གནོད་གནས་ཀྱི་སྒྲུབ་པའི་ཐབས།
རྒྱ་གར་སྐད་དུ། ཤྲཱི་ཛཾ་བྷ་ལ་སཱ་དྷ་ནཾ། བོད་སྐད་དུ། དཔལ་གནོད་གནས་ཀྱི་སྒྲུབ་པའི་ཐབས། ཕུན་སུམ་ཚོགས་པ་མ་ལུས་པ་སྟེར་བའི་དཔལ་གནོད་གནས་ལ་ཕྱག་འཚལ་ལོ། །དང་པོར་རེ་ཞིག་ཕྱི་རོལ་གྱི་དོན་ཐམས་ཅད་དང་རང་གི་ལུས་ཀྱང་སྟོང་པ་ཉིད་དུ་རྣམ་པར་བསམས་ལ། དེའི་རྗེས་སུ་ཅུང་ཞིག་དམར་བའི་ཟླ་བའི་དཀྱིལ་འཁོར་ཐབས་དང་ཤེས་རབ་ཀྱི་བདག་ཉིད་དོ། །དེ་ཉིད་གནོད་སྦྱིན་གྱི་ས་ཀ་ཊཾ་པདྨ་འདབ་མ་བརྒྱད་པའི་རྣམ་པའོ། །དེའི་དབུས་སུ་བཾ་གྱིས་ལྷ་མོ་ནོར་རྒྱུན་མ་མདོག་སེར་བ། འབྲས་ཀྱི་སྙེ་མ་དང༌། མཆོག་སྦྱིན་པ་ཕྱག་ན་རྒྱན་ཐམས་ཅད་ཀྱིས་བརྒྱན་པ། གནོད་སྦྱིན་མོ་བརྒྱད་ཀྱིས་བསྐོར་བ་ནི་འདི་ལྟ་སྟེ། བཟང་མོ་དང༌། རབ་ཏུ་བཟང་མོ་དང༌། སྦས་མ་དང༌། རབ་ཏུ་སྦས་མ་དང༌། ལྷ་མོ་དང༌། དབྱངས་ཅན་མ་དང༌། འཕགས་མ་དང༌། ཟླ་ཤེལ་ཅན་ནོ། །འདི་རྣམས་ཀྱིས་ཡོངས་སུ་བསྐོར་བའི་ལྷ་མོ་ཆེན་མོ་དེའི་བྷ་གའི་དབུས་སུ་ཛཾ་གིས་བདག་ཉིད་སངས་རྒྱས་རྣམ་པ་ལྔའི་དབུ་རྒྱན་ཅན་གཡས་པའི་ཕྱག་ན་ས་བོན་གྱིས་གང་བའི་ཤིང་ཐོག །གཡོན་པ་ན་སྲེ་མོང་བསྣམས་པ། དེ་བཞིན་གཤེགས་པ་ལྔས་ཀྱང་རིན་པོ་ཆེ་ལ་སོགས་པའི་ཆར་རབ་ཏུ་འབེབས་བཞིན་པ། ཞབས་གཉིས་ན་དུང་གི་མགོ་དང༌། པདྨའི་མགོའི་གཏེར་ཆེན་པོ་རིན་པོ་ཆེ་ལ་སོགས་པའི་ཆར་རབ་ཏུ་འབེབས་བཞིན་པ་རང་གི་ཁྱིམ་གྱི་ཕྱོགས་གཅིག་ཏུ་རྣམ་པར་བསམ་པར་བྱའོ། །མདོག་སེར་པོ་ཨུཏྤལ་སྔོན་པོའི་ཕྲེང་བ་འཆང་བ། དཔལ་གནོད་གནས་མགོན་པོ་ནོར་རྒྱུན་མ་ལ་འཁྱུད་པ། བྱང་ཆུབ་ཀྱི་སེམས་ཕྱིར་སྤྲོས་པ་ལས་སྐྱེས་པའི་རིན་པོ་ཆེའི་ཚོགས་ཀྱིས་ནམ་མཁའ་མ་ལུས་པར་ཁྱབ་པའི་རྣམ་པ་བསྒོམ་པར་བྱའོ། །དབབ་པའི་དུས་སུ་ཤར་ཕྱོགས་སུ་མདོག་སྔོན་པོའི་གང་བ་བཟང་པོའོ། །ལྷོའི་ཕྱོགས་སུ་མདོག་སེར་པོའི་རྣམ་ཐོས་སོ། །ནུབ་ཕྱོགས་སུ་མདོག་དམར་པོའི་གནོད་སྦྱིན་ནོ། །བྱང་གི་ཕྱོགས་སུ་མདོག་སེར་པོའི་ནོར་བུ་བཟང་པོའོ། །མེའི་ཕྱོགས་སུ་མདོག་དམར་པོའི་ཙི་པི་ཀུཎྜ་ལིའོ། །སྲིན་པོ་རུ་སྔོན་པོ་ཀེ་ལི་མཱ་ལི་ནཾ་ངོ༌། །རླུང་དུ་སེར་པོ་ཙ་རེནྡྲའོ། །དབང་ལྡན་དུ་སེར་པོ་མུ་ཁེནྡྲའོ། །དེ་ཐམས་ཅད་ཀྱང་གནོད་སྦྱིན་མོའི་བྷ་གའི་དབུས་སུ་གནས་པའི་རིན་པོ་ཆེའི་ཆར་འབེབས་བཞིན་པ་གནོད་གནས་དང་འདྲ་བ་བསྒོམ་པར་བྱའོ། །ཤར་གྱི་
སྒོ་རུ་ནོར་སྦྱིན་དང༌། ནོར་སྦྱིན་ཆེན་མོ་གཉིས་གཅེར་བུ་དབང་པོ་འཕྱང་བ་རིན་པོ་ཆེའི་ཆར་རབ་ཏུ་འབེབས་པའོ། །ལྷོའི་སྒོ་རུ་པདྨ་དང་པདྨ་ཆེན་པའོ། །ནུབ་ཀྱི་སྒོ་རུ་ཀི་ལི་དང་ཀི་ལི་ཆེན་པོའོ། །བྱང་གི་སྒོ་རུ་གང་བ་དང་གང་བ་བཟང་པོའོ། །འདི་རྣམས་ཀྱང་གཅེར་བུ་དབང་པོ་འཕྱང་བའོ། །མགོན་པོ་གནོད་གནས་ལ་གོ་རིམས་བཞིན་དུ་སྔགས་ཀྱི་ཡི་གེ་དགོད་པར་བྱའོ། །ཨོཾ་ནི་སྤྱི་བོར་རོ། །ཛཾ་ནི་ཁ་ལའོ། །བྷ་ལ་ནི་ལག་པ་གཉིས་ལའོ། །ཛ་ནི་སྙིང་གར་རོ། །ལེན་ནི་ལྟེ་བར་རོ། །དྲ་ཡེ་ནི་བརླ་གཉིས་ལའོ། །སྭཱ་ཧཱ་ནི་ངར་གདོང་གཉིས་ལའོ་ཞེས་བྱའོ། །སྤྱི་བོར་ནི་ནོར་བུ་བཟང་པོ་སྟེ། མིག་གཉིས་ལ་ནི་རྣམ་ཐོས་སོ། །དེ་བཞིན་དུ་མུ་ཁེན་དྲ་ནི་ཁ་ལ་གནས། །གང་བ་བཟང་པོ་ནུ་མའི་བར། ལྟེ་བར་གནོད་སྦྱིན་ནོར་སྦྱིན་ནོ། །བརླ་གཉིས་ཀི་ལི་མི་ལིའོ། །རྐང་གཉིས་ཙི་པི་ཀུཎྜ་ལི། །ཡན་ལག་ཐམས་ཅད་ཛ་ལེནྡྲ། །གནོད་གནས་མགོན་པོའི་བདག་ཉིད་དུ་དེ་ལྟར་བསམས་ལ། ད་ནི་ཡི་གེ་དགོད་པར་བྱའོ། །ཨོཾ་ནི་སྤྱི་བོར་རོ། །ཛླུཾ་ནི་དཔྲལ་བར་རོ། །བླུཾ་ནི་རྣ་བ་གཉིས་ལའོ། །སཿནི་མགོ་བོའི་རྒྱབ་ཏུ་དགོད་པར་བྱའོ། །ད་ནི་ལག་པ་ལ་དགོད་པ་བརྗོད་པར་བྱ་སྟེ། དངོས་སུ་ལྷ་ནི་ཡི་གེ་སྟེ། ཨོཾ་ནི་མཁྲིག་མགུལ་དུའོ། །ཛླུཾ་ནི་ལག་པའི་དབུས་སུའོ། །བླུཾ་ནི་སེན་མོ་ཐམས་ཅད་ཀྱི་རྩེ་མོ་ལའོ། །སཿནི་སོར་མོ་ཐམས་ཅད་ཀྱི་རྩ་བར་རོ། །ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། ཞེས་བྱ་བས་རབ་ཏུ་གནས་པར་བྱའོ། །སྡིགས་མཛུབ་ལ་ནི་ནོར་བུ་བཟང་པོ་སྟེ། གང་བ་བཟང་པོ་གུང་མོའོ། །སྲིན་ལག་ལ་ནི་ནོར་སྦྱིན་དགོད། །དེ་བཞིན་མཐེའུ་ཆུང་རྣམ་ཐོས་སོ། །མུ་ཁེནྡྲ་ནི་ལག་པའི་ལོགས། །མཁྲིག་མགུལ་ཀེ་ནི་མཱ་ལཱི་ནི། །མཐེབ་ཆེན་ཙི་པི་ཀུཎྜ་ལི། །སྡིགས་མཛུབ་མཐེ་བོ་གཉིས་ཀྱིས་ནི། །བར་དུ་ཛ་ལེནྡྲ་ཀའོ། །ལག་པའི་དབུས་སུ་ཛཾ་བྷ་ལ་ཛ་ལེནྡྲའོ། །རྡོ་རྗེ་ཆུ་ལ་སོགས་པ་བདུད་རྩི་ལྔ་སྦྱིན་ནོ། །དེ་མེད་ན་རྡོ་རྗེའི་ཆུ་ཙམ་ཡང་ཆུ་དང་བསྲེས་ནས། ཁྱོར་བས་འཐུངས་ཏེ། ཁྱོར་བ་བརྒྱ་རྩ་བརྒྱད་ཐུན་གསུམ་དུ་སྦྱིན་པར་བྱའོ། །རིང་པོར་མི་ཐོགས་པ་ཉིད་དུ་གནོད་གནས་དང་འདྲ་བར་འགྱུར་རོ། །གསེར་དང་ནོར་ལ་སོགས་པ་ཡང་དག་པར་འབེབས་བཞིན་པ་ས་གཞི་རྫས་ཀྱིས་གང་བར་བྱེད་དོ། །ཨོཾ་ཛླུཾ་བླུཾ་སྭཱ་ཧཱ། སཿཞེས་བྱ་བ་བརྗོད་ཅིང་ཁྱོར་བས་སྦྱིན་པར་བྱའོ། །
མ་གྲུབ་པར་གྱུར་ན་དཔལ་རྡོ་རྗེ་ཧཱུཾ་མཛད་དུ་བདག་ཉིད་བསྒོམས་ལ་གནོད་གནས་ཀྱི་སྐུ་གཟུགས་ལ་དུག་དང་སྐེ་ཚེ་དང༌། ནིམ་པའི་ལོ་མ་དང༌། དྷ་དུ་ར་དང༌། དུར་ཁྲོད་ཀྱི་སོལ་བས་རབ་ཏུ་བྱུགས་ལ། བསྲོ་ཤིང་སྐེམ་པར་བྱའོ། །ཕྱིས་ནི་དུར་ཁྲོད་ཀྱི་མེ་ལ་ཁྲོས་པས་གདུང་བར་བྱས་ན་ངེས་པར་འགྲུབ་པར་འགྱུར་རོ། །དཔལ་གནོད་གནས་ཀྱི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།།