རྒྱུད་སྣ་ཚོགས་ལས་བཏུས་པའི་གཏོར་མའི་ཆོ་ག།
ཀླུ་སྒྲུབ།
རྒྱ་གར་སྐད་དུ། ནཱ་ནཱ་ཏནྟྲ་ཨུདྡྷྲྀ་ཏོ་བ་ལིཾ་བི་དྷིཿ། བོད་སྐད་དུ། རྒྱུད་སྣ་ཚོགས་ལས་བཏུས་པའི་གཏོར་མའི་ཆོ་ག །ཨོཾ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཡེ་ཤེས་ལྔ་ཡི་རང་བཞིན་ཅན། །སྐུ་མཆོག་རང་གི་སྣང་བས་འཁྱུད། །སྐྱོབ་པ་མ་ལུས་སྤྲོ་མཛད་པ། །རྡོ་རྗེ་སེམས་དཔའ་ཕྱག་འཚལ་ནས། །དེ་བཞིན་གཤེགས་རྣམས་རབ་སྟེར་བ། །ལྷ་མོ་ཆོས་དབྱིངས་དབང་ཕྱུག་མ། །མ་ལུས་རྒྱལ་བ་རྣམས་ཀྱི་ཡུམ། །འགྲོ་བ་སྐྱོབ་ལ་རབ་བཏུད་ནས། །གང་གི་སྐུ་དྲིན་ཆེན་པོ་ཡིས། །གསུང་ནི་བླ་མེད་ཐོབ་འགྱུར་བ། །འཇམ་པའི་དབྱངས་ཀྱི་ཞབས་པདྨ། །ཆུ་སྐྱེས་གཉིས་ལ་ཕྱག་འཚལ་ལོ། །གང་གིས་རེག་པས་འཁོར་བ་ཡི། །གདུང་བ་དག་ནི་ཞི་འགྱུར་བ། །བླ་མའི་ཞལ་སྔ་ནས་ཀྱི་ཞབས། །པདྨ་དང་འབྲེལ་རྡུལ་བསྟོད་ནས། །སེམས་ཅན་རྣམས་ལ་ཕན་པའི་ཕྱིར། །གཏོར་མའི་སྒྲུབ་ཐབས་བདུད་རྩི་མཚུངས། །སྣ་ཚོགས་རྒྱུད་ཀྱི་རྒྱ་མཚོ་ལས། །ཡང་དག་བཏུས་ནས་བདག་གིས་བཤད། །སྔོན་གྱི་དུས་སུ་བཅོམ་ལྡན་གྱིས། །ཞལ་གྱི་མན་ངག་གསུངས་པར་གྱུར། །དེ་ཙམ་ཁོ་ནས་སེམས་ཅན་རྣམས། །གྲུབ་གྱུར་གླེགས་བ་མ་དག་ལས་མིན། །དེ་ནས་གསུམ་ལྡན་དུས་གྱུར་ནས། །རྩ་བའི་རྒྱུད་རྣམས་སྤེལ་བར་འགྱུར། །དེ་ལས་དོན་གྱི་འབྲེལ་རྟོགས་ནས། །བསམས་ཏེ་སྐྱེ་བོས་དངོས་གྲུབ་ཐོབ། །གཉིས་ལྡན་དུ་ནི་གཙོར་རྒྱལ་བས། །བཤད་པ་རྒྱ་ཆེན་མཛད་པར་འགྱུར། །དེ་དོན་རྟོགས་
པ་ཉིད་ཀྱིས་ནི། །མཁས་པས་དངོས་གྲུབ་ཐོབ་པར་འགྱུར། །རྩོད་པའི་དུས་གྱུར་དེང་སང་ནི། །གསུང་རབ་ཡན་ལག་བཅུ་གཉིས་པོ། །བཅོམ་ལྡན་འདས་ཀྱིས་མང་དུ་གསུངས། །འོན་ཀྱང་སྐྱེ་བོ་ཞི་མི་གྱུར། །ཅི་ཕྱིར་འདི་ལྟར་སེམས་ཅན་རྣམས། །རྟག་ཏུ་ཚེ་དང་བརྩོན་འགྲུས་ཆུང༌། །ཆགས་སོགས་ཉོན་མོངས་གདུང་བ་ཡིས། །རྟག་ཏུ་རང་གི་སེམས་གདུངས་གྱུར། །རང་གི་ལྟོ་བ་དག་ལ་བརྩོན། །འབའ་ཞིག་ལྷུར་ལེན་ཡིད་ལྡན་པ། །རྒྱལ་པོ་མཉེས་སོགས་བྱ་བ་དག །ཐོ་རངས་ལངས་ནས་སྤྱོད་པ་བྱེད། །ནང་བར་བཤད་གཅིག་དག་གིས་ཏེ། །ཉི་མ་ཕྱི་འཕྲེད་ཟས་སྐོམ་གྱིས། །ཚིམ་ནས་འདོད་པས་གནོད་འགྱུར་ཏེ། །སྐྱེ་བོ་མཚན་མོ་གཉིད་ཀྱིས་སོ། །རེ་ཞིག་ལོ་ནི་བརྒྱ་ཐུབ་པ། །ཚེ་ཡི་མཆོག་ཏུ་བརྗོད་པར་བྱ། །སེམས་ཅན་དེ་དག་ཉིད་ཀྱིས་ནི། །ཕྱེད་ནི་ཡོངས་སུ་ཟད་བར་འགྱུར། །བྱིས་པ་རྒས་པ་ནད་རྣམས་ཀྱིས། །དེ་ལས་ཀྱང་ནི་ཕྱེད་ཟད་འགྱུར། །ཚེ་ཡི་ཆ་ཤས་ལྷག་མ་ཡི། །ནང་དུ་དགེ་བ་ཇི་སྙེད་བྱེད། །འོན་ཀྱང་གལ་ཏེ་དགེ་བ་ཡི། །ལས་ལ་བརྩོན་འགྲུས་དང་བཅས་འགྱུར། །སངས་རྒྱས་ཉིད་ནི་འཐོབ་འགྱུར་ན། །དེ་མིན་གཞན་གྱི་དབང་གྱུར་པས། །འདོད་ངན་ཁ་ཅིག་བུད་མེད་ཀྱི། །དབང་པོའི་ཆུ་སྒོ་ཉམ་ང་རུ། །ལྷུང་བར་གྱུར་ན་འཁོར་བ་ཡི། །རྒྱ་མཚོར་རབ་ཏུ་ནུབ་པར་འགྱུར། །ཆོས་ཀྱི་ལམ་ལས་ཡོངས་ཉམས་ཤིང༌། །སྐད་ཅིག་ལོངས་སྤྱོད་ལ་བསྐུལ་བརྩོན། །རང་ཉིད་ཉམས་པའི་གྲོགས་ངན་གྱིས། །ཁ་ཅིག་རྣམ་པར་ཉམས་པར་འགྱུར། །ཁ་ཅིག་ཚོལ་བའི་སྡུག་བསྔལ་ཉེན། །བཟའ་བཏུང་དག་ནི་བཙལ་བའི་ཕྱིར། །རྨོངས་པ་འབད་པ་དང་ལྡན་པས། །ཕྱོགས་བཅུ་དག་ཏུ་འཁྱམས་པར་འགྱུར། །ཉིན་མཚན་གཉིད་ནི་མི་ལོག་ཅིང༌། །རྒྱལ་པོ་མཉེས་སོགས་ཉོན་མོངས་ཀྱིས། །ཡོངས་གདུངས་པ་ཡི་སེམས་ལྡན་པ། །གཞན་དག་འབྲས་བུ་མེད་པར་འགྱུར། །དེ་ལྟར་སེམས་ཅན་རྣམ་དཔྱད་ནས། །རྟག་ཏུ་མི་ཁོམ་པ་ཡི་ཚོགས། །བརྩོན་འགྲུས་མི་ལྡན་དེ་བས་ན། །བདག་གིས་ངལ་འདི་འབྲས་བུར་བཅས། །སེམས་ཅན་ལ་ནི་ཕན་འདོད་པས། །རྟོགས་པར་སླ་ཞིང་གཞུང་ཉུང་ལ། །
རབ་ཏུ་དོན་མང་ཡིད་འོང་བ། །གཏོར་མའི་ལས་ཀྱི་ཆོ་ག་བཤད། །འདི་ན་ཁ་ཅིག་ཕྱོགས་སྔ་མ། །རབ་ཏུ་བྱེད་པ་འདི་ལྟ་སྟེ། །ཆོས་རྣམས་དག་ནི་མ་སྐྱེས་ཤིང༌། །གཉིས་ཀྱིས་སྟོང་ལ་སྔགས་རིག་པས། །ཇི་ལྟར་གཏོར་སྤྱིན་གང་ཞིག་ལ། །ཡང་དག་པར་ནི་བགེགས་གང་ཡོད། །བྱུང་ནས་རབ་ཏུ་ཞིག་འགྱུར་ན། །སྔགས་ཀྱིས་གང་ཞིག་རབ་རྒྱས་བྱེད། །རང་བཞིན་གྱིས་ནི་སྐལ་བ་ཡི། །ལྷ་ཆོགས་རྣམས་ལ་གཏོར་མ་ནི། །དེ་ཉིད་རིག་པས་ཇི་ལྟར་གཏང༌། །དེ་རྣམས་དེ་ནི་ཇི་ལྟར་ཟ། །མཚན་མ་གཅིག་སོགས་གནས་སུ་ནི། །གཏོར་མ་ཇི་ལྟར་དོར་བར་བྱ། །གཞན་དུ་མིན་ཞིང་དེར་གཏོར་ཡང༌། །དེ་རྣམས་ཀྱིས་དེ་ཇི་ལྟར་འཁྱེར། །གཞན་ཡང་ཤིན་ཏུ་ཉུང་བ་ཡི། །ཆུ་དང་བཟའ་བ་ལ་སོགས་པས། །ནམ་མཁའ་དང་མཚུངས་གྲངས་མེད་པའི། །འབྱུང་པོ་ཀུན་ནི་ཇི་ལྟར་ཚིམ། །ཡི་དགས་ལ་སོགས་གང་འགའ་ཞིག །ཁྲག་གི་བཏུང་བ་འཐུང་བྱེད་པ། །སྔགས་པས་གཏོར་མ་ཙམ་གྱིས་ནི། །དེ་དག་ཇི་ལྟར་མགུ་བར་འགྱུར། །གཟོད་ནས་མ་སྐྱེས་རྫོགས་བྱང་ཆུབ། །ཐོབ་པའི་སྐྱོབ་པ་རྣམས་དང་ནི། །མཁའ་འགྲོ་མ་དང་དེ་རྣམས་ལ། །གཏོར་སྤྱིན་རིགས་པ་ཅི་ཞིག་ཡོད། །དེ་ཙམ་གྱིས་ནི་མཉེས་གྱུར་ནས། །བསྐལ་པ་མང་པོར་རྣལ་འབྱོར་པ། །ཐོབ་འགྱུར་འདོད་པའི་དངོས་གྲུབ་གང༌། །མི་རྣམས་ལ་ནི་ཇི་ལྟར་སྟེར། །འདིར་ནི་བརྗོད་བྱ་རང་བཞིན་གྱིས། །ཆོས་རྣམས་རེ་ཞིག་བདག་མེད་ཅིང༌། །སྒྱུ་མ་སྨིག་རྒྱུ་དྲི་ཟ་ཡི། །གྲོང་ཁྱེར་དང་ནི་རྨི་ལམ་མཚུངས། །འོན་ཀྱང་སངས་རྒྱས་རྣམས་ཀྱིས་ནི། །འགྲོ་འདི་བདེན་པ་གཉིས་སུ་བསྟན། །རྣམ་རྟོག་དང་བཅས་ཅིག་ཤོས་ལས། །ཀུན་རྫོབ་དང་ནི་དོན་དམ་མོ། །ཆོས་ཉིད་ལ་ནི་རབ་ཞུགས་པ། །གཉིས་མེད་རེག་པའི་རྣལ་འབྱོར་པས། །རེ་ཞིག་གཏོར་མ་དག་གི་ལས། །དམ་པའི་དོན་དུ་ཇི་ལྟར་བྱ། །འོན་ཀྱང་ཀུན་རྫོབ་ཕྱོགས་བརྟེན་ནས། །བསོད་ནམས་ཚོགས་ནི་འཕེལ་བྱའི་ཕྱིར། །དེ་ལ་དང་པོའི་ལས་ཅན་གྱིས། །གཏོར་མའི་ལས་ནི་བྱ་བ་ཡིན། །དེ་ཉིད་ཀྱི་ནི་རིམ་གྱིས་འདིར། །བགེགས་རྣམས་ཀུན་དུ་འབྱུང་བ་ཡོད། །དེ་བས་དེ་རབ་ཞི་བྱའི་ཕྱིར། །མཁས་པ་རྣམས་ཀྱིས་གཏོར་མ་
བསྔགས། །དངོས་རྣམས་སྐད་ཅིག་ཉིད་ཡིན་ཡང༌། །སྔགས་རྣམས་ལ་ནི་ནུས་པ་ཡོད། །དུག་འཇོམས་པ་ཡི་སྔགས་བཞིན་དུ། །དེ་དག་མངོན་སུམ་ཉིད་དུ་འགྲུབ། །སྔགས་རྣམས་ནུས་པ་འདི་འདྲ་སྟེ། །མི་སྣང་ལྷ་ཚོགས་གང་ཡིན་པ། །དེ་ཉིད་རེ་ཞིག་སྤྱན་དྲངས་པས། །མིག་གི་མངོན་སུམ་ཉིད་དུ་འགྱུར། །ཤིང་གཅིག་དྲུང་ལ་སོགས་པ་ཡང༌། །དངོས་གྲུབ་གནས་སུ་བཅོམ་ལྡན་གསུངས། །དེས་ན་རྣམ་པ་དེ་ལྟ་བུ། །གཏོར་མའི་གནས་སུ་གསུངས་པར་གྱུར། །ལྷ་རྣམས་རང་མཐུས་གཏོར་མ་ལས། །རོ་དག་མྱོང་བར་བྱེད་པ་ཉིད། །དེས་ན་སྣང་བར་གྱུར་ཀྱང་ནི། །ཉེས་པ་ཡོད་པ་མ་ཡིན་ནོ། །གཞན་ཡང་དངོས་གྲུབ་མཆོག་ཐོབ་བའི། །རྣལ་འབྱོར་ལག་ནས་གཏོར་མ་ནི། །བླངས་ན་ལྷ་རྣམས་ཟ་བར་བྱེད། །ནགས་སུ་ཀླུ་ཡི་བྱང་ཆུབ་བཞིན། །སྔགས་ཀྱིས་བདུད་རྩི་ལྔར་བྱས་ནས། །མཁས་པ་རྣམས་ཀྱིས་གཏོར་མ་གཏོང༌། །དེ་ཡི་མཐུ་ཡིས་ལྷ་ཚོགས་རྣམས། །མཉེས་འགྱུར་ཆུང་བའི་ཉེས་པ་མེད། །ཟང་ཟིང་ལ་སོགས་རབ་དབྱེ་བ། །དེ་བཞིན་གཤེགས་པས་སྦྱིན་རྣམ་བཞི། །གསུངས་ཏེ་དེ་བས་ཡི་དགས་ཀྱི། །གཏོར་མ་ལ་ནི་ཆོས་བཤད་གྱུར། །འདི་ལྟར་འདམ་གྱིས་རྙོགས་པ་དང༌། །བྲལ་བའི་ཆུ་བོ་དག་གི་རྒྱུན། །མཐོང་ནས་ཀྱང་ནི་ཁྱེད་རྣམས་ཁྲག །ལག་པ་དག་གིས་ཅི་ཕྱིར་འཐུང༌། །དེས་ན་མ་བྱིན་བླངས་པ་ཡིས། །འདི་ཡི་རྣམ་སྨིན་མི་བཟད་ཡིན། །དེ་བས་ཚིམ་བྱེད་གཏོར་མ་འདི། །ཁྱེད་རྣམས་ཀྱིས་ནི་བླང་བར་གྱིས། །དེ་ལྟར་རིམ་པ་འདི་བཞིན་དུ། །རྣལ་འབྱོར་པ་འདིས་ཡི་དགས་རྣམས། །ཆོས་འདོད་པར་ནི་དེ་བས་སྐྱོན། །ཅུང་ཟད་ཙམ་ནི་ཡོད་མ་ཡིན། །བཅོམ་ལྡན་འདས་དང་མ་མོ་ལ། །ཅུང་ཟད་དོགས་པ་མེད་མོད་ཀྱི། །འོན་ཀྱང་བསོད་ནམས་ཚོགས་དག་ལ། །དང་པོའི་ལས་ཅན་བསྐུལ་བར་བྱ། །རིམ་གྱིས་ཡེ་ཤེས་ཚོགས་དག་ཀྱང༌། །ཐོབ་ནས་རྣལ་འབྱོར་པ་དག་ནི། །རྫོགས་པའི་བྱང་ཆུབ་སྡོད་འགྱུར་ཏེ། །དེས་ན་དངོས་གྲུབ་ཅིས་མི་འཐོབ། །གྲངས་མེད་བསྐལ་བས་བྱང་ཆུབ་ནི། །ཐོབ་འགྱུར་འདི་ནི་བདེན་མོད་ཀྱང༌། །ཐབས་དང་མ་ཚང་ཉིད་གྱུར་པ། །རིམ་
འདི་ཐེག་པ་ཆེན་པོ་ཡིན། །སྔགས་ཚུལ་ཆེན་པོའི་རྣལ་འབྱོར་པས། །སྐད་ཅིག་གིས་ངེས་པ་རུ། །རྡོ་རྗེ་འཆང་ནི་ཆེན་པོའི་གནས། །ཐོབ་འགྱུར་བློ་ཡི་ཁྱད་པར་གྱིས། །དེ་ལྟར་ཕྱོགས་རྣམས་བརྩམས་ནས་ནི། །གཏོར་མའི་ཆོ་གའི་གཞུང་ལུགས་འགྲུབ། །ཡང་དག་བྱང་ཆུབ་འདོད་རྣམས་ཀྱིས། །དེ་ཡང་མགུ་བར་བྱ་བ་ཡིན། །ཉིན་དང་མཚན་དུ་རྣལ་འབྱོར་པས། །དེ་ཐུན་གསུམ་མམ་བཞི་དག་ཏུ། །བསོད་ནམས་ཚོགས་དང་ཡེ་ཤེས་ཀྱི། །ཚོགས་ནི་སྤེལ་ཕྱིར་བྱ་བ་ཡིན། །ཚོགས་ཀྱི་འཁོར་ལོའི་ཆོ་ག་གང༌། །དེ་ནི་གཏོར་མ་ཆེན་པོར་བཤད། །གང་ཕྱིར་དཀྱིལ་འཁོར་འཁོར་ལོ་ཡི། །རྣམ་པ་དང་བཅས་རབ་མཉེས་ཕྱིར། །རེ་ཞིག་དེ་ཡི་རིམ་པ་འདི། །ཇི་ལྟར་དཀྱིལ་འཁོར་འཁོར་ལོ་ཡི། །ཕྱི་རོལ་མཁས་པས་ཚིམ་བྱ་བ། །མཁས་པ་རྣམས་ཀྱིས་མཉེན་པར་གྱིས། །རེ་ཞིག་དང་པོ་རྣལ་འབྱོར་བས་རང་གི་འདོད་པའི་ང་རྒྱལ་དང་ལྡན་པས་དང་པོ་སྦྱོར་བ་ལ་སོགས་པའི་ཏི་ང་ངེ་འཛིན་གྱི་བར་ལ་ལངས་ཏེ། །སྔར་བསྡུས་པ་པུལླཱི་ར་མཱ་ལ་སོགས་པ་གནས་ཉི་ཤུ་རྩ་བཞིའི་མཁའ་འགྲོ་མའི་འཁོར་ལོ་སྣ་ཁུང་གཡས་པ་དང་གཡོན་པའི་སྲོག་དང་རྩོལ་བས་བསྐུལ་བ་ཇི་ལྟ་བ་བཞིན་དུ་རྗེས་སུ་འོད་ཟེར་སྤྲོ་བའི་སྦྱོར་བ་སའི་རྡུལ་ཚོན་ལ་སོགས་པས་སྤྲུལ་པའི་ཕྱི་རོལ་གྱི་དཀྱིལ་འཁོར་འཁོར་ལོར་སོ་སོའི་གནས་སུ་རྣམ་པར་སྤྲོས་ཏེ་བཀོད་ལ་མཆོད་པའི་ཆོ་གའི་རིམ་པ་བཞིན་དུ་ཡང་དག་པར་མཆོད་དེ་གཏོར་མའི་ལས་བྱའོ། །དེ་ལ་རེ་ཞིག་དང་པོ་དཀྱིལ་འཁོར་གྱི་ཕྱི་རོལ་ན་གནས་པའི་ལྷ་དང༌། ཀླུ་དང༌། གནོད་སྦྱིན་དང། འབྱུང་པོ་རྣམས་ལ་རིམ་པ་འདིས་གཏོར་མ་སྦྱིན་པར་བྱའོ། །དེ་ལ་འཇིག་རྟེན་པའི་ལྷ་རྣམས་དཀྱིལ་འཁོར་གྱི་ཕྱི་རོལ་དུ་རྣམ་པར་དགོད་པའི་རིམ་པ་ནི་འདི་ཡིན་ཏེ། ནང་གི་དཀྱིལ་འཁོར་ལས་ཕྱི་རོལ་གྱི་རྡོ་རྗེའི་ར་བ་ལས་ཕྱི་རོལ་གྱི་ཤར་དུ་དུར་ཁྲོད་མ་དང༌། དྲ་མི་ཏྲི་དང༌། གཏུམ་མོ་བདུད་རྩིའི་ཆུའི་སྣོད་ལག་ན་ཐོགས་པ་དཀར་མོ་དང༌། སེར་མོ་དང༌། དམར་མོའི་བདག་ཉིད་ཅན་དགོད་པར་བྱའོ། །བྱང་དུ་དྲག་མོ་དང༌། ཁྲག་མ་དང༌། ཤ་ཟ་མ་ལྕགས་ཀྱུ་ལྔས་གང་བའི་སྣོད་ལག་ན་ཐོགས་པ་སེར་མོ་དང་དཀར་མོ་དང༌། དམར་མོའི་མདོག་ཅན་རྣམས་སོ། །ནུབ་
ཏུ་མི་བཟད་མ་དང༌། འབར་མ་དང༌། འཇིགས་རུང་མ་ལག་ན་གཏོར་མའི་སྣོད་ཐོགས་པ་དམར་མོ་དང༌། སེར་མོ་དང༌། སྔོན་མོའི་མདོག་ཅན་རྣམས་སོ། །ལྷོ་རུ་ཐོད་པ་མོ་དང༌། རྡེ་རྗེ་མ་དང༌། བུམ་པ་མ་བཟའ་བ་དང་བཏུང་བ་ལ་སོགས་པས་གང་བའི་སྣོད་ཐོགས་པ་ནག་མོ་དང༌། དམར་མོ་དང༌། དཀར་མོའི་མདོག་ཅན་རྣམས་སོ། །དབང་ལྡན་གྱི་ཕྱོགས་སུ་སྒེག་མོ་དང༌། དྲི་མ་དཀར་མོ་དང༌། སེར་མོའི་མདོག་གོ །མེའི་ཕྱོགས་སུ་པི་ཝང་མ་དང༌། མེ་ཏོག་མ་དཀར་མོ་དང༌། ནག་མོའི་མདོག་ཅན་རྣམས་སོ། །བདེན་བྲལ་གྱི་ཕྱོགས་སུ་གླུ་མ་དང། བདུག་པ་མ་ནག་མོ་དང༌། དམར་མོ་དག་གོ །རླུང་གི་ཕྱོགས་སུ་གར་མ་དང༌། མར་མེ་མ་དམར་མོ་དང༌། སེར་མོ་དག་གོ །དེ་དག་ཐམས་ཅད་འབར་བའི་ཕྲེང་བས་ཁྱབ་པའི་འོང་དང་ལྡན་པ། སྐྲ་བཤིག་པ་སྤྲུལ་རྣམས་ཀྱིས་བརྒྱན་པ། གོས་དང་རྒྱན་སྣ་ཚོགས་ཀྱིས་ང་རྒྱན་པ་བཟང་པོའི་འདུག་སྟངས་ཀྱིས་གནས་པ་རྣམས་སོ། །དེ་ནས་ཕྱི་རོལ་གྱི་ས་གཞིའི་གཡས་ཕྱོགས་ནས་བསྐོར་བར་འཆད་པར་འགྱུར་བའི་གཏོར་མའི་སྔགས་ཀྱི་རྗེས་སུ་འབྲངས་ནས་ཞིང་སྐྱོང་བརྒྱད་ཡོངས་སུ་བརྟག་སྟེ། ཕྱོགས་བརྒྱད་དུ་དྲག་པོ་ནག་པོ་ལ་སོགས་པ་ཞིང་གི་བདག་པོ་རྣམས་བློ་ཡིས་དགོད་པར་བྱའོ། །དེ་ལ་རིམ་པ་འདི་ཡིན་ཏེ། ཤར་དུ་དྲག་པོ་ནག་པོ། བྱང་དུ་དྲག་པོ་ཆེན་པོ། ནུབ་ཏུ་ལྷ་སྦྱིན། ལྷོ་རུ་དྲག་པོ། དབང་ལྡན་གྱི་ཕྱོགས་སུ་གཙིགས་པ། མེའི་ཕྱོགས་སུ་འཇིགས་སུ་རུང་བ། བདེན་བྲལ་གྱི་ཕྱོགས་སུ་རྣོན་པོ། རླུང་གི་ཕྱོགས་སུ་ལོག་འདྲེན་ཏེ་དེ་དག་ཐམས་ཅད་ཀྱང་མིག་གསུམ་པ། ལག་པ་བཞི་པ། གདོང་གཅིག་པ། ཇི་སྐད་བཤད་པའི་ཕྱག་མཚན་དང་གོས་དང་རྒྱན་གྱིས་བརྒྱན་པ་ནག་པོ་དང་སེར་པོ་དང་དཀར་པོ་དང་དམར་པོའི་མདོག་ཅན་དང༌། དབང་ལྡན་ལ་སོགས་པའི་མཚམས་རྣམས་ཀྱི་ནི་དཀར་ནག་དང༌། དཀར་སེར་དང༌། དམར་སེར་དང༌། དམར་ནག་རྣམས་ཏེ་འཁོར་དང་བཅས་པ་དག་གོ །ནག་པོ་དྲག་པོའི་མདུན་དུ་ཙཱ་མུཎྜཱི། གཡོན་དུ་དྲག་མོ། རྒྱབ་ཏུ་འཇིགས་སུ་རུང་མ། གཡས་སུ་ལྷ་མོ་ཨུ་མ་བསམ་པར་བྱའོ། །ལྷ་མོ་དེ་དག་ཀྱང་མཁའ་འགྲོ་མ་ལ་
སོགས་པའི་མདོག་ཅན་མཆོད་པ་རྣམ་པ་ལྔ་ལ་སོགས་པས་ལག་པ་བྲེལ་བ་མཆོད་པ་རྣམ་པ་ལྔ་ཁོ་ནས་ཡང་དག་པར་མཆོད་པར་བྱེད་པའོ། །དེ་བཞིན་དུ་བྱང་དུ་རྒྱལ་མ་དང༌། རྣམ་པར་རྒྱལ་མ་དང༌། རྒྱལ་བྱེད་མ་དང༌། གཞན་གྱིས་མི་ཐུབ་མ་ཞེས་བྱ་བ་དྲག་པོ་ཆེན་པོའི་འཁོར་རྣམས་ཏེ་ཐུགས་ཀྱི་འཁོར་ལོའི་མཁའ་འགྲོ་མ་རྣམས་ཀྱི་མདོག་ཅན་ནོ། །དེ་བཞིན་དུ་ནུབ་ཏུ་ནག་མོ་ཆེན་མོ་དང༌། ནག་མོ་སྦོམ་མ་དང༌། རྣལ་འབྱོར་མ་དང༌། ལྷ་སྦྱིན་གྱི་མཁའ་འགྲོ་མ་གསུང་གི་འཁོར་ལོའི་མཁའ་འགྲོ་མའི་མདོག་ཅན་རྣམས་བསམ་པར་བྱའོ། །དེ་བཞིན་དུ་ལྷོ་རུ་དབང་མ་དང༌། ཟླ་བ་མ་དང༌། དྲག་མོ་དང༌། གདུག་པ་ཞི་བྱེད་མ་དང༌། འཕྱང་མ་དང༌། ལྷའི་དབང་ཕྱུག་མ་ཞེས་བྱ་བ་ནག་མོའི་ལྷ་མོ་སྐུའི་འཁོར་ལོའི་མཁའ་འགྲོ་མའི་མདོག་ཅན་རྣམས་སོ། །དབང་ལྡན་གྱི་ཕྱོགས་སུ་ཀམ་པོ་ཛི་མ་དང༌། འབར་མ་དང༌། འཇིབ་མ་དང༌། གྲོང་ན་ཀུན་དུ་གནས་པའི་རྣལ་འབྱོར་མ་གཙིགས་པའི་མ་ཁའི་འགྲོ་མ་ཁྭཱི་གདོང་ཅན་མའི་མདོག་ཅན་རྣམས་སོ། །མེའི་ཕྱོགས་སུ་དྲག་པོའི་གཟུགས་ཅན་མ་དང༌། མཆེ་བའི་གཟུགས་ཅན་མ་དང༌། གཙིགས་མ་ཞེས་བྱ་བ་འཇིགས་སུ་རུང་བའི་མཁའ་འགྲོ་མ་འུག་པའི་གདོང་ཅན་མའི་མདོག་ཅན་རྣམས་སོ། །བདེན་བྲལ་གྱི་ཕྱོགས་སུ་ཐོད་པའི་ཕྲེང་བ་ཅན་མ་དང༌། ཕྲེང་ལྡན་མ་དང༌། མགོ་ཅན་མ་དང༌། མཐུ་ཆེན་མ་ཞེས་བྱ་བ་རྣོན་པོའི་མཁའ་འགྲོ་མ་ཁྱིའི་གདོང་ཅན་མའི་མདོག་ཅན་རྣམས་སོ། །རླུང་གི་ཕྱོགས་སུ་ལག་ན་རལ་གྲི་མ་དང༌། ལག་ན་དགྲ་སྟ་མ་དང༌། རྡོ་རྗེ་མ་དང༌། ལག་ན་གཞུ་ཐོགས་མ་ཞེས་བྱ་བ་ལོག་འདྲེན་གྱི་མཁའ་འགྲོ་མ་ཕག་གི་གདོང་ཅན་མའི་མདོག་ཅན་རྣམས་སོ། །དེ་ནས་ཤར་གྱི་སྒོར་ཁྱབ་འཇུག་དབྱིག་པ་ཐོགས་པ། ལྷོར་ཚངས་པ་རྔ་ཡབ་ཐོགས་པ། ནུབ་ཏུ་དྲག་པོ་མཚན་ནས་སྒྲོགས་པ་ལྷུར་ལེན་པ། བྱང་དུ་དབང་པོ་གདུགས་ཐོགས་པ། དེ་བཞིན་དུ་ལྷོའི་སྣམ་བུ་ལ་དབང་ལྡན་གྱི་ཕྱོགས་སུ་བརྒྱ་བྱིན། མེའི་ཕྱོགས་སུ་ལུས་ངན་པོ། བདེན་བྲལ་གྱི་ཕྱོགས་སུ་འབྱུང་པོའི་བདག་པོ། ཀླུའི་ཕྱོགས་སུ་རླུང་གི་བདག་པོའོ། །དེ་རྣམས་བུ་དང་ཆུང་མ་དང་འཁོར་དང་བཅས་པ་
སྟེ། ཁ་དོག་དང་ལག་པ་དང་ཕྱག་མཚན་ནི་སྒྲུབ་ཐབས་གཞན་གྱི་རྗེས་སུ་འབྲང་བར་བྱའོ། །དེ་ལ་ཕྱི་རོལ་གྱི་ཁྱམས་ཀྱི་ཤར་གྱི་ཆར་རུས་གོང་འཇིགས་བྱེད་དང༌། ཁ་ཊྭཱཾ་ག་དང་ལྡན་པའི་ཚོགས་ཀྱི་སྲིན་པོ་དང༌། ཚོགས་ཀྱི་དབང་ཕྱུག་དང༌། དྲིལ་བུའི་རྣ་བ་ཅན་ཞེས་བྱ་བ་མཁའ་འགྲོ་མ་ལ་སོགས་པའི་མདོག་ཅན་རྣམས་བསམ་པར་བྱའོ། །དེ་བཞིན་དུ་བྱུང་དུ་གཏུམ་མོའི་དབང་ཕྱུག་དང༌། འདུ་ན་སའི་ལྷ་དང༌། རྒན་པོའི་དབང་ཕྱུག་དང༌། སིལ་སྒྲ་ས་འཇིགས་བྱེད་ཅེས་བྱ་བ་ལ་སོགས་པའི་མདོག་ཅན་རྣམས་སོ། །ལྷོ་རུ་ནི་གཏུམ་བུ་རའི་དབང་ཕྱུག་དང༌། སྒྲ་ཆེན་དང༌། མཆེ་བ་གཙིགས་པ་དང༌། གཞུ་འཛིན་ཞེས་བྱ་བ་ཀམ་པོ་ཛི་མ་ལ་སོགས་པའི་མདོག་ཅན་རྣམས་སོ། །དེ་བཞིན་དུ་ནུ་བ་ཏུ་ནི་འདོད་པ་དྲག་པོ་དང༌། གནས་ཀྱི་དབང་ཕྱུག་དང༌། ཅད་ཏེའུ་འདུལ་བ་དང༌། རྔའི་སྒྲས་འཇིགས་བྱེད་ཅེས་བྱ་བ་འཇིག་བྱེད་མ་ལ་སོགས་པའི་མདོག་ཅན་རྣམས་སོ། །འདི་རྣམས་ཀྱང་ལག་པ་བཞི་པ་ཁ་ཊྭཱཾ་ཐོགས་པ་ལྷ་མོ་ལ་ཁྱུད་ཅིང་ལག་ན་རྩེ་གསུམ་ཐོགས་པ་མིག་གསུམ་པ་སྟག་གི་པགས་པའི་ཤམ་ཐབས་ཅན་སྦྲུལ་གྱི་རྒྱན་གྱིས་བརྒྱན་པ་ཐོང་པའི་ཕྲེང་བ་ཅན་རྣམས་སོ། །དེ་ནས་ཕྱི་རོལ་གྱི་མུ་ཁྱུད་ཀྱིས་གཞི་ལ་འབྱུང་པོ་དང༌། ཤ་ཟ་ལ་སོགས་པ་ཅ་ཅོའི་སྒྲ་སྒྲོགས་པ་རྣམས་དང༌། དེ་དག་གི་འཁོར་རྣམས་ཀྱང་བལྟ་བར་བྱའོ། །དྲག་པོ་ལ་སོགས་པ་དང༌། རུས་གོང་འཇིགས་བྱེད་ལ་སོགས་པ་རྣམས་ཀྱི་ཆོས་ཀྱི་ཡི་གེ་ནི་རང་གི་མིང་གི་དང་པོའི་ཡི་གེ་དེ་ཁོ་ན་ཡིན་ནོ། །རྡོ་རྗེ་ཁུ་ཚུར་གཉིས་བཅིངས་ཏེ་གུང་མོ་དང་མཛུབ་མོ་དག་བརྐྱང་ནས་ལྕགས་ཀྱུའི་རྣམ་པར་སྦྱར་བར་བྱའོ། །ཨོཾ་ཨཱ་ཀཪྵ་ཡ་ཧཱུཾ་ཕཊ་ཅེས་བྱ་བ་ནི་འཇིག་རྟེན་པའི་ལྷ་རྣམས་སྤྱན་དྲང་བའི་སྔགས་སོ། །ཨོཾ་ཡུཾ་སྭཱ་ཧཱ་ཞེས་བྱ་བ་དང༌། རྩེ་གསུམ་གྱི་ཕྱག་རྒྱ་ནི་དུར་ཁྲོད་མ་ལ་སོགས་པ་རྣམས་ཀྱི་དམ་ཚིག་གི་ཕྱག་རྒྱ་དང་སྔགས་སོ། །ཐལ་མོ་སྦྱར་ནས་དེ་ཉིད་གཡས་སུ་ཕབ་སྟེ་གཟུང་བར་བྱ་ཞིང༌། ཨོཾ་གྷྲཾ་སྭཱ་ཧཱ་བྱ་བ་ནི་དྲག་མོ་ལ་སོགས་པ་རྣམས་ཀྱིའོ། །རྡོ་རྗེ་ཐལ་མོ་བཅིངས་ནས་དབྱེ་བར་བྱ་ཞིང༌། ཨོཾ་ཀུ་རུ་ཀུ་རུ་སྭཱ་ཧཱ་ཞེས་བྱ་བ་ནི་གཙིགས་མ་ལ་སོགས་པ་རྣམས་ཀྱིའོ། །ལག་པ་གཡས་
པ་བརྐྱང་ནས་རྒྱབ་གཉིས་སྦྱར་ཏེ་སོར་མོ་རྣམས་སོ་སོར་བཅིངས་ཞིང༌། ཨོཾ་བེ་ཏཱ་ལཱི་ཧཱུཾ་སྭཱ་ཧཱ་ཞེས་བྱ་བ་ནི་མི་བཟད་མ་ལ་སོགས་པ་རྣམས་ཀྱིའོ། །རྡོ་རྗེ་ཁུ་ཚུར་གཉིས་བཅིངས་ཏེ་དཀུ་དག་ཏུ་གཟུང་ཞིང༌། ཨོཾ་ཧཱུཾ་སྭཱ་ཧཱ་ཞེས་བྱ་བ་ནི་སྒེག་མོའི་འོ། །གཡོན་པ་བརྐྱང་སྟེ་མཐེ་བོང་དང་སྲིན་ལག་སྦྱར་ནས་གཡས་པས་གཟུང་བར་བྱ་ཞིང༌། ཨོཾ་སུ་པྲི་ཡ་གནྡྷེ་ཧཱུཾ་ཞེས་བྱ་བ་ནི་དྲི་མའི་འོ། །པི་ཝང་གི་ཟློས་གར་དང༌། ཨོཾ་ཧཱུཾ་ཧོ་སྭཱ་ཧཱ་ཞེས་བྱ་བ་ནི་པི་ཝང་མའི་འོ། །ཐལ་མོ་སྦྱར་བ་སྤྱི་བོར་གཞག་ནས། ཨོཾ་ཤྲཱི་སྭཱ་ཧཱ་ཞེས་བྱ་བ་ནི་མེ་ཏོག་མའི་འོ། །རྡོ་རྗེ་ཁུ་ཚུར་གཉིས་བཅིངས་ནས་མཛུབ་མོ་བསྒྲེངས་ཏེ་ཁར་བསྐྱོད་ནས་ཧཱུཾ་ཧཱུཾ་ཧཱུཾ་སྭཱ་ཧཱ་ཞེས་བྱ་བ་ནི་གླུ་མའི་འོ། །རྡོ་རྗེ་ཁུ་ཚུར་གཉིས་བཅིངས་ཏེ་ལག་པ་བསྐྱོད་པའི་ཚིགས་སུ་གཟུང་ཞིང༌། ཨོཾ་ཨི་སྭཱ་ཧཱ་ཞེས་པ་ནི་བདུག་པ་མའི་འོ། །ལག་པ་གཡོན་པས་གཡས་ཀྱི་རྐེད་པའི་ཆར་སྒེག་པ་དང་བཅས་པར་བཞག་ནས་གཡས་ཕྲག་པར་གཞག་ཅིང༌། ཨོཾ་སུ་ནི་རྟེ་སྭཱ་ཧཱ་ཞེས་བྱ་བ་ནི་གར་མའི་འོ། །བྲལ་མོ་སྦྱར་བ་སྤྱི་བོར་གཟུང་ཞིང༌། ཨོཾ་ཀྵུཾ་སྭཱ་ཧཱ་ཞེས་བྱ་བ་ནི་མར་མེ་མའི་འོ། །གཡས་པ་ཁུ་ཚུར་བཅིངས་ནས་མཛུབ་མོ་དང་གུང་མོ་དག་བསྒྲེངས་ཏེ་དཔྲལ་བར་རེག་པར་བྱ་ཞིང༌། ཨོཾ་མུ་མུ་ཧཱུཾ་སྭཱ་ཧཱ་ཞེས་བྱ་བ་ནི་བརྒྱ་བྱིན་གྱིའོ། །རྡོ་རྗེ་བསྡམས་པ་བཅིངས་ནས་མཛུབ་མོ་གཉིས་རིན་པོ་ཆེའི་རྣམ་པར་སྤྱར་ཞིང༌། ཨོཾ་རཏྣེ་གྲེ་སྭཱ་ཧཱུཾ་ཞེས་བྱ་བ་ནི་ནོར་སྤྱིན་གྱིའོ། །གཡས་པ་རྡོ་རྗེ་ཁུ་ཚུར་བཅིངས་ཏེ་སྡིགས་མཛུབ་བསྒྲེངས་ནས། ཨོཾ་གཱ་ཏ་ནི་ཧཱུཾ་ཕཊ་ཅེས་བྱ་བ་ནི་འབྱུང་བོའི་བདག་པོའི་འོ། །གཡས་པ་ཁུ་ཚུར་བཅིངས་ཏེ། ཨོཾ་བྷུར་བྷུ་བ་སྭཱ་ཧཱ་ཞེས་བྱ་བ་ནི་ཀླུའི་བདག་པོའི་འོ། །རྡོ་རྗེ་ཁུ་ཚུར་སྤྱི་བོར་བཞག་ཅིང༌། ཨོཾ་ཁ་ས་སྭཱ་ཧཱ་ཞེས་བྱ་བ་ནི་ཁྱབ་འཇུག་གིའོ། །གཡས་པའི་བ་དན་གསུམ་སྤྱི་བོར་བཞག་ནས། ཨོཾ་ཧཱུཾ་སྭཱ་ཞེས་བྱ་བ་ནུ་དྲག་པོའི་འོ། །གཡས་པའི་ཁུ་ཚུར་སྙིང་གར་བསྐྱོད་ཅིང། ཨོཾ་སྭཱ་ཧཱ་ཞེས་བྱ་བ་ནི་ཚངས་པའི་འོ། །ལག་པ་གཡས་པ་བརྐྱང་སྟེ་ཁ་སྦུབས་ནས་གཡོན་པའི་ཁུ་ཚུར་གྱི་ཁྲོ་བོའི་སོར་མོ་བརྐྱང་སྟེ་དབུས་སུ་སྦྱར་ཞིང་གདུགས་ཀྱི་རྣམ་པར་བྱས་ནས། ཨོཾ་མུ་སྭཱ་ཧཱ་ཞེས་བྱ་བ་ནི་དབང་པོའི་འོ། །དྲག་པོ་ནག་པོ་ལ་སོགས་པ་རྣམས་དང༌། རུས་གོང་
འཇིགས་བྱེད་ལ་སོགས་པ་རྣམས་ཀྱི་ནི་དྲག་པོའི་དམ་ཚིག་གི་སྔགས་དང་ཕྱག་རྒྱ་ཁོ་ན་ཡིན་ནོ། །དེ་ལ་ལྷ་རྣམ་པར་བཀོད་པའི་རྗེས་ཐོགས་ལ་མཆོད་པ་རྣམ་པ་ཉི་ཤུས་ཡང་དག་པར་མཆོད་དེ། སྒེག་མོའི་ཕྱག་རྒྱ་བཅིངས་ཏེ་ཡི་གེ་ཧཱུཾ་གི་སྒྲ་བརྗོད་ནས། ཧཱུཾ་ཧཱུཾ་ཧཱུཾ་གྷུཾ་ཊུཾ་ཧཱུཾ་ཧཱུཾ་ཧཱུཾ། ཨོཾ་གྷེ་གྷེ་གྷེ་ཧཱུཾ། ཨོཾ་གྷེ་ཏྱ་གྷེ་ཏྱ་ཧཱུཾ་སྭཱ་ཧཱ་ཞེས་བྱ་བའི་སྔགས་འདིས་ཤིན་ཏུ་མཉེས་པར་བྱའོ། །དེ་ནས། རྡོ་རྗེ་དེ་ཉིད་ཀྱིས་བཟུང་ནས། །དྲིལ་བུ་ཆོས་ཀྱིས་དཀྲོལ་བར་བྱ། །རྡོ་རྗེ་ཁུ་ཚུར་གཉིས་བཅིངས་ནས། །རྒྱབ་ཏུ་རྒྱབ་ནི་སྦྱར་བར་བྱ། །མཐེའུ་ཆུང་གཉིས་ནི་བཅིངས་བྱས་ནས། །ཅུང་ཟད་དུ་ནི་བཅིང་བར་བྱ། །ཨོཾ་བཛྲ་གྷ་ཎྜེ་ཧོ། །དེ་ནས་ཨོཾ་བཛྲ་གྷཎྜེ། ར་ཎ་ར་ཎ། པྲ་ར་ཎ་པྲ་ར་ཎ། སཾ་པྲ་ར་ཎ་སཾ་པྲ་ར་ཎ། སརྦ་བུདྡྷེ་ཀྵེ་ཏྲ་པྲ་ཙ་ནི་ཏེ། པྲ་ཛྙཱ་པཱ་ར་མི་ཏཱ་ནཱཾ་སམྦྷ་བེ། བཛྲ་ཧྲྀད་ཡཾ་ས་ནྟོ་ཥ་ནི་ཧཱུཾ་ཧཱུཾ་སྭཱ་ཧཱ་ཞེས་བྱ་བའི་སྔགས་ཀྱིས་དྲིལ་བུ་བཟུང་སྟེ། དཔལ་མཆོག་དང་པོའི་རྒྱུད་ལས་གསུངས་པའི་མཚན་བརྒྱ་རྩ་བརྒྱད་ཀྱིས་ཡང་དག་པར་བསྟོད་ལ་རྡོ་རྗེའི་གླུ་བླངས་ཏེ། དེ་བཞིན་དུ་རྣམ་པ་སྣ་ཚོགས་པའི་བསྟོད་པ་དང་མཆོད་པ་བྱས་ལ། ཡང་དག་པར་མཉེས་པར་བྱ་བའི་ཕྱིར་དྲིལ་བུ་དཀྲོལ་བར་བྱའོ། །དེ་ནས་སྙིང་གར་རྡོ་རྗེ་ཐལ་མོ་བཅིངས་ཏེ་སྙིང་གར་གཞག་ལ། ཨོཾ་ཤུདྡྷེ་དྷ་རྨེ་ཧཱུཾ་ཨཱ་ཨཱ་ཨོཾ་ཨ་ཞེས་བྱ་བ་བརྗོད་པས་ལྷའི་ང་རྒྱལ་བརྟན་པར་བྱས་ལ་ཕྱི་རོལ་གྱི་ལྷ་རྣམས་ལ་གཏོར་མ་སྦྱིན་པར་བྱའོ། །ཇི་སྐད་བཤད་པའི་གོས་དང་རྒྱན་གྱིས་རྣམ་པར་བརྒྱན་པ། རྡོ་རྗེ་དང་དྲིལ་བུ་ཐོགས་པ། བརྒྱ་བྱིན་ལ་སོགས་པའི་འཁོར་དང་ལྡན་པའི་སློབ་དཔོན་རྐང་པ་གཡས་པ་སེམས་དཔའི་སྐྱིལ་མོ་ཀྲུང་དུ་གནས་པ་གཡོན་བརྐྱང་བས་རོལ་པའི་ཚུལ་དུ་གནས་པས་རྫས་དྲི་ཞིམ་པོ་རྣམས་ཀྱིས་དཀྱིལ་འཁོར་གྲུབ་བཞིར་བྱས་ལ། ཁ་དོག་དཀར་པོ་ལ་སོགས་པའི་མེ་ཏོག་ལ་སོགས་པས་ཡང་དག་པར་མཆོད་དེ། འབྲས་སཱ་ལུ་དྲི་ཞིམ་པོའི་འབྲས་ཅན་ཞོ་དང་ཁ་ར་དང༌། སྦྲང་རྩི་དང༌། མར་ནག་དག་བསྲེས་པ་ཟངས་ལ་སོགས་པ་ལས་བྱས་པའི་སྣོད་རྣམས་སུ་གཞག་པས་ཤར་གྱི་སྒོར་གཏོར་མ་སྤྱིན་པར་བྱའོ། །འདོད་པའི་རྒྱལ་པོའི་ཕྱག་རྒྱ་བཅིངས་ལ། ཨོཾ་བཏྟ་ལེ་མ་ཧཱ་བཏྟ་ལི། ཧཱུཾ་ཧཱུཾ་ཧཱུཾ་ཛཿསྭཱ་ཧཱ་ཞེས་བྱ་བའི་
སྔགས་འདིས་ལྷ་རྣམས་དགུག་པར་བྱའ། །ཨོཾ་ཝ་ཧི་ནི་མ་ཧཱ་ཝ་ཧི་ནི་སཱུ་ཪྻ་ཙནྡྲ་སིདྡྷྱ་མུ་ཁི། ཇ་ཡ་ར་ཛི་སོ་མ་ཛི་ཨུ་མ་དེ་བི་ག་ག་སུ་རུ་པི་ཏ་ར་ཡ། ས་ཏོད་གྲ་ཧ་ག་ཎ་སྲྦེ་ག་ཎ་པ་ཏི་ཀ་རྟི་ཀ་ཤྲི་ཤ་ཤི་དེ་བཱི་དེ་ག་ལོ་ཨ་སུ་ར་ས་རོ་ཙེ། པུཀྐ་སཱི། མ་ཧཱ་པུཀྐ་སཱི་ཧཱུཾ་ཧེ་ཧོ། ཨཱ་ཀཱ་ཪྵ་ཡ་ཨཱ་ཀཱ་ཪྵ་ཡ། ས་མ་ཡ་དེ་བཱི་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། སྦྱན་དྲང་བའི་ཕྱག་རྒྱ་མཛུབ་མོ་གཉིས་བསྒྲེང་བ་དང༌། ཨོཾ་བྷ་ཀྵ་ཡ་བྷ་ཀྵ་ཡ། ས་མ་ཡེ་ཏིཥྛ་ཛྲཾ་ཧྲི་བ་ཧཱུཾ་ཕཊ་སྭཱ་ཧཱ། ཞེས་བྱ་བས་མཉེས་པར་བྱས་ཏེ་སེ་གོལ་གསུམ་བརྡབས་ལ་གཏང་བར་བྱའོ། །དེ་ནས་ཤར་གྱི་ཕྱོགས་སུ་ས་གཙང་མར་དོར་བར་བྱའོ། །དེ་ནི་ལྷའི་གཏོར་མའོ། །དེ་ནས་སྔར་བཤད་པའི་ཆོ་ག་བཞིན་དུ་བྱས་པའི་དཀྱིལ་འཁོར་འོ་མ་ལ་སོགས་པ་ལས་བྱས་པའི་ལྷ་བཤོས་ཀྱིས་ཡོངས་སུ་བསྐོར་བར་མང་ར་གསུམ་དང་བསྲེས་པའི་འོ་ཐུག་གིས་བཀང་བའི་གསེར་ལ་སོགས་པ་ལས་བྱས་པའི་སྣོད་དུ་བཞག་སྟེ། སྔགས་དང་ཕྱག་རྒྱ་དེ་ཉིད་ཀྱིས་མཐའ་ཡས་དང༌། ནོར་རྒྱས་དང༌། འཇོག་པོ་དང༌། སྟོབས་ཀྱི་རྒྱུད་དང༌། པདྨ་དང༌། པདྨ་ཆེན་པོ་དང༌། དུང་སྐྱོང་དང༌། རིགས་ལྡན་དང༌། ལྔ་ལྡན་དང༌། ལྔ་ལྡན་ཆེན་པོ་དང༌། ཟླ་བ་དང༌། གཙུག་ཏོར་དང༌། གཙུག་ཏོར་ཆེན་པོ་དང༌། དབྱིག་པ་ཐོགས་པ་དང༌། ཧུ་ལུ་ཏ་དང༌། དགའ་བོ་དང༌། ཉེ་དགའ་བོ་དང༌། རྒྱ་ཚོ་ཆེན་པོ་དང༌། གདུང་བ་དང༌། གདུང་བ་ཆེན་པོ་དང༌། དཔལ་འདོད་དང༌། འོད་ཆེན་དང༌། རིན་པོ་ཆེའི་འོད་དང༌། གཟུགས་བཟང་དང༌། གཟུགས་ཆེན་དང༌། སྤྲུལ་བཟངས་དང༌། གསུས་པོ་ཆེ་དང༌། ཇི་ལི་དང༌། མ་ཧཱ་ཇི་ལི་བོ་སྟེ། ཨོཾ་ཨཱགཚྪ་ཨཱ་གཏཚ། མ་ཧཱ་དྷི་པ་ཏི་སྲབ་བྷུར་བྷུ་ཕྲུཾ་ཕྲུཾ་ཕྲུཾ་ཕུ། རྡོ་རྗེ་ཁུ་ཚུར་བཅིངས་ནས་ནི། །མཐེ་བོང་དང་ནི་མཐེའུ་ཆུང་སྦྱར། དབུས་ཀྱི་སོར་མོ་དག་བརྐྱང་ནས། །གདེངས་ཀའི་རྣམ་པར་སྦྱར་བར་བྱ། །དེ་ལྟ་བུ་འདིས་སྲིན་ལག་གཟུང་སྟེ་གཏད་པར་བྱའོ། །བྱང་ཕྱོགས་སུ་ཆུ་བོ་ལ་དོར་བར་བྱའོ། །ཀླུའི་གཏོར་མའོ། །དེ་ནས་ནུབ་ཕྱོགས་སུ་མངོན་པར་ཕྱག་པའི་རྣལ་འབྱོར་པ་དཀྱིལ་འཁོར་གྱི་འགྲམ་ན་གནས་པས་ཙནྡན་དམར་པོ་ལ་སོགས་པ་ལ་བྱས་པའི་དཀྱིལ་འཁོར་གྲུ་གསུམ་མེ་ཏོག་དམར་པོ་ལ་སོགས་པས་མཛེས་པར་བྱ་ལ། སྔ་མ་
བཞིན་དུ་ཞོ་དང་སྦྲང་རྩི་དང་བཅས་པའི་འབྲས་ཆན་བདུད་རྩི་ལྔ་དང་ཡང་དག་པར་ལྡན་པའི་སྣོད་མདུན་དུ་བཞག་ལ་སྔ་མ་བཞིན་དུ་ནོར་བུ་བཟང་པོ་དང༌། །གང་བ་བཟང་པོ་དང༌། རྒྱལ་བ་བཟང་པོ་ལ་སོགས་པ་གནོད་སྦྱིན་གྱི་བདག་པོ་རྣམས་བོས་ཏེ། རྡོ་རྗེ་བསྡམས་པ་སྙིང་གར་བཅིངས་ལ་བཟུང་ཞིང༌། ཨོཾ་ནཱ་གཱ་དྷི་པ་ཏི་བ་ཏ་ལི་ཧཱུཾ་སྭཱ་ཧཱ་ཞེས་བྱ་བའི་སྔགས་འདིས་མཉེས་པར་བྱའོ། །དེ་ཁོ་ན་བཞིན་དུ་བཏང་ནས་ལྷོའི་ཕྱོགས་སུ་ཤིང་གཅིག་པར་དོར་བར་བྱའོ། །དེ་ནི་གནོད་སྦྱིན་གྱི་གཏོར་མའོ། །ཡང་དེ་ཁོ་ན་བཞིན་དུ་ལྷོ་རུ་མངོན་པར་ཕྱོགས་བར་གནས་པ་རྡོ་རྗེའི་འགྲོས་དང་ལྡན་པས་ཙནྡན་དམར་པོ་ལ་སོགས་པ་ལས་བྱས་པའི་དཀྱིལ་འཁོར་གྲུ་གསུམ་མེ་ཏོག་དམར་པོ་ལ་སོགས་པ་བཀྲམ་པར་ལྷ་བཤོས་ལ་སོགས་པ་ཡང་ཕུལ་ཏེ། ཉ་ཤ་སྐམ་པོ་དང༌། སྒོག་པ་དང༌། བཙོང་དང༌། ཁྲག་དང༌། ཏིལ་དང༌། བག་ཕྱེ་ལ་སོགས་པའི་ཁུར་བ་དང༌། བདུད་རྩི་ལྔ་དང༌། བཟའ་བ་དང༌། བཅའ་བ་དང༌། བཏུང་བ་དང༌། མྱང་བ་དང༌། གཞིབ་པ་རྣམ་པ་ཐ་དད་པ་དང་ཉའི་གཟུགས་བརྙན་གྱིས་གང་བའི་སྣོད་མདུན་དུ་བཞག་ལ། སྔགས་དང་ཕྱག་རྒྱ་དེ་རྣམས་ཀྱིས་སྣོད་ལ་རེག་སྟེ། གདན་བཞི་པའི་རྒྱུད་ལས་གསུངས་པའི་ཨེ་ཀ་བྲྀཀྵ་ཞེས་བྱ་བ་ལ་སོགས་པའི་སྔགས་བརྗོད་ལ་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་བཅིངས་ཏེ་མཛུབ་མོ་གཉིས་ལུ་གུ་རྒྱུད་བྱས་ལ་ཕྱག་རྒྱ་དེ་དང༌། ཨོཾ་ཏིཥྛ་ཏིཥྛ་ཧཱུཾ། བྷཀྵ་བྷ་ཀྵ་ཛཿཕཊ་སྭཱ་ཧཱ། ཞེས་བྱ་བའི་སྔགས་ཀྱིས་མགུ་བར་བྱས་ཏེ་བཏང་ལ་རྔ་ལ་སོགས་པའི་སྒྲ་དང། དྲིལ་བུའི་སྒྲ་དང༌། འབྱུང་པོའི་གཏོར་མ་ཡོ་བྱད་ཀྱི་སྔགས་དང༌། ཕྱག་རྒྱ་ཉིད་ཀྱིས་གང་ན་དཀྱིལ་འཁོར་གྱི་གཞི་ཡོད་པ་དེ་ལ་ཕྱི་རོལ་གྱི་མཚམས་ཀྱི་ཕྱོགས་བརྒྱད་དུ་གཏོར་མ་དོར་བར་བྱའོ། །དེ་ནི་འབྱུང་པོའི་གཏོར་མའོ། །གཏོར་མ་དེ་དག་ཐམས་ཅད་ལ། །སྔགས་པ་བཟང་པོས་གཏོང་དུས་སུ། །དགེ་བསྙེན་གྱི་ནི་སྤྱི་བོ་རུ། །ལན་གསུམ་དུ་ནི་བསྐོར་བར་བྱ། །གཏོར་མ་སྐྱེལ་བྱེད་དད་ལྡན་གང༌། །འཕགས་པ་འཁྱིལ་པའི་སྔགས་ཀྱིས་ནི། །དེ་ལ་བསང་གཏོར་བྱ་བ་ཉིད། །མིན་ན་དེ་རྣམས་ཀྱིས་ཟོས་འགྱུར། །ནང་གི་དཀྱིལ་འཁོར་དག་གི་ནི།།
གཏོར་མ་དག་གིས་རྣལ་འབྱོར་པས། །དངོས་གྲུབ་མཆོག་ནི་འགྲུབ་འགྱུར་བ། །དེ་ནས་ཡང་དག་བཤད་བྱ་བ། །སྒྱུ་མའི་རྒྱུད་ལས་ཇི་སྐད་བཤད་པ་བཞིན། །སྐྲ་བཤིག་རྐང་པ་ཡིས་ནི་གར་ཐབས་བྱས། །གཅེར་བུ་ལྷོ་ཕྱོགས་གནས་པའི་བདག་ཉིད་ཀྱིས། །ཐུན་མཚམས་ཀུན་དུ་གཏོར་མ་རབ་སྦྱིན་བྱ། །དང་པོར་ཕྱོགས་ནི་བརྒྱད་རྣམས་སུ། །ཁྲོ་མོ་མཁའ་འགྲོ་མ་བསམ་བྱ། །དེ་རྣམས་ལ་ནི་བློ་རྒྱ་ཆེས། །བདུད་རྩི་ལྔ་ལྡན་གཏོར་མ་སྦྱིན། །བདུད་རྩི་ལྔ་དང་ཡང་དག་ལྡན། །ཐུན་བཞི་རུ་ནི་རབ་ཏུ་བྱ། །སྔ་དྲོ་རྡོ་རྗེ་མཁའ་འགྲོ་ལ། །མཁའ་སྤྱེད་རྣམས་ལ་ཉིན་ཕྱེད་ན། །མཚན་དུས་ས་སྤྱོད་རྣམས་ལའོ། །མཁའ་འགྲོ་མ་ལ་མཚན་ཕྱེད་ན། །གཡས་བརྐྱང་གནས་པས་མཁའ་འགྲོ་ལ། །གཡོན་བརྐྱང་བ་ཡིས་མཁའ་སྤྱོད་ལ། །ས་སྤྱོད་རྣམས་ལ་ཁྱད་པར་དུ། །རྐང་པ་མཉམ་པར་བྱ་བ་ཡིན། །པདྨ་བསྐོར་བའི་སྦྱོར་བ་ཡིས། །གཅེར་བུ་གར་དང་ཡང་དག་ལྡན། །དྲག་པོའི་ལྟ་སྟངས་དང་ལྡན་པ། །མིག་ནི་གཡོན་པ་དག་གིས་བལྟ། །རུས་སྦལ་ཕྱག་རྒྱ་བཅིངས་ནས་ནི། །དཔྲལ་བའི་སྟེང་དུ་ཡང་དག་གཞག །སྐད་ཅིག་རྣམ་པའི་ཚུལ་གྱིས་ནི། །ཧེ་རུ་ཀ་ཡིག་གཟུགས་སུ་བྱ། །ཅིག་ཅར་སྔགས་ནི་བརྗོད་བྱ་ཞིང༌། །ཅིག་ཅར་ཕྱོགས་ནི་རྒྱས་གདབ་ཅིང༌། །དུར་ཁྲོད་དམ་ནི་ཆུ་བོའི་འགྲམ། །མཚན་མ་གཅིག་གམ་བཞི་མདོ་རུ། །འདོད་བའི་འབྲས་བུ་རབ་སྟེར་བ། །རྣལ་འབྱོར་རྒྱལ་པོས་རྟག་ཏུ་སྦྱིན། །བདུད་རྩིས་ཁ་ནི་བཀང་ནས་སུ། །རུས་གོང་སྟེང་དག་གནས་བྱས་ལ། །ཕྱག་རྒྱ་ལྔ་ནི་འཆིང་བ་ཡིས། །སྔགས་ནི་བརྗོད་ཅིང་གཏོར་མ་སྦྱིན། །ཨོཾ་སརྦ་ཀྲོ་དྷ་ཌཱ་ཀི་ཉ་ཨི་མཾ་བ་ལིཾ་པྲ་ཏཱི་ཙྪནྟུཧཱུཾ་ཕཊ་སྭཱ་ཧཱ། དེ་ནས། གཏོར་མ་དུར་ཁྲོད་ལ་སོགས་སུ། །རྣལ་འབྱོར་སྐྱེས་མཆོག་དག་གིས་དོར། །དེ་ནས་མེ་ཏོག་མགོར་བཞག་སྟེ། །རང་གི་གནས་སུ་འཇུག་པར་བྱ། །དེ་ནི་ནང་གི་རྡོ་རྗེ་མཁའ་འགྲོ་མ་རྣམས་ཀྱི་གཏོར་མའོ། །གྲངས་ནི་བཞི་རུ་གྱུར་བ་ཡི། །རྒྱལ་ཆེན་ཇི་ལྟར་ཚིམ་གྱུར་པ། །གཏར་མའི་ལས་ནི་ཡིད་འོང་བ། །དེ་ཡི་རྗེས་ལ་བཤད་པར་བྱ། །རྩ་བའི་དཀྱིལ་འཁོར་ཤར་སོགས་ཀྱི། །ཕྱོགས་རྣམས་སུ་ནི་འཁོར་ལོ་བཞི། །རྣམ་པར་བསྒོམས་
ནས་གང་བའི་སྣོད། །བཞི་ནི་དེ་རུ་གཞག་པར་བྱ། །ཡུལ་འཁོར་སྐྱོང་གི་སྣོད་གང་ཡིན། །དེ་ནི་བཟའ་བ་ཆང་སྤངས་པས། །ཡོངས་སུ་གང་བར་རབ་ཏུ་བྱ། །དེ་བཞིན་རྣམ་ཐོས་སྲས་ཀྱི་ནི། །ཤ་དང་ཆང་ལ་སོགས་པས་དགང༌། །དེ་བཞིན་ལུས་འཕགས་པོ་ཡི་སྣོད། །ཁྲག་གིས་གང་བར་གྱུར་པར་བྱ། །མིག་མི་བཟང་གི་སྣོད་དག་ནི། །འོ་མ་དག་གིས་དགང་བར་བྱ། །དེར་ནི་སྣོད་ཀྱི་ཆོ་གའི་རིམ། །བྱས་ནས་རྒྱལ་པོ་ཆེན་པོ་ནི། །བསྐྱེད་པའི་ཕྱིར་ནི་བསྒོམ་པར་བྱ། །དང་པོའི་ཡི་གེ་ལས་བྱུང་བའི། །རྒྱལ་པོ་ཆེན་པོ་བཞི་པོ་ནི། །ཡི་གེ་གསུམ་གྱིས་བྱིན་བརླབས་ཤིང༌། །ཡེ་ཤེས་སེམས་དཔའ་དང་ལྡན་བསྒོམ། །ཧེ་རུ་ཀ་ཡི་སྐུར་གནས་ཏེ། །ལག་ན་རྡོ་རྗེ་དྲིལ་བུ་ཐོགས། །བརྟུལ་ཞུགས་བཟང་པོས་སྔགས་འདི་ཡིས། །དེ་རྣམས་སོ་སོར་གཏོར་མ་སྦྱིན། །ཨོཾ་དྷྲྀ་ཏ་རཱཥྚཱ་ཡ་གནྡྷརྦྷ་སེ་ནཱ་དྷི་པ་ཏ་ཡེ་ཨི་མཾ་བ་ལིཾ་པྲ་ཏཱི་ཙྪ་ས་མ་ཡ་མ་ནུ་སས་ར་ཨཱཿཧཱུཾ་ཧཱུཾ་ཕཊ་སྭཱ་ཧྭཱ། ཨོཾ་ན་མོ་བཻ་ཤྲ་བ་ཎཱ་ཡ་ཡཀྵ་སེ་ནཱ་དྷི་པ་ཏ་ཡེ་ཨི་མཾ་བ་ལིཾ་པྲ་ཏཱི་ཙྪ་ས་མ་ཡ་མ་ནུ་སྨ་ར་ཨཱ་་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་བི་རཱུ་ཌྷ་ཀཱ་ཡ་མ་ཧཱ་ཀུ་བེ་རཱདྷི་པ་ཏ་ཡེ་ཨི་མཾ་བ་ལིཾ་པྲ་ཏཱི་ཙྪ་ས་མ་ཡ་མ་ནུ་སྨ་ར་ཨཱཿཧཱུཾ་ཧཱུཾ་ཕཊ་སྭཱ་ཧཱ། ཨོཾ་བི་རཱུ་པཱ་ཀྵཱ་ཡ་མ་ཧཱ་ན་གཱ་དྷི་པ་ཏ་ཡེ་ཨི་མཾ་བ་ལིཾ་པྲ་ཏཱི་ཙྪ་མ་ཡ་མ་ནུ་སྨ་ར་ཨཱཿཧཱུཾ་ཧཱུཾ་ཕཊ་སྭཱ་ཧཱ། །སྔགས་ཚིགས་བླ་མེད་འདི་རྣམས་ཀྱིས། །སྣོད་བཞི་བྱིན་གྱིས་བརླབས་ནས་ནི། །རྣལ་འབྱོར་པ་ཡིས་རིམ་བཞིན་དུ། །ཤར་ལ་སོགས་པར་དོར་བར་བྱ། །དེ་ནི་རྒྱལ་པོ་ཆེན་པོ་བཞིའི་གཏོར་མའི་ཆོ་གའོ།། །། བདེ་མཆོག་ཆོ་ག་ལས་གསུངས་པའི། །སྐྱེ་བོ་རྣམས་ནི་མཆོད་འགྱུར་བ། །གཏོར་མ་འབྱུང་པོ་ཐམས་ཅད་ལ། །དེ་ནས་ཡང་དག་རབ་བཤད་བྱ། །དམ་ཚིག་འཁོར་ལོའི་ཕྱི་རོལ་དུ། །ཧཱུཾ་གི་ས་བོན་ལས་བྱུང་བ། །ཤིང་གཅིག་དང་བཅས་དུར་ཁྲོད་བརྒྱད། །རྣལ་འབྱོར་རིག་པས་བསམ་པར་བྱ། །གནོད་སྤྱིན་སྲིན་པོ་འབྱུང་པོ་དང༌། །དེ་བཞིན་ཡི་དགས་ཤ་ཟ་དང༌། །གྲུལ་བུམ་བརྗེད་བྱེད་མཁའ་འགྲོ་དང༌། །མཁའ་འགྲོ་མ་ཡེ་ཚོགས་ཉིད་དག །ཤིང་དྲུང་གཅིག་ནི་བརྒྱད་པོ་ཡི། །རྩེ་མོར་དྲག་པོ་རྣམས་བསམ་བྱ། །ཤིང་གི་རྩ་རུ་དེ་མཚུངས་པའི། །
འཁོར་དག་རྣམ་པར་བསམ་པར་བྱ། །ཁྭ་ཡི་གདོང་ཅན་ལ་སོགས་པའི། །འཁོར་གྱི་རང་གི་གཟུགས་དག་ནི། །ཐམས་ཅད་ཧཱུཾ་ལས་ཡང་དག་བྱུང༌། །མཚོན་ཆ་སྣ་ཚོགས་དག་ཐོགས་པ། །ཆང་དང་ཤ་དང་བཙོང་ལ་སོགས། །ཁུ་བ་དེ་བཞིན་ཤ་ཡི་གཟུགས། །སྣོད་དུ་བཅུག་ནས་དེ་ཉིད་ནི། །བདུད་རྩིའི་རང་བཞིན་ཉིད་དུ་བྱ། །སྔར་བཞིན་སྐྲ་བཤིག་ལ་སོགས་ལྡན། །གཡོན་བརྐྱང་ལ་སོགས་སྦྱོར་བྱས་པ། །བརྟུལ་ཞུགས་བཟང་པོས་སྔགས་འདི་ཡིས། །དེ་རྣམས་ཉིད་ནི་བོད་པར་བྱ། །ཨོཾ་བཛྲ་ཨ་ར་ལི་ཧོ་ཛཿཧཱུཾ་བཾ་ཧོཿ། བཛྲ་ཌཱ་ཀི་ནཱི་ས་མ་ཡ་སྟྭཾ་དྲྀ་ཤྱ་ཧོཿ། སྔགས་འདི་ལན་གསུམ་བརྗོད་ནས་ནི། །རང་ཉིད་ཀྱི་ནི་སྙིང་གར་ཡང༌། །སྣོད་ཀྱི་ཕྱག་རྒྱ་ལན་གསུམ་དུ། །བསྐོར་ནས་གཏོར་མ་སྦྱིན་པར་བྱ། །མཁའ་སྤྱོད་ཕྱག་རྒྱ་བཅིངས་ནས་ནི། །ཁྲོ་ཚིག་མཚན་གཅིག་ལ་སོགས་སུ། །སྒྲུབ་བ་པོ་ཡིས་སྔགས་འདི་ཡིས། །དོགས་པ་མེད་པར་གཏོར་མ་གཏང༌། །ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཱཀྵ་ས་བྷཱུ་ཏ་བྲེ་ཏ་བི་ཤ་ཙོནྨ་ད་ཨ་པ་སྨ་ར་ཌཱ་ཀ་ཌཱ་ཀི་ནྱ་ད་ཡ་ཨི་མཾ་བ་ལིཾ་གྲྀ་ཧྞནྟུ་ས་མ་ཡ་ར་ཀྵནྟུ་མ་མ་སརྦ་སིདྡྷི་མྨེ་པྲ་ཡ་ཙྪ་ནྟུ། ཡ་ཐཻ་བཾ། ཡ་ཋེ་ཥྚཾ། བྷུཉྫ་ཐ་པི་པ་ཐ། མཱ་ཏི་ཀྲ་མ་ཐ་མ་མ་སརྦ་ཀརྟ་ཡ་སྟ་སུ་ཁ་བི་ཤུདྷ་ཡེ། ས་ཧ་ཡི་ཀ་བྷ་བནྟུ་ཧཱུཾ་ཧཱུཾ་ཕཊ་སྭཱ་ཧཱ། དེ་འདྲའི་སྔགས་ཆེན་བརྗོད་བྱས་ནས། །དུར་ཁྲོད་དུ་ནི་གཏོར་མ་སྦྱིན། །འཇིགས་བྱེད་སེམས་ཅན་དྲག་པོའི་བདག །སྙིང་རྗེར་ལྡན་པས་གཏོར་མ་དོར། །དེ་ལྟ་བུ་ཡི་རིམ་འདི་ཡིས། །འདི་ནི་འབྱུང་པོ་ཐམས་ཅད་བརྗོད། །བགེགས་རྣམས་ཞི་བར་བྱ་ཕྱིར་ཡང༌། །གཏོར་མ་འདི་ནི་བསྔགས་པ་ཡིན། །དེ་ནི་འབྱུང་པོ་ཐམས་ཅད་པའི་གཏོར་མའི་ཆོ་གའོ།། །།གཞན་ཡང་རྡོ་རྗེ་མཁའ་འགྲོ་མ། །གུར་ལས་གསུངས་པའི་གཏོར་མའི་ལས། །ཁམས་གསུམ་དག་ཏུ་ཅིག་ཅར་དུ། །ཚིམ་པར་བྱ་ཕྱིར་ཡང་དག་བྱ། །ནམ་མཁའ་དབྱིངས་ཀྱི་དབུས་སུ་ནི། །ཆུ་སྐྱེས་འདབ་བརྒྱད་དབུས་སུ་བསྒོམ། །དབང་པོ་ཤར་གྱི་འདབ་མར་བསམ། །གཤིན་རྗེ་ལྷོ་རུ་དགོད་པར་བྱ། །ཆུ་ལྷ་ནུབ་ཀྱི་འདབ་མར་ཏེ། །བྱང་དུ་གནོད་སྤྱིན་དགོད་པར་བྱ། །མེ་ཡི་ཕྱོགས་སུ་མེ་ཆེན་པོ། །བདེན་བྲལ་ཕྱོགས་སུ་བདེན་བྲལ་
ཏེ། །རླུང་གི་ཕྱོགས་སུ་རླུང་ལྷ་བསམ། །འབྱུང་པོའི་བདག་པོ་དབང་ལྡན་དུ། །ཟླ་བ་ཉི་མ་ཚངས་ལ་སོགས། །ཚངས་རིས་དམ་པ་རྣམས་དང་ནི། །ཚངས་པའི་འདུན་ན་འདོན་བདག་ཉིད། །དགའ་ལྡན་མཐའ་བྲལ་ན་གནས་དང༌། །རྒྱལ་པོ་ཆེན་པོ་ཀུན་དུ་སྐྱེས། །གཞན་འཕྲུལ་དབང་བྱེད་དག་དང་ནི། །འཕྲུལ་དགའ་ཡི་ནི་ལྷ་རྣམས་དང༌། །གང་དག་གཙང་མའི་གནས་འདུག་དང༌། །བདེ་བ་ཅན་ན་ཀུན་དུ་གནས། །འོག་མིན་ན་ནི་གནས་པ་དང༌། །འོད་ཅན་འཇིག་རྟེན་ཁམས་གནས་དང༌། །སུམ་ཅུ་རྩ་གསུམ་ན་གནས་པ། །དེ་དག་ཐམས་ཅད་སྟེང་དུ་བསམ། །སྟོབས་རྒྱུ་དང་ནི་དུང་སྐྱོང་དང༌། །མཐའ་ཡས་དེ་བཞིན་ནོར་རྒྱས་དང༌། །འཇོག་པོ་དང་ནི་རིགས་ལྡན་ཉིད། །པདྨ་ཆེ་དང་པདྨ་ནི། །ཆོས་འབྱུང་གི་ནི་དབུས་ན་གནས། །ལྷ་མ་ཡིན་དང་སེམས་དམྱལ་དང༌། ཆོས་འབྱུང་གི་ནི་འོག་ཏུའོ། །ཨོཾ་ལས་ཚངས་པ་ལ་སོགས་པ། །ཡི་གེ་ཧཱུཾ་ལས་དབང་པོ་སོགས། །ཨ་ལས་སྟོབས་རྒྱུ་ལ་སོགས་པ། །ཞལ་གཅིག་ཕྱག་ནི་གཉིས་པའོ། །སྟེང་གི་ལྷ་ནི་ཤིན་ཏུ་དཀར། །དབང་པོ་ལ་སོགས་མདོག་སྔོན་པོ། །སྟོབས་རྒྱུ་ལ་སོགས་ཤིན་ཏུ་དམར། །རང་སྣང་རིག་མས་ཡན་ལག་འཁྱུད།། རྡོ་རྗེ་དྲིལ་གུས་ཕྱག་བྲེལ་བ། །གཡས་བརྐྱང་བ་ཡི་གནས་པས་གནས། །ཆངས་སོགས་རྟག་པས་རྒྱས་གདབ་བཅིང༌། །རྡོ་རྗེ་ཅན་གྱིས་བརྒྱ་བྱིན་སོགས། །ལྟོས་འགྲོ་ལ་སོགས་གར་དབང་གིས། །ཐམས་ཅད་རིགས་ལས་བྱུང་བ་ཡི། །གཽ་རཱི་ཡིས་ནི་དགུག་པར་བྱ། །རྐུན་མོས་གཞུག་པར་བྱ་བ་སྟེ། །རོ་ལངས་མ་ཡིས་ཞགས་པས་བཅིངས། །དྲིལ་བུ་ཟ་ཕོད་མས་དབང་བྱ། །དེ་ནས་མཆོད་ཡོན་ཞལ་བསིལ་དབུལ། །དེ་བཞིན་མེ་ཏོག་བདུག་པ་སོགས། །མཉམ་པར་གཞག་པའི་སེམས་ཀྱིས་ནི། །སྔགས་འདི་ཡིས་ནི་ཚིམ་པར་བྱ། །ཨོཾ་ཨཱཿཧཱུཾ། གསང་སྔགས་འདི་དག་ཉིད་ཀྱིས་ནི། །སྔར་བཞིན་རྫས་ཀྱིས་གང་བ་ཡི། །ཐོད་པ་དེ་རྣམས་དག་ལ་དབུལ། །མཚན་གཅིག་ལ་སོགས་རྣམས་སུ་དོར། །གཏོར་མའི་ཆོ་ག་བཞིན་བྱས་ནས། །དོགས་པ་མེད་པའི་སེམས་ཀྱིས་ནི། །དེ་ནས་འཐོར་འཐུང་ཕུལ་བྱས་ནས། །སྔགས་འདི་ཡིས་
ནི་གཤེགས་སུ་གསོལ། །ཨོཾ་བཛྲ་ཌཱ་ཀི་ས་མ་ཡ་མ་ནུ་པཱ་ལ་ཡ། བཛྲ་ཌཱ་ཀི་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦ་སིདྡྷི་མྨེ་པྲ་ཡ་ཙྪ། སརྦ་ཀརྨ་སུ་ཙ་མེ་ཙི་ཏྟཾ་ཤྲེ་ཡཿཀུ་རུ་ཧཱུཾ་ཧ་ཧ་ཧ་ཧ་ཧོཿ། བྷ་ག་བཱན་སརྦ་ཏ་ཐཱ་ག་ཏ་མཱ་མེ་མུཉྩ་ཌཱ་ཀི་བྷ་བ་མ་ཧཱ། ས་མ་ཡ་ས་ཏྭ་ཨཿམུཿ། དེ་ནས་གཏོར་མའི་ལས་བྱས་ནས། །དཀྱིལ་འཁོར་རང་གི་ཡན་ལག་ལ། །བསྡུ་བ་བྱས་ནས་སྔར་རིམ་བཞིན། །ཡེ་ཤེས་འཁོར་ལོ་གཤེགས་སུ་གསོལ། །སྔ་དྲོའི་ཐུན་ལ་དེ་བཞིན་དུ། །ཐམས་ཅད་མཉམ་པར་གཞག་པས་བྱ། །ཐུན་བཞི་དག་ནི་ཐམས་ཅད་ལ། །སྐད་ཅིག་གིས་ནི་བསྒོམ་པར་བྱ། །དེ་ལྟར་གུར་གྱི་རྒྱུད་གསུངས་པ། །ཅིག་ཅར་འབྱུང་པོ་ཐམས་ཅད་ནི། །ཚིམ་པ་རུ་ནི་བྱེད་པའི་མཆོག །གཏོར་མ་བདག་གིས་བཤད་པ་ཡིན། །དེ་ནི་དུས་གཅིག་ཏུ་ཁམས་གསུམ་པ་ཚིམ་པར་བྱེད་པའི་གཏོར་མའི་ཆོ་གའོ།། །། གང་ཚེ་རྣལ་འབྱོར་སྔར་བཤད་པའི། །གཏོར་མའི་ཆོ་ག་བྱེད་པས་ནི། །གནོད་པ་བྱ་བྱེད་བགེགས་མཐོང་བ། །དེ་ཚེ་དེ་རབ་ཞི་བྱའི་ཕྱིར། །གཏོར་མ་བྱ་བ་དེ་རིམ་པ། །དཔལ་ལྡན་རྒྱུད་དྲ་དགྱེས་རྡོ་རྗེ། །རྒྱུད་གཉིས་ཀྱི་ནི་རྗེས་འབྲངས་ནས། །བདག་གིས་བཟང་པོར་བཤད་པར་བྱ། །རེ་ཞིག་དང་པོར་རྣལ་འབྱོར་པས་ཆོས་ཐམས་ཅད་སྟོང་པ་ཉིད་དུ་བསམས་ཏེ། དེ་ནས་རཾ་ལས་བྱུང་བའི་ཉི་མའི་དཀྱིལ་འཁོར་གྱི་སྟེང་དུ་ཡི་གེ་ཧཱུཾ་ཁ་དོག་སྔོན་པོ་ལས་བྱུང་བའི་བཅོམ་ལྡན་འདས་རྡོ་རྗེ་ཧཱུཾ་མཛད་ཞལ་གསུམ་པ་ཕྱག་དྲུག་པ་ཕྱག་གཡས་པ་བ་ན་རལ་གྲི་དང༌། རྡོ་རྗེ་དང༌། རྩེ་གསུམ་བསྣམས་པ། གཡོན་པ་ན་དྲིལ་བུ་དང༌། དགྲ་སྟ་དང་ཐོ་བ་བསྣམས་པ། མཆེ་བ་གཙིགས་པ། ལྗགས་བསྐྱེད་པ། དབུ་སྐྲ་སེར་པོ། སྤྱན་དམར་པོ། མགུལ་པ་སྤྲུལ་གྱིས་བརྒྱན་པ། གཡོན་པ་བརྐྱང་པས་སའི་སྟེང་མནན་པ། ཁྲོ་བོ་འབར་བའི་ཕྲེང་བ་འཕྲོ་བ། སྙིང་གར་ཡི་གེ་ཧཱུཾ་གིས་མཚན་པ། ཧ་ཧ་ཞེས་སྒྲོགས་པར་བདག་ཉིད་བསྒོམས་ལ། དེ་ནས་མདུན་དུ་ཅི་ནུས་པར་རྡུལ་ཚོན་ལ་སོགས་པས་དཀྱིལ་འཁོར་ཀུན་དུ་བྲིས་ཏེ། བུམ་པ་སྲོག་ཆགས་མེད་པའི་ཆུ་དྲི་བཟང་པོ་དང་ལྡན་པས་ཡོངས་སུ་བཀང་པ་ལྕུག་མས་ཁ་རྒྱན་བྱས་པ། གོས་
ཀྱིས་མགྲིན་པ་དཀྲིས་པ། ནང་དུ་འབྲུ་དང༌། རིན་པོ་ཆེ་དང༌། སྨན་བཅུག་པ་བཅུའམ་ལྔའམ་གཅིག་དེ་ཉིད་དུ་བཞག་ལ། གཡོན་དུ་མཆོད་ཡོན་གྱི་སྣོད་དང༌། གཡས་སུ་མེ་ཏོག་ལ་སོགས་པའི་ཡོ་བྱད་བཞག་སྟེ། མཆོད་ཡོན་གྱི་སྣང་ལ་རང་གི་འདོད་པའི་ལྷའི་སྔགས་ལན་ཉི་ཤུ་རྩ་གཅིག་བཟླས་པར་བྱའོ། །ལས་ཐམས་ཅད་པའི་སྣང་ལ་ཡང་བདུད་རྩི་འཁྱིལ་པའི་སྔགས་དེ་ཁོ་ན་བཞིན་དུ་ཡོངས་སུ་བཟླས་པར་བྱའོ། །དེ་ནས་ཟླ་བ་དང་རྡོ་རྗེ་ལ་སོགས་པའི་རིམ་པ་མདོར་བསྡུས་པས་བུམ་པ་རྣམས་སུ་རྡོ་རྗེ་སེམས་དཔའ་ལ་སོགས་པ་བདུད་རྩི་འཁྱིལ་པ་ལ་ཐུབ་པའི་གཟུགས་བསྐྱེད་ལ་རྗེ་བཙུན་གྱི་ཡི་གེ་བརྒྱ་པ་ལན་གསུམ་བརྗོད་ནས་ཨོཾ་ཨཱཿཧཱུཾ་ཞེས་བྱ་བའི་སྔགས་ཀྱིས་རྡོ་རྗེ་ཡང་དག་པར་མཆོད་དེ། །ཨོཾ་བཛྲ་གྷཎྜེ་ར་ཎ་ཞེས་བྱ་བའི་སྔགས་ཀྱིས་མཆོད་ལ་སྤོས་ཀྱིས་བདུགས་ཏེ། ཨོཾ་བཛྲ་དྷྲྀ་ཀ་ཅེས་བྱ་བ་ལ་སོགས་པའི་སྔགས་ཀྱིས་བུམ་པ་དག་སྤྱན་དྲང་བར་བྱའོ། །དེ་ནས་མེ་ཏོག་དང་སྤོས་དང་ཡོན་ཆབ་དང་དྲི་དང་ལྷ་བཤོས་ཕུལ་ལ། རང་རང་གི་སྔགས་རྣམས་ཡི་གེ་བརྒྱ་པ་འདོན་པ་སྔོན་དུ་འགྲོ་བ་ཅན་རྡོ་རྗེ་རྩེ་གསུམ་པའི་ཕྱག་རྒྱས་བུམ་པ་རྣམས་ལ་བརྒྱ་རྩ་བརྒྱད་ཡོངས་སུ་བཟླས་ཏེ་རས་ལ་སོགས་པ་ལ་བཞུགས་པའི་བཅོམ་ལྡན་འདས་ཁྲུས་བྱའོ། །རི་མོ་བྲིས་པ་རྣམས་ལ་ནི་མེ་ལོང་ལ་སྐུ་གཟུགས་རྣམས་ནི་དངོས་སུའོ། །སྐུ་ཁྲུས་ཀྱི་ཡོ་བྱད་འབྲུ་ལ་སོགས་པ་རྣམས་ནི་ཁྲུས་ཀྱི་ཆོ་ག་ལས་བསྟན་ཏེ་དེ་ཉིད་ལས་ཤེས་བར་བྱའོ། །དེ་ནས་རང་གི་སྔགས་ཀྱིས་དཀྱིལ་འཁོར་གྱི་བུམ་པ་དག་གིས་དབང་བསྐུར་ལ་དཀྱིལ་འཁོར་མཆོད་པ་ལྔ་ལ་སོགས་པས་མཆོད་པར་བྱའོ། །དེའི་རྗེས་ལ་ཕྱོགས་བཅུ་ན་གནས་པའི་སྤྲིན་ནག་པོ་དང་མཚུངས་པའི་གནོད་སྤྱིན་དང་སྲིན་པོ་དང་ཤ་ཟ་ལ་སོགས་པ་ལག་ན་རལ་གྲི་དང་ཐོ་བ་དང་མདའ་བོ་ཆེ་ལ་སོགས་པ་ཐོགས་པ་རྣམས་བསམས་ཏེ། ནམ་མཁའ་ལ་ཡང་པཾ་ལས་བྱུང་བའི་པདྨ་ཆེན་པོ་དེའི་འདབ་མ་བརྒྱད་ལ་འཇིག་རྟེན་སྐྱོང་བ་བརྒྱད་ཁ་དོག་དང་དབྱིབས་དང་ཆ་བྱད་ཇི་ལྟ་བ་བཞིན་དང་ལྡན་པ། ལྟེ་བའི་དབུས་སུ་བགེགས་ཀྱི་རྒྱལ་པོ་ལོག་འདྲེན་མདོག་དམར་པོ་གླང་པོ་ཆེའི་གདོང་ཅན་
གདོང་གཅིག་པ། ལག་པ་བཞི་པ། ལག་པ་གཡས་ན་དགྲ་སྟ་དང་རལ་གྲི་ཐོགས་པ། ལག་པ་གཡོན་ན་ཕྲེང་བ་དང་ལ་དུ་ཐོགས་པ། གསུས་པ་འཕྱང་བ་གར་བྱེད་པ། ཚངས་པའི་རྒྱབ་ཏུ་རྐང་པ་གཉིས་ཀྱིས་མནན་པ། གླང་པོ་ཆེའི་སྒྲས་གང་བའི་མཆུའི་རྩེ་མོའི་སྒྲས་ཕྱོགས་བཅུའི་གཏོས་ཀྱི་ནང་འགེངས་པ། མེ་ཏོག་གི་མཆེ་བ་ཅན་གྱི་ཚོགས་ཀྱིས་རྐང་པའི་པདྨ་གཉིས་ལ་ཕྱག་བྱས་པ་རྣམ་པར་བསྒོམས་ལ། ཨོཾ་བཛྲ་ཨ་ར་ལི་ཧོ་ཛཿཧཱུཾ་བཾ་ཧོཿ། །བཛྲ་ཌཱ་ཀི་ནི་ས་མ་སྟྭཾ་དྲྀ་ཤྱ་ཧོ་ཞེས་བྱ་བའི་སྔགས་ཀྱིས་བོས་ལ། དཀྱིལ་འཁོར་གྱི་ཕྱོགས་བཅུ་ཀུན་དུ་བསམ་པར་བྱའོ། །དེ་ནས་ཡི་གེ་ཧཱུཾ་གི་སྒྲ་འཇིགས་སུ་རུང་བ་བརྗོད་ནས་འཁྱིལ་པའི་སྔགས་ཀྱིས་ཉུངས་ཀར་བྱིན་གྱིས་བརླབས་ཏེ་བགེགས་ཐམས་ཅད་ལ་དམིགས་ནས་ཨོཾ་རི་རི་ཏི་ཏི་ཕཊ་སྭཱཧཱ་ཞེས་བྱ་བའི་སྔགས་དང༌། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ་ཞེས་བྱ་བའི་སྔགས་ཀྱིས་མེའི་སྣོད་དུ་གཞུག་པར་བྱའོ། །དེ་ནས་བགེགས་རྣམས་ཀྱི་སྤྱི་བོ་དང་སྙིང་ཨརྫ་ཀའི་དོག་པ་བཞིན་དུ་འགས་པར་འགྱུར་རོ། །གལ་ཏེ་དམ་ཚིག་ལ་གནས་པར་མི་བྱེད་ན་དེའི་ཚེ་བག་ཕྱེ་ལས་བགེགས་རྣམས་ཀྱི་གཟུགས་བརྙན་བྱས། དཀྱིལ་འཁོར་གྱི་དབུས་སུ་གསོར་བའི་རྡོ་རྗེས་ཕྱེ་མར་བྱས་ན་སྐད་ཅིག་དེ་ཉིད་ལ་དེ་རྣམས་དམ་ཚིགས་ལ་གནས་པར་འགྱུར་རོ། །དེ་ནས་སུམྦྷ་ནི་སུམྦྷ་ཞེས་བྱ་བ་ལ་སོགས་པས་ཕུར་བུ་གདབ་ཅིང༌། དེ་བཞིན་དུ་སྔགས་རྐང་པ་ཕྱི་མས་བརྡུང་བར་བྱའོ། །དེའི་རྗེས་ལ་ས་ལ་སོགས་པའི་བུམ་པའམ་ཕྲུ་བ་ཚད་ཆེན་པོ་དང་ལྡན་པ་ཆུས་ཡོངས་སུ་གང་བར་བྱ་སྟེ་ཉའི་ཤ་རློན་པ་དང༌། བཙོས་པ་དང༌། བསེགས་པའི་དབྱེ་བ་རྣམ་པ་གསུམ་དང༌། དེ་བཞིན་དུ་པྲི་ཡང་ཀུ་དང་ཀོ་ལ་དྠ་དང་ཙ་ན་ཀ་དང༌། འབྲེང་བུའི་ཆུན་པོ་དང༌། འབྲས་ཡོས་དང༌། སྟར་ཀའི་འབྲས་བུ་དང༌། སྣུམ་ཁུར་དང༌། ཤ་དང༌། མ་ཡོ་སྟ་དང༌། ཐུག་པ་དང༌། བཙོང་དང༌། བཙོང་དང༌། སྒོག་སྐྱ་དང༌། ཀེའུ་དང༌། ཁབ་དང༌། འགྲོན་བུ་དང༌། སྙེ་མའི་འབྲུ་དང༌། གོང་བུའི་འབྲུ་དང༌། ལན་ཚྭ་དང༌། སྦྲང་རྩི་དང༌། འབྲུའི་ཆང་དང༌། རྒུན་ཆང་དང༌། གོས་སྔོན་པོ་དང༌། སྒྲོན་
བུའི་ཚོགས་ཀྱིས་གང་བར་བྱས་ལ་ཁྲོ་བོ་བདུད་རྩི་འཁྱིལ་པའི་སྔགས་བརྒྱ་རྩ་བརྒྱད་ཡོངས་སུ་བཟླས་པར་བྱའོ། །འདིར་སྔགས་ནི་འདི་ཡིན་ཏེ། ཨོཾ་ན་མཿས་མནྟ་ཀཱ་ཡ་ཝཱ་ཀ་ཙི་ཏྟ་བཛྲཱ་ཎཱ་ན་མོ་བཛྲ་ཀྲོ་དྷ་ཡ་མ་ཧཱ་དཾ་ཥྚོད་ཀ་ཊ་བྷཻ་ར་བཱ་ཡ། ཨ་སི་མུ་ས་ལ་པ་ལ་ཤུ་པཱ་ཤ་ཧསྟཱ་ཡ། ཨོཾ་ཨ་མྲྀ་ཏ་ཀུཎྜ་ལི་ཁ་ཁ་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། གརྫ་གརྫ། བིསྥོ་ཊ་ཡ། བི་སྥོ་ཊ་ཡ། སརྦ་བི་གྷན་བི་ནཱ་ཡ་ཀན་མ་ཧཱ་ག་ཎ་པ་ཏི་ཛཱི་བི་ཏ་ཨནྟ་ཀ་རཱ་ཡ་སྭཱ་ཧཱ། དེའི་རྗེས་ལ་རྗེ་བཙུན་ཡི་གེ་བརྒྱ་པས་མེ་ཏོག་དང་སྤོས་རྣམས་ཀྱིས་མཆོད་ལ། གཡས་བརྐྱང་བའི་འདུག་སྟངས་ཉེ་བར་བཅིངས་ཏེ་དྲྀལ་བུ་དཀྲོལ་ཞིང་རྡོ་རྗེ་གསོར་བས་སྔགས་འདི་བརྗོད་པར་བྱའོ། །ཨོཾ་ཨིནྡྷ། ཛ་མ། ཛ་ལ། ཛ་ཀྑ། བྷཱུ་ཏ། བཧྣི། བཱ་ཨུ། རཀྑ། ཙནད། སུཛྫ། མཱད། པཔྤ། ཏ་ལ་པཱ་ཏཱ་ལེ། ཨཊྛ་སཔྤ་སྭཱ་ཧཱ། ཨི་དཾ་བ་ལི་མྦྷུཉྫ། ཛི་གྷ། ཕུལླ། དྷཱུ་པྤ། མཱཾ་ས། པིཾ་གྷ། ཨཾ་བྷ། སཔྤ། ཀཛྫ། སཱ་ད། ཁནྟི། ཁུ་ཎི། ཕེཌ། གཱ་ད། དེ་བཞིན་དུ་ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱཱ་ནུ་ཏྤ་ནྣ་ཏྭཏྟ་ཨོཾ་ཨཱཿཧཱུཾ་ཕཊ་སྭཱ་ཧཱ། ཡང་ན་སྔགས་སོ་སོས་གཏོར་མ་སྦྱིན་པར་བྱའོ། །འདི་སྟ་སྟེ། ཨོཾ་ཨིནྡྲེ་ཡེ་སྭཱ་ཧཱ། དབང་པོའི་ཕྱོགས་སུའོ། །བེ་བ་སྭ་ཡེ་སྭཱ་ཧཱ། གཤིན་རྗེའི་ཕྱོགས་སུའོ། །ཨོཾ་ཨ་པཱཾ་པ་ཏ་ཡེ་སྭཱ་ཧཱ། ཆུའི་ཕྱོགས་སུའོ། །ཨོཾ་ཡ་ཀྵ་བིཪྻ་དྷ་རི་སྭཱ་ཧཱ། ལུས་ངན་པོའི་ཕྱོགས་སུའོ། །ཨོཾ་རུ་དྲཱ་ཡ་སྭཱ་ཧཱ། དབང་ལྡན་གྱི་ཕྱོགས་སུའོ། །ཨོཾ་ཨ་གནཱ་ཡ་སྭཱ་ཧཱ། མིའི་ཕྱོགས་སུའོ། །ཨོཾ་རྐྵ་སིདྡྷི་པ་ཏ་ཡེ་སཱ་ཧཱ། བདེན་བྲལ་གྱི་ཕྱོགས་སུའོ། །ཨོཾ་ཝ་ཡ་བེ་སྭཱ་ཧཱ། རླུང་གི་ཕྱོགས་སུའོ། །ཨོཾ་ཀཾ་ཀ་རི་སྭཱ་ཧཱ། སྲིན་པོ་རྣམས་ཀྱིའོ། །ཨོཾ་པི་ཙི་པི་ཙི་སྭཱ་ཧཱ། ཤ་ཟ་རྣམས་ཀྱིའོ། །ཨོཾ་གྷུཾ་གྷུཾ་སྭཱ་ཧཱ། འབྱུང་པོ་རྣམས་ཀྱིའོ། །ཨོཾ་ག་ར་ལ་ཡེ་སྭཱ་ཧཱ། ལྷ་མ་ཡིན་རྣམས་ཀྱིའོ། །ཨོཾ་མ་ཏི་བྷྱོ་སྭཱ་ཧཱ། མ་མོ་རྣམས་ཀྱིའོ། །ཨོཾ་བི་ཤུདྡྷ་སྭཱ་ཧཱ་བ་བི་ནི་སྭཱ་ཧཱ། དྲི་ཟ་རྣམས་ཀྱིའོ། །ཨོཾ་ཡཀྵ་ཤྲ་ཡ་སྭཱ་ཧཱ། གནོད་སྦྱིན་རྣམས་ཀྱིའོ། །ཨོཾ་པི་ཤཱ་ཙ་ག་ཏི་སྭཱ་ཧཱ། ཤ་ཟ་རྣམས་ཀྱིའོ། །ཨོཾ་གྲ་ཧེ་སརྫ་པྲབྟ་ཛྱོ་ཏི་མ་ཡ་སྭཱ་ཧཱ། རྒྱུ་སྐར་རྣམས་ཀྱིའོ། །རིམ་པ་འདི་ཁོ་ན་བཞིན་དུ་སྔགས་འདི་རྣམས་ཀྱིས་ཆུ་སྙིམ་པ་གསུམ་
སྦྱིན་པར་བྱའོ། །དེ་ནས་ཐམས་ཅད་ཕུར་བུ་ལས་ཐར་བར་འགྱུར་རོ། །འདིར་ཕྱག་རྒྱ་ཡང་འབྱུང་སྟེ། མཛུབ་མོ་འདུས་བྱས་གུང་མོ་སྦྱར། །མཐེ་བོང་རྡོ་རྗེ་བརྟན་པོར་སྦྱར། །དེ་ནི་དཔྲལ་བའི་དབུས་བཞག་ནས། །བསྐོར་ཞིང་བསྐོར་ནས་བསྐྱོད་པར་བྱ། །ལྷོ་རུ་ལུས་ནི་བལྟས་བྱས་ནས། །གཅེར་བུ་སྐྲ་ནི་བཤིག་གྱུར་ཅིང༌། །དྲག་ཅིང་ཁྲོས་པའི་སེམས་ལྡན་པས། །ཐུན་གསུམ་དུ་ནི་གཏོར་མ་སྦྱིན། །ཡང་ན་རྐེད་པའི་ཕྱོགས་སུ་ལག་པ་གཡོན་པ་དྲིལ་བུ་དང་བཅས་པ་བཞག་ལ་གཡས་པས་བསྙེམས་ཚུལ་དང་བཅས་པའི་རྡོ་རྗེ་གསོར་ཞིང་གཏོར་མ་སྦྱིན་པར་བྱའོ། །ཡང་ན་གུང་མོ་དང་སྲིན་ལག་དག་བཀུག་ནས་དེ་དག་གི་རྩ་བར་མཐེ་བོང་བཅུག་སྟེ་མཛུབ་མོ་དང་མཐེའུ་ཆུང་དག་ལྕགས་ཀྱུའི་རྣམ་པར་བྱ་ཞིང་ལག་པ་གཡོན་པའི་ཚིགས་རྒྱབ་ཏུ་ལག་པ་གཡས་པའི་རྒྱབ་ཚིགས་གཞག་སྟེ་སྙིང་གའི་གནས་སུ་བཞག་པར་བྱའོ། །དེ་ལྟ་བུ་དེ་ཡང་གཏོར་མའི་ཕྱག་རྒྱ་ཡིན་ནོ། །ཐུན་མཚམས་ཐམས་ཅད་དུ་རྒྱུའི་རྒྱུད་ལས་གསུངས་པའི་ཆོ་ག་བཞིན་དུ་གཏོར་མ་སྦྱིན་པར་བྱའོ། །དེ་ནས་སྒྲུབ་པའི་གྲོགས་མཆོག་གིས་ཨོཾ་ཨ་མྲྀ་ཏེ་ཧཱུཾ་ཕཊ་ཅེས་པའི་སྔགས་བརྗོད་པས་སྒྲུབ་པ་པོས་སྲུང་བ་བྱས་ནས་ཐོར་ཚུགས་བཅིང་བར་བྱས་ཏེ་ཤིང་གཅིག་གམ། ལམ་གྱི་བཞི་མདོའམ། སུམ་མདོའམ། མཚན་མ་གཅིག་པའམ། ཆུ་བོ་དག་ཏུ་གཏོར་མདོར་བར་བྱ་བའམ་བཀྲེས་པ་རྣམས་ལ་སྦྱིན་པར་བྱའོ། །དེ་ནས་དཀྱིལ་འཁོར་གྱི་རྡུལ་ཚོན་ཆུ་བོ་ལ་དབོ་བར་བྱའོ། །དཀྱིལ་འཁོར་གྱི་ས་གཞི་བའི་ལྕི་བས་བྱུགས་ལ་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་བཀླག་པར་བྱའོ། །བསོད་ནམས་ཡོངས་སུ་བསྔོས་ཏེ། དེ་བཞིན་གཤེགས་པ་ཐམས་ཅད་ལ་ཕྱག་བྱས་ནས་བསྐོར་བ་བྱས་ཏེ་ལངས་ནས་ཁྱེད་ཀྱིས་ཞེས་བྱ་བ་ལ་སོགས་པ་དང༌། ངོ་མཚར་གྱི་ཕྱག་རྒྱས་བཏབ་ལ་རང་གི་ལྷའི་ང་རྒྱལ་གྱིས་སྤྱོད་ལམ་རྣམ་བཞིའི་སྒོ་ནས་ཇི་ལྟར་འདོད་པས་གནས་པར་བྱའོ། །དེ་ནི་བགེགས་རབ་ཏུ་ཞི་བར་བྱེད་པའི་གཏོར་མའི་ཆོ་གའོ།། །།གདོན་དང་ཕྱོགས་སྐྱོང་ཚིམ་བྱའི་ཕྱིར། །དཔུང་བཟངས་རྒྱུད་ལས་ཇི་སྐད་གསུངས། །གཏོར་མའི་ལས་ནི་ལུང་བཞིན་དུ། །དེ་ནས་དང་པོར་རབ་བཤད་བྱ། །རེ་ཞིག་དང་
པོར་སྔར་བཤད་པའི་བཟའ་བ་དང་བཅའ་བ་ལ་སོགས་པ་ཉེ་བར་བསོགས་ཏེ་ཆ་གཉིས་སུ་བྱས་ནས་ཆ་གཅིག་ལ་གདོན་རྣམས་ཚིམ་པར་བྱ་བའི་ཕྱིར་ཚིགས་སུ་བཅད་པ་འདི་རྣམས་བརྗོད་པར་བྱའོ། །ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། །ནམ་མཁའ་ལྡིང་དང་འདབ་བཟང་ལུས་སྲུལ་པོ། །དྲི་ཟ་སྲིན་པོ་གདོན་གྱི་རིགས་རྣམས་དང༌། །གང་དག་ས་ལ་གནས་པའི་རྫུ་འཕྲུལ་ཅན། །བདག་ཅག་པུས་མོ་ས་ལ་བཙུགས་ནས་ནི། །ཐལ་སྦྱར་ཁྱེད་རྣམས་ལ་ཡང་གསོལ་འདེ་བས་ན། །བུ་སྨད་བཅས་ཤིང་གཡོག་འཁོར་བཅས་པ་རྣམས། །གསན་ནས་ཕན་འདོགས་སླད་དུ་འདིར་སྦྱོན་ཅིག །འབྱུང་པོ་གང་དག་རི་རབ་སྟེང་གནས་དང༌། །དགའ་བའི་ཚལ་དང་ལྷ་ཡུལ་ཀུན་གནས་དང༌། །ཤར་ནུབ་རི་དང་ཉི་ཟླའི་ཁྱིམ་རྣམས་དང༌། །གྲོང་ཁྱེར་ཀུན་ན་གང་དག་གནས་པ་དང༌། །ཆུ་བོ་ཀུན་དང་ཆུ་བོའི་ངོགས་རྣམས་དང༌། །རིན་ཆེན་གནས་ན་ལྷག་པར་གང་གནས་དང༌། །རྫིང་དང་མཚོ་དང་ལུ་མ་ལྟེང་ཀ་དང༌། །ཁྲོན་པ་དང་ནི་ངམ་གྲོག་ཆུ་མིག་དང༌། །གྲོང་དང་ཕྱུགས་ལྷས་དང་ནི་ནགས་ཚལ་དང༌། །ཁང་སྟོང་དང་ནི་ལྷ་ཡི་ཁང་པ་དང༌། །གང་དག་གཙུག་ལག་ཁང་དང་མཆོད་རྟེན་གནས། །སོ་ནམ་ཁྱིམ་དང་གླང་པོའི་ཁང་རྣམས་དང༌། །གང་དག་རྒྱལ་པོའི་དཀོར་ཁང་གནས་པ་དང༌། །སྲང་དང་ཁྱམས་དང་གྲོང་དང་འདུན་ས་དང༌། །གང་དག་ཤིང་གཅིག་དྲུང་དང་ལམ་ཆེན་གནས། །དུར་ཁྲོད་དང་ནི་ནགས་ཚལ་ཆེ་གནས་དང༌། །སེང་གེ་གླང་ཆེན་དྲེད་ཀྱི་གནས་རྣམས་དང། །འཇིགས་སུ་རུང་བའི་དགོན་པ་ཆེ་གནས་དང༌། །ཆུ་གླིང་མཆོག་དག་ཏུ་ནི་གནས་བཅས་དང༌། །གང་དག་འབྲོག་དགོན་དུར་ཁྲོད་གནས་ན་གནས། །དགའ་ཞིང་མགུ་ནས་དྲི་དང་མེ་ཏོག་ཕྲེང༌། །སྤོས་དང་མེ་ཏོག་མར་མེ་གུས་ཕུལ་བ། །འདི་དག་བསྣམས་ཏེ་སོ་སོར་བཞེས་ནས་ཀྱང༌། །ལས་འདི་དག་གི་འབྲས་བུ་མཆིས་པར་མཛོད། །གདོན་ལ་མཆོད་པ་བྱ་བའི་ཕྱིར་དེ་ལྟར་བྱ་སྟེ། དེ་ནས་ཆ་གཅིག་ལ་ཕྱོགས་སྐྱོང་རྣམས་ལ་མཆོད་པར་བྱ་བའི་ཕྱིར་ཚིགས་སུ་བཅད་པ་འདི་རྣམས་བརྗོད་པར་བྱའོ། །ཤར་ཕྱོགས་རྡོ་རྗེ་ཅན་
ཏེ་ལྷ་ཚོགས་བཅས། །གཏོར་མ་ཕུལ་བ་འདི་དག་བཞེས་སུ་གསོལ། །མེ་དང་གཤིན་རྗེ་བདེན་བྲལ་སྲིན་པོའི་བདག །ཆུ་བདག་རླུང་བདག་ནོར་གྱི་བདག་པོ་དང༌། །སྟེང་གི་ཉི་ཟླ་ཚངས་པ་ཆེན་པོ་དང༌། །ལྷ་རྣམས་མ་ལུས་ས་ཡི་ཀླུ་དག་དང༌། །རི་ཡི་ལྷ་དང་གསང་བའི་ཚོགས་འདུས་ལ། །སོ་སོ་སོ་སོར་གཏོར་མ་ཕུལ་བ་རྣམས། །རང་རང་གི་ནི་ཕྱོགས་སུ་བཞུགས་ནས་ཀྱང༌། །རང་གི་བུ་སྨད་གྲོགས་དང་གཡོག་འཁོར་བཅས། །དཔུང་དང་སྡེ་བཅས་མཉེས་ནས་བཞེས་སུ་གསོལ། །སྤོས་དང་མེ་ཏོག་གཏོར་མ་ལྷ་བཤོས་ནི། །འདི་དག་བཞེས་ཤིང་སོ་སོར་བསྣམས་ནས་ཀྱང༌། །བྱ་བ་འདི་ནི་འབྲས་བུ་མཆིས་པར་མཛོད། །འདི་ནི་བགེགས་ཉེ་བར་ཞི་བར་བྱེད་པའི་དོན་དུའམ། དགོས་པ་གཞན་འདོད་པའི་མཁས་པ་རྣམས་ཀྱིས་བསྒྲུབ་པར་བྱའོ། །གཏོར་མ་འདི་ལ་སྔགས་རྣམས་ནི། །ཀུན་དུ་འབྱུང་བ་མེད་མོད་ཀྱི། །འོན་ཀྱང་ཚིགས་བཅད་ཙམ་གྱིས་ནི། །འདིར་ནི་གདོན་སོགས་རིམ་པར་འགྱུར། །དཀའ་ཐུབ་མཐུ་དང་བདེན་པ་རྣམས། །ལྷག་པར་ཡང་དག་ཐོབ་འགྱུར་བ། །བཅོམ་ལྡན་འདས་ཀྱི་བཀའ་ལུང་ནི། །འདི་ལྟར་སྔགས་དང་མཚུངས་པར་འདོད། །སླུ་བ་མེད་པའི་ཚིག་གང་ཡིན། །དེ་ནི་གསང་སྔགས་ཉིད་དུ་འདོད། །མུ་སྟེགས་ཀྱིས་ནི་བསྟན་པའི་སྔགས། །དེ་ཉིད་ཕྱིར་ན་ཆད་མ་མིན། །དེ་བས་དངོས་གྲུབ་ཐོབ་རྣམས་ཀྱི། །ཚིག་གང་དེ་སྔགས་ཉིད་ཡིན་ཏེ། །སྤྱོད་ལམ་བཞི་པོ་དེ་དག་ནི། །ཕྱག་རྒྱ་ཉིད་དུ་བཤད་པ་ཡིན། །དེ་བས་གཏོར་མའི་ལས་འདི་ལ། །ཚིགས་བཅད་གསང་སྔགས་ཉིད་དུ་འགྲུབ། །དེ་བས་འདིར་ནི་སྭཱ་ཧཱ་སོགས། །སྤེལ་བའི་སྔགས་ནི་དགོས་པ་མེད། །དེ་ནི་གདོན་དང་ཕྱོགས་སྐྱོང་རྣམས་ཀྱི་གཏོར་མའི་ཆོ་གའོ།། །།དཀྱིལ་འཁོར་ཐམས་ཅད་ཚིམ་བྱའི་ཕྱིར། །དུས་ཀྱི་འཁོར་ལོ་ལས་གསུངས་པ། །གཏོར་མའི་ལས་ནི་ཤིན་ཏུ་གསང༌། །དེ་བཞེན་གཤེགས་དང་ལྷ་མོ་རྣམས། །དཀྱིལ་འཁོར་གྱི་ནི་འཁོར་རྣམས་དང༌། །ཁྲོ་བོ་མཁའ་འགྲོ་མ་རྣམས་ཀྱིས། །སུམ་ཅུ་དྲུག་གི་བར་གསལ་བར། །དེ་ནས་གཞན་ཡང་རབ་བཤད་བྱ། །དང་པོ་སྦྱོར་བ་སོགས་དབྱེ་བས། །ཏིང་ངེ་འཛིན་ནི་གསུམ་དུ་འདོད། །དེ་ཡི་མཐའ་མར་རྣལ་འབྱོར་པས། །ཕྱི་
རོལ་དཀྱིལ་འཁོར་ཚིམ་པར་བྱ། །ཡེ་ཤེས་འཁོར་ལོ་རང་སྙིང་ནས། །སྣ་ཡི་བུ་ག་གཡས་དང་གཡོན། །གཉིས་ནས་ཀུན་དུ་སྤྲོ་བྱ་ཞིང༌། །དཀྱིལ་འཁོར་ལ་ནི་ཡང་དག་དགོད། །ཆོས་ཀྱི་འཁོར་ལོའི་ཕྱོགས་ཀྱི་མཐའ། །བཞི་པོ་ལས་ཀྱང་མཁའ་འགྲོ་སོགས། །གནས་ནི་ཉི་ཤུ་རྩ་བཞི་ལས། །རབ་ཏུ་གཏུམ་མོ་ལ་སོགས་སྤྲོ། །ཁྭ་ཡི་གདོང་ཅན་ལ་སོགས་པ། །ཐམས་ཅད་ཟ་བྱེད་མཁའ་འགྲོ་མ། །རུལ་བའི་དྲི་ལྡན་ལ་སོགས་སྒོ། །དུར་ཁྲོད་རྣམས་ནས་ཡང་དག་སྤྲོ། །འཁོར་ལོའི་དཀྱིལ་འཁོར་ནང་དུ་ནི། །མཁའ་འགྲོ་མ་ཡི་དཀྱིལ་འཁོར་མཆོག །མཐོང་ནས་མཆོད་ཡོན་ཞབས་བསིལ་སོགས། །སྔར་བཞིན་རྣལ་འབྱོར་སོ་སོར་དབུལ། །དེ་ནས་སྔར་བཞིན་ཆུ་སྐྱེས་སོགས། །རྣལ་འབྱོར་པས་ནི་རྣམ་པར་བསམ། །བདུད་རྩི་ལྔ་ཡང་བསམ་པར་བྱ། །རང་གི་ས་བོན་བྱིན་བརླབས་ཤིང༌། །འོད་ཀྱི་ཚོགས་ནི་རྣམ་པར་འཕྲོ། །བྱང་ཆུབ་སེམས་ཀྱི་རང་བཞིན་དུ། །དེ་དག་བརྟུལ་ཞུགས་ཆེན་པོས་བསམ། །དེ་ནས་རྣམ་པར་སྦྱང་བ་ལ་སོགས་པའི་སྔགས་ཀྱི་ཚིག་ནི་འདི་རྣམས་ཡིན་ནོ། །ཨོཾ་ན་མཿཤྲཱི་བཛྲ་ཌཱ་ཀི་ཡ་ཨོཾ་ཨཱཿཧཱུཾ། ཡི་གེ་ཨོཾ་གྱིས་སྦྱང་བར་བྱའོ། །ཡི་གེ་ཨཱཿཡིས་སྤེལ་བར་བྱའོ། །ཡི་གེ་ཧཱུཾ་གིས་བདུད་རྩིར་བྱའོ། །ལག་པ་གཡོན་པས་སྦྱང་བར་བྱའོ། །ལག་པ་གཡས་པས་རྟོགས་པར་བྱའོ། །ཐལ་མོ་བཀབ་ནས་སྤར་བར་བྱའོ། །ནམ་མཁའ་ལྡིང་གི་ཕྱག་རྒྱས་ཟླ་བཞུ་བའི་རང་བཞིན་དུ་བདུད་རྩིར་བྱའོ། །དེ་ནས་གཡོན་པའི་སྲིན་ལག་གིས་དབུས་ནས་ཐིག་ལེ་བླངས་ཏེ་ས་ལ་ཆོས་འབྱུང་གྲུ་གསུམ་བྱ་ཞིང། དེའི་ནང་དུ་ཟླུམ་པོའི་ཐིག་ལེའི་གཟུགས་ཅན་བྱའོ། །དེའི་ནང་དུ་མེ་ལོང་གི་གཟུགས་བརྙན་བཞིན་དུ་གསལ་བའི་དཀྱིལ་འཁོར་གྱི་འཁོར་ལོ་བསམ་ཞིང་དེ་ཚིམ་པར་བྱའོ། །ཨོཾ་ཨཱཿཧཱུཾ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ་ཞེས་བྱ་བ་ནི་རྣམ་པར་ཤེས་པ་ལ་སོགས་པའི་ཕུང་པོ་རྣམས་དང་ནམ་མཁའ་ལ་སོགས་པའི་ཁམས་རྣམས་སོ། །ཨ་ཨཱ། ཨི་ཨཱི། ཨེ་ཨཻ། ཨར་ཨཱ་ར། ཨོ་ཨཽ། ཨའ་ཨཱལ། ཨོཾ་ཨཱཿཧཱུཾ་ཞེས་བྱ་བ་ནི་དབང་པོ་དྲུག་གོ །ཡ་ཡཱ། ར་རཱ། ཝ་ཝཱ། ལ་ལཱ། ཧ་ཧཱ་ཞེས་བྱ་བ་ནི་ཐབས་དང་ཤེས་རབ་ཀྱི་སྐུ་ཅན་གྱི་ཁྲོ་བོ་བཅུ་དང༌། ལས་ཀྱི་དབང་པོ་དང་ཞེ་སྡང་རྡོ་རྗེ་ལ་
སོགས་པའི་བདག་ཉིད་ཅན་དག་གོ །ཀ་ཀཱ་ཁ་ཁཱ་ག་གཱ་གྷ་གྷཱ་ང་ངཱ༌། ཙ་ཙཱ་ཚ་ཚཱ་ཛ་ཛཱ་ཛྷ་ཛྷཱ་ཉ་ཉཱ། ཊ་ཊཱ་ཋ་ཋཱ་ཌ་ཌཱ་ཌྷ་ཌྷཱ་ཎ་ཎཱ། པ་པཱ་ཕ་ཕཱ་བ་བཱ་བྷ་བྷཱ་མ་མཱ། ཏ་ཏཱ་ཐ་ཐཱ་ད་དཱ་དྷ་དྷཱ་ན་ནཱ། ཤ་ཤཱ་ཥ་ཥཱ་ས་སཱ་ཧ་ཧཱ་ཚྱ་ཚྱཱ་ཧ་ཧཱ། ཡ་ཡཱ་ར་རཱ་ཝ་ཝཱ་ལ་ལཱ་ཀྵ་ཀྵཱ་ཞེས་བྱ་བ་ནི་ཐབས་དང་ཤེས་རབ་ཀྱི་རིགས་སུམ་ཅུ་རྩ་དྲུག་ཚིམ་པར་བྱ་བའི་ཆོ་གའི་སྔགས་སོ། །དེ་ལྟར་བརྗོད་ནས་དཀྱིལ་འཁོར་གྱི་འཁོར་ལོའི་མཁའ་འགྲོ་མ་ཚིམ་པར་བྱ་བའི་ཕྱིར་སྲིན་ལག་དང་མཐེ་བོང་དག་གིས་ཐིག་ལེ་ཕུལ་ཏེ། དཀྱིལ་འཁོར་རང་གི་ཡན་ལག་ལ་བསྡུ་བར་བྱས་ནས། རང་གི་ཁ་མཚན་མ་གཅིག་པར་བདུད་རྩི་ལྔའི་ཐིག་ལེ་མཁའ་འགྲོ་མའི་གྲངས་དང་མཉམ་པ་སྔགས་འདི་ས་གཏོར་བར་བྱའོ། །ཨོཾ་སརྦ་ཀྲོ་དྷ་ཌཱ་ཀ་ནྱ་ཨི་མཾ་བ་ལིཾ་པྲ་ཏཱི་ཙྪནྟུ་ས་མ་ཡ་མ་ནུ་སྨ་ར་ཨཱཿཧཱུཾ་ཕཊ་སྭཱ་ཧཱ། དེ་ནས་ཡོངས་སུ་མཉེས་པར་བྱ་བའི་དོན་དུ་ཡང་སྔགས་འདི་བརྗོད་པར་བྱ་སྟེ། ཨོཾ་དི་བྱཱན་ནེ་ས་མཱ་དྷི་དྷྱ་ན་པྲྀ་ཎ་ནེ་སྭཱ་ཧཱ། དེའི་རྗེས་ལ་མཁའ་འགྲོ་མའི་འཁོར་ལོ་མ་ལུས་པ་ཡོངས་སུ་མཉེས་པར་གྱུར་ནས་ཁམས་གསུམ་པ་ཡང་དེ་ཁོ་ན་བཞིན་དུ་བསྒོམ་པར་བྱའོ། །དེ་ནས་ལངས་ཏེ་ཡེ་ཤེས་ཀྱི་འཁོར་ལོ་གཤེགས་སུ་གསོལ་བ། དམ་ཚིག་གི་འཁོར་ལོ་ནང་དུ་བཅུག་སྟེ། སྨོན་ལམ་བཏབ་ལ་བསོད་ནམས་ཡོངས་སུ་བསྔོས་ཏེ། རང་གི་ལྷའི་ང་རྒྱལ་དུ་དམིགས་ལ་སྣང་བ་ཙམ་གྱིས་རང་གི་ངོ་བོའི་སྤྱོད་ལམ་རྣམས་ཀྱིས་གནས་པར་བྱའོ། །དེ་ནི་དུས་ཀྱི་འཁོར་ལོའི་མན་ངག་གི་རིམ་པའི་རྡོ་རྗེ་མཁའ་འགྲོ་མ་རྣམས་ཀྱི་གཏོར་མའི་ཆོ་གའོ།། །།གང་གི་ལུས་ནི་རབ་རྒྱས་ཤིང༌། །བདེ་བ་ཆེན་པོ་ཐོབ་འགྱུར་བ། །ཡི་དགས་ཚིམ་བྱེད་གཏོར་མ་ནི། །དེ་ནས་གཞན་ཡང་རབ་བཤད་བྱ། །དང་པོ་ཆུ་ནི་དྲག་ཟུག་པའི། །ཆུ་བོ་ནུབ་བལྟས་སོང་ནས་ནི། །ལག་པ་ལ་སོགས་བཀྲུས་ནས་ནི། །གུས་པ་ཡིས་ནི་བཟླས་པར་བྱ། །པདྨའི་ཕྲེང་བ་བླངས་ནས་ནི། །མཁས་པས་བརྒྱ་དང་རྩ་བརྒྱད་བཟླས། །སྔགས་ནི་ཡི་གེ་དྲུག་པ་སྟེ། །དངོས་སུ་འཕགས་པ་སྤྱན་རས་གཟིགས། །ཨོཾ་དང་མ་ཎི་པདྨེ་དང༌། །ཧཱུཾ་གི་མཐའ་ཅན་སྔགས་རྒྱལ་པོ། །ཡི་དགས་རྣམས་ཀྱི་བཀྲེས་སྐོམ་སོགས། །ཉོན་མོངས་གདུང་བ་འཛོམས་བྱེད་པ། །འོ་མའི་མཚོ་ལྟར་དཀར་བའི་འོད། །ཞི་བ་འཕགས་པ་སྤྱན་རས་གཟིགས། །རལ་པའི་ཐོར་
ཚུགས་ཀྱིས་བརྒྱན་པ། །ཞལ་གཅིག་ཕྱག་ནི་གཉིས་པ་སྟེ། །མཆོག་སྦྱིན་ཆུ་སྐྱེས་དག་གིས་མཚན། ཐུགས་རྗེའི་རང་གི་ཤུགས་ཀྱིས་ནི། །གདུང་པར་འགྱུར་བའི་ཡིད་མངའ་བ། །མཚོ་སྐྱེས་ཆེན་པོའི་གེ་སར་གྱི། །ལྟེ་བའི་དབུས་ན་ཡང་དག་བཞུགས། །སྐྱིལ་ཀྲུང་ཕྱེད་པར་བཞུགས་གྱུར་པ། །འོད་དཔག་མེད་པས་དབུ་རྒྱན་བྱས། །ཟླ་བའི་འོད་ཀྱིས་བརྒྱན་གྱུར་ཅིང༌། །འོད་ཀྱི་འཁོར་ལོས་རྣམ་པར་བརྒྱན། །སྡུག་བསྔལ་གསུམ་གྱིས་སྡུག་བསྔལ་གྱུར། །མ་ལུས་འགྲོ་བ་སྐྱོབ་བརྩོན་པ། །རྣལ་འབྱོར་པས་ནི་བདག་ཉིད་བསམ། །སྐྲག་འགྱུར་རི་དགས་གཞོན་ནུ་མའི། །གཡོ་བའི་མིག་ནི་ཟིལ་གནོན་མཛད། །ཡིད་འོང་ལྷ་མོ་སྒྲོལ་མ་ནི། །གཡས་ལོགས་སུ་ནི་བསྒོམ་བར་བྱ། །གཡོན་དུ་དེ་བཞིན་སེར་པོར་སྣང༌། །ཕྱག་བྱེད་པ་ལ་ཡང་དག་བརྩོན། །ཟླ་བ་ཕྱེད་པ་དང་མཚུངས་པའི། །དཔྲལ་བ་དང་ལྡན་ཁྲོ་གཉེར་ཅན། །དེ་ནས་སྙིང་གིའི་པད་དབུས་སུ། །ཡི་གེ་ཧྲཱིཿནི་ཡང་དག་བསམ། །དེ་ཡི་འོད་ཀྱིས་འགྲོ་བ་ཀུན། །གསལ་བར་བྱས་ནས་རབ་ཏུ་དགང༌། །འོད་ཟེར་མང་པོ་དེ་ཉིད་ཀྱིས། །ཤིན་ཏུ་སྐེམ་པའི་ཡི་དགས་ལྟར། །རང་གི་སྐྲ་དང་བ་སྦུས་གཡོགས། །གསུས་པ་རི་བོ་དག་དང་མཚུངས། །མགྲིན་པའི་ཝ་ལས་བྱུང་བ་ཡི། །རྣག་ནི་འཐུང་བར་ཀུན་དུ་འདོད། །རུས་པ་སྣབས་ལུད་བཀྲེས་ཟས་ཉེན། །རང་གི་མཆུ་དང་ལྐོག་མ་རྣམས། །དེ་རྣམས་བལྟས་ནས་བསོད་ལྡན་པས། །སྙིང་རྗེ་ཆེན་པོ་བསྐྱེད་བྱས་ནས། །དེ་རྣམས་སྟེང་དུ་ལུས་བྱུང་བའི། །འོད་ཟེར་འཁོར་ལོ་དབབ་པར་བྱ། །དེ་ནས་སྙིང་རྗེའི་ཤུགས་ཀྱིས་ནི། །ལག་པ་དག་ལས་ཤིན་ཏུ་བྱུང༌། །འོ་མའི་རྒྱུན་གྱི་དེ་དག་ནི། །སྙིམ་བ་ཁ་དང་འབྲེལ་བ་དགང༌། །དེ་ནས་ལོ་མ་འབྲས་ཆན་དང༌། །འོ་མ་དང་ནི་མངར་གསུམ་གྱིས། །སྣོད་ནི་ཤིན་ཏུ་གང་བྱས་ནས། །དེ་རྣམས་འདི་ལྟར་བོད་པར་བྱ། །ཨོཾ་ཨཱ་ཡནྟུ་ཨཱ་ཡནྟུ་མ་ཧཱ་པྲེ་ཏ་སངྒྷ་ཤུཥྐ་མ་ཀནྠོཥཱ་པཱུ་ཏ། ཀྵ་དཱི་པཱ་སཱ་ཝ་ཤྲཱི་ཀྲི་ཏ་དྷི་ནི་ཙི་ཏྟ། ཨི་མཾ་བ་ལིཾ་གྲྀ་ཧྞ་ཏ་ཛི་གྷ་ཐ་བི་བ་ཐ་བྷཱུཉྫ་ཐ་སུ་ཁཝ་ཏྱཾ་ར་མ་ཐ། པུ་ནར་ཀུ་ཤལ་དྷི་མ་ར་ཐ་སྭཱ་ཧཱ། སྔགས་འདི་ཡིས་ནི་ཡི་དགས་ཀྱི། །རིགས་ཆེན་པོ་ལ་དེ་ནས་ནི། །གཏོར་མ་སྦྱིན་ཕྱིར་སྔགས་འདི་ནི། །རྣལ་འབྱོར་པ་ནི་གསལ་བར་བརྗོད། །ཨོཾ་ན་མོ་བྷ་ག་བ་ཏེ་ཨ་པ་ཡ་བྷི་རུ་ཀ་ཏེ་ཛོ་རཱ་ཛཱ་ཡ་ཏ་ཐཱ་ག་ཏ་ཡ་ཨརྷ་ཏེ་སམྱཀསཾ་
བུདྡྷཱ་ཡ། ཏདྱ་ཐཱ། ཨོཾ་སརྦ་ཏ་ཐཱ་ག་ཏ་ཨ་བ་ལོ་ཀི་ཏེ། བྷ་ར་བྷ་ར། སམྦྷ་ར་སམྦྷ་ར། ཧཱུཾ་ཛྫ་སརྦ་པྲེ་ཏ་ཀ་ལ་ནི་སནྟརྤ་ནི་སྭཱ་ཧཱ། དེ་ཉིད་ཀྱི་ཕྱག་རྒྱ་འབྱུང་སྟེ་ལག་པ་གཉིས་ཀྱིས་ཐལ་མོ་ཁ་ཅུང་ཟད་ཕྱེ་བ་བྱས་ལ་མཛུབ་མོ་དག་རྣ་ཆའི་རྣམ་པར་བྱས་པའི་ཕྱག་རྒྱ་བྱས་ཏེ། ཡི་དགས་ཀྱི་གཏོར་མའི་སྔགས་དང་ཕྱག་རྒྱའོ། དེ་ནས་ཆུ་བོ་དེ་ཉིད་འོ་མར་འབྲུབ་པར་བསམས་ལ་དེ་ཉིད་དུ་གཏོར་མ་དེ་དོར་བར་བྱའོ། །ཡི་དགས་དེ་རྣམས་ཀྱང་ལུས་ཡོངས་སུ་རྒྱས་པ་འོད་ཟེར་གྱི་ཚོགས་དེ་ཉིད་ཀྱི་སྟེང་དུ་བཏེག་ལ། བདེ་བ་ཅན་གྱི་འཇིག་རྟེན་གྱི་ཁམས་འཇིག་རྟེན་དབང་ཕྱུག་བཞིན་དུ་པདྨའི་སྟན་ལ་ཉེ་བར་གནས་པ་བསམ་གཏན་ལ་དགའ་བའི་ཡིད་ཅན་དུ་བསྒོམ་པར་བྱའོ། །དེ་ནི་ཡི་དགས་ཀྱི་གཏོར་མའོ།། །།བདག་ཉིད་སྐལ་བཟང་སྒྲུབ་པ་དང༌། །རྒྱལ་པོ་ལ་སོགས་དབང་བྱའི་ཕྱིར། །དྲི་ཟའི་གཏོར་མ་བསྒྲུབ་པ་ནི། །དེ་ནས་གཏོར་མ་རབ་བཤད་བྱ། །དཀྱིལ་འཁོར་གྲུ་བཞི་བྱ་སྟེ། གླ་རྩི་དང༌། ག་པུར་དང༌། བཞི་མཉམ་དང༌། གུར་ཀུམ་དང༌། ཙནྡན་དང༌། སི་ལ་ར་ས་དང༌། བ་ལ་ལ་སོགས་པ་རྣམས་ཀྱིས་ཉེ་བར་བྱུགས་ལ་དབུས་ཀྱི་གནས་སུ་ཨ་ཀ་རུའི་སྤོས་དུད་སྣ་ཚོགས་ཀྱི་དྲི་བསྲུང་ཡིད་དུ་འོང་བ། ནོར་བུ་མཐིང་ཤུན་རང་བཞིན་ཅན་ཤིན་ཏུ་མཐོ་བ། དངུལ་དང་བྱི་རུ་དང་གསེར་ལས་བྱས་པའི་རྩེ་མོ་གསུམ་གྱིས་ཉེ་བར་མཛེས་པའི་གཟུགས་ཅན་དྲི་ཟིའི་རྒྱལ་པོ་རྣམས་རྐེད་པའི་ཆ་སྣ་ཚོགས་ལ་སྣ་ཚོགས་རྒྱན་ལྡན་དང༌། སྣ་ཚོགས་མཐུ་ལྡན་ལ་སོགས་པ་དྲི་ཟའི་རྒྱལ་པོས་རྣམ་པར་བརྒྱན་པའི་རིའི་རྒྱལ་པོ་སྤོས་ཀྱི་ངད་ལྡང་རྣམ་པར་བསྒོམས་ལ་དེའི་སྟེང་དུ་སྔར་བཤད་པའི་དྲི་ཟའི་བདག་པོ་ལུས་རྫས་དྲི་ཞིམ་པོ་དག་གིས་ཉེ་བར་བྱུགས་པ་དྲ་ཞིམ་པོའི་ཚོགས་ཀྱིས་ཕྱོགས་བཅུར་གཏོགས་པའི་ཁོང་གང་བར་བྱས་ལ། ལུས་ལྷའི་མེ་ཏོག་སྣ་ཚོགས་ཀྱི་ཕྲེང་བས་རྣམ་པར་བརྒྱན་པ། དྲི་ཟའི་བུ་མོ་ནུ་མའི་ལྗིད་ཀྱིས་དབྱིབས་དགུ་བ་ལ་འཁྱུད་པ་ལས་བྱུང་བའི་དགའ་བ་དང་ལྡན་པ། ས་འཛིན་པ་ལ་སོགས་པ་ཀླུའི་བྱེ་བྲག་གླུ་ཡོངས་སུ་ལེན་པའི་སྒྲ་སྙན་པས་ལྐོག་མ་ཁྱབ་པ་དག་རྣམ་པར་བསྒོམས་ཏེ་དཀྱིལ་འཁོར་གྱི་འགྲམ་དུ་གཏོར་མའི་སྣོད་ཆུ་དྲི་ཞིམ་པོ་དང༌། ཞོ་དང༌། འབྲས་ཡོས་དང༌། སྨན་ཐམས་ཅད་དང༌། ཉུངས་ཀར་དང༌། ཙནྡན་དཀར་པོ་དང༌། ཙནྡན་དམར་པོ་དང༌། གླ་རྩི་དང༌། གུར་ཀུམ་དང༌། སྤང་སྤོས་དང༌། དྭ་ཚྭ་དང༌།
ཨ་ཀ་རུ་ལ་སོགས་པའི་དྲི་ཞིམ་པོ་རྣམས་ཀྱིས་ཡོངས་སུ་བཀང་ལ། སྣོད་གཞན་ཡང་ཞོ་དང༌། སྦྲང་རྩི་དང༌། མར་སར་དང༌། ཤ་ཁ་ར་དང༌། ཁ་དྷ་དང༌། བུ་རམ་དང༌། འབྲས་ཆན་དག་གིས་གང་བར་བྱ་སྟེ། དེ་རྣམས་བོད་པའི་དོན་དུ་སྔགས་འདི་གསུམ་བརྗོད་པར་བྱའོ། །ཨོཾ་གནྡྷ་རྦ་སརྦ་ཨ་དྷི་པ་ཏ་ཡེ། བི་ཙི་ཏྲ་ཨངྒ་དྷ་དྷ་ཡི། མ་མ་ཀ་ཏྱ་སིདྡྷ་ཡེ། ཨི་ཏཱ་ཨ་ཡནྟུ། ས་ས་མ་ཡཾ་པ་ལ་ཡནྟུ། བྷ་ག་བཱན། བཛྲ་དྷ་ར་ཤཱ་ས་ནེ་ཏིཥྛནྟུ། ཨ་ཏྲ་སནྣི་ཧི་ཏ་བྷ་བནྟུ་སྭཱ་ཧཱ། དྲི་རྡོ་རྗེ་མའི་ཕྱག་རྒྱས་གཏོར་མའི་སྣོད་ཡོངས་སུ་རྒྱས་བཏབ་སྟེ་སྔགས་བརྗོད་པར་བྱའོ། །ཨོཾ་སྭ་བྷཱ་བ་ཤུདྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཎཱཾ་ཨཱདྱ་ནུ་དྤནྣ་ཏྭཱ་ཏ་ཨོཾ་ཨཱཿཧཱུཾ་ཕཊ་སྭཱ་ཧཱ། དེ་ནས་གཏོར་མའི་སྣོད་རིའི་རྩ་རུ་དོར་བར་བྱའོ། །ཁྱོད་ཀྱིས་ཞེས་བྱ་བ་ལ་སོགས་པས་བཏང་སྟེ་རྣལ་འབྱོར་པས་གནས་པར་བྱའོ། །དེ་ནས་རྒྱལ་པོ་ལ་སོགས་པ་རྣམས་འདིས་དབང་དུ་འགྱུར་རོ། །དེ་ནི་དྲི་ཟའི་གཏོར་མའོ།། །། ཞིང་ནི་སྲུང་བར་བྱེད་པ་དག །ཐམས་ཅད་ཀྱིས་ནི་རབ་མཉེས་འགྱུར། །ཞིང་སྲུང་གཏོར་མའི་བྱ་བ་ནི། །དེ་ནས་གཞན་ཡང་རབ་བཤད་བྱ། །དེ་ནས་བཅོམ་ལྡན་འདས་ཀྱིས་ཞིང༌། །ཐོད་པའི་དུམ་བུ་ལ་སོགས་དང༌། །དངོས་གྲུབ་དོན་དུ་གང་དུ་གནས། །ཉི་ཤུ་རྩ་བཞི་གསུངས་པར་གྱུར། །དེ་ལ་འདི་རྣམས་ནི་ཞིང་རྣམས་ཀྱི་བརྔའི་མིང་ཡིན་ཏེ། པུ་ཛ་ཨོ་ཨ་གོ་ར་དེ་མ། ཀ་ཨོ་ཏྲི་ཀོ་ཀ་ལ་ཀ་ཧི། པྲ་གྲྀ་སོ་སུ་ནཱ་སི་མ་ཀུ། པུལླི་མ་ར་ཡ་དང༌། ཛཱ་ལནྡྷ་ར་དང༌། ཨོ་ཌི་ཡ་ན་དང༌། ཨརྦུ་ཏ་རྣམས་ནི་གནས་དག་ཡིན་ནོ། །གོ་དཱ་ཝ་རཱི་དང༌། རཱ་མེ་ཤྭ་ར་དང༌། དེ་བཱི་ཀོ་ཊཱི་དང༌། མཱ་ལཱ་བ་རྣམས་ནི་ཉེ་བའི་གནས་སོ། །ཀཱ་མ་རཱུ་པ་དང༌། ཨོ་ཊེ་དག་ནི་ཞིང་ངོ༌། །ཏྲི་ཤ་ཀུ་ནེ་དང༌། ཀོ་ས་ལ་དག་ནི་ཉེ་བའི་ཞིང་ངོ༌། །ཀ་ལིཾ་ཀ་དང༌། ལམྦ་ཀ་དག་ནི་ཙྪ་ནྷོ་ཧའོ། །ཀཱཉྩི་དང༌། ཧི་མ་ལ་ཡ་དག་ནི་ཉེ་བའི་ཙྪནྡོ་ཧའོ། །པྲེ་ཏ་པུ་རི་དང༌། གྲྀ་ཧ་དེ་བ་ཏ་དག་ནི་འདུས་པའོ། །སོ་རཱ་ཥྚ་དང༌། སུ་ཝ་རྞྞ་དྭཱི་པ་དག་ནི་ཉེ་བའི་འདུས་པའོ། །ན་ག་ར་དང༌། སིནྡྷུ་ཤ་དག་ནི་དུར་ཁྲོད་དོ། །མ་རུ་དང༌། ཀུ་ལུ་ཏཱ་དག་ནི་ཉེ་བའི་དུར་ཁྲོད་དོ། །ཞིང་དེ་རྣམས་ཀྱི་བདག་པོ་དག་གི་མིང་རྣམས་བརྗོད་པར་བྱ་སྟེ། རྒས་པ་མེད་དང་ཆུར་འགྱུར་དང༌། །དེ་བཞིན་ཨི་དང་རྐུན་པོ་དང༌། །ཟླ་བའི་གཟུགས་ཅན་འུག་གདོང་དང༌། །དྲོད་ཟ་དང་ནི་དྲག་པོ་འཇོམས། །ལུས་མེད་བྱུག་པའི་ལུས་
ཅན་དང༌། །རོལ་པས་འདོན་བྱེད་མཆེ་བ་ཅན། །ས་སྲུང་དང་ནི་རླབས་ཅན་དང༌། །དེ་བཞིན་དུ་ནི་སྨན་འཇོམས་དང༌། །མཐའ་ཡས་དང་ནི་ཉོན་མོངས་སེམས། །ཨ་སྨྲ་ལེན་དང་མི་བཟད་གདོང༌། །བ་ལང་གདོང་ཅན་དྲིལ་བུའི་འོད། །ཟ་བྱེད་གཏུམ་པོ་དང་ལྡན་དང༌། །རལ་པས་འགྱིང་བ་ཞིང་སྲུང་རྣམས། །གོ་རིམས་བཞིན་དུ་ཤེས་པར་བྱ། །སྤྱན་སེར་དབུ་སྐྲ་གྱེན་དུ་བརྫེས། །མཆེ་གཙིགས་པ་ཡི་ཞལ་མངའ་དང༌། །ཐོད་པའི་ཕྲེང་བའི་རྒྱན་དང་ལྡན། །ཕྱག་ན་ཐོད་པ་ཁ་ཊྭཱཾ་ག །ནག་དང་འཕྲོག་དང་གྲོང་སོ་སོ། །རི་དང་ཚང་ཚིང་ཆུ་འགྲམ་དང༌། །ཆུ་བོ་རྫིང་འགྲམ་དག་དང་ནི། །ཁང་སྟོང་དང་ནི་བཞི་མདོ་དང༌། །དབེན་པ་ཚོང་འདུས་ཡུལ་འཁོར་དང༌། །གྲོང་ཁྱེར་ཤིང་དྲུང་དག་དང་ནི། །དུར་ཁྲོད་དང་ནི་ཚང་ཚིང་ཁྱིམ། །སྨད་འཚོང་ཁྱིམ་དང་མུན་ཁུང་དང༌། །གནས་གཞན་དག་ཏུ་དེ་དག་ནི། །གནས་བཅས་ནས་ནི་རྟག་ཏུ་གནས། །ཧཱུཾ་གི་ས་བོན་ལས་བྱུང་བ། །ནང་གི་ཡིག་གསུམ་བྱིན་གྱིས་བརླབས། རྣལ་འབྱོར་པས་ནི་མདུན་གནས་པར། །འབད་པ་ཡིས་ནི་བསྒོམ་པར་བྱ། །ཆང་དང་ཤ་དང་འབྲུ་ཡི་ཆང༌། །འབྲས་ཀྱི་རྒྱལ་པོའི་ཆན་གྱིས་དགང༌། །སྣོད་ནི་ཉི་ཤུ་རྩ་བཞི་དག །བླངས་ནས་གཏོར་མ་དབུལ་བར་བྱ། །དྲིལ་བུའི་སྒྲ་བཅས་སྦོས་ཕུལ་ནས། །རྣལ་འབྱོར་རིག་པས་སྤྱན་དྲང་བྱ། །དེ་ནས་སྤྱན་དྲང་དོན་དུ་ན། །དེ་ཡི་སྔགས་འདི་བརྗོད་པར་བྱ། །ཨོཾ་ཨ་ཡཱནྟུ། ཨོཾ་ཨ་ཡཱནྟུ། ཀྵི་ཏ་ཨ་དྷི་པ་ཏ་ཡེ། མཱ་མ་ཤཱནྡི་པུཥྚི་ཝ་ཤྱེ་དི་དྷི་སཱ་དྷ་ན་ཡ། ན་མོ་གྷ་ནཾ་ནཤྩ་ཌྷ་ན་པ་ཏེ་ས་པ་རི་ཝཱར་ས་རཀྵཱ་རྠཱཾ་ས་ནྣི་ཧི་ཏ་ཨི་ཧ་བྷ་བནྟུ་སྭཱ་ཧཱ། དེ་ན་བོས་ཏེ་དྲི་ཡི་ཆུས། །ཞལ་བསིལ་མཆོད་ཡོན་དག་ཕུལ་ནས། །སྔགས་འདི་གསང་སྔགས་རིག་པ་ཡིས། །དེ་རྣམས་ལ་ནི་གཏོར་མ་དབུལ། །ཨོཾ་ཧྲཱིཿཧཱུཾ་ཨ་མུ་ཀ་ཨ་བ་ཏ་ར་ཀྵེ་ཏྲ་པཱ་ལ། མ་ཧཱ་བ་ལ་ཀ་པི་ལ་ཛ་ཊ་ལ་མ་ཧཱ་བ་ལ་བྷ་སུ་ར་ཏྲི་ནེ་ཏྲེ་ཛྭ་ལ་མུ་ཁ། གནྡྷ་དྷཱུ་པ་བ་ལིཾ་པཱུ་ཛ་གྲྀ་ཧྣ་གྲྀ་ཧྣ། བྷཻ་ར་བ་རཱུ་བེ་ཏ་ར་ཏ་ར། ཏུ་རུ་ཏུ་རུ། མུ་རུ་མུ་རུ། ཁ་ཁ་ཁཱ་ཁཱ། ལ་ལ་ལ། ཧེ་ཧེ་ཧ་ཧ། མ་ཧཱ་དྷ་མ་ར་ཨ་ཏི་པ་ཏ་ཡེ་སྭཱ་ཧཱ། ཞེས་བྱ་བ་བརྗོད་ལ། དཔལ་བདེ་མཆོག་འཁོར་ལོའི་རྒྱུད་ལས་བཤད་བའི་མཁའ་འགྲོ་མའི་ཕྱག་རྒྱས་བཏབ་སྟེ། ཤིང་གཅིག་གི་དྲུང་དུ་གཏོར་མ་དོར་བར་བྱའོ། །དེ་ལྟར་བྱས་ན་རྣལ་འབྱོར་པ། །
གང་གིས་སེམས་ཅན་དག་གི་དོན། །རྒྱུན་མི་ཆད་པར་བྱེད་པའི་ལས། །ཞི་བ་ལ་སོགས་དེ་འགྲུབ་འགྱུར། །གལ་ཏེ་ཐུན་ནི་གསུམ་མམ་བཞིར། །རྣལ་འབྱོར་པས་ནི་གཏོར་མ་སྦྱིན། །དེས་ན་དེ་ལ་ཞིང་སྲུང་རྣམས། །རྟག་ཏུ་སྲུང་བར་བྱེད་པར་འགྱུར། །དགྲ་བོ་དང་ནི་རྒྱལ་པོ་དང༌། སེང་གེ་སྟག་ལ་སོགས་པ་དང༌། །གཞན་ཡང་གསོད་བྱེད་རིགས་ཅན་དང༌། །རྐུན་མ་འང་དེ་ལ་གནོད་མི་བྱེད། །ལངས་བ་འམ་ནི་འདུག་པ་འམ། །ཉལ་ལམ་འགྲོ་བར་གྱུར་ཀྱང་རུང༌། །སྤྱོད་ལམ་ཐམས་ཅད་དང་ལྡན་བ། །དེ་ལ་དེ་རྣམས་སྲུང་བར་བྱེད། །བདག་ཉིད་དང་ནི་གཞན་དག་ལ།། གང་ཞིག་མྱུར་དུ་སྐྱོབ་འདོད་པ། །དེ་ཡིས་ཞིང་སྲུང་གཏོར་མ་ནི། །གུས་པ་ཡིས་ནི་རྟག་ཏུ་བྱ། །དེ་ནི་ནམ་མཁའ་དང་མཉམ་པའི་རྒྱུད་ཀྱི་མན་ངག་གི་སྒོ་ནས་དཔལ་བདེ་མཆོག་གི་ཞིང་གི་བདག་པོའི་གཏོར་མའི་ཆོ་གའོ།། །།གང་གིས་རིམས་སོགས་རྣལ་འབྱོར་པས། །སྐད་ཅིག་གིས་ནི་རབ་ཞི་བྱེད།། ཤ་ཟའི་གཏོར་མའི་སྒྲུབ་པ་ནི། །དེ་ནས་གཞན་ཡང་རབ་བཤད་བྱ། །དང་པོར་ཏིང་འཛིན་ལས་ལངས་ཏེ། །འཇིགས་རུང་དུར་ཁྲོད་སོང་ནས་ནི། །དོགས་པ་མེད་པའི་ཡིད་ཀྱིས་ནི། །དེ་རུ་དཀྱིལ་འཁོར་བྲི་བར་བྱ། །དུར་ཁྲོད་ཀྱི་ནི་སོ་ཕག་ཚོགས། །ལག་པས་བརྡུངས་ཏེ་ཕྱེར་བྱས་ནས། །ཚོན་རྩི་ཁ་དོག་ལྔ་པ་དག །དེ་ནི་རྣལ་འབྱོར་རིག་པས་བྱ། །དེ་ནི་བདེ་མཆོག་དཀྱིལ་འཁོར་ནི། །གོ་རིམས་བཞིན་དུ་ལེགས་བྲིས་ནས། །མེ་ཏོག་ཀ་ར་བཱི་ར་སོགས། །གོ་ཀུ་ད་ཧ་ན་རྣམས་དང༌། །བདུད་རྩི་ཡི་ནི་རྫས་དག་དང༌། །བཟའ་བཏུང་དེ་བཞིན་ཤེས་རབ་དང༌། སྙོམས་འཇུག་མཆོད་པས་སྒྲུབ་པ་པོས། །གཙོ་བོ་ཧེ་རུ་ཀ་མཆོད་བྱ། །ཇི་སྲིད་དཀྱིལ་འཁོར་ལས་འོད་ཟེར། །ཁ་དོག་སྔོན་པོ་རྣམ་བྱུང་བ། །དེ་སྲིད་རྐང་པ་བརྒྱད་པའི་སྔགས། །མཉམ་གཞག་རྣལ་འབྱོར་པ་ཡིས་བཟླ། །དེ་མཐོང་ཡིད་ཆེས་ཤེས་བྱས་ནས། །ཤ་ཟའི་གཏོར་མ་བརྩམ་པར་བྱ། །ཆང་གི་བཏུང་བ་དང་ལྡ་ཁྲག །ཉ་ཤ་རློན་པ་དག་དང་ནི། །བསྲེགས་དང་བཙོས་པའི་བྱེ་བྲག་དང༌། །དྲི་ཞིམ་མེ་ཏོག་དམར་པོ་དང༌། །ཁབ་དང་རས་ནི་སྔོན་པོ་དང༌། །ཟངས་དང་འཁར་བ་ལས་བྱས་དང༌། །ལྕགས་ཀྱི་ཕྱེ་མ་དག་དང་ནི། །འབྲུ་སྣའི་ཆན་གྱིས་ཡོངས་གང་བ། །བྱས་ནས་སྤོས་དང་མེ་ཏོག་སོགས། །བྱིན་ཏེ་
བོད་པ་ཡང་དག་བརྩམ། །ཁྲོ་བོའི་སེམས་ལྡན་ཐུབ་དཀའ་བ། །དོགས་མེད་ཡིད་ཀྱིས་སྔགས་པ་ཡིས། །དུར་ཁྲོད་གནས་པའི་ཤིང་གཅིག་ལ། །འཛེགས་ནས་རྩེ་མོ་ལ་གནས་པ། །གཅེར་བུ་སྐྲ་བཤིག་གྱུར་པ་ཡིས། །དཔའ་བོ་དྲུག་གི་གོ་ཆ་དགོད། །ཊ་དང་མ་ལས་ཡང་དག་བྱུང༌། །ཟླ་བ་དང་ནི་ཉི་མ་དག །མིག་ལ་བསམས་ནས་གནོད་མཛེས་ནི། །རྒྱལ་པོས་ཕྱོགས་དག་བཅིང་བར་བྱ། །ཨོཾ་ཨ་ར་ལླི་ཧོ་ཛཿཧཱུཾ་བཾ་ཧོཿབཛྲ་ཊཱ་ཀི་ནྱ་ས་མ་ཡ་སྟྭཾ་དྲྀ་ཤྱ་ཧོ། །དེ་ནས་ཤ་ཟ་བློ་ལྡན་གྱིས། །འདི་ཡིས་བོད་པ་བྱས་ནས་སུ། །བརྩེ་བའི་བདག་ཉིད་ཁྲོ་ཚིག་གིས། །ཚིགས་བཅད་འདི་ནི་བརྗོད་པར་བྱ། །ཤ་ཟ་འམ་དེའི་ཡིད་འོང་བ། །འདིར་ནི་མི་བཟད་སུ་ཞིག་གནས། །མིང་ནི་འདི་ཞེས་བྱ་བ་ངས། །ཀྱེ་ལུས་གཏོར་མ་སྦྱིན་པར་བྱ། །ང་ཡི་ལུས་ལས་ཤ་ཁྲག་སོགས། །བཟའ་བ་དང་ནི་བཏུང་བར་གྱིས། །ཚིགས་དང་རྐང་དང་ཀླད་པ་དང༌། །དེ་བཞིན་ཁམས་ནི་བདུན་པོ་དག །འོངས་ཏེ་ཁས་བླངས་ནས་ནི། །ཅི་བདེ་བར་ནི་གནས་པར་གྱིས། །རྣལ་འབྱོར་བ་ནི་དེ་དེ་ཡི་ཚིག །དེ་སྐད་མཚན་ཕྱེད་ནས་ཐོས་ནས། །རབ་ཏུ་དགའ་བའི་ཡིད་ལྡན་པ། །ཤ་ཟ་ཀུན་ཀྱང་མཐོང་བར་འགྱུར། །གུས་པས་ཤ་ནི་བཟའ་བའི་ཕྱིར། །བྱིན་ཅིག་ཅེས་ནི་ངེས་པར་སྨྲ། །དེ་ནས་དེ་ཡི་ཚིག་ཐོས་ཏེ། །འདི་ནི་ཁྱེར་ཅིག་ཅེས་བརྗོད་བྱ། །གལ་ཏེ་ནུས་ཡོད་པའི་ལུས་ལས། །ཁྲག་ལ་སོགས་པ་དག་ཁྱེར་ཅིག །དེ་ནས་ཧེ་རུ་ཀའི་གཟུགས་སུ། །མཐོང་ནས་དེ་དག་འཇིགས་པར་འགྱུར། །རྣལ་འབྱོར་པ་ཡི་རང་ལག་ནས། །གཏོར་མ་བླངས་ཏེ་འགྲོ་བར་བྱེད། །དེ་ལ་གཏོར་མའི་སྔགས་ནི་འདི་ཡིན་ཏེ། །ཨོཾ་པི་ཙི་པི་ཙི་པི་སྨ་ཤཱ་ན་ཝ་སི་བྷྱོ། །མ་ཧཱ་པི་ཤཱ་ཙི་བྷྱོ། །ཨི་མཾ་བ་ལིཾ་གྲྀ་ཧྞ་ཏུ། བྷུཉྫ་ཐ། པི་བ་ཐ། ཡ་ཐཻཥྚ་ད་མ་མེ་པྲ་ཡ་ཙྪན་ཏུ་སྭཱ་ཧཱ། དེ་ནས་རབ་ཏུ་གསང་བར་བྱ། །ཚིག་བརྒྱད་པ་ཡི་སྔགས་བརྗོད་ཅིང༌། །དེ་ནི་ཤིང་རྩེ་ནས་བབས་ཏེ། །ཡེ་ཤེས་འཁོར་ལོ་གཤེགས་སུ་གསོལ། །རིམས་ལ་སོགས་པའི་ནད་ཞི་བ། །དེ་ནས་དེ་ཡི་རབ་འགྲུབ་འགྱུར། །རྣལ་འབྱོར་པ་ནི་ཇི་ལྟར་འདོད། །ལས་བྱེད་འགྱུར་འདིར་ཐེ་ཚོམ་མེད། །དེ་ནས་རང་གི་གནས་ཕྱིན་ཏེ། །ཆུ་ཡི་གཏོར་མ་གཏང་བར་བྱ། །དེ་ཡིས་སྔར་བཤད་རིམ་པ་བཞིན། །སྙིམ་པ་གསུམ་ནི་སྦྱིན་པར་བྱ། །དེ་ནི་རྡོ་རྗེ་ཅན་
འབྱུང་བ་ཞེས་བྱ་བའི་རྒྱུད་ཀྱི་མན་ངག་གི་ཤ་ཟའི་གཏོར་མའི་ཆོ་གའོ།། །།རྒྱུད་ཆེན་སྒྱུ་འཕྲུལ་དྲ་བ་ལས། །བཏུས་ནས་དུག་ནི་ཞི་བྱའི་ཕྱིར། །མཁའ་ལྡིང་གཏོར་མ་བྱ་བ་ནི། །དེ་ནས་གཞན་ཡང་རབ་བཤད་བྱ། །ཕ་རོལ་ཚུ་རོལ་མེད་པའི་མཆོག །འོ་མའི་རྒྱ་མཚོ་ཟབ་མོ་ནི། །ཆུ་སྲིན་འཛིན་ཁྲིས་ཀུན་དུ་ཁྱབ། །གཡོ་ཞིང་ནམ་མཁའི་གཏོས་རིག་པ། །རླབས་ཀྱིས་ཆུ་ནི་ཀུན་དུ་འཁྲུགས། །འོ་མ་མུ་ཏིག་ཀུན་ད་མཚུངས། །ཆུ་ནི་དཀར་པོ་མཁའ་གསལ་བ། །ཡི་གེ་སཾ་ལས་བྱུང་བར་བསམ། །དེ་ཡི་དབུས་གནས་ཡི་གེ་ཏཱཾ། །ཤིན་ཏུ་དཀར་པོ་བསམ་པར་བྱ། །དེ་ལས་ཡོངས་སུ་གྲུབ་པའི་གྲུ། །གསེར་གྱི་རྒྱན་ནི་སྣ་ཚོགས་པས། །ཕྱོགས་བཞི་ནས་ནི་རྣམ་སྤྲས་བའི། །ཀ་པ་དག་གིས་བརྒྱན་པ་བསམ། །དེའི་སྟེང་པཾ་ལས་བྱུང་བ་ཡི། །པདྨ་དཀར་པོ་འདབ་བརྒྱད་པ། །ལྟེ་བ་གེ་སར་དང་བཅས་ཤིང༌། །འོད་ཀྱི་ཚོགས་ཀྱིས་རབ་འབར་བསམ། །ཡཾ་སོགས་ས་བོན་ལས་བྱུང་བ། །རླུང་ལ་སོགས་པའི་དཀྱིལ་འཁོར་བཞི། །དེ་ཡི་སྟེང་དུ་ཕྱོགས་སུ་ནི། །གོ་རིམས་བཞིན་དུ་བསམ་པར་བྱ། །སྔར་བཞིན་བདུད་རྩི་ཞེས་བྱ་བ། །སྤྲོ་དང་བསྡུ་བའི་རིམ་པ་ཡིས། །མཁའ་ལྡིང་བདག་པོ་སྐྱེད་བྱེད་པ། །ས་བོན་དེ་ཡི་སྟེང་དུ་དགོད། །དེ་ནས་དེ་ནི་གྱུར་པ་ལས། །མཁའ་ལྡིང་བདག་པོ་བསམ་པར་བྱ། །གདོང་གཅིག་ལག་པ་བཞི་པ་སྟེ། །ཁ་དོག་དཀར་པོ་འོད་ཆེན་ལྡན། །གསེར་གྱི་གཤོག་པའི་དབུ་རྒྱན་ཅན། །ནོར་བུ་བཻ་ཌཱུཪྻ་ཡི་མཆུ། །རྐང་སྡེར་བྱུ་རུ་ལས་བྱུང་བ། །ཤེལ་ལྟར་དཀར་བའི་གདོང་དང་ལྡན། །རྐེད་ལྟེ་བར་དུ་བདུད་རྩིས་གང༌། །བུམ་པ་ལག་པ་གཉིས་ཀྱིས་ནི། །སྙིང་གར་འཛིན་བྱེད་གཞན་དག་ནི། །ཕྱག་བྱེད་པ་ལ་རབ་ཏུ་བརྩོན། །མིག་སོགས་ལ་ནི་གཏི་མུག་སོགས། །རྡོ་རྗེ་གསུམ་ལ་ཚིགས་གསུམ་དགོད། །བསྐྱེད་ནས་དེ་ཡི་ཡན་ལག་གི །ཚིགས་རྣམས་ལ་ནི་ཧཱུཾ་དགོད་བྱ། །རིག་བྱེད་ཡི་གེ་དང་པོ་ནི། །དེ་ཡི་སྤྱི་བོར་བསམ་པར་བྱ། །སྙིང་གའི་ཡི་གེ་ཧཱུཾ་བྱུང་བའི། །འོད་ཟེར་མང་པོའི་ཆོགས་ཀྱིས་ནི། །མཁའ་ལྡིང་དབང་ཕྱུག་འཁོར་རྣམས་ནི། །རང་གི་རྣམ་པ་ཅན་ཉིད་སྤྲོ། །དེ་ནས་མཁའ་ལྡིང་དབང་ཕྱུག་གི །དཀྱིལ་འཁོར་རྫོགས་པར་བ་ལྟས་ནས་ནི། །དྲི་ཞིམ་ཆུ་ཡིས་དེ་ཉིད་ལ། །མཆོད་ཡོན་བྱིན་ནས་དེ་བཞིན་བོད། །དུག་འཇོམས་པ་ལ་བརྩོན་ལྡན་པའི། །
ཕྱག་རྒྱ་འབར་བ་བཅིང་བར་བྱ། །ཨོཾ་པ་ཀྵི་སྭཱ་ཧཱ། སྙིང་གའོ། །ཨོཾ་ཀྵི་པ་སྭཱ་ཧཱ། མགོ་བོའོ། །ཨོཾ་སྭཱ་ཀྵི་པ་སྭཱ་ཧཱ། གཙུག་ཕུད་དོ། །ཨོཾ་ཧཱ་ཀྵི་པ་སྭཱ་ཧཱ། ཆོ་གའོ། །ཧཱ་སྭཱ་ཀྵི་པ་ཨོཾ་མཚོན་ཆའོ། །ཡང་ཨོཾ་པ་ཀྵི་སྭཱ་ཧཱ། ལྟེ་བའོ། །དེ་ནི་ཡན་ལག་དྲུག་ལ་གོ་ཆ་དགོད་པའོ། །དེ་བཞིན་དུ་བོད་པའི་ཕྱག་རྒྱ་འབྱུང་སྟེ། ལག་པ་གཡོན་པའི་གུང་མོ་བསྒྲེང་སྟེ་མཛུབ་མོ་དང་སྲིན་ལག་ཅུང་ཟད་བཀུག་ནས་མཐེའུ་ཆུང་དང་མཐེ་བོང་དག་དགུག་པར་བྱའོ། །དེ་ནི་ནམ་མཁའ་ལྡིང་བོད་པའི་ཕྱག་རྒྱའོ། །ཨོཾ་ཧྲིཿཔཀྵེ་རཱ་ཛཱ་ཡ་ཨཱ་གཙྪ་ཡ་ཨཱ་གཙྪ་ཡ་སརྦ་དུཥྚཱ་ནཱཾ་མུ་ཁཾ་བནྡྷ་ཀུ་རུ་མ་ཧཱ་ཀཱ་ལ་ཀཱུ་ཊ་བི་ཥཱ་པ་ཧ་རི་ནི་ཤཱི་གྷྲཾ་ས་མ་ཡ་ཥྚ་སྦྲུཾ་སྦྲུཾ་ཤྲུཾ། ས་ས་ས་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ནམ་མཁའ་ལྡིང་བོད་པའི་སྔགས་སོ། །དེ་ནས་མདུན་དུ་བ་ལང་དང་མ་ཧེ་ལ་སོགས་པའི་ཁ་ན་མ་ཐོ་བ་མེད་པའི་སྲོག་ཆགས་ཀྱི་རིགས་རྣམས་ཀྱི་འོ་མས་སྣོད་ཡོངས་སུ་བཀང་སྟེ། གངྒཱའི་ཆུ་དང་ཡང་བསྲེས་ནས་དེ་བཞིན་དུ་སྣོད་གཉིས་པ་འོ་ཐུག་གིས་ཡོངས་སུ་གང་བར་བྱས་ལ་སྔགས་འདིས་བྱིན་རླབས་བྱའོ། །ཨོཾ་སརྦ་ཏ་ཐཱ་ག་ཏ་མི་བཻ་ཪྻ་ས་མ་ཡ་མུ་ཏྲ་སྤ་ར་ཎ་ཤྲི་ཡེ་ཧཱུཾ། དེ་ནས་སྤོས་དང་མེ་ཏོག་དང་མར་མེ་དང༌། དྲི་དང༌། ལྷ་བཤོས་རྣམས་ཛཱ་ཏི་ཕ་ལ་དང༌། གླ་གོར་ཞོ་ཤ་ལ་སོགས་པ་རྣམས་ཀྱིས་གཏོར་མ་ལ་མཆོད་དེ་རྩེ་གསུམ་པའི་ནམ་མཁའ་ལྡིང་གི་ཕྱག་རྒྱས་མངོན་པར་བཏབ་ལ་ཡི་གེ་བརྒྱ་པ་ལན་གསུམ་བཟླས་ཏེ་གཏོར་མའི་སྔགས་བརྗོད་པར་བྱའོ། །ཨོཾ་ན་མོ་བྷ་ག་བ་ཏྱཻ་ཨཱཪྻ་པ་ར་མ་ཨ་ཤྱ་ཡ། ཏ་ཐཱ་ག་ཏཱ་ཡ་ཨརྷ་ཏེ་སམྱ་ཀྶཾ་བུ་དྡྷཱ་ཡ། ཨོཾ་ཏཱ་རེ་ཏུ་ཏྟཱ་རེ་ཏུ་རེ་སྭཱ་ཧཱ། ཨོཾ་གྲྀཧྞ་གྲྀཧྞ་པུ་ཥྤ་དྷཱུ་པ་བ་ལིཾ་ཨི་མཾ་སརྦ་ཨུ་པ་ཙ་ར་སཾ་པནྣཾ། ཁ་གྷཱ་དྷི་པ་ཏེ། ཁ་ཁ་ཁཱ་ཧི་ཁཱ་ཧི་ས་མ་ཡ་མ་ནུ་སྨ་ར་ཨཱཿཧཱུཾ་ཕཊ་སྭཱ་ཧཱ། ཞེས་བརྗོད་ལ། སྙིང་གར་པདྨ་བསྐོར་བ་ལ་ལན་ལྔ་བྱས་ཏེ། རྡོ་རྗེ་དང་དྲིལ་བུ་དཀྲོལ་བ་སྔོན་དུ་འགྲོ་བ་ཅན་གྱི་སྙིང་པོ་འཇུག་པའི་ཕྱག་རྒྱ་བཅིངས་ལ། རྟའི་རྒྱལ་པོའི་ང་རྒྱལ་དང་ལྡན་པས་གཏོར་མ་དོར་བ་བྱ་སྟེ། པདྨའི་མཚོ་འགྲམ་མམ། རྫིང་ཆེན་པོའི་འགྲམ་དུ་གཏོར་མ་དོར་བར་བྱའོ། །དེ་ནས་ལངས་ཏེ། ཨོཾ་བྷ་ཀྵ་སྭཱ་ཧཱ། ཞེས་བྱ་བའི་ཡི་གེ་ལྔའི་སྔགས་ཀྱིས་ལག་པ་གཡོན་པའི་སོར་མོ་རྣམས་བྱིན་གྱིས་བརླབས་ལ། ལག་པའི་དབུས་སུ་དབྱངས་དྲུག་པ་རྣམས་པར་བཀོད་དེ། དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རྣམ་པར་བསྒོམས་ལ། དེའི་སྟེང་དུ་བའི་འོ་མ་ལྟར་
མདོག་དཀར་པོ་དང་ལྡན་པའི་ཡི་གེ་ཧཾ་རྣམ་པར་བཀོད་དེ། ལག་པ་དེས་ཆུ་ལ་མངོན་པར་བསྔགས་ལ། ཀུ་རུ་ཀུལླེའི་སྔགས་ཀྱིས་གང་གི་ཁ་རུ་ཆུ་བླུགས་པ་དེ་སྐད་ཅིག་དེ་ཉིད་ལ་དུག་སྐྱུག་པར་འགྱུར་རོ། །བརྟན་པ་འམ་ནི་གཡོ་བ་འམ། །བཅོས་པ་ཡི་ནི་དུག་ཀྱང་རུང༌། །མཆེ་བའི་དུག་གམ་དྲན་པའི་ངག་རེག་དང་མཐོང་བའི་དུག་ལ་སོགས། །སྦྲུལ་དག་གིས་ནི་ཟོས་པ་ཡི། །དུག་ནི་སྐད་ཅིག་དེ་ལ་འཇོམས། །ཐ་ན་དྲག་པོའི་མགྲིན་གནས་པའང༌། །མ་ལུས་པར་ནི་འཇོམས་བྱེད་ན། །ཀཱ་ལ་ཀུ་ཊའང་འཇོམས་པ་ནི། །འགྱུར་བ་རུ་ནི་ཐེ་ཚོམ་མེད། །དེ་བས་མཁའ་ལྡིང་མཆོད་པའི་ཕྱིར། །རྣལ་འབྱོར་པས་ནི་གཏོར་མའི་ལས། །གཞན་ལ་ཕན་པའི་སེམས་ཀྱིས་ནི། །བརྩོན་པ་ཡིས་ནི་ཀུན་དུ་བྱ། །བཟའ་བཏུང་ཁྱད་པར་ཅན་སོགས་དང༌། །གོས་དང་རྒྱན་དང་བྱུག་པ་ཡིས། །སེམས་ཅན་ཁམས་ནི་མ་ལུས་པ། །རབ་གསོལ་ལས་བྱུང་བསོད་ནམས་གང༌། །བསོད་ནམས་དེ་ནི་སེམས་ཅན་གཅིག ། སྲོག་ནི་ཡོངས་སུ་བསྲུངས་ལས་བྱུང༌། །དེ་བས་དུག་ནི་གཞོམ་པའི་ཕྱིར། །མཁའ་ལྡིང་བདག་པོའི་གཏོར་མར་འདོད། །དེ་ནི་རིག་པ་འཛིན་པའི་སྡེ་སྣོད་ལས། །བདག་གིས་གཏོར་མའི་ཆོ་ག་གསལ་བར་བཏུས། །མཁས་པས་སེམས་ཅན་ལ་ནི་ཕན་གདགས་ཕྱིར། །འབད་པ་ཡིས་ནི་རྟག་པ་ཉིད་དུ་བྱ། །དཔལ་རིག་པ་འཛིན་པའི་སྡེ་སྣོད་ཀྱི་ནང་ནས་བཏུས་པའི་མཁའ་ལྡིང་གི་གཏོར་མའི་ཆོ་གའོ།། །།རོ་ལངས་གཏོར་མ་བསྒྲུབ་པ་ནི། །རྡོ་རྗེ་བདུད་རྩིའི་རྒྱུད་ལས་གསུངས། །ཆོ་ག་ཡིས་ནི་རིམ་བཞིན་དུ། །གསལ་བར་དེ་ནས་ཡང་དག་བཤད། །གཏོར་མའི་ལས་ནི་ཐམས་ཅད་ལ། །བསྒོམས་པའི་སྟོབས་ཀྱིས་འབྱུང་པོ་རྣམས། །བསྐྱེད་ནས་མགུ་བར་བྱ་ཞེས་གྲགས། །རྣལ་འབྱོར་པས་འདིར་དེ་བཞིན་མིན། །དང་པོར་རོ་ལངས་དག་གི་ཚོགས། །སྔགས་ཀྱི་མཐུ་ཡིས་བསླངས་ནས་ནི། །དེ་ནས་འདས་སོགས་ཀུན་དྲིས་ནས། །སྙིང་རྗེ་ཆེན་པོས་གཏོར་མ་སྦྱིན། །རེ་ཞིག་དང་པོར་ཤིན་ཏུ་འཇིགས། །དུར་ཁྲོད་རོ་ཡིས་འཇིགས་བྱེད་པར། །སོང་ནས་དོགས་མེད་སེམས་ཀྱིས་ནི། །མཚན་མོ་རོ་ནི་བཙལ་བར་བྱ། །རྒྱལ་པོས་ཉེས་པ་ལ་བརྟེན་ནས། །སྒེགས་པར་གྱུར་པ་གང་ཡིན་དང༌། །བསལ་ཤིང་ལ་བསྐྱོན་ཡན་ལག་ནི། །མ་ཉམས་རོ་ཆེན་བཙལ་བར་བྱ། །འཁྱུད་པ་དང་
ནིའོ་བྱས་ཏེ། །དེ་བཞིན་དཔྱང་ཐག་བྱ་བ་ཡིས། །དགྱེས་གང་བཅོམ་ལྡན་འདས་ཀྱིས་ནི། །འདི་གསུངས་མཱ་མ་ཀཱི་ལ་གསུངས། །རོ་ལངས་ཆེན་པོ་བསྒྲུབ་པ་ནི། །དེ་ནས་ཡང་དག་རབ་བཤད་བྱ། །མར་ངོའི་བརྒྱད་དམ་བཅུ་བཞི་ལ། །མཚན་མ་གཅིག་གམ་བཞི་མདོ་འམ། །ཤིང་གཅིག་གམ་ནི་དུར་ཁྲོད་དམ། །ཆུ་ཡི་འགྲམ་དང་རི་བོ་རུ། །བྱ་བ་དག་ནི་ཐམས་ཅད་བསྒྲུབ། །དེ་བཞིན་རོ་ལངས་བསླང་བ་ན། །མཚན་རྣམས་ཐམས་ཅད་ཡང་དག་རྫོགས། །འགེགས་ནས་ཤི་བ་གང་ཡིན་པ། །གདོལ་པ་འམ་ནི་གཡུང་མོ་འང་རུང༌། །སྡུག་ཅིང་མཛེས་ལ་རྨ་མེད་པ། །སུམ་ཅུ་རྩ་གཉིས་སོ་དང་ལྡན། །ལོ་ནི་ཉི་ཤུ་རྩ་ལྔ་ལོན། །ཡང་ན་བཙའ་བའི་དུས་སུ་ནི། །ཤི་བའི་བུད་མེད་བསླང་བར་བྱ། །སྔགས་དང་སྨན་དང་ལྡན་པ་ཡི། །ཆུ་མདོག་དག་གིས་ཁྲུས་བྱ་ཞིང༌། །ཙནྡན་དཀར་པོ་གླ་རྩི་ཡིས། །དེ་ལ་རྣམ་པར་བྱུག་པར་བྱ། །སྤོས་དང་མེ་ཏོག་དག་གིས་མཆོད། །གཏོར་མ་སྣ་ཚོགས་སྦྱིན་པར་བྱ། །ཏིལ་མར་ཆེན་པོས་བྱུགས་ནས་ན། །ཉུངས་ཀར་གྱིས་ནི་གདོང་ལ་རྡེག །སྒྲུབ་པ་པོས་ནི་ཧེ་རུ་ཀ །ཞེས་བྱའི་དཀྱིལ་འཁོར་དེ་བྲི་བྱ། །ཟླ་བ་ཕྱེད་པ་ཐོད་མཚུངས་པ། །གཞུ་བདུངས་པ་ཡི་རྣམ་པ་ཅན། །རིག་མ་བརྒྱད་དང་ཡང་དག་ལྡན། །ཐོད་པ་རྣམས་ཀྱིས་ཉེ་བར་མཛེས། །གཞི་ནི་ཐོད་པ་དག་ཡིན་ཏེ། །ཐམས་ཅད་ཁ་ཊྭྰཾ་ག་བསྣམས་པ། །སྤྱན་གསུམ་དྲག་པོའི་གཟུགས་ཅན་ཏེ། །སྤྱན་དྲུག་རལ་གྲི་ཕྱག་བསྣམས་པ། །དཀྱིལ་འཁོར་འདི་ཡི་ཕྱི་རོལ་དུ། །སྒོ་སྲུང་དག་ནི་རབ་ཏུ་བརྟག །བ་ལང་སྣ་དང་གླང་པོའི་སྣ། །བཞིན་བཟངས་དེ་བཞིན་བཞིན་ངན་པ། །དྲག་པོའི་ཞགས་པ་ལྕགས་ཀྱུ་ཐོགས། །མི་སྡུག་རྣམ་གཙིགས་འཇིགས་རུང་བ། །ཞལ་གཅིག་པ་ལ་ཕྱག་གཉིས་པ། །སྤོས་དང་མེ་ཏོག་ལ་སོགས་བྲི། །རོལ་ཆ་རྣམ་པ་སྣ་ཚོགས་མཆོག །དཀྱིལ་འཁོར་དུ་ནི་རིམ་བཞིན་བྲི། །དེ་ནས་དཔའ་བོ་སྒྲུབ་པ་པོ། །ཧེ་རུ་ཀ་ཡི་གཟུགས་འཛིན་པ། །དུད་ཆེན་དག་གིས་རྣམ་པར་བརྒྱན། །ཁ་ན་ཤ་ཆེན་ཟ་བྱེད་པ། །ཐོད་པའི་ཕྲེང་བའི་དབུ་རྒྱན་ཅན། །ཤིན་ཏུ་རྣམ་གཙིགས་འཇིགས་རུང་བས། །དེ་རུ་ཅང་ཏེའུ་བརྡུང་བྱ་ཞིང༌། །གར་གྱིས་གྲོང་ཁྱེར་འཇུག་པར་བྱ། །ལུས་ལ་སྔགས་ཀྱིས་གོ་བགོས་པས། །དེར་ནི་ཡི་གེ་ཕཊ་བརྗོད་བྱ། །དཀྱིལ་འཁོར་མཆོག་ནི་སྔར་བཞིན་དུ། །
ཁྲག་ཆེན་པོ་ཡིས་བསང་གཏོར་བྱ། །ཧེ་རུ་ཀ་ཡི་སྔགས་ཆེན་པོ། །སྒྲུབ་པ་པོས་ནི་བཟླས་པར་བྱ། །ཁྲོ་བོ་བཅས་ནས་རོ་ལངས་ནི། །འབྲུག་གི་སྒྲ་ནི་སྒྲོགས་པར་འགྱུར། །སྔགས་པས་འཇིགས་པར་མི་བྱ་ཞིང༌། །ཧེ་རུ་ཀ་ནི་རྗེས་དྲན་བྱ། །ཧེ་རུ་ཀ་ནི་འཇིགས་རུང་བཤད། །ཚངས་པའི་ཡུལ་ས་ཟ་བྱེད་བརྩོན། །དྲག་པོ་ཆེན་པོ་ལྕགས་བསྐྱོད་པ། །འགྲོ་བ་ཀུན་དུ་སྡུད་པ་པོ། །ཧ་ཧ་ཞེས་ནི་སྒྲོགས་བཤད་པ། །འཇིགས་བྱེད་ཇི་བཞིན་འཇིགས་རུང་བ། །རྒྱ་མཚོའི་གླིང་གི་མེ་ལྟར་འབར། །ཉི་མ་བཅུ་གཉིས་དང་མཚུངས་འོད། །དཔའ་བོ་དབང་ཕྱུག་གཟུགས་ཅན་དཔའ། །ཁམས་གསུམ་དག་ནི་གཡོ་མཛད་པ། །སྒོམ་པའི་བདག་ལྡན་དེ་ཡི་གཟུགས། །སྒྲུབ་པ་པོས་ནི་དབང་པོ་བསམ། །ལངས་པར་གྱུར་ནས་རོ་ལངས་དེ། །སྒྲུབ་པ་པོ་ལ་འདི་སྐད་སྨྲ། །དཔལ་ཆེན་བདག་གིས་ཅི་ཞིག་བགྱི། །རྡོ་རྗེ་ཅན་མཆོག་བཀའ་སྩོལ་ཅིག །རལ་གྲི་མིག་སྨན་ས་འོག་དང༌། །མཁའ་སྤྱོད་ཕན་པར་བྱ་བ་དག །ཇི་ལྟར་བསྒྲུབ་པར་འདོད་བཞིན་བུ། །ལས་དེ་རབ་ཏུ་སྒྲུབ་པར་བྱེད། །ཡིད་ལ་འདོད་པའི་ལས་གང་ཡིན། །སྒྲུབ་པ་པོས་ནི་དེ་ལ་བརྗོད། །དེ་དག་ཐམས་ཅད་སྒྲུབ་པར་བྱེད། །པདྨ་རྒྱ་ཆེན་མཱ་མ་ཀཱི། །དེ་ནས་དེ་ཡི་ཁ་ལས་ནི། །འདས་དང་མ་འོངས་སོགས་ཞེས་བྱ། །རྒྱལ་པོ་ལ་སོགས་ཚེ་ཚད་དང༌། །བདག་ཉིད་ཀྱི་ཡང་དེ་ལས་ཡིན། །ཤ་ཆེན་རྒུན་ཆང་ཟང་ཟིང་དང༌། །སྐྱེ་བ་བདུན་པ་ལས་བྱུང་བ། །ཤ་ནི་ཆེན་པོ་དག་གིས་ཀྱང༌། །དེ་ནས་དེ་ལ་གཏོར་མ་སྦྱིན། །ཡང་ན་ལུས་ནི་མ་ཉམས་པ། །གཞོན་ནུའི་གཟུགས་ཅན་ཡོན་ཏན་ལྡན། །བ་ལང་ཁ་ན་མ་ཐོ་མེད། །རྙེད་ནས་གཏོར་མའི་སྣོད་དུ་གཞུག ། བདུད་རྩི་དག་གིས་ཁ་བཀང་ནས། །ཧེ་རུ་ཀ་ཡི་གཟུགས་འཛིན་ཅིང༌། །སྔགས་པ་ཕྱག་རྒྱ་ལྔ་འཆང་བ། །རྡོ་རྗེ་དྲིལ་བུ་སྙེམས་བཅས་པས། །བཤང་གཅི་ཁྲག་ལྡན་བུད་མེད་གོས། །བདུད་རྩི་གུ་གུལ་གྱིས་ཐོད་པར། །རོ་བསྲེགས་མེ་ལ་སྤོས་གཏུལ་ཏེ། །སྒྲ་ཡི་མཆོད་པ་ཕྱིར་ལྡན་ཞིང༌། །དེ་བྱས་སོར་གདུབ་དང་ལྡན་པས། །འབེབས་པར་བྱེད་པའི་མཆོག་འགྱུར་ཏེ། །གསང་སྔགས་འདི་ནི་བརྗོད་པར་བྱ། །ཨོཾ་བྷུར་བྷུ་བ་སྭཿ། ཤྲཱི་ཧེ་རུ་ཀ་ཁཱ་ཡ་བིད་མ་ཧེ། །བིདྱཱ་རཱ་ཛ་ཡཱ་དྷི་མ་ཧེ་སྭཱ་ཧཱ། ཞེས་བྱ་དེ་ཡིས་ཕབ་ནས་ནི། །མཁའ་སྤྱོད་ཕྱག་རྒྱ་བཅིངས་ནས་སུ། །བློ་གྲོས་ཆེན་པོས་རོ་
ལངས་ལ། །ལག་པ་གཉིས་སུ་གཏོར་མ་སྦྱིན། །འདི་ཡི་སྔགས་ནི་འདི་ཡིན་ཏེ། །ཧཱུཾ་བཛྲ་ཀ་ར་མུ་ཁ་ཡ་ན་མཿ་ཤྲཱི་བཛྲ་རཱ་ག་ས་མཱ་ཡཱ་ན་མཿཁ་ཊྰཾ་ག་བཛྲ་པྲ་ཛ་ལ་ཡ་ཡ་ན་མཿཤྲཱི་བཛྲ་གྷཎྜ་ཙ་ལ་ཡཱ་ཡ་ན་མཿ་ལག་པ་གཡས་དང་གཡོན་དག་གིས། །སྒེག་བཅས་རྩེད་མོའི་གར་དག་གིས། །བསྐལ་བཟང་རྡོ་རྗེ་ཧ་ཧར་བཤད། །གཏོར་མའི་མཆོད་པ་སྦྱིན་པར་བྱ། །དེ་ནི་རྣལ་འབྱོར་གྱིས་བཏེག་སྟེ། །ཆེ་མཆོག་ལས་བྱུང་མཆོག་འཛིན་པས། །དཔྲལ་བ་རུ་ནི་བསྐོར་བྱས་ཏེ། །སྤྱི་བོའི་གཙུག་ཏུ་གཟུང་བར་བྱ། །དེ་ནས་གར་བྱེད་ཕབ་བྱས་ནས། །ལྷ་མོའི་རྣལ་འབྱོར་གྱིས་གླུ་དག །བླང་ཞིང་ཕྱག་རྒྱ་བརྒྱད་ཀྱིས་ནི། །དེ་ཉིད་གསང་བ་ལ་སྦྱར་བྱ། །དེ་ལྟར་ཐམས་ཅད་བྱས་ནས་ནི། །གཏོར་མའི་ཆོ་ག་རབ་རྫོགས་ནས། །དེ་ནས་རོ་ལངས་དེ་ཡིད་ནི། །མགུ་བར་རྟོགས་ནས་གུས་བཅས་པས། །དེ་ལ་རྣལ་འབྱོར་བདེ་མཆོག་གིས། །ཚིག་ནི་འདི་སྐད་བརྗོད་པར་བྱ། །ཁྱོད་ཀྱི་མགུལ་ནས་ཞགས་པ་གང༌། །དེ་ནི་གྲོགས་མཆོག་ང་ལ་བྱིན། །ཁ་ནས་བྱུང་བར་གྱུར་པ་ཡིན། །པེ་ནེ་འདི་ནི་ང་ལ་བྱིན། །དེ་ནས་ཞགས་པ་པེ་ནེ་དག །དེ་ཡིས་དེ་ལ་སྟེར་བར་འགྱུར། །དེ་དག་བླངས་ནས་རྣལ་འབྱོར་པའི། །རྨད་ཆེན་ལས་ནི་བྱེད་པར་འགྱུར། །ཞགས་པའི་ཐལ་བ་བླངས་ནས་ནི། །ཆུ་གྲང་ལྷན་ཅིག་འཐུང་བྱེད་གང༌། །བརྗེད་བྱེད་འཇིགས་པ་ཆེན་པོ་ལས། །དེ་ནི་སྐད་ཅིག་གིས་གྲོལ་འགྱུར། །གཙང་བའི་དོན་དུ་གང་ཞིག་ལ། །སྔགས་པ་གང་གིས་པེ་ནེ་བྱིན། །དེ་ནི་ལག་ཏུ་སླར་ལྡོག་པར། །འགྱུར་བ་རུ་ནི་ཐེ་ཚོམ་མེད། །དེ་ནས་བཏང་བར་བྱས་ནས་ནི། །རྣལ་འབྱོར་རང་གི་གནས་འགྲོ་བྱ། །སྨོན་ལམ་བཏབ་སྟེ་དགེ་བ་ཉིད། །ཡོངས་སུ་བསྔོས་ཏེ་བདེ་བར་གནས། །དེ་ནི་རྡོ་རྗེ་བདུད་རྩིའི་རྒྱུད་ལས་བཏུས་པའི་རོ་ལངས་ཀྱི་གཏོར་མའི་ཆོ་གའོ།། །།དཔལ་ལྡན་གདན་བཞིའི་རྒྱུད་གསུངས་པའི། །ཆོ་གས་རྒྱས་པའི་ལས་ལ་ནི། །ཆུ་ཡི་ལས་བྱ་གཏོར་མའི་ལས། །དེ་ནས་ཡང་དག་བཤད་པར་བྱ། །ངོ་མཚར་གྱུར་པའི་ལྷ་ཐོས་ཏེ། །ཆུ་ཡི་སྦྱིན་སྲེག་ཇི་ལྟ་བུ། །དེ་ཉིད་ཆུ་ཡི་སྦྱིན་སྲེག་གི །མཚན་ཉིད་ཇི་ལྟར་ཤེས་པར་གྱིས། །བཅོམ་ལྡན་འདས་ཀྱིས་བཀའ་སྩལ་པ། །ཆུ་སོགས་མཚན་ཉིད་ཡང་དག་པ། །རྡོ་རྗེ་དེ་ཉིད་ཡང་དག་བྱིན། །བླ་རེ་དག་ནི་རྣམ་པར་བྲེས། །སྣ་ཚོགས་གོས་ནི་རབ་ཏུ་འཕྱང༌། །དྲི་དག་གིས་ནི་ཀུན་དུ་བྱུགས། །གྲུ་བཞི་
ཤིན་ཏུ་རྒྱ་ཆེ་བ། །དབུས་སུ་སྣོད་ནི་དཀར་པོ་གཞག །རྫས་ནི་དཀར་པོས་བྱུག་པར་བྱ། །ཆུ་ནི་འོ་མ་དང་བསྲེས་ཤིང༌། །གཙང་མའི་ཆུ་ཡིས་ཡོངས་གང་བ། །དྲི་ཡི་ཆུ་ཡིས་ཀུན་དུ་གང༌། །ལྕུག་མ་དག་གིས་བརྒྱན་གྱུར་པ། །བུམ་པ་བརྒྱད་པོ་དག་ཀྱང་ནི། །ཕྱོགས་བརྒྱད་དུ་ནི་གཞག་པར་བྱ། །སྐད་ཅིག་རྣམ་པས་བསྐྱེད་པ་ཡི། །ཡེ་ཤེས་མཁའ་འགྲོ་བདག་ཉིད་ལ། །སྤོས་དང་མེ་ཏོག་དྲི་སོགས་ཀྱིས། །བདག་གི་དངོས་པོ་མཆོད་པར་བྱ། །དེ་ནས་ཕྱི་རོལ་གནས་སུ་ནི། །ཆུ་ཡི་ལས་རྣམས་བྱ་བ་ཡིན། །ལག་གཉིས་ཐལ་མོ་སྦྱར་བྱས་ནས། །པདྨའི་རྣམ་པར་གཟུང་བར་བྱ། །ཨོཾ་ཀ་མ་ལ་ཡེ་སྭཱ་ཧཱ། །པདྨའི་སྔགས་དང་ཕྱག་རྒྱའོ། །ཆུའི་དབུས་སུ་པདྨ་ནི། །ཟླ་བའི་དཀྱིལ་འཁོར་བརྒྱན་པ་དགོད། །གདུགས་ནི་དཀར་པོས་གཡོགས་པ་ཡི། །ས་བོན་དབུས་སུ་བསྒོམ་པར་བྱ། །རང་གི་དབུགས་ལས་བྱུང་གྱུར་པ། །ས་བོན་གྱིས་ནི་གཟུགས་བསྐྱེད་བྱ། །ཕྱག་གཉིས་སེམས་དཔའི་སྐྱིལ་ཀྲུང་བཅས། །རྒྱན་ནི་ཐམས་ཅད་ཀྱིས་བརྒྱན་པ། །ཕྱག་ན་རྡོ་རྗེ་དབྱུག་པ་བསྣམས། །སྐུ་མདོག་དཀར་པོར་རབ་ཏུ་གྲགས། །བཞད་ཅིང་ཁྲོ་བོ་སྒེག་ལྡན་པ། །རབ་ཏུ་མཛེས་པའི་གོས་ཀྱིས་བརྒྱན། །དམ་ཚིག་ཕྱག་རྒྱ་བསྟན་བྱ་ཞིང༌། །དམ་ཚིག་སྔགས་ནི་བརྗོད་པར་བྱ། །ལག་གཉིས་ཕན་ཚུན་ཁུ་ཚུར་བཅས། །མཛུབ་མོ་གཉིས་ནི་རབ་བརྐྱང་ཞིང༌། །བཀུག་ཅིང་མདུད་པ་བྱས་པ་ནི། །དམ་ཚིག་ཕྱག་རྒྱར་རབ་ཏུ་བསྒྲགས། །ཨོཾ་ས་མ་ཡེ་ཏིཥྛ་ཧཱུཾ་ཕཊ། །དམ་ཚིག་སྔགས་དང་ཕྱག་རྒྱའོ། །ཤར་གྱི་བུམ་པར་ནོར་བུ་བཟང༌། །ལྷོ་རུ་གང་བ་བཟང་པོ་སྟེ། །ནོར་སྦྱིན་ནུབ་ཀྱི་བུམ་པར་རོ། །དེ་བཞིན་བྱང་དུ་རྣམ་ཐོས་སྲས། །རྣ་ཆ་བཟང་པོ་དབང་ལྡན་དུ། །རྩེ་ལྡན་ཞེས་བྱ་མེ་ཕྱོགས་སུ། །བདེན་བྲལ་ཕྱོགས་སུ་ཕྲེང་ལྡན་ཉིད། །མུ་ཅོར་སྨྲ་བ་རླུང་ཕྱོགས་སུ། །ཡང་དང་ཡང་དུ་མངོན་བསྔགས་ནས། །ཛཾ་བྷ་ལ་ནི་དབུས་སུ་དགོད། །དེ་ནི་བུམ་པ་དགོད་པའོ། །ནོར་འདོད་པ་ཡི་རྣལ་འབྱོར་པས། །དེ་ནས་ལག་པ་ལ་དགོད་བྱ། །ལག་པ་དྲི་ཡིས་བྱུགས་པ་ལ། །ནོར་བུ་བཟང་སོགས་ཡང་དག་དགོད། །ནོར་བུ་བཟང་པོ་མཛུབ་མོ་ལ། །གང་བ་བཟང་པོ་གུང་མོ་ལ། །ནོར་སྦྱིན་གནོད་སྦྱིན་སྲིན་ལག་ལ། །རྣམ་ཐོས་སྲས་ནི་མཐེའུ་ཆུང་ལ། །མཐེ་བོང་ལ་ནི་རྣ་ཆ་བཟང༌། །མཁྲིག་མར་རྩེ་ལྡན་ཕྲེང་ཅན་དག །ལག་པ་ཡི་ནི་ལག་ངར་ལ། །ཀུན་དུ་མུ་ཅོར་སྨྲ་དབང་ཕྱུག །ཡང་དང་ཡང་དུ་མངོན་བསྔགས་ཏེ། །ཛཾ་བྷ་
ལ་ནི་དབུས་སུ་དགོད། །ཨོཾ་ཛུཾ་པུཾ་བུཾ་ས་ཞེས་བྱ་བའི་ས་བོན་རྣམས་གུང་མོ་ནས་བརྩམས་ཏེ་མཐེ་བོང་ལ་ཐུག་པ་ལ་དགོད་པར་བྱའོ། །དེ་ནས་སོ་སོའི་ཕྱག་མཚན་ནི། །དམ་ཚིག་ཕྱག་རྒྱ་བཞིན་དུ་བསྟན། །སྤོས་དང་མེ་ཏོག་ལ་སོགས་དྲིས། །མཁས་པ་ཡིས་ནི་མཆོད་པར་བྱ། །རྡོ་རྗེ་ཁུ་ཚུར་གཉིས་བཅིངས་ཏེ། །གཡོན་པ་སྙིང་གར་གཞག་བྱ་ཞིང༌། །གཡས་པ་གོང་དུ་གཞག་བྱ་བ། །རྩ་ཡི་ཕྱག་རྒྱར་རབ་ཏུ་བསྒྲགས། །ཨོཾ་ན་མོ་རཏྣ་ཏྲ་ཡཱ་ཡ། ཨོཾ་ཛིཾ་ཧཱུཾ་སྭཱ་ཧཱ། རྩ་བའི་སྔགས་སོ། །མེ་ཏོག་དཀར་པོ་ཀུནད་སོགས། །དཱུར་བ་མདུན་དུ་དབུལ་བར་བྱ། །ཁྱོར་བ་བརྒྱ་རྩ་བརྒྱད་པ་ནི། །མཁས་པས་མགོ་པོའི་སྟིང་དུ་བླུགས། །ཁྱོར་བ་རེ་རེ་ཞིང་ནི་བླུགས། །ལན་གཅིག་བརྗོད་ནས་དབུལ་བར་བྱ། །ཁྲི་ཕྲག་གཅིག་གིས་དེ་ཡི་ལས། །ཐམས་ཅད་དག་ནི་འགྲུབ་པར་འགྱུར། །མེ་ཏོག་ཀ་ར་བཱི་ར་སོགས། །མེ་ཏོག་ཁ་དོག་དཀར་པོ་འང་རུང༌། །ཁྱོར་བ་ཁྲི་ཕྲག་གཅིག་ཕུལ་ན། །ཁྱིམ་ནི་ཞི་བར་བྱས་པར་འགྱུར། །ཡམ་ཤིང་ནཱ་ག་པུཥྤ་དག །འོ་མ་དང་བསྲེས་དབུལ་བྱ་ཞིང༌། །ཁྱོར་བ་ཁྲི་ཕྲག་གཅིག་ཕུལ་ན། །དེ་བཞིན་གྲོང་ནི་ཞི་བར་འགྱུར། །ལས་རྣམས་ཀུན་ལ་སྦྱར་བྱ་ཞིང༌། །པདྨ་རྣམ་པ་སྣ་ཚོགས་པ། །ཁྲི་ཕྲག་ཕུལ་བ་ཙམ་གྱིས་ནི། །ཡུལ་ནི་ཞི་བར་བྱས་པར་འགྱུར། །པྲི་ཡང་ཀུ་དང་བིལ་བ་དང༌། །ཨུཏྤལ་དང་ཀུ་མུ་ད། །རྒྱལ་པོའི་སྐྱོན་ལ་སྦྱར་བྱས་ན། །ཕ་རོལ་ཡུལ་འཁོར་འཇིག་པར་འགྱུར། །གང་ཞིག་ནང་པར་བརྒྱ་རྩ་བརྒྱད། །ཆུ་ལ་གཏོར་མ་སྦྱིན་བྱེད་པ། །སྔགས་པ་དེ་ལ་ཡིད་འོང་པའི། །ནོར་དག་རྒྱས་པར་གྱུར་པ་ཡིན། །དེ་ནས་སྔ་མ་བཞིན་དུ་གསེར་ལ་སོགས་པ་ལས་བྱས་པའི་སྣོད་དགུ་ཆུ་དྲི་ཞིམ་པོས་གང་བར་བྱས་ཏེ་དེའི་ནད་དུ་འབྲུ་དང་རིན་པོ་ཆེ་དང་སྨན་དང་དེ་བཞིན་དུ་བའི་འོ་མ་བཅུག་ལ། མེ་ཏོག་དང་སྤོས་ལ་སོགས་པའི་མཆོད་པ་རྣམ་པ་ལྔས་ཡང་དག་པ་མཆོད་དེ། །སྔར་བཤད་པའི་ཕྱག་རྒྱས་ཀྱང་མངོན་པར་རྒྱས་བཏབ་ནས་དྲིལ་བུ་དཀྲོལ་བ་སྔོན་དུ་འགྲོ་བས་སྔགས་འདི་བརྗོད་པར་བྱའོ། །ཨོཾ་ཛཾ་བྷ་ལ་ཛ་ལེནྡྲཱ་ཡ་སྭཱ་ཧཱ། ཇི་སྲིད་ཨོཾ་མུ་ཁེ་ཤྭ་རཱ་ཡ་སྭཱ་ཧཱ་ཞེས་བྱ་བ་ལ་ཐུག་པའི་སྔགས་དགུ་བརྗོད་ལ་སྤྱན་དྲང་སྟེ། །དེ་རྣམས་མངོན་སུམ་དུ་གྱུར་པར་བལྟས་ལ་གཏོར་མ་སྦྱིན་པའི་ཕྱིར་ཡང་སྔགས་འདི་བརྗོད་པར་བྱའོ། །ཨོཾ་ན་མོ་བྷ་ག་པ་ཏེ་ཛཾ་བྷ་ལ་ཛ་ལེནྡྲཱ་ཡ་མ་ཧཱ་ཡཀྵ་སེ་ནཱ་པ་ཏ་ཡེ། ཨི་མཾ་བ་ལིཾ་པྲ་ཏཱི་ཙྪ་ས་མ་ཡ་མ་ནུ་སྨ་ར་ཧཱུཾ་བཛྲ་ཛཾ་ཕཊ་སྭཱ་ཧཱ། མ་མ་ཧི་ར་ཎྱ་སུ་བརྞ་མ་ཎི་མུཀྟ་རཏྣ་ཧེ་མ་ནི་དྷ་ནི་དེ་ཧི་མཱཾ།
ཛི་གྷྲནྟུ། པི་བནྟུ་ཁ་དནྟུ། མ་མ་ཤཱནྟི་པུཥྚི་ཀུ་རུ་བཛྲ་དྷ་རི་ཀ་བ་ལིཾ་པྲ་ཏཱི་ཙྪ་ས་མ་ཡ་མ་ནུ་སྨ་ར་ཛཾ་ཛཾ་ཛཾ་ཧཱུཾ་ཛཱུཾ་ཛི་ཛ་ཕཊ་སྭཱ་ཧཱ་ཞེས་བྱ་བ་བརྗོད་ལ། དྲག་ཏུ་འབྲུབ་པའི་ཆུ་བོ་ལ་གཏོར་མའི་སྣོད་དགུ་པོ་དག་དོར་བར་བྱའོ། །དེ་ནས་ཁྱོད་ཀྱིས་ཞེས་བྱ་བ་ལ་སོགས་པའི་ཚིགས་སུ་བཅད་པས་གཤེགས་སུ་གསོལ་ལོ། །དེ་ནི་གདན་བཞི་པའི་རྒྱུད་ལས་གསུངས་པའི་མན་ངག་གི་རིམ་པའི་ཆུའི་སྦྱིན་སྲེག་གི་ཆུའི་གཏོར་མའི་ཆོ་གའོ། །དེ་ནས་གཏོར་མ་བསྒྲུབ་པ་དང༌། །དེའི་བདག་རྡོ་རྗེ་གནོད་སྦྱིན་དང༌། །བུ་སྟེ་རྣམ་ཐོས་སྲས་ཀྱི་ནི། །དེ་བས་གཞན་ཡང་རབ་བཤད་བྱ། །རེ་ཞིག་དང་པོར་རང་གི་ཁྱིམ་མམ། ལྷ་ཁང་ངམ་མཆོད་རྟེན་གྱི་གནས་སམ་ལྷའི་ཁང་པ་འམ། གང་ཡང་རུང་བར་གནས་པས་ཉིན་ཞག་རྟག་ཏུ་བྱ་བའི་རིམ་པས་གཏོར་མའང་བྱའོ། །བཟའ་བར་བྱ་བའི་དང་པོར་ཡི་གེ་དང་པོ་ཡོངས་སུ་གྱུར་པ་ལས་གནོད་སྦྱིན་མ་ཆེན་མོ་འཕྲོག་མ་གདོང་གཅིག་པ་ལག་པ་གཉིས་པ་ཁའི་ནང་མཆེ་བ་གཙིགས་པས་འཇིགས་སུ་རུང་བ་ཁ་ན་ལྕེ་འདྲིལ་བ། རྐང་པའི་ཆ་མིའི་པགས་པས་གཡོགས་པ། ལག་པ་གཡོན་པས་མིའི་མགོ་བོ་བཟུང་བ་གཡས་ན་ངོ་མཚར་གྱི་ཕྱག་རྒྱ་འཛིན་པ། གར་གྱི་འགྱིང་ཚུལ་བྱས་པ་སྣ་ཚོགས་མདོག་ཅན་རྣམ་པར་བསྒོམས་ལ། དེ་བཞིན་དུ་དེའི་བདག་པོ་རྡོ་རྗེ་གནོད་སྦྱིན་དེ་ཁོ་ན་བཞིན་དུ་བྱུང་བ་སྟེ། འོན་ཀྱང་གཅེར་བུ་སྐྲ་བཤིག་པ་རྣམ་པར་བསྒོམས་ཏེ། དེ་བཞིན་དུ་དེའི་བུ་རྣམ་ཐོས་སྲས་ཡི་གེ་དང་པོ་ལས་བྱུང་བ་མདོག་དམར་པོ་ལག་པ་གཉིས་པ་གདོང་གཅིག་པ་མཆེ་བ་ཅུང་ཟད་གཙིགས་པའི་གདོང་ཅན་སེང་གེ་ལ་ཞོན་པ་གཡོན་སེང་གེའི་རྒྱལ་མཚན་ཐོགས་པ། གཡས་ན་རིན་པོ་ཆེའི་གཏེར་ཐོགས་པ། དུང་གི་གཏེར་དང༌། པདྨའི་གཏེར་གཉིས་སྒེག་པད་དང་བཅས་པའི་ལག་པ་གཡོན་དང་གཡས་པ་ན་ཐོགས་པའི་རྔ་ཡབ་དཀར་པོ་གཡོབ་པར་ཡང་རྣམ་པར་བསྒོམས་ལ། དེ་ནས་དེ་རྣམས་བོད་པའི་ཕྱིར་ཨུཏྤ་ལའི་ཕྱག་རྒྱ་བཅིང་བར་བྱའོ། །འདིར་སྔགས་ནི་ཨོཾ་ཨེ་ཧྱེ་ཧི་རི་ཏེ་ཡཱ་པ་ཤུ་པུ་ཏྲ་ཤ་ཏ་པ་རི་བཱ་རེ་བཛྲ་ཡཀྵ་པྲི་ཡེ་ཨསྨིན་ས་ནྣི་ཧི་ཏོ་བྷ་བ་སྭཱ་ཧཱ། བོད་པའི་སྔགས་སོ། །དེ་ནས་ཟས་ཀྱི་སྣོད་ནས་འབྲས་ཆན་གྱི་ཆང་བུ་གསུམ་བྱས་ཏེ་ས་ལ་གཞག་པར་བྱའོ། །ཆང་དང་ཤ་ལ་སོགས་པ་ཇི་ལྟར་རྙེད་པར་ཅུང་ཟད་ཙམ་བྱིན་ལ་སྔགས་བརྗོད་པར་བྱའོ། །ཨོཾ་ཧ་རི་ཏྱཻ་མ་ཧཱ་ཡཀྵ་སེ་ནཱ་པ་ཏ་ཡེ་ཧ་ར་ཧ་ར།
སརྦ་པཱ་པཾ་ནི་ཀྵིཾ་སརྦ་ཡཀྵ་ནི་པྲ་བེ་ཤ་ཏ་པ་རི་བཱ་ར་ཨི་མཾ་བ་ལིཾ་གྲྀ་ཧྣ་གྲྀ་ཧྣ་ཧཱུཾ་ཕཊ་སྭཱ་ཧཱ། ཨོཾ་བཛྲ་ཡཀྵ་རུ་དྲ་ཕཊ་སྭཱ་ཧཱ། ཨོཾ་བཻ་ཤྲ་བ་ཎཱ་ཡ་སྭཱ་ཧཱ། ཞེས་བྱ་བའི་སྔགས་བརྗོད་ལ་ཆུའི་སྣོད་དུ་བཅུག་སྟེ་དབེན་པར་གཞག་པར་བྱའོ། །དེ་ནི་རྟག་པར་བྱ་བའི་གཏོར་མའི་ཆོ་གའོ། །མཁའ་སྤྱོད་གཏོར་མའི་རིམ་པ་ནི། །ཆོ་ག་རབ་གསལ་ལ་བརྟེན་ནས། །རྣལ་འབྱོར་མ་རྒྱུད་རྗེས་འབྲངས་ནས། །དེ་ནས་གཞན་ཡང་རབ་བཤད་བྱ། །གཏོར་མའི་ལས་ལ་བྱ་རྣམས་ལས། །བྱ་རོག་གི་ནི་རིགས་རྣམས་བསྔགས། །འདི་ལྟར་དེ་དག་མཁས་རྣམས་ཀྱིས། །གཏོར་ཟན་ཉིད་དུ་བཤད་པ་ཡིན། །སྔགས་པས་བཟའ་བའི་སྔོན་རོལ་དུ། །དུར་ཁྲོད་ཆེན་པོར་སོང་ནས་ནི། །བྱ་རོག་ལྷ་ཡི་བདག་ཉིད་ཅན། །ཚིམ་ཕྱིར་དེ་རུ་གཏོར་མ་བྱ། །མངོན་བརྗོད་བླ་མའི་རིམ་པ་བཞིན། །དེ་རུ་དཀྱིལ་འཁོར་བསམ་པར་བྱ། །གེ་སར་ལྟེ་བ་དང་ལྡན་པའི། །པདྨ་འདབ་མ་བརྒྱད་པ་བསམ། །དེ་ཡི་དབུས་སུ་ལྷ་མོ་དགོད། །དྲག་པོའི་གཟུགས་ཅན་མདངས་ཅན་མ། །ཞལ་གཅིག་ཕྱག་ནི་བཞི་པ་སྟེ། །ཐོད་པ་ཁ་ཊྭཱཾ་ག་ཡིས་བརྒྱན། །ཕྱག་ན་གྲི་གུག་མ་གོ་བསྣམས་ཉིད། །ལྟེ་བའི་དབུས་སུ་བསྒོམ་པར་བྱ། །སྤྱན་གསུམ་སྨིན་མ་ཁམ་ལྡན་པ། །རོལ་པའི་འདུག་སྟངས་གར་དང་ལྡན། །སྒེག་པ་ལ་སོགས་རོ་ལྡན་པ། །གར་གྱི་སྦྱོར་ལྡན་བསྒོམ་པར་བྱ། །ཁྲོ་བོའི་རྒྱལ་པོ་སྟོབས་ཆེན་རྣམས། །ཕྱག་རྣམས་ཀུན་ན་ཐོ་སོགས་བསྣམས། །མི་སྡུག་དྲག་པོ་འཇིགས་རུང་བ། །འདབ་མ་བརྒྱད་ལ་རྣམ་དགོད་བྱ། །དེ་ནས་རང་རང་སྔགས་རྣམས་དང༌། །སྤྲོ་དང་སྡུད་པ་བྱེད་པ་ཡིན། །མཁའ་སྤྱོད་ཕྱག་རྒྱ་བཅིངས་ནས་ནི། །དེ་ནས་ཀུན་དུ་སྤྱན་དྲང་བྱ། །སྤོས་དང་མེ་ཏོག་མར་མེ་དང༌། །དྲི་དང་ལྷ་བཤོས་ལྔ་རྣམས་དང༌། །མཆོད་ཡོན་ཞབས་བསིལ་རིམ་གྱིས་ནི། །དཀྱིལ་འཁོར་མཆོག་ནི་མཆོད་པར་བྱ། །ཁྭ་ཡི་གདོང་ཅན་མཁའ་འགྲོ་མར། །བདག་ཉིད་ཀྱང་ནི་བསམ་པར་བྱ། །ཇི་ལྟར་དཀྱིལ་འཁོར་འཁོར་ལོ་བཞིན། །འཁོར་རྣམས་བརྒྱད་པོ་བསམ་པར་བྱ། །དེ་ནས་ཤིང་རྩེ་ལ་གནས་པའི། །བྱ་རོག་ཚོགས་རྣམས་གུས་བཅས་པས། །ཁྭ་གདོང་ཆ་བྱད་གཟུགས་ཅན་དག །རིམ་པ་ལ་ནི་བརྟེན་ནས་བསྒོམ། །དེ་ནས་དེ་ཡི་སྔགས་ཀྱིས་ནི། །དེ་རྣམས་ཀྱང་ནི་སྤྱན་དྲང་བྱ། །རྣལ་འབྱོར་པས་ནི་སྤྱན་དྲངས་ནས། །དེ་རྣམས་ལ་ནི་གཏོར་མ་དབུལ། །ཞོ་དང་འབྲས་ཆན་
ཡིད་འོང་བས། །སྣོད་ནི་རབ་ཏུ་གང་བྱས་ནས། །བློ་ལྡན་གྱིས་ནི་ཆང་པུ་དགུས། །གཉིས་པ་ཡང་ནི་དགང་བར་བྱ། །མཆོད་ཡོན་མེ་ཏོག་སོགས་རྣམས་ཀྱིས། །སྔར་བཞིན་སྣོད་གཉིས་མཆོད་པར་བྱ། །དེ་ནས་རྣལ་འབྱོར་མཉམ་གཞག་པ། །ཁྭ་ཡི་གདོང་ཅན་གཟུགས་འཛིན་ཅིང༌། །དཔའ་བོའི་སེམས་ལྡན་བརྩེ་བདག་གིས། །གཏོར་མའི་སྔགས་ནི་བརྗོད་པར་བྱ། །དེ་ནས་ཐུགས་ཀྱི་འཁོར་ལོ་གནས། །མཁའ་སྤྱོད་མ་ཡི་ཚོགས་ཇི་སྙེད། །འོད་བ་བྱ་རོག་གཟུགས་ཉིད་དུ། །དེ་དག་ཐམས་ཅད་དེར་འོང་འགྱུར། །ཕྱོགས་བཅུའི་འཇིག་རྟེན་ཁམས་གནས་པའི། །མཁའ་སྤྱོད་དག་ནི་ཅི་འདྲ་དང༌། །ཇི་སྙེད་ཡོད་པ་དེ་དག་ཀུན། །བྱ་རོག་རྣམ་པར་དེ་གནས་འགྱུར། །ཨོཾ་ན་མཿ་ཤྲཱི་བཛྲ་ཌཱ་ཀཱ་ཡ་ཨོཾ་ཀཱ་ཀཱ་སྱེ་ཧཱུཾ་ཧཱུཾ་ཕཊ། །དེ་ཡིས་རབ་ཏུ་གང་བའི་སྣོད། །སྙིང་གར་རབ་ཏུ་བསྐོར་བྱས་ནས། །དེ་ནས་མདུན་སྦྱིན་རྣམ་འབྱོར་བས། །དེ་རུ་མཚན་མ་བརྟག་པར་བྱ། །དེས་ནི་ས་རབ་གཡོ་བར་གྱུར། །ཕྱོགས་རྣམས་ལས་ནི་འབྲུག་སྒྲ་འབྱུང༌། །གླ་རྩི་མཚོ་སྐྱེས་དག་གི་ནི། །དྲི་བསྲུང་ཡིད་དུ་འོང་བའང་འབྱུང༌། །དེ་ཡིས་སླར་ཡང་ཚིམ་བྱ་ཞིང༌། །སེ་གོལ་བཅུ་པོ་དག་གིས་ནི། །ཕྱོགས་བཅུ་བཅིངས་པ་སྔོན་འགྲོ་བས། །སྡོམ་བརྩོན་གྱིས་ནི་སྔགས་འདི་བརྗོད། །ཨོཾ་བཛྲ་ཌཱ་ཀི་ཉ་ཁེ་ཙ་རི་རུ་ཀ་ཀཱ་པ་སྱ་ཙི་ལ་ལ་ག་རུ་ཌ་ཨི་མཾ་བ་ལིཾ་གྲྀ་ཧྞཾ་ཏུ་ས་མ་ཡ་རཀྵནྟུ། ཡ་ཐཻཥྚཾ་སརྦ་སིདྡྷི་པྲ་ཡཙྪནྟུ་ཧཱུཾ་ཧཱུཾ་ཕཊ་སྭཱ་ཧཱ། དེ་ནས་ཤིང་གཅིག་དྲུང་དུ་ནི། །གཏོར་མ་ཆེན་པོ་དེར་དོར་ནས། །སྔར་བཞིན་གཤེགས་སུ་གསོལ་བྱས་ཏེ། །བསྟོད་པའི་ཚིགས་བཅད་འདི་རྣམས་བརྗོད། །ཀུན་དུ་རྟོག་པའི་འཆིང་བ་བཅད། །འཇིག་རྟེན་བྱ་བ་གྲུབ་བྱེད་པའི། །ཇི་སྙེད་རྡོ་རྗེ་མཁའ་འགྲོ་མ། །དེ་སྙེད་རྣམས་ལ་རྟག་ཕྱག་འཚལ། །མཁའ་འགྲོ་མ་ཡི་འཁོར་ལོས་སྒྱུར། །སྐུ་གསུམ་ཡེ་ཤེས་ལྔ་ལྡན་པ། །འགྲོ་བ་སྐྱོབ་མཛད་དཔལ་ལྡན་པའི། །རྡོ་རྗེ་མཁའ་འགྲོར་ཕྱག་འཚལ་ལོ། །དེ་ནི་མཁའ་གྲོར་ཕྱག་འཚལ་ལོ། །དེ་ནི་མཁའ་སྤྱོད་མའི་གཟུགས་ཅན་གྱི་བྱ་རོག་གི་གཏོར་མའི་ཆོ་གའོ། །གང་གིས་ས་སྤྱོད་ཚོགས་དག་ནི། །མཆོག་ཏུ་ཚིམ་པར་འགྱུར་པ་ཡི། །ཕྱིའི་གཏོར་མའི་རིམ་པ་ནི། །དེ་ནས་གཞན་ཡང་རབ་བཤད་བྱ། །དགོན་པ་ཆེན་པོའི་རྣལ་འབྱོར་ཆེས། །དཀྱིལ་འཁོར་ཆེན་པོ་བསམ་པར་བྱ། །སྔར་བཞིན་འདབ་བརྒྱད་དག་གིས་ནི། །ཡོངས་སུ་མཛེས་
བྱས་པདྨ་ནི། །དེ་དབུས་ལྷ་མོ་ཁྱི་གདོང་ཅན། །སྔ་མ་བཞིན་དུ་བསམས་ནས་ནི། །རྣལ་འབྱོར་དབང་ཕྱུག་བདག་ཉིད་ཀྱང༌། །དེ་བཞིན་ཁོ་ནར་རྣམ་པར་བསམ། །དེ་ནས་མཆོད་པ་རྣམ་ལྔ་ཡང༌། །ཆོ་ག་ཇི་བཞིན་མཆོད་བྱས་ནས། །འབྲས་ཆན་ཤ་དང་ཁྲག་རྣམས་ཀྱིས། །གཏོར་མའི་སྣོད་ནི་རབ་དགང་བྱ། །གཏོར་སྣོད་ཡང་དག་མཆོད་བྱས་ནས། །ཕྱོགས་བཅིང་བར་ནི་རབ་བྱས་ནས། །ཕྱག་རྒྱ་བཅིངས་ཏེ་བཟླས་བྱས་ལ། །དེ་ཡིས་སྤྱན་དྲང་ཉིད་ཀྱང་བྱ། །ཨོཾ་ཨཱ་ཡནྟྲ་ཡནྟུ་རྡྲ་ཀིནྱ་ཤ་ན་ཝ་གཱ་ཏྲ་མ་ཧོ་གྲ་བྷཱི་མ་ཝ་པུ་ཥ་ཨི་མཾ་བ་ལིཾ་བྷུཉྫ། ཛིགྷྲ་ཐ། པི་པ་ཐ། གྲིཧྣ་ཏྭཾ། ཨསྨ་ཀཾ། །པུཥྚིཾ། ཀུ་རུ་ས་མ་ཡ་མ་ནུ་སྨ་ར་ཨཱཿཧཱུཾ་ཕཊ་སྭཱ་ཧཱ། སྔགས་འདི་ཡིས་ནི་སྤྱན་དྲངས་པས། །ཕྱོགས་བཅུ་ནས་ནི་ཁྱིའི་གཟུགས་ཅན། །ཁྱི་གདོངས་སྤྱོད་འཁོར་ལོ་དང༌། །གཏོར་མ་བཟའ་ཕྱིར་མདུན་འོང་འགྱུར། །དེ་རྣམས་ཚིམ་པར་བྱས་ནས་ནི། །སྨོན་ལམ་བཏབ་ནས་གཤེགས་གསོལ་ཏེ། །ཤིན་ཏུ་མཉམ་གཞག་སྒྲུབ་པ་པོ། །ཅི་འདོད་གཟུགས་ཀྱིས་གནས་པར་བྱ། །ཡང་ན་ཆོ་ག་གཞན་གྱིས་ནི། །ཇི་ལྟར་འཇིག་རྟེན་ཐམས་ཅད་ལ། །འབྲས་བུ་བདེ་འགྲོ་སྟེར་འགྱུར་བ། །ཁྱི་རྣམས་ལ་ནི་གཏོར་མ་སྤྱིན། །མངོན་པར་འདོད་པའི་དོན་སྒྲུབ་ཕྱིར། །འཕོ་ཞག་གཉིས་ལ་བརྟེན་ནས་ནི། །བཟའ་བའི་སྔོན་དུ་གུས་བཅས་པས། །ཁྱི་རྣམས་ལ་ནི་གཏོར་མ་སྦྱིན། །ཕྱི་དྲོ་ཁང་པའི་སྒོ་ཁང་དུ། །ཚོན་རྩི་དཀར་པོས་དཀྱིལ་འཁོར་ནི། །གྲུ་བཞི་ཤིན་ཏུ་མཛེས་གྱུར་པ། །རི་མོ་བརྒྱད་པར་རབ་ཏུ་བྱ། །ཁམ་ཕོར་འབྲས་ཆན་དག་དང་གཞན། །ཚོད་མ་ཡིད་འོང་དེ་བཞིན་དུ། །ལྷ་ཡི་ཡོ་བྱད་རྣམས་ཀྱིས་བཀང༌། །ས་ལས་བྱས་པ་དེར་གཞག་བྱ། །གཉིས་པ་ཆང་གིས་ཀུན་དུ་དགང༌། །སྣོད་ནི་དེ་ཡི་འགྲམ་དུ་གཞག །གསུམ་པ་སྤོས་དང་མེ་ཏོག་སོགས། །སྣོད་ནི་གཡས་ཀྱི་འགྲམ་དུའོ། །དེ་ནས་ཁྱི་ནི་བོས་ནས་སུ། །དཀྱིལ་འཁོར་མདུན་དུ་གཞག་པར་བྱ། །ཁྱི་གདོང་རྩ་བའི་སྔགས་ཀྱིས་ནི། །དེ་ལ་བསང་གཏོར་ཀུན་དུ་བྱ། །དེ་ལ་མེ་ཏོག་སྔགས་སོགས་ཀྱིས། །གོ་རིམས་བཞིན་དུ་མཆོད་པར་བྱ། །དེ་ནས་སྔགས་ནི་འདི་དག་གིས། །གཏོར་མ་མདུན་དུ་སྦྱིན་པར་བྱ། །ཨོཾ་ཤྭ་ན་སྱེ་བྷུ་རྩ་རི་ཡེ་ཨི་མཾ་བ་ལིཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཇི་སྲིད་མདུན་དུ་ཁྱི་གཏོར་ཟ། །དེ་ནས་བཟླས་པ་རབ་ཏུ་བྱ། །ཟོས་པ་ཡི་ནི་ཐ་མ་རུ། །སྔར་བཞིན་རབ་ཏུ་གཏང་བར་བྱ། །གཏོར་མ་འདི་ནི་ཉིན་རེ་བཞིན། །གལ་ཏེ་སྔགས་པས་བྱས་ན་ནི། །བློ་ལྡན་དེ་ཡི་ལས་རྣམས་ནི། །ཐམས་ཅད་འགྲུབ་པར་འགྱུར་བ་ཡིན། །ཚོགས་པ་མེད་ན་སྔར་བཤད་པའི། །རིམ་པ་ཉིད་ལ་བརྟན་པར་
བྱ། །ཡང་ན་ཟླ་བ་རེ་རེ་ཞིང༌། །ཡར་གྱི་ངོ་ཡི་བཅུ་གཉིས་ལ། །དེ་ནི་ས་སྤྱོད་མའི་གཟུགས་ཅན་གྱི། ཁྱིའི་གཏོར་མའི་ཆོ་གའོ། །གང་གིས་ས་ནི་གསེར་བྱུགས་པ། །རྣལ་འབྱོར་བས་ནི་འགྲུབ་འགྱུར་པ། །ས་འོག་གནས་པའི་གཏོར་མའི་ལས། །དེ་ནས་ང་ཡིས་བཤད་པར་བྱ། །བསོད་ནམས་འབྲས་ཆེན་ཐོབ་བྱའི་ཕྱིར། །ཉིན་རེ་ཞིང་ངམ་བཅོ་ལྔའམ། །བཅུ་གཉིས་བར་གྱིས་གཏོར་མའི་ལས། །འདི་ནི་རྣལ་འབྱོར་དབང་པོས་བྱ། །ཆུ་བོའམ་རྒྱ་མཚོའི་ཆུ་འགྲམ་དུ། །ས་འོག་གནས་པའི་སེམས་ཅན་རྣམས། །ཚིམ་པར་བྱ་ཕྱིར་རྡུལ་ཚོན་གྱི། །དཀྱིལ་འཁོར་དག་ནི་ཆེན་པོ་བྱ། །གཽ་རཱི་ནག་མོ་ཕྱག་གཉིས་མ། །ཞལ་གཅིག་ཕྱག་ནི་གཉིས་བ་སྟེ། །ཉ་དང་གྲི་གུག་བསྣམས་པ་མཆོག །ཉ་ཡི་གདན་ཅན་ཉ་གསོལ་བ། །ཉ་ཡི་རྒྱན་དག་གིས་བརྒྱན་པ། །དཀྱིལ་འཁོར་དབུས་སུ་དགོད་པར་བྱ། །འདབ་མ་གཞན་ལ་སྔ་མ་བཞིན། །གར་གྱི་འགྱིང་ཚུལ་ལ་བརྩོན་པ། །ཧ་ཧ་ཧི་ཧི་ཞེས་སྒྲོགས་འཇིགས། །ཁྲོ་བོའི་གཟུགས་དག་རྣམ་པར་དགོད། །དེ་ནས་དཀྱིལ་འཁོར་དེ་ཉིད་ནི། །སྤོས་དང་མེ་ཏོག་ལྷ་བཤོས་སོགས། །དྲི་ཡིས་ཆོ་ག་བཞིན་མཆོད་ནས། །གཏོར་མའི་ལས་ནི་ཡང་དག་བྱ། །གཽ་རཱིའི་གཟུགས་འཛིན་རྣལ་འབྱོར་པ། །སེམས་དཔའ་གསུམ་དག་སྐུ་འཛིན་པས། །སྐད་ཅིག་གིས་ནི་སྔར་བརྗོད་ནས། །ཅིག་ཅར་དུ་ནི་ཕྱོགས་བཅིང་བྱ། །སྐད་ཅིག་ཏུ་ནི་བསྒོམ་པར་བྱ། །དེ་ནི་དབང་རྣོན་རིམ་པའོ། །དེ་ནས་ཡི་གེ་ཐ་ལས་བྱུང༌། །ཉ་རྣམས་ཁྱབ་འཇུག་གཟུགས་ཅན་དུ། །རྣམ་པར་བསམས་ནས་སྒྲུབ་པ་པོས། །དེ་རྣམས་སྔགས་ཀྱིས་བོད་པར་བྱ། །ཨོཾ་ཨེ་ཧྱེ་ཧི་མ་ཧཱ་བ་ལ་བིཪྻ་པར་ཀྲ་མ། མ་ཧཱ་ཡོ་ཛ་ན་ས་ཧཱ་སྲ་པྲ་ལཾ་བ་ཝ་པུ་ཥཱ། ཏི་ལི་ཏི་མི་གི་ལི། མ་ཧཱ་ཏི་མི་གི་ལི་པྲ་བྷི་ཏ་ཡོ་མ་ཧཱ་མ་ཎི་ཨ་རྷི་པ་ཏ་ཡེ། ཨ་ཏྲ་སན་ནི་ཧི་ཏོ་བྷ་བནྟུ། མ་མ་ཨ་བྷི་ཕྲེ་ཏཱ་རྠ་སིདྡྷི་མ་བི་ཏ་ར་ནྟུ་སྭཱ་ཧཱ། དེ་ནས་དེ་རྣམས་བོད་བྱས་ནས། །ཁར་ཁཎྜ་འབྲས་ཆན་ཕྱེ། །ལ་དུ་གློ་ཁ་ས་སོགས་ཀྱིས། །གཏོར་མའི་སྣོད་ནི་རབ་ཏུ་དགང༌། །ཆུ་ནི་གཙང་མ་དྲི་ཞིམ་པ། །སྲོག་ཆགས་དག་ནི་རྣམ་སྤངས་པ། །ཁྱབ་འཇུག་གིས་ནི་ཆང་བསྲུང་ཕྱིར། །ཆང་མ་གཏོགས་པ་སྦྱིན་པར་བྱ། །མཆོད་ཡོན་ཞབས་བསིལ་མཆོད་ནང་དུ། །བྱིན་ནས་མེ་ཏོག་ལ་སོགས་གཞུག །བྱིན་ནས་སྔགས་ནི་འདི་ཉིད་ཀྱིས།། གཏོར་མའི་སྣོད་ནི་དོར་བར་བྱ། །ཨོཾ་ཨ་ཨཱ་ཨི་ཨཱི་ཨུ་ཨཱུ། རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨམ་ཨཿ་སྭཱ་ཧཱ། དེ་ནས་དེ་དག་སྔར་བཞིན་དུ། །མྱུར་དུ་བཏང་བ་བྱས་ནས་ནི། །དཀྱིལ་འཁོར་གྱི་ནི་རྡུལ་ཚོན་དེ། །དོགས་པ་མེད་པར་དོར་པར་བྱ། །དེ་ལྟར་བྱས་ནས་ས་འོག་ན། །གནས་པ་རྣམས་ནི་མགུ་བར་འགྱུར། །དེ་ལ་མཁའ་འགྲོ་མ་ཡི་ཚོགས། །དངོས་གྲུབ་ཡིད་
འོང་སྟེར་བར་འགྱུར། །འདོད་ཆགས་བྲལ་བ་སྟོང་ཕྲག་ལ། །ཉིན་རེ་བཟའ་བ་མཆོག་ཕུལ་ལས། །བྱུང་བའི་བསོད་ནམས་གང་ཡིན་དེ། །ཉ་རྣམས་ཚིམ་པར་བྱས་ལས་འབྱུང༌། །རང་རྒྱལ་གྱི་ནི་དགེ་འདུན་ལ། །བསོད་སྙོམས་ཕུལ་ལས་དགེ་གང་འབྱུང༌། །ཉ་རྣམས་ཚིམ་པར་བྱས་པ་ལས། །བསོད་ནམས་དེ་ནི་ཐོབ་པར་འགྱུར། །དེ་ནི་ས་འོག་ན་གནས་པའི་གཟུགས་ཅན་གྱི་ཉའི་གཏོར་མའི་ཆོ་གའོ། །གང་གི་སྤྱོད་ལམ་རྣམ་བཞི་རུ། །རྣལ་འབྱོར་པ་ཡིས་འགྲུབ་འགྱུར་བ། །ཕྱོགས་སྤྱོད་གཏོར་མ་བསྒྲུབ་པ་ནི། །དེ་ནས་གཞན་ཡང་རབ་བཤད་བྱ། །རབ་ཏུ་གྲགས་པའི་བཞི་མདོ་རུ། །རྒྱལ་པོའི་སྐྱེད་མོས་ཚལ་བརྟེན་ནས། །རྡུལ་ཚོན་ཁ་དོག་ལྔ་པ་ཡིས། །དེ་རུ་དཀྱིལ་འཁོར་བྲི་བར་བྱ། །པདྨ་འདབ་བརྒྱད་ལྟེ་བར་བཅས། །པདྨ་སྣ་ཚོགས་དང་ལྡན་པ། །རྣལ་འབྱོར་པ་ཡིས་དེར་བྲི་བྱ། །དབུས་སུ་ཐོད་པ་བྲི་བར་བྱ། །སྡིགས་མཛུབ་རྡོ་རྗེ་འགྱིང་བཅས་པས། །ཤིན་ཏུ་མི་བཟད་འཇིགས་མཛད་པ། །སྤྲིན་ནི་སྔོན་པོའི་མདོག་དང་ལྡན། །འབར་བ་སྔོན་པོ་རབ་ཏུ་ཁྱབ། །གཽ་རཱི་གཽ་རཱིའི་བདག་པོ་ཡིས། །སྙིང་གར་གཡས་བརྐྱང་ཞབས་ཀྱིས་མནན། །ལྟེ་བའི་དབུས་སུ་བཅོམ་ལྡན་འདས། །རྡོ་རྗེ་ཧཱུཾ་མཛད་བསྒོམ་པར་བྱ། །ཤར་འདབ་ཚངས་པའི་ལྷ་མོ་བསམ། །ཁྱབ་འཇུག་གི་ནི་ལྷོ་ན་གནས། །གཞོན་ནུ་ཡི་ནི་ནུབ་ཏུ་བསྒོམ། །གཤིན་རྗེ་བྱང་གི་ཕྱོགས་ན་གནས། །སྲིན་པོའི་ཕྱོགས་སུ་ལུས་ངན་པོ། །མེ་ཡི་ཕྱོགས་སུ་ཙ་མུ་ཎྜཱི། །དབང་ལྡན་ཕྱོགས་སུ་དབང་ལྡན་མ། །རླུང་གི་ལྷ་མོ་རང་ཕྱོགས་གནས། །ཞལ་གཅིག་སྤྱན་ནི་གསུམ་པ་སྟེ། །ཕྱག་གཉིས་གར་ལ་རབ་བརྩོན་པ། །གཡས་པ་ཡི་ནི་ཕྱག་རྣམས་སུ། །ཕྲེང་བ་དེ་བཞིན་འཁོར་ལོ་དང༌། །རྩེ་གསུམ་དབྱུག་པ་དབྱུག་ཏོ་དང༌། །རལ་གྲི་མདུང་དང་གོས་ཉིད་དེ། །ཕྱག་མཚན་འདི་རྣམས་བསམ་པར་བྱ། །སྤྱི་བླུགས་དང་ནི་པདྨ་དང༌། །ཕྲེང་བ་དང་ནི་དེ་བཞིན་མགོ །སེང་གེའི་རྒྱལ་མཚན་ཐོད་པ་དང༌། །ཁ་ཊྭཱཾ་ག་དང་ངོ་མཚར་གཞན། །གཡོན་པ་རྣམས་སུ་བསམ་པར་བྱ། །དམར་པོ་ལྗང་གུ་སེར་དང་མཚུངས། །སྔོན་པོ་དམར་པོ་དམར་དཀར་འོད། །ཨིནྡྲ་ནཱི་ལའི་འོད་ལྡན་པ། །མི་མོ་མཆོག་ནི་འདི་རྣམས་བསམ། །སྔགས་དང་དམ་ཚིག་ཕྱག་རྒྱ་ཡིས། །དེ་རུ་སྤྱན་ནི་དྲང་བར་བྱ། །དེ་ནས་གཏོར་མ་རྒྱ་ཆེན་པོ། །སྔགས་པས་སྦྱིན་བྱ་ལུང་རྗེ་བཞིན། །ཨོཾ་ན་མོ་བྷ་ག་ཝ་ཏེ་བཛྲ་ཧཱུཾ་ཀ་ར། ཧྲཱིཿཥྚྲྀ་སརྦ་བྷཱུ་ཏ་ནི་སྟཾ་བྷ་ཡ་སྭཱ་ཧཱ། ཨོཾ་བྲཧྨ་ཎི་ལེ་ཧཱུཾ་ཧཱུཾ་ཕཊ། ཨོཾ་བཻཥྞ་བཱི་ཡེ་ཧྲཱིཿཕཊ། ཨོཾ་ཀཽ་མཱ་རཱི་ཡེ་ཧྲཱིཿཧཱུཾ་ཕཊ། ཨོཾ་ཡ་མཱ་ནཱི་ཡེ་ཧྲཱིཿཧཱུཾ་ཕཊ། ཨོཾ་ཀུ་བཻ་རཱ་ཡེ་ཧྲཱིཿཧཱུཾ་ཕཊ། ཨོཾ་ཙཱ་མུ་ཎྜཱ་ཡེ་ཧྲཱིཿཧཱུཾ་ཕཊ། ཨོཾ་ཨེ་ཥ་བྷྱོ་ཧྲཱིཿཧཱུཾ་ཕཊ། ཨོཾ་བ་ཡ་བྱཻ་ཧྲཱིཿཧཱུཾ་ཕཊ།
ལག་པ་གཉིས་ནི་བརྐྱང་ནས་སུ། །གུང་མོའི་རྩ་བར་མཐེ་འོང་དག །ཐལ་སྦྱར་ཚིག་འདོན་སྦྱོར་བ་ནི། །ཚངས་པའི་ཕྱག་རྒྱར་རབ་ཏུ་བསྒྲགས། །རྡོ་རྗེ་ཁུ་ཚུར་གཉིས་བཅིངས་ནས། །མཛུབ་མོ་རྣ་ཆའི་དབྱིབས་བྱས་པ། །ཁྱབ་འཇུག་ལྷ་མོའི་ཕྱག་རྒྱ་ཡིན། །གཡས་པའི་ཁུ་ཚུར་གཞོན་ནུ་མའི། །ཁ་ཚུར་གཉིས་ནི་གཤིན་རྗེ་མའི། །གཉིས་ཀྱིས་མཆོག་སྦྱིན་ནོར་སྦྱིན་མའི། །ལག་གཉིས་ཁུ་ཚུར་བཅིངས་བྱས་ནས། །མཛུབ་གཉིས་བསྒྲེང་བ་ཙཱ་མུཎྜཱིའི། །མཐེའུ་ཆུང་མཐེ་བོང་དག་བཀུག་ནས། །གཞན་དག་བསྒྲེང་བ་དབང་ལྡན་མའི། །གོས་ཀྱི་རོལ་པས་ལག་པ་གཉིས། །སྤྱི་བོ་རུ་ནི་གཞག་པར་བྱ། །ཕྱག་རྒྱ་འདི་ནི་རླུང་གི་སྟེ། །དེ་ནི་ཕྱག་རྒྱའི་ཚོགས་རིམ་པ། །དེ་ནས་སྣོད་ནི་གང་བ་དགུ། །ཁྱད་པར་དུ་ནི་བདུད་རྩི་ལྡན། །སྔ་མ་བཞིན་དུ་གཞག་པར་བྱ། །བ་ལང་ཁྱིམ་བྱ་ལས་བྱུང་དང༌། །བོང་མི་རུས་སྦལ་རྔ་མོ་དང༌། །ཁྱི་དང་ཅེ་སྤྱང་རྟ་ལས་བྱུང༌། །ཤ་རྣམས་ཀྱིས་ནི་གོ་རིམས་བཞིན། །རྣལ་འབྱོར་པ་ཡིས་དགང་བར་བྱ། །དོགས་པ་མེད་པའི་སེམས་ཀྱིས་ནི། །སྤོས་དང་མེ་ཏོག་སོགས་ཕུལ་ནས། །སྔར་བཤད་སྔགས་དང་ཕྱག་རྒྱ་ཡིས། །དེ་རྣམས་ལམ་གྱི་བཞི་མདོར་དོར། །མ་མོ་རྣམས་ནི་རང་གནས་སུ། །དེ་ནས་གཤེགས་སུ་གསོལ་བྱས་ནས། །བསོད་ནམས་བསྔོས་ཏེ་རྣལ་འབྱོར་པ། །སྐྱེས་མཆོག་ཇི་ལྟར་འདོད་གནས་བྱ། །འགྲོ་བ་འམ་ནི་འགྲེང་ཡང་རུང༌། །གཉིད་ལོག་པའམ་སད་པའང་རུང༌། །མི་གཙང་བའམ་གཙང་ཡང་རུང༌། །མ་མོ་རྣམས་ནི་བསྲུང་བར་འགྱུར། །བློ་མཆོག་རྣམས་ནི་ཞི་རྒྱས་སོགས། །ལས་ནི་ཅུང་ཟད་གང་བྱེད་པ། །དེ་ལ་གཏོར་མ་དག་གིས་ནི། །མཉེས་ནས་དེ་ཡི་གྲོགས་བྱེད་འགྱུར། །དེ་ཡི་བཀའ་ནོད་ལ་བརྩོན་པ། །བགེགས་ལ་སོགས་པ་འགའ་ཡང་རུང༌། །དེ་རྣམས་ཀྱང་ནི་དེ་ཉིད་ལ། །སྲུང་དང་སྐྱོབ་དང་སྦེད་པར་འགྱུར། །མར་ངོ་ཡི་ནི་ཚེས་བརྒྱད་དམ། །ཡང་ན་ཚེས་ནི་བཅུ་བཞི་ལ། །མཚན་ཕྱེད་ལ་ནི་གཏོར་མ་བྱ། །དེ་ནི་དུས་ཀྱི་ཆོ་གའི་རིམ་པའོ། །དེ་ནི་ཕྱོགས་ན་སྤྱོད་པའི་སྒོ་ནས་མ་མོ་རྣམས་ཀྱི་གཏོར་མའི་ཆོ་གའོ། །བྱས་ན་བསོད་ནམས་མཐའ་ཡས་པ། །མི་ཟད་གང་དུ་འབྱུང་འགྱུར་བ། །གང་ཞིག་ཐང་ལ་སྤྱོད་རྣམས་ཀྱི། །གཏོར་མ་གཞན་ཡང་རབ་བཤད་བྱ། །ཐང་སྤྱོད་རྣམས་ཀྱི་ནང་ནས་ནི། །བ་ལང་མཆོད་པ་རབ་
ཏུ་བསྔགས། །སྐྱུགས་ལྡང་བྱེད་པའི་ལྷ་ཡིན་པས། །བདེ་མཆོག་ལས་ནི་བཅོམ་ལྡན་གསུངས། །སྒྲུབ་པ་པོས་ནི་ཡར་ངོ་ཡི། །བཅུ་བཞི་ལ་ནི་སྔར་ལངས་ཏེ། །ཆུ་བོ་དྲི་མེད་ཆུ་ལྡན་པར། །སོང་ནས་ཁྲུས་ནི་ཀུན་དུ་བྱ། །མདོ་ལས་གསུངས་པའི་ཆོ་ག་བཞིན། །ལུས་ནི་རབ་ཏུ་བཀྲུ་བར་བྱ། །སྡོམ་བརྩོན་གྱིས་ནི་གདོང་ལ་སོགས། །དབེན་བར་བཤང་གཅི་དོར་བྱས་ཏེ། །མཚན་མར་བདུན་དང་འཕོངས་སུ་བདུན། །ལག་པར་ས་ཕུར་བདུན་བླུགས་ཤིང༌། །དེ་ནས་ཆུ་ཡིས་བཀྲུས་ནས་ནི། །དེ་ནས་ལན་གསུམ་འཐོར་འཐུང་བྱ། །རྣ་སོགས་ལྟེ་བ་ལ་ཐུག་པར། །ལན་བདུན་ཉེ་རེག་བྱས་ནས་ནི། །དབང་བསྐུར་བྱས་པས་ལན་གསུམ་དུ། །ཆུ་ལ་བྱི་ཟུལ་བྱས་ནས་ནི། །ཁྱོར་བ་དག་ནི་བརྒྱ་རྩ་བརྒྱད། །ཛཾ་བྷ་ལ་ལ་སྦྱིན་པར་བྱ། །རྡོ་རྗེ་འཛིན་པའི་དཀྱིལ་འཁོར་ལའང༌། །ཆུ་ནི་སྙིམ་པ་གསུམ་དག་ཉིད། །རེ་རེ་ཞིང་ནི་རང་སྔགས་ཀྱིས། །མཁས་པ་རྣམས་ཀྱིས་དབུལ་བར་བྱ། །དེ་ནས་སྙིམ་པར་གསུམ་གྱིས་ནི། །ཡི་གེ་བརྒྱ་པས་ཚིམ་པར་བསྔོ། །ཡི་དགས་རྣམས་ལ་ཆུ་སྙིམ་ལྔ། །འཇིག་རྟེན་དབང་པོའི་སྔགས་ཀྱིས་ནི། །དེ་ནས་ལངས་ཏེ་བ་བརྒྱད་ནི། །ཁྱུ་མཆོག་མཐོན་པོ་དང་ལྡན་པ། །འཁོར་ལོའི་ཚུལ་དུ་བཞག་ནས་ནི། །དབུས་སུ་ཁྱུ་མཆོག་མཐོན་པོ་གཞག །དེ་ནས་མཆོད་ཡོན་དག་གི་སྣོད། །བའི་རྣམ་ལྔས་དགང་བར་བྱ། །དཱུར་བའི་ཆུན་པོས་བསངས་ནས་ནི། །མཁའ་འགྲ་དྲག་མོ་རོ་ལངས་མ། །དེ་བཞིན་གཞན་ཡང་གཏུམ་མོ་དང༌། །སེང་མོ་སྟག་མོ་འུག་པ་མོ། །དེ་བཞིན་གཞན་ཡང་ཅེ་སྤྱང་མའི། །ས་བོན་དེ་དག་ལ་དགོད་བྱ། །རྡོ་རྗེ་སེམས་དཔའི་ས་བོན་གྱིས། །དབུས་སུ་ཁྱུ་མཆོག་བྱིན་རླབས་བྱ། །དེ་ལ་ས་བོན་ནི་འདི་རྣམས་ཡིན་ཏེ། །ཡེ་ཤེས་མཁའ་འགྲོ་མ་རྣམས་ཀྱི་ས་བོན་ནི་ཡི་གེ་ཧཱུཾ། །དྲག་མོའི་ས་བོན་ནི་ཡི་གེ་ཀྵུཾ། །རོ་ལངས་མའི་ས་བོན་ནི་ཡི་གེ་ཡུཾ། །གཏུམ་མོའི་ས་བོན་ནི་ཡི་གེ་ཧཱུཾ། སེང་མོའི་ས་བོན་ནི་ཡི་གེ་སྨྲཾ། སྟག་མོའི་ས་བོན་ནི་ཡི་གེ་ཀྵྨྼྻུཾ་འུག་པ་མོའི་ས་བོན་ནི་ཡི་གེ་ཡྨྼྻུཾ་ཅེ་སྤྱང་མའི་ས་བོན་ནི་ཡི་གེ་ཀྵྨྼྻུཾ། ས་བོན་བརྒྱད་པོ་དེ་དག་དང༌། །དགུ་པ་ཡེ་ཤེས་ས་བོན་ནི། །དེ་དག་སྙིང་གར་བཀོད་ནས་ནི། །དེ་ནས་གཏོར་མ་སྦྱིན་པར་བྱ། །འབྲས་ཆན་ཆང་བུ་རྣམས་ཀྱིས་ཀྱང༌། །སྣོད་ནི་དགུ་དག་དགང་བར་བྱ། །འོ་ཐུག་ལན་ཚྭ་དང་ལྡན་པ། །དེ་རྣམས་ཀྱི་ནི་ནང་དུ་བ། །དེ་རྣམས་ལོགས་
སུ་ས་ལ་ནི། །ཆུ་ནི་སྙིམ་པ་གསུམ་བླུགས་བྱ། །མེ་ཏོག་སྤོས་ལ་སོགས་རྣམས་ཀྱིས། །མཉམ་པར་གཞག་པས་མཆོད་པར་བྱ། །བདག་ཉིད་ཞི་བར་མཐུ་ལྡན་པ། །བཅོམ་ལྡན་སྒྲོལ་མ་དབང་ཕྱུག་མ། །མ་དུ་ལུང་ག་རྩེ་གསུམ་བསྣམས། །ཁྱུ་མཆོག་ལ་ནི་བཅིངས་པར་བསྒོམ། །དེ་ནས་གསང་སྔགས་འདི་ཡིས་ནི། །གང་གི་སེམས་ཅན་ཁམས་རྣམས་ནི། །བདེ་བྱེད་རྣལ་འབྱོར་པས་འགྲུབ་འགྱུར། །གཏོར་མ་དེ་ཡི་མདུན་དུ་སྦྱིན། །ཨོཾ་ཨ་ཨཱ་ཨཾ་ཨ་ཀཱ་རོ་མུ་ཁཾ་སརྦ་དྷཱ་རྨྨཱ་ཎཱཾ་ཨཱ་དྱ་ནུ་ཏྤ་ནྣ་ཏྭཱ་ཏ། ཞེས་བྱ་བ་ཡི་སྔགས་འདི་ཡིས། །གཏོར་མའི་སྣོད་ནི་གུས་བཅས་པས། །ལན་གསུམ་བྱིན་གྱིས་བརླབས་ནས་སུ། །དེ་ནས་དེ་རྣམས་ལ་སྦྱིན་བྱ། །ཇི་སྲིད་པ་ལ་ཟ་འགྱུར་པ། །བཞི་པའི་མཐུ་ལྡན་སྒྲོལ་མ་ཡི། །དེ་ཉིད་གསུམ་དང་ཡོངས་སྤེལ་བའི། །སྔགས་འདི་དེ་སྲིད་བརྗོད་པར་བྱ། །ཨོཾ་ཏཱ་རེ་ཏུ་ཏྟཱ་རེ་ཏུ་རེ་ཨཱཿཧཱུཾ་ཕཊ་སྭཱ་ཧཱ། མུཿའི་མཐའ་ཅན་སྔགས་ཀྱིས་ནི། །དེ་ནས་སྔགས་པས་གཤེགས་གསོལ་བྱ། །གུས་པ་ཡིས་ནི་བཟའ་བ་དག། དགེ་སློང་དགེ་འདུན་དག་ཕུལ་ནས། །དགེ་བ་བསྔོས་ཏེ་བསྟོད་པ་དག །བརྗོད་ནས་སྒྲོལ་མའི་རིགས་དག་ལ། །ཕྱག་བྱས་ན་ནི་ཀུན་ལངས་ཏེ། །དེ་ནས་ཇི་ལྟར་འདོད་བཞིན་གནས། །དེ་ནི་ཐང་ལ་སྤྱོད་པའི་གཟུགས་ཅན་གྱི་བ་ལང་རྣམས་ཀྱི་གཏོར་མའོ། །གང་གིས་འཁོར་ལོ་གསུམ་མཁའ་འགྲོ། །སྒྲུབ་པ་པོ་ལ་ཀུན་དུ་སྲུང༌། །གཞོན་ནུ་མ་ཡི་གཏོར་སྒྲུབ་པ། །དེ་ནས་ཡང་དག་རབ་བཤད་བྱ། །རེ་ཞིག་དང་པོར་ནམ་མཁའ་ཉི་མའི་སྟེང་གི་ཟླ་བའི་མཆོད་རྟེན་གྱི་དབུས་སུ་ཡི་གེ་མཾ་ལས་ཡོངས་སུ་སྤྲུལ་པ་གཞོན་ནུ་མའི་གཟུགས་ཅན། གསེར་བཙོ་མ་ལྟ་བུ་ཉི་མ་འཆར་ཀའི་འོད་ཟེར་གྱི་ཕྲེང་བ་སྟོང་ཕྲག་འཕྲོ་བའི་མེ་ཏོག་བནྟུ་ཛི་བ་ཀ་དང༌། ཛ་བ་ལྟ་བུའི་གོས་དང་ལྡན་པ། ཨང་ག་རག་དང་སྟོད་གཡོགས་དམར་པོ་རྣམ་པ་སྣ་ཚོགས་པ་དང་ལྡན་པ། ལག་གདུབ་དང༌། རྣ་རྒྱན་དང༌། སྐེ་རགས་དང༌། རྐང་གདུབ་དང༌། གཡེར་ཀ་རྣམས་ཀྱི་སྒྲ་དང༌། སོར་གདུབ་ཁ་དོག་སྣ་ཚོགས་པའི་རྒྱན་དག་གིས་རྣམས་པར་བརྒྱན་པ། རྣམ་པར་སྣང་མཛད་ཀྱིས་དབུ་རྒྱན་བྱས་པ། མགོ་ལ་མྱ་ངན་མེད་པའི་ཕྲེང་བས་རྣམ་པར་བརྒྱན་པ། ཕྱག་བརྒྱད་པ། ཞལ་གསུམ་པ། སྤྱན་གསུམ་པ་ཕྱག་གཡོན་པ་རྣམས་ན་གཞུ་དང༌། ཤིང་མྱ་ངན་མེད་པ་དང༌། སྐུད་པ་དང་ཞགས་པ་བསྣམས་པ། ཕྱག་གཡས་པ་རྣམས་ན་རྡོ་རྗེ་འབར་བ་དང༌། ཁབ་དང༌། ལྕགས་ཀྱུ་
དང༌། མདའ་གསོར་བ་ལ་བརྩོན་པ། ཞལ་དང་པོ་ཞི་བ་པདྨ་ཁ་རབ་ཏུ་བྱེ་བ་ལྟ་བུ་གསེར་རབ་ཏུ་སེར་པོའི་མེ་ཏོག་ཅན། མིག་རབ་ཏུ་ཡངས་པ། མཆུ་ལི་ཁྲིའི་ཕྱེ་མ་བཞིན་དུ་དམར་བ་སྒེག་ཅིང་རོལ་པ་དང་བཅས་པ། ཞལ་གཡོན་པ་ཕག་གི་གདོང་ཅན་ཁྲོ་བ་དང་བཅས་ཤིང་རྣམ་པར་གཙིགས་པ་ལ། མི་སྡུག་ཅིང་དྲག་པོ་འཇིགས་སུ་རུང་བ་ཨིནྡྲ་ནཱི་ལའི་མདོག་དང་མཚུངས་པ་མཐིང་ཤུན་ལྟར་སྣང་བ། ཉི་མ་སྟོང་ཕྲག་བཅུ་གཉིས་དང་མཚུངས་པའི་འོད་དང་ལྡན་པ། ཁྲོ་གཉེར་གཙིགས་པ་དང་བཅས་པ་འཇིགས་པར་མཛད་པ། ཞལ་གཡས་པ་པདྨ་རཱ་ག་ལྟར་ཤིན་ཏུ་དམར་བ་མཆོག་ཏུ་འབར་བའི་ཉི་མ་སྟོང་ཕྲག་ལྟར་རབ་ཏུ་གསལ་ཞིའི་ཞི་བ་མཆོད་རྟེན་གྱི་བུམ་པ་ལས་བྱུང་བའི་ཤིང་མྱ་ངན་མེད་པའི་མེ་ཏོག་གིས་གཡོགས་པ། དེའི་འོག་ཏུ་རྣམ་པར་སྣང་མཛད་རལ་པའི་ཐོར་ཚུགས་ཀྱིས་བརྒྱན་ཅིང་ཞི་བ། གསེར་རབ་ཏུ་སེར་པོའི་མདོག་ལྟར་འབར་བ། བྱང་ཆུབ་མཆོག་གི་ཕྱག་རྒྱ་དང་ཡོངས་སུ་ལྡན་པར་བཞུགས་པ། ཕག་པའི་གདན་ལ་གཡོན་བརྐྱང་བའི་གནས་པས་གཞོན་ནུ་མའི་ཚོད་དུ་བཞུགས་པ། དེའི་འོག་ཏུ་རླུང་གི་དཀྱིལ་འཁོར་ལ་ཡི་གེ་རཾ་ལས་ཡོངས་སུ་སྤྲུལ་པའི་གཟའ་ཆེན་པོ་སྒྲ་གཅན་ཉིན་དང༌། མཚན་དུ་ཟླ་བ་དང་ཉི་མ་དག་ཟ་བར་བྱེད་པ་རྣམ་པར་བསྒོམས་ལ། རང་གི་སྔགས་ཀྱིས་བདག་ཉིད་བྱིན་གྱིས་བརླབས་ཏེ། ཨོཾ་མཱ་རཱི་ཙྱི་སྭཱ་ཧཱ་ཞེས་བྱ་བའི་སྔགས་འདི་བཟླས་པར་བྱའོ། །དེ་ནས་མདུན་དུ་ཁྱེའུ་གཅིག་དང་བུ་མོ་བརྒྱད་བཀུག་སྟེ་གོ་རིམས་བཞིན་དུ་དཀྱིལ་འཁོར་གྱི་རིམ་པས་རྣམ་པར་བཞག་ལ། དེ་དག་ལོ་ནི་བཅུ་གཉིས་ལོན་པའི་མིག་ཡངས་རབ་ཏུ་མཛེས་རྙེད་ནས། །ས་ཕྱོགས་དབེན་པར་ཁྲུས་ལེགས་བྱས་ཤིང་གོས་ནི་གར་དགར་གོན་པ་ཡི། །གུར་ཀུམ་དང་ནི་གླ་རྩི་ལ་སོགས་བྱུགས་ཤིང་སྤོས་ཀྱིས་རབ་བདུགས་ལ། །དེ་དག་ཐམས་ཅད་དེ་ཁོ་ན་བཞིན་ཉེ་བར་བྱུགས་ཏེ་བདུག་བྱས་ནས། །དེའི་མདུན་ས་གཞི་བ་ཡི་ལྕི་བས་བྱུགས་ཏེ་དེ་ཉིད་དུ་བཞག་ལ། །གུ་གུལ་བདུག་པ་རབ་བྱིན་གསང་སྔགས་བརྒྱ་རྩ་བརྒྱད་བཟླས་བསྒྲུབ་བྱ་ཡི། །སྙིང་གར་ཟླ་བའི་དཀྱིལ་འཁོར་རྣམ་པར་བཀོད་དེ་དེ་ཡི་སྟེང་དུ་ཡི་གེ་མཾ། །རྣམ་པར་བཀོད་པས་འོད་ཟེར་ཅན་གྱི་ང་རྒྱལ་རབ་ཏུ་བསྙེམས་ཚུལ་གྱིས། །དྲིལ་བུའི་སྒྲ་དང་གུ་གུལ་བདུགས་པས་སྐད་ཅིག་དེ་ཉིད་ལ་
འབབ་འགྱུར། །འདིར་ནི་སྔགས་ཀྱང་འབྱུང་བ་སྟེ། ཨོཾ་མཱ་རཱི་ཙྱཻ་ཨཱ་བེ་ཤ་ཡ་ཨཱ་བེ་ཤ་ཡ། ཀཾ་པ་ཀཾ་པ། དྷུ་ན་དྷུ་ན། གྲྀཧྣ་གྲྀ་ཧྣ། ཧཱུཾ་མཱ་རཱི་ཙྱཻ་སྭཱ་ཧཱ། ཞེས་བྱ་བའི་སྔགས་འདིས་ཕབ་སྟེ། དེ་ནས་དེ་རྣམས་ལ་མེ་ཏོག་དང་སྤོས་ལ་སོགས་པས་ཇི་ལྟར་རྗེས་སུ་མཐུན་པ་ཉིད་ཀྱི་སྔགས་རྣམས་ཀྱིས་བྱིན་ལ། མེ་ཏོག་ཕྲེང་བ་གཙུག་ཕུད་ཀྱི་ནང་དུ་བཅུག་སྟེ་མདུན་དུ་བཟའ་བ་དང་བཅའ་བ་དང་བཏུང་བ་ལ་སོགས་པས་ཡོངས་སུ་གང་བའི་སྣོད་གཞོན་ནུ་མའི་གྲངས་དང་མཉམ་པ་རྣམས་ཨོཾ་མཱ་རཱི་ཙྱཻ་བ་ར་ལི་བ་ད་ལི། བཏྟ་ལི་བཱ་རཱ་ཧཱ་མུ་ཁཱི་སརྦ་དུ་ཥྚ་པྲ་དུ་ཥྚཱ་ནཱཾ་མུ་ཁཾ་བནྡྷ་བནྡྷ་ཧཱུཾ་ཧཱུཾ་ཕཊ། ཨི་མཾ་བི་ལིཾ་པྲ་ཏཱི་ཙྪ་ས་མ་ཡ་མ་ནུ་སྨ་ར་ཨཱཿཧཱུཾ་སྭཱ་ཧཱ་ཞེས་བྱ་བའི་སྔགས་ཀྱིས་སྦྱིན་པར་བྱའོ། །དེ་ནས་ཇི་སྲིད་གཏོར་མ་ཟ་བ་དེ་སྲིད་དུ་བཅོམ་ལྡན་འདས་མའི་རྩ་བའི་སྔགས་བཟླས་པར་བྱའོ། །ཟས་ཀྱི་བྱ་བའི་མཐའ་མར་འགྲོན་བུ་དང༌། སྟར་ཀའི་འབྲས་བུ་དང༌། ཚོན་སྣ་ལྔའི་སྐུད་པ་སྣ་ཚོགས་པ་དང༌། རྣ་བ་དང་ལག་པ་དང༌། མགུལ་རྒྱན་ཅི་འབྱོར་པའི་ཡོ་བྱད་བྱིན་ཏེ། ཁྱེད་ཀྱིས་ཞེས་བྱ་བ་ལ་སོགས་པའི་ཚིགས་བཅད་ཀྱིས་བཏང་སྟེ། ཡེ་ཤེས་ཀྱི་འཁོར་ལོ་གཤེགས་སུ་གསོལ་ནས་འོད་ཟེར་ཅན་གྱི་ང་རྒྱལ་གྱིས་གནས་པར་བྱའོ། །དེ་ནི་གཞོན་ནུ་མའི་གཏོར་མའི་ཆོ་གའོ། །གང་གིས་ས་གཉི་ཇི་སྲིད་པར། །མཆོད་རྟེན་རྒྱལ་བའི་གནས་སྲུང་འགྱུར། །ནག་པོ་ཆེན་པོའི་གཏོར་མའི་རིམ། །དེ་ནས་གཞན་ཡང་བཤད་བྱ། །ལྷ་ཁང་ལ་སོགས་ཟིན་ནས་ནི། །རབ་གནས་རྒྱུད་ལས་གསུངས་པ་ཡི། །ཆོ་གས་དེ་རབ་གནས་བྱས་ཏེ། །དེ་ནས་གཏོར་མ་ཀུན་དུ་བྱ། །རྒྱལ་བའི་གནས་ནི་བསྲུང་བའི་ཕྱིར། །གཙུག་ལག་ཁང་གི་སྒོར་གནས་ཤིང༌།། དྲི་གཙང་ཁང་གི་ནང་གནས་པར། །ནག་པོ་ཆེ་དགོད་རྣལ་འབྱོར་པས། །སྐུ་མདོག་ནག་པོ་ཞལ་བཞི་པ། །ལྟོ་བ་ཆེན་པོ་ཕྱག་བཅུ་པ། །ནམ་མཁའི་གོས་ཅན་སྟག་ལྤགས་ཀྱིས། །སྨད་ཀྱི་ཆ་ནི་རབ་དཀྲིས་པ། །དབུ་ལ་ཐོད་པའི་ཕྲེང་བར་ལྡན། །མཆེ་བ་གཙིགས་ཤིང་མི་བཟད་པ། །ཐོད་པའི་ཕྲེང་བ་བཀོད་པ་ཡིས། །མགྲིན་པ་རྐང་པ་རྣམ་བརྒྱན་པ། །སྨིན་མ་ཁམ་པའི་སྨིན་འཁྱུག་དང༌། །སྤྱན་གསུམ་གྱིས་ནི་རྣམ་པར་སྤྲས། །དང་པོའི་ཞལ་ནི་ནག་པོ་མཚུངས། །གཡས་པ་སྔོན་པོར་སྣང་བ་སྟེ། །གཡོན་པ་དམར་པོ་ཤིན་ཏུ་མཛེས། །ཉི་མ་ཁྲི་དང་མཚུངས་པའི་འོད། །རྒྱབ་ནི་དྲི་བཅས་དུ་བའི་
མདོག །དེ་ཡི་གདོང་ནི་བསམ་པར་བྱ། །རལ་གྲི་དང་ནི་ཐོ་བ་དང༌། །རྩེ་གསུམ་རྒྱུད་མངས་དག་གི་རྒྱུད། །སྦྲེང་བ་ལ་ནི་བརྩོན་འགྱུར་བ། །དེ་ཡི་གཡས་ཀྱི་ཕྱག་ཏུ་བསམ། །གཡོན་དུ་ཐོད་པ་ཁ་ཊྭཱཾ་ག །པི་ཝང་དེ་བཞིན་གར་བྱེད་པ། །མི་ཡི་པགས་པ་ཁྲག་འཛག་པ། །སྟེང་གི་ཕྱག་དག་ན་བསྣམས་ཤིང༌། །གཡས་བརྐྱང་འདུག་སྟང་ས་གར་བྱེད་པ། །མཉམ་པར་གཞག་པས་བསྒོམ་པར་བྱ། །དེ་བཞིན་དུ་ནི་དེ་ཡི་འཁོར། །མི་སྡུག་གདོང་ཅན་མཁའ་འགྲོ་མ། །སེང་གེ་གླང་པོ་དྲེད་དང་སྦྲུལ། །བྱི་ལ་ཁྱི་ཡི་གདོང་ཅན་ཏེ། །ཧ་ཧ་ཞེས་སྒྲོགས་ཅ་ཅོའི་སྒྲས། །རྨོངས་པ་རྣམས་ནི་སྐྲག་བྱེད་པ། །ཐོད་པའི་ནང་དུ་བླུགས་པའི་ཁྲག །འཐུང་བྱེད་པ་ནི་བསྒོམ་པར་བྱ། །དེ་ལྟར་བསམས་ནས་རྣལ་འབྱོར་དབང༌། །བདག་ཉིད་མ་ཧེ་ལ་ཞོན་ཅིང༌། །དྲག་པོ་ཆེན་པོ་གཤིན་རྗེ་གཤེད། །གདུག་པ་ཐམས་ཅད་འཇོམས་མཛད་པ། །ཞལ་དྲུག་དང་ནི་ཞབས་དྲུག་དང༌། །ཕྱག་དྲུག་ཉིད་ཀྱིས་རྣམ་བརྒྱན་པ། །ལྷ་དང་ལྷ་མིན་ཟ་བྱེད་པ། །གཡས་པའི་ཕྱག་རྣམས་ན་ཐོ་བ། །རལ་གྲི་ལྕགས་ཀྱུ་བསྣམས་སྡིགས་མཛུབ། །ཞགས་པ་དང་ནི་དྲིལ་བུ་ཡིས། །གཡོན་པ་རྣམས་ནི་མཛེས་བྱས་པ། །གཡས་བརྐྱང་བ་དང་གཡོན་བརྐྱང་དང༌། །དེ་བཞིན་མཉམ་པའི་འདུག་སྟངས་ཀྱིས། །ལྷ་ཡི་ཚོགས་རྣམས་དྲུག་པོ་ཡི། །སྟོབས་ནི་ཀུན་དུ་མནན་ནས་བཞུགས། །སྙིང་གའི་ཡི་གེ་ཧཱུཾ་ལས་བྱུང༌། །འོད་ཟེར་འཁོར་ལོ་འབར་བ་ལས། །ཁྲོ་བའི་སྤྲིན་གྱི་ཚོགས་དག་ནི། །ཆ་བྱད་མཚུངས་པའི་ཚོགས་རྣམས་སྤྲོ། །ཨིནྡྲ་ནཱི་ལ་ལྟར་སྣང་བསམ། །དེ་འདྲའི་གཟུགས་སུ་གནས་ནས་ནི། །ནག་པོ་ཆེན་པོ་སྙིང་འགས་པར། །བརྩོན་པར་གྱུར་པའི་སྔགས་འདི་ཡང༌། །ཁྲོ་བོའི་ཚིག་གིས་བརྗོད་པར་བྱ། །ཨོཾ་ཧྲཱིཿཥྚྀཿབི་ཀྲྀ་ཏཱ་ན་ན་སརྦ་ཤ་ཏྲུཾ་ནཱ་ཤ་ཡ་སྟཾ་བྷ་ཡ་ཧཱུཾ་ཧཱུཾ་ཕཊ་སྭཱ་ཧཱ། དེའི་རྗེས་ལ་འདི་སྐད་དུ་བཀའ་བསྒོ་བར་བྱའོ། །སྔར་བཤད་པའི་སྔགས་ཉིད་ཀྱིས་བཀུག་སྟེ་བཅིངས། དེ་དབང་དུ་བྱས་ནས་གཤིན་རྗེ་གཤེད་ཀྱི་རྣལ་འབྱོར་ཉིད་ཀྱིས་བཀའ་བསྒོ་བར་བྱ་སྟེ། ཀྱེ་ནག་པོ་ཆེན་པོ་གཙུག་ལག་ཁང་འདི་ཇི་སྲིད་གནས་པ་དེ་སྲིད་དུ་ཁྱོད་ཀྱིས་བསྲུང་བར་བྱ་ཞིང་འཁོར་དང་བཅས་པ་ཁྱོད་ཀྱིས་འཕགས་པའི་དགེ་འདུན་གྱི་བཀའ་ཡང་མཉན་པར་བྱའོ། །དེའི་རྗེས་ལ་རྣལ་འབྱོར་པ་དེ་ཉིད་ཀྱིས་
ཡོངས་སུ་མཉེས་པར་བྱ་བའི་ཕྱིར་དེ་ལ་གཏོར་མ་སྦྱིན་པར་བྱའོ། །ཟངས་ལ་སོགས་པ་ལས་བྱས་པའི་སྣོད་ཚད་ཆེན་པོ་དང་ལྡན་པ་ཙནྡན་དམར་པོ་ལས་བྱས་པའི་དཀྱིལ་འཁོར་གྲུ་བཞི་པ་བཞག་སྟེ། ཐུག་པ་ནག་པོ་དང༌། གློ་བ་དང༌། འོ་ཐུག་དང༌། རློན་པ་དང༌། བཙོས་པ་དང༌། བསྲེགས་པའི་དབྱེ་བས་ཉའི་ཤ་རྣམ་པ་གསུམ་དང༌། ཁྲག་དང༌། ཞག་དང༌། ཀླད་པ་དང༌། ཚིལ་རྣམས་དང༌། རྒུན་ཆང་དང༌། འབྲུའི་ཆང་དང༌། ཉའི་གཟུགས་བརྙན་དང༌། འགྲེང་བུའི་ཆུན་པོ་དང༌། སྒོག་པའི་བྱེ་བྲག་བདུན་དང༌། སྣུམ་ཁུར་དང༌། ནས་དང༌། གྲོ་ལ་སོགས་པའི་བྱེ་བྲག་གི་འབྲུ་རྣམས་དང༌། ཟངས་དང༌། ལྕགས་ལས་བྱས་པའི་ཁབ་ཀྱི་ཚོགས་ཀྱིས་ཡོངས་སུ་བཀང་ལ། མེ་ཏོག་དང་སྤོས་ལ་སོགས་པའི་མཆོད་པའི་ཡོ་བྱད་རྣམ་པ་ལྔས་ཡོངས་སུ་མཆོད་དེ། གཤིན་རྗེ་གཤེད་ཀྱི་ཕྱག་རྒྱས་ཀྱང་མངོན་པར་བཏབ་ལ་ཕྱོགས་བཅིང་བ་བྱ་སྟེ། ཁྲོས་པའི་སེམས་དང་ལྡན་ཞིང་དྲིལ་བུ་དང་རྡོ་རྗེ་གསོར་བ་ལ་བརྩོན་པའི་རྣལ་འབྱོར་པས་སྔགས་འདིས་སྤྱན་དྲང་བར་བྱའོ། །ཨོཾ་མ་ཧཱ་ཀཱ་ལ་ཨ་ཡ་ཏི་མ་ཧཱ་བི་ཧ་ར་པཱ་ལ་ནཱ་ཡ། སརྦ་ཌཱ་ཀི་ནཱི་ཡཀྵ་རཱཀྵ་ས་ས་པ་རི་ཝཱ་རཱ་ན་ཏྲ་སིནན་ཧི་ཏོ་བྷ་བ་སྭཱ་ཧཱ། དེའི་རྗེས་ལ་སྔགས་འདི་དང་སྙོམས་པར་འཇུག་པའི་ཕྱག་རྒྱས་ཚིམ་པར་བྱ་པའི་ཕྱིར་གཏོར་མ་བྱིན་གྱིས་བརླབ་པར་བྱའོ། །ཨོཾ་ཨཱཿ་ད་ཤ་དིཀ་ཐྭ་སཾ་བྱ་བ་སྠི་ཏཱ། སརྦ་ད་ཤ་དི་ཀ་དྷཱ་ཏུ་པ་ར་མ་ཎུ་པ་རནྟ་ར་བ་ཏི་སརྦ་བ་ཏི་ཀ་ལོ་ཀ་པཱ་ལ། མ་ཧཱ་ཀཱ་ལ་བཛྲ་ཨཱ་ཡུ་དྷ་མཱ་ཡཱ་བཛྲ། བཛྲཱ་ན་ལ། བཛྲ་ཀཱ་ལ། བཛྲ་མུ་ས་ལ། ནཱ་ག་བཛྲ། བཛྲ་ནིལ། བཛྲ་ཤཽཎྜ། བཛྲ་བྷེ་ར་ཝ། བཛྲ་ཀྲོ་དྷ། བཛྲ་ཀུཎྜ་ལེ། བཛྲ་པྲ་བྷ། མོ་ན་བཛྲ། བེ་མ་ཙེ་ཏྲི། པྲྀ་ཐི་བཻ་དེ་བ་ཏཱ། སརྦ་ཨི་ཏྱུ་པ་སརྦ་ཨུ་པ་ཤཱནྟ་ཡེ། སརྦ་གནྡྷ་པུཥྤ་དྷཱུ་པ། དཱི་པ། ནཻ་བི་ཏྱ། སརྦོ་པ་ཏྲ་ཨ་ལཾ་ཀ་ར་དི་ན་ཤྩ་པྲ་ཏཱི་ཙྪ། ཨུ་པ་པཱུ་ཛྱ། སརྦ་ཥ་ནཾ། ཀཱ་ཡ་ཝཱ་ཀ་ཙི་ཏྟཾ། སྟཾ་བྷ་ཡ་སྟཾ་བྷ་ཡ། མ་མ་སརྦ་ཨཱ་ཤཾ་པ་རི་པཱུ་ར་ཡ་ཐཱ་ཡ་བ་དཱ་སཾ་སཱ་ར། མ་མ་སརྦ་སཏྭཱ་ནཱཾ་ཙ། སཏྶུ་ཁ་སིདྡྷ་ཡེ་ས་ཧ་ཡ་ཀཱ་བྷ་བནྟུ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བརྗོད་ལ། གཏོར་མའི་སྣོད་སྒྲུབ་པའི་གྲོགས་མཆོག་ཐོར་ཚུགས་བཅིངས་པའི་ལག་ཏུ་བྱིན་ཏེ་དུར་ཁྲོད་ཆེན་པོར་དོར་བར་བྱའོ། །དེ་ནས་ནག་པོ་ཆེན་པོ་ནི། །འཁོར་དང་བཅས་པ་མཉེས་གྱུར་ནས།།
ཇི་སྲིད་ནམ་མཁའ་ཉི་ཟླ་དང༌། །ཇི་སྲིད་སྐར་མ་དག་དང་ས། །ཇི་སྲིད་རྒྱ་མཚོ་དང་ནི་གླིང༌། །ཇི་སྲིད་འགྲོ་བ་རིགས་དྲུག་གནས། །དེ་སྲིད་རྒྱལ་བཅས་གཙུག་ལག་ཁང༌། །མཆོད་རྟེན་བཅས་པ་དེས་སྲུང་འགྱུར། །དེ་ནི་འཕགས་པའི་དགེ་འདུན་ཡང༌། །ཚེ་ནི་རིང་པོར་བྱེད་པར་འགྱུར། །མེ་ལ་སོགས་པ་བགེགས་ཀྱི་ཚོགས། །འབྱུང་བ་དེ་ཡིས་འཇིགས་པར་བྱེད། །རབ་གནས་དུས་སུ་རྣལ་འབྱོར་པས། །གཏོར་མ་འདི་ནི་ཡང་དག་བྱ། །ཕན་ཕྱིར་བྱ་བའི་རྒྱུད་ལས་ནི། །བཅོམ་ལྡན་འདས་ཀྱིས་དེ་སྐད་གསུངས། །དེ་ནི་ནག་པོ་ཆེན་པོའི་གཏོར་མའོ། །སྐྱེ་བོ་སྡིག་པ་བྱེད་པ་རྣམས། །གང་གིས་བདེ་འགྲོར་སྐྱེ་འགྱུར་བ། །འཆི་བའི་དུས་ཀྱི་གཏོར་མ་ནི། །བཟང་པོ་དེ་ནས་བཤད་པར་བྱ། །བློ་གྲོས་ཆེན་པོས་བུད་མེད་དམ། །སྐྱེས་པ་ཤི་བ་མཐོང་ནས་ནི། །དེ་ཚེ་བདག་ཉིད་བྱང་ཆུབ་སེམས། །ཕྱག་ན་རྡོ་རྗེ་བསམ་པར་བྱ། །ཞལ་གཅིག་པ་ལ་ཕྱག་གཉིས་པ། །ཨུཏྤལ་སྔོན་པོའི་འདབ་འདྲའི་འོད། །མཆེ་བ་ཅུང་ཟད་གཙིགས་པ་སྟེ། །སྒེག་པ་ཡི་ནི་རོ་ཡིས་བརྒྱན། །གཡོན་པ་སྡིགས་མཛུབ་དང་ལྡན་ཞིང༌། །གཡས་པ་རྡོ་རྗེ་གསོར་མཛད་པ། །གར་བཅས་དེ་དག་མཚུངས་ཉིད་ཀྱིས། །འདྲེན་པ་རྣམས་ཀྱིས་ཡོངས་སུ་བསྐོར། །ས་སྙིང་ལ་སོགས་ས་བོན་གྱིས། །ཡན་ལག་དྲུག་གི་གོ་ཆ་དགོད། །མིག་ལ་སོགས་པ་བྱིན་བརླབས་ན། །དེ་ནས་ལྷ་ཡི་མིག་སོགས་འགྱུར། །དེ་ཡི་མགོ་དང་ལོགས་སོགས་སུ། །དེ་ཡིས་གཤིན་རྗེའི་ཕོ་ཉ་མཐོང༌། །པག་པ་དབྱུག་པའི་ཐོ་བ་ཅན། །དེ་ནས་མཐོང་ནས་འདི་ལྟར་བསྡིགས། །གཤིན་རྗེ་ཕོ་ཉ་ཁྱེད་རྣམས་ནི། །འདི་ནི་མདུན་ནས་འགྲོ་བར་གྱིས། །ང་ནི་གནས་པ་འདི་རུ་ཁྱེད། །སྐད་ཅིག་ཙམ་ཡང་གནས་སྐབས་མེད། །དེ་མིན་རྡོ་རྗེ་རྣོན་པོ་ཡིས། །ཁྲག་དང་རྣག་རྫབ་འཇིགས་རུང་བར། །ཁྱོད་ཀྱི་མགོ་ནི་འགས་པར་བྱ། །རྡོ་རྗེ་འཛིན་པའི་རྣལ་འབྱོར་པ། །དེ་ཡི་ཚིག་དེ་ཐོས་ནས་ནི། །མི་བཟད་གཤིན་རྗེའི་ཕོ་ཉ་སོགས། །ཕྱོགས་རྣམས་ཀུན་ཏུ་འབྲོས་པར་འགྱུར། །དེ་ནས་དེ་ཡི་སྙིང་ག་ནས། །འབྱུང་བར་འགྱུར་བའི་རླུང་དག་དང༌། །རྣམ་པར་ཤེས་པ་ཚིམ་བྱའི་ཕྱིར། །གཏོར་མ་དག་ནི་བྱ་བ་ཡིན། །རྣ་བའི་དྲུང་དུ་སྔགས་འདི་ནི། །རྣལ་འབྱོར་རིགས་པས་གསང་ནས་ནེ། །བཟླས་ན་དེ་ལས་
རྡོར་འཛིན་དང༌། །མཚུངས་པ་ཉིད་དུ་འགྲུབ་བར་འགྱུར། །ཨོཾ་ན་མོ་བྷ་ག་བ་ཏེ་སརྦ་དུ་རྒ་ཏི་པ་རི་ཤོ་དྷ་ནི་རཱ་ཛཱ་ཡ་ཏ་ཐཱ་ག་ཏཱ་ཡ་ཨ་རྷ་ཏེ། སམྱ་ཀྶཾ་བུདྡྷཱ་ཡ། ཏདྱ་ཐཱ། ཨོཾ་བྷྱོ་མ་བྱ་བི་ནི། བྷྱོ་མ་རུ་སྤཱ་ཡ། སརྦ་བྷྱ་བི་ནེ། ཤྲི་བ་ཡ་ཧྲིཾ། བྲ་ཧྨ་མཱ་ཧ། ཧྲཱིཾ་བིཥྞུ་ད་ཡཻ་ཏེ། ཀྵྱཾ་རུ་དུ་ཀྵ་བི་སརྦི་ནི་ཧཱུཾ་རུ་ཏྲ་ས་རུ་པེ། ཧྲི་ནཱ་དཱ་ཨཱ་ཏ་མ་ཀེ། ཧཱུཾ་བིནྡུ་ཤ་རཱི་རེ་ཨཻ་ཤག་སཾ་ཡ་ཛ་ནི་མ་བྷྱོ་མ་ཡོ་ཛ་ནི། བཱི་ཤཱ་ཏ་ཀེ་བེ་ལྱེ་པ་དེ་བྲ་ཧྨ་བི་དྷྱེ་ན་མཿ། ཡུཾ་རླུཾ་ལྦུཾ་ཀྵཾ་ཀྵྨྻུཾ་ན་མཱ་ཐ་ཨོཾ་ཨོཾ་ཨཱིཾ་ཨ་མཱུཾ་བྷྱོ་མ་བྱ་བ་ནི་བྷྱོ་མ་བྱ་བ་ནི་བྷྱ་ཕཊ། དེ་ནས་གསང་སྔགས་འདི་ཡིས་ནི། །མི་སྐྱོང་གནས་ནི་ཉམས་དགའ་བ། །རྒ་དང་འཆི་བ་རྣམས་སྤངས་པར།། རྣམ་པར་ཤེས་པ་བྱུང་ནས་འགྲོ། །དེ་ཡི་ཚངས་པའི་སྒོ་ནས་ནི། །རྣམ་ཤེས་མྱུར་དུ་འབྱུང་བར་འགྱུར། །བཞིན་ནི་རབ་ཏུ་འཛུམ་བྱེད་ཅིང༌། །ངོ་ནི་ངོ་མཚར་ཕྱག་རྒྱར་ལྡན། །རླུང་རྣམས་ཀྱི་སྔགས་འདི་ཡིས་ནི། །ཨོཾ་ཧཱུཾ་པྲ་ནཱ་ཡ་སྭཱ་ཧཱ། ཨོཾ་ཨཾ་པཱ་ནཱ་ཡ་སྭཱ་ཧཱ། ཨོཾ་ཨ་ས་མཱ་ནཱ་ཡ་སྭཱ་ཧཱ། ཨོཾ་ས་ཨུ་དྷ་ནཱ་ཡ་སྭཱ་ཧཱ། ཨོཾ་ཧཱ་བྱཱ་ནཱ་ཡ་སྭཱ་ཧཱ། ཨོཾ་ཀྵཾ་ཨུད་ཝ་ཧ་ཡ་སྭཱ་ཧཱ། ཨོཾ་ཛྲཾ་བི་ཝ་ཧ་ཡཱ་སྭཱ་ཧཱ། ཨོཾ་གཾ་སཾ་ཝ་ཧཱ་ཡཱ་སྭཱ་ཧཱ། ཨོཾ་ཀྵཥྚ་ནི་ཝ་ཧཱ་ཡ་སྭཱ་ཧཱ། ཨོཾ་སཾ་བི་ཛྙཱ་ན་ཡ་ཨ་རུ་པི་ནི་ག་ག་ན་རཱུ་པ་ཡ། ཨེ་ཧྱེ་ཧི་པྲ་བྷཱ་སྭཱ་ཧཱ་བྷཱ་བ་བཛྲ་དྷ་ར་རཱུ་པི་ཎེ་ཧཱུཾ་བོ་ཤཊ། སྔགས་མཆོག་བཟང་པོ་འདི་རྣམས་ཀྱིས། །ཚིགས་དག་ནས་ནི་རླུང་འབྱུང་བས། །སྐྱེ་བོ་བདེ་བར་བྱེད་པར་འགྱུར། །ནམ་མཁའི་རང་བཞིན་དུ་མར་འགྱུར། །དེའི་རྗེས་ལ་ནམ་མཁར་སྲིད་པ་བར་མའི་ཡི་གེ་ཧོཿ་གཉིས་ཀྱིས་བརྟེན་པ་རྣམ་པར་བསྒོམས་ཏེ་དེའི་མངོན་སུམ་ཁོ་ནར་ཤི་བའི་རོ་བསྲེག་པར་བྱའོ། །འཕགས་པ་འཁྱིལ་པའི་སྔགས་ཀྱིས་ནི། །བྱིན་གྱིས་བརླབས་ནས་ཆུས་བསངས་ཏེ། །དེ་ནས་ཆུ་བོར་ཁྲུས་བྱས་ནས། །བ་ཡི་རྣམ་ལྔས་དགང་བར་བྱ། །དེ་ནས་དྲི་མ་དག་བྱུགས་ཏེ། །ཁ་རུ་གོ་ལ་གཞུག་པར་བྱ། །མེ་ཏོག་སྤོས་ལ་སོགས་རྣམས་ཀྱིས། །མཆོད་བྱས་ནས་ནི་སྤོས་ཀྱིས་དཀྲིས། །གླུ་དང་རོལ་མོ་ཡིད་འོང་བས། །དེ་ལ་རབ་ཏུ་མཆོད་པར་བྱ། །ཡིག་གསུམ་བྱིན་བརླབས་མེ་ལྷ་ནི། །སྦྱིན་སྲེག་ལས་བཤད་ཆོ་གས་གཞག །ཚིག་པར་གྱུར་གྱི་བར་དུ་ནི། །མཁས་པས་ལན་བརྒྱ་རྩ་བརྒྱད་དམ། །སྟོང་ངམ་ཁྲི་ནི་བཟླས་ནས་ནི། །འདི་ནི་ཤི་བའི་མཆོག་རིམ་པ། །རུས་པ་བླངས་ནས་དག་བྱས་དེ། །རྡུལ་ནི་ཆུ་བོ་ལ་དོར་བྱ། །
རྡུལ་ཚོན་ཁ་དོག་དམར་པོ་ཡིས། །ཁྲོ་བོའི་གཟུགས་ཅན་གཤིན་རྗེ་གཤེད། །དཀྱིལ་འཁོར་དེ་རུ་བྲི་བར་བྱ། །ཁྲོ་བོ་བརྒྱད་དང་ཡང་དག་ལྡན། །སྔར་བཤད་སྐུ་མདོག་ཕྱག་མཚན་སོགས། །གདན་བཅས་ཁྲོ་བོའི་སྐུ་འཛིན་པ། །དེ་ནས་མཉམ་གཞག་གྱུར་པ་ཡིས། །སྔགས་ཀྱི་བཟླས་བརྗོད་སྔོན་འགྲོ་བའི། །མེ་ཏོག་ལ་སོགས་ཡིད་འོང་བའི། །དཀྱིལ་འཁོར་དེ་རུ་བྲི་བར་བྱ། །ཁྲོ་བོ་བརྒྱད་དང་ཡང་དག་ལྡན། །སྔར་བཤད་སྐུ་མདོག་ཕྱག་མཚན་སོགས། །གདན་བཅས་ཁྲོ་བོའི་སྐུ་འཛིན་པ། །དེ་ནས་མཉམ་གཞག་གྱུར་པ་ཡིས། །སྔགས་ཀྱི་བཟླས་བརྗོད་སྔོན་འགྲོ་བའི། །མེ་ཏོག་ལ་སོགས་ཡིད་འོང་བའི། །དཀྱིལ་འཁོར་པ་ཡང་མཆོད་ནས་ནི། །མར་མེ་དག་གི་སྣོད་རྣམས་ནི། །བརྒྱད་པོ་གོ་རིམས་བཞིན་དུ་འབུལ། །དབུས་སུ་ཡང་ནི་མར་མེའི་སྣོད། །ཆོ་ག་བཞིན་དུ་གཞག་པར་བྱ། །མཆོད་པ་བྱས་ནས་གཏོར་མ་སྦྱིན། །ཁམ་པའི་སྣོད་ནི་བཅུ་གཅིག་དང༌། །འོ་མ་སྦྲང་རྩི་དེ་བཞིན་དུ། །ཙནྡན་དཀར་པོའི་ཆུས་བཀང་སྟེ། །མེ་ཏོག་བཀྲམ་པ་མཛེས་གྱུར་བའི། །པ་ཡི་རྣམ་ལྔས་དག་བྱས་ནས། །དེ་ནས་འབྲས་ཆན་ཆང་བུ་གཅིག །སྣོད་གཅིག་ཏུ་ནི་གཞག་པར་བྱ། །གཉིས་པ་གཉིས་ཏེ་གསུམ་པ་ལ། །དེ་བཞིན་གསུམ་སྟེ་བཅུ་གཅིག་པར། །བཅུ་གཅིག་པར་དུ་གཞག་པ་འདི། །གཏོར་མ་སྦྱིན་པའི་ཆོག་རིམ་པ། །སྔར་བཤད་སྔགས་ནི་བཅུ་དྲུག་གིས། །བྱིན་གྱིས་བརླབས་ནས་མེ་ཏོག་སྤོས། །སོགས་པས་དེ་རྣམས་རབ་མཆོད་དེ། །དེ་ནས་ཆུ་བོར་དོར་བར་བྱ། །དཀྱིལ་འཁོར་གཤེགས་སུ་གསོལ་ནས་ཀྱང༌། །རྡུལ་ཚོན་ཆུ་བོར་དོར་ནས་ན། །ནམ་མཁའ་སྲིད་པ་ཕར་མ་ནི། །དེ་བཞིན་གཤེགས་པས་ཡོངས་བསྐོར་ཅིང༌། །ཆོས་སྟོན་པ་ནི་ལྷུར་ལེན་པ། །མི་བསྐྱོད་གཟུགས་ཅན་བལྟ་བར་བྱ། །དེ་ནས་ལངས་ནས་དེ་ཉིད་ཀྱི། །རུས་པ་བླངས་ཏེ་ཕྱེ་མར་བྱ། །ས་ལས་བྱས་པའི་མཆོད་རྟེན་གྱི། །ནང་དུ་རབ་ཏུ་གཞུག་པར་བྱ། །དེ་ལ་རིམ་པ་འདི་ཡིན་ཏེ། །ཨོཾ་ཝ་ར་དྷེ་ཛིན་གོ་ལེ་ཡ་ཤོ་ཏེ་སརྦ་བུདྡྷ་ཨ་དྷི་ཥྛི་ཏེ་སྭཱ་ཧཱ། འཇི་མ་པ་ལ་ལན་ཉི་ཤུ་རྩ་གཅིག་ཡོངས་སུ་བཟླས་ཏེ་མཆོད་རྟེན་བྱའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ་ཞེས་བྱས་པས་སྐོལ་ཕོར་དུ་གཞུག་པར་བྱ། །མཆོད་རྟེན་འབྱིན་པ་ན་ཡང་འདི་སྐད་བརྗོད་པར་བྱ་སྟེ། ཨོཾ་དྷརྨྨ་དྷཱ་ཏུ་གརྦྷེ་
སྭཱ་ཧཱ། ཨོཾ་ཨ་བྷཱ་བ་སྭ་བྷཱ་བ་དྷརྨྨ་ཏེ་སྭཱ་ཧཱ། ཨོཾ་པྲ་མརད་ནཱ་ཡ་སྭཱ་ཧཱ། ཨོཾ་སུ་པྲ་ཏིཥྛ་ཏ་སྟཱུ་པེ་སྭཱ་ཧཱ། ཨོཾ་ན་མོ་རཏྣ་ཏྲ་ཡཱ་ཡ། ཨོཾ་ན་མོ་བྷ་ག་བ་ཏེ་ཨཀྵོ་བྷྱཱ་ཡ་ཏ་ཐཱ་ག་ཏཱ་ཡ་ཨ་རྷ་ཏེ་སམྱཀྶཾ་བུདྡྷཱ་ཡ། ཨོཾ་ན་མོ་བྷ་ག་ཝ་ཏེ། ན་མ་ཨཱཪྻཱ་བ་ལོ་ཀི་ཏེ་ཤྭཱ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ནི་ཀཱ་ཡ། ཏདྱ་ཐཱ། ཨོཾ་ཙི་ལི་བནྡྷ་མི་མི་ལི་བནྡྷ་མི་ཙི་ལི་མི་ལི་བནྡྷ་མི། སི་མཾ་བནྡྷ་མི། །སི་མཾ་དེ་བ་དཱཏྟ་ཤྩ་མ་ཀ་ཤིན་བྱ་ཏི་ཀྲ་མ་ཏུ་སྭ་ཧཱ། སྔགས་འདིས་ཉུངས་ཀར་ལ་ལན་ཉི་ཤུ་རྩ་གཅིག་ཡོངས་སུ་བཟླས་ཏེ་ཕྱོགས་བཅུར་གཏོར་ན་ཕྱོགས་བཅིང་པ་བྱས་པར་འགྱུར་རོ། །དེས་ནི་མཆོད་རྟེན་རབ་ཏུ་གནས་པར་བྱའོ། །དེའི་རྗེས་ལ་བདག་དང་གཞན་བསྲུང་བའི་སྔོན་དུ་སྔགས་འདི་བརྗོད་པར་བྱའོ། །ཨོཾ་ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཏ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་བཛྲ་ཀྲོ་དྷ་མ་ཧཱ་བ་ལ་མ་ཧཱ་ཏེ་ཛ་ཡ། མ་ཧཱ་ཏེ་ཛ་ཡ། མ་ཧཱ་ཧ་ན་ད་ཧ་པ་ཙ་མ་ཐ། བི་ཀི་ར་ཎ་བི་དྷྭཱཾ་ས་ཡ། བ་དྲ་པ་ཡ། ཛཱ་ཊི་ལཾ་བོད་ར། ཨུཙྪུ་སྨ་ཀྲོ་དྷ་དྷཱུཾ་ཕཊ། རཀྵ་རཀྵ། ཛཱི་བཾ་མ་མ་དེ་བ་ད་ཏྟ་སྱ་ཙ་སརྦ་བཻ་ཡོ་པ་དྲ་བེ་བྷྱཿ་སྭཱ་ཧཱ། འདིས་བདག་བསྲུང་བ་དང༌། གཞན་བསྲུང་བར་བྱའོ། །དེ་ནས་ལངས་ཏེ་ཅི་བདེར་གནས་པར་བྱའོ། །འཆི་བའི་དུས་ཀྱི་གཏོར་མའི་ཆོ་གའོ། །དེ་ནས་ཟོས་པའི་མཐའ་མ་རུ། །གང་གི་རྣལ་འབྱོར་ཞི་བ་དང༌། །རྒྱས་པར་འགྱུར་བའི་གཏོར་མ་ནི། །ལྷག་མ་ཞེས་བྱ་རབ་བཤད་བྱ། །ཚོགས་ཀྱི་འཁོར་ལོར་ཟོས་པ་ཡང༌། །ཡང་ན་རང་གིས་ཟོས་པའི་མཐར། །བཟའ་བ་ལ་སོགས་ཀུན་འདུས་ཏེ། །སྣོད་གཅིག་ཏུ་ནི་གཞུག་པར་བྱ། །ཆང་དང་འབྲུ་ཡི་ཆང་ལྷག་གང༌། །དེ་ཡང་གཅིག་ཏུ་བླུགས་པར་བྱ། །དེ་རུ་འབྲས་ཀྱི་ཕྱེ་མ་ཡིས། །དེ་ནི་དཀྱིལ་འཁོར་གྲུ་གསུམ་བྱ། །དབུས་སུ་དང་པོའི་དབྱངས་དགོད་ཅིང༌། །ཟུར་གསུམ་དུ་ནི་ཡི་གེ་གསུམ། །བཅོམ་ལྡན་འཁོར་བ་ལས་སྒྲོལ་བ། །དབུས་སུ་སྒྲོལ་མ་བསམ་པར་བྱ། །སྤྱན་ནི་རྟག་པ་དང་ལྡན་པ། །ཨོཾ་གྱི་གྲྭ་རུ་ཡང་དག་བསམ། །ཨཱཿ་ཡི་གྲྭ་རུ་ལྷ་མོ་ནི། །གོས་དཀར་མོ་ནི་བསྒོམ་པར་བྱ། །མི་བསྐྱོད་དང་ལྡན་མཱ་མ་ཀཱི། །ཧཱུཾ་གི་གྲྭ་རུ་ཡང་དག་བསམ། །འབར་བའི་ཕྲེང་བས་ཁྱབ་ཅིང་དག །གྲུ་གསུམ་མཁས་པས་བསྒོམ་པར་བྱ། །དེ་ཡི་དབུས་སུ་བུམ་པ་ནི། །ས་ལས་བྱས་པ་ལ་སོགས་གཞག །བཟའ་དང་བཅའ་བ་སོགས་གང་དེ། །བུམ་པ་
དེ་རུ་རབ་ཏུ་གཞུག །དེ་ནས་གྲུ་གསུམ་མཐའ་མ་རུ། །དུར་ཁྲོད་ཆེན་པོ་བསམ་པར་བྱ། །ཁ་ཊྭཱཾ་ག་དང་མགོ་ལ་སོགས། །ཐོད་པ་རྣམས་ཀྱིས་ཡོངས་སུ་བརྒྱན། །ཤིང་གཅིག་དང་ནི་ལྡན་པ་ཉིད། །ཁྲོ་དང་ཁྱི་སོགས་རྣམ་འཇིགས་པ། །དཔའ་བོ་རྣལ་འབྱོར་མ་ཚོགས་ཀྱིས། །ཉེ་བར་སྤྲས་པའི་གཟུགས་འཛིན་པ། །ཀེང་རུས་མཁའ་འགྲོ་མ་ཉིད་ནི། །དུར་ཁྲོད་གནས་པར་དེ་བསྒོམ་བྱ། །དྲག་མོ་གྲི་གུག་སྣོད་ཐོགས་པ། །སྐྲ་བཤིག་སྤྱན་ནི་གསུམ་པ་སྟེ། །ཁ་ནི་ཡི་དྭགས་ཟ་བྱེད་ཅིང༌། །རྒྱས་པ་མི་བཟང་གསུས་པ་འཕྱང༌། །སྟག་གི་པགས་པའི་གོས་ཀྱིས་ནི། །སྨད་ཀྱི་ཆ་ནི་རྣམ་པར་བརྒྱན། །མགོ་པོའི་སྟེང་དུ་རྐང་པ་གཉིས།། གར་གྱི་འགྱིང་ཚུལ་ལ་བརྩོན་པ། །ཐོད་པའི་ཕྲེང་བའི་རྒྱན་དང་ལྡན། །རྒྱུ་མའི་ཕྲེང་བས་རྣམ་པར་བརྒྱན། །ཡི་དགས་ཀླད་པ་ཚིལ་དང་ཞག །རབ་ཏུ་བྱུགས་པ་ལ་དགྱེས་པ། །མི་ཡི་རུས་པའི་ཕྲེང་ལྡན་པའི། །སྐ་རགས་ཁྲག་གི་ཐིག་ལེ་ཅན། །ལག་འགྲོ་ཆེན་པོའི་རྣ་ཆ་ཅན། །བྲང་འགྲོའི་རྐང་གདུབ་འཇིགས་རུང་བ། །ཁ་དོག་དམར་པོ་འབར་པའི་ཚོགས། །གཟི་བརྗིད་ཐུབ་པར་དཀའ་བ་ཡི། །ཤིན་ཏུ་མི་བཟད་ཁྲོས་པ་ཡིས། །གནོད་སྦྱིན་ལ་སོགས་སྡིགས་བྱེད་པ། །ཡཀྵ་ཆེན་པོའི་སྒྲ་སྒྲོགས་པ། །ཤ་ཟ་ལ་སོགས་རྣམས་ཀྱིས་བསྐོར། །དེ་བལྟས་ནས་ནི་རྩེ་གསུམ་གྱི། །ཕྱག་རྒྱ་བཅིངས་ནས་རྣལ་འབྱོར་པས། །སྤྱན་འདྲེན་སྔགས་ནི་བཟླས་བྱ་ཞིང༌། །ཆང་གི་བཏུང་བ་དབུལ་བར་བྱ། །ཨོཾ་ཨེ་ཧྱེ་ཧི་ཤྨ་ཤཱ་ན་ཝ་སི་ནི་མ་མ་ས་པ་རི་བཱ་ར་སྱ་རཀྵཾ་ཀུ་རུ་ཨི་ཧ་ས་ནྣི་ཧི་ཏོ་བྷ་བ་སྭཱ་ཧཱ། རང་རང་སྔགས་ཀྱིས་གོ་རིམས་བཞིན། །དེ་ནས་མེ་ཏོག་སོགས་ཕུལ་ནས། །སྔགས་ཀྱི་རྒྱལ་པོ་འདི་ཡིས་ནི། །དེ་ལ་གཏོར་མ་དབུལ་བར་བྱ། །ཨོཾ་ཀུ་རུ་ཀུ་རུ། ཝ་ཏཱ་ལི་མ་ཧཱ་ཝ་ཏྟ་ལི། སིཏྟ་མུ་ཁི་ཤྨ་ཤཱ་ན་ཝ་སི་ནི། པྲེ་ཏ་ཝཱ་ད་ནི་ཙཎྜ་ཀ་རཱ་ལི་རུ་དྷི་ར་པྲི་ཡེ། ས་མ་ཡ་རཀྵི་ཏ། ཡོ་ག་དྷ་རི། ཀི་ལི་ཀི་ལི། ར་བཻ་བཛྲ་པྲི་ཏི་ཝ་མ་ན་དྷེ་པཱུ་ཛ་ཏཾ། བཀྟི་གཱུ་ཧ་ན་དཱུ་ཏེ། ཧཱུཾ་མཾ་ག་གྲ་རི། ཙཎྜ་ཀ་རཱ་ལི། །ཏིཥྛ་ཏིཥྛ་ཨི་མཾ་ཨུཙྪ་ཥཊ་བ་ལིཾ་གྲྀ་ཧྣ་སརྦ་དུ་ཥྚ་ན་བྷ་ཀཥ་ཡ། ཧོ་ཕྲུཾ་ཕྲེཾ་ཕཊ་སྭཱ་ཧཱ། ཞེས་བྱ་བའི་ལྷག་མའི་སྔགས་བརྗོད་ལ། གཏོར་མའི་སྣོད་ལན་གསུམ་བསྐོར་ལ་མཚན་མ་གཅིག་པར་དོར་བར་བྱའོ། །དེ་ནས་ལངས་ཏེ་ལག་པ་དང་ཁ་བཀྲུས་ལ་དཀྱིལ་འཁོར་ཕྱིས་ཏེ། སྔ་མ་བཞིན་དུ་གཤེགས་གསོལ་ལ་ཅི་བདེར་ཉལ་བར་བྱའོ། །དེ་ནི་ལྷག་མའི་གཏོར་མའི་ཆོ་གའོ།
ཉལ་བའི་དུས་སམ་རབ་གནས་སམ། །སྦྱིན་སྲེག་མཐར་ཡང་རྣལ་འབྱོར་པས། །ཕྱོགས་བཅུ་ཚིམ་པར་བྱ་བའི་ཕྱིར། །ཁྲོ་བོའི་རྒྱལ་པོའི་གཏོར་མ་བྱ། །གཤིན་རྗེ་མཐར་བྱེད་ནས་བརྩམས་ཏེ། །གནོད་མཛེས་རྒྱལ་པོ་ལ་ཐུག་པ། །སྐུ་མདོག་ཕྱག་མཚན་ཆ་ལུགས་ནི། །ཇི་བཞིན་ཁྲོ་བོ་བཅུ་པོ་བསྒོམ། །མདུན་དུ་དཀྱིལ་འཁོར་བསམ་པར་བྱ། །ཡང་ན་རྡོ་རྒྱུས་དག་གིས་བྲི། །མཚོ་སྐྱེས་འདབ་མ་བརྒྱད་པ་སྟེ། །དེ་ལ་ཁྲོ་བོ་རྣམ་པར་བསམ། །དབུས་སུ་དཔལ་ལྡན་རྡོ་རྗེ་སེམས། །གཤིན་རྗེ་གཙུག་ཏོར་ལ་ཐུག་རྣམས། །གོ་རིམས་བཞིན་དུ་ཤར་ཕྱོགས་དང༌། །འོག་དང་སྟེང་གི་ཕྱོགས་སུ་བསམ། ཤ་དང་འབྲས་ཆན་ཆང་བཏུང་བས། །གང་བར་གྱུར་པའི་སྣོད་བཅུ་དག །རིམ་པ་བཞིན་དུ་གཞག་བྱ་ཞིང༌། །མཆོད་ཡོན་ཕུལ་ཏེ་དེ་ནས་མཆོད། །སྔགས་འདི་ཡིས་ནི་སྒྲུབ་པ་པོས། །དེ་ནས་སྤྱན་ནི་དྲང་བར་བྱ། །ཨོཾ་ཨེ་ཧྱེ་ཧི་བྷ་ག་བཱ་ན། ཨི་ཧཱ་བྷ་ཀྟྱ་ཙ་ས་མ་ཡེ་ན་ཙ་ཨརྒྷཾ་པུཥྤ་པྲ་ཏཱི་ཙཚ་ཨི་དཾ་པཱུཾ་ཛ་ཝཱ་དྱཾ་པྲ་སཱ་ད་མི། དེ་ནས་རང་རང་གི་སྔགས་བཅུ་པོ་ཁོ་ནས་གཏོར་མའི་སྣོད་རྣམས་བྱིན་གྱིས་བརླབ་པར་བྱའོ། །ཨོཾ་ན་མཿས་མནྟ་བུདྡྷེ་བྷྱོ། ན་མོ་བཛྲ་མུངྒ་ར་ཧསྟཱ་ཡ་ཙནྡྲ་མཎྜ་ལ་ཨ་ཀཥོ་པ་རཱ་ཡ་ཧཱུཾ་ཕཊ། གཤིན་རྗེ་གཤེད་ཀྱིའོ། །ཨོཾ་ན་མཿས་མནྟ་བུདྡྷེ་བྷྱོ། མ་ཧ་ན་དྷ་ར། བི་བི་དྷ། སོ་ར་སོ་ར། བ་ར་ད་ན་བུདྡྷ། ནི་རྨ་ཐ་ནི་རྨ་ཐ་ཧཱུཾ་ཕཊ། ཤེས་རབ་མཐར་བྱེད་ཀྱིའོ། །ཨོཾ་ན་མཿས་མནྟ་བུདྡྷེ་བྷྱོ་ཧུ་ལུ་ཧུ་ལུ། མ་ཧཱ་པདྨ་ཨ་མི་ཏཱ་ཀུ་རུ་མ་ཧཱ་བི་ཤ་ན་ཨཱ། པདྨ་མཐར་བྱེད་ཀྱིའོ། །ཨོཾ་ན་མཿས་མནྟ་བུདྡྷོ་བྷྱོ། ན་མོ་བཛྲ་ཀྲོ་དྷཱ་ཡ། མ་ཧཱ་དཾ་ཥྚྲ་ཨུངྒ་ཏེ་བྷཻ་ར་བཱ་ཡ། བཛྲ་སནྡྡྷ་ར་པཱ་ཡ། ཨ་མྲཾ་ཏ་ཀུཎྜ་ལི་ཧཱུཾ་ཕཊ། བགེགས་མཐར་བྱེད་ཀྱིའོ། །ཨོཾ་ན་མཿས་མནྟ་བུདྡྷེ་བྷྱོ། ཡ་མ་དཎྜཱ་ཡ། ཏུ་རུ་ཏུ་རུ་། མུ་རུ་མུ་རུ། སརྦ་དུ་ཥཊ་མཱ་ར་ཡ་ཧཱུཾ་ཕཊ། དབྱུག་པ་སྔོན་པོ་ཅན་གྱིའོ། །ཨོཾ་ན་མཿས་མནྟ་བུདྡྷེ་བྷྱོ། ན་མོ་མ་ཧཱ་བ་ལཱ་ཡ་ཨུཙྪུ་ཥྨ་ཀྲོ་དྷ་རཱ་ཛཱ་ཡ། སརྦ་ནཱ་ག་ནཱཾ་ཧྲྀ་ད་ཡ་ཧཱུཾ་ཕཊ། སྟོབས་པོ་ཆེའིའོ། །ཨོཾ་ན་མཿས་མནྟ་བུདྡྷེ་བྷྱོ། ན་མོ་ཨ་ཙ་ལ་ཀ་ན་ཙེ་ཊ་ཙེ་ཊ། མུ་ཊྚ་མུ་ཊྚ། ཏུ་ཊ་ཏུ་ཊ། གྷ་ཏ་གྷ་ཏ། གྷ་གྷ་གྷཱ་ཏ་ཡཾ་ཧཱུཾ་ཕཊ། མི་གཡོ་བའིའོ། །ཨོཾ་ན་མཿས་མནྟ་བུདྡྷེ་བྷྱོ། ཨོཾ་ཊ་ཀྐི་ཧཱུཾ་ཛ། འདོད་པའི་རྒྱལ་པོའིའོ། །ཨོཾ་སུཾ་བྷ་ནི་སུཾ་བྷ་ཧཱུཾ། གྲྀ་ཧྞ་གྲྀ་ཧྞ་ཧཱུཾ། གྲྀ་ཧྞཱ་པ་ཡ་གྲྀ་ཧྞཱ་པ་ཡ་ཧཱུཾ། ཨཱ་ན་ཡ་ཧོ་བྷ་ག་བཱ་ན་བིདྱ་རཱ་ཛཱ་ཧཱུཾ་ཕཊ། གནོད་མཛེས་རྒྱལ་པོའིའོ། །ཨོཾ་ན་མཿས་མནྟ་བུདྡྷཱ་ནཱཾ། ན་མཿས་མནྟ་དྷརྨྨཱ་ནཱཾ། ན་མཿས་མནྟ་སཾ་གྷཱ་ནཱཾ། ཨོཾ་སི་ཏཱ་ཏ་པ་ཏྲེ། ཨོཾ་བི་མ་ལ།
ཨོཾ་ཤཾ་ཀ་ར། ཨོཾ་པྲ་ཏྱ་ངྒི་ར། བཛྲ་ཨུཥྞཱི་ཥ་ཙ་ཀྲ་ཝརྟི་སརྦ་ཡནྟྲ་ཏནྟྲ་མཱུ་ལ་ཀརྨ། བནྡྷ་ནཱཾ། ཏཱ་ཌ་ནཾ། ཀཱི་ལ་ནཾ་ཝཱ། མ་མ་ཀྲྀ་ཏྱ་ཡ་ན་ཀེ་ན་ཙིཏྟ་ཀྲྀ་ཏཾ་ཏཚརྦཱནྡུ། ཙྪེནྡ་ཙྪིནྡ། བྷིནྡ་བྷིནྡ། ཙི་རི་ཙི་རི། གི་རི་གི་རི། མ་ར་མ་ར། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། གཙུག་ཏོར་འཁོར་ལོས་སྒྱུར་བའིའོ། །ཐམས་ཅད་སྲུང་བར་བྱེད་པའོ། །སྔགས་མཆོག་བཟང་པོ་འདི་རྣམས་ཀྱིས། །ཁྲོ་བོའི་རྒྱལ་པོ་བཅུ་བོ་ནི། །རྫོགས་པར་ཚིམ་པར་བྱས་པར་འགྱུར། །དེ་ནས་ཤར་སོགས་ཕྱོགས་རྣམས་སུ། །སྔགས་ཀྱི་གོ་རིམས་ངི་བཞིན་དུ། །ཁྲོ་བོ་རྣམས་ཀྱི་གོ་རིམས་བཞིན། །གཏོར་མའི་སྣོད་རྣམས་དོར་བར་བྱ། །དེ་ཡིས་ནམ་ཡང་རྨི་ལམ་ནི། །ངན་པ་ཉིད་ནི་མཐོང་མི་འགྱུར། །ཁྲོ་བོ་ཚིམ་ལས་རྣལ་འབྱོར་དབང༌། །རྨི་ལམ་བཟང་པོ་ཉིད་མཐོང་འགྱུར། །རབ་གནས་མཐའ་མར་གཏོར་མ་འདིས། །ལྷ་ཁང་ཤིན་ཏུ་བརྟན་པར་འགྱུར། །སྦྱིན་སྲེག་མཐའ་མ་མཁའ་འགྲོ་མ། །སྟོབས་ཆེན་མ་དག་རབ་མཉེས་འགྱུར། །གང་ཕྱིར་སྣ་ཚོགས་མ་ལུས་འདི། །ཕྱོགས་བཅུའི་སེམས་ཅན་དང་བཅས་པ། །ཁྲོ་རྒྱལ་གྱིས་ནི་རང་གི་མཐུས། །རྟག་ཏུ་ཕམ་པར་བྱས་ཏེ་གནས། །ད་ཕྱིར་དེ་ནི་ཚིམ་བྱས་པས། །ཀླུ་དང་འབྱུང་པོ་དྲང་སྲོང་དང༌། །གནོད་སྦྱིན་ལྷ་མིན་བཅས་འགྲོ་བ། །རྒྱུ་དང་མི་རྒྱུ་ཚིམ་པར་འགྱུར། །རང་གི་འདོད་ལྷའི་རྣལ་འབྱོར་རམ། །རྟ་ཡི་རྒྱལ་པོའི་རིམ་གྱིས་ནི། །རྩེ་གཅིག་སེམས་ལྡན་སྒྲུབ་པ་པོས། །ཁྲོ་རྒྱལ་རྣམས་ལ་གཏོར་མ་དབུལ། །དེས་ཁྲོ་བོའི་རྒྱལ་པོ་བཅུའི་གཏོར་མའི་ཆོ་གའོ། །གང་ཞིག་བྱས་པས་རྣལ་འབྱོར་དབང༌། །རྡོ་རྗེ་སེམས་དཔའ་ཉིད་ཐོབ་འགྱུར། །གང་གི་གཏོར་མ་ཞེས་བྱ་བ། །དེ་བས་གཞན་ཡང་རབ་བཤད་བྱ། །བཞིན་བཟངས་མིག་ནི་རབ་ཡངས་པའི། །སི་ཧླ་ག་པུར་དག་གིས་བརྒྱན། །པང་པ་རུ་ནི་གཞག་བྱ་སྟེ། །ནུ་མ་གཟུང་བར་རབ་ཏུ་བསམ། །རྡོ་རྗེ་པདྨ་འོ་བྱས་ཤིང༌། །རྡོ་རྗེ་བསྐྱོད་པས་མཉེ་བར་བྱ། །རྡོ་རྗེ་འཁྱུད་ནས་ནི། །རྡོ་རྗེ་མཆུ་ནི་རབ་ཏུ་གཞིབ། །རྡོ་རྗེ་སོར་མོའི་སྦྱོར་བ་ཡིས། །རྡོ་རྗེ་གནས་ནི་རབ་ཏུ་བསྐྱོད།། རྡོ་རྗེ་སེམས་ནི་རབ་ཕྱུང་ནས། །རྡོ་རྗེའི་ལྕེ་ཡིས་བཟའ་བར་བྱ། །དེ་ནས་དེ་ཡི་བདེ་ཆེན་དུ། །རྡོ་རྗེ་སེམས་དཔའ་རབ་ཏུ་གཞུག །རྡོ་རྗེ་བསྡམས་པའི་སྦྱོར་བ་ཡིས། །རྡོ་རྗེའི་མཆོད་པ་རབ་ཏུ་བརྩམ། །རྡོ་རྗེ་སེམས་དཔའ་ཐོབ་པ་ན། །བརྟུལ་ཞུགས་ཅན་གྱིས་རྡོར་སེམས་སྤྲོ། །པདྨའི་མེ་ཏོག་ཡང་དག་ལྡན། །མེ་ཏོག་དམར་པོས་མཆོད་པར་བྱ། །པདྨ་
མཉེས་གྱུར་རྡོ་རྗེ་ཅན། །པདྨ་དམར་པོས་ཁྱད་པར་དུ། །དྲི་ལྔ་ཡི་ནི་སྦྱོར་བ་དང༌། །སྤོས་དང་ག་བུར་མཆོད་པས་སོ། །འདི་ཡིས་རྒྱས་པར་འགྱུར་བ་སྟེ། །སྟོབས་དང་མཐུ་དང་རྩལ་ལྡན་འགྱུར། །བལྟས་པ་ཙམ་གྱིས་བསྐུལ་ནས་ནི། །འཇིག་རྟེན་དག་ནི་དབང་དུ་འགྱུར། །ཤེས་རབ་ཡན་ལག་སྦྱོར་བ་ཡིས། །ནང་གི་གཏོར་མའི་རིམ་འདི་བཤད། །གཞན་ཡང་བཟའ་བའི་སྦྱོར་བས་ཀྱང༌། །ནང་གི་གཏོར་མ་བཤད་པར་བྱ། །ཇི་སྐད་དུ་དཔལ་ལྡན་ལྷ་མོ་བཞིས་ཆོས་ཀྱི་དབྱིངས་ཞུས་པ་ལས་ལྷ་མོ་སྒྲོལ་མའི་ཐེ་ཚོམ་བསལ་བའི་ཕྱིར་བཅོམ་ལྡན་འདས་ཀྱིས་ཏེ། རྫས་ཀྱི་སྒྲུབ་པ་ཡན་ལག་བརྒྱད། །ཆོས་རྣམས་བསྒྲུབ་པ་བཤད་པར་བྱ། །མི་དང་གླང་པོ་རྟ་དང་ནི། །བ་ལང་ཁྱི་དང་བོད་བུ་ཉིད། །རྔ་མོ་དང་ནི་མ་ཧེ་ཉིད། །ཆ་དག་མཉམ་པར་བྱས་ནས་ནི། །མཐེ་བོང་གི་ནི་རྩེ་མོ་ཙམ། །མཉམ་པར་མཉམ་པས་ངེས་པར་སྦྱར། །བཤང་གཅི་ཁྲག་དང་ཁུ་བ་དག །ནས་ཀྱི་འབྲུ་ཡི་ཚད་ཙམ་ཡང༌། །སྔགས་ཀྱི་སྒོ་ནས་སྦྱར་བྱ་ཞིང༌། །བྱིན་གྱིས་ཀྱང་ནི་བརླབ་པར་བྱ། །ཨོཾ་དང་ཡི་གེ་ཨཱཿ་དང་ནི། །དབུས་སུ་ཡི་གེ་ཧཱུཾ་ཉིད་དང༌། ཛྭ་ལ་ཛྭ་ལ་ཡ་ཧྲི་སྟེ། །འདི་ནི་དགུ་པར་རབ་ཏུ་གྲགས། །ལན་གྲངས་ཉི་ཤུ་རྩ་གཅིག་གམ། །སྔགས་འདི་བརྗོད་པས་གདགས་པར་བྱ། །ཚེས་བརྒྱད་དམ་ནི་བཅུ་བཞི་ལ། །ལྔ་ལྔ་དང་ནི་བསྲེ་བྱ་ཞིང༌། །ཉུངས་ཀར་ལྔ་ཡི་ཚད་ཙམ་གྱིས། །དེ་ནས་རི་ལ་དག་བྱས་ནས། །པདྨའི་སྣོད་དུ་བཞག་ནས་སུ། །སྟོང་ཕྲག་བརྒྱ་ནི་བཟླས་པར་བྱ། །ཉིན་རེ་བཞིན་དུ་བཟའ་བྱ་ཞིང༌། །ཐུན་བཞི་དག་ཏུ་བསྒོམས་བྱས་ན། །བསྐལ་པའི་མཐའ་ལ་ཐུག་པར་རུ། །དངོས་གྲུབ་རྒྱ་ཆེན་ཐོབ་པར་འགྱུར། །རི་ལུ་ཆེན་པོ་ཟོས་པ་ཡིས། །མདོག་དང་གཟི་བརྗིད་སྟོབས་དང་མཐུ། །ལྔ་བ་སྨོན་ལམ་ཉིད་དང་ནི། །མངོན་པར་ཤེས་པ་ལྔ་ཐོག་འགྱུར། །ཞེས་གསུངས་པ་བཞིན་ནོ།། དེ་ལྟར་ནང་གི་གཏོར་མ་ནི། །རྟག་ཏུ་བྱ་བ་རྣལ་འབྱོར་པས། །འདིར་ནི་དཔལ་ལྡན་རྡོ་རྗེ་སེམས། །རྒ་ཤི་མེད་པའི་གནས་མྱུར་འགྲུབ། །དེ་ནི་ནང་གི་གཏོར་མའི་ཆོ་གའོ། །སྣ་ཚོགས་རྒྱུད་ཀྱི་རྒྱ་མཚོ་ལས། །བདག་གིས་གཏོར་མའི་ཆོ་ག་ནི། །མ་ལུས་ཐམས་ཅད་མཉེས་བྱེད་པ། །རིན་ཆེན་ཚོགས་མཚུངས་སུམ་ཅུ་བཏུས། །རྒྱ་ཆེན་རྒྱུད་འཛིན་འཇིགས་པ་ལ། །གཞུང་ཚད་དགུ་བརྒྱད་དང་ལྡན་པ། །ལག་མཐིལ་འབྲས་མཚུངས་གཏོར་མ་ཡི། །སྒྲུབ་ཐབས་འདི་ནི་བདག་གིས་བྱས། །རྣམ་པ་སྣ་ཚོགས་རྒྱུད་ལས་བཏུས། །ངལ་བར་གྱུར་པ་བདག་གིས་ནི། །ཕན་དང་བདེ་ཕྱོགས་ཡང་དག་སྒྲུབ་བྱེད་གཏོར་མའི་སྒྲུབ་ཐབས་བྱས་པ་ལས། །དེ་རིང་ཟླ་བའི་འོད་མཚུངས་ཤིན་ཏུ་རྒྱ་ཆེན་དགེ་
བ་གང་བསགས་པ། །དེ་ཡིས་དེང་སང་སྐྱེ་བོ་མང་པོ་བདེ་གཤེགས་ཉིད་ནི་རབ་ཐོབ་ཤོག །བདག་ཀྱང་སྲིད་པ་འདི་རུང་ནི། །རྡོ་རྗེ་སེམས་དཔར་འགྱུར་པར་ཤོག །མ་ལུས་བདེ་གཤེགས་བསམ་བྱ་བ། །ལྷ་ཆེན་སོགས་ཀྱིས་བསྡམ་མི་ཁྱབ། །རྟོག་པའི་རླབས་ནི་འཇོམས་བྱེད་བློ་མཆོག་སྐྱེ་བོ་ཡེ། །སྙིང་ལ་རྟག་ཏུ་ཤིན་ཏུ་བརྟན་པར་གནས་པར་བྱེད་པར་ཤོག །རྒྱུད་སྣ་ཚོགས་ལས་བཏུས་པའི་གཏོར་མའི་ཆོ་ག་སློབ་དཔོན་དཔལ་ཀླུ་སྒྱུར་གྱི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་རྡོ་རྗེ་སློབ་དཔོན་ཆེན་པོ་ཀརྨ་བཛྲའི་ཞལ་སྔ་ནས་དང༌། །ལོ་ཙཱ་བ་དགེ་སློང་གཞོན་ནུ་ཚུལ་ཁྲིམས་ཀྱིས་བསྒྱུར་ཅིང་ཞུས་པའོ།། །།