ཨོ་ཌི་ཡཱན་ནས་བྱུང་བའི་རིགས་བྱེད་མའི་སྒྲུབ་པའི་ཐབས།
རྒྱ་གར་སྐད་དུ། ཨོ་ཌི་ཡཱ་ན་བི་ནི་ར་ག་ཏ་ཀུ་རུ་ཀུལླེ་སཱ་དྷ་ནཾ། བོད་སྐད་དུ། ཨོ་ཌི་ཡཱན་ནས་བྱུང་བའི་རིགས་བྱེད་མའི་སྒྲུབ་པའི་ཐབས། འཕགས་མ་རིགས་བྱེད་མ་ལ་ཕྱག་འཚལ་ལོ། །དང་པོར་རེ་ཞིག་བསྒོམ་པའི་དང་པོར་དྲི་ཞིམ་པོ་རྣམ་པ་ལྔས་སའི་ཕྱོགས་ཅིག་བྱུགས་ལ། བརྟུལ་ཞུགས་དང་ལྡན་པས་དགའ་བའི་སེམས་ཀྱིས་མཉམ་པར་བཞག་པས་འཇམ་པའི་གདན་ལ་ཉེ་བར་གནས་ལ། དེ་ནས་ཕྱིས་ནི་རང་གི་སྙིང་གར་རཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་འོད་འབར་བའི་
ཕྲེང་བའི་རྣམ་པ་འཁྲུགས་པའོ། །དེའི་ལྟེ་བར་ཧྲཱིཿདྨར་པོ་རྣམ་པར་བསམ་མོ། །དེ་ནས་ཧྲཱིཿལས་ངེས་པར་འབྱུང་བའི་འོད་ཟེར་གྱི་དྲ་བས་ཕྱོགས་བཅུ་ན་ཉེ་བར་གནས་པའི་སེམས་ཅན་གྱི་ཁམས་གསལ་བར་བྱ་སྟེ། དཔལ་རིགས་བྱེད་མའི་གཟུགས་སུ་ཉེ་བར་གནས་པར་བྱས་ལ། ཡང་འོད་ཟེར་དེ་ཉིད་ཕྱིར་འོངས་ཏེ། དེ་ཉིད་ལ་ཞུགས་པས་འོད་ཟེར་གྱི་དྲ་བ་རྣམ་པར་བསྒོམ་པར་བྱའོ། །དེ་ནས་ཕྱིས་ནི་མདུན་གྱི་ནམ་མཁའ་ལ་བརྒྱད་གཉིས་ལོན་པའི་རྣམ་པ་མགོ་སྐྱེས་ཁམ་པ་གྱེན་དུ་འགྲེང་བ། ཐོད་པ་རྣམ་པ་ལྔ་དབུ་ལ་འཆང་བ། རོ་ལ་ཞོན་པ་མགོའི་ཕྲེང་བས་དོ་ཤལ་བྱས་ཤིང་སྐྱིལ་ཀྲུང་ཕྱེད་པའི་གར་གྱིས་གནས་པ་ཅུང་ཞིག་མཆེ་བ་གཙིགས་པའི་ཞལ། ལྗགས་འདྲིལ་བ། འཁོར་ལོ་དང༌། རྣ་ཆ་དང༌། མགུལ་རྒྱན་དང༌། དཔུང་རྒྱན་དང༌། སྐ་རགས་དང༌། རྐང་རྒྱན་གྱིས་བརྒྱན་པ། སྟག་གི་པགས་པའི་ཤམ་ཐབས་ཅན། གཡོན་དུ་བྱས་པའི་སྤྱན་གསུམ་ནི་ཟླུམ་ཞིང་དམར་ལ་གཡོ་བའོ། །འོད་དཔག་མེད་པའི་དབུ་རྒྱན་ཅན། ཕྱག་བཞི་པ། རྣ་བའི་བར་དུ་བཀང་པ། ཨུཏྤ་ལ་དམར་པོ། མདེའུ་ཅན་གྱི་མདའ་དང༌། མེ་ཏོག་དམར་པོའི་གཞུ་བཀང་ཞིང་བསྣམས་པའོ། །ཕྱག་ལྷག་མ་གཉིས་ན་མེ་ཏོག་དམར་པོ་ལས་བྱས་པའི་ལྕགས་ཀྱུ་དང༌། ཨུཏྤ་ལ་དམར་པོ་བསྣམས་པའི་རྣམ་པ་བསམ་པར་བྱའོ། །འདི་ཉིད་མཆོད་པའི་དོན་དུ་རང་གི་སྙིང་གའི་ཉི་མའི་དཀྱིལ་འཁོར་ལ་གནས་པ་ཧྲཱིཿལས་བྱུང་བའི་མཆོད་པ་རྣམ་པ་ལྔ། མེ་ཏོག་དང༌། བདུག་པ་དང༌། མར་མེ་དང༌། དྲི་དང༌། ལྷ་བཤོས་ལ་སོགས་པ་རྣམས་ཀྱིས་མཆོད་པར་བྱའོ། །མཆོད་ནས་མཆོག་གི་སྙིང་རྗེ་ཆེན་པོའི་རྣལ་འབྱོར་པས་གུས་པས་བཏུད་ཅིང་ལུས་ལ་སོགས་པས་ཕྱག་བྱའོ། །དེ་ནས་གང་ཞིག་སྡིག་པ་བྱེད་དུ་བཅུག་པ་དང༌། བདག་གིས་བགྱིས་པ་དང༌། རྗེས་སུ་ཡི་རང་བ་འདི་དག་བཅོམ་ལྡན་འདས་མ་ལ་མངོན་སུམ་དུ་བཤགས་པར་བྱའོ། །དེའི་རྗེས་སུ་འཁོར་བའི་རྒྱ་མཚོར་ལྷུང་བའི་སེམས་ཅན་གྱི་ཁམས་བསྒྲལ་བའི་ངོ་བོ་ཉིད། བྱང་ཆུབ་ཀྱི་སེམས་རྣམ་པར་གཟུང་ངོ༌། །དེ་ནས་ཚངས་པའི་གནས་བཞི་བསྒོམ་པར་བྱའོ། །དེའི་རྗེས་སུ་སྟོང་པ་ཉིད་བསྒོམས་ཏེ། སྔགས་འདིས་སེམས་ཙམ་དུ་ལྷག་པར་གནས་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་
བས་སེམས་བྱིན་གྱིས་བརླབས་ལ། དེའི་རྗེས་སུ་ནམ་མཁའི་ཕྱོགས་སུ་རཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་འབར་བ་བརྟན་པའི་རྣམ་པར་བསྒོམ་པར་བྱའོ། །དེའི་སྟེང་དུ་ཧཱུཾ་ནག་པོ་ཡོངས་སུ་གྱུར་པ་ལས་སྣ་ཚོགས་རྡོ་རྗེའོ། །ར་བ་དང༌། གུར་བཅིང་བ་དང༌། རྡོ་རྗེའི་ས་གཞི་བསྒོམ་པར་བྱའོ་ཞེས་པ་ནི་སྲུང་བའི་འཁོར་ལོའོ། །དེ་ནས་དབུས་སུ་ཨེའི་རྣམ་པར་བྱེད་པའི་ལྷ་རྫས་ཀྱི་ཆོས་འབྱུང་གི་ཡེ་ཤེས་མདོག་དཀར་བའི་རྣམ་པར་བསྒོམ་པར་བྱའོ། །དེའི་དབུས་སུ་ཧྲཱིཿདྨར་པོ་ལས་བྱུང་བའི་པདྨ་དམར་པོ་འདབ་མ་བརྒྱད་པའོ། །དེའི་སྟེང་གི་ཟེའུ་འབྲུ་ལ་རཾ་ཡོངས་སུ་གྱུར་པ་ལས་ཉི་མའོ། །དེའི་སྟེང་དུ་རོའོ། །ཡང་དེའི་སྟེང་དུ་ཨ་ཡོངས་སུ་རྫོགས་པའི་ཟླ་བ་དཀར་པོ། མཚན་སུམ་ཅུ་རྩ་གཉིས་ཀྱི་བདག་ཉིད་དོ། །དེའི་སྟེང་དུ་ཡང་ཉི་མའི་དཀྱིལ་འཁོར་དཔེ་བྱད་བཟང་པོ་བརྒྱད་ཅུའི་ངོ་བོ་ཉིད་ཁ་དོག་དམར་པོའོ། །དེ་ཉིད་ཀྱི་དབུས་སུ་ཧྲཱིཿདྨར་པོ་ཡོངས་སུ་གྱུར་པ་ལས་ཨུཏྤ་ལ་དམར་པོའི་མདེའུ་ཅན་གྱི་མདའ་ལ་རང་སེམས་ཞུགས་པར་རྣམ་པར་བསྒོམ་པར་བྱའོ། །ཕྱིས་ནི་ཟླ་བ་དང་ཉི་མ་དང༌། མདའ་གཅིག་ཏུ་གྱུར་པ་ལས་དེ་ཉིད་དུ་སྔོན་བཞིན་གྱི་བདག་ཉིད་རིགས་བྱེད་མའི་གཟུགས་སུ་རྣམ་པར་བསྒོམ་པར་བྱའོ། །རྣམ་པར་བསྒོམས་ནས་རང་གི་སྙིང་གར་རཾ་ལས་ཉི་མའི་དཀྱིལ་འཁོར། དེའི་ལྟེ་བ་ལ་ཡང་ཧྲཱིཿཡིག་བསྒོམ་པར་བྱའོ། །དེ་ལས་བྱུང་བའི་འོད་ཟེར་གྱིས་མགོན་པོ་འོད་དཔག་མེད་པ་བཀུག་ཅིང་སྤྱན་དྲངས་ལ། གསང་བ་དང་ཅིག་ཤོས་ཀྱི་མཆོད་པས་ཡང་དག་པར་མཆོད་ལ། དབང་བསྐུར་བར་གསོལ་བ་གདབ་པར་བྱའོ། །དེ་ལ་འདི་ནི་གསོལ་བ་སྟེ། མགོན་པོ་འོད་དཔག་མེད་པ་ཁྱེད་ཀྱིས་བདག་ལ་དབང་སྐུར་དུ་གསོལ་ཞེས་པའོ། །དེ་ནས་མགོན་པོ་འོད་དཔག་མེད་པ་དེས་རང་གི་སྙིང་ག་ལས་བདུད་རྩི་རྣམ་པ་ལྔས་གང་བའི་བུམ་པ་ལྔ་སྤྲོས་པའི་རྣམ་པར་བསྒོམ་པར་བྱའོ། །དེ་ནས་བདུད་རྩི་རྣམ་པ་ལྔས་གང་བའི་བུམ་པ་དེས་མངོན་པར་ཁྲུས་བྱའོ། །ཁྲུས་བྱས་ནས་རང་གི་སྙིང་གར་བུམ་པ་གཞུག་གོ །དེ་ལ་ཞུགས་ནས་རྣལ་འབྱོར་པའི་མགོ་ལ་མགོན་པོ་འོད་དཔག་མེད་པ་བསྒོམ་པར་བྱའོ། །ཐུན་མཚམས་གསུམ་དུ་བསྒོམ་ཞིང་བཟླས་པ་བྱའོ། །དེ་ནས་སྔགས་ནི་ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ་ཙནྡན་ན་དམར་པོའི་ཆེད་དུ་བཟླས་པར་བྱའོ། །ཨོཾ་ཨཱཿཧཱུཾ་
ཞེས་བྱ་བས་ཁ་བྱིན་གྱིས་བརླབ་པ་ནི་དགོས་པའོ། །གཞན་ཡང་སྔགས་པས་སྐྱེས་པའམ་བུད་མེད་དབང་དུ་བྱ་བར་འདོད་པས། དཀར་པོའི་ཕྱོགས་ཀྱི་ཚེས་གཅིག་ནས་བརྩམས་ཏེ། ཐུན་མཚམས་གསུམ་དུ་ཁྲི་ཚོ་གཅིག་ཉི་མ་རེ་རེ་ཞིང་བཅོམ་ལྡན་འདས་མའི་གཟུགས་དམིགས་ལ་གོས་དམར་པོས་རོ་སྨད་དང༌། ལུས་ལ་དཀྲིས་ལ་དེའི་རྗེས་སུ་རང་གི་སྙིང་གར་ཉི་མ་ལ་གནས་པའི་ཧྲཱིཿདྨར་པོ་ཡོངས་སུ་གྱུར་པ་ལས་པདྨ་དམར་པོ་འདབ་མ་བརྒྱད་པ། སྐྱེ་གནས་ཀྱི་བར་དུ་སོན་པའི་སྡོང་བུའི་རྣམ་པ་བསྒོམ་པར་བྱའོ། །དེའི་འདབ་མ་རྣམས་སུ་བུང་བ་བརྒྱད་བརྒྱད་པའི་མཐའི་མཐའ་དབྱངས་ཡིག་དེ་ཡོངས་སུ་གྱུར་པ་ལས་བུང་བ་བརྒྱད་དོ། །ཤིན་ཏུ་དགའ་བ་དང་རྒྱས་པ་དང༌། ཁྲོས་ཤིང་ཆགས་པ་ནི་གོ་རིམས་བཞིན་དུ་ཡོངས་སུ་བརྗོད་དོ། །རང་གི་སྣའི་རླུང་གིས་བསྐུལ་ཏེ། འཕུར་ནས་གཡས་པ་ལས་གཞན་ཅིག་ཤོས་ཀྱིས་ནའི་ཁུང་བུ་ནས་བྱུང་སྟེ། བསྒྲུབ་བྱའི་གཡས་པའི་སྣ་བུག་ནས་ཞུགས་ནས། དགའ་བས་དུམ་བུར་གཏུབ་ཅིང་ཉམས་པར་བྱས་དབྱངས་ཡིག་དང་པོ་ལ་སོགས་པ་བརྒྱད་ཅུང་ཞིག་དམར་བ་དང་ལྡན་པའི་འདབ་མ་བཞི་བར་བྱའོ། །འདི་ལྟར་ལྟ་བར་བྱེད་པ་ནི་རྣལ་འབྱོར་པས། ཕྱི་ནས་རྣ་བའི་བར་དུ་བཀང་བའི་ཨུཏྤ་ལའི་མདེའུ་དང་ལྡན་པའི་མདའ་འཆང་བ་ལ་ལྟ་བ་དང་ལྡན་པའི་སྔགས་པས། ཟེའུ་འབྲུ་སོ་སོར་རྟོག་པར་བྱའོ། །དེ་ནས་བུང་བ་དེ་དབུགས་ཀྱིས་བསྐུལ་ཏེ། གཡོན་པའི་སྣའི་བུ་ག་ནས་བྱུང་ནས་དབྱངས་ཡིག་རེ་བླངས་ཤིང་ཁྱེར་ནས། རྣལ་འབྱོར་པའི་སྣ་བུག་གཡས་པ་ནས་ཞུགས་ཏེ། རང་གི་སྙིང་གར་རང་དང་གཞན་གྱི་ཡེ་ཤེས་གཅིག་པའི་ངོ་བོ་ཉིད་དུ་བྱའོ། །དེ་ནས་ཨུཏྤ་ལས་སྐེ་བ་ནས་བཅིངས་ཏེ། སྐེ་ནས་ལྕགས་ཀྱུས་ཕུག་ཅིང་མདའི་དྲ་བའི་རྣམ་པར་བསམས་ན་དབང་དུ་འགྱུར་རོ། །མགལ་མེའི་འཁོར་ལོ་ལ་གནས་པའི་བསྒྲུབ་བྱ་བསམ་པར་བྱའོ། །སྒྲུབ་པ་པོ་ནི་སྔགས་གཟུགས་ཀྱིས། །གདམས་ངག་དག་ནི་ངེས་བྱས་ལ། །རྟག་ཏུ་དགའ་བས་སྔགས་བཟླས་བྱ། །ཨོཾ་ཀུ་རུ་ཀུལླེ་ཧྲཱིཿཨ་མུ་ཀཱིཾ་མེ་བ་ཤ་མ་ནཱ་ཡ་སྭཱ་ཧཱ། མ་ལུས་པར་འདི་ཡང་ཉིན་དང་མཚན་དུ་བྱའོ། །དེ་ནས་མྱོས་པར་གྱུར་ནས་འོང་བར་འགྱུར་རོ། །སྔགས་ཀྱིས་བསྐུལ་ནས་སྐྲ་གྲོལ་བ་གོས་མེད་པ་འདོད་པ་སྤྱོད་འདོད་
པས་ནོན་པ། དེ་ཐོབ་ནས་རང་གི་ལྷག་པའི་ལྷའི་རྣལ་འབྱོར་གྱིས་དཀྱིལ་འཁོར་མཆོད་པར་བྱའོ། །དངོས་གྲུབ་རྒྱ་ཆེན་པོ་གང་གིས་གཞོམ་པར་མི་ནུས་པའི་ཨོ་ཌི་ཡཱ་ན་ནས་བྱུང་བའི་ལྷ་མོ་རིགས་བྱེད་མའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།།