ཆོས་ཐམས་ཅད་རང་བཞིན་མེད་པར་གྲུབ་པ།
ཆོས་ཐམས་ཅད་རང་བཞིན་མེད་པར་གྲུབ་པ། ཐམས་ཅད་མཁྱེན་པ་ལ་ཕྱག་འཚལ་ལོ། །དངོས་པོ་རྣམས་ལ་ཕྱིན་ཅི་ལོག་གི་བློ་ཅན་རྣམས་ཀྱི་ཀུན་ནས་ཉོན་མོངས་པ་མ་ལུས་པར་རྒྱས་པར་འགྱུར་བས་དེའི་ཕྱིར་དེ་དག་ལ་ཀུན་ནས་ཉོན་མོངས་པ་མ་ལུས་པ་མཐའ་དག་གཅོད་པའི་རྒྱུ་ཕྱིན་ཅི་མ་ལོག་པ་བསྟན་པའི་ཕྱིར་འདི་བརྩམ་མོ། །དེ་ལ་རེ་ཞིག་གང་དག་དོན་དམ་པར་དངོས་པོ་རྣམས་ཀྱི་རང་བཞིན་བརྗོད་པ་ན། ཡང་དག་པར་དེ་དག་རང་བཞིན་དང་བཅས་པར་རྗོད་པར་བྱེད་དེ། དེ་དག་གི་ཕྱིན་ཅི་ལོག་ཡིན་པ་ཁོ་ནར་བསྟན་པའི་ཕྱིར། རིགས་པ་དང་ལུང་དག་གིས་དངོས་པོ་རྣམས་ཀྱི་སྐྱེ་བ་དཔྱད་པར་བྱའོ། །གལ་ཏེ་འདི་སྙམ་དུ་མྱུ་གུ་ལ་སོགས་པའི་སྐྱེ་བ་ས་བོན་ལ་སོགས་པའི་རྐྱེན་ཅན་གནག་རྫི་ཡན་ཆད་ལ་གྲགས་པ་ཁོ་ན་ཡིན་ན། དེ་ལ་དཔྱད་པར་བྱ་ཅི་དགོས། དངོས་པོའི་བདག་ཉིད་གཏན་ལ་ཕབ་པ་ལ་ནི་རྟོག་པ་དང་ལྡན་པ་རྣམས་དཔྱད་པར་རུང་བ་མ་ཡིན་ཏེ།
ཐུག་པ་མེད་པར་ཐལ་བར་འགྱུར་བའི་ཕྱིར་དང༌། རྟོག་པ་དང་མི་ལྡན་པ་ཉིད་དུ་ཐལ་བར་འགྱུར་བའི་ཕྱིར་རོ་སྙམ་དུ་སེམས་ན། དེ་ནི་རིགས་པ་མ་ཡིན་ཏེ། ཚད་མས་གཏན་ལ་མ་ཕབ་པའི་ཕྱིར་དང༌། གྲགས་པ་ཡང་ལོག་པར་སྲིད་པའི་ཕྱིར་རོ། །དེ་ལྟ་མ་ཡིན་ན་རང་ལ་གྲགས་པའི་དོར་བྱས་ཏེ་འཇུག་པ་རྣམས་སུ་ཡང་གང་ལ་ཡང་སླུ་བར་མི་འགྱུར་རོ། །དེ་ལ་དཔེར་ན་འཇིག་པ་ཡང་རྒྱུ་དང་ལྡན་པ་ཉིད་དུ་གྲགས་ལ། གཟུགས་ལ་སོགས་པ་ཡང་ཕྱི་རོལ་གྱི་དོན་ཉིད་དུ་གྲགས་སུ་ཟིན་ཀྱང༌། དཔྱད་པ་བྱས་ན་ཚད་མས་གནོད་པ་སྲིད་པ་དེ་བཞིན་དུ་འདི་ལ་ཡང་གྲགས་པ་བརྫུན་པའི་ངོ་བོ་ཡང་སྲིད་པས་དཔྱད་པར་བྱ་བར་རུང་བ་ཉིད་དོ། །དེ་ལ་ལུང་རིགས་པ་དང་བྲལ་བ་ནི་རྟོག་པ་དང་ལྡན་པ་རྣམས་རངས་པར་མི་འགྱུར་ལ། རིགས་པས་བརྟན་པོར་བྱས་པའི་ལུང་ཡང་དོན་གཞན་དུ་དྲང་བར་མི་ནུས་པས་དེའི་ཕྱིར་རེ་ཞིག་རིགས་པས་དཔྱད་པར་བྱའོ། །སྦྱོར་བ་ནི་གང་དང་གང་དག་ཡང་དག་པར་རང་དང་གཞན་དང་གཉི་ག་ལས་སྐྱེ་བ་དང༌། རྒྱུ་མེད་པ་ལས་སྐྱེ་བ་དང་བྲལ་བ་དེ་དག་ནི་ཡང་དག་པར་ན་རང་བཞིན་མེད་པ་ཡིན་ཏེ། །དཔེར་ན་ནམ་མཁའི་པདྨ་ལ་སོགས་པ་བཞིན་ནོ། །རང་དང་གཞན་གྱི་སྐྱེ་བོས་སྨྲས་པ་འདི་དག་ཀྱང་དེ་དང་འདྲ་བས་དོན་གྱིས་ན་ཁྱབ་པར་བྱེད་པ་མི་དམིགས་པ་ཡིན་ཏེ། སྐྱེ་བས་དངོས་པོ་རང་བཞིན་ལ་ཁྱབ་པར་བྱེད་པའི་ཕྱིར་རོ། །འདི་ལ་དམ་བཅས་པ་ལ་མངོན་སུམ་གྱིས་གནོད་པ་ཡང་མི་བསམ་སྟེ། དོན་དམ་པར་རང་བཞིན་མེད་པ་ཉིད་དུ་སྒྲུབ་པར་བྱེད་པའི་ཕྱིར་རོ། །དངོས་པོ་རྣམས་རང་བཞིན་དང་བཅས་པ་ཉིད་དུ་དོན་དམ་པར་ཡོད་པར་མངོན་སུམ་དུ་གྲགས་པ་ནི་མ་ཡིན་ཏེ། འདི་ལྟར་རེ་ཞིག་ཕྱི་རོལ་གྱི་དོན་དམ་པ་པ་ཡིན་པར་འདོད་པ་ཡན་ལག་ཅན་གྱི་ངོ་བོའམ། རྡུལ་ཕྲ་རབ་བསགས་པའི་བདག་ཉིད་གཅིག་ཡིན་གྲང་ནི། །དེ་གཉི་གའི་ངོ་བོ་ཡང་མངོན་སུམ་དུ་རིགས་པ་མ་ཡིན་ཏེ། ལག་པ་ལ་སོགས་པ་ཡན་ལག་སྣང་བ་མ་གཏོགས་པ་ཡན་ལག་ཅན་སྣང་བ་ཉམས་སུ་མྱོང་བ་ཡང་མེད་ལ། རྡུལ་ཕྲ་རབ་རྣམས་ཀྱང་རགས་པ་དང་རྣམ་པ་གཅིག་ཏུ་སྣང་བ་ཅན་གྱི་ཤེས་པའི་ཡུལ་དུ་རུང་བ་མ་ཡིན་ཏེ། དེ་དང་རྣམ་པ་མི་འདྲ་བའི་ཕྱིར་རོ། །
ཤེས་བྱ་ནང་གི་ཡིན་པར་སྨྲ་བ་གང་དག་གཉིས་མེད་པའི་རྣམ་པར་ཤེས་པ་ཉིད་དེ་ཁོ་ན་ཡིན་ནོ་ཞེས་ཟེར་བ་དེ་དག་གི་ལྟ་བ་ལ་ཡང་དེ་མངོན་སུམ་དུ་མ་གྲུབ་སྟེ། དུས་ཐམས་ཅད་དུ་གཟུང་བ་དང་འཛིན་པར་སྣང་བའི་ཤེས་པ་ཉམས་སུ་མྱོང་བའི་ཕྱིར་རོ། །དེ་ལྟ་མ་ཡིན་ན་ཐམས་ཅད་དེ་ཁོ་ན་མཐོང་བ་ཁོ་ནར་འགྱུར་ཏེ། དེས་ན་ཐར་པ་དོན་དུ་གཉེར་བ་རྣམས་ཀྱིས་འཕགས་པའི་ལམ་བསྐྱེད་པའི་འབད་པ་དོན་མེད་པར་འགྱུར་རོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས། མིག་དང་རྣ་བ་སྣ་ཡང་ཚད་མ་མིན། །ལྕེ་དང་ལུས་དང་སེམས་ཀྱང་ཚད་མ་མིན། །གལ་ཏེ་དབང་པོ་འདི་དག་ཚད་ཡིན་ན། །འཕགས་པའི་ལམ་གྱིས་སུ་ལ་ཅི་ཞིག་བྱ། །འདི་ལྟར་དབང་པོ་འདི་དག་ཚད་མིན་ཏེ། །ངོ་བོ་ཉིད་ཀྱི་བེམས་པོ་ལུང་མ་བསྟན། །དེ་ཕྱིར་མྱ་ངན་འདས་པའི་ལམ་འདོད་གང༌། །དེས་ནི་འཕགས་པའི་ལམ་གྱི་བྱ་བ་བྱོས། །ཞེས་གསུངས་སོ། །གལ་ཏེ་དངོས་པོ་ཐམས་ཅད་རང་བཞིན་མེད་པ་ཉིད་ཡིན་ན། འོ་ན་ནི་དེའི་ཚེ་དེ་དག་ཡུལ་དང་དུས་ལ་སོགས་པ་ངེས་པར་སྔོན་པོ་དང༌། ཕྱ་ལེ་བ་ལ་སོགས་པའི་ངོ་བོར་སྣང་བ་ཇི་ལྟར་མི་འགལ་ཞེ་ན། མ་ཡིན་ཏེ། འཁྲུལ་པའི་རྣམ་པར་ཤེས་པ་ལ་སྣང་བའི་གཟུགས་བཞིན་དུ་བརྫུན་པ་ཡང་སྣང་བའི་ཕྱིར་རོ། །ཇི་ལྟར་འཁྲུལ་པའི་རྣམ་པར་ཤེས་པ་ལ་སྣང་བའི་རྣམ་པ་རྣམས་དོན་དམ་པར་རང་བཞིན་མེད་པ་ཡིན་ཡང༌། ཡུལ་དང་དུས་ལ་སོགས་པ་ངེས་པར་སྣང་བ་ལྟར་གཞན་དག་ཀྱང་དེ་དང་འདྲ་བས་མི་འགལ་བ་ཉིད་དོ། །གང་དེ་ལྟར་སྣང་བར་འགྱུར་བ་ཟླ་བ་གཉིས་ལ་སོགས་པ་ཕྱི་རོལ་གྱི་དོན་དེ་ལྟ་བུ་དེ་ཡང་མེད་ལ། ཡུལ་དང་དུས་གཞན་ན་ཡོད་པའི་དོན་ཡང་ཡུལ་དང་དུས་ལ་སོགས་པ་སྣང་བ་དང་འབྲེལ་བའི་ངོ་བོ་ཉིད་མེད་ན། གང་གིས་ན་འདི་དེའི་ངོ་བོར་སྣང་ངོ་ཞེས་བྱ་བར་འགྱུར། གཞན་ནི་གཞན་གྱི་ངོ་བོར་སྣང་བ་རིགས་པ་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །དེ་ལྟ་ན་དོན་དམ་པ་ཐམས་ཅད་ཀྱང་རྣམ་པར་ཤེས་པ་ཐམས་ཅད་ཀྱི་ཡུལ་དུ་འགྱུར་རོ། །གང་གིས་ན་སྣང་བར་འགྱུར་བའི་ངོ་བོ་གཞན་ཡང་དེ་ལ་མེད་དེ། དུ་མར་ཐལ་བར་འགྱུར་བའི་ཕྱིར་རོ། །ཟླ་བ་གཉིས་ལ་སོགས་པ་དེ་ཤེས་པའི་ངོ་བོར་བདེན་པ་ཉིད་དུ་
རིགས་པ་མ་ཡིན་ཏེ། ཤེས་པ་གཅིག་དང་ཐ་མི་དད་པའི་ངོ་བོ་ཉིད་ཡིན་པར་ཤེས་པའི་རང་གི་ངོ་བོ་བཞིན་སྣ་ཚོགས་མ་ཡིན་ངོ་བོ་ཉིད་དུ་ཐལ་བར་འགྱུར་བའི་ཕྱིར་རམ། དེ་དང་ཤེས་པ་ཐ་མི་དད་པའི་ཕྱིར་དེའི་རང་གི་ངོ་བོ་བཞིན་སྣ་ཚོགས་ཉིད་དུ་ཐལ་བར་འགྱུར་བའི་ཕྱིར་རོ། །ཡུལ་ལ་བཀྲམ་པ་ལྟར་འདུག་པར་ཡོངས་སུ་འཛིན་པར་སྣང་བའི་རྣམ་པ་སྣ་ཚོགས་ཉིད་ཡིན་པར་གཞུང་གཟུགས་པའི་ཕྱིར་ཤེས་པ་དུ་མ་སྐྱེ་བར་རྟོགས་པ་ཡང་ལེགས་པ་མ་ཡིན་ཏེ། ཤེས་པ་རྣམས་ནི་ལུས་མེད་པ་ཉིད་ཀྱི་ཕྱིར་ཡུལ་ལ་བཀྲམ་པ་ལྟར་འདུག་པར་ཡོངས་སུ་འཛིན་པ་མེད་པའི་ཕྱིར་རོ། །དེ་ལྟ་བས་ན་དོན་དམ་པར་ན་དེ་དག་ཤེས་པའི་ངོ་བོ་ཉིད་དུ་ཡང་མི་སྲིད་དོ། །འོན་ཀྱང་འདི་དག་ཡུལ་དང་དུས་ལ་སོགས་པ་ངེས་པར་ཡང་སྣང་སྟེ། དེ་ལྟ་བས་ན་དངོས་པོ་ཐམས་ཅད་དོན་དམ་པའི་རང་བཞིན་དང་བྲལ་བ་ཡིན་ཡང་སྣང་བ་མི་འགལ་བ་ཉིད་པས་དམ་བཅས་པ་ལ་མངོན་སུམ་གྱི་གནོད་པ་མེད་དོ། །གལ་ཏེ་འདི་སྙམ་དུ་མངོན་སུམ་གྱིས་གནོད་པ་མེད་དུ་ཟིན་ཀྱང་རང་གི་ཚིག་དང་འགལ་བ་ཉིད་ནི་གསལ་རབ་ཏུ་དམིགས་པ་ཁོ་ན་སྟེ། འདི་ལྟར་གཞན་དག་ལ་ངེས་པ་སྐྱེད་པར་འདོད་དེ། གཏན་ཚིགས་སྨྲ་བས་གཏན་ཚིགས་ཀྱིས་ངེས་པ་སྐྱེ་བར་ཁས་བླངས་པའི་ཕྱིར་ངེས་པ་ནི་རང་བཞིན་དང་བཅས་པ་ཁས་བླང་བར་འགྱུར་རོ། །དེ་ལྟ་མ་ཡིན་ན་གཏན་ཚིགས་སྦྱོར་བ་དོན་མེད་པ་ཁོ་ནར་འགྱུར་རོ། །ཁས་བླངས་པ་འདིས་ན་རང་བཞིན་མེད་པ་ཉིད་དུ་དམ་བཅས་པ་ལ་གནོད་པས་ངའི་མ་ནི་མོ་གཤམ་ཡིན་ནོ་ཞེས་བྱ་བ་བཞིན་དུ་རང་གི་ཚིག་དང་འགལ་བར་གསལ་རབ་ཉིད་དོ་སྙམ་དུ་སེམས་ན། དེ་ཡང་རིགས་པ་མ་ཡིན་ཏེ། ངེས་པ་བསྐྱེད་པའི་ཕྱིར་གཏན་ཚིགས་སྦྱོར་མོད་ཀྱི། དེས་ངེས་པ་དོན་དམ་པར་སྐྱེ་བར་ཁས་བླངས་བར་ནི་མི་འགྱུར་རོ། །འོན་ཀྱང་སྐྱེ་བ་ཙམ་ཁས་བླངས་བར་འགྱུར་གྱི། སྐྱེ་བའི་ཁྱད་པར་ནི་མ་ཡིན་ནོ། །དོན་དམ་པའི་སྐྱེ་བ་བཀག་པས་ནི་འདིར་དོན་དམ་པ་པར་རང་བཞིན་མེད་པར་སྒྲུབ་པར་འདོད་མོད་ཀྱི། སྐྱེ་བ་ཙམ་བཀག་པས་ནི་མ་ཡིན་ནོ། །དེའི་ཕྱིར་གཏན་ཚིགས་ཀྱིས་ངེས་པ་དོན་དམ་པར་སྐྱེ་བ་མེད་ཀྱིས་ཀྱང་གདོང་ལས་གཟུགས་བརྙན་བཞིན་
དུ་ཀུན་རྫོབ་པའི་སྐྱེ་བ་མི་འགལ་བ་ཉིད་པས་དམ་བཅས་པ་ལ་ཡང་རང་གི་ཚིག་དང་འགལ་བ་མེད་དོ། །ངེས་པ་ཀུན་རྫོབ་པ་དེ་ཡང་དོན་དམ་པ་རྟོགས་པའི་གཏན་ཚིགས་སུ་ཚད་མ་ཉིད་དུ་འདོད་པས་ཉེས་པ་མེད་དོ། །འདིས་ནི་ལས་དང་འབྲས་བུར་འབྲེལ་པ་དང་རྟེན་ཅིང་འབྲེལ་པར་འབྱུང་བ་ལ་སོགས་པ་སྟོན་པར་བྱེད་པའི་ལུང་དང་འགལ་བའི་ལན་ཡང་བཏབ་པ་ཡིན་ཏེ། ལས་དང་འབྲས་བུར་འབྲེལ་པ་ལ་སོགས་པ་ཀུན་རྫོབ་པ་ཁས་བླངས་བའི་ཕྱིར་རོ། །ཀུན་རྫོབ་པའི་ངོ་བོ་ཉིད་ཡིན་ཡང་བརྒལ་ཞིང་བརྟག་པ་མཚུངས་པ་མ་ཡིན་ཏེ། དེ་བརྟག་མི་བཟོད་པ་ཉིད་ཀྱི་ཕྱིར་ཀུན་རྫོབ་པ་ཡིན་པའི་ཕྱིར་རོ། །དེ་ལྟ་མ་ཡིན་ན་དེ་དོན་དམ་པའི་ངོ་བོ་ཁོ་ནར་འགྱུར་གྱི། ཀུན་རྫོབ་པ་ནི་མ་ཡིན་ནོ། །དེ་ཉིད་ཀྱི་ཕྱིར་ཀུན་ནས་ཉོན་མོངས་པ་དང་རྣམ་པར་བྱང་བ་ལ་སོགས་པའི་རྟགས་དང༌། དོན་དམ་པའི་རང་བཞིན་དུ་འབྲེལ་པ་གང་དུ་ཡང་མ་གྲུབ་པས་རྗེས་སུ་དཔག་པས་གནོད་པ་ཡང་མི་སྲིད་དོ། །དེས་ཕྱིར་ཀུན་ནས་ཉོན་མོངས་པ་ལ་སོགས་པ་རྒྱུ་ཙམ་ཞིག་ཏུ་སྒྲུབ་ན་ནི་གྲུབ་པ་སྒྲུབ་པ་ཉིད་ཡིན་ཏེ། དེ་ཀུན་རྫོབ་པའི་རྒྱུ་ཡིན་པར་ཁས་ལེན་པའི་ཕྱིར་རོ། །མིང་ལ་ནི་བརྩད་པ་མེད་དེ། བརྫུན་པ་ཡང་གྲགས་པར་བསྒྲུབ་པའི་ཕྱིར་དང༌། ཚད་མས་ཀྱང་གནོད་པའི་ཕྱིར་རོ། །འཕགས་པ་ལང་ཀར་གཤེགས་པ་ལས། བྱང་ཆུབ་སེམས་དཔའ་དངོས་པོ་ཐམས་ཅད་རང་བཞིན་མེད་དོ་ཞེས་དམ་བཅས་པར་མི་བྱའོ་ཞེས་བསྟན་པ་གང་ཡིན་པ་དེ་ཡང་གཅིག་ཁོ་ནར་རང་བཞིན་མེད་པར་དམ་འཆའ་བ་དགག་པ་ཡིན་པར་ལྟ་སྟེ། ཀུན་རྫོབ་པའི་རང་བཞིན་ཁས་ལེན་པའི་ཕྱིར་གཅིག་ཁོ་ན་དགག་པ་ནི་རིགས་པ་མ་ཡིན་ནོ། །དེ་ལྟ་མ་ཡིན་ན་མངོན་སུམ་ལ་སོགས་པས་གནོད་པར་ཐལ་བར་འགྱུར་བའི་ཡང་གསལ་རབ་ལ། དེ་ལྟ་བུ་རང་བཞིན་མེད་པ་ཉིད་དུ་སྒྲུབ་པར་བྱེད་པའི་ཚད་མ་ཡང་ཅུང་ཟད་ཀྱང་མེད་དོ། །དམ་བཅས་པ་ཙམ་གྱིས་ཀྱང་འདོད་པའི་དོན་འགྲུབ་པ་མ་ཡིན་ཏེ། ཐམས་ཅད་ཀྱི་ཐམས་ཅད་དུ་འགྲུབ་པར་ཐལ་བར་འགྱུར་བའི་ཕྱིར་རོ། །དེ་ལྟ་བས་ན་དོན་དམ་པའི་རང་བཞིན་དགག་པར་བྱའི། སྤྱིར་ནི་མ་ཡིན་ནོ། །དེ་བས་ཀྱང་དེ་ཉིད་ལས།
བློ་གྲོས་ཆེན་པོ་སྣང་བ་དང་མི་སྣང་བའི་མཚན་ཉིད་ཡིན་པའི་ཕྱིར་བྱང་ཆུབ་སེམས་དཔའ་དངོས་པོ་ཐམས་ཅད་རང་བཞིན་མེད་དོ་ཞེས་དམ་བཅའ་བར་མི་བྱའི། བློ་གྲོས་ཆེན་པོ་འོན་ཀྱང་བྱང་ཆུབ་སེམས་དཔའ་ཆོས་ཐམས་ཅད་སྒྱུ་མ་དང་རྨི་ལམ་དང་འདྲའོ་ཞེས་བསྟན་པར་བྱའོ་ཞེས་གསུངས་ཏེ། དེ་ལ་མདོའི་དོན་ནི་སྣང་བའི་མཚན་ཉིད་ནི་ཀུན་རྫོབ་ཏུའོ། །མི་སྣང་བའི་མཚན་ཉིད་ནི་དོན་དམ་པར་རོ་ཞེས་བྱ་བར་མངོན་ནོ། །དེའི་ཕྱིར་དེ་ལྟར་རེ་ཞིག་དམ་བཅས་པའི་དོན་མི་འགལ་བ་ཡིན་ནོ། །གཏན་ཚིགས་མ་གྲུབ་པ་ཉིད་དུ་ཡང་དོགས་པར་མི་བྱ་སྟེ། འདི་ལྟར་རེ་ཞིག་དངོས་པོ་རྣམས་རང་ལས་སྐྱེ་བར་ནི་རིགས་པ་མ་ཡིན་ཏེ། རང་གི་ངོ་བོ་ཡོད་པ་དང་མེད་པ་བདག་ཉིད་ཀྱི་རྒྱུར་མི་འཐད་པའི་ཕྱིར་རོ། །དངོས་པོའི་རྒྱུ་རང་གི་ངོ་བོ་ཡིན་ན། ཡོད་པའམ་མེད་པ་ཞིག་ཡིན་གྲང་ན། རེ་ཞིག་ཡོད་པ་ནི་མ་ཡིན་ཏེ། དེ་ལ་ཅུང་ཟད་ཀྱང་བྱར་མེད་པའི་ཕྱིར་རི་འབིགས་བྱེད་དང་གངས་ཅན་བཞིན་ནོ། །གང་གི་ཚེ་དངོས་པོའི་རང་གི་ངོ་བོ་གྲུབ་པ་དེའི་ཚེ་ཉིད་ན་དེ་དང་ཐ་མི་དད་པའི་ཕྱིར་དངོས་པོ་ཡང་གྲུབ་ཟིན་པས་དེ་ལས་རྒྱུའི་བྱ་བ་མེད་དེ། ཐུག་པ་མེད་པར་ཐལ་བར་འགྱུར་བའི་ཕྱིར་རོ། །གང་གྲུབ་ན་གང་ཞིག་མི་འགྲུབ་པ་དེ་ནི་དེའི་རང་གི་ངོ་བོ་ཡིན་པར་ཡང་རིགས་པ་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །ཐ་དད་པ་མ་ཡིན་ན་ཡང་རྒྱུ་དང་འབྲས་བུའི་དངོས་པོར་རིགས་པ་མ་ཡིན་ཏེ། དེ་གཉིས་ཀྱི་རྒྱུ་ནི་ཐ་དད་པ་ཡིན་པའི་ཕྱིར་རོ། །དེ་ལྟ་མ་ཡིན་ན་དེའི་རྒྱུ་མེད་པའི་ཕྱིར་འདི་ནི་འབྲས་བུའོ་འདི་ནི་རྒྱུའོ་ཞེས་དེའི་ཐ་སྙད་མ་འཆོལ་བར་འདོགས་པར་མི་འགྱུར་གྱི། རྒྱུ་དང་འབྲས་བུ་ཞེས་མིང་བཏགས་པ་འབའ་ཞིག་ཏུ་འགྱུར་བར་ཟད་དེ། མིང་ལ་ནི་བརྩད་པ་མེད་དོ། །ཅི་སྟེ་གནས་སྐབས་ཐ་དད་པ་རྒྱུ་ཡིན་པར་རྟོག་པར་བྱེད་ན། གལ་ཏེ་དེ་ལྟ་ན་འོ་ན་ནི་རང་གི་ངོ་བོ་ཁོ་ན་རྒྱུར་མི་འགྲུབ་སྟེ། གནས་སྐབས་རྣམས་དང་གནས་པོ་ཐ་མི་དད་པའི་ཕྱིར་རོ། །གནས་སྐབས་ཐ་དད་པར་ཁས་ལེན་ན་ནི་དེ་དང་འདྲ་བར་གནས་པོ་ཡང་ཐ་དད་པར་འགྱུར་ཏེ། དེའི་ཕྱིར་རྣ་ཆ་གདུབ་ཀོར་ལ་སོགས་པ་རྒྱུའི་གནས་སྐབས་ཀྱི་གསེར་གྱི་རྫས་ཀྱང་གཞན་ཁོ་ན་ཡིན་ལ། དཔུང་རྒྱན་ལ་སོགས་པ་འབྲས་
བུའི་གནས་སྐབས་ཀྱི་ཡང་གཞན་ཁོ་ན་ཡིན་ན། རང་གི་ངོ་བོ་ཁོ་ན་རྒྱུར་ཇི་ལྟར་འགྱུར། ཅི་སྟེ་གནས་པོ་དང་འདྲ་ན་ནི་གནས་སྐབས་གཉིས་ཀྱང་གཅིག་པའི་ངོ་བོར་འགྱུར་ཏེ། དེའི་ཕྱིར་ཉེས་པ་སོ་ན་འདུག་པ་ཁོ་ན་ཡིན་ནོ། །དེ་ལྟ་མ་ཡིན་ན་གནས་པོ་དང་གནས་སྐབས་རྣམས་ཐ་དད་པ་ཁོ་ནར་འགྱུར་ཏེ། དེ་གྲུབ་པ་དང་བདེ་བ་གཅིག་པ་མ་ཡིན་པའི་ཕྱིར་རོ། །ཡང་ཐ་དད་པར་ཁས་ལེན་ན་ནི་གནས་སྐབས་དག་ཁོ་ན་རྒྱུ་དང་འབྲས་བུར་འགྱུར་གྱི། རང་གི་ངོ་བོ་ནི་མ་ཡིན་ནོ། །དེ་ལྟ་བས་ན་ངོ་བོ་ཉིད་འདྲ་བ་གཞན་དང་གཞན་འབྱུང་བས་བསླུས་པ་ནི་གསེར་ལ་སོགས་པ་དེ་ཉིད་འདི་ཡིན་ནོ་ཞེས་ཐ་སྙད་འདོགས་ཀྱི། དེ་ཉིད་གཞན་དུ་འགྱུར་བ་མཐོང་ནས་ནི་མ་ཡིན་ནོ། །དེ་ཉིད་ནི་གཞན་དུ་མི་འགྱུར་ཏེ། དེ་ཁོ་ན་དང་གཞན་ནི་ཕན་ཚུན་སྤངས་ཏེ་གནས་པའི་མཚན་ཉིད་ཡིན་པའི་ཕྱིར་རོ། །འདི་ལྟར་དངོས་པོའི་དེ་ཁོ་ན་ནི་ཡོངས་སུ་གཅོད་པ་ན་གཞན་ཉིད་རྣམ་པར་བཅད་ནས་ཡོངས་སུ་གཅོད་ལ་གཞན་ཉིད་ཀྱང་དེ་ཉིད་རྣམ་པར་བཅད་ནས་ཡོངས་སུ་གཅོད་དོ། །དེ་ལས་བཟློག་པའི་རྣམ་པར་བཅད་ན་ནི་ཡོངས་སུ་གཅོད་པ་མ་ཡིན་པ་ཁོ་ནར་འགྱུར་རོ། །གང་རྣམ་པར་བཅད་པ་མེད་པར་གང་ཡོངས་སུ་གཅོད་པ་མེད་པ་དེ་གཉིས་ནི་ཕན་ཚུན་སྤངས་ཏེ་གནས་པའི་མཚན་ཉིད་ཡིན་ལ། གང་དག་ཕན་ཚུན་སྤངས་ཏེ་གནས་པའི་མཚན་ཉིད་ཡིན་པ་དེ་དག་ཀྱང་ཆོས་ཅན་གཅིག་ལ་ཅིག་ཅར་འདུར་མི་རུང་བ་སྟེ། དཔེར་ན་ལུས་དང་ལུས་མེད་པ་ཐ་དད་པ་ལྟ་བུའོ། །དེ་ལྟ་མ་ཡིན་ན་ཐམས་ཅད་རྫས་གཅིག་ཁོ་ནར་འགྱུར་ཏེ། དེས་ན་ལྷན་ཅིག་སྐྱེ་བ་དང་འཇིག་པར་ཐལ་བར་འགྱུར་རོ། །དེ་ལྟ་བས་ན་དེ་ཉིད་གཞན་དུ་འགྱུར་ཞེས་བྱ་བ་འདིར་རྨོངས་པ་རབ་ཏུ་མང་པོས་སྤུངས་བསྐྱེད་པར་ཟད་དོ། །གཞན་ཡང་ཡོངས་སུ་འགྱུར་བ་ཞིག་ཡིན་ན། ངོ་བོ་སྔ་མ་ཡོངས་སུ་བོར་ནས་སམ། ཡོངས་སུ་མ་བོར་ནས་འགྱུར་གྲགས་དེ་བཞིན་དུ་ཆོས་དག་གམ། ཆོས་ཅན་ཞིག་འགྱུར་གྲང་ཞེས་རྣམ་པར་བརྟག་སྟེ། དེ་ལ་གལ་ཏེ་ཡོངས་སུ་བོར་ནས་ཞེས་བྱ་བའི་ཕྱོགས་ཡིན་ན་ནི་དེའི་ཚེ་དངོས་པོ་ནི་ཆ་ཤས་མེད་པ་ཡིན་པའི་ཕྱིར་སྔ་མའི་ངོ་བོ་ནི་བདག་
ཉིད་ཐམས་ཅད་ཀྱིས་རྣམ་པར་ཞིག་ན་རྗེས་སུ་འགྲོ་བ་ཅན་གྱི་ངོ་བོ་ཉིད་འགའ་ཡང་མེད་པར་འགྱུར་བ་ག་ལ་ཡོད། འོན་ཏེ་ཡོངས་སུ་མ་བོར་ནས་ཞེས་བྱ་བའི་ཕྱོགས་ཡིན་ན་ན་དེའི་ཚེ་གནས་སྐབས་འཆོལ་བར་འགྱུར་ཏེ། དེས་ན་རྒན་པོ་ལ་སོགས་པའི་གནས་སྐབས་ནའང་བུས་བ་ལ་སོགས་པའི་གནས་སྐབས་དམིགས་པར་འགྱུར་རོ། །ཆོས་དག་ཀྱང་འགྱུར་བར་རིགས་པ་མ་ཡིན་ཏེ། དེ་དག་ནི་དེ་དང་ཐ་མི་དད་པ་ཉིད་པས་ཆོས་ཅན་ནི་རང་གི་ངོ་བོ་བཞིན་དུ་ངོ་བོ་གཅིག་པའི་ཕྱིར་ལ། ཆོས་ཅན་ཡང་དེ་དང་ཐ་མི་དད་པ་ཉིད་པས་ཆོས་ཀྱི་རང་གི་ངོ་བོ་བཞིན་དུ་སྐྱེ་བ་དང་འཇིག་པར་ཐལ་བར་འགྱུར་བའི་ཕྱིར་རོ། །དེ་ལྟ་མ་ཡིན་ན་ཆོས་དང་ཆོས་ཅན་དག་ཐ་དད་པ་ཁོ་ནར་འགྱུར་ཏེ། དེའི་ཚེ་ཆོས་སྔ་མ་ནི་རྒྱུ་མེད་པ་ཁོ་ནར་འཇིག་ལ། སྔོན་མེད་པའི་ཆོས་ནི་འབྱུང་བས་གང་ཞིག་འབྱུང་བར་འགྱུར། ཐ་དད་པ་ཡིན་ན་ཆོས་དང་ཆོས་ཅན་གྱི་དངོས་པོར་ཡང་རིགས་པ་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །ཆོས་ཅན་ཡང་འགྱུར་བ་མ་ཡིན་ཏེ། དེ་ནི་ཁྱོད་ཀྱི་ལུགས་ཀྱིས་དུས་ཐམས་ཅད་དུ་ངོ་བོ་གཅིག་པ་ཡིན་པའི་ཕྱིར་རོ། །དེ་ཉིད་གཞན་དུ་འགྱུར་བར་མི་རིགས་པར་ཡང་སྔར་བསྒྲུབས་ཟིན་ཏོ། །གཞན་ཡང་གལ་ཏེ་ཆོས་ཅན་དེ་རང་བཞིན་གྱིས་བརྟན་པ་ཡིན་ན། དེའི་ཚེ་དེ་ཇི་ལྟར་གཞན་དུ་འགྱུར། ནམ་མཁའ་ལ་སོགས་པ་ལྟ་བུ་ངོ་བོ་གཅིག་པ་ནི་རང་གི་ངོ་བོ་སྔ་མ་མ་བོར་བར་གཞན་དུ་འགྱུར་བར་རིགས་པ་མ་ཡིན་ཏེ། མི་བརྟན་པའི་ངོ་བོ་ཉིད་དུ་ཐལ་བར་འགྱུར་བའི་ཕྱིར་རོ། །འོ་ན་མི་བརྟན་པའི་བདག་ཉིད་ཡིན་ན་ནི། དེའི་ཚེ་གཡོ་བའི་རང་བཞིན་ཅན་ཡིན་པས་རྒྱུ་མེད་པར་འཇིག་པར་འགྱུར་གྱི། དེ་ཕྱི་མར་མི་གནས་པའི་ཕྱིར་གཞན་དུ་ནི་མི་འགྱུར་རོ། །དེ་ལྟ་བས་ན་འགྱུར་བར་སྨྲ་བ་འདི་ནི་བཟང་པོ་མ་ཡིན་ནོ། །དེ་ལྟ་ན་ཅུང་ཟད་ཀྱང་མི་བྱེད་པའི་ཕྱིར། རང་གི་ངོ་བོ་ཡོད་པ་ཡང་བདག་ཉིད་ཀྱི་རྒྱུའི་དངོས་པོར་ཡོད་པ་མ་ཡིན་ནོ། །མེད་པ་ཡང་མ་ཡིན་ཏེ། དེ་ཡང་ནུས་པ་ཐམས་ཅད་དང་བྲལ་བའི་མཚན་ཉིད་ཡིན་པས་ཅུང་ཟད་མི་བྱེད་པའི་ཕྱིར་རོ། །མེད་པའི་མཚན་ཉིད་ནི་འདི་ཁོ་ན་ཡིན་ཏེ། འདི་ལྟར་ནུས་པ་ཐམས་ཅད་དང་བྲལ་བའོ། །གང་ཞིག་ནུས་པའི་ནོར་མ་ལུས་པ་དང་བྲལ་བ་
དེས་ཇི་ལྟར་ཕན་འདོགས་པར་ནུས་ཏེ། ཕན་པའི་རྒྱུ་ནི་ནུས་པ་ཡིན་པའི་ཕྱིར་རོ། །དེ་ལྟ་བས་ན་གྲངས་ཅན་ལ་སོགས་པས་དངོས་པོ་རྣམས་རང་སྐྱེ་བར་ཡོངས་སུ་བརྟགས་པ་དེ་རིགས་པ་མ་ཡིན་ནོ། །གཞན་ལས་ཤེས་བྱའི་ཕྱོགས་ཀྱང་རིགས་པ་མ་ཡིན་ཏེ། འདི་ལྟར་གཞན་ལས་སྐྱེ་བར་འགྱུར་ན། རྟག་པའམ་མི་རྟག་པའམ། གཉི་གའམ་གཉི་ག་མ་ཡིན་པ་ལས་འགྱུར་གྲང་ཞེས་བརྟག་སྟེ། རེ་ཞིག་རྟག་པའི་དངོས་པོ་ཅི་ཡང་མེད་པའི་ཕྱིར་རྟག་པ་ལས་ནི་མ་ཡིན་ནོ། །རྟག་པའི་དངོས་པོ་དེར་ཡོངས་སུ་བརྟག་ན། དོན་བྱེད་ནུས་པ་ཞིག་ལ་རྒྱུར་ཡོངས་སུ་བརྟག་སྟེ། དཔེར་ན་གཞན་དག་གིས་བདག་ལ་སོགས་པ་བདེ་བ་ལ་སོགས་པའི་རྒྱུར་ཡོངས་སུ་བརྟགས་པ་ལྟ་བུ་ཞིག་གམ་མི་ནུས་པ་ཞིག་པ་སྟེ། དཔེར་ན་བྱེ་བྲག་ཏུ་སྨྲ་བ་རྣམས་ཀྱིས་ནམ་མཁའ་ལ་སོགས་པ་གསུམ་ནུས་པ་མེད་པ་ཁོ་ན་ལ་དངོས་པོ་ཉིད་དུ་ཡོངས་སུ་བརྟགས་པ་ལྟ་བུ་ཞིག་ཡིན་གྲང་ན། དེ་ལ་དོན་བྱེད་ནུས་པ་གང་ཡིན་པ་དེ་ནི་རྟག་པ་ཡིན་པར་རིགས་པ་མ་ཡིན་ཏེ། རྟག་པ་ནི་ཀུན་རྫོབ་ཏུ་ཡང་རིམ་དང་ཅིག་ཤོས་དག་གིས་དོན་བྱེད་པ་མི་འཐད་པའི་ཕྱིར་རོ། །རྒྱུ་ནུས་པ་ཐོགས་པ་མེད་པ་ཡིན་ན་ཡང་རེས་འགའ་ཡང་འབྲས་བུ་མི་སྐྱེད་པར་མི་འགྲུབ་ལ། འབྲས་བུ་རྒྱུ་མ་ཚང་བ་མེད་པ་ཅན་ཡིན་ན་ནམ་ཡང་མི་སྐྱེ་བར་མི་འགྱུར་ན། གང་གིས་ན་རིམ་གྱིས་དོན་བྱ་བ་བྱེད་པར་འགྱུར། གཞན་དག་གིས་ཕོགས་དབྱུང་དུ་མེད་པ་ནི་ལྟོས་པ་ཅི་ཡང་མེད་ན། གང་གིས་ན་ལྷན་ཅིག་བྱེད་པའི་རྐྱེན་ལ་ལྟོས་ནས་རེས་འགའ་འབྲས་བུ་བསྐྱེད་པར་མི་འགྱུར་རོ་ཞེས་བྱ་བར་རིགས་པར་འགྱུར། གཞན་ཡང་བྱ་བ་བྱེད་པའི་དུས་ན་དེའི་ལྷན་ཅིག་བྱེད་པའི་རྐྱེན་ཐམས་ཅད་ཉེ་བའི་རང་བཞིན་གང་ཡིན་པ་དེ་ཉིད་ལྷན་ཅིག་བྱེད་པའི་རྒྱུ་དང་བྲལ་བའི་དུས་སུ་རྗེས་སུ་འབྲང་བར་འདོད་ན་ནི་དེའི་ཚེ་དེ་དང་འབྲེལ་པའི་རང་བཞིན་རྗེས་སུ་འབྲང་བས་ནན་གྱིས་མགུལ་ནས་ལྕགས་ཐག་གིས་དམ་རབ་ཏུ་བཏགས་པ་འདྲ་བར་འདོད་པའི་དུས་བཞིན་དུ་རྟག་ཏུ་ལྷན་ཅིག་བྱེད་པའི་རྐྱེན་རྣམས་དང་ཉེ་བའི་རང་བཞིན་དུ་འགྱུར་ཏེ། དེའི་ཕྱིར་ལྷན་ཅིག་བྱེད་པ་དང་མི་འབྲལ་བ་ཉིད་དུ་འགྱུར་རོ། །འབྲས་བུ་ཡང་ལྟོས་པར་རིགས་པ་མ་ཡིན་ཏེ། མེད་
པའི་ཕྱིར་དཔེར་ན་རི་བོང་གི་རྭ་ལྟ་བུའོ། །དེ་དང་འབྲེལ་པའི་རང་གི་ངོ་བོ་འཐོབ་པའི་ཕྱིར་བློས་ཡོངས་སུ་བརྟགས་པ་ལ་ལྟོས་ནས་མེད་པ་ལ་ཡང་བློས་རྣམ་པར་གཞག་མོད་ཀྱི། དེ་ལྟ་ན་ཡང་དེ་མངོན་པར་འགྲུབ་པར་བྱ་བ་ལ་དེས་རྒྱུ་ནུས་པ་ཐོགས་པ་མེད་པ་གང་ཡིན་པ་དེ་ཉིད་ལ་ཕན་འདོགས་པར་ལྟོས་པར་བྱའི། གཞན་ལ་ནི་མ་ཡིན་ནོ། །དེའི་ཕྱིར་འབྲས་བུས་རྟོག་པར་འདོད་པའི་དངོས་པོ་རྟག་ཏུ་ཕན་འདོགས་པ་ཉིད་དུ་ཉེ་བར་ནུས་པ་ཐོགས་པ་མེད་པ་དེ་ཉིད་བོར་ནས་གཞན་ལ་ལྟོས་ཅི་དགོས་ཏེ། དེས་འདི་ལ་གནོད་པ་བྱས་པའམ། གཞན་དག་གིས་འདི་ལ་ཕན་བཏགས་པ་ནི་ཅུང་ཟད་ཀྱང་མེད་དོ། །གཞན་ཡང་འབྲས་བུ་ལྷན་ཅིག་བྱེད་པའི་རྐྱེན་རྣམས་ལ་ལྟོས་ལ་ནི་རག་ན་འོན་ཀྱང་དབང་ཕྱུག་ལ་སོགས་པ་རྒྱུ་གང་ཡིན་པ་དེ་ནུས་པ་ཐོགས་པ་མེད་པ་ཡིན་ན་གོ་ལྟོས་ཅི་དགོས། གང་གིས་ན་དེ་སྐྱེར་མི་འདོད་པ་བཞིན་དུ་ཡང་ནན་གྱིས་དྲངས་ཏེ་སྐྱེད་པར་མི་བྱེད། དེ་ལྟ་ན་དེས་བདག་ཉིད་ཀྱི་མཐུ་ཉེ་བར་བརྟན་པར་འགྱུར་གྱི། གཞན་དུ་ནི་མ་ཡིན་ནོ། །དེ་ལྟ་བས་ན་འབྲས་བུ་མེད་པ་ལྟོས་པར་རིགས་པ་མ་ཡིན་ནོ། ཡོད་པ་ཡང་མ་ཡིན་ཏེ། དེ་ནི་རང་གི་ངོ་བོ་མཐའ་དག་ཐོབ་པ་ཉིད་ཀྱིས་ཐམས་ཅད་ལ་རེ་བ་མེད་པའི་ཕྱིར་རོ། །གལ་ཏེ་འདི་སྙམ་དུ་དེ་གཉིས་ཐ་དད་པ་མ་ཡིན་པ་ཉིད་དུ་ཐལ་བར་འགྱུར་པའི་ཕྱིར་འབྲས་བུ་རྒྱུའི་ཆོས་ཐམས་ཅད་ཀྱི་རྗེས་སུ་བྱེད་པ་ནི་མ་ཡིན་ནོ། །དེའི་ཕྱིར་གདོན་མི་ཟ་བར་དེ་གཉིས་རྣམ་པ་འགའ་ཞིག་གིས་ཐ་དད་པར་འགྱུར་རོ། །དེས་ན་རིམ་མ་ཡིན་པ་ལས་ཀྱང་འབྲས་བུ་རིམ་ཅན་མི་འགལ་བ་ཉིད་དོ་སྙམ་དུ་སེམས་ན། དེ་ནི་རིགས་པ་མ་ཡིན་ཏེ། ཁོ་བོ་ཅག་ཀྱང་འབྲས་བུ་རྒྱུའི་ཆོས་ཐམས་ཅད་ཀྱི་རྗེས་སུ་བྱེད་དོ་ཞེས་ནི་མི་ཟེར་རོ། །འོན་ཀྱང་རེ་ཞིག་གདོན་མི་ཟ་བར་འབྲས་བུས་རྒྱུ་ལ་ཡོད་པའི་རྗེས་སུ་འགྲོ་བ་དང༌། ལྡོག་པའི་ནི་རྗེས་སུ་བྱ་དགོས་ཏེ། རྒྱུ་དང་འབྲས་བུའི་དངོས་པོའི་རྒྱུ་ནི་དེ་ཙམ་དུ་ཟད་པའི་ཕྱིར་རོ།། འབྲས་བུ་འགའ་ཡང་རྒྱུ་རྟག་པར་འདོད་པ་ལ་ཡོད་པའི་ལྡོག་པའི་རྗེས་སུ་བྱེད་པ་ནི་མེད་དོ། །རྟག་པ་ལ་ལྡོག་པ་མེད་པའི་ཕྱིར་རོ། །དེ་ལྟ་མ་ཡིན་ན་ནི་རྟག་པ་ཁོ་ནར་འགྱུར་གྱི། རྟག་པ་ནི་མ་ཡིན་ནོ། །རྗེས་སུ་འགྲོ་བའི་བྱེད་པའི་རྗེས་སུ་བྱེད་པ་ཡང་མ་ཡིན་ཏེ། དེ་རིལ་གྱིས་ཉེ་ཡང་རེས་འགའ་འབྲས་
བུ་མི་འབྱུང་བའི་ཕྱིར་རོ། །གང་ཞིག་གང་ལ་ཡོད་པའི་རྗེས་སུ་འགྲོ་བའི་རྗེས་སུ་མི་བྱེད་པ་དེ་ན་དེའི་འབྲས་བུར་རིགས་པ་མ་ཡིན་ཏ། ཧ་ཅང་ཐལ་བར་འགྱུར་བའི་ཕྱིར་རོ། །དེ་ལྟར་ན་རེ་ཞིག་རྟག་པས་རིམ་གྱིས་དོན་བྱེད་པར་མི་ནུས་སོ། །ཅིག་ཅར་ཡང་མ་ཡིན་ཏེ། ཕྱིས་བྱ་བ་བྱེད་པའི་རང་བཞིན་དེ་ལྟ་བུའི་རྗེས་སུ་འབྲང་ན་འབྲས་བུ་སྐྱེ་བ་དང་བྲལ་བར་མི་རུང་བའི་ཕྱིར་སྔ་མ་བཞིན་ནོ། །རྗེས་སུ་མི་འབྲང་ན་ནི་དེའི་རྟག་པ་ཉིད་ཉམས་སོ། །རིམ་དང་ཅིག་ཅར་དག་ལས་གཞན་པ་གང་གིས་དོན་བྱེད་པར་འགྱུར་བའི་རྣམ་པ་གཞན་ནི་མེད་དེ། དེ་གཉིས་ནི་ཕན་ཚུན་རྣམ་པར་བཅད་པ་མེད་ན་ཡོངས་སུ་གཅོད་པ་མེད་པ་ཉིད་ཀྱིས་ཕན་ཚུན་སྤངས་ཏེ། གནས་པའི་མཚན་ཉིད་ཡིན་པའི་ཕྱིར་རོ། །ནུས་པ་མ་ལུས་པས་སྟོང་པ་དངོས་པོ་ཉིད་དུ་རིགས་པ་ཡང་མ་ཡིན་ཏེ་ཧ་ཅང་ཐལ་བར་འགྱུར་བའི་ཕྱིར་རོ། །དེ་ལྟ་ན་ནི་མོ་གཤམ་གྱི་བུ་ལ་སོགས་པ་ཡང་དངོས་པོ་ཉིད་དུ་ཐལ་བར་འགྱུར་རོ། །དེའི་ཕྱིར་དངོས་པོ་མེད་པར་ཐ་སྙད་གདགས་པའི་རྒྱུ་ཅི་ཡང་མ་གྲུབ་པས་དངོས་པོ་མེད་པར་ཆུང་ཟད་ཀྱང་འགྲུབ་པར་མི་འགྱུར་རོ། །དེ་མ་གྲུབ་ན་དངོས་པོ་ཡང་མི་འགྲུབ་སྟེ། དེ་མི་མཐུན་པའི་ཕྱོགས་རྣམ་པར་གཅད་པ་མ་གྲུབ་པའི་ཕྱིར་རོ། །མི་མཐུན་པའི་ཕྱོགས་ལས་མ་ལོག་པའི་རང་བཞིན་ནི་ཅུང་ཟད་ཀྱང་རང་གི་ངོ་བོ་ཡོངས་སུ་གཅད་པར་མི་ནུས་སོ། །དེ་ལྟ་བས་ན་དོན་བྱེད་པའི་ནུས་པ་དང་བྲལ་བ་ཁོ་ན་རི་བོང་གི་རྭ་ལ་སོགས་པའི་ངོ་བོའི་མཚན་ཉིད་ཡིན་ལ། །དེ་ལས་བཟློག་པ་ནི་དངོས་པོའི་མཚན་ཉིད་དོ་ཞེས་བྱ་བར་རིགས་སོ། །དེས་ན་རི་བོང་གི་རྭ་ལ་སོགས་པ་དང་ཁྱད་པར་མེད་པར་སོ་སོར་བརྟགས་པའི་འགོག་པ་ལ་སོགས་པ་ལ་རྟོགས་པ་དང་ལྡན་པ་རྣམས་དངོས་པོར་ཐ་སྙད་འདོགས་པར་རིགས་པ་མ་ཡིན་ཏེ། དེའི་རྒྱུ་མེད་པའི་ཕྱིར་རོ། །འདི་ལྟར་གལ་ཏེ་སོ་སོར་བརྟགས་པའི་འགོག་པ་ལ་སོགས་པ་དེ་འགའ་ཞིག་གི་ཤེས་པའི་ཡུལ་དུ་འགྱུར་ན་ནི། དེའི་ཚེ་དེའི་གདོན་མི་ཟ་བར་དེའི་རྒྱུའི་དངོས་པོར་ཁས་བླངས་དགོས་ཏེ། རྒྱུ་མ་ཡིན་པ་ལ་རྒྱུ་ཡུལ་ཉིད་མེད་པའི་ཕྱིར་རོ། །རྒྱུའི་ཁྱད་པར་ཁོ་ན་རང་གི་རྣམ་པར་འཇོག་པས་རྣམ་པར་ཤེས་པ་ལ་ཕན་པ་བྱེད་པ་ན་ཡུལ་ཡིན་ནོ་ཞེས་གསུངས་སོ། །དེ་ལྟ་མ་ཡིན་ན་ནི་རྟག་པ་དེའི་རྟག་
པ་ཉིད་ཉམས་པར་འགྱུར་ཏེ། གང་དུ་ཡང་རིམ་དང་ཅིག་ཅར་དག་གི་རྒྱུར་མི་རུང་བའི་ཕྱིར་རོ། །འོན་ཏེ་ཕན་མི་འདོགས་བཞིན་དུ་ཡང་རྣམ་པར་ཤེས་པའི་ཡུལ་དུ་རྟོག་ན་ནི་དེའི་རྣམ་པར་ཤེས་པའི་རང་བཞིན་རྣམ་པ་ཐམས་ཅད་དུ་རྗེས་སུ་འབྲང་བས་དེའི་རྣམ་པར་ཤེས་པ་ཡང་དེའི་རང་བཞིན་དང་འདྲ་བར་རྟག་པར་རྗེས་སུ་འབྲང་བའི་ཕྱིར་རྟག་པར་ཐལ་བར་འགྱུར་རོ། །རྗེས་སུ་མི་འབྲང་ན་ནི་དེའི་རྟག་པ་ཉིད་ཉམས་པར་ཐལ་བ་བཟློག་དཀའོ། །འོན་ཏེ་ཐ་ན་ཐམས་ཅད་མཁྱེན་པའི་ཐུགས་ཀྱང་རུང་འགའི་ཡུལ་གྱི་དངོས་པོར་ཡང་ཉེ་བར་མི་འགྲོའོ་ཞེས་རྟོག་པར་བྱེད་ན། དེའི་ཚེ་མཁས་པ་རྣམས་དེ་ལ་དངོས་པོར་ཐ་སྙད་འདོགས་པར་རིགས་པ་མ་ཡིན་ཏེ། རྣམ་པ་ཤེས་པ་དེར་ཐ་སྙད་གདགས་པའི་རྒྱུ་མེད་པའི་ཕྱིར་རོ། །དེ་རི་བོང་གི་རྭ་ལ་སོགས་པ་ཤིན་ཏུ་མེད་པ་ལས་ཀྱང་གང་གིས་ན་དེ་ལས་ཐ་དད་པར་བསྒྲུབ་པར་བྱ་བ་ཁྱད་པར་བྱ་དགོས་ཏེ། དངོས་པོ་མེད་པ་ལས་རྣམ་པར་མ་ཕྱེ་བའི་རང་བཞིན་ནི་དངོས་པོ་ཉིད་དུ་རྟོགས་པར་མི་ནུས་སོ། །དེའི་ཁྱད་པར་བདག་གི་ངོ་བོ་འཛིན་པ་ཡོད་དོ་ཞེས་བརྗོད་པར་ཡང་རིགས་པ་མ་ཡིན་ཏེ། དངོས་པོ་མེད་པ་ལ་ཡང་ནུས་པ་ཐམས་ཅད་དང་བྲལ་བའི་མཚན་ཉིད་ཀྱི་བདག་གི་ངོ་བོ་འཛིན་པ་ཡོད་པའི་ཕྱིར་རོ། །མོ་གཤམ་གྱི་བུ་ལ་སོགས་པ་དང་ཁྱད་པར་མེད་པ་དེ་ལྟ་བུ་དེ་ལ་ཡང་དངོས་པོ་ཞེས་མིང་དུ་འདོགས་ན་མིང་ལ་ནི་བརྩད་པ་མེད་དོ། །འོན་ཀྱང་རྟོག་པ་དང་ལྡན་པ་དོན་བྱེད་པ་དོན་དུ་གཉེར་བས་དངོས་པོའི་རང་གི་ངོ་བོ་དཔྱོད་པར་བྱེད་པ་དེ་དག་ནི་ཤིན་ཏུ་མི་དམིགས་པའི་རང་བཞིན་ནུས་པ་ཐམས་ཅད་ཀྱིས་སྟོང་པས་མོ་གཤམ་གྱི་བུ་ལ་སོགས་པ་དང་ཁྱད་པར་མེད་པ་དེ་ལྟ་བུ་དེ་ལ་ཐ་སྙད་གདགས་པའི་རྒྱུ་མེད་པའི་ཕྱིར་དངོས་པོ་རྣམ་པར་འཇོག་པ་ནི་ལེགས་པ་མ་ཡིན་ནོ་ཞེས་ཟེར་རོ། །སྨྲས་པ། དོན་བྱེད་ནུས་པ་མ་ཡིན་ལ། །དེའི་དོན་གཉེར་བས་དཔྱད་ཅི་ཕན། །མ་ནིང་གཟུགས་བཟང་མི་བཟང་ཞེས། །འདོད་ལྡན་རྣམས་ཀྱིས་བརྟགས་ཅི་ཕན། །དེ་ལྟར་ན་རྟག་པ་ཉིད་ཀྱིས་དངོས་པོ་ཅི་ཡང་མེད་པས་རྟག་པ་ལས་སྐྱེ་བ་རིགས་པ་མ་ཡིན་ནོ། །མི་རྟག་པ་ལས་ཀྱང་མ་ཡིན་ཏེ། འདི་ལྟར་མི་རྟག་པ་ལས་འབྲས་བུ་སྐྱེ་བ་ན་རྒྱུ་འདས་པ་ལས་སྐྱ་སྟེ། དཔེར་ན་བྱེ་བྲག་ཏུ་སྨྲ་བ་རྣམས་
ཀྱིས་རྣམ་པར་སྨིན་པའི་རྒྱུ་འདས་པ་ལས་ཀྱང་འབྲས་བུ་ཉེ་བར་བརྗོད་པ་ལྟ་བུའམ། མ་འོངས་པ་ལས་ཏེ། དཔེར་ན་དེ་དག་ཉིད་ཀྱིས་མ་འོངས་པའི་སྐྱེ་བ་ནི་བསྐྱེད་པར་བྱ་བ་སྐྱེད་པ་ཡིན་ནོ་ཞེས་ཉེ་བར་བརྟགས་པ་ལྟ་བུའམ། ད་ལྟར་གྱི་ལས་སྐྱེའོ་ཞེས་བྱ་བའི་ཕྱོགས་ཤིག་ཡིན་གྲང་ན། དེ་ལ་རེ་ཞིག་འདས་པ་ལས་ཞེས་བྱ་བའི་ཕྱོགས་ནི་རུང་བ་མ་ཡིན་ཏེ། འདས་པའི་དངོས་པོ་ཡོད་པ་མེད་པའི་ཕྱིར་རོ། །འདས་པ་ཞེས་བྱ་བ་ཅི་ཞེས་བྱ། རང་གི་ངོ་བོ་ལས་མ་ཉམས་པའམ། རང་གི་ངོ་བོ་ལས་ཉམས་པ་ཡིན་གྲང༌། དེ་ལྟ་མ་ཡིན་ན་ད་ལྟར་བཞིན་དུ་རང་གི་ངོ་བོ་མ་ཉམས་པའི་ཕྱིར་ཇི་ལྟར་འདས་པ་ཡིན། གང་རང་གི་ངོ་བོ་ཉམས་པའི་བདག་ཉིད་དེ་ཡང་མེད་པའི་རང་བཞིན་ཡིན་པའི་ཕྱིར་འབྲས་བུ་ཇི་ལྟར་བསྐྱེད་དེ། དོན་བྱེད་པ་ནི་རང་གི་ངོ་བོ་ལ་རག་ལས་པའི་ཕྱིར་རོ། །འོན་ཏེ་བྱེད་པ་ཞིག་པ་ལས་འདས་པ་ཞེས་བྱ་བའི་རང་གི་ངོ་བོ་ཉམས་པའི་དབང་གིས་ནི་མ་ཡིན་ནོ་ཞེ་ན། དེ་ལྟ་ཡང་དེའི་བྱེད་པ་ཞིག་པ་ལས་འབྲས་བུ་སྐྱེ་བར་རིགས་པ་མ་ཡིན་ནོ། །དེ་ལྟ་མ་ཡིན་ཏེ། འབྲས་བུ་སྐྱེད་ན་ཇི་ལྟར་ཞིག་པར་འགྱུར། འབྲས་བུ་གཅིག་ལ་དངོས་པོའི་ངོ་བོ་གཅིག་གིས་རིམ་གྱིས་འཕེལ་བ་དང༌། རབ་ཏུ་སྐྱེད་པའི་མཐུ་ཐ་དད་པར་རིགས་པ་མ་ཡིན་ན། གང་གི་ཕྱིར་འབྲས་བུ་འཕེན་པ་ཙམ་བྱེད་པར་འགྱུར་གྱི། རབ་ཏུ་བྱེད་པ་མ་ཡིན། ཁྱད་པར་མེད་པའི་ཕྱིར་དེ་འཕེན་པའི་དུས་ཁོ་ན་རབ་ཏུ་སྐྱེད་པར་ཡང་འགྱུར་རོ། །དེ་ལྟ་མ་ཡིན་ན་ནི་ཕྱིས་ཀྱང་སྔ་མ་དང་ཁྱད་པར་མེད་པའི་ཕྱིར་རབ་ཏུ་སྐྱེད་པར་མི་འགྱུར་རོ། །གཞན་ཡང་བྱེད་པ་ཞེས་བྱ་བ་དེ་གལ་ཏེ་ནུས་པའི་ངོ་བོའམ། བྱ་བའི་ངོ་བོ་ཞིག་ཡིན་པར་འགྱུར་གྲང༌། རེ་ཞིག་གལ་ཏེ་གཉི་ག་དོན་གཞན་ཡིན་ན་ནི། དེའི་ཚེ་ཇི་ལྟར་རེ་ཞིག་ཅེས་བརྗོད་པར་བྱ། གལ་ཏེ་རང་གི་ངོ་བོ་ཞིག་པའི་ཕྱིར་ན་ནི་དེའི་ཚེ་རྟག་ཏུ་དངོས་པོ་ཐམས་ཅད་ཡོད་པར་སྨྲ་བ་ཉམས་པར་ཡང་འགྱུར་རོ། །དོན་གཞན་དེ་ཞིག་ན་ཡང་དངོས་པོའི་རང་གི་ངོ་བོ་མི་གཡོ་བ་འཇིག་པར་འགྲུབ་པར་མི་འགྱུར་ཏེ། ལྷ་སྦྱིན་ཤི་བར་གྱུར་བས་མཆོད་སྦྱིན་རང་གི་ངོ་བོ་ལས་མ་ཉམས་པའི་ངོ་བོ་ཡང་འཆི་བ་ནི་མེད་དོ། །འོན་ཏེ་བྱེད་པའི་ཕྱིར་རོ་ཞེ་ན། དེ་ནི་རིགས་པ་མ་ཡིན་ཏེ། ཐུག་པ་
མེད་པར་ཐལ་བར་འགྱུར་བའི་ཕྱིར་བྱེད་པ་ལ་བྱེད་པ་གཞན་ནི་མེད་དེ། དེ་ལ་ཡང་བརྒལ་ཞིང་བརྟགས་པ་མཚུངས་པའི་ཕྱིར་རོ། །དེའི་ཕྱིར་འགའ་ཡང་འཇིག་པར་མི་འགྲུབ་བོ། །བྱེད་པ་དོན་གཞན་པ་ཉིད་ཡིན་ན་ནི་དངོས་པོའི་རྒྱུ་ཉིད་དུ་མི་འགྱུར་ཏེ། བྱེད་པ་ཁོ་ན་ལས་འབྲས་བུ་སྐྱེ་བའི་ཕྱིར་རོ། །དེའི་ཕྱིར་དངོས་པོ་མེད་པ་ཉིད་དུ་ཐལ་བར་འགྱུར་ཏེ། དངོས་པོའི་མཚན་ཉིད་ནི་དོན་བྱེད་ནུས་པའི་ཕྱིར་རོ། །བྱེད་པ་དོན་གཞན་དུ་གྱུར་པ་གཉི་གའི་ངོ་བོ་དེ་ཡང་འབྲས་བུ་སྐྱེད་པ་ན་གལ་ཏེ་བྱེད་པའི་རང་གི་ངོ་བོར་གྱུར་པ་ཁོ་ནས་སྐྱེད་པར་འདོད་ན་ནི་དེའི་ཚེ་དངོས་པོ་ཡང་བྱེད་པའི་རང་གི་ངོ་བོར་གྱུར་པ་ཁོ་ནས་འབྲས་བུ་སྐྱེད་པར་འགྱུར་ན་དོན་གཞན་བརྟགས་པས་ཅི་ཞིག་བྱ། འོན་ཏེ་གཞན་དུ་གྱུར་པས་སྐྱེད་དོ་ཞེ་ན། དེའི་ཚེ་དེ་ལ་ཡང་བྱེད་པ་གཞན་དུ་རྟོག་ན་ཐུག་པ་མེད་པར་འགྱུར་བའི་ཕྱིར་གང་གི་ཡང་རྒྱུ་ཉིད་དུ་མི་འགྲུབ་པོ། །དངོས་པོ་ཕན་པར་བྱེད་པ་མ་ཡིན་པའི་ཕྱིར་འདིའི་བྱེད་པ་འདི་ཡིན་ནོ་ཞེས་བྱ་བ་ཡང་མ་འགྲུབ་སྟེ་འབྲེལ་པ་ནི་ཐམས་ཅད་དུ་ཕན་པས་རབ་ཏུ་ཕྱེ་བའི་ཕྱིར་རོ། །འོན་ཏེ་ཡང་དེ་ལ་དངོས་པོ་ཕན་འདོགས་པ་ཉིད་དུ་ཁས་ལེན་ན་ནི་དེའི་ཚེ་དངོས་པོ་བྱེད་པའི་བདག་ཉིད་དུ་གྱུར་པའི་དབང་གིས་བྱེད་པ་ལ་ཕན་འདོགས་ན་དེའི་ཚེ་ཅིའི་ཕྱིར་འབྲས་བུ་ལ་དེ་ལྟར་ཕན་འདོགས་པར་མི་བྱེད། གང་གིས་ན་བྱེད་པ་དོན་གཞན་དུ་ཉེ་བར་བརྟག །བྱེད་པ་དངོས་པོ་ཡོད་པ་ཙམ་ལ་རག་ལས་པ་ཡིན་ན་ཡང་རྟག་ཏུ་རྒྱུ་རིལ་གྱིས་ཉེ་བའི་ཕྱིར་འཇིག་པ་འགྲུབ་པར་ཡང་མི་འགྱུར་རོ། །འོན་ཏེ་དོན་གཞན་དུ་གྱུར་པས་ཕན་འདོགས་ན་ནི་དེའི་ཚེ་དེ་དང་དེར་འབྲེལ་པར་ཡང་མི་འགྲུབ་སྟེ། དེའི་ཚེ་བྱེད་པ་རྣམས་ཁོ་ན་རྒྱུད་མར་སྦྱོར་བའི་ཕྱིར་དངོས་པོ་ནི་གྱི་ན་འདུག་པ་ཉིད་དུ་འགྱུར་རོ། །བྱེད་པ་བྱ་བའི་ངོ་བོ་ཡིན་པར་ཡང་སྐད་ཅིག་མ་རྣམས་ནི་སྐྱེས་མ་ཐག་ཏུ་མི་གནས་པའི་ཕྱིར་རིགས་པ་མ་ཡིན་པ་ཁོ་ན་ལ་སྐད་ཅིག་མ་མ་ཡིན་པ་རྣམས་ཀྱང་རྟག་ཏུ་ངོ་བོ་གཅིག་པར་གནས་པའི་ཕྱིར་ནམ་མཁའ་བཞིན་དུ་བྱ་བ་དང་འབྲེལ་པར་རིགས་པ་མ་ཡིན་པ་ཉིད་པས་བྱ་བ་ཞེས་བྱ་བ་གང་ལ་ཡང་མེད་དོ། །དེ་ལྟ་བས་ན་རང་གི་ངོ་བོ་ཙམ་ཁོ་ནས་སོ་སོར་ངེས་པའི་འབྲས་བུ་ཉེ་བར་སྐྱེད་པ་ན་རང་གི་རྒྱུ་རྐྱེན་གྱིས་ངེས་པར་བྱས་པའི་ངོ་བོ་ཉིད་ཡིན་པའི་ཕྱིར་དངོས་པོའི་རང་གི་ངོ་བོ་ཁོ་ན་ལ་ནུས་པ་དང་བྱ་བ་ལ་
སོགས་པའི་སྒྲར་བརྗོད་ཀྱི། དོན་གཞན་ནི་མ་ཡིན་ནོ། །དངོས་པོ་དང་ཐ་མི་དད་པའི་བྱེད་པ་གཉི་གའི་ངོ་བོ་དེ་ཞིག་སྟེ་རང་གི་ངོ་བོ་ཉམས་པའི་མཚན་ཉིད་གཅིག་ཡིན་ན་དངོས་པོ་ཡང་དེ་དང་ཐ་མི་དད་པས་རང་གི་ངོ་བོ་ཉམས་ན་ཇི་ལྟར་འདས་པ་ཡོད་པ་ཉིད་དུ་འགྲུབ། བྱེད་པ་ཡང་དེ་དང་ཐ་མི་དད་པའི་ཕྱིར་དངོས་པོའི་རང་གི་ངོ་བོ་བཞིན་དུ་མི་འཇིག་པར་ཐལ་བར་འགྱུར་བས་བྱེད་པ་ཞིག་པར་མི་འགྲུབ་པོ། །འོན་ཏེ་བྱེད་པ་དེ་ཉིད་དང་གཞན་དག་ཏུ་བརྗོད་པར་བྱ་བ་མ་ཡིན་པར་རྟོག་ན། དེའི་ཚེ་འདི་བརྟགས་པའི་ཡོད་པ་ཉིད་ཡིན་པས་དངོས་པོ་མེད་པའི་ཕྱིར་དེའི་དབང་གིས་དུས་གསུམ་རྣམ་པར་གཞག་པ་དོན་དམ་པ་པར་མི་འགྲུབ་པོ། །དངོས་པོ་ནི་རྣམ་པ་གང་གིས་ཀྱང་བརྗོད་པར་བྱ་བ་མ་ཡིན་པར་རིགས་པ་མ་ཡིན་ཏེ། ཐམས་ཅད་བརྗོད་པར་བྱ་བ་མ་ཡིན་པ་ཉིད་དུ་ཐལ་བར་འགྱུར་བའི་ཕྱིར་རོ། །དེ་ལྟ་བས་ན་འདས་པའི་དངོས་པོ་མེད་པའི་ཕྱིར་འདས་པ་ལས་འབྲས་བུ་སྐྱེ་བ་མ་ཡིན་ནོ། །མ་འོངས་པ་ལས་ཀྱང་མ་ཡིན་ཏེ། མ་འོངས་པ་ཞེས་བྱ་བ་ནི་བདག་གི་རང་གི་ངོ་བོར་མ་རེད་པ་ལ་བྱའོ། །དེ་ལྟ་མ་ཡིན་ཏེ། ད་ལྟར་བཞིན་དུ་རང་གི་ངོ་བོ་མི་གཡོ་བར་འཛིན་ན། ཇི་ལྟར་མ་འོངས་པ་འགྲུབ་པར་འགྱུར། བདག་གི་དེ་ཁོ་ནར་མ་རེད་པ་གང་ཡིན་པ་དེ་ལས་ནི་ནམ་མཁའི་པདྨ་ལ་སོགས་པ་བཞིན་དུ་འབྲས་བུ་སྐྱེ་བར་རིགས་པ་དང་ལྡན་པ་མ་ཡིན་ནོ། །འོན་ཏེ་བྱེད་པ་མ་ཐོབ་པས་མ་འོངས་པ་ཞེས་བྱ་བ་ནི་དེའི་ཚེ་དེ་ལས་འབྲས་བུ་སྐྱེ་བར་ཡང་ཤིན་ཏུ་ཡང་མི་རིགས་ཏེ། བྱེད་པ་མ་ཐོབ་པའི་ཕྱིར་རོ། །རྟག་ཏུ་དངོས་པོ་ཐམས་ཅད་ཡོད་པ་ཉིད་ཡིན་ན་དེ་འཐོབ་པའི་རྒྱུ་རྣམས་མ་ཚང་བ་མེད་པའི་ཕྱིར་ཅིའི་ཕྱིར་རེས་འགའ་ལ་ལས་བྱེད་པ་མི་འཐོབ་པར་མི་འགྱུར། བྱེད་པོ་དངོས་པོ་གཞན་དུ་རིགས་པ་མ་ཡིན་ནོ་ཞེས་ནི་དཔྱད་ཟིན་ཏོ། །དོན་གཞན་མ་ཡིན་པ་ཉིད་ཡིན་ཡང་གི་ངོ་བོ་ཡང་དེ་དང་ཐ་མི་དད་པའི་ཕྱིར་བྱེད་པ་བཞིན་དུ་མ་ཐོབ་པ་ཉིད་དུ་ཐལ་བར་འགྱུར་བས་མ་འོངས་པ་ཡོད་པ་ཉིད་དུ་མི་འགྲུབ་པར་འགྱུར་པའམ། བྱེད་པ་ཡང་དེ་དང་ཐ་མི་དད་པ་ཉིད་ཀྱིས་དངོས་པོའི་རང་གི་ངོ་བོ་བཞིན་མ་ཐོབ་པ་ཉིད་དུ་ཐལ་བར་འགྱུར་བའི་ཕྱིར་བྱེད་པ་མ་ཐོབ་པ་ཉིད་མི་འགྲུབ་པར་འགྱུར་རོ། །དེ་ལྟ་བས་ན་མ་
འོངས་པ་ཡང་དངོས་པོ་མེད་པའི་ཕྱིར་དེ་ལས་འབྲས་བུ་སྐྱེ་བར་རིགས་པ་མ་ཡིན་ནོ། །དེ་ལྟ་མ་ཡིན་ན་འབྲས་བུ་རྒྱུ་མེད་པ་ཁོ་ནར་ཐལ་བར་འགྱུར་ཏེ། དེ་ལ་འོག་ནས་འབྱུང་བའི་ཉེས་པ་ཡོད་དོ། །ད་ལྟར་གྱི་ལས་ཞེས་བྱ་བའི་ཕྱོགས་ཀྱང་རུང་བ་མ་ཡིན་ཏེ། འདི་ལྟར་དེ་ལས་འབྲས་བུ་སྐྱེ་བ་ན་དུ་མ་ལས་གཅིག་གམ། དུ་མ་ཞིག་སྐྱེ་བར་འགྱུར་བའམ། གཅིག་ལས་དུ་མའམ། གཅིག་སྐྱེ་བར་འགྱུར་བའམ། འབྲས་བུ་དུ་མ་གཅིག་གི་རང་གི་ངོ་བོ་དེ་ཡང་རྒྱུ་དང་དུས་མཉམ་པའམ། དུས་ཐ་དད་པ་ཞིག་ཏུ་སྐྱེ་བར་འགྱུར་གྲང་ཞེས་རྣམ་པར་བརྟག་སྟེ། དེ་ལ་གལ་ཏེ་ཕྱོགས་དང་པོ་ལྟར་ཡིན་ན་ནི་དེའི་ཚེ་རྒྱུའི་ཐ་དད་པ་ཐ་དད་པར་བྱེད་པར་འགྱུར་པ་མ་ཡིན་ཏེ། འདི་ལྟར་བུམ་པ་ལ་སོགས་པ་རས་ཡུག་ལ་སོགས་པ་ལས་རང་བཞིན་ཐ་དད་པ་གང་ཡིན་པ་དེ་ནི་རྒྱུའི་ཐ་དད་པས་བྱས་པ་ཡིན་གྱི། རྒྱུ་མེད་པ་ཉིད་དུ་ཐལ་བར་འགྱུར་བའི་ཕྱིར་རང་བཞིན་གྱིས་ནི་མ་ཡིན་ནོ། །དེ་ལ་གལ་ཏེ་རྒྱུ་ཐ་དད་པ་མེད་ཀྱང་འབྲས་བུ་ཐ་དད་པར་འགྱུར་ན་ནི་དེའི་ཚེ་འཁྲུལ་པའི་ཕྱིར་འབྲས་བུའི་ཐ་དད་པ་མ་ཡིན་པ་ནི་རྒྱུའི་ཐ་དད་པ་དང་ཐ་དད་པ་མ་ཡིན་པར་བྱས་པར་མི་འགྱུར་རོ། །ཐ་དད་པ་དང་ཐ་དད་པ་མ་ཡིན་པ་ལས་མ་གཏོགས་པའི་དངོས་པོ་འགའ་ཡང་མེད་པས་ཐམས་ཅད་རྒྱུ་མེད་པ་ཅན་ཁོ་ནར་ཐལ་བར་འགྱུར་རོ། །ཅི་སྟེ་ཡང་བདག་ཉིད་ཇི་ལྟ་བའི་རྒྱུ་རྣམས་ཀྱིས་ཉེ་བར་སྦྱར་བར་བྱས་པའི་རང་གི་ངོ་བོའི་ཁྱད་པར་མ་འཆོལ་བའི་ཕྱིར་རྒྱུའི་ཐ་དད་པ་ཐ་དད་པ་ཁོ་ནར་བྱེད་པ་ཡིན་ཏེ། འདི་ལྟར་མིག་ལ་སོགས་པ་རང་གི་ངོ་བོ་ཐ་དད་པ་དག་ལས་འབྲས་བུ་མིག་གི་རྣམ་པར་ཤེས་པ་ལ་སོགས་པ་སྐྱེ་བ་ན་དངོས་སུ་ཐ་དད་པ་མ་ཡིན་ཡང་རྟོགས་པའི་བདག་ཉིད་དང༌། སོ་སོར་ངེས་པའི་ཡུལ་ཅན་དང༌། ཡུལ་གྱི་རྣམ་པ་ཉེ་བར་གྱུར་པ་སྐྱེ་ལ། དེ་ཡང་རྗེས་སུ་འགྲོ་བ་དང་ལྡོག་པ་དག་གིས་མཚུངས་པ་དེ་མ་ཐག་པའི་རྐྱེན་ལས་རྟོགས་པའི་ངོ་བོ་ཁོ་ན་སྐྱེའི། མིག་ལ་སོགས་པ་དག་ལས་ནི་མ་ཡིན་ནོ་ཞེས་བྱ་བར་ངེས་ལ། དེ་བཞིན་དུ་ཡུལ་ལས་ནི་དེ་དང་འདྲ་བ་ཉིད་དབང་པོ་ལས་ནི་ཡུལ་སོ་སོར་ངེས་པར་འཛིན་པ་ཞེས་བྱ་བ་འདི་ཡང་ཡོངས་སུ་ངེས་སོ། །དེ་ལྟར་ཡུལ་ལས་ནི་རྟོགས་པའི་ངོ་བོ་ལ་སོགས་པ་མ་ཡིན་ལ། མཚུངས་པ་དེ་མ་ཐག་པའི་རྐྱེན་ལས་ནི་ཡུལ་གྱི་ངོ་བོ་ཉིད་
ལ་སོགས་པ་མ་ཡིན། དབང་པོ་ལས་ཀྱང་མ་ཡིན་པས་རྒྱུའི་ཐ་དད་པ་ནི་ཐ་དད་པར་བྱེད་པ་ཉིད་ཁོ་ན་ཡིན་ཏེ། རྒྱུ་ཐ་དད་པ་དག་ལས་ཁྱད་པར་ཐ་དད་པ་དག་འབྱུང་བའི་ཕྱིར་རོ་སྙམ་དུ་སེམས་ན། དེ་ཡང་རིགས་པ་མ་ཡིན་ཏེ། འདི་ལྟར་ཁྱད་པར་གང་ཡིན་པ་དེ་དག་གལ་ཏེ་བརྟགས་པ་མ་ཡིན་པ་ཁོ་ན་ཞིག་གམ། ལྡོག་པའི་བྱེ་བྲག་གིས་བརྟགས་པའི་ངོ་བོ་ཁོ་ན་ཞིག་ཏུ་འགྱུར་གྲང་ན། དེ་ལ་གལ་ཏེ་ཕྱོགས་དང་པོ་ལྟར་ན་ནི་དེའི་ཚེ་དམིགས་པའི་བདག་ཉིད་ལ་སོགས་པ་ལས་ཐ་དད་པ་མ་ཡིན་པའི་ཕྱིར་དེ་དང་འདྲ་བར་དུ་མ་ཉིད་དུ་ཐལ་བའམ། དམིགས་པའི་བདག་ཉིད་ལ་སོགས་པ་ཡང་རྣམ་པར་ཤེས་པ་བཞིན་དུ་གཅིག་པ་ཉིད་དུ་བཟློག་ཏུ་མི་རུང་ལ། རྣམ་པར་ཤེས་པ་ཡང་རྟོགས་པའི་ངོ་བོ་ལས་གཞན་མ་ཡིན་པའི་ཕྱིར། དེ་དང་འདྲ་བར་གཟུགས་ལས་མི་སྐྱེ་བར་ཐལ་བའམ། འདྲ་བ་ཉིད་ལས་གཞན་མ་ཡིན་པའི་ཕྱིར་གཟུགས་ལས་སྐྱེ་བར་ཡང་སྨྲ་བར་འགྱུར་རོ། །དེའི་ཕྱིར་དངོས་པོ་གཅིག་ལ་དུས་གཅིག་ཏུ་སྐྱེ་བ་དང་མི་སྐྱེ་བ་ཕན་ཚུན་འགལ་བ་དག་ཇི་ལྟར་མི་འགལ། ཅི་སྟེ་ཉེས་པ་འདིར་འགྱུར་དུ་འོང་ཞེས་ཏེ་ཁྱད་པར་དེ་དག་རྣམ་པར་ཤེས་པ་ལས་དོན་གཞན་པ་གྱུར་པ་ཁོ་ནའོ་ཞེས་རྟོག་ན་ནི་དེའི་ཚེ་རྣམ་པར་ཤེས་པ་རྒྱུ་མེད་པ་ཅན་དུ་འགྱུར་ཏེ། མིག་ལ་སོགས་པ་གཞན་ཁོ་ན་ལ་ཉེ་བར་སྦྱོར་བའི་ཕྱིར་རོ། །དེའི་ཕྱིར་རྟག་པར་ཡོད་པ་ལ་སོགས་པར་ཐལ་བར་འགྱུར་རོ། །འོན་ཏེ་རྟག་པ་ཞེས་བྱ་བའི་ཕྱོགས་ཡིན་ན་ནི་དེའི་ཚེ་ཡང་རྣམ་པར་ཤེས་པ་རྒྱུ་མེད་པ་ཅན་ཁོ་ནར་འགྱུར་ཏེ། བརྟགས་པའི་བདག་ཉིད་ཁོ་ན་ལ་མིག་ལ་སོགས་པར་སྤྱོད་པའི་ཕྱིར་རོ། །བརྟགས་པའི་བདག་ཉིད་ལ་ཡང་འགའ་ཡང་ཉེ་བར་སྦྱོར་བ་མེད་པས་ཐམས་ཅད་རྒྱུ་མེད་པ་ཅན་དུ་ཐལ་བར་འགྱུར་རོ། །དུ་མ་ལས་དུ་མ་སྐྱེ་ཞེས་བྱ་བའི་ཕྱོགས་ཀྱང་རུང་བ་མ་ཡིན་ཏེ། མར་མེ་ལ་སོགས་པ་གཅིག་ལས་ཀྱང་རྣམ་པར་ཤེས་པ་ལ་སོགས་པ་འབྲས་བུ་དུ་མ་སྐྱེ་བར་མཐོང་བའི་ཕྱིར་དང༌། མིག་ལ་སོགས་པ་དུ་མ་ལས་ཀྱང་རྣམ་པར་ཤེས་པ་ལ་སོགས་པའི་དོན་གཅིག་སྐྱེ་བར་གྲགས་པའི་ཕྱིར་རོ། །གཞན་ཡང་གལ་ཏེ་འབྲས་བུ་ཐམས་ཅད་ལ་རྒྱུ་དུ་མ་ཞིག་གིས་བྱེད་ན་ནི་འབྲས་བུ་རེ་རེ་ཡང་དུ་མ་ལས་སྐྱེ་བའི་
ཕྱིར་དེ་ཉིད་རྒྱུའི་ཐ་དད་པ་ཐ་དད་པར་བྱེད་པ་མ་ཡིན་པར་འགྱུར་ཏེ། ཉེས་པ་སྔ་མ་དང་འདྲའོ། །འོན་ཏེ་འབྲས་བུ་རེ་རེ་ཁོ་ན་ལ་རེ་རེ་ཁོ་ན་ཞིག་ཉེ་བར་སྦྱོར་ན་ནི་དེའི་ཚེ་གཅིག་ལས་གཅིག་ཁོ་ན་སྐྱེ་བར་ཁས་བླངས་པར་འགྱུར་ཏེ། དེ་ལས་ཡང་འོག་ནས་འབྱུང་བའི་ཉེས་པ་ཡོད་པས། འདི་ནི་ཕྱོགས་གཞན་དུ་སྨྲས་པ་མ་ཡིན་ནོ། །དོན་དམ་པར་གཅིག་ལས་དུ་མ་སྐྱེ་ཞེས་བྱ་བའི་ཕྱོགས་ཀྱང་རུང་བ་མ་ཡིན་ཏེ། སྔ་མ་བཞིན་དུ་རྒྱུའི་ཐ་དད་པ་ཐ་དད་པར་བྱེད་པ་ཉིད་མ་ཡིན་པར་ཐལ་བར་འགྱུར་བའི་ཕྱིར་རོ། །འདི་ལྟར་གལ་ཏེ་མིག་བདག་ཉིད་ཀྱི་ཁྱད་པར་གང་གིས་རིགས་མཐུན་པའི་སྐད་ཅིག་མ་སྐྱེད་པར་བྱེད་པ་དེ་ཉིད་ཀྱིས་རང་གི་རྣམ་པར་ཤེས་པ་སྐྱེད་པར་བྱེད་ན་ནི་དེའི་ཚེ་རྒྱུ་ཐ་དད་པ་མེད་ཀྱང་འབྲས་བུ་ཐ་དད་པའི་ཕྱིར་ཇི་ལྟར་འབྲས་བུའི་ཐ་དད་པ་དང་ཐ་དད་པ་མ་ཡིན་པ་དག་ཏུ་རྒྱུ་མེད་པ་ཅན་དུ་མི་འགྱུར། དེ་ལ་གང་གིས་ན་འབྲས་བུ་གཞན་སྐྱེད་པར་འགྱུར་བ་བདག་ཉིད་ཀྱི་ཁྱད་པར་གཞན་ཡང་མེད་དེ། དངོས་པོ་ཐམས་ཅད་ནི་ཆ་ཤས་མེད་པའི་ཕྱིར་རོ། །དེས་ན་རྒྱུ་རང་གི་ངོ་བོ་འཕོས་ནས་འབྲས་བུ་ཉེ་བར་བསྐྱེད་པ་མ་ཡིན་མོད་ཀྱི། འོན་ཀྱང་རྒྱུའི་བདག་ཉིད་དེ་ལ་ཁྱད་པར་མེད་པའི་ཕྱིར་དེས་བྱས་པའི་འབྲས་བུ་ཡང་ཁྱད་པར་ཡོད་པར་མི་འགྱུར་རོ། །གཅིག་ལས་གཅིག་སྐྱེའོ་ཞེས་བྱ་བའི་ཕྱོགས་ཀྱང་རུང་བ་མ་ཡིན་ཏེ། ཐམས་ཅད་ལོང་བ་དང་འོན་པ་ལ་སོགས་པའི་དངོས་པོར་ཐལ་བར་འགྱུར་རོ། །འདི་ལྟར་གལ་ཏེ་གང་གི་ཚེ་མིག་གི་དབང་པོ་ལ་སོགས་པས་རང་གི་རྣམ་པར་ཤེས་པ་ཉེ་བར་སྐྱེད་པར་བྱེད་པ་དེའི་ཚེ་རིགས་མཐུན་པའི་སྐད་ཅིག་མ་གཞན་གྱི་རྒྱུན་ཆགས་པར་མི་བྱེད་ན། དེའི་ཚེ་སྐད་ཅིག་མ་གཉིས་པ་ལ་ཐམས་ཅད་ལོང་བ་ལ་སོགས་པར་ཐལ་བར་འགྱུར་རོ། །དུས་མཉམ་པ་ཞེས་བྱ་བའི་ཕྱོགས་ཀྱང་རུང་བ་མ་ཡིན་ཏེ། འབྲས་བུ་སྐྱེ་བའི་སྔོན་རོལ་ན་རྒྱུ་ཡང་མེད་པ་ཉིད་པས་རི་བོང་གི་རྭ་དང་འདྲ་བ་ཁོ་ནར་ནུས་པ་དང་མི་ལྡན་པའི་ཕྱིར་རོ། །གང་གི་ཚེ་བདག་གི་ངོ་བོ་ཉིད་ཐོབ་པ་ཉིད་ཀྱིས་ནུས་པ་ཡིན་པ་དེའི་ཚེ་ནི་འབྲས་བུ་ཡང་རྒྱུ་དང་དུས་མཉམ་པར་ཡོད་པ་ཉིད་ཀྱི་ཕྱིར་གྲུབ་པ་ཁོ་ན་ཉིད་ཡིན་པས་དེ་ལ་དེས་ཅུང་ཟད་ཀྱང་བྱར་མེད་པའི་ཕྱིར་རྒྱུར་ཐ་སྙད་གདགས་པར་རིགས་པ་མ་ཡིན་ཏེ། དཔེར་ན་འབྲས་བུར་འདོད་
པ་དེ་ཉིད་རྒྱུའི་དངོས་པོ་མ་ཡིན་པ་བཞིན་ནོ། །དེ་ལྟ་མ་ཡིན་ན་རྒྱུ་དང་འབྲས་བུའི་དངོས་པོར་རྣམ་པར་གཞག་པར་ཇི་ལྟར་མ་འཆོལ་བར་རྟོགས་པར་འགྱུར་རོ། །དུས་ཐ་དད་པ་ཞེས་བྱ་བའི་ཕྱོགས་ཀྱང་རུང་བ་མ་ཡིན་ཏེ། དུས་ཐ་དད་པ་ཉིད་ཡིན་ན་ཡང་འབྲས་བུ་རྒྱུ་བས་སྔ་བའམ་འཕྱི་བ་ཞིག་ཏུ་འགྱུར་གྲང༌། རེ་ཞིག་ཕྱོགས་དང་པོ་ནི་མ་ཡིན་ཏེ། དེ་ལྟ་ན་ནི་མ་འོངས་པ་ཁོ་ན་ལས་འབྲས་བུ་སྐྱེ་བར་འདོད་པར་འགྱུར་རོ། །མ་འོངས་པ་ཞེས་བྱ་བའི་དངོས་པོ་ནི་མེད་དོ་ཞེས་དེ་ནི་སྔར་དཔྱད་ཟིན་ཏོ། །དེ་ནི་ཕྱོགས་གཉིས་པ་ཡང་མ་ཡིན་ཏེ། འདི་ལྟར་ཕྱིས་འབྲས་བུ་སྐྱེ་བ་ན་སྐད་ཅིག་མས་ཆོད་པའམ་མཆོད་པ་ཞིག་ཏུ་སྐྱེ་གྲང༌། གལ་ཏེ་ཆོད་ནས་སྐྱེ་ན་ནི་དེའི་ཚེ་འདས་པ་ཁོ་ན་ལས་སྐྱེ་བར་ཁས་བླངས་པར་འགྱུར་ཏེ། དེ་ཡང་རིགས་པ་མ་ཡིན་ཏེ་ཞེས་སྔར་ཁོང་དུ་ཆུད་པར་བྱས་ཟིན་ཏོ། །མཆོད་པར་ཞེས་བྱ་བ་ཡང་རིགས་པ་མ་ཡིན་ཏེ། འདི་ལྟར་སྐད་ཅིག་མ་སྔ་མ་དང་ཕྱི་མ་གཉིས་མཆོད་པ་ཞིག་ཡིན་གྲང་ན། ཕྱོགས་གཅིག་གིས་སམ། བདག་ཉིད་ཐམས་ཅད་ཀྱིས་མཆོད་པར་འགྱུར་གྲང༌། རེ་ཞིག་ཕྱོགས་གཅིག་ནི་མ་ཡིན་ཏེ། སྐད་ཅིག་མ་དག་ལས་ཆ་ཤས་མེད་པ་ཉིད་ཀྱིས་ཕྱོགས་གཅིག་མེད་པའི་ཕྱིར་རོ། །དེ་ལྟ་མ་ཡིན་ན་དུས་ཀྱི་མཐའི་མཚན་ཉིད་སྐད་ཅིག་མ་ཡིན་པར་མི་འགྱུར་རོ། །བདག་ཉིད་ཐམས་ཅད་ཀྱིས་ཀྱང་མ་ཡིན་ཏེ། དུས་མཉམ་པ་ཉིད་དུ་ཐལ་བར་འགྱུར་བའི་ཕྱིར་རོ། །དུས་མཉམ་པ་ནི་རྒྱུ་དང་འབྲས་བུའི་དངོས་པོ་མེད་དོ་ཞེས་སྔར་བསྟན་ཟིན་ཏོ། །སྐད་ཅིག་མ་གཉིས་བདག་ཉིད་ཐམས་ཅད་ཀྱིས་མཆོད་ན་ནི་གོང་བུ་རྡུལ་ཕྲ་རབ་ཙམ་ཉིད་དུ་ཐལ་བ་བཞིན་དུ་བསྐལ་པ་ཡང་སྐད་ཅིག་མ་ཉིད་དུ་ཐལ་བ་བཟློག་དཀའ་སྟེ། ཇི་ལྟར་རྡུལ་ཕྲ་རབ་རྣམས་བདག་ཉིད་ཐམས་ཅད་ཀྱིས་སྦྱོར་བ་ཡིན་ན། རྡུལ་ཕྲ་རབ་ཐམས་ཅད་ཀྱི་བདག་ཉིད་ཐམས་ཅད་ཀྱིས་གཅིག་ཏུ་ཞུགས་པའི་ཕྱིར་གོང་བུ་རྡུལ་ཕྲ་རབ་ཙམ་ཉིད་དུ་ཐལ་བར་འགྱུར་བ་དེ་བཞིན་དུ་སྐད་ཅིག་མ་རྣམས་བདག་ཉིད་ཐམས་ཅད་ཀྱིས་མཆོད་པ་ཡིན་ན་ནི་སྐད་ཅིག་མ་ཐམས་ཅད་སྐད་ཅིག་མ་གཅིག་ཁོ་ནའི་ནང་དུ་ཞུགས་པའི་ཕྱིར་སྐལ་པ་ཡང་སྐད་ཅིག་མ་ཙམ་ཉིད་དུ་ཐལ་བར་བཟློག་དཀའོ། །གལ་ཏེ་རྒྱུ་དང་འབྲས་བུ་དག་
མཆོད་པ་ཡིན་ན་ཡང་དུས་གཅིག་པ་ཉིད་དུ་མི་འགྱུར་ཏེ། དཔེར་ན་དངོས་པོ་དང་ཞིག་ནས་མེད་པ་དག་ལྟ་བུ་དང༌། དཔེར་ན་གྲིབ་མ་དང་ཉི་མ་དག་མཆོད་པ་ཡིན་ཡང་ཡུལ་གཅིག་པ་ཉིད་མ་ཡིན་པ་ལྟར་རྒྱུ་དང་འབྲས་བུ་དག་ཀྱང་དེ་དང་འདྲའོ་ཞེས་བྱ་བ་ལ་སོགས་པ་དཔེར་རྗོད་པར་བྱེད་ན། དཔེ་དེ་དག་ནི་ཁོ་བོ་ཅག་ལ་མ་གྲུབ་སྟེ། ཐམས་ཅད་དོན་དམ་པར་མ་སྐྱེས་པ་ཉིད་པས་དེ་ལ་ཡང་བརྒལ་ཞིང་བརྟགས་པ་མཚུངས་པའི་ཕྱིར་རོ། །འདི་ལྟར་གལ་ཏེ་ཞིག་ནས་མེད་པ་དང༌། དངོས་པོར་ལྷན་ཅིག་བདག་ཉིད་ཐམས་ཅད་ཀྱིས་མཆོད་ན་ནི་དེའི་ཚེ་དུས་མཉམ་པར་ཐལ་ཏེ། དེའི་ཕྱིར་གཅིག་ལ་ཅིག་ཅར་དངོས་པོ་དང་དངོས་པོ་མེད་པ་ཕན་ཚུན་འགལ་བ་དག་ཏུ་འགྱུར་རོ། །འོན་ཏེ་ཕྱོགས་གཅིག་གིས་ཡིན་ན་ནི་དེའི་ཚེ་ཆ་ཤས་དང་བཅས་པ་ཉིད་དུ་བཟློག་དཀའོ། །མེད་པ་ཞེས་བྱ་བ་ནི་གང་གིས་ན་ལྷན་ཅིག་མཆོད་པ་ལ་སོགས་པའི་བསམ་པ་འཇུག་པར་འགྱུར་བ་ཡོངས་སུ་གྲུབ་པ་ཅི་ཡང་མེད་དེ། འདི་ནི་བློས་ཀུན་བརྟགས་པའི་བདག་ཉིད་འབའ་ཞིག་ཁོ་ན་ཡིན་པར་ཟད་པས་དངོས་པོའི་མཇུག་ཐོགས་སུ་འབྱུང་ངོ་ཞེས་སྐད་ཅིག་ལས་ཕན་ཚུན་དུ་དངོས་པོའི་རང་གི་ངོ་བོ་དག་གནས་པ་དགག་པའི་ཕྱིར་རྣམ་པར་གཞག་གི་དོན་དམ་པར་ནི་མ་ཡིན་ནོ། །དོན་དམ་པར་ནི་ཁྱེད་རྒྱུའི་མཇུག་ཐོགས་སུ་འབྲས་བུ་འབྱུང་ངོ་ཞེས་བྱ་བར་འདོད་དེ། དེས་ན་དེ་ལ་མཆོད་པ་ལ་སོགས་པའི་བསམ་པ་འཇུག་པ་ཉིད་དོ། །ཁོ་བོ་ཅག་གི་ལྟར་ན་ནི་དེ་ཁོ་ན་ཉིད་མཐའ་གཉི་ག་དང་བྲལ་བའི་ཕྱིར་དོན་དམ་པར་ན་དེ་དངོས་པོ་ཡང་མ་ཡིན་ལ་དངོས་པོ་མེད་པར་ཡང་མ་གྲུབ་ན་དེ་ཇི་ལྟར་དེ་གཉིས་དཔེ་ཉིད་དུ་འགྲུབ་པར་འགྱུར། འདིས་ནི་གྲིབ་མ་དང་ཉི་མའི་དཔེར་ཡང་གསལ་བ་ཡིན་ཏེ། འདི་ལྟར་གྲིབ་མ་དང་ཉི་མ་རྡུལ་ཕྲ་རབ་བསགས་པའི་བདག་ཉིད་ཆ་ཤས་ཅན་གྱི་ངོ་བོ་དག་གལ་ཏེ་བདག་ཉིད་ཐམས་ཅད་ཀྱིས་མཆོད་ན་ནི་དེའི་ཚེ་ཡུལ་གཅིག་པ་ཉིད་དུ་ཐལ་བར་འགྱུར་རོ། །འོན་ཏེ་ཕྱོགས་གཅིག་གིས་ཡིན་ན་ནི་དེའི་ཚེ་ཆ་ཤས་དང་བཅས་པ་ཉིད་དུ་ཐལ་བས་བརྒལ་ཞིང་བརྟག་པར་མཚུངས་སོ། །རྣམ་པར་ཤེས་པ་སྣང་བའི་ངོ་བོ་དག་ཡིན་ན་ཡང་དེ་གཉིས་བརྫུན་པའི་ཕྱིར་མཆོད་པ་ལ་སོགས་པའི་
བསམ་པ་མི་འཇུག་པ་ཉིད་དེ། དེའི་ཕྱིར་ཡང་དཔེར་ཡང་མ་གྲུབ་པ་ཉིད་དོ། །སྲང་མདའི་མཐོན་དམན་གྱི་དཔེ་གང་ཡིན་པ་དེ་ཡང་དོན་དམ་པར་མ་གྲུབ་སྟེ། འདི་ལྟར་རེ་ཞིག་སྲང་མདའ་ཞེས་བྱ་བ་ཆ་ཤས་ཅན་གྱི་རྫས་གཅིག་པུ་ནི་མ་གྲུབ་སྟེ། གཅིག་ལ་གྱེན་ཐུར་དུ་འགྲོ་བ་ལ་སོགས་པ་ཕན་ཚུན་འགལ་བའི་བྱ་བ་གཉིས་དང་ལྡན་པ་མི་རུང་བའི་ཕྱིར་རོ། །དུ་མར་དབྱེ་ན་ཡང་རྡུལ་ཕྲ་རབ་ཏུ་དབྱེ་གྲང་ན། རྡུལ་ཕྲ་རབ་དེ་དག་ཀྱང་ཤར་དང་བྱང་ལ་སོགས་པའི་ཕྱོགས་ཆ་ཐ་དད་པར་ཡོངས་སུ་འཛིན་པར་གནས་པར་ཁས་བླངས་པའི་ཕྱིར་ཕྱོགས་ཐ་དད་པ་ཡང་ཁས་བླངས་པ་ཡིན་ཏེ། དེ་ལྟ་བུ་དེ་དག་གི་དོན་དམ་པར་ཡོད་པར་མ་གྲུབ་པོ། །བཅོམ་ལྡན་འདས་ཀྱི་སཱ་ལུ་ལྡང་པ་ལ་སོགས་པའི་མདོ་ལས། ཆད་པར་ལྟ་བ་ཡོངས་སུ་སྤང་བའི་ཕྱིར་སྲང་མདའི་མཐོན་དམན་གྱི་དཔེ་བསྟན་པ་གང་ཡིན་པ་དེ་ཡང་རྒྱུ་དང་འབྲས་བུའི་ཀུན་རྫོབ་པ་ལ་བལྟ་བར་བྱའི། དོན་དམ་པ་ལ་ནི་མ་ཡིན་ཏེ། དེ་ལྟར་མ་གྲུབ་པའི་ཕྱིར་རོ། །ཇི་སྟེ་སྲང་རྣམ་པར་ཤེས་པ་སྣང་བ་ཙམ་གྱི་ངོ་བོ་ཉིད་དུ་སྟོན་ན་ནི་དེའི་ཚེ་རྣམ་པར་ཤེས་པ་ལུས་ཅན་མ་ཡིན་པ་ཉིད་ཀྱིས་དོན་དམ་པར་ན་མཐོ་བ་ལ་སོགས་པའི་བྱ་བ་མི་སྲིད་པ་ཉིད་ཡིན་ན་ཇི་ལྟར་དཔེ་གྲུབ་པར་འགྱུར། རྣམ་པར་ཤེས་པ་ཡང་དོན་དམ་པར་ན་གཉིས་སུ་མེད་པ་ཉིད་ཡིན་པ་ལས་གཉིས་སུ་སྣང་བ་བརྫུན་པའི་ཕྱིར་དེ་སྣང་བའི་སྲང་ཡང་བརྫུན་པ་ཁོ་ན་ཡིན་ལ། ཇི་ལྟར་སྲང་དོན་དམ་པར་ཡོད་པར་འགྲུབ་པར་འགྱུར། དེ་ལྟ་བས་ན་ཇི་ལྟར་ཡང་གཞན་ལས་སྐྱེ་བར་མི་འགྲུབ་བོ། །སློབ་དཔོན་རྣམས་ཀྱིས་ནི་རྒྱུ་དང་འབྲས་བུ་ཀུན་རྫོབ་པ་གྲུབ་པ་ཁོ་ན་ལས་ཀུན་རྫོབ་ཏུ་གཅིག་ལས་དུ་མ་སྐྱེ་བ་དང༌། དུ་མ་ལས་ཀྱང་གཅིག་སྐྱེ་བ་གཟིགས་པའི་ཕྱིར་མིག་ལ་སོགས་པ་ཇི་ལྟར་གྲགས་པ་རྣམས་རྗེས་སུ་འགྲོ་བ་དང་ལྡོག་པ་དག་གིས་མིག་གི་རྣམ་པར་ཤེས་པ་ལ་སོགས་པ་བྱེ་བྲག་ཏུ་འབྱེད་པ་ཉིད་དུ་ཉེ་བར་དྲངས་ནས་བྱིས་པའི་སྐྱེ་བོ་གཟུང་བའི་ཕྱིར་འབྲས་བུའི་གཏན་ཚིགས་གཞུང་གཟུགས་པར་རྒྱུའི་ཐ་དད་པ་ཐ་དད་པར་བྱེད་པ་ཉིད་དུ་བཤད་ཀྱི། དོན་དམ་པར་ནི་མ་ཡིན་ནོ་ཞེས་རྟོགས་པར་བྱ་སྟེ། དོན་དམ་པར་དེ་མ་གྲུབ་
པའི་ཕྱིར་རོ། །གྲངས་ཅན་ལ་སོགས་པ་གང་དག་མྱུ་གུ་ལ་སོགས་པའི་རྒྱུ་ས་དང་ཆུ་དང་ས་བོན་ལ་སོགས་པ་ཐ་དད་པ་དང་ཐ་དད་པ་མ་ཡིན་པ་མཐོང་ནས་དོན་དམ་པར་རང་དང་གཞན་ལས་སྐྱེ་བར་རྟོགས་པར་བྱེད་པ་དེ་དག་གི་ཡང་གཉི་གའི་ཕྱོགས་ལ་བཤད་པའི་ཉེས་པ་སུན་དབྱུང་བའི་ཕྱིར་རྟོག་པ་འདི་ཡང་བཟང་པོ་མ་ཡིན་ནོ། །གང་དག་རི་མོ་མཁན་ལ་སོགས་པའི་བྱེད་པ་མེད་པར་རྨ་བྱ་ལ་སོགས་པའི་སྒྲོ་བཀྲ་བ་ཉིད་ལ་སོགས་པ་མཐོང་བའི་ཕྱིར་དངོས་པོ་ཐམས་ཅད་རྒྱུ་མེད་པ་ཅན་ཉིད་དུ་རྗོད་པར་བྱེད་པ་དེ་དག་གི་ཕྱོགས་ཀྱང་དངོས་པོ་རྣམས་རེས་འགའ་བར་མཐོང་བའི་ཕྱིར་དང༌། ཡུལ་དང་དུས་དང་རྫས་ལ་སོགས་པ་རྒྱུ་ཁྱད་པར་ཅན་ལ་ལྟོས་པ་མཐོང་བའི་ཕྱིར་རིགས་པ་མ་ཡིན་ནོ། །ལྟོས་པ་མེད་པ་ལས་ནི་རེས་འགའ་བ་ཉིད་དུ་རིགས་པ་མ་ཡིན་ཏེ། དངོས་པོ་དང་དངོས་པོ་མེད་པའི་དུས་གཉིས་ཁྱད་པར་མེད་པའི་ཕྱིར་རྟག་ཏུ་དངོས་པོ་ཡོད་པའམ། དངོས་པོ་མེད་པར་འགྱུར་རོ། །རྨ་བྱ་ལ་སོགས་པའི་དཔེ་གང་ཡིན་པ་དེ་ཡང་དངོས་པོ་རྣམས་རྒྱུ་མེད་པར་སྐྱེ་བ་དོན་དམ་པར་བསྒྲུབ་པར་བྱ་བ་ལས་མ་གྲུབ་པ་ཉིད་དེ། དོན་དམ་པར་ཆོས་ཐམས་ཅད་མ་སྐྱེས་པའི་ཕྱིར་རོ། །བསྒྲུབ་པར་བྱ་བ་ཀུན་རྫོབ་པ་ཡིན་ན་ནི་དཔེ་བསྒྲུབ་པར་བྱ་བ་མ་ཚང་བ་ཡིན་ཏེ། འདི་ལྟར་ཡུལ་དང་དུས་དང་རྫས་ལ་སོགས་པའི་ཁྱད་པར་གང་ལ་ལྟོས་ནས་དཔེ་དེ་དག་གྲུབ་པ་ཉིད་དེ། དེ་དག་གི་རྒྱུ་ཡིན་པས་དཔེ་བསྒྲུབ་པར་བྱ་བ་མ་ཚང་བ་ཉིད་དོ། །དེ་བས་ན་དེ་ལ་རི་མོ་མཁན་གྱི་བྱ་བ་ལ་སོགས་པ་མེད་དོད་ཀྱི། འོན་ཀྱང་དེ་དག་རྒྱུ་མེད་པ་ཉིད་ནི་མ་ཡིན་ཏེ། དེ་དག་རང་གི་རྒྱུ་དག་ཁོ་ན་ལས་སྐྱེ་བའི་ཕྱིར་རོ། །དངོས་པོའི་ནུས་པ་རྣམས་སོ་སོར་ངེས་པའི་ཕྱིར་ཐམས་ཅད་ལས་ཐམས་ཅད་སྐྱེ་བ་ཡང་མ་ཡིན་ནོ། །མེ་དང་དུ་བ་ལ་སོགས་པ་ཡང་མངོན་སུམ་དང་མི་དམིགས་པ་དག་གིས་རྒྱུ་དང་འབྲས་བུའི་དངོས་པོར་གྲུབ་པའི་ཕྱིར་དམ་བཅས་པ་ལ་མངོན་སུམ་གྱིས་གནོད་པ་ཡང་ཡོད་ལ། དངོས་པོ་རྣམས་རེས་འགའ་བ་ཉིད་ཀྱིས་ལྟོས་པ་དང་བཅས་པ་ཉིད་དུ་གྲུབ་པའི་ཕྱིར་རྗེས་སུ་དཔག་པས་གནོད་པ་ཡང་ཡོད་དོ། །གཏན་ཚིགས་ལས་བསྒྲུབ་པར་བྱ་བ་ལ་ངེས་པ་སྐྱེ་བར་ཁས་བླངས་པའི་ཕྱིར་དམ་བཅས་པ་ལ་རང་གི་
ཚིག་དང་འགལ་བ་ཡང་ཡོད་དོ། །དེ་ལྟ་མ་ཡིན་ན་གཏན་ཚིགས་ཀྱི་སྦྱོར་བ་དོན་མེད་པ་ཁོ་ནར་འགྱུར་རོ། །དམ་བཅས་པ་ཙམ་གྱིས་ནི་འདོད་པའི་དོན་འགྲུབ་པ་མ་ཡིན་ཏེ། ཐམས་ཅད་ཀྱི་ཐམས་ཅད་འགྲུབ་པར་ཐལ་བར་འགྱུར་བའི་ཕྱིར་རོ། །དེ་ལྟ་བས་ན་གཏན་ཚིགས་མ་གྲུབ་པ་ཉིད་མ་ཡིན་ནོ། །ཅི་སྟེ་ཁྱོད་ལ་བཞི་པོ་བསྒྲུབ་པར་བྱ་བའི་ཆོས་ཅན་མ་གྲུབ་པའི་ཕྱིར་གཏན་ཚིགས་གཞི་མ་གྲུབ་པ་ཡིན་ནོ་སྙམ་དུ་སེམས་ན་དེ་ཡང་དག་པ་མ་ཡིན་ནོ། །གྲུབ་པའི་མཐའ་ལ་རྟེན་པའི་ཆོས་ཅན་གྱི་ཁྱད་པར་ཉ་བར་བཟུང་ནས་བསྒྲུབ་པ་རྗོད་པ་ནི་མ་ཡིན་ཏེ། ཆོས་ཅན་དེ་ལྟ་བུ་རྒོལ་བ་གཉི་ག་ལ་ནི་གང་དུ་ཡང་མ་གྲུབ་པའི་ཕྱིར་རོ། །གྲུབ་ན་ནི་གྲུབ་པར་བྱ་བ་ཡང་གྲུབ་པ་ཉིད་པས་རྩོད་པར་མི་འགྱུར་རོ། །འོན་ཀྱང་གནག་རྫི་ཡན་ཆད་ལ་གྲགས་པའི་དངོས་པོ་དག་ལ་རབ་ཏུ་སྨྲ་བ་ཐམས་ཅད་ཀྱི་བསྒྲུབ་པར་བྱ་བ་དང༌། བསྒྲུབ་པའི་བསམ་པའི་འཇུག་པ་ཉིད་པས་ཁོ་བོ་ཅག་ལ་ཉེས་པ་མེད་དོ། །ཁོ་བོ་ཅག་གིས་ནི་སྒྲུབ་པ་འདི་གང་གིས་ན་འདིའི་ཆོས་ཅན་དངོས་པོར་གྱུར་པ་བཙལ་བར་གྱུར་པ་བསྒྲུབ་པའི་ངོ་བོར་བཤད་པ་ཡང་མ་ཡིན་ནོ། །འོ་ན་ཅི་ཞེ་ན། དགག་པའི་ངོ་བོ་ཡིན་ཏེ། དེ་ཡང་དངོས་པོ་མེད་པ་ལ་ལེགས་པར་རབ་ཏུ་གྲུབ་པས་ཇི་ལྟར་ན་གཏན་ཚིགས་མ་གྲུབ་པ་ཉིད་དུ་འགྱུར། མ་ངེས་པ་ཉིད་ཀྱང་མ་ཡིན་ཏེ། སྔར་རྟག་པའི་དངོས་པོ་ཐམས་ཅད་བསལ་བས་དེ་ཡོངས་སུ་སྤང་བའི་ཕྱིར་རོ། །རྟག་པ་དང་མི་རྟག་པ་ཉིད་དག་ཏུ་བརྗོད་པར་བྱ་བ་མ་ཡིན་པའི་གང་ཟག་གིས་མ་ངེས་པ་ཉིད་དག་ཀྱང་མ་ཡིན་ཏེ། དངོས་པོར་ཡོད་པ་ལ་བརྗོད་པར་བྱ་བ་མ་ཡིན་པ་མི་སྲིད་པའི་ཕྱིར་རོ། །འདི་ལྟར་རྟག་པ་དང་མི་རྟག་པ་ཕན་ཚུན་སྤངས་ཏེ་གནས་པའི་མཚན་ཉིད་དག་ནི་གཅིག་ལ་བསྒྲུབ་པ་དང་དགག་པ་དག་ནི་ཅིག་ཤོས་བསྒྲུབ་པ་དང༌། དགག་པ་མེད་ན་མེད་པ་ཡིན་པའི་ཕྱིར་ཅིག་ཤོས་དགག་པ་གང་ཡིན་པ་དངོས་པོ་གཞན་སྒྲུབ་པ་ཡིན་ན་ཇི་ལྟར་བརྗོད་པར་བྱ་བ་མ་ཡིན་ཞེས་བྱ་བ་དངོས་པོར་འགྱུར། དེ་ལྟ་མ་ཡིན་ན་ཁྱད་པར་མེད་པའི་ཕྱིར་དངོས་པོ་ཐམས་ཅད་བརྗོད་པར་བྱ་བ་མ་ཡིན་པར་འགྱུར་རོ། །དེའི་ཕྱིར་གཏན་ཚིགས་མ་ངེས་པ་ཉིད་མ་ཡིན་ནོ། །གང་དག་དངོས་པོ་
རྣམས་རྐྱེན་དག་ལས་སྐྱེ་བ་ནི་མ་ཡིན་ནོ། །འོ་ན་ཅི་ཞེ་ན། གསལ་བ་ཁོ་ནས་ཏེ། དེས་ན་གཏན་ཚིགས་མ་ངེས་པ་ཁོ་ནའོ་སྙམ་དུ་སེམས་པ་དེ་ཡང་སྙིང་པོ་མ་ཡིན་པ་ཉིད་དེ། དངོས་པོ་རྟག་པ་ཐམས་ཅད་གསལ་བ་ཉིད་ཀྱི་ཕྱིར་གསལ་བར་བྱ་བ་རྟག་པ་ཅི་ཡང་མེད་པས་གསལ་བ་ཡང་གསལ་བའི་ཕྱིར་རོ། །གཞན་ཡང་རྐྱེན་རྣམས་ཀྱི་དངོས་པོ་གསལ་བ་ཞིག་ཡིན་ན། ཅི་སྟེ་རང་གི་མཚན་ཉིད་རྒྱས་པར་འགྱུར་བའམ། དེའི་སྒྲིབ་པ་ཡང་དག་པར་ཟད་པའི་བདག་ཉིད་དམ། དབང་པོ་ལེགས་པར་སྦྱངས་པའམ། ཡུལ་དེ་ལ་ཤེས་པ་སྐྱེ་བའི་མཚན་ཉིད་གཅིག་ཡིན་གྲང་ཞེས་རྣམ་པར་བརྟག་སྟེ། དེ་ལ་རེ་ཞིག་ཕྱོགས་དང་པོ་ནི་མ་ཡིན་ཏེ། རྟག་པ་ཉིད་ཉམས་པར་ཐལ་བར་འགྱུར་བའི་ཕྱིར་རོ། །གལ་ཏེ་རང་གི་ངོ་བོ་མ་རྒྱས་པ་ནི་རང་གི་ངང་གིས་འཇིག་པ་ཡིན་ལ་གསལ་བར་བྱེད་པའི་རྐྱེན་གྱིས་སྔོན་མེད་པའི་རང་གི་ངོ་བོ་རྒྱས་པ་ཞིག་སྐྱེ་ན་ནི་དེའི་ཚེ་དེ་ལས་རང་གི་མཚན་ཉིད་རྒྱས་པར་འགྱུར་རོ། །དེ་ལྟ་མ་ཡིན་ཏེ། རང་གི་ངོ་བོ་སྔ་མ་འགག་པར་མི་འགྱུར་ན་ནི་དེའི་ཚེ་འདི་ལ་རྒྱས་པ་ཕན་ཚུན་འགལ་བའི་རང་གི་ངོ་བོ་གཉིས་འཆོལ་བར་ཁས་བླངས་པར་འགྱུར་རོ། །རང་གི་ངོ་བོ་སྔོན་མེད་པ་ཞིག་མི་སྐྱེ་ན་ནི་གསལ་བར་བྱེད་པའི་རྐྱེན་དོན་མེད་པར་འགྱུར་རོ། །དངོས་པོ་རྣམས་ཀྱི་སྐྱེ་བ་ཡང་སྔར་རྒྱས་པར་གསལ་བའི་ཕྱིར་རིགས་པ་མ་ཡིན་ནོ། །སྒྲིབ་པ་ཡང་དག་པར་ཟད་པ་ཡང་མ་ཡིན་ཏེ། མེད་པའི་ངོ་བོ་དེ་ནི་དངོས་པོ་མེད་པ་ཉིད་ཀྱིས་གང་གིས་ཀྱང་བྱ་བར་མི་སྲིད་པའི་ཕྱིར་རོ། །བྱ་བ་དངོས་པོའི་ངོ་བོ་ཡང་སྔར་གསལ་ཟིན་པའི་ཕྱིར་རོ། །འགའ་ཞིག་གིས་རྟག་པའི་དངོས་པོའི་རང་བཞིན་ཁྱད་པར་ཅན་འགའ་ཞིག་མ་བཤིག་པའམ། མ་བསྐྱེད་པར་ནི་ནམ་ཡང་སྒྲིབ་པ་མེད་པར་བྱེད་པར་རིགས་པ་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །ཡུལ་དེ་ལ་ཤེས་པ་སྐྱེ་བའི་གེགས་བྱེད་པ་ཉིད་ཀྱིས་སྒྲིབ་པར་བྱེད་པ་ཡིན་པར་ཡང་རིགས་པ་མ་ཡིན་ཏེ། དེ་རང་གི་ལུས་ལ་ཤེས་པ་སྐྱེད་པར་ནུས་པའམ། དེའི་རྣམ་པར་ཤེས་པས་རྣམ་པར་ཤེས་པའི་རང་བཞིན་ཡིན་པ་དང༌། ཤེས་པ་རྒྱུ་མ་ཚང་བ་མེད་པ་ལ་སུས་ཀྱང་བགེགས་བྱ་བར་མི་ནུས་པའི་ཕྱིར་རོ། །ཅི་སྟེ་འདི་
མི་ནུས་པའང་དེའི་རྣམ་པར་ཤེས་པས་རྣམ་པར་ཤེས་པར་བྱ་བའི་རང་བཞིན་མ་ཡིན་ན་ནི་དེའི་ཚེ་བདག་ཉིད་ཀྱིས་རྒྱུ་མ་ཚང་བས་ཡུལ་དེ་ལ་རྣམ་པར་ཤེས་པ་མི་སྐྱེ་བའི་ཕྱིར་འདི་ནི་ཡུལ་དེ་ལ་ཤེས་པ་སྐྱེ་བའི་གེགས་བྱེད་པ་ཉིད་ཀྱིས་སྒྲིབ་པར་བྱེད་པ་ཡིན་པར་རིགས་པ་མ་ཡིན་ནོ། །སྒྲིབ་པ་ཡང་དག་པར་ཟད་པ་བཞིན་དུ་ཤེས་པ་སྐྱེ་བའི་བགེགས་མེད་པ་དང་མ་ཡིན་པའི་ངོ་བོ་ཡང་བྱ་བར་རིགས་པ་མ་ཡིན་པ་ཁོ་ནའོ། །དེ་བས་ན་མི་ནུས་པའི་ཕྱིར་རམ། དེའི་རྣམ་པར་ཤེས་པས་རྣམ་པར་ཤེས་པར་བྱ་བའི་རང་བཞིན་མ་ཡིན་པའི་ཕྱིར་གསལ་བར་བྱེད་པའི་རྐྱེན་རྣམས་ཀྱིས་དེ་ལ་སྒྲིབ་པར་བྱེད་ལ་བཟློག་ཀྱང་ཡུལ་དེ་ལ་རྣམ་པར་ཤེས་པ་སྐྱེ་བར་རིགས་པ་མ་ཡིན་ནོ། །འོན་ཏེ་ནུས་པར་ཁས་ལེན་ན་ནི་དེའི་ཚེ་སྒྲིབ་པར་བྱེད་པ་ཡོད་དུ་ཟིན་ཀྱང་དེ་ལ་རྒྱུ་མ་ཚང་བ་མེད་པའི་ཕྱིར་རྣམ་པར་ཤེས་པ་རྟག་ཏུ་སྐྱེ་བར་འགྱུར་བས་གསལ་བར་བྱེད་པ་རྣམས་ཀྱིས་བྱེད་པ་དོན་མེད་པ་ཡིན་ནོ། །དེ་ལྟ་བས་ན་རྟག་པ་རྣམས་ལ་ཆུང་ཟད་ཀྱང་མི་བྱེད་པའི་ཕྱིར་འགའ་ཡང་སྒྲིབ་པར་བྱེད་པ་ཡིན་པར་རིགས་པ་མ་ཡིན་ནོ། །མི་རྟག་པ་རྣམས་ལ་ནི་རྣམ་པར་ཤེས་པ་སྐྱེད་མི་ནུས་པའི་སྐད་ཅིག་མ་གཞན་སྐྱེད་པ་ཉིད་ཀྱིས་རྒྱུའི་ཁྱད་པར་ཁོ་ན་རེས་འགའ་ཞིག་སྒྲིབ་པར་བྱེད་པ་ཡིན་པར་འགྱུར་གྱི་གཞན་དུ་ནི་མ་ཡིན་ནོ། །དབང་པོ་ལེགས་པར་བྱ་ཞེས་བྱ་བའི་ཕྱོགས་ཀྱང་མ་ཡིན་ཏེ། དེའི་རང་གི་ངོ་བོར་གྱུར་པ་སྔོན་མེད་པ་ཞིག་ལེགས་པར་བྱེད་པ་ཡིན་དང༌། མི་རྟག་པ་ཉིད་དུ་ཐལ་བར་འགྱུར་ཏེ་སྔ་མ་བཞིན་ནོ། །ལེགས་པར་བྱ་བ་དོན་གཞན་དུ་གྱུར་པ་ཞིག་བྱེད་ན་ནི་དེ་ལེགས་པར་བྱེད་པར་རིགས་པ་མ་ཡིན་ཏེ། དེ་ལ་ཅུང་ཟད་ཀྱང་མི་བྱེད་པའི་ཕྱིར་རོ། །དེ་ལྟ་མ་ཡིན་ན་ཧ་ཅང་ཐལ་བར་འགྱུར་རོ། །གང་གིས་ཀྱང་དངོས་པོ་འགའ་ཡང་བྱེད་པར་མི་སྲིད་དེ་ཞེས་ཀྱང་སྔར་བསྒྲུབས་ཟིན་ཏོ། །དབང་པོ་ལེགས་པར་བྱེད་པ་ཡིན་དུ་ཆུག་ན་ཡང་གལ་ཏེ་གསལ་བར་བྱ་བའི་དངོས་པོའི་བདག་ཉིད་དེ། བདག་ཉིད་ཀྱིས་དབང་པོའི་རྣམ་པར་ཤེས་པ་སྐྱེ་བར་མི་ནུས་པའམ། ཡུལ་དེའི་རྣམ་པར་ཤེས་པས་རྣམ་པར་ཤེས་པར་བྱ་བའི་རང་བཞིན་མ་ཡིན་ན་ནི་དེའི་ཚེ་དེ་ལ་རྣམ་པར་ཤེས་པ་སྐྱེ་བར་མི་འགྱུར་པ་ཁོ་ན་བས་ལེགས་པར་བྱེད་པ་དོན་མེད་པ་ཁོ་ནར་འགྱུར་རོ། །ཅི་སྟེ་ནུས་པའམ་དེའི་རྣམ་པར་ཤེས་པས་རྣམ་པར་
ཤེས་པར་བྱ་བའི་རང་བཞིན་ཞིག་ཡིན་ན་ནི་དེའི་ཚེ་དེ་ཡང་དབང་པོ་ལེགས་པར་བྱ་བའི་སྔོན་རོལ་དུ་དེ་ལ་ཤེས་པ་སྐྱེ་བར་ཐལ་བར་འགྱུར་བའི་ཕྱིར་ལེགས་པར་བྱ་བ་དོན་མེད་པ་ཁོ་ནར་འགྱུར་རོ། །དེ་ཉིད་ཀྱི་ཕྱིར་ལེགས་པར་བྱ་བ་ནི་ཡུལ་དེ་ལ་ཤེས་པ་སྐྱེ་བའི་མཚན་ཉིད་ཅན་དུ་ཡང་རིགས་པ་མ་ཡིན་ཏེ། འདི་ལྟར་གལ་ཏེ་གསལ་བར་བྱ་བའི་དངོས་པོ་དེ་བདག་ཉིད་ཀྱིས་མི་ནུས་པའམ། དེའི་རྣམ་པར་ཤེས་པས་རྣམ་པར་ཤེས་པར་བྱ་བའི་རང་བཞིན་མ་ཡིན་ན་ནི་དེའི་རྣམ་པར་ཤེས་པ་དེ་སྐྱེས་སུ་ཟིན་ཀྱང་དེའི་རྣམ་པར་ཤེས་པ་དེའི་ཡུལ་ཉིད་མ་ཡིན་པར་འགྱུར་རོ། །འོན་ཏེ་ནུས་པའང་དེའི་རྣམ་པར་ཤེས་པས་རྣམ་པར་ཤེས་པའི་རང་བཞིན་ཞིག་ཡིན་ན་ནི་དེའི་ཚེ་དེའི་རང་གི་ངོ་བོ་བཞིན་དུ་རྒྱུ་མ་ཚང་བ་མེད་པའི་ཕྱིར་རྣམ་པར་ཤེས་པ་རྟག་ཏུ་ཉེ་པ་ཁོ་ན་ཡིན་པས་གསལ་བར་བྱེད་པ་རྣམས་རྣམ་པར་ཤེས་པ་སྐྱེད་པར་བྱེད་པ་མ་ཡིན་ནོ། །གཞན་ཡང་ཁྱེད་ཅག་གི་ལུགས་ཀྱིས་དངོས་པོའི་རིགས་ཐམས་ཅད་རྟག་ཏུ་གནས་པའི་ངོ་བོ་ཉིད་ཡིན་པས་གསལ་བ་དང་གསལ་བར་བྱེད་པ་རྣམས་དང་གསལ་བར་བྱ་བ་ཡང་རྟག་ཏུ་གནས་པའི་ཕྱིར་གསལ་བ་ལ་སོགས་པ་རྣམ་པར་གཞག་པ་རིགས་པ་མ་ཡིན་ནོ། །གསལ་བར་བྱེད་པ་རྣམས་ཀྱང་ཆུང་ཟད་ཀྱང་མི་བྱེད་པའི་ཕྱིར་དངོས་པོ་ཐམས་ཅད་རྟག་ཏུ་གསལ་བར་ཐལ་བར་འགྱུར་པ་ཡང་བཟློག་དཀའོ། །དེ་ལྟ་བས་ན་གསལ་བར་སྨྲ་བ་འདི་ནི་བཟང་པོ་མ་ཡིན་ནོ། །མཐུན་པའི་ཕྱོགས་ལ་ཡོད་པའི་ཕྱིར་གཏན་ཚིགས་མ་ངེས་པ་ཉིད་ཀྱང་མ་ཡིན་ལ། འགལ་བ་ཉིད་ཀྱང་མ་ཡིན་ཏེ། དེའི་ཕྱིར་དོན་དམ་པར་དངོས་པོ་ཐམས་ཅད་རྟག་ཏུ་རང་བཞིན་མེད་དོ་ཞེས་བྱ་བ་འདི་འགྲུབ་བོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་སཱ་ལུ་ལྗང་པའི་མདོ་ལས། དངོས་པོ་རྣམས་རང་དང་གཞན་དང་གཉི་ག་དང་རྒྱུ་མེད་པ་ཅན་དུ་བཀག་སྟེ། ཇི་སྐད་དུ་མིང་དང་གཟུགས་ཀྱི་མྱུ་གུ་དེ་ནི་རང་ཉིད་ཀྱིས་ཀྱང་མ་བྱས། གཞན་གྱིས་ཀྱང་མ་བྱས། གཉི་གས་ཀྱང་མ་བྱས། དབང་ཕྱུག་གིས་ཀྱང་མ་སྤྲུལ། དུས་ཀྱིས་ཀྱང་མ་བསྒྱུར། རྐྱེན་གཅིག་པུ་ལ་རག་ལས་པ་མ་ཡིན། རྒྱུ་མེད་པ་ལས་སྐྱེས་པ་ཡང་མ་ཡིན་ནོ་ཞེས་བྱ་བ་ལ་སོགས་པ་ལྟ་བུའོ། །གཞན་དག་ན་རེ་བཀའ་འདི་ནི་བྱེད་པ་དགག་པ་ལྷུར་མཛད་པ་ཡིན་ནོ་ཞེས་ཟེར་བ་དེ་དག་གི་དེ་ཡང་རིགས་པ་མ་ཡིན་ཏེ། དོན་དམ་པར་དངོས་པོ་འགའ་ཡང་སྐྱེ་བ་མེད་པའི་ཕྱིར་
རོ། །གལ་ཏེ་དོན་དམ་པར་འགའ་ཞིག་སྐྱེ་བར་གྲུབ་ན་ནི་དེའི་ཚེ་བཤད་པ་འདི་བཟང་གི་གཞན་དུ་ནི་མ་ཡིན་ནོ། །དེ་ཉིད་ཀྱི་ཕྱིར་འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང༌། དོན་དམ་སྐྱེ་བ་དགག་པའི་ཕྱིར། །བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དག་གང་ན་ཡང༌། །སྐྱེ་བ་ནམ་ཡང་ཡོད་མ་ཡིན། །ཞེས་གསུངས་སོ། །དེ་ལྟ་བས་ན་དོན་དམ་པར་ན་ཆོས་ཐམས་ཅད་སྐྱེ་བ་མེད་པ་ཁོ་ནར་རིགས་ཏེ། འཕགས་པ་ཆོས་ཡང་དག་པར་སྡུད་པ་ལས། ཇི་སྐད་དུ། སྐྱེ་བ་མེད་པ་དེ་ནི་བདེན་གྱི། ཆོས་གཞན་ནི་ཡོད་པ་མ་ཡིན་ནོ། །ཞེས་གསུངས་པ་ལྟ་བུའོ། །སྐྱེ་བ་མེད་པ་འདི་ཡང་དོན་དམ་པར་རྟོགས་པ་དང་མཐུན་པའི་ཕྱིར་དོན་དམ་པ་ཞེས་བྱ་སྟེ། འདི་ལྟར་སྐྱེ་བ་ལ་སོགས་པ་དགག་པར་བྱ་བ་ཅི་ཡང་མ་གྲུབ་པའི་ཕྱིར་ཡུལ་མེད་པ་ལ་མེད་པ་མི་སྦྱོར་བའི་ཕྱིར་སྐྱེ་བ་མེད་པ་ལ་སོགས་པར་འཛིན་པ་ནི་སྤྲོས་པ་ཁོ་ན་ཡིན་ཏེ། རྣམ་པར་རིག་པ་ཙམ་ཉིད་ལ་སོགས་པར་རྣམ་པར་རྟོག་པ་བཞིན་ནོ། །དོན་དམ་པར་ནི་དེ་ཁོ་ན་ཉིད་སྐྱེ་བ་མེད་པ་ལ་སོགས་པར་བརྗོད་པར་བྱ་བ་མ་ཡིན་ཏེ། དེ་ཉིད་ཀྱི་ཕྱིར་འཕགས་པ་འཇམ་དཔལ་གཞོན་ནུར་གྱུར་པས་དེ་ཁོ་ན་ཉིད་དྲིས་པ་དང༌། འཕགས་པ་དྲི་མ་མེད་པར་གྲགས་པས་ཅང་མི་གསུང་བར་གྱུར་ཏོ། །འཕགས་པ་དེ་བཞིན་གཤེགས་པའི་ཡེ་ཤེས་ཕྱག་རྒྱའི་ཏིང་ངེ་འཛིན་གྱི་མདོ་ལས་ཀྱང༌། བྱང་ཆུབ་ཀྱི་སྙིང་པོ་ལ་བཞུགས་ནས་བདེན་པ་གཅིག་ཀྱང་གྲུབ་པ་མ་མཐོང་ན་བཞི་ལྟ་ཅི་སྨོས་ཞེས་གསུངས་སོ། །དེ་ལྟར་རེ་ཞིག་རིགས་པས་དངོས་པོ་ཐམས་ཅད་གཅིག་ཏུ་རང་བཞིན་མེད་པ་ཉིད་དུ་བསྒྲུབས་པ་ཡིན་ནོ། །དེ་ནི་ལུང་གིས་ཀྱང་བསྒྲུབ་པར་བྱ་སྟེ། དེ་ལ་གླང་པོ་རྩལ་གྱི་མདོ་ལས། གང་ལ་སྐྱེ་བ་སྲིད་པ་ཡི། །དངོས་པོ་འགའ་ཡང་མི་རྙེད་དོ། །རང་བཞིན་མེད་པའི་དངོས་རྣམས་ལ། །བྱིས་པ་དག་ནི་སྐྱེ་བར་འདོད། །ཅེས་གསུངས་སོ། །འཕགས་པ་དཀོན་མཆོག་འབྱུང་གནས་ཀྱི་མདོ་ལས་ཀྱང༌། གང་ལ་རང་བཞིན་ཡོད་པ་མ་ཡིན་པ། །རང་བཞིན་མེད་དེ་གཞན་རྐྱེན་ཇི་ལྟར་འགྱུར། །རང་བཞིན་མེད་པས་གཞན་ཅི་སྐྱེད་འགྱུར་ཞེས། །རྒྱུ་དེ་དེ་བཞིན་གཤེགས་པས་བསྟན་པ་ཡིན། །ཞེས་གསུངས་སོ། །ཀླུའི་རྒྱལ་པོ་རྒྱ་མཚོས་ཞུས་པའི་མདོ་ལས་ཀྱང༌། སྔོན་གྱི་མཐའ་སྟོང་ཕྱི་མའི་མཐའ་སྟོང་ཞིང༌། །སྐྱེ་དང་འཇིག་དང་གནས་པའི་དངོས་པོ་སྟོང༌། །འདི་ནི་དངོས་མིན་
དངོས་པོ་མེད་པའང་མིན། །ཆོས་རྣམས་ཐམས་ཅད་རང་གི་ངོ་བོས་སྟོང༌། །ཞེས་གསུངས་སོ། །འཕགས་པ་ཏིང་ངེ་འཛིན་གྱི་རྒྱལ་པོའི་མདོ་ལས་ཀྱང༌། དཔེར་ན་ཆུ་ཤིང་རློན་པའི་སྡོང་པོ་ལས། །སྙིང་པོ་འདོད་མིས་རྣམ་པར་བཤིག་ན་ཡང༌། །ཕྱི་དང་ནང་ན་སྙིང་པོ་མེད་པ་ལྟར། །ཆོས་རྣམས་ཐམས་ཅད་དེ་འདྲར་ཤེས་པར་གྱིས། །ཞེས་གསུངས་སོ། །འཕགས་པ་སངས་རྒྱས་ཀྱིས་ཡང་དག་པར་སྡུད་པ་ལས་ཀྱང༌། ཚུལ་བཞིན་འདྲི་བ་ནི་གང་ལགས། ཚུལ་མ་ལགས་པ་ནི་གང་ལགས། བཀའ་སྩལ་པ། སྐྱེ་བ་མེད་པ་ནི་ཚུལ་ཡིན་ཏེ། དེ་འདྲི་བ་ནི་ཚུལ་བཞིན་འདྲི་བའོ་ཞེས་གསུངས་སོ། །ཡང་དེ་ཉིད་ལས་ཆོས་ཐམས་ཅད་ནི་ཙ་ཞེས་བྱ་བའི་སྒོ་ཅན་ཏེ། འཆི་འཕོ་དང་སྐྱེ་བ་དང་བྲལ་བ་ཡིན་ནོ། །ཆོས་ཐམས་ཅད་ནི་རང་བཞིན་གྱི་སྒོ་ཅན་ཏེ། རང་བཞིན་ནི་སྟོང་པ་ཉིད་ཀྱི་ཕྱིར་རོ་ཞེས་གསུངས་སོ། །ཡབ་དང་སྲས་མཇལ་བའི་མདོ་ལས་ཀྱང༌། ཆོས་འདི་དག་ཐམས་ཅད་ནི་དུས་གསུམ་མཉམ་པ་ཉིད་ཀྱིས་མཉམ་པ་སྟེ། འདས་པའི་དུས་ན་ཡང་ཆོས་ཐམས་ཅད་རང་བཞིན་དང་བྲལ་བ་ཡིན་ལ། མ་འོངས་པ་དང་ད་ལྟར་བྱུང་བའི་དུས་སུ་ཡང་ཆོས་ཐམས་ཅད་རང་བཞིན་དང་བྲལ་བ་ཡིན་ནོ་ཞེས་གསུངས་ཤིང༌། ཡང་དེ་ཉིད་ལས། ཆོས་ཐམས་ཅད་ནི་རང་བཞིན་གྱིས་སྟོང་པའོ། །རང་བཞིན་མེད་པའི་ཆོས་གང་ཡིན་པ་དེ་ནི་འདས་པ་མ་ཡིན་མ་འོངས་པ་མ་ཡིན་ད་ལྟར་བྱུང་བ་མ་ཡིན་ནོ། །དེ་ཅིའི་ཕྱིར་ཞེ་ན། རང་བཞིན་མེད་པའི་ཕྱིར་འདས་པ་ཞེས་གདགས་པར་བྱ་བ་མ་ཡིན། མ་འོངས་པ་ཞེས་གདགས་པར་བྱ་བ་མ་ཡིན། ད་ལྟར་བྱུང་བ་ཞེས་གདགས་པར་བྱ་བ་མ་ཡིན་ནོ་ཞེས་གསལ་བར་མཛད་དོ། །འཕགས་པ་བདེན་པ་གཉིས་ལ་འཇུག་པ་ལས་ཀྱང༌། འཇམ་དཔལ་ཡང་དག་པའི་སྦྱོར་བ་གང་ཡིན། འཇམ་དཔལ་གྱིས་སྨྲས་པ། ལྷའི་བུ་དོན་དམ་པར་དེ་བཞིན་ཉིད་དང༌། ཆོས་ཀྱི་དབྱིངས་དང༌། ཤིན་ཏུ་སྐྱེ་བ་མེད་པ་གང་དང་མཉམ་པ་མཚམས་མེད་པ་རྣམས་ཀྱང་དེ་དང་མཉམ་མོ་ཞེས་ཀུན་ནས་ཉོན་མོངས་པ་དང༌། རྣམ་པར་བྱང་བའི་ཆོས་ཐམས་ཅད་རྒྱས་པར་བཤད་པ་དང༌། སྨྲས་པ། འཇམ་དཔལ་གཞོན་ནུར་གྱུར་པ་མཉམ་པ་ཉིད་གང་གིས་རྣམ་པར་བྱང་བའི་བར་གང་དང་མཉམ་པ་ཆོས་ཐམས་ཅད་ཀྱང་དེ་དང་མཉམ། འཇམ་དཔལ་གྱིས་སྨྲས་པ། ལྷའི་བུ་དོན་དམ་པར་ཆོས་ཐམས་ཅད་སྐྱེ་བ་མེད་པར་མཉམ་པ་ཉིད་དང༌།
དོན་དམ་པར་ཆོས་ཐམས་ཅད་ཤིན་ཏུ་སྐྱེ་བ་མེད་པར་མཉམ་པ་ཉིད་དང༌། དོན་དམ་པར་ཆོས་ཐམས་ཅད་དངོས་པོ་མེད་པར་མཉམ་པ་ཉིད་ཀྱིས་ཆོས་ཐམས་ཅད་མཉམ་མོ་ཞེས་རྒྱ་ཆེར་གསུངས་སོ། །འཕགས་པ་སངས་རྒྱས་ཐམས་ཅད་ཀྱི་ཡེ་ཤེས་སྣང་བའི་རྒྱན་ལས་ཀྱང༌། སྐྱེ་མེད་ཆོས་ནི་རྟག་ཏུ་དེ་བཞིན་གཤེགས། །ཆོས་རྣམས་ཐམས་ཅད་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པ་ཡིས། །འཇིག་རྟེན་ན་ནི་མེད་པའི་ཆོས་ལ་སྤྱོད། །ཅེས་གསུངས་སོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཀྱང༌། རབ་འབྱོར་རང་གི་མཚན་ཉིད་སྟོང་པ་ཉིད་ཀྱི་ཕྱིར། གཟུགས་ནས་རྣམ་པར་ཤེས་པའི་བར་དུ་རང་གི་ངོ་བོས་སྟོང་ངོ་ཞེས་གསུངས་སོ། །དཀོན་མཆོག་ཟ་མ་ཏོག་ལས་ཀྱང༌། འཇམ་དཔལ་དེའི་ཕྱིར་སངས་རྒྱས་ཀྱི་ཆོས་ཀྱང་ཆོས་མ་ཡིན་ནམ། བཙུན་པ་རབ་འབྱོར་སངས་རྒྱས་ཀྱི་ཆོས་རྣམས་ལ་ཡང་དག་པར་གྲུབ་པ་འགའ་ཡང་མེད་དོ།། གང་གྲུབ་པ་མེད་པ་དེ་ནི་ཆོས་ཀྱང་མ་ཡིན། ཆོས་མ་ཡིན་པ་ཡང་མ་ཡིན་ནོ་ཞེས་བརྗོད་པར་བྱ་སྟེ། དེ་ལྟ་བས་ན་བཅོམ་ལྡན་འདས་ཉིད་ཀྱིས་ཆོས་ཐམས་ཅད་ནི་ཆོས་མ་ཡིན་པའོ་ཞེས་གསུངས་སོ། །གལ་ཏེ་འདི་ཐམས་ཅད་ནི་ཀུན་བརྟགས་པའི་ངོ་བོ་ཉིད་ལས་དགོངས་ནས་གསུངས་པ་ཡིན་ཏེ། མདོ་ལས་ཇི་སྐད་དུ། ཀུན་བརྟགས་པའི་ངོ་བོ་ཉིད་ལས་དགོངས་ནས་ཆོས་ཐམས་ཅད་ངོ་བོ་ཉིད་མེད་པར་བསྟན་ཏོ་ཞེས་གསུངས་པ་ལྟ་བུའོ་ཞེ་ན། འདི་ནི་བདེན་པ་ཉིད་ན་འོན་ཀྱང་ཀུན་བརྟགས་པའི་ངོ་བོ་ཉིད་འདི་གང་ཡིན་ཞེས་བྱ་བ་འདི་བརྗོད་དགོས་སོ། །གལ་ཏེ་གང་ཚད་མས་གནོད་བཞིན་དུ་བྱིས་པ་རྣམས་ཀྱིས་དེ་ཁོ་ན་ཉིད་བཟུང་བ་ཡིན་ནོ་ཞེ་ན་ནི་གལ་ཏེ་དེ་ལྟ་ན་ནི་སྒྱུ་མ་བཞིན་དུ་མ་བརྟགས་ན་དགའ་བརྟེན་ཅིང་འབྲེལ་པར་འབྱུང་བའི་དངོས་པོ་ཐམས་ཅད་ལ་བྱིས་པ་རྣམས་ཀྱིས་དོན་དམ་པར་སྐྱེ་བ་ལ་སོགས་པར་སྒྲོ་འདོགས་པ་གང་ཡིན་པ་དེ་ཉིད་ཚད་མས་གནོད་པའི་ཕྱིར་ཀུན་བརྟགས་པའི་བདག་ཉིད་ཡིན་ཏེ། སྔར་ཇི་སྐད་དུ་བཤད་པ་ཡིན་ནོ། །དེ་ལྟ་མ་ཡིན་ན་ནི་ཕྱི་རོལ་གྱི་དོན་ཡང་ཀུན་བརྟགས་པའི་ངོ་བོ་ཉིད་ཀྱིས་སྟོང་པའི་ཕྱིར་དོན་དམ་པར་ཡོད་པ་ཉིད་དུ་ཅིའི་ཕྱིར་མི་བཟུང༌། ཅི་སྟེ་ཚད་མས་གནོད་པའི་ཕྱིར་དོན་དམ་པར་ཡོད་པ་ཉིད་དུ་མི་གཟུང་ན་ནི་གལ་ཏེ་དེ་ལྟ་ན་སྐྱེ་བ་ལ་སོགས་པ་ཡང་ཚད་མས་
གནོད་པའི་ཕྱིར་དེ་བཞིན་དུ་གཟུང་བར་མི་བྱའོ། །གལ་ཏེ་སྐྱེ་བ་ལ་སོགས་པ་གྲགས་པ་ཡིན་པའི་ཕྱིར་ཚད་མས་གནོད་པར་བྱ་བ་མི་ནུས་སོ་ཞེ་ན་མ་ཡིན་ཏེ། དོན་དམ་པར་ནི་མ་ཡིན་གྱི། ཀུན་རྫོབ་ཏུ་གྲགས་པའི་ཕྱིར་ཇི་ལྟར་སྔར་སྤྱད་པ་བཞིན་ནོ། །བཅོམ་ལྡན་འདས་ཀྱིས་ཀྱང༌། དངོས་རྣམས་སྐྱེ་བ་ཀུན་རྫོབ་ཏུ། །དམ་པའི་དོན་དུ་རང་བཞིན་མེད། །རང་བཞིན་མེད་ལ་འཁྲུལ་པ་གང༌། །དེ་ནི་ཡང་དག་ཀུན་རྫོབ་འདོད། །ཅེས་གསུངས་སོ། །དེ་ལྟ་མ་ཡིན་ན་ཕྱི་རོལ་གྱི་དོན་ཡང་གྲགས་པའི་ཚད་མས་གནོད་པར་མི་འགྱུར་རོ། །དེ་ལྟ་བས་ན་ཚད་མས་གྲགས་པའི་གྲགས་པ་གང་ཡིན་པས་དེ་ཁོ་ན་རིགས་པ་ཡིན་གྱི། གཞན་ནི་མ་ཡིན་ནོ། །དེ་བས་ན་བཅོམ་ལྡན་འདས་ཀྱིས་འཕགས་པ་དགོངས་པ་ངེས་པར་འགྲེལ་པ་ལ་སོགས་པ་ལས། ངོ་བོ་ཉིད་རྣམ་པ་གསུམ་ནི་ངས་ཆོས་ཐམས་ཅད་ངོ་བོ་ཉིད་མེད་པ་རྣམ་པ་གསུམ་ལས་དགོངས་ནས་ངོ་བོ་ཉིད་རྣམ་པ་གསུམ་མོ་ཞེས་བསྟན་པ་གང་ཡིན་པ་དེ་དང་ཡང་མི་འགལ་བ་ཉིད་དེ། འདིར་ཡང་ངོ་བོ་ཉིད་གསུམ་རྣམ་པར་གཞག་པ་འགལ་བ་མེད་པའི་ཕྱིར་རོ། །འདི་ལྟར་མ་བརྟགས་པར་གྲགས་པ་དངོས་པོ་རྣམས་ཀྱི་བྱེད་ཅིང་འབྲེལ་པར་འབྱུང་བའི་ངོ་བོ་ཉིད་གང་ཡིན་པ་དེ་ནི་གཞན་གྱི་དབང་གི་ངོ་བོ་ཉིད་དེ། ཀུན་རྫོབ་ཏུ་སྒྱུ་མ་ལ་སོགས་པ་བཞིན་དུ་རྐྱེན་གྱི་དབང་གིས་སྐྱེ་བས་ངོ་བོ་ཉིད་མེད་པའི་ཕྱིར་སྐྱེ་བ་ངོ་བོ་ཉིད་མེད་པ་ཡིན་ནོ། །དེ་ལ་དོན་དམ་པར་སྐྱེ་བ་ལ་སོགས་པའི་ངོ་བོར་སྒྲོ་འདོགས་པ་གང་ཡིན་པ་དེ་ནི་ཀུན་བརྟགས་པའི་ངོ་བོ་ཉིད་དེ། དེ་ཡང་ཚད་མས་ཇི་ལྟར་རྣམ་པར་བརྟགས་པ་བཞིན་ངོ་བོ་ཉིད་མ་གྲུབ་པའི་ཕྱིར་མཚན་ཉིད་ངོ་བོ་ཉིད་མེད་པ་ཡིན་ནོ། །གཞན་གྱི་དབང་ལ་ཇི་སྐད་བཤད་པའི་ཀུན་བརྟགས་པའི་ངོ་བོ་ཉིད་ཀྱིས་སྟོང་པ་གང་ཡིན་པ་དེ་ནི་ཡོངས་སུ་གྲུབ་པའི་ངོ་བོ་ཉིད་དེ། དེ་ནི་ཚད་མས་ཡང་དག་པར་གྲུབ་པ་ཉིད་དུ་རྟག་ཏུ་གྲུབ་པའི་ཕྱིར་རོ། །དེ་ཡང་ཆོས་ཐམས་ཅད་ལ་ཁྱབ་པར་བྱེད་པ་ཉིད་ཀྱིས་སྤྱིའི་མཚན་ཉིད་ཀྱིས་ཡིན་པའི་ཕྱིར་དོན་དམ་པ་ངོ་བོ་ཉིད་མེད་པ་ཡིན་པས་འདིར་ཡང་ཐམས་ཅད་མི་འགལ་བ་ཁོ་ནའོ། །སྐྱེ་བ་དང་འགག་པ་ལ་སོགས་པ་ལ་མངོན་པར་ཞེན་པའི་གདུལ་བྱ་ལ་ཁྱད་པར་ལྟ་བ་ཡོངས་སུ་སྤང་པའི་ཕྱིར་བཅོམ་ལྡན་འདས་ཀྱིས་འཕགས་པ་དགོངས་པ་ངེས་པར་འགྲེལ་པ་ལ་སོགས་པ་ལས་
རྣམ་པར་ཤེས་པ་ལ་སོགས་པ་ཡོད་པ་ཉིད་དུ་བརྟན་པ་གང་ཡིན་པ་དེ་ཡང་དོན་དམ་པར་མ་ཡིན་ནོ་ཞེས་བྱ་བར་གཟུང་བར་བྱ་སྟེ། འཕགས་པ་ཆོས་ཡང་དག་པར་སྡུད་པ་ལས། ཇི་སྐད་དུ་རིགས་ཀྱི་བུ་འཇིག་རྟེན་གནས་པ་ནི་སྐྱེ་བ་དང་འགག་པ་ལ་མངོན་པར་ཞེན་པ་ཡིན་ཏེ། དེ་ལ་དེ་བཞིན་གཤེགས་པ་ཐུགས་རྗེ་ཆེན་པོ་ཅན་གྱིས་འཇིག་རྟེན་གྱི་སྐྲག་པའི་གནས་ཡོངས་སུ་སྤང་བའི་ཕྱིར་ཐ་སྙད་ཀྱི་དབང་གིས་སྐྱེ་བ་འགག་གོ་ཞེས་གསུངས་པར་ཟད་ཀྱི། འདི་ལ་ཆོས་འགའ་ཡང་སྐྱེ་བ་མེད་དོ་ཞེས་གསུངས་པ་ལྟ་བུའོ། །དེ་ལྟ་བས་ན་ལུང་ལས་ཀྱང༌། ཆོས་ཐམས་ཅད་དོན་དམ་པར་ངོ་བོ་ཉིད་མེད་དོ་ཞེས་བྱ་བར་གྲུབ་བོ། །དེས་ན་དངོས་པོ་དག་ལ་དོན་དམ་པར་སྐྱེ་བ་ལ་སོགས་པར་མངོན་པར་ཞེན་པ་ནི་ཕྱིན་ཅི་ལོག་ཡིན་ལ། དེ་ལས་བཟློག་པ་མངོན་པར་མ་ཞེན་པ་ནི་ཕྱིན་ཅི་མ་ལོག་པ་ཞེས་བྱ་བ་འདི་རྣམ་པར་གནས་སོ། །ཐོག་མ་མེད་པའི་སྲིད་པར་འབྱུང་བའི་དངོས་པོ་མངོན་པར་ཞེན་པའི་གདོན་གྱིས་བརླམས་པ་ཁ་ཅིག་གིས་ཀུན་རྫོབ་དང་དོན་དམ་པའི་མཚན་ཉིད་ཕྱིན་ཅི་མ་ལོག་པར་བསྟན་པའི་ཕྱིར་འདི་སྐད་དུ། གང་ལ་བཅོམ་དང་བློ་ཡིས་གཞན། །བཙལ་ན་དེའི་བློ་མི་འབྱུང་བ། །བུམ་ཆུ་སོགས་བཞིན་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་བཤད་པ་གང་ཡིན་པ་དེ་ཕྱིན་ཅི་མ་ལོག་པར་སྟོན་པར་ནུས་པ་མ་ཡིན་ཏེ། འདི་ལྟར་གཞན་དག་གིས་བུམ་པ་ལ་སོགས་པ་ཡན་ལག་ཅན་ཉིད་དུ་ཀུན་བརྟགས་པ་རྣམས་ཀུན་རྫོབ་པ་ཉིད་དུ་བསྒྲུབ་པའི་ཕྱིར་བཤད་པ་གང་ཡིན་པ་གལ་ཏེ་བུམ་པ་ལ་སོགས་པ་གང་ཡིན་པ་དེ་དག་དོན་དམ་པར་ཡོད་ན་ཅིའི་ཕྱིར་དེ་དག་བཅོམ་ན་དེའི་བློ་མི་འབྱུང་ཞེས་བྱ་བ་དེ་ནི་མ་ངེས་པ་ཡིན་ནོ། །འདི་ལྟར་བཅག་ན་ཞེས་བྱ་བ་ཞིག་ན་ཞེས་བྱ་བའི་དོན་ཡིན་པར་བརྗོད་པར་འདོད་ན་ནི་དེའི་ཚེ་དེ་ཉིད་མ་ཡིན་པ་ཉིད་ཀྱི་ཕྱིར་དེ་དག་ལ་དེ་ལྟ་བུའི་བློ་མི་འབྱུང་བར་ཟད་ཀྱི། བརྫུན་པའི་ཕྱིར་ནི་མ་ཡིན་ནོ་ཞེས་བྱ་བར་ཡང་སྲིད་དོ། །འོན་ཏེ་ཆ་ཤས་སུ་བཤིག་ན་ཞེས་བྱ་བའི་དོན་ཡིན་ན་ནི་དེའི་ཚེ་ཡན་ལག་ལྡན་པ་ཞིག་ཡིན་པ་དང༌། ཡན་ལག་ཅན་ཞིག་ཡིན་པའི་ཕྱིར་དེ་ལྟ་བུའི་བློ་མི་འབྱུང་ངོ་ཞེས་བྱ་བར་ཡང་དོགས་སོ། །བློས་གཞན་བསྩལ་ན་ཞེས་པ་དེ་ཡང་ཧ་ཅང་ཁྱབ་ཆེས་པའི་ཕྱིར་མཚན་ཉིད་མ་ཡིན་པ་ཉིད་དེ། ཇི་སྟེ་བུམ་པ་ལ་སོགས་པ་བློས་རྣམ་པར་གཞིགས་ན། ཆ་ཤས་ཀྱིས་ངོ་བོ་ཉིད་དོན་
དམ་པ་པ་ངེས་པ་མི་ཟིན་པ་ལྟར་རྡུལ་ཕྲ་རབ་དག་དང་རྣམ་པར་ཤེས་པ་ཡང་དེ་དང་འདྲ་བས་དེ་དག་ཀྱང་ཀུན་རྫོབ་ཉིད་དུ་ཐལ་བར་འགྱུར་རོ། །ཇི་ལྟར་རྡུལ་ཕྲ་རབ་རྣམས་ལུས་ཅན་ཡིན་པའི་གདོན་མི་ཟ་བར་ཕྱོགས་ཆ་ཐ་དད་པར་ཁས་བླང་དགོས་སོ། །དེ་ལྟ་མ་ཡིན་ན་ཤར་དང་བྱང་ལ་སོགས་པའི་ཕྱོགས་ཆ་ཐ་དད་པར་གནས་མེད་པའི་ཕྱིར་རི་ལ་སོགས་བསགས་པར་མི་འགྱུར་རོ། །དེ་ལྟ་བས་ན་བསགས་པའི་ངོ་བོ་ཉིད་ཀྱི་ཕྱིར་ཕྱོགས་ཆ་ཐ་དད་པས་ཐ་དད་པ་འདི་དག་ཆ་ཤས་བསལ་བ་བྱས་ན་བུམ་པ་ལ་སོགས་པ་བཞིན་དུ་ངོ་བོ་ཉིད་ངེས་པར་མི་ཟིན་པའི་ཕྱིར་ཀུན་རྫོབ་པ་ཁོ་ནར་འགྱུར་རོ། །རྣམ་པར་ཤེས་པ་ཡང་གདོན་མི་ཟ་བར་རྣམ་པ་དང་བཅས་པ་ཉིད་དུ་ཁས་བླངས་དགོས་ཏེ། ཤེས་པ་ནི་ཐམས་ཅད་དུ་རྟོག་པའི་ངོ་བོ་ཉིད་དུ་མཚུངས་པའི་ཕྱིར་རྣམ་པ་མེད་པ་ཡིན་ཡང་ཡུལ་འཛིན་པར་རྣམ་པར་གཞག་པ་སོ་སོར་ངེས་པ་མི་རུང་བའི་ཕྱིར་རོ། །དེའི་ཕྱིར་ཕྱི་རོལ་གྱི་དོན་བཞིན་དུ་ཤེས་པ་སྣ་ཚོགས་ཀྱི་ངོ་བོ་ཉིད་ཡིན་པའི་ཕྱིར་སྣ་ཚོགས་ཀྱི་རྣམ་པ་རེ་རེ་ནས་བརྩལ་ཡང་ངོ་བོ་ཉིད་འགའ་ཡང་མི་ཟིན་པའི་ཕྱིར་ཀུན་རྫོབ་པ་ཉིད་དུ་འགྱུར་རོ། །དེ་ལྟ་ན་ནི་ཀུན་རྫོབ་པའི་མཚན་ཉིད་འདིས་དངོས་པོ་ཐམས་ཅད་གསལ་བ་ཁོ་ནར་ཀུན་རྫོབ་ཀྱི་ངོ་བོར་བསྒྲུབ་པའི་ཕྱིར་ཁོ་བོ་ཅག་གི་ལྟ་བ་ཁོ་ན་གཞུང་བཙུགས་པར་འགྱུར་ཏེ། དེ་སྐད་དུ་འཕགས་པ་ལང་ཀར་གཤེགས་པའི་མདོ་ལས། །བློ་ཡིས་རྣམ་པར་གཞིགས་རྣམས་ཀྱི། །ངོ་བོ་ཉིད་ནི་ངེས་མི་ཟིན། །དེ་ཕྱིར་དེ་དག་བརྗོད་མེད་དང༌། །ངོ་བོ་ཉིད་ནི་ངེས་པར་བསྟན། །ཞེས་གསུངས་སོ། །གཞན་དག་ན་རེ་དོན་བྱ་བ་བྱེད་ནུས་པའི་དོན་དེ་ནི་དོན་དམ་པར་ཡོད་ཀྱི། གཞན་དུ་ནི་ཀུན་རྫོབ་ཏུ་ཡོད་པའོ་ཞེས་ཟེར་ཏེ། དེ་འདིར་གལ་ཏེ་ཡང་དག་པའི་ཀུན་རྫོབ་ལ་བརྟེན་ནས་བྱིས་པ་རྣམས་གཟུང་བའི་དོན་དམ་པར་ཡོད་པའི་མཚན་ཉིད་དུ་བརྗོད་ན་ནི་དེའི་ཚེ་འདི་རིགས་པ་ཡིན་ནོ། །དེ་ཉིད་ཀྱི་ཕྱིར་དེ་ལས་ཇི་ལྟ་བ་དེ་ལྟར་ཡོད་དུ་ཟད་མོད་ཅེས་བཤད་དོ། །འོན་ཏེ་གཅིག་ཁོ་ནར་དོན་དམ་པར་ཡོད་པའི་མཚན་ཉིད་ཡིན་ནོ་ཞེ་ན། དེའི་ཚེ་དོན་དམ་པར་དངོས་པོ་ཐམས་ཅད་ཀྱི་དོན་བྱ་བ་བྱེད་པ་ཉིད་མ་གྲུབ་པའི་ཕྱིར་ཇི་ལྟར་སྔར་དཔྱད་པ་བཞིན་ནོ། །དེའི་ཕྱིར་མཚན་ཉིད་མི་སྲིད་པ་ཅན་ཡིན་ནོ། །གཞན་དག་ན་རེ་ཤེས་པ་ལ་གཟུང་བ་དང་འཛིན་པའི་རྣམ་པས་སྟོང་པ་ཉིད་ནི་དེ་ཁོ་ན་ཡིན་ནོ། །གཉིས་པོ་ནི་ཀུན་རྫོབ་ཀྱི་བདེན་པའོ་ཞེས་ཟེར་ཏེ། འདི་ལྟར་གལ་ཏེ་མེད་པའི་ངོ་བོ་སྟོང་པ་ཉིད་བརྗོད་པར་འདོད་ན་ནི་དེ་མེད་པ་ནི་དེ་ཁོ་ན་ཉིད་ཡིན་ནོ། །འོན་ཏེ་མ་ཡིན་
པའི་ངོ་བོ་ཉིད་ཡིན་ན་དེའི་ཚེ་གཉིས་སུ་སྣང་བ་ལས་མ་གཏོགས་པ་ཤེས་པའི་ངོ་བོ་གཞན་ཚད་མས་མ་གྲུབ་པའི་ཕྱིར་འདི་ནི་དེ་ཁོ་ན་ཉིད་སྟོན་པར་ནུས་པ་མ་ཡིན་ནོ། །ཅི་སྟེ་གལ་ཏེ་རྣམ་པར་ཤེས་པ་གཉིས་སུ་མེད་པའི་མཚན་ཉིད་དོན་དམ་པར་ཡོད་པ་མ་ཡིན་ན། དེའི་ཚེ་གཉིས་སུ་སྣང་བའི་རྒྱུ་ཅི་ཞིག་ཡིན་པར་འགྱུར་སྙམ་དུ་སེམས་ན། དེ་ནི་རིགས་པ་མ་ཡིན་ཏེ། དེ་དང་དེར་ལྷན་ཅིག་འབྲེལ་པ་མ་གྲུབ་པའི་ཕྱིར་རོ། །གཉིས་དང་གཉིས་སུ་མེད་པ་ནི་ལྷན་ཅིག་དེའི་བདག་ཉིད་ཀྱིས་འབྲེལ་པ་ཡང་མེད་དེ། བདེན་པ་དང་བདེན་པ་མ་ཡིན་པ་དག་ནི་ཕན་ཚུན་སྤངས་ཏེ་གནས་པའི་མཚན་ཉིད་ཀྱིས་འགལ་བའི་ཕྱིར་རོ། །དེ་ལས་བྱུང་བའི་མཚན་ཉིད་ཀྱང་མ་ཡིན་ཏེ། བདེན་པ་མ་ཡིན་པ་ནི་གང་ལས་ཀྱང་འབྱུང་བར་མི་སྲིད་པའི་ཕྱིར་དཔེར་ན་རི་བོང་གི་རྭ་ལྟ་བུའོ། །དེ་ལྟ་མ་ཡིན་ན་འདི་གཞན་གྱི་དབང་གི་ངོ་བོ་ཁོ་ནར་འགྱུར་གྱི། ཀུན་བརྟགས་པ་ནི་མ་ཡིན་ནོ། །དེ་ཉིད་ཀྱི་ཕྱིར་རྣམ་པར་ཤེས་པ་དང་འབྲེལ་པ་མེད་ན་རི་བོང་གི་རྭ་བཞིན་ཏེ་སྣང་བར་མི་འགྱུར་རོ། །གཞན་ཡང་གལ་ཏེ་གཉིས་པོ་མ་གཏོགས་པ་རྣམ་པར་ཤེས་པའི་རང་བཞིན་གཞན་ཞིག་ཡིན་གྱི་གཉིས་པོ་ནི་མ་ཡིན་པ་ཉིད་ཡིན་ན་ནི་དེའི་ཚེ་གཉིས་པོ་བདག་ཉིད་སྣང་བར་མི་འགྱུར་ཏེ། ཤེས་པའི་རང་གི་ངོ་བོ་མ་ཡིན་པའི་ཕྱིར་རོ། །རྣམ་པར་ཤེས་པ་རང་གི་ངོ་བོ་ནི་འདི་ཁོ་ན་ཡིན་ཏེ། གང་བདག་ཉིད་གསལ་བར་བྱ་བའི་ཕྱིར་གསལ་བ་གཞན་ལ་མི་ལྟོས་ལ། གསལ་བར་མ་བྱས་པར་ཡང་མི་འདུག་སྟེ། ནམ་མཁའི་ངོས་དང་མར་མེའི་སྙིང་པོའི་འོད་བཞིན་ནོ། །གཉིས་པོ་ཡང་དེ་དང་འདྲ་བས་འདི་ཤེས་པའི་ངོ་བོ་མ་ཡིན་པར་མི་རིགས་སོ། །གཉིས་པོ་ཤེས་པའི་ངོ་བོར་གྱུར་པ་དེ་ཡང་བརྫུན་པ་ཡིན་ན་ནི་ཤེས་པ་ཉིད་བརྫུན་པ་ཡིན་ནོ་ཞེས་གསལ་རབ་ཏུ་སྨྲས་པར་འགྱུར་རོ། །གཞན་ཡང་ཤེས་པ་གཉིས་སུ་མེད་པའི་ངོ་བོ་བདེན་ཞེས་བྱ་བ་གང་ཡིན་པ་དེ་ཡང་རེ་ཞིག་རྟག་པའི་ངོ་བོ་ཉིད་དུ་རིགས་པ་ཡིན་ཏེ། སྔར་རྟག་པའི་དངོས་པོ་རྒྱས་པར་བསལ་བའི་ཕྱིར་རོ། །རྟག་པ་ནི་ཁྱད་པར་དུ་བྱར་མེད་པའི་ཕྱིར་རྣལ་འབྱོར་གོམས་པ་ལ་སོགས་པས་ཅུང་ཟད་ཀྱང་མི་བྱེད་ལས་ཐར་པ་དོན་དུ་གཉེར་བ་རྣམས་ཀྱིས་འབད་པ་དོན་མེད་པར་འགྱུར་རོ། །དོན་དམ་པར་ནི་མི་རྟག་པར་ཡང་རིགས་པ་མ་ཡིན་ཏེ། དེ་རྒྱུ་དང་བཅས་པ་དང་རྒྱུ་མེད་པར་སྐྱེ་བ་བཀག་པའི་ཕྱིར་ལ། མ་སྐྱེས་པར་ནི་མི་རྟག་པ་ཡིན་པར་རིགས་པ་མ་ཡིན་པས་སོ། །དངོས་པོའི་ངོ་བོ་གཞན་ཡང་ཡོད་
པ་མ་ཡིན་ཏེ། དེས་ན་ངོ་བོ་ཉིད་མེད་པ་ཉིད་ཀྱིས་དངོས་པོ་ཐམས་ཅད་ལ་ཁྱབ་པའི་ཕྱིར་དང་ཚད་མས་གྲུབ་པའི་ཕྱིར་དོན་དམ་པར་རིགས་སོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས། ཆོས་ཀུན་རྟག་ཏུ་ངོ་བོ་ཉིད་ཀྱིས་སྟོང༌། །རྒྱལ་བའི་སྲས་རྣམས་དངོས་པོ་རྣམ་པར་འབྱེད། །སྲིད་པ་ཐམས་ཅད་རྣམ་པ་ཀུན་ཏུ་སྟོང༌། །ཉི་ཚེ་སྟོང་པ་མུ་སྟེགས་ཅན་རྣམས་ཀྱི། །ཞེས་གསུངས་སོ། །དེ་ལྟ་ན་ཉོན་མོངས་པ་དང་ཤེས་བྱའི་སྒྲིབ་པ་སྤང་བར་འདོད་པ་རྟོགས་པ་དང་ལྡན་པས་ཆོས་ཐམས་ཅད་ངོ་བོ་ཉིད་མེད་པའི་ལམ་འདི་ཁོ་ན་བསྒོམ་པར་བྱ་སྟེ། སྒྲིབ་པའི་རྩ་བ་ནི་ཕྱིན་ཅི་ལོག་ཡིན་པའི་ཕྱིར་ལ། ཕྱིན་ཅི་ལོག་ཐམས་ཅད་དང་འགལ་བའི་རྣམ་པ་ཅན་ཆོས་ཐམས་ཅད་ངོ་བོ་ཉིད་མེད་པ་ལ་གོམས་པ་འདིས་ཀྱང་དངོས་པོ་ལ་སོགས་པ་ཕྱིན་ཅི་ལོག་སྤོང་བས་རྩ་བ་བཅད་པའི་ཕྱིར་སྒྲིབ་པ་ཐམས་ཅད་སྤོང་བར་འགྱུར་བ་ཉིད་དོ། །དེ་སྐད་དུ་འཕགས་པ་བདེན་པ་གཉིས་བསྟན་པ་ལས་ཀྱང༌། འཇམ་དཔལ་ཇི་ལྟར་ན་ཉོན་མོངས་པ་ཡོངས་སུ་ཤེས་པར་འགྱུར། འཇམ་དཔལ་གྱིས་སྨྲས་པ། དོན་དམ་པ་ཤིན་ཏུ་མ་སྐྱེས་ཤིང་མ་བྱུང་བའི་དངོས་པོ་དག་ལ་ཀུན་རྫོབ་ཏུ་ཡོད་པ་མ་ཡིན་པ་ལས་ཕྱིན་ཅི་ལོག་དེ་ཡོད་དེ་མ་ཡིན་པ་ལས་ཕྱིན་ཅི་ལོག་པ་དེ་ལས་ཀུན་དུ་རྟོག་པ་དང་རྣམ་པར་རྟོག་པ་འབྱུང་ངོ༌། །ཀུན་དུ་རྟོག་པ་དང་རྣམ་པར་རྟོག་པ་དེ་ལས་ཚུལ་བཞིན་མ་ཡིན་པ་ཡིད་ལ་བྱེད་པ་འབྱུང་ངོ༌། །ཚུལ་བཞིན་མ་ཡིན་པའི་ཡིད་ལ་བྱེད་པ་དེ་ལས་བདག་ཏུ་སྒྲོ་འདོགས་པ་འབྱུང་ངོ༌། །བདག་ཏུ་སྒྲོ་འདོགས་པ་ལས་ལྟ་བ་ཀུན་ནས་ལྡང་ངོ༌། །ལྟ་བ་ཀུན་ནས་ལྡང་བ་དེ་ལས་ཉོན་མོངས་པ་རྣམས་འབྱུང་ངོ༌། །ལྷའི་བུ་གང་དག་གིས་ཆོས་ཐམས་ཅད་དོན་དམ་པར་ཤིན་ཏུ་མ་སྐྱེས་པ་དང་མ་བྱུང་བའི་དངོས་པོར་མཐོང་བ་དེ་ནི་དོན་དམ་པར་ཕྱིན་ཅི་མ་ལོག་པ་ཡིན་ནོ།། གང་ཞིག་གིས་དོན་དམ་པར་ཕྱིན་ཅི་མ་ལོག་པ་དེ་ནི་ཀུན་དུ་མི་རྟོག་རྣམ་པར་མི་རྟོག་གོ །གང་ཀུན་དུ་མི་རྟོག་རྣམ་པར་མི་རྟོག་པ་དེ་ནི་ཚུལ་བཞིན་དུ་ཞུགས་པ་ཡིན་ནོ། །གང་ཚུལ་བཞིན་དུ་ཞུགས་པ་དེ་ནི་བདག་ཏུ་སྒྲོ་འདོགས་པར་མི་འགྱུར་རོ། །གང་བདག་ཏུ་སྒྲོ་འདོགས་པར་མི་འགྱུར་བ་དེ་ལ་ནི་ལྟ་བ་ཀུན་ནས་ལྡང་བར་མི་འགྱུར་ཏེ། དོན་དམ་པར་མྱ་ངན་ལས་འདས་པར་ལྟ་བ་ཀུན་ནས་ལྡང་བའི་བར་དུ་ཡང་མི་འགྱུར་རོ། །སྐྱེ་བ་མེད་པ་ལ་གནས་པའི་དེ་ཉིད་ཀྱི་ཉོན་མོངས་པ་ཤིན་ཏུ་རྣམ་པར་གདུལ་བར་ལྟ་སྟེ། འདི་ཉོན་མོངས་པ་འདུལ་བ་ཞེས་བྱའོ། །ལྷའི་བུ་གང་གི་ཚེ་ཉོན་མོངས་པ་དང་སྣང་བ་མེད་པར་ཤེས་པས་དོན་དམ་པར་ཤིན་ཏུ་སྟོང་པ་དང༌། མཚན་མ་མེད་པ་དང༌།
ཤིན་ཏུ་དངོས་པོ་མེད་པར་རབ་ཏུ་ཤེས་པ་དེའི་ཚེ་ལྷའི་བུ་ཉོན་མོངས་པ་རྣམས་ཡོངས་སུ་ཤེས་པ་ཡིན་ནོ། །ལྷའི་བུ་འདི་ལྟ་སྟེ་དཔེར་ན་གང་སྦྲུལ་གྱི་རིགས་འདོན་པ་དེས་ནི་སྦྲུལ་དེའི་དུག་ཞི་བར་བྱེད་དོ། །ལྷའི་བུ་དེ་བཞིན་དུ་གང་ཞིག་ཉོན་མོངས་པ་རྣམས་ཀྱི་རིགས་འདོན་པ་དེའི་ཉོན་མོངས་པ་རྣམས་རབ་ཏུ་ཞི་བར་འགྱུར་རོ། །ལྷའི་བུས་སྨྲས་པ། འཇམ་དཔལ་ཉོན་མོངས་པ་རྣམས་ཀྱི་རིགས་གང་ཡིན། འཇམ་དཔལ་གྱིས་སྨྲས་པ། ལྷའི་བུ་ཆོས་ཐམས་ཅད་ཀྱི་དངོས་པོ་ཤིན་ཏུ་མ་སྐྱེས་ཤིང་མ་བྱུང་བ་དག་ལ་ཀུན་དུ་རྟོག་པ་གང་ཡིན་པ་འདི་ནི་ཉོན་མོངས་པ་རྣམས་ཀྱི་རིགས་ཡིན་ནོ་ཞེས་རྒྱས་པར་གསུངས་སོ། །དངོས་པོ་ལ་སོགས་པས་ཕྱིན་ཅི་ལོག་པས་ཀྱང་ཕྱིན་ཅི་ལོག་ཐམས་ཅད་ལ་ཁྱབ་པའི་ཕྱིར་སྤངས་ན་ཕྱིན་ཅི་ལོག་ཐམས་ཅད་སྤངས་པས་ཤེས་བྱའི་སྒྲིབ་པ་ཡང་འདིས་ལེགས་པར་སྤོང་བར་འགྱུར་ཏེ། སྒྲིབ་པ་ནི་ཕྱིན་ཅི་ལོག་གི་མཚན་ཉིད་ཡིན་པའི་ཕྱིར་རོ། །ཤེས་བྱའི་སྒྲིབ་པ་སྤངས་ན་གགས་བྱེད་པ་མེད་པའི་ཕྱིར་སྤྲིན་ལ་སོགས་པའི་སྒྲིབ་པ་དང་བྲལ་བའི་ནམ་མཁའ་ལ་ཉི་མའི་འོད་ཟེར་བཞིན་དུ་ཐམས་ཅད་ཐོགས་པ་མེད་པའི་ཤེས་པའི་སྣང་བ་འཇུག་སྟེ། འདི་ལྟར་རྣམ་པར་ཤེས་པ་ནི་དངོས་པོའི་རང་གི་ངོ་བོ་གསལ་བའི་ངོ་བོ་ཡིན་ལ་དེ་ཡང་ཉེ་བའི་ཕྱིར་རོ། །གགས་བྱེད་པ་ཡོད་ན་ནི་དངོས་པོ་གསལ་བར་མི་འགྱུར་བ་ཞིག་ན། གགས་བྱེད་པ་མེད་པ་ཡིན་ན་གོ་མཐུའི་ཁྱད་པར་བསམ་གྱིས་མི་ཁྱབ་པ་བརྙེས་པའི་ཕྱིར་ཅིའི་ཕྱིར་དངོས་པོ་ཐམས་ཅད་ཇི་ལྟ་བ་བཞིན་དུ་གསལ་བར་མི་འགྱུར། དེའི་ཕྱིར་དངོས་པོ་ཐམས་ཅད་ཇི་ལྟ་བ་བཞིན་དུ་ཀུན་རྫོབ་དང་དོན་དམ་པའི་ངོ་བོར་ཡོངས་སུ་མཁྱེན་པའི་ཕྱིར་ཐམས་ཅད་མཁྱེན་པ་ཉིད་ཐོབ་བོ། །དེའི་ཕྱིར་སྒྲིབ་པ་སྤང་བར་བྱ་བ་ལ་ལམ་འདི་ཁོ་ན་དམ་པ་ཡིན་ནོ། །དེ་ལྟ་བས་ན་ཐམས་ཅད་མཁྱེན་པའི་གོ་འཕང་ཐོབ་པར་འདོད་པས་སྟོང་པ་ཉིད་ཀྱི་ལམ་འདི་ཁོ་ན་ཐབས་དང་ལྡན་པའི་ཤེས་རབ་ཀྱིས་བརྟེན་པར་བྱའོ། །འབའ་ཞིག་གིས་ནི་མ་ཡིན་ཏེ། ཐབས་མེད་པའི་ཤེས་རབ་འབའ་ཞིག་གིས་བརྟེན་ན་ཉན་ཐོས་བཞིན་དུ་འགོག་པ་མངོན་སུམ་དུ་བྱས་པའི་ཕྱིར་མྱ་ངན་ལས་འདས་པར་ལྷུང་ལ། ཐབས་ཙམ་བརྟེན་པས་ཀྱང་ཕྱིན་ཅི་ལོག་ཏུ་གྱུར་བའི་ཕྱིར་འཁོར་བར་ལྷུང་ངོ༌། །དེའི་ཕྱིར་ཤེས་རབ་ཀྱི་སྟོབས་ཀྱིས་འཁོར་བ་ལ་མི་གནས་པའི་ཕྱིར་དང༌། ཐབས་ཀྱི་སྟོབས་ཀྱིས་མྱ་ངན་ལས་འདས་པར་མི་འཇུག་པའི་ཕྱིར་བྱང་ཆུབ་སེམས་དཔའ་རྣམས་ཀྱི་ལམ་ཐབས་དང་ཤེས་རབ་ཀྱི་ངོ་བོ་མི་གནས་པའི་མྱ་ངན་ལས་འདས་པ་ཐོབ་པའི་རྒྱུ་ཡིན་ནོ། །དེ་སྐད་དུ་འཕགས་པ་ག་ཡ་མགོ་རི་ལས་ཀྱང༌།
ལམ་གང་དག་དང་ལྡན་ན་བྱང་ཆུབ་སེམས་དཔའ་རྣམས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་བྱང་ཆུབ་སེམས་དཔའ་རྣམས་ཀྱི་ལམ་མདོར་བསྟན་པ་གཉིས་པོ་འདི་དག་སྟེ། གཉིས་གང་ཞེན་འདི་ལྟ་སྟེ་ཤེས་རབ་དང་ཐབས་སོ་ཞེས་གསུངས་སོ། །འཕགས་པ་དྲི་མ་མེད་པར་གྲགས་པར་བསྟན་པ་ལས་ཀྱང༌། ཐབས་དང་བྲལ་པའི་ཤེས་རབ་ནི་བྱང་ཆུབ་སེམས་དཔའ་རྣམས་ཀྱི་འཆིང་བའོ། །ཤེས་རབ་དང་བྲལ་བའི་ཐབས་ཀྱང་འཆིང་བའོ། །ཤེས་རབ་དང་བཅས་པའི་ཐབས་ནི་ཐར་པའོ། །ཐབས་དང་བཅས་པའི་ཤེས་རབ་ཀྱང་ཐར་པའོ་ཞེས་གསུངས་སོ། །དེའི་ཕྱིར་བྱང་ཆུབ་ཀྱི་སེམས་སེམས་ཅན་ཐམས་ཅད་ལ་སྙིང་རྗེ་ཆེན་པོ་སྔོན་དུ་འགོ་བ་ཅན་བསྐྱེད་དེ། ཐམས་ཅད་མཁྱེན་པའི་གོ་འཕང་ཐོབ་པར་བྱ་བའི་ཕྱིར་ཤེས་རབ་དང་ཐབས་ཏེ། སྦྱིན་པ་ལ་སོགས་པ་བསོད་ནམས་ཀྱི་ཚོགས་ཀྱི་མཚན་ཉིད་ཐམས་ཅད་ལ་གོམས་པར་བྱའོ། །དེ་ལྟར་ན་བྱང་ཆུབ་སེམས་དཔའ་སྒྲོ་འདོགས་པ་དང་སྐུར་པ་འདེབས་པའི་མཐའ་སྤངས་ནས་དབུ་མའི་ལམ་ལ་ཞུགས་པ་ཡིན་ཏེ། ཤེས་རབ་ཀྱི་དངོས་པོ་ཐམས་ཅད་ཀྱི་རང་བཞིན་ཇི་ལྟ་བ་བཞིན་ཡོངས་སུ་ཤེས་པའི་ཕྱིར་སྒྲོ་འདོགས་པའི་མཐར་ཡང་མི་ལྷུང་ལ། ཐབས་བསྟན་པས་ནི་ཀུན་རྫོབ་ཏུ་སྦྱིན་པ་ལ་སོགས་པ་བསོད་ནམས་ཐམས་ཅད་ལ་སྐུར་བ་མི་འདེབས་པའི་ཕྱིར་སྐུར་པའི་མཐར་ཡང་མི་ལྷུང་ངོ༌། ལྷགས་པས་ཉམ་ཐག་པས་མེ་བཞིན་དུ་ཕྱིན་ཅི་ལོག་གི་ལྕགས་པ་བསལ་བའི་ཕྱིར་སྟོང་པ་ཉིད་བརྟེན་པར་བྱ་བ་འབའ་ཞིག་ཏུ་ཟད་ཀྱི། མངོན་སུམ་དུ་བྱེད་པ་ནི་མ་ཡིན་ཏེ། ཇི་སྐད་དུ་ཆོས་བཅུ་པའི་མདོ་ལས། འདི་ལྟ་སྟེ་དཔེར་ན། སྐྱེས་བུ་ཞིག་མེ་ལ་བཀུར་སྟི་བྱེད་པར་གྱུར་ལ། མེ་དེ་ལ་གུས་པར་བྱེད། བླ་མར་བྱེད། མགུ་བར་བྱེད་མཆོད་པར་བྱེད། ལེགས་པར་བཀུར་སྟི་བྱེད་ཀྱང་དེ་འདི་སྙམ་དུ་བདག་གིས་མེ་འདི་ལ་གུས་པར་བྱས། བླ་མར་བྱས། མགུ་བར་བྱས། མཆོད་པར་བྱས། བཀུར་སྟི་བྱས་པས་ལག་པ་གཉིས་ཀྱིས་འདི་གཟུང་བར་བྱའོ་སྙམ་དུ་མི་སེམས་སོ། །དེ་ཅིའི་ཕྱིར་ཞེ་ན། དེའི་གཞི་ལས་བདག་གི་ལུས་ཀྱི་སྡུག་བསྔལ་དང༌། སེམས་ཀྱི་ཡིད་མི་བདེ་བར་འགྱུར་དུ་འོང་ངོ་སྙམ་མོ། །དེ་བཞིན་དུ་བྱང་ཆུབ་སེམས་དཔའ་ཡང་མྱ་ངན་ལས་འདས་པ་ལ་སེམས་པ་དང༌། མྱ་ངན་ལས་འདས་པ་ལ་གཞོལ་བ་དང༌། མྱ་ངན་ལས་འདས་པ་ལ་འབབ་པ་དང༌། མྱ་ངན་ལས་འདས་པ་ལ་བབ་པ་ཡིན་ཡང༌། མྱ་ངན་ལས་འདས་པ་མངོན་
སུམ་དུ་མི་བྱེད་དོ། །དེ་ཅིའི་ཕྱིར་ཞེ་ན། བདག་འདིའི་གཞི་ལས་བྱང་ཆུབ་ལས་ལྡོག་པར་འགྱུར་དུ་འོང་ངོ་སྙམ་མོ། །ཐབས་དང་ཤེས་རབ་དག་རྒྱས་པར་ནི། བློ་གྲོས་མི་ཟད་པས་བསྟན་པ་ལ་སོགས་པ་ལས་ངེས་པར་གཟུང་བར་བྱའོ། །མདོར་ན་བྱང་ཆུབ་སེམས་དཔའི་ཐབས་ནི་གང། ཤེས་རབ་ཀྱིས་ཆོས་ཐམས་ཅད་རང་བཞིན་མེད་པ་ཉིད་དུ་རྟོགས་པར་བྱས་ནས་སྒྱུ་མ་ལ་སོགས་པ་བཞིན་དུ་ཕྱིན་ཅི་མ་ལོག་པ་ཉིད་སྙིང་རྗེ་ཆེན་པོ་དང༌། སྟོང་པ་ཉིད་ཁོ་ན་ཡོད་པའི་སེམས་ཅན་ལ་ལྟ་བས་སྦྱིན་པ་ལ་སོགས་པ་བསོད་ནམས་ཀྱི་ཚོགས་ཐམས་ཅད་ལ་བརྟེན་པ་འདི་ཁོ་ན་ཡིན་ནོ། །དེས་ན་དེ་བཞིན་གཤེགས་པའི་ལོངས་སྤྱོད་ཆེན་པོ་ཞིང་དང༌། འཁོར་དང༌། གཟུགས་ཀྱི་སྐུ་ལ་སོགས་པ་མངོན་པར་མཐོ་བ་ཕུན་སུམ་ཚོགས་པ་ལ་སོགས་པ་ཐམས་ཅད་འཐོབ་ན་འཁོར་བ་ཇི་སྲིད་པར་འགྲོ་བ་མ་ལུས་པ་ཕན་པ་དང༌། བདེ་བའི་རྣམ་པ་ཐམས་ཅད་བསྒྲུབ་ཅིང་གནས་པས་རྟོག་པ་དང་ལྡན་པས་སངས་རྒྱས་བཅོམ་ལྡན་འདས་ལ་དང་བ་ཉེ་བར་བསྐྱེད་ནས། དེའི་ཡོན་ཏན་ཉེ་བར་ཡོངས་སུ་གྲུབ་པར་བྱ་བའི་ཕྱིར་འབད་པར་བྱའོ། །དེ་ལྟར་བདག་གིས་དབུ་མའི་ལམ། །རབ་ཏུ་གསལ་བྱས་བསོད་ནམས་གང༌། །ཐོབ་པ་དེ་ཡིས་འགྲོ་བ་གང། །དབུ་མའི་ལམ་འདི་ཐོབ་པར་ཤོག །ཆུ་ཡིས་མཚོ་ལྟར་ཡོན་ཏན་མི་ངོམས་ཤིང༌། །ཕྲག་དོག་ལ་སོགས་དྲི་མ་སྤངས་མཁས་རྣམས། །ངང་པ་རབ་དགའ་ཆུ་ལས་འོ་མ་བཞིན། །རྣམ་པར་ཕྱེ་ནས་ལེགས་པར་བཤད་རྣམས་ལེན། །དེ་ལྟ་བས་ན་མཁས་རྣམས་ཀྱིས། །འདྲེས་པ་ལས་ནི་ལེགས་བཤད་པའི། །སྙིང་པོ་སྐྱོན་མེད་ཀུན་བླང་ཞིང༌། །ཉེས་བཤད་དུག་བཞིན་དོར་བར་བྱ། །ཆོས་ཐམས་ཅད་རང་བཞིན་མེད་པ་ཉིད་དུ་གྲུབ་པ། སློབ་དཔོན་ཀ་མ་ལ་ཤཱི་ལས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཤཱི་ལེནྡྲ་བོ་དྷི་དང༌། ཞུ་ཆེན་གྱི་ལོ་ཙཱ་བ་དགེ་སློང་དཔལ་བརྩེགས་རཀྵི་ཏས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།