ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས།
དགེ་འདུན་སྦྱིན་གྱི་སྲས།
རྒྱ་གར་སྐད་དུ། པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་རང་གི་སྙིང་གར་པདྨ་དཀར་པོ་དང༌། ཟླ་བའི་དཀྱིལ་འཁོར་ལ་པྲཾ་དཀར་པོ་བཀོད་ནས་སྔོན་དུ་བསྟན་པ་བཞིན་དུ་ཐམས་ཅད་བྱས་ལ། པྲཾ་དང་པདྨ་ཡོངས་སུ་གྱུར་པ་ལས་བཅོམ་ལྡན་འདས་མ་ཞལ་གཅིག་མ། ཕྱག་གཉིས་མ་དཀར་མོ། །ལུང་དང་རྟོགས་པའི་བདག་
ཉིད་རིན་པོ་ཆེའི་དབུ་རྒྱན་འཆང་བ། ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏིས་མཚན་པའི་པདྨ་གཉིས་གཡོན་དང་གཡས་ཀྱི་ལོགས་ཀྱི་ནང་དུ་ལོངས་ཀྱིན་ཡང་དག་པར་བསྣམས་ཤིང་བཟུང་བའི་ཕྱག་གཉིས་ཀྱིས་ཆོས་བཤད་པའི་ཕྱག་རྒྱ་ཀུན་ནས་བཅིངས་ཏེ། པདྨ་དཀར་པོ་དང་ཟླ་བ་ལ་རྡོ་རྗེ་སྐྱིལ་ཀྲུང་ཅན་མ། ལང་ཚོ་གསར་ལ་བབ་ཅིང་བདོ་བ། སྣ་ཚོགས་ཀྱི་ན་བཟའ་དང་རྒྱན་གྱིས་བརྒྱན་བའི་རབ་ཏུ་སྣང་བ་ཙམ་མོ། །སྣ་ཚོགས་ཀྱི་འོད་ཟེར་རབ་ཏུ་འཕྲོས་པའི་ཚོགས་ཀྱིས་ནམ་མཁའ་བཀང་སྟེ། མར་མེའི་ཕྲེང་བ་ལྟ་བུ་ཐོགས་པ་མེད་པས། ཤེས་རབ་ཀྱི་ཕ་རོལ་ཏུ་ཕྱིན་མ་མང་པོ་འཕྲོ་ཞིང་བསྡུ་བའི་སྦྱོར་བས་ཐམས་ཅད་གཅིག་གི་རང་བཞིན་དུ་ལྷག་པར་མོས་པས་ཡང་ཇི་སྲིད་དུ་ཤེས་རབ་ཀྱི་ཕ་རོལ་ཏུ་ཕྱིན་མ་མངོན་དུ་མ་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་གལ་ཏེ་དགོད་པར་བྱུང་བར་གྱུར་ན། དེ་ལ་པདྨ་དཀར་པོ་སྣའི་རྩེ་མོར་སྲན་ཙ་ན་ཀའི་ཚད་ཙམ་བྲིས་པ་ལྟ་བུ་རྣམ་པར་བསྒོམས་ལ། དེ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་མ་ཤིན་ཏུ་ཕྲ་བ་བརྗོད་པའི་གཟུགས་རྩེ་གཅིག་པའི་ཡིད་ཀྱིས་ཡང་དང་ཡང་དུ་མངོན་དུ་བྱ་ཞིང་བསྒོམ་པར་བྱའོ། །དེ་ནས་བསྐྱེད་པའི་རིམ་པའི་ཕྱོགས་ཀྱི་སྔགས་ནི། ཨོཾ་པྲཾ་སྭཱ་ཧཱ། རྫོགས་པའི་རིམ་པའི་ཕྱོགས་ཀྱི་སྔགས་མེད་དེ། དོན་དམ་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་པ་གདམས་ངག་ཐོབ་པས་སོ། །དགེ་འདུན་སྦྱིན་གྱི་བུ་ཡིས་ནི། །རིགས་ཀྱི་མིང་གིས་འབད་པ་ཡིས། །སེམས་ཅན་ཀུན་གྱི་དོན་གྱི་རྒྱུར། །སྒྲུབ་ཐབས་གསལ་པོ་འདི་བྲིས་སོ། །ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། སློབ་དཔོན་དགེ་འདུན་སྦྱིན་གྱི་སྲས་ཀྱིས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།།