ཚིག་ལྷུག་པའི་བརྟན་པའི་འཁོར་ལོའི་སྒྲུབ་ཐབས།
རྒྱ་གར་སྐད་དུ། མུཀྟ་ཀེ་ན་སྠི་ར་ཙཀྲ་སཱ་དྷ་ནཾ། བོད་སྐད་དུ། ཚིག་ལྷུག་པའི་བརྟན་པའི་འཁོར་ལོའི་སྒྲུབ་ཐབས། །འཕགས་པ་འཇམ་དཔལ་ལ་ཕྱག་འཚལ་ལོ། །འཇམ་པའི་དཔལ་ལ་རབ་བཏུད་དེ། །མི་ཤེས་མུན་པ་འཇོམས་བྱེད་པ། །དེ་ཡི་འཁོར་ལོ་བསྒོམ་པའི་ཐབས། །ཚིག་འདི་གསལ་པོར་བྲི་བར་བྱ། །རྣལ་འབྱོར་པ་བདེ་བའི་སྟན་ལ་གནས་ཏེ་བླ་མ་དང་སངས་རྒྱས་དང༌། བྱང་ཆུབ་སེམས་དཔའ་རྣམས་ནམ་མཁའ་ལ་གནས་པར་རྣམ་པར་བསམས་ནས་དེ་རྣམས་ལ་ཡིད་ཀྱིས་རང་བཞིན་གྱི་རྣམ་པ་སྣ་ཚོགས་པའི་མཆོད་པ་ཕུལ་ཏེ་སྡིག་པ་བཤགས་པ་ལ་སོགས་པ་བྱའོ། །དེ་ནས་སྣ་ཚོགས་འདི་སེམས་
ཙམ་སྟེ་གཟུང་བ་དང་འཛིན་པ་སྤངས་ཏེ་རྨི་ལམ་ལྟ་བུ་དང༌། གཟུགས་བརྙན་ལྟ་བུར་བདག་ཉིད་ཀྱིས་ངེས་པར་བྱས་ཏེ། གུར་གསུམ་དམར་པོ་ལྟ་བུའི་མུཿལས་བསྐྱེད་པའི་ཟླ་བའི་འོད་ཟེར་དམར་པོ་ཅན་ལ་ཨ་ལ་སོགས་པའི་དབྱངས་ཡིག་འབར་བ་བལྟའོ། །དེའི་སྟེང་དུ་མུཿལས་སྐྱེས་པའི་འོད་དམར་པོ་ཅན་གྱི་ཟླ་བ་ལ་འབར་བའི་ཀ་ལ་སོགས་པ་བལྟ་བར་བྱའོ། །དེའི་སྟེང་དུ་མུཿལས་སྐྱེས་པའི་འབར་ཞིང་དྲི་མ་མེད་པའི་ཨུཏྤལ་ཟེའུ་འབྲུལ་མུཿས་མཚན་པ་རྣམ་པར་བསམས་ལ། དེ་ཡོངས་སུ་གྱུར་པ་ལས་གུར་གུམ་ལྟ་བུའི་གཞོན་ནུ་ཟུར་ཕུད་ལྔ་པ་རྒྱན་དང་སྒེག་པའི་ཉམས་དང་ལྡན་པ་རལ་གྲི་དང་པོ་ཏི་བསྣམས་པའི་ངག་གི་དབང་ཕྱུག་ཏུ་བདག་ཉིད་ཟླ་བའི་གདན་ལ་བསྒོམ་པར་བྱའོ། །དེའི་སྙིང་གར་མུཿ་ལས་སྐྱེས་པའི་བརྟན་པའི་འཁོར་ལོ་རྩིབས་བརྒྱད་པ་འོད་ཀྱི་རང་བཞིན་འབར་བའི་ཨ་ལ་སོགས་པའི་ཕྲེང་བས་བརྒྱན་པའི་ཕྱི་རོལ་དུ་འབར་བའི་ཀ་ལ་སོགས་པའི་ཕྲེང་བས་བསྐོར་བ་སྟེ། དེའི་ལྟེ་བ་ལ་ཨའོ། །ཤར་གྱི་རྩིབས་ལ་རའོ། །ལྷོའི་རྩིབས་ལ་བའོ། །ནུབ་ཀྱི་རྩིབས་ལ་ཙའོ། །བྱང་གི་རྩིབས་ལ་ནའོ། །མེ་ལ་སོགས་པའི་མཚམས་བཞི་རུ་ནི་པྲ་བན་ཙ་ཞེས་བྱ་བའི་ཡི་གེ་རྣམས་གུར་གུམ་ལྟ་བུའི་རྣམ་པར་བསམས་ལ། དེ་ལ་འཁོར་ལོའི་འོད་ཀྱི་ཚོགས་ཀྱིས་ལུས་ཀྱི་ནང་གསལ་བར་བྱས་ནས་བ་སྤུའི་ཁུང་བུ་སོ་སོ་ནས་ཕྱིར་བྱུང་སྟེ། ཕྱོགས་བཅུའི་འཇིག་རྟེན་གྱི་ཁམས་གསལ་བར་བྱས་ནས་ཡང་བ་སྤུའི་ཁུང་བུ་དེ་ཉིད་དུ་ཕྱིར་ཞུགས་ཏེ། ལུས་ཀྱི་ནང་གསལ་བར་བྱེད་པར་ཡུན་རིང་དུ་བསམ་པར་བྱའོ། །ཨོཾ་ཨ་ར་པ་ཙ་ན་མུཿཞེས་བྱ་བ་ནི་བཟླས་པའི་སྔགས་སོ། །བརྟན་པའི་འཁོར་ལོ་སྒྲུབ་པའི་ཐབས། །བྱས་པའི་བསོད་ནམས་གང་བསགས་པ། །དེ་ཡིས་འགྲོ་བ་ཐམས་ཅད་ནི། །འཇམ་པའི་རྡོ་རྗེ་མཚུངས་པར་ཤོག །ཚིག་ལྷུག་པའི་བརྟན་པའི་འཁོར་ལོ་སྒྲུབ་པའི་ཐབས་རྫོགས་སོ། །ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། །།