འཕགས་པ་གཤིན་རྗེ་དམར་པོའི་སྒྲུབ་པའི་ཐབས།
རྒྱ་གར་སྐད་དུ། ཨཱཪྻ་རཀྟ་ཡ་མཱ་རི་སཱ་དྷ་ནཾ། བོད་སྐད་དུ། འཕགས་པ་གཤིན་རྗེ་དམར་པོའི་སྒྲུབ་པའི་ཐབས། འཕགས་པ་གཤིན་རྗེ་དམར་པོ་ལ་ཕྱག་འཚལ་ལོ། །དེ་ཁོ་ན་བཞིན་དུ་སྡིག་པ་བཤགས་པ་ལ་སོགས་པ་སྔོན་དུ་འགྲོ་བས། སྟོང་པ་ཉིད་དུ་རྣམ་པར་བསམས་ལ་ཨཾ་དམར་པོ་ལས་སྐྱེས་པའི་ཉི་མའི་དཀྱིལ་འཁོར་ལ་ཧཱུཾ་དམར་པོ་སྟེ་དེ་ཡོངས་སུ་གྱུར་པ་ལས་མགོ་བོ་རློན་པ་སེར་པོས་མཚན་པའི་དབྱུག་པ་དཀར་པོ་ལ་ཧཱུཾ་གིས་བྱིན་གྱིས་བརླབས་པ་བསྒོམ་པར་བྱའོ། །དེ་ཐམས་ཅད་ཡོངས་སུ་གྱུར་པ་ལས་བདག་ཉིད་གཤིན་རྗེ་མཐར་བྱེད་དམར་པོ་ཞལ་གཅིག་པ། ཕྱག་གཉིས་པ། གཡོན་བརྐྱང་བའི་ཞབས་ཅན་ཁྲག་གིས་ཡོངས་སུ་བཀང་བའི་ཐོད་པ་གཡོན་ནའོ། །མགོ་བོ་རློན་པ་སེར་པོས་མཚན་པའི་དབྱུག་པ་ནི་གཡས་ནའོ། ཀླུ་ཡིས་བརྒྱན་ཅིང་འཇིགས་པར་བྱེད་པ། སྐྲ་ཁམ་པ་གྱེན་དུ་བསྒྲེང་བ། སྟག་གི་ཤམ་ཐབས་ཅན་མི་བསྐྱོད་པས་དབུ་བརྒྱན་པ་རང་འོད་ཀྱི་ཤེས་རབ་མ་ལ་འཁྱུད་ཅིང་མ་ཧིཪྵ་འི་སྟེང་ན་སྣ་ཚོགས་ཀྱི་པདྨ་དང་ཉི་མ་ལ་གནས་པ་བསལ་པར་བྱའོ། །བཅོམ་ལྡན་འདས་མ་ཡང་ཞལ་གཅིག་མ། ཕྱག་གཉིས་མ་སྣ་ཚོགས་ཀྱི་རྒྱན་ཅན། གཡས་བརྐྱང་བའི་ཞབས་ཀྱིས་གནས་པ། མྱོས་བྱེད་ཀྱིས་མྱོས་ཤིང་འཛག་པ། སྟག་གི་ཤམ་ཐབས་ཅན། བཅོམ་ལྡན་འདས་མ་དང་ལྷན་ཅིག་ཏུ་ཁ་སྦྱོར་གྱི་སྦྱོར་བས་གཡོན་བརྐྱང་བའི་ཞབས་ཀྱིས་ཉེ་བར་གནས་
པའོ། །དེ་ལྟར་རྣམ་པར་བསམས་ནས་སྙིང་གའི་ཉི་མ་ལ་ཧཱུཾ་ཡོངས་སུ་གྱུར་པ་ལས་མགོ་བོས་མཚན་པའི་དབྱུག་པ་དཀར་པོའི་དབུས་སུ་ཉི་མ་ལ་གནས་པའི་ཧཱུཾ་རྣམ་པར་བསྒོམ་པར་བྱའོ། །དེ་ནས་བཅོམ་ལྡན་འདས་ཀྱི་ཧཱུཾ་ཡོངས་སུ་གྱུར་པ་ལས་རྡོ་རྗེའོ། །བཅོམ་ལྡན་འདས་མའི་ཨཿ་ཡོངས་སུ་གྱུར་པ་ལས་པདྨ་རྣམ་པར་བསྒོམས་ལ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བྱ་བས་ལྷག་པར་གནས་པར་བྱའོ། །དེའི་རྗེས་སུ་ལྟེ་བའི་འོག་ཏུ་པདྨ་དམར་པོ་འདབ་མ་བརྒྱད་པའི་སྟེང་དུ་ཧྲཱིཿཡིག་དམར་པོ་འབར་བར་བསམ་པར་བྱའོ། །དེ་ནས་ཨོཾ་ཨཱཾ་ཛྲཱྀ་ཁཾ་ཧཱུཾ་ཞེས་བྱ་བའི་སྔགས་ཀྱི་ཡི་གེས་དམ་ཚིག་གི་རྫས་བསྟེན་པ་སྔོན་དུ་འགྲོ་བས་ཐུན་གཉིས་དང་གསུམ་དུ་བསྒོམ་པར་བྱའོ། །སྔགས་ཀྱི་བཟླས་པ་ནི་འདི་ལྟ་སྟེ། ཨོཾ་ཧྲཱྀཿཥྚྲཱྀཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱཧཱ། ཨོཾ་ཡ་མཱནྟ་ཀ་ཧཱུཾ་ཞེས་བྱ་བའོ། །འཕགས་པ་གཤིན་རྗེ་གཤེད་དམར་པོའི་སྒྲུབ་པའི་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།།