ལས་དང་པོ་བའི་ཚོགས་སོག།
སྲིད་གསུམ་རྣམ་པར་དག་པའི་རྡོ་རྗེ།
ལས་དང་པོ་པའི་ཚོགས་སོག་བཞུགས།། ཡེ་ཤེས་ཉི་མས་ཉོན་མོངས་མཚོ་སྐེམས་ཤིང༌། །འཇམ་པའི་གསུང་གིས་སྲིད་པ་གསུམ་སྒྲོལ་བ། །ཡིད་བཞིན་ནོར་ལྟར་སེམས་ཅན་རེ་སྐོང་བའི། །མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ཚོགས་སོག་རྣལ་འབྱོར་རྣམས་ལ་ཕན་གདགས་ཕྱིར། །བྱ་བའི་ཆོ་གའི་རིམ་པ་བདག་གིས་དབྱེ། །རྣལ་འབྱོར་རྣམ་པ་གཉིས་སུ་བསྟན། །དངོས་གྲུབ་སྒྲུབ་དང་ཚོགས་སོག་པའོ། །དངོས་གྲུབ་བསྒྲུབ་པར་བྱ་བའི་ཐབས། །རྒྱུད་དང་བླ་མ་སོ་སོ་ཡི། །གདམས་ངག་དག་ལས་གསལ་བར་བཤད།། ཚོགས་སོག་རིམ་པ་གཉིས་ཡིན་ཏེ། །རིགས་པ་དང་ནི་ལུང་ཡིན་ནོ། །རིགས་པས་ཕྱེ་ན་གཉིས་ཡིན་ཏེ། །སློབ་དཔོན་བྱེད་དང་སློབ་མར་གནས། །སློབ་དཔོན་ལ་ཡང་རྣམ་གསུམ་སྟེ། །རབ་དང་འབྲིང་དང་ཐ་མའོ། །སློབ་མ་ལ་ཡང་དེ་བཞིན་ནོ། །གང་ཟག་དྲུག་གི་བྱ་བ་ནི།། བྱེ་བྲག་ཐུན་མོང་གཉིས་སུ་བསྟན། །སློབ་དཔོན་རབ་ཀྱི་བྱ་བ་ནི། །ཐུན་དྲུག་ཏུ་ནི་སྒྲུབ་པ་དང༌། །དབང་བསྐུར་ཆོས་བཤད་དཀྱིལ་འཁོར་དང༌། །སྦྱིན་སྲེག་རབ་གནས་གཏོར་མ་བྱ། །སློབ་དཔོན་འབྲིང་གི་བྱ་བ་ནི། །ཐུན་བཞི་རུ་ན་སྒོམ་པ་དང༌། །ཆོས་བཤད་སྦྱིན་སྲེག་གཏོར་རབ་གནས། །སློབ་དཔོན་ཐ་མའི་བྱ་བ་ནི། །ཐུན་གསུམ་དུ་ནི་སྒོམ་པ་དང༌། །སྦྱིན་སྲེག་རབ་གནས་གཏོར་མ་བྱ། །སློབ་མ་རབ་ཀྱི་བྱ་བ་ནི། །ཐུན་དྲུག་སྒོམ་དང་མཆོད་གཏོར་གསུམ། །སློབ་མ་འབྲིང་གི་བྱ་བ་ནི། །ཐུན་བཞིར་སྒོམ་དང་མཆོད་གཏོར་གཉིས། །སློབ་མ་ཐ་མའི་བྱ་བ་ནི། །ཐུན་
གསུམ་སྒོམ་དང་མཆོད་གཏོར་གཅིག །དེ་ནི་བྱེ་བྲག་ཆོ་གའོ། །སློབ་དཔོན་སློབ་མ་གཉིས་ལ་ཡང༌། །དམ་བཅས་པ་དང་མ་བཅས་པའི། །བྱེ་བྲག་གཉིས་སུ་ཤེས་པར་བྱ། །ཐུན་མོང་རིམ་པའི་ཆོ་ག་ནི། །བསྒྲུབ་དང་སྒྲུབ་ཐབས་བསྒོམ་པ་དང༌། །ཁྲུས་དང་བླ་མ་ཕྱག་འཚལ་དང༌། །ཁ་ཏོན་འདོན་དད་གླེགས་བམ་ཀློག །རྒྱུན་ཆགས་བདུན་དང་ཆོས་སྤྱོད་དང༌། །དེ་ནས་ཁ་ཟས་རྣལ་འབྱོར་བྱ། །སཱཙྪ་གདབ་དང་བསྐོར་བ་དང༌། །དུས་ཀུན་བྱ་བའི་སྤྱོད་ལམ་དང༌། །ཉིན་ཕྱེད་དུས་ཀྱི་ཆོས་སྤྱོད་དང༌། །དགོངས་དག་ཆོས་སྤྱོད་རྒྱས་པར་བྱ། །ཉམས་བཤགས་སྙིང་གའི་དཀྱིལ་འཁོར་དང༌། །གཉིས་མེད་སྦྱོར་བས་ཉལ་བའོ། །ཐུན་མོང་བསྡུས་པ་བཅུ་དང་གསུམ། །དེ་ལ་ལྡང་བའི་དུས་སུ་ནི། །སྟོང་པ་ཉིད་ལ་གནས་པ་ལས། །ལྷ་མོ་བཞིས་བསྐུལ་ལྡང་བར་བསམ། །སྒྲུབ་ཐབས་སོ་སོའི་གཞུང་ལས་གསལ། །ཁྲུས་ལ་རྣམ་བཞིར་ཤེས་པར་བྱ། །ཆུ་ཡི་རྡུལ་ཕྲན་འདུས་པ་ལས། །ཁྲོ་བོ་བདུད་རྩི་འཁྱིལ་པར་གྱུར། །སྐུ་མདོག་ལྗང་སེར་ཞལ་གཅིག་པ། །ཕྱག་གཉིས་མཚན་ལྡན་འཇིགས་པའི་གཟུགས། །གཡས་ན་སྣ་ཚོགས་རྡོ་རྗེ་ལ། །གཡོན་ན་བདུད་རྩིས་བཀང་ཐོད་བསྣམས། །དེ་ཡིས་བགེགས་བསྐྲད་གྱུར་པར་བསམ།། རང་སྙིང་ཧཱུཾ་ལས་སྤྱན་སོགས་སྤྲོས། །བདུད་རྩིའི་བུམ་པ་ཕྱག་ན་བསྣམས། །རང་གི་ལུས་ལ་དབང་བསྐུར་བསམ། །བསྐུར་བས་ལུས་ཀུན་བདེས་གང་བས། །དྲི་མ་ཀུན་ནས་དག་པར་བསམ། །བདུད་རྩིར་བྱིན་བརླབས་ཆུ་ཡིས་ནི། །ཛམྦྷ་ལ་ཡི་དབུ་བཀྲུས་བསམ། །ཨ་ཀཱ་རོ་ཡི་སྔགས་སོགས་ཀྱིས། །ཡི་དགས་ཀུན་ལ་ཆུ་སྦྱིན་བྱ། །ཕྱག་འཚལ་ཆོ་ག་གཉིས་ཤེས་བྱ། །ཏིང་འཛིན་ལྡན་པའི་བླ་མ་ལ། །དུས་སུ་གུས་པས་ཕྱག་འཚལ་བྱ། །ཏིང་འཛིན་ལྡན་པའི་བླ་མ་ལ། །ལག་པ་དལ་བས་སྒོ་བརྡུངས་ནས། །གུས་པས་ཕྱག་འཚལ་ཁམས་བདེ་ཞུ། །བྱ་བར་འོས་པའི་གདམས་ངག་ནོད། །ཁ་ཏོན་གླེགས་བམ་ཀློག་པས་ནི། །བསམ་པའི་རིམ་པ་བཞིར་ཤེས་བྱ། །བདག་ཉིད་གསུང་གི་རྡོ་རྗེ་འམ། །ཡི་དམ་སོ་སོའི་ལྷར་བསམས་ནས། །མདུན་དུ་ལྷ་ཀླུ་ལ་སོགས་བསམ། །ཟབ་མོའི་མདོ་སོགས་ལེགས་གདོན་བྱ། །དེ་ཡིས་དེ་
རྣམས་ཚིམ་གྱུར་ནས། །གཉིས་མེད་ཡེ་ཤེས་དོན་རྟོགས་བསམ་།རྒྱུན་བཤགས་བདུན་ལྡན་ཆོ་ག་ནི། །བཅུ་གསུམ་དུ་ནི་ཤེས་པར་བྱ། །མཎྜལ་ཤིན་ཏུ་མཛེས་པ་ལ། །བདུད་རྩི་ལ་སོགས་དྲིས་བྱུགས་ལ། །མེ་ཏོག་ཡིད་འོང་སིལ་བཀྲམ་ནས། །ཕྱོགས་བཅུ་དུས་གསུམ་བཞུགས་པ་ཡི། །དཀོན་མཆོག་གསུམ་པོ་དེ་བསམས་ནས། །ཡོན་ཏན་ཕུན་ཚོགས་ཀྱིས་བསྟོད་པའི། །གུས་པའི་ཚུལ་གྱིས་ཕྱག་འཚལ་བྱ། །ཅི་འབྱོར་མཆོད་པ་བཤམས་ནས་ནི། །རིམ་པ་ཇི་བཞིན་སྔགས་དང་དབུལ། །སྡིག་པ་ཐམས་ཅད་བཤགས་པ་དང༌།། བྱེད་པ་ཡང་ནི་བསྡམ་པ་དང༌། །བསོད་ནམས་ཀུན་ལ་ཡི་རང་བྱ། །དཀོན་མཆོག་གསུམ་ལ་སྐྱབས་འགྲོ་བྱ། །བྱང་ཆུབ་མཆོག་ཏུ་སེམས་བསྐྱེད་བྱ། །ཆོས་ཀྱི་འཁོར་ལོ་བསྐོར་བསྐུལ་བྱ། །མྱ་ངན་འདའ་ལ་གསོལ་འདེབས་དང༌། །བདག་གི་ལུས་སོགས་དབུལ་བ་དང༌། །དགེ་ཀུན་བྱང་ཆུབ་མཆོག་ཏུ་བསྔོ། །དཀོན་མཆོག་གསུམ་དགྱེས་གནང་སྦྱིན་བསམ། །ཁ་ཟས་ཀྱི་ནི་རྣལ་འབྱོར་ནི། །སྦྱང་དང་ཟ་གཏོར་སྦྱིན་སྲེག་ནི། །ནང་དང་བླ་མེད་བཞིར་ཤེས་བྱ། །སྦྱང་དང་ཟ་གཏོར་སོ་སོའི་གཞུང༌། །སྙིང་གར་ཡི་དམ་ལྷ་བཀོད་དེ། །བདུད་རྩིར་བྱིན་བརླབས་ཟས་ཀྱིས་ནི། །དཀྱིལ་འཁོར་དེ་ལ་ཚིམ་པར་བསམ། །དེ་ནི་ནང་གི་སྦྱིན་སྲེག་གོ །ཚིམ་པའི་ཡེ་ཤེས་འོད་འཕྲོས་པས། །སེམས་ཅན་སྡིག་བསྲེགས་སླར་འདུས་ནས། །བདག་ལུས་བསྲེགས་ནས་སྟོང་པར་བསམ། །བླ་མེད་སྦྱིན་སྲེག་ཡིན་པར་བཤད། །སཱཙྪ་གདབ་པའི་རྣལ་འབྱོར་ནི། །ས་ཆུ་མེ་དང་བྱེ་བ་ལ། །ནམ་མཁའ་ལ་ཡང་གདབ་པར་བྱ། །ཆོ་གའི་རིམ་གཞུང་བཞིན་བྱ། །བསྐོར་བའི་རྣལ་འབྱོར་བཤད་པར་བྱ། །དུས་གསུམ་སངས་རྒྱས་མདུན་བསམས་ནས། །ལུས་ཀྱིས་གཡས་ནས་བསྐོར་བར་བྱ། །ངག་གིས་ཡི་གེ་བརྒྱ་པ་བཟླ། །ཡིད་ཀྱིས་མཆོད་པ་སྣ་ཚོགས་མཆོད། །སངས་རྒྱས་ཀུན་དགྱེས་འོད་ཟེར་ནི། །དུས་མཐའི་མེ་བཞིན་འཕྲོས་པ་ཡིས། །བདག་དང་སེམས་ཅན་མ་ལུས་པའི། །སྒྲིབ་པ་ཐམས་ཅད་བསྲེགས་པར་བསམ། །དུས་ཀུན་བྱ་བའི་སྤྱོད་ལམ་ནི། །ལུས་ངག་ཡིད་གསུམ་བྱ་བའོ། །ལུས་ཀྱིས་ཕྱག་རྒྱ་
ལ་སོགས་བྱ། །ངག་གིས་སྔགས་སོགས་བཟླས་པར་བྱ། །ཡིད་ཀྱིས་ཀུན་རྫོབ་ལྷར་བསྒོམ་དང༌། །རང་བཞིན་མེད་པར་མོས་པར་བྱ། །མཐོ་གང་ཙམ་གྱིས་འཕགས་པ་ནི། །སྤྱི་བོར་ཟླ་དཀྱིལ་བརྟག་པར་བྱ། །ཨོཾ་ནི་དབུས་སུ་གནས་བསམས་ནས། །བདུད་རྩི་ལྔ་པོ་འབབ་པར་བྱ།། རྐང་མཐིལ་བར་དུ་ལུས་ཁྱབ་ནས། །ངལ་དུབ་བསལ་བར་གྱུར་པར་བསམ། །ཇི་སྲིད་མི་སྐྱོའི་བར་དུ་བསྒོམ། །རྩ་བ་ཡན་ལག་དམ་ཚིག་ནི། །ཤེས་བཞིན་བག་ཡོད་བསྒོམ་སྟེ་བསྲུང༌། །ཉིན་ཕྱེད་ཆོས་སྤྱོད་གོང་དང་མཐུན། །དགོངས་ཀའི་ཆོས་སྤྱོད་གསུམ་ཡིན་ཏེ། །ཆོས་སྤྱོད་དང་ནི་མདོ་གདོན་དང༌། །སྨོན་ལམ་དག་ནི་གདབ་པར་བྱ། །ཆོས་སྤྱོད་བྱེད་པ་གོང་མ་བཞིན། །བཅུ་གསུམ་དུ་ནི་ཤེས་པར་བྱ། །མདོ་གདོན་ཤེས་རབ་སྙིང་པོ་དེ། །ཟབ་མོའི་དོན་ལ་བསྐུལ་ཕྱིར་རོ། །དགེ་བ་མི་ཟད་བསྔོ་བའི་ཕྱིར། །སྨོན་ལམ་དམ་པ་གདབ་པར་བྱ། །ཉམས་བཤགས་སྙིང་གའི་དཀྱིལ་འཁོར་ནི། །རང་ཉིད་ཡི་དམ་ལྷར་བསམས་ནས། །དེ་སྙིང་པདྨ་ཟླ་དཀྱིལ་འཁོར། །རིགས་ལྔ་འམ་ཡང་ན་དོན་གྲུབ་ནི། །ལྷ་ནི་སྙིང་གར་བསྐྱེད་པར་བྱ། །དེ་ལ་དོན་གྲུབ་བསྐྱེད་པ་ནི། །ཁཾ་བསམ་དེ་ལས་རལ་གྲི་བསམ། རལ་གྲི་ཁཾ་ལས་འོད་འཕོས་པས། །སེམས་ཅན་དོན་བྱས་སླར་འདུས་པས། །བདེ་གཤེགས་ལས་རིགས་ཉིད་དུ་གྱུར། །སྐུ་མདོག་ལྗང་གཡས་སྔོ་གཡོན་དཀར། །ཞལ་གསུམ་པ་ལ་ཕྱག་དྲུག་པ། །དང་པོ་གཉིས་ནི་ཡུམ་ལ་འཁྱུད། །གཡས་ཀྱི་གཉིས་པས་རལ་གྲི་འཛིན། །གསུམ་པ་སྣ་ཚོགས་རྡོ་རྗེ་སྟེ། །གཡོན་གྱི་གཉིས་པས་འཁོར་ལོ་འཛིན། །གཡོན་གྱི་གསུམ་པར་པདྨ་བསྣམས། །དེ་ལ་སྐྱེ་མཆེད་བྱིན་གྱིས་བརླབ། །སྐུ་གསུང་ཐུགས་ཀྱང་བྱིན་གྱིས་བརླབ། །དབང་བསྐུར་རིགས་ཀྱི་གཙོ་བོར་གྱུར། །དེ་ཡི་ཐུགས་ལས་འོད་འཕྲོས་ཏེ། །སངས་རྒྱས་ཀུན་ལ་གསོལ་འདི་གདབ། །རྡོ་རྗེ་འཛིན་པས་འགྲོ་སྐྱབས་ཕྱིར། །ཡོན་ཏན་འབྱུང་གནས་སྩོལ་བ་ལྟར། །སངས་རྒྱས་ཀུན་གྱིས་དབང་བསྐུར་བ། །དེ་བཞིན་དུ་ནི་བདག་ལ་སྩོལ། །དེ་བཞིན་གསོལ་བ་བཏབ་པ་ཡིས། །དེ་བཞིན་གཤེགས་པ་ཀུན་མཉེས་ནས། །སྤྱན་ལ་སོགས་པའི་
ལྷ་མོ་རྣམས། །བདུད་རྩི་ལྔས་གང་བུམ་པ་ཡིས། །དབང་བསྐུར་བར་ནི་བསམ་པར་བྱ། །ཞལ་ནས་ཚིག་འདི་འདོན་པར་བསམ། །དབང་བསྐུར་བ་ནི་རྡོ་རྗེ་ཆེ། །ཁམས་གསུམ་ཀུན་གྱིས་ཕྱག་བྱས་པས། །གསང་བ་གསུམ་གྱི་གནས་ལས་བྱུང༌། །དབང་བསྐུར་བ་ནི་སྦྱིན་པར་བྱ། །ཞེས་ནི་ཚིགས་བཅད་འདོན་པར་བསམ། །དབང་བསྐུར་ལུས་ཀུན་བདེ་གང་བས། །དམ་ཚིག་ཉམས་པའི་སྡིག་པ་ཀུན། །བསལ་ཞིང་རྣམ་པར་དག་པར་འགྱུར། །སྤྱི་བོར་ཐུགས་ཀྱི་བདག་པོ་བསམ། །གཉིས་མེད་སྦྱོར་བས་ཉལ་བ་ནི། །ཡེ་ཤེས་ལྷ་ནི་གཤེགས་གསོལ་ཅིང༌། །དམ་ཚིག་ལྷ་རྣམས་རང་ལ་བསྡུ། །ཉི་ཟླ་ཁ་སྦྱོར་དབུས་སུ་ནི། །རང་རང་ཡུམ་དང་སྦྱོར་བར་བསམ། །ཡང་ན་སྟོང་ཉིད་རྣལ་འབྱོར་བྱ། །ཐུན་མོང་ཆོ་ག་བཅུ་གསུམ་དང༌། །ཁྱད་པར་ཆོ་ག་བཅུ་གཉིས་ནི། །དེ་གཉིས་བསྡོམས་པས་ཉི་ཤུ་ལྔ། །སློབ་དཔོན་རབ་ཀྱི་བྱ་བ་ཡིན། །ཁྱད་པར་བརྒྱད་དང་ཐུན་མོང་དང༌། །དེ་དག་བསྡོམས་པས་ཉི་ཤུ་གཅིག །སློབ་དཔོན་འབྲིང་གི་བྱ་བ་ཡིན། །ཁྱད་པར་ཆོ་ག་དྲུག་དང་ནི། །ཐུན་མོང་བསྡོམས་པས་བཅུ་དང་དགུ། །སློབ་དཔོན་ཐ་མའི་བྱ་བ་ཡིན། །ཐུན་མོང་བཅུ་གསུམ་སློབ་མ་རབ། །འབྲིང་དང་ཐ་མ་ཅི་རིགས་བྱ། །དེ་ལྟར་རིགས་པ་བཤད་ཟིན་ནས། །ད་ནི་ལུང་གིས་ཡིད་ཆེས་བྱ། །མཁའ་འགྲོ་མ་ཡི་རྡོར་གུར་ལས། །ཇི་སྲིད་བྱང་ཆུབ་སྙིང་པོའི་བར། །དཀོན་མཆོག་གསུམ་ནི་སྤང་མི་བྱ། །རྟག་ཏུ་དམ་ཚིག་བསྲུང་བར་བྱ། །རྡོ་རྗེ་དྲིལ་བུའང་གཟུང་བར་བྱ། །རྟག་ཏུ་སྦྱིན་སྲེག་གསལ་བར་བྱ། །རྟག་ཏུ་དཀྱིལ་འཁོར་བཞེངས་པར་བྱ། །རྟག་ཏུ་བདེ་གཤེགས་རབ་གནས་བྱ། །འབྱུང་པོ་ཆེ་ལ་གཏོར་མ་སྦྱིན། །ཕྱག་རྒྱ་བཅིང་བ་རྣམས་སྤང་ཞིང༌། །མཆོད་རྟེན་ལས་ནི་མི་བྱ་ཞིང༌། །རྡོ་རྗེ་གསུམ་མཆོག་ཕྱག་མི་བྱ། །དཀྱིལ་འཁོར་ལ་སོགས་ལུས་ཀྱི་ལས། །རྨི་ལམ་དུ་ཡང་མི་བྱ་ཞིང༌། །སློབ་དཔོན་གཞན་ལ་ཕྱག་མི་བྱ། །བླ་མ་རྒན་ལ་ཕྱག་འཚལ་ཏེ། །རྟག་པར་རྒྱུན་དུ་སྔགས་བཟླ་ཞིང༌། །བསམ་གཏན་གཉིས་ཀྱང་རྣམ་པར་སྤང༌། །རྟག་ཏུ་སློབ་མ་བསྡུ་མི་བྱ། །རྟག་པ་རུ་ནི་ཆོས་བཤད་ཀྱིས། །
རྟག་ཏུ་སེམས་ཅན་བསྐྱད་བར་བྱ། །རྟག་ཏུ་སངས་རྒྱས་ཆེར་མཉེས་བྱ། །ཛམྦྷ་ལ་ལ་ཆུ་སྦྱིན་བྱ། །ལས་རྣམས་ཐམས་ཅད་ཡང་དག་སྤྱད། །བྱེ་མའི་མཆོད་རྟེན་ལས་ལ་ཡང༌། །མཁས་པས་ཆོ་ག་བཞིན་དུ་བྱ། །གཞན་ཡང་རྒྱུད་རྣམས་དུ་མ་ལས། །བྱ་བའི་རིམ་པ་མང་དུ་གསུངས། །བསོད་ནམས་ཡེ་ཤེས་ཚོགས་འདོད་པས། །རྟག་ཏུ་དད་དང་བརྩོན་འགྲུས་དྲན་པ་དང༌། །ཤེས་བཞིན་ཏིང་འཛིན་མཆོག་ལ་གནས་བྱས་ནས། །གཡེང་སྤངས་བག་ཡོད་ཚུལ་གྱིས་ནི། །རྟག་ཏུ་དལ་བསྟེན་པར་གྱིས། །བདག་ནི་བློ་ཆུད་ཤེས་རབ་དམན་གྱུར་ཀྱང༌། །ཚོགས་སོག་རྣལ་འབྱོར་རྣམས་ལ་ཕན་དོན་དུ། །ཆོ་གའི་རིམ་པ་ཅུང་ཟད་བསྡེབས་པ་ལས། །འཕགས་དང་མཁའ་འགྲོའི་ཚོགས་རྣམས་བཟོད་པར་མཛོད། །བདག་ཕན་སྙིང་རྗེའི་སེམས་ཀྱིས་འདི་བརྩམས་པས། །བསོད་ནམས་དྲི་མེད་ཕུན་ཚོགས་གང་ཐོབ་པས། །ནམ་མཁའི་མཐས་ཀླས་སེམས་ཅན་མ་ལུས་ཀུན། །རྡོ་རྗེ་འཛིན་པའི་ས་དགེ་ཐོབ་པར་ཤོག །སློབ་དཔོན་སྲིད་གསུམ་རྣམ་པར་དག་པའི་རྡོ་རྗེས་མཛད་པའི་ལས་དང་པོའི་ཚོགས་སོག་བྱ་བའི་རིམ་པ་མདོར་བསྡུས་པ་རྫོགས་སོ།།