ཚུལ་ཁྲིམས་དང་སྡོམ་པ་དང་དམ་ཚིགས་མི་འགལ་པ་ཞེས་བྱ་བ།
རྒྱ་གར་སྐད་དུ། ཤཱི་ལ་སམྦ་ར་ས་མ་ཡ་ཨ་བི་རུ་དྡྷ་ནཱ་མ། བོད་སྐད་དུ། ཚུལ་ཁྲིམས་དང་སྡོམ་པ་དང་དམ་ཚིག་མི་འགལ་བ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དཔལ་ཚོགས་ཀུན་མཁྱེན་དམ་པའི་དབང་ཕྱུག་སྙིང་རྗེའི་མཆོག་གི་བདུད་རྩིས་བརླན་བའི་བློ་གྲོས་ཅན། །གཞན་དོན་ཡོན་ཏན་དྲི་མེད་བདེན་པའི་རིན་ཆེན་རིན་ཐང་མེད་པ་མང་པོ་འཐོབ་པའི་མཆོག །འགྲོ་བ་ཉོན་མོང་ས་ཧ་ལ་ཧ་ལའི་དུག་ཟོས་རྣམས་ལ་ཆོས་ཀྱི་བདུད་རྩིའི་ཆར་པ་ཡིས། །མྱ་ངན་འདས་པ་དམ་པའི་དོན་བྱེད་པ་ཡི་དཔལ་ལྡན་གང་ཡིན་ཁྱེད་ཀྱིས་རྟག་ཏུ་སྲུངས། །དགེ་བའི་བཤེས་གཉེན་དང་བྲལ་ཞིང༌། །བདེ་གཤེགས་བྱིན་རླབས་མེད་པ་དང༌། །མང་དུ་ཐོས་པ་དང་བྲལ་ཞིང༌། །ཐོས་པ་ཉུང་དུ་ས་ཆོག་ཤེས་པ། །མཁས་པ་ཉིད་དུ་རློམ་བྱེད་རྣམས། །རྒྱུད་དང་སྔགས་དང་ཕྱག་རྒྱ་སོགས། །སྦྱིན་ལ་སོགས་དང་སངས་རྒྱས་ཡུམ། །ལུང་ནོད་ཇི་བཞིན་མ་རྟོགས་པས། །དཔལ་ལྡན་སངས་རྒྱས་ཀྱིས་བསྟན་པའི། །བྱང་ཆུབ་སེམས་དཔའ་རྣམས་ཀྱི་སྡོམ། །དང་པོར་བཟུང་ནས་དེ་འོག་ཏུ། །རབ་ཏུ་བྱུང་ནས་དགེ་སློང་ངམ། །དང་པོར་རབ་ཏུ་བྱུང་བརྟན་ནས། །སྔགས་དང་ཕ་རོལ་ཕྱིན་ལམ་ནས། །ཕྱི་ནས་དེ་རྣམས་རྨོངས་སོགས་ཀྱིས། །འདུལ་བ་ཡི་ནི་བསྟན་བཅོས་ལས། །ཉན་ཐོས་ལ་སོགས་སྡོམ་གནས་པ། །སོ་སོར་ཐར་དང་ལོ་དྲིར་གནས། །དེར་བསྟན་པ་ཡི་བསླབ་པ་རྣམས། །ཕལ་ཆེར་བསྲུང་བར་མ་ནུས་པས། །བྱང་ཆུབ་སེམས་དཔའི་སྡོམ་པ་དང༌། །འགལ་བ་ཉིད་དུ་གནས་བཟུང་ནས། །དེ་ལྟར་དེ་སྤངས་རྣམ་པར་གནས། །དེ་དག་མི་ཤེས་བསལ་ཕྱིར་དང༌། །བསྟན་པ་འཁྲུལ་པ་བཟློག་པའི་ཕྱིར། །རིག་
འཛིན་གྱི་ནི་དམ་ཚིག་རྣམས། །བྱང་ཆུབ་སེམས་དཔའི་བསླབ་པ་དང༌། །སོ་སོར་ཐར་གསུངས་སྡོམ་པ་ནི། །རྒྱུ་འབྲས་ལྟོས་འབྲེལ་གྲུབ་རྣམས་ལ། །མི་འགལ་འབྲེལ་པ་གསལ་བར་བྱ། །སྒྲུབ་པ་ལུང་བཞིན་བྱ་བ་ནི། །དཔལ་ལྡན་བླ་མའི་ཞལ་སྔ་ནས། །ཡང་དག་ཤེས་རབ་ཕ་རོལ་ཕྱིན། །མངོན་པར་རྟོགས་པ་བརྒྱད་རྣམས་དང༌། །དམ་ཚིག་དབང་བསྐུར་ཐོབ་པ་ཡིས། །ཤིན་ཏུ་མན་ངག་དང་ལྡན་པས། །དཔལ་ལྡན་འདུས་སོགས་རྒྱུད་ཀྱི་དོན། །རིམ་པ་གཉིས་ནི་རྣམ་དབྱེ་བ། །ཐོབ་པ་ངེས་བསམ་སྙིང་རྗེ་ཡིས། །བདག་དང་གཞན་གྱི་བྱང་ཆུབ་ཕྱིར། །བྱང་ཆུབ་ཏུ་ནི་སེམས་བསྐྱེད་དེ། །ཀུན་ལས་ཕྱིར་མི་ལྡོག་བརྟན་བྱ། །ཐབས་ཀྱི་རང་བཞིན་བྱ་བ་འམ། །བསྒོམ་པ་ཡི་ནི་ལམ་དག་སྟེ། །སྦྱིན་ལ་སོགས་པའི་བསླབ་པ་ལ། །ཡང་ན་སྔགས་སྤྱོད་རིམ་པ་ལས། །རྟག་ཏུ་དགེ་བའི་བཤེས་གཉེན་ནི། །བསྟེན་པ་ཡོངས་སུ་གཏང་མི་བྱ། །མདོ་སྡེ་ཆོས་མངོན་འདུལ་བ་ཡི། །གཙུག་ལག་གི་ནི་བསྟན་བཅོས་དང༌། །གཙུག་ལག་མ་ཡིན་ལོ་དྲི་སོགས། །སློབ་དང་རང་སངས་རྒྱས་རྣམས་དང༌། །བྱང་ཆུབ་སེམས་དཔའ་ཐམས་ཅད་ཀྱི། །སོ་སོར་ཐར་སོགས་སྡོམ་པ་ནི། །དགེ་སློང་བློ་དང་ལྡན་པ་ཡིས། །བྱང་ཆུབ་སེམས་དཔའ་ཡང་དག་བསྟེན། །བདག་དང་གཞན་གྱི་བྱང་ཆུབ་དང༌། །དཔལ་ལྡན་འཆི་བདག་ལས་རྒྱལ་བའི། །བསྟན་པ་ཡང་ནི་བསྲུང་ཕྱིར་དང༌། །དེ་བཞིན་འཇིག་རྟེན་གསུམ་གནས་པའི། །མི་དང་ལྷ་སོགས་འཇིག་རྟེན་རྣམས། །སེམས་སུན་འབྱིན་པ་གཞོམ་ཕྱིར་རོ། །སྡོམ་བའི་རྣམ་པར་དབྱེ་བ་ནི། །དཔལ་ལྡན་རྒྱལ་བས་གང་གསུངས་པ། །ཕན་ཚུན་འགལ་བ་དག་ཏུ་ནི། །གང་ཡང་ནམ་དུའང་གནས་མ་ཡིན། །ཆོས་འདུལ་ལས་ནི་བཅོམ་ལྡན་གྱིས། །སོ་སོར་ཐར་པའི་སྡོམ་པ་ནི། །རྣམ་པ་བརྒྱད་གསུངས་འདི་ལྟ་སྟེ། །དགེ་སློང་དང་ནི་དགེ་སློང་མ། །དགེ་སློབ་དགེ་ཚུལ་དགེ་ཚུལ་མ། །དེ་བཞིན་དགེ་བསྙེན་དགེ་བསྙེན་མ། །བསྙེན་གནས་ལ་ནི་གནས་པའོ། །དེ་རྣམས་བསླབ་པའང་རྣམ་དབྱེ་བ། །དཔལ་ལྡན་ཐུབ་པའི་དབང་ཆེན་པོ། །སྙིང་རྗེ་ལྡན་པས་
གསུངས་པ་ནི། །དགེ་བསྙེན་ཕོ་མོ་དག་གི་སྡོམ། །རྣམ་པ་ལྔ་རུ་རབ་བསྟན་ཏེ། །འདི་ལྟར་སྲོག་གཅོད་སྤོང་བ་ནས། །མྱོས་འགྱུར་ཆང་མི་འཐུང་བའི་བར། །དགེ་ཚུལ་ཕོ་མོའི་སྔོམ་དག་ནི། །མགོན་པོས་རྣམ་པ་བཅུར་གསུངས་ཏེ། །སྲོག་གཅོད་པ་ལ་སོགས་པ་ནས། །ཇི་སྲིད་གསེར་དངུལ་ལ་སོགས་པ། །ལེན་པ་སྤོང་བའི་བར་དུའོ། །དེ་བཞིན་གཞན་ནི་བར་སློབ་མའི། །འདུལ་ལས་བཅུ་གཉིས་ཉིད་ཡིན་ཏེ། །ཆོས་དང་རྗེས་སུ་མཐུན་པ་རྣམས། །ཐར་པའི་ལམ་ནི་དག་ཕྱིར་གསུངས། །ཐུབ་པ་ཐུགས་རྗེ་ཆེན་པོ་ཡིས། །སྤང་བྱ་ཐམས་ཅད་སྤངས་བ་ནི། །དགེ་སློང་དགེ་སློང་མ་རྣམས་ཀྱི། །སྡོམ་པ་ཡིན་པར་གསུངས་པ་ཡིན། །ཐུབ་པ་ཐུགས་རྗེ་ཆེན་པོ་ཡིས། །གླུ་དང་གར་སོགས་ཕྲེང་བ་སོགས། །གཅིག་བྱས་ཕྱེད་དང་དུས་མིན་ཟས། །བར་གྱི་སྤང་བྱ་བརྒྱད་སྤངས་པ། །བསྙེན་གནས་ཀྱི་ནི་སྡོམ་པར་གསུངས། །སྦྱིན་ལ་སོགས་པའི་སངས་རྒྱས་ཆོས། །བྱ་བ་ཐབས་ཀྱི་བདག་ཉིད་གནས། །ཤེས་རབ་ཕ་རོལ་ཕྱིན་པ་རུ། །བསྟན་པ་རྒྱལ་བའི་དབང་པོ་ཡིས། །བྱང་ཆུབ་སེམས་དཔའ་ཐམས་ཅད་ཀྱི། །སྡོམ་པ་ཉིད་དུ་གསུངས་པ་ཡིན། །ཕྱག་རྒྱ་སྔགས་སོགས་རྣལ་འབྱོར་གྱི། །རིམ་པ་གཉིས་ལ་བརྟེན་པ་ལས། །རྡོ་རྗེ་ཡེ་ཤེས་ལུས་ངག་གི །ལྷ་ཡི་རྣམ་པ་རབ་བསྒོམས་པ། །ཐབས་དང་ལྡན་པར་སྒྲུབ་པ་ནི། །བྱང་ཆུབ་སེམས་དཔའི་བསླབ་འགྲུབ་པས། །སོ་སོར་ཐར་སྔོམ་གྱིས་དེ་འགྲུབ། །གསང་སྔགས་སྦྱིན་སོགས་དབྱེ་བ་ལས། །རྒྱུ་དང་འབྲས་བུའི་དབྱེ་བ་ཡིས། །དགེ་སློང་ལ་སོགས་དབྱེ་བྱ་སྟེ། །དགེ་སློང་སོགས་སྡོམ་དབྱེ་བ་མེད། །དགེ་སློང་ཉིད་སྡོམ་གཅིག་ཡིན་ཏེ། །དེ་བཞིན་ལེན་དང་བསྒྲུབ་པའང་གཅིག །རབ་བྱུང་སྡོམ་པ་བཏང་ནས་ནི། །སྔགས་ཀྱི་སྡོམ་དང་སྦྱིན་སོགས་ཀྱི། །སྡོམ་པ་ཡང་ནི་གཟུང་མི་བྱ། །གསང་སྔགས་ཀྱི་ནི་སྡོམ་པ་དང༌། །སྦྱིན་སོགས་སྡོམ་པས་བསྡམས་པ་དང༌། །རྙེད་དང་བཀུར་སྟིའི་རྒྱུ་ཡིས་སམ། །གནས་ཀྱི་འཚོ་བ་འགྲུབ་དོན་དུ། །རབ་བྱུང་སྡོམ་པ་ལེན་འདོད་ན། །དགེ་སློང་མིན་པས་
སྡོམ་མི་བྱ། །གསང་སྔགས་སྦྱིན་སོགས་ལྡན་པ་ནི། །རབ་བྱུང་སྡོམ་པ་བསྒྲུབ་པའོ། །འཕགས་པ་མགོན་པོ་བྱམས་པ་ཡིས། །འདི་ལྟར་མཁྱེན་ཏེ་གསུངས་པ་ནི། །རབ་ཏུ་བྱུང་བའི་ཕྱོགས་དག་ནི། །ཡོན་ཏན་ཚད་མེད་རྣམས་དང་ལྡན། །དེ་ལྟར་སྡོམ་བརྩོན་ཁྱིམ་པ་ཡི། །བྱང་ཆུབ་སེམས་ལས་ཁྱད་པར་འཕགས། །གསང་སོགས་ལམ་དང་སྦྱིན་སོགས་ཀྱི། །ལམ་ཉིད་དག་ནི་དགེ་སློང་གིས། །དགེ་སློང་མཁས་ལས་བླང་བྱ་ཡི། །གཞན་ཉིད་ལས་ནི་མ་ཡིན་ནོ། །སྔགས་དང་སྦྱིན་སོགས་ལ་གནས་པའི། །བྱང་ཆུབ་སེམས་དཔའི་སྡོམ་པ་ནི། །ཚུལ་ཁྲིམས་ཕ་རོལ་ཕྱིན་རྣམ་གསུམ། །དང་པོ་སྡོམ་པའི་ཚུལ་ཁྲིམས་དང༌། །དགེ་བ་ཆོས་སྡུད་ཚུལ་ཁྲིམས་དང༌། །སེམས་ཅན་དོན་བྱེད་ཚུལ་ཁྲིམས་ཏེ། །དེས་བསྒྲུབས་འདི་འགྲུབ་ངེས་པ་ཡིན། །རྒྱལ་བས་འདུལ་བའི་སྡེ་སྣོད་ལས། །དགེ་སློང་སྡོམ་གར་གསུངས་དེ་ནི། །དགེ་སློང་བྱང་ཆུབ་སེམས་དཔའ་ཡིས། །ཚུལ་ཁྲིམས་སྡོམ་པའི་ཆ་རུ་འགྱུར། །དཔལ་ལྡན་དེ་བཞིན་གཤེགས་པ་དང༌། །དཔལ་ལྡན་རྡོ་རྗེ་སེམས་དཔའ་ཡི། །དབུགས་དབྱུང་དག་ལ་བརྟེན་ནས་ནི། །རྡོ་རྗེའི་ལམ་ནི་གཉིས་སུ་གནས། །དེ་ལ་བདེ་གཤེགས་དབུགས་དབྱུང་བ། །དགེ་སློང་རྣམས་ལ་ཞི་སེམས་ཀྱིས། །མ་ལུས་སྤྲོས་པ་དང་བྲལ་བ། །གསུངས་པ་དབང་སྤྱོད་སོགས་རིམ་བྱ། །ཕྱི་རོལ་ཤེས་རབ་སྤངས་ནས་ནི། །རྟག་ཏུ་རང་སྣང་ཤེས་རབ་ལྡན། །དེ་ལ་འདུལ་ལས་གསུངས་པ་ཡི། །སྡོམ་པ་ཡིས་ནི་བྱང་ཆུབ་སྒྲུབ། །རྡོ་རྗེའི་བདག་ཉིད་ཐོབ་པ་ཡི། །རྡོ་རྗེ་སེམས་དཔའི་རོལ་པ་ནི། །དགེ་སློང་བདག་ཉིད་གྱུར་པ་ཡི། །དཔལ་ལྡན་རྣམ་པར་སྣང་མཛད་སོགས། །གོས་དཀར་སོགས་དང་སྙོམས་འཇུག་པ། །དོ་ཤལ་དཔུང་རྒྱན་གདུ་བུ་ཡིས། །རྣམ་པར་བརྒྱན་ཅིང་གོས་དག་ནི། །ཤིན་ཏུ་བཟང་པོ་བསྣམས་པ་རུ། །དཔལ་ལྡན་འདུས་སོགས་ལས་བྱུང་བས། །སེམས་ཅན་ཀུན་གྱི་དོན་འགྱུར་རོ། །རྡོ་རྗེ་སེམས་དཔའི་དབུགས་དབྱུང་བ། །རྟག་ཏུ་ཁྱིམ་པ་སྦྱང་བྱའི་ཕྱིར། །དབང་བསྐུར་ལ་སོགས་རིམ་པ་ནི། །སྤྲོས་དང་བཅས་པ་དེ་ལ་
གསུངས། །སེམས་སོགས་འོས་སུ་གྱུར་པ་ལ། །ཕྱི་རོལ་རིག་མའི་དབང་བསྐུར་བྱ། །སྤྲོས་པ་མེད་པས་རབ་བྱུང་ལ། །དགེ་སློང་རྣམས་ཀྱིས་དེ་སྦྱིན་ཏེ། །འདུལ་ལ་སོགས་པའི་སྡོམ་པ་ནི། །ཐམས་ཅད་ལྡན་པའི་སློབ་མ་ལ། །རྟག་ཏུ་རང་སྣང་ཤེས་རབ་ཀྱིས། །བསྒོམ་པ་གསལ་བར་བྱ་ཕྱིར་རོ། །སྦྱིན་སོགས་སྤྱོད་དང་སྔགས་སོགས་སྤྱོད། །རྣལ་འབྱོར་གནས་པའི་བདག་ཉིད་དག །རྫོགས་པའི་བྱང་ཆུབ་སངས་རྒྱས་ཆོས། །རང་དང་གཞན་ལ་རབ་བསྒྲུབ་པར། །རབ་ཏུ་འཇུག་པའི་དགེ་སློང་གི །དངོས་གནས་བྱང་ཆུབ་སེམས་དཔའ་དང༌། །བསེ་རུ་ཉན་ཐོས་ཉིད་གནས་པའི། །ཞི་བ་འདོད་པའི་དགེ་སློང་གིས། །འདུལ་ལས་གསུངས་པའི་སྡོམ་པ་ཡང༌། །ཕྲ་མོ་ཙམ་ཡང་གཏང་མི་བྱ། །ཁྱིམ་པའི་བྱང་ཆུབ་སེམས་དཔའ་ཡང༌། །གང་ཚེ་ཚངས་སྤྱོད་ཉིད་བསྲུངས་ན། །རབ་བྱུང་བྱང་ཆུབ་སེམས་དཔའ་ཡིས། །རང་གི་ཚུལ་ཁྲིམས་ཇི་ལྟར་དོར། །དཔལ་ལྡན་མགོན་པོ་བྱམས་པ་ཡིས། །རྟག་ཏུ་ཚངས་པར་སྤྱོད་ཉིད་དང༌། །འཚོ་བ་རྣམ་པར་དག་ཉིད་དོ། །བྱང་ཆུབ་སེམས་དཔའ་ལ་གསུངས་སོ། །དགེ་སློང་བྱང་ཆུབ་སེམས་དཔའ་ཡིས། །སྤྱིན་སོགས་བྱ་བའི་ལམ་གྱིས་སམ། །ཡང་ན་སྔགས་ཀྱི་སྡོམ་པ་ཡིས། །གནས་ཏེ་དེ་ཉིད་སྒྲུབ་བྱེད་པས། །འདུལ་ལས་གསུངས་པའི་སྡོམ་པ་ནི། །ཇི་སྲིད་འཚོ་ཡི་བར་དུ་བསྲུང༌། །དཔལ་ལྡན་ཐུབ་པའི་དབང་པོ་ནི། །ཐམས་ཅད་མཁྱེན་པ་གང་ཡིན་དེས། །ཐེག་པ་གསུམ་གྱིས་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་བྱ་བར་ནི་གསུངས་པ་ཡིན། །སྡོམ་པ་རྣམས་ནི་སྡོམ་པ་ཡིན། །གོང་ནས་གོང་དུ་རྗེས་འཇུག་སྟེ། །འདི་ལྟར་དགེ་བསྙེན་སྡོམ་པ་ནི། །དགེ་ཚུལ་གྱི་ནི་རྗེས་སུ་འཇུག །གང་དེ་དགེ་སློང་རྗེས་སུ་འཇུག །གང་དག་ཉན་ཐོས་དགེ་སློང་གི །སྡོམ་གསུངས་བྱང་ཆུབ་སེམས་དཔའ་ཡི། །རྗེས་སུ་འཇུག་སྟེ་ཀུན་ལྡན་པས། །དགེ་སློང་ཤིན་ཏུ་ཁྱད་པར་འཕགས། །བྱ་བ་ཐབས་ཀྱི་སྦྱོར་བ་ནི། །བྱང་ཆུབ་སེམས་དཔའི་སྡོམ་པ་སྟེ། །སྔགས་པས་སྦྱིན་ལ་སོགས་པ་
སྟེ། །ཐམས་ཅད་དུ་ནི་འཇུག་པར་བྱ། །གལ་ཏེ་སྡོམ་པ་འགལ་གྱུར་ན། །དགེ་སློང་གིས་ནི་སྡོམ་པ་རྣམས། །ཕུལ་བར་གྱུར་ན་དགེ་ཚུལ་དང༌། །དགེ་བསྙེན་ཡང་ནི་མི་གནས་འགྱུར། །སེམས་ཅན་དོན་ལ་ལྟོས་པ་ཡིས། །སོ་སོར་ཐར་གསུངས་སྡོམ་གཏོང་ཞེས། །གལ་ཏེ་དེ་ལྟར་རྗོད་བྱེད་ན། །དེ་དག་ངེས་པར་རྨོངས་པ་ཡིན། །བློ་ལྡན་ཁྱད་པར་འཕགས་པ་ཡི། །དགེ་སློང་བྱང་ཆུབ་སེམས་དཔའ་ནི། །ཐབས་ལ་མཁས་པས་ཐམས་ཅད་དུ། །རྨི་ལམ་དུ་ཡང་འགལ་མི་བསམ། །སྦྱིན་ལ་སོགས་པ་བྱ་བའམ། །ཡང་ན་དེ་ཉིད་བསྒོམ་བྱ་ཡིན། །དགེ་སློང་སེམས་ཅན་དོན་བསྒྲུབ་པའམ། །བྱང་ཆུབ་སེམས་དཔའ་སྙིང་རྗེ་ཆེ། །གཞན་དོན་བྱེད་པར་འདོད་རྣམས་ཀྱིས། །འདུལ་ལ་སོགས་པའི་དགེ་སློང་གིས། །བྱ་བ་ཚུལ་ཁྲིམས་ཁྱད་འཕགས་ཕྱིར། །ཚུལ་ཁྲིམས་ལྷག་པར་བསྟེན་པར་བྱ། །འདུལ་བ་ལས་བརྗོད་ཚུལ་ཁྲིམས་ནི། །དགེ་སློང་ཉིད་དུ་བསྒྲུབ་བྱའི་ཕྱིར། །ཇི་སྲིད་འཚོ་བར་བསྟེན་བྱ་བ། །སེམས་ཅན་དོན་ཡིན་གཏང་མི་བྱ། །སྔགས་སོགས་བསྒོམ་པ་གནས་པ་དང༌། །སྦྱིན་པ་སོགས་ལ་གནས་པ་ཡི། །དགེ་སློང་བྱང་ཆུབ་སེམས་དཔའ་ཡིས། །སོ་སོར་ཐར་གསུངས་བསླབ་པ་ནི། །ནམ་ཡང་གཏང་བར་མི་བྱའོ། །བཏང་ན་དམྱལ་སོགས་འགྲོ་བར་འགྱུར། །དེ་ལྟར་མ་གྱུར་རྣམ་ངེས་ན། །ཡང་དག་བྱང་ཆུབ་བསྒྲུབ་པའི་ཕྱིར། །དགེ་སློང་སྡོམ་པ་ཡང་དག་པ། །སོ་སོར་ཐར་ལ་གནས་པར་བྱ། །རྒྱལ་དང་རྒྱལ་བའི་སྲས་རྣམས་ལ། །གུས་པས་ལུང་དང་རིགས་པ་ཡིས། །ཤིན་ཏུ་དྲི་མ་མེད་ཅིང་མི་འགལ་སྡོམ་རྣམས་བྱས་པ་ལས། །བདག་གིས་ཟླ་འོད་ལྟ་བུའི་དགེ་བ་བསགས་པ་གང་ཡིན་དེས། །འཇིག་རྟེན་མ་ལུས་དཔལ་ལྡན་རྒྱལ་བའི་དབང་པོ་མྱུར་འགྲུབ་ཤོག །ཚུལ་ཁྲིམས་དང་སྡོམ་པ་དང་དམ་ཚིག་མི་འགལ་བ་ཞེས་བྱ་བ། སློབ་དཔོན་མཁས་པ་ཆེན་པོ་ཡེ་ཤེས་དཔལ་བཟང་པོའི་ཞལ་སྔ་ནས་མཛད་པ་རྫོགས་སོ།། །།ཁ་ཆེའི་མཁན་པོ་ཛྙཱ་ན་ཤྲཱི་བྷ་དྲ་དེ་ཉིད་དང༌། ཞུ་ཆེན་གྱི་ལོ་ཙཱ་བ་དགེ་སློང་བློ་གྲོས་སྙིང་པོ་དང༌། དགེ་སློང་རབ་ཞི་བཤེས་
གཉེན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།