དེ་ཉིད་མཐོང་བའི་ལམ་ཞེས་བྱ་བ།
ཡེ་ཤེས་རྡོ་རྗེ།
རྒྱ་གར་སྐད་དུ། ཏཏྟྭ་མཱརྒཱ་དཪྴ་ན་ནཱ་མ། བོད་སྐད་དུ། དེ་ཉིད་མཐོང་བའི་ལམ་ཞེས་བྱ་བ། སྤྱན་རས་གཟིགས་མགོན་དེ་ལ་ཕྱག་འཚལ་ལོ། །ཞི་ཞིང་འབྱོར་པ་འགྲོ་མགོན་ཐུགས་རྗེ་ཅན། །རི་ཁྲོད་ཞབས་ལ་གུས་པས་ཕྱག་འཚལ་ཏེ། །སྟོན་ལས་རྗེ་ཡིས་བྱིན་བརླབས་རྒྱུད་ཀྱི་དོན། །ཞབས་ཀྱི་རྡུལ་ལ་མ་རེག་ཆོས་འདི་ནི། །དད་བརྩོན་ལྡན་དང་བདག་ཉིད་བརྗེད་འཇིགས་པས། །དེ་ཉིད་མཐོང་བའི་ལམ་འདི་འདིར་བཤད་བྱ། །ཐམས་ཅད་མཁྱེན་པས་འདི་གསུངས་པ། །གདུལ་བྱའི་རིམ་པས་གཞག་པ་སྟེ། །དང་པོར་གསོ་སྦྱོང་སྦྱིན་པར་བྱ། །དེ་རྗེས་བསླབ་པའི་གནས་བཅུ་ཉིད། །དེ་ནས་བྱེ་བྲག་སྨྲ་ལ་བསླབ། །མདོ་སྡེ་པ་ཡང་དེ་ནས་བསྟན། །རྣལ་འབྱོར་སྤྱོད་པ་དེ་བཞིན་ཏེ། །དེ་ནས་དབུ་མ་པ་ཡང་བསྟན། །སྔགས་ཀྱི་རིམ་པ་ཀུན་ཤེས་ནས། །དགྱེས་པའི་རྡོ་རྗེའི་དབང་བསྐུར་སྦྱིན། །དགྱེས་རྡོར་རྒྱུད་ནས་དེ་བསྟན་པས། །གསོ་སྦྱོང་གནས་བཅུ་བྱེ་བྲག་དང༌། །ཆུང་བའི་མདོ་སྡེ་ཉན་ཐོས་ལམ། །ཐེག་པ་ཆེན་པོའི་མདོ་སྡེ་དང༌། །རྣལ་འབྱོར་སྤྱོད་དང་དབུ་མའི་ཆོས། །སྔགས་གཞན་དགྱེས་རྡོར་བརྗོད་པ་ཉིད། །བདེ་བའི་ལམ་དང་འབྲས་བུར་བསྔགས། །དེ་ལ་དང་པོ་ཉན་ཐོས་དང་རང་སངས་རྒྱས་པ་དབང་པོ་རྣོན་པོས། མདོ་དང་འདུལ་བ་ལྟར་ཡང་ཤེས་པར་བྱའོ། །འདིར་རྒྱུད་ལྟར་སྐལ་བ་དང་ལྡན་པས་བླ་མ་མཉེས་པས་བསྒྲུབ་སྟེ། དེ་ཡང་དང་པོ། ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་པས་ཐེག་པ་གསུམ་ལ་བསླབས་པར་བྱ་སྟེ། ཉན་ཐོས་དང༌། རང་སངས་རྒྱས་གཉིས་ལ་འཇུག་པར་འདོད་པས་དང་པོ་གསོ་སྦྱོང་བྱ་བ་དང༌།
གཉིས་པ་བསླབ་པ་བསྲུང་བ་དང༌། གསུམ་པ་ཆོས་ལ་བསླབ་པའོ། །དེ་ཡང་བྱམས་པས་ཞུས་པའི་མདོ་ལས། དང་པོ་སྐྱབས་དང་གསོ་སྦྱོང་བྱ། །གཉིས་པ་བསླབ་པའི་རིམ་པ་བཞིན། །གསུམ་པ་ཆོས་དག་དེ་ལ་བསྟན། །ཞེས་པས་སོ། །སྐྱབས་ལ་བདུན་ཏེ། དང་པོ་དང༌། ལུས་ངག་ཡིད་ཀྱི་སྦྱོར་བ་དང༌། རྟེན་དང༌། དེ་ལ་མཆོད་པ་དང༌། དུས་དང༌། ཡོན་ཏན་དང༌། མི་ཉམས་པར་བྱ་བའོ། །དང་པོ་ལ་གཉིས་ཏེ། ཤེས་པ་དག་པའི་མཁན་པོ་དང༌། སློབ་དཔོན་ནོ། །སྦྱོར་བ་ནི་ལུས་གུས་པ་དང༌། ངག་འཇམ་པས་བརྗོད་པ་དང་ཡིད་ཆོས་ལ་དག་པ་དང་གསུམ་མོ། །རྟེན་མཆོག་ཏུ་གྱུར་པ་ནི་དཀོན་མཆོག་གོ །རྟེན་ལ་མཆོད་པ་ནི་ཅི་འབྱོར་པའི་མཆོད་པས་ལུས་དུབས་བའོ། །དུས་ནི་འདི་ནས་ཞེས་པ་དང༌། ཇི་སྲིད་འཚོའི་བར་གཉིས་སོ། །ཡོན་ཏན་ནི་སྔོན་གྱི་སྡིག་པ་ཐམས་ཅད་འབྱང་ཞིང་ཕྱི་མའི་སྡུག་བསྔལ་ཐམས་ཅད་ཟད་པ་བདེ་བའོ། །མི་ཉམས་པར་བྱ་བ་ལ་གསུམ་སྟེ། སངས་རྒྱས་ལ་སྐྱབས་ནས་འཇིག་རྟེན་པའི་ལྷ་སྤངས་པ་དང༌། ཆོས་ལ་སྐྱབས་ནས་སྲོག་མི་གཅོད་པ་དང༌། དགེ་འདུན་ལ་སྐྱབས་ནས་མུ་སྟེགས་དང་མི་འགྲོགས་པའོ། །བསླབ་པ་བསྲུང་བ་ལ་གཉིས་ཏེ། རྟེན་དང་བསླབ་པ་དངོས་སོ། །རྟེན་ལ་གསུམ་སྟེ། གཞན་ལས་སྐྱེ་བ་དང༌། རང་ལས་སྐྱེ་བ་དང༌། གཉི་ག་ལས་སྐྱེ་བའོ། །གཞན་ལས་སྐྱེ་བ་ལ་གསུམ་སྟེ། མཁན་པོ་དང་སློབ་དཔོན་ཏེ། དང་པོ་བར་ཆད་མེད་པས་ཚུལ་ཁྲིམས་ཐོབ་པ་དང༌། ནུས་པ་དང་ལྡན་པས་སྡོམ་པ་ལ་གནས་པ་དང༌། བདག་དང་གཞན་གྱི་ཉེས་པ་འཆོས་དགོས་པས་མཁས་པ་སྟེ། དེ་གསུམ་དང་ལྡན་པ་ལས་བསླབ་པ་སྐྱེའོ། །རང་ལས་སྐྱེ་བ་ལ་གཉིས་ཏེ། སྤྱི་དང་བྱེ་བྲག་གོ །སྤྱི་ལ་དྲུག་སྟེ། འགྲོ་བ་ཁྱད་པར་འཕགས་པ་ནི་མི་ཙམ་མ་ཡིན་ཏེ། གླིང་ཁྱད་པར་དུ་འཕགས་པའི་གླིང་འདི་ཙམ་ཡིན་ཏེ། རིགས་ཁྱད་པར་དུ་འཕགས་པ་རྒྱལ་རིགས་དང༌། བྲམ་ཟེའི་རིགས་དང༌། རྗེའུའི་རིགས་སོ། །རིགས་ཙམ་མ་ཡིན་ཏེ། གཟུགས་ཁྱད་པར་དུ་འཕགས་པ་སྐྱེས་པ་དང་བུད་མེད་ཙམ་ཡིན་ཏེ། ལུས་ཁྱད་པར་འཕགས་པ་དབང་པོ་ཚང་བ་ཙམ་གྱིས་མི་ཆོག་སྟེ། ཤེས་པ་དང་སེམས་ཁྱད་པར་དུ་འཕགས་པ་རྒན་
གཞོན་སྤངས་ནས་ལུས་དར་བའོ། །བྱེ་བྲག་སྤྱི་དང་ལྡན་པ་དེས་ནམ་བླངས་པའི་དུས་དེར་སྐྱེའོ། །གཉི་ག་ལས་སྐྱེ་བ་ལ་གསུམ་སྟེ། མཁན་སློབ་ལ་ཐེ་ཚོམ་མེད་པ་དང༌། ཆོས་དང་ཆོས་ཀྱི་ཡོན་ཏན་ལ་ཐེ་ཚོམ་མེད་པ་དང༌། བསླབ་པ་བསྲུངས་པ་དང་ཐོབ་པར་ཐེ་ཚོམ་མེད་པས་སྐྱེའོ། །བསླབ་པ་དངོས་ལ་བརྒྱད་དེ། རྟེན་གྱི་ཁྱད་པར་གྱིས་བསླབ་པའི་རིམ་པ་དང༌། བསླབ་པར་བྱ་བའི་ངོ་བོ་དང༌། ཉེས་པའི་ཚད་དང༌། བཅོས་པའི་ཐབས་དང༌། ངེས་པ་སྐྱེས་པ་དང༌། དུས་མ་ངེས་པར་བསླབ་པ་དང༌། ཡོན་ཏན་དང༌། ཐོབ་པའི་དུས་བསྟན་པའོ། །བསླབ་པའི་རིམ་པ་ལ་སོ་སོ་ཐར་པ་རིགས་བདུན་གྱི་རིམ་པས་བསླབ་པ་སྟེ། སྡེ་པའི་འདོད་པ་མི་མཐུན་ཏེ། ཡང་འདིར་བསྙེན་གནས་དང༌། དགེ་བསྙེན་ལ་བཞི་སྟེ་ལྔ་དང༌། དགེ་ཚུལ་དང༌། དགེ་སློང་དང་བདུན་གྱིས་བསླབ་པའོ། །ངོ་བོ་ལ་གཉིས་ཏེ་སྤྱི་དང་བྱེ་བྲག་གོ །སྤྱི་ལ་ཡང་གཉིས་ཏེ་རྩ་བའམ་རང་བཞིན་གྱི་སྡིག་པ་སྡོམ་པ་དང༌། ཡན་ལག་གམ་བཅས་པའི་སྡོམ་པའོ། །བྱེ་བྲག་ནི་བསྙེན་གནས་ལ་རྩ་བ་བཞི་སྟེ་བརྒྱད་དོ། །སྣ་འགའ་བསྲུང་བའི་དགེ་བསྙེན་ལ་སྲོག་མི་གཅོད་པ་དང༌། རྩ་བ་གཞན་གང་རུང་ཅིག །ཕལ་ཆེར་བསྲུང་བ་ལ་རྩ་བ་གསུམ། ཡོངས་སུ་རྫོགས་པ་ལ་རྩ་བ་གསུམ་དང་འདོད་ལོག་བསྲུང༌། ཚངས་པར་སྤྱོད་པའི་དགེ་བསྙེན་ནི་རྩ་བ་བཞི་དང་ཆང་བསྲུང་བའོ། །དགེ་ཚུལ་གྱིས་རྩ་བ་བཞི་ཡན་ལག་བདུན། ཆང་དང་གླུ་གར་རྩེ་འཇོ་དང༌། །རྒྱན་དང་ཁ་དོག་འཆང་བ་དང༌། །མལ་སྟན་ཆེན་པོ་གསེར་དངུལ་གྱི་ཁྲི་དང༌། ཁྲི་སྟན་མཐོན་པོ་ཁྲུ་གང་པ་ཡན་ཆད་སྤང་བ་དང༌། ཕྱི་དྲོ་ཁ་ཟས་དང༌། གསེར་དངུལ་འཆང་བ་སྤང་བའོ། །མཁན་པོ་ལས་ཐོབ་པའི་རྟགས་གསུམ་སྟེ། ཁྱིམ་པའི་རྟགས་གཙུག་ཕུད་དང༌། གོས་དཀར་པོ་སྤངས་ཏེ། རབ་ཏུ་བྱུང་བའི་རྟགས་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གོན་པའོ། །ཕྱི་རོལ་མུ་སྟེགས་པའི་རྟགས་སྟོད་གོས་གཡས་ལ་འགེལ་བ་དང༌། སྨད་གོས་དཀྲིས་པ་སྤངས་ནས་ནང་བ་སངས་རྒྱས་པའི་རྟགས་སྟོད་གོས་གཡོན་དུ་འགེལ་བ་དང༌། སྨད་གོས་ཆེ་བས་ཟུར་དུ་སྤུང་བའོ། །མི་དགེ་བ་འཇིག་རྟེན་པའི་རྟགས་དེ་དག་སྤངས་ནས་དགེ་བ་དགེ་འདུན་གྱི་
རྟགས་གསེག་ཤང་དང་ལྷུང་བཟེད་གྲི་ཁབ་ལ་སོགས་པ་མཁོ་བའི་རྫས་བཟུང་བའོ། །དགེ་སློང་གིས་ཤེས་རབ་ཅན་དང༌། དངོས་ཀྱི་རྩ་བ་བཞི་དང༌། ཁུ་བ་ཕྱུང་བ་ལ་སོགས་པ་ལྷག་མ་བཅུ་གསུམ་དབེན་པ་དང༌། སྐྱབས་མ་ངེས་པ་གཉིས་དང་འཆང་བ་འབྲལ་བ་ལ་སོགས་སྤང་བའི་ལྟུང་བྱེད་སུམ་ཅུ་དང༌། ལྟུང་བྱེད་དགུ་བཅུ་དང༌། གྲོང་དུ་ཉལ་བ་ལ་སོགས་པ་སོ་སོར་བཤགས་པ་བཞི་དང༌། ཤམ་ཐབས་ལ་སོགས་པ་བསླབ་པར་བྱ་བ་བརྒྱད་ཅུ་རྩ་གཉིས་དང༌། མངོན་སུམ་དུ་ང་རྒྱལ་མི་བྱ་བ་ལ་སོགས་ཏེ་ཉིས་བརྒྱ་ལྔ་བཅུ་རྩ་གསུམ་བཀའ་ལུང་ནས་ཤེས་པར་བྱའོ། །འདིར་འོག་ནས་སྟོན་པའི་ལུས་ངག་ཡིད་ཀྱིས་མི་བྱ་བ་དང་བྱ་བ་རྣམས་སོ། །དེ་ནས་བསླབ་པའི་གནས་བཅུ་སྦྱིན། །ཞེས་པས་མི་དགེ་བ་བཅུ་སྤངས་ལ་དགེ་བ་བཅུ་བསྟེན་པའོ། །ཉེས་པའི་ཚད་ལ་གཉིས་ཏེ། རྩ་བ་དང་ཡན་ལག་གིའོ། །རྩ་བ་ལ་ལྔ། རྩ་བ་དང་འདྲ་བར་སྦྱོར་བ་དང༌། དངོས་དང་མཇུག་ཚང་ན་ལྟུང་བ་ཆེན་པོས་ཉམས། དངོས་མཇུག་གཉིས་བྱུང་ན་ལྟུང་བ་སྦོམ་པོ་སྟེ་ཉམས། སྦྱོར་བ་དང་དངོས་བྱུང་ན་ཆུང་དུན་ཏེ་ཉམས། སྦྱོར་བ་དང་མཇུག་བྱུང་ན་ལྟུང་བ་ཕྲ་མོ་སྟེ་ཉམས། རེ་རེ་བྱུང་ན་ལྟུང་བྱེད་དེ་ཉམས། ལྷག་མ་དང་མ་ངེས་པ་ལ་སོགས་པའི་ཡན་ལག་རྣམས་ལ་ཡང་ལྔ་སྟེ། སྦྱོར་བ་དང༌། དངོས་དང་མཇུག་རྫོགས་ན་ཉེས་པ་ཆེན་པོ་སྟེ་ཉམས། དངོས་མཇུག་གཉིས་བྱུང་ན་ཉེས་པ་སྤོམ་པོ་སྟེ་ཉམས། སྦྱོར་བ་དང་དངོས་བྱུང་ན་ཉེས་པ་ཆུང་དུ་ན་ཏེ་ཉམས། སྦྱོར་བ་དང་མཇུག་གཉིས་བྱུང་ན་ཉེས་པ་ཕྲ་མོ་སྟེ་ཉམས། རེ་རེ་བྱུང་ན་ཉེས་པ་མེད་དོ། །བཅོས་པའི་ཐབས་ལ་གཉིས་ཏེ། ཐབས་དངོས་དང་དུས་སོ། །ཐབས་ལ་བཅུ་གཅིག་སྟེ་རྩ་བ་དང་ཡན་ལག་གཉིས་ཡན་ཆད་དམ། བཞི་མན་ཆད་བྱུང་ན་འགྱོད་པས་ལན་གསུམ་དུ་བསྐྱར་ཞིང་བླང༌། རྩ་བའི་སྦོམ་པོ་བྱུང་ན་སྔོན་བཞིན་དུ་བླང༌། ཆུང་དུན་བྱུང་ན་སློབ་དཔོན་ལས་དེ་ཉིད་བླང༌། ཕྲ་མོ་བྱུང་ན་སློབ་དཔོན་ལ་བཤགས་པས་ཐུབ། ལྟུང་བྱེད་བྱུང་ན་འགྱོད་པ་དང་བསྡམས་སེམས་ཀྱིས་ཐུབ། ཉེས་པ་ཆེན་པོ་བྱུང་བ་སྤོན་བཞིན་བླང༌། ཉེས་པ་སྦོམ་པོ་སློབ་དཔོན་ལས་བླང༌། ཉེས་པ་ཆུང་དུན་སློབ་དཔོན་ལ་བཤགས། ཉེས་པ་ཕྲ་མོ་འགྱོད་པ་དང་བསྡམས་སེམས་ཀྱིས་ཐུབ་
ཉེས་མེད་ཕྱིས་མ་བྱས་པས་ཐུབ། ཆང་རྩ་བ་དང་འདྲའོ། །རྩ་བ་དང་ཡན་ལག་ལྟར་ཀུན་བཏང་སེམས་ཀྱིས་བཏང་ན་བླང་དུ་མེད། རྒས་པ་དང་ན་བ་དང་གཞན་གྱི་དབང་ལ་ཉེས་པ་མེད། དུས་ལ་བཞི་སྟེ། བསྙེན་གནས་ཀྱི་སྐབས་དང་ལྡན་ཏེ། ཉིན་སྐབས་མེད་ན་ཟླ་གཅིག་གམ་ཕྱེད་དམ་བརྒྱད་ཀྱི་དུས་དེའོ། །དགེ་བསྙེན་སྐབས་དང་ལྡན་ན་ཐུན་གཉིས་པ་ལ་བླང༌། སྐབས་མེད་ན་ཞག་ལྔ་ལ་བླང༌། དགེ་ཚུལ་སྐབས་དང་ལྡན་ན་ཞག་ལྔ་ཚུན་ཆད་ལ་བླང༌། མི་ལྡན་ན་ཟླ་བ་གཅིག་ཚུན་ཆད་ན་བླང༌། དགེ་སློང་སྐབས་དང་ལྡན་ན་དེ་ཉིད་ནས་ཞག་བཅུ་མི་ལྡན་ན་ཟླ་བ་བདུན་ཚུན་ཆད། ངེས་བསྐྱེད་པ་དུས་དེ་ལ་རྩ་བ་དང༌། ཡན་ལག་ཉམས་པ། ཐབས་དེས་བཅོས་པས་ཐར་པ་ཐོབ་སྟེ། སྒྲུང་གི་དཔེ་རེ་རེ་བསྟན་པའོ། །དེ་ཡང་སྲོག་གཅད་པ་ལས་ཐར་པ། དགེ་སློང་ཟླ་བའི་འོད་བྱ་བ་རིགས་བྲམ་ཟེ་ཡིན་པས། ལོ་ཉི་ཤུ་རྩ་གཅིག་ནས་བཞི་བཅུའི་བར་ཉི་ཤུར་སྡོམ་པ་བསྲུངས་ཏེ། བཞི་བཅུ་ལོན་ནས་ཕ་ཀུན་དུ་འཁོར་ཞེས་བྱ་བས་སྙན་ངག་ཡོད་པས་རྒྱལ་པོའི་ཕོ་བྲང་དུ་སྙན་ངག་བཏོན་པས། རྒྱལ་པོ་གཟུགས་ཅན་སྙིང་པོ་ཤིན་ཏུ་དགའ་ནས། གོ་ལ་བདུན་དང་བཅས་པ་བྱིན་ནས་བྲམ་ཟེ་གཞན་ཅིག་གིས་གཅིག་ལམ་དུ་ཁྱེར་བས་ཁྲོས་ནས་འཐབས་པས་ཀུན་དུ་འཁོར་བ་གསོད་དོ། །བུ་དགེ་སློང་སེམས་འཁྲུགས་ཏེ་སྦྱོར་བ་གསང་བས་ལས་ཀྱི་སྤུ་གྲི་ཁྱེར་ཏེ། བྲམ་ཟེ་ཁྲུས་བྱེད་སར་བསྒུགས་ཏེ་སྤུ་གྲི་མངད་ནས་བདར་བ་དང་བྲམ་བྲེ་ཁྲུས་ལས་བྱུང་བ་དང་སྤུ་གྲིས་སྐེ་བཅད་དེ་བསད་དོ། །མཇུག་འགྱོད་པ་མེད་པར་དགའ་བར་གྱུར་ཏེ། རོ་ཡང་གར་དགར་གཞག་གོ །དེར་ཀུན་གྱིས་རོ་མཐོང་ནས་འདི་སུས་བསད་སྙམ་ནས་ངས་ཕའི་མི་ཤར་བསད་ཅེས་བསྒྲགས་སོ། །དེར་ཀུན་གྱིས་ཀྱང་དཔྱས་པར་གྱུར། རྟགས་ཀྱང་གཞག་པ་ལས། ཡུལ་དེར་ནད་འགོ་བ་བྱུང་སྟེ། ཀུན་ཀ་ན་བ་དང༌། དཀའ་ཐུབ་མེད་པ་དེ་ཡང་ན་བ་དང་ནད་དྲག་པོས་གཟིར་བས་ཤིན་ཏུ་འགྱོད་པའི་སེམས་སྐྱེས་ཏེ། ལུང་ནས་སངས་རྒྱས་འོད་མའི་ཚལ་ན་བཞུགས་པ་ལ་གོང་གི་ཉེས་པ་རྣམས་ཞུས་པས་སངས་རྒྱས་ཀྱིས་གནད་ནས་བསླབ་པ་བསྐྱར་ཏེ། དགེ་སློང་དྲི་མ་དང་བྲལ་བར་གྱུར་ཏེ་མ་ལྟུང་ངོ༌། །ཡུལ་ཡངས་པ་ཅན་གྱི་གྲོང་ན་རྗེའུའི་
རིགས་དགེ་སློང་རིན་ཆེན་སྲུང་ཞེས་བྱ་བ་ཅིག་ཡོད་པ་ལ་བསོད་སྙོམས་ལ་ཕྱིན་ནས་ཁྱིམ་བདག་གི་མཛོད་མཐོང་སྟེ། ལྷ་ཁང་གི་ལོགས་སུ་སྦྱོར་བ་ལ་དོང་བརྐོས་ཏེ་གནས་དེ་ནས་མ་ག་དྷཱར་སངས་རྒྱས་ཀྱི་སྤྱན་སྔར་འགྲོ་ཞེས་དགེ་འདུན་ལ་བསྒྲགས་ནས་སོང་སྟེ། དེ་ནུབ་ནམ་ཕྱེད་ན་བང་མཛོད་ཕུག་སྟེ། བཻ་ཌཱུཪྻ་དང༌། པདྨ་རཱ་ག་དང༌། གསེར་དངུལ་རུས་ནས་ད་ཅིའི་དོང་དུས་སྦས་ཏེ། མཇུག་འགྱོད་པ་མེད་པར་དགའ་བར་གྱུར་ཏེ། །དེ་ལོངས་སྤྱོད་སྤྱོད་པ་ལས་ནུབ་མོ་རྐུན་པོ་རྐུན་འཕྱན་གཞན་དང་ཕྲད་ནས་ནོར་ཁྱེར་རོ། །ལུས་གཏག་པ་ལས་ཤིན་ཏུ་འགྱོད་ནས་སངས་རྒྱས་ཀྱི་སྤྱན་སྔར་ཕྱིན་ཏེ། གོང་གི་ཉེས་པ་བཤགས་ནས་སྡོམ་པ་བླངས་ཏེ་སངས་རྒྱས་ཀྱིས་གནང་ནས་དགེ་སློང་རིན་ཆེན་འབྱུང་གནས་སུ་གྱུར་ཏེ་ལྟུང་བ་མེད་དོ། །གྲོང་ཁྱེར་སེར་སྐྱར་དགེ་སློང་ཤེས་གྲགས་ཀྱིས་བསོད་སྙོམས་བྱེད་པ་ལས། རེ་ཞིག་ན་སྨད་འཚོང་བ་འབྱོར་པ་རྙེད་བྱ་བའི་སྒོར་ཕྱིན་ཏེ་བསླངས་ནས་ཡོན་བྱིན་པས། སྨད་འཚོང་མ་དེ་ཤིན་ཏུ་ལེགས་པར་མཐོང་སྟེ། ཆགས་པའི་སེམས་ཀྱིས་སྦྱོར་བ་སླར་ལོག་ནས་ཀ་བྱ་རིའི་རས་གཡར་ནས་གྱོན་ཏེ། འགྲོན་བུ་ཀ་ཧོ་ན་ཅིག་ཁྱེར་ནས་སྲོད་ལ་ཕྱིན་ཏེ་ང་ཉོན་བྱས་པ་ལས་ཡར་ཤོག་ཟེར་ཏེ་ཕྱིན་ནས་ཆགས་པ་སྐྱེ་བའི་ཐབས་སྣ་ཚོགས་བྱས་དངོས་སུ་ཉོན་མོངས་པ་ལ་ཞེན་ནས་བསྲུབས་ཏེ་ཁུ་བ་ཕྱུང་ངོ༌། །མཇུག་བདེ་བར་ཚོར་ནས་ཕྱིས་ཀྱང་ཕྲད་དོ། །རིང་ཞིག་ན་རོ་མཛེ་བྱུང་སྟེ་སྡུག་བསྔལ་བར་གྱུར་ནས་འགྱོད་དེ་སངས་རྒྱས་ཀྱི་སྤྱན་སྔར་ཕྱིན་ནས་ས་ལ་འགྱེལ་ཏེ་ཉེས་པ་རྣམས་བཤགས་ནས་བསླབ་པ་བསྐྱར་ཏེ། དགེ་སློང་ཞི་བའི་ཡེ་ཤེས་སུ་གྱུར་ཏེ་ལྟུང་བ་མེད་དོ། །རྒྱལ་བྱེད་ཀྱི་ཚོལ་དུ་དགེ་སློང་བྱང་ཆུབ་འབྱུང་གནས་སུ་གྲགས་པ་རྒྱལ་རིགས་སུ་གྱུར་པ་ཅིག་བྱུང་བས་དད་པ་ཤིན་ཏུ་ཆེ་ནས་ཁྲས་པ་ཎར་ཕྱིན་པས་སྤྱན་རས་གཟིགས་མཐོང་ནས་ཡུལ་དེ་ལ་ཁ་རས་པ་ཎ་ཞེས་བཏགས་སོ། །སླར་ལོག་ནས་མ་ག་དྷཱར་ཕྱིན་ཏེ། བསྟན་བཅོས་མང་པོ་བྱས་ནས་དེ་ནས་ང་ལ་སངས་རྒྱས་མང་པོས་བསྟན་ཞེས་བསྒྲགས་པས། སློབ་མ་མང་པོ་ཡོད་པ་ལས། སངས་རྒྱས་ཀྱིས་མཁྱེན་ནས་མ་བཏང་བ་ལས་ནོར་ས་འོག་ཏུ་སྦས་ནས་ཕྱིན་པ་དང༌། སྒྱུ་མ་བྱས་པའི་སྦྱོར་བ་མང་པོ་
བྱས་ནས་ཆོས་འཆད་པའི་སྦྱོར་བ་དང༌། དངོས་སུ་ཀུན་བསྲུབས་བ་མང་བ་དང༌། མཇུག་འགྱོད་པ་མེད་པར་དགའ་བས་ལོངས་སྤྱོད་སྤྱོད་པ་ལ་རྒྱལ་པོའི་ཆད་པ་བྱུང་ལ་ཁད་པ་དང་ཚོར་ནས་ཤིན་ཏུ་འགྱོད་པ་སྐྱེས་ཏེ། སངས་རྒྱས་ཀྱི་སྤྱན་སྔར་ཕྱིན་ཏེ་ཉེས་པ་ཀུན་བཤགས་ཏེ་སླར་བསླབ་པ་གསོས་ནས་དགེ་སློང་རྡོ་རྗེ་སྙིང་པོར་གྱུར་ཏེ་ལྟུང་བ་མེད་དོ། །གཞན་ཡང་འདུལ་བ་དང་མདོ་ནས་འགྱོད་དེ། སླར་གསོས་པས་ཐར་པ་མང་པོ་དང༌། གཏན་གྱི་ཐེ་ཚོམ་མེད་པར་ཕྱིར་བཅོས་སོ། །ཡན་ལག་གི་ཉེས་པ་ཚོ་ཡང་བཅོས་པས་ཡང་བར་ཤེས་པར་བྱའོ། །ཆང་རྩ་བ་ལྟར་ཤེས་པར་བྱའོ། །འདིར་ཐེག་པ་ཆེན་པོ་དང་ཡང་སྦྱར་བར་བྱའོ། །དུས་མ་ངེས་པ་ལ་ཉིན་གཅིག་གམ་ཞག་གཅིག་གམ་ཞག་བདུན་ནས་ཇི་སྲིད་འཚོའི་བར་དུ་བསྲུང་བར་བྱའོ། །ཡོན་ཏན་ལ་ཤེས་རབ་ཅན་གྱིས་རེ་རེའི་བྱེ་བྲག་མདོར་བལྟའོ། །འདིར་སྤྱི་ཙམ་བསྟན་པ་ནི་དགེ་བསྙེན་ལ་སོགས་ཀྱི་གཞི་མི་ལས་ཐོབ་པ་དང༌། ལམ་རྟེན་དང་ལྡན་ནས་བསྲུང་བ། འབྲས་བུ་དགྲ་བཅོམ་པ་ཐོབ་པའོ། །དགེ་སློང་གི་ལས་ལ་དགེ་སློང་གི་མདོ་དང་འདུལ་བར་བལྟའོ། །འདིར་གསུམ་སྟེ། ཡོན་ཏན་ཆེ་བ་དང༌། དུས་ངེས་པ་དང༌། ཡོན་ཏན་ངེས་པའོ། །ཡོན་ཏན་ཆེ་བ་ལ་གཉིས་ཏེ། བདུད་ཀྱིས་བར་མི་ཆོད་ཅིང་ལམ་ཉེ་བ་དང༌། འབྲས་བུ་ཉེ་བའོ། །ལ་མ་ཉེ་བ་ལ་ཡང་གསུམ་སྟེ། སངས་རྒྱས་ལ་སྐྱབས་པས་འཇིག་རྟེན་པའི་ལྷ་སྤངས་པས། ཕྱི་མར་དགའ་ལྡན་དུ་བྱམས་པ་དང་མཇལ་ལོ། །ཆོས་ལ་སྐྱབས་པས་སྲོག་གཅོད་པ་སྤངས་པས་བྱམས་པ་ལས་ཆོས་ཉན་པ་དང༌། དགེ་འདུན་ལ་སྐྱབས་ཏེ་མུ་སྟེགས་དང་མ་འགྲོགས་པས་བྱམས་པའི་འཁོར་གྱི་དགེ་འདུན་དང་འགྲོགས་པའོ། །འབྲས་བུ་ལ་གསུམ་སྟེ། སོ་སོར་ཐར་པའི་བསླབ་པ་རིགས་བདུན་རྫོགས་པས་བདག་ཉིད་སངས་རྒྱས་སུ་གྱུར་པ་དང༌། ལུས་ངག་ཡིད་ཀྱིས་སངས་རྒྱས་ཀྱི་ཆོས་སྤྱད་པས་བདག་ཉིད་སངས་རྒྱས་པས་ཆོས་སྟོན་པའོ། །དབེན་པར་གཅིག་པུ་བསྟེན་པས་བདག་སངས་རྒྱས་ནས་དགེ་འདུན་གྱི་འཁོར་ཕྱུག་པའོ། །དུས་སྐྱེ་བ་བདུན་ན་དགྲ་བཅོམ་པ་ཐོབ་ངེས་སོ། །ཡོན་ཏན་ངེས་པ་
ལ་གཉིས་ཏེ། རྒྱུ་དང་འབྲས་བུའོ། །རྒྱུ་སྐྱེ་བ་བདུན་དུ་རྟེན་ཁྱད་པར་དུ་འཕགས་པ་དྲུག་དང་ལྡན་ངེས་ལ་འབྲས་བུ་ལྷག་བཅས་དང་ལྷག་མེད་གཉིས་མཐོང་ངེས་པའོ། །ཐོབ་པའི་དུས་ལ་གསུམ་སྟེ། སྦྱོར་བ་དང༌། བླང་བ་དང༌། ཐོབ་པ་དངོས་སོ། །སྦྱོར་བ་ལ་གཉིས་ཏེ། གོང་གི་དབང་པོ་ལ་སོགས་པའི་སྐྱབས་སུ་འགྲོ་བའི་སྦྱོར་བ་བདུན་པ་དང༌། སྐྱབས་དངོས་སོ། །དངོས་ལ་སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག །ཕྱོགས་བཅུའི་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཕྱོགས་བཅུའི་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །ཕྱོགས་བཅུའི་དགེ་འདུན་ལ་སྐྱབས་སུ་མཆིའོ་ཞེས་ལན་གསུམ་བསྐྱར་རོ། །དེ་ལ་ཡང་དབང་པོ་དང༌། བསྐྱབ་པར་བྱ་བ་དང༌། དུས་དང༌། སྐྱོབ་མཁན་དང། གྲངས་དང༌། དགོས་པ་ཤུགས་ཀྱིས་བསྟན་པ་སྟེ་དྲུག་གོ །བླང་བ་དངོས་ལ་སྐྱབས་པའི་ཡོན་ཏན་ཤེས་པ་ས་བླང་བ་ལས་སོ་སོར་ཐར་པའི་བསླབ་པའི་རིགས་བདུན་ཏེ། བསྙེན་གནས་བླང་བ་ལ་རང་བཟོ་མིན་པ་དང༌། བླང་བ་གཉིས་རང་བཟོ་མིན་པ་ལ་ཡང་དབང་པོ་ལ་སོགས་པ་དྲུག་སྟེ། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་ནས། ཇི་སྲིད་འཚོའི་བར་དུ་སྔོན་གྱི་དགྲ་བཅོམ་པ་རྣམས་ཀྱི་བསླབ་པ་ལ་རྗེས་སུ་སློབ་པོ། །རྗེས་སུ་སྒྲུབ་པོ། །རྗེས་སུ་བགྱིད་དོ་ཞེས་ལན་གསུམ་བསྐྱར་རོ། །བླང་བ་ལ་ཡང་དབང་པོ་ལ་སོགས་པ་དྲུག་སྟེ། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་ནས་ཇི་སྲིད་དམ། ལོའམ་ཟླ་བ་སྔོན་དུ་བསྟན་པ་ལྟར་རོ། །ཟླ་བ་བྱུང་ངོ་ཅོག་གི་ངོ་ལ་སྟོང་ངམ། ཉའམ་བརྒྱད་ཀྱི་བསྙེན་གནས་སྲུང་བར་འཚལ་བས་དེའི་ཉིན་པར་དང་མཚན་མོ་རྩ་བའི་དང་པོ་སྲོག་གཅོད་པ་སྤངས་ནས་སླར་ལྡོག་པར་བགྱིད་དོ་ཞེས་ལན་གསུམ་བརྗོད་དོ། །དེ་བཞིན་དུ་གཅིག་གམ་གཉིས་སམ་གསུམ་བསྲུང་བ་ལ་རྩ་བ་ནས་རེ་རེར་གསུམ་མམ་ཡན་ལག་ཏུ་བཅས་པར། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་
བས་དུས་འདི་ནས་བཟུང་ནས་ཇི་སྲིད་འཚོའི་བར་དུ་ཟླ་བ་བྱུང་ངོ་ཅོག་གི་ངོ་ལ། ཉའི་བསྙེན་གནས་བསྲུང་བར་འཚལ་བས། དེའི་ཉིན་པར་དང་མཚན་མོ་རྩ་བའི་དང་པོ་སྲོག་གཅོད་པ་དང༌། རྩ་བ་གཉིས་པ་མ་བྱིན་པར་ལེན་པ་དང༌། རྩ་བ་གསུམ་པོ་མི་ཚངས་པར་སྤྱོད་པ་དང༌། རྩ་བ་བཞི་པ་བརྫུན་དུ་སྨྲ་བ་དང༌། ཡན་ལག་གི་དང་པོ་འབྲུའི་ཆང་དང༌། བཅོས་པའི་ཆང་དང༌། མྱོས་པར་འགྱུར་བའི་ཆང་དང༌། ཡན་ལག་གཉིས་པ་གླུ་གར་རྩེད་འཇོ་རྒྱན་ཁ་དོག་འཆང་བ་དང༌། ཡན་ལག་གསུམ་པ་མལ་སྟན་དང༌། ཁྲི་སྟན་དང༌། ཡན་ལག་བཞི་པ་ཕྱི་དྲོའི་ཁ་ཟས་སྤངས་ནས་སླར་ལྡོག་པར་བགྱིད་དོ། །སྔོན་གྱི་དགྲ་བཅོམ་པ་ཀུན་གྱི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཐབས་ཡིན་ནོ། །ལེགས་སོ་ཞེས་སོ། །བསྙེན་གནས་ཀྱི་བསླབ་པ་ལ་འཐོབ་པོ། །སློབ་དཔོན་གྱིས་བསྙེན་གནས་སུ་གཟུང་དུ་གསོལ་ལོ། །ཞེས་ལན་གསུམ་བརྗོད་ནས་ཕྱག་ལན་གསུམ་བྱའོ། །ཐོབ་པ་དངོས་ལ་དྲུག་སྟེ། སྐྱབས་འགྲོ་སྦྱོར་བ་སྔོན་དུ་སོང་བ་དང༌། བླང་བ་དང༌། སློབ་དཔོན་ལ་ཐེ་ཚོམ་མ་ཟོས་པ་དང༌། ཆོས་ལ་ཐེ་ཚོམ་མ་ཟོས་པ་དང༌། མ་ཐོབ་པར་ཐེ་ཚོམ་མ་ཟོས་པ་དང༌། དུས་དེ་ཉིད་དུ་ཐོབ་པའོ། །དགེ་བསྙེན་ལ་སོགས་པ་དྲུག་པོ་ཡང༌། དོན་དྲུག་པོ་དེ་དང་ལྡན་ནས་ཐོབ་སྟེ། འདྲ་བར་ཤེས་པར་གྱིས་ཤིག །དགེ་བསྙེན་གྱི་སྐྱབས་འགྲོ་ཡང་གོང་ལྟར་བླང་བ། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་སྔོན་གྱི་དགྲ་བཅོམ་པ་རྣམས་ཀྱི་བསླབ་པ་ལ་རྗེས་སུ་སློབ་པོ། །རྗེས་སུ་སྒྲུབ་པོ། །རྗེས་སུ་བགྱིད་དོ་ཞེས་ལན་གསུམ་བརྗོད་དེ། དང་པོ་ལ་སོགས་པ་དྲུག་གོང་བཞིན་ལྡན་ནོ། །སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་སྣ་འགའ་བསྲུང་བའི་དགེ་བསྙེན་བགྱིད་པས་རྩ་བའི་དང་པོ་སྲོག་གཅོད་པ་སྤངས་ནས་སྲོག་གཅོད་པ་ལས་སླར་ལྡོག་པར་བགྱིད་དོ་ཞེས་ལོ་ཟླ་བའི་གྲངས་ཀྱིས་གསུམ་དུ་བརྗོད་དོ། །སློབ་དཔོན་དགོངས་སུ་གསོལ། །བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་སྣ་འགའ་བསྲུང་བའི་དགེ་བསྙེན་བགྱིད་པས་རྩ་
བ་གཉིས་མ་བྱིན་པར་ལེན་པ་སྤངས་ནས་སླར་ལྡོག་པར་བགྱིད་དོ། །སྔོན་གྱི་དགྲ་བཅོམ་པ་རྣམས་ཀྱི་བསླབ་པ་ལ་རྗེས་སུ་སློབ་པོ། །རྗེས་སུ་སྒྲུབ་པོ། །རྗེས་སུ་བགྱིད་དོ། །ཐབས་ཡིན་ནོ། །ལེགས་སོ། །སྣ་འགའ་བསྲུང་བའི་དགེ་བསྙེན་དུ་གྱུར། སློབ་དཔོན་གྱིས་སྣ་འགའ་བསྲུང་བའི་དགེ་བསྙེན་དུ་གཟུང་དུ་གསོལ་ཞེས་ལན་གསུམ་བརྗོད་དོ། །ཕྱག་གསུམ་བྱའོ། །ཕལ་ཆེར་བསྲུང་བའི་དགེ་བསྙེན་དུ་གྱུར་པ་སྐྱབས་འགྲོ་གོང་བཞིན་སོང་བ་དང༌། རང་བཟོ་མེད་པའི་བསླང་བ་ཡང་འདྲ་བས་སོང་ནས་སློབ་དཔོན་དགོངས་སུ་གསོལ། །བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་ཕལ་ཆེར་བསྲུང་བའི་དགེ་བསྙེན་བགྱིད་པས་རྩ་བ་དང་པོ་སྲོག་གཅོད་པ་སྤངས་ནས་སླར་ལྡོག་པར་བགྱིད་དོ་ཞེས་ལན་གསུམ་བཟླའོ། །དེ་བཞིན་དུ་རྩ་བ་གཉིས་པ་མ་བྱིན་པར་ལེན་པ་དང༌། གསུམ་པ་འདོད་པས་ལོག་པར་གཡེམ་པ་སྤངས་ནས་སླར་ལྡོག་པར་བགྱིད་དོ་ཞེས་ལན་གསུམ་བརྗོད་ནས། སྔོན་གྱི་དགྲ་བཅོམ་པ་རྣམས་ཀྱི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཐབས་ཡིན་ནོ། །ལེགས་སོ། །ཕལ་ཆེར་བསྲུང་བའི་དགེ་བསྙེན་དུ་གྱུར་རོ། །སློབ་དཔོན་གྱིས་ཁལ་ཆེར་བསྲུང་བའི་དགེ་བསྙེན་དུ་གཟུང་དུ་གསོལ་ཞེས་བརྗོད་ལ་ཕྱག་ལན་གསུམ་བྱའོ། །ཡོངས་སུ་རྫོགས་པའི་དགེ་བསྙེན་ལ་གཞན་སྔོན་དུ་སོང་བས། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་ཡོངས་སུ་རྫོགས་པའི་དགེ་བསྙེན་ལ་གནས་པས་རྩ་བའི་དང་པོ་སྲོག་གཅོད་པ་དང༌། གཉིས་པ་མ་བྱིན་པར་ལེན་པ་དང༌། གསུམ་པ་འདོད་པས་ལོག་པར་གཡེམ་པ་དང༌། བཞི་པ་བརྫུན་དུ་སྨྲ་བ་སྤངས་ནས་སླར་ལྡོག་པར་བགྱིད་དོ་ཞེས་རེ་རེ་ལ་གསུམ་གསུམ་བརྗོད་ལ། སྔོན་གྱི་དགྲ་བཅོམ་པ་རྣམས་ཀྱི་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཐབས་ཡིན་ནོ། །ལེགས་སོ། །ཡོངས་སུ་རྫོགས་པའི་དགེ་བསྙེན་དུ་འགྱུར་རོ། །སློབ་དཔོན་གྱིས་ཡོངས་སུ་རྫོགས་པའི་དགེ་བསྙེན་དུ་གཟུང་དུ་གསོལ་ཞེས་བྱའོ། །ཚངས་པར་སྤྱོད་པའི་དགེ་བསྙེན་གྱིས་ཀྱང་གཞན་སྔོན་དུ་སོང་བས། སློབ་དཔོན་དགོངས་སུ་
གསོལ། །བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་ཚངས་པར་སྤྱོད་པའི་དགེ་བསྙེན་ལ་གནས་པས་རྩ་བའི་དང་པོ་སྲོག་གཅོད་པ་དང༌། རྩ་བ་གཉིས་པ་མ་བྱིན་པར་ལེན་པ་དང༌། གསུམ་པ་མི་ཚངས་པར་སྤྱོད་པ་དང༌། བཞིན་པ་བརྫུན་དུ་སྨྲ་བ་དང༌། ཡན་ལག་གི་དང་པོ་མྱོས་པའི་ཆང་དང༌། བཅོས་པའི་ཆང་དང༌། འབྲུའི་ཆང་དག་སྤངས་ནས་སླར་ལྡོག་པར་བགྱིད་པ་ལགས་སོ་ཞེས་རེ་རེ་ལ་གསུམ་གསུམ་བརྗོད་ན། སྔོན་གྱི་དགྲ་བཅོམ་པ་རྣམ་སྐྱི་བསླབ་པ་ལ་རྗེས་སུ་སློབ་པོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཐབས་ཡིན་ནོ། །ལེགས་སོ། །ཚངས་པར་སྤྱོད་པའི་དགེ་བསྙེན་དུ་འགྱུར་རོ། །སློབ་དཔོན་གྱིས་ཚངས་པར་སྤྱོད་པའི་དགེ་བསྙེན་དུ་གཟུང་དུ་གསོལ། །དགེ་ཚུལ་གྱིས་ཀྱང་གཞན་གོང་ལྟར་མཁན་པོ་སློབ་དཔོན་དད་པའི་དགེ་འདུན་གྱི་སྤྱན་སྔར་སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་དགེ་ཚུལ་ལ་གནས་པས་རྩ་བའི་དང་པོ་སྲོག་གཅོད་པ་དང༌། གཉིས་པ་མ་བྱིན་པར་ལེན་པ་དང༌། གསུམ་པ་མི་ཚངས་པར་སྤྱོད་པ་དང༌། བཞི་པ་བརྫུན་དུ་སྨྲ་བ་དང༌། ཡན་ལག་དང་པོ་འབྲུའི་ཆང་དང༌། བཅོས་པའི་ཆང་དང་མྱོས་པར་འགྱུར་བ་དང༌། ཡན་ལག་གཉིས་པ་གླུ་གར་རྩེ་འཇོ་དང༌། །ཡན་ལག་གསུམ་པ་རྒྱན་དང་ཁ་དོག་འཆང་བ་དང༌། བཞི་པ་མལ་སྟན་མཐོན་པོ་དང༌། ལྔ་པ་ཁྲི་སྟན་ཆེན་པོ་དང༌། དྲུག་པ་ཕྱི་དྲོའི་ཁ་ཟས་དང༌། བདུན་པ་གསེར་དངུལ་འཆང་བ་སྤངས་ནས་སླར་ལྡོག་པར་བགྱིད་ལགས་སོ་ཞེས་རེ་རེ་ལ་གསུམ་གསུམ་བརྗོད་དོ། །སྔོན་གྱི་ཞེས་པ་ལ་སོགས་པ་གོང་ལྟར་བརྗོད་དོ། །དགེ་སློང་དངོས་ཀྱི་ལས་ཀྱི་ཆོ་གས་བླང༌། འདིར་སྐྱབས་དང་ལེགས་པར་བརྗོད་པ་གོང་ལྟར་གསུམ་བརྗོད་པ་དང༌། གོང་གི་རྩ་བ་བཞི་དང༌། ལྷག་མ་དང་མ་ངེས་པ་གཉིས་དང། སྤང་བའི་ལྟུང་བྱེད་ལ་སོགས་པ་ལས་ལྡོག་པར་བརྗོད་དོ། །གསོ་སྦྱོང་ཞེས་བྱ་བ་ལོའམ། ཟླ་བའམ་ཉ་སྟོང་གསོ་ཞིང་སྦྱོང་བའོ། །ཉམས་པ་ཡང་བཅོས་སུ་ཡོད་པས་ཀྱང་གསོ་སྦྱོང་ངོ༌། །དུས་མ་ངེས་པ་ཟླ་བ་འམ་ལོ་ཙམ་སྲུང་བ་ལ་ཡང་གསོ་ཞིང་སྦྱོང་བ་ལེགས་སོ། །འདིར་
འོག་གི་ཐེག་པ་གསུམ་འདོད་པས་དུས་སྙིང་པོ་བྱང་ཆུབ་ལ་མཆིས་ཀྱི་བར་དུ་བརྗོད་ཅིང་ཁས་བླང་ངོ༌། །སེམས་བསྐྱེད་པའི་ཚེ་འོག་གི་གདམས་ངག་གིས་བྱང་ཆུབ་སྙིང་པོར་ཤེས་པར་བསྟན་པར་བྱའོ། །མདོ་ནས་ཀྱང་ཉེས་པ་སྐྱེས་བས་བལྟའོ། །གསུམ་པ་ཆོས་ལ་བསླབ་པ་ལ་བཞི་སྟེ། སྤྱོད་ལམ་དང༌། ལྟ་བ་དང༌། བསྒོམ་པ་དང༌། སྐྱོན་སྤང་བའོ། །སྤྱོད་ལམ་ལ་བཞི་སྟེ། བསྙེན་གནས་པས་སྤྱད་པ་དང༌། དགེ་བསྙེན་གྱིས་སྤྱད་པ་དང༌། དགེ་ཚུལ་བས་སྤྱད་པ་དང༌། དགེ་སློང་གིས་སྤྱད་པའོ། །དེ་ལ་བསྙེན་གནས་པས་སྤྱད་པ་ནི་ཀུན་དུ་བཟང་པོའི་མདོ་ལས་བསྙེན་གནས་པའི་གང་ཟག་གིས། དེ་དུས་ལུས་ངག་ཡིད་ཀྱིས་སྒྲིམ་ཞེས་པས་ལུས་ཀྱིས་ཁྲུས་དང་ཕྱག་བྱ་བ་དང༌། ངག་གིས་འདོན་པ་དང༌། སྙིང་པོ་བཟླས་པ་དང༌། ཡིད་ཀྱིས་ཉེས་པ་ཤེས་པས་བསླབ་པ་བསྲུང་བའི་སེམས་དང༌། ཡོན་ཏན་ཤེས་པས་ཡི་དམ་གྱི་ལྷ་དྲན་པ་དང༌། ལུས་ངག་གིས་དགེ་བ་བྱས་པ་དང༌། བསྲུང་བའི་ཉི་མ་ཡིད་ལ་བྱ་བའོ། །དགེ་བསྙེན་གྱིས་སྤྱད་པ་ལ་བྱམས་པས་ཞུས་པའི་མདོ་ནས། དགེ་བསྙེན་དད་དང་ལྡན་པ་ཡིས། །ལས་མིན་སྤང་ཞིང་དགེ་བཅུ་བསྙེན། །ཞེས་པས་བ་ལང་དང༌། བྱ་ཕྱག་གསོ་བ་ལ་སོགས་པ་བཅུ་མྱ་ངན་ལས་འདས་པའི་ནང་ནས་བསྟན་པ་ལྟར་སྤང་བའོ། །དགེ་བ་བཅུ་ནི་ཀུན་དགའ་བོས་ཞུས་པའི་མདོ་ནས་བསྟན་པ་ལྟར་སྤྱད་དེ། སྲོག་བསྐྱབ་པ་དང༌། འབྱོར་པ་སྦྱིན་པར་གཏང་བ་དག །དཀོན་མཆོག་མཆོད་པ་དང༌། མཆོད་རྟེན་དང༌། སྐུ་གཟུགས་དང་ལྷ་ཁང་ལ་སོགས་པ་ལ་ན་བཟང་དབུལ་བ་དང༌། བསྐོར་བ་དང༌། ཕྱག་དང༌། ཁ་ཏོན་ཀླག་པ་གདང༌། སྙིང་པོ་དང༌། བསྟོད་པ་བྱ་བ་དང༌། ཞིག་པ་གསོ་བ་དང༌། སྐུ་དཀར་བྱུག་པ་དང༌། ཉ་མོ་བཙུན་པའི་དགེ་བ་བྱ་བ་དང༌། འོས་པའི་ཁ་མ་དང་དྲིན་ཅན་ལ་རིམ་གྲོ་བྱ་བའོ། །དགེ་ཚུལ་གྱིས་སྤྱད་པ་ལ་དགེ་ཚུལ་དངོས་ཀྱི་འདུལ་བར་བལྟའོ། །འདིར་ཀཱ་རི་ཀཱ་ནས། ནམ་གྱི་ཆ་སྨད་མལ་ལངས་ནས། །ནམ་ལངས་བར་དུ་ཁ་ཏོན་བྱ། །གདོང་དང་སོ་ཡི་དྲི་བཀྲུས་ལ། །དེ་བཞིན་གཤེགས་ལ་གུས་ཕྱག་འཚལ། །ཞེས་པས་ལུས་ངང་ཡིད་ཀྱིས་བྱ་བ་སྟེ་ལུས་ཀྱི་ཉེས་པ་འཕེལ་བར་མི་བྱ་བ་ལ་
བཞི་སྟེ། ཉིན་པར་འཇིག་རྟེན་པ་མ་དད་པ་སྤང་བ་དང༌། མཚན་མོ་ཕྱི་སྒོ་ཕྱིན་ཆད་དུ་མི་ཉལ་བ་དང༌། འགྲོ་བའི་ཚེ་བསླབ་པ་དྲན་པས་བག་མ་ལྟར་འགྲོ་བ་དང༌། ཟ་བ་དང་འདུག་པ་དག་བག་མེད་པར་མི་བྱའོ། །དགེ་བ་འཕེལ་བས་ཐོ་རངས་སྲོད་ཙོག་ཙོག་པོ་དང༌། ཁྲུས་དང་རྟེན་ལ་ཕྱག་དུས་དང་སྐབས་སུ་བྱའོ། །ངག་གིས་མི་སྨྲ་བ་དྲུག་སྟེ། མི་ཤེས་པ་དང༌། མི་ཁྲོ་བ་དང༌། མཚང་མི་འདྲུ་བ་དང༌། ཕྱར་ཀ་མི་གཏང་བ་དང༌། རྟ་གད་མི་བྱ་བ་དང༌། གཙུག་ལག་ཁང་དང་དགེ་འདུན་མང་པོའི་གསེབ་ཏུ་གཅམ་བསྐྱུང་བའོ། །ངག་གིས་བརྗོད་པར་བྱ་བ་ཁ་དོན་དང༌། ཀླག་པ་དང༌། སྙིང་པོ་བརྗོད་པ་དང༌། བསྟོད་པས་བསྟོད་པ་དང༌། ཞི་བས་བླང་བ་དང༌། དང་བས་ཆོས་ཞུ་བ་དང་དྲུག་གོ །ཡིད་ལ་གཉིས་ཀྱི་ཉེས་པ་སྤང་བ་ལ་ཡང་གཉིས་ཏེ། མཆོད་རྟེན་དང༌། གཙུག་ལག་ཁང་དང༌། དགེ་འདུན་གྱི་དཀོར་ལ་གནོད་སེམས་དང༌། རྐུ་སེམས་སྤང་བ་དང༌། བསླབ་པ་ཉམས་པའི་ཉེས་པ་དྲན་པར་བྱས་ལ་བསླབ་པ་བསྲུང་བའོ། །ཡོན་ཏན་དྲན་པས་བསམ་པ་ལྔ་སྟེ། ལུས་ངག་གི་དགེ་བའི་ཡོན་ཏན་དྲན་པར་བྱ་བ་དང༌། འཁོར་བ་སྡུག་བསྔལ་བར་ཤེས་པར་བྱ་བ་དང༌། བྱས་པ་མི་རྟག་པ་དང༌། མྱ་ངན་ལས་འདས་པ་ཞི་བ་དང༌། སྟོང་པ་བདག་མེད་པར་ཤེས་པར་བྱ་བའོ། །དགེ་སློང་གི་སྤྱད་པ་ལ་དགེ་སློང་དངོས་དང༌། ཤེས་རབ་ཅན་གྱིས་འདྲུལ་བར་ཡང་བལྟའོ། །འདིར་ལྷའི་དབང་པོས་ཞུས་པའི་མདོ་ལས། དགེ་སློང་རྣམས་ཀྱིས་བྱ་བ་ནི། །མི་དགེ་བཅུ་སྤང་དགེ་བཅུ་བསྒྲུབ། །དེ་ཡང་ལུས་ངག་ཡིད་ཀྱིས་ཏེ། །མ་ཡེངས་སྤྱོང་ལམ་རྣམ་བཞིར་སྤྱོད། །ཅེས་པ་དང༌། དགྱེས་པའི་རྡོ་རྗེ་ནས། དེ་ནས་བསླབ་པའི་གནས་བཅུ་པོ་ཞེས་པས། དགེ་བ་བཅུ་བསྒྲུབ་སྟེ། དེ་ཡང་མི་དགེ་བ་བཅུ་མི་འཕེལ་བར་བྱ་བའི་ཕྱིར། དགའ་བོས་ཞུས་པ་དེ་ཉིད་ལས་མི་དགེ་བ་བཅུ་འཕེལ་བས་དགེ་སློང་རྣམས་ཉེས་བྱེད་བཅུ་སྤོངས་ཤིག །བཅུ་གང་ཞེ་ན། སྲོག་གཅོད་པའི་ཉེས་བྱེད་མ་བསམས་པར་དགེ་སློང་རྣམས་ལུས་ཀྱི་བྱ་བ་བྱེད་པ་དང༌། མ་བྱིན་པར་ལེན་པའི་ཉེས་བྱེད་གཞན་གྱི་གཟུགས་ཀྱི་ཡུལ་ལ་རེག་པ་དང༌། མི་ཆངས་པར་སྤྱོད་པའི་ཉེས་བྱེད་བུད་མེད་ཀྱི་ཡུལ་ལྔ་ལ་སྤྱོད་པ་དང༌། བརྫུན་གྱི་ཉེས་
བྱེད་མ་བསམས་པར་སྨྲ་བ་དང༌། ཕྲ་མའི་ཉེས་བྱེད་མང་བར་སྨྲ་བ་དང༌། ངག་འཁྱལ་པའི་ཉེས་བྱེད་བྲེ་མོར་སྨྲ་བ་དང༌། ཚིག་རྩུབ་མོའི་ཉེས་བྱེད་མི་དགའ་བར་སྨྲ་བ་དང༌། བརྣབ་སེམས་ཀྱི་ཉེས་བྱེད་བདག་ལ་དགོས་སེམས་འཆང་བ་དང༌། གནོད་སེམས་ཀྱི་ཉེས་བྱེད་གཞན་ལ་ལོག་པར་སྤྱོད་པའོ། །ལོག་པར་ལྟ་བའི་ཉེས་བྱེད་དངོས་པོ་ལ་ཆགས་པ་རྣམས་སྤོངས་ཤིག་ཅེས་བཀའ་སྩལ་པའོ། །མི་དགེ་བཅུ་འགགས་པས་མི་དགེ་བ་དང་བྲལ་ནས་དགེ་བཅུར་འགྱུར་བའོ། །དེ་ནི་བསླབ་པའི་གནས་བཅུ་ཞེས་པའོ། །དེ་ནས་བྱེ་བྲག་པ་ལ་བསླབ་ཅེས་པ་ལ་ཡང་དེ་ཉིད་ནས། དགེ་བཅུ་རྒྱས་ཕྱིར་ཆོས་གཉིས་དང༌། །སྤྱོད་ལམ་བཞི་རུ་དགེ་སློང་སྤྱོད། །ཅེས་པས། དེ་ཡང་ཆོས་གཉིས་པོ་ཉེས་པ་དང༌། མི་དགེ་བ་སྤྱོད་ལམ་རྣམ་བཞིས་མི་བྱེད་པ་དང༌། ཡོན་ཏན་དགེ་བ་འཕེལ་བ་སྤྱོད་ལམ་བཞིས་བྱ་བ་སྟེ། དེ་ཡང་དེ་ཉིད་ནས། དགེ་སློང་བྱང་ཆུབ་སེམས་ལྡན་པས། །རྟག་ཏུ་དབེན་པར་བསྡད་པར་བྱ། །སེམས་ཀྱིས་བདག་གཞན་དོན་བྱེད་ལ། །དགེ་སློང་ཞེས་ནི་ངས་བརྗོད་དོ། །ཞེས་པས་དེ་ཡང་སེམས་གཉིས་བསྐྱེད་ནས་ཐེག་པ་གསུམ་དང་ལྡན་ཞིང་དབེན་པར་གནས་ནས་མི་དགེ་བ་མི་འབྱུང་ཞིང་དགེ་བ་འཕེལ་ཏེ། གལ་ཏེ་གཞན་དོན་སེམས་ཀྱིས་བྱེད་ཀྱང་དངོས་སུ་མི་ནུས་པ་དང༌། དབེན་པར་མི་གནས་པས་འདི་ལྟར་བྱ་སྟེ། སྤྱོད་ལམ་བཞིས་མི་བྱ་བ་ལ་གཉིས་ཏེ། ཡིད་ཀྱིས་དྲན་པ་ལུས་ཀྱིས་མི་བྱ་བ་དང༌། ངག་གིས་མི་བྱ་བ་དང༌། ལུས་ཀྱིས་གཞི་ལ་སྡོད་པ་དང༌། འགྲོ་བ་དང༌། ཟས་ཟ་བའི་ཚེ་དང༌། ཉལ་བའི་དུས་སོ། །སྡོད་པ་ལ་ཉེས་པ་འབྱུང་བ་དང༌། ཉེས་པ་ཆེན་པོ་འབྱུང་ནས་བསྡད་པ་གཉིས་ཀྱི་ཉེས་པ་འབྱུང་བས་མི་བསྡད་པ་ལ་བཅུ་གཉིས་ཏེ། འགྲེང་བ་དང༌། ལྟོ་རྒྱལ་དང༌། སྙེས་པ་དང༌། ཁྱི་ཚུགས་དང༌། ས་རྐོ་བ་དང༌། རྩྭ་གཅོད་པ་དང༌། ཆུ་དང༌། མེ་དང༌། ཁྱི་དང༌། བུ་ཆུང་ལ་རྩེ་བ་དང༌། འཇིག་རྟེན་དང་བུད་མེད་ནང་དུ་སྡོད་པ་སྤང་བའོ། །ཉེས་པ་ཆེན་པོ་འབྱུང་བས་མི་བསྡད་པ་ལ་གཉིས་ཏེ། བསྡད་ས་མིན་པ་དང༌། རྟེན་ནོ། །རྟེན་ལ་དགུ། མཆོད་རྟེན་དང༌། ལྷ་ཁང་དང༌། སྐུ་གཟུགས་དང༌། གླེགས་བམ་དང༌། མཁན་པོ་དང༌། སློབ་དཔོན་དང༌།
དགེ་འདུན་དང༌། ཕ་མ་དང༌། རྒྱལ་པོ་དང༌། རྒན་པོའོ། །བསྡད་ས་མིན་པ་ལ་གཉིས་ཏེ། གཡས་དང་མདུན་དུ་མི་བསྡད་པའོ། །འགྲོ་བ་ལ་གཉིས་ཀྱི་ཉེས་པ་འབྱུང་བས་མི་འགྲོ་བ་ལ་བཅུ་བདུན་ཏེ། མུ་སྟེགས་དང་འགྲོགས་ཏེ་མི་འགྲོ་།རྒྱུག་ཅིང་རྒྱུག་ཅིང་མི་འགྲོ། མུ་སྟེགས་ཀྱི་ནང་དུ་མི་འགྲོ་།སྒྱུ་མ་མཁན་དང་མི་འགྲོགས་ནང་དུ་མི་འགྲོ་།དེ་བཞིན་དུ་ཚོང་བ་དང་མི་འགྲོགས་ནང་དུ་མི་འགྲོ་།དམག་དང་མི་འགྲོགས་ནང་དུ་མི་འགྲོ་།ཤན་པ་དང་སྨད་འཚོང་མ་དང་མི་འགྲོགས་ནང་དུ་མི་འགྲོ་།བུད་མེད་དང་མི་འགྲོགས་ནང་དུ་མི་འགྲོ། །ཕྱོགས་སུ་ལྟ་བ་དང་ཡུལ་ཡེངས་པས་མི་འགྲོ་།གོས་མེད་པ་དང༌། སྟོད་གོས་མེད་པ་དང༌། གཞན་ཡང་རྩོད་པའི་སར་མི་འགྲོ་བ་དང༌། འཇིགས་པ་དང༌། དོན་མེད་པ་དང༌། ཡང་བ་དང་མི་འགྲོགས། ཡང་བའི་སར་མི་འགྲོ་བའོ། །ཉེས་པ་ཆེན་པོ་འབྱུང་བས་མི་བྱ་བ་གཉིས་ཏེ། རྟེན་གོང་ལྟར་དགུ། མི་འགྲོ་བ་ལྔ། དངོས་སམ་གྲིབ་མ་ལ་མི་འགོམ། གཡོན་བསྟན་ལ་མི་འགྲོ་།སྟེང་ནས་མི་འགྲོ་།མདུན་ནས་མི་འགྲོ་།རྗེས་ནོན་པས་མི་འགྲོ་བའོ། །ངག་ལ་ཡིད་ཀྱིས་ཟིན་པར་བྱ་སྟེ། མི་སྨྲ་བ་ལ་བཞི་སྟེ། སྡོད་པའི་ཚེ་མི་སྨྲ་བ་ལ་གཉིས་ཏེ། ཉེས་པ་དང་ཉེས་པ་ཆེན་པོ་ལས་མུ་སྟེགས་ལ་སོགས་པ་བདེན་ཡང་མི་སྨྲ་བ་དང༌། འདྲི་བའི་ལན་འདེབས་པ་དང༌། ཞི་བ་དང་འཇམ་པ་དང༌། ངལ་བས་སྨྲ་བའོ། །ཉེས་པ་ཆེན་པོ་འབྱུང་བས་མི་སྨྲ་བ་ལ་གསུམ་སྟེ། འགྲེང་སྟེ་སྡོད་པ་ལ་སོགས་པས་ཆོས་མི་བཤད་པ་དང༌། མཆོད་རྟེན་ལ་སོགས་པ་ལ་རྒྱུ་འབྲས་ལ་སྐུར་བ་དང༌། བྲེ་མོའི་གཏམ་མི་བྱའོ། །བརྫུན་སོགས་གོང་དུ་བཀག་པ་རྣམས་ཀྱང་སྨྲ་བར་མི་བྱའོ། །འགྲོ་བ་ལ་ཡང་དེ་བཞིན་ཏེ། ཟ་བ་དང་ཉལ་བ་ལ་ཡང་དེ་བཞིན་ནོ། །ཉེས་པ་དང༌། ཉེས་པ་ཆེན་པོ་དག་ཤེས་ཏེ་སྨྲ་བའི་ཚོད་རིག་པར་བྱའོ། །ལུས་ཀྱིས་ཟས་ཟ་བའི་ཚེ་ན་ཡང་གཉིས་ཏེ། ཉེས་པ་ཉི་ཤུ་སྟེ། འགྲེང་བ་ལ་སོགས་པ་བཅུས་མི་བཟའ་བ་དང༌། འགྲོ་ཞིང་མི་བཟའ་བ་དང༌། སྨྲ་ཞིང་དང༌། ཁམ་ཆེ་བ་དང༌། ཆུང་བ་དང༌། འགྲམ་པ་གཡས་གཡོན་སྤོ་བ་དང༌། རྒན་སྨྲས་དང༌། རིངས་པས་དང༌། འཕྲོ་གཅོད་པ་དང༌། མ་འགྲངས་
པར་དང༌། ཡང་པའི་སར་ཟ་བ་སྤང་བའོ། །ཉེས་པ་ཆེན་པོ་འབྱུང་བས་སྤང་བ་ལ་ལྔ། །དཀོན་མཆོག་ལ་བསྔོས་པ་ཟ་བ་དང༌། མཁན་པོ་དང་སློབ་དཔོན་ལ་དད་པས་བསྔོས་པ་ཟ་བ་དང༌། ཕ་དང་མ་ལ་བསྔོས་པ་ཟ་བ་དང༌། གཏོར་མ་དང་བྱིན་གྱིས་རློབ་པ་ཟ་བ་དང༌། རྒྱལ་པོ་དང་གྲོང་དཔོན་ལ་བསྔོས་པ་ཟ་བ་སྤང་བའོ། །ཉལ་བའི་ཚེའི་ལུས་ལ་ཡང་གཉིས་ཏེ། ཉེས་པ་ལ་དགུ་སྟེ། གན་རྐྱལ་དུ་མི་ཉལ། ཁ་བུབ་དང༌། གོས་མེད་པ་དང༌། དབང་པོ་ལག་པས་གཟུང་བ་དང༌། ནུབ་ཏུ་མགོ་བསྟན་པ་དང༌། འཇིག་རྟེན་པའི་གྲོང་དང༌། འཇིག་རྟེན་པའི་མི་མང་པོ་ནང་དང༌། ནད་འཕལ་པའི་ས་དང༌། གྲོགས་མེད་པར་མི་ཉལ་བའོ། །ཉེས་པ་ཆེན་པོ་འབྱུང་བས་མི་ཉལ་བ་ལ་གསུམ་སྟེ། གོང་གི་ལྷ་ཁང་ལ་སོགས་པའི་རྟེན་དུ་འོས་པའི་སྟེང་དང༌། རྐང་པ་བསྟན་པ་དང༌། རྒྱབ་བསྟན་པས་མི་ཉལ་བའོ། །ནའམ་ས་ཡེ་མ་རྙེད་དམ། སྲོག་གི་བར་ཆད་དུ་འགྱུར་རམ་དབང་མེད་ན། མདོ་བཟང་པོ་འཕེལ་བ་ནས། དང་པོ་པ་ཡི་ཆོས་རྣམས་ནི། །བར་ཆད་མེད་པར་ཤེས་བྱས་ལ། །གསོ་སྦྱོང་བྱ་ཞིང་བསླབ་པ་བསྲུང༌། །རིམ་གྱིས་རིམ་གྱིས་གོམས་ཏེ་བླ། །ཞེས་པ་དང༌། གསོ་སྦྱོང་བྱ་ཞིང་སྐབས་དང་སྦྱར་རོ། །བྱེ་བྲག་ཁོ་ན་དབང་དུ་བྱས་ནས་འདོད་པ་དང༌། དུས་གཉིས་སུ་བསྡུས་ཏེ། འདོད་པ་སངས་རྒྱས་དང༌། སྡོམ་པས་རྒན་པ་ལ་ཕྱག་བྱེད་པ་དང༌། ལུས་ངག་གི་དགེ་བ་རང་གི་དོན་དུ་འདོད་པ་གཉིས་སོ། །དུས་ལ་གསུམ་སྟེ། དུས་འདི་ཇི་སྲིད་འཚོའི་བར་དང༌། ལམ་སྐྱེ་བ་བདུན་དང༌། འབྲས་བུ་བསྐལ་པ་གཅིག་ནས་ཆོས་སྟོན་པའི་དུས་སོ། །འདིར། ཆོས་ཀྱི་དབྱིངས་ལ་དབྱེར་མེད་ཕྱིར། །ཐེག་པ་གསུམ་དུ་དབྱེར་མེད་ཀྱང༌། །གཙོ་བོས་ཐེག་པ་གསུམ་བསྟན་པ། །ང་ཡི་ཐབས་ལ་མཁས་པའོ། །ཞེས་པས་ཐེག་པ་གསུམ་ལ་གནས་པར་བྱ་ཞིང༌། སྡོམ་པ་གསུམ་དང་ལྡན་པར་བྱས་པས་ཡོན་ཏན་དང་དགེ་བ་འཕེལ་བའི་ཕྱིར་སྦྱོར་ལམ་བཞིས་སྤྱད་པར་བྱ་བ་ཡང་སྡོད་པ་ལ་སོགས་པ་ཐུན་བཞིར་བསྒྲུབ་སྟེ། སྔ་དྲོའི་ཐུན་ལ་གསུམ་སྟེ། ལྡང་བ་དང༌། ཁྲུས་དང༌། ཆོས་སྤྱད་པའོ། །དང་བ་ལ་སྦྱོར་བ་དང༌། དངོས་དང༌། མཇུག་གསུམ་སྟེ། སྦྱོར་བ་ཡིད་ངག་ལུས་གསུམ་
སྟེ། ཡོད་སྔོན་ཡང་ལེ་ལོ་དང་གཉིད་ཁོ་ན་ལ་བརྟེན་ནས་འདི་འདྲའོ་ཞེས་བསམས་ཏེ་ནམ་སྨད་ལྡང་ངོ༌། །གང་གི་ན། ན་མོ་བུདྡྷཱ་ཡ། ན་མོ་མཉྫུ་ཤྲཱི། ན་མོ་བཛྲ་པཱ་ཎི། ན་མོ་ལོ་ཀེ་ཤྭ་རཱ་ཡ། ན་མཿཏཱ་ར། ཞེས་རང་གི་ཡི་དམ་གྱི་ལྷ་བསྐུལ་ལོ། །ལུས་དལ་ནས་ཙོག་ཙོག་ཏུ་ལྡང་ངོ༌། །དངོས་ལུས་ལེགས་པར་ལངས་ལ་སྟོད་གོས་དང་སྨད་གོས་བགོ་བ་དང༌། ངག་སྙིང་པོ་སྒྲ་དང་བཅས་པས་སྤྲུལ་དང་སེམས་ཅན་བསྐྲད་པ་དང༌། ཡིད་དགེ་བ་བྱ་བའི་ཕྱིར་ཆོས་དྲན་པའོ། །མཇུག་ལེ་ལོ་དང་ཐེ་ཚོམ་མེད་པའོ། །ཁྲུས་ལ་ཡང་སྦྱོར་བ་དངོས་མཇུག་གསུམ་སྟེ། སྦྱོར་བ་བཤང་བ་ཆེ་ཆུང་དང༌། སྣབས་ལུད་སེམས་ཅན་ལ་གནོད་པ་དང༌། ས་མིན་སར་མི་འདོར་ཞིང་ལེགས་པར་བྱས་པ་དང༌། ཆུ་སྲོག་ཆགས་དང་དྲི་མ་མེད་པས་སྣོད་བཀང་བ་དང༌། བཀྲུ་ས་ཡང་མི་གནོད་པ་དང༌། ས་མ་ཡིན་པར་བཀྲུ་བ་དང༌། ཆུ་བྱིན་གྱིས་བརླབ་པ་ཆུ་སྣོད་དེའི་ཆུ་ལ་ཨ་དཀར་པོ་བསམས་ལ། །ཨའི་འོད་ཀྱིས་འཕགས་པ་སྤྱན་རས་གཟིགས་སྤྱན་དྲངས་ཏེ། མདུན་ན་གསལ་བའི་འོད་ཀྱིས་ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས་ཏེ། སྤྱན་རས་གཟིགས་ལྟ་བུར་གྱུར་པས་ནམ་མཁའ་ཁེངས་པ་ཕྱག་མཚན་ཀུན་དེའི་མཐུས་སྔར་གྱི་ཆུས་བཀང་ནས་འོ་མ་ལྟར་བདུད་རྩིའི་ཆུར་གྱུར་པར་བསམས་ཏེ་བཀྲུའོ། །བཀྲུ་བ་དངོས་ནི་ཨོཾ་མ་ཎི་པདྨེ་སྭ་བྷཱ་བ་ཧཱུ༵། ཞེས་བརྗོད་ཅིང་ཁ་དང་ལག་པ་དང༌། གདོང་བཀྲུའོ། །ཡིད་ཀྱིས་སྒྲིབ་པ་གཉིས་སངས་རྒྱས་ཀྱི་མཐུ་དང༌། བྱིན་གྱིས་བརླབས་པ་ཆུ་དང། སྔགས་ཀྱི་ནུས་པས་དག་པར་བསམ་མོ། །མཇུག་མདུན་གྱིས་སངས་རྒྱས་རྣམས་གཞན་དོན་ལ་སླར་གཤེགས་པར་བསམ་མོ། །རང་ཉེས་པ་དང་སྒྲིབ་པ་དག་པས་དགེ་བ་བྱས་པར་གནས་པར་གནས་པར་བམ་ཞིང་དོན་ཆེ་བར་བསམ་མོ། ཆོས་སྤྱད་པ་ལ་བསམ་གཏན་དང༌། ཁ་ཏོན་དང༌། ཆུ་སྦྱིན་དང༌། འབྱུང་བོ་ལ་གཏོར་མ་གཏང་བ་དང༌། མཎྜལ་བྱ་བ་དང་ལྔའོ། །བསམ་གཏན་ལ་ཡང་གསུམ་སྟེ། སྦྱོར་བ་ལུས་ཅོག་ཅོག་གམ་སྐྱིལ་ཀྲུང་དུ་བསྡད། ངག་ཨོཾ་ཨཱཿཧཱུ༵་ཞེས་བརྗོད། ཡིད་ཨོཾ་གྱི་འོད་ཁ་དོག་ལྔས། དངོས་པོ་སངས་རྒྱས་ཀྱི་སྐུའི་ངོ་བོར་བྱས། ཨཿའི་འོད་
དཀར་པོས་སྐུའི་ངོ་བོ་དེ་སངས་རྒྱས་ཀྱི་གསུང་དང་ལྡན་པར་བྱས། ཧཱུ༵་གི་འོད་ནག་པོ་དེས་སྐུ་གསུང་གི་ངོ་བོ་དེ་ཐུགས་དང་ལྡན་པར་བྱས་ཏེ། ཐམས་ཅད་མཉམ་པོར་བསྒྲུབས་གནས་དང་བདག་དང་ཏིང་ངེ་འཛིན་དག་སྟེ་བསྲུང་བར་ཡང་དེ་འགྱུར་རོ། །དེ་ནས་བསམ་གཏན་དངོས་རྟོགས་པ་དང་མན་ངག་དང་ཡིད་མོས་པ་ལ་ཐུན་དང་ནུས་ཚད་དུ་གནས་པར་བྱའོ། །ཁ་དོན་ལ་ལྔ་སྟེ། བར་ཆད་ཞི་བར་བྱ་བའི་ཕྱིར་གཙུག་ཏོར་དང༌། རྡོ་རྗེ་རྣམ་པར་འཇོམས་པ་གདོན། །སྒྲིབ་པ་བསལ་ཞིང་དགེ་བ་བསྡུ་པའི་ཕྱིར་ལྟུང་བཤགས་གདོན། དགེ་བ་རྒྱས་བར་བྱ་བའི་ཕྱིར་བྱམས་པ་དང་སྤྱན་རས་གཟིགས་དང། བཟང་སྤྱོད་ཀྱི་སྨོན་ལམ་གདོན། དགེ་བ་མི་ཉམས་པར་བྱ་བའི་ཕྱིར་ཤེས་རབ་སྙིང་པོ་གདོན། བསྟན་པ་རྒྱས་པར་བྱ་བའི་ཕྱིར་འཇམ་དཔལ་གྱི་མཚན་བརྗོད་དང༌། མགོན་པོ་ནག་པོའི་མདོ་གདོན་ནོ། །དེ་ཡང་གཙུག་ཏོར་རྒྱལ་བའི་མདོ་ལས། བགེགས་རྣམས་གཙུག་ཏོར་རྡོ་རྗེས་འཇོམས། །ཀུན་དུ་དགེ་བ་ཞུས་པ་ཡིས། །སྒྲིབ་སེལ་བསོང་ནམས་སྡུད་པ་དང༌། །བྱམས་པ་སྨོན་དང་བཟང་པོར་སྤྱོད། །དགེ་བ་རྒྱས་ཕྱིར་ང་ཡིས་བསྐུལ། །ཤེས་རབ་ཕ་རོལ་ཕྱིན་དེ་དག །དེ་རྣམས་ཀུན་གྱི་སྙིང་པོ་བརྗོད། །བསྟན་པ་རྒྱས་བྱེད་འཇམ་དཔལ་དང༌། །དལ་ཁས་བླངས་མགོན་ནག་པོ། །ཞེས་སོ། །དེ་ལ་ཡང་སྦྱོར་བ་ལྟ་རྣམས་མདུན་དུ་གསལ་བ་དང༌། དག་པ་དང་གསལ་བ་དང་བར་མ་ཆོད་པར་གདོན་པ་དངོས་དང༌། ཡོན་ཏན་ལ་ཐེ་ཚོམ་མི་ཟ་བ་དངོས་སོ། །རྒྱས་པར་བཤད་པའི་སྦྱོར་བ་དངོས་མཇུག་ཀྱང་ཤེས་པར་བྱའོ། །ཆུ་སྦྱིན་ནི་རྟེན་སྣོད་དུ་གཞག་བའམ། མེད་ན་ཡང་ངང་ཡི་དམ་གྱི་ལྷ་གང་ཡིན་པ་དེར་བསྒོམས་ལ། ཨོཾ་ཨཱཿཧཱུ༵་བརྗོད་པས་ཧཱུ༵་གི་འོད་དེས་སྣོད་ཀུན་སྟོང་པར་བསམ། སྟོང་པ་ལས་པཾ་ལས་པདྨ་སེར་པོ་འདབ་མ་བརྒྱད་པ། དེའི་ལྟེ་བ་ལ་ཨ་ལས་ཟླ་བ་རྒྱས་པ་འོད་དང་བཅས་པ། དེའི་སྟེང་དུ་ཛཾ་སེར་འོད་དང་བཅས་པ། ཛཾ་དེ་གྱུར་པ་ལས་ནོར་སྦྱིན་སེར་པོ་པདྨ་དང་ཟླ་བའི་སྟེང་དུ་གཡས་བརྐྱང་བའི་འོ་ག་ན་ཡིད་བཞིན་གྱི་ནོར་བུ་མནན་པ། གཡོན་བཀུམ་པའི་པུས་མོའི་འོག་ན་རིན་པོ་ཆེ་སྣ་ཚོགས་ཀྱི་བུམ་པ་མནན་པ། མདོག་སེར་པོ་གསེར་བསྲེགས་པ་འདྲ་བ། རལ་བ་གྱེན་དུ་བརྫེས་ནས་རིན་པོ་ཆེའི་ཟེ་པྲོག་ཅན། ཞལ་རྣམ་
པར་སྣང་མཛད་ལྟར་མདངས་དང་ལྡན་པ། སྙན་ཆ་མགུལ་རྒྱན། དབུ་རྒྱན་ཕྱག་གདུབ། ཞབས་གདུབ་རིན་པོ་ཆེ་སྣ་ཚོགས་ཀྱིས་བྱས་པ་གཅིག་བསྒོམས་ལ། དེའི་ཐུགས་ཀ་ན་པདྨོའི་སྟེང་ན་ཟླ་བ། དེའི་སྟེང་ན་ཛཾ་སེར་པོ་ཡོང་པ་དེས་རང་བཞིན་གྱི་ནོར་ལྷ་དེ་ཉིད་འདྲ་བ་སྤྱན་དྲངས་ཏེ་དངོས་སམ་ཡིད་ཀྱིས་མཆོད་སྦྱིན་ཕུལ་ལ་བདག་གཞན་གྱི་འདོད་པ་སྐོངས་ཤིག་ཅེས་བརྗོད་དེ། དེ་ལ་བཅུག་ལ་གཉིས་མེད་དུ་གྱུར་པའི་ཐུགས་ཀའི་ཟླ་བའི་ཇཾ་གིས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་སྤྱན་དྲངས་ཏེ་མཆོད་པ་རྣམས་ཀྱིས་མཆོད་ནས་དབང་མནོས་རྣམ་པར་སྣང་མཛད་ཀྱི་རྒྱན་དང་ལྡན་པའོ། །སྦྱོར་བ་དེས་ནོར་སྦྱིན་བསྐྱེད་ནས་ཆུ་སྣོད་ཆུ་དང་བཅས་པ་ལ་སྔོན་དུ་བསྟན་པའི་ཁྲུས་ཀྱི་སྐབས་ལྟར་བྱིན་གྱིས་བརླབས་ལ་སྦྱོར་བ་དེ་དང་ལྡན་པས་སྦྱིན་པ་དངོས་གཡས་པའི་སོར་མོ་ལས་བདུད་རྩིའི་རྒྱུན་གྱིས་སྦྱིན་པ། །ཨོཾ་ཛཾ་བྷ་ལ་ཛ་ལནྡྲ་ཡེ་སྭཱ་ཧཱ། ཞེས་བརྒྱ་རྩ་བརྒྱད་སྤྱིན་ནོ། །མཇུག་བདག་གི་འདོད་པ་སྐོངས་པར་གྱིས་ཤིག་ཅེས་བརྗོད་ལ་ཆུ་དེ་གཙང་སར་བསྐྱལ་ལོ། །དེ་ཡང་སངས་རྒྱས་བྱ་རྒོད་ཕྱང་པོའི་རི་ལ་བཞུགས་པ་ལ། ལྷ་སྦྱིན་གྱིས་བྲག་འཕངས་པ་ལ་ཕྱག་ན་རྡོ་རྗེས་རྡོ་རྗེ་འཕངས་པས་བྲག་ཕྱེད་མར་ཆད་པ་ལས། ཕྱེད་ཀྱིས་བཅོམ་ལྡན་འདས་ཀྱི་མཐེ་བོང་ལ་བཞར་ཕྱེད་ཀྱིས་ནོར་སྦྱིན་གྱི་མགོ་བཀས་པས་སངས་རྒྱས་ཀྱི་འཁོར་ཐམས་ཅད་བྲེད་པ་ལ། སངས་རྒྱས་ཀྱི་ཞལ་ནས་འུ་ཅག་གཉིས་ལ་ཁོའི་དེ་ཙམ་གྱི་ལན་ཆགས་པས་མི་དགའ་མ་བྱེད་ཅིག །ཁྱོད་ལ་ངས་ཕན་གདགས་སོ་ཞེས་བརྗོད་ནས་གོང་ལྟར་བཀྲུས་པས་སོས་ཏེ། འགྲོ་བ་ལ་ཕྱིན་ཆད་ནོར་སྦྱིན་པར་བྱང་ཆུབ་ཏུ་སེམས་བསྐྱེད་ནས་ཕྱིར་བས་ཀྱི་གང་ཟག་ཆོས་ལ་མོས་པ་དང་ལྡན་པ་རྣམས་ཀྱིས་ཆུ་སྦྱིན་ཞིང༌། །ནོར་སྦྱིན་གྱིས་ནོར་སྦྱིན་པར་སངས་རྒྱས་ཀྱི་སྤྱན་སྔར་དམ་བཅས་པའོ། །འབྱུང་པོ་ལ་གཏོར་མ་སྦྱིན་པ་ལ་གཏོར་སྣོད་གཙང་མར་ཟན་དང་ཆུ་གཙང་མས་བཀང་བ་མདུན་དུ་སྟེགས་ལ་གཞག་སྟེ། རང་ཡི་དམ་གྱི་ལྷར་གསལ་བས་ཨོཾ་ཨཱཿཧཱུ༵་བརྗོད་པས་ཧཱུ༵་གི་འོད་སྔོན་པོས་སྟོང་པར་བྱས། ཨཱཿཔའི་འོད་དཀར་པོས་སྣོད་བཅུད་དུ་བཅས་པ་རྒྱ་ཆེ་ཞིང་ཟབ་པའི་བདུད་རྩིར་གྱུར་ཏེ། ཨོཾ་གྱི་འོད་ལྔས་ཡེ་ཤེས་ཀྱི་བདུད་རྩིར་བསམ་པ་
དང༌། འབྱུང་པོ་དང་ཡི་དགས་བཟའ་བཏུང་གིས་ཕོངས་པ་ཐམས་ཅད་བཀུག་སྟེ་བདུད་རྩི་ལ་ཟད་པ་མེད་ཅིང་རོ་དང་ལྡན་པ་ལ་ཡི་དགས་དགའ་ནས་ལོངས་སྤྱོད་པར་བསམ་པའོ། །བཏང་བ་དངོས་ལ་ལག་པ་གཡས་པའི་སོར་མོ་ལྔ་ལས་ཀྱང་བདུད་རྩི་དཀར་མེ་རེ་རེ་འབབ་པར་བསམས་ལ། ནམཿས་མ་ནྟ་བུདྡྷཱ་ནཱཾ། སརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོཾ་སཾ་བཏ་ར་སཾ་བྷ་ར་ཧཱུ༵་ཕཊ་སྭཱ་ཧཱ། ཞེས་ལན་གསུམ་བརྗོད་ཅིང༌། གཡས་པས་སེ་གོལ་ལན་གསུམ་བརྡབས་ལ་སྦྱིན་ནོ། །མཇུག་གཙང་སར་བསྐྱལ་བ་དང༌། དེར་ཚོགས་པའི་འབྱུང་པོ་རྣམས་འགྲངས་ངོམས་ཏེ་ཆོས་ལ་དད་བར་བསམ་མོ། །དེ་ཡང་སངས་རྒྱས་རྒྱལ་བྱེད་ཀྱི་ཚལ་ན་བཞུགས་པ་ལ་མ་ག་དྷཱར་ཁྱིམ་བདག་ཕུང་པོ་དགེ་ཞེས་བྱ་བས་སངས་རྒྱས་འཁོར་བཅས་སྤྱན་དྲངས་ནས་ཆོས་སྟོན་དྲངས་ཏེ་སླར་གཤེགས་སོ། ཕྱི་དེ་ལོ་དུས་ཁྱིམ་བདག་དེ་ལྟོགས་པར་གྱུར་ཏེ། སངས་རྒྱས་ཀྱི་སྤྱན་སྔར་ཕྱིན་ཏེ་དྲིས་པ་ལ། སངས་རྒྱས་ཀྱི་ཞལ་ནས་འཕགས་པ་སྤྱན་རས་གཟིགས་ལ་ཞུས་ཞེས་བསྟན་ནས། ཁྱིམ་བདག་གིས་འཕགས་པ་སྤྱན་རས་གཟིགས་ལ་ཞུས་པས། །ཁྱོད་ཀྱིས་སྔ་མ་མཆོད་པའི་ཡི་དགས་དང་འབྱུང་པོ་སྐལ་བ་བཅད་པས་ཉེས་ཏེ། ད་འདི་བཞིན་དུ་ཡི་དགས་སྒོ་དྲུང་ན་ཡོད་པ་དང༌། གཞན་དག་ལ་ཡང་གཏོར་མ་འདི་ལྟར་བྱིན་ཞེས་གོང་གི་དེ་བསྟན་བས་དེ་སླར་སྔོན་བཞིན་འབྱོར་པ་དང་ལྡན་པར་གྱུར་ཏོ། །ཕྱི་རབས་ཀྱི་གང་ཟག་ཆོས་ལ་དད་པ་རྣམས་ཀྱང་འབྱུང་པོའི་གཏོར་མ་ལ་བརྩོན་པས་ཡི་དགས་ལ་ཕན་པ་དང༌། བདག་གི་འབྱོར་པ་མི་ཉམས་པའོ། །མཎྜ་ལ་ཡང་གསུམ་སྟེ། ཡིད་དུ་འོང་པའི་ས་ལ་ཁྲུ་གང་ལས་མི་ཆུང་བའི་གྲུ་བཞི་ལ་སོགས་པ་བྱས་ཏེ། སྦྱོར་བ་ཆུ་གཙང་མ་དང་མེ་ཏོག་དང་དྲིས་བྱུག་པ་དང༌། ཨོཾ་ཨཱཿབཛྲ་བྷཱུ་མི་ཧཱུ༵། ཞེས་བརྗོད་ཅིང་ས་བྱུགས་པས། རྡོ་རྗེའི་ས་བཞིར་བསམ་པ་དང༌། ཨོཾ་ཨཱཿབཛྲ་རེ་ཁེ་ཧཱུ༵་ཞེས་བརྗོད་ལ། རེ་ཁཱ་བསྐོར་བས་རྒྱ་ཆེ་བའི་གཞལ་ཡས་སུ་བསམ་པ་དང༌། ཨོཾ་ཨཱཿབཛྲ་མཎྜལ་ཧཱུམ་ཞེས་བརྗོད་ལ་སྙོམས་པར་བྱུགས་པས་རྡོ་རྗེའི་དཀྱིལ་འཁོར་དུ་བྱུགས་པར་བསམས་ལ། ཨོཾ་ཨཱཿབཛྲ་རེ་ཁེ་ཧཱུ༵་ཞེས་བརྗོད་དེ་བསྲུང་བ་གཞན་པས་རྡོ་རྗེའི་སྲུང་
བས་བགེགས་བསྐྲད་པར་བསམ་པ་དང༌། ལག་པ་བཀྲུ་པའོ། །དབུལ་བ་དངོས་ལ་མཎྜལ་ལ་དབུལ་བ་དང༌། མཎྜལ་དབུལ་བ་གཉིས་སོ། །མཎྜལ་ལ་དབུལ་བ་ནི་མེ་ཏོག་ཚོམ་བུ་དགུ་དབུས་དང་ཤར་གྱི་རིམ་པས་ཕྱོགས་དང་མཚམས་སུ་བཀོད་ལ་སྐད་ཅིག་གམ་རིམ་གྱིས་མཚོ་ལས་པདྨ་འདབ་མ་སྟོང་དང་ལྡན་པ་ལྟེ་བ་ན་ཟླ་བའི་གདན་ལ་ལྷ་སོ་སོའི་དམ་ཚིག་པ་ས་བོན་ནམ་མངོན་བྱང་ལྔས། སྒྲུབ་ཐབས་ལྟར་བསྐྱེད་ལ། དེའི་འོད་ཀྱིས་ཡེ་ཤེས་སེམས་དཔའ་བཀུག་ཅིང་བསྟིམ་ལ་བསྒོམ་སྟེ། ཨོཾ་བཛྲ་པུཥྤེ་ཨཱཿཧཱུ༵་ཕཊ་སྭཱཧཱ། ཨོཾ་བཛྲ་དཱི་པེ་ཨཱཿཧཱུ༵་ཕཊ་སྭཱ་ཧཱ། ཨོཾ་བཛྲ་གནྡྷེ་ཨཱཿཧཱུ༵་ཕཊ་སྭཱ་ཧཱ། ཨོཾ་བཛྲ་ནཻ་བི་དྱེ་ཨཱཿཧཱུ༵་ཕཊ་སྭཱ་ཧཱ། ཨོཾ་བཛྲ་གནྡྷ་ལེ་ཨཱཿཧཱུ༵་ཕཊ་སྭཱ་ཧཱ། ཞེས་བརྗོད་ལ་གཟུགས་ལ་སོགས་པ་དངོས་སམ་ཡིད་ཀྱིས་མཆོད་པ་དང༌། ཕྱག་འཚལ་བ་དང༌། སྡིག་པ་བཤགས་པ་དང༌། འཇིག་རྟེན་གྱི་དགེ་བ་ལ་ཡི་རང་བ་དང༌། དེའི་དགེ་བ་བསྔོ་བ་དང༌། གསུམ་ལ་སྐྱབས་སུ་འགྲོ་བ་དང༌། ལུས་དབུལ་བ་དང༌། སེམས་བསྐྱེད་པ་དང༌། བསྐུལ་བ་དང༌། གསོལ་བ་གདབ་པ་དང༌། བདག་གི་དགེ་བའི་ལས་རྣམས་འདི་དག་གིས། འཇིག་རྟེན་དུ་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང༌། །སེམས་ཅན་སྡུག་བསྔལ་མང་པོས་གཟིར་བ་སྒྲོལ། །ཞེས་སྨོན་ལམ་གདབ་པ་ནི་མཇུག་གོ །མཎྜལ་དབུལ་བ་ལ་ཡང་གཉིས་ཏེ། དཀོན་མཆོག་སྤྱི་དང༌། བླ་མ་ལ་དབུལ་བའོ། །སྤྱི་ལ་དབུལ་བ་ནི་ཇི་ལྟར་མཛེས་པར་བྱ་སྟེ། དངོས་སམ་ཡིད་གྱིས་དངོས་པོ་གཟུགས་ལ་སོགས་པ་ལུས་ངང་བཅས་པ་དབུལ་བ་དང༌། མཇུག་བདུན་རྣམ་པར་དག་པ་དང༌། སྨོན་ལམ་གོང་ལྟར་གདབ་བོ། །བླ་མ་ལ་དབུལ་བ་ནི། ཨོཾ་ཧཾ་མ་ཧཱ་མེ་རེ་བེ་ན་མཿ། ཞེས་བརྗོད་པས་མཎྜལ་གྱི་དཀྱིལ་དུ་བཞག་ལ་རི་རབ་ཏུ་བསམ། ཨོཾ་ཡཾ་པཱུ་རྦ་བི་དེ་ཧ་ཡ་ན་མཿ། ཞེས་པས་ཤར་གྱི་གླིང་དུ་བསམ། །ཨོཾ་རཾ་ཛཾ་བུ་དྭཱི་པཱ་ཡ་ན་མཿ་ཞེས་བརྗོད་པས་ལྷོའི་གླིང་ཆགས་པར་བསམ། ཨོཾ་ལཾ་ཨ་བ་ར་དཱ་ནཱི་ཡན་མཿཞེས་བརྗོད་པས་ནུབ་ཀྱི་གླིང་དུ་ཆགས་པར་བསམ། ཨོཾ་བཾ་ཨུཏྟ་ར་བེ་ན་མཿ་ཞེས་པས་བྱང་གི་གླིང་དུ་ཆགས་པའོ། །ཨོཾ་ཡཿཨུ་པ་དྭཱི་
པཱ་ཡ་ན་མཿ་ཞེས་པས་ཤར་ལྷོར་གཞག །ཨོཾ་རཿཨུ་པ་དྭཱི་པཱ་ཡ་ན་མཿ་ཞེས་པས་ལྷོ་ནུབ་ཏུ་གཞག །ཨོཾ་ལཿཨུ་པ་དྭཱི་པཱ་ཡ་ན་མཿ་ཞེས་པས་ནུབ་བྱང་དུ་གཞག །ཨོཾ་བཿཨུ་པ་དྭཱི་པཱ་ཡ་ན་མཿ་ཞེས་བྱང་ཤར་དུ་གཞག །ཨོཾ་ཡཿཨ་ཤྭ་རཏྣཱ་ཡ་ན་མཿ་ཞེས་པས་ཤར་གྱི་གླིང་དུ་རྟ་རིན་པོ་ཆས་གང་བར་བསམ། ཨོཾ་རཿམ་ཎིརཏྣཱ་ཡ་ན་མཿ་ཞེས་པས་ལྷོར་ནོར་བུ་རིན་པོ་ཆེས་གང་བར་བསམ། ཨོཾ་ལཿཧ་སྟི་རཏྣཱ་ཡན་མཿ། ཞེས་བརྗོད་པས་བྱང་དུ་གླང་པོ་ཆས་གང་བར་བསམ། ཨོཾ་བཿཔུ་རུ་ཥ་རཏྣཱ་ཡ་ན་མཿ་ཞེས་པས་ནུབ་ཏུ་བློན་པོས་གང་བར་བསམ། ཨོཾ་ཡཿཁཌྒ་རཏྣཱ་ཡ་ན་མཿ་ཞེས་པས་ཤར་ལྷོང་དམག་དཔོན་གྱིས་གང་བར་བསམ། ཨོཾ་རཿསྟྲཱི་རཏྣཱ་ཡ་ན་མཿ་ཞེས་པས་ལྷོ་ནུབ་ཏུ་བཙུན་མོས་གང་བར་བསམ། །ཨོཾ་ལཿཙཀྲ་རཏྣཱ་ཡ་ན་མཿ་ཞེས་བརྗོད་པས་ནུབ་བྱང་དུ་འཁོར་ལོས་གང་བར་བསམ། ཨོཾ་བ་སརྦ་ནི་དྷི་བྷྱོ་ན་མཿ་ཞེས་པས་བྱང་ཤར་དུ་གཞག་པས་རིན་པོ་ཆེ་སྣ་ཚོགས་ཀྱིས་གང་བར་བསམ། ཨོཾ་ཧཾ་ཨ་དྷི་མེ་ར་བེ་ནཿགུ་རུ་བྷཌྚཱ་ར་ཀཱ་ཡ་ཨི་དཾ་མཎྜལ་མ་ནི། ཞེས་བརྗོད་པས་དབུས་སུ་བསྐར་ནས་བཞག་ནས་སྟེང་གི་རི་རབ་ཀྱི་ཁར་པདྨའི་གདན་ལ་བླ་མ་སྤྱན་དྲངས་ཏེ་མཆོད་པ་གཞན་དང་བཅས་པས་དབུལ། མཇུག་གང་འདོད་སྨོན་ལམ་གདབ་པ་དང༌། མཎྜལ་བསྡུས་པའི་མེ་ཏོག་གཙང་སར་བསྐྱལ་ལོ། །དུས་ཀྱི་འཁོར་ལོ་ནས་བསྟན་པའོ། །བླ་མ་ལ་དབུལ་བ་མུ་སྟེགས་དང་ཐུན་མོང་ངོ༌། མཇུག་ཡོན་ཏན་དྲན་པར་བྱ་བ་ནི་དཀྱིལ་འཁོར་ཆེན་པོའི་མདོ་ནས། ལྕི་བ་ཆུ་བཅས་སྦྱིན་པ་སྟེ། སྙོམས་པར་བྱུགས་པ་ཚུལ་ཁྲིམས་སོ། །སྲོག་ཆགས་བསལ་བ་བཟོད་བ་ཡིན། །མཎྜལ་ཉིད་ལ་བརྩོན་པ་དང༌། །རྩེ་གཅིག་སེམས་པ་བསམ་གཏན་དང༌། །ཕྱོགས་མཚམས་འབྱེད་པ་ཤེས་རབ་དྲུག །སངས་རྒྱས་སོགས་ལ་འདི་དབུལ་བས། །ཕ་རོལ་ཕྱིན་དྲུག་ཐོབ་པར་འགྱུར། །ནད་ཀུན་ལས་གྲོལ་གསེར་མདོག་འགྱུར། །ལྷ་དང་མིས་མཆོད་ཟླ་བ་བཞིན་འབར་མདངས། །ནོར་དང་གསེར་དང་དབང་ཕྱུག་རྒྱལ་པོར་སྐྱེ། །སངས་རྒྱས་གྱུར་ནས་ཡོངས་སུ་ཞིང་ཁམས་དག །ཅེས་བརྗོད་པའི་ཡོན་ཏན་དྲན་པར་བྱའོ། །ཉིན་གུང་གི་ཐུན་གྱི་ཆོས་སྤྱོད་ལ་ལྔ་སྟེ། གླེགས་བམ་བཀླག་པ་དང༌། བསྐོར་བ་བྱ་བ་དང༌། ཟན་བཟའ་བ་དང༌། ཚ་ཚ་
གདབ་པ་དང༌། ངལ་གསོ་བའོ། །གླེགས་བམ་ཀླག་པ་གསུམ་སྟེ། མཎྜལ་མཛེས་པ་བྱ་བ་དང༌། མཆོད་པ་བཤམས་པ་དང༌། ཁ་ལག་བཀྲུ་བའོ། །བཀླག་པ་དངོས་ལ་ལྟུང་བ་ཐམས་ཅད་སེལ་བས་ཕུང་པོ་གསུམ་པ་བཀླག་པ་དང༌། ཤེས་རབ་འཕེལ་བས་བརྒྱད་སྟོང་པ་དང། སྡུད་པ་བཀླག་པའོ། །མཇུག་བཀླགས་པའི་དོན་དང༌། ཡོན་ཏན་དྲན་པར་བྱ་བའོ། །གོང་ལྟར་བདག་གི་དགེ་བའི་ལས་ཀྱང་བསྔོ་བ་ཡང་བྱའོ། །བསྐོར་བ་བྱེད་པ་ལ་ཡང་གསུམ་སྟེ། སྦྱོར་བ་རྟེན་གྱི་རྩར་ཕྱིན་ལ་ཤར་ནས་ཕྱག་གསུམ་བྱ། རང་ཡི་དམ་གྱི་ལྷར་མོས་པ་བྱས་ནས། ཨོཾ་ཨཱཿ་ཧཱུ༵་བརྗོད་པས་ཧཱུ༵་གིས་རྟེན་སྟོང་པར་སྦྱངས་ཏེ། ཨཱཿའི་འོད་ཀྱིས་རང་གི་ཡི་དམ་ལྷའི་གདན་པདྨ་དང་ཉི་ཟླ་གང་ཡིན་པའི་ཁར་ས་བོན་གསལ་བ་ལས་སྐུ་མདོག་རྒྱན་བཞུགས་ཚུལ་གསལ་བར་བསྐྱེད་ལ། དེ་ཉིད་ཀྱི་ཐུགས་ཀའི་ས་བོན་གྱི་འོད་ཀྱིས་ཡེ་ཤེས་སེམས་དཔའ་དགུག་གཞུག་བྱ། དེའི་སྙིང་པོ་བརྗོད་ཅིང་སྙིང་པོའི་འོད་ཀྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྟེན་དེ་ལ་འདུས་ནས་ཡོད་པ་ལ། བསྐོར་བ་དངོས་མ་ཡེངས་པར་སྙིང་པོ་དེ་ཟློས་ཤིང་བསྐོར་ཏེ། དངུལ་བྱུང་ན་བཞག་ལ་མཇུག་འཕྲོ་གཅོད་ཀར་སྤྱན་དྲངས་པ་རྣམས་འགྲོ་དོན་ལ་གཤེགས་སུ་གསོལ། སྐྱེད་པ་དེ་རང་ལ་བསྡུས་ཏེ་མཆོད་རྟེན་ནམ་ཚ་ཚའམ། གླེགས་བམ་ཡིན་ན་དེ་ཉིད་དུ་གྱུར་ནས་གཞག་གོ །བཟའ་བ་ལ་གསུམ་སྟེ། སྦྱོར་བ་ལ་ལྔ། གང་དང་གང་གིས་གང་འཚོ་བ། །འཚོ་བ་དག་པ་དེ་བཙལ་ལ། །བཀྲེས་དང་སྐོམ་སོགས་ཞི་བྱའི་ཕྱིར། །སྨན་བཞིན་དུ་ནི་བསམ་པར་བྱ། །ཞེས་པས་ཅི་ཙམ་དགོས་པ་གཡོ་སྒྱུས་མ་བཙལ་ཞིང༌། ལུས་གསོ་བར་བྱེད་པའི་ཕྱིར་དགོས་པ་དང༌། དེ་ལ་གཏོར་མ་གཏང་བ་ནི་སྣོད་གཙང་མར་ཟན་དང༌། ཚོད་མ་དང་སྤགས་པ་ཅི་ཡོད་ལས་གཅོད་དེ་ཆུས་བཀང་ལ་མདུན་དྲང་པོར་སྟེགས་ལ་བཞག་ལ་རང་ཡི་དམ་གྱི་ལྷར་གསལ་བས་ཨོཾ་ཨཱཿཧཱུ༵་བརྗོད་ཅིང་ཧཱུ༵་གིས་སྟོང་བར་བྱ། ཨཱཿའི་འོད་ཀྱིས་བདུད་རྩིར་གྱུར། ཨོཾ་གྱི་འོད་ཀྱིས་ཡེ་ཤེས་ཀྱི་བདུད་རྩིར་གྱུར་ནས་མགྲོན་བཀུག་སྟེ། ཨོཾ་ཨཱ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱ་ཏ་ཨོཾ་ཨཱཿཧཱུ༵་ཕཌ་སྭཱཧཱ། ཞེས་ལན་གཉིས་བརྗོད་ལ་གཏང༌། སྨོན་
ལམ་གདབ་པ་དང༌། ཨོཾ་སརྦ་བུདྡྷ་བོ་དྷི་ས་ཏྭ་བྷྱཿ་བཛྲ་ནཻ་བི་དྱེ་ཧཱུ༵། ཞེས་བརྗོད་ལ་ལྷ་བཤོས་དབུལ། ཨོཾ་ཧ་རི་ཏེ་པཉྩ་ག་ཏ་པུ་མཧཱ་ཡཀྵ་ནི་ཧ་ར་ཧ་ར་སརྦ་པཱ་པཾ་སརྦ་ཨ་སི་ནི་ཨ་ཏི་པཎྜི་ཀྲིཾ་སྭཱཧཱ། ཞེས་བརྗོད་ལ། འཕྲོག་མ་ལ་ཆང་བུ་སྤྱིན་པ་དང༌། ཨོཾ་ཨ་གྲ་པཎྜྀ་ཨ་སི་བྷྱཿསྭཱ་ཧཱ། ཞེས་བརྗོད་ལ་ཕུད་ཀྱི་ཆང་བུ་སྦྱིན་ནོ། །བཟའ་བ་དངོས། ཨོཾ་ཨཱཿཧཱུ༵་བརྗོད་པས་དུག་ཐམས་ཅད་དང་བྲལ་ཏེ་བདུད་རྩིར་བསམ། གཡས་པའི་སྲིན་ལག་གིས་རེག་པས་དུག་ཐམས་ཅད་ཞི་བར་བསམ། དེ་ནས་ཅི་རིགས་པར་བཟའོ། །ཨོཾ་ཨུ་ཙིཥྚ་པཎྜི་ཨ་སི་བྷྱཿསྭཱཧཱ། ཞེས་པས་ལྷག་མ་བཅང་ལ་སྦྱིན་ནོ། །གཞན་ལྷག་མེད་པར་བཅང་ངོ༌། །མཇུག་ལ་གཉིས་ཏེ། ཡོན་ཏན་ཟླ་བ་གྲགས་པའི་མདོ་ནས། གཏོར་མ་གཏང་ཞིང་བཤོས་གཙང་ཕུལ། །འཕྲོག་མ་ཕུད་ཀྱི་ཆང་བུ་དང༌། །ལྔ་པ་ལྷག་མའི་ཆང་བུ་ཡིས། །འབྲས་བུ་ལོངས་སྤྱོད་ཆེན་པོར་འགྱུར། །ཞེས་བསྟན་པ་དང། བདག་ལ་ལན་ཆགས་མི་འོང་བར་བྱ་བའི་ཕྱིར་ཁ་བཤལ་ཏེ། གང་གིས་སྦྱིན་དང་གང་ལ་སྦྱིན། །སྦྱིན་པ་ཇི་ལྟར་མི་དམིགས་པ། །སྦྱིན་པ་དུས་གསུམ་མཉམ་པ་ཡིས། །སྦྱིན་བདག་དེ་ལ་ཡོངས་རྫོགས་ཤོག །ཅེས་སྨོན་ལམ་གདབ་པོ། །དེ་ཡང་སངས་རྒྱས་ལ་སྒྱུ་མ་མཁན་བཟང་པོས་ཆོས་སྟོན་དྲངས་ལ་སངས་རྒྱས་སྐྱེངས་པར་བྱ་བར་འདོད་པ་ལ། སངས་རྒྱས་ཀྱིས་བྱིན་གྱིས་བརླབས་ཏེ། དངོས་སུ་འཁོར་གསུམ་སྦྱིན་བདག་ཟས་ལེན་པ་པོ་གསུམ་སྒྱུ་མ་དང་འདྲ་སྟེ། སྒྱུ་མའི་ནུས་པ་ཡོད་པས་སྨོན་པའོ། །ཚ་ཚ་ལ་ཡང་གསུམ་སྟེ། སྦྱོར་བ་ནི་དང་པོ་ས་དད། ཆུ་དང༌། མེ་ཏོག་དང༌། དྲི་དག་སྦྱར་ལ། ཇི་ཙམ་འདེབས་པའི་འདག་པ་དྲིས་བཏབ་ལ། མདུན་དུ་ཁྲི་ལ་གཞག་སྟེ། རང་ཡི་དམ་གྱི་ལྷར་མོས་པས་ཨོཾ་ཨཱཿཧཱུ༵། བརྗོད་པས་སྟོང་པར་གྱུར། དེ་ལས་བྷྲཱུཾ་སེར་པོ། དེ་ལས་འཁོར་ལོར་གྱུར། འཁོར་ལོའི་ལྟེ་བ་ལ་ཨ་ལས་ཟླ་བ། ཟླ་བའི་སྟེང་ན་ཨོཾ་ཡོད་པ་དེའི་འོད་ཀྱིས་སྣང་ཁྱབ་སྟེ། སངས་རྒྱས་ཐམས་ཅད་ཀྱི་ཐུགས་དམ་བསྐུལ། སེམས་ཅན་གྱི་སྒྲིབ་པ་སྦྱངས་ཏེ་སླར་འདུས་ནས་ཨོཾ་ཤིན་ཏུ་གསལ་བ་ལས་རྣམ་པར་སྣང་མཛད་བྱང་ཆུབ་མཆོག་གི་ཕྱག་རྒྱ་ཅན། འཁོར་ལོ་དང་ཟླ་བའི་གདན་ལ་སྐྱིལ་ཀྲུང་གིས་བཞུགས་པ། རིན་པོ་ཆེའི་
རྒྱན་གྱིས་བརྒྱན་པ་བསྐྱེད་དེ་གསལ་བ་དང༌། དེའི་ཐུགས་ཀའི་པདྨ་དང་ཟླ་བའི་སྟེང་ན་ཨོཾ་ལས་འོད་ཟེར་འཕྲོས་པས་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་བཀུག་སྟེ་མདུན་གྱི་ནམ་མཁར་བཞུགས་པ་ལ་ཡོན་ཆབ་ལ་སོགས་པས་མཆོད་ནས་བསྐྱེད་པ་དང༌། གཉིས་མེད་དུ་ཞུ་ནས། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོ་བདུད་རྩིའི་ངོ་བོ་དཀར་བ་འོད་དང་བཅས་པ་གྱུར་བར་བསམ་མོ། །དེ་ནས་ན་མོ་བྷ་ག་བ་ཏེ། བཻ་རོ་ཙ་ན་བྲ་བྷ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱ་ཀྶཾ་བུདྡྷཱ་ཡ། ཏདྱ་ཐཱ། ཨོཾ་སུ་ཀྵྨཻ་སུ་ཀྵྨཻ། སེམས་མ་ཡེ། ཤཱནྟེ། དཱནྟེ། ས་མོ་བེ། ཨ་ན་ལཾ་བྷེ། ཏ་རཾ་བྷེ། ཡ་ཤོ་བ་ཏི། མ་ཧཱ་ཏེ་ཛེ། ནིར་ཀུ་ལེ། ནིརྦཱ་ཎི། སརྦ་ཏ་ཐཱ་ག་ཧྲྀ་ད་ཡ། ཨ་དྷིཥྛཱ་ན། ཨ་དྷིཥྛ་ཏེ་སྭཱཧཱ། ཞེས་ཉི་ཤུ་རྩ་གཅིག་པ་བཟླས་ལ་གདབ་སྟེ། ལག་པས་ལེན་ཙ་ན་འོད་ཀྱི་གོང་བུ་ཨོཾ་དང་ལྡན་པ་བླངས་ཏེ་སྐུ་པར་དུ་བཅུག་ལ། གོང་གི་སྔགས་ཀྱིས་བཏབ་ལ་རྣམ་པར་སྣང་མཛད་དུ་འབྱུང་ངོ༌། །མཇུག །ཨོཾ་ཡེ་དྷརྨཱ་ཧེ་ཏུ་པྲ་བྷཱ་བ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་བཾ་བཱ་དཱི་མཧཱ་ཤྲ་མ་ཎ་ཡེ་སྭཱཧཱ། ཞེས་ལན་བདུན་བརྗོད་པས་རབ་གནས་སུ་འགྱུར་རོ། །མེ་ཏོག་ལ་བཟླས་ཏེ་ཚ་ཚ་ལ་གཏོར་བས་སྐད་ཅིག་ལ་རྣམ་པར་སྣང་མཛད་གྲངས་མེད་དུ་གྱུར། དེའི་འོད་ཀྱིས་ཕྱོགས་བཅུའི་སངས་རྒྱས་ཐམས་ཅད་བཀུག་སྟེ་སྔོན་བཞིན་དངོས་སམ་བློས་མཆོད་ནས་ཚ་ཚར་གྱུར་པའོ། །གཅིག་བྱས་པས་བྱེ་བ་སྙེད་ཀྱི་བསོད་ནམས་འཐོབ་པོ། །ངལ་བ་གསོ་བ་ལ་གསུམ་སྟེ། སྦྱོར་བ་ལུས་དལ་བར་བསྡད། །དངོས་ཆོས་སྤྱོད་པའི་རྒྱལ་པོ་དང༌། ཁྱིམ་བདག་དང༌། མཁན་པོ་དང༌། སློབ་དཔོན་གྱི་ཆེ་བ་བརྗོད་པ་དང༌། དེ་དག་དྲན་པར་བྱ། དགེ་བ་བྱས་པའི་ཡོན་ཏན་དྲན་པར་བྱ། མཇུག་རྒྱུ་འབྲས་ཐེག་པ་ཆེན་པོའི་མདོ་བལྟའོ། །ཕྱི་དྲོ་འཐུན་ལ་གསུམ་སྟེ། གོང་བཞིན་དུ་ཐུན་གླེགས་བམ་ཀླག་པ་དང༌། བསྐོར་བ་བྱ་བ་དང༌། གཙུག་ཏོར་ལ་སོགས་པའི་མདོ་གདོན་པའོ། །སྲོད་ཀྱི་ཐུན་ལ་ལྔ་སྟེ། གོང་བཞིན་དུ་ཁྲུས་བྱ་བ་དང༌། གཏོར་མ་གཏང་བ་དང༌། མཎྜལ་དང་མཆོད་པ་དབུལ་བ་དང༌། བསམ་གཏན་བྱ་བ་དང་ཉལ་པའོ། །ཉལ་བ་ལ་གསུམ་སྟེ། སྦྱོར་བ་ཁམས་དང་སྦྱར་ལ་བསམ་གཏན་བསྡུ་བ་
དང། གློ་གཡས་ཕབ་ལ་ཉལ་བ་དངོས་དང་ནང་པར་སྔ་བར་ལྡང་སེམས་ཀྱིས་གཉིད་ཀྱི་བསམ་གཏན་ལ་འཇུག་པའོ། །བྱེ་བྲག་པའི་ལྟ་བ་ལ་ཡང་གཉིས་ཏེ། ནུབ་ཕྱོགས་བྱེ་བྲག་ཏུ་སྨྲ་བའི་ཉན་ཐོས་ཐ་མ་དང༌། འབྲིང་གཉིས་ཀྱི་ལྟབ་ཆོས་ཀྱི་བདག་དང༌། གང་ཟག་གཉིས་སུ་འདོད་དེ། ཆོས་ཀྱི་བདག་ཕྱིའི་ཡུལ་དཀར་དམར། སྙན་མི་སྙན། ཞིམ་མི་ཞིམ། ཁ་མངར། འཇམ་རྩུབ་སྣ་ཚོགས་སུ་སྣང་བ་འདི་རྡུལ་ཕྲ་རབ་འདུས་པའི་ངོ་བོ་གཡག་རྔ་དང་ནེ་གསིང་ལྟར་འདོད་ཅིང༌། དགེ་སྡིག་གི་རྒྱུ་འབྲས་ཀྱང་ཡུལ་ཅན་རྗེས་སུ་འདོད་ལ། དེ་ཡང་རྐྱེན་གྱིས་མི་རྟག་སྐད་ཅིག་མས་རྟག་པར་སྣང་སྟེ། བུམ་པ་ལ་སོགས་པ་དབྱུག་པས་འཇིག་པར་དངོས་སུ་སྣང་བ་དང༌། སྡོམ་རྫས་ཅན་ཡུལ་ཅན་ཡིན་པས་ཉམས་ན་རྫ་ཆག་པ་དང་འདྲ་བ་དང༌། ཇི་སྲིད་འཚོའི་བར་དུ་ཡོད་པ་དང༌། ཕྱི་མར་འཕྲོ་འདོད་པ་དང༌། སྡིག་པ་ཡང་དེ་བཞིན་དུ་འདོད་པའོ། །གང་ཟག་གི་བདག་ཕུང་པོ་གསུམ་པར་འདོད་དེ། བདག་བཙལ་བས་མགོ་ནས་རྐང་པའི་བར་དུ་མེད་ལ། བདེ་སྡུག་ཉམས་སུ་མྱོང་བས་ཡོད་པ་ཡང་མིན་མེད་པ་ཡང་མིན་པར་འདོད་པའོ། །བསྒོམ་པ་ལ་གསུམ་སྟེ། བསྒོམ་པའི་སྐྱོན་དང༌། བསྒོམ་པའི་ཐབས་དང༌། བསྒོམས་པའི་འབྲས་བུའོ། །སྐྱོན་ནི་འཁོར་བར་སྡུག་བསྔལ་བའོ། །དེ་ཡང་བདག་ཏུ་མཐོང་བས་འགྲོ་བ་བཟང་མོ་ལ་ཆགས་པ་ཉེས་སོ། །བསྒོམ་ཐབས་བདག་ཞི་བར་མགོ་ནས་རྐང་པའི་བར་བདག་མེད་པར་མི་གཙང་བར་མཐོང༌། བསྒོམས་པས་འབྲས་བུ་སེམས་དེ་ཞི་ནས་དགྲ་བཅོམ་པར་འདོད་པའོ། །སྐྱོན་རྟག་པ་དང་ཆད་པར་ཕྱི་ནང་འདོད་པ་དང༌། ལུས་གཙང་བ་དང་ཉོན་མོངས་པ་ལ་ཆགས་ནའོ། །ཉན་ཐོས་འབྲིང་གི་བསྒོམ་པ་ལ་ཡང་གསུམ་སྟེ། མ་བསྒོམས་པར་རྟོགས་པས་འཁོར་སྡུག་བསྔལ་ལོ། །དེ་ཡང་རླུང་ཕྱིར་ཤོར་བས་རྟོག་པ་འབྱུང་བས་བདག་ཏུ་བརྟགས་པས་ཉོན་མོངས་པ་ལ་ཆགས་པས་ཉེས་ཐབས་རླུང་འཛིན་པ་སྟེ་གསུམ། བགྲང་རླུང་གཅིག་ནས་བཅུ་དང་བརྒྱ་དང༌། སྟོང་ཁྲི་འབུམ་གྱི་བར་དུ་བགྲངས་ཏེ། ཞེ་སྡང་ལ་སོགས་པའི་ཉེས་པ་དག་པར་འདོད། བསྡམས་ནས་རེ་རེ་བགྲངས་པས་བདག་ཕུང་པོ་གསུམ་པར་འདོད་པ་དང༌། ཁ་དོག་ལ་སློབ་པ་དང༌། དཀར་སྔོ་འདྲ་བར་ཕྱིར་
འབྱུང་ནང་དུ་འོང་བ་གཉིས་དྲག་ཞན་བློའི་གནས་བཟང་ནས་འབྲས་བུ་ལྷག་བཅས་ལྷག་མེད་དེ་ལས་འབྱུང་བར་འདོད་དོ། །དབྱིབས་ལ་སློབ་པ་རྡོ་རྗེ་རྩེ་གཅིག་པ་དང༌། གསུམ་པ་དང༌། པདྨ་དང༌། ཨུཏྤ་ལ་ལྟར་སློབ་སྟེ། རྩེ་གཅིག་པ་སྣའི་རྩེ་མོ་ནས་སོར་བཞི་ནས། དཔག་ཚད་ཙམ་དུ་ཕྱིར་བསྲིང་ཞིང༌། སྣའི་ཚང་ཚིང་ནས་ལྟེ་བར་བསྐྱིལ་བའོ། །རྩེ་གསུམ་པ་ཕར་ལ་སྔ་སྒོ་གཉིས་ནས་སྤྲོ་བ་ཚུར་ལ་སྣ་རྩེར་བསྡུས་ཏེ་གོང་བཞིན་བསྲིང༌། པདྨ་དང༌། ཨུཏྤ་ལ་སྣ་རྩེ་ནས་འཕྲོ་ལ་ཕར་ལ་ཡུལ་གང་བ་དང༌། ནང་དུ་བུམ་པར་བཀང་བས་ལྷག་བཅས་ལྷག་མེད་ཀྱི་འབྲས་བུ་འབྱུང་བར་འདོད་པའོ། །སྐྱོན་མི་གཙང་བ་སྒོམ་པ་དང༌། བུམ་པ་ལྟར་འགགས་ནས་སེམས་མེད་པའོ། །ཉན་ཐོས་རབ་དང་རང་སངས་རྒྱས། ཁ་ཆེ་བྱེ་བྲག་ཏུ་སྨྲ་བ་སྟེ། ཆོས་ཀྱི་བདག་ཐ་མ་དང་མཐུན་ནོ། །གང་ཟག་གི་བདག་མེད་པར་འདོད་པའོ། །དེས་བསྒོམ་པ་ཡང་བདེན་བཞི་བསྒོམ། དེ་ཡང་ལས་ཀྱི་འབྱུང་པའི་མདོ་ལས། སྡུག་བསྔལ་འདི་བརྒྱད་ཕུང་པོ་ལ། །ཕུང་པོར་ཆགས་པས་དུག་ལྔ་ཡིན། །ཞེས་པས་རྒྱུ་ཀུན་དུ་གེ་ལྔ་སྤོང་བ་དང༌། འབྲས་བུ་སྡུག་བསྔལ་ལུས་ལ་གནོད་པར་ཤེས་པས་ལས་ལ་མི་ཆགས་ཤིང་བདག་མེད་པ་དང༌། ཡེ་ཤེས་དང་བྱམས་པ་དང་མི་གཙང་བ་དང༌། བདག་མེད་དུ་ལྷག་གིས་མཐོང་ལ། བདག་མེད་པའི་སྟོང་པ་དེ་བསྒོམ་པའོ། །དེ་ཡང་གོང་གི་ལུས་ངག་ཡིད་ཀྱི་དགེ་བ་དང་བསྡོམས་པས་སྔོན་གྱི་སྒྲིབ་པ་བདག་ལ་བདག་མེད་པ་སྟོང་པ་ལ་བཞག་པས་དགྲ་བཅོམ་པ་ཐོབ་པའོ། །སྐྱོན་གང་ཟག་གི་བདག་འདོད་པ་སྤང་བའོ། །ཐེག་པ་ཆེན་པོའི་སྡོམ་པ་ལ་གཉིས་ཏེ། བྱང་ཆུབ་སེམས་དཔའི་སྡོམ་པ་དང༌། །སྔགས་ཀྱི་དམ་ཚིག་གཉིས་སོ། །བྱང་ཆུབ་སེམས་དཔའི་སྡོམ་པ་ལ་བཞི་སྟེ། སྤྱོད་ལམ་དང༌། ལྟ་བ་དང༌། བསྒོམ་པ་དང་སྐྱོན་ནོ། །སྤྱོད་ལམ་ལ་གཉིས་ཏེ་རྟེན་དང་སྤྱོད་ལམ་དངོས་སོ། །རྟེན་ལ་ལྔ་སྟེ། མདོ་སྡེ་བ་དང༌། རྣམ་བཅས་པ་དང༌། རྣམ་མེད་པ་དང༌། སྒྱུ་མ་ལྟ་བུ་དང༌། རབ་ཏུ་མི་གནས་པའོ། །སྤྱོད་ལམ་དངོས་ལ་གསུམ་སྟེ། སྦྱོར་བ་དང༌། དངོས་དང་མཇུག་གོ །དེ་ཡང་སྤྱོད་ལམ་ཁྱད་པར་མེད་པར་དུས་གསུམ་དུ་ལྔ་
ཆར་འདོད་ལ་ལྟ་བ་ལ་ཁྱད་ཡོད་དེ། སྦྱོར་དངོས་མཇུག་གསུམ་མདོ་སྡེ་པས་རྟེན་འབྲེལ་དུ་འདོད་ལ། རྣམ་བཅས་སེམས་ཀྱི་རྣམ་པར་འདོད། །རྣམ་མེད་པས་བཟང་རྟོག་ཏུ་འདོད་ལ། སྒྱུ་མ་ལྟ་བུས་སྒྱུ་མ་ལྟ་བུར་འདོད། རབ་ཏུ་མི་གནས་པས་ཀུན་རྫོབ་བ་ཡིན་གྱི་དོན་དམ་མ་ཡིན་ཏེ་རྨི་ལམ་ལྟ་བུ་མི་བདེན་པར་སྣང་བར་འདོད་དེ། དོན་དམ་ལ་ཁས་ལེན་མེད་པའོ། །གཞན་དོན་དམ་དུ་འདོད་པའོ། །སྤྱོད་ལམ་དངོས་ཀྱི་སྦྱོར་བ་ལ་དགུ་སྟེ། མཆོད་པ་དང༌། བསྟོད་པ་དང༌། ཕྱག་འཚལ་བ་དང༌། སྐྱབས་སུ་འགྲོ་བ་དང༌། སྡིག་པ་བཤགས་པ་དང༌། ཡི་རང་བ་དང༌། བསྐུལ་བ་དང༌། གསོལ་བ་གདབ་པ་དང༌། བསྔོ་བའོ། །དེ་ཡང༌། མཆོད་དང་བསྟོད་དང་ཕྱག་འཚལ་དང༌། །སྐྱབས་དང་སྡིག་བཤགས་ཡི་རང་དང༌། །བསྐུལ་དང་གསོལ་བ་གདབ་པ་དང༌། །བསྔོ་དང་དགུ་བོ་སྦྱོར་བར་བསྟན། །ཞེས་དྲི་མ་མེད་པའི་མདོ་ནས་བསྟན་ཏོ། །མཆོད་པ་ལ་གསུམ་སྟེ་གནས་དང༌། རྟེན་དང་མཆོད་པ་དངོས་སོ། །གནས་རང་བྱུང་དང༌། བྱིན་གྱིས་བརླབས་པ་ལྷ་ཁང་ལ་སོགས་པ་ཉམས་དགའ་བར་རྟེན་བྱང་ཆུབ་ཆེན་པོ་དང༌། བྱང་ཆུབ་སེམས་དཔའ་དང༌། མཁན་པོ་ལ་མཆོད་པར་བྱའོ། །མཆོད་པ་དངོས་ལ་གཉིས་ཏེ། མཆོད་པར་བྱ་བ་དང༌། མཆོད་པར་བྱེད་པའོ། །མཆོད་པ་བྱ་བ་ལ་རྟེན་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་མཆོད་པའོ། །མཆོད་བྱེད་པ་དག་དགོས་པ་དེ་རྣམས་མཉེས་པ། དེ་ལ་དགོས་པ་མཆོད་པ་ཡིན། དེའི་དགོས་པ་བདག་གཞན་དོན་གྲུབ་པའོ། །མཆོད་པ་དང་ཡོན་འབྱོར་ན་དངོས། མ་འབྱོར་ན་བསྐལ་བཟང་ལྟར་མེ་ཏོག་སྤོར་གང་ལ་བརྟེན་ཏེ་སློབ་དཔོན་དང༌། ཡིད་ཀྱིས་གཞན་ན་ཡོད་པའི་དངོས་པོ་ལུས་སེམས་སུ་བཅས་པ་དབུལ་ཏེ། མཆོད་པ་རྣམ་པ་བདུན་གྱིས་མཆོད་དེ། ཆུ་གཙང་གིས་སྐུ་བསིལ་ཞིང་རས་བཟངས་ཀྱིས་སྐུ་བྱི་དོར་བྱ་བ་དང༌། མེ་ཏོག་མནྡཱ་ར་ལ་སོགས་པའི་ཕྲེང་བ་དང༌། སིལ་སྙེན་གྱིས་མཆོད་པ་དང༌། ཙནྡན་དང༌། ཨ་ག་རུ་དང༌། ག་བུར་དང༌། གླ་རྩི་དང༌། རྒྱ་སྤོས་ལ་སོགས་པའི་དུད་པས་མཆོད་པ་དང༌། རིན་པོ་ཆེ་འབར་བ་དང༌། མར་མེའི་ཕྲེང་བ་གཅིག་གམ། བཅུའམ་བརྒྱ་སྟོང་དབུལ་བ་དང༌། ཙནྡན་ལ་
སོགས་པའི་དྲིའི་བྱུག་པ་བྱ་བ་དང༌། འབྲས་ཆན་དང༌། སྲན་ཆན་དང༌། གྲོ་ཆན་དང༌། ནས་ཆན་དང༌། ཞོ་དང༌། མར་དང༌། ཤ་སྐམ་དང༌། ཉ་སྐམ་དང༌། ཉ་བཙོས་པ་དང༌། ན་རི་ཀེ་ལ་དང༌། ཨ་མྲ་དང༌། བིལ་བ་དང༌། ཉོ་ཏི་ལ་སོགས་པའི་འབྲས་བུ་དང༌། གྲོ་མ་དང༌། ཉུངས་མ་དང༌། ལ་ཕུག་དང༌། བེ་ལ་ཤལ་སོགས་པའི་རྩ་བ་དང༌། ཁུར་བ་དང་ལ་དུ་ལ་སོགས་པས་མཆོད་པ་དང༌། དུང་ལ་སོགས་པ་སིལ་སྙན་དང་དབྱངས་ཀྱི་རིམ་པས་མཆོད་པའོ། །ཡོན་ལ་རིན་པོ་ཆེ་སྣ་བདུན་དང༌། བཀྲ་ཤིས་ཀྱི་རྫས་བརྒྱད་དང༌། ཆུ་མིག་དང༌། ནགས་ཚལ་དང༌། སྐྱེད་མོས་ཚལ་དང༌། སྤང་ལྗོངས་དང༌། མཚོ་དང༌། ལྟེང་ཀ་ལ་སོགས་པ་གཟུགས་སྒྲའི་བྱེ་བྲག་ཇི་སྙེད་པ་བློ་དང་དངོས་སུ་འབྱོར་བ་དབུལ་ལོ། །འབྲེལ་བ་ནམ་མཁའི་སྙིང་པོའི་མདོ་ནས། སེམས་གཉིས་བསྐྱེད་ནས་སངས་རྒྱས་མཆོད། །མཆོད་པ་ཡོན་དང་བཅས་པ་ཡིས། །རྒྱལ་དང་དེ་ཡི་སྲས་མཉེས་ནས། །འགྲོ་བའི་དོན་ལ་རེག་པར་འགྱུར། །ཞེས་བྱའོ། །བསྟོད་པ་ཡང་རྟེན་གོང་ལྟར་བསྟོད་བྱེད་དང༌། དགོས་པ་མཉེས་པ་དང་དེ་ལ་དགོས་པ། ཕྱོགས་དུས་ཀུན་གྱི་སངས་རྒྱས་སྲས། །གང་དག་འཇིག་རྟེན་ཁམས་བཞུགས་པའི། །འགྲོ་བ་འདྲེན་པར་གང་བཞུགས་པ། །སྐུ་ཡི་མཚན་ལྡན་རྣམས་ལ་བསྟོད། །བྱམས་པའི་ཐུགས་ལྡན་རྣམས་ལ་བསྟོད། །ཅེས་ཐེག་པ་ཆེན་པོའི་མདོ་ནས་སངས་རྒྱས་དང༌། བྱང་ཆུབ་སེམས་དཔའ་ལ་བསྟོད་པ་ཉིད་ཀྱིས་བསྟོད་དོ། །འབྲེལ་བས་ཀུན་ནས་བརྗོད་པས་སོ། །ཕྱག་འཚལ་བ་ལ་ཡང་གོང་ལྟར་དྲུག་གིས་ཐེག་པ་ཆེན་པོ་ནས་ཕྱག་འཚལ་བ་གསུམ་མམ། བདུན་ནས་སྟོང་དང་ཁྲིའི་བར་དུ་འཚལ་བའོ། །སྐྱབས་དངོས་དང་དབྱེ་བ་གཉིས་ལས། དངོས་ལ་གསུམ། སྐྱབས་སྔོན་གྱི་སྦྱོར་བ་རྣམས་ཤེས་ནས། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས་སྙིང་པོ་བྱང་ཆུབ་ལ་མཆིས་ཀྱི་བར་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །ཞི་བ་འདོད་ཆགས་དང་བྲལ་བ་ཆེན་པོའི་ཆོས་ལ་སྐྱབས་སུ་མཆིའོ། །ཀུན་ལ་སྐྱོབ་པར་མཛད་པའི་འཕགས་པ་ཕྱིར་མི་ལྡོག་པའི་
བྱང་ཆུབ་སེམས་དཔའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ལན་གསུམ་བརྗོད་དོ། །དབྱེ་བ་ལ་བརྒྱད། དབང་པོ་དང༌། རྟེན་སྐྱབས་སུ་མཆི་བ་ཉན་ཐོས་ལྟར། བདུན་ལ་གཞན་འདྲ་སྟེ། ཡིད་ཐེག་པ་ཆེན་པོའི་ཆོས་དང་གཞན་དག་ལ་དད་པའོ། །སྦྱོར་བ་ལུས་ངག་ཡིད་གོང་ལྟར་དང༌། གཞན། སྐྱབས། སེམས་རྟེན་དང༌། སངས་རྒྱས་སྤྲུལ་སྐུར་ཤེས་པ། ཆོས་ཤེས་རབ་ཀྱི་ཕ་རལ་ཏུ་ཕྱིན་པ་དང༌། དགེ་འདུན་འཇམ་དཔལ་ལ་སོགས་པར་ཤེས་པར་བྱའོ། །མཆོད་པ་ནི་གོང་གིའོ། །དུས་མཐའ་ཐུག་པ་མེད་པའམ། བྱང་ཆུབ་བར་དུའོ། །ཡོན་ཏན་འཁོར་བ་ལས་ཐར་པ་དང༌། གཞན་དོན་ནུས་པའོ། །སྤྱོད་པ་ལ་འཇུག་པ་ནས་ཁྱེད་ཀྱི་ཐུགས་རྗེས་སུ་བཟུང་བས་ན། སྲིད་ལ་མི་འཇིགས་སེམས་ཅན་ཕན་པ་བགྱི། །ཞེས་པས་སོ། །མི་ཉམས་པ་བྱ་བ་ལ་གོང་མའི་འཇིག་རྟེན་གྱི་སྤངས་པའི་སྟེང་དུ་གཞན་དོན་བྱ་བ་དང༌། སྲོག་གཅོད་པ་སྤངས་ནས་གཞན་ལ་མི་འཚེ་བ་དང༌། མུ་སྟེགས་དང་ཉན་ཐོས་དང་རང་སངས་རྒྱས་མི་འགྲོགས་པའོ། །སྡིག་པ་བཤགས་པ་རྟེན་དང༌། མཁན་པོ་སྤྱན་སྔར། བདག་མིང་འདི་ཞེས་བྱ་བ་ཡིས། །ཐོག་མེད་དུས་ནས་འཁོར་བར་འཁོར། །ཤིན་ཏུ་མ་རིག་སྡིག་པའི་ལས། །སྣ་ཚོགས་བགྱིས་དང་བགྱིད་དུ་སྩལ། །རྗེས་སུ་ཡི་རང་བགྱིས་པ་བཤགས། །ཞེས་པ་དང༌། མདོ་གཞན་ནས་བསྟན་པ་ལྟར་བཤགས་སོ། །ཡི་རང་བའི་རིམ་པ་མདོ་གཞན་ལྟར་ཡང་བྱ། འཇིག་རྟེན་འདི་དང་གཞན་དག་ན། །སྐྱེ་བོ་རྣམས་ཀྱིས་དགེ་སྤྱད་དང༌། །དེ་ཡི་སྟོབས་ཀྱིས་བདེ་འགྱུར་ལའང༌། །བདག་ནི་ཤིན་ཏུ་ཡི་རང་ངོ༌། །ཉན་ཐོས་རང་རྒྱལ་དགེ་བ་དང༌། །བྱང་ཆུབ་སེམས་དཔའི་སྤྱོད་པ་ལའང༌། །ངེས་པར་དི་རིང་ཡི་རང་ངོ༌། །སངས་རྒྱས་མཛད་པ་གང་བྱུང་དང༌། །སེམས་ཅན་བདེ་ལ་ཡི་རང་ངོ༌། །བསྐུལ་བ། སངས་རྒྱས་རྣམས་དང་བྱང་ཆུབ་སེམས། །དེ་དག་ཚོགས་ལ་བདག་བསྐུལ་ན། །སེམས་ཅན་རང་དགར་མི་གཏོང་བར། །ཆོས་ཀྱིས་རྒྱུད་འབྱོངས་འཁོར་ལོ་བསྐོར། །གསོལ་བ་གདབ་པ། ཕྱོགས་བཅུའི་སངས་རྒྱས་ཐམས་ཅད་དང༌། །བྱང་ཆུབ་སེམས་དཔའ་འདོན་མཛད་ལ། །སེམས་ཅན་བདེ་ལ་མ་བཀོད་པར། །མྱ་ངན་མི་འདའ་བཞུགས་པར་གསོལ། །དེ་རྣམས་ཀྱི་དགེ་བ་བསྔོ་བ། །བདག་
གིས་དེ་ལྟར་དགེ་སྤྱད་པས། །ནམ་མཁའ་ཁྱབ་པའི་སེམས་ཅན་རྣམས། །དགེ་བ་འདི་ཡི་བྱིན་རླབས་ཀྱིས། །ཕ་རོལ་ཕྱིན་དྲུག་མཐར་ཕྱིན་ནས། །ཐམས་ཅད་བྱང་ཆུབ་ཆེན་པོར་ཤོག །གལ་ཏེ་བྱང་ཆུབ་མ་ཐོབ་པར། །ཐེག་ཆེན་ཆོས་ལ་སྤྱོད་པ་དང༌། །འགྲོ་དོན་མི་འདོར་འཁོར་བ་ལས། །འགྲོ་རྣམས་མྱུར་དུ་སྒྲོལ་བ་ཤོག །མདོ་གཞན་ལྟར་ཡང་གདབ་བོ། །དངོས་ལ་གཉིས་ཏེ། སྨོན་པ་དང་འཇུག་པའོ། །སྨོན་པ་ནི་སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས་སྙིང་པོ་བྱང་ཆུབ་ལ་མཆིས་ཀྱི་བར་དུ་སྔོན་གྱི་སངས་རྒྱས་བཅོམ་ལྡན་འདས་རྣམས་དང་བྱང་ཆུབ་སེམས་དཔའ་རྣམས་ཀྱི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་པོ། །སྔོན་གྱི་སངས་རྒྱས་དང་བྱང་ཆུབ་སེམས་དཔའ་འགྲོ་བ་རྣམས་ལ་ཇི་ལྟར་ཕན་པ་དེ་ལྟར་བདག་ཀྱང་ཕན་པར་བགྱིད་དོ་ཞེས་ལན་གསུམ་བརྗོད་དོ། །དངོས་འཇུག་པ་ནི། སློབ་དཔོན་དགོངས་སུ་གསོལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ཀྱི་སྦྱིན་པ་ལས་བྱུང་བའི་དགེ་བ་དང༌། ཚུལ་ཁྲིམས་ལས་བྱུང་བའི་དགེ་བ་དང༌། བཟོད་པ་ལས་བྱུང་བའི་དགེ་བ་དང༌། བརྩོན་འགྲུས་ལས་བྱུང་བའི་དགེ་བ་དང༌། བསམ་གཏན་ལས་བྱུང་བའི་དགེ་བ་དང༌། ཤེས་རབ་ལས་བྱུང་བའི་དགེ་བའི་རྩ་བ་ཇི་སྙེད་ཅིག་ཡོད་པ་དེ་སྙེད་ཀྱིས་སེམས་ཅན་མ་གྲོལ་བ་ཐམས་ཅད་གྲོལ་བར་མཛད་པ་དང༌། མ་བསྒྲལ་བ་ཐམས་ཅད་བསྒྲལ་བར་མཛད་པ་དང༌། དབུགས་མ་ཕྱིན་པ་ཐམས་ཅད་དབུགས་ཕྱིན་པར་མཛད་པ་དང༌། མྱ་ངན་ལས་མ་འདས་པ་ཐམས་ཅད་མྱ་ངན་ལས་འདའ་བར་མཛད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་ནས། ནམ་སྙིང་པོ་བྱང་ཆུབ་ལ་མཆིས་ཀྱི་བར་དུ་བདག་གིས་སྦྱིན་པ་ལས་བྱུང་བའི་དགེ་བའི་རྩ་བ་དང༌། ཚུལ་ཁྲིམས་ལས་བྱུང་བའི་དགེ་བ་དང༌། བཟོད་པ་ལས་བྱུང་བའི་དགེ་བ་དང༌། བརྩོན་འགྲུས་ལས་བྱུང་བའི་དགེ་བ་དང༌། བསམ་གཏན་ལས་བྱུང་བའི་དགེ་བ་དང༌། ཤེས་རབ་ལས་བྱུང་བའི་དགེ་བ་ཇི་སྙེད་བགྱིད་པ་དེ་སྙེད་ཀྱིས་སེམས་ཅན་མ་གྲོལ་བ་
ཐམས་ཅད་དགྲོལ་བར་བགྱིའོ། །མ་རྒལ་བ་ཐམས་ཅད་བསྒྲལ་བར་བགྱིའོ། །དབུགས་མ་ཕྱིན་པ་ཐམས་ཅད་དབུགས་དབྱུང་བར་བགྱིའོ། །མྱ་ངན་ལས་འདས་པ་ཐམས་ཅད་མྱ་ངན་ལས་བཟླ་བར་བགྱིའོ་ཞེས་ལན་གསུམ་བརྗོད་པར་བྱའོ། །སློབ་དཔོན་དགོངས་སུ་གསོལ། །གལ་ཏེ་སྡོམ་པ་ལས་ཉམས་ན་སླར་གསོ་བས་གནང་དུ་གསོལ་ཞེས་ལན་གསུམ་བརྗོད་དོ། །མཇུག་གི་དོན་ཤེས་པར་བྱ་བ་ལ་གསུམ་སྟེ། དགོས་པ་ཤེས་པར་བྱ་བ་དང༌། ཐོབ་པར་ཤེས་པ་དང༌། མཇུག་མི་ཉམས་པའོ། །དགོས་པ་ལ་གཉིས་ཏེ། སྦྱོར་བ་དང་རྟེན་ནོ། །སྦྱོར་བ་ལ་མཆོད་པ་ལ་སོགས་བ་དགུ་ལས་སྐྱེ་བས་དགུ་དགོས་པར་ཤེས་པ་དང༌། རྟེན་གཞན་དང་བདག་ཉིད་ལས། གཞན་ལ་རྟེན་དབང་དང་པོ་གཉིས། དབང་པོ་སྡོམ་པ་ལ་གནས་པ་མཁས་པའི་སློབ་དཔོན་ལས་སྐྱེ་བར་ཤེས་པ་དང༌། ཡི་དམ་དང་དབང་པོ་ལས་སྐྱེ་བའོ། །རྟེན་བྱང་ཆུབ་ཆེན་པོ་ལ་སོགས་པའི་མཆོག་གསུམ་ལས་སྐྱེའོ། །བདག་ལས་སྐྱེ་བ་གང་གི་ཉན་ཐོས་ཀྱི་ལྟར་ཁྱད་པར་དུ་འཕགས་པ་དྲུག་དང༌། ཕན་སེམས་ཡོད་པ་ནུས་པ་དང་ལྡན་པ་ལས་སྐྱེ་བར་ཤེས་པར་བྱའོ། །ཐོབ་པར་ཤེས་པ་ལ་བཅུ་སྟེ། རྟེན་དང༌། དབང་པོ་དང༌། སེམས་ཅན་དང༌། སྡུག་བསྔལ་བ་དང༌། སྦྱོར་བ་དང༌། བླངས་པ་དངོས་དང༌། སེམས་ཅན་བྱང་ཆུབ་ལ་དགོད་པའི་བསམ་པ་དང༌། མི་ལྡོག་པའི་བསམ་པ་དང༌། བླངས་པའི་དུས་དེ་ཉིད་ནས་ཡིད་ཆེས་པས་ཐོབ་པའོ། །མི་ཉམས་པར་བྱ་བ་ལ་གསུམ་སྟེ། ཤེས་པར་བྱ་བ་དང༌། ཤེས་པས་སྤང་བ་དང། ཤེས་པས་བསྒྲུབ་པའོ། །ཤེས་པར་བྱ་བ་ལ་ལྔ་སྟེ། སྡོམ་པའི་ངོ་བོ་དང༌། རྟེན་གྱི་ཁྱད་པར་གྱིས་བསླབ་པའི་རིམ་པ་དང༌། དུས་དང༌། རིགས་དང༌། སྡོམ་པ་གསུམ་ལྡན་དུ་ཤེས་པར་བྱ་བའོ། །ངོ་བོ་སྨོན་འཇུག་གཉིས་ལས་སྨོན་པའི་ངོ་བོ་དང༌། གྲོགས་གཉིས་ཏེ། དེ་ཡང་ངོ་ཚ་ཤེས་པ་དང་ཁྲེལ་ཡོད་པས་ངོ་བོ་ཡང་དག་པར་བླངས་པའི་སེམས་པ་དགེ་བ་རྒྱུན་ཆགས་འབྲས་བུ་ལ་དམ་འཆའ་བའོ། །དེ་ཡང་དད་པ་དང༌། སྙིང་རྗེ་དང༌། འདོད་པ་དང༌། ཁས་བླང་པ་བཞི་ལས་དང་བའི་དད་པ་གཞན་དོན་གྱིས་བདག་གྲོལ་བར་ཤེས་པ་དང༌། བདེན་སྙམ་པ་དང༌། བདག་
ལ་སྙིང་རྗེ་སྐྱེས་པས་གཞན་དོན་ལ་མོས་པའོ། །མོས་པ་སྐྱེས་ནས་རྒྱུན་ས་བཅུ་མན་ཆད་དུ་ཡིན་དགོས་པས་སྨོན་པའི་དགེ་བའི་རྒྱུན་སེམས་ཅན་ལ་སངས་རྒྱས་ཀྱི་བྱ་བས་སྨོན་པ་སེམས་ཅན་སངས་རྒྱས་སུ་འདོད་ལ། ཁས་ལེན་དམ་འཆའ་བའོ། །གྲོགས་ལ་བདུན་ཏེ། འདུན་པ་ས་བདུན་འཇུག་པའི་གཞི་བྱེད་པ་དང༌། ལྷག་པའི་བསམ་པ་ཟླ་བ་ཚེས་པ་ལྟ་བུ་དགེ་བ་འཕེལ་བ་དང༌། སྦྱོར་བ་མེ་ལྟ་བུ་དངོས་པོ་ཐམས་ཅད་བསྲེག་པ་དང༌། བསམ་པ་བཟང་པོ་གསེར་ལྟ་བུ་སེམས་མི་ཉམས་པ་དང༌། སྐྱོབ་པ་མ་ལྟ་བུ་ཉེས་པས་མི་གོས་པ་དང༌། འབྲེལ་བ་རྒྱུ་འབྲས་ལྟ་བུ་ཐམས་ཅད་མཁྱེན་པ་འབྱུང་བ་དང༌། མྱུར་བ་ཐོག་ལྟ་བུ་ས་ལ་སྤྱོད་པའོ། །འཇུག་པའི་ངོ་བོ་དེ་ཡང་ངོ་ཚ་ཤེས་པ་དང༌། ཁྲེལ་ཡོད་པས་ཡང་དག་པར་བླངས་པའི་སེམས་པ་དགེ་བ་རྒྱུན་ཆགས་རྒྱུ་ལ་དམ་འཆའ་བའི་ངོ་བོ་སྟེ། དེ་ཡང་གོང་ལྟར་བཞི། ཡིད་ཆེས་པའི་དད་པ་སངས་རྒྱས་གཞན་དོན་ལས་འབྱུང་བས་གཞན་ལ་སྙིང་རྗེ་སྐྱེས་ཏེ། སངས་མ་རྒྱས་བར་དུ་འཕྲོ་མི་གཅོད་པ་དང༌། གཞན་དོན་བྱེད་པས་གཞན་དོན་ཁས་བླངས་པ་དང༌། བདག་གཞན་སངས་རྒྱས་པའི་རྒྱུ་སྡོམ་པའི་ཚུལ་ཁྲིམས་ཀྱི་རང་བཞིན་དང་བཅས་པའི་སྡིག་པ་སྤོང་བ་སོ་སོར་ཐར་པའི་བསླབ་པ་དགེ་བ་ཆོས་བསྡུས་པས་ཕ་རོལ་ཏུ་ཕྱིན་པ་དྲུག་སྤྱོད་པ། སེམས་ཅན་དོན་བྱེད་དེ་གཉིས་སེམས་ཅན་དོན་དུ་སྤྱོད་ལ་སྟོབས་གར་ཆེར་དེ་ཡང་འབྱེད་པ་དང་ཕྱེ་ཞིང་སྤྱོད་པའོ། །དེ་ཡང་སངས་མ་རྒྱས་པར་དུ་སངས་རྒྱས་འདོད་པའི་རྒྱུ་སྤྱོད་པར་ཁས་ལེན་པའོ། །གྲོགས་ལ་བཞི་སྟེ། སེམས་ཅན་ཐམས་ཅད་སྔོན་འབྲེལ་གྱི་བུར་ཤེས་ནས་བྱམས་པར་བྱ་བ་དང༌། མ་ཆགས་པས་འདོད་པ་ཆོས་ནོར་སྦྱིན་པ་དང༌། ཆོས་ཐམས་ཅད་བདག་མེད་པས་རང་ལ་འདོད་པ་མེད་བ་དང༌། སངས་རྒྱས་གཞན་དོན་ལས་འབྱུང་བས་རྒྱུ་འབྲས་མི་དགག་པའོ། །རྟེན་གྱི་ཁྱད་པར་གྱིས་བསླབ་པའི་རིམ་པ་ཤེས་པར་བྱ་བ་ལ་གཉིས་ཏེ། རྟེན་དང་བསླབ་པའི་ཆོས་སོ། །རྟེན་ལ་ཡང་གཉིས་ཏེ། འདོད་པ་ཆུང་བ་དང་ཆེ་བའོ། །ཆེ་བ་ལ་ཡང་གཉིས་ཏེ། ལས་དང་པོ་པ་དང༌། མཐར་ཕྱིན་པ་དག་པའོ། །བསླབ་པའི་རིམ་པ་ལ་གཉིས་ཏེ། སྤྱོད་པ་དང་འཇུག་པའོ། །སྨོན་པ་ལ་ཡང་གཉིས་ཏེ། བཏགས་པ་ནི་གོང་གི་
མིང་དང་ཞེས་པའི་རྟེན་ཙམ་ཡང་སྐྱེ་ལ། དངོས་ཐོབ་ནས་ངོ་བོ་དང་ལྡན་པར་བསྲུང་བའི་ལས་དང་པོའོ། །འཇུག་པ་ལ་གཉིས། བཏགས་པ་བ་ལས་དང་པོ་བ་དེ་ལ་ཡང་ཡོད་དེ། དངོས་པོ་བདག་པ་ལ་ཡོད་པའོ། །ལས་དང་པོ་པའི་བསླབ་བྱ་ལ་གསུམ། གཞི་ལ་ཡང་གསུམ་སྟེ། སྦྱོར་བ་སྔོན་དུ་སོང་བས་མོས་པ། སྨོན་པས་གསུམ་ལ་སྐྱབས་པ་དང༌། དབང་པོ་ཤེས་ནས་གནས་ཚོལ་བ་དང་བསམ་པའོ། །བསམ་པ་བདག་ལ་སེམས་པ་དང༌། གཞན་ལ་སེམས་པའོ། །བདག་ལ་སེམས་པ་ལ་གཞི་སྟེ། བདག་གི་སྡུག་བསྔལ་ཞི་བར་བྱ་བ་དང༌། དགོས་པ་ལུས་ངག་གི་དགེ་བ་བྱས་དང༌། གྲོགས་ལུས་དལ། ངག་དབེན། ཡིད་ཞི་བ་དང༌། ལོངས་སྤྱོད་ཀྱིས་ཚོགས་བསགས་པའོ། །གཞན་སེམས་པ་ལ་གཉིས་ཏེ། སྙིང་རྗེ་དང་བཟོད་པའོ། །སྙིང་རྗེ་ཆོས་དམིགས་པ་དང༌། གང་ཟག་ལ་དམིགས་པའོ། །བཟོད་པ་སྡུག་བསྔལ་དང་དུ་ལེན་པ་དང༌། སྡུག་བསྔལ་ལ་ཇི་མི་སྙམ་པའོ། །ལམ་ཕ་རོལ་ཏུ་ཕྱིན་པ་དྲུག་སྨོན་ནས་སྤྱོད་པའོ། །འབྲས་བུ་སྐྱེ་བ་ལ་དབང་བ་དང༌། ཉོན་མོངས་པ་དང༌། ལས་དང༌། ཐབས་དང༌། སེམས་ཅན་གྱི་དོན་བྱེད་པ་ལ་དབང་བ་ལྔའོ། །ཤིན་ཏུ་རྣམ་པར་དག་པའི་ལས་དང་པོའི་བསླབ་བྱ་ལ་ཡང་གསུམ་སྟེ། གཞི་སྦྱོར་བ་སྔོན་དུ་སོང་བས་སྐྱབས་པ་དང༌། དབང་པོ་དང༌། བསམ་པ་འཇུག་པའི་སེམས་ཀྱིས་གོང་བཞིན་འདོད་པའོ། །བསམ་པ་གཞན་ལ་སེམས་པ་ཁོ་ན་སྟེ། སྙིང་རྗེ་དང་བཟོད་པ་ལ་གཉིས་ཏེ། སྙིང་རྗེ་ལ་ཡང་གང་ཟག་ལ་དམིགས་པ་དང༌། ཆོས་ལ་དམིགས་པ་དང་དམིགས་པ་མེད་པ་གསུམ་སྟེ། གང་ཟག་ལ་དམིགས་པ་ནི་མུ་སྟེགས་དང༌། ཉན་ཐོས་དང་ཐུན་མོང་སྟེ། སེམས་ཅན་རྐྱེན་གྱིས་སྡུག་བསྔལ་བ་ལ་སྐྱེ་བའོ། །ཆོས་ལ་དམིགས་པ་ནི་སེམས་ཙམ་སྟེ། ཆོས་ཉིད་མ་རྟོགས་པས་ལོན་ཏེ་རྟོགས་པར་བྱེད་པའོ། །དམིགས་པ་མེད་པ་དབུ་མ་སྟེ། སྡུག་བསྔལ་བ་ཆོས་ཉིད་མ་རྟོགས་པ་ལ་སྙིང་རྗེ་བསྐྱེད་པའི་དུས་ན་རབ་ཏུ་མི་གནས་པར་ཤེས་པས་གསུམ་བསྡུས་པའོ། །བཟོད་པ་གཞན་དོན་དུ་སྡུག་བསྔལ་ཕྲ་མོ་ལ་སོན་ཞིང་དང་དུ་ལེན་པའོ། །གོམས་ནས་ཆེ་བས་མི་གནོད་ལ་ཇི་མི་སྙམ་པ་དང༌། བཟོད་པ་དེ་དང་མི་བཟོད་པ་རབ་ཏུ་མི་གནས་པར་བརྗོད་པ་གསུམ་ཀ་བསྒོམ་བའོ། །
ལམ་ཕ་རོལ་ཏུ་ཕྱིན་པ་དྲུག་གཞན་དོན་དུ་རྫོགས་པར་བྱེད་པའོ། །འབྲས་བུ་རེ་བ་མེད་པ་དང༌། སྐུ་བཞི་ངག་གིས་འབྱུང་བའོ། །དུས་ལ་འདོད་པ་ཆུང་བའི་མཐའ་མེད་པ་དང༌། ཆེན་པོའི་རྒྱུ་བསྐྱེད་པའི་དུས་བླངས་མ་ཐོག་དང༌། ལམ་སྒྲུབ་པ་སྙིང་པོ་བྱང་ཆུབ་ཐོབ་པ་དང༌། སངས་རྒྱས་པའི་དུས་བསྐལ་པ་གྲངས་མེད་གསུམ་པའོ། །རིགས་ལ་གཉིས་ཏེ། ཟླ་པ་ཡར་ངོ་ལ་སེམས་བསྐྱེད་ཐོབ་པ་རྣམས་བྱམས་པ་ལ་སོགས་པ་ལྟར་བྲམ་ཟེ་ལས་སངས་རྒྱས་པ་དང༌། མར་ངོ་ལས་ཐོབ་པ་རྣམས་ཤཱཀྱ་ཐུབ་པ་ལ་སོགས་བ་ལྟར་རྒྱལ་རིགས་ལས་སངས་རྒྱས་པའོ།། གསུམ་དང་ལྡན་པར་ཤེས་པར་བྱ་བ་ལ་གཉིས་ཏེ། ལྡན་ལུགས་བསྟན་པ་དང༌། ངེས་པ་བསྐྱེད་པའོ། །ལྡན་ལུགས་ལ་ནམ་མཁའི་སྙིང་པོའི་མདོ་ནས། ཆོས་དང་གང་ཟག་གཅིག་ཉིད་སེམས། །སྨོན་དང་འཇུག་དང་སོ་སོར་ཐར། །རིག་པ་སྦྱོར་བས་གཞན་གྱི་དོན། །ནུས་ན་གོང་ནས་གོང་དུ་འགྱུར། །ཞེས་གསུངས་པ་བཞིན་ཏེ། གོང་གི་སོ་སོར་ཐར་བའི་བསླབ་པ་རིགས་བདུན་གྱི་བྱེ་བྲག་དེ་རང་གི་སེམས་ཡིན་པས་འོག་མའི་ཉན་ཐོས་མ་སྤངས་པར་ཐེག་པ་ཆེན་པོ་བྱང་ཆུབ་སེམས་དཔའི་སྡོམ་པ་ཡང་ཡིན་ལ། དེ་ཡང་སེམས་ཀྱི་སྣང་བ་ཕུང་པོ་དང༌། ཁམས་དང༌། སྐྱེ་མཆེད་རྒྱུད་ལྟར་ལྷར་གནས་པའོ། །དེ་ཡང་སྔགས་ཀྱི་དམ་ཚིག་ནི། བདག་དང་དགོས་པ་ལྷར་གནས་པ་མཐོང་བས་ལྷ་དང༌། ལྷ་མི་གནོད་པས་ཉན་ཐོས་ལྟར་ཉེས་པ་སྤོང་བ་དང༌། ལྷ་མ་ཡིན་གཞན་གྱིས་མ་རྟོགས་པས་བྱང་ཆུབ་སེམས་དཔའ་ལྟར་ཕན་འདོགས་པ་དང༌། དེ་ལྟར་སེམས་སུ་འདུས་པའི་དོན་ལ་སེམས་ཅན་རྣམས་ཤིན་ཏུ་འཁྲུལ་ནས་སེམས་རབ་ཏུ་མི་གནས་པར་མ་ཤེས་ཤིང་བདག་ཏུ་བཟུང་བ་ལ་དམིགས་པ་མེད་པའི་སྙིང་རྗེ་སྐྱེས། སོ་སོར་ཐར་པའི་བསླབ་པ་དང༌། དམ་ཚིག་སྤྱོད་པ་དག་ལ་དམིགས་བ་མེད་པས་སྨོན་འཇུག་གཞན་དོན་དུ་བྱེད་པ་དང༌། དེ་ཡང་སྔགས་ཀྱིས་ལྷར་སྣང་བ་ཐམས་ཅད་སེམས་ཀྱི་འཕྲུལ་པར་སྣང་བས་ཉན་ཐོས་བྱེ་བྲག་ཏུ་སྤྱོད་ལ། བྱེ་བྲག་མ་འགགས་ན་ནུས་པ་སོ་སོར་འབྱུང་བས་བྱང་ཆུབ་སེམས་དཔའ་ལྟར་འདོགས་པ་དང༌། དེ་ལྟར་སེམས་ཀྱི་རྒྱུན་ལ་བརྟེན་ནས་སྐུ་བཞི་འབྱུང་བས། འགྲོ་བ་འདྲེན་པའི་སྣང་བ་
ལྟར་སོ་སོར་ཐར་པའི་བསླབ་པ་དང༌། བྱང་ཆུབ་སེམས་དཔའི་སྡོམ་པ་དང༌། སྔགས་ཀྱི་དམ་ཚིག་དང་གསུམ་ལྡན་པའོ། །སྐུ་བཞི་ནུས་པ་སོ་སོ་ནས་སྣང་ཞིང་ཆོས་སྐུར་འདུས་ཤིང་འབྱུང་བ་བཞིན་སྡོམ་པ་ཡར་ལྡན་དུ་འགྱུར་ཏེ། སོ་སོར་ཐར་བ་བྱང་ཆུབ་སེམས་དཔར་འགྱུར། །དེ་སྔགས་སུ་འགྱུར། དེ་སོ་སོར་སྣང་བ་ཡང་བཏུབ་པ་བཞིན་ནོ། །ངེས་པ་བསྐྱེད་པ་ཡང་བཞི་སྟེ། གཞི་མ་ཉམས་པ་དང༌། རྒྱུ་མ་ཉམས་པ་དང༌། ལམ་མ་ཉམས་པ་དང༌། འབྲས་བུ་མ་ཉམས་པའོ། །གཞི་མ་ཉམས་པ་སློབ་དཔོན་ལ་ལ་དག་རྟེན་དང་བརྟེན་པར་སྡོམ་པ་གསུམ་མིན་པར་འདོད། དེ་མི་བདེན་ཏེ། ཀ་བས་གདུང་དང་འོག་གིས་སྟེང་ཁང་བཏེག་པ་ལྟར་མ་ཡིན་ཟེར་བ་མི་རིགས་ཏེ། སྡོམ་པ་ཡར་ལྡན་དུ་གནས་གྱུར་པས་ས་བོན་གྱི་དུས་ན་ས་བོན་མ་ཉམས། མྱུ་གུ་མ་སྤངས། འབྲས་བུའི་དུས་ན་འབྲས་བུ་མ་ཉམས་ལ་ས་བོན་མ་སྤངས་ཏེ། དམ་ཚིག་གི་དུས་ན་སོ་སོར་ཐར་པར་མ་སོང་སྟེ། མི་གནས་མེད་ཀྱང་ཉེས་པ་མེད་དོ། །ཉམས་པ་སྤང༌། སློབ་དཔོན་ལ་མི་གཅིག་གིས་མི་མང་པོ་གསོད་ན། མི་གཅིག་པོ་དེ་མ་བསད་ན་བྱང་ཆུབ་སེམས་དཔའི་སྡོམ་པ་ཉམས་ལ། བསད་ན་སོ་སོར་ཐར་བའི་སྡོམ་པ་ཉམས་པར་འགྱུར་བ་དེ་བཞིན་དུ། མ་ཤིན་བརྫུན་ནམ་ཐབས་ཀྱི་ཡན་ལག་ཉམས་ཟེར་ཏེ་དེ་ཡང་མི་བདེན་ཏེ། སོ་སོར་ཐར་བའི་ལྟུང་བ་ནི་སྦྱོར་བ་དང༌། དངོས་དང༌། མཇུག་རྫོགས་པས་འོང་སྟེ། སྦྱོར་བ་དང༌། མཇུག་མེད་པ་དང༌། དངོས་སོ་སོར་ཐར་བ་བདག་འཁོར་བ་ལ་འཇིགས་པ་དང༌། བྱང་ཆུབ་སེམས་དཔའ་སེམས་ཅན་གྱི་དོན་བྱེད་དུ་དམྱལ་བ་ལ་མི་འཇིགས་པར་ཉེས་པ་ལེན་པའོ། །དེ་ལྟར་སྲོག་མང་བར་བཏོན་པ་དང༌། གཅིག་ལ་སྡིག་པ་གོས་པར་དང༌། བདག་དམྱལ་བ་ལ་མི་འཇིགས་པར་རང་ཡང་ཐར་པའོ། །དེ་བཞིན་དུ་བརྫུན་སོགས་ཡན་ལག་དང་བཅས་པ་ཉམས་པས་སོ། །ལམ་མ་ཉམས་པ་ཡང་སློབ་དཔོན་ལ་ལ་དག །སོ་སོར་ཐར་པའི་བསླབ་པ་རྟེན་དུ་དགོས་ན། སོ་སོར་ཐར་བའི་བསླབ་པ་གོང་གི་རྟེན་ཁྱད་པར་དུ་འཕགས་པ་དྲུག་ལ་སྐྱེའི། བྱང་ཆུབ་ཀྱི་སེམས་འགྲོ་བ་གཞན་དང་གླིང་གཞན་ནས་སྐྱེ་ཟེར་ཏེ། དེ་ཡང་མི་བདེན་ཏེ།
དེ་ལྟར་མུ་སྟེགས་ལྟར་རྐྱེན་མེད་པས་རྒྱུ་གཙོ་བོས་ལས་བརྫུན་ཏེ། འགྲོ་དྲུག་སོ་སོ་བསྐྱེད་ལ་དགེ་བས་ཐར་པ་ཐོབ་པའི་རྒྱུ་ཡིན་པ་ལ། དགེ་བས་ངན་འགྲོར་འགྲོ་བ་ཡང་ཡོད་དགོས་པ་ལ་མེད་པ་དེས་དེ་ལྟར་ཡིན་ཏེ། སངས་རྒྱས་ཀྱི་ཐུགས་རྗེས་སེམས་ཅན་མིར་སྐྱེས་ལ། མི་བསྙེན་གནས་བསྲུངས་པས་ཉན་ཐོས་ཀྱི་རྟེན་བཟང་པ་དེ་གོམས་པ་ལས་བྱང་ཆུབ་ཀྱ་སེམས་སུ་འགྱུར་བས་ཐམས་ཅད་མཁྱེན་པའོ། །རྒྱུ་རྐྱེན་མ་སོང་བར་ཐམས་ཅད་མཁྱེན་པ་འབྱུང་ན། མུ་སྟེགས་དང་ཉན་ཐོས་ལ་ཐམས་ཅད་མཁྱེན་པའི་རིགས་ན། ཆོས་ཉིད་སྟོང་པ་ཤེས་རབ་ཀྱི་ཕ་རོལ་ཏུ་ཕྱིན་པ་རྟོགས་བས་འཐོབ་ཟེར་ན། ཆོས་ཉིད་ཡོད་པས་འཐོབ་ན་སེམས་ཅན་ལ་ཅིས་མེད། རྟོགས་པས་ཆོག་ན་རྟོགས་ཚད་གང་ཁོ་ན། རྟོགས་ཚད་གང་ཁོ་ན་ཙམ་གྱིས་ཆོག་ན་ད་ལྟ་ག་རེ། ཚད་བསྟན་དུ་ཡོད་ན་ཐམས་ཅད་མཁྱེན་ཏེ། བརྟགས་དཔྱད་རིགས་པ་གཞི་ཅི་བྱ། མེད་ན་རྩོད་པ་བརྗོད་པ་ལ་དོན་མེད། ཐོབ་པས་མཁྱེན་ན་ཐོབ་རྒྱུ་བརྟག་སྟེ། དེས་ན་ལམ་སྔོན་དུ་མ་སོང་བར་འགྲོ་བ་གཞན་དང༌། མི་གཞན་དག་ལ་བྱང་ཆུབ་སེམས་མི་སྐྱེའོ། །འབྲས་བུ་མ་ཉམས་པར་བྱ་བ་ལ་སློབ་དཔོན་ལ་ལ་ཉན་ཐོས་ཀྱི་རིགས་དང༌། རང་སངས་རྒྱས་དང༌། ཐེག་པ་ཆེན་པོ་དང༌། རིགས་ངེས་པ་དང༌། མ་ངེས་པ་དང༌། ཆད་པ་དྲུག་ཡོད་ལ། སངས་རྒྱས་ཀྱང་རིམ་གྱིས་དང༌། ཉན་ཐོས་ལས་ལྡོག་པ་དང༌། རང་སངས་རྒྱས་ལས་ལྡོག་པ་དང༌། སོ་སོར་ཡོད་པ་མཚན་ཉིད་ཀྱིས་སངས་རྒྱས་པ་དང༌། སྔགས་ཀྱིས་དང༌། སངས་རྒྱས་སོ་སོར་ཡོད་པ་ལ། །བསྟན་པ་ཡུན་རིང་ཐུང་དང༌། ཆོས་ཐེག་པ་ཆེ་ཆུང་སྟོན་ལ། བྲམ་ཟེ་དང་རྒྱལ་རིགས་སོ་སོར་འདོད་དེ། དེ་མི་བདེན་ཏེ། གཞི་དོན་དམ་པ་ལ་ཡང་སེམས་ཅན་དང༌། སངས་རྒྱས་གཉིས་ལ་ཁྱད་མེད་པར། སངས་རྒྱས་ལ་ཁྱད་ཡོད་དེ། རྒྱུ་རིག་པ་བཟང་རྟོག་ཏུ་སྦྱོར་བ་ལ་ཡང་འདྲ་སྙམ། ལམ་སེམས་གཉིས་དང་ཕར་ཕྱིན་དྲུག་སྤྱོད་པ་ཡང་འདྲ་སྙམ། འབྲས་བུ་འདོད་པ་ཆེ་ཆུང་བསྟན་པ་དང༌། ཆོས་རིགས་ཀྱང་གདུལ་བྱ་སྟེ། སྐུ་བཞི་ལ་བཟང་ངན་མེད། གལ་ཏེ་ཡོད་ན་གོང་བཞིན་དུ་དགེ་བས་ངན་སོང་དང༌། སྡིག་པ་དང་ཐར་པ་དང༌། ཉན་ཐོས་ཀྱིས་བཅུ་
བཞི་པའི་ས་དང༌། སྔགས་དང་ཉན་ཐོས་ལ་སོགས་པར་འགྲོ་བའོ། །དེ་ནས་སངས་རྒྱས་ཐམས་ཅད་ཀྱི་ཐུགས་བདེ་བ་ཆེན་པོར་གནས་ཤིང་ཆོས་སྐུར་སྣང་བ་ལ། གསུང་བརྗོད་དུ་མེད་པར་གནས་ཏེ། ཐེག་པ་གསུམ་དང་ཐེག་པའི་དགོས་པར་ཡང་གསུང་ངོ༌། །སྐུ་བཅུ་བཞིའི་ས་ལ་བཞུགས་ལ་རྡོ་རྗེ་འཆང་གི་ངོ་བོ་གཟུགས་སྐུར་སྟོན་ཏོ། །ཡོན་ཏན་སྤྲོས་པ་དང་བྲལ་ལ་བཟང་ངན་གྱི་རྟོག་པ་འདོད་ཡོན་དུ་སྣང་འགྲུབ་པའོ། །ཕྲིན་ལས་བྱ་བརྩལ་དང་བྲལ་བ་དགྱེས་རྡོར་ལྟར་སེམས་ཅན་ཐམས་ཅད་རིགས་ལྔ་དང༌། གསུམ་དང་གཅིག་ཏུ་གྲུབ་པའོ། །དེ་ལྟར་ཤེས་པས་སྡོམ་པ་གསུམ་རྫོགས་ནས་གསུམ་ལྡན་དུ་བྱའོ། །སྔགས་ཀྱི་རྒྱས་པར་འོག་གི་སྐབས་སུ་བསྟན་པ་ནས་དབང་ཐོབ་པར་ཤེས་པར་གྱིས་ཤིག །ཤེས་པས་སྤངས་པ་ལ་གཉིས་ཏེ། ཉེས་པ་ཤེས་པ་དང་སྲང་བའོ། །ཉེས་པ་ཤེས་པ་ལ་སྨོན་འཇུག་གཉིས་ཏེ། སྨོན་པའི་རྩ་བའི་ཉེས་པ་གཞན་དོན་ལ་སྨོན་པ་བཞག་ནས་ཉན་ཐོས་སུ་འགྱུར་བའོ། །ཡན་ལག་ལ་བཞི་སྟེ། དཀོན་མཆོག །མཁན་པོ། སློབ་དཔོན། རྣལ་འབྱོར་པ། པཎྜི་ཏ། དགེ་འདུན་ཆོས་སྐྱོང་བའི་རྒྱལ་པོ། ཕ་མ། མཆོད་པར་འོས་པ་བསླུས་པ་དང༌། བྱང་ཆུབ་སེམས་དཔའ་སེམས་བསྐྱེད་པ་མཐོང་བ་ཐོས་པ། སློབ་དཔོན་གཅིག་པ་དུས་གཅིག་ཏུ་བསྐྱེད་པ་ལ་ཕྲག་དོག་གིས་བསྐྱེད་པ་དང༌། ཉན་ཐོས་དང་རང་སངས་རྒྱས་དང༌། བྱང་ཆུབ་སེམས་དཔའི་བྱེ་བྲག་སོང་ནས་གོང་དུ་འཕོ་བར་མི་འགྱུར་བར་དེ་རྣམས་ཀྱི་དགེ་བའི་རྒྱུ་འབྲས་ལ་སྐུར་ནས་འགྱོད་པ་བསྐྱེད་བ་དང༌། སེམས་ཅན་ཐམས་ཅད་ལ་བདག་གི་ལུས་ངག་གིས་གནོད་པ་བྱེད་པའོ། །འཇུག་བའི་ཉེས་པ་ལ་གཉིས་ཏེ། རྩ་བ་ཕ་རོལ་ཕྱིན་པ་དྲུག་གཞན་དོན་བོར་ནས་རང་དོན་དུ་བསྔོ་བ་དང༌། ཡན་ལག་ལ་ཡང་བཞི་སྟེ། ཞེ་སྡང་གི་བཤགས་པས་མི་ཕན་པར་གཞན་འཚོག་པ་དང༌། ཆགས་པས་སེར་སྣ་དང་ལྡན་ཏེ། ཆོས་ནོར་དགོས་པ་དང༌། འདོད་པ་ལ་མི་སྟེར་བ་དང༌། ཆོས་རྣམས་བདག་མེད་པར་མ་ཤེས་པ་གཞན་ལ་འགྲན་སེམས་ཀྱིས་གནོད་པ་དང༌། སངས་རྒྱས་གཞན་དོན་ལས་མི་འདོད་པར་རྒྱུ་འབྲས་བཀག་ནས་སྨོན་འཇུག་སྤོང་བའོ། །སྤང་བ་ལ་ཡང་གཉིས་ཏེ། སྨོན་པ་ཉམས་པར་ཤེས། སྨོན་པ་ཉེས་པ་སྤང༌།
འཇུག་པའི་ཉེས་པ་འཇུག་པས་སྤང་པའོ། །ཤེས་པས་བསྒྲུབ་པ་ལ་གཉིས་ཏེ། ཡོན་ཏན་དུ་ཤེས་པ་དང༌། ཡོན་ཏན་དུ་ཤེས་པ་བསྒྲུབ་བོ། ཡོན་ཏན་ལ་གསུམ་སྟེ། སངས་རྒྱས་ལ་སྐྱབས་པས་སངས་རྒྱས་ཀྱི་ཞལ་མཐོང་བ་དང༌། ཆོས་ལ་སྐྱབས་པས་སངས་རྒྱས་ཀྱི་ཆོས་ཉན་ཅིང་ཞལ་མཐོང་བ་དང༌། བྱང་ཆུབ་སེམས་དཔའི་དགེ་འདུན་ལ་སྐྱབས་པས་གྲོགས་བྱང་ཆུབ་སེམས་དཔའ་དང་འགྲོགས་པའོ། །ལམ་གྱི་ཡོན་ཏན་མཁན་པོ་དང་བླ་མ་མཆོད་པས་ད་ལྟ་ཉིད་སངས་རྒྱས་དང་འགྲོགས་པ་དང༌། སེམས་ཅན་སླུ་བ་དང་འགྱོད་པ་སྤངས་ནས་ཕ་རོལ་ཏུ་ཕྱིན་པ་དྲུག་སྤྱད་པས་ད་ལྟ་ཉིད་ཐེག་མ་ཆེན་པོའི་ཆོས་ཉན་པ་དང༌། གཞན་ལ་གནོད་སེམས་སྤངས་ནས་ཕན་སེམས་དང་ལྡན་པས་བྱང་ཆུབ་སེམས་དཔའ་དང་ད་ལྟ་འགྲོགས་པའོ། །འབྲས་བུའི་ཡོན་ཏན་འཇུག་པས་ཕ་རོལ་ཏུ་ཕྱིན་པ་དྲུག་སྤྱོད་པས་གདུལ་བྱ་ལ་སྤྲུལ་སྐུ་དང༌། ཚོགས་རྫོགས་པའི་སྣང་བ་ལ་ལོངས་སྐུ་སྟེ། ད་ལྟ་ཉིད་སངས་རྒྱས་ཡིན་པ་དང༌། གང་འདོད་གང་ཕན་སྤྱོད་པས་ད་ལྟ་ཉིད་ཆོས་སྟོན་པ་དང༌། བསྟན་པ་དང་སྤྱོད་པས་ཕན་པས་ད་ལྟ་ཉིད་དུ་བྱང་ཆུབ་སེམས་དཔས་བསྐོར་བའོ། །བསྒྲུབ་པར་བྱ་བ་ལ་བཞི་སྟེ། སྡོམ་པ་གསུམ་བསྒྲུབ་པ་དང༌། མི་ཉམས་པར་བྱ་བ་དང༌། །རྒྱས་པར་བྱ་བ་དང༌། ཉེས་པ་བཅོས་ཐབས་སོ། །སྡོམ་པ་གསུམ་སྒྲུབ་པ་ནི་སྡོམ་པ་དངོས་དང༌། རང་བཞིན་དང་བཅས་པའི་སྡིག་སྤང་བ་དང༌། སེམས་ཅན་རྣམས་ཀྱི་དགེ་བ་བསྒྲུབ་པ་ཕ་རོལ་ཏུ་ཕྱིན་པ་དྲུག་སྟེ། སྦྱིན་པ་ཆོས་དང་སྐྱབས་དང༌། ཟང་ཟིང་གི་སྦྱིན་པ་བདག་གཏོང་བ་པོ་དང༌། གཞན་ལེན་པ་པོ་དང༌། སྦྱིན་པར་བྱ་བའི་རྒྱུ་གསུམ་སྒྱུ་མར་ཤེས་པའི་གཞན་དོན་སྒྲུབ་པ་དང༌། དགེ་བ་ཆོས་སྡུད་པའི་ཚུལ་ཁྲིམས་དང༌། སྡོམ་པའི་ཚུལ་ཁྲིམས་དང༌། སེམས་ཅན་དོན་བྱེད་ཀྱི་ཚུལ་ཁྲིམས་དང༌། སྡུག་བསྔལ་དང་དུ་ལེན་པ་དང༌། སྡུག་བསྔལ་ལ་ཇི་མི་སྙམ་པ་དང། ཟས་མོས་པ་དང༌། གོ་ཆའི་བརྩོན་འགྲུས་དང༌། སྦྱོར་བ་དང༌། ངེས་པར་སྤྱོད་པ་དང༌། མི་འགོང་བའི་དང༌། དཔའ་བོའི་བརྩོན་འགྲུས་དང༌། བསམ་གཏན་ལུས་དལ། །ངག་དཔེན། སེམས་ཞི་བ་དང༌། ཐོས་བསམ་བསྒོམ་པའི་ཤེས་རབ་རྣམས་སྒྱུ་མར་ཤེས་པས་གཞན་དོན་བསྒྲུབ་
པའོ། །སེམས་ཅན་དོན་བྱེད་ཀྱི་ཚུལ་ཁྲིམས་གཞན་དོན་དུ་སྦྱིན་སོགས་སྟོབས་གར་ཆེ་རིམ་པ་དང༌། དམ་བཅས་པ་མེད་པས་སྒྱུ་མའི་རྣམ་པས་སྒྱུ་མ་ཤེས་པས་བསྒྲུབ་པའོ། །མི་ཉམས་པར་བྱ་བ་ལ་བརྒྱད་དེ། སེམས་ཅན་སྔོན་ལས་ཀྱི་འབྲས་བུ་ཡིན་པས་དཔེན་པར་བསྒྲུབ་པ་དང༌། མ་ཆགས་པས་ལུས་དང་ལོངས་སྤྱོད་དགེ་བ་སྦྱིན་པ་དང༌། བདག་མེད་པས་འབྲས་བུ་མི་རེ་བ་དང༌། སངས་རྒྱས་གཞན་ལས་འབྱུང་བས་སྒྱོ་བ་མི་བྱ་བ་དང༌། སློབ་དཔོན་སངས་རྒྱས་དང་འདྲ་བས་བསྙེན་པ་དང༌། གྲོགས་པོ་བྱང་ཆུབ་སེམས་དཔའ་བསྙེན་པ་དང༌། དགེ་བ་བྱེད་པ་ཐམས་ཅད་ལ་ཡི་རངས་པ་དང་བསྐུལ་བ་དང༌། ལུས་ངག་ཡིད་ཀྱིས་དོན་ལས་གཞན་མི་བྱའོ། །རྒྱས་པར་བྱ་བ་ལ་གཉིས་ཏེ། མ་རྒྱས་པ་དང༌། དེ་རྒྱས་པར་བྱ་བའོ། །མ་རྒྱས་པ་ལ་རྒྱུ་འབྲས་གཉིས་ཏེ། རྒྱུ་ལས་བསྔོ་བ་མ་ཤེས་པ། བསྔོ་བ་ལུས་པ། བསྔོ་བ་ལོག་པ། བསྔོ་བ་མ་དག་པ། བསྔོ་བ་མ་བརྒྱས་པའོ། །བསྔོ་བ་མ་ཤེས་པ་ནི་སྔོན་དུ་སེམས་ཅན་ལ་ཁས་བླངས་ནས། ཆོས་ནོར་སྐྱབས་མི་སྟེར་བའོ། །མི་འདོད་མི་དགོས་མི་ཕན་ན་ཉེས་པ་མེད་དོ། །བསྔོ་བ་མ་ལུས་པ་ནི་སྦྱིན་པར་བསམས་ནས་མ་གྱིན་བའོ། །དེ་ཡང་མི་འདོད། མི་དགོས། མི་ཕན། ཕན་ཆུང༌། གནོད་ན་ཉེས་པ་མེད་དོ། །བསྔོ་བ་ལོག་པ་ནི་གཅིག་ལ་བསྔོས་ནས་གཞན་གཅིག་ལ་བྱིན་ནའོ། །གཅིག་སྟོབས་ཆེ་ལ་གཅིག་མི་འདོད་སོགས་གོང་ལྟར་ན་ཉེས་པ་མེད་དོ། །བསྔོ་བ་མ་དག་པ་ནི་ལན་ལ་རེ་བ་དང༌། དྲིན་བརྩིས་པ་དང༌། འདིའི་ཕན་ལ་མི་རེ་བའོ། །དེས་ཆོས་འཕེལ་ཞིང་རང་གི་ཡིད་ལ་ཚེ་འདིའི་འདོད་པ་མེད་ན་ཉེས་པ་མེད་དོ། །བསྔོ་བ་མ་རྒྱས་པ་ནི་གྲགས་པ་དང༌། གཞན་འོག་ཏུ་གཞུག་པ་སྟེ། དེས་བསྟན་པ་ལ་ཕན་ཞིང་ཡིད་ལ་མེད་ན་ཉེས་པ་མེད་དོ། །འབྲས་བུ་ལ་ཡང་ལྔ་སྟེ། བསྔོ་བ་ལུས་པ་ནི་ཕ་རོལ་ཏུ་ཕྱིན་པ་དྲུག་སྤྱད་ཀྱང་དགེ་བའི་རྩ་བ་མ་བསྔོས་པའོ། །བསྔོ་བ་མ་ཤེས་པ་ནི་སྦྱིན་པ་ལ་སོགས་པའི་རྒྱུ་ལས་འབྲས་བུ་ལོངས་སྤྱོད་ཆེ་བ་ལ་སོགས་པར་རེ་བའོ། །བསྔོ་བ་ལོག་པ་ནི་བདག་དོན་དུ་བསྔོས་པའོ། །བསྔོ་བ་མ་དག་པ་ནི་སེམས་ཅན་སངས་རྒྱས་སུ་མི་སྨོན་པའོ། །བསྔོ་བ་མ་རྒྱས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱས་མ་ཐེབས་པའོ། །རྒྱས་
པར་བྱ་བ་དེ་རྣམས་ལས་བཟློག་པ་སྟེ། ཤེས་པ། མ་ལུས་པ། མ་ལོག་པ། དག་པ། རྒྱས་པ་བྱང་ཆུབ་སེམས་དཔའ་འདོད་པ་ཆེ་བས་སེམས་ཅན་ལ་བསྔོ་བ་མ་ལུས་པ་ལ་སོགས་པས་སྤྱིན་ནོ། རྒྱས་པ་ལ་སོགས་པས་བསྔོས་པ་སེམས་ཅན་ཐམས་ཅད་ཀྱི་དོན་དུ་བདག་སྐུ་བཞི་ཐོབ་སྟེ། སངས་རྒྱས་ནས་སེམས་ཅན་ཐམས་ཅད་སྐུ་བཞི་ལ་དགོད་པར་སྨོན་ལ། གཞན་ཡང་མདོ་དང༌། སློབ་དཔོན་གཞན་ལྟར་སྨོན་ནོ། །འདོད་པ་ཆུང་བ་དེ་དག་རྣམས་སེམས་ཅན་ཐམས་ཅད་སངས་མ་རྒྱས་ཀྱི་བར་དུ། སེམས་ཅན་གྱི་དོན་བྱེད་ཅིང་འགྲུབ་པར་སྨོན་ལ། མདོ་དང་བསྟན་བཅོས་གཞན་ལྟར་ཡང་སྨོན་ནོ། །རྒྱས་པ་ཆེན་པོར་འཇིག་རྟེན་གྱི་དགེ་བའི་རྒྱུ་འབྲས་ལ་ཡི་རང་ཞིང་བསྔོས་པར་འགྱུར་རོ། །ཉམས་པ་བཅོས་པའི་ཐབས་ལ་གསུམ་སྟེ། ཉམས་པའི་ཚད་དང༌། ཐབས་དང༌། ཉམས་པ་བཅོས་པ་ཉེས་པར་བསྟན་པའོ། །ཚད་ནི་རྩ་བའི་ཕམ་པ་བཞི་ལས་བདག་ཉིད་རྙེད་པ་དང༌། བཀུར་སྟི་ལ་རབ་ཏུ་ཞེན་ནས་བདག་ལ་བསྟོད་ལ་གཞན་ལ་སྨོད་ན་ཕམ་པ་དང་པོ་བྱུང་བའོ། །བདག་ལ་ནོར་ཟས་ཡོད་པ་ལ་སྡུག་བསྔལ་ལ་མགོན་མེད་པ་བཀྲེས་པ་སོགས་སློང་བ་ལ་སྙིང་སྲན་གྱིས་མི་སྟེར་བ་དང༌། དད་པ་དང༌། གུས་པ་དང་ལེགས་པས་ཆོས་འདོད་པ་ལ་སྙིང་མི་བརྩེ་བས་ཆོས་མི་སྟེར་བ་སྟེ་གཉིས་པ་བྱུང་བའོ། ཞེ་སྡང་བདོ་ནས་གཞན་ལ་ཁྲོས་ཏེ་འཐབ་མོ་སྩོགས་ཀྱིས་གཞན་གྱིས་བཤགས་པ་མི་ཉན་པར་བརྡེག་པ་ལ་སོགས་པ་བྱེད་པར་ཞེ་སྡང་པོས་འཆང་ན་གསུམ་པ་བྱུང་བའོ། །ཐེག་པ་ཆེན་པོའི་སྡེ་སྣོད་འགྲོ་བ་སྐྱོབ་པ་ལ་སྐུར་པ་འདེབས་ཤིང་གཞན་གྱིས་ཞར་ལ་བཅོས་པའི་ཆོས་མ་ཡིན་པ་ལ་ཆོས་ལྟར་སྟོན་ཏམ་ཉན་ན། བྱང་ཆུབ་སེམས་དཔའ་ཕམ་པ་བཞི་པ་བྱུང་བའོ། །ཡན་ལག་ལྡོམ་པ་ཉི་ཤུ་པ་ལྟར་ཉོན་མོངས་པའི་སེམས་དང༌། ཉོན་མོངས་པ་མེད་པའི་སེམས་ཀྱིས་དཀོན་མཆོག་གསུམ་གྱི་མཆོད་བ་ལ་སོགས་པའི་སྡོམ་པ་རྣམས་སོ། །བཅོས་པའི་ཐབས་དངོས་ནི་རྩ་བ་བཞི་གང་བྱུང་ཡང༌། ཉོན་མོངས་པ་དྲག་པོ་བྱུང་ནས་ཉམས་པ་སྔོན་བཞིན་འགྱོད་པས་བླང༌། ཉོན་མོངས་པ་འབྲིང་ན་ཁྲེལ་ཡོད་པ་ངོ་ཚ་ཤེས་ནས། མཁས་པར་
གནས་པ་གསུམ་ལ་བཤགས། དེས་ཀྱང་འགྱོད་དམ་ཞེས་དྲི། འགྱོད་དོ་ཞེས་ལན་གསུམ་བརྗོད་ཅིང་ཕྱིན་ཆད་བསྡམ། ཉོན་མོངས་པ་ཆུད་ན་གཅིག་པོ་དེའི་དྲུང་དུ་བཤགས་སོ། །འགྱོད་དམ་ཞེས་པ་དང་འགྱོད་དེ་ཞེས་ལན་གསུམ་དྲི་བར་བྱའོ། །ཡན་ལག་རྣམས་བྱུང་ནའང་དེ་བཞིན་དུ་བཤགས་ཏེ། ཉེས་པ་དང་ཉེས་པ་མེད་པའི་ཁྱད་པར་སྡོམ་པ་ཉི་ཤུ་པའི་འགྲེལ་པ་ནས་ཤེས་པར་བྱའོ། །ངེས་པ་བསྐྱེད་པ་ལ་བཅོས་པ་དང༌། བྱེད་པ་སྤོ་བ་གཉིས་སམ། བཅོས་པས་ངེས་པ་བསྐྱེད་པ་ནི་མ་ག་དྷཱར་ཤཱ་རིའི་བུས་སངས་རྒྱས་ཀྱི་སྤྱན་སྔར་སེམས་བསྐྱེད་ནས་བྱ་རྒོད་ཀྱི་ཕུང་པོའི་རིའི་ནུབ་ཏུ་གསང་བ་གསུམ་པའི་ཕུག་ཏུ་བསྒོམས་པས་བྲམ་ཟེ་གཅིག་སློང་དུ་བྱུང་སྟེ། ཅི་འདོད་བྱས་པས་ཁྱོད་ཀྱི་ལག་པ་གཡས་པ་འདོད་ཟེར་ནས། ལག་པ་བཅད་ནས་གཡོན་པའི་ཁར་བཞག་ནས་བྱིན་པས་མ་འདོད་ནས། ངས་ནི་སེམས་ཅན་གྱི་དོན་མི་འོང་ངོ༌། །བླང་ཟེར་ནས་བྱིན་པ་ཡང་མི་འདོད་པ་སྙམ་སྟེ། ཡི་མུག་པར་གྱུར་ནས་སྨོན་པ་དད་འཇུག་པ་གཉིས་ཀ་བཏང་བ་ལ། སངས་རྒྱས་ཀྱིས་ནམ་མཁའ་ནས་ཚིགས་སུ་བཅད་པ་གསུངས་ཏེ། ཐབས་དང་ལྡན་པ་བྱང་ཆུབ་སེམས། །ཐབས་མེད་པས་ན་ཉན་ཐོས་ཏེ། །ཁྱོད་རང་ཐབས་ལ་མི་མཁས་པས། གཡོན་པ་མི་འདོད་མགོས་སྦྱིན་མོད། །ཅེས་བརྗོད་ནས་བྲམ་ཟེ་ལག་པ་གཡོན་པ་མི་འདོད་པ་ལ་གཡོན་པས་སྟེར་བ་རང་གིས་ཉེས་ན་ཅི་ལ་ཡི་ཆད། མགོ་ཐོག་ཏུ་བཞག་ལ་སྦྱིན་མོད། དེ་ཡང་ཐབས་ལ་མཁས་པས་སངས་རྒྱས་བསྒྲུབ་པར་བྱའོ། །ཞེས་གསུངས་པས་སླར་འགྱོད་ནས་བསླངས་པས་ཐོབ། །རྒྱལ་པོ་མ་སྐྱེས་དགྲས་སེམས་བསྐྱེད་ནས་ཕ་བསད་དེ། ཡང་འགྱོད་ནས་སླར་བླངས་པས་ཐོབ་པོ། །མདོ་གཞན་ནས་ཀྱང་བལྟ་བ་སྟེ། བྱང་ཆུབ་སེམས་དཔའི་སྡོམ་པ་གསེར་དངུལ་ལྟར་བཅོས་སུ་བཏུབ་པས་ཉམས་པ་མེད་དེ། མེད་པས་སྤྲོས་པ་ལ་རྒྱུ་འབྲས་གཉིས་ལས། །འབྲས་བུའི་ཡོན་ཏན་དཔག་ཏུ་མེད་ཅིང་རྟགས་མང་བས་འདིར་བརྗོད་པས་མི་ཟད་པས་མ་བསྟན་ཏེ། མདོ་གཞན་ན་བལྟ་བར་བྱ་ཞིང་ཤེས་པར་བྱའོ། །རྒྱུ་ཕ་རོལ་ཏུ་ཕྱིན་པ་དྲུག་ལ་སོགས་པའི་འབྲས་བུ་གཞན་ལ་བསྔོས་པས་ཚོགས་ལམ་ལ་སྦྱོར་བ་དང༌།
སྦྱོར་ལམ་ལ་སྦྱོར་བའོ། །དེའི་རྒྱུ་འབྲས་ཆོས་ཐམས་ཅད་རབ་ཏུ་མི་གནས་པར་ཤེས་པས་མཐོང་བའི་ལམ་ལ་སྤྱོར་བའོ། དེ་རྣམས་མི་གནས་པར་ཤེས་ནས་རྒྱུན་ཆད་པ་མེད་པས་བསྒོམ་པའི་ལམ་ལ་སྦྱོར་བའོ། །དེ་སེམས་ཅན་གྱི་དོན་དུ་ཕ་རོལ་ཏུ་ཕྱིན་པ་དྲུག་སྤྱོད་པ་ལྟར་སྣང་ཡང་འབྲས་བུ་ལ་རེ་བ་མེད་པས་མཐར་ཕྱིན་པའི་ལམ་ལ་སྦྱོར་བའོ། །ཕ་རོལ་ཏུ་ཕྱིན་པ་དྲུག་སྤྱོད་པ་ལ་ཆོས་ནོར་ལ་ཆགས་པ་མེད་ན་ས་དང་པོ་ལ་སྦྱོར་རོ། །དྲུག་དང་ཆགས་པ་མེད་པ་དང༌། ཉོན་མོངས་པ་མེད་ནས་གཉིས་པ་ལ་སྦྱོར་རོ། །དྲུག་དང་མ་ཆགས་པ་དང༌། ཉོན་མོངས་པ་མེད་ནས་ཞེ་སྡང་མེད་ནས་གསུམ་པ་ལ་སྦྱོར་རོ། །དེ་ལྟར་སྙོམ་ལས་མེད་ན་བཞི་པ་ལ་སྦྱོར་རོ། །དེ་ལྟར་དང༌། དལ་བ། དབེན་པ། ཞི་བ་ན་ལྔ་པ་ལ་སྦྱོར་རོ། །དེ་ལྟར་བཅུ་གསུམ་པ་དང༌། འཁྲུལ་པ་བཅད་ན་དྲུག་པ་ལ་སྦྱོར་རོ། །དེའི་སྟེང་དུ་སྐྱོན་མེད་ན་བདུན་པ་ལ་སྦྱོར་རོ། །དེའི་སྟེང་དུ་ཞུམ་པ་མེད་ན་བརྒྱད་པ་ལ་སྦྱོར་རོ། །དེའི་སྟེང་དུ་ཐེ་ཚོམ་མེད་ན་དགུ་པ་ལ་སྦྱོར་རོ། དེའི་སྟེང་དུ་རྨོངས་པ་མེད་ན་ས་བཅུ་པ་ལ་སྦྱོར་རོ། འབྲས་བུ་ལམ་དང་གནས་པ་དངོས་ཀྱིས་མདོ་ལས་བལྟ་བར་གྱིས་ཤིག །དེ་ལྟར་སྤྱོད་ལམ་དུ་བྱ་བ་སེམས་བསྐྱེད་ནས་མདོ་སྡེ་པ་དང༌། དབུ་མ་པའི་བར་དུ་སྤྱད་པ་ལ་མེད་ན་འདོད་པ་ལ་ཁྱད་མེད་དོ། །ལྟ་བ་ལྔ་སྟེ། ལྔ་ཆར་ལ་རེ་རེ་སྟེ། མདོ་སྡེ་པ་རྟེན་འབྲེལ་དུ་ཡོད་དེ། དཔེར་ན་རས་སྔོན་པོའི་ཁར་ཤེལ་བཞག་པ་དང་འདྲ་སྟེ། ཤེས་པ་དང་རྣམ་པ་རྟེན་འབྲེལ་ཡིན། རས་ཀྱིས་ཤེལ་སྔོ་བ་སྔོ་བྱེད་རས་ཡིན། དེ་བཞིན་དུ་མ་ཡིན་ནས་ཐ་དད་ན། བྱེ་བྲག་པའི་དགེ་བས་སེམས་ལ་མི་ཕན་པ་དང༌། །སྡིག་པས་སེམས་ལ་མི་གནོད་དེ། བྱེ་བྲག་མ་ཡིན་པས་རྟེན་འབྲེལ་ཡིན་ཏེ། དགེ་བའི་རྣམ་པར་སེམས་ལ་ཕན་ལ། སེམས་རྟེན་འབྲེལ་དུ་ཡེ་ཡོད་པས་གནོད་པའི་རྣམ་པས་སྐྱེད་པར་བྱེད་པའི་རྡུལ་ཕྲ་རབ་ཆ་དང་བཅས་པ་སྐད་ཅིག་གིས་མ་རྟོགས་པའི་སིལ་བུར་འདོད་ལ། ཕ་རོལ་ཏུ་ཕྱིན་པ་དྲུག་ཀྱང་དེ་ཙམ་དུ་རྟོགས་པ་འབྲས་བུ་སྐུ་བཞིར་འདོད་དོ། །བསྒོམ་པ་ནི་དེ་ལྟར་རྟོགས་སམ་ཞེ་ན། དངོས་པོ་ཐམས་ཅད་དང་སེམས་རྟེན་འབྲེལ་དུ་ཡེ་ཡོད་པས་ཕ་རོལ་ཏུ་ཕྱིན་པ་དྲུག་ལས་འབྲས་བུ་འབྱུང་སྟེ། དེ་ལྟར་དེ་མི་རྟོག་པས་དེ་ལྟར་རྟེན་འབྲེལ་
སེམས་ཡིན་པར་ཁད་ཀྱིས་ཁད་ཀྱིས་བསྒོམ་པར་འདོད་ལ། དེ་ཡང་གྲུབ་པའི་མཐའ་མ་ལུས་པར་སྟོན་པ་ཐེག་པ་ཆེན་པོའི་མདོ་ནས། རྡོ་རྗེ་སྐྱིལ་ཀྲུང་བཅས་ནས་ནི། །སྐད་ཅིག་སྐད་ཅིག་ལ་བརྟེན་ནས། །སེམས་ནི་སྣ་རྩེར་བརྟན་བྱས་ལ། །ཁྱིམ་པར་གྱུར་ཀྱང་བསྒོམ་པར་བྱ། །ཞེས་པས་རྟེན་འབྲེལ་ཤེས་པའི་རྣམ་པར་བསྒོམ་པའོ། །སྐྱོན་བསལ་བ་ལ་གསུམ་ལས་ལྟ་བའི་སྐྱོན་བསལ་བ་ནི་མུ་སྟེགས་རྒྱུ་གཙོ་བོར་འདོད་པ་ན་རེ། ཐམས་ཅད་རྒྱུ་ལ་རག་ལས་ཏེ། །པདྨ་ལ་སོགས་མེ་ཏོག་བཞིན། །འགྲོ་བ་སོ་སོའི་རྒྱུ་ཉིད་ལས། །ཐར་པ་དང་ནི་ཐམས་ཅད་མཁྱེན། ཞེས་བརྗོད་དེ། སངས་རྒྱས་པའི་རྒྱུ་སེམས་གདོད་མ་ནས་ཡོད་ལ། གདོད་མ་ནས་མེད་ན་བསྒྲུབས་པས་མི་འགྲུབ་སྟེ། པདྨ་རང་ལ་སྔོ་དཀར་དམར་པོ་སོ་སོ་ན་ཡོད་ལ། དེ་བཞིན་དུ་སེམས་ཅན་ལ་སངས་རྒྱས་པའི་རྒྱུ་ཡོད་པས་སངས་རྒྱས། རྒྱུ་མེད་ན་བཙལ་བས་མི་ཕན། ཡོད་པ་ལ་བསྒྲུབ་མི་དགོས། ཡོད་པར་ཤེས་པས་ཆོག་ཟེར་བ་དེའི་སྐྱོན་ནི་འདིར་ནི་རྒྱུ་ལ་རྩོལ་སྒྲུབ་ཀྱིས་འདོད་པའོ། །བསྒོམས་པའི་སྐྱོན་ནི་ཞི་བ་དང༌། བྱེ་བྲག་པ་སྟེ། འོང་བར་འགྱུར་བའི་བདག་ཉིད་ནི། །ཕྱི་ཡི་སྤྱོད་ཡུལ་ལས་འགགས་ནས། །གཉིས་ཀྱིས་བསྒྲུབས་པའི་ཞི་བར་གནས། །འབད་དེ་བདག་གིས་བསྒོམ་པར་བྱ། །ཞས་པས་རྣམ་པ་ལ་བློ་ལོག་སྟེ། རང་གི་སེམས་ཞི་བར་བྱིང་ནས་བདེ་བ་སྙམ་བྱེད་པ་དང༌། ཉན་ཐོས་བྱེ་བྲག་ཏུ་སྨྲ་བ་མིན་ཏེ། མདོ་ལས། རྒྱལ་བྱེད་ཚལ་ནི་ཉམས་དགའ་བར། །བདག་ཉིད་གང་གི་གྱུར་ཀྱང་བླའི། །བྱེ་བྲག་པ་ཡི་ཐར་པ་ནི། །ནམ་ཡང་གོ་ཏམ་མི་འཚལ་ལོ། །ཞེས་པས་ནི་གོང་དུ་བསྟན་པའོ། །ཉན་ཐོས་མི་གཙང་བ་དང༌། དབུས་དང༌། བདེན་པ་བཞིས་གནས་པའི་སེམས་དེ་སྐྱོན་ནོ། །འདིར་རྟེན་འབྲེལ་དུ་ཕ་རོལ་ཏུ་ཕྱིན་པ་དྲུག་སྤྱོད་ཅིང་གོང་ལྟར་གསལ་ལ་མི་རྟོག་པའོ། །ཐེག་པ་ཆེན་པོའི་སྐྱོན་ནི་མདོ་ལས། བྱེ་བྲག་བདག་ཆོས་ཕུང་པོ་གསུམ། གཞན་སྤངས་རང་གི་སྡུག་བསྔལ་ཞི། །བདེ་བར་འདོད་པ་དམན་པས་ཏེ། །སླར་ཡང་ཆུང་བས་འཁོར་བར་འགྱུར། ཞེས་པས་ཡུལ་བྱེ་བྲག་ཏུ་འདོད་ཅིང༌། གང་ཟག་གི་བདག་ཡོད་པ་ཡང་མིན། མེད་པ་ཡང་མིན་ཞེས་ཕུང་པོ་གསུམ་པར་འདོད་ལ། རང་འཁོར་བ་ལས་ཐར་པའི་བདེ་བ་འདོད་
པས་བསྐལ་པ་གཅིག་ནས་སླར་འཁོར་བའོ། །འདིར་གྲུབ་པའི་མཐའ་མ་ལུས་པ་སྟོན་པར་བྱེད་པའི་ཐེག་པ་ཆེན་པོའི་མདོ་ནས། ཕ་རོལ་ཕྱིན་དྲུག་གཞན་ལ་བསྔོ། །ཐེག་ཆེན་ཆོས་ལ་རྣམ་པར་སྤྱོད། །དགེ་བ་སེམས་དང་འབྲེལ་པར་བརྗོད། །མདོ་སྡེ་དེ་ནི་ཐེག་ཆེན་བཤད། །ཅེས་པས་དེ་ལྟར་གསུམ་དང་གོང་གི་བསྒོམ་པ་སྐད་ཅིག་ཟེར་བས་ཉན་ཐོས་བྱེ་བྲག་ཏུ་སྨྲ་བ་སྐད་ཅིག་ནས་མི་རྟག་པ་ཤེས་པ་དང༌། ཁྱིམ་པར་ཤེས་པ་དང༌། སེམས་ཙམ་སྣང་བར་མི་འདོད་པས་དེ་བཞིན་ཐེག་པ་ཆེན་པོའོ། །སེམས་ཙམ་ཞེ་ན། རྣམ་པ་སེམས་ཁོ་ནར་མི་འདོད་རྟེན་འབྲེལ་དུ་འདོད་དེ། དེས་སྤྱོད་པ་སྒོམ་པ་སོ་སོའི་རྣམ་བཅས་ཀྱི་ལྟ་བ་ནི་མདོ་སྡེ་པ་ལྟར་འབྲེལ་པ་ཡིན་ཏེ། ཐམས་ཅད་སེམས་ཡིན་ལ་རྣམ་པ་ཡང་སེམས་ཀྱི་རྣམ་པར་འདོད་དེ། ལུང་ལས་ཀྱང༌། ཀྱེ་རྒྱལ་བའི་སྲས་དག་ཁམས་གསུམ་པོ་འདི་ནི་སེམས་ཙམ་མོ་ཞེས་པ་དང༌། རིགས་པ་ཡང་ཉི་ཤུ་པ་ནས། དྲུག་གིས་ཅིག་ཅར་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ཀྱང་གོ་གཅིག་ན། །གོང་བུ་རྡུལ་ཕྲན་ཙམ་དུ་འགྱུར། །ཞེས་པས་མདོ་སྡེ་པའི་ཕྲ་རབ་བདུན་ལ་རྡུལ་ཕྲན་གཅིག་ཡིན་པས་ཕྲ་རབ་དྲུག་ཅར་ཤར་དང་ལྷོ་དང༌། ནུབ་དང་བྱང་དང༌། སྟེང་དང་འོག་གི་ཆ་དེས་སོ་སོར་དུས་གཅིག་ལ་ཕྱེ་ཞིང་བླང་དུ་བཏུབ་ན་ཕྲ་རབ་དེ་ལ་དྲུག་པོའི་ས་ནས་ཡང་དྲུག་བླངས་ཏེ་ཕྱེ་བས་ཕྲ་རབ་མེད་ན། ཤར་ཕྱོགས་གཅིག་གི་ས་ནས་གཅིག་ལེན་ན་རིའི་གོང་བུ་འདི་ཡང་རྡུལ་ཕྲན་དུ་རིགས་ཏེ། དེས་ན་སེམས་ཁོ་ན་སྟེ། ཕ་རོལ་ཏུ་ཕྱིན་པ་དྲུག་སེམས་ཀྱི་རྣམ་པར་གཞན་དོན་དུ་སྤྱད་པས་འབྲས་བུ་ཐམས་ཅད་མཁྱེན་པའི་སྐུ་བཞི་དོན་དམ་དུ་འདོད་པའོ། །མདོ་སྡེ་པ་དང་ཉན་ཐོས་ཀྱང་ཀུན་རྫོབ་ཏུ་མི་འགེགས་སོ། སློབ་དཔོན་ཤེས་རབ་འབྱུང་གནས་སྦས་པ་མཉམ་གཞག་ན་མི་རྟོག །རྗེས་ལ་ཐམས་ཅད་མཁྱེན་པར་འདོད། །སྐུ་གསུམ་བདག་པོ་ཀར་འདི་འཁྲུལ་བ། སངས་རྒྱས་པས་སྣོད་གཞལ་ཡས་ཁང༌། བཅུད་ལྷ་དང་ལྷ་མོར་མི་རྟོག་སྣང་བར་འདོད་དོ། །ངག་གི་དབང་ཕྱུག་གྲགས་པ་ནི། དགག་སྒྲུབ་གང་ཡང་མེད་ལ་མཉམ་གཞག་དང་རྗེས་ཐོབ་ཡང་མེད་པར་སྣ་ཚོགས་གཉིས་མེད་དུ་འདོད། བསྒོམ་པ་ཡང་ཐམས་ཅད་
སེམས་ཡིན་པས་དེ་ལ་དང་གིས་འཇོག་པའོ། །སྐྱོན་ལ་ལྟ་བའི་སྐྱོན་རིག་བྱེད་ལྟར་སོང་བ་བསྒོམ་པའི་སྐྱོན་མདོ་སྡེ་པའོ། །རིག་བྱེད་པ་ན་རེ། དངོས་པོ་གང་དང་གང་སྣང་བ། །བྱ་བྲལ་སེམས་ཉིད་ཆོས་སྐུར་སྣང༌། །སེམས་ལས་གཞན་ཡོད་མ་ཡིན་ལ། །གསལ་ལ་མི་རྟོག་གནས་བདེ་བ། །ཚངས་པ་ལ་ཡང་ཚངས་དེ་ཉིད། །བདག་གི་ཡེ་ཤེས་ཚངས་པའི་མཆོག །ཅེས་པའི་སྣང་བས་དངོས་པོ་ཅི་སྣང་སེམས་ཡིན་ལ། །དེ་ཡང་ཡེ་ནས་ཡིན་པས། བྱ་བ་རྩལ་དང་རྟོག་པ་དང༌། ཐེ་ཚོམ་མེད་ལ་ད་ཡང་ཆོས་སྐུ་སྣང་ཡང་སེམས་ཉིད་ཡིན་ལ་མི་རྟོག་པར་གནས་པས་བདེ་སྟེ། གསལ་ལ་མི་རྟོག་པ་འདི་ནི་ལྷ་ཚངས་པ་ཞེས་བྱ། །ཆོས་སྐུ་ཞེས་བྱ། །སངས་རྒྱས་ཞེས་བྱ་སྟེ། དེ་ལས་དོན་ལྷག་པ་གཞན་མེད་ལ། །དེ་རྟོགས་པས་བདག་ལྷུན་གྱིས་གྲུབ་ཅིང་སངས་རྒྱས་དང་འདྲ་བར་འདོད་པའོ། །མདོ་སྡེ་པའི་བསྒོམ་པ་བརྟན་པར་བྱ་བ་དང༌། སྣ་རྩེར་སེམས་འཛིན་པའོ། །འདི་ལྟར་ལྟ་སྐད་ཅིག་གིས་མི་རྟག་པས་ཁྱད་པར་རོ། །བསྒོམ་པ་ལ་སེམས་ཡིན་པས་མཉམ་གཞག་རྗེས་ཐོབ་མེད་ལ་ཡེ་ནས་རང་རིག་ཡིན་པས་གོམས་སུ་མེད་པའོ། །རྣམ་པ་མེད་པའི་ལྟ་བ་ནི་རྣམ་པ་དང་བཅས་པ་མ་ཡིན་ཏེ། རྣམ་པ་འཁྲུལ་པའི་ཤེས་པ་ཡིན་ལ། དོན་དམ་དུ་རྣམ་པ་མེད་པའོ། །ལུང་ལས། བག་ཆགས་ཀྱིས་ནི་དཀྲུགས་པའི་སེམས། །གོང་དུ་སྣང་བ་རབ་ཏུ་འཇུག །ཅེས་པས་རླུང་གིས་དཀྲུགས་པ་ཆུ་ལས་ཆབ་རོམ་འབྱུང་སྟེ། དེ་ཆུ་ཡིན་རླུང་གིས་ལན། དེ་བཞིན་དུ་བག་ཆགས་ཀྱིས་དཀྲུགས་ནས་དངོས་པོར་ཞེན་པས་སྣང་བ་སེམས་ཀྱིས་རྣམ་པར་མཐོང་སྟེ། སེམས་རྣམ་པ་མེད་པ་ཡིན་ཏེ། རིགས་པ་རྣམ་པ་སེམས་ཡིན་ན། ཐ་དད་པ་ཡིན་ནམ་ཅིག་ཅར་ཡིན། ཐ་དད་ན་བྱེ་བྲག་པ་དང་འདྲ་ལ་འདྲེ་བ་ཡང་མེད། སེམས་རྣམ་པ་ཡིན་ནམ། གཉིས་ཀར་ཡིན། རྣམ་པ་སེམས་སུ་ཡིན་ན་མ་བཅད་པའི་ཡུལ་མི་ཤེས་པ་ཅི་སེམས་རྣམ་པར་ཡིན་ན་བེམས་པོར་འགྱུར། གཉིས་ཀར་ཡིན་ན་འདུས་པས་ཡིན་ནམ། མ་འདུས་པས་ཡིན། འདུས་པས་ཡིན་ན་མི་འདུ་བའི་རྒྱུ་མཚན་ཡོད་དམ་མེད། མེད་ན་སྔོན་དུ་འམ་ད་ལྟར་ཡང་སྣང་བ་སེམས་སུ་སྟོང་པར་རམ། སེམས་སྣང་བར་ཅིས་མ་སོང༌། ཡུལ་དབང་པོ་ཡུལ་དུ་ཅིས་
མ་སོང༌། ཡོད་ན་གར་འདུས་མ་འདུས་པ་ཡིན་པར་གཉིས་སོ་སོ་ན་སེམས་ལ་རྣམ་པ་གང་ཡོད་ཅེས་སོ། །གཞན་ཡང་སློབ་དཔོན་གཞན་གྱི་འདོད་པ་དབུ་མའི་རིགས་པ་བཞིས་ཀྱང་ཁེབས་སོ། །སློབ་དཔོན་ངག་གི་དབང་ཕྱུག་གྲགས་པའི་སྣ་ཚོགས་གཉིས་མེད་དུ་འདོད་པ་ནི་རྣམ་པ་སྣ་ཚོགས་སེམས་སུ་གཉིས་མེད་ཅེས་འདོད་པ་གོང་མ་དང༌། འདེས་ཀྱང་འགེགས་པའོ། །རྣམ་པ་དེ་དཀར་དམར་དང་རྟོག་གམ་མི་རྟོག །མི་རྟོག་ན་རྣམ་པ་དང་སེམས་གཉིས་མེད་དུ་ཅིས་ཤེས། །དེ་མིག་རྒྱང་རིང་པོ་བལྟས་པས་སྣ་ཚོགས་ཡོད་དེ། སེམས་སུ་གཉིས་མེད་མ་རྟོགས་པས་མན་ངག་ཏུ་འདོད་དོ། །སྣ་ཚོགས་སུ་ཤེས་པས་མངོན་སུམ་གྱིས་ད་ལྟ་ཤེས་ཞེས་ཏེ། དེ་ལ་སྐྱོན་མང་སྟེ། དེ་གདོད་ནས་སམ་ད་ལྟར་གདོད་ནས་ན་སྔོན་དུ་མ་ཤེས་པ་ཅི། ཤེས་ཀྱང་མ་ཕན་ན་དགོས་པ་མེད། །ཤེས་ཀྱང་དགོས་ན་ཐུག་པ་མེད་ནས་མ་ཤེས་ན་རང་རིག་ཉམས། ད་ལྟ་ན་སྔོན་དུ་མེད་ཕྱིས་མེད་པས་ཆད་པར་ཐལ། ཡང་ན་གཉིས་མེད་དེ་གཉིས་མེད་དུ་གང་གིས་ཤེས། གཞན་གྱིས་ཤེས་སམ་དེ་ཉིད་ཀྱིས་ཤེས། གཞན་གྱིས་ཤེས་ན་རང་རིག་ཉམས། དེ་ཉིད་ཀྱིས་དེ་ཉིད་ཤེས་སམ། དེ་ལས་འབྱུང་བས་ཤེས། དེ་ཉིད་ཀྱིས་དེ་ཉིད་ཤེས་ན། རྟག་ནས་སམ་མི་རྟག་ནས། རྟག་ན་མི་རྟག་པར་ཐལ། མི་རྟག་ན་ཤེས་རྒྱུ་མེད། སྔོན་དུ་མ་ཤས་པ་ཅི། རྐྱེན་དགོས་ན་གོང་ལྟར་དེ་ཉིད་དུ་ན་དུས་སམ་རིགས་ཡིན་ན་དེ་ལ་རྣམ་པ་ཅི་ཕན། ཡང་ན་དེ་ལས་བྱུང་བས་ཕན་ན་ཤེས་བྱའམ་ཤེས་བྱེད། །ཤེས་བྱ་ཤེས་བྱེད་གང༌། ཤེས་བྱ་གཉིས་མེད་བྱུང་ན་ཤེས་བྱེད་མེད་བར་ཤེས་བྱ་གང་ཡིན་ཤེས། ཤེས་བྱེད་བྱུང་ན་ཤེས་བྱ་མེད་པར་ཤེས་བྱེད་ཀྱིས་ཅི་བྱེད། དུས་གཅིག་ཏུ་སྐད་ཅིག་ལ་གཉིས་འོང་བ་མི་རིགས་སོ། དེས་ན་ཤེས་བྱ་མེད་པར་ཤེས་བྱེད་དུ་མི་ཤེས། ཤེས་བྱེད་མེད་པར་ཤེས་བྱ་མི་ཤེས། དེས་ན་གཉི་ག་མི་འབྱུང་ན་གཅིག་གིས་ནི་མི་ཤེས་སོ། །དེས་ན་རྣམ་པ་མེད་པའི་རང་རིག་པ་སྤྲོས་པ་མེད་པ་བསམ་དུ་མེད་པ་སྐད་ཅིག་མས་མི་རྟག །རྒྱུན་དུ་གནས་པ་དོན་དམ་མོ། །ཤཱནྟི་པ་རྗེས་ཐོབ་ལ་སྤྲུལ་སྐུར་འདོད། གཞན་མི་རྟོག་པ་ལས་སོ། །བསྒོམ་པ་ཡང་དེའི་ངང་ལ་བློ་འཇོག་པའོ། །སྐྱོན་ལ་ལྟ་བའི་དང༌། །སྒོམ་པའི་གཉིས་ལས་ལྟ་བའི་སེམས་ཙམ་རྣམ་པ་དང་བཅས་པ་དེའོ། །
བསྒོམ་པའི་ཉི་མ་དང་མཐུན་ཏེ། མུ་སྟེགས་ཉི་མ་པའི་རྒྱུད་ནས། རྟོག་པའི་རྒྱ་མཚོ་དང་བ་ལ། ཆུ་བུར་དབའ་རླབས་སོགས་འབྱུང་ཡང༌། ཤར་བ་དང་ནི་ནུབ་པ་དག །ཆུ་བོ་དེ་རུ་རོ་མཉམ་གཅིག །ཅེས་པས་དཔེར་ན་འོག་གི་རྒྱ་མཚོ་ནས་ཆུ་བུར་དང༌། དབའ་རླབས་དང༌། གཞན་ཡང་རྙོག་མ་དང༌། ཆུ་གཞན་དེར་འབབ་ཀྱང་རྒྱ་མཚོའི་ངང་དུ་གཅིག་པ་ལྟར། རང་གི་སེམས་ཉིད་རྣམ་པ་མེད་པ། སྤྲོས་པ་མེད་པ། མཐའ་དང་མུ་མེད་པ་བསམ་དུ་མེད་པ། ཐམས་ཅད་རྟག་པ་དེ་རྟོགས་ན་དངོས་པོ་ཅིར་སྣང༌། རྟོག་པ་ཅི་བྱུང་ཡང་སེམས་ཉིད་ལས་ཀྱང་ཚངས་པ། ཆོས་ཉིད་སངས་རྒྱས་ཡིན་ནོ་ཞེས་འདོད་དོ། །འདིར་སྐད་ཅིག་མས་མི་རྟག་ལ། རྒྱུན་གྱིས་རྟག་པར་འདོད་པའོ། སྒྱུ་མ་ལྟ་བུའི་ལྟ་བ་ནི་དེ་གཉིས་མི་བདེན་ཏེ། རྣམ་པ་སྒྱུ་མ་སྐད་ཅིག་གིས་མི་རྟག་ལ་རྒྱུན་དུ་གནས་པར་འདོད་དོ། །ལུང་གིས་ཀྱང༌། གཟུགས་ལས་ཀྱང་སྟོང་པ་ཉིད་གཞན་མ་ཡིན། སྟོང་པ་ཉིད་ལས་གཟུགས་གཞན་མ་ཡིན་ཞེས་གསུངས་ལ། རིགས་པས་ཀྱང་རྣམ་པ་སེམས་སུ་བདེན། སེམས་རྣམ་པ་ཡིན་ན་དཔྱད་པས་མ་གྲུབ་སྟེ། སྐྱོན་མེད་ན་བདེ་སྡུག་ཉམས་སུ་མྱོང་བ་ཡང་བརྫུན་ལ། ཕ་རོལ་ཏུ་ཕྱིན་པ་དྲུག་བསགས་པ་ལ་དགོས་པ་མེད། སྐུ་བཞི་མེད་པ་དེས་ན་སྒྱུ་མ་བདེན་ཏེ་དོན་དམ་དུ་འདོད་པའོ། །སངས་རྒྱས་གསང་བ་གཟུགས་སྐུ་ཡང་རིགས་པས་སྒྱུ་མ་བག་ཆགས་ལྟར་འདོད་དོ། །ཀ་མ་ལ་རཀྵི་ཏ་མཉམ་གཞག་དང་རྗེས་ཐོབ་ཏུ་འདོད་དོ། །གཞན་མི་རྟོག་པར་གཟུགས་སྐུ་སེམས་ཅན་གྱི་སྣང་བར་འདོད་དོ། །རྣམ་པ་མེད་པ་དང༌། རིག་པར་འདོད་པ་དང༌། རིག་པ་རྣམ་པ་མེད་པ་གཉིས་འགལ་བས་སྐྱོན་གོང་བཞིན་ནོ། །བསྒོམ་པ་ཡང་སྒྱུ་མར་ཤེས་པའི་ངར་ལ་བློ་འཇོག་གོ །སྐྱོན་ལྟ་བ་དང་སྒོམ་པ་གཉིས་ཏེ། ལྟ་བ་དང༌། བསྒོམ་པ་འདྲ་སྟེ། མུ་སྟེགས་གྲངས་ཅན་པ་ནི་ལུང་ལས། དེ་ཙམ་ཉི་ཤུ་ལྔ་ཤེས་ན། །རལ་པ་སྤྱི་བོར་བཅིངས་པའང་འགྲོལ། །ཅི་དགའ་སྤྱོད་པ་བྱེད་པ་དག །བདག་ནི་དེ་ལས་ཉམས་པ་ཡིན། །ཞེས་པས་ཕུང་པོ་ལྔ། འབྱུང་བ་ལྔ། ཕྱོགས་ལྔར་འདོད་དེ། རྩ་བའི་ཉི་ཤུ་རྩ་ལྔ་ཡང་ལྔ་སྟེ། ཐམས་ཅད་སོ་སོའོ། །སེམས་འདོད་ཆགས་ཞེ་སྡང་གཏི་མུག་གསུམ་ཆ་མཉམ་པ་ལས་སྣང་བ་བདེན་རྟག་པར་འདོད་པའོ། །དེ་ཡང་སེམས་སུ་བདེན་པས་དཔྱོད་པ་དང༌། རྟོག་པ་
དང་བྱ་བ་ཐབས་ཉེས་པ་མེད་འདོད་པའོ། །འདི་སྐད་ཅིག་མས་མི་རྟག་པ་རྒྱུན་དུ་གནས་པའོ། །རབ་ཏུ་མི་གནས་པའི་ལྟ་བ་ནི་དེ་ཐམས་ཅད་བདེན་པ་མ་ཡིན་ཏེ། ཀུན་རྫོབ་ཡིན་ལ་དོན་དམ་པ་ལ་རྣམ་གཅོད་དང་ཡོངས་གཅོད་མེད། རྣམ་གཅོད་ཡོངས་གཅོད་མེད་ཟེར་བ་རང་ཀུན་རྫོབ་པོ། །ལུང་ལས་ཀྱང་བདེན་པ་གཉིས་ཀྱི་མདོ་ནས། དོན་དམ་པའི་བདེན་པ་སངས་རྒྱས་འདས་པ་དང༌། མ་བྱོན་པ་དང༌། ད་ལྟར་བྱུང་བ་ཕྱོགས་བཅུ་ན་བཞུགས་པ་ཐམས་ཅད་ཀྱིས་མཐོང་བ་དང༌། ཐོས་པ་དང་ཤེས་པའང་མེད་ན། རིགས་ཀྱི་བུ་ཐོབ་པའམ་ཉམས་སུ་མྱོང་དུ་ལྟ་ག་ལ་ཡོད་ཅེས་དང༌། སློབ་དཔོན་ཀླུ་སྒྲུབ་ཀྱི་ཞལ་སྔ་ནས་ཀྱང༌། ཁྱོད་ཀྱི་དོན་དམ་གང་ཡིན་པ། །དེ་ནི་ང་ཡི་ཀུན་རྫོབ་ཡིན། །ཞེས་གསུངས་ལ། སློབ་དཔོན་བློ་གྲོས་མི་ཟད་པའི་ཞལ་སྔ་ནས་ཀྱང༌། དོན་དམ་བློ་སྒྲའི་སྤྱོད་ཡུལ་མིན། །བློ་དང་སྒྲ་ནི་ཀུན་རྫོབ་ཡིན། །ཞེས་གསུངས་སོ། །རིགས་པ་ཡང་གཏན་ཚིགས་ཆེན་པོ་བཞི་སྟེ། འདིར་གཏན་ཚིགས་བཞི་ཡང་གཞན་ལྟར་གསུམ་དང༌། ཤེས་བྱ་ཤེས་བྱེད་མ་གྲུབ་པ་བཞིའོ། །དེ་ཡང་རྒྱུ་མན་ཆད་དུ་འདོད་པ་ལ་རྟེན་ཅིང་འབྲེལ་འབྱུང་གིས་དོན་དམ་པ་དེ་གང་དངོས་པོ་རྣམས་རྣམ་པ་མེད་པའི་རིགས་སྒྱུ་མ་དེ་རྣམས་ཀྱང་སེམས་ཉིད་སྟོང་པ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་སྐུ་ཡང་རྟེན་འབྲེལ་ཀུན་རྫོབ་བོ། །དེ་ཡང་རྟོག་པ་སྣང་བ་ཕ་རོལ་ཏུ་ཕྱིན་པ་ལྔ། གཟུགས་སྐུ་ལ་ལྟོས་ནས་ཆོས་སྐུར་བཏགས་ཏེ། དེ་ཡང་དེ་རྣམས་སྟོང་པ་ལ་སོགས་པར་མཐོང་བ། ཆོས་སྐུ་ལ་ཆོས་སྐུར་འདོད་བ་དེ་རྣམས་མེད་ན་མེད་པའོ། །དེས་ན་རྡོ་དཀར་པོ་ཞེས་པ་དོན་དམ་དུ་མེད་ཀྱང་མི་དགེ་བ་ཀུན་རྫོབ་ཏུ། རྡོ་དང་དཀར་པོ་དང་སྲ་བ་ལྕི་བ་ཀུན་ལ་གྲགས་པས་ཡོད་པའོ། །དེས་ན་རྣམ་བཅས་རྣམ་མེད་སྒྱུ་མ་རྟེན་འབྲེལ་ཙམ་ཀུན་རྫོབ་སྒྱུ་མ་ཙམ་དུ་ཡོད་པའོ། །དོན་དམ་པར་མེད་པས་ཆོས་སྐུར་ཡང་མེད་དོ། །མུ་བཞི་སྐྱེ་འགོག་ནི་དོན་དམ་པར་འདོད་པ་ནི་ཡོད་ནས་འདོད་དམ་མེད་ནས་འདོད། ཡོད་ནས་འདོད་ན་ཡོད་པ་ནི་མེད་པ་ལ་ལྟོས་ནས་ཤེས་ཏེ། མེད་པ་མ་གྲུབ་པར་ཡོད་པ་ག་ན་གྲུབ། མེད་པ་གྲུབ་ན་ཡོད་པ་འགག་པའོ། །མེད་ནས་འདོད་ན་ཡང་མེད་པ་ཡོད་པ་ལ་ལྟོས་ནས་ཤེས་ཏེ། ཡོད་པ་གྲུབ་པར་མེད་པ་ག་ན་གྲུབ། ཡོད་
པ་མ་གྲུབ་ན་མེད་པ་འགག་པའོ། །གཉི་ག་འདོད་ནས། ཡོད་ན་མེད་པ་འགགས་ལ་མེད་ན་ཡོད་པ་འགགས་པས་སོ། །ཕུང་པོ་གསུམ་ཡང་མི་རིགས་ལ། གཉི་ག་མེད་པ་ཡང་མི་རིགས་ཏེ། གཉིས་སྔོན་དུ་མ་གྲུབ་པར་རོ། །གྲུབ་ནས་གཉིས་མེད་ན་བདེན་ཏེ། དེས་ན་ཀུན་རྫོབ་སྒྱུ་མ་ཙམ་མོ། །རྡོ་རྗེ་གཟེགས་མ་ཐོགས་པ་མེད་པ་ཡང་དོན་དམ་དེ་བདག་ལས་སམ་གཞན་ལས་སྐྱེ། ཡོད་ན་བདག་གྲུབ་པ་ལས་སམ། མ་གྲུབ་པ་ལས། གྲུབ་པ་ལས་སྒྲུབ་ན་སངས་རྒྱས་ཀྱང་སྒྲུབ་དགོས་པས་ཐུག་པ་མེད། ཡང་ན་ཕན་གནོད་མེད་དེ། གྲུབ་ཀྱང་སྒྲུབ་དགོས་པའི་ཕྱིར་རོ། །མ་གྲུབ་པ་སྒྲུབ་ན་ནམ་མཁའི་མེ་ཏོག་དང་རི་བོང་གི་རྭ་ཡང་སྒྲུབ་པར་འགྱུར་རོ། །མི་སྒྲུབ་ན་སྒྲུབ་པ་ལ་དགོས་པ་ཅི། གཞན་ལས་སྐྱེ་ན་རྟག་པ་ལས་སམ། མི་རྟག་པ་ལས། རྟག་པ་ལས་སྐྱེ་ན་རིམ་གྱིས་སམ། ཅིག་ཅར། རིམ་གྱིས་རྐྱེན་རྟག་པ་ཉ་མས་ཏེ་ས་བོན་ལས་མྱུ་གུ་ལྟར་འགྱུར་རོ། །ཅིག་ཅར་སྐྱེ་ན་དེ་ཉིད་འགྱུར་ནས་སམ་མ་འགྱུར་ནས་འགྱུར་ན་མི་རྟག །མ་འགྱུར་ན་གཅིག་སྐྱེ་བའམ། དུ་མ་སྐྱེ། གཅིག་སྐྱེ་ན་དུ་མ་མ་གྲུབ་པར་གཅིག་མི་འགྲུབ། གཉིས་ཀ་ཡང་གོ་རིམས་བཞིན་དུ་མི་རིགས་སོ། །མི་རྟག་པ་ལས་སྐྱེ་ན་ཡང་དེ་བཞིན་དུ་གཅིག་ལས་སམ། དུ་མ་ལས་ཀྱང་མི་རིགས་ཏེ། སྐད་ཅིག་མ་སྔ་ཕྱི་ཡང་སྔ་མ་འདས། ཕྱི་མ་མ་སྐྱེས། དེ་ལྟ་བ་ལ་ཡང་འདས་པ་དང༌། ད་ལྟར་མ་འོངས་པ་གསུམ་མ་གྲུབ་པའོ། །དེས་ན་སྒྱུ་མ་ཀུན་རྫོབ་ཙམ་མོ། །ཤེས་བྱ་ཤེས་བྱེད་མ་གྲུབ་ཀྱང་ང་རྒྱལ་གྱིས་འདོད་ན་ཡང་དོན་དམ་པ་དེ་ཤེས་བྱ་བའམ། ཤེས་བྱེད་དམ། གཉི་ག་ཤེས་བྱ་གང་གི་ཤེས། ཤེས་བྱེད་ཡིན་ན་གང་ཤེས། ཤེས་བྱ་ཡོད་ན་ཤེས་བྱེད་ཉམས། གཉིས་ཀ་ན་ཤེས་བྱ་སྔོན་དུ་སྐྱེའམ། ཤེས་བྱེད་སྔོན་དུ་སྐྱེ་ཤེས་བྱ་སྔོན་དུ་སྐྱེ་ན་ཤེས་བྱེད་ཅི་དགོས། ཤེས་བྱེད་སྔོན་དུ་སྐྱེ་ན་ཤེས་བྱར་གང་གིས་ཤེས། ལྷན་ཅིག་པར་ནི་ཤེས་པ་སྐད་ཅིག་མ་ལ་ཡང་རིགས་སོ། །དེ་ལྟར་རེ་རེ་མ་གྲུབ་བར་གཉིས་ཀྱང་མི་འགྲུབ། ཤེས་རབ་ལེ་འུར་སློབ་དཔོན་བློ་གྲོས་མི་ཟད་པས་བསྟན་པའོ། །དེས་ན་སྒྱུ་མ་ཀུན་རྫོབ་ཙམ་དུ་མི་འགག་སྟེ། ཀུན་རྫོབ་སྒྱུ་མ་ཡིན་ན་སངས་རྒྱས་བསྒྲུབས་པ་ལ་ཕན་མེད། ཀུན་རྫོབ་ཡིན་པས་ཟེར་ན་
དོན་དམ་པ་འདོད་ཐོག །ཀུན་རྫོབ་ལ་ཁྱབ་པ་མ་གྲུབ་སྟེ། ཀུན་རྫོབ་སྒྱུ་མར་འདྲ་བ་ལ། ཆུ་དང་མེའི་ལས་ཐ་དད། བདེ་སྡུག་ཚོར་བ་ཐ་དད། དེ་བཞིན་དུ་འཁོར་བ་དང་མྱ་ངན་ལས་འདས་པ་ཡང་ངོ༌། །དེས་ན་འདིར་ཆོས་སྐུ་དང༌། ངོ་བོ་ཉིད་ཀྱི་སྐུ་དང༌། གཟུགས་སྐུ་གཉིས་ཆར་ཡང་ཀུན་རྫོབ་པོ། །སྒྲུབ་པ་ཡང་ཀུན་རྫོབ་ཐོབ་པ་ཡང་ཀུན་རྫོབ་ཀུན་རྫོབ་ཏུ་རྒྱུན་ཆད་པར་སྐུ་བཞི་སྐུ་བཞི་སྐད་ཅིག་མར་མི་རྟག་པར་འགྱུར་བའོ། །ཁོ་ན་རེ་ཁྱོད་ལ་ཤེས་བྱེད་ཡོད་དམ་མེད་ཟེར་ན་དོན་དམ་པ་ལའམ། ཀུན་རྫོབ་ལ། དོན་དམ་པ་ལ་ཁས་ལེན་མེད་པར་ཤེས་ཅི་དགོས། ཀུན་རྫོབ་ལ་སྐད་ཅིག་གི་བྱེ་བྲག་གི་རྒྱུན་ལ་གཉིས་ཀ་ཡང་མི་སྟོ། ཤེས་བྱ་ཤེས་བྱེད་མེད་པས་ཆད་པའོ་ཟེར་ན་ཁས་མི་ལེན་པར་སྐྱོན་ཅི་གནོད་དེ། ནམ་མཁའ་ལ་སྐྱོན་ཅི་ལ་གདགས། ཡང་ཁྱོད་ལ་རྣམ་གཅོད་ཡོངས་གཅོད་མེད་ན། རྒྱུ་མན་ཆད་ལ་སྐྱོན་དེ་ཙམ་རྣམ་པར་བཅད་པས་རྣམ་གཅད་དེས་ཡོངས་སུ་གཅོད་པའི་སྒྲུབ་པ་ཡང་ཡོད་པས་ཁྱོད་ལ་ཡང་ཡོད་ལ། ཡང་དོན་དམ་དཔྱད་པས་ཡོད་ཟེར་ན། ང་ལ་དོན་དམ་རྣམ་གཅོད་ཡོངས་གཅོད་མེད་ན་ཁས་ལེན་མེད་དེ། ཁྱོད་དོན་དམ་དུ་ཡོངས་སུ་གཅད་ནས་འདོད་པ་ལ་དའི་ཀུན་རྫོབ་ཀྱི་སྤྱད་པའི་སྐྱོན་ཡོད་པ་མཐོང་ནས། རྣམ་པར་གཅོད་ལ། ཀུན་རྫོབ་ཀྱིས་དཔྱད་པས་དོན་དམ་པ་གྲུབ་པ་མེད་པར་ཡོངས་སུ་གྲུབ་ཀྱི། ཁྱེད་དེ་ལྟར་དོན་དམ་ལ་དོན་དུ་འདོད་པ་མེད་དོ། །ཡང་ཁོ་ན་རེ་འོ་ན་ཁྱོད་ཀུན་རྫོབ་ཀྱི་ཡོངས་གཅོད་ཀུན་རྫོབ་ཏུ་གྲུབ་པ་མན་ཞེ་ན་གྲུབ་སྟེ། འོ་ན་གྲུབ་པ་མེད་པ་དེ་རྣམ་གཅོད་ཡོངས་གཅོད་ཀྱིས་གྲུབ་ན་ང་དང་འདྲ་ལ། རྣམ་གཅོད་ཡོངས་གཅོད་སེལ་ན་ནི་སྒྲུབ་བྱེད་གང་གིས་བྱེད་ལ། སྒྲུབ་བྱེད་མེད་ན་ཅི་འགྲུབ་ཅེས་འདྲི་ན། ཁྱེད་དོན་དམ་དུ་འདོད་པ་རྣམ་པར་གཅོད་ཅིང༌། ཀུན་རྫོབ་ཏུ་གཅད་པས་མ་གྲུབ་པ་དེ་ཉིད་ཀུན་རྫོབ་ཏུ་གྲུབ་ལ། རྣམ་གཅོད་ཡོངས་གཅོད་ཀུན་རྫོབ་ལ་རང་བཞི་ནས། དོན་དམ་ལ་སེམས་བྱེད་མི་འདོད་ལ། མི་འདོད་ཟེར་བ་དང༌། དོན་དམ་ཟེར་བ་ཡང་དེ་ཙམ་དུ་བརྗོད་པར་ཟད་ཀྱི་མི་བརྗོད་དུ་མ་བཏུབ་པ་ལས་ཀུན་རྫོབ་བོ། །ཅི་འགྲུབ་ཟེར་བ་དོན་དམ་ལ་འདོད་ཐོག །དམ་བཅའ་མཐུན་པའོ། །ཀུན་རྫོབ་ཏུ་ཅི་ཡང་མ་ཡིན་པ་དེ་ལ་སྐད་ཅིག་གིས་སྔ་མ་རྒྱུན་མ་ཆད་པ་ཆུ་བོ་ལྟར་ཡིན་འཇིག་པའོ། །ཡང་ཁོ་ན་རེ། རྣམ་གཅོད་བ་དག་ལ་
མཐོང་བ་དེ་རང་ཞི་ལ། ཡོངས་གཅོད་ཁྱོད་རང་ཡོན་ཏན་དུ་མཐོང་བའི་ཁས་ལེན་མེད་པ་དེ། རྣམ་གཅོད་ནས་སམ། མཆོད་ནས། མཆོད་ན་གཉིས་སམ། ཕུང་པོ་གསུམ་པའི་སྐྱོན་ཡོད། ཆོད་ན་གཅོད་བྱེད་གཞན་ནས་འབྱུང་ངམ། དེ་ལས་ཡིན། གཅོད་བྱེད་ཤེས་པ་གཞན་ནས་འབྱུང་བ་མི་རིགས་ཏེ། སངས་རྒྱས་ལུང་རིགས་ཀུན་གྱིས་རང་ལ་འབྱུང་གིས་གཞན་གྱིས་མི་བྱེད། བྱེད་ན་སངས་རྒྱས་གཅིག་གིས་སེམས་ཅན་སངས་རྒྱས་ལ་འགོད་པར་རིགས་སོ། །དེ་ལས་བྱུང་ནས་རྣམ་པར་གཅོད་ན་དེ་གཅད་པའི་ཤེས་པ་དེ་ལ་ཡང་གཅོད་བྱེད་ཅིག་དགོས་པས་ཐུག་པ་མེད་པའམ། ཕན་མ་བཏགས་པའི་སྐྱོན་ཡོད་དོ་ཞེ་ན། དེ་ནི་དཔེར་ན་གཟུགས་སམ་སྒྲའི་ཡུལ་ཡོད་པས། མཐོང་བ་དང་ཐོས་པ་ཡོད་ལ། ཡུལ་མེད་ན་དབང་པོས་མཐོང་ཐོས་མེད་པ་ལ་རྐྱེན་མེད་དུ་རང་ཞི་ལ་ཤིང་མ་ཟད་ཀྱི་བར་ལ་མེ་འབར་ལ། ཤིང་ཟད་ནས་མེ་རང་ཞི་བ་ལ་རྐྱེན་མེད་དོ། །དེ་བཞིན་དུ་རྣམ་གཅོད་མེད་པས་དང་གིས་རབ་ཏུ་མི་གནས་སོ། །སྒོམ་པ་དེ་ལྟར་ཀུན་རྫོབ་རྣམ་གཅོད་ཡོངས་གཅོད་མེད་པ་དེ་ལ་ངང་གིས་ཀུན་རྫོབ་ཏུ་གནས་སོ། །ཀུན་རྫོབ་ལ་ཡང་གཉིས་ཏེ། དགེ་སྡིག་གཉིས་ཀྱི་རྒྱུ་འབྲས་ཀྱི་སྣང་བའོ། །སྤྱོད་འཇུག་ནས། དེ་ལ་ཀུན་རྫོབ་རྣམ་པ་གཉིས་མཐོང༌། རྣལ་འབྱོར་པ་ཡང་དེ་བཞིན་ཕལ་ཞེས་པའོ། །འཇིག་རྟེན་པའི་སྡིག་པའི་རྒྱུ་འབྲས་སྣང་བ་ལ་དབྱེ་ན་ཡང་མང་ལ། རྣལ་འབྱོར་བའི་དགེ་བའི་རྒྱུ་འབྲས་སྣང་བ་ཡང་མུ་སྟེགས་དང༌། ནང་པ་ལ་ཡང་མདོར་དབྱེ་བ་ཐེག་པ་གསུམ་དང༌། བྱེ་བྲག་ཏུ་སྨྲ་བ་ལ་སོགས་པའི་ལྟ་བ་དྲུག་གི་རིམ་པས་རྒྱུ་ཕ་རོལ་ཏུ་ཕྱིན་པ་དྲུག ། འབྲས་བུ་སྐུ་བཞི། དེ་ཡང་མཚན་ཉིད་ཀྱི་ལུགས་ཀྱིས་ཕ་རོལ་ཏུ་ཕྱིན་པ་དྲུག་བསྐལ་བ་གྲངས་མེད་གསུམ་དུ་སྦྱངས་པས་སྐུ་བཞི་ཐོབ་ལ། དེ་ཡང་གོང་བཞིན་སེམས་བསྐྱེད་ནས་སྤྱད་པས་སྤྱིན་པ་དང༌། ཚུལ་ཁྲིམས་ལ་བརྩོན་འགྲུས་ཀྱིས་གྲོགས་བྱས་ནས་གཞན་དོན་དུ་བསྔོ་བ་བསྔོས་པས་སྤྲུལ་སྐུ་འབྱུང་ལ། བཟོད་པ་བརྩོན་འགྲུས་ཀྱིས་གྲོགས་བྱས་པས་ལོངས་སྐུ། བསམ་གཏན་ལ་གྲོགས་བྱས་པས་ངོ་བོ་ཉིད་ཀྱི་སྐུར་རྒྱུན་དུ་རང་སེམས་གནས། དེ་རྣམས་ཐམས་ཅད་གདོད་ནས་རབ་ཏུ་མི་གནས་པའི་ཤེས་རབ་ལ་བརྩོན་པས་ཆོས་སྐུའོ། །དེ་ཡང་བྱམས་པས་ཞུས་
པའི་མདོ་ནས། སྦྱིན་དང་ཚུལ་ཁྲིམས་བཟོད་པ་དག །བརྩོན་པས་གཟུགས་སྐུ་འབྱུང་བའོ། །བསམ་གཏན་ཤེས་རབ་ངོ་བོ་ཆོས། །སྐུ་དེ་བརྩོན་འགྲུས་ཀྱིས་འབྱུང་ངོ༌། །ཞེས་བསྟན་ཏོ། །སྔགས་ཀྱི་ལུགས་ལ་སློབ་དཔོན་ལ་ལ་དག །ལམ་བདེ་བ་ཡིན་གྱི་ཉེས་པ་ཡིན་ཏེ། དཔེར་ན་རྡོ་རྗེ་གདན་དུ་འགྲོ་བ་ལ་རྟ་རྐང་འགྲོགས་པ་ཉིན་གཅིག་གིས་མི་སླེབ་པས་རྟ་བ་དེ་མི་ཆད་རྐང་ཐང་ཆད་དེ་ཕྱིན་པ་འདྲ་བ་བཞིན་དུ། སྔགས་དང་མཚན་ཉིད་སངས་རྒྱས་པའི་དུས་དང་རྩོལ་སྒྲུབ་འདྲ་སྟེ། སྔགས་པ་ཐབས་དང་བསམ་པ་དང་ལུས་མཚན་ཉིད་པ་བཞིན་མི་སྒྲུབ་པའི་ལོངས་སྤྱོད་དང་འདོད་ཡོན་གྱིས་སྒྲུབ་ཅེས་འདོད་དོ། །འདིར་ལམ་བདེ་བ་དང་ལམ་ཉེ་བར་འདོད་དོ། ཐབས་དང་བསམ་པ་གཙོ་བོས་ཉན་ཐོས་པས་མཚན་ཉིད་ཐེག་པ་ཆེན་པོ་ཉེ་ལ། དེ་བས་སྔགས་ཉེ་བའོ། །སྐུ་བཞིའི་རྒྱུ་ཡར་དམ་ཚིག་གི་ཕྱག་རྒྱ་ལས་སྤྲུལ་སྐུ་དང༌། ལོངས་སྐུ་ལས་ཀྱི་ཕྱག་རྒྱ་ལས་འབྱུང༌། ཆོས་ཀྱི་ཕྱག་རྒྱས་བདེ་བ་ཆེན་པོའི་སྐུ་འབྱུང༌། ཕྱག་རྒྱ་ཆེན་པོ་རྩོལ་སྒྲུབ་མེད་པ་དེ་ཡེ་ནས་གནས་པས་ཆོས་སྐུའོ། །ལམ་དུ་བསྒོམ་ཐབས་ལ་སོགས་པ་རྒྱས་པར་འོག་ནས་སྔགས་ཀྱི་སྐབས་སུ་སྟོན་ནོ། །སློབ་དཔོན་ལ་ལའི་ཀུན་རྫོབ་ཡང་དག་པ་ཟླ་བ་གཅིག་གམ་ཆུ་དངོས་བྱ་བ་ནུས་པ་ཡིན་ལ། ལོག་པའི་ཀུན་རྫོབ་སྨིག་རྒྱུའི་ཆུ་དང༌། ཟླ་བ་གཉིས་པར་མཐོང་བ་ནི་འཁྲུལ་ཏེ་མི་བདེན་པར་སྣང་ཟེར་བ་འདིར་མི་འདོད་དེ། འདིར་ཀུན་རྫོབ་སྨིག་རྒྱུ་དང༌། ཆོས་སྐུ་འདྲ་བར་མི་བདེན་པར་སྣང་ལ་འཁྲུལ་པའི་སྣང་བའོ། །དེ་ཡང་འཁྲུལ་པའི་སྨིག་རྒྱུའི་ཆུ་དང་ཟླ་བ་གཉིས་འཁྲུལ་པ་ལ་སྣང་བ་ཙམ་ལས་མེད་དེ། མ་འཁྲུལ་པ་ཆུ་ངོས་དང༌། ཟླ་བ་གཅིག་བྱང་ཆུབ་སེམས་དཔའ་ལ་སྣང་བ་ཙམ་ལས་དངོས་སུ་མེད་པས་བྱང་ཆུབ་སེམས་དཔའི་སྣང་བ་ཙམ་པོ་དེ་སངས་རྒྱས་ཀྱི་ངོ་བོ་ཉིད་དང༌། བདེ་བ་ཆེན་པོ་ལ་མེད། བྱ་བ་དེ་དོན་དམ་ལ་མེད་པས་དེ་ཀུན་ལོག་པར་སོང་ཞིང་མ་ཤེས་པའོ། །སྔ་མ་ལྟར་སྣང་བ་ཙམ་པོ་ཕྱེ་ན་དགེ་སྡིག་གཉིས་གྲངས་མེད་པར་བདེན་པའོ། །རིགས་པས་གནོད་ཀྱང་ཀུན་རྫོབ་ཏུ་བདེན་པ་ཙམ་དེ་ཉིད་བདེན་པར་བརྗོད་པའོ། །སྐྱོན་ནི་མུ་སྟེགས་བྲམ་ཟེ་དེ་ཉིད་དེ། ཁོའི་རྒྱུས་ནས། ཚངས་པ་
གདོང་བཞི་ཀུན་དུ་བཟང༌། །སེམས་ཉིད་དོན་དམ་པར་ཤེས་ཤིང༌། །སྣང་བ་ཐམས་ཅད་ཀུན་རྫོབ་སྟེ། །དེ་ལྟར་རྟོགས་ནས་ཕན་གནོད་མེད། །ཅེས་པས་རང་གི་སེམས་འདི་ཙམ་ལས་མགོ་ནས་རྐང་པའི་བར་དུ་མིག་དང་རྣ་བ་དང་བ་སྤུ་ལ་སོགས་པ་ཡང་མེད་ལ། ཕྱི་ན་ཡང་གཟུགས་སྒྲ་ལ་སོགས་པ་གང་ཡང་མེད་ཅིང་མ་རྙེད་པ་དེ་ཁོ་ན་རྙེད་པ་སྟེ། དེ་ཉིད་ནམ་མཁའ་ལྟར་བརྗོད་པ་དང༌། བསམ་པ་དང་བྲལ་ཞི་མཐའ་དང་བར་མཚམས་དང་མུ་མེད་པ་དེ་ཉིད་ལ་རྟོགས་པ་ཞེས་བྱ། ཆོས་སྐུ་ཞེས་བྱ། ཚངས་པ་ཞེས་བྱ། དེ་ཁོ་ན་ཉིད་ཅེས་བྱ། ཀུན་དུ་བཟང་པོ་ཞེས་བྱ་སྟེ། སངས་རྒྱས་ཡིན་ལ། དེ་ལ་དགེ་བས་ཕན་འདོགས་མ་མྱོང༌། མི་འདོགས་ལ། སྡིག་པས་གནོད་མ་མྱོང་མི་གནོད་ཀྱི། གཞན་སངས་རྒྱས་པ་དང༌། མུ་སྟེགས་རྩོལ་སྒྲུབ་ལ་རེ་བ་རྣམས་སྙིང་རེ་རྗེ། དོན་དམ་པ་དེ་ལ་རྩོལ་བ་མེད་པས་འགྲུབ་པས་སོ་ཞེས་ཟེར་རོ། །དེ་ཡང་འདིར་སྐྱོན་ཡིན་ཏེ། དེ་ཉིད་དེར་རྟོགས་པས་ཆོག་པ་དེ་རྟོགས་པར་གང་གིས་ཤེས། དེ་ལས་བྱུང་བ་ཞིག་ཤེས་སམ། གཞན་གྱིས་ཤེས། གཞན་གྱིས་ཤེས་ན་ཁྱོད་ཀྱིས་བདག་ཀྱང་རྟོགས་སུ་ཆུག །ང་སངས་རྒྱས་སུ་ཆུག །ཡང་ན་རང་ལ་སངས་རྒྱས་ཡོད་པ་དང༌། ཡིན་ཟེར་བ་དང་ཉམས། དེ་ཉིད་ལས་བྱུང་ན་དེ་ཁོ་ན་འདྲ་བ་ཅིག་བྱུང་ནས་ཤེས་སམ། མི་འདྲ་བ་ཅིག་བྱུང་ནས་ཤེས། མིང་འདྲ་བས་འདྲ་བར་མི་ཤེས་ཏེ། མི་འདྲ་བ་དེ་འདྲ་བ་མིན་ཏེ། མིན་པས་ཡིན་པར་ཤེས་པ་ག་ལ་ཡོད། རྟེན་ལོང་བ་ལ་སོགས་པས་མཐོང་བ་ལ་སོགས་པ་ཡོད་ན་སྟོན། དེས་ན་མི་འདྲ་བ་ཅིག་བྱུང་བས་ཀྱང་མི་ཤེས་པས་སངས་ཇི་ལྟར་རྒྱ། དེ་ཁོ་ན་འདྲ་བ་ཅིག་བྱུང་ནས་ཤེས་ན། དེ་སྔོན་ནས་ཡོད་ནས་ཤེས་སམ་ཞར་ལ་བྱུང༌། སྔོན་ནས་ཡོད་ནས་ཤེས་སམ། ད་ལྟ་ཤེས། སྔོན་ནས་ཡོད་ནས་སྔོན་རང་དུ་ཤེས་ན་ཤེས་པ་ལ་ཕན་མེད་ཅིང༌། སྔོན་ནས་ཤེས་པས་ད་ལྟ་སེམས་ཅན་དུ་འདུག་པ་ལ་ཕན་ཏེ། སངས་རྒྱས་ཀྱང་སེམས་ཅན་དུ་ཡོད་པས་སོ། །ཡང་ན་ཐུག་པ་མེད་དེ། སྔོན་ནས་ཡོད་ཀྱང་ད་ལྟ་ཡང་ཤེས་དགོས་པས་སོ། །སངས་རྒྱས་ལ་ཡང་ཐུག་པ་མེད་དོ། །ཡང་ན་རིགས་པ་ཡོད་དགོས་ན། ལ་ལས་སངས་རྒྱས་དགེ་བ་མ་བྱས་ཀྱང་
འགྲོ་བའམ་སྡིག་པ་མ་བྱས་ཀྱང་ངན་སོང་དུ་འགྲོ་བ་ལ་སོགས་པའོ། །ཡང་ན་དུས་རྒྱུར་ལྟ་བ་བཞིན་དུ་དུས་ཡོད་དགོས་ཏེ་མི་རིགས་སོ། །ཞར་ལ་བྱུང་བས་ཤེས་ན་དེ་ཉིད་གཉིས་སུ་སོང་བའམ། མང་པོའི་སྐྱོན་དང་རྒྱུ་རྐྱེན་མི་དགོས་ན་སྔོན་དུ་ཡང་འབྱུང་བར་རིགས། དགོས་ན་དེ་ཁོ་ན་འདྲ་བ་འབྱུང་ན་ཐུག་པ་མེད་པ་དང༌། ཕན་མེད་ན་དང༌། ཕན་པའི་སྐྱོན་དང༌། མི་འདྲ་ན་འགྱུར་མི་རྟག་པ་དང༌། གོང་ལྟར་རང་རིག་དང་ཀུན་སངས་རྒྱས་སུ་བྱ་བར་རིགས་སོ། །དེས་ན་ཕྱི་རོལ་མུ་སྟེགས་པ་དང༌། ནང་པ་སངས་རྒྱས་པ་ཐམས་ཅད་དོན་དམ་དུ་ཁས་ལེན་པ་དང༌། སངས་རྒྱས་འདོད་པ་སྐྱོན་ནོ། །དེ་ཡང་སྐད་ཅིག་མ་དང༌། རྒྱུ་མེད་པར་རྟག་པ་དང༌། ཐེར་ཟུག་པའོ། །སྐད་ཅིག་དང་རྒྱུན་མ་ཤེས་ན་སེམས་ཙམ་རྣམ་བཅས་རྣམ་མེད་སྒྱུ་མ་པ་དང་རབ་ཏུ་མི་གནས་པར་འདོད་ཀྱང་མུ་སྟེགས་སུ་འགྲོའོ། །མཚན་ཉིད་ཀྱི་དེ་ཉིད་མཐོང་བའི་ལམ་གྱི་རིམ་པའི་ལེའུ་སྟེ་དང་པོའོ།། །།གཉིས་པ་སྔགས་ཀྱི་རིམ་པ་བཤད་པ་ལ་གཉིས་ཏེ། སྣོད་དུ་བྱ་བ་དང་བཅུད་དུ་བྱ་བའོ། །སྣོད་དུ་བྱ་བ་ལ་དབང་བཞི་སྟེ། བུམ་པའི་དབང་དང་གསང་བའི་དབང་དང༌། ཤེས་རབ་ཡེ་ཤེས་ཀྱི་དབང་དང་བཞི་པའོ། །བཅུད་ལ་ཕྱག་རྒྱ་བཞིའོ། །བུམ་པའི་དབང་ལ་གཉིས་ཏེ། སློབ་མའི་བྱ་བ་དང༌། སློབ་དཔོན་གྱི་ལས་སོ། །སློབ་མའི་བྱ་བ་ལ་གསུམ་སྟེ། བསྙེན་པའི་བྱ་བ་དང༌། སྟ་གོན་གྱི་བྱ་བ་དང༌། ཞག་གི་བྱ་བའོ། །བསྙེན་པའི་བྱ་བ་ལ་ལྔ་སྟེ། སློབ་དཔོན་གྱི་མཚན་ཉིད་བརྟག་པ་དང༌། ཞུ་དབུལ་བ་དང༌། རྫས་བསགས་པ་དང༌། བསྙེན་པ་ཞུ་བ་དང༌། སྡོམ་པ་གཟུང་བའོ། །མཚན་ཉིད་བརྟག་པ་ལ་བཞི་སྟེ། བརྒྱུད་པ་དང་ལྡན་ཞིང་དོན་དམ་མི་གནས་པར་རྟོགས་པ་དང༌། དམ་ཚིག་དང་ཞིང་བྱིན་རླབས་འབྱུང་བ་དང༌། རྒྱུད་དེ་ཤེས་ཤིང་དཀྱིལ་འཁོར་ལ་མཁས་པ་དང༌། གཞན་དོན་ལ་བརྩོན་ཞིང་ཆགས་པ་མེད་པའོ། །ཞུ་དབུལ་བ་ནི་བདག་ཡང་དག་པར་རྫོགས་པའི་སངས་རྒྱས་ཐོབ་པར་བྱ་བའི་དོན་དུ་ཞི་བ་ལ་སོགས་ཐུན་མོང་གིས་གཞན་དོན་དང༌། མཆོག་གིས་འགྲོ་བ་ཐམས་ཅད་སངས་རྒྱས་ལ་བཀོད་པའི་དོན་གྱི་ཕྱིར་སློབ་དཔོན་བདག་ལ་བུམ་པའི་དབང་ཞུ་འཚལ་ཞེས་བརྗོད་ཅིང༌། མཎྜལ་དང་མེ་ཏོག་གི་ཕྲེང་བ་དག་
དབུལ་ལོ། །རྫས་བསག་པ་ནི་རྒྱུད་ཀུན་ནས། །རིན་ཆེན་གསེར་དངུལ་མུ་ཏིག་དང༌། །མེ་ཏོག་ལ་སོགས་རྒྱལ་སྲིད་བཅས། །གཏོར་མ་ཤིང་རྟས་བསྐྱལ་བ་དང༌། །དཔའ་བོའི་སྟོན་མོས་དགའ་སྟོན་བྱ། །ཞེས་པས་འཁོར་ལོ་མཆོད་པ་ལ་ཆུ་གཙང་བརྒྱད་སྟོང་ཁྲི་འབུམ་གྱི་བར་དུ་དགྲམ། དེ་བཞིན་དུ་མེ་ཏོག་སྤོས། མར་མེ་དྲིའི་བྱེ་བྲག་དཔག་ཏུ་མེད་པ་དང༌། ཞལ་ཟས་དཔག་ཏུ་མེད་པ་དང༌། སིལ་སྙན་དཔག་ཏུ་མེད་པ་བསག་གོ །རྒྱལ་སྲིད་རིན་པོ་ཆེ་སྣ་བདུན། བཀྲ་ཤིས་ཀྱི་རྫས་བརྒྱད། གཟུགས་སྒྲའི་བྱེ་བྲག་དབུལ་བ་དང༌། ཤ་ལྔ་དང༌། བདུད་རྩི་ལྔ་དང༌། རྡོ་རྗེའི་གླུ་གར་དང། ནང་གི་མཆོད་པ་དང༌། བཅུ་གཉིས་བཅུ་དྲུག་ཉི་ཤུས་མཛད་པ་དེ་ཁོ་ནའི་མཆོད་པ་དེས་ཁོ་ནའི་མཆོད་པ་བསག །བླ་མ་མཆོད་པ་ལ་ཨང་དེ་ལྟར་མཆོད་པ་གསུམ་དང༌། རྒྱུན་གྱི་བྱེ་བྲག་བསག་པ་དང༌། ཆོས་སྐྱོང་མཆོད་པའི་ཡོ་བྱད་འབྲས་ཆན་ལ་སོགས་པ་ཆན་གྱི་རིགས་ཇི་སྙེད་ཡོད་པ་དང༌། ཤ་དང་ཉའི་རིགས་དང༌། ཏིག་ཏས་བྲན་པའི་ཚོད་མ་ལ་སོགས་པའི་རིགས་དང༌། ཞོ་ལ་སོགས་པའི་དཀར་གྱི་རིགས་དང༌། ལ་དུ་ལ་སོགས་པ་ཁུར་བའི་རིགས་དང༌། གུར་ཀུམ་ལ་སོགས་པ་སྨན་གྱི་རིགས་དང༌། ན་རི་ཀེ་ལ་སོགས་པའི་འབྲས་བུའི་རིགས་དང༌། པོག་ཕྲན་ལ་སོགས་པ་ལ་དུའི་རིགས་དང༌། ཀ་ར་ལ་སོགས་པ་མངར་གྱི་རིགས་དང༌། ལ་ཕུག་ལ་སོགས་པ་རྩ་བའི་རིགས་དང༌། གཞན་ཡང་བཅའ་བ་དང༌། ཚ་བ་དང༌། ཁ་བ་དང༌། སྐྱུར་བའི་རིགས་ཀྱི་མཆོད་པའོ། །རྫས་བསག་པ་དང༌། དགའ་སྟོན་བྱ་བ་ཡང་རྒྱུད་ནས། །མཆོད་འོས་མ་གྱུར་གཏོར་མ་དབང༌། །སྡེ་དང་རིགས་རྣམས་དགའ་བར་བྱ། །ཞེས་པས་དབང་ཐོན་ནས་ཡོ་བྱད་ལྷག་པ་ལ་རྣལ་འབྱོར་པ་དང༌། ཀུ་སུ་ལུའི་ཚོགས་དང༌། པཎྜི་ཏ་དང༌། སློབ་མའི་འཁོར་དང༌། དགེ་འདུན་དང༌། དགེ་བསྙེན་གྱི་གཡོག་དང༌། རྒྱལ་པོ་དང༌། རྒྱལ་རིགས་དང༌། བྲམ་ཟེ་དང༌། རིག་བྱེད་ཀྱི་སྡེ་དང༌། རྗེའུ་རིགས་དང༌། གཙང་མ་རྣམས་དང༌། དམངས་རིགས་དང༌། རིགས་ངན་རྣམས་ལ་ཅི་རིགས་པས་མཆོད་པ་དང༌། སྦྱིན་པ་བྱ་བའི་ཕྱིར་བསག་གོ །བསྙེན་པ་ཞུ་བ་ནི་དེ་ལྟར་རྫས་ཚོགས་ནས་སློབ་དཔོན་བདག་གི་བསམ་པ་སྒྲུབ་པར་ཞུ་ཞེས་ལན་གསུམ་བརྗོད་ཅིང་
མཎྜལ་དང་མེ་ཏོག་གི་ཕྲེང་བ་དབུལ་ལོ། །སྡོམ་པ་གཟུང་བ་ནི་བསྙེན་པའི་དུས་ཏེ་འོག་ནས་སྟོན་ཏོ། །སློབ་དཔོན་གྱིས་ལས་ལ་ཤེས་པ་དང་དབང་བསྐུར་བ་སྟེ། ཤེས་པ་ལ་བཞི་སྟེ། བརྒྱད་པ་དང་ལྡན་པས་སངས་རྒྱས་ནས་བར་མ་ཆད་པ། དོན་དམ་རྟོག་པ་རབ་ཏུ་མི་གནས་པའི་ལྟ་བ་འདོད་པ་རྟོག་པས་སྐུ་བཞི་མན་ངག་གིས་སྒྲུབ་པའི་དོན་ཤེས་པ་དང༌། བྱིན་རླབས་དམ་ཚིག་ལས་འབྱུང་བས་དམ་ཚིག་ཤེས་ནས་བསྲུང་བ་དང༌། རྒྱུད་དང་དཀྱིལ་འཁོར་གྱི་ཆོ་ག་ལ་མཁས་པས་མ་ཚང་བ་བརྒྱད་ཀྱིས་ཁ་སྐོང་བ་དང༌། སློབ་མ་ཡོངས་སུ་སྐྱོབ་པ་དང༌། གཞན་དོན་ལ་བརྩོན་ཞིང་མ་ཆགས་པས་བསྙེན་པ་དང་ལྡན་ཞིང་འབྱོར་པ་ལ་ཕན་པའོ། །ཆོ་ག་ལ་གསུམ་སྟེ། བསྙེན་པའི་ཆོ་ག་དང༌། དཀྱིལ་འཁོར་གྱི་ཆོ་ག་དང༌། དབང་བསྐུར་བའི་ཆོ་གའོ། །བསྙེན་པ་ལ་སློབ་མའི་བསྙེན་པ་དང༌། ལྷའི་བསྙེན་པ་གཉིས་ལས་སློབ་མའི་བསྙེན་པ་ལ་ཡང་སྡོམ་པ་སྦྱིན་པ་དང་བསྲུང་བ་གཉིས་སོ། །སྡོམ་པ་སྦྱིན་པ་ལ་སློབ་དཔོན་རིམ་གྱིས་བསྟན་པ་སློབ་མ་སྲུང་དུ་གཞུག་པ་གཉིས་ལས། སློབ་མ་སྲུང་དུ་གཞུག་པའི་སྡོམ་པ་ལ་ཡང་ཆུང་བ་དང༌། ཆེ་བ་གཉིས་ལས་ཆུང་བ་ནི་སྔོན་དུ་བསྟན་པའི་སྐྱབས་སུ་གསོལ་བའི་བྱེ་བྲག་བདུན་དང༌། རྟེན་དང་བསླབ་པའི་བྱེ་བྲག་རྣམས་རིམ་པས་བསྟན་ལ་སྲུང་དུ་གཞུག་པའོ། །ཐེག་པ་ཆེན་པོའི་ཡང་དེ་བཞིན་དུ་གོང་དུ་བསྟན་པ་བཞིན་དུ་སྲུང་དུ་གཞུག་པའོ། །བསྲུང་བ་ལ་ཡང་གཉིས་ཏེ། མཁའ་གསང་དུ་རྣམ་པར་སྣང་མཛད་དུ་བྱ་སྟེ། ཕྱོགས་བཅུའི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་ནས་གདོན་པ་དང༌། རྒྱུ་གོང་བསྙེན་གྱི་བསྲུང་བ་སྔགས་ཟློས་སུ་གཞུག་པའོ། །ལྷའི་བསྙེན་པ་ལ་བསྙེན་ཐབས་དང༌། བརྟག་གཉིས་ལས། ལྷའི་བསྙེན་པའི་ཐབས་ལ་རྫས་ཀྱིས་བསྙེན་པ་དང༌། ཏིང་ངེ་འཛིན་དང༌། སྔགས་ཀྱིས་བསྙེན་པ་དང་གསུམ་མོ། །རྫས་ལ་མཎྜལ་ཕུལ་བས་འཁོར་བས་འཁོར་ལོ་བསྙེན་པ་དང༌། གཏོར་མས་ཆོས་སྐྱོང་བསྙེན་པའོ། །ཏིང་ངེ་འཛིན་ལ་རྣལ་འབྱོར་བཞིས་འཁོར་ལོ་བསྙེན་པ་དང་དགུག་གཞུག་བསྐྱེད་པས་ཆོས་སྐྱོང་བསྙེན་པའོ། །སྔགས་ལ་གཙོ་འཁོར་གཉིས་བསྙེན་པ་དང༌། ཡི་
གེ་བརྒྱ་མཚམས་སྦྱར་བའོ། །རྟགས་ལ་མངོན་སུམ་དང༌། མཚན་མ་དང༌། གྲངས་སུ་བསྐྱལ་པའོ། །དཀྱིལ་འཁོར་གྱི་ཆོ་ག་ལ་ཡང་བཞི་སྟེ། དཀྱིལ་འཁོར་རྒྱུའི་བྱ་བ་དང༌། ལྷག་གནས་དང༌། དཀྱིལ་འཁོར་གྱི་ངོ་བོ་དང༌། ཆོ་ག་དངོས་སོ། །རྒྱུའི་བྱ་བ་ལ་བདུན་ཏེ། ས་བཙལ་བ་དང༌། བརྟག་པ་དང༌། བསླང་བ་དང༌། གཟུང་བ་དང༌། གཅད་པ་དང༌། སྦྱང་བ་དང༌། བརྩིག་པའོ། །ལྷ་གནས་ལ་བཞི་སྟེ། སའི་ལྷ་མོ་དང༌། འཁོར་ལོ་དང༌། བུམ་པ་དང༌། སློབ་མ་ལྷག་པར་གནས་པའོ། །ངོ་བོ་ལ་ཐིག་གདབ་པ་དང༌། ཚོན་དགྱེ་བ་དང༌། རྒྱན་དགོད་པའོ། །ས་བཙལ་བ་ལ་ཏིང་ངེ་འཛིན་སོགས་ཀྱིས་ལུས་ལྷ། ཡིད་གང་འདོད་ཀྱི་འགྲོ་དོན་ལ་དམིགས་པ་དང༌། ངག་སྙིང་པོའི་སྦྱོར་བ་དང༌། བཙལ་བ་དངོས་ལ་ལས་དང་སྦྱར་ལ་ཕྱོགས་བཙལ་བ་དང༌། རྒྱུད་ལྟར་དབེན་པའམ་མི་འཇིགས་པའི་ས་བཙལ་བའོ། །བརྟག་པ་ལ་ཡང་སྦྱོར་བ་དངོས་སུ་སོང་བ་ལས་དང་སྦྱར་བ་ཁ་དོག་དབྱིབས་བརྟག་པ་དང༌། རྒྱུད་ལྟར་བུམ་པ་ལ་སོགས་པའི་མཚན་ཉིད་བརྟག་པའོ། །བསླང་བ་ལ་ཡང་བདག་པོ་དངོས་པོར་སྣང་བ་ལས་བསླང་བ་དང༌། དངོས་པོ་མེད་པ་ལས་བསླང་བའོ། །གཟུང་བ་ལ་ཡང་རྣལ་འབྱོར་བཞིས་གཟུང་བ་དང༌། སའི་ལྷ་མོ་དབང་བས་གཟུང་བའོ། །གཅད་པ་ལ་ཡང་ཇི་ཙམ་འདོད་པ་དེ་སའི་ལྷ་མོ་མཁའ་ལ་བཏེག་ལ་ཡིད་ཀྱིས་གཅད་པ་དང༌། ཁྲོ་བོའི་ཕུར་བུས་ཕྱོགས་མ་ནོར་བར་གཅད་པའོ། །སྦྱང་བ་ལ་རྫས་དང༌། ལུས་དང༌། ངག་དང༌། ཡིད་ཀྱིས་སྦྱང་བ་ལྔ་ལས། རྫས་ལ་ས་རོ་མང་ན་ལེགས་པར་བསལ། གཞན་གྱིས་དགང་བ་དང༌། རིན་པོ་ཆེའི་བུམ་པ་བཅུད་ཅན་སྦ་བ་དང༌། གཏོར་མ་གཏང་བའོ། །ལུས་རྐང་པ་རྡོ་རྗེ་བརྐྱང་བསྐུམ་གྱིས་བགེགས་བསལ་བའོ། །ངག་སློབ་མས། དེ་བཞིན་གཤེགས་ཀུན་ཞི་བ་དང༌། །ཞེས་པ་ལ་སོགས་པ་དང༌། ཡཀྵ་ཞེས་བརྗོད་པས་བགེགས་བསལ་བའོ། །ཡིད་དྲ་བ་དང༌། གུར་དང༌། གདོད་ནས་དག་པ་དང༌། རྡོ་རྗེའི་གདན་ལྟར་མི་འགྱུར་བར་བསམ་མོ། །རྩིག་པ་ལ་དྲི་དང་བའི་རྣམ་པ་ལྔ་བསྲེས་ལ་ཚད་དང་ལྡན་པར་བརྩིག་པ་དང༌། དྲི་དང་སྤོས་བྱུག་པའོ། །སའི་ལྷ་མོ་ལྷག་པར་གནས་པ་ལས་བསྐྱེད་པ་དང༌། ནམ་མཁའི་སྤྱན་
དྲང་བ་དང༌། མཆོད་པ་དང༌། གཉིས་མེད་བྱས་ལ་བསྟིམ་པའོ། །འཁོར་ལོ་ལྷག་གནས་ལས་མེ་ཏོག་དགོད་པ་དང༌། ལྷ་བསྐྱེད་པ་དང༌། གསོལ་བ་གདབ་པ་གསུམ་པ་ལས། མེ་ཏོག་དགོད་པ་ལ་རྡོ་རྗེ་སློབ་དཔོན་གྱིས་ལྷའི་གནས་སུ་མཚན་མ་གདབ་པ་དང༌། ལས་ཀྱ་སློབ་དཔོན་གྱིས་མེ་ཏོག་དགོད་པའོ། །ལྷ་བསྐྱེད་པ་ནི་སྦྱོར་བ་གསུམ་གྱི་རྣལ་འབྱོར་བཞི་སྒྲུབ་ཐབས་ཀྱི་འདོད་པས་བསྐྱེད་པའོ། །གསོལ་བ་གདབ་པ་ལ་ལྔ་སྟེ། སློབ་དཔོན་ཕྱིར་བྱུང་ལ་ཤར་ནས་ཡིད་ཀྱིས་བལྟ་བ་དང༌། འཁོར་ལོའི་ལྷ་ལ་གསོལ་བ་གདབ་པ་དང༌། སངས་རྒྱས་དང་བྱང་ཆུབ་སེམས་དཔའ་སྤྱི་ལ་གསོལ་བ་གདབ་པ་དང༌། ཆོས་སྐྱོང་ལ་གསོལ་བ་གདབ་པ་དང༌། གསོལ་བ་བཏབ་ལ་མཁའ་ལ་གཤེགས་པའོ། །བུམ་པའི་ལྷག་གནས་ལ་མཚན་ཉིད་དང༌། ཕྱིའི་བྱ་བ་དང༌། ནང་གི་བྱ་བ་གསུམ་མོ། །མཚན་ཉིད་ལ་གྲངས་ལྷ་དང་སྦྱོར་བ་དང༌། རྒྱུ་རིན་པོ་ཆེའམ་ས་ལས་བྱས་པ་དང༌། མུ་སྟེགས་ཀྱི་མ་ཡིན་པ་བྲེ་གང་ལས་མི་ཆུང༌། བྲེ་གསུམ་ལས་མི་ཆེ་བ། རྩ་བ་མེད་ཅིང་མི་གནག་པའོ། །ཕྱིའི་བྱ་བ་ལ་ཡང་མཚན་མ་གདབ་པ་དང༌། ཁ་རྒྱན་མགུལ་རྒྱན་གྱིས་བརྒྱན་པ་དང༌། གདན་ལ་གཞག་པའོ། །ནང་གི་བྱ་བ་བཅུད་ལ་དྲུག་སྟེ། བཅུད་བླུགས་པ་དང༌། གཞལ་ཡས་ཁང་དང་ལྷར་བསྐྱེད་པ་དང༌། ཡེ་ཤེས་ཀྱི་ལྷ་དགུག་པ་དང༌། མཆོད་པ་དང༌། སྔགས་བཟླས་པ་དང༌། བཞུ་བས་བཀང་ལ་གནས་སུ་གཞག་པའོ། །སློབ་མའི་ལྷག་གནས་ལ་སློབ་དཔོན་དང༌། སློབ་མ་འབྲེལ་བའི་བྱ་བ་བདུན་ཏེ། སྤྲོ་བ་བསྐྱེད་པ་དང༌། གནང་བ་སྦྱིན་པ་དང༌། སྡོམ་པ་སྦྱིན་པ་དང༌། བསྲུང་བ་དང༌། སོ་ཤིང་དོར་བ་དང༌། ཀུ་ཤའི་སྔས་དང་སྟན་སྦྱིན་པ་དང༌། གཟེངས་བསྟོད་ལ་ཉལ་དུ་གཞུག་པའོ། །སྤྲོ་བ་བསྐྱེད་པ་ལ་གསུམ། སློབ་མས་ཁྲུས་བྱས་ལ་མཎྜལ་དབུལ་བ་དང༌། སློབ་དབོན་གྱིས་སྔགས་ཀྱི་དངོས་གྲུབ་ཅེས་པའི་ཆོས་བསྟན་པ་དང༌། སློབ་མས་ཕ་རོལ་ལ་དམིགས་ཏེ་རྒྱ་ཆེ་བར་ཤེས་པར་བྱའོ། །གནང་བ་སྦྱིན་པ་ལ་ནོད་པ་དང༌། སྦྱིན་པ་གཉིས་ལས། དགའ་ཆེན་ཞེས་སྤྲོ་བས་ནོད་པ་དང༌། བུ་ཚུར་ཞེས་བརྩེ་བས་སྦྱིན་པའོ། །སྤྲོ་བ་ལ་གསུམ་སྟེ། སངས་རྒྱས་ཞེས་སྐྱབས་སུ་གཞུག་པ་དང༌། སྐྱབས་པའི་ཡོན་ཏན་སངས་རྒྱས་
ལོངས་སྐུ། ཆོས་བདེབས་བསྒྲུབ་པ་དང༌། དགེ་འདུན་གཙོ་བོའི་ངོ་བོ་བསྟན་པ་དང༌། སྡོམ་པ་དང་ལྡན་པས་སློབ་དཔོན་དེ་གསུམ་དང་ལྡན་པ་དང༌། ཁྱོད་ཀྱི་དབང་ཐོབ་ནས་ཡིན་པར་འགྱུར་རོ། །སྡོམ་པ་དངོས་ལ་གཉིས་ཏེ། མཚན་ཉིད་ཀྱི་དང་སྔགས་ཀྱིའོ། །མཚན་ཉིད་ལ་བདུན་སྔོན་དུ་སོང་བའོ། །སྔགས་ལ་གཉིས་ཏེ། སློབ་དཔོན་གྱི་དང་རིགས་ལྔའི་སྡོམ་པ་འཛིན་དུ་གཞུག་པ། འདི་ནི་སངས་རྒྱས་ཞེས་པས་གཞུག་པའོ། །བསྲུང་བ་ལ་འབྱོར་བས་བསྲུང་བ་དང༌། གདམས་པས་བསྲུང་བའོ། །འབྱོར་བ་ལ་ཞི་སོགས་ཀྱི་སྦྱིན་སྲེག་བྱའོ། །གདམས་པས་བསྲུང་བ་ལ་སློབ་མ་དང་སློབ་དཔོན་གྱི་བྱ་བ་གཉིས་ལས། སློབ་མས་བསྲུང་བ་ལ། ལུས་གུས་པས་རྐང་པ་གཡས་པའི་པུས་མོ་ས་ལ་བཙུགས་ལ་བསྡད་པ་དང༌། ཡིད་བྱ་བ་དྲན་པར་བྱའོ། །སློབ་དཔོན་གྱིས་བསྲུང་བ་ལ་ཏིང་ངེ་འཛིན་དང༌། མཆོད་པ་དང་རྫས་གསུམ་གྱིས་བསྲུང་བའོ། །ཏིང་ངེ་འཛིན་མཁའ་གསང་དུ་སློབ་མ་རྣམ་པར་སྣང་མཛད་དུ་བྱིན་གྱིས་བརླབས་ལ་གདོན་པ་དང༌། སངས་རྒྱས་ཐམས་ཅད་ལུས་ལ་གཞུག་པའོ། །མཆོད་པ་ལ་གནས་གསུམ་དུ་དྲིས་མཚན་མ་བྱ་བ་དང༌། ལྷ་བསྐྱེད་པ་དང༌། ཕྱི་ནང་གི་མཆོད་པས་དངོས་སུ་མཆོད་པའོ། །རྫས་ལ་སྐུད་པ་དང༌། གཏོར་མ་གཉིས་ལས། སྐུད་པའི་རྒྱུ་དང༌། ཏིང་ངེ་འཛིན་དང༌། སྔགས་དང༌། གདགས་ས་བཞི་ལས། རྒྱུ་རས་སམ་བལ་ལམ་རིང་ཐུང་སུམ་བསྒྲིལ་མདུད་མ་བདུན་ནམ་ལྔ་གསུམ་དུ་བྱའོ། །ཏིང་ངེ་འཛིན་ལ་བདུད་རྩི་འཁྱིལ་བ་ལ་སོགས་པར་བསྐྱེད། ཡེ་ཤེས་དགུག་མཆོད། གཉིས་མེད་དུ་བྱས་ཏེ། སྔགས་དེ་བརྒྱ་སྟོང་དུ་བཟླས་ཏེ་གོ་ཆར་བསམ་པའོ། །གདགས་ས་སྐྱེས་པའི་གཡོན། བུད་མེད་ཀྱི་གཡས་སུའོ། །གཏོར་མ་ལ་རྒྱུ་བྱིན་གྱིས་བརླབས་པ། མགྲོན་བསྔོ་བའོ། །རྒྱུ་སྣོད་ཀ་པཱ་ལ་དང༌། རིན་པོ་ཆེའམ། དེ་མེད་ན་ཤིང་དང་རྡོ་ཀྱོང་ཡང་བཟང༌། བྱིན་གྱིས་བརླབ་པ་སྣོད་དང་བཅུད་ལས། སྣོད་རླུང་མེ་བསྐྱེད་པ་ཀ་པཱ་ལར་རོ། །བཅུད་བདུད་རྩི་ལྔ་དང་ཤ་ལྔའོ། །མགྲོན་ལ་གནས་དང༌། ལྷ་གཉིས་ལ། གནས་ཆོས་འབྱུང་པདྨ་དང༌། ལྷ་ལ་བསྐྱེད་པ་དང༌། དགུག་པ་ལས། བསྐྱེད་པ་བར་དུ་ཆོས་སྐྱོང༌། སྟེང་དུ་ལྷ་ཆེན་པོ། འོག་ཏུ་ཀླུ་སྟེ་གཞན་ལྟར་རོ། །སོ་ཤིང་དོར་བ་ལ་བདུན་ཏེ། སོ་ཤིང་
གི་མཚན་ཉིད་དང༌། དོར་ས་དང༌། སློབ་མའི་ཁ་ལྟ་ཕྱོགས་དང༌། དོར་བའི་ཐབས་དང༌། དགོས་པ་དང༌། དེ་ལ་དགོས་པ་དང༌། ལྟས་བརྟག་པའོ། །ཀུ་ཤའི་སྔས་དང༌། སྟན་སྦྱིན་པ་ལ་ཀུ་ཤ་བསངས་ལ་གཙོ་བོའི་སྔགས་ཀྱིས་སྔགས་སུ་སྦྱིན་པ་དང༌། ལས་བུམ་གྱིས་བསངས་ལ་ལས་ཀྱི་སྔགས་ཀྱིས་སྟན་དུ་སྦྱིན་པའོ། །གཟེངས་བསྟོད་ནས་ཉལ་དུ་གཞུག་པ་ལ། གཟེངས་བསྟོད་པ་དང༌། ཉལ་པ་ལ་གཉིས་ཏེ། སློབ་དཔོན་གྱིས། འཇིག་རྟེན་དུ་ནི་ཀུན་མཁྱེན་དག །ཅེས་ངེས་པར་བསྟན་པ་དང༌། སློབ་མས་སྤྲོ་བས་ཡིད་ཆེས་པས་མཉན་ནས་དགའ་བར་བྱའོ། །ཉལ་བ་ལ་སྤྱོར་བ་དང༌། རྨི་ལམ་བརྟགས་པ་དང་བཟླ་བའོ། །སྦྱོར་བ་ལ་ལུས་སེང་གེའི་ཉལ་སྟབས་ཀྱིས་དཀྱིལ་འཁོར་དང་སློབ་དཔོན་ལ་སྔགས་བསྟན་ལ་ཉལ་བ་དང༌། ངག་བསྙེན་པའི་དུས་ཀྱི་སྙིང་པོ་བཟླས་པ་དང༌། ཡིད་འགྲོ་བ་དང་བདག་གི་དོན་འདོད་པས་ཐ་མལ་ལ་མ་ཡེངས་པས་ཉལ་བའོ། །རྨི་ལམ་བརྟག་པ་ནི་བདག་གི་སོ་ཤིང་གི་ལྟས་དང་མཐུན་པའི་ཐུན་མོང་དང་མཆོག་གི་ལྟས་ཤོག་ཅིག །སྟོན་ཅིག་ཅེས་བརྗོད་དོ། །རྨི་ལམ་བཟླ་བ་ལ་བཟླ་བ་དང་བརྟག་པའོ། །བཟླ་བ་བླ་མ་ལ་མཎྜལ་ཕུལ་ནས་དང་པོའམ་ཐ་མ་གང་གསལ་བཟླའོ། །བརྟག་པ་ནི་རྨི་ལམ་བཟང་བ་ལ་སོགས་པ་དང༌། ངན་པ་མར་ནག་གིས་ལུས་བྱུགས་སམ། སྤྲེའུ་དང་འབུ་སྤྲང་དང༌། སྡིག་སྤྲུལ་གྱིས་སོས་བཏབ་པ་རྨིས་ན་ཞི་སོགས་མན་ངག་གིས་སྦྱིན་སྲེག་བྱ། གཞན་ཡང་ཆུས་ཁྱེར་བ་ལ་སོགས་པ་རྨིས་ན་སྔགས་མང་དུ་བཟླ། གཞན་གྱིས་བདག་གི་ནོར་སོགས་ཁྱེར་ན་བཟང་པའོ། །གཞན་ཡང་བཟང་བ་མང༌། ངན་ཡང་སྒྱུ་མར་ཤེས་ན་ཟློགས་སོ། །ཐིག་ལ་རྒྱུ་དང༌། བྱིན་གྱིས་བརླབ་པ་དང་གདབ་པའོ། །རྒྱུ་དཀར་པོ་ལ་སོགས་པ་ལྔའོ། །བྱིན་གྱིས་བརླབས་པ་ཐིག་སྐུད་འཁལ་པ་བདག་ལྷ་གཙོ་བོའི་ངོ་བོར་གསལ། འཁལ་མཁན་ཤར་གྱི་ལྷར་གསལ། ནག་པོ་དཀར་པོ་སེར་དམར་ལྗང་གུ་གཙོ་བོའི་འོད་ཀྱིས་ལྟར་གསལ། འོད་ཀྱིས་རིགས་ཀྱི་ཐུགས་དམ་བསྐུལ་ས་སྤྱང་བ་དང་སྣོད་དུ་ལྷ་བསྐྱེད་པ་དང༌། ཡེ་ཤེས་ཀྱི་ལྷ་དགུབ་། མཆོད་བསྒྲིལ། གཉིས་མེད་ཐིག་ཏུ་གྱུར་པའོ། །གདབ་པ་ཡེ་ཤེས་ཀྱི་མཁའ་ལ་གདབ་པ་དང༌།
དམ་ཚིག་གི་སྐུད་པས་དཀྱིལ་འཁོར་དངོས་ལ་གདབ་པ་དང༌། ཡེ་ཤེས་ཀྱི་སྐུད་བས་བསྲེ་བའོ། །ཚོན་ལ་རྒྱུ་དང་བྱིན་གྱིས་བརླབ་པ་དང་དགྱེ་བའོ། །རྒྱུ་རིན་པོ་ཆེའམ་འབྲུའམ་དུར་ཁྲོད་ཀྱི་རྫས་སམ། ས་དངོས་དང་ལྔའོ། །བྱིན་གྱིས་བརླབས་པ་ལྷའི་ཁ་དོག་གིས་ཕྱོགས་མ་ནོར་བར་སྣོད་དུ་ཡི་གེ་བྲིས་ལ་གཞག་པ་དང༌། ཡེ་ཤེས་པ་དགུག་པ་དང༌། མཆོད་པ་དང༌། མཆོད་པ་དང༌། གཉིས་མེད་ཚོན་དུ་གྱུར་པའོ། །དགྱེ་བ་ལ་བསྲུང་བ་དང༌། དགྱེ་བ་དངོས་སོ། །བསྲུང་བ་བྱང་ཤར་དུ་གཙོ་བོའི་རིམ་པས་སོར་བཞི་དགྱེ་བ་དང༌། ལྷ་ལྔ་བསྐྱེད་པ་དང༌། ཡེ་ཤེས་དགུག་པ་དང༌། མཆོད་པ་དང༌། གཉིས་མེད་དུ་གྱུར་ནས་བགེགས་མཐར་བྱེད་ཀྱིས་བསྲུངས་ཏེ་ཀ་པཱ་ལ་བཀང་ལ་གཞག་གོ །དགྱེ་བ་ཚོན་ཕྱོགས་དང་ས་ལ་མནོར་བར་དགྱེ་བ་དང༌། ཚོན་ཕྲ་བརྟག་པའོ། །རྩིག་པ་ལྔ་ནས་རེ་ཁཱ་བར་མཆོད་པར་ཕྱོགས་ནས་བྲིས་ཏེ་སྔོན་གྱིས་བསྲུང་བ་ནས་བར་ཆད་དམ་དེ་བས་སྦོམས་སམ། ཕྲས་སམ་ཕྱི་ནང་དུ་ཡོན་སློབ་དཔོན་འཆི་བ་དང༌། ནད་དང༌། ནོར་ཉམས་པ་དང༌། ཆོ་ག་འཁྲུགས་པ་ལ་སོགས་པ་རིམ་པ་བཞིན་འོང་བར་ཤེས་པར་བྱའོ། །དེ་ལས་ལོག་པ་བཟང་བའོ། །རྟོག་པ་མེད་པའམ་མི་ཤེས་བས་བྲིས་ན་ཉེས་པ་མེད། རྒྱན་དགྲམ་པ་ནི་བླ་བྲེ་ལ་སོགས་པས་དཀྱིལ་འཁོར་གྱི་ནམ་མཁའ་བརྒྱན་པ་དང༌། ཕྱི་ནང་གི་མཆོད་པས་དཀྱིལ་འཁོར་ས་གཞི་བརྒྱན་པའོ། །ཆོ་ག་དངོས་དབང་བསྐུར་བ་ལ་བཞི་ལས། བུམ་པའི་དབང་ལ། བུམ་པ་ལ་བསྒྲུབ་པ་དང༌། བསྐུར་བ་དངོས་གཉིས་ལས། བསྒྲུབ་པ་ལ་རྣལ་འབྱོར་གསུམ་བཞིའོ། བསྐུར་བ་དངོས་ལ་སློབ་དཔོན་གྱིས་བླང་བ་དང༌། སློབ་མ་ལ་བསྐུར་བ་གཉིས་ལས། སློབ་དཔོན་གྱིས་བླང་བ་ལ་དཀྱིལ་འཁོར་དུ་འཇུག་པ་དང་དབང་དངོས་གཉིས་ཀྱི་དཀྱིལ་འཁོར་དུ་འཇུག་པ་ལ་ཞུགས་པ་དང༌། ཞུགས་ནས་ཕྱིར་ཤར་སྒོར་བྱུང་བ་དང༌། ཕྱོགས་བཅུའི་སངས་རྒྱས་དང། བླ་མ་དེའི་ས་བོན་གྱི་འོད་ཀྱིས་སྤྱན་དྲངས་ཏེ། དེ་ཉིད་ལ་གཞག་པ་དང༌། བདག་གི་ས་བོན་ལས་སྤྲོས་ལ་ཕྱི་ནང་དེ་ཉིད་ཀྱི་མཆོད་པ་དབུལ་བ་དང༌། དགའ་ཆེན་ཞེས་གསོལ་བ་གདབ་པ་དང༌། བདུད་རྩི་བཏུང་བ་དང༌། མཁྱེན་པར་གསོལ་བ་དང༌། ཁྱོད་སུ་ཞེས་དྲིས་ནས། སློབ་
དཔོན་དང་མི་བསྐྱོད་པ་སྤྱི་བོ་ན་ཡོད་པའི་ངོ་བོས་བསྐུལ་ནས་ཤར་གྱི་སྒོ་བས་ནང་དུ་བཅུག་པ་དང༌། སྡོམ་པ་སྦྱིན་པ་དང༌། བདག་གིས་ཀྱང་སངས་རྒྱས་ཆོས་དང་ཞེས་ཁས་བླང་བ་དང༌། ཕྱོགས་བཅུ་ནས་ཡང་ངོ་བོས་བསྐུལ། ཤར་སྒོར་བཀུག་མཆོད་ནས་བདག་ལ་ཕྱོགས་བཅུའི་སངས་རྒྱས་ཐམས་ཅད་འཁོར་ལོར་གྱུར་ནས་བཅུག་པ་དང༌། མཆོག་གི་ཡེ་ཤེས་བྱིན་ནས་ཐུན་མོང་དུ་ལས་རྣམས་ཀྱང་འགྲུབ་པར་ལུང་བསྟན་པ་དང༌། སྐུའི་རྡོ་རྗེ་བཀུག་ནས་བཅུག་པ་དང༌། ཐུགས་རྡོ་རྗེ་བཅུག་པ་དང༌། གསུང་རྡོ་རྗེ་བཀུག་ནས་བཅུག་པ་དང༌། དེ་ཐམས་ཅད་སློབ་དཔོན་ལས་བྱུང་བས་མཉན་པར་ཤེས་པ་དང༌། སྐུ་གསུང་ཐུགས་ཀྱི་ཡེ་ཤེས་མན་ངག་ལྟར་དབབ་པ་དང༌། དེ་ནས་བསྐོར་བ་བྱ་བ་དང༌། ཕྱག་བྱ་བ་དང༌། དེ་ནས་ཡི་དམ་གྱི་ལྷ་ངོ་ཤེས་པ་དང༌། ལྷ་དེ་རྣམས་ངོ་བོ་གཅིག་པས་ཐ་དད་པ་མ་ཡིན་པར་ཀུན་ཤེས་པ་དང༌། བདག་ལ་དེ་རྣམས་ལེགས་པ་བརྗོད་པའོ། །དབང་ལ་བྱང་ཆུབ་ཅེས་ཞུ་བ་དང༌། བསྐུར་བ་གཉིས་ལས། བསྐུར་བ་ལ་བགེགས་ཁྲོ་བོས་བསྐྲད་པ་དང༌། བདག་ལ་པད་སོགས་གདན་དང༌། གདུགས་སོགས་རྒྱན་དང༌། བསྐུར་བ་སྟེ་གསུམ་མོ། །བསྐུར་བ་དངོས་ལ་བུམ་སོགས་སློབ་མས་བླང་བ་དང༌། རྡོ་རྗེའི་དེ་ཉིད་དང༌། དྲིལ་བུའི་དེ་ཉིད་དང༌། ཕྱག་རྒྱའི་དེ་ཉིད་བསྐུར་བ་ལྟར་མན་ངག་གིས་བྱིན་གྱིས་བརླབས་ལ་དབང་བླང་ངོ༌། །གསང་དབང་མན་ངག་བཞིན་བྱིན་གྱིས་བརླབ། གཏང༌། བླང་ངོ༌། །ཤེས་རབ་ཡེ་ཤེས་ཀྱང་དེ་བཞིན་ནོ། །བཞི་པ་ཡང་དེ་བཞིན་ནོ། །སློབ་མ་ལ་དབང་བསྐུར་བ་ཡང་དེའི་རིམ་པས་ཏེ། དེ་ཡང་དཀྱིལ་འཁོར་དུ་གཞུག་པ་དང་དབང་བསྐུར་བའོ། །གཞུག་པ་ལ་ནང་དུ་གཞུག་པ་དང༌། གསང་བ་བསྒོ་བ་དང༌། དཀྱིལ་འཁོར་དུ་གཞུག་པའོ། །ནང་དུ་གཞུག་པ་ནི་ལས་བུམ་ཆུས་བསངས་པའི་མིག་རས་ཨཱ་ཁཾ་གིས་བྱིན་གྱིས་བརླབས་ལ་བཅིང་བ་དང༌། ཨཱ་ཁཾ་ཟློས་སུ་གཞུག་པ་དང༌། དགའ་ཆེན་ཞེས་གསོལ་བ་གདབ་པ་དང༌། ལས་ཀྱི་སློབ་དཔོན་གྱིས་རྡོ་རྗེ་དང་མེ་ཏོག་སུ་ར་ཏ་སྟྭཾ། ཞེས་སྙིང་གར་སྦྱིན། ཨཱ་ཁཾ་གིས་ནང་དུ་གཞུག །གང་ཡིན་ཞེས་དྲི། ནང་དུ་གཞུག་པའོ། །གསང་བ་བསྒོ་བ་ལ་གསུམ་སྟེ། རྒྱུད་སྦྱང་བ། བསྒོ་བ་
དངོས་དང་ཡེ་ཤེས་དབབ་པའོ། །རྒྱུད་སྦྱང་བ་ལ་ལྔ་སྟེ། ཐོག་མ་ཞེས་པ་སྡིག་པ་སྦྱང་བ་དང༌། ཨུཏྤཱ་ད་ཡས་སེམས་བསྐྱེད་པ་དང༌། སྡོམ་པ་འཛིན་དུ་གཞུག་པ་དང༌། མཁའ་གསང་ནས་དབྱུང་བ་དང༌། བགེགས་བསལ་བའོ། །བསྒོ་བ་དངོས་ལ་བདུན་ཏེ། འདོད་ཆགས་ཆེན་པོ་ལས་བྱུང་བའི། །འཁོར་ལོའི་དེ་ཉིད་གཟུགས་བརྙན་བཞིན། །ཞེས་བྱིན་གྱིས་བརླབ་ཅིང་གནང་བ་ནོད་པ་དང༌། སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱིས་བརླབས་པས་སྨྲར་མི་གཞུག་པ་དང༌། མཆོག་གི་དངོས་གྲུབ་ཐོབ་པ་དང༌། འདི་ནི་ཁྱོད་ཀྱི་དམ་ཚིག་གི་རྡོ་རྗེ་ཞེས་རྡོ་རྗེར་བྱིན་གྱིས་བརླབས་པ་དང༌། རྡོ་རྗེ་སེམས་དཔའ་ཞེས་ཐུགས་རྡོ་རྗེ་དང༌། འདི་ནི་ཁྱོད་ཀྱི་དམྱལ་པའི་ཞེས་གསུང་རྡོ་རྗེར་བྱིན་གྱིས་བརླབས་ལ་སྨར་མི་རུང་བར་བསྒོ་བ་དང༌། དེ་རྣམས་སློབ་དཔོན་ལས་བྱུང་བས་བརྙས་པ་མ་བྱེད་པར་བསྒོ་བའོ། །ཡེ་ཤེས་དབབ་པ་ལ་སློབ་མས་ཡེ་ཤེས་ཞུ་བ་དང༌། སློབ་མའི་ཡེ་ཤེས་དབབ་པ་དང༌། བབས་ན་ཞེས་ལུས་ངག་ཡིད་བརྟག་པའོ། །དཀྱིལ་འཁོར་དུ་གཞུག་པ་ལ་དགུ་སྟེ། སྙིང་པོའི་ཞེས་དམ་བཅས་པ་དང༌། འཁོར་ལོ་བསྐོར་བ་དང༌། པྲ་ཏི་ཞེས་མེ་ཏོག་དོར་བ་དང༌། སྣང་བ་དྲི་བ་དང༌། གཙུག་ཏོར་ལ་སོགས་པ་དངོས་གྲུབ་རབ་འབྲིང་བརྟག་པ་དང༌། སྟོབས་པོ་ཆེ་ཞེས་མེ་ཏོག་མགོར་བཅིང་བ་དང༌། ཨོཾ་རྡོ་རྗེ་སེམས་དཔའ་ཞེས་མིག་དབྱེ་བ་དང༌། ལྟོས་ཤིག་ཅེས་དཀྱིལ་འཁོར་བསྟན་པ་དང༌། ཤར་སྒོ་ནས་དབུས་ཀྱི་བར་དུ་ལྷ་བསྟན་པའོ། །ལ་ལ་དེ་ཁོ་ན་ཉིད་འདིར་སྟོན་ཏེ་དེ་ནི་མ་ཡིན་ཏེ། སཾ་གྲ་ཧ་ནས་དབང་བསྐུར་ནས་ནི་དེ་ཉིད་བསྟན། གཞན་དུ་ན་ནི་དངོས་གྲུབ་དག། ཤིན་ཏུ་རིང་བར་འགྱུར་རོ་ཞེས། །རྡོ་རྗེ་འཛིན་པས་ཡང་དག་གསུངས། །ཞེས་པས་དབང་རྫོགས་ནས་འཁོར་ལོ་དེ་ཉིད་བསྟན་པར་བྱའོ། །དབང་བསྐུར་བ་ལ་སློབ་དཔོན་མཉེས་པར་བྱ་བ་དང་བསྐུར་བ་གཉིས་སོ། །མཉེས་པ་ལ་ཕྱི་ནང་དེ་ཉིད་གསུམ་མཆོད་པ་ལས་ཕྱིའི་མཆོད་པ་ཡོན་དུ་ལུས་ངག་ཡིད་གསུམ་དང་བཅས་པ་དབུལ་བ་མན་ངག་གིས་སོ། །ནང་ཤ་ལྔ་བདུད་རྩི་ལྔའམ་བྱིན་གྱིས་བརླབས་ལ་ནང་གི་སྤྱིན་སྲེག་ཏུ་བྱའོ། །དེ་ཁོ་ན་ཉིད་ནི་དབང་གི་ཡེ་ཤེས་པས་ག་བུར་མ་ཉམས་པའོ། །བསྐུལ་བ་ལ་བུམ་པ་ལ་སོགས་པ་བཞི་ལས་བུམ་པ་ལ་སྦྱོར་
བ་དང༌། དངོས་གཉིས་ལས་སྦྱོར་བ་རྡོ་རྗེ་ཞེས་ནོད་པ་དང༌། གདན་བཤམ་པ་དང༌། རིན་པོ་ཆེ་ལ་སོགས་པའི་རྒྱན་གྱིས་བརྒྱན་པ་དང༌། གདུགས་ལ་སོགས་པ་བཀྲ་ཤིས་ཀྱི་རྫས་དང༌། མཆོད་པ་བཤམ་པ་དང༌། ཏིལ་ལ་སོགས་པས་བགེགས་བསྐྲད་པ་དང༌། ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས་ཏེ་བཅུག་ནས་མཆོད་པ་དང༌། ཕུན་སུམ་ཞེས་བཀྲ་ཤིས་བརྗོད་པའོ། །དངོས་ལ་ཕྱི་ནང་གསང་བ་གསུམ་གྱིས་འཁོར་ལོ་མཆོད་ལྷ་མོ་ལྔ་དང་རིགས་ལྔར་གྱུར་ཏེ། སངས་རྒྱས་སྤྱན་གྱིས་ལས་བུམ་གྱིས་ཕྱི་ལྟར་ཞེས་བཀྲུས་པས་དྲི་མ་རྐང་པར་བུད་པར་བསམ་པ་དང༌། ཧེ་རུ་ཀ་དང་རྣམ་པར་སྣང་མཛད་ཀྱིས་ཕྱོགས་བཅུའི་སངས་རྒྱས་ཐམས་ཅད་ཀྱིས་གསང་བ་གསུམ་ཞེས་པས་གཙོ་བོ་དང༌། ཤར་བུམ་བསྐུར་བས་སྐུའི་རིགས་ཐམས་ཅད་དང་བཅས་པས་ལུས་ལ་བཅུག་ནས་བདུད་རྩིས་ལུས་རྒྱས་ཏེ་དཔྲལ་བར་རྣམ་སྣང་བྱོན་པའོ། །དེ་ནས་ཆུས་བསངས་ཏེ་ཅོད་པན་དང༌། ཐོར་ཚུགས་ལ་རིན་ཆེན་འབྱུང་ལྡན་བསྐྱེད་དེ། ཡེ་ཤེས་ཀྱི་འཁོར་ལོ་བཀུག་མཆོད་བསྟིམས་ནས་ཐོར་ཚུགས་སུ་གྱུར། མཱ་མ་ཀཱི་ས་ཇི་ལྟར་ཞེས་བསྐྲུས་པས་དྲི་མ་དང་སྒྲིབ་པ་རྐང་པར་བུད་པར་བསམ་པ་དང༌། ཧེ་རུ་ཀ་ར་རིན་ཆེན་འབྱུང་ལྡན་གྱིས། ཕྱོགས་བཅུའི་སངས་རྒྱས་ཐམས་ཅད་ཀྱི། །གསང་བ་གསུམ་ལས་བྱུང་པ་ཡིས། །ཞེས་གཙོ་བོ་དང་ལྷ་མོའི་བུམ་པ་ཐོགས་ནས་བསྐུར་བས་ཡོན་ཏན་གྱི་རིགས་ཐམས་ཅད་དང་བཅས་པ་ལུས་ལ་བཅུད་པས་བདུད་རྩིས་ལུས་བརྒྱན་ཏེ་རྣ་ལྟག་གཡས་སུ་རིན་ཆེན་འབྱུང་ལྡན་དུ་གྱུར་པའོ། །དེ་བཞིན་དུ་རྡོ་རྗེ་དང་བདག་པོ་དར། མིང་རྣམས་ལ་ཡང་གོ་བར་བྱའོ། །རྡོ་རྗེ་སློབ་དཔོན་གྱི་དབང་ནི་སློབ་དཔོན་ཁ་ཅིག་འདིར་འདོད་མོད་ཀྱི། རྗེ་རི་ཁྲོད་ཞབས་ཀྱིས་འདིར་བཞི་པ་ཡན་ཆད་བསྐུར་ནས་སོ། །དེ་ལ་འདིར་རྡོ་རྗེའི་དེ་ཉིད་སྤྱིན་པ་ནི། རྡོ་རྗེ་ལ་གོང་ལྟར་བྱིན་གྱིས་བརླབས་པ་རྡོ་རྗེར་གྱུར་པ་དེ་ཚིགས་བཅད་དང་སྔགས་ཀྱིས་སྦྱིན་ཏེ། སློབ་མའི་ལག་པ་གཡས་སུ་མ་ལས་ཉི་མ་ཧཱུཾ་གསེར་གྱི་རྡོ་རྗེར་གྱུར་པར་བསྒོམ་དུ་བཅུག་ལ་དེ་གཉིས་མེད་དུ་གཟུང་ཞེས་པས་སྦྱིན་པའོ། །དྲིལ་བུའི་དེ་ཉིད་ཀྱང་དེ་བཞིན་ཉིད་དུ་བྱས་ལ། ལག་པ་གཡོན་པར་ཨ་དང་ཁཾ་
ལས་ཟླ་བ་དང་དྲིལ་བུར་གྱུར་པ་དང་གཉིས་མེད་དུ་སྦྱིན་ནོ། །ཐོག་མཐའ་མེད་ཅེས་པ་དང༌། འདི་ནི་སངས་རྒྱས་ཞེས་པས་གསོར་བ་དང་དཀྲོལ་བ་གསུམ་གསུམ་བྱེད་དུ་གཞུག་གོ །ཕྱག་རྒྱའི་དེ་ཉིད་དངོས་སམ་བསྐྱེད་པ་ཡང་དམ་ཚིག་དང་ཡེ་ཤེས་པ་མཆོད་པ་དང་གཉིས་མེད་དུ་གྱུར་ནས་སྦྱིན་ནོ། །རིགས་གང་ཡིན་པ་བསྒོམ་དུ་ཡང་གཞུག་གོ །དེ་ནས་ཕྱི་ནང་དེ་ཉིད་ཀྱིས་མཆོད་དོ། །དེ་ནས་གསང་དབང་དང་ཤེས་རབ་ཡེ་ཤེས་དང༌། བཞི་པ་བརྒྱུད་པའི་མན་ངག་ལས་བླང་བའོ། །དེ་ནས་རྗེས་གནང་རིགས་ལྔ་སྦྱིན་དེ་ནས་ལུང་བསྟན་ཏེ། སློབ་དཔོན་སྐུ་ཆ་ལུགས་ཕྱག་རྒྱ་སྔགས་དེས་སངས་རྒྱས་ཐམས་ཅད་ཀྱིས་བྱིན་གྱིས་བརླབ་ཅིང་ལུང་སྟོན་པའོ། །དེ་ནས་གསང་བ་བསྒྲག །དེ་ནས་དབུགས་དབྱུང་བ་དང༌། དེ་ནས་དེ་ཉིད་བསྟན་པའོ། །བཅུད་དུ་བྱ་བ་ལ་ཕྱག་རྒྱ་བཞིའི་དོན་ཤེས་པར་བྱ་བ་དང༌། བསྒོམ་པར་བྱ་བ་དང༌། བསྲུང་བར་བྱ་བ་དང༌། སྤྱད་པར་བྱ་བ་དང་བཞིའོ། །ཕྱག་རྒྱ་བཞིའི་དོན་ཤེས་པར་བྱ་བ་དང༌། དབང་གི་དགོས་པ་ཤེས་པར་བྱ་བ་དང༌། རྒྱུད་ཀྱི་དོན་དང་དཀྱིལ་འཁོར་གྱི་ཆོ་ག་ཤེས་པར་བྱ་བའོ། །དབང་གི་དགོས་པ་ལ་བཞི། བུམ་པའི་དབང་བརྟགས་པ། རིག་པའི་ལྷ་མོས་བཀྲུས་པ་དང༌། མ་རིག་པ་བྱང་ནས་ཡེ་ཤེས་ལྔ་སྐྱེས་པ་དང༌། ཕུང་པོ་ལ་ལྷ་ལྔར་རིག་པའོ། །བུམ་པ་ཟླུམ་པས་དབྱེ་བ་མེད་པ་ཆོས་སྐུ་འབྱུང་བ་དང༌། ཆུ་འཛིན་པས་བདེ་བ་ཆེན་པོའི་སྐུ་འབྱུང་བ་དང༌། ཁ་ཁྱེར་ཆེ་བས་ལོངས་སྐུ་འབྱུང་བ་དང༌། དྲི་མ་མེད་པས་སྤྲུལ་སྐུ་འབྱུང་བ་དང༌། བཅུད་མགུལ་རྒྱན་མཚན་མ་གསུམ་རིགས་གསུམ་གྱི་བདག་ཉིད་འབྱུང་བ་དང༌། ཁ་རྒྱན་གཟུངས་ཐག་གཉིས་མེད་ཀྱིས་འགྲོ་བ་འདྲེན་པ་དང༌། ཐོར་ཚུགས་རིགས་ལྔ་བྱུང་ནས་ལས་ལྔ་བྱེད་པ་དང༌། ཅོད་པན་གྱིས་ངོ་བོ་གཅིག་ཅིང་རྟོག་པ་མེད་པའོ། །རྡོ་རྗེ་དྲིལ་བུ་དང༌། བདག་པོ་དང་མིང་ནི་དབང་ནས་ཤེས་པར་བྱའོ། །དེ་ཉིད་གསུམ་ཡང་ཚིག་གི་དོན་ལྟར་ཉིད་དོ། །དེས་ལུས་ཀྱི་ཉེས་པ་དག་སྤྲུལ་སྐུ་ཐོབ་པའི་རྟེན་བྱེད་པའོ། །གསང་དབང་གིས་ངག་གི་ཉེས་པ་དག །སངས་རྒྱས་ནས་བརྒྱུད་པས་ལོངས་སྐུའི་རྟེན་བྱེད་པའོ། །ཤེས་རབ་ཡེ་ཤེས་ཀྱིས་ཡིད་ཀྱི་ཉེས་པ་དག །ཤེས་རབ་ལ་བརྟེན་པས་
བདེ་ཆེན་སྐུའི་རྟེན་བྱེད་པའོ། །བཞི་པས་ལུས་ངག་ཡིད་གསུམ་གྱི་སྒྲིབ་པ་དག །ཆོས་སྐུའི་ངོ་བོ་རྟོགས་བརྡས་བསྟན་ཏེ་བླ་མ་ལས་བྱུང་བས་སོ། །རྒྱུད་དོན་ཤེས་པར་བྱ་བ་ནི་ལྟ་བ་སྟེ། འདི་རབ་ཏུ་མི་གནས་པ་ཡིན་ཏེ། སེམས་ཙམ་དུ་འདོད་པ་དང༌། སྒྱུ་མར་འདོད་པ་ཡང་ཉེས་པ་མེད་པར་བརྗོད་དོ། །དེ་ལ་རྒལ་བ་བྱེ་བྲག་ཏུ་སྨྲ་བ་དང༌། གཞན་དོན་བྱེད་མ་བཏུབ་ན་མདོ་སྡེ་བ་ཐེག་པ་ཆེན་པོར་འདོད་ལ་སྔགས་སུ་ཅིས་མ་བཏུབ་ཅེ་ན། ཡུལ་སེམས་སོ་སོར་འདོད་པས་ཞེའོ། །འོ་ན་ཟླ་བ་གྲགས་པས་སྒྲོན་གསལ་དུ་གཉིས་བཤད་པ་ཞེ་ན། དེ་ཀུན་རྫོབ་ཏུ་བསྟན་ཞེའོ། །འོ་ན་དངོས་པོར་འཛིན་པ་སྐྱོན་ནམ་དོན་དམ་སྐྱོན་རྣམ་པ་བཅས་ཀྱང་ཞེ་ན། དེ་རྣམས་སེམས་སུ་འདོད་པས་ཞེས་སོ། །འོ་ན་མདོ་སྡེ་པ་རྣམས་དང༌། སེམས་ཙམ་པ་རྟེན་འབྲེལ་ཟེར་བ་ཞེ་ན། རྟེན་འབྲེལ་དུ་འདོད་པ་ཐ་དད་ཅེས་སོ། །རྒྱུད་ཀྱི་རྒྱུ་མཚན་གཞན་ལྟར་ཡང་ཤེས་པར་བྱ་བ། འདིར་རྒྱུའི་རྒྱུད་སེམས་ཅན། ཐབས་ཀྱི་རྒྱུད་རྒྱུད་སྡེ་བཞི། འབྲས་བུའི་རྒྱུད་སྐུ་བཞིའོ། །དེ་ཡང་བརྒྱུད་པས་རྒྱུད་དེ། སེམས་ཅན་ལས་བརྒྱུད་པས་སྐུ་བཞི། འབྲེལ་པས་རྒྱུད། ཐབས་རྒྱུ་དེས་འབྲེལ་ནས་མ་ནོར་བས་རྒྱུད་སྐུ་བཞི་འདོད་པ་འབྱུང་ལ། །དེ་ལྟར་རྒྱུ་ཐབས་དང་འབྲས་བུར་བརྒྱུད་ནས་འབྲེལ་ཞིང་མ་ནོར་བར་འདུས་པས་རྒྱུད་དུ་གདགས་སོ། །འདུས་པ་ལས་འབྲས་བུ་འདུས་པ་ནི་འདི་ལྟ་སྟེ། རྡོ་རྗེ་མཁའ་འགྲོ་ནས། རྒྱུད་ཀྱི་དོན་ནི་གཉིས་ཡིན་ཏེ། །དོན་དམ་པ་དང་ཀུན་རྫོབ་བདེན། །དོན་དམ་བརྗོད་དུ་མི་ནུས་ཏེ། །ཀུན་རྫོབ་ཆུ་ཡི་ཟླ་ལྟར་བསྟན། །ཞེས་པས་དོན་དམ་ལ་བརྗོད་དུ་མེད་དོ། །ཀུན་རྫོབ་ལ་ཀུན་རྫོབ་དངོས་དང༌། དོན་དམ་ལ་སྤྱང་དུ་མེད་པའོ། །ཀུན་རྫོབ་དངོས་ལ་གཉིས་ཏེ། ཀུན་རྫོབ་ལ་གོང་བཞིན་གཉིས། རྣལ་འབྱོར་པའི་ཡང་སྔགས་དང་མཚན་ཉིད་གཉིས། སྔགས་ལ་ཡང་གཟུགས་སྐུ་དང༌། ཆོས་སྐུ་གཉིས། ཆོས་སྐུ་ལ་ཡང་བདེ་བ་ཆེན་པོ་དང༌། སྟོང་པ་གཉིས་སོ། །དེ་ཡང་ཀུན་སྤྱོད་ནས། འགྲོ་པ་འདི་ཀུན་སངས་རྒྱས་ལྔ་བདག་ཉིད། །གར་མཁན་དག་དང་རི་མོ་བཟང་ལྟར་སྣང༌། །གང་དུ་བདེ་ཆེན་ཞེས་པ་གཅིག་པོ་ཉིད། །གཅིག་པོ་ཉམས་ནི་
དུ་མས་གར་མཛད་དོ། །ཞེས་པས་སོ། །དེས་དོན་དམ་བརྗོད་དུ་མེད་ཀྱང༌། ཀུན་རྫོབ་ཏུ་བདེ་བ་ཆེན་པོའི་ངོ་བོ་ཁོ་ན་ཡིན་ལ། ཆོས་ཐམས་ཅད་གསང་སྔགས་ཡིན་ལ། གསང་སྔགས་ཀྱིས་འཚང་རྒྱ་བའོ། །དེ་ལྟར་ན་ཤཱཀྱ་ཐུབ་པ་དང༌། དེ་བཞིན་གཤེགས་པ་གཞན་ཡང་སངས་རྒྱས་པ་སྔགས་ཀྱིས་ཡིན་པར་བསྟན་ལ། བསྐལ་པ་གྲངས་མེད་གསུམ་དུ་ཕ་རོལ་ཏུ་ཕྱིན་པ་དྲུག་སྟོན་པས་སངས་རྒྱས་སོ་ཞེ་ན། ཀུན་སྤྱོད་ནས། རྒྱུད་རྣམས་ཀུན་དུ་གསང་བ་ཡང༌། །རྒྱུད་འདི་ཡིས་ནི་རྣལ་འབྱོར་བ། །བདེན་པ་གཉིས་ལ་ཡང་དག་བསྟེན། །སྤྲུལ་པ་དངོས་ལ་དེ་ཉིད་བསྟན། །ཞེས་པས་བདེ་བ་ཆེན་པོ་བརྗོད་དུ་མེད་པ་མུ་བཞི་དང་བྲལ་ཏེ། ཕྱི་རབས་ལ་བདེན་གཉིས་ཞེས་ཕ་རོལ་ཏུ་ཕྱིན་པར་སྤྲུལ་སྐུར་བསྟན་ཡང༌། སྤྲུལ་སྐུ་ཉིད་སེམས་ཅན་ལ་སྔགས་དང༌། ཕ་རོལ་ཏུ་ཕྱིན་པར་སྣང་སྟེ། སྤྲུལ་སྐུ་ཉིད་བདེ་བ་ཆེན་པོ་ཉིད་དོ། །སྣང་བ་དེ་སྔོན་དུ་རྒྱུ་དང༌། རྐྱེན་སོང་བས་འབྱུང་སྟེ། ཙ་རི་ཀ་པ་བཞིན་མཁའ་ལྟར་ཡས་ཕུབ་ཅེས་རྒྱུ་མེད་མིན་ནོ། །དེས་ན་བདེ་བ་ཆེན་པོ་ཡིན་ཡང་སེམས་ཅན་གྱི་དོན་དུ་ཕ་རོལ་ཏུ་ཕྱིན་པ་བསྟན་ནས་བདེ་བ་ཆེན་པོ་ཐོབ་ནས་ཚོགས་ཆུང་ཞིང་སངས་རྒྱས་པའོ། །ཐམས་ཅད་གསང་བའི་རྒྱུད་ནས། དཔེར་ན་སྒྲ་ཡི་མཁན་པོ་དག །སྒྲ་ཡི་སྐྱོན་མེད་དོན་ཚོལ་ཏེ། །མ་ཤེས་པ་ལ་ཀ་ཀཱ་དང༌། །ཀི་ཀཱི་དབྱངས་ཡིག་སྟོན་པར་བྱེད། །ཅེས་པས་འདིར་ཡང་སངས་རྒྱས་ཐམས་ཅད་བདེ་བ་ཆེན་པོར་གནས་ལ་འགྲོ་པའི་ཁྱད་པར་གྱི་ཐེག་པའི་རིམ་པར་བསྟན་པའོ། །ལམ་འདུས་པར་བསྟན་པའོ། །ཆོས་ཀྱི་ཕུང་པོར་འདུས་པ་ཡང༌། །ཆོས་ཀྱི་ཕུང་པོ་བརྒྱད་ཁྲི་དང༌། །བཞི་སྟོང་གི་ནི་གྲངས་སྙེད་ཀུན། །ཡི་གེ་གཉིས་སུ་དེ་བཞིན་འདུས། །ཞེས་པས་གསང་སྔགས་ཀྱང་ཐབས་གཟུགས་སྐུ་བསྐྱེད་རིམ་དམ་ཚིག་གི་ཕྱག་རྒྱ་དང༌། ལས་ཀྱི་ཕྱག་རྒྱར་འདུས་ལ། ཤེས་རབ་ཆོས་སྐུ་དང་བདེ་བ་ཆེན་པོར་འབྱུང་བས་ཕྱག་རྒྱ་ཆེན་པོར་འདུས་པས་སོ། །དེ་ཡང་ཨ་ཝཾ་མ་ཡཱ་ཤྲུ་ཏ་མེ་ཀསྨིན། ཞེས་པ་དང༌། འདི་སྐད་བདག་གིས་ཐོས་པའི་དུས་གཅིག་ན། ཞེས་རྒྱུད་སྡེ་བཞི། ཕྱག་རྒྱ་བཞི་སྐུ་བཞིའོ། །དེ་ཡང་ཨེ་ལས་ཀྱི་ཕྱག་རྒྱ། འདི་སྐད་ཅེས་དངོས་མིན་ཏེ་ལས་ཀྱི་ཕྱག་རྒྱས་དཔེ་མཚོན་པའོ། །བཾ་ཆོས་ཀྱི་ཕྱག་རྒྱ་འདི་ལྟ་སྟེ། དོན་ཆོས་ཀྱི་ཕྱག་
རྒྱ་རྙེད་པའོ། །མ་ཕྱག་རྒྱ་ཆེན་པོ་སྐད་ཅེས་པས་བརྡས་མཚོན་པའོ། །རིགས་པས་མི་རྙེད་པའོ། །ཡཱ་དམ་ཚིག་གི་ཕྱག་རྒྱས་འདི་སྐད་ཅེས་པས་སྤྲུལ་པ་སྒྱུ་མར་སྣང་བའོ། །དེ་བཞིན་དང་སྒྲའི་སྟོབས་ཀྱིས། ཤྲཱུ་ཏ་མེ་ཀ་སྨིན་བདག་གིས་ཐོས་པའི་དུས་གཅིག་ལ་སྦྱར་ནས་དྷརྨ་ཀཱ་ཡ། སཾ་བྷོ་ག་ཀཱ་ཡ། ནིར་མ་ཎ་ཀཱ་ཡ། མ་ཧཱ་སུ་ཁ་ཀཱ་ཡ་ནི་རིམ་པ་ལྟར་ཆོས་དང༌། ལོངས་སྤྱོད་རྫོགས་པ་དང༌། སྤྲུལ་པ་དང༌། བདེ་བ་ཆེན་པོའི་སྐུར་འབྱུང་བའོ། །རྒྱུ་འདུས་པས་སེམས་ཅན་གྱི་བསམ་པས་འདུལ་བ་དང༌། ཐེག་པ་ཆུང་བ་ཀྲྀ་ཡོག་ཏུ་འདུས་ལ། མངོན་པ་དང་ཐེག་པ་ཆེན་པོ་ནང་པར་འདུས་སོ། །རྡོ་རྗེ་ཕྲེང་བ་ནས། ཐབས་ཆུང་བྱ་མང་དོན་རིང་བས། །ཕྱི་པ་ཀྲྀ་ཡོག་སྤྱོད་ལམ་སྟེ། །ཐབས་ཆེ་བྱ་ཉུང་དོན་ཉེ་བས། །དེ་ཕྱིར་ནང་སྟེ་བླ་ན་མེད། །ཅེས་སོ། །དེ་ཡང་དྲང་དོན་ངེས་དོན་དུ་འདུས་ཏེ། འཇམ་དཔལ་གྱིས་ཞུས་པའི་མདོ་ནས། འོག་མ་གོང་དུ་འགྲོ་བས་དྲང་བ་སྟེ། །མ་ནོར་དེ་ཉིད་འབྱུང་བས་ངེས་པ་ཡིན། ཞེས་པས་དེ་ཡང་མཚན་ཉིད་ཐམས་ཅད་དྲང་དོན། སངས་རྒྱས་བདེ་བ་ཆེན་པོར་འགྲོ་བས་གསང་སྔགས་ཐམས་ཅད་ངེས་དོན། སངས་རྒྱས་ཐམས་ཅད་བདེ་བ་ཆེན་པོར་གནས་པས་འདུལ་བ་དང༌། ཐེག་པ་ཆུང་ངུའི་མདོ་དྲང་དོན་ཆེན་པོ་དང་མངོན་པར་འགྲོ་བས་མངོན་པ་དང༌། ཐེག་པ་ཆེན་པོའི་མདོ་ཐམས་ཅད་ངེས་དོན། འགྲོ་དོན་དུ་ངེས་པས་འདུལ་བ་དྲང་དོན། ཆུང་བའི་མདོ་སྡེ་ངེས་དོན། རྒྱུ་ལས་དང་འབྲས་བུ་སྟོན་པས་ཕ་རོལ་ཏུ་ཕྱིན་པ་ལྔ་གོང་དུ་འགྲོ་བས་ཐེག་པ་ཆེན་པོའི་དྲང་དོན། རྒྱུ་དེ་རྣམས་ཤེས་རབ་ཀྱི་པ་རོལ་ཏུ་ཕྱིན་པར་ངེས་དོན་ནོ། །རྒྱུ་ལས་དང་འབྲས་བུར་འདོད་པས་ཀྲྀ་ཡོག་དྲང་དོན། མ་ནོར་བའི་འབྲས་བུ་ཉིད་ལ་སྤྱོད་པས་ནང་པ་ངེས་དོན། ཐབས་ལ་བརྟེན་ནས་འགྲོ་བས་ཕ་རྒྱུད་དྲང་དོན། ཤེས་རབ་རྒྱུད་ལ་གཏོགས་པས་མ་རྒྱུད་ངེས་དོན། དེ་རྣམས་རིམ་པར་བརྒྱུད་པས་རྒྱུད་རྣམས་དྲང་དོན། རྒྱུད་དོན་སྐུ་བཞིར་ངེས་པས་ངེས་དོན་ཏེ། སྐུ་བཞི་སྒྱུ་མ་ཀུན་རྫོབ་ཡིན་པས་དྲང་བའི་དོན། །དོན་དམ་མཚོན་དུ་མེད་པས་ངེས་པར་ཤེས་པར་གྱིས། །ཞེས་མཚོན་པས་གྲུབ་མེད་ཉམས་དགའ་ཙམ་སྐུ་བཞི་འགྲུབ་པར་རིག་པར་བྱའོ། །དཀྱིལ་འཁོར་གྱི་ཆོ་ག་ཤེས་པར་བྱ་བ་ལ་སྒྲ་དོན་
གཉིས་ལས། སྒྲ་ལ་བསྙེན་པ་དང༌། དཀྱིལ་འཁོར་གྱི་ཆོ་ག་དང༌། དབང་བསྐུར་གྱི་ཆོ་ག་དང༌། དབང་བསྐུར་བ་གོང་ལྟར་རམ། གཞན་ལྟར་ཤེས་པར་བྱའོ། །དོན་གྱི་ཁྱད་པར་ལ་ངེས་དོན་དང་དྲང་དོན་དུ་ཤེས་པར་བྱ་བ་དང༌། དྲང་དོན་ངེས་དོན་དུ་སྒྲུབ་པ་ལ་གཉིས་ལས་ངེས་དོན་དང་དྲང་དོན་དུ་ཤེས་པར་བྱ་བ་ལ་གཉིས་ཏེ། ངེས་དོན་ནི་དཀྱིལ་ཞེས་བྱ། དབུ་མ་ཞེས་བྱ་བ་དང༌། མ་དྷྱ་མ་སྟེ། དབུ་མ་མུ་བཞི་དང་བྲལ་བ་ལ། གང་མུ་བཞི་དང་བྲལ་ན་འཁོར་ཞེས་བྱ། གཡོག་ཅེས་བྱའོ། །ཀ་བྱ་དྷ་ར་སྟེ། དངོས་པོར་འཛིན་པ་མུ་བཞི་དང་བྲལ་ལ། ཆེ་གེ་ཞེས་བྱ། སྒྲུབ་པ་ཞེས་བྱའོ། །སཱ་དྷ་ས་ཧ་ཛ་སྟེ། ལྷན་ཅིག་གདོད་ནས་གཉིས་མེད་དུ་ཡོད་པར་ཤེས་པའོ། །དྲང་དོན་དུ་སྣོད་དུ་བྱ་བ་ཤེས་པ་དང༌། བཅུད་དུ་བྱ་བ་ལ་ཡང་བསྙེན་པ་དང་དཀྱིལ་འཁོར་ཆོ་ག་དང༌། དབང་བསྐུར་བ་ཤེས་པར་བྱའོ། །ངེས་དོན་དང་དྲང་དོན་དུ་ཤེས་པར་བྱ་བ་དེ་ཡང་དགྱེས་པའི་རྡོ་རྗེ་ནས། སྟོན་པ་པོ་ང་ཆོས་ཀྱང་ང། །ཉན་པའི་ཚོགས་ལྡན་ཞུ་བ་ང༌། །ཞེས་པས་དེ་དག་ཐམས་ཅད་ངེས་པར་བཅོམ་ལྡན་འདས་ཉིད་སེམས་ཅན་དྲང་བའི་དོན་དུ་མཛད་པ་སྟེ། ཉན་ཐོས་དང༌། སོ་སོའི་སྐྱེ་བོ་དང་མུ་སྟེགས་པ་རྣམས་ལ་ནི་མདོ་དང་འདུལ་བ་ལྟར་ཡང་སྣང་སྟེ། བྱང་ཆུབ་སེམས་དཔའ་རྣམས་ལ་གོང་ལྟར་སྡོམ་པ་གསུམ་ལྡན་དེ་སྣང་བའོ། །བསྙེན་པའི་དུས་ན་སློབ་དཔོན་གྱི་མཚན་ཉིད་བཞིར་བརྟག་ཅེས་པ་སྐུ་བཞི་དང་ལྡན་པའོ། །བརྒྱུད་པ་དང་ལྡན་ཞེས་པ་ཆོས་སྐུར་གནས་པའོ། །དམ་ཚིག་ཅེས་པ་བདེ་བ་ཆེན་པོའི་སྐུར་གནས་པའོ། །རྒྱུད་སྡེ་ཞེས་པ་ལོངས་སྐུར་གནས་པའོ། །གཞན་དོན་ཞེས་པ་སྤྲུལ་སྐུར་སྟོན་པའོ། །ཞུ་འབུལ་ཞེས་པ་བྱང་ཆུབ་མཆོག་ཏུ་སེམས་བསྐྱེད་པའོ། །འོག་མིན་དུ་ལོངས་སྐུ་ལ་ཞུ་བ་ཕུལ་བ་བུམ་པའི་དབང་བསྐུར་བའི་སྣང་བ་དེ་རྒྱལ་པོ་ཟས་གཙང་གི་སྲས་བཙས་ནས་ཁྲུས་གསོལ་བ་ན་བླ་མེ་ཏོག་ཅེས་པ་ནི་ཆོས་སྐུ་བདེ་བ་ཆེན་པོ་ལས་མ་གཡོས་པར་སྤྲུལ་སྐུ་སྟོན་པའོ། །རྫས་བྱམས་པའི་སྟོབས་ཕན་ཆད་ཀྱིས་བསགས་ཏེ་སྤོས་ཀྱི་གླང་པོ་ལ་སོགས་པ་སྐོར་མང་བ་ལ་ཕྱོགས་བཅུའི་སངས་རྒྱས་དང༌། བྱང་ཆུབ་སེམས་དཔའ་དང༌། ཆོས་སྐྱོང་ཐམས་ཅད་ཀྱིས་མཆོད་ནས་འཛམ་བུའི་གླིང་དུ་ལུང་བསྟན་པ་དེ་ཕྱིའི་མཆོད་པའོ། །ཡབ་ཡུམ་གྱི་
གནས་སུ་བཅས་ནས་ཡི་གེ་ལྔ་ལས་མངོན་བྱང་ལྔར་ཉམས་སུ་མྱོང་བ་དེ་ནང་མཆོད་དོ། །དེའི་དུས་ན་ཡུམ་གྱི་ལྷུམས་ན་བཞུགས་པ་དེ་དེ་ཁོ་ནའི་མཆོད་པའོ། །ཡབ་ཡུམ་གྱི་སྐོར་སྤོས་ཀྱི་གླང་པོ་ལ་སོགས་པར་སྣང་བ་དེ་ཆོས་སྐྱོང་ལ་གཏོར་མ་སྟེར་བའོ། །རིགས་བཞི་ལ་ནོར་ཟས་ཀྱི་སྤྱིན་པ་གཏོང་བར་སྣང་བ་དེ་སློབ་མ་ཡོངས་སུ་སྐྱོབ་པ་ཡིན་ལ། དམངས་ལ་ཉེ་རིང་མེད་པར་ཕ་རོལ་ཏུ་ཕྱིན་པ་དྲུག་ཏུ་སྤྱོད་པར་སྣང་བ་དེ་དང་གཞན་རྗེས་སུ་སྨོན་པ་དེ་གཉིས་ཀ་སློབ་དཔོན་ལས་སྡོམ་པ་ལེན་པའོ། །སྐུ་སྐྱོ་ནས་གྲོང་ཁྱེར་དུ་འཆག་པ་ལ་སྐྱེ་རྒ་ལ་སོགས་པའི་སྣང་བ་མཐོང་བ་ལ་དེ་འཁོར་བ་ལ་ཡི་མུག་པར་སྟོན་པ་དེ་སོ་སོ་ཐར་པའི་བསླབ་པ་སྲུང་བའོ། །དེའི་དུས་སུ་རྒྱལ་བུ་མིང་སྲིང་ཕན་ཆད་སྤྱིན་པ་བྱས་པའི་སྣང་བ་དེ་ཐེག་པ་ཆེན་པོའི་སྡོམ་པ་སྲུང་བའོ། །ཡུམ་ལས་བལྟམས་པར་སྣང་བ་དེ་མཁའ་གསང་བྱིན་གྱིས་བརླབ་པའོ། །རྒྱལ་རིགས་དང་བྲམ་ཟེའི་རིགས་ཆེ་བས་བསྟོད་པའི་སྣང་བ་དེ་རྒྱུ་གང་བསྙེན་གྱི་སྔགས་ཟློ་བའོ། །རྫས་ཀྱི་བྱེ་བྲག་ལམ་ཆགས་པའི་སྣང་བ་དེ། དཔའ་བོ་དགའ་སྟོན་བྱེད་པའོ། །དེ་ནས་ཁྱིམ་སྤོང་ཞེས་ཡབ་ཡུམ་ལ་ཞུ་བའི་སྣང་བ་དེ་སངས་རྒྱས་འདས་པ་ལ་ཞུ་བའོ། །མཎྜལ་གོང་ལྟར་རོ། །ལོངས་སྐུ་ལ་ཞུ་བའི་སྣང་བ་དེ་སློབ་དཔོན། ཤེས་པ་ལ་ཞུ་བ་དེ་འདས་པའི་སངས་རྒྱས་སོ། །བརྒྱུད་པ་ཞེས་པ་འདས་པའི་སངས་རྒྱས་དེ་ཡང་སྐུ་བཞི་དང་ལྡན་པའོ། །དེར་རྒྱལ་སྲིད་གཟུང་པའི་སྣང་བ་དེ་རྫས་ཀྱིས་ལྷ་བསྙེན་པའོ། །རྒྱལ་པོ་ཆེན་པོ་བཞིས་བཏེག་པའི་སྣང་བ་དེ་རྣལ་འབྱོར་བཞིས་ལྷ་བསྙེན་པའོ། །དཔལ་ལྷ་ལས་བབས་པའི་རྩེར་ཕྱིན་པའི་སྣང་བ་དེ་ཆོས་སྐྱོང་བསྙེན་པའོ། །མཆོད་རྟེན་ལ་མཁན་པོ་བྱས་པ་དང༌། བཅོམ་ལྡན་འདས་ཉིད་ལས་མེད་ལ། སྡོམ་པ་ལེན་པའི་རྗོད་བྱེད་གཙོ་བོ་དང་འཁོར་ལ་བསྙེན་པའོ། །དབུ་སྐྲ་ཉིད་ཀྱིས་བཞར་བའི་སྣང་བ་དེ་ཡི་གེ་བརྒྱ་བས་མཚམས་སྦྱར་བའོ། །དེར་ཆོས་གོས་དང་ཁྱིམ་པའི་རྟགས་སྤངས་ཤིང་སྔོམ་པ་དང་ལྡན་པའི་སྣང་བ་དེ་བསྙེན་པའི་རྟགས། མཚན་མ་གྲངས་ཀྱི་བསྙེན་པ་སྔོན་དུ་སྐྱེལ་བའོ། དེ་ནས་ཤར་དུ་མ་ག་དྷཱར་བྱོན་པའི་སྣང་བ་དེ་དཀྱིལ་འཁོར་གྱི་ས་བསླང་བའོ། །དེ་ཡང་མིས་མ་མཐོང་བར་
ཉིད་སྣང་བ་ལ་འཁོར་གྱིས་བསྐོར་ཞེས་གྲགས་པ་ཏིང་ངེ་འཛིན་དང་ལྡན་པའོ། །ཤར་དུ་གཟིགས་ནས་བྱོན་པའི་སྣང་བ་དེ་སངས་རྒྱས་ཞི་བས་སྒྲུབ་པའོ། །ཐམས་ཅད་སྤངས་པར་སྣང་བ་དེ་དཔེན་པ་བཙལ་བའོ། །ཕི་ལི་པར་པ་ཏར་བཞུགས་པའི་སྣང་བ་དེ་ཕྱི་རབས་ལ་བརྟགས་པ་དགོས་པར་བསྟན་པའོ། །བྲམ་ཟེ་མོ་བཟང་ལྡན་ལ་དྲིས་ནས་བྲམ་ཟེ་ག་ཡ་ལས་གཡར་བ་དེ་བདག་པོ་ལ་བསླང་བའོ། །ལྷ་མ་ཡིན་གྱིས་བར་ཆོད་བྱེད་པར་བསྒྲགས་པ་དེ་བདག་པོ་དངོས་སྣང་བ་མེད་པ་ལ་བསླང་བའོ། །བར་མ་ཆོད་པར་སྣང་བ་དེ་རྣལ་འབྱོར་བ་ཞིས་གཟུང་བའོ། །སའི་ལྷ་མོ་སྐུ་སྟོད་བཏོན་པ་དེ་དཔང་དུ་གསོལ་བའོ། །དེར་འགྱུར་བ་མང་དུ་སྣང་བ་དེ་ཇི་ཅམ་འདོད་པ་ཐུགས་ཀྱིས་བཅད་པའོ། །དེའི་ཟུར་བཞིར་རྡོ་རྗེ་ཕུར་པ་བཞི་བཏབ་སྟེ་ཁྲོ་བོས་མཚམས་བསྲུང་བའོ། །ལྷུང་བཟེད་བསྒྱུར་བས་ས་ལ་ཐིམ་པའི་སྣང་བ་དེས་གཏར་བཅུག་པའོ། །ཀླུ་ཨུ་བི་ཀ་གཉིད་སད་པ་ལ་ལྷུང་བཟེད་དུ་ཤེས་ནས་ཉལ་བའི་སྣང་བ་དེ། ས་བདག་མ་དགའ་ནས་ས་བཏའ་མ་ཆགས་པའོ། །བདུད་རྣམས་ཀྱི་མདའ་མཚོན་མེ་ཏོག་ཏུ་སོང་བའི་སྣང་བ་དེ་གཏོར་མས་ལན་ཆགས་འཇལ་ཞིང་བར་ཆད་ཟློག་པའོ། །རྒྱལ་པོ་བཞིས་བཞེངས་པར་བསྐུལ་བའི་སྣང་བ་དེ་སློབ་མ་རིགས་བཞིས་བསྐུལ་བའོ། །བཞེངས་ནས་སྤྱན་བལྟས་པས་བདུད་མོ་རྣམས་འདོད་པས་སྟེག་པར་མཐོང་སྟེ། སྤྱན་གཡས་པ་བསྟན་ནས་སེ་གོལ་གཏོགས་པས་རྒན་མོར་སོང་བའི་སྣང་བ་དེ་སྤྱན་གཡས་པའི་ཊ་ལས་ཉི་མ་བསྐལ་བའི་མེ་ལྟར་སྲེག་པའོ། །འགྱོད་ནས་བདུད་མོས་གུས་པ་ཕུལ་པས་སྔར་བཞིན་སོང་པའི་སྣང་བ་དེ་སྤྱན་གཡོན་པ་ཨ་ལས་ཟླ་བའི་འོད་ཀྱིས་སྙིང་རྗེས་ཉམས་པ་གསོས་པའོ། །དེ་ནས་དབང་ལྡན་ནས་ཕུར་པའི་མཚམས་ནས་ཕྱོགས་བཞིར་གཡས་སྐོར་དུ་བྱང་ཆུབ་ཤིང་ལ་དབྱངས་དང་ལྡན་པས་ལན་གསུམ་བསྐོར་བས་རྡོ་རྗེ་ལ་སོགས་པ་བཞི་ཞབས་རྗེས་ལ་བྱུང་པའི་སྣང་བ་དེ། རྡོ་རྗེ་བརྒྱང་བསྐུམ་གྱི་དྲ་གུར་དུ་བྱས་པའོ། །དབྱངས་རཀྵ་སྟེ། རྡོ་རྗེའི་མདའི་དྲ་བར་གྱུར་པའོ། །དོ་རྗེའི་གདན་མི་འགྱུར་ཞེས་གྲགས་པ་དེ། དེ་ལྟར་བསྲུང་པའི་བྱིན་རླབས་དང་བསམ་པའོ། །ས་ཡུལ་དེ་ཕྱོགས་གཞན་པས་མཐོ་བར་གྲགས་པ་དེ་ཚད་ལྡན་དུ་བརྩིགས་པ་ལ་
སོགས་པའོ། །ཤིན་ཏུ་དྲི་ཞིམ་ཞིང་ཉམས་དགའ་བ་དེ་དྲི་དང་བའི་རྣམ་ལྔས་བྱུག་པའོ། །སའི་ལྷ་མོ་དེ་ཉིད་དུ་ཐིམ་པའི་སྣང་བ་དེ་སའི་ལྷ་མོ་ལྷག་པར་གནས་པའོ། །བྱང་ཆུབ་ཀྱི་ཤིང་དེ་སངས་རྒྱས་ཐམས་ཅད་ཀྱི་རྟེན་ཡིན་པའི་སྣང་བ་དེ་མེ་ཏོག་བཀོད་པའོ། །འདས་པ་དང་མ་འོངས་པ་ཀུན་གྱི་ཡང་རྟེན་པའི་ཡང་རྟེན་ཞེས་གྲགས་པའི་སྣང་བ་དེ་ལྷ་གྲངས་ཀྱི་མེ་ཏོག་བཀོད་པའོ། །བྱང་ཆུབ་ཀྱི་ཤིང་ལས་འོད་ཟེར་བྱུང་ནས་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་གྲགས་པ་དེ་མཎྜལ་བཀོད་པ་ལ་རྣལ་འབྱོར་བཞིས་བསྐྱེད་པའོ། །དེ་ལ་སངས་རྒྱས་ཀྱི་ཚིགས་བཅད་བཞི་འདོན་པའི་སྣང་བ་དེ་འཁོར་ལོ་དང༌། གཞན་ལ་གསོལ་བ་གདབ་པའོ། །དེས་འཁོར་གྱི་མུ་སྟེགས་ཀུན་དགའ་ནས་ཡི་རང་བ་དེ་ཆོས་ཀྱིས་སྐྱོང་བ་གསོལ་གདབ་པའོ། །འོད་ཟེར་དེ་སངས་རྒྱས་པའི་སྣང་བ་དེ་འཁོར་ལོ་མཁན་ལ་བརྟེན་པའོ། །ཕྱོགས་སྐྱོང་བཞིས་བུམ་པ་ཕུལ་བའི་སྣང་བ་དེ་བུམ་པ་སྟ་གོན་ནོ། །བུམ་པ་གཅིག་ཏུ་བྱིན་གྱིས་བརླབས་པའི་སྣང་བ་དེ་དཀར་པོས་བྱུགས་པའོ། །ཁོང་རང་གིས་སོ་སོར་མཐོང་ལ་གཞན་གྱིས་གཅིག་ཏུ་མཐོང་བའི་སྣང་བ་དེ་རིན་པོ་ཆེ་དང་ས་ལས་བྱས་པའོ། །བྱིན་གྱིས་བརླབས་པས་མཛེས་ཤིང་ཆེ་བའི་སྣང་བ་དེ་མུ་སྟེགས་ཀྱིས་སྤངས་པའོ། །ཚངས་པ་ལ་སོགས་པས་རང་རང་གི་ནོར་གྱིས་དོགས་པས་མཚན་མ་བཏབ་པ་དེ་མཚན་མ་བཏབ་པའོ། །ཕྱི་དྲོ་གསོལ་དུ་མ་རུང་ནས་རས་བཀང་ནས་ཀུ་ཤའི་ཁར་གཞག་པའི་སྣང་བ་དེ་མགུལ་ཆིངས་དང་གདན་ལ་གཞག་པའོ། །ཁྱིམ་བདག་གི་བུ་མོས་འོ་མ་དྲངས་པ་ཡང་དེར་བླུགས་པའི་སྣང་བ་དེ་བཅུད་བླུགས་པའོ། །དེ་བླུགས་པས་བྱང་ཆུབ་ཀྱི་ཤིང་གི་གཟུགས་དེར་ཤར་བའི་སྣང་བ་དེ་ལྷ་བསྐྱེད་པའོ། །དེ་ལས་བླངས་པ་བྱུང་ནས། བྱང་ཆུབ་ཀྱི་ཤིང་ལ་ཕོག་པས་འདབ་མ་གཅིག་དེར་ལྷུང་བའི་སྣང་བ་དེ་ཡེ་ཤེས་ཀྱི་ལྷ་སྤྱན་དྲངས་པའོ། །དེ་ལ་ཀུན་ངོ་མཚར་སྐྱེས་ནས་མཆོད་པའི་སྣང་བ་དེ་སྤྱན་དྲངས་པ་དེ་ལ་མཆོད་པའོ། །བཅོམ་ལྡན་འདས་ཀྱིས་ན་མོ་བུདྷཱ་ཡ། ཞེས་བརྗོད་ནས་ཤིང་ལོ་དེར་བཅུག་ནས་ཐམས་ཅད་འོ་མར་གྱུར་ཏེ་གཞག་པའི་སྣང་བ་དེ་ལྷ་མཆོད་བསྙེན་བསྒྲུབ་ཏུ་ཞུ་བའོ། །དེ་ལ་ཀུན་དགའ་ནས་སྤྲོ་ལ་སངས་རྒྱས་ཉིད་ཀྱང་དགྱེས་པའི་སྣང་བ་དེ་སྟ་གོན་ལ་འཇུག་པས་དགའ་
བའོ། །བཅོམ་ལྡན་འདས་ཀྱིས་བཀྱེད་ནས་ཤིང་ལ་གཟིགས་པའི་སྣང་བ་དེ་དགའ་ཆེན་ཞུས་པའོ། །ཤིང་ལས་ཡང་འོད་ཟེར་བྱུང་བས་བཅོམ་ལྡན་འདས་དང་བུམ་པ་ལ་ཕོག་པའི་སྣང་བ་དེ་བུ་ཚུར་ཞེས་པ་དང༌། བུམ་པ་སྔགས་ཀྱི་གཟུངས་ཐག་གདགས་པའོ། །སངས་རྒྱས་ཀྱིས་ན་མོ་བུདྡྷཱ་ཡ། ན་མོ་དྷརྨཱ་ཡ། ན་མཿསཾ་དྷཱ་ཡ། ཞེས་བརྗོད་པས་ཕྱོགས་སྐྱོང་ལ་སོགས་པས་ཕྱག་བྱས་པ་དང༌། ནེརཉྫ་ནའི་ཉ་ཆེ་ཆུང་དང་ཕྲད་ཅིང་མུ་སྟེགས་རྣམས་འཁོར་དུ་གྱུར་པའི་སྣང་བ་དེས་སངས་རྒྱས་སྤྲུལ་པའི་སྐུ་སྟེ། དེ་ལྟར་སྣང་བ་དང༌། རྒྱལ་པོའི་ཁབ་བྱ་རྒོད་ཕུང་པོའི་རི་ལ་ཤེས་རབ་ཀྱི་ཕ་རོལ་ཏུ་ཕྱིན་པ་གསུང་བ་དང༌། ཤྲཱི་ད་ན་ཕ་རྒྱུད་གསུངས་པ་ལ་སོགས་པ་གཅིག་ཡིན་པས་སངས་རྒྱས་རྡོ་རྗེ་སེམས་དཔའི་རྣམ་འཕྲུལ་རྒྱུད་རེ་རེ་ཉིད་ལ་ཆོས་རྒྱུད་ལྟར་ལ་དེ་ལྟར་ཡོ་གསུངས་པ་ཡོ་རྒྱུད་དོ། །དགེ་འདུན་འཁོར་དེ་ཡོ་འཁོར་ལོའི་ལྷར་སྟོན་པ་ཉིད་དོ། །གོང་ན་སྟོན་པ་པོ་ཞེས་པས་སོ། །དེ་ལྟར་ཡང་ལྡན་སྔགས་སུ་ཤེས་པས་ཐམས་ཅད་སངས་རྒྱས་འཇིག་རྟེན་ན་བཞུགས་པ་དང༌། ཐམས་ཅད་ཆོས་ལྟར་གྱུར་པས་སྲོག་མི་གཅོད་པ་དང༌། ཐམས་ཅད་གྲོགས་དང་དགེ་འདུན་ཡིན་པས་ཕྱིར་མི་ལྡོག་པའི་ཡོན་ཏན་སྟོན་པའོ། །དེ་ནས་སངས་རྒྱས་འཁོར་རྣམ་བཞི་ལ་རང་རང་གི་སྤྱོད་ལམ་གྱིས་ཆོས་སྟོན་པ་རིགས་ཀྱི་སྡེམ་པ་འཛིན་པའོ། །ཀླུ་ཁ་ལ་མེ་འབར་གྱིས་སངས་རྒྱས་བསྡིགས་པས་སངས་རྒྱས་ཀྱི་སྐུ་ལས་མེ་དཔུང་དཔག་ཏུ་མེད་པས་ཀླུ་བྲེད་པ་དེ་ཞི་སོགས་ཀྱི་སྦྱིན་སྲེག་བྱེད་པའོ། །རྩྭ་ཀུ་ཤ་ལ་མཉེལ་བསོ་བ་དེ་མཁའ་གསང་བྱིན་གྱིས་བརླབས་པའོ། །ཚངས་པས་མེ་ཏོག་གཏོར་བ་དང༌། མཆོད་པའི་སྣང་བ་དེ་མཆོད་པའི་གནས་སུ་མཛད་པའོ། །པདྨའི་སྐུད་པ་གཡས་ཀྱི་དཔུང་བ་ལ་བཅིངས་པས་རླུང་ཞི་བ་དང༌། ཁྱིམ་བདག་གི་བུ་མོའི་གཡོན་ལ་བཏགས་པས་རླུང་ཞི་བའི་སྣང་བ་དེ་སྲུང་སྐུད་གཡོན་དུ་བཏགས་པའོ། །ཁྱིམ་བདག་གི་བུ་མོས་འོ་ཐུག་གི་ལྷུང་བཟེད་བླངས་ནས་དྲངས་པས་གསོལ་བའི་ལྷག་མ་འཁོར་ལ་བྱིན་པའི་སྣང་བ་དེ་གཏེར་མ་གཏོང་བའོ། །ཞལ་དུ་ཚེམས་ཤིང་གིས་དྲི་མ་ཕྱིས་ནས་དོར་བས་ནྱ་གྲོ་དྷར་གྱུར་པ་དེ་སོ་ཤིང་དོར་བའོ། །ཀུ་ཤ་སྔོན་དུ་བོར་བས་སྔ་ཕྱིར་བྱིན་གྱིས་བརླབས་ནས། སྟན་བྱས་པའི་སྣང་བ་དེ་ཀུ་ཤའི་སྔས་ལ་གཙོ་བོའི་སྔགས་
བཏབ་པ་དང༌། སྟན་ལ་སྔགས་ཀྱིས་བཏབ་བ་གདིང་བའོ། །ཡོ་བསྐྲད་ནས་བྱང་ཆུབ་ཀྱི་ཤིང་ལ་དབུ་གཏད་ནས་གཡས་ས་ལ་ཕབ་ནས་གཟིམས་པར་སྣང་བ་དེ་ལུས་ངག་ཡིད་ཐ་མལ་མིན་པས་འཁོར་ལོ་མགོ་གཏད་སེང་གེའི་ཉལ་སྟབས་སུ་གཟིམས་པའོ། །སྲོད་ལ་བདུད་ཀྱིས་སྤྲུལ་པ་བྱས་པ་ལས། འོད་ཟེར་སྐུ་ལས་བྱུང་བའི་སྣང་བ་དེ་རྨི་ལམ་ངན་པ་བཟློག་པའོ། །ལྷ་མོ་རྣམས་ཀྱི་མཆོད་པ་བཞེས་ནས་མཉེས་པའི་སྣང་བ་དེ་རྨི་ལམ་བཟང་ནས་མཉེས་པའོ། །དེ་ནས་ཤིང་དྲུང་དུ་གཤེགས་པས་སྐུ་ལས་འོད་ལྔ་བྱུང་བའི་སྣང་བ་དེ་ཐིག་སྐུད་ལྔ་བཀལ་བའོ། །འོད་ཚུར་འདུས་བྱང་ཆུབ་ཤིང་ལས་འོད་ལྔ་བྱུང་བ་ནི་ཐིག་སྐུད་སྣོད་དུ་བཅུག་ནས་ལྷ་ལྔ་བསྐྱེད་པའོ། །འོད་དེས་ཕྱོགས་བཅུར་ཁྱབ་ནས་སངས་རྒྱས་ཐམས་ཅད་བཀུག་པའི་སྣང་བ་དེ་ཡེ་ཤེས་ཀྱི་ལྷ་བཀུག་པའོ། །ཕྱོགས་བཅུའི་སངས་རྒྱས་བྱོན་ནས་ནམ་མཁའི་མདུན་ན་བཞུགས་པ་ལ་མཆོད་ནས་ཤིང་ལ་བཞུགས་པའི་སྣང་བ་དེ་ཐིག་སྐུད་ཀྱི་ལྷ་མཆོད་ནས་ཐིག་སྐུད་དུ་བྱས་པའོ། །ཤིན་ཏུ་བསལ་ནས་སངས་རྒྱས་གནས་སུ་གཤེགས་པའི་སྣང་བ་དེ་ཐིག་བཏབ་ནས་སྐུད་པ་བསལ་བའོ། །ཚོན་ཡང་དེ་བཞིན་དུ་འོད་ལྔ་པོ་ཕྱོགས་ཀྱི་སྣང་བ་ཚིག་ལྔའི་རྒྱུ་འོད་ལྔ་ཕྱོགས་ནས་སྤྲོས། ཕྱོགས་ཕྱོགས་སུ་ཐིམ། ཕྱོགས་ཕྱོགས་སུ་གསལ། རིགས་ལྔར་གྲགས་པ་དང༌། བཅོམ་ལྡན་འདས་ཉིད་དབུས་ན་གནས་པའི་སྣང་བ་དེ་ལྷ་བསྐྱེད་བཀུག་མཆོད་བསམས་བཀྱེ་གསལ་བདག་གི་ཏིང་ངེ་འཛིན་གྱིས་གཙོ་བོར་གསལ་བས་བསྲུང་བའོ། །འོད་ཟེར་གྱི་སྣང་བ་ལ་འཁོར་གྱི་རྟོགས་ཚད་ནི་པྲ་བརྟགས་པའོ། །བྱང་ཆུབ་ཀྱི་ཤིང་གི་ཤར་ནས་གཟིགས་པའི་ཞབས་རྗེས་ཡོད་པ་དེ་དཀྱིལ་འཁོར་དུ་བཅུག་པའི་བྱེ་བྲག །ལྷོ་ཕྱོགས་སུ་ཀུ་ཤའི་སྟན་ལ་བཞུགས་པ་དང༌། ཤར་གྱི་ཞབས་རྗེས་ལ་བཀྲ་ཤིས་རྫས་བརྒྱད་མངའ་བའི་སྣང་བ་དེ་དབང་སྟེགས་ལ་གདུགས་སྩོགས་ཀྱིས་མཆོད་པའོ། །སྐུ་ལ་མེ་དཔུང་ཕྱུང་བས་བདུད་དང་མུ་སྟེགས་བྱེད་བྲོས་པའི་སྣང་བ་དེ་བགེགས་བསྐྲད་ཕྱིར་སྦྱིན་སྲེག་དང་ཏིལ་བསྔགས་པའོ། །བྱང་ཕྱོགས་སུ་གཤེགས་པས་པདྨ་བཅུ་གསུམ་བྱུང་བ་དེ་དབང་ལ་བུམ་པ་
དང། ཅོད་པན་དང༌། རྡོ་རྗེ་དང༌། བདག་པོ་དང༌། མིང་དང༌། དེ་ཉིད་དང༌། གསང་དབང་དང༌། ཤེས་རབ་ཡེ་ཤེས་དང༌། བཞི་པ་དང༌། རྗེས་སུ་གནང་བ་དང༌། ལུང་བསྟན་པ་དང༌། གསང་བ་བསྒྲགས་པ་དང༌། དབུགས་དབྱུང་བར་བསྐུར་བའོ། །བྱང་ཆུབ་ཀྱི་ཤིང་ལ་ཟླ་བ་གཅིག་ཏུ་གཟིགས་པའི་སྣང་བ་དེ་དཀྱིལ་འཁོར་དང༌། ལྷའི་དེ་ཁོ་ན་ཉིད་ལྟ་བའོ། །ནུབ་ནས་ཤར་དུ་གཟིགས་ནས་འོད་ཟེར་བཀྱེ་བའི་སྣང་བ་དེ་དབང་རྫོགས་པས་འགྲོ་དོན་བྱེད་པར་ཤེས་པའོ། །ལྷའི་དབང་པོས་ཟེའུ་ཕྲོག་ལྔ་པ་ཕུལ་བས་དབུ་ལ་གསོལ་བའི་སྣང་བ་དེ་རིག་པའི་དབང་ལྔ་ཐོབ་པའོ། །ཚངས་པས་གསེག་ཤང་དང་པར་བུ་ཕུལ་བ་ཕྱག་གཡས་གཡོན་དུ་གཟུང་བའི་སྣང་བ་དེ་རྡོ་རྗེ་དང་དྲིལ་བུའི་དེ་ཉིད་ཐོབ་པའི་རྟགས། སྒྲོལ་མས་ཆོས་གོས་གསོལ་བའི་སྣང་བ་དེ་ཕྱག་རྒྱའི་དེ་ཉིད་ཐོབ་པའི་རྟགས། ལེགས་སྐྱེས་མས་འོ་ཐུག་དྲངས་པ་གསོལ་ནས་སྐུ་གསེར་དུ་གྱུར་པ་དེ་གསང་དབང་ཐོབ་པའི་རྟགས། ལེགས་སྐྱེས་མས་སྦྱིན་ལེན་ནོར་ལ་སྟོན་པས་གསུངས་པ་དེ་ཤེས་རབ་ཡེ་ཤེས་ཐོབ་པའི་རྟགས། མེ་ལོང་སྒྲ་སོགས་ཕུལ་བ་ལ་ལྟས་སོགས་བྱས་ནས་སླར་གཏད་པ་དེ་བཞི་པ་ཐོབ་པའི་རྟགས། ལྷ་ཚངས་པས་གསེར་གྱི་འཁོར་ལོ་ཕུལ་བ་དེ་རྗེས་གནང་ཐོབ་པའི་རྟགས། དེ་ལྟར་ཕུལ་ཡང་ཆོས་མ་གསུངས་པས་ནམ་མཁའ་ལ་སངས་རྒྱས་ཐམས་ཅད་མངོན་སུམ་དུ་མཐོང་ནས་ཁྱོད་མངོན་པར་རྫོགས་ནས་སངས་རྒྱས་པས་ཆོས་སྟོན་ཞེས་པ་དེ་ལུང་བསྟན་ཏོ། །མྱ་ངན་ལས་འདས་པར་བཞེད་པ་ལ། ཚངས་པས་ཞུས་པ་དེ་གསང་བ་བསྒྲགས་པའི་རྟགས། དེ་ནས་ཤཱཀྱའི་རིགས་ཤིང་གི་ལྷོ་ཕྱོགས་སུ་རབ་ཏུ་བྱུང་བའི་སྣང་བ་དེ་དབུགས་ཕྱིན་པའི་རྟགས། དེ་ནས་བྱ་བ་གཏོང་གསུངས་པ་དེ་དཀྱིལ་འཁོར་གྱི་དེ་ཉིད་གོ་བའི་རྟགས། བཅུད་དུ་བྱ་བ་ལ་ཕྱག་རྒྱ་བཞི་ངེས་དོན་དང་དྲང་དོན་དུ་ཤེས་པར་བྱ་བ་ལ་ཡང་བཞི་སྟེ། དམ་ཚིག་གི་ཕྱག་རྒྱ་ཤེས་པར་བྱ་བ་དང༌། སངས་རྒྱས་དེ་ཆོས་གོས་ལ་སོགས་པར་བཏང་བ་འབྱོར་བའི་ཚོགས་སོགས་པའོ། །པོ་ཀ་རིར་སྐུ་ཁྲུས་མཛད་ནས་མྱ་ངན་ལས་འདའ་བར་བཞེད་པ་ལ་ཚངས་པས་གསོལ་བ་ཡན་ཆད་གདམས་པས་ཚོགས་བསག་པའོ། །རྒྱལ་པོ་བཞིས་ཆོས་སྟོན་དྲངས་པ་བཞེས་ནས་
གཅིག་ཏུ་བྱས་ཚོགས་པ་ལ་བཀྱེ་བས་ཚད་མེད་བཞི་བསྟན། ཐམས་ཅད་བཞག་ནས་ཤིང་དྲུང་དུ་གཤེགས་ནས་བདུད་སྐྱེས་པས་བསྲུང་བའི་གྲྭ་གུར་ཡན་ཆད་བསྟན་ཏོ། །ཤིང་ལ་སྐུ་བརྟེན་ནས་ཞལ་ཤར་དུ་གཟིགས་པས་མངོན་བྱང་ལྔ་ལས་རྒྱུའི་རྡོ་རྗེ་འཆང་སྦྱོར་དང་པོའི་རྣལ་འབྱོར་རོ། །སྐུ་དེ་ལས་འོད་ཕྱོགས་བཞིར་སྤྲོས་སླར་འདུས་ཏེ་ཤིང་གི་ཟིལ་བ་དབུ་གཙུག་ལ་ཕོག་པས་ཐུགས་མཉམ་པར་གནས་པ་དེ་རྒྱུའི་རྡོ་རྗེ་འཆང་ཞུ་བ་གོ་ལ། སྒྲོལ་མ་ལ་སོགས་པ་ལྷ་མོ་བཞེས་བསྐུལ་བས་དེ་ལས་བཞེངས་ནས་སྒྲོལ་མ་ལ་སོགས་པ་ལ་བལྟས་ཏེ། ལྷ་མོ་བཞིས་བསྐུལ་ནས་རྡོ་རྗེ་འཆང་བཞེངས་པ་གོ་སྟེ་རྗེས་ཀྱི་རྣལ་འབྱོར་རོ། །སྐུ་ལས་འོད་བྱུང་ཕྱོགས་བཅུར་སྤྲོས་པས་སངས་རྒྱས་ཐམས་ཅད་མདུན་དུ་སྣང་བར་གྱུར་ནས། བཅོམ་ལྡན་འདས་ཀྱི་སྐུ་ལ་ཐིམ་པ་དེ་འཁོར་ལོ་རྫོགས་པར་བསྐྱེད་པ་སྟེ། རྫོགས་པའི་རྣལ་འབྱོར་ར་མ། དཀྱིལ་འཁོར་རྒྱལ་མཆོག་ཏུ་གོ་བའོ། །དེ་ནས་ཐུགས་ཀ་ནས་འོད་འཕྲོས་ནས་སྣང་བས་ཁྱབ་ནས་སླར་ཐིམ་པ་དེ་ཡེ་ཤེས་སེམས་དཔའ་བཅུག་བའོ། །དེ་ནས་དབང་པོ་རྣམས་ནས་འོང་བྱུང་སྣང་བར་བྱས་སླར་འདུས་སྐྱེ་མཆེད་བྱིན་གྱིས་བརླབས་པའོ། །ཡང་མཛོད་སྤུ་དང༌། ལྗགས་དང༌། ཐུགས་ཀ་ནས་དེ་བཞིན་དུ་རིམ་གྱིས་འོད་འཕྲོས་སླར་བསྡུས་པ་དེ་སྐུ་གསུང་ཐུགས་བྱིན་གྱིས་བརླབས་པའོ། །གཙུག་ནས་འོད་བྱུང་ནས་སྣང་བ་ནི་དབང་བསྐུར་བའོ། །ཁྱིམ་བདག་གི་བུ་མོས་ཡད་འོ་ཐུག་དྲངས་པ་མ་གསོལ་བར་མདུན་དུ་གཞག་པས་སྐུ་གསལ་བར་གྱུར་པ་དེ་བདུད་རྩི་མྱང་བའོ། །འོན་ཀྱང་ཐུགས་ཀ་ནས་འཕྲོས་འདུས་ལྷ་མིའི་ཚོགས་ཀྱིས་མཆོད་ཕ་བྱེད་དེ་ཕྱི་ནང་གསང་བའི་མཆོད་པར་གོ་ལ། དེ་ནས་ཚངས་པ་ལ་སོགས་པས་བསྟོད་པར་གོ་བའོ། །དེ་ནས་འོད་ཟེར་དེ་ཐམས་ཅད་སྐུ་ལ་ཐིམ་ནས་གནས་པ་བསྐྱེད་པ་རྫོགས་པར་གོའོ། །དེ་ལྟར་མཉམ་པར་གནས་པ་དེ་དམ་ཚིག་གི་ཕྱག་རྒྱར་བསྒོམ་པར་གོ །ལས་ཀྱི་ཕྱག་རྒྱ་ངེས་དོན་དང་དྲང་དོན་དུ་ཤེས་པར་བྱ་བ་ནི་དེ་ལྟར་གནས་པ་ཤིང་ལ་སྐུ་རྒྱབ་གཏད་པང་ཨཝ་དྷཱུ་ཏཱི་ལ་དབུགས་ཡོད་ལ་ས་ལ་བ་ན་ཡོད་པའོ། །རྩ་བ་མེ་རླུང་ལ་ཟུག་པ་ཡང༌། རྩ་དེའི་ཞབས་གོ་བའོ། །རྩེ་མོ་ལྟོ་ནུབ་ཏུ་འོང་ཞིང་ཟིལ་པ་འབབ་པ་དེ་
བདུད་རྩིར་ས་ནཱ་གཡས་ནས་འབབ་པའོ། །ཡན་ལག་བྱང་ཆུབ་ན་ཡར་འོང་བ་ལ་ལ་ནཱའོ། །ཡལ་ག་ཕྲ་ལ་མང་བ་དེ་རྩ་ཕྲན་མང་པོའོ། །དུད་དེ་ལོ་མ་བརྗེ་བ་དེ་ཉོན་མོངས་ཡེ་ཤེས་སུ་སོང་བའོ། །མེ་ཏོག་ནུབ་མོ་གསལ་བ་ཀུན་ལ་གསང་བའོ། །འབྲས་བུ་ཕྲ་ཞིང་ཤིང་ལ་ཐང་ཆུ་མེད་པ་ནི་རོ་ཉམས་སུ་མྱོང་ཞིང་ཉོན་མོངས་པ་མེད་པའོ། །སྐུ་དེ་གྲིབ་མ་ལ་ཞུགས་བདེ་མི་སྤོང་བའོ། །ཆོས་ཀྱི་ཕྱག་རྒྱའི་ངེས་དོན་དང་དྲང་དོན་དུ་ཤེས་པར་བྱ་བ་ནི་སྐུ་དྲང་པོར་ཞལ་ཤར་དུ་གཟིགས་ནས་བཞུགས་པ་དེ་བརྒྱུད་པའི་མན་ངག་ཡོད་ཅིང་ཉམས་སུ་ལོན་པའོ། །ཕྱག་རྒྱ་ཆེན་པོ་སྐུ་མི་སྣང་བར་མཛད་ནས་འོད་དང་སྤྲུལ་པས་ཀུན་དུ་ཉིད་ནི་རྟེན་འབྲེལ་ཐབས་ཤེས་རབ་མཉམ་གཞག་དང་རྗེས་ཐོབ་ཏུ་བསྒོམ་པའོ། །སྤྱན་སྣ་རྩེར་གཏད་པ་དེ་དཔེས་དོན་མཚོན་ཅིང་རྙེད་པའོ། །ཞབས་རྡོ་རྗེ་སྐྱིལ་ཀྲུང་དུ་བཞུགས་པ་དེ་ཡེ་ཤེས་གོ་ཞིང་གདེང་དང་ལྡན་པའོ། །ཕྱག་རྒྱ་ཆེན་པོ་སྐུ་མི་སྣང་བར་མཛད་ནས་འོད་དང་སྤྲུལ་པས་ཀུན་དུ་ཁྱབ་པའོ། །དེ་ཡང་དམ་ཚིག་གི་ཕྱག་རྒྱ་ཅི་དགོས་ཤེ་ན། འབྱོར་བ་དང༌། གདམས་པས་བསོད་ནམས་ཀྱི་ཚོགས་བསག་པ་ནི་རྒྱུ་ལས་འབྲས་བུ་འབྱུང་བས་སངས་རྒྱས་ལྟར་སྤྲུལ་སྐུ་འབྱུང་ངོ༌། །དེ་ཡང་ཆད་མེད་བཞི་དང་ཡེ་ཤེས་ཀྱི་ཚོགས་སོགས་པས་མ་ཉམས་ཤིང་འབྱུང་བའོ། །དེ་གཉིས་རྒྱུ་བསོད་ནམས་མེད་ན་མི་འབྱུང་བས་དེའི་རྒྱུའི་དུས་སོ། །འབྲས་བུ་རྟེན་དང་བརྟེན་པ་སངས་རྒྱས་རེ་རེའི་སྣང་བ་དེ་བསྲུངས་པས་བདུད་མེད་པའོ། །དེ་ཡང་སྟོང་པས་འཆི་བདག་བཅོམ། །མེས་ཉོན་མོངས་བཅོམ། དྲ་གུར་གྱིས་ཕུང་པོ་བཅོམ། ཁྲོ་བོས་ལྷའི་བུའི་བདུད་བཅོམ། དེ་ལྟར་བདུད་མེད་པས་གཞལ་ཡས་ཁང་ཇི་ཙམ་འདོད་པར་རང་རང་གིས་བསྟན་པའོ། །མངོན་བྱང་ལྔ་ལས་སྐུ་བཞེངས་པ་སྤྲུལ་སྐུ། ཕ་དང་མའི་སི་ལ་དང་ག་པུར་ཟླ་ཉི་ཧཱུཾ་ཟླུམ་པོ། འཕྲོ་འདུའི་ཚོགས་ཀྱི་རྒྱུ་མཐུན་དེ་ལས་སྐུ་བཞེངས་པ་སྔོན་སྟོང་པ་ཡི་གེ་ལྔར་བྱས་པ་འོག་མིན་ལས་ཆད་པ་མི་འདོད་པ་ཐམས་ཅད་རང་གི་སེམས་སུ་འདོད་པས་འཇིག་རྟེན་པའི་སྣང་བ་ལ་ཕ་མ་ལས་རང་གི་མངོན་བྱང་ལྔ་ལས་སྐུ་བྱུང་བའོ། །ཞུ་ནས་བསྐུལ་བས་བསྐྱེད་པས་འདོད་ཆགས་འདུལ་བ་དང་བསྐུལ་ནས་ཡབ་ཡུམ་བཞེངས་པ། ཞུ་བར་གྱུར་བ་མི་རྟོག་པ། བཞེངས་པ་
འགྲོ་བ་གདུལ་བྱར་བྱ་བ་གཞན་མཛད་པའོ། །དཀྱིལ་འཁོར་རྫོགས་བ་སྲས་བལྟམས་པའོ། །ཡེ་ཤེས་སེམས་དཔའ་བཀུག་བཅུག་གཉིས་མེད་དགྱེས་པ། བདག་དང་སངས་རྒྱས་ཐམས་ཅད་ངོ་བོ་གཅིག་པ། དུས་མི་ཉམས་པས་བཀུག་པ། དུས་མི་ཉམས་པས་བཀུག་པ། ཐ་དང་མེད་པས་བཅུག་ལ། མི་རྟོག་པས་གཉིས་མེད་བྱས་པའོ། །འགྲོ་དོན་ནུས་པས་མཉེས་པའོ། །སྐྱེ་མཆེད་ལ་མངོན་ཤེས་འབྱུང་བའོ། །རིགས་གསུམ་འདུས་ན་འདུལ་བས་སྐུ་གསུམ་བྱིན་གྱིས་བརླབ་པའོ། །སངས་རྒྱས་ལ་དབྱེ་བ་མེད་ཅིང་མེ་རྟོག་པས་དབང་ངོ༌། །བདེ་བ་ཆེན་པོར་གནས་པས་བདུད་རྩི་མྱང་བའོ། །འཇིག་རྟེན་པ་ཐམས་ཅད་ཀྱིས་ཤཱཀྱ་ཐུབ་པ་ལ་སོགས་པ་མཆོད་པའོ། །སེམས་ཅན་འདྲེན་པས་བསྟོད་པའོ། །མི་རྟོག་པའི་རང་བཞིན་གྱི་ངོ་བོས་རྫོགས་རིམ་མོ། །ཡང་ན་དེ་ལྟར་བྱས་པས་ཡེ་ཤེས་སེམས་དཔའ་ལ་སོགས་བ་ལ་སེམས་ཅན་གྱི་སྣང་བས་རྡོ་རྗེ་གདན་དུ་འོད་ལ་སོགས་པ་གོང་བཞིན་ཤེས་པར་བྱའོ། །གསང་སྔགས་བཞིན་བྱས་པས་སྒྱུ་མ་སོགས་ཀྱིས་ད་ལྟར་བསྒོམ་པ་དེ་ལྟར་བསྐྱེད་པར་ཤེས་པར་བྱའོ། །འདིར་རབ་ཏུ་མི་གནས་པས་བྱང་ཆུབ་སེམས་དཔའི་སྣང་བ་ལ་བརྟེན་ནས་བརྟེན་པའི་རྣལ་འབྱོར་པར་སྣང་བ་སེམས་ལ་རྡོ་རྗེ་གདན་ལྟར་སྣང་བའོ། །དེ་ཡང་ལས་ཀྱི་ཕྱག་རྒྱའི་རྩ་ཡོད་པས་སངས་རྒྱས་ཐམས་ཅད་ཀྱི་ལམ་རྒྱབ་ན་གནས་པས་སངས་རྒྱས་ཐམས་ཅད་ཀྱིས་བརྟེན་པ། མེ་རླུང་ཡོད་པས་ཐབས་དགོས་པ་ལ་ལ་ནཱ་དང་ར་ས་ནཱ་སངས་རྒྱས། དགོས་པ་སྤྱི་བོ་ནས་འབབ་པ་སངས་རྒྱས་རྒྱུད་པའི་གསུང་གི་ཡེ་ཤེས་ཐོབ་པ་དང་ཉམས་སུ་མྱོང་བའོ། །རྩ་བྲན་དང་ཉོན་མོངས་པ་མེད་པ་ལ་སོགས་པ་ལོངས་སྤྱོད་རྫོགས་པའི་སྐུ་བྱུང་བ་དངོས། ཆོས་ཀྱི་ཕྱག་རྒྱའི་བདེ་བ་ཆེན་པོ་གནས་པ་ལ་སྐུ་གཉིས་འབྱུང་བ་དང༌། ཕ་རོལ་ཏུ་ཕྱིན་པའི་ལུགས་གོང་གི་ལྟར་རྡོ་རྗེ་གདན་དུ་བྱུང་བའོ། །ཕྱག་རྒྱ་ཆེན་པོས་སྐུ་གདོད་ནས་མུ་བཞི་དང་བྲལ་བ་དེ་རྣམས་འབྱུང་ཞིང་དེ་ཉིད་ཡིན་པར་ཕ་རོལ་ཏུ་ཕྱིན་པའི་གོང་ལྟར་མི་སྣང་བ་འོད་དུ་གྱུར་པའོ། །དེ་ཡང་སྤྲུལ་སྐུ་ཤཱཀྱ་ཐུབ་པ་དང༌། ཧེ་རུ་ཀ་སེམས་ཅན་གྱི་སྣང་བ་ལོངས་སྐུར་བྱང་ཆུབ་སེམས་དཔའི་སྣང་བ།
བདེ་བ་ཆེན་པོ་རང་གི་བདེ་བ་མྱོང་བ་ཆོས་ཀུན་ལ་ཁྱབ་པའོ། །དྲང་དོན་དང་ངེས་དོན་དུ་བསྒྲུབ་པ་ལ་སྣོད་བསྒྲུབ་པ་དང་བཅུད་བསྒྲུབ་པའོ། །སྣོད་བསྒྲུབ་པ་ནི་རྡོ་རྗེ་མཁའ་འགྲོ་ནས། །ལུས་ཉིད་དཀྱིལ་འཁོར་དག་ཏུ་བསྒྲུབ། །འབྲས་བུ་དེ་ལས་འབྱུང་བའོ། །བསྙེན་པ་གོང་འོག་ལྟར་བསྒྲུབས་ཏེ། །ཞེས་འབྱུང་བ་དཀྱིལ་འཁོར་ཆོ་ག་ལས་བཙལ་བ་བསོད་ནམས་ཀྱི་ཚོགས་སོགས་པ། བརྟག་པ་ཡེ་ཤེས་ཀྱི་ཚོགས་བསགས་པ། བསླང་བ་གཞལ་ཡས་ཁང་དང་རྒྱུ་བསྐྱེད་པ། འབྲས་བུ་རྫོགས་པ་ཡེ་ཤེས་བཅུག་པའོ། །གཟུང་བ་སྐྱེ་མཆེད་ནས་བསྟོད་པ་ཡན་ཆད་དོ། །བཅད་པ་ཕུང་པོ་ཁམས་དང་སྐྱེ་མཆེད་ལ་སོགས་པ་གང་འདོད་གདོད་ནས་ཡོད་པའོ། །སྦྱང་བ་རྣམ་དག་ཤེས་པའོ། །རྩིག་པ་ལུས་གྲུབ་བཞིར་བྱུང་བས་ཕུང་པོར་ཆགས་པའོ། །ཐིག་འཁོར་ལོ་བཞི་ལ་སོགས་པའི་རྩ། ཚོན་ག་པུར་སྣང་བས་ཁྲག་འབབ་པའོ། །རྐྱེན་གནས་སྙིང་དབུས་ན། མིང་ཡང་ཨ་ཝ་དྷཱུ་ཏཱི་གཟུགས་ཡི་གེ་ཧཱུཾ། ལྷ་གཙོ་བོ། དབྱིབས་ཐིག་ལེ། ངོ་བོ་ཁུ་བ། ལས་ཅན་གྱི་རྒྱུ་སེམས་ཀྱི་འཕྲུལ་པ། བདེ་བའི་རང་བཞིན་མི་རྟོག་པ། ཉམས་སྟོང་པའི་ངང༌། རྟོགས་པ་དང་ལྡན་པས་ཕུན་སུམ་ཚོགས་པ་ལྔ་དང༌། སྐུ་བཞི་དེ་ལས་འབྱུང་བས་གནས་བརྒྱན་ལ། མི་རྟག་པའི་འཁོར་བ་དེ་ལས་སོ། །བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན། ཕ་རོལ་ཏུ་ཕྱིན་པ་དྲུག །སྟོང་པ་བཅོ་བརྒྱད་ཡིན་ལ། མངོན་བྱང་ལྔ་ལས་འཁོར་ལོ་བྱུང་བའོ། །མ་རྟོགས་པ་འཁོར་བའི་གཟུགས་སོགས་དང༌། ཁྲག་དང་ཁུ་བ་ལ་སོགས་པ་སེམས་ཅན་གྱི་ལུས་འབྱུང་བའོ། །དབང་བསྒྲུབ་པ་རྒྱུད་ལྟར་མན་ངག་གི་རྩ་དང་རླུང་དང་མེ་བསྒོམ་པ་དཀྱིལ་འཁོར་གྱི་སྟ་གོན་ནོ། །ཉམས་སུ་མྱོང་བའི་སྒྲུབ་པའོ། །རང་ལས་བྱུང་བའི་དཀྱིལ་འཁོར་དུ་བཅུག་པ་མཐོང་བའོ། །ལུས་རྒྱ་ནས་འབྱུང་བས་མི་གནོད་པ་བུམ་དབང་ཐོབ་ལུས་ཀྱི་ཉེས་པ་དག་པའོ། །སྤྱི་བོ་ནས་བབས་པས་གསང་དབང་ཐོབ་ངག་གི་ཉེས་པ་དག་པའོ། །ཡིད་མཉམ་པར་གཞག་པས་དབང་གསུམ་པ་ཐོབ་ཡིད་ཀྱི་ཉེས་པ་དག་པའོ། །ཐམས་ཅད་དེ་ལྟར་རྟོགས་པས་ལུས་ངག་གི་ཉེས་པ་ཞི་དབང་བཞི་ཐོབ་པའོ། །བཅུད་བསྒྲུབ་པ་ལ་ཕྱག་རྒྱ་བཞིའི་ཚུལ་དང༌།
དྲང་དོན་ངེས་དོན་དུ་བསྒྲུབ་པ་ལ་ཐེག་པ་ཆེ་ཆུང་གཉིས། ཆུང་བའི་སྐྱབས་དཀོན་མཆོག་གསུམ་ཞེས་བ་གོང་དུ་བསྟན་པའི་ཧེ་རུ་ཀ་ཕྱི་ནང་ཡོར་སྣང་བ་དེ་དང༌། རྒྱུད་འཁོར་ལོར་གྱུར་པས་སོ། །མཆོད་པ་དངོས་པོ་ཐམས་ཅད་ལྷར་ཤེས་པའོ། །དུས་ཤེས་པ་དེ་ཉིད་དོ། །ཡོན་ཏན་དེ་ལྟར་གནས་པས་སོ། །ཐམས་ཅད་ལྷ་གསལ་བས་དགེ་འདུན་དང་འགྲོགས། །ལྷ་ལ་ལྷས་སྲོག་མི་གཅོད་པ་བདག་ཉིད་ལྷ་ཡིན་ནས་ཕྱག་གང་ལ་འཚལ་ཏེ་མི་ཉམས་པའོ། །རྟེན་གཞན་སློབ་དཔོན་ཡི་དམ་ལྷ་སྤྱི་ཁྱད་པར་འཕགས་པ་དྲུག་འགྲོ་དྲུག་དང་བྱེ་བྲག་བདུན་ལས་བྱུང་བའོ། །སློབ་དཔོན་པས་ལྷག་པ་མེད། སྔགས་ལས་ལྷག་པའི་ཆོས་མེད། །རིགས་ལྔའི་སྔོམ་པ་ལས་ལྷག་པ་མེད་པས་འགྲུབ་པའོ། །སོ་སོ་ཐར་པའི་རིས་བདུན་དག་པའོ། །རྩ་བ་ཚད་མེད་པ་བཞི། རང་བཞིན་ཡེ་ཤེས་ཀྱི་ཚོགས། ཡན་ལག་རྣམ་པར་སྣང་མཛད་གཞལ་ཡས་ཁང་རྟེན་དང་བཅས་པ་ལྷ་གཙོ་ངོར་བརྟེན་པའོ། །རྩ་བ་བཞི་དང་ཡན་ལག་བཞི་སྟེ། བརྒྱད་གཞལ་ཡས་ཁང་དུར་ཁྲོད་བརྒྱད་དང་བཅས་པའོ། །སྲོག་མི་གཅོད་པ་དང༌། རྩ་བ་གསུམ་ས་བོན་ཕྱག་འཚལ་འཕྲོས་འདུས་གཅིག་ཏུ་གྱུར་པས་ཡོངས་སུ་རྫོགས་པའི་སྐུ་བཞེངས་པའོ། །ཆང་དང་ལྷ་བསྲུང་བ་མངོན་བྱང་ལྔ་ལས་གྲུབ་པའོ། །ཁྱིམ་པའི་རྟགས་སྤངས་པས་སངས་རྒྱས་ཀྱི་སྐུ་གསལ་བར་བསྒོམ་པ། རབ་ཏུ་བྱུང་བའི་རྟགས་རྡོ་རྗེ་པདྨ་བྱིན་གྱིས་བརླབས་པ། མུ་སྟེགས་ཀྱི་རྟགས་སྤངས་པ་ཡེ་ཤེས་ཀྱི་འཁོར་ལོ་གཞུག་པ། སངས་རྒྱས་པའི་རྟགས་བསྒྲུབས་པ་བདུད་རྩི་ཞལ་དུ་ཞུགས་པ། དགེ་བའི་རྟགས་སྤངས་པ་བསྒྲུབ་པ་དགེ་བའི་རྟགས་འཁོར་ལོ་ལྔར་གྱུར་པའོ། །རྩ་བ་བཞི་དང་ཡན་ལག་བདུན་སྔོན་དུ་ཚད་མེད་བཞི་བདུན་དག་པ་བསགས་པས་ལྷ་མོ་བཞི་འབྱུང་བའོ། །ཆང་གླུ་ཞེས་པ་གླུས་བསྐུལ་བའོ། །དགེ་སློང་གི་རྩ་བ་བཞི་བླངས་པའོ། །ལྷག་མ་བཅུ་གསུམ་གྱིས་ཡབ་ཡུམ་གྱི་སྐུ་རྫོགས་པར་བསྒོམ་པའོ། །མ་ངེས་པ་ལ་སོགས་པའི་སྔོམ་པ་དྲུག་ཡབ་ཀྱི་ཐུགས་ཀྱིས་བོན་དང༌། ཡུམ་གྱི་ཐུགས་ཀའི་བོན་གསལ་བ་དང༌། ས་བོན་དེ་སྤྲོ་བ་དང༌། རིགས་ཀྱི་ཐུགས་དམ་བསྐུལ་བ་དང༌། ལས་སྦྱང་བ་དང༌། གཉིས་མེད་དུ་སྤྱན་དྲང་བ་དང༌། ཡི་གེ་ལྔ་དང་འདྲེས་ནས་ཞུ་བ་དང༌། ཞལ་དུ་ཞུགས་པ་དང༌། རྩ་རྣམས་
ནས་བབས་པ་དང༌། བསྲུབས་པ་དང༌། གཞལ་ཡས་ཁང་བསྐྱེད་པ་དང༌། གཙོ་བོ་ལ་སོགས་པའི་གདན་བསྐྱེད་པ་དང༌། གཙོ་བོ་དང༌། འཁོར་བསྐྱེད་པ་དང༌། གཙོ་བོ་དང་རིགས་ལྔའི་ལས་བྱས་ནས་གཞག་པའོ། །རྩ་བ་ལྔ་ཞེས་པ་འཁོར་ལོ་རྫོགས་པར་བསྒོམས་པ་རྒྱུ་འབྲས་མངོན་བྱང་ལྔ་ལས་བསྐྱེད་པའོ། །རྩ་བའི་སྦྱོར་བ་དབང་མ་བསྐུར་བ། དངོས་མ་མཉན་པ། མཇུག་མ་བསྒོམས་པའོ། །དེ་གསུམ་ཀ་མེད་པ་ལས་ཉན་ཐོས་ཀྱི་སྔོམ་པ་མེད་ན་ཉམས་པ་ཆེན་པོའོ། །མ་མཉམ་པ་སྒོམ་ན་ཉམས་པ་སྦོམ་པོའོ། །དབང་མེད་པར་ཉམས་པ་ཆུང་དུའོ། །མ་མཉན་ན་ཉམས་པ་སྦོམ་པོའོ། །དབང་དང་བསྒོམ་པ་མེད་ན་ཕྲ་མོའོ། །གཅིག་ལས་མེད་ན་ལྟུང་བྱེད་དོ། །ཡན་ལག་བསོད་ནམས་ཀྱི་ཚོགས་དང་རྣལ་འབྱོར་བཞི་རྫོགས་རིམ་སྦྱོར་བ་དངོས་མཇུག་གོ །དེའི་ཉེས་པ་ཡང་གོང་བཞིན་ནོ། །རྩ་བའི་ཉེས་པ་དབང་སྔོམ་པ་དང༌། བསླབ་པ་གསུམ་ཆར་བླངས་ན་སྦོམ་པོ། །མཉན་ལ་བསྒོམས་ནས་ཆུང་དུ་བྱུང་བ་དབང་བསྐུར་བ་མ་ཉན། ཕྲ་མོ་དང་དབང་བསྐུར་ལ་བསྒོམ། ལྟུང་བྱེད་རེ་རེ་མེད་པར་བླང༌། །ཉེས་པ་ལ་སོགས་གང་སྤྱད་དེ་བསླང་པའོ། །དེ་ཡང་དབང་དང་སློབ་དཔོན་ལ་ཚོགས་དབུལ་བ་དང༌། མཎྜལ་གྱིས་བཤགས། །ཕྱིན་མི་བྱེད་པར་བསྡམས་པས་ཐུབ་པའོ། །ཆང་ཞེས་པ་བདུད་རྩི་མྱང་བ་དང༌། ག་བུར་མ་ཤོག་བའོ། །གཏང་སེམས་ཞེས་པ་སྔགས་གཞག་པའོ། །རྒས་ཞེས་པ་མ་ནུས་པའོ། །བསྙེན་གནས་ཞེས་པ་ཡེ་ཤེས་སེམས་དཔའ་གཞུག་པ་དང༌། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་དང༌། དབང་བདུད་རྩི་བཞི་དང། དགེ་བསྙེན་བཞི་དང༌། དགེ་ཚུལ་དང་དགེ་སློང་ཆོས་བསྟོད་བ་སྟེ། སྐབས་ཞེས་པ་ལོང་ཡོད་ན་ལེགས་པར་བཅོས། མེད་ན་བསྒོམ་བྱའོ། །བཅོས་ཐབས་ངེས་པར་བསྐྱེད་ཅེས་པ། དེ་ལྟར་ཤེས་པའི་སྔགས་པ་ལ་འདུལ་བའི་རྩ་བ་ཡན་ལག་རེ་རེ་མི་གནོད། ཐབས་དེས་སླར་གསོས་པས་ཐོབ་བོ།། སྔོན་ཡང་སངས་རྒྱས་ཀྱང་ཧེ་རུ་ཀ་དང༌། རྒྱུད་སྟོན་པར་འཁོར་ལ་སྣང་ལ། འཁོར་ཡང་སྔོམ་པ་གསུམ་དང་ལྡན་པའོ། །དེས་ཉམས་པ་བཅོས་སུ་བཏུབ་སྔགས་གཙོ་བོའོ། །དེས་ན་སྔགས་སྒྲུབ་པ་ལ་བློ་སྐྱེད་ཅིང་བརྩོན་པར་བྱའོ། །དུས་ངེས་ཞེས་སྔགས་ལས། ཨིནྡྲ་བྷཱུ་ཏི་དང༌། ཌོམྦི་ལ་སོགས་པ་
ལྟར་ཕྲད་མ་ཐོག་དང༌། རང་ཞིག་དང༌། ངེས་པ་མེད་པར་ཐོབ་ལ། མ་གྲུབ་བར་དུ་ངན་འགྲོར་མི་སྐྱེ་བས་ཇི་སྲིད་དོ། །ཡོན་ཏན་ཡང་ཡི་དགས་སྟོན་པའི་རྒྱུད་ནས། དམ་ཚིག་ཕྱག་རྒྱ་ལེགས་བསྒོམས་ན། །རྣལ་འབྱོར་བ་ཡིས་གཟུགས་གཉིས་འཐོབ། །ཅེས་པས་མིའི་ནང་ནས་བྲམ་ཟེར་སྐྱེ་ལ། ངོ་ཚ་ཤེས་པ་དང་ཁྲེལ་ཡོད་པས་སྡོམ་པ་གསུམ་ཡང་དེས་ཐུབ་ཅིང་སྐུ་བཞི་ཡང་དེ་ལས་བྱུང་བའོ། །ཡོན་ཏན་ཆེ་བ་ལ་སོགས་པ་དེ་ལྟར་གནས་པའོ། །ཐོབ་ནས་དབང་ཐོབ་མཉན་བསྒོམས་བསོད་ནམས་ཀྱི་ཚོགས་བསགས་རྣལ་འབྱོར་བཞི་རྫོགས་རིམ་ཞེས་བསྒོམས་པས་དེ་ཉིད་ནའོ། །དེ་ལྟར་ཡོན་ཏན་ཤེས་ན་གསུམ་ལ་སྐྱབས་སུ་འགྲོ་བ་དང༌། ལུས་ངག་ཡིད་ཀྱི་སྡིག་པ་བཤགས་ལ། ཆོས་འགྲོ་བའི་དོན་དུ་སྣ་ཚོགས་སྤྱོད་ཀྱང་རང་ཉིད་སྔགས་དོན་ཤེས་པས་གཞན་དུ་བྱེད་པའོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་ཉིད་ལ་རྟོག་པ་མེད་པར་གཞན་ལ་དོན་མཛད་པའོ། །གསོ་སྤྱོང་ཞེས་པ་གོང་ལྟར་སྦྱོར་བ་དངོས་མཇུག་ལ་དུས་ཐམས་ཅད་དམ་དུས་ཁྱད་པར་ཅན་རྒྱུད་ནས་དོན་བསྟན་པ་ལ་སྤྱོད་པའོ། །དུས་མཆོག་དང་ཐུན་མོང་ཞག་ཟླ་བ་ན་ཡང་འོང་བའོ། །ཆོས་ཞེས་པ་བདག་གིས་གོང་ལྟར་ཉེས་པས་འགྲོ་དོན་དུ་ལུས་ངག་ཡིད་ཀྱིས་དེ་རྣམས་སུ་ཧ་ཅང་ཆེས་ཏེ། འབྱོར་ནུས་ཡོད་ན་ལྷ་ཁང་ལ་སོགས་པ་བཞེངས་ཤིང་གོས་བ་དང༌། རྒྱུད་དང་མདོ་དང༌། འདུལ་བ་དང༌། མངོན་པ་དང༌། བསྟན་བཅོས་བྲི་པ་དང༌། མཆོད་པར་བྱའོ། །མ་འབྱོར་ན་ཡང་ཡིད་ཀྱིས་སྤྱོད་ལམ་བཞི་ལ་མི་དོག་པས་ཐུན་པ་ཞིར་ཉམས་སུ་བླང་བར་བྱའོ། །ཐེག་པ་ཆེན་པོའི་ཡང་སྐྱབས་པའི་ཡོན་ཏན་གོང་ལྟར་སངས་རྒྱས་སྤྲུལ་སྐུ་དེ་ཧེ་རུ་ཀའི་བཞུ་བཏུལ་སྤྲོ་བ་སྤུ་ཡོད་པ་ཡིན་ཞིང་ཆོས་ཀྱང་སེམས་ལས་ཤེས་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ལ། དགེ་འདུན་ཡང་རང་ལ་ཡོད་པས་འཁོར་ལོ། །དེ་ལྟར་ཤེས་པས་ཐམས་ཅད་རང་བཞིན་གྱིས་དོན་སངས་རྒྱས་ཀྱི་ལས་ཡིན་ན། སྤྱོར་དངོས་མཇུག་གོང་ལྟར་དང༌། དེ་ལྟར་ཡང་མཐར་ཐུག་དཔུང་བཟང་ངོ༌། །ཤེས་རབ་དང༌། ལས་དང༌། སྨོན་ལམ་དང༌། སྔོན་གྱི་སྐལ་བ་ལ་མ་རྨོངས་པས་དེ་ལྟར་སྤྱད་པ་ཤེས་པར་བྱའོ། །བློ་དེ་ལྟར་མེད་པ་ལ་སོགས་པས་རེ་རེ་འདྲ་བས་སྤྱད་དེ། ཕན་
སེམས་དད་དམ་ཚིག་ཐུབ་ན་བྱང་ཆུབ་ཀྱི་ཕྱོགས་དང་སྔགས་འགྲུབ་བོ། །ཕྱག་རྒྱ་བཞིའི་ཚུལ་དུ་དྲང་དོན་དང༌། ངེས་དོན་དུ་བསྒྲུབ་པ་ལ་ཡང་བཞི་སྟེ། དམ་ཚིག་གི་ཕྱག་རྒྱ་བསྒྲུབ་པའི་ཡོན་ཏན་དེ་ལྟར་ཤེས་པས་སྤྱད་དགོས་པ་དང༌། ཞེན་པ་རྣམས་སྙིང་རྗེ་བར་མཐོང་ཞིང་བྱ་བ་བཏང་བ་འབྱོར་བའི་ཚོགས་ཡིན་ལ། དགེ་བ་ཅི་བྱས་པ་བྱ་ཐམས་ཅད་སེམས་ཅན་གྱི་ཆེད་དུ་སངས་རྒྱས་སུ་བསྔོ་ཞིང༌། བདུན་དག་པ་ཡིད་ཀྱིས་བྱེད་པ་བསོད་ནམས་ཀྱི་ཚོགས་དང༌། བདག་དོན་ལ་མི་རེ་གཞན་ལ་མི་སྤྱོད་པ་ཉིད་ཚད་མེད་པ་བཞི་དང༌། ཐམས་ཅད་སེམས་སྟོང་པར་ཤེས་པ་ཡེ་ཤེས་ཀྱི་ཚོགས་དང༌། དེ་ལྟར་ཤེས་པས་གཞན་མེད་པས་བསྲུང་པ་དང༌། དེ་ལྟར་སེམས་གཙོ་བས་གཞལ་ཡས་ཁང༌། ཤེས་རབ་སྐྱེ་བས་རྒྱུའི་རྡོ་རྗེ་འཆང་ཡིན་པ་སེམས་སུ་དྲན་པས། སེམས་ལ་སྤྲོས་པ་ཡེ་ཤེས་སེམས་དཔའ་བསྟིམ་པའོ། །དེའི་དུས་དབང་པོ་ཡུལ་དུ་སྣང་བས་སྐྱེ་མཆེད་ཀྱི་ལྷ་དང༌། དེ་ཡང་བདག་གཞན་གཉིས་སུ་མེད་པར་བྱས་པས་སྐུ་གསུམ་དང༌། དེས་འགྲོ་དོན་ནུས་པས་དབང་དང༌། ཉམས་སུ་མྱོང་བས་བདུད་རྩི་མྱང་བ་དང༌། བཀག་པ་མེད་པས་མཆོད་པ་དང༌། ངོ་མཚར་ཆེ་བས་བསྟོད་པར་ཤེས་པའོ། །ཐམས་ཅད་གསང་བའི་རྒྱུད་ནས། དེ་ལས་བྱུང་པ་དེ་ཉིད་པ། །ཞེས་པས་དེ་ལ་ཞེས་པས་དམ་ཚིག་གི་ཕྱག་རྒྱ་བསྒོམ་པའོ། །དེ་ཡང་སྐུ་ལས་འབྱུང་ཞིང་རྟོག་པ་མེད་པ་མ་ཟད་པའོ། །བརྒྱུད་ནས་འགྲོ་དོན་སྣང་བས་དམ་ཚིག་ཡིན་ལ། ཟད་པ་མེད་པས་ཕྱག་རྒྱའོ། །ལས་ཀྱི་ཕྱག་རྒྱ་ཡང་དེ་ལྟར་དུ་ཤེས་པས་བདེ་བ་ལ་བདག་གཞན་གཉིས་ལས་འབྱུང་བས་རྩོལ་བའི་ལས་དང༌། བདེན་པའི་ཕྱག་རྒྱའོ། །ཐམས་ཅད་གསང་བའི་རྒྱུད་ནས། ལས་ནི་བདག་གཞན་བྱ་བ་སྟེ། །ཉམས་མེད་གནས་པ་རྒྱ་རུ་བཤད། །ཅེས་པའོ། །ཆོས་ཀྱི་ཕྱག་རྒྱ་ཡང་དེ་ལས་ཤེས་པས་ཐམས་ཅད་ཆོས་སུ་གྱུར་པ་རེ་དོགས་མེད་པས་མ་ཡེངས་པའོ། །རྒྱུད་ལས། ཆོས་ལས་སེམས་འབྱུང་འཁྲུལ་པ་ཚད་མཉམ་མམ་ལངས་ཀྱང་མི་གཡོ་བ། ཞེས་པས་སོ། །ཕྱག་རྒྱ་ཆེན་པོ་ཡང་དེ་ལྟར་གསུམ་པོ་ཤེས་པས་བདག་ལ་དུས་དང་རིས་མེད་པར་སྐུ་བཞི་འབྱུང་བའི་ཕྱག་རྒྱ་བཞི་ལ་གནས་པའོ། །རྒྱུད་ལས། ཕྱག་རྒྱ་ཆེན་པོ་མཆོག་ཆེན་པོ། །དུས་གསུམ་
མི་མཉམ་ཆོས་ཀྱི་སྐུ། །ཞེས་སོ། །དེ་ཤེས་པས་མི་ཕན་པས་བསྒོམ་པར་བྱའོ། །ཡི་དགས་སྟོན་པའི་རྒྱུད་ནས། སྐུ་བཞི་འདོད་པས་ཕྱག་རྒྱ་བཞི། །མ་བསྒྲུབས་ཐོབ་པ་མ་ཡིན་ཏེ། །རྒྱུ་རྐྱེན་མེད་པར་ས་བཅུས་ཀྱང༌། །རྒྱུ་མེད་བྱང་ཆུབ་སྤྲུལ་མི་ནུས། །ཞེས་པས་སོ། །ལས་ཀྱི་ཕྱག་རྒྱ་རྩ་དང་རླུང་དང་ངག་གིས་བསྒོམ་པའོ། །ཆོས་ཀྱི་སྐུ་མ་ཡེངས་པར་བསྒོམ་པའོ། །ཕྱག་རྒྱ་ཆེན་པོ་མི་འཛིན་པར་བསྒོམ་པའོ། །དེ་ཡང་སློབ་དཔོན་གཞན་དག་དཀྱིལ་འཁོར་འཁོར་ལོ་རྫོགས་ནས་ལྷ་བསྡུས་ནས་ནཱ་ད་དང༌། ཕྲ་མོ་ཐིག་ལེ་བསྒོམ་ཞིང་མི་རྟོག་པར་འདོད་ལ། རྗེས་ཐོབ་མེད་པར་ཕྱག་རྒྱ་ཆེན་པོར་འདོད་དེ། དེ་ཡང་མ་ཡིན་ཏེ། རིམ་གྱིས་འོག་མ་འགགས་ཏེ་དགོས་པ་མེད་པའི་སྐྱོན་ནི་ལ་ལ་མི་དགོས་བརྟན་བྱེད་དུ་འདོད་དེ། ཡང་མི་བདེན་ཏེ། གསུམ་ལ་སློབ་པ་བས་གཅིག་ཉེད་ལ་བརྟེན་ན་སྐྱེད་པར་ངེས་ཏེ། འདིར་དབང་བཞི་སྔོན་དུ་སོང་ནས་ལམ་ཕྱག་རྒྱ་བཞི་ཀ་དགོས་ལ་སྐད་ཅིག་ལ་བསྒོམས་ཏེ་འབྲས་བུ་ཡང་སྐུ་བཞི་འབྱུང་བས་བླ་མ་བརྒྱུད་པ་ཡང་དབང་བཞི་བསྐུར་ནས་ཤེས་པར་བྱ། བསྟན་པར་བྱ་སྟེ། དེ་ཉིད་ནས་བཞི་ཀ་དགོས་པར་དམ་ཚིག་ཕྱག་རྒྱ་གཅིག་བསྒོམས་ན། རྣལ་འབྱོར་བ་དེ་གཟུགས་གཉིས་འཐོབ། །ལས་ཀྱི་ཕྱག་རྒྱ་གཅིག་བསྒོམས་ན། །རྣལ་འབྱོར་པ་དེ་འདོད་ཁམས་སྐྱེ། །ཆོས་ཀྱི་ཕྱག་རྒྱ་གཅིག་བསྒོམས་ན། །རྣལ་འབྱོར་པ་དེ་གཟུགས་ཁམས་སྐྱེ། །ཕྱག་རྒྱ་ཆེན་པོ་གཅིག་བསྒོམས་ན། །རྣལ་འབྱོར་པ་དེ་གཟུགས་མེད་ཁམས། །དེ་བས་སྔགས་དང་ཕྱག་རྒྱ་བཞི། །ལམ་བཞི་སྐུ་བཞི་བཅུ་གཉིས་ཟངས། །ཞེས་པས་མན་ངག་ལས་ངེས་པར་འབྱུང་བར་བསྒོམ་མོ། །དེ་ལྟར་བསྒྲུབས་པའི་འབྲས་བུ་ལ་གཉིས་ཏེ། མཐར་ཕྱིན་ན་སྐུ་བཞི་འབྱུང་བ་ལ་ལམ་མ་ནོར་བ་བཞི་སྟེ། བུམ་པའི་དབང་ཐོབ། ལུས་ཀྱི་ཉེས་པ་དག །རིག་པའི་དབང་ཐོབ། ལྷ་ལྔར་གྱུར་པས་དམ་ཚིག་གི་ཕྱག་རྒྱ་བསྒོམ་དུ་རུང་སྟེ། དེ་ལྟར་སྐུར་ཤེས་ཤིང༌། བསྒོམས་པས་ཤ་ཐམས་ཅད་སྒྱུ་མར་སྣང་བས་མེ་ལོང་ལྟ་བུའི་ཡེ་ཤེས་རིག་སྟེ། སའི་ཁམས་དངོས་པོ་མེད་དེ། སངས་རྒྱས་སྤྱན་ལྟར་མཐོང་བས་སངས་རྒྱས་སྤྱན་གྱིས་སྒྲུབ་པའི་གྲོགས་དང༌། གྲུབ་ནས་སེམས་ཅན་གྱི་སྣང་བ་ལ་སའི་ཁམས་སངས་རྒྱས་སྤྱན་དུ་འབྱུང་བའོ། །སྒྱུ་མའི་སྣང་བས་
འགྲོ་དོན་མ་འགགས་པར་མཛད་ལ། གཟུགས་ཙམ་པོར་ཤེས་པས་གཟུགས་རྣམ་པར་སྣང་མཛད་ཀྱིས་སྒྲུབ་བའི་གྲོགས་བྱེད་ལ། གྲུབ་ནས་སེམས་ཅན་གྱི་སྣང་བ་ལ་གཟུགས་རྣམ་པར་སྣང་མཛད་དུ་བྱུང༌། ཁྲག་གིས་ལུས་ཁྱབ་ཅིང་སྡུད་ལ་རྣམ་པ་དེ་ཐམས་ཅད་ལ་སྟོང་པའི་རྒྱས་ཐེབས་པས་མཉམ་བ་ཉིད་ཀྱི་ཡེ་ཤེས་རིག་པ་སྟེ། ཆུའི་ཁམས་སྡུད་པས་མཱ་མ་ཀཱི་དང་ལྷ་ལྟར་ཟ་མཉམ་སྟེ། མཱ་མ་ཀཱིས་སྒྲུབ་པའི་གྲོགས་དང༌། གྲུབ་ནས་སེམས་ཅན་གྱི་སྣང་བ་ལ་ཆུའི་ཁམས་མཱ་མ་ཀཱིར་འབྱུང་ངོ༌། །སྐྱེ་མེད་དུ་མཉམ་པར་འགྲོ་དོན་རྟོག་མེད་དུ་བྱེད་པས་ཚོར་བ་ལ་ཁྱད་མེད་དགོས་པ་འབྱུང་བས་རིན་ཆེན་འབྱུང་ལྡན་དུ་གྲུབ་ལ་གྲུབ་ནས་སེམས་ཅན་གྱི་སྣང་བ་ལ་ཚོར་བ་རིན་ཆེན་འབྱུང་ལྡན་དུ་སྣང་བའོ། །མེས་དངོས་པོ་བསྲེག་ཅིང་རྣམ་པ་དེ་རྣམས་མ་འདྲེས་པར་ཤེས་པས་སོ་སོར་རྟོག་པའི་ཡེ་ཤེས་རིག་སྟེ། མེས་ཐམས་ཅད་གསལ་བས། གོས་དཀར་མོ་སྒྲུབ་པའི་གྲོགས་དང༌། གྲུབ་ནས་སེམས་ཅན་གྱི་སྣང་བ་ལ་གེས་དཀར་མོར་བྱུང་བའོ། །འདུ་ཤེས་ཚད་མེད་ཅིང་འགྲོ་དོན་མི་འཆད་པས་འདུ་ཤེས་སྣང་བ་མཐའ་ཡས་སུ་གྲུབ་ཅིང་གྲུབ་ནས་སེམས་ཅན་གྱི་སྣང་བ་ལ་འདུ་ཤེས་སྣང་བ་མཐའ་ཡས་སུ་བྱུང་བའོ། །རླུང་གི་གནས་སུ་སྐྱེལ་བ་དེ་ཐམས་ཅད་སྤྱད་པས་བྱ་བ་ནན་ཏན་གྱི་ཡེ་ཤེས་རིག་སྟེ། རླུང་གི་ཁམས་བསྐྱོད་པས་སྒྲོལ་མར་གྱུར་ཏེ། སྒྲུབ་པའི་གྲོགས་དང་གྲུབ་ནས་རླུང་གི་ཁམས་སྒྲོལ་མར་འབྱུང་བའོ། །འགྲོ་བ་ཡང་ཡེ་ཤེས་གོང་ནས་གོང་དུ་འདུས་བྱས་ཡོད་པས་དོན་ཡོད་གྲུབ་པའི་གྲོགས་སུ་འདུ་བྱེད་ཅིང་གྲུབ་ནས་འདུ་བྱེད་ཀྱི་ཕུང་པོ་དོན་ཡོད་གྲུབ་པར་འབྱུང་བའོ། །ནམ་མཁའི་ཁམས་རྒྱ་ཆད་པས་དངོས་པོར་སྣང་བ་ཐམས་ཅད་སྟོང་ཞིང་བདག་མེད་པས་ཆོས་ཀྱི་དབྱིངས་ཀྱི་ཡེ་ཤེས་རིག་སྟེ། ནམ་མཁའི་ཁམས་ཀྱིས་ཁྱབ་པ་རེག་བྱ་རྡོ་རྗེ་མར་གྱུར་ཏེ་སྒྲུབ་པའི་གྲོགས་ནམ་མཁའི་ཁམས་རེག་བྱ་རྡོ་རྗེས་བྱེད་ལ་གྲུབ་ནས་ནམ་མཁའི་ཁམས་རེག་བྱ་རྡོ་རྗེར་འབྱུང་བའོ། །ཐམས་ཅད་རང་གི་སེམས་ཡིན་ཞིང་སྟོང་པར་རིག་པས་འབྱུང་ལ་དེ་ལྟར་གསལ་བས་རྣམ་པར་ཤེས་པ་དེས་གྲོགས་བྱས་ནས་རྡོ་རྗེ་སེམས་དཔར་སྒྲུབ་ལ་གྲུབ་ནས་སེམས་ཅན་གྱི་སྣང་བ་ལ་རྣམ་པར་ཤེས་པའི་ཕུང་པོ་རྡོ་རྗེ་སེམས་དཔར་འབྱུང་བའོ། །དེ་ལྟར་ཤེས་ཙམ་ན་ཡུལ་ཐམས་ཅད་ལོངས་སྤྱད་དུ་བཏུབ་པས་མཆོད་པའི་ལྷ་
མོ་དང་ཡེ་ཤེས་སུ་འགྱུར་བས་མན་ངག་གིས་དེ་ལྷ་དང་བདེ་བ་དང་མི་རྟོག་པའི་ངང་སྟོང་པར་ཡུལ་རྣམས་སོང་བས་སྐྱེ་མཆེད་ལྷར་འགྱུར་པའོ། །དེ་ཡང་དངོས་པོ་གསལ་བ་མྱོང་བ་བདེ་བ་གཉིས་མེད་མི་རྟོག་པས་སྐུ་གསུང་ཐུགས་སུ་འགྱུར་པའོ། །བདག་ཏུ་གནས་པ་མི་བསྐྱོད་པ་དབང་དུ་གྱུར་པའོ། །ཉམས་སུ་མྱོང་བ་རྡོ་རྗེ་འཛིན་པ་སྣང་བ་མཐའ་ཡས་བདུད་རྩིར་གྱུར་པའོ། །དེ་བཞིན་ལོངས་སྤྱོད་ངོ་མཚར་བ་རིན་ཆེན་འབྱུང་ལྡན་དང་དོན་ཡོད་གྲུབ་པ་མཆོད་བསྟོད་དུ་གྱུར་པའོ། །དེ་ལྟར་གཅིག་ཉིད་རྣམ་ཤེས་ལྔ་ཕུང་པོ་ལྔ་རྒྱུ་ཁམས་ལྔ་དང་དེ་བཞིན་བརྒྱ་སྟོང་ཁྲི་འབུམ་དུ་གྲུབ་ནས་སེམས་ཅན་གྱི་སྣང་བ་ལ་བྱུང་པའོ། །དེ་ལྟར་ལུས་ཀྱི་ཉེས་པ་དག་རིག་པའི་ལྷ་མོས་བཀྲུས་ལྷ་ལྔར་གྱུར་པས་དམ་ཚིག་གི་ཕྱག་རྒྱ་མཐའ་ཕྱིན་པའོ། །གསང་དབང་ཐོབ་པས་ངག་གི་ཉེས་པ་དག་ལ་ཤེས་རབ་ཡེ་ཤེས་ཀྱི་དབང་ཐོབ་ལོངས་སྤྱོད་ལས་ཀྱི་ཕྱག་རྒྱ་བསྒོམ་དུ་རུང་སྟེ། སངས་རྒྱས་ཀྱི་ཡེ་ཤེས་བྱང་ཆུབ་སེམས་དཔས་གཏོར་མ་བྱིན་ཏེ་ལྕེ་ལ་གཞག་པས་ཨ་ཝ་དྷཱུ་ཏཱིར་ཕྱིན་འཁོར་ལོ་རྒྱས་ཏེ། སངས་རྒྱས་ཀྱིས་བྱིན་གྱིས་བརླབས་པས་ངག་གི་ཉེས་པ་དག་ལ། ཡེ་ཤེས་ཉམས་སུ་མྱོང་ཞིང་འདོད་ཡོན་སྤྱད་པས་ཡེ་ཤེས་ཐོབ་ལ། ལོངས་སྐུར་གྱུར་ནས་ལས་ཀྱི་ཕྱག་རྒྱ་མཐར་ཕྱིན་པའོ། །དེ་བཞིན་དུ་ཀླུ་སྒྲུབ་ནས་བརྒྱུད་པས། དེ་ལྟར་དག་ཐོབ་གྱུར་ནས་མཐར་ཕྱིན་པའོ། །གཞན་ནས་བརྒྱུད་པ་ཡང་དེ་བཞིན་ནོ། །ཤེས་རབ་ཡེ་ཤེས་ཀྱི་དབང་ཐོབ་ནས་ཡིད་ཀྱི་ཉེས་པ་དག །ཤེས་རབ་ཀྱི་དབང་གིས་མི་རྟོག་པར་གྱུར་ནས་ཆོས་ཀྱི་ཕྱག་རྒྱ་བསྒོམ་དུ་རུང་སྟེ། སེམས་ཉིད་ཤེས་པ་དེ་ལས་འབྱུང་ཞིང་སྨྲར་མེད་པས་གོང་མ་རྣམས་དེར་བསྡུ་འདུས་པས་མཐར་ཕྱིན་པའོ། །བཞི་པས་ལུས་དང༌། ངག་དང་ཡིད་ཀྱི་སྒྲིབ་པ་དག །ཚིག་གི་དབང་བརྗོད་དུ་མེད་པ་བརྡར་བསྒོམ་དུ་རུང་སྟེ། དེ་ལྟར་དེ་བཞིན་བཞི་པའོ། །ཞེས་གསུངས་པས་དེར་བཞིའོ། །རྒྱས་པར་མན་ངག་ལས་ཤེས་པར་བྱའོ། །སྣང་བའི་ཆོས་ཐམས་ཅད་ཀྱི་སྤྱིའི་མཚན་ཉིད་ཀྱང་དེ་ལྟར་ཤེས་པ་ཙམ་ན་ཕྱོགས་ཁ་དོག་རྟེན་དང༌། ཕྲ་རབ་ཏུ་སྣང་བ་གཟུགས་ལ་སོགས་ས་སོགས་མན་ངག་ལ་བརྟེན་པ་དང༌། འགྲོ་བ་རེ་རེ་ལ་ཡང་དེ་བཞིན་གནས་ཤིང་སྣང་བ་འབྱུང་བའོ། །དེ་བཞིན་དུ་བཞི་པ་དཀྱིལ་འཁོར་གྱི་ཆོ་ག་དང་
བསྟན་པ་དབང་བཅུ་བཞིར་ཤེས་པར་བྱའོ། །བསྲུང་བར་བྱ་བ་ལ་ཡང་རྩ་བ་དང་ཡན་ལག་སྟེ། གཤིན་རྗེའི་རྒྱུད་ནས་བསྟན་པའི་རྩ་བ་བཅུ་བཞི་བསྲུང་སྟེ། སློབ་དཔོན་དབང་བསྐུར་བ་དང༌། ཆོས་སྟོན་ཕ་གཉིས་དང༌། དབང་ལ་ལས་ཀྱི་དང༌། རྡོ་རྗེ་སློབ་དཔོན་དང༌། གསང་བ་ལ་སོགས་པ་ལྔའོ། །བསྲུང་བྱ་ཁྱོད་ཀྱི་ཆོས་དེ་མི་བྱེད་ཁྱེད་རང་ཁྱེར། དེ་ནས་ཁྱོད་ཀྱི་སློབ་མ་ང་མིན་ཞེས་པ་དང༌། བསྟན་པ་མི་ཉན་པར་སྡིག་ལས་བྱེད་པ་དང༌། འབྱོར་པ་ལ་གནོད་པ་དང༌། རྐུ་བ་དང༌། བཙུན་མོ་ལ་སྤྱོད་པ་དང༌། བརྙས་སེམས་དང༌། ཉེས་པ་བརྗོད་པ་དང༌། མང་པོའི་གསེབ་ཏུ་མི་མཛེས་པའོ། །བཀའ་ནི་སངས་རྒྱས་ཀྱིས་གསུངས་པ་སྟེ། བསྲུང་བ་བཀའ་ལྟར་མི་བྱེད་པ་དང༌། མ་མཉན་པར་རང་དགར་འཆད་པའོ། །རྡོ་རྗེ་སྤུན་ནི་དབང་དང་རྒྱུད་དང་མན་ངག་སློབ་དཔོན་གཅིག་པའམ། དུས་གཅིག་པའོ། །བསྲུང་བྱ་ཞེས་སྡང་གིས་ཉེས་པ་བརྗོད་ཅིང་ཉེས་པ་བསྒྲགས་ན་རུང་སེམས་སོ། །བྱང་ཆུབ་སེམས་ནི་གོང་ལྟར་སེམས་ཅན་ཐམས་ཅད་ལ་བསྐྱེད་པ་དང༌། ཀུན་རྫོབ་ལུས་ལ་བསྐྱེད་པའོ། །བསྲུང་བ་ནི་དེ་དག་དོན་དུ་སེམས་པ་དང༌། ཏིང་ངེ་འཛིན་ཉམས་པར་བྱེད་པའོ། །སེམས་ཅན་རྣམས་ཞེས་པ་འགྲོ་དྲུག །བྱམས་སེམས་སྤོང་ཞེས་པ་ཕན་མི་འདོགས་པ་དང༌། བདག་མེད་པ་དང༌། དགེ་བ་མི་བསྔོ་བ་དང༌། སེམས་ཅན་གྱི་སྡུག་བསྔལ་མ་ཤེས་པས་རང་འདོད་བྱེད་པའོ། །མ་སྨིན་ཞེས་པ་དབང་མ་ཐོབ་པ་དང༌། མི་གོ་བ་ལ་བསྲུང་བྱ་སྔགས་དང༌། གདམས་ངག་ཟབ་མོ་སྟོན་པའོ། །རང་ངམ་ཞེས་པ་སངས་རྒྱས་པ་དང༌། མུ་སྟེགས་དང་གཉིས། བསྲུང་བྱ་དང་པོ་མི་སྨད་པར་མཉན་རབ་ཏུ་ལམ་ཡིན་མིན་གྱིས་གྲུབ་མཐའ་བཅད་དེ། རབ་ཏུ་མི་གནས་པས་མི་སྨད་དོ། །ཐ་མ་ཕྱག་རྒྱ་བཞིར་རང་གི་སྣང་བ་མེད་པས་མི་སྨད་དོ། །སངས་རྒྱས་ཞེས་པས་གོང་ལྟར་སྒྲུབ་ཤེས་ཙམ་ནའོ། །བསྒྲུབ་བྱ་སངས་རྒྱས་སུ་མི་བསྒྲུབ་པ་དང༌། སྲོག་བཏང་བ་དང༌། སྡིག་པའི་ལས་ཀྱིས་ལུས་སྡུག་བསྔལ་བར་སྤྱོད་པའོ། །རང་བཞིན་དག་པ་ཞེས་པ་ཆོས་ཐམས་ཅད་རབ་ཏུ་མི་གནས་པ། བསྲུང་བྱ་རྟག་པའམ་ཆད་པའམ། ཕུང་པོ་གསུམ་པའམ། རྟེན་འབྲེལ་ལམ། རྣམ་པ་དང་བཅས་པའམ། རྣམ་མེད་དམ་སྒྱུ་མ་དོན་དམ་དུ་འདོད་པའོ། །
གདུག་ལ་ཞེས་པ་བསྟན་པ་དང༌། བླ་མ་ལ་སྡང་བ་དང༌། བདག་གྲོགས་པོ་ལ་བྱམས་ལྡན་ཞེས་པ། བསྲུང་བྱ་ཚར་མི་གཅོད་པ་ནི་བྱམས་པ་དང༌། ཤེས་པར་དགའ་ཞིང་ཁ་སྦྱང་གིས་གྲོགས་བྱེད་པའོ། །མིང་སོགས་ཞེས་པ་དང༌། བདུད་རྩི་སོགས། བསྲུང་བྱ་དེར་ཞེས་པ་མི་གཙང་བ་དང༌། དོན་ཡོད་པ་མི་ཤེས་པའོ། །དད་ལྡན་ཞེས་པ་ཕྱིར་མི་ལྡོག་པ་སེམས་སུ་ཞེས་པ་བསྲུང་བྱ་སྟེ། བློ་ཆོས་དང་མ་སྦྱར་བ་གོང་འོག་ལ་སུན་འབྱིན་པར་བྱེད་པ་དང༌། སྔགས་ལ་དད་པའི་རིགས་ངན་དང༌། བཙུན་པ་དང་བུད་མེད་མི་འཇུག་པའོ། །ཇི་བཞིན་རྙེད་ཅེས་པ་ནི་རྡོ་རྗེའི་རིགས་ལ་སོགས་པའོ། །མི་སྟེན་ཞེས་པ་བསྲུང་བྱ་འདོད་ངོ་བླ་གཞན་དབང་སྤྱོད་པ་དང་གྲོགས་སུ་གྱུར་པའོ། །བུད་མེད་ཅེས་ཐམས་ཅད་བསྲུང་བྱ་མི་ལུས་རྟེན་བཟང་བ་ལ་མ་བརྟེན་པ་དང༌། ཡེ་ཤེས་ཀྱི་རྟེན་ཡིན་པ་དང༌། སྤྲུལ་སྐུ་ལྷུ་མས་སུ་བལྟམས་པ་དང༌། མངོན་བྱང་ལྔ་ལས་བྱུང་བ་དང༌། ལོངས་སྐུ་དེ་ལས་བྱུང་བའི་ཡེ་ཤེས་ཀྱི་སྣང་བ་ཡིན་ལ། བདེ་ཆེན་གནས་པ་ཞེས་པ་ནི་སྨད་པ་ཙམ་མོ། །རྩ་བ་དང༌། ཡན་ལག་དང༌། བླ་མ་ལྔ་བཅུ་པ་ཡང་བལྟ་ཞིང་བསྲུང་ངོ༌། །ཉམས་ན་སྐྱོན་ཏེ། རྩ་བ་ཉམས་ན་དབང་བསྐུར་བ་དང། ཚོགས་འཁོར་བྱ་ཞིང་དེ་ཉིད་བསླང༌། །ཡན་ལག་ཉམས་ན་བཤགས་པ་དང༌། །མཎྜལ་འབྱོར་པས་བླ་མ་དང༌། །ཡི་དམ་མཆོད་ཅིང་དེ་ཉིད་བསྲུང༌། །རྩ་བར་ཤེས་དང་བསྒོམ་དང་བསྲུང༌། །སྤྱད་པར་བྱ་བ་བཞི་བོ་འདི། །མ་ཡེངས་གུས་པར་བྱ་བ་དང༌། །གཞན་དོན་གཏང་བར་མི་བྱའོ། །སྤྱད་པར་བྱ་བ་ལ་གོང་མ་ལྟར་ཤེས་པས། སྣོད་དང༌། གནས་དང༌། རྒྱལ་པོ་དང༌། དུས་དང་ལྡན་ཞིང་བླ་མ་ལ་མི་གནོད་པ་དང༌། བསྟན་པ་ལ་མི་གནོད་པ་དང༌། རང་ལ་མི་གནོད་པས་ཞི་སོགས་དང༌། དབང་དང་ཆོས་དང༌། གཏོར་མ་དང༌། སྦྱིན་སྲེག་དག་བདག་གི་ཚེ་འདི་དང༌། ཕྱི་མའི་དོན་མིན་པར་གཞན་སྒྲོལ་བའི་བསམ་པས་སྦྱིན་པ་དང༌། སྤྱོད་པ་དང༌། འགྲོ་བ་འདུལ་བས་འདུལ་བ་དང༌། །འགྲོ་བ་སྦྱོར་བས་བྱང་ཆུབ་སེམས། །རིགས་ལ་སྦྱོར་བས་དམ་ཚིག་ནི། །མ་ཡེངས་སྤྱོད་ལམ་བཞིས་སྤྱད་བྱའོ། །བདག་བློ་རྨོངས་པས་གུས་པ་ཡིས། །ཡུན་རིངས་མགོན་པོ་བསྙེན་པ་ལས། །བརྒྱུད་པའི་རྒྱུད་དོན་ཉམས་མྱོང་ནས། །བྱམས་པའི་སེམས་ཀྱིས་ནན་ཏན་
བྱས། །ཡི་གེས་གསོལ་བཏབ་དཔལ་མོ་ཡིས། །དེ་ཉིད་མཐོང་བའི་ལམ་འདི་བྱས། །འདི་ལས་བསོད་ནམས་ཅི་ཐོབ་དེས་།འགྲོ་བས་སྐུ་བཞི་མྱུར་ཐོབ་ཤོག །དེ་ཉིད་མཐོང་བའི་ལམ་དཔལ་ཡེ་ཤེས་རྡོ་རྗེས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཔལ་དེ་ཉིད་དང༌། ལོ་ཙཱ་བ་རྡོག་བུདྡྷ་པཱ་ལས་བསྒྱུར་ཏེ་གཏན་ལ་ཕབ་པའོ།། །།དཔལ་ཤིང་ཀུན་དུ་ཚོགས་འཁོར་སར་གསོལ་བ་བཏབ་ནས་ལྷ་ཁང་བི་ཧ་རར་བསྒྱུར་བའོ།།