རྡོ་རྗེ་གདན་གྱི་སྒྲུབ་ཐབས།
རྒྱ་གར་སྐད་དུ། བཛྲཱ་ས་ན་སཱ་དྷ་ནཾ། བོད་སྐད་དུ། རྡོ་རྗེ་གདན་གྱི་སྒྲུབ་ཐབས། བྱང་ཆུབ་ཆེན་པོ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་འདིར་སྟོང་པ་ཉིད་དུ་བསྒོམས་ནས་རྒྱུན་མ་ཆད་པར་ཟླ་བའི་དཀྱིལ་འཁོར་ལ་ཧཱུཾ་ཡིག་སྔོན་པོ་ལ། ཨ་ཡིག་ལ་སོགས་པའི་དབྱངས་དཀར་པོ་བཅུ་དྲུག་གིས་བསྐོར་བའོ། །དེ་ནས་ཀ་ཡིག་ལ་སོགས་པའི་གསལ་བྱེད་དཀར་པོ་སུམ་ཅུ་རྩ་བཞིས་ཡོངས་སུ་བསྐོར་བའོ། །དེ་རྣམས་ཐམས་ཅད་ཡོངས་སུ་གྱུར་པ་ལས། ཟླ་བའི་དཀྱིལ་འཁོར། དེའི་སྟེང་དུ་སླར་ཡང་ལྷའི་ས་བོན་དེ་ཡོངས་སུ་གྱུར་པ་ལས་རྡོ་རྗེ་སེར་པོ་དེའི་ལྟེ་བ་ལ་ཧཱུཾ་ཡིག་སེར་པོ། དེ་ཐམས་ཅད་ཡོངས་སུ་གྱུར་པ་ལས་རྗེ་བཙུན་སངས་རྒྱས་དཔལ་ལྡན་རྡོ་རྗེ་གདན་གྱི་བདག་ཉིད་མྱུར་དུ་བསྒོམ་པར་བྱ་སྟེ། ཕྱག་གཉིས་པ། ཞལ་གཅིག་པ་སེར་པོའོ། །བདུད་བཞི་ལས་བྱས་པའི་སེང་གེའི་ཁྲི་ཆེན་པོ་མཆོག་ལ། དེའི་སྟེང་དུ་སྣ་ཚོགས་པདྨ་དང་རྡོ་རྗེ་ལ་སྐྱིལ་མོ་ཀྲུང་གིས་བཞུགས་པ། ཕྱག་གཡོན་པ་པང་དུ་བཞག་པ། གཡས་པས་གནོན་གྱི་ཕྱག་རྒྱ་མཛད་པ། སྐུ་ལན་བཟའ་དམར་པོ་བསྣམས་པ། ཡན་ལག་དང་ཉིང་ལག་ཐམས་ཅད་རྒྱས་པའི་སྐུ་རུ་བསྒོམ་པར་བྱའོ། །ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པའི་སྔགས་ཀྱིས་གཉིས་སུ་མེད་པའི་ང་རྒྱལ་བྱའོ། །དེ་ནས་བཅོམ་ལྡན་འདས་ཀྱི་གཡས་ན་བྱང་ཆུབ་སེམས་དཔའ་བྱམས་པ་གསེར་གྱི་མདོག་ལྟ་བུ་སེར་པོ་ཕྱག་གཉིས་པ་རལ་པའི་ཅོད་པན་བཅིངས་པ། ཕྱག་གཡས་ན་རྔ་ཡབ་བསྣམས་པ། ཕྱག་གཡོན་ན་ཀླུ་ཤིང་གི་ཡལ་ག་འབྲས་བུ་དང་བཅས་པ་བསྣམས་པའོ། །དེ་བཞིན་དུ་གཡོན་ན་བྱང་ཆུབ་སེམས་དཔའ་འཇིག་རྟེན་དབང་ཕྱུག་དཀར་པོ་རལ་པའི་ཅོད་པན་ཅན་ཕྱག་གཡས་པ་རྔ་ཡབ་འཛིན་པ། གཡོན་ན་ཆུ་སྐྱེས་འཛིན་པའོ། །དེ་དག་གཉིས་ཀྱང་བཅོམ་ལྡན་འདས་ལ་ཞལ་མངོན་པར་ཕྱོགས་ཤིང་བལྟ་བའོ། །དེ་ནས་ཡན་ལག་དྲུག་ཏུ་ཡི་གེ་ངག་དགོད་པར་བྱའོ། །བཅོམ་ལྡན་འདས་ཀྱི་སྤྱན་དག་ལ་ཟླ་བ་ལ་གནས་པའི་ཀྵིཾ་ཡིག་དཀར་པོའོ། །སྙན་དག་ལ་ཟླ་བ་ལ་གནས་པའི་ཛྲཱྀཾ་ཡིག་སྔོན་པོའོ། །ཤངས་ཀྱི་བུ་ག་དག་ལ་ཟླ་བ་ལ་གནས་པའི་ཁཾ་ཡིག་སེར་པོའོ། །ལྗགས་ལ་ཟླ་བ་གནས་པའི་གཾ་ཡིག་དམར་པོའོ། །
དཔྲལ་བ་ལ་ཟླ་བ་ལ་གནས་པའི་ཀཾ་ཡིག་སེར་པོའོ། །ནུ་མ་ལ་ཟླ་བ་ལ་གནས་པའི་སཾ་ཡིག་དཀར་པོའོ། །དེ་ནས་ཐུགས་ཀར་ཟླ་བ་ལ་གནས་པའི་ཧཱུཾ་ཡིག་སྔོན་པོ་ལས་སྐྱེས་པའི་རྡོ་རྗེ། དེའི་ལྟེ་བ་ལ་ཡང་ཟླ་བ་ལ་གནས་པའི་ཧཱུཾ་ཡིག་ཅེས་པ་ནི་ཐུགས་རྣམ་པར་དག་པ་བསྒོམ་པའོ། །མགྲིན་པར་ཟླ་བའི་དཀྱིལ་འཁོར་ལ་ཨཱཿཡིག་དམར་པོ་ལས་སྐྱེས་པའི་པདྨའི་ལྟེ་བ་ལ་གནས་པའི་ཨཱཿཡིག་ཅེས་པ་ནི་གསུང་རྣམ་པར་དག་པ་བསྒོམ་པའོ། །སྤྱི་བོར་ཟླ་བ་ལ་ཨོཾ་ཡིག་དཀར་པོ་ལས་སྐྱེས་པའི་འཁོར་ལོ་རྩིབས་བརྒྱད་པའི་ལྟེ་བ་ལ་གནས་པའི་ཨོཾ་ཡིག་ཅེས་པ་ནི་སྐུ་རྣམ་པར་དག་པ་བསྒོམ་པའོ། །ལྟེ་བའི་སྟེང་དུ་ཟླ་བ་ལ་གནས་པའི་རྡོ་རྗེ་དང་བཅས་པའི་ཧཱུཾ་ཡིག་ཅེས་པ་ནི་ཐུགས་རྣམ་པར་དག་པ་བསྒོམ་པའོ། །དེ་ནས་སྙིང་གའི་ས་བོན་གྱིས་ཡེ་ཤེས་སེམས་དཔའ་བཀུག་ནས་མཆོད་ཡོན་དང༌། ཞབས་བསིལ་དང་རྣམ་པ་སྣ་ཚོགས་པའི་མཆོད་པས་མཉེས་པར་བྱས་ཏེ། བསྟོད་ཅིང་ཕྱག་འཚལ་བ་སྔོན་དུ་འགྲོ་བས་དམ་ཚིག་སེམས་དཔའ་དང་གཅིག་ཏུ་བྱས་ནས། ས་མ་ཡ་སྟྭཾ། ས་མ་ཡ་སྟྭཾ། ས་མ་ཡ་སྟྭཾ། ཨ་ཧཾ་ཨོཾ་ཨཱཿཧཱུཾ་ཞེས་པའི་སྔགས་འདིས་གཉིས་སུ་མེད་པའི་ང་རྒྱལ་བསྐྱེད་པར་བྱའོ། །དེ་ནས་བསྒོམས་པས་ངལ་ན་སྔགས་བཟླས་པར་བྱའོ། །ཨོཾ་ཨཱཿབཛྲ་ཧཱུཾ་སྭཱ་ཧཱ། རྡོ་རྗེ་གདན་གྱི་སྒྲུབ་ཐབས་རྫོགས་སོ།།