བདེན་པ་གཉིས་རྣམ་པར་འབྱེད་པའི་དཀའ་འགྲེལ།
ཞི་བ་འཚོ།
རྒྱ་གར་སྐད་དུ། ས་ཏྱ་དྭ་ཡ་བི་བྷཾ་ག་པཉྫི་ཀ །བོད་སྐད་དུ། བདེན་པ་གཉིས་རྣམ་པར་འབྱེད་པའི་དཀའ་འགྲེལ། བམ་པོ་དང་པོ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བློ་ཆུང་རྣམས་ཀྱི་ཤེས་རབ་དག །རབ་ཏུ་རྒྱས་པར་བྱ་བའི་ཕྱིར། །བདེན་གཉིས་རྣམ་པར་དབྱེ་བ་ཡིས། །དཀའ་འགྲེལ་འདི་ནི་མདོར་བསྡུ་བྱ། །དེ་ལ་བསྟན་བཅོས་བརྩམ་པ་ལ། །གང་དག་དངོས་པོ་ངོ་བོ་ཉིད་མེད་ཡང་དག་མཁྱེན་གྱུར་ཀྱང༌། །ཐུགས་རྗེས་འཁོར་བ་ཇི་སྲིད་བར་དུ་ཐུབ་དབང་སྲས་བཅས་རྣམས། །འཇིག་རྟེན་མ་ལུས་པ་ཡི་འཚལ་བའི་དངོས་པོ་བསྒྲུབ་སླད་དུ། །འདིར་བཞུགས་དྲི་མེད་བློ་ལྡན་དེ་དག་རྣམས་ལ་ཕྱག་འཚལ་ལོ། །ཞེས་བྱ་བ་སྡུག་པའི་ལྷ་ལ་ཕྱག་བྱ་བ་བརྗོད་པ་ནི་བཀྲ་ཤིས་པར་བྱ་བའི་ཕྱིར་རོ། །གཅིག་ཏུ་ན་ཡ་རབས་ཀྱི་ཚུལ་དང་མཐུན་པར་འཇུག་པ་ཡིན་པར་བསྟན་པ་ཡིན་ནོ། །གཅིག་ཏུ་ན་བསྟན་བཅོས་བརྩམ་པ་ལ་སྟོན་པ་ལ་མཆོད་པ་བྱ་བ་ནི་བསྟན་བཅོས་དེ་ལ་གུས་པ་བསྐྱེད་པའི་ཕྱིར་རམ། དེའི་དོན་བཟང་བ་ལས་ན་སྟོན་པ་གྲུབ་པར་བྱ་བའི་ཕྱིར་ཏེ། དེ་ལ་གྲུབ་པ་དང་མ་གྲུབ་པའི་རིགས་གཉིས་ཡོད་པའི་ཕྱིར་རོ། །ཕྱག་བྱ་བ་འདི་ནི་བསྟན་བཅོས་ཀྱི་དོན་ཇི་ལྟ་བུ་ཡིན་པ་དེ་དང་མཐུན་པ་ཁོ་ནར་བྱས་པ་ཡིན་ཏེ། བདག་གིས་འདིར་དོན་འདི་ལྟ་བུ་རབ་ཏུ་བསྒྲུབ་བོ་ཞེས་བསྟན་པའི་ཕྱིར་ཏེ། ཚིགས་སུ་བཅད་པ་འདིར་དོན་གསུམ་བསྟན་ཏེ། དངོས་པོའི་དེ་ཁོ་ན་ཇི་ལྟ་བ་བཞིན་དུ་ཐུགས་སུ་ཆུད་པ་ནི། གང་དག་དངོས་པོ་ངོ་བོ་ཉིད་མེད་ཡང་དག་མཁྱེན་གྱུར་ཀྱང༌། །ཞེས་བྱ་བ་འདིས་བསྟན་ཏོ། །དངོས་པོ་དང་དངོས་པོ་མེད་པའི་ངོ་བོ་ཉིད་ལས་འདས་པ་ནི་ངོ་བོ་ཉིད་མེད་པ་སྟེ། དངོས་པོ་དང་དངོས་པོ་མེད་པ་གཉི་ག་ངོ་བོ་ཉིད་མེད་པའི་ཕྱིར་རོ། །དངོས་པོ་ཞེས་བྱ་བའི་སྒྲ་ནི་ངོ་བོ་ཉིད་ལ་བྱའོ། །བཞུགས་པ་ནི་ཆེན་པོ་རྣམ་པ་ལྔས་བསྟན་ཏེ། རྒྱུ་ཆེན་པོ་ནི་ཐུགས་རྗེའི་རྒྱུ་ལས་བྱུང་བའི་ཕྱིར་རོ། །ཐུགས་རྗེ་ནི་སེམས་ཅན་ལ་སོགས་པ་ལ་དམིགས་པས་རྣམ་པ་གསུམ་མོ། །དུས་ཆེན་པོ་ནི་འཁོར་བ་ཇི་སྲིད་བར་
དུ་བཞུགས་པའི་ཕྱིར་རོ། །མཛད་པ་ཆེན་པོ་ནི་སངས་རྒྱས་དང་བྱང་ཆུབ་སེམས་དཔའ་མཛད་པ་པོ་ཡིན་པའི་ཕྱིར་རོ། །ལུས་དང་ངག་དང་ཡིད་ཐུབ་པ་དང་ལྡན་པའི་ཕྱིར། ཉན་ཐོས་དང་རང་སངས་རྒྱས་རྣམས་ནི་ཐུབ་པ་རྣམས་སོ། །བཅོམ་ལྡན་འདས་ནི་ལུས་དང་ངག་དང་ཡིད་ཐུབ་པ་ཐུན་མོང་མ་ཡིན་པ་དང་ལྡན་པའི་ཕྱིར་དེ་དག་གི་དབང་པོ་ཡིན་ཏེ། དེ་ནི་དེ་བཞིན་གཤེགས་པའི་གསང་བའི་མདོ་ལས། སྐུའི་གསང་བ་ལ་སོགས་པ་སྨོས་བས་བསྟན་ཏེ། སྲས་བཅས་ཞེས་སྨོས་པ་ནི། བཅོམ་ལྡན་འདས་ཀྱི་འཁོར་རྟག་ཏུ་མང་ཞིང་རྣམ་པར་དག་པ་ཡིན་པར་བསྟན་པའི་ཕྱིར་རོ། །དགོས་པ་ཆེན་པོ་དེ་ཡང་འཇིག་རྟེན་ཞེས་བྱ་བ་ལ་སོགས་པས་བསྟན་ཏེ། འཇིག་རྟེན་མ་ལུས་པའི་འཚལ་བ་ནི། འདི་མ་ལུས་པ་ཡང་ཡིན། འཇིག་རྟེན་གྱི་འཚལ་བའི་དངོས་པོ་འགྲུབ་པ་ཡང་ཡིན་ནོ་ཞེས་བྱ་བར་སྦྱར་རོ། །སྐྱོན་རྣམས་ཀྱིས་མ་གོས་པ་ཆེན་པོ་ནི། དྲི་མེད་བློ་ལྡན་ཞེས་བྱ་བས་བསྟན་ཏོ། །བློ་དྲི་མ་མེད་པ་ནི་ཉོན་མོངས་པ་དང་ཤེས་བྱའི་སྒྲིབ་པ་སྤངས་པའི་ཕྱིར་ཏེ། ཉོན་མོངས་པ་དང་ཤེས་བྱའི་སྒྲིབ་པ་དེ་གཉིས་གཏན་དུ་སྤངས་པ་དང༌། བག་ཆགས་དང་བཅས་པར་སྤངས་པ་དང༌། ཏིང་ངེ་འཛིན་དང་སྙོམས་པར་འཇུག་པ་ཐམས་ཅད་ཀྱི་སྒྲིབ་པ་སྤངས་པའི་ཕྱིར་རོ། །གཅིག་ཏུ་ན་འཁོར་བ་ན་གནས་པ་རྣམས་ཀྱི་འཁོར་བའི་སྐྱོན་འཇིག་རྟེན་གྱི་ཆོས་ལ་སོགས་པས་མི་གོས་པའི་ཕྱིར་བློ་དྲི་མ་མེད་པ་ཡིན་ནོ། །ཀྱང་ཞེས་བྱ་བ་ནི་མི་མཐུན་པའི་རྒྱན་སྟོན་པ་ཡིན་ཏེ། དོན་དམ་པའི་བདེན་པ་ལ་བརྟེན་ནས་ནི་དངོས་པོའི་དེ་ཁོ་ན་ཇི་ལྟ་བ་བཞིན་དུ་ཐུགས་སུ་ཆུད་ལ། ཀུན་རྫོབ་ཀྱི་བདེན་པ་ལ་བརྟེན་ནས་ནི་བཞུགས་པ་ཡང་བསྟན་ཏོ། །གང་གི་ཕྱིར་རྫོགས་པར་ལོངས་སྤྱོད་པའི་སྐུ་དེ་བསོད་ནམས་དང་ཡེ་ཤེས་ཀྱི་ཚོགས་ལས་ངེས་པར་བྱུང་བ་ཡིན་ཡང་བྱང་ཆུབ་སེམས་དཔའ་ཆེན་པོ་རྣམས་ཀྱི་མོས་པ་ཇི་ལྟ་བ་བཞིན་དུ་སྔོན་པོ་ལ་སོགས་པའི་ངོ་བོར་སྣང་བ་ཇི་ལྟ་བ་དེ་བཞིན་དུ་རྣམ་པར་འཇོག་སྟེ་དེའི་ཕྱིར་འགལ་བ་མེད་དོ། །ཕྱག་བྱ་བ་དེ་ནི་མདོར་ན་ལས་གསུམ་གྱི་རང་བཞིན་གྱི་དོན་ཡིན་པའི་ཕྱིར་རོ། །རབ་ཏུ་བྱེད་པ་འདི་ནི་དགོས་པ་མེད་པའི་ཕྱིར་བརྩམ་པར་བྱ་བ་མ་ཡིན་ཏེ། བྱ་རོག་གིས་སོ་བརྟག་པ་དང་འདྲའོ་སྙམ་དུ་དོགས་པའི་གཏན་ཚིགས་མ་གྲུབ་པ་ཉིད་དུ་བསྟན་པའི་ཕྱིར། བདེན་པ་གཉིས་ཇི་ལྟ་བ་བཞིན་དུ་ཁོང་དུ་ཆུད་པར་
བྱ་བའི་ཕྱིར་ཞེས་བྱ་བ་སྨོས་ཏེ། ཇི་ལྟ་བ་བཞིན་ཞེས་བྱ་བའི་ཚིག་ནི། གཞན་དག་གིས་ཀྱང་བདེན་པ་གཉིས་རྣམ་པར་དབྱེ་བ་བསྟན་མོད་ཀྱི། དེ་ནི་ཡང་དག་པ་མ་ཡིན་ནོ་ཞེས་བསྟན་པའི་ཕྱིར་རོ། །འབྲེལ་བ་ནི་དགོས་པའི་ནང་དུ་འདུས་པའི་ཕྱིར་ལོགས་ཤིག་ཏུ་མ་སྨོས་ཏེ། འདི་ལྟར་བསྟན་བཅོས་ཐམས་ཅད་དམ། ལས་ལ་ནི་དགོས་པ་ཉིད་ཀྱི་འབྲེལ་པ་བརྗོད་པར་བྱའི། བྱེད་པའི་མཇུག་ཐོགས་ལ་སོགས་པའི་མཚན་ཉིད་ཀྱི་འབྲེལ་པ་གཞན་ནི་བརྗོད་པར་མི་བྱ་སྟེ། བསྟན་བཅོས་ལ་བྱ་བའི་ཡན་ལག་མ་ཡིན་པའི་ཕྱིར་རོ། །དཔེར་ན་གསོ་བའི་བསྟན་བཅོས་ཇི་ལྟ་བ་དེ་བཞིན་དུ། དགོས་པ་དང་ལྡན་པ་གང་ཡིན་པ་དེ་བརྩམ་པར་བྱ་སྟེ། རབ་ཏུ་བྱེད་པ་འདི་ཡང་དགོས་པ་དང་ལྡན་པ་ཡིན་ནོ། །དཔེར་ན་གསོ་བའི་བསྟན་བཅོས་ལ་ཇི་ལྟ་བ་དེ་བཞིན་དུ་འབྲེལ་པ་དང་ལྡན་པ་གང་ཡིན་པ་དེ་རྟོག་པ་སྔོན་དུ་གཏོང་བ་རྣམས་ཀྱིས་གཟུང་བར་བྱ་སྟེ། རབ་ཏུ་བྱེད་པ་འདི་ཡང་འབྲེལ་པ་དང་བཅས་པ་ཡིན་ཏེ། རྟོག་པ་སྔོན་དུ་གཏོང་པའི་སྐྱེ་བོ་བདེན་པ་གཉིས་ཁོང་དུ་ཆུད་པར་བྱ་བའི་ཕྱིར་རོ་ཞེས་བྱ་བ་ལྷག་མའོ། །འདི་ཞེས་བྱ་བ་ནི་འོག་ནས་འབྱུང་བའི་རབ་ཏུ་བྱེད་པ་ནང་དུ་ཡོངས་སུ་རྫོགས་པའི་ངོ་བོར་བཞག་ནས་བརྗོད་པ་ཡིན་ཏེ། མངོན་སུམ་ཉེ་བའི་ཚིག་ཡིན་པའི་ཕྱིར་རོ། །བརྩམས་ཏེ་ཞེས་བྱ་བ་ནི། ད་ལྟར་དང་ཉེ་བ་ལ་ད་ལྟར་ཞེས་བཤད་པའི་ཕྱིར་རོ། །རྣམ་པ་གཅིག་ཏུ་ན་བརྩམས་ལ་ཡོངས་སུ་རྫོགས་པ་མ་ཡིན་པ་ནི་ད་ལྟར་གྱི་དུས་སོ། །བཅོམ་ལྡན་འདས་ཀྱིས་བདེན་པ་གཉིས་ཇི་ལྟ་བ་བཞིན་དུ་རྣམ་པར་ཕྱེ་ལ། སློབ་དཔོན་ཀླུ་སྒྲུབ་ཀྱི་ཞལ་སྔ་ནས་ཀྱིས་ཀྱང་གསལ་བར་མཛད་ཟིན་པ་མ་ཡིན་ནམ། ཅིའི་ཕྱིར་བདེན་པ་གཉིས་རྣམ་པར་དབྱེ་བ་ཇི་ལྟ་བ་བཞིན་དུ་ཁོང་དུ་ཆུད་པར་བྱ་བའི་ཕྱིར་རབ་ཏུ་བྱེད་པ་འདི་བརྩམས་ཤེ་ན། གང་གི་ཕྱིར། བདེན་པ་གཉིས་པོ་རྣམ་ཕྱེ་ཡང༌། །ཤིང་རྟ་ཆེ་དག་རྨོངས་ཉིད་ན། །གཞན་རྣམས་སྨོས་ཀྱང་ཅི་དགོས་ཏེ། །དེ་བས་བདག་གིས་རྣམ་པར་དབྱེ། །ཞེས་བྱ་བ་སྨོས་སོ། །གཞན་གྱི་དོན་ནི་མངོན་པར་མཐོ་བ་དང་ངེས་པར་ལེགས་པའི་མཚན་ཉིད་དེ། དེ་འབྱུང་བ་དེ་ལ་མཁས་ཞེས་བྱ་བར་ཚིག་རྣམ་པར་སྦྱར་བར་བྱའོ། །བཅོམ་ལྡན་འདས་ཞེས་བྱ་བ་ནི་བདུད་བཞི་བཅོམ་པའི་ཕྱིར་རམ། དབང་ཕྱུག་ལ་སོགས་པའི་ཡོན་ཏན་དང་ལྡན་པའི་ཕྱིར་རོ། །སྐྱེ་བོ་བློ་ཆུང་ངུ་ནི་བློ་མི་གསལ་བའོ། །རང་གི་སྡེ་བ་ནི་སློབ་དཔོན་ཆོས་སྐྱོང་ལ་སོགས་
པའོ། །དེ་དག་གི་ཁ་ན་ལས་པས་འཇུག་པ་གང་དག་སློབ་དཔོན་ཆོས་སྐྱོང་ལ་སོགས་པའི་ལྟ་བའི་རྗེས་སུ་འབྲང་བས་ཞུགས་པ་དེ་དག་ནི་ཤིན་ཏུ་རྨོངས་པ་ཁོ་ན་ཡིན་པའི་ཕྱིར། གཞན་རྣམས་ལྟ་སྨོས་ཀྱང་ཅི་དགོས་ཞེས་བྱ་བ་སྨོས་སོ། །བདེན་པ་གཉིས་རྣམ་པར་ཕྱེ་བ་དེ་ཉིད་ཀྱིས་དོན་ཅི་ཞིག་ཏུ་འགྱུར་ཞེ་ན། བདེན་གཉིས་རྣམ་དབྱེ་ཤེས་པ་དག །ཐུབ་པའི་བཀའ་ལ་མི་རྨོངས་ཏེ། །དེ་དག་མ་ལུས་ཚོགས་བསགས་ནས། །ཞེས་བྱ་བ་ལ་སོགས་པ་སྨོས་ཏེ། འདིས་ནི་བདེན་པ་གཉིས་རྣམ་པར་དབྱེ་བ་ཤེས་པ་ནི་དགོས་པ་ཡིན་ལ། དགོས་པ་དེ་ཡང་བཅོམ་ལྡན་འདས་ཀྱི་བཀའ་དག་ལ་མི་རྨོངས་ཤིང་མ་རྨོངས་ན། བསོད་ནམས་དང་ཡེ་ཤེས་ཀྱི་ཚོགས་མ་ལུས་པ་ཡོངས་སུ་རྫོགས་པར་འགྱུར་ལ། རྫོགས་པ་དེ་ཡང་བདག་དང་གཞན་གྱི་དོན་ཕུན་སུམ་ཚོགས་པ་རབ་ཀྱི་མཐར་ཕྱིན་པར་འགྱུར་ཏེ། དེ་ནི་སངས་རྒྱས་ཉིད་དུ་འགྱུར་རོ་ཞེས་དེ་སྐད་དུ་སྟོན་ཏེ། དེ་ལས་དགོས་པ་གཞན་མེད་པའི་ཕྱིར། ཕུན་ཚོགས་ཕ་རོལ་འགྲོ་བ་ཉིད། །ཅེས་བྱ་བ་སྨོས་ཏེ། འགྲོ་འམ། མི་འགྲོ་སྙམ་དུ་ཐེ་ཚོམ་ཟ་བའི་རྒྱུ་མེད་པའི་ཕྱིར། འགྲོ་བ་ཉིད་ཅེས་བྱ་བ་སྨོས་སོ། །འདི་ནི་གོ་རིམས་ཁོ་ན་བཞིན་དུ་རྣམ་པར་དགྲོལ་བའི་ཕྱིར། བདེན་པ་གཉིས་རྣམ་པར་དབྱེ་བ་ལ་མཁས་པ་ཞེས་བྱ་བ་ལ་སོགས་པ་སྨོས་སོ། །འགྲོ་ལ་ཕན་པ་དེ་འབྱུང་བ། །དེ་བསྐྱེད་པ་ནི་བྱེད་པ་སྟེ། །དེར་བློ་དང་ལྡན་པའོ། །ཡང་ན་བློ་དེས་འགྲོ་བ་ལ་ཕན་པ་འབྱུང་བ་སྐྱེད་པས་དེ་འགྲོ་བ་ལ་ཕན་པ་འབྱུང་བ་སྐྱེད་པའི་བློ་དང་ལྡན་པའོ་ཞེས་ཚིག་རྣམ་པར་སྦྱར་རོ། །འཇིག་རྟེན་སྨོས་པ་ནི་བདེན་པ་གཉིས་རྣམ་པར་དབྱེ་བ་ལ་མཁས་པའི་ཆེ་བ་ཉིད་བརྗོད་པའི་ཕྱིར་ཏེ། བདེན་པ་གཉིས་རྣམ་པར་དབྱེ་བ་ལ་མཁས་པ་འདི་ལྟ་བུ་ནི། གང་གིས་འཇིག་རྟེན་འཁོར་བའི་སྲིན་བུ་ཡང༌། བདག་དང་གཞན་གྱི་དོན་ཕུན་སུམ་ཚོགས་པའི་ཕ་རོལ་ཏུ་ཕྱིན་པར་འགྱུར་བའོ། །བདག་གི་དོན་ཕུན་སུམ་ཚོགས་པ་ནི་ཡེ་ཤེས་དང་སྤངས་པ་ཕུན་སུམ་ཚོགས་པའི་མཚན་ཉིད་དེ། གཞན་གྱི་དོན་ཕུན་སུམ་ཚོགས་པ་ཡང་དེ་དང་འདྲའོ། །བྱེ་བྲག་ཏུ་བྱར་མེད་པ་ནི་སངས་རྒྱས་ཀྱི་ཐུགས་ཀྱི་རྒྱུད་ལ་མངའ་བའི་བདག་དང་གཞན་གྱི་དོན་ཕུན་སུམ་ཚོགས་པ་བརྗོད་པའི་ཕྱིར་རོ། །ཤིན་ཏུ་ཞེས་བྱ་བ་ནི། བདེན་པ་གཉིས་རྣམ་པར་དབྱེ་བ་ལ་མཁས་པ་ཞེས་བྱ་བ་ལ་སོགས་པ་ཚིག་ལྔ་པོ་
དག་དང་སྦྱར་རོ། །གཞན་ནི་ཞེས་བྱ་བ་ནི། ཉན་ཐོས་ལ་སོགས་པའི་རིགས་ཅན་ཏེ། འགྲོ་བ་ལ་ཕན་པ་འབྱུང་བ་བསྐྱེད་པའི་བློ་དང་ལྡན་པ་དག་ལས་གཞན་ཡིན་པའི་ཕྱིར་རོ། །དེ་ཡང་བདེན་པ་གཉིས་རྣམ་པར་དབྱེ་བ་ལ་མཁས་པ་ཁོ་ནར་གྱུར་ན། བདེ་བར་གཤེགས་པའི་གསུང་རབ་རབ་འབྱམ་དག་ལ་ཤེས་པའི་སྣང་བ་ཐོབ་ནས་བསམ་པ་དང་མཐུན་པ་ཉན་ཐོས་ལ་སོགས་པའི་བྱང་ཆུབ་ཀྱི་མཚན་ཉིད་ཡིད་ལ་བསམས་པ་བཞིན་དུ་ཡོངས་སུ་རྫོགས་པའི་ཕ་རོལ་ཏུ་ཕྱིན་པར་འགྱུར་རོ་ཞེས་བྱ་བར་སྦྱར་རོ། །ངེས་པར་ཞེས་བྱ་བ་ནི་གཉི་ག་དང་ཡང་སྦྱར་བར་བྱའོ། །དེའི་ཕྱིར་འདིས་ནི་གདོན་མི་ཟ་བ་ཁོ་ནར་ཕ་རོལ་ཏུ་ཕྱིན་པར་འགྱུར་ཏེ། འཁྲུལ་པ་ཡིན་པ་སྙམ་དུ་མི་བྱའོ་ཞེས་སྟོན་ཏོ། །དེ་དང་དེར་ཞེས་བྱ་བ་ནི་སྤྱིར་བཏང་བའི་ཚིག་སྟེ། མདོ་སྡེ་མང་བ་ཉིད་དུ་སྟོན་ཏོ། །བདེན་པ་གཉིས་རྣམ་པར་དབྱེ་བའི་དོན་ཀྱང་བྱའོ་ཞེས་སྟོན་པ་ལ། ཇི་ལྟར་སྣང་བ་འདི་ཁོ་ན་ཞེས་བྱ་བ་བསྣན་པ་ནི་རིགས་པ་ཇི་ལྟ་བ་བཞིན་དུ་མ་ཡིན་ནོ་ཞེས་བསྟན་པའི་ཕྱིར་རོ། །ཀུན་རྫོབ་སྨོས་པ་ནི་ཀུན་རྫོབ་ཀྱི་བདེན་པ་སྟེ་ཚིག་ཐ་མ་ཁོང་ནས་དབྱུང་བའི་ཕྱིར་རོ། །གཞན་ནི་ཞེས་བྱ་བ་ནི། ཇི་ལྟར་སྣང་བ་ལས་གཞན་པའོ། །དེའི་ཕྱིར་འདིས་ནི་རིགས་པ་ཇི་ལྟ་བ་བཞིན་ཉིད་ནི་དོན་དམ་པའི་བདེན་པའོ་ཞེས་སྟོན་ཏོ། །ནི་ཞེས་བྱ་བ་ནི་བསྣན་པའི་དོན་ཏེ། །གཞན་ཁོ་ན་ཞེས་བྱ་བའམ་ཅིག་ཤོས་ཁོ་ན་ཞེས་བྱ་བར་བསྣན་པར་བྱའོ། །འདི་རྣམ་པར་དགྲོལ་བའི་ཕྱིར། ཇི་ལྟར་བ་ལང་རྫི་མོ་ཞེས་བྱ་བ་སྨོས་ཏེ། བ་ལང་རྫི་མོ་སྨོས་པ་ནི་བློ་མ་བྱང་བའི་འཇིག་རྟེན་བསྟན་པའི་ཕྱིར་རོ། །སོགས་པ་སྨོས་པས་ནི་བློ་བྱང་བ་རྣམས་གཟུང་སྟེ། ཇི་ལྟར་དེ་དག་གི་མཐོང་བ་བུམ་པ་ལ་སོགས་པའི་རྣམ་པ་དང་མཐུན་པར་ཞགས་པ་ཡིན་ནོ་ཞེས་བྱ་བ་ལྷག་མ་སྟེ། དེ་བཞིན་དུ་ཀུན་རྫོབ་ཏུ་བུམ་པ་ལ་སོགས་པ་བདེན་པར་རྣམ་པར་གནས་ཀྱི་དེ་ཁོ་ན་ཉིད་དུ་ནི་མ་ཡིན་ཏེ། རིགས་པས་དཔྱད་ན་བུམ་པར་མི་རུང་ངོ་ཞེས་བྱ་བའི་ཐ་ཚིག་གོ །ཇི་ལྟར་མཐོང་བ་བཞིན་དུ་རྣམ་པར་གནས་པ་ཇི་ལྟ་བུ་ཞེ་ན། མཐོང་བ་དང་མཐུན་པར་དངོས་པོའི་དོན་ངེས་པར་འཛིན་པའི་ཕྱིར་རོ་ཞེས་བྱ་བ་སྨོས་ཏེ། དེའི་ཕྱིར་འདིས་ནི་བྱིས་པ་དང༌། མཁས་པ་དག་བུམ་པ་ལ་སོགས་པ་གང་ལ་བློ་མཐུན་པ་དེ་ནི་ཡང་དག་པའི་ཀུན་རྫོབ་ཀྱི་བདེན་པ་ཡིན་ནོ་ཞེས་བསྟན་པར་འགྱུར་རོ། །མཐོང་བ་ནི་རྣམ་པ་གཉིས་ཏེ་ཞེས་བྱ་བ་ལ་སོགས་པས་ནི། ཡང་དག་པ་དང་
ཡང་དག་པ་མ་ཡིན་པ་ལ་སོགས་པའི་བྱེ་བྲག་གི་ཚུལ་ཉིད་ཀྱིས་ཀུན་རྫོབ་ཀྱི་བདེན་པ་བསྡུས་པར་བསྟན་ཏོ། །ནི་ཞེས་བྱ་བའི་སྒྲ་ནི་བསྣན་པའི་དོན་ཏོ་ཞེས་བྱ་བ་ནི་སྔར་བཤད་པ་ཉིད་དོ། །ཅིའི་ཕྱིར་རིགས་པ་ལ་དོན་དམ་པ་ཞེས་བྱ་ཞེ་ན། གང་གི་ཕྱིར། སླུ་བ་མེད་པས་རིགས་པ་ནི། །དོན་དམ་ཡིན་ཏེ་ཞེས་བྱ་བ་སྨོས་སོ། །མི་སླུ་བ་དེ་ཉིད་ཇི་ལྟ་བུ་ཞེ་ན། རིགས་པའི་སྟོབས་ཀྱིས་དོན་ལ་ངེས་པ་ནི་སླུ་བར་མི་འགྱུར་ཏེ། དེའི་ཕྱིར་ཚུལ་གསུམ་པའི་རྟགས་ཀྱི་བསྐྱེད་པའི་རྟོགས་པ་གང་ཡིན་པ་དེ་ནི་དམ་པ་ཡང་ཡིན་ལ། དོན་ཀྱང་ཡིན་པས་དོན་དམ་པའོ་ཞེས་བྱ་བ་སྨོས་སོ། །རིགས་པའི་སྟོབས་ནི་དེའི་བདག་ཉིད་དང་དེ་ལས་བྱུང་བའི་མཚན་ཉིད་ཀྱི་འབྲེལ་བ་དང་ལྡན་པའི་དངོས་པོའི་སྟོབས་སོ། །སླུ་བར་མི་འགྱུར་ཞེས་བྱ་བ་ནི། གང་གི་ཕྱིར་འབྲས་བུས་རྒྱུ་ལ་འཁྲུལ་བར་མི་འགྱུར་བ་སྟེ། དེའི་འབྲས་བུ་མ་ཡིན་པ་ཉིད་དུ་ཐལ་བར་འགྱུར་བའི་ཕྱིར་རོ། །ངོ་བོ་ཉིད་ཀྱང་ངོ་བོ་ཉིད་ལ་འཁྲུལ་བར་མི་འགྱུར་ཏེ། དེའི་ངོ་བོ་ཉིད་མ་ཡིན་པར་ཐལ་བར་འགྱུར་བའི་ཕྱིར་རོ། །དམ་པ་ཡང་ཡིན་ཞེས་བྱ་བ་ནི་མི་སླུ་བའི་ཕྱིར་རམ། དོན་དང་འབྲེལ་བའི་ཕྱིར་རོ། །མངོན་སུམ་གྱིས་གཏན་ལ་ཕབ་པའི་དོན་ནི། །མངོན་སུམ་དང་བྲེས་གཞལ་བའི་འབྲུ་ནི་བྲེ་ཞེས་བྱ་བ་དང་འདྲ་བར། དོན་དམ་པས་གཏན་ལ་ཕབ་པའི་དོན། སྐྱེ་བ་མེད་པ་ལ་སོགས་པ་ཡང་དོན་དམ་པ་ཞེས་བརྗོད་དོ། །གལ་ཏེ་ཚུལ་གསུམ་པའི་རྟགས་ཀྱིས་བསྐྱེད་པའི་ཤེས་པ་དོན་དམ་པ་ཡིན་ན། དེ་ལྟ་ན་ནི་འདི་ན་དུ་བ་ཡོད་པའི་ཕྱིར་མེ་ཡོད་དོ་ཞེས་བྱ་བའི་ཤེས་པ་ཡང་དོན་དམ་པར་འགྱུར་ཏེ། དེ་ལྟ་ན་དེས་གཏན་ལ་ཕབ་པའི་དོན་ཀྱང་དོན་དམ་པར་འགྱུར་རོ་ཞེ་ན། དེ་ལྟར་ནི་ཤེས་པར་མི་བྱ་སྟེ། དུ་བ་ལ་སོགས་པ་ནི་གཟོད་མ་ནས་མ་སྐྱེས་པས་མེད་པའི་ཕྱིར་དེས་བསྐྱེད་པའི་ཤེས་པའམ། དེས་གཞལ་པའི་དོན་ཡོད་པར་ག་ལ་འགྱུར། ཇི་སྟེ་ཇི་ལྟར་མཐོང་བ་ཉིད་ཀྱི་དུ་བ་ལ་སོགས་པའི་རྟགས་ཀྱིས་མེ་ལ་སོགས་པའི་དོན་སྒྲུབ་ན། དེ་ལྟ་ན་ནི་འདོད་པ་ཡིན་པའི་ཕྱིར་དེ་ཉེས་པ་མེད་དེ། འདི་ལྟར་མེ་ལ་སོགས་པ་མེད་པ་གཅོད་པར་སྒྲུབ་པ་དེ་ནི་དོན་དམ་པ་དང་མཐུན་པའི་ཕྱིར། དོན་དམ་པ་ཉིད་ཅེས་བྱ་བར་འདོད་པ་ཉིད་དེ། དོན་དམ་པ་ནི་རྟོག་པའི་དྲ་བ་མ་ལུས་པ་རྣམ་པར་གཅོད་པའི་མཚན་ཉིད་ཡིན་པའི་ཕྱིར་རོ། །ཚིག་ལེའུར་
བྱས་པ་ལས་ནི་ཀུན་རྫོབ་ཅེས་བརྗོད་པ་མ་ཡིན་ནམ། འབྲེལ་བ་ལས་ཀུན་རྫོབ་ཀྱི་བདེན་པ་ཞེས་ཅིའི་ཕྱིར་བརྗོད་ཅེ་ན། ཚིག་ཐ་མ་ཁོང་ནས་དབྱུང་བའི་ཕྱིར་རོ་ཞེས་བྱ་བ་སྨོས་སོ། །གལ་ཏེ་རིགས་པས་རུང་བ་མ་ཡིན་ན་ཇི་ལྟར་བདེན་པ་ཞེས་བྱ་ཞེ་ན། ཇི་ལྟར་སྣང་བ་དེ་ཉིད་བདེན། །ཞེས་བྱ་བ་སྨོས་སོ། །དེ་ལྟ་ན་བུམ་པ་ལ་སོགས་པ་དང༌། ཟླ་བ་གཉིས་པ་ལ་སོགས་པ་བྱེ་བྲག་ཅི་ཡང་མེད་པར་འགྱུར་རོ་ཞེ་ན། ཟླ་བ་གཉིས་ལ་སོགས་པ་ཡང་ཞེས་བྱ་བ་ལ་སོགས་པ་སྨོས་སོ། །ཡང་ཞེས་བྱ་བའི་སྒྲས་ནི་བུམ་པ་ལ་སོགས་པ་འབའ་ཞིག་མ་ཡིན་པའོ། །འོ་ན་འཇིག་རྟེན་པ་དག་བུམ་པ་ལ་སོགས་པ་དང༌། ཟླ་བ་གཉིས་པ་ལ་སོགས་པ་ལ་བདེན་པ་དང༌། བདེན་པ་མ་ཡིན་པའི་ཐ་སྙད་ཇི་ལྟ་བུར་འདོགས་ཤེ་ན། མ་རིག་པས་ལྡོངས་པའི་འཇིག་རྟེན་པ་རྣམས་བུམ་པ་ལ་སོགས་པ་བཞིན་དུ། ཟླ་བ་གཉིས་པ་ལ་སོགས་པ་བདེན་པ་ཉིད་དུ། དེ་ལྟར་ཁས་མི་ལེན་པས་སོ། །ཚིག་དེ་དག་གིས་དོན་དམ་པ་དང་མཐུན་པའི་དོན་དམ་པ་གང་ཡིན་པ་དེ་ནི། དེའི་ས་བོན་ཙམ་ཞིག་སྨོས་པ་བྱས་ནས། ཞིབ་ཏུ་ནི་འོག་ནས་རྣམ་པར་འབྱེད་པར་བྱེད་དོ། །ད་ནི་རྣམ་གྲངས་མ་ཡིན་པའི་དོན་དམ་པ་གང་ཡིན་པ་དེ། ཇི་ལྟར་སྣང་བའི་དངོས་པོར་ནི། །རྣམ་པར་གནས་པར་མི་རུང་སྟེ། །ཤེས་པའི་དངོས་པོ་ཐམས་ཅད་ལ། །ཇི་ལྟ་བུར་ཡང་སྣང་མི་འགྱུར། །ཞེས་བྱ་བ་སྨོས་པ་ལ་སོགས་པ་མདོ་ཙམ་ཞིག་བྱེད་དོ། ཞིབ་ཏུ་ནི་འོག་ནས་གསལ་བར་བྱེད་དོ། །ཤེས་པའི་དངོས་པོ་ཐམས་ཅད་ནི། །ཤེས་པའི་བདག་ཉིད་ཐམས་ཅད་དོ། །ཐམས་ཅད་སྨོས་པ་ནི་ཐམས་ཅད་མཁྱེན་པ་དང༌། ཐམས་ཅད་མཁྱེན་པ་མ་ཡིན་པ་བསྡུ་བའི་ཕྱིར་ཏེ། དེ་ལྟར་ན་དྲུག་པར་བསྡུའོ། །གཅིག་ཏུ་ཐམས་ཅད་སྨོས་པ་ནི་མཐའ་དག་གི་དོན་ཏེ་བྱེ་བག་གི་ཚིག་སྡུད་པའོ། །ཡང་ཞེས་བྱ་བའི་སྒྲ་ནི་ཐམས་ཅད་མཁྱེན་པ་མ་ཡིན་པའི་ཡང་ངོ༌། །ཤེས་པའི་དངོས་པོ་ཐམས་ཅད་ལ། །ཇི་ལྟ་བུར་ཡང་མི་སྣང་འགྱུར། །ཞེས་བྱ་བ་འདི་ལུང་དང་སྦྱར་བར་བྱ་བའི་ཕྱིར། དེ་ཉིད་ཀྱི་ཕྱིར་མདོ་སྡེ་ལས་ཞེས་བྱ་བ་སྨོས་སོ། །འགའ་ཡང་ཞེས་བྱ་བ་ནི་དངོས་པོ་དང་དངོས་པོ་མེད་པ་ལ་སོགས་པའི་ངོ་བོ་ལ་བྱའོ། །མཐོང་བ་མེད་པ་ཞེས་བྱ་བ་ནི་མེད་པར་དགག་པ་ཡིན་ནོ། །རྟེན་ཅིང་འབྲེལ་པར་འབྱུང་བ་གཟུང་བ་དང་འཛིན་པ་དང་བྲལ་བ་སོ་སོ་རང་གིས་རིག་
པའི་ཤེས་པ་ནི་ཡོད་པ་ཁོ་ན་ཡིན་ཏེ། འགའ་ཡང་མཐོང་བ་མེད་པ་ནི་ཞེས་དེ་སྐད་གང་གསུངས་བ་དེ་ནི། ཀུན་བརྟགས་པའི་ངོ་བོ་ཉིད་ལ་དགོངས་ནས་གསུངས་པ་ཡིན་ནོ་ཞེས་ཟེར་བ་ལ། གལ་ཏེ་བརྟགས་པའི་ངོ་བོ་ཉིད། །འགའ་ཡང་མཐོང་བ་མེད་ཅེ་ན། །ཞེས་བྱ་བ་སྨོས་ཏེ། དེ་ནི་རྟག་ཏུ་མེད་པ་ཉིད་ཡིན་པས་དེ་སྣང་བའི་ལམ་དུ་མི་འགྱུར་རོ། །དེ་ནི་དེ་ལྟ་བུ་ཡིན་ནོ་ཞེས་བྱ་བ་ནི་བརྟགས་པའི་ངོ་བོ་ཉིད་ཀྱི་དབང་དུ་མཛད་ནས་གསུངས་པའོ། །དེ་ལྟ་མ་ཡིན་ན་ཞེས་བྱ་བ་ནི་ངོ་བོ་ཉིད་མ་ལུས་ཕར་ཡོངས་སུ་བསྡུ་ན་ནི། འགའ་ཡང་ཞེས་ཅིའི་ཕྱིར་གསུངས། ཅིའི་ཕྱིར་ཞེས་བྱ་བ་ནི་སྤང་བ་ལ་བྱ་སྟེ། །སྤྱིར་བྱ་བ་ཡིན་ན་ནི། ངོ་བོ་ཉིད་མི་མཐོང་བ་ཞེས་བྱ་བ་ཁོ་ནར་གསུང་བར་འགྱུར་ཏེ། དེ་ལྟ་ན་བཤད་པ་ཡོངས་སུ་རྫོགས་པར་འགྱུར་གྱི། དེ་ལྟ་མ་ཡིན་ན་སྐབས་དང་མཐུན་པར་མི་འགྱུར་རོ། །དེ་མེད་པར་ཞེས་བྱ་བ་ནི་གཉིས་མེད་པར་རོ། །དེ་ལྟ་མ་ཡིན་ན་ཞེས་བྱ་བ་ནི། གལ་ཏེ་དབེན་པའི་ངོ་བོར་རིག་པ་མི་འབྱུང་ན་ཞེས་བྱ་བའི་ཐ་ཚིག་གོ །མི་རིགས་པའི་ཕྱིར་རོ་ཞེས་བྱ་བ་ནི་གཉིས་མེད་པར་ཤེས་པ་ཞེས་བྱ་བ་ལྷག་མ་སྟེ། འདིས་ནི་ཇི་ལྟར་བུམ་པ་ལ་སོགས་པས་དབེན་པའི་ངོ་བོའི་ས་ཞིག་ཁོང་དུ་ཆུད་པར་དེ་ན་བུམ་པ་མེད་པར་མི་ཤེས་པ་དེ་བཞིན་དུ་བསྟན་ཏོ། །གཉིས་ཀྱིས་དབེན་པའི་ངོ་བོའི་བདག་ཤེས་པ་ཡོད་དོ་ཞེ་ན། དེའི་ཕྱིར། ཤེས་པ་ནི་བདག་གིས་བདག་ཤེས་པ་མ་ཡིན་ཏེ། རང་སྣང་བས་སྟོང་པའི་ཕྱིར་ཏེ་ཞེས་བྱ་བ་ལ་སོགས་པ་སྨོས་སོ། །འདི་ནི་སྦྱོར་བ་གཙོ་བོ་སྨོས་པའི་ཚིག་ཡིན་གྱི། འདི་ཉིད་སྒྲུབ་པའི་སྦྱོར་བ་ནི་མ་ཡིན་ཏེ། གལ་ཏེ་ཡིན་ན་ནི་དེའི་ཚེ་ཤེས་པ་གཞན་བཞིན་ནོ་ཞེས་བྱ་བའི་དཔེ་ནི་བསྒྲུབ་པར་བྱ་བ་དང་མི་ལྡན་པར་འགྱུར་ཏེ། ཕ་རོལ་གྱི་ཤེས་པ་གཞན་ནི་བདག་ཤེས་པ་ཉིད་དོ། །འདིར་སྦྱོར་བ་ནི་འདི་ལྟ་བུ་ཡིན་ཏེ། གང་དང་གང་སྣང་བས་སྟོང་པ་དེ་དང་དེ་མི་ཤེས་ཏེ། དཔེར་ན་ཤེས་པ་གཞན་མི་ཤེས་པ་བཞིན་ཏེ། དེ་བཞིན་དུ་བསྒྲུབ་པར་བྱ་བ་ཉིད་དུ་བརྗོད་པར་འདོད་པའི་ཤེས་པ་ནི་རང་སྣང་བས་སྟོང་པ་ཡིན་ནོ། །གཏན་ཚིགས་འདི་མ་གྲུབ་པ་ཡང་མ་ཡིན་ཏེ། དེའི་ཕྱིར། རང་སྣང་བར་ཁས་མི་ལེན་ན་ནི། ཐ་དད་པར་ཐལ་བར་འགྱུར་ཏེ། སྔོན་པོ་དང་དེ་ཤེས་པ་བཞིན་ནོ་ཞེས་བྱ་བ་སྨོས་ཏེ། དེ་ནི་འདི་སྐད་དུ་དཔེར་ན་སྔོན་པོ་དང༌།
དེར་སྣང་བ་སྔོན་པོ་ཤེས་པ་ནི་ཐ་དད་དེ། གང་གི་ཕྱིར་སྔོན་པོ་ཉིད་སྔོན་པོར་སྣང་བ་མ་ཡིན་པ་དེ་བཞིན་དུ། ཤེས་པ་དང་ཤེས་པའི་བདག་ཉིད་དུ་སྣང་བ་ཐ་དད་པར་འགྱུར་རོ། །དེ་ལྟར་ནི་མི་འདོད་དོ། །ཤེས་པ་གཞན་གྱིས་ཤེས་པ་མྱོང་བར་བརྟགས་ན་ནི་ཐུག་པ་མེད་པར་འགྱུར་བའི་ཕྱིར་རོ། །དེ་ལྟ་བས་ན་གཏན་ཚིགས་འདི་མ་གྲུབ་པ་མ་ཡིན་ནོ་ཞེས་བསྟན་པར་འགྱུར་རོ། །གལ་ཏེ་རིག་པའི་ངོ་བོ་ཉིད་ཡིན་པའི་ཕྱིར་བདག་ཤེས་པ་ཡང་ཡིན་ལ། རང་གི་རྣམ་པས་སྟོང་པ་ཡང་ཡིན་ཏེ་འདི་གཉིས་ལ་འགལ་པ་ཅི་ཞིག་ཡོད། དེ་བས་ན་གཏན་ཚིགས་འདི་ནི་མི་མཐུན་པའི་ཕྱོགས་ལས་ལྡོག་པ་ལ་ཐེ་ཚོམ་ཡོད་པ་ཡིན་ནོ་ཞེ་ན། རིག་པའི་ངོ་བོ་ཉིད་ཡིན་པའི་ཕྱིར་ཡང་མ་ཡིན་ཏེ་ཞེས་བྱ་བ་སྨོས་ཏེ། བདག་ཤེས་པར་ཞེས་བྱ་བ་བསྙེགས་སོ། །དེ་ཅིའི་ཕྱིར་ཞེ་ན། ཧ་ཅང་ཐལ་བའི་ཕྱིར་རོ། །དེ་ལྟ་ན་ནི་ཤེས་པ་ཐམས་ཅད་ཀྱང་ཐམས་ཅད་རིག་པ་པོར་འགྱུར་ཏེ། ཤེས་པ་གང་ཡང་དངོས་པོ་ཅི་ཡང་མི་ཤེས་པ་མེད་པའི་ངོ་བོ་ཉིད་དུ་འགྱུར་རོ། །གལ་ཏེ་སྔོན་པོ་ཤེས་པ་ནི་སེར་པོ་ཤེས་པའི་རིག་པའི་ངོ་བོ་ཉིད་མ་ཡིན་ནོ་ཞེ་ན། རིག་པའི་ངོ་བོ་ཉིད་ཡིན་པའི་ཕྱིར་མི་རུང་སྟེ། ཡུལ་མྱོང་བ་ན་འདི་ནི་སྔོན་པོ་ཤེས་པ་ཉིད་ཡིན་གྱི། འདི་སེར་པོ་ཤེས་པ་ནི་མ་ཡིན་ནོ་ཞེས་བྱ་བའི་རྣམ་པར་དབྱེ་བ་མེད་པའི་ཕྱིར་རོ། །གལ་ཏེ་རང་རིག་པའི་ངོ་བོ་ཡིན་པས། བདག་རིག་ཅེས་བྱ་བར་བསྙེགས་ཏེ། དེའི་ཕྱིར་རྒྱུ་དེས་ཧ་ཅང་ཐལ་བར་མི་འགྱུར་རོ་ཞེ་ན། དེ་ཡང་མི་རུང་སྟེ་དེ་ནི་མི་རིགས་སོ་ཞེས་བྱ་བ་ལྷག་མའོ། །ཅིའི་ཕྱིར་ཞེ་ན། ཉེ་བའི་རྒྱུ་མེད་པའི་ཕྱིར་རོ། །དེ་ནི་འདི་སྐད་དུ་འདི་ནི་རང་རིག་པའི་ངོ་བོ་ཡིན་གྱི། འདི་གཞན་རིག་པའི་ངོ་བོ་ནི་མ་ཡིན་ནོ་ཞེས་འདི་ལ་ཉེ་བའི་རྒྱུ་ཅི་ཞིག་ཡོད་དེ། གང་གིས་ན་དེ་སྐད་ཅེས་སྨྲ་ཞེས་བྱ་བར་བསྟན་པར་འགྱུར་རོ། །དེ་ལྟ་མ་ཡིན་ཏེ། ཉེ་བའི་རྒྱུ་མེད་པར་ཡིན་ན་ནི་ཧ་ཅང་ཐལ་བར་སྔ་མ་དེ་ཉིད་དུ་འགྱུར་རོ། །ཇི་སྟེ་རྒྱུ་ཡོད་ལ་རྒྱུ་དེ་ཡང་དེའི་རྣམ་པ་ལས་གཞན་མ་ཡིན་ན་ནི། དེ་ལྟ་ན་ཡང་རང་སྣང་བར་ཁས་ལེན་ན་ནི་ཐ་དད་པར་འགྱུར་རོ་ཞེས་སྐྱོན་སྔར་བསྟན་ཟིན་ཏོ། །མི་རུང་སྟེ་ལན་བཏབ་ཟིན་པའི་ཕྱིར་རམ་ཞེས་བྱ་བས་ནི་འདི་སྐད་དུ། གལ་ཏེ་རིག་པའི་ངོ་བོ་ཉིད་ནི་རང་གི་རྒྱུ་ལས་སྐྱེས་པ་ཡིན་ནོ་ཞེ་ན། དེ་ལ་ཁོ་བོས་རིག་པའི་ངོ་བོ་ཉིད་ཡིན་པའི་ཕྱིར་ཡང་མ་ཡིན་ཏེ། ཧ་ཅང་ཐལ་བར་
འགྱུར་བའི་ཕྱིར་རོ་ཞེས་བྱ་བས་ལན་བཏབ་ཟིན་ཏོ། །ཞེས་བྱ་བར་བསྟན་པ་ཡིན་ནོ། །ཇི་སྟེ་རིག་པའི་ངོ་བོ་ཉིད་ནི་རང་གི་རྒྱུ་ལས་སྐྱེས་པ་ཡིན་ནོ་ཞེ་ན། ཁོ་བོས་དེ་ལ་ཡང་རང་རིག་པའི་ངོ་བོ་ཡིན་པས་དེའི་ཕྱིར་ཧ་ཅང་ཐལ་བར་མི་འགྱུར་རོ་ཞེ་ན་ཡང་མི་རུང་སྟེ། ཉེ་བའི་རྒྱུ་མེད་པའི་ཕྱིར་རོ། །དེ་ལྟ་མ་ཡིན་ན་ཧ་ཅང་ཐལ་བ་ཉིད་དུ་འགྱུར་རོ་ཞེས་བྱ་བས་ལན་བཏབ་ཟིན་ཏེ་རྣམ་པ་གཞན་ནི་མི་སྲིད་དོ། །ཅིའི་ཕྱིར་མི་སྲིད་དེ། འདི་ལྟར་གང་གི་ཕྱིར་འདི་ནི་བདག་རིག་པ་ཡིན་གྱི་འདི་གཞན་རིག་པ་ནི་མ་ཡིན་ནོ་ཞེས་བྱ་བ་དེ་ལྟ་བུའི་ངོ་བོ་ཉིད་ཅིག་ཤེས་པ་དེ་ལ་ཡོད་མོད་ཀྱི། དེ་ནི་དཔྱད་པར་མི་ནུས་སོ་ཞེ་ན། གལ་ཏེ་དེ་ལྟར་དཔྱད་དུ་མེད་པས་འདི་ནི་བདག་གིས་བདག་རིག་པ་ཡིན་གྱི། གཞན་རིག་པ་ནི་མ་ཡིན་ནོ་ཞེས་དེ་ལྟར་རྣམ་པར་འཇོག་ན། ཇི་སྐད་བརྗོད་པར་བྱ། བདག་རིག་པ་ལེགས་པར་གནས་པ་ཡིན་ཏེ། དེའི་ཕྱིར་འདི་ནི་གྱི་ནའོ། །ཤེས་པ་དེའི་ངོ་བོ་ཉིད་ནི་འདི་འདྲ་སྟེ། རང་གི་རྒྱུ་ལས་སྐྱེས་ཞེས་བྱ་བ་དེ་ལ་ཚད་མ་ཅི་ཡང་མེད་པ་དེའི་ཕྱིར་མི་སླུ་བའི་ཚད་མ་མེད་པའི་ཕྱིར་ཏེ་ཞེས་བྱ་བ་སྨོས་སོ། །ཚད་མ་མེད་ཀྱང་ཤེས་པ་དེ་ལྟ་བུ་འབྱུང་བ་མི་རིགས་པར་བརྗོད་པའི་ཕྱིར་སེམས་མི་མཐུན་པ་གཞན་རྣམས་ནི་ཞེས་བྱ་བ་ལ་སོགས་པ་སྨོས་སོ། །སེམས་མི་མཐུན་པ་ཞེས་བྱ་བ་ནི་གཞུང་ལུགས་ཐ་དད་པ་གང་ལ་གནས་པ་རྣམས་སོ། །རང་གི་ཚུལ་བརྗོད་པ་ནི་རང་གི་གྲུབ་པའི་མཐའ་བརྗོད་པའོ། རྣམ་པ་མེད་པར་སྨྲ་བ་ཞེས་བྱ་བ་ལ་སོགས་པ་ནི་འདིར་སྣོན་སྨྲས་པའོ། །དེ་སྐད་བརྒལ་བ་ཞེས་བྱ་བ་ནི་ཤེས་པ་འདི་ནི་རྣམ་པ་མེད་པ་ཁོ་ན་ཡིན་ལ། དེའི་བདག་ཉིད་ནི་འདི་འདྲ་སྟེ། རང་གི་རྒྱུ་ལས་སྐྱེས་ཤིང་གང་གིས་འདི་ལྟར་འདི་ནི་སྔོན་པོ་རིག་པ་ཡིན་གྱི་སེར་པོ་རིག་པ་ནི་མ་ཡིན་ནོ་ཞེས་བྱ་བར་འགྱུར་རོ། །དེ་བས་ནི་འདིར་གཏན་ཚིགས་ཀྱིས་ཅི་ཞིག་བྱ་ཞེས་བྱ་བའོ། །མཚན་ཉིད་དང་རྣམ་འགྲེལ་བྱེད་པ་སྨོས་པ་ནི་དེ་གཉིས་ཁྱེད་ཀྱི་ནང་ན་རྟོག་གེ་པའི་མཆོག་ཡིན་ནོ། །གཞན་ཡང་རུང་ཞེས་སྨོས་པ་ནི་རིགས་པ་འདིའི་རྗེས་སུ་འབྲང་བ་ཁྱེད་ཡིན་ཏེ། ཅི་བྱར་ཡང་མེད་དོ་ཞེས་བསྟན་པའི་ཕྱིར་ལ་ཡུག་པ་རྐྱང་གི་རིགས་པ་འདི་ལྟ་བུ་རྟོག་གེ་པ་གཞན་དག་ཀྱང་ཁས་མི་ལེན་ཏེ། དེའི་ཕྱིར་དེ་ནི་རིགས་པ་དང་ལྡན་པ་མ་ཡིན་ནོ་ཞེས་བསྟན་པའོ། །གཞན་ཡང་དེའི་ངོ་བོ་ནི་འདི་འདྲ་སྟེ་རང་གི་རྒྱུ་ལས་སྐྱེས་ཞེས་
བྱ་བ་འདི་ལྟ་བུ་ནི་རིགས་པ་མ་ཡིན་ནོ། །དེ་ཅིའི་ཕྱིར་ཞེ་ན། རྒྱུའི་ནུས་པ་བཀག་ཕྱིར་རོ། །འོག་ནས་ཞེས་བྱ་བ་ལྷག་མའོ། །རང་རིག་པ་མི་རིགས་པའི་ཕྱིར་ངོ་བོ་ཉིད་གསུམ་པོ་ཡང་མི་མཐོང་བ་ཡིན་དུ་ཆུག་ཀྱང༌། ངོ་བོ་ཉིད་གསུམ་པོ་དེ་ནི་ཡོད་པ་ཁོ་ན་སྟེ། གང་གི་ཕྱིར་མི་དམིགས་པ་ཙམ་གྱི་ཕྱིར་མེད་དོ་ཞེས་ངེས་པར་བྱར་མི་ནུས་སོ་ཞེས་བརྒྱ་ལ་དེ་སྐད་ཟེར་ན་དེའི་ཕྱིར། ངེས་པར་བྱ་བར་མི་ནུས་ཞེས་བྱ་བར་སྨོས་ཏེ། དེ་དང་སྦྱར་རོ། །གང་གིས་ཤེ་ན། མི་མཐོང་བ་ནི་དེ་ཁོ་ན་མཐོང་བའོ་ཞེས་བྱ་བར་ཆུག་ན་ཡང་ཞེས་བྱ་བ་སྨོས་སོ། །གང་ཞིག་ཅེ་ན། ངོ་བོ་ཉིད་ཐམས་ཅད་ཅེས་བྱ་བ་སྨོས་ཏེ། གཞན་གྱི་དབང་ལ་སོགས་པའི་ངོ་བོ་ཉིད་ཡོད་པར་ཞེས་བྱ་བ་ལྷག་མའོ། །ཅིའི་ཕྱིར་ཞེ་ན། དེ་ཉིད་ཀྱི་ཕྱིར་ཞེས་བྱ་བ་སྨོས་ཏེ། རང་རིག་པ་མི་རིགས་པའི་ཕྱིར་རོ། །ཇི་ག་ཞེས་བྱ་བ་ནི་མི་བཟོད་པ་སྟོན་པའོ། །ཅིའི་ཕྱིར་ངེས་པར་བྱར་མི་ནུས་ཤེ་ན། དེའི་ཕྱིར་འདི་ལྟར། ཡོད་མེད་དངོས་པོ་མཁྱེན་པའོ། །ཀུན་མཁྱེན་པས་ཀྱང་གང་མ་གཟིགས། །དེ་ཡི་དངོས་པོ་ཅི་འདྲ་ཞིག །ཤིན་ཏུ་ཞིབ་པའི་ལྟ་བས་དཔྱོད། །ཅེས་བྱ་བ་སྨོས་སོ། །ཀྱང་ཞེས་བྱ་བའི་སྒྲ་ནི་གཞན་ལྟ་ཞོག་ཅེས་བྱ་བའོ། །ཅི་འདྲ་ཞིག་ཅེས་བྱ་བ་ནི་སྤོང་བའོ། །ཤིན་ཏུ་ཞིབ་པའི་ལྟ་བས་ཞེས་བྱ་བ་ནི་མཆོག་ཏུ་ཕྱས་བྱ་བའི་ཐ་ཚིག་གོ །ཤིན་ཏུ་ཞེས་བྱ་བ་ནི་ཞིབ་པའི་ལྟ་བ་ཞེས་བྱ་བའི་བྱེ་བྲག་གོ །ཡང་ན་དཔྱོད་ཅིག་པའོ། །དེ་ཉིད་ཀྱི་ཕྱིར་ཇི་ལྟར་སྣང་བ་ནི་ཀུན་རྫོབ་ཀྱི་བདེན་པའོ། །དོན་དམ་པའི་བདེན་པ་ནི་སོ་སོ་རང་ལ་ཇི་ལྟར་ཡང་སྣང་བར་མི་འགྱུར་རོ། །དེ་ཉིད་ཀྱི་ཕྱིར་མདོ་ལས་ཀྱང༌། དེ་ལ་ཀུན་རྫོབ་ཀྱི་བདེན་པ་གང་ཞེ་ན། ཇི་སྙེད་འཇིག་རྟེན་གྱི་ཐ་སྙད་གདགས་པ་དང༌། ཡི་གེ་དང་སྐད་དང་བརྡ་བསྟན་པ་དག་གོ །དོན་དམ་པའི་བདེན་པ་ནི་གང་ལ་སེམས་རྒྱུ་བ་ཡང་མེད་ན། ཡི་གེ་རྣམས་ལྟ་སྨོས་ཀྱང་ཅི་དགོས་ཞེས་གསུངས་སོ་ཞེས་བྱ་བ་སྨོས་སོ། །མདོའི་ཚིག་འདི་དག་བཤད་པར་འདོད་ནས་འཇིག་རྟེན་གྱི་ཐ་སྙད་གདགས་པ་ནི་འཇིག་རྟེན་གྱི་འཇུག་པ་སྟེ། ཤེས་པ་དང་ཤེས་བྱའི་མཚན་ཉིད་ཡིན་གྱི་ཞེས་བྱ་བ་ལ་སོགས་པ་སྨོས་སོ། །ཐ་སྙད་གདགས་པ་ཞེས་བྱ་བ་ནི་ལས་སུ་སྒྲུབ་པའོ། །རྗོད་པར་བྱེད་པའི་མཚན་ཉིད་དེ་ནི་ཡི་གེ་དང་སྐད་དང་བརྡ་བསྟན་པ་ཞེས་བྱ་བའི་ཚིག་འོག་མ་འདིས་བརྗོད་པའི་ཕྱིར་རོ། །
རྗོད་པར་བྱེད་པའི་མཚན་ཉིད་དེ་ཡང་འཇིག་རྟེན་གྱི་འཇུག་པ་ཤེས་བྱའི་མཚན་ཉིད་དུ་མ་གཏོགས་སམ་ཞེ་ན། རྗོད་པར་བྱེད་པའི་མཚན་ཉིད་ནི་མ་ཡིན་ནོ་ཞེས་བཤད། དེ་ནི་བདེན་ཏེ་ཤེས་བྱའི་ངོ་བོས་ནི་འདུས་མོད་ཀྱི། རྗོད་པར་བྱེད་པའི་ངོ་བོས་ནི་མ་ཡིན་ཏེ། དེ་ནི་བྱེད་པ་ཡིན་ལ། ལས་ཀྱི་ངོ་བོ་ནི་མ་ཡིན་པས་ཉེས་པ་མེད་དོ། །དེས་ན་ཞེས་བྱ་བ་ནི་ཇི་སྙེད་པ་ཞེས་བྱ་བ་ཚིག་གིས་སོ། །ཡང་ན་དེས་ན་ཞེས་བྱ་བ་ནི་འཇིག་རྟེན་གྱི་ཐ་སྙད་གདགས་པ་འཇིག་རྟེན་གྱི་འཇུག་པ་ཤེས་པ་དང༌། ཤེས་བྱའི་མཚན་ཉིད་ཅེས་བྱ་བ་འདིས་སོ། །ཡང་ཞེས་བྱ་བའི་སྒྲ་ནི་གཞན་གྱི་མི་སྲིད་དོ་སྙམ་པ་གཅད་པ་སྟོན་ཏོ། །ཁོ་ན་ཡིན་ནོ་ཞེས་བྱ་བའི་ཚིག་ནི་མ་ཡིན་ནོ་སྙམ་དུ་དོགས་པར་མི་བྱ་བར་བསྟན་པའི་ཕྱིར་རོ། །དེ་ནི་ཞེས་བྱ་བ་ནི་ཇི་སྙེད་ཅེས་བྱ་བའི་ཚིག་ལ་བྱའོ། །འོག་ཏུ་ཡང་ཞེས་བྱ་བ་ནི་ཡི་གེ་དང་སྐད་དང་བརྡ་བསྟན་པའོ་ཞེས་བྱ་བ་དེར་རོ། །བརྗོད་ཟིན་པའི་དོན་བསྟན་པར་བྱ་བའི་ཕྱིར། དེ་ནི་དེ་ལྟར་རྟོགས་པར་བྱ་ཞེས་བྱ་བ་སྨོས་ཏེ། དེ་ནི་ཞེས་བྱ་བ་ནི་ཤེས་པ་དང་ཤེས་བྱའི་མཚན་ཉིད་ཅེས་བྱ་བ་དང༌། རྗོད་པར་བྱེད་པའི་མཚན་ཉིད་དེ་ཀུན་རྫོབ་ཀྱི་བདེན་པ་ཡིན་ནོ་ཞེས་དེ་ནི་དེ་ལྟར་རྟོགས་པར་བྱའོ། །ཅིའི་ཕྱིར་སྙམ་པ་ལ། དོན་དམ་པའི་བདེན་པ་བསྟན་པ་ལ་སེམས་རྒྱུ་བ་ཡང་མེད་དེ་ཞེས་གསུངས་པའི་ཕྱིར་རོ་ཞེས་བྱ་བ་སྨོས་སོ། །འདིས་ནི་གང་ལ་སེམས་རྒྱུ་བ་ཡང་མེད་པ་ཡིན་གྱི་ཚིག་འབའ་ཞིག་ནི་མ་ཡིན་ཏེ། དེ་ནི་དོན་དམ་པའི་བདེན་པ་ཡིན་ནོ་ཞེས་བརྗོད་པའི་ཕྱིར་ལ། གང་ལ་སེམས་རྒྱུ་བ་དང་ཚིག་ཀྱང་ཡོད་པ་དེ་ནི་ཀུན་རྫོབ་ཀྱི་བདེན་པ་ཡིན་ནོ་ཞེས་བསྟན་པ་ཡིན་ནོ། །དེ་ལྟར་ཤེས་པ་དང་ཤེས་བྱ་འཇུག་པའི་མཚན་ཉིད་ཀུན་རྫོབ་ཀྱི་བདེན་པ་ཡིན་ན། གཟུགས་ལ་སོགས་པ་དང་བདེ་བ་ལ་སོགས་པ་སེམས་ཀྱི་ཡུལ་ཡིན་པར་གྱུར་པ་ཡང༌། གང་གིས་ཀུན་རྫོབ་ཀྱི་བདེན་པ་ཉིད་དུ་མི་འགྱུར་ཞེས་སུ་ཞིག་ཟློག་པར་བྱེད་ཅེས་དེ་སྐད་བསྟན་པ་ཡིན་ཏེ། དེ་ནི་དེ་ལྟར་རྟོགས་པར་བྱའོ། །གང་གི་ཕྱིར། རྗོད་པར་བྱེད་པའི་མཚན་ཉིད་ཁོ་ན་ཀུན་རྫོབ་ཀྱི་བདེན་པ་ཡིན་ན་ཞེས་བྱ་བ་ནི་ཀུན་རྫོབ་ཀྱི་བདེན་པ་ཡིན་པར་ཁས་ལེན་ན་ནི་ཞེས་བྱ་བ་ལྷག་མའོ། །ཡི་གེ་རྒྱུ་བ་ཡང་མེད་ན་ཞེས་གསུངས་པར་འགྱུར་གྱི། སེམས་ཞེས་གསུང་བར་མི་འགྱུར་རོ་ཞེས་བྱ་བ་ནི་སེམས་རྒྱུ་བ་མེད་པ་ལ་
ནི་མི་བྱ་སྟེ། གང་གི་ཕྱིར་སེམས་རྒྱུ་བ་ཀུན་རྫོབ་ཀྱི་བདེན་པ་ཡིན་པར་ཁས་མ་བླངས་པའི་ཕྱིར་རོ། །ཁོ་ན་ཞེས་བྱ་བ་ནི་སེམས་རྒྱུ་བའི་མཚན་ཉིད་ཀུན་རྫོབ་ཀྱི་བདེན་པ་མ་ཡིན་པར་རྣམ་པར་གཅད་པའི་ཕྱིར་རོ། །གལ་ཏེ་ཇི་སྐད་གསུངས་པའི་གོ་རིམས་ཅན་དེ་གཉིས་མི་འདོད་ན་ནི་སེམས་རྒྱུ་བ་ཡང་མེད་ན། ཡི་གེ་རྣམས་ལྟ་སྨོས་ཀྱང་ཅི་དགོས་ཞེས་བྱ་བ་བརྗོད་པར་བྱ་བའི་གོ་རིམས་ཅིའི་ཕྱིར་མཛད་ཅེས་བྱ་བས་ནི་སྣོན་བསྟན་ཏོ། །གོ་རིམས་དེ་གང་ཡིན་ཞེ་ན། སེམས་རྒྱུ་བ་ཡང་མེད་ན། ཡི་གེ་རྣམས་ལྟ་སྨོས་ཀྱང་ཅི་དགོས་ཞེས་བྱ་བ་སྨོས་སོ། །ཅིའི་ཕྱིར་གོ་རིམས་མི་རུང་ཞེ་ན། །གལ་ཏེ་ཇི་སྐད་གསུངས་པ་ཞེས་བྱ་བ་སྨོས་ཏེ། ཇི་སྐད་གསུངས་པ་ནི་གཉིས་ཏེ། སེམས་རྒྱུ་བའི་མཚན་ཉིད་དང༌། རྗོད་པར་བྱེད་པའི་མཚན་ཉིད་དོ། །ཅི་འདྲ་བ་ཞིག་ཅེ་ན། གོ་རིམས་ཅན་ཞེས་བྱ་བ་སྨོས་ཏེ། གོ་རིམས་ཅན་ཞེས་བྱ་བ་ནི་སེམས་རྒྱུ་བ་དེ་རྗོད་པར་བྱེད་པའི་སྔོན་དུ་འགྲོ་བ་ཡིན་པའི་ཕྱིར་རོ། །མི་འདོད་ནི་ཞེས་བྱ་བ་ཀུན་རྫོབ་ཀྱི་བདེན་པ་ཉིད་དུ་ཞེས་བྱ་བ་ལྷག་མའོ། །གལ་ཏེ་འདོད་པར་གྱུར་ན་ནི་དེའི་རྒྱུ་མེད་ན་འབྲས་བུ་མེད་པས་སེམས་རྒྱུ་བ་ཡང་མེད་ན། ཡི་གེ་རྣམས་ལྟ་སྨོས་ཀྱང་ཅི་དགོས་ཞེས་བྱ་བའི་གོ་རིམས་རུང་བར་འགྱུར་རོ། །རྗོད་པར་བྱེད་པ་ནི་ཀུན་རྫོབ་ཀྱི་བདེན་པ་ཉིད་དེ། དེ་ཀུན་ནས་སློང་བ་ཡིན་པས་རྣམ་པར་རྟོག་པའི་ཤེས་པ་ཡང་ངོ༌། །རྣམ་པར་མི་རྟོག་པའི་ཤེས་པ་དེ་ནི་ཀུན་རྫོབ་ཀྱི་བདེན་པ་མ་ཡིན་པ་ཁོ་ན་ཡིན་པས། དེས་ཡོངས་སུ་གཅད་པའི་བདེ་བ་ལ་སོགས་པ་ཀུན་རྫོབ་ཀྱི་བདེན་པར་ཇི་ལྟར་འགྱུར་ཏེ། དེ་ལྟར་ན་སེམས་རྒྱུ་བ་མེད་པ་ཞེས་བྱ་བ་འདིར་རྣམ་པར་རྟོག་པའི་ཤེས་པ་ཁོ་ན་ཡོངས་སུ་གཟུང་ངོ་ཞེས་བརྒྱ་ཞིག་ལ་དེ་སྐད་ཟེར་དུ་འོང་བས། རྣམ་པར་རྟོག་པའི་ཤེས་པ་ཉིད་ཡིན་པར་ཡོངས་སུ་གཟུང་ན་ནི། སེམས་རྒྱུ་བ་ཡང་མེད་ན་ཞེས་བྱ་བ་འདིར། རྣམ་པར་རྟོག་པ་རྒྱུ་བ་ཡང་མེད་ན་ཞེས་གསུང་བར་འགྱུར་ཏེ་ཞེས་བྱ་བ་སྨོས་སོ། །ཅིའི་ཕྱིར་ཞེ་ན། ཐེ་ཚོམ་མེད་པའི་ཕྱིར་རོ། །སེམས་ཡིན་པར་གཟུང་ན་ནི་ཅི་རྣམ་པར་རྟོག་པའི་ཤེས་པ་ཡོངས་སུ་གཟུང་ངམ། འོན་ཏེ་སེམས་ཙམ་ཁོ་ན་ཡིན་ཞིག་གུ་སྙམ་དུ་ཐེ་ཚོམ་ཟ་བར་འགྱུར་རོ། །གལ་ཏེ་སེམས་སྨོས་པ་སྤྱིའི་སྒྲ་ཡིན་ཡང་རྣམ་པར་རྟོག་པའི་ཤེས་པ་ཡོངས་སུ་གཟུང་བར་འགྱུར་རོ་ཞེ་ན། འདི་ལ་ངེས་པར་བྱེད་
པའི་ཚད་མ་ནི་མེད་དོ་ཞེས་བྱ་བ་སྨོས་སོ། །འདི་ལ་ཞེས་བྱ་བ་ནི་སེམས་རྒྱུད་མེད་ཅེས་བྱ་བ་འདི་ལའོ། །གལ་ཏེ་རྣམ་པར་རྟོག་པ་ཉིད་ཡོངས་སུ་གཟུང་གི །སེམས་ཙམ་ནི་མ་ཡིན་ནོ་ཞེས་བྱ་བ་འདི་ལ། སེམས་ཀྱི་སྒྲ་ནི་སྤྱིའི་སྒྲ་ཡིན་མོད་ཀྱི། བྱེ་བྲག་ཏུ་ནི་རྣམ་པར་རྟོག་པ་ལ་གནས་པར་འགྱུར་ཞེ་ན། སྤྱིའི་སྒྲ་ཡང་དོན་དང་སྐབས་ལ་སོགས་པ་མེད་པར་བྱེ་བྲག་ཏུ་གཞག་པར་མི་ནུས་སོ་ཞེས་བྱ་བ་སྨོས་ཏེ། སོགས་པ་སྨོས་པ་ནི་ལྷན་ཅིག་རྒྱུ་བ་ལ་སོགས་པ་ཡོངས་སུ་གཟུང་ངོ༌། །གཉིས་ནི་སེམས་རྒྱུ་བ་ཡང་མེད་ན་ཡི་གེ་རྣམས་ལྟ་སྨོས་ཀྱང་ཅི་དགོས་ཞེས་བྱ་བའོ། །ཅིའི་ཕྱིར་གཉིས་བརྗོད་པར་མི་བྱ་ཞེ་ན། རྗོད་པར་བྱེད་པའི་སྤྱི་ཞེས་བྱ་བ་ལ་སོགས་པ་སྨོས་སོ། །དེ་ནི་འདི་སྐད་དུ་སྤྱི་ཞེས་བྱ་བ་གུད་ན་མེད་དེ། རྣམ་པར་རྟོག་པའི་ཤེས་པའི་རྗེས་སུ་འཇུག་པ་ཁོ་ནའི་ངོ་བོ་ལ། ཕྱི་རོལ་གྱི་ངོ་བོར་གཟུང་བ་ནི་ཡི་གེའི་སྤྱི་ཡིན་ནོ། །དེ་ལྟར་ན་སེམས་རྒྱུ་བ་མེད་པ་བརྗོད་ན་འོག་མ་ཡི་གེ་རྣམས་རྒྱུ་བ་མེད་པ་ཡང་བརྗོད་པ་ཉིད་དུ་འགྱུར་ཏེ། དེའི་ཕྱིར་ཡི་གེ་རྣམས་རྒྱུ་བ་མེད་ཅེས་བརྗོད་པ་དོན་མེད་དོ་ཞེས་བསྟན་པར་འགྱུར་རོ། །སྣོན་བསྟན་པ་ནི། ཡང་ཞེས་བྱ་བའི་སྒྲ་མཛེས་པ་མ་ཡིན་ནོ་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། རྗོད་པར་བྱེད་པའི་སྤྱི་རྣམ་པར་རྟོག་པའི་རྗེས་སུ་འབྲང་བ་ཡིན་པ། དེ་ལྟ་ན་ནི་སེམས་རྒྱུ་བ་མེད་པ་དེ་དང་ཐ་དད་པ་མ་ཡིན་པའི་ཕྱིར། ཡི་གེ་རྣམས་རྒྱུ་བ་མེད་པ་ཡང་བསྟན་པ་ཡིན་ཏེ། དེའི་ཕྱིར་འདི་ལ་གང་གིས་ཡང་ཞེས་བྱ་བའི་སྒྲ་མཛེས་པར་བྱེད་པ་ལྷག་པ་ཅི་ཡང་མེད་དོ། །ཕྱིར་ཞེས་བྱ་བ་ནི་དེའི་ཕྱིར་རོ་ཞེས་བྱ་བ་འདིའི་དོན་ཏོ། །གལ་ཏེ་ཡི་གེ་རང་གི་མཚན་ཉིད་དུ་གྱུར་པ་རྣམས་རྣམ་པར་རྟོག་པའི་ཤེས་པའི་རྗེས་སུ་འབྲང་བ་མ་ཡིན་ཏེ། དེ་དག་ཐུགས་ལ་བཞག་ནས་ཡི་གེ་རྣམས་ལྟ་སྨོས་ཀྱང་ཅི་དགོས་ཞེས་དེ་སྐད་གསུངས་སོ་ཞེ་ན། རང་གི་མཚན་ཉིད་ནི་རྗོད་པར་བྱེད་པ་མ་ཡིན་པའི་ཕྱིར་དེ་ཐུགས་ལ་བཞག་ནས་རྗོད་པ་རུང་བ་ཁོ་ན་མ་ཡིན་ནོ་ཞེས་བྱ་བ་སྨོས་སོ། །ཡི་གེ་རྣམས་རྒྱུ་བ་ནི་རྗོད་པར་སྐྱེད་པ་ཡིན་པའི་ཕྱིར་ཏེ། དེ་ནི་རང་གི་མཚན་ཉིད་ལ་ཡོད་པ་མ་ཡིན་པ་ཁོ་ནའོ། །དེ་ལྟ་ན་ནི་འདི་གསུངས་པས་ཅི་ཞིག་ཏུ་འགྱུར་སྙམ་དུ་སེམས་སོ། །ཇི་སྟེ་ཡང་ཇི་ལྟར་གྱུར་ཀྱང་ཅི་གེ་རྣམས་ལྟ་སྨོས་ཀྱང་ཅི་དགོས་ཞེས་བྱ་བ་འདི་མི་བརྗོད་དུ་མི་རུང་ངོ་སྙམ་དུ་སེམས་ན། དེ་ལྟ་ན་ཡང༌། དོན་
འོག་མ་བརྗོད་པར་ཡི་གེ་རྣམས་ལྟ་སྨོས་ཀྱང་ཅི་དགོས་ཞེས་བྱ་བ་འོག་ཏུ་བརྗོད་པ་འདིར། གོང་མ་སེམས་རྒྱུ་བ་ཡང་མེད་ན་ཞེས་བྱ་བ་དེ་འདུས་པ་ཉིད་དུ་འགྱུར་རོ། །ཅིའི་ཕྱིར་འདུས་པར་འགྱུར་ཞེ་ན། རྗོད་པར་བྱེད་པ་སྤྱིའི་རྗེས་སུ་ནང་གི་རྗོད་པ་འབྲང་བ་ཡིན་པའི་ཕྱིར་རོ་ཞེས་བྱ་བ་སྨོས་སོ། །དེའི་ཕྱིར་གཉིས་བརྗོད་པར་མི་འགྱུར་བ་ཞིག་ན། གཉིས་ཀ་ཡང་བཀའ་སྩལ་ཏོ། །དེའི་ཕྱིར་རབ་ཏུ་བསྒྲུབ་པར་བྱ་བ་འདོད་པའི་དོན་མཇུག་བསྡུ་བའི་ཕྱིར། དེ་ལྟ་བས་ན་དངོས་པོ་ཙམ་དང་མཐུན་པར་བྱེད་པའི་ངང་ཅན་གྱི་སེམས་རྒྱུ་བ་ཡང་མེད་ཅེས་བྱ་བ་འདི་ཉིད་ཡང་དག་པར་ན། བཅོམ་ལྡན་འདས་བཞེད་དོ་ཞེས་བྱ་བ་སྨོས་ཏེ། དངོས་པོ་ཙམ་དང་མཐུན་པར་བྱེད་པའི་ངང་ཅན་གྱི་སེམས་ནི་རང་གི་མཚན་ཉིད་ཀྱི་ཡུལ་ཅན་གྱི་ཤེས་པ་ལ་བྱའོ། །ཡང་ཞེས་བྱ་བའི་སྒྲ་ནི་སྲིད་པ་སྟེ། རྣམ་པར་རྟོག་པའི་ཤེས་པ་ཡོངས་སུ་གཟུང་བའི་ཕྱིར་ནི་མ་ཡིན་ནོ། །ཡང་ན་བཅོམ་ལྡན་འདས་ཀྱང་བཞེད་དོ་ཞེས་བལྟ་བར་བྱ་སྟེ། འཕགས་པ་བློ་གྲོས་མི་ཟད་པ་འབའ་ཞིག་ནི་མ་ཡིན་པར་འདོད་དོ། །ཡང་དག་པར་ན་ཞེས་བྱ་བ་ནི་དེ་ཁོ་ན་ཉིད་དུ་ནའོ། །བཞེད་ཅེས་བྱ་བ་ནི་དགོངས་ཞེས་བྱ་བའི་ཐ་ཚིག་གོ །དེ་ལྟ་ན་ནི་ཐམས་ཅད་འཚམ་མོ་ཞེས་བྱ་བ་ནི་མཛེས་སོ་ཞེས་བྱ་བའི་ཐ་ཚིག་སྟེ་དེ་ནི་བརྡ་ཕྲད་པར་སླའོ། །དེ་ལྟར་ན་དངོས་པོ་ཙམ་དང་མཐུན་པར་བྱེད་པའི་ངང་ཅན་གྱི་སེམས་ཀྱི་རྗེས་སུ་འཇུག་པ་རྗོད་པར་བྱེད་པ་སྤྱི་ནི་མ་ཡིན་ཏེ། དེའི་ཕྱིར་གཉིས་བརྗོད་པ་རིགས་ཏེ། གང་དུ་དངོས་པོ་ཙམ་དང་མཐུན་པར་བྱེད་པའི་ངང་ཅན་གྱི་སེམས་མི་འཇུག་པ་དེར། རྣམ་པར་རྟོག་པ་ཡང་མི་འཇུག་པ་ཁོ་ན་སྟེ་དེས་རབ་ཏུ་ཕྱེ་བའི་ཕྱིར་རོ། །དེ་ལྟ་ན་རྣམ་པར་རྟོག་པའི་རྗེས་སུ་འཇུག་པ་རྗོད་པར་བྱེད་པའི་ཕྱི་ནི་ཐག་རིང་བ་ཁོ་ན་ཡིན་པས་ཡང་ཞེས་བྱ་བའི་སྒྲ་ཡང་འཚམ་པ་ཉིད་དོ། །དེ་ལྟར་གྱུར་ན་གཟུགས་ལ་སོགས་པ་དང༌། བདེ་བ་ལ་སོགས་པ་ཡང་ཀུན་རྫོབ་ཀྱི་བདེན་པ་ཡིན་ནོ། །ཡི་ནི་དེ་ལྟ་ཡིན་ན། གལ་ཏེ་ཁ་ཅིག་འདི་སྐད་དུ་གཟུགས་ལ་སོགས་པ་དང༌། བདེ་བ་ལ་སོགས་པ་སོ་སོ་རང་གིས་གནས་པ་གང་དག་ཡིན་པ་དེ་དག་ནི་དོན་སོ་སོར་ངེས་པའི་རྣམ་པའི་ཚིག་གིས་རིག་པ་མ་ཡིན་ཏེ། དེ་དག་ནི་དག་གི་ལམ་ལས་འདས་པས་ཀུན་རྫོབ་ཀྱི་བདེན་པ་མ་ཡིན་ཏེ། དེ་ན་ཐ་སྙད་གདགས་པ་ཡིན་པའི་ཕྱིར་ཏེ། འདི་
ལྟར་མདོ་ལས་དེ་ལ་ཀུན་རྫོབ་ཀྱི་བདེན་པ་གང་ཞེ་ན། འཇིག་རྟེན་གྱི་ཐ་སྙད་གདགས་པ། ཡི་གེ་དང་སྐད་དང་བརྡ་བསྟན་པ་ཇི་སྙེད་པ་དག་གོ་ཞེས་གསུངས་པའི་ཕྱིར་རོ། །འདི་ལ་ཚིག་གི་དོན་ནི་གྲགས་པའི་དངོས་པོའི་རྒྱུ་ལས་བྱུང་བ། སྒྲ་དང་དོན་མ་གྲགས་པའི་རྣམ་པ་གསལ་བར་བྱ་བའི་ཕྱིར་དེ་གཉིས་དང་མཐུན་པར་བྱེད་པ་བརྡ་ཤེས་པ་རྣམས་ཀྱི་ཡི་གེ་དང༌། ཚིག་དང་ངག་མདོ་སྡེ་དང་འབྲེལ་པ་ཡང་རུང་སྟེ། བརྗོད་པར་བྱ་བ་དང་བཅས་པ་ནི་ཀུན་རྫོབ་ཀྱི་བདེན་པ་ཞེས་གསུངས་སོ། །དེ་དག་ནི་དེ་བཞིན་དུ་སྤྱིའི་རྣམ་པ་འཛིན་པ་མ་ཡིན་ཏེ། དེའི་ཕྱིར་རྗོད་པར་བྱེད་དོ་ཞེ་ན། དོན་དམ་པ་ལ་ཡང་ཐལ་བར་འགྱུར་ཏེ། དེ་ཡང་ཚིག་གི་ངོ་བོའི་རྗོད་པར་བྱེད་པས། བརྗོད་པར་བྱ་བ་ཡིན་པའི་ཕྱིར་རོ། །དེ་དག་ནི་དོན་དམ་པའི་བདེན་པ་མ་ཡིན་ཏེ། དེ་དག་ལ་དངོས་པོའི་སྒྲ་ཡོད་པའི་ཕྱིར་རོ། །རྣམ་པ་གཞན་ནི་མེད་པས། དེའི་ཕྱིར་དེ་དག་ནི་མེད་དེ། རང་གི་ཤེས་པ་འགལ་བ་བདེན་པ་གཉིས་ཀྱིས་མ་བསྡུས་པའི་ཕྱིར་ལ། དེ་དག་ནི་ཡོངས་སུ་འཁྱམ་པ་ཡིན་ཏེ། འདི་ལྟར་བཅོམ་ལྡན་འདས་ནི་ཐ་སྙད་གདགས་པ་ཁོ་ན་ཀུན་རྫོབ་ཀྱི་བདེན་པ་ཡིན་པར་མི་གསུང་གི །གང་ལ་སེམས་འཇུག་པ་དེ་ཀུན་རྫོབ་ཀྱི་བདེན་པའོ་ཞེས་གསུངས་སོ། །མདོའི་དོན་ནི་བཤད་ཟིན་པ་ཉིད་ཡིན་ནོ། །དོན་དམ་པ་ནི་ངག་གི་ངོ་བོ་རྗོད་པར་བྱེད་པས། བརྗོད་པར་བྱ་བ་མ་ཡིན་པར་འོག་ནས་བརྗོད་པར་བྱའོ། །བདེན་པ་གཉིས་ཀྱིས་མ་ཟིན་པ་ཉིད་ནི་མ་གྲུབ་པ་ཁོ་ན་ཡིན་ཏེ་སྤྲོས་པས་ཆོག་གོ །སེམས་སྤྱོད་ཡུལ་ཇི་སྙེད་པ་དེ་ནི་ཀུན་རྫོབ་ཀྱི་བདེན་པ་སྟེ། དོན་དམ་པའི་བདེན་པ་མ་ཡིན་པའོ་ཞེས་བྱ་བའི་ཐ་ཚིག་གོ་ཞེ་ན། རྣམ་པར་དག་པའང་ཡང་དག་ཏུ། །རིགས་སམ་འོན་ཏེ་མིན་ཞེས་སོམས། །ཞེས་བྱ་བ་ནི་རིགས་པ་མ་ཡིན་པ་ཁོ་ནའོ་ཞེས་བསམས་པའོ། །ཅིའི་ཕྱིར་ཞེ་ན། དེའི་ཕྱིར་སེམས་སྤྱོད་ཡུལ་དུ་གྱུར་པའོ་ཞེས་སྨོས་སོ། །ཅིའི་ཕྱིར་སྙམ་པ་ལ། བདག་ཉིད་རིག་པ་ཡིན་པའི་ཕྱིར། ཞེས་བྱ་བ་སྨོས་སོ། །གལ་ཏེ་དེ་ནི་བྱེད་པ་དང་ལས་དང་བྱ་བའི་ངོ་བོས་བདག་ཉིད་རིག་པ་ནི་མ་ཡིན་ནོ་ཞེ་ན། གལ་ཏེ་དེ་ལྟ་ན་ནི་ཤེས་པའི་ངོ་བོར་འགྱུར་རོ། །གལ་ཏེ་རིག་པའི་ངོ་བོ་ཉིད་ཡིན་པའི་ཕྱིར་དེ་ལྟ་མ་ཡིན་ནོ་ཞེ་ན། འོ་ན་ནི་དེ་དངོས་པོ་ཐམས་ཅད་རིག་པར་འགྱུར་རོ། །འདི་ནི་བདག་ཉིད་རིག་
པའི་ངོ་བོ་ཉིད་ཡིན་ནོ་ཞེས་སྨྲ་ན་ནི། སེམས་ཀྱི་སྤྱོད་ཡུལ་ཡིན་པས་དེ་ཀུན་རྫོབ་ཀྱི་བདེན་པ་ཉིད་དུ་ཁས་བླངས་པས་རེ་ཞིག་གཞག་གོ །ཀུན་རྫོབ་ལ་ལོག་པར་རྟོགས་པའི་བློ་ཅན་དག་ལ་རབ་ཏུ་དབྱེ་བ་བྱས་པས་ཀྱང་རྟོགས་པར་བྱ་བའི་ཕྱིར། ཀུན་རྫོབ་དེ་ནི་ཡང་དག་པ་དང་ཡང་དག་པ་མ་ཡིན་པའི་བྱེ་བྲག་གིས་རྣམ་པ་གཉིས་ཏེ། དེ་ལ། བརྟགས་པའི་དོན་གྱིས་དབེན་གྱུར་པ། །དངོས་ཙམ་བརྟེན་ནས་གང་སྐྱེས་དེ། །ཡང་དག་ཀུན་རྫོབ་ཤེས་པར་བྱ། །ཞེས་བྱ་བ་ལ་སོགས་པ་སྨོས་སོ། །སོགས་པ་ཞེས་བྱ་བའི་སྒྲ་དང་པོས་ནི་གནས་པ་ལ་སོགས་པ་ཡོངས་སུ་གཟུང་ངོ༌། །འོག་མས་ནི་སྐྱེས་བུའི་ཡོངས་སུ་འགྱུར་བ་ལ་སོགས་པ་བསྡུའོ། །ཡང་དག་པར་ཞེས་བྱ་བ་ནི། རེ་རེ་དང་ཡང་སྦྱར་རོ། །དངོས་པོ་ཙམ་ཉིད་ཀྱི་གཏན་ཚིགས་ནི་དོན་བྱེད་ནུས་པ་སྟེ། འདི་ཡང་ཇི་ལྟར་སྣང་བ་བཞིན་དུ་ཡིན་གྱི། ཡང་དག་པ་ཇི་ལྟ་བ་བཞིན་དུ་ནི་མ་ཡིན་ནོ། །རྒྱུ་དང་རྐྱེན་རྣམས་ལ་བརྟེན་ནས་སྐྱེས་པ་ནི། ཇི་ལྟར་སྣང་བ་ཞེས་བྱ་བར་བསྙེམས་སོ། །རྒྱུ་རྣམས་ནི་ཐུན་མོང་མ་ཡིན་པའི་བྱེད་རྒྱུའོ། །རྐྱེན་རྣམས་ནི་ཐུན་མོང་བའོ། །དངོས་སུ་དཔྱད་ན་ནི་རྐྱེན་རྣམས་ཀྱང་རྒྱུ་ཉིད་ཡིན་ནོ། །ཅིའི་ཕྱིར་འདི་ཡང་དག་པའི་ཀུན་རྫོབ་ཀྱི་བདེན་པ་ཞེས་བྱ་ཞེ་ན། འདི་ལྟར་བྱིས་པ་ཡན་ཆད་ཀྱི་ཤེས་པ་ལ་དོན་ཇི་སྙེད་ཅེས་བྱ་བ་སྨོས་ཏེ། བུམ་པ་ལ་སོགས་པ་ཤེས་པ་ལ། སྣང་བ་དེ་ནི་ཡང་དག་པའི་ཀུན་རྫོབ་ཡིན་པར་རིགས་ཏེ་ཞེས་བྱ་བར་སྦྱར་རོ། །ཇི་ལྟར་སྣང་ཞེ་ན། མཐུན་པར་ཞེས་བྱ་བ་སྨོས་སོ། །སུ་དག་དང་མཐུན་ཞེ་ན། བྱིས་པ་ཡན་ཆད་ཅེས་བྱ་བ་སྨོས་ཏེ། མཁས་པ་རྣམས་ནས་བཟུང་སྟེ། བྱིས་པའི་བར་དུ་ཞེས་བྱ་བའི་ཐ་ཚིག་གོ །དེ་ནི་འདི་སྐད་དུ་གང་དག་བསྟན་བཅོས་ཀྱིས་བརྟན་པོར་བྱས་པའི་བློ་དང་ལྡན་པ་དེ་དག་ལ་ཡང་ཇི་ལྟར་བྱིས་པ་ལ་སྣང་བདེ་བཞིན་དུ་བུམ་པ་ལ་སོགས་པ་སྣང་བ་གང་ཡིན་པ་དེ་ནི་ཡང་དག་པའི་ཀུན་རྫོབ་ཀྱི་བདེན་པའོ། །བསྟན་བཅོས་ལ་སོགས་པའི་སྟོབས་ཀྱིས་སྒྲོ་བཏགས་པའི་རྣམ་པ་མི་སྣང་བའི་ཚུལ་ཅན་ནི་ཡང་དག་པ་མ་ཡིན་པའི་ཀུན་རྫོབ་ཀྱི་བདེན་པ་ཞེས་བྱ་བར་བསྟན་པར་འགྱུར་རོ། །ཇི་ལྟ་བུར་སྣང་ཞེ་ན། རྒྱུ་ལས་ཞེས་བྱ་བ་སྨོས་ཏེ། མིག་ལ་སོགས་པ་ཚོགས་པ་ལས་ཞེས་བྱ་བའི་ཐ་ཚིག་སྟེ། ལོག་པ་ལ་གོམས་པའི་བག་ཆགས་ཡོངས་
སུ་སྨིན་པ་ལས་སམ། བསྟན་བཅོས་ལས་བྱུང་བ་ནི་མ་ཡིན་པར་བསམས་པའོ། །འདིས་ནི་རྒྱུའི་སྟོབས་ཀྱིས་གཟུགས་ལ་སོགས་པ་སྣང་བ་དེ་ནི་ཀུན་རྫོབ་ཀྱི་བདེན་པ་ཡིན་གྱི། དོན་དམ་པའི་བདེན་པ་ནི་མ་ཡིན་ནོ་ཞེས་དེ་སྟོན་པར་བྱེད་དོ། །ཅིའི་ཕྱིར་འདི་ཡང་དག་པའི་ཀུན་རྫོབ་ཀྱི་བདེན་པ་ཞེས་བྱ་ཞེ་ན། ཤེས་པ་ལ་སྣང་བ་དང་མཐུན་པར་དངོས་པོ་གནས་པའི་ཕྱིར་རོ་ཞེས་བྱ་བ་སྨོས་སོ། །གལ་ཏེ་དེ་ལྟར་ན་ཡང་དག་པར་སྐྱེ་བ་ལ་སོགས་པ་ཡང་ཇིག་ཡང་དག་པ་ལ་ཀུན་རྫོབ་ཀྱི་བདེན་པར་མི་འགྱུར་རམ་ཞེ་ན། ཡང་དག་པར་སྐྱེ་བ་ལ་སོགས་པ་ནི་མི་སྣང་སྟེ་ཞེས་བྱ་བ་སྨོས་སོ། །གལ་ཏེ་མི་སྣང་ན་ཇི་ལྟར་སྒྲོ་བཏགས་པ་ཡིན་ཞེ་ན། ཇི་ལྟ་བུའང་རུང་བའམ། གྲུབ་པའི་མཐའ་ལ་བརྟེན་ནས་སྒྲོ་བཏགས་པ་འབའ་ཞིག་ཏུ་ཟད་དོ་ཞེས་བྱ་བ་སྨོས་སོ། །ཇི་ལྟ་བུའང་རུང་ཞེས་བྱ་བ་ནི་ཐོག་མ་མེད་པའི་དུས་ནས་ལོག་པར་ཡོངས་སུ་བརྟགས་པའི་དབང་གིས་ཏེ། དེ་ནི་དེ་ལྟའོ། །དེ་ལྟ་མ་ཡིན་ན་ནི་ཡང་དག་པར་སྐྱེ་བ་ལ་སོགས་པ་སྣང་བར་གྱུར་པ་དེ་དག་ལ། རྩོད་པ་མེད་པར་ཐལ་བ་ཁོ་ནར་འགྱུར་རོ། །ཅིའི་ཕྱིར་ཞེ་ན། རྒོལ་བ་དང་ཕྱིར་རྒོལ་བའི་ཤེས་པ་ལ་སྣང་བའི་ཆ་ལ་ནི་རྩོད་པ་སུ་ཡང་མེད་དོ་ཞེས་བྱ་བ་སྨོས་སོ། །གལ་ཏེ་འདི་ལྟ་བུའི་ཆ་ལ་བརྒྱ་ལ་རྩོད་པར་བྱེད་དོ་ཞེ་ན། རྩོད་པར་བྱེད་ན་ནི་མངོན་སུམ་ལ་སོགས་པས་གནོད་པར་འགྱུར་རོ་ཞེས་བྱ་བ་སྨོས་སོ། །སོགས་པའི་བསྡུ་བས་ནི་རྗེས་སུ་དཔག་པ་ལ་སོགས་པ་ཡོངས་སུ་བསྡུའོ། །ཡང་དག་མིན་ནི་ཀུན་རྫོབ་སྟེ་ཀུན་བརྟགས་པའི་དངོས་པོ་ཞེས་བྱ་བ་ལྷག་མའོ། །འདི་དགྲོལ་བའི་ཕྱིར། ཡང་དག་པར་སྐྱེ་བ་ལ་སོགས་པ་གང་ཡིན་པ་དེ་ནི་ཞེས་བྱ་བ་སྨོས་སོ། །དེ་ནི་རྟོག་པའི་བཟོས་སྦྱར་བའོ་ཞེས་བྱ་བ་འདིས་བསྟན་ཏེ། མིག་ལ་སོགས་པ་ཚོགས་ཀྱང་སྣང་བ་མ་ཡིན་ཏེ། དེ་བས་ན་དེ་ནི་ཡང་དག་པ་མ་ཡིན་པའི་ཀུན་རྫོབ་ཀྱི་བདེན་པ་ཞེས་བྱའོ། །ནི་ཞེས་བྱ་བ་ནི་བསྣན་པའི་དོན་ཏམ། ཀུན་བརྟགས་པ་ཁོ་ནའོ་ཞེས་གོ་རིམས་བཟློག་པའོ། །གལ་ཏེ་དེ་ལྟ་ན་ནི་ཟླ་བ་གཉིས་པ་ལ་སོགས་པ་ཡང་དག་པ་མ་ཡིན་པའི་ཀུན་རྫོབ་ཀྱི་བདེན་པར་མི་འགྱུར་རོ་ཞེ་ན། ཉེས་པ་མེད་དེ་སྐབས་ཀྱིས་རྒོལ་བའི་དངོས་པོའི་ངོ་བོ་རྣམ་པར་གཅད་པ་གཙོ་བོ་ཡིན་པའི་ཕྱིར་རོ། །ཡང་དག་པར་སྐྱེ་བ་ལ་སོགས་པ་བཀག་པ་ཡང༌། ཇིག་སྣང་བའི་
ཚུལ་ཅན་མ་ཡིན་པའི་ཕྱིར་ཡང་དག་པར་སྐྱེ་བ་ལ་སོགས་པ་བཞིན་དུ་ཡང་དག་པ་མ་ཡིན་པའི་ཀུན་རྫོབ་ཏུ་འགྱུར་རོ། །ཅིའི་ཕྱིར་མི་སྣང་ཞེ་ན། དེ་ནི་ཞེས་བྱ་བ་སྨོས་ཏེ། ཡང་དག་པར་སྐྱེ་བ་ལ་སོགས་པ་བཀག་པའོ། །དངོས་པོ་བུམ་པ་ལ་སོགས་པ་སྣང་བ་ན་མི་སྣང་ངོ་ཞེས་བྱ་བར་སྦྱར་རོ། །ཅི་འདྲ་ཞེ་ན། ཡང་དག་པར་སྐྱེ་བ་ལ་སོགས་པ་བཞིན་དུའོ། །མ་ཡིན་ཏེ་ཞེས་བྱ་བ་ནི་མི་སྣང་ཞེས་བྱ་བར་སྦྱར་རོ། །དགག་པ་གཉིས་ཀྱིས་ནི་སྣང་བ་ཁོ་ནའོ་ཞེས་བྱ་བར་བསྟན་ཏོ། །ཅིའི་ཕྱིར་སྣང་ཞེ་ན། དངོས་པོའི་ངོ་བོ་དང་ཐ་དད་པ་མ་ཡིན་པའི་ཕྱིར་རོ་ཞེས་བྱ་བ་སྨོས་ཏེ། དངོས་པོ་བཞིན་ནོ། །ཇི་ལྟར་བུམ་པ་ལ་སོགས་པས་དབེན་པ་ནི་དེས་དབེན་ཕ་དང་ལྡན་པའི་ས་ཕྱོགས་སྣང་བར་གྱུར་ན་ཐ་དད་པ་མ་ཡིན་པའི་ཕྱིར་སྣང་སྟེ། འདི་ཡང་དེ་དང་འདྲའོ་ཞེས་བྱ་བའི་ཐ་ཚིག་གོ །གང་གི་ཚེ་སྐྱེ་བ་ལ་སོགས་པ་ཆོས་གཞན་ཞིག་ཡིན་པར་རྟོག་པ་དེའི་ཚེ། དངོས་པོའི་ངོ་བོ་དང་ཐ་དད་པ་མ་ཡིན་པར་མི་འགྲུབ་བོ་ཞེས་བརྒྱ་ཞིག་ལ་དེ་སྐད་ཟེར་དུ་དོགས་པས། ཆོས་གཞན་ཞིག་ཡིན་པར་ཡོངས་སུ་བརྟགས་ན་ནི་ཞེས་བྱ་བ་སྨོས་ཏེ། ནི་ཞེས་བྱ་བ་ནི་བསྣམ་པའི་དོན་ཏོ། །ཡང་དག་པ་མ་ཡིན་པའི་ཀུན་རྫོབ་ཏུ་ཡང་འགྱུར་རོ་ཞེས་བྱ་བ་ནི། འདིར་ཡང་ཡང་དག་པ་མ་ཡིན་པའི་ཀུན་རྫོབ་ཁོ་ནའོ་ཞེས་བསྣན་པའི་དོན་གྱི་རྗེས་སུ་བསྙེགས་སོ། །ཕྱོགས་གཞན་ལ་ནི་ཡང་དག་པའི་ཀུན་རྫོབ་ཁོ་ན་ཡིན་ཞེས་བསྟན་པའི་ཕྱིར། ཡང་ཞེས་བྱ་བ་སྨོས་སོ། །ཅིའི་ཕྱིར་དེ་ལྟ་ཡིན་ཞེ་ན། གང་གི་ཕྱིར། སྐྱེ་ལ་སོགས་པ་བཀག་པ་ཡང༌། །དོན་དམ་པ་ཡིན་པར་ཁོ་བོ་ཅག་འདོད་དོ་ཞེས་བྱ་བར་སྦྱར་རོ། །ཅི་ལྟ་ཞེ་ན། ཡང་དག་པ་དང་མཐུན་པའི་ཕྱིར། །ཞེས་བྱ་བ་སྨོས་སོ། །ཇི་ལྟར་ན་ཡང་དག་པ་དང་མཐུན་པ་ཁོ་ན་ཡིན་ཞེ་ན། ཡང་དག་པར་སྐྱེ་བ་ལ་སོགས་པར་རྟོག་པའི་དངོས་པོ་བཀག་པའི་གཏན་ཚིགས་ཀྱིས་ཞེས་བྱ་བ་སྨོས་སོ། །གཞན་དག་ནི་རྣལ་འབྱོར་སྤྱོད་པ་དག་གིས་སྐྱེ་བ་ལ་སོགས་པ་བཀག་པ་ནི། ཡང་དག་པ་ཁོ་ནར་དོན་དམ་པར་འཛིན་པས་ཡང་ཞེས་བྱ་བ་ནི་བསྡུ་བའི་དོན་ཏོ། །རིགས་པ་སྨྲ་བ་ཡང་ཅིའི་ཕྱིར་དེ་ལྟར་མི་འདོད་ཅེ་ན། གང་གི་ཕྱིར་སྐྱེ་བ་ལ་སོགས་པ་བཀག་པ་ཀུན་རྫོབ་ཁོ་ན་ཡིན་པའི་ཕྱིར་རོ། །ཅིའི་ཕྱིར་ཞེ་ན། རིགས་པས་དཔྱད་ན་ཞེས་བྱ་བ་སྨོས་སོ། །ཅིའི་ཕྱིར་ཀུན་རྫོབ་ཁོ་ན་ཡིན་
ཞེ་ན། དགག་བྱ་ཡོད་པ་མ་ཡིན་པས། །ཡང་དག་ཏུ་ན་བཀག་མེད་བསལ། །ཞེས་བྱ་བ་སྨོས་སོ། །དེ་རྣམ་པར་དགྲོལ་བའི་ཕྱིར་དགག་བྱ་མེད་ན་བཀག་པ་མི་འབྱུང་བའི་ཕྱིར་ཏེ་ཞེས་བྱ་བ་སྨོས་སོ། །ཅིའི་ཕྱིར་དགག་བྱ་མེད་ན་བཀག་པ་མི་འཇུག་ཅེ་ན་། ཡུལ་མེད་པའི་བཀག་པ་མི་རིགས་པའི་ཕྱིར་རོ་ཞེས་བྱ་བ་སྨོས་སོ། །ཡུལ་མེད་ན་བཀག་པ་མི་རུང་བ་ནི་བདེན་ན་འདི་ལ་ནི་ཡུལ་ཡོད་དེ། གལ་ཏེ་གཟུགས་ལ་སོགས་པ་ལ་སྐྱེ་བ་ལ་སོགས་པར་རྣམ་པར་རྟོག་པའི་རྒྱུ་ཅན་ཕ་རོལ་པོས། དངོས་པོ་ཡང་དག་པ་ཉིད་དུ་བརྟགས་པ་གང་ཡིན་པ་དེ་དགག་བྱ་ཉིད་ཡིན་ནོ་ཞེ་ན་ཞེས་བྱ་བ་སྨོས་སོ། །འདི་ནི་དེ་ལྟ་བུ་ཡིན་པར་རྟོགས་པར་བྱ་སྟེ། འདི་ལྟར་གཞན་ཞིག་ན་བུམ་པ་ལ་སོགས་པ་མེད་པར་སྒྲུབ་ན། དེར་རྣམ་པར་རྟོག་པའི་རྒྱུ་ཅན་གྱི་དངོས་པོ་བཀག་པ་ཉིད་ཀྱིས་གྲུབ་སྟེ། གཞན་ནི་མི་རིགས་པའི་ཕྱིར་རོ། །འདི་ནི་གལ་ཏེ་དེ་ལྟ་ན། །བརྟགས་པའི་རང་གི་ངོ་བོ་ཡི། །བཀག་པ་བརྟགས་མིན་ཇི་ལྟར་འགྱུར། །ཞེས་བྱ་བས་འགོག་པར་བྱེད་དོ། །ཇི་ལྟར་འགྱུར་ཞེས་བྱ་བས་ནི་མི་སྲིད་པ་སྟེ་བརྟགས་པ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ །དེ་ཉིད་ཅིའི་ཕྱིར་ཞེ་ན། དགག་བྱ་བརྟགས་པ་ཡིན་དུ་ཟིན་ན། བཀག་པ་ཡང་བརྟགས་པ་ཉིད་དུ་འགྱུར་ཏེ་ཞེས་བྱ་བ་སྨོས་སོ། །ཅི་འདྲ་ཞེ་ན། མོ་གཤམ་གྱི་བུའི་སྔོ་བསངས་ཉིད་ལ་སོགས་པ་བཀག་པ་བཞིན་ནོ་ཞེས་བྱ་བ་སྨོས་སོ། །གལ་ཏེ་སྐྱེ་བ་ལ་སོགས་པ་བཀག་པ་ཡང་དག་པར་མེད་ན། སྐྱེ་བ་ལ་སོགས་པ་ཡོད་པར་འགྱུར་རོ་ཞེས་བརྒྱལ་སྨྲ་བར་འགྱུར་དུ་དོགས་ནས། ཡང་དག་པར་བཀག་པ་མེད་ཀྱང༌། སྐྱེ་བ་ལ་སོགས་པ་ཡོད་པར་མི་འགྱུར་ཏེ་ཞེས་བྱ་བ་སྨོས་སོ། །དེ་ཅིའི་ཕྱིར་ཞེ་ན། བཀག་པས་སྐྱེ་བ་མེད་པ་ལ་སོགས་པ་ལམ་ཁྱབ་པའི་ཕྱིར་ཞེས་བྱ་བ་སྨོས་ཏེ། བཀག་པས་སྐྱེ་བ་ལ་སོགས་པ་བཀག་པས་སྐྱེ་བ་མེད་པ་ལ་སོགས་པ་ལ་མ་ཁྱབ་པའི་ཕྱིར་རོ། །གང་གི་ཕྱིར་བཀག་པ་མེད་པ་གང་གིས་སྐྱེ་བ་ལ་སོགས་པའི་བཀག་པ་ལྡོག་པར་འགྱུར་ཏེ། སྐྱེ་བ་མེད་པ་ལ་སོགས་པ་ལྡོག་པར་འགྱུར་བ་གང་གིས་སྐྱེ་བ་ལ་སོགས་པ་ཡོད་པར་འགྱུར་བ། གང་ན་སྐྱེ་བ་མེད་པ་ལ་སོགས་པ་ཡོད་པ་དེ་ན། སྐྱེ་བ་ལ་སོགས་པ་བཀག་པ་ཡོད་པ་ནི་མ་ཡིན་གྱི། འོན་ཀྱང་སྐྱེ་བ་མེད་པ་ལ་སོགས་པའི་ངོ་བོ་ཉིད་ཀྱིས་གནས་སོ། །གང་གིས་སྐྱེ་བ་ལ་སོགས་པ་མེད་པ་ངེས་ན། སྐྱེ་བ་ལ་སོགས་པའི་བཀག་པ་ཡང་ཡོད་ཅིང༌། དེ་
མེད་ན་སྐྱེ་བ་ལ་སོགས་པ་ཡོད་པར་འགྱུར་རོ་ཞེས་བྱ་བའི་ཚིག་གིས་ལུགས་འདི་ནི་འགལ་བ་ཡང་ཡིན་ཏེ། དེ་ལྟ་ན་ནི་མོ་གཤམ་གྱི་བུ་ལ་སོགས་པ་ཡང་ཡོད་པ་ཉིད་དུ་ཐལ་བར་འགྱུར་རོ། །སྣོན་བྱ་བའི་ཕྱིར་དེ་ཡོད་པའི་རིགས་པ་མེད་པའི་ཡང་ཕྱིར་རོ་ཞེས་བྱ་བ་སྨོས་ཏེ། དེ་ཡོད་པར་ཞེས་བྱ་བ་ནི་སྐྱེ་བ་ལ་སོགས་པ་ཡོད་པར་ཏེ་རིགས་པ་མེད་པའི་ཕྱིར་རོ། །ཇི་ལྟར་རིགས་པ་མེད་པ་དེ་ལྟར་ནི་འོག་ནས་བཤད་པར་བྱའོ། །དེ་ལྟར་དོན་བསྒྲུབས་ནས་མཇུག་བསྡུ་བའི་ཕྱིར། དེ་བས་འདི་ནི་ཀུན་རྫོབ་སྟེ། །ཡང་དག་པར་ན་སྐྱེ་བ་མེད། །ཅེས་བྱ་བ་ལ་སོགས་པའོ། །ཡང་དག་དོན་ཡིན་ཡང་དག་མིན། །ཡང་དག་པའི་དོན་ཞེས་བྱ་བར་བསྙེགས་སོ་ཞེས་བྱ་བ་སྨོས་སོ། །ཅིའི་ཕྱིར་ཡང་དག་པ་མ་ཡིན་ཞེ་ན། དེའི་ཕྱིར། ཡང་དག་ཉིད་དུ་གཉིས་མེད་དེ། །ཞེས་བྱ་བ་སྨོས་ཏེ། །གཉིས་ནི་སྐྱེ་བ་ལ་སོགས་པ་དང༌། སྐྱེ་བ་མེད་པ་ལ་སོགས་པ་སྟེ། དོན་འདི་ལུང་དང་སྦྱར་བའི་ཕྱིར། །དེ་ཉིད་ཕྱིར་ན་དེ་སྟོང་མིན། །མི་སྟོང་མ་ཡིན་ཡོད་མེད་མིན། །མི་སྐྱེ་མ་ཡིན་སྐྱེ་མིན་ཞེས། །དེ་ལ་སོགས་པ་བཅོམ་ལྡན་གསུངས། །ཞེས་བྱ་བ་སྨོས་སོ། །སྟོང་པ་མ་ཡིན་པ་ནི་ཡང་དག་པར་ན་དགག་བྱ་མེད་པས་བཀག་པ་ཡང་མེད་པར་གསལ་བའི་ཕྱིར་རོ། །མི་སྟོང་པ་མ་ཡིན་པ་ལ་སོགས་པ་ནི། དུ་མས་དངོས་པོ་གཅིག་མི་བྱེད། །ཅེས་བྱ་བ་ལ་སོགས་པས་བཀག་པའི་ཕྱིར་རོ། །ཅིའི་ཕྱིར་ཡང་དག་པར་ན་གཉིས་མེད་ཅེ་ན། དེ་ནི་སྤྲོས་པ་མེད་པ་ཡིན། །ཞེས་བྱ་བ་སྨོས་ཏེ། དེ་ཁོ་ན་ཞེས་བྱ་བ་ལྷག་མའོ། །དེ་ནི་དེ་ཁོ་ན་ནི་རྟོག་པའི་དྲ་བ་ཐམས་ཅད་དང་བྲལ་བའོ་ཞེས་བྱ་བས་རྣམ་པར་འགྲེལ་ཏོ། །དེའི་ཕྱིར་འདིར་སྤྲོས་པ་ནི་རྟོག་པའི་དྲ་བ་ཡིན་ནོ་ཞེས་བརྗོད་དོ། །རྣམ་པ་གཅིག་ཏུ་ན་སྤྲོས་པ་ནི་ངག་གི་རྒྱུ་བ་སྟེ། དེ་ཡང་རྟོག་པའི་དྲ་བས་ཀུན་ནས་བསླང་བ་ཡིན་ནོ། །དེའི་ཕྱིར་ཀུན་ནས་སློང་བ་པོ་མེད་ན། བསླང་བར་བྱ་བའི་སྤྲོས་པ་ཡང་མེད་པར་སྟོན་ཏེ། གང་གི་ཕྱིར་དེ་ལྟར་ངག་གི་སྤྱོད་ཡུལ་ལས་འདས་པ་ཡང་དག་པ་ཡིན་པ་དེའི་ཕྱིར། འཇམ་དཔལ་གྱིས་ནི་ཡང་དག་དྲིས། །རྒྱལ་བའི་སྲས་པོ་མི་གསུང་བཞུགས། །ཞེས་བྱ་བ་སྨོས་ཏེ་གོ་སླའོ། །ཆོས་ཀྱི་སྒོ་གང་ལ་སྐྱེ་བ་དང་མི་སྐྱེ་བ་ལ་སོགས་པ་གཉིས་མེད་པ་དེ་ནི་གཉིས་མེད་པའོ། །དེ་ནི་གཉིས་མེད་པ་ཡང་ཡིན་ལ། སྟོབས་བཅུ་དང་མི་འཇིགས་པ་
ལ་སོགས་པ་ཆོས་རྣམས་ཀྱི་སྒོ་ཡང་ཡིན་ཏེ། དེ་ནི་དེ་དག་རྟོགས་པ་འབྱུང་བའི་སྒོ་ཡིན་པའི་ཕྱིར་ཏེ། དེ་བསྟན་ཞེས་བྱ་བར་ཚིག་རྣམ་པར་སྦྱར་རོ། །གཉིས་མེད་པ་ལ་འཇུག་པ་ནི་ཅང་མི་སྨྲ་བ་ཉིད་དེ། འདིས་འཇུག་པར་བྱེད་པའི་ཕྱིར་རོ། །གཉིས་སུ་མེད་པ་དེ་གང་ཞེ་ན། གང་ལ་ཡི་གེ་དང་སྐད་དང་རྣམ་པར་རིག་བྱེད་འཇུག་པ་མེད་པ་ཞེས་བྱ་བ་སྟེ་ཡི་གེ་ནི་ཚིག་འབྲུའོ། །སྐད་ནི་ཚིག་གོ །རྣམ་པར་རིག་བྱེད་ནི་ངག་སྟེ། དོན་རྣམ་པར་རིག་པར་བྱེད་པའི་ཕྱིར་རོ། །དེའི་ཕྱིར་དེ་ཉིད་དོན་གོ་བར་བྱེད་པ་ཡིན་ཏེ། གཞན་ནི་མ་ཡིན་ནོ། །འདི་ནི་ཚིག་སོ་སོར་ཕྲལ་བའོ། །གང་གི་ཕྱིར་རྣམ་པ་འདི་ལྟར་ཡང་སྲིད་དེ། སྐད་དེ་ནི་ཡི་གེ་སྔོན་དུ་འགྲོ་བ་ཡང་ཡིན་ལ། སྐད་ཀྱང་ཡིན་པས་ཡི་གེའི་སྐད་དོ། །རྣམ་པར་རིག་བྱེད་ནི་དེ་གཉིས་སྔོན་དུ་འགྲོ་བ་ཡང་ཡིན་ལ་རྣམ་པར་རིག་བྱེད་ཀྱང་ཡིན་ཏེ། དེའི་ཕྱིར་ཡི་ཤེའི་སྐད་ཀྱི་རྣམ་པར་རིག་བྱེད་དེ། །འདི་ལྟ་བུ་དེ་ཁོ་ན་ཡིན་པར་ཁོང་དུ་ཆུད་པར་བྱའོ། །གལ་ཏེ་དེ་གཉིས་ལས་དབེན་པ་གཞན་གྱི་དབང་གི་ངོ་བོ་དེ་ཁོ་ན་ཡིན་དུ་ཟིན་ན་དེའི་ཚེ་དེ་མི་རིགས་ཏེ། དེའི་ཕྱིར། གཉིས་པོ་དག་ལས་དབེན་པའི་དངོས། །གཞན་དབང་དངོས་པོ་ཡང་དག་ན། །དྲིས་ན་ཅི་ཕྱིར་རྒྱལ་བའི་སྲས། །དེ་ནི་མི་གསུང་བཞུགས་པར་གྱུར། །ཞེས་བྱ་བ་སྨོས་ཏེ། གཉིས་པོ་ནི་གཟུང་བ་དང་འཛིན་པའོ། །རྒྱུ་རྐྱེན་གཞན་དག་གིས་དབང་བྱེད་ཅིང་བསྐྱེད་པར་བྱ་བ་ཡིན་པས་གཞན་གྱི་དབང་ངོ༌། །ཅིའི་ཕྱིར་ཅང་མི་གསུང་བ་མི་རིགས་སྙམ་པ་ལ། བརྡ་ཤེས་རིགས་པ་ཤེས་པ་ཡི། །སྐྱེ་བོ་དག་ནི་ཇི་ལྟར་ཡང༌། །རང་གི་རྟོགས་པ་རྗོད་བྱེད་དེ། །དེ་བས་མི་གསུང་མི་རིགས་སོ། །ཞེས་བྱ་བ་སྨོས་ཏེ། རང་གི་རྟོགས་པ་བརྗོད་པ་ཇི་ལྟར་ཡང་ཀུན་རྫོབ་ཏུ་རྗོད་པར་བྱེད་དོ་ཞེས་སྦྱར་རོ། །སུ་དག་གིས་ཤེ་ན། བརྡ་ཤེས་པ་དག་ཅེས་བྱ་བ་སྨོས་པ་སྟེ། མི་དག་གིས་སོ། །ཇི་ལྟ་བུ་དག་གིས་ཤེ་ན། རིགས་པ་ཤེས་པ་དག་གིས་ཏེ། ཁོང་དུ་ཆུད་པར་བྱེད་པ་ལ་མཁས་པ་དག་གིས་སོ། །ལྷག་མ་ནི་བརྡ་ཕྲད་སླ་བས་མ་བཤད་དོ། །གལ་ཏེ་ཀུན་རྫོབ་ཀྱི་བསྙད་པས་ཀྱང་བརྗོད་པར་མི་ནུས་སོ་ཞེ་ན། གལ་ཏེ་དེ་ལྟ་མིན་ན་ཀུན་རྫོབ་ཀྱི་བསྙད་པས་ཀྱང་བརྗོད་པར་མི་ནུས་པ་དེའི་ཚེ། རང་གི་མཚན་ཉིད་མཐར་ཕྱིན་པ་ཉིད་ཀྱིས་གང་བརྗོད་པ་ཅི་དག་གི་ཞེ་ན། སྒྲ་རྣམས་ཀྱིའོ། །སུ་དག་གིས་ཤེ་ན། རིགས་པ་སྨྲ་བ་དག་གིས་ཏེ་སློབ་དཔོན་ཕྱོགས་ཀྱི་གླང་པོ་ལ་སོགས་པས་སོ། །དེ་ཇི་ལྟར་རིགས་པར་འགྱུར་བ་གསལ་བར་སྨྲོས་ཤིག །གལ་ཏེ་རང་གི་ངོ་བོས་བསྟན་པར་མི་ནུས་ཏེ། དེའི་ཕྱིར་ཅང་མི་གསུང་བར་གྱུར་ཏོ་ཞེ་ན། གལ་ཏེ་དེ་ལྟ་ན་ནི་བདག་ཅག་གིས་ནི་རང་རང་གི་བསྟན་པ་བཤད་ཟིན་ཞེས་སྨོས་པ་དེ་དག་གིས་བསྟན་པ་ཡང་ཇི་ལྟར་རུང༌། གལ་ཏེ་དེ་དག་གིས་
སྤྱིའི་ངོ་བོར་སྒྲོ་བཏགས་པས་བསྟན་ཏོ་ཞེ་ན་ནི། འོ་ན་འཕགས་པ་དྲི་མ་མེད་པར་གྲགས་པ་ཡང་དེ་བཞིན་དུ་ཅིའི་ཕྱིར་མི་སྟོན་ཏེ། རྒྱུ་གང་གིས་ཅི་ཡང་མི་གསུང་བར་འགྱུར། གང་གི་ཕྱིར་ཁོ་ན་དོན་དམ་པ་དེ་ལ་ནི་བརྗོད་པར་བྱ་བའི་བག་ཀྱང་ཞེས་བྱ་བ་ཐ་སྙད་ཙམ་ཡང༌། ཅི་ཡང་མེད་གང་གི་ཕྱིར། ཤེས་བྱ་དང་ཡོད་པ་དང་དེ་ཁོ་ན་དང་དོན་དམ་པ་ཞེས་བྱ་བ་ལ་སོགས་པ་བརྗོད་པ་དེ་དག་གི་གནས་ཀྱང་དེ་ན་མེད་པ་ཉིད་ཡིན་ཏེ། འཇུག་པའི་རྒྱུ་མཚན་མེད་པའི་ཕྱིར་རོ། །གལ་ཏེ་དེ་ལྟ་ཡིན་ན། དེ་ལ་ཞེས་བྱ་བའི་སྒྲས་དོན་དམ་པ་བརྗོད་པར་བྱ་བ་ཡིན་པར་བྱས་ལ། བརྗོད་པར་བྱ་བའི་བག་ཀྱང་མེད་དོ་ཞེས་བརྗོད་པ་ཇི་ལྟ་བུ་ཞེ་ན། དེ་ནི་ཉེས་པ་མེད་དེ། རྨོངས་པའི་བློ་དང་ལྡན་པ་གཞན་དག་དོན་དམ་པ་དེ་ལ་བརྗོད་པར་བྱ་བའི་བག་ཡོད་དོ་ཞེས་བརྗོད་དོ། །དེ་སྐད་བརྗོད་པར་མི་བྱའོ། །ཞེས་ཁོ་བོ་ཅག་དེ་དགག་པར་བྱེད་ཀྱི། ཁོ་བོ་ཅག་དེ་ལ་ཞེས་བྱ་བའི་སྒྲས་སམ། གཞན་གྱིས་རྗོད་པར་བྱེད་པ་ནི་མ་ཡིན་ཏེ། ཕ་རོལ་གྱི་རྟོག་པ་རྣམ་པར་བཅད་པ་ཙམ་འབའ་ཞིག་བྱེད་དུ་ཟད་དོ། །བག་ཀྱང་ཞེས་བྱ་བའི་བརྗོད་པའི་ཚིག་ནི་ལ་དོར་བ་བརྗོད་པ་གཙོར་བྱས་པའོ། །ཁོ་ན་ཞེས་བྱ་བ་ནི་བསྣན་པའི་ཕྱིར་རོ། །དེ་ཡི་ཕྱིར་ན་དྲིས་ཀྱང་དོན། །མི་གསུང་བཞུགས་པས་རྒྱ་ཆེར་བཤད། །ཀྱང་ཞེས་བྱ་བ་ནི་བསྣན་པའི་དོན་ཏེ། དྲིས་པ་ཁོ་ནའམ་བཞུགས་པ་ཁོ་ནའམ་རྒྱ་ཆེར་བཤད་པ་ཁོ་ནའོ། །རྒྱ་ཆེར་ཞེས་བྱ་བའི་ཚིག་ནི་སྤྱིའི་ངོ་བོས་སམ་བྱེ་བྲག་གི་ངོ་བོས་སམ་རབ་ཏུ་དབྱེ་བའི་ངོ་བོས་ནི་བསྟན་པར་མི་ནུས་པའོ། །གལ་ཏེ་དོན་དམ་པ་ནི་རྟེན་ཅིང་འབྲེལ་པར་འབྱུང་བ་ལ་མ་གཏོགས་པ་མ་ཡིན་ནམ། དེ་ལྟ་ཡིན་ན་ནི་མདོའི་ཚིག་དང་འགལ་བར་འགྱུར་རོ་ཞེ་ན། དེའི་ཕྱིར་ཆོས་རྣམས་ལ་ཆོས་ཀྱི་རྗེས་སུ་ལྟ་བ་ཅན་དུ་གནས་པའི་བྱང་ཆུབ་སེམས་དཔའ་དེ་ཞེས་བྱ་བ་སྨོས་སོ། །རྗེས་སུ་ལྟ་བར་བྱེད་པ་ནི་རྗེས་སུ་ལྟ་བ་སྟེ། ཆོས་རྣམས་ལ་སྐྱེ་བ་མེད་པ་ལ་སོགས་པའི་རྣམ་པ་དག་གིས་རྗེས་སུ་ལྟ་བའོ། །དེ་དེ་ལ་ཡོད་པས་ཆོས་ཀྱི་རྗེས་སུ་ལྟ་བ་ཅན་ནོ། །ཡང་ན་དེའི་ཚུལ་ཅན་ནོ། །མདོའི་ཚིག་འདི་ལ་འགལ་བ་མེད་དེ། ཅིའི་ཕྱིར་ཞེ་ན། ཆོས་ཞེས་སྨོས་པའི་ཕྱིར་རོ་ཞེས་བྱ་བ་སྨོས་སོ། །དོན་དམ་པར་ནི་ཆོས་ཀྱང་མེད། །ཆོས་མ་ཡིན་པ་ཡང་མེད་དོ། །ཡང་ཀུན་རྫོབ་ནི་རྣམ་པ་གཉིས་སུ་བསྟན་ཏེ་ཞེས་བྱ་བས་ནི་བྱེ་བྲག་ཏུ་རྟོགས་
པར་བྱ་བ་ཁོ་ནའི་ཕྱིར་གཞན་རྣམ་པ་གཉིས་སུ་བསྟན་ཏོ། །དོན་བྱེད་དག་ནུས་པའི་ཕྱིར། ཡང་དག་པས་སོ། །མི་ནུས་ཕྱིར་ཡང་དག་པ་མ་ཡིན་པས་སོ། །ཀུན་རྫོབ་ཀྱི་ནི་དབྱེ་བ་བྱས། །ཞེས་བྱ་བ་ནི་གྲངས་བཞིན་དུ་སྦྱར་བར་བྱའོ། །རྣམ་པར་འགྲེལ་པ་ནི་འདི་ཡིན་ཏེ། ཤེས་པའོ་ཅི་འདྲ་བ་ཞིག་ཅེ་ན། གསལ་བའི་རྣམ་པ་སྣང་བ་ཅན་དུ་འདྲ་ཡང་ཞེས་བྱ་བར་སྦྱར་ཏེ། འཇིག་རྟེན་གྱིས་ཡང་དག་པ་དང་ཡང་དག་པ་མ་ཡིན་པར་རྟོགས་སོ་ཞེས་བྱ་བར་སྦྱར་རོ། །ཅི་ཞིག་ཅེ་ན། ཆུ་ལ་སོགས་པ་དང༌། སྨིག་རྒྱུ་ལ་སོགས་པ་དག་སྟེ། གོ་རིམས་བཞིན་དུ་སྦྱར་རོ། །ཇི་ལྟ་བུར་བྱས་ནས་ཤེ་ན། ངེས་པར་བྱས་ནས་ཞེས་བྱ་བ་སྨོས་པའོ། །ཅི་ཞིག་ཡིན་པར་ཞེ་ན། དོན་བྱེད་པ་ལ་སླུ་བ་དང་མི་སླུ་བ་ཡིན་པར་ཞེས་བྱ་བ་སྨོས་པའོ། །འདིར་ཡང་གོ་རིམས་བཞིན་དུ་སྦྱར་རོ། །དོན་བྱེད་པ་ལ་སླུ་བ་དང་མི་སླུ་བ་ཡིན་པར་ངེས་པར་བྱས་ནས་ཞེས་བྱ་བ་ཇི་ལྟ་བུ་ཡིན་སྙམ་པ་ལ། དོན་ཇི་ལྟར་སྣང་བ་དེ་བཞིན་དུ་ཞེས་བྱ་བ་སྨོས་སོ། །གལ་ཏེ་ཡང་དག་པ་དང་ཡང་དག་པ་མ་ཡིན་པའི་བྱེ་བྲག་ཡོད་ན། འོ་ན་ནི་དངོས་པོ་དག་ངོ་བོ་ཉིད་མེད་པ་མ་ཡིན་ནོ་སྙམ་པ་ལ། དངོས་སུ་ན་གཉིས་ནི་ཞེས་བྱ་བ་ལ་སོགས་པ་སྨོས་སོ། །ཇི་ལྟར་ངོ་བོ་ཉིད་མཚུངས་ཤེ་ན། ངོ་བོ་ཉིད་མེད་པ་ཉིད་དུ་ཞེས་བྱ་བ་སྨོས་སོ། །འོ་ན་ཇི་ལྟར་ཡང་དག་པ་དང་ཡང་དག་པ་མ་ཡིན་པར་ཕྱེ་སྙམ་པ་ལ། ཇི་ལྟར་སྣང་བ་བཞིན་དུ་ནི་རྣམ་པར་གནས་སོ་ཞེས་བྱ་བ་སྨོས་ཏེ། འཇིག་རྟེན་གྱིས་ཇི་ལྟར་རྟོགས་པ་དེ་བཞིན་དུ་རྣམ་པར་གནས་སོ་ཞེས་བྱ་བའི་ཐ་ཚིག་གོ །དོན་བྱེད་པ་ལ་སླུ་བ་དང་མི་སླུ་བའི་རྒྱུས་རྣམ་པར་གཞག་པ་ཡིན་ན་ཅི་དེ་དག་བདེན་པ་ཡིན་ནམ་འོན་ཏེ་མ་ཡིན་ཞེ་ན། དོན་བྱེད་པ་ལ་སླུ་བ་དང་མི་སླུ་བ་ཡང་ཇི་ལྟར་གྲགས་པ་ཁོ་ན་བཞིན་ཏེ་ཞེས་བྱ་བ་སྨོས་སོ། །ཅིའི་ཕྱིར་ཞེ་ན། དོན་བྱེད་པ་དེ་ཡང་ངོ་བོ་ཉིད་མེད་པའི་ཕྱིར་རོ་ཞེས་བྱ་བ་སྨོས་སོ། །ཡང་གི་སྒྲ་གཉིས་ཀྱིས་ནི་ཡང་དག་པ་དང་ཡང་དག་པ་མ་ཡིན་པའི་ཐ་དད་པར་སྟོན་ཏོ། །དེ་ལྟར་ན་ཀུན་རྫོབ་ནི་རྣམ་པ་གསུམ་དུ་བསྟན་ཏེ། ཡང་དག་པའི་ཀུན་རྫོབ་ནི་རྣམ་པ་གཅིག་གོ །ཡང་དག་པ་མ་ཡིན་པའི་ཀུན་རྫོབ་ལ་ནི་རྣམ་པ་གཉིས་ཏེ། རྣམ་པར་རྟོག་པ་དང་བཅས་པ་དང༌། རྣམ་པར་མི་རྟོག་པའི་བྱེ་བྲག་གི་ཕྱིར་རོ།། །།བམ་པོ་གཉིས་པ། གལ་ཏེ་
ཁྱོད་ཀྱང་བརྟེན་ནས་སྐྱེས་པ་དོན་གྱི་བྱ་བ་བྱེད་པ་དངོས་པོ་ཙམ། ཇི་ལྟར་སྣང་བ་བཞིན་དུ་འདོད་ན་ནི་དེ་འུ་བུ་ཅག་ལ་མཚུངས་པ་ཁོ་ནའོ། །ཀྱང་ཞེས་བྱ་བའི་སྒྲ་ནིང་འབའ་ཞིག་མ་ཡིན་ནོ། །རིགས་མིན་པར་ཞེས་བྱ་བ་ནི་འདོད་ཅེས་བྱ་བར་བསྙེགས་སོ། །བརྟེན་ནས་སྐྱེས་པ་དོན་གྱི་བྱ་བ་བྱེད་པ་དངོས་པོ་ཙམ་ལ་རིགས་པར་འདོད་ན་ནི་ཐམས་ཅད་འཁྲུགས་པར་འགྱུར་ཏེ་རིགས་པར་ན་མི་རུང་ངོ་ཞེས་བྱ་བའི་ཐ་ཚིག་གོ །ཁོ་བོ་ཅག་ང་རྒྱལ་ག་ལ་བྱེད་ཅེས་བྱ་བ་ནི། ཅི་ཁྱོད་དང་མཚུངས་སམ་སྙམ་དུ་སེམས་པའོ། །འདི་ཞེས་བྱ་བ་ནི་བརྟེན་ནས་སྐྱེས་པ་དོན་གྱི་བྱ་བ་བྱེད་པ་དངོས་པོ་ཙམ་མོ། །ཅིའི་ཕྱིར་བརྔས་ནས་འཐོར་བ་དང་འདྲ་སྙམ་པ་ལ། འདི་ལྟར་རྒྱུ་དང་འབྲས་བུའི་དངོས་པོར་རྣམ་པར་ངེས་པ་འདི་ལ་ཁྱོད་ཀྱི་ཐབས་མེད་པ་ཁོ་ན་ཡིན་ནོ་ཞེས་བྱ་བ་སྨོས་སོ། །ཅིའི་ཕྱིར་ཐབས་མེད་པ་ཁོ་ན་ཡིན་སྙམ་པ་ལ། འདི་ལྟར། རྣམ་པ་མེད་པའི་ཤེས་པ་ནི། ཡུལ་ལ་འཛིན་པར་མི་རིགས་སོ་ཞེས་བྱ་བ་སྨོས་ཏེ། རྣམ་པ་མེད་པའི་ཤེས་པ་ནི་རིག་པ་འདི་སྔོན་པོ་ཡིན་གྱི། འདི་སེར་པོ་ནི་མ་ཡིན་ནོ་ཞེས་རྣམ་པར་གཞག་པར་མི་འགྲུབ་སྟེ། ཉེ་བའི་རྒྱུ་མེད་པའི་ཕྱིར་རོ། །དེའི་ཕྱིར་དེས་ཡུལ་ལ་འཛིན་པར་ག་ལ་འགྱུར། ཅིག་ཤོས་ཞེས་བྱ་བ་ནི་རྣམ་པ་དང་བཅས་པ་སྟེ། ཡུལ་ལ་འཛིན་པར་མི་རིགས་སོ་ཞེས་བྱ་བར་བསྙེགས་སོ། །ཅིའི་ཕྱིར་ཞེ་ན། རྣམ་པ་ཚད་མ་མིན་པའི་ཕྱིར་རོ། །དངོས་པོས་ནི་རྣམ་པ་ལ་མ་ཁྱབ་སྟེ། མི་རྟག་པ་ཉིད་ཀྱིས་གཞལ་བྱ་ཉིད་ལ་མ་ཁྱབ་པ་བཞིན་ཏེ། འདི་ལྟར་རྨི་ལམ་ལ་སོགས་པ་ལ་སྔོན་པོ་ལ་སོགས་པ་མེད་ཀྱང༌། བློ་ལ་སྔོན་པོ་ལ་སོགས་པར་སྣང་བ་ཡོད་པའི་ཕྱིར་རོ། །དེའི་ཕྱིར་རྣམ་པ་དེ་རིགས་པ་ཇི་ལྟར་དངོས་པོ་རྟོགས་པར་བྱེད་པར་འགྱུར། གལ་ཏེ་རྟོགས་པར་བྱེད་ན་ནི་མི་རྟག་པ་ཉིད་ཀྱང་གཞལ་བྱ་ཉིད་ཀྱིས་རྟོགས་པར་བྱེད་པར་འགྱུར་རོ། །མི་རིགས་པའི་ཕྱིར་ཞེས་བྱ་བ་ནི་རྣམ་པའོ། །ཡུལ་ལ་འཛིན་པར་མི་རིགས་སོ། །ཅིའི་ཕྱིར་མི་རིགས་ཤེ་ན། འདི་ལྟར། གང་ཕྱིར་སྣ་ཚོགས་ངོ་བོ་རུ། །སྣང་བ་ཅན་གྱི་དངོས་གཅིག་ལ། །ཞེས་བྱ་བ་ལ། ངོ་བོ་ནི་ཤེས་པའི་བདག་ཉིད་ལ་སྟེ། རྣམ་པ་རྣམས་བདེན་ཇི་ལྟར་འགྱུར། །ཅིའི་ཕྱིར་བདེན་པར་མི་འགྱུར་སྙམ་པ་ལ། དེ་ཡི་གཅིག་ཉིད་ཉམས་ཕྱིར་རོ། །ཞེས་བྱ་བ་སྨོས་ཏེ་དེའི་ཕྱིར་རོ། །དེ་ལྟ་ན་ནི་ཤེས་པའི་
བདག་ཉིད་ཀྱི་དངོས་པོ་དེ་གཅིག་པུ་ཉིད་དུ་མི་རུང་སྟེ། རྣམ་པ་དག་དང་ཐ་དད་པ་མ་ཡིན་པའི་ཕྱིར་ཏེ། རྣམ་པའི་བདག་ཉིད་བཞིན་ནོ། །ཡང་ན་རྣམ་པ་རྣམས་ཐ་དད་པར་མི་འགྱུར་ཏེ། ཤེས་པའི་བདག་ཉིད་གཅིག་པ་དང་ཐ་མི་དད་པའི་ཕྱིར་ཏེ། ཤེས་པའི་རང་གི་ངོ་བོ་བཞིན་ནོ། །དེ་ལྟར་རྣམ་པ་མེད་པའམ་རྣམ་པ་དང་བཅས་པའི་ཤེས་པ་ཡུལ་ལ་མི་འཛིན་ན། འབྲས་བུ་དང་རྒྱུ་ཉིད་འདི་ནི་མི་རུང་ངོ་ཞེས་བྱ་བ་ལྷག་མའོ། །ཅིའི་ཕྱིར་སྙམ་པ་ལ། མངོན་སུམ་དང༌། མི་དམིགས་པའི་ས་ཞེས་བྱ་བ་སྨོས་ཏེ། རྣམ་པ་དང་བཅས་པའམ། རྣམ་པ་མེད་པའི་མངོན་སུམ་གྱིས་དོན་ཡོངས་སུ་གཅོད་པར་མི་རིགས་སོ། །རྣམ་པ་གཞན་ནི་མེད་དོ། །མི་དམིགས་པ་ནི་བུམ་པ་ལ་སོགས་པས་དབེན་པའི་ས་གཞི་ལ་སོགས་པ་དམིགས་པས་མངོན་སུམ་ཉིད་དོ། །མངོན་སུམ་དང་མི་དམིགས་པ་གཉིས་ལས་གཞན་པའི་རྣམ་པ་ཞིག་སོམས་ཤིག །གལ་ཏེ་རྣམ་པ་གཞན་ཞིག་ཡོད་པ་ཁོ་ན་ཡིན་ནོ་སྙམ་པ་ལ། གལ་ཏེ་རྒྱུ་འབྲས་ཉིད་བློ་ཡི། །ཐབས་འགའ་ཞིག་ནི་ཡོད་ཅེ་ན། །དེ་སྨྲོས། ཞེས་བྱ་བ་སྨོས་ཏེ། དེ་ཞེས་བྱ་བ་ནི་ཐབས་ཏེ་དེ་སྨྲོས་ཤིག་པའོ། །ཇི་སྟེ་སེར་སྣའི་ཕྱིར་མི་བརྗོད་དོ་ཞེ་ན། དེའི་ཕྱིར། འདུད་པ་བདག་ཅག་ལ་སེར་སྣ་བྱ་བ་ག་ལ་རིགས་ཞེས་བྱ་བ་སྨོས་སོ། །འདིར་ནི་འདུད་པའི་ཕྱིར་སེར་སྣའི་རྒྱུ་མེད་པས་སེར་སྣ་ཡང་མེད་པར་སྟོན་ཏོ། །གལ་ཞེས་བྱ་བ་ནི་སྤོང་བ་བརྗོད་པའོ། །རྣམ་པ་གཞན་དཔྱོད་ཅིག་ཅེས་བྱ་བ་དེ་ཅིའི་ཐ་ཚིག །ཡང་ནི་རྣམ་པ་གཞན་ནི་ཡོད་པ་ཉིད་དེ། འདི་ལྟར་སྐད་ཅིག་སྔ་མ་འབྱུང་བ་ལ་ཡོངས་སུ་གཅོད་པའི་ཤེས་པ་གང་ཡིན་པ་ཡང་རང་རིག་པ་ལས་འགྱུར་ལ། སྐད་ཅིག་ཕྱི་མ་འབྱུང་བ་ཡང་རང་རིག་པ་ལས་གཅོད་དེ། དེའི་ཕྱིར་འདི་ནི་འདིའི་མཇུག་ཐོགས་ཡིན་པར་རྟོགས་པས་འདི་ནི་རྒྱུའོ། །འདི་ནི་འབྲས་བུའོ་ཞེས་བྱ་བར་རྟོགས་སོ། །དེ་ལྟ་མ་ཡིན་ན་ནི་མཇུག་ཐོགས་ངེས་པར་མི་རུང་ངོ༌། །ཇི་སྟེ་རུང་ན་ནི་ཧ་ཅང་ཐལ་བའི་སྐྱོན་དུ་འགྱུར་རོ་ཞེ་ན། དེ་ནི་མི་རིགས་ཏེ། འདི་ལྟར་རང་རིག་པ་ནི་ཡོངས་སུ་གཅོད་པར་རིག་པའི་ཆ་ཙམ་ལ་ཡང་མ་རིག་གོ་ཞེས་བསྟན་ཟིན་ཏོ། །འདི་ནི་འདིའི་མཇུག་ཐོགས་སོ་ཞེས་བྱ་བའི་རིག་པ་ཡང་མི་འགྲུབ་སྟེ། དེའི་ཡུལ་ནི་བརྟགས་པ་མ་ཡིན་པའི་ཕྱིར་རོ། །ཤེས་པ་གཞན་གྱིས་འགྲུབ་པར་
རྟོག་ན་ཡང་མི་རིགས་ཏེ། རྣམ་པ་མེད་པ་དང་རྣམ་པ་དང་བཅས་པས་ཡོངས་སུ་གཅོད་པར་མི་རིག་པའི་ཕྱིར་རོ། །ཡོངས་སུ་གཅོད་པར་རིག་ན་ནི་ཤེས་པའི་དོན་ཡུལ་གཞན་དུ་འགྱུར་ཏེ། དེ་ནི་ཁྱེད་མི་འདོད་དོ། །ཤེས་པ་དེ་གཉིས་ཁོ་ནས་མཇུག་ཐོགས་སུ་འབྱུང་བ་ངེས་པར་ཡོངས་སུ་གཅོད་པ་ཡང་མ་ཡིན་ཏེ། དེ་གཉིས་ཀ་ཡང་འགགས་པའི་ཕྱིར་རོ། །འདི་ནི་དེའི་འོག་ཏུ་འབྱུང་ངོ་ཞེས་ཡོངས་སུ་གཅོད་པ་མེད་པར་རྒྱུ་དང་འབྲས་བུ་ཉིད་དུ་རིགས་པར་ག་ལ་འགྱུར་ཏེ། ཧ་ཅང་ཡང་ཐལ་བའི་ཕྱིར་མི་རུང་ངོ༌། །དེ་ལྟ་ན་ནི་གཞན་གྱི་སེམས་ཀྱི་རྒྱུད་ལ་ཡོད་པའི་ལས་འདིའི་འབྲས་བུ་འདི་ཡིན་ནོ་ཞེས་བྱ་བར་རིག་པ་མེད་པས་ཐམས་ཅད་མཁྱེན་པ་དག་གིས་ཀྱང་རྟོགས་པར་མི་སྤྱོད་དེ། རིག་པའི་ཡུལ་ནི་རང་གི་ངོ་བོ་ཙམ་ཡིན་པའི་ཕྱིར་རོ། །གང་གིས་འདི་ལྟ་བུར་རྟོགས་པའི་རྣམ་པ་གཞན་ནི་མེད་དོ། །དེས་ན་ཐམས་ཅད་མཁྱེན་དེས་ཀྱང་ཞེས་བྱ་བའི་ཀྱང་གི་སྒྲ་ནི་གཞན་ཉི་ཚེ་མ་ཡིན་ནོ། །དེས་ན་རྣམ་པ་མེད་པའི་ཤེས་པ་ནི། །ཡུལ་ལ་འཛིན་པར་མི་རིགས་སོ། །ཞེས་བྱ་བ་ལ་སོགས་པའི་རྣམ་པས་རྒྱུ་དང་འབྲས་བུ་ཉིད་ཅུང་ཟད་ཙམ་ཡང་ངེས་པར་རྟོགས་པར་མི་ནུས་སོ། །ཡང་གི་སྒྲ་ནི་མཐའ་དག་ཀྱང་མ་ཡིན་པའོ། །གང་དག་གི་ཞེ་ན། གཞན་གྱི་དབང་གི་སྐད་ཅིག་གིའོ། །སངས་རྒྱས་སྤྱོད་ཡུལ་བསམ་ཡས་པས། །ཐམས་ཅད་མཁྱེན་པ་ཁོ་ནས་མཁྱེན། །ཞེས་བྱ་བ་ལ་སོགས་པའི་དོན་ནི་གསལ་བས་མ་བཤད་དོ། །འདི་དག་ཙམ་གྱིས་རྒྱུ་དང་འབྲས་བུའི་དངོས་པོར་ཁས་བླངས་པའི་ཐབས་མེད་པར་བསྟན་ཏོ། །ད་ནི་རྒྱུ་དང་འབྲས་བུའི་དངོས་པོ་ཉིད་ཀྱང་མེད་པར་བསྟན་པའི་ཕྱིར། རྒྱུ་དང་འབྲས་བུའི་དངོས་པོ་ཡང་རིགས་པ་མ་ཡིན་ཏེ། ཅིའི་ཕྱིར་ཞེ་ན། འདི་ལྟར། དུ་མས་དངོས་པོ་གཅིག་མི་བྱེད། །དུ་མས་དུ་མ་བྱེད་མ་ཡིན། །གཅིག་གིས་དུ་མའི་དངོས་མི་བྱེད། །གཅིག་གིས་གཅིག་བྱེད་པ་ཡང་མིན། །ཞེས་བྱ་བ་སྨོས་སོ། །ཚིགས་སུ་བཅད་པ་འདི་ལ་ནི། །རྣམ་པར་རྟོག་པ་བཞི་ཡོད་དེ། །དེ་ལ་དང་པོའི་དབང་དུ་བྱས་ནས། དུ་མས་གཅིག་བྱེད་པ་མ་ཡིན་ཏེ་ཞེས་བྱ་བ་སྨོས་སོ། །ཅིའི་ཕྱིར་དུ་མས་གཅིག་མི་བྱེད་སྙམ་པ་ལ། འདི་ལྟར། ངོ་བོ་ཉིད་ཐ་དད་པ་མིག་ལ་སོགས་པ་དག་ལས་ཞེས་བྱ་བ་སྨོས་ཏེ། སོགས་པ་སྨོས་པས་ནི་གཟུགས་དང་སྣང་བ་དང་ཡིད་ལ་བྱེད་པ་
ལ་སོགས་པ་དག་བསྡུའོ། །འབྲས་བུ་ཐ་དད་པ་མ་ཡིན་པ་ཞེས་བྱ་བ་ནི་མིག་གི་རྣམ་པར་ཤེས་པ་སྟེ་འབྱུང་བར་ཁས་བླངས་པ་ལ། རྒྱུ་ཐ་དད་པ་ནི་ཐ་དད་པ་བྱེད་པར་མི་འགྱུར་རོ། །ཅིའི་ཕྱིར་སྙམ་པ་ལ། དེ་ཐ་དད་ཀྱང་ཞེས་བྱ་བ་སྨོས་ཏེ། རྒྱུ་ཐ་དད་ཀྱང་ངོ༌། །ཐ་དད་པ་མེད་པའི་ཕྱིར་རོ་ཞེས་བྱ་བ་ནི་འབྲས་བུའོ། །དེ་ལྟ་ན། ཐ་དད་པ་མ་ཡིན་པ་མེད་ཀྱང་ཞེས་བྱ་བ་ནི་རྒྱུ་ལ་བྱའོ། །ཐ་དད་པ་མེད་པར་གྱུར་པས། །ཞེས་བྱ་བ་ནི་འབྲས་བུའོ། །དེ་ལྟ་བས་ན་ཐ་དད་པ་མེད་པ་ནི་རྒྱུའོ། །ཐ་དད་པ་མེད་པ་བྱེད་པར་མི་འགྱུར་བ་ནི་འབྲས་བུའོ། །རྒྱུའི་ཐ་དད་པ་དང་ཐ་དད་པ་མེད་པའི་རྗེས་སུ་འགྲོ་བ་དང་ལྡོག་པ་ལ་ལྟོས་པ་འབྲས་བུའི་ཐ་དད་པ་དང༌། ཐ་དད་པ་མེད་པ་དག་ནི་རྒྱུ་དང་བཅས་པར་འགྱུར་ན། འདིར་ནི་དེ་ལྟ་མ་ཡིན་ཏེ། དེའི་ཕྱིར་འབྲས་བུའི་ཐ་དད་པ་དང་ཐ་དད་པ་མེད་པ་དག་ནི་རྒྱུ་མེད་པ་ཅན་དུ་འགྱུར་རོ། །གལ་ཏེ་ཁྱོད་ཀྱིས་ཐ་དད་པ་དང་ཐ་དད་པ་མེད་པ་དག་རྒྱུ་མེད་པ་ཅན་ཡིན་ནོ་ཞེ་ན། དེ་ལས་གུད་ན་མེད་པའི་ཕྱིར། །ཞེས་བྱ་བ་སྨོས་ཏེ། ཐམས་ཅད་ནི་ཐ་དད་པ་དང་ཐ་དད་པ་མ་ཡིན་པ་ལས་གུད་ན་མེད་པའི་ཕྱིར། ཐམས་ཅད་ཀུན་རྒྱུ་མེད་པ་ཅན་དུ་འགྱུར་རོ། །དེ་ལྟར་རྒྱུ་མེད་པ་ཅན་དུ་གྱུར་ན་རྟག་ཏུ་ཡོད་པའམ་མེད་པ་ཞིག་ཏུ་འགྱུར་ཏེ། ཐམས་ཅད་ཅེས་བྱ་བ་ལྷག་མའོ། །ཅིའི་ཕྱིར་ཞེ་ན། རྒྱུ་གཞན་ལ་ནི་མི་ལྟོས་པའི་ཕྱིར་རོ། །ལྟོས་ན་ནི་དངོས་པོ་རྣམས་རེས་འགའ་བ་ཉིད་ཡིན་པར་སྲིད་དོ། །གལ་ཏེ་འབྲས་བུའི་སྐྱེད་པར་བྱེད་པ་ནི་ཚོགས་པ་ཅན་ཡིན་ཏེ། དེའི་ཡང་ཐ་དད་པ་དང་ཐ་དད་པ་མ་ཡིན་པའི་རྗེས་སུ་བྱེད་པར་གསལ་ཞིང་དེའི་རྗེས་སུ་འགྲོ་བ་དང༌། ལྡོག་པའི་རྗེས་སུ་བྱེད་པ་དེས་ན། འབྲས་བུ་ཐ་དད་པ་དང་ཐ་དད་པ་མ་ཡིན་ཏེ། དེ་བས་ན་ཇི་ལྟར་རྒྱུ་མེད་པ་ཅན་དུ་འགྱུར་བ་ཡིན་ཞེ་ན། དེ་ནི་རུང་བ་མ་ཡིན་ཏེ། འདི་ལྟར་ཚོགས་པ་ཅན་དག་ལས། །གུད་ན་ཚོགས་པ་ཅན་ཞེས་བྱ་བ་གང་ཡང་མེད་པའི་ཕྱིར་རོ། །དེ་དག་ཀྱང་ཕན་ཚུན་ཐ་དད་པ་ལོག་པའི་ངོ་བོ་ཉིད་ཡིན་པས་ཐ་དད་པ་ཁོ་ན་ཡིན་ན། འབྲས་བུ་ཐ་དད་པ་མ་ཡིན་པ་གཅིག་པུ་སྐྱེད་པར་ཇི་ལྟར་ནུས། ཚོགས་པ་ཅན་གཞན་གྱི་ནང་དུ་གཏོགས་པའི་ཚོགས་པ་དག་ཀྱང་ཅིའི་ཕྱིར་དེ་སྐྱེད་པར་མི་བྱེད། དེ་ལས་ཐ་དད་པའི་ཕྱིར་སྐྱེད་པར་མི་བྱེད་དོ་ཞེ་ན། དེ་བཞིན་ནོ། །གང་དག་
དེ་སྐྱེད་པའི་ངོ་བོ་ཉིད་ཀྱི་བྱེ་བྲག་དང་ལྡན་པའི་ལུས་མྱོང་བར་བྱེད་པ་དེ་དག་དེ་སྐྱེད་པར་བྱེད་ཀྱི་ཅིག་ཤོས་ནི་མ་ཡིན་ནོ་ཞེ་ན་ཡང་འཁྲུལ་པ་ཡིན་ཏེ། དེ་སྐྱེད་པའི་ངོ་བོ་ཉིད་ཀྱི་བྱེ་བྲག་གཅིག་ལས་ཐ་དད་པ་མ་ཡིན་པ་དང་ལྡན་པའི་ལུས་འཛིན་པ་ནི་མིག་ལ་སོགས་པ་འདི་དག་ཕན་ཚུན་ཐ་དད་པར། མངོན་སུམ་ལ་སོགས་པའི་ཚད་མ་དང་འགལ་བར་འགྱུར་རོ། །ཡང་ན་དེ་སྐྱེད་པའི་ངོ་བོ་ཉིད་ཀྱང་ཐ་དད་པར་འགྱུར་ཏེ། ངོ་བོ་ཉིད་ཐ་དད་པ་མིག་ལ་སོགས་པ་ཐ་དད་པའི་ཕྱིར་རོ། །དེ་ལྟ་ན་ནི་ངོ་བོ་ཉིད་ཐ་དད་པ་མིག་ལ་སོགས་པ་ཞེས་བརྗོད་པའི་སྐྱོན་དུ་འགྱུར་བ་དེ་ཉིད་ཀྱིས་ཕྱོགས་དེ་ཤིན་ཏུ་ལེགས་པ་མ་ཡིན་པར་སྟོན་ཏོ། །ཇི་སྟེ་དེ་དག་ལས་དེ་སྐྱེད་པའི་ངོ་བོ་ཉིད་ཀྱི་བྱེ་བྲག་ཐ་དད་དོ་ཞེས་གཞན་ཟེར་ན། དེ་ལྟ་ན་ཡང་ཉེས་པ་འདི་ཉིད་ཡིན་ཏེ། གང་གི་ཕྱིར་འདི་ཉིད་འབྲས་བུ་བསྒྲུབ་པའི་མཐུའི་བྱེ་བྲག་དང་ལྡན་པ་མྱོང་བར་བྱེད་དོ། །འབྲས་བུ་འབྱུང་བར་བྱ་བའི་བྱེད་པ་བྱེ་བྲག་ཅན་བླངས་པ་ཡིན་གྱི། མིག་ལ་སོགས་པ་གཞན་ནི་དེ་ལྟ་མ་ཡིན་པར་འགྱུར་ཏེ། དེའི་ཕྱིར་ནུས་པར་བརྗོད་པ་མཐའ་དག་དང་བྲལ་བའི་གནས་སྐབས་སུ་འགྱུར་བས་དངོས་པོ་མེད་པའི་ངོ་བོ་ཉིད་ལས། དེའི་ངོ་བོ་གཞན་ཅི་ཞིག་ཡོད་ཤིན་ཏུ་སྨྲོས་ཤིག །དེའི་ཕྱིར་ཁྱོད་མངོན་སུམ་ལ་སོགས་པ་དང་འགལ་བ་དང་ཤིན་ཏུ་ལྡན་པར་འགྱུར་རོ། །ཕྱོགས་གཉིས་པ་ལ་བརྟེན་ནས་ལན་གདབ་པའི་ཕྱིར། དེ་ལྟར་ནི་མི་འགྱུར་ཏེ་ཞེས་བྱ་བ་སྨོས་ཏེ། ཐམས་ཅད་རྒྱུ་མེད་པ་ཅན་ཉིད་དུ་འགྱུར་བའོ། །དེ་ཅིའི་ཕྱིར་ཞེ་ན། གང་གི་ཕྱིར་རྒྱུ་དུ་མས་དུ་མ་བྱེད་པའི་ཕྱིར་རོ་ཞེས་བྱ་བ་སྨོས་སོ། །དེ་ཉིད་ཅིའི་ཕྱིར་ཞེ་ན། རྒྱུའི་ཉེ་བར་སྦྱོར་བས་འབྲས་བུའི་ངོ་བོ་ཉིད་ཀྱི་བྱེ་བྲག་མ་འདྲེས་པའི་ཕྱིར་རོ་ཞེས་བྱ་བ་སྨོས་སོ། །རྒྱུ་རྣམས་ཀྱི་ཉེ་བར་སྦྱོར་བ་ནི་བྱེད་པ་སྟེ། བྱེད་པས་འབྲས་བུ་བསྐྱེད་པར་བྱ་བའི་ངོ་བོ་ཉིད་ཀྱི་བྱེ་བྲག་དེ་མ་འདྲེས་པའི་ཕྱིར་རོ་ཞེས་ཚིག་རྣམ་པར་སྦྱར་རོ། །ཡང་ན་རྒྱུའི་ཉེ་བར་སྦྱོར་བས་འབྲས་བུ་དེའི་ངོ་བོ་ཉིད་ཀྱི་བྱེ་བྲག་དེ་མ་འདྲེས་པའི་ཕྱིར་རོ། །དེ་ཉིད་ཅིའི་ཕྱིར་སྙམ་པ་ལ། དེའི་བྱེ་བྲག་ལ་ཉེ་བར་སྦྱོར་བའི་ཕྱིར་ཏེ་ཞེས་བྱ་བ་སྨོས་ཏེ། འབྲས་བུ་དེའི་བྱེ་བྲག་ལ་རྒྱུ་རྣམས་ཉེ་བར་སྦྱོར་བའི་ཕྱིར་རོ་ཞེས་བྱ་བའི་ཐ་ཚིག་གོ །གལ་ཏེ་དེའི་བྱེ་བྲག་ལ་རྒྱུ་རྣམས་ཉེ་བར་སྦྱོར་བ་ཇི་ལྟ་བུ་ཞེ་ན། དེའི་ཕྱིར་རང་གི་ངོ་བོ་ཉིད་ཇི་ལྟ་བུ་
བྱེ་བྲག་གིས་ཞེས་བྱ་བ་སྨོས་ཏེ། རྒྱུ་གང་གི་ངོ་བོ་ཉིད་ཅི་འདྲ་བ་དེ་འདྲ་བ་ཁོ་ན་འབྲས་བུའི་ངོ་བོ་ཉིད་ལ་སྦྱོར་ཞེས་བྱ་བའི་ཐ་ཚིག་གོ །གལ་ཏེ་དེ་ཉིད་ཇི་ལྟ་བུ་ཞིག་ཅེ་ན། དེའི་ཕྱིར་འདི་ལྟར་མཚུངས་པ་དེ་མ་ཐག་པའི་རྐྱེན་གྱི་རྣམ་པར་ཤེས་པ་ལས་ནི་མིག་གི་རྣམ་པར་ཤེས་པ་རྟོགས་པའི་བདག་ཉིད་དུ་འགྱུར་རོ། །མིག་གི་དབང་པོ་ལས་ནི་རྟོགས་པའི་བདག་ཉིད་དེ་གཟུགས་ལ་འཛིན་ནུས་པ་ཉིད་དུ་སོ་སོར་ངེས་སོ། །ཡུལ་ལས་ནི་དེ་དང་མཐུན་པའི་ངོ་བོ་ཁོ་ནར་འགྱུར་རོ། །དངོས་སུ་ན་འབྲས་བུ་ཐ་དད་པ་མ་ཡིན་ཡང༌། རྒྱུ་རྣམས་ཀྱི་ངོ་བོ་ཉིད་ཐ་དད་པ་དག་གིས་ངོ་བོ་ཉིད་ཐ་དད་པ་ཁོ་ནར་འགྱུར་ཏེ། རྒྱུ་ཐ་དད་པས་ཀྱང་འབྲས་བུའི་བྱེ་བྲག་དེ་ཐ་དད་པ་མེད་པ་ནི་མ་ཡིན་ནོ། །གཞན་དུ་ཡང་དེ་བཞིན་དུ་སྦྱར་བར་བྱའོ་ཞེས་བྱ་བ་སྨོས་སོ། །འདི་བསལ་བའི་ཕྱིར། དེ་ནི་རིགས་པ་མ་ཡིན་ཏེ། །ཞེས་བྱ་བ་སྨོས་ཏེ། རིགས་པས་རུང་བ་མ་ཡིན་ཞེས་བྱ་བའི་ཐ་ཚིག་གོ །ཅིའི་ཕྱིར་སྙམ་པ་ལ། རྟོགས་པའི་བདག་ཉིད་ལ་སོགས་པ་དག་ཅེས་བྱ་བ་སྨོས་ཏེ། སོགས་པ་སྨོས་པས་ནི་གཟུགས་ལ་འཛིན་ནུས་པ་ཉིད་དུ་ངེས་པ་ལ་སོགས་པ་བསྡུའོ། །ཕན་ཚུན་ཐ་དད་པར་ཁས་ལེན་ན་ནི་རྣམ་པར་ཤེས་པ་དེ་དུ་མར་འགྱུར་ཏེ་རྟོགས་པའི་བདག་ཉིད་ལ་སོགས་པ་དེ་དག་དང་ཐ་མི་དད་པའི་ཕྱིར་ཏེ། རྟོགས་པའི་བདག་ཉིད་ལ་སོགས་པའི་རང་གི་བདག་ཉིད་བཞིན་ནོ། །ཇི་སྟེ་ན་གལ་ཏེ་དེ་དག་དང་ཐ་མི་དད་པ་མི་འགྲུབ་སྟེ། དེ་ལྟ་ན་རྣམ་པར་ཤེས་པ་དུ་མ་ཉིད་དུ་མི་འགྱུར་རོ་ཞེ་ན། དེའི་ཕྱིར། ཐ་དད་ན་ནི། ཞེས་བྱ་བ་སྨོས་ཏེ། ཐ་དད་པར་ཁས་ལེན་ན་ནི་རྒྱུ་མེད་པ་ཅན་དུ་འགྱུར་ཏེ། རྣམ་པར་ཤེས་པ་དེ་ཞེས་བྱ་བ་ལྷག་མའོ། །ཅིའི་ཕྱིར་རྒྱུ་མེད་པ་ཅན་དུ་འགྱུར་སྙམ་པ་ལ། རྒྱུའི་བྱེད་པ་རྣམ་པར་ཤེས་པ་ལས་གཞན་དུ་འབྲས་བུའི་བྱེ་བྲག་ལ་ཉེ་བར་སྦྱར་བ་བྱས་པའི་ཕྱིར་རོ་ཞེས་བྱ་བ་སྨོས་སོ། །དེ་ལྟ་ན་ཡང་རྟག་ཏུ་ཡོད་པའམ་མེད་པ་ཞིག་ཏུ་འགྱུར་རོ་ཞེས་བྱ་བའི་ཉེས་པ་ཡོད་དོ། །ཇི་སྟེ་ཇི་སྐད་སྨོས་པའི་ཉེས་པས་འཇིགས་པའི་ཕྱིར་ཐ་དད་པར་ཁས་མི་ལེན་ན། དེ་ལྟར་གྱུར་ན་ནི་རྣམ་པར་ཤེས་པ་དུ་མ་ཉིད་དུ་འགྱུར་བའི་ཉེས་པ་སྔར་སྨོས་པ་འབའ་ཞིག་ཏུ་མ་ཟད་ཀྱི་གཞན་ཡང་ཡོད་དེ། རྟོགས་པའི་བདག་ཉིད་ཅན་ལ་སོགས་པ་དེ་དག་ཕན་ཚུན་ཐ་
དད་པ་མེད་པར་ཡང་འགྱུར་ཏེ། ཐ་དད་པ་མེད་པར་འགྱུར་རོ་ཞེས་བྱ་བའི་ཐ་ཚིག་གོ །ཅིའི་ཕྱིར་སྙམ་པ་ལ། རྣམ་པར་ཤེས་པ་གཅིག་ལས་གཞན་མ་ཡིན་པའི་ཕྱིར་རོ་ཞེས་བྱ་བ་སྨོས་ཏེ། རྣམ་པར་ཤེས་པའི་རང་གི་བདག་ཉིད་བཞིན་ནོ། །དེ་ལྟ་ན་ནི་རྒྱུའི་ཡུལ་ཐ་དད་པར་བརྟགས་པས་དོན་ཅི་ཞིག་གསོས་པར་འགྱུར་ཏེ། ཚིག་བར་མ་མ་སྨོས་པས་རྒྱུའི་བྱེད་པའི་ཡུལ་ཐ་དད་པར་བརྟགས་པས་ཞེས་བྱ་བའི་ཐ་ཚིག་གོ །དེའི་ཕྱིར་དེ་ལྟ་བས་ན་གནས་སྐབས་དེའི་ཉེས་པར་འགྱུར་ཏེ། ངོ་བོ་ཉིད་ཐ་དད་པ་མིག་ལ་སོགས་པ་དག་ལས་འབྲས་བུ་ཐ་དད་པ་མ་ཡིན་པ་འབྱུང་བ་ལ། རྒྱུ་ཐ་དད་པ་ནི་ཐ་དད་པ་བྱེད་པར་མི་འགྱུར་ཏེ། དེ་ཐ་དད་ཀྱང་ཐ་དད་པ་མེད་པའི་ཕྱིར་རོ། །ཐ་དད་པ་མ་ཡིན་པ་མེད་ཀྱང་ཐ་དད་པ་མེད་པར་འགྱུར་རོ། །ཐ་དད་པ་མེད་པ་ཡང་ཐ་དད་པ་མེད་པར་བྱེད་པར་མི་འགྱུར་རོ། །དེའི་ཕྱིར་ཐ་དད་པ་དང་ཐ་དད་པ་མེད་པ་ནི་རྒྱུ་མེད་པ་ཅན་དུ་འགྱུར་ཏེ། ཐམས་ཅད་ཀྱང་དེ་ལས་གུད་ན་མེད་པའི་ཕྱིར། ཐམས་ཅད་ཀུན་རྒྱུ་མེད་པ་ཅན་དུ་འགྱུར་རོ། །དེ་ལྟར་གྱུར་ན་བརྟག་ཏུ་ཡོད་པའམ་མེད་པ་ཞིག་ཏུ་འགྱུར་རོ་ཞེས་སྨོས་པ་གང་ཡིན་པ་སྔ་ན་ཡོད་པ་དེའི་གནས་སྐབས་ཞེས་བྱའོ། །བརྒྱ་ཞིག་ལ་ཤེས་པ་དེ་ནི་ཐ་དད་པ་མེད་པ་ཁོ་ན་ཡིན་ན། འབྲས་བུ་རྟོགས་པའི་བདག་ཉིད་ལ་སོགས་པའི་ཆོས་ནི་ཐ་དད་དེ་རྟོག་པས་སྒྲོ་བཏགས་པ་ཡིན་ནོ། །དེའི་ཕྱིར་དེ་དག་དང་ཐ་དད་པ་མ་ཡིན་པའི་ཕྱིར་ཤེས་པ་དུ་མ་ཉིད་དུ་འགྱུར་རོ་ཞེས་བྱ་བའི་གཏན་ཚིགས་དང༌། དེ་དག་ཀྱང་ཐ་དད་པ་མ་ཡིན་པར་འགྱུར་རོ་ཞེས་བྱ་བ་མ་གྲུབ་བོ་ཞེས་སྨྲ་བར་དོགས་པའི་ཕྱིར། གལ་ཏེ་དེའི་བྱེད་པའི་ཡུལ་ཐ་དད་པར་བརྟགས་པ་བྱེད་དོ་ཞེ་ན་ནི་ཞེས་བྱ་བ་སྨོས་ཏེ། དེའི་ཞེས་བྱ་བའི་སྒྲ་ནི་རྒྱུ་དང་སྦྱར་རོ། །ཅི་ཞིག་བྱས་ནས་ཤེ་ན། ཆོས་ཐ་དད་པར་བརྟག་པ་བྱས་ནས་ཞེས་བྱ་བ་སྨོས་སོ། །སུའི་ཞེ་ན། འབྲས་བུའི་བདག་ཉིད་ཀྱིའོ། །ཅི་འདྲ་བ་ཞེ་ན། དུ་མ་ལས་ལོག་པ་དང་ལྡན་པ་སྟེ། མི་རྟོགས་པའི་བདག་ཉིད་ལ་སོགས་པ་དུ་མ་ལས་ལོག་པའོ། །ཡང་ན་ལོག་པ་དུ་མ་ཞེས་བྱེ་བྲག་གི་ཚིག་སྡུད་པའོ། །ཆོས་ཐ་དད་པ་བརྟག་པ་ཇི་ལྟར་བྱེད་སྙམ་པ་ལ། རྒྱུ་དང་མཐུན་པར་ཞེས་བྱ་བ་སྨོས་ཏེ། རྟོགས་པའི་བདག་ཉིད་ཡིད་ལ་བྱེད་པ་ལས། རྟོགས་པའི་ངོ་བོ་ཁོ་ན་ཞེས་བྱ་བ་ལ་སོགས་པ་དང་ངོ༌། །གྱིས་ཤིག་ཅེས་བྱ་བ་
འདིས་ནི་རྗེས་སུ་དགའ་བ་སྟོན་ཏོ། །གལ་ཏེ་ཕྱོགས་འདི་ཇི་ག་ཉེས་པ་མེད་པར་འགྱུར་རོ་སྙམ་པ་ལ། རྒྱུའི་བྱེད་པ་དེ་ནི་ཡང་དག་པའི་དོན་དུ་ན་བརྟགས་པ་པ་ཁོ་ན་ཡིན་པར་འགྱུར་རོ་ཞེས་བྱ་བ་སྨོས་ཏེ། ཅིའི་ཕྱིར་སྙམ་པ་ལ། རྟོག་པའི་བཟོས་སྦྱར་བ་དག་ལ་ཡིན་ཏེ་ཞེས་བྱ་བ་སྨོས་ཏེ། རྟོགས་པའི་བདག་ཉིད་ལ་སོགས་པ་དག་ལ་ཞེས་བྱ་བ་ལྷག་མའོ། །རྒྱུའི་བྱེད་པ་དེ་ནི་རྟོག་པའི་བཟོས་སྦྱར་བ་དག་ལ་ཡིན་ཏེ། དེའི་ཕྱིར་དེ་ལྟ་བས་ན། ཡང་དག་པའི་དོན་དུ་ན། བརྟགས་པ་པ་ཁོ་ན་ཡིན་པར་འགྱུར་རོ། །གལ་ཏེ་བརྟགས་པ་ཡིན་དུ་ཟིན་ཀྱང་ཉེས་པ་ཅི་ཞིག་ཡོད་སྙམ་པ་ལ། དེ་ལྟ་ན་ནི་འབྲས་བུ་རྒྱུ་མེད་པ་ཅན་དུ་འགྱུར་ཏེ་ཞེས་བྱ་བ་སྨོས་སོ། །ཅིའི་ཕྱིར་འབྲས་བུ་རྒྱུ་མེད་པ་ཅན་དུ་འགྱུར་སྙམ་པ་ལ། རྒྱུའི་བྱེད་པ་བརྟགས་པའི་བདག་ཉིད་རྣམས་ལ་ཉེ་བར་སྦྱོར་བའི་ཕྱིར་རོ་ཞེས་བྱ་བ་སྨོས་སོ། །དངོས་སུ་ན་འབྲས་བུ་ཐ་དད་པ་མ་ཡིན་ཡང་ཞེས་བྱ་བ་ལ་སོགས་པ་གང་སྨྲས་པ་དེ་ལ་ཉེས་པ་བརྗོད་པའི་ཕྱིར་བཤད་པ། གཞན་ཡང་དངོས་སུ་ན་འབྲས་བུ་ཐ་དད་པ་མ་ཡིན་ཡང་གལ་ཏེ་ཁྱོད་བྱེ་བྲག་རྣམས་ནི་ཐ་དད་པར་ཁས་ལེན་ན། དེ་ལྟར་གྱུར་ན་ཡང་ཆོས་དང་ཆོས་ཅན་དངོས་སུ་ཐ་དད་པ་ཁོ་ནར་འགྱུར་ཏེ། ཅིའི་ཕྱིར་ཞེ་ན། ཐ་དད་པ་དང་ཐ་དད་པ་མ་ཡིན་པའི་ངོ་བོ་ཉིད་དང་ལྡན་པའི་ཕྱིར། ཟླ་བ་དང་སྐར་མ་ལ་སོགས་པ་བཞིན་ནོ། །དེ་ལྟ་ན་ཤུགས་ཀྱིས་སྤྱི་ཐ་དད་པ་ཁོ་ནར་འགྱུར་བ་འབའ་ཞིག་ཏུ་མ་ཟད་ཀྱི། གཞན་ཡང་སྔར་སྨོས་པའི་ཉེས་པ་རྒྱུའི་བྱེད་པ་གཞན་དུ་སྦྱོར་བ་བྱས་པའི་ཕྱིར། འབྲས་བུ་རྒྱུ་མེད་པ་ཅན་དུ་འགྱུར་རོ་ཞེས་བྱ་བ་ཡང་ཡོད་དོ། །འདི་ལྟར་བྱེ་བྲག་འདི་དག་ཀྱང་ཀུན་བརྟགས་པ་ཁོ་ན་ཡིན་པས། དངོས་པོ་ཐ་དད་པ་དང་ཐ་དད་པ་མ་ཡིན་པའི་ངོ་བོ་ཉིད་དང་ལྡན་པ་ཉིད་དུ་མ་གྲུབ་སྟེ། དེ་ལྟ་ཡིན་པས་ཇི་སྐད་སྨོས་པའི་ཉེས་པ་མེད་དོ་སྙམ་དུ་སེམས་པར་གྱུར་ན། ཇི་སྟེ་བྱེ་བྲག་དེ་དག་ཀྱང་བརྟགས་པ་ཁོ་ན་ཡིན་ནོ་ཞེ་ན་ཞེས་བྱ་བ་ལ་སོགས་པ་སྨོས་སོ། །དེ་ལྟ་ཡིན་ན་ནི་ཞེས་བྱ་བ་ནི་བརྟགས་པ་ཉིད་ཡིན་ནའོ། །ཅིའི་ཕྱིར་རིགས་པ་མ་ཡིན་སྙམ་པ་ལ། རྟོག་པས་བཀོད་པའི་ཐ་དད་པ་ནི་རྒྱུའི་བྱེད་པ་ལ་མི་ལྟོས་སོ་ཞེས་བྱ་བ་སྨོས་ཏེ། འདིར་གཏན་ཚིགས་ནི་རྟོག་པས་བཀོད་པ་ཉིད་དོ། །རྒྱུའི་བྱེད་པ་ལ་མི་ལྟོས་པ་ཞེས་བྱ་
བ་ནི་དམ་བཅའ་བའོ། །ནམ་མཁའི་ཨུཏྤལ་ལ་སོགས་པ་ནི་དཔེ་ཉིད་དུ་ཁོང་ནས་དྲང་བར་བྱའོ། །འབྲས་བུ་ཐ་དད་མ་ཡིན་ཡང༌། །བྱེ་བྲག་རྣམས་ནི་ཐ་དད་དང༌། །གཞན་མིན་ཁྱེད་འདོད་དེ་བས་ན། །ཞེས་བྱ་བས་ནི་འབྲས་བུ་ཐ་དད་པ་མ་ཡིན་ཞིང༌། བྱེ་བྲག་རྣམས་ནི་ཐ་དད་པ་ཡིན་ལ།། འབྲས་བུ་ལས་བྱེ་བྲག་རྣམས་གཞན་པ་ཡང་མ་ཡིན་ན། དེ་ལྟ་ན་ཡང་སྔ་མ་དང་ཕྱི་མ་ནང་འགལ་བ་འདི་ཇི་ལྟར་བཟོད་ཅེས་བསྟན་པ་ཡིན་ནོ། །དབང་ཕྱུག་གིས་བྱས་པ་ཉིད་ཀྱིས་ནི་དབང་ཕྱུག་གིས་བྱས་པ་བཞིན་དུ་ཚིག་འདི་རིགས་པ་དང་ལྡན་པ་མ་ཡིན་ནོ་ཞེས་འཕྱས་བྱ་བར་སྟོན་ཏོ། །རྟོགས་པའི་ངོ་བོ་ལས་གཞན་མིན་པར་ཁས་ལེན་ན་ནི་འབྲས་བུ་དེ་ནི་གཟུགས་ལས་སྐྱེ་བ་མ་ཡིན་ཏེ། རྟོགས་པའི་ངོ་བོ་ལས་གཞན་མ་ཡིན་པའི་ཕྱིར། རྟོགས་པའི་ངོ་བོའི་རང་གི་བདག་ཉིད་བཞིན་ནོ། །དེའི་རྣམ་པ་དེ་ལས་ཏེ། ཡུལ་གྱི་རྣམ་པ་ལས་གཞན་མིན་ཕྱིར་འབྲས་བུ་དེ་གཟུགས་ལས་ཀྱང་ནི་སྐྱེ་བར་འགྱུར་ཏེ། ཡུལ་གྱི་རྣམ་པ་ལས་གཞན་མ་ཡིན་པའི་ཕྱིར། ཡུལ་གྱི་རྣམ་པའི་རང་གི་བདག་ཉིད་བཞིན་ནོ། །དེ་ལྟ་ན་ནི་འབྲས་བུ་གཅིག་ལ་སྐྱེ་བ་དང༌། མི་སྐྱེ་བ་དག་ཏུ་ཐལ་བར་འགྱུར་ལ། རྒྱུ་གཅིག་ལ་སྐྱེད་པར་བྱེད་པ་དང༌། སྐྱེད་པར་བྱེད་པ་མ་ཡིན་པ་དག་ཏུ་ཐལ་བར་འགྱུར་ཏེ། སྐྱེ་བ་དང་མི་སྐྱེ་བདེ་དག་ཀྱང་ཅིའི་ཕྱིར་ན་མི་འགལ་ཞེས་བྱ་བར་སྦྱར་རོ། །འབྲས་བུ་དུ་མ་ལ་མི་འགལ་བ་ཁོ་ནའོ་སྙམ་ན་འབྲས་བུ་གཅིག་ལ་ཞེས་བྱ་བ་སྨོས་སོ། །གལ་ཏེ་འབྲས་བུ་གཅིག་པུ་དེ་ལ་ཡང་རིམ་གྱིས་འགལ་བ་མེད་དོ་སྙམ་ན་ཡང༌། ཅིག་ཅར་ཞེས་བྱ་བ་སྨོས་སོ། །བརྟགས་པས་ན་འགལ་བ་མེད་དོ་སྙམ་ན། ཡང་དག་པར་ཞེས་བྱ་བ་སྨོས་སོ། །དེ་བཞིན་དུ་རྒྱུ་གཅིག་ལ་སྐྱེད་བྱེད་དང་སྐྱེད་བྱེད་མ་ཡིན་པ་ཅིའི་ཕྱིར་མི་འགལ་ཞེས་བྱ་བར་སྦྱར་ཏེ། ལྷག་མ་ནི་སྔ་མ་བཞིན་ནོ། །བརྒྱ་ཞིག་ལ་རྟོགས་པ་ལ་སོགས་པའི་བདག་ཉིད་འབྲས་བུ་ཐམས་ཅད་རྣམ་པར་ཤེས་པ་ལ་སོགས་པ་རྒྱུ་ཐམས་ཅད་ལས་སྐྱེ་བར་ཁས་བླངས་ན་ཇི་སྐད་སྨོས་པའི་ཉེས་པ་འདི་མེད་དོ་ཞེས་སྨྲ་བར་འགྱུར་བས། ཀུན་ནས་ཐམས་ཅད་སྐྱེ་ན་ནི། །ཞེས་བྱ་བ་ལ་སོགས་པ་སྨོས་ཏེ། རིག་པའི་རྗེས་སུ་འབྲངས་ནས་སྨྲས་ཏེ། ཐ་དད་པ་དང་ཐ་དད་པ་མ་ཡིན་པ་སྒྲུབ་པར་བྱེད་པ་ནི། རྗེས་སུ་འགྲོ་བ་དང་ལྡོག་པ་དག་འཁྲུལ་པ་ཉིད་དུ་སྟོན་པ་ཡིན་ནོ། །ཇི་སྟེ་
གལ་ཏེ་ཇི་སྐད་སྨོས་པའི་ཉེས་པ་ཐོག་ཏུ་བབ་པས་ཕྱོགས་སྔ་མ་འདི་ནི་དོར་བར་བྱ་བ་ཡིན་གྱི། འདི་སྐད་དུ་རང་གི་ངོ་བོ་ཉིད་ཇི་ལྟ་བའི་བྱེ་བྲག་གིས་ཞེས་བྱ་བ་ལ་སོགས་པ་ལ་བརྟེན་པར་བྱའོ་ཞེས་སྨྲའོ་སྙམ་ན། གལ་ཏེ་བྱེ་བྲག་རྐྱེན་རྣམས་ལས། །ཞེས་བྱ་བ་ལ་སོགས་པ་སྨོས་སོ། །རེ་རེ་ནི་སྐྱེད་པར་བྱེད་པ་མ་ཡིན་པར་འགྱུར་རོ། །དངོས་པོ་རྣམས་འགའ་ཞིག་རྟོག་པ་སྔོན་དུ་བཏང་ནས། འདི་ལ་གཅིག་གིས་ཀྱང་ནུས་ཀྱི། འདིར་བདག་ཅི་དགོས་ཞེས་ཏེ་གཞན་ལྡོག་པ་མེད་དོ་ཞེས་གསུངས་པའི་ཕྱིར་དེ་ཡང་ཁྱེད་འདོད་དེ། དེའི་ཕྱིར་འདིས་ནི་ཁས་བླངས་པ་དང་འགལ་བར་སྟོན་ཏོ། །རྒྱུའི་བྱེད་པ་བྱེ་བྲག་རྣམས་ལ་ཉེ་བར་སྦྱོར་བ་བྱས་པའི་ཕྱིར། ཡིན་ན་ཡང་འབྲས་བུ་རྒྱུ་མེད་པར་འགྱུར། འདིས་ནི་སྣོན་བསྟན་ཏོ། །ཇི་སྟེ་ཇི་སྐད་བཤད་པའི་ཉེས་པ་ཡོངས་སུ་སྤོང་བར་འདོད་ནས། རྐྱེན་རྣམས་ལས་འབྲས་བུ་སྐྱེ་བར་སྨྲ་ན། འོན་ཀྱང་ཉེས་པ་ཡོད་པས། གལ་ཏེ་ཁྱོད་ནི་རྐྱེན་རྣམས་ལས། །ཞེས་བྱ་བ་ལ་སོགས་པ་སྨོས་སོ། །ཇི་སྟེ་ཇི་སྐད་སྨོས་པའི་ཉེས་པ་བསལ་བའི་ཕྱིར་འབྲས་བུ་གང་ཡིན་པ་དང༌། རྒྱུའི་ཡུལ་དེ་གཉིས་ཐ་མི་དད་པར་འདོད་ན། འོན་ཀྱང་ཉེས་པ་ཡོད་པས་ཇི་སྟེ་དེ་གཉིས་གཞན་མིན་ན་ཞེས་བྱ་བ་ལ་སོགས་པ་སྨོས་ཏེ། མཚུངས་པ་དེ་མ་ཐག་པའི་རྐྱེན་ལ་སོགས་པ་དག་ལས། མིག་གི་རྣམ་པར་ཤེས་པ་དེ་རྟོགས་པའི་བདག་ཉིད་ལ་སོགས་པའི་རྣམ་པར་དབྱེ་བ། ཅིའི་ཕྱིར་འཐད། དེ་ནི་མི་འཐད་པ་ཁོ་ནའོ་ཞེས་བྱ་བའི་ཐ་ཚིག་གོ །དེ་ལྟ་བས་ན་རྣམ་པར་ཤེས་པ་དེ་གཅིག་པ་ཡང་མ་ཡིན་ཏེ། དེ་དག་ལས་ཀྱང་གཞན་མ་ཡིན་པའི་ཕྱིར་རོ། །ཡང་ན་དེ་དག་ཀྱང་ཐ་དད་པར་མི་འགྱུར་ཏེ། ཅིའི་ཕྱིར་ཞེ་ན། རྣམ་པར་ཤེས་པ་ལས་གཞན་མ་ཡིན་པའི་ཕྱིར་རོ། །དེ་ལྟ་ཡིན་ན་ནི་རང་བཞིན་ཐ་དད་པ་རྣམས་ལས་ཞེས་བྱ་བ་ལ་སོགས་པ་ཉེས་པའི་ཚོགས། བཤད་ཟིན་ཉེས་པར་ཐལ་འགྱུར་ཕྱིར། །འདི་ནི་གླང་ཆེན་ཁྲུས་འདྲར་འགྱུར། གཅིག་གིས་དུ་མའི་དངོས་མི་བྱེད། །ཅེས་བྱ་བ་ཕྱོགས་གསུམ་པ་ལ་འཇུག་པར་བྱ་བའི་ཕྱིར། གཞན་ཡང་གཞན་འདིར་བརྗོད་པར་བྱ་སྟེ་ཞེས་བྱ་བ་ལ་སོགས་པ་སྨོས་སོ། །ཅིའི་ཕྱིར་ཐ་དད་པ་དང་ཐ་དད་པ་མ་ཡིན་པ་རྒྱུ་མེད་པ་ཅན་དུ་འགྱུར་སྙམ་པ་ལ། རྒྱུ་ཐ་དད་པ་མེད་བཞིན་དུ་ཡང་འབྲས་བུ་
ཐ་དད་པའི་ཕྱིར་རོ་ཞེས་བྱ་བ་སྨོས་སོ། །འདིས་ནི་ཐ་དད་པ་དང་ཐ་དད་པ་མ་ཡིན་པ་སྒྲུབ་པར་བྱེད་པ་རྗེས་སུ་འགྲོ་བ་དང་ལྡོག་པ་དག་འཁྲུལ་པར་སྟོན་ཏོ། །གལ་ཏེ་གང་གིས་འབྲས་བུ་གཅིག་བྱེད་པ་དེ་ལས་བདག་ཉིད་ཀྱི་ཁྱད་པར་གཞན་གྱིས་འབྲས་བུ་གཞན་བྱེད་དོ་ཞེ་ན་ཞེས་བྱ་བར་སྦྱར་ཏེ། འོ་ན་ནི་དངོས་པོ་དེ་གཅིག་པུར་མི་འགྱུར་ཏེ། བདག་ཉིད་ཀྱི་ཁྱད་པར་ལས་ཐ་དད་པ་མེད་པ་མ་ཡིན་པའི་ཕྱིར། བདག་ཉིད་ཀྱི་ཁྱད་པར་མེད་པར་མ་ཡིན་པ་བཞིན་ནོ། །གལ་ཏེ་རྒྱུ་གཅིག་གིས་འབྲས་བུ་གཅིག་ཁོ་ན་བྱེད་དུ་ཟད་མོད་ཅེ་ན་ཞེས་བྱ་བས་ནི་ཕྱོགས་བཞི་པ་ལ་བརྟེན་པར་བྱེད་དོ། །དེ་ལྟ་ནི་མ་ཡིན་ཏེ་ཞེས་བྱ་བ་ལ་སོགས་པས་ནི་འགོག་པར་བྱེད་དོ། །ཅིའི་ཕྱིར་ཞེ་ན། འགྲོ་བ་ཐམས་ཅད་ལོང་བ་དང་འོན་པ་ལ་སོགས་པའི་དངོས་པོར་ཐལ་བར་འགྱུར་བའི་ཕྱིར་རོ་ཞེས་བྱ་བ་སྨོས་སོ། །མིག་ལ་སོགས་པ་རང་གི་རིགས་དང་མཐུན་པའི་སྐད་ཅིག་སྐྱེད་པར་བྱེད་པ་ཡིན་པའི་ཕྱིར། རང་གི་རྣམ་པར་ཤེས་པ་སྐྱེད་པར་བྱེད་པ་ཉིད་མ་ཡིན་ནོ་ཞེས་བྱ་བ་ལྷག་མའོ། །དེ་ལྟ་ཡིན་ན་རྣམ་པར་ཤེས་པ་མེད་ན་ལོང་བ་དང༌། འོན་པ་དང༌། དྲི་མི་ཚོར་བ་དང༌། རོ་མི་མྱོང་བ་དང༌། རེག་མི་ཚོར་བའི་དངོས་པོར་གསལ་བར་ཐལ་བར་འགྱུར་རོ། །ཇི་སྟེ་རང་གི་རྣམ་པར་ཤེས་པ་སྐྱེད་པ་ཉིད་དུ་ཁས་ལེན་ན། དེ་ལྟ་ཡིན་ན་ནི་སྔར་བཤད་པའི་ཉེས་པ་ནི་མེད་མོད་ཀྱི། ཉེས་པ་གཞན་ཡོད་པས་བཤད་པ། རང་གི་རྣམ་པར་ཤེས་པ་སྐྱེད་པར་བྱེད་པ་ཉིད་ཡིན་པར་ཁས་ལེན་ན་ནི་རང་གི་རིགས་འཆད་དེ། མིག་ལ་སོགས་པའི་རིགས་འཆད་དོ་ཞེས་བྱ་བའི་ཐ་ཚིག་གོ །དེ་བས་དེ་ལྟ་བས་ན་ཅིར་ཡང་མི་རུང་ངོ༌། །ཅིའི་ཕྱིར་ཞེ་ན། ཤེས་པའི་སྐད་ཅིག་ཕྱིན་ཆད་མིག་ལ་སོགས་པ་ཡང་མེད་ལ། རྣམ་པར་ཤེས་པ་ཡང་མེད་པས་ཅིར་ཡང་མི་རུང་ངོ་ཞེས་བཤད་དོ། །རྒྱུ་གཅིག་གིས་འབྲས་བུ་གཅིག་སྐྱེད་པར་བྱེད་དོ་ཞེས་བྱ་བ་ཁས་མི་ལེན་མོད་ཀྱི་བརྒྱ་ཞིག་ལ་ཕ་རོལ་པོ་རེ་ཐག་ཆད་པར་གྱུར་པ་དེ་སྐད་སྨྲ་བར་འགྱུར་བས་ཁོ་བོ་ཅག་གིས་དེའི་ཚིག་འཇུག་པ་ལ་གནོད་པ་བྱས་སོ་སྙམ་དུ་བསམས་པའོ། །དེ་ལྟ་མིན་ན་ཞེས་བྱ་བ་ལ། དེ་ལྟ་མ་ཡིན་པ་ནི་འགྲོ་བ་གཞལ་བྱ་ཡང་ཡིན་ལ། དབང་ཕྱུག་བྱེད་པ་པོ་ཡང་ཡིན་ན་འདི་ལ་འགལ་བ་ཅི་ཡོད་ཅེས་བྱ་བ་འདིའོ། །གཞལ་བྱ་ཉིད། །ལ་སོགས་ཡེ་མེད་ཁོ་ནར་འགྱུར། །ཞེས་བྱ་བ་ནི་དབང་ཕྱུག་བྱེད་པ་པོ་ཉིད་ཡིན་ན་རྒྱུ་ཉེ་པ་
ཁོ་ན་ལས་འགྲོ་བ་སྐྱེ་བའི་ཕྱིར་འདི་ནི་གཞལ་བྱ་ཡིན་ནོ་ཞེས་བྱ་བ་འདི་ཉིད་མི་སྲིད་དེ། དུས་ཅིག་ཅར་བ་རྣམས་ཀྱི་ཡོངས་སུ་གཅད་པར་བྱ་བ་དང༌། ཡོངས་སུ་གཅོད་པར་བྱེད་པའི་དངོས་པོ་མི་རུང་བའི་ཕྱིར་རོ། །སོགས་པ་སྨོས་པས་ནི་བསྐྱེད་པར་བྱ་བ་དང་སྐྱེད་པར་བྱེད་པ་ལ་སོགས་པ་ཡོངས་སུ་བསྡུའོ། །རྣམ་པ་མང་པོར་མཛད་ཅེས་བྱ་བ་ནི་བདག་ལས་མ་ཡིན་གཞན་ལས་མ་ཡིན་ཏེ་ཞེས་བྱ་བ་ལ་སོགས་པས་སོ། །དེ་བཞིན་དུ་སྐྱེ་བ་འགོག་པར་བྱེད་པ་བདག་ལས་གཞན་ལས་ཞེས་བརྟགས་པའི་ཐ་སྙད་འདོགས་པའི་རྒྱུ་ཅན་ལ་ཡིན་ན་ནི། འདི་གྲུབ་པ་སྒྲུབ་པའོ། །དེ་ལྟ་ན་གང་ལས་སྐྱེ་བ་དེ་བདག་ལས་གཞན་ལས་ཞེས་ཐ་སྙད་གདགས་པར་མི་ནུས་ཏེ། རང་གི་མཚན་ཉིད་ནི་ངག་གི་རྒྱུ་ལས་འདས་ནས་འཇུག་པའི་ཕྱིར་རོ། །གང་ཡང་གཞན་ཞེས་བྱ་བ་ལ་སོགས་པས་ཐ་སྙད་འདོགས་པ་དེ་ནི་རྟོག་པས་ཉེ་བར་བཀོད་པ་ཡིན་ཏེ། དེའི་ཕྱིར་དེ་ལས་མི་སྐྱེའོ་ཞེས་བྱ་བ་སྨྲ་བ་ནི་གསལ་བ་ཁོ་ནར་གྲུབ་པ་སྒྲུབ་པ་ཉིད་ཡིན་ནོ། །འདི་ལྟར་རྒྱུ་མེད་དངོས་མེད་པས། །ཞེས་བྱ་བ་ལ་སོགས་པས་ནི་ཕ་རོལ་པོ་རང་གི་སྒོ་ཁོ་ན་ནས་ལེན་འདེབས་སུ་འཇུག་པར་རིམ་པ་འགོད་པར་བྱེད་པའོ། །ཅི་སཱ་ལུའི་ས་བོན་ལ་སོགས་པ་དེ་མྱུ་གུ་ལ་སོགས་པ་འབྲས་བུ་ལས་གཞན་ནམ། འོན་ཏེ་ས་བོན་ལ་སོགས་པ་དེ་ཉིད་མྱུ་གུ་ལ་སོགས་པ་ཡིན། ཅིའི་ཕྱིར་རྟོག་པ་འདི་གཉིས་ཁོ་ན་བྱེད་སྙམ་པ་ལ། ཕན་ཚུན་ལོག་པའི་ལུས་ལ་ནི། །ཞེས་བྱ་བ་ལ་སོགས་པ་སྨོས་སོ། །རྣམ་པ་གཞན་ཞེས་བྱ་བ་ནི། ས་བོན་ལས་མྱུ་གུ་ལ་སོགས་པ་གཞན་ཡང་ཡིན་ལ། གཞན་མ་ཡིན་པ་གང་ཡིན་པ་དང༌། གཞན་ཡང་མ་ཡིན་གཞན་མ་ཡིན་པ་ཡང་མ་ཡིན་ཞེས་བྱ་བ་སྟེ་འདི་ནི་འགལ་བས་མི་སྲིད་དོ། །རང་གི་མཚན་ཉིད་ནི་ངག་གི་སྤྱོད་ཡུལ་ལས་འདས་པའི་ཕྱིར་བརྗོད་པར་མི་ནུས་ཞེས་སྨྲའོ། །ལམ་གཞན་ནི་བརྗོད་པའི་ཀུན་རྫོབ་པོ། །ལེགས་ཞེས་བྱ་བ་ནི་ལམ་གཞན་གྱི་བྱེ་བྲག་གམ་བྱ་བའི་བྱེ་བྲག་གོ །ཇི་ལྟར་ཐ་སྙད་ཀྱི་རྗེས་སུ་མཐུན་པར་བུམ་པ་སྣམ་བུ་ཞེས་བྱ་བ་ལ་སོགས་པར་བསྙད་པར་ནུས་པ་དེ་བཞིན་དུ། ས་བོན་ལ་སོགས་པ་ལས་མྱུ་གུ་ལ་སོགས་པ་གཞན་ནམ་གཞན་མ་ཡིན་ཞེས་བྱ་བ་ལ་སོགས་པ་འདི་ཡང་བསྙད་པར་ནུས་པར་གནང་ངོ༌། །དེ་ལྟ་མ་ཡིན་ཏེ་རྣམ་པ་ཐམས་
ཅད་དུ་བརྗོད་པར་བྱ་བ་མ་ཡིན་ན་ནི། མི་སྨྲ་ཐུག་སྟེ། འདི་ལྟར་ཕྱེད་རྒས་པ་ནི་རིགས་པ་མ་ཡིན་ནོ། །ཇི་སྟེ་ས་བོན་ལ་སོགས་པ་དང་མྱུ་གུ་ལ་སོགས་པ་གཞན་དང་གཞན་མ་ཡིན་པའི་ཕྱོགས་གཉིས་ཀྱི་ནང་ནས་འགའ་ཕྱོགས་གསུམ་པ་ཞིག་བརྗོད་ན། དེ་ཉིད་ཁོ་བོ་ཅག་གིས་དགག །དེ་བས་དེ་ལྟ་བས་ན་དེ་ལྟ་ཡིན་ན་ནི། ཕ་རོལ་གྱིས་ཁས་བླངས་པ་འགོག་པ་ཡིན་ན། རྩོད་པ་ལ་བཟོ་བ་ག་ལ་ཡིན། ཁྱོད་རྩོད་པ་ལ་མཁས་པ་ག་ལ་ཡིན་ཏེ་མ་ཡིན་པ་ཁོ་ནའོ་ཞེས་བྱ་བའི་ཐ་ཚིག་གོ །འདི་སྐད་དུ་དབུ་མ་པ་ནི་བྱས་ཤི་འགོག་པ་སྨྲ་བ་ནི་མ་ཡིན་གྱི། འོན་ཀྱང་ཕ་རོལ་པོས་ཕྱོགས་གང་ཁས་ལེན་པ་དེ་ཁོ་ན་འགོག་པ་སྨྲའོ། །ཇི་སྟེ་ཕ་རོལ་པོ་ཕྱོགས་འགའ་ཡང་ཁས་མི་ལེན་ན་ནི། དབུ་མ་པ་འགོག་པ་ཡང་ཅི་ཡང་མི་སྨྲ་བ་ཉིད་དོ། །དེ་ལྟ་ཡིན་ན་བདག་ལས་སྐྱེ་གཞན་ལས་སྐྱེ་ཞེས་བྱ་བ་དེ་ལྟ་བུ་ནི་ཕ་རོལ་པོ་ཁོ་ནས་སྨྲས་ཀྱི། སློབ་དཔོན་གྱིས་ནི་མ་ཡིན་ནོ། །སློབ་དཔོན་ནི་མ་ཡིན་ནོ་ཞེས་དགག་པ་ཙམ་འཆད་པར་ཟད་པས་ཉེས་པ་ཅི་ཡང་མེད་དོ་ཞེས་བཤད་པ་ཡིན་ནོ། །མ་ཞིག་པ་ལས་འབྲས་སྐྱེ་ན། །དེ་ཚེམ་ཞིག་པའི་གནས་སྐབས་ན། ཅིའི་ཕྱིར་འབྲས་བུ་མེད། གལ་ཏེ་ཡོད་ན་ནི་དེའི་ཚེ་འབྲས་བུ་དང་རྒྱུ་གཉིས་ཅིག་ཅར་ཡིན་པར་ཐལ་བར་འགྱུར་རོ། །དེ་ལྟ་ན་ཡང་དེ་གཉིས་ཀྱི་རང་གི་ངོ་བོ་ཉམས་པར་ཐལ་བ་ཡིན་ནོ། །ཞིག་ནས་འབྲས་བུ་སྐྱེ་ན་ནི་དེ་ཚེ་རྒྱུ་གང་ལས་འབྲས་བུར་འགྱུར། འདི་ལྟར་རེ་ཞིག་འབྲས་བུ་འདི་རྒྱུ་ཞིག་པ་ལས་ནི་མི་འགྱུར་ཏེ། དེ་ནུས་པར་བརྗོད་པ་ཐམས་ཅད་དང་བྲལ་བའི་ངོ་བོ་ཉིད་ཡིན་པའི་ཕྱིར་རོ། །རྒྱུ་གཞན་ཡང་ཡོད་པ་མ་ཡིན་ཏེ། དེ་ལ་ཡང་མཚུངས་པར་ཐལ་བར་འགྱུར་བའི་ཕྱིར་རོ། །དེའི་ཕྱིར་འབྲས་བུ་རྒྱུ་མེད་པ་ཅན་ཁོ་ནར་འགྱུར་རོ། །ཡང་ན་ནི་མེད་པ་ཁོ་ནར་འགྱུར་རོ། །ཇི་སྟེ་བདག་ཉིད་ཀྱིས་རང་དགས་རྒྱུ་མ་འགགས་པ་ཡོད་པ་ལས་འབྲས་བུ་སྐྱེའོ་ཞེས་བྱ་བ་དེ་ལྟ་བུར་རྟོག་པར་བྱེད་ན། དེ་ལ་ཡང་རྒྱུ་དང་འབྲས་བུ་དུས་མཉམ་པ་ཉིད་ཁོ་ན་དང་འབྲེལ་བར་འགྱུར་རོ། །གལ་ཏེ་ཡང་རྒྱུའི་ལུས་ནི་འཇིག་པས་ཟིན་ལ། འབྲས་བུ་ནི་སྐྱེ་བས་ཟིན་ཏེ། རྒྱུ་འཇིག་པ་ན་མཇུག་ཐོགས་ཁོ་ནར་འབྲས་བུ་སྐྱེ་ལ། བར་ན་བར་དུ་གཅོད་པར་བྱེད་པའི་དུས་ཅི་ཡང་མེད་པས། དེའི་ཕྱིར་རྒྱུ་མ་འགགས་པའི་མཇུག་ཐོགས་ཁོ་ནར་འབྲས་བུ་འབྱུང་ངོ༌། །གང་གི་ཕྱིར་སྐད་
ཅིག་མ་དང་པོ་ལ་ནི་རྒྱུ། སྐད་ཅིག་མ་གཉིས་པ་ལ་ནི་འབྲས་བུ་སྐྱེ་སྟེ། དེ་ལྟ་ཡིན་ན་ནི་མ་ཞིག་པ་ལས་སྐྱེ་བ་ཡིན་ནོ། །འདི་ལྟར་མཇུག་ཐོགས་སུ་ཡོད་པ་ཡིན་ལ། དེ་ཡང་མ་ཞིག་པ་ཁོ་ན་ལས་འབྱུང་བ་ཡིན་ནོ། །དེ་ལྟ་མ་ཡིན་ན་སྐད་ཅིག་གསུམ་པ་ལ་འབྲས་བུར་འགྱུར་ཏེ། སྐད་ཅིག་དང་པོ་ལ་ནི་རྒྱུ་ཡོད་པའོ། །གཉིས་པ་ལ་ནི་འཇིག་པའོ། །ཞིག་ནས་ནི་འབྲས་བུ་སྐྱེད་དེ་སྐྱེས་མ་ཐག་ཏུ་ནི་འབྲས་བུ་ཡོད་པ་ཡིན་ནོ་སྙམ་དུ་སེམས་ན། འདི་ཡང་རིགས་པས་འབྲེལ་པ་ཉམས་སུ་འབབ་པ་མ་ཡིན་ནོ། །འདི་ལྟར་རེ་ཞིག་དང་པོ་ཁོ་ནར་དེ་ལྟ་མ་ཡིན་ན། སྐད་ཅིག་གསུམ་པ་ལ་འབྲས་བུར་འགྱུར་རོ་ཞེས་བྱ་བ་ལ་སོགས་པ་འདི་ཤིན་ཏུ་མ་འབྲེལ་བ་ཡིན་ཏེ། གང་ཞིག་ཇི་ལྟར་ཡང་ཞིག་པ་དང་མ་ཞིག་པ་ལས་སྐྱེ་བར་མི་འདོད་པ་དེ་ལ། འདི་ལྟ་བུའི་རྗོད་པ་ཇི་ལྟར་འཚམ་ཞེས་བདག་ཉིད་ཀྱིས་རྟོགས་ཤིག །གང་ཡང་རེ་ཞིག་སྐད་ཅིག་མ་དང་པོ་ལ་ཞེས་བྱ་བ་ལ་སོགས་པ་གང་ཡིན་པ་དེ་ཡང་སྙིང་པོ་མེད་པ་ཉིད་དོ། འདི་ལྟར་སྐད་ཅིག་གཉིས་པ་ལ་མ་ཞི་པ་ལས་འབྲས་བུ་འདི་འབྱུང་བ་ནི་མ་ཡིན་ཏེ། དེའི་ཚེ་མ་ཞིག་པ་མེད་པའི་ཕྱིར་རོ། །གང་གི་ཚེ་འདི་མ་ཞིག་པ་དེའི་ཚེ་ཡང་འབྲས་བུ་མེད་པ་ཁོ་ནའོ། །ཇི་སྟེ་སྐད་ཅིག་གཉིས་པ་ལ་མ་ཞིག་པ་ཁོ་ན་ལས་འབྲས་བུ་སྐྱེ་སྟེ། འདི་ལྟར་སྐྱེས་མ་ཐག་ཏུ་ཡོད་ལ། དེ་ཡང་མ་ཞིག་པ་ཁོ་ན་ལས་འབྱུང་ངོ་ཞེ་ན། ཡིན་ལ་ནི་རག་མོད་ཀྱི། ཁྱོད་ཀྱི་སྐད་ཅིག་པ་ཉིད་མ་ཡིན་པར་འགྱུར་རོ། །གལ་ཏེ་འདི་སྐད་ཅིག་པ་ཉིད་མ་ཡིན་པ་མ་ཡིན་ཏེ། འདི་ལྟར་རྒྱུ་འཇིག་པ་ན་འབྲས་བུ་སྐྱེད་པར་བྱེད་དོ་ཞེ་ན། དེ་ཡང་རིགས་པ་མ་ཡིན་ཏེ། །འདི་ལྟར་རེ་ཞིག་གང་གི་ཚེ་རྒྱུ་འཇིག་པ་དེའི་ཚེ་ན་རེ་ཞིག་འབྲས་བུ་མེད་ལ་གང་གི་ཚེ། ཞིག་ཟིན་པ་དེའི་ཚེ་འབྲས་བུ་དེ་གང་ལས་འབྱུང་ཞེས་བརྗོད་པར་བྱ། གལ་ཏེ་འཇིག་པ་དེ་ཉིད་ལས་འབྱུང་ངོ་ཞེ་ན། དེའི་ཚེ་དེ་མེད་པ་མ་ཡིན་ནམ། གང་གི་ཚེ་ཡོད་པར་གྱུར་པ་དེའི་ཚེ་ནི་དེ་ལས་འབྲས་བུ་འབྱུང་བར་ཁྱོད་མི་འདོད་དོ། །གནས་སྐབས་གཞན་ཡང་ཅི་ཡང་མེད་དེ། དེའི་ཕྱིར་དངོས་པོ་རྟོགས་བཞིན་དུ་ཡང་མཇུག་ཐོགས་པ་ལ་མངོན་པར་ཞེན་པ་ཙམ་གྱི་ལིང་ཏོག་གིས་ཡང་དག་པའི་བློའི་མིག་ཁེབས་པས། རྒྱུ་མ་འགགས་པ་ལས་སྐྱེའོ་སྙམ་དུ་གདོན་མི་ཟ་བར་སེམས་ཏེ། དེ་ལྟར་ནི་དབྱེ་
པར་མི་ནུས་སོ། །འདི་ལྟར་སྐད་ཅིག་དང་པོ་ལ་ནུས་པ་ཐམས་ཅད་མ་ཉམས་པ་རྒྱུ་མཐུ་ཆེ་བའི་ཚེ་ནི་འབྲས་བུ་མི་སྐྱེའོ། །སྐད་ཅིག་གཉིས་པ་སྟེ། གང་གི་ཚེ་འབྲས་བུ་སྒྲུབ་པར་ནུས་པའི་མཐུའི་བྱེ་བྲག་ཐམས་ཅད་མེད་པར་གྱུར་པ་དེའི་ཚེ། འབྲས་བུ་སྐྱེ་བར་ཇི་ལྟར་འགྱུར། །དེ་ལྟ་བས་ན་སྨྲ་ཅི་དགོས་ཏེ་དེ་ནི་གཞག་གོ །དེ་དག་རྣམ་པར་རྟོགས་བྱེད་པ། །ཞེས་བྱ་བ་ལ་སོགས་པ་ནི་དོན་གསལ་ལོ། །གལ་ཏེ་འདི་ཡོད་ན་འདི་འབྱུང་ཞེས་བྱ་བ་ནི་ལུང་དང་འཇིག་རྟེན་ན་ཡང་ཡོད་ལ། ས་བོན་ལ་སོགས་པ་རྒྱུ་དང་འབྲས་བུའི་དངོས་པོ་འདི་ཡང་འདི་ཙམ་གྱི་རྒྱུ་རྐྱེན་ཡིན་པས་དེའི་ཕྱིར་འདི་དོན་དམ་པར་ཡོད་དོ་ཞེ་ན། འདི་ཡོད་འདི་ཞེས་བྱ་བ་དང༌། །ཞེས་བྱ་བ་ལ་སོགས་པ་སྨོས་ཏེ། འདི་སྐད་དུ་འདི་ཡོད་ན་འདི་འབྱུང་ཞེས་བྱ་བ་འདི་འཇིག་རྟེན་དང་གྲུབ་པའི་མཐའ་ལ་ཡང་ཡོད་དེ། དེ་ནི་ཚིག་ཙམ་གྱིས་མ་ཡིན་ཏེ་ཚད་མས་ཡིན་ན། སྔར་བཤད་པ་ཡི་རྣམ་པ་ཡིས། །ཚད་མའང་ཁྱོད་ལ་ཡོད་མ་ཡིན། སྔར་བཤད་པ་ཡི་རྣམ་པ་ནི། །རྣམ་པ་མེད་པའི་ཤེས་པ་ནི། །ཡུལ་ལ་འཛིན་པར་མི་རིགས་སོ། །ཞེས་བྱ་བ་ལ་སོགས་པ་དང༌། དུ་མས་དངོས་པོ་གཅིག་མི་བྱེད། །ཅེས་བྱ་བ་ལ་སོགས་པའོ། །དེ་ལྟ་བས་ན་ངེད་ཀྱི་སྟེ། །ཁོ་བོ་ཅག་གི་རྐྱེན་ཉིད་འདི་པ་ཙམ། གསུང་རབ་དང་འཇིག་རྟེན་ན་ཡོད་པ་ནི། ཇི་ལྟར་སྣང་བ་ཁོ་ནར་ཟད་དོ། །ཅིའི་ཕྱིར་སྙམ་པ་ལ། འདི་ལྟར་འདི་ལ་དངོས་བསམས་ན། །ཞེས་བྱ་བ་ལ་སོགས་པ་སྨོས་སོ། །བརྒྱ་ཞིག་ལ་ང་ཡང་ཇི་ལྟར་སྣང་བ་འདི་ཁོ་ན་འདོད་དོ་ཞེས་སྨྲ་བར་འགྱུར་བས། ངེད་ཀྱང་དེ་ལྟར་འདོད་ཅེ་ན། །ཞེས་བྱ་བ་ལ་སོགས་པ་སྨོས་སོ། །གལ་ཏེ་བག་མེད་པས་འཁྲུལ་པའི་ཕྱིར་རྐྱེན་འདི་ཙམ་རྗོད་པ་ལ་ཉེས་པ་ཅི་ཡང་མེད་དོ་ཞེ་ན། ཡང་དང་ཡང་དུ་ཞེས་བྱ་བ་སྨོས་ཏེ། མཁས་པ་ནི་ནམ་ཡང་ཡང་དང་ཡང་དུ་འཁྲུལ་པར་མི་འགྱུར་རོ། །གལ་ཏེ་ཚད་མས་གྲུབ་པའི་ཕྱིར་རོ་ཞེ་ན། དེ་གྲུབ་བྱ་ལ་ཚད་མ་ནི། །ཞེས་བྱ་བ་ལ་སོགས་པ་སྨོས་སོ། །གལ་ཏེ་ཚིག་ཙམ་གྱིས་གྲུབ་པོ་ཞེ་ན། ཐམས་ཅད་འགྲུབ་པར་ཐལ་འགྱུར་ཕྱིར། །ཞེས་བྱ་བ་ལ་སོགས་པ་སྨོས་ཏེ། །བརྗོད་པར་འདོད་པའི་གཞན་དབང་ཕྱིར། །སྒྲ་རྣམས་གང་ལ་ཡོད་མ་ཡིན། །དེ་ཡོད་པས་ནི་དོན་འགྲུབ་ན། །ཐམས་ཅད་ཀྱི་ནི་ཐམས་ཅད་འགྲུབ། །ཅེས་འབྱུང་བའི་ཕྱིར་ཐམས་ཅད་འགྲུབ་པར་ཐལ་བ་ཡིན་ནོ། །
འདི་ལྟ་བུའི་རྐྱེན་འདི་པ་ཉིད་ཙམ་འདི་ཡང་དག་པར་ཡོད་དོ་ཞེས་རྗོད་པར་བྱེད་ཅིང་བདག་ཉིད་སྟོད་པར་བྱེད་པ་ནི། ཀྱེ་མའོ་བློ་ནི་ཤིན་ཏུ་ཞིབ། །འདིས་ནི་བླུན་པ་ཉིད་དུ་བརྗོད་ཅིང་བཞད་གང་དུ་བྱེད་དོ། །ཁྱོད་ཀྱིས་ཀུན་རྫོབ་ཀྱི་བདེན་པའི་བྱེ་བྲག་ནི་བརྗོད་ལ། གང་གིས་ན་དེས་དེ་ན་པ་ཡིན་པ་ཀུན་རྫོབ་དེ་ཉིད་ནི་མ་བཤད་དོ་སྙམ་པ་ལ། ཇི་སྟེ་ཀུན་རྫོབ་ཀྱི་ཞེས་བྱ་བ་འདི་ཅི་ཞིག་ཡིན་ཞེ་ན་ཞེས་བྱ་བ་ལ་སོགས་པ་སྨོས་སོ། །གང་ཞིག་གིས་སྒྲིབ་ཅེས་བྱ་བ་འདིས་ནི་བྱེད་པ་སྒྲུབ་པའོ། །གང་ཞིག་ལ་ཞེས་བྱ་བ་འདིས་ནི་གཞི་སྒྲུབ་པའོ། །བཞེད་ཅེས་བྱ་བ་ནི་བཅོམ་ལྡན་འདས་བཞེད་ཅེས་བྱ་བའི་ཐ་ཚིག་གོ །འདི་ཉིད་ལུང་དང་བསྟན་པའི་ཕྱིར། །མདོ་ལས་ཇི་སྐད་དུ་ཞེས་བྱ་བ་ལ་སོགས་པ་སྨོས་སོ། །སྐྱེ་བ་ཀུན་རྫོབ་ཏུ་ཞེས་བྱ་བ་ནི་ཇི་ལྟར་སྣང་བཞིན་སྐྱེའོ་ཞེས་བྱ་བའི་ཐ་ཚིག་གོ །དམ་པའི་དོན་གྱི་ཚུལ་དུ་དཔྱད་ན། རང་བཞིན་མེད་པ་རྣམས་ལ་སྐྱེའོ་ཞེས་འཁྲུལ་པ་གང་ཡིན་པ་དེ་ནི་ཡང་དག་ཀུན་རྫོབ་འདོད་དེ་ནི་བདེན་ཏེ་འཁྲུལ་པ་ཡིན་པར་མི་བྱའོ་ཞེས་བྱ་བའི་ཐ་ཚིག་གོ །ཀུན་རྫོབ་དེས་ན་སྣ་ཚོགས་འདི་ཀུན་ཐམས་ཅད་བདེན་པ་ཡིན་གྱི། དམ་པའི་དོན་རིགས་པས་ནི་མ་ཡིན་ནོ་ཞེས་བྱ་བའི་ཐ་ཚིག་གོ །འདི་ཡང་ལུང་དང་སྦྱར་བའི་ཕྱིར། མདོ་ལས་ཇི་སྐད་དུ་ཞེས་བྱ་བ་ལ་སོགས་པ་སྨོས་སོ། །ཇི་སྟེ་ཀུན་རྫོབ་ཅེས་བྱ་བ་འདི་ཅི་ཡིན་ཞེ་ན་ཞེས་དྲིས་པ་དང་དབུ་མ་པས་ཀུན་རྫོབ་ནི་དངོས་པོ་མེད་པ་ཡིན་ནོ་ཞེས་བཤད་ཅེས་གྲགས་པ་དེ་ལ། བཙུན་པ་ལྷ་དབང་བློས་སུན་འབྱིན་པ་སྨྲས་པ་དང༌། ཀུན་རྫོབ་དངོས་པོ་མེད་ཡིན་ན། །གལ་ཏེ་ཀུན་རྫོབ་ཅེས་བྱ་བའི་སྒྲ་དངོས་པོ་མེད་པར་བརྗོད་པར་འགྱུར་ན་ཞེས་བྱ་བའི་ཐ་ཚིག་གོ །སྐྱེ་བ་དངོས་པོའི་རྣམ་གྲངས་ཡིན་ནོ་ཞེས་བྱ་བའི་ཐ་ཚིག་གོ །ཕྱིར་དེ་ལྟ་བས་ན་དེ་ལ་དངོས་པོ་གཟུགས་ལ་སོགས་པ་གཅིག་པོ་དེ་ལ་དེའི་ཚེ། །ནུས་དང་མི་ནུས་ཅིག་ཅར་འགྱུར། །ཞེས་བྱ་བར་བསྙེགས་སོ། །གང་གི་ཕྱིར་གཟུགས་ལ་སོགས་པའི་དངོས་པོ་འདི་ཀུན་རྫོབ་ཀྱི་ངོ་བོ་ཉིད་ཡིན་པ་དེའི་ཕྱིར་དོན་བྱ་བར་མི་ནུས་ཏེ་མི་རུང་བ་ཡིན་ནོ། །གང་གི་ཕྱིར་སྐྱེ་བའི་ངོ་བོ་ཉིད་ཡིན་པ་དེའི་ཕྱིར་དོན་བྱེད་ནུས་ཏེ་བསྒྲུབ་པར་ནུས་པའོ། །དེ་ལྟ་བས་ན་གཅིག་ལ་ཕན་ཚུན་འགལ་བའི་ངོ་བོ་ཉིད་གཉིས་ཇི་ལྟར་རུང༌། ཇི་སྟེ་ཀུན་རྫོབ་ནི་སྐྱེ་བའི་རྣམ་གྲངས་ཡིན་ནོ་ཞེས་སྨྲ་ན། དེའི་ཕྱིར་སྨྲས་པ། གལ་
ཏེ་ཀུན་རྫོབ་སྐྱེ་བ་ཡིན་ན། དེའི་ཚེ་ལྟ་བ་འདི་ལ་ནི། ཀུན་རྫོབ་ཏུ་སྐྱེ་བཞེས་བྱ་བ་མཁས་པ་རྣམས་ཀྱི་ཚིག་འདིའི་དོན་ནི། སྐྱེ་བ་སྐྱེ་ཞེས་བྱ་བར་འགྱུར་བས་མཚར་ཏོ། །དེ་ལྟར་བས་ན་བརྗོད་པ་དེ་ལྟ་བུ་ནི་འབྲེལ་པ་མ་ཡིན་ནོ་ཞེས་ཕྱས་སུ་བྱ་བའོ། །འདི་ནི་འབྲེལ་པ་མེད་པ་གཞན་ཡིན་ཏེ། འདིའི་སྐྱེ་བ་ཀུན་རྫོབ་སྟེ་དོན་དམ་པ་ནི་མ་སྐྱེས་ན་ཞེས་བྱ་བ་ལ་སོགས་པ་འདི་སྨོས་ཏེ། དོན་དམ་པ་ནི་ཀུན་རྫོབ་ལས་བཟློག་པ་ཡིན་པའི་ཕྱིར་རོ་སྙམ་དུ་བསམས་པའོ། །དེ་ལྟ་ཡིན་ན་དངོས་པོ་རྣམས་དོན་དམ་པར་མ་སྐྱེས་པའོ་ཞེས་བྱ་བ་ལ་འདི་སྐད་དུ། སྐྱེ་བ་མེད་པས་དངོས་པོ་རྣམས་མ་སྐྱེས་པར་བཤད་པར་འགྱུར་རོ། །དེ་ལྟ་བས་ན་རྒོལ་བ་དེ་སྐད་དུ། སྨྲ་ན་གྲུབ་པ་སྒྲུབ་པ་ཉིད་སྨྲ་བར་འགྱུར་ཏེ། འདི་ལྟར་དངོས་པོ་རྣམས་སྐྱེ་བ་མེད་པས་མ་སྐྱེས་སོ་ཞེས་བྱ་བ་དེ་ནི་ཐམས་ཅད་ལ་གྲུབ་པ་ཁོ་ན་སྟེ། དེའི་ཕྱིར་དམ་བཅས་པ་གྲུབ་པ་སྒྲུབ་པ་ཉིད་ཀྱི་ཉེས་པ་ཡིན་ནོ། །དེ་ལྟ་ཡིན་ན་རྒོལ་བས་རྐྱེན་ལ་རག་ལས་ཏེ། སྐྱེ་བ་ཉིད་ཀྱི་གཏན་ཚིགས་འདིས་གང་གིས་ན་འདི་སྒྲུབ་པ་ཡིན་པར་འགྱུར་བ། མི་འདོད་ཅི་ཞིག་བསྒྲུབས་པར་འགྱུར། །རིགས་པའི་རྗེས་སུ་འབྲངས་ནས་འདིས། །གནས་པ་ལ་སོགས་དེ་བཞིན་བརྗོད། །གནས་པ་དང་བརྒལ་བ་དང་མི་རྟག་པ་ཉིད་ལ་སོགས་པ་ལ་ཡང་དེ་བཞིན་བརྗོད་དེ། འདི་ལྟར་ཀུན་རྫོབ་དངོས་པོ་མེད་ཡིན་ན། །གནས་སོགས་དངོས་པོ་ཡིན་པའི་ཕྱིར། །དེ་ཚེ་དངོས་པོ་གཅིག་དེ་ལ། །ནུས་དང་མི་ནུས་ཅིག་ཅར་འགྱུར། །གལ་ཏེ་ཀུན་རྫོབ་གནས་སོགས་ཡིན། །ཞེས་བྱ་བ་ལ་སོགས་པའོ། །དེ་ལ་སོགས་པ་ཞེས་སྨོས་པ་ནི་སློབ་དཔོན་ཆོས་སྐྱོང་གིས་ཇི་སྟེ་ཀུན་རྫོབ་ཅེས་བྱ་བ་འདི་ཅི་ཞིག་ཡིན། མི་བདེན་པའི་རྣམ་གྲངས་ཡིན་ནམ་ཞེས་བྱ་བ་ལ་སོགས་པ་སྨྲས་པའམ། གཞན་འགའ་ཞིག་གིས་ཀུན་རྫོབ་ཀྱི་བདེན་པ་ལས་བརྩམས་ནས་སྨྲས་པ། གང་ཡིན་པ་བསྡུས་ཏེ་སྐབས་དང་མི་ལྡན་པའི་ཕྱིར། མ་འབྲེལ་ལ། འདི་སྐད་ཀྱི་བྱིངས་དང་ཉེ་བར་བསྒྱུར་བ་དང༌། རྐྱེན་རྣམས་ཀྱི་དོན་མ་ཡིན་པའི་ཕྱིར་སྒྲའི་དོན་མ་ཡིན་ནོ། །ཀུན་རྫོབ་མཚན་འདི་ལས་ཞེས་བྱ་ནི་གང་གིས་ཡང་དག་པའི་སྒྲིབ་པར་བྱེད་ཅེས་བྱ་བ་ལ་སོགས་པ་ལས་སོ། །ཉམས་པ་ནི་བྲལ་བ་ཞེས་བྱ་བའི་ཐ་ཚིག་གོ །དེ་བས་ན་འདིས་ནི་རྒོལ་བ་དག་བསལ་བར་བྱ་བ་ལ་ཁོ་བོ་ཅག་འབད་པ་མི་བྱེད་དོ་ཞེས་
རྗོད་པར་བྱེད་དོ། །སློབ་དཔོན་ཆོས་སྐྱོང་གིས་དངོས་པོ་གཅིག་ལ་ཅིག་ཅར་བདེན་པར་ཡང་འགྱུར། མི་བདེན་པར་ཡང་འགྱུར་ཞེས་འགལ་བ་སྨྲས་པ་ཡོངས་སུ་སྤང་བའི་ཕྱིར་བཤད་པ། དངོས་པོའི་སྟོབས་ཀྱིས་ཞུགས་པའི་རྗེས་སུ་དཔག་པའི་རིགས་པས་བརྟགས་ན་ནི། བདེན་པ་མ་ཡིན་ཏེ། དངོས་པོའི་སྟོབས་ཀྱིས་ཞུགས་པའི་རྗེས་སུ་དཔག་པས་མི་རུང་བའི་ཕྱིར་རོ། །དངོས་པོ་དེ་གཞན་དུ་ན་བདེན་པ་ཡིན་ཏེ། ཇི་ལྟར་སྣང་བ་བཞིན་དུ་ཞེས་བྱ་བའི་ཐ་ཚིག་གོ །ཡང་ན་ནི་རིགས་པ་ལས་གཞན་པ་ནི་དེ་གཞན་དུ་ན་སྟེ། དེས་ན་ཇི་ལྟར་སྣང་བ་དང་རིགས་པའི་སྟོབས་ཀྱིས་བརྗོད་པ་ན་དངོས་པོ་གཅིག་ལ་བདེན་པ་ཉིད་དང་མི་བདེན་པ་ཉིད་ཇི་ལྟར་འགལ་ཏེ། མི་འགལ་བ་ཉིད་དོ་ཞེས་བྱ་བའི་ཐ་ཚིག་སྟེ། ལྟོས་པའི་བྱེ་བྲག་གིས་ཞེས་སྙམ་དུ་བསམས་པའོ། །སློབ་དཔོན་ལྷ་དབང་བློས་འགལ་བ་སྨྲས་པ་ཡོངས་སུ་སྤང་བའི་ཕྱིར། རིགས་པས་བརྟགས་ན་དངོས་མ་ཡིན། །ཞེས་བྱ་བ་ལ་སོགས་པ་སྨོས་སོ། །ད་ནི་དབུ་མ་པ་རྣམས་ཀྱི་དམ་བཅས་པ་ཇི་ལྟར་བུར་རྣམ་པར་གནས་པ་དེ་བསྙད་པའི་ཕྱིར། དེ་ལྟ་ཡིན་ན་ཡང་ཞེས་བྱ་བ་ལ་སོགས་པ་སྨོས་ཏེ། འདི་སྐད་དུ་ཕ་རོལ་པོ་རྣམས་ཀྱིས་ནི་དངོས་པོ་རྣམས་དོན་དམ་པར་སྐྱེས་སོ་ཞེས་སྨྲས་ལ། དབུ་མ་བས་ནི་དངོས་པོ་རྣམས་དོན་དམ་པར་སྐྱེས་སོ་ཞེས་གང་སྨྲས་པ་དེ་མ་ཡིན་ནོ་ཞེས་དགག་པ་ཙམ་བྱེད་པར་ཟད་དོ་ཞེས་བཤད་པ་ཡིན་ནོ། །ཚིག་དོན་འདི་ནི་རིགས་པ་ཡི། །རྗེས་སུ་འབྲངས་ནས་སྐྱེ་བ་མེད། །ཅེས་བྱ་བ་ནི་དེ་ཉིད་སྟོན་པར་བྱེད་པ་ཡིན་ཏེ། ཚིག་འདིའི་དོན་ནི་དོན་དམ་པར་མ་སྐྱེས་པའོ་ཞེས་བྱ་བ་ཡིན་ནོ། །གཞན་ལའང་དེ་བཞིན་སྦྱར་བར་གྱིས། །ཞེས་བྱ་བ་ལ་སོགས་པ་ནི་རྟོགས་པར་སླའོ། །ཕ་རོལ་པོ་དངོས་པོར་སྨྲ་བ་རྣམས་ཀྱིས་སྐྱེ་བ་ལ་སོགས་པ་འདོད་པ་ཞེས་བྱ་བར་སྦྱར་ཏེ། སོགས་པ་སྨོས་པ་ནི་གནས་པ་ལ་སོགས་པ་གཟུང་ངོ༌། །ཇི་ལྟ་བུ་ཞིག་སྙམ་པ་ལ་བཤད་པ། རིགས་ལམ་བརྟེན་པ་ཅན། །ཞེས་བྱ་བ་སྨོས་སོ། །གང་དག་གི་སྙམ་པ་ལ་དངོས་པོ་རྣམས་ཀྱི་ཞེས་བྱ་བ་སྨོས་ཏེ། གཟུགས་ལ་སོགས་པ་རིག་པའི་ལམ་ལ་བརྟེན་པ་ཉིད་ཀྱི་ངོ་བོ་དེ་ཁོ་ན་རང་བཞིན་མེད་པ་ཉིད་དུ་མཐོང་བའི་ཕྱིར་རོ། །འགོག་པར་བྱེད་ན་དེ་བས་དེ་ལྟ་ན་རང་བཞིན་མེད་པ་ཉིད་དུ་ལྟ་བ་ལ། ཅི་ཞིག་གནོད་དེ་ཅི་ཞིག་གནོད། །ཅེས་བྱ་
པའི་ཚིག་འདིས་ནི་གཞན་དག་གིས་དམ་བཅས་པ་ལ། མངོན་སུམ་དང༌། རྗེས་སུ་དཔག་པ་དང༌། རང་གི་ཚིག་དང་གྲངས་པ་དང་ལུང་དང་འགལ་བའི་གནོད་པ་ཡོད་དོ་ཞེས་བརྗོད་པ་གང་ཡིན་པ་དེ་མི་སྲིད་དོ་ཞེས་སྟོན་པར་བྱེད་དོ། འདི་ལྟར་སྐྱེ་བ་ལ་སོགས་པ་ཇི་ལྟར་སྣང་བ་བཞིན་རྣམ་པར་གནས་པ་དེ་དག་ནི་གང་གི་ཕྱིར་མངོན་སུམ་ལ་སོགས་པ་དང་འགལ་བར་འགྱུར་བ་དེ་ལྟར་ནི་མི་འགོག་གི །རིགས་པ་ཇི་ལྟ་བ་བཞིན་དུ་འགོག་སྟེ། ཇི་ལྟར་གཞན་དག་གིས་སྐྱེ་བ་ལ་སོགས་པར་ཡོངས་སུ་བརྟགས་པ་དག་འཇུག་པ་དེ་དག་ཀྱང་དེ་ལྟར་ནི་མངོན་སུམ་མ་ཡིན་ཏེ། དེ་ལྟ་བས་ན་དེ་དང་ག་ལ་འགལ། དོན་དམ་པར་སྐྱེའོ་ཞེས་བྱ་བ་དེ་ལ་རིགས་པ་སྨྲ་བ་རྣམས་ཀྱིས་གཞན་དག་གིས་དོན་དམ་པ་ཞེས་བྱ་བའི་སྒྲའི་དོན་ཇི་ལྟ་བུར་ཡོངས་སུ་བརྟགས་པ་དེ་ལ་བརྟེན་ནས་འགོག་པར་བྱེད་དེ། དེ་ལྟ་ཡིན་ན་སློབ་དཔོན་ཆོས་སྐྱོང་གིས་དམ་པར་མ་སྐྱེས་ཞེས་བྱ་བ་འདི་ལ། དོན་དམ་པ་ཞེས་བྱ་བའི་སྒྲའི་དོན་ཅི་ཡིན་ཞེས་བྱ་བ་ལ་སོགས་པས་གནོད་པ་སྨྲས་པ་གང་ཡིན་པ་དེ་འདི་ལ་མི་སྲིད་དོ་སྙམ་ནས། ཅི་ཞིག་གནོད་ཅེས་བྱ་བ་སྨོས་ཏེ། འདི་ལྟར་དོན་དམ་པར་སྐྱེའོ་ཞེས་བྱ་བ་འདི་ལ། དོན་དམ་པ་ཞེས་བྱ་བའི་སྒྲའི་དོན་འཇིག་རྟེན་གྱི་རྣམ་པར་འཇོག་པ་གང་ཡིན་པ་དེ་ཉིད་རིགས་པ་སྨྲ་བས་འགོག་པར་བྱེད་དོ། །དེ་ནི་ཡང་རབ་འབྱོར་ཞེས་བྱ་བ་ལ་སོགས་པ་མདོའི་ཚིག་འོག་ནས་འབྱུང་བ་བཤད་པར་བཞེད་ནས། དེ་ཉིད་ཀྱི་ཕྱིར་ཞེས་བྱ་བ་སྨོས་ཏེ། གང་གི་ཕྱིར་དོན་དམ་པ་དང་མཐུན་པའི་ཕྱིར། ཀུན་རྫོབ་ཉིད་དོན་དམ་པའི་སྒྲར་བརྗོད་པ་དེ་ཉིད་ཀྱི་ཕྱིར། ཀུན་རྫོབ་ཅེས་བྱ་བ་ལ་སོགས་པ་སྨོས་ཏེ། དེ་བཞིན་ཉིད་ནི་ངོ་བོ་ཉིད་དོ། ཅིའི་ཕྱིར་ཀུན་རྫོབ་དང་དོན་དམ་པ་གཉིས་ཐ་མི་དད་སྙམ་པ་ལ། རིགས་དེ་ཡང་ཞེས་བྱ་བ་ལ་སོགས་པ་སྨོས་ཏེ། དེ་ལྟ་ཡིན་ན་ནི་རིགས་པ་ཡང་ཀུན་རྫོབ་ཁོ་ན་ཡིན་ནོ། །ཅིའི་ཕྱིར་ཞེ་ན། ཇི་ལྟར་སྣང་བའི་ངོ་བོ་ཉིད་ཡིན་པའི་ཕྱིར་རོ། །དེ་ཉིད་ཅིའི་ཕྱིར་སྙམ་པ་ལ། རིགས་པ་ནི་ཞེས་བྱ་བ་ལ་སོགས་པ་སྨོས་སོ། །ཅིའི་ཕྱིར་རིག་པ་གཞན་དུ་མི་འཇུག་གོ་སྙམ་པ་ལ། འདི་ལྟར་ཞེས་བྱ་བ་ལ་སོགས་པ་སྨོས་ཏེ། འདི་རྣམ་པར་འགྲོལ་པར་བྱེད་དོ། །རྗེས་སུ་དཔག་པ་དང་རྗེས་སུ་དཔག་པར་བྱ་བ་འབྱུང་གི་ཞེས་བྱ་བར་སྦྱར་རོ། །ཇི་ལྟར་ཞེ་ན་རྒོལ་བ་དང་ཕྱིར་རྒོལ་བ་དག་གི་སྣང་བའི་ཆོས་སོ། །
ང་ལ་ཞེ་ན། བློའི་བདག་ཉིད་ལའོ། །ཇི་ལྟ་བུར་ཞེ་ན། ཆོས་ཅན་དང༌། ཆོས་དང༌། དཔེ་ཉིད་དུ་རྣམ་པར་གཞག་པར་རོ། །གཞན་ན་ནི་འབྱུང་བ་མ་ཡིན་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། རྗེས་སུ་དཔག་པ་འབྱུང་བ་མི་རུང་བའི་ཕྱིར་རོ། །ཇི་ལྟ་ཞེ་ན། གཉིས་ཀ་ལ་མ་གྲུབ་པ་ཉིད་ཀྱིས་སོ། །གང་དག་ཅེ་ན། ཆོས་ཅན་དང་ཆོས་ལ་སོགས་པའོ། །སོགས་པ་སྨོས་པས་ནི་དཔེ་ཉེ་བར་བསྡུ་པའོ། །ཅིའི་ཕྱིར་གཉི་ག་ལ་མ་གྲུབ་པ་ཉིད་ཡིན་ཞེ་ན། བཤད་པ་ཆོས་དང་ཆོས་ཅན་དང་དཔེ་གང་ལ་ཡང་བློ་མཚུངས་པ་ཉིད་མེད་པའི་ཕྱིར་རོ། །གང་དག་གི་ཞེ་ན། གཞུང་ལུགས་ཐ་དད་པ་གནས་པ་རྣམས་ཀྱིའོ། །གཞུང་ལུགས་ནི་གྲུབ་པའི་མཐའོ། །གང་གི་ཕྱིར་དེ་ལྟར་ཡིན་པ་དེ་ཉིད་ཀྱི་ཕྱིར་བློ་ལ་སྣང་བའི་ཆོས་ཅན་དེ་ལྟ་བུ་ལ་གནས་ཏེ། དངོས་པོ་སེམས་པར་བྱེད་པ་རྣམས་ནི་བློ་ལ་སྣང་བའི་གཏན་ཚིགས་ལ་སོགས་པ་དེ་ལྟ་བུ་ཁོ་ནས་ཅི་བློ་ལ་སྣང་བ་འདི་ཡང་དག་པར་ཡོད་དམ་མེད། དངོས་པོ་ལ་བརྟེན་པ་ཞིག་གམ་འོན་ཏེ་མ་ཡིན་ཞེས་སེམས་པར་བྱེད་པར་ཁས་བླང་བར་བྱའོ། །སོགས་པ་ཞེས་སྨོས་པས་ནི་དཔེ་ཉེ་བར་གཟུང་ངོ༌། །རིགས་པ་སྨྲ་བ་ནི་དབུ་མ་པའམ། དངོས་པོ་སྨྲ་བའོ། །བློ་ལ་སྣང་བའི་ཆ་མ་བརྟགས་ན་ཉམས་དགའ་བས། གཞན་གྱི་སྐྱེ་བ་ལ་སོགས་པར་ཡོངས་སུ་བརྟགས་པ་འགོག་པ་ལྷུར་ལེན་པའི་རྗེས་སུ་དཔག་པ་འབྱུང་བར་བྱེད་ན། ཀུ་ཞིག་འགོག་པར་འགྱུར་ཏེ། སྤོང་བར་བྱེད་པ་སུ་ཞིག་ཅེས་བྱ་བ་སུ་ཡང་མི་འགོག་གོ་ཞེས་སྟོན་ཏོ། །དངོས་པོ་འདི་ནི་མཚུངས་པ་ཉིད་དུ་གྲུབ་པར་རྒྱ་ཆེར་གཏན་ལ་ཕབ་བས་མངས་སུ་དོགས་པས། འདིར་ནི་འདི་རྒྱ་མ་བསྐྱེད་དོ། །གང་གི་ཕྱིར་དེ་ལྟར་རིགས་པ་དེ་ཡང་ཇི་ལྟར་སྣང་བ་བཞིན་དུ་ཀུན་ཏུ་གནས་པ་དེ་ཉིད་ཀྱི་ཕྱིར་མདོ་ལས། འཇིག་རྟེན་གྱི་ཀུན་རྫོབ་ཀྱང་གཞན་ལ། དོན་དམ་པ་ཡང་གཞན་པ་ནི་མ་ཡིན་ཞེས་བྱ་བ་གསུངས་ཏེ་རིགས་པ་མ་ཡིན་ནོ། །ཅིའི་ཕྱིར་དེ་གཉིས་གཞན་མ་ཡིན་ཞེ་ན། འདི་ལྟར་འཇིག་རྟེན་གྱི་ཀུན་རྫོབ་ཀྱི་དེ་བཞིན་ཉིད་ཀྱི་ངོ་བོ་ཉིད་གང་ཡིན་པ་ཇི་ལྟར་སྣང་བའི་ངོ་བོ་ཉིད་ཅེས་བྱ་བའི་ཐ་ཚིག་སྟེ། དེ་ཉིད་དོན་དམ་པའི་དེ་བཞིན་ཉིད་ཀྱང་ཡིན་ཏེ། རིགས་པ་ཡང་ཇི་ལྟར་སྣང་བ་བཞིན་ཀུན་རྫོབ་ཏུ་གནས་པའི་ཕྱིར་རོ། །རེ་ཞིག་དེ་ལྟར་མདོའི་
དོན་ཚུལ་གསུམ་པའི་རྟགས་ཀྱི་མཚན་ཉིད་ཀྱི་རིག་པ་དོན་དམ་པ་ཡིན་པར་བཤད་པ་ཡིན་ནོ། །རྣམ་པ་གཞན་ཡང་བཤད་པ། ཡང་ན་སྐྱེ་བ་ལ་སོགས་པ་བཀག་པ་ཡང་ཞེས་བྱ་བ་ལ། ཡང་ཞེས་བྱ་བའི་སྒྲ་ནི་རིགས་པ་འབའ་ཞིག་ཏུ་མ་ཟད་ཀྱི་ཞེས་བྱ་བ་ཡིན་ནོ། །འགའ་ཞིག་གིས་ཞེས་བྱ་བ་ནི་དོན་དམ་པར་སྤྲོས་པ་ཐམས་ཅད་བྲལ་བ་དང་མཐུན་པའི་ཕྱིར་རིགས་པ་སྨྲ་བ་རྣམས་ཀྱིས་དོན་དམ་པ་ཉིད་དུ་འདོད་པའོ། །གཞན་དག་གིས་ནི་སྐྱེ་བ་མེད་པ་ལ་སོགས་པ་འགོག་པ་ཡང་དག་པ་ཁོ་ནར་དོན་དམ་པ་ཉིད་དུ་འདོད་ཅེས་བྱ་བར་སྦྱར་ཏེ། རྣལ་འབྱོར་སྤྱོད་པ་པ་རྣམས་ཀྱི་ལྟར་ན་དངོས་སུ་སྟོང་པ་ཉིད་ཡང་དག་པ་ཡིན་པའི་ཕྱིར་རོ། །དེ་ལྟ་ན་ཡང་ཞེས་བྱ་བ་ནི་དེ་ལྟ་བུའི་དོན་དམ་པ་ལ་བརྟེན་ན་ཡང་སྟེ། མདོའི་ཚིག་འདི་འཇིག་རྟེན་གྱི་ཀུན་རྫོབ་ཀྱང་གཞན་ལ། དོན་དམ་པ་ཡང་གཞན་པ་ནི་མ་ཡིན་ནོ་ཞེས་བྱ་བ་འདི་ལེགས་པར་དྲངས་ཏེ། ལེགས་པར་གོ་བར་བྱས་པ་ཡིན་ཏེ། དེ་ལ་ནི་སྐྱེ་བ་ལ་སོགས་པ་བཀག་པ་ཡང་ཀུན་རྫོབ་ཀྱི་ངོ་བོ་ཡིན་པའི་ཕྱིར་རོ། །འདི་ནི་སྔར་ཡང༌། དགག་བྱ་ཡོད་པ་མ་ཡིན་པས། །ཡང་དག་ཏུ་ན་བཀག་མེད་གསལ། །ཞེས་བསྒྲུབས་ཟིན་ཏོ། །དངོས་པོ་དེ་ཉིད་སློབ་དཔོན་ཀླུ་སྒྲུབ་ཀྱིས་བཤད་པ། གཞན་རྣལ་འབྱོར་སྤྱོད་པའི་དོན་དམ་པར་བྱས་པ་རྣམ་པར་གཞག་པ་སྐྱེ་བ་ལ་སོགས་པ་བཀག་པ་གང་ཡིན་པ་དེ་ནི། གཞན་གྱི་ཞེས་བྱ་བ་དབུ་མ་པའི་ཀུན་རྫོབ་ཡིན་ནོ། །གལ་ཏེ་ཇི་ལྟར་གཅིག་ཁོ་ན་གཅིག་གི་དོན་དམ་པ་ཡིན་ལ། གཞན་གྱི་ནི་ཀུན་རྫོབ་ཡིན་ཞེ་ན། ལྟོས་པའི་བྱེ་བྲག་གིས་དེ་ནི་ཉེས་པ་མེད་དེ། འདི་ལྟར་བུད་མེད་གཅིག་ཁོ་ན་གཞན་དེའི་བུའི་ནི་མ་ཡིན་ལ། མ་དེ་ཉིད་གཞན་གྱི་ཆུང་མ་ཡང་ཡིན་པ་བཞིན་ནོ། །ཡང་ཞེས་བྱ་བའི་སྒྲ་ནི་རིམ་པ་གཞན་དུ་སྦྱར་པའོ། །ཁ་ཅིག་རྒྱུ་དང་འབྲས་བུའི་དངོས་པོ་དོན་དམ་པ་རྟོགས་པར་བྱེད་པའི་ཚད་མ་འགོག་པ་དང༌། ཡང་དག་པའི་སྐྱེ་བ་འགོག་པའི་རིགས་པ་གང་ཡིན་པ་འདི་ནི། ཀུན་རྫོབ་པའི་སྐྱེ་བ་དང་དེ་རྟོགས་པར་བྱེད་པའི་ཚད་མ་ཇི་ལྟར་སྣང་བ་བཞིན་གནས་པ་ལ་ཡང་མཚུངས་ཏེ་གཏན་ཚིགས་ཀྱི་ཡུལ་ནི་སྐྱེས་བུའི་འདོད་པའི་དབང་གིས་བྱེ་བྲག་ཏུ་དབྱེ་བ་མ་ཡིན་ཏེ། ཁྱབ་པ་ནི་ཐམས་ཅད་ཉེ་བར་བསྡུས་ནས་ཉེ་བར་སྟོན་པའི་ཕྱིར་རོ་སྙམ་དུ་སེམས་ཏེ་དེའི་
ཕྱིར་འདོད་པ་དེའི་དོགས་པ་བསུ་བར་བྱེད་དེ། ཀུན་རྫོབ་ཏུ་ཡང་མི་སྐྱེ་དང༌། ཡང་ཞེས་བྱ་བའི་སྒྲ་ནི་དོན་དམ་པ་འབའ་ཞིག་ཏུ་མ་ཟད་ཀྱི་ཞེས་བྱ་བའོ། །མི་སྐྱེ་ཞེས་བྱ་བ་ནི་ཉེ་བར་མཚོན་པ་ཡིན་ཏེ། དེ་རྟོགས་པར་བྱེད་པའི་ཚད་མ་ཞེས་བྱ་བར་ཡང་ཤེས་པར་བྱའོ། །ཡང་ན་དང་ཞེས་བྱ་བའི་སྒྲ་མི་སྐྱེ་དང་ཞེས་བྱ་བ་རིམ་པ་གཞན་དུ་སྦྱར་ཏེ། དང་ཞེས་བྱ་བའི་སྒྲས་ནི་དེ་རྟོགས་པར་བྱེད་པའི་ཚད་མ་ཡང་ཞེས་བྱའོ། །རིགས་པའི་སྟོབས་ཀྱིས་ན་ཞེས་བྱ་བ་ནི། དུ་མས་དངོས་པོ་གཅིག་མི་བྱེད། །ཅེས་བྱ་བ་ལ་སོགས་པ་སྨོས་པས་སོ། །འདི་བཤད་པ། ཇི་སྟེ་དངོས་པོར་སྨྲ་བ་རྣམས། །ཀུན་རྫོབ་ལ་ཡང་ཞེས་བྱ་བའི་སྒྲ་ནི་སྔ་མ་བཞིན་ནོ། །སྣང་བ་དང་ལྡན་པ་ནི་རྣམ་པ་དང་བཅས་པའོ། །ཅིག་ཤོས་ཀྱིས་ཞེས་བྱ་བ་ནི་ཤེས་པ་རྣམ་པ་མེད་པས་སོ། །ཡོངས་སུ་གཅོད་པ་མི་རུང་བའི་ཕྱིར། རྒྱུ་དང་འབྲས་བུར་འདོད་པ་མེ་དང་དུ་བ་ལ་སོགས་པ་འཛིན་པར་མི་འཐད་པའི་རྒྱུས་རྒྱུ་དང་འབྲས་བུ་ཉིད་ངེས་པ་མེད་པ་ཁོ་ན་སྟེ་མི་རུང་ངོ་ཞེས་བྱ་བ་ནི་ལྷག་མའོ། །སྔ་མ་བཞིན་དུ་ཞེས་བྱ་བ་ནི། གོང་དུ་དངོས་པོར་སྨྲ་བ་རྣམས་ལ་རྣམ་པ་མེད་པའི་ཤེས་པ་ནི། ཡུལ་ལ་འཛིན་པར་མི་རིགས་སོ། །རྣམ་པ་ཚད་མ་མིན་ཕྱིར་དང༌། །མི་རིགས་ཕྱིར་ན་ཅིག་ཤོས་མིན། །ཞེས་ཇི་སྐད་བསྟན་པ་ལྟ་བུའོ། །དེ་ནི་རིགས་པ་མ་ཡིན་ནོ། །ཞེས་བྱ་བ་ནི་རྒྱུ་དང་འབྲས་བུ་ཉིད་དོ། །ཅིའི་ཕྱིར་ཞེ་ན། དུ་མས་དངོས་པོ་གཅིག་མི་བྱེད། །དུ་མས་དུ་མ་བྱེད་མ་ཡིན། །ཞེས་བྱ་བ་ལ་སོགས་པ་གཏན་ཚིགས་སྔ་མ་ཁོ་ནའི་ཕྱིར་རོ། །འདིར་ལན་བཤད་པ། བློ་རྒྱ་ཆེན་པོའི་ནོར་ཅན་ཁྱོད་ཀྱིས་གང་སྨྲས་པ། དེ་བདེན་ཏེ། བརྟག་མི་བཟོད་པ་ཉིད་ཀྱི་རྒྱུ། །དེའི་ཕྱིར་ན་འདི་ནི་བཅོམ་ལྡན་འདས་ཐུགས་རྗེའི་རྒྱུ་ལས་བྱུང་བའི་རྡུལ་ཕྲ་རབ་ཀྱིས་བསྒྲུབས་པའི་སྐུ་ཅན་གྱིས། སངས་རྒྱས་ཐམས་ཅད་ཀྱི་ཡུལ་ལ་འཇུག་པ་ཡེ་ཤེས་སྣང་བའི་རྒྱན་ལ་སོགས་པའི་མདོ་ལས། ཇི་ལྟར་སྣང་བཞིན་ཡིན་པར་གསུངས། །འདི་བཤད་པ་རྒྱུ་གང་གི་ཕྱིར། རིགས་པའི་མཐུས་རྒྱུ་དང་འབྲས་བུ་ཉིད་ལ་སོགས་པ་མི་རུང་བ། དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་སྐྱེ་བ་ནི་ཇི་ལྟར་སྣང་བ་བཞིན་ཡིན་པར་གསུངས་སོ། །གཞན་ཡང་རུང་ཞེས་བྱ་བ་ནི། དེ་རྟོགས་པར་བྱེད་པའི་ཚད་མ་དང༌། གནས་པ་དང་རྒ་བ་དང་མི་རྟག་པ་ཉིད་ལ་སོགས་པའོ།།
འདིའི་ངོ་བོ་ཉིད་སྐྱེ་བ་མེད་པའི་ཆོས་ཡིན་པས། སྐྱེ་བ་མེད་ཆོས་ཏེ། དེའི་ཆོས་དོན་དམ་པ་པའི་སྐྱེ་བ་མ་ཡིན་ནོ་ཞེས་བྱ་བའི་ཐ་ཚིག་གོ །རྫོགས་པར་སངས་རྒྱས་པའི་གནས་སྐབས་ན་ཡང་དག་པའི་ཤེས་པས་སྒྲོ་བཏགས་པའི་རྣམ་པ་དང་བྲལ་བའི་ཕྱིར། དེ་ལྟར་ཆོས་མ་སྐྱེས་པ་ཡིན་གྱི། སྔ་མ་དེ་ལྟར་རང་བཞིན་ཡིན་པར་གྱུར་པ་ནི་མ་ཡིན་ནོ་སྙམ་དུ་དོགས་པ་བཟློག་པའི་ཕྱིར་བཤད་པ། རྟག་ཏུ་སྟེ་དུས་ཐམས་ཅད་དུའོ། །རྫོགས་པར་སངས་མ་རྒྱས་པའི་གནས་སྐབས་ན་ཡང་ཞེས་བྱ་བའི་ཐ་ཚིག་སྟེ། འདི་ལྟར། འདི་ལ་བསལ་བ་ཅི་ཡང་མེད། །གཞག་པར་བྱ་བ་ཅི་ཡང་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་འགྲོལ། །ཞེས་འབྱུང་ངོ༌། །ཆོས་རྣམས་ཀུན་ཀྱང་ཞེས་བྱ་བ་ནི། དེ་བཞིན་གཤེགས་པ་ལས་གཞན་པ་རྣམས་སོ། །བདེ་བར་གཤེགས་པ་དང་འདྲ་ཞེས་བྱ་བ་ནི། མི་སྐྱེ་བའི་ཆོས་རྣམས་ཡིན་པས། དེ་དག་ཀྱང་སྐྱེ་བ་ཚད་མས་གནོད་པ་ཡིན་པའི་ཕྱིར། རང་བཞིན་འདི་ལས་མི་འདའོ། །འོ་ན་ནི་ཇི་ལྟར་སྐྱེ་བོ་དག་གཟུགས་ལ་སོགས་པ་དངོས་པོ་རྣམས་སྐྱེ་བ་དང་གནས་པ་དང་འཇིག་པ་ལ་རྟེན་ཏོ་ཞེས་ཐ་སྙད་དག་འཇུག་པར་བྱེད་སྙམ་པ་ལ། བཤད་པ། མཚན་མར་འཛིན་པའི་ཐོག་མ་མེད་པའི་དུས་ནས་འཇུག་པའི་ཕྱིན་ཅི་ལོག་གི་བག་ཆགས་ལས་བྱུང་བ་དངོས་པོར་མངོན་པར་ཞེན་པས། དངོས་པོའི་དེ་ཁོ་ན་བརྟག་པ་ལ་མི་གཟོ་བའི་ཕྱིར་མི་མཁས་པ་རྣམས་ནི་བྱིས་པ་དག་གོ །གང་དག་ལ་ཐོས་པའམ་བསམས་པའམ་བསྒོམས་པའི་རིམ་པས་བློ་སྐྱེས་པར་མ་གྱུར་པ་ཡོད་པ་དེ་དག་ལ་དེ་སྐད་ཅེས་བྱའོ། །མེད་པའི་ཆོས་ཏེ། སྐྱེ་བ་ལ་སོགས་པ་དང་ལྡན་པ་གཟུགས་ལ་སོགས་པ་མེད་པ་རྣམས་ལ་ཡང་དག་བར་མངོན་པར་ཞེན་པས་ཐ་སྙད་འདོགས་སོ། །ཇི་ལྟར་སྣང་བཞིན་ངོ་བོའི་ཕྱིར། །ཞེས་བྱ་བ་ནི། མ་བརྟགས་ན་ཉམས་དགའ་བ་ཡིན་པའི་ཕྱིར་རོ། །ཀུན་རྫོབ་འདི་ལ་དཔྱད་པ་སྟེ། །བརྟག་པ་མི་འཇུག་གོ །འདི་ལ་ཇི་སྐད་བཤད་པའི་དཔྱད་པ། ཅི་རྒྱུ་དང་འབྲས་བུའི་དངོས་པོ་ཀུན་རྫོབ་པ། ཤེས་པ་རྣམ་པ་དང་བཅས་པས་ཤེས་སམ་ཞེས་བྱ་བ་དང༌། དེ་བཞིན་དུ་འདི་ཇི་ལྟར་འདོད། ཅི་དུ་མས་གཅིག་བྱས་སམ། འོན་ཏེ་དུ་མ་བྱས་ཞེས་བྱ་བ་ལ་སོགས་པ་དེ་ནི་གནས་མེད་དེ་རྟེན་མེད་དོ། །ཅིའི་ཕྱིར་ཞེ་ན། འདི་ལྟར་ཇི་
སྐད་བཤད་པའི་རྣམ་བར་དཔྱོད་པར་བྱེད་པ་ཡིན་ན་ནི། གནོད་པ་དེ་ཚར་གཅད་པའི་གནས་སུ་འགྱུར་རོ། །ཅིའི་ཕྱིར་ཞེ་ན། དོན་གཞན་དུ་སོང་བས་ཏེ། སྐབས་ཡིན་པའི་དོན་བོར་ན་རྩོད་པ་གཞན་ལ་བརྟེན་པའི་ཕྱིར་ཞེས་བྱ་བའི་ཐ་ཚིག་གོ །འདི་རྣམ་པར་འགྲེལ་བར་བྱེད་དེ། དབུ་མ་པ་ཁོ་བོ་ཅག་ནི་ཀུན་རྫོབ་འདི་ལ་དཔྱོད་པ་སྔར་མ་བསྟན་གྱི། ཁྱེད་ཀྱིས་བྱེད་ན་འགོག་པར་བྱེད་དོ། །གལ་ཏེ་དཔྱད་པ་བྱས་ཏེ། དེ་དག་གི་དེ་མ་རུང་ན་མ་རུང་དུ་ཟད་དོ། །ཁོ་བོ་ཅག་ལ་ཅི་གནོད། འོན་ཀྱང་ཇི་ལྟར་སྣང་བའི་ངོ་བོའི་ཀུན་རྫོབ་ལ་སྔར་བརྟེན་ནས་ཏེ། ཁས་བླངས་ནས་ཕྱིས་ཀུན་རྫོབ་དེ་ལ་ཁྱོད་ཇི་སྐད་བཤད་པའི་དཔྱོད་པ་བྱེད་པ་ཡིན་ན་ནི་དོན་རྣལ་མ་ལས། དོན་གཞན་དུ་འགྲོ་བའི་ཕྱིར་གནོད་པ་སྟེ། ཕམ་པ་འབའ་ཞིག་ཏུ་འགྱུར་རོ། །དོན་རྣལ་མ་ལས་དོན་གཞན་ཞེས་བྱ་བ་ནི། མ་འབྲེལ་བའི་དོན་ཏེ། དེ་ཚར་གཅད་པའི་གནས་སུ་རྣམ་པར་གཞག་པ་ནི་རིག་པ་དང་ལྡན་པ་ཡིན་ནོ། །ཇི་སྟེ་ཇི་སྐད་བཤད་པའི་མཚན་ཉིད་མ་ཡིན་པ་ལ་ཞེས་བྱ་བ་ནི་ཇི་ལྟར་སྣང་བའི་ངོ་བོ་མ་ཡིན་གྱི། རིགས་པའི་རྗེས་སུ་འབྲང་བ་ཉིད་ཀྱིས་ཁས་བླངས་པའི་དོན་ཁོ་ན་ལ། གལ་ཏེ་ཀུན་རྫོབ་ཅེས་བྱ་བའི་མིང་དུ་འདོགས་ན་དེ་ལ་དེ་ལྟ་བུའི་ཉེས་པ་བརྗོད་ཀྱང་ཁོ་བོ་ཅག་ལ་གནོད་པ་ཅི་ཡང་མེད་དེ། དོན་གཞན་དུ་འགྲོ་བ་མེད་པའི་ཕྱིར་རོ། །དངོས་པོར་མངོན་པར་ཞེན་པ་ཆེན་པོའི་གཞན་གྱི་དབང་གི་བློ་ཅན་གཞན་དག་དོན་དམ་པའི་ཚུལ་ལ་རྣམ་པར་སྡང་ཞིང་ཀླན་ཀ་ཚོལ་བར་བྱེད་དེ། འོ་ན་གལ་ཏེ་དངོས་པོ་རྣམས་དོན་དམ་པར་མ་སྐྱེས་པ་ཁོ་ན་ཡིན་ན། དེའི་ཚེ་ཅིའི་ཕྱིར་ན་འདི་ལ་མེ་དང་ས་བོན་ལ་སོགས་པའི་རྒྱུ་འདི་ལས་དུ་བ་དང་མྱུ་གུ་ལ་སོགས་པའི་ངོ་བོ་དེར་སྔོན་མི་སྣང་བ་ལས་ངེས་པར་སྣང་ཞེས་བྱ་བ་འདི་སྨྲ་བར་བྱོས། ཀླན་ཀ་འདིའི་ལན་གློན་པར་བྱེད་དེ། ཁྱོད་དང་བ་ལང་རྫི་ལ་སོགས་པ་མངོན་པར་ཞེན་པ་ངན་པའི་དུག་ལ་སོགས་པས་མ་རུང་བར་བྱས་པའི་བློ་ཅན་རྣམས་ཀྱིས་ཇི་ལྟར་མཐོང་བ་འདི་འདྲ་སྟེ། འདི་ལྟ་བུ་དུ་བ་ལ་སོགས་པ་འདི་ནི་མེ་ལ་སོགས་པའི་རྒྱུ་འདི་ལས་སྣང་སྟེ། དེའི་ཕྱིར་འདི་ལ་ལྷག་པ་ཅི་ཞིག་སྨྲ་བར་བྱ། སྔོན་མ་བྱུང་བ་ཅི་ཡང་སྨྲར་མེད་དོ་ཞེས་བྱ་བའི་ཐ་ཚིག་སྟེ། འདི་ལྟར་ཁྱོད་ལ་དུ་བ་ལ་སོགས་པ་ཆ་ཇི་ཙམ་སྣང་བ་དེ་ཙམ། ཁོ་བོ་ལ་ཡང་དེ་དག་ལ་ཆ་དེ་ཙམ་
སྣང་ངོ༌། །ཁོ་བོས་ཁྱོད་ཀྱི་ངོ་མི་ཆོད་པའི་ཕྱིར་སྨྲ་བར་འདོད་ནས། མིག་གཉིས་ཏེ་པོར་ཕྱེ་ཡང་དེ་དག་ལ་སྔོན་མ་བྱུང་བའི་རྣམ་པ་ནི་ཅི་ཡང་མི་སྣང་ན། དེ་ལ་དེ་ལྟ་བུའི་དངོས་པོའི་ངོ་བོ་ཉིད་ལ་ཁོ་བོ་ཅག་ལ་ཅི་ཞིག་འདྲི། དྲི་བ་གཞན་གྱི་ཡུལ་སྔོན་མ་བྱུང་བ་མེད་པའི་ཕྱིར། ཁྱོད་ཀྱི་འདྲི་བ་འདི་ནི་དོན་མེད་ལ་ཁོ་ན་ཡིན་ཏེ། འདི་ལྟར་དྲིས་སུ་ཟིན་ཀྱང་ཁོ་བོས་གང་ཁྱོད་དང་བ་ལང་རྫི་ལ་སོགས་པ་དང་བཅས་བས་མཐོང་བ་དེ་ཙམ་གྱི་ཆ་ཞིག་བརྗོད་པར་བྱའི། སྔོན་མ་བྱུང་བའི་ངོ་བོ་བརྗོད་པར་བྱ་བ་ནི་ཅི་ཡང་མེད་དོ། །དེའི་ཕྱིར་ཅིའི་ཕྱིར་ན་རྒྱུ་འདི་ལས་དེར་སྣང་བ་འདི་སྨྲ་བ་བྱོས། ཞེས་བྱ་བ་དེ་སྐད་དུ། འདྲི་བ་ནི་ཀུན་ནས་ཉོན་མོངས་པ་སྟེ། དོན་སྟོང་པ་ལ་བརྟེན་པ་འབའ་ཞིག་ཏུ་ཟད་དོ། །གཞན་ཡང་སྐྱེ་བོ་བློའི་ནོར་ཅན་གང་ཞིག་མ་བརྟགས་ན་དགའ་བ། མེ་དང་དུ་བ་ལ་སོགས་པ་བདག་ཉིད་ཀྱིས་རྣམ་པར་གསལ་བར་མཐོང་བཞིན་དུའང༌། དམིགས་བཞིན་དུའང་མི་ཤེས་ཏེ་འདི་ནི་དེ་ལྟའོ་ཞེས་མི་གོ་བ། དེ་རྩོད་པ་ཡིས། གྲགས་པས་ཀྱང་གཞན་ལ་ཅིའི་ཕྱིར་ན་རྒྱུ་འདི་ལས། དེར་སྣང་བ་འདི་སྨྲ་བར་བྱོས། །ཞེས་སྨྲའོ། །མ་འཕགས་ངན་པ་ནི། བཟང་པོ་མ་ཡིན་པའོ། །མི་ཤེས་པ་ནི་བླུན་པ་སྟེ། །མི་ཤེས་པ་ཁོ་ན་འདིར་ངན་པ་ཞེས་བྱ་བར་འོས་ཀྱི། སྲོག་ཆགས་ཕན་པ་འདོད་པས་བསླུས་པ་ལ། ལྟ་ཉེས་བ་ཅི་ཡོད་སྙམ་དུ་བསམས་པའོ། །རྩོད་པར་གྲགས་པ་ནི། རྩོད་པ་ཡིས་ནི་གྲགས་པའོ།། །།བམ་པོ་གསུམ་པ་སྟེ་ཐ་མའོ། །བཙུན་པ་བློ་བརྟེན་ན་རེ། ཀུན་རྫོབ་ནི་གཞི་མེད་པར་མི་རུང་ངོ་ཞེས་ཟེར་བ་དེའི་དོགས་པ་བསུ་བའི་ཕྱིར། ཀུན་རྫོབ་འདི་ནི་གཞི་མེད་བར། །ཞེས་བྱ་བ་སྨོས་ཏེ། རྟེན་མེད་པར་མི་རུང་ངོ་ཞེས་ཀྱང་བརྗོད་པར་མི་ནུས་ཏེ། འདི་ལྟར་བརྟགས་པ་ཀུན་རྫོབ་ནི་གཞི་དང་བཅས་པ་སྟེ། ཡང་དག་པའི་གཞི་དང་ལྡན་པ་ནི་འགའ་ཡང་དངོས་པོ་གང་ལ་ཡང་མི་སྣང་ངོ༌། །ཤིང་ལ་སོགས་པ་གདགས་པའི་གཞི་ཡལ་ག་ལ་སོགས་པ་སྣང་བ་མ་ཡིན་ནམ་ཞེ་ན། བརྫུན་པ་ཡིན་ནོ་སྙམ་ནས་བཤད་པ། ཤིང་ལ་སོགས་པའི་དོན་གྱི་གདགས་པ་འདི་ཡང་གཞི་སྟེ། དོན་དམ་པ་པའི་རྒྱུ་ལ་ལྟོས་པ་མ་ཡིན་པ་ཉིད་དོ། །འདི་ལྟར་ཤིང་ལ་སོགས་པའི་གདགས་པའི་རྒྱུ་ནི་ཡལ་ག་ལ་སོགས་པ་ཡིན་པར་འགྱུར་ལ། ཡལ་ག་ལ་སོགས་པ་དེ་
ཡང་ཆ་ཤས་དང་བཅས་པའི་ཕྱིར། དེའི་ཆ་ཤས་ཀྱི་གཟུགས་ཀྱང་གཞན་ཡིན་ནོ། །དེ་བཞིན་དུ་བློས་རྣམ་པར་གཞིགས་ན་གདགས་པའི་གཞི་རྡུལ་ཕྲ་རབ་ཀྱི་བར་དུ་རྣམ་པར་གནས་ལ། དེ་ཡང༌། གང་ལ་ཤར་སོགས་ཕྱོགས་ཡོད་པ། །དེ་ལ་ཤར་གྱི་ཕྱོགས་ཆའང་ཡོད། །གང་ཕྱིར་རྡུལ་ལ་ཕྱོགས་རྣམས་ཡོད། །དེའི་ཕྱིར་རྡུལ་ཕྲན་མིན་པར་བཤད། །ཅེས་བྱ་བ་དེ་ལྟ་བུ་ལ་སོགས་པ་ཕྱོགས་ཆ་ཐ་དད་པས་དཔྱད་ན་མེད་པ་ཁོ་ན་ཡིན་ན། ཤིང་ལ་སོགས་པ་ཀུན་རྫོབ་པ་གདགས་པའི་རྒྱུ་དེ་ལྟ་ག་ལ་ཡོད་དེ་མེད་པ་ཁོ་ནའོ། །དེ་ལྟར་སྣང་བའི་རྒྱུ་རྣམ་པར་ཤེས་པ་ཡིན་པར་རྟོག་པ་གང་ཡིན་པ་དེ་ཡང་སྔར་སྐྱེ་བ་མེད་པར་བསྒྲུབས་པའི་ཕྱིར་མི་འཐད་པ་ཉིད་དོ། །དངོས་པོ་ཡོད་པ་ཞེས་བྱ་བ་ནི་དོན་དམ་པ་ཡིན་ནོ། །ཀུན་རྫོབ་པ་ནི་རྒྱུ་ཁོ་ན་ཡིན་ཏེ། འདིའི་རྒྱུར་སྔ་མ་མི་འགལ་ལ། རྒྱུ་དེའི་རྒྱུ་ཡང་ཀུན་རྫོབ་པ་གཞན་སྔ་མ་ཁོ་ན་ཡིན་ནོ། །དེ་ལྟར་རྒྱུ་བརྒྱུད་པ་ཐོག་མ་མེད་པའི་ཕྱིར་ཀུན་རྫོབ་གཞི་མེད་པ་ནི་ཅི་ཡང་མེད་དོ། །གལ་ཏེ་འདིའི་རྒྱུ་རིགས་པའི་རྗེས་སུ་འབྲང་བ་མེད་དོ་ཞེ་ན། འདི་ཡང་རྣམ་པ་དེ་ལྟ་བུ་ཁོ་ན་མ་ཡིན་ནམ། དེ་ལྟ་བས་ན་ཅི་ཡང་མི་གནོད་དོ། །ཇི་སྟེ་ཡང་དག་པའི་གཞི་མེད་པར་འདི་འབྱུང་བར་རིགས་པ་མ་ཡིན་ནོ་ཞེས་བྱ་བར་འདོད་ན་ནི། ཀུན་རྫོབ་དང་དོན་དམ་པ་བའི་གཞི་དེར་འདི་ལྟར་དེ་མེད་ན་དེར་མི་འགྱུར་བའི་འབྲལ་བ་ཅི་ཡང་མེད་པ་མ་ཡིན་ནམ། གལ་ཏེ་དེའི་བདག་ཉིད་ཀྱི་མཚན་ཉིད་ཡིན་ནོ་ཞེ་ན། གལ་ཏེ་དེ་ལྟ་ན་གཞི་ཡང་དེའི་ངོ་བོ་ཉིད་ཁོ་ན་ཡིན་པས་ཁོ་བོ་ཅག་གི་འདོད་པ་གྲུབ་པ་ཁོ་ན་ཡིན་ནོ། །དེ་ལྟ་ཡིན་ན་དོན་དམ་པ་པའི་གཞིའི་ངོ་བོ་ཉིད་ཡིན་པའི་ཕྱིར་ཀུན་རྫོབ་ཀྱི་ངོ་བོ་འདོར་བར་འགྱུར་བའམ། གཞི་ཀུན་རྫོབ་ཏུ་ཡོད་པར་ཐལ་བར་འགྱུར་རོ། །སྐྱེ་བའི་མཚན་ཉིད་ཀྱི་འབྲེལ་པ་ཡིན་ན་ནི། རང་གི་ངོ་བོ་ཉམས་པར་ཐལ་བར་འགྱུར་ཏེ། འབྲས་བུ་ནི་རྒྱུ་དང་མཐུན་པའི་ཕྱིར་རོ། །དེ་ལྟ་བས་ན། ཇི་ལྟར་སྣང་བ་འདི་ཁོ་ནའོ། །རྒྱུ་དངོས་པོ་ཡོད་པ་ལ་ལྟོས་ནས་འཇུག་པ་ནི། གང་ཡང་མེད་དོ་ཞེས་ཁས་བླང་བར་བྱའོ། །གལ་ཏེ་ཀུན་རྫོབ་དོན་དམ་པ་པའི་གཞི་ལ་ལྟོས་པར་གྱུར་ན། དེ་ལྟ་ཡིན་ན་ནི་དངོས་པོར་འགྱུར་ཏེ། འབྲས་བུ་ནི་རྒྱུ་དང་མཐུན་པའི་ཕྱིར་ཀུན་རྫོབ་ཀྱི་ངོ་བོ་ཉིད་འདོར་ཞིང་དོན་དམ་པ་པའི་དངོས་པོར་འགྱུར་རོ་ཞེས་བྱ་བའི་
ཐ་ཚིག་གོ །ཇི་སྟེ་དེ་རང་གི་ངོ་བོ་མི་འདོར་ན་དེ་ལྟ་ཡིན་ན་ནི། ཁྱོད་ཀྱི་གཞི་ཡང་ཇི་ལྟར་ཀུན་རྫོབ་ཏུ་མི་འགྱུར་ཏེ། དེ་ཡང་དེའི་བདག་ཉིད་དང་དེ་ལས་བྱུང་བའི་ཕྱོགས་དག་ལ་ཀུན་རྫོབ་ཀྱི་ངོ་བོར་བསྒྲུབས་མ་ཐག་པ་ཡིན་ནོ། །དེ་ནི་དེ་ལྟ་ཡིན་ཏེ་ཞེས་བྱ་བ་ནི། བཏགས་པ་གཞི་དང་བཅས་པ་ནི། །འགའ་ཡང་གང་ལའང་མི་སྣང་ངོ༌། །ཞེས་བྱ་བ་དེ་ནི་དེ་ལྟ་ཡིན་པའོ། །ཅིའི་ཕྱིར་ཞེ་ན། གཏན་ཚིགས་གང་གི་ཕྱིར་རྣལ་འབྱོར་སྤྱོད་པ་དངོས་པོར་སྨྲ་བ་ཁྱོད་ཀྱི་ལྟར་ན་ཡང༌། བརྟགས་པའི་ངོ་བོ་ཉིད་གཟུང་བ་དང་འཛིན་པའི་མཚན་ཉིད་ནི། རྒྱུ་ཅི་ལ་ཡང་མི་ལྟོས་པ་ཁོ་ན་ཡིན་ནོ། །རྣལ་འབྱོར་སྤྱོད་པ་པ་འདོད་པའི་དོགས་པ་བསུ་བར་བྱེད་དེ། རྟག་ཏུ་མེད་ཅེས་འབྱུང་བའི་ཕྱིར། །གལ་ཏེ་མེད་པའི་ཕྱིར་མི་ལྟོས་སོ་ཞེ་ན། འདིའི་བསམ་པ་ནི་འདི་ཡིན་ཏེ། བརྟགས་པ་ནི་གཅིག་ཁོ་ནར་མེད་པ་ཡིན་ཏེ། ཇི་སྐད་དུ་དང་པོ་པ་ནི་མཚན་ཉིད་ཀྱིས། །ངོ་བོ་ཉིད་མེད་ཅེས་བཤད་པ་ལྟ་བུའོ། །དེའི་ཕྱིར་འདི་ནི་ཇི་ལྟར་སྣང་བ་བཞིན་དུ་ཡང་མེད་པ་ཡིན་པས། དེ་རྒྱུ་ལ་མི་ལྟོས་པ་ཉིད་ནི་རིགས་པ་ཡིན་ནོ། །ཇི་ལྟར་སྣང་བ་བཞིན་དུ་ཀུན་རྫོབ་ཏུ་ཡོད་པ་གང་ཡིན་པ་དེ་ནི་ངེས་པར་རྒྱུ་ལ་ལྟོས་པ་ཡིན་ནོ་སྙམ་པ་འདི་ཡིན་ནོ། །དེའི་ཕྱིར་འདིར་ལན་མངོན་སུམ་དང་འགལ་བ་ཀུན་ཏུ་སྤྱོད་དེ་ཞེས་བྱ་བ་སྨོས་སོ། །འདི་ལ་གང་གིས་ན་མངོན་སུམ་དང་འགལ་བར་རྣམ་པར་གཞག་པར་འགྱུར་བ་མངོན་སུམ་དང་གྲགས་པའི་དོན་སྤང་བ་གང་ཞིག་ཡིན་སྙམ་པ་ལ། བཤད་པ། གཟུང་བ་དང་འཛིན་པ་ནི་བརྟགས་པའི་ངོ་བོ་ཉིད་ཅེས་བྱ་བ་སྟེ། དོན་ཕྱིར་ན་བརྟགས་པ་བསྟན་པ་ཡིན་ཞེས་འབྱུང་བའི་ཕྱིར་རོ། །དེ་གཉིས་ཀྱང་མངོན་སུམ་ཁོ་ནར་ཤིང་རྟ་འཚོང་བ་ལ་སོགས་པ་སྐྱེ་བོ་མཐའ་དག་ལ་གྲགས་པའི་ཚད་མས་གྲགས་པ་དག་ཡིན་པས་དེ་སྤངས་ན་མངོན་སུམ་དང་འགལ་བ་བཟློག་དཀའ་སྟེ། འདི་ལྟར་སྔོན་པོ་ལ་སོགས་པ་དང་དེ་འཛིན་པར་བྱེད་པ་སྲོག་ཆགས་ཐམས་ཅད་ཀྱི་མངོན་སུམ་དུ་གྲུབ་པོ། །ཡང་ཕ་རོལ་པོ་འདོད་པའི་དོགས་པ་བསུ་བར་བྱེད་དེ། རྣམ་པར་ཤེས་པ་ཉིད་ནི་གཉིས་མེད་པའི་ངོ་བོའོ། །མ་རིག་པས་གཟུང་བ་དང་འཛིན་པར་མངོན་པར་ཞེན་པ་ཉིད་ཀྱིས་དཀྲུགས་པ་ནི་ནོར་བར་བྱས་པའོ། །དེ་ལྟར་ཞེས་བྱ་བ་ནི་གཟུང་བ་དང་འཛིན་པའི་ངོ་བོར་ཏེ། གཉིས་པ་ལ་མངོན་པར་ཞེན་པའི་བག་ཆགས་ཀྱི་གཉིད་མ་སངས་
པ་དག་གི་གཉིད་ཀྱིས་ནོན་པའི་སེམས་རྣམས་ཀྱིས་རྟོགས་པ་བཞིན་དུ་རྟོགས་སོ་ཞེ་ན། རིགས་པ་སྨྲ་བས་བཤད་པ། མྱོང་བ་དང་འགལ་བ་སྒྲུབ་པ་ཁྱོད་ལ་འགོག་པར་བྱེད་པ་སུ་ཞིག་ཡོད། གྲུབ་པའི་མཐའི་ཕྱོགས་འཛིན་པས་མ་ཉམས་པའི་བློ་གྲོས་ཅན་བུད་མེད་དང་དམངས་རིགས་ལ་སོགས་པའམ། མངོན་པར་མ་ཞེན་པའི་གནས་སྐབས་ན་ཁྱོད་ཀྱང་རུང་སྟེ། འཇུག་པའི་རྣམ་པར་ཤེས་པ་འདི་གཟུགས་ལ་སོགས་པ་ཉིད་དུ་རྟོགས་ཀྱི། དེ་ལས་མ་གཏོགས་པ་གཟུགས་དང་སྒྲ་ལ་སོགས་པ་ནི་མེད་དོ། །ཞེས་བྱ་བ་དེ་ལྟ་བུའི་མྱོང་བ་ནི་མེད་ཀྱི་རྣམ་པར་ཤེས་པ་འདི་ནི་ནང་ན་གནས་པའི་ངོ་བོ་ཡིན་ནོ། །གཟུགས་ལ་སོགས་པ་འདི་ནི་ཕ་རོལ་ན་སྣང་བའི་ངོ་བོ་ཡིན་ནོ་ཞེས་བྱ་བ་དེ་ལྟ་བུའི་མྱོང་བ་འཇུག་པ་རབ་ཏུ་གྲགས་པར་གྱུར་ཏོ། །ཇི་སྟེ་ཁྱོད་དེ་ལྟར་གྱུར་པ་འཇིག་རྟེན་ཐམས་ཅད་ལ་གྲགས་པའི་དོན་ཡང་སྤང་ན་ནི་དེའི་ཚེ། བདག་ཉིད་མི་ཤེས་པ་དེ་ལྟ་བུ་བདག་དང་གཞན་གྱིས་ཉམས་སུ་མྱོང་བ་དང་འགལ་བའི་ཐ་སྙད་སྨྲ་བ་ཁྱོད་ནི། འཇིག་རྟེན་གྱིས་ཐག་རིང་པོ་ཁོ་ནར་སྤོང་སྟེ། འཇིག་རྟེན་པའི་ཐ་སྙད་དང་མི་མཐུན་པར་ཞུགས་པའི་ཕྱིར་རོ། །གཞན་གྱིས་སྨྲས་པ། རྨི་ལམ་ལ་སོགས་པ་ན་ཡང་རྣམ་པར་ཤེས་པ་ཉིད་དེ་ལྟར་རྟོགས་པར་མཐོང་བ་མ་ཡིན་ནམ། སོགས་པ་སྨོས་པས་ནི་སྒྱུ་མ་དང་དྲི་ཟའི་གྲོང་ཁྱེར་ལ་སོགས་པ་ཡོངས་སུ་བསྡུའོ། །རྨི་ལམ་ན་ནི། ཕྱི་རོལ་གྱི་གཟུགས་ཡོད་པར་མི་འཐད་དེ། ཁྱིམ་ཆུང་ངུ་ན་ཡང་དཔག་ཚད་ཀྱི་ཚད་ཀྱི་རི་དང་ཤིང་དང་རྒྱ་མཚོ་ལ་སོགས་པ་དག་དམིགས་པའི་ཕྱིར་རོ། །གཟུགས་ལ་སོགས་པ་ཡང་ཐོགས་པ་དང་བཅས་པ་ཡིན་ཏེ། དེ་ལྟ་བས་ན་དེ་ན་རྣམ་པར་ཤེས་པ་ཉིད་དེ་ལྟར་རྟོགས་ཏེ། གཉིད་ཀྱིས་མ་ལོག་པའི་གནས་སྐབས་ན་ཡང་དེ་དང་འདྲ་བར་འགྱུར་རོ་ཞེའོ། །དེ་ལ་བཤད་པ། བདེན་ན་རྨི་ལམ་ལ་སོགས་པ་ན་ཡང་རྣམ་པར་ཤེས་པ་ལ་མ་གཏོགས་པ་དེ། གཟུགས་ལ་སོགས་པ་ཇི་ལྟར་སྣང་བ་བཞིན་མཐོང་བཞིན་དུ་ཡང་མངོན་པར་ཞེན་པ་ངན་པས་ཁྱོད་ལ་རྣམ་པར་ཤེས་པ་ཉིད་དེ་ལྟར་རྟོགས་སོ་སྙམ་དུ་ལོག་པར་སྣང་གི །གཉིད་ཀྱིས་མ་ལོག་པའི་གནས་སྐབས་བཞིན་དུ། དེ་ན་ཡང་དེ་ལྟར་རྟོགས་པ་ན། ཕྱི་རོལ་གྱི་གཟུགས་ལ་སོགས་པ་
ཇི་ལྟར་སྣང་བ་བཞིན་ནི་ཡོད་པ་ཁོ་ནའོ། །གལ་ཏེ་རིགས་པས་མི་འཐད་དོ་ཞེ་ན། དེ་ཉིད་ཀྱི་ཕྱིར་མ་བརྟགས་ན་ཉམས་དགའ་བའི་ཕྱིར་དང༌། བརྟག་པའི་དཔྱད་པ་མི་བཟོད་པའི་ཕྱིར་ཀུན་རྫོབ་པ་ཞེས་བྱ་སྟེ། གཉིད་ཀྱིས་མ་ལོག་པའི་གནས་སྐབས་ན་ཡོད་པའི་རྣམ་པར་ཤེས་པ་ཡང་དེ་ལྟ་བུ་ཁོ་ན་ཡིན་ཏེ། དེ་ཡང་སྐྱེ་བ་མེད་པར་བསྒྲུབས་པའི་ཕྱིར་རོ། །སྣོན་བཤད་པ། གང་ཡང་འཇིག་རྟེན་ཐམས་ཅད་ལ་གཟུང་བ་དང་འཛིན་པའི་རྣམ་པར་སྣང་བའི་དངོས་པོ་འདི་ཅི་ཞིག་གཞན་གྱི་དབང་གི་ངོ་བོ་ཉིད་ཡིན་ནམ། འདི་ཇི་ལྟར་རུང་སྟེ་འདི་གཞན་གྱི་དབང་གི་ངོ་བོ་ཉིད་དེ་ནི་ཡང་དག་པར་ན་དེས་དབེན་པའི་ངོ་བོ་ཅན་ཡིན་ནོ། །གང་ལ་གཟུང་བ་དང་འཛིན་པའི་རྣམ་པ་དེས་དབེན་ཞིང་བྲལ་བའི་རང་གི་ངོ་བོ་ཡོད་པ་དེ་སྐད་ཅེས་བྱ་སྟེ། དེ་ལ་སྔ་མ་པོ་རྟག་ཏུ་མེད་པར་གྱུར་པ་ཞེས་འབྱུང་བའི་ཕྱིར་རོ། །དེའི་ཕྱིར་ཇི་ལྟར་ན་གཞན་གྱི་དབང་དེ་ལྟར་གཟུང་བ་དང་འཛིན་པའི་རྣམ་པར་སྣང༌། གལ་ཏེ་མ་རིག་པས་དཀྲུགས་པའི་ཕྱིར་དེ་ལྟར་སྣང་ངོ་ཞེ་ན། བཤད་པ། མ་རིག་པས་དཀྲུགས་པའི་ཕྱིར་དེ་ལྟར་སྣང་བར་ནི་ཆུག་མོད་ཀྱི་ཞེས་བྱ་བ་ནི་ཁས་བླང་བའོ། །དེར་སྣང་བར་རིགས་པ་ནི་མ་ཡིན་ཏེ་འབྲེལ་པ་མེད་པའི་ཕྱིར་རོ་ཞེས་མཇུག་ཐོགས་ཁོ་ནར་གཏན་ཚིགས་འཆད་དེ། གཟུང་བ་དང་འཛིན་པའི་རྣམ་པ་དེ་ནི་གཞན་གྱི་དབང་དེའི་བདག་ཉིད་ངོ་བོ་ཉིད་ནི་མ་ཡིན་ནོ། །ཅིའི་ཕྱིར་མ་ཡིན་ཞེ་ན། གཞན་གྱི་དབང་དེའི་བདག་ཉིད་ནི་གཟུང་བ་དང་འཛིན་པའི་ངོ་བོ་གཉིས་ཀྱིས་དབེན་པའི་ཕྱིར་རོ། །དེ་ལྟ་ཡིན་ན་ཡང་གཞན་གྱི་དབང་གི་བདག་ཉིད་དེ་སྣང་བ་ན། གཉིས་པོ་ཅིའི་ཕྱིར་སྣང༌། ཅིའི་ཕྱིར་དེ་སྣང་བར་མི་འགྱུར་སྙམ་ན། བཤད་པ། གཉིས་པོ་དང་གཞན་གྱི་དབང་དུ་འབྲེལ་བ་མེད་པའི་ཕྱིར་རོ། །སྦྱོར་བ་ནི་གང་གིས་དབེན་པའམ་གང་ཞིག་གང་དང་འབྲེལ་བ་མེད་པ་ནི་དེ་སྣང་བ་ན་དེ་མི་སྣང་སྟེ། དཔེར་ན་རྣ་བའི་རྣམ་པར་ཤེས་པ་ལ་གཟུགས་བཞིན་ནོ། །གཞན་གྱི་དབང་གི་བདག་ཉིད་ཀྱང་གཉིས་པོས་དབེན་པ་ལ། གཉིས་པོ་དང་གཞན་གྱི་དབང་གི་བདག་ཉིད་དུ་འབྲེལ་བ་ཡང་མེད་ཅེས་བྱ་བ་ནི་ཁྱབ་པར་བྱེད་པ་མི་དམིགས་པ་ཡིན་ནོ། །ཕ་རོལ་པོ་ན་རེ། གཏན་ཚིགས་གཉིས་པོ་མ་གྲུབ་སྟེ། འདི་ལྟར་མ་རིག་པས་དཀྲུགས་པའི་ཕྱིར་ཞེས་བྱ་བ་འདིས་འབྲེལ་
པ་སྨྲས་ཟིན་ཏོ་ཞེས་ཟེར་ན། ལན་བཤད་པ། གལ་ཏེ་དེ་ལྟར་འབྲེལ་པ་ཡོད་པ་ཡིན་ན་ནི། དེའི་ཚེ་གཉིས་པོས་དབེན་པའི་ཤེས་པའི་རང་གི་ངོ་བོ་བཞིན་དུ། མ་རིག་པ་དང་འབྲེལ་པའི་ཕྱིར། གཞན་དབང་ཉིད་སྨོས་ཏེ་སུ་ཟློག་སུས་ཀྱང་བཟློག་པར་མི་ནུས་ཏེ། འདི་ལྟར་ཅིག་ཤོས་གཉིས་པོས་དབེན་པ་གཞན་གྱི་དབང་སེམས་དང་སེམས་ལས་བྱུང་བའི་བདག་ཉིད་དུ་འདོད་པ་ཡང་གཞན་གྱི་དབང་ཉིད་དུ་བྱ་བ་སྟེ། གཞན་གྱི་དབང་གི་བདག་ཉིད་དུ་རྣམ་པར་གཞག་པ་ལ་འབྲེལ་པའི་རྒྱུ་འདི་ཁོ་ནར་ཟད་ལ། འབྲེལ་པའི་རྒྱུ་དེ་ནི་གཉིས་པོ་དེ་ལ་ཡང་ཡོད་དེ། དེ་བས་ན་དེ་ལྟ་བས་ན་བརྟགས་པ་མེད་དོ། །ཇི་སྟེ་ཤེས་པ་གང་ལ་གཉིས་པོ་དེ་སྣང་བའི་ཤེས་པ་དེ་ཉིད་རྒྱུ་དང་རྐྱེན་གྱིས་བསྐྱེད་པའི་ཕྱིར་གཞན་གྱི་དབང་ཡིན་གྱི། གཉིས་པོ་ནི་མ་ཡིན་ནོ་ཞེས་བྱ་བར་འདོད་ན། དེའི་ཕྱིར་བཤད་པ། གལ་ཏེ་ཡང་ཤེས་པ་ཁོ་ན་རྒྱུ་དང་རྐྱེན་རྣམས་ཀྱིས་སྐྱེད་ན་ནི། གལ་ཏེ་ཡང་ཞེས་བྱ་བ་ནི་ཁས་ལེན་པ་རྗོད་པར་བྱེད་པའི་ཚིག་ཡིན་ནོ། །དེ་ཡང་ཡང་དག་པར་ན་སྐྱེ་བ་མེད་དོ་ཞེས་དུ་མས་དངོས་པོ་གཅིག་མི་བྱེད་ཅེས་བྱ་བ་ལ་སོགས་པས་བསྒྲུབས་ཟིན་ཏོ། །འོན་ཀྱང་བཤད་པར་བྱ་སྟེ། དེ་ཙམ་སྐྱེད་ལ་ནི་རག་ན་གཉིས་ཀྱི་བདག་ཉིད་དེ་གོ་ཅིའི་ཕྱིར་སྣང་སྟེ། དེ་ནི་དེ་དག་གིས་བསྐྱེད་བ་མ་ཡིན་ནོ། །ཕ་རོལ་བོ་ན་རེ་གཞན་གྱི་དབང་གི་བདག་ཉིད་ཤེས་པ་ཉིད། དེ་ལྟར་གཉིས་ཀྱི་ངོ་བོར་སྣང་ངོ་ཞེས་ཟེར་ན། དེའི་ཕྱིར་བཤད་པ། དེ་ནི་བཤད་ཟིན་ཏེ། ཇི་སྐད་དུ་བཤད་ཅེ་ན། རྣམ་པར་ཤེས་པ་གཉིས་པོས་དབེན་པའི་ངོ་བོ་དེ་རྒྱུ་དང་རྐྱེན་དེ་དག་གིས་ཇི་ལྟ་བུ་ཁོ་ནར་བསྐྱེད་པ་དེ་ལྟ་བུ་ཁོ་ནར་སྣང་དུ་ཟད་ཀྱི། གཉིས་ཀྱི་བདག་ཉིད་དུ་གོ་ཅིའི་ཕྱིར་སྣང་ཞེས་བྱ་བར་བཤད་དོ། །ཡང་ཕ་རོལ་པོ་འདོད་པའི་དོགས་པ་བསུ་བར་བྱེད་དེ། གཉིས་ཀྱི་ངོ་བོ་དེ་ལྟ་བུ་ཁོ་ནར་སྐྱེད་དོ་ཞེ་ན། ལན་དུ་བཤད་པ། འོ་ན་ནི་ཤེས་པ་དེ་གཉིས་ཀྱིས་དབེན་པ་ཅན་གྱི་ངོ་བོ་མ་ཡིན་ཏེ། དེ་གཉིས་ཀྱི་བདག་ཉིད་དུ་བསྐྱེད་པའི་ཕྱིར་རོ། །ངོ་བོ་སྟེ་རང་གི་ངོ་བོ་གང་ལ་གཉིས་ཀྱིས་དབེན་པ་ཡོད་པའི་ངོ་བོ་དེ་ནི་གཉིས་ཀྱི་དབེན་པ་ཅན་ནོ། །འདི་ལ་གཉིས་ཀྱིས་དབེན་པའི་ངོ་བོ་ཡོད་པས་དེ་སྐད་ཅེས་བཤད་དོ། །གཞན་ཡང་འདི་ལ་གཞན་གྱི་
དབང་ཉིད་དུ་སྨྲ་ལ་རག་སྟེ། འདི་ལ་སུ་ཞིག་ཟློག་ཅེས་བཤད་ཀྱང་ཟིན་ཏོ། །ཇི་སྟེ་ཤེས་པ་ལ་ནི་གཉིས་སུ་མེད་པའི་རང་བཞིན་གཉུག་མ་ཁོ་ནར་ཡོད་ན། མ་རིག་པས་དཀྲུགས་པའི་ཤེས་པ་གཞན་གྱིས་དེ་ཉིད་ཀྱི་བདག་ཉིད་དུ་རྟོགས་སོ་ཞེས་བྱ་བར་འདོད་ན། དེའི་ཕྱིར་གཉིས་པོ་མེད་པའི་ངོ་བོ་ཡིན་ན་ཡང་ཞེས་བྱ་བ་ལ་སོགས་པ་སྨོས་ཏེ། འདི་ལྟར་ཤེས་པ་གཞན་དེ་ལ་ཡང་བརྒལ་ཞིང་བརྟགས་པ་མཚུངས་ཏེ། ཤེས་པ་གཞན་དེ་ཡང་གཉིས་ཀྱིས་དབེན་པ་ཁོ་ན་ཡིན་ནོ། །དེ་ལྟ་ན་ཡང་འབྲེལ་པ་མེད་པའི་ཕྱིར་དེ་སྣང་བ་ན་གཉིས་པོ་གོ་ཅིའི་ཕྱིར་སྣང་བར་འགྱུར་ཞེས་བྱ་བ་ལ་སོགས་པ་ཐམས་ཅད་བརྗོད་པར་བྱའོ། །ཡང་དོན་དམ་པའི་ཚུལ་ལ་སྡང་བ་གཞན་དག་ཀླན་ཀ་ཚོལ་བར་བྱེད་དེ། ཡང་དག་པར་དངོས་མ་སྐྱེས་པ། །མོ་གཤམ་བུ་ལ་སོགས་བཞིན་དུ། །ཀུན་རྫོབ་ཏུ་ཡང་མི་སྐྱེ་ཟེར། །ཡང་ཞེས་བྱ་བའི་སྒྲ་ནི་དོན་དམ་པ་འབའ་ཞིག་ཏུ་མ་ཟད་པའོ། །དོན་དམ་པར་མ་སྐྱེས་པའི་ངོ་བོ་ཉིད་གང་དག་ཡིན་པ་དེ་དག་ནི་ཀུན་རྫོབ་ཏུ་ཡང་འབྱུང་བ་འཐོབ་བར་མི་འགྱུར་ཏེ། དཔེར་ན་མོ་གཤམ་གྱི་བུ་དང་རི་བོང་གི་རྭ་ལ་སོགས་པ་བཞིན་ནོ། །གཟུགས་དང་ཚོར་བ་ལ་སོགས་པ་ཡང༌། དོན་དམ་པར་མ་སྐྱེས་པའི་རང་བཞིན་དག་ཡིན་པ་ཞེས་བྱ་བ་ནི། ཁྱབ་པར་བྱེད་པ་མི་དམིགས་པ་ལྟར་འཆོས་པའི་སྦྱོར་བ་ཡིན་ནོ། །འདི་ནི་བསྒྲུབ་པའམ་ཐལ་བར་བསྒྲུབ་པ་ཞིག་ཏུ་འགྱུར་གྲང་སྟེ། རྣམ་པ་གཞན་ནི་མེད་པའི་ཕྱིར་རོ། །དེ་ལ་རེ་ཞིག་འདི་སྒྲུབ་པ་ནི་མ་ཡིན་པས། འཇིག་རྟེན་གནོད་སོགས་སྲིད་པའི་ཕྱིར་ཞེས་བྱ་བ་ལ་སོགས་པ་སྨོས་ཏེ། སྒྲའི་དོན་འགོག་ན་འཇིག་རྟེན་གྱི་གནོད་པ་ཡིན་ནོ། །སོགས་པ་སྨོས་པ་ནི་མངོན་སུམ་གྱི་གནོད་པ་ལ་སོགས་པ་ཡོངས་སུ་བསྡུའོ། །བརྒྱ་ཞིག་ལ་འཇིག་རྟེན་མ་སྐྱེས་པའི་ཕྱིར། འཇིག་རྟེན་གྱི་གནོད་པ་ལ་སོགས་པ་མི་སྲིད་དོ་ཞེས་སྨྲ་བར་འགྱུར་བས། གལ་ཏེ་འཇིག་རྟེན་མ་སྐྱེས་ཕྱིར། །ཞེས་བྱ་བ་ལ་སོགས་པ་སྨོས་སོ། །འཇིག་རྟེན་མ་སྐྱེས་པའི་ཕྱིར་གཏན་ཚིགས་ལ་སོགས་པ་ཡང་འཇིག་རྟེན་གྱི་ཁོངས་སུ་གཏོགས་པས་མེད་དོ། །དེ་ལྟ་ན་ཡང༌། གཏན་ཚིགས་ལ་སོགས་མེད་པའི་ཕྱིར། །དེ་ཚེ་བསྒྲུབ་བྱ་གྲུབ་མི་འགྱུར། །སོགས་པ་སྨོས་པས་ནི། དཔེ་ལ་སོགས་པ་བསྡུའོ། །རང་གི་
ཚིག་དང་འགལ་བའི་ཕྱིར། །དེ་ཚེ་བསྒྲུབ་བྱ་གྲུབ་མི་འགྱུར། །ཞེས་བྱ་བར་བསྙེགས་སོ། །འདི་ལྟར་དམ་འཆའ་བར་འདོད་པས། རང་གི་ཚིག་སྐྱེ་བར་ཁས་བླངས་ཏེ། ཁས་བླངས་ནས་ཡང་འདོར་བར་བྱེད་བས་གསལ་བར་རང་གི་ཚིག་དང་འགལ་བ་ཡིན་ནོ། །བརྒྱ་ཞིག་ལ་ཁོ་བོས་རང་གི་ཚིག་གཅིག་པུ་མ་གཏོགས་པ། ལྷག་མ་ཀུན་རྫོབ་ཏུ་མི་སྐྱེའོ་ཞེས་དམ་བཅས་སོ་ཞེས་སྨྲ་བར་འགྱུར་བས། གལ་ཏེ་དེ་གཅིག་མ་གཏོགས་ན་ཞེས་བྱ་བ་སྨོས་ཏེ། དམ་བཅས་བའི་ངོ་བོར་ཞེས་བྱ་བ་ལྷག་མའོ། །དེ་ཞེས་བྱ་བ་ནི་རང་གི་ཚིག་གོ །དེས་ན་ཞེས་བྱ་ནི་རང་གི་ཚིག་གིས་སོ། །དཔེ་ལའང་ཞེས་བྱ་བ་ལ་སོགས་པས་ནི་སྣོན་བསྟན་ཏོ། །སྒྲུབ་པ་ནི་འདིར་གཏན་ཚིགས་ཏེ། ཡང་དག་པར་ནམ་སྐྱེས་པའི་ངོ་བོ་ཉིད་ཁོ་ན་ཡིན་ན། དེ་ཡང་མོ་གཤམ་གྱི་བུ་ལ་སོགས་པ་ལ་མེད་དེ། དེ་དག་ལ་ཡང་དག་པར་ནམ་སྐྱེས་པའི་རང་བཞིན་ཉིད་མེད་པའི་ཕྱིར་རོ། །བསྒྲུབ་བྱས་ཁྱབ་པ་དེ་བཞིན་ན། །ཁྱོད་ལ་གལ་ཏེ་གྲུབ་ཅེ་ན། །ཞེས་བྱ་བར་བསྙེགས་ཏེ། དེ་ལྟར་གཏན་ཚིགས་དང་ཁྱབ་པ་གྲུབ་པའི་ཕྱིར་འདི་ཁྱོད་ལ་ཉེས་པ་ཡིན་གྱི། ཁོ་བོའི་ནི་གཏན་ཚིགས་གྲུབ་ཏུ་ཟིན་ཀྱང༌། ཁྱབ་པ་མ་གྲུབ་པས་དེའི་ཕྱིར་ཁོ་བོ་ལ་ཉེས་པ་འདི་མེད་པས། དེར་ནི་བདག་ལ་ཉེས་པ་མེད། །ཅེས་བྱ་བ་ལ་སོགས་པ་སྨོས་སོ། །བརྒྱ་ཞིག་ལ་ཁྱོད་ཁོ་ན་ལ་གཏན་ཚིགས་གྲུབ་ཀྱི་ང་ལ་ནི་མ་ཡིན་ནོ་ཞེས་སྨྲ་བར་འགྱུར་བས་བཤད་པ། གལ་ཏེ་ང་ལ་ཚད་མ་ཡིས། །གྲུབ་ན་གཏན་ཚིགས་ཞེས་བྱ་བ་ལྷག་མའོ། །གྲུབ་དེ་ཁྱོད་ལའང་ཁྱབ། ཚད་མས་གྲུབ་པ་ནི་སུ་ལའང་མ་གྲུབ་བོ་ཞེས་བརྗོད་པར་རིགས་པ་མ་ཡིན་ནོ་སྙམ་དུ་བསམས་པའོ། །དེ་ལྟ་ན་ཡང་འདི་ཁྱོད་ཁོ་ན་ལ་ཉེས་པ་ཡིན་གྱི། ཁྱབ་པ་མ་གྲུབ་པའི་ཕྱིར་ང་ལ་ནི་མ་ཡིན་ནོ་སྙམ་ནས། །མཁས་ཁྱོད་ཅི་ཕྱིར་བདག་ཉིད་ཀྱི། །ཞེས་བྱ་བ་ལ་སོགས་པ་སྨོས་སོ། །གལ་ཏེ་གཏན་ཚིགས་ཚད་མས་མ་གྲུབ་བོ་སྙམ་དུ་སེམས་ན་དེ་ནི་བཟང་པོ་མ་ཡིན་ཏེ། འདི་ལྟར་ཡང་དང་ཡང་དུ་བསྒྲུབས་ཟིན་ཏོ། །དེ་རེས་འགའ་མ་ཡིན་ཞེས་བྱ་བ་ལྷག་མའོ། །ཇི་ལྟར་སྙམ་པ་ལ་བཤད་པ། ཡོད་མེད་སྐྱེ་བ་བཀག་པའི་ཕྱིར་རོ། །སྐྱེས་ཟིན་པ་ཡང་མི་སྐྱེ་བས་ཡོད་པ་སྐྱེ་བ་དགག་པ་ནི་རུང་ན། མེད་པ་སྐྱེ་བ་
གོ་ཇི་ལྟར་དགག་པ་མ་ཡིན་ནམ། དེའི་ཕྱིར་འདི་དཔྱད་པར་བྱ་སྟེ། དེ་ལ་ཅི་རི་བོང་གི་རྭ་ལ་སོགས་པ་དང་མྱུ་གུ་ལ་སོགས་པ་མེད་པ་ལ་བྱེ་བྲག་ཅུང་ཟད་ཀྱང་ཡོད་དམ་ནུས་པར་བརྗོད་པ་ཐམས་ཅད་དང་བྲལ་བའི་མཚན་ཉིད་ཀྱི་ལུས་འཛིན་པར་བྱེ་བྲག་ཅི་ཡང་མེད་དེ། དུས་སྔར་འབྱུང་བ་ཅན་དུ་རྣམ་པར་རྟོག་ན། མེད་པ་འདིའི་རང་གི་ངོ་བོ་ཉམས་པར་འགྱུར་ཏེ། སཱ་ལུའི་ས་བོན་ལ་འདི་ལྟར་བྱེ་བྲག་གི་ངོ་བོ་དང་ལྡན་པའི་ལུས་འཛིན་པ་ལ་ནི་གང་གི་ཕྱིར། རི་བོང་གི་རྭ་ལ་སོགས་པ་ལྟ་བུར་འདི་མེད་པའི་ཐ་སྙད་ཀྱི་ཡུལ་ཉིད་དུ་འགྱུར་བ་ནུས་པར་བརྗོད་པ་ཐམས་ཅད་དང་བྲལ་བའི་མཚན་ཉིད་དུ་བརྟག་ཏུ་མེད་དོ། །ཇི་སྟེ་ཕ་རོལ་པོ་དུས་ཕྱིས་འབྱུང་བ་ཅན་ལ་བརྟེན་ཏེ་རྣམ་པར་རྟོག་ན་འོན་ཀྱང་ཇི་སྟེ། སཱ་ལུའི་ས་བོན་ལས་སཱ་ལུའི་མྱུ་གུ་མེད་པ་ཁོ་ན་སྐྱེ་བར་འགྱུར་གྱི། གཞན་ནམ་མཁའི་ཨུཏྤལ་སོགས་པ་དང་ནས་ཀྱི་མྱུ་གུ་ལ་སོགས་པ་ནི་ཅི་སྟེ་མ་ཡིན་ཞེས་བྱ་བ་བརྗོད་པར་བྱ་དགོས་ཏེ། མེད་པ་ལ་ནི་བདག་ཉིད་ཀྱི་བྱེ་བྲག་ཐ་དད་པ་ཆུང་ངུ་ཡང་ཅི་ཡང་བརྟག་ཏུ་མེད་དེ། འདི་ལྟར་བདག་ཉིད་ཀྱི་བྱེ་བྲག་སྲིད་ན། མེད་པའི་མེད་པ་ཉིད་རྣམ་པར་རྟོག་པའི་ཡུལ་དུ་འགྱུར་བར་དཀའོ། །བདག་ཉིད་ཀྱི་བྱེ་བྲག་མེད་དེ། མེད་པ་ཉིད་དུ་མཚུངས་པར་སྤྱོད་པ་ལས་འགའ་ཞིག་ལས་འགའ་ཞིག་སྐྱེའོ་ཞེས་བྱ་བའི་ཚིག་འདིའི་མཁས་པའི་སེམས་འཕྲོག་པར་བྱེད་པ་མ་ཡིན་ནོ། །སཱ་ལུའི་ས་བོན་ནི་སཱ་ལུའི་མྱུ་གུ་མེད་པ་ཁོ་ན་སྐྱེ་བ་སྒྲུབ་ནུས་པའི་བྱེ་བྲག་དང་ལྡན་གྱི་གཞན་ནི་མ་ཡིན་པ་མ་ཡིན་ནམ། དེའི་ཕྱིར་ཇི་ལྟར་ཐམས་ཅད་བདག་གིར་མ་བྱས་པའི་བྱེ་བྲག་དང་ལྡན་པ་མེད་པ་སྐྱེད་པར་བྱེད། འདི་ལྟ་བུ་མངོན་པར་རྗོད་པའི་རྒོལ་བ་ལ་ནི་ལྟག་རྨེན་བསལ་ན་མིག་གི་འབྲས་བུ་འབྱུང་བ་ལྟ་བུའི་ཉེས་པར་འགྱུར་ཏེ། འདི་ལྟར་ཁྱོད་སཱ་ལུའི་ས་བོན་ནི་མེད་པ་འགའ་སྐྱེ་བའི་མཐུའི་བྱེ་བྲག་དང་ལྡན་པ་ལ་རྟེན་གྱི། མེད་པ་མ་ལུས་པ་ནི་མ་ཡིན་ནོ་ཞེས་སྨྲ་ན། བདེ་བ་ལ་སོགས་པ་བཞིན་དུ་ཡོད་པའི་བྱེ་བྲག་དང་ལྡན་པས། མེད་པའི་ངོ་བོ་འདོར་བར་འགྱུར་རོ། །དེ་ལྟ་ན་ཡང་བདེ་བླག་ཏུ་ཕྱོགས་སྔ་མ་ཉམས་པའི་ཉེས་པར་འགྱུར་རོ། །ཇི་སྟེ་ཡོད་པ་སྐྱེ་བར་འགྱུར་རམ། མེད་པ་སྐྱེ་བར་འགྱུར་ཞེས་བྱ་བའི་བསམ་པ་འདིས་ཁོ་བོ་ཅག་ལ་ཅི་ཞིག་བྱ། རྒྱུ་ལས་འབྲས་བུ་སྐྱེ་བར་སྣང་སྟེ། ཁོ་བོ་ཅག་ནི་འདི་ཙམ་གྱིས་ཡོངས་སུ་མགུའོ་སྙམ་ན། བདེན་
ཏེ་ཁྱོད་དེ་སྐད་དུ་སྨྲ་བ་ན་ཡོངས་སུ་མགུ་བ་སྐྱེས་མོད་ཀྱི། རྒྱུ་ལས་དོན་དམ་པ་ཁོ་ནར་འབྲས་བུ་སྐྱེའོ་ཞེས་སྨྲ་བ་ན། རྣམ་པར་རྟོག་པ་གཉིས་ལས་བྱུང་བ་དངོས་པོར་གནས་པའི་ཉེས་པ་བཤད་མ་ཐག་པ་གཉིས་སྤང་བར་མི་ནུས་ཏེ། དེའི་ཕྱིར་བསོད་ནམས་དང་མི་ལྡན་པ་ལ་ཡོངས་སུ་མགུ་བ་ལྟག་ལས་འབྱུང༌། དེ་བས་ན་ཞར་ལ་འོངས་པས་ཆོག་གོ །གང་གི་ཕྱིར། ཁྱབ་བ་དེ་ཡང་ཁྱོད་ཀྱིས་སྨྲས་པ་དེའི་ཕྱིར། དེ་ལྟ་ཡིན་ན་ཁྱོད་ཀྱིས་ཉེས་པ་ཞེས་བྱ་བར་སྦྱར་བར་བྱའོ། །ཅིའི་ཕྱིར་ཁྱོད་ལ་ཉེས་པ་མེད་སྙམ་པ་ལ། ཁོ་བོའི་བདེན་པར་ཞེས་བྱ་བ་ལ་སོགས་པ་སྨོས་ཏེ། །ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་མ་གྲུབ་པ་ནི་དེའི་བདག་ཉིད་དང་དེ་ལས་བྱུང་བའི་མཚན་ཉིད་ཀྱི་འབྲེལ་བ་མེད་པའི་ཕྱིར་རོ་སྙམ་དུ་བསམས་པའོ། །དེ་ཉིད་ཇི་ལྟར་མ་ཡིན་སྙམ་པ་ལ། ཡང་དག་སྐྱེ་བ་བཀག་པ་ཡིས། །ཞེས་བྱ་བ་ལ་སོགས་པ་སྨོས་ཏེ། །དགག་པར་བྱ་བ་དང་འགོག་པར་བྱེད་པའི་བྱེ་བྲག་གིས། དགག་པ་དེ་གཉིས་ཐ་དད་དོ་སྙམ་དུ་བསམས་པའོ། །བརྒྱ་ཞིག་ལ་མི་སྐྱེ་བ་དེ་གཉིས་ཡང་དག་པར་ན་བྱེ་བྲག་འགའ་ཞིག་ཡོད་པ་མ་ཡིན་ནམ་ཞེས་སྨྲ་བར་འགྱུར་བས། བཤད་པ། ཡང་དག་པར་ན་གཉིས་པོ་ཡང་དག་པར་སྐྱེ་བ་མེད་པ་དང༌། ཀུན་རྫོབ་ཏུ་མི་སྐྱེ་བདག་མེད་དོ། །ཇི་ལྟ་སྙམ་པ་ལ། གང་ཕྱིར་སྤྲོས་དང་བྲལ་བ་ནི། །ཞེས་བྱ་བ་ལ་སོགས་པ་སྨོས་སོ། །དེའི་ཕྱིར་སྤྲོས་པ་ཐམས་ཅད་དང་བྲལ་བའི་དེ་ཁོ་ན། དེ་ལ་གཏན་ཚིགས་ལ་སོགས་པ་ཡན་ལག་མེད་དོ། །སོགས་པ་སྨོས་པས་ནི། དཔེ་དང་ཕྱོགས་ཡོངས་སུ་བསྡུའོ། །དེ་ལྟ་ན་ཡང་ཁྱོད་ཀྱིས་འདོད་པའི་དོན་ཉིད་མི་འགྲུབ་པོ་སྙམ་དུ་བསམས་པའོ། །གལ་ཏེ་འོ་ན་དེ་ལས་བྱུང་བའི་མཚན་ཉིད་ཀྱི་འབྲེལ་པར་འགྱུར་རོ་སྙམ་ན། འདི་ལྟར་དེ་གཉིས་ཞེས་བྱ་བ་ལ་སོགས་པ་སྨོས་སོ། །གལ་ཏེ་དངོས་པོའི་སྟོབས་ཀྱིས་ཞུགས་པའི་སྒྲུབ་པ་མི་རུང་ན། འོ་ན་ཐལ་བར་འགྱུར་རོ་སྙམ་པ་ལ། འདི་ཉིད་ཀྱིས་ཞེས་བྱ་བ་ལ་སོགས་པ་སྨོས་སོ། གཞན་ཡང་ཞེས་བྱ་བ་ལ་སོགས་པས་ནི་གཏན་ཚིགས་ཀྱི་སྣོན་བསྟན་ཏོ། །ཅིའི་ཕྱིར་ཚད་མས་མི་རུང་སྙམ་པ་ལ། ཚད་མ་མ་ཡིན་པ་ལ་ཞེས་བྱ་བ་ལ་སོགས་པ་སྨོས་སོ། །ཅིའི་ཕྱིར་གནོད་པ་མེད་སྙམ་པ་ལ། རིགས་པས་འོངས་པ་ཞེས་བྱ་བ་ལ་སོགས་པ་སྨོས་སོ། །
བླུན་པོ་ནི་སྡང་བར་རིགས་པ་ཁོ་ན་ཡིན་པས། རྟོག་པ་སྔོན་དུ་གཏོང་བ་སྨོས་སོ། །དཔྱད་པ་ནི་ཁས་བླངས་པའི་ཆེད་ཡིན་ན། གལ་ཏེ་ཅི་ཞིག་ལྟར་ན་ཀུན་རྫོབ་ཁས་བླངས་པར་གྱུར་པ་དེའི་ཚེ་དཔྱད་པ་མི་མཛེས་སོ་ཞེ་ན། གང་གི་ཕྱིར་ཞེས་བྱ་བ་ལ་སོགས་པ་སྨོས་ཏེ། དཔྱོད་པར་ཡང་བྱེད་པས་དེའི་ཕྱིར་འདི་སྔར་ཁས་མ་བླངས་སོ་སྙམ་དུ་བསམས་པའོ། །འདི་ཉིད་ཅིའི་ཕྱིར་སྙམ་པ་ལ། འདི་ལྟར་ཞེས་བྱ་བ་ལ་སོགས་པ་སྨོས་སོ། །འདི་སྨྲ་ཉིད་ལའམ་ཞེས་བྱ་བ་ནི། དབུ་མ་པ་ལ་སྟེ། ཀུན་རྫོབ་ཁས་མི་ལེན་ན་ཁྱོད་ལ་ཡང་མངོན་སུམ་ལ་སོགས་པ་དང་འགལ་བར་འགྱུར་རོ་སྙམ་དུ་བསམས་པའོ། །བརྒྱ་ཞིག་ལ་ཁོ་བོ་ཅག་འདི་ཡོངས་སུ་སྤོང་ངོ༌། །ཞེས་ཕ་རོལ་པོ་སྨྲ་བར་འགྱུར་བས་གང་གིས་ན་ཁྱོད་མ་གཏོགས་ཞེས་བྱ་བ་ལ་སོགས་པ་སྨོས་སོ། །བརྒྱ་ཞིག་ལ་ཁོ་བོ་ཅག་འདི་ཡོངས་སུ་མི་སྤོང་མོད་ཀྱི། འདིས་བདག་ཅག་མི་འཇིགས་སོ་ཞེས་སྨྲ་བར་འགྱུར་ན། གལ་ཏེ་དེས་ཁྱེད་མི་འཇིགས་སོ་ཞེ་ན་ཞེས་བྱ་བ་ལ་སོགས་པ་སྨོས་སོ། །ཀུན་རྫོབ་ནི་ཇི་ལྟར་སྣང་བ་བཞིན་ཞེས་བྱ་བ་ནི་མངོན་སུམ་ཞེས་བྱ་བའི་ཐ་ཚིག་གོ །ཚད་མས་ཞེས་བྱ་བ་ནི་རྗེས་སུ་དཔག་པས་སོ། །དེ་ལ་ཞེས་བྱ་བས་ནི་མངོན་སུམ་གྱི་ཚད་མ་ལའོ། །གནོད་པ་འབབ་ན་ཞེས་བྱ་བ་ནི་ཀུན་རྫོབ་མངོན་སུམ་ཡིན་པའི་ཕྱིར་རོ་སྙམ་དུ་བསམས་པའོ། །ཅིའི་ཕྱིར་ཡིད་བརྟན་དུ་མི་རུང་བར་བརྗོད་སྙམ་པ་ལ། མཚན་ཉིད་དང་ལྡན་པ་ལ་ཞེས་བྱ་བ་ལ་སོགས་པ་སྨོས་སོ། །དེ་ལྟ་ན་ཡང་ཚད་མ་མེད་པའི་ཕྱིར་ཚིག་ཙམ་གྱིས་ནི་ཀུན་རྫོབ་ཀྱང་དགག་པར་མི་ནུས་པ་ཁོ་ནའོ་སྙམ་དུ་སེམས་པའོ། །ཚད་མ་མེད་པའི་ཕྱིར་རམ་ཚད་མས་གནོད་པའི་ཕྱིར། གང་ཞིག་ཡང་དག་དངོས་མི་འདོད་པའི་སྨྲ་བ་དེ་ལ་ཚད་མ་མེད་པའམ། ཚད་མས་གནོད་པའི་ཀུན་རྫོབ་ཅི་ཞིག་སྨོས། འདོད་པ་ཞེས་བྱ་བ་ལྷག་མ་སྟེ། དེ་ལ་དེ་འདོད་པ་ཤིན་ཏུ་ཡང་མེད་དོ་སྙམ་དུ་བསམས་པའོ། །གལ་ཏེ་ཀུན་རྫོབ་ཁས་མ་བླངས་ན་ཐ་སྙད་མེད་པ་དང། དོན་བྱེད་པ་མེད་པར་འགྱུར་བ་མ་ཡིན་ནམ། དེའི་ཕྱིར་ཁྱོད་ཀྱིས་ཀུན་རྫོབ་གདོན་མི་ཟ་བར་ཁས་བླངས་པར་བྱ་དགོས་སོ་ཞེ་ན། བཤད་པ་ཅི། ཐ་སྙད་ལ་སོགས་པ་མེད་པ་དེ་སྨྲ་བར་གཞན་ལའང་མི་མཚུངས་སམ། ཐ་སྙད་ལ་སོགས་པ་མེད་པར་ཐལ་བར་འགྱུར་བའི་ཕྱིར་དེས་ཀྱང་ཀུན་
རྫོབ་ཏུ་ཁས་བླང་བར་བྱ་བ་ཐོས་སོ་ཞེས་བྱ་བའི་ཐ་ཚིག་གོ །ཅིའི་ཕྱིར་སྙམ་པ་ལ། འཇིག་རྟེན་བཞིན་དུ་བསྙད་བྱ་དགོས། །ཞེས་བྱ་བ་སྨོས་ཏེ། ཁོང་དུ་ཆུད་པར་སླའོ། །དེ་ལྟ་བས་ན་ཞེས་བྱ་བ་ལ་སོགས་པ་ནི་མཇུག་སྡུད་པ་སྟེ་རྟོགས་པར་སླའོ། །གལ་ཏེ་སྣང་བའི་ངོ་བོ་གང་ཡིན་པ་དེ་མི་འགོག་ན་འོ་ན་ཅི་འགོག་སྙམ་པ་ལ། བཤད་པ། རྣམ་པ་གང་སྣང་བ་མིན་ལ། སྨྲ་བ་གཞན་གྱིས་ཡོངས་སུ་བརྟགས་པ་དེ་ཉིད་འགོག་ཅེས་བྱ་བར་སྦྱར་རོ། །དེ་ཡང་ནི་ཞེས་བྱ་བ་ནི་དམིགས་ཀྱིས་བསལ་བའོ། །རྣམ་པ་དེ་གང་ཡིན་སྙམ་པ་ལ། ཡང་དག་པར་ཞེས་བྱ་སོགས་པར་ཞེས་བྱ་བ་སྨོས་སོ། །དེ་གང་ཡིན་སྙམ་པ་ལ། སྐྱེ་ལ་སོགས་པ་ཞེས་བྱ་བ་སྨོས་སོ། །གང་ཡང་ཞེས་བྱ་བ་ལ་སོགས་པ་རྣམ་པར་འགྲེལ་པ་ནི་ཁོང་དུ་ཆུད་པར་སླའོ། །བསྟན་བཅོས་ལ་སོགས་པ་ལ་བརྟེན་ནས་ཞེས་བྱ་བ་ལ་སོགས་པ་སྨོས་པས་ནི། གྲོགས་པོ་ངན་པ་ལ་བརྟེན་པ་དང༌། ལོག་པ་ལ་གོམས་པའི་བག་ཆགས་ཐོག་མ་མེད་པའི་དུས་ཅན་ལ་བརྟེན་པ་ཡང་གཟུང་ངོ༌། །ཅིའི་ཕྱིར་དེ་ཉིད་འགོག་སྙམ་པ་ལ། དེ་བཀག་པ་ལ་ཞེས་བྱ་བ་ལ་སོགས་པ་སྨོས་སོ། །དེ་བས་རིགས་པས་སྨྲ་བའི་ལྟ་བ། འདིར་ནི་དེ་ལྟ་བུ་ཇི་སྐད་སྨོས་པའི་རྣམ་པས་བརྟགས་པ་ཁོ་ན་སྟེ། མི་སྣང་བ་ལ་ཡང་དག་པར་སྐྱེ་བ་ལ་སོགས་པར་རྟོག་པས་སྒྲོ་བཏགས་པ་ཁོ་ན། དགག་པར་རིགས་ཏེ་རིགས་པས་རུང་ངོ་ཞེས་བྱ་བའི་ཐ་ཚིག་གོ །གལ་ཏེ་ཅིའི་ཕྱིར་ཞེ་ན། བཤད་པ། ཇི་སྐད་སྨོས་པའི་ཉེས་པ་མེད་པའི་ཕྱིར་རོ། །གོང་དུ་བརྗོད་པ་མངོན་སུམ་ལ་སོགས་པ་དང་འགལ་བའི་ཉེས་པ་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ །བརྟགས་པ་མ་ཡིན་འགོག་པ་འདི། །ཞེས་བྱ་བ་ལ་སོགས་པ་ནི། གཟུགས་ལ་སོགས་པའི་ལུས་རྟོག་པའི་ཉེས་པས་མ་སྤངས་པ་ཞེས་བྱ་བ་ལ་སོགས་པས་འགྲེལ་ཏེ། རྟོག་པ་ཉིད་ཉེས་པ་ཡིན་ནོ། །གཟུགས་ལ་སོགས་པའི་ལུས་འདི་ལ་དེས་མ་སྤགས་པ་ཁོ་ན་ཡོད་པས་ཞེས་ཚིག་རྣམ་པར་སྦྱར་རོ། །ཅི་ལྟ་བུ་ཞིག་ཅེ་ན། རྒྱུ་དང་རྐྱེན་ལ་རག་ལས་ཏེ་སྐྱེ་བས་གཞན་གྱི་དབང་གི་བདག་ཉིད་དོ། །ཅིའི་ཕྱིར་ལུས་རྟོག་པའི་ཉེས་པས་མ་སྤགས་པ་ཅན་ཡིན་སྙམ་པ་ལ། བཤད་པ། རྣམ་པར་ཤེས་པ་ཙམ་སྣང་བ་ཡིན་ཏེ་རྟོག་པས་
དབེན་པའི་ཤེས་པ་སྣང་བ་ཞེས་བྱ་བའི་ཐ་ཚིག་གོ །ཙམ་སྨོས་པ་ནི་རྟོག་པ་དང་ལྷན་ཅིག་པ་རྣམ་པར་གཅོད་པར་བྱེད་པའོ། །གཟུགས་ལ་སོགས་པ་དེ་ལྟ་བུ་དེ་ནི་རང་རིག་པའི་ཕྱིར། དགག་པར་བྱ་མི་ནུས་པ་འབའ་ཞིག་ཏུ་མ་ཟད་ཀྱི། འགོག་པར་བྱེད་ན་བྱེད་པ་པོ་ལ་ཕྱིར་གནོད་པ་ཁོ་ན་བྱེད་དོ་ཞེས་བྱ་བར་སྦྱར་རོ། །གང་གིས་ཤེ་ན། བཤད་པ། མངོན་སུམ་ལ་སོགས་པས་སོ། །སོགས་པ་སྨོས་པས་ནི། རྗེས་སུ་དཔག་པ་ལ་སོགས་པ་ནང་དུ་བསྡུ་བར་བྱའོ། །གལ་ཏེ་གཟུགས་ལ་སོགས་པ་སྣང་བ་ལ་ཡང་དག་པར་སྐྱེ་བ་ལ་སོགས་པར་བརྟགས་པ་གང་ཡིན་པ་དེ་ནི་དགག་པར་རིགས་ཀྱི། གཙོ་བོ་ལ་སོགས་པ་དགག་པ་གོ་སྣང་བ་གང་གི་ཡིན། མ་ཡིན་ནམ་ཞེ་ན། བཤད་པ། རྣམ་པར་རྟོག་པ་སྣང་བ་ཡི། །གཙོ་བོ་ལ་སོགས་ཡང་དག་པར། །ཞེས་བྱ་བ་ལ་སོགས་པ་སྨོས་སོ། །སོགས་པའི་སྒྲས་ནི་བདག་ལ་སོགས་པ་གཟུང་ངོ༌། །སྣང་བའི་ཉམས་སུ་མྱོང་བའི་རྟག་པ་ལ་སོགས་པའི་ངོ་བོ་དངོས་པོའི་རྒྱུར་གྱུར་པར་གྲངས་ཅན་ལ་སོགས་པ་གཞན་གྱིས་བརྟགས་པ་གང་ཡིན་པ་དེ་འགོག་གོ །ཇི་ལྟར་བརྟགས་ཤེ་ན། བཤད་པ། ཡང་དག་པར་རོ། །ཁ་ཅིག་ན་རེ་འདུས་བྱས་ཡང་དག་པར་ན་མི་སྐྱེའོ་ཞེས་བྱ་བ་ཡང་དག་པར་ཞེས་བྱ་བའི་ཚིག་འདི་འགོག་པའི་བྱེ་བྲག་ཡིན་ཏེ། དེའི་ཕྱིར་འདུས་བྱས་ཡང་དག་པར་མི་སྐྱེའོ་ཞེས་བྱ་བ་ནི། འདི་སྐད་དུ་བདེན་པ་ཁོ་ནར་མི་སྐྱེའོ་ཞེས་བཤད་པ་ཡིན་ནོ། །དེ་ལྟ་ན་ཡང་ཀུན་རྫོབ་ཏུ་ཡང་མི་སྐྱེའོ་ཞེས་བྱ་བར་འགྱུར་ཏེ། དེའི་ཕྱིར་ཁྱོད་ལ་ཁས་བླངས་པ་དང་འགལ་བའི་ཉེས་པར་འགྱུར་རོ་ཞེས་ཟེར་བ་དེ་དགག་པའི་ཕྱིར། བཤད་པ། ཡང་དག་པར་སྐྱེ་བ་ལ་སོགས་པར་བརྟགས་པ་མི་སྣང་བ་འགོག་པར་བྱེད་པ་ལ་ཡང་དག་པར་ཞེས་བྱ་བའི་ཚིག་ནི་འགོག་པའི་བྱེ་བྲག་མ་ཡིན་གྱི་འདི་སྐད་བསྟན་པ་ཡིན་ཏེ། ཡང་དག་པར་སྐྱེའོ་ཞེས་གང་ཕ་རོལ་པོས་ཁས་བླངས་པ་དེ་དགག་པར་སྦྱར་གྱི། འདི་འགོག་པའི་བྱེ་བྲག་ནི་མ་ཡིན་ནོ། །དེའི་ཕྱིར་གང་གིས་ན་ཁས་བླངས་པ་དང་འགལ་བར་འགྱུར་བ། ཀུན་རྫོབ་ཇི་ལྟར་མེད་པར་འགྱུར། །ཞེས་བཤད་པ་ཡིན་ནོ། །གཞན་གྱི་དབང་བསྒྲུབ་པར་བྱ་བའི་ཕྱིར་མདོ་གང་དག་འཕགས་པ་རྣམས་ཀྱིས་གསུངས་པ་དེ་དག་འདི་ཁོ་ནར་རུང་ངོ་ཞེས་བྱ་བར་བསྟན་པའི་ཕྱིར་མདོ་
རྣམས་བཤད་པར་འདོད་ནས། དེ་ཉིད་ཀྱི་ཕྱིར་ཞེས་བྱ་བ་ལ་སོགས་པ་སྨོས་སོ། །གཞན་ལ་ནི་གཞན་གྱི་དབང་བཀག་པའི་ཕྱིར། ཇི་ལྟར་མི་འཐད་པ་དེ་བཞིན་དུ་བཤད་ཟིན་ཏོ། །ཡང་དག་པར་སྐྱེ་བ་ལ་སོགས་པའི་མཚན་ཉིད་དུ། བརྟགས་པའི་དངོས་པོ་ཡོད་མ་ཡིན།། གཞན་གྱི་དབང་ནི་ཡོད་པ་སྟེ། །རྟེན་ཅིང་འབྲེལ་བར་འབྱུང་བའི་དངོས་པོ་ཇི་ལྟར་སྣང་བ་བཞིན་ཞེས་བྱ་བའི་ཐ་ཚིག་གོ །བརྟགས་པ་ཡོད་དོ་ཞེས་སྨྲ་ན་སྒྲོ་འདོགས་པའི་མཐར་ལྟུང་ངོ༌། །ཇི་ལྟར་སྣང་བ་བཞིན་ཡང་མེད་དོ་ཞེས་སྨྲ་ན། སྐུར་བ་འདེབས་པའི་མཐར་ལྟུང་ངོ༌། །དེའི་ཕྱིར། སྒྲོ་འདོགས་པ་དང་སྐུར་འདེབས་པའི། །མཐར་རྟོགས་པ་ནི་ཕུང་བར་འགྱུར། །གཞན་གྱི་དབང་གི་མཚན་ཉིད་ཀྱི། །ཆོས་རྣམས་ཐམས་ཅད་བརྟགས་པ་ཡི། །ངོ་བོ་ཉིད་ཀྱིས་མ་སྐྱེས་སོ། །ཇི་ལྟར་སྣང་བ་བཞིན་ནི་རང་གི་ངོ་བོས་སྐྱེས་པ་ཁོ་ན་ཡིན་ནོ། །དེ་ལྟ་མ་ཡིན་ན་བརྟགས་པ་ཞེས་བྱ་བའི་བྱེ་བྲག་དོན་མེད་པར་འགྱུར་རོ། །མི་རྣམས་གཞན་གྱི་དབང་དངོས་པོ་ཇི་ལྟར་སྣང་བ་གཞན་སྐྱེས་པ་ལ་བརྟེན་ནས་རྣམ་པར་རྟོག་པ་འབྱུང་ངོ༌། །གཟུགས་ལ་བརྟགས་པ་མེད་པ་སྟེ། །དེས་དབེན་པ་ནི་གཞན་གྱི་དབང་གི་དངོས་པོ་ཡིན་ནོ། །དེ་ཡང་ངོ་བོ་ཉིད་ཡིན་པས། རབ་འབྱོར་གཟུགས་ནི་གཟུགས་མེད་པའི་ངོ་བོ་ཉིད་ཡིན་ཞེས་རྒྱས་པར་འབྱུང་ངོ་ཞེས་བྱ་བ་ཡང་བརྗོད་པར་རུང་ངོ༌། །བརྒྱ་ཞིག་ལ་དངོས་པོ་གང་ཞིག་མེད་པ་དེ་ལ་གཟུགས་ཀྱང་མེད་ན་ཇི་ལྟར་ངོ་བོ་ཉིད་དུ་འགྱུར་བར་འོས་ཞེས་སྨྲ་བར་འགྱུར་བས། དེ་ལྟར་བྱས་ན་ཞེས་བྱ་བ་ལ་སོགས་པ་སྨོས་སོ། །འདི་སྙམ་དུ་གཞན་གྱི་དབང་ཇི་ལྟར་སྣང་བ་བཞིན་ཡོད་པའི་ཕྱིར། གཟུགས་མེད་པའི་ངོ་བོ་ཉིད་ཅེས་བྱ་བའི་ཚིག་ནི་ཁོ་བོ་ཁོ་ན་ལ་རུང་གི་ཁྱོད་ལ་ནི་མ་ཡིན་ཏེ། དེ་ཚུལ་ཇི་ལྟ་བ་བཞིན་དུ་བཀག་པའི་ཕྱིར་རོ་སྙམ་དུ་བསམས་པའོ། །དེ་ལྟ་ན་གཟུགས་མེད་པའི་ངོ་བོ་ཉིད་ཅེས་བྱ་བའི་ཚིག་འདིའི་དོན་ནི་གཞན་གྱི་དབང་བརྟགས་པའི་ངོ་བོས་དབེན་པའི་ངོ་བོ་ཉིད་ཡིན་ནོ་ཞེས་བྱ་བར་འགྱུར་རོ། །ལས་དང་འབྲས་བུ་དག་ཇི་ལྟར། །རྣམ་པར་གནས་ཞེས་བྱ་བ་ལྷག་མའོ། །བསམ་པ་ནི་ལས་དང་འབྲས་བུ་དག་ནི་དབང་པོའི་ཡུལ་མ་ཡིན་པའི་ཕྱིར་ཇི་ལྟར་སྣང་བ་བཞིན་རྣམ་པར་གནས་པར་རིགས་པ་མ་ཡིན་ནོ་སྙམ་པ་འདི་ཡིན་ནོ། །
མཐོང་བ་པོའི་ལྟ་བ་ལ་ཞེས་བྱ་བ་ལ་སོགས་པས་ནི་འདི་སྐད་དུ། དངོས་པོ་ནི་ཁྱོད་ཁོ་ནའི་མཐོང་བ་ལྟར་རྣམ་པར་གནས་པ་མ་ཡིན་གྱི། དེ་གང་གིས་ཇི་ལྟར་མཐོང་བ་དེའི་མཐོང་བ་ལ་ཡང་བརྟེན་ནས་དེ་ཇི་ལྟར་སྣང་བ་བཞིན་རྣམ་པར་གནས་ལ། བཅོམ་ལྡན་འདས་ཀྱིས་ཀྱང་ལས་དང་འབྲས་བུ་ཇི་ལྟར་གཟིགས་པ་དེ་བཞིན་དུ། བཅོམ་ལྡན་འདས་ཀྱི་གཟིགས་པ་ལ་བརྟེན་ནས་དེ་གཉིས་རྣམ་པར་གནས་པས་དེའི་ཕྱིར། ཐམས་ཅད་ཇི་ལྟར་སྣང་བཞིན་གནས། །ཞེས་བྱ་བ་ལ་སོགས་པ་སྨོས་ཏེ། རི་རབ་ལ་སོགས་པ་ཡང་སྙམ་དུ་བསམས་པའོ། །འདི་ལ་གཟིགས་པ་སྣང་བ་ཐོགས་པ་མི་མངའ་བ་ཡོད་པས་ཞེས་ཚིག་རྣམ་པར་སྦྱར་རོ། །ཐུགས་རྗེའི་རང་བཞིན་ཅན་ཞེས་བྱ་བའི་རང་བཞིན་ནི་རྒྱུ་འམ་ངོ་བོ་ཉིད་ཡིན་ནོ། །རྟོག་པས་བཅིངས་པ་གཟིགས་ནས་ནི། །ཇི་ལྟར་སྣང་བ་བཞིན་ཁོ་ན་ཞེས་བྱ་བ་ལྷག་མའོ། །དེ་ཉིད་ཀྱིས་ཞེས་བྱ་བ་ནི་སྔར་བསྟན་པ་ལས་དང་འབྲས་བུ་དག་གཟིགས་པ་པོ་ཡིན་པར་སྟོན་ཏེ། །སོགས་པ་སྨོས་བས་ནི། ཕུང་པོ་དང་ཁམས་ལ་སོགས་པ་ཡོངས་སུ་བསྡུའོ། །འགྲོ་བ་རྟོག་པའི་ལྕགས་སྒྲོག་གིས་བཅིངས་པ་ལ་གཟིགས་ནས། འགྲོ་བ་བཅིངས་པ་ཐར་པ་བསྟན་པ་མཛད་དོ་ཞེས་བྱ་བར་སྦྱར་རོ། །གང་དུ་བཅིངས་ཤེ་ན། འཁོར་བའི་བཙོན་རར་རོ། །བཅིངས་བ་ཐར་པ་བསྟན་པ་མཛད་པ་དེ་སུ་སྙམ་པ་ལ། བཤད་པ། བཅོམ་ལྡན་འདས་ལས་དང་འབྲས་བུ་མཁྱེན་པའི་ཐུགས་རྗེའི་རང་བཞིན་ཅན་གྱི་སྐུ་ཅན་དེ་ཉིད་དོ། །འདི་ལ་ཐུགས་རྗེའི་རང་བཞིན་གྱི་སྐུ་ཡོད་པས་ཞེས་ཚིག་རྣམ་པར་སྦྱར་རོ། །ཅི་མཛད་དེ་ཞེ་ན། དངོས་པོར་འཛིན་པ་མ་ལུས་པར་སེལ་བར་མཛད་ཅིང་ངོ༌། །ཇི་ལྟར་ཞེ་ན། བཤད་པ། རིམ་གྱིས་སོ། །རིམ་པ་གང་གིས་ཤེ་ན། བསམ་པ་ཇི་ལྟ་བ་བཞིན་དུ་ཕུང་པོ་ལ་སོགས་པ་བསྟན་པས་སོ། །ཇི་སྟེ་རྟོགས་པ་ཞེས་བྱ་བ་འདི་ཅི་ཡིན་ཞེས་བྱ་བ་འདི་ལ་བསམ་པ་ནི་ཆོས་ཐམས་ཅད་ངོ་བོ་ཉིད་མེད་པ་ཡིན་ན་རྟོག་པ་ཞེས་བྱ་བ་ཅི་ཡང་མེད་དོ་སྙམ་པ་འདི་ཡིན་ནོ། །ཅི་ཡིན་ཞེས་བྱ་བའི་སྒྲ་ནི་སྤོང་བའོ། །སྒྲོ་བཏགས་རྣམ་ཅན་རྟོག་པ་ཡིན། །ཞེས་བྱ་བ་འདིས་ནི། འདི་ཐམས་ཅད་ནི་ཇི་ལྟར་སྣང་བ་བཞིན་རྣམ་པར་གནས་ཏེ། དེའི་ཕྱིར་ཁམས་གསུམ་པའི་སེམས་དང་སེམས་ལས་བྱུང་བ་
སྒྲོ་བཏགས་པའི་རྣམ་པ་ཅན་རྟོག་པ་ཡང་ཇི་ལྟར་སྣང་བ་བཞིན་ཁོ་ན་ཡིན་ནོ་ཞེས་དེ་སྟོན་པར་བྱེད་དོ། །དེ་ལྟ་བུ་ཡིན་དུ་ཟད་མོད་འོན་ཀྱང་ཁམས་གསུམ་པའི་སེམས་དང་སེམས་ལས་བྱུང་བ་རྣམས་ངོ་བོ་ཉིད་མེད་པ་ཡིན་ནོ། ཇི་ལྟར་འཆིང་བའི་རྒྱུ་ཉིད་དུ་གསུངས་སྙམ་པ་ལ། དེ་དག་འཆིང་བའི་རྒྱུ་ཉིད་དུ། ཇི་ལྟར་རྣམ་པ་གང་གིས་གཟིགས་པ་དེ་བཞིན་གསུངས། ཇི་ལྟར་སྣང་བ་བཞིན་འཆིང་བའི་རྒྱུ་ཉིད་དུ་ཞེས་བྱ་བ་ལྷག་མའོ། །དེ་དག་ཀྱང་ཞེས་བྱ་བ་ལ་སོགས་པས་ཚིག་ལེའུར་བྱས་པའི་ཆ་འདི་ཉིད་གསལ་བར་བྱེད་དོ། །ཅིའི་ཕྱིར། ཡང་དག་པར་ནི་མ་ཡིན་ཞེ་ན། འདི་ལྟར་དེ་དག་མེད་པའི་ཕྱིར་རོ། །གལ་ཏེ་དེ་ལྟ་ན་ཇི་ལྟར་མེད་པ་རྣམས་དོན་བྱ་བ་དག་ལ་ནུས་སྙམ་པ་ལ། བཤད་པ། མེད་པ་ལྕགས་སྒྲོག་ལ་སོགས་པ་རྣམས་ཀྱང་དོན་བྱ་བ་དག་ལ་ནུས་པ་ཇི་ལྟར་སྣང་བ་བཞིན་དུ་འདོད་དེ། འདི་ལྟར་ལྕགས་སྒྲོག་ལ་སོགས་པ་ཡང་ཕྱོགས་ཀྱི་ཆས་གཞིགས་ན་མེད་པ་ཉིད་དོ། །ཡང་ན་སྲིད་པའོ། །འདི་ནི་རྣམ་པར་དབྱེ་བའི་ཕྱིར། མེད་པ་རྣམས་ཀྱང་ཞེས་བྱ་བ་སྨོས་ཏེ། འཆིང་བ་ལ་སོགས་པའི་དོན་བྱེད་པར་མི་འགལ་བ་ཁོ་ནའོ་ཞེས་བྱ་བར་སྦྱར་རོ། །ཇི་ལྟར་སྙམ་པ་ལ། ཇི་ལྟར་གྲགས་པ་བཞིན་ཞེས་བྱ་བ་སྨོས་ཏེ། ཇི་ལྟར་སྣང་བ་བཞིན་ཞེས་བྱ་བའི་ཐ་ཚིག་གོ ། ཅིའི་ཕྱིར་ཡང་དག་པར་མ་ཡིན་ཞེ་ན། ཡང་དག་པར་ན་འཆིང་བ་དང་བཅིང་བར་བྱ་བ་དག་ཀྱང་མེད་དོ་ཞེས་བྱ་བ་སྨོས་སོ། །ཅི་འདྲ་སྙམ་ན། བཤད་པ། འཆིང་བ་བཞིན་ནོ། །འཆིང་བ་ནི་ལྕགས་སྒྲོག་ལ་སོགས་པའོ། །མེད་པ་རྣམས་ཀྱི་ནུས་པ་ཡང་ཇི་ལྟར་སྣང་བ་བཞིན་དུ་འདོད་དོ་ཞེས་བྱ་བ་འདི་དེ་ལྟར་ཤེས་པར་བྱ་སྟེ། འདི་ལྟར། ཡོད་པ་རྣམས་ཀྱི་ནུས་པ་ནི། །ཇི་ལྟར་བུར་ཡང་མི་མཐོང་ངོ༌། །སངས་རྒྱས་རྣམས་ཀྱིས་ཀྱང་ཞེས་བྱ་བ་ལྷག་མའོ། །འདི་རྣམ་པར་འགྲེལ་པར་བྱེད་དེ། ཡོད་པ་རྣམས་ཀྱི་ནུས་པ་ནི་སངས་རྒྱས་ཀྱིས་ཀྱང་གཟིགས་པར་མི་སྤྱོད་ཅེས་བྱ་བར་སྦྱར་རོ། །ཅི་ལ་ཞེ་ན། དོན་བྱེད་པ་དག་ལའོ། །ཅིའི་ཕྱིར་སྙམ་པ་ལ། བཤད་པ། ཤེས་པ་རྣམ་པ་མེད་པ་དང༌། །རྣམ་པ་དང་ལྡན་པས་ཡོངས་སུ་གཅོད་པ་མེད་པའི་ཕྱིར་རོ། །འོ་ན་གཞན་ཞིག་ཡོངས་སུ་གཅོད་པར་བྱེད་པར་འགྱུར་རོ་སྙམ་པ་ལ། ཡོངས་སུ་གཅོད་པར་བྱེད་པ་གཞན་ཡང་ཞེས་བྱ་བ་ལ་སོགས་པ་
སྨོས་སོ། །མེད་པ་ལ་ནི་བྱེ་བྲག་ཅི་ཡང་མེད་པས་ཇི་ལྟར་འདོད་ཆགས་ལ་སོགས་པ་འཆིང་བར་ནུས་པ་ལྟར་སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པ་ཡང་དེ་དང་འདྲ་བར་འགྱུར་ལ། ཇི་ལྟར་སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པས་ཐར་པར་ནུས་པ་ལྟག །འདོད་ཆགས་ལ་སོགས་པ་ཡང་དེ་དང་འདྲ་བར་འགྱུར་བ་མ་ཡིན་ནམ་ཞེ་ན། བཤད་པ། འདོད་ཆགས་ལ་སོགས་པ་དང༌། སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པ་གང་ལས་འཆིང་བ་དང་ཐར་པ་གང་ཞིག་ཡོད་པར་ཐམས་ཅད་མཁྱེན་པས་གཟིགས་པ་དེ་ཡོད་ན། འདོད་ཆགས་ལ་སོགས་པ་དང་སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པ་དེ་ཡོད་ན་འཆིང་བ་དང་ཐར་པ་དེ་ངེས་པར་ཡོད་དོ། །དེ་མེད་ན་འདོད་ཆགས་ལ་སོགས་པ་དང༌། སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པ་དེ་མེད་ན་འཆིང་བ་དང་ཐར་པ་འདི་མེད་པ་ཉིད་དོ། །རྒྱུ་དེའི་ཕྱིར་ཧ་ཅང་ཐལ་བར་མི་འགྱུར་ཏེ། འདོད་ཆགས་ལ་སོགས་པས་ཀྱང་ཐར་པ་མ་ཡིན་ལ། སྡུག་བསྔལ་ལ་ཆོས་ཤེས་པ་ལ་སོགས་པའི་བཟོད་པས་ཀྱང་འཆིང་བ་མ་ཡིན་ནོ་ཞེས་བྱ་བའི་ཐ་ཚིག་གོ །ཐ་སྙད་ཐམས་ཅད་ཇི་ལྟར་སྣང་བ་ཁོ་ན་བཞིན་འཇུག་གོ་ཞེས་བྱ་བ་དེ་ནི་དེ་ལྟ་ཡིན་ནོ་ཞེས་བྱ་བར་ཤེས་པར་བྱ་སྟེ། དེའི་ཕྱིར་དངོས་པོ་ཁས་བླངས་སུ་ཟིན་ཀྱང་ངོ་བོ་ཉིད་མེད་པའི་ལྟ་བ་ལས་གཞན་པ་དངོས་པོར་སྨྲ་བའི་ལྟ་བ་ལ། དངོས་པོ་ཇི་ལྟ་བ་བཞིན་ཐ་སྙད་གདགས་སུ་ནི་རིགས་པས་མི་རུང་ངོ༌། །ཅིའི་ཕྱིར་མི་རུང་སྙམ་པ་ལ། མི་སྣང་བའི་ཕྱིར་ཞེས་བྱ་བ་སྨོས་ཏེ། དངོས་པོའི་ངོ་བོ་ཞེས་བྱ་བ་ལྷག་མའོ། །ཤེས་པའི་བདག་ཉིད་ལ་ནི་ཞེས་བྱ་བ་ལ་སོགས་པས་ནི་འདི་ཉིད་རྣམ་པར་འགྲེལ་ཏོ། །རྡུལ་ཕྲ་རབ་དག་དང་ཞེས་བྱ་བ་ནི་ཕྱི་རོལ་གྱི་དོན་ཡོད་པར་སྨྲ་བའི་ལྟ་བ་ལ་བརྟེན་ཏེ་བཤད་པའོ། །གཉིས་མེད་པ་ཞེས་བྱ་བ་ནི་རྣམ་པར་ཤེས་པར་སྨྲ་བའི་ལྟ་བ་སྟེ། དེ་དག་གི་ལྟར་ན་རྣམ་པར་ཤེས་པའི་བདག་ཉིད་དངོས་པོའི་ངོ་བོ་གཟུང་བ་དང༌། འཛིན་པའི་བདག་ཉིད་ཀྱིས་དབེན་པ་ནི་གཉིས་མེད་པ་ཡིན་ནོ། །གལ་ཏེ་མི་སྣང་དུ་ཟིན་ཀྱང་ཁོ་བོ་དེས་ཐ་སྙད་འདོགས་པར་འགྱུར་རོ་སྙམ་པ་ལ། མི་སྣང་བ་ལ་ནི་ཞེས་བྱ་བ་ལ་སོགས་པ་སྨྲོས་སོ། །གལ་ཏེ་གང་སྣང་བ་དེས་ཐ་སྙད་འདོགས་པར་འགྱུར་རོ་སྙམ་པ་ལ་སྣང་བ་གང་ཡིན་པ་ཞེས་བྱ་བ་ལ་སོགས་པ་
སྨོས་སོ། །ཅིའི་ཕྱིར་དངོས་པོའི་ངོ་བོ་ཁོ་ན་མ་ཡིན་སྙམ་པ་ལ། བཤད་པ། འདུས་པ་ནི། དངོས་པོ་མ་ཡིན་པའི་ཕྱིར་རོ། །གཉིས་ཀྱང་དངོས་པོ་མ་ཡིན་པའི་ཕྱིར་རོ་ཞེས་བྱ་བར་བསྙེགས་སོ། །འདི་གཉིས་ལས་ཞེས་བྱ་བ་ནི། གཉིས་དང་འདུས་པ་དག་ལས་སོ།། དེ་ཞེས་བྱ་བ་ནི་དངོས་པོའོ། །ཅིའི་ཕྱིར་དེས་ན་ཅི་ཞེས་བྱ། ངེས་པར་མ་ཟིན་པ་དེ་ལྟ་བུ་ལ་ནི་ཐ་སྙད་མེད་དེ། ཐ་སྙད་ནི་ངེས་པ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །དེའི་ཕྱིར་ཁོ་བོ་ཅག་གིས་དངོས་པོ་ཇི་ལྟ་བ་བཞིན་ཐ་སྙད་གདགས་སུ་ནི་རིགས་པས་མི་རུང་ངོ་ཞེས་དམ་བཅས་པ་གང་ཡིན་པ་དེ་དེ་ཁོ་ན་བཞིན་དུ་གནས་སོ། །སྔར་ནི་སྣང་བཞིན་དུ་ཡང་དེ་ངེས་པར་མི་ཟིན་ཏོ་ཞེས་བྱ་བ་དེ་ཁས་བླངས་ནས་བཤད་དོ། །ད་ནི་སྣང་བ་ཉིད་ལ་ཡང་ཐེ་ཚོམ་ཡོད་པས་སྣང་ཞེས་བྱ་བ་ཡང་ཞེས་བྱ་བ་ལ་སོགས་པ་སྨོས་སོ། །ཅིའི་ཕྱིར་མནའ་ཆུ་བཏུང་དགོས་སྙམ་པ་ལ། ཡིད་ཆེས་པ་མེད་པའི་ཕྱིར་ཞེས་བྱ་བ་སྨོས་ཏེ། ངེས་པ་མེད་པའི་ཕྱིར་ཞེས་བྱ་བའི་ཐ་ཚིག་གོ །སྔར་ནི་དངོས་པོའི་ངོ་བོ་ཁས་བླངས་ནས་དངོས་པོ་ཇི་ལྟ་བ་བཞིན་དུ་ཐ་སྙད་གདགས་པར་རིགས་པས་མི་རུང་ངོ་ཞེས་བཤད་དོ། །ད་ནི་དངོས་པོའི་ངོ་བོ་ཉིད་ཀྱང་མེད་པའི་ཕྱིར། དངོས་པོའི་ངོ་བོ་མི་རུང་ཕྱིར། །ཞེས་བྱ་བ་ལ་སོགས་པ་སྨོས་ཏེ། དེས་ཐ་སྙད་གདགས་སུ་རིགས་པས་མི་རུང་ངོ་ཞེས་བྱ་བ་ལྷག་མའོ། །ཇི་ལྟར་མི་རུང་ཞེ་ན། ཚད་མ་མེད་པའི་ཕྱིར་ཞེས་བྱ་བ་སྨོས་ཏེ། དངོས་པོ་གྲུབ་པར་བྱ་བ་ལ་ཞེས་བྱ་བ་ལྷག་མའོ། །ཚད་མས་གནོད་པའི་ཕྱིར། ཡང་དངོས་པོའི་ངོ་བོ་མི་རུང་ངོ་ཞེས་རྣམ་པར་དབྱེ་བ་བསྒྱུར་ཏེ་སྦྱར་རོ། །གཉིས་པོ་དེ་ཇི་ལྟར་སྙམ་པ་ལ། རིགས་པའི་རྗེས་སུ་འབྲངས་ནས་བཤད། །ཅེས་བྱ་བ་སྨོས་ཏེ། མི་རུང་བར་ནི་རྣམ་པ་མེད་པ་ཞེས་བྱ་བ་ལ་སོགས་པས་རིགས་པ་བཤད་ཟིན་ཏོ། །གནོད་པར་ནི། དུ་མས་དངོས་པོ་གཅིག་མི་བྱེད། །ཅེས་བྱ་བ་ལ་སོགས་པས་རིགས་པས་བཤད་ཟིན་ཏོ། །དེ་ལྟར་རབ་ཏུ་བསྒྲུབས་ནས། དེ་ལྟ་བས་ན་ཞེས་བྱ་བ་ལ་སོགས་པས་མཇུག་སྡུད་པར་བྱེད་དོ། །དེ་ལ་མངོན་པར་ཞེན་པ་ཞེས་བྱ་བ་ནི་དངོས་པོའི་ངོ་བོ་ལ་མངོན་པར་ཞེན་པའོ། །ངོ་བོ་ཉིད་མེད་པ་ནི་དངོས་སུ་རིགས་པ་དང་ལྡན་ཞིང་ཚད་མས་ཀྱང་མི་གནོད་ལ། ཐ་སྙད་ཀྱང་ཇི་ལྟར་སྣང་བ་བཞིན་སྲིད་པས་དེའི་
ཕྱིར་ཁྱེད་དངོས་པོའི་ངོ་བོར་མངོན་པར་ཞེན་པ་ནི་དོན་མེད་པ་འཕེལ་བར་བྱེད་པའི་འབྱུང་གནས་ཁས་ལེན་པར་བྱེད་པ་འབའ་ཞིག་ཏུ་ཟད་དོ། །དེ་ལྟ་བས་ན་འབད་དེ་འདི་དོར་བར་བྱའོ་སྙམ་པའི་བསམ་པ་དང་ལྡན་ནས། རང་ལྟ་ཆགས་པས་ཅི་ཞིག་བྱ། །ཞེས་བྱ་བ་ལ་སོགས་པ་སྨོས་ཏེ། དོན་གསལ་བར་ཟད་དོ། །གལ་ཏེ་ལྟ་བ་འདི་ལ་ཡང་ཐམས་ཅད་མེད་པའི་ཕྱིར་ཆད་པར་ཐལ་བར་འགྱུར་བ་མ་ཡིན་ནམ་ཞེ་ན། ལྟ་བ་འདི་ལ་ཞེས་བྱ་བ་ལ་སོགས་པ་སྨོས་སོ། །ཅིའི་ཕྱིར་ཆད་པར་ཐལ་བར་མི་འགྱུར་ཞེ་ན། གང་ཕྱིར་རྒྱུ་ལས་ཞེས་བྱ་བ་ལ་སོགས་པ་སྨོས་སོ། །བརྒྱ་ཞིག་ལ་ཆད་པ་མེད་ན་འོ་ན་རྟག་པར་ཐལ་བར་འགྱུར་རོ་ཞེས་སྨྲ་བར་འགྱུར་བས། དེ་ལོག་ན་ནི་ཞེས་བྱ་བ་སྨོས་ཏེ། རྒྱུ་ལོག་ན་ནི་འབྲས་བུ་ལོག་པ་ལ་ཅིའི་ཕྱིར་རྟག་པ་ཉིད་ཡིན་སྨྲོས། ཅི་ཞེས་བྱ་བའི་སྒྲ་ནི་གཉི་ག་ཡང་སྤོང་བ་ཡིན་ནོ། །འདི་རྣམ་པར་དབྱེ་བའི་ཕྱིར་བཤད་པ། གང་གི་ཚེ་སེམས་ཅན་ཞེས་བྱ་བའི་དངོས་པོ་འདི། འཁོར་བ་ཇི་སྲིད་པར་འཇུག་པ་ཞེས་བྱ་བར་སྦྱར་རོ། །ཇི་ལྟར་འཇུག་ཅེ་ན། བཤད་པ། ལས་དང་ཉོན་མོངས་པའི་དབང་གིས་སོ། །ཇི་ལྟར་ལས་དང་ཉོན་མོངས་པའི་དབང་གིས་འཇུག་ཅེ་ན། བཤད་པ། ཇི་ལྟར་སྣང་བ་བཞིན་ནོ། །དེའི་ཚེ་འདི་ཆད་པར་ཇི་ལྟར་འགྱུར་ཏེ། མི་འགྱུར་པ་ཉིད་དོ་ཞེས་བྱ་བའི་ཐ་ཚིག་གོ །ཇི་ལྟར་ཆད་པར་མི་འགྱུར་བ་ཉིད་སྙམ་པ་ལ། འགྲོ་བ་བརྒྱུད་པས་ཞེས་བྱ་བ་ལ་སོགས་པ་སྨོས་སོ། །གང་གི་ཚེ་དངོས་པོ་འདི་མྱ་ངན་ལས་འདས་པའི་གྲོང་ཁྱེར་ན་གནས་པ་དེའི་ཚེ་འདི་ཇི་ལྟར་རྟག་པར་འགྱུར་ཞེས་བྱ་བར་སྦྱར་རོ། །ཇི་ལྟ་བུ་ཞིག་ཡིན་སྙམ་པ་ལ། བཤད་པ། འཕགས་པའི་བདེན་པ་མཐོང་བ་ཉིད་མེ་ཡིན་ཏེ། གང་ལ་དེས་ལས་དང་ཉོན་མོངས་པ་ཐམས་ཅད་བསྲེགས་པ་ཡོད་པ་དེ་ནི། འཕགས་པའི་བདེན་པ་མཐོང་བའི་མེས་ལས་དང་ཉོན་མོངས་པ་མཐའ་དག་བསྲེགས་པ་ཅན་ནོ། །དེ་བས་དེ་ལྟར་ན་ཞེས་བྱ་བ་ལ་སོགས་པས་ནི་མཇུག་སྡུད་པར་བྱེད་དོ། །དོན་དམ་པའི་དངོས་པོའི་བདག་ཉིད་ལ་ལྟ་གནས་མི་ཐོད་པ་ཁོ་ན་སྟེ་རྟག་པ་དང་ཆད་པའི་ཆོས་ཉིད་ཅེས་བྱ་བར་སྦྱར་རོ། །ཅིའི་ཕྱིར་གནས་མི་ཐོད་སྙམ་ན། འདི་ལྟར་ཞེས་བྱ་བ་ལ་སོགས་པ་སྨོས་ཏེ། ཁོང་དུ་ཆུད་པར་སླའོ། །དེ་ལྟ་ཡིན་དུ་ཆུག་ན་ངོ་བོ་ཉིད་མེད་པར་ལྟ་བ་འདི་ལ་ཐམས་
ཅད་མཁྱེན་པ་ཇི་ལྟ་བུ་ཡིན་སྙམ་པ་ལ། བཤད་པ། ཇི་ལྟར་སྣང་བ་འདི་ཁོ་ན། །བརྟེན་ནས་སྐྱེས་པའི་དངོས་པོ་ཐམས་ཅད་ནི། ཐམས་ཅད་མཁྱེན་པས་མངོན་སུམ་གྱི་ཚད་མས་གཟིགས་ཞེས་བྱ་བར་སྦྱར་རོ། །ཇི་ལྟ་བུ་ཞིག་སྙམ་པ་ལ། བརྟགས་པའི་ངོ་བོས་དབེན་པའི་ཞེས་བྱ་བ་སྨོས་ཏེ། ཇི་ལྟར་སྣང་བ་ཞེས་བྱ་བའི་སྒྲ་ནི་གཟིགས་པ་དང་བརྟེན་ཏེ་སྐྱེས་ཞེས་བྱ་བའི་སྒྲ་གཉི་ག་དང་སྦྱར་བར་དྲང་ངོ༌། །འདི་རྣམ་པར་དགྲོལ་བའི་ཕྱིར། དངོས་པོ་རྣམས་ངོ་བོ་ཉིད་མེད་བཞིན་དུ། ཡང་ཇི་ལྟར་སྣང་བ་ལ་ཞེས་བྱ་བ་སྨོས་ཏེ། ཐམས་ཅད་མཁྱེན་པ་ཞེས་བྱའོ་ཞེས་བྱ་བར་སྦྱར་རོ། །ཅི་ཞིག་མཛད་ཅེ་ན། དངོས་པོ་ཐམས་ཅད་རྣམ་པ་ཐམས་ཅད་དུ་མཁྱེན་པ་ནའོ། །དངོས་པོ་ཇི་ལྟ་བུ་ཞིག་སྙམ་པ་ལ་བརྟེན་ནས་སྐྱེས་པ་ཁོ་ན་ཞེས་བྱ་བ་སྨོས་ཏེ། འདིར་ཡང་ཇི་ལྟར་སྣང་བ་བཞིན་ཞེས་བྱ་བར་སྦྱར་རོ། །གལ་ཏེ་བརྟེན་ནས་སྐྱེས་པ་ཁོ་ན་ཇི་ལྟ་བུ་ཞིག་སྙམ་པ་ལ། ཡང་དག་པར་སྐྱེ་བ་ལ་སོགས་པས་དབེན་པ་ཞེས་བྱ་བ་སྨོས་སོ། །གང་གིས་མཁྱེན་སྙམ་པ་ལ། མངོན་སུམ་གྱིས་ཞེས་བྱ་བ་སྨོས་སོ། །ཇི་ལྟ་ཞེ་ན། བཤད་པ། ཅིག་ཅར་རོ། །རྣམ་པར་ཤེས་པར་སྨྲ་བའི་ལྟ་བ་ལ་ནི་ཐམས་ཅད་མཁྱེན་པ་ཇི་ལྟར་ཡང་མི་རུང་བས། གང་ལ་དོན་གཞན་ཡོངས་གཅོད་པ། །ཞེས་བྱ་བ་ལ་སོགས་པ་སྨོས་སོ། །ཤེས་བྱ་ནང་གི་ཡིན་པར་སྨྲ་བ་ཞེས་བྱ་བ་ལ་སོགས་པས་ནི་འདི་རྣམ་པར་འབྱེད་དོ། །གལ་ཏེ་ཅིའི་ཕྱིར་ཐམས་ཅད་མཁྱེན་པ་བརྟགས་པ་ཁོ་ན་ཡིན་པར་འགྱུར་སྙམ་པ་ལ། བཤད་པ། རྒྱུད་གཞན་ལ་ཡོད་པའི་དངོས་པོ་ཡོངས་སུ་མི་གཅོད་པའི་ཕྱིར་རོ། །ཅིའི་ཕྱིར་ཡོངས་སུ་མི་གཅོད་ཅེ་ན། འདི་ལྟར་གཟུང་བ་དང་འཛིན་པ་མེད་པའི་ཕྱིར་ཏེ། དེ་དག་ཉིད་ཀྱིས་དེ་ལྟ་མ་ཡིན་ན། དོན་དང་ལྡན་པའི་ཕྱིར་རྣམ་པར་རིག་པ་ཙམ་དུ་ངེས་པར་འགྲུབ་པར་མི་འགྱུར་རོ་ཞེས་སྨྲས་སོ། །ཇི་སྟེ་རྒྱུད་གཞན་ལ་ཡོད་པའི་དངོས་པོ་ཅིའི་ཕྱིར་ཡོངས་སུ་མི་གཅོད་སྙམ་ན། བཤད་པ། བློ་རྣམ་པ་དང་བཅས་པ་དང་ཅིག་ཤོས་ཀྱིས་ཡོངས་སུ་གཅོད་པར་མི་རུང་བའི་ཕྱིར་རོ། །རང་གི་རྒྱུད་ལ་ཡོད་པའི་དངོས་པོ་ཡང་དེ་དང་འདྲ་བར་ཡོངས་སུ་གཅོད་པར་མི་རུང་བའི་ཕྱིར་རོ་ཞེས་བྱ་བར་སྦྱར་རོ། །གང་གིས་ཤེ་ན། བློས་སོ། །ཇི་ལྟ་བུས་ཤེ་ན། རྣམ་
པ་དང་བཅས་པ་དང་ཅིག་ཤོས་ཀྱིས་སོ། །ངོ་བོ་ཉིད་མེད་པར་སྨྲ་བའི་ལྟར་ན་ནི། ཐམས་ཅད་མཁྱེན་པ་མེད་པའི་ཉེས་པར་བཤད་པ་གང་ཡིན་པ་དེ་དག་ཐམས་ཅད་མེད་པས་ཉེས་པ་མེད་པ་ཉིད་ཅེས་བྱ་བ་སྨོས་སོ། །གལ་ཏེ་ཅིའི་ཕྱིར་སྙམ་ན། བཤད་པ། ཇི་ལྟར་གྲགས་པ་བཞིན་ཏེ། ཇི་ལྟར་སྣང་བ་བཞིན་ཡོངས་སུ་གཅོད་པའི་ཕྱིར་རོ། །གང་གི་ཚེ་ཅུང་ཟད་ཀྱང་མི་མཐོང་བ་དེའི་ཚེ་དེ་ཁོ་ན་བཞིན་གནས་ཏེ་ཞེས་བྱ་བ་སྦྱར་རོ། །ཅི་ཞིག་བྱེད་ཅིང་ཞེ་ན། བཤད་པ། དངོས་པོའི་རང་གི་ངོ་བོ་དཔྱོད་པར་བྱེད་ཅིང་ངོ༌། །ཅི་ཞིག་བྱས་ནས་ཤེ་ན། བཤད་པ། ཆོས་རྣམས་མ་སྐྱེས་སོ་ཞེས་བྱ་བ་ལ་སོགས་པ་ཡང་བརྟགས་པའི་བདག་ཉིད་དག་ཡིན་ནོ་ཞེས་བྱ་བར་ཁོང་དུ་ཆུད་པར་བྱས་ནས་སོ། །དེ་དག་ཇི་ལྟར་བརྟགས་པའི་བདག་ཉིད་ཡིན་སྙམ་པ་ལ། བཤད་པ་ཡང་དག་པར་སྐྱེ་བ་ལ་སོགས་པར་རྟོགས་པ་བཀག་པའི་ངོ་བོ་ཉིད་ཀྱིས་སོ། །ཅིའི་ཕྱིར་དེ་ཁོ་ན་བཞིན་གནས་སྙམ་པ་ལ། བཤད་པ། འདི་ལྟར། དེ་ནི་མཚན་མ་མི་འབྱུང་ཕྱིར། །མི་བཞེངས་སོ་ཞེས་བྱ་བར་སྦྱར་རོ། །གང་གི་ཚེ་མཚན་མ་མི་འབྱུང་སྙམ་པ་ལ། བཤད་པ། གང་ཚེ་ཤེས་དང་ཤེས་བྱ་དང༌། །བདག་ཉིད་རྗེས་སུ་མི་མཐོང་ནའོ། །བདག་ཉིད་ཅེས་བྱ་བ་ནི་རྣལ་འབྱོར་པ་ཡིན་པར་སྟོན་ཏོ། །གནས་པ་བརྟན་ཕྱིར་ཡང་མི་ལྡང་ངོ༌། །ཞེས་བྱ་བར་སྦྱར་བར་བྱ་སྟེ། ཡང་ཞེས་བྱ་བ་ནི་མི་མངོན་པར་བསྟན་ཏོ། །གནས་པ་ནི་ཏིང་ངེ་འཛིན་ཏོ། །འདི་རྣམ་པར་འགྲེལ་པར་བྱེད་དེ། བཅོམ་ལྡན་འདས་འདིའི་མཚན་མ་མི་འབྱུང་ན་བཞེངས་པ་ལྟ་ག་ལ་ཡོད་ཅེས་བྱ་བར་སྦྱར་རོ། །མཚན་མ་ཞེས་བྱ་བ་ནི། ཤེས་པ་དང་ཤེས་བྱ་དང་བདག་གི་མཚན་མའོ། །ཅིའི་ཕྱིར་མཚན་མ་མི་འབྱུང་ཞེ་ན། བཤད་པ། བཅོམ་ལྡན་འདས་གང་ལ་རྟོག་པའི་ས་བོན་ཐམས་ཅད་བག་ཆགས་དང་བཅས་ཏེ་རྩ་ནས་བཏོན་པ་ཡོད་པ་དེའི་དངོས་པོ་ནི་དེ་ཉིད་དེ། རྟོག་པའི་ས་བོན་མཐའ་དག་བག་ཆགས་དང་བཅས་ཏེ་རྩ་ནས་བཏོན། ཉིད་ཀྱི་ཕྱིར་རོ། །བག་ཆགས་ནི་ཉོན་མོངས་པས་བྱས་པ་ལུས་ལ་སོགས་པ་འགྱུར་བའོ། །བཅོམ་ལྡན་འདས་འདིའི་ཏིང་ངེ་འཛིན་བརྟན་པའི་ཡང་ཕྱིར་བཞེངས་པ་ལྟ་ག་ལ་ཡོད་ཅེས་བྱ་བར་སྦྱར་རོ། །དེ་ཡང་ཅིའི་ཕྱིར་སྙམ་པ་ལ། བཤད་པ། བསྐལ་པ་གྲངས་མེད་པ་དུ་མར་གུས་པར་མཛད་དེ་བར་ཆད་མེད་པར་
ལེགས་པར་བསྒོམས་པས་ཞེས་བྱ་བ་འདིས་ནི་ཡུན་རིང་པོ་ནས་ལེགས་པར་བསྒོམས་པ་དང་གུས་པར་བྱས་ཏེ། ལེགས་པར་བསྒོམས་པ་དང་བར་ཆད་མེད་པར་ལེགས་པར་བསྒོམས་པས་ཏིང་ངེ་འཛིན་བརྟན་པ་ཉིད་དུ་བསྟན་ཏོ། །གནས་སྐབས་གང་ལ་ཞུགས་པས་ཏེ། གནས་སྐབས་གང་ཞིག་རྟོགས་པས་ཡོན་ཏན་ཀུན་གྱི་རྟེན་དུ་གྱུར་ཏེ། ཡོན་ཏན་ཀུན་ནི་འཇིག་རྟེན་པ་དང་འཇིག་རྟེན་ལས་འདས་པ་རྣམས་སོ། །བསམ་གྱིས་མི་ཁྱབ་པར་འགྱུར་ཏེ་སེམས་ཅན་ཐམས་ཅད་ཀྱི་བསམ་པའི་ཡུལ་ལས་ཡང་དག་པར་འདས་པའི་ཕྱིར་རོ། །མཚུངས་མེད་དུ་འགྱུར་ཏེ། འདི་ལྟར་ཡོན་ཏན་ཐུན་མོང་མ་ཡིན་པའི་རྟེན་ཡིན་པའི་ཕྱིར། དེ་བཞིན་གཤེགས་པ་དང་མཉམ་པའི་སེམས་ཅན་འགའ་ཡང་མེད་དོ། །ཕྱག་གནས་སུ་གྱུར་ཏེ། སེམས་ཅན་ཐམས་ཅད་ཀྱིས་མཆོད་པར་འོས་པའི་ཕྱིར་རོ། །འདྲེན་པར་འགྱུར་ཏེ་ལམ་ངན་པ་ལས་ཕྲལ་ཏེ་ལམ་བཟང་པོ་ཐོབ་པར་མཛད་པའི་ཕྱིར་རོ། །དང་ཞེས་བྱ་བ་ནི་རིམ་པ་གཞན་དུ་སྦྱར་བ་སྟེ། གནས་སྐབས་འགའ་དེ་བསམ་གྱིས་མི་ཁྱབ་པ་ཡིན་ནོ། །འདིས་ནི་ཆོས་ཀྱི་སྐུ་འབྲས་བུའི་སྒོ་ནས་ཉེ་བར་བསྟོད་པ་ཡིན་ནོ། །ད་ནི་རྣམ་པར་བཤད་པའི་སྒོ་ནས་བསྔགས་པ་བྱ་བའི་ཕྱིར། ཆོས་རྣམས་ཀུན་གྱི་ལུས་ཡིན་ཕྱིར། །ཞེས་བྱ་བ་ལ་སོགས་པ་སྨོས་སོ། །རྣམ་པ་གསུམ་གྱིས་ཆོས་ཀྱི་སྐུ་ཞེས་བྱ་ཞེས་བྱ་བ་ནི་ཚིག་གསུམ་བཟུང་ནས་དེ་སྐད་དུ་བཤད་དོ། །དེ་ལྟ་མ་ཡིན་ན་ཚིག་གཅིག་གིས་དོན་གཉིས་ཟིན་པས་རྣམ་པ་བཞིས་ཞེས་བརྗོད་པར་བྱ་དགོས་སོ། །ཅིའི་ཕྱིར་ཆོས་ཐམས་ཅད་ཀྱི་ལུས་ཞེས་བྱ་བ་སྙམ་པ་ལ། འགྲོ་བ་ཐམས་ཅད་ཅེས་བྱ་བ་ལ་སོགས་པ་སྨོས་སོ། །དེ་བས་ན་རྣམ་པ་འདི་ལ་ནི་སྐུ་ཞེས་བྱ་བའི་སྒྲ་ནི་ལུས་སུ་བརྗོད་པར་བལྟ་བར་བྱའོ། །ལུས་ནི་ཚོགས་ཡིན་པའི་ཕྱིར་ཆོས་ཀྱི་སྐུ་ནི་ཆོས་རྣམས་ཀྱི་ཚོགས་ཞེས་བྱ་སྟེ། རྒྱུ་ལས་འབྲས་བུ་ཉེ་བར་བཏགས་པའི་ཕྱིར་རོ། །ཅིའི་ཕྱིར་རྒྱུ་ཉིད་ཡིན་སྙམ་པ་ལ་བཤད་པ། འཇིག་རྟེན་པ་དང་འཇིག་རྟེན་ལས་འདས་པའི་ཡོན་ཏན་ཐམས་ཅད་ཀྱི་རྟེན་ཡིན་པའི་ཕྱིར་རོ། །ཡང་ན་འདིར་འཇིག་རྟེན་པ་དང་འཇིག་རྟེན་ལས་འདས་པའི་ཆོས་རྣམས་སྒྲོགས་ཤིང་བརྗོད་པའི་ཕྱིར་ཆོས་ཀྱི་སྐུ་ཡིན་ནོ། །ཆོས་ཀྱི་དབྱིངས་རྟོགས་ན་འཇིག་རྟེན་
པ་དང་འཇིག་རྟེན་ལས་འདས་པའི་ཆོས་ཐམས་ཅད་བོས་པ་བཞིན་དུ་འདུ་སྟེ། ཟད་པ་ཤེས་ལ་ཟག་བཅས་ཀྱང༌། །ཞེས་འབྱུང་བའི་ཕྱིར་རོ། །འདིས་ནི་ཆོས་ཀྱི་སྐུ་ཞེས་བྱ་བའི་སྒྲ་འདི་བྱེད་པའི་སྒྲ་ཉིད་དུ་སྟོན་པར་བྱེད་དོ། །ལུས་ནི་བྱེད་པ་མེད་པ་མ་ཡིན་ནམ། ཇི་ལྟར་ན་ཡོན་ཏན་བསམ་གྱིས་མི་ཁྱབ་པ་ཀུན་གྱི་རྟེན་ཞེས་བྱ་སྙམ་པ་ལ། བཤད་པ། རྟེན་གྱི་དངོས་པོ་ནི་ཀུན་བརྟགས་པའོ་ཞེས་བྱ་བར་སྦྱར་རོ། །གལ་ཏེ་ཇི་ལྟར་སྙམ་པ་ལ། བཤད་པ། དེ་ལ་འཇུག་པ་ཐོབ་པས་ན་ཆོས་ཀྱི་དབྱིངས་ལ་འཇུག་པ་རྟོགས་པ་སྟེ། དེས་འཇིག་རྟེན་པ་དང་འཇིག་རྟེན་ལས་འདས་པའི་ཡོན་ཏན་རྣམས་ཐོབ་པའོ། །ཅིའི་ཕྱིར་རིགས་པས་རྣམ་པར་གནས་པའི་ངོ་བོ་ཉིད་ཡིན་སྙམ་པ་ལ། བཤད་པ། ངོ་བོ་ཉིད་དེ་ཉིད་རིགས་པ་དང་ལྡན་པའི་ཕྱིར་རོ། །དེ་ལྟ་བས་ན་འདིས་ནི་ཆོས་ཞེས་བྱ་བའི་སྒྲ་ནི་རིགས་པར་བརྗོད་པ་ཡིན། སྐུ་ཞེས་བྱ་བའི་སྒྲ་ནི་ངོ་བོ་ཉིད་དུ་བརྗོད་པ་ཡིན་ནོ་ཞེས་བསྟན་པ་ཡིན་ནོ། །དེ་ལྟར་ཆོས་ཀྱི་སྐུ་མདོར་བསྡུས་ཏེ་བསྟན་ནས། ལོངས་སྤྱོད་རྫོགས་པའི་སྐུ་བརྗོད་པར་རྩོམ་པ་ན། དེ་ཚེ་རྣམ་རྟོག་མེད་ཅེས་བྱ་བ་ལ་སོགས་པ་སྨོས་སོ། །དེ་ཚེ་ཞེས་བྱ་བ་ནི་ཆོས་ཀྱི་དབྱིངས་རྟོགས་པར་བྱེད་པའི་དུས་སྟོན་པར་བྱེད་དོ། །གལ་ཏེ་རྟོག་པར་མི་མཛད་ན་ཇི་ལྟར་སེམས་ཅན་གྱི་དོན་འབྱུང་སྙམ་པ་ལ། བཤད་པ་སྔོན་གྱི་ཤུགས་ཀྱིས་ཏེ་སྔོན་གྱི་སྨོན་ལམ་གྱི་ཤུགས་ཀྱི་ཞེས་བྱ་བའི་ཐ་ཚིག་གོ །སེམས་ཅན་གྱི་དོན་གང་གི་ཚེ་ཅི་འདྲ་བ་ཞིག་གང་དུ་རྣམ་པ་ཇི་ལྟ་བུ་ཞིག་འབྱུང་སྙམ་པ་ལ། རྟག་ཏུ་ཞེས་བྱ་བ་ལ་སོགས་པ་སྨོས་སོ། །དེ་བས་ན་འདིས་ནི་ཐམས་ཅད་ནས་སེམས་ཅན་གྱི་དོན་འབྱུང་བར་རྗོད་པར་བྱད་ཅིང་གཞན་གྱི་དོན་ཕུན་སུམ་ཚོགས་པ་ཡང་སྟོན་ཏོ། །གཞན་གྱི་དོན་ཕུན་སུམ་ཚོགས་པ་འདི་ནི་གཙོ་བོ་ཡིན་པའི་ཕྱིར་སྔར་བཤད་དོ། །རང་གི་དོན་ཕུན་སུམ་ཚོགས་པ་ནི། གཞན་གྱི་དོན་ཕུན་སུམ་ཚོགས་པའི་ཐབས་ཡིན་པའི་ཕྱིར་ཕྱིས་སྨོས་སོ། །ཚིགས་སུ་བཅད་པ་གཉིས་པའི་ཕྱེད་གོང་མས་ནི་ཡེ་ཤེས་ཕུན་སུམ་ཚོགས་པ་བསྟན་ཏོ། །ཕྱེད་འོག་མས་ནི་ཆེ་བའི་བདག་ཉིད་ཕུན་སུམ་ཚོགས་པ་བསྟན་ཏོ། །ཚིགས་སུ་བཅད་པ་གསུམ་པའི་ཕྱད་གོང་མས་ནི་ཉོན་མོངས་པའི་སྒྲིབ་པ་སྤངས་པ་ཕུན་སུམ་ཚོགས་པ་བསྟན་ཏོ། །ཕྱེད་འོག་མས་ནི་ཤེས་བྱའི་
སྒྲིབ་པ་སྤངས་པ་ཕུན་སུམ་ཚོགས་པ་བསྟན་ཏོ། །གང་ལ་མཁྱེན་པའི་སྐད་ཅིག་གཅིག་གིས་ནི། །ཤེས་བྱའི་དཀྱིལ་འཁོར་ཀུན་ཁྱབ་ཅན། །མངའ་བ་ཞེས་ཚིག་རྣམ་པར་སྦྱར་རོ། །ཡོན་ཏན་རིན་པོ་ཆེའི་ཚོགས་དང་ཏིང་ངེ་འཛིན་དང་བསམ་གཏན་དག་ཚིག་རྣམ་པར་ཕྲལ་བ་རྣམས་བསམ་གྱིས་མི་ཁྱབ་པའི་ཚིག་དང༌། གཞི་མཐུན་པའི་བསྡུ་བ་བྱས་ནས་རྟེན་གྱི་ཚིག་དང་དྲུག་པའི་བསྡུ་བ་བྱའོ། །ཡོན་ཏན་ནི་མངོན་པར་ཤེས་པ་དང་ཚད་མེད་པ་དང་སྟོབས་དང་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་སོགས་པའོ། །ཏིང་ངེ་འཛིན་རྣམས་ནི་དཔའ་བོར་འགྲོ་བ་དང་ནམ་མཁའ་མཛོད་ཀྱི་ཏིང་ངེ་འཛིན་ལ་སོགས་པའོ། །བསམ་གཏན་རྣམས་ནི་དང་པོ་ལ་སོགས་པའོ། །རྟོག་པ་དང་ཉོན་མོངས་པ་དང་བག་ཆགས་རྣམས་ཀྱི་ཚིག་ཕྲལ་བ་བྱས་ནས། གང་ལ་རྟོག་པ་དང་ཉོན་མོངས་པ་དང་བག་ཆགས་རྣམས་མ་ལུས་པར་གཏན་གཅད་པ་ཡོད་པ་ཞེས་འབྲུ་མང་པོར་བྱའོ། །རྟོག་པ་ནི་ཉོན་མོངས་པ་འབྱུང་བའི་རྒྱུ་ལོག་པའི་རྣམ་པར་རྟོག་པའོ། །བག་ཆགས་ནི་ཉོན་མོངས་པའི་འབྲས་བུ་ལུས་དང་ངག་འགྱུར་བའོ། །འདི་གཉིས་ནི་ཉོན་མོངས་པའི་རྒྱུ་དང་འབྲས་བུ་དག་ཡིན་ནོ་ཞེས་བྱ་བ་རབ་ཏུ་བསྟན་པའི་ཕྱིར་ཉོན་མོངས་པ་རབ་ཏུ་བསྟན་ཏོ། །དེ་ལྟ་མ་ཡིན་ན་ཉོན་མོངས་པ་ཞེས་བྱ་བའི་ཚིག་དང་པོ་སྨྲ་བར་འགྱུར་རོ། །གང་ལ་ཤེས་བྱའི་ཡུལ་ལ་མི་ཤེས་པའི། །ཚོགས་ནི་མཐའ་དག་རྣམ་སྤངས་ཅན། །མངའ་བ་ཞེས་ཚིག་རྣམ་པར་སྦྱར་རོ། །ཚིགས་སུ་བཅད་པ་གསུམ་སྨོས་པའི་དོན་མདོར་བསྡུས་ནས་བརྗོད་པར་བྱ་སྟེ། ཉེས་པ་ཀུན་གྱིས་མ་ཡིན། །ཞེས་བྱ་བ་འདིས་ནི་སྒྲིབ་པ་སྤངས་པ་ཕུན་སུམ་ཚོགས་པ་བསྟན་ཏོ། །ཡོན་ཏན་རྒྱ་མཚོ་ཀུན་གྱིས། །ཞེས་བྱ་བ་འདིས་ནི་ཆེ་བ་ཉིད་ཕུན་སུམ་ཚོགས་པ་བསྟན་ཏོ། །རྟག་ཏུ་ཞེས་བྱ་བ་ལ་སོགས་པས་ནི་ཚིགས་སུ་བཅད་པ་དང་པོར་བསྟན་པ་གཞན་གྱི་དོན་ཕུན་སུམ་ཚོགས་པ་བསྟན་ཏོ། །ཡིད་བཞིན་ནོར་བུ་བཞིན་དུ་ནི། །ཞེས་བྱ་བ་ལ་སོགས་པས་འདིའི་གནས་པའི་དུས་སྟོན་ཏེ། གཞན་གྱི་དོན་ཕུན་སུམ་ཚོགས་པ་ལ་སོགས་པས་མཚུངས་པ་མེད་པ་ཁོ་ནར་འཁོར་བ་ཇི་སྲིད་དུ་འཇུག་གོ །ཅི་དང་འདྲ་བར་མཚུངས་པ་མེད་ཅེ་ན། ཡིད་བཞིན་གྱི་ནོར་བུ་བཞིན་ནོ། །འགའ་ཞིག་གིས་ཆོས་མཐུན་
པའི་ཕྱིར་འདིའི་དཔེ་བས་ཀྱི་རྣམ་པ་ཐམས་ཅད་ནི་མ་ཡིན་ནོ་ཞེས་བྱ་བར་ཤེས་པར་བྱའོ། །འདིའི་རྒྱུ་ཕུན་སུམ་ཚོགས་པ་བརྗོད་པའི་ཕྱིར་བཤད་པ་འདི་ནི་ཐུགས་རྗེ་ཆེན་པོས་བསྒྲུབས་པ་ཡང་ཡིན་ལ་བསམ་གྱིས་མི་ཁྱབ་པའི་བསོད་ནམས་དང་ཡེ་ཤེས་ཀྱང་ཡིན་པ་དེ་ལས་མཚུངས་མེད་འབྱུང་བ་འདི་ལ་ཡོད་པས། ཐུགས་རྗེ་ཆེས་བསྒྲུབས་བསམ་མི་ཁྱབ། །བསོད་ནམས་ཡེ་ཤེས་མཚུངས་མེད་འབྱུང་བ་ཡིན་ནོ། །ཡང་དག་པའི་མཆོག་ཐོབ་ཅིང་ཞེས་བྱ་བ་ལ་སོགས་པས་ནི་དེ་གང་དག་གི་ཡུལ་གྱི་ངོ་བོར་འགྱུར་བ་དེ་སྟོན་ཏོ། །སའི་མཆོག་ནི་རབ་ཏུ་དགའ་བ་ལ་སོགས་པའོ། །དེ་བས་ན་ཚིགས་སུ་བཅད་པ་འདི་ལས་རྩ་བ་དང་པོས་ནི་ཡེ་ཤེས་ཀྱི་ཚོགས་དང་ལྡན་པ་སྟོན་ཏོ། །གཉིས་པས་ནི་བསོད་ནམས་ཀྱི་ཚོགས་དང་ལྡན་པ་སྟོན་ཏོ། །གང་གི་ཕྱིར་འདི་བསམ་གྱིས་མི་ཁྱབ་པ་དེའི་ཕྱིར་བྱང་ཆུབ་སེམས་དཔའ་འདི་ལྟ་བུ་དག་ཁོ་ནའི་མིག་གི་ཡུལ་དུ་འགྱུར་རོ། །ཇི་ལྟར་སྐུ་འདི་ལོངས་སྤྱོད་རྫོགས་པ་ཞེས་བྱ་སྙམ་པ་ལ། དེ་ལས་བྱང་ཆུབ་སེམས་དཔའ་རྣམས་ཞེས་བྱ་བ་ལ་སོགས་པས་གཏན་ཚིགས་བསྟན་ཏེ། ཚིགས་སུ་བཅད་པ་ཁོང་དུ་ཆུད་པར་སླའོ། །སེམས་ཅན་སོ་སོའི་ཞེས་བྱ་བ་ལ་སོགས་པས་སྤྲུལ་པའི་སྐུ་སྟོན་པར་བྱེད་དེ། ཚིགས་སུ་བཅད་པ་རྣམས་དོན་གོ་བར་སླ་བས་དེའི་ཕྱིར་རྣམ་པར་དབྱེ་བར་མི་བྱའོ། །སྤུའི་ཁུང་ཞེས་བྱ་བ་ལ་སོགས་པ་སྨོས་པས་ནི། སྐྱེ་བ་ལ་སོགས་པ་ཡོངས་སུ་བསྡུའོ། །སྤྲུལ་པའི་སྐུའི་མཚན་ཉིད་དང་མཛད་པ་མདོར་བསྡུས་ནས་བརྗོད་ཅིང༌། རྒྱལ་བས་འཇིག་རྟེན་མ་ལུས་པའི། །ཞེས་བྱ་བ་ལ་སོགས་པ་སྨོས་སོ། །འདིའི་ཞེས་བྱ་བ་ནི་དེ་བཞིན་གཤེགས་པའི་སྐུ་ལོངས་སྤྱོད་རྫོགས་པའི་མཚན་ཉིད་ཀྱིའོ། །ཁ་ཅིག་སྤྲུལ་པ་ནི་སྤྲུལ་པར་མི་མཛད་དོ་སྙམ་དུ་འཁྲུལ་པ་རྣམ་པར་གཅད་པའི་ཕྱིར། སྤྲུལ་པ་ཡིས་ནི་ཞེས་བྱ་བ་ལ་སོགས་པ་སྨོས་སོ། །གལ་ཏེ་ཅིའི་ཕྱིར་སྤྲུལ་པས་ཇི་ལྟར་བཞེད་པ་བཞིན་སྤྲུལ་པ་མཛད་སྙམ་པ་ལ། བཤད་པ། །ཁྱབ་བདག་མཐུ་ཡི་ཤུགས་ཀྱིས་སོ། །ཁྱབ་བདག་ནི་ལོངས་སྤྱོད་རྫོགས་པའི་སྐུའི་མཚན་ཉིད་ཀྱི་དེ་བཞིན་གཤེགས་པའོ། །ཇི་ལྟ་བུར་མཛད་སྙམ་པ་ལ། བཤད་པ། མཛད་པ་ཀུན་ལ་འཇུག་པ་བཞིན། །ཇི་ལྟར་ཁྱབ་བདག་ཤུགས་ཀྱི་མཐུས་སྤྲུལ་པ་བཞུགས་
པ་དང་འཆག་པ་དང༌། གཟིམས་པ་དང༌། ཆོས་སྟོན་པ་ལ་སོགས་པའི་མཛད་པ་ལ་འཇུག་པར་མཛད་པ་ལྟར། སྤྲུལ་པ་ཡང་དེ་དང་འདྲ་བར་མཛད་དོ། །ཅིའི་ཕྱིར་བཅོམ་ལྡན་འདས་ཀྱི་སྐུ་ཤིན་ཏུ་མདོར་བསྡུས་ནས་བསྟན་ཞེ་ན། བཤད་པ། རྣམ་པ་ཐམས་ཅད་ཅེས་བྱ་བ་ལ་སོགས་པ་སྨོས་སོ། །ཉན་ཐོས་ལ་སོགས་པའི་ཞེས་བྱ་བ་ལ་སོགས་པས་ནི་རང་སངས་རྒྱས་དང་བྱང་ཆུབ་སེམས་དཔའ་དང༌། སོ་སོའི་སྐྱེ་བོ་རྣམས་གཟུང་ངོ༌། །ད་ནི་ང་རྒྱལ་མེད་པ་ཉིད་དུ་སྟོན་ཅིང་གཞན་ལམ་བཟང་པོ་དང་སྦྱར་བར་བཞེད་ནས་བཤད་པ། དེ་ལྟར་ཇི་སྐད་བཤད་པའི་རྣམ་པས། བདེན་གཉིས་རྣམ་ཕྱེ་འདིར། ཅི་ཉེས་པ་ཡོད་དམ་འོན་ཏེ་མེད་ཅེས་བྱ་བ་དཔྱད་པར་གྱིས་ཤིག །ཉེས་པ་མེད་པ་ཁོ་ནའོ་སྙམ་དུ་བསམས་པའོ། །ཅི་ཞིག་བྱ་སྙམ་པ་ལ་བཤད་པ། ཕྱོགས་འཛིན་པ་ཡིས་དཀྲུགས་པའི་ཡིད། །ལེགས་པར་བོར་ལ་སྟེ། ཕྱོགས་འཛིན་པས་དཀྲུགས་པའི་ཡིད་ལ་ཡང་དག་པ་དང་ཡང་དག་པ་མ་ཡིན་པ་བཞིན་དུ་སྣང་ལ། དེ་བཞིན་དུ་ཡང་དག་པ་མ་ཡིན་པ་ཡང༌། ཡང་དག་པ་བཞིན་དུ་སྣང་ངོ་སྙམ་དུ་བསམས་པའོ། །ད་ནི་སྙིང་རྗེས་ནོན་པ་ན། གཞན་དག་གི་སྡང་བ་ཡོངས་སུ་སྤང་བའི་ཕྱིར། བཤད་པ། མི་ཡང་ཤིན་ཏུ་ཐོབ་པར་དཀའ་བ་ཡིན་ན། རབ་ཏུ་སྡང་བ་གང་དུ་དགོས། །ཞེས་བྱ་བར་སྦྱར་རོ། །གང་དུ་ཞེས་བྱ་བ་ནི་སྤོང་བའོ། །མི་དགོས་པ་འབའ་ཞིག་ཏུ་མ་ཟད་ཀྱི། སླར་གནོད་པའི་རྒྱུ་ཡང་ཡིན་པའི་ཕྱིར་དོར་བར་བྱ་སྟེ། འདི་ལྟར་སྡང་བས་ངན་སོང་བ་ནི་མི་འཐོབ་པར་དཀའོ། །ཇི་སྟེ་ཁོ་བོ་ཅག་གི་འདོད་པའི་དོན་བདག་གིས་ལེགས་པར་གཏན་ལ་ཕབ་ཟིན་ཏེ། དེ་བས་ཅིའི་ཕྱིར་ལྟ་བ་གཞན་སྤང་བར་མི་བྱ་སྙམ་པ་ལ། བཤད་པ། བློ་སྦྱང་ཉམ་ཡང་རབ་ཏུ་ཆུང༌། །འདི་སྙམ་དུ་སངས་རྒྱས་རྣམས་དང་སར་ཆུད་པ་རྣམས་ཀྱི་ཤེས་རབ་ལ་ལྟོས་ནས། ཁྱེད་ཀྱི་ཤེས་རབ་ཅི་འདྲ་ཞེས་བྱ་བ་དེ་ལྟ་རེ་ཞིག་ཞོག་གི །མོས་པས་སྤྱོད་པའི་ས་ལ་གནས་པ་རྣམས་ཀྱི་ཤེས་རབ་ལ་ལྟོས་ནས་ཀྱང་ཁྱོད་ཀྱི་ཤེས་རབ་ཚོད་ཡོད་དོ། །དེ་བས་ན་བློ་སྦྱང་བ་ཉམ་ཆུང་བའི་ཕྱིར། ཁྱོད་ཀྱི་དོན་འདི་བདག་གིས་ལེགས་པར་གཏན་ལ་ཕབ་ཟིན་ཏོ་ཞེས་བརྗོད་པ་ནི་ཧ་ཅང་གཟུ་ལུམས་ཆེས་སོ་སྙམ་དུ་
སེམས་པའོ། །ཇི་སྟེ་འཁོར་བར་གནས་པ་འདི་བླ་སྟེ། དེའི་ཕྱིར་ཅིའི་ཕྱིར་མི་སྤང་བར་མི་བྱ་སྙམ་པ་ལ་བཤད་པ། འཁོར་བའི་དགོན་པ་བགྲོད་པར་དཀའ། །ཞེས་བྱ་བ་སྨོས་སོ། །ཇི་སྟེ་ཁོ་བོ་ཅག་མི་འཆི་བ་ཁོ་ནས། དེའི་ཕྱིར་སྡང་བས་ཅི་འཇིགས་སྙམ་དུ་སེམས་ན། དེའི་ཕྱིར་སྲོག་ཀྱང་ཤིན་ཏུ་གཡོ་བ་ཡིན། །ཞེས་བྱ་བ་སྨོས་སོ། །ཇི་སྟེ་གྲོགས་པོ་བཟང་པོ་ལ་བརྟེན་ནས་སྡང་བའི་ཉེས་པ་ཡོངས་སུ་སྤང་བར་བྱའོ་སྙམ་དུ་སེམས་ན། དེའི་ཕྱིར། བཤེས་གཉེན་བཟང་པོའང་རྙེད་དཀའ་ན། །ཞེས་བྱ་བ་སྨོས་སོ། །ཡང་ན་གལ་ཏེ་ཁོ་བོ་ལ་བཤེས་གཉེན་བཟང་པོས་ལྟ་བ་གཞན་འདི་ནི་རིགས་པ་མ་ཡིན་ནོ་ཞེས་བསྟན་པས། དེའི་ཕྱིར་སྡང་བས་ཁོ་བོ་ཅག་མི་འཇིགས་སོ་ཞེ་ན། བཤེས་གཉེན་བཟང་པོའང་རྙེད་དཀའ་ན། །ཞེས་བྱ་བ་སྨོས་སོ། །ཇི་སྟེ་ལྟ་བ་གཞན་ལ་ཁོ་བོ་མོས་པ་མེད་པས་དེའི་ཕྱིར་སྤོང་ངོ་ཞེས་སྨྲ་བར་འགྱུར་ན། བཤད་པ། མོས་པ་མེད་དུ་ཟིན་ན་ཡང༌། །རབ་ཏུ་སྡང་བ་གང་དུ་དགོས། །ཞེས་བྱ་བར་སྦྱར་རོ། །ཅིའི་ཕྱིར་མོས་པ་མེད་སྙམ་པ་ལ། དེ་ནི་འགའ་ལ་བསོད་ནམས་ཀྱིས། །ཞེས་བྱ་བ་སྨོས་ཏེ། ཇི་སྐད་དུ། ཡང་རབ་འབྱོར་སེམས་ཅན་གང་དག་མདོ་སྡེའི་ཚིག་བཤད་པ། ཇི་ལྟ་བུ་འདི་ལ་སེམས་དང་བ་གཅིག་ཙམ་ཡང་རྙེད་པ་དེ་དག་ནི་སངས་རྒྱས་བརྒྱ་སྟོང་དུ་མ་ལ་བསྙེན་བཀུར་བྱས་ཤིང༌། སངས་རྒྱས་བརྒྱ་སྟོང་དུ་མ་ལས་དགེ་བའི་རྩ་བ་སྐྱེད་པ་ཡིན་ཞེས་གསུངས་པ་ལྟ་བུའོ། །སྡང་བ་བོར་ཏེ་ཡང་དག་པ་མཐོང་བ་གོམས་པར་བྱས་པའི་རིམ་གྱིས་མོས་པ་འདི་ནི། རེ་ཞིག་གཅིག་ན་འགྱུར་ཏེ་དེ་ལྟ་མ་ཡིན་ན་ནི། སྡང་པས་ཚིག་པ་ཁྱོད་ལ་ནི་མོས་པ་འབའ་ཞིག་ཏུ་མ་ཟད་ཀྱི། དལ་བ་འབྱོར་པའང་རིང་བར་གསལ། །བདེན་པ་གཉིས་རྣམ་པར་དབྱེ་བ་བྱས་པས། བསོད་ནམས་བསགས་པ་ཡོངས་སུ་བསྔོ་བའི་ཕྱིར། བདེན་པ་གཉིས་ནི་ཞེས་བྱ་བ་ལ་སོགས་པ་སྨོས་ཏེ། ཡེ་ཤེས་སྙིང་པོ་ནི་སངས་རྒྱས་བཅོམ་ལྡན་འདས་ཡིན་ནོ། །བདེན་པ་གཉིས་རྣམ་པར་འབྱེད་པའི་དཀའ་འགྲེལ་སློབ་དཔོན་ཞི་བ་འཚོས་མཛད་པ་རྫོགས་སོ།། །།རྒྱ་གར་གྱི་མཁན་པོ་པྲ་ཛྙཱ་ཝ་རྨ་དང༌། ཛྙཱ་ན་གརྦྷ་དང༌། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།