སྤྱིའི་དམ་ཚིག་མདོར་བསྡུས་པ།
སྒེག་པའི་རྡོ་རྗེ།
སྤྱིའི་དམ་ཚིག་མདོར་བསྡུས་པ་བཞུགས་སོ། རྡོ་རྗེ་འཛིན་ལ་ཕྱག་འཚལ་ཏེ། །དེ་ལྟར་སྟོན་པ་མཆོད་བྱས་ནས། །ལམ་གྱི་རྣལ་འབྱོར་རྣམས་དོན་ཕྱིར། །རྒྱུད་གསུམ་ངེས་པར་གསལ་བྱེད་པའི། །དམ་ཚིག་ཆེན་པོ་མདོར་བཤད་བྱ། །ལམ་གྱི་རྒྱུད་ལ་ཞུགས་རྣམས་ཀྱིས། །བསླབ་པ་གསུམ་ལ་གནས་བྱས་ནས། །དོན་གཉིས་མངོན་དུ་བྱེད་པ་ཡང༌། །ནང་རིགས་ལ་ལ་མུན་སྣང་བཞིན། །གཅིག་གིས་འཐད་པ་མ་ཡིན་ལ། །ལ་ལ་ཆ་མཐུན་སྤྱོད་པའི་རིགས། །གདུལ་བྱ་སྐས་ཀྱི་རིམ་སྤྱོད་པ། །སངས་རྒྱས་མཛད་པ་དེ་གསུངས་སོ། །གཉེར་འདི་ལུང་གིས་ལུས་གཞག་པ། །ངོ་བོ་རྣམ་གྲངས་བསྲུང་ཐབས་དང༌། །ཉམས་རྒྱུ་སྔ་རྟགས་སྐྱོན་ཡོན་གཉིས། །སྐོང་ཐབས་དཔེ་དང་མདོ་བཅུར་བཤད། །ངོ་བོ་རྩ་བ་བཞི་དང་ནི། །ཐུན་མིན་ཐུན་མོང་ཡན་ལག་གཉིས། །རྩ་བ་ཆེན་པོ་མདོར་འབྲེལ་པའོ། །དམ་ཚིག་རྣམ་པའི་གྲངས་དག་ནི། །སེམས་ཅན་གྲངས་དང་ལོག་རྟོག་གྲངས། །སངས་རྒྱས་ཉིད་ཀྱིས་མི་མཁྱེན་ཕྱིར། །རྟོག་འདུལ་གཉེན་པོ་དམ་ཚིག་གྲངས། །རྒྱལ་བ་ཉིད་ཀྱིས་བརྗོད་ལས་འདས། །འོན་ཀྱང་རྨོངས་པའི་མདོ་བཟུང་ན། །བྱང་ཆུབ་སེམས་གཉིས་སློབ་དཔོན་དྲུག །མཆེད་བཞི་སྔགས་གསུམ་ཕྱག་རྒྱ་བཞི། །གསང་བཅུ་རྩ་བར་ཤེས་པར་བྱ། །སྤྱད་པ་ལྔ་དང་མི་སྤང་ལྡ། །དང་དུ་བླང་དང་སྒྲུབ་དེ་བཞིན། །ཤེས་བྱ་ལྔ་རྣམས་ཐུན་མོང་བཤད། །ཉིད་ལག་སྐབས་སུ་ཤེས་པར་བྱ། །ཐུན་མོང་དམ་ཚིག་མཐའ་ཡས་པ། །མདོར་བསྡུས་བདག་གཞན་དོན་གཉིས་པོ། །རྣམ་གྲངས་སྐབས་སུ་ཤེས་བར་བྱའོ། །བསྲུང་བའི་ཐབས་ནི་འདི་ལྟ་སྟེ། །རང་ལུས་རྒྱལ་བའི་ཕྱག་རྒྱ་ཆེར། །སེམས་ཅན་ཁམས་ཀྱང་དེར་ཤེས་ཤིང༌། །སྣང་སྟོང་གཉིས་མེད་ཡེ་ཤེས་སྐུ། །བྱས་མཐོང་ཟོས་པ་ཐམས་
ཅད་ལ། །སེམས་ཕྱིར་གང་ཡང་བྱས་སྣང་མེད། །དྲན་པ་ཤེས་བཞིན་སྔོན་བཏང་ལ། །དུས་གསུམ་རྒྱུན་དུ་མ་དྲན་ན། །ཐེག་ཆེན་སྔགས་པར་ཅི་སྟེ་ཚུད། །ལྟ་སྤྱོད་དམ་ཚིག་འབྲེལ་པ་ཡི། །སྤྱི་དང་འདྲེན་དང་དམ་ཚིག་དབང༌། །ཉམས་ཆགས་སྐོང་དང་ཤེས་རྒྱུད་འགྲོལ། །མན་ངག་ལུང་གི་སློབ་དཔོན་རྣམས། །ལུས་ལ་དབང་བའི་རྒྱལ་པོ་དང༌། །ཁོ་བོ་མ་དང་པ་དང་མིག །སྙིང་བས་ལྷག་པའི་ཚུལ་བལྟས་ཏེ། །སྒོ་གསུམ་ཟོལ་སྒྱུ་མེད་པ་ཡིས། །ཡི་དམ་ལྷ་ལྟར་རྒྱུན་དུ་བསམ། །བསྲུང་རིམ་འཆད་པ་བཞིན་ཤེས་བྱ། །མཐའ་ཡས་སེམས་ཅན་རང་རིག་ཕྱིར། །གང་ཡང་བདག་ལས་གཞན་མེད་དང༌། །བདེ་གཤེགས་སྙིང་པོས་སྤུན་ཡིན་ཕྱིར། །མ་འོངས་སངས་རྒྱས་རང་བཞིན་ནོ། །སྤྱི་ཡི་མཆེད་དེ་ཕ་ཚན་བཞིན། །སངས་རྒྱས་ཆོས་བཞུགས་རིང་བ་དང༌། །ལྟ་སྤྱོད་མཐུན་པ་ཉེ་བར་བཤད། །ཕ་གཅིག་དམ་ཚིག་གང་འདྲེས་པའི། །ནང་ཚན་ཕ་སྤུན་སྤུན་བས་ཀྱང༌། །ལྷག་པར་བལྟས་ཏེ་བསྲུང་བ་ནི། །ལུས་ཀྱི་ཟས་ནོར་མཉེས་བྱ་བ། །སྦུར་མ་ལྟ་བུར་ཕོངས་པ་མེད། །གདན་གདིང་ཁུར་སོགས་ལས་བྱ་བ། །བྲན་བཞིན་ངེས་བར་དང་དུ་བླང༌། །བླ་མའི་རིགས་འཁོར་དེ་བཞིན་ནོ། །ནོར་རྫས་བླངས་བའི་རྣམ་སྨིན་ཕྱིར། །ཏིལ་འབྲུ་ཙམ་ཡང་མ་འབག་ཅིག །མལ་གོས་ཕྱགས་སོགས་བགོམ་མི་བྱ། །མཆོད་རྟེན་བཤིག་དང་འདྲ་བར་གསུངས། །བརྡེག་གསོད་རྐུ་འཕྲོག་བསྡོ་བ་ནི། །དངོས་སུ་བྱ་བ་ཅི་སྨོས་ཀྱི། །རྩེད་མོའི་ལས་སུའང་བྱ་བ་མིན། །དག་གིས་སྐྱོན་སྤངས་ཡོན་ཏན་བསྒྲགས། །ཚུལ་བརྗོད་པས་ནི་ཉམས་པར་འགྱུར། །སྒྲོ་སྐུར་ལ་སོགས་མཚན་ཉིད་ཅན། །བྲེ་མོ་གཏམ་ཡང་ཟུར་མི་བྱ། །ཡིད་ཀྱིས་གཡོ་སྒྱུ་ཕྲག་དོག་དག །ངན་སེམས་འཕྱ་སེམས་ནོར་ལ་བརྐམ། །སེ་གོལ་ཡུལ་དུའང་བྱ་བ་མིན། །ཤིན་ཏུའང་བརྩེ་ཞིང་གདུང་བར་བྱ། །སྤྱོད་ལམ་ཅིས་ཀྱང་མཉེས་བྱེད་ཅིང༌། །བཀའ་ཡི་ཟུར་ཡང་མི་གཅོད་པ། །དེ་ནི་ལྡོག་པར་མ་གསུངས་སོ། །རྩ་བ་བསྐྱེད་དང་ལས་སྔགས་ཀྱིས། །དམ་ཚིག་ལས་དང་ཆོས་དང་ནི། །སྐུ་གཉིས་ཕྱག་རྒྱ་ཆེན་པོ་བཞི། །རང་གི་སྒོ་གསུམ་ཡི་དམ་གྱི། །སྐུ་གསུང་
ཐུགས་སུ་མངོན་སྦྱར་ལ། །རྟག་ཏུ་བཟླས་པ་བྱེད་པ་ནི། །བྱང་ཆུབ་གཟུང་ལ་ཞུགས་པ་ཡིན། །རབ་ཀྱིས་ཆུ་བོའི་རྒྱུན་བཞིན་ནམ། །ཉིན་གསུམ་མཚན་གསུམ་གཉིས་གཅིག་ཏུ། །མ་ཡེངས་པར་ནི་གང་གིས་བཟླས། །འབྲིང་གིས་ཟླ་གཅིག་དུས་དྲུག་ཏུ། །དུས་བཞི་བར་དུ་མི་བཅད་ཅིང༌། །ཐ་མ་སྤྱད་པའི་རྣལ་འབྱོར་པས། །ཟླ་རེའམ་ར་བའི་དུས་དག་ཏུ། །བརྩོན་པས་འབད་དེ་མི་བྱེད་པ། །བྱང་ཆུབ་ས་བོན་རླག་པ་ཡིན། །ཚོགས་དང་གཏོར་མ་དེ་བཞིན་ཏེ། །ཐ་ན་ལོ་ཟླ་མི་བཟླའོ། །ལྟ་ཟབ་སྤྱོད་པ་བརླང་པོ་དང༌། །ལྷ་ཡི་གཟུགས་དང་གྲུབ་རྟགས་དང༌། །སྤྱིར་གསང་རྣམ་པ་བཞིར་བཤད་དོ། །སྒྲུབ་པའི་གནས་དུས་གྲོགས་དང་རྫས། །རབ་ཏུ་གསང་ལ་བསྒྲུབ་པར་བྱའོ། །གསང་བར་འོས་པ་མདོར་བསྡུ་ན། །ཕུད་དང་གཏོར་མ་ཚོགས་དག་དང༌། །བྷནྡྷ་ཕུར་པ་མར་མེའི་སྣོད། །རྫས་དང་ལ་ག་ཆ་དཀྱིལ་འཁོར་དང༌། །སྐྱེ་བོས་མཐོང་བར་ཡོངས་མི་བྱ། །དྲིལ་བུ་རྡེའུ་ཆུང་ལ་སོགས་སྒྲ། །སྐྱེ་བོས་ཐོས་པར་ཡོངས་མི་བརྡུང༌། །གྲོགས་པོའི་སྤྱོད་དང་མཚང་རྣམས་དང༌། །སེམས་ཅན་ཀུན་གྱི་ར་ན་སྤྱོད་རྣམས། །ཤིན་ཏུ་གསང་ན་བྱང་ཆུབ་རྒྱུ། །གཉེར་གཏད་པ་ཡི་གདམས་པ་སྟེ། །སྔར་བཤད་སློབ་དཔོན་ཆེད་ཀྱིས་སོ། །གསང་སྔགས་སྐྱོན་ཡོད་མ་ཡིན་ཏེ། །སེམས་ཅན་དོན་ཕྱིར་ཤིན་ཏུ་གསང༌། །གསང་ཐུབ་དངོས་གྲུབ་མི་ཡལ་བས། །གསང་ཕྱིར་གདམས་དག་སྣ་ཚོགས་གསུངས། །དམ་ཉམས་དམ་ལས་ལོག་པ་དང༌། །དམ་མེད་དཀྱིལ་འཁོར་མ་མཐོང་ཞིང༌། །འདྲེས་དང་མ་འདྲེས་ཐམས་ཅད་ལ། །སེམས་ཀྱིས་བསྟན་པར་མི་བྱ་ཞིང༌། །ལུས་ཀྱིས་ཐམས་ཅད་སྦས་ལ་གཞག །དག་གིས་རྡོ་རྗེ་ལྕེ་ཡོད་ཀྱང༌། །བརྗོད་པ་དག་ཏུ་བྱ་བ་མེད། །དེ་དག་རྩ་བ་བཞིར་བཤད་དོ། །ཐུན་མོང་ཡན་ལག་བཤད་བྱ་བ། །སྒྲོལ་སྦྱོར་མ་བྱིན་ལེན་པ་དང༌། །བརྫུན་སྨྲ་ངག་རྩུབ་སྤྱོད་པ་ལྔ། །རང་བཞིན་གྱིས་ནི་སྦྱོར་སྒྲོལ་དང༌། །དབང་པོའི་ཡུལ་དུ་སྦྱོར་སྒྲོལ་དང༌། །ཏིང་ངེ་འཛིན་གྱི་སྦྱོར་སྒྲོལ་དང༌། །ཐབས་ཆེན་པོ་ཡི་སྦྱོར་སྒྲོལ་དང༌། །སྔོན་དུ་བྱ་བའི་སྦྱོར་སྒྲོལ་ལྔའོ། །གཉིས་ནི་ཤེས་བྱའི་ཐུན་མོང་
བཤད། །ཏིང་འཛིན་བསླབ་པ་ཐུན་མོང་གསུམ། །དངོས་ཕྱུང་དམ་ཚིག་ཆེན་པོ་ལ། །བྱེད་པའི་ཚིག་ལྔར་ཤེས་པར་བྱ། །ལྟ་སྤྱོད་ཏིང་འཛིན་འབྲེལ་གོམས་པས། །དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་ལོག་དང་འཁུས་པ་དང༌། །འདུས་པར་འོངས་དང་ཡོངས་ལ་གནོད། །དམ་སྲི་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་ནི། །རྣལ་འབྱོར་ཀུན་གྱིས་དང་དུ་བླང༌། །གྲངས་ནི་རྩ་བ་བཅུ་བཞིའོ། །ཏིང་འཛིན་སྔགས་དང་ཕྱག་རྒྱ་རྣམས། །ཤིན་ཏུ་གོམས་པས་དབང་བསྒྱུར་ཏེ། །བྱང་ཆུབ་ཞིང་དུ་དགོད་པར་བྱ། །ཏིང་འཛིན་སྔགས་རྒྱས་བག་ཆགས་སྦྱང༌། །རྣམ་ཤེས་ལྷར་བསྐྱེད་དབང་བསྐུར་འཕང༌། །ཡེ་ཤེས་ཚོགས་ཀྱང་རྫོགས་པར་འགྱུར། །ཕུང་པོ་བྱིན་བརླབས་མཆོད་པ་བསྔོ། །བསོད་ནམས་མཆོག་ཏུ་འདི་འགྱུར་རོ། །དེ་ལྟར་བསྒྲལ་བའི་དགོས་ཆེད་ཀྱང༌། །བྱང་ཆུབ་སྤྱོད་འཕེལ་སེམས་ཅན་བདེ། །ལྷ་མཉེས་བདག་གི་དམ་སྐོང་ཞིང༌། །ལས་ངན་བར་ཆད་སྡུག་ཡུན་ཐུང༌། །རང་གིས་བསགས་མེད་ངན་སོང་ལ། །བདེ་ལམ་འདི་ལས་གཞན་མེད་དོ། །ཐབས་ཀྱི་སྤྱོད་པས་འཆིང་འགྱུར་ན། །བྱང་ཆུབ་སེམས་དཔའ་འདུལ་དབང་གིས། །རྔོན་དང་སྨད་འཚོང་སྟོན་པ་ལྟུང༌། །ཁེ་དང་སྤྱོད་པ་དེ་མིན་ཕྱིར། །ཐབས་ཆེན་ལམ་ལ་གནས་པའི་ཕྱིར། །སྐྱེ་བོ་ཀུན་གྱིས་བྱ་བར་འབྱུང༌། །ག་ཎའི་དམ་ཚིག་ཆེན་པོ་ནི། །ལོག་པར་ཆགས་ཡིད་གཡོ་སྤངས་པའི། །དོན་གཉིས་མངོན་དུ་འདོད་པའི་མིས། །པད་ཅན་དུང་ཅན་རི་མོ་ཅན། །བ་ལང་ཅན་དང་ལྕུག་ཕྲན་མ། །སྡོད་ཅིག་མི་རེག་ཕྱལ་བ་བརྒྱད། །མཉེན་དང་སྐེ་རིང་སྟོད་སྨད་ཕྱེད། །ཡན་ལག་ཕྲ་འཇམ་ཚིགས་མིག་ཟླུམ། །དཔྲལ་བའི་དབྱེས་ཕྱེ་སྨིན་དཀྱུས་རིང༌། །དམིག་ཕྲག་དཀྱིལ་ན་ཨུཏྤལ་མདོག །ཆུ་ཞེང་གཉིས་ཀ་འབྲིང་དུ་བཤད། །ལུས་ལ་ཆུ་ཀླུང་ག་པུར་དྲི། །གསང་ཐུབ་ཤེས་རབ་སྤྱོད་པ་དལ། །དད་ལྡན་འགྲོགས་ཤིང་ཡིད་དང་ཆེ། །གསང་བའི་གནས་སུ་སྤྱད་པར་བྱའོ། །དབང་བསྐུར་དམ་དབོག་ཆོས་གསུམ་བཤད། །ལུས་ལ་རིགས་ལྔའི་རྡུལ་ཚོན་དགྱེ། །ཐབས་ལ་མཁས་པས་སྐབས་ཀྱིས་སྦྱར། །དམ་ཚིག་རྣམ་གྲངས་བཅུ་གཉིས་ཀྱི། །དངོས་
གྲུབ་ཡོན་ཏན་བསམ་མི་ཁྱབ། །སློབ་བུ་སྨིན་ཅིང་ལས་རྣམས་འགྲུབ། །སྐྱེ་གནས་ངན་འགྲོ་རིགས་སུ་ངེས། །ཐབས་ཀྱི་ཐེག་པ་འདིར་བཤད་དོ། །མཚན་ཉིད་ཆ་དང་རྣམ་གྲངས་དང༌། །ལྟོས་པའི་ཀུན་བརྟགས་རྣམ་པ་གསུམ། །དངོས་པོ་དེ་ཉིད་ལས་བརྫུན་ཞེས། །ཐམས་ཅད་རང་རིག་སྣང་ཕྱིར་བདེན། །ཤེས་ནས་ཀུན་སྨྲ་སྐྱེས་བུའི་ཡུལ། །དཀོན་མཆོག་གསུམ་དང་སློབ་དཔོན་མཆེད། །སེམས་ཅན་གནོད་པར་འོངས་པ་ལ། །བརྫུན་དུ་སྨྲ་བའི་ཚིག་དག་བྱ། །གང་ལ་གསང་བར་བྱ་རྣམས་དང༌། །གསང་བཅུ་ལ་འདྲི་བརྫུན་བཅུ་སྨྲ། །བསྲུང་བ་བཅུ་བདུན་ཉམས་སུ་བླང༌། །ཞིང་བཅུར་གྱུར་པའི་ནོར་བཅུ་དང༌། །མཚན་ལྡན་གཟུངས་དང་བཀྲ་ཤིས་རྫས། །སྦས་ཆོས་ཕལ་འཆང་བྱིན་ཅན་རྫས། །བསྲུང་བ་ཡོད་དང་མེད་པའི་གཏེར། །ཕྱུག་པོ་སེར་སྣས་བཅིངས་པའི་ནོར། །མིང་གིས་བླངས་ལ་ཚོགས་སུ་བསྔོ། །དམ་ཚིག་བཅུ་བདུན་སྤྱད་པར་བྱ། །ཞིང་བཅུར་གྱུར་པའི་སེམས་ཅན་ལ། །བརླང་ཚིག་བཅུ་ཡིས་ཞེ་བཅད་དེ། །དྲག་ཤུལ་སྤྱོད་པའི་སྔགས་དག་དང༌། །གཟུངས་ལ་བརླང་པོའི་སྦྱོར་ཚིག་དང༌། །སློབ་བུ་སྣོད་ཅེས་ཞེ་གཅོད་དང༌། །འབྱུང་བོ་ཞེ་གཅོད་རྔམ་པའི་སྒྲ། །སྣོད་ལྡན་བུ་ལ་བླང་ཆོས་བཤད། །དག་གི་དམ་ཚིག་བཅོ་ལྔ་བསྲུང༌། །མི་སྤང་དམ་ཚིག་བཤད་པར་བྱ། །ཡང་དག་དུག་ལྔ་ལོག་དུག་ལྔ། །བཤད་པའི་ཐབས་མཁས་འདོད་ཆགས་དང༌། །འདོད་སྤྱོད་སེམས་ཀྱི་རྒྱན་ཤེས་ནས། །ཤིན་ཏུ་ཞེན་པའི་ལམ་དུ་གསུངས། །ཞིང་བཅུ་རླག་བྱེད་ཞེ་སྡང་གཅོད། །ལྟས་ངན་འཇོམས་པ་དེ་བཞིན་ཏེ། །ཐབས་ལ་མཁས་པས་སྤྱོད་པ་ཡིན། །མངོན་བར་མཐོ་བའི་ལྟ་བ་དང༌། །ཏིང་འཛིན་ངེས་པར་སྲན་ཚུགས་དང༌། །ཤིན་ཏུ་རྒྱལ་བའི་མཆོག་ཏུ་གསུངས། །ལྟ་བས་ཕྱོགས་རིགས་མི་འབྱེད་པ། །སྤྱོད་པས་བླང་དོར་མི་བྱེད་པ། །ཐེག་པ་ཆེན་པོའི་གཏི་མུག་གོ །ལྟ་སྤྱོད་དམན་ལ་ཕྲག་དོག་ཅིང༌། །དམ་མ་འདྲེས་སོགས་སྤོང་བྱེད་པས། །ཕྲག་དོག་དམ་ཚིག་བསྲུང་བའོ། །ལོག་དུག་སེམས་ཅན་ཀུན་ལྡན་པས། །དུག་ལྔ་རང་རིག་རང་ལྡན་ཕྱིར། །དྲན་པ་ཐམས་ཅད་ཤེས་པ་ལས།
ཤེས་པ་ཐམས་ཅད་རྩོལ་བ་ཡིན། །རྩོལ་བའི་སེམས་ཕྱིར་ཐབས་མཁས་པས། །ཐབས་མཁས་རང་རིག་ཡེ་ཤེས་ཏེ། །ཉི་མའི་དཀྱིལ་ན་མུན་མེད་ལྟར། །རིག་ལ་རང་སྣང་མ་གཏོགས་པ། །ཉོན་མོངས་འཁོར་བ་རང་གིས་མེད། །དེ་ཤེས་ཡེ་ཤེས་རང་རིག་ལས། །སྤང་བར་བྱ་བ་དམིགས་མི་འགྱུར། །དམ་ཚིག་བཅོ་ལྔ་གནས་པ་ཡི། །རྣལ་འབྱོར་ཆེན་པོའི་དོན་གཉིས་རྫོགས། །ཀུན་གྱིས་བླང་བའི་དམ་ཚིག་ལྔ། །དྲི་ཆེན་དྲི་ཆུ་མང་ས་དང༌། །ཟིལ་པ་ལྷག་པའི་སེམས་རྣམས་དང༌། །གྲུབ་པ་བཞི་ཡིས་བརྒྱན་པའི་ཕྱིར། །ནད་ལྔ་བསལ་ཕྱིར་བླང་བ་དང༌། །གཙང་སྨེ་རྟོག་སྦྱང་ཕྱིར་བླང་དང༌། །ཐུན་མོང་དགོས་པ་ལྔ་ཕྱིར་དང༌། །རིགས་ལྔ་གྲུབ་པའི་ཡོན་ཏན་ནོ། །སྡུག་བསྔལ་ལས་གྲོལ་དངོས་གྲུབ་ཐོབ། །བཅུད་ལྡན་བཏུང་ལྔ་ལམ་གྱི་མཆོག །ཐབས་ཀྱི་ལུས་ལ་བརྟེན་ཤེས་ན། །ཡོན་ཏན་བརྗོད་ལས་འདས་པར་གསུངས། །ཕྱེ་བའི་དམ་ཚིག་གསུམ་ཅུ་གཉིས། །སྐབས་ཀྱིས་དང་དུ་བླང་བར་བྱའོ། །བསྒྲུབ་པར་བྱ་བ་རྣམ་ལྔ་ལ། །རིགས་དང་ཡེ་ཤེས་ཡབ་ཡུམ་ལ། །གཅིག་ལའང་ལྔ་ལྡར་ཤེས་པར་བྱ། །སྐུ་དང་གསུང་ཐུགས་ཡོན་ཏན་ལ། །གཅིག་ལའང་ལྔ་ལྔར་ཕྱེ་བས་ན། །བཞི་བཅུ་རྩ་ལྔའི་བྱེ་བྲག་རྣམས། །མཚན་ཉིད་ཤེས་ནས་བསྒྲུབ་པར་བྱ། །ཤེས་པ་ལྔ་ལས་བྱེ་བྲག་ཏུ། །ཕུང་པོ་ལྔ་དང་འབྱུང་བ་ལྔ། །དབང་པོ་ཡུལ་དང་ཡན་ལག་གོ །ཉོན་མོངས་དམ་རྫས་ཤ་དང་ནི། །ཕྱོགས་དང་ཁ་དོག་འགྲོ་བ་དང༌། །སྙིགས་མ་བག་ཆགས་ལྔ་ལྔའོ། །བདུན་ཅུ་ལ་སོགས་འཁོར་བའི་ཆོས། །ཡེ་ཤེས་སྐུ་རིགས་ཡབ་ཡུམ་སོགས། །རང་གཞན་ངང་གིས་སྐུར་དག་ལ། །བློ་ལ་ཉམས་སུ་ལོན་པ་ནི། །སྤྱོད་ཡུལ་ཡང་དག་རྣལ་འབྱོར་པའོ། །ཐུན་མོང་དམ་ཚིག་མདོར་བསྡུ་ན། །བདག་གཞན་དོན་དུ་ཤེས་པར་བྱའོ། །རྒྱན་འགྱེད་ལུས་མཛེས་འདུ་ལྟ་དང༌། །ཆང་དང་དྲེགས་སྤྱོད་ཁེངས་སེམས་དང༌། །ཆེ་དག་དགེ་སྨོད་སྡིག་སྤྱོད་དང༌། །ལེ་ལོ་སེར་སྣ་གཉིད་གཡེང་དང༌། །ཁྲོ་གཏུམ་ཡེ་ཤེས་སྔོན་མི་གཏོང༌། །བཀའ་བཅག་སྡིག་པའི་གྲོགས་བསྟེན་དང༌། །བག་མེད་སྤྱོད་དང་དམ་ཆོས་འདོར། །ཆོག་མི་ཤེས་དང་རྔོམ་ལ་
དགའ། །སྦང་བྱ་ཉི་ཤུ་གཅིག་བཟློག་པ། །བདག་དོན་མཆོག་ཏུ་གྱུར་པ་སྟེ། །ཀུན་གྱིས་བདག་ཉིད་བཀུར་བར་གྱུར། །ཕ་རོལ་ཕྱིན་དྲུག་ཆོས་སྤྱོད་བཅུ། །རྣམ་བཞི་ལས་ཀྱི་སྤྱོད་པ་དང༌། །མཐུན་འཇུག་ལས་ཀྱི་སྤྱོད་པ་ནི། །ཐེག་པ་དགུ་དང་མུ་སྟེགས་དགུ།། འགྲོ་བ་དྲུག་གེ་སྤྱོད་པ་རྣམས། །འཛིན་དང་ཉམ་ང་མེད་པར་སྤྱོད། །དོན་འགྱུར་ཅི་ཡང་ཉམས་སུ་བླང༌། །བཞི་བཅུ་བཞི་ལ་སོགས་པ་ཡིས། །གདུལ་བྱ་གང་ཡང་དོར་མི་བྱ། །བསྲུང་བ་དེ་དག་གྲངས་བཏབ་པ། །དྲན་དང་ཤེས་བཞིན་གྱིས་སྤྱོད་པ། །རྣལ་འབྱོར་དབང་ཕྱུག་ཆེན་པོར་གསུངས། །ཉམས་པར་གྱུར་བའི་རྒྱུ་དག་ནི། །མི་ཆོས་བློན་པོ་ལས་བྱེད་དང༌། །བདག་བསྟོད་གཞན་སྨོད་གཟུང་འཛིན་མཁས། །ཁེངས་དྲེགས་གཉིས་ཕྱིར་འདུ་བ་སྟེ། །རྫས་ལ་ཆགས་སེམས་རང་ཕྱོགས་ཆེ། །ཆང་དང་རང་མཐོང་ལྟ་སྤྱོད་སྙོམས། །ཆོས་ལ་ཕྱོགས་རིས་ངོམས་སྐྱེན་དང༌། །གསང་ཆུང་ལེ་ལོ་གཙང་སྨེ་ཆེ། །སྒྲོ་སྐུར་གྲོགས་ཀྱི་ཉམས་ལེན་དང༌། །འཁོར་བའི་རིགས་རྒྱུད་སྤེལ་འདོད་ཅིང༌། །གཅིག་པུར་མི་དགའ་འདུ་ལ་དགའ། །ཉི་ཤུ་ཉམས་པའི་རྒྱུར་འགྱུར་རོ། །སྔ་རྟགས་སྔོན་དུ་འབྱུང་བ་ནི། །ཉམ་ང་བ་ཡི་ནད་རྣམས་དང༌། །དགྲ་བགེགས་གཉིས་ལ་བདེ་མི་འཇུག །འཁོར་དང་ལོངས་སྤྱོད་ཡིད་འོང་འབྲལ། །ཡ་ག་མ་ཉེས་ལ་སོགས་འབྱུང༌། །བརྩམས་པའི་ལས་ལ་འབྲས་མེད་ཅིང༌། །ཡིད་དུ་མི་འོང་སྣ་ཚོགས་འབྱུང༌། །གལ་ཏེ་ཉམས་ལ་རྟགས་མེད་པར། །ལེགས་པར་སྣང་ན་མི་རུང་སྟེ། །བདེ་བ་ཟད་མེད་གཏན་དུ་སྡུག །གལ་ཏེ་ཉམས་ལ་རྟགས་བྱུང་ན། །སྔོན་གྱི་རྣམ་སྨིན་ཟད་འགྱུར་ཕྱིར། །བསྐང་བའི་ལས་རྣམས་བརྩོན་བྱས་ན། །ངན་སོང་སྡུག་བསྔལ་མྱོང་མི་འགྱུར། །ཉམས་པར་གྱུར་པའི་སྐྱོན་བཤད་པ། །བྱང་སེམས་དམ་ཚིག་ཉམས་གྱུར་ན། །བསྐལ་པར་དགེ་བ་ཅི་བསགས་ཀྱང༌། །གཞི་རྟེན་མེད་པར་གྱུར་པ་ཡིས། །འཁོར་བའི་ཁམས་གསུམ་ཟག་པར་འགྱུར། །སྐུ་ཡི་དམ་ཚིག་ཉམས་གྱུར་ན། །ཡ་ངའི་ནད་སོགས་སྡུག་བསྔལ་འབྱུང༌། །དུས་མིན་ཚེ་ཟད་བར་ཆད་མང༌། །བསྐལ་པར་རྡོ་རྗེ་དམྱལ་བར་ལྟུང༌། །བདེ་བས་རབ་ཏུ་
བྲེལ་བར་འགྱུར། །གསུང་གི་དམ་ཚིག་ཉམས་གྱུར་ན། །བགེགས་རྣམས་ཐོགས་མེད་འོང་བ་དང༌། །རྐྱེན་དང་ཡེ་འདྲོག་མང་བ་དང༌། །ཆོས་ལ་བྱིན་རླབས་མེད་འགྱུར་ཞིང༌། །བསྐལ་པ་གཉིས་སུ་དམྱལ་བར་ལྟུང༌། །སྒྲུབ་པའི་དམ་ལས་འདས་པར་འགྱུར། །ཐུགས་ཀྱི་དམ་ཚིག་ཉམས་གྱུར་ན། །སྨྱོ་འབོག་དབང་པོ་ཉམས་དང་འཆལ། །མྱོས་ཤིང་སྐུར་པའི་གནས་སུ་འགྱུར། །གང་ཡང་བསྒྲུབས་ལ་རྟགས་མེད་ཅིང༌། །ལྕེ་ལ་ཞིང་རྨོ་ལ་སོགས་པའི། །དམྱལ་བར་བསྐལ་པ་གསུམ་ལ་གནས། །རྩ་བ་ཀུན་ཉམས་ཕལ་པ་དག །གསོ་ལ་ཉེ་བར་མི་བརྩོན་ན། །རྡོ་རྗེ་དམྱལ་བར་དེ་ལྟུང་སྟེ། །དམྱལ་བ་ཕལ་པ་ཐམས་ཅད་ཀྱི། །སྡུག་བསྔལ་གཅིག་ཏུ་བསྡོམས་པས་ནི། །དེ་ཡི་འབུམ་གྱི་ཆར་མི་ཕོད། །སངས་རྒྱས་སྟོང་གི་འོད་ཟེར་དང༌། །བྱང་ཆུབ་སེམས་དཔའི་ཕྲིན་ལས་ཀུན། །རྒྱུན་དུ་མཛད་ཀྱང་ཕན་མི་འགྱུར། །བསྐལ་པ་ཐེར་འབུམ་ལ་སོགས་སུ། །དེ་ནི་ཐོན་པར་མི་འགྱུར་ཏེ། །འཇིག་རྟེན་འཇིག་ན་འང་གཞན་དུ་འཕོ། །སེ་གོལ་གཅིག་གིས་ཕྱིན་པར་བྱེད། །དེ་བས་ཤིན་ཏུ་ནན་ཏན་གྱིས། །ཡན་ལག་དམ་ཚིག་ཉམས་གྱུར་ན། །ལོངས་སྤྱོད་མང་དུ་འཕེལ་བ་མེད། །ཐེག་པ་ཆེ་ལ་འཕྱས་དོགས་ཤིང༌། །ཐུན་མོང་མཆོག་གི་དངོས་གྲུབ་རྣམས། །ཤིན་ཏུ་རིང་བར་གྱུར་བ་དང༌། །གདུལ་བྱའི་དོན་རྣམས་ཡལ་འགྱུར་ཞིང༌། །ལྟ་སྤྱོད་ཡ་ཆར་གྱུར་པ་ཡིས། །ཐེག་པ་ཕྱི་ནང་འདྲེས་པ་ཉིད། །བཀའ་ཡི་བྱིན་ཉམས་འགྲུབ་པར་དཀའ། །སྲུང་བའི་ལྷ་རྣམས་གཡེལ་བ་དང༌། །ཟབ་མོའི་ཆོས་ལས་རིང་འགྱུར་ཞིང༌། །བསྐལ་པར་ངན་སོང་ལྟུང་བར་འགྱུར། །རྣལ་འབྱོར་སྔོ་སྐམས་ཉིད་དུ་འགྱུར། །རྣལ་འབྱོར་སྐྱེས་བུ་ཆེན་པོ་ཡིས། །དམ་ཚིག་མ་ཉམས་གཞུང་མཐུན་དང༌། །ལུས་ལ་ནད་ཉུང་མཚན་ལྡན་ཞིང༌། །ཐུན་མོང་ཉེས་བྱས་དག་པར་འགྱུར། །སྲིད་པ་གསུམ་ལ་དབང་བསྒྱུར་ཞིང༌། །ཐེག་ཆེན་ཟབ་མོའི་དོན་ཐོབ་གྱུར། །གསུང་གིས་ལྷ་མཉེས་རྒྱུད་འཕེལ་ཞིང༌། །མཐུ་དང་བྱིན་རླབས་བསམ་མི་ཁྱབ། །ལས་རྣམས་དུས་སུ་འགྲུབ་པར་འགྱུར། །བསམ་པ་ཐམས་ཅད་ཡོངས་སུ་རྫོགས། །ཐུགས་ཀྱི་སྐྱོ་དུབ་མེད་པ་དང༌། །མན་ངག་སྣོད་
གྱུར་དངོས་གྲུབ་ཉེ། །དགོངས་ཟབ་དོན་ལ་མཁས་པ་དང༌། །ལྷ་རྣམས་ཀྱིས་ནི་དབང་བསྐུར་འགྱུར། །ཡན་ལག་དམ་ཚིག་མ་ཉམས་ན། །སྐྱོན་བཟློག་པ་ཉིད་ཡོན་ཏན་འགྱུར། །བདུད་བཞི་བཅོམ་ཞིང་ངན་སོང་སྐྱོབ། །ཐེག་ཆེན་ལྟ་སྤྱོད་གཞུང་བསྲང་བས། །ལྷ་རྣམས་འགོ་ཞིང་བསམ་པ་འགྲུབ། །དོན་གཉིས་ཡོངས་སུ་རྫོགས་པར་འགྱུར། །ཐེག་ཆེན་དམ་ཚིག་ལ་གནས་ན། །འོག་མའི་འདུལ་སྡོམ་དམ་ཚིག་ཀུན། །བསྲུང་བ་མེད་པར་ཐུབ་པས་ན། །དགེ་སློང་བྱང་ཆུབ་སེམས་དཔའ་དང༌། །རྣལ་འབྱོར་རྣལ་འབྱོར་ཆེན་པོ་ཡིན། །ཉམས་ན་བསྐང་བའི་ཐབས་རྣམས་ནི། །བྱང་ཆུབ་སེམས་ཀྱི་དམ་ཉམས་ན། །མཁས་ལ་གནས་ཏེ་གནས་པར་བྱ། །སྐུ་ཡི་དམ་ཚིག་ཉམས་གྱུར་ན། །གང་ལ་ཉམས་པ་དེར་སོང་ལ། །ནོར་རྫས་མཉེས་པ་དེར་ཕུལ་ནས། །གང་ཉེས་ཚིག་ཏུ་བཤགས་བྱས་ལ།། ཕྱིན་ཆད་སྡོམ་པ་ལེགས་པར་བཅའ། །གལ་ཏེ་གྲོངས་ཆད་གྱུར་པ་ན། །དེ་ཡི་སློབ་དཔོན་བཞུགས་པ་ལ། །དམ་ཚིག་གོང་མ་བཞིན་དུ་བཤགས། །མེད་ན་མཉམ་པ་བརྒྱ་ལ་བཤགས། །དེ་ཡང་རྙེད་པར་མ་གྱུར་ན། །དེ་དང་མཉམ་པ་གསུམ་བཀུག་ལ། །སྦྱིན་སྲེག་མེ་ཐབ་རབ་བརྩིགས་ནས། །དཀྱིལ་འཁོར་ལྷ་ལ་མཆོད་རྗེས་སུ། །སྤྱན་དྲངས་གསང་མཆན་ལ་སོགས་མཆོད། །གོང་དུ་སྨོས་པའི་ཡོན་རྣམས་ཀྱང༌། །མཉམ་པོ་གསུམ་ལ་དབུལ་བར་བྱ། །གལ་ཏེ་གུས་པར་མི་ལེན་ན། །གཉིས་ཀ་རྡོ་རྗེ་དམྱལ་བར་སྐྱེ། །དེ་པས་མྱུར་དུ་ཚངས་པར་བྱ། གསུང་གི་དམ་ཚིག་ཉམས་གྱུར་ན། །སྒོ་གསུམ་སྐུ་གསུང་ཐུགས་ཉིད་དུ། །ངེས་པར་ཤེས་ཏེ་སྐོང་པར་འགྱུར། །བཟླས་པ་སྔགས་ཀྱིས་བསབ་པ་དང༌། །སྒྲུབ་པ་ཆེན་པོ་གསུམ་གྱིས་བསྐང༌། །ཐུགས་ཀྱི་དམ་ཚིག་ཉམས་གྱུར་ན། །འགྲོ་དྲུག་སེམས་སུ་གསལ་རྟོགས་ན། །བདག་ཉིད་བདག་ལ་བསབ་པར་བྱེད། །མི་རྟོག་ཏིང་འཛིན་རླུང་ཞུགས་ཏེ། །མ་ཡེངས་བློ་ལ་འདྲིས་པར་བྱའོ། །ཡན་ལག་དམ་ཚིག་ཉམས་གྱུར་ན། །གང་འདས་དེ་ཉིད་སོར་བཅུག་ལ། །བརྒྱ་རྩ་བརྒྱད་ཀྱི་ཚོགས་ཀྱིས་བསྐང༌། །དེ་ལྟར་ཉམས་སུ་བླངས་ན་སྐོང༌། །སྔ་རྟགས་སྡུག་
བསྔལ་འབྱུང་མི་འགྱུར། །དམ་ཚིག་ཆེན་པོ་དཔེས་བསྟན་པ། །ས་གཞི་ལྟ་བུའི་རང་བཞིན་པས། །ལམ་དང་འབྲས་བུའི་ཆོས་རྣམས་ཀུན། །དམ་ཚིག་མེད་པར་འབྱུང་མི་སྲིད། །ས་མཐའི་མཁར་གྱི་རང་བཞིན་པས། །བསྲུང་བ་ཐུབ་དང་མ་ཐུབ་ལས། །ལེགས་ཉེས་སྟོངས་ཆེན་སྤྱོད་པའོ། །རིན་ཆེན་ལྟ་བུའི་རང་བཞིན་པས། །དངོས་གྲུབ་དོགས་འདོད་ཐམས་ཅད་འབྱུང༌། །ནམ་མཁའ་ལྟ་བུའི་རང་བཞིན་པས། །འདི་ཡོད་ཐམས་ཅད་ཤོད་པར་འགྱུར། །རྣོ་དཔལ་མཚོན་གྱི་རང་བཞིན་པས། །འཁོར་བའི་དྲ་བ་གཅོད་པ་ལ། །ཕ་མ་ལྟ་བུའི་རང་བཞིན་པས། །དུས་གསུམ་རྒྱལ་བ་ཐམས་ཅད་བསྐྱེད། །རྒྱ་མཚོ་ལྟ་བུའི་རང་བཞིན་བས། །རླབས་ཆེན་དུས་དུས་འབྱུང་བར་བྱེད། །མེ་དཔུང་ལྟ་བུའི་རང་བཞིན་པས། །གང་མཚོ་ཐམས་ཅད་ཚིག་པར་འགྱུར། །དེ་བཞིན་རྩི་སྣན་རང་བཞིན་པས། །འཁོར་བའི་གཅོང་རྙིང་མ་ལུས་འབྱིན། །རྒྱལ་པོ་ལྟ་བུའི་རང་བཞིན་པས། །ཕྱོགས་འགའ་བརྟེན་ཡང་རིམ་གྱིས་འཚོ། །རྒྱ་མཚོ་ནོར་ལེན་དེད་དཔོན་དང༌། །ཐོག་མ་ནས་མཐར་འདིས་ཕྱིན་པས། །འདི་ལ་ཤིན་ཏུ་ནན་ཏན་བྱའོ། །དམ་ཚིག་དམ་ཚིག་ཅེས་བྱ་བ། །གུད་ན་ཡོད་པ་མ་ཡིན་ཏེ། །རང་གི་སེམས་ཉིད་དམ་ཚིག་ཡིན། །ཇི་སྙེད་སྣང་བའི་ཆོས་རྣམས་ཀུན། །རང་རིག་རྐྱེན་བྲལ་ཉིད་སྣང་བས། །ཅིར་སྣང་ཅིར་སྲིད་རང་རིག་ཉིད། །འགྲོ་ལྡོག་སྤྱི་ཚུགས་གང་ཡོང་ཡང༌། །སྙིང་པོའི་དོན་ལས་འདའ་མི་སྲིད། །རང་བཞིན་དམ་ཚིག་ཆེན་པོ་ཡིད། །རང་བཞིན་ལྷུན་གྲུབ་དམ་ཆིག་ལ། །རིགས་པས་ཕྱིན་ཅི་མ་ལོག་ན། །མངོན་སྣང་གདགས་པའི་ཆོས་མེད་པས། །ལྟ་བའི་དམ་ཚིག་ཆེན་པོར་བཤད། །དེ་དག་བློ་ལ་འདྲིས་པ་ཡིས། །སྤྱོད་ལམ་ཀུན་ཡང་མ་ཉམས་པར། །ཏིང་འཛིན་རྒྱུད་ཀྱི་དམ་ཚིག་སྟེ། །སངས་རྒྱས་ཉིད་དང་སྤྱོད་ཡུལ་གཅིག །འདི་ལ་བསྲུང་བ་ཅི་ཡང་མེད། །ཉམས་པ་རྡུལ་ཙམ་འབྱུང་མི་སྲིད། །མ་འགགས་སྤྱོད་པ་འཛིན་མེད་པས། །ལྷག་པའི་དམ་ཚིག་རྣམ་བཞི་ལྡན། །བསྲུང་བྱ་མ་ལུས་འདིར་འདུས་ཕྱིར། །དམ་ཚིག་ཀུན་གྱི་མདོ་ཞེས་སོ། །སྒྱུ་འཕྲུལ་རྣམ་དཔྱོད་གཏོར་ཚོགས་རྒྱ་མཚོའི་རྒྱུད་ཆེན་
ལས། །ལམ་འབྲས་སྙིང་པོ་མེ་ལོང་བཅུ་གཅིག་གིས་མཚན་པ། །འཁོར་བའི་དང་མཆུའི་ཚུལ་གྱིས་སྒེག་པའི་བློས་བསྡུས་པའི། །དགེ་རྩ་ས་ཀུན་ཀྱང་དམ་གནས་འགྲོ་ཀུན་བྱང་ཆུབ་ཤོག་སྤྱིའི་དམ་ཚིག་མདོར་བསྡུས་པ་དཔལ་སྒེག་པའི་རྡོ་རྗེས་མཛད་པ་དམ་ཚིག་ཆེན་པོའི་མདོ་རྫོགས་སོ།།