ཕྱིར་བཟློག་མ་ཆེན་མོའི་སྒྲུབ་ཐབས།

---

^{[མ་དཔེ་གཟིགས་ན་འདིར་གནོན།]}

རྒྱ་གར་སྐད་དུ། མ་ཧཱ་པྲ་ཏྱཾ་གཱི་ར་སཱ་དྷ་ནཾ། བོད་སྐད་དུ། ཕྱིར་བཟློག་མ་ཆེན་མོའི་སྒྲུབ་ཐབས། འཕགས་མ་ཕྱིར་བཟློག་མ་ཆེན་མོ་ལ་ཕྱག་འཚལ་ལོ། །ཕྱིར་བཟློག་མ་ཆེན་མོ་ནག་མོ་ཞལ་གཅིག་ཕྱག་དྲུག་མར་འདོད་དོ། །རལ་གྲི་དང༌། ལྕགས་ཀྱུ་དང༌། མཆོག་སྦྱིན་པ་ནི་གཡས་ཀྱི་ཕྱག་གོ །པདྨ་དམར་པོ་དང༌། རྩེ་གསུམ་དང༌། སྙིང་གར་

---

^{[མ་དཔེ་གཟིགས་ན་འདིར་གནོན།]}

གནས་པའི་ཞགས་པ་དང་བཅས་པའི་སྡིགས་མཛུབ་དང་ལྡན་པ་ནི་གཡོན་པའི་ཕྱག་གོ །ས་བོན་ནི་ཧཱུཾ་ངོ༌། །མི་བསྐྱོད་པས་དབུ་བརྒྱན་པའོ། །ལྷ་རྫས་ཀྱི་ན་བཟའ་དང༌། རྒྱན་དང་ལྡན་པའི་རྣལ་འབྱོར་མ་ཞེས་བྱ་བ་ལ་སོགས་པའོ། །ཨོཾ་ཧཱུཾ་སྭཱ་ཧཱ། བཟླས་པའི་སྔགས་སོ། །ཕྱིར་བཟློག་པ་ཆེན་མོའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།།