ཨུ་ཌྱན་གྱི་འོད་ཟེར་ཅན་གྱི་སྒྲུབ་པའི་ཐབས།
ལྷན་ཅིག་སྐྱེས་པའི་རོལ་པ།
རྒྱ་གར་སྐད་དུ། ཨུ་ཌི་ཡཱ་ཎ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། ཨུཌྱན་གྱི་འོད་ཟེར་ཅན་གྱི་སྒྲུབ་པའི་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྡིག་པ་བཤགས་པའི་རྗེས་སུ་སྟོང་པ་ཉིད་རྣམ་པར་བསྒོམས་ལ། སྣ་ཚོགས་པདྨ་དང་ཉི་མ་ལ་མཾ་གི་ས་བོན་དམར་པོ་ཡོངས་སུ་གྱུར་པ་ལས་ཨུ་ཌྱན་གྱི་འོད་ཟེར་ཅན་མདོག་དམར་བ། ཞལ་དྲུག་པ་ཕྱག་བཅུ་གཉིས་པ་ཞལ་རེ་རེ་ལ་སྤྱན་གསུམ་གསུམ་མོ། །དམར་པོ་དང༌།
ནག་པོ་དང༌། དཀར་པོ་དང༌། ལྗང་གུ་དང༌། སེར་པོ་ནི་གཡས་སྐོར་དུ་ཞལ་ལྔའོ། །སྟེང་དུ་ནི་ཕག་ཞལ་ནག་པོའོ། །དང་པོ་གཡས་ཀྱི་ཕྱག་དྲུག་ཏུ་གོ་རིམས་བཞིན་དུ་རལ་གྲི་དང༌། འཁོར་ལོ་དང༌། གཏུན་ཤིང་དང༌། མདའ་དང༌། དགྲ་སྟ་དང༌། རྡོ་རྗེ་རྩེ་གཅིག་པའོ། །གཡོན་གྱི་ཕྱག་རྣམས་སུ་སྡིགས་མཛུབ་དང་བཅས་པའི་ཞགས་པ་དང༌། ཁ་ཊྭཱཾ་ག་དང༌། ཐོད་པ་དང༌། མྱ་ངན་མེད་པའི་ཡལ་ག་དང༌། ཚངས་པའི་མགོ་བོ་དང༌། གཞུ་དང་རྩེ་གསུམ་མོ། །མཆོད་རྟེན་གྱི་ནང་ན་གནས་པ། ཀླུའི་དབང་པོ་བརྒྱད་ཀྱིས་སྐུ་བརྒྱན་པ། སྐྲ་ཁམ་པ་གྱེན་དུ་བསྒྲེང་བ། ཞལ་མཆེ་བ་གཙིགས་པ། མགོ་བོ་སྐམ་པོ་བརྒྱད་ཀྱིས་དབུ་བརྒྱན་པ། མགོ་བོ་རློན་པའི་ཕྲེང་བ་སྐེ་བ་ནས་འཆང་བ། རིན་པོ་ཆེ་མང་པོས་སྤྲས་པའི་ཤིང་རྟ་སྣ་ཚོགས་པ་ཕག་པ་བདུན་ལ་ཆིབས་པ། ཕྱི་རོལ་དུ་དུར་ཁྲོད་བརྒྱད་ཀྱིས་ཡོངས་སུ་བསྐོར་བ། ཤིང་རྟའི་དབུས་སུ་གནས་པ་ནི་སྐྱིལ་མོ་ཀྲུང་གིས་བཞུགས་པ། རྡོ་རྗེ་དང་ཁབ་དང༌། མྱ་ངན་མེད་དང༌། སྡིགས་མཛུབ་བསྣམས་པ། མདོག་བཟང་པོའི་འོད་ཟེར་ཅན་ཤ་འགག་སེར་པོ། སྣ་ཚོགས་ཀྱི་རིན་པོ་ཆེས་བརྒྱན་པ། སྟག་གི་པགས་པའི་ཤམ་ཐབས་ཀྱིས་ཀྱང་བརྒྱན་པའོ། །འོད་དམར་པོ་ལས་དེ་བཞིན་གཤེགས་པ་ལྔ་སྤྲོ་བ་དང༌། སྐད་ཅིག་གིས་བསམས་ལ་སྙིང་གར་ཉི་མ་ལ་མཾ་གི་ས་བོན་ལས་རྣམ་པར་བྱུང་བའི་འོད་ཟེར་བརྒྱད། སངས་རྒྱས་དང་བྱང་ཆུབ་སེམས་དཔའ་ཡང་དག་པར་བཀུག་སྟེ། དབང་བསྐུར་བ་བླངས་ནས་རྣམ་པར་སྣང་མཛད་བདག་ཉིད་ཀྱི་དབུ་རྒྱན་དུ་རྣམ་པར་བསམ་པར་བྱའོ། །དེ་ནས་རྣལ་འབྱོར་པས་འཁོར་ལོ་འཁོར་བའི་རིམ་པ་འདིས་སྔགས་ཀྱི་བཟླས་པ་བྱའོ། །ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱཧཱ། བཟླས་པ་བྱས་ནས་ཕྱིས་ཀྱི་དུས་སུ་ཏིང་ངེ་འཛིན་ཉེ་བར་བསྡུས་ལ་དེ་ཉིད་ཀྱི་རྣལ་འབྱོར་གྱིས་ཇི་ལྟར་བདེ་བར་གནས་པར་བྱའོ། །ཨུ་ཌྱན་གྱི་འོད་ཟེར་ཅན་གྱི་སྒྲུབ་ཐབས། སློབ་དཔོན་ལྷན་ཅིག་སྐྱེས་པའི་རོལ་པས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།།