དམ་ཚིག་གསུམ་གྱི་རྒྱལ་པོའི་སྒྲུབ་ཐབས།
རིན་ཆེན་འབྱུང་གནས་སྦས་པ།
རྒྱ་གར་སྐད་དུ། ཏཱྀ་ས་མ་ཡ་རཱ་ཛ་སཱ་དྷ་ནཾ། བོད་སྐད་དུ། དམ་ཚིག་གསུམ་གྱི་རྒྱལ་པོའི་སྒྲུབ་ཐབས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །མི་མཉམ་མི་གཡོ་ཤིན་ཏུ་ཡང་དག་ཆོས་ཀྱི་སྙིང༌། །སྙིང་རྗེའི་བདག་ཉིད་འགྲོ་བ་རྣམས་ཀྱི་སྡུག་བསྔལ་འཇོམས། །མཉམ་མེད་ཡོན་ཏན་ཀུན་དང་དངོས་གྲུབ་སྟེར་མཛད་པ། །དྲི་མེད་མི་གཡོ་མཚུངས་མེད་རབ་མཆོག་ཆོས་རྣམས་ནི། །ནམ་མཁའ་དང་མཚུངས་དེ་རྣམས་དཔེ་མེད་ཡོན་ཏན་གྱི། །ཆ་ཤས་རྡུལ་ཕྲན་ཟེགས་མས་ཀྱང་ནི་མཚམས་མེད་པ། །རྟག་ཏུ་སེམས་ཅན་ཁམས་བྱེད་དངོས་གྲུབ་སྦྱིན་པ་པོ། །དཔེ་དང་བྲལ་ཞིང་མ་ལུས་པ་ཡི་དངོས་གྲུབ་རྣམས། །རྟག་ཏུ་དྲི་མེད་སྙིང་རྗེའི་ཤུགས་ཀྱིས་ལངས་ནས་ནི། །སྨོན་ལམ་གྲུབ་ཅིང་འགོག་པ་མེད་པའི་ཆོས་ཉིད་དོ། །འགྲོ་བའི་དོན་དུ་སྒྲུབ་ཐབས་གཞན་ཡང་མཐའ་མེད་པ། །བརྩེ་བ་ཆེན་པོའི་བདག་ཉིད་རྟག་ཏུ་རྣམ་པར་མཛེས། །འགག་མེད་སྙིང་རྗེའི་སྤྱོད་པ་གཡོ་བ་མེད་པ་ཡིས། །འཇིག་རྟེན་
གསུམ་བགྲོད་མཆོག་གི་དངོས་གྲུབ་སྦྱིན་པ་པོ། །གཞལ་བྱ་གཞལ་བྱེད་དང་བྲལ་ལེགས་པར་ཡོངས་རྫོགས་ཤིང༌། །ཀྱེ་མ་ཆོས་ཉིད་དེར་འཇུག་ལེགས་པར་ཁོང་དུ་ཆུད། །དམ་ཚིག་གསུམ་མཆོག་དངོས་གྲུབ་མཆོག་སྦྱིན་སྟེར་མཛད་པ། །སྦྱིན་པའི་མཆོག་དེ་བདག་ལ་རྟག་ཏུ་ལེགས་པར་སྩོལ། །འཇིག་རྟེན་གསུམ་ཀུན་མཆོག་སྦྱིན་མཆོག་གི་སྒྲུབ་པ་པོ། །མགོན་པོ་དུས་གསུམ་གཤེགས་རྣམས་ཀུན་ནས་སྒྲིབ་མེད་པ། །དམ་ཚིག་གསུམ་རྒྱལ་རྟོག་པར་གསུངས། །རྡོར་འཛིན་གླུ་དང་བསྟོད་པ་བྱ། །དེ་འདིར་སངས་རྒྱས་ཐམས་ཅད་ཀྱི། །ཡོན་ཏན་རྒྱ་ཆེན་ཕུལ་དུ་བྱུང༌། །ལན་ཅིག་ཙམ་དུ་བརྗོད་པས་ཀྱང༌། །སྔགས་རྣམས་ཐམས་ཅད་ངེས་པར་འགྲུབ། །བསྟོད་པའི་རྒྱལ་པོ་འདི་ཡིས་ནི། །དེ་བཞིན་གཤེགས་རྣམས་ངེས་པར་མཉེས། །དངོས་གྲུབ་རྒྱ་ཆེན་སྟེར་བར་བྱེད། །རྟོག་པ་ལ་གནས་རྟོག་ལས་གསུངས། །མགོན་པོ་རྣམ་པར་སྣང་མཛད་ཆེ། །མི་བསྐྱོད་རིན་ཆེན་འབྱུང་ལྡན་དང༌། །རྒྱལ་བ་དག་པ་འོད་དཔག་མེད། །དོན་ཡོད་གྲུབ་པ་རྒྱལ་པོ་ཀུན། །རོ་དང་རོ་བཅུད་དེ་ཉིད་དང༌། །མཆོག་ཏུ་སྟེར་བར་མཛད་པ་སྟེ། །མ་ལུས་དངོས་གྲུབ་དག་དང་ནི། །དགའ་བ་རྒྱ་ཆེན་ཕུན་ཚོགས་གནས། །བསམ་པ་ཐམས་ཅད་ཡོངས་སུ་གང༌། །ཡིད་ཀྱི་འདོད་པ་ཡོངས་སུ་སྟེར། །ཡེ་ཤེས་ཚེ་དང་སྟོབས་ཀྱི་ཤུགས། །དགེ་བའི་མཆོག་རྣམས་སྟེར་བ་པོ། །ཞེས་སོ། །དེ་བཞིན་དུ་བསྟོད་པ་འདི་རྡོ་རྗེའི་གུར་གྱིས་བརྒྱན་པ། རྣལ་འབྱོར་རྒྱུད་ཆེན་པོའི་རྗེས་སུ་འབྲང་ནས་བརྗོད་པར་བྱའོ་ཞེས་སོ། །སངས་རྒྱས་ཀུན་ལ་ཕྱག་འཚལ་ལོ། །སངས་རྒྱས་སྲས་ཀྱི་རང་བཞིན་དང༌། །དུས་གསུམ་སངས་རྒྱས་ཕྱག་འཚལ་ནས། །འཆད་འགྱུར་དམ་ཚིག་ཅུང་ཟད་རྣམས། །དཔལ་ལྡན་དམ་ཚིག་གསུམ་ལས་གསུངས། །དམ་ཆོས་སྨད་པར་མི་བྱ་ཞིང༌། །གང་དུའང་སྤང་བར་མི་བྱའོ། །རྫོགས་སངས་རྒྱས་དང་བྱང་ཆུབ་སེམས། །དེ་རྣམས་མི་གུས་སྤང་བར་བྱ། །བླ་མའི་བཀའ་ལས་འདའ་མི་བྱ། །ལུས་ཅན་རྣམས་ནི་གསད་མི་བྱ། །རང་གི་སྔགས་དང་ཕྱག་རྒྱ་ཡང༌། །དོན་མེད་པ་དང་ཉམས་མི་བྱ། །སེར་སྣ་ཆང་གི་བཏུང་བ་ནི། །ཐམས་ཅད་དུ་ཡང་བྱ་བ་མིན། །རྡོ་རྗེའི་རྣམ་པ་མི་འགོང་ཞིང༌། །བཟའ་བར་བྱ་བའང་མ་ཡིན་ནོ། །ཁྲི་ཡི་སྟེང་དུ་མི་
ཉལ་ཞིང༌། །ཕྱག་རྒྱ་མི་གུས་སྤང་བར་བྱ། །བླ་མ་དང་ནི་ལྷ་རྣམས་དྲུང༌། །བྱིས་པའི་ཆོས་ཉིད་མི་བྱའོ། །མངོན་སྤྱོད་བྱ་བ་མ་ཡིན་ཞིང༌། །ཚུལ་ཁྲིམས་ལྡན་པ་སྨད་མི་བྱ། །བྱ་མིན་བྱ་བ་མི་བྱ་ཞིང༌། །སྡིག་ལ་རྗེས་སུ་ཡི་རང་མིན། །རང་གཞན་རྗེས་སུ་མི་མཐུན་པའི།། བྱ་བ་རྣམས་ནི་སྤང་བར་བྱ། །རྟོག་པ་ཆེན་པོའི་དམ་ཚིག་འདི། །དཔལ་ལྡན་དམ་ཚིག་གསུམ་ལས་ཤེས། །འཚོ་བ་འགྱོད་བཅས་མི་བྱ་ཞིང༌། །ཚོགས་སྨྲ་དགའ་བས་ཆོག་པར་བྱ། །ཐེ་ཚོམ་ཉིད་དུ་གྱུར་པ་དང༌། །ཡོ་བྱད་ཡོངས་སུ་འཛིན་པ་དང༌། །ལེ་ལོ་དང་ནི་ཞུམ་པའི་སེམས། །དེ་བཞིན་བདག་ལ་བསྟོད་ལ་སོགས། །བར་དུ་གཅོད་པའི་ཆོས་རྣམས་སུ། །རྟོག་པའི་རྒྱལ་པོ་ཉིད་ལས་གསུངས། །ཉེས་པ་འདི་རྣམས་ལས་ངེས་པར་གྲོལ་ཞིང་སྔོན་དུ་གསུངས་པའི་དམ་ཚིག་ལ་གནས་ནས་ཆགས་པ་ཐམས་ཅད་སྤངས་ཏེ། དད་པ་དང་བརྟན་པའི་ཡང་དག་པའི་བྱང་ཆུབ་ཀྱི་སེམས་ཀྱིས་འགྲོ་བ་གསུམ་པོ་ལ་ཕན་པ་དང་ལྡན་པའི་ལུས་དང༌། ངག་དང་ཡིད་རྣམས་ཀྱིས་བྱེད་པ་དང༌། དམ་ཚིག་གསུམ་ལས་གསུངས་པའི་སྒྲུབ་ཐབས་ཀྱི་ཆོ་གས་འདོད་པའི་དངོས་གྲུབ་ཏུ་འགྱུར་རོ། །རིན་ཆེན་འབྱུང་གནས་སྦས་བའི་ཞབས་ཀྱིས་མཛད་པ། དམ་ཚིག་གསུམ་གྱི་རྒྱལ་པོའི་སྒྲུབ་ཐབས་རྫོགས་སོ།།