དཔལ་ཚོགས་ཀྱི་བདག་པོ་འཇུར་གེགས་སེལ་བ་ཞེས་བྱ་བའི་སྒྲུབ་ཐབས་ཞེས་བྱ་བ།
ཨིནྡྲབྷཱུཏི།
རྒྱ་གར་སྐད་དུ། ཤྲཱི་ཨཛྙཱ་བི་ནི་བ་ཏྲ་ག་ཎ་བ་ཏི་སཱ་དྷ་ནཾ་ནཱ་མ། བོད་སྐད་དུ། དཔལ་ཚོགས་ཀྱི་བདག་པོ་འཇུར་གེགས་སེལ་བ་ཞེས་བྱ་བའི་སྒྲུབ་ཐབས་ཞེས་བྱ་བ། འཕགས་པ་ཐུགས་རྗེ་ཆེན་པོ་ལ་ཕྱག་འཚལ་ལོ། །སེམས་ཅན་ཀུན་ལ་སྙོམས་པའི་ཐུགས་རྗེ་ཡིས། །རྟག་ཏུ་འཛིན་བྱེད་དེ་ཡི་སྤྲུལ་པ་ནི། །ཚོགས་གྱི་བདག་ལ་གུས་པས་ཕྱག་འཚལ་ཏེ། །གསང་བའི་སྒྲུབ་ཐབས་བདག་གིས་བཤད་པར་བྱ། །དང་པོ་ཚོགས་བདག་རྟེན་བཞེངས་པ། །རྟ་ཡི་ཁྲུའམ་རས་བཟངས་ལ། །འཕགས་པ་སྐུ་མདོག་གངས་ལྟར་དཀར། །ཞལ་གསུམ་ཕྱག་དྲུག་ཞབས་བཞི་པ། །གླང་ཆེན་བྱི་ལ་སྤྲེའུ་ཡི་ཞལ། །ཕྱག་གཡས་ལ་བུག་རིན་ཆེན་དང༌། །རལ་གྲི་གཡོན་པས་ལ་དུ་དང༌། །ཆང་གི་ཐོད་པ་དགྲ་སྟའོ། །ཞབས་གཡས་བརྐྱང་བ་གཡོན་པ་བསྐུམ། །གཉིས་ཀྱིས་སྐྱིལ་ཀྲུང་ལེགས་པར་བཞུགས། །འོག་ཏུ་ལྷ་མོ་དཀར་མོ་ནི། །སྤྲེའུ་ཡི་ཞལ་དུ་འཕགས་པ་ཡི། །གསང་བ་ཕྱེད་ཙམ་ནུབ་པར་བྱ། །ཞབས་རྟེན་པ་ཡི་ལྷ་མོ་གཉིས། །ཡུམ་གྱི་ཁ་ནས་རིན་ཆེན་འབབ། །བུམ་པ་ཟེད་ཅིང་སྒྲུབ་པ་པོའི། །དབུལ་བ་སེལ་ཞིང་རེ་བ་བསྐོང༌། །སྐར་ཆེན་དག་ལ་བྲི་བར་བྱ། །དེ་ཡི་ལོགས་བཞིར་གི་ཝང་གིས། །ཏདྱ་ཐཱ། ན་མཿསྟུ་ཏེ་ག་ཎ་བ་ཏི། ཀཊྚ་ཀཊྚ། མཊྚ་མཊྚ། རཊྚ་རཊྚ། ད་ཧ་ད་ཧ། གྲྀཧྞ་གྲྀཧྞ། པཉྫ་པཉྫ། ན་མཿསྟུ་སྟེ། ག་ཎ་པ་ཏི་རུ་རུ་ཙ་ན་ཡ་སྭཱ་ཧཱ། ཨོཾ་ཨ་བྷུ་ཏྲ་བི་ན་བུ་ཁ་མྙྩ་དྷ་ར་བྷྲ་མ་ག་ཙྪ་ཏི། ཧ་ཧ་ཡ། མ་ཧཱུ་ཏ་ཏི་ཀྵི་ཏ་ནན་པྲ་ཡེ་བ་ཡེ་མི། ཀུ་རུ་ཀུ་རུ། ཙུ་རུ་ཙུ་རུ། མུ་རུ་མུ་རུ། ན་མོ་ན་མ་སྭཱ་ཧཱ། ཚར་རེ་མིང་དང་སྤེལ་བ་བྲ། །དེ་རྒྱབ་གཟུངས་རིང་བྲི་བར་བྱ། །རབ་ཏུ་གནས་པ་དེ་ཡི་མདུན། །མཎྜལ་དཀར་པོ་འདབ་བརྒྱད་ལ། །ཙནྡན་ཆུ་ཡིས་བྱུགས་པའི་སྟེང༌། །མེ་ཏོག་དཀར་པོ་སིལ་མར་བཀྲམ། །ཆང་དང་ལ་ཕུག་ལ་དུ་དང༌། །འབྲས་ཆན་ཁུར་བ་ལ་སོགས་པས། །འཕགས་པ་མཆོད་ལ་བདག་ཉིད་ནི། །ཡིད་མ་བྱས་ལ་སྔགས་འདི་བཟླས། །ཨོཾ་གཾ་
ག་ཎ་པ་ཏི་མ་མ་རཏྣ་སིདྡྷི་ག་ག་ག་ག་ག་ག་ག་ག་ག་ཎ་པ་ཏི་སྭཱ་ཧཱ། ཞེས་པ་གྲངས་ཀྱི་རྟགས་དང་སྦྱར། །ཟླ་བ་གཅིག་གིས་ངེས་པར་འགྲུབ། །དེ་ནས་སྐུ་གཟུགས་མཆོད་བྱས་ལ། །དུར་དུ་དྲིལ་ལ་མི་ཡི་རྐང༌། །དབུས་སུ་བཅུག་ལ་ཐོ་རངས་ཁར། །ལགས་པས་བཙུགས་ཏེ་གཏོར་མ་སྦྱིན། །ཨོཾ་གཾ་ག་ཎ་པ་ཏི་རཏྣ་སིདྡྷི་ག་ག་ག་ག་ག་ག་ག་ག་ག་ཎ་པ་ཏི་སྭཱ་ཧཱ། ཨོཾ་གཾ་ག་ཎ་པ་ཏི་བ་ལིཾ་ཏ་ཁཱ་ཧི་ཁཱ་ཧི། བདུན་གྱིས་སྔགས་ལ་དབུལ་བར་བྱ། །དེ་ནས་བསྟོད་ལ་སྔགས་འདི་བྱ། །ཨོཾ་ག་ཎ་པ་ཏི་རཏྣ་རཏྣ་སིདྡྷི་མཱ་མ་རོདྡྷ་རོདྡྷ་ག་ཎ་པ་ཏི་ག་ག་ག་ག་ག་ག་ག་ག་ག་ཀ་ཊ་ཀ་ཊ་སྭཱ་ཧཱ། ག་ཎ་པ་ཏི་པདྨ་ན་བུཥྚི་ཀུ་རུ་མ་ཊ་མ་ཊ་སྭཱ་ཧཱ། ག་ཎ་པ་ཏི་སིདྡྷི་ཝ་ཤཾ་ཀུ་རུ་ར་ཊར་ཊ་སྭཱ་ཧཱ། ག་ཎ་པ་ཏི་རཏྣ་བཽ་ཥཊ་གྲྀཧྞ་གྲྀཧྞ་སྭཱ་ཧཱ། བརྒྱ་རྩ་བརྒྱད་དུ་བཟླས་པ་ཡིས། །ཡིད་ལ་རེ་བ་རྫོགས་པར་འགྱུར། །འཁོར་ལོས་སྒྱུར་རྒྱལ་ཉིད་ཐོབ་ནས། །འབད་པ་མེད་པར་ནོར་རྙེད་འགྱུར། །སྤོགས་མི་དགོས་པར་འགྲུབ་འགྱུར་ཏེ། །དེའི་ཕྱིར་གཏོར་མ་འབད་པར་བྱ། །འཕགས་པ་འཇུར་གེགས་ཀུན་སེལ་བའི། །སྒྲུབ་ཐབས་འདི་བརྩམས་དགེ་བ་དེས། །འཇིག་རྟེན་ནོར་ལ་དབང་བྱེད་ཅིང༌། །བླ་མེད་འབྲས་བུ་ཐོབ་པར་ཤོག །འཕགས་པ་ཚོགས་ཀྱི་བདག་པོའི་སྒྲུབ་ཐབས་འཇུར་གེགས་སེལ་བ་ཞེས་བྱ་བ་སློབ་དཔོན་ཆེན་པོ་ཨིནྡྲ་བྷཱུ་ཏི་ས་མཛད་པ་རྫོགས་སོ།། །།པཎྜི་ཏ་ཆེན་པོ་དཱི་པཾ་ཀ་ར་ཤྲཱི་ཛྙཱ་ན་དང་ལོ་ཙཱ་བ་རྒྱ་བརྩོན་འགྲུས་སེང་གེས་ཡམ་བུ་ཀརྟ་རིར་ལེགས་པར་བསྒྱུར་བའོ།།