རྨུགས་འཛིན་འཆོལ་བའི་མན་ངག་གི་བསྟོད་པ།
རྒྱ་གར་སྐད་དུ། ཨུ་ཙུཥྨ་ཛམྦྷ་ལ་ཨུ་པ་དེ་ཤ་སྟོ་ཏྲ། བོད་སྐད་དུ། རྨུགས་འཛིན་འཆོལ་བའི་མན་ངག་གི་བསྟོད་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །མགོན་པོ་ནམ་མཁའི་མདོག་ཅན་ནོར་གྱི་ཆར་འབེབས་པ། །མ་སྐྱེས་རང་བཞིན་དག་པས་སྐུ་མདོག་ནག་པོར་བཞུགས། །ཁྱོད་ནི་རྡོ་རྗེ་སེམས་དཔའ་ཉིད་དེ་བདག་དྲན་ན། །ཁྱོད་ལ་འདུད་ཀྱིས་ཐུགས་རྗེས་ཅི་ཡི་ཕྱིར་མི་གཟིགས། །ལོ་དྲུག་བྱིས་པའི་གཟུགས་ལ་གཞོན་པའི་ཤ་རྒྱས་པ། །འཛུམ་ལ་ཁྲོ་ལ་བྱམས་པའི་མཆེ་བ་དཀར་པོ་གཙིགས། །ཁྲོ་གཉེར་དཔྲལ་བར་བསྙེར་ཞིང་རལ་པ་དམར་སེར་ལངས། །དབུལ་བ་སེལ་མཛད་སྤྱན་ཡངས་སྙིང་རྗེ་ཅན་ལ་འདུད། །མི་བསྐྱོད་དབུ་ལ་བཞུགས་བས་ཐུགས་ཀྱི་རིག་འཛིན་ཅིང༌། །བྱམས་པས་ཀུན་ལ་ཁྲོས་ཏེ་གཅིར་བུ་སྤྲུལ་གྱིས་བརྒྱན། །ཨོཾ་ཨ་ལས་སྐྱེས་ནོར་སྦྱིན་གདན་ལ་བཞུགས་ཤིང་འགྱིང༌། །རེ་བ་སྐོང་མཛད་དཔག་བསམ་ཤིང་འདྲ་ཁྱོད་ལ་འདུད། །ཕྱག་གཡས་སྙིང་རྗེས་དོན་མཛད་ཐོད་པ་ཁྲག་གིས་བཀང༌། །ཕྱག་གཡོན་ནོར་སྤྱིན་མ་བཟུང་ནེའུ་ལེས་རིན་ཆེན་འབེབས། །གཡས་གཡོན་ཞབས་ཀྱིས་རྣམ་ཐོས་སྲས་ཀྱི་རྐང་བརྫིས། །ནོར་བདག་གན་རྐྱལ་གནོན་ཅིང་བརྒྱད་བསྐུམ་བཞུགས་ལ་འདུད། །རྣམ་བ་མ་ཕུག་རིགས་ངན་ཆ་ལུགས་ལྷག་མ་ཟ། །ལག་ནས་ཁ་རུ་འོ་མའི་བདུད་རྩི་རྩ་ལམ་རྡོ་རྗེ་ནས་བྱུང་སྟེ། །གུར་གུམ་
མདོག་འདྲ་ཞལ་དུ་ཕུལ་བས་མཉེས་མཛོད་ལ། །ཉིད་ཀྱིས་བདག་གི་བསམ་མཁྱེན་རེ་བ་མྱུར་དུ་སྐོངས། །ཡི་གེ་བཅུ་པས་བྱིན་བརླབས་མེ་ཏོག་དང་བཅས་པས། །ཨོཾ་ལས་འོད་འཕྲོས་གདུབ་བུ་རིན་ཆེན་སྤྲས་པས་བརྒྱན། །ཨོཾ་ལས་བྱུང་བའི་བུམ་པ་བཟང་པོས་ཆུ་ཕུལ་ནས། །བཅོམ་ལྡན་མགོན་པོ་ཅི་ཕྱིར་རེ་བ་མི་བསྐོང་ལགས། །འགྲོ་དྲུག་ཀུན་ལ་རེ་བསྐོང་ནོར་གྱི་ཆར་པ་དག །ཅི་འདོད་མང་པོ་འབེབས་པའི་ཐུགས་རྗེ་གྲགས་ལགས་ན། །བདག་གིས་མོས་པས་ཁྱོད་ཀྱི་ཡོན་ཏན་རྟག་ཏུ་བརྗོད། །ཐིགས་པ་གཅིག་ཀྱང་མི་སྩོལ་སྐལ་པ་མེད་དམ་ཅི། །ཉི་མ་རེ་རེ་བཞིན་དུ་རྟག་ཏུ་ཁྱོད་འབོད་ན། །བདག་ནི་ཡི་ཆད་སྒྱིད་ལུགས་གདོང་པ་དག་མོད་ཀྱང༌། །ཁྱོད་ཀྱི་སྔོན་གྱི་དམ་བཅས་ཐུགས་རྗེ་གང་དུ་ཐལ། །གཏེར་ཆེན་སྐལ་བ་མེད་ཀྱང་ལོག་འཚོ་མེད་ཙམ་བྱིན། །བདག་གིས་སྙིང་ནས་སྨྲས་ཀྱང་ད་དུང་མ་གཟིགས་ན། །ས་གསུམ་ཀུན་ལ་སྙོམས་པར་དམ་ནི་མ་བཅས་སམ། །བདག་ལ་སྐལ་བ་མེད་ཀྱང་ཐུགས་རྗེས་ཅིས་མི་གཟིགས། །སེམས་ཅན་མིན་ནམ་དབུལ་པའི་སྡུག་བསྔལ་བྲལ་པར་མཛོད། །བདག་གིས་བོས་པས་ཁྱོད་ཀྱི་ཐུགས་རྗེའི་ཞགས་པ་ཡིས། །སྲིད་འདིར་དབུལ་བ་སོལ་བ་བདེ་ཆེན་གནས་སུ་དྲོངས། །འཇིགས་ལ་འཇིགས་པར་མི་བྱེད་ཁྱོད་ཀྱིས་བྱིན་བརླབས་ཏེ། །འདི་དང་ཕ་རོལ་གཉིས་ཀར་རྟག་ཏུ་བསྐྱབ་པར་མཛོད། །རྨུགས་འཛིན་འཆོལ་བའི་མན་ངག་གི་བསྟོད་པ་བླ་མ་དྷ་བྱང་ཆུབ་སེམས་དཔས་མཛད་པ་རྫོགས་སོ།། །།ཁ་ཅིག་སློབ་དཔོན་ཉི་མ་སྦས་པས་མཛད་དོ་ཞེས་ཀྱང་ཟེར་སྐད་དོ།།