བླ་མ་དམ་པ་བསོད་ནམས་དཔལ་ཞེས་བྱ་བ་ལ་བསྟོད་པ།
རྒྱ་གར་སྐད་དུ། །གུ་རུ་པ་ར་མ་པུ་ཎྱ་ཤྲི་ན་མ་སྟོ་ཏྲ། བོད་སྐད་དུ། བླ་མ་དམ་པ་བསོད་ནམས་དཔལ་ཞེས་བྱ་བ་ལ་བསྟོད་པ། ཆོས་འབྱུང་རབ་གཟིགས་ཤིན་ཏུ་ཡངས་པའི་སྐུ་མངའ་བ། །བསོད་ནམས་དཔལ་གྱི་ཞབས་ཟུང་དག་ལ་བརྟེན་པར་བགྱི། །མཁས་པ་འདི་ནི་ཀུན་དུ་བསྐྱོད་བར་གྱུར་པ་ལ། །སྔོན་ཆད་མ་མཐོང་སྟོང་ཉིད་རྩེ་མོས་ངོ་མཚར་མཐོང༌། །ཤིན་ཏུ་རྒྱ་ཆེན་ཟབ་པ་འདི་ནི་ཆེན་པོའི་ཚུལ། །མཆོད་རྟེན་བསྐྱོད་པ་ལྟ་བུའི་སྐུ་ལ་ལྷག་པར་བརྟེན། །དཔལ་མཆོག་བླ་མ་སྟོན་པའི་བསྟན་པ་ལ། །དུས་དེས་གསལ་བ་འོད་གསལ་ཆེན་པོའི་ཚུལ། །མཚུངས་མེད་སྙིང་རྗེའི་བཅུད་ཀྱིས་སེམས་ཅན་བདེ་མཛད་པ། །འདི་ནི་ངོ་མཚར་བསོད་ནམས་དཔལ་གྱི་ཡེ་ཤེས་སྐུ། །དེ་ནི་ཀུན་ལ་བྱམས་པས་ཕྱག་ཀྱང་རབ་ཏུ་འཚལ། །བདེ་ཞིང་བདེ་བའི་སྣང་ལྡན་སྤྲོས་པ་མི་མངའ་བ། །བཟོད་བའི་གཏེར་ཆེན་བསམ་གཏན་དགའ་བའི་རོ་མཆོག་དང༌། །རྣམ་པ་ཀུན་དུ་རྫོགས་སངས་བྱང་ཆུབ་ལམ་རྣམས་མཁྱེན། །གཏི་མུག་མུན་ལྡོངས་འགྲོལ་རབ་ཏུ་གསལ་བར་མཛད། །དེ་ནི་བརྩེ་ལྡན་བསོད་ནམས་དཔལ་གྱི་ཡེ་ཤེས་སྐུ། །པོ་ཊ་ལ་ཀར་སྤྱན་རས་གཟིགས་དབང་ཞབས་པད་ལ། །བུང་བ་རོལ་པ་ཞེས་བྱའི་སྟོབས་ལྡན་སྤྱན་དག་གིས། །ལྷོ་
ཕྱོགས་ཡུལ་དུ་ལམ་ཚོལ་ཡང་དག་བསྐྱོད་པ་ཡིས། །རིམ་བཞིན་འཆག་ལ་དུབ་པ་མེད་པའི་བསོད་ནམས་དཔལ། །སངས་རྒྱས་མཐུ་ཡིས་རྒྱ་མཚོ་ཟླ་བས་གང་བ་བཞིན། །དཔལ་མཆོག་བླ་མ་འདི་ནི་ལམ་མཆོག་དེད་དཔོན་མཁས། །ཡེ་ཤེས་བདུད་རྩིའི་རླངས་ཀྱི་ལམ་གྱིས་དུབ་པ་ལ། །ཉེར་ཕྱིན་ལམ་ལ་མཁས་རྣམས་ཀུན་གྱིས་བརྟེན་པར་བྱ། །དཔལ་མཆོག་བླ་མ་འདི་ནི་སྟོན་པའི་བསྟན་པ་ལ། །དུས་ལ་རབ་གསལ་འོད་གསལ་ཆེན་པོའི་ཚུལ། །མཚུངས་མེད་བླ་མའི་ཞབས་ལ་རབ་ཏུ་འདུད། །རྒྱ་གར་ལྷོ་ཕྱོགས་ཀྱི་ཡུལ་དཔལ་ལྡན་འབྲས་ཀྱི་ཕུང་པོ་ཞེས་བྱ་བའི་མཆོད་རྟེན་བཞུགས་པའི་གནས་དེར་བླ་མ་མན་ལུངས་པའི་སྐུ་གསུང་ཐུགས་ཀྱི་སྤྱོད་པ་རླབས་པོ་ཆེ། བྱང་ཆུབ་སེམས་དཔའི་རྣམ་པར་ཐར་པ་དང་ཆ་མཐུན་པ་ལ་མོས་པའི་པཎྚི་ཏ་བི་མ་ལ་ཤྲཱི་ཞེས་བྱ་བ་མཁས་ཤིང་བཙུན་པ་དེས་ཚིགས་སུ་བཅད་པ་འདིས་བསྟོད་པའོ། །དཔལ་ལྡན་མན་ལུངས་ཀྱི་གཙུག་ལག་ཁང་ཆེན་པོར་པཎྚི་ཏ་གོ་ཏ་མ་བྷ་དྲ་དང༌། ལོ་ཙཱ་བ་གྲགས་པ་བྱང་ཆུབ་གཉིས་ཀྱིས་བསྒྱུར་བའོ།།