རྡོ་རྗེ་ཐེག་པ་རྩ་བའི་ལྟུང་བའི་ལས་ཀྱི་ཆོ་ག།
རྡོ་རྗེ་གདན་པ།
རྒྱ་གར་སྐད་དུ། བཛྲ་ཡཱ་ན་མཱུ་ལཱ་པཏྟི་ཀརྨ་བི་དྷིཿ། བོད་སྐད་དུ། རྡོ་རྗེ་ཐེག་པ་རྩ་བའི་ལྟུང་བའི་ལས་ཀྱི་ཆོ་ག །
བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྡོ་རྗེ་ཐེག་པའི་སྒོར་ཞུགས་པའི། །རྣལ་འབྱོར་བ་ཡིས་དཔྱད་བྱ་པ། །ལས་ཀྱི་ཆོ་ག་འདི་ལྟར་མཛོད། །སྤྱི་བོ་ཉི་ཟླ་པད་སྟེང་དུ། །བླ་མ་སངས་རྒྱས་བསམས་བྱས་ཏེ། །རྟག་ཏུ་དྲན་དང་གསོལ་གདབ་བྱ། །སྲོག་གཅོད་བརྫུན་དང་མ་བྱིན་ལེན། །འདོད་པས་ལོག་པར་གཡེ་མ་པ་ནི། །ཅི་ལ་བབ་ཀྱང་བསྲུང་བར་བྱ། །བྱམས་དང་སྙིང་རྗེ་དགའ་བ་ནི། །ལུས་གྲིབ་བཞིན་དུ་འབྲལ་མི་བྱ། །བུམ་པའི་དབང་ཐོབ་གྱུར་ནས་ནི། །ལྷ་དང་བཟླས་པ་རྣལ་འབྱོར་དང༌། །ཕྱག་འཚལ་མཆོད་དང་སྡིག་བཤགས་དང༌། །རྗེས་སུ་ཡི་རང་བསྐོར་དང་གསོལ། །དགེ་བསྔོ་སྡོམ་པ་བྱུལ་བ་དང༌། །སྦྱིན་པ་བླ་མ་དྲན་དང་ཆོས། །དམ་ཚིག་རྣམ་པ་བཅོ་ལྔ་འདི། །ཉིན་རེ་ཐེབས་རེ་མ་བྱས་ན། །ཞག་གསུམ་འདས་ན་བུམ་དབང་གི །དམ་ཚིག་ཉམས་པས་བཤགས་པར་བྱ། །དེ་ཡང་བརྒྱ་པ་བརྒྱ་རྩ་བརྒྱད། །བཟླས་ཏེ་ཕྱིས་ནི་མི་ཉམས་བྱ། །གསང་བའི་དབང་ཐོབ་རྣལ་འབྱོར་པས། །མི་འཆི་ལྔ་དང་སྒྲོན་མ་ལྔ། །རླུང་དང་ལྟ་སྟངས་འཁྲུལ་འཁོར་དང༌། །ཚོགས་དང་གཏོར་མ་བརྟུལ་ཞུགས་དང༌། །གླུ་དང་གར་དང་ནི་རཾ་ཤུ། །དམ་ཚིག་རྣམ་པ་བཅུ་གཅིག་པོ། །ཟླ་བ་ཕྱེད་དུ་བྲལ་གྱུར་ན། །གསང་བའི་དམ་ཚིག་ཉམས་པར་གསུངས། །ཉམས་ན་ཚོགས་འཁོར་སྦྱིན་སྲེག་བྱ། །གསུམ་པའི་དབང་ཐོབ་རྣལ་འབྱོར་བས། །བདེ་བ་ཐིག་ལེ་རྩ་གནས་དང༌། །མི་འཛག་བདེ་བ་སྐད་ཅིག་དང༌། །ཕྱག་རྒྱ་མ་དང་སྦྱོར་བ་དང༌། །ཟླ་བ་གཅིག་བྲལ་ཉམས་པར་གསུངས། །དབང་དང་སྦྱིན་སྲེག་བཤགས་པ་བྱ། །བཞི་པའི་དབང་ཐོབ་རྣལ་འབྱོར་པ། །སྤང་བླང་རྩོལ་དང་དངོས་དང་ཞེན། །སྐད་ཅིག་སྐྱེས་ཀྱང་ཉམས་པས་ན། །མི་དམིགས་བདེ་ཆེན་སྤྲོས་བྲལ་གཞག །དབང་བཞི་སྤྱི་ཡི་དམ་ཚིག་ནི། །རྒྱ་མཚོའི་དཀྱིལ་དུ་གཟིངས་མི་བཤིག །བཙན་དུག་གར་མ་བཟའ་མི་བྱ། །འཐབ་ཁང་རྩེ་ནས་དབབ་མི་བྱ། །ཟ་མ་ཏོག་ཏུ་སྦྲུལ་མི་གཞུག །པདྨ་སད་ཀྱིས་བསད་མི་བྱ། །གཡོས་ལེགས་གཞན་ལ་དྲང་མི་བྱ། །དེ་དྲུག་རྡོ་རྗེ་དམྱལ་བའི་རྒྱུ། །རྒྱལ་ཁྲིམས་བཤིག་པར་མི་བྱ་ཞིང༌། །ཆུང་མ་ཉམས་པར་
མི་བྱའོ། །ཕ་མ་བཙོངས་ནས་རིན་མི་བཟའ། །མེ་མདག་འགམ་པར་མི་བྱའོ། །འདི་བཞི་ངན་སོང་གསུམ་གྱི་རྒྱུ། །སྤུ་གྲིའི་སྦྲང་རྩི་བལྡག་མི་བྱ། །གཡོས་འགྱེད་བཟའ་རུ་བྱོག་མི་བྱ། །སྨན་ཟོས་མི་གསེབ་སྐྱུག་མི་བྱ། །རི་རབ་རྩེ་ནས་བརྙིལ་མི་བྱ། །གཉེན་ལ་སྙིང་རིང་མི་བྱའོ། །དེ་ལྟ་སེམས་ཅན་དམྱལ་བའི་རྒྱུ། །མ་བུ་འབྲལ་བའི་ལས་མི་བྱ། །གདུང་སེམས་ཐག་པ་རྒྱུན་མི་གཅད། །ཆུ་ཟླ་བདེན་པར་གཟུང་མི་བྱ། །སྦྲང་རྩིའི་རོ་ལ་ཆགས་མི་བྱ། །འདི་བཞི་ཁམས་གསུམ་འཁོར་བའི་རྒྱུ། །དུག་ཆུ་ཁོལ་མར་ལུས་མི་བཀྲུ། །རྩི་དུག་སྦྱར་བའི་དུག་མི་བལྡག །རྫ་སྣོད་སེང་གེའི་ཞོ་མི་བཞོ། །ཆང་རྫའི་ཐེམ་བུ་གཏང་མི་བྱ། །དེ་བཞི་བྱོལ་སོང་ཕག་གི་རྒྱུ། །འདིར་ཡང་ཚེ་ཐུང་དངོས་གྲུབ་འགྱང༌། །མཐོན་པོའི་ཁ་ནས་ལྡང་མི་བྱ། །ཆགས་མི་གསེབ་བཅག་མི་བྱའོ། །ག་ཞ་གཞན་ལ་བརྗོད་མི་བྱ། །ལམ་དུ་ཚེར་མ་དགྲམ་མི་བྱ། །འདི་ནི་རང་ངན་སྒྲུབ་པའི་རྒྱུ། །ལྕེ་ཐོག་ཟས་ཞིམ་བསྐྱུར་མི་བྱ། །མཛོད་ཕུགས་དགྲ་ལ་བསྟན་མི་བྱ། །རྐུན་ནོར་གཞན་ལ་བསྟན་མི་བྱ། །སེར་རའི་རོ་ཚོགས་མི་བྱ་ཞིང༌། །མི་ལ་ང་བ་མི་ཤེས་མིན། །ཁྱི་རྒོད་པང་དུ་བླང་མི་བྱ། །འདི་དྲུག་དངོས་གྲུབ་ཡལ་བའི་རྒྱུ། །ལྷ་ཁང་དུད་པས་མི་བདུག་ཅིང༌། །མཆོད་རྟེན་བཤིག་པར་མི་བྱའོ། །འདི་གཉིས་དམན་པའི་བྱང་ཆུབ་རྒྱུ། །མེ་ལོང་གཡའ་ཡིས་མི་བསྒོ་ཞིང༌། །ཁབ་རྩེ་གཉིས་པས་བཅོམ་མི་བྱ། །འདི་གཉིས་བདུད་ཀྱིས་འཁྱེར་བའི་རྒྱུ། །དུག་གི་ཕྱག་ཚང་མི་བྱ་ཞིང༌། །སྟག་ལ་ཞུམ་བུ་མི་བྱའོ། །འདི་གཉིས་མཁའ་འགྲོས་ཟ་བའི་རྒྱུ། །ནམ་མཁའ་ཚོས་ཀྱིས་བསྒྱུར་མི་བྱ། །རི་བོང་རྭས་ཕུག་འཇིགས་མི་བྱ། །འདི་གཉིས་འཁོར་བར་སྡོང་པའི་རྒྱུ། །མྱུ་གུ་ཐན་པར་བསྐུར་མི་བྱ། །ལྕུག་ཕྲན་རྩྭ་གུག་བྲེག་མི་བྱ། །འགྲོ་བའི་ལམ་སྣ་དགག་མི་བྱ། །འདི་གསུམ་ངན་སོང་བསྐྱུར་བའི་རྒྱུ། །མཆོག་ལ་དམན་པར་གཟུང་མི་བྱ། །བྱམས་ཚིག་ཁྱད་དུ་གསད་མི་བྱ། །དགོས་པ་ཡལ་བར་དོར་མི་བྱ། །འདི་གསུམ་གཏན་གྱི་བར་ཆོད་ཡིན། །བདེ་ལ་སྐུར་པ་གདབ་མི་བྱ། །མ་ལ་ངན་ཚིག་སྨྲ་མི་བྱ། །བུ་མོ་སྲིང་མོ་སྐྱི་མི་བྱ། །འདི་གསུམ་མཁའ་འགྲོ་འཁྲུག་པའི་རྒྱུ། །ལས་ཀྱི་ཆོ་ག་འདི་རྣམས་ལས། །འགལ་ན་རྩ་
བའི་ལྟུང་བར་འགྱུར། །ལྟུང་བ་ཆེན་པོ་བྱུང་གྱུར་ན། །དབང་རྫོགས་བདུན་དང་སྦྱིན་སྲེག་ཁྲི། །ཚོགས་འཁོར་བརྒྱ་རྩ་བརྒྱད་དང་ནི། །འཁོར་གསུམ་ཡོངས་སུ་དག་པས་བཤགས། །ལྟུང་བ་བཞི་པོ་བྱུང་གྱུར་ན། །དབང་བསྐུར་གཅིག་དང་སྦྱིན་སྲེག་བརྒྱ། །ཚོགས་འཁོར་བདུན་དང་མཆོད་སྦྱིན་གཅིག །སྨྲེ་སྔགས་དྲག་པོས་བཤགས་པར་བྱ། །ལྟུང་བ་ཆུང་དུ་བྱུང་གྱུར་ན། །ལུས་ལ་ཚབ་མ་སྨྲེ་བཤགས་བྱ། །མཎྜལ་གཅིག་དབུལ་བཟོད་གསོལ་བྱ། །བརྒྱ་པ་བདུན་ནམ་ཉི་ཤུ་གཅིག །བཟླས་བས་དེ་ལས་ལྡང་བ་ཡིན། །ངག་ལ་རྒྱལ་དང་སྨྲེ་བཤགས་བྱ། །མཎྜལ་དབུལ་ཞིང་བཟོད་གསོལ་བྱ། །བརྒྱ་པ་བརྒྱ་རྩ་བརྒྱད་དང་ནི། །ལྔ་བཅུ་ཉེར་གཅིག་བདུན་དག་དང༌། །ལན་ཅིག་བརྗོད་པས་འདག་པར་གསུངས། །ཡིད་ལ་འགྱོད་དང་མཎྜལ་དང༌། །བརྒྱ་པ་གོང་བཞིན་བཟླས་པས་འདག །ཀུན་གྱི་ཁ་སྐོང་གཏོར་མ་དང༌། །མཎྜལ་བདུན་པོ་རྣམ་དག་ཤིས། །བརྒྱ་པ་རྟག་ཏུ་བཟླས་པར་བྱ། །ཡན་ལག་དམ་ཚིག་ཅེས་བྱ་བ། །སྔགས་མེད་བཙན་དུག་བཟའ་མི་བྱ། །རྩི་མེད་རི་མོ་བཀྲུ་མི་བྱ། །སྟོབས་མེད་རལ་ཁ་སྤྲད་མི་བྱ། །ཚོད་མེད་ཞལ་ཆེ་བཅད་མི་བྱ། །དཔུང་མེད་སྐྱེལ་མ་མི་བྱ་སྟེ། །རྒྱུས་མེད་ས་མཁན་མི་བྱའོ། །ཡང་རྩལ་མེད་པར་མཆོང་མི་བྱ། །དགའ་བའི་ས་རུ་ཤགས་འགྱེད་མིན། །བྱེ་མའི་རི་ལ་མཁར་མི་བརྩིག །རྒྱ་མཚོའི་གླིང་དུ་ཡུལ་མི་གཟུང༌། །ཙནྡན་ནགས་ལ་མེ་མི་གཞུག །མེ་ཏོག་ལྡུམ་སར་སད་མི་བསད། །རྒྱལ་པོས་འབངས་ཀྱི་གཡོག་མི་བྱ། །རང་གི་ལས་ལ་གཡོ་མི་བྱ། །རྒྱལ་པོ་བཙུན་མོ་བརྡེག་མི་བྱ། །འདོད་ལ་མི་སྟེར་སྤང་བར་བྱ། །མི་འདོད་སྟེར་བ་སྤང་བར་བྱ། །ལྕགས་སྒྲོག་བཅིང་བར་མི་བྱའོ། །བྱིས་པ་རྣམས་དང་འདྲིས་མི་བྱ། །མགྱོགས་པོ་འགྲན་བང་མི་བྱའོ། །གཡང་ལུག་རྟག་ཏུ་འགོ་མི་བྱ། །སྟན་ལ་འདུག་པ་སྤང་བར་བྱ། །མཚོན་ཆའི་སྣོད་ཁ་དམ་པར་བྱ། །རྟག་ཏུ་མདའ་ནི་བསྲང་བྱ་ཞིང༌། །རྟག་ཏུ་གཞུ་ནི་བདུང་བར་བྱ། །རྟག་ཏུ་ཕུབ་གཟུགས་བྱ་ར་བྱ། །མཁར་དཔེ་སྟོད་ཀྱིན་འོབས་བཙང་བྱ། །ཤི་བའི་རོ་ལ་ཡང་ཡང་བརྟག །རང་གི་སྲོག་ཟོན་དུས་དྲུག་བྱ། །མདོར་ན་དེ་ལ་སོགས་པ་ཡི། །དམ་ཚིག་དཔག་ཏུ་མེད་མོད་
ཀྱང། །རང་སེམས་དྲང་པོར་བསྲང་བྱས་ཏེ། །རྟག་ཏུ་བླ་མ་དྲན་བྱེད་ཅིང༌། །སྒོ་གསུམ་ཐ་མལ་མ་ལུས་ན། །དམ་ཚིག་སྡོམ་པ་ཐམས་ཅད་ནི། །གདོན་མི་ཟ་བར་བསྲུང་པར་ངེས། །བག་ཡངས་ཆེན་པོ་ཅི་བདེར་སྤྱོད། །དམ་ཚིག་དང་སྡོམ་པའི་རྣམ་པར་བཤད་པ་རྡོ་རྗེ་ཐེག་པའི་རྩ་བའི་ལས་ཀྱི་ཆོ་ག་རྣལ་འབྱོར་གྱི་སྲོག་ཅེས་བྱ་བ་བླ་མ་རྡོ་རྗེ་གདན་པས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཨ་བྷྱ་ཀ་ར་གུཔྟ་དང་བོད་ཀྱི་ལོ་རྩཱ་བ་ཙ་མི་སངས་རྒྱས་གྲགས་པས་གླེན་སྐད་དུ་བསྒྱུར་བའོ།།