ངག་གི་རྒྱལ་པོ་སྒྲུབ་པའི་ཐབས།
རྒྱ་གར་སྐད་དུ། བཱ་གཱི་རཱ་ཛ་སཱ་དྷ་ནཾ། བོད་སྐད་དུ། ངག་གི་རྒྱལ་པོ་སྒྲུབ་པའི་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །ཡེ་ཤེས་མགོན་བདག་ཕྱག་འཚལ་ནས། །བྱ་བའི་རྒྱུད་ཀྱི་རྗེས་འབྲངས་ཏེ། །དངོས་གྲུབ་ཐམས་ཅད་སྟེར་བ་ཡི། །དེ་ཡི་སྒྲུབ་ཐབས་བདག་གིས་བརྗོད། །སྔགས་པས་དང་པོར་རེ་ཞིག་ཡིད་དང་མཐུན་པའི་གནས་སུ་ཇི་ལྟར་བདེ་བར་འདུག་ནས། སྡུག་བསྔལ་གྱི་རྒྱ་མཚོར་ལྷུང་བའི་སེམས་ཅན་རྣམས་བལྟས་ནས་སྨོན་ལམ་གདབ་པར་བྱ་སྟེ། སྡུག་བསྔལ་བའི་སེམས་ཅན་འདི་རྣམས་འཁོར་བར་འཁོར་ཞིང་འདུག་སྟེ། དེ་རྣམས་བདག་འཇམ་པའི་དབྱངས་སུ་གྱུར་ནས། སེམས་ཅན་ཐམས་ཅད་བླ་ན་མེད་པའི་གོ་འཕང་ལ་རབ་ཏུ་གནས་པར་བྱའོ་ཞེས་བྱའོ། །དེ་ནས་ཐང་སྐུ་ལ་སོགས་པ་དགྲམ་པའི་བཅོམ་ལྡན་འདས་འཇམ་པའི་དབྱངས་དང༌། བླ་མ་དང༌། སངས་རྒྱས་དང་
བྱང་ཆུབ་སེམས་དཔའ་རྣམས་ཀྱང་མདུན་དུ་དམིགས་ནས་མེ་ཏོག་ལ་སོགས་པས་ཡང་དག་པར་མཆོད་ལ་ཕྱག་བྱས་ནས་སྡིག་པ་བཤགས་པ་དང༌། སླན་ཆད་གཅོད་ཅིང་སྡོམ་པ་དང༌། བསོད་ནམས་ལ་རྗེས་སུ་ཡི་རང་བ་དང༌། ཡོངས་སུ་བསྔོ་བ་དང༌། བདག་ཉིད་དབུལ་བ་དང༌། གསུམ་ལ་སྐྱབས་སུ་འགྲོ་བ་དང༌། བྱང་ཆུབ་མཆོག་ཏུ་སེམས་བསྐྱེད་པ་ཡང་བྱའོ། །ཚིགས་བཅད་འདི་ཉིད་ཀྱིས་བྱ་སྟེ། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་གཟུང༌། །བྱང་ཆུབ་མཆོག་གི་སེམས་ནི་བསྐྱེད་པར་བགྱི། །སེམས་ཅན་ཐམས་ཅད་བདག་གིས་དེ་ལ་གཟུང༌། །བྱང་ཆུབ་སྤྱོད་མཆོག་ཡིད་འོང་སྤྱད་ནས་སུ། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །དེ་ནས་ལམ་བསྟན་པར་བྱའོ། །དེའི་རྗེས་སུ་ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་པའི་དོན་རྗེས་སུ་རྟོགས་པས་ལན་གསུམ་དུ་བརྗོད་ནས་རང་བཞིན་གྱིས་དག་པར་མོས་པར་བྱ་སྟེ། ཆོས་ཐམས་ཅད་བདག་མེད་པར་བསྒོམ་པར་བྱའོ། །ཁམས་གསུམ་སྟོང་པ་ཉིད་དང༌། མཚན་ཉིད་མེད་པར་བལྟས་ནས་རང་གི་སྙིང་གར་ཡི་གེ་ཨ་ལས་ཟླ་བའི་དཀྱིལ་འཁོར་དེའི་སྟེང་དུ་ཡི་གེ་མུཿགྶེར་བསྲེགས་པ་ལྟ་བུ་དེ་ལས་བྱུང་བའི་འོད་ཟེར་གྱི་ཚོགས་ཀྱིས་འཇིག་རྟེན་གྱི་ཁམས་ཐམས་ཅད་དུ་བཀྱེ་ཞིང་སྣང་བར་བྱས་ནས་ཇི་ལྟར་སྣོད་དང་ལྡན་པའི་སེམས་ཅན་གྱི་དོན་བྱ་སྟེ། དེ་བཞིན་གཤེགས་པ་ཐམས་ཅད་བསྐུལ་ནས་དེའི་ཚེ་འོད་དེ་ས་བོན་ལ་ཞུགས་པ་དང༌། དེ་ཐམས་ཅད་ཡོངས་སུ་རྫོགས་པ་ལས་བདག་ཉིད་འཇམ་པའི་དབྱངས་སུ་བསྒོམ་པར་བྱའོ། །ཞལ་གཅིག་ཕྱག་གཉིས་པ་གསེར་བཞུ་བ་ལྟ་བུའི་སེང་གེའི་སྟེང་ན་པདྨ་དང༌། ཟླ་བའི་གདན་ལ་སྐྱིལ་ཀྲུང་ཕྱེད་པས་བཞུགས་པའོ། །ཟུར་ཕུད་གསུམ་དང་ལྡན་པ་རིན་པོ་ཆེའི་དབུ་རྒྱན་ཅན་ཟླ་བའི་དཀྱིལ་འཁོར་གྱི་འོད་ཅན་གཞོན་ནུའི་རྣམ་པའི་གཟུགས་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། སྒེག་པའི་ཉམས་དང་ལྡན་པ། ཅུང་ཞིག་འཛུམ་པ། ཕྱག་གཉིས་ན་ཆོས་ཀྱི་འཁོར་ལོའི་ཕྱག་རྒྱ་བསྣམས་པ། ཤེས་རབ་ཀྱི་ཕ་རོལ་ཏུ་ཕྱིན་པ་དང་བཅས་པའི་ཨུཏྤ་ལ་སྔོན་པོ་
གཡོན་པའི་ཕྱག་ན་བསྣམས་པ་གཡོན་པའི་ངར་གདོང་ལ་བརྟེན་པའི་ཁྲོ་བོ་ཆེན་པོ་གཤིན་རྗེ་མཐར་བྱེད་མདོག་སྔོ་བ། ཞལ་འགྱུར་ཞིང་མཆེ་བ་གཙིགས་པ། སྐྲ་ཁམ་པ་འཁྱིལ་བ་སྤྱན་དམར་ཞིང་ཟླུམ་པ། འཇིགས་པར་བྱེད་པ། ཁྲོ་གཉེར་ཅན། མི་བཟད་པའི་ཞལ་ཅན། ཐོད་པའི་ཕྲེང་པས་དབུ་ལ་བརྒྱན་པ་ཕྱག་གཡས་ཀྱིས་བཅོམ་ལྡན་འདས་ཀྱི་ངར་གདོང་ལ་རེག་པ། གཡོན་ན་དབྱུག་པ་བསྣམས་པའོ། །དེ་ལྟར་རྣམ་པར་བསྒོམས་ནས་སྐུ་དང་གསུང་དང་ཐུགས་རྣམས་སུ་ཟླ་བའི་དཀྱིལ་འཁོར་ལ་ཨོཾ་ཨཱཿཧཱུཾ་ཞེས་བྱ་བའི་ཡི་གེ་གསུམ་དཀར་པོ་དང༌། དམར་པོ་དང༌། སྔོན་པོའི་མདོག་ཅན་རིམ་པ་ཇི་ལྟ་བས་བཀོད་ནས། དེ་ནས་ནུ་མའི་བར་དུ་ཟླ་བའི་དཀྱིལ་འཁོར་ལ་ཡི་གེ་མུཿརྣམ་པར་བསམས་ཏེ། དེ་ནས་མཆོད་པ་དང་མཆོད་པ་པོ་དབྱེར་མེད་པར་དམིགས་ནས། རྣམ་པ་སྣ་ཚོགས་པའི་ལྷ་མོ་རྣམས་ཀྱིས་མཆོད་པ་དང༌། ཡང་དག་པའི་བསྟོད་པ་བྱེད་པར་བདག་ཉིད་བལྟས་ནས་སྤྲོ་བ་དང་སྡུད་པས་ཇི་སྲིད་སྐྱོ་བར་མ་གྱུར་པ་དེ་སྲིད་དུ་བསྒོམ་པར་བྱའོ། །དེ་ལྟར་རྟག་ཏུ་སྒོམ་པར་བྱེད་པ་ནི་སངས་རྒྱས་ཀྱི་བྱང་ཆུབ་འགྲུབ་པར་འགྱུར་ཏེ། ཚེ་འདི་ཉིད་ལ་ཐུགས་རྗེ་ཆེན་པོ་འཇམ་པའི་དབྱངས་ཐོབ་པར་འགྱུར་རོ། །བསྒོམས་བས་སྐྱོ་བར་གྱུར་ན་བསྟོད་པ་དང༌། རང་གི་སྙིང་གར་ཟླ་བའི་དཀྱིལ་འཁོར་ལ་སྔགས་ཀྱི་རྣམ་པར་བཀོད་ལ་ཆགས་པ་མེད་པའི་ཡིད་ཀྱིས་བཟླས་པར་བྱའོ། །དེ་ལ་བཟླས་པའི་སྔགས་ནི་འདི་ཡིན་ཏེ། ཨོཾ་དྷརྨ་དྷཱ་ཏུ་བཱ་གཱི་ཤྭ་རི་མུཿདེ་ལྟར་བཟླས་པ་བྱས་ནས་མི་སྐྱོ་བར་གྱུར་ན་བསྒོམ་པར་བྱའོ། །གལ་ཏེ་ལང་པར་འདོད་ན་ཡང་དེ་བཞིན་དུ་མཆོད་པ་དང་བསྟོད་པ་དང༌། དགེ་བ་ཡོངས་སུ་བསྔོ་བ་བྱས་ནས་ཚིགས་བཅད་འདི་ཡིས་བཟོད་པར་གསོལ་བར་བྱ་སྟེ། བདག་ནི་རྨོངས་པའི་དབང་གིས་ཀྱང༌། །ཉེས་པ་ཇི་སྲིད་བགྱིས་པ་གང༌། །གང་ཕྱིར་ལུས་ཅན་མགོན་པོ་ཡིས། །དེ་མགོན་ཁྱེད་ཀྱིས་བཟོད་པར་བཞེས། །འགྲོ་ལ་ཕན་ཕྱིར་སྨོན་ལམ་གདབ་པར་བྱའོ། །བདག་གི་བསོད་ནམས་འདི་ཡིས་ནི། །སངས་རྒྱས་ཉིད་ནི་ཐོབ་ནས་ཀྱང༌། །སྲིད་པའི་རྒྱ་མཚོ་ཟབ་མོ་ལས། །འགྲོ་བ་མ་ལུས་སྒྲོལ་བར་ཤོག །དེ་ནས་ཆོས་ཐམས་ཅད་མཉམ་པ་ཉིད་དུ་ལྷག་པར་མོས་ནས་འགྲོ་བ་ཐམས་ཅད་
འཇམ་པའི་དབྱངས་སུ་བལྟས་ཏེ། རང་གི་ལྷའི་རྣལ་འབྱོར་གྱི་ང་རྒྱལ་དང་ལྡན་པས་ཇི་ལྟར་བདེ་བར་གནས་པར་བྱའོ། །དེ་ལྟར་ཐུན་མཚམས་བཞི་འམ་ཐུན་མཚམས་གསུམ་དུ་བྱའོ། །སྒྲུབ་ཐབས་འདི་ནི་བྱས་པ་ལས། །བདག་གིས་འབྲས་བུ་གང་ཐོབ་པ། །དེ་ཡིས་སྲིད་གསུམ་འཇིག་རྟེན་འདི། །མ་ལུས་འཇམ་པའི་དབྱངས་གྱུར་ཅིག །ངག་གི་རྒྱལ་པོའི་སྒྲུབ་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་དྷརྨ་ཀཱིརྟིས་བསྒྱུར་བའོ།།