མཁའ་ལྡིང་གྲུབ་པའི་བསྟན་བཅོས།
རྒྱ་གར་སྐད་དུ། སིདྡྷ་ག་རུ་ཌ་ཤཱསྟྲ། བོད་སྐད་དུ། མཁའ་ལྡིང་གྲུབ་པའི་བསྟན་བཅོས། དཔལ་རྡོ་རྗེ་མཁའ་ལྡིང་ལ་ཕྱག་འཚལ་ལོ། །ཁ་སྦྱར་མཆུ་བར་སྤྲུལ་ནི་བསྡམས་པ་ཡིས། །གདེངས་ཀའི་ནོར་བུ་མཁའ་ལྡིང་མེ་ལོང་སྟེ། །རང་བཞིན་འོད་གསལ་གཉུག་མའི་གཟུགས་མཐོང་ངོ༌། །ཁྲོ་བ་སྤངས་པ་དེ་ན་རྒྱལ་གྱུར་ཅིག །མཁའ་ལྡིང་བསྟན་བཅོས་སྐྱེད་མོས་ཚལ་ནས་ནི། །མེ་ཏོག་རྩི་ཡི་སྦྲང་རྩི་དེ་ཉིད་ནི། །སེམས་ཅན་དོན་དུ་སྦྲང་རྩི་བྱེད་པ་ཡི། །དཔལ་ལྡན་ཤང་ཀུ་བདག་གིས་འདིར་དེ་བསྡུ། །གང་ཞིག་བརྟན་པའི་སེམས་ཀྱིས་བླ་མ་ཡི། །རྗེས་འཇུག་དག་པའི་ལམ་ལ་ཡང་དག་གནས། །མི་དེ་ཕྲིན་ལས་མ་ལུས་པ་ཡི་ནི། །དངོས་གྲུབ་ཐམས་ཅད་ཀྱི་ནི་སྣོད་དུ་འགྱུར། །བཟོད་དཀའི་དུག་ལས་བྱུང་བའི་ཚོར་བ་ཡིས། །འཁྲུགས་པའི་འགྲོ་བའི་སྲོག་ནི་འཛིན་བྱེད་ཅིང༌། །ཆོས་དང་ནོར་དང་འདོད་དང་ཐར་པ་ནི། །བསོད་ནམས་བྱས་པའི་འགྲོ་བ་དེ་ཡིས་འཐོབ། །འགྲོ་བའི་དོན་ཕྱིར་མཁའ་ལྡིང་བསྟན་བཅོས་ནི། །དམ་པའི་སྐྱེ་བོ་དེ་ཡིས་བསྔགས་པར་བྱེད། །འདོད་པ་ཅན་ནི་ནོར་གྱིས་དགའ་བ་ལྟར། །སྔགས་པས་སྤྲུལ་གདུག་མི་བཟད་པ་ཡིས་སོ། །དེ་ནས་གདེངས་ཀ་ཅན་དང་ཙི་ཏི་རྣམས། །རཱ་ཡི་དཀྱིལ་འཁོར་ཅན་དང་འདྲེན་གཟུགས་སོགས། །རླུང་གི་ཡོན་ཏན་དུས་དང་དུས་མིན་དང༌། །ཨ་མ་རཏྟ་སྦྱོར་རླུང་བུས་པའོ། །མཁའ་ལྡིང་གིས་བཤད་སྨན་གྱི་ནུས་པ་དང༌། །ཇི་ལྟར་དུག་འཇོམས་པ་ཡི་རིམ་པ་དག །གུས་པས་དེ་ནི་རྩེ་གཅིག་སེམས་ཀྱིས་ཉོན། །གཞན་དག་ཀྱང་ནི་ཐོས་པ་ལས་བྱུང་བའི། །མཚོན་པས་སོ། །ཏྲི་ན་ཨིནྡྲ་ནཱི་ལ་ལྟ་བུའི་ལུས། །འདབ་བརྒྱ་རྒྱས་འདྲའི་མཚན་པ་ལྷག་མ་ཅན། །ནོར་རྒྱས་ལུས་ནི་ཁ་དོག་དཀར་པོ་ལ། །མཚན་པ་པདྨ་རྒྱས་འདྲ་སྔོན་པོ་ཡིན། །ཤར་ཐོགས་ཉི་མའི་འོད་ཟེར་ལྟ་བུ་ལ། །མགོ་ལ་གཡུང་དྲུང་དུང་ཆེན་འཇོག་པའོ། །ཀརྐོ་ཊ་ནི་མུན་པ་ལྟ་བུ་ཡི། །རི་མོ་གསུམ་ནི་མགྲིན་པར་ཡོད་པ་ཡིན། །པདྨའི་ལུས་ནི་ཁ་དོག་ལྗང་གུ་ལ། །སྐར་ཚོགས་ལྟ་བུའི་ཐིག་ལེས་གདེངས་ཀ་མཛེས། །པད་ཆེན་ཟླ་འོད་བསྐུས་པ་ལྟ་བུ་ལ། །མདུང་རྩེ་
གསུམ་པ་ལྟ་བུ་གདེངས་ཀ་ཡིན། །དུང་སྐྱོང་ཀ་ནི་ཡ་རའི་མེ་ཏོག་འདྲ། །མགྲིན་པར་ཟླ་བའི་ཆ་ཡིས་མཚན་པ་ཡིན། །རིགས་ལྡན་གྱི་ནི་སྤྱི་བོའི་གདེངས་ཀ་དག །དུ་བ་ལྟ་བུའི་ཟླ་བ་ཕྱེད་པ་ཡིན། །དབྱིག་པ་ཡིས་ནི་བརྡེགས་པ་མཆོག་ཡིན་ཏེ། །ཀླུ་རྣམས་བཟུང་ནས་སྐྲོད་པ་དེ་ལྟར་མིན། །སྡང་བས་གླགས་ནི་ཚོལ་བར་བྱེད་པ་ན། །སྔགས་པ་དག་ནི་གང་གིས་ཐར་བར་བྱེད། །ས་འོག་གནས་ན་ཡོངས་སུ་གནས་པ་ཡི། །དབང་ཆེན་འོག་ནི་ཀླུ་རྣམས་ཤིན་ཏུ་དཀོན། །གདེངས་ཀའི་ནོར་བུས་མཛེས་པར་བྱས་པ་ཡི། །ཁོལ་པོ་ཡང་ནི་གློག་གི་ཟེར་མ་འདྲ། །ལྕེ་གཉིས་གདེངས་ཅན་ཕུད་ཅེས་འཇིགས་པའི་སྒྲ། །རིན་པོ་ཆེ་ནི་མེད་པར་གྱུར་པ་སྟེ། །ཁོལ་པོ་ཡི་ཡང་ཁོལ་པོའི་གནས་སུ་ནི། །གུས་པ་མེད་པའི་ལྟོ་འཕྱེ་དག་ཡིན་ནོ། །ཨ་ཀུ་བ་སཾ་གཉིས་གཉིས་བྲམ་ཟེ་རྒྱལ། །མེ་ཏོག་དང་ནི་སཱ་ལའི་དྲི་ཡིན་ནོ། །དེ་བཞིན་སྟ་མ་ཀ་པ་རྗེའུ་དང་དམངས། །མར་དང་ཉ་ཡི་དྲི་ནི་བྲོ་བ་ཡིན། །དུང་འཆང་མཆེ་བའི་རྩ་ན་ལེགས་གནས་པ། །སྦྲང་རྩིའི་མེ་ཏོག་ཕྲེང་བ་ལྟ་བུ་ཡིན། །དེ་ནི་འགྲོ་བ་རྣམས་ཀྱི་རྨོངས་བྱེད་ཀྱི། །དུག་སྟེ་ཡོངས་སུ་འཛག་པར་གྱུར་པས་སོ། །གདེངས་ཀ་ཅན་ནི་རང་གི་ངོ་བོའོ།། གནད་ཡ་ནའི་ཡིན་པར་གྱུར་ན་ནི། །མགོ་མཇུག་ལུས་ལ་རི་མོ་ཀྱོག་པོ་ཡོད། །གདེངས་ཀས་དམན་ནོ་འཇིག་རྟེན་གནད་ཡ། །ཙི་ཏི་ཞེས་ནི་ཡོངས་སུ་གྲགས་པ་ཡིན། །དེ་ཡིས་བཟུང་ན་གཡོ་མེད་སྐད་ཅིག་གིས། །དེ་ནི་འགྱུར་བ་མེད་པའི་རང་བཞིན་ཡིན། །དེ་ཉིད་གྲུབ་པ་ཐོབ་པས་གལ་ཏེ་ན། །སད་པར་བྱེད་ན་དྲན་པ་འབྱུང་བར་འགྱུར། །ཙི་ཏིའི་རང་བཞིན་ནོ། །ཐིག་བཏབ་ལྟ་བུའི་རི་མོ་རིང་མོ་ཅན། །བནད་ཡ་རུ་རྣམ་པར་ཤེས་པར་བྱ། །ཤིང་དང་ལྕུག་འཁྱིལ་རྩས་གཏུགས་ཡོད་པར་ནི། །ངེས་པར་ཤིན་ཏུ་ལེགས་གནས་རཱ་ཡི་ལ་ལ། །ཁ་སྐོམ་མིག་དམར་ཟས་དང་སྟན་མི་འདོད། །ཚ་དང་འཁྲུ་བ་ཡི་ནི་རྗེས་ལ་བརྒྱལ། །དཀར་དང་དམར་དང་ནག་དང་ལྗང་གུ་ཡི། །རི་མོ་མེད་པ་ཡིན་ནོ་རཱ་ཡིལ་ལ། །བཙོ་མའི་གསེར་འདྲའི་ལུས་ལྡན་དེ་ཡིས་ནི། །འགྲོ་བ་རྣམས་ཀྱི་སྲོག་ནི་འཕྲོག་བྱེད་ཡིན། །རཱ་ཡིལ་གྱིས་ནི་བཟུང་ན་ངེས་བར་ནི། །རིལ་གྱིས་
ཁྱབ་པར་སྐྲངས་པ་ཁོ་ནར་འགྱུར། །གསེར་མདོག་ལུས་དེ་རྒྱུ་བའི་ཚེ་ན་ནི། །འབར་བའི་མེ་ལྕེ་ཆད་པས་འོད་མ་བསྲེག །འོད་མའི་རང་བཞིན་ཡང་ནི་དེས་བསྲེག་ན། །དེ་ཡིས་བཟུང་ན་ཇི་ལྟར་འཚོ་བར་འགྱུར། །རཱ་ཡིལ་ལའི་རང་བཞིན་ནོ།། །།ཆུ་དང་རླུང་མེ་ས་ཡི་རང་བཞིན་གྱི། །ཀོ་ཊ་རྣམས་ཀྱི་གང་ཞིག་མཚན་པ་ནི། །གོ་མེད་ས་རྣམས་སུ་ནི་ཤེས་པར་བྱ། །དུག་ཆེན་སྐྲངས་འབུར་ཡང་དག་སྐྱེད་པ་པོ། །ཆུ་ཡི་དཀྱིལ་འཁོར་ཅན་ནི་དུག་འཛིན་གྱིས། །ཟིན་པའི་མཚན་ཉིད་ལུས་ནི་འདྲུལ་བ་ཡིན། །ཚ་དང་འདར་དང་སྐམ་དང་སྐྲང་བ་ནི། །རླུང་གི་ལུས་ཅན་གྱིས་ནི་སྐྱེད་པར་བྱེད། །ལུས་ཀུན་གྱི་ནི་སྤུ་ཡི་རྩ་བ་ནས། །སེ་བ་གནག་འདྲའི་བྲག་གི་ཐིགས་པ་འབྱུང༌། །མེ་ཡིས་རེག་པས་ཀུན་ནས་སྐྱེད་པ་ནི། །ཐོས་དང་གཟུགས་དང་མཐོང་བས་ཉམས་པ་ཡིན། །ས་ཡི་དཀྱིལ་འཁོར་ཅན་གྱིས་སྨས་པ་ན། །སྐྲང་དང་ཚ་བའི་རེག་པས་གདུངས་པ་ཡིན། །གཉིད་དང་སྟན་དག་ལ་ནི་སྡང་བར་འགྱུར། །སྐྱེས་བུ་སེམས་ལ་ཟུག་གཟེར་དག་གིས་ཉེན། །ཕུང་པོ་ལ་ནི་མྱུར་དུ་སྣད་གྱུར་པ། །རིང་པོ་ཡི་ནི་རིང་པོར་སྐྲང་པ་སྟེ། །ངེས་པ་ཉིད་དུ་མང་པོས་མང་པོའོ། །ཐལ་བ་དང་ནི་རུས་པ་བཤང་བའམ། གཞན་ཡང་ལུས་ལས་གང་ཞིག་བྱུང་བ་ཡིས། །གོ་མེད་ས་རྣམས་ཀྱིས་ནི་མྱུར་ཉིད་དུ། །འགྲོ་བ་རྣམས་ཀྱི་ལུས་ནི་ཉམས་པར་བྱེད། །གང་ཞིག་སྟོབས་ཅན་ཡང་ནི་ལ་ལ་དག །མགོ་མཇུག་ཏུ་ཡང་མེས་མཚན་མེད་པ་དང༌། །ཡུད་ཙམ་གྱིས་ནི་འཆི་བ་དེ་ཡིས་འཛིན། །དེས་ནི་འགྲོ་བ་འཆི་བར་ཐེ་ཚོམ་མེད། །འདིར་ནི་མང་དུ་སྨྲས་པ་ཅི་ཞིག་དགོས། །དེས་ན་སྙིང་པོ་དང་དུ་བླང་བར་བགྱི། །སྔགས་དང་སྨན་དང་སྦྱོར་བ་གང་ཡིན་པ། །ཇི་སྲིད་དབུགས་རྒྱུའི་བར་དུ་བྱ་བ་ཡིན། །དཀྱིལ་འཁོར་ཅན་གྱི་རང་བཞིན་ནོ།། །།གང་ཞིག་དྲན་པའི་དུག་གིས་ཕྱེ་བ་ན། །བྲམ་ཟེ་ཡིན་པར་གྱུར་ན་དེ་ནི་དཀར། །དམར་པོ་རྒྱལ་རིགས་སེར་པོ་རྗེའུ་རིགས་ཡིན། །དམངས་རིགས་ནག་པོ་འདི་དེ་རྣམས་ལའོ། །གང་ཞིག་བྱ་རོག་རྐང་འདྲའི་མདུད་པ་དང༌། །ཕྱེ་ན་རི་མོ་འཁྱོག་པོ་སྣང་བ་ལ། །མི་མཉམ་ཐིག་ལེས་རྣམ་པར་སྤྲས་པ་ནི། །ངེས་པར་ནག་པོ་
བརྩེགས་པ་དག་དང་མཚུངས། །གཞན་དུ་བཅུད་ཀྱིས་ལེན་ནི་བསྒྲུབ་པ་ལ། །བྲམ་ཟེ་འམ་ནི་དེ་བཞིན་རྒྱལ་རིགས་ཀྱིས། །རྗེའུ་རིགས་ཀྱི་ནི་མཛེ་ནད་གཞོམ་པ་ལ། །གསོད་པ་ལ་ནི་དམངས་རིགས་རུང་བར་བྱ། །འདྲེན་པའི་མཚན་ཉིད་དོ། །སྨད་འཚོང་སེམས་ཀྱིས་དོར་ཐབས་ཀྱིས་སེམས་བཞིན། །བདག་རྒྱུན་མི་འཆད་རྣལ་འབྱོར་ཡང་དག་འགྲུབ། །མཁས་པས་དེ་བཞིན་རླུང་གི་ཡོན་ཏན་གྱིས། །དུས་ནི་ངེས་པར་ཤེས་པ་ཁོ་ན་ཡིན། །སྲོག་ཆགས་རྣམས་ནི་གང་གིས་འཚོ་བ་དང༌། །ཁྱད་ཅན་གང་ཞིག་ཉམས་པས་སྲོག་འགྲོའོ། །དོན་དམ་ཞིང་བརྩོན་དེ་ལ་སེམས་དང་ནི། །བདག་དང་མཆོག་དང་དེ་ཉིད་དུ་ནི་འདོད། །འཇུག་པའི་རང་བཞིན་སྲོག་ནི་ཁ་བ་ཡི། །འོད་ལ་བརྟེན་པས་གསལ་པོར་སྐྱེད་པར་བྱེད། །བདག་དང་སྐྱེས་བུའི་རང་བཞིན་དེ་ཉིད་ནི། །ཉི་མའི་ཞིང་ལ་བརྟེན་ན་སྡུད་པར་བྱེད། །སྙིང་སྟོབས་རྡུལ་དང་མུན་པར་བབས་པ་ན། །དུག་བརྒྱལ་དགེ་དང་ཐེ་ཚོམ་མི་དགེ་ཡི། །སྟོན་པར་བྱེད་དེ་རླུང་གི་དབྱེ་བ་དག །འཇུག་དང་གནས་དང་འབྱུང་བ་ཉིད་ནའོ། །གཙོ་བོར་ཆོས་སེམས་པ་ན་སྙིང་སྟོབས་ཏེ། །ཡུལ་ལ་ཆགས་ན་དེ་བཞིན་རྡུལ་ལ་སྲོག །རྨོངས་པ་ལ་ཞེན་མུན་པས་འགོག་པ་ཡིས། །གསལ་པོར་ཆ་ནི་ཤེས་པར་གྱུར་པ་ཡིན། །འབྱུང་བན་ནི་འབྱུང་བ་ཁོ་ན་སྟེ། །འཇུག་པ་ན་ནི་འཇུག་པ་སྟོན་པར་བྱེད། །རང་གི་གཉུག་མའི་ལུས་ལ་དེ་བཞིན་དུ། །ཀུན་དུ་གྲོང་ཁྱེར་གཞན་ལའང་དེ་བཞིན་ནོ། །ཟླ་བ་དང་ནི་ཉི་མའི་ཞིང་དུ་རླུང༌། །རྒྱུ་བའི་ཕྱོགས་སུ་ཕོ་ཉ་གནས་ན་ནི། །དུག་གིས་བརྒྱལ་བ་དེ་ནི་འཚོ་བར་འགྱུར། །དེ་བཞིན་སྟོང་པའི་ཁྱིམ་ལ་འཆི་བར་འགྱུར། །ཉི་མའི་ཞིང་ལ་རླུང་ནི་གནས་པ་ན། །གསལ་པོར་ཕོ་ཉས་ཐད་ཀར་བལྟས་པ་དང༌། །སྐྱེས་བུ་རྒྱབ་ནས་འདུག་སྟེ་ཡིན་ན་ནི། །ངེས་པར་ཟླ་བའི་ཁྱིམ་ལ་བཟང་པོར་གཟུང༌། །དུག་ཞིར་འགྲོ་དང་བྱ་བ་གང་ལ་ཡང། །ཟླ་བའི་སྲོག་གི་ཟས་འཁྲིག་འཐབ་མོ་ལ། །ཉི་མའི་སྲོག་ནི་མཛེས་སོ་བི་སུ་ལ། །བབ་ན་རྡུལ་གྱིས་ཆར་ནི་གཟུང་བར་བྱ། །གྲུབ་པ་གཞན་དག་གསུངས་པ་གཉིས་ཀ་ཡང༌། །ཞིང་དུ་སྲོག་གི་རླུང་ནི་ལེགས་པར་གནས། །དབྱེ་བ་རྣམ་པ་བཞིར་ནི་ཡོད་པ་ལ། །དེ་ལ་སེམས་ཅན་ངོ་
མཚར་ཡོད་པ་ལ། །ཁྱབ་དང་སྟེང་འོག་དབུས་སུ་རླུང་དང་ནི། །ཡོན་ཏན་ཞི་དང་ལྷ་ཡི་བདག་པོ་ན། །དོན་མེད་འཁྱམ་དང་འཐབ་དང་འཆི་བ་ནི། །དྲི་ཁུར་དེ་ཡིས་དེ་རྣམས་བྱེད་པ་ཡིན། །སྐོམ་དང་བཀྲེས་དང་སྐྱོ་བ་དག་དང་ནི། །འདོད་པའི་དགོས་པ་ཉམས་པ་རྩེ་གསུམ་གྱི། །འགྲོ་བ་རྣམས་ལ་རྒྱལ་བའི་དགེ་བསྐྱེད་པ། །མི་འཆི་མེད་ན་དེ་བྱེད་ཡིན་མ་ཡིན། །གཞན་དོན་བྱེད་ན་དཀའ་བ་མེད་པར་ནི། །བདེར་གནས་བདེ་སྐྱེད་ཡིད་ནི་ཚིམ་པར་བྱེད། །དྲི་མེད་དྲི་ཞིམ་ལ་ནི་མངོན་འདོད་བཞིན། །གཟུགས་བཟང་ལྷ་ཡི་བདག་པོ་དེ་ཡིས་བྱེད། །ཡི་དགས་མི་དང་རིག་འཛིན་སྒོ་དང་ནི། །གནོད་སྦྱིན་སྒོ་གང་ལག་པ་གཉིས་ཀྱིས་སྡོམ། །དོན་དམ་ཐིག་ལེ་གང་ཡིན་དེ་དག་ནི། །ཟླ་ཆ་རྩེ་སྤྲོད་དབུས་གནས་མཚོན་པར་བྱེད། །ནག་དང་ལི་ཁྲི་དུང་དང་གསེར་སྦྱངས་མདོག །དོན་གང་ཡིན་པ་དེ་ནི་ཐོབ་པར་འགྱུར། །གང་དག་བརྗོད་པས་དྲི་ཁུར་རབ་དབྱེ་ལས། །མཉན་པ་དེ་དག་རབ་ཏུ་ཐོབ་པར་བྱེད། །མིག་དང་ཁ་སྦྱོར་ཇི་ལྟ་བཞིན་དུ་སྨྲ། །དབུགས་འཇུག་འབྱུང་བ་ཀུན་ནས་མ་ཉམས་ན། །སྙིང་སྟོབས་ལ་ནི་བབ་པའི་མཚན་ཉིད་དེ། །རྣམ་འགྱུར་མེད་པས་འཚོ་བར་འགྱུར་བ་ཡིན། །མིག་གི་སྦུབས་ནི་ཅུང་ཟད་ཕྱེ་བ་དང༌། །རྨ་ཅན་ཅུང་ཟད་སོ་ཡི་ཕྲེང་བ་རྣམས། །རྨི་ལམ་བཞིན་དུ་དུག་གི་རེག་པ་ཡིས། །གཡེངས་པས་འགགས་པ་དེ་ནི་རྡུལ་ལ་ཡིན། །རྨ་ཅན་གྱི་ནི་ཁ་གདངས་མིག་ཀྱང་བགྲང༌། །གསུས་པ་འཇིགས་སུ་རུང་བ་སྤོས་པ་དང༌། །སེན་མོ་སོ་དང་མིག་རྣམས་མདོག་འགྱུར་བ། །གསར་པོ་ར་ཏི་མི་ཡི་མདོག་གི་ཉལ། །གང་དག་ལ་ནི་ལག་པས་དྲངས་ཙམ་གྱིས། །རྩ་ནས་བུད་དོ་མགོ་ལ་སྐྱེས་པའི་དགྲ། །འབྱུང་པོའི་ཕ་ནི་གང་ཡིན་དེ་སོང་ལ། །དེ་ལ་ཐེ་ཚོམ་ཡང་ནི་དགོས་སམ་ཅི། །འཐུངས་པ་དེ་ཡི་མོད་ལ་ལྡོག་བྱེད་དེ། །སྨན་དང་ཆུ་ནི་མིང་དག་གང་ཡིན་ལ། །སྲོག་དེའི་མདུན་དུ་རྒྱུག་པར་བྱེད་པ་སྟེ།། གཡོག་འཁོར་གྱི་ནི་སྐྱེས་བུ་ཇི་བཞིན་ནོ། །སོ་རྩའི་བདུད་རྩི་ཞིམ་པོ་མ་ཡིན་དང༌། །རྣ་བའི་སྒྲ་མེད་མིག་གི་གློག་ཀྱང་མེད། །སྐྱེས་བུ་གང་གི་སྤྱི་བོའི་དུ་བ་ནི། །མི་མཐོང་བ་ནི་དེ་ནས་བསྐྱོད་པ་ཡིན། །ཉིན་མཚན་མཚམས་ཀྱི་རྟགས་ནི་གོ་བྱ་བ། །ཚིགས་པོར་བྱས་ནས་བོར་བ་དེ་ཡི་ནི།།
དཀར་ནག་དང་ནི་གསེར་གྱི་མདོག་ཅན་ཏེ། །རྨན་ཅན་གྱི་ནི་ཟླ་དང་ཉི་མིག་གོ །ཟླ་དང་ཉི་མའི་མིག་གི་སྙིང་པོར་ནི། །གོ་བུའི་གཟུགས་བརྙན་སྣང་བར་མི་འགྱུར་ཞིང༌། །སོ་རྩའི་བདུད་རྩི་དག་ནི་མི་འཛག་ན། །ཕུང་པོའི་ཞིང་ལས་རླུང་དེ་བསྐྱོད་པ་ཡིན། །སྣ་ནི་རང་གི་གནས་ནས་གཡོགས་པ་དང༌། །མིག་ནི་མཆིམས་དཀྲུགས་དང་ཤེས་པ་གཡེངས། །ཁ་ཡི་རླུང་ནི་ཆུ་ལ་བབ་པ་དང༌། །སྣ་སྐད་དུ་ནི་སྨྲ་བ་གང་ཡིན་པའོ། །རླུང་གི་ཡོན་ཏན་གྱི་རབ་ཏུ་དབྱེ་བའོ། །ལུས་ཀྱི་ཆ་ནི་གང་ལ་རྨ་མཐོང་བ། །དེ་འདྲ་དེ་རུ་འཕོ་བར་བྱེད་པ་སྟེ། །མི་བཟད་དུས་ཀྱི་དབང་དུ་བྱས་པ་ཡིན། །རྣ་བའི་རྒྱབ་ཏུ་རི་མོ་དམའ་བ་སྣང༌། །རྨས་པའི་ས་རུ་སྦལ་རྒྱབ་ལྟར་མཐོ་ཡིས། །དུག་གིས་ཟིན་པ་དེ་ནི་མི་འཚོའོ། །ཁྲག་ནི་སྣ་ཚོགས་མདོག་ཏུ་འཛག་བྱེད་ཅིང༌། །དེ་ནི་བྱ་རོག་རྐང་འདྲའི་གཟུགས་སུ་སྣང༌། །མགྲིན་པ་འཕོངས་ཚོས་གསང་བ་དང་ནི་གནད། །མིག་དང་རྣ་བ་ལག་སོར་རྣམས་ཀྱི་རྩེ། །ལྟེ་བ་བཤང་ལམ་ཕྲག་པ་རྐེད་པར་ནི། །ཟིན་པ་བསོད་ནམས་ཀྱིས་ནི་འཚོ་བ་ཡིན། །རྨའི་མཚན་ཉིད་དོ། །གང་གི་ཁྱིམ་གྱི་ཐ་སྙད་མ་ཧེ་དང༌། །བོང་བུ་དང་ནི་རྔ་མོ་ཞོན་པ་ཡི། །ཕོ་ཉ་ལྟས་ངན་ཡིན་ཞེས་སུ་ཞིག་སྨྲ། །སུ་ལའང་དེ་ཡིས་ལྟས་ངན་བསྐྱེད་མ་ཡིན། །ལྟས་ངན་བདེན་པར་བརྗོད་པ་འདི་དག་སྟེ། །ཡུན་རིངས་ཤུགས་ནི་འབྱིན་པར་བྱེད་པ་དང༌། །དེ་བཞིན་དུ་ནི་རྡུལ་དག་བྱུང་བ་དང༌། །ཕོ་ཉ་རིགས་གཞན་དག་ནི་ཡིན་པ་དག །ཕལ་ཆེར་བསྔགས་པ་མ་ཡིན་ཁོ་ན་སྟེ། །ཡན་ལག་ཉམས་དང་ཐོད་པ་ཅན་གྱི་གཟུགས། །གོས་ནག་ངུར་སྨྲིག་གྱོན་པ་ཉེ་བར་ན། །ཕོ་ཉའི་མགོ་ལ་མར་ནག་བྱུགས་པའམ། །ཡིན་ན་རྡུལ་གྱི་སྐབས་ལ་བབས་པ་ཡིན། །རྐང་པ་གཡས་བརྐྱང་པ་ན་འཚོ་བ་སྟེ། །ཕལ་ཆེར་བུད་མེད་ལ་ནི་མཚོན་པའོ། །རྐང་པ་གཡོན་པ་བརྐྱང་བས་སྐྱེས་པ་དག །སྲོག་ནི་འགྲོ་བ་ཡིན་པར་མཚོན་པ་ཡིན། །རྗེས་ཀྱི་དབྱངས་མེད་དེ་དང་སྦྱར་བའམ། །ཡི་གེ་ཕན་ཚུན་སྦྱར་དང་དང་པོ་ཀ །དྲིས་ཚེ་ཉོན་མོངས་ཚིག་ནི་བརྗོད་པ་ན། །རྨ་ཅན་དེ་ནི་ཐེ་ཚོམ་མེད་པར་འཆི། །ཉི་མས་རང་གི་གནས་ཞིག་བསྲེགས་ནས་ནི། །འོད་ཟེར་རྣོན་པོས་བསྲེག་བཞིན་པ་ཡིས་
གནས། །དེ་བཞིན་མདུན་ན་མོ་ལ་དུད་པར་འཐུལ། །ལྟག་མ་རྣམས་ནི་དགེ་བའི་རྣམ་པ་ཡིན། །དགོས་པ་ལ་ནི་འགྲོ་ཆེད་ཉམས་པ་དང༌། །ཉམས་བཞིན་པ་དང་ཉམས་པར་འགྱུར་བ་ཡི། །ཕྱོགས་གསུམ་མ་ཡིན་ཕྱོགས་གཞན་རྣམས་སུ་འགྲུབ། །སྦྲིད་པ་བྱ་རོག་ཀཱ་རཱ་ཡི་དང་ཅེ་སྦྱང་གཉིས། །ཟངས་དུང་ལ་སོགས་སྒྲ་ཡི་དུས་དང་འཛོམ་པ་ན། །ཉོན་མོངས་སྲོག་ནི་འགྲོ་ཚེ་ཕྱོགས་ནས་སྒྲོགས། །དྲི་ཁུར་རྗེས་འབྲང་རྟོག་མཁས་ཕོ་ཉ་ཡི། །གཉིས་ནི་བཟང་ངན་དགེ་དང་མི་དགེ་དག །དུག་འཇོམས་ཐེ་ཚོམ་ཉོན་མོངས་འགྲོ་བ་ཡི། །བདེན་པ་འདི་ནི་ངེས་པར་མཁྱེན་པ་ཡིན། །ཕོ་ཉའི་མཚན་ཉིད་དོ། །མ་མོའི་ཁྱིམ་མམ་པདྨ་ཅན་གྱི་མཚོ། །ཤིང་འཛེག་ཕུག་པ་གྲོག་མཁར་དག་ནས་སམ། །ཁང་རུལ་དུར་ཁྲོད་ཀྱི་ནི་ལྟོ་འཕྱེ་རྣམས། །ཆུའམ་བཞི་མདོ་ཡི་ནི་གདུག་པ་ཅན། །དྲག་པོའི་གཟའ་ལ་ལྟོ་འཕྱེའི་དུག་གིས་ནི། །འཛིན་ན་བཞིའམ་བཅུ་བཞི་ཡིན་ན་འཇིག །དེ་བཞིན་ཆ་ནི་རབ་ཉམས་གནམ་སྟོང་དང༌། །ཚེས་བརྒྱད་ལ་ནི་བབས་པར་གྱུར་ནའོ། །ཀརྟི་ཀ་དང་མརྒྷ་ཨ་ཏྲ་དང༌། །བཱ་ར་ཎི་དང་མཱུ་ལ་བི་སཱ་ཁ། །སླེ་ཤ་འཕུར་གསུམ་གལ་ཏེ་ཚེས་དང་གཟའ། །རྒྱུ་སྐར་ལ་ཟིན་ངེས་པར་བརླག་པར་འགྱུར། །བད་མཁྲིས་རླུང་ནི་གཙོ་བོ་མི་དང་ནི། །ལྟོ་འཕྱེའི་ཁམས་ནི་འདྲ་བར་གྱུར་པ་ན། །དེ་ལྟར་ཤེས་ན་ཆོས་མི་མཐུན་པ་དང༌། །ཆོས་མཐུན་པ་ཡི་དཀའ་བ་མེད་ལའང་ཡོད། །གནས་དང་ཚེས་གྲངས་དང་གཟའ་དང་རྒྱུ་སྐར་དང་ཆོས་མཐུན་པ་དང་མི་མཐུན་པའོ། །ཉིན་མཚན་ཐུན་ཕྱེད་དག་ལ་ཀླུ་རྣམས་ནི། །གཟའ་ཡི་དབང་གྱུར་དག་ནི་ལོངས་སྤྱོད་དེ། །ཉིན་མོ་གང་ལ་དེ་ཡི་དུས་ཉིད་དེ། །མཚན་མོ་སྒོ་ནི་རྣམ་པ་གཞན་དུ་འགྱུར། །འབྱུང་པོ་ཕྱོགས་དུས་མེ་དང་རི་བོ་དང༌། །དུས་དང་ཐར་པ་ཉིན་མོའི་དུས་སུ་བསྒྲེང༌། །རོ་དུས་མིག་དང་ཐུབ་པ་དང་ནི་མདའ། །མེ་དང་ཟླ་བ་མཚན་མོ་དག་ཏུ་ཤེས། །སྤེན་པའི་དུས་ཕྱེད་སྔ་མ་བླ་མ་ཡི། །དང་པོ་འདས་པར་དགོས་པའི་ས་ཡིན་ཏེ། །ཉིན་མཚན་འཕོ་བའི་མཚམས་ནི་གང་ཡིན་པ། །བཅུ་དྲུག་པོ་དེ་རིགས་ལྡན་དུས་ཡིན་ནོ། །གཉུག་མའི་ལུས་ལ་ལྟ་ན་ཉི་ཟླ་སྟེ། །ལག་པ་རྣ་བ་ལ་རེག་ས་སྐྱེས་ཡིན། །སྣ་ལ་ལག་པས་རེག་ན་གཟའ་ལག་གོ །མགྲིན་པ་ལ་རེག་ལྷའི་
བླ་མའོ། །དབུགས་ནི་དྲུག་ཏུ་འབྱིན་ན་པ་བ་སངས། །དགོད་བན་ཡང་སྦེན་པ་རུ་ནི་ཤེས། །ས་ལ་ལྟ་ན་སྒྲ་གཅན་ཉིད་ཡིན་ནོ། །དུས་དང་དགོས་པའི་དབྱེ་བ་དང་རགས་པ་དང་སྟོང་པ་སྟེ། དུག་ཟིན་གྱི་མཚོན་བྱེད་དོ། །ཉི་ཟླ་ས་སྲས་གཟའ་ལག་ཕུར་བུ་དང༌། །པ་བ་སངས་དང་སྤེན་པས་བསྐྱེད་པ་ན། །ཚོགས་མིག་རྒྱ་མཚོ་རོ་དང་བཅུ་དྲུག་དང༌། །སུམ་ཅུ་གཉིས་དང་ལྔ་བཅུ་ཐམ་པ་སྟེ། །འགྲོ་བས་རང་དབང་ཅན་གྱི་ལྟོ་འཕྱེའོ། །ཐེ་ཚོམ་མེད་པ་དེ་ཡང་ཤེས་པར་བྱ། །དགོས་པ་དང་ནི་བཅས་པའི་དུག་དག་ཀྱང༌། །སྟོང་དང་སྟོང་པ་མ་ཡིན་དབུས་སུ་ཡང༌། །སྲོག་རྡུལ་སྙིང་གི་དབུས་སུ་དལ་བ་ཡིས་རྣམ་པར་གསལ་བ་ཡིས་ནི་ལེགས་གནས་ན། །གནས་ན་གནས་པས་དེ་མ་ཐག་ཏུ་ནི། །ཡུན་རིང་བརྒྱལ་བ་ལ་ཡང་མཚོན་པར་བྱ། །གཉིས་པའི་ཕྱོགས་རྩ་བསྟན་པའོ། །སྤྱི་བོ་དག་ནི་ནག་པོ་རླུང་ཡིན་ཏེ། །མགྲིན་པ་ལྟེ་བར་མེ་ཡི་འབར་བས་དཀྲིགས། །དེ་ནས་དབང་ཆེན་སོར་མོ་མཁའ་ལྡིང་གི ། པུས་མོ་ནས་བརྩམས་ཆུ་ནི་དཀར་པོ་ཡིན། །བརྒྱ་བྱིན་གྱིས་ནི་བདུད་རྩི་ཕྲོགས་ནས་ཀྱང༌། །རྡོ་རྗེའི་མཚོན་ཆས་དགྲ་མེད་དགའ་བ་ཡིས། །མཁའ་ལྡིང་དགྲ་ནི་རེང་པར་འགྱུར་བ་དང༌། །ཡིད་འཕྲོག་ཐོབ་པ་དེ་ནི་རྒྱལ་གྱུར་ཅིག །གར་གྱི་དཔལ་བརྗིད་གཤོག་པས་བསྐྱོད་པ་ཡི། །རླུང་གི་རིགས་ཀྱི་རི་རྣམས་བསྐྱོད་བྱེད་པ། །མཁའ་ལྡིང་དུ་ནི་ཡོངས་སུ་བསྒོམ་བྱ་སྟེ། །མ་ལུས་དུག་རྣམས་ཞི་དོན་གཉེར་བས་སོ། །རླུང་དུ་བསྟན་པས་སེམས་ནི་ཕུར་བུས་འདེབས། །འབར་བ་ཡིས་ནི་སྤེལ་བར་བྱེད་པ་ཡིན། །བརྒྱ་བྱིན་གྱིས་ནི་གསལ་པོར་རེངས་པར་བྱེད། །ཆུ་ཟིལ་འབབ་པས་དུག་ནི་བརླག་པར་བྱེད།། མཁའ་ལྡིང་བྱེ་བྲག་རེ་རེ་ཡིས་ཀྱང་ནི། །སེལ་ལ་ངེས་པར་བསྒོམ་པ་དང་ལྡན་ན། །བི་མེད་ང་ཡིས་བཞིན་གནས་སུ་ན། །མ་ལུས་དུག་ནི་ཚར་གཅོད་བྱེད་པ་ཡིན། །ཨ་སྟི་བི་ཥཾ་བརྗོད་ན་དུག་ཡོད་དེ། །ན་ཨ་སྟི་བི་ཥཾ་ས་སྟེངས་ཀུན་ན་མེད། །བསོད་ནམས་ཡང་དག་བསགས་ལ་མཆོག་གི་ནི། །དེ་ཉིད་འདི་དེ་སྐྱེ་བ་ཁོ་ནར་འགྱུར། །ལྟ་བྱེད་མིག་གསུམ་འབར་བས་བསྟན་པ་ཡི། །དུག་མཆོག་ཐལ་བ་རུ་ནི་བརླག་ནས་ཀྱང༌། །ལ་ལ་དག་ལ་གལ་ཏེ་འདི་སྐད་དུ། །མགྲིན་སྔོན་ཁྱོད་བརྗོད་བྱིན་པར་གྱུར་ན་ནི། །སྐྱེས་བུ་དེ་ཡི་ལུས་ལ་ཇི་སྲིད་ནི། །འཚོ་བའི་བར་དུ་དུག་ནི་མི་འཕོ་སྟེ། །རི་བོང་མགོ་
ལ་རྭ་ནི་སྐྱེ་བདག །ནམ་དུ་ཡང་ནི་སྲིད་པར་འགྱུར་རམ་ཅི། །གལ་ཏེ་འཕྲོག་བྱེད་ཁ་སྣ་བཀག་གོ་མྱུར་བར་ནི། །དགའ་བའི་མཐར་ཞུགས་སྲོག་ལུང་འགྲོ་བཞིན་པ། །རེ་ཞིག་གསལ་བར་འགུལ་བར་གྱུར་ན་ནི། །རྨས་པ་དེ་ནི་འཚོ་བར་ཤེས་པར་བྱ། །འབྱུང་བའི་རླུང་ནི་ནང་དུ་རྔུབས་ནས་སུ། །འཕྲོག་བྱེད་ཀྱི་ནི་ཁ་དྲུང་ཇི་བཞིན་ལྟ། །སྐྱེ་བོའི་དགྲ་ནི་དབེན་པའི་གནས་སུ་ནི། །སྦས་པའི་ཡུལ་ལ་ཡང་ནི་ཤེས་པར་བྱ། །ཐེ་ཚོམ་མམ་ནི་དགེ་དང་མི་དགེ་བ། །འདྲི་མི་འདྲ་ལྷག་དུག་གིས་བརྒྱལ་བ་ལ། །ཕྱིས་ན་ཕོ་ཉའི་གོས་ནི་ཕྲོགས་བྱེད་ནི། །ཁྲུ་ཡིས་བཅལ་བ་ལ་ནི་སྣང་བར་འགྱུར། །མཁའ་ལྡིང་གཤོག་ཚོགས་གར་དང་ལྡན་པ་ཡིས། །ཀླུ་གཟུགས་དེ་ལ་རྣམ་པར་གནོན་པ་ན། །དེ་ལྟར་གང་གསོན་སྐད་ཅིག་ཙམ་གྱིས་ནི། །གསལ་པོར་སྨྲ་བ་དང་ནི་བསྐྱོད་པར་འགྱུར། །ཁ་དང་སྣ་རླུང་རྒྱུ་བ་བཀག་ནས་ནི། །སྐད་ཅིག་ཙམ་གྱིས་དེ་ནི་ཁྱད་པར་དུ། །གདེངས་ཀ་ཅན་གྱིས་བཟུང་ནས་བརྒྱལ་བ་ནི། །ངེས་པ་ཉིད་དུ་ཚོར་བ་དང་བཅས་འགྱུར། །དུག་འཇོམས་བྱེད་པ་པདྨ་རྒྱས་པར་དང༌། །སྲོག་གི་རླུང་གིས་ཀྱང་ནི་བྱེད་པ་སྟེ། །ཡང་དག་འགག་པའི་འགྲོ་བའི་སྙིང་པོ་ནི། །སློབ་དཔོན་གྱིས་ནི་སྒོམ་པར་བྱེད་པ་ཡིན། །དུག་གི་སྐྱོན་ནི་མེད་པ་ཁོ་ནར་ཡང༌།། གང་དག་གིས་ནི་རྒྱུ་མཚན་འགའ་ཞིག་གིས། །བརྒྱལ་བར་བྱས་ལ་མཁས་པས་སེན་མཚམས་སུ། །སེན་མོ་ཡིས་ནི་སོང་བར་བྱེད་པ་ཡིན། །དུག་ཟིན་གྱིས་ནི་བསོད་ནམས་སྦྱོར་བ་ཡི། །གང་ལ་ཐིག་ལེ་དཀར་པོ་བྱུང་གྱུར་ན། །དེ་ལ་གང་དང་གང་གིས་བརྗོད་བྱས་པ། །དེ་དང་དེ་ནི་སྔགས་སུ་འགྱུར་པ་ཡིན། །ལུས་ཀྱི་ཡན་ལག་དག་ནི་དཀར་པོ་ལ། །གང་གི་གནས་དེར་མེ་ནི་འབར་བ་དག །དྲག་པོ་ཡི་ནི་རླུང་གིས་བསྐྱོད་པ་ན། །རྨས་པ་དེ་མ་ཐག་ཏུ་འགྱེལ་བར་འགྱུར། །ལྷག་མ་ནོར་བུའི་གདེངས་ཀའི་འདབ་མའི་རྩར། །སྲེད་མེད་བུ་བཞིན་རྨ་ཅན་བདེ་བར་ཉལ།། འོ་མའི་མཚོ་ཡི་བདུད་རྩི་དཀར་པོ་ཡིས། །བསྒོས་པས་དུག་ནི་འཇོམས་པར་འགྱུར་བ་ཡིན། །གང་གི་ལུས་ནི་དཀར་པོར་སྒྱུར་བྱེད་པའི། །ཐིག་ལེ་དཀར་པོ་དག་ནི་ལྟ་བྱེད་ན། །སྟོང་པ་དེ་ཡི་དུག་ནི་སྟོང་པར་ནི། །བསྒོམ་པས་ཀྱང་ནི་ཞི་བར་ཤེས་པར་བྱ། །འཕྲོག་བྱེད་མིག་གི་མེ་ནི་འབར་བ་དག །རང་གིས་
བསྐྱོད་པ་གང་གི་སྙིང་ལ་ནི། །རབ་ཏུ་འབར་བས་རྨ་ནི་རྙིང་པ་ལ། །ཡུད་ཙམ་གྱིས་ནི་དེ་ལ་རྒྱས་པར་བསྐྱེད། །རིགས་ལྡན་ནོར་གྱིས་འབྱོར་དང་ཡོན་ཏན་ཅན། །དཀའ་ཐུབ་སྙིང་སྟོབས་ཅན་དང་རྒན་པོ་དང༌། །བུད་མེད་མངལ་ནི་རབ་ཏུ་རྒྱས་པ་དང༌། །བྲམ་ཟེ་དང་ནི་བྱིས་ལ་བསྐྱེད་མི་བྱ། །མཁའ་ལྡིང་སེར་པོས་དུག་ཟིན་དག་ལ་ནི། །ཐིག་ལེ་ཡིས་ནི་གལ་ཏེ་མནན་པ་དང༌། །བུམ་པ་ཅན་གྱི་ཉིན་ཞག་མང་པོར་ཡང༌། །རི་རབ་ཀྱིས་ནི་མནན་བཞིན་གཡོ་བ་མེད། །དུག་གིས་ཟིན་པ་ནོར་རྒྱས་དཀར་པོ་ཡིས། །མཇུག་མས་མགུལ་བར་བཅིངས་ཏེ་མི་ལྷུང་བ། །དེ་ཡི་མགོ་ལས་གལ་ཏེ་བཟུང་ན་ནི། །ཤང་ཤང་ནམ་མཁའ་ལ་ནི་འགྲོ་ན་ཡང༌། །ཟླ་བའི་ཞིང་དུ་སོན་པའི་ནུས་པ་ནི། །སྙིང་གའི་པདྨ་ཕུག་ནས་པད་སྐུད་འདྲའི། །འཛག་པ་གང་ལ་ཟག་མེད་བལྟས་ནས་ནི། །དེ་ཡི་ལུས་ལ་དུག་ནི་གང་ལ་སྟེ། །གང་ཕྱིར་ག་མའི་ལུས་ལས་ནུས་པ་ནི། །འཛགས་པ་ཡིས་ནི་རྒྱང་རིང་གནས་པ་ཡིས། །མ་ལུས་དུག་ཀྱང་ཕིག་ནས་ངེས་པར་ནི། །ཞི་བར་བྱེད་པ་ཁོ་ན་ཡིན་པའོ། །སྦྱོར་བའོ།། །།འདབ་མ་དཀར་པོ་རབ་རྒྱས་རབ་འཛག་པའི། །ཁ་བའི་འོད་འདྲ་ཆུ་ཤེལ་ནོར་བུའི་གཟུགས། །མི་བཟད་དུག་ཀྱང་དང་པོའི་དབྱངས་ཀྱིས་ནི། །བསྒོམས་པས་ཡང་དང་ཡང་དུ་འཇོམས་པར་བྱེད་པ་ཡིན། །ལག་པ་གཡོན་དུ་དབང་ཕྱུག་སྤྱི་བོའི་རྒྱན། །དབུས་གནས་དྲུག་པ་ལ་ནི་ཐིག་ལེས་བརྒྱན། །དབྱངས་ནི་དུག་རྣམས་སྡུད་པར་བྱེད་པ་སྟེ། །འཕྲོག་བྱེད་དཀར་པོའི་ཁུ་ཚུར་བཅངས་པས་སོ། །ས་འོག་སྤྱི་བོར་ཟླ་བའི་དུམ་བུ་ནི། །ཐིག་ལེ་དང་བཅས་སྐྲ་རིས་སྤྱི་ནག་སྟོང༌། །ཨུ་ཡིག་གི་ནི་དབྱངས་ལ་ཞོན་པ་སྟེ། །འཕྲོག་བྱེད་དཀར་པོ་དུག་མཐར་བྱེད་པ་ཡིན། །སྤོང་བ་དང་ནི་གོས་དག་འཕྲོག་པ་དང༌། །དུག་བཅིངས་ཆོ་ལོ་སྟོན་མོ་ས་ཡི་འོག །ཇི་ལྟར་ངེས་པར་བསྒོམས་པས་བྱེད་པ་ན། །དེ་ལྟར་དགོད་པ་ཡང་ནི་ཤེས་པར་གྱིས། །འགྲོ་བ་དུག་གིས་བརྒྱལ་བ་དག་ལ་ཡང༌། །སྙིང་གར་ཡང་ནི་མགོ་མེད་དཀར་པོ་སྟེ། །གཞན་དག་ཀྱང་ནི་བརྒྱལ་བར་བྱེད་པ་ན། །དྲག་པོའི་རླུང་གིས་བསྐྱོད་མེ་འབར་བས་སོ། །ས་འོག་གོས་གནས་རླུང་གིས་དྲངས་པ་ན། །སྐད་ཅིག་གིས་ནི་ཕྱེད་ཙམ་གྱིས་ཀྱང་ནི། །མྱུར་དུ་ཁྲོས་ན་
འཕྲོག་པ་དེ་ལ་ནི། །གཏིང་བཞིན་འབྲངས་ནས་འདེད་པར་བྱེད་པ་ཡིན། །ཉོན་མོངས་སྙིང་གར་ཆུད་པའི་མི་ཤིགས་པས། །བཀུག་བའི་དུག་གི་གོང་བུ་ནག་པོ་ནི། །ཀུམ་པ་དཀར་བཅས་གོས་ནི་བཅིངས་པ་ཡིས། །ཉིན་ཞག་མང་པོར་ཡང་ནི་གཡོ་བ་མེད། །ཚེས་བཞི་སྤྲིན་ནག་ལྷ་ཡི་བླ་མ་དང༌། །ཟླ་ཉི་པ་བ་སངས་ནི་ཆོལ་ཤིང་སྟེ། །རྩིས་ཀྱི་རི་མོ་གློག་ནི་འགྱུར་བ་དང༌། །གང་པོར་ཆོ་ལོར་སྐར་མའི་ཚོགས་སུ་སྟེ། །ཆོས་སྐུར་ལག་པ་དབང་ཕྱུག་བཞིན་པའི་མིག །ཆོ་ལོ་མཁན་པོ་གཉིས་སྐྱེས་མཆོག་གི་ཚོགས། །དུག་ཟིན་དུག་ལས་ཡོངས་སུ་ཐར་ནས་ནི། །ཆོལ་རེས་ལ་ནེ་ལག་ནས་ཡོངས་སུ་འཛིན། །དེ་ཡིས་དུག་གིས་བཟུང་བའི་སྐྱེས་བུ་ནི། །རྣམ་པར་དག་པས་སྐད་ཅིག་ཁྱད་པར་འཕགས། །བཟའ་བ་ཟོས་པའི་ལྷག་མའི་དུས་སུ་ནི། །ཆུ་སྣོད་བཟུང་ནས་ཆུ་ནི་སྟེར་བར་བྱེད། །གང་ཞིག་མཐོང་དང་ཐོས་དང་གང་ཞིག་ནི། །ཉམས་སུ་མྱོང་བའང་ཡུལ་བྱས་སྤྱོད་པ་ནི། །དེ་ཀུན་སེམས་ཀྱིས་བྱེད་དོ་གུས་པར་གྱིས། །སྲིད་པའི་དངོས་པོ་མེད་པ་འབྱུང་བ་ཡིས། །དེ་བཞིན་དུ་ནི་ན་ར་ཡས་སྨྲས་པ། །ནུས་པ་གང་གིས་མྱུར་དུ་ཐར་སྐྱེད་དང༌། །དེས་ནི་དུག་དང་འབྱུང་པོ་འཇོམས་བྱེད་དེ། །ཟླ་བ་དང་ནི་ཉི་མར་ཞུགས་པ་ནའོ། །འདུས་པའི་སྐྱེ་བོ་ཁ་ཡི་སྦུབས་ནས་ནི། །ནུས་པ་བ་མོ་ལྟ་བུ་བབ་པ་ཡིས། །དགོད་པའི་སྒྲ་ཡིས་དུག་དག་མྱུར་དུ་ནི། །འཇོམས་པར་བྱེད་དེ་བསྒོམས་པ་བྱས་པས་སོ། །དུག་ཟིན་སྨྲ་བས་གལ་ཏེ་ཡོད་པ་ན། །རྒྱང་རིང་ན་ཡང་དུག་ནི་མྱུར་དུ་སྡུད། །སྙིང་གར་ངང་བ་དཀར་པོ་བསྒོམ་པ་ནི། །བདུད་རྩིའི་སྙིང་པོས་ཡོངས་སུ་རྒྱས་པའོ། །བརྟན་པའི་དུག་ནི་ཁུར་བུ་སྟོང་ཕྲག་ཀྱང༌། །རླུང་གིས་བསྡུས་པས་དུག་མེད་པར་ནི་བྱེད། །ངང་པའི་བདུང་རྩི་འབབ་པར་གྱུར་པ་ནི། །ཟླ་བའི་ཞིང་ནས་བྱུང་བས་དེར་འགྱུར་རོ། །ལྟོ་བ་སྤྱི་བོ་སྤྱི་གཙུག་གོ་ཆ་ནི། །མིག་དང་ལག་པ་ལག་སོར་སྒྲ་ལྡན་པས། །རེ་རེ་བོར་བའི་རིང་པོ་ཚེག་དྲག་ཀྱང༌། །དྲུག་པོ་ཡང་ནི་བླང་བར་བྱ་བ་ཡིན། །ཉི་མའི་གྲངས་ཀྱི་དབྱངས་ནི་སྦྱར་བྱ་སྟེ། །ས་མཆོག་སྲིད་པ་དམིགས་པ་མེད་པས་འགོད། །དེ་ནི་དྲག་པོ་དང་མཉམ་ཚིག་བཙན་ཞིང༌། །དུག་འཇོམས་མི་བྱེད་པ་ནི་མ་ཡིན་ནོ། །ས་མཆོག་ར་ལ་བསྐྱོན་པ་གུག་རིངས་དང༌།
ཟླ་ཕྱེད་ཐིག་ལེ་ཡིས་ནི་མཛེས་པར་བྱས། །མར་གྱི་ཉིང་ཁུས་མཛེས་པ་བསྒོམས་ནས་ནི། །གོ་ནས་ཡི་དུག་ནི་སེལ་བར་བྱེད། །གང་ཞིག་འབུམ་ཕྲག་བདུན་ནི་བཟླས་པ་ཡིས། །བི་ཎ་ཡ་ཡི་བུ་བཞིན་སྦྲུལ་དུག་བཟོད། །མི་བཟློག་སྙན་དངགས་མཁན་གྱི་རྒྱལ་པོར་ནི། །དབྱངས་ཅན་གྱི་ནི་ནུས་པ་བསྒོམ་པ་ནའོ། །དེ་ཉིད་ཚེག་དྲག་དང་བཅས་འཆར་ཀ་ཡི། །འོད་ཀྱིས་དཀྲིགས་པའི་སྐྱེས་བུ་གང་ཞིག་གིས། །སྒོམ་པར་བྱེད་ན་དུག་དང་མཁའ་འགྲོ་མ། །གདེངས་ཀ་ཅན་ཡང་ཁྲོ་ཞིང་འཁྲུགས་པར་བྱེད། །སྙིང་ལ་བསྒོམས་པ་ཡིས་ནི་འགུགས་པ་སྟེ། །དབྲལ་བའི་མཐིལ་དུ་གནས་པ་དབང་དུ་སྡུད། །ཡན་ལག་མཆོག་ལ་བཙུད་པས་ཆང་གི་རྒྱུན། །ཛུ་བ་ཏི་ལ་འབབ་པ་ཁོ་ནར་འགྱུར། །ཁ་ཡི་སྦུབས་སུ་འབར་བས་དཀྲིགས་པ་ཡི། །སུམ་སྡོམ་རབ་ཏུ་འབར་བས་དུག་བརྒྱལ་བ། །འཆི་བའམ་ནི་འཚོ་བ་ཡང་ནི་རུང༌། །བདེ་བར་གསལ་པོ་ཉིད་དུ་དེ་ཡིས་སྨྲ། །དེ་ཉིད་དྷ་ཡི་ནང་དུ་ཆུང་གྱུར་ཅིང༌། །པདྨའི་ལྟེ་བར་གནས་པ་བསྒོམས་ན་ནི། །བདུད་རྩིའི་ཟིལ་བ་དལ་འབབ་ཚེག་དྲག་བཅས། །དུག་འཇོམས་པ་ཡི་ས་བོན་ཉིད་ཡིན་ནོ། །དེ་ཉིད་མེ་ཡི་ནང་དུ་བཞག་ནས་ནི། །ཉི་མ་འཆར་ཀའི་འོད་འདྲས་མངོན་གསལ་དཀྲིགས། །ངེས་པར་དུག་སེལ་རིམས་དང་འབྱུང་པོ་དང༌། །དུག་གི་ཁྱད་པར་ཡང་ནི་སེལ་བར་བྱེད། །ཀཥ་སྦྱར་བ་དཀར་པོ་ཐིག་ལེར་བཅས། །རི་དགས་མཚན་མའི་དབུས་སུ་ཆུད་པ་ནི། །སྙིང་ལ་ཆུད་པར་བྱས་པས་དུག་རྣམས་ནི། མྱུར་དུ་འཇོམས་པར་བྱེད་པ་ཁོ་ན་ཡིན། །དབྱངས་ཡིག་ཨཱུ་རིང་ཡང་དག་ལྡན་པ་ཡི། །ཡི་གེ་དེ་ཉིད་མི་ཡི་སེང་གེའི་སྟེང༌། །འཇིགས་དང་སྒྲ་དང་སྡིག་དང་དུག་དང་ནི། །འབྱུང་པོ་ནད་དང་དབུལ་པོ་བརླག་པར་བྱེད། །ཡི་གེ་ཧཱུཾ་ཕཊ་མེ་ཡི་རང་བཞིན་ཅན། །འབར་བའི་ཕྲེང་བས་དཀྲིགས་པས་གསལ་བྱས་པ། །གང་གིས་མགྲིན་པར་བྲིས་པ་ཡིན་ན་ནི། །དེ་ཡིས་གསལ་པོར་དོན་གྲུབ་བྱེད་པར་འགྱུར། །ལ་ཡིག་མཆོག་ནི་ཟླུམ་པོའི་ཐིག་ལེར་བཅས། །གོས་གནས་བདུད་རྩི་དཀར་པོ་རྒྱུན་འཛག་པ། །དུག་གིས་ཟིན་ལ་བྱབ་ཏུ་བཅུག་ན་ནི། །ངེས་པར་དུག་ནི་འཇོམས་པར་བྱེད་པ་ཡིན། །དྲི་ཁུར་ནག་པོའི་དབུས་ཆུད་ཐ་ཡིག་ནི། །སྔགས་འདིས་དུག་ཟིན་ལ་ནི་བྱིན་བརླབས་ན། །བསྐྱོད་དང་སྨྲ་དང་གཟེར་བའི་སྒྲ་དང་ནི། །ལངས་ནས་ཀུན་དུ་ལྟ་བར་ཐེ་ཚོམ། །
མེད། །གསུམ་པ་ཉེ་བར་བསྟན་པའོ།། །།ཛྷཾ་ཀཱ་རི་ཎི་ཀུ་རུ་ཀུལླེ་དང༌། །བེ་རུཎྞ་དང་གསེར་རི་ས་བོན་དག །གང་དུ་དུག་གིས་བརྒྱལ་ལ་བྱེད་པ་ཡི། །དབྱེ་བ་དེར་ནི་ལེགས་པར་མཉན་པར་གྱིས། །སདྡོ་བཱ་མ་གྷོ་ར་དེ་སྐྱེས་བུ། །ལྔ་པ་དེ་རུ་ཡཱ་ནི་དབང་ལྡན་དུ། །དཀར་སེར་དམར་ལྗང་ནམ་མཁའ་སོར་མོར་གནས། །རྒན་ལྕུགས་གུང་མོ་གསུམ་ལ་ཛྷཾ་ཀཱ་རི། །ཡི་གེ་རྣམ་པར་སྤྲས་པ་དག་ཡིན་ནོ། །བཞི་པ་ལྷ་ནི་ཎི་ཡིག་ཅེས་བྱ་བ། །མིང་མེད་ལ་ནི་གནས་པ་ཉིད་ཡིན་ནོ། །མཁར་གནས་དྷ་དང་ཝ་སྦྱར་ཐིག་ལེར་བཅས། །དུག་ཟིན་མིང་ཡིག་དང་པོར་བར་དུ་སྟེ། །རྒན་པོའི་སྔགས་དང་སྦྱར་བ་དག་གིས་ནི། །དབང་ལྡན་དེ་ནི་མཉེས་ན་མ་ལུས་པའི། །དུག་ནི་དེ་ཡི་མོད་ལ་ཞི་བར་འགྱུར། །དེ་ཡི་སྐྱེས་བུ་དང་ནི་སྦྱར་བ་ན། །འབྱུང་པོའི་གནོད་པ་ཡོད་ན་མངོན་གསལ་འགྱུར། །འཇིགས་པའི་གྷོ་རི་དང་ནི་སྦྱར་བ་ན། །དགྲ་སྦྲུལ་དམན་པ་ཡང་ནི་མོད་ལ་བསྐྱོད། །གཡོན་པ་མནན་པས་རེངས་པ་ཕོངས་པ་དང༌། །དགྲ་དང་ངག་དང་དུག་དང་དཔུང་དག་གོ །ལུག་གཡོན་ཟླ་བའི་དབུས་གནས་ཐ་ཡིག་ཆུད། །ཛྷཾ་མཉེས་དཀར་པོ་འཛག་པར་བྱས་ནས་ནི། །འོད་དང་ཆ་ཀུན་རྫོགས་པ་དེ་ཡིས་ནི། །དུག་དང་ལུ་བ་རིམས་འབྲས་མཁའ་འགྲོ་མ། །གདོན་དང་འབྱུང་པོའི་གནོད་དང་ཚ་བ་དང༌། ངེས་པར་ཞི་བྱེད་ཡོངས་སུ་བཟླས་པའི་ཆུས། །སྔགས་པས་འགྲོ་བ་རྣམས་ལ་དེ་བྱེད་དོ། །ཁ་ལ་ཛྷཾ་ཡིག་ལྐོག་མར་ཀཱ་ཡིན་ནོ། །ལྟེ་བར་རི་ཡིག་གསང་ནི་རྐང་གཉིས་དྷྭཾ། །མདའ་དང་ཉུངས་ཀར་རྨ་བྱའི་སྒྲོ་སོགས་ཀྱིས། །འབྱུང་པོ་ལ་སོགས་གནོད་པ་འཇོམས་བྱེད་དེ། །དུང་སོགས་སྒྲ་ལའང་ལན་བདུན་བཟླས་པས་སོ། །འབུམ་བཟླས་སྦྱིན་སྲེག་ཁྲི་ཡིས་མཆོད་གཏང་དང༌། །ཙན་ཏིས་ཨོཾ་ཁི་ལ་ལ་ཀུ་ཡིན་ཏེ། །རུ་ནི་ལྐོག་མར་ཀུ་ནི་ནུ་བྲག་ཏུ། །ལླེ་ནི་གསང་བར་རྐང་གཉིས་སྭཱ་ཧཱའོ། །སྟོང་བཟླས་སྐུད་པར་བཏབ་བ་རྣ་བར་བཏགས། །དེ་ནི་ནགས་སུ་སྦྲུལ་གྱིས་མི་འཇིགས་སོ། །ས་གར་སོགས་བྲིས་ཁྱིམ་གཞག་དེ་མི་འོང༌། །བི་རི་མ་ཧཱ་སེ་ན་ཙ་ན་ར་དང༌། །ཙན་ཏིས་འབུམ་བདུན་རེ་རེས་དབང་ཀུན་འགྲུབ། །ཨོཾ་སུ་ཝརྞ་རེ་ཁེ་ཀུཀྐུ་ཏ་བི་ཀྲི་ཧ་རཱུ་པི་ཎི་སྭཱ་ཧཱ། ལག་མཐིལ་པད་དཀར་འདབ་བརྒྱད་དབུས་སུ་ནི། །ཡི་གེ་འདྲེན་པ་གཞན་ལ་གཉིས་གཉིས་བརྩེགས། །
བ་མོ་འབབ་པས་སྨན་མ་ལ་བསངས་ན། རས་བལ་འདབ་མ་རླུང་གིས་བསྐྱོད་བཞིན་ལྡང༌། །ཨོ་ཨེ་ཧོ་མཱ་ཡེ། །བྷེ་རུཎྜེ་ཨཱ་ཨཱི་ཨཱུ་བའི་ཛེ། །བྷ་རི་ཡ་ཀ་རཎྜེ། ཏཏྟ་མནྟ་ཨཱ་གྷོ་ཥེ། ཧཱུཾ་ཀ་རེ་བི་ཥ་ན་སེ་ཐཱ་བར་ཛཾ་ག་མ་ཨ་ག་ཛ་ཀིཏྟ་མ་ཧཱ་ར་ཏ་ར་ཧཱུཾ་ཕཊ་སྭཱ་ཧཱ།། །།ཨོཾ་པཀྵིཾ་སྭཱ་ཧཱ།། ཥི་སིདྡྷ་ནཱ་ཐཱ་དི་བཱ་ཀ་རི་ཨཛྙཱ་ཤྲཱི་ཤྲཱིསྐཎྛ་ཤྲཱི་ནཱི་ལ་ཀཎྛ། ཥཱི་བི་ཥཾ་ཁ་ལ། །རི་མི་ཛཱི་མི་ཧཾ་ས། ཀྵི་པི་ཀྵྀ་པི་ཧཾ་ས་ཧཱུཾ་ཧཾ་ས། ཛཾ་ཧཾ་ས་ནཱཏྟི་བི་ཥི། ཏྲི་བྷ་བ་ནེ། ས་ཡ་ལེ། འབྲུམ་བུ་གཉིས་དང་དུག་ཟིན་ལ་སོགས་པ། །གསོ་དང་སྔར་གསུངས་བླ་མའི་མན་ངག་བཞིན། །སྔགས་ཆབ་ཇི་ཙམ་འགྲོ་བའི་ལམ་དེ་ན། །དུག་སེལ་བྱེད་པར་ཡིད་ལ་གདོན་མི་ཟ། །པད་སྟེང་བུམ་བཅའ་སྔགས་བདུན་བཟླས་ཀླུ་མཆོད། །ཨོཾ་པཀྵིཾ་སྭཱ་ཧཱ། །ཞེས་བྱ་བ་དང་རིག་པའི་རྒྱལ་མོ་དྲུག །སྒྲ་རིས་ཟླ་དཀྱིལ་ལག་མཐིལ་བསམ་པས་ཀྱང༌། །དུག་སེལ་བྱ་རྒོད་བཤད་པ་མཐོང་བ་དང༌། །སྐྱེ་བོའི་སྐྱིད་སྡུག་བདེ་བའི་སྒྲ་ཡིས་ཀྱང༌། །ཚ་གསུམ་པོ་ལའི་ས་བོན་སྦྲང་རྩིར་སྦྱར། །སྣར་བླུགས་ལུས་སྐྱེས་སོགས་ཀྱི་ནད་འཇོམས་བྱེད། །ཚེར་ཅན་ཤིང་ཤའི་རྔ་ལ་ནི། །ཁ་གཉིས་པགས་པས་རྔ་གཡོགས་བྱས། །སྦྲུལ་དགྲའི་རྐང་གིས་བརྡུངས་ནས་ནི། །ཇི་སྲིད་སྒྲས་ཁྱབ་དེ་དུག་འཇོམས། །ཕ་ནི་ཛ་དང་སུ་དཪྵ་ན་ལུས་བཏགས་ཀྱང༌། །ཥེ་ཏེ་པུ་ནར་ན་བའི་ཁུ་བླུད་པས། །མ་ནིང་ཀ་ཀོ་ཏི་ཡི་ཙ། །བ་མར་དང་འཐུངས་དུག་གསུམ་སེལ། །ཀནྟ་ཤིར་ཤའི་རྩ་ཤུན་འབྲས་བཀྲུས་ཆུར། །སྦྱར་བ་ཨ་ཤ་ར་ཡི་ཉ་དག་ལ། །འཐུངས་ན་ལོ་གཅིག་དུག་ནི་ཐུབ་པ་ཡིན། །ཤུ་དག་ཤིང་ཀུན་ནིམ་པའི་ཁུ་བ་དག །སྣར་བླུགས་དུག་གིས་སྐྲ་རྩེ་སླེབས་ཀྱང་སེལ། །ཀ་རཉྫ་ཡི་ཚེར་ཅན་ནིམྤའི་འདབ། །མར་སྦྲང་ཡུངས་ཀར་གོ་ནས་ཡང་སེལ། །ཁ་གཉིས་ལུས་ཆེ་ནེའུ་ལེ་ཡི་མིག །སྦྲུལ་དགྲའི་མཁྲིས་པའི་ཆ་མཉམ་པ། །ཁྱིམ་དུ་གཞག་པས་ཀྱང་ནི་སྦྲུལ་མགོ་འགེགས། །ཤྲཱི་བཱ་ས། བི་རངྒ། ཨུ་ཤི་ར། སརྫ་ར་ས། ལཱཀྵ་བྷ་ལཱ་ལཱ་ཏ་ཀ །ཀུད་ཐ། ཏྲི་ཕ་ལ། ཨརྫུ་ན། ཀུ་སུ་མ། འདི་དག་ཆ་མཉམ་དུ་བ་ཡིས། །ལུས་སྐྱེས་ཙེ་རི་སྦྲང་མ་སོགས། །སྦྲུལ་ཡང་འབྲོས་ཞེས་ཀླུ་སྒྲུབ་གསུང༌། །
མེ་ཏོག་གྲོང་ཁྱེར་ཞེས་བྱ་བ། །བརྒྱ་བྱིན་ཕོ་བྲང་དང་མཉམ་པར། །ཟླ་ཆ་ཞེས་བྱའི་བྲམ་ཟེ་མེའི། །ལོ་རྒྱུས་ཀྱང་ནི་ལྔ་པ་ཡིན། །དཔལ་མཁའ་ལྡིང་གྲུབ་པའི་བསྟན་བཅོས་བྲམ་ཟེ་ཤང་ཀུས་མཛད་པ་རྫོགས་སོ། །གུ་ཎ་སཱ་ག་ར། འདིར་ནི་བླ་མ་དམ་པའི་རྗེས་འབྲངས་ཏེ། །དཔལ་ལྡན་ཤང་ཀུ་བདག་གིས་མདོར་བསྡུས་བྲིས། །དགེ་བ་དེ་ཡིས་སྲིད་གསུམ་མ་ལུས་པ། །དུག་མེད་བདུད་རྩིའི་གོ་འཕང་བསྟེན་པར་ཤོག །རྒྱ་གར་གྱི་མཁན་པོ་དཔལ་བྲམ་ཟེ་ཨ་བ་དྷཱུ་ཏཱི་ཆེན་པོ་དཔེ་མེད་ཀྱི་ཞལ་སྔར། །ལོ་ཙཱ་བ་བནྡེ་པྲཛྙཱ་ཀཱིརྟིས་བསྒྱུར་བའོ།། །།དབང་ཕྱུག་ཆེན་པོས་མཁའ་ལྡིང་དུ་སྤྲུལ་ནས། མཁའ་ལྡིང་རྒྱ་མཚོ་བ་འབུམ་ཕྲག་བཞི་བཤད། དེ་བྲམ་ཟེ་སང་ཀུས་དབང་བསྐུར་གྱི་ཚེ་ཀླུ་བདུད་ཀྱི་དུག་ཡོད་པ་ལ། འཇོག་པོའི་དུག་ཁམ་ཕོར་དུ་མར་དང་སྦྲང་རྩི་བྱིན་པ་མ་ཡོག །བདུན་པོ་ཀུན་གྱི་བུ་མོ་ནུ་མོ་བཀུག་ནས་ཆུང་མར་བྱས། །འཇོག་པོའི་བུ་མོ་བཀུག་པས་མོས་ཕུ་བྱས་དུག་གིས་ཟིན་ནས་ཤི་ལ་ཐུག་པས། ཡུལ་མི་ཀུན་གྱིས་ཁྱེད་གྲོངས་ན་ངེད་ཀྱི་དུག་སུས་གསོ་བྱས་པས། མཆོད་སྡོང་ཚུགས་ཤིག་ཟེར་ནས། ནམ་མཁའ་ལྡིང་གི་མཆོད་སྡོང་རྡོ་རིངས་སྟེང་དུ་བཙུགས། སྟེང་ནས་རྡོའི་གདུགས་ཕུབ་པ་ཅིག་བྱས། །ཁོས་འཁྱུད་ནས་སྔགས་བཟླས་ཏེ། །ཀུན་དུག་ཞི་བར་བྱེད་དོ། །དེ་ལྟ་བུའི་ཤང་ཀུས་མཛད་དོ།། །།དུས་དང་དུས་མ་ཡིན་པ་ལ་ལྔ་སྟེ། རྨའི་མཚན་ཉིད་དང༌། ཕོ་ཉའི་མཚན་ཉིད་དང༌། གནས་དང༌། ཚེས་གྲངས་དང༌། གཟའ་དང༌། རྒྱུ་སྐར་དང༌། ཆོས་མཐུན་པ་དང༌། མི་མཐུན་པ་དང༌། དུས་དང༌། དགོས་པའི་དབྱེ་བ་དང༌། རགས་པ་དང༌། སྟོང་པ་སྟེ་དུག་ཟིན་གྱི་མཚན་ཉིད་དང༌། དུས་མ་ཡིན་པར་མི་འཆི་བ་བསྟན་པའོ། །ཉིང་དགོས་ལ་གསུམ། ཕྲིན་ལས་ཐམས་ཅད་ཀྱི་སྣོད་དུ་འགྱུར་བའི་དགོས་པ་དང༌། སེམས་
ཀྱི་སྲོག་འཛིན་པ་དང༌། ཕྱོགས་ཐམས་ཅད་དུ་གྲགས་པས་ཁྱབ་པའོ།། །།མཆོད་བརྗོད་དང༌། དགོས་འབྲེལ་དང༌། གཞུང་བཤད་པ་གསུམ་མོ། །གཞུང་ལ་གཉིས། ལུས་རྣམ་གཞག་དང༌། ཡན་ལག་རྒྱས་བཤད་དོ། །ཨོཾ་ཙ་ཀྲ་ར་ཧི་ཙ་ཀྲ་བྷི་ད་ནི་གྷ་ཎ་ཏི་ཀཱ་རི་ཧཾ། ས་གཞི་ལྕི་བས་མཎྜལ་གྲུ་བཞི་བྱུག །དུང་དང་བུ་ཆ་བཀྲུས་ལ་ཐུབ་པ་དང་ཁ་བྱང་དུ་བསྟན། རང་ཡང་ཁ་བྱང་དུ་བལྟས་ལ། དུང་ལ་གུ་གུལ་བདུག །གཡས་གཡོན་གང་དུ་འཁོར་འདོད་པ་དེ་ངོས་སུ་དུང་བསྐོར། ལག་པ་གཉིས་ཀྱི་བར་དུ་དུང་གཟུང༌། དུང་ལ་ཁ་གཏད་ལ་སྔགས་བཟླ། །བུ་ཚའི་མགོ་ལ་མེ་ཏོག་གཏོར། །གཙང་པ་ལོ་ཙཱ་བའི་ཕྱག་དཔེ་ལས་བྲིས་སོ།།