དམ་པའི་ཆོས་པུཎྜ་རཱི་ཀའི་འགྲེལ་པ།
སའི་རྩ་ལག།
དམ་པའི་ཆོས་པདྨ་དཀར་པོའི་འགྲེལ་པ་བཞུགས། དམ་པའི་ཆོས་པུཎྜ་རཱི་ཀའི་འགྲེལ་པ་རྒྱ་ལས་བསྒྱུར་བ། བམ་པོ་དང་པོ། མདོ་སྡེ་འདི་བཤད་པ་ལ་དོན་རྣམ་པ་བཞིས་དབྱེ་བར་བྱ་སྟེ། མདོ་སྡེ་བཤད་པའི་གླེང་གཞི་དང༌། མདོ་སྡེ་འདིའི་ལེའུ་རྣམས་ཀྱི་དོན་བསྟན་པ་དང༌། ལེའུ་རྣམས་ཀྱི་གོ་རིམས་བསྟན་པ་དང༌། གཞུང་དགྲོལ་བ་དང་བཞིའོ། །མདོ་འདིའི་གླེང་གཞི་ཡང་དོན་རྣམ་པ་ལྔ་སྟེ། གླེང་གཞི་དང༌། གླེང་སློང་བ་དང༌། ཐེ་ཚོམ་དུ་འཛིན་པ་བསལ་བ་དང༌། ལུང་སྟོན་པའི་སྤྱོད་པ་བསྟན་པ་དང༌། ཚེ་འདི་དང་གཞན་དུ་ཕན་གདགས་པའི་དོན་བསྟན་པ་དང༌། དུས་དང་དབང་པོ་བསྟན་པ་དང་ལྔའོ།། གླེང་གཞི་ལ་ཡང་རྣམ་པ་ལྔ་སྟེ། སྤྱོད་པ་དང༌། སྨོན་ལམ་དང༌། ཚོལ་བ་དང༌། འཛིན་པ་དང༌། ལྟས་དང་ལྔའོ། །བླ་ན་མེད་པའི་སངས་རྒྱས་སུ་གྲུབ་པའང་སྤྱོད་པ་དམ་པ་དང་ལྡན་པས་གདོད་འགྲུབ། སྤྱོད་པའང་སྨོན་ལམ་གྱིས་བསྟང་དགོས། སྤྱོད་པ་དང་སྨོན་ལམ་དུ་ལྡན་ཡང་འབད་པ་དང་བཅས་པས་ཚོལ་ཞིང་འཛིན་ན་གདོད་འབྲས་བུ་ཐོབ་པར་འགྱུར་རོ། །འབྲས་བུ་ཕུན་སུམ་ཚོགས་པས་འགྲོ་བ་མང་པོའི་དོན་མཛད་པར་དགོངས་ཏེ། མདོ་སྡེ་ཟབ་མོ་འདི་བཤད་པའི་ལྟས་ཆེན་པོ་སྟོན་ཏོ། །སངས་རྒྱས་བཅོམ་ལྡན་འདས་འཇིག་རྟེན་དུ་འབྱུང་བ་ཡང་དོན་ཆེན་པོ་གཅིག་གི་ཕྱིར་འབྱུང་ཞེས་བྱ་བ་ཡང་དེའོ། །དེ་ལ་སྤྱོད་པའི་གཞི་ཡང་ཐབས་མཁས་པའི་ལེའུ་ལས་མདོ་སྡེ་འདིའི་འགྲེལ་པ་སུ་བ་ན་དྷུས་ཟབ་མོ་བརྒྱད་བསྟན་པ་བཞིན་ཏེ། སྔོན་སངས་རྒྱས་མང་པོ་གྲངས་མེད་པ་ལ་རིམ་གྲོ་དང་བསྙེན་བཀུར་བྱས་ཏེ། སངས་རྒྱས་བཅོམ་ལྡན་འདས་ཀྱིས་མཛད་པ་དང༌། སྤྱོད་པ་གྲངས་མེད་པ་ལ་བརྩོན་པ་དང་གྲགས་པ་ཕུན་སུམ་ཚོགས་པས་ཟབ་མོ་སྔོན་མ་བྱུང་བའི་ཆོས་ཆུད་པར་དཀའ་བ་དེ་བཞིན་གཤེགས་པ་ཉིད་ཀྱིས་དགོངས་ཏེ། སོ་སོའི་ཡིད་དང་མཐུན་པར་སྟོན་པ་ཉན་ཐོས་དང་རང་སངས་རྒྱས་ཀྱིས་ཤེས་པར་མི་ནུས་ཏེ། དེ་ཡང་གཟུང་བ་དང་འཛིན་པ་ཤིན་ཏུ་ཟབ་པ་དང༌། ཀློག་ཅིང་འདོན་པ་ཤིན་ཏུ་ཟབ་པ་སྟེ། སྤྱོད་པ་ཤིན་ཏུ་ཟབ་པ་དང༌། འབྲས་བུ་ཤིན་ཏུ་ཟབ་པ་དང༌། བསོད་ནམས་སྤེལ་པའི་སེམས་ཤིན་ཏུ་ཟབ་པ་དང༌། དོན་དམ་པ་ལ་མོས་པའི་སེམས་ཤིན་ཏུ་ཟབ་པ་དང༌། བླ་ན་མེད་པ་ཤིན་ཏུ་ཟབ་པ་དང༌། འཇུག་པ་ཤིན་ཏུ་ཟབ་པ་དང༌། ཐུན་མོང་མ་ཡིན་པ་ཤིན་ཏུ་ཟབ་པ་སྟེ། ཉན་ཐོས་དང་རང་སངས་རྒྱས་ཀྱི་སྤྱོད་པ་ལས་ཁྱད་པར་དུ་འཕགས་པའི་ཕྱིར་ཤིན་ཏུ་ཟབ་པ་འདི་དག་སངས་རྒྱས་
བཅོམ་ལྡན་འདས་ཀྱི་སྤྱོད་པ་ཐམས་ཅད་རྫོགས་པར་བྱེད་པ། ཐེག་པ་གཅིག་པའི་སྤྱོད་པ་དང་ལྡན་ཞིང་རྣམ་པ་ཐམས་ཅད་མཁྱེན་པའི་རྒྱུ་གྲུབ་པས་བླ་ན་མེད་པའི་འབྲས་བུ་ཐོབ་པར་བྱེད་པ་དེའི་གླེང་གཞིའི་རྒྱུ་བསྟན་པའི་ཕྱིར་དམ་པའི་ཆོས་འདི་སྟོན་ཏོ། །དེ་ལ་སྨོན་ལམ་གྱི་རྒྱུ་ནི་ཡང་ཐབས་མཁས་པའི་ལེའུ་ལས། ཤཱ་རིའི་བུ་ང་སྔོན་གྱི་དུས་ན་སེམས་ཅན་ཐམས་ཅད་དང་བཞིན་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་སུ་གྲུབ་པར་བྱའོ་ཞེས་སྨོན་ལམ་བཏབ་པས། སྨོན་ལམ་དེ་ཉིད་གྲུབ་སྟེ། སེམས་ཅན་དགྲོལ་བ་ལ་མངའ་བརྙེས་པ་དང༌། སྔོན་གྱི་དུས་ན་དམ་བཅས་ཤིང་སྨོན་ལམ་བཏབ་པ་དེ་ཉིད་སྤྱོད་པ་དང་འབྲས་བུ་མཐུན་པར་གྱུར་པ་བཞིན་སེམས་ཅན་ཐམས་ཅད་ཀྱང་སྤྱོད་པ་དེ་ལ་གཟུད་པའི་ཕྱིར་དོན་དེ་བསྟན་ཏོ། །དེ་ལ་ཚོལ་བའི་རྒྱུ་ནི་མོས་པར་བྱ་བའི་ལེའུ་ལས། ང་སྔོན་འདས་པའི་དུས་ན་དམ་པའི་ཆོས་འདི་འདོད་པའི་ཕྱིར་བསྐལ་པ་མང་པོར་སྐྱོ་མི་ཤེས་པས་ཚོལ་ཞིང་སྔོན་རྒྱལ་པོ་མཛད་པའི་ཚེ་ཕྱོགས་བཞིར་དུང་བུས་རྔ་བརྡུངས་ཏེ་ཆོས་ཚོལ་བ་ན་དྲང་སྲོང་ལས་ཆོས་མཉན་པའི་ཕྱིར་རིམ་གྲོ་བཀུར་སྟི་གྲངས་མེད་པར་བྱེད་པ་ནི་དགེ་བའི་བཤེས་གཉེན་ལས་ཆོས་ཐོས་པར་ཚོལ་བའི་རྒྱུ་དང་གླེང་གཞིར་སྟོན་པའོ། །དེ་ལ་འཛིན་པའི་རྒྱུ་ནི་སྔར་སྨོས་པའི་ཤིན་ཏུ་ཟབ་པ་བརྒྱད་ལས་དང་པོར་སྔོན་སངས་རྒྱས་བཅོམ་ལྡན་འདས་སངས་རྒྱས་བརྒྱ་སྟོང་གྲངས་མེད་པ་ལ་རིམ་གྲོ་དང་བསྙེན་བཀུར་བྱས་པ་སྟེ། འདི་ལ་བྱང་ཆུབ་སེམས་དཔའ་ཆུ་བོ་གང་གཱའི་བྱེ་མ་སྙེད་ཀྱི་སངས་རྒྱས་མཆོད་པར་གྱུར་པ་ནས། རིམ་གྱིས་སངས་རྒྱས་མང་པོ་ལ་བསྙེན་བཀུར་བྱས་པ་དང༌། དགེ་བའི་བཤེས་གཉེན་དང་ཡུན་རིང་དུ་འགྲོགས་པའི་ཕྱིར་མདོ་འཛིན་ཅིང་ཀློག་པས་དབང་པོ་དྲུག་རྣམ་པར་དག་པ་དང༌། སངས་རྒྱས་མང་པོ་ལ་རྟག་ཏུ་བསྙེན་བཀུར་བྱེད་པར་འགྱུར་བའི་ཕྱིར། འཛིན་ཅིང་ཀློག་པ་ཉིད་ཤིན་ཏུ་ཟབ་པར་བསྟན་ཏོ། །དེ་ལ་ལྟས་ནི་སངས་རྒྱས་བཅོམ་ལྡན་འདས་བླ་ན་མེད་པའི་འབྲས་བུ་བརྙེས་ནས་མདོ་སྡེ་འདི་བཤད་པར་དགོངས་ཏེ། སྔར་བྱང་ཆུབ་སེམས་དཔའ་རྣམས་ལ་ལྟས་བསྟན་པའི་ཕྱིར་ལྷའི་མེ་ཏོག་འབྲུལ་བ་དང༌། ས་རྣམ་པར་གཡོ་བ་དང༌། འོད་ཀྱིས་སྣང་བར་མཛད་པས་འཁོར་མང་པོ་ཞལ་དུ་ལྟ་ཞིང་དགའ་བ་དང་སྤྲོ་བའི་སེམས་ཀྱིས་དེང་ནི་བཅོམ་ལྡན་འདས་ཀྱིས་དམ་པའི་ཆོས་པུཎྜ་རཱི་ཀ་བཤད་
པར་དགོངས་པའི་ལྟས་མང་པོ་སྟོན་པར་མཛད་པ་སྙམ་དུ་སེམས་པ་ལ་སོགས་པ་བསམ་པ་བསྐྱེད་པའི་ལྟས་མདོ་སྡེ་གཞན་བཤད་པ་དང་མི་འདྲ་བར་སྟོན་པ་ནི་ལྟས་ཆེན་པོའོ། །དེ་ལ་བཤད་པའི་རྒྱུ་ནི་དེ་བཞིན་གཤེགས་པ་འཇིག་རྟེན་དུ་འབྱུང་བའང་དོན་ཆེན་པོ་གཅིག་གི་ཕྱིར་ཞེས་འབྱུང་ཞེས་བྱ་བ་ནས་གནས་དེར་ཉན་ཐོས་ཀྱི་འཁོར་རྣམས་མེད་དེ། བྱང་ཆུབ་སེམས་དཔའི་འཁོར་འབའ་ཞིག་ལ་ཆོས་སྟོན་ཏེ། རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་པའི་བར་དུ་འགྱུར་བ་ལ་སོགས་པའི་བར་དུ་རྒྱས་པར་བསྟན་ཏེ། དུས་གསུམ་གྱི་སངས་རྒྱས་བཅོམ་ལྡན་འདས་ཀུན་གྱིས་ངེས་པའི་དོན་ཐེག་པ་ཆེན་པོ་སྟོན་པའང་དུས་དང་དབང་པོ་སྨིན་པར་སྟོན་པ་དེ་ནི་བཤད་པའོ། །དེ་ལ་བཤད་པར་གླེང་སློང་བ་ཇི་ལྟར་མདོ་ལས་གསུངས་པ་བཞིན་ཏེ། བཅོམ་ལྡན་འདས་དང་པོ་བལྟམས་པའི་ཚེ་ཕྱོགས་བཞིར་གོམ་པ་བདུན་བདུན་བོར་ཏེ། འོད་ཆེན་པོས་ཕྱོགས་སུ་སྣང་བར་མཛད་ནས་ཀུན་ལ་སེང་གེའི་སྒྲ་སྒྲོགས་པར་དགོངས་པ་མཐའ་ཡས་པའི་སེམས་ཅན་ཐམས་ཅད་བསྒྲལ་བར་ཐུགས་དམ་བཅས་ཏེ། སྐུ་ཁད་ཀྱིས་སྐྱེས་ནས་མཁར་གྱི་སྒོ་བཞིར་གཤེགས་ཤིང་འཇིག་རྟེན་གདུལ་བའི་ལྟས་གཟིགས་ནས་བླ་ན་མེད་པའི་ལམ་ཚོལ་བའི་ཕྱིར་ཁབ་ནས་བྱུང་ཞིང་དཀའ་ཐུབ་རྣམ་པ་སྣ་ཚོགས་མཛད་དེ། མངོན་པར་རྫོགས་པར་སངས་རྒྱས་བྱང་ཆུབ་ཀྱི་ཤིང་དྲུང་དུ་རྡོ་རྗེ་གདན་ལ་བཞུགས་པའི་བར་འཁོར་མང་པོར་དང་པོ་ཆོས་སྟོན་པ་སྟེ། དབང་པོ་མ་སྨིན་པ་རྣམས་ལ་བཀྲི་བ་དང་བཅས་པའི་ཆོས་སྟོན་པ་དང༌། མདོ་སྡེ་འདི་སྟོན་པའི་དུས་ནི་སེམས་ཅན་དབང་པོ་སྨིན་པ་རྣམས་ལ་ངེས་པའི་དོན་བསྟན་པར་དགོངས་ཏེ། འཕགས་པ་ཤཱ་རིའི་བུ་དང༌། བྱམས་པ་བྱང་ཆུབ་སེམས་དཔའ་དང༌། འཇམ་དཔལ་གཞོན་ནུར་གྱུར་པས་གསོལ་བའི་དོན་རྣམས་གཅིག་ཏུ་ངེས་པར་སྟོན་པ་ལ་སོགས་པ་ནི་གླེང་བསླང་ནས་ཆོས་སྟོན་པའོ། །ཐེ་ཚོམ་བསལ་བ་ནི་བཅོམ་ལྡན་འདས་མངོན་པར་རྫོགས་པར་སངས་རྒྱས་ན་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་སངས་རྒྱས་སུ་འགྲུབ་པར་ལུང་སྟོན་པ་མཛད་ཀྱི། ཉན་ཐོས་རྣམས་ནམ་དུའང་བླ་ན་མེད་པའི་བྱང་ཆུབ་ཐོབ་པར་ལུང་མ་བསྟན་པའི་ཕྱིར། འཕགས་པ་ཤཱ་རིའི་བུ་ལ་སོགས་པ་ཉན་ཐོས་རྣམས་ལ་བླ་ན་མེད་པའི་བྱང་ཆུབ་ཀྱི་རྒྱུ་མེད་དོ་སྙམ་དུ་ཐེ་ཚོམ་དུ་གྱུར་
པ་དང། བྱང་ཆུབ་སེམས་དཔའ་རྣམས་ཀྱིས་ཀྱང་ཉན་ཐོས་རྣམས་ནམ་དུ་ཡང་སངས་རྒྱས་སུ་གྲུབ་པའི་རྒྱུ་མེད་པ་སྙམ་དུ་སེམས་པ་དང༌། ཁ་ཅིག་མ་ངེས་པའི་རང་བཞིན་ཅན་རྣམས་ཀྱང་ཐེ་ཚོམ་དུ་གྱུར་པ་དེ་བསལ་བའི་ཕྱིར་མདོ་སྡེ་འདི་ལས་ཉན་ཐོས་དང་བྱང་ཆུབ་སེམས་དཔའ་ལ་སོགས་ཏེ། མདོ་སྡེ་འདི་ལ་ཆུང་དུ་ན་ཚིགས་སུ་བཅད་པ་གཅིག་ཐོས་པ་ཙམ་གྱིས་ཀྱང་བླ་ན་མེད་པའི་སངས་རྒྱས་སུ་འགྲུབ་པར་ལུང་བསྟན་པས་དེ་དག་གི་ཐེ་ཚོམ་བསལ་ཏོ། །དེ་ལ་ལུང་བསྟན་པ་དང་སྤྱོད་པ་ཡང་དང་པོ་མངོན་པར་སངས་རྒྱས་པ་ནས་དེའི་བར་དུ་ཉན་ཐོས་ཀྱི་སྤྱོད་པས་མངོན་པར་རྫོགས་པར་འཚང་རྒྱ་བར་ལུང་མ་བསྟན་གྱི། འདིར་ཐབས་ཀྱིས་དྲང་བའི་དུས་ལ་བབ་པར་ལུང་བསྟན་པའི་ཕྱིར་རོ། །སྤྱོད་པ་ནི་བྱང་ཆུབ་སེམས་དཔའ་ཐེག་པ་གཅིག་པ་འདིའི་ནང་ནས་འཆད་པའི་ཕྱིར་ཏེ། མདོ་འདི་ཉིད་ལས་ཀྱང་རྒྱལ་བའི་སྲས་སེམས་ཞི་བ་དུལ་བ་དབང་པོ་རྣོ་བ་སངས་རྒྱས་མང་པོ་ལ་དགེ་བའི་རྩ་བ་བསྐྲུན་པ་རྣམས་ལ་ཐེག་པ་ཆེན་པོའི་སྤྱོད་པ་འདི་བསྟན་པའི་ཕྱིར་མདོ་འདི་གསུངས་སོ། །དེ་ལ་ཚེ་འདི་ལ་ཕན་པ་ནི་དམ་པའི་ཆོས་པུཎྜ་རཱི་ཀ་འདི་འཕགས་པ་དང་མ་རབས་སུ་གྱུར་པ་གང་གིས་ཐོས་ཀྱང་ཕན་འདོགས་པར་གྱུར་པའི་ཕྱིར་རོ། །དེ་ལ་ཡང་རྣམ་པ་གཉིས་ཏེ། འབྲས་བུ་ཐོབ་པར་ལུང་སྟོན་པས་ཕན་འདོགས་པ་དང༌། འཕྲལ་དུ་མངོན་པར་གྲུབ་པར་བྱེད་པས་ཕན་འདོགས་པའོ། །འབྲས་བུ་ཐོབ་པར་ལུང་སྟོན་པ་ནི་འཕགས་པ་ཉན་ཐོས་ལྔ་བརྒྱ་བླ་ན་མེད་པའི་བྱང་ཆུབ་ཏུ་ལུང་བསྟན་པས་ཚེ་འདི་ལ་ཕན་འདོགས་པའོ། །དེ་སྟོན་པ་ཡང་རྣམ་པ་དྲུག་སྟེ། ཤཱ་རིའི་བུ་ལ་སོགས་པ་ཉན་ཐོས་ཆེན་པོ་བཞི་མཚན་མི་མཐུན་ཏེ་སོ་སོར་ལུང་བསྟན་པ་རྣམ་པར་ཕྱེ་སྟེ། ལུང་བསྟན་པ་དང༌། འཕགས་པ་གང་པོ་ལ་སོགས་པ་ཉན་ཐོས་ལྔ་བརྒྱ་མཚན་མཐུས་པར་ལུང་བསྟན་པས་སྤྱིར་ལུང་བསྟན་པ་དང༌། སློབ་པ་དང་མི་སློབ་པ་ཕལ་ཆེར་མང་པོ་གཞན་རྣམས་དབང་པོ་ཞན་པའི་ཕྱིར་ཕྱིས་ལུང་བསྟན་པ་དང༌། ལྷས་ཕྱིན་ལུང་བསྟན་པས་བྱམས་སྡང་མེད་པར་ལུང་བསྟན་པ་དང༌། རབ་ཏུ་བྱུང་བ་དང༌། ཁྱིམ་ན་གནས་པ་དང༌། ལྷའི་བུ་མོ་ལ་སོགས་པ་ལུང་བསྟན་པའི་ཕྱིར་དང༌། བཀོལ་བ་མེད་པར་སྟོན་པ་སྟེ། དེ་ནི་མདོ་སྡེ་འདི་བཤད་པའི་དུས་སུ་དེ་བཞིན་གཤེགས་པ་ཉིད་ཀྱིས་ལུང་བསྟན་པའོ། །རྟག་ཏུ་མི་བརྙས་
པར་བྱང་ཆུབ་སེམས་དཔའ་ལ་སེམས་ཅན་ཐམས་ཅད་ནི་དེ་བཞིན་གཤེགས་པའི་རང་བཞིན་ཅན་ནོ་ཞེས་རྒྱུ་ལ་དགོངས་ཤིང་སྟོན་པ་སྟེ། དེ་ལ་གོང་གི་ལྔ་ནི་ཚེ་འདི་ལ་ཕན་པའི་སྒོ་ནས་ལུང་བསྟན་པའོ། །འཕྲལ་དུ་མངོན་པར་འགྱུར་བར་བྱེད་པས་ཕན་པ་ནི་ཇི་ལྟར་མོས་པར་བྱ་བའི་ལེའུ་ལས་ཀླུའི་རྒྱལ་པོའི་བུ་མོ་དམ་པའི་ཆོས་འདི་ཐོས་པ་ཉིད་ཀྱིས་བླ་ན་མེད་པའི་འབྲས་བུ་ཐོབ་པ་འཁོར་བརྒྱད་པོ་ཐམས་ཅད་ཀྱིས་མངོན་དུ་མཐོང་བའི་ཕྱིར་ཀུན་གྱི་དགའ་བ་དང་མགུ་བ་གྲངས་མེད་པ་ཐོབ་པ་ལྟ་བུ་སྟེ། མདོ་སྡེ་འདི་བཤད་པའི་ཚེ་ལྷ་དང་མི་དང་ལྷ་མ་ཡིན་ལ་སོགས་པས་གཟུངས་དང་ཏིང་ངེ་འཛིན་གྲངས་མེད་པ་ཐོབ་པ་དང༌། མིག་རྣམ་པར་དག་ཅིང་བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པ་ལ་འཇུག་པ་ལ་སོགས་པ་ཕན་འདོགས་པ་མང་པོ་ནི་ཚེ་འདི་ཉིད་ལ་ཕན་པའོ། །ཚེ་རབས་གཞན་དུ་ཕན་པ་ནི་མདོ་སྡེ་འདི་བཤད་པ་ཐོས་པའི་བསོད་ནམས་ཀྱི་དགེ་བའི་རྩ་བ་མང་པོ་འཕེལ་བའི་ཚེ། ཚེ་རབས་གཞན་དུ་འཕེལ་བ་སྟེ། མདོ་སྡེ་འདི་ལ་རྗེས་སུ་ཡི་རང་བའི་བསོད་ནམས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ་རིན་པོ་ཆེ་སྣ་བདུན་གྱི་སྦྱིན་པ་བྱིན་པ་དང༌། སེམས་ཅན་ཐམས་ཅད་དགྲ་བཅོམ་པའི་འབྲས་བུ་ལ་བཀོད་པ་བས་བསོད་ནམས་འདི་ཆེ་བར་བསྟན་པ་དང༌། གཞན་ཡང་དམ་པའི་ཆོས་འདི་འདོན་པའི་དགེ་སློང་ལ་རིམ་གྲོ་བྱས་པ་ཙམ་གྱིས་ཀྱང་ནམ་དུ་ཡང་འོན་པ་དང་ལྐུགས་པར་མི་སྐྱེ་བ་དང༌། སུ་འབྲི་བ་དང༌། ཀློག་པ་དང༌། དབང་པོ་རྣམ་པར་དག་པའི་བསོད་ནམས་གྲངས་མེད་པ་འཐོབ་པ་ནི་ཚེ་རབས་གཞན་དུ་ཕན་པའོ། །དུས་དང་དབང་པོ་བསྟན་པ་ནི། དུས་ལ་ཡང་རྣམ་པ་གཉིས་ཏེ། སངས་རྒྱས་བཅོམ་ལྡན་འདས་ཆོས་སྟོན་པ་ཡང་ཅིག་ཅར་སྟོན་པའི་དུས་དང༌། རིམ་གྱིས་སྟོན་པའི་དུས་སོ། །ཅིག་ཅར་སྟོན་པ་ནི་དབང་པོ་རྣོན་པོའི་ཆེད་དུ་སྟོན་ཏེ། སེམས་ཅན་མ་རབས་ཀྱིས་ནས་བླ་ན་མེད་པའི་འབྲས་བུ་ཐོབ་པར་སྩོལ་བའི་ཕྱིར་རོ། །སངས་རྒྱས་བཅོམ་ལྡན་འདས་ཆོས་སྟོན་པའི་དུས་ཀྱང་རྣམ་པ་ལྔ་སྟེ། དང་པོར་མངོན་པར་རྫོགས་པར་སངས་རྒྱས་ནས་ཚོང་བ་ལྔ་བརྒྱ་ལ་སྐྱབས་གསུམ་དང༌། དགེ་བ་བཅུ་ལ་སོགས་པ་འཇིག་རྟེན་གྱི་བདེན་པའི་ཕྱིར་རྩ་བ་བསྟན། དེའི་འོག་ཏུ་མྱ་ངན་ལས་འདས་ནས་ལོ་བཅུ་གཉིས་ཀྱི་བར་དུ་
ཡོད་པ་ཅན་གྱི་བསྟན་པ་ཐེག་པ་ཆུང་དུའི་མདོ་སྡེ་ཨཱ་ཀ་མ་ལ་སོགས་པ་བསྟན། དེའི་འོག་ཏུ་མངོན་པར་བྱང་ཆུབ་ནས་ལོ་སུམ་ཅུའི་བར་དུ་ཡོད་པ་དང་མེད་པའི་ཕྱོགས་ལས་བརྩམས་ཏེ་ཆོས་བསྟན། དེའི་འོག་ཏུ་མངོན་པར་བྱང་ཆུབ་ནས་ལོ་བཞི་བཅུའི་བར་དུ་ཐེག་པ་གཅིག་པ་ལས་བརྩམས་ཏེ། དེ་བཞིན་གཤེགས་པའི་རང་བཞིན་རྟག་པ་ཉིད་དུ་སྟོན་པའི་གཞུང་དམ་པའི་ཆོས་པུཎྜ་རཱི་ཀ་ཉིད་ཀྱི་གཞུང་བསྟན། དེའི་འོག་ཏུ་ཤིང་སཱ་ལའི་དྲུང་དུ་སེམས་ཅན་ཐམས་ཅད་ལ་དེ་བཞིན་གཤེགས་པའི་རང་བཞིན་ཡོད་པ་ཉིད་དུ་བསྟན་ཞེས་ཀྱང་ཟེར་ཏེ། དེ་བཞིན་གཤེགས་པའི་ཆོས་སྟོན་པ་ནི་གསུང་རབ་ཚིག་དབང་པོ་སོ་སོར་སྨིན་པར་བྱེད་དེ། ཇི་ལྟར་རོ་གཅིག་ཏུ་འབབ་པའི་ཆར་པས་ཤིང་རྩི་སྣ་ཚོགས་སོ་སོར་སྨིན་པ་བཞིན་པས་འདི་སྐད་དུ་བསྟན་པར་ངེས་པ་ཙམ་མ་ཡིན་ནོ། །ཇི་ལྟར་དགོངས་པ་ངེས་པར་འགྲེལ་པ་ལས་བྱང་ཆུབ་སེམས་དཔའ་དོན་དམ་མ་ཡང་དག་འཕགས་ཀྱིས་ཞུས་པ་ལས་ཀྱང༌། བཅོམ་ལྡན་འདས་མངོན་པར་བྱང་ཆུབ་ནས་དང་པོ་རི་དྭགས་མའི་ཚལ་དྲང་སྲོང་བབས་པའི་གནས་སུ་འཕགས་པ་ཉན་ཐོས་པ་རྣམས་ལ་བདེན་པ་བཞི་ལས་བརྩམས་ཏེ་ཆོས་ཀྱི་འཁོར་ལོ་བསྐོར་བ་ཡང་ངོ་མཚར་རྨད་དུ་བྱུང་བ་འཇིག་རྟེན་ཐམས་ཅད་དུ་མངོན་པར་བྱུང་བའི་ཆོས་ཀྱི་འཁོར་ལོ་བསྐོར་ཏོ་ཞེས་བསྒྲགས་ཀྱང་དེ་ཡང་བླ་མ་དང་བཅས་པ་སྐབས་དང་བཅས་པ། རྩོད་པའི་གླགས་ཡོད་པ་གཅིག་ཏུ་ངེས་པ་མ་ཡིན་ནོ། །དེའི་འོག་ཏུ་བྱང་ཆུབ་སེམས་དཔའ་རྣམས་ལ་ཐེག་པ་ཆེན་པོ་ལས་བརྩམས་ཏེ། ཆོས་ཐམས་ཅད་མ་བྱུང་བ། མ་སྐྱེས་པ། ཐོག་མ་ནས་ཞི་བ། རང་བཞིན་གྱིས་མྱ་ངན་ལས་འདས་པ་མི་མངོན་པའི་ཚུལ་གྱིས་བསྒགས་ཏེ། ཆོས་ཀྱི་འཁོར་ལོ་བསྐོར་བ་ཡང་ཤིན་ཏུ་དཀོན་པ་རྨད་དུ་བྱུང་བ་ལ། སྔོན་མ་བྱུང་བ་ཡིན་མོད་ཀྱི། དེ་ཡང་བླ་མ་དང་བཅས་པ་སྐབས་ཅན་གཅིག་ཏུ་མ་ངེས་པ་རྩོད་པ་དང་བཅས་པ་ཡིན་ནོ། །དེའི་འོག་ཏུ་བཅོམ་ལྡན་འདས་ཀྱིས་ཐེག་པ་ཐམས་ཅད་པ་ལས་བརྩམས་ཏེ། ཆོས་ཐམས་ཅད་རང་བཞིན་གྱིས་མ་སྐྱེས་པ། མྱ་ངན་ལས་འདས་པ་སྟེ་མངོན་པ་ཉིད་དུ་བསྒྲགས་ཏེ། ཆོས་བསྟན་པ་ནི་བླ་ན་མ་མཆིས་པ། སྐབས་མ་མཆིས་པ། རྩོད་པའི་གླགས་མ་མཆིས་པའོ་ཞེས་གསུངས་ཏེ། དང་པོར་ཉན་ཐོས་རྣམས་ལ་ཨཱ་ཀ་མའི་གཞུང་བཤད་དེ། ཡོད་པར་མངོན་པ་ཉིད་དུ་མ་བསྟན་པ་ཡང་ཡོད་པ་ཉིད་རང་བཞིན་མི་
འགྲུབ་པ། ཤེས་རབ་ཀྱི་ཕ་རོལ་ཏུ་ཕྱིན་པའི་ནང་དུ་སྟོང་པ་ཉིད་དུ་བསྟན་པ་ཡང་སྟོང་པའི་རང་བཞིན་གྲུབ་པ་མེད་སྡོང་པོས་བརྒྱན་པ་ལ་སོགས་པར་ཡོད་པ་ཉིད་དུ་མངོན་པར་བསྒྲགས་པ་ལ་ཡང་གཞན་གྱི་དབང་དང༌། ཡོངས་སུ་གྲུབ་པའི་མཚན་ཉིད་ཡོད་པ་ལ་བརྟེན་ཏེ་གསུངས་པའི་དཔེར་མྱ་ངན་ལས་འདས་པ་ཆེན་པོ་ལས་ཀྱང་དཔེར་ན་སྨན་པ་མཁས་པ་ཞིག་གིས་ཡུལ་ཕྱོགས་སུ་འོ་མ་ལུས་ལ་གསོལ་བར་སྨྲས་པས་མི་ཀུན་གྱིས་འོ་མ་འབའ་ཞིག་འཐུངས་པས་ནད་དུ་གྱུར་ཏེ་འཆེ་བ་ཡང་མང་བར་གྱུར་ཏོ། །དེའི་གཉེན་པོར་འོ་མ་བཅད་པའི་ཕྱིར་འོ་མ་ནི་དུག་ཡིན་གྱི་འོ་མ་ནི་སུ་ཡང་མ་འཐུང་ཤིག་ཅེས་བསྒོ་བས་ཡུལ་ཕྱོགས་སུ་ནད་ཉུང་བར་གྱུར་ཏོ། །དེའི་འོག་ཏུ་ཡུལ་དེའི་རྒྱལ་པོ་ལ་སྨན་གཏང་བའི་ཕྱིར་སྨན་འོ་མ་དང་སྦྱར་བ་དང༌། སྨན་པ་ལ་རྒྱལ་པོས་བཀྱོན་ཏེ། སྔར་འོ་མ་ནི་དུག་ཡིན་ནོ་ཞེས་ཟེར་ན། ད་བཟའ་བའི་སྨན་འོ་མ་དང་སྦྱར་རམ་ཞེས་ཟེར་བ་ལ། འོ་མ་འབའ་ཞིག་འཐུངས་ན་ནི་དེ་སྐད་སྨྲས་པ་ཡང་བདེན་ན། ད་སྨན་དང་སྦྱར་ཏེ་ནད་ལ་ཕན་པའི་དུས་སུ་མི་གཏོང་བ་ཡང་མ་ཡིན་ཏེ། དེ་བཞིན་གཤེགས་པའི་བསྟན་པ་ཡང་དེ་བཞིན་དུ་བལྟའོ། །དབང་པོ་ནི་ཇི་ལྟར་མྱ་ངན་ལས་འདས་པ་ཆེན་པོའི་མདོ་ལས་སེམས་ཅན་ཐམས་ཅད་དབང་པོ་གཅིག་པ་སྟེ། ཀུན་ཀྱང་དེ་བཞིན་གཤེགས་པའི་རང་བཞིན་ཅན་པས་ཇི་ཙམ་དུ་སེམས་ཀྱིས་ཟིན་པ་དེ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའོ་ཞེས་གསུངས་སོ། །ཡང་མདོ་ལས་ཀྱང་ཕྱོགས་བཅུའི་དེ་བཞིན་གཤེགས་པའི་ཞིང་ཐམས་ཅད་ནི་ཐེག་པ་གཅིག་པ་སྟེ། གཉིས་དང༌། གསུམ་དུ་མེད་པས་ཐབས་མཁས་པས་རོལ་བ་ནི་མ་གཏོགས་སོ་ཞེས་འབྱུང་ངོ༌། །མདོ་སྡེ་འདིའི་ནང་ནས་ཀྱང་ཐེག་པ་གཅིག་བསྟན་པའི་ཕྱིར་རང་བཞིན་ཡང་གཅིག་པ་ཡིན་ན། ཡང་རང་བཞིན་ལ་རྣམ་པ་གཉིས་ཏེ། གྲུབ་པའི་རང་བཞིན་དང༌། སྒྲུབ་བའི་རང་བཞིན་ནོ། །གྲུབ་པའི་རང་བཞིན་ནི་མདོ་སྡེ་དག་ལས་སེམས་ཅན་ཐམས་ཅད་ལ་དེ་བཞིན་གཤེགས་པའི་རང་བཞིན་ཡོད་ཅེས་བྱའོ། །སྒྲུབ་པའི་རང་བཞིན་ནི་བསྒྲུབས་ན་འགྲུབ་པའི་རང་བཞིན་ཅན་ནོ། །ཡང་སེམས་ཅན་ལ་རང་བཞིན་དང༌། རང་བཞིན་མེད་པ་གཉིས་ཏེ། ཐོག་མ་
མེད་པ་ནས་གནས་དྲུག་ཏུ་མཐོ་དམན་དུ་འཁོར་ཞིང་གནས་པ་ནི་སྒྲུབ་པ་ལ་བརྟེན་པའི་སེམས་ཅན་ཏེ་རང་བཞིན་ཅན་ནོ། །རང་བཞིན་མེད་པ་ནི་ཇི་ལྟར་སེམས་བསྐྱེད་དེ་བརྩོན་འགྲུས་བརྩམས་སུ་ཟིན་ཀྱང་ལྷ་དང་མིའི་དགེ་བ་སྨན་པ་ཙམ་ལས་བླ་ན་མེད་པའི་བྱང་ཆུབ་འཐོབ་པར་མི་ནུས་སོ། །འཕགས་པ་ལང་ཀར་གཤེགས་པ་ལས་ནི་རིགས་རྣམ་པ་ལྔ་སྟེ། ཉན་ཐོས་པའི་རིགས་དང༌། རང་སངས་རྒྱས་ཀྱི་རིགས་དང༌། དེ་བཞིན་གཤེགས་པའི་རིགས་དང༌། མ་ངེས་པའི་རིགས་དང༌། རིགས་མེད་པའོ། །རིགས་མེད་པ་ཡང་རྣམ་པ་གཉིས་ཏེ། དགེ་བའི་རྩ་བ་ཐམས་ཅད་བསྲེགས་པའི་སེམས་ཅན་དང༌། བྱང་ཆུབ་སེམས་དཔའ་ཐུགས་རྗེ་ཆེན་པོས་སེམས་ཅན་གྱི་མཐའ་དང་སྦྱར་ཞིང་མྱ་ངན་ལས་མི་འདའ་བ་དང་གཉིས་སོ། །དེ་བས་ན་མདོ་སྡེ་འདི་བཤད་པའི་དགོངས་པ་ཡང་ཐེག་པ་གཅིག་ཏུ་བསྟན་པ་ནི་བྱང་ཆུབ་སེམས་དཔའི་རིགས་ཅན་རྣམས་ལ་བསྟན་ནས་ཆར་བའི་རོ་གཅིག་གིས་རྩི་ཤིང་རྣམ་པ་གསུམ་སོ་སོར་སྨིན་པ་ནི་ཉན་ཐོས་ཀྱི་ཆེད་དུ་བསྟན་པ་ཡིན་ནོ། །འདི་མན་ཆད་རྩིས་མགོ་གཉིས་པ་སྟེ། མདོ་སྡེ་འདི་ཉིད་ཀྱི་གཞུང་བསྟན་པའོ། །ཡང་མདོ་སྡེའོ་ཅོག་ལ་སྤྱིར་ཚུལ་རྣམ་པ་བཞིར་བསྟན་ཏེ། རང་བཞིན་ཡོད་པའི་གཞུང་སྟེ། ཕུང་པོ་ལྔའི་རང་བཞིན་དངོས་པོར་ཡོད་པ་དང༌། རང་བཞིན་གསལ་བའི་གཞུང་སྟེ། ཆོས་ཐམས་ཅད་དངོས་པ་ཅན་མ་ཡིན་གྱི། མཚན་ཉིད་ཙམ་དུ་ཡོད་པར་སྨྲ་བ་དང༌། མཚན་ཉིད་འཇིག་པའི་གཞུང་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ལྟ་བུ་ཆོས་ཀྱི་མཚན་ཉིད་ཀྱང་བསལ་ནས་སྟོང་པ་ཉིད་དུ་བསྟན་པའི་གཞུང་དང༌། ཡང་དག་པ་ཉིད་བསྟན་པའི་གཞུང་སྟེ། སྡོང་པོས་བརྒྱན་པ་ལྟ་བུ་ཡང་དག་པ་ཉིད་མངོན་དུ་བསྟན་ཏེ། དབུ་མའི་ཚུལ་བཤད་པ་དང་བཞི་ལས། མདོ་སྡེ་འདི་ནི་བཞི་པའི་གཞུང་དུ་བལྟའོ། །ཡང་ཉན་ཐོས་པ་སོ་སོའི་གཞུང་མི་མཐུན་པ་མ་ཧཱ་སང་གི་ག་ལ་སོགས་པ་གཞུང་མི་མཐུན་པ་ཉི་ཤུ་རྩ་གཉིས་སུ་ལྟ་བ་མི་མཐུན་པས་སོ་སོར་སྨོས་པ་ཡང་མང་མོད་ཀྱི་མདོར་རྣམ་པ་གསུམ་སྟེ། ཡོད་པར་སྨྲ་བ་ཐེག་པ་ཆུང་དུའི་གཞུང་ཨཱ་ཀ་མ་ལ་སོགས་པ་བསྟན་པ་ཡང་མཐར་སྟོང་པ་ཉིད་ཀྱི་མཚན་ཉིད་དང་ཐ་དད་པ་མ་ཡིན་ཤེས་རབ་ཀྱི་ཕ་རོལ་ཏུ་ཕྱིན་པའི་གཞུང་ལྟ་བུ་སྟོང་པ་ཉིད་
དུ་བསྟན་ཀྱང་ཡོད་པ་ལས་འགལ་བ་མ་ཡིན་ནོ། །སྡོང་པོས་བརྒྱན་པ་དང༌། དགོངས་པ་ངེས་པར་འགྲེལ་པ་ལ་སོགས་པར་ཡོད་མེད་གཉི་ཀའི་མཐའ་བསལ་ཏེ་བསྟན་པ་ཡང་འདུས་བྱས་དང་འདུས་མ་བྱས་པའི་མཚན་ཉིད་ནི་ཡོད་པར་བསྟན། བདག་དང་བདག་གིས་འཛིན་པ་ནི་བསལ་བ་ཙམ་ལས་འདས་པ་མ་ཡིན་ནོ། །སྡོང་པོས་བརྒྱན་པ་ལས་དེ་བཞིན་གཤེགས་པས་ཚིག་གཅིག་གསུངས་པས་སེམས་ཅན་སོ་སོའི་དབང་པོ་བཞིན་དུ་གོ་བར་གྱུར་པ་དང༌། གཞན་ཡང་མདོ་དག་ལས་དེ་བཞིན་གཤེགས་པ་མངོན་པར་བྱང་ཆུབ་ནས་ལོ་བཞི་བཅུའི་བར་དུ་རྟག་པར་ཆོས་ཐམས་ཅད་མ་བྱུང་བ་མི་སྐྱེས་པ། འགྲོ་བ་མེད་པ། འོང་བ་མེད་པ། ཐོབ་པ་མེད་པ། ཉམས་པ་མེད་པ། མཚན་ཉིད་མེད་པ། མཚན་ཉིད་གཅིག་པ་ཤ་སྟག་ཏུ་སྟོན་གྱིས་ཀྱང་སེམས་ཅན་རྣམས་ཀྱི་གོ་བ་མི་མཐུན་པར་གྱུར་པ་ཡང་སོ་སོའི་དབང་པོ་ལས་གྱུར་པ་ཡིན་ཏེ། ཇི་ལྟར་ལྷའི་ཡིད་བཞིན་གྱི་རྔ་བརྡུངས་པའི་སྒྲ་ལས་ཆོས་ཐོས་པ་མི་མཐུན་པ་བཞིན། ཐེག་པ་ཆེ་ཆུང་ལ་རིམ་པ་དང༌། ཅིག་ཅར་དུ་ཆུད་པ་ཡང་དེ་བཞིན་དུ་བལྟའོ། །གཉིས་པ་མདོ་སྡེ་འདིའི་མཚན་བཤད་པ་ནི་མདོ་སྡེ་འདི་དམ་པའི་ཆོས་པདྨ་དཀར་པོ་ཞེས་བྱ་བའི་མདོ་སྡེ་སྟེ། མདོ་སྡེ་འདི་འཆད་པར་དགོངས་པའི་ལྟས་སྨིན་མཚམས་ཀྱི་མཛོད་སྤུ་ནས་འོད་དཀར་པོས་སྣང་བར་མཛད་དེ། གླང་དཀར་པོའི་ཤིང་རྟ་ལ་བཅིབས་ནས་པདྨ་དཀར་པོ་ལ་གཟིགས་ཏེ། ཆོས་སྟོན་པ་ཡང་དཀོར་པོ་ནི་ཁ་དོག་ཐམས་ཅད་ཀྱི་གཞི་ཡིན། ཐེག་པ་གཅིག་པ་ཡང་ཐེག་པ་ཐམས་ཅད་ཀྱི་ཕྱི་མོ་ཡིན་པར་བསྟན་པའི་ཕྱིར་པདྨ་དཀར་པོས་དཔེ་བསྟན་ཏོ། །མདོ་སྡེ་འདིའི་ནང་ནས་རྒྱུ་དང་འབྲས་བུ་དང་རིགས་པ་དང་ཡེ་ཤེས་གཙོ་བོར་སྟོན་པ་དེ་ཉིད་ལ་དམ་པའི་ཆོས་པདྨ་དཀར་པོ་ཞེས་བྱ་སྟེ། དེ་བཞིན་གཤེགས་པའི་ཡེ་ཤེས་སྣང་བ་འབྱེད་པ་བླ་ན་མེད་པའི་སྐུ་ཐོབ་པའི་ཕྱིར་རོ། །རིགས་བདག་ཡེ་ཤེས་ལ་བརྟེན་པས་དེ་བཞིན་གཤེགས་པའི་སྤྱོད་ཡུལ་དུ་འཇུག་པ་ནི་རྒྱུ་ཡང་ཐེག་པ་གཅིག་པུ་ལ་གནས་པ་སྟེ། བླ་ན་མེད་པའི་གནས་སུ་ཕྱིན་པ་ནི་ཐེག་པ་གཅིག་པོའི་འབྲས་བུ་ཡིན་པར་བལྟའོ། །ཡང་ཆོས་འདི་པདྨ་ཞེས་གདགས་པ་ཡང་དོན་རྣམ་པ་གཉིས་ཏེ། ཆུ་ལས་སྐྱེས་པ་དང་ཁ་འབྱེ་
བའོ། །ཐེག་པ་རྣམ་གཉིས་ཀྱི་ཆུ་འདམ་ཅན་ལས་ཁྱད་པར་དུ་འཕགས་པའི་ཕྱིར་དང༌། གསུང་རབ་དམ་པ་ལ་བརྟེན་ནས་ཡང་དག་པའི་དོན་གྱི་སྒོ་འབྱེད་པ་ཞེས་བྱའོ། །ཡང་དེ་བཞིན་གཤེགས་པའི་དགོངས་པ་བསམ་གྱིས་མི་ཁྱབ་པ་རིགས་པ་དང་ཆུབ་བར་དཀའ་བ་དེ་ཉིད་ལ་དམ་པའི་ཆོས་ཞེས་བྱ་སྟེ། དེ་ཡང་རྟོགས་པ་ཤིན་ཏུ་ཟབ་པ་དང་གཞུང་ཤིན་ཏུ་ཟབ་པའི་ཕྱིར། ལུང་དང་གཞུང་དང་སྒྲུབ་པ་དང༌། འབྲས་བུ་ཀུན་ཀྱང་ཐེག་པ་གཅིག་པོ་ཉིད་ཡིན་པས་དམ་པའི་ཆོས་པདྨ་དཀར་པོ་ཞེས་བྱ་བ་ཡང་དེ་ཡིན་ནོ། །དེ་ལ་ལུང་ནི་གཞུང་དམ་པ་སྒྲོགས་པའི་ལས་བྱེད། གཞུང་ནི་གདོན་པར་བྱ་བ་ཆུ་ལས་འབྱིན་པའི་མཐུ་ཡོད། སྒྲུབ་པ་ནི་འབྲས་བུ་སྨིན་པར་བྱེད་པའི་མཐུ་ཡོད། འབྲས་བུ་ནི་རྒྱུས་བསྒྲུབས་པ་དོན་ཡོད་པར་བྱེད་པའོ། །མདོ་སྡེ་འདིའི་ནང་ནས་ལེའུའི་གྲངས་དང་མིང་བསྟན་པ་ནི་ལེའུ་ཉི་ཤུ་རྩ་བདུན་ཞིག་ཡོད་པ་ལས། དང་པོ་གླེང་གཞིའི་ལེའུ་དང༌། ཐབས་མཁས་པའི་ལེའུ་དང༌། དཔེའི་ལེའུ་དང༌། དད་པའི་ལེའུ་དང༌། སྨན་གྱི་ལེའུ་དང༌། ལུང་བསྟན་པའི་ལེའུ་དང༌། སྔོན་བྱུང་བའི་ལེའུ་དང༌། དགེ་སློང་ལྔ་བརྒྱ་ལུང་བསྟན་པའི་ལེའུ་དང༌། དགེ་སློང་གཞན་ཉིས་སྟོང་ལུང་བསྟན་པའི་ལེའུ་དང༌། ཆོས་སྨྲ་བའི་ལེའུ་དང༌། མཆོད་རྟེན་བསྟན་པའི་ལེའུ་དང༌། མོས་པ་བྱ་བའི་ལེའུ་དང༌། བདེ་བ་ལ་གནས་པའི་ལེའུ་དང༌། བྱང་ཆུབ་སེམས་དཔའ་སའི་རུམ་ནས་འཐོན་པའི་ལེའུ་དང༌། དེ་བཞིན་གཤེགས་པའི་ཚེའི་ཚད་ཀྱི་ལེའུ་དང༌། བསོད་ནམས་ཀྱི་གཞུང་གི་ལེའུ་དང༌། རྗེས་སུ་ཡི་རང་བའི་བསོད་ནམས་བསྟན་པའི་ལེའུ་དང༌། སྐྱེ་མཆེད་དྲུག་རྣམ་པ་དག་པའི་ཡོན་ཏན་གྱི་ལེའུ་དང༌། རྟག་ཏུ་མི་བརྙས་པའི་ལེའུ་དང༌། དེ་བཞིན་གཤེགས་པའི་རྫུ་འཕྲུལ་མངོན་པར་འདུ་བྱེད་པའི་ལེའུ་དང༌། གཟུངས་སྔགས་ཀྱི་ལེའུ་དང༌། སྨན་གྱི་རྒྱལ་པོའི་སྔོན་གྱི་ཚུལ་གྱི་ལེའུ་དང༌། སང་སང་པོའི་དབྱངས་ཀྱི་ལེའུ་དང༌། ཀུན་གྱི་སྒོའི་ལེའུ་དང༌། དགེ་བའི་རྒྱན་གྱི་སྔོན་གྱི་ཚུལ་གྱི་ལེའུ་དང༌། ཀུན་དུ་བཟང་པོ་མོས་པར་བྱ་བའི་ལེའུ་དང༌། ཡོངས་སུ་གཏད་པའི་ལེའུའོ། །ལེའུ་དེ་དག་ཀྱང་ཆོས་ཀྱི་དོན་ལས་བཏགས་པ་རྣམ་པ་བཞི་དང༌། དཔེ་ལས་བཏགས་པ་རྣམ་པ་གསུམ་དང༌། བྱང་ཆུབ་སེམས་དཔའ་གང་གིས་གསོལ་བ་འདེབས་པ་
ལས་བཏགས་པ་རྣམ་པ་བཞི་དང༌། དོན་ལས་བཏགས་པ་རྣམ་པ་བཞི་དང༌། དོན་དང་བྱང་ཆུབ་སེམས་དཔའ་གཉིས་ཀ་ལས་བཏགས་པ་རྣམ་པ་དགུ་དང༌། མ་ངེས་པ་རྣམ་པ་གཉིས་ཏེ། བདེ་བ་ལ་གནས་པ་དང༌། མཆོད་རྟེན་བསྟན་པ་གཉིས་ནི་རྒྱུ་དང་འབྲས་བུ་གཉིས་ཀར་འབྲེལ་པའི་ཕྱིར་མ་ངེས་པ་སྟེ། སྤྱིར་ཉི་ཤུ་རྩ་བདུན་ནོ། །ལེའུ་ཉི་ཤུ་རྩ་བདུན་གྱི་རིམ་པ་བཤད་པ་ནི། དེ་བཞིན་གཤེགས་པས་ཆོས་བཤད་པར་དགོངས་ཏེ། འགྲོ་བ་མང་པོ་ལ་གཟིགས་ནས་གཟེངས་བསྟོད་ཅིང་རྨུགས་པ་བསལ་ཏེ་དབང་པོ་དང་བར་བྱས་ནས་སོ་སོའི་དབང་པོ་དང་མཐུན་པར་ཆོས་བསྟན་པའི་ཕྱིར་དང་པོ་གླེང་གཞིའི་ལེའུ་བསྟན་ཏོ། །གླེང་གཞིའི་ལེའུ་བསྟན་ནས་ཡང་དག་པའི་གཞུང་ཉིད་བསྟན་པར་བཞེད་དེ། ཐེག་པ་གཅིག་པའི་གཞུང་སྟོན་པ་ཡང་བཀྲི་བ་དང་ངེས་པའི་དོན་གྱི་དབང་པོ་རྣོ་རྟུལ་སོ་སོར་ཕན་བཏགས་པའི་ཕྱིར་དེའི་འོག་ཏུ་ཐབས་མཁས་པའི་ལེའུ་བསྟན་ཏོ། །དབང་པོ་རྣོ་རྟུལ་ཆོས་རིམ་པར་ཕྱེ་སྟེ་བསྟན་ཟིན་གྱིས་ཀྱང་ཟབ་མོ་རྟོགས་པར་མི་ནུས་པར་མི་ནུས་པས་དཔེས་གོ་བར་བྱ་བའི་ཕྱིར་དེའི་འོག་ཏུ་དཔེའི་ལེའུ་བསྟན་ཏོ། །དཔེས་དོན་ཟབ་མོ་མཐོང་ཞིང་དད་པ་བསྐྱེད་པའི་ཕྱིར་དེའི་འོག་ཏུ་དད་པའི་ལེའུ་བསྟན་ཏོ། །དད་པ་སྐྱེས་སུ་ཟིན་གྱིས་ཀྱང་ད་དུང་ངེས་པ་ཙམ་མ་ཡིན་པས་དེ་བརྟན་པར་བྱ་བའི་ཕྱིར་ཡང་སྨན་གྱི་དཔེའི་ལེའུ་བསྟན་ཏོ། །ཉན་ཐོས་ཆེན་པོ་བཞི་དོན་ཟབ་མོ་མཐོང་བས་དེའི་འབྲས་བུ་བསྟན་པའི་ཕྱིར་དེའི་འོག་ཏུ་ལུང་བསྟན་པའི་ལེའུ་བསྟན་ཏོ། །དབང་པོ་རྣོན་པོ་དང་བར་མ་གཉིས་ཀྱིས་ཤེས་པ་སྐྱེས་སུ་ཟིན་ཀྱང་དབང་པོ་རྟུལ་བ་རྣམས་ཡང་དང་ཡང་དུ་བཟླས་ཤིང་ཆུད་པར་བྱ་བའི་ཕྱིར་སྔོན་བྱུང་བ་གྲོང་ཁྱེར་གྱི་དཔེའི་ལེའུ་བསྟན་ཏོ། །དབང་པོ་རྣོན་པོ་རྣམས་དོན་གླེངས་པ་ཙམ་གྱིས་ཆུད་པ་དང༌། དད་པ་སྐྱེས་ཏེ་ལུང་བསྟན་པ་བཞིན་དབང་པོ་རྟུལ་པོ་རྣམས་ཀྱང་ལན་གཉིས་ལན་གསུམ་དུ་བཟླས་པས་རྟོགས་པ་སྐྱེས་ཏེ། དེའི་ལུང་བསྟན་པར་དགོངས་པའི་ཕྱིར་དེའི་འོག་ཏུ་དགེ་སློང་ལྔ་བརྒྱ་ལུང་བསྟན་པའི་ལེའུ་བསྟན་ཏོ། །དབང་པོའི་རིགས་པ་བཞིན་དགེ་སློང་གཞན་དག་ཀྱང་རྟོགས་པ་སྐྱེས་པའི་ཕྱིར་དེའི་འོག་ཏུ་སློབ་པ་དང་མི་སློབ་པ་རྣམས་ལུང་བསྟན་པའི་ལེའུ་བཀོད་དོ། །དབང་པོ་རྣོ་རྟུལ་རིམ་པ་གསུམ་པོ་རྣམས་སོ་སོར་ལུང་བསྟན་ཏེ། ཡུན་རིང་པོ་མ་འོངས་པའི་དུས་སུ་
ཆོས་བཟང་བའི་དཔེ་ལུགས་བཞག་པའི་ཕྱིར་དེའི་འོག་ཏུ་ཆོས་སྨྲ་བའི་ལེའུ་བཞག་གོ །ལུང་བཞིན་བསྒྲུབས་ཏེ་ཡང་དག་པ་ཉིད་ཆུད་པའི་རྟགས་གཞན་དང་པ་བསྐྱེད་པའི་ཕྱིར་སྔོན་གྱི་འཕགས་པ་རྣམས་འབྱུང་བའི་མཆོད་རྟེན་གྱི་ལེའུ་བསྟན་ཏོ། །དོན་དེ་བདག་ཉིད་ཀྱིས་ཆུད་པར་མ་ཟད་ཀྱི་གཞན་གྱི་དོན་ཡང་བྱ་དགོངས་པས་རྒྱལ་པོའི་ལུས་སུ་སྤྲུལ་ཏེ་ཆོས་སྟོན་པའི་ཕྱིར་དེའི་འོག་ཏུ་སྔོན་བྱུང་བའི་ལེའུ་བསྟན་ཏོ། །མདོ་སྡེ་འདི་ལྟ་བུ་བདག་དང་གཞན་གྱི་རིན་ཆེ་བ་དང་གུས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱིས་རྗེས་སུ་འཛིན་པར་གསོལ་བས་དེའི་འོག་ཏུ་རྗེས་སུ་འཛིན་པའི་ལེའུ་བསྟན་ཏོ། །མ་འོངས་པའི་དུས་ན་ཆོས་སྒྲུབ་པའི་སྤྱོད་ལམ་མི་མཐུན་པར་བྱེད་པ་རྣམས་ཀྱི་ལུས་ཉོན་མོངས་པར་སྐྱེ་བ་ལ་སྤྱོད་ལམ་གྱི་ཚུལ་བསྟན་པས་སྤྱོད་ལམ་བསླབ་པའི་ཕྱིར་དེའི་འོག་ཏུ་བདེ་བ་ལ་གནས་པའི་ལེའུ་བསྟན་ཏོ། །ཆུ་བོ་གང་གཱའི་བྱེ་མ་སྙེད་ཀྱི་བྱང་ཆུབ་སེམས་དཔའ་རྣམས་ཀྱིས་དམ་པའི་ཆོས་འདི་ཐོས་ནས་རྗེས་སུ་འཛིན་ཅིང་སློབ་པར་དགའ་སྟེ་སྨོན་པ་ལས་སངས་རྒྱས་བཅོམ་ལྡན་འདས་ཀྱི་སྔོན་ཡང་བྱང་ཆུབ་སེམས་དཔའ་སྐྱོན་གྱི་དྲི་མ་དང་བྲལ་བ་རྣམས་ལངས་ནས་འདི་འཛིན་པར་སྨོན་པ་རྣམས་ལ་བསྟན་པའི་ཕྱིར་བྱང་ཆུབ་སེམས་དཔའ་རྣམས་སའི་འོག་ནས་མང་དུ་འཐོན་པས་དེའི་འོག་ཏུ་བྱང་ཆུབ་སེམས་དཔའ་སའི་རུམ་ནས་འཐོན་པའི་ལེའུ་བཞག་གོ །འཁོར་མང་པོ་རྣམས་ཀྱི་བྱང་ཆུབ་སེམས་དཔའ་སའི་འོག་ནས་འཐོན་པ་མཐོང་ནས་འདི་ནི་དེ་བཞིན་གཤེགས་པ་ཤཱཀྱ་ཐུབ་པ་བས་སྔར་གྲུབ་པ་ཤ་སྟག་སྟེ། འདི་ནི་ཤཱཀྱ་ཐུབ་པས་སྤྲུལ་པ་མ་ཡིན་ནོ་སྙམ་པའི་དོགས་པ་བསལ་བའི་ཕྱིར་དེ་བཞིན་གཤེགས་པ་རྣམས་ནི་ཚེ་མཐའ་ཡས་པ་སྟེ། དེའི་འོག་ཏུ་དེ་བཞིན་གཤེགས་པའི་སྐུ་ཚེའི་ཚད་ཀྱི་ལེའུ་བཞག་གོ །དེ་བཞིན་གཤེགས་པའི་སྤྲུལ་པའི་སྐུའི་ཚེ་ཚད་དེ་ལྟན་ཆོས་དང་ལོངས་སྤྱོད་རྫོགས་པའི་སྐུའི་ཡོན་ཏན་དང་ཚེ་ཚད་ཀྱང་གྲངས་མེད་པར་ཐབས་ཀྱིས་བསྟན་པས་སེམས་ཅན་རྣམས་དེ་ལ་མོས་པ་བསྐྱེད་པའི་ཕྱིར་དེའི་འོག་ཏུ་བསོད་ནམས་ཀྱི་རྣམ་གྲངས་དབྱེ་བའི་ལེའུ་བསྟན་ཏོ། །དེ་ལྟར་བསོད་ནམས་ཀྱི་རྣམ་གྲངས་མེད་པར་བསྟན་པས་སེམས་ཅན་རྣམས་དང་པ་བསྐྱེད་པའི་ཕྱིར་དེའི་འོག་ཏུ་རྗེས་སུ་ཡི་རང་བའི་ལེའུ་བཞག་གོ །
གཞན་བྱེད་པ་ལ་རྗེས་སུ་ཡི་རང་བ་ཙམ་གྱིས་ཀྱང་བསོད་ནམས་གྲངས་མེད་པ་ཐོབ་ན། དངོས་སུ་འཆད་པ་དང་འདོན་པ་རྣམས་ལྟ་སྨོས་ཀྱང་མི་དགོས་པར་བསྟན་པའི་ཕྱིར་དེའི་འོག་ཏུ་སྐྱེ་མཆེད་དྲུག་རྣམ་པར་དག་པའི་ཡོན་ཏན་གྱི་ལེའུ་བཞག་གོ །གང་ཆོས་སྨྲ་བ་དེ་བླ་ན་མེད་པའི་བྱང་ཆུབ་ཏུ་འགྱུར་བས་ཆོས་སྨྲ་བ་ལ་སྨོད་པ་ཁ་ན་མ་ཐོ་བ་ཆེ་བར་བསྟན་པའི་ཕྱིར་དེའི་འོག་ཏུ་རྟག་ཏུ་མི་བརྙས་པའི་ལེའུ་བཞག་གོ །དེ་བཞིན་གཤེགས་པས་བསོད་ནམས་ཆེ་བའི་རིམ་པ་བསྟན་ཀྱང་སེམས་ཅན་མོས་པ་ཆུང་བ་རྣམས་དགོས་པ་སྐྱེ་བ་ཡང་ཡོད་དེ། དེ་བསླུ་བ་མ་ཡིན་པའི་གཏན་ཚིགས་སུ་དེ་བཞིན་གཤེགས་པའི་རྫུ་འཕྲུལ་མངོན་པར་འདུ་བྱེད་པའི་ལེའུ་བཞག་གོ །སྨན་གྱི་རྒྱལ་པོ་སྔོན་དམ་པའི་ཆོས་འདི་ཚོལ་བ་ལ་ལུས་དང་སྲོག་ལ་མི་ཕངས་པས་བརྩོན་པར་ཚོལ་བ་སྔོན་གྱི་ཚུལ་བསྟན་པའི་ཕྱིར་དེའི་འོག་ཏུ་སྨན་གྱི་རྒྱལ་པོ་བྱང་ཆུབ་སེམས་དཔའི་ལེའུ་བཞག་གོ །ཡང་དག་པའི་ཆོས་སྤྱོད་པ་འཇིག་རྟེན་འདི་དང་ཁམས་གཞན་དག་ཏུ་རྒྱས་པར་བསྒྲགས་པའི་ཕྱིར་དབྱངས་དམ་པ་དང་ལྡན་པའི་བྱང་ཆུབ་སེམས་དཔའ་སྒྲོགས་སུ་གཞུག་པའི་ཕྱིར་དེའི་འོག་ཏུ་སང་སང་པོའི་དབྱངས་ཀྱི་ལེའུ་བཞག་གོ །སེམས་ཅན་རྣམས་མདོ་འདི་འཛིན་པ་ལ་བགེགས་དང་བར་ཆད་ཆེ་བས་ཐུགས་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་ལ་བརྟེན་པའི་ཀུན་གྱི་སྒོའི་ལེའུ་བཞག་གོ །བགེགས་དང་བར་ཆད་ཞི་བར་བྱ་བའི་ཕྱིར་གཟུངས་ཀྱི་ལེའུ་བཞག་གོ །སྔོན་གྱི་གཏན་ཚིགས་དང་གླེང་གཞི་ལ་བརྟེན་པའི་ཕྱིར་དེའི་འོག་ཏུ་དགེ་བའི་རྒྱན་གྱི་སྔོན་གྱི་ཚུལ་གྱི་ལེའུ་བཞག་གོ །ཡུལ་ཁམས་ཐམས་ཅད་དུ་རྒྱས་པར་བསྟན་པའི་ཕྱིར་དེའི་འོག་ཏུ་བྱང་ཆུབ་སེམས་དཔའ་ཀུན་ཏུ་བཟང་པོའི་ལེའུ་བཞག་གོ །མདོ་སྡེ་འདི་བཤད་པའི་གཞུང་རྫོགས་ཤིང་མཐར་ཕྱིན་པས་དེའི་འོག་ཏུ་གདམས་ཤིང་གཏད་པར་འོས་པའི་ཕྱིར་དེའི་འོག་ཏུ་ཡོངས་སུ་གཏད་པའི་ལེའུ་བཞག་གོ །དེ་ལ་མདོ་སྡེའི་གཞུང་འགྲེལ་པ་ནི་འདི་སྐད་བདག་གིས་ཐོས་པ་ཞེས་པ་ལ་དོན་རྣམ་པ་གསུམ་སྟེ། དེའི་ཕྱིར་བཤད་པ་དང་དེ་ཅིར་དགོངས་པ་དང༌། དེའི་གཞུང་དགྲོལ་བ་དང་རྣམ་པ་གསུམ་མོ། །དེ་ལ་ཅིའི་ཕྱིར་བཤད་པ་ནི་སངས་རྒྱས་བཅོམ་
ལྡན་འདས་མྱ་ངན་ལས་འདའ་ཀར་འཕགས་པ་དགའ་བོས་དོན་རྣམ་པ་བཞི་ཞིག་དྲིས་པ། བཅོམ་ལྡན་འདས་མྱ་ངན་ལས་འདས་པའི་འོག་ཏུ་དགེ་སློང་རྣམས་ཇི་ལྟར་བཅོམ་ལྡན་འདས་ལ་གནས་འཆའ་བ་བཞིན་མ་འོངས་པ་ན་སུ་ལ་བརྟེན་པར་བགྱི། ཅི་ལ་གནས་པར་བགྱི། དགེ་སློང་མ་རུངས་པ་ནི་ཇི་ལྟར་གདུལ་བར་བགྱི། མདོ་སྡེ་ཐམས་ཅད་ཀྱི་ཀླད་ལ་ནི་ཚིག་ཇི་སྐད་དུ་སྨོས་ཞེས་དྲིས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། མྱ་ངན་ལས་འདས་པའི་འོག་ཏུ་སོ་སོར་ཐར་པ་ལ་སྟོན་པར་ཟུང་ཤིག །ཚུལ་ཁྲིམས་ལ་གནས་ཤིང་དྲན་པ་ཉེ་བར་གཞག་པ་བཞི་ལ་གནས་འཆའ་བར་གྱིས་ཤིག །དགེ་སློང་མ་རུངས་པ་རྣམས་མི་སྨྲ་བས་ཐུལ་ཅིག །མདོ་སྡེ་ཐམས་ཅད་ཀྱི་ཀླད་ལ་འདི་སྐད་བདག་གིས་ཐོས་པ་ཞེས་བྲིས་ཤིག་ཅེས་གསུངས་པས་དེའི་ཕྱིར་འདིར་ཡང་འདི་སྐད་བདག་གིས་ཐོས་པ་ཞེས་སྨོས་སོ། །དེ་སྐད་སྨོས་པ་དེ་ཅིར་དགོངས་པ་བསྟན་པའི་ཕྱིར་དད་པ་ཕུན་སུམ་ཚོགས་པ་བསྟན་ཏེ། གཞུང་ལས་ཀྱང་འདི་སྐད་བདག་གིས་ཐོས་པ་ཞེས་སྨོས་པས་དད་པ་སྐྱེ་བར་གྱུར་ཏོ། །མངོན་པར་དགའ་ཞེས་སྨོས་པས་ཡེ་ཤེས་སྐྱེ་བར་འགྱུར་རོ་ཞེས་འབྱུང་སྟེ། དད་པས་ནི་འཇུག་ནུས་པར་འགྱུར། ཡེ་ཤེས་ཀྱིས་ནི་འབྱུང་ནུས་པར་འགྱུར་ཏེ། དད་པ་ནི་དགེ་བའི་ཆོས་ཐམས་ཅད་ཀྱི་རྩ་བ། ཡེ་ཤེས་ནི་ཟབ་མོ་རྟོགས་པར་འགྱུར་བའི་མཐའོ། །ཡང་སློབ་དཔོན་གཞན་གྱིས་བཤད་པ་ལས་ཀྱང་འདི་སྐད་ཅེས་བྱ་བ་དོན་རྣམ་པ་བཞི་སྟེ། རྣམ་ཐོས་བུ་བཞིན་ཕྱུག་པའི་ཕྱིར་དཔེ་དེ་ཁོ་ན་བཞིན་ཞེས་བྱ་བ་དང༌། ཇི་སྐད་དུ་བསྒོ་བ་དེ་བཞིན་ཉིད་དུ་མཉན་པའི་ཕྱིར་དེ་བཞིན་ཞེས་བྱ་བ་དང༌། ཇི་སྐད་དུ་དྲིས་པ་དེ་བཞིན་དུ་ལན་བཏབ་པའི་ཕྱིར་འདི་སྐད་ཅེས་བྱ་བ་དང༌། གཞན་གྱིས་སྨྲས་པ་དེ་ལྷག་ཆད་མེད་པར་ཟློས་པ་དེ་ལ་ཡང་འདི་སྐད་ཅེས་བྱ་སྟེ། མདོ་སྡེ་པའི་བྱང་ཆུབ་སེམས་དཔས་སྔོན་བཅོམ་ལྡན་འདས་ཀྱིས་ཇི་སྐད་དུ་བཤད་པ་དེ་བཞིན་དུ་ཟློས་པའི་ཕྱིར་འདི་སྐད་ཅེས་བྱའོ། །ཡང་འདུལ་བ་ཕྲན་ཚེགས་ཀྱི་ནང་ནས་འཕགས་པ་དགའ་བོ་འཁོར་མང་པོ་ལ་ཆོས་སྟོན་པ་ན་འཁོར་རྣམས་ཐེ་ཚོམ་དུ་གྱུར་པ། འདི་གསུམ་བསལ་བའི་ཕྱིར་དགའ་བོས་འདི་སྐད་ཅེས་སྨྲས་ཏེ། དགའ་བོ་མཚན་དང་དཔེ་
བྱད་དུ་ལྡན་པས་ཆོས་སྟོན་པ་ལ་འཁོར་རྣམས་བཅོམ་ལྡན་འདས་ཐུགས་རྗེ་དང་ལྡན་པས་མྱ་ངན་ལས་འདས་པ་ལས། སླར་བཞེངས་ཏེ་འཁོར་རྣམས་ལ་ཆོས་སྟོན་པ་ཞིག་གམ་ཕྱོགས་གཞན་གྱི་དེ་བཞིན་གཤེགས་པ་ཞིག་འདིར་ཆོས་སྟོན་ཅིང་བྱོན་པ་ཞིག་གམ། དགའ་བོ་འདི་ཉིད་མངོན་པར་སངས་རྒྱས་ཏེ་ཆོས་སྟོན་པ་ཞིག་གམ་སྙམ་པའི་ཐེ་ཚོམ་དེ་བསལ་བའི་ཕྱིར་དགའ་བོས་འདི་སྐད་བདག་གིས་ཐོས་པ་ཞེས་སྨྲས་སོ། །ཡང་སློབ་དཔོན་གཞན་ན་རེ་དུས་གསུམ་གྱི་སངས་རྒྱས་བཅོམ་ལྡན་འདས་ལྷག་ཆད་མེད་པར་མཐུན་པར་སྟོན་པའི་ཕྱིར་དེ་བཞིན་ཞེས་བྱའོ། ཡང་ན་ཆོས་རྣམས་ཀྱི་དེ་ཁོ་ན་ལུགས་གཅིག་པས་མ་ཉམས་པ་ཉིད་དེ་བཞིན་ཞེས་བྱ་བ་དང༌། ཡང་ན་འཕགས་པ་དགའ་བོས་བཅོམ་ལྡན་འདས་ལ་ཇི་སྐད་ཐོས་པ་དེ་སྐད་དུ་བཟླས་པའི་ཕྱིར་འདི་སྐད་ཅེས་བྱའོ། །བདག་གིས་ཐོས་པ་ནི་ཆོས་འདི་ལྟ་བུ་བདག་ཉིད་ཀྱིས་མངོན་སུམ་དུ་ཐོས་ཀྱི། ཉིད་ནས་ཉིད་དུ་བརྒྱུད་དེ་ཐོས་པ་མ་ཡིན་པའི་ཕྱིར་བདག་གིས་ཐོས་པ་ཞེས་སྨོས་སོ། །བདག་ཅེས་བྱ་བ་ནི་ཕུང་པོ་ལྔ་ལ་འཇིག་རྟེན་པའི་ཐ་སྙད་ཙམ་དུ་བཏགས་པ་ལ་བདག་གོ་ཞེས་གདགས་ཀྱི། ཇི་ལྟར་མུ་སྟེགས་ཅན་གྱིས་བཏགས་པ་ལྟ་བུ་ནི་མ་ཡིན་གྱི། ལྟ་སྦྱིན་དང་མཆོད་སྦྱིན་ཞེས་བཏགས་པ་ལ་བདག་ཅེས་གདགས་པ་བཞིན་ནོ། །ཡང་འདིར་སུས་ཐོས་པ་མིང་མི་སྨོས་པར་སྤྱིར་བདག་གིས་ཐོས་ཞེས་པ་ཅིའི་ཕྱིར་ཞེས་དྲིས་པ་ལ། དགའ་བོས་ཐོས་པ་མང་བ་ཐོས་པ་བསགས་པ། ཐོས་པ་རྒྱ་མཚོ་ཡིན་པས། ཐེག་པ་གསུམ་གྱི་སྡེ་སྣོད་ཀུན་དགའ་བོས་བསྡུས་པའི་ཕྱིར་མིང་མ་སྨོས་སོ། །ཐོས་པ་ནི་རྣ་བའི་དབང་པོ་དང་རྣམ་པར་ཤེས་པ་གཅིག་ཏུ་བསྡུས་པས་ཐོས་པའི་ང་རྒྱལ་སྐྱེ་བའོ། །ཐོས་པ་ཉི་ཚེ་སྨོས་ཀྱི་མཐོང་བ་ལ་སོགས་པ་མ་སྨོས་པ་ནི་དོན་ཟབ་མོ་རྟོགས་པ་ལ་ཐོས་པའི་ཤེས་རབ་སྔོན་དུ་འགྲོ་བ་དང༌། ཁམས་འདིར་སྒྲས་སངས་རྒྱས་ཀྱི་མཛད་པ་མཛད་པའི་ཕྱིར་ཐོས་པ་ཞེས་སྨོས་སོ། །ཡང་བདག་གིས་ཐོས་པ་ཞེས་སྨོས་པས་ཇི་ལྟར་དེ་བཞིན་གཤེགས་པས་བཤད་པ་དེ་ཁོ་ན་བཞིན་སྨྲས་ཏེ། བསྐྱེད་པ་དང་སྐུར་པའི་མཐའ་བསལ་བའི་ཕྱིར་འདི་སྐད་བདག་གིས་ཐོས་ཞེས་སྨོས་སོ། །དུས་གཅིག་ན་ཞེས་བྱ་བ་ནི་འདིར་དུས་
ཕུན་སུམ་ཚོགས་པ་བསྟན་ཏེ། དེ་ཡང་རྣམ་པ་གཉིས་སོ། །ཆོས་ཀྱི་རྒྱལ་པོ་ཐུགས་རྗེས་འགྲོ་བའི་དོན་མཛད་པར་དགོངས་པ་དང༌། སེམས་ཅན་སྐལ་བ་ཅན་མང་པོ་སྨིན་པའི་དུས་དང་མཉམ་པ་དང་འཆད་པ་བར་ཆད་མེད་པར་དུས་གཅིག་ཏུ་གྱུར་པའོ། །ཡང་དུས་ལ་རྣམ་པ་གཉིས་ཏེ། རིགས་པའི་དུས་དང༌། རྣམ་པར་ཤེས་པ་ཙམ་གྱི་དུས་སོ། །དེ་ལ་རིགས་པའི་དུས་ནི་འཆད་པ་དང་ཉན་པ་རྣམས་འདུ་བྱེད་ཀྱི་ཕུང་པོ་སྐད་ཅིག་ལ་སྐྱེ་ཞིང་འཇིག་པའི་རང་བཞིན་ཅན་སྔ་མ་མ་འདས་པ་དང༌། ཕྱི་མས་མ་ཕུལ་བའི་དུས་ཀྱི་ཆ་ཇི་ཙམ་དུ་རྒྱུན་དུ་གནས་པ་དེ་ལྟར་གྱི་དུས་དེ་ལ་དུས་གཅིག་ཅེས་གདགས་ཀྱི་སྐད་ཅིག་མ་གཅིག་ལ་སྐྱེ་ཞིང་འཇིག་པའི་དུས་ལ་མི་བྱའོ། །དེ་ལ་རྣམ་པར་ཤེས་པའི་དུས་ནི་འཆད་པ་དང་ཉན་པ་རྣམས་ཀྱི་ཡིད་ལ་དུས་གསུམ་ལྟ་བུར་སྣང་ཞིང་ཡུན་རིང་ཐུང་དང་ཉིན་མཚན་དུ་སྣང་བ་དེའི་དུས་ཏེ། ཇི་ལྟར་རྨི་ལམ་ན་ཡུན་རིང་དུ་ལོན་ཀྱང་སད་ན་དེ་ལྟ་མ་ཡིན་པ་བཞིན་ནོ། །ཡང་དུས་གཅིག་ཅེས་སྨོས་པ་ཡང་སྐད་ཅིག་མའི་དུས་དང༌། དུས་བཞི་དང་དྲུག་དང་བརྒྱད་ལ་མི་བྱའི། ནམ་ཐུགས་རྗེས་ཕན་འདོགས་པ་དང༌། དབང་པོ་སྨིན་པ་དུས་གཅིག་ཏུ་གྱུར་པ་དེ་ལ་དུས་ཤེས་པའོ།། བཅོམ་ལྡན་འདས་ཞེས་སྨོས་པ་ནི་སྟོན་པ་ཕུན་སུམ་ཚོགས་པ་སྟེ། དབང་ཕུན་སུམ་ཚོགས་པ་ལ་སོགས་པའི་ཡོན་ཏན་དྲུག་དང་ལྡན་པ་ནི་བཅོ་ལྡན་འདས་ཞེས་བྱའོ། །རྒྱལ་པོའི་ཁབ་བྱ་རྒོད་ཕུང་པོའི་རིལ་བཞུགས་ཞེས་པ་ནི་གནས་ཕུན་སུམ་ཚོགས་པ་བསྟན་ཏེ། དེར་གནས་པ་དང་བཞུགས་པ་དང་བཞེངས་ཞེས་པའི་དོན་ཏེ། འཕགས་པ་དང་ལྷ་དང་ཚངས་པའི་བཞུགས་ས་ལས་ཁྱད་པར་དུ་བསྟན་པའི་ཕྱིར། བཅོམ་ལྡན་འདས་དེར་བཞུགས་ཞེས་སྨོས་སོ། །རྒྱལ་པོའི་ཁབ་ཅེས་སྨོས་པ་ནི་སྔོན་རྒྱལ་པོ་གསལ་རྒྱལ་གྱི་ཕོ་བྲང་འབངས་མང་པོ་དང་འདབ་ཆགས་སུ་འདུག་པ་ལ་རྟག་ཏུ་མེ་ཤོར་བས་བསྙེངས་ཏེ། རྒྱལ་ཁྲིམས་སུ་བཅས་པས་ད་སླན་ཆད་སུའི་ཁྱིམ་ན་མེ་ཤོར་བ་དེ་དུར་ཁྲོད་གདོན་གྱི་གནས་སུ་གཅིག་པུར་སྤྱུགས་པར་བྱས་པ་ལས། དང་པོ་རྒྱལ་པོའི་ཁབ་མེ་ཤོར་བས་རྒྱལ་པོ་ཉིད་དུར་ཁྲོད་དེར་འཕོས་ཏེ། ཕོ་བྲང་བཏབ་ནས་འབངས་དེར་འཕོས་པ་རྣམས་
ཀྱང་འདྲེ་གདོན་གྱིས་མི་གཙོ་བའི་ཕྱིར་སྒོ་སྒོ་ལ་རྒྱལ་པོའི་ཁབ་ཅེས་བྲིས་པས། དེའི་ཕྱིར་ཡུལ་འཁོར་དེ་རྒྱལ་པོའི་ཁབ་ཏུ་ཆགས་སོ། །རྒྱལ་པོའི་ཁབ་དང་བྱ་རྒོད་ཕུང་པོའི་རི་གཉི་ག་སྨོས་པ་ནི་ཁྱིམ་ན་གནས་པ་དང་རབ་ཏུ་བྱུང་བ་གཉི་ག་ལ་ཕན་གདགས་པའི་ཕྱིར་གཉི་ག་སྨོས་སོ། །རྒྱལ་པོའི་ཁབ་དེ་རིན་པོ་ཆེ་ཐམས་ཅད་ཀྱི་འབྱུང་ཁུངས་གནས་གཞན་ཐམས་ཅད་ལས་འཕགས་པ་བཞིན་དམ་པའི་ཆོས་འདི་དེར་བཤད་པ་ཡང་མདོ་སྡེ་གཞན་ཐམས་ཅད་ལས་ཁྱད་པར་དུ་བསྟན་པ་དང༌། བྱ་རྒོད་ཕུང་པོའི་རི་དེ་ཡང་རི་གཞན་ཐམས་ཅད་ལས་འཕགས་པ་བཞིན་ཐེག་པ་གཅིག་པའི་ཐེག་པ་འདི་ཡང་ཐེག་པ་གཉིས་ལས་ཁྱད་པར་དུ་འཕགས་པའི་ཕྱིར་གནས་དེར་བཤད་དོ། །མདོ་ལས་དགེ་སློང་གི་དགེ་འདུན་ཆེན་པོ་དགེ་སློང་སྟོང་ཕྲག་བཅུ་གཉིས་ཞེས་འབྱུང་བ་འདི་ནི་འཁོར་ཕུན་སུམ་ཚོགས་པའོ། །འཁོར་ཕུན་སུམ་ཚོགས་པ་དེ་ཡང་རྣམ་པ་ལྔ་སྟེ། དེའི་གཏན་ཚིགས་བསྟན་པ་དང༌། བཀྲི་བ་དང་ངེས་པའི་དོན་རྣམས་གླེང་བ་དང༌། གྲངས་མང་ཉུང་གཏན་ལ་དབབ་པ་དང༌། འཁོར་རྣམས་ཀྱི་རིམ་པ་བསྟན་པ་དང༌། འགྲེལ་པའི་དོན་བསྟན་པའོ། །གཏན་ཚིགས་བསྟན་པ་ལ་ཡང་རིམ་པ་ལྔ་སྟེ། དད་པ་དང་ཡིད་ཆེས་པའི་གཏན་ཚིགས་སུ་དགའ་བོ་འདིས་རང་བཟོར་སྨྲས་པ་ནི་མ་ཡིན་པ་དང༌། གཞན་ལས་བརྒྱུད་དེ་སྨྲས་པ་མ་ཡིན་པ་དང༌། གཞན་གྱི་ཚིག་ཟློས་པ་མ་ཡིན་པར་བསྟན་པའི་ཕྱིར་ལྷན་ཅིག་ཏུ་ཐོས་པ་ཡང་མང་དུ་ཡོད་པར་བསྟན་པས་གཞན་དག་ཡིད་ཆེས་པར་འགྱུར་བའི་གཏན་ཚིགས་དང་གཉིས་སུ་ཕྱེ་བ་ཕུན་སུམ་ཚོགས་པ་བསྟན་པས་གཞན་ཡིད་ཆེས་པར་འགྱུར་བའི་གཏན་ཚིགས་སྟེ། ལྷའི་རྒྱལ་པོ་བརྒྱ་བྱིན་དང༌། ཆངས་པའི་འཁོར་གྱིས་བསྐོར་བ་སྨོས་པ་དང༌། ཡང་ཤཱ་རིའི་བུ་དང་འཇམ་དཔལ་གཞོན་ནུར་གྱུར་པ་དང༌། བྱམས་པ་དང་བྱང་ཆུབ་སེམས་དཔའ་བཀྲི་བ་དང་ངེས་པའི་དོན་ལན་གཉིས་ལན་གསུམ་དུ་གསོལ་ཏེ། རྒྱུ་དང་འབྲས་བུ་དང་བསླབ་པའི་མདོ་བསྟན་པས་འཁོར་རྣམས་ལ་ཕན་པ་དང་བདེ་བས་ཡིད་ཆེས་པར་འགྱུར་བ་དང༌། ཡང་སོ་སོའི་དབང་པོ་ལས་ཐེག་པ་གཅིག་པའི་གཞུང་འདི་ལན་གསུམ་བཟླས་ཏེ་བཤད་པ་ཐེག་པ་ཆེན་པོར་སེམས་སྐྱེ་བ་དང་མི་སྐྱེ་བའི་ཆོས་ལ་བཟོད་པ་ཐོབ་པ་ལ་སོགས་པ་དབང་པོ་གསུམ་པོ་རྣམས་ལ་ཆོས་
འདི་བསྟན་པ་དང༌། ཡང་སྔོན་གྱི་དུས་ན་བྱུང་བ་བསྟན་པས་ད་ལྟར་གྱི་སེམས་ཅན་རྣམས་དད་པ་བསྐྱེད་པ་སྟེ། དེ་ལྟ་བུའི་འཕགས་པ་སྟེ་དམ་པ་རྣམས་དང་ཐབས་ཅིག་པ་ལ་ཞེས་དད་པ་སྐྱེ་བར་འགྱུར་རོ། །དེ་ལ་བཀྲི་བ་དང་ངེས་པའི་དོན་བསྟན་པ་ནི་ཇི་ལྟར་བཅོམ་ལྡན་འདས་སྤྲུལ་པ་བཞུགས་པའི་ཞིང་ཉན་ཐོས་རྣམས་ལ་ངེས་པའི་དོན་སྟོན། བྱང་ཆུབ་སེམས་དཔའ་རྣམས་ལ་བཀྲི་བའི་དོན་སྟོན། རྫོགས་ལོངས་སྤྱོད་པའི་སྐུ་ནི་བྱང་ཆུབ་སེམས་དཔའ་ལ་ནི་ངེས་པའི་དོན་སྟོན། ཉན་ཐོས་པ་རྣམས་ལ་ནི་བཀྲི་བའི་དོན་སྟོན། འདི་ནི་བཀྲི་བ་དང་ངེས་པའི་དོན་གཉི་ག་སྟོན་པའི་ས་བསྟན་ཏོ། །དེ་ལ་གྲངས་མང་ཉུང་བསྟན་པ་ཡང་སྔར་འཁོར་བཅོ་ལྔ་སྟེ། ཡོན་ཏན་ཆེ་ལ་མིང་ཡོད་པ་རྣམས་དང༌། ཡོན་ཏན་ཆེ་ལ་མིང་མེད་པ་རྣམས་དང༌། དགེ་འདུན་མ་ཡོན་ཏན་ཆེ་བ་རྣམས་དང༌། དགེ་འདུན་མ་ཉེ་བའི་འཁོར་རྣམས་དང༌། ཡོན་ཏན་འཕགས་པ་བསམ་གྱིས་མི་ཁྱབ་པ་རྣམས་དང༌། བརྒྱ་བྱིན་ལྷའི་དབང་པོ་རྣམས་དང༌། རྒྱལ་ཆེན་བཞིའི་ལྷ་རྣམས་དང༌། དབང་ཕྱུག་ལྷའི་བུ་རྣམས་དང༌། གཟུགས་ཀྱི་ཁམས་ཀྱི་ལྷའི་བུ་རྣམས་དང༌། ཀླུའི་རྒྱལ་པོ་རྣམས་དང༌། མིའམ་ཅི་རྣམས་དང༌། དྲི་ཟ་རྣམས་དང༌། ལྷ་མ་ཡིན་རྣམས་དང༌། ནམ་མཁའ་ལྡིང་རྣམས་དང༌། མིའི་རྒྱལ་པོ་རྣམས་སོ། །ཡང་འཁོར་རྣམ་པ་དྲུག་སྟེ། བཅོམ་ལྡན་འདས་རིན་ཆེན་མང་གི་འཁོར་དང༌། སྐུས་སྤྲུལ་པའི་འཁོར་དང༌། ཀླུའི་ཕོ་བྲང་ནས་ལྷགས་པ་དང༌། སའི་རུམ་ནས་འཐོན་པའི་འཁོར་དང༌། བྱང་ཆུབ་སེམས་དཔའ་སང་སང་པོའི་དབྱངས་དང༌། ཀུན་ཏུ་བཟང་པོའི་འཁོར་རོ། །འཁོར་དེ་དག་ཀྱང་ཆོས་ཉན་པ་དང༌། ཆོས་རྟོགས་པ་དང༌། ཆོས་སྤྱོད་པ་དང༌། ཆོས་འཛིན་པ་དང༌། ཆོས་འཆད་པ་དང༌། ཆོས་རིག་པའི་བྱེ་བྲག་གིས་ཐ་དད་པ་ཤ་སྟག་གོ །འཁོར་འདིར་རང་སངས་རྒྱས་ཀྱི་འཁོར་མ་སྨོས་པ་ནི་རང་སངས་རྒྱས་སངས་རྒྱས་འཇིག་རྟེན་ན་མི་བཞུགས་པའི་ཚེ་འབྱུང་བའི་ཕྱིར་རོ། །གཟུགས་མེད་པའི་ཁམས་ཀྱི་ལྷ་རྣམས་ཀྱང་དེ་བཞིན་གཤེགས་པའི་འོད་ཀྱིས་རིག་པ་རྣམས་ཆོས་ཉན་ཅིང་འཁོར་དུ་འདུ་བ་ཡིན་ན། ཁམས་དེ་དབང་པོ་མ་སྨིན་པས་འོད་ཀྱིས་སྣང་བར་མི་མཛད་དེ། དེ་ནས་འདིར་མ་
སྨོས་སོ། །སེམས་ཅན་དམྱལ་བ་འདིར་མ་སྨོས་པ་ནི་སྐལ་བ་དང་མི་ལྡན་པའི་ཕྱིར་འདིར་མ་སྨོས་སོ། །དེ་བཞིན་གཤེགས་པའི་བྱིན་གྱི་རླབས་ཀྱིས་གཟུངས་ཀྱི་སྒོ་འཆད་པའི་ཚེ་ངན་སོང་ཞི་བར་མཛད་པའི་ཕྱིར་དེ་དག་ཏུ་སྨོས་པ་ཡང་ཡོད་དོ། །འཁོར་གོང་དུ་མ་སྨོས་པ་རྣམས་ཀྱང་འོག་ནས་བསྟན་པ་ཡིན་ནོ། །འཁོར་དེ་དག་གི་རིམ་པ་ནི་སྤྱིར་རྣམ་པ་བཞི་སྟེ། ཉན་ཐོས་པའི་འཁོར་དང༌། བྱང་ཆུབ་སེམས་དཔའི་འཁོར་དང་རྒྱལ་པོ་དང་རྒྱལ་པོ་རྣམས་ཀྱི་འཁོར་རོ། །དེ་ཡང་ཕྱི་ནང་དུ་དབྱེ་ན་ཉན་ཐོས་དང་བྱང་ཆུབ་སེམས་དཔའི་འཁོར་ནི་ནང་གི་འཁོར་རོ། །ལྷ་མ་སྲིན་འཁོར་བརྒྱད་པོ་ནི་ཕྱིའི་འཁོར་རོ།། བྱང་ཆུབ་སེམས་དཔའི་ཉན་ཐོས་པའི་འཁོར་སྔར་སྨོས་པ་ནི་རྣམ་པ་བཞིའི་ཕྱིར་ཏེ། ཉན་ཐོས་པ་རབ་ཏུ་བྱུང་བས་དེ་བཞིན་གཤེགས་པའི་ཆ་ལུགས་དང་མཐུན་པའི་ཕྱིར་ཉན་ཐོས་པ་སྔར་སྨོས་པ་དང༌། ཉན་ཐོས་པ་རྟག་ཏུ་ཞབས་འབྲིང་ན་མཆིས་ཤིང་གནས་ཏེ། རིང་དུ་མ་གྱུར་པའི་ཕྱིར་སྔར་སྨོས་པ་དང༌། རབ་ཏུ་བྱུང་བ་ཚུལ་ཁྲིམས་བསྲུང་བའི་སྒོ་ནས་སྔར་སྨོས་པ་དང༌། ཁྱིམ་པས་རབ་ཏུ་བྱུང་བ་ལ་གུས་པ་བསྟན་པའི་ཕྱིར་སྔར་སྨོས་སོ། །ཡང་འཁོར་ཕུན་སུམ་ཚོགས་པ་ལ་རྣམ་པ་བཞི་སྟེ། གྲངས་ཕུན་སུམ་ཚོགས་པ་དང༌། སྒྲུབ་པ་ཕུན་སུམ་ཚོགས་པ་དང༌། ཡོན་ཏན་ཕུན་སུམ་ཚོགས་པ་དང༌། སྤྱོད་ལམ་ཕུན་སུམ་ཚོགས་པའོ། །གྲངས་ཕུན་སུམ་ཚོགས་པ་ནི་འཁོར་གྲངས་མེད་པ་ཞེས་སྨོས་པའོ། །སྒྲུབ་པ་ཕུན་སུམ་ཚོགས་པ་ནི་ཉན་ཐོས་པ་རྣམས་ཐེག་པ་ཆུང་དུ་སྒྲུབ་པ་དང༌། བྱང་ཆུབ་སེམས་དཔའ་རྣམས་ནི་ཐེག་པ་ཆེན་པོ་སྒྲུབ་ཅིང༌། གཞན་གྱི་དོན་བྱེད་པའོ། །ཡོན་ཏན་ཕུན་སུམ་ཚོགས་པ་ནི་ཉན་ཐོས་པ་རྣམས་ཚིག་གི་དོན་རྣམ་པ་བཅུ་དྲུག་ཏུ་བསྟན་པ་དང༌། བྱང་ཆུབ་སེམས་དཔའ་རྣམས་ཚིག་གི་དོན་རྣམ་པ་བཅུ་གསུམ་གྱིས་སྟོན་པའོ། །སྤྱོད་ལམ་ཕུན་སུམ་ཚོགས་པ་ནི་བཅོམ་ལྡན་འདས་འཁོར་རྣམས་ཀྱིས་བསྐོར་ཏེ་གུས་པ་རི་མོ་བྱེད་པའི་ཚུལ་གྱིས་མཛེས་པར་གནས་པ་རྣམས་སོ། །དེ་ལ་དགེ་སློང་ཞེས་བྱ་བའི་དོན་རྣམ་པ་གསུམ་སྟེ། བདུད་དང་མུ་སྟེགས་འཇིག་པར་བྱེད་པ་དང༌། སློང་བ་དང་ཚུལ་ཁྲིམས་བསྲུང་བས་དགེ་འདུན་གྱི་གྲངས་སུ་འགྲོ་བ་དང༌། འཚོ་བ་གཙང་མས་འཚོ་ཞིང་སྒོ་གསུམ་དག་པར་གནས་པའོ། །དགེ་འདུན་གྱི་དགེ་སློང་བཞི་ཡན་
ཆད་དེ་མང་བ་མཐུན་པ་རིགས་དང་གཞུང་མ་འདྲེས་པའི་དོན་ཏོ། །ཆེན་པོ་ནི་ཆོས་དང་གྲངས་ལ་སོགས་པའི་ཆེན་པོ་རྣམས་དང་ལྡན་པ་དང༌། སློབ་པ་དང་མི་སློབ་པ་ལས་འཕགས་པའི་ཕྱིར་ཁྱད་པར་ཆེ་བ་དང༌། ཤེས་རབ་དང་ཡེ་ཤེས་མཐོང་བའི་ཕྱིར་ཡོན་ཏན་ཆེ་བ་དང། སྟོང་ཕྲག་བཅུ་གཉིས་སྙེད་བཞུགས་པའི་ཕྱིར་གྲངས་མང་བས་ཆེ་བའོ། །ཐབས་ཅིག་ནི་གནས་པ་གཅིག་པའི་ཐ་ཚིག་གོ །ཐམས་ཅད་ཀྱང་དགྲ་བཅོམ་པ་ཤ་སྟག་གོ་ཞེས་བྱ་བ་ནས། དབང་དུ་གྱུར་པ་ཤ་སྟག་གི་བར་སྨོས་པ་ནི་ཡོན་ཏན་ཕུན་སུམ་ཚོགས་པ་སྟེ། མདོ་སྡེ་ལས་ཚིག་གི་དོན་རྣམ་པ་བཅུ་དྲུག་སྨོས་པའོ། །དེ་ཡང་མདོར་རྣམ་པ་གསུམ་དུ་བསྡུ་ན། ཚིག་གོང་མ་འོག་མས་བཤད་པའི་མདོ་དང༌། སྤྱི་དང་དབྱེ་བའི་མཚན་ཉིད་བསྟན་པ་དང༌། དོན་གྱི་མདོ་བསྡུ་བ་དང་གསུམ་མོ། །ཚིག་གོང་མས་འོག་མ་སྟོན་པ་ནི་ཚིག་གོང་མས་ཚིག་འོག་མ་བསྐྱེད་པ་དང༌། ཡང་ན་ཚིག་འོག་མ་གོང་མས་བཀྲོལ་བ་ནི་ཟག་པ་ཟད་པ་ཉིད་དགྲ་བཅོམ་པ་ཞེས་བསྟན་པ་དང༌། ཉོན་མོངས་པ་ཐམས་ཅད་ཟད་པ་ཉིད་ནི་དགྲ་བཅོམ་པ་ཞེས་བཤད་པ་ལྟ་བུའོ། །ཟག་པ་ཟད་པ་ཞེས་པ་ནི་ཉོན་མོངས་པ་མངོན་དུ་རྒྱུ་བས་སྲིད་པ་རྣམས་སུ་ཟག་པར་བྱེད་པའི་ཕྱིར་ཟག་པ་ཞེས་བྱའོ། །མངོན་དུ་རྒྱུ་བ་དང་བག་ཆགས་ཀྱི་ཚུལ་དུ་གནས་པ་དེ་གཉི་ག་ཡང་སྤྱིར་ཟག་པ་ཞེས་བྱ་སྟེ། དེ་ཡང་འདོད་པའི་ཟག་པ་དང༌། སྲིད་པའི་ཟག་པ་དང༌། མ་རིག་པའི་ཟག་པ་དང་གསུམ་མོ། །བདེན་པ་བཞི་མཐོང་བ་དང་བསྒོམ་པས་སྤང་བར་བྱ་བའི་ཉོན་མོངས་པ་དང༌། བག་ལ་ཉལ་བ་རྣམས་ནི་འདོད་པའི་ཟག་པའོ། །གཟུགས་དང་གཟུགས་མེད་པའི་ཁམས་ན་ཁྲོ་བ་བཏོན་པའི་ཉོན་མོངས་པ་ལྷག་མ་ནི་སྲེད་པའི་ཟག་པའོ། །ཁམས་གསུམ་གྱི་མ་རིག་པ་བཅོ་ལྔ་ནི་མ་རིག་པའི་ཟག་པའོ། །དེ་ལ་འདོད་པའི་ཁམས་ཀྱི་ཉོན་མོངས་པ་ཡང་འདོད་པས་གཞི་བྱས་པའི་ཕྱིར་འདོད་པའི་ཟག་པའོ། །གཟུགས་དང་གཟུགས་མེད་པའི་ཁམས་ན་ཉོན་མོངས་པ་གཞན་གྱིས་མི་སྐྱེད་ཀྱི་སྲིད་པར་སྦྱོར་བ་ཉིད་ཉོན་མོངས་པ་ཡིན་པས་སྲིད་པའི་ཟག་པའོ། །མ་རིག་པ་ཡང་དངོས་སུ་མ་རིག་པ་ཉིད་ཀྱིས་ཟག་པར་བྱེད་པའི་ཕྱིར་མ་རིག་པའི་ཟག་པའོ། །ཚིག་བཞི་བས་ཚིག་གཉིས་པ་དགྲོལ་བ་ནི་དབང་དུ་གྱུར་པས་
ཟག་པ་ཟད་ཅེས་བྱའོ། །ཚིག་གཉིས་པ་དང་གསུམ་པས་བཞི་པ་དགྲོལ་བ་ནི་ཟག་པ་ཟད་པ་དང་ཉོན་མོངས་པ་མེད་པར་གྱུར་པས་དབང་ཡང་དག་པ་ཐོབ་ཅེས་བྱ་བའོ། །ཉོན་མོངས་པ་མངོན་དུ་རྒྱུ་བ་དང་བག་ཆགས་སུ་གནས་པ་སྤངས་པས་དབང་ཐོབ་པ་ཞེས་བྱའོ། །ཚིག་དྲུག་པས་ཚིག་བཞི་པ་དགྲོལ་བ་ནི་ཤེས་རབ་དང་སེམས་ཤིན་ཏུ་རྣམ་པར་གྲོལ་བས་དབང་རབ་ཏུ་ཐོབ་པ་སྟེ། ཏིང་ངེ་འཛིན་གྱི་སྒྲིབ་པ་སྤངས་པས་སེམས་རྣམ་པར་གྲོལ་བ་དང༌། རང་བཞིན་སྒྲིབ་པ་སྤངས་པས་ཤེས་རབ་རྣམ་པར་གྲོལ་བའོ། །མ་རིག་པ་དང་སྲེད་པ་ལ་སོགས་པ་སྤངས་པས་ཤེས་རབ་རྣམ་པར་གྲོལ་བ་དང༌། དེ་དང་སྦྱོར་བའི་སེམས་གནས་འཕོས་པས་སེམས་རྣམ་པར་གྲོལ་བ་དང༌། དེ་གཉི་གའི་སྐྱོན་དང་བྲལ་ཏེ་འདུས་མ་བྱས་ཉིང་རྟོགས་པའི་ཕྱིར་དབང་དུ་གྱུར་པ་ཞེས་བྱའོ། །དེ་དག་གི་འཆིང་བ་མངོན་དུ་རྒྱུ་དང་བག་ཆགས་ཀྱི་ཚུལ་དུ་གནས་པ་ཡང་སྤངས་པའི་ཕྱིར་ཉོན་མོངས་པ་མེད་པ་ཞེས་བྱའོ། །སེམས་དང་ཤེས་རབ་ཤིན་ཏུ་རྣམ་པར་གྲོལ་བའི་ཕྱིར་རྟ་ཅང་ཤེས་བཞིན་དུ་ཞི་ཞིང་དུལ་བ་དང༌། གླང་པོ་ཆེན་པོ་ཞེས་བྱ་བ་ནི་ཇི་ལྟར་མི་བདེ་བའི་གནས་ཐམས་ཅད་དུ་སོང་ཡང་ལམ་བདེ་བ། མ་ཉམས་པ་ལ་འགྲོ་བ་བཞིན་གང་བགྲོད་པའི་གནས་སུ་སོན་པ་དང་ཐོགས་པ་མེད་པར་གྱུར་པ་སྟེ། དེའི་ཕྱིར་བྱ་བ་བྱས་པ་བྱེད་པ་བྱས་པའོ། །བྱ་བ་བྱས་པ་བྱེད་པ་བྱས་པའི་ཕྱིར་ཁུར་བོར་བ་སྟེ། ལམ་དང་འགོག་པའི་བདེན་པ་མངོན་དུ་གྱུར་པས་སྲིད་པ་ཕྱི་མ་མི་ལན་ཞེས་པའི་དོན་ཏོ། །སྲིད་པར་སྦྱོར་བའི་ཁུར་ལྕི་བ་བོར་བས་རང་གི་དོན་ཐོབ་པ་ཡིན་ཏེ་མྱ་ངན་ལས་འདས་པའི་བདེ་བ་ཐོབ་ཅེས་པའི་དོན་ཏོ། །རང་གི་དོན་བདེ་བ་ཐོབ་པ་ཡང་ཉོན་མོངས་པའི་རྒྱུ་སྤངས་པས་སྲིད་པར་སྦྱོར་བ་ཐམས་ཅད་ཡང་མི་ལེན་ཏེ། ཁམས་གསུམ་དུ་མི་སྐྱེ་ཞེས་པའི་དོན་ཏོ། །ཟག་པ་ཟད་པ་ཉིད་བཀའ་ཡང་དག་པས་སེམས་ཤིན་ཏུ་རྣམ་པར་གྲོལ་བ་སྟེ། སེམས་ཤིན་ཏུ་རྣམ་པར་གྲོལ་བ་ནི་མཐོང་བས་སྤང་བ་ཡང་བསྒོམ་པས་སྤང་བའི་ཉོན་མོངས་པ་ཐམས་ཅད་བསལ་ཏེ་སེམས་ཀྱི་དབང་ཐོབ་པ་དང༌། ཡོན་ཏན་གྱི་མཐར་ཐུག་པས་རྫུ་འཕྲུལ་དང་མངོན་པར་ཤེས་པ་ལ་སོགས་པ་རྫོགས་པར་གྱུར་པའོ། །དབྱེ་བ་གཉིས་
པ་སྟེ། སྤྱི་དང་དབྱེ་བ་བསྟན་པའི་སྒོ་སྟེ་ཀུན་ཀྱང་དགྲ་བཅོམ་པ་ཤེ་དག་གོ་ཞེས་བྱ་བ་ནི་སྤྱིའི་མཚན་ཉིད་དོ། །ཚིག་གི་དོན་བཅོ་ལྔ་པོ་གཞན་ནི་དབྱེ་བའི་མཚན་ཉིད་དོ། །དགྲ་བཅོམ་པའི་དོན་ནི་འོས་པའི་དོན་རྣམ་པ་བཅོ་ལྔ་སྟེ། དེ་ལ་ཟག་པ་ཟད་པའི་ཕྱིར་ཞལ་ཟས་དང་ཁྲི་སྟན་ལ་སོགས་པ་ཐམས་ཅད་ཀྱིས་མཆོད་པར་འོས་པས་མཆོད་པའི་ཞིང་དུ་མཛེས་པའོ། །ཉོན་མོངས་པ་ཐམས་ཅད་དང་བྲལ་བའི་ཕྱིར་སྟོན་པ་ལ་དབང་དུ་གྱུར་པ་སྟེ། ཁེ་དང་གྲགས་པ་ཚོལ་བ་དང་བྲལ་བའི་ཕྱིར་རོ། །འཇུག་པར་ཡང་འོས་པ་སྟེ། གྲོང་དང་གྲོང་ཁྱེར་དུ་འཇུག་ན་སེམས་ཀྱི་དབང་དུ་གྱུར་པས་འདོད་པའི་ཡུལ་གྱིས་མི་བསླུ་བའི་ཕྱིར་རོ། །བདུད་དང་མུ་སྟེགས་འདུལ་བར་འོས་པ་སྟེ། སེམས་ཤིན་ཏུ་རྣམ་པར་གྲོལ་བའི་ཡེ་ཤེས་ཀྱི་སྤོབས་པ་དང་ལྡན་པའི་ཕྱིར་རོ། །ཆོས་རྣམས་ལ་ཤེས་རབ་མྱུར་བར་འོས་པ་སྟེ། ཤེས་རབ་ཤིན་ཏུ་རྣམ་པར་གྲོལ་བའི་ཕྱིར་ཆོས་རྣམས་ཀྱི་མཚན་ཉིད་ལ་མཁས་པའོ། །ཆོས་འཆད་པ་ལ་ཧ་ཅང་མྱུར་བ་དང་བུལ་བའི་སྐྱོན་དང་བྲལ་བར་འོས་པ་སྟེ། ཆོས་འཆད་པ་ལ་མཁས་པ་འབྲེལ་པ་སྐྱོ་བ་དང་བྲལ་བ་ཇི་ལྟར་རྟ་ཅང་ཤེས་བཞིན་སེམས་ཤིན་ཏུ་དུལ་བའི་ཕྱིར་རོ། །གཅིག་པུ་དབེན་པར་འོས་པ་སྟེ། ཟས་དང་གོས་ལ་སོགས་པ་ཡོ་བྱད་ཐམས་ཅད་མི་སོག་མི་སྡུད་པས་ཆོག་ཤེས་པར་གནས་པ་ནི་ཇི་ལྟར་གླང་པོ་ཆེ་འདུ་འཛི་དང་བྲལ་བ་བཞིན་ནོ། །གཅིག་ཏུ་ན་བསམ་གཏན་རྣམས་ལ་མ་ཆགས་པ་སྟེ། བྱ་བ་བྱས་པས་རྟག་ཏུ་བླ་མའི་ས་ལ་བརྩོན་པའི་ཕྱིར་རོ། །རྟག་ཏུ་སྟོང་པ་ཉིད་ཀྱི་སྤྱོད་པའི་ཕྱིར་བྱེད་པ་བྱས་པས་བདག་དང་བདག་གིར་འཛིན་པ་དང་བྲལ་བའི་ཕྱིར་རོ། །རྟག་ཏུ་མཚན་མ་མེད་པའི་སྤྱོད་པ་དང་ལྡན་པས་ཁུར་ལྕི་བ་བོར་བའི་ཕྱིར་འགོག་པ་ཉིད་ལ་གནས་པའོ། །རྟག་ཏུ་སྨོན་པ་མེད་པའི་སྤྱོད་པ་དང་ལྡན་པས། རང་གི་དོན་བདེ་བ་ཐོབ་པའི་ཕྱིར་འཁོར་བ་ལ་སྨོན་པ་མེད་པར་གནས་པའོ། །འཇིག་རྟེན་རྣམས་ཀྱི་བསམ་གཏན་དགའ་བའི་རོ་ལ་ཆགས་པ་མེད་པའི་ཕྱིར་སྲིད་པར་སྦྱོར་བ་ཡོངས་སུ་སྤངས་པའོ། །ཆོས་རྣམས་ཀྱི་ཡོན་ཏན་ཁྱད་པར་ཅན་ལ། རྫུ་འཕྲུལ་གྱིས་རོལ་པའི་ཕྱིར་བཀའ་ཡང་དག་པས་སེམས་ཤིན་ཏུ་རྣམ་པར་གྲོལ་བའོ། །དོན་དམ་པ་ཉིད་ཀྱི་ཡོན་ཏན་ལ་བདེ་བར་གནས་པ་སྟེ། སེམས་ཀྱི་དབང་པོ་
ཐོབ་པས་འདུས་མ་བྱས་ལ་རེག་པའི་ཕྱིར་སེམས་ཀྱི་དབང་ཐོབ་པའོ། །ཡང་དག་པ་ཇི་ལྟ་བ་བཞིན་དུ་ཤེས་པའི་ཕྱིར་སེམས་ཅན་ཐམས་ཅད་ལ་ཕན་པའི་ཡོན་ཏན་ཐོབ་པར་བྱེད་པའི་ཕྱིར་རོ། །བསྡུ་བའི་དོན་ནི་གོང་དུ་སྨོས་པའི་ཚིག་བཅོ་ལྔ་པོ་ཡོན་ཏན་བཅུ་ར་བསྡུ་བར་བྱ་སྟེ། བསྟན་དུ་ཡོད་པའི་འབྲས་བུ་དང། བསྟན་དུ་མེད་པའི་འབྲས་བུ་སྟེ། དགྲ་བཅོམ་པའི་འབྲས་བུ་ལ་འདུས་བྱས་ནི་བསྟན་དུ་ཡོད་པ་འདུས་མ་བྱས་ནི་བསྟན་དུ་མེད་པའི་འབྲས་བུའོ། །ཡོན་ཏན་རྣམ་པ་བཅུ་ལ་ཟག་པ་ཟད་པ་དང་ཉོན་མོངས་པ་མེད་པ་ནི་འཆིང་བ་དང་བག་ལ་ཉལ་བ་གཉིས་སྤངས་པའི་ཕྱིར་རོ། །དབང་དུ་གྱུར་པ་དང༌། སེམས་དང་ཤེས་རབ་རྣམ་པར་གྲོལ་བ་ནི་སེམས་དབང་དུ་གྱུར་བས་འཇིག་རྟེན་གྱི་ཡོན་ཏན་ཐམས་ཅད་ཟིལ་གྱིས་མནན་ཏེ། འཁྲུག་པ་སྣ་ཚོགས་ཞི་བའི་ཕྱིར་རོ། །དེ་བཞིན་གཤེགས་པའི་བསྟན་པའི་རྗེས་སུ་ཞུགས་པའི་ཕྱིར། རྟ་ཅང་ཤེས་ལྟ་བུ་ཞི་ཞིང་དུལ་བ་ཡིད་བཞིན་དུ་དབང་དུ་གྱུར་པའོ། །ཡོན་ཏན་ཁྱད་པར་ཅན་ཐོབ་པ་ནི་གླང་པོ་ཆེ་ལྟར་གཟི་བརྗིད་ཆེ་བས་མཐུ་དང་རྫུ་འཕྲུལ་ཕུན་སུམ་ཚོགས་པའོ། །བྱ་བ་བྱས་པ་ཡོན་ཏན་ཁྱད་པར་ཅན་ནི་བཅོམ་ལྡན་འདས་ལ་རིམ་གྲོ་དང་བསྟི་སྟང་བྱེད་པ་ནི་ཡང་དག་པའི་ཆོས་ཀྱི་རིམ་གྲོ་བྱེད་པ་ཡིན་གྱི་ནོར་རྫས་ཀྱིས་ནི་མ་ཡིན་ནོ། །ཡོན་ཏན་ཕུན་སུམ་ཚོགས་པ་ནི་བྱེད་པ་བྱས་པ་རྫོགས་པ་སྟེ། སློབ་པའི་ས་རྣམས་རྫོགས་པས་འགོག་པའི་བདེན་པའི་མཐར་ཕྱིན་པའི་ཕྱིར་རོ། །ཤིན་ཏུ་འདས་པར་གྱུར་པའི་ཡོན་ཏན་ནི་ཁུར་བོར་བ་རང་གི་དོན་ཐོབ་པ་སྲིད་པའི་སྦྱོར་བ་ཡོངས་སུ་ཟད་པ་སྟེ། ཤི་འཕོའི་ཁུར་ལྕི་བ་བོར་བ་དང༌། ལོག་པའི་འཚོ་བ་སྤངས་པས་ཁེ་དང་གྲགས་པ་མི་ཚོལ་བ་དང༌། སྲིད་པའི་མདུད་པ་གཅོད་པ་སློབ་པའི་ས་ལས་འདས་པའི་ཕྱིར་རོ། །ཡོན་ཏན་བླ་མའི་ཡང་བླ་མ་སྡུད་པ་ནི་ཡང་དག་པའི་ཡེ་ཤེས་ཀྱི་སེམས་རྣམ་པར་གྲོལ་བས་འདུས་མ་བྱས་ཀྱི་འབྲས་བུ་ལ་རེག་པའི་ཕྱིར་རོ། །སེམས་ཅན་ལ་ཕན་འདོགས་པའི་ཡོན་ཏན་སྡུད་པ་ནི་སེམས་ཀྱི་དབང་དམ་པ་ཐོབ་པའི་ཕྱིར་རྫུ་འཕྲུལ་དང་མངོན་པར་ཤེས་པ་ཐོབ་པའི་ཕྱིར་རོ། །བླ་མའི་ཡང་བླ་མའི་ཡོན་ཏན་སྡུད་པའི་ཡོན་ཏན་ཐམས་ཅད་ཀྱི་མཐར་ཕྱིན་པ་སྟེ། ཕ་རོལ་ཏུ་ཕྱིན་པ་རྫོགས་པའི་ཕྱིར་རོ། །ཡང་མདོ་ལས་འདི་ལྟ་བུ་ཞེས་བྱ་བ་ནས་ཆུ་བོ་འོད་སྲུངས་ཀྱི་བར་དུ་སྟེ། འདི་མན་ཆད་
ཉན་ཐོས་ཆེན་པོ་རྣམས་ཀྱི་མཚན་བཤད་པ་ལ་རྣམ་པ་གཉིས་ཏེ། སྔར་སོ་སོའི་མཚན་སྨོས་པ་དང༌། ཡོན་ཏན་བསྡུ་བའོ། །ཉན་ཐོས་དེ་དག་གི་རིམ་པ་ནི་ལ་ལ་རབ་ཏུ་བྱུང་བ་སྔ་ཕྱི་ལས་བཀོད་པ་དང༌། ལ་ལ་ཡོན་ཏན་ཆེ་བས་སྔར་བཞག་པ་ཡང་ཡོད་དེ། དེ་དག་ཀྱང་བཅོམ་ལྡན་འདས་དང་པོ་མངོན་པར་རྫོགས་པར་སངས་རྒྱས་པའི་ཚེ་ཉན་ཐོས་ཆེན་པོ་ལྔ་རབ་ཏུ་བྱུང་ངོ༌། །དེའི་འོག་ཏུ་གྲགས་འཛིན་གྱི་འཁོར་ལྔ་བཅུ་རབ་ཏུ་བྱུང་ངོ༌། །དེའི་འོག་ཏུ་ལྟེང་རྒྱས་འོད་སྲུངས་ཀྱི་འཁོར་ལྔ་བརྒྱ་དང༌། ག་ཡ་འོད་སྲུངས་ཀྱི་འཁོར་སུམ་བརྒྱ་དང༌། ཆུ་བོ་འོད་སྲུངས་ཀྱི་འཁོར་ཉིས་བརྒྱ་དང། ཤཱ་རིའི་བུའི་འཁོར་བརྒྱ་དང༌། མཽད་གལ་གྱི་བུའི་འཁོར་བརྒྱ་རབ་ཏུ་བྱུང་བ་དང༌། སྤྱིར་སྟོང་ཉིས་བརྒྱ་ལྔ་བཅུ་རབ་ཏུ་བྱུང་ངོ༌། །ཉན་ཐོས་ཆེན་པོ་ལྔ་ཡང་དང་པོ་བཅོམ་ལྡན་འདས་མངོན་པར་བྱང་ཆུབ་ནས་ཆོས་ཀྱི་འཁོར་ལོ་བསྐོར་བའི་ཚེ་དང་པོར་ཅང་ཤེས་ཀཽཎྜི་ནྱས་བདེན་པ་དང་པོར་རྟོགས་ཏེ་ངས་ཀུན་ཤེས་སོ་ཞེས་སྨྲས་པ་ལས་རུས་ཀཽཎྜི་ནྱ་ཀུན་ཤེས་སུ་བཏགས་སོ། །འོད་སྲུངས་ཆེན་པོ་ནི་དང་པོ་དྲང་སྲོང་འོད་ཅན་གྱི་རིགས་ཏེ་འོད་སྲུངས་འདི་ཉིད་དང་པོ་བཙས་པའི་ཚེ་ཡང་འོད་བྱུང་བའི་ཕྱིར་འོད་སྲུངས་ཞེས་བཏགས་ཏེ་འོད་སྲུངས་གཞན་ལས་དཀར་བའི་ཕྱིར་འོད་སྲུངས་ཆེན་པོ་ཞེས་བཏགས་སོ། །ལྟེང་རྒྱས་འོད་སྲུངས་དང་གཞན་ནི་ཆུ་དང་རི་དང་ཤིང་གི་འབྲས་བུ་ལས་བཏགས་ཏེ་མིང་ཙམ་དུ་ཟད་དོ། །མདོ་ལས་ཤཱ་རིའི་བུ་ནས་ཀ་པི་ནའི་བར་དུ་སྟེ་སོ་སོའི་མིང་བཤད་པ་ནི། ཤཱ་རིའི་བུ་ནི་མ་བྱ་ཤ་རི་ཀའི་མིག་དང་འདྲ་བར་མིག་མཛེས་པའི་བུ་ཡིན་པས་ཤཱ་རིའི་བུ་ཞེས་བཏགས་སོ། །མཽད་གལ་ཆེན་པོ་ནི་སྔོན་དྲང་སྲོང་ཉིད་རི་ལ་གནས་ཤིང་སྲན་མ་རྨེད་པ་ལས་རུས་སུ་ཆགས་ཏེ། མཽད་གལ་གྱི་མ་དེའི་རྒྱུད་ཡིན་པས་ན་མཽད་གལ་ཞེས་བཏགས་སོ། །རྫུ་འཕྲུལ་ཆེ་བའི་ཕྱིར་མཽད་གལ་ཞེས་བཏགས་སོ། །ཀཱ་ཏྱཱ་ཡ་ན་ཆེན་པོ་ནི་སྔོན་དྲང་སྲོང་ཞིག་ཏུ་སྐྲ་བྲེགས་པ་ལས་རུས་སུ་སོང་སྟེ། དེའི་རྒྱུ་ལས་རུས་ལས་མིང་དུ་བཏགས་པའོ། །འདི་མན་ཆད་ཉན་ཐོས་ཀྱི་རྣམས་ལ་ལ་ནི་སྐར་མ་ལས་བཏགས། ལ་ལ་ནི་སྔོན་གྱི་བྲམ་ཟེའི་རུས་ལས་བཏགས། ལ་ལ་ནི་དབྱིབས་འདྲ་བ་ལས་བཏགས་ཏེ། སྤྱིར་མིང་ཙམ་དུ་ཟད་དོ། །མདོ་ལས་སློབ་པ་དང་མི་སློབ་པ་ཞེས་བྱ་བ་ནི་ཚུལ་
ཁྲིམས་དང༌། །ཏིང་ངེ་འཛིན་དང༌། །ཤེས་རབ་ནི་བསླབ་པར་བྱ་བ་དང༌། །དེ་གསུམ་ལ་གནས་པ་ནི་སློབ་པའོ། །དེ་གསུམ་རྫོགས་པར་གྱུར་པ་ནི་མི་སློབ་པའོ། །མདོ་ལས་བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་ཕྲག་བརྒྱད་ཅུ་ཞེས་སྨོས་པ་ལྔ་པ་སྟེ། །འཕགས་པའི་ཡོན་ཏན་བསམ་གྱིས་མི་ཁྱབ་པ་བསྟན་པ་དེ་ཡང་རྣམ་པ་གསུམ་དུ་དབྱེའོ། །དེའི་གྲངས་དང་དེའི་ཡོན་ཏན་དང༌། །དེ་དག་གི་མཚན་སོ་སོར་དབྱེ་བའོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་སྨོས་པ་དོན་རྣམ་པ་གཉིས་ཏེ། ཡེ་ཤེས་ཆེན་པོ་གཙོར་བྱས་པས་བདག་གི་དོན་བསྟན་པ་དང་ཐུགས་རྗེ་ཆེན་པོ་གཙོར་བྱས་པས་གཞན་གྱི་དོན་བསྟན་པའོ། །བྱང་ཆུབ་ནི་རྟོགས་པའི་དོན་ཏེ་བསྒྲུབ་པར་བྱ་བའི་འབྲས་བུའོ། །སེམས་དཔའ་ནི་ཐུགས་རྗེས་སེམས་ཅན་སྒྲོལ་བ་ལ་དཔའ་བའོ། །ཡང་ན་བྱང་ཆུབ་གསུམ་པོས་བསྒྲུབ་པ་ལ་ཡུལ་དང་དུས་ཀྱིས་སྤ་བཀོང་བ་མེད་པར་བརྩོན་པའི་ཕྱིར་བྱང་ཆུབ་སེམས་དཔའོ། །ཡང་ན་བྱང་ཆུབ་ནི་ཤེས་རབ་བོ། །སེམས་དཔའ་ནི་ཐབས་ཏེ། ཆོས་དེ་ཉིད་ཀྱིས་སེམས་ཅན་རྣམས་ལ་ཕན་པ་དང་བདེ་བ་སྟོབས་པའི་ཕྱིར་རོ། །ཆེན་པོ་ནི་ས་བརྒྱད་པ་ཡན་ཆད་ཆེན་པོ་ཞེས་བྱ་སྟེ། བྱང་ཆུབ་སེམས་དཔའ་གཞན་དང་ཐེག་པ་གཉིས་པ་དག་དགར་པའི་ཕྱིར་ཆེན་པོ་ཞེས་སྨོས་སོ། །མདོ་ལས་བླ་ན་མེད་པ་ཡང་དག་པའི་བྱང་ཆུབ་ཕྱིར་མི་ལྡོག་པ་ཤེ་དག་ཅེས་འབྱུང་བ་ནི། མན་ཆད་ཚིག་བཅུ་གསུམ་གྱིས་འཕགས་པའི་ཡོན་ཏན་བསྟན་ཏེ། དེ་ཡང་རྣམ་པ་གཉིས་སུ་དབྱེའོ། །བླ་འོག་གི་ཡན་ལག་ཏུ་དབྱེ་བ་དང་བསྡུས་པའི་དོན་བསྟན་པའོ། །ཡན་ལག་ནི་ཆ་སྟེ་ཆ་སྔ་མས་ནི་སྤྱིའི་མཚན་ཉིད་བསྟན་པའོ། །ཆ་འོག་མས་ནི་སོ་སོའི་མཚན་ཉིད་བསྟན་ཏོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཤེ་དག་ཅེས་སྨོས་པ་ནི་དེ་སྤྱིའི་མཚན་ཉིད། །གཞན་ནི་སོ་སོའི་མཚན་ཉིད་དོ་བླ་ན་མེད་པ་ཡང་དག་པར་རྫོགས་པ་ཞེས་པ་ནི་ཆུད་པ་རྟོགས་པའི་དོན་རྣམ་པ་བཞིའོ། །ཆོས་ཀྱི་དབྱིངས་རྣམ་པར་དག་པ་རྟོགས་པ་ཉིད་བླ་ན་མེད་པའི་རྟོགས་པ་དང༌། ཕྱི་རོལ་མུ་སྟེགས་ཅན་གྱི་རྟོགས་པ་ལས་ཁྱད་པར་དུ་བསྟན་པའི་ཕྱིར་ཡང་དག་པའི་རྟོགས་པ་དང༌། ཐེག་པ་རྣམ་གཉིས་ཀྱི་རྟོགས་པ་ལས་ཁྱད་པར་དུ་བསྟན་པའི་ཕྱིར་རྫོགས་པར་རྟོགས་པ་དང༌།
བྱང་ཆུབ་སེམས་དཔའ་ཡང་སྤྱོད་པ་མ་རྫོགས་པ་དག་ལ་ཁྱད་པར་དུ་བསྟན་པའི་ཕྱིར་ཡང་དག་པར་རྫོགས་པའི་བྱང་ཆུབ་ཅེས་བསྟན་ཏོ། །ཕྱིར་མི་ལྡོག་བ་འང་མོས་པ་ཕྱིར་མི་ལྡོག་པ་དང༌། གྲལ་ཕྱིར་མི་ལྡོག་པ་དང༌། ཆུད་པ་ཕྱིར་མི་ལྡོག་པ་དང༌། སྤྱོད་པ་ཕྱིར་མི་ལྡོག་པའོ། །ཡང་ཕྱིར་མི་ལྡོག་པ་རྣམ་པ་གཉིས་ཏེ། ཐོས་ཟིན་པ་ཕྱིར་མི་ལྡོག་པ་དང༌། ཐོབ་པར་འགྱུར་བ་ཕྱིར་མི་ལྡོག་པའོ། །ཐོབ་པ་ནི་ས་དང་པོ་པའོ། །ཐོབ་པར་འགྱུར་བ་ནི་ས་བརྒྱད་པ་ཡན་ཆད་དོ། །ཡང་མདོ་ལས་གཟུངས་ཐོབ་པ་ཤེ་དག་ཅེས་པ་ནས་ཕྱིར་མི་ལྡོག་པའི་ཆོས་ཀྱི་འཁོར་ལོ་བསྐོར་བ་ཤེ་དག་ཅེས་བྱ་བའི་བར་དུ་ནི་འདི་མན་ཆད་ཚིག་བཅུ་གཉིས་ཀྱིས་དབྱེ་བའི་ཆ་བསྟན་ཏེ། དེ་ལ་དབྱེ་བ་རྣམ་པ་བཅུ་སྟེ། ཚིག་དང་པོ་དགུས་ནི་རང་གི་དོན་བསྟན། འོག་མ་གཅིག་གིས་ནི་གཞན་གྱི་དོན་བསྟན། དང་པོ་དགུ་ལ་ཡང་རྣམ་པ་གཉིས་ཏེ། དང་པོ་བརྒྱད་ཀྱིས་ནི་འདུས་བྱས་ཀྱི་ཡོན་ཏན་བསྟན། འོག་མ་གཅིག་གིས་ནི་འདུས་མ་བྱས་ཀྱི་ཡོན་ཏན་བསྟན། དང་པོ་ལའང་རྣམ་པ་གཉིས་ཏེ། དང་པོ་ལྔས་ནི་བསོད་ནམས་དང་ཡེ་ཤེས་ཀྱི་ཚོགས་བསྟན། ཕྱི་མ་གསུམ་གྱིས་ནི་ཐུགས་རྗེ་དང་ཡེ་ཤེས་བསྟན་ཏོ། །དང་པོ་ལྔ་ལ་ཡང་གཉིས་སུ་དབྱེ་སྟེ། དང་པོ་གསུམ་གྱིས་ནི་ནང་གི་སྤྱོད་པ་བསྟན། དེའི་འོག་མ་གཉིས་ཀྱིས་ནི་དགེ་བ་ལ་དམིགས་པ་བསྟན་ཏོ། །དང་པོ་ལ་ཡང་རྣམ་པ་གསུམ་སྟེ། བདག་གི་དོན་བསྒྲུབ་པ་དང༌། གཞན་གྱི་དོན་བསྒྲུབ་པ་དང༌། དགེ་བའི་ཆོས་ལ་དམིགས་པའི་ཕན་པའོ། །དམིགས་པ་ཡང་རྣམ་པ་གཉིས་ཏེ། སྤྱོད་པ་བསྒྲུབ་པ་ལ་དམིགས་པ་དང༌། ཐེ་ཙོམ་བཅད་པའོ། །ཐུགས་རྗེ་དང་ཡེ་ཤེས་བཤད་པ་ཡང་སྔར་ནི་བྱམས་པ་དང་སྙིང་རྗེ་བསྟན། དེའི་འོག་ཏུ་ནི་ཤེས་རབ་དང་ཡེ་ཤེས་བསྟན་ཏོ། །དེ་ཡང་རྣམ་པ་གསུམ་མོ། །ཆོས་ཐོས་པ་རྣམས་ལས་ཕྱིར་མི་ལྡོག་པ་ནི་དེ་ཀུན་ཀྱང་གཟུངས་ཐོབ་པ་ཤེ་དག་གི་ཕྱིར་རོ། །གཟུངས་ནི་འཛིན་པའི་ཕྱིར་གཟུངས་ཏེ། དེ་ཡང་རྣམ་པ་གཉིས་སོ། །བསྡུས་པ་འཛིན་པ་དང༌། སྤྲོས་པ་འཛིན་པའོ། །ཡང་འཛིན་པ་ནི་ཚིག་དང་དོན་འཛིན་པས་ཆོས་ཐོས་པ་རྣམས་མི་བརྗེད་པར་འཛིན་པའི་ཕྱིར་བསྡུས་པ་འཛིན་པའོ། །བྱང་ཆུབ་སེམས་དཔའ་ས་བརྒྱད་པ་
ཡན་ཆད་ཀྱི་ཆོས་ཐམས་ཅད་ལ་བཟོད་པར་ནུས་པ། སེམས་པར་ནུས་པ་འཛིན་པར་ནུས་པ་སྟེ། བཟོད་པ་ནི་ཐོས་པའི་ཤེས་རབ། སེམས་ནི་བསམ་པའི་ཤེས་རབ། འཛིན་པ་ནི་བསྒོམ་པའི་ཤེས་རབ་པོ། །དེ་ལ་ཡང་སྤྲོས་པ་འཛིན་པ་ནི་རྣམ་པ་བཞི་སྟེ། ཆོས་སྤྲོས་པ་འཛིན་པ་དང། དོན་སྤྲོས་པ་འཛིན་པ་དང༌། ཆོས་དགའ་བ་བཟོད་པ་དང༌། རིག་སྔགས་ཀྱི་གཟུངས་རྣམས་སོ། །དེ་ཡང་རྣམ་པ་གཉིས་ཏེ། དང་པོ་ནི་སྒྲུབ་པའོ། །གསུམ་པ་ནི་བསྒྲུབ་པར་བྱ་བའོ། །ཐོས་པ་ལ་སོགས་པ་ནི་བདག་གི་དོན་ཏོ། །ཆོས་དང་དོན་ལ་སོགས་པ་ནི་གཞན་གྱི་དོན་ཏེ། དེ་ཡང་རྒྱུ་དང་འབྲས་བུའི་ཚུལ་དུ་དབྱེའོ། །ཆོས་སྟོན་པ་ལ་ཕྱིར་མི་ལྡོག་པ་ནི་སྤོབས་པ་ཆེན་པོ་བཞི་དང༌། བདུན་དུ་ལྡན་པའི་ཕྱིར་དང༌། ས་རྣམ་པ་གཉིས་ལ་ཕྱིར་མི་ལྡོག་པའི་ཕྱིར་རོ། །འཁོར་ལོ་ཡང་རྣམ་པ་གསུམ་སྟེ། འཕགས་པའི་ལམ་ཡན་ལག་བརྒྱད་ལ་ལྟེ་བ་དང་མུ་ཁྱུད་ལ་སོགས་པ་ཚང་པའི་ཕྱིར་ཡོངས་སུ་རྫོགས་པའི་དོན་དང་འགྱུར་ཞིང་འཕོ་བའི་དོན་ཏེ། མཐོང་བའི་ལམ་གྱིས་བསྒོམ་པའི་ལམ་བསྐྱོད་པ་དང༌། བསྒོམས་པས་མི་ལྡོག་པའི་ལམ་ལ་གནས་ཏེ། འཕགས་པར་གྱུར་པ་དང༌། བདག་ཉིད་འཕགས་པས་དོན་གཞན་ལ་སྟོན་པ་བཞིན་གཅིག་ནས་གཅིག་ཏུ་བརྒྱུད་ཅིང་འཕོ་བའི་དོན་དང༌། ཇི་ལྟར་འཁོར་ལོའི་འཁྲུལ་བས་གཅོག་ཅིང་གནོན་པ་བཞིན་འཕགས་པའི་ལམ་ལ་གནས་པའི་སེམས་ཀྱི་ཉོན་མོངས་པ་འཇོམས་པ་ཞེས་བྱ་བའི་དོན་དང་གསུམ་མོ། །ཡང་འཁོར་ལོ་འདིའི་དོན་རྣམ་པ་ལྔ་སྟེ། ཆོས་རྣམ་པར་འབྱེད་པའི་ཡན་ལག་དང་ཡང་དག་པའི་ལྟ་བ་ལ་སོགས་པ་འཁོར་ལོའི་རང་བཞིན་དུ་གནས་པ་དང༌། ཐོས་པ་དང་བསམ་པ་ལ་སོགས་པ་འཕགས་པའི་ལམ་བསྐྱེད་པ་རྣམས་འཁོར་ལོའི་རྒྱུ་ལྟ་བུར་གནས་པ་དང༌། རྣམ་པར་གྲོལ་བའི་ཕུང་པོ་ལྔ་ལ་སོགས་པ་འཕགས་པའི་ལམ་ལ་སྟོང་པ་འཁོར་ལོའི་ཡན་ལག་ཏུ་གནས་པ་དང༌། འཕགས་པའི་བདེན་པ་བཞི་ལ་སོགས་པ་འཁོར་ལོའི་སྤྱོད་ཡུལ་དུ་གནས་པ་དང༌། མྱ་ངན་ལས་འདས་པ་དང༌། བྱང་ཆུབ་སྔོན་དུ་གྱུར་པ་རྣམས་འཁོར་ལོའི་འབྲས་བུར་གནས་པ་སྟེ། ཆོས་དེ་ལྔ་ཡང་ལུང་
དང་གཞུང་དང་སྤྱོད་པ་དང་འབྲས་བུར་བལྟའོ། །མདོ་ལས། སངས་རྒྱས་བརྒྱ་སྟོང་མང་པོ་ལ་བསྙེན་བཀུར་བྱས་པ་དང་སངས་རྒྱས་བརྒྱ་སྟོང་མང་པོས་ཡང་དག་པར་བསྟོད་པའི་བར་དུ་སྟེ། དེ་ལ་འདི་ནི་དགེ་བའི་བཤེས་གཉེན་ལ་བརྟེན་པའི་ཕྱིར་མི་ལྡོག་པ་ཡིན་ཏེ། སངས་རྒྱས་བརྒྱ་སྟོང་མང་པོ་ལ་བསྙེན་བཀུར་བྱེད་པ། སངས་རྒྱས་བརྒྱ་སྟོང་མང་པོ་ལ་དགེ་བའི་རྩ་བ་བསྐྱེད་པ། སངས་རྒྱས་བརྒྱ་སྟོང་མང་པོས་ཡང་དག་པར་བསྟོད་པ་ནི། རང་གི་ལུས་དང་སེམས་ཤིན་ཏུ་བསྡུས་པས་དགེ་བའི་ལས་ཐམས་ཅད་ཀྱིས་མཆོད་ཅིང་རིམ་གྲོ་བྱེད་པའོ། །དེ་རིམ་གྲོ་བྱེད་པ་ཡང་རྣམ་པ་བཅུར་དབྱེ་སྟེ། དེ་བཞིན་གཤེགས་པའི་རིང་བསྲེལ་དང་མཆོད་རྟེན་མངོན་དུ་བཞུགས་པ་ལ་མཆོད་ཅིང་རིམ་གྲོ་བྱེད་པ་དང༌། ཡང་ན་དེ་བཞིན་གཤེགས་པ་གཞན་གྱི་རིང་བསྲེལ་དང་མཆོད་རྟེན་མངོན་དུ་བྱས་ཏེ། མཆོད་ཅིང་རིམ་གྲོ་བྱེད་པའོ། །ཡང་དེ་བཞིན་གཤེགས་པ་གཅིག་གི་མཆོད་རྟེན་ལ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པའི་མཆོད་རྟེན་དུ་བསམས་ཏེ་མཆོད་ཅིང་རིམ་གྲོ་བྱས་ན་ཐམས་ཅད་ལ་རིམ་གྲོ་དང་མཆོད་པ་བྱས་པ་ཡིན་པ་དང༌། དེ་ལྟ་བུའི་མཚན་ཉིད་དུ་བདག་ཉིད་མཆོད་པར་བྱད་པ་དང༌། ཡང་སྙིང་རྗེའི་སེམས་ཀྱིས་དབུལ་ཕོངས་པ་རྣམས་ལ་ཉམས་ཀྱིས་ཅི་ནུས་སུ་སྦྱིན་པར་བྱས་ཏེ། ཐམས་ཅད་བདེ་བར་གྱུར་ཅིག་ཅེས་སྤྱོད་པ་དེ་གཞན་ལ་འང་བསྟབས་ཤིང་མཆོད་པ་བྱེད་པ་དང༌། བདག་ཇི་ལྟར་མཆོད་པ་དང༌། རིམ་གྲོ་བྱེད་པ་བཞིན་གཞན་ཡང་བྱེད་དུ་འཇུག་པ་དང༌། སྤོས་དང་མེ་ཏོག་དང་རིན་པོ་ཆེ་ལ་སོགས་པ་གུས་པར་འབུལ་བས་མཆོད་ཅིང་རིམ་གྲོ་བྱེད་པ་དང༌། རྒྱ་ཆེན་པོའི་རིམ་གྲོ་དང་མཆོད་པ་བྱེད་པ་ནི་ཡུན་རིང་པོར་མཆོད་པ་དང་རིམ་གྲོ་བྱེད་པ་སྟེ། རྣམ་པར་དག་པའི་སེམས་ཀྱིས་བྱང་ཆུབ་ཆེན་པོར་བསྔོས་ནས་རང་གི་ལུས་བརྒྱ་སྟོང་དུ་མས་དེ་བཞིན་གཤེགས་པ་གྲངས་མེད་པ་ལ་སྤོས་དང་མེ་ཏོག་ཚད་མེད་པས་མཆོད་ཅིང་རིམ་གྲོ་བྱས་ཏེ། ཚིག་སྙན་པ་དང་ཡིད་དུ་འོང་བ་གྲངས་མེད་པ་ཕྱོགས་བཅུར་ཁྱབ་པར་བྱས་ཏེ་མཆོད་ཅིང་རིམ་གྲོ་བྱེད་པ་དང༌། ཡང་ང་རྒྱལ་དང་དྲེགས་པ་སྤངས་ཏེ་མཆོད་པ་རྣམ་པར་དག་པས་རིམ་གྲོ་བྱེད་པ་དང༌། ཡང་དག་པའི་སྤྱོད་པས་མཆོད་པ་
དང་རིམ་གྲོ་བྱེད་པ་ནི་ཚད་མེད་པ་བཞི་མངོན་དུ་བསྒོམས་ཏེ་སུ་ཅི་འདོད་པ་རྣམས་ལ་དེ་བཞིན་དུ་སྟེར་བ་དང༌། སྐད་ཅིག་ཙམ་ཡང་ཡང་དག་པ་ཉིད་དུ་བཟོད་པ་དང་དད་པ་ལ་གནས་པ་ལས་མི་གཡོ་བར་མཚན་མ་མེད་པའི་སེམས་ཀྱིས་བྱང་ཆུབ་སེམས་དཔའི་སྡོམ་པ་མི་གཏོང་བ་བསྡུ་བ་རྣམ་བ་བཞིའི་སྤྱོད་པ་དམ་པས་མཆོད་ཅིང་རིམ་གྲོ་བྱེད་པ་ནི་སྔ་མའི་མཆོད་པ་བསྐྲུན་ཅིང་དཔེར་ཡང་མི་བཟོད་དོ། །བཟང་བ་ཕུལ་དུ་གྱུར་པའི་རིམ་གྲོ་སྟེ། བསོད་ནམས་དང་ཡོན་ཏན་ཚད་མེད་པའི་ཕྱིར་ཆོས་དང་དགེ་འདུན་ལ་ཡང་དེ་བཞིན་དུ་མཆོད་དོ། །མདོ་ལས་ལུས་དང་སེམས་བྱམས་པས་ཡོངས་སུ་བསྒོམས་པ་ནས་ཕ་རོལ་ཏུ་ཕྱིན་པའི་ཚུལ་རྟོགས་པ་དག་ཅེས་པ་ནི་ཆོས་དེ་དང་དེ་དག་ལ་འཇུག་པ་ནི་བྱམས་པ་དང་སྙིང་རྗེ། ལུས་དང་སེམས་བསྒོམས་པའི་ཕྱིར་གཞན་ལ་ཕན་འདོགས་པ་སྟེ་སྡུག་བསྔལ་གྱི་གནས་ནས་འདོན་པ་དང༌། བདེ་བའི་གནས་ལ་འཇིག་པའོ། །ཡང་དག་པའི་དབྱིངས་ཉིད་ལས་ཡེ་ཤེས་ཕྱིར་མི་ལྡོག་པར་འཇུག་པ་དང༌། བདག་ཏུ་ལྟ་བ་གཉིས་དང་བྲལ་བའི་ཡེ་ཤེས་ཀྱིས་ཤེས་རབ་ཆེན་པོ་རྟོགས་པ་དང༌། དེ་བཞིན་ཉིད་ཀྱི་དབྱིངས་ལས་ཕྱིར་མི་ལྡོག་པའི་ཕྱིར་ཕ་རོལ་ཏུ་ཕྱིན་པའི་ཚུལ་རྟོགས་པའོ། །མདོ་ལས་འཇིག་རྟེན་གྱི་ཁམས་བརྒྱ་སྟོང་མང་པོར་རྣམ་པར་གྲགས་པ་དག་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་ཀུན་ནས་སྒྲོལ་བ་དག་ཅེས་འབྱུང་བ་ནི་བྱ་བ་བྱས་པས་ཆོས་ལ་གནས་པའི་ཕྱིར་མི་ལྡོག་པ་སྟེ། དེ་བཞིན་གཤེགས་པའི་བསྟན་པ་འཛིན་པས་ཕྱོགས་སུ་རྣམ་པར་གྲགས་ཤིང༌། སེམས་ཅན་བརྒྱ་སྟོང་མང་པོ་སྒྲོལ་བར་བྱེད་པའོ། །ཡོན་ཏན་གྱི་ཁྱད་པར་བསྡུ་བ་ནི་ཅི་ལ་གནས་པ་དང༌། སེམས་གང་ལ་གནས་པ་དང་ཡེ་ཤེས་གང་ལ་གནས་པ་དང༌། སྤྱོད་ཡུལ་གང་ལ་གནས་པ་དང༌། སྤོབས་པ་ཅི་ལ་གནས་པ་ཤེས་པ་ནི་དེ་བཞིན་གཤེགས་པ་བརྒྱ་སྟོང་གྲངས་མེད་པ་ལ་མཆོད་ཅིང་རིམ་གྲོ་བྱེད་པས་དགེ་བའི་རྩ་བ་བསྐྱེད་པ་དང༌། དགེ་བའི་བཤེས་གཉེན་ལ་གནས་པའོ། །སེམས་ཇི་ལྟ་བུ་ལ་བརྟེན་པ་ནི་བྱམས་པ་དང་སྙིང་རྗེའི་སེམས་བསྒོམ་པ་ལ་གནས་ཏེ་མཐའ་ཡས་པའི་སེམས་ཅན་ཐམས་ཅད་སྒྲོལ་ཞིང་ཕན་འདོགས་པར་སེམས་པའོ། །ཡེ་ཤེས་ཇི་ལྟ་བུ་ལ་གནས་ཤེ་ན། དེ་བཞིན་
གཤེགས་པའི་ཡེ་ཤེས་ལ་འཛུད་པ། ཤེས་རབ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་རྟོགས་པ་སྟེ། ཡེ་ཤེས་ཀྱང་རྣམ་པ་གསུམ་སྟེ། ཡེ་ཤེས་ཟབ་མོ་རྣམ་པར་ཕྱེ་བས་སེམས་ཅན་རྣམས་དེ་བཞིན་གཤེགས་པའི་ཡེ་ཤེས་ལ་འཛུད་པ་དང༌། མངོན་པར་ཤེས་པའི་ཡེ་ཤེས་ཏེ། མཐུ་དང་རྫུ་འཕྲུལ་ཆེན་པོས་འགྲོ་བ་འདྲེན་པས་ཕན་འདོགས་པའི་ཡེ་ཤེས་སོ། །ཤེས་རབ་ཆེན་པོས་ཡང་དག་པའི་མཐའ་རྟོགས་པའི་ཡེ་ཤེས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་རྟོགས་པའི་ཡེ་ཤེས་སོ། །སྤྱོད་ཡུལ་ཇི་ལྟ་བུ་ལ་གནས་ཤེ་ན། འཇིག་རྟེན་གྱི་ཁམས་བརྒྱ་སྟོང་མང་པོར་རྣམ་པར་གྲགས་པ་སྟེ། སྣོད་དང་སེམས་ཅན་གྱི་འཇིག་རྟེན་ནི་བྱང་ཆུབ་སེམས་དཔའ་རྣམས་ཀྱི་སྒྲུབ་པའི་སྤྱོད་ཡུལ་ལོ། །སྤོབས་པ་ཅི་ལ་གནས་ཤེ་ན། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་ཀུན་ནས་སྒྲོལ་བ་དག་སྟེ། བྱང་ཆུབ་སེམས་དཔའ་ཡེ་ཤེས་རྣམ་པ་གསུམ་གྱིས་སེམས་ཅན་མང་པོ་སྒྲོལ་ཞིང་ཕན་འདོགས་པའོ། །མདོ་ལས་འདི་ལྟ་སྟེ་འཇམ་དཔལ་གཞོན་ནུར་གྱུར་པ་བྱང་ཆུབ་སེམས་དཔའ་སེམས་དཔའ་ཆེན་པོ་དང༌། སྤྱན་རས་གཟིགས་དབང་ཕྱུག་བྱང་ཆུབ་སེམས་དཔའ་སེམས་དཔའ་ཆེན་པོ་དང༌། མཐུ་ཆེན་ཐོབ་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་པ་ནི་འདི་མན་ཆད་བྱང་ཆུབ་སེམས་དཔའ་རྣམས་ཀྱི་མཚན་སོ་སོར་དབྱེ་བ་ལ་སྤྱིའི་མཚན་དང་སོ་སོའི་མཚན་ནོ། །བྱང་ཆུབ་སེམས་དཔའ་འདི་དག་ཀུན་ཀྱང་སྔོན་གྱི་སྨོན་ལམ་དང་སྤྱོད་པ་ལས་མཚན་བཏགས་པ་སྟེ། དུམ་བུ་བདུན་དུ་ཕྱེ་སྟེ་བཤད་པར་བྱའོ། །དང་པོའི་བྱང་ཆུབ་སེམས་དཔའ་འདི་གསུམ་ནི་སེམས་ཅན་རྣམས་སྡུག་བསྔལ་ལས་འདོན་པ་དང་བདེ་བ་ལ་འཇོག་པའི་མཐུ་ཅན་ཏེ། འཇམ་དཔལ་གཞོན་ནུར་གྱུར་པ་ནི་བྱང་ཕྱོགས་ཀྱི་དེ་བཞིན་གཤེགས་པ་རིན་ཆེན་བརྩེགས་པ་སྟེ། དེའི་མཚན་ཐོས་པ་ཙམ་གྱིས་སྡིག་པ་ཐམས་ཅད་བྱང་བར་འགྱུར་ཏེ། སངས་རྒྱས་ཕལ་པོ་ཆེའི་མདོ་ལས་ཀྱང་ཤར་ཕྱོགས་ཀྱི་སྤང་རི་རྩེ་ལྔ་ལ་གནས་ཤིང་བྱང་ཆུབ་སེམས་དཔའ་ཁྲི་དང་ལྷན་ཅིག་ཏུ་བཞུགས་པར་འབྱུང་ངོ༌། །བྱང་ཆུབ་སེམས་དཔའ་སྤྱན་རས་གཟིགས་ནི་གཟིགས་པ་ལ་མངའ་བརྙེས་
པ་སྟེ། སེམས་ཅན་ལ་གཟིགས་ཤིང་སྡུག་བསྔལ་གྱིས་ནས་འདོན་པ་ལ་མངའ་བརྙེས་པའོ། །ལུང་བསྟན་པའི་མདོ་ལས་དེ་བཞིན་གཤེགས་པ་སྣང་བ་མཐའ་ཡས་མྱ་ངན་ལས་འདས་པའི་འོག་ཏུ་འཕགས་པ་སྤྱན་རས་གཟིགས་ལུང་བསྟན། དེའི་འོག་ཏུ་འཕགས་པ་མཐུ་ཆེན་ཐོང་ལུང་བསྟན་ཏེ། བྱང་ཆུབ་སེམས་དཔའ་མཐུ་ཆེན་ཐོབ་གང་དུ་བྱོན་པའི་འཇིག་རྟེན་གྱི་ཁམས་དེ་གཡོ་བ་ལ་སོགས་ཏེ་མཐུ་ཆེན་པོ་སྟོན་ཅིང་སེམས་ཅན་གྱི་སྡུག་བསྔལ་ཞི་བར་མཛད་པའི་ཕྱིར་མཐུ་ཆེན་པོ་ཐོབ་པ་ཞེས་བྱའོ། །མདོ་ལས་རྟག་ཏུ་བརྩོན་པ་བྱང་ཆུབ་སེམས་དཔའ་དང༌། མི་གཏོང་བརྩོན་བའི་བྱང་ཆུབ་སེམས་དཔའ་ནི་བདག་གི་དོན་སྤྱོད་པ་དང༌། གཞན་གྱི་དོན་ལ་བརྩོན་པ་སྟེ་རིམ་པ་བཞིན་ནོ། །ལག་ན་རིན་ཆེན་དང་རབ་ཏུ་སྦྱིན་པའི་བྱང་ཆུབ་སེམས་དཔའ་དག་ནི་སེམས་ཅན་དབུལ་བ་དང་ནད་ཀྱིས་ཉོན་མོངས་པ་རྣམས་ལ་ཅི་རིགས་པར་ཕན་འདོགས་པའི་ཕྱིར་མཚན་གསོལ་བའོ། །རིན་ཆེན་ཟླ་བ་དང་ཟླ་རྒྱལ་དག་ནི་སེམས་ཅན་རྣམས་ཀྱི་མ་རིག་པའི་མུན་པ་སེལ་བའི་སྒོ་ནས་མཚན་གསོལ་བའོ། །གནོན་པ་ཆེན་པོ་བྱང་ཆུབ་སེམས་དཔའ་དག་ནི་སེམས་ཅན་འདུལ་བ་དང་མཐའ་ཡས་པའི་སེམས་ཅན་མཐུ་ཆེ་ཆུང་གིས་སྒྲོལ་བའོ། །འཇིག་རྟེན་གསུམ་གནོན་བྱང་ཆུབ་སེམས་དཔའ་དང༌། བཟང་སྐྱོང་བྱང་ཆུབ་སེམས་དཔའ་ནི་འཇིག་རྟེན་སྒྲོལ་བ་དང༌། དམ་པའི་ཆོས་བསྲུང་བ་ལས་མཚན་གསོལ་ཏོ། །བྱམས་པ་ལ་སོགས་པའི་བྱང་ཆུབ་སེམས་དཔའ་ནི་འཇིག་རྟེན་དང་འཇིག་རྟེན་ལས་འདས་པའི་དོན་ལས་བཏགས་པ་སྟེ། སྡུག་བསྔལ་གྱིས་ནས་འདོན་པའི་བྱང་ཆུབ་སེམས་དཔའ་རིན་པོ་ཆེ་སེམས་ཅན་ལ་བསྟབས་ཤིང་མྱ་ངན་ལས་འདས་པའི་ཞི་བ་ལ་འཇོག་པ་ལས་བཏགས་སོ། །དེ་ལ་སོགས་པ་དང་ཐབས་ཅིག་ཏུ་བཞུགས་པ་ནི་བསྡུས་པའི་ཚིག་གོ །མདོ་ལས་བརྒྱ་བྱིན་ལྷའི་དབང་པོའི་འཁོར་ལྷའི་སྲས་པོ་སྟོང་ཕྲག་ཉི་ཤུ་ནི་གོང་དུ་ཕྱིའི་འཁོར་དང་ནང་གི་འཁོར་དུ་སྨོས་པ་གཉིས་ལ། ནང་གི་འཁོར་ལྔ་ནི་གོང་དུ་བསྟན་པ་ཡིན། ཕྱིའི་འཁོར་བཅུ་ལ་མི་དང་མི་མ་ཡིན་པར་དབྱེ་བ་དང༌། མི་མ་ཡིན་པ་ལའང་ལྷ་དང༌། ལྷ་མ་ཡིན་དུ་དབྱེ་བ་དང༌། ལྷ་ལ་ཡང་འདོད་པ་དང་གཟུགས་ཀྱི་ལྷར་དབྱེ་བ་དང༌། འདོད་ཁམས་ཀྱི་ལྷ་ལ་
ཡང་བརྒྱ་བྱིན་དང༌། རྒྱལ་པོ་ཆེན་པོ་བཞི་དང༌། དབང་ཕྱུག་དང་གསུམ་མོ། །དེ་ལ་འདི་ནི་དང་པོ་སྟེ། ས་ལ་གནས་པ་དང་ནམ་མཁའ་ལ་གནས་པར་དབྱེའོ། ས་ལ་གནས་པ་ནི་བརྒྱ་བྱིན་དང༌། རྒྱལ་པོ་ཆེན་པོ་བཞི་སྟེ། བརྒྱ་བྱིན་ནི་རི་རབ་ཀྱི་རྩེ་ལ་གནས་ཤིང་སུམ་ཅུ་རྩ་གསུམ་ལྷའི་རྒྱལ་པོའོ། །མདོ་ལས་ཟླ་བ་ལྷའི་སྲས་པོ་ཞེས་པ་ནས། སྟོང་ཕྲག་ཉི་ཤུ་དང་ཐབས་ཅིག་གི་ཞེས་པའི་བར་ནི་འོད་ཅན་དེ་གསུམ་ནི་རྒྱལ་པོ་ཆེན་པོ་བཞིའི་ཁམས་སུ་གཏོགས་ཏེ། ཉི་མ་ལྷའི་སྲས་པོ་ནི་འཕགས་པ་སྤྱན་རས་གཟིགས། ཟླ་བ་ལྷའི་སྲས་པོ་ནི་འཕགས་པ་མཐུ་ཆེན་པོ་ཐོབ་པ། ནམ་མཁའི་མཛོད་བྱང་ཆུབ་སེམས་དཔའ་ནི་རིན་ཆེན་འོད་བྱང་ཆུབ་སེམས་དཔའ་ཡིན་པར་མདོ་ལས་འཆད་དོ། །ཉི་མ་ནི་དཔག་ཚད་ལྔ་བཅུས་འཁོར། ཟླ་བ་ནི་དེ་བཞིན་ནོ། །སྐར་མ་ནི་ཆུ་ཤེལ་ལས་བྱས་ཏེ། ནང་གི་ཆེན་པོ་ལ་རྒྱང་གྲགས་བཅོ་བརྒྱད་ཀྱིས་འཁོར། ནང་གི་ཆུང་དུ་ནི་རྒྱང་གྲགས་བཞིས་འཁོར་ཞེས་འཆད་དེ། དེ་དག་ཐམས་ཅད་ཀྱང་ནམ་མཁའ་ལ་རྒྱུ་ཞིང་གླིང་བཞི་འཁོར་བར་རྒྱུ་ལ་རྒྱུ་བའི་ས་ནི་རི་རབ་ཀྱི་རྐེད་ནས་འཁོར་རོ། །མདོ་ལས་ལྷའི་དབང་པོ་ཆེན་པོ་ལྷའི་སྲས་པོའི་འཁོར་དང་ཐབས་ཅིག་ཏུ་བཞུགས་ཞེས་པ་ནི་ནམ་མཁའ་ལ་གནས་པའི་ལྷ་སྟེ། མཚེ་མ་རྣམས་དང་དགའ་ལྡན་གྱི་ལྷ་ནི་དབང་ཕྱུག་ལྷའི་སྲས་པོ་སྟེ། དགེ་བའི་རྣམ་པར་སྨིན་པ་ཆེ་བའི་ཕྱིར་གོང་ནས་གོང་དུ་འབྲས་བུ་དམ་པ་འབྱུང་བའི་ལྷའི་ཡིད་བཞིན་གྱི་ཤིང་ལས་ཅི་འདོད་པ་ལེན་ཅིང་དབང་སྒྱུར་བས་བདག་དང་གཞན་གྱི་ལོངས་སྤྱོད་རྫོགས་པའོ། །མདོ་ལས་ཚངས་པ་མི་མཇེད་ཀྱི་བདག་པོ་ཚངས་པའི་འཁོར་དང་ཐབས་ཅིག་ཅེས་པ་ནི་དེ་དག་གཟུགས་ཀྱི་ཁམས་ཀྱི་ལྷ་རྣམས་ཏེ། བསམ་གཏན་གྱི་རིམ་པས་གནས་ཤིང་ལྷའི་རྒྱལ་པོ་དེ་གཞན་ལ་ཕན་པ་དང་བདེ་བ་བྱེད་པས་མི་སྐྱོ་ཞིང་ཐུབ་པ་ཉམས་སུ་ལེན་པས་མི་མཇེད་པའོ། །མདོ་ལས་ཀླུའི་རྒྱལ་པོ་བརྒྱད་འཁོར་མང་པོ་དང་ཐབས་ཅིག་ཏུ་བཞུགས་པའི་བར་དུ་ནི་འདི་མན་ཆད་ལྷ་མ་ཡིན་པའི་འཁོར་ལྔ་ལས་དང་པོ་སྟེ་ཀླུའི་འཁོར་རོ། །དགའ་བོ་དང་བསྙེན་དགའ་བོ་ནི་སྔོན་སྤུན་ཡིན་ཏེ། དགེ་བའི་སེམས་ཀྱིས་ཆར་དང་རླུང་དུས་སུ་འབེབས་པའི་རྒྱལ་པོ་སྟེ། གཞན་
ཡང་སོ་སོའི་ཡོན་ཏན་དང་མཐུ་ལས་མིང་དུ་བཏགས་པའོ། །མདོ་ལས་མིའམ་ཅིའི་རྒྱལ་པོ་བཞིའི་འཁོར་དང་ཐབས་ཅིག་ཏུ་བཞུགས་ཞེས་པ་ནི་སྒྲ་སྙན་པའི་ཡོན་ཏན་དང་ལྡན་པ་དག་གོ །མདོ་ལས་དྲི་ཟའི་རིགས་ཀྱི་འཁོར་རྣམས་དང་ཐབས་ཅིག་ཏུ་བཞུགས་ཞེས་པ་ནི་དེ་དག་རྒྱུ་ཞིང་གར་དང་རོལ་མོའི་སྒྲ་སྙན་པ་འབྱིན་ཅིང་དྲིས་འཚོ་བར་བྱེད་པའོ། །མདོ་ལས་ལྷ་མ་ཡིན་གྱི་དབང་པོའི་འཁོར་བཞི་རྣམས་དང་ཐབས་ཅིག་ཅེས་པ་ནི་ལྷའི་སྤྱོད་པ་མེད་དེ། གཡོ་དང་སྒྱུས་སྤྱོད་པ་མང་པས་ལྷ་མ་ཡིན་ཏེ། ཇི་ལྟར་མིའི་གཞུང་ཉམས་པ་ལ་མི་མ་ཡིན་ཞེས་བྱ་བ་བཞིན་ནོ། །རྣལ་འབྱོར་སྤྱོད་པའི་གཞུང་ལས་ནི་ལྷའི་ཁམས་སུ་བཤད་དོ། །གཞན་ལས་ནི་ཡི་དགས་དང་བྱོལ་སོང་གི་ཁམས་སུ་གཏོགས་པར་ཡང་འཆད་དོ། །མདོ་ལས་འདབ་བཟངས་ཀྱི་དབང་པོ་འཁོར་བཞི་དང་ཐབས་ཅིག་ཏུ་བཞུགས་ཞེས་པ་ནི་འདབ་བཟངས་ནི་སྐྱེ་བ་རྣམ་པ་བཞི་ལས་སྐྱེ་སྟེ། ཀླུའི་རིགས་ཀྱང་རྣམ་པ་བཞི་ལས་སྐྱེ་སྟེ། འདབ་བཟངས་འདི་ཟས་སུ་ཀླུ་ཟའོ། །ཟ་བའི་ཐབས་ནི་འདབ་བཟངས་འདི་འདབ་མས་རྒྱ་མཚོ་ལ་སླེབས་པས་ཀླུ་རྣམས་ཐོན་པ་ལ་ཟ་སྟེ། ཀླུ་བསོད་ནམས་དང་ལྡན་པ་དེ་བཞིན་གཤེགས་པའི་འཁོར་དུ་སྐྱེས་པ་རྣམས་འདབ་བཟངས་ཀྱིས་མི་གསོད་པར་ཚད་མེད་པ་བཞིའི་སེམས་ཀྱིས་བསྐྱབ་པའི་ཕྱིར་ཏེ། དགེ་སློང་དག་སུ་འཚེ་བ་ཐམས་ཅད་ལས་ཐར་བར་འདོད་པའི་ཕྱིར་ཚད་མེད་པ་བཞི་ལ་བརྟེན་པར་བྱའོ་ཞེས་གསུངས་པ་ཡིན་ནོ། །མདོ་ལས་ལུས་འཕགས་མོའི་བུ་མ་སྐྱེས་དགྲ་དང་ཐབས་ཅིག་གོ་ཞེས་པ་ནི་མིའི་རྒྱལ་པོའི་འཁོར་བསྟན་ཏེ་རྒྱལ་པོ་སྨོས་པ་ནི་གཙོ་བོས་བསྡུས་པའི་ཕྱིར་ཏེ། མ་སྐྱེས་དགྲའི་གླེང་གཞི་ནི་མ་བཙས་པའི་སྔ་རོལ་ཏུ་ཕ་བསད་པའི་བསམ་པ་དང་བཅས་པའི་ཕྱིར་མ་སྐྱེས་པར་ཕའི་དགྲར་གྱུར་པ་སྟེ། དེས་ཕ་བསད་པ་དེ་ཉན་ཐོས་པའི་གཞུང་དུ་སྡིག་པ་བཤགས་པས་སེམས་ཅན་དམྱལ་བར་ཕོ་ལོང་བརྡབས་པ་ཙམ་ཞིག་སྐྱེས་ཏེ། ཕྱིས་རང་སངས་རྒྱས་ཀྱི་འབྲས་བུ་ཐོབ་པར་ཡང་འཆད་ཐེག་པ་ཆེན་པོ་ལས་ནི་ཆོས་ཟབ་མོ་རྟོགས་པའི་བཤགས་པས་སེམས་ཅན་དམྱལ་བར་མ་ལྷུང་བར་ཡང་འཆད་དེ། ཞིབ་ཏུ་མྱ་ངན་ལས་
འདས་པ་ཆེན་པོའི་མདོ་ལས་གསུངས་པ་བཞིན་ནོ། །མདོ་ལས་ཡང་དེའི་ཚེ་བཅོམ་ལྡན་འདས་འཁོར་བཞིས་བསྐོར་ཏེ། མཆོད་པ་དང་རིམ་གྲོ་བྱས་ཞེས་པའི་བར་དུ་ནི་འཁོར་ཕུན་སུམ་ཚོགས་པ་བཞིར་ཕྱེ་བ་ལ། གསུམ་ནི་བསྟན་ཟིན། འདི་བཞི་པ་སྟེ། འཁོར་བཞི་ལ་བདུད་དང་ཚངས་པ་དང༌། དགེ་སློང་དང་བྲམ་ཟེའི་འཁོར་ཞེས་ཀྱང་འཆད། ཡང་འཁོར་རྣམ་པ་བཞི་སྟེ། ཉན་ཐོས་པའི་འཁོར་ཤཱ་རིའི་བུ་དང༌། བྱང་ཆུབ་སེམས་དཔའ་བྱམས་པ་ལྟ་བུ་ཆོས་གླེང་བའི་འཁོར་དང༌། དབང་པོ་སྨིན་པ་དེ་ཆོས་རྟོགས་པའི་འཁོར་དང༌། དགེ་བའི་རྒྱུ་ལ་སོགས་པའི་འཁོར་དང༌། མ་འོངས་པ་ན་ཆུད་པར་འགྱུར་བའི་འཁོར་རོ། །ཡང་འཁོར་བཞི་སྟེ། དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མའི་འཁོར་རོ། །མདོ་ལས་གདོན་མི་ཟ་བར་བསྟན་པ་ཆེན་པོ་ཞེས་བྱ་བ་ཆོས་ཀྱི་གཞུང་མདོ་སྡེ་ཤིན་ཏུ་རྒྱས་པ་ཆེན་པོ། །བྱང་ཆུབ་སེམས་དཔའ་རྣམས་ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་ཟིན་པ་བཤད་པར་བཞེད་དེ་ཞེས་པ་ནི་དེ་བཞིན་གཤེགས་པ་ཆོས་བཤད་པར་བྱེད་པའི་དུས་དེ་ཡང་རྣམ་པ་གསུམ་སྟེ། སྔར་བྱང་ཆུབ་སེམས་དཔའ་རྣམས་ལ་ཐེག་པ་ཆེན་པོ་མཐའ་ཡས་གདོན་མི་ཟ་བ་བསྟན་པ་ཞེས་བྱ་བའི་ཆོས་ཀྱི་གཞུང་བསྟན། འོག་ཏུ་ཉན་ཐོས་པ་རྣམས་ཀྱི་ཆེད་དུ་ཐེག་པ་གཅིག་པུ་བསྟན་པ་དང༌། གཞན་གྱི་དོན་དུ་ལུང་དང་རིགས་པས་བྱང་ཆུབ་སེམས་དཔའ་རྣམས་ལ་ཐེག་པ་གཅིག་པུ་བསྟན། དེའི་འོག་ཏུ་བདག་གི་དོན་དུ་སྤྱོད་པ་དང༌། འབྲས་བུ་བསྟན། གསུམ་དུ་སྔར་ཆོས་ཀྱི་མཚན་ཉིད་བསྟན། འོག་ཏུ་ཆོས་ཀྱི་མཐུ་བསྟན་པའི་ཕྱིར་གདོན་མི་ཟ་བར་བྱ་བས་མདོ་འདི་བསྟན་ཏོ། །ཐེག་པ་ཆེན་པོ་ཞེས་བྱ་བ་ནི་དོན་རྣམ་པ་དྲུག་སྟེ། ཐེག་པ་རྣམ་པ་གཉིས་ལས་འདས་པ་དང༌། སངས་རྒྱས་ཀྱི་སར་འདིས་ཕྱིན་པར་བྱེད་པ་དང༌། སངས་རྒྱས་ཀྱི་ཐེག་པ་པས་ཐེག་པ་ཆེན་པོ་ཡིན་པ་དང༌། སྡུག་བསྔལ་ཆེན་པོ་ཞི་བར་བྱེད་ཅིང་བདེ་བ་ཆེན་པོ་སྦྱིན་པར་བྱེད་པ་དང༌། འཕགས་པ་སྤྱན་རས་གཟིགས་ལ་སོགས་ཏེ་སྐྱེས་བུ་ཆེན་པོ་རྣམས་ཀྱི་ཐེག་པ་ཡིན་པ་དང༌། ཆོས་རྣམས་ཀྱི་མཐར་ཐུག་པར་བྱེད་པའི་ཕྱིར་ཐེག་པ་ཆེན་པོ་བསྡུས་པ་ལས་ཀྱང་ཐེག་པ་ཡང་ཡིན་ལ་ཆེན་
པོ་ཡང་ཡིན་པས་ཐེག་པ་ཆེན་པོའོ། །འདིས་འདེགས་པར་བྱེད་པའི་ཕྱིར་ཐེག་པའོ། །ཆེན་པོ་ནི་རྣམ་པ་བདུན་དང་ལྡན་པའི་ཕྱིར་ཆེན་པོ་སྟེ། སྤྱད་ཡུལ་དང༌། སེམས་དང་ཡེ་ཤེས་དང་བརྩོན་འགྲུས་དང་ཐབས་དང༌། ཐོབ་པ་དང༌། ལས་ཆེན་པོའི་ཕྱིར་ཆེན་པོ་ཞེས་བྱའོ། །མཐའ་ཡས་གདོན་མི་ཟ་བར་བསྟན་པ་ཞེས་པ་ནི་མདོ་སྡེ་འདིའི་རྣམ་གྲངས་ཀྱི་མིང་སྟེ་འདིའི་འགྲེལ་པ་ལས་མདོ་སྡེའི་མིང་གི་རྣམ་གྲངས་བཅུ་བདུན་ཡོད་དེ། མདོ་སྡེ་འདི་བྱང་ཆུབ་སེམས་དཔའ་ཐེག་པ་ཆེན་པོ་སྤྱོད་པ་རྣམས་ལ་བཤད་པས་མཐའ་ཡས་གདོན་མི་ཟ་བའི་དོན་ཏོ། །བྱང་ཆུབ་སེམས་དཔའ་རྣམས་ལ་བསྟན་པ། དེ་བཞིན་གཤེགས་པ་རྣམས་ཀྱིས་གཟུང་བ། དེ་བཞིན་གཤེགས་པ་རྣམས་ཀྱི་གསང་བ། དེ་བཞིན་གཤེགས་པ་རྣམས་ཀྱི་ཡོན་ཏན་གྱི་མཛོད། དེ་བཞིན་གཤེགས་པ་རྣམས་ཀྱི་མན་ངག་གི་གནས། དེ་བཞིན་གཤེགས་པ་རྣམས་བསྐྱེད་པ། དེ་བཞིན་གཤེགས་པ་རྣམས་ཀྱི་དབྱིངས། དེ་བཞིན་གཤེགས་པ་རྣམས་ཀྱི་རིང་བསྲེལ་བསྟན་པར་བྱེད་པ། ཐབས་མཁས་པས་ཐེག་པ་གཅིག་སྟོན་པ། བླ་ན་མེད་པའི་གནས་དམ་པའི་ཆོས་པུཎྜ་རཱི་ཀ་ཞེས་བྱ་བ་ཆོས་རྣམས་ཀྱི་དམ་པའོ། །འགྲེལ་པ་ལས་མཐའ་ཡས་གདོན་མི་ཟ་བར་བསྟན་པ་ཞེས་པ་ནི་ཚིག་དང་དོན་རྫོགས་པ་མིང་གི་རྣམ་གྲངས་བཅུ་བདུན་ཏེ། ཆོས་ཀྱི་སྒོ་མོ་འདིས་ཆོས་ཀྱི་སྒོ་མོ་ཟབ་མོ་གཞན་ཡང་སྟོན་པར་བྱེད་དོ། །འཆད་པའི་ལུང་དང་བཤད་པའི་འབྲས་བུ་གཉི་ག་ཡང་མཐའ་ཡས་པའི་ཕྱིར་རོ། །སེམས་ཅན་རྣམས་ཀྱི་རང་བཞིན་མཐའ་ཡས་པའི་ཕྱིར་ཆོས་རྣམས་ཀྱང་མཐའ་ཡས་སོ། །ཆོས་མཐའ་ཡས་པའི་ཕྱིར་དོན་ཡང་མཐའ་ཡས་སོ། །དོན་མཐའ་ཡས་པ་ནི་ཆོས་གཅིག་བསྐྱེད་པའོ། །ཆོས་གཅིག་ནི་མཚན་མ་མེད་པའི་ཆོས་ཏེ། བྱང་ཆུབ་སེམས་དཔའ་རྣམས་ཀྱིས་གནས་པར་བྱ་བའོ། །དེ་ཉིད་ཡང་དག་པ་སྟེ། བྱམས་པ་དང་སྙིང་རྗེར་ལྡན་པ། སེམས་ཅན་རྣམས་སྡུག་བསྔལ་གྱི་ས་ནས་འདྲེན་པ། བདེ་བའི་གནས་སུ་འཇོག་པའོ། །རིགས་ཀྱི་བུ་བྱང་ཆུབ་སེམས་དཔའ་རྣམས་མཐའ་ཡས་པའི་ཆོས་ཀྱི་སྒོ་དེ་གཅིག་བསྒྲུབས་པས་མྱུར་དུ་བླ་ན་མེད་པའི་བྱང་ཆུབ་འཐོབ་པོ། །འདི་ལྟ་སྟེ་དཔེར་ན་ས་བོན་གཅིག་བསྐྱེད་པས་བརྒྱ་སྟོང་མང་པོ་བསྐྱེད་པར་འགྱུར་རོ། །བརྒྱ་སྟོང་མང་པོ་ལས་ཀྱང་དེ་བཞིན་དུ་བསྐྱེད་དེ་
མཐའ་ཡས་པར་འགྱུར་བ་བཞིན། མདོ་སྡེ་འདི་ཡང་དེ་བཞིན་ཏེ། ཆོས་གཅིག་གིས་དོན་བརྒྱ་སྟོང་གྲངས་མེད་པ་བསྐྱེད་དོ། །དོན་དེ་ལས་ཀྱང་དེ་བཞིན་དུ་མང་དུ་བསྐྱེད་པས་དོན་མཐའ་ཡས་མུ་མེད་པར་འགྱུར་བའི་ཕྱིར་མདོ་སྡེ་འདི་ཡང་མཐའ་ཡས་གདོན་མི་ཟ་བར་བསྟན་པ་ཞེས་བྱའོ། །ཡང་ན་མདོ་སྡེ་འདི་མཆོག་གམ་ངམ་པ་ཞེས་བྱ་སྟེ། སྡེ་སྣོད་གསུམ་གྱི་ནང་ནས་མཛོད་འདི་དམ་པ་ཡིན་པའི་ཕྱིར་རོ། །ཡང་མདོ་སྡེ་འདི་ཐེག་པ་ཆེན་པོ་ཤིན་ཏུ་རྒྱས་པ་ཆེན་པོ་གདོན་མི་ཟ་བའི་སྒོ་ཡིན་ཏེ། སེམས་ཅན་རྣམས་ཀྱི་དབང་པོ་དང་མཐུན་པར་འཛིན་པའི་ཕྱིར་འཛིན་པ་ཕུན་སུམ་ཚོགས་པའོ། །ཡང་འདི་བྱང་ཆུབ་སེམས་དཔའ་རྣམས་ལ་གདམས་པའི་ཆོས་ཏེ། དབང་པོ་སྨིན་པ་རྣམས་ལ་སྣོད་བཞིན་དུ་ཆོས་སྟོན་པས་ཐེག་པ་རྣམ་གཉིས་སུ་མི་འགྱུར་བའི་ཕྱིར་རོ། །ཡང་འདི་དེ་བཞིན་གཤེགས་པ་རྣམས་ཀྱིས་ཡོངས་སུ་གཟུང་བ་སྟེ། གནས་གཞན་མེད་པའི་ཕྱིར་རོ། །ཡང་འདི་དེ་བཞིན་གཤེགས་པ་རྣམས་ཀྱི་གསང་བའི་ཆོས་ཏེ། ཆོས་འདི་ཤིན་ཏུ་ཟབ་པའི་ཕྱིར་སངས་རྒྱས་ཉག་གཅིག་གི་མཁྱེན་པ་སྟེ། གསང་བ་ནི་མཛོད་ཅེས་པའི་དོན་ཏོ། །ཡང་འདི་དེ་བཞིན་གཤེགས་པ་རྣམས་ཀྱི་ཡོན་ཏན་གྱི་མཛོད་དེ། བསོད་ནམས་དང་ཏིང་ངེ་འཛིན་ལ་སོགས་པའི་མཛོད་ཡིན་པའི་ཕྱིར་རོ།། །།དམ་པའི་ཆོས་པུཎྜ་རཱི་ཀའི་འགྲེལ་པ། བམ་པོ་གཉིས་པ། ཡང་འདི་དེ་བཞིན་གཤེགས་པ་རྣམས་ཀྱི་གསང་བའི་གནས་ཏེ། དབང་པོ་མ་སྨིན་ཅིང་སྣོད་དུ་མ་གྱུར་པ་རྣམས་ལ་སྦྱིན་པར་བྱ་བ་མ་ཡིན་པའོ། །ཡང་འདི་དེ་བཞིན་གཤེགས་པ་རྣམས་བསྐྱེད་པ་སྟེ། ཆོས་ཀྱི་སྒོ་འདི་ཐོས་པས་སྤྲུལ་པ་དང་རྫོགས་ལོངས་སྤྱོད་པའི་སྐུ་ཐོབ་པར་བྱེད་པའོ། །ཡང་འདི་དེ་བཞིན་གཤེགས་པ་རྣམས་ཀྱི་དབྱིངས་ཏེ། ཆོས་འདིས་བླ་ན་མེད་པའི་བྱང་ཆུབ་འགྲུབ་པར་བྱེད་ཀྱི་མདོ་སྡེ་གཞན་གྱིས་མ་ཡིན་པས་དེ་བཞིན་གཤེགས་པའི་ཆོས་ཀྱི་སྐུ་དང་ཡེ་ཤེས་སྟོན་པར་བྱེད་པའི་ཕྱིར་རོ། །ཡང་འདི་དེ་བཞིན་གཤེགས་པ་རྣམས་ཀྱི་ཆོས་ཀྱི་སྐུ་སྟེ། ཆོས་ཀྱིས་སྒྲིབ་པ་སྤྱོད་བར་བྱེད་པའི་ཕྱིར་རོ། །ཡང་འདི་དུས་གསུམ་གྱི་དེ་བཞིན་གཤེགས་པ་རྣམས་ཀྱི་རིང་བསྲེལ་བསྟན་པར་བྱེད་པ་སྟེ། དེ་ཡང་དེ་བཞིན་གཤེགས་པའི་ཡོན་ཏན་དང་ཆོས་ཀྱི་སྐུ་འདིའི་ནང་ནས་སྟོན་པའི་ཕྱིར་རོ། །ཡང་
འདི་ཐབས་མཁས་པ་སྟེ། ཆོས་ཀྱི་དོན་འདི་ལ་བརྟེན་པས་མངོན་པར་རྫོགས་པར་འཚང་རྒྱ་བའོ། །སངས་རྒྱས་ནས་ཀྱང་ལྷ་དང་མི་ལ་སོགས་པའི་སེམས་ཅན་རྣམས་ལ་ཐེག་པ་རྣམ་པ་ལྔའི་ཆོས་ཀྱིས་བྱང་ཆུབ་ཐོབ་པའི་ཡེ་ཤེས་དང་ཐབས་སྟོན་པའི་ཕྱིར་རོ། །ཡང་འདི་ཐེག་པ་གཅིག་པོ་སྟོན་པས་བླ་ན་མེད་པའི་བྱང་ཆུབ་ཀྱི་ངོ་བོ་ཉིད་སྟོན་པ་ཡིན་གྱི། ཉན་ཐོས་དང་རང་སངས་རྒྱས་ཀྱིས་ནི་ཡང་དག་པའི་མཐའ་མ་ཡིན་ནོ། །ཡང་འདི་དོན་དམ་པའི་གནས་ཏེ། ཆོས་འདི་དེ་བཞིན་གཤེགས་པའི་ཆོས་ཀྱི་སྐུ་ཡང་དག་པའི་གནས་ཏེ། ཆོས་ཀྱི་སྐུ་ཉིད་དམ་པ་ཡིན་པའི་ཕྱིར་དམ་པའི་གནས་ཞེས་བྱའོ། །ཡང་འདི་དམ་པའི་ཆོས་པདྨ་དཀར་པོ་ཞེས་པ་ནི་འགྲེལ་པ་ལས་རྣམ་པ་གཉིས་ཏེ། ཆུ་ལས་བྱུང་བའི་དོན་དང༌། ཁ་འབྱེད་པའི་དོན་ཏོ། །ཆུ་ལས་བྱུང་བ་ཡང་དོན་རྣམ་པ་གཉིས་ཏེ། ཐེག་པ་རྣམ་པ་གཉིས་ཀྱི་ཆུ་རྙོག་པ་ཅན་ལས་བྱུང་སྟེ། ཅིག་ཅར་ཆུད་པའི་བྱང་ཆུབ་སེམས་དཔའ་ཉིད་པདྨོ་དང་འདྲ་བར་རྙོག་པ་དང་བྲལ་ཞིང་ཆོས་ཉིད་བརྟན་པའི་ཚུལ་ཐེག་པ་གཅིག་པུའི་གཞུང་རྟོགས་ཞེས་པའི་དོན་སྟོན་ཏོ། །ཡང་ན་ཐེག་པ་རྣམ་པ་གཉིས་ཆུ་རྙོག་པ་ཅན་གྱི་ནང་ནས་བྱུང་སྟེ་དེ་བཞིན་གཤེགས་པའི་འཁོར་ཆེན་པོར་ཞུགས་པ་ནི་བྱང་ཆུབ་སེམས་དཔའ་པདྨོའི་གདན་ལ་བཞུགས་ཤིང་མཐའ་ཡས་གདོན་མི་ཟ་བའི་ཡེ་ཤེས་རྣམ་པར་དག་པའི་སྤྱོད་ཡུལ་དེ་བཞིན་གཤེགས་པའི་གསང་བའི་མཛོད་རྟོགས་པ་བཞིན་ཉན་ཐོས་པ་རྣམས་ཀྱིས་ཀྱང་རིམ་གྱིས་ལུང་ཡང་དག་པ་དང༌། གཞུང་དང་སྤྱོད་པ་དང་འབྲས་བུ་ལ་ཞུགས་ཞེས་པའི་དོན་ཏོ། །ཡང་འདི་བླ་ན་མེད་པའི་ཆོས་ཀྱི་སྒོ་སྟེ། ཕུན་སུམ་ཚོགས་པ་ཐམས་ཅད་སྡུད་པའི་ཕྱིར་རོ། །སྡུད་པ་ནི་མཐའ་ཡས་པའི་མིང་དང་ཚིག་དང་འབྲུའི་ཚོགས་ཐམས་ཅད་སྡུད་པའི་ཕྱིར་བླ་ན་མེད་པ་སྟེ། བཤད་པ་དང་བཤད་པར་བྱ་བའི་ཆོས་ཐམས་ཅད་འདིར་འདུས་པའི་ཕྱིར་རོ། །རྣམ་གྲངས་བཅུ་བདུན་པོ་འདི་ལས་འདི་ནི་སྤྱིའི་ཚིག་གོ །གཞན་ནི་དབྱེ་བའི་ཚིག་གོ །མདོ་སྡེ་འདི་ཉིད་ཀྱི་རྣམ་གྲངས་གསུམ་ཞིག་འབྱུང་སྟེ། མཐའ་ཡས་གདོན་མི་ཟ་ཞེས་པ་ནི་བྱིན་གྱི་རླབས་ཀྱི་ཁྱད་པར་བསྟན་པའོ། །བྱང་ཆུབ་སེམས་དཔའ་རྣམས་ལ་གདམས་པ་ནི་དབང་པོ་སྨིན་པ་རྣམས་ཀྱི་ཆེད་དུ་གསུངས་
པའི་དོན་ཏོ། །སངས་རྒྱས་ཐམས་ཅད་ཀྱིས་ཡོངས་སུ་ཟིན་པ་ནི་སངས་རྒྱས་ཉིད་ལ་བརྟེན་ཞེས་པའི་དོན་ཏེ། འདི་གསུམ་གཙོ་བོ་ཡིན་པའི་ཕྱིར་སྨོས་སོ། །མཐའ་ཡས་པ་ནི་རྣམ་པ་གཉིས་ཏེ། དོན་མཐའ་ཡས་པ་དང་ཚིག་མཐའ་ཡས་པའོ། །ཚིག་མཐའ་ཡས་པ་ནི་སྟོན་པའི་ཆོས་སོ། །དོན་ནི་བསྟན་པར་བྱ་བའི་ཆོས་སོ། །མདོ་ལས་བཅོམ་ལྡན་འདས་ཆོས་ཀྱི་གདན་དེ་ཉིད་ལ་སྐྱིལ་མོ་ཀྲུང་བཅས་ནས་མཐའ་ཡས་གདོན་མི་ཟ་བ་བསྟན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྐུ་མི་གཡོ་བར་བཞུགས་ཤིང་སེམས་མི་གཡོ་བར་གྱུར་པ་ནི་སྤྱོད་ལམ་ཕུན་སུམ་ཚོགས་པའི་ཆོས་དམ་པ་སྟོན་པ་སྟེ། ཆོས་ཟབ་མོ་འདི་སྟོན་པ་ལ་སྤྱོད་ལམ་དམ་པ་ལ་ཞུགས་ཏེ་ཆོས་སྟོན་པར་འོས་པའི་ཕྱིར་སྐྱིལ་མོ་ཀྲུང་བཅས་ཏེ་བཞུགས་སོ། །བཞུགས་པའང་རྣམ་པ་གཉིས་ཏེ། བདུད་འདུལ་བའི་བཞུགས་པ་དང༌། བཀྲ་ཤིས་པའི་ཚུལ་དུ་བཞུགས་པ་ལས་འདི་ནི་དང་པོའི་ཚུལ་དུ་བཞུགས་པའོ། །སྤྱོད་ལམ་དམ་པ་ཡང་རྣམ་པ་གསུམ་སྟེ། ཏིང་ངེ་འཛིན་ཕུན་སུམ་ཚོགས་པ་ལ་བཞུགས་པས་སྐུ་དང་ཐུགས་མི་གཡོ་བར་གྱུར་པའོ། །ཡང་ན་སྣོད་ཀྱི་འཇིག་རྟེན་ན་ལྷའི་མེ་ཏོག་འབུལ་བ་དང༌། ཞིང་རྣམ་པར་གཡོ་བ་ལ་བཞུགས་པའོ། །ཡང་ན་བཅུད་ཀྱི་འཇིག་རྟེན་ན་བཞུགས་པ་སྟེ། འཁོར་བཞི་དང་བརྒྱད་ཀྱིས་བསྐོར་ཅིང་ཏིང་ངེ་འཛིན་དུ་བཞུགས་པ་དང༌། ཆོས་ཟབ་མོ་རྟོགས་པར་མཛད་པས་འཁོར་དགའ་ཞིང་ཞལ་དུ་ལྟ་བ་དང་བཞུགས་པའོ། །སྙོམས་པར་ཞུགས་ཞེས་པ་ནི་མཐའ་ཡས་པའི་དོན་ཟབ་མོ་ལ་སེམས་མཉམ་པར་གཞག་ཅེས་པའི་དོན་ཏོ། །འགྲེལ་པ་ལས་ཏིང་ངེ་འཛིན་ལ་རྣམ་པ་གཉིས་ཏེ། ཐུགས་དང་སྐུ་ལ་མངའ་བརྙེས་ཤིང་ཕུན་སུམ་ཚོགས་པས་ཟབ་མོ་འདི་བཤད་པ་ལ་ཏིང་ངེ་འཛིན་ལ་མ་ཞུགས་ན་གཡོ་བ་དང་རྟོག་པ་འབྱུང་བའི་ཕྱིར་ཏིང་ངེ་འཛིན་དུ་ཞུགས་པ་དང་སྒྲིབ་པ་ཐམས་ཅད་དང་བྲལ་བ་ནི་མངའ་བརྙེས་པ་སྟེ། ཏིང་ངེ་འཛིན་དུ་ཞུགས་པས་ཏིང་ངེ་འཛིན་གྱིས་སྒྲིབ་པ་ཐམས་ཅད་བསལ་བས་ཆོས་སྟོན་པ་ལ་མངའ་བརྙེས་ཞེས་པའི་དོན་ཏོ། །འགྲེལ་པ་ལས་མངའ་བརྙེས་པ་ཡང་རྣམ་པ་གཉིས་ཏེ། སེམས་ཅན་སོ་སོའི་དབང་པོ་དང་མཐུན་པར་བསྟན་
པས་བྱང་ཆུབ་ཀྱི་ཕྱོགས་ལ་འཛུད་ཅིང་སོ་སོའི་ཐབས་དང་གཉེན་པོ་ལ་སྦྱོར་བས་ཟག་པ་མེད་པའི་ལམ་སྟོན་པ་དང༌། གཉིས་སུ་སེམས་ཅན་རྣམས་ཐོག་མ་མེད་པའི་དུས་ནས་ཉོན་མོངས་པས་དམ་དུ་བཅིངས་པ་རྣམས་དེའི་གཉེན་པོར་རྣམ་པར་རྟོག་པ་དང་གཡོ་བ་དང༌། ཁྲོ་སེམས་ལ་སོགས་པའི་ལས་ཞི་བར་བྱ་བའི་ཕྱིར། ཏིང་ངེ་འཛིན་དེ་ལ་ཞུགས་ཤིང་མཐུས་དབང་སྒྱུར་བའོ། །འགྲེལ་པ་ལས་ཏིང་ངེ་འཛིན་དུ་ཞུགས་པའི་ཕྱིར་ས་གཡོ་བ་དང༌། སྔོན་བསྐལ་པ་གྲངས་མེད་པ་འདས་པའི་དོན་རྣམས་ཞེས་པའང་ཏིང་ངེ་འཛིན་དུ་ཞུགས་པ་ལས་འབྱུང་གི་གཞན་གྱིས་མ་ཡིན་ནོ། །བཅོམ་ལྡན་འདས་ཏིང་ངེ་འཛིན་དུ་མ་ཞུགས་པའི་ཐུགས་དང་སྤྱོད་པ་མི་མངའ་སྟེ། དུས་ཐམས་ཅད་དུ་ཏིང་ངེ་འཛིན་གྱི་སྤྱོད་པ་དང་ལྡན་པའོ་ཞེས་འབྱུང་ན། ཅིའི་ཕྱིར་བཅོམ་ལྡན་འདས་ཏིང་ངེ་འཛིན་དུ་བཞུགས་ཞེས་སྨོས་སོ། །དོན་རྣམ་པ་བཅུའི་ཕྱིར་ཏེ། ཏིང་ངེ་འཛིན་དུ་ཞུགས་པ་དང༌། ཏིང་ངེ་འཛིན་ལས་བཞེངས་པས་འགྲོ་བ་ལ་ཕན་འདོགས་པའི་ཕྱིར་དང༌། བཅོམ་ལྡན་འདས་ཆོས་ཉིད་ཀྱི་ཏིང་ངེ་འཛིན་དུ་ཞུགས་ནས་འོད་གཏོང་བ་ལ་སོགས་པ་མཛད་པའི་ཕྱིར་ཏིང་ངེ་འཛིན་དུ་མ་ཞུགས་ན་ལྟས་དེ་དག་ཀྱང་བཅོམ་ལྡན་འདས་ཀྱི་མ་ཡིན་པར་དོགས་པ་བསལ་བ་དང༌། ཡང་ན་ཆོས་སྟོན་པ་ཏིང་ངེ་འཛིན་གྱི་དབང་པོ་བསྡུ་བར་བསྟན་པ་དང༌། ཆོས་ཟབ་མོ་ནི་ཏིང་ངེ་འཛིན་དུ་མ་ཞུགས་པས་ཆུད་དཀའ་སྟེ་གུས་པ་སྐྱེ་བར་བསྟན་པ་དང༌། ཤེས་རབ་ནི་ཏིང་ངེ་འཛིན་དུ་ཞུགས་པས་གདོད་སྐྱེའི་གཞན་གྱིས་མ་ཡིན་ཞེས་ཏིང་ངེ་འཛིན་བསྒོམས་པ་ལ་གཟུང་བའི་ཕྱིར་དང༌། ཏིང་ངེ་འཛིན་དང་ཤེས་རབ་རྫོགས་པས་ཆོས་སྟོན་གྱི་མ་རྫོགས་པས་ནི་མ་ཡིན་པར་བསྟན་པ་དང༌། མ་འོངས་པ་ན་ཆོས་སྟོན་པ་རྣམས་ཚུལ་དེ་དང་འདྲ་བའི་སེམས་ཀྱིས་ཆོས་སྟོན་ཅིག་པར་བསྟན་པ་དང༌། ཚུལ་འདི་བསྟན་པས་གཞན་དག་ཀྱང་སེམས་ཤིན་ཏུ་ངེས་པར་བྱས་པ་ནི་ཐོས་པ་འཛིན་པའི་མཚན་ཉིད་པས་གཞན་དག་ཀྱང་སེམས་ངེས་པར་བསྟན་པ་དང༌། ཏིང་ངེ་འཛིན་དུ་ཞུགས་ཏེ་ལྟས་མང་པོ་བསྟན་པས་འཕགས་པ་བྱམས་པ་ལ་སོགས་པ་ཆོས་གསོལ་བའི་རྟོག་པ་སྐྱེའི་གཞན་གྱིས་མ་ཡིན་པ་དང༌། ཡང་གསང་བ་གསུམ་བསྟན་པའི་ཕྱིར་ཏེ། ཏིང་ངེ་འཛིན་དུ་ཞུགས་པས་ཐུགས་གསང་བ་དང༌། འོད་
ལ་སོགས་པའི་ལྟས་ཀྱིས་སྐུ་གསང་བ་དང༌། ཆོས་སྟོན་པས་གསུང་གི་གསང་བ་བསྟན་པའོ། །ཡང་རྟོག་པ་ན་རེ་དམ་པའི་ཆོས་པུཎྜ་རཱི་ཀ་འཆད་པར་དགོངས་ན་དམ་ཆོས་པདྨ་དཀར་པོའི་ཏིང་ངེ་འཛིན་ལ་འཇུག་པར་འོས་ཀྱི་དོན་མཐའ་ཡས་པའི་ཏིང་ངེ་འཛིན་ལ་འཇུག་པར་མི་འོས་སོ་ཞེས་པ་ལ། དེ་ནི་ཇི་ལྟར་རྡོ་རྗེ་གཅོད་པ་ལས་ཀྱང༌། ལུས་བསྲང་དྲན་པ་མངོན་དུ་བཞག་སྟེ་ཆོས་སྟོན་ཏོ་ཞེས་འབྱུང་བ་བཞིན་ཏེ། སྔར་མཐའ་ཡས་གདོན་མི་ཟ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཕྱིས་དམ་པའི་ཆོས་པུཎྜ་རཱི་ཀ་སྟོན་པ་ཡང་སྔ་མ་ནི་བྱང་ཆུབ་སེམས་དཔའི་ཆེད་དུ་བསྟན། ཕྱི་མ་ནི་ཉན་ཐོས་རྣམས་ཀྱི་ཆེད་དུ་བསྟན། ཡང་སྔ་མ་ནི་རང་བཞིན། ཕྱི་མ་ནི་བྱེད་པའི་ལས་བསྟན་ཏེ། སོ་སོའི་དབང་པོའི་རིམ་པ་དང་སྦྱར་ཏེ་མིང་དུ་བཏགས་པས་འགལ་བ་མེད་དོ། །མདོ་ལས་བཅོམ་ལྡན་འདས་སྙོམས་པར་ཞུགས་མ་ཐག་ཏུ་ཞེས་པ་ནས། མེ་ཏོག་གི་ཆར་མངོན་པར་བབ་ཅིང་འབྲུལ་ལོ་ཞེས་པའི་བར་དུ་ནི་སྣོད་ཀྱི་འཇིག་རྟེན་རྣམ་པ་གཉིས་ལ་མེ་ཏོག་བྲུལ་བ་དང་ས་གཡོ་བ་སྟེ། ད་འདིར་མེ་ཏོག་འབྲུལ་བ་ནི་མེ་ཏོག་ཡིད་དུ་འོང་བ་དང༌། དགའ་བར་བྱེད་པ་དག་ཡིན་པས་ཆོས་འདི་ཉན་པ་རྣམས་སེམས་ཞི་ཞིང་དགའ་བ་བསྐྱེད་པའི་ཕྱིར་རོ། །མེ་ཏོག་དེ་དག་གི་ཡོན་ཏན་ཡང་རྣམ་པ་ལྔ་སྟེ། ཁ་བྱེ་ཞིང་ཟུམ་པ་ཡང་ཆོས་འདི་ཐོས་པས་ཉོན་མོངས་པའི་དྲི་མ་བསལ་བར་བསྟན་པ་དང༌། འཇིག་རྟེན་གྱི་རྒྱན་དུ་བྱེད་པ་ནི་ཆོས་འདི་ཐོས་པས་ཡོན་ཏན་མང་པོས་ལུས་རྒྱན་དུ་བྱེད་པ་དང༌། ཁ་འབྱེ་བས་ནི་ཐེག་པ་རྣམ་གཅིག་དོན་འབྱེད་པར་སྟོན་པ་དང༌། མེ་ཏོག་གི་རྗེས་ལ་འབྲས་བུ་འབྱུང་བ་བཞིན་ཆོས་འདི་ཐོས་པས་བྱང་ཆུབ་ཆེན་པོའི་འབྲས་བུ་ཐོབ་པ་དང༌། དྲི་ཞིམ་པོ་ཡིད་དུ་འོང་བ་ནི་ཆོས་འདི་ཐོས་པས་ནང་གི་ཡོན་ཏན་ཕུན་སུམ་ཚོགས་པས་ཕྱོགས་བཅུའི་འཇིག་རྟེན་གྱི་ཁམས་ཡོན་ཏན་ཡིད་དུ་འོང་བས་ཁྱབ་པར་གྱུར་པའོ། །ལྷའི་མེ་ཏོག་རྣམ་པ་བཞི་སྨོས་པ་ནི་འཁོར་རྣམ་པ་ཞིས་འཕགས་པའི་ཡོན་ཏན་ཆོས་བཞི་པ་རྫུ་འཕྲུལ་གྱི་རྐང་པ་བཞི་ལ་སོགས་པ་ཐོབ་པ་དང༌། མདུད་པ་ལ་སོགས་པ་སྤྱོད་པའི་དོན་དུ་བསྟན་ཏོ། །མདོ་ལས་སངས་རྒྱས་ཀྱི་ཞིང་ཐམས་ཅད་ཀྱང་རྣམ་པ་དྲུག་ཏུ་གཡོས་
པར་གྱུར་ཏོ་ཞེས་པ་ནི་དེ་བཞིན་གཤེགས་པ་ཤཱཀྱ་ཐུབ་པའི་ཞིང་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཏེ། གཡོ་འགུལ་ཞེས་པའི་དོན་ཏོ། །ཞིང་ཐམས་ཅད་ཅེས་པ་ནི་ཞིང་དེ་གཡོས་པ་ལ་བྱའི། ཕྱོགས་བཅུའི་འཇིག་རྟེན་གྱི་ཁམས་གཡོ་བ་ནི་མ་ཡིན་ནོ། །དེ་གཡོ་བ་ཡང་རྣམ་པ་གསུམ་སྟེ། དེ་བཞིན་གཤེགས་པ་ཡུམ་གྱི་ལྷུམས་སུ་ཞུགས་པ་དང༌། བལྟམས་པ་དང༌། རབ་ཏུ་བྱུང་བ་དང༌། མངོན་པར་བྱང་ཆུབ་པ་དང༌། ཆོས་ཀྱི་འཁོར་ལོ་བསྐོར་བ་དང༌། མྱ་ངན་ལས་འདས་པའི་དུས་སུ་གཡོ་སྟེ་འདི་ནི་ཆོས་ཀྱི་འཁོར་ལོ་བསྐོར་བ་དང་སྦྱར་བའོ། །ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཆེན་པོའི་མདོ་ལས་རྣམ་པ་དྲུག་ཏུ་གཡོ་བ་སྟེ། ཤར་ཕྱོགས་དམའ་ན་ནུབ་ཕྱོགས་མཐོ། །མཐའ་དམའ་ན་དབུས་མཐོ་བའི་བར་དུ་སྟེ་དྲུག་གོ །ཡང་མཚན་ཉིད་དྲུག་ཏུ་གཡོ་བ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ལས་འགུལ། རབ་ཏུ་འགུལ་ཞེས་བྱ་བ་ནས་འཁྲུགས་རབ་ཏུ་འཁྲུགས་པའི་པར་དུ་སྟེ། འགུལ་ཞེས་པ་ནི་ཆུང་དུ་འགུལ་བའོ། །རབ་ཏུ་འགུལ་བ་ནི་ཕྱོགས་ཐམས་ཅད་འགུལ་བ་སྟེ། འོག་མའི་རྣམས་ཀྱང་དེ་བཞིན་དུ་སྦྱོར་རོ། །དེ་བསྒུལ་བ་ཅིར་དགོངས་ཤེ་ན། དོན་རྣམ་པ་བདུན་གྱི་ཕྱིར་ཏེ། བདུད་དང་མུ་སྟེགས་ཅན་རྣམས་སྡང་བ་དང༌། སེམས་གཡེང་བའི་འཁོར་རྣམས་སེམས་བསྡུ་བ་དང༌། ཡང་དྲེགས་པ་ལ་གནས་པ་རྣམས་ཆོས་ལ་གཟུད་པའི་ཕྱིར་གཞན་གདབ་པ་དང༌། ཆོས་ཀྱི་མཚན་ཉིད་ལ་སེམས་སུ་གཞུག་པ་དང༌། རྟོགས་པའི་གནས་བསྟན་པ་དང༌། སྨིན་པ་རྣམས་གྲོལ་བ་ཐོབ་པར་བྱ་བ་དང། ཡང་དག་པའི་དོན་འདྲི་བར་བསྐུལ་བའི་ཕྱིར་ས་གཡོ་བ་བསྟན་ཏོ། །མདོ་ལས་ཡང་དེའི་ཚེ་འཁོར་དེར་གང་དགེ་སློང་དང་ཞེས་པ་ནས། བཅོམ་ལྡན་འདས་ལ་ལྟ་ཞིང་ངོ་མཚར་དུ་གྱུར་རྨད་དུ་གྱུར་དགའ་བར་གྱུར་ཏོ་ཞེས་པའི་བར་དུ་ནི་འདི་མན་ཆད་བཅུད་ཀྱི་འཇིག་རྟེན་བསྟན་ཏེ། དེ་ཡང་ཚོགས་བཞིར་བསྡུའོ། །འཁོར་བཞི་པ་དང༌། འཁོར་བརྒྱད་པ་དང༌། རྒྱལ་པོ་གཉིས་དང་མངོན་པར་དགའ་བ་རྣམས་སོ། །མདོ་ལས་བཅོམ་ལྡན་འདས་ཀྱི་སྨིན་མཚམས་ཀྱི་བར་གྱི་མཛོད་སྤུ་ནས་འོད་ཟེར་གཅིག་བྱུང་ཞེས་པ་ནི་དེ་མན་ཆད་བཤད་པའི་རྒྱུ་ཕུན་སུམ་ཚོགས་པ་བསྟན་
ཏེ། འགྲེལ་པ་ལས་འགྲོ་བ་ཕ་ལ་པོ་ཆེ་རྣམས་དེ་ལྟ་བུའི་ལྟས་ངོ་མཚར་དུ་གྱུར་པ་མཐོང་ན་དེ་བཞིན་གཤེགས་པ་དེ་ཡང་བདག་ཅག་ལ་ཆོས་འཆད་དོ་སྙམ་པའི་སྤྲོ་བའི་སེམས་སྐྱེ་བའི་བཤད་པའི་རྒྱུ་ཕུན་སུམ་ཚོགས་པ་སྟེ། འོད་དེ་བཏང་བས་འཇིག་རྟེན་གྱི་ཁམས་ན་དོན་གྱི་རྣམ་པ་ཐམས་ཅད་སྣང་བར་མཛད་དོ། །ཡང་བཅོམ་ལྡན་འདས་ཆོས་སྟོན་པ་ནི་འགྲོ་བ་མང་པོ་ལ་ཕན་པའི་ཆེད་པས་ཉན་པ་རྣམས་སྤྲོ་ཞིང་ཐོས་པར་དཀའ་བའི་སེམས་སྐྱེ་བའི་ཕྱིར་བཤད་པའི་རྒྱུ་ཞེས་བྱ་བས་དེའི་ཕྱིར་འོད་ཀྱིས་རྒྱང་རིང་པོ་ཚུན་ཆད་སྣང་བར་མཛད་དོ། །རྣམ་པ་གཉིས་སུ་རྣམ་པ་དྲུག་ཏུ་གཡོ་བར་བསྟན་ནས། དེའི་འོག་ཏུ་ཆོས་བསྟན་པར་མཛད་པ་ནི། ཆོས་ཟབ་མོ་རང་གི་རིག་པའི་དོན་ཡིན་པས་སྔར་ཆོ་འཕྲུལ་བསྟན་ཏེ་གཟོད་ཆོས་འདི་སྟོན་པར་མཛད་པས་དེའི་ཕྱིར་ཆོས་བཤད་པའི་རྒྱུ་ཞེས་བྱའོ། །སྔར་ལྷའི་མེ་ཏོག་འབྲུལ་བ་དང་ས་རྣམ་པར་གཡོ་བ་བསྟན་པ་ཡང་ངོ་མཚར་དུ་བྱ་བ་ཡིན་མོད་ཀྱི་འོད་ཀྱིས་སྣང་བར་མཛད་པ་འདི་ཉིད་ཆོས་ཟབ་མོ་རང་གི་རིག་པ་བསྟན་པའི་ལྟས་བསམ་གྱིས་མི་ཁྱབ་པར་ཀུན་གྱིས་མཐོང་བས་བཤད་པའི་རྒྱུ་ཞེས་བྱའོ། །འོད་གཏོང་བ་དང་ཡུལ་སྣང་བར་མཛད་པ་མཐོང་བར་བྱེད་པ་སྟ། འདི་ནི་དང་པོ་སྨིན་མ་བཞིན་གྱི་རྒྱན་ཡིན་པ་བཞིན་ཐེག་པ་ཆེན་པོའི་གཞུང་དེ་ཡང་གཙོར་ཡིན་པར་བསྟན་པ་དང༌། མཚམས་ཞེས་བསྟན་པས་དབུ་མའི་དོན་མཚོན་པ་དང༌། དཀར་པོ་ཞེས་སྨོས་པས་ཁ་དོག་ཐམས་ཅད་ཀྱི་གཞི་ཡིན་ཏེ། དེ་བཞིན་དུ་མདོ་སྡེ་འདི་ཡང་ཐེག་པ་རྣམ་གསུམ་གྱི་གཞི་ཡིན་པར་བསྟན་པའོ། །མཛོད་སྤུ་དེ་ཡང་ཤིན་ཏུ་དཀར་པ་བརྐྱང་ན་རིང་པ། བསྐུམ་ན་ཐུང་བའོ། །འོད་དེ་ཡང་རྣམ་པ་བདུན་ཏེ། མི་ཆེན་པོའི་ཆ་ཡིན་པས་འགྲོ་བ་དད་པ་སྐྱེ་བར་འགྱུར་བ་དང༌། མུན་པ་སེལ་བས་མ་རིག་པའི་ས་འཇོམས་པ་དང༌། སྣང་བ་དེས་མཚོན་པས་འཇིག་རྟེན་ནས་འདྲེན་བ་དང་ནང་གི་བསྟན་པ་ཡེ་ཤེས་ཀྱི་འོད་ཡིན་པར་མཚོན་པ་དང༌། འོད་ཀྱིས་རེག་པ་རྣམས་སྡུག་བསྔལ་ཞི་བར་བྱེད་པ་དང༌། འོད་ཀྱིས་རེག་པ་རྣམས་ཆོས་ཉན་པར་བསྐུལ་བ་དང༌། ཡུལ་ལ་ཆགས་པ་རྣམས་སྐྱོ་བ་བསྐྱེད་པའི་ཕྱིར་ཏེ་བདུན་ནོ། །གཅིག་ཏུ་རྫུ་འཕྲུལ་བཤད་པའི་སྐབས་སུ་
བསྟན་ཏོ། །མདོ་ལས་དེ་ཤར་ཕྱོགས་སུ་སངས་རྒྱས་ཀྱི་ཞིང་སྟོང་ཕྲག་བཅོ་བརྒྱད་ཅེས་པ་ནས་འོད་ཀྱིས་ཤིན་ཏུ་ཁྱབ་པར་སྣང་ངོ་ཞེས་པའི་བར་དུ་ནི་ཡུལ་སྣང་བར་མཛད་པ་བསྟན་པ་སྟེ། ཞིང་ནི་སྟོང་ཕྲག་བཅོ་བརྒྱད་པའོ། །ཤར་ཕྱོགས་ཞེས་སྨོས་པ་ནི་ཕྱོགས་ཀྱི་གཙོ་བོ་ཡིན་པ་བཞིན་བསྟན་པ་འདི་ཐེག་པའི་གཙོ་བོ་ཡིན་པའོ། །དང་པོ་དེར་འཆར་བ་ཡང་དཔེར་ཉི་མ་རི་མཐོ་མཐོ་ལ་དང་པོར་འཆར་བ་བཞིན་མདོ་སྡེ་འདི་ཡང་དང་པོར་དབང་པོ་སྨིན་པ་རྣམས་ལ་སྣང་བར་མཛད་དོ། །སེམས་ཅན་དམྱལ་བ་སྣང་བར་མཛད་པ་ནི་སྡུག་བསྔལ་ཞི་བར་མཛད་པ། ལྷའི་ཁམས་སྣང་བར་མཛད་པ་ནི་ཐེག་པ་ཆེན་པོ་ཉན་པར་བསྐུལ་བ་སྟེ། ཐུགས་རྗེས་ཁྱབ་པར་མཛད་ཅེས་པའི་དོན་ཏོ། །སེམས་ཅན་དམྱལ་བ་བསྟིར་མེད་པ་ཞེས་པ་ནི་སྡུག་བསྔལ་མྱོང་བ་མནར་བའི་སྐབས་མེད་པའི་ཕྱིར་རོ། །མདོ་ལས་སངས་རྒྱས་ཀྱི་ཞིང་དེ་དག་གི་འགྲོ་བ་དྲུག་ན་སེམས་ཅན་གང་ཡོད་པ་དེ་དག་ཐམས་ཅད་མ་ལུས་པར་སྣང་ངོ་ཞེས་པ་ནི་འདི་སྣང་བར་བྱ་བའི་ཡུལ་བསྟན་ཏེ། དེ་ཡང་རྣམ་པ་བདུན་ནོ། །འགྲོ་བ་དྲུག་དང་སངས་རྒྱས་དང་ཆོས་དང་དགེ་འདུན་དང༌། བྱང་ཆུབ་སེམས་དཔའ་དང་མྱ་ངན་ལས་འདས་པ་རྣམས་དང༌། མཆོད་རྟེན་རྣམས་སོ། །དེ་ཡང་དུམ་བུ་གསུམ་དུ་དབྱེ་སྟེ། འཁོར་བར་འཁོར་པའི་སེམས་ཅན་རྣམས་སྣང་བར་བྱས་པ་དང༌། དཀོན་མཆོག་གསུམ་སྣང་བར་བྱས་པ་དང༌། མྱ་ངན་ལས་འདས་པའི་སྤྱོད་པ་བསྟན་པའོ། །འགྲོ་བ་དྲུག་ལ་ཡང་དྲུག་ཏུ་དབྱེ་སྟེ། དེའི་མིང་བསྟན་པ་དང༌། བསྐྱེད་པའི་རྒྱུ་དང༌། དབྱེ་བ་དང་བསྡུ་བ་བསྟན་པ་དང༌། གནས་བསྟན་པ་དང༌། ཚེའི་ཚང་བསྟན་པ་དང༌། རྒྱུ་དང་འབྲས་བུའི་མཚན་ཉིད་བསྟན་པའོ། །མིང་བསྟན་པ་ནི་དྲུག་ཅེས་པ་ནི་གྲངས་སོ། །འགྲོ་བ་ཞེས་པ་ནི་ཉོན་མོངས་པ་དང༌། ལས་ཀྱིས་བསྐྱེད་པའི་ཕུང་པོ་ལྔ་ལ་གནས་པ་འགྲོ་བ་སྣ་ཚོགས་སུ་འགྲོ་ཞེས་པའི་དོན་ཏོ། །རང་གིས་བྱས་པའི་ལས་ལ་སྤྱོད་པའི་ཕྱིར་ལྷའོ། །ཡང་ན་འདོད་པ་དང་རྫུ་འཕྲུལ་དུ་ལྡན་པ་ནི་ལྷའོ། །སེམས་པ་མང་བ་ནི་མིའོ། །བཀྲེས་པའི་སྡུག་བསྔལ་གྱིས་མནར་བ་ནི་ཡི་དགས་སོ། །དུད་དེ་འགྲོ་བས་དུད་འགྲོའོ། །གཏུབ་པ་དང་གཤེགས་པ་ལ་སོགས་པའི་གཞིར་གྱུར་པའི་ཕྱིར་དམྱལ་བའོ། །ལྷ་མ་ཡིན་ནི་སྔར་
བསྟན་པ་ཡིན་ནོ། །སྐྱེད་པའི་རྒྱུ་ནི་འགྲོ་བ་དྲུག་པོ་ཀུན་ཀྱང་རྣམ་པར་སྨིན་པའི་རྣམ་པར་ཤེས་པས་བསྐྱེད་པའི་རང་བཞིན་ཅན་མ་བསྒྲིབས་ལ་ལུང་དུ་མ་བསྟན་པའོ། །བསྡུ་བ་དང་དབྱེ་བ་ལ། འགྲོ་བ་དྲུག་ཅེས་པ་ནི་བསྡུ་བའོ། །དེ་ཡང་དགེ་བ་བསྐྱེད་པ་དང༌། མི་དགེ་བ་བསྐྱེད་པ་ནི་དབྱེ་བའོ། །ཡང་ན་འཁོར་བ་ཞེས་པ་ནི་བསྡུ་བའོ། །སྲིད་པ་གསུམ་དང་སྐྱེ་བ་རྣམ་བཞི་ནི་དབྱེ་བའོ། །གནས་ནི་ཁམས་གསུམ་པའོ། །མདོ་ལས་སངས་རྒྱས་ཀྱི་ཞིང་དེ་དག་ན་སངས་རྒྱས་བཅོམ་ལྡན་འདས་བཞུགས་ཤིང་འཚོ་སྐྱོང་བ་ནས་འབྲས་བུ་ཐོབ་པ་དང་མ་ཐོབ་པ་ཐམས་ཅད་ཀྱང་སྣང་ངོ་ཞེས་པ་ནི་འདི་ནི་དཀོན་མཆོག་གསུམ་འབྱུང་བ་བསྟན་པ་སྟེ། སངས་རྒྱས་དང་ཆོས་དང་དགེ་འདུན་སྣང་བའོ། །དགེ་འདུན་ལ་ཡང་རྣམ་པ་གཉིས་ཏེ། ཉན་ཐོས་ཀྱི་དགེ་འདུན་དང་བྱང་ཆུབ་སེམས་དཔའི་དགེ་འདུན་ནོ། །ཉན་ཐོས་ཀྱི་དགེ་འདུན་ལ་ཡང་འཕགས་པའི་འབྲས་བུ་ཐོབ་པ་དང་རྣལ་འབྱོར་པ་ལམ་ལ་གནས་ཤིང་འབྲས་བུ་མ་ཐོབ་པ་དང་རྣམ་པ་གཉིས་སོ། །མདོ་ལས་སངས་རྒྱས་ཀྱི་ཞིང་དེ་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་པ་ནས་སྤྱོད་པ་ཐམས་ཅད་སྣང་ངོ་ཞེས་པ་ནི་བྱང་ཆུབ་སེམས་དཔའི་དགེ་འདུན་ཏེ། འགྲོ་བ་མང་པོ་སྡུག་བསྔལ་གྱི་ས་ནས་འདོན་པའི་ཕྱིར་དད་པ་དང་ཐབས་སྣ་ཚོགས་ཀྱིས་བྱང་ཆུབ་ཀྱི་ཕྱོགས་ལ་འཛུད་ཅིང་སྤྱོད་པ་དང་སངས་རྒྱས་ཀྱི་ཞིང་ཡོངས་སུ་བརྒྱན་པའི་ཕྱིར་བསྡུ་བ་རྣམ་པ་བཞི་དང༌། ཕ་རོལ་ཏུ་ཕྱིན་པ་ལ་སོགས་ཏེ་བྱང་ཆུབ་ཀྱི་སྤྱོད་པ་སྣ་ཚོགས་སྤྱོད་པ་ནི་བྱང་ཆུབ་སེམས་དཔའི་སྤྱོད་པ་སྟེ། དད་པ་ནི་མོས་པས་སྤྱོད་ཅིང་འཕགས་པའི་འབྲས་བུ་མ་ཐོབ་པའི་སའོ། །འགྲེལ་པ་ལས་ཀྱང་བསྡུ་བ་རྣམ་པ་བཞིས་སེམས་ཅན་ཐམས་ཅད་ཐབས་སུ་སྡུད་ཅིང་བསྟན་པ་ལ་འཇོག་པ་ནི་བྱང་ཆུབ་སེམས་དཔའི་སྤྱོད་པ་སྟེ། སྦྱིན་པ་དང་ཚིག་སྙན་པ་དང་དོན་སྤྱོད་པ་དང་དོན་མཐུན་པས་འདྲེན་པའོ། །མདོ་ལས་སངས་རྒྱས་ཀྱི་ཞིང་དེ་དག་ན་རིང་བསྲེལ་གྱི་མཆོད་རྟེན་རིན་པོ་ཆེ་ལས་བྱས་པ་སྣང་ངོ་ཞེས་པ་ནི་མྱ་ངན་ལས་འདས་པའི་འོག་གི་སྤྱོད་པ་བསྟན་པ་སྟེ། མྱ་ངན་ལས་འདའ་བར་འཇུག་པ་དང་མཆོད་རྟེན་བསྟན་པའོ། །མྱ་ངན་ལས་འདས་པ་
ཡང་རྣམ་པ་དྲུག་སྟེ། རང་བཞིན་དང་མིང་དང་དུས་དང་གང་ཟག་དང་བསྟན་པ་དང༌། མྱ་ངན་ལས་འདའ་བར་འཇུག་པའི་དོན་ཏོ། །རང་བཞིན་ལ་རྣམ་པ་བཞི་སྟེ། རང་བཞིན་གྱིས་མྱ་ངན་ལས་འདས་པ་དང༌། ལྷག་མ་དང་བཅས་པ་དང༌། ལྷག་མ་མེད་པའི་མི་གནས་པའི་མྱ་ངན་ལས་འདས་པའོ། །དེ་བཞི་སྤྱིར་མྱ་ངན་ལས་འདས་པ་སྟེ་ཡང་དག་པ་ཉིད་དུ་དོན་གཅིག་པའོ། །བཅོམ་ལྡན་འདས་མངོན་པར་བྱང་ཆུབ་ནས་སེམས་ཅན་མ་གྲོལ་བ་རྣམས་གྲོལ་བར་མཛད་དོ། །རྒྱུ་ཡོད་པ་རྣམས་མྱ་ངན་ལས་འདས་པའི་འོག་ཏུ་མཆོད་རྟེན་བཞག་པས་གྲོལ་བར་འགྱུར་བའི་རྒྱུ་བསྟན་ཏོ། །མདོ་ལས་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་སྙམ་དུ་སེམས་ཏེ། དེ་བཞིན་གཤེགས་པས་ཆོ་འཕྲུལ་ཆེན་པོ་མཛད་པ་འདི་ཅིའི་ལྟས་ཞེས་པ་ནི་འཁོར་མང་པོ་རྣམས་ལྟས་དེ་དག་དབང་པོ་ཞན་པ་རྣམས་ཀྱིས་ཅིའི་ལྟས་སུ་བསྟན་པ་མི་ཤེས་པས་འཕགས་པ་བྱང་ཆུབ་སེམས་དཔའ་བྱམས་པས་འགྲོ་བ་མང་པོའི་ཐེ་ཚོམ་བསལ་བའི་ཕྱིར་འདྲི་བར་བརྩམས་སོ། །མདོ་འདིའི་དོན་བདག་གིས་སུ་ལ་དྲི། ལན་ལྡོན་སུས་ནུས། དེ་ཡང་འདི་ལྟར་ཞེས་པ་ནས་འཇམ་དཔལ་གཞོན་ནུར་གྱུར་པ་ལ་དོན་འདི་འདྲི་འོ་སྙམ་དུ་བསམས་པ་ནི་བཅོམ་ལྡན་འདས་ཀྱིས་ཆོ་འཕྲུལ་བསམ་གྱིས་མི་ཁྱབ་པ་བསྟན་པ་འདི་འཇམ་དཔལ་གཞོན་ནུར་གྱུར་པ་ལ་འདྲིའོ་ཞེས་པ་ལེགས་པ་ཆེན་པོ་འཇམ་དཔལ་ལ་ཡོད་པ་བསྟན་པ་སྟེ། སྔོན་གྱི་རྒྱལ་བ་ལ་བྱ་བ་བྱས་ནས་ཆོས་ཀྱི་རྒྱལ་ཚབ་ཏུ་དབང་བསྐུར་བ་སྟེ། འགྲེལ་པ་ལས་ཀྱང་དོན་ཟབ་མོ་གཅིག་ལ་དྲིས་དང་མང་པོ་ཐོས་པར་འགྱུར་བས་ཀུན་གྱི་ཐེ་ཚོམ་གཅོད་པ་ནི་འཇམ་དཔལ་གཞོན་ནུར་གྱུར་པའོ་ཞེས་འབྱུང༌། ཡང་འགྲེལ་པ་ལས་ཀྱང་སངས་རྒྱས་དང་བྱང་ཆུབ་སེམས་དཔའ་དགོངས་པ་མཐུན་པར་གྱུར་པས་སྒྲུབ་པ་དང་བཤད་པའི་ཆོས་གཉི་ག་འགྲུབ་པར་འགྱུར་བའི་ཕྱིར་ལྟས་ཆེན་པོ་བསྟན་པའི་དོན་དམ་པའི་ཆོས་འདི་ཉིད་བཤད་པའི་གླེང་གཞི་ཡིན་པའི་ཕྱིར་རོ། །ཆོས་འདི་ཐེ་ཚོམ་ཅིའི་ཕྱིར་འཇམ་དཔལ་གཞོན་ནུར་གྱུར་པ་འབའ་ཞིག་ལ་དྲི་ཞེ་ན། དོན་རྣམ་པ་གཉིས་ཀྱི་ཕྱིར་ཏེ། ཆོས་འདི་ཉིད་འཇམ་དཔལ་གཞོན་ནུར་གྱུར་པ་འབའ་ཞིག་གིས་མངོན་དུ་གྱུར་པའི་ཕྱིར་དང༌། རང་གི་སེམས་ཀྱིས་
རྟོགས་པ་ཉིད་ཡིན་གྱི། གཞན་ལ་མཉན་མི་དགོས་པའི་ཕྱིར་རོ། །ཡང་འགྲེལ་པ་ལས་འཇམ་དཔལ་གཞོན་ནུར་གྱུར་པས་དྲིས་པ་དེའི་ལུང་བསྟན་པར་ནུས་པ་ནི་འཇམ་དཔལ་དེ་ཕུན་སུམ་ཚོགས་པ་གཉིས་དང་ལྡན་པའི་ཕྱིར་ཏེ། བསོད་ནམས་ཕུན་སུམ་ཚོགས་པ་དང་ཡེ་ཤེས་ཕུན་སུམ་ཚོགས་པའོ། །རྒྱུ་དེ་གཉིས་ཕུན་སུམ་ཚོགས་པའི་ཕྱིར་ཆོས་དེ་སྟོན་པར་འོས་པའོ། །མདོ་ལས་དགེ་སློང་ཕ་དང་དགེ་སློང་མ་ནས་བདག་ཅག་གིས་སུ་ལ་དྲི་སྙམ་པའི་བར་དུ་ནི་དོན་སླ་བས་མ་བཤད་དོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ་ཞེས་པ་ནི་དོན་རྣམ་པ་གཉིས་ཀྱིས་གླེང་གཞི་ཆོས་འདྲི་བ་ལ་སྔར་ནི་ཚིག་ལྷུག་པས་བཤད། དེའི་འོག་ཏུ་ནི་ཚིགས་སུ་བཅད་པས་བསྡུས་ཏེ་བསྟན་པའོ། །མདོ་ལས་འཇམ་དཔལ་ལ་བཅོམ་ལྡན་འདས་ཀྱིས་གང་འདི་ལྟ་བུའི་ལྟས་ཞེས་པ་ནས་འདི་ཅིའི་རྒྱུ་ཅིའི་རྐྱེན་ཞེས་པའི་བར་དུ་ནི་ལྟས་དང་ཆོ་འཕྲུལ་དྲི་བ་བསྡུ་བའོ། །ཞིང་འདི་དག་སྣ་ཚོགས་བལྟ་ན་སྡུག་པ་ཞེས་པ་ནི་དེ་བཞིན་གཤེགས་པའི་ཞིང་རྣམ་པ་སྣ་ཚོགས་ཏེ། ཞིང་ཡོངས་སུ་དག་པ་དང་མ་དག་པ་རྣམས་སོ། །སངས་རྒྱས་ཐོག་མར་བཞུད་པ་ནི་བྱང་ཆུབ་སེམས་དཔའ་རྣམས་ཀྱི་འདྲེན་པ་ཡིན་པའི་ཕྱིར་རོ། །མདོ་ལས་ཚིགས་སུ་བཅད་པ་འདི་གསུངས་པ་ནི་འདི་ཚིགས་བཅད་ཀྱི་བསྡུ་བ་སྟེ་དུམ་བུ་བཅུར་དབྱེའོ། །དཔང་པོ་རྣོ་རྟུལ་གཉི་ག་ལ་ཕན་བ་དང་སྔ་ཕྱི་རྣམ་གཉིས་ཀྱི་འཁོར་བ་ལ་ཕན་གདགས་པ་དང༌། དྲང་པོ་དང་དེ་མ་ཡིན་པ་གཉིས་དགའ་བར་བྱ་བ་དང༌། དཀའ་སླ་གཉི་གའི་ཆེད་དང་དོན་དམ་པ་དང་ཀུན་རྫོབ་གཉི་གའི་དོན་དང༌། བླང་དོར་གཉི་གའི་ཆ་དང༌། གསལ་མི་གསལ་དབྱེ་བ་དང༌། ཤེས་པ་དང་སྤོབས་པ་དབྱེ་བ་དང༌། ཐེ་ཚོམ་དང་འཆིང་བ་དབྱེ་བ་དང༌། བཤད་པ་དང་སྤྱོད་པ་བསྟན་པའོ།། མདོ་ལས་འཇམ་དཔལ་ཞེས་པ་ནས་ཞལ་གྱི་མཛོད་སྤུ་ཞེས་པའི་བར་དུ་ནི་ཚིགས་སུ་བཅད་པ་འདི་དག་ལ་རྩ་བ་དྲུག་ཅུ་རྩ་གཉིས་ཡོད་དེ། དུམ་བུ་གཉིས་སུ་དབྱེའོ། །དང་པོ་རྩ་བ་ལྔ་བཅུ་རྩ་བཞིས་ནི་ལྟས་རྣམས་ཀྱི་དོན་བསྟན། རྩ་བ་བརྒྱད་ཀྱིས་ནི་དོན་འདྲི་བའོ། །དང་པོ་ལ་ཡང་རྣམ་པ་གསུམ་སྟེ།
ཚིགས་བཅད་དང་པོ་གཅིག་གིས་ནི་འོད་ཀྱིས་སྣང་བར་མཛད་པའི་གླེང་གཞི་སྟོན་ཏོ། །དེའི་འོག་མ་རྩ་བ་གསུམ་གྱིས་ནི་མེ་ཏོག་འབྲུལ་བ་དང་ས་གཡོ་བའི་སྤྱོད་ལམ་བསྟན་ཏོ། །དེའི་འོག་གི་རྩ་བ་ལྔ་བཅུས་ནི་ཡུལ་རྣམས་སྣང་བར་མཛད་པའི་གླེང་གཞི་བསྟན་ཏེ་འདི་ནི་དང་པོའོ། །མདོ་ལས། མེ་ཏོག་མན་དཱ་ར་བའི་ཆར་ཆེན་ཀྱང༌། ཞེས་པ་ནས་གང་གིས་དེ་ནི་ཀུན་དུ་མཛེས་པ་ཞེས་པའི་བར་དུ་དེ་ལ་རྩ་བ་གསུམ་གྱིས་ནི་སྤྱོད་ལམ་གསུམ་གྱི་དོན་བསྟན། རྩ་བ་ཕྱེད་དང་གཉིས་ཀྱིས་ནི་མེ་ཏོག་གི་ཆར་བབ་པ་བསྟན། རྩ་བ་ཕྱེད་ཀྱིས་ནི་ས་གཡོ་བ་བསྟན། རྩ་བ་གཅིག་གིས་ནི་འཁོར་བཞི་རབ་ཏུ་དགའ་བ་བསྟན། འདི་ནི་མེ་ཏོག་གི་ཆར་འབབ་པ་བསྟན་ཏོ། །མེ་ཏོག་དེ་དག་ཙན་དན་གྱི་དྲི་བསུང་དང་ལྡན་ཞིང་ཡིད་དུ་འོང་བས་ཞིང་དེ་མཛེས་པར་བྱེད་པའོ། །མདོ་ལས། འཁོར་བཞི་དེ་དག་ཤིན་ཏུ་དགའ་བ་འཐོབ། །ཞིང་འདི་ཐམས་ཅད་ཀུན་ནས་རབ་ཏུ་གཡོས། །ཞེས་པ་ནི་ས་གཡོ་བས་འཁོར་འདི་རྣམས་དགའ་བ་བསྟན་ཏོ། །མདོ་ལས། འོད་ཟེར་དེ་ཡིས་ཤར་གྱི་ཕྱོགས་ལོགས་སུ། །ཞེས་པ་ནས། བསྟིར་མེད་ཡན་ཆད་སྲིད་པའི་ཐོག་མའི་བར། །ཞེས་པའི་བར་དུ་ནི་ཚིགས་སུ་བཅད་པའི་རྩ་བ་བཅོ་ལྔས་ཡུལ་རྣམས་སྣང་བར་མཛད་པ་བསྟན་ཏེ། དེ་ལ་རྩ་བ་ཕྱེད་ཀྱིས་ནི་སྣང་བའི་ཡུལ་བསྟན། གཞན་གྱིས་ནི་ལྟ་བ་བསྟན་ཏེ། འདིས་ནི་སྣོད་ཀྱི་འཇིག་རྟེན་སྣང་བར་བྱེད་པ་བསྟན་ཏོ། །གསེར་གྱི་ཁ་དོག་དུ་སྣང་ཞེས་པ་ནི་ཐེག་པ་གཅིག་པོ་འདི་རིན་ཆེ་བར་བསྟན་པའོ། །མདོ་ལས། དེ་དག་ཞིང་གི་ཇི་སྙེད་སེམས་ཅན་དག །ཅེས་པ་ནས། འགྲོ་བ་བདེ་དང་མི་བདེ་རྣམས་ཀྱང་སྣང༌། །ཞེས་པའི་བར་དུ་ནི་སྣང་བར་བྱ་བ་རྣམས་བསྟན་ཏེ། །དུམ་བུ་དྲུག་ཏུ་དབྱེའོ། །ཚིགས་བཅད་རྩ་བ་ཕྱེད་དང་གཉིས་ཀྱིས་མི་འགྲོ་བ་དྲུག་པོ་རྣམས་བསྟན། རྩ་བ་ཕྱེད་ཀྱིས་ནི་སངས་རྒྱས་བཅོམ་ལྡན་འདས་བསྟན། དེའི་འོག་ཏུ་རྩ་བ་ཕྱེད་དང་བདུན་གྱིས་ནི་ཆོས་ཐོས་པ་བསྟན། ཡང་ཕྱེད་དང་གཉིས་ཀྱིས་ནི་འཁོར་བཞི་བསྟན། དེའི་འོག་ཏུ་རྩ་བ་སུམ་ཅུ་རྩ་གཅིག་གིས་ནི་བྱང་ཆུབ་སེམས་དཔའི་སྤྱོད་པ་བསྟན། རྩ་བ་བདུན་གྱིས་ནི་མྱ་ངན་ལས་འདས་པ་དང་མཆོད་རྟེན་བསྟན་ཏེ། འདིས་ནི་དང་པོ་ལས་དགེ་བ་དང་མི་དགེ་བས་བསྐྱེད་པའི་འགྲོ་བ་དྲུག་པོ་རྣམས་ལས་དང་ཉོན་མོངས་པས་བདེ་བ་དང་མི་
བདེ་བ་རྣམ་པར་སྨིན་པ་མྱོང་བར་བྱེད་པ་རྣམས་སྣང་བར་མཛད་པའོ། །ཡང་མདོ་ལས། བཟང་པོ་ངན་པ་དེ་བཞིན་བར་མ་ཡང༌། །ཞེས་པ་ནས། སངས་རྒྱས་ཆོས་འདི་རབ་ཏུ་སྟོན་པ་ནི། །ཞེས་པའི་བར་དུ་ནི་བཅོམ་ལྡན་འདས་སྣང་བ་བསྟན་ཏེ། བཅོམ་ལྡན་འདས་ཉིད་སེངྒེ་བཞིན་བག་ཚ་བ་མི་མངའ་བར་ཆོས་སྟོན་པ་ལ་མངའ་བརྙེས་པའོ། །སངས་རྒྱས་ཆོས་ནི་རབ་ཏུ་སྟོན་པ་ནི། ཞེས་པ་ནི། ཆོས་ཐོས་པ་བསྟན་ཏེ། སྤོབས་བ་སོ་སོ་ཡང་དག་པར་རིག་པས་དཔེ་དང་དོན་གསལ་བར་སྟོན་པའོ། །མདོ་ལས། སེམས་ཅན་གང་དག་སྡུག་བསྔལ་གཟིར་བ་རྣམས། ཞེས་པ་ནས། དེ་དག་ལ་ནི་བྱང་ཆུབ་ཕྱིར་བསྔགས་གསུང༌། །ཞེས་པའི་བར་དུ་ནི་ཐེག་པ་ཆེ་ཆུང་གསུམ་གྱི་རིམ་པ་བསྟན་ཏེ། མདོ་ལས་འབྱུང་བ་བཞིན་དུ་ཆུད་པར་བྱའོ། །མདོ་ལས། ཤིན་ཏུ་མཐོང་ཞིང་ཐོས་སོ་འཇམ་པའི་དབྱངས། །ཞེས་པ་ལས་ནི་ཆ་ཙམ་སྨོས་པར་བྱ་ཞེས་པའི་བར་དུ་ནི་ཚིགས་སུ་བཅད་པ་འདིས་ནི་འཁོར་རྣམ་བཞི་སྣང་བར་བསྟན་ཏེ། འཁོར་དེ་དག་གིས་ལམ་བསྒྲུབས་པ་དང་འབྲས་བུ་ཐོབ་པའང་སྣང་ཞེས་པའི་དོན་ཏེ། ཚིགས་གོང་མས་ནི་ཉན་ཐོས་ཚིག་འོག་མས་ནི་བྱང་ཆུབ་སེམས་དཔའི་ཐེག་པ་བསྟན་ཏོ། །མདོ་ལས་མཐོང་ཞིང་རྣམ་པ་མང་པོ་དག་ན་ཡང༌། །ཞེས་པ་ནས། བརྩོན་འགྲུས་སྣ་ཚོགས་བྱང་ཆུབ་བསྐྱེད་པ་དག །ཅེས་པའི་བར་དུ་ནི་བྱང་ཆུབ་སེམས་དཔའི་སྤྱོད་པ་བསྟན་ཏེ། ཚིགས་སུ་བཅད་པ་འདིས་ནི་བརྩོན་འགྲུས་སྣ་ཚོགས་བསྟན། རྩ་བ་བདུན་གྱིས་ནི་དངོས་པོ་བསྟན། ཡང་རྩ་བ་ཕྱེད་དང་བཅུ་བཞིས་ནི་མོས་པས་སྤྱོད་པ་སྣ་ཚོགས་བསྟན་ཏོ། །གང་གཱ་ཞེས་པ་ནི་ཆུ་བོ་མ་དྲོས་པ་ལས་ཆུ་བོ་བཞི་འབྱུང་བའི་གཅིག་གོ །དེ་བྱེ་མ་མང་བའི་ཕྱི་མང་བའི་དཔེར་བསྟན་ཏོ། །མདོ་ལས། ལ་ལ་སྦྱིན་པ་སྦྱིན་པའང་དེ་བཞིན་ཏེ། །ཞེས་པ་ནས། སྨོན་པ་དེ་བཞིན་གཤེགས་ཀྱི་ཡེ་ཤེས་ལ། །ཞེས་པའི་བར་དུ་འདིས་ནི་སྦྱིན་པ་སྣ་ཚོགས་ཀྱི་མཚན་ཉིད་བསྟན་ཏེ། འདི་ལའང་རྣམ་པ་གཉིས་སུ་དབྱེའོ། །དང་པོའི་ཚིགས་བཅད་བཅོ་ལྔས་ནི་ཕ་རོལ་ཏུ་ཕྱིན་པ་དྲུག་བསྟན། ཚིགས་སུ་བཅད་པ་གཉིས་ཀྱིས་ནི་རླུང་བརྒྱད་ཀྱིས་མི་བསྐྱོད་པར་བསྟན། ཚིགས་སུ་བཅད་པ་དྲུག་གིས་ནི་སྤྱིན་པ་བསྟན། དེའི་འོག་མ་གཉིས་ཀྱིས་ནི་ཚུལ་
ཁྲིམས་བསྟན། དེའི་འོག་མ་གཉིས་ཀྱིས་བཟོད་པ་དང་བརྩོན་འགྲུས་བསྟན། དེའི་འོག་མ་གཉིས་ཀྱིས་ནི་བསམ་གཏན་བསྟན། དེའི་འོག་མ་གསུམ་གྱིས་ནི་ཤེས་རབ་བསྟན་ཏོ། །སྦྱིན་པ་ལ་ཡང་རྣམ་པ་གསུམ་སྟེ། རྩ་བ་བཞིས་ནི་ཕྱིའི་ནོར་གྱིས་ཕན་གདགས་པ། དེའི་འོག་མ་གཅིག་གིས་ནི་ནང་གི་པན་གདགས་པ། དེའི་འོག་མ་གཅིག་གིས་ནི་ཕྱི་ནང་གཉིས་གའི་ཕན་གདགས་པའོ། །དང་པོ་བཞི་ལ་ཡང་རིན་པོ་ཆེ་བདུན་སྦྱིན་པ་དང་དབྱིག་བརྒྱད་སྦྱིན་པ་དང༌། ཐེག་པ་སྦྱིན་པ་དང༌། རྫས་སྣ་ཚོགས་སྦྱིན་པའོ། །རིན་པོ་ཆེ་བདུན་ནི་གསེར་དང་དངུལ་ལ་སོགས་པ་བདུན་ནོ། །དབྱིག་བརྒྱད་ནི་བྲན་ཕོ་མོ་དང༌། ཤིང་རྟ་དང༌། ཁྱོགས་རིན་པོ་ཆེས་སྤྲས་པ་ལ་སོགས་པའོ། །མདོ་ལས། འཇམ་དཔལ་བདག་གིས་མཐོང་བ་ལ་ལ་ན། །ཞེས་པ་ནས། ངུར་སྨྲིག་གོས་རྣམས་རབ་ཏུ་གྱོན་པར་བྱེད། །ཅེས་པའི་བར་དུ་འདིས་ནི་རབ་ཏུ་འབྱུང་བའི་མཚན་ཉིད་བསྟན་ཏེ། གང་རབ་ཏུ་བྱུང་ནས་འདུལ་བ་ལ་གནས་པ་དེ་སྤྱོད་པ་ཐམས་ཅད་ཀྱི་གཞི་ཡིན་པའི་ཕྱིར་རོ། །དེ་རབ་ཏུ་བྱུང་བའི་ཡོན་ཏན་ཡང་རྣམ་པ་ལྔ་སྟེ། དེ་བཞིན་གཤེགས་པ་རྣམས་ཀྱིས་སྐྱོབ་པ་དང༌། འཆི་ཀར་དགའ་བ་བསྐྱེད་པ་དང༌། ཚུལ་ཁྲིམས་བསྲུངས་པས་བཤེས་གཉེན་བཟང་བ་དང༌། ཡོན་ཏན་ཕུན་སུམ་ཚོགས་པ་དང༌། སྐྱེ་བ་ཐམས་ཅད་དུ་རབ་ཏུ་བྱུང་བའི་རྒྱུ་ལ་སོགས་པའོ། །མདོ་ལས། བདག་མཐོང་བྱང་ཆུབ་སེམས་དཔའ་ལ་ལ་དག །ཅེས་པ་ནས། ལ་ལ་ལུང་ནོད་ཁ་ཏོན་བྱེད་ལ་དགའ། །ཞེས་པའི་བར་དུ་འདིས་ནི་མདོ་སྡེ་དཀའ་བ་འདོན་ཅིང་མདོ་ཟབ་མོ་ལ་སེམས་པའི་བཟོད་པ་དང་ལྡན་པས་བཟོད་པ་དང་ལྡན་པ་བསྟན་ཏོ། །ཡང་མདོ་ལས། བདག་མཐོང་བྱང་ཆུབ་སེམས་དཔའ་ལ་ལ་དག །ཅེས་པ་ནས། ཡོངས་སུ་བསམས་པས་ཉེ་བར་རྟོགས་པར་གྱུར། །ཅེས་པའི་བར་དུ་འདིས་ནི་གོ་ཆ་བ་གོས་པ་དང་དགེ་བ་སྡུད་པའི་བརྩོན་འགྲུས་བསྟན་ཏེ། བརྩོན་འགྲུས་རྣམ་པ་ལྔ་དང་ལྡན་ཞེས་པའི་དོན་ཏོ། །ཡང་མདོ་ལས། ཁ་ཅིག་གིས་ནི་འདོད་པ་མ་ལུས་སྤངས། །ཞེས་པ་ནས། །ཚིགས་བཅད་སྟོང་གིས་རྒྱལ་བ་རྒྱལ་པོ་ལའོ། །ཞེས་པའི་བར་དུ་འདི་གཉིས་ཀྱིས་ནི་བསམ་གཏན་ལ་གནས་པ་བསྟན་ཏོ། །
བསམ་གཏན་གྱི་མངོན་པར་ཤེས་པ་ལ་སོགས་པ་བསྐྱེད་པས་དེ་བཞིན་གཤེགས་པ་མང་པོ་ལ་བསྟོད་པའི་སྤོབས་པ་སྐྱེ་བའོ། །མདོ་ལས། དྲན་དང་ལྡན་ཞིང་དུལ་བ་མི་འཇིགས་པ། །ཞེས་པ་ནས། །ཐོས་ནས་དེ་དག་ཆོས་རྣམས་འཛིན་པར་འགྱུར། །ཞེས་པའི་བར་དུ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྤྱོད་པ་ཟབ་མོ་དང་ལྡན་ཞིང་ཐོས་པ་འཛིན་པར་གྱུར་པའོ། །མདོ་ལས། ཡོངས་སུ་སྒོམ་པ་བདག་ཉིད་རྒྱལ་དབང་སྲས་པོ་རྣམས། །ཞེས་པ་ནས། །ཆོས་ཀྱི་རྔ་ནི་ཤིན་ཏུ་རྡུང་བར་བྱེད། །ཅེས་པའི་བར་དུ་ནི་ཤེས་རབ་དང་ཏིང་ངེ་འཛིན་དང་ལྡན་པར་གྱུར་པའོ། །ཆོས་སྟོན་པ་ནི་རྣམ་པ་བཞི་སྟེ། དགའ་བས་ཕན་འདོགས་པའི་ཕྱིར་སྟོན་པ་དང༌། བྱང་ཆུབ་སེམས་དཔའ་རྣམས་ཀྱི་ཆེད་དུ་སྟོན་པ་དང༌། བདུད་རྣམས་སྡང་བར་བྱེད་པ་དང༌། བཀྲི་བ་དང་ངེས་པའི་དོན་གྱིས་བརྡུང་བའོ། །མདོ་ལས། མངོན་པ་ལ་ལས་བདེ་གཤེགས་བསྟན་པ་ལ། །ཞེས་པ་ནས། །བསྙེམས་མེད་ཞི་ཞིང་རབ་ཏུ་ཞི་བར་སྤྱོད། །ཅེས་པའི་བར་དུ་ནི་འཇིག་རྟེན་གྱི་རླུང་བརྒྱད་ཀྱིས་མི་བསྐྱོད་པའི་དོན་ཏེ། འཇིག་རྟེན་གྱི་ཆོས་བརྒྱད་ནི་བསྟོད་པ་དང་སྨད་པ་ལ་སོགས་པའོ། །མདོ་ལས། མང་དུ་ནགས་གནས་དེ་བཞིན་གཞན་དག་ཀྱང༌། །ཞེས་པ་ནས། །དེ་དག་རྣམས་ཀྱང་བྱང་ཆུབ་ཕྱིར་དུ་འཇུག །ཅེས་པའི་བར་དུ་འདིས་ནི་ཐུགས་རྗེས་འདྲེན་པར་བསྟན་ཏེ། ཐུགས་རྗེའི་འོད་ཀྱིས་སེམས་ཅན་དམྱལ་བའི་གནས་རྣམས་ཞི་བར་བྱེད་པའོ། །རྒྱལ་བའི་སྲས་པོ་ལ་ལ་བརྩོན་འགྲུས་གནས། །ཞེས་པ་ནས། དེ་དག་བརྩོན་འགྲུས་བྱང་ཆུབ་མཆོག་ལ་ཞུགས། །ཞེས་པའི་བར་དུ་ནི་སེམས་ཅན་མོས་པས་སྤྱོད་པའི་ས་ན་ཕ་རོལ་ཏུ་ཕྱིན་པ་དྲུག་ཚོལ་བར་སྤྱོད་པ་བསྟན་པའི་ཕྱིར་འདི་མན་ཆད་ཚིགས་བཅད་རྩ་བ་ཕྱེད་དང་བཅུ་བཞིས་བསྟན་ཏོ། །དེ་ལ་དང་པོ་འདིས་ནི་བརྩོན་འགྲུས་བསྟན། །དེའི་འོག་མ་གཅིག་གིས་ནི་ཚུལ་ཁྲིམས་བསྟན། ཡང་ཕྱེད་དང་གཉིས་ཀྱིས་ནི་བཟོད་པ་བསྟན། ཡང་གཉིས་ཀྱིས་ནི་བསམ་གཏན་བསྟན། ལྔས་ནི་སྦྱིན་པ་བསྟན། གསུམ་གྱིས་ནི་ཤེས་རབ་བསྟན་ཏེ། འདི་ནི་དང་པོ་བརྩོན་འགྲུས་རྩོམ་པ་ཡང་སྡིག་པ་མི་དགེ་པའི་ཆོས་སྐྱེས་པ་བསལ་བ་དང་
དགེ་བའི་ཆོས་མ་སྐྱེས་པ་བསྐྱེད་པར་བྱ་བ་ལ་སོགས་པའོ། །མདོ་ལས། ལ་ལ་སྲུང་བ་རྟག་ཏུ་རྣམ་དག་པ། །ཞེས་པ་ནས། དེ་ལས་སྤྱོད་པ་ཡོངས་སུ་རྫོགས་པར་འགྱུར། །ཞེས་པའི་བར་དུ་ནི་བསླབ་པ་ལ་གནས་ཤིང་སྒོ་གསུམ་ལ་སྤྱོད་པ་སྐྱོན་མེད་པར་གྱུར་བའོ། །ཇི་ལྟར་རིན་པོ་ཆེ་ཕྱི་ནང་གསལ་བ་འོད་ཡོང་པ་ཀུན་གྱི་ཡིད་དུ་འོང་བ་བཞིན་ཚུལ་ཁྲིམས་མ་ཉམས་པ་སྐྱོན་མེད་པར་གྱུར་པའོ། །རྒྱལ་སྲས་ལ་ལ་བཟོད་པའི་སྟོབས་ཅན་ཏེ། །ཞེས་པ་ནས། །བཟོད་པ་དེ་དག་བྱང་ཆུབ་མཆོག་ལ་ཞུགས། །ཞེས་པའི་བར་དུ་ནི་རྡེག་པ་དང་སྤྱོད་བ་དང་སྨད་པ་ལ་སོགས་པས་སྨ་དབབ་པ་སྣ་ཚོགས་ཉམས་སུ་ལེན་ཅིང་བཟོད་པའོ། །དེ་བཟོད་པ་ཡག་རྣམ་པ་ལྔའི་ཚུལ་གྱིས་བཟོད་དེ། ཐོག་མ་མེད་པ་ནས་གཉེན་དུ་གྱུར་པའི་བསམ་པ་དང༌། ཆོས་ལ་བསམ་པ་དང༌། ཆོས་ལ་བསམ་པ་དང༌། སྡུག་བསྔལ་ལ་བསམ་པ་དང༌། མི་རྟག་པ་ལ་བསམ་པ་དང༌། སྡུག་བསྔལ་བའི་བསམ་པས་བཟོད་པའོ། །མདོ་ལས། བདག་མཐོང་བྱང་ཆུབ་སེམས་དཔའ་ལ་ལ་ནི། །ཞེས་པ་ནས། དེ་དག་བསམ་གཏན་བྱང་ཆུབ་མཆོག་ལ་ཞུགས། །ཞེས་པའི་བར་གྱིས་ནི་བསམ་གཏན་ལ་གནས་པ་བསྟན་ཏེ། གཡེང་བའི་སྐྱོན་འདི་དག་བསྩལ་ཏེ་གནས་སོ།། རྣམ་པར་རྟོག་པ་དང་རྩེད་མོའི་དགའ་བ་དང༌། བྱིས་པོ་མ་རབས་སྤང་བ་དང༌། བཤེས་གཉེན་ངན་པ་དང་མི་འགྲོགས་ཤིང་སེམས་སྡུད་པའོ། །ཡང་མདོ་ལས། ལ་ལས་དེ་བཞིན་སྦྱིན་པ་བྱིན་པ་ནི། །ཞེས་པ་ནས། སྦྱིན་པ་དེ་དག་བྱང་ཆུབ་མཆོག་ལ་ཞུགས། །ཞེས་པའི་བར་དུ་སྦྱིན་པ་རྣམ་པ་སྣ་ཚོགས་བསྟན་པའོ། །སྦྱིན་པ་དེ་དག་ཀྱང་རྒྱ་ཆེར་སྦྱིན་པ་དང༌། མི་སྐྱོ་བར་སྦྱིན་པ་དང༌། དགའ་བར་སྦྱིན་པ་དང༌། ཆགས་པ་མེད་པར་སྦྱིན་པ་དང༌། དགེ་བའི་རྒྱུར་འགྱུར་བའི་སྦྱིན་པའོ། །དེ་ལ་ཁ་ཟས་ཀྱི་སྦྱིན་པ་བྱས་ན་ནི་མུ་གེའི་བསྐལ་པར་མི་སྐྱེ། སྨན་བྱིན་པས་ནི་བླ་ན་མེད་པའི་ཆོས་ཀྱི་སྨན་དང་ལྡན་པར་འགྱུར། །གོས་བྱིན་པས་ནི་རིན་པོ་ཆེ་སྣ་བདུན་དང་ལྡན་ཞིང་ཁྲེལ་དང་ངོ་ཚ་ཡོད་པར་འགྱུར། ཁྲི་སྟན་ལ་སོགས་པ་བྱིན་པས་ནི་བསོད་ནམས་དང་ཡེ་ཤེས་ཀྱི་ཚོགས་དང་ལྡན་པར་འགྱུར། ར་བ་དང་སྐྱེད་མོས་ཚལ་བྱིན་པས་ནི་གཟུངས་ཀྱི་
སྐྱེད་མོས་ཚལ་དང་ལྡན་པར་འགྱུར། མེ་ཏོག་བྱིན་པས་ནི་བྱང་ཆུབ་ཀྱི་ཡན་ལག་བདུན་དང་ལྡན་པར་འགྱུར། འབྲས་བུ་བྱིན་པས་ནི་འཕགས་པའི་འབྲས་བུ་བཞི་དང་ལྡན་པར་འགྱུར། རྫིང་དང་ཁྲོན་པ་བྱིན་པས་ནི་རྣམ་པར་གྲོལ་བའི་ཆུ་དྲི་མ་མེད་པ་དང་ལྡན་པར་འགྱུར་ཞེས་གསུངས་སོ། །མདོ་ལས། དེ་དག་བྱང་ཆུབ་མཆོག་ཞུགས་ཡེ་ཤེས་ཀྱི། །ཞེས་བྱ་བ་ནས། དེ་དག་ཤེས་རབ་བྱང་ཆུབ་མཆོག་ལ་ཞུགས། །ཞེས་པའི་བར་དུ་ནི་ཤེས་རབ་ཀྱི་མཚན་ཉིད་བསྟན་ཏེ། མཚན་མ་མེད་པ་གཉིས་སུ་མེད་པ་ནམ་མཁའ་དང་མཚུངས་པའོ། །མཚན་མ་ཡོད་པ་དང་མཚན་མ་མེད་པ་ནི་གཞན་གྱི་དོན་དེ་དང་བདག་གི་དོན་ལ་སྤྱོད་པའི་ཡེ་ཤེས་སོ། །མདོ་ལས། གང་གིས་གཞན་ཡང་མཐོང་བ་འཇམ་པའི་དབྱངས། །ཞེས་པ་ནས། རྒྱལ་བའི་རིང་བསྲེལ་དག་ལ་རིམ་གྲོ་བྱེད། །ཅེས་པའི་བར་དུ་ནི་འདི་མན་ཆད་དུམ་བུ་དྲུག་སྟེ། ཚིགས་བཅད་རྩ་བ་བདུན་གྱིས་མཆོད་རྟེན་སློང་བ་བསྟན། དེ་ལ་ཡང་རྣམ་པ་གཉིས་ཏེ། རིང་བསྲེལ་མཆོད་པ་དང་མཆོད་རྟེན་ལ་མཆོད་པའོ། །ཡང་བྱང་ཆུབ་སེམས་དཔའ་ལ་མཆོད་པ་དང་འཁོར་བརྒྱད་ལ་མཆོད་པའོ། །མདོ་ལས། མཆོད་རྟེན་བྱེ་བ་སྟོང་ཕྲག་མི་ཉུང་བ། །ཞེས་བྱ་བ་ནས། །དྲིལ་དང་དྲིལ་བུ་གཡེར་ཁ་རྟག་ཏུ་འཁྲོལ། །ཞེས་པའི་བར་འདིས་ནི་མཆོད་རྟེན་སློང་བ་བསྟན་ཏེ། བཅོམ་ལྡན་འདས་མྱ་ངན་ལས་འདས་པའི་འོག་ཏུ་རིང་བསྲེལ་གྱི་མཆོད་རྟེན་ལ་མཆོད་པ་དང་རིམ་གྲོ་བྱས་ན་བསྐལ་པ་དུ་མར་ངན་སོང་དུ་མི་ལྷུང་བྱང་ཆུབ་ཆེན་པོའི་ཚོགས་ཀྱང་རྫོགས་པར་འགྱུར་ཞེས་བསྟན་ཏོ། །དཔག་ཚད་ཅེས་པ་ནི་གཞུ་འདམ་ལྔ་བརྒྱ་ལ་རྒྱང་གྲགས་གཅིག །རྒྱང་གྲགས་བརྒྱད་ལ་དཔག་ཚད་གཅིག་གོ །མདོ་ལས། མེ་ཏོག་དྲི་དང་དེ་བཞིན་སིལ་སྙན་གྱི། །ཞེས་པ་ནས། འདི་འདྲའི་མཆོད་རྟེན་རྒྱལ་བའི་རིང་བསྲེལ་ལ། །ཞེས་པའི་བར་དུ་ནི་འཁོར་བརྒྱད་ཀྱིས་མཆོད་པ་བསྟན་ཏོ། །མདོ་ལས། གང་གིས་ཕྱོགས་བཅུའི་དེ་དག་བརྒྱན་པ་ནི། །ཞེས་བྱ་བ་ནས། ལྷ་དང་བཅས་པའི་འཇིག་རྟེན་རྒྱས་པ་འདི། །ཞེས་པའི་བར་དུ་ནི་མཆོད་རྟེན་དེ་བྱས་པས་འཇིག་རྟེན་ཐམས་ཅད་ལ་མཛོས་པ་ནི་དཔེར་ན་
ལྷའི་མེ་ཏོག་པ་རི་ཡ་ཏ་རྒྱས་པ་བཞིན་དུ་མཛོས་པ་བསྟན་ཏོ། །མདོ་ལས། རྒྱལ་བས་འོད་ཟེར་གཅིག་པུ་འདི་བཏང་བས། །ཞེས་པ་ནས། སྟོང་ཕྲག་མང་པོའི་ཞིང་རྣམས་སྟོན་པའོ། །ཞེས་པའི་བར་དུ་ཚིགས་བཅད་རྩ་བ་བརྒྱད་ཀྱིས་ནི་གསོལ་བའི་དོན་བསྟན་ཏེ། རྩ་བ་བཞིས་ནི་ལན་བཏབ་པའོ། །མདོ་ལས། ལྟས་རྣམས་མཐོང་ནས་བདག་ཅག་ངོ་མཚར་ཐོབ། །ཅེས་པ་ནས། ཐེ་ཚོམ་སོལ་ལ་དགའ་བ་བསྐྱེད་པར་གྱིས། །ཞེས་པའི་བར་དུ་ནི་བདག་དང་གཞན་གྱི་རེ་བ་སྐོང་བར་བསྟན་པའོ། །མདོ་ལས། བདེ་གཤེགས་སྲས་པོ་ཁྱོད་ཀྱིས་ལུང་སྟོན་ཅིག་ཅེས་པ་ནས། འདི་འདྲའི་རྒྱ་ཆེན་འོད་ཀྱང་རབ་ཏུ་བཏང༌། །ཞེས་པའི་བར་དུ་འདིས་ནི་དྲིས་པའི་ལན་གསོལ་བའོ། །མདོ་ལས། བདེ་གཤེགས་སྲས་པོ་ཁྱོད་ཀྱིས་ལུང་སྟོན་ལ། །ཞེས་པ་ནས། འདི་ཡི་རྒྱུ་ནི་ཆུང་བར་མི་འགྱུར་ཏེ། །ཞེས་པའི་བར་དུ་ནི་དྲིས་པའི་ལན་བཏབ་པ་དང། ལུང་བསྟན་པ་དང༌། དོན་ཆེ་བ་བསྟན་པ་དང༌། ཞིང་རྣམ་པར་དག་པ་འདིའི་དོན་ཆུང་བ་མ་ཡིན་པར་བསྟན་པའོ། །མདོ་ལས། ཞིང་རྣམས་སྟོང་ཕྲག་དུ་མ་གང་བསྟན་པ། །ཞེས་པ་ནས། འཇམ་དབྱངས་འདི་རུ་ཅི་ཞིག་ལུང་སྟོན་ཅེས། །ཞེས་པའི་བར་དུ་ནི་དྲིས་པའི་ལན་དངོས་སུ་བཏབ་པའོ། །མདོ་ལས་དེ་ནས་ཞེས་པ་ནས་རིགས་ཀྱི་བུ་རྣམས་ཞེས་པའི་བར་དུ་ནི་འཇམ་དཔལ་གཞོན་ནུར་གྱུར་བ་ལན་གློན་པར་ནུས་པ་ནི་འགྲེལ་པ་ལས། འཇམ་དཔལ་སྔོན་གྱི་གནས་རྗེས་སུ་དྲན་པའི་ཡེ་ཤེས་ཀྱིས་འདས་པ་རྒྱུ་དང་འབྲས་བུ་ཕུན་སུམ་ཚོགས་པ་མངོན་དུ་གཟིགས་པའི་ཕྱིར་ལན་གློན་ནུས་པ་སྟེ། རྗེས་སུ་དཔག་པའམ་ཡིད་ཚོད་ཙམ་གྱིས་ལན་འདེབས་པ་མ་ཡིན་ནོ། །འཇམ་དཔལ་གྱིས་རང་གི་སྐུ་སངས་རྒྱས་མང་པོ་ལ་བྱ་བ་བྱས་པའི་རྒྱུ་དེ་ད་ལྟར་གྱི་འབྲས་བུ་འདི་ཉིད་པས་སྔོན་དམ་པའི་འོད་ཅེས་བྱ་བའི་དགེ་སློང་དུ་གྱུར་པ་ན། དེ་བཞིན་གཤེགས་པ་ལས་ཆོས་འདི་མངོན་དུ་ཐོས་པའི་ཕྱིར། ད་འགྲོ་བ་མང་པོ་ལ་སྟོན་ནུས་ཏེ། འདི་མན་ཆད་དུམ་བུ་གསུམ་དུ་བཅད་དེ་སྟོན་ཏོ། །དང་པོ་མིང་སྨོས་ཏེ་མདོར་བསྟན་པ་དང༌། དྲིས་པའི་ལན་གདབ་པ་དང༌། འོག་མ་ཉན་པ་རྣམས་ལ་གདམས་པ་དང་གསུམ་མོ། །མདོ་ལས་
འདི་ནི་བདེ་བར་གཤེགས་པས་ཆོས་ཆེན་པོ་བསྒྲགས་ཤིང་ཡང་དག་པར་བརྗོད་པར་མཛད་པར་དགོངས་པ་ཞེས་པ་ནི་དྲིས་པའི་ལན་གདབ་པ་སྟེ། འདི་འགྲེལ་པ་ལས་ལན་གདབ་པ་ལ་དོན་རྣམ་པ་བཅུ་སྟེ། དོན་ཆེན་པོ་མངོན་དུ་མཐོང་བའི་རྒྱུ་སྟེ་འདི་ཉིད་ཡིན་པ་དང༌། རིགས་ཀྱི་བུ་རྣམས་ང་སྔོན་འདས་པའི་དུས་འཇིག་རྟེན་གྱི་ཚིག་དང་འབྲུ་དང་ལེའུ་ཤིན་ཏུ་ཟབ་པའི་རྒྱུ་དང་མཐོང་བ་དང༌། ཡང་རིགས་ཀྱི་བུ་རྣམས་སྔོན་འདས་པ་གྲངས་མེད་དཔག་ཏུ་མེད་པ་ནས་ངོ་མཚར་རྨད་དུ་བྱ་བའི་རྒྱུ་མཐོང་བ་སྔོན་ཡང་དེ་བཞིན་གཤེགས་པ་ཉི་ཟླ་སྒྲོན་མ་ཞེས་བྱ་བ་ནས་རྒྱུ་དམ་པ་མཐོང་བ་དང༌། ཡང་དེ་བཞིན་གཤེགས་པ་ནང་གི་ཐ་མ་ཁྱིམ་ནས་མ་བྱུང་བ་ནས་ལོངས་སྤྱོད་པའི་རྒྱུ་ཆེན་པོ་མཐོང་བ་དང༌། སངས་རྒྱས་མྱ་ངན་ལས་འདས་པའི་འོག་ཏུ་དམ་པའི་འོད་བྱང་ཆུབ་སེམས་དཔའ་དམ་པའི་ཆོས་འདི་འཛིན་པ་ནས་དེ་བཞིན་གཤེགས་པ་རྣམས་ཀྱི་ཆོས་སྡུད་ཅིང་འཛིན་པའི་རྒྱུ་མངོན་དུ་མཐོང་བ་དང་ཡང་ཉི་ཟླ་སྒྲོན་མ་དེ་བཞིན་གཤེགས་པའི་སྲས་བརྒྱད་པོ་ཡང་དམ་པའི་འོད་ལ་བརྟེན་ནས་ཤིན་ཏུ་བརྟན་པའི་དེ་བཞིན་གཤེགས་པ་མངོན་དུ་མཐོང་བའི་རྒྱུ་དང་རྒྱལ་བུ་དེ་དག་གིས་མཆོད་པ་དང་རིམ་གྲོ་གྲངས་མེད་པར་བྱས་པས་འཇུག་པར་ནུས་པའི་རྒྱུ་མངོན་དུ་མཐོང་བ་དང༌། དེ་བཞིན་གཤེགས་པ་ནང་གི་ཐ་མར་མངོན་པར་སངས་རྒྱས་པ་སྒྲོན་མ་མཛད་པ་ལ་མངོན་དུ་དྲན་པའི་རྒྱུ་མཐོང་བ་དང༌། བྱམས་པ་ཁྱོད་ཀྱིས་ཤེས་པར་གྱིས་ཤིག །དེའི་ཚེ་དམ་པའི་དབྱངས་བྱང་ཆུབ་སེམས་དཔའ་དམ་པའི་འོད་ལ་བདག་ཉིད་ཀྱིས་མངོན་དུ་སྤྱད་པ་སྤྱད་པའི་རྒྱུ་མཐོང་བ་སྟེ། རྒྱུ་ནི་གཏན་ཚིགས་ཀྱི་དོན་ཏོ། །འཇམ་དཔལ་གཞོན་ནུར་གྱུར་པས་གཏན་ཚིགས་དེ་དག་མངོན་དུ་གྱུར་པ་ལས་དཔག་ནས་འཕགས་པ་བྱམས་པ་ལ་ལན་བཏབ་པའོ། །རྒྱུ་དེ་བཅུ་ཡང་དོན་ལྔར་བསྡུས་ཏེ། དོན་བསྟན་པ་དང༌། ཡ་མཚན་དུ་གྱུར་པ་དང༌། གྲོལ་བ་དང་བཅིངས་པ་དང༌། བརྩོན་འགྲུས་བསྟན་པ་དང༌། བདག་དང་གཞན་དུ་སྦྱར་བའོ། །རྒྱུ་བཅུ་པོ་དེ་དག་ཀྱང་ལྟས་ལས་དཔགས་ཏེ་ལན་གདབ་པ་དང༌། སྔོན་གྱི་དང་ད་ལྟར་སྦྱར་ཏེ་ལན་གདབ་པ་དང༌། དོན་གཞན་ལས་གླེང་སྟེ་ལན་གདབ་པ་དང༌། སྔོན་གྱི་
ལུགས་དང་སྦྱར་ཏེ་ལན་གདབ་པའོ། །དེ་ལའང་དང་པོའི་གཉིས་དང༌། ཐ་མའི་གཅིག་ནི་གོང་མའི་རིམ་པ་བཞིན་དུ་སྦྱར། བར་གྱི་བདུན་པོ་ནི་གཞན་ལས་གླེངས་ཏེ་ལན་གདབ་པ་དང་སྦྱར་རོ། །འདི་ནི་ལྟས་ལས་དཔགས་ཏེ་ལན་གདབ་པའོ། །འགྲེལ་བ་ལས་དོན་ཆེན་པོ་མཐོང་བའི་རྒྱུ་ཕུན་སུམ་ཚོགས་པ་མཐོང་བ་ནི་ལྟས་རྣམ་པ་བརྒྱད་དོ། །ཆོས་ཆེན་པོའི་ཆར་འབེབས་པ་དང༌། །ཆོས་ཀྱི་རྔ་བརྡུང་བ་དང་དུང་འབུད་པ་ལ་སོགས་པའོ། །འགྲེལ་བ་ལས་ཐེ་ཚོམ་ཅན་རྣམས་ཐེ་ཚོམ་བསལ་བའི་ཕྱིར་ཆོས་ཆེན་པོ་འཆད་དེ་ཐེ་ཚོམ་ཆོད་ན་ཡེ་ཤེས་ཀྱི་ལུས་སྨིན་པར་བྱ་བའི་ཕྱིར་ཆོས་ཀྱི་ཆར་ཆེན་པོ་ཕབ་པས་དགེ་བའི་མྱུ་གུ་སྐྱེས་ཏེ་འཕགས་པའི་གནས་ཐོབ་པར་འགྱུར་རོ། །དབང་པོ་སྨིན་པ་རྣམས་སྤྱོད་ཡུལ་གསང་བ་རྣམ་པ་གཉིས་སྟོན་ཏོ། །ཉན་ཐོས་རྣམས་ལ་ནི་ཆོས་ཀྱི་རྔ་ཆེན་པོ་བརྡུང་ངོ༌། །བྱང་ཆུབ་སེམས་དཔའ་རྣམས་ལ་བླ་མའི་བླ་མ་རྣམ་པར་དག་པའི་དོན་བསྟན་པའི་ཕྱིར་ཆོས་ཀྱི་རྒྱལ་མཚན་བསྒྲེང་བ། བྱང་ཆུབ་སེམས་དཔའ་ཆོས་ཀྱི་ཡེ་ཤེས་རྟོགས་པའི་ཕྱིར་ཡེ་ཤེས་ཀྱི་སྒྲོན་མ་སྣང་བར་མཛད་པས་ཆོས་ཀྱི་སྒྲོན་མ་འབར་བར་མཛད་པའོ། །ཡེ་ཤེས་ཐམས་ཅད་མངོན་དུ་གྱུར་པའི་ཕྱིར་ཚིག་འབྲུ་དང་དོན་བསྒྲགས་པའི་ཕྱིར་ཆོས་ཀྱི་དུང་འབུད་པ་ཞེས་པའོ། །དེ་དག་ཀྱང་སྡིག་པ་སྤོང་ཞིང་དགེ་བར་འཇུག་པ་དང༌། དྲང་བའི་དོན་གྱིས་ངེས་པའི་དོན་སྟོན་པ་དང༌། ཤེས་རབ་ཀྱིས་ཡང་དག་པའི་དོན་ཆུད་པ་དང༌། ཆོས་སྟོན་པས་འགྲོ་བ་ལ་ཕན་པའོ། །མདོ་དང་འབྲེལ་པ་ལས་འབྱུང་བ་འདི་དག་ཅི་རིགས་པ་དང་གར་འོས་སུ་སྦྱར་རོ། །མདོ་ལས་རིགས་ཀྱི་བུ་འདི་ནི་དེ་བཞིན་གཤེགས་པས་ཆོས་ཆེན་པོ་བཤད་པར་དགོངས་པ་སྟེ་ཞེས་པ་ནི་འཇིག་རྟེན་གྱི་ཚིག་འབྲུའི་དོན་ཤིན་ཏུ་ཟབ་པའི་རྒྱུ་སྟོན་ཏེ། དེ་ནི་སྔོན་གྱི་ལུགས་ལས་དྲང་སྟེ་ང་འདི་ལྟའོ་ཞེས་དོན་སྦྱར་བའོ། །མདོ་ལས་རིགས་ཀྱི་བུ་རྣམས་བདག་གིས་ཇི་ལྟ་བུར་སྤོབས་པ་དང༌། ཇི་ལྟར་སྔོན་གྱི་དེ་བཞིན་གཤེགས་པ་ཞེས་པ་ནས་འོད་ཟེར་བཏང་ཞིང་སྣང་བ་ཐོག་མ་མཐོང་བ་མངོན་པར་བསྟན་ཏོ་ཞེས་པའི་བར་དུ་ནི་གཞུང་བཞིན་དུ་ཆུད་པར་བྱའོ། །མདོ་ལས་རིགས་ཀྱི་བུ་རྣམས་བདག་གིས་དྲན་པ་འདས་པའི་དུས་བསྐལ་བ་གྲངས་
མེད་པའི་ཡང་གྲངས་མེད་པ་ཞེས་པ་ནི་རྒྱུ་བརྒྱད་སྦྱར་དུམ་བུ་གཉིས་སུ་ཕྱེ་སྟེ། ཚིག་ལྷུག་པ་དང་ཚིགས་སུ་བཅད་པས་བསྡུ་བའོ། །སྔར་རྒྱུན་གྱིས་ན་དོན་གཞན་ལས་གླེངས་ཏེ་ལན་བཏབ། རྒྱུ་གཅིག་གིས་སྔོན་གྱི་ལུགས་ལས་དྲས་ཏེ་ལན་བཏབ། དང་པོ་ལ་ཡང་རྣམ་པ་གསུམ་སྟེ། ངོ་མཚར་དུ་གྱུར་པ་ལས་བསྟོད་དེ་ལན་བཏབ་པ་དང༌། ཕྱིས་ཁྱད་པར་དུ་གྱུར་པ་ལས་ལན་བཏབ་པ་དང༌། ཕྱི་མ་ལྔས་ནི་དོན་མཐུན་པ་ལས་དྲས་ཏེ་ལན་བཏབ། ངོ་མཚར་དུ་གྱུར་པ་ལས་བསྟོད་དེ་ལན་བཏབ་པ་ནི་འགྲེལ་པ་ལས་ཡ་མཚན་མངོན་དུ་གྱུར་པའི་རྒྱུ་དང་སྦྱར་རོ། །གྲངས་མེད་པའི་ཡང་གྲངས་མེད་པ་ཞེས་པ་ནི་བསྐལ་པའི་དུས་ཡུན་རིང་བས་སྟེ། བསྐལ་པ་གྲངས་མེད་པ་ཞེས་པ་ནི་གྲངས་ཀྱི་མཐའ་ལྔ་བཅུ་རྩ་གཉིས་ལ་གྲངས་མེད་པ་ཞེས་བྱའོ། །ཡང་ན་བསྐལ་པ་ཞེས་པ་ནི་ལྷའི་ཚེ་དང་སྦྱར་བའི་བསྐལ་པ་དང༌། ལོ་དང་དུས་མི་མཐུན་པའི་བསྐལ་པ་ཞེས་འདིར་བསྐལ་པ་ཞེས་པ་ནི་ལོ་དང་སྦྱར་ཏེ། དེ་བཞིན་གཤེགས་པ་རྣམས་ཀྱི་བསྐལ་པ་ཆེན་པོ་ན་བརྒྱ་ལམ་ན་ལན་གཅིག་འབྱུང་བས། འཇམ་དཔལ་གྱིས་ཐོས་པའི་དུས་ཧ་ཅང་ཡུན་རིང་བའི་ཕྱིར་རོ། །མདོ་ལས་རྒྱང་རིང་བ་དཔག་ཏུ་མེད་པ་བསམ་གྱིས་མི་ཁྱབ་པ་བསྐྱང་དུ་མེད་པ། ཚད་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ཏུ་གྱུར་པ་དེའི་དུས་དེའི་ཚེ་ན་ཞེས་པ་ནས་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ་ཞེས་པའི་བར་དུ་ནི་ཉི་ཟླ་སྒྲོན་མ་དེ་བཞིན་གཤེགས་པ་ནི་ཉི་མ་ལ་དོན་རྣམ་པ་གཉིས་ཏེ། སྣང་བའི་དོན་དང་སྨིན་པའི་དོན་ཏོ། །ཟླ་བ་ལ་དོན་རྣམ་པ་གཉིས་ཏེ། ཐེ་ཙོམ་སེལ་བའི་དོན་དང་བསིལ་བའི་དོན་ཏོ། །སྒྲོན་མ་ལ་ཡང་རྣམ་པ་གཉིས་ཏེ་མུན་པ་སེལ་བ་དང༌། སྣང་བ་མཆེད་པའི་དོན་ནོ། །དེ་བཞིན་གཤེགས་པ་དགྲ་བཅོམ་པ་ཞེས་པ་ནི་དེ་བཞིན་གཤེགས་པ་ཡོན་ཏན་གྱི་མཚན་རྣམ་པ་བཅུའོ། །དེ་བཞིན་གཤེགས་པ་ནི་སྔོན་གྱི་དེ་བཞིན་གཤེགས་པའི་ལུགས་བཞིན་དུ་གཤེགས་པའི་ཕྱིར་དེ་བཞིན་གཤེགས་པའི། །ཡང་དེ་བཞིན་གཤེགས་པ་ནི་གང་ནས་ཀྱང་མ་བྱོན། གང་དུ་ཡང་མི་བཞུད་པའི་ཕྱིར་དེ་བཞིན་གཤེགས་པ་དེ་ཆོས་ཀྱི་སྐུའོ། །ཡང་ན་དེ་བཞིན་ཉིད་ཀྱི་བདེན་བ་ལས་བྱུང་བའི་ཕྱིར་དེ་བཞིན་གཤེགས་པའོ། །དགྲ་བཅོམ་
པ་ཞེས་པ་ནི་ཉོན་མོངས་པའི་དགྲ་ཐམས་ཅད་བཅོམ་པའི་ཕྱིར་དགྲ་བཅོམ་པའོ། །ཤེས་བྱའི་སྒྲིབ་པ་ཐམས་ཅད་སྤངས་པའི་ཕྱིར་ཡང་དག་པར་རྫོགས་པ་སྟེ། རིག་པ་དང་ཞབས་སུ་ལྡན་པ་ནི་སྔོན་གྱི་གནས་དྲན་པའི་རིག་པ་དང་འཆི་འཕོ་ཤེས་པ་དང༌། ཟག་པ་ཟད་པ་ཤེས་པའི་རིག་པ་ནི་རིག་པའོ། །བསྟན་པ་དང༌། སྤྱོད་པ་དང་སྨོན་ལམ་རྣམ་པར་དག་པས་འཚོ་བ་དག་པར་གྱུར་པ་ནི་ཞབས་ཏེ། རིག་པ་དང་ཞབས་སུ་ལྡན་པའོ། །བདེ་བར་གཤེགས་པ་ནི་བདག་དང་གཞན་ལ་ཕན་འདོགས་པའི་ཡོན་ཏན་ཆེན་པོ་དང་ལྡན་པས་བྱང་ཆུབ་ཆེན་པོར་གཤེགས་པའི་ཕྱིར་བདེ་བར་གཤེགས་པའོ། །འཇིག་རྟེན་མཁྱེན་པ་ཞེས་པ་ནི་སྣོད་དང་བཅུད་ཀྱི་འཇིག་རྟེན་མ་ལུས་པར་མཁྱེན་པ་དང་ཅི་འདུལ་བ་སོ་སོར་མཁྱེན་པ་དང༌། སེམས་ཅན་གྱི་སྤྱོད་པ་བརྒྱད་ཁྲི་བཞི་སྟོང་མི་མཐུན་པ་སོ་སོར་མཁྱེན་པ་དང༌། སྣོད་ཀྱི་འཇིག་རྟེན་འཇིག་པ་དང་ཆགས་པ་མཁྱེན་པ་དང༌། སེམས་ཅན་སོ་སོའི་རང་བཞིན་དང༌། རྒྱུ་རྐྱེན་ལ་སོགས་པ་ཀུན་མཁྱེན་པའོ། །བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ་ནི་ཟླ་མེད་པའི་ཕྱིར་བླ་ན་མེད་པ་སྐྱེས་བུ་ཆེན་པོའི་མཚན་བཟང་པོ་དང་ལྡན་པ་ཕུལ་དུ་གྱུར་པའི་ཕྱིར་རོ། །ལྷ་དང་མིའི་མཁན་པོ་ནི་ལྷ་དང་མིས་དོན་ཟབ་མོ་ཆུད་པའི་སྐལ་བ་དང་ལྡན་པས་དེའི་མཁན་པོ་ཞེས་བྱའོ། །སྒྲིབ་པ་ཐམས་ཅད་བསལ་ཏེ། ཆོས་ཐམས་ཅད་མངོན་དུ་གྱུར་པ་ནི་སངས་རྒྱས་སོ། །བཅོམ་ལྡན་འདས་ཞེས་པ་ནི་བདུད་རྣམ་བཞི་བཅོམ་ལ། དབང་ཕྱུག་ལ་སོགས་པ་ཡོན་ཏན་དྲུག་དང་ལྡན་པའི་ཕྱིར་བཅོམ་ལྡན་འདས་སོ། །མདོ་ལས་དེས་ཆོས་ཐམས་ཅད་ཅེས་པ་ནས་ཚངས་པར་སྤྱོད་པ་ཡང་དག་པར་སྟོན་པ་ཞེས་པའི་བར་དུ་ནི་ཆོས་ཁྱད་པར་ཅན་དུ་བསྟན་པའི་ཕྱིར་ཏེ། ཐོག་མར་དགེ་བ་ནི་ཐོས་པ་ཙམ་གྱིས་དགའ་བའོ། །བར་དུ་དགེ་བ་ནི་སྒོམ་པ་ལ་བར་ཆད་མེད་ཅིང་མཐའ་གཉིས་སྤངས་པའི་སྤྱོད་ཡུལ་དྲི་མ་དང་བྲལ་བས་འཇུག་པའོ། །ཐ་མར་དགེ་བ་ནི་སྤྱོད་པ་དང་སྒྲུབ་པའི་མཐར་ཕྱིན་པའི་འབྲས་བུ་ལ་གནས་པའོ། །ཡང་ན་ཐོག་མར་དགེ་བ་ནི་སྦྱིན་བ། བར་དུ་དགེ་བ་ནི་ཚུལ་ཁྲིམས། ཐ་མར་དགེ་བ་ནི་ཏིང་ངེ་འཛིན་ཏོ། །ཡང་ན་སྡུག་བསྔལ་ཤེས་པ་དང་ཀུན་འབྱུང་སྤངས་པ་ནི་ཐོག་མར་དགེ་བ། ཡང་དག་པའི་ལམ་བསྒོམ་
པ་ནི་བར་དུ་དགེ་བ། འགོག་པ་མངོན་དུ་གྱུར་པ་ནི་ཐ་མར་དགེ་བ་སྟ། ཉན་ཐོས་པ་དང་སྦྱར་རོ། །བྱང་ཆུབ་ནི་སེམས་མི་གཏོང་བ་དང༌། ཐེག་པ་གཉིས་པར་མི་བསྔོ་བར་བླ་ན་མེད་པའི་ཡེ་ཤེས་ཐོབ་པ་ནི་བྱང་ཆུབ་སེམས་དཔའི་ཐོག་མ་དང་བར་མ་དང་ཐ་མར་དགེ་བའོ། །འཕགས་པའི་ལམ་ཡན་ལག་བརྒྱད་ཡང་དག་པའི་ངག་ལ་སོགས་པས་ཚིག་སྦྱར་ལེགས་ཤིང་དོན་ཟབ་མོ་དང་ལྡན་པས་མང་པོ་ལ་ཕན་པར་འགྱུར་བ། མུ་སྟེགས་ཀྱི་ལམ་དང་མ་འདྲེས་པ། དོན་དང་ཚིག་ཚང་བ་ཁྱད་པར་དུ་འཕགས་པ་ནི་དོན་བཟང་བ་ཚིག་འབྲུ་བཟང་བ་མ་འདྲེས་པ། ཡོངས་སུ་རྫོགས་པ་ཞེས་བྱའོ། །ཡོངས་སུ་དཀར་པ་ནི་རྣམ་པར་གྲོལ་བར་འགྱུར་བའོ། །ཚངས་པར་སྤྱོད་པ་ནི་འཕགས་པའི་ཡན་ལག་བརྒྱད་དང་འགོག་པའི་བདེན་པ་དང༌། ཚངས་པར་སྤྱོད་པ་སྟེ། ལམ་དེ་གཞན་དང་མ་འདྲེས་པའི་ཕྱིར་མ་འདྲེས་པའོ། །མདོ་ལས་འདི་ལྟར་ཉན་ཐོས་རྣམས་ལ་ཞེས་པ་ནས་ཡེ་ཤེས་ཀྱི་མཐའི་བར་དུ་ཆོས་སྟོན་ཏོ་ཞེས་པའི་བར་དུ་ནི་འགྲོ་བ་ལ་ཕན་གདགས་པའི་ཕྱིར་ཆོས་སྟོན་པ་སྟེ། དེ་བཞིན་གཤེགས་པ་འཇིག་རྟེན་དུ་བྱུང་ནས་ཐེག་པ་རྣམ་པ་གསུམ་གྱིས་ཆོས་སྟོན་པ་ནི་ཉན་ཐོས་པ་རྣམས་ལ་བདེན་པ་བཞི་བསྟན། རང་སངས་རྒྱས་ལ་རྟེན་ཅིང་འབྲེལ་པར་འབྱུང་བ་བཅུ་གཉིས་བསྟན། བྱང་ཆུབ་སེམས་དཔའ་རྣམས་ལ་ཕ་རོལ་ཏུ་ཕྱིན་པ་དྲུག་སྟོན་པ་ཡང་དབང་པོའི་རིམ་པ་བཞིན་དུ་གྱུར་ཏོ། །མདོ་ལས་ཡང་རིགས་ཀྱི་བུ་ཉི་ཟླ་སྒྲོན་མ་ཞེས་པ་ནས་འདི་ལྟ་བ་ར་དྭ་ཛའི་རིགས་སུ་མཐུན་པ་ཡང་དེ་བཞིན་གཤེགས་པ་སྟོང་ཕྲག་ཉི་ཤུ་བྱུང་ཞེས་པའི་བར་དུ་ནི་ཕྱིར་འབྱུང་བ་ཁྱད་པར་ཅན་ལས་དཔགས་ཏེ་ལན་བཏབ་པའོ། །འགྲེལ་པ་ལས་རྒྱུ་ཁྱད་པར་ཅན་མངོན་དུ་མཐོང་བའི་རྒྱུ་སྟེ། རིགས་དམ་པ་དང་མིང་དམ་པ་དང་ལྡན་པར་བསྟན་པའི་གཏན་ཚིགས་སྨོས་པའོ། །མདོ་ལས་དེ་ལ་མ་ཕམ་པ་དེ་བཞིན་གཤེགས་པ་སྟོང་ཕྲག་ཉི་ཤུ་པོ་དེ་དག་ཅེས་པ་ནས་ཁབ་ན་གནས་ཤིང་རབ་ཏུ་མ་བྱུང་བའི་ཚེ་སྲས་བརྒྱད་ཡོད་དོ་ཞེས་པའི་བར་དུ་ནི་དོན་མཐུན་པ་ལས་དྲིས་ཏེ་ལན་བཏབ་པའོ། །ཡང་རྒྱུ་རྣམ་པ་ལྔ་སྟེ་ལོངས་སྤྱོད་ཆེ་བའི་རྒྱུ་དང༌། དེ་བཞིན་གཤེགས་པ་རྣམས་ཆོས་ཀྱི་འཁོར་ལོ་བསྐོར་བའི་རྒྱུ་དང༌། དེ་བཞིན་གཤེགས་པ་
ཤིན་ཏུ་བསྟན་པའི་ཆོས་ཀྱི་འཁོར་ལོའི་རྒྱུ་དང༌། འཇུག་པར་འགྱུར་བའི་རྒྱུ་དང་དྲན་པའི་རྒྱུའོ། །དེ་ལ་ཡང་རྣམ་པ་གཉིས་ཏེ། རྒྱུ་དང་པོ་ནི་བཅོམ་ལྡན་འདས་ཆོས་སྟོན་པའོ། །རྒྱུ་ཕྱི་མ་ནི་མྱ་ངན་ལས་འདས་པའི་སྤྱོད་པའོ། །ལོངས་སྤྱོད་པའི་རྒྱུ་ཆེན་པོ་ནི་འགྲེལ་པ་ལས་སྔོན་བཅོམ་ལྡན་འདས་རྒྱལ་བུ་མཛད་པ་ནས་ལོངས་སྤྱོད་ཆེན་པོ་སྤངས་ཏེ། ཁབ་ནས་བྱུང་བར་མཛད་ན་འགྲོ་བ་མ་རབས་རྣམས་ཀྱིས་ཡུན་ད་སྲིད་དུ་སྐྱོ་བའི་སེམས་མི་སྐྱེད་པ་དེ་ངོ་མཚར་དུ་བསྟན་པའོ། །ལོངས་སྤྱོད་ཀྱང་རྣམ་པ་གཉིས་ཏེ། ཁྱིམ་ན་གནས་ཤིང་སྡོད་པས་ལོངས་སྤྱོད་པ་དང༌། ཁྱིམ་ནས་བྱུང་ནས་ཆོས་ལ་ལོངས་སྤྱོད་པའོ། །བཅོམ་ལྡན་འདས་ཁབ་ནས་མ་བྱུང་བའི་ཚེ་སེམས་ཅན་བསྒྲལ་བའི་ཆེད་དུ་འདོད་པ་ལ་ལོངས་སྤྱོད་པ་དང་སྲས་མངའ་བར་ཡང་བསྟན་ཏོ། །མདོ་ལས་འདི་ལྟ་སྟེ་བློ་གྲོས་ཞེས་བྱ་བ་ནས་ཆོས་ཀྱི་བློ་གྲོས་ཀྱི་བར་དུ་གཞོན་ནུ་དེ་དག་ནི་ཤེས་རབ་ཆེ་བ་དང༌། ཐུགས་རྗེ་ཆེ་བ་དང༌། ཡོད་པ་དང་མེད་པ་ལ་མཁས་པ་དང༌། དགེ་བ་ལ་འཇུག་ཅིང་སྡིག་པ་སྤོང་བ་ལས་མཚན་དུ་བཏགས་པ་ཤེ་དག་གོ །མདོ་ལས་མ་ཕམ་པ་བཅོམ་ལྡན་འདས་ཞེས་པ་ནས་ལོངས་སྤྱོད་ཅིང་དེ་དག་རྒྱལ་པོ་བྱེད་དོ་ཞེས་པའི་བར་དུ་ནི་གོ་སླ་བས་མ་བཤད་དོ། །མདོ་ལས་དེ་དག་གིས་བཅོམ་ལྡན་འདས་དེ་ཁབ་ནས་མངོན་པར་འབྱུང་བར་ཤེས་ཤིང་ཞེས་པ་ནས་དགེ་བའི་རྩ་བ་བསྐྱེད་པར་གྱུར་ཏོ་ཞེས་པའི་བར་དུ་ནི་རབ་ཏུ་བྱུང་བ་བསྟན་ཏེ། རྟེན་དམ་པ་དང་འགྲོགས་པ་དང་ཉོན་མོངས་པ་ལས་འབྱུང་བར་རྩོལ་བ་རྒྱུ་དམ་པ་ལ་སྦྱོར་ཞིང་བསོད་ནམས་དང་ཡེ་ཤེས་ཀྱི་ཚོགས་བསྒྲུབ་པའོ། །མདོ་ལས་མ་ཕམ་པ་དེའི་ཚེ་ན་ཡང་ཞེས་པ་ནས་སངས་རྒྱས་ཐམས་ཅད་ཀྱིས་ཡོངས་སུ་ཟིན་པ་བཤད་ནས་ཞེས་པའི་བར་དུ་ནི་དུས་མཐུན་པར་གྲུབ་པ་བསྟན་ཏོ། །དེའི་ཚེ་སྐད་ཅིག་ཡུད་ཙམ་ཐང་ཅིག་ཅེས་པ་ནས་སེམས་མི་གཡོའོ་ཞེས་པའི་བར་དུ་ནི་སྤྱོད་ལམ་མཐུན་པ་བསྟན་ཏ། ཏིང་ངེ་འཛིན་དུ་ཞུགས་པ་དང་སྣོད་ཀྱི་འཇིག་རྟེན་དང་བཅུད་ཀྱི་འཇིག་རྟེན་ཏེ་འདི་དང་པོའོ། །མདོ་ལས་མེ་ཏོག་མན་དཱ་ར་བ་ནས་རབ་ཏུ་འཁྲུག་པའི་བར་གྱིས་ནི་སྣོད་ཀྱི་འཇིག་རྟེན་བསྟན་ཏོ། །མ་ཕམ་པ་དེའི་ཚེ་འཁོར་དེར་ཞེས་པ་ནས་རྨད་དུ་དགའ་བར་གྱུར་ཏོ་
ཞེས་པའི་བར་དུ་འདིས་ནི་བཅུད་ཀྱི་འཇིག་རྟེན་བསྟན་ཏོ། །མདོ་ལས་དེ་ནས་དེའི་ཚེ་བཅོམ་ལྡན་འདས་ཞེས་པ་ནས་ཤིན་ཏུ་ཁྱབ་པར་སྣང་བའི་བར་དུ་ནི་སྟོན་པ་མཐུན་པའི་རྒྱུ་སྟེ་འོད་གཏོང་པ་དང་སྣང་བར་བྱ་བ་དང་སྲུང་བར་བྱེད་པ་བསྟན་ཏོ། །མདོ་ལས་མ་ཕམ་པ་འདི་ལྟ་སྟེ་ཞེས་པ་ནས་ངོ་མཚར་དུ་གྱུར་རྨད་དུ་གྱུར། ལྟད་མོ་རབ་ཏུ་བྱུང་ངོ་ཞེས་པའི་བར་དུ་ནི་དེ་ཡང་ཆོས་ཐོས་པར་དགའ་བ་དང༌། སྔོན་གྱི་རྒྱུ་བསྟན་པར་འདོད་པའོ། །གཞན་ནི་གོ་སླ་བས་མ་བཤད་དོ། །མདོ་ལས་མ་ཕམ་པ་དེའི་ཚེ་ན་ཡང་བཅོམ་ལྡན་འདས་དེའི་བསྟན་པ་ལ་འོད་མཆོག་ཅེས་བྱ་བའི་བྱང་ཆུབ་སེམས་དཔའ་ཞེས་པ་ནས་བརྒྱད་བརྒྱ་ཡོད་དོ་ཞེས་པའི་བར་དུ་ནི་དེ་དང་མཐུན་པས་ལན་བཏབ་པ་སྟེ། སྣང་བར་བྱེད་པའི་འཁོར་མདོ་འདི་ལས་གླེང་བ་དང་ཡུན་རིང་བ་དང་འཁོར་སྐྱིད་པ་སྟེ་འདི་ནི་དང་པོའོ། །མདོ་ལས་བཅོམ་ལྡན་འདས་དེ་ཡང་ཞེས་པ་ནས་ལུས་སྐྱོ་བ་ཡང་མེད་སེམས་སྐྱོ་བ་ཡང་མེད་ཅེས་པའི་བར་དུ་འདི་དག་ནི་མདོ་འདི་གླེང་བ་དང་དུས་རིང་ཐུང་དང་འཁོར་བཞི་དགའ་ཞིང་མོས་པ་གོ་རིམས་བཞིན་དུ་སྦྱར་ཏེ། གཞན་ནི་གོ་སླ་བས་མ་བཤད་དོ། །མདོ་ལས་དེ་ནས་བཅོམ་ལྡན་འདས་ཉི་ཟླ་སྒྲོན་མ་ཞེས་པ་ནས་མྱ་ངན་ལས་འདས་སོ་ཞེས་པའི་བར་དུ་ནི་ལྟས་ཀྱི་ལུགས་མཐུན་པ་བསྟན་པ་སྟེ། སངས་རྒྱས་མྱ་ངན་ལས་འདས་པ་ནི་ཐེག་པ་རྣམ་པ་གཉིས་ལས་ཁྱད་པར་དུ་བསྟན་པའི་ཕྱིར་ལྷག་མ་མ་ལུས་པའི་མྱ་ངན་ལས་འདས་པའོ། །མདོ་ལས་དེ་ནས་མ་ཕམ་པ་ཞེས་པ་ནས་ལུང་བསྟན་ནས་ཞེས་པའི་བར་ནི་དགེ་བའི་རྩ་བ་སྨིན་པའི་ཕྱིར་ལུང་བསྟན་པ་ཡིན་ནོ། །མདོ་ལས་དགེ་སློང་རྣམས་དཔལ་གྱི་སྙིང་པོ་བྱང་ཆུབ་སེམས་དཔའ་ཞེས་པ་ནས་སངས་རྒྱས་སུ་གྱུར་ཏོ་ཞེས་པའི་བར་དུ་ནི་ཡང་སངས་རྒྱས་འཇིག་རྟེན་དུ་བྱུང་བ་དོན་རྣམ་པ་ལྔའི་ཕྱིར་ཏེ། ཆོས་ཀྱི་འཁོར་ལོ་བསྐོར་བ་དང་ཕ་མ་བྱང་ཆུབ་ལ་དགོད་པ་དང༌། མ་དད་པ་རྣམས་དད་པར་བྱ་བ་དང་བྱང་ཆུབ་ཏུ་སེམས་མ་བསྐྱེད་པ་རྣམས་སེམས་བསྐྱེད་པ་དང༌། ལུང་མ་བསྟན་པ་རྣམས་ལུང་བསྟན་པའོ། །མདོ་ལས་དགེ་སློང་རྣམས་དཔལ་གྱི་སྙིང་པོ་ཞེས་པ་ནས་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་པའི་བར་དུ་ནི་དེ་བཞིན་
གཤེགས་པ་ཤིན་ཏུ་བསྟན་པས་ཆོས་འཛིན་པའི་རྒྱུའོ། །འགྲེལ་པ་ལས་བཅོམ་ལྡན་འདས་དེ་མྱ་ངན་ལས་འདས་ནས་བསྐལ་པ་གྲངས་མེད་པའི་འོག་ཏུ་དེ་བཞིན་གཤེགས་པས་ཤིན་ཏུ་བསྟན་པའི་ཆོས་འཛིན་པར་འགྱུར་རོ། །མདོ་ལས་དེ་ལ་མ་ཕམ་པ་དེའི་སྲས་བློ་གྲོས་ལ་སོགས་པ་ཞེས་པ་ནས་མངོན་པར་སངས་རྒྱས་ནས་ཞེས་པའི་བར་དུ་ནི་འཇུག་པར་ནུས་པའི་རྒྱུ་བསྟན་ཏེ། མཆོད་པ་དང་རིམ་གྲོ་ནི་ཆོས་དང་ཟང་ཟིང་གི་སྤྱོད་པས་སོ། །མདོ་ལས་དེ་དག་གི་ཐ་མ་མར་མེ་མཛད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡིན་ནོ་ཞེས་པ་ནས་རིམ་གྲོར་བྱས་སོ་ཞེས་པའི་བར་དུ་ནི་དྲན་པའི་རྒྱུ་དང་བསྟན་པའི་རྒྱུ་དང་དག་པའི་རྒྱུ་བསྟན་ཏོ། །མདོ་ལས་མ་ཕམ་པ་ཁྱོད་དེའི་དུས་ན་ཞེས་པ་ནས་ཆོས་སྨྲས་པ་ཡིན་ནོ་ཞེས་པའི་བར་དུ་མཐུན་པའི་དོན་གྱིས་ལན་བཏབ་པ་དང༌། སྔོན་གྱི་ལུགས་ལས་ལན་བཏབ་པ་སྟེ་འདི་ནི་ངའི་ཡིན་ནོ་ཞེས་པ་ནི་གཏན་ཚིགས་ཀྱི་རྒྱུ་སྨྲས་སོ། །མདོ་ལས་གང་ཡང་གྲགས་འདོད་བྱང་ཆུབ་སེམས་དཔའ་ཞེས་པ་ནས་སྙམ་བྱེད་དོ་ཞེས་པའི་བར་དུ་ནི་སྤྱིར་བསྡུས་ཏེ་ལན་བཏབ་པའོ། །མདོ་ལས་དེ་ནས་འཇམ་དཔལ་ཞེས་པ་ནས་མཐའ་ཡས་བྱེ་བ་སྟོང་རྣམས་ཤེས་པའི་བར་དུ་ནི་འདི་མན་ཆད་ཚིགས་སུ་བཅད་པ་བཞི་བཅུ་རྩ་གསུམ་གྱི་དོན་སྔ་མ་རྣམས་བཟླས་ཏེ་སྔ་མའི་ལུགས་ཀྱི་ལྟས་བསྟན་ཏོ། །མདོ་ལས་དེའི་ཚེ་རྒྱལ་པོ་དེའི་སྲས་སུ་གྱུར་པ་དེའི་ཞེས་པ་ནས་ཐམས་ཅད་རབ་ཏུ་བྱུང་ངོ་ཞེས་པའི་བར་དུ་ནི་འདི་མན་ཆད་ཚིགས་བཅད་སུམ་ཅུ་རྩ་བརྒྱད་ཀྱིས་དོན་མཐུན་པའི་ལུགས་བསྟན་ཏེ། རྒྱུ་ལྔ་པ་དང་སྦྱར་རོ། །ཚིགས་སུ་བཅད་པ་ཉི་ཤུ་རྩ་དགུས་ནི་ལོངས་སྤྱོད་ཀྱི་རྒྱུ་ཆེ་བ་བསྟན། ཚིགས་སུ་བཅད་པ་དགུས་ནི་རྒྱུ་བཞི་པོ་བསྟན། དང་པོ་ལའང་རྣམ་པ་བཞི་སྟེ། དང་པོའི་ཚིགས་སུ་བཅད་པ་ཉི་ཤུས་ནི་ལྟས་མཐུན་པ་བསྟན། དེའི་འོག་མ་ཚིགས་སུ་བཅད་པ་བཞིས་ནི་མྱ་ངན་ལས་འདས་པ་མི་མཐུན་པ་བསྟན། ཡང་ཕྱེད་དང་གསུམ་གྱིས་ནི་ལུང་བསྟན་པ་བསྟན། ཚིགས་སུ་བཅད་པ་གཉིས་ཀྱིས་ནི་མྱ་ངན་ལས་འདས་པ་བསྟན་ཏོ། །དང་པོ་ལའང་རྣམ་པ་དྲུག་སྟེ་འཁོར་ཕུན་སུམ་ཚོགས་པ་དང་དུས་ཕུན་སུམ་ཚོགས་པ་དང༌། སྤྱོད་ལམ་ཕུན་སུམ་ཚོགས་པ་དང༌། རྒྱུ་ཕུན་སུམ་ཚོགས་པ་དང༌། ཐོས་པ་ཕུན་སུམ་
ཚོགས་པ་དང༌། ལམ་ཕུན་སུམ་ཚོགས་པའོ། །ཚིགས་བཅད་དང་པོ་གཉིས་ཀྱིས་ནི་ཁྱིམ་ན་གནས་པ་བསྟན། དེའི་འོག་མ་གཉིས་ཀྱིས་ནི་རབ་ཏུ་བྱུང་བ་བསྟན་ཏོ། །མདོ་ལས། འཇིག་རྟེན་མགོན་པོ་དེ་ཡིས་ཆོས་བཤད་པ། །ཞེས་པ་ནས། །སྲོག་ཆགས་སྟོང་ཕྲག་བྱེ་བ་དག་ལས་བཤད། །ཅེས་པའི་བར་དུ་ནི་དུས་ཕུན་སུམ་ཚོགས་པ་བསྟན་ཏོ། །མདོ་ལས་རྣམ་པར་འདྲེན་པ་ཞེས་པ་ནས་བཞུགས་ནས་བསམ་གཏན་མཛད་ཅེས་པའི་བར་དུ་ནི་སྤྱོད་ལམ་ཕུན་སུམ་ཚོགས་པ་བསྟན་ཏེ། དེ་ལ་ཚིགས་བཅད་གཅིག་གིས་ནི་བསམ་གཏན་ལ་འཇུག་པ་བསྟན། དེའི་འོག་མ་གཉིས་ཀྱིས་ནི་སྣོད་དང་བཅུད་ཀྱི་འཇིག་རྟེན་བསྟན་ཏོ། །མདོ་ལས་རྫུ་འཕྲུལ་གྱི་མེ་ཏོག་ཅེས་པ་ནས། ཞིང་རྣམས་ཐམས་ཅད་དེ་མ་ཐག་ཏུ་གཡོས། །ཞེས་པའི་བར་དུ་འདིས་ནི་སྣོད་དང་བཅུད་ཀྱི་འཇིག་རྟེན་བསྟན་ཏེ། དེ་ལ་ཡང་སྙོམས་པར་འཇུག་པ་དང་མེ་ཏོག་གི་ཆར་འབབ་པ་དང། མཆོད་པ་བསྟན་པས་གཡོ་བ་ལ་སོགས་པ་བསྟན་པའོ། །མདོ་ལས། དེ་ནི་ངོ་མཚར་རྨད་དུ་གྱུར། །ཅེས་པ་ནས། རབ་ཏུ་སྣང་བས་འཇིག་རྟེན་ཐམས་ཅད་མཛེས། །ཞེས་པའི་བར་དུ་ནི་རྒྱུ་ཕུན་སུམ་ཚོགས་པ་སྟེ། འོད་གཏོང་བ་དང་ཡུལ་སྣང་བར་བྱས་པ་དང༌། སངས་རྒྱས་ཀྱིས་ཀྱང་མངོན་དུ་སྣང་བ་སྟེ། འདི་ནི་དང་པོའོ། །མདོ་ལས། སེམས་ཅན་རྣམས་ཀྱི་ཤི་འཕོ་སྐྱེ་བ་སྟོན། །ཞེས་པ་ནས་དེས་མངོན་དུ་མཐོང་བ་བསྟན་ཏེ། དང་པོ་ཚིགས་བཅད་ཕྱེད་དང་དྲུག་གིས་ནི་འགྲོ་བ་དྲུག་བསྟན། ཚིགས་བཅད་གསུམ་གྱིས་ནི་སངས་རྒྱས་མཐོང་བ་བསྟན། གཅིག་གིས་ནི་ཆོས་ཐོས་པ་བསྟན། གཅིག་གིས་ནི་འཁོར་བཞི་མཐོང་བ་བསྟན། ཚིགས་བཅད་བཞིས་ནི་བྱང་ཆུབ་སེམས་དཔའ་མཐོང་བ་བསྟན་ཏེ་འདི་ནི་དང་པོའོ། །འགྲོ་བ་ནི་ལས་དང་རྒྱུ་རྣམས་ཀྱིས་འགྲོ་བར་བྱེད་པའོ། །མདོ་ལས། འདི་ལྟར་དེ་ན་ལ་ལས་རིན་ཆེན་ཞིང༌། །ཞེས་པ་ནས། །རྣམ་པར་འདྲེན་པའི་འོད་ཟེར་དེ་ཡི་མ་ཐུས། །ཞེས་པའི་བར་ནི་སངས་རྒྱས་མཐོང་བ་བསྟན་ཏེ། ཞིང་མཐོང་བ་དང་མཆོད་པ་མཐོང་བ་དང་སངས་རྒྱས་མངོན་དུ་མཐོང་བ་དང་གསུམ་སྟེ་འདི་ནི་དང་པོའོ། །ཤཱཀྱ་ཐུབ་པའི་འོད་ཀྱིས་ནི་གསེར་གྱི་ཁ་དོག་ཏུ་སྣང་བར་བྱས། ཉི་ཟླ་སྒྲོན་མའི་འོད་ཀྱིས་
ཤེལ་དང་བཻ་ཌཱུཪྻའི་འོད་དུ་སྣང་བར་བྱས་ཏེ། ཐེག་པ་ཆེན་པོ་འདི་གཞན་དང་མ་འདྲེས་པ་ཉིད་དམ་པ་ཡིན་པར་བསྟན་པའི་ཕྱིར་རོ། །མདོ་ལས། ལྷ་དང་མི་དང་དེ་བཞིན་གནོད་སྦྱིན་ཀླུ། །ཞེས་པ་ནས། གསེར་གྱི་མཆོད་སྡོང་ལྟ་བུ་ལྟ་ན་མཛེས། །ཞེས་པའི་བར་དུ་ནི་འཁོར་བརྒྱད་རྣམས་ཀྱིས་མཆོད་ནས་དེ་བཞིན་གཤེགས་པ་མཐོང་བའོ། །མདོ་ལས། བཻ་ཌཱུཪྻ་ཡི་དབུས་ན་གསེར་གཟུགས་བཞིན། །ཞེས་པ་ནས། ཆོས་འདི་རབ་ཏུ་གསུངས་ཞེས་པའི་བར་དུ་ནི་ཆོས་ཐོས་པར་བསྟན་ཏོ། །མདོ་ལས། སོ་སོའི་ཞིང་དུ་རྣམ་པར་འདྲེན་པ་ཡི། །ཞེས་པ་ནས། འདིའི་ཅི་ཞིག་ཅེས་ནི་ཕན་ཚུན་འདྲི། །ཞེས་པའི་བར་དུ་འཁོར་རྣམ་བཞི་བསྟན་པ་དང༌། བྱང་ཆུབ་སེམས་དཔའ་རྣམས་ཀྱིས་ཆོས་རྟོགས་ཤིང་མོས་པ་སྐྱེ་བ་དང་ཁྱིམ་ན་གནས་པ་དང་རབ་ཏུ་བྱུང་བ་གཉི་གས་བྱང་ཆུབ་ཀྱི་སྤྱོད་པ་ཐོབ་པ་དང༌། ཕ་རོལ་ཏུ་ཕྱིན་པ་ལ་དབང་དུ་གྱུར་པར་བསྟན་ཏོ། །མདོ་ལས། གནོད་སྦྱིན་ལྷ་མིས་དེ་མཆོད་མ་ཐོགས་པར། །ཞེས་པ་ནས། ང་ཡི་ཆོས་མཛོད་འདི་ལ་ཁྱོད་མངོན་སུམ། །ཞེས་པའི་བར་དུ་ནི་ལན་བཏབ་པ་ཕུན་སུམ་ཚོགས་པ་སྟེ། ཚིགས་བཅད་དང་པོ་གཅིག་གིས་ནི་བཤད་པའི་རྒྱུ་བསྟན། ཕྱི་མ་གཉིས་ཀྱིས་ནི་ཡུན་རིང་ཐུང་བསྟན། ཏིང་ངེ་འཛིན་ལས་བཞེངས་མ་ཐག་ཏུ་སེམས་ཅན་རྣམས་བྱང་ཆུབ་ལ་འཛུད་ཅེས་པའི་དོན་ཏོ། །མདོ་ལས། ཇི་ལྟར་སྲོག་ཆགས་ཕན་ཕྱིར་ངས་བསྟན་པ། །ཞེས་པ་ནས། །དེ་ཚེ་རྒྱལ་བས་ཆོས་རབ་འདི་གསུངས་པ། །བར་གྱི་བསྐལ་བ་དྲུག་ཅུ་ཚང་བར་དེ། ཉེས་པའི་བར་དུ་ནི་དུས་རིང་བ་བསྟན་པ་དང༌། ལྟས་མཐུན་པ་བསྟན་པ་དང༌། བརྩོན་འགྲུས་ཀྱིས་འབྱུང་བར་བསྟན་པ་དང༌། དེ་བཞིན་གཤེགས་པ་ཡང་བསྐལ་པར་ཏིང་ངེ་འཛིན་ལས་མི་བཞེངས་ནས་སེམས་ཅན་མ་རབས་ཉོན་མོངས་པ་སྤོང་བར་མི་རྩོལ་བ་མི་རིགས་པར་བསྟན་པ་དང༌། སེམས་ཅན་ལ་ཐུགས་རྗེ་ཞིང་ཕན་གདགས་པར་དགོངས་པ་དང་དུས་ལ་བབ་པ་རྣམས་ལུང་བསྟན་ཞིང་མྱ་ངན་ལས་འདས་པའི་བདེ་བ་ལ་འཇོག་པ་དང་ལོངས་སྤྱོད་ཆེ་བའི་རྒྱུ་བསྟན་ཏེ་ཆོས་འཛིན་ཅིང་དགེ་བའི་རྒྱུ་ལ་འཇུག་པར་བསྟན་པའོ། །མདོ་ལས། །དེ་ཡི་སློབ་མར་གྱུར་པ་བརྒྱད་བརྒྱ་དག །ཅེས་པ་ནས། །དེ་དག་སངས་
རྒྱས་བྱེ་བ་མང་པོ་མཐོང༌། །ཞེས་པའི་བར་དུ་འདིས་ནི་དེ་བཞིན་གཤེགས་པ་ཤིན་ཏུ་བསྟན་པའི་ཆོས་ཀྱི་རྒྱུ་བསྟན་པ་སྟེ། ཐེག་པ་ཆུང་ངུའི་ཚུལ་དུ་བསྐལ་པ་གྲངས་མེད་པ་གསུམ་ནི་ལུགས་ལས་བཟློག་པ་བསྟན་པའོ། །བསྐལ་པ་དང་པོའི་ཚེ་སངས་རྒྱས་ཤཱཀྱ་ཐུབ་པ་མཐོང༌། དེའི་འོག་ཏུ་སངས་རྒྱས་ཁྲག་ཁྲིག་བདུན་ཅུ་རྩ་ལྔ་མཐོང༌། བསྐལ་པ་གཉིས་པར་སངས་རྒྱས་རིན་ཆེན་གཙུག་ཕུང་མཐོང་སྟེ། ཡང་སངས་རྒྱས་ཁྲི་ཕྲག་བདུན་ཅུ་རྩ་དྲུག་མཐོང༌། བསྐལ་པ་གསུམ་པར་སངས་རྒྱས་མར་མེ་མཛད་མཐོང་སྟེ། སངས་རྒྱས་ཁྲི་ཕྲག་བདུན་ཅུ་རྩ་བདུན་མཐོང་ངོ༌། །མདོ་ལས། །དྲང་སྲོང་ཆེན་པོ་དེ་དག་བཀུར་སྟི་བྱས། །ཞེས་པ་ནས། །བྱང་ཆུབ་མཆོག་ཏུ་གཅིག་གིས་གཅིག་ལུང་བསྟན། །ཞེས་པའི་བར་གྱིས་ནི་འཇུག་པར་འགྱུར་བའི་རྒྱུ་བསྟན་ཏེ། ཀུན་གྱིས་བྱང་ཆུབ་ཆེན་པོ་ཐོབ་ཅེས་པའི་དོན་ཏོ། །མདོ་ལས། སངས་རྒྱས་དེ་དག་རིམ་གྱིས་འབྱུང་བ་ཡིན། །ཞེས་པ་ནས། །སྲོག་ཆགས་བྱེ་བ་སྟོང་ཡང་དུལ་བར་བྱས། །ཞེས་པའི་བར་དུ་ཚིགས་བཅད་དྲུག་གིས་ནི་དྲན་པའི་རྒྱུ་བསྟན་ཏེ། ཚིགས་བཅད་དང་པོ་གཅིག་གིས་ནི་རྒྱལ་བུ་བརྒྱད་ལ་དགོངས་པ་བསྟན། དེའི་འོག་མ་ལྔས་ནི་འཁོར་བརྒྱད་བརྒྱ་ལ་དགོངས་པ་བསྟན་ཏོ། །མདོ་ལས། །གང་སྔོན་བདེ་བར་གཤེགས་པ་དེ་ཡི་སྲས། །ཞེས་པ་ནས། །ཕྱོགས་རྣམ་པར་གྲགས་ཞེས་པའི་བར་དུ་ནི་འཁོར་རྣམས་ལ་དགོངས་པ་བསྟན་ཏེ། ཚིགས་བཅད་ཕྱེད་དང་གསུམ་གྱིས་ཉོན་མོངས་པའི་རྒྱུ་བསྟན། ཡང་ཚིགས་བཅད་ཕྱེད་དང་གསུམ་གྱིས་ནི་དག་པའི་རྒྱུ་བསྟན་ཏེ། འདི་ནི་དང་པོ་དང་སྦྱར་རོ། །ཁེ་དང་གྲགས་པ་དང་ཆོ་རིགས་ལ་ཆགས་པ་ཐོས་པར་རྩོལ་བའི་ཆགས་པ་དེ་དག་གྲགས་པར་འདོད་པའོ། །མདོ་ལས། །དེ་ཡང་དགེ་བ་རྣམས་ཀྱིས་ལས་དེ་དག །ཅེས་པ་ནས། །སྲོག་ཆགས་སྟོང་ཕྲག་བྱེ་བ་འདུལ་བར་འགྱུར། །ཞེས་པའི་བར་གྱིས་ནི་རྣམ་པར་དག་པའི་རྒྱུ་བསྟན་ཏོ། །མདོ་ལས། །དེའི་ཚེ་ལེ་ལོ་ཅན་དུ་གང་གྱུར་པ། །ཞེས་པ་ནས། །ཆོས་སྨྲ་བ་ནི་ཁོ་བོ་ཡིན། །ཞེས་པའི་བར་དུ་ནི་དོན་གཞན་ལས་གླེང་བ་རྣམས་བསྟན་ནས་སྔོན་གྱི་ལུགས་དང་སྦྱར་བ་བསྟན་པ་སྟེ། ཚིགས་བཅད་དང་པོས་
ནི་གང་ཟག་བསྟན། །དེའི་འོག་མས་ནི་ཆོས་བསྟན། དེའི་འོག་མས་ནི་བསྡུ་བ་སྟེ་འདི་ནི་དང་པོའོ། །མདོ་ལས། ཡེ་ཤེས་འདི་ཡི་ལྟས་སྣང་འགྱུར། །ཞེས་པ་ནས་བྱང་ཆུབ་གང་འདིར་ཞུགས་ཞེས་པའི་བར་དུ་ནི་ཆོས་བསྟན་པ་དང༌། ལྟས་བསྟན་ནས་གཟེངས་བསྟོད་པ་དང༌། ཆོས་ཟབ་མོ་ལ་སེམས་སུ་གཞུག་པའི་ཕྱིར་ལྷའི་འོད་ཀྱིས་བསྟན་པ་དང༌། ཆོས་ཀྱི་ཆར་པ་ཕབ་པས་དགེ་བའི་མྱུ་གུ་བསྐྱེད་པ་དང༌། བྱང་ཆུབ་ཚོལ་བ་རྣམས་ཐེ་ཚོམ་བཅད་པའོ།། །།དམ་པའི་ཆོས་པུཎྜ་རཱི་ཀའི་འགྲེལ་བ། བམ་པོ་གསུམ་པ། འདི་མན་ཆད་ཐབས་མཁས་པའི་ལེའུ་སྟོན་ཏེ། དེ་ཡང་གདགས་པའི་གཏན་ཚིགས་དང་མིང་དགྲོལ་བ་དང༌། རང་བཞིན་བསྟན་པའོ། །འདི་ལ་ཡང་ལེའུ་བརྒྱད་གཞུང་ཡང་དག་པར་འགྲེལ་པ་སྟེ། པདྨ་ཆུ་ལས་སྐྱེས་པ་དང་ཁ་འབྱེད་པའི་དོན་གྱིས་དམ་པའི་ཆོས་ཀྱི་འབྲས་བུ་རྟོགས་པར་སྟོན་ཏེ་ཐེག་པ་གཅིག་པོ་སྟོན་པ་ཡང་ཐེག་པ་རྣམ་པ་གཉིས་བསྩལ་ནས་དབང་པོ་རྣམ་གསུམ་ལུང་བསྟན་པ་དང་ཐེ་ཚོམ་བསྩལ་བའི་ཕྱིར་དཔེ་དང་ཐབས་རྣམ་པ་སྣ་ཚོགས་སྟོན་པས་ཐབས་མཁས་པའི་ལེའུ་སྟོན་པར་དགོངས་པ་དང༌། ཡང་ན་ལེའུ་བཅུ་དགུ་པ་ཡང་དག་པའི་གཞུང་ཉིད་སྟོན་པ་ལ་ཐབས་མཁས་པའི་ལེའུ་འདི་མན་ཆད་ལེའུ་བཅུ་གཉིས་ཀྱིས་ཐེག་པ་གཅིག་པོ་སྟོན་པའི་དམིགས་པ་སྟོན་པ་དང༌། བདེ་བ་ལ་གནས་པ་དང་སའི་རུམ་ནས་འཐོན་པའི་ལེའུ་གཉིས་ཀྱིས་ཐེག་པ་གཅིག་པོའི་སྤྱོད་པ་བསྟན་པ་དང༌། དེ་བཞིན་གཤེགས་པའི་ཚེའི་ཚད་ཀྱི་ལེའུ་དང༌། རྟག་ཏུ་མི་བརྙས་པའི་ལེའུ་དང༌། སྤྱིར་ལེའུ་ལྔས་ཐེག་པ་གཅིག་པོའི་འབྲས་བུ་བསྟན་པ་སྟེ། དམིགས་པ་བསྟན་པས་ནི་ཐེག་པ་འདིའི་དྲང་བ་དང་ངེས་པའི་དོན་མཚོན་ནས་ཉན་ཐོས་པ་རྣམས་དེ་རྟོགས་པ་ལུང་བསྟན་པའོ། །དེ་ལ་ཡང་དང་པོའི་ལེའུ་བརྒྱད་ཀྱིས་ནི་དྲང་བ་དང་ངེས་པའི་དོན་དངོས་པོ་བསྟན་པས་དབང་པོ་རྣམ་གསུམ་ལུང་བསྟན་པས་ཐོབ་པ་དང༌། ལེའུ་གསུམ་གྱིས་ཆོས་དང་གང་ཟག་ལ་བསྟོད་ཅིང་མདོ་འདི་ལ་གཟུད་པ་དང་ལེའུ་གཅིག་གིས་བཀྲི་བའི་དོན་སྤངས་ཏེ་ངེས་པའི་དོན་ལ་འཇུག་པའོ། །འགྲེལ་པ་ལས་འདི་མན་ཆད་རྒྱུ་དང་འབྲས་བུའི་མཚན་ཉིད་སྟོན་ཏེ།
གླེང་གཞིའི་ལེའུ་བཤད་པའི་རྗེས་ལ་གཞུང་ཉིད་བསྟན་པའི་ཕྱིར་རྒྱུ་དང་འབྲས་བུ་སྟོན་པའི་མཚན་ཉིད་རྣམ་པ་གསུམ་སྟེ། དེ་བཞིན་གཤེགས་པ་རྣམས་ཀྱི་ཡེ་ཤེས་བླ་ན་མེད་པའི་འབྲས་བུའོ། །ཡེ་ཤེས་ཀྱི་འབྲས་བུ་ནི་མཚོན་པར་བྱེད་པའི་རྒྱུའོ། །ཕུགས་སུ་འགྲོ་བ་སྒོ་ནས་འཇུག་པ་བཞིན་བསྟན་པའི་ལུང་འདི་ལ་གནས་ཏེ་ཡང་དག་པའི་འབྲས་བུ་ལེན་པར་བྱེད་པ་ཞེས་པའི་དོན་ཏོ། །དེ་ཡང་མདོ་སྡེ་འདི་ཉིད་ཀྱི་གཞུང་དང་ལུགས་སུ་བསྟན་པ་ཡང་དག་པའི་ཡེ་ཤེས་ཀྱི་སྒོ་དབྱེ་བ་དང༌། དེ་བསྟན་པ་དང་དེ་རྟོགས་པ་དང༌། དེ་ཆུད་པ་སྟེ། དེ་ཉིད་རྒྱུ་དང་འབྲས་བུར་བལྟའོ། །ཐེག་པ་རྣམ་པ་གསུམ་གྱི་གཞུང་ཐོས། ཐེག་པ་རྣམ་པ་གཅིག་གི་ཚུལ་ལ་ཞུགས་པ་དེ་ཉིད་ཀྱི་འབྲས་བུ་ཐོབ་པ་ནི་ཆོས་ཀྱི་པདྨོ་ཞེས་པའི་དོན་ཏོ། །འདི་མིང་བཤད་པ་ནི་དེ་བཞིན་གཤེགས་པའི་ཡེ་ཤེས་ལ་རྣམ་པ་གཉིས་ཏེ། ཡང་དག་པའི་ཡེ་ཤེས་དང་སྦྱོར་བའི་ཡེ་ཤེས་སོ། །ཡང་དག་པའི་ཡེ་ཤེས་ཀྱང་འདུས་བྱས་དང་འདུས་མ་བྱས་ཀྱི་ཡེ་ཤེས་དང་གཉིས་སུ་དབྱེ་བ་ལ། འདིར་ནི་ཟག་པ་མེད་པའི་ཡེ་ཤེས་རྩ་བ་དང་རྒྱབ་ནས་ཐོབ་པའི་ཡེ་ཤེས་གཉིས་དང་སྦྱར་རོ། །སྦྱོར་བ་ནི་ཡང་དག་པའི་ཡེ་ཤེས་ལ་སྦྱོར་ཞིང་འཇུག་པའི་ཕྱིར་ཀུན་རྫོབ་ཀྱི་ཡེ་ཤེས་ཏེ་ཐབས་ཉིད་དོ། །ཐབས་དེ་ཡང་བདག་དང་གཞན་གྱི་དོན་སྒྲུབ་པ་ལ་སྦྱོར་བ། སྒྲུབ་པ་ལ་མཁས་པ་དེ་ཐབས་ཞེས་གདགས་སོ། །དེ་ཡང་འོག་མ་འདྲེས་པ་དང༌། བླ་མ་ལ་སྦྱར་བའོ། །ཇི་ལྟར་མདོ་ལས་སྣོད་མི་གཙང་བ་འཛིན་ཅིང་གོས་མི་གཙང་བ་གྱོན་པས་མངོན་པར་བྱང་ཆུབ་པ་ནི་ལུས་ཀྱི་ཐབས་སོ། །བདེན་པ་བཞི་ལ་སོགས་པ་ཆོས་ཀྱི་འཁོར་ལོ་བསྐོར་བ་དང༌། ཐེག་པ་ཆེན་པོ་ལ་འཇུག་པའི་མདོ་སྟོན་པ་ནི། ངག་གི་ཐབས་མཁས་པའོ། །སྔོན་གྱི་དེ་བཞིན་གཤེགས་པས་མཛད་པ་དང་འདྲ་བར་ཐབས་མཁས་པ་རྣམ་པ་སྣ་ཚོགས་དགོངས་པ་ནི་ཡིད་ཀྱི་ཐབས་མཁས་པའོ། །ཡང་ན་འདྲེན་པའི་ཐབས་མཁས་པ་སྟེ་ཕྱི་རོལ་གྱི་དྲུག་སྤྱོད་པའོ། །བསྔོ་བ་ལ་ཐབས་མཁས་པ་སྟེ་ནང་དུ་དྲུག་སྤྱོད་པའོ། །འདི་རང་བཞིན་ནི་ཤེས་རབ་ཀྱི་རང་བཞིན་ཏེ། རྣམ་པར་མི་རྟོག་པའི་ཡེ་ཤེས་སོ། །ཡང་ན་ཕྱིས་ཐོབ་པའི་ཡེ་ཤེས་ཏེ་གཞན་ལ་ཕན་འདོགས་པའི་ཕྱིར་སྤྱོད་པ་དམ་པ་དང་ལྡན་པའི་ཕྱིར་ཞེས་
ཀྱང་འཆད་དོ། །མདོ་ལས་དེ་ནས་བཅོམ་ལྡན་འདས་དགོངས་པ་དང་ལྡན་ཞིང་ཞེས་པ་ནས་རང་སངས་རྒྱས་ཐམས་ཅད་ཀྱིས་ཤེས་པར་དཀའོ་ཞེས་པའི་བར་དུ་ནི་འདི་མན་ཆད་ཚིག་རྐྱང་བས་རྒྱས་པར་བཤད་པ་དང༌། ཚིགས་སུ་བཅད་པས་བསྡུས་ཏེ་བསྟན་པའི་དོན་ནི་དམ་པའི་ཆོས་ཀྱི་དོན་ཆུད་པར་བྱ་བ་དེ་བཞིན་གཤེགས་པ་ཉག་གཅིག་གིས་མཁྱེན་པ་དེ་སྟོན་ཏེ། བཅོམ་ལྡན་འདས་དགོངས་པ་དང་མཁྱེན་བཞིན་དུ་ལྡན་ཞེས་པ་ནི་ཡང་དག་པའི་ཡེ་ཤེས་ཀྱིས་གཟིགས་ཤིང་ཏིང་ངེ་འཛིན་ལས་བཞེངས་པའོ། །ཏིང་ངེ་འཛིན་དེ་ལས་བཞེངས་པ་ཡང་ཆོས་ལ་མངའ་བརྙེས་པའི་དོན་དང༌། བཅོམ་ལྡན་འདས་ཏིང་ངེ་འཛིན་དུ་བཞུགས་པ་ལ་གཞན་གྱིས་བཞེངས་པར་བསྐུལ་མི་ནུས་ཀྱི་བཅོམ་ལྡན་འདས་ཉིད་དེ་ལས་བཞེངས་ཤིང་འབྱུང་བ་དང་འཇུག་པ་ལ་མངའ་བརྙེས་པ་སྟོན་ཏོ། །དེ་ལས་བཞེངས་ནས་ཡང་དག་པའི་དོན་དེ་བཞིན་ལ་བཀའ་མི་སྩོལ་གྱི། ཤཱ་རིའི་བུ་ཞེས་བོས་ཏེ་བཀའ་སྩལ་པ་ནི་ཤེས་རབ་མཆོག་ཏུ་རྣོ་བས་ཆོས་དམ་པའི་མཆོག་སྣོད་དུ་འགྱུར་བ་དང་འཕགས་པ་ཉན་ཐོས་པ་རྣམས་གཟེངས་བསྟོད་ཅིང་དམ་པའི་ཆོས་འདི་འཕགས་པ་ཉན་ཐོས་པ་རྣམས་ཀྱི་ཆེད་དུ་གསུངས་པ་དང་ཉན་ཐོས་པ་རྣམས་བྱང་ཆུབ་ཆེན་པོ་ལ་གཞོལ་ཞིང་འབྲས་བུ་བླ་ན་མེད་པ་ལ་གཟུད་པ་དང་འཕགས་པ་ཉན་ཐོས་པ་རྣམས་སྙིང་རྗེ་ཞན་པ་ཡིན་པས་བྱང་ཆུབ་སེམས་དཔའ་ལ་བཀའ་སྩལ་ནས་ཆོས་འདི་ལ་ཉན་ཐོས་པ་རྣམས་སྐལ་བ་མེད་པ་དང་དོན་དུ་མ་བཤད་ཅེས་འཇུག་ཏུ་མི་བཏུབ་པའི་ཕྱིར་ཤཱ་རིའི་བུ་ལ་བཀའ་སྩལ་ནས་འཕགས་པ་ཉན་ཐོས་པ་གཞན་ཡང་མདོ་འདི་ལ་འཇུག་པར་སེམས་བསྐྱེད་པ་དང་བལྟ་བ་དང༌། རྟོགས་པར་དཀའ་བ་ནི་ཡེ་ཤེས་དང་ཡེ་ཤེས་ཀྱི་སྒོའོ། །འགྲེལ་པ་ལས་ཀྱང་ཤིན་ཏུ་ཟབ་པ་རྣམ་པ་གཉིས་ཏེ། རྟོགས་པ་ཤིན་ཏུ་ཟབ་པ་དང་གཞུང་ཤིན་ཏུ་ཟབ་པའོ། །རྟོགས་པ་ནི་ཤེས་རབ་པོ། །གཞུང་ནི་ཤེས་རབ་ཀྱི་སྒོའོ། །ཤེས་རབ་ཅེས་པ་ནི་ཐམས་ཅད་མཁྱེན་པ་དང༌། རྣམ་པ་ཐམས་ཅད་མཁྱེན་པ་སྟེ། ཐམས་ཅད་མཁྱེན་པ་ནི་ཡུལ་མཁྱེན་པའོ། །རྣམ་པ་ཐམས་ཅད་མཁྱེན་པ་ནི་གང་ཡོད་པ་དང་མེད་པ་དང༌། འདུས་བྱས་དང་འདུས་མ་བྱས་དང་ཟག་པ་དང་ཟག་པ་མེད་པ་ལ་སོགས་པ་སྟེ། རྣམ་པ་ཐམས་ཅད་ཐུགས་སུ་ཆུད་པའོ།།
ཤེས་རབ་ཀྱི་སྒོ་ནི་གཞུང་ཤིན་ཏུ་ཟབ་པ་སྟེ། དེ་བཞིན་གཤེགས་པས་གསུངས་པའི་ཚིག་དང་དོན་ཐམས་ཅད་དེ་བསམ་གྱིས་མི་ཁྱབ་པའི་ཆོས་ཡེ་ཤེས་རྣམ་པ་ལྔའི་སྤྱོད་ཡུལ་དུ་གྱུར་པའོ། །རྟོགས་པར་དཀའ་བ་ནི་ཐེག་པ་རྣམ་གཅིག་རང་བཞིན་གྱིས་ཤིན་ཏུ་ཟབ་པ་བླ་ན་མེད་པ་སྟེ། ཡང་དག་པ་ཉིད་ཀྱི་དོན་ཏོ། །ཡང་ཟབ་པ་ནི་དངོས་པོ་དམ་པ་ཡིན་པ་དང་ཆུད་པར་དཀའ་བའོ། །དངོས་པོ་དམ་པ་ནི་རྟོགས་པ་ཤིན་ཏུ་ཟབ་པ་ལྔའོ། །ཆུད་པར་དཀའ་བ་ནི་ཉན་ཐོས་དང་རང་སངས་རྒྱས་ཀྱིས་ཤེས་པར་མི་ནུས་པའོ། །ཤིན་ཏུ་ཟབ་པ་ལྔ་ནི་དོན་ཟབ་པ་སྟེ་དོན་ཐ་དད་པ་དང༌། རང་བཞིན་ཟབ་པ་སྟེ་ངོ་བོ་ཉིད་ཀྱི་ཕྱིར་དང༌། རང་གི་རིག་པ་ཟབ་པ་སྟེ། ཡང་དག་པའི་ཡེ་ཤེས་ཀྱི་རང་རིག་པའི་ཡེ་ཤེས་གཞན་གྱིས་ཤེས་པར་མི་ནུས་པ་དང༌། གནས་ཟབ་པ་སྟེ། ཆོས་ཀྱི་དབྱིངས་ཆོས་ཉིད་ནི་དེ་བཞིན་གཤེགས་པ་རྣམས་ཀྱི་གཞི་ཡིན་པ་དང་བླ་ན་མེད་པའི་ཟབ་པ་སྟེ་དངོས་པོ་དམ་པའི་ཕྱིར་ཟབ་པའོ། །མདོ་ལས་དེ་ཅིའི་ཕྱིར་ཞེ་ན་ཞེས་པ་ནས་ཤེས་པར་དཀའ་བའི་ཆོས་ཤེས་པ་རྣམས་སོ་ཞེས་པའི་བར་དུ་ནི་འདིར་གཞུང་ལས་ཤིན་ཏུ་ཟབ་པ་བརྒྱད་འབྱུང་བ་བསྟན་ཏེ། ཅིའི་ཕྱིར་ཞེས་དྲིས་པ་ནི་ཐེག་པ་རྣམ་གསུམ་རྣམ་པར་གྲོལ་བ་ཐོབ་པར་འདྲ་ན་ཁྱད་པར་ཅི་ཡོད་ཅེས་པ་ལ་ཤིན་ཏུ་ཟབ་པ་འདི་དག་གིས་འཕགས་པ་ཉན་ཐོས་པ་ལས་ཁྱད་པར་དུ་བསྟན་པའི་ཕྱིར་ཤིན་ཏུ་ཟབ་པའི་ཚིག་གི་དོན་རྣམ་པ་བརྒྱད་སྟོན་ཏེ། སངས་རྒྱས་མང་པོ་ལ་བསྙེན་བཀུར་ཞེས་པ་ནི་གཟུང་ཞིང་འཛིན་པ་དང༌། ཀློག་ཅིང་འདོན་པ་ཤིན་ཏུ་ཟབ་པ་བསྟན་ཏེ། བཅོམ་ལྡན་འདས་སྔོན་བསྐལ་བ་གྲངས་མེད་པ་གསུམ་གྱི་བར་དུ་སངས་རྒྱས་ཆུ་བོ་གང་གཱའི་བྱེ་མ་སྙེད་ལ་བསྙེན་བཀུར་བྱས་ཤིང་ལུང་མནོས་པའི་ཕྱིར་ཤིན་ཏུ་ཟབ་པའོ། །བྱང་ཆུབ་ཀྱི་སྤྱད་པ་སྤྱོད་ཅེས་པ་ནི་མངོན་པར་སྒྲུབ་པ་ཤིན་ཏུ་ཟབ་པ་སྟོན་པ་སྟེ། དེ་བཞིན་གཤེགས་པ་རྣམས་བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་བས་མངོན་པར་བྱང་ཆུབ་པ་སྟོན་གྱི་ཉན་ཐོས་པ་རྒྱུ་སྒྲུབ་པ་ཙམ་དུ་ཟད་པ་མ་ཡིན་པར་བསྟན་པའི་ཕྱིར་ཤིན་ཏུ་ཟབ་པ་འདི་བསྟན་ཏོ། །བརྩོན་འགྲུས་སྤྱད་པ་རྣམས་ཞེས་པ་ནི་འབྲས་བུ་སྒྲུབ་པ་ཤིན་ཏུ་ཟབ་པ་སྟོན་ཏེ། བརྟུན་པའི་བརྩོན་འགྲུས་ཀྱིས་
སྐྱོ་བ་དང་དུབ་པ་མེད་པར་བསྒྲུབས་པས་འབྲས་བུ་དམ་པ་འཐོབ་པ་ནི་འབྲས་བུ་ཤིན་ཏུ་ཟབ་པའོ། །ངོ་མཚར་དང་ཞེས་པ་ནི་བསོད་ནམས་སྤེལ་བའི་སེམས་ཤིན་ཏུ་ཟབ་པ་སྟེ། བྱང་ཆུབ་སེམས་དཔའ་དེ་དཀའ་པ་སྤྱོད་ཅིང་བརྩོན་པ་མི་གཏོང་བའི་སེམས་ཕྱོགས་ཐམས་ཅད་དུ་གྲགས་པ་གཞན་གྱིས་ཐོས་ཏེ་ངོ་མཚར་དུ་གྱུར་པ་ཤིན་ཏུ་གྲགས་པ་ཟབ་པའོ། །རྨད་ཀྱི་ཆོས་དང་ལྡན་པ་ཞེས་པ་ནི་ཆོས་དམ་པས་ཚིམ་པའི་སེམས་ཤིན་ཏུ་ཟབ་པ་སྟེ། སྔོན་མ་ཐོབ་པའི་ཆོས་དམ་པ་མངོན་དུ་གྱུར་པས་སེམས་དགའ་བ་དང་མོས་པ་སྐྱེས་པ་ཤིན་ཏུ་ཟབ་བོ། །ཤེས་པར་དཀའ་བའི་ཆོས་ཤེས་པ་ནི་བླ་ན་མེད་པ་ཤིན་ཏུ་ཟབ་པ་སྟེ། ཤེས་པར་དཀའ་བའི་ཆོས་དེ་དག་དེ་བཞིན་གཤེགས་པ་ཉག་གཅིག་གིས་ཐུགས་སུ་ཆུད་པས་བླ་ན་མེད་པའི་ཟབ་པའོ། །ལྡེམ་པོ་དག་ཤེས་པར་དཀའོ་ཞེས་པ་ནི་འཇུག་པ་ཤིན་ཏུ་ཟབ་པ་སྟེ། མིང་དང་ཚིག་དང༌། དོན་ཤིན་ཏུ་ཤེས་པར་དཀའ་བའི་ཕྱིར་དེ་བཞིན་གཤེགས་པ་རང་གིས་རིག་པ་སྟེ། དེ་ཡང་ཤིན་ཏུ་འཇུག་པར་དཀའ་བ་དང༌། བསྙད་པར་དཀའ་བའོ། །འཇུག་པ་ནི་བདག་ཉིད་འཇུག་པའོ། །བཤད་པ་ནི་གཞན་ལ་བཤད་པར་དཀའ་བ་སྟེ། དེ་གཉི་ག་དེ་བཞིན་གཤེགས་པ་ཉག་གཅིག་གིས་སྤྱོད་ཅེས་པའོ། །ཉན་ཐོས་དང་རང་སངས་རྒྱས་ཀྱིས་ཤེས་པར་དཀའ་བ་ནི་གནས་པ་ཤིན་ཏུ་ཟབ་པ་བསྟན་པ་སྟེ། ཕྱི་ནང་གི་སྤྱོད་པ་ཐུན་མོང་མ་ཡིན་པ་བསྟན་པའོ། །མདོ་ལས་ཤཱ་རིའི་བུ་དེ་བཞིན་གཤེགས་པ་ཞེས་པ་ནས་རྣམ་པ་སྣ་ཚོགས་ཀྱི་ཐབས་མཁས་པ་དང༌། ཡེ་ཤེས་དང་མཐོང་བ་དང༌། རྒྱུ་དང་གཞི་དང། དམིགས་པ་དང༌། ངེས་པའི་ཚིག་དང་ཞེས་པའི་བར་དུ་ནི་སྔར་བཤད་པ་དང་ཆུད་པར་བྱ་བའི་ཆོས་དམ་པ་བསྟན། དེའི་འོག་ཏུ་དེ་བཞིན་གཤེགས་པས་དགོངས་པ་དང་སྟོན་པའི་ཆོས་སྨྲ་བ་ཉིད་ཀྱི་ཡོན་ཏན་འཆད་དེ། དེ་བཞིན་གཤེགས་པ་སྟོན་པའི་རྒྱུ་ཕུན་སུམ་ཚོགས་པའོ། །ཐབས་མཁས་པ་དང༌། ཡེ་ཤེས་མཐོང་བ་དང་རྒྱུ་དང་ངེས་པའི་ཚིག་ཅེས་པ་ཚིག་འོག་མས་གོང་མ་འབྲེལ་ཏེ། བཅོམ་ལྡན་འདས་མངོན་པར་བྱང་ཆུབ་ནས་སེམས་ཅན་དྲང་བའི་ཆེད་དུ་གནས་དེ་དང་དེ་དག་ཏུ་དཔེ་དང་ཐབས་རྣམ་པ་སྣ་ཚོགས་ཀྱིས་ཆོས་བསྟན་ཏེ། སེམས་ཅན་ཆགས་པའི་གནས་ལས་
དགྲོལ་བར་མཛད་དོ། །དང་པོ་ཚིག་དེ་བཞི་སོ་སོར་དགྲོལ་བ་དང་དེའི་འོག་ཏུ་ཚིག་རྣམས་ལན་གསུམ་ཙམ་དུ་བཟླས་ཏེ་འཆད་པའོ། །དེ་ཡང་དེ་བཞིན་གཤེགས་པའི་ཡོན་ཏན་རྣམ་པ་བཞི་རྫོགས་པར་བྱ་བ་སྟེ། སེམས་ཅན་བསྒྲལ་བའི་ཕྱིར་བྱོན་པ་དང་བཞུད་པ་སྟོན་ཅིང་ཐབས་མཁས་པ་རྫོགས་པར་མཛད་པ་སྟེ། དང་པོ་དགའ་ལྡན་གནས་ན་གནས་པ་དང་མྱ་ངན་ལས་འདས་པར་གཤེགས་པའི་བར་དུ་སེམས་ཅན་ལ་ཕན་པའི་དོན་རྣམ་པ་སྣ་ཚོགས་མཛད་པ་ནི་ཐབས་མཁས་པའོ། །ཡེ་ཤེས་མཐོང་བ་ཞེས་པ་ནི་ཆོས་རྣམ་པར་དག་པའི་རྒྱུ་བསྟན་པ་སྟེ། ཡེ་ཤེས་དང་གཟིགས་པ་མངའ་བའི་ཕྱིར་ཆོས་རྣམ་པར་དག་པ་གཟིགས་ཤིང་མཁྱེན་པར་འོས་པ་སྟེ། སྔར་ནི་ལུས་ཀྱི་སྒོ་ནས་སེམས་ཅན་གྱི་དོན་མཛད་པ་བསྟན། འདིར་ནི་རིགས་པ་དང་བཤད་པའི་སྒོ་ནས་སྟོན་པའོ། །ཡེ་ཤེས་མཐོང་བ་ཞེས་པ་ནི་ཡོན་ཏན་ཕུན་སུམ་ཚོགས་པའི་མཐའ་བསྟན་ཏེ། ཆོས་སྟོན་པ་ལ་དབང་པོ་དང་མཐུན་པ་ཅི་དང་ཅིས་འདུལ་བ་མཁྱེན་པ་གཟིགས་ཤིང་ཆོས་སྟོན་པའོ། །ངེས་པའི་ཚིག་ཅེས་པ་ནི་སོ་སོ་ཡང་དག་པར་རིག་པ་བཞིས་ཅི་རིགས་པར་ཆོས་སྟོན་པ་སྟེ། དེ་ལ་དང་པོ་སྤྲུལ་པའི་སྐུས་ཐབས་སྣ་ཚོགས་ཀྱིས་ཆོས་སྟོན་པ་བསྟན། དེའི་འོག་མས་ནི་ཆོས་རྣམ་པར་དག་པའི་རིགས་པས་སེམས་ཅན་གྱི་དོན་མཛད་པ་བསྟན། དེའི་འོག་མས་ནི་ཡང་དག་པ་ཇི་ལྟ་བ་བཞིན་དུ་ཆོས་སྟོན་པའི་མཐར་ཕྱིན་པ་བསྟན། དེའི་འོག་མས་ནི་སོ་སོ་ཡང་དག་པར་རིག་པས་སོ་སོའི་ཡིད་དང་མཐུན་པར་ཆོས་སྟོན་པ་ནི་དེ་བཞིན་གཤེགས་པ་ཉག་གཅིག་གིས་གོ་བར་བསྟན་པའོ། །ཡང་ན་ཚིག་དེ་བཞི་ཡང་སྤྲུལ་བའི་སྐུ་དང་ལོངས་སྤྱོད་རྫོགས་པའི་སྐུ་དང༌། ཆོས་ཀྱི་སྐུ་དང༌། སྤོབས་པ་མཐའ་ཡས་པ་དང་ལྡན་པས་སྟོན་པ་ཞེས་སྦྱར་རོ། །མདོ་ལས་རྣམ་པར་བསྟན་པ་རྣམས་ཀྱིས་ཡང་དག་པར་སྟོན་ཏེ། ཐབས་མཁས་པ་དེ་དང་དེས། སེམས་ཅན་དེ་དང་དེ་ལ་ཆགས་པའི་རྣམས་རབ་ཏུ་འགྲེལ་ཏོ་ཞེས་པ་དེ་གོང་གི་ཚིག་དེ་བཞི་ཡང་དང་ཡང་དུ་བཟླས་ཏེ་དགྲོལ་ཞིང་བཤད་པ་ལ་འདི་ནི་ཐབས་མཁས་པས་སྟོན་ཏེ། ཐབས་མཁས་པ་ནི་མུ་སྟེགས་ཅན་གྱི་རྣམས་ཐབས་སྣ་ཚོགས་ཀྱིས་ཡང་དག་པའི་བསྟན་པ་ལ་འཛུད་པར་མཁས་པས་ཐབས་མཁས་པ་སྟེ། མུ་
སྟེགས་ཅན་དེ་དག་ཀྱང་དགེ་བ་ལ་འཛུད་པ་དང༌། ཐེ་ཙོམ་བཅད་པ་དང༌། ཡེ་ཤེས་དམ་པ་ལ་གཟུད་པ་དང༌། བསྡུ་བ་རྣམ་པ་བཞིས་བསྡུ་ཞིང་རྣམ་པར་གྲོལ་བ་ཐོབ་པར་མཛད་པས་ཐབས་མཁས་པ་སྟེ། གོང་མ་བཞི་དང་རིམ་པ་བཞིན་དུ་སྦྱར་རོ། །ཡང་ན་ཐབས་སྣ་ཚོགས་ཀྱིས་དྲང་ཞིང་ཆགས་པ་ལས་དགྲོལ་བ་སྟེ། ཁམས་ལ་ཆགས་པ་དང༌། ས་ལ་ཆགས་པ་དང༌། ཕྱོགས་ལ་ཆགས་པ་དང༌། ཐེག་པ་ལ་ཆགས་པའོ། །ཁམས་ལ་ཆགས་པ་ནི་ཁམས་གསུམ་ལ་ཆགས་པའོ། །ས་ལ་ཆགས་པ་ནི་ཚུལ་ཁྲིམས་དང༌། བརྟུལ་ཞུགས་དང༌། བསམ་གཏན་དང༌། ཏིང་ངེ་འཛིན་གྱི་ས་ལ་ཆགས་པའོ། །ཕྱོགས་ལ་ཆགས་པ་ནི་ཁྱིམ་པའི་ཕྱོགས་དང༌། རབ་ཏུ་བྱུང་བའི་ཕྱོགས་ལ་སྟེ་ལས་དང་འཚོ་བ་སྣ་ཚོགས་དང་ཁེ་དང་གྲགས་པ་ལ་ཆགས་པའོ། །ཐེག་པ་ལ་ཆགས་པ་ནི་ཐེག་པ་ཆེ་ཆུང་གི་ལྟ་བ་ལ་གཙོར་འཛིན་ཅིང་ཆགས་པའོ། །མདོ་ལས་ཤཱ་རིའི་བུ་དེ་བཞིན་གཤེགས་པ་ཞེས་པ་ནས་རྨད་དུ་བྱུང་བའི་ཆོས་དང་ལྡན་ཏེ་ཞེས་པའི་བར་དུ་ནི་གོང་མའི་ཡེ་ཤེས་མཐོང་བ་ཞེས་པས་སྟོན་ཏེ། ཆེན་པོ་ནི་བླ་ན་མེད་པ་མཆོག་ཅེས་པ་ནི་དམ་པའོ། །དེ་ཀུན་ཀྱང་ཡེ་ཤེས་རྣམ་གཉིས་ཀྱི་འཁོར་ཏེ། ཐོགས་པ་མེད་པ་ནི་སྤོབས་པ་སོ་སོ་ཡང་དག་པར་རིག་པ་བཞིའོ། །སྟོབས་ནི་སྟོབས་བཅུའོ། །མི་འཇིགས་པ་ནི་མི་འཇིགས་པ་བཞིའོ། །མ་འདྲེས་པ་ནི་བཅོ་བརྒྱད་དོ། །དབང་པོ་དང་སྟོབས་ནི་ལྔ་ལྔའོ། །བྱང་ཆུབ་ཀྱི་ཡན་ལག་ནི་བདུན་ནོ། །བསམ་གཏན་ནི་བཞིའོ། །རྣམ་པར་ཐར་པ་ནི་བརྒྱད་དོ། །ཏིང་ངེ་འཛིན་ནི་གསུམ་མོ། །སྙོམས་པར་འཇུག་པ་ནི་དགུའོ། །དེ་དག་གི་མཚན་ཉིད་དང་རྣམ་གྲངས་བཤད་པ་ནི་མདོ་དང་གཙུག་ལག་ལས་རྒྱས་པར་བཤད་པ་བཞིན་ནོ། །མདོ་ལས་རྨད་དུ་བྱུང་བའི་ཆོས་དང་ལྡན་པ་ཞེས་པ་ནས་ཡང་དག་པར་སྟོན་པ་རྣམས་སོ་ཞེས་པའི་བར་དུ་ནི་ངེས་པའི་ཚིག་སྟོན་ཏེ། འགྲེལ་པ་ལས་སྟོན་པ་ཕུན་སུམ་ཚོགས་པ་རྣམ་པ་བདུན་སྟོན་པ་ལ་འདི་དང་པོ་སྟེ། འཇིག་རྟེན་དང་འཇིག་རྟེན་ལས་འདས་པའི་ཆོས་རྣམས་ཤིན་ཏུ་ཟབ་མོར་འཇུག་པའོ། །མདོ་ལས་ཤཱ་རིའི་བུ་ཞེས་པ་ནས་གྱིས་ཤིག་ཅེས་པའི་བར་དུ་ནི་ཚིག་ཕུན་སུམ་ཚོགས་པ་དང༌། མིང་དང་མཚན་མ་ཕུན་སུམ་ཚོགས་པ་སྟོན་ཏེ། དེ་བཞིན་གཤེགས་པས་
གསུང་སྙན་པ་ཡིད་དུ་འོང་བས་ཆོས་སྟོན་ཏེ། དེ་ནི་འབྲུག་སྒྲ་ལྟར་ཤིན་ཏུ་ཟབ་པ་གསུང་གསལ་ཞིང་དག་པ་རྒྱང་དུ་སྒྲོག་ཅིང་ཐོས་པ་རྣམས་དགའ་བ་སྐྱེ་བ་དང༌། སེམས་ལ་ཞེན་པར་དད་ཅིང་གུས་པ་སྐྱེ་བའི་གསུང་དང༌། བདེ་བའི་དོན་གོ་སླ་བའི་གསུང་དང༌། ཉན་པ་རྣམས་མི་སྐྱོ་ཞིང་ཆོས་རྣམ་པར་འབྱེད་པ་ལ་མཁས་པའི་གསུང་ངོ༌། །མིང་དང་མཚན་ཉིད་ཕུན་སུམ་ཚོགས་པ་ནི་དེ་ཙམ་གྱིས་ཆོག་གིས་ཞེས་པ་སྟེ། སེམས་ཅན་ཆོས་ཀྱི་སྣོད་དུ་གྱུར་པ་རྣམས་སྨིན་པར་གྱུར་ཟིན་པའི་ཕྱིར་ཏེ། ཆོས་ཀྱི་སྣོད་ལ་ཡང་ཡང་དག་པ་དང་ཡང་དག་པ་མ་ཡིན་པ་རྣམ་པ་གཉིས་ཏེ། ཡང་དག་པ་ནི་ཤཱ་རིའི་བུ་ལ་སོགས་པའོ། །ཡང་དག་པ་མ་ཡིན་པ་ནི་ང་རྒྱལ་ཅན་རྣམས་སོ། །ཆོས་ཡང་དག་པའི་སྣོད་དུ་གྱུར་པ་ནི་འཕགས་པ་རྣམས་ནི་དམ་པའི་ཆོས་ཀྱི་དགའ་བས་སེམས་རྒྱས་པར་གྱུར་པའི་ཕྱིར་མཆོག་ཅེས་བཀའ་སྩལ་པ་དང༌། ཆོས་ཡང་དག་པ་མ་ཡིན་པའི་སྣོད་ཅན་རྣམས་ཀྱང་རང་གི་འཕགས་པའི་སེམས་ཐོབ་པ་ཙམ་དུ་སེམས་ཤིན་ཏུ་རྣམ་པར་གྲོལ་བའི་ཆོས་ཐོབ་པས་ཆོག་པར་སེམས་པས་ཆོག་ཅེས་གསུངས་པའོ། །མདོ་ལས་ཤཱ་རིའི་བུ་དེ་བཞིན་གཤེགས་པ་ཞེས་པ་ནས་ངོ་མཚར་རབ་ཏུ་ཐོབ་པ་སྟེ་ཞེས་པའི་བར་དུ་ནི་འདི་བཤད་པར་འོས་པ་སྟོན་ཏེ། འཕགས་པ་ཤཱ་རིའི་བུ་ལ་སོགས་པ་དབང་པོ་སྨིན་པ་རྣམས་ཡོན་ཏན་རྨད་ཀྱི་ཆོས་རྣམས་བཤད་པར་འོས་པའི་ཕྱིར་ངོ་མཚར་རབ་ཏུ་ཐོབ་པའོ། །མདོ་ལས་ཤཱ་རིའི་བུ་དེ་ཙམ་ཞེས་པ་ནས་ཤཱ་རིའི་བུ་དེ་བཞིན་གཤེགས་པ་ཉིད་མཁྱེན་ཏོ་ཞེས་པའི་བར་དུ་ནི་ཚད་མེད་པའི་རྣམ་པ་ཕུན་སུམ་ཚོགས་པ་སྟོན་ཏེ། དེ་བཞིན་གཤེགས་པའི་སྙིང་པོ་ནི་མི་འགྱུར་བས་ཆོས་ཀྱི་སྐུའི་རང་བཞིན་ཏེ། འདུས་བྱས་དང་འདུས་མ་བྱས་ཀྱི་ཆོས་ཐམས་ཅད་མཁྱེན་པའི་ཕྱིར་རྣམ་པ་ཚད་མེད་པ་མཁྱེན་པའོ། །ཚིག་དེ་དག་གིས་གོང་དུ་སྨོས་པའི་ཐབས་མཁས་པ་དང་ཡེ་ཤེས་མཐོང་བ་ལ་སོགས་པའི་ཚིག་གི་དོན་རྣམས་མདོ་སྡེ་ཉིད་ཀྱིས་བཀྲོལ་བ་དང་བཅས་སུ་བསྟན་ཏེ། གོ་རིམས་བཞིན་དུ་སྦྱར་ཞིང་ཆུད་པར་བྱའོ། །མདོ་ལས་ཆོས་དེ་དག་གང་ཡིན་པ་དང་ཞེས་པ་ནས་དེ་བཞིན་གཤེགས་པ་ཉིད་མངོན་སུམ་སྟེ། མི་མངོན་པ་མ་ཡིན་ནོ་ཞེས་པའི་བར་དུ་ནི་དེ་བཞིན་
གཤེགས་པ་ཡང་ཆོས་ཐམས་ཅད་མངོན་དུ་གཟིགས་ཤིང་མཁྱེན་ནས་ཆོས་སྟོན་ཏོ། །ཚིག་གི་དོན་རྣམ་པ་ལྔ་པོ་དེ་ནི་ལན་བཞིར་བཟླས་ཏེ་བཤད་པར་བྱའོ། །དེ་ལ་ཆོས་གང་ཡིན་ཞེས་པ་ནི་ཐེག་པ་རྣམ་གསུམ་ལ་འཇུག་པ་བཀྲི་བའི་དོན་བསལ་ཏེ་ངེས་པའི་དོན་གང་ཡིན་པ་ལ་འཇུག་པ་དང༌། ཆོས་དེ་དག་ཇི་ལྟ་བུ་ཡིན་པ་ནི་ཐེག་པ་གཅིག་པུ་ལ་དོན་རྣམ་པ་སྣ་ཚོགས་སུ་སྟོན་པའོ། །ཆོས་དེ་དག་ཅི་འདྲ་བ་ཞེས་པ་ནི་ཐེག་པ་རྣམ་གསུམ་གྱི་སྒོར་ཞུགས་པ་ལ་སྤྱོད་པ་རྣམ་པར་དག་པ་བསྒྲུབ་པའོ། །མཚན་ཉིད་ཇི་ལྟ་བུ་ཡིན་པ་ནི་ཐེག་པ་རྣམ་པ་གསུམ་གྱི་མཚན་ཉིད་གཅིག་ཏུ་བསྟན་པའོ། །ངོ་བོ་ཉིད་ཅི་ཡིན་པ་ནི་མཐར་ཐེག་པ་གཅིག་ཏུ་ཟད་དེ་གཉིས་དང་གསུམ་གྱི་ངོ་བོ་ཉིད་མེད་པར་བསྟན་པའོ། །ཡང་འདི་མན་ཆད་ཚིག་དེ་དག་ལས་གཞན་དུ་གྲོལ་ན་ཆོས་དེ་དག་གང་ཡིན་ཞེས་པ་ནི་འདུས་བྱས་དང་འདུས་མ་བྱས་པའི་ཆོས་སོ། །ཆོས་དེ་དག་ཇི་ལྟ་བུ་ཡིན་པ་ནི་རྒྱུ་དང་རྐྱེན་གྱིས་བསྐྱེད་པ་དང༌། རྒྱུ་དང་རྐྱེན་གྱིས་མ་བསྐྱེད་པ་སྟེ། དེ་ལ་རྒྱུ་དང་རྐྱེན་གྱིས་བསྐྱེད་པ་ནི་འདུས་བྱས་ཀྱི་ཆོས་སོ། །རྒྱུ་དང་རྐྱེན་གྱིས་མ་བསྐྱེད་པ་ནི་འདུས་མ་བྱས་པའི་ཆོས་སོ། །དེ་དག་ཇི་འདྲ་བ་ནི་རྟག་པ་དང་མི་རྟག་པའི་ཆོས་ཏེ། དེ་ཡང་རྐྱེན་གྱིས་མ་བསྐྱེད་པ་ནི་རྟག་པའི་ཆོས་སོ། །རྐྱེན་གྱིས་བསྐྱེད་པ་ནི་མི་རྟག་པའི་ཆོས་སོ། །མཚན་ཉིད་ཇི་ལྟ་བུ་ཡིན་པ་ནི་སྐྱེ་བ་དང༌། གནས་པ་དང་འཇིག་པའི་ཆོས་ཀྱི་མཚན་ཉིད་དོ། །མཚན་ཉིད་དེ་གསུམ་དང་ལྡན་པ་ནི་འདུས་བྱས་མི་རྟག་པའི་ཆོས་སོ། །མཚན་ཉིད་དེ་གསུམ་དང་བྲལ་བ་ནི་འདུས་མ་བྱས་རྟག་པའི་ཆོས་སོ། །ངོ་བོ་ཉིད་ཅི་ཡིན་པ་ནི་ཕུང་པོ་ལྔའི་ངོ་བོ་ཉིད་དང་ཕུང་པོ་ལྔ་དང་བྲལ་བའི་ངོ་བོ་ཉིད་ཀྱི་ཆོས་ཏེ། ཕུང་པོ་ལྔ་ནི་སྐྱེ་བ་ལ་སོགས་པའི་མཚན་ཉིད་དོ། །ཕུང་པོ་ལྔ་དང་བྲལ་བ་ནི་སྐྱེ་བ་མེད་པ་ལ་སོགས་པའོ། །ཡང་བཤད་པ་གསུམ་ནི་ཚིག་དེ་ལྔ་ལས་དང་པོའི་གཉིས་ནི་གོང་དུ་བཤད་པ་དག་དང་འདྲ། ཆོས་དེ་དག་ཅི་འདྲ་ཞེས་པ་ནི་རང་བཞིན་མེད་པ་སྟེ་རྟེན་ཅིང་འབྲེལ་ཏེ་འབྱུང་བའི་ཆོས་སོ། །མཚན་ཉིད་ཇི་ལྟ་བུ་ཡིན་པ་ནི་བ་ལྟར་རུང་བའི་མཚན་ཉིད་ཀྱི་ཆོས་རྣམས་སོ། །ངོ་བོ་ཉིད་ཇི་ལྟ་བུ་ཡིན་པ་ནི་ཕུང་པོ་ལྔ་གཟུང་བ་དང་འཛིན་པའི་ཆོས་ཏེ། ཀུན་འབྱུང་གི་ངོ་བོ་ཉིད་དམ་ལམ་གྱི་བདེན་པས་གཟུང་བའོ། །ཡང་ཆོས་དེ་དག་ལ་བཤད་པ་བཞི་སྟེ།
ཆོས་སྟོན་པའི་བྱེད་པ་ལ་བརྟེན་ཏེ་བཤད་པ་ནི་ཆོས་དེ་དག་གང་ཡིན་ཞེས་བ་ནི་མིང་དང་ཚིག་དང་འབྱུང་བའི་ཚོགས་ཀྱི་བཤད་པའི་ཆོས་སོ། །ཆོས་དེ་དག་ཇི་ལྟ་བུ་ཡིན་པ་ནི་དེ་བཞིན་གཤེགས་པའི་ཆོས་རྣམས་ལ་བརྟེན་ཏེ་བཤད་པའི་ཆོས་རྣམས་སོ། །ཆོས་དེ་དག་ཅི་འདྲ་བ་ཞེས་པ་ནི་འདུལ་བ་གདུལ་བར་བྱ་བའི་སེམས་ཅན་རྣམས་སོ། །མཚན་ཉིད་ཇི་ལྟ་བུ་ཡིན་པ་ནི་ཚིག་གི་སྒྲ་ལ་བརྟེན་ནས་ཆུད་པར་བྱེད་པ་སྟེ། ཚིག་གི་སྒྲ་ལ་འཇུག་པའི་མཚན་ཉིད་དོ། །ངོ་བོ་ཉིད་ཅི་ཡིན་པ་ནི་ངོ་བོ་ཙམ་ལ་བརྟེན་ནས་ཆོས་ཡང་དག་པ་ལ་འཇུག་པ་ངེས་པ་མ་ཡིན་ཏེ། དེ་ལ་ཆགས་ཤིང་ཞེན་པ་ཡང་ཡོད་དེ། ཆོས་ཀྱི་ངོ་བོ་ཉིད་ཚིག་གི་ཐ་སྙད་དང་བྲལ་བའི་ངོ་བོ་ཉིད་དུ་རྟོགས་པས་འཇུག་པ་བསྟན་པའོ། །མདོ་ལས་དེ་ནས་བཅོམ་ལྡན་འདས་ཀྱིས་དེ་ཉིད་ཀྱི་དོན་རྒྱ་ཆེར་བསྟན་པ་ཞེས་པ་ནས་སུས་ཀྱང་ཤེས་པར་མི་ནུས་སོ་ཞེས་པའི་བར་དུ་ནི་འདི་མན་ཆད་ཚིགས་སུ་བཅད་པ་ཉི་ཤུ་རྩ་གཅིག་ལ་རྣམ་པ་གཉིས་སུ་ཕྱེ་སྟེ། ཚིགས་བཅད་ཕྱེད་དང་བཅོ་བརྒྱད་ཀྱིས་ནི་གོང་གི་དམ་པ་གཉིས་བསྟན། དེའི་འོག་མ་ཚིགས་བཅད་ཕྱེད་དང་བཞིས་ནི་དད་པའི་སེམས་སྐྱེ་བ་དང་ཡང་དག་པའི་དོན་སྟོན་པ་བཤད་དོ། །དང་པོ་ལ་ཡང་རྣམ་པ་གཉིས་སུ་དབྱེ་སྟེ། གོང་མ་གཉིས་ཀྱིས་ནི་དམ་པ་གཉིས་བསྟན། དེའི་འོག་མ་ཚིགས་བཅད་ཕྱེད་དང་བཅུ་དྲུག་གིས་ནི་དམ་པ་གཉིས་ཀྱི་དབྱེ་བ་བསྟན་ཏེ་འདི་དང་པོའོ། །ཚིགས་བཅད་དང་པོས་ནི་སྟོན་པའི་ཡོན་ཏན་བསྟན། དེའི་འོག་མ་གཅིག་གིས་ནི་ཆོས་ཀྱི་བསྔགས་པ་བསྟན་ཏོ། །མདོ་ལས། སྔོན་ཆད་བསྙན་ཅིང་སྤྱད་པ་ནི། །ཞེས་པ་ནས། ཤེས་དཀའ་ཤིན་ཏུ་ལྟ་བར་དཀའ། །ཞེས་པའི་བར་དུ་ནི་འདི་མན་ཆད་ཚིགས་བཅད་བཅོ་ལྔས་དམ་པ་གཉིས་ཀྱི་དབྱེ་བ་སྟོན་ཏེ། དེ་ཡང་རྣམ་པ་གཉིས་སོ། །ཚིགས་བཅད་བཅུ་བཞིས་ནི་ཆོས་དམ་པར་བསྔགས། དེའི་འོག་མ་གཅིག་གིས་ནི་ཆོས་སྨྲ་བ་དམ་པར་བསྔགས་པའོ། །དེའི་དང་པོ་ལ་ཡང་རྣམ་པ་ལྔར་དབྱེ་སྟེ། ཚིགས་བཅད་དང་པོ་གཅིག་གིས་ནི་ཀློག་ཅིང་འདོན་པ་དང་གྲུབ་ཅིང་སྤྱོད་པའི་ཤིན་ཏུ་ཟབ་པ་གཉིས་བསྟན། དེའི་འོག་མ་ཚིགས་བཅད་གཅིག་གིས་ནི་འབྲས་བུ་སྤྱོད་ཅིང་ཡོན་ཏན་རྣམ་པར་འཕེལ་བས་སེམས་བདེ་བའི་དམ་
པ་ཐོབ་སྟེ་ཤིན་ཏུ་ཟབ་པ་གསུམ་བསྟན། ཡང་ཚིགས་བཅད་གཅིག་གིས་ནི་བླ་ན་མེད་པའི་ཟབ་པ་བསྟན། ཡང་ཕྱེད་དང་གཉིས་ཀྱིས་ནི་འཇུག་པ་ཤིན་ཏུ་ཟབ་པ་བསྟན། ཡང་ཚིགས་བཅད་ཕྱེད་དང་དགུས་ནི་ཐེག་པ་རྣམ་པ་གཉིས་དང་ཐུན་མོང་མ་ཡིན་པར་འཛིན་པ་ཤིན་ཏུ་ཟབ་པ་བསྟན་ཏེ་འདི་ནི་དང་པོའོ། །མདོ་ལས། དེ་ལྟར་སྤྱད་པ་སྤྱོད་པ་ནི། །ཞེས་པ་ནས། དེ་ནི་ཅི་འདྲ་བ་ཡང་མཐོང༌། །ཞེས་པའི་བར་དུ་ནི་ཚིགས་བཅད་འདི་གཅིག་གིས་ནི་འབྲས་བུ་སྤྱོད་པས་བསོད་ནམས་རྣམ་པར་འཕེལ་བ་སྟོན་ཏེ། སེམས་དགའ་བའི་དམ་པ་ཐོབ་པ་ཡང་བརྩོན་འགྲུས་བསྐལ་པ་གྲངས་མེད་པར་སྤྱད་པས་འབྲས་བུ་དམ་པ་ཐོབ་སྟེ། ཅི་ཡང་མཁྱེན་ཅིང་གཟིགས་པའི་དམ་པ་ཐོབ་པའོ། །མདོ་ལས། དེ་ནི་ང་ཡིས་རབ་ཏུ་ཤེས། །ཞེས་པ་ནས། །དེ་ཡི་མཚན་ཉིད་ཅི་འདྲ་བ། །ཞེས་པའི་བར་དུ་ནི་འདིས་བླ་ན་མེད་པའི་ཤིན་ཏུ་ཟབ་པ་བསྟན་ཏེ། དེའི་ངོ་བོ་ཉིད་དང་གཞུང་ཅི་འདྲ་བར་དེ་བཞིན་གཤེགས་པས་རབ་ཏུ་མཁྱེན་ཅེས་པའོ། །མདོ་ལས། དེ་ནི་བསྟན་དུ་མི་ནུས་ཏེ། །ཞེས་པ་ནས། །རྣམ་དག་གང་རྣམས་དད་ལ་གནས་པའོ། །ཞེས་པའི་བར་དུ་ནི་འཇུག་པ་ཤིན་ཏུ་ཟབ་པ་བསྟན་ཏེ། དེ་བཞིན་གཤེགས་པའི་ཆོས་སྟོན་པ་མིང་དང་ཚིག་དང་ཡིག་འབྲུས་ཆོས་སྟོན་པ་འཇུག་པ་དང་ཤེས་བར་དཀའ་བས་འཇུག་པ་ཤིན་ཏུ་ཟབ་པའོ། །ཡང་ན་དེ་བཞིན་གཤེགས་པ་ཉིད་ཟབ་མོ་འདི་ལ་གནས་ཤིང་ཞུགས་པའི་ཕྱིར་མུ་སྟེགས་ཅན་ལས་ཁྱད་པར་དུ་བསྟན་ཏེ། མུ་སྟེགས་ཅན་ལྟ་བུ་རང་གི་ཆོས་སྤྱོད་ཀྱང་ཆོས་ཉིད་མ་རྟོགས་པ་ལྟ་བུ་མ་ཡིན་ཏེ། རྟེན་ཅིང་འབྲེལ་པར་འབྱུང་བ་ཟབ་མོ་ཚིག་གི་ཐ་སྙད་དང་བྲལ་བ་སེམས་ཅན་རྣམས་ཀྱིས་འཇུག་པར་མི་ནུས་ཀྱི། བྱང་ཆུབ་སེམས་དཔའ་དད་པ་བརྟན་པ་ལ་གནས་པ་ཉག་གཅིག་གིས་མཁྱེན་ཅེས་པའོ། །བྱང་ཆུབ་སེམས་དཔའ་ས་དང་པོ་ལ་གནས་པ་ཡན་ཆད་ཆོས་བཞི་ལ་དད་པའི་ཕྱིར་མི་ནུར་བ་རྣམས་ཀྱི་ཆོས་འདི་ལ་བཟོད་པས་བཤད་པར་འོས་ཀྱི་གཞན་ལ་མ་ཡིན་ཞེས་པའོ། །ཆོས་བཞི་ནི་དཀོན་མཆོག་གསུམ་དང་ཚུལ་ཁྲིམས་ལ་ཡིད་ཆེས་ཤིང་ཕྱིར་མི་ནུར་བའོ། །མདོ་ལས་གང་དེ་འཇིག་རྟེན་གྱིས་མཁྱེན་པའི་ཕྱིར་རྣམ་པར་ཤེས་པ་ནས། དེ་དག་ཡུལ་མེད་རྒྱལ་བའི་ཡེ་ཤེས་ལ། །ཞེས་པའི་བར་དུ་ནི་འདི་མན་ཚིགས་བཅད་ཕྱེད་
དང་བཅུས་ཐེག་པ་རྣམ་པ་གཉིས་དང་ཐུན་མོང་མ་ཡིན་པ་སྟོན་ཏེ། གནས་ཤིང་འཛིན་པ་ཤིན་ཏུ་ཟབ་པ་དང་སྦྱར་རོ། །དེ་ཡང་རྣམ་པ་གསུམ་དུ་དབྱེ་སྟེ། དང་པོ་ཚིགས་བཅད་བཞིས་ནི་ཉན་ཐོས་དང་ཐུན་མོང་མ་ཡིན་པ་བསྟན། ཚིགས་བཅད་གཉིས་ཀྱིས་ནི་རང་སངས་རྒྱས་དང་ཐུན་མོང་མ་ཡིན་པ་བསྟན། ཚིགས་བཅད་ཕྱེད་དང་བཞིས་ནི་བྱང་ཆུབ་སེམས་དཔའ་དང་ཐུན་མོང་མ་ཡིན་པར་བསྟན་ཏོ། །ཚིག་རྐྱང་པ་ལས་ནི་ཐེག་པ་རྣམ་པ་གཉིས་དང་ཐུན་མོང་མ་ཡིན་པ་ཉི་ཚེ་བསྟན། ཚིགས་སུ་བཅད་པ་ལས་ནི་བྱང་ཆུབ་སེམས་དཔའ་དང་ཐུན་མོང་མ་ཡིན་པའང་སྟོན་ཏོ། །ཉན་ཐོས་དང་ཐུན་མོང་མ་ཡིན་པའང་དབང་པོ་རྣོན་པོ་ཤཱ་རིའི་བུ་ལྟ་བུ་དང་ཐུན་མོང་མ་ཡིན་པ་དང༌། འཁོར་གཞན་དང་ཡང་ཐུན་མོང་མ་ཡིན་པ་བསྟན་པ་ལས་འདི་ནི་དང་པོ་དང་སྦྱར་རོ། །ཟག་པ་ཟད་པ་འཕགས་པ་དགྲ་བཅོམ་པའི་ལུས་ཐོབ་པའི་ཡེ་ཤེས་ཀྱིས་ཀྱང་མི་སྐྲུན་ཅེས་པའོ། །མདོ་ལས་གལ་ཏེ་འཇིག་རྟེན་འདི་དག་ཐམས་ཅད་དུ་ཞེས་པ་ནས་དེའི་བདེ་གཤེགས་ཡེ་ཤེས་མི་ནུས་ཞེས་པའི་བར་དུ་འདིས་ནི་དབང་པོ་རྣོན་པོ་འཕགས་པ་ཤཱ་རིའི་བུའི་ཡེ་ཤེས་ཀྱིས་ཀྱང་ཤེས་པར་མི་ནུས་པས་དེ་བཞིན་གཤེགས་པའི་ཡེ་ཤེས་ཤེས་པ་དང་ཆུད་པར་དཀའ་བ་བསྟན་ཏོ། མདོ་ལས། གལ་ཏེ་ཁྱོད་འདྲར་མཁས་པ་རྣམས་ཀྱིས་སུ། །ཞེས་པ་ནས། ཐམས་ཅད་འདུས་པར་ཤེས་པར་མི་ནུས་ཏེ། །ཞེས་པའི་བར་དུ་ནི་ཕྱོགས་བཅུའི་གང་ཤེས་རབ་རྣོན་པོར་གྱུར་པ་འཕགས་པ་ཤཱ་རིའི་བུ་ལྟ་བུ་དང༌། གཞན་ཡང་དབང་པོ་རྣོ་བ་རྣམས་ཀྱི་ཡེ་ཤེས་གཅིག་ཏུ་བསྡུས་པའི་ཤེས་རབ་ཀྱིས་ཀྱང་ཤེས་པར་མི་ནུས་ཞེས་བསྟན་ཏོ། །མདོ་ལས། ཇི་ཙམ་ཚད་མེད་ཡེ་ཤེས་ངས་ཤེས་པ། །ཞེས་པ་ནས། དེ་ཡི་ཡང་དག་དོན་ནི་ཡོངས་མི་ཤེས། །ཞེས་པའི་བར་དུ་ནི་རང་སངས་རྒྱས་དང་ཐུན་མོང་མ་ཡིན་པ་བསྟན་ཏེ། རང་སངས་རྒྱས་ལ་ཡང་བསེ་རུ་བཞིན་དུ་གཅིག་པུར་གནས་པ་དང༌། མང་པོ་ཁྱུས་ལྡིང་བ་སྟེ་ཆོས་རྣམ་པར་འབྱེད་པ་ལམ་ཞུགས་པ་ནི་གཅིག་པུ་གནས་པས་སྒྲུབ་པའོ། །ཆོས་རྣམ་པར་འབྱེད་པ་ལ་ཞུགས་པ་ནི་ཁྱུས་ལྡིང་བ་འགྲུབ་པ་སྟེ། རྣམ་པར་གྲོལ་བའི་ཆ་མ་སྐྱེས་པ་དང་རྣམ་པར་གྲོལ་བའི་ཆ་སྐྱེས་པའི་བྱེ་བྲག་གིས་དབྱེའོ། །མདོ་ལས།
བྱང་ཆུབ་སེམས་དཔའ་ཐེག་པ་གསར་ཞུགས་རྣམས། །ཞེས་པ་ནས། །འདི་ལ་དེ་དག་གི་ཡང་ཡུལ་མེད་དོ། །ཞེས་པའི་བར་དུ་ནི་བྱང་ཆུབ་སེམས་དཔའ་དང་ཐུན་མོང་མ་ཡིན་པ་བསྟན་པ་སྟེ། བྱང་ཆུབ་ཀྱང་བྱང་ཆུབ་སེམས་དཔས་མི་དཔོགས་པ་དང༌། བྱང་ཆུབ་སེམས་དཔའ་ཆེན་པོས་མི་དཔོགས་པ་དང་གཉིས་ཏེ། འདི་ནི་དང་པོའོ། །སེམས་གསར་དུ་བསྐྱེད་ཅེས་བ་ནི་ཡོན་ཏན་དྲུག་དང་ལྡན་པ་སྟེ། བསྙེན་བཀུར་བྱེད་པ། དོན་རྟོགས་པ་འཆད་མཁས་པ་འཁོར་མང་བ་སེམས་གཅིག་ཏུ་གྱུར་པ་རྣམས་ཀྱིས་ཀྱང་མི་དཔོགས་ཞེས་པའོ། །མདོ་ལས། ཕྱིར་མི་ལྡོག་པའི་བྱང་ཆུབ་སེམས་དཔའ་གང༌། །ཞེས་པ་ནས། །འདི་ལ་དེ་དག་གི་ཡང་ཡུལ་མེད་དོ། །ཞེས་པའི་བར་དུ་ནི་དབང་པོ་རྣོན་པོའི་བྱང་ཆུབ་སེམས་དཔའ་ཆེན་པོ་རྣམས་ཀྱིས་ཀྱང་མི་རིག་པར་སྟོན་ཏེ། ཕྱིར་མི་ལྡོག་པའི་ས་བརྒྱད་པ་ཡན་ཆད་དོ། །མདོ་ལས། ཟབ་ཅིང་ཤིན་ཏུ་ཕྲ་བའི་ཆོས་ཤེས་པ། །ཞེས་པ་ནས། །ཡུན་རིང་བཤད་ཀྱང་མཆོག་གི་དོན་ཡིན་ནོ། །ཞེས་པའི་བར་དུ་ནི་འདི་མན་ཆད་ཚིགས་སུ་བཅད་པ་ཕྱེད་དང་བཞིས་དད་པའི་སེམས་བསྐྱེད་པར་བསྐུལ་བ་སྟེ། དེ་ཡང་ཚིགས་བཅད་ཕྱེད་དང་གཉིས་ཀྱིས་ནི་ཤཱ་རིའི་བུ་ལ་མཆོག་གི་དོན་བསྟན་ཏེ་བསྐུལ། འོག་མ་ཚིགས་བཅད་གཉིས་ཀྱིས་ནི་ཐེག་པ་རྣམ་གཉིས་ཀྱིས་འཁོར་མང་པོ་ལ་ཐབས་ཀྱིས་བསྐུལ་བ་བསྟན་ཏེ། བཅོམ་ལྡན་འདས་ཀྱི་བསྟན་པ་འདི་ལ་དད་པ་བསྐྱེད་ཅིག་པའོ། །མདོ་ལས། བསྒོའོ་ཉན་ཐོས་འདི་དག་ཐམས་ཅད་དང༌། །ཞེས་པ་ནས། ཐེག་པ་གསུམ་རྣམས་ཉེ་བར་བསྟན་པ་ནི། །ཞེས་པའི་བར་དུ་ནི་ཚིགས་སུ་བཅད་པ་གཉིས་ཀྱིས་ཐེག་པ་གཉིས་པའི་འཁོར་ལ་ཐེག་པ་ཆེན་པོ་བསྟན་ཞིང་བླ་ན་མེད་པར་གཏང་བའི་ཕྱིར་ཐེག་པ་གསུམ་པ་བསྟན་ཏོ། །མདོ་ལས་དེ་ནས་འཁོར་དེ་ན་ཞེས་པ་ནས་དེ་དག་ཐམས་ཅད་འདི་སྙམ་དུ་སེམས་སོ་ཞེས་པའི་བར་དུ་ནི་འཁོར་བཞི་པོ་རྣམས་ཀྱི་ཐེ་ཚོམ་དུ་གྱུར་པ་ཆེད་དུ་གླེངས་ཏེ་བཅོམ་ལྡན་འདས་ལ་དོན་དེ་དགྲོལ་བར་ཡིད་ཀྱིས་བསམས་པའོ། །མདོ་ལས་ཀྱེ་མ་གང་གི་རྒྱུ་ཅིའི་ཕྱིར་ཞེས་པ་ནས་ཤེས་པར་དཀའོ་ཞེས་པའི་བར་དུ་ནི་ཐེ་ཚོམ་གྱི་དོན་ཉིད་གླེངས་ཏེ། ཐེག་པ་རྣམ་པ་གཉིས་དང་བྱང་ཆུབ་སེམས་དཔའ་རྣམས་ཀྱིས་ཤེས་པར་དཀའ་བའི་དོན་དེ་དངོས་སུ་གང་ཡིན་ཞེས་པའོ། །མདོ་ལས་དེ་ལྟར་
བཅོམ་ལྡན་འདས་ཀྱིས་རྣམ་པར་གྲོལ་བ་གཅིག་གོ་ཞེས་བཀའ་སྩལ་པ་ཞེས་པ་ནས་མ་རིག་གོ་སྙམ་པའི་བར་དུ་ནི་འདི་ཉིད་ཐེ་ཚོམ་གྱི་དོན་ངེས་པ་སྟེ། མྱ་ངན་ལས་འདས་པ་ཐོབ་པ་ཡན་ཆད་ནི་བསམ་གཏན་གྱི་དོན་ལ་ཐེ་ཚོམ་ཟ་བ། འཕགས་པ་ཉན་ཐོས་པ་རྣམས་ལྟ་བ་ཟབ་མོ་ལ་གཟུད་པ་དང༌། མྱ་ངན་ལས་འདས་པ་ཆེན་པོ་ལ་བརྟེན་པའི་ཕྱིར་ཤེས་པ་དང་ཆུད་པར་དཀའ་བའི་དོན་ཞེས་སྨོས་སོ། །མདོ་ལས་དེ་ནས་ཚེ་དང་ལྡན་བ་ཤཱ་རིའི་བུས་ཞེས་པ་ནས་ཡང་དང་ཡང་གསུངས་པ་དེ་བཅོམ་ལྡན་འདས་ཀྱིས་དགེ་བར་བཤད་དུ་གསོལ་ཞེས་པའི་བར་དུ་ནི་འཕགས་པ་ཤཱ་རིའི་བུས་ཐེ་ཚོམ་གླེངས་པ་སྔར་ནི་ཚིག་རྐྱང་པས་གསོལ། དེའི་འོག་ཏུ་ནི་ཚིགས་སུ་བཅད་པས་བསྡུས་ཏེ་གསོལ་པའོ། །དེ་ཡང་སྔར་ནི་ཐེ་ཚོམ་གྱི་དོན་གླེངས། དེའི་འོག་ཏུ་ནི་ཐེ་ཚོམ་བཅད་པར་གསོལ་བའོ། །ཐེ་ཙོམ་གྱི་དོན་ནི་ཐེག་པ་རྣམ་གསུམ་གྱིས་རྣམ་པར་གྲོལ་བ་སོ་སོའི་བྱེ་བྲག་དང༌། ཁྱད་པར་ཡོད་པ་ཡང་བསྟན། ཐེག་པ་རྣམ་གསུམ་རྣམ་པར་གྲོལ་གཅིག་སྟེ། །རྣམ་པར་གྲོལ་བའི་ཁྲི་གཅིག་ལ་བཞུགས་སོ། །ཞེས་ཀྱང་བསྟན་པ་དེ་ཉིད་རྒྱུ་ལ་ཐེ་ཚོམ་དུ་གྱུར་ཏོ། །དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡེ་ཤེས་ཀྱི་མཚན་ཉིད་དང༌། ཆོས་ཀྱི་སྐུ་གཉིས་སུ་མེད་པ་ལས་དགོངས་པ་དང༌། མྱ་ངན་ལས་འདས་པ་ཆེན་པོ་ལས་རྣམ་པ་གསུམ་བསྟན་པ་བཞིན་ཅི་རིགས་པར་ཆུད་པར་བྱའོ། །ཅིའི་རྒྱུ་ཞེས་པ་ནི་དོན་ཅི་ལས་གླེངས་པའོ། །ཅིའི་ཕྱིར་ཞེས་པ་ནི་དངོས་པོའོ། །དངོས་པོ་གང་ལས་དྲིས་ཞེས་པའི་དོན་ཏོ། །མདོ་ལས་དེ་ནས་ཚེ་དང་ལྡན་པ་ཤཱ་རིའི་བུ་ཞེས་པ་ནས། དེ་དག་ཚད་མེད་ངས་ཐོབ་དང༌། །ཞེས་པའི་བར་དུ་ནི་ཚིགས་སུ་བཅད་པ་བཅུ་གཅིག་ལ་རྣམ་བ་བཞིར་དབྱེ་སྟེ། དང་པོ་ཚིགས་སུ་བཅད་པ་ཕྱེད་དང་བཞིས་ནི་བཅོམ་ལྡན་འདས་ལ་ཐབས་མཁས་ཤིང་ཤིན་ཏུ་ཟབ་པའི་སྒོ་ནས་བསྟོད་པ་དང༌། ཡང་ཚིགས་སུ་བཅད་པ་གསུམ་གྱིས་ནི་འཁོར་བཞི་པོ་རྣམས་ཀྱི་ཐེ་ཚོམ་གླེངས་པ་དང༌། ཚིགས་བཅད་ཕྱེད་དང་གཉིས་ཀྱིས་ཐེ་ཚོམ་དེ་ལྟ་བུ་སྔོན་མ་ཐོས་པ་གླེངས་པ་དང༌། ཡང་ཚིགས་བཅད་གསུམ་གྱིས་བཅོམ་ལྡན་འདས་ལ་ཡང་དོན་དེ་བཤད་པར་གསོལ་བའོ། །དེ་དག་ལ་ཡང་དེ་བཞིན་གཤེགས་པ་ཉིད་ཀྱིས་དགོངས་ཤིང་མཁྱེན་པ་ཟབ་ཅིང་རྒྱ་ཆེ་བ་དང༌། ཐོགས་པ་མེད་པར་འཇུག་པ་བསྟན་ཏོ། །ཉི་མ་ཞེས་པ་ནི་བཅོམ་ལྡན་
འདས་ཀྱི་ཡོན་ཏན་གྱི་དཔེ་སྟེ། ཉི་མ་དེས་མུན་པ་སེལ་བ་དང༌། བྱ་བ་ལ་འཇུག་པ་སློང་བ་དང༌། བྱ་མང་པོ་སྐད་འབྱིན་པ་དང༌། གདུང་བ་བསྐྱེད་པ་བཞིན་བཅོམ་ལྡན་འདས་འཇིག་རྟེན་དུ་བྱུང་བ་བས་ཀྱང་མ་རིག་པའི་མུན་པ་སེལ་བ་དང༌། བསོད་ནམས་ཀྱི་བྱ་བ་བྱེད་པ་སྟོན་པ་དང༌། འཁོར་མང་པོ་ལ་ཆོས་སྒྲོག་པ་དང༌། བདུད་དང་མུ་སྟེགས་གདུང་བ་བསྐྱེད་པའོ། །མདོ་ལས། སྙིང་པོ་བྱང་ཆུབ་བརྗོད་མཛད་པ། །ཞེས་པ་ནས། །མ་དྲིས་པར་ཡང་གསུང་མཛད་པ། །ཞེས་པའི་བར་དུ་ནི་ཚིགས་བཅད་གོང་མ་གཉིས་ཀྱིས་ནི་མངོན་པར་བྱང་ཆུབ་པ་དང༌། མྱ་ངན་ལས་འདས་པ་ཤེས་པ་བསྟན། འོག་མ་གཉིས་ཀྱིས་ནི་གོང་མ་དེ་ཉིད་ཐེག་པ་རྣམ་གཉིས་ཀྱིས་ནི་མི་ཤེས་ཏེ། ཡེ་ཤེས་ཟབ་མོའི་སྤྱོད་ཡུལ་དུ་བསྟན་པའོ། །མདོ་ལས། ཉིད་ཀྱི་སྤྱོད་པ་ཀུན་ཀྱང་བརྗོད། །ཞེས་པ་ནས། ཐུབ་པ་ཆེན་པོ་ལུང་བསྟན་གསོལ། །ཞེས་པའི་བར་དུ་ནི་དེ་ལ་དང་པོའི་ཚིགས་བཅད་གཅིག་གིས་ནི་བཅོམ་ལྡན་འདས་ཏིང་ངེ་འཛིན་ལས་བཞེངས་ཤིང་ཆོས་ཉིད་ཀྱིས་བསྒྲགས་པ་དང༌། དེའི་འོག་མས་ནི་འཁོར་བཞི་རྣམས་ཀྱི་ཐེ་ཚོམ་གླེང་ཞིང་དགྲོལ་བར་གསོལ་བའོ། །མདོ་ལས། ཇི་སྙེད་འཁོད་པའི་ཉན་ཐོས་ནི། །ཞེས་པ་ནས། འོན་ཏེ་བདག་ལ་སྤྱོད་བསྟན་ཏམ། །ཞེས་པའི་བར་དུ་ནི་འབྲས་བུ་ཐོབ་པ་དེ་འབྲས་བུ་ཉིད་མངོན་དུ་གྱུར་པ་འམ། རྒྱུ་མངོན་དུ་གྱུར་པ་ཡིན། འབྲས་བུ་མངོན་དུ་གྱུར་པ་ཡིན་ན་ནི་མངོན་པར་བསྟོད་ཀྱང་ཅི་དགོས། རྒྱུ་མངོན་དུ་གྱུར་པ་ཡིན་ན་ནི་རྒྱུ་བསྒྲུབས་པས་གཟོད་འབྲས་བུ་རྩོམ་པ་ཡིན་པའི་ཕྱིར་འཁོར་རྣམས་ཀྱིས་ཐོབ་པར་ངེས་པའི་སེམས་བསྐྱེད་དེ། དེ་ངེས་པའི་དོན་མེད་པས་ཤཱ་རིའི་བུ་ཐེ་ཙོམ་དུ་གྱུར་པ་བསྟན་ཏོ། །མདོ་ལས། །རྔ་མཆོག་དབྱངས་ཀྱིས་རབ་ཏུ་སྒྲ་ཕྱུང་སྟེ། །ཞེས་པ་ནས། ཀྱེ་མ་ཇི་ལྟར་སྤྱོད་རྫོགས་བྱས། །ཞེས་པའི་བར་དུ་ནི་འཕགས་པ་ཉན་ཐོས་པའི་འཁོར་རྣམས་ཀྱིས་ཆོས་བཤད་པར་གསོལ་བ་དང༌། ཕྱིའི་འཁོར་རྣམས་ཀྱིས་ཆོས་བཤད་པར་གསོལ་བའོ། །དེ་བཞིན་གཤེགས་པས་བསྟན་པའི་ཐུགས་ལས་སྐྱེས་པའི་སྲས་པོས། མངལ་ནས་སྐྱེ་བ་ལ་སོགས་པ་གསོལ་བའོ། །མདོ་ལས་དེ་སྐད་ཅེས་གསོལ་པ་དང་ཞེས་པ་ནས་སྡང་བར་འགྱུར་ཞེས་པའི་བར་དུ་ནི་འདི་ལ་དུམ་བུ་གཉིས་སུ་དབྱེ་སྟེ། སྡར་དགག་པ་དང་ཕྱིས་གསོལ་བ་སྟེ། འདི་ནི་མི་བཤད་པར་དགག་པའོ། །
ཡང་འཆད་ཅིང་ལུང་སྟོན་པ་ཡང་རྣམ་པ་བཞི་སྟེ། ངེས་པར་ལུང་བསྟན་པ་ལ་སོགས་པའོ། །ཡང་ལུང་བསྟན་པ་ཡང་རྣམ་པ་གསུམ་སྟེ་སྔོན་འདས་པའི་དུས་ན་འཁོར་རྣམས་ཀྱིས་ལེགས་ཉེས་ཅི་བྱས་པ་སྟོན་པ་དང༌། སྐྱེས་བུ་ཆེན་པོ་སངས་རྒྱས་སུ་ལུང་སྟོན་པ་དང༌། ལྡེམ་པོ་ངག་གི་དོན་ངེས་པར་སྟོན་པའོ། །ཡང་འགྲེལ་པ་ལས་དོན་རྣམ་པ་བཞི་ལ་བརྟེན་ཏེ། སེམས་ངེས་པ་དང༌། ལུང་སྟོན་པའི་རྒྱུ་དང་ལུང་ནོད་པ་དང༌། ལུང་དཔོག་པར་གསོལ་བ་སྟེ། སེམས་ངེས་པ་ལ་ནི་དེ་བཞིན་གཤེགས་པའི་རང་བཞིན་ངེས་པར་ཡོད་པ་ལས་དགོངས་ཏེ་མི་བཤད་པར་དག་པའོ། །སྡང་བ་ལ་རྣམ་པ་ལྔ་སྟེ། སྐུར་བས་སྡང་བ་དང་སྒྲུབ་དཀའ་བའི་ཕྱིར་སྡང་བ་དང༌། ཕྱིན་ཅི་ལོག་དུ་སྡང་བ་དང༌། འགྱོད་པས་སྡང་བ་དང༌། དོགས་པས་སྡང་བའོ། །སྐུར་པས་སྡང་བ་ནི་ཐོས་པའི་སྒྲས་སྡང་བ་སྟེ་ཉན་ཐོས་ཀྱི་མྱ་ངན་ལས་འདའ་བ་ཉིད་ཡང་དག་པའི་མཐའ་ཡིན་པར་སེམས་པ་ལ་ཐེག་པ་ཆེན་པོའི་མྱ་ངན་ལས་འདའ་བ་ཐོས་པས་གཉིས་ཀ་ལ་སྐུར་ཅིང་སྡང་བ་དང༌། སྒྲུབ་དཀའ་བའི་ཕྱིར་སྡང་བ་ནི་བྱང་ཆུབ་སེམས་དཔའི་སྤྱོད་པ་བསྐལ་པ་གྲངས་མེད་པར་བསྒྲུབས་པས་གདོད་འགྲུབ་པ་ལས་སེམས་ནུར་ཞིང་སྡང་བ་དང༌། ཕྱིན་ཅི་ལོག་གིས་སྡང་བ་ནི་དབང་པོ་མ་སྨིན་པའི་སེམས་ཅན་མ་རབས་ཀྱི་རིགས་ཅན་ཉོན་མོངས་པ་སྟུག་པ་བདག་དང་བདག་གིར་འཛིན་པ་ལ་ཞེན་པ་ལ་ཆོས་ཟབ་མོ་བསྟན་ན་ཕྱིན་ཅི་ལོག་ཏུ་འཛིན་ཅིང་སྡང་བ་དང༌། འགྱོད་པའི་སྡང་བ་ནི་འཕགས་པ་ཤཱ་རིའི་བུ་ལྟ་བུ་ཐེག་པ་ཆུང་དུ་ལ་གནས་པའི་སེམས་ལ་འགྱོད་ཅིང་དངང་བས་ཐེག་པ་ཆེན་པོ་ལ་འཇུག་པ་ལྟ་བུའོ། །དོགས་པས་དངང་པ་ནི་ལྷག་པའི་ང་རྒྱལ་ཅན་ཏེ། དེ་ཡང་ཉན་ཐོས་ཀྱི་རིགས་ལ་ནི་རིགས་ངེས་པ་དང་མ་ངེས་པ་གཉིས་སོ། །སེམས་ཅན་མ་རབས་ལ་ནི་མ་ཐོབ་པ་ཐོབ་པར་སེམས་པ་དང༌། ཉོན་མོངས་པ་སྟུག་པོ་དང་ལྡན་པའོ། །བྱང་ཆུབ་སེམས་དཔའ་ལ་ནི་ཕྱིར་ལྡོག་པ་དང་མི་ལྡོག་པ་ལ་གནས་ཏེ་ངེས་པའི་རིགས་ཅན་གྱི་ཉན་ཐོས་ནི་སྐུར་བས་དངང་ངོ༌། །མ་ངེས་པའི་རིགས་ཅན་ནི་འགྱོད་པས་དངང་ངོ༌། །མ་ཐོབ་པ་ཐོབ་པར་སེམས་པ་ནི་དོགས་པས་དངང་ངོ༌། །ཉོན་མོངས་པ་སྟུག་པ་ནི་ཕྱིན་ཅི་ལོག་གིས་དངང་ངོ༌། །ཕྱིར་ལྡོག་པའི་བྱང་ཆུབ་སེམས་དཔའ་ནི་སྒྲུབ་པར་དཀའ་བས་
དངང་ངོ། །ཕྱིར་མི་ལྡོག་པའི་བྱང་ཆུབ་སེམས་དཔའ་ནི་དངང་བ་རྣམས་དང་བྲལ་བ་སྟེ། ཐེག་པ་གཅིག་པོ་བཤད་པར་འོས་པའི་སྣོད་དུ་གྱུར་པའོ། །ཡང་མི་བཤད་པར་དགག་པ་ནི་གང་ཟག་རྣམ་པ་གཉིས་ཀྱི་དོན་ཏེ། དེ་བཞིན་གཤེགས་པའི་སྙིང་པོ་ལ་དེས་པའི་སེམས་པ་དང་སྒྲུབ་པར་དཀའ་བ་ལས་ལྷག་པར་སེམས་པ་གཉིས་ཀྱི་ཕྱིར་རོ། །ཡང་མི་བཤད་པར་དགག་པ་ནི་ལྷ་དང་མི་ལ་སོགས་པ་དོན་མ་རྟོགས་པར་དངང་བ་དང༌། འཁོར་མང་པོ་དོན་ཟབ་མོ་ཚོལ་དུ་གཞུག་པ་དང༌། གུས་ཤིང་རིན་ཆེ་བར་སེམས་སུ་གཞུག་པ་དང༌། ལྷག་པའི་ང་རྒྱལ་ཅན་རྣམས་གདུལ་བའི་ཕྱིར་རོ། །མདོ་ལས་ཡང་ཚེ་དང་ལྡན་པ་ཤཱ་རིའི་བུས་ཞེས་པ་ནས་བདེ་བར་གཤེགས་པ་བཤད་དུ་གསོལ་ཞེས་པའི་བར་དུ་ནི་འདས་པའི་དེ་བཞིན་གཤེགས་པ་གྲངས་མེད་པ་རྣམས་ཀྱིས་སེམས་ཅན་གྱི་དོན་མཛད་པར་སྟོན་པ་སྟེ། འདི་ཆོས་བཤད་པར་གསོལ་བ་གཉིས་པ་སྔར་ནི་ཚིག་རྐྱང་པས་གསོལ། དེའི་འོག་ཏུ་ནི་ཚིགས་སུ་བཅད་པས་བསྡུས་པ་སྟེ། འདི་ནི་དང་པོའོ། །མདོ་ལས་དེ་ཅིའི་སླད་དུ་ཞེ་ན་ཞེས་པ་ནས་ཡིད་ཆེས་པ་དང་འཛིན་པ་མཆིས་སོ་ཞེས་པའི་བར་དུ་ནི་འདི་བསྟན་པར་འོས་པའི་རྒྱུ་བསྟན་པ་སྟེ། སྔོན་དེ་བཞིན་གཤེགས་པ་མཐོང་བའི་རྒྱུ་བཟང་པོ་ཡོད་པ་ཤེས་རབ་རྣོ་ཞིང་དབང་པོ་གསལ་བ་དོན་ཟབ་མོ་ལ་མཁས་པའི་འཁོར་རྣམས་ཞེས་སྦྱར་རོ། །མདོ་ལས་དེ་ནས་ཚེ་དང་ལྡན་པ་ཤཱ་རིའི་བུ་ཞེས་བ་ནས་ཁྱོད་ཀྱིས་ཆོས་བསྟན་གང་གིས་འཚལ་བར་འགྱུར་ཞེས་པའི་བར་དུ་ནི་ཚིགས་སུ་བཅད་པས་བསྡུས་པའོ། །མདོ་ལས་དེ་ནི་བཅོམ་ལྡན་འདས་ཀྱིས་ཞེས་པ་ནས་གཡང་ས་ཆེན་པོར་ལྷུང་བར་འགྱུར་རོ་ཞེས་པའི་བར་དུ་ནི་དགག་པ་གསུམ་པ་སྟེ། ཐོས་པའི་རྒྱུ་དང་མི་ལྡན་པའི་ང་རྒྱལ་ཅན་རྣམས་འཇིག་རྟེན་པའི་བསམ་གཏན་བཞི་ལ་གནས་པ་དགྲ་བཅོམ་པའི་འབྲས་བུ་མ་ཐོབ་པ་ཐོབ་པར་སེམས་པའི་འཆི་བའི་དུས་ཀྱི་ཚེ་ན་འཕགས་པའི་ལམ་མེད་དོ་ཞེས་སྐུར་པས་སེམས་ཅན་དམྱལ་བའི་གཡང་ས་ཆེན་པོར་ལྷུང་ངོ་ཞེས་པའོ། །མདོ་ལས་དེ་ནས་བཅོམ་ལྡན་འདས་ཀྱིས་ཞེས་པ་ནས་སྨན་པ་དང་བདེ་བར་འགྱུར་རོ་ཞེས་པའི་བར་དུ་ནི་ཆོས་བཤད་པར་གསོལ་བ་གསུམ་པ་སྟེ། བཤད་པར་གསོལ་བ་
དང་ཆོས་ཀྱི་སྣོད་དུ་རུང་བའི་གཏན་ཚིགས་སྨོས་ཏེ། འཕགས་པ་ཤཱ་རིའི་བུ་བདག་ཉིད་ཚེ་རབས་ཀྱང་དྲན་ལ་གཞན་གྱི་དབང་པོ་འང་རྟོགས་པ་ཡིན་པས་ཆོས་ཀྱི་སྣོད་དུ་འགྱུར་བའི་གཏན་ཚིགས་ཀྱིས་གསོལ་ཏོ། །མདོ་ལས་དེ་ནས་ཚེ་དང་ལྡན་པ་ཤཱ་རིའི་བུས་དེའི་ཚེ་ཞེས་པ་ནས། དེ་དག་ཁྱོད་ཀྱིས་ཆོས་བཤད་དད་པར་འགྱུར། །ཞེས་པའི་བར་དུ་ནི་ཚིགས་སུ་བཅད་པ་བཞི་ལ་དང་པོ་ཚིགས་བཅད་གཅིག་གིས་ནི་ཤཱ་རིའི་བུ་ཉིད་སྲས་ཀྱི་ཐུ་བོ་ཡིན་པའི་སྒོ་ནས་ཆོས་བཤད་བར་གསོལ་བ་དང༌། དེའི་འོག་གི་ཚིགས་བཅད་ཕྱེད་དང་གཉིས་ཀྱིས་ནི་སྔོན་དེ་བཞིན་གཤེགས་པས་བྱིན་གྱིས་བརླབས་པ་ཤ་སྟག་གོ་ཞེས་གཞན་ལ་གླེངས་ཏེ་གསོལ་བ་དང༌། དེའི་འོག་གི་ཚིགས་བཅད་ཕྱེད་དང་གཉིས་ཀྱིས་ནི་བདག་དང་གཞན་གཉི་ག་ལས་གླེངས་ཏེ་གསོལ་བ་ལས་འདི་ནི་དང་པོའོ། །རྐང་གཉིས་ཀྱི་གཙོ་བོ་ཞེས་པ་ནི་ལྷ་དང་མི་ཆོས་ཀྱི་སྣོད་དུ་གྱུར་པ་ཡིན་ལ་དེའི་གཙོ་བོ་བས་ན་བཅོམ་ལྡན་འདས་རྐང་གཉིས་ཀྱི་གཙོ་བོས་གསུངས་སོ། །མདོ་ལས། གང་དུ་ཁྱོད་ཀྱིས་རྟག་པར་སྔོན་འཁོར་ན། །ཞེས་པ་ནས། གང་དག་དང་འགྱུར་ཁྱོད་ཀྱིས་ཆོས་འདི་ལ། ཞེས་པའི་བར་དུ་ནི་རྒྱུ་སྨིན་པ་ལས་གླེངས་ཏེ། ཆོས་བཤད་པར་གསོལ་པའོ། །མདོ་ལས། འདི་དག་བདག་འདྲ་བརྒྱ་ཕྲག་བཅུ་གཉིས་ཏེ། །ཞེས་པ་ནས། དེ་དག་དགའ་བའི་མཆོག་ཀྱང་བསྐྱེད་དུ་གསོལ། ཞེས་པའི་བར་བུ་ནི་བདག་དང་གཞན་གཉི་ག་ལས་གླེངས་ཏེ་ཆོས་བཤད་པར་གསོལ་བའོ། །མདོ་ལས་དེ་ནས་བཅོམ་ལྡན་འདས་ཀྱིས་ཞེས་པ་ནས་ངས་ཁྱོད་ལ་བཤད་དོ་ཞེས་པའི་བར་དུ་ནི་ལུང་བསྟན་དང་རྣམ་པ་བཞི་ལས་ངེས་པར་ལུང་སྟོན་པ་དང༌། ཁས་བླང་ཞིང་ལུང་སྟོན་པ་སྟེ་དེ་ཡང་སྔར་ནི་ལུང་བསྟན་པ་རྣམ་གཉིས་གླེངས། དེའི་འོག་ཏུ་ནི་སྙིགས་མ་རྣམ་པ་ལྔ་དང་སྦྱར། ཐེ་ཚོམ་རྣམ་བཞི་བསྩལ་བ་ལ་འདི་ནི་དང་པོ་སྟེ། ཁས་བླངས་པས་ལུང་བསྟན་པ་ཡང་བཅོམ་ལྡན་འདས་ཀྱིས་བཤད་པར་གནང་བ་དང༌། ང་རྒྱལ་ཅན་གྱི་རྣམས་བསལ་བར་སྟོན་ཏོ། །ལེགས་པར་ཤིན་ཏུ་ཉོན་ལ་ཡིད་ལ་ཟུང་ཤིག་པ་ནི་དབང་པོ་བསྡུས་ཏེ་བཀའ་ཉན་དུ་གཟུང་བའོ། །མདོ་ལས་བཅོམ་ལྡན་འདས་ཀྱིས་ཚིག་དེ་གསུངས་མ་ཐག་ཏུ་ཞེས་པ་ནས་འཁོར་དེ་ནས་དོང་ངོ་ཞེས་
པའི་བར་དུ་ནི་ང་རྒྱལ་ཅན་གྱི་རྣམས་དོང་བ་བསྟན་ཏོ། །མདོ་ལས་འདི་ལྟར་ང་རྒྱལ་ཅན་གྱི་ཞེས་པ་ནས་འཁོར་དེ་ནས་དོང་ངོ་ཞེས་པའི་བར་དུ་ནི་ང་རྒྱལ་ཅན་དེ་དག་ཅིའི་ཕྱིར་དོང་བའི་གཏན་ཚིགས་བསྟན་ཏེ། ཐོབ་པར་དཀའ་བ་རྣམས་སྔ་སྟེ། མིའི་ལུས་ཐོབ་པ་དང་ཡུལ་གྱི་དབུས་སུ་སྐྱེ་བ་དང་དབང་པོ་ཚང་པ་དང༌། དེ་བཞིན་གཤེགས་པ་འཇིག་རྟེན་དུ་བྱུང་བ་མཐོང་བ་དང༌། དམ་པའི་ཆོས་ཐོས་པ་འདི་དག་དཀའ་བ་ལས་རྙེད་པ་ཡིན་ན་ང་རྒྱལ་ཅན་གྱི་འཁོར་འདི་རྣམས་ཅིའི་ཕྱིར་སྟན་ལ་ལངས་ཏེ་དོང་ངོ་ཞེས་པའོ། །དེ་ནི་རྣམ་པ་གཉིས་ཀྱི་ཕྱིར་སྡིག་པའི་རྣམ་པར་སྨིན་པ་སྟུག་པ་དང། ང་རྒྱལ་ཅན་དུ་གྱུར་པའི་ཕྱིར་ཏེ། སྡིག་པ་སྟུག་ཆེས་པ་ནི་ཉོན་མོངས་པའི་སྒྲིབ་པ་དང༌། ལས་ཀྱི་སྒྲིབ་པ་དང་རྣམ་པར་སྨིན་པའི་སྒྲིབ་པ་སྟེ། དེ་ཉིད་རང་གི་སྐྱོན་དུ་གྱུར་པའོ། །སྐྱོན་དེ་གསུམ་གྱི་སྒྲིབ་པས་འཕགས་པའི་འབྲས་བུ་མི་ཐོབ་ཅེས་པའོ། །ང་རྒྱལ་ཞེས་པ་ནི་ང་རྒྱལ་རྣམ་པ་བདུན་ལས་འདི་ནི་ལྷག་པའི་ང་རྒྱལ་དང༌། མ་ཐོབ་པ་ཐོབ་པར་སེམས་ཤིང་ལོག་པའི་ང་རྒྱལ་དང་ལྡན་པའོ། །འཕགས་པའི་འབྲས་བུ་མ་ཐོབ་པ་དང༌། འདུས་མ་བྱས་མ་རྟོགས་པས་སྣོད་དུ་མ་གྱུར་པའི་ཕྱིར་ལངས་ཏེ་དོང་ངོ་ཞེས་སྦྱར་རོ། །མདོ་ལས་བཅོམ་ལྡན་འདས་ཅང་མི་གསུང་བར་བཞུགས་སོ་ཞེས་པ་ནི་ངེས་པའི་འབྲས་བུ་སྨིན་པ་ནི་བཅོམ་ལྡན་འདས་ཀྱི་མཐུས་ཀྱང་བསྟང་བ་མི་མཛད་པ་བསྟན་ཏོ། །མདོ་ལས་དེ་ནས་བཅོམ་ལྡན་འདས་ཀྱིས་ཞེས་པ་ནས་དེའི་དོན་བཤད་དོ་ཞེས་པའི་བར་དུ་ནི་འཁོར་མ་བརྟགས་པ་བསལ་ཏེ། སྣོད་དུ་གྱུར་པ་འཁོར་དམ་པ་ཉི་ཚེ་ལ་ཆོས་བཤད་པར་དགོངས་པའོ། །མདོ་ལས་བཅོམ་ལྡན་འདས་ལ་སླར་ཉན་ཏོ་ཞེས་པ་ནས་བརྒྱ་ལམ་ན་རེས་འགའ་འབྱུང་ངོ་ཞེས་པའི་བར་དུ་ནི་འདི་མན་ཆད་མ་ཐོས་པ་ཐོས་པར་བྱ་བ་དང༌། འདི་བཤད་པར་བྱ་བའི་ཆོས་ཤེས་པར་དཀའ་བ་བསྟན་པ་དང༌། དེ་བཞིན་གཤེགས་པས་གསུངས་པའི་ཐབས་ལ་སོགས་པ་ལ་བསྟེན་པ་དང༌། ཐེག་པ་གཅིག་པོ་ལ་གནས་པར་བྱ་བ་དང༌། འཛིན་པ་རྣམ་གཉིས་བསྩལ་བ་སྟོན་ཏེ། འདིས་ནི་མ་ཐོས་པ་ཐོས་པར་བྱ་བ་དང༌། ཐོས་པར་དཀའ་བ་དང་དེའི་དཔེ་བསྟན་ཏོ། །འཁོར་ལོས་སྒྱུར་བའི་
རྒྱལ་པོ་ནམ་བྱུང་བའི་ཚེ་རྒྱ་མཚོ་བྲི་བར་གྱུར་པས་མེ་ཏོག་ཨུ་དུམ་བཱ་ར་འདི་འབྱུང་བ་བཞིན་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བས་འཁོར་བའི་རྒྱུད་བསྲབས་ཤིང་ཐེག་པ་ཆེན་པོའི་དོན་གསལ་བར་འགྱུར་ཞེས་པའི་དོན་ཏོ། །མདོ་ལས་ཤཱ་རིའི་བུ་དེ་བཞིན་དུ་ཞེས་པ་ནས་ང་ནི་གཞན་དུ་མི་སྨྲའོ་ཞེས་པའི་བར་དུ་ནི་དེ་བཞིན་གཤེགས་པའི་གསུང་ལ་ཡིད་ཆེས་པར་བྱ་བ་བསྟན་ཏོ། །མདོ་ལས་ཤཱ་རིའི་བུ་དེ་བཞིན་གཤེགས་པའི་ལྡེམ་པོ་དག་ནི་ཆུད་པར་དཀའོ་ཞེས་པ་ནི་བཤད་པར་བྱ་བ་བསྟན་ཏོ། །མདོ་ལས་དེ་ཅིའི་ཕྱིར་ཞེས་པ་ནས་དེ་བཞིན་གཤེགས་པས་མཁྱེན་པའོ་ཞེས་པའི་བར་དུ་ནི་བཤད་པར་བྱ་བའི་དོན་མཚོན་པར་བྱ་བ་སྟེ། བརྟགས་པ་དང་རྟོགས་པའི་སྤྱོད་ཡུལ་ལས་འདས་པ་ནི་དེ་བཞིན་ཉིད་བདེན་པའི་དོན་ཏེ། ཚིག་གི་ཐ་སྙད་ཐམས་ཅད་ལས་འདས་པ་ཡིན་ན་བཅོམ་ལྡན་འདས་ཐབས་མཁས་པ་དང་ལྡན་པས་ཡི་གེ་དང་ཚིག་འབྲུའི་སྒོ་ནས་ཐེག་པ་རྣམ་པ་གསུམ་གྱི་དོན་མཚོན་པའོ། །མདོ་ལས་དེ་ཅིའི་ཕྱིར་ཞེན་ཞེས་པ་ནས་འཇིག་རྟེན་དུ་བྱུང་སྟེ་ཞེས་པའི་བར་དུ་ནི་གང་ལ་བརྟེན་པར་བྱ་བའི་དོན་སྟོན་ཏེ། དེ་ཡང་བྱ་བ་གཅིག་པ་དེ་སྔར་གླེང་པ་དང་ཕྱིས་དགྲོལ་བ་ལ་འདི་ནི་དང་པོའོ། །གང་ལ་བརྟེན་པར་བྱ་བ་ནི་བཅོམ་ལྡན་འདས་ཉག་གཅིག་གིས་མཁྱེན་པའི་ཆོས་ཏེ་ཤེས་པར་དཀའ་བའི་དོན་ཏོ། །དོན་དེ་སེམས་ཅན་རྣམས་ལ་པན་གདགས་པའི་ཕྱིར་སོ་སོའི་དབང་པོ་དང་སྦྱོར་ཞིང་ཆོས་སྟོན་པ་མཛད་དོ། །མདོ་ལས་དེ་ལྟར་ན་ཤཱ་རིའི་བུ་ཞེས་པ་ནས་ཡེ་ཤེས་མཐོང་བའི་ལམ་དུ་འཇུག་གོ་ཞེས་པའི་བར་དུ་ནི་འདི་མན་ཆད་བསྟན་པར་བྱ་བའི་ཆོས་རྒྱས་པར་དགྲོལ་བ་སྟེ། དོན་ཆེན་པོ་བྱ་བ་གཅིག་པ་ཞེས་པ་ནི། དེ་བཞིན་གཤེགས་པའི་མཁྱེན་པ་གཟིགས་པ་སྟེ་དེ་ཡང་དབྱེ་བ་དང་བསྟན་པ་དང༌། ཆུད་པར་བྱ་བ་དང༌། འཇུག་པ་དང་འདི་བཞི་སྟོན་ཏོ། །རྣམ་པ་འདི་བཞིས་དེ་བཞིན་གཤེགས་པའི་མཁྱེན་པ་གཟིགས་པ་རྟོགས་པར་བྱེད་དོ། །ཡེ་ཤེས་དེའི་བྱེད་པ་དང༌། རང་བཞིན་གཉིས་ཀ་ལ་མཁྱེན་པ་གཟིགས་པ་ཞེས་བྱ་སྟེ། དོན་དམ་པ་དང་ཀུན་རྫོབ་གཉི་གའི་སྤྱོད་ཡུལ་ལ་འཇུག་པའོ། །དེ་ལ་དབྱེ་བ་ལ་ནི་བླ་ན་མེད་པའི་དོན་བསྟན་པ་ནི་མཐུན་པའི་དོན་ནི་རྟོགས་པར་བྱ་བ་
ནི་མི་ཤེས་པ་ཤེས་པར་བྱ་བའི་དོན་ལ་འཇུག་པ་ནི་ཕྱིར་མི་ལྡོག་པའི་སར་འཇུག་ཅིང་ཡེ་ཤེས་ཀྱི་ལས་ཚད་མེད་པར་སྟོན་པའོ། །བླ་ན་མེད་པའི་བྱང་ཆུབ་དང་མྱ་ངན་ལས་འདས་པ་གཉིས་ཀ་གཞན་ལས་འཕགས་པའི་ཕྱིར་བླ་ན་མེད་པ་ཞེས་གདགས་སོ། །བསྟན་པ་མཐུན་པའི་དོན་ནི་ཐེག་པ་རྣམ་གསུམ་ཀུན་ལས་ཆོས་ཀྱི་སྐུས་འདྲ་བར་ཁྱབ་པའི་ཕྱིར་མཐུན་པ་ཞེས་གདགས་སོ། །རྟོགས་པར་བྱ་བ་ནི་ཐེག་པ་རྣམ་གཉིས་པ་དག་ཡང་དག་པའི་ངོ་བོ་མི་ཤེས་ཤིང་ཐེག་པ་རྣམ་གཅིག་གི་དོན་ལ་མི་གནས་པའི་ཕྱིར་དེ་བཞིན་གཤེགས་པས་མི་ཤེས་པ་ཤེས་པར་བྱ་བའི་ཕྱིར་འདི་བསྟན་པ་དང༌། འཇུག་པར་བྱ་བ་ནི་མཚན་ཉིད་གསུམ་པོ་གང་དུ་བསྟན་པ་དེ་ལ་འཇུག་པ་དང༌། ཐོབ་པར་བྱ་བའི་ཐབས་བསྟན་ཏོ། །དེ་བཞིན་གཤེགས་པ་འཇིག་རྟེན་དུ་བྱུང་སྟེ་ཆོས་སྟོན་པ་ཡང་རིམ་དང་ཅིག་ཅར་དང་ཆེ་ཆུང་གི་རྣམ་པ་མི་མཐུན་གྱིས་ཀྱང་སེམས་ཅན་ཐམས་ཅད་ཡེ་ཤེས་དེ་མཐོང་བ་དང་འཇུག་པར་བྱ་བ་ལས་གཞན་མི་སྟོན་ཏོ། །ཡེ་ཤེས་མཐོང་བ་དང་འཇུག་པ་ལ་མཐོང་བ་ནི་མངོན་དུ་རྟོགས་པ་ཤེས་པ་ནི་རྣམ་པར་ཤེས་པ་ལྔ་དང་ལྡན་པ་སྟེ། ཆོས་མངོན་པ་ལས་ཀྱང་མཁྱེན་ལ་མི་གཟིགས་པ་དང༌། གཟིགས་ལ་མི་མཁྱེན་པ་དང༌། མཁྱེན་ཀྱང་མཁྱེན་ལ་གཟིགས་ཀྱང་གཟིགས་པ་སྟེ་རྣམ་པ་གསུམ་མོ། །མཁྱེན་ལ་མི་གཟིགས་པ་ནི་ཟད་པའི་ཡེ་ཤེས་དང༌། མི་སྐྱེ་པའི་ཡེ་ཤེས་སོ། །གཟིགས་ལ་མི་མཁྱེན་པ་ནི་བཟོད་པ་བརྒྱད་དང་འཇིག་རྟེན་པའི་ཡང་དག་པར་ལྟ་བའོ། །མཁྱེན་ཀྱང་མཁྱེན་ལ་གཟིགས་ཀྱང་གཟིགས་པ་ནི་ཡེ་ཤེས་ལྷག་མ་གཞན་དག་གོ །རྣ་བས་ཐོས་པ་ལྟ་བུ་ནི་མཁྱེན་པ་དང་སྦྱར་རོ། །མིག་གིས་མངོན་དུ་མཐོང་བ་ནི་གཟིགས་པ་དང་སྦྱར་རོ། །ཡང་དོན་ཆེན་པོ་ཞེས་པ་ནི་དེ་བཞིན་གཤེགས་པའི་རང་བཞིན་བསྟན་པ་སྟེ། མ་རིག་པའི་སྒྲིབ་པས་བསྒྲིབས་པའི་སེམས་ཅན་རྣམས་ལ་ཡང་དག་པའི་རང་བཞིན་མཚོན་པ་ནི་དབྱེ་བའོ། །དེ་ཉིད་རྣམ་པར་ཕྱེ་སྟེ་དགྲོལ་བ་ནི་བསྟན་པའོ། །ཡང་ན་རྣམ་པ་ཐམས་ཅད་མཁྱེན་པའི་ཡེ་ཤེས་མ་གཏོགས་པར་དོན་གཞན་མེད་དོ་ཞེས་གསུངས་ཏེ་ཐམས་ཅད་མཁྱེན་པ་ནི་ཆོས་དང་གང་ཟག་ལ་བདག་མེད་པར་མཁྱེན་པའོ། །ཡེ་ཤེས་ནི་རྣམ་པ་ཐམས་ཅད་མཁྱེན་པའི་ཡེ་ཤེས་ཏེ། དེ་གཉིས་ལས་
འདའ་བའི་ཆོས་གཞན་མེད་པའི་ཕྱིར་བླ་ན་མེད་པའོ། །དེ་ལ་དབྱེ་བ་དང་བསྟན་པ་དང་རྟོགས་པ་འདི་གསུམ་གྱིས་ནི་བླ་ན་མེད་པའི་འབྲས་བུ་བསྟན། འཇུག་པར་བྱ་བས་ནི་སྒྲུབ་པའི་རྒྱུ་བསྟན་ཏོ། །མདོ་ལས་ཤཱ་རིའི་བུ་ཞེས་པ་ནས་ཡེ་ཤེས་མཐོང་བའི་ལམ་དུ་འཇུག་གོ་ཞེས་པའི་བར་དུ་ནི་དེ་བཞིན་གཤེགས་པའི་མཁྱེན་པ་དང༌། གཟིགས་པས་སེམས་ཅན་རྣམས་ལ་སྟོན་པ་སྟེ། ཐེག་པ་རྣམས་པ་གཉིས་པ་དག་བླ་ན་མེད་པའི་སྐལ་བ་མེད་པ་ཙམ་དུ་སེམས་པ་དེ་དག་འབྲས་བུ་དེ་ལ་གཟུད་པའི་ཕྱིར་རྣམ་པ་དེ་བཞིན་བསྟན་ཏོ། །མདོ་ལས་ཤཱ་རིའི་བུ་ད་ནི་ཐེག་པ་གཅིག་ལས་བརྩམས་ཏེ་ཞེས་པ་ནས་གཉིས་སམ་གསུམ་ཞེས་བྱ་བ་ཆུང་ཟད་ཀྱང་མེད་ཅེས་པའི་བར་དུ་ནི་ལུང་བསྟན་པའི་ནང་ནི་ཐེག་པ་གཅིག་བརྩམས་པ་ལ་གནས་པ་སྟེ། ཐེག་པ་གཅིག་བརྩམས་པ་འདི་སེམས་ཅན་རྣམས་ལ་ཆོས་སྟོན་གྱི་རང་སངས་རྒྱས་ཐེག་པ་གཉིས་པའམ། ཉན་ཐོས་ཞེས་ཐེག་པ་གསུམ་པའི་ཁྱད་པར་རིམ་པར་བཀོད་པ་མེད་དེ། དེ་ལ་ཟབ་པའམ་མི་ཟབ་པའམ་དཀའ་བའམ་སླ་བ་ལས་རིམ་པར་བཀོད་པ་ཡང་མ་ཡིན་ནོ། །སྐབས་འདིར་ཐེག་པ་གཉིས་བསལ་ཏེ་ཐེག་པ་ཆེན་པོ་གཅིག་བསྟན་པའི་དོན་སྟོན་ཏོ། །མདོ་ལས་ཤཱ་རིའི་བུ་ཕྱོགས་བཅུའི་འཇིག་རྟེན་ཐམས་ཅད་ཀྱི་དོན་ཡང་དེའོ་ཞེས་པ་ནི་ཆོས་ལ་གནས་པ་སྟེ། ད་ལྟར་བཞུགས་པའི་སངས་རྒྱས་ཤཱཀྱ་ཐུབ་པ་ཡང་སངས་རྒྱས་ཐམས་ཅད་ཀྱི་ཆོས་ལུགས་ལ་བརྟེན་ཏེ་འགྲོ་བ་མང་པོ་ལ་དད་པ་བསྐྱེད་ཅིང་བདག་དང་འདྲ་བར་བྱ་བའི་ཕྱིར་སྔར་ཐབས་ཙམ་བསྟན་ནས་ཕྱིས་ཡང་དག་པ་གང་ཡིན་པ་སྟོན་ཏེ། སྔར་ནི་ཕྱོགས་བཅུའི་སངས་རྒྱས་ཀྱི་ཆོས་ལུགས་ཀྱང་འདིའོ། །དུས་གསུམ་གྱི་སངས་རྒྱས་བཅོམ་ལྡན་འདས་ཀྱི་ཆོས་ལུགས་ཀྱང་འདིའོ། །ད་ལྟར་ངས་བསྟན་པའི་ཆོས་ལུགས་ཀྱང་འདིའོ་ཞེས་བསྟན་པ་སྟེ། འདི་ནི་ཕྱོགས་བཅུའི་སངས་རྒྱས་ཀྱི་ཆོས་ལུགས་བསྟན་པའོ། །དུས་གསུམ་ལས་ཕྱོགས་བཅུ་ཞེས་བྱ་བ་གཞན་པ་མེད་ལ་ཕྱོགས་བཅུ་ལས་དུས་གསུམ་ཞེས་བྱ་བ་གཞན་ཡང་མེད་མོད་ཀྱི་ཆུ་ཞེང་ལས་ཁྱད་པར་དུ་བཤད་དོ། །མདོ་ལས་དེ་ཅིའི་ཕྱིར་ཞེས་པ་ནས་ཐེག་པ་གཅིག་ལས་བརྩམས་ཏེ་ཆོས་བཤད་པ་དེ་ཡང་ཐམས་ཅད་མཁྱེན་པའི་
མཐའི་བར་དུ་ཞེས་པ་ནི་དུས་གསུམ་གྱི་སངས་རྒྱས་ཀྱི་ཆོས་ལུགས་བསྟན་པ་སྟེ་འདི་ལ་ཡང་རྣམ་པ་གཉིས་སོ། །སྔར་དུས་གསུམ་གྱི་ཆོས་སོ་སོར་བསྟན་པ་ཐམས་ཅད་དང་མཐུན་པ་སྟེ་སྔ་མ་ལ་ཡང་རྣམ་པ་གསུམ་སྟེ། འདས་པ་དང་མ་འོངས་པ་དང་ད་ལྟར་དང་གསུམ་མོ། །གསུམ་པོ་ལ་ཡང་གཉིས་གཉིས་ཏེ། སངས་རྒྱས་ཀྱི་ཆོས་བསྟན་པའི་ཆོས་ལུགས་མཐུན་པ་དང༌། སེམས་ཅན་གྱི་དོན་བྱས་པའི་འབྲས་བུ་མཐུན་པ་སྟེ། འདི་ནི་འདས་པའི་སངས་རྒྱས་ཀྱི་ཆོས་ལུགས་དང་མཐུན་པར་བསྟན་པའོ། །སྔར་རྒྱུ་རྐྱེན་རྣམ་པ་མང་པོས་ཐབས་སུ་བསྟན་པ་ནི་ཕྱིས་སངས་རྒྱས་ཀྱི་ཐེག་པ་གཅིག་ཐོབ་པར་བྱ་བའི་ཕྱིར་བསྟན་ཏོ། །འགྲེལ་པ་ལས་ཐབས་ནི་སྦྱོར་བ་སྟེ་ཐེག་པ་ཆུང་ངུའི་ཕུང་པོ་དང་ཁམས་དང༌། སྐྱེ་མཆེད་ལ་རྟོག་ཅིང་སྡུག་བསྔལ་ལས་སྐྱོ་བ་དང་སྡུག་བསྔལ་སྤང་བ་དང༌། རྣམ་པར་གྲོལ་བ་ཐོབ་པར་བྱེད་པ་ཐེག་པ་ཆེན་པོའི་ཕ་རོལ་ཏུ་ཕྱིན་པ་རྣམས་དང༌། བསྡུ་བ་རྣམ་བཞིས་བདག་དང་གཞན་གྱི་དོན་བྱེད་པ་གཉེན་པོའི་ཆོས་རྣམས་སོ། །རྒྱུ་ཞེས་བྱ་བ་ནི་འགྲེལ་པ་ལས་སྔར་དོན་དྲུག་སྨོས་པ་ལས་གཉིས་པའི་ནང་ནས་བཤད་པ་བཞིན་ནོ། །སྔར་རྒྱུ་དང་རྐྱེན་རྣམ་པ་སྣ་ཚོགས་ཞེས་སྨོས་པ་ནི་ཐེག་པ་གསུམ་ཡང་ཚིག་དང་མིང་དུ་བཏགས་པ་ཙམ་དུ་ཟད་དེ་ཡང་དག་པའི་དོན་ཡོད་པ་མ་ཡིན་ལ། ཡང་དག་པའི་དོན་ལ་བཤད་དུ་མེད་ཅེས་བྱ་བའི་དོན་ཏོ། །དཔེ་ཞེས་བྱ་བ་ནི་དཔེར་ན་བ་ལ་འོ་མ་དང་ཞོ་དང་མར་དང་ཞུན་མར་དང་མར་གྱི་སྙིང་པོ་ཡོད་པ་དང་འདྲ་སྟེ། དེ་ལ་ཐེག་པ་ཆུང་དུ་ནི་འོ་མ་ལྟ་བུ་ཡིན་ནོ། །ཐེག་པ་ཆེན་པོ་ནི་མར་གྱི་སྙིང་པོ་ལྟ་བུ་ཡིན་ནོ། །དཔེ་འདིས་ན་ཐེག་པ་ཆེན་པོ་བླ་ན་མེད་པ་བསྟན་ཏེ། ཉན་ཐོས་ལ་སོགས་པ་ཡང་ཐེག་པ་ཆེན་པོ་བླ་ན་མེད་པ་དང་མཐུན་པར་བསྟན་ཏོ། །ཉན་ཐོས་དང་མཐུན་པ་བསྟན་པ་ནི་སངས་རྒྱས་བཅོམ་ལྡན་འདས་ཀྱི་ཆོས་ཀྱི་སྐུ་ཉིད་སེམས་ཅན་དང་རང་སངས་རྒྱས་ལ་སོགས་པར་ཆོས་ཀྱི་སྐུར་མཉམ་ཞིང་ཁྱད་པར་མེད་པར་བསྟན་པ་སྟེ། དཔེ་འདི་དང་སྦྱར་ན་སེམས་ཅན་ནི་བ་ལྟ་བུ་ཉན་ཐོས་ནི་འོ་མ་ལྟ་བུ། རང་སངས་རྒྱས་ནི་ཞོ་ལྟ་བུ། བྱང་ཆུབ་སེམས་དཔའ་ནི་མར་ལྟ་བུ། བྱང་ཆུབ་སེམས་དཔའ་ཆེན་པོ་ནི་ཞུན་མར་ལྟ་བུ། སངས་རྒྱས་བཅོམ་ལྡན་འདས་ནི་མར་གྱི་སྙིང་པོ་ལྟ་བུ་སྟེ།
མར་གྱི་སྙིང་པོ་མཆོག་དམ་པ་ཡིན་པ་ལྟར་སངས་རྒྱས་ཀྱི་ཐེག་པ་གཅིག་ཀྱང་དེ་དང་འདྲ་སྟེ། བའི་འོ་མ་གཅིག་ལས་མར་གྱི་སྙིང་པོའི་བར་དུ་འགྱུར་བའི་ཕྱིར་སེམས་ཅན་ལས་སངས་རྒྱས་ཀྱི་བར་དུ་མཚན་མ་ཐ་དད་ཀྱང་རང་བཞིན་ནི་མཉམ་སྟེ་གཉིས་སུ་མེད་དོ། །མདོ་ལས་དེ་ནི་སེམས་ཅན་རྣམས་ཞེས་པ་ནས་བྱང་ཆུབ་ཐོབ་པར་གྱུར་ཏོ་ཞེས་པའི་བར་དུ་ནི་འདས་པའི་སེམས་ཅན་གྱི་དོན་བྱས་པའི་འབྲས་བུ་མཐུན་པར་བསྟན་པ་སྟེ། སྔར་ཐེག་པ་གཉིས་ཀྱིས་དོན་བྱས་ནས་ཕྱིས་སངས་རྒྱས་སུ་རྣམ་པ་ཐམས་ཅད་མཁྱེན་པའི་ཡེ་ཤེས་འཐོབ་པ་བསྟན་ཏེ། རྣམ་པ་ཐམས་ཅད་མཁྱེན་པའི་ཡེ་ཤེས་ནི་སངས་རྒྱས་ཀྱི་ཡང་དག་པའི་ཡེ་ཤེས་སོ། །རྣམ་པ་ཞེས་བྱ་བ་ནི་ཆོས་ཀྱི་རྣམ་པ་ཐམས་ཅད་མཁྱེན་པ་སྟེ། ཡང་དག་པ་ནི་གླང་པོའི་ཤིང་རྟ་ལྟ་བུ། མདོ་ལས་འདི་ལྟར་ཤཱ་རིའི་བུ་མ་འོངས་པའི་དུས་ཞེས་པ་ནས་ཐམས་ཅད་མཁྱེན་པའི་མཐའི་བར་དུ་ཞེས་པའི་བར་དུ་ནི་མ་འོངས་པའི་སངས་རྒྱས་རྣམས་ཀྱི་ཆོས་ལུགས་མཐུན་པ་བསྟན་ཏོ། །མདོ་ལས་དེ་ནི་སེམས་ཅན་རྣམས་ཞེས་པ་ནས་བྱང་ཆུབ་ཐོབ་པར་འགྱུར་རོ་ཞེས་པའི་བར་དུ་ནི་མ་འོངས་པའི་སེམས་ཅན་གདུལ་བར་འགྱུར་བའི་འབྲས་བུ་མཐུན་པར་བསྟན་པའོ། །མདོ་ལས་ཤཱ་རིའི་བུ་ད་ལྟར་གྱི་དུས་ན་ཞེས་པ་ནས་ཐམས་ཅད་མཁྱེན་པའི་ཆོས་འཆད་དོ་ཞེས་པའི་པར་དུ་ནི་ད་ལྟར་གྱི་སངས་རྒྱས་བཅོམ་ལྡན་འདས་ཆོས་ལུགས་མཐུན་པར་བསྟན་པ་སྟེ། དོན་དང་ཕན་པ་དང་བདེ་བ་ནི་བདེ་བར་བྱེད་པའི་དོན་ཏེ། བདེ་བ་ནི་བདེ་བ་བྱིན་པའོ། །སྡུག་བསྔལ་ལས་བཏོན་ཏེ་བདེ་བ་བྱིན་པ་དང་ཡེ་ཤེས་དང་བསོད་ནམས་བྱིན་པ་དང༌། འཇིག་རྟེན་དང་འཇིག་རྟེན་ལས་འདས་པའི་འབྲས་བུ་བྱིན་པ་དང༌། འབྲས་བུ་ཆུང་ངུ་དང་ཆེན་པོ་བྱིན་པར་གོ་རིམས་བཞིན་སྦྱར་རོ། །མདོ་ལས་ཤཱ་རིའི་བུ་ང་ཡང་ཞེས་པ་ནས་ཐམས་ཅད་མཁྱེན་པ་ཞེས་པའི་བར་དུ་ནི་ད་ལྟར་གྱི་སེམས་ཅན་ཐམས་ཅད་འབྲས་བུ་ཐོབ་པ་མཐུན་པར་བསྟན་པའོ། །མདོ་ལས་དེ་ནི་སེམས་ཅན་རྣམས་ཞེས་པ་ནས་བྱང་ཆུབ་ཐོབ་པར་འགྱུར་རོ་ཞེས་པའི་བར་དུ་ནི་སེམས་ཅན་རྣམས་ལ་ཆོས་འཆད་པ་ཡང་ཐེག་པ་གཅིག་ལས་བརྩམས་ཏེ་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ལ་འཛུད་པ་དང་སྟོན་པ་དང་
འཇུག་པ་དང་ཆུད་པར་བྱེད་པའི་ཕྱིར་རོ། །འཛུད་པ་ནི་མུ་སྟེགས་ཅན་དག་ལོག་པར་ལྟ་བ་ལས་བཟློག་སྟེ་ཡང་དག་པའི་ཆོས་ལ་ཞུགས་པའོ། །ཆུད་པར་བྱེད་པ་ནི་ཉན་ཐོས་པ་དག་བྱང་ཆུབ་ཆེན་པོ་ཆུད་པར་བྱེད་ཅིང༌། ཆུང་ངུ་ལས་བཟློག་ནས་ཆེན་པོ་ཆུད་པར་བྱེད་པའོ། །འགྲེལ་པ་ལས་འཛུད་པ་ནི་བླ་ན་མེད་པའི་དོན་ཏོ། །སྟོན་པ་ནི་མཐུན་པའི་དོན་ཏེ་ཐེ་ཚོམ་ཡོད་ན་བསྒོམ་ཞིང་སྤྱོད་པའོ། །འདུག་པ་ནི་མི་ཤེས་པའི་དོན་ཏེ། སེམས་མ་བསྐྱེད་པ་བསྐྱེད་པ་དང་མུ་སྟེགས་ཅན་དག་དམ་པའི་དོན་ལ་གཞུག་པའི་ཕྱིར་རོ། །ཆུད་པར་བྱེད་པ་ནི་ཕྱིར་མི་ལྡོག་པའི་ས་ལ་ཆུད་པར་བྱེད་པ་དང་སེམས་བསྐྱེད་པ་དག་ཆོས་ཆུད་པ་དང་ཉན་ཐོས་པ་དག་བྱང་ཆུབ་ཆེན་པོ་ཆུད་པར་བྱེད་པའོ། །མདོ་ལས་དེ་ནི་སེམས་ཅན་རྣམས་ཞེས་པ་ནས་བྱང་ཆུབ་ཐོབ་པར་འགྱུར་རོ་ཞེས་པའི་བར་དུ་ནི་ང་ཡང་ཆོས་ལུགས་འདི་ལ་བརྟེན་ཏེ། ཐམས་ཅད་ཀྱི་ཆོས་ཀྱང་དེའོ་ཞེས་བསྟན་པ་སྟེ། སངས་རྒྱས་ཉག་གཅིག་ལ་སྣ་ཚོགས་མཁྱེན་པའི་སྟོབས་མངའ་བས་སེམས་ཅན་གྱི་དབང་པོ་སྣ་ཚོགས་མཁྱེན་ཅིང་ཡེ་ཤེས་ཀྱི་སྟོབས་ཤིན་ཏུ་མོས་པ་མཁྱེན་ཏེ་མོས་པའི་ནི་སྤྱོད་པ་ལ་མོས་པའོ། །ཁམས་སྣ་ཚོགས་མཁྱེན་པའི་སྟོབས་མངའ་བས་རང་བཞིན་མཁྱེན་ཏེ། རིགས་མ་ངེས་པའི་ཁམས་སུ་གཏོགས་པ་མོས་པ་བསྐྱེད་པའི་ཕྱིར་སྔར་ཐེག་པ་གསུམ་ཐབས་ཙམ་དུ་གསུངས་ནས། ཕྱིས་མཐར་ཕྱིན་པའི་ཐེག་པ་གསུངས་ཏེ། སོ་སོའི་སྐྱེ་བོ་དག་སངས་རྒྱས་ཀྱི་ཐེག་པ་གཅིག་ཐོབ་པ་དང་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་ཕྱིར་མདོ་ལས་ཐེག་པ་གཅིག་ལས་བརྩམས་ཏེ་ཐམས་ཅད་མཁྱེན་པའི་མཐའ་བར་དུ་གསུངས་སོ། །མདོ་ལས་ཤཱ་རིའི་བུ་ཞེས་པ་ནས་ཐེག་པ་གཉིས་སུ་གདགས་པ་ཡང་མེད་ན་གསུམ་དུ་ལྟ་ཅི་སྨོས་ཞེས་པའི་བར་དུ་ནི་རང་སངས་རྒྱས་ཀྱི་ཐེག་པ་གཉིས་པ་ཡང་མེད་ན་ཉན་ཐོས་ཀྱི་ཐེག་པ་གསུམ་པ་ཡོད་པ་ལྟ་ཅི་སྨོས་ཞེས་བསྟན་པ་སྟེ། མདོ་ལས་རའི་ཤིང་རྟ་དང་རི་དགས་ཀྱི་ཤིང་རྟ་དང༌། གླང་པོ་ཆེའི་ཤིང་རྟ་འདོད་པའི་ཕྱིར་མེ་འབར་བའི་གྲོང་ཁྱེར་ལས་བྱུང་བ་ནི་ཐེག་པ་གཉིས་བསལ་བར་ཟད་ཀྱི་གླང་པོ་ཆེའི་ཐེག་པ་ཡང་བསལ་བ་མ་ཡིན་ཏེ་དེ་བས་ནི་འདི་ལ་ཐེག་པ་གཉིས་ཀྱི་མྱ་ངན་ལས་འདའ་
བ་དང་མཐར་ཕྱིན་པ་མེད་དོ་ཞེས་གསུངས་སོ། །འགྲེལ་པ་ལས་ཐེག་པ་གཉིས་མེད་པ་ནི་ཐེག་པ་གཉིས་ཀྱི་མྱ་ངན་ལས་འདའ་བ་མེད་པ་སྟེ། སངས་རྒྱས་བཅོམ་ལྡན་འདས་ཉག་གཅིག་གིས་མྱ་ངན་ལས་འདས་པ་ཆེན་པོ་བརྙེས་ཏེ། ཡེ་ཤེས་ཐམས་ཅད་ཡོངས་སུ་རྫོགས་པའི་མཐར་ཕྱིན་པས་མྱ་ངན་ལས་འདས་པ་ཆེན་པོ་ཞེས་བྱའོ། །དེ་ཡང་དངོས་པོ་གསུམ་ཡོངས་སུ་རྫོགས་ཏེ་ཐེག་པ་གཉིས་པ་ལྟར་བརྟགས་ཏེ་འགོག་པ་ལ་ལྟོས་པ་མ་ཡིན། ཡེ་ཤེས་ཆེན་པོའི་ཆོས་ཀྱི་སྐུ་ཡོད་པ་མ་ཡིན། མྱ་ངན་ལས་འདས་པ་ཆེན་པོ་ཡོད་པ་མ་ཡིན་ཏེ། སངས་རྒྱས་ཀྱི་ཐེག་པ་འབའ་ཞིག་ལ་མངའོ། །འགྲེལ་པ་ལས་ལུང་བསྟན་པའི་ནང་ནས་དོན་རྣམ་པ་དྲུག་གིས་ཆོས་གང་བསྟན་པ་ལ་སོགས་པ་དོན་རྣམ་པ་ལྔ་བསྟན་པ་ལ། ཆོས་གང་ལ་སོགས་པ་ཞེས་བྱ་བ་ནི་མ་ཐོས་པ་ཐོས་པར་བྱ་བ་སྟེ། སྔོན་མ་བྱུང་བའི་ཆོས་བསྟན་ནས་ཐོས་པར་བྱེད་པའོ། །ཆོས་གང་དག་ཅེས་བྱ་བ་ནི་སྣ་ཚོགས་བསྒྲུབ་པར་བཤད་པ་དང༌། རྒྱུ་དང་གཞི་རྣམ་པ་ཐ་དད་པ་བསྟན་པ་དང༌། དམིགས་པ་དང་ངེས་པའི་ཚིག་གིས་ཐབས་ལ་མཁས་པ་བསྟན་པའོ། །ཆོས་ཇི་ལྟ་བུ་ཞེས་བྱ་བ་ནི་གང་ལ་བརྟན་ཞེ་ན་བྱ་བའི་དོན་ཆེན་པོ་གཅིག་གི་ཕྱིར་ཞེས་སྨོས་པའོ། །ཆོས་ཀྱི་མཚན་ཉིད་ཇི་ལྟ་བུ་ཞེས་པ་ནི་ཐེག་པ་གཅིག་ལ་གནས་ནས་སེམས་ཅན་གྱི་དབང་པོ་ཇི་ལྟ་བ་བཞིན་དུ་སངས་རྒྱས་ཀྱི་རང་བཞིན་ཡོད་དེ། སངས་རྒྱས་ཀྱི་ཆོས་ལ་གནས་པའོ། །ཇི་ལྟ་བུའི་རང་བཞིན་ཞེས་པ་ནི་ཐེག་པ་གཉིས་ཀྱི་རང་བཞིན་བསལ་ཏེ། ཐེག་པ་གཅིག་གི་རང་བཞིན་འབའ་ཞིག་གོ་ཞེས་སྨོས་པ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་སྐུ་མཉམ་པའོ། །མདོ་ལས་འོན་ཀྱང་དེ་བཞིན་གཤེགས་པ་ཞེས་པ་ནས་ཚེའི་རྙོག་མ་ལ་བྱུང་ན་ཞེས་པའི་བར་དུ་ནི་འདིར་ཡང་དག་པའི་མཚན་ཉིད་བསྟན་པ་སྟེ། འདི་མན་ཆད་ཐེ་ཚོམ་རྣམ་པ་བཞི་འགྲེལ་བ་ལས་དོན་རྣམ་པ་ལྡས་སྟོན་ཏེ། ཐེ་ཚོམ་རྣམ་པ་བཞི་གང་ཞེ་ན་ནམ་ཞིག་སྟོན་པར་འགྱུར་བ་དང༌། ང་རྒྱལ་གྱི་དབང་དུ་གྱུར་པ་ཇི་ལྟར་ཤེས་པ་དང༌། བསྟན་པའི་སྣོད་དུ་ཇི་ལྟར་འགྱུར་བ་དང་ཇི་ལྟར་ན་བརྫུན་དུ་མི་འགྱུར་བ་དང་བཞིའོ། །སྐབས་འདིར་ཐེ་ཚོམ་དང་པོ་བསལ་བ་བསྟན་ཏེ།
འགྲེལ་པ་ལས་སངས་རྒྱས་བཅོམ་ལྡན་འདས་ནམ་ཞིག་གི་དུས་ན་ཐབས་ཙམ་དུ་བསྟན་པ་སྟོན་པར་འགྱུར་བ་དང༌། སངས་རྒྱས་བཅོམ་ལྡན་འདས་ནམ་ཞིག་གི་དུས་ན་སྔར་ཐེག་པ་གཉིས་ཐབས་ཙམ་དུ་བསྟན་ཏེ། ཕྱིས་ཐེག་པ་གཅིག་པ་ཡང་དག་པ་བསྟན་པར་འགྱུར་ཞེས་སྨོས་པ་ལ་ཡང་རྣམ་པ་གཉིས་ཏེ། སྔར་རྙོག་པ་ལྔའི་དུས་བྱུང་བ་བསྟན་པ་དང༌། ཕྱིས་ཅིའི་ཕྱིར་བསྟན་པ་སྟེ་རྙོག་པ་ལ་ཡང་རྣམ་པ་ལྔའོ། །མིང་བསྟན་པ་དང༌། མཚན་ཉིད་བསྟན་པ་དང་གཉེན་པོ་དང་བཞག་པ་དང་གཟུགས་དང་གཅིག་གིས་གཅིག་བསྡུ་བ་དང་ལྔའོ། །དེ་ལ་མིང་བསྟན་པ་ནི་རྙོག་པ་སྟེ། རྙོག་ཅེས་བྱ་བ་ནི་དྲི་མའང་མི་གཙང་བའི་དོན་ཏོ། །དཔེར་ན་ཁ་ཟས་མི་གཙང་བ་དྲི་མ་ཅན་ནི་བཙོག་པ་སྟེ་རྙོག་པ་ཞེས་བྱའོ། །མདོར་ན་བསྐལ་པ་སྐྱེ་བའི་ཚེ་བསྐལ་པ་གསུམ་ནི་བགས་གྱིས་དམས། ཉོན་མོངས་པ་ནི་ཁད་ཀྱིས་བསྲབས་ཏེ། སེམས་ཅན་དག་དགེ་བ་ལ་ཕྱོགས་ཤིང་ལོག་པར་ལྟ་བ་ཉུང་བས་ཚེའི་དབང་པོ་ནི་ཕྱི་ཕྱིར་རིང༌། བཟང་ཞིང་ལེགས་པ་ནི་ཕྱི་ཕྱིར་སྐྱེ་བ་དང་སེམས་ཅན་སྡུག་བསྔལ་བ་མེད་ཅིང་སངས་རྒྱས་སྤྲུལ་བ་འཇིག་རྟེན་དུ་མ་བྱུང་བའི་དུས་ནི་གཙང་མ་ཞེས་བྱའོ། །སངས་རྒྱས་སྤྲུལ་བ་འཇིག་རྟེན་དུ་བྱུང་ན་བསྐལ་བ་འགྲིབ་པའི་དུས་འབྱུང་དུ་ཉེ་སྟེ། བསྐལ་པ་ཆུང་དུ་གསུམ་ཡང་བགས་ཀྱིས་འབྱུང༌། ཉོན་མོངས་པ་ཡང་ཕྱི་ཕྱིར་སྐྱེ། སེམས་ཅན་ཡང་ཉེས་པ་ལ་དགའ་ཞིང་ལྟ་བ་ལ་ཕྱི་ཕྱིར་ཞེན་པ་དང༌། ཚེའི་དབང་པོ་ཕྱིར་ཞིང་ཐུང་བ་དང༌། ཕྱི་ཕྱིར་ཞིང་ངན་ལ་བཙོག་པའི་དུས་ནི་རྙོག་པ་ཞེས་བྱའོ། །ལྔ་ཞེས་པ་ནི་གྲངས་བསྟན་པའོ། །དེ་ལ་མཚན་ཉིད་བསྟན་པ་ནི་འགྲེལ་པ་ལས་ད་ལྟར་གྱི་མི་རྣམས་རབ་ཏུ་ཚེ་ཐུང་སྟེ་ལོ་བརྒྱ་ལས་མི་འདའ་བ་ནི་ཚེའི་རྙོག་པ་ཞེས་བྱ་སྟེ། ཀུན་གཞིའི་རྣམ་པར་ཤེས་པ་ལ་བག་ཆགས་ཀྱི་རྣམ་པས་ལས་ཐ་དད་པར་གྱུར་པ་ནི་ཚེའི་དབང་པོའི་མཚན་ཉིད་དོ། །དགེ་བའི་ལས་ཀྱི་འབྲས་བུའི་མཐུ་ཞན་པར་གྱུར་ཏེ། ཚེའི་དབང་ཕྱི་ཕྱིར་ཐུང་བར་གྱུར་བ་ནི་སྲོག་གཅོད་པའི་ལས་ཀྱི་དབང་གིས་གྱུར་ཏོ། །སེམས་ཅན་གང་ཕ་མར་མི་ཤེས་པ་དང་དགེ་སྦྱོང་དང་བྲམ་ཟེ་དང་བླ་མར་མི་ཤེས་པ་དང༌། ཆོས་མི་ཤེས་པ་དང༌། འཇིག་རྟེན་འདི་དང་འཇིག་རྟེན་ཕ་རོལ་ལས་ཀྱི་རྣམ་པར་སྨིན་པས་མི་འཇིགས་མི་སྐྲག་པ་དང༌། སྦྱིན་པ་མི་བྱེད་
བསོད་ནམས་མི་བྱེད་ཅིང༌། ཚུལ་ཁྲིམས་མི་བསྲུང་བ་སྟེ། མདོར་ན་སྡིག་པ་བྱེད་ཅིང་དགེ་བ་མེད་པ་ནི་སེམས་ཅན་གྱི་རྙོག་པ་ཞེས་བྱའོ། །སེམས་ཅན་གང་ཆོས་མ་ཡིན་པ་ལ་ཆགས་པ་མཚོན་ཆ་དང༌། སེམས་ཅན་ལ་གནོད་པར་འགྱུར་བའི་ཡོ་བྱད་སྦྱིན་པ་དང༌། འཐབ་ཅིང་རྩོད་པ་ལ་དགའ་བ་དང༌། བརྫུན་དང་གཡོ་སྒྱུ་བྱེད་པ་དང༌། ལོག་པའི་ཆོས་འཛིན་ཅིང་དགེ་བའི་ཆོས་མ་ཡིན་པ་སྤྱོད་པ་ནི་ཉོན་མོངས་པའི་རྙོག་པ་ཞེས་བྱ་སྟེ། ལྟ་བ་ལྔ་མ་གཏོགས་པ་ཉོན་མོངས་པ་ཐམས་ཅད་དང་ཉེ་བའི་ཉོན་མོངས་པ་ཐམས་ཅད་ནི་ཉོན་མོངས་པའི་རྙོག་པའི་མཚན་ཉིད་ཅེས་བྱའོ། །ཆོས་མ་ཡིན་པའི་འདོད་ཆགས་ཀྱི་མཚོན་ཆ་ལ་སོགས་པ་བྱིན་ཏེ་གསོད་དུ་བཅུག་པ་དང༌། ནོར་རྫས་ལ་ཆགས་ཏེ་མཚོན་ཆ་བྱིན་པས་འཐབ་ཅིང་རྩོད་པའི་གཞིར་གྱུར་པ་དང༌། གཞན་ཡང་སྡིག་པ་མི་དགེ་བའི་ཆོས་སུ་གཏོགས་པ་ཉོན་མོངས་པ་དང༌། ཉེ་བའི་ཉོན་མོངས་པ་བག་ཆགས་ཀྱི་དབང་གིས་ཉོན་མོངས་པ་སྐྱེ་བ་དང༌། འཇིག་རྟེན་ན་དམ་པའི་ཆོས་ནུབ་སྟེ། ནམ་གཟུགས་བརྙན་ཙམ་ལ་སྤྱད་པ་ལོག་པར་ལྟ་བ་སྐྱེས་པ་ནི་ལྟ་བའི་རྙོག་པ་ཞེས་བྱའོ། །མུ་སྟེགས་ཅན་ངན་པར་ལྟ་བ་མང་དུ་བྱུང་སྟེ། མུ་གེའི་བསྐལ་པ་དང་ནད་ཀྱི་བསྐལ་པ་དང༌། མཚོན་གྱི་བསྐལ་པ་བྱུང་བ་ནི་བསྐལ་པའི་རྙོག་པ་ཞེས་བྱའོ། །དེ་ལ་གཉེན་པོ་ནི་སྤྱོད་པ་ལས་གཉེན་པོ་བསྟན་ཏེ། འགྲེལ་པ་ལས་གྲུབ་པའི་མཐའ་རྣམ་པ་བཞི་དང༌། རྙོག་པ་ལྔར་སྦྱར་རོ། །གྲུབ་པའི་མཐའ་བཞི་ནི་འཇིག་རྟེན་གྱི་གྲུབ་པའི་མཐའ་དང༌། དབང་པོ་སོ་སོའི་གྲུབ་པའི་མཐའ་དང༌། གཉེན་པོའི་གྲུབ་པའི་མཐའ་དང༌། དོན་དམ་པའི་གྲུབ་པའི་མཐའོ། །དེ་ལ་བསྐལ་པའི་རྙོག་པ་དང་སེམས་ཅན་གྱི་རྙོག་པའི་གཉེན་པོ་ནི་འཇིག་རྟེན་གྱི་གྲུབ་པའི་མཐའོ། །ཚེའི་རྙོག་པའི་གཉེན་པོ་ནི་དབང་པོ་སོ་སོའི་གྲུབ་པའི་མཐའོ། །ཉོན་མོངས་པའི་རྙོག་པ་དང༌། ལྟ་བའི་རྙོག་པའི་གཉེན་པོ་ནི་གཉེན་པོའི་གྲུབ་པའི་མཐའོ། །གྲུབ་པའི་མཐའ་གསུམ་གྱིས་རྙོག་པ་ལྔ་བཅོམ་ནས་དོན་དམ་པར་ཞུགས་ཏེ་ཡང་དག་པ་ཉིད་ནི་རིག་པའོ། །དེ་ལ་གཟུགས་པ་དང་གཞིག་པ་ནི་དྲིས་པ། ཅིའི་ཕྱིར་རྙོག་པ་ལྔ་ལས་མི་མང་མི་ཉུང་ཞེ་ན། ལན་བཏབ་པ། སེམས་ཅན་ལ་རྣམ་པ་གཉིས་
ཏེ། སྡིག་པ་སྤྱོད་པ་ཁྱིམ་པ་སྐྱེ་བོ་དང་ལོག་པར་ལྟ་བ་སྟེ་རབ་ཏུ་བྱུང་བའི་མུ་སྟེགས་ཅན་ནོ། །ཁྱིམ་པ་ཤིས་པ་མེད་པ་ཉོན་མོངས་པ་བསྐྱེད་པ་ནི་ཉོན་མོངས་པའི་རྙོག་པ་ཞེས་བྱའོ། །མུ་སྟེགས་ཅན་ལ་ལོག་པར་ལྟ་བ་དོན་མེད་པ་ཚོལ་བ་ནི་ལྟ་བའི་རྙོག་པ་ཞེས་བྱའོ། །གཞན་ཡང་དབང་པོ་རྟུལ་པོ་ནི་ཉོན་མོངས་པའི་རྙོག་པ་ཞེས་བྱ། དབང་པོ་རྣོན་པོ་ནི་ལྟ་བའི་རྙོག་པ་ཞེས་བྱ་སྟེ། རྒྱུ་རྣམ་པ་གཉིས་ཀྱིས་མ་འོངས་པའི་འབྲས་བུ་ཐོབ་པའི་ཚེ་བསྡུ་བ་དང་དབྱེ་བ་མི་མཐུན་པས་རྙོག་པ་རྣམ་གཉིས་སུ་ཕྱེ་སྟེ་ནང་གི་འབྲས་བུ་གཉིས་དང་སྤྱིར་བསྡུ་བ་ནི་སེམས་ཅན་གྱི་རྙོག་པ་ཞེས་བྱའོ། །སེམས་ཅན་སྡིག་པ་ཕྱིའི་འབྲས་བུ་གཉིས་དང་སྤྱིར་བསྡུས་པ་ནི་བསྐལ་པའི་རྙོག་པ་ཞེས་བྱའོ། །རྩ་བ་བསྟན་པའམ། ནང་གི་མི་དགེ་བའི་འབྲས་བུ་ནི་ཚེའི་རྙོག་པ་ཞེས་བྱ། ཕྱི་རོལ་གྱི་མི་དགེ་བའི་འབྲས་བུ་ནི་བསྐལ་པའི་རྙོག་པ་ཞེས་བྱ། སྡིག་པའི་རྒྱུ་དང་འབྲས་བུ་སེམས་ཅན་སྡིག་པ་ལས་ཡོད་པར་འགྱུར་བས་སེམས་ཅན་གྱི་རྙོག་པ་ཞེས་བྱ་སྟེ་དེ་བས་ན་རྙོག་པ་ལྔའི་མཚན་ཉིད་བསྟན་པས་དེ་ལ་སྐྱོ་བར་བྱ་བའི་ཕྱིར་རྙོག་པ་ལྔ་བཤད་དོ། །དེ་ལ་གཅིག་གིས་གཅིག་བསྡུ་བ་ནི་མདོ་དག་ལས་རྙོག་པ་བཅུ་གཉིས་གསུངས་ཏེ། བསྐལ་པའི་རྙོག་པ་བསྟན་པ་དང༌། དུས་ཀྱི་རྙོག་པ་བསྟན་པ་དང། སེམས་ཅན་གྱི་རྙོག་པ་བསྟན་པ་དང༌། ཉོན་མོངས་པའི་རྙོག་པ་བསྟན་པ་དང༌། ཚེའི་རྙོག་པ་བསྟན་པ་དང༌། ཐེག་པ་གསུམ་གྱི་ཁྱད་པར་གྱི་རྙོག་པ་བསྟན་པ་དང༌། ཡོངས་སུ་མ་དག་པའི་ཞིང་གི་རྙོག་པ་བསྟན་པ་དང༌། སེམས་ཅན་གདུལ་དཀའ་བའི་རྙོག་པ་བསྟན་པ་དང༌། ཉོན་མོངས་པ་སྣ་ཚོགས་བསྟན་པའི་རྙོག་པ་བསྟན་པ་དང༌། མུ་སྟེགས་ཅན་འཁྲུག་པའི་རྙོག་པ་བསྟན་པ་དང༌། བདུད་ཀྱི་རྙོག་པ་བསྟན་པ་དང༌། བདུད་ཀྱི་ལས་ཀྱི་རྙོག་པ་བསྟན་པ་དང་བཅུ་གཉིས་སོ། །རྙོག་པ་བཅུ་གཉིས་པོ་འདི་སྤྲུལ་པའི་སངས་རྒྱས་ཀྱི་ཞིང་ན་ཐེག་པ་ཆེན་པོ་པ་འབའ་ཞིག་ལ་ཡོད་དོ། །རྙོག་པ་ལྔའི་ཡོངས་སུ་མ་དག་པའི་ཞིང་ན་ཐེག་པ་ཆེ་ཆུང་གཉི་ག་ལ་ཡོད་དོ། །བསྐལ་པ་དང་དུས་ནི་བསྐལ་པའི་རྙོག་པ་སེམས་ཅན་དང་གདུལ་དཀའ་བའི་སེམས་ཅན་ནི་སེམས་ཅན་གྱི་རྙོག་པ་ཉོན་མོངས་པ་དང་ཉོན་མོངས་པ་སྣ་ཚོགས་པ་ནི་ཉོན་མོངས་པའི་རྙོག་པ། ཚེ་ནི་ཚེའི་རྙོག་པ། མུ་སྟེགས་ཅན་འཁྲུག་པ་ནི་ལྟ་བའི་
རྙོག་པ་སྟེ། བརྒྱད་པོ་འདི་ནི་རྙོག་པ་རྣམ་པ་ལྔའོ། །ལྷག་མ་བཞི་པོ་ནི་ཐེག་པ་གསུམ་གྱི་ཁྱད་པར་དུ་བསྟན་ཏོ། །ཡོངས་སུ་མ་དག་པའི་ཞིང་ན་བདུད་དང་བདུད་ཀྱི་ལས་ནི་རྙོག་པ་ལྔར་མི་བསྡུའོ། །འགྲེལ་པ་ལས་རྣམ་པར་དག་པ་ནི་རྙོག་པ་མ་ཡིན་པའི་དོན་ཏེ། རྙོག་པ་ལ་ཡང་རྣམ་པ་དྲུག་སྟེ། རྙོག་པ་འདི་དང་བྲལ་ན་རྣམ་པར་དག་པ་ཞེས་བྱའོ། །དྲུག་གང་ཞེ་ན་ཆགས་པའི་རྙོག་པ་དང༌། སྤྱོད་ལམ་གྱི་རྙོག་པ་དང༌། སྒྲིབ་པའི་རྙོག་པ་དང༌། མཚན་མ་ཐ་དད་པའི་རྙོག་པ་དང༌། ཡོན་ཏན་དང་མི་ལྡན་པའི་རྙོག་པ་དང༌། གཏི་མུག་གི་རྙོག་པ་དང་དྲུག་གོ །གཉེན་པོའི་ཕྱིར་ལེ་ལོ་སྤང་བའི་ཕྱིར་དག་པའི་ཕྱིར་བསྟན་པའི་ཕྱིར་བསོད་ནམས་དང་ལྡན་པའི་ཕྱིར། ཡེ་ཤེས་དང་ལྡན་པའི་ཕྱིར་གཉེན་པོ་འདི་དྲུག་དང་ཟག་པ་དྲུག་གོ་རིམས་སུ་སྦྱར་རོ། །ཆོས་ཉིད་སངས་རྒྱས་ནི་རྙོག་པ་ལྔའི་ཚེ་འཇིག་རྟེན་དུ་གཤེགས་ཏེ་དེ་བས་ན་སངས་རྒྱས་བཅོམ་ལྡན་འདས་ནི་རྙོག་པ་ལྔའི་དུས་སུ་འཇིག་རྟེན་དུ་གཤེགས་སོ། །ཅིའི་ཕྱིར་བྱམས་པ་ནི་ཚེ་ལོ་བརྒྱད་ཁྲིའི་དུས་སུ་གཤེགས་ལ་ཤཱ་ཀྱ་ཐུབ་པ་ནི་ཚེ་ལོ་བརྒྱའི་དུས་སུ་གཤེགས་པར་གྱུར། སྨྲས་པ། སྨོན་ལམ་ནི་ཐ་དད་ཀྱི་གཉི་ག་ཡང་རྙོག་པ་ལྔའི་དུས་སུ་གཤེགས་པར་འདྲ་བར་སྔར་ཐེག་པ་གསུམ་ཐབས་ཙམ་དུ་བསྟན་ནས་ཕྱིས་ཡང་དག་པ་བསྟན་ཏེ། །སྤྲུལ་པའི་སྐུ་ལ་འདྲའོ། །གལ་ཏེ་བསོད་ནམས་ཀྱི་སྐུ་དང༌། སྤྲུལ་པའི་སྐུ་ལ་ཐེག་པ་གཉིས་པོ་ལ་འདུལ་བ་མི་མཛད་ན་ངེས་པར་རྙོག་པ་མ་ཡིན་པའི་དུས་སུ་གཤེགས་ནས་ཐེག་པ་གཉིས་པོ་ལ་གདུལ་བར་མཛད་པས་ངེས་པར་རྙོག་པའི་དུས་སུ་གཤེགས་སོ། །རྙོག་པ་ཞེས་བྱ་བ་ནི་འགྲིབ་པའི་བསྐལ་བ་ལས་འཇུག་སྟེ་རྙོག་པ་ལྔ་ཁད་ཀྱིས་སྐྱེ་བས་དེ་ལ་རྙོག་པ་ཞེས་བྱའོ། །སངས་རྒྱས་བྱམས་པ་གཤེགས་པའི་ཚེ་ལོ་བརྒྱད་ཁྲི་ལས་ཁད་ཀྱིས་བྲི་བས་དེ་ལ་ཡང་རྙོག་པའི་དུས་ཞེས་བྱ་བའི་ཚེ་ལོ་བཅུའམ་ཉི་ཤུ་ལས་མི་ཐུབ་པའི་བསྐལ་པ་ཆུང་ངུ་འབྱུང་བ་འབའ་ཞིག་ལ་རྙོག་པ་ཞེས་བྱ་བ་མ་ཡིན་ནོ། །དེ་བས་ན་བསྐལ་བ་འགྲིབ་པའི་ཚེ་སངས་རྒྱས་འཇིག་རྟེན་དུ་གཤེགས་ལ་བསྐལ་པ་སྐྱེ་བའི་ཚེ་འཁོར་ལོས་སྒྱུར་བའི་རྒྱལ་པོ་འབྱུང་ངོ༌། །དེ་ལྟར་བསྐལ་པ་འགྲིབ་པའི་ཚེ་སངས་རྒྱས་གཤེགས་ལ་བསྐལ་པ་སྐྱེ་བའི་ཚེ་འཁོར་
ལོས་སྒྱུར་བའི་རྒྱལ་པོ་འབྱུང་ན་ཅིའི་ཕྱིར་རྒྱལ་པོ་དུང་ཞེས་བྱ་བ་སངས་རྒྱས་བྱམས་པ་དང་ཅིག་ཅར་བྱུང་ལ་གལ་ཏེ་རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་པོར་འགྱུར་ཞིང་སངས་རྒྱས་མར་མེ་མཛད་ཀྱི་སྲས་བརྒྱད་ཅར་གླིང་བཞི་ལ་དབང་བར་འགྱུར་ཞེས་གསུངས། ལན་བཏབ་བ་རྒྱལ་པོ་དུང་ཞེས་བྱ་བ་བསྐལ་བ་སྐྱེ་བའི་ཚེ་བྱུང་བ་ནི་བདེན་ན་ཚེ་རིང་བས་བྱམས་པ་དང་ཕྲད་པར་ཟད་ཀྱི་སངས་རྒྱས་བྱམས་པ་བསྐལ་པ་འགྲིབ་པའི་དུས་མ་ཡིན་པར་གཤེགས་པ་ནི་མ་ཡིན་ནོ། །སངས་རྒྱས་རབ་ཏུ་བྱུང་ནས་འཁོར་ལོས་སྒྱུར་བའི་རྒྱལ་པོར་འགྱུར་ཞེས་བསྟན་པ་ཡང་ངེས་པར་ལུང་བསྟན་པ་མ་ཡིན་ནོ། །སངས་རྒྱས་མར་མེ་མཛད་ཀྱི་སྲས་བརྒྱད་ཀྱང་སྔ་མ་དང་འདྲ་སྟེ། བསོད་ནམས་ཀྱི་སྐུ་ཡིན་པས་དེ་འདྲའི་སྐྱོན་མེད་དུ་ངེས་སོ། །གསེར་གྱི་འཁོར་ལོས་སྒྱུར་བའི་རྒྱལ་པོ་ནི་བསྐལ་པ་ཡར་སྐྱེ་བའི་ཚེ་འཇིག་རྟེན་དུ་ངེས་པར་འབྱུང་གི །དངུལ་དང་ཟངས་དང་ལྕགས་ཀྱི་འཁོར་ལོས་སྒྱུར་ཕའི་རྒྱལ་པོ་འབྱུང་བའི་དུས་སུ་ནི་ངེས་པ་མེད་དེ། དེ་བས་ན་རྒྱལ་པོ་དྷརྨཱ་ཨ་ཤོ་ཀ་སངས་རྒྱས་མྱ་ངན་ལས་འདས་ནས་ལོ་བརྒྱ་ལོན་པའི་འོག་ཏུ་འབྱུང་ངོ༌།། །།དམ་པའི་ཆོས་པུཎྜ་རཱི་ཀའི་འགྲེལ་པ། བམ་པོ་བཞི་པ། མདོ་ལས་ཤཱ་རིའི་བུ་འདི་ལྟ་སྟེ་ཞེས་པ་ནས་ཐེག་པ་གསུམ་དུ་བཤད་དེ་བསྟན་ཏོ་ཞེས་པའི་བར་དུ་ནི་སངས་རྒྱས་རྙོག་པ་ལྔའི་དུས་སུ་ཅིའི་ཕྱིར་འབྱུང་བ་བསྟན་པའི་ཕྱིར་འདི་ལྟར་བསྐལ་པ་དང༌། འཁྲུག་པའི་རྙོག་པ་དང༌། དྲི་མ་མང་པོ་དང་བརྐམ་པའི་སེམས་ཅན་དགེ་བའི་རྩ་བ་ཆུང་བདག་ལ་བཅོམ་ལྡན་འདས་ཐབས་མཁས་པ་རྣམ་པ་གསུམ་དུ་སྟོན་ཏོ། །མུ་གེའི་བསྐལ་པ་དང་མཚོན་གྱི་བསྐལ་པ་དང་ནད་ཀྱི་བསྐལ་བ་བྱུང་བའི་ཚེ། སེམས་ཅན་འཁྲུག་པའི་རྙོག་པ་དང༌། དྲི་མ་མང་ཞེས་བྱའོ། །དྲི་མ་ནི་རྙོག་པའམ་མི་གཙང་བའི་དོན་མང་པོ་ནི་གཞིག་དཀའ་བའི་དོན་ཏོ། །དྲི་མ་ལ་རྣམ་པ་དྲུག་སྟེ། འཚེ་བ་དང༌། ཁོན་དུ་འཛིན་པ་དང། འཁྲུག་པ་དང༌། གཡོ་དང༌། བརྫུན་དུ་སྨྲ་བ་དང༌། ང་རྒྱལ་དང་དྲུག་གོ །དེ་ལ་གང༌། སེམས་ཅན་ལ་གནོད་པར་བྱེད་པ་དགའ་བ་ནི་འཚེ་བ་ཞེས་བྱའོ། །ཁོང་ཁྲོ་བའི་དབང་གིས་ཞེ་ལ་འཛིན་པ་ནི་ཁོན་དུ་འཛིན་པ་ཞེས་བྱའོ། །ཉེས་པས་རྐྱེན་བྱས་ཏེ། སྨྲེ་སྔགས་འདོན་པ་ནི་འཁྲུག་པ་ཞེས་
བྱ་སྟེ། འདི་གསུམ་ནི་ཞེ་སྡང་གི་རང་བཞིན་ནོ། །བདག་གི་ཉེས་པ་འཆབ་ཅིང་ཕ་རོལ་པོའི་སྐྱོན་རྟོག་པ་དང་གཞན་གྱི་ཡིད་དང་སྦྱོར་ཏེ་ཚུལ་འཆོས་པ་ནི་གཡོ་ཞེས་བྱའོ། །བཀུར་སྟིའི་ཕྱིར་ཡོན་ཏན་སྒྱུས་སྟོན་པ་ནི་བརྫུན་ཞེས་བྱ་སྟེ་འདི་གཉིས་ནི་འདོད་ཆགས་དང་གཏི་མུག་གི་རང་བཞིན་ནོ། །དར་ཅིང་རྒྱགས་པ་ལ་ཆགས་པར་བྱེད་པ་ནི་ང་རྒྱལ་ཞེས་བྱ་སྟེ་འདོད་ཆགས་ཀྱི་རང་བཞིན་ནོ། །སེམས་ཅན་དག་དྲི་མ་དྲུག་པོ་མང་བའི་ཕྱིར་དགེ་སྦྱོང་དུ་མི་ཤེས། དགེ་བའི་ཆོས་མི་སྤྱོད་པ་ནི་སེམས་ཅན་གྱི་རྙོག་པའོ། །སེར་སྣ་དང་འཇུངས་པ་དང༌། ཕྲག་དོག་ནི་ཉོན་མོངས་པའི་རྙོག་པ་སྟེ། ཆོས་དང་ཟང་ཟིང་བདོག་པ་གཏོང་མི་ཕོད་པ་ནི་སེར་སྣ་ཞེས་བྱའོ། །མ་ཐོབ་པའི་ཟང་ཟིང་ལ་ཐོབ་པར་བྱེད་པའི་ཐབས་སྦྱོར་ཏེ་ཆགས་ཤིང་རེ་བ་ནི་བརྐམ་པ་ཞེས་བྱའོ། །དགེ་བའི་རྩ་བ་ཆུང་ཞེས་བྱ་བ་ནི་འདོད་ཆགས་དང་ཞེ་སྡང་དང་གཏི་མུག་མི་དགེ་བའི་རྩ་བའོ། །དེ་ལྟར་ན་སེམས་ཅན་དགེ་བ་ཆུང་བས་ལྷ་དང་མི་ནི་འགྲིབ། ངན་སོང་ནི་འཕེལ་ཞིང་སྐྱེ་སྟེ། སེམས་ཅན་དག་ཐེག་པ་ཆེན་པོ་ལ་ཅིག་ཅར་དགོད་པར་དཀའ་བས་སངས་རྒྱས་རྣམས་ཐབས་མཁས་པས་སངས་རྒྱས་ཀྱི་ཐེག་པ་གཅིག་པོ་དེ་ལས་ཐེག་པ་གསུམ་དུ་བཅད་དེ་བསྟན་ཏོ། །མདོ་ལས་ཤཱ་རིའི་བུ་དེ་ལྟར་ཞེས་པ་ནས་སངས་རྒྱས་ཀྱང་མ་ཡིན་པར་རིག་པར་བྱའོ་ཞེས་པའི་བར་དུ་ནི་དེ་བཞིན་གཤེགས་པས་ང་རྒྱལ་གྱི་དབང་དུ་གྱུར་པ་ལ་མི་སྟོན་ཏོ་ཞེས་ཐེ་ཚོམ་དུ་གྱུར་པ་འགྲོ་བ་སྟེ་དེ་དག་ང་རྒྱལ་གྱི་དབང་དུ་གྱུར་པ་ཇི་ལྟར་ཤེས་ཤེ་ན་དེ་ལ་རྣམ་པ་གསུམ་སྟེ། ཡང་དག་པ་མ་ཡིན་པ་ཐེག་པ་གཉིས་ཀྱི་འཕགས་པའི་མཚན་ཉིད་བསྟན་པ་དང༌། ང་རྒྱལ་གྱི་དབང་དུ་གྱུར་པའི་མཚན་ཉིད་བསྟན་པ་དང༌། ཡང་དག་པའི་འཕགས་པ་བསྡུས་པའི་མཚན་ཉིད་དོ། །འདིར་ནི་ཡང་དག་པ་མ་ཡིན་པ་བསྟན་པ་སྟེ། ཉན་ཐོས་དང་རང་སངས་རྒྱས་འཕགས་པ་ཡང་དག་པར་རབ་ཏུ་ཞི་བ་ལ་ཞུགས་པ་ནི། སངས་རྒྱས་དང་ཕྲད་ཀྱང་ཕལ་ཆེར་ཐེག་པ་ཆེན་པོའི་ཆོས་དང་མི་ཕྲད་དོ། །གང་རིགས་མ་དེས་ཤིང་སེམས་བསྐྱེད་པ་ནི་ཐོས་མ་ཐག་ཏུ་ཉན་པ་དང༌། འཇུག་པ་དང༌། ཁོང་དུ་ཆུད་པར་གྱུར་ཏེ། དེ་ནི་འཕགས་པ་ཡང་དག་པའོ། །གང་དེ་ལྟར་མི་ཤེས་པ་དེ་ནི་སངས་རྒྱས་ཀྱི་ཉེ་གནས་མ་ཡིན་ཏེ། འཕགས་པ་ཡང་དག་པ་མ་ཡིན་པར་རིག་པར་བྱའོ། །
མདོ་ལས་འདི་ལྟར་ཤཱ་རིའི་བུ་ཞེས་པ་ནས་ང་རྒྱལ་ཅན་དུ་ཤེས་པར་བྱའོ་ཞེས་པའི་བར་དུ་ནི་ང་རྒྱལ་གྱི་དབང་དུ་གྱུར་པའི་མཚན་ཉིད་བསྟན་པ་སྟེ། མ་རབས་བསམ་གཏན་བཞི་པ་ཐོབ་པ་འབྲས་བུ་གསུམ་གྱི་ཉོན་མོངས་པ་མ་ཟད་པ་དགྲ་བཅོམ་པའི་འབྲས་བུ་ཕུང་པོ་ནང་གི་ཐ་མ་མྱ་ངན་ལས་འདའ་བ་ཐོབ་སྙམ་སྟེ། སངས་རྒྱས་མི་འདོད་པ་ནི་ང་རྒྱལ་ཅན་ཞེས་བྱའོ། །མདོ་ལས་དེ་ཅིའི་ཕྱིར་ཞེས་པ་ནས་གནས་མ་ཡིན་ནོ་ཞེས་པའི་བར་དུ་ནི་ཡང་དག་པའི་འཕགས་པ་བསྡུས་པའི་མཚན་ཉིད་བསྟན་པ་སྟེ། འཕགས་པ་ཡང་དག་པ་དང་ཕྲད་པ་རབ་ཏུ་ཞི་བ་ལ་ཞུགས་པ་ན་ཕལ་ཆེར་ཆོས་དང་ཕྲད་དོ་དེ་དག་སྤྱོད་མི་ནུས་ཀྱང་དད་ཅིང་ཡིད་ཆེས་པར་བྱེད་དོ། །གང་རིགས་མ་ངེས་པ་ནི་ཐོས་ནས་ཀྱང་འཇུག་ཅིང་སྤྱོད་པར་བྱེད་དེ་དེ་བས་ན་དེ་བཞིན་གཤེགས་པ་དང་མངོན་སུམ་དུ་གྱུར་ཏེ་ཆོས་འདི་ཐོས་ནས་དད་པར་མི་འགྱུར་བའི་སྐབས་མེད་དེ་གནས་མ་ཡིན་ནོ་ཞེས་སྨོས་སོ། །མདོ་ལས་དེ་བཞིན་གཤེགས་པ་མྱ་ངན་ལས་འདས་པ་ནི་མ་གཏོགས་སོ་ཞེས་པ་ནི་སྐབས་འདིར་ཇི་ལྟར་ཆོས་ཀྱི་སྣོད་དུ་འགྱུར་ཞེས་བའི་ཐེ་ཚོམ་བསྟན་པ་སྟེ། ལ་ལ་ནི་སངས་རྒྱས་ལས་ཆོས་ཐོས་ནས་སྐུར་བའི་སེམས་སྐྱེ་སྟེ། ཅིའི་ཕྱིར་ན་དེ་བཞིན་གཤེགས་པས་ཁ་ཅིག་ལ་སངས་རྒྱས་སུ་མི་འགྱུར་པ་དང་ཆོས་ཀྱི་སྣོད་དུ་མི་འགྱུར་བ་ཞེས་བསྟན་པ་ཐེ་ཚོམ་སྐྱེས་ཏེ། དེ་ལྟར་སྣོད་དུ་མ་གྱུར་པའི་སེམས་ཅན་ལ་ཆོས་སྟོན་པ་མི་མཛད་ན་ཐམས་ཅད་མཁྱེན་པའི་ཡེ་ཤེས་ཞེས་བྱ་བར་རུང་ངམ་ཞེས་པའི་དོགས་པ་བསལ་བའི་ཕྱིར་དེ་བཞིན་གཤེགས་པ་མྱ་ངན་ལས་འདས་པ་ནི་མ་གཏོགས་སོ་ཞེས་སྨོས་སོ། །མདོ་ལས་དེ་ཅིའི་ཕྱིར་ཞེས་པ་ནས་མི་འབྱུང་ཞེས་པའི་བར་དུ་ནི་མྱ་ངན་ལས་འདས་ནས་ཐབས་མི་མཁས་པ་རབ་ཏུ་ཞི་བ་ལ་ཞུགས་པ་ཆོས་འདི་དང་ཕྲད་ཀྱང་མདོ་སྡེ་འདི་ལྟ་བུ་འཛིན་པའམ་འཆད་པ་མི་འབྱུང་ངོ་ཞེས་སྨོས་སོ། །མདོ་ལས་ཤཱ་རིའི་བུ་ཞེས་པ་ནས་ཐེ་ཚོམ་མེད་པར་འགྱུར་རོ་ཞེས་པའི་བར་དུ་ནི་གང་ཆོས་དང་ཕྲད་པ་ནི་ང་མྱ་ངན་ལས་འདས་ཀྱང་སངས་རྒྱས་གཞན་དང་ཕྲད་དེ་ཐབས་མཁས་པས་བསྟན་ན་ཆོས་འདི་ལ་ཐེ་ཚོམ་མེད་པར་འགྱུར་རོ་ཞེས་སྨོས་སོ། །མདོ་ལས་ཤཱ་རིའི་བུ་ཞེས་པ་ནས་སངས་རྒྱས་ཀྱི་ཐེག་པའོ་ཞེས་པའི་བར་དུ་ནི་སྔར་ཐེག་པ་གསུམ་བསྟན་པ་
ལས། ད་ཐེག་པ་གཅིག་བསྟན་ཞེས་པའི་ཐེ་ཚོམ་བཅད་པ་སྟེ། སྔར་བསྟན་པ་དང་ཕྱིས་གསུངས་པ་མི་མཐུན་ཡང་བརྫུན་དུ་མི་འགྱུར་བ་ནི་ང་འབའ་ཞིག་གིས་མཁྱེན་གྱི་ཁྱེད་མི་ཤེས་པས་དད་པར་གྱིས་ཤིག །ཡིད་ཆེས་པར་གྱིས་ཤིག །ཁྱེད་ཐོག་མ་སེམས་བསྐྱེད་པས་རྟོགས་པར་གྱིས་ཤིག །དགྲ་བཅོམ་པའི་སེམས་བསྐྱེད་ནས་བསྐལ་པ་སྟོང་ཕྲག་ཉི་ཤུ་འདས་ན་གདོད་བསྐལ་པ་གྲངས་མེད་པ་གསུམ་དུ་སྤྱོད་པའི་དད་པའི་སེམས་དང་འདྲ་བས་ཁྱེད་ཐེ་ཚོམ་མ་བྱེད་པར་ཡིད་ཆེས་པར་གྱིས་ཤིག་དང་ངས་གསུངས་པ་ལ་བརྫུན་མེད་དོ་ཐེག་པ་གཅིག་ཏུ་ཟད་དོ་ཞེས་སྨོས་པ་ཡིན་ནོ། །མདོ་ལས་དེ་ནས་བཅོམ་ལྡན་འདས་ཞེས་པ་ནས་དགེ་བསྙེན་མ་རྣམས་ལ་དད་དོ་ཞེས་པའི་བར་དུ་ནི་འདི་མན་ཆད་ཚིགས་བཅད་ཚིག་བརྒྱ་ཉི་ཤུ་རྩ་གཅིག་ལ་གཉིས་སུ་དབྱེ་སྟེ། ཚིག་བརྒྱ་རྩ་བཅོ་བརྒྱད་ནི་རྐྱང་པ་བཟླས་སོ། །ཚིག་གསུམ་ནི་གཞུང་འོག་མ་དང་མཚམས་སྦྱོར་བའོ། །སྔ་མ་ལ་ཡང་རྣམ་པ་གཉིས་སུ་དབྱེ་སྟེ་ཚིག་བརྒྱ་རྩ་བཅོ་ལྔས་ནི་སྔར་ལུང་བསྟན་པ་རྣམ་གཉིས་པོ་སྟོན་ཏོ། །ཚིག་གསུམ་གྱིས་ནི་ཐེ་ཚོམ་བཞི་བསལ་བ་བསྟན་པ་སྟེ་སྔ་མ་ལ་ཡང་རྣམ་པ་གཉིས་སོ། །སྔ་མའི་ཚིག་བཞིས་ནི་ལུང་བསྟན་པ་ལས་དན་པ་སྐྱོན་ཅན་ཕྱིར་དོང་བ་བསྟན་ཏོ། །ཚིག་བརྒྱད་ཅུ་རྩ་གཅིག་གིས་ནི་ལུང་བསྟན་པ་བསྟན་ཏོ། །ཚིག་སྔ་མ་བཞི་པོ་ལས་ཚིག་སྔར་སྨོས་པ་གཅིག་གིས་ནི་ང་རྒྱལ་གྱི་དབང་དུ་གྱུར་པ་བསྟན་ཏོ། །ཚིག་གསུམ་གྱིས་ནི་མི་དགེ་བའི་རྩ་བ་ཆེ་བ་བསྟན་ཏོ། །ཚིགས་བཅད་འདིས་ནི་ང་རྒྱལ་གྱི་དབང་དུ་གྱུར་པ་བསྟན་ཏེ། རབ་ཏུ་བྱུང་བ་ནི་ཚུལ་ལ་གནས་པ་ཡིན་ན་མ་ཐོབ་པ་ཐོབ་ཅེས་སྨྲ་བས་ང་རྒྱལ་ཅན་ནོ། །ཁྱིམ་ན་གནས་པ་དགེ་བསྙེན་པ་ཡང་ང་ཞེས་པ་ལ་ཞེན་པས་ང་རྒྱལ་གྱི་སེམས་སྐྱེས་ཏེ། ང་རྒྱལ་ཅན་དགེ་བསྙེན་མ་ནི་ང་ཞེས་པའི་ལྟོ་མེད་ཀྱང་ཁྱིམ་ཐབ་ཀྱི་རྗེས་སུ་ང་ཞེས་པ་བསྐྱེད་པས་ང་རྒྱལ་ཅན་ཞེས་སྨོས་སོ། །མདོ་ལས། ལྔ་སྟོང་ལས་ནི་མི་ཉུང་བ། །ཞེས་པ་ནས། །དེ་དག་སྙིང་པོ་རབ་ཏུ་གནས། །ཞེས་པའི་བར་དུ་ནི་ཚིག་གསུམ་ནི་མི་དགེ་བའི་རྩ་བ་ཆེ་བ་བསྟན་པ་སྟེ། སྐྱོན་སྤེད་པ་ནི་ཚུལ་ཁྲིམས་ཉམས་ནས་ཉེས་པ་འཆབ་པའོ། །ཉམས་པ་ནི་ཚུལ་ཁྲིམས་ལས་ཤས་ཀྱིས་ཉམས་པའོ། །མ་ཐོབ་
པར་ཐོབ་ཅེས་སྨྲ་བ་ནི་ཚུལ་ཁྲིམས་ཀྱི་རྩ་བ་མེད་པ་སྟེ་དེ་ལ་ཚུལ་ཁྲིམས་ཀྱང་མེད་པ་རྣམ་པར་དག་པ་ཡང་མ་ཡིན། ཏིང་ངེ་འཛིན་ཀྱང་མངོན་དུ་མི་འགྱུར་རོ། །སྙིགས་མ་ཞེས་བྱ་བ་ནི་ཅིར་ཡང་དགོས་པ་མེད་པ་སྟེ། བྱིས་པའི་བློ་ཅན་དག་སངས་རྒྱས་ཀྱི་མཐུས་དོང་བ་ཡང་ཅི་སྟེ་དམ་པའི་ཆོས་ཐོས་ན་དེ་ལ་སྐུར་བ་འདེབས་པས་སྡིག་པ་སྐྱེ་བར་འགྱུར་ཏེ། ཕན་པ་མེད་པའི་ཕྱིར་ཕྱིར་དོང་ངོ༌། །མདོ་ལས། འདི་འདྲ་ང་ལ་ཉོན་ཅིག་ཤཱ་རིའི་བུ། །ཞེས་པ་ནས་ཐབས་ལ་མཁས་པ་བརྒྱ་ཕྲག་དུ་མ་ཞེས་པའི་བར་དུ་འདི་མན་ཆད་ནི་ཚིག་བརྒྱ་རྩ་བཅུ་གཅིག་གིས་ལུང་བསྟན་པ་བརྗོད་དེ། སྔར་མདོ་ལས་རྣམ་པ་དྲུག་ཏུ་ཕྱེ་བ་ལྟར་འདིར་ཡང་རྣམ་པ་དྲུག་ཏུ་དབྱེ་སྟེ་ཚིག་དྲུག་གིས་ནི་ཅིའི་ཕྱིར་བཤད་པ་བསྟན་ཏོ། །ཚིག་ཕྱེད་དང་བརྒྱད་ཀྱིས་ནི་གནས་པ་བསྟན་ཏོ། །ཚིག་ཕྱེད་དང་གཉིས་ཀྱིས་ནི་བཅས་པ་བསྟན་ཏོ། །ཚིག་ཕྱེད་དང་དགུས་ནི་དོན་གང་ལ་བརྟེན་པ་བསྟན་ཏོ། །ཚིག་བདུན་ཅུ་རྩ་གཅིག་གིས་ཆོས་བསྡུ་བ་བསྟན་ཏོ། །ཚིག་བདུན་གྱིས་ནི་མ་ཐོས་པ་ཐོས་པར་བྱ་བ་བསྟན་ཏེ། མདོ་ལས་འགྲེལ་པ་ལས་བཤད་པ་དང་ལྟག་འོག་ནི་མི་མཐུན་ནོ། །ཚིག་དྲུག་གིས་ཅིའི་ཕྱིར་བཤད་པ་ལས་ཡང་རྣམ་པ་གཉིས་སུ་དབྱེ་སྟེ། ཚིག་ཕྱེད་དང་ལྔས་ནི་ཅིའི་ཕྱིར་བྱ་བ་བསྟན་ཏོ། །ཚིག་ཕྱེད་དང་གཉིས་ཀྱིས་ནི་དབང་པོ་ཇི་བཞིན་དུ་བཤད་པ་བསྟན་ཏོ། །དེ་ལ་ཚིགས་བཅད་གཅིག་གིས་རྒྱུ་སྣ་ཚོགས་བསྟན་ཏོ། །ཚིག་གཉིས་ཀྱིས་ནི་གདོན་མི་ཟ་བའི་ཚིག་དང་རྒྱུ་དང་དཔེ་སྣ་ཚོགས་བསྟན་ཏོ། །ཚིག་ཕྱེད་དང་གཉིས་ཀྱིས་ནི་ཆོས་སྣ་ཚོགས་བསྟན་པ་སྟེ། ཚིགས་བཅད་འདིས་ནི་དབང་པོ་ཇི་བཞིན་དུ་རྒྱུ་སྣ་ཚོགས་བསྟན་པའོ། །མདོ་ལས། དེ་ཡི་བསམ་པ་སྤྱོད་པ་ཇི་འདྲ་མཁྱེན། །ཞེས་པ་ནས། །ཅི་ནས་སེམས་ཅན་ཐམས་ཅད་མགུ་བར་བྱས། །ཞེས་པའི་བར་དུ་ནི་གདོན་མི་ཟ་བའི་ཚིག་དང་རྒྱུ་དང་དཔེ་རྣམ་པ་སྣ་ཚོགས་བསྟན་པའོ། །ཁོང་དུ་ཆུད་པ་ནི་བྱང་ཆུབ་རྟོགས་པའོ། །དད་པ་སྣ་ཚོགས་ནི་མོས་པའི་མཆོག་ཅེས་བྱ་བའི་དོན་ཏོ། །བསམ་པ་དང་སྦྱོར་བ་ནི་དགེ་བ་དང་མི་དགེ་བའི་ལས་སོ། །དེ་ལྟར་བསམ་པ་དང་དཔྱོད་པ་དང་དད་པ་སྣ་ཚོགས་མཁྱེན་པས་གདོན་མི་ཟ་བའི་ཚིག་དང་རྒྱུ་དང་དཔེ་མང་པོ་བསྟན་པས་ཐམས་ཅད་མགུ་བར་གྱུར་ཏོ། །མདོ་ལས་དེ་བཞིན་མདོ་སྡེ་ཞེས་པ་ནས་གཏན་
ལ་ཕབ་ཀྱང་དེ་བཞིན་བཤད་ཅས་པའི་བར་དུ་ནི་སྐབས་འདིར་མདོ་སྡེ་བཅུ་གཉིས་བསྟན་ཏེ། དེ་ལ་ཡང་རྣམ་པ་གསུམ་མོ། །མཚན་ཉིད་བསྟན་པ་དང༌། མིང་བསྟན་པ་དང༌། ཁྱད་པར་བསྟན་པའོ། །མདོ་སྡེའི་མཚན་ཉིད་ལ་ཡང་རྣམ་པ་གཉིས་ཏེ། སྤྱིའི་མཚན་ཉིད་དང་རང་གི་མཚན་ཉིད་དོ། །དེ་ལ་སྤྱིའི་མཚན་ཉིད་ནི་འདི་སྐད་བདག་གིས་ཐོས་པ་ནས་མངོན་པར་དགའོ་ཞེས་པའི་བར་དུ་ནི་ཚིག་གི་དོན་གང་བརྗོད་པ་དེ་དག་ཐམས་ཅད་ནི་སྤྱིའི་མཚན་ཉིད་ཅེས་བྱའོ། །འགྲེལ་པ་དག་ལས་མདོ་སྡེའི་ཚིགས་སུ་བཅད་དེ་གསུངས་པ་མ་གཏོགས་པར་ཚིག་རྐྱང་པ་ལས་ཚིག་གི་དོན་མཚོན་ཏེ་བརྗོད་པ་ནི་རང་གི་མཚན་ཉིད་ཅེས་བྱའོ། །དབྱངས་ཀྱིས་བསྙད་པ་ལ་ཡང་རྣམ་པ་གཉིས་ཏེ། ཕྱིས་འོངས་པ་ལ་ཕན་གདགས་པ་དང་རྐྱང་པ་ལས་དོན་མ་ངེས་པ་ངེས་པར་བསྟན་པའོ། །འགྲེལ་པ་དག་ལས་མདོ་སྡེ་ལ་ལ་སྔ་ཕྱི་མི་མཐུན་ཏེ་རྐྱང་པ་ལས་སྨོས་པའི་འོག་ཏུ་ཚིགས་སུ་བཅད་དེ་བཟླས་པ་ནི་ཕྱིས་འོངས་པ་ལ་ཕན་པའོ། །རྐྱང་པ་ལས་དོན་མ་ངེས་པ་དག་ཚིགས་སུ་བཅད་དེ་བཟླས་པས་དོན་གསལ་བར་བྱ་བའི་ཕྱིར་དོན་མ་ངེས་པ་ངེས་པར་བསྟན་པ་ཞེས་བྱའོ། །ལུང་བསྟན་པ་ལ་རྣམ་པ་གསུམ་སྟེ། ཉེ་གནས་ཀྱི་སྐྱེ་ཤིའི་རྒྱུ་དང་འབྲས་བུ་ལུང་བསྟན་པ་དང༌། ངེས་པའི་དོན་ལ་གསལ་བར་ལུང་བསྟན་པ་དང༌། བྱང་ཆུབ་སེམས་དཔའ་ལ་སངས་རྒྱས་སུ་ལུང་བསྟན་པ་དང་གསུམ་མོ། །འཕགས་པའི་ཉེ་གནས་དག་ལ་ཁྱོད་འདས་པའི་དུས་ལེགས་པ་དང་ཉེས་པ་འདི་ལྟ་བུ་ཞིག་བྱས་ཏེ་སྐྱེ་བའི་གནས་ཀྱི་ཁྱད་པར་ལུང་བསྟན་པ་ནི་སྐྱེ་ཤིང་རྒྱུ་དང་འབྲས་བུ་ལུང་བསྟན་པའོ། །མདོ་སྡེ་མ་ངེས་པ་ངེས་པའི་དོན་དུ་ལུང་བསྟན་པ་ནི། ངེས་པའི་དོན་ཟབ་མོར་ལུང་བསྟན་པའོ། །མ་ཕམ་པ་ཁྱོད་མ་འོངས་པའི་དུས་རྒྱལ་པོ་དུང་ཞེས་བྱ་བ་དེའི་ཚེ་བྱམས་པ་ཞེས་བྱ་བའི་སངས་རྒྱས་སུ་འགྱུར་རོ་ཞེས་ལུང་བསྟན་པ་ནི་སངས་རྒྱས་སུ་ལུང་བསྟན་པའོ། །ཚིགས་སུ་བཅད་པ་ནི་མདོ་སྡེ་དག་ལ་ཚིག་རྐྱང་པ་ལས་མི་སྨོས་པར་ཚིགས་སུ་བཅད་པ་གཉིས་སམ་གསུམ་མམ་བཞི་འམ་ལྔའམ་དྲུག་ལ་སོགས་པ་དོན་གང་བརྗོད་པ་ཚིགས་སུ་བཅད་དེ་གསུངས་པ་ནི་ཚིགས་སུ་བཅད་པའི་སྡེ་ཞེས་བྱའོ། །ཆེད་དུ་བརྗོད་པ་ནི་
མདོ་སྡེ་ལས་གསོལ་བ་མ་བཏབ་པར་ཡང་དག་པའི་ཆོས་དང་བསྟན་པ་དང་ཡུན་དུ་གནས་པར་བྱ་བའི་ཕྱིར་གསོལ་བ་གདབ་མི་དགོས་པར་གསུངས་པ་ནི་ཆེད་དུ་བརྗོད་པའི་སྡེ་ཞེས་བྱའོ། །གླེང་གཞི་ལ་ཡང་རྣམ་པ་གསུམ་སྟེ་གསོལ་བ་བཏབ་ནས་བསྟན་པ་དང་ཉམས་པ་ལས་ཚུལ་ཁྲིམས་བཅས་པ་བསྟན་པ་དང༌། གླེང་བ་ཡོད་པས་ཆོས་བསྟན་པ་དང་གསུམ་མོ། །འགྲེལ་པ་དག་ལས་གླེངས་ནས་བསྟན་པ་ནི་གསོལ་བ་བཏབ་ནས་བཤད་པའོ། །བསླབ་ཚིག་བཅས་པ་ནི་བཅས་པའོ། །མདོ་སྡེ་དག་ལས་ཕ་རོལ་བོས་གླེངས་ཏེ་དཔེར་ན་མཉན་དུ་ཡོད་པ་ན་མི་ཞིག་གིས་བྱ་ཞིག་བཟུང་ནས་ཕྱིར་ཡང་བཏང་བ་ལས་གླེངས་ཏེ་བཅོམ་ལྡན་འདས་ཀྱིས་སྔོན་གྱི་རྒྱུ་ཡང་གླེངས་ནས་བསྟན་པ་ནི་གླེངས་ནས་བསྟན་པ་ཞེས་བྱའོ། །དཔེ་ནི་མདོ་སྡེ་དག་ལས་དཔེ་རྣམ་པ་མང་པོས་ཆོས་བསྟན་པའོ། །ད་ལྟར་འདས་པའི་སྡེ་ནི་སྐྱེས་པའི་རབས་མ་གཏོགས་པར་སྔོན་འདས་པའི་གང་ཟག་དང་ཆོས་ཀྱི་རྒྱུས་བསྟན་པའོ། །སྐྱེས་པའི་རབས་ཀྱི་དེ་ནི་བཅོམ་ལྡན་འདས་སྔོན་འདས་པའི་དུས་ན་ཆེ་གེ་མོ་ཞིག་ན་སྐྱེ་བ་དང་འཆི་འཕོ་བ་བྱང་ཆུབ་སེམས་དཔའི་སྤྱོད་པ་དཀའ་བ་སྤྱོད་པ་དང༌། མདོ་སྡེ་དག་ལ་འདས་པའི་དུས་ན་ཤ་བ་དང་དྲེད་མོ་དང༌། རི་བོང་དང་བྱ་ནམ་མཁའ་ལྡིང་ལ་སོགས་པའི་ལུས་བྱས་པ་བསྟན་པ་ནི་སྐྱེས་པའི་རབས་ཞེས་བྱའོ། །ཤིན་ཏུ་རྒྱས་པ་ལ་རྣམ་པ་གཉིས་ཏེ། བྱང་ཆུབ་སེམས་དཔའི་ལམ་ལ་སྟོན་པ་དང༌། རྒྱ་ཆེ་ལ་དུས་ཡུན་རིང་བའོ། །ཉན་ཐོས་ལའང་ཤིན་ཏུ་རྒྱས་པ་ཡོད་དེ། འདིར་ནི་གཉི་ག་ལ་ཤིན་ཏུ་རྒྱས་པ་ཞེས་བྱའོ། །རྨད་དུ་བྱུང་བ་ནི་མདོ་སྡེ་དག་ལས་སངས་རྒྱས་དང་ཉེ་གནས་འཕགས་པ་འཁོར་བརྒྱད་ཀྱི་ཡོན་ཏན་ཐུན་མོང་དང་ཐུན་མོང་མ་ཡིན་པ་ཡ་མཚན་ངོ་མཚར་དུ་གྱུར་པ་བསྟན་པ་ནི་རྨད་དུ་བྱུང་བ་ཞེས་བྱའོ། །གཞན་ཡང་མདོ་སྡེ་ལས་སངས་རྒྱས་བཙས་མ་ཐག་ཏུ་གོམ་པ་བདུན་བདུན་གཤེགས་པ་དང༌། འོད་ཟེར་ཆེན་པོས་ཕྱོགས་བཅུ་སྣང་བར་བྱས་པ་དང༌། སྤྲེའུས་སྦྲང་རྩི་ཕུལ་བ་དང༌། ཁྱི་དཀར་པོས་ཆོས་ཉན་པ་ལ་སོགས་ཏེ། ངོ་མཚར་རྨད་དུ་བྱུང་བའི་ཆོས་རྣམས་ནི་རྨད་དུ་བྱུང་བ་ཞེས་བྱའོ། །གཏན་ལ་ཕབ་པར་བསྟན་པ་ཞེས་བྱ་བ་ལ་རྣམ་པ་གཉིས་ཏེ། སངས་རྒྱས་ཉིད་ཀྱིས་བསྟན་པ་དང༌། འཕགས་པ་ཉེ་གནས་ཀྱིས་བསྟན་
པའོ། །འགྲེལ་པ་དག་ལས་མདོ་སྡེ་གང་ལྟག་འོག་གཏན་ལ་ཕབ་པ་ནི་གཏན་ལ་ཕབ་པར་བསྟན་པ་ཞེས་བྱའོ། །གང་མདོ་སྡེ་ངེས་པར་བསྟན་པ་ལ་ཡང་གཏན་ལ་ཕབ་པ་ཞེས་བྱའོ། །དེ་ལ་མིང་བསྟན་པ་ནི་མདོ་སྡེ་བཅུ་གཉིས་ཀྱི་མིང་བསྟན་པའོ། །དེ་ལ་ཁྱད་པར་ལ་ཡང་རྣམ་པ་གཉིས་ཏེ་རང་བཞིན་གྱི་ཁྱད་པར་དང༌། བསྟན་པའི་ཁྱད་པར་རོ། །རང་བཞིན་གྱི་ཁྱད་པར་ནི་དབྱངས་ཀྱིས་བསྙད་པའི་ནང་ན་ཚིགས་སུ་བཅད་པ་མེད་ལ། ཚིགས་སུ་བཅད་པའི་ནང་ན་དབྱངས་ཀྱིས་བསྙད་པ་མེད་དེ་སྔ་ཕྱི་དང༌། རྐྱང་པ་དང་བཟླས་པ་ཐ་དད་པའི་ཕྱིར་རོ། །མདོ་སྡེ་དག་ལས་ཐོག་མ་འདི་སྐད་བདག་གིས་ཐོས་པ་ནས་ཐ་མ་རྗེས་སུ་སྤྱད་པའི་བར་དུ་མདོ་སྡེ་ཞེས་སྨོས་པས་སྡེ་བཅུ་གཉིས་ཀྱང་བསྡུས་ཏེ། མདོ་སྡེ་ནི་ཚིག་རྐྱང་པ་འབའ་ཞིག་ལ་བྱ་བས་དབྱངས་ཀྱིས་བསྙད་པ་དང་ཚིགས་སུ་བཅད་པ་མ་གཏོགས་པར་སྡེ་བདུན་པོ་ཀུན་ལ་བཅུ་གཉིས་ཚང་བར་ཡོད་པར་ཤེས་པར་བྱའོ། །བསྟན་པའི་ཁྱད་པར་ཞེས་བྱ་བ་ནི་ཐེག་པ་ཆེན་པོ་ལ་ཚང་བར་ཡོང་ལ་ཐེག་པ་ཆུང་ངུ་ལ་དགུ་ལས་མེད་དེ། འདིའི་སྐབས་སུ་ཐེག་པ་ཆུང་ངུ་སྨོས་པས་ལུང་བསྟན་པ་དང༌། ཆེད་དུ་བརྗོད་པ་དང་ཤིན་ཏུ་རྒྱས་པ་དང་གསུམ་མ་སྨོས་ཏེ། འདི་ནི་ཁྱད་པར་བསྟན་པའོ། །མདོ་ལས་མི་མཁས་ངན་ལ་ཆགས་པར་གང་གྱུར་ཞེས་པ་ནས་དེ་ལས་མྱ་ངན་འདས་པ་ཉེ་བར་བསྟན་ཞེས་པའི་བར་དུ་ཚིག་ཕྱེད་དང་གཉིས་ཀྱིས་དབང་པོ་ཇི་ལྟ་བ་བཞིན་དུ་རྟོགས་པར་དཀའ་བ་བསྟན་པ་སྟེ། འདི་ལ་རྣམ་པ་ལྔའོ། །དབང་པོ་རྟུལ་བས་གོ་དཀའ་བ་དང་ཆུང་ངུ་ལ་མོས་ཤིང་ཆེན་པོས་སྐྲག་པ་དང་འཁོར་བ་ལ་ཆགས་ཤིང་འཇིག་རྟེན་ལས་འདས་པ་ལ་མ་དད་པ་དང༌། སྐལ་བ་ཡོད་ཀྱང་མི་སྤྱོད་པ་དང༌། སྡུག་བསྔལ་མང་པོས་མངོན་དུ་གཟིར་བ་སྟེ། དེ་དག་ལ་མྱ་ངན་ལས་འདས་པ་ཉེ་བར་བསྟན་པའོ། །དབང་པོ་རྟུལ་ཞིང་མི་མཁས་ལ་ངན་ཏེ་འཁོར་བ་ལ་ཆགས་པས་སངས་རྒྱས་རྣམས་དང་ཕྲད་ཀྱང་ཐེག་པ་ཆེན་པོའི་ཆོས་ཟབ་མོ་མི་སྤྱོད་དེ་སྡིག་པ་མི་དགེ་བ་སྤྱོད་པས་སྡུག་བསྔལ་མྱོང་བར་འགྱུར་ཏེ། སྡུག་བསྔལ་ཐར་བར་བྱ་བའི་ཕྱིར་ཐེག་པ་གཉིས་ཀྱི་མྱ་ངན་ལས་འདས་པ་བསྟན་ཏོ། །མདོ་ལས། དེ་ལྟར་རང་བྱུང་བ་ནི་ཐབས་མཛད་པ། །ཞེས་པ་ནས་ཁྱེད་ཅག་སངས་རྒྱས་སུ་ཡང་འགྲུབ་པོ་ཞེས་པའི་བར་དུ་འདི་མན་ཆད་ཚིག་ཕྱེད་
དང་བརྒྱད་ཀྱིས་གནས་པར་བྱ་བ་བསྟན་པ་སྟེ། དེ་ལ་ཚིག་གཅིག་ནི་སྤྱིར་བསྟན་ཏོ། །ཚིག་གཅིག་ནི་བཤད་པའོ། །ཚིག་བཞིས་བསྡུས་པའོ། །ཚིག་གཅིག་ནི་གནས་པར་བསྐུལ་བའོ། །འདི་ནི་སྤྱིར་བསྟན་པ་སྟེ། གཉིས་ཐབས་ཙམ་དུ་བསྟན་ནས་མཐར་སངས་རྒྱས་ཀྱི་ཡེ་ཤེས་ཐེག་པ་གཅིག་ལ་འཇུག་པ་བསྟན་པའོ། །མདོ་ལས་ཅིའི་ཕྱིར་ཞེ་ན་སྐྱོབ་པ་དུས་ལ་སྡོད་ཅེས་པ་ནས་ཡང་དག་གདོན་མི་ཟ་བ་བཤད་དོ་ཞེས་པའི་བར་དུ་ནི་འདིར་སྤྱིར་བསྟན་པ་ལས་དམིགས་ཏེ། སྔོན་ཁྱོད་ཀྱི་དབང་པོ་མ་སྨིན་པས་ཐེག་པ་ཆེན་པོ་མི་རྟོགས་ཏེ་བསྟན་པའི་སྣོད་དུ་མ་གྱུར་ཏོ། །ད་ནི་དབང་པོ་སྨིན་པས་དུས་ལ་བབ་སྟེ་གདོན་མི་ཟ་བའི་དོན་བཤད་དོ་ཞེས་བསྟན་ཏོ། །མདོ་ལས། ང་ཡིས་བསྟན་པ་སྡེ་དགུ་དེ་རྣམས་ཀྱང༌། །ཞེས་པ་ནས། །རབ་ཏུ་གཞུག་པའི་ཕྱིར་ནི་ངས་བཤད་དོ། །ཞེས་པའི་བར་དུ་ནི་འདི་མན་ཆད་ཚིག་ཕྱེད་དང་ལྡས་བསྡུས་པ་བསྟན་པ་སྟེ། དེ་ལ་ཡང་གསུམ་དུ་དབྱེའོ། །ཚིག་གཅིག་གིས་ནི་ཆོས་ཆུང་ངུ་ཡང་དག་པ་མ་ཡིན་ཏེ། ཆེན་པོ་ནི་ཡང་དག་པའོ་ཞེས་བསྟན་པའོ། །ཚིག་གཅིག་གིས་ནི་ཆོས་ཆེན་པོ་དམ་པར་བསྟན་ཏེ་སྐྱེས་བུ་དམ་པ་ལ་བཤད་པ་བསྟན་པའོ། །ཚིག་གཉིས་ཀྱིས་ནི་ཆོས་དང་གང་ཟག་བསྟན་པ་སྟེ། འདི་ནི་ཐོག་མ་སེམས་བསྐྱེད་པའི་མཐུ་སྟོབས་ཇི་ལྟ་བ་བཞིན་དུ་བསྟན་པ་སྡེ་དགུ་བཤད་དེ། མཐར་ཕྱིན་པ་མ་ཡིན་པས་ཆེན་པོ་ལ་རབ་ཏུ་གཞུག་གོ་ཞེས་བསྟན་ཏོ། །མདོ་ལས། འདི་ལྟར་རྟག་ཏུ་རྣམ་པར་དག་འགྱུར་བ། །ཞེས་པ་ནས། །དེ་ལ་ཤིན་ཏུ་རྒྱས་པའི་མདོ་སྡེ་བཤད། །ཅེས་པའི་བར་དུ་ནི་སྐབས་འདིར་ཆོས་ཆེན་པོ་དམ་པ་སྐྱེས་བུ་དམ་པ་ལ་བཤད་པ་བསྟན་ཏེ། མདོར་ན་བྱང་ཆུབ་སེམས་དཔའི་ཆོས་སྤྱོད་པ་ཐམས་ཅད་ལ་སངས་རྒྱས་ཀྱི་སྲས་ཞེས་བྱའོ། །སངས་རྒྱས་ཀྱི་སྲས་ཀྱང་ཡོན་ཏན་ལྔ་དང་ལྡན་བའོ། །ལྔ་གང་ཞེ་ན་བསམ་པ་རྣམ་པར་དག་པ་སྟེ་ཐེག་པ་ཆེན་པོའི་སངས་རྒྱས་ཀྱི་ཡེ་ཤེས་འབའ་ཞིག་ཚོལ་བ་དང༌། མཉན་ངེས་པ་སྟེ་ངེས་པའི་སེམས་ཀྱིས་ཐེག་པ་ཆེན་པོ་ལ་བརྩོན་པ་དང་དབང་པོ་རྣོ་བ་སྟེ་སྡུག་བསྔལ་ལས་འདོན་ཅིང་བདེ་བ་བྱིན་པ་དང༌། ཚད་མེད་པ་སྟེ་སངས་རྒྱས་མང་པོ་ལ་བསྙེན་བཀུར་བྱེད་པ་དང༌། ཤིན་ཏུ་ཟབ་མོ་སྤྱོད་པ་སྟེ་བསོད་ནམས་དང་ཡེ་ཤེས་ཀྱི་ཚོགས་ལ་ནན་ཏན་
བྱེད་པའོ། །དེ་ཡང་བྱང་ཆུབ་ཏུ་སེམས་བསྐྱེད་པ་སྟེ། ཆོས་བཅུ་པོ་འདི་དང་ལྡན་ན་བྱང་ཆུབ་ཏུ་སེམས་བསྐྱེད་པ་ཞེས་བྱའོ། །གང་ཞེ་ན་དགེ་བའི་བཤེས་གཉེན་ལ་བསྙེན་བཀུར་བྱེད་པ་དང༌། སངས་རྒྱས་མང་པོ་ལ་བྱ་བ་བྱེད་པ་དང༌། དགེ་བའི་རྩ་བ་སྤྱོད་པ་དང༌། ཆོས་མཆོག་ཚོལ་བ་དང༌། སེམས་མ་ཉེན་ཞིང་ངེས་པ་དང༌། སྡུག་བསྔལ་ལ་བཟོད་པ་དང༌། སྙིང་རྗེ་ཤས་ཆེ་བ་དང༌། བསམ་པ་དག་པས་སྙོམས་པ་དང༌། ཐེག་པ་ཆེན་པོ་ལ་མོས་པ་དང༌། སངས་རྒྱས་ཀྱི་ཡེ་ཤེས་ཚོལ་བ་དང་བཅུ་སྟེ། ཡོན་ཏན་འདི་དག་དང་ལྡན་ན་སངས་རྒྱས་ཀྱི་སྲས་ཞེས་བྱ་སྟེ་ཐེག་པ་ཆེན་པོ་སྟོན་པར་འགྱུར་རོ། །མདོ་ལས། འདི་ལྟར་དེ་དག་བསམ་པ་རྫོགས་པ་དང༌། །ཞེས་པ་ནས། །ཤིན་ཏུ་རྒྱས་པའི་མདོ་སྡེ་རབ་ཏུ་བཤད། །ཅེས་པའི་བར་དུ་ནི་ཡོན་ཏན་ལྔ་དང་ལྡན་པའི་གང་ཟག་མ་འོངས་པའི་དུས་སུ་འཚང་རྒྱ་བར་འགྱུར་རོ། །དེ་ཡང་སངས་རྒྱས་དྲན་པའི་བསམ་པ་རྫོགས་པ་དང༌། རྣམ་པར་དག་པའི་ཚུལ་ཁྲིམས་དང་ལྡན་པའོ། །སངས་རྒྱས་དྲན་པ་ལ་རྣམ་པ་གཉིས་ཏེ་སེམས་ཀྱིས་དྲན་པ་དང་ཚིག་གིས་བརྗོད་པའོ། །ཚུལ་ཁྲིམས་དང་ལྡན་པ་བསླབ་པ་གསུམ་རྫོགས་པ་ལ་ལུང་སྟོན་པར་འགྱུར་ཏེ། དེ་དག་ཐོས་ནས་ཤིན་ཏུ་དགའ་བར་འགྱུར་ཞེས་སྨོས་སོ། །མདོ་ལས། འདི་ལྟར་འདྲེན་པའི་ཉན་ཐོས་དེ་དག་ལས། །ཞེས་པ་ནས། །ཐམས་ཅད་བྱང་ཆུབ་འགྱུར་བར་ཐེ་ཙོམ་མེད། །ཞེས་པའི་བར་དུ་ནི་དད་པ་སྐྱེད་པར་བསྐུལ་བ་སྟེ། ཆོས་འདི་ཐོས་སམ་གཟུང་ཡང་རུང་ཐེག་པ་ཆེན་པོ་ལ་གནས་པར་འགྱུར་བ་བསྟན་པའོ། །མདོ་ལས། ཐེག་པ་གཅིག་སྟེ་གཉིས་སུ་མེད། །ཅེས་པ་ནས། །ཐེག་པ་སྣ་ཚོགས་མངོན་པར་བསྟན། །ཞེས་པའི་བར་དུ་ནི་ཚིག་ཕྱེད་དང་གཉིས་པོ་འདིས་གཉིས་སུ་མེད་པ་བསྟན་པ་སྟེ། གཉིས་སུ་མེད་པ་ནི་རང་སངས་རྒྱས་ཀྱི་ཐེག་པ་མེད་ཅེས་པའི་དོན་ཏོ། །གསུམ་དུ་མེད་པ་ནི་ཉན་ཐོས་ཀྱི་ཐེག་པ་མེད་པ་སྟེ། སངས་རྒྱས་ཀྱིས་ཐབས་སུ་གསུངས་པ་མ་གཏོགས་པར་ཐེག་པ་ཆེན་པོ་ལས་གཉིས་དང་གསུམ་དུ་མེད་ཅེས་བསྟན་ཏོ། །མདོ་ལས། སངས་རྒྱས་ཡེ་ཤེས་བསྟན་པའི་ཕྱིར། །ཞེས་པ་ནས། །ཐེག་པ་ཆུང་ངུས་མི་འདྲེན་སངས་རྒྱས་ཀྱི། །ཞེས་པའི་བར་དུ་ནི་འདི་མན་ཆད་ཚིགས་བཅད་བྱེད་དང་བཅུ་དགུས་དོན་གང་ལ་གནས་པར་བྱ་
བ་བསྟན་པ་སྟེ། དེ་ལ་ཚིག་ཕྱེད་དང་གཉིས་ཀྱིས་ནི་བྱ་བ་ཆེན་པོ་གཅིག་བསྟན་པའོ། །ཚིག་བཅུ་བདུན་གྱིས་ནི་འཛུད་པ་དང་སྟོན་པ་དང༌། འཇུག་པ་དང་ཆུད་པར་བྱེད་པ་བསྟན་པའོ། །སངས་རྒྱས་འཇིག་རྟེན་དུ་བྱུང་བ་ནི་བྱ་བ་གཅིག་གི་ཕྱིར་ཏེ། སངས་རྒྱས་ཀྱི་ཐེག་པ་གཅིག་སྟེ་གཉིས་སུ་ཡོད་པ་མ་ཡིན་ནོ། །མདོ་ལས། རང་བྱུང་བདག་ཉིད་གཅིག་ལ་གནས་པ་དང༌། །ཞེས་པ་ནས། །དེ་དག་ལ་ཡང་སེམས་ཅན་སོ་སོར་འཇོག །ཅེས་པའི་བར་དུ་འདི་མན་ཆད་ཚིགས་བཅད་བཅུ་བདུན་གྱིས་འཛུད་པ་དང་སྟོན་པ་དང༌། འཇུག་པ་དང་ཆུད་པར་བྱ་བ་བསྟན་པ་སྟེ། ཐོག་མའི་ཚིག་གཅིག་གིས་འཛུད་པ་བསྟན་ཏོ། །ཚིག་ལྔས་ནི་འཇུག་པ་བསྟན་ཏོ། །ཚིག་གཅིག་གིས་ནི་ཆུད་པར་བྱ་བ་བསྟན་ཏོ། །ཚིག་བཅུས་ནི་སྟོན་པ་བསྟན་པ་སྟེ། གནས་པ་ནི་བརྟེན་པའི་དོན་ཏེ་མྱ་ངན་ལས་འདའ་བ་དང༌། བྱང་ཆུབ་ལ་བདེ་བར་གནས་པའོ། །སྟོབས་དང་བསམ་གཏན་ཚད་མེད་པས་བརྒྱན་ཏེ་བསོད་ནམས་དང་ཡེ་ཤེས་ཀྱི་ཚོགས་སུ་འགྱུར་བའི་ཡོན་ཏན་ཐམས་ཅད་ཆོས་འདི་གཉིས་ཀྱི་ནང་དུ་འདུ་སྟེ། སེམས་ཅན་ཐམས་ཅད་དེ་ལ་འཇོག་པས་འཛུད་པ་ཞེས་བྱའོ། །མདོ་ལས། སེར་སྣའི་ཉེས་པ་ང་ལ་ཡོད་པར་འགྱུར། །ཞེས་པ་ནས། །སེམས་ཅན་གཅིག་ཀྱང་རུང་སྟེ་ང་མི་དགེ །ཞེས་པའི་བར་དུ་འདི་མན་ཆད་ཚིགས་བཅད་ལྔས་ནི་འཇུག་པ་བསྟན་པ་སྟེ། དེ་ལ་ཡང་གསུམ་དུ་དབྱེའོ། །ཚིགས་བཅད་ཕྱེད་དང་གཉིས་ཀྱིས་ནི་མཉམ་པ་བསྟན་ཏོ། །ཚིག་ཕྱེད་དང་གསུམ་གྱིས་ནི་ཡོན་ཏན་གྱི་ཁྱད་པར་བསྟན་ཏོ། །ཚིག་གཅིག་གིས་ནི་འཇུག་པ་ཉིད་བསྟན་ཏེ། བྱང་ཆུབ་མཆོག་རབ་ཅེས་བྱ་བ་ནི་བླ་ན་མེད་པའི་ཐེག་པ་ཆེན་པོ་དོན་དམ་པའོ། །སངས་རྒྱས་ཀྱི་བླ་ན་མེད་པའི་ཐེག་པ་མཉམ་པ་བརྙེས་ན་དེ་ལ་བདག་གམ་ཕ་རོལ་ཞེས་ཐ་དད་པར་ག་ལ་ཞིག་འབྱེད་དེ། ནང་གི་ཡེ་ཤེས་མི་མཉམ་ན་བདག་འབའ་ཞིག་ཐེག་པ་ཆེན་པོ་ལ་འཇུག་པར་བྱེད་ཕྱི་རོལ་གྱི་ཡེ་ཤེས་མི་མཉམ་ན་ཕ་རོལ་པོ་ཐེག་པ་ཆུང་ངུ་ལ་འཇོག་པར་འགྱུར། སྒྲིབ་དང་མ་བྲལ་ན་བླ་ན་མེད་པའི་ཐེག་པ་ཆེན་པོར་ག་ལ་རུང་སྟེ། དེ་བས་ན་སེར་སྣའི་ཉེས་པ་ང་ལ་ཡོད་ན་མི་དགེ་ཞེས་སྨོས་པ་ཡིན་ནོ། །མདོ་ལས། ང་ལ་སེར་སྣ་དག་ནི་ཆུང་ཟད་མེད། །ཞེས་པ་ནས། །འགྲོ་བ་ཀུན་རིག་དེ་
བསང་སངས་རྒྱས། །ཞེས་པའི་བར་དུ་ནི་ཡོན་ཏན་གྱི་ཁྱད་པར་བསྟན་པ་སྟེ། དེ་ལ་ཚིག་ཕྱེད་དང་གཉིས་ཀྱིས་ང་འདོད་ཆགས་དང་བྲལ་བས་འཇིགས་པ་མེད་པའི་ཡོན་ཏན་བསྟན་ཏོ། །ཚིག་འོག་མ་གཅིག་གིས་ནི་ཕྱི་རོལ་གྱི་རྒྱན་དང་ཡང་དག་པའི་ཆོས་ཀྱི་ཡོན་ཏན་བསྟན་ཏེ། སེར་སྣ་མེད་ཅེས་བྱ་བ་ནི་ཐེག་པ་ཆེན་པོ་བཅབས་ཏེ། ཐེག་པ་ཆུང་ངུ་སྟོན་ཅིང་སེམས་ཅན་བསླུ་བའམ། སྔར་ཐེག་པ་ཆེན་པོ་སྦྱིན་པར་བྱ་བ་ལས་ཕྱིས་མ་སྦྱིན་པ་མ་ཡིན་པས་སེར་སྣ་མེད་དོ། །སེམས་ཅན་གྱིས་ཐེག་པ་ཆེན་པོ་རིག་ཅིང་ཆུད་ཀྱིས་དོགས་པའི་ཐུགས་མི་མངའ་བས་ཕྲག་དོག་མེད་དོ། །སྡིག་པའི་ཆོས་ནི་གང་ཉོན་མོངས་པའི་ལས་དང་བཅས་པ་སྡུག་བསྔལ་བ་འཁོར་བའི་ཆོས་ཡོངས་སུ་བཅད་པས་ཉེས་པའི་སྐྱོན་གང་ཡང་མེད་དེ། ཡང་དག་པའི་ཡེ་ཤེས་རྫོགས་ནས་ཕྱོགས་བཅུར་སེང་གེའི་སྒྲ་བསྒྲགས་ཏེ་འཇིགས་པ་མི་མངའ་བས། འགྲོ་བ་ཀུན་རིག་ང་སངས་རྒྱས། །ཞེས་བྱའོ། །མདོ་ལས། ཇི་ལྟར་མཚན་རྣམས་ཀྱིས་ནི་ང་བརྒྱན་ཏེ། །ཞེས་པ་ནས། །ཆོས་ཀྱི་རང་བཞིན་ཕྱག་རྒྱ་འདི་བཤད་དོ། །ཞེས་པའི་བར་དུ་ནི་ཕྱི་རོལ་གྱི་མཚན་གྱིས་བརྒྱན་པ་བསྟན་པ་སྟེ། མཚན་བཟང་པོས་བརྒྱན་པའི་སྐུའི་འོད་དང༌། ཡེ་ཤེས་ཀྱི་འོད་ཀྱིས་སྣོད་ཀྱི་འཇིག་རྟེན་དང་བཅུད་ཀྱི་འཇིག་རྟེན་སྣང་བར་བྱས་ནས་སྲོག་ཆགས་ཀུན་གྱིས་ང་ལ་བཀུར་སྟི་བྱས་སོ། །ནང་ན་ཉོན་མོངས་པ་མེད་པས་ཕྱི་རོལ་གྱི་མཚན་གྱིས་བརྒྱན་ཏེ་ཆོས་ཀྱི་རང་བཞིན་གྱི་ཕྱག་རྒྱ་འདི་བཤད་དོ། །ཕྱག་རྒྱ་ནི་སྟོང་པ་གཉིས་ཀྱི་ཐེག་པ་ཆེན་པོའི་ཕྱག་རྒྱ་སྟེ། ཕྱག་རྒྱ་འདིས་བཏབ་པ་ནི་ཐེག་པ་ཆེན་པོའི་ཆོས་ཡང་དག་པ་ཞེས་བྱའོ། །མདོ་ལས། དེ་ལྟར་ངས་བསམས་ཤཱ་རིའི་བུ། །ཞེས་པ་ནས། །བདག་འོད་རང་བྱུང་འཇིག་རྟེན་རིག་པར་རོ། །ཞེས་པའི་བར་དུ་ནི་གོ་བར་བྱ་བ་བསྟན་པ་སྟེ་ཐེག་པ་ཆེན་པོ་ཡང་དག་པའི་ཡེ་ཤེས་ངས་ཇི་ལྟར་རིག་པ་བཞིན་དུ་སེམས་ཅན་ཐམས་ཅད་ལ་ཡང་བསྟན་ཞེས་པའི་དོན་ཏོ། །མདོ་ལས། ཇི་ལྟར་མཐོང་ཞིང་ཇི་ལྟར་བསམས་པ་དང༌། །ཞེས་པ་ནས། །དུར་ས་དེ་དག་ཕྱི་ཕྱིར་སྐྱེ་བར་འགྱུར། །ཞེས་པའི་བར་དུ་ཚིགས་བཅད་གཅིག་གིས་ཆུད་པར་བྱེད་པ་བསྟན་པ་སྟེ། །སྔོན་གྱི་སྨོན་ལམ་ཡོངས་སུ་རྫོགས་ནས་
སྨོན་ལམ་བཞིན་དུ་བྱང་ཆུབ་ལ་དགོད་དེ། བྱང་ཆུབ་ནི་རྒྱུའི་དོན་ཏོ། །ས་དང་པོ་ནས་ས་བརྒྱད་ཀྱི་བར་དུ་ཆུད་པར་བྱེད་དེ། ཕྱིར་མི་ལྡོག་པ་ཐོབ་པས་སངས་རྒྱས་སུ་འགྱུར་བའི་རྒྱུའོ། །འདི་མན་ཆད་ཚིག་བཅུས་ནི་སྟོན་པ་འགྲེལ་པ་སྟེ། དེ་ལ་ཐོག་མའི་ཚིག་བརྒྱད་ཀྱིས་མི་མཐུན་པ་སྟོན་ཏོ། །ཚིག་ཕྱི་མ་གཉིས་ཀྱིས་ནི་ཕྱིས་མཐུན་པར་འགྱུར་བ་བསྟན་པ་སྟེ། དེ་ལ་གང་ཤེས་པ་དང་ལྡན་པས་ནི་དེ་བཞིན་དུ་འཛིན་པར་འགྱུར་གྱི་གང་མི་ཤས་པ་རྣམས་ནི་དེ་ལ་མྱོས་ཏེ་སྐུར་པ་འདེབས་སོ། །འདི་མན་ཆད་ཚིག་དྲུག་གིས་མི་མཐུན་པའི་མཚན་མ་བསྟན་ཏེ། དེ་ལ་ཡང་རྣམ་པ་གཉིས་སོ། །ཐོག་མ་ཚིག་གཅིག་གིས་ནི་དགེ་བ་མེད་ལ་སྡིག་པ་དང་བཅས་པས་མི་མཐུན་པ་བསྟན་ཏོ། །འོག་མ་ཚིག་ལྔས་ནི་སྡིག་པ་དང་བཅས་ལ་དགེ་བ་མེད་པས་མི་མཐུན་པ་བསྟན་ཏོ། །སྤྱོད་པ་མ་སྤྱད་ཚེ་རབས་སྔ་མ་ལ། །ཞེས་པ་ནི་འཇིག་རྟེན་ལས་འདས་པའི་དགེ་བའི་རྩ་བ་མ་བསྐྱེད་པ་སྟེ། ཅུང་ཟད་བསྐྱེད་པ་ཡང་ཟག་པ་མེད་པའི་རྒྱུར་འགྱུར་བ་མ་ཡིན་གྱི་འདོད་པ་ལྔའི་ཡོན་ཏན་གྱི་རྒྱུར་འགྱུར་བས་འདི་ལྔ་ལ་ཆགས་ཤིང་ཞེན་ཏེ། གཏི་མུག་གི་ལས་བྱས་པས་སྲེད་པ་སྐྱེས་ཏེ། སྐྱེ་ཤིའི་སྡོང་པོ་ཕྱི་ཕྱིར་སྐྱེ་བར་གྱུར་ཏོ། །འདི་མན་ཆད་ཚིག་ལྔས་སྡིག་པ་དང་བཅས་ལ་དགེ་བ་མེད་པས་མི་མཐུན་པར་བསྟན་ཏེ། དེ་ཡང་རྣམ་པ་གཉིས་སོ། །དེ་ལ་སྔ་མ་ཚིག་བཞིས་ནི་སྡིག་པ་དང་བཅས་པས་མི་མཐུན་པ་བསྟན་ཏོ། །འོག་མ་ཚིག་གཅིག་གིས་ནི་དགེ་བ་མེད་པས་མི་མཐུན་པ་བསྟན་ཏོ། །སྔ་མ་ལ་ཡང་རྣམ་པ་གཉིས་ཏེ། འདོད་པ་ལྔའི་ཡོན་ཏན་ལ་ཆགས་ཤིང་ཞེན་པས་མི་མཐུན་པ་དང༌། བསླབ་པ་མྱོས་ཤིང་འཁྲུལ་པས་མི་མཐུན་པ་སྟེ། འདོད་པའི་དབང་གིས་མི་དགེ་བའི་ལས་འབའ་ཞིག་སྤྱད་པས་ངན་འགྲོར་ལྷུང་ཞེས་བྱའོ། །ལས་འདྲེན་མར་སྤྱད་པ་འགྲོ་བ་དྲུག་ཏུ་ཉོན་མོངས་པར་འགྱུར་རོ། །སྐྱེ་བ་རྣམ་བཞིར་ལས་དང་འགྲོགས་པས་སྡུག་བསྔལ་གསུམ་དང་ལྔ་དང་བརྒྱད་ཀྱིས་གདུངས་པས་བཙིར་བ་ཞེས་བྱའོ། །ཕྱི་ཕྱིར་སྐྱེ་བར་འགྱུར་བ་ནི་འཁོར་བའི་རྒྱུན་མི་འཆད་པའོ། །མདོ་ལས། བསོད་ནམས་ཆུང་བས་སྡུག་བསྔལ་ཀུན་གྱིས་བཙིར། །ཞེས་པ་ནས། །ཚེ་རབས་སྐྱེ་བ་སྟོང་ཕྲག་དུ་མའོ། །ཞེས་པའི་བར་དུ་འདི་མན་ཆད་ཚིག་ཕྱེད་
དང་གཉིས་ཀྱིས་བསླབ་པ་འཁྲུགས་པས་མི་མཐུན་པ་བསྟན་པ་སྟེ། ཐོག་མའི་ཚིག་ཕྱེད་དང་གཉིས་ཀྱིས་ནི་འཇིག་ཚོགས་སུ་ལྟ་བ་དང་མཐར་ལྟ་བས་ལྟ་བ་དྲུག་ཅུ་རྩ་གཉིས་སུ་འགྱུར་བ་བསྟན་ཏོ། །ཕྱི་མ་ཚིག་གཅིག་གིས་ནི་ལྟ་བ་བསྙེམས་པ་དང་ཚུལ་ཁྲིམས་བསྙེམས་པའི་རྒྱུར་འགྱུར་བ་དང༌། དེ་མ་ཡིན་པ་གཞན་ཡང་སྐྱེ་བ་བསྟན་ཏོ། །སེམས་ཅན་ཐོག་མ་མེད་པ་ནས་བསོད་ནམས་དང་ཡེ་ཤེས་ཀྱི་ཚོགས་ཆུང་བས་སྡུག་བསྔལ་གྱིས་བཙིར་བར་གྱུར་ཏོ། །དེ་དག་ཀྱང་ཐར་པའི་ལམ་འདོད་མོད་ཀྱི་ཡང་དག་པ་དང་ལོག་པ་མ་རྟོགས་ཏེ་མུ་སྟེགས་ཅན་དུ་གྱུར་ན་ལོག་པར་ལྟ་བ་ལ་སློབ་པ་དང༌། སྤྱོད་པ་འཁྲུལ་པས་ལོག་པར་ལྟ་བ་ཞེས་བྱའོ། །ལྟ་བ་ལ་རྣམ་པ་མང་སྟེ་གང་སེམས་ཅན་གྱི་འབྱུང་བའི་ལམ་གྱི་བར་དུ་གཅོད་ཅིང་རྣམ་པར་གྲོལ་བར་མི་འགྱུར་བ་ལ་ལྟ་བ་སྟུག་པོ་ཞེས་བྱའོ། །ཡོད་པ་དང་མེད་པ་ཞེས་བྱ་བ་ནི་ལྟ་བ་ལྔ་ལ་བཞི་ནི་ཡོད་པར་ལྟ་བའོ། །ངན་པར་ལྟ་བ་ནི་མེད་པར་ལྟ་བའོ། །གཞན་ཡང་ལྟ་བ་སྣ་ཚོགས་ནི་ཡོད་མེད་ཅེས་བྱའོ། །གཞན་ཡང་ཡོད་པ་ནི་བདག་གི་ཕུང་པོ་ཕྱི་མ་ཡོད་པར་འཛིན་པ་སྟེ། རྟག་པར་ལྟ་བའོ། །མེད་པ་ནི་བདག་གི་ཕུང་པོ་ཕྱི་མ་མེད་པར་འཛིན་པ་སྟེ་ཆད་པར་ལྟ་བའོ། །མཐར་ལྟ་བ་དང་ལོག་པར་ལྟ་བ་ལས་ལྟ་བ་དྲུག་ཅུ་རྩ་གཉིས་སུ་འཛིན་པ་ནི་ཡོད་མེད་ཅེས་བྱའོ། །དེ་ལྟར་ངར་འཛིན་པར་ལྟ་བ་དྲུག་ཅུ་རྩ་གཉིས་ལ་སོགས་པར་འཛིན་ཅིང་ཆགས་ཏེ་གཏོང་དུ་མི་བཏུབ་བས་ལོག་པར་བྱེད་པར་ང་རྒྱལ་ཅན་ཞེས་བྱའོ། །འདི་མན་ཆད་ཚིག་གཅིག་གིས་ནི་དགེ་བ་མེད་པས་མི་མཐུན་པ་བསྟན་ཏེ། གང་དགེ་བ་དང་ལྡན་པ་ནི་བསྙེན་པ་བཞི་ལ་བསྙེན་པར་བྱའོ། །དགེ་བའི་བཤེས་གཉེན་ལ་བརྟེན་པ་དང་ཡང་དག་པའི་ཆོས་ཉེན་པ་དང་ཚུལ་བཞིན་ཡིད་ལ་བྱེད་པ་དང༌། ཐོས་པ་བཞིན་དུ་ནན་ཏན་བྱེད་པའོ། །བྱིས་པ་གཡོ་བྱེད་པ་སྡིག་པ་ཅན་ནི་ཚེ་རབས་དུ་མར་སངས་རྒྱས་ཀྱི་མཚན་ཡང་མི་ཐོས་ན་དགེ་བའི་བཤེས་གཉེན་དང་གང་ཞིག་ཕྲད་དེ། དེ་ལྟར་སངས་རྒྱས་ཀྱང་མི་མཐོང༌། ཆོས་ཀྱང་མི་ཐོས་ཏེ། ཆོས་ཐོས་པའི་སྐལ་བ་མེད་པ། ཡིད་ལ་བྱེད་པ་དང་ནན་ཏན་དུ་སྤྱོད་པར་ག་ལ་ཞིག་འགྱུར་ཏེ། དེ་ནི་ཤིན་ཏུ་གདུལ་དཀའ་བས་ཐོག་མ་ནས་
ཐེག་པ་ཆེན་པོ་བསྟན་པར་དཀའོ། །མདོ་ལས། ངའི་ཐབས་ཀྱིས་དེ་ལ་ཤཱ་རིའི་བུ། །ཞེས་པ་ནས་དེ་དག་མྱ་ངན་ལས་འདའ་བ་ཉེ་བར་བསྟན་ཞེས་པའི་བར་དུ་ནི་མི་མཐུན་པ་བསྡུ་བ་བསྟན་པ་སྟེ། ངས་སྔར་ཐབས་ཀྱི་མྱ་ངན་ལས་འདས་པ་སྡུག་བསྔལ་ཞི་བ་ཙམ་བསྟན་ཏོ། །མདོ་ལས། འདི་ལྟར་རྟག་ཏུ་ངས་བཤད་མྱ་ངན་འདས། །ཞེས་པ་ནས། ཐེག་པ་འདི་ནི་གཅིག་སྟེ་གཉིས་སུ་མེད། །ཅེས་པའི་བར་དུ་ནི་འདི་མན་ཆད་ཚིགས་བཅད་བདུན་ཅུ་རྩ་ཕྱེད་དང་གཅིག་གིས་ཆོས་ལ་གནས་པ་བསྟན་པ་སྟེ། དེ་ལ་རྣམ་པ་གསུམ་མོ། །ཚིག་ཕྱེད་དང་གཉིས་ཀྱིས་ནི་ཕྱོགས་བཅུའི་སངས་རྒྱས་ཀྱི་ཆོས་བསྟན་ཏོ། །བར་གྱི་ཚིགས་བཅད་སུམ་ཅུ་རྩ་ཕྱེད་དང་དགུས་ནི་དུས་གསུམ་གྱི་སངས་རྒྱས་ཀྱི་ཆོས་བསྟན་ཏོ། །ཐ་མ་ཚིགས་བཅད་སུམ་ཅུ་རྩ་ཕྱེད་དང་གཅིག་གིས་ནི་ང་ཡང་དེ་བཞིན་ནོ་ཞེས་པ་བསྟན་ཏོ། །འདི་ནི་ཕྱོགས་བཅུའི་སངས་རྒྱས་ཀྱི་ཆོས་བསྟན་པ་སྟེ། མདོ་ལས། ཐེག་པ་གཅིག་སྟེ་གཉིས་སུ་མེད། །ཅེས་འབྱུང་ན་གསུམ་མེད་པར་བྱ་སྟེ། གཅིག་ཏུ་བསྡུར་ག་ལ་ཞིག་རུང༌། མདོ་ལས། སྔོན་གྱི་དེ་བཞིན་གཤེགས་པ་གང་བྱུང་བ། །ཞེས་པ་ནས། །དེ་དག་ཚད་བཟུང་དུ་ནི་ཡོད་མེད་པ། །ཞེས་པའི་བར་དུ་ནི་འདི་མན་ཆད་ཚིགས་བཅད་སུམ་ཅུ་རྩ་ཕྱེད་དང་དགུས་དུས་གསུམ་ཀྱི་སངས་རྒྱས་ཀྱི་ཆོས་བསྟན་པ་སྟེ། དེ་ལ་ཡང་རྣམ་པ་གསུམ་མོ། །ཐོག་མའི་ཚིག་ཉི་ཤུ་རྩ་ཕྱེད་དང་བརྒྱད་ཀྱིས་ནི་སྔོན་འདས་པ་བསྟན་ཏོ། །བར་གྱི་ཚིག་དྲུག་གིས་ནི་མ་འོངས་པ་བསྟན་ཏོ། །ཐ་མའི་ཚིག་བཞིས་ནི་ད་ལྟར་བསྟན་ཏེ་འདས་པ་བསྟན་པ་ལ་རྣམ་པ་གཉིས་ཏེ། ཐོག་མའི་ཚིག་ཕྱེད་དང་ལྔས་ནི་སངས་རྒྱས་ཀྱི་ཆོས་བསྟན་པ་ཐོག་མར་བཀྲི་བའི་ཐབས་ཙམ་བསྟན་ནས་ཕྱིས་ཡང་དག་པ་བསྟན་པའོ། །ཚིག་ཉི་ཤུ་རྩ་གསུམ་གྱིས་ནི་སེམས་ཅན་རྣམས་ཆོས་ཐོས་ནས་མཐར་ཐམས་ཅད་མཁྱེན་པའི་ཡེ་ཤེས་ཐོབ་པ་བསྟན་པའོ། །སྔ་མ་ལ་ཡང་བཞི་སྟེ། ཚིག་གཅིག་གིས་ནི་སངས་རྒྱས་མང་བ་བསྟན་ཏོ། །ཚིག་གཅིག་གིས་ནི་ཐབས་ཙམ་བསྟན་ཏོ། །ཚིག་གཅིག་གིས་ནི་ཡང་དག་པར་བསྟན་ཏོ། །ཚིག་ཕྱེད་དང་གཉིས་ཀྱིས་ནི་ཅིའི་ཕྱིར་ཐབས་དང་ཡང་དག་པ་བསྟན་པ་བརྗོད་དོ། །མདོ་ལས། སྐྱེས་བུ་དམ་པ་དེ་དག་ཐམས་ཅད་ཀྱི། །ཞེས་པ་
ནས། ཐབས་ལ་མཁས་པ་བརྒྱ་ཕྲག་དུ་མ་ཡིས། །ཞེས་པའི་བར་དུ་ནི་ཐབས་ཙམ་དུ་བསྟན་པ་བརྗོད་པའོ། །མདོ་ལས། དེ་དག་ཀུན་གྱི་ཐེག་པ་གཅིག་ཏུ་བསྟན། །ཞེས་པ་ནས། །སྲོག་ཆགས་དུ་མ་བསམ་གྱིས་མི་ཁྱབ་རྣམས། །ཞེས་པའི་བར་དུ་ནི་ཡང་དག་པ་བསྟན་པའོ། །མདོ་ལས། རྒྱལ་བའི་ཐབས་གཞན་རྣམ་པ་ཐ་དད་པས། །ཞེས་པ་ནས། དེ་བཞིན་གཤེགས་པས་འཇིག་རྟེན་ལྷར་བཅས་ལ། །ཞེས་པའི་བར་དུ་ནི་ཅིའི་ཕྱིར་རྒྱལ་བས་ཐབས་ཙམ་བསྟན་པ་དང༌། ཡང་དག་པ་བསྟན་པ་བརྗོད་པ་སྟེ། སེམས་ཅན་མང་པོ་ཅིག་ཅར་ཐེག་པ་གཅིག་ལ་འཇུག་མི་ནུས་ཏེ་དེ་བས་ན་དབང་པོ་དང་སྦྱར་ཏེ། སྔར་ཐབས་རྣམ་པ་ཐ་དད་པ་བསྟན་ཏེ། ཕྱིས་ཐེག་པ་གཅིག་ཏུ་བསྟན་ཏོ། །མདོ་ལས། སེམས་ཅན་གང་གིས་དེ་ལ་མངོན་སུམ་དེར། །ཞེས་པ་ནས། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཞེས་པའི་བར་དུ་ནི་འདི་མན་ཆད་ཚིག་ཉི་ཤུ་རྩ་གསུམ་གྱིས་སེམས་ཅན་མང་པོ་ཆོས་ཐོས་ནས་མཐར་ཐམས་ཅད་མཁྱེན་པའི་ཡེ་ཤེས་ཐོབ་པར་བསྟན་པ་སྟེ། དེ་ལ་ཡང་རྣམ་པ་གསུམ་མོ། །ཐོག་མའི་ཚིག་གཉིས་ཀྱིས་ནི་སངས་རྒྱས་ད་ལྟར་བཞུགས་པ་བརྗོད་དོ། །ཚིག་ཉི་ཤུས་ནི་འདས་པའི་སངས་རྒྱས་བརྗོད་དོ། །ཚིག་གཅིག་གིས་ནི་བསྡུ་བ་བསྟན་ཏོ། །འདི་ནི་ཐོག་མ་སྟེ་སངས་རྒྱས་དང་ཕྲད་ནས་ཆོས་ཐོས་པས་ཕ་རོལ་ཏུ་ཕྱིན་པ་དྲུག་དང་བསྡུ་བ་བཞི་ལ་སོགས་པ་ནི་བསོད་ནམས་རྣམ་པ་ཐ་དད་པ་ཞེས་བྱ་སྟེ། སངས་རྒྱས་ཀྱི་རྒྱུར་འགྱུར་བ་བསྒོམ་ཞིང་བྱང་ཆུབ་སེམས་དཔའི་སྤྱད་པ་སྤྱོད་པས་དེ་དག་ཐམས་ཅད་བྱང་ཆུབ་ཐོབ་པར་འགྱུར་རོ། །མདོ་ལས། མྱ་ངན་ལས་འདས་རྒྱལ་བ་དེ་དག་གི །ཞེས་པ་ནས། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཞེས་པའི་བར་དུ་འདི་མན་ཆད་ཚིགས་བཅད་ཉི་ཤུས་སངས་རྒྱས་འདས་པ་བསྟན་པ་སྟེ། དེ་ལ་རྣམ་པ་ལྔའོ། །ཚིག་གཅིག་གིས་ནི་བྱང་ཆུབ་སེམས་དཔའ་བསྟན་ཏོ། །ཚིག་གཅིག་གིས་ནི་བྱམས་པ་བསྟན་ཏོ། །ཚིག་ཕྱེད་དང་ལྔས་ནི་མཆོད་རྟེན་བྱས་པ་བསྟན་ཏོ། །ཚིག་ཕྱེད་དང་བདུན་གྱིས་ནི་སྐུ་གཟུགས་བྱས་པ་བསྟན་ཏོ། །ཚིག་བདུན་གྱིས་མཆོད་པ་བྱས་པ་བསྟན་ཏོ། །ཚིག་
གཅིག་གིས་ནི་སངས་རྒྱས་བརྗོད་པ་བསྟན་ཏོ། །འདི་ནི་ཐོག་མ་སྟེ། བཟོད་ཀྱང་ཞི་ལ་དུལ་བ་མེད་དམ། ཞི་ལ་དུལ་ཡང་བཟོད་པ་མེད་ན་བྱང་ཆུབ་ཀྱི་སེམས་ཞེས་མི་བྱ་སྟེ། གང་བཟོད་ཅིང་ཞི་ལ་དུལ་བ་ནི་བྱང་ཆུབ་ཀྱི་སེམས་ཞེས་བྱ་སྟེ། ཚུལ་བཞིན་དུ་ཕན་པའི་དོན་དུ་འགྱུར་བ་ལ་རབ་ཏུ་ཞི་ཞིང་དུལ་ན་དེ་དག་བྱང་ཆུབ་ཐོབ་པར་འགྱུར་རོ། །འདིའང་སངས་རྒྱས་མྱ་ངན་ལས་འདས་ནས་ཕྱི་མ་གདུལ་དཀའ་བ་རྣམས་ཀྱི་སྤྱོད་པ་ཡིན་གྱི་སངས་རྒྱས་བཞུགས་པའི་ཚེ་སྤྱོད་པ་འདིས་རྒྱུར་བྱ་བ་མ་ཡིན་ནོ། །ཕ་རོལ་ཏུ་ཕྱིན་པ་དྲུག་ཀྱང་སངས་རྒྱས་མྱ་ངན་ལས་འདས་ནས་ཐུན་མོང་དུ་སྤྱོད་པ་ཡིན་ཏེ། དེ་དག་ཀྱང་བྱང་ཆུབ་ཐོབ་པར་འགྱུར་རོ། །མདོ་ལས། གང་གིས་རིང་བསྲེལ་ལ་ནི་མཆོད་བྱེད་པ། །ཞེས་པ་ནས། །དེ་དག་གིས་ཀྱང་བྱང་ཆུབ་ཐོབ་པར་འགྱུར། །ཞེས་པའི་བར་དུ་ནི་འདི་མན་ཆད་ཚིགས་བཅད་ཕྱེད་དང་ལྔས་མཆོད་རྟེན་བྱས་པས་བྱང་ཆུབ་ཐོབ་པ་བསྟན་པ་སྟེ། དེ་ལ་ཡང་རྣམ་པ་གཉིས་སོ། །ཐོག་མའི་ཚིགས་བཅད་བཞིས་ནི་མཆོད་རྟེན་བྱས་པ་བསྟན་ཏོ། །འོག་མའི་ཚིགས་བཅད་ཕྱེད་ཀྱིས་ནི་མདོར་བསྡུས་པ་བསྟན་ཏོ། །ཐོག་མའི་ཚིགས་བཅད་ལ་རྣམ་པ་གསུམ་སྟེ། ཐོག་མའི་ཚིག་གཉིས་ཀྱིས་ནི་མཆོད་རྟེན་མང་པོ་ལ་རིན་པོ་ཆེས་བརྒྱན་བ་བསྟན་ཏོ། །ཚིག་གཅིག་གིས་ནི་རྣམ་པ་ལས་མཆོད་རྟེན་བྱས་པ་བསྟན་ཏོ། །ཚིག་གཅིག་གིས་ནི་རྩེད་མོའི་ཕྱིར་བྱེ་མ་ལས་མཆོད་རྟེན་བྱས་པ་བསྟན་པ་སྟེ། གང་གིས་མཆོད་རྟེན་བྱས་ན་ཚངས་པའི་རྒྱལ་པོའི་བསོད་ནམས་དང་མཉམ་མོ། །ཚངས་པའི་བསོད་ནམས་ནི་གླིང་བཞི་དང༌། འདོད་པའི་ཁམས་དྲུག་གི་ལྷའི་བསོད་ནམས་དང་མཉམ་སྟེ་མཆོད་རྟེན་བྱས་ནས་བྱང་ཆུབ་ཐོབ་པར་འགྱུར་རོ། །མདོ་ལས། གང་གིས་མཆོད་རྟེན་རྔོ་ཡི་སྙིང་ལས་བྱས། །ཞེས་པ་ནས། རྒྱལ་བའི་མཆོད་རྟེན་དགའ་བཞིན་བྱས་པ་དང༌། །ཞེས་པའི་བར་དུ་ཚིག་གཅིག་གིས་ནི་རྣམ་པ་དགུ་ལ་མཆོད་རྟེན་དུ་བྱས་པ་བསྟན་པའོ། །མདོ་ལས། དེའི་ཕྱིར་རྡུལ་གྱི་ཕུང་པོ་དག་ལས་ཀྱང༌། །ཞེས་པ་ནས། དེ་རྣམས་ཀྱིས་ཀྱང་བྱང་ཆུབ་ཐོབ་པར་འགྱུར། །ཞེས་པའི་བར་དུ་ཚིག་གཅིག་གིས་ནི་རྩེ་བའི་ཕྱིར་དངོས་པོ་རིན་ཆུང་བ་ལ་མཆོད་རྟེན་བྱས་ཀྱང་བྱང་
ཆུབ་ཏུ་འགྱུར་རོ་ཞེས་བསྟན་ཏེ། བྱེ་མ་ལས་ཕུང་པོ་བྱས་ཏེ། རྒྱལ་བའི་མཆོད་རྟེན་བྱས་ན་བྱང་ཆུབ་ཐོབ་པར་འགྱུར་བ་ནི་གང་བྱང་ཆུབ་ཏུ་སེམས་བསྐྱེད་པ། བྱང་ཆུབ་སེམས་དཔའི་སྤྱད་པ་སྤྱོད་པ། དགེ་བའི་རྩ་བ་གང་བྱས་ཀྱང་བྱང་ཆུབ་ཐོབ་པར་བྱེད་པ་ལ་བྱ་བའི་མ་རབས་མ་ངེས་པའི་རིགས་ཅན་ཉན་ཐོས་སམ་བྱང་ཆུབ་ཏུ་སེམས་མ་བསྐྱེད་པ་ནི་ཐོབ་པར་འགྱུར་བ་མ་ཡིན་ནོ། །དེའི་ཚུལ་དུ་ཆུང་དུ་ནས་ཐལ་མོ་སྦྱར་ཏེ་བཏུད་པ་ཙམ་ཡང་བྱང་ཆུབ་ཐོབ་པར་འགྱུར་ཞེས་བརྗོད་པ་ཡང་དེ་བཞིན་དུ་སྦྱར་རོ། །མདོ་ལས། ལ་ལས་དེ་བཞིན་རིན་ཆེན་གཟུགས་བྱས་པ། །ཞེས་པ་ནས། དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཞེས་པའི་བར་དུ་ཚིག་དྲུག་གིས་སྐུ་གཟུགས་བྱས་པ་བསྟན་ཏེ། དེ་ལ་ཡང་རྣམ་པ་གཉིས་སོ། །ཚིག་ལྔས་ནི་སྐུ་གཟུགས་བྱས་པ་བསྟན། ཚིག་ཕྱེད་དང་གཉིས་ཀྱིས་ནི་མདོར་བསྡུས་པ་བསྟན་ཏོ། །སྐུ་གཟུགས་བྱེད་པ་ཡང་གཞོག་པ་དང་རི་མོར་བྲི་བ་ལ་སོགས་པའོ། །མདོ་ལས། ལ་ལས་དེ་ནི་རིན་ཆེན་སྣ་བདུན་དང༌། །ཞེས་པ་ནས། དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཞེས་པའི་བར་དུ་ཚིག་གཉིས་ཀྱིས་རིན་པོ་ཆེ་ལ་སོགས་པས་སྐུ་གཟུགས་བྱས་པ་བསྟན་པའོ། །མདོ་ལས། གང་གིས་རྩིག་ངོས་སྐུ་གཟུགས་བྲིས་པ་སྟེ། །ཞེས་པ་ནས། དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཞེས་པའི་བར་དུ་ཚིགས་བཅད་འདིས་ནི་སྐུ་གཟུགས་རི་མོར་བྲིས་པ་བསྟན་པའོ། །མདོ་ལས། ལ་ལ་དེ་ནི་སློབ་པའི་ཚེ་ནའང་རུང༌། །ཞེས་པ་ནས། དེ་དག་ཐམས་ཅད་བྱང་ཆུབ་ཐོབ་པ་ཡིན། །ཞེས་པའི་བར་དུ་ཚིགས་བཅད་འདིས་ནི་རྩེད་མོ་ལས་སྐུ་གཟུགས་བྲིས་པ་བསྟན་པའོ། །མདོ་ལས། དེ་དག་ཐམས་ཅད་སྙིང་རྗེ་ཅན་དུ་འགྱུར། །ཞེས་པ་ནས། བྱང་ཆུབ་སེམས་དཔའ་མང་པོ་རབ་ཏུ་འཛུད། །ཞེས་པའི་བར་དུ་ཚིགས་བཅད་འདིས་ནི་མདོར་བསྡུས་པ་བསྟན་པ་སྟེ། གང་སྙིང་རྗེ་ཆེན་པོའི་སེམས་དང་ལྡན་པ་ནི་དགེ་བ་ཅི་བྱེད་ཀྱང་སྙིང་རྗེའི་སེམས་དང་བཅས་པས་ཕ་རོལ་ཏུ་ཕྱིན་ཅིང་བྱང་ཆུབ་ཐོབ་པར་འགྱུར་རོ། །མདོ་ལས། དེ་བཞིན་གཤེགས་པ་རྣམས་ཀྱི་རིང་བསྲེལ་དང༌། །ཞེས་པ་ནས། དེ་ལ་མེ་ཏོག་དང་ནི་སྤོས་གསོལ་ཏེ། །ཞེས་པའི་བར་དུ་ནི་
འདི་མན་ཆད་ཚིགས་བཅད་བདུན་གྱིས་མཆོད་པ་བྱ་བ་བསྟན་ཏེ། དེ་ལ་ཚིགས་བཅད་ཕྱེད་དང་དྲུག་གིས་ནི་མཆོད་པ་བྱ་བ་བསྟན་ཏོ། །ཕྱེད་དང་གཉིས་ཀྱིས་མདོར་བསྡུས་པ་བསྟན་ཏོ། །དེ་ལ་ཚིགས་བཅད་གཅིག་གིས་ནི་དངོས་པོ་བཞིས་མཆོད་པ་བྱ་བ་བསྟན། ཚིགས་བཅད་གཅིག་གིས་ནི་རོལ་མོས་མཆོད་པ་བྱ་བ་བསྟན། ཚིགས་བཅད་གཅིག་གིས་ནི་དབྱངས་ཀྱིས་མཆོད་པ་བྱ་བ་བསྟན། ཚིགས་བཅད་གཅིག་གིས་ནི་ལུས་ཀྱི་ལས་ཀྱིས་མཆོད་པ་བྱ་བ་བསྟན་ཏོ། །མེ་ཏོག་གིས་མཆེད་པས་བྱང་ཆུབ་ཀྱི་ཡན་ལག་བདུན་གྱི་མེ་ཏོག་འཐོབ་པོ། །སྤོས་ཕུལ་བས་ཆོས་ཀྱི་སྐུའི་གསུང་ཐོབ་པོ། །བ་དན་ཕུལ་བས་གཟུངས་ཐོབ་ཅིང་སྡིག་པ་ལས་བཟློག་པར་འགྱུར་རོ། །གདུགས་ཕུལ་བས་ཚད་མེད་པ་བཞིས་སེམས་ཅན་འགེབས་པར་འགྱུར་རོ། །མདོ་ལས། དེར་ནི་གང་གིས་སིལ་སྙན་བརྡུང་བཅུག་པ། །ཞེས་པ་ནས། ཆུ་ལ་བརྡབས་དང་ཐལ་མོ་བརྡབས། །ཞེས་པའི་བར་དུ་ནི་རོལ་མོས་མཆོད་པ་བྱ་བ་བསྟན་པ་སྟེ། མདོ་ལས་རོལ་མོ་དང་ན་ཆུང་བཟང་མོ་ཕ་རོལ་གྱི་སེམས་འཕྲོག་པས་སྦྱིན་པར་མི་བྱའོ་ཞེས་འབྱུང་སྟེ། སངས་རྒྱས་ལ་མཆོད་ན་འགལ་བ་མེད་དོ། །མདོ་ལས། བདེ་བར་གཤེགས་པ་དེ་ལ་མཆོད་པའི་ཕྱིར། །ཞེས་པ་ནས། རིང་བསྲེལ་དེ་ལ་རྣམ་པ་མང་པོས་མཆོད། །ཅེས་པའི་བར་དུ་ནི་ཚིགས་བཅད་འདིས་དབྱངས་དང་གླུ་སྙན་པས་མཆོད་པ་བྱས་པ་བསྟན་པ་སྟེ། ཚངས་པའི་དབྱངས་ཐོབ་པར་འགྱུར་རོ། །མདོ་ལས། བདེ་གཤེགས་རིང་བསྲེལ་ལ་ནི་ཅུང་ཟད་ཀྱིས། །ཞེས་པ་ནས། དེ་དག་རིམ་གྱིས་སངས་རྒྱས་བྱེ་བ་མཐོང། །ཞེས་པའི་བར་དུ་ནི་མེ་ཏོག་གི་མཆོད་པ་བྱ་བ་བསྟན་པ་སྟེ། སྔར་དངོས་པོ་བཞིས་མཆོད་པ་ལས་མེ་ཏོག་གི་མཆོད་པ་དང་ཅི་མི་འདྲ་ཞེ་ན། འདི་ནི་འཁྲུག་བཞིན་པའི་སེམས་ཀྱིས་མཆོད་པ་ལ་བྱའོ། །མདོ་ལས། མཆོད་རྟེན་དེ་ལ་གང་གིས་ཐལ་མོ་སྦྱར། །ཞེས་པ་ནས། དེ་བཞིན་ལན་ཅིག་ལུས་ཀྱང་བཏུད་པ་དང༌། །ཞེས་པའི་བར་དུ་ཚིགས་བཅད་འདིས་ནི་ལུས་ཀྱི་ལས་ཀྱི་མཆོད་པ་བྱ་བ་སྟེ། གླུ་དང་དབྱངས་ཀྱིས་མཆོད་པ་ནི་དག་གི་ལས་སོ། །དེ་ལྟར་མཆོད་པ་བྱ་བར་བསམས་བ་ནི་ཡིད་ཀྱི་ལས་སོ། །འདི་ལས་གཞན་པ་ནི་ཕྱི་རོལ་གྱི་ཟང་ཟིང་གི་མཆོད་པ་ཞེས་བྱའོ། །མདོ་ལས།
ཕྱག་འཚལ་སངས་རྒྱས་ལན་ཅིག་སྨྲས་པ་དང༌། །ཞེས་པ་ནས། དེ་དག་ཀུན་གྱིས་བྱང་ཆུབ་ཐོབ་པར་འགྱུར། །ཞེས་པའི་བར་དུ་ཚིགས་བཅད་འདིས་ནི་སངས་རྒྱས་ཀྱི་མཚན་བརྗོད་པས་བྱང་ཆུབ་ཐོབ་པར་བསྟན་པ་སྟེ། སངས་རྒྱས་ཀྱི་མཚན་ལན་གཅིག་བརྗོད་པས་བྱང་ཆུབ་མཆོག་ཐོབ་ན་ལན་མང་དུ་བརྗེད་པ་ལྟ་ཅི་སྨོས། །མདོ་ལས། དེའི་ཚེ་བདེ་བར་གཤེགས་པ་དེ་དག་ནི། །ཞེས་པ་ནས། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཞེས་པའི་བར་དུ་ཚིགས་བཅད་འདིས་ནི་སེམས་ཅན་ཆོས་ཐོས་ནས་ཐམས་ཅད་མཁྱེན་པའི་ཡེ་ཤེས་ཐོབ་པ་བསྟན་པའོ། །མདོ་ལས། ཕྱིས་འབྱུང་སངས་རྒྱས་བྱེ་བ་མང་པོ་རྣམས། །ཞེས་པ་ནས། ཐབས་འདི་ཡང་ནི་རབ་ཏུ་འཆད་པར་འགྱུར། །ཞེས་པའི་བར་དུ་འདི་མན་ཆད་ཚིགས་བཅད་ཕྱེད་དང་བདུན་གྱིས་མ་འོངས་པའི་ཆོས་བསྟན་པ་སྟེ། དེ་ལ་ཚིགས་བཅད་བྱེད་དང་བཞིས་ནི་ད་ལྟར་བཤད་པ་དང་མཐུན་ནོ་ཞེས་བསྟན་ཏོ། །ཚིགས་བཅད་གསུམ་གྱིས་ནི་དོན་སྔ་མ་བཟླས་ཏེ་བསྟན་ཏོ། །སྔ་མ་ལ་ཡང་གཉིས་ཏེ། ཚིགས་བཅད་གཅིག་གིས་ནི་ཐབས་ཙམ་དུ་མཐུན་པ་བསྟན་པ་དང༌། ཚིགས་བཅད་ཕྱེད་དང་གཉིས་ཀྱིས་ནི་ཡང་དག་པ་བསྟན་ཏོ། །ཚིགས་བཅད་གཅིག་གིས་ནི་ཅིའི་ཕྱིར་བཤད་པ་བསྟན་ཏོ། །མདོ་ལས། ཐབས་ལ་མཁས་པ་དག་ནི་མཐའ་ཡས་པ། །ཞེས་པ་ནས། ཆོས་འདི་ཐོས་ནས་སངས་རྒྱས་མི་འགྱུར་བ། །ཞེས་པའི་བར་དུ་ཚིགས་བཅད་འདིས་ནི་ཡང་དག་པར་འགྲུབ་པར་འགྱུར་བ་བསྟན་པ་སྟེ། དེ་ལྟར་ཆོས་ཐོས་པ་ཐམས་ཅད་ཀྱིས་སངས་རྒྱས་སུ་མི་འགྱུར་བ་མེད་ངོ། །མདོ་ལས། དེ་བཞིན་གཤེགས་པ་རྣམས་ཀྱི་སྨོན་ལམ་ནི། །ཞེས་པ་ནས། བྱང་ཆུབ་ཕྱིར་དུ་སྤྱད་ནས་སྤྱད་པར་འཇུག །ཅེས་པའི་བར་དུ་ཚིགས་བཅད་འདིས་ནི་ཅིའི་ཕྱིར་བཤད་པ་བསྟན་པ་སྟེ། དེ་ཡང་སྔོན་གྱི་སྨོན་ལམ་གྱི་དབང་ངོ་ཞེས་བསྟན་ཏོ། །མདོ་ལས། བྱེ་བ་སྟོང་ཕྲག་དུ་མ་ཆོས་ཀྱི་སྒོ། །ཞེས་པ་ནས། དེ་བཞིན་གཤེགས་པ་ཉིད་དུ་ཆོས་རྣམས་བཤད། །ཞེས་པའི་བར་དུ་འདི་མན་ཆད་ཚིགས་བཅད་གསུམ་གྱིས་དོན་སྔ་མ་བཟླས་ཏེ་བསྟན་ཏོ། །དེ་ལ་ཚིགས་བཅད་གཅིག་གིས་ནི་སྔར་ཐབས་ཙམ་དུ་བསྟན་པ་ཡང་ཐེག་པ་གཅིག་ཏུ་ཟད་པ་དང༌། ཚིགས་བཅད་གཉིས་
ཀྱིས་ནི་མཚན་ཉིད་གསུམ་གྱི་ཁུངས་བསྟན་ཏོ། །མདོ་ལས། འདི་ལྟར་རྟག་ཏུ་ཆོས་ཀྱི་ཚུལ་གནས་པ། །ཞེས་པ་ནས། ཐབས་ལ་མཁས་པ་ཤིན་ཏུ་སྟོན་པར་འགྱུར། །ཞེས་པའི་བར་དུ་ཚིགས་བཅད་འདིས་ནི་མཚན་ཉིད་གསུམ་གྱི་ཁུངས་བསྟན་ཏོ། །ཐེག་པ་གཅིག་ནི་ཡོངས་སུ་རྫོགས་པའི་མཚན་ཉིད་ལ་བྱ་སྟེ་སྔར་བཤད་པ་བཞིན་ནོ། །ཆོས་ཀྱི་གནས་ཉིད་ནི་ཆོས་ཐམས་ཅད་ལ་ཡང་དག་བར་གནས་པས་ཆོས་ཀྱི་གནས་ཉིད་དོ། །ཆོས་ལ་ཉོན་མོངས་པ་དང༌། རྣམ་པར་དག་པ་ཡོད་དེ་ཉོན་མོངས་པ་སྤངས་ནས་རྣམ་པ་ཐོབ་པ་ནི་ཆོས་མི་འགྱུར་པ་ཉིད་དོ། །ཡང་དག་པའི་མཚན་ཉིད་རྟག་ཏུ་གནས་པས་མི་གཡོ་བར་གནས་པའོ། །སྙིང་པོ་བྱང་ཆུབ་ལ་བཞུགས་ཤིང་ཆོས་ཐམས་ཅད་ལ་ཐབས་མཁས་པས་ཤིན་ཏུ་སྟོན་ཏོ། །ཆོས་ཐམས་ཅད་ལ་རྣམ་པ་གཉིས་ཏེ་སྟོང་པ་ཉིད་དང་ཡོད་པ་ཉིད་དོ། །སྟོང་པ་ལ་ཁྱད་པར་མེད་པས་མཚན་ཉིད་གཅིག་སྟེ། ཀུན་ཏུ་རྟོག་པ་ཞེས་བྱའོ། །ཡོད་པ་ལ་ཁྱད་པར་ཡོད་དེ་རྣམ་པ་གཉིས་སོ། །རྟག་པ་དང་མི་རྟག་པ་སྟེ་རྟག་པ་ནི་ཡོངས་སུ་རྫོགས་པའི་མཚན་ཉིད་དོ། །མི་རྟག་པ་ནི་གཞན་གྱི་དབང་ལས་ཀྱི་མཚན་ཉིད་དོ། །དེ་ལ་ཡང་གཉིས་ཏེ་ཟག་པ་དང་བཅས་པ་དང་ཟག་པ་མེད་པའོ། །ཟག་པ་དང་བཅས་པ་ནི་གཞན་གྱི་དབང་ལས་མཚན་ཉིད་དོ། །ཟག་པ་མེད་པ་ནི་ཡོངས་སུ་རྫོགས་པའི་མཚན་ཉིད་དེ། དེ་བས་ན་ཡོངས་སུ་རྫོགས་པའི་མཚན་ཉིད་ཀྱི་དབང་དུ་བྱས་ཏེ། དེ་ལ་ཐེག་པ་གཅིག་ཅེས་བྱའོ། །ཐེག་པ་གཅིག་གིས་ཡང་དག་པ་ཉིད་རིག་པས་ཆོས་ཀྱི་གནས་ཉིད་དང་ཆོས་མི་འགྱུར་བ་ཉིད་དེ། དེ་ལ་མི་གཡོ་བར་གནས་ནས་སེམས་ཅན་ལ་ཐབས་མཁས་པས་ཆོས་སྟོན་ཏོ། །མདོ་ལས། ལྷ་མི་ཀུན་གྱི་མཆོད་པ་ཕྱོགས་བཅུ་ན། །ཞེས་པ་ནས། དེ་དག་རྣམས་ཀྱང་ཐེག་པ་མཆོག་འདི་འཆད། །ཅེས་པའི་བར་དུ་འདི་མན་ཆད་ཚིགས་བཅད་ཕྱེད་དང་ལྔས་ད་ལྟར་གྱི་དོན་སྟོན་ཏོ། །མདོ་ལས། ཐབས་ལ་མཁས་པས་རབ་ཏུ་འཆད་པ་དང༌། །ཞེས་པ་ནས། དད་བཞི་བའི་ས་འདི་རིག་ནས་སོ། །ཞེས་པའི་བར་དུ་ཚིགས་བཅད་འདིས་ནི་སྔར་ཐབས་ཙམ་བསྟན་པ་ལ་ཕྱིས་ཡང་དག་པར་བསྟན་པའོ། །མདོ་ལས། ལུས་ཅན་ཀུན་གྱི་སྤྱོད་པ་རིག་པ་དང༌། །ཞེས་པ་ནས། སྣ་ཚོགས་མངོན་པར་བསྒྲུབ་པ་རབ་ཏུ་
བསྟན། །ཞེས་པའི་བར་དུ་ཚིགས་བཅད་འདིས་ནི་ཅིའི་ཕྱིར་སྔར་ཐབས་ཙམ་བསྟན་ལ་ཕྱིས་ཡང་དག་པ་བསྟན་པ་ཉིད་སྟོན་པ་སྟེ། ལུས་ཅན་ཀུན་གྱི་སྤྱོད་པ་ནི་སེམས་ཀྱི་སྤྱོད་པའི་མཚན་ཉིད་དོ། །ཅི་བསམས་པ་ནི་ཀུན་ཏུ་འགྲོ་བའི་མཚན་ཉིད་དོ། །མཐུ་ནི་ལས་ཀྱི་མཐུའོ། །སྟོབས་ཞེས་ཀྱང་བྱ་སྟེ་སེམས་ཅན་གྱི་དབང་པོ་སྣ་ཚོགས་ཤེས་པའི་སྟོབས་སོ། །བརྩོན་འགྲུས་ནི་གནས་དང་གནས་མ་ཡིན་པའི་སྟོབས་སོ། །དེ་ལྟར་སེམས་ཅན་གྱི་དད་པ་རིག་ནས་དཔེ་དང་གཞི་རྣམ་པ་མང་པོ་སེམས་ཅན་གྱི་དབང་པོ་བཞིན་དུ་སྣ་ཚོགས་མངོན་པ་སྟོན་ཏེ། མ་བྱོན་པའི་སངས་རྒྱས་རྣམས་ཀྱང་མཚན་ཉིད་གསུམ་རིག་པར་འགྱུར་རོ། །ད་ལྟར་བཞུགས་པ་ཡང་སེམས་ཅན་གྱི་དབང་པོ་མཁྱེན་པས་སྔར་ཐབས་ཙམ་བསྟན་ནས་ཕྱིས་ཡང་དག་པར་སྟོན་ཏོ། །མདོ་ལས། འདྲེན་པའི་དབང་པོ་རྒྱལ་བ་ང་ཡང་འདིར། །ཞེས་པ་ནས། དེ་ནི་ང་ཡི་རང་རིག་ཡེ་ཤེས་སྟོབས། །ཞེས་པའི་བར་དུ་འདི་མན་ཆད་ཚིགས་བཅད་སུམ་ཅུས་ང་ཡང་དེ་བཞིན་ནོ་ཞེས་པ་བསྟན་པ་སྟེ། དེ་ལ་ཚིགས་བཅད་གཉིས་ཀྱིས་དངོས་སུ་དམིགས་ཏེ་བསྟན་ཏོ། །ཉི་ཤུ་རྩ་བརྒྱད་ཀྱིས་ནི་རྒྱས་པར་བསྟན་ཏོ། །མདོ་ལས། ང་ཡིས་མཐོང་བའི་སེམས་ཅན་དབུལ་པོ་རྣམས། །ཞེས་པ་ནས། འདོད་པས་འདི་དག་རྟག་ཏུ་ལྡོངས་པར་བྱས། །ཞེས་པའི་བར་དུ་ཚིགས་བཅད་འདིས་ནི་རྒྱས་པར་བསྟན་པ་སྟེ། ཐོག་མའི་ཚིག་ཉི་ཤུ་རྩ་ཕྱེད་དང་གཅིག་གིས་ནི་སྔར་ཐེག་པ་གསུམ་ཐབས་ཙམ་དུ་བསྟན་པ་སྟེ། ཚིག་རྐྱང་པ་ལས་སེམས་ཅན་གྱི་མོས་པ་སྣ་ཚོགས་མཁྱེན་ནོ་ཞེས་བསྟན་པའོ། །ཚིགས་བཅད་བདུན་གྱིས་ནི་ད་ལྟར་ཡང་དག་པ་ཉིད་དུ་བསྟན་པ་བརྗོད་དེ། སྔར་སངས་རྒྱས་ཀྱི་ཐེག་པ་གཅིག་པུ་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་ཕྱིར་བསྟན་པའོ། །སྔ་མ་ལ་ཡང་རྣམ་པ་བཞི་སྟེ་ཚིགས་བཅད་ཕྱེད་དང་བཞིས་ནི་སྐྱེ་བའི་གནས་སུ་བགེགས་ལས་ཐར་བར་བྱ་བ་བསྟན་ཏོ། །ཚིགས་གསུམ་གྱིས་ནི་གྲོལ་བར་བྱ་བར་མི་ནུས་པ་སེམས་པ་བསྟན་པའོ། །ཚིག་ཕྱེད་དང་བཅུ་གཉིས་ཀྱིས་ནི་ཐབས་ཙམ་དུ་བསྟན་པར་དགོངས་སོ། །ཚིག་ཕྱེད་དང་བཞིས་ནི་ཐེག་པ་གསུམ་སྤྲུལ་པ་བསྟན་ཏོ། །སྔ་མ་ལ་ཡང་གཉིས་ཏེ་ཚིག་གཅིག་གིས་ནི་དགེ་བ་མེད་པ་བསྟན་ཏོ། །ཚིག་ཕྱེད་དང་གསུམ་
གྱིས་ནི་སྡིག་པ་ཡོད་པར་བསྟན་ཏོ། །ང་ཡིས་མཐོང་བ་ཞེས་བྱ་བ་ནི་སྤྱན་ལྔའི་ནང་ནས་སངས་རྒྱས་ཀྱི་སྤྱན་གྱིས་གཟིགས་སོ། །ཤེས་རབ་དང་བསོད་ནམས་སྤོང་བ་ནི་འགྲོ་བ་དྲུག་གི་སེམས་ཅན་ཐོག་མ་མེད་པ་ནས་བསོད་ནམས་དང་ཡི་ཤེས་ཀྱི་རྒྱུར་འགྱུར་བ་མི་བྱེད་འཕགས་པའི་ནོར་བདུན་དང་མི་ལྡན་ལྷ་དང་མིའི་ཆོས་ཀྱི་ནོར་བདུན་དང༌། ཕ་རོལ་ཏུ་ཕྱིན་པ་དྲུག་དང་ཐབས་མཁས་པ་མེད་པ་ནི་ཤེས་རབ་དང་བསོད་ནམས་སྤངས་པའོ། །འདི་མན་ཆད་ཚིགས་བཅད་ཕྱེད་དང་གསུམ་གྱིས་ནི་སྡིག་པ་ཡོད་པར་བསྟན་པ་སྟེ། དེ་ལ་ཚིག་ཕྱེད་དང་གཉིས་ཀྱིས་ནི་ད་ལྟར་གྱི་དུས་ན་འཁོར་བར་ནུབ་ཅིང་སྡུག་བསྔལ་སྐྱེ་བ་བསྟན་ཏོ། །ཚིགས་བཅད་གཅིག་གིས་ནི་གྲོལ་བར་འདོད་ཀྱང་ལོག་པར་ལྟ་བ་སྤྱོད་པ་བསྟན་ཏོ། །འཇིག་རྟེན་ན་གཡག་རྔ་མ་ལ་ཆགས་པ་བཞིན་དུ་སེམས་ཅན་དག་ཀྱང་འདོད་པ་ལྔ་ལ་ཆགས་ནས་སྡུག་བསྔལ་གྱིས་གདུངས་ཏེ་ངན་སོང་དུ་ལྷུང་བར་འགྱུར་རོ། །མདོ་ལས། སངས་རྒྱས་མཐུ་ཆེན་རྣམས་ཀྱང་ཡོངས་མི་ཚོལ། །ཞེས་པ་ནས། ང་ཡི་སྙིང་རྗེ་སྟོབས་ཆེན་དེ་དག་ལ། །ཞེས་པའི་བར་དུ་ཚིགས་བཅད་འདིས་ནི་གྲོལ་བར་འདོད་ལ་ལོག་པར་ལྟ་བ་སྤྱོད་པ་བསྟན་པ་སྟེ། སངས་རྒྱས་ཀྱི་མཐུ་ཆེན་པོ་དང་ཡེ་ཤེས་ཀྱི་སྡུག་བསྔལ་གཅོད་པ་ནི་མུ་སྟེགས་ཅན་གྱི་ལྟ་བ་དང་འདྲ་བར་ངན་པ་ལྟ་བར་ལྷུང་སྟེ། ལུས་སྡུག་བསྔལ་བར་བྱས་ནས་འཁོར་བའི་སྡུག་བསྔལ་ལས་གྲོལ་བར་འདོད་པ་ནི་མི་གཤའོ། །ལོ་དྲུག་གི་བར་དུ་ནས་འབྲུ་རེ་ལས་མ་ཟོས་ཀྱང་བྱང་ཆུབ་མ་ཐོབ་ན་ཚེར་ཕུང་གི་སྟེང་ན་ཉལ་བས་བྱང་ཆུབ་ག་ལ་ཞིག་ཐོབ་སྟེ། ཁྱི་རྡོལ་བསྙེགས་པ་དང་འདྲ་བའི་སེང་གེ་ལྟར་མི་བསྙེགས་པ་མ་ཡིན་ནོ། །འདི་མན་ཆད་ཚིག་གསུམ་གྱིས་གྲོལ་བར་བྱ་མི་ནུས་པ་སེམས་པ་བསྟན་པ་སྟེ། དེ་ལ་ཡང་གསུམ་མོ། །ཚིགས་བཅད་ཕྱེད་ཀྱིས་ནི་སྔོན་སྤྱོད་པའི་རྒྱུ་སེམས་པ་བསྟན་པ་སྟེ། ཚིག་གཅིག་གིས་ནི་འབྲས་བུ་ཐོབ་ནས་ཀྱང་སེམས་པ་བསྟན་ཏོ། །ཚིག་ཕྱེད་དང་གཉིས་ཀྱིས་ནི་མི་ནུས་པར་སེམས་པ་བསྟན་ཏོ། །འདི་ནི་དང་པོ་སྟེ་སེམས་ཅན་དག་རྒྱུ་འདི་གཉིས་དང་ལྡན་པས་ངའི་སྙིང་རྗེ་སྟོབས་ཆེ་དེ་དག་ལའོ་ཞེས་བསྟན་ཏོ། །མདོ་ལས། དེ་དག་ངས་བསམས་བྱང་ཆུབ་སྙིང་པོ་དེར། །ཞེས་པ་ནས། དེ་ཡི་དྲུང་ན་ཕན་ཚུན་འཆག་ཅིང་གནས། ཞེས་པའི་བར་དུ་ཚིགས་བཅད་འདིས་འབྲས་བུ་ཐོབ་
ནས་དགོངས་པ་བསྟན་པ་སྟེ། མངོན་པར་སངས་རྒྱས་ནས་ཤིང་རྒྱལ་གྱི་དྲུང་དུ་ཕན་ཚུན་འཆག་ཅིང་སེམས་ཅན་གྱི་དོན་ཇི་ལྟར་བྱ་བ་དགོངས་པའོ། །གཞན་ཡང་སྡོང་པོ་བརྟག་པ་ནི་དོན་ལ་ཐུགས་བཞག་པ་བསྟན་ཏོ། །འཆག་པ་ནི་སེམས་ཅན་གྱི་དོན་མཛད་པའོ། །སྡོང་པོ་ལ་བརྟག་པ་ནི་སྐྱེ་བ་རྣམ་བཞིའི་སྐྱབས་མཛད་པར་དགོངས་པའོ། །འཆག་པ་ནི་བསོད་ནམས་དང་ཡེ་ཤེས་སྦྱིན་པར་དགོངས་པའོ། །མདོ་ལས། ཡེ་ཤེས་འདི་ནི་དམ་པ་ངོ་མཚར་ཆེ། སེམས་ཅན་འདི་དག་མི་མཁས་གཏི་མུག་ལྡོངས། །ཞེས་བྱ་བ་ནི་ཐར་བར་བྱར་མི་རུང་བར་དགོངས་པ་སྟེ་རྒྱུ་རྣམ་བཞིའི་ཕྱིར་རོ། །ཆོས་ཟབ་པས་ཤེས་པར་དཀའ་བ་དང༌། དབང་པོ་རྟུལ་བས་ཤེས་པར་དཀའ་བ་དང༌། འདོད་པ་ལ་ཆགས་པས་གཏོང་མི་ཕོད་པ་དང༌། གཏི་མུག་གིས་ལྡོངས་པས་ཐར་བར་བྱར་མི་རུང་ངོ་སྙམ་དུ་དགོངས་སོ། །མདོ་ལས། དེ་ཚེ་ང་ལ་གསོལ་བ་ཚངས་པ་དང༌། །ཞེས་པ་ནས། ཐམས་ཅད་ཐལ་མོ་སྦྱར་ནས་གུས་པར་འཁོད། །ཅེས་པའི་བར་དུ་འདི་མན་ཆད་ཚིགས་བཅད་ཕྱེད་དང་བཅུ་གཉིས་ཐབས་ཙམ་དུ་བསྟན་པར་དགོངས་པ་བསྟན་པ་སྟེ། དེ་ལ་ཡང་རྣམ་པ་བཞིའོ། །དང་པོ་ནི་ཚིག་གཉིས་ཀྱིས་ནི་ལྷ་རྣམས་ཀྱི་ཆོས་བཤད་པར་གསོལ་བ་བཏབ་པ་བསྟན་ཏོ། །ཚིག་གསུམ་གྱིས་ནི་དགོངས་པ་བསྟན་ཏོ། །ཚིག་ཕྱེད་དང་ལྔས་ནི་སྐལ་པ་དང་ལྡན་པ་བསྟན་ཏོ། །ཚིག་གཉིས་ཀྱིས་ནི་ཐབས་ཙམ་གྱིས་བསྟན་པ་བསྟན་ཏོ། །འདི་ནི་ཚངས་པའི་རྒྱལ་པོ་ལ་སོགས་པས་གསོལ་བ་བཏབ་ནས་ཐེག་པ་གསུམ་གྱི་ཆོས་བསྟན་པ་སྟེ་ཆོས་ཉིད་ཀྱིས་གསོལ་བ་མ་བཏབ་པར་ཆོས་མི་སྟོན་ཏོ། །མདོ་ལས། དོར་རྣམས་ཇི་ལྟར་བྱ་བར་རབ་ཏུ་བསམ། །ཞེས་པ་ནས། ང་དེང་ཞི་བར་མྱ་ངན་འདའ་བར་ཤོག །ཅེས་པའི་བར་དུ་འདི་མན་ཆད་ཚིག་གསུམ་གྱིས་དགོངས་པ་བསྟན་པ་སྟེ། འདི་ལ་ཡང་རྣམ་པ་གཉིས་སོ། །ཚིག་གཉིས་ཀྱིས་ནི་ཐེག་པ་ཆེན་པོའི་སེམས་ཅན་ལ་གནོད་པར་འགྱུར་བ་བསྟན་ཏོ། །ཚིགས་བཅད་གཅིག་གིས་ནི་ཐེག་པ་གསུམ་གྱི་སེམས་ཅན་ལ་ཕན་པར་འགྱུར་བ་བསྟན་པ་སྟེ། སེམས་ཅན་འདི་དག་སྡུག་བསྔལ་གྱིས་མངོན་སུམ་དུ་གཟིར་བས་ཁྱིམ་ནས་བྱུང་བ་ཡང་ཆོས་མ་ཡིན་པའི་སྡུག་བསྔལ་སྤྱོད་པས་དེ་དག་ལ་ཅིག་ཅར་ཐེག་པ་ཆེན་པོའི་ཆོས་བསྟན་ན་ཡིད་ཆེས་པར་མི་འགྱུར་ཏེ། བྱིས་
པའི་བྲོ་ཅན་དག་སྐུར་བས་ངན་སོང་དུ་ལྷུང་བར་འགྱུར་ཏེ། ཁྱིམ་པ་རྣམས་ནི་སྡུག་བསྔལ་གྱིས་གཟིར་བས་ཡིད་ཆེས་པར་མི་འགྱུར། རབ་ཏུ་བྱུང་བ་ཕྱི་རོལ་པ་རྣམས་ནི་ཆོས་བཤད་པས་ཡིད་མི་ཆེས་ཏེ། དེ་བས་ན་ཆོས་མ་བཤད་པར་མྱུར་དུ་མྱ་ངན་ལས་འདས་ཀྱང་སླའོ་སྙམ་དགོངས་སོ། །མདོ་ལས། མངོན་པ་ན་དགའ་བ་སྔོན་གྱི་སངས་རྒྱས་དང༌། །ཞེས་པ་ནས། རྣམ་པ་གསུམ་དུ་ཕྱེ་སྟེ་རབ་ཏུ་བཤད། །ཅེས་པའི་བར་དུ་ནི་ཐེག་པ་གསུམ་གྱིས་སེམས་ཅན་ལ་ཕན་པ་སྟེ། སངས་རྒྱས་རྣམས་དང་མཐུན་པའི་ཕྱིར་རོ། །མདོ་ལས། ང་ཡིས་དོན་དེ་དེ་ལྟར་བསམས་པ་ནི། །ཞེས་པ་ནས། འཇིག་རྟེན་འདྲེན་པ་རྣམས་ཀྱི་རྗེས་ཐོབ་པ། །ཞེས་པའི་བར་དུ་འདི་མན་ཆད་ཚིག་ཕྱེད་དང་ལྔས་ནི་སྐལ་བ་དང་ལྡན་པ་ལ་འདུལ་བར་འགྱུར་བ་བསྟན་པ་སྟེ། ཚིག་ཕྱེད་དང་གཉིས་ཀྱིས་ནི་ད་ལྟར་གྱི་སངས་རྒྱས་བསྔགས་པ་བསྟན་པའོ། །ཚིག་ཕྱེད་ཀྱིས་ནི་སངས་རྒྱས་རྣམས་དང་མཐུན་པ་བསྟན་ཏོ། །ཚིག་ཕྱེད་དང་གསུམ་གྱིས་ནི་ཕྱི་མ་བདེན་གྱི་སྔ་མ་ཐབས་ཙམ་དུ་བསྟན་ཏོ་ཞེས་དབང་དུ་གྱུར་པ་བསྟན་ཏོ། །མདོ་ལས། ངས་ཀྱང་དམ་པའི་གནས་རིག་དེ་ཡི་ཚེ། རྣམ་པ་གསུམ་དུ་ཕྱེ་སྟེ་རབ་ཏུ་བཤད། །ཅེས་པ་ནི་བདག་དཔང་ཏུ་འགྱུར་བ་བསྟན་ཏེ། ཐབས་ཙམ་དུ་ཐེག་པ་གསུམ་བཤད་ཅེས་པའི་དོན་ཏོ།། མདོ་ལས། མཁས་པ་མ་ཡིན་དད་པ་ཆུང་བའི་མི། །ཞེས་པ་ནས། བྱང་ཆུབ་སེམས་དཔའ་མང་པོ་གཟུད་པར་བྱ། །ཞེས་པའི་བར་དུ་ནི་བྱིས་པའི་བློ་ཅན་དང་པ་ཆུང་བ་དག་ཆུང་དུ་ལ་མོས་པས་འཚང་རྒྱ་བར་འགྱུར་བའི་དོན་ཆེན་པོ་ལ་ཡིད་མི་ཆེས་པས་སྔར་ཐེག་པ་གསུམ་ཐབས་ཙམ་དུ་བསྟན་པ་སྟེ། བྱང་ཆུབ་སེམས་དཔའ་གཟུང་པར་བྱེད་དོ། །མདོ་ལས། དེ་ཡི་སྒྲ་ཐོས་པ་ནི་དགའ་གྱུར་པ། །ཞེས་པ་ནས། དྲང་སྲོང་ཆེ་མཆོག་གདོན་མི་ཟ་བ་གསུང༌། །ཞེས་པའི་བར་ཚིགས་བཅད་གཉིས་ཀྱིས་ཐབས་ཙམ་དུ་འདྲེན་པ་བསྟན་པ་སྟེ། སྒྲ་ཐོས་ཏེ་དགའ་བས་བསྟོད་པ་དང་དེའི་རྗེས་སུ་སྤྱོད་པ་དགོངས་པ་བསྟན་པའོ། །མདོ་ལས། བདག་ཀྱང་དེ་བཞིན་ཀུན་ཏུ་སྤྱད་པ་ནི། །ཞེས་པ་ནས། སེམས་ཅན་རྙོག་པ་ཅན་གྱི་ནང་དུ་སྐྱེས། །ཞེས་པའི་བར་དུ་ནི་རྗེས་སུ་སྤྱོད་པ་བསྟན་བར་དགོངས་པ་སྟེ། སྐལ་བ་དང་ལྡན་པ་ལ་རྙོག་པ་ཅན་གྱི་ནང་དུ་སྐྱེས་ཀྱང་དེའི་རྗེས་སུ་སྤྱོད་པ་དགོངས་པའོ། །
མདོ་ལས་དེ་ལྟར་ང་ཞེས་པ་ནས་ནི་ཤཱ་རིའི་བུ་ཞེས་པ་ནས་ཐབས་ཀྱིས་རབ་ཏུ་ཞི་བའི་ཆོས་བཤད་ཅེས་པའི་བར་དུ་འདི་མན་ཆད་ཚིགས་བཅད་ཕྱེད་དང་བཞིས་ཐེག་པ་གསུམ་སྤྲུལ་པར་ཡང་དག་པར་བསྟན་པ་སྟེ། དེ་ལ་རྣམ་པ་གསུམ་མོ། །ཚིག་ཕྱེད་དང་གཉིས་ཀྱིས་ནི་ཐབས་ཙམ་དུ་བསྟན་ཏོ། །གཅིག་གིས་ནི་དཀོན་མཆོག་གསུམ་བྱུང་བ་བསྟན་ཏོ། །ཚིག་གཅིག་གིས་ནི་ད་ལྟར་དང་འདས་པ་གྲུབ་པ་བསྟན་ཏོ། །བཱ་རཱ་ཎཱ་སཱི་ར་ནི་རི་དགས་ལ་མི་འཇིགས་པ་བྱིན་པའི་གནས་སོ། །གནས་དེར་ཐོག་མར་རྟེན་ལྔ་པོ་ལ་ཆོས་བསྟན་ཏེ་ཐབས་ཀྱིས་རབ་ཏུ་ཞི་བའི་ཆོས་བསྟན་ཏོ། མདོ་ལས། དེ་ནས་ང་ནི་ཆོས་ཀྱི་འཁོར་ལོ་བསྐོར། །ཞེས་པ་ནས། དེར་ནི་དགེ་འདུན་སྒྲ་ཡང་དེ་བཞིན་བྱུང༌། །ཞེས་པའི་བར་དུ་ནི་དཀོན་མཆོག་གསུམ་བྱུང་བ་བསྟན་པ་སྟེ། ཆོས་ཀྱི་འཁོར་ལོ་བསྐོར་བ་ནི་ལན་གསུམ་དུ་ཚུལ་བཅུ་གཉིས་ཀྱིས་བསྐོར་བའོ། །འཁོར་ལོ་ཞེས་བྱ་བ་ནི་འཁོར་ཅིང་མི་གནས་པའི་དོན་ཏོ། །འཕགས་པའི་ལམ་གྱི་ཡན་ལག་བརྒྱད་དང་ཅི་རིགས་སུ་སྦྱར་རོ། །འཕགས་པའི་ལམ་བསྟན་པས་ཕ་རོལ་འབྲས་བུ་ཐོབ་པས་བསྐོར་བ་ཞེས་བྱའོ། །དེ་ལྟར་འཕགས་པའི་ལམ་འཇིག་རྟེན་དུ་བྱུང་བས་དཀོན་མཆོག་གསུམ་གྱི་སྒྲ་ཡང་འཇིག་རྟེན་དུ་བྱུང་བར་གྱུར་ཏོ། །སངས་རྒྱས་ཉིད་ནི་སངས་རྒྱས་དཀོན་མཆོག་མྱ་ངན་ལས་འདས་པ་དང༌། འབྲས་བུ་དང་ཆོས་བསྟན་པ་ནི་ཆོས་དཀོན་མཆོག་གོ །རྟེན་ལྔ་ལ་སོགས་པ་ནི་དགེ་འདུན་དཀོན་མཆོག་གོ །མདོ་ལས། ལོ་ཡི་གྲངས་ནི་ཉུང་བར་ཡང་བཤད། །ཅེས་པ་ནས། དེ་བཞིན་རྟག་པར་དུས་གསུམ་ངས་སྨྲས་སོ། །ཞེས་པའི་བར་དུ་ད་ལྟར་དང་སྔོན་ཡང་གྲུབ་པ་བསྟན་པ་སྟེ། ད་ལྟར་གྱི་དུས་འདི་འབའ་ཞིག་ཏུ་མྱ་ངན་ལས་འདའ་བ་བསྟན་པ་མ་ཡིན་གྱི་ལོའི་གྲངས་མི་ཉུང་བར་སྡུག་བསྔལ་གྱི་མཐའ་ཟད་ཀྱི་བར་དུ་བཤད་ཅིང་བསྟན་ཏོ། །མདོ་ལས། ང་ནི་དེ་ཡི་ཚེ་ན་ཤཱ་རིའི་བུ། །ཞེས་པ་ནས། ཐབས་ལ་མཁས་པ་རྣམ་པ་མང་པོའོ། །ཞེས་པའི་བར་དུ་འདི་མན་ཆད་ཚིགས་བཅད་བདུན་གྱིས་ཆོས་འདི་བཤད་པས་ཐམས་ཅད་མཁྱེན་པའི་ཡེ་ཤེས་ཐོབ་པོ་ཞེས་བསྟན་པ་སྟེ། འདི་ལ་ཡང་རྣམ་པ་བཞིའོ། །ཐོག་མའི་ཚིག་གཉིས་ཀྱིས་ནི་དབང་པོ་སྨིན་པས་ཕྲད་པ་བསྟན་ཏོ། །ཚིག་གཅིག་གིས་ནི་དོན་བྱ་བར་དགོངས་པ་
བསྟན་ཏོ། །ཚིག་གསུམ་གྱིས་ནི་ཡང་དག་པར་བཤད་པ་བསྟན་ཏོ། །ཚིག་གཅིག་གིས་ནི་ཆོས་ཀྱི་དོན་བསྟན་ཏོ། །ངས་ཐབས་ཙམ་དུ་བསྟན་པ་ཡང་སྔོན་གྱི་རྒྱལ་བ་དག་ལས་ཐབས་ཙམ་དུ་བསྟན་པ་ཐོས་པས་དགེ་བའི་རྩ་བ་དང་ལྡན་ཞིང་ང་དང་ཕྲད་པ་ལས་ཆོས་བཤད་པར་དགོངས་པ་བསྟན་པའོ། །མདོ་ལས། དེ་མ་ཐག་ཏུ་ངས་ནི་འདི་སྙམ་བསམ། །ཞེས་པ་ནས། བྱང་ཆུབ་མཆོག་དེ་འདིར་ནི་རབ་ཏུ་བཤད། །ཅེས་པའི་བར་དུ་དོན་བྱ་བར་དགོངས་པ་བསྟན་པ་སྟེ། དབང་པོ་སྨིན་པ་རྣམས་ལ་སངས་རྒྱས་ཡེ་ཤེས་བཤད་དེ་བྱང་ཆུབ་མཆོག་ལ་ཅི་ཕྱིར་དགོངས་པར་མི་བྱ་སྙམ་དགོངས་ཏེ། དུས་ལ་བབ་པར་བསྟན་པའོ། །མདོ་ལས། དེ་རིང་འདི་ལ་དད་པར་དཀའ་བ་ནི། །ཞེས་པ་ནས། མི་མཁས་པ་དང་ང་རྒྱལ་ལྡན་པའོ། །ཞེས་པའི་བར་དུ་འདི་མན་ཆད་ཚིགས་བཅད་གསུམ་གྱིས་ཡང་དག་པར་བཤད་པ་བསྟན་པ་སྟེ། དེ་ལ་ཚིག་གཅིག་གིས་ནི་མི་མཁས་པ་བྱིས་པའི་བློ་ཅན་འཛིན་མི་ནུས་པ་བསྟན་ཏོ། །ཚིག་གཉིས་ཀྱིས་ནི་དབང་པོ་རྣོན་པོ་བློ་དང་ལྡན་པས་འཛིན་ནུས་པ་བསྟན་ཏོ། །ཆོས་འཛིན་མི་ནུས་པའི་སྐྱོན་རྣམ་པ་ལྔ་སྟེ། དབང་པོ་རྟུལ་པོས་ཆོས་ཐོས་ཀྱང་དོན་མི་གོ་བ་དང༌། བྱིས་པའི་བློ་ཅན་ཤེས་པ་ཆུང་བ་དང༌། མཚན་མར་འདུ་ཤེས་པ་སྟེང་པ་དང། ཡོད་པའི་མཚན་མ་གཉིས་སུ་འཛིན་པ་དང༌། ང་རྒྱལ་ཅན་ལོངས་སྤྱོད་ཀྱིས་རྒྱགས་པ་དང་དྲེགས་པ་མི་མཁས་པས་ཉོན་མོངས་པ་དང་བཅས་པའོ། །མདོ་ལས། དེ་ལ་ང་ཡང་འཇིགས་མེད་རབ་ཏུ་དགའ། །ཞེས་པ་ནས། འདི་དག་ཐམས་ཅད་འཇིག་རྟེན་སངས་རྒྱས་འགྱུར། །ཞེས་པའི་བར་དུ་འཛིན་ནུས་པ་བསྟན་པ་སྟེ། དགའ་བ་ནི་དགའ་བ་ཚད་མེད་པས་སེམས་ཅན་འཚང་རྒྱ་བ་ལ་ཕྲག་དོག་མེད་པའོ། །འཇིགས་པ་མེད་པ་ནི་གདོན་མི་ཟ་བའི་དོན་ནི་སེང་གེའི་སྒྲ་སྒྲོགས་པ་ལ་གདོན་མི་ཟ་བའོ། །རྣམ་པ་ཀུན་སྤངས་པ་ནི་ཐབས་ཙམ་དུ་གསུམ་དུ་བསྟན་པའོ། །སར་མ་ཕྱིན་པའི་བྱང་ཆུབ་སེམས་དཔའ་ནི་བདག་བྱང་ཆུབ་སེམས་དཔའ་ཐོབ་པར་འཛིན་ཏེ། ཉན་ཐོས་ལ་སྐལ་བ་མེད་པར་འཛིན་པ་དང༌། རིགས་མ་ངེས་པ་དག་བདག་ཀྱང་སྐལ་པ་མེད་པར་སེམས་པས་ཆུང་དུར་ཕྱིར་ནུར་བདག་གི་ཕྱིར་ཆོས་འདི་བསྟན་པས་ཐེ་ཚོམ་དང་བྲལ་བ་བསྟན་པའོ། །ཉན་ཐོས་བརྒྱ་ཕྲག་བཅུ་
གཉིས་ཀྱང་འཚང་མི་རྒྱ་བར་སེམས་པས་དེ་དག་གི་ཕྱིར་ཡང་ཆོས་བསྟན་ཏོ། །མདོ་ལས། འདི་ལྟར་སྔ་མའི་སྐྱོབ་པ་དེ་དག་དང༌། །ཞེས་པ་ནས། དེ་ལྟར་ཁྱོད་ལ་དེ་རིང་ངས་བཤད་དོ། །ཞེས་པའི་བར་དུ་ནི་ཆོས་བསྡུས་པ་བསྟན་པ་སྟེ། ཐེག་པ་ཆེན་པོའི་དོན་དམ་པར་ནི་ངོ་བོ་ཉིད་ཀྱི་རྣམ་པར་རྟོག་པ་སྤངས་ཏེ། ཐེག་པ་གསུམ་ལ་ཐ་དད་པ་མེད་པས་ཐམས་ཅད་འཚང་རྒྱ་བར་འགྱུར་རོ་ཞེས་བསྟན་ཏོ། །མདོ་ལས། རས་འགའ་གང་དུ་ཅི་ཡི་འཇིག་རྟེན་དུ། །ཞེས་པ་ནས། གང་གིས་ཆོས་མཆོག་ཐོས་ནས་དད་པའོ། །ཞེས་པའི་བར་དུ་འདི་མན་ཆད་ཚིགས་བཅད་བདུན་གྱིས་མ་ཐོས་པ་ཐོས་པར་བྱ་བ་བསྟན་པ་སྟེ། འདི་ལ་ཡང་རྣམ་པ་བཞིའོ། །དེ་ལ་ཚིག་གཉིས་ཀྱིས་ཤིན་ཏུ་དཀའ་བ་བཞི་བསྟན་ཏོ། །ཚིགས་བཅད་ཕྱེད་དང་གསུམ་གྱིས་ནི་དཔེ་རྣམ་པ་གཉིས་ཤིན་ཏུ་དཀའ་བ་བསྟན་ཏོ། །ཚིགས་བཅད་ཕྱེད་དང་གཉིས་ཀྱིས་ནི་དད་པ་བསྐྱེད་པར་བསྐུལ་བ་བསྟན་ཏོ། །ཚིགས་བཅད་གཅིག་གིས་ནི་དོན་བསྡུས་པ་བསྟན་ཏོ། །དཀའ་བ་བཞི་ལ་སངས་རྒྱས་འབྱུང་བར་དཀའ་བ་དང༌། ཆོས་བཤད་པར་དཀའ་བ་དང༌། ཆོས་ཐོས་པར་དཀའ་བ་དང་ཉན་པར་དཀའ་བའོ། །དེ་ལ་སངས་རྒྱས་འབྱུང་བར་དཀའ་བ་ནི་བསྐལ་པ་བཟང་པོའི་སངས་རྒྱས་སྟོང་འབྱུང་བ་ལྟ་བུའོ། །དེ་བཞིན་དུ་བསྐལ་པ་དུ་མས་སངས་རྒྱས་འབྱུང་ཞིང་སངས་རྒྱས་འོད་སྲུངས་ལྟ་བུ་ཞག་བདུན་ལས་མི་བཞུགས་པས་སངས་རྒྱས་འབྱུང་བ་དེ་ལྟར་དཀའ་བའོ། །དེ་ལྟར་སངས་རྒྱས་འབྱུང་བར་དཀའ་བ་མི་ཁོམ་པ་བརྒྱད་ཀྱིས་བསྐལ་ཏེ། སངས་རྒྱས་དང་ཕྲད་པར་དཀའ་བས་ཆོས་ཐོས་པར་དཀའོ། །ཆོས་མི་ཐོས་པས་སྤྱོད་པའང་ཤིན་ཏུ་དཀའོ། །མདོ་ལས། ཨུ་དུམ་བཱ་རའི་མེ་ཏོག་རྙེད་པར་དཀའ་བ་བཞིན། །ཞེས་པ་ནས། སངས་རྒྱས་ཐམས་ཅད་མཆོད་པ་བྱས་པར་འགྱུར། །ཞེས་པའི་བར་དུ་ཚིགས་བཅད་འདིས་ནི་དཔེ་གཉིས་ཀྱིས་རྙེད་པར་དཀའ་བ་བསྟན་པ་སྟེ། དེ་ལ་ཚིག་གཅིག་གིས་ནི་ཆོས་འབྱུང་བར་དཀའ་བ་བསྟན། ཚིག་ཕྱེད་དང་གཉིས་ཀྱིས་ནི་ཐོས་ནས་བསྟོད་པར་དཀའ་བ་བསྟན་ཏོ། །ཆོས་འབྱུང་བ་དང་ཐོས་ནས་བསྟོད་པར་དཀའ་བ་ཡང་ཨུ་དུམ་བཱ་རའི་མེ་ཏོག་དང་འདྲའོ་ཞེས་བསྟན་ཏོ། །མདོ་ལས། འདི་ལྟར་ཐེ་ཚོམ་སོམ་ཉི་རྣམ་པར་སྤོངས། །ཞེས་པ་ནས། འདི་ན་ང་ལ་ཉན་ཐོས་
གང་ཡང་མེད། །ཞེས་པའི་བར་དུ་ནི་དད་པ་བསྐྱེད་པར་བསྐུལ་ཏེ། ཐེ་ཚོམ་སྤོངས་ཤིག་པར་བསྟན་པའོ། །མདོ་ལས། ཤཱ་རིའི་བུ་ཁྱོད་འདི་ཡང་གསང་བར་གྱིས། །ཞེས་པ་ནས། ང་ཡི་གསང་བ་འདི་རྣམས་ཐུབ་པར་གྱིས། །ཞེས་པའི་བར་དུ་ནི་སངས་རྒྱས་རྣམས་ཀྱི་གསང་བར་བསྔགས་པ་བསྟན་པའོ། །མདོ་ལས། ཇི་ལྟ་ཞེ་ན་རྙོག་པ་ལྔ་ཡི་ཚེ། །ཞེས་པ་ནས། དེ་དག་རྣམས་ཀྱང་བྱང་ཆུབ་སེམས་མི་སྐྱེ། །ཞེས་པའི་བར་དུ་འདི་མན་ཆད་སྤྱིར་ཚིགས་བཅད་གསུམ་གྱིས་ཐེ་ཚོམ་བཞི་བསལ་བ་བསྟན་ཏེ། དེ་ལ་ཡང་རྣམ་པ་གསུམ་མོ། །ཐོག་མ་ཚིགས་བཅད་གཅིག་གིས་སངས་རྒྱས་ནས་འཇིག་རྟེན་དུ་འབྱུང་ཞིང་ཐེག་པ་གསུམ་གྱིས་རྙོག་པ་ལྔའི་ཚེ་འབྱུང་བར་འགྱུར་བ་བསྟན་ཏོ། །ཚིགས་བཅད་གཅིག་གིས་ནི་ཇི་ལྟར་ན་ང་རྒྱལ་གྱི་དབང་དུ་གྱུར་པ་དགྲ་བཅོམ་པའོ་ཞེས་བརྗོད་ཅིང་ཆོས་འདི་ལ་ཡིད་ཆེས་པའི་ཆོས་མེད་པར་བསྟན་ཏོ། །ཚིགས་བཅད་གཅིག་གིས་ནི་ཇི་ལྟར་སྟོན་པར་འགྱུར་སྙམ་པ་སྟོན་ཏོ། །མདོ་ལས། །ང་ཡི་ཐེག་པ་གཅིག་པོ་འདི་ཐོས་པ། །ཞེས་པ་ནས། མདོ་སྡེ་སྐུར་པས་སེམས་ཅན་དམྱལ་བར་འགྲོ། །ཞེས་པའི་བར་དུ་ཚིགས་བཅད་འདིས་ནི་མ་འོངས་པའི་དུས་ན་སེམས་ཅན་སྡིག་པ་ཅན་ང་རྒྱལ་གྱི་དབང་དུ་གྱུར་པ་སེམས་ཅན་དམྱལ་བར་འགྲོ་བར་བསྟན་ཏོ། །མདོ་ལས། མཛེས་ཤིང་གཙང་བར་འགྱུར་བའི་སེམས་ཅན་དག །ཞེས་པ་ནས། ཐེག་པ་གཅིག་གིས་བསྔགས་པ་མཐའ་ཡས་སོ། །ཞེས་པའི་བར་དུ་ཚིགས་བཅད་འདིས་ནི་ཇི་ལྟར་བསྟན་པར་འགྱུར་བ་བསྟན་ཏེ། འཛེམ་པ་ནི་ཁྲེལ་བ་དང་ངོ་ཚ་དང་ལྡན་པའི་དོན་ཏོ། །མདོ་ལས། འདྲེན་པ་རྣམས་ཀྱིས་བཤད་པ་དེ་ལྟ་བུ། །ཞེས་པ་ནས། སངས་རྒྱས་འགྱུར་གྱིས་དགའ་བ་རབ་ཏུ་སྐྱེད། །ཅེས་པའི་བར་དུ་ཚིགས་བཅད་འདི་གསུམ་གྱིས་ནི་དགའ་བའི་སེམས་དང་ལྡན་པ་ངེས་པར་འཚང་རྒྱ་བར་བསྟན་པ་སྟེ། ཚིག་ཕྱེད་དང་གཉིས་ཀྱིས་ནི་སངས་རྒྱས་ཀྱི་ཆོས་རྣམས་མི་མཐུན་ཏེ་མ་བསླབས་ན་མི་རྟོགས་པར་བསྟན་ཏོ། །ཚིག་ཕྱེད་དང་གཉིས་ཀྱིས་ནི་དགའ་བའི་སེམས་བསྐྱེད་པས་འཚང་རྒྱ་བར་འགྱུར་བར་བསྟན་ཏོ།། །།དམ་པའི་ཆོས་པུཎྜ་རཱི་ཀའི་འགྲེལ་པ། བམ་པོ་ལྔ་པ། འདི་མན་ཆད་དཔེའི་ལེའུ་སྟེ་རྣམ་པ་གསུམ་དུ་དབྱེའོ། །ཅིའི་ཕྱིར་བསྟན་པ་དང༌། ལེའུའི་མིང་བསྟན་པ་དང༌། དོགས་པ་
བསལ་བའོ། །ཅིའི་ཕྱིར་བསྟན་པ་ལ་ཡང་གཉིས་ཏེ། ཤཱ་རིའི་བུ་དབང་པོ་རྣོན་པོས་ཐོས་པ་ཙམ་གྱིས་རྟོགས་པ་དང༌། གང་ཟག་བཞི་པོ་དབང་པོ་འབྲིང་པོས་དཔེ་བསྟན་པས་ཤེས་པར་འགྱུར་བ་སྟེ། དབང་པོ་འབྲིང་པོའི་ཕྱིར་དཔེའི་ལེའུ་འདི་བསྟན་ཏོ། །འགྲེལ་པ་ལས་འདི་མན་ཆད་ཉོན་མོངས་པ་དང་བཅས་པའི་སྐྱེ་བོ་བདུན་པོའི་ཕྱིར་དཔེ་རྣམ་པ་བདུན་གྱིས་ང་རྒྱལ་རྣམ་པ་བདུན་དང་ཉོན་མོངས་པ་གསུམ་གྱི་གཉེན་པོར་བསྟན་ཏོ། །དེ་ལེའུའི་མིང་བསྟན་པ་ནི་དཔེའི་ལེའུ་སྟེ། དཔེ་ཞེས་བྱ་བ་ནི་འཇིག་རྟེན་གྱི་མངོན་སུམ་གྱིས་འཇིག་རྟེན་ལས་འདས་པའི་དོན་ཟབ་མོ་རྟོགས་པར་བྱེད་པའི་དོན་ཏོ། །དེ་ལ་དོགས་པ་བསལ་བ་ནི་དྲིས་པ་ལས་འདིར་ནི་དཔེས་དོན་བསྟན་པས་ལེའུ་ཡང་དཔེའི་ལེའུ་ཞེས་གདགས་སུ་རུང་ན་ལེའུ་སྔ་མ་ལས་ཆོས་འབའ་ཞིག་སྟོན་ན་དེ་ལ་ཆོས་ཀྱི་ལེའུ་ཞེས་གདགས་སམ། ལན་བཏབ་པ་སྔ་ཕྱི་འབྲེལ་བས་གཞུང་གིས་དེ་ལྟ་བུ་ཡིན་ཡང་མིང་གདགས་པ་ལ་སོ་སོ་སྟེ། ཐབས་ཞེས་བྱ་བ་ནི་བྱེ་བྲག་ཏུ་དབྱེའོ། །དཔེ་ནི་སྤྱིར་སྙེགས་ཏེ་ཐ་དད་པ་མེད་དོ། །མདོ་ལས་དེ་ནས་ཚེ་དང་ལྡན་པ་ཤཱ་རིའི་བུ་ཞེས་པ་ནས་དགའ་བ་ཐོབ་ཞེས་པའི་བར་དུ་འདི་མན་ཆད་ལེའུ་འདི་ལ་སྤྱིར་རྣམ་པ་གཉིས་དབྱེ་སྟེ། ཤཱ་རིའི་བུ་ཆོས་ཐོས་ནས་དགའ་རངས་ཏེ་ལུང་བསྟན་པ་ཐོབ་པ་དང་དཔེས་དབང་པོ་འབྲིང་པོ་ལ་ཆོས་བསྟན་པའོ། །འདི་མན་ཆད་ཤཱ་རིའི་བུ་ཆོས་ཐོས་ནས་དགའ་རངས་པ་ལ་རྣམ་པ་གཉིས་ཏེ། ཚིག་རྐྱང་པ་ལ་སྨོས་པ་དང༌། ཚིགས་སུ་བཅད་དེ་བཟླས་པའོ། །ཇི་ལྟར་རེ་བ་བཞིན་དུ་ཡིད་དང་མི་འགལ་བ་ཐོས་པས་དགའ་བ་དང་སྤྲོ་བའོ། །བཤད་པར་གསལ་པ་གདབ་པས་ཐལ་མོ་སྦྱར་རོ། །བཤད་པའི་ལན་འདོད་པས་བཅོམ་ལྡན་འདས་ལ་བལྟའོ། །འདི་ལྟ་བུའི་སྒྲ་ཞེས་པ་ནི་ཐེག་པ་ཆེན་པོའི་གསུང་རབ་པོ། །སྔོན་མ་ཐོས་པ་ཐོས་པས་ངོ་མཚར་རྨད་དུ་གྱུར་ཏོ། །གཞན་ཡང་དོན་རྣམ་པ་གསུམ་གྱིས་དགའ་བ་ཐོབ་བོ། །སངས་རྒྱས་ལས་ཐོས་ནས་སེམས་རབ་ཏུ་བདེ་ཞིང་བདུད་མ་ཡིན་པར་རྟོགས་པ་དགའ་བ་དང༌། ཡང་དག་པ་གཅིག་ཐོབ་པས་སྔ་མ་གསུམ་པོ་ཐབས་ཙམ་དུ་བསྟན་པར་ཤེས་པས་དགའ་བ་དང༌། སངས་རྒྱས་ཀྱིས་དགྲ་བཅོམ་པ་བརྒྱ་ཕྲག་ཕྱེད་དང་བཅུ་གསུམ་ཡང་སངས་རྒྱས་སུ་ལུང་བསྟན་པ་ཐོས་པས་དགའ་
བ་ཐོབ་པས། མདོ་ལས་དེ་ཅིའི་སླད་དུ་ཞེས་པ་ནས་ཡོངས་སུ་གདུང་བར་གྱུར་ཏོ་ཞེས་པའི་བར་དུ་འདི་མན་ཆད་ནི་ཅིའི་ཕྱིར་དགའ་བ་བསྟན་ཏེ། དེ་ལ་ཡང་རྣམ་པ་བཞིའོ། །ཆོས་ཆེན་པོ་ལས་ཉམས་པས་གདུང་བར་གྱུར་པ་དང༌། ཐེག་པ་ཆུང་ངུས་བཏོན་པས་འགྱོད་པ་དང༌། ཐོས་པས་མྱ་ངན་ཟད་པས་དགའ་བ་དང་སངས་རྒྱས་ཀྱི་སྲས་རྣམས་བྱང་ཆུབ་ཐོབ་པར་རྟོགས་པའོ། །འདི་ནི་ཆོས་ཆེན་པོ་ཉམས་པས་གདུང་བར་གྱུར་བ་བསྟན་པ་སྟེ། བདག་ཅག་གིས་སྔོན་བྱང་ཆུབ་སེམས་དཔའ་ལ་ལུང་བསྟན་པ་ཐོས་ཀྱང་ལུང་བསྟན་པ་མ་ཐོབ་པོ་སྙམ་ནས་གདུང་བར་གྱུར་པ་དང༌། དེ་བཞིན་གཤེགས་པའི་ཡེ་ཤེས་དང་གཟིགས་པ་ལས་ཉམས་པས་གདུང་བར་གྱུར་ཏོ། །མདོ་ལས་བཅོམ་ལྡན་འདས་ཞེས་པ་ནས་ཤེ་དག་གིས་སྤྱོད་དོ་ཞེས་པའི་བར་དུ་ནི་ཐེག་པ་ཆུང་ངུས་བཏོན་པས་འགྱོད་པ་བསྟན་པ་སྟེ། འདི་ལ་ཡང་རྣམ་པ་གཉིས་སོ། །ཆུང་དུས་གནས་པས་འགྱོད་པ་དང༌། ལོག་པར་གྱུར་པས་འགྱོད་པའོ། །ཆོས་ཀྱི་དབྱིངས་ནི་གང་ཟག་ལ་བདག་མེད་པ་ཡང་དག་པ་ཉིད་དེ། དེ་ལ་བྱང་ཆུབ་སེམས་དཔའ་དང་བདག་ཅག་ཞུགས་པར་མཚུངས་ན་ཅིའི་སླད་དུ་བཅོམ་ལྡན་འདས་ཀྱིས་བདག་ཅག་ཐེག་པ་ཆུང་ངུས་བཏོན་སྙམ་དུ་འགྱོད་དོ། །མདོ་ལས་བཅོམ་ལྡན་འདས་ཞེས་པ་ནས་དེ་སྙམ་དུ་སེམས་སོ་ཞེས་པའི་བར་དུ་ནི་འདིར་བདག་འགྱོད་པ་བསྟན་ཏེ། ནོངས་ཞེས་བྱ་བ་ནི་སྡིག་པ་ལ་བྱའོ། །མདོ་ལས་ཅིའི་སླད་དུ་ཞེས་པ་ནས་བཏོན་པར་འགྱུར་ཞིག་ན་ཞེས་པའི་བར་དུ་ནི་ཅིའི་ཕྱིར་ཞེས་བྱ་བ་བསྟན་ཏེ། དེ་ཡང་བླ་ན་མེད་པའི་བྱང་ཆུབ་ཏུ་བརྩམས་པའི་རྒྱུ་བྱང་ཆུབ་ཀྱི་ཕྱོགས་དང་ཕ་རོལ་ཏུ་ཕྱིན་པ་དང་མངོན་པར་ཤེས་པ་དང་སེམས་ཅན་ཡོངས་སུ་སྨིན་པར་བྱེད་པའོ། །བསྡད་པ་ནི་རེ་བའི་དོན་ཏེ་དེ་བས་ན་བདག་ཅག་གིས་བླ་ན་མེད་པའི་བྱང་ཆུབ་ཀྱི་རྒྱུར་གྱུར་བ་རེ་བའི་སེམས་ཀྱིས་བསྡད་ན་ནི་ཐེག་པ་ཆེན་པོའི་ཆོས་ལ་བཏོན་པར་འགྱུར་བ་ཞིག་ན་བདག་ཅག་ལ་རེ་བ་མེད་པས་ན་ཐེག་པ་ཆེན་པོ་ལ་དགོད་པར་མ་གྱུར་ཏོ་སྙམ་དུ་འགྱོད་དོ། །བྱང་ཆུབ་ཀྱི་སེམས་ལ་རྣམ་པ་གསུམ་སྟེ། འདུས་བྱས་ལས་སྐྱེ་བ་དང༌། བྱང་ཆུབ་ཚོལ་བ་དང་སེམས་ཅན་ལ་ཤིན་ཏུ་དགོངས་པའོ། །མདོ་ལས་བཅོམ་ལྡན་འདས་ཞེས་པ་ནས་དགྲ་བཅོམ་པ་ཐོབ་པོ་ཞེས་པའི་བར་དུ་ནི་ཤིན་ཏུ་འགྱོད་པ་བསྟན་ཏེ།
བཅོམ་ལྡན་འདས་ཀྱིས་ལྡེམ་པོ་ངག་ཏུ་གསུངས་པ་ན་མ་རིག་པ་ནས་ཐབས་ཙམ་དུ་བསྟན་པ་ཐོས་མ་ཐག་ཏུ་གཟུང་བ་དང༌། བསྒོམས་པ་དང༌། བསམས་པ་དང༌། ཡིད་ལ་བྱས་པས་ཐེག་པ་ཆེན་པོ་ལམ་བཀོད་པ་ནི་བདག་ཅག་གིས་ནོངས་སོ་སྙམ་དུ་འགྱོད་པར་གྱུར་ཏོ། །དེ་ལ་ཐོས་ནས་མྱ་ངན་ཟད་པས་དགའ་བ་ནི་སྔོན་ཐེག་པ་ཆེན་པོའི་རྣམ་པར་གྲོལ་བ་ལ་སྐལ་པ་མེད་སྙམ་དུ་འཛིན་ཏེ། དེ་བཅོམ་ལྡན་འདས་ལ་ཐེག་པ་ཆུང་ངུ་གཉིས་ངེས་པའི་དོན་མ་ཡིན་ཏེ། སངས་རྒྱས་ཀྱི་བྱང་ཆུབ་ལ་སྐལ་པ་ཡོད་པར་རྟོགས་པས་མྱ་ངན་ཟད་ནས་དགའ་བ་དང་བསིལ་བ་ཐོབ་པ་གྱུར་ཏོ། དེ་ལྟར་ཐེ་ཚོམ་མེད་པས་བདེ་བ་དང་བསིལ་བར་གྱུར་ཏོ། །མདོ་ལས་བཅོམ་ལྡན་འདས་ཀྱི་སྲས་ཐུ་བོ་ཞེས་པ་ནས་ཡོངས་སུ་གདུང་བ་དང་བྲལ་ལོ་ཞེས་པའི་བར་དུ་ནི་སངས་རྒྱས་ཀྱི་སྲས་རྣམས་བྱང་ཆུབ་ཐོབ་པར་རྟོགས་པ་བསྟན་པ་སྟེ། འཕགས་པའི་ཡེ་ཤེས་ཐོབ་ཅིང་སངས་རྒྱས་ཀྱི་ཐུགས་ལས་བྱུང་བས་སྲས་ཐུ་བོའོ། །སོ་སོའི་སྐྱེ་བོ་ལས་གཞན་པ་ནི་ཐུགས་ལས་བྱུང་བའོ། །ཆོས་ཀྱི་གསུང་རབ་ལས་བྱུང་བས་ཞལ་ནས་སྐྱེས་པའོ། །ཆོས་ཀྱི་རྗེས་སུ་ཚུལ་བཞིན་ཡིད་ལ་བྱེད་པ་ནི་ཆོས་ལས་སྐྱེས་པའོ། །ཆོས་ཀྱི་སྐུའི་རྗེས་སུ་དེ་དང་འདྲ་བའི་ཆོས་ཐོབ་པ་ནི་ཆོས་ཀྱི་སྤྲུལ་པའོ། །ཆོས་ཀྱི་ཉེ་མཚམས་ཆོས་ཀྱིས་གྲུབ་པ་ནི་ཟག་པ་མེད་པའི་ཆོས་རིན་པོ་ཆེ་ལ་ལོངས་སྤྱོད་པ་སྟེ། ཆོས་ནི་ཆོས་དཀོན་མཆོག་དང་འཕགས་པའི་ནོར་བདུན་ནོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཇི་ལྟར་ཆོས་ལ་ལོངས་སྤྱོད་པ་དང་འདྲ་བར་བདག་ཀྱང་ཆོས་ཀྱི་ནོར་ལ་ལོངས་སྤྱོད་པར་བྱའོ་ཞེས་པའི་དོན་ཏོ། །སངས་རྒྱས་ཀྱི་སྲས་ཞེས་བྱ་བ་ནི་འཇིག་རྟེན་གྱི་སྐྱོན་དང་བཅས་པ་མི་གཙང་བའི་མངལ་ནས་སྐྱེས་པ་ལས་བཟློག་པའོ། །ཐུགས་ལས་བྱུང་བ་ནི་ཕ་མའི་ཁུ་བ་མི་གཙང་བ་ལས་འབྱུང་བ་མ་ཡིན་པར་བསྟན་པའོ། །ཞལ་ནས་སྐྱེས་པ་ནི་ཆོས་མ་ཡིན་པའི་འདོད་ཆགས་ལས་འབྱུང་བ་མ་ཡིན་པར་བསྟན་པའོ། །ཆོས་ལས་སྐྱེས་པ་ནི་ཆོས་ཀྱི་སྐུའི་རིགས་འཚོབ་པ་བསྟན་པ་སྟེ། ཇི་ལྟར་བྲམ་ཟེ་དག་རིགས་འཚོབ་པ་བཞིན་ནོ། །ཆོས་ཀྱི་སྤྲུལ་པ་ནི་ཆོས་ཀྱི་ནོར་ལ་ལོངས་སྤྱོད་པ་སྟེ་ཇི་ལྟར་འཇིག་རྟེན་ན་ཕའི་ནོར་ལ་བུ་དག་སྤྱོད་པ་བཞིན་ནོ། །མདོ་ལས་དེ་ནས་ཚེ་དང་ལྡན་པ་ཞེས་པ་ནས།
ཐེག་པ་མཆོག་འདིར་བདག་ནི་ཡོངས་སྨིན་མཛད། །ཅེས་པའི་བར་དུ་འདི་མན་ཆད་ཚིགས་བཅད་ཀྱིས་བསྟན་ཏེ། ཚིགས་བཅད་ཉི་ཤུ་རྩ་ཕྱེད་དང་དྲུག་ལ་རྣམ་པ་གཉིས་ཏེ། ཐོག་མའི་ཚིག་ཕྱེད་དང་གསུམ་གྱིས་ནི་གླེང་བ་བསྟན་ཏོ། །ཚིགས་བཅད་ཉི་ཤུ་རྩ་གསུམ་གྱིས་ནི་བཤད་པ་བསྟན་ཏོ། །གླེང་པ་བསྟན་པ་ལ་ཡང་གཉིས་ཏེ། ཐོག་མའི་ཚིག་གཅིག་གིས་ནི་ཐེ་ཙོམ་མེད་པས་རབ་ཏུ་དགའ་བ་བསྟན་ཏ། །ཚིག་ཕྱེད་དང་གཉིས་ཀྱིས་ནི་ཐེ་ཙོམ་དང་མྱ་ངན་ཟད་པས་ངོ་མཚར་དུ་གྱུར་པ་བསྟན་ཏོ། །མདོ་ལས། བདེ་བར་གཤེགས་པའི་གསུང་དེ་ངོ་མཚར་གྱུར། །ཞེས་པ་ནས། གསུང་ཐོས་པ་ཡིས་ཐམས་ཅད་མེད་པར་གྱུར། །ཞེས་པའི་བར་དུ་ཐེ་ཙོམ་དང་མྱ་ངན་ཟད་པས་ངོ་མཚར་དུ་གྱུར་པ་བསྟན་ཏོ། །སྔོན་ཐེག་པ་ཆེན་པོ་མ་ཐོས་པ་ཐེ་ཚོམ་དང་མྱ་ངན་དུ་འགྱུར་བ་ལས་ད་ཐེག་པ་ཆེན་པོ་ཐོས་པས་ཐེ་ཙོམ་དང་མྱ་ངན་སློས་པ་བསལ་ཞེས་སྨོས་སོ། །མྱ་ངན་སློས་པ་ཞེས་བྱ་བ་ནི་སངས་རྒྱས་སུ་མི་འགྱུར་དུ་དོགས་པའོ། །མདོ་ལས། གདུགས་ལ་སྤྱོད་ཅིང་ཕན་ཚུན་འཆི་བ་དང༌། །ཞེས་པ་ནས། ཀྱེ་མ་སྡིག་གི་སེམས་ཀྱིས་བདག་བསླུས་པས། །ཞེས་པའི་བར་དུ་འདི་མན་ཆད་ནི་འགྱོད་པ་བསྟན་པ་སྟེ། ཀྱེ་མ་ཞེས་བྱ་བ་ནི་ཤིན་ཏུ་འགྱོད་པའི་ཐ་ཚིག་སྟེ། སྔར་ཐེག་པ་ཆུང་ངུ་ལ་གནས་པས་ཐེག་པ་ཆེན་པོ་ལ་སྐལ་པ་མེད་པ་ཙམ་དུ་འཛིན་པས་སྡིག་པའི་སེམས་ཀྱིས་བསླུས་པ་ཞེས་བྱའོ། །མདོ་ལས། ཟག་པ་མེད་པའི་ཆོས་སུ་འདྲ་བ་ལ། །ཞེས་པ་ནས་འཆད་པར་མི་འགྱུར་རོ་ཞེས་པའི་བར་དུ་ཚིག་འདི་ནི་ཅིས་འགྱོད་པ་བསྟན་པ་སྟེ། ཟག་པ་མེད་པའི་ཆོས་ཀྱི་དབྱིངས་ཡང་དག་པ་ཉིད་དེ། ཤེས་པ་མེད་པ་དག་ནི་མ་འོངས་པའི་དུས་སུ་སངས་རྒྱས་སུ་འགྱུར་ཞིང་ཆོས་འཆད་པར་མི་འགྱུར་རོ་ཞེས་བསྟན་ཏོ། །མདོ་ལས། བདག་ནི་སུམ་ཅུ་རྩ་གཉིས་མཚན་ལས་ཉམས། །ཞེས་པ་ནས་བདག་རྨོངས་སོ་ཞེས་པའི་བར་དུ་འདི་མན་ཆད་ཚིགས་བཅད་ཕྱེད་དང་དྲུག་གིས་ཆོས་ཆེན་པོ་ལས་ཉམས་པས་འགྱོད་པ་བསྟན་པ་སྟེ་འདི་ལ་ཡང་རྣམ་པ་གཉིས་སུ་དབྱེའོ། །དེ་ལ་ཡང་ཚིག་ཕྱེད་དང་བཞིས་ནི་ཆོས་ཆེན་པོ་གང་ཉམས་པ་བསྟན་ཏེ། ཚིགས་བཅད་གཉིས་ཀྱིས་ནི་བདག་འགྱོད་པ་བསྟན་ཏོ། །ཆོས་གང་ཉམས་པ་བསྟན་པ་ལ་ཡང་རྣམ་པ་གཉིས་སུ་དབྱེ་སྟེ། ཐོག་མའི་ཚིགས་བཅད་གཉིས་ཀྱིས་ནི་ཕྱི་ནང་གི་
མཚན་གྱིས་བརྒྱན་པའི་ཡོན་ཏན་བསྟན་ཏོ། །ཚིག་ཕྱེད་དང་གཉིས་ཀྱིས་ནི་གྲགས་པ་དང་རྙེད་པའི་ཡོན་ཏན་བསྟན་ཏོ། །མཚན་གྱིས་བརྒྱན་པ་ལ་ཡང་རྣམ་པ་གཉིས་ཏེ། ཚིགས་བཅད་གཅིག་གིས་ནི་མཚན་རྫོགས་པས་བདུད་བཏུལ་བའི་ཡོན་ཏན་བསྟན་ཏོ། །ཚིགས་བཅད་གཅིག་གིས་ནི་དཔེ་བྱད་རྫོགས་པས་མ་འདྲེས་པའི་ཡོན་ཏན་བསྟན་པ་སྟེ། འདིར་ནི་མཚན་རྫོགས་པའི་ཡོན་ཏན་ནོ། །མཚན་སུམ་ཅུ་རྩ་གཉིས་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཆེན་པོ་ལས་རྒྱས་པར་བཤད་པ་བཞིན་ནོ། །མདོ་ལས། ཐུབ་པ་ཆེན་པོའི་དཔེ་བྱད་བཟང་པོ་གང༌། །ཞེས་པ་ནས། དེ་ལས་བདག་ཅག་ཉམས་ཤིང་ཆེས་བསླུས་སོ། །ཞེས་པའི་བར་དུ་ནི་དཔེ་བྱད་བཟང་པོ་རྫོགས་པས་མ་འདྲེས་པའི་ཡོན་ཏན་བསྟན་པ་སྟེ། དཔེ་བྱད་བཟང་པོ་བརྒྱད་ཅུ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཆེན་པོ་ལས་རྒྱས་པར་བཤད་པ་བཞིན་ནོ། །སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱང་འགྲེལ་བ་ལས་རྒྱས་པར་བཤད་པ་བཞིན་ཏེ། ཐེག་པ་ཆུང་དུ་གཉིས་ལ་མེད་པས་མ་འདྲེས་པ་ཞེས་བྱའོ། །མདོ་ལས། འཇིག་རྟེན་ཕན་པ་ཐུགས་བརྩེ་ཁྱོད་མཐོང་ནས། །ཞེས་པ་ནས། ཀྱེ་མ་བདག་ནི་བསླུས་ཞེས་རྣམ་པར་སེམས། །ཞེས་པའི་བར་དུ་ནི་གྲགས་པ་དང་རྙེད་པའི་ཡོན་ཏན་བསྟན་ཏོ། །དེ་ལྟར་བདག་བསླུས་པས་སངས་རྒྱས་ཀྱི་ཡོན་ཏན་ལས་ཉམས་ཏེ་ཆུང་ངུས་ཆོག་པར་འཛིན་ཏོ། །མདོ་ལས། མ་ཆགས་ཡེ་ཤེས་བསམ་གྱིས་མི་ཁྱབ་ལས། །ཞེས་པ་ནས། །རྣམ་པར་འདྲེས་པས་བསྟན་པའོ། །ཞེས་པའི་བར་དུ་ནི་བདག་འགྱོད་པ་བསྟན་པ་སྟེ། དེ་ལ་ཚིགས་བཅད་གཅིག་གིས་ནི་ཐེག་པ་ཆེན་པོ་ལས་ཉམས་མ་ཉམས་ཞེས་དྲིས་པའོ། །ཚིགས་བཅད་གཅིག་གིས་ནི་བདག་རྟག་ཏུ་སངས་རྒྱས་མཐོང་ཡང་བྱང་ཆུབ་སེམས་དཔའ་ལ་ནི་བསྔགས་ཤིང་བསྟོད་ཀྱི་བདག་ཅག་ལ་མ་བསྟོད་དོ་སྙམ་སེམས་པའོ། །མདོ་ལས། སངས་རྒྱས་གསུང་འདི་བདག་གིས་ཐོས་པ་ནི། །ཞེས་པ་ནས། བྱང་ཆུབ་སྙིང་པོར་གསུང་ཞེས་པའི་བར་དུ་འདི་མན་ཆད་ཚིགས་བཅད་བཅུ་བཞིས་ནི་ཐོས་ནས་དགའ་བས་མྱ་ངན་ཟད་པ་བསྟན་ཏེ། དེ་ལ་གཉིས་སུ་དབྱེའོ། །ཚིག་ཕྱེད་དང་བཅུ་གསུམ་གྱིས་ནི་ཐེ་ཙོམ་དང་མྱ་ངན་བསལ་བ་བསྟན་ཏོ། །ཚིག་ཕྱེད་དང་གཉིས་ཀྱིས་ཤིན་ཏུ་བདེ་བ་ཐོབ་པ་བསྟན་
ཏོ། །སྔ་མ་ལ་གཉིས་ཏེ། ཚིག་ལྔས་ནི་སྔོན་གྱི་མྱ་ངན་ཟད་པ་བསྟན་ཏོ། །ཚིག་ཕྱེད་དང་བརྒྱད་ཀྱིས་ནི་ད་ལྟར་གྱི་ཐེ་ཚོམ་དུ་གྱུར་པ་བསྟན་ཏོ། །སྔ་མ་ལ་ཡང་གཉིས་ཏེ་ཚིག་གཅིག་གིས་ནི་ཅིའི་ཕྱིར་ཐེ་ཚོམ་བསལ་བ་བསྟན་ཏོ། །ཚིག་བཞིས་ནི་ཐེ་ཚོམ་བསལ་བ་དངོས་བསྟན་ཏོ། །འདིར་ནི་ཆོས་ཐོས་པས་མྱ་ངན་ཟད་པ་བསྟན་ཏོ། །སངས་རྒྱས་ཀྱིས་གསུངས་པ་འདི་ཐོས་པས་ཟག་པ་མེད་པའི་ཡེ་ཤེས་དཔག་དཀའ་བ་བྱང་ཆུབ་ཀྱི་སྙིང་པོར་འགྱུར་བ་ཐོས་པས་མྱ་ངན་དང་བྲལ་ཏེ། མྱ་ངན་དང་བྲལ་བས་ཟག་པ་མེད་པ་ཞེས་བྱའོ། །མདོ་ལས། སྔོན་ཆད་བདག་ནི་ལྟ་ལ་ཆགས་གྱུར་པ། །ཞེས་པ་ནས། བདག་གིས་སྟོང་པ་ཉིད་ཀྱི་ཆོས་ཐོབ་སྟེ། །ཞེས་པའི་བར་འདི་མན་ཆད་ཚིག་བཞིས་མྱ་ངན་བསལ་བ་བསྟན་ཏེ། དེ་ལ་ཡང་གཉིས་སུ་དབྱེའོ། །ཚིག་ཕྱེད་དང་གཉིས་ཀྱིས་ནི་སྔོན་ངན་པར་ལྟ་བ་ལས་ཕྱིས་ཡང་དག་པར་གྱུར་པ་བསྟན་ཏོ། །ཚིག་ཕྱེད་དང་གསུམ་གྱིས་ནི་ད་ཐེག་པ་ཆུང་ངུར་རྟོགས་ནས་ཐེག་པ་ཆེན་པོ་ལ་འཇུག་པ་བསྟན་ཏོ། །འདིར་ནི་ངན་པར་ལྟ་བ་ལས་ཡང་དག་པར་ལྟ་བ་བསྟན་པ་སྟེ། སྔོན་མུ་སྟེགས་ཅན་གྱིས་སྟོན་པ་ལས་འཁོར་བརྒྱ་དང་བཅས་ཏེ་སངས་རྒྱས་ཀྱི་བསྟན་པ་ལ་རབ་ཏུ་བྱུང་ནས་གང་ཟག་ལ་བདག་མེད་པར་ཆུད་དེ་དགྲ་བཅོམ་པར་གྱུར་པས་སྟོང་པ་ཉིད་ཀྱི་ཆོས་ཐོབ་ཅེས་བྱའོ། །མདོ་ལས། དེ་ཕྱིར་བདག་ནི་མྱ་ངན་འདས་སྙམ་བགྱིད། །མྱ་ངན་འདས་ཞེས་བྱ་བ་དེ་མ་ལགས། །ཞེས་བྱ་བ་ནི་ཐེག་པ་ཆུང་ངུར་རྟོགས་ནས་ཐེག་པ་ཆེན་པོ་ལ་འཇུག་པ་བསྟན་པ་སྟེ། དེ་ལ་ཡང་གཉིས་སོ། །ཚིག་གཅིག་ནི་ཐེག་པ་ཆུང་ངུར་རྟོགས་པ་དང་ཚིག་གཅིག་ནི་ཆེན་པོ་ལས་ཉམས་པ་ཞེས་བྱའོ། །མདོ་བས། ནམ་ཞིག་སངས་རྒྱས་སེམས་ཅན་གཙོར་གྱུར་ཏེ། །ཞེས་པ་ནས། གསུང་ཐོས་དེ་རིང་བདག་ནི་མྱ་ངན་འདས། །ཞེས་པའི་བར་དུ་ནི་ཡང་དག་པའི་འགོག་པ་རྟོགས་ཤིང་མངོན་པར་བྱང་ཆུབ་པ་བསྟན་ཏེ། མཚན་དམ་པས་སྐུ་བརྒྱན་པས་སེམས་ཅན་མང་པོ་འདུ་བའི་གནས་སུ་གྱུར་པ་ཉིད་སྐྱེ་བ་རྣམ་པ་གཉིས་སྤངས་ཤིང་ཟག་པ་མེད་པ་བརྙེས་པའི་ཕྱིར་ཐེག་པ་ཆེན་པོ་མྱ་ངན་ལས་འདས་པ་ཐོབ་པོ། །མདོ་ལས། གང་ཚེ་བདག་ནི་བྱང་ཆུབ་མཆོག་ལུང་བསྟན། །ཞེས་པ་ནས། བདག་ནི་བག་ཚ་བ་ཡི་མཐུ་སྐྱེས་པ། །ཞེས་པའི་བར་དུ་ནི་འདི་མན་ཆད་ཚིགས་སུ་བཅད་པ་ཕྱེད་དང་བརྒྱད་ལ་
བག་ཚ་བའི་ཐེ་ཚོམ་བསལ་བ་བསྟན་ཏེ། སྔར་ཚིགས་བཅད་གཅིག་གིས་ཐེ་ཚོམ་གྱི་གཞི་གླེང་པ་བསྟན། དེའི་འོག་མས་ནི་ཐེ་ཚོམ་བསལ་བའི་གཏན་ཚིགས་བསྟན། དེའི་འོག་མ་གཞན་གྱིས་ནི་དངོས་སུ་ཐེ་ཙོམ་བསལ་བ་བསྟན་ཏེ་འདི་ནི་དང་པོའོ། །མདོ་ལས། ཐོག་མར་རྣམ་པར་འདྲེན་གྱི་གསུང་ཐོས་ནས། །ཞེས་པ་ནས། གང་ཚེ་རྒྱུ་དང་གཞི་ཡི་རྣམ་པ་དང༌། །ཞེས་པའི་བར་དུ་ནི་ཐེ་ཚོམ་དངོས་སུ་བསལ་བ་བསྟན་ཏེ། དེ་ལ་ཡང་དང་པོའི་ཚིགས་བཅད་འདིས་ནི་ཐེ་ཙོམ་སྐྱེ་བའི་གཏན་ཚིགས་བསྟན། འོག་མ་ཕྱེད་དང་དྲུག་གིས་ནི་ཐེ་ཙོམ་དངོས་སུ་བསལ་བ་བསྟན་ཏོ། །སྔོན་བཅོམ་ལྡན་འདས་ཀྱིས་ཐེག་པ་རྣམ་པ་གསུམ་བཤད་དེ། དེ་སོ་སོའི་འབྲས་བུ་ཡང་ཐོབ་པའི་རྗེས་ལ་ད་ཐེག་པ་གཅིག་གོ་ཞེས་གསུངས་པ་འདི་སྔར་གསུངས་པ་དང་མི་འགལ་བའི་ཕྱིར་གཞུང་ལ་ཐེ་ཚོམ་མེད་ཀྱང་སྨྲ་བའི་ཚིག་འདི་བདུད་ཀྱིས་བཤད་པ་མ་ཡིན་ན་མ་ཞེས་ཐེ་ཚོམ་དུ་གྱུར་པའོ། །མདོ་ལས། དཔེ་རྣམས་བྱེ་བ་ཁྲག་ཁྲིག་སྙེད་ཀྱིས་བསྟན། །ཞེས་པ་ནས། དེ་ནས་བདག་ནི་ཆོས་ཐོས་ཐེ་ཚོམ་བྲལ། །ཞེས་པའི་བར་དུ་ནི་ཐེ་ཚོམ་དང་བྲལ་བ་དང་དངོས་སུ་བསྟན་པ་སྟེ། འདི་མན་ཆད་ཐབས་མཁས་པས་དཔེ་དང་དོན་གསལ་བའི་ཕྱིར་ཐེ་ཚོམ་དང་བྲལ་བ་དང༌། དུས་གསུམ་གྱི་དེ་བཞིན་གཤེགས་པ་ཐབས་མཁས་པ་སྟོན་པ་མཐུན་པའི་ཕྱིར་ཐེ་ཚོམ་དང་བྲལ་བ་དང༌། དེ་བཞིན་གཤེགས་པའི་གསུང་རབ་དང༌། བདུད་ཀྱི་ཚིག་དང་མི་མཐུན་པའི་ཕྱིར་ཐེ་ཚོམ་དང་བྲལ་བ་སྟེ། འདི་ནི་དང་པོའོ། །བཅོམ་ལྡན་འདས་ཆོས་སྟོན་པ་ཡང་དཔེའི་སྒོ་ནས་ཆོས་སྟོན་པ་དང༌། དོན་དངོས་སུ་བསྟན་པའི་ཕྱིར་ཆོས་སྟོན་པ་ལ་དཔེ་དང་དོན་དུ་སྦྱར་བ་ལ་མི་འགལ་བའི་ཕྱིར་ཐེ་ཚོམ་དང་བྲལ་བའོ། །མདོ་ལས། དེ་ལྟར་བདག་ལ་སངས་རྒྱས་བྱེ་བ་སྟོང༌། །ཞེས་པ་ནས། ཤིན་ཏུ་སྟོན་པར་འགྱུར་ཞིང་ད་ལྟར་འཆད། །ཞེས་པའི་བར་དུ་ནི་འདིས་དུས་གསུམ་གྱི་དེ་བཞིན་གཤེགས་པ་ཐབས་མཁས་པས་ཆོས་སྟོན་པ་ལ་ལུགས་མཐུན་པ་སྟོན་ཏེ། ཚིག་དང་པོ་ནི་འདས་པ་དང་སྦྱར། དེའི་འོག་མ་ནི་མ་འོངས་པ་དང་ད་ལྟར་གྱི་དང་སྦྱར་ཏེ། དུས་གསུམ་གྱི་དེ་བཞིན་གཤེགས་པ་ཆོས་སྟོན་པ་ལ་དྲང་བ་དང་ངེས་པའི་དོན་སྟོན་པ་གཞུང་
ལུགས་མཐུན་པའི་ཕྱིར་ཐེ་ཚོམ་དང་བྲལ་བའོ། །མདོ་ལས། དེ་ལྟར་ཁྱོད་ནི་སྤྱོད་པ་ཅི་འདྲ་བ། །ཞེས་པ་ནས། ཆོས་ཀྱི་འཁོར་ལོ་ཅི་འདྲ་ཁྱོད་ཀྱིས་མཁྱེན། །ཞེས་པའི་བར་དུ་ནི་དུས་གསུམ་གྱི་སངས་རྒྱས་ཀྱང་མཚུངས་པའི་སྒོ་ནས་ཐེ་ཚོམ་བྲལ་བ་སྟོན་ཏེ། དང་པོ་བལྟམས་པ་དང་ཁབ་ནས་བྱུང་བའི་བར་དུ་ནི་སྐུའི་སྤྱོད་པ་བསྟན་ཏོ། །འཕགས་པའི་ལམ་བརྙེས་པས་ནི་ཐུགས་ཀྱི་སྤྱོད་པ་བསྟན་ཏོ། །ཆོས་ཀྱི་འཁོར་ལོ་བསྐོར་བས་ནི་གསུང་གི་སྤྱོད་པ་བསྟན་ཏོ། །དེ་ལྟར་སྟོན་བ་ལ་འཁྲུལ་པ་དང་འགལ་བ་མེད་པའི་ཕྱིར་ཐེ་ཚོམ་བསལ་ཏོ། །མདོ་ལས། ཇི་ལྟར་ཁྱོད་ཀྱིས་ཆོས་བཤད་གནས་པ་ལས། །ཞེས་པ་ནས། བདག་ཉིད་དེ་ལྟར་སེམས་ལ་ཐེ་ཚོམ་སྐྱེས། །ཞེས་པའི་བར་དུ་ནི་དེ་བཞིན་གཤེགས་པའི་གསུང་རབ་དང༌། བདུད་ཀྱི་ཚིག་མི་འདུ་བ་ལས་ཐེ་ཚོམ་དང་བྲལ་བ་བསྟན་ཏོ། །མདོ་ལས། གང་ཚེ་འཇམ་ཞིང་ཟབ་མོ་སྙན་པ་ཡི། །ཞེས་པ་ནས། ཐེ་ཚོམ་དང་བྲལ་ཡེ་ཤེས་གནས། །ཞེས་པའི་བར་དུ་ནི་འདིས་ཉོན་མོངས་པ་ཟད་པས་དགའ་བ་སྐྱེ་བ་བསྟན་ཏེ། ཐུགས་རྗེས་འདྲེན་པའི་གསུང་ནི་འཇམ་པའོ། །འབྲུག་སྒྲ་ལྟ་བུས་རྒྱང་དུ་ཐོས་པར་བྱེད་པ་ནི་ཟབ་པའོ། །ཀ་ལ་པིང་ཀའི་སྒྲ་ལྟ་བུ་ཡིད་དུ་འོང་བ་ནི་སྙན་པའོ། །དྲང་བའི་དོན་བསལ་ཏེ་ངེས་པའི་དོན་ལ་གནས་པ་ནི་ཡེ་ཤེས་ལ་གནས་པའོ། །མདོ་ལས། དེ་བཞིན་གཤེགས་པར་བདག་འགྱུར་ཐེ་ཚོམ་མེད། །ཞེས་པ་ནས། བྱང་ཆུབ་སེམས་དཔའ་མང་པོ་ཡང་དག་འཛུད། །ཞེས་པའི་བར་དུ་ཐེག་པ་ཆེན་པོ་ལ་ཕྱོགས་པའི་རྒྱུ་ཆེན་པོ་བསྐྱེད་པས་སངས་རྒྱས་སུ་འགྲུབ་ཅིང་ལྷ་དང་མི་ལ་སོགས་པས་མཆོད་པ་དང། བྱང་ཆུབ་སེམས་དཔའ་མང་པོ་བླ་ན་མེད་པའི་གནས་སུ་འཇོག་པར་འགྱུར་བ་བསྟན་པའོ། །མདོ་ལས་དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ་ཞེས་པ་ནས་ངའི་རྗེས་སུ་སློབ་པར་གྱུར་ཏོ་ཞེས་པའི་བར་དུ་འདི་མན་ཆད་འཕགས་པ་ཤཱ་རིའི་བུའི་སྔོན་གྱི་སྤྱོད་པ་བསྟན་པ་དང་ད་ལྟར་དེ་བཞིན་གཤེགས་པ་དང་ཕྲད་པ་དང༌། ཕྱིས་ཀྱང་ཡང་དག་པ་ཉིད་ལ་གནས་པར་འགྱུར་བ་སྟོན་པ་ལ་འདི་ནི་དང་པོའོ། །ཤཱ་རིའི་བུ་སྔོན་སངས་རྒྱས་བྱེ་བ་ཁྲག་ཁྲིག་མང་པོའི་ཐད་དུ་བྱང་ཆུབ་སེམས་དཔའི་སྤྱོད་པ་སྤྱད་པ་ལས་བྲམ་ཞེས་མིག་
བསླངས་ཏེ། མིག་བྱིན་པ་དང༌། མིག་ས་ལ་བརྫིས་ཏེ་དོན་མེད་པར་བྱས་པ་དང༌། སེམས་ཆེན་པོ་ལས་ནུར་ཏེ་ཐེག་པ་ཆུང་དུ་ལ་ཞུགས་པ་སྔོན་གྱི་སྤྱོད་པ་བསྟན་པའོ། །མདོ་ལས་ཤཱ་རིའི་བུ་ཁྱོད་བྱང་ཆུབ་སེམས་དཔའི་མན་ངག་དང་ཞེས་པ་ནས་པའི་གསུང་རབ་འདི་ལས་སྐྱེས་པར་གྱུར་ཏོ་ཞེས་པའི་བར་དུ་ནི་ད་ལྟར་གྱི་དུས་ནས་སངས་རྒྱས་དང་ཕྲད་པ་བསྟན་ཏེ། སྔོན་སྤྱོད་པ་ཆེན་པོ་ལས་ཉམས་པ་དང་ཐབས་ཀྱིས་བསྒྱུར་ཏེ་སྟོང་པ་ཟག་པ་མེད་པའི་ཡེ་ཤེས་རྟོགས་ཤིང་ཐེག་པ་ཆེན་པོའི་ཆོས་ལ་གནས་པར་གྱུར་པ་འདི་ཉིད་དེ་བཞིན་གཤེགས་པའི་གསུང་དེ་ལས་སྐྱེས་པའོ། །མདོ་ལས་ཤཱ་རིའི་བུ་ཁྱོད་འདི་ལྟར་ཞེས་པ་ནས་མྱ་ངན་ལས་འདས་སོ་སྙམ་དུ་སེམས་ཏེ་ཞེས་པའི་བར་དུ་ནི་ཕྱིས་ཡང་དག་པ་ཉིད་ལ་གནས་པར་འགྱུར་བ་བསྟན་ཏེ། མི་དྲན་ནས་ཞེས་པ་ནི་དྲང་བའི་དོན་ལ་བརྟེན་ཅིང་ངེས་པའི་དོན་བརྗོད་པའོ། །འཕགས་པ་ཉན་ཐོས་པའི་ཡེ་ཤེས་དང་མྱ་ངན་ལས་འདས་པ་ཉིད་མཐར་ཕྱིན་པའི་གནས་ཙམ་དུ་གནས་ཤིང་ཐེག་པ་ཆེན་པོའི་ཡེ་ཤེས་དང་མྱ་ངན་ལས་འདས་པ་མི་འགྲུབ་པའོ། །མདོ་ལས་ཤཱ་རིའི་བུ་ངས་ཁྱོད་ཀྱི་སྤྱོད་པ་དང་ཞེས་པ་ནས་ཉན་ཐོས་པ་རྣམས་ལ་ཡང་དག་པར་བསྟན་ཏོ་ཞེས་པའི་བར་དུ་སྔོན་ཐེག་པ་ཆེན་པོ་སྤྱོད་པའི་སེམས་དྲན་པ་དང་བསྐུལ་བ་སྟེ། དམ་པའི་ཆོས་དང་བསམ་གྱིས་མི་ཁྱབ་པ་བྱང་ཆུབ་སེམས་དཔའ་ལ་གདམས་པ་དང༌། སངས་རྒྱས་ཀྱིས་ཡོངས་སུ་གཟུང་བ་ནི་མདོ་སྡེ་འདི་ཉིད་ཀྱི་རྣམ་གྲངས་ཏེ། འདི་ཐེག་པ་ཆེན་པོ་ལ་འཇུག་པའི་ཐབས་དང་སྤྱོད་པ་ཐོབ་པར་འགྱུར་བ་བསྟན་ཏོ། །མདོ་ལས་ཤཱ་རིའི་བུ་ཁྱོད་ནི་འདི་ལྟར་མ་འོངས་པའི་དུས་ཞེས་པ་ནས་འདི་དག་ཡོངས་སུ་རྫོགས་པར་བྱས་ནས་ཞེས་པའི་བར་དུ་ནི་འདི་མན་ཆད་དུམ་བུ་བཞིར་དབྱེ་སྟེ། སྔར་ལུང་བསྟན་པ་དང༌། ལྷ་དང་མིས་མཆོད་ཅིང་བསྟོད་པའོ། །དང་པོ་ལ་ཡང་གཉིས་ཏེ། རྒྱུའི་སྒོ་ནས་ལུང་བསྟན་པ་དང༌། འབྲས་བུའི་སྒོ་ནས་ལུང་བསྟན་པའོ། །དེའི་དང་པོ་ལ་ཡང་བཞི་སྟེ། བསྐལ་པ་ཚད་མེད་ཅེས་པ་ནི་དུས་བསྟན་པའོ། །དེ་བཞིན་གཤེགས་པ་བྱེ་བ་ཁྲག་ཁྲིག་ཅེས་པ་ནི་བཤེས་གཉེན་དམ་པ་བསྟན་པའོ། །དམ་པའི་ཆོས་འཛིན་པ་དང༌། སེམས་ཅན་མང་པོ་ལ་ཕན་པ་སྣ་ཚོགས་བྱས་ནས་བླ་ན་མེད་པའི་
སངས་རྒྱས་སུ་འགྲུབ་ཅེས་པའོ། །མདོ་ལས་པད་མོའི་འོད་ཅེས་བྱ་བ་ཞེས་པ་ནས་འཇིག་རྟེན་དུ་འབྱུང་ངོ་ཞེས་པའི་བར་དུ་ནི་འབྲས་བུ་དངོས་སུ་ལུང་བསྟན་པ་སྟེ། དེ་ཡང་ཚིག་རྐྱང་པ་དང་ཚིགས་སུ་བཅད་པ་དབྱེའོ། །ཚིག་རྐྱང་པ་ལ་ཡང་རྣམ་པ་དྲུག་སྟེ། ནང་གི་ཡོན་ཏན་ཕུན་སུམ་ཚོགས་པ་དང། ཕྱིའི་ཞིང་རྒྱན་དམ་པ་དང་ལྡན་པ་དང༌། ཆོས་སྟོན་པའི་ལུགས་གཅིག་པ་དང་བསྐལ་བའི་མིང་མི་མཐུན་པ་དང༌། འཁོར་བཟང་ངན་དང་ཆོས་གནས་པའི་ཡུན་རིང་ཐུང་དང་དྲུག་ལས་འདི་ནི་དང་པོའོ། །སངས་རྒྱས་ཀྱི་མཚན་འདོགས་པ་ཡང་ལ་ལ་ནི་སྔོན་གྱི་སངས་རྒྱས་མཐོང་བ་ལས་དྲས་ཏེ་མཚན་བཏགས་པ་དང་སེམས་བསྐྱེད་པའི་སྒོ་དང༌། མཚན་མ་ལས་མཚན་འདོགས་པ་དང༌། ཡུལ་དང་སེམས་ཅན་གྱི་དོན་མཛད་པ་ལས་མཚན་འདོགས་པ་སྟེ། འཕགས་པ་ཤཱ་རིའི་བུ་མངོན་པར་བྱང་ཆུབ་པའི་མཚན་པདྨོའི་འོད་ཅེས་བཏགས་པ་ནི་མེ་ཏོག་གི་ཆར་བ་བཅིང་འོད་ཀྱིས་སྣང་བར་མཛད་པས་དེ་བཞིན་གཤེགས་པ་པདྨོའི་ཡེ་ཤེས་འོད་ཀྱིས་སྣང་བར་མཛད་པ་ལས་པདྨོའི་འོད་ཅེས་གདགས་པ་དང༌། དམ་པའི་ཆོས་ཀྱི་རོ་མྱོང་བས་ཡེ་ཤེས་ཀྱི་འོད་ཤར་ཏེ། ཐེག་པ་རྣམ་པ་གཉིས་ལ་སྣང་བར་མཛད་པའི་པདྨོའི་འོད་ཅེས་བཏགས་སོ། །དེ་ལ་ལུང་སྟོན་པ་ཡང་རྣམ་པ་བཞི་སྟེ། ཅིའི་ཕྱིར་ལུང་སྟོན་པ་དང༌། སུས་ལུང་སྟོན་པ་དང༌། དོགས་པ་བསལ་བ་དང་བཞིའོ། །ཅིའི་ཕྱིར་ལུང་བསྟན་པ་ཡང་རྣམ་པ་ལྔ་སྟེ། འཕགས་པ་ཉན་ཐོས་པའི་རྣམས་ངེས་པའི་སེམས་བསྐྱེད་པ་སྟེ། ཉན་ཐོས་པའི་ཆོས་ཉིད་མ་ཡིན་པ་དང༌། བདག་མེད་པ་དང་རྣམ་གཉིས་ཉན་ཐོས་པས་ཆུད་པར་བྱ་བ་མ་ཡིན་པར་སེམས་པ་དག་སེམས་ངེས་པས་ཐེག་པ་ཆེན་པོ་ལ་བཞུགས་པའི་ཕྱིར་ལུང་བསྟན་པ་དང༌། དེ་བཞིན་གཤེགས་པའི་ཆོས་ཀྱི་སྐུ་མཉམ་པ་ཉིད་འདུས་བྱས་ཀྱི་དབྱེ་བ་ཙམ་དུ་ཟད་ཀྱི་ཐེག་པ་རྣམ་གསུམ་ཡང་དག་པའི་གཞུང་མི་མཐུན་པ་མེད་པར་ལུང་བསྟན་པ་དང༌། བྱང་ཆུབ་སེམས་དཔའ་འཕགས་པ་ཉན་ཐོས་པ་རྣམས་ཐེག་པ་ཆེན་པོའི་མྱ་ངན་ལས་འདས་པ་གཏན་མི་འཐོག་པ་ཙམ་དུ་སེམས་པའི་ཐེ་ཚོམ་བཅད་པའི་ཕྱིར་ལུང་བསྟན་པ་དང༌། ལུང་བསྟན་པ་འདིས་ཀུན་ལ་སངས་རྒྱས་སུ་འགྲུབ་པའི་རྒྱུ་ཡོད་པར་བསྟན་པས་སངས་རྒྱས་ཀྱི་སྤྱོད་པ་ལ་མང་པོ་གཟུད་པའི་ཕྱིར་ལུང་བསྟན་
པ་དང། ཐེག་པ་གཅིག་པོ་འདི་རྟོགས་པས་ལུང་བསྟན་པ་དང་ལྔའོ། །སུས་ལུང་སྟོན་པ་ནི་རྣམ་པ་གསུམ་དུ་དབྱེ་སྟེ། ཅི་ལ་གནས་པ་དང་ལུང་སྟོན་པའི་རང་བཞིན་དང༌། ལུང་སྟོན་པའི་ལས་སོ། །ཅི་ལ་གནས་ཏེ་ལུང་སྟོན་པ་ནི་ལུང་སྟོན་པ་རྣམ་པ་དྲུག་ལས། ལྔ་ནི་བཅོམ་ལྡན་འདས་ཉག་གཅིག་གིས་མཁྱེན་ཅིང་ལུང་སྟོན། གཅིག་ནི་བྱང་ཆུབ་སེམས་དཔས་ལུང་སྟོན་ཏེ། དེ་བཞིན་གཤེགས་པས་ལུང་སྟོན་པ་ལྔ་ནི་བྱེ་བྲག་ཏུ་ལུང་སྟོན་པ་དང༌། མཐུན་པར་ལུང་སྟོན་པ་དང༌། ཕྱིས་ལུང་སྟོན་པ་དང༌། བཀོལ་བ་མེད་པའི་ལུང་སྟོན་པ་དང༌། སྤྱོད་པ་ལས་ལུང་སྟོན་པའོ།། བྱང་ཆུབ་སེམས་དཔས་ནི་རྒྱུ་དང་ལྡན་པ་ཙམ་ལ་ལུང་སྟོན་ཏེ། །ཇི་ལྟར་རྟག་ཏུ་མི་བརྙས་བྱང་ཆུབ་སེམས་དཔའ་སེམས་ཅན་ཐམས་ཅད་དེ་བཞིན་གཤེགས་པའི་རང་བཞིན་ཅན་ནོ་ཞེས་ལུང་སྟོན་པ་སྟེ། ལུང་སྟོན་པར་ནུས་པ་དེ་གཉིས་ལས་གཞན་མེད་དོ་ཞེས་པའོ། །ལུང་སྟོན་པའི་རང་བཞིན་ནི་ཕྱིས་ཐོབ་པའི་ཡེ་ཤེས་དང༌། ཀུན་རྫོབ་ཀྱི་ཡེ་ཤེས་སོ། །ལུང་སྟོན་པའི་ལས་ནི་ཚིག་གིས་སྤྱོད་པ་སྟེ། སྤྲུལ་པའི་སྐུ་ལ་སོགས་པ་ལ་ལྡན་པ་དང་བཅས་པའོ། །སུས་ལུང་སྟོན་པ་ནི་གང་ལ་བརྟེན་པ་དང་རང་བཞིན་ནོ། །གང་ལུང་བསྟན་པར་བྱ་བ་ཉིད་གང་ལ་བརྟེན་པ་སྟེ། ལུང་བསྟན་པར་བྱ་བ་རྣམ་པ་དྲུག་ལ། འཕགས་པ་ཤཱ་རིའི་བུ་ལ་སོགས་པ་ཉན་ཐོས་ཆེན་པོ་བཞི་སོ་སོར་ཕྱེ་སྟེ་ལུང་བསྟན་པ་དང༌། འཕགས་པ་གང་པོ་ལ་སོགས་པ་དགེ་སློང་ལྔ་བརྒྱ་མཚན་གཅིག་པ་ལ་སོགས་པ་སྤྱིར་མཐུན་པར་ལུང་བསྟན་པ་དང༌། སློབ་པ་དང་མི་སློབ་པ་ལ་སོགས་པ་དབང་པོ་ཞན་པ་རྣམས་ཕྱིས་ལུང་བསྟན་པ་དང༌། ལྷས་བྱིན་ལྟ་བུ་ལུང་བསྟན་པས་བཀོལ་བ་མེད་པར་ལུང་བསྟན་པ་དང༌། སྤྱོད་པ་ལས་ལུང་བསྟན་པ་སྟེ། དགེ་སློང་མ་དང་ལྷའི་བུ་མོ་ལ་སོགས་པ་ལུང་བསྟན་པ་དང༌། རྒྱུ་དང་ལྡན་པ་ཙམ་ལས་ལུང་བསྟན་པ་སྟེ། སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་ལུང་བསྟན་པ་སྟེ། ཞིབ་ཏུ་མདོ་འདི་ཉིད་ཀྱི་སོ་སོའི་ལེའུ་ལས་འབྱུང་བ་བཞིན་དུ་སྦྱར་རོ། །དོགས་པ་བསལ་བ་ནི་འཕགས་པ་ཉན་ཐོས་པ་རྣམས་ལུང་བསྟན་པ་ངེས་པར་སངས་རྒྱས་སུ་འགྲུབ་པ་ཡིན་ནམ། ཐབས་ཀྱིས་བསྟན། དེ་སྟེ་ངེས་པར་འགྲུབ་པ་ཡིན་ན་ནི་བྱང་ཆུབ་སེམས་དཔའི་
སྤྱོད་པ་རླབས་པོ་ཆེ་དེ་སྙེད་སྤྱད་ཀྱང་ཅི་དགོས། དེ་སྟེ་ངེས་པར་འགྲུབ་པ་མ་ཡིན་ན་ནི་འགྲུབ་པར་ཅིའི་ཕྱིར་ལུང་བསྟན། དེ་ནི་འཕགས་པ་ཉན་ཐོས་པ་རྣམས་ཐེག་པ་ཆེན་པོར་ངེས་པའི་སེམས་བསྐྱེད་པ་ལ་དགོངས་ཏེ་ལུང་བསྟན་གྱི་གྲུབ་ཟིན་པའི་རང་བཞིན་ལས་ལུང་བསྟན་པ་མ་ཡིན་པ་དང༌། ཡང་དེ་བཞིན་གཤེགས་པས་ཐེག་པ་གསུམ་མཉམ་པ་སྟེ། ཐེག་པ་གཅིག་པོར་བསྡུ་ཞིང་ཆོས་ཀྱི་སྐུ་དང༌། འཕགས་པ་ཉན་ཐོས་པས་ལུས་སུ་ཡང་མཉམ་པ་ཉིད་པས་ལུང་བསྟན་པ་ཡིན་གྱི། སྤྱོད་པ་དང་ཡོན་ཏན་ཐམས་ཅད་རྫོགས་པའི་སྒོ་ནས་ལུང་བསྟན་པ་མ་ཡིན་ནོ། །མདོ་ལས་ཤཱ་རིའི་བུ་དེའི་ཚེ་ན་ཞེས་པ་ནས་ལྷ་དང་མི་མང་པོས་རབ་ཏུ་གང་ཞེས་པའི་བར་དུ་ནི་ཕྱིའི་ཞིང་རྒྱན་དམ་པ་དང་ལྡན་པ་སྟེ། ཞིང་རྣམ་པར་དག་པའོ། །དེ་ལ་ཡང་དགའ་བ་འབའ་ཞིག་གིས་བསྐྱེད་པའི་ཕྱིར་རྡུལ་མེད་པའི་ཕྱིར་ཞིང་ཞེས་བྱ་སྟེ། དྲི་མའི་སྐྱོན་མེད་པའོ། །ང་རྒྱལ་གྱི་སེམས་སྤངས་པས་ན་མཉམ་ཞིང་མཐོ་དམན་མེད་པ་དང༌། སེམས་ཅན་གྱི་སེམས་རྣམ་པར་དག་པ་ཕྱིར་ཞིང་རྣམ་པར་དག་པ་རྒྱན་སྣ་ཚོགས་ཀྱིས་བརྒྱན་པ་དང༌། གསོད་པ་དང་འཕྲོགས་པའི་སེམས་དང་བྲལ་བའི་ཕྱིར་བདེ་བ་སྐྱེད་པ་ནད་དང་མུ་གེ་མེད་པའི་ཞིང་དང༌། སྡིག་པའི་བཤེས་གཉེན་དང་བྲལ་བའི་ཕྱིར་ལྷ་དང་མིས་ཡོངས་སུ་རྒྱས་པའོ། །མདོ་ལས་བཻཌཱུཪྻ་ལས་བྱས་པ་ཞེས་བྱ་བ་ནས་མེ་ཏོག་འབྲས་བུར་ལྡན་ནོ་ཞེས་པའི་བར་དུ་ནི་སེམས་ཀྱི་སྐྱོན་དང་བྲལ་བའི་ཕྱིར་ཞིང་བཻ་ཌཱུཪྻ་ལྟར་རྣམ་པར་དག་པ་སྟོང་པ་བརྒྱད་ལ་གནས་ཤིང་འཕགས་པའི་ལམ་བརྒྱད་སྒྲུབ་པའི་ཕྱིར་གསེར་གྱི་ཐིག་གིས་ཕྱོགས་བརྒྱད་དུ་རེའུ་མིག་བྲིས་པའོ། །གཟུངས་གཞི་ལ་གནས་པའི་ཕྱིར་སྐྱེད་མོས་ཚལ་དང་ལྡན་པ། བྱང་ཆུབ་ཀྱི་ཡན་ལག་བདུན་སྤྱོད་པའི་ཕྱིར་རིན་པོ་ཆེའི་ཤིང་མེ་ཏོག་དང༌། འབྲས་བུར་ལྡན་པའོ། །མདོ་ལས་ཤཱ་རིའི་བུ་པདྨོའི་འོད་དེ་བཞིན་གཤེགས་པ་ཞེས་པ་ནས་ཐེག་པ་གསུམ་ཉིད་བརྩམས་ཏེ་ཆོས་སྟོན་ཞེས་པའི་བར་དུ་ནི་སྔོན་གྱི་དེ་བཞིན་གཤེགས་པ་དང་ཆོས་སྟོན་པའི་ལུགས་མཐུན་པ་བསྟན་པ་སྟེ། དེ་ལ་སྔར་ནི་ལུགས་མཐུན་པ་བསྟན། དེའི་འོག་ཏུ་ནི་དེའི་གཏན་ཚིགས་བསྟན་ཏེ། ཞིང་རྣམ་པར་དག་པ་ཞེས་སྨོས་པ་ཉིད་སྤྲུལ་པའི་ཞིང་དུ་ལྟའོ། །མདོ་ལས་གཞན་ཡང་ཤཱ་རིའི་བུ་ཞེས་པ་ནས་སྨོན་ལམ་གྱི་དབང་གིས་ཆོས་སྟོན་པར་འགྱུར་རོ་ཞེས་པའི་བར་དུ་ནི་
དེའི་གཏན་ཚིགས་བསྟན་ཏེ། ཤཱཀྱ་ཐུབ་པ་དེ་བཞིན་གཤེགས་པ་ཡང་ཐབས་ལ་མཁས་པའི་སྨོན་ལམ་གྱི་དབང་གིས་འཇིག་རྟེན་རྙོག་པའི་དུས་སུ་བྱུང་ཞིང་ཆོས་སྟོན་པ་བཞིན་པདྨོའི་དེ་བཞིན་གཤེགས་པ་ཡང་སྔོན་གྱི་སྨོན་ལམ་གྱི་མཐུ་བཞིན་དྲང་བ་དང་ངེས་པའི་དོན་གྱི་སེམས་ཅན་རྣམས་ལ་ཆོས་སྟོན་ཏོ། །མདོ་ལས་ཤཱ་རིའི་བུ་བསྐལ་བ་དེའི་མིང་ཞེས་པ་ནས་བྱང་ཆུབ་སེམས་དཔའ་རྣམས་ནི་རིན་པོ་ཆེ་ཞེས་བྱ་སྟེ་ཞེས་པའི་བར་དུ་ནི་བསྐལ་པ་མི་མཐུན་པ་བསྟན་པའོ། །མདོ་ལས་དེའི་ཚེ་དེའི་དུས་ཞེས་པ་ནས་མང་པོར་བྱུང་སྟེ་ཞེས་པའི་བར་དུ་ནི་འཁོར་གྱི་ཁྱད་པར་བསྟན་ཏེ། དེ་ཡང་སོ་སོར་སྨོས་པ་དང༌། སྤྱིར་བསྡུ་བ་ལ། དང་པོ་ལ་རྣམ་པ་བཅུ་སྟེ། འདི་ནི་གྲངས་དཔག་ཏུ་མེད་པ་ཇི་ལྟར་ཙན་དན་གྱི་ཚལ་ཙན་དན་གྱིས་བསྐོར་བ་བཞིན་ནོ། །མདོ་ལས་དེ་བཞིན་གཤེགས་པས་བགྲངས་བ་ནི་ཞེས་པ་ནས་རིན་པོ་ཆེའི་པདྨོའི་སྟེང་ནས་འགྲོ་བ་ཞེས་པའི་བར་དུ་ནི་རིན་པོ་ཆེ་པདྨོའི་སྟེང་ནས་འགྲོ་བ་སྟོན་ཏེ། དེ་ཡང་སེམས་རྣམ་པ་དག་པ་དགུ་ལ་རྟག་ཏུ་གནས་པའི་ཕྱིར་ཏེ་རྣམ་པར་དག་པ་དགུ་ནི་ཚུལ་ཁྲིམས་དང་སེམས་དང་ལྡན་པ་དང་ཐེ་ཚོམ་དང་བྲལ་བ་དང་ལམ་ཤེས་པ་དང་སྤྱོད་པ་ཤེས་པ་དང་སྨོན་ལམ་ཤེས་པ་དང༌། མི་དམིགས་པར་འགོག་པ་དང་ཞིང་རྣམ་པར་དག་པ་སྟེ་དགུ་དང་ལྡན་པའི་ཕྱིར་རོ། །དགེ་བའི་རྩ་བ་དམན་པ་ཤེ་དག་པ་ལས་ཐོབ་པ་མ་ཡིན་པའོ། །མདོ་ལས་དགེ་བའི་རྩ་བ་ཡུན་རིང་པོ་ནས་སྤྱད་པ་ཞེས་པ་ནས་དེ་བཞིན་གཤེགས་པས་ཡོངས་སུ་བསྟོད་པ་ཞེས་པའི་བར་དུ་ནི་དེ་ཡང་ཡོན་ཏན་གཉིས་ཏེ། ཡུན་རིང་པོ་ནས་སྨོན་ལམ་ཆེན་པོ་བཏག་པའི་དབང་གིས་ཐོས་པ་ཕུན་སུམ་ཚོགས་ཤིང་མང་པོ་ཀུན་གྱིས་ཤེས་པའི་ཕྱིར་སྟོན་པའོ། །མདོ་ལས་སངས་རྒྱས་ཀྱི་ཡེ་ཤེས་ལ་བརྩོན་པ་ཞེས་པ་ནས་ཞིང་དེ་ཡོངས་སུ་གང་བར་འགྱུར་ཞེས་པའི་བར་དུ་ནི་བླ་ན་མེད་པའི་མོས་པ་དང་ལྡན་པ། སྙིང་རྗེ་ཆེན་པོས་འགྲོ་བ་འདྲེན་པར་སེམས་པ་བསམ་བདག་པས་གཡོ་དང་སྒྱུ་མེད་པ། སེམས་སྤྱོད་པ་ཕྱིར་མ་ནུར་པ་ཉོན་མོངས་པ་མི་བསྐྱོད་པའི་ཕྱིར་དྲན་པ་དང་ལྡན་པ་དག་གིས་ཞིང་དེ་ཡོངས་སུ་གང་ཞེས་སྦྱར་རོ། །མདོ་ལས་ཤཱ་རིའི་བུ་འདི་ལྟར་ཡང་ཞེས་པ་ནས་བསྐལ་པ་བརྒྱད་དུ་འགྱུར་རོ་ཞེས་པའི་བར་དུ་ནི་བཅོམ་ལྡན་འདས་དེའི་བསྟན་པ་གནས་པའི་ཡུན་རིང་ཐུང་ཡོད་པར་བསྟན་ཏེ། དེ་བཞིན་གཤེགས་
པའི་སྐུ་ཚེའི་ཚད་དང་སྐྱེ་བ་དང་སངས་རྒྱས་སུ་གྲུབ་པ་ལུང་བསྟན་པ་དང༌། བསྟན་པ་ཇི་སྲིད་དུ་གནས་པ་བསྟན་པ་ལ་འདི་ནི་དང་པོའོ། །བཅོམ་ལྡན་འདས་ཤཱཀྱ་ཐུབ་པ་ནི་སེམས་ཅན་བསོད་ནམས་དང་ཤེས་རབ་ཆུང་བས་བཅོམ་ལྡན་འདས་ཀྱི་སྐུ་ཚེ་ཡང་ཐུང་བར་བསྟན་པདྨོའི་འོད་དེ་བཞིན་གཤེགས་པའི་ཞིང་ན་སེམས་ཅན་བཅོམ་ལྡན་འདས་ཀྱིས་མ་བསྟན་མ་བཤད་ཀྱང་དགེ་བ་ལ་རབ་ཏུ་རྩོལ་ཞིང་བསོད་ནམས་ཤེས་རབ་ཆེ་བ་ཤ་དག་པས་སྐུ་ཚེ་ཡང་རིང་བ་བསྟན་ཏོ། །མདོ་ལས་ཤཱ་རིའི་བུ་པདྨོའི་འོད་ཅེས་པ་ནས། བྱང་ཆུབ་ཏུ་ལུང་བསྟན་ནས་ཞེས་པའི་བར་དུ་ནི་མ་འོངས་པ་ན་སངས་རྒྱས་སུ་འགྲུབ་པ་བསྟན་པ་སྟེ། དེ་ཡང་དང་པོར་དུས་བསྟན། དེའི་འོག་ཏུ་དངོས་སུ་ལུང་བསྟན། དེའི་འོག་ཏུ་ཞིང་བསྟན་པའོ། །མདོ་ལས་ཡོངས་སུ་མྱ་ངན་ལས་འདས་ཏེ་ཞེས་པ་ནས་འཇིག་རྟེན་དུ་འབྱུང་ངོ་ཞེས་པའི་བར་དུ་དངོས་སུ་ལུང་བསྟན་ཏེ། དམ་པའི་ཆོས་འདི་ཐོས་པས་མངོན་པར་བྱང་ཆུབ་པའི་ཕྱིར་སྟོབས་བརྗིད་པ་པདྨ་འདོར་བ་ཉིད་དུ་ཁྱུ་མཆོག་གི་འགྲོས་ལྟ་བུར་དེ་བཞིན་གཤེགས་པར་འགྱུར་རོ། །མདོ་ལས་ཤཱ་རིའི་བུ་བཞེས་པ་ནས་དེ་དག་འདྲ་བ་ཉིད་དུ་འགྱུར་རོ་ཞེས་པའི་བར་དུ་ནི་དེ་བཞིན་གཤེགས་པ་དེའི་ཞིང་པདྨོའི་དེ་བཞིན་གཤེགས་པའི་ཞིང་དང་འདྲ་བར་རྒྱུ་དམ་པ་ཉིད་ཀྱིས་བསྐྱེད་པའོ། །མདོ་ལས་ཡང་ཤཱ་རིའི་བུ་ཞེས་པ་ནས་གཟུགས་བརྙན་གནས་པར་འགྱུར་རོ་ཞེས་པའི་བར་དུ་ནི་བཅོམ་ལྡན་འདས་མྱ་ངན་ལས་འདས་ནས་དེའི་བསྟན་པ་ཡུན་ཇི་སྲིད་དུ་གནས་པ་སྟོན་ཏེ། ཡང་དག་པའི་བསྟན་པ་ནི་ལུང་དང་སྤྱོད་པ་དང་མངོན་པར་གྲུབ་པ་དང་བཅས་པའོ།། ཆོས་ཀྱི་གཟུགས་བརྙན་ནི་མངོན་པར་གྲུབ་པ་མེད་དེ། ལུང་དང་སྤྱོད་པ་ཙམ་དུ་ཟད་པ་ལ་བསྟན་པ་དེ་ཡང་མེད་པར་གྱུར་བའི་དུས་ན་ལུང་ཉི་ཚེ་བཞུགས་སོ། །བཅོམ་ལྡན་འདས་ཤཱཀྱ་ཐུབ་པའི་བསྟན་པ་ཡང་དག་པ་ནི་ཡུན་ཐུང༌། ཆོས་ཀྱི་གཟུགས་བརྙན་རིང་སྟེ། བུད་མེད་རབ་ཏུ་བྱུང་བ་ལས་ཡང་དག་པའི་བསྟན་པ་ལོ་ལྔ་བརྒྱས་ཐུང་བར་འགྱུར་རོ། །པདྨོའི་འོད་དེ་བཞིན་གཤེགས་པའི་ཡང་དག་པའི་བསྟན་པ་དང༌། ཆོས་ཀྱི་གཟུགས་བརྙན་དུས་མཉམ་པར་གནས་སོ། །མདོ་ལས་དེ་ནས་བཅོམ་ལྡན་འདས་ཀྱིས་ཞེས་པ་ནས་སྲོག་ཆགས་བྱེ་བ་ཕྲག་སྟོང་རྣམ་པར་འདུལ་ཞེས་པའི་བར་དུ་
འདི་མན་ཆད་ཚིགས་བཅད་ཕྱེད་དང་བཅུ་གཅིག་ལ་ཚིགས་བཅད་བཅུས་ནི་གོང་དུ་ལུང་བསྟན་པ་ལ་བཟླས་ཚིག་གཅིག་གིས་ནི་བསྡུས་ཏེ་དབྱེ་བའི་ཚུལ་གོང་མ་དག་དང་འདྲ་བར་སྦྱར་རོ། །ཀུན་དུ་སྤྱན་ཞེས་པ་ནི་ཐམས་ཅད་མཁྱེན་པ་དང་རྣམ་པ་ཐམས་ཅད་མཁྱེན་པ་གཉིས་དང་ལྡན་པའོ། །མདོ་ལས། སངས་རྒྱས་བྱེ་བ་མང་ལ་བཀུར་སྟི་བྱས། །ཞེས་པ་ནས། བྱང་ཆུབ་དམ་པའི་མཆོག་ཀྱང་ཐོབ་པར་འོང༌། །ཞེས་པའི་བར་དུ་ནི་རྒྱུའི་སྒོ་ནས་ལུང་བསྟན་པ་ལ་སྔོན་བཤེས་གཉེན་དམ་པ་ལ་བརྟེན་པ་དང༌། བྱང་ཆུབ་ཀྱི་སྤྱོད་པ་རྫོགས་པར་བྱས་པ་བསྟན་ཏོ། །མདོ་ལས། ཚད་མེད་བསམ་གྱིས་མི་ཁྱབ་བསྐལ་པ་ན། །ཞེས་པ་ནས། །བལྟ་ན་སྡུག་པ་མེ་ཏོག་འབྲས་བུས་བརྒྱན། །ཞེས་པའི་བར་དུ་ནི་སངས་རྒྱས་སུ་འགྲུབ་པ་ཉིད་བསྟན་ཏེ། འདི་མན་ཆད་བསྐལ་པའི་མིང་བསྟན་པ་དང༌། ཞིང་གི་རྒྱན་བསྟན་པ་དང༌། འཁོར་བཟང་ངན་བསྟན་པ་དང༌། སྐུ་ཚེའི་ཚད་བསྟན་པ་ལ་འདི་ནི་དང་པོའི་གཉིས་སོ། །ཕྱིའི་ཞིང་གི་རྒྱན་བསྟན་པ་ཡང་མིང་དང་དག་པའི་མཚན་ཉིད་དང༌། ས་གཞི་དང་ལམ་དང་རིན་པོ་ཆེའི་ཤིང་དང༌། མེ་ཏོག་དང་འབྲས་བུ་ལ་སོགས་པ་བསྟན་པའོ། །མདོ་ལས། དྲན་ལྡན་བྱང་ཆུབ་སེམས་དཔའ་དེ་མ་མང༌། །ཞེས་པ་ནས། དེ་དག་སངས་རྒྱས་ཞིང་དེར་སྐྱེ་བར་འགྱུར། །ཞེས་པའི་བར་དུ་ནི་འཁོར་གྱི་ཁྱད་པར་བསྟན་ཏེ་ཕྱིར་མི་ལྡོག་པ་སྤྲུལ་ཏེ་འོང་བ་དགེ་བའི་བཤེས་གཉེན་དང་བསྟེན་པ་རྒྱུ་དམ་པ་བསྐྱེད་པ་ཤ་སྟག་ཅེས་སྦྱར་རོ། །མདོ་ལས། རྒྱལ་བ་དེ་ཡི་ཐ་མའི་ལུས་ཀྱི་ཚེ། །ཞེས་པ་ནས། དེ་དག་དེ་ན་ཚེ་ཡི་ཚད་དུ་གྱུར། །ཞེས་པའི་བར་དུ་ནི་སྐུ་ཚེའི་ཚད་དང་འཁོར་རྣམས་ཀྱི་ཚེའི་ཚད་དང་ཡང་དག་པ་དང་གཟུགས་བརྙན་གྱི་བསྟན་པ་ཡུན་ཇི་སྲིད་དུ་གནས་པ་རྣམས་སྟོན་ཏེ། སྐྱེ་བ་ཐམས་ཅད་ཀྱི་ཐ་མ་རྒྱལ་བུར་གྱུར་ཅིང་ཁྱིམ་ནས་བྱུང་བ་ཉིད་བླ་ན་མེད་པའི་བྱང་ཆུབ་འགྲུབ་པའི་དུས་བསྟན་ཏོ། །མདོ་ལས། རྒྱལ་བ་དེ་ནི་མྱ་ངན་འདས་ནས་ཀྱང༌། །ཞེས་པ་ནས། ཟིལ་གྱིས་མི་ནོན་རྐང་གཉིས་གཙོ་བོ་སྟེ། །ཞེས་པའི་བར་དུ་ནི་དམ་པའི་ཆོས་དང་གཟུགས་བརྙན་གྱི་བསྟན་པ་ཇི་སྲིད་དུ་གནས་པ་དང༌། བསྡུས་པ་བསྟན་ཏོ། །མདོ་ལས་དེ་ནས་འཁོར་བཞིའི་དགེ་སློང་དང་ཞེས་པ་ནས་རང་རང་
གི་གོས་བཅོམ་ལྡན་འདས་ལ་མངོན་དུ་གསོལ་ཏོ་ཞེས་པའི་བར་དུ་ནི་ལུང་བསྟན་པའི་ཚེ་ལྷ་རྣམས་ཀྱིས་མཆོད་པ་དང་བསྟོད་པ་བསྟན་ཏོ། །སྔར་ནི་འཁོར་བཞི་དང་བརྒྱད་ཀྱིས་མཆོད། དེའི་འོག་ཏུ་ནི་ལྷ་རྣམས་ཀྱིས་མཆོད་པ་ལ་འདི་ནི་དང་པོའོ། །གོས་ནི་འགེབས་པའི་དོན་ཏེ་བླ་ན་མེད་པའི་འབྲས་བུ་ཆེན་པོ་བརྙེས་པ་འགྲོ་བ་མང་པོ་ལ་ཐུགས་རྗེས་འགེབས་པའི་དོན་ཏམ། དམ་པའི་ཆོས་འདི་འཛིན་པ་དེ་བཞིན་གཤེགས་པའི་ན་བཟས་གཡོགས་པའོ་ཞེས་འབྱུང་བ་ཉིད་དང་ཡང་སྦྱར་རོ། །མདོ་ལས་ལྷའི་དབང་པོ་བརྒྱ་བྱིན་དང་ཞེས་པ་ནས་འཕྲུལ་གྱི་གོས་མངོན་དུ་གསོལ་ཏོ་ཞེས་པའི་བར་དུ་ནི་ལྷ་རྣམས་ཀྱིས་མཆོད་པ་དང་བསྟོད་པ་བསྟན་ཏེ་མེ་ཏོག་མང་པོར་འཐོར་བ་ནི་དམ་པའི་ཆོས་འདི་དོན་རྟོགས་པར་སྟོན་པའོ། །མདོ་ལས་འཕྲུལ་གྱི་མེ་ཏོག་དང་ཞེས་པ་ནས་བར་སྣང་ལ་བུན་ལོང་དུ་གྱུར་ཏོ་ཞེས་པའི་བར་དུ་ནི་ངོ་མཚར་དུ་གྱུར་པ་བསྟན་ཏེ་བར་སྣང་ལ་གནས་པས་ཆོས་འདི་ཐོས་པས་འགྲོ་བ་རྣམ་བཞི་ལས་ཁྱད་པར་དུ་གྱུར་པ་བསྟན་ཏོ། །མདོ་ལས་ལྷ་རྫས་ཀྱི་སིལ་སྙན་བརྒྱ་སྟོང་དང་ཞེས་པ་ནས་མངོན་པར་ཕབ་ནས་ཞེས་པའི་བར་དུ་ནི་ལྷའི་རོལ་མོས་མཆོད་པ་བསྟན་ཏེ་ཆོས་ཀྱི་སྒྲ་ཐོས་པས་དོན་རྟོགས་པའི་ཕྱིར་རོལ་མེ་སིལ་སྙན་གྱི་མཆོད་པ་བསྟན་ཏོ། །མདོ་ལས་འདི་སྐད་སྨྲའོ་ཞེས་པ་ནས་ཆོས་ཀྱི་འཁོར་ལོ་བསྐོར་ཏོ་ཞེས་པའི་བར་དུ་ནི་མངོན་པར་བསྟོད་པ་ཡང་ཚིག་རྐྱང་པ་དང་ཚིགས་སུ་བཅད་པ་དབྱེ་སྟེ་བསྟན་པ་གཞན་དག་ལ་ལྟོས་ནས་དྲང་བ་དང་ངེས་པའི་དོན་དུ་ལྡན་པའི་ཆོས་ཀྱི་འཁོར་ལོ་བསྐོར་བ་འདི་ཉིད་བླ་ན་མེད་པའོ། །མདོ་ལས། ལྷ་ཡི་སྲས་པོ་དེ་རྣམས་ཀྱི། །ཞེས་པ་ནས། འདི་ལ་གཞན་གྱིས་དད་པར་དཀའ། །ཞེས་པའི་བར་དུ་ནི་ཚིགས་སུ་བཅད་པ་ཕྱེད་དང་བདུན་ལ་བཞིར་དབྱེ་སྟེ་ཚིགས་བཅད་དང་པོ་གཉིས་ཀྱིས་སྔོན་བཤད་པའི་དོན་ཆུང༌། ད་འདིར་བཤད་པ་ནི་དོན་ཆེ་བར་བསྟན་པ་དང༌། དེའི་འོག་ཏུ་ཚིགས་བཅད་ཕྱེད་དང་གཉིས་ཀྱིས་ནི་དོན་དམ་པའི་ཆོས་ལ་རྗེས་སུ་ཡི་རང་བར་བསྟོད་པ་དང༌། ཚིགས་བཅད་གཉིས་ཀྱིས་ནི་གཞན་རྟོགས་པ་བསྐྱེད་པས་བདག་ཉིད་ཀྱང་སངས་རྒྱས་སུ་འགྲུབ་པར་བསྟན་པ་དང༌། ཚིགས་བཅད་གཅིག་གིས་ནི་བསྔོ་བ་སྟོན་ཏེ་འདི་ནི་དང་པོའོ། །ཕུང་པོ་ལྔའི་སྐྱེ་བ་དང་འཇིག་པ་སྨོས་པས་བདེན་པ་བཞིའི་
དོན་སྟོན་ཏེ། དྲང་བའི་དོན་སྤང་ཞིང་ངེས་པའི་དོན་ལ་འཇུག་པ་བསྟན་པའོ། །མདོ་ལས། རྣམ་པར་འདྲེན་པས་དེང་བཤད་དོ། །ཞེས་པ་ནས། དཔའ་བོ་བདག་ཅག་རྗེས་ཡི་རང༌། །ཞེས་པའི་བར་དུ་ནི་ཆོས་དམ་པ་ལ་རྗེས་སུ་ཡི་རང་ཞིང་སྤྱོད་པ་ཆེན་པོ་ལ་གཞོལ་བ་བསྟན་ཏོ། །མདོ་ལས། ལྡེམ་ངག་དྲང་སྲོང་ཞེས་གསུངས་ཏེ། །ཞེས་པ་ནས། བྱང་ཆུབ་ཏུ་ཡང་སྨོན་པར་ཤོག །ཅེས་པའི་བར་དུ་ནི་གཞན་རྟོགས་པ་བསྐྱེད་པའི་སྒོ་ནས་བདག་ཉིད་བྱང་ཆུབ་པ་དང་བསྔོ་བ་བསྟན་ཏོ། །མདོ་ལས་དེ་ནས་ཚེ་དང་ལྡན་པ་ཤཱ་རིའི་བུ་ཞེས་པ་ནས་སོ་མ་ཉི་དང་བྲལ་བར་གྱུར་ཏོ་ཞེས་པའི་བར་དུ་ནི་སྔར་དབང་པོ་རྣོན་པོ་ལ་དྲང་བ་དང་ངེས་པའི་དོན་བསྟན་ཏེ། དོན་དུ་གྱུར་པས་དབང་པོ་བར་མ་ལ་དཔེའི་སྒོ་ནས་བསྟན་པའི་ཕྱིར་འདི་སྟོན་ཏེ། འཕགས་པ་ཤཱ་རིའི་བུ་དོན་རྟོགས་ཏེ་ལུང་བསྟན་པ་ཐོས་པས་ཡང་བཅོམ་ལྡན་འདས་ལ་གསོལ་བ་ནི་བདག་དང་གཞན་ལ་ཕན་གདགས་པ་དང། དེ་བཞིན་གཤེགས་པའི་དགོངས་པ་དང་མཐུན་པར་བྱ་བའི་ཕྱིར་ཤཱ་རིའི་བུས་གསོལ་ཏེ། མདོ་ལས་བཅོམ་ལྡན་འདས་གང་འདི་དག་ཅེས་པ་ནས་ཐེ་ཚོམ་འཚལ་བར་གྱུར་ན་ཞེས་པའི་བར་དུ་ནི་གཞན་གྱི་དོགས་པ་གླེང་བ་སྟེ། འབྱུང་བར་ལྟ་བ་དང༌། འཇིག་པར་ལྟ་བ་ཞེས་པ་ནི་ཡོད་མེད་དུ་ལྟ་བའི་མཐའོ། །བདག་ཏུ་ལྟ་བ་ནི་ལོག་པར་ལྟ་བའོ། །ལྟ་བ་དེ་དག་གི་མུ་སྟེགས་ཅན་གྱི་ལྟ་བ་དྲུག་ཅུ་རྩ་གཉིས་དེར་འདུས་ཏེ་དེ་ལས་འཕེལ་བའོ། །ལྟ་བ་དེ་དག་གི་སྐྱོན་དང་བྲལ་བའི་ཕྱིར་འདི་ལྟར་བསྟན་ཏོ། །ཡང་ན་ལྟ་བ་དེ་གསུམ་གྱི་ཉོན་མོངས་པ་ཐམས་ཅད་བསྐྱེད་པའི་ཕྱིར་བཅོམ་ལྡན་འདས་ཀྱིས་ལྟ་བ་དེ་དག་དང་བྲལ་བའི་ཕྱིར་ཉོན་མོངས་པའི་རྒྱུ་བཀག་ནས་འབྲས་བུ་ཡང་མི་སྐྱེ་བར་འགྱུར་རོ། །དེ་ལྟར་ཐེག་པ་ཆུང་ངུའི་མྱ་ངན་ལས་འདས་པའི་མཐར་ཕྱིན་པ་དག་ཡང་ངེས་པ་དང་དྲང་བའི་དོན་འདི་བསྟན་པས་ཐེ་ཚོམ་དུ་གྱུར་བའོ། །མདོ་ལས་བཅོམ་ལྡན་འདས་ཅི་ནས་འཁོར་བཞི་པོ་འདི་དག་ཅེས་པ་ནས་བདེ་བར་གཤེགས་པ་བཀའ་སྩལ་དུ་གསོལ་ཞེས་པའི་བར་དུ་ནི་ཐེ་ཚོམ་བསལ་བར་གླེང་པ་ལ་སྔར་ནི་གཏན་ཚིགས་གསོལ་དེའི་འོག་ཏུ་ནི་རིགས་པར་ཞི་བའོ། །མདོ་ལས་དེ་སྐད་ཅེས་གསོལ་བ་དང་ཞེས་པ་ནས་བྱང་ཆུབ་སེམས་དཔའི་ཐེག་པ་ཉིད་ལ་འཛུད་དོ་ཞེས་པའི་བར་དུ་ནི་བཅོམ་
ལྡན་འདས་ཀྱིས་དོན་ཆེན་པོ་སྟོན་པར་བཞེད་པ་ལ་མདོར་བསྡུས་ཏེ་གླེངས་པའི་ལན་བཏབ་པ་དང༌། གྲོང་ཁྱེར་གྱི་དཔེ་བསྟན་པ་དང༌། དཔེ་དང་དོན་དུ་སྦྱར་བ་དང་གསུམ་མོ། །དེ་ཡང་འཕགས་པ་ཉན་ཐོས་པ་རྣམས་བྱང་ཆུབ་སེམས་དཔའི་ཐེག་པ་ལ་གཟུད་ཅིང་སོ་སོའི་དད་པ་བཞིན་སྟོན་པའི་ཕྱིར་རྒྱུ་དང་དཔེ་སྣ་ཚོགས་ཀྱིས་སྔར་ནི་དྲང་བའི་དོན་བསྟན། ཕྱིས་འདིར་ནི་ངེས་པའི་དོན་སྟོན་པ་ཉིད་དུ་ཤེས་པར་བྱའོ། །མདོ་ལས་འདི་ལྟར་ཡང་ཤཱ་རིའི་བུ་ཞེས་པ་ནས་དཔེས་དོན་ཤེས་པར་འགྱུར་རོ་ཞེས་པའི་བར་དུ་བཅོམ་ལྡན་འདས་ཀྱིས་ཐེ་ཚོམ་དགྲོལ་བར་དགོས་པའི་དཔེར་གླེང་པའོ།། མདོ་ལས་ཤཱ་རིའི་བུ་འདི་ལྟ་སྟེ་ཞེས་པ་ནས་དགོག་ཏུ་ཕྱིན་པ་ཞེས་པའི་བར་དུ་ནི་དཔེ་འདི་ལ་ཚིག་རྐྱང་པ་དང་ཚིགས་སུ་བཅད་པ་གཉིས་སུ་དབྱེའོ། །ཚིག་རྐྱང་པ་ལ་སྔར་དཔེ་བསྟན། དེའི་འོག་ཏུ་དོན་སྟོན་ཏོ། །དཔེ་ཡང་སྔར་ནི་དྲང་བའི་དོན་གྱི་དཔེ། ཕྱིས་ནི་ངེས་པའི་དོན་གྱི་དཔེའོ། །དྲང་བའི་དོན་གྱི་དཔེ་ལ་ཡང་ཁམས་གསུམ་ན་སང་རྒྱས་བཞུགས་པའི་དཔེ་དང༌། འགྲོ་བ་རྣམ་ལྔ་ཡང་ཟ་བའི་དཔེ་དང༌། ཁྱིམ་བདག་ཕྱུག་པོས་མེ་འབར་བ་ཆེན་པོ་མཐོང་བས་ཐབས་ཀྱིས་འདྲེན་པའི་དཔེ་དང༌། བུ་རྣམས་ཀྱིས་ཁྱིམ་བདག་དེའི་ཚིག་མཉན་པས་སྡུག་བསྔལ་དེ་ལས་ཐར་བའི་དཔེའོ།། དཔེ་དང་པོ་ལ་ཡང་རྣམ་པ་དྲུག་ཏུ་དབྱེ་སྟེ། དེའི་གནས་དང་དེའི་བདག་པོ་དང༌། དེའི་རྒན་གཞོན་དང༌། དེའི་འབྱོར་བ་དང༌། དེའི་ཁང་ཁྱིམ་དང༌། དེའི་སྐར་ཁུང་དང༌། དྲུག་ཏུ་དབྱེའོ། །གྲོང་ཁྱེར་དང་གྲོང་རྡལ་དང་ལྗོངས་ཞེས་པ་ནི་གནས་སོ། །ཐེག་པ་རྣམ་གསུམ་སྟོང་པ་ཉིད་སྤྲུལ་པའི་སངས་རྒྱས་སུ་མངོན་ཏེ། དེ་ཉིད་སྟོང་གསུམ་གྱི་འཇིག་རྟེན་གྱི་ཁམས་ན་མངའ་མཛད་པའི་བདག་པོ་སྟེ། དེད་དཔོན་ཕྱུག་པོ་གྲོང་ཁྱེར་གྱི་བདག་པོ་བྱེད་པ་བཞིན་ནོ། །དགོག་ཏུ་ཕྱིན་པ་ཞེས་པ་ནི་རྒན་གཞོན་བསྟན་པ་སྟེ། བཅོམ་ལྡན་འདས་མཁྱེན་པ་སྣ་ཚོགས་ཀྱིས་བགྲེས་ཤིང་མཐར་ཕྱིན་པ་ཞེས་པའོ། །མདོ་ལས་ཕྱུག་པོ་རིན་པོ་ཆེ་ཞེས་པ་ནས་སྒོ་གཅིག་པ་ཞེས་པའི་བར་དུ་ནི་འབྱོར་བ་བསྟན་ཏེ། ཕྱུག་ཅིང་རིན་པོ་ཆེ་མང་བ་ནི་འཕགས་པའི་ནོར་བདུན་དང་ལྡན་པའོ། །ཁང་པ་ཞེས་པ་ནི་རྣམ་པར་སྨིན་པའི་རྣམ་པར་ཤེས་པ་ཉིད་ཁང་ཁྱིམ་ལྟ་བུར་བལྟའོ། །ཡང་ན་འཇིག་རྟེན་གྱི་རྒྱལ་པོ་ཆེན་པོ་ངོས་བཞི་ལ་དབང་
བྱེད་པ་བཞིན་བཅོམ་ལྡན་འདས་ཀྱང་སེམས་ཅན་མང་པོའི་གནས་དང་བདག་པོར་གྱུར་པའོ། །སྒོ་གཅིག་པ་ཞེས་པ་སྒོ་ནི་འབྱུང་བ་དང་འཇུག་པའི་དགོས་པ་བྱེད་པ་བཞིན་ཐེག་པ་གཅིག་པོའི་བསྟན་པ་འདིས་སེམས་ཅན་ཐམས་ཅད་མྱ་ངན་ལས་འདའ་བའི་གནས་སུ་འདིས་འཇུག་པའི་ཕྱིར་སྒོ་ཞེས་བྱའོ། །མདོ་ལས་ཞིག་ལ་ཐུག་པ་རྩྭས་གཡོགས་པ་ཞེས་པ་ནས་སྲོག་ཆགས་བརྒྱ་ཕྲག་གཅིག་གམ་གཉིས་སམ་ལྔའི་བར་དུ་དེ་ན་གནས་ཞེས་པའི་བར་དུ་ནི་འགྲོ་བ་རྣམ་ལྔ་གཡང་ཟ་བའི་དཔེ་སྟེ། འདི་མན་ཆད་སྲོག་ཆགས་མང་དུ་གནས་པ་དང་ཁང་ཁྱིམ་རྙིངས་པ་དང་ཕྱོགས་བཞི་ནས་མེ་འབར་བ་དང༌། བུ་མང་པོ་དེ་ན་གནས་པའི་དཔེ་སྟོན་པ་ལ་འདི་ནི་དང་པོའོ། །མདོ་ལས་ཁྱིམས་རྣམས་ཀྱང་འདྲུམས་པ་ཞེས་པ་ནས་གོགས་པར་གྱུར་པའི་ཁང་པ་དེ་ལ་ཞེས་པའི་བར་དུ་ནི་གནས་རྙིང་པ་བསྟན་ཏེ། དཔེ་རྣམ་པ་བཞི་ཞིང་སྟོན་ཏོ། །ཁང་པའི་དཔེ་ནི་གཟུགས་ཀྱི་དཔེའོ།། རྩིག་པ་ནི་འདུ་ཤེས་ཀྱི་དཔེའོ། །ཀ་བའི་རྩ་བ་རུལ་པ་ནི་འདུ་བྱེད་ཀྱི་དཔེའོ། །གདུང་མ་གཡོ་བ་ནི་ཚོར་བའི་དཔེའོ། །སྤྱིར་ཁང་པ་གཡོ་བ་ནི་རྣམ་པར་ཤེས་པའི་དཔེ་སྟེ། ཕུང་པོ་བཞི་རྣམ་པར་ཤེས་པ་ལ་བརྟེན་ཞེས་པའི་དོན་ཏོ། །མདོ་ལས་གློ་བུར་དུ་མེའི་ཕུང་པོ་ཆེན་པོ་ངོས་ཐམས་ཅད་ནས་རབ་ཏུ་འབར་བར་གྱུར་ལ་ཞེས་པ་ལ་མེ་ཀུན་ནས་འབར་ཞེས་པ་ནི་སྐྱེ་བ་དང་འཇིག་པའི་མཚན་ཉིད་བཞི་པོ་དག་གིས་ཕུང་པོ་ལྔ་འཇོམས་ཞེས་པའི་དོན་ཏོ། །གློ་བུར་ཞེས་པ་ནི་ལུགས་དང་རྒྱུ་མེད་པར་ཉོན་མོངས་པའི་མཚན་ཉིད་སྐད་ཅིག་གཅིག་ལ་སྐྱེ་ཞིང་འབྱུང་ཞེས་པའི་དོན་ཏོ། །ཀུན་ནས་ཞེས་པ་ནི་སྐྱེ་བ་དང་རྒ་བ་དང་ན་བ་དང་ཤི་བས་འཇོམས་པའོ། །མདོ་ལས་སྐྱེས་བུ་དེ་ལ་ཡང་ཞེས་པ་ནས་ཕྱི་རོལ་ཏུ་བྱུང་བར་གྱུར་ན་ཞེས་པའི་བར་དུ་ནི་འགྲོ་བ་རྣམ་ལྔའི་སེམས་ཅན་ཐམས་ཅད་ལ་བཅོམ་ལྡན་འདས་སྲས་དང་འདྲ་བའི་ཕྱིར་བུ་ཞེས་བཀའ་སྩལ་ཏོ། །མདོ་དག་ལས་ཐེག་པ་རྣམ་པ་གསུམ་སོ་སོའི་སྤྱོད་པ་དང༌། རིགས་ལས་བྱང་ཆུབ་སེམས་དཔའ་ནི་གྲངས་བཅུ་དང་སྦྱར། རང་སངས་རྒྱས་ནི་གྲངས་ཉི་ཤུ་དང་སྦྱར། ཉན་ཐོས་ནི་གྲངས་སུམ་ཅུ་དང་སྦྱར་ཞེས་འབྱུང་ངོ༌། །མདོ་ལས་དེ་ནས་ཤཱ་རིའི་བུ་སྐྱེས་བུ་དེ་ཞེས་པ་ནས་སེམས་མི་དགའ་བར་གྱུར་ཏོ་ཞེས་པའི་བར་དུ་ནི་དྲང་བའི་ཐབས་
སྦྱོར་བའི་དཔེ་སྟོན་ཏེ། །འདིས་བཅོམ་ལྡན་འདས་ཐུགས་རྗེ་ཆེན་པོས་སེམས་ཅན་ལ་དགོངས་ཤིང་འདྲེན་པའི་དཔེ་སྟོན་པ་ལ་མེ་དང་ཀུན་ལས་འབར་བའི་དོན་ནི་གོང་དུ་བསྟན་པ་ཡིན་ནོ། །མདོ་ལས་འདི་ལྟར་བདག་ནི་མེའི་ཕུང་པོ་འདི་ཞེས་པ་ནས་ཕྱིར་འབྱུང་བར་ཡང་ཡིད་ལ་བྱ་བ་མི་བསྐྱེད་དོ་སྙམ་དུ་སེམས་སོ་ཞེས་པའི་བར་དུ་ནི་འདིས་བཅོམ་ལྡན་འདས་ཐུགས་རྗེས་སེམས་ཅན་རྣམས་ལ་ཕན་འདོགས་པར་དགོངས་པའི་དཔེ་སྟེ། འབར་བའི་སྒོ་ཞེས་པ་ནི་ཐེག་པ་གཅིག་བུ་སྟོན་པ་དམ་པའི་ཆོས་ལ་སྐུར་བ་འདེབས་ཤིང་མ་དད་པ་རྣམས་ཉོན་མོངས་པ་ཕྲག་དོག་གི་སེམས་ཀྱིས་མདོ་སྡེ་འདི་ལ་འཇུག་པ་སྟོང་པ་རྣམ་པ་གཉིས་དང་ཕན་པ་རྣམ་གཉིས་ཀྱི་སྤྱོད་པ་སྲེག་ཅེས་པའི་དོན་ཏོ། །རྩེ་དགའ་ཞེས་པ་ནི་གནས་དང་ཁམས་དང་ཐེག་པ་ལ་སོགས་པ་ལ་ཆགས་ཤིང་བག་མེད་པར་སྤྱོད་པའི་དོན་ཏོ། །མི་ཤེས་ཁོང་དུ་མི་ཆུད་པ་ནི་མངོན་སུམ་དང་རྗེས་སུ་དཔོག་པའི་སྒོ་ནས་མི་འཇུག་པའོ། །ཡང་ན་མི་དང་མི་འཇིགས་སྐྱེ་ཞིང་སྤོང་བར་མི་བྱེད་ཅེས་པའི་དོན་ཏོ། །ཕྱིར་འབྱུང་བར་ཡིད་ལ་མི་བྱེད་པ་ནི་ཐེག་པ་ཆེན་པོའི་མྱ་ངན་ལས་འདའ་བ་མི་ཚོལ་བའོ། །མདོ་ལས་ཤཱ་རིའི་བུ་སྐྱེས་བུ་དེ་ཞེས་པ་ནས་འབྱུང་ངོ་སྙམ་དུ་བསམས་པ་དང་ཞེས་པའི་བར་དུ་ནི་ཐེག་པ་ཆེན་པོ་འདིར་གཟུད་པ་ཡང་ཐེག་པ་ཆེན་པོའི་འབྲས་བུ་བསྟན་ཏེ། གཟུད་པ་དང་རྒྱུ་བསྟན་ཏེ་གཟུད་པ་དང༌། ཐེག་པ་ཆེན་པོའི་སྤྱོད་པ་བསྟན་ཏེ་གཟུད་པ་དང༌། ཆེན་པོ་ལ་རེག་པ་བསྐྱེད་དེ་གཟུད་པ་ལ་འདི་ནི་དང་པོའོ། །ཐེག་པ་ཆེན་པོའི་འབྲས་བུ་ནི་ཡེ་ཤེས་རྣམ་གཉིས་དང་ལྡན་པའོ། །སྟོབས་དང་ལྡན་པ་ནི་ཡང་དག་པའི་ཡེ་ཤེས་རྣམ་གཉིས་སྐུ་ལྟ་བུར་ལྟ་བ་དེ་དང་ལྡན་པའོ། །སྟོབས་ཆེ་བ་ཞེས་པ་ནི་མངོན་པར་ཤེས་པ་དྲུག་དང་ལྡན་པའི་སྐུའི་ཡན་ལག་ལྟ་བུར་བལྟ་བས་དེ་གཉིས་དང་ལྡན་པའི་ཕྱིར་ཐེག་པ་རྣམ་གཉིས་པ་ཐེག་པ་ཆེན་པོ་ལ་མངོན་དུ་དད་པ་མེད་ཀྱིས་ཀྱང་ཡོན་ཏན་དེ་གཉིས་ཀྱི་མཐུས་བསྒྱུར་ཞིང་ཐེག་པ་ཆེན་པོ་ལ་འཛུད་ཅེས་པའོ། །ཐེག་པ་བར་མ་ནི་བཅོམ་ལྡན་འདས་ཀྱི་ཡེ་ཤེས་རྣམ་གཉིས་ཀྱི་མཐུས་འཛུད་དོ། །ཉན་ཐོས་པ་རྣམས་ནི་བུས་པ་མང་དུ་བླངས་ཏེ་སྒོར་འབྱིན་པ་བཞིན་མངོན་པར་ཤེས་པའི་མཐུས་ཐེག་པ་ཆེན་པོ་ལ་
འཛུད་དོ། །མདོ་ལས་དེ་ཡང་འདི་སྙམ་དུ་སེམས་ཏེ་ཁང་པ་འདི་སྲང་གཅིག་ལ་སྒོ་ཡང་དོག་ཅེས་པ་ནི་ཐེག་པ་ཆེན་པོའི་རྒྱུད་བསྟན་ཏེ་འཛུད་པ་སྟེ། དེ་ལས་རྒྱུ་བསྟན་པ་ཡང་ཐེག་པ་ཆེན་པོའི་སྤྱོད་པ་ཆེན་པོ་ལ་བརྟེན་པ་དང༌། སྐུར་བའི་སེམས་སྐྱེས་ན་ངན་སོང་དུ་ལྟུང་བར་བསྟན་པ་དང༌། དཀའ་བ་སྣ་ཚོགས་སྟོན་ཅིང་ཐེག་པ་ཆེན་པོ་ཉིད་གསངས་ཏེ་སྨོན་པ་དང་གསུམ་ལས་འདི་ནི་དང་པོའོ། །ཁམས་གསུམ་ནས་འབྱུང་བའི་སྲང་ཐེག་པ་ཆེན་པོ་གཅིག་ཡིན་པའི་ཕྱིར་སྲང་གཅིག་ཅེས་པ་དང་བྱང་ཆུབ་སེམས་དཔའི་སྤྱོད་པ་ལ་ཉན་ཐོས་པའི་སྤྱོད་པས་མི་ཆུད་པའི་ཕྱིར་སྒོ་ཡང་དོག་པ་ཞེས་སྨོས་ཏེ། རྒྱ་མཚོ་ཤིན་ཏུ་ཡངས་ཀྱང་མི་རོ་ཞག་ཏུ་མི་འཇོག་པ་བཞིན་ནོ། །མདོ་ལས་ཁྱེའུ་འདི་དག་ཀྱང་ཞེས་པ་ནས་བྱིས་པ་དེ་དག་ལ་འབོད་དེ་ཞེས་པའི་བར་དུ་ནི་གང་འདི་ལ་མ་དད་པ་རྣམས་ངན་སོང་དུ་ལྟུང་བ་བསྟན་པ་སྟེ། སེམས་ཅན་རྣམས་འཇིག་རྟེན་ལས་འབྱུང་བའི་རྒྱུད་ཡོད་དུ་ཟིན་གྱིས་ཀྱང་འབྱུང་བར་རྩོལ་བ་མེད་པས་ན་བྱིས་པ་ཞེས་བྱའོ། །ཇི་ལྟར་བྱིས་པ་ལེགས་ཉེས་ཀྱི་བྱེ་བྲག་མི་ཤེས་པ་བཞིན་ཐེག་པ་ཆེན་པོ་འདིའི་ཡོན་ཏན་མ་རྟོགས་ཤིང༌། སྐུར་པའི་སེམས་བསྐྱེད་པ་རྣམས་སྡུག་བསྔལ་སྣ་ཚོགས་མྱོང་བ་ཡང་ཇི་ལྟར་མེའི་ཕུང་པོ་ལས་བྱོལ་བར་མི་སེམས་པའི་བྱིས་པ་བཞིན་ནོ། །མདོ་ལས་ཁྱིམ་འདི་ལ་ཞེས་པ་ནས་ཚུར་ཤེག་ཕྱིར་འབྱུང་ཞེས་པའི་བར་དུ་ནི་སེམས་ཅན་རྣམས་ལ་ཐེག་པ་ཆེན་པོ་གསངས་ཏེ་བསྟན་པའི་དཔེ་དང༌། ཐེག་པ་ཆེན་པོའི་སྤྱོད་པ་བསྟན་ཏེ་འཛུད་པ་སྟོན་པ་ལ་དེ་ཡན་ཆད་རྒྱུ་དང་འབྲས་བུ་དང་སྤྱོད་པ་ལ་གཟུད་པའི་དཔེ་བསྟན་ཏོ། །མདོ་ལས་དེ་ལྟར་ཕན་པར་འདོད་པའི་སྐྱེས་བུ་དེས་ཞེས་པ་ནས་ཁྱིམ་འདི་ནས་གདོན་ཏོ་སྙམ་ཞེས་པའི་བར་དུ་ནི་ཕུང་པོ་ལྔ་ལ་ཆགས་ཤིང་ཉོན་མོངས་པ་སྣ་ཚོགས་ཀྱི་མེས་གདུང་བར་བྱེད་པའི་ཕྱིར་ཚུལ་བཞིན་མ་ཡིན་པའི་མེས་ཚིག་ཅེས་པའི་དོན་ཏོ། །སྙམ་པ་ནི་ཇི་ལྟར་དེ་བཞིན་གཤེགས་པ་རྣམས་མྱ་ངན་ལས་འདས་པའི་བདེ་བ་བརྙེས་པའི་ས་ན་བཞུགས་པ་བཞིན་སེམས་ཅན་ཐམས་ཅད་ཀྱང་ས་དེར་གདོན་ཅིང་འཇོག་ཅེས་པའི་དོན་ཏོ། །མདོ་ལས་སྐྱེས་བུ་དེས་བྱིས་པ་དེ་དག་གི་བསམ་པ་ཤེས་ཞེས་པ་ནས་རྣམ་པ་དུ་མ་ཡིན་ན་ཞེས་པའི་བར་དུ་ནི་
ཐེག་པ་རྣམ་གསུམ་དངོས་སུ་བཤད་པའི་དཔེ་སྟོན་པར་གླེང་པ་ལ་སྔར་སོ་སོའི་དབང་པོ་ཤེས་པ་དང༌། ཕྱིས་དངོས་སུ་སྟོན་པ་ལ་འདི་ནི་དང་པོའོ། །བྱིས་པ་དེ་དག་གི་བསམ་པ་དང་དད་པ་རིག་ནས་ཞེས་པ་ནི་ཐེག་པ་རྣམ་གསུམ་གྱི་རིགས་ཤེས་པ་སྟེ། དབང་པོ་མཐོ་དམན་ཤེས་པའོ། །མཛེས་པ་དང་སྡུག་པ་དང་ཡིད་དུ་འོང་བ་དང་ཞེས་པ་ནི་ཐེག་པ་རྣམ་གསུམ་གྱི་དོན་ཏོ། །མདོ་ལས་དེ་དག་དཀོན་པར་གྱུར་ཏེ་ཞེས་པ་ནས་མྱུར་དུ་བརྒྱུགས་ཏེ་ཤོག་ཤིག་ཅེས་པའི་བར་དུ་ཐེག་པ་རྣམ་གསུམ་གྱི་དཔེ་ཤིང་རྟ་རྣམ་གསུམ་དང་སྦྱར་ཏེ་སྟོན་ལ་སྔར་སྦྱིན་ནོ་བྱ་བར་གླེང་བ་དང༌། རྣམ་གསུམ་གྱི་མིང་བསྟན་པ་དང། དངོས་སུ་བྱིན་པ་དང་གསུམ་དུ་བགོ་སྟེ། འདི་ནི་དང་པོའོ། །ཐེག་པ་རྣམ་པ་གསུམ་གྱི་མཐུ་དང་སྤྱོད་རླབས་ཁྱད་པར་ཡོད་པའི་ཕྱིར་དཔེ་ཡང་བཟང་ངན་གསུམ་དུ་བཀོད་དོ། །ཕྱི་སྒོར་བཀོད་ཅེས་པ་ནི་འཇིག་རྟེན་གྱི་དགེ་བའི་རྩ་བ་སྣ་ཚོགས་དང་ཏིང་ངེ་འཛིན་གྱི་ཡོན་ཏན་ཐམས་ཅད་ཐེག་པ་དེ་གསུམ་གྱི་སྒོ་ནས་འཇུག་ཅིང་འཐོབ་པའི་ཕྱིར་སྒོ་ཞེས་བྱའོ། །བསྟན་པ་འདི་ལ་བརྟེན་ཏེ་ཐེག་པ་རྣམ་གསུམ་གྱིས་མྱ་ངན་ལས་འདའ་བའི་འབྲས་བུ་ཕྱིས་ཐོབ་པར་བྱེད་པའི་ཕྱིར་ཕྱི་སྒོར་བཀོད་ཅེས་བྱ་སྟེ། རྒྱུ་ལ་བརྟེན་ཏེ་འབྲས་བུ་འཐོབ་པའི་ཕྱིར་རོ། །ཐེག་པ་འདི་རྣམ་གསུམ་ཡང་སྐྱེད་པ་དང་ཕྱིན་པར་བྱེད་པའི་དོན་དུ་འདྲ་བས་ཇི་ལྟར་ཤིང་རྟ་ཡང་མང་ཉུང་སྐྱེད་པ་ལ་མི་འདྲ་ཡང་སྤྱིར་ཤིང་རྟ་ཞེས་མིང་གཅིག་སྟེ། འདུས་མ་བྱས་ལ་དབྱེ་བ་མེད་མོད་ཀྱི་འདུས་བྱས་ཀྱི་སྒོ་ནས་ཆེ་ཆུང་རིམ་པར་དབྱེ་བའི་ཕྱིར་གླང་དང་ར་དང་རི་དགས་ཀྱི་ཤིང་རྟ་ཞེས་སྨོས་སོ། །མདོ་ལས་དེ་ནས་བྱིས་པ་དེ་དག་ཅེས་པ་ནས་དེ་ནས་མྱུར་དུ་ཕྱིར་འཐོན་ཏོ་ཞེས་པའི་བར་དུ་ནི་བཅོམ་ལྡན་འདས་ཀྱི་གསུངས་རབ་ལ་བརྟེན་པས་ཁམས་གསུམ་ལས་ཐར་པའི་དཔེ་བསྟན་ཏེ། དེ་ཡང་བུས་པ་རྣམས་ཉོན་མོངས་པ་ལས་ཐར་བ་དང༌། ཕ་བདེ་བར་འདུག་པའི་དཔེས་སེམས་ཅན་རྣམས་ཐེག་པ་རྣམ་གསུམ་ལ་བཀོད་པས་བཅོམ་ལྡན་འདས་དགྱེས་ཞེས་པའི་དོན་ཏོ། །གཅིག་གིས་གཅིག་བདས་ཤིང་བརྒྱུགས་ཏེ་ཞེས་པ་ནི་བརྩོན་འགྲུས་ཆེན་པོ་རྩོལ་བ་བསྟན་ཏོ། །མདོ་ལས་དེ་ནས་སྐྱེས་བུ་དེས་ཞེས་པ་ནས་འཇིགས་པ་མེད་པ་ཐོབ་པར་གྱུར་ཏེ་ཞེས་པའི་བར་དུ། དཔོང་ས་བཞི་མདོ་ཞེས་པ་ནི།
བདེན་པ་རྣམ་བཞིའི་དོན་བསྟན་པའོ། །འཕགས་པ་ཉན་ཐོས་པ་རྣམས་ལྷག་མ་དང་བཅས་པའི་མྱ་ངན་ལས་འདས་པ་ཐོབ་པས་ཉོན་མོངས་པ་ལས་རྣམ་པར་གྲོལ་བ་དང༌། བྱང་ཆུབ་སེམས་དཔའ་ལྷག་མ་མ་ལུས་པའི་མྱ་ངན་ལས་འདས་པ་ཐོབ་པ་ཤེས་བྱའི་སྒྲིབ་པ་ལས་རྣམ་པར་གྲོལ་བའི་ཕྱིར་སྐྱབས་དང་སྒྲིབ་པ་མེད་པ་ནི་བླ་གབ་མེད་པར་གནས་པ་བཞིན་ནོ། །མདོ་ལས་དེ་ནས་བྱིས་པ་དེ་དག་ཅེས་པ་ནས་བདག་ཅག་སྩལ་དུ་གསོལ་ཞེས་པའི་བར་དུ་ནི་དཔེ་སྔ་མས་ནི་དྲང་བའི་དོན་བསྟན། དཔེ་འདིས་ནི་ངེས་པའི་དོན་སྟོན་ཏེ། དེ་ཡང་བུ་རྣམས་ཀྱིས་སྦྱིན་པར་བྱས་པ་དེ་བསླངས་པ་དང༌། ཕས་གཅིག་བྱིན་པ་བསྟན་པ་དང༌། ཕས་བསམས་པའི་དོན་དང་བུས་པ་རྣམས་ཀྱི་བསམ་པ་དང་འགལ་བ་དང་བཞིར་དབྱེ་བ་ལ་འདི་ནི་དང་པོའོ། །ཐེག་པ་རྣམ་པ་གཉིས་པ་དག་ནི་ཕུང་པོ་དང་བྲལ་བའི་རྣམ་པར་གྲོལ་བ་ཐོབ་དུ་ཟིན་གྱིས་ཀྱང་མྱ་ངན་ལས་འདས་པ་ཆེན་པོ་མ་ཐོབ་པ་དང༌། བྱང་ཆུབ་སེམས་དཔའ་ནི་རྣམ་པ་ཐམས་ཅད་མཁྱེན་པའི་ཡེ་ཤེས་མ་ཐོབ་པ་དེ་གཉིས་ཀྱི་དཔེར་བུས་པ་ཕྱིར་འཐོན་པ་རྣམས་ཕ་ལ་སོ་སོ་ནས་སྔར་བྱིན་པར་བྱ་བ་དེ་བསླངས་ཞེས་པར་སྦྱར་རོ། །ཡང་ན་ལྷག་མ་དང་བཅས་པའི་མྱ་ངན་ལས་འདས་པ་ཐོབ་ཏུ་ཟིན་གྱིས་ཀྱང་ལྷག་མ་མ་ལུས་པའི་མྱ་ངན་ལས་འདས་པ་མ་ཐོབ་པའི་ཕྱིར་སྦྱིན་པར་བྱས་པ་དེ་བླངས་སོ། །མདོ་ལས་དེ་ནས་ཤཱ་རིའི་བུ་སྐྱེས་བུ་དེས་ཞེས་པ་ནས་བདག་གི་བུ་རྣམས་ལ་རླུང་ལྟར་མགྱོགས་ཤིང་མཐུ་དང་ལྡན་པའི་གླང་པོ་ཆེའི་ཤིང་རྟ་བྱིན་ཏེ་ཞེས་པའི་བར་དུ་ནི་ཕས་ཀུན་ལ་འདྲ་བར་བྱིན་པ་བསྟན་ཏེ་དེ་ཡང་ཤིང་རྟ་བྱིན་པ་དང༌། དེའི་རྒྱན་དང་གླང་དེའི་མཚན་དང་དེའི་འཁོར་བསྟན་པ་ལ་འདི་ནི་དང་པོའོ། །གླང་པོ་ཆེའི་ཤིང་རྟ་ནི་ཐེག་པ་ཆེན་པོའི་འབྲས་བུ་བསྟན་ཏེ་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་རང་བཞིན་ཅན་ནམ་ཡེ་ཤེས་བཞི་དང་ལྔའི་དངོས་པོའོ། །མདོ་ལས་ཀྱང་དེ་བཞིན་ཉིད་ཀྱི་ངོ་བོ་ནི་དཔེས་ཤིང་རྟ་བཞིན་ནོ་ཞེས་འབྱུང་བ་ལྟ་བུ་སྟེ། གླང་དེ་ཡང་རླུང་བཞིན་དུ་མགྱོགས་པའི་དཔེས་ཐེག་པ་ཆེན་པོ་འདི་ལ་གནས་པས་ཕྱིར་མི་ལྡོག་པའི་ས་ལ་མྱུར་དུ་སོན་པར་བྱེད་པའི་ཕྱིར་མགྱོགས་པར་བསྟན་ཏོ། །དེ་བཞིན་གཤེགས་པས་
ཆོས་སྟོན་པ་ཡང་སེམས་ཅན་ལ་དབྱེ་བ་དང་རིམ་པ་མི་མཛད་མོད་ཀྱི་སོ་སོའི་སྣོད་ཇི་བཞིན་པ་ལས་མྱ་ངན་ལས་འདའ་བ་ཐོབ་པའང་ཁྱིམ་བདག་དེས་བུ་རྣམས་ལ་འདྲ་བར་གླང་པོ་ཆེའི་ཤིང་རྟ་བྱིན་པའི་དཔེ་བསྟན་ཏོ། །མདོ་ལས་རིན་པོ་ཆེ་བདུན་ལས་བྱས་པ་ལོགས་དང་ལྡན་པ་དྲིལ་བུ་མང་པོས་རབ་ཏུ་དབྱངས་པ་མཐོ་ཞིང་བརྟན་པ་ཞེས་པ་ནི་ཤིང་རྟ་དེའི་རྒྱན་བསྟན་ཏེ། དེ་ལ་ཡང་རྣམ་པ་བཅུ་ཡོད་པ་ལ་འདིར་བཞི་ཞིག་སྟོན་ཏེ། དེའི་ཚད་དང་རྒྱན་དང་ཁ་ལོ་སྒྱུར་བ་དང་འཕྱང་བ་མང་པོ་སྟོན་ཏོ། །མཐོ་ཞིང་བརྟན་པ་ནི་ཚད་དེ་དེ་བཞིན་གཤེགས་པའི་ཡེ་ཤེས་ཀྱི་དཔེ་སྟེ། ཕྱོགས་ཐམས་ཅད་དུ་གཟིགས་ཤིང་འཕགས་པར་གྱུར་ཅེས་པའི་དོན་ཏོ། །རིན་པོ་ཆེ་མང་པོ་ནི་དེའི་རྒྱན་ཏེ་ཡོན་ཏན་ཐམས་ཅད་ཀྱིས་བརྒྱན་པར་བྱ་བ་ནི་བཅོམ་ལྡན་འདས་ཀྱི་ཡེ་ཤེས་ཉིད་དོ། །ལོགས་དང་ལྡན་པ་ཞེས་པ་ནི་ཁ་ལོ་སྒྱུར་བ་དང་ལྡན་པ་སྟེ་གཟུངས་རྣམ་བཞིས་བརྟན་ཞེས་པའི་དོན་ཏོ། །དྲིལ་བུ་རབ་ཏུ་དབྱངས་ཞེས་པ་ནི་སྦྱང་པར་བྱ་བའི་རྒྱན་ཏེ་སྤོབས་པ་རྣམ་པ་བདུན་ལ་སོགས་པས་སྤོབས་པའི་རྒྱན་ཞེས་པའི་དོན་ཏེ། །མདོ་ལས་རིན་པོ་ཆེ་ངོ་མཚར་རྨད་དུ་བྱུང་བའི་རྒྱན་གྱིས་བརྒྱན་ཞེས་པ་ནི་རྒྱན་དེ་ནི་གདུགས་ཀྱིས་འགེབས་པའི་རྒྱན་ཏེ། འགྲོ་བ་མང་པོ་ལ་ཚད་མེད་པ་བཞིའི་གདུགས་ཀྱིས་འགེབས་ཞེས་པའི་དོན་ཏོ། །མདོ་ལས་རིན་པོ་ཆེའི་ཕྲེང་བས་མཛེས་པར་བརྒྱན་པ་ཞེས་པ་ནས་རྟེན་པ་དམར་བ་གཉིས་སུ་བཞག་པ་ཞེས་པའི་བར་དུ་ནི་འདི་ལ་རྒྱན་བཞི་སྟེ། ཕྲེང་བ་དང་མེ་ཏོག་དང་གདིང་བ་དང་རྒྱབ་རྟེན་དང་བཞི་ལ་ཕྲེང་བ་ནི་སྨོན་ལམ་རྒྱ་ཆེན་པོ་བཞིའི་དོན་ཏེ། བཞིའི་ནི་བྱང་ཆུབ་སེམས་དཔའ་དགེ་བ་ཅི་བརྩམས་པ་རྣམས་སེམས་ཅན་ཐམས་ཅད་ལ་བསྔོ་སྟེ། སེམས་ཅན་སྡུག་བསྔལ་ལས་ཐར་བར་གྱུར་ཅིག །བདེ་བ་མ་ཐོབ་པ་རྣམས་བདེ་དང་ལྡན་པར་ཤོག་ཤིག །སྡིག་པ་སྤོང་དགེ་བ་ལ་འཇུག་པའི་བྱང་ཆུབ་ཀྱི་སེམས་མ་བསྐྱེད་པ་རྣམས་སེམས་དེ་བསྐྱེད་པར་གྱུར་ཅིག །བླ་ན་མེད་པའི་བྱང་ཆུབ་ཀྱི་འབྲས་བུ་མ་ཐོབ་པ་རྣམས་ཐོབ་པར་གྱུར་ཅིག་ཅེས་སྨོན་ལམ་འདེབས་པའོ། །རིན་པོ་ཆེའི་མེ་ཏོག་གི་ཕྲེང་བ་ཞེས་པ་ནི་བསྡུ་བ་རྣམ་བཞིའི་དོན་ཏེ། སྦྱིན་པ་དང་ཚིག་སྙན་པ་དང་ཕན་པར་སྤྱོད་པ་དང་དོན་མཐུན་པའོ། །
གདིང་བ་ནི་ཡང་དག་པའི་འཚོ་བ་སྟེ་རྒྱུ་དང་ལོག་པར་སྤྱོད་པ་སྒོ་གསུམ་ནས་མི་རྒྱུ་ཞེས་པའི་དོན་ཏོ། །རྟེན་དམར་པོ་ཞེས་པ་ནི་མྱ་ངན་ལས་འདའ་བའི་བདེ་བ་ལ་བརྟེན་ནས་ཞེས་པའི་དོན་ཏེ། ཟག་པ་མེད་པའི་འགོག་པ་ལ་གནས་ཤིང་འཕགས་པའི་ལམ་འཕེལ་བར་བྱེད་པའི་དོན་ཏམ། དད་པའི་དབང་པོ་ལ་སོགས་པ་དབང་པོ་ལྔས་བརྟེན་ཞེས་པའི་དོན་ཏོ། །མདོ་ལས་གླང་དཀར་པོ་རབ་ཏུ་དཀར་ཞིང་ཞེས་པ་ནས་བྱིས་པ་རྣམས་ལ་རེ་རེ་བྱིན་ཏེ་ཞེས་པའི་བར་དུ་ནི་གླང་དཀར་པོ་རྩ་བའི་ཡེ་ཤེས་དང་སྦྱར་རོ། །གླང་ཞེས་པ་ནི་ཤིང་རྟ་འདྲེན་པའི་དོན་ཏེ། འགྲོ་བ་མང་པོ་འདྲེན་པའོ། །དཀར་པོ་ཞེས་པ་ནི་ཁ་དོག་ཐམས་ཅད་ཀྱི་གཞི་སྟེ་པདྨོ་དཀར་པོ་དང་འདྲའོ། །ཡང་གླང་དེ་ལ་ཡོན་ཏན་རྣམ་པ་གསུམ་སྟེ། དགྲ་འདུལ་བའི་དོན་ཏེ་སྒྲིབ་པ་རྣམ་གཉིས་འཇོམས་པའོ། །མཛེས་པའི་དོན་ཏེ་འཕགས་པའི་ཡོན་ཏན་ཐམས་ཅད་ཀྱིས་བརྒྱན་པའོ། །འདེགས་པའི་དོན་ཏེ་བདག་དང་གཞན་དགྲོལ་བའོ། །ཡང་ན་གླང་གིས་དྲང་བའི་ཤིང་རྟ་ནི་ར་དང་རི་དྭགས་ཀྱིས་དྲང་བའི་ཤིང་རྟ་ལས་ཁྱད་པར་དུ་བསྟན་ཏེ་ཐེག་པ་ཆེན་པོ་འདི་ཡང་ཐེག་པ་རྣམ་པ་གཉིས་ལས་འཕགས་ཞེས་པའི་དོན་ཏོ། །སྟོབས་དང་ལྡན་པ་ཞེས་པ་ནི་ཡང་དག་པའི་ཡེ་ཤེས་ཏེ། ནང་གི་ཡོན་ཏན་ཕུན་སུམ་ཚོགས་པའོ། །ཁ་དོག་དཀར་བ་ཞེས་པ་ནི་སྒྲིབ་པ་ཐམས་ཅད་བསལ་ཏེ་ཚུལ་ཁྲིམས་ཀྱི་ཡོན་ཏན་དང་ལྡན་པ་བསྟན་ཏོ། །ཡང་མཛེས་པ་ཞེས་པ་ནི་མཚན་དང་དཔེ་བྱད་བཟང་པོས་བརྒྱན་པས་ལྷ་དང་མིས་མཆོད་པར་འོས་པ་བསྟན་ཏོ། །ཡང་སྟོབས་དང་ལྡན་པ་ནི་མངའ་བ་ཕུན་སུམ་ཚོགས་པ་བསྟན་ཏེ། རྣམ་པ་ཐམས་ཅད་ཀྱིས་མི་བསྙེངས་ཞེས་པའི་དོན་ཏོ། །རླུང་བཞིན་དུ་མགྱོགས་པ་ཞེས་པ་ནི་ཐུགས་རྗེས་སེམས་ཅན་འདྲེན་པ་དང་ཡོད་པ་དང་མེད་པའི་ཆོས་གཟིགས་པ་ལ་ཐོགས་པ་མེད་པར་འཇུག་པའི་དོན་ཏེ། མདོ་ལས་ཤཱ་རིའི་བུ་དེ་ཅིའི་ཕྱིར་ཞེ་ན་ཞེས་པ་ནས་དེས་འདི་སྙམ་དུ་བསམས་སོ་ཞེས་པའི་བར་དུ་ནི་ཕ་དེའི་བསམ་པ་བསྟན་ཏེ། བང་མཛོད་དང་ནོར་མང་པོ་དག་ནི་འདུས་བྱས་དང་འདུས་མ་བྱས་པའི་ཡོན་ཏན་ནོ། །བང་མཛོད་ཅེས་པ་ནི་སྡེ་སྣོད་གཉིས་དང་གསུམ་དུ་ལྡན་པའོ། །མདོ་ལས་བདག་གིས་བྱིས་པ་འདི་རྣམས་བཞོན་པ་ངན་
པ་བྱིན་ཏེ་ཅི་ཞིག་བྱ་སྙམ་ཞེས་པ་ནས་འདི་དག་ཐམས་ཅད་ལ་སྙོམས་པར་བསམ་གྱི་མི་སྙོམས་པར་མི་བྱའོ་ཞེས་པའི་བར་དུ་ནི་བྱང་ཆུབ་ཏུ་སེམས་མ་བསྐྱེད་པ་ཕྱིར་བུས་པ་ཞེས་གདགས་སོ། །ཐེག་པ་ཆེན་པོ་ལ་ཞུགས་པའི་ཕྱིར་ངའི་བུར་འདྲའོ་ཞེས་སྨས་སོ། །ཐུགས་རྗེས་དགོངས་པ་གཉིས་སུ་མི་མཛད་པའི་ཕྱིར་སྙོམས་པའོ། །མདོ་ལས་བདག་ཀྱང་བང་མཛོད་མང་གི་ཞེས་པ་ནས་བདག་གི་བུ་རྣམས་ལྟ་ཅི་སྨོས་ཞེས་པའི་བར་དུ་ནི་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པས་འགྲོ་བ་ལྔར་སྐྱེས་པའི་སེམས་ཅན་ཐམས་ཅད་དང་རིགས་མེད་པ་དང་རིགས་ངེས་པ་རྣམས་ལ་ཡང་སྙོམས་པར་སྟོན་ན་ཐེག་པ་ཆེན་པོའི་རིགས་ཅན་དང་རིགས་མ་ངེས་པ་རྣམས་ལ་ལྟ་ཅི་སྨོས་ཞེས་པའི་དོན་ཏོ། །མདོ་ལས་དེའི་ཚེ་བྱིས་པ་དེ་དག་ཀྱང་ཞེས་པ་ནས་དེ་ཇི་སྙམ་དུ་སེམས་ཞེས་པའི་བར་དུ་ནི་རྣམས་ཀྱིས་སྔར་བསམ་པའི་རེ་བ་ལས་འགལ་བ་བསྟན་ཏེ། སྔར་ཐེག་པ་རྣམ་གསུམ་བསྟན་ལ་ཕྱིས་ཐེག་པ་ཆེན་པོ་འབའ་ཞིག་བསྟན་པས། འགལ་ཞེས་པའི་དོན་ཏོ། །མདོ་ལས་སྐྱེས་བུ་དེས་བྱིས་པ་དེ་དག་ལ་ཞེས་པ་ནས། དེ་བརྫུན་དུ་སྨྲས་པར་མི་འགྱུར་རམ་ཞེས་པའི་བར་དུ་ནི་སྔར་ནི་ངེས་པའི་དོན་གྱི་དཔེ་བསྟན་ཕྱིས་ཐེ་ཚོམ་དགྲོལ་བའི་དཔེ་བསྟན་ཏེ་གོང་དུ་བཅོམ་ལྡན་འདས་ནི་བདེན་པར་གསུང་བ་ཡང་དག་པ་ཉིད་དུ་གསུང་པའོ་ཞེས་འབྱུང་བ་ལ་ཐེག་པ་རྣམ་གསུམ་བསྟན་པ་འདིར་ཐེག་པ་ཆེན་པོ་གཅིག་ཏུ་བསྡུས་ན་གསུང་དམ་པར་གྱུར་ཅེས་པའི་དོན་ཏོ། །མདོ་ལས་ཤཱ་རིའི་བུས་གསོལ་པ། བཅོམ་ལྡན་འདས་དེ་ལྟ་མ་ལགས་སོ་ཞེས་པ་ནས་སྲོག་དང་ལྡན་པར་བགྱིས་པའི་སླད་དུའོ་ཞེས་པའི་བར་དུ་ནི་དྲིས་པའི་ལན་བཏབ་པ་སྟེ། སྔར་གླེང་བ་དང་ཕྱིས་དགྲོལ་བའོ། །ཉོན་མོངས་པ་ལས་སྟོན་པ་དང་ངན་འགྲོ་གསུམ་ལས་ཐར་པར་བྱས་པ་ནི་སྲོག་དང་ལྡན་པར་བྱས་པའོ། །མདོ་ལས་དེ་ཅིའི་སླད་དུ་ཞེ་ན་ཞེས་པ་ནས་སྐྱེས་བུ་དེ་ཤོ་བེ་མཆི་བར་མི་འགྱུར་རོ་ཞེས་པའི་བར་དུ་ནི་ཁམས་གསུམ་འབར་བའི་ཁང་པ་དང་འདྲ་བ་ལས་ཐར་བར་བྱས་པའི་ཕྱིར་བརྫུན་དུ་མི་འགྱུར་བ་དང༌། སྐྱེས་བུ་དེ་ཐབས་མཁས་པ་དང་ལྡན་པས། ཆེན་པོ་སྦྱིན་པའི་བསམ་པས་ཆུང་ངུར་བརྗོད་དེ་ཆེན་པོ་ཐབ་པར་བྱས་པས་འགལ་བ་མེད་པའི་ཕྱིར་རོ།།
མདོ་ལས་དེ་ཅིའི་སླད་དུ་ཞེ་ན་བཅོམ་ལྡན་འདས་སྐྱེས་བུ་དེ་ཤོ་བོ་མཆི་བ་མ་ལགས་སོ་ཞེས་པའི་བར་དུ་ནི་ཐེག་པ་ཆེ་པོ་བསྟན་པའི་ཕྱིར་བརྫུན་དུ་མི་འགྱུར་བ་བསྟན་པའོ། །མདོ་ལས་དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་ལེགས་སོ་ལེགས་སོ། །དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ་ཞེས་པ་ནི་དོན་དེ་ཉིད་ཡིན་པར་བཅོམ་ལྡན་འདས་ཀྱིས་ཀྱང་བསྟན་པར་བྱས་སོ། །མདོ་ལས་ཤཱ་རིའི་བུ་དེ་བཞིན་དུ་ཞེས་པ་ནས་དེ་བཞིན་གཤེགས་པའི་ཡེ་ཤེས་དང་ཞེས་པའི་བར་དུ་ནི་དཔེ་དག་ཀྱང་སྔ་མ་ནི་དྲང་བའི་དོན་གྱི་དཔེ། ཕྱི་མ་ནི་ངེས་པའི་དོན་དང་སྦྱར་བའོ། །དེ་ལ་དེའི་གནས་དང་ཁྱིམ་བདག་དང༌། རྒན་དང་འབྱོར་པ་དང༌། ཁྱིམ་གྱི་རྟགས་དང༌། སྒོ་དང༌། དྲུག་གཅིག་ཅིག་སྟོན་ཏེ། འཇིག་རྟེན་ཞེས་པ་ནི་གནས་སོ། །ཁྱིམ་བདག་ཅེས་པ་ནི་བདག་པོའོ། །འཇིག་རྟེན་ཡང་སྣོད་དང་བཅུད་དུ་དབྱེའོ། །འཇིགས་པ་ཐམས་ཅད་བསལ་བ་ཞེས་པ་ནི་འབྱོར་པ་བསྟན་ཏེ། འཇིགས་པ་ནི་རྣམ་པ་ལྔ་སྟེ། འཚོ་བ་མི་འབྱོར་བས་འཇིགས་པ་དང༌། གཏམ་ངན་གྱིས་འཇིགས་པ་དང༌། འཆི་བས་འཇིགས་པ་དང༌། ངན་སོང་གིས་འཇིགས་པ་དང༌། འཁོར་གྱི་ནང་དུ་སྤ་གོང་བས་འཇིགས་པའོ། །འཆི་བ་དང་འཁྲུག་པ་ཞེས་པ་ནི་མི་བདེ་བའི་སྡུག་བསྔལ་སྣ་ཚོགས་སོ། །དེ་དག་ནི་འཁོར་བའི་འཇིགས་པ་དང་སྦྱར་རོ། །ཡིད་མི་བདེ་བ་དང༌། མ་རིག་པ་ལ་སོགས་པ་ནི་ཉོན་མོངས་པའི་རྩ་བ་གཏི་མུག་སྟེ་སྡུག་བསྔལ་གྱི་རྒྱུ་ཡིན་པས་དུག་གསུམ་དང་སྦྱར་རོ། །ཡང་ན་དཀོན་མཆོག་གསུམ་མ་རིག་པ་ཡང་སྦྱར་རོ། །ཉོན་མོངས་པ་དེ་དག་མ་ལུས་པ་སྤངས་པས་ཡོན་ཏན་ཐམས་ཅད་དང་ལྡན་པའི་དེ་བཞིན་གཤེགས་པ་ཉིད་སེམས་ཅན་ཐམས་ཅད་ཀྱི་ཕ་ཡིན་པར་སྦྱར་རོ། །མདོ་ལས་སྟོབས་དང་མི་འཇིགས་པ་ཞེས་པ་ནས་ཡེ་ཤེས་དམ་པའི་མཆོག་ཐོབ་པ་ཞེས་པའི་བར་དུ་ནི་འབྱོར་པ་བསྟན་ཏོ། །སྟོབས་དང་མི་འཇིགས་པ་དང་སངས་རྒྱས་ཀྱི་ཆོས་མ་འདྲེས་པ་ལ་སོགས་པ་ནང་གི་ཡོན་ཏན་ཕུན་སུམ་ཚོགས་པའི་ཕྱིར་ཕྱུག་ཅིང་ནོར་མང་བ་ལྟ་བུར་བསྟན་ཏོ། །རྫུ་འཕྲུལ་ནི་བྲན་གཡོག་འཁོལ་བ་དང་འདྲ་བར་དེས་དབང་དང་སེམས་ཅན་གྱི་དོན་བྱེད་
པའོ། །མདོ་ལས་སྙིང་རྗེ་ཆེན་པོ་མི་སྐྱོ་བའི་ཡིད་ཀྱིས་ཕན་པར་འདོད་པ་ཞེས་པ་ནས་ཞིག་པའི་ཁང་པ་དང་འདྲ་བར་སེམས་ཅན་ཞེས་པའི་བར་དུ་ནི་སེམས་ཅན་ལ་ཕན་འདོགས་པ་ལ་ཐུགས་རྗེ་ཆེན་པོ་སྐྱེ་མི་མཁྱེན་པར་བསྟན་པ་སྟོན་ཏེ། སྤོང་བ་ཕུན་སུམ་ཚོགས་པ་དང༌། ཡེ་ཤེས་ཕུན་སུམ་ཚོགས་པས་བདག་དང་གཞན་གྱི་དོན་རྫོགས་པར་མཛད་པ་དང༌། ཁང་པ་མེ་འབར་བ་དང་འདྲ་བར་ཁམས་གསུམ་གྱི་སེམས་ཅན་འགྲོ་བ་ལྔར་སྐྱེ་བ་རྣམས་ལ་ཕན་འདོགས་ཤིང་འཇིག་རྟེན་དུ་གཤེགས་ཏེ། དེ་ལས་བྱུང་བ་བསྟན་པས་ཐེག་པ་རྣམས་གཅིག་གི་དོན་སྤྱོད་པ་ལ་གཟུད་པར་ཐབས་མཁས་པ་ཆེན་པོས་ཕན་འདོགས་པ་བསྟན་པའོ། །མདོ་ལས་སྐྱེ་བ་དང་རྒ་བ་དང༌། ན་བ་དང༌། འཆི་བ་ཞེས་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གཟུད་པའི་ཕྱིར་འབྱུང་སྟེ་ཞེས་པའི་བར་དུ་ནི་སེམས་ཅན་འགྲོ་བ་ལྔར་སྐྱེས་པ་རྣམས་འཁོར་བ་གཡང་ཟ་བ་ན་གནས་པའི་དཔེ་སྟེ། དེ་ཡང་དེ་ན་རབ་ཏུ་མང་བར་གནས་པ་དང༌། ཁང་ཁྱིམ་ཞིག་བ་དང༌། ཕྱོགས་ཐམས་ཅད་ནས་མེ་འབར་བ་བུས་པ་རྣམས་དེ་ན་གནས་པར་སྟོན་པ་ལ་རབ་ཏུ་མང་བ་གནས་པའི་སེམས་ཅན་མང་པོ་ཞེས་པའི་དོན་ཏོ། །སྐྱེ་བ་དང་རྒ་བ་དང་ན་བ་དང་འཆི་བ་ལ་སོགས་པ་ནི་ཁང་པ་རྙིང་པ་དང་འདྲ་བར་སྦྱར་རོ། །མ་རིག་པའི་མུན་པ་ཞེས་པ་ལ་སོགས་པ་ནི་གདུག་པ་གསུམ་གྱི་མེ་ཕྱོགས་བཞི་ནས་འབར་བ་བསྟན་ཏོ། །བྱང་ཆུབ་ལ་གཟུད་ཅེས་པ་ནི་བུ་རྣམས་ལ་ཐུགས་རྗེ་སྐྱེ་ཞིང་ཉོན་མོངས་པའི་གནས་ནས་འདོན་ཞེས་པའོ། །ཕུང་པོ་བཞི་ལ་མི་རྟག་པ་ལ་སོགས་པས་འཇོམས་པ་དང༌། སྐྱེ་རྒ་ན་འཆིས་རྙིངས་པར་བྱེད་པ་ནི་ཁང་པ་རྙིངས་པ་ལྟ་བུའོ། །མདོ་ལས་དེ་བྱུང་མ་ཐག་ཏུ་སེམས་ཅན་རྣམས་ཞེས་པ་ནས་སྡུག་བསྔལ་རྣམ་པ་མང་པོ་རབ་ཏུ་མྱོང་བ་ཞེས་པའི་བར་དུ་ནི་དེ་ཡང་བཅོམ་ལྡན་འདས་ཐུགས་རྗེ་སྐྱེ་བ་སྟོན་པ་ལ་ཐུགས་རྗེ་སྐྱེ་བ་དང༌། ཐུགས་རྗེ་སྐྱེ་བའི་དངོས་པོ་རྣམ་གཉིས་སྟོན་ཏེ། སེམས་ཅན་རྣམས་ཞེས་པ་ནི་ཐུགས་རྗེ་སྐྱེའོ། །སྐྱེ་རྒ་ན་འཆི་བ་ལ་སོགས་པ་ནི་ཐུགས་རྗེ་སྐྱེ་བའི་དངོས་པོའོ། །དེ་འདྲ་བའི་སྡུག་བསྔལ་སྣ་ཚོགས་པ་ལ་སེམས་ཅན་འདི་དག་གནས་སོ་ཞེས་བཅོམ་ལྡན་འདས་ཐུགས་རྗེ་སྐྱེ་བའོ། །དེ་ཡང་སྔར་ནི་འདོད་པའི་ཁམས་
ཀྱི་སྡུག་བསྔལ་བདུན་བསྟན། སྡུག་བསྔལ་རྣམ་པ་མང་པོ་ཞེས་པ་ནི་གཟུགས་དང་གཟུགས་མེད་པའི་ཁམས་ཀྱི་སྡུག་བསྔལ་བསྟན་ཏོ། །འདོད་པའི་ཁམས་ཀྱི་སྡུག་བསྔལ་ཡང་འདུ་བྱེད་ཀྱི་མཚན་ཉིད་བཞིས་འཇོམས་པ་དང༌། འདོད་པ་རྣམ་ལྔས་བསྲེགས་པ་དང་རྒྱུད་རྣམས་སུ་འཁོར་བའོ། །དེ་ཡང་སྔ་མ་གསུམ་ནི་ཚེ་འདིའི་སྡུག་བསྔལ་ལོ། །གཅིག་ནི་ཚེ་ཕྱི་མའི་སྡུག་བསྔལ་ལོ། །ཡང་ན་སྔ་མ་གཉིས་ནི་འདོད་པ་མི་རྙེད་པའི་སྡུག་བསྔལ་ལོ། །འཁོར་བར་འཁོར་བ་ནི་སྡུག་པ་དང་བྲལ་བ་དང་མི་སྡུག་པ་དང་ཕྲད་པའི་སྡུག་བསྔལ་ལོ། །རྣམ་པ་སྣ་ཚོགས་ཞེས་པ་ནི་ཉེ་བར་ལེན་པའི་ཕུང་པོ་ལྔ་རྣམས་ལ་སྡུག་བསྔལ་བར་གྱུར་པའམ། སྡུག་བསྔལ་བརྒྱད་ལ་སོགས་པ་རྣམས་བསྡུའོ། །དབང་པོ་ལྔ་དང་མངོན་པར་འགྱུར་བ་ནི་སྡུག་བསྔལ་བའོ། །ཡིད་ཀྱི་དབང་པོ་དང་ཕྲད་པ་ནི་འཁྲུག་པ་ལ་སོགས་པའོ། །མདོ་ལས་ད་ལྟར་གྱི་ཚེ་ལ་ཚོལ་བའི་ཕྱིར་ཡོངས་སུ་བསགས་པའི་ཕྱིར་ཞེས་པ་ནས་སྡུག་པ་དང་བྲལ་བའི་སྡུག་བསྔལ་རབ་ཏུ་མྱོང་བ་ཞེས་པའི་བར་དུ་ནི་འདོད་པས་གདུངས་པ་དང༌། འཁོར་བར་འཁོར་བ་བསྟན་ཏེ། མ་རྙེད་པ་ཚོལ་བ་དང༌། རྙེད་པ་ཡོངས་སུ་སོག་པའི་ཕྱིར་སྡུག་བསྔལ་སྐྱེའོ། །དབུལ་ཕོངས་པའི་སྡུག་བསྔལ་ནི་མི་དང་སྦྱར་རོ། །མི་སྡུག་པ་དང་ཕྲད་པ་དང་སྡུག་པ་དང་བལ་བའི་སྡུག་བསྔལ་ནི་ལྷ་དང་མི་གཉི་ག་དང་སྦྱར་རོ། །ལྷ་དང་མི་ལ་སྡུག་བསྔལ་དེ་རབ་ཏུ་ཆེ་བའི་ཕྱིར་གཞན་ལས་བཀར་ཏེ་སྨོས་སོ། །མདོ་ལས་དེ་ཉིད་དུ་སྡུག་བསྔལ་གྱི་ཕུང་པོར་འཁོར་ཞིང་ཞེས་པ་ནས་ཡིད་ལ་བྱ་བ་མི་བསྐྱེད་པར་གཟིགས་སོ་ཞེས་པའི་བར་དུ་ནི་སྡུག་བསྔལ་དེ་དག་ལ་གནས་ཀྱང་སྤོང་ཞིང་སྐྱེ་བར་མི་སེམས་ཏེ་རྗེས་སུ་དཔོག་པའི་སྒོ་ནས་རིག་པ་མི་བསྐྱེད། མངོན་སུམ་གྱི་སྒོ་ནས་ཚོར་བར་མི་བྱེད། འབྲས་བུ་ལ་མི་འཇིག་པ་དང་རྒྱུ་ལ་མི་གྲག་པ་དེ་དག་ཀུན་ལ་སྐྱོ་བ་མི་བསྐྱེད་འབྱུང་བར་མི་སེམས་ཏེ་དེ་ལ་གཞོལ་དེར་རྒྱུགས་ཅེས་པའི་དོན་ཏོ། །མདོ་ལས་ཤཱ་རིའི་བུ་ང་ནི་སེམས་ཅན་འདི་དག་གི་ཕ་སྟེ་ཞེས་པ་ནས་དེ་ལྟར་གཟིགས་སོ་ཞེས་པའི་བར་དུ་ནི་འདི་ཐེག་པ་ཆེན་པོ་ལ་རེ་བ་བསྐྱེད་པ་བསྟན་ཏེ། དེ་ཡང་ཐེག་པ་ཆེན་པོའི་འབྲས་བུ་སེམས་སུ་བཅུག་སྟེ་གདུལ་པ་དང་ཐེག་པ་ཆེན་པོའི་རྒྱུ་
བསྟན་ཏེ་གདུལ་བ་དང་ཐེག་པ་ཆེན་པོའི་སྤྱོད་པ་གསང་བ་བསྟན་ཏེ་གདུལ་བ་དང་ཐེག་པ་ཆེན་པོ་མངོན་དུ་ཆུད་པར་བྱ་བ་སྟོན་པ་དང་བཞི་ལ་འདི་ནི་དང་པོ་དང་སྦྱར་རོ། །མདོ་ལས་དེ་ལ་ཤཱ་རིའི་བུ་ཞེས་པ་ནས་སེམས་ཅན་དེ་དག་ཆོས་དེ་དག་གིས་འབྱུང་བར་མི་འགྱུར་རོ་ཞེས་པའི་བར་དུ་ནི་ཐེག་པ་ཆེན་པོའི་རྒྱུ་སེམས་སུ་གཞུག་པས་གདུལ་བ་སྟེ། གོང་དུ་ཁང་པ་དེ་ཡང་གཅིག་ལ་ཞེས་འབྱུང་བ་དེ་དང་སྦྱར་ཏེ། སྒོ་དེ་ལས་བྱང་ཆུབ་སེམས་དཔའི་ཐེག་པ་འབའ་ཞིག་གིས་འབྱུང་གི་གཞན་གྱིས་འབྱུང་ནུས་པ་མ་ཡིན་པ་བསྟན་ཏེ། སྟོབས་དང་རྫུ་འཕྲུལ་སོགས་པ་རྒྱ་ཆེན་པོ་བསྟན་པས་ཐེག་པ་རྣམ་གཉིས་སྣོད་ཆུང་དུ་ཅན་སྤྱོད་པ་ཞན་པ་འདོར་ཞིང་ཐེག་པ་ཆེན་པོ་ལ་ཞུགས་པས་འདོད་ཁམས་གསུམ་ལ་འབྱུང་གི་གཞན་གྱི་ཐབས་དང་སྤྱོད་པ་ལ་གནས་པས་འབྱུང་བར་མི་ནུས་པ་ཞེས་པའི་དོན་ཏོ། །མདོ་ལས་དེ་ཅིའི་ཕྱིར་ཞེ་ན་སེམས་ཅན་འདི་དག་ནི་ཞེས་པ་ནས་དེ་བཞིན་གཤེགས་པ་དེ་ལྟར་གཟིགས་སོ་ཞེས་པའི་བར་དུ་ནི་རེ་བ་མེད་པར་ཆེན་པོ་ཐོབ་པ་བསྟན་ཏེ། དེ་བཞིན་གཤེགས་པའི་ཡེ་ཤེས་ཟབ་མོ་དེ་བསྟན་པར་མི་ནུས་པའི་ཕྱིར་རེ་བ་མེད་ཅེས་པའི་དོན་ཏོ། །མདོ་ལས་དེ་ཤཱ་རིའི་བུ་ཞེས་པ་ནས་ཐེག་པ་གསུམ་མངོན་པར་སྟོན་པའི་བར་དུ་ནི་ཇི་ལྟར་འབྱུང་བའི་ཐབས་སྦྱོར་བ་བསྟན་པ་དང་སྦྱར་ཏེ། སྟོབས་ལ་སོགས་པ་རྫུ་འཕྲུལ་གྱི་རྣམ་གཞག་སྟེ་གསུང་གི་ཐབས་མཁས་པས་སེམས་ཅན་རྣམས་མེ་འབར་བའི་ཁང་པ་ལས་ཐར་བར་བྱས་ནས་གདོད་ཐེག་པ་ཆེན་པོ་སྟོན་ཞེས་པའོ། །བཅོམ་ལྡན་འདས་ཇི་ལྟར་སྨན་པ་མཁས་པ་ནད་ཐབས་དང་སྦྱོར་ཞིང་སྨན་གཏོང་བ་བཞིན་སེམས་ཅན་གྱི་དབང་པོ་དང་སྦྱོར་ཞིང་ཆོས་སྟོན་ཞེས་པའོ། །མདོ་ལས་ཁྱེད་ཅག་འབར་བའི་ཁྱིམ་དང་འདྲ་བའི་ཞེས་པ་ནས། ཁམས་འདི་ནས་བྱུང་ལ་ཞེས་པའི་བར་དུ་འདི་ནི་ཐེག་པ་རྣམ་གསུམ་དངོས་སུ་བསྟན་པ་སྟེ། དེ་ཡང་ཁམས་གསུམ་ལ་སྐྱོ་བ་བསྐྱེད་པ་དང༌། ཐེག་པ་རྣམ་པ་གསུམ་ལ་གཟུད་པ་དང༌། མངོན་དུ་ཆུད་པ་རྣམས་ཀྱི་དཔེ་དང༌། ཐེག་པ་ཆེན་པོའི་བསྔགས་པ་དང་བཞི་ཞིག་སྟོན་པ་ལ་འདི་ནི་དང་པོ་དང་སྦྱར་རོ། །འདོད་པ་ལྔ་ནི་ཕྱིའི་ཡུལ་ལོ། །གདུང་བ་ཞེས་པ་ནི་ནང་གི་དམིགས་པ་སྟེ། དེ་གཉིས་སྤོང་བ་ལ་ཁམས་གསུམ་ནས་འབྱུང་བའི་ལམ་
ཚོལ་ཅིག་པའོ། །མདོ་ལས་ཉན་ཐོས་ཀྱི་ཐེག་པ་དང་ཞེས་པ་ནས་ཐོབ་པར་གྱིས་ཤིག་ཅེས་པའི་བར་དུ་ནི་ཐེག་པ་རྣམ་གསུམ་ཐོབ་པ་སྩོལ་དུ་གཞུག་པའོ། །མདོ་ལས་ང་ནི་གནས་འདི་ལ་ཁྱེད་ཀྱི་སྙིང་རྗེ་བ་སྟེ་ཞེས་པ་ནས་བརྩོན་འགྲུས་གྱིས་ཤིག་ཅེས་པའི་བར་དུ་ནི། འཕགས་པ་རྣམས་ཀྱིས་མངོན་དུ་ཆུད་པའི་དཔེ་བསྟན་ཏེ། ཐེག་པ་རྣམ་གསུམ་གྱི་དོན་འཕགས་པ་རྣམས་ཀྱིས་མངོན་དུ་གཟིགས་པའི་ཕྱིར་བསླུ་བ་མ་ཡིན་ནོ་ཞེས་སྟོན་པའོ། །མདོ་ལས་ཀྱེ་མ་སེམས་ཅན་དག་ཞེས་པ་ནས། ཀུན་ཏུ་རྒྱུག་པར་འགྱུར་གྱིས་ཞེས་པའི་བར་དུ་ནི་ཐེག་པ་ཆེན་པོའི་ཡོན་ཏན་བསྔགས་པ་སྟེ། སྔར་ནི་འཁོར་བ་དང་མི་མཐུན་པ་བསྟན། དེའི་འོག་ཏུ་ནི་ཐེག་པ་གཞན་ལས་ཁྱད་པར་དུ་གྱུར་པ་ལས་བསྔགས་པ་སྟེ། འདི་ནི་དང་པོའོ། །འཇིག་རྟེན་གྱི་འཁོར་བ་ནི་ཉོན་མོངས་པས་བཅིངས་པ་རང་དབང་མེད་པ་ཡིན་ན། འཕགས་པ་རྣམས་ཀྱིས་གཟིགས་ཤིང་བརྙེས་པའི་ཐེག་པ་ནི་ཟག་པ་མེད་པས་དགའ་བ་ཆེན་པོ་དང་ལྡན་པའོ། །མི་ཕོངས་པར་རྩེན་ཞེས་གཞན་ལ་རག་ལུས་པ་མེད་པའི་ཕྱིར་རོ། །མི་ཕོངས་པ་ནི་མི་ཚོལ་བའི་དོན་ཏེ་ཚོལ་བ་རྣམ་གསུམ་སྤངས་པའོ། །ཚོལ་བ་རྣམ་གསུམ་ནི་འདོད་པའི་ཚོལ་བ་དང༌། སྲིད་པའི་ཚོལ་བ་དང༌། ལོག་པའི་སྤྱོད་པས་ཚོལ་བའོ། །མདོ་ལས་དབང་པོ་དང་སྟོབས་དང༌། བྱང་ཆུབ་ཀྱི་ཡན་ལག་དང་ཞེས་པ་ནས་ཡིད་བདེ་བ་ཆེན་པོ་དང་ལྡན་པར་བྱོས་ཤིག་ཅེས་པའི་བར་ནི་འདིས་ཐེག་པའི་དམིགས་པའི་ཡོན་ཏན་བསྟན་ཏེ་ཐེག་པ་ཆེན་པོ་དེ་སྟོབས་དང༌། མི་འཇིགས་པ་དང་བྱང་ཆུབ་ཀྱི་ཡན་ལག་བདུན་དང༌། འཕགས་པའི་ལམ་ཡན་ལག་བརྒྱད་དང༌། བསམ་གཏན་བཞི་དང༌། སྙོམས་པར་འཇུག་པ་དགུ་དང༌། རྣམ་པར་ཐར་པ་བརྒྱད་དང༌། ཏིང་ངེ་འཛིན་གསུམ་ལ་སོགས་པ་ལ་དམིགས་ཤིང་གནས་པའི་ཕྱིར་བདེ་བ་དང་ཡིད་བདེ་བ་སྐྱེ་ཞེས་པའི་དོན་ཏོ། །མདོ་ལས་དེ་ལ་ཤཱ་རིའི་བུ་སེམས་ཅན་གང་མཁས་པར་འགྱུར་ཞེས་པ་ནི་བྱིས་པ་ཁ་ཅིག་རི་དགས་ཀྱི་ཤིང་རྟ་འདོད་དེ་འབྱུང་བ་བཞིན་ཞེས་པའི་བར་དུ་ནི་འདི་མན་ཆད་དེ་བཞིན་གཤེགས་པའི་གསུང་རབ་ལ་བརྟེན་ཏེ། ཐེག་པ་རྣམ་གསུམ་སོ་སོར་གྲོལ་བ་ཐོབ་པར་སྟོན་པ་ལ། འདི་ཉན་ཐོས་ཀྱི་ཐེག་པ་དང་སྦྱར་ཏེ་
དཔེ་དང་དོན་དུ་སྦྱར་བར་དབྱེའོ། །མཁས་པར་གྱུར་པ་ཞེས་པ་ནི་མཐུ་རྣམ་བཞི་སྟོན་ཏེ་མཁས་པ་ནི་རྒྱུ་དང་ལྡན་པའི་མཐུའོ། །དེ་བཞིན་གཤེགས་པ་ཞེས་པ་ནི་དགེ་བའི་བཤེས་གཉེན་གྱི་མཐུའོ། །ཕ་རོལ་གྱི་སྒྲ་ཐོས་ཞེས་པ་ནི་ཡིད་ལ་བྱེད་པའི་མཐུའོ། །བརྩོན་པར་བྱེད་ཅེས་པ་ནི་ཚོགས་པའི་མཐུའོ། །དེ་བཞིན་གཤེགས་པ་འཇིག་རྟེན་དུ་བྱུང་བ་དང་ཕྲད་དེ། རིགས་ཀྱི་རྒྱུ་བཞིན་དུ་སེམས་བསྐྱེད་ལ་དད་པས་ཆོས་ཉན་ཅིང་བརྩོན་པས་ཚིག་སྩོགས་པའོ། །བརྩོན་པ་ནི་སྤྱོད་པ་ཐམས་ཅད་སྡུད་པའི་གཙོ་བོ་ཡིན་ནོ། །བདག་ཡོངས་སུ་མྱ་ངན་ལས་འདས་ཞེས་པ་ནི་སྤྱོད་པ་ཞན་པས་གཞན་གྱི་དོན་མི་བྱེད་པའོ། །ཕ་རོལ་ལས་ཐོས་ཞེས་པ་ཡང་འཕགས་པའི་མན་ངག་པས་འབྲས་བུ་རྙེད་པར་འགྱུར་གྱི་གཞན་གྱིས་མ་ཡིན་ཞེས་པའོ། །མདོ་ལས་སེམས་ཅན་གཞན་སློབ་དཔོན་མེད་པའི་ཡེ་ཤེས་དང་ཞེས་པ་ནས་བྱིས་པ་ཁ་ཅིག་རའི་ཤིང་རྟ་འདོད་པ་དེ་འབྱུང་བ་བཞིན་ནོ་ཞེས་བའི་བར་དུ་ནི་འདི་ནི་མཐུ་རྣམ་གསུམ་གྱིས་འབྱུང་བར་བྱེད་པ་དེའི་རྒྱུ་མི་དགོས་པར་རང་བཞིན་གྱི་ཤེས་པས་སངས་རྒྱས་མི་བཞུགས་པའི་འཇིག་རྟེན་དུ་འབྲས་བུ་ཐོབ་པར་བྱེད་པ་སྟེ། འཕགས་པ་ཉན་ཐོས་ལྟར་བཅོམ་ལྡན་འདས་ཀྱི་གསུང་མངོན་དུ་ཐོས་པས་ལམ་ཐོབ་པ་ལྟར་མ་ཡིན་ཏེ། རྟེན་ཅིང་འབྲེལ་ཏེ་འབྱུང་བའི་དོན་ཟབ་མོ་རྟོགས་པས་འབྲས་བུ་ཐོབ་ཅེས་པའོ། །དེ་ཡང་བསེ་རུ་བཞིན་གནས་པ་དང་ཁྱུས་ལྡིང་པའོ། །སྔར་བཅོམ་ལྡན་འདས་ཀྱི་བསྟན་པ་ལ་ཞུགས་པ་ལ་ཕྱིས་འབྲས་བུ་ཐོབ་པས་ན་རང་གིས་རིག་ཞེས་པའོ། །མདོ་ལས་སེམས་ཅན་གཞན་ཡང་ཐམས་ཅད་མཁྱེན་གྱི་ཡེ་ཤེས་ཞེས་པ་ནས་བུས་པ་ཁ་ཅིག་གླང་གི་ཤིང་རྟ་འདོད་དེ་འབྱུང་བ་ཡིན་ནོ་ཞེས་པའི་བར་དུ་ནི་ཐེག་པ་ཆེན་པོ་དང་བྱང་ཆུབ་སེམས་དཔའི་ཐེག་པ་ཞེས་དབྱེ་ཞིང་སྟོན་ཏེ། ཐམས་ཅད་མཁྱེན་པ་ནི་སྟོང་པ་མཁྱེན་པའི་ཡེ་ཤེས་སོ། །ཐེག་པ་རྣམ་གསུམ་ཀུན་ལ་ཡང་ཡེ་ཤེས་མངའ་མོད་ཀྱི་དངོས་པོ་ལ་གཟིགས་པའི་ཡེ་ཤེས་ནི་བཅོམ་ལྡན་འདས་ཉག་གཅིག་ལ་མངའ་བ་དང་རང་རིག་པའི་ཡེ་ཤེས་ཉིད་ནི་རང་བྱུང་གི་ཡེ་ཤེས་སོ། །གཞན་ལ་ལྟོས་པ་མེད་པར་མཁྱེན་པ་ནི་མཁན་པོ་མེད་པའི་ཡེ་ཤེས་སོ། །ཡང་ན་དེ་ཡེ་ཤེས་ཀྱི་རང་བཞིན་ནི་རང་བྱུང་གི་ཡེ་ཤེས་སོ། །ཡེ་ཤེས་ཀྱི་མཚན་ཉིད་ནི་
མཁན་པོ་མེད་པའི་ཡེ་ཤེས་སོ། །ཡེ་ཤེས་དེ་གཉིས་ཀྱི་འཁོར་ནི་སྟོབས་དང་མི་འཇིགས་པ་ལ་སོགས་པ་ནང་གི་ཡོན་ཏན་དག་གོ །ཡོན་ཏན་དེ་དག་གིས་འགྲོ་བ་རྣམས་བྱམས་པ་དང་ཐུགས་རྗེས་ཕན་པ་དང་བདེ་བར་མཛད་ཅིང་སེམས་ཅན་སྒྲོལ་བས་ཐེག་པ་ཆེན་པོ་ཞེས་བྱའོ། །བྱང་ཆུབ་ཞེས་པ་ནི་ཐེག་པ་རྣམ་གསུམ་ཐུན་མོང་གི་མིང་སྟེ་དེ་དག་ལ་ཁྱད་པར་དུ་བསྟན་པའི་ཕྱིར་སེམས་དཔའ་ཆེན་པོ་ཞེས་སྨོས་སོ། །མདོ་ལས་ཤཱ་རིའི་བུ་འདི་ལྟ་སྟེ་དཔེར་ན་ཞེས་པ་ནས་བུས་པ་དེ་དག་ལ་བཞོན་པ་ཆེན་པོ་གཅིག་བྱིན་པ་དེ་བཞིན་དུ་ཞེས་པའི་བར་དུ་ནི་ཡང་དག་པ་ཉིད་སྟོན་པ་ལ་རྣམ་པ་གཉིས་སུ་དབྱེ་སྟེ། ཡང་དག་ལ་བསྟན་པ་དང༌། ཐེ་ཚོམ་དགྲོལ་བའོ། །དེ་ཡང་བུ་རྣམས་ཀྱི་རེ་བ་ལས་འགལ་བ་བསྟན་པ་དང༌། དཔེ་དང་དོན་དུ་སྦྱར་བའོ། །དཔེ་ལ་ཡང་བུའི་ཕྱིར་ཐོན་པ་མཐོང་བ་དང༌། ཕའི་ཡིད་རངས་པ་བསྟན་པ་སྟེ། མདོ་དང་ཅི་རིགས་པར་སྦྱར་རོ། །མདོ་ལས་ཤཱ་རིའི་བུ་དེ་བཞིན་གཤེགས་པ་ཞེས་པ་ནས་མྱ་ངན་ལས་འདས་པའི་བདེ་བ་ཐོབ་པར་གཟིགས་ན་ཞེས་པའི་བར་དུ་ནི་ཕའི་བསམ་པ་བསྟན་ཏེ་ཁམས་གསུམ་གཡང་ཟབ་མེ་འབར་བའི་ཁང་པ་ལྟ་བུ་ལས་འགྲོ་བ་མང་པོ་བཏོན་ནས་དེ་བཞིན་གཤེགས་པའི་བསྟན་པ་ཡང་དག་པའི་སྒོར་གཟུད་པ་དང༌། མྱ་ངན་ལས་འདའ་བའི་བདེ་བ་དམ་པ་ལ་ཡོངས་སུ་བཀོད་དེ་འཇིགས་པ་དང་འཚེ་བ་ཐམས་ཅད་ལས་ཐར་ཞེས་པའི་དོན་ཏོ། །མདོ་ལས་ཤཱ་རིའི་བུ་དེ་དག་ལ་དེའི་ཚེ་ཞེས་པ་ནས་ཡོངས་སུ་མྱ་ངན་ལས་འདའ་བར་བྱེད་ཀྱི་ཞེས་པའི་བར་དུ་ནི་ཐེག་པ་རྣམ་གཉིས་དང་བྱང་ཆུབ་སེམས་དཔའ་ལས་སྲས་སུ་འདྲ་བས་གཟུད་པའི་ཕྱིར་དེ་གཉི་ག་ཡང་ཐེག་པ་ཆེན་པོའི་མྱ་ངན་ལས་འདའ་བ་ལ་དགོད་ཀྱི་གཞན་ལ་མི་གསུང་ཞེས་པའི་དོན་ཏོ། །མདོ་ལས་སེམས་ཅན་གང་ལ་ཡང་ཞེས་པ་ནས་དགའ་བར་འགྱུར་བ་ཐམས་ཅད་ཁ་དོག་གཅིག་པ་སྦྱིན་པར་མཛད་དོ་ཞེས་པའི་བར་དུ་ནི་དེ་ཡང་ཐེག་པའི་རང་བཞིན་དང་ཐེག་པའི་ཡོན་ཏན་སྟོན་པ་ལ་འདི་ནི་དང་པོའོ། །མ་ངེས་པའི་རིགས་ཅན་དང༌། བྱང་ཆུབ་སེམས་དཔའི་རིགས་དང་ཉན་ཐོས་པའི་རིགས་རྣམས་ལ་དགེ་བ་ཐམས་ཅད་རྫོགས་པར་བསྟན་པའི་ཕྱིར་ཐེག་པ་རྣམ་གཅིག་བྱིན་པ་བསྟན་ཏོ། །ཁ་དོག་གཅིག་པ་བདེ་བ་དམ་རྩེན་པ། །ཞེས་
པ་ནི་ཐེག་པའི་ཡོན་ཏན་བསྟན་ཏེ། རྒྱུ་དང་འབྲས་བུ་ཐམས་ཅད་ཉོན་མོངས་པ་དང་མ་འདྲེས་པ་ནི་ཡོན་ཏན་ཐམས་ཅད་ཀྱི་གཞིར་གྱུར་པའོ། །ཟག་པ་མེད་པའི་ཆོས་ཅན་འཕགས་པ་རྣམས་ཀྱིས་བསྔགས་པར་བྱའོ། །མདོ་ལས་ཤཱ་རིའི་བུ་འདི་ལྟ་སྟེ་ཐམས་ཅད་ལ་བྱིན་པའི་ཕྱིར་བརྫུན་དུ་སྨྲ་བ་མ་ཡིན་པ་དེ་བཞིན་དུ་ཞེས་པ་ནི་ཐེ་ཚོམ་བསལ་བ་བསྟན་ཏེ། དཔེས་གླེང་བ་དང༌། དོགས་པ་བསལ་བ་དང༌། དྲིས་པ་དང༌། དེའི་ལན་ལ་སོགས་པ་ཅི་རིགས་པ་དང་སྦྱར་རོ། །མདོ་ལས་ཤཱ་རིའི་བུ་དེ་བཞིན་གཤེགས་པ་ཞེས་པ་ནས་ཡོངས་སུ་མྱ་ངན་ལས་ཟློ་བའི་ཕྱིར་བརྫུན་དུ་སྨྲ་བ་མ་ཡིན་ནོ་ཞེས་པའི་བར་དུ་ནི་གོ་སླ་བས་མ་བཤད་དོ། །མདོ་ལས་དེ་ཅིའི་ཕྱིར་ཞེ་ན་ཞེས་པ་ནས་བང་མཛོད་མང་པོ་དང་ལྡན་ཏེ་ཞེས་པའི་བར་དུ་ནི་ཐེག་པ་གཅིག་པོ་འདི་ཡོན་ཏན་བསམ་གྱིས་མི་ཁྱབ་པ་དང་ལྡན་ཏེ། སེམས་ཅན་རྣམ་པ་སྣ་ཚོགས་ཀྱི་རིགས་ཅན་ཐམས་ཅད་ཀྱིས་དེ་ལ་ལོངས་སྤྱོད་དུ་ཟིན་གྱིས་ཀྱང་མི་ཟད་པ་བསྟན་ཏོ། །མདོ་ལས་སེམས་ཅན་ཀུན་ཐམས་ཅད་མཁྱེན་གྱི་ཡེ་ཤེས་དང་ལྡན་པའི་ཆོས་ཞེས་པ་ནས་གཞུང་འདིས་ཀྱང་དེ་ལྟ་བུར་རིག་པར་བྱའོ་ཞེས་པའི་བར་དུ་ནི་འདིས་བསྡུས་པ་བསྟན་ཏེ་ཐེག་པ་གཅིག་པོ་སྟོན་པའི་རིགས་པ་དང༌། རྒྱུ་དང་རྐྱེན་གྱི་ཐེག་པ་རྣམ་གསུམ་དུ་སྟོན་པའི་བྱེ་བྲག་དང་གཏན་ཚིགས་བསྟན་པས་འབྲས་བུ་བླ་ན་མེད་པ་ནི་གཅིག་ཏུ་ཟད་པར་བཤད་པ་ཡིན་ནོ།། །།དམ་པའི་ཆོས་པུཎྜ་རཱི་ཀའི་འགྲེལ་པ། བམ་པོ་དྲུག་པ། མདོ་ལས་དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ་ཞེས་པ་ནས། ཀ་བའི་རྩ་བ་རུལ་བར་འགྱུར། །ཞེས་པའི་བར་དུ་ནི་འདི་མན་ཆད་ཚིགས་བཅད་བརྒྱ་དང་དྲུག་ཅུ་རྩ་ལྔ་ཞིག་ཡོད་པ་ལས་དུམ་བུ་གཉིས་སུ་དབྱེ་སྟེ། དང་པོར་ཚིགས་བཅད་བརྒྱ་དང་དྲུག་ཅུ་རྩ་ཕྱེད་དང་ལྔས་ནི་ཆོས་དང་དཔེར་སྦྱར་བ་སྔར་སྨོས་པ་རྣམས་བསྟན་ཏེ། ཤཱ་རིའི་བུ་ཁྱོད་ལ་སོགས་པ་ཐམས་ཅད་ངའི་སྲས་ཡིན་ཞེས་པ་ལ་སོགས་པའོ། །དེའི་འོག་ཏུ་ཚིགས་བཅད་བརྒྱད་ཅུ་ཞིག་འབྱུང་བ་དེ་བཞིན་གཤེགས་པའི་ཡེ་ཤེས་ལ་དད་པ་བསྐྱེད་ཅིང་གཟུད་པའི་དོན་དུ་བསྟན་པའོ། །དང་པོ་ལ་ཡང་རྣམ་པ་གསུམ་སྟེ། ཚིགས་བཅད་དྲུག་ཅུ་རྩ་ལྔས་ནི་དཔེ་བསྟན། དེའི་འོག་གི་ཚིགས་
སུ་བཅད་པ་བརྒྱད་ཀྱིས་ནི་དཔེ་དང་དོན་དུ་སྦྱར། དེའི་འོག་མ་ཚིགས་སུ་བཅད་པ་གཅིག་གིས་བསྡུས་པའི་དོན་བསྟན་པའོ། །དང་པོའི་ཚིགས་སུ་བཅད་པ་དྲུག་ཅུ་རྩ་ལྔས་དཔེ་བསྟན་པ་ལ་ཡང་རྣམ་པ་གཉིས་ཏེ། ཚིགས་བཅད་ལྔ་བཅུ་རྩ་གསུམ་གྱིས་ནི་བཀྲི་བའི་དཔེ་བསྟན། དེའི་འོག་མ་ཚིགས་སུ་བཅད་པ་བཅུ་གཉིས་ཀྱིས་ནི་ངེས་པའི་དོན་བསྟན། དང་པོ་ལ་ཡང་རྣམ་པ་བཞིར་དབྱེ་སྟེ། དང་པོ་ཚིགས་སུ་བཅད་པ་ཕྱེད་ཀྱིས་ནི་འཇིག་རྟེན་གསུམ་ན་དེ་བཞིན་གཤེགས་པ་བཞུགས་པའི་དཔེ་བསྟན། དེའི་འོག་ཏུ་ཚིགས་སུ་བཅད་པ་སུམ་ཅུ་རྩ་ཕྱེད་དང་གསུམ་གྱིས་འགྲོ་བ་ལྔ་རྣམས་གཡང་ཟ་ཞིང་བག་ཚ་བའི་དཔེ་བསྟན། དེའི་འོག་མ་ཚིགས་སུ་བཅད་པ་བཅུ་བཞིས་ནི་ཐབས་རྣམ་པ་སྣ་ཚོགས་བཤམས་པའི་དཔེ་བསྟན། དེའི་འོག་གི་ཚིགས་བཅད་ཕྱེད་དང་བཅུ་བདུན་གྱིས་ནི་གསུང་རབ་ལ་བརྟེན་ནས་ཉོན་མོངས་པའི་ས་ནས་འབྱུང་བའི་དཔེ་བསྟན་ཏེ། འདི་ལ་ཁྱིམ་ཆེན་པོ་ཞེས་པ་ནི་ཇི་ལྟར་སྔར་དོན་རྣམ་པ་གསུམ་དུ་བསྟན་པ་བཞིན་ཏེ། ཚིགས་སུ་བཅད་པ་སུམ་ཅུ་རྩ་ཕྱེད་དང་གསུམ་གྱིས་ནི་འགྲོ་བ་ལྔ་གཡང་ཟ་བ་བསྟན་པ་ལ་སྔར་ཚིག་ལྷུག་པས་རྣམ་པ་བཞིར་ཕྱེ་སྟེ། ད་འདིར་ཚིགས་སུ་བཅད་པ་ལ་རྣམ་པ་གསུམ་དུ་དབྱེའོ། དང་པོའི་ཚིགས་བཅད་གསུམ་གྱིས་ནི་ཁང་པ་འདྲུམས་ཤིང་རུལ་པ་བསྟན། དེའི་འོག་གི་ཚིགས་བཅད་ཕྱེད་ཀྱིས་ནི་དེ་ན་གནས་པ་མང་བར་བསྟན། དེའི་འོག་མའི་ཚིགས་བཅད་ཉི་ཤུ་རྩ་དགུས་ནི་ཕྱོགས་ཐམས་ཅད་ནས་གནོད་པ་སྣ་ཚོགས་གཡོ་བ་བསྟན། ཁང་པ་འདྲུམས་པ་ལ་ཡང་རྣམ་པ་གཉིས་སུ་ཕྱེ་སྟེ། ཚིགས་སུ་བཅད་པ་བཅུ་བཞིས་ནི་ཁམས་གསུམ་དང་ཕུང་པོ་ལྔ་རྣམས་མི་རྟག་པ་བསྟན། དེའི་འོག་གི་ཚིགས་བཅད་ལྔས་ནི་གཟུགས་ཀྱི་ཕུང་པོ་མི་རྟག་པ་དང༌། བདག་མེད་པ་དང་མི་གཙང་བ་དང་སྟོང་པའི་དོན་བསྟན། ཁང་པ་རྙིང་པ་འདྲུམས་ཞེས་པ་ནི་རྣམ་པར་ཤེས་པའི་ཕུང་པོ་སྐད་ཅིག་མ་གཅིག་ལ་སྐྱེ་ཞིང་འཇིག་པ་སྒྱུ་མ་དང་འདྲ་བའི་དོན་བསྟན་ཏོ། །ཁང་ཁྱིམ་ཆེ་ཞེས་པ་ནི་གཟུགས་ཀྱི་ཕུང་པོ་མི་རྟག་པ་དབུ་བའི་གོང་བུ་དང་འདྲའོ། །ཀ་བའི་རྩ་བ་རུལ་པ་ཞེས་པ་ནི་འདུ་བྱེད་ཀྱི་ཕུང་པོ་སྐད་ཅིག་མ་གཅིག་ལ་སྐྱེ་ཞིང་འཇིག་པ་བྱ་བ་བཏང་བས་མེད་པ་ལ་གནས་པ་ནི་ཆུ་ཤིང་གི་སྡོང་པོ་དང་འདྲའོ། །ཁྱམས་
རྣམས་ཞིག་ཅེས་པ་ནི་ཚོར་བའི་ཕུང་པོ་མི་རྟག་པས་བདེ་བ་དང་བྲལ་བ་སྟེ་ཆུ་བུར་དང་འདྲ་བར་བསྟན་པའོ། །མདོ་ལས། ཁང་ཐོག་དང་ནི་སྐར་ཁུང་སྐབས་རེར་བྲལ། །ཞེས་པ་ནས་། རྩྭས་གཡོགས་ཐམས་ཅད་འབྲུལ་ཞིང་འཛག །ཞེས་པའི་བར་དུ་ནི་འདུ་ཤེས་ཀྱི་ཕུང་པོ་མི་རྟག་པ་བསྟན་ཏེ། ཚིགས་སུ་བཅད་པ་འདི་ལྔས་ཀྱང་གཟུགས་ཀྱི་ཕུང་པོ་མི་རྟག་པ་ལ་སོགས་པ་བསྟན་པའི་ཕྱིར་ཏེ། ཚིགས་བཅད་གསུམ་གྱིས་ནི་མི་རྟག་པ་བསྟན། ཚིགས་སུ་བཅད་པ་གཅིག་གིས་ནི་བདག་མེད་པ་བསྟན། ཡང་གཅིག་གིས་ནི་མི་གཙང་བ་བསྟན་ཏེ། དེ་གསུམ་གྱི་ཕྱིར་སྟོང་པ་ཉིད་དུ་བསྟན་ཏོ། །སྐྱོང་ནུལ་ཞིག་ཞེས་པ་ནི་ཤ་དང་བྲལ་བའི་དོན། རེ་ལྡེ་ནི་པགས་པ་དང་བྲལ་བའི་དོན། ཁ་རན་རྙིངས་ཞེས་པ་ནི་རུས་པ་དང་ཆུ་རྒྱུས་སུ་བྲལ་བའི་དོན། གཙུག་ལག་དང་མདོ་གཞན་དག་ལས་ཀྱང༌། ལུས་འདི་ནི་མཁར་དང་ཁང་པ་འདྲ་བར་གནས་པ་སྟེ། རྣམ་པར་ཤེས་པ་བརྒྱད་ནི་མཁར་ལྟ་བུའོ། །ཆུ་རྒྱུས་ནི་གཟུངས་ལྟ་བུའོ། །ཤ་ནི་སྐྱོང་ནུལ་ལྟ་བུའོ། །ཤིང་དང་རྡོ་ལ་སོགས་པ་ནེ་རུས་པ་ལྟ་བུར་གནས་པའོ། །འདོད་ཆགས་དང་ཞེ་སྡང་དང་གཏི་མུག་དང་མ་རིག་པ་ལ་སོགས་པས་གླགས་ཤིང་བརྟན་པར་གནས་པའོ། །མདོ་ལས་བརྒྱ་ཕྲག་ལྔ་དག་ལས་ནི་མི་ཉུང་བ། དེན་དེ་དག་གི་ཡང་གནས་གྱུར་ལ་ཞེས་པ་ནི་མང་དུ་གནས་པའི་དོན་བསྟན་ཏོ། །མདོ་ལས། ཁང་ཕྲན་མང་པོ་ཤིན་ཏུ་དོག་པ་རྣམས། །ཞེས་པ་ནས། རབ་རྩིག་པ་དག་ཀྱང་དེ་བཞིན་ཞིག །ཞེས་པའི་བར་དུ་ནི་འདིས་ནི་དབང་པོ་མེད་ཅིང་མི་གཙང་བའི་གནས་ལུས་འདི་རྫས་སུམ་ཅུ་རྩ་དྲུག་གིས་གླགས་ཤིང་ཁྱབ་པར་བྱས་པའི་དོན་བསྟན་ཏོ། །མདོ་ལས། དེ་གནས་བྱ་རྒོད་བྱེ་བ་དག་དང་ནི། །ཞེས་པ་ནས། མི་མ་ཡིན་མང་གནས་དང་གནས་དག་ན། །ཞེས་པའི་བར་དུ་ནི་ཚིགས་སུ་བཅད་པ་ཉི་ཤུ་རྩ་དགུས་ཕྱོགས་སྣ་ཚོགས་ནས་གནོད་པའི་ལྟས་ངན་པ་མང་དུ་འབྱུང་བ་བསྟན་ཏེ། དེ་ལ་ཡང་རྣམ་པ་གསུམ་དུ་དབྱེའོ། །དང་པོ་ཚིག་ཕྱེད་དང་བཅོ་བརྒྱད་ཀྱིས་ནི་འདྲེ་དང་སྲིན་བུ་རྣམས་བསྟན། དེའི་འོག་ཏུ་ཚིག་ཕྱེད་དང་བཅུ་གཅིག་གིས་ནི་དེ་དག་འབྱུང་བའི་གནས་བསྟན། ཚིགས་བཅད་གཅིག་གིས་ནི་བསྡུས་པའི་དོན་བསྟན་ཏེ། དེ་དག་ཀྱང་ཉོན་མོངས་པ་བཅུའི་མཚན་ཉིད་ལྟས་ངན་གྱི་དོན་དུ་བསྟན་ཏེ། འགྲོ་བ་རྣམས་དེ་ལ་འཇིགས་ཤིང་སྐྱོ་བ་དང༌། སྦོང་དུ་གཞུག་པའི་ཕྱིར་བསྟན་ཏོ། །
སྲོག་ཆགས་སྔ་མའི་ལྟས་ཀྱིས་ནི་གདུག་པ་ཆུང་ཞིང་གནོད་པ་བགས་ཀྱིས་བྱེད་པའི་དོན་ཏེ། འདོད་ཆགས་ལ་སོགས་པ་ལྔ་དང་སྦྱར་རོ། །དེའི་འོག་མ་འདྲེ་གདོན་མཐུ་ཆེ་ལ་གནོད་པ་མྱུར་བར་བྱེད་པའི་དཔེས་ནི་ལྟ་བ་རྣམ་པ་ལྔ་བསྟན་ཏོ། །དེའི་འོག་གི་ཚིགས་བཅད་ཕྱེད་དང་གཉིས་ཀྱིས་ནི་ཉེས་པའི་སྐྱོན་བསྡུ་བ་བསྟན། དེ་ལ་ཡང་རྣམ་པ་གཉིས་སུ་ཕྱེ་སྟེ། ཚིག་ཕྱེད་དང་དྲུག་གིས་ནི་སོ་སོའི་མཚན་ཉིད་ཅི་འདྲ་བ་བསྟན། དེའི་འོག་མ་ཚིགས་བཅད་ཕྱེད་ཀྱིས་ནི་བསྡུས་པའི་དོན་བསྟན། དང་པོ་ལ་ཡང་རྣམ་པ་ལྔར་དབྱེ་སྟེ། དང་པོའི་ཚིགས་བཅད་ཕྱེད་ཀྱིས་ནི་འདོད་ཆགས་ཀྱི་དཔེ་བསྟན། དེའི་འོག་མ་ཚིགས་བཅད་ཕྱེད་དང་གཉིས་ཀྱིས་ནི་ཞེ་སྡང་གི་དཔེ་བསྟན། དེའི་འོག་མ་ཚིགས་བཅད་གཅིག་གིས་ནི་གཏི་མུག་གི་དཔེ་བསྟན། དེའི་འོག་མ་གཅིག་གིས་ནི་ཐེ་ཚོམ་གྱི་དཔེ་བསྟན། གཅིག་གིས་ནི་ང་རྒྱལ་གྱི་དཔེ་བསྟན་ཏོ། །འདོད་ཆགས་ལ་རྣམ་པ་བཞི་སྟེ་མངོན་དུ་ཆགས་པ་དང༌། ཆགས་པར་འགྱུར་བ་དང། ཆགས་པ་དང་ཞེན་པ་གཉིས་དང་ལྡན་པ་དང༌། ཡུལ་དེ་དང་དེ་ལ་དགའ་ཞིང་ཆགས་པ་རྣམ་པ་བཞི་སྟེ། བྱ་རྒོད་དང་ཕུག་རོན་ལ་སོགས་པ་རིམ་པར་སྦྱར་རོ། །བྱ་དེ་དག་འདོད་ཆགས་ཆེ་བའི་ཕྱིར་འདོད་ཆགས་བཞི་དང་བརྒྱད་དུ་སྦྱར་རོ། །ཞེ་སྡང་ལ་ཡང་དཔེ་རྣམ་པ་བཅུ་གཅིག་སྟེ། སྦྲུལ་ལ་སོགས་པ་རྣམས་སོ། །དེ་ལ་ཞེ་སྡང་རྣམ་པ་བཅུ་ནི་དེའི་ལུས་ཀྱི་ཕྱིར་ཞེ་སྡང་བ་དང༌། ཡིད་དུ་འོང་བའི་སེམས་ཅན་གྱི་ཕྱིར་ཞེ་སྡང་བ་དང༌། ཡིད་དུ་མི་འོང་བའི་ཕྱིར་ཞེ་སྡང་བ་དང༌། འདས་པའི་དགྲ་ལ་ཞེ་སྡང་བ་དང༌། ད་ལྟར་གྱི་དགྲ་ལ་ཞེ་སྡང་བ་དང༌། མ་འོངས་པའི་དགྲ་ལ་ཞེ་སྡང་བ་དང༌། ཡིད་དུ་མི་འོང་བའི་སྤྱོད་ཡུལ་ལ་ཞེ་སྡང་བ་དང༌། ཕྲག་དོག་པའི་ཕྱིར་ཞེ་སྡང་བ་དང༌། སྔོན་གྱི་བག་ཆགས་ཀྱི་ཕྱིར་ཞེ་སྡང་བ་དང༌། གཞན་གྱི་ཉོན་མོངས་པ་མཐོང་བས་ཞེ་སྡང་བའོ། །མདོ་ལས། བཤང་གཅིས་རབ་ཏུ་སྨེ་བར་བྱས། །ཞེས་པ་དག་ནི་རྫས་སུམ་ཅུ་རྩ་དྲུག་གིས་གླགས་པ་གཏི་མུག་གི་ཕུང་པོ་ཡིན་པ་སྟེ། སྐྱོ་བ་དང་སྤང་བར་བྱ་བ་ཡིན་གྱི་དགའ་བའི་གནས་མ་ཡིན་པར་བསྟན་པའོ། །སྦྱང་ཀི་དང་ཁྱི་དང་ཝ་ནི་ཁམས་གསུམ་མམ་དུས་གསུམ་དུ་སྦྱར་རོ། །མདོ་ལས། མི་ཡི་རོལ་རབ་ཏུ་ཟ། །ཞེས་པ་ནི་ང་རྒྱལ་བསྟན་ཏེ། ང་རྒྱལ་གྱིས་རྙེད་པ་ལ་འཐབ་ཅིང་རྩོད་ཅེས་པའི་དོན་ཏོ། །མདོ་ལས། གནས་དང་གནས་ན་རྣམ་པར་འཆའ་ཞིང་ཟ། །འཐབ་མོ་
བྱེད་དེ་རབ་ཏུ་སྒྲ་ཡང་འབྱིན། །རྣམ་པ་དེ་འདྲས་ཁྱིམ་དེ་ཤིན་ཏུ་འཇིགས། །ཤིན་ཏུ་སེམས་གཏུམ་གནོད་སྦྱིན་དེ་ན་འཁོད། མི་ཡི་རོ་དག་ལ་ཡང་རྣམ་འདྲེན་ཞིང༌། །ཞེས་པ་ནི་ཚིག་འདི་དག་གིས་ནམ་མཁའ་ལ་གནས་པའི་འདྲེ་གདོན་གྱི་དཔེ་ལྟ་བ་རྣམ་ལྔ་བསྟན་ཏེ། དེ་ལ་ཚིག་དང་པོ་གསུམ་གྱིས་ནི་ལོག་པར་ལྟ་བའི་དཔེ་བསྟན། དེའི་འོག་མ་ཚིག་ཕྱེད་ཀྱིས་ནི་ཚུལ་ཁྲིམས་དང་བརྟུལ་ཞུགས་ཀྱི་དཔེ་བསྟན། དེའི་འོག་མས་ནི་འཇིག་ཚོགས་ལ་ལྟ་བའི་དཔེ་བསྟན། དེའི་འོག་མས་ནི་ལྟ་བ་བསྙེམས་པའི་དཔེ་བསྟན། དེའི་འོག་མས་མཐར་ལྟ་བ་བསྟན་ཏོ། །ཡང་ལྟ་བ་དེ་དག་ལ་དང་པོར་ལྟ་བ་སྤྱིའི་མཚན་ཉིད་བསྟན། དེའི་འོག་ཏུ་ལྟ་བ་སོ་སོའི་མཚན་ཉིད་དང་སྤྱོད་པ་བསྟན། གནོད་སྦྱིན་ལ་སོགས་པ་སེམས་གཏུམ་པོ་དེ་དག་ལོག་པར་ལྟ་བས་དགེ་བ་དེ་དག་ཐམས་ཅད་ཀྱི་རྩ་བ་མེད་པར་བྱེད་པ་ཉིད་གནོད་སྦྱིན་མིའི་རོལ་འབྲང་བ་བཞིན་ནོ། །མདོ་ལས། སྦྲུལ་དང་རྐང་བརྒྱ་པ་དང་གཅན་གཟན་རྣམས། །ཞེས་པ་ནས། ཞིག་པའི་ཁྱིམ་དེར་ནི་ཡང་གནས་འཆའ་སྟེ། །ཞེས་པའི་བར་དུ་ནི་ལོག་པར་ལྟ་བས་ཉོན་མོངས་པ་ཐམས་ཅད་བསྐྱེད་པའི་ཕྱིར་དཔེར་སེམས་ཅན་གཏུམ་པོ་གདུག་པ་དེ་དག་གིས་བསྟན་ཏེ། སྐྱེ་ཞིང་འཕེལ་བའི་གནས་སུ་གྱུར་པ་ཕྲུ་གུ་གློག་པ་ཞེས་སྨོས་སོ། །མདོ་ལས། ཇི་ཙམ་གནོད་སྦྱིན་དེ་དག་འགྲངས་གྱུར་པ། །ཞེས་པ་ནས། འཁང་དུ་བཅུག་པ་དེ་ལ་དགའ་བར་བྱེད། །ཞེས་པའི་བར་དུ་ནི་ལོག་པར་ལྟ་བ་ལ་སོགས་ཏེ་ལྟ་བ་རྣམ་ལྔས་རྒྱས་ཤིང་འཕེལ་བར་གྱུར་པ་ཉིད་འགྲངས་པར་གྱུར་པ་སྟེ། སྒོ་གསུམ་ནས་སྤྱོད་པ་རྣམ་པ་གཞན་གྱིས་འཇིགས་སུ་རུང་བའི་ཕྱིར་དང༌། ཚུལ་ཁྲིམས་དང་བརྟུལ་ཞུགས་བསྙེམས་པ་དང༌། བརྟུལ་ཞུགས་བསྙེམས་པས་སེམས་ཅན་གཙེས་པའི་འཁང་པས་བདག་དགའ་བར་བྱེད་པ་བཞིན་དུ་ཚུལ་ཁྲིམས་དང༌། བརྟུལ་ཞུགས་བསྙེམས་པས་མཐོ་རིས་བགྲོད་པའང་དེ་དང་འདྲའོ། །མཐོ་གང་ཚད་དང་དེ་བཞིན་ཁྲུ་གང་ཚད། །ཞེས་པ་ནི་ཚུལ་ཁྲིམས་བསྙེམས་པ་དང༌། བརྟུལ་ཞུགས་བསྙེམས་པ་གཙོ་ཡིན་པར་འཛིན་པས་འཇིག་རྟེན་ལས་འདས་པའི་དོན་ཚོལ་བ་ཉིད་དོ། །མདོ་ལས། དེ་དག་ཁྱི་རྣམས་རྐང་ནས་བཟུང་ནས་ནི། །ཞེས་པ་ནས། འཁང་དུ་བཅུག་པ་དེ་ལ་དགའ་བར་བྱེད། །ཞེས་པའི་བར་དུ་ནི་སྤྱོད་པའི་མཚན་ཉིད་སོ་སོར་དབྱེ་བ་སྟེ། མུ་སྟེགས་ཅན་ཐར་པ་
ཚོལ་བ་ནི་ཡང་དག་པའི་ཆོས་མ་ཡིན་ཏེ། སྤྱོད་པ་ཁྱི་ལྟ་བུས་ཚུལ་ཁྲིམས་དང་བརྟུལ་ཞུགས་བསྙེམས་པ་ནི་ཁྱིའི་རྐང་པ་ནས་འཛིན་པའོ། །རབ་ཏུ་མགྲིན་དགག་ཅས་པ་ནི་ཚུལ་ཁྲིམས་དང་བརྟུལ་ཞུགས་ཀྱིས་མྱ་ངན་ལས་འདས་པའི་གནས་བདེ་བ་ལ་གནས་པར་སེམས་པ་ཉིད་ཁྱིའི་མགྲིན་པ་ལ་རྫིབ་དང་འདྲའོ། །ལོག་པའི་བརྟུལ་ཞུགས་ཀྱིས་རྣམ་པར་གྲོལ་བའི་དགའ་བ་ཚོལ་བ་ནི་ཁྱི་འཁང་པས་དགའ་བར་བྱེད་པ་བཞིན་ནོ། །མདོ་ལས། གཅེར་བུ་གནས་ཤིང་ཉམ་ཆུང་རིད་པ་ཡི། །ཞེས་པ་ནས། རབ་ཏུ་བཀྲེས་ཏེ་ཁ་ཟས་ཀུན་ཚོལ་ཞིང༌། །ཞེས་པའི་བར་དུ་ནི་འཇིག་ཚོགས་སུ་ལྟ་བའི་དཔེ་སྟེ། ལྷན་ཅིག་སྐྱེས་པ་དང་བརྟགས་ཏེ་སྐྱེས་པ་ནི་ཆེ་ཞིང་རིང་བའོ། །དགེ་བའི་རྒྱུ་མེད་པར་འཛེམ་པ་དང༌། ངོ་ཚ་བ་མེད་པ་ནི་གཅེར་བུ་ལྟ་བུའོ། །མ་རིག་པ་དང་བཅས་པས་སྒྲིབ་པ་ནི་གནས་པ་ཡང་དག་པའི་གཞུང་གི་ཤས་ཆུང་བའི་ཕྱིར་རིད་པའོ། །ཕུང་པོ་ལྔ་ལ་དམ་དུ་འཛིན་པའི་ཕྱིར་དེར་གནས་པའོ། །ཉོན་མོངས་པའི་ཆོས་རྣམས་ཀྱི་རྒྱུས་བདག་ཏུ་འཛིན་པ་སྐྱེ་ཞིང་འཕེལ་བར་གྱུར་པས་གནས་དང་གནས་སུ་བདག་ཏུ་ལྟ་བ་འཕེལ་བར་བྱེད་པ་ནི་རབ་ཏུ་བཀྲེས་ཏེ་ཟས་ཚོལ་བའོ། །མདོ་ལས། ལ་ལ་བ་ལང་གདོང་ལ་ཁབ་ཀྱི་ཁ། །ཞེས་པ་ནི་ལྟ་བ་བསྙེམས་པའི་དཔེ་སྟེ། གཞན་གྱི་ལྟ་བ་བཟང་པོ་མི་ཆུད་མི་ལོམ་ཞེས་པའི་དོན་ཏོ། །མདོ་ལས། མི་ཙམ་དང་ནི་དེ་བཞིན་ཁྱི་ཙམ་དང༌། །ཞེས་པ་འདི་ནི་མཐར་འཛིན་པ་བསྟན་ཏེ། ཇི་ལྟར་གླང་གི་མགོ་ལ་རྭ་གཉིས་ཡོད་པ་དང་འདྲ་བར་ལྟ་བ་བསྙེམས་པ་རྣམས་ལ་འཛིན་པ་གཉིས་འབྱུང་སྟེ། རྟག་པར་འཛིན་པ་དང༌། ཆད་པར་འཛིན་པ་གཉིས་ཏེ། ཆད་པར་འཛིན་པ་ནི་རྒྱུ་དང༌། འབྲས་བུ་ཐམས་ཅད་སྤངས་པའི་ཕྱིར་སྡིག་པ་ཅན་མིའི་ཤ་ཟ་བ་བཞིན་ནོ། །རྟག་པར་འཛིན་པ་ནི་སྡིག་པ་དེ་ཙམ་དུ་མི་ཆེ་བའི་ཕྱིར་ཁྱི་ཤ་ཟ་བ་བཞིན་ནོ། །མདོ་ལས། ལྷུག་པའི་སྒྲ་དེ་བཤིག་ཅིང་སྒྲ་ཡང་འབྱིན། །ཞེས་པ་ནས། ཟས་ལ་སྲེད་པས་རབ་ཏུ་གདུངས་པའི་ཕྱིར། །དེ་ན་ཕྱོགས་བཞིར་རབ་ཏུ་ལྟ་བར་བྱེད། །ཞེས་པ་ནི་སྤྱོད་པ་གཞན་རྣམས་ཀྱི་དཔེ་བསྟན་ཏེ། མཐར་ལྟ་བ་འདི་གཉིས་ལ་མུ་སྟེགས་ཀྱི་ལྟ་བ་སུམ་ཅུ་རྩ་བདུན་ཞིག་འདིར་བསྐྱེད་པའི་ཕྱིར་སྐྲ་འཛིངས་པ་ལྟ་བུའོ། །ཡང་དག་པའི་ལུང་གི་ཟས་དང་བྲལ་བ་ཡང་དག་པའི་གཞུང་གི་ཆུ་མ་རྙེད་པ་བཀྲེས་པ་དང་སྐོམ་པས་
ནང་གི་སེམས་གདུངས་པའི་ཕྱིར་ཕྱོགས་བཞིར་ལྟ་ཞིང་སྒྲ་འབྱིན་པའོ། །མདོ་ལས། རྟག་ཏུ་སྐར་ཁུང་དང་མཐངས་དག་ནས་ཀྱང༌། །ཞེས་ནས་ཀྱང་ཞེས་པ་ནས། དེ་ལྟར་ཁྱིམ་དེ་མི་བཟད་འཇིགས་འགྱུར་ལ། །ཞེས་པའི་བར་དུ་ནི་བསྡུ་བ་བསྟན་ཏེ། མུ་སྟེགས་ཅན་རྣམས་ཕྱིན་ཅི་ལོག་སྣ་ཚོགས་ཀྱིས་ལོག་བར་ལྟ་བ་ནི་དཔེར་གནོད་སྦྱིན་ལ་སོགས་པའི་གདོན་ལྟ་བུ་སྟེ། ཡང་དག་པའི་ལྟ་བ་སྤངས་ཤིང་ཤེས་པ་མེད་པས་ལོག་པ་ལ་ཞེན་པ་རྣམས་སྲེད་ཅིང་ཁ་ཟས་ཀྱི་མནར་བ་ལྟ་བུ་སྟེ། སྐྱེ་རྒན་འཆིས་འཇིགས་པ་ལས་ནམ་དུ་ཡང་མི་ཐར་ཞེས་པའོ། །མུ་སྟེགས་ཀྱི་སྤྱོད་པས་ཡང་དག་པའི་ལམ་ལ་ལྟ་བ་ནི་སྐར་ཁུང་ནས་ནམ་མཁར་ལ་ལྟ་བ་ཙམ་མོ། །མདོ་ལས། ཆེ་ལ་མཐོ་ཞིང་རབ་ཏུ་མི་བརྟེན་ནོ། །ཞེས་པ་ནས། མེ་ལྕེ་སྟོང་སྙེད་ཀུན་ཏུ་འབར་བར་གྱུར། །ཞེས་པའི་བར་དུ་ནི་འདྲེ་གདོན་སྣ་ཚོགས་དང༌། ལྟས་སྣ་ཚོགས་གནས་པའི་ས་བསྟན་པ་སྟེ། མི་གཅིག་ཅིག་ནི་ཡོངས་སུ་དབང་འགྱུར་ལ་ཞེས་པ་ནི་བྱང་ཆུབ་སེམས་དཔའ་མོས་པས་སྤྱོད་པའི་ས་ནས་བླ་ན་མེད་པའི་བྱང་ཆུབ་ཐོབ་པའི་བར་དུ་འཇིག་རྟེན་ལ་གནས་ཤིང་འགྲོ་བ་སྒྲོལ་བའི་དཔེ་སྟེ། མི་དེ་ཁྱིམ་གྱི་ཕྱི་རོལ་ཏུ་བྱུང་ཞེས་པ་ཡང་ཇི་ལྟར་ཁྱིམ་བདག་མེད་པའི་ཁང་པ་བཅོས་ཤིང་ལྟ་བ་མེད་པ་འདྲུམས་ཤིང་ཞིག་པར་གྱུར་པ་བཞིན། བཅོམ་ལྡན་འདས་མྱ་ངན་ལས་འདས་པའི་འོག་ཏུ་འཇིག་རྟེན་ན་ཆོས་ཀྱི་བདག་པོ་མེད་པས་ཁམས་གསུམ་སྟོངས་ཞེས་པའི་དོན་ཏོ། །མེ་ལྕེ་འབར་ཞེས་པ་ཡང་ཉོན་མོངས་པ་སྣ་ཚོགས་མཆེད་པས་སྐྱེ་རྒན་འཆིའི་བར་དུ་བཞི་མཆེད་ཅེས་པའི་དོན་ཏོ། །མདོ་ལས། འོད་མ་དང་ནི་ཤིང་དག་མེས་ཚིག་སྟེ། །ཞེས་པ་ནས།། ཀ་བ་དང་ནི་རྩིག་པ་དེ་བཞིན་འབར། །ཞེས་པའི་བར་དུ་ནི་གདུང་མ་ནི་ཚོར་པའི་ཕུང་པོའི་དོན། གྲལ་བུ་ནི་རུས་པའི་དོན་གཟུགས་ཀྱི་ཕུང་པོ་ནི་ཀ་བའི་དོན་ཏེ། སྐྱེ་བ་ལ་སོགས་པ་ཕུང་པོ་ལྔ་ཁྱབ་པའི་ཕྱིར་རྩིག་པའི་དོན་ཏོ། །འཇིག་པ་ནི་འདུ་བྱེད་ཀྱི་ཕུང་པོ་མི་རྟག་པའི་དོན་ཏེ། སྤྱིར་ན་ཕུང་པོ་ལྔ་པོ་འདི་འཇིགས་སུ་རུང་བ་མི་བརྟན་པ་སྐྱེ་བ་དང༌། རྒ་བ་དང༌། ན་བ་དང༌། ཤི་བས་ནམ་དུ་ཡང་འཇིགས་པར་འགྱུར་ཞེས་པའི་དོན་ཏོ། །ཁང་པའི་ནང་ན་མེ་དང་སྲོག་ཆགས་གནས་པའི་དཔེ་འདི་གཉིས་ལ་བྱེ་བྲག་ཅི་ཡོད་ཅེ་ན། ལུས་དང་སེམས་ཚིག་པར་བྱེད་པས་མེའི་དཔེ་བསྟན། མ་རིག་པ་ལ་སོགས་པས་ཉོན་མོངས་པས་གློ་
བུར་དུ་བྱུང་བ་ནི་སྲོག་ཆགས་སྣ་ཚོགས་ཀྱིས་འཇིགས་པར་བྱེད་པའི་དཔེ་སྟེ། རྣམ་པར་ཤེས་པ་ནི་ཕུང་པོ་བཞི་རྣམས་ཀྱི་གནས་སུ་གྱུར་པའི་ཕྱིར་ཁང་པ་ལྟ་བུར་བལྟའོ། །མདོ་ལས། གནོད་སྦྱིན་ཡི་དགས་འདི་དག་སྒྲ་ཡང་འབྱིན། །ཞེས་པ་ནས། དེ་ན་ཤ་ཟ་མང་པོ་ཕན་ཚུན་རྒྱུ། །ཞེས་པའི་བར་དུ་ནི་འདོད་པ་དང་གཟུགས་ཀྱི་ཁམས་ན་ལྟས་ངན་དང་འདྲེ་གདོན་སྣ་ཚོགས་བསྟན་པ་སྟེ། འདོད་པའི་ཁམས་ན་མུ་སྟེགས་ཅན་ཁྱིམ་ནས་བྱུང་བ་དང་ཁྱིམ་ནས་མ་བྱུང་བ་གཉི་ག་ཡང་སྲེད་པའི་ཉོན་མོངས་པས་ལས་དང་འཇིག་རྟེན་གྱི་ཟང་ཟིང་ལ་རྩོད་ཅིང་སྒྲ་འབྱིན་པ་དང༌། ལོག་པར་ལྟ་བའི་ཉོན་མོངས་པས་ལུས་ཚིག་ཅིང་གདུག་པ་སྣ་ཚོགས་ཀྱིས་གཙེས་ཞེས་པའི་དོན་ཏོ། །མདོ་ལས། བསོད་ནམས་མེད་པ་མེ་ཡིས་ཀུན་ཚིག་ནས། །ཞེས་པ་ནས། ཚིག་པར་གྱུར་པ་དག་ལ་ཁྲག་གིས་འཐོར། །ཞེས་པའི་བར་དུ་ནི་གནས་དེ་ན་དག་པའི་བསམ་གཏན་གྱིས་ཉོན་མོངས་པ་ཆོམས་པའི་ཕྱིར་ཉོན་མོངས་པ་མི་སྐྱེ་མོད་ཀྱི་ཡང་དག་པའི་བསོད་ནམས་ཅན་མ་ཡིན་པས་བསོད་ནམས་ཞན་པ་སྟེ། ཉོན་མོངས་པ་འདོད་ཆགས་དང་གཏི་མུག་དང༌། ང་རྒྱལ་དང་ཐེ་ཚོམ་དང༌། འཇིག་ཚོགས་སུ་ལྟ་བ་ལ་སོགས་པའི་ཉོན་མོངས་པས་བསྲེགས་པའི་ཕྱིར་ཉོན་མོངས་པ་མ་སྤངས་པས་གཟུགས་མེད་པའི་ཁམས་ནའང་གནོད་པ་ཡོད་པའི་ཕྱིར་ཕན་ཚུན་སོས་འདེབས་ཞེས་པ་དང༌། རང་གི་ལྟ་བ་དམ་པོར་འཛིན་པ་ནི་ཁྲག་གིས་འཐོར་བ་ལྟ་བུའོ། །མདོ་ལས། དེ་ན་དུས་བྱས་ཤི་ལ་སྦྱང་ཀི་དག །ཞེས་པ་ནས། འཇིག་རྟེན་དག་ན་ཕྱོགས་བཞིར་རབ་ཏུ་འཐུལ། །ཞེས་པའི་བར་དུ་ནི་ཉོན་མོངས་པ་ལས་ཐར་བར་ཚོལ་ཡང་ལྟ་བ་དམ་པོར་འཛིན་པའི་ཕྱིར་མི་འཐོར་བའི་དོན་དུ་བསྟན་པའི་དཔེ་སྟེ། སྤྱང་ཀི་དག་ཅེས་པ་ནི་འདོད་པའི་ཁམས་ཀྱི་ཉོན་མོངས་པ་གཞན་དག་ཀྱང་བསྡུ་བ་སྟེ། གཟུགས་ཀྱི་ཁམས་ན་འདོད་པ་ལ་སོགས་པའི་ཉོན་མོངས་པ་ནི། ཕན་ཚུན་ཟ་བ་འདྲ་བར་བསྟན། ཉོན་མོངས་པའི་དྲིང་བ་ཕྱོགས་བཞིར་འཐུལ་བ་ནི་བསམ་གཏན་བཞི་པ་རྣམས་ཀྱི་ཉོན་མོངས་པའི་དཔེ་བསྟན་ཏོ། །མདོ་ལས། སྲིད་བུ་རྐང་བརྒྱ་པ་དག་འབྲོས་གྱུར་པ། ཞེས་པ་ནས། བཀྲེས་པ་དང་ནི་བསྲེགས་པས་ཤིན་ཏུ་གདུངས། །ཞེས་པའི་བར་དུ་ནི་འདིས་ཀྱང་གཟུགས་མེད་པའི་
ཁམས་ཀྱི་ཉོན་མོངས་པ་བསྟན་པ་སྟེ། གཟུགས་མེད་པའི་ཁམས་འོག་མ་གསུམ་གྱི་འགོག་པའི་བསམ་གཏན་གྱི་མེས་ཁམས་གོང་མར་རྒྱུ་ཞེས་པའི་དོན་ཏོ། །གྲུལ་བུམ་ཞེས་པ་ནི་མུ་སྟེགས་ཅན་གྱི་ལྟ་བ་མང་པོ་དམ་དུ་བཟུང་བས་བླ་མ་བླ་མའི་ས་ཚོལ་བར་སེམས་པ་སྟེ། ལྟ་བ་ངན་པའི་ཟན་ཟོས་པས་ཉོན་མོངས་པ་ཕྱིར་ཞིང་འཕེལ་ཞེས་པའི་དོན་ཏོ། །མེ་ལྕེ་སྟོང་སྙེད་རབ་ཏུ་འབར། །ཞེས་པ་ནི་སྲིད་པའི་རྩེ་མོ་ལ་གནས་པའི་མུ་སྟེགས་ཅན་ཡང་དག་པའི་བསྟན་པའི་ཟས་དང་སྐོམ་གྱིས་གདུངས་པས་ཉོན་མོངས་པའི་མེས་ཚིག་ཅེས་པའི་དོན་ཏོ། །མདོ་ལས། ཁྱིམ་འདིའི་བདག་པོ་མི་དེ་ནི། །སྒོ་ནས་འདུག་ཅིང་ཤིན་ཏུ་རྣམ་པར་ལྟ། །ཞེས་པ་ནི་འདི་མན་ཆད་ཚིགས་བཅད་རྩ་བ་བཅུ་བཞིས་དྲང་བའི་དོན་བསྟན་པའི་དཔེ་དང༌། སྡུག་བསྔལ་བ་རྣམས་ལ་སྙིང་རྗེ་སྐྱེ་བའི་དཔེ་དང༌། ངོ་མཚར་བསྟན་པའི་དཔེ་དང༌། སྡུག་བསྔལ་གྱིས་ནས་གདོན་པའི་དཔེ་དང༌། ཐེག་པ་གསུམ་བཤད་པའི་དཔེ་ལ། འདི་ནི་སྡུག་བསྔལ་བ་རྣམས་ལ་སྙིང་རྗེ་སྐྱེ་བའི་དཔེ་སྟེ། སྡུག་བསྔལ་བ་བསྟན་པ་ཚིག་གཉིས་ལ་ཡང་ཚིག་གོང་མས་ནི་སངས་རྒྱས་འཇིག་རྟེན་དུ་འབྱུང་བ་བསྟན་པའི་དཔེ། དེའི་འོག་མ་ཚིག་ཕྱེད་དང་གཉིས་ཀྱིས་ནི་སེམས་ཅན་སྡུག་བསྔལ་བ་རྣམས་ལ་སྙིང་རྗེ་བར་བྱ་བའི་དོན་བསྟན་པའོ། །སྒོ་ན་འདུག་ཅེས་པ་ནི། སྡོད་པ་དང་འདུག་ཅེས་པའི་དོན་ཏེ། ཁང་པ་དེའི་ནང་ན་གནས་པའི་བུ་རྣམས་གདོན་པའི་སེམས་ཀྱིས་འདུག་པ་དང༌། སྐྱབས་བྱ་བའི་སེམས་ཀྱིས་སྡོང་པ་དང༌། དབང་པོ་སྨིན་མ་ཐག་ཏུ་ཕན་གདགས་པར་སེམས་པས་སྡོད་པ་དང༌། ཉོན་མོངས་པའི་གནས་ནས་བསླངས་ཏེ། གྲུབ་པའི་གནས་བདེ་བ་ལ་དགོད་པར་སེམས་པའོ། །མདོ་ལས། དེས་ཐོས་དེ་ན་དེ་ཡིས་བདག་གི་བུ། །ཞེས་པ་ནས། དེ་ལྟར་བ་བདག་ནི་མི་ཤེས་ཕྱིར། །ཞེས་པའི་བར་དུ་དཔེ་འདིས་ནི་སེམས་ཅན་ཉོན་མོངས་པའི་ས་ན་སྡུག་བསྔལ་བ་བསྟན་པ་སྟེ། ཞིབ་ཏུ་ཚིག་ལྷུག་པའི་ནང་དུ་བསྟན་པ་ཡིན་ནོ། །ཐོས་པ་ཞེས་པའི་དུས་གསུམ་གྱི་དེ་བཞིན་གཤེགས་པས་སེམས་ཅན་སྡུག་བསྔལ་གྱིས་ན་གནས་པར་བཤད་པ་ཐོས་པ་དང༌། བདག་ཉིད་ཀྱིས་སེམས་ཅན་སྡུག་བསྔལ་བར་མཐོང་བའོ། །ཐོག་མ་མེད་པའི་དུས་ནས་འཛེམ་པ་དང༌། ཁྲེལ་བ་མེད་པས་ཉོན་མོངས་པ་སྣ་ཚོགས་ལ་བག་མེད་པར་སྤྱོད་པ་དེ་ཉིད་བྱིས་པ་མི་
ཤེས་པའོ། །མདོ་ལས། དེས་ཐོས་དེ་ནས་མྱུར་དུ་དེར་སོང་སྟེ། །ཞེས་པ་ནས། སྡུག་བསྔལ་ཆེན་པོ་དག་ནི་གཅིག་ཕྱིར་གཅིག །ཞེས་པའི་བར་དུ་ནི་སྙིང་རྗེ་སྐྱེ་བར་བསྟན་པ་སྟེ། སེམས་ཅན་འཁོར་བ་ན་གནས་པ་ནི་མེའི་ཁང་པར་ཞུགས་པ་བཞིན་ཏེ། མྱུར་དུ་མི་ཐར་ཅེས་པའི་དོན་ཏོ། །དེ་ལ་ཁྱིམ་གྱི་ཉེས་པ་དེས་བརྗོད་འདི། །སྡུག་བསྔལ་འདི་དག་མི་བཟད་རིགས་ཀྱི་བུ། །ཞེས་པ་ནི་སྡུག་བསྔལ་འཇིགས་པ་ཆེན་པོ་དང་ལྡན་པར་བསྟན་པ་སྟེ། ཐེག་པ་ཆེན་པོས་བསྐྱེད་ཅིང་གདོན་ཞེས་པའི་དོན་ཏོ། །གཅིག་ཕྱིར་གཅིག་ཅེས་པ་ནི་ཐོག་མ་མེད་པའི་དུས་ནས་གཅིག་གིས་གཅིག་སྡུད་ཅིང་ཉོན་མོངས་པའི་གནས་ན་སྐྱེ་བ་དང་རྒ་བ་དང་ན་བ་དང་ཤི་བ་རྒྱུན་མི་འཆད་ཅེས་པའི་དོན་ཏོ། །མི་བཟད་ཅེས་པ་ནི་མུ་སྟེགས་ཅན་གྱི་ཁྱིམ་ནས་བྱུང་བ་དང་ཁྱིམ་ན་གནས་པ་གཞན་སླུ་བར་བྱེད་པ་མི་བཟད་ཅེས་པའི་དོན་ཏོ། །མདོ་ལས། སྤྲུལ་དང་གནོད་སྦྱིན་གཏུམ་སེམས་དང༌། །ཞེས་པ་ནས། མེ་མེད་ཟིན་ཀྱང་རབ་ཏུ་འཇིགས། །ཞེས་པའི་བར་དུ་ནི། སྤྲུལ་ནི་ཞེ་སྡང་ངོ༌། །གནོད་སྦྱིན་ནི་ལས་ངན་པར་སྤྱོད་པའོ། །གྲུལ་བུམ་ནི་ཚུལ་ཁྲིམས་ངན་པ་ལ་གནས་པའོ། །ཝ་ནི་ཐེ་ཚོམ་དང་སྦྱར་རོ། །ཁྱི་ནི་ང་རྒྱལ་དང་སྦྱར་རོ། །བྱ་རྒོད་ནི་འདོད་ཅིང་བརྐམ་པ་དང་སྦྱར་རོ། །དེ་ལྟ་བུའི་ཉོན་མོངས་པ་སྣ་ཚོགས་ཀྱིས་གཟིར་ཞེས་པའི་དོན་ཏོ། །མདོ་ལས། །དེ་འདྲའི་སྡུག་བསྔལ་འབའ་ཞིག་སྟེ། །ཞེས་པ་ནས། དེ་ཚེ་དེ་ཡི་ཐབས་བསམས་པ། །ཞེས་པའི་བར་དུ་ནི་ཐུགས་རྗེས་ཕན་འདོགས་པ་ཉིད་དང་སྦྱར་རོ། །མདོ་ལས། བྱིས་པ་དེ་དག་རྩེ་ལ་ཆགས། །ཞེས་པ་ནས། དགའ་བར་ལྷན་ཅིག་ཕྱིར་འཐོན། ཞེས་པའི་བར་དུ་ནི། འདི་མན་ཆད་ཐེག་པ་རྣམ་གསུམ་དང་སྦྱར་ཏེ། རི་དགས་དང་ར་དང་གླང་གི་བཞོན་པས་ཐེག་པ་རྣམ་པ་གསུམ་དང་སྦྱར་ཏེ་བསྟན་པའོ། །དེ་ལ་ཡང་དང་པོར་བཞོན་བ་བྱིན་པར་ཁས་བླང་བ་དང༌། བཞོན་པ་ཁྱིམ་གྱི་ཕྱི་རོལ་ན་ཡོད་པར་བསྟན་པ་དང༌། བཞོན་པ་ཉིད་ཅི་དང་ཅི་འདྲ་བར་བསྟན་པའོ། །བཞོན་པ་ང་ལ་ཡོད་ཅེས་པ་ནི་བཞོན་པ་སྦྱིན་པར་ཁས་བླངས་པའོ། །རི་དགས་དང་ར་དང་གླང་ཞེས་པ་ནི་ཕྱི་རོལ་ན་ཡོད་པ་དང་དངོས་བསྟན་པའོ། །འབྲས་བུ་ནི་རྒྱུའི་སྒོ་ནས་བྱུང༌། གཞུང་ཉིད་ནི་བསྟན་པ་ལས་ཕྱི་རོལ་བས་ཕྱི་རོལ་ན་ཡོད་ཅེས་སྨྲས་སོ། །བླ་ན་མེད་པའི་གནས་ཁམས་
གསུམ་ལས་འདས་པའི་ཕྱིར་ཕྱི་རོལ་ན་ཡོད་ཅེས་བསྟན་ཏོ། །ཁྱེད་ཅག་གི་ཕྱིར་ངས་བྱས་ཞེས་པ་ནི་བཞོན་པའི་དགོས་པ་བསྟན་ཏེ། མྱ་ངན་ལས་འདས་པའི་གནས་དམ་པ་ནི་འདུས་མ་བྱས་པ་ཡིན་མོད་ཀྱི་ཐེག་པ་ཉིད་འདུས་བྱས་ཡིན་པའི་ཕྱིར་བྱས་ཞེས་སྨྲས་སོ། །མདོ་ལས། བཞོན་པ་དེ་འདྲ་ཡོད་པར་ཤེས་ནས་སུ། །ཞེས་པ་ནས། སྡུག་བསྔལ་དག་ལས་ཐར་ཏེ་སྟོང་པར་འདུག །ཅེས་པའི་བར་དུ་ནི་གསུང་རབ་ལ་བརྟེན་ནས་སྡུག་བསྔལ་ལས་ཐར་བར་བསྟན་ཏེ། དེ་ཡང་བུ་རྣམས་སྡུག་བསྔལ་གྱིས་ནས་འཐོན་པ་དང་ཕ་བདེ་བར་གནས་པ་སྟེ། འདིས་ནི་བུ་རྣམས་སྡུག་བསྔལ་གྱིས་ནས་འཐོན་པ་བསྟན་ཏོ། །སྟོང་པར་འདུག་ཅེས་པ་ནི་སྒྲིབ་པ་གསུམ་དང་བྲལ་བའི་གནས་བསླབ་པ་མེད་པའི་ས་དང་པོ་ལ་གནས་པའོ། །མདོ་ལས། མི་དེས་བྱིས་པ་འཐོན་པ་མཐོང་ནས་སུ། །ཞེས་པ་ནས། ཕ་དེ་བདེ་བར་འདུག་པར་རིག་ནས་སུ། །ཞེས་པའི་བར་དུ་ནི་བུ་རྣམས་ཐོན་ནས་ཕ་བདེ་བར་གནས་པ་བསྟན་ཏེ། དཔོང་ས་བཞི་མདོར་ཞེས་པ་ནི། བདེན་པ་བཞིའོ། །སེང་གེའི་ཁྲི་ལ་བཞུགས་ཞེས་པ་ནི་མི་འཇིགས་པའི་ས་ལ་གནས་པ་སྟེ། སྔོན་བྱང་ཆུབ་སེམས་དཔའི་སྤྱོད་པ་མཛད་པ་ན་སེམས་ཅན་ཐམས་ཅད་སྒྲོལ་བའི་ཐུགས་དམ་དང་བཅས་པས་སེམས་ཅན་འཁོར་བའི་གནས་ནས་ཐོན་པས་དགོངས་པ་གྲུབ་པའི་ཕྱིར་བདེ་བར་བཞུགས་ཞེས་སྨྲས་སོ། །མདོ་ལས། བུ་རྣམས་དོང་སྟེ་འདི་སྐད་སྨྲས། །ཞེས་པ་ནས། དེ་དག་དུས་དེང་སྩལ་དུ་གསོལ། །ཞེས་པའི་བར་དུ་ནི་དེ་ཡན་ཆད་ནི་དྲང་བའི་དོན་བསྟན་འདི་མན་ཆད་ནི་ངེས་པའི་དོན་བསྟན་ཏེ། བདག་ཅག་སྩོལ་ཞེས་པ་ནི་དབང་པོ་སྨིན་ཞེས་པའི་དོན་ཏོ། །མདོ་ལས། མི་དེ་མཛོད་ཀྱི་མཐུ་ལྡན་པ། །ཞེས་པ་ནས། གང་ལ་རིན་ཆེན་ཤིང་རྟ་བཅས། །ཅེས་པའི་བར་དུ་ནི་མི་དེ་མཛོད་ཀྱི་མཐུ་དང་ལྡན་པ་ནི་འདུས་བྱས་དང་འདུས་མ་བྱས་ཀྱི་མཛོད་དང་ལྡན་པའོ། །ཡུལ་འཁོར་ཐམས་ཅད་ཀྱང་མི་ལ་བྱིན་ན་ཡང་མི་ཟད་པའི་ནོར་དང་ལྡན་པ་ཡིན་ན། བྱིས་པ་རྣམས་ལ་བྱིན་པས་གང་ལ་ཟད་པར་འགྱུར་བ་ནི་ཡོན་ཏན་གྱི་ཆོས་མང་པོ་དང་ལྡན་པའོ། །རྣམ་པ་ཐམས་ཅད་མཁྱེན་པའི་ཡེ་ཤེས་ཟག་པ་མེད་པའི་ཕུང་པོ་ལྔ་དང་ལྡན་པའི་སྐུ་སྟེ། ཤིང་རྟ་ཞེས་པ་ནི་དེ་བཞིན་ཉིད་ཀྱི་ཆོས་ལ་བྱའོ། །རྒྱན་སྣ་ཚོགས་ཀྱིས་བརྒྱན་པའི་ཤིང་རྟ་དེ་ཡང་ཁ་ལོ་སྒྱུར་བ་དང་
དྲིལ་བུ་དང༌། གཡེར་ཀ་དང༌། གདུགས་དང༌། ལྷབ་ལྷུབ་དང༌། མུ་ཏིག་གི་དྲ་བ་དང༌། གསེར་གྱི་ཕྲེང་བ་དང༌། གདིང་བ་འཇམ་པོ་ལ་སོགས་པའི་རྒྱུ་ནི་རྣམ་པར་དཀར་བ་སྒྲིབ་པ་གཉིས་དང་བྲལ་བའི་རྐྱེན་སྤྱོད་པ་དམ་པ་དང་ལྡན་པ་འཚོ་བ་རྣམ་པར་དག་པའི་གདན་ལ་བཞུགས་ཞེས་པའི་དོན་ཏོ། །གླང་དཀར་པོ་ཚོལ་བཟང་བ་ནི། གཅིག་ཏུ་དཀར་བ། གཅིག་ཏུ་ཚོ་ཞིང་སྟོབས་དང་ལྡན་པ་གཅིག་ཏུ་འབད་པ། གཅིག་ཏུ་མཛེས་པ་དང་ལྡན་ཞེས་པའི་དོན་ཏོ། །མདོ་ལས། སྐྱེས་བུ་དུ་མས་རབ་ཁྲིམ་པ། །སྐྱེས་བུ་དེ་ཡིས་དེ་འདྲ་བྱིན། །ཞེས་པ་ནས། ཕྱོགས་དང་ཕྱོགས་མཚམས་རྩེ་བར་དོང༌། །ཞེས་པའི་བར་དུ་ནི། ཕྱོགས་དང་ཕྱོགས་མཚམས་ཞེས་པ་ནི་ཕྱོགས་བཞིར་སྐྱེ་བ་རྣམ་བཞིས་སྐྱེ་བའི་སེམས་ཅན་གྱི་དོན་ལ་རོལ་པའོ། །རྩེ་ཞེས་པ་ནས་རྫུ་འཕྲུལ་གྱིས་རོལ་པའོ། །མདོ་ལས། དེ་བཞིན་ང་ཡང་ཤཱ་རིའི་བུ། །ཞེས་པ་ནས། སྐྱེ་རྒན་བ་དུ་མ་བརྒྱ། །ཞེས་པའི་བར་དུ་ཚིགས་བཅད་དྲུག་ཅུ་རྩ་ལྔས་ནི་དཔེ་བསྟན། བཅོ་བརྒྱད་ཀྱིས་ནི་དོན་དང་སྦྱར་བ་བསྟན་ཏེ། དེ་ལ་དང་པོ་ཚིགས་བཅད་བཅུ་གཅིག་གིས་ནི་དྲང་བའི་དོན་བསྟན། ཚིགས་བཅད་བདུན་གྱིས་ནི་ངེས་པའི་དོན་བསྟན། དྲང་བའི་དོན་ལ་ཡང་ཚིགས་བཅད་གསུམ་གྱིས་བསྟན། ཁམས་གསུམ་གྱིས་ནི་ཁམས་གསུམ་ན་སངས་རྒྱས་བཞུགས་པ་དང་སྦྱར། དེའི་འོག་མ་ཚིགས་བཅད་གསུམ་གྱིས་ནི་འགྲོ་བ་རྣམ་ལྔ་གཡང་ཟ་བའི་གནས་སུ་སྦྱར། དེའི་འོག་མ་ཚིགས་བཅད་ལྔས་ནི་དྲང་བའི་དོན་གྱི་དཔེ་བསྟན་ཏོ། །མདོ་ལས། ཁམས་གསུམ་ནས་ནིང་ཐར་ཞིང༌། །ཞེས་པ་ནས། མི་ལྡོག་བྱང་ཆུབ་སེམས་དཔའ་ཞེས་པའི་བར་དུ་ནི་དྲང་བའི་ཐབས་ཀྱི་དཔེ་བསྟན་པ་དང༌། སྡུག་བསྔལ་བ་རྣམས་ལ་ཐུགས་རྗེ་སྐྱེ་བ་དང༌། དོན་ཆེན་པོ་བསྟན་ཀྱང་མི་དངང་བ་དང༌། བདག་ཉིད་ཁམས་གསུམ་གྱི་གནས་ལས་བྱུང་བར་བསྟན་པ་དང༌། གནས་དེ་ཉིད་སངས་རྒྱས་ཀྱི་ཡིན་པ་བསྟན་པའོ། །ནགས་ཚལ་དབེན་པའི་གནས་ཞེས་པ་ནི་ཡོན་ཏན་མང་པོའི་ཚལ་དུ་སྦྱར་རོ། །ཕྱིར་མི་ལྡོག་ཞེས་པ་ནི་ས་དང་པོ་ལ་གནས་པ་ཡན་ཆད་དོ། །དྲུག་ཤེས་པ་ནི་དགྲ་བཅོམ་པའོ། །གསུམ་རིག་པ་ནི་སྔོན་གྱི་གནས་དྲན་པ་དང༌། ལྷའི་སྤྱན་དང༌། ཟག་པ་ཟད་པར་མཁྱེན་པའོ། །མདོ་ལས། མཁས་པ་རྣམས་ལ་དཔེ་མཆོག་འདི། །ཞེས་པ་ནས། མི་མཆོག་
ཐབས་མཁས་མ་གཏོགས་སོ། །ཞེས་པའི་བར་དུ་ནི། ཐེག་པ་མཆོག་ཡིན་པར་བསྟོད་ཅིང་བསྔགས་པ་སྟེ། ཐེག་པ་དེ་ཡང་ཚིགས་བཅད་དང་པོ་གཅིག་གིས་ནི་ཐེག་པ་དེ་ཡོན་ཏན་བཞི་དང་ལྡན་པར་བསྟན། དེའི་འོག་མ་གཅིག་གིས་ནི་འཕགས་པ་རྣམས་ཀྱི་བསྔགས་པ་བསྟན། དེའི་འོག་མ་གཅིག་གིས་ནི་ལོངས་སྤྱོད་དམ་པ་དང་ལྡན་པ་བསྟན། དེའི་འོག་མ་གཉིས་ཀྱིས་ནི་དགའ་བའི་མཆོག་ཡིན་པར་བསྟན་ཏོ། །དེ་ལ་ཡོན་ཏན་བཞི་ནི་དམ་པ་ཁྱད་པར་ཅན་སྒྲིབ་པ་མེད་པས་རྣམ་པར་དག་པ་དང༌། མཆོག་དམ་པ་ཡིན་པ་དང༌། བླ་ན་མེད་པ་དང་ཟླ་མེད་པའོ། །ཡངས་པའི་དངོས་པོ་ཕྱག་གི་གནས། །ཞེས་པ་ནི་འཕགས་ལ་རྣམས་ཀྱི་བསྔགས་པའོ། །འཕགས་པ་རྣམས་དེ་ལྟར་ན་མ་རབས་རྣམས་ལ་ཅི་སྨོས་ཞེས་སྦྱར་རོ། །བསམ་གཏན་དང་སྟོབས་དང་ཏིང་ངེ་འཛིན་ཞེས་པ་ནི་ལོངས་སྤྱོད་ཀྱི་གནས་དམ་པ་ཡིན་པར་བསྟན་པའོ། །ནུབ་དང་ཉིན་པར་ལོ་དང་བསྐལ་པ་འདའ་བར་བྱེད། །ཞེས་པ་ནི། ཐེག་པ་གཅིག་པོ་འདི་ལ་གནས་པ་ནི་གནས་པའི་དམ་པ་ཡིན་པར་བསྟན་ཏེ། བླ་ན་མེད་པའི་བྱང་ཆུབ་ཀྱི་སྙིང་པོ་ལ་རེག་པར་འགྱུར་ཞེས་པའི་དོན་ཏོ། །དེ་ཡན་ཆད་བསྟན་པ་དང༌། གཞུང་དང་སྤྱོད་པ་དང༌། འབྲས་བུ་ཐམས་ཅད་ཐེག་པ་ཆེན་པོ་དང་ལྡན་པར་བསྟན་ཏོ། །མི་མཆོག་ཐབས་མཁས་མ་གཏོགས་ཞེས་པ་ནི་དེ་བཞིན་གཤེགས་པ་ཐབས་མཁས་པ་དང་ལྡན་པས་སེམས་ཅན་རྣམས་རིམ་གྱིས་ཐེག་པ་གཅིག་པོ་ལ་དྲང་ཞིང་གཟུད་པའི་ཕྱིར་ཕྱོགས་བཅུ་གང་དུ་ཡང་ཐབས་ཀྱིས་རོལ་པ་མ་གཏོགས་པར་ཐེག་པ་གཉིས་དང་གསུམ་དུ་མ་བཤད་དོ། །མདོ་ལས། ཁྱོད་ཀྱི་ཕ་ང་ཡི་བུ་ཁྱོད། །ཞེས་པ་ནས། བྱང་ཆུབ་སེམས་དཔའ་གང་མང་འདུལ། །ཞེས་པའི་བར་དུ་ནི་འདི་མན་ཆད་མོས་བསྐྱེད་ཅིག་པར་བསྟན་པ་སྟེ། སྔར་ཚིགས་བཅད་བཅུ་བཞིས་དྲང་བ་དང་ངེས་པའི་དོན་ལ་འཇུག་པར་བསྟན། དེའི་འོག་མ་ཚིགས་བཅད་དྲུག་ཅུ་རྩ་དྲུག་གིས་ནི་བསླབ་པར་བྱ་བའི་གནས་བསྟན་ཏོ། །དང་པོ་ལ་ཕ་བུ་ལ་བྱམས་པའི་དཔེས་སྡུག་བསྔལ་ལས་འདོན་པ་བཞིན་ངེས་པ་དང་དྲང་བའི་དོན་དངོས་སུ་སྟོན་པའོ། །འདི་ལྟར་མྱ་ངན་ལས་འདས་པ་ངས་བསྟན་ཀྱང་ཞེས་པ་ནི། བཅོམ་ལྡན་འདས་ཀྱིས་ཡང་དག་པའི་དོན་སྔར་དྲང་བའི་ཚུལ་གྱིས་བསྟན་དུ་ཟིན་གྱིས་དེ་མྱ་ངན་ལས་འདས་པ་ཆེན་པོ་མ་ཡིན་པས། ང་མྱ་ངན་ལས་འདས་པ་ཉིད་བསྟན་པའི་
ཕྱིར་ངེས་པའི་དོན་བསྟན་ཏོ། ཀུན་ཉོན་ང་ཡི་སངས་རྒྱས་ཚུལ། །ཞེས་པའོ། །ཚུལ་ནི་ཆོས་ཀྱི་སྐུ་ཉིད་དོ། །སྒྲིབ་པ་རྣམ་གཉིས་དང་བྲལ་བའི་ཕྱིར་མྱ་ངན་ལས་འདས་པ་ཆེན་པོའི་མདོ་ལས། བྱང་ཆུབ་སེམས་དཔའ་གང་མང་འདུལ། །ཞེས་པ་ནས། ལམ་རྣམས་བསྒོམས་ནས་ཐར་བར་འགྱུར། །ཞེས་པའི་བར་དུ་ནི་དེ་ལྟར་དྲང་བ་དང༌། ངེས་པའི་དོན་བསྟན་པ་ཡང་བདེན་པ་བཞི་དང་སྦྱར་ཏེ་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །དང་པོའི་ཚིགས་བཅད་གཉིས་ཀྱིས་ནི་སྡུག་བསྔལ་གྱི་བདེན་པ་བསྟན། དེའི་འོག་མ་ཕྱིད་དང་གཉིས་ཀྱིས་ནི་ཀུན་འབྱུང་གི་བདེན་པ་བསྟན། ཡང་ཕྱེད་དང་གཉིས་ཀྱིས་ནི་འགོག་པའི་བདེན་པ་སྟན། དེའི་འོག་མ་གཅིག་གིས་ནི་ལམ་གྱི་བདེན་པ་བསྟན་ཏེ། འདོད་ངན་དེ་ལ་ཆགས་པར་གྱུར་པ་ནི་ཕྱི་ནང་གི་ཡུལ་ལ་དགའ་བར་བྱ་བ་དེ་ཐམས་ཅད་སྡུག་བསྔལ་ཉིད་ཡིན་པར་བསྟན་པས་འཇིག་རྟེན་གྱི་བདེན་པ་མ་སྤངས་པར་ཡང་དག་པའི་བདེན་པ་ཉིད་ལ་གཟུད་པའོ། །གང་རྣམས་མི་ཤེས་སྡུག་བསྔལ་གྱི། །ཞེས་པ་ལ་སོགས་པ་ནི་ཀུན་འབྱུང་གི་བདེན་པ་བསྟན་ཏེ། སྡུག་བསྔལ་གྱི་རྒྱུ་ཀུན་འབྱུང་ལས་འབྱུང་ཞེས་པའི་དོན་ཏོ། །སྡུག་བསྔལ་འབྱུང་བ་སྲེད་འདུས་པ། །ཞེས་བྱ་བ་ལ་སོགས་པ་ནི་འགོག་པའི་བདེན་པ་བསྟན་ཏེ། སྡུག་བསྔལ་སྐྱེ་བར་བྱེད་པའི་རྩ་བ་སྲེད་པ་ཡིན་ན། སྲེད་པ་དེ་ཡང་འགོག་པས་བཙལ་ཞེས་བྱ་བའི་དོན་ཏོ། །གང་གིས་ཐར་ཞེས་པ་ལ་སོགས་པ་ནི་ལམ་གྱི་བདེན་པ་བསྟན་ཏེ། ལམ་བསྒོམས་པས་འགོག་པ་འགྲུབ་ཅེས་པའི་དོན་ཏོ། །མདོ་ལས། ཅི་ཐར་ཞེ་ན་ཤཱ་རིའི་བུ། །ཞེས་པ་ནས། འཇིག་རྟེན་འདིར་སྐྱེ་བདེ་བྱའི་ཕྱིར། །ཞེས་པ་ནི་དྲང་བ་དང་ངེས་པའི་དོན་གྱི་བདེན་པ་བཞི་བསྟན་པ་ཡང་འདི་མན་ཆད་ཚིག་བཞིས་ནི་དྲིས། ཚིག་བཞིས་ནི་ལན་བཏབ་པ་སྟེ། བདེན་པ་བཞི་དང་ཅི་རིགས་པ་དང་སྦྱར་རོ། །མྱ་ངན་ལས་འདའ་བ་དང༌། མ་འདས་པ་ཡང་དྲང་བའི་དོན་གྱི་ཐེག་པ་རྣམ་གཉིས་ལ་བསྟན་པ་དང༌། ངེས་པའི་དོན་གྱིས་བླ་ན་མེད་པའི་ལམ་དང་སྦྱོར་བའོ། །དེ་ལྟར་དགོངས་ཏེ་ཆོས་རྒྱལ་ཞེས་པ་འང་ངེས་པའི་དོན་ལ་མངོན་སུམ་དུ་གཟུད་པའི་ཕྱིར་འཇིག་རྟེན་ལ་བདེ་བའི་ཕྱིར་ཞེས་པ་དང་སྦྱར་རོ། །ཆོས་རྒྱལ་ཞེས་པ་ནི་སེམས་ཅན་རྣམས་ལ་སོ་སོའི་དབང་པོ་ལ་སྦྱོར་ཞིང་ཆོས་ལ་མངའ་བརྙེས་པའི་ཕྱིར་ཆོས་རྒྱལ་ཞེས་བྱའོ། །མདོ་ལས།
འདི་ངའི་ཆོས་རྒྱལ་ཤཱ་རིའི་བུ། །ཞེས་པ་ནས། ཁྱོད་ཀྱི་མི་དེ་མི་ལྡོག་གཟུང༌། །ཅེས་པའི་བར་དུ་དེ་ནི། སྣོད་མ་རྟོགས་པར་ཆོས་མ་གཏོད་ཅིག་པར་བསྟན་པ་སྟེ། ཆོས་ཀྱི་ཕྱག་རྒྱ་ཞེས་པ་ནི། ཐེག་པ་གཅིག་པོའི་གཞུང་དམ་པ་ངེས་པ་ཉིད་ལ་བྱའོ། །རྗེས་སུ་ཡི་རང་ཞེས་པ་ནི་མོས་པ་ཆེ་བའི་ཕྱིར་མི་ལྡོག་ཅེས་པ་སྟེ། ཡུན་རིང་པོ་ནས་དགེ་བའི་རྩ་བ་བསྐྱེད་པ་ས་ལ་གནས་པར་གྱུར་པའོ། །ཐེག་པ་རྣམ་གཉིས་ལྟ་བུ་ལས་ཁྱད་པར་དུ་བསྟན་པའོ། །མདོ་ལས་སྔོན་གྱི་དེ་བཞིན་གཤེགས་པ་དེས་མཐོང་ཞེས་པ་ནས། སངས་རྒྱས་ཀྱིས་འདི་མི་ཤེས་པའི་བར་དུ་དེ་དག་གིས་ནི་སྔོན་དེ་བཞིན་གཤེགས་པའི་བསྟན་པ་ལ་ཞུགས་ཤིང་ཐོས་པའི་རྒྱུས་འདི་ལ་འཇུག་ནུས་པར་བསྟན་པ་དང༌། མདོ་འདི་ལ་དད་ཅིང་འཇུག་པ་ནི་དེས་ང་དང་ངའི་དགེ་འདུན་མཐོང་ཞེས་པ་ཡང་དཀོན་མཆོག་གསུམ་ཐ་མི་དད་པའི་མཚན་ཉིད་བསྟན་པའོ། །ཤེས་པ་ཆུང་བ་དང་དགེ་བའི་རྩ་བ་ཞན་པ་རྣམས་ཀྱིས་འཇུག་པར་མི་ནུས་པའི་ཕྱིར་བྱིས་པ་མྱོས་གྱུར་པ་ཞེས་གསུངས་སོ། །ཐེག་པ་རྣམ་གཉིས་སུ་རིགས་ངེས་པ་རྣམས་ཀྱིས་ཀྱང་འཇུག་པའི་ཕྱིར་ཉན་ཐོས་དང་རང་སངས་རྒྱས་ཀྱིས་མ་ཡིན་ཞེས་གསུངས་སོ། །མདོ་ལས། ཤཱ་རིའི་བུ་ཁྱོད་དང་འབྲང་ན་ཞེས་པ་ནས། འདི་དག་རང་རིག་ཡེ་ཤེས་མེད། །ཅེས་པའི་བར་དུ་ནི་རིགས་མ་ངེས་པའི་ཉན་ཐོས་རྣམས་ཀྱང་ངའི་གསུང་འདི་ཐོས་ནས་གདོད་དད་པ་སྐྱེ་ཞིང་རྗེས་སུ་འབྲང་བར་འགྱུར་ན་གཞན་ལྟ་ཅི་སྨོས་ཞེས་བསྟན་པའོ། །མདོ་ལས། ཁྱེད་ཀྱི་ཁེངས་པ་དང་ནི་ང་རྒྱལ་ཅན། མི་རིགས་ཞུགས་པ་དག་ལ་འདི་མ་བསྟན། །ཞེས་པ་ནི་ཚིགས་སུ་བཅད་པ་སུམ་ཅུ་རྩ་དྲུག་གིས་མི་ཤེས་པ་དད་པ་མེད་པ་སྡིག་པ་ཅན་བཞི་དང༌། བདུན་དག་ལ་བསྟན་དུ་མི་རུང་བར་གསུངས་པ་སྟེ། དེ་ལ་སྡིག་པ་ཅན་བཞི་ནི་ཁེངས་པ། ང་རྒྱལ་ཅན། ལེ་ལོ་ཅན། བདག་ཏུ་ལྟ་བའི་མུ་སྟེགས་ཅན་རྣམས་སོ། །མདོ་ལས། བུས་པ་འདོད་ལས་རྟག་ཏུ་རབ་མོས་ཤིང༌། ཆོས་བསྟན་མི་ཤེས་པས་ན་སྤོང་བར་བྱེད།། ཅེས་པ་ནི་སྡིག་ཅན་གསུམ་ལ་མི་བཤད་པ་སྟེ། ཤེས་པ་ཆུང་བ་ལོག་པའི་ཤེས་རབ་ཅན་དང༌། འདོད་པ་རྣམ་ལྔས་མྱོས་ཤིང་ཉོན་མོངས་པ་སྟུག་པ་རྣམས་དང༌། རིགས་མེད་པའི་སེམས་ཅན་ཐོས་ཀྱང་འཇུག་པར་མི་ནུས་པ་རྣམས་སོ། །མདོ་ལས། ང་ཡི་ཐར་པ་འདི་ནི་སྤོང་བ་ནི། འཇི་
རྟེན་རྟག་ནས་སངས་རྒྱས་ཚུལ་ཡང་སྤང༌། །ཞེས་པའི་དོན་ཏེ། དེ་ཡང་མ་དད་པས་སྡིག་པ་མི་དགེ་བའི་རྒྱུ་བསྐྱེད་པ་དང༌། སྡུག་བསྔལ་བའི་འབྲས་བུ་ལེན་པའོ། །ཟག་པ་མེད་པའི་རྒྱུ་སྤོང་བ་ནི་སངས་རྒྱས་ཀྱི་རིགས་གཅོད་པའོ། །ཟག་བ་དང་བཅས་པའི་རྒྱུ་སྤོང་བ་ནི་འཇིག་རྟེན་གྱི་དགེ་བསོ་མཐོ་རིས་སྤོང་བ་སྟེ། མདོ་སྡེ་འདི་ལ་མ་དད་པས་དེ་གཉིས་སྤངས་ཞེས་པའི་དོན་ཏོ། །མདོ་ལས། ཁྲོ་གཉེར་བྱས་ཤིང་ཐེག་པ་སྤངས་པ་ཡི། །ཞེས་པ་ནས། དེ་དག་རྣམ་སྨིན་མི་བཟད་ང་ལ་ཉོན། །ཞེས་པའི་བར་དུ་ནི་མདོ་སྡེ་འདི་ལ་མ་དད་པས་སྡིག་པ་སྐྱེ་བར་བསྟན་པ་སྟེ། ཁྲོ་གཉེར་བྱས་ཞེས་པ་ནི་ལུས་དང་སེམས་མ་དད་པའི་ཚུལ་སྟོན་པའོ། །མདོ་སྡེ་འདི་འདྲ་བ་ཀློག་པའི་དགེ་སློང་ལ་ངན་བྱས་ན་ཞེས་པ་ནི་ཆོས་སྤྱོད་པ་རྣམ་པ་བཅུའི་བར་ཆད་བྱས་པའོ། །ངན་བྱས་པ་ནི་བརྙས་པ་སྨད་པ་ཕྲག་དོག་བྱས་པ་ཁོན་དུ་གཟུང་བའོ། །མདོ་ལས། མི་ལས་ཤི་འཕོས་བསྟིར་མེད་པ་དེ་ཡི། །ཞེས་པ་ནས། བུས་པ་ཤི་ཤིང་འཕོས་ནས་དེར་ཡང་ལྟུང། །ཞེས་པའི་བར་དུ་ནི། མདོ་སྡེ་འདི་ལམ་དད་པ་རྣམས་སྡུག་བསྔལ་མྱོང་བའི་འབྲས་བུ་བསྟན་པ་སྟེ། ཚིག་དང་པོ་ཉི་ཤུ་བརྒྱད་ཀྱིས་ནི་མ་དད་པ་རྣམས་ཀྱི་འབྲས་བུ་བསྟན། དེའི་འོག་མ་གཉིས་ཀྱིས་ནི་བསྡུ་བ་བསྟན་ཏེ། འདི་ནི་དང་པོའོ། །དེ་ལ་ཡང་ཚིག་ཉི་ཤུ་གཉིས་ཀྱིས་ནི་ངན་སོང་རྒྱུད་གསུམ་གཅིག་ནས་གཅིག་ཏུ་འཕོ་བ་རྣམ་པར་སྨིན་པ་བསྟན། ཚིག་དྲུག་གིས་ནི་འགྲོ་བ་བཞིར་རྣམ་པར་སྨིན་པ་བསྟན། དེ་ལ་ཚིག་དང་པོ་གཅིག་གིས་ནི་སེམས་ཅན་དམྱལ་བ་མྱོང་བ་བསྟན། ཚིག་བཅུས་ནི་བྱོལ་སོང་གི་འབྲས་བུ་མྱོང་བ་བསྟན། དེའི་འོག་མ་ཚིག་བཅུས་ནི་མིའི་ནང་ན་ཐ་མར་སྐྱེ་བ་བསྟན། འདིར་ཡི་དགས་མ་སྨོས་པ་ནི་ཡི་དགས་སྲེད་པའི་དབང་གིས་སྐྱེ་བའི་ཕྱིར་འདིར་མ་སྨོས་སོ། །དེ་དག་ཀྱང་རྣམ་པ་དྲུག་གིས་དབྱེ་བར་བྱ་སྟེ། དེའི་མིང་དང༌། དེའི་ལུས་དང༌། དེ་བསྡུ་བ་དང༌། དེའི་གནས་དང༌། དེའི་འབྲས་བུ་དང༌། དེའི་ཚེའི་ཚད་དེ། གྲང་བ་བརྒྱད་དང་ཚ་བ་བརྒྱད་ལ་སོགས་པ་གཞན་དག་ལས་འབྱུང་བ་བཞིན་ཤེས་པར་གྱིས་ཤིག །མདོ་ལས། སེམས་ཅན་དམྱལ་ལས་ནམ་ཞིག་འཕོས་ན་ཡང༌། །ཞེས་པ་ནས། འདི་འདྲ་བ་ཡི་མདོ་སྡེ་འདིས་སྤངས་པ། །ཞེས་པའི་བར་དུ་ནི་བྱོལ་སོང་དུ་གྱུར་པ་རྣམས་ཀྱི་སྡུག་བསྔལ་སྣ་ཚོགས་མྱོང་བར་བསྟན་པའོ། །ཁྱིར་གྱུར་པ་ནི་རྣམ་པར་སྨིན་པ་བཅུ་སྟེ། སྐམ་པ། རིད་པ། མདོག་
ཉམས་པ། རྔོས་ཉེན་པ། གཞན་གྱིས་གཙེ་བ། ཤེས་པ་མེད་པ། བཀྲེས་པ། སྐོམ་པས་ཉེན་པ། བརྡེག་པ་དང༌། གཞུ་བའི་གནས་སུ་གྱུར་པའོ། །རྔ་མོའི་རྣམ་པར་སྨིན་པ་ནི་ཁུར་ལྕི་བས་མནན་པ། ཟས་ཀྱིས་གདུངས་པ། གཞུ་བརྡེག་གི་གནས་སུ་གྱུར་པ། ཤེས་པའི་བློ་མེད་པའོ། །ཝར་གྱུར་བའི་རྣམ་པར་སྨིན་པ་ནི་རྔོས་འཁོངས་པ་མིག་ཞར་བ། བརྡེག་པའི་གནས་སུ་གྱུར་པའོ། །སྦྲུལ་དུ་གྱུར་པའི་སྡུག་བསྔལ་ནི་ལུས་ཧ་ཅང་ཆེ་བ་རྣ་བ་འོན་པ། ཤེས་པ་མེད་པའོ། །མདོ་ལས། ནམ་ཞིག་མི་ཡི་ལུས་ཐོབ་གྱུར་ཀྱང་ནི། །ཞེས་པ་ནས། མགོན་མེད་གྱུར་ཅིང་འཇིག་རྟེན་དག་ན་རྒྱུ། །ཞེས་པའི་བར་དུ་ནི་མདོ་སྡེ་འདི་སྡོང་བའི་རྣམ་པར་སྨིན་པས་མི་ཞིག་ཏུ་སྐྱེས་ན་ཡང༌། མ་རབས་དབང་པོ་མ་ཚང་བ་སྐྱོན་སྣ་ཚོགས་ཀྱིས་མནར་བར་སྐྱེ་སྟེ། ལུས་ཀྱི་སྐྱོན་ནི་དབང་པོ་རྟུལ་བ། ཧ་ཅང་ཐུང་བ། མཚན་དུ་མི་སྡུག་པ། ཞ་བོར་གྱུར་པ། གྲུམ་པོར་གྱུར་པ། ལོང་བ་འོན་པ་སྒུར་པོར་གྱུར་པ། ཚིག་སྨྲས་པ་མིས་ཡིད་མི་ཆེས་པར་གྱུར་པ། ཁ་ནས་རུལ་བའི་དྲི་མནམ་པ་འདྲེ་གདོན་གྱིས་གཙེ་བ། དབུལ་བ། དམན་པ། གཞན་གྱིས་བཀོལ་བ། ནད་མང་བ། རེག་པར་གྱུར་པ་སྟེ། ལུས་དང༌། ངག་དང༌། ཡིད་དང༌། གསུམ་གྱི་སྒོ་ནས་སྡིག་པ་བྱས་པའི་རྣམ་པར་སྨིན་པ་ཡིན་པར་སྦྱར་རོ། །མདོ་ལས། དེ་ན་གང་ལ་དེ་ཡིས་ཉེར་བསྙེན་ཀྱང༌། །ཞེས་པ་ནས། བྱིན་ན་ཡང་ནི་མྱུར་དུ་མི་ཟ་སྟེ། །ཞེས་པའི་བར་དུ་ནི་མདོ་སྡེ་འདི་ལ་མ་དད་པའི་ཕྱིར་གཞན་ལ་བརྟེན་ཀྱང་དེས་སྐྱབས་མི་བྱེད་ཅེས་པའི་དོན་ཏོ། །མདོ་ལས། དེ་དག་འདི་འདྲ་སྡིག་གི་འབྲས་བུ་ནི། །ཞེས་པ་ནས། ནམ་ཡང་དེ་ཡི་ནད་རྣམས་མཐར་མི་སོས། །ཞེས་པའི་བར་དུ་ནི་མདོ་སྡེ་འདི་ལ་སྐུར་པ་བཏབ་པས་བསོད་ནམས་ཆུང་བར་བསྟན་པའོ། །མདོ་ལས། གཞན་གྱི་རྐུན་པོ་བྱས་པར་གྱུར་པ་ཡང༌། །ཞེས་པ་ནས། སྡིག་པའི་ལས་ཅན་དེ་ལ་འདུ་ཤེས་འབབ། །ཞེས་པའི་བར་དུ་ནི་མདོ་སྡེ་འདི་ལ་སྐུར་པས་ཉེས་པ་གློ་བུར་འོང་ཞེས་པའི་དོན་ཏོ། །མདོ་ལས། དེས་ཀྱང་འཇིག་རྟེན་མགོན་པོ་ཡང་མི་མཐོང༌། །ཞེས་པ་ནས། །དེ་དག་སེམས་མི་དྲན་ཞིང་འོན་པར་གྱུར། །ཞེས་པའི་བར་དུ་ནི་མདོ་སྡེ་འདི་སྤངས་པས་ནམ་དུ་ཡང་སངས་རྒྱས་མི་མཐོང་བ་དང༌། ཆོས་མི་ཐོས་པ་དང༌། དབང་པོ་ཉམས་པར་འགྱུར་བ་ལ་
འདི་ནི་དང་པོ་གཉིས་དང་སྦྱར་རོ། །མདོ་ལས། བྱང་ཆུབ་འདི་འདྲ་བ་འདི་སྤངས་པས་ན། །ཞེས་པ་ནས། བླུན་ཞིང་ཡན་ལག་དག་ནི་ཚང་མི་འགྱུར། །ཞེས་པའི་བར་དུ་འདིས་ནི་དབང་པོ་ཉམས་པར་བསྟན་ཏོ། །མདོ་ལས། དེས་ནི་མདོ་སྡེ་འདི་སྤངས་སྡིག་གི་འབྲས། །ཞེས་པ་ནས། དེ་ན་དེ་དག་རྟག་ཏུ་དེ་གནས་འགྱུར། །ཞེས་པའི་བར་དུ་ནི་དེས་ངན་སོང་བཞི་མྱོང་བར་བསྟན་པ་སྟེ། སེམས་ཅན་དམྱལ་བ་དང༌། ཡི་དགས་དང༌། བྱོལ་སོང་དང༌། མི་མ་རབས་སུ་འགྱུར་བ་རིམ་བཞིན་ཅི་རིགས་པར་སྦྱར་རོ། །མདོ་ལས། དེ་དག་མི་ཡི་ལུས་སུ་གྱུར་ན་ཡང༌། །ཞེས་པ་ནས། དེ་ཚེ་དེ་ཡི་རྒྱན་ནི་དེ་དག་སྟེ། །ཞེས་པའི་བར་དུ་ནི་མི་མ་རབས་སུ་གྱུར་པ་རྣམ་པར་སྨིན་པ་བསྟན་ཏེ། རྒྱན་ངན་པས་བརྒྱན་པ་དང༌། རྟེན་ངན་པ་དང་བརྟེན་པ་དང༌། མི་མཛེས་པར་གྱུར་པ་དང༌། སྤྱོད་པ་ངན་པར་གྱུར་པ་སྟེ། འོག་ནས་འབྱུང་བ་དང་སྦྱར་རོ། །མདོ་ལས། ནད་རྣམས་དེ་ཡི་ལུས་ལ་བྱེ་བ་ཁྲག་ཁྲིག་རྨ། །ཞེས་པ་ནས། དེ་ནི་བྱོལ་སོང་སྐྱེ་གནས་དེ་རྟག་དགའ། །ཞེས་པའི་བར་དུ་ནི་འདིས་མི་མཛེས་པར་གྱུར་བ་དང༌། སྤྱོད་ལམ་ངན་པར་གྱུར་པ་བསྟན་ཏོ། །མདོ་ལས། དེ་རིང་གལ་ཏེ་ངས་དེང་ཤཱ་རིའི་བུ། །ཞེས་པ་ནས། འདི་འདྲའི་མདོ་སྡེ་མ་བཤད་ཅིག་ཅེས་བསྒོ། །ཞེས་པའི་བར་དུ་ནི་མདོ་སྡེ་འདི་ལ་མ་དད་པའི་རྣམ་པར་སྨིན་བ་མདོར་བསྡུས་ཏེ་བཤད་པའོ། །མདོ་ལས། འདི་ལྟར་གང་དག་གསལ་ཞིང་མང་ཐོས་དང༌། །ཞེས་པ་ནས། དེ་ལ་ཁྱོད་ཀྱིས་དོན་དམ་འདི་དེར་སྒྲོགས། །ཞེས་པའི་བར་དུ་ཚིག་བཅུ་དགུ་པོ་འདིས་ནི་བཤད་པར་འོས་པ་རྣམས་ཀྱི་མཚན་ཉིད་བསྟན་ཏེ། སྔོན་བྱང་ཆུབ་ཏུ་སེམས་བསྐྱེད་དུ་ཟིན་གྱིས་དེ་བཞིན་གཤེགས་པའི་རིགས་ཅན་བཤད་པར་འོས་པ་དང༌། བྱང་ཆུབ་ཏུ་སེམས་ཀྱང་བསྐྱེད་ལ་ཕ་རོལ་ཏུ་ཕྱིན་པ་དྲུག་སྤྱོད་སྤྱོད་པའི་བག་ཆགས་ཅན་འོག་ནས་འབྱུང་བ་རྣམས་ལ་བཤད་པར་འོས་པ་སྟེ། དེ་བཞིན་གཤེགས་པའི་རིགས་ཀྱི་རྟགས་ཡོད་པ་ནི་དབང་པོ་རྣོ་བ། ཤེས་རབ་ཅན་ལེགས་ཉེས་རྟོགས་པ། མི་རྨོངས་པའི་རང་བཞིན་ཅན་མང་དུ་ཐོས་པ། སེམས་གསལ་ཞིང་རྟུལ་ཕོད་པ། དམ་པའི་ཆོས་འདི་ཉན་པར་དགའ་ཞིང་ཐོས་པ་གཞན་མི་ཚོལ་བ་ནི་དེ་བཞིན་གཤེགས་པའི་རིགས་སུ་ངེས་པ་སྟེ། བཤད་
པར་འོས་པའོ། །མདོ་ལས། གང་གིས་སངས་རྒྱས་བྱེ་བ་མང་པོ་མཐོང༌། །ཞེས་པ་ནས། དེ་ལ་ཁྱོད་ཀྱིས་དོན་དམ་འདི་སྒྲོགས་ཤིག །ཞེས་པའི་བར་དུ་ནི་བྱང་ཆུབ་ཏུ་སེམས་བསྐྱེད་པ་ཕ་རོལ་ཏུ་ཕྱིན་པ་དྲུག་གི་བག་ཆགས་ཅན་ནི་འདི་དག་སྟེ་འདི་ནི་སངས་རྒྱས་མང་པོ་མཐོང་ཞིང་སྦྱིན་པ་རྒྱ་ཆེན་པོ་བྱས་ཤིང་དགེ་བའི་རྩ་བ་བསྐྱེད་པ་སྟེ། སྦྱིན་པའི་བག་ཆགས་ཅན་དང་སྦྱར་རོ། །མདོ་ལས། གང་རྣམས་བརྩོན་འགྲུས་གང་ལྡན་རྟག་བྱམས་སེམས། །ཞེས་པ་ནས། དེ་དག་ལ་ནི་མདོ་སྡེ་འདི་མངོན་ཤོད། །ཅེས་པའི་བར་དུ་བརྩོན་འགྲུས་དང་བསམ་གཏན་དུ་སྦྱར་རོ། །མདོ་ལས། ཕན་ཚུན་རྟོག་ཅིང་རིམ་གྲོ་བཅས་པ་ཅན། །ཞེས་པ་ནས། དེ་མདུན་མདོ་སྡེ་བཟང་པོ་འདི་སྨྲོས་ཤིག །ཅེས་པའི་བར་དུ་ནི་ཤེས་རབ་དང་ཚུལ་ཁྲིམས་ཀྱི་བག་ཆགས་རིམ་པ་བཞིན་དུ་སྦྱར་རོ། །མདོ་ལས། རྟག་ཏུ་ཁྲོ་བ་མེད་ཅིང་གང་དྲན་པ། །ཞེས་པ་ནས། དེ་ཡི་མདུན་དུ་མདོ་སྡེ་མཆོག་འདི་སྨྲོས། །ཞེས་པའི་བར་དུ་ནི་བཟོད་པའི་བག་ཆགས་དང་སྦྱོར་རོ། །མདོ་ལས། གང་དག་འཁོར་གྱི་དབུས་སུ་ཆོས་སྟོན་ཅིང༌། །ཞེས་པ་ནས། དེ་ལ་ཁྱོད་ཀྱིས་མདོ་སྡེ་འདིར་བསྒྲོགས། །ཞེས་པའི་བར་དུ་ནི་མདོ་སྡེ་འདི་ཚོལ་བ་དང་རིམ་གྲོར་བྱེད་པ་རྣམ་པ་གཉིས་ལ་གཞན་གྱི་བསྟན་པ་ཐམས་ཅད་སྤངས་ཏེ། ཐེག་པ་ཆེན་པོའི་མདོ་སྡེ་འབའ་ཞིག་ཚོལ་བའི་ཕྱིར་ཚོལ་བ་བསྟན་ཏོ། །མདོ་ལས། ཇི་ལྟར་དེ་བཞིན་གཤེགས་པའི་གདུང་འཛིན་པ། །ཞེས་པ་ནས། དེ་དག་མདུན་དུ་མདོ་སྡེ་མཆོག་འདི་སྨྲོས། །ཞེས་པའི་བར་དུ་ནི་མདོ་སྡེ་འདི་ལ་རིམ་གྲོ་བསྐྱེད་པ་དང༌། བཤད་པར་འོས་པ་རྣམས་ཀྱི་མཚན་ཉིད་ཀྱི་བསྡུ་བ་བསྟན་ཏོ།། །།འདི་མན་ཆད་དད་པའི་ལེའུ་བསྟན་ཏེ། གོང་དུ་དྲང་བ་དང་དེས་པའི་ཚུལ་རྟོགས་པར་བྱ་བའི་ཕྱིར་དཔེས་དོན་མཚོན་པས་དབང་པོ་རྣོ་བ་འཕགས་པ་ཤཱ་རིའི་བུ་ལྟ་བུ་དང༌། དབང་བོ་བར་མ་འཕགས་པ་བཞི་པོ་ཡང་དཔེ་དེ་ཉིད་ཀྱིས་དོན་གོ་བར་གྱུར་བས་ཟབ་མོ་ཉིད་ལ་མོས་པ་སྐྱེས་པའི་ཕྱིར་དད་པའི་ལེའུ་བསྟན་ཏོ། །འཕགས་པའི་ཉན་ཐོས་པ་རྣམས་སྤྱོད་ཡུལ་དམ་པའི་མཐར་མ་ཕྱིན་པར་ཕྱིན་བ་ཙམ་དུ་སེམས་ཤིང་ཐེག་པ་ཆེན་པོ་བ་དང་ཁྱད་པར་མེད་པ་ཙམ་དུ་བསྙེམས་པ་དེའི་དོན་དུ་སྤྲང་པོ་དང་འདྲ་བར་བསྟན་པའི་ཕྱིར་འདིའི་ནང་ནས་སྦྲང་པོའི་དཔེ་བསྟན་ཏོ། །དད་པ་
ཞེས་པ་ནི་ཆོས་ཇི་བཞིན་པར་བཟོད་པ་སེམས་རྣམ་པར་དག་པའི་མཚན་ཉིད་དོ། །མདོ་ལས་དེ་ནས་ཚེ་དང་ལྡན་པ་རབ་འབྱོར་ཞེས་པ་ནས་ཤིན་ཏུ་དགའ་བར་གྱུར་ཏོ་ཞེས་པའི་བར་དུ་ནི་འཕགས་པ་དེ་བཞིན་དགའ་བར་གྱུར་པ་དང༌། འཕགས་པ་དེ་བཞིན་བྱས་པ་གཟོ་བས་དྲིན་བསབ་བ་སྟེ། དེ་ལ་དང་པོས་དགའ་བའི་མཚན་ཉིད་བསྟན་པ་དང༌། གུས་པའི་མཚན་ཉིད་བསྟན་པ་སྟེ་འདི་ནི་དང་པོའོ། །ཚེ་དང་ལྡན་པ་ཞེས་པ་ནི་འཇིག་རྟེན་པ་ལུས་རིང་དུ་འཚོ་བའི་ཚེ་དང་འཕགས་པ་རྣམས་ཡེ་ཤེས་ཀྱི་སྲོག་གིས་འཚོ་བའི་ཚེ་གཉི་ག་དང་ལྡན་པས་ཚེ་དང་ལྡན་པ་ཞེས་བྱའོ། །འཕགས་པ་གཞན་ནི་རུས་ལས་བཏགས་པ་དང༌། ཆུང་ངུ་ལས་དགའ་བ་ལྟས་བཟང་པོ་ལས་བཏགས་པ་སྟེ། ཅི་རིགས་པར་སྦྱར་རོ། །སྔར་དཔེ་ལས་དོན་རྟོགས་པར་གྱུར་ཅིང་བླ་ན་མེད་པའི་ལུང་བསྟན་པ་ཐོས་པས་ཤིན་ཏུ་དགའ་བར་གྱུར་པའོ། །མདོ་ལས་དེའི་ཚེ་སྟན་ལས་ལངས་ཏེ་ཞེས་པ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་པའི་བར་དུ་ནི་གུས་པའི་ཚུལ་བསྟན་ཏེ། ཚུལ་དེ་ཡང་རྣམ་པ་དགུར་དབྱེའོ། །སྟན་ལས་ལངས་པ་ནི་ཐེག་པ་རྣམ་གཉིས་ལས་འཕགས་ཤིང་སེམས་ཆེན་པོ་བསྐྱེད་པའི་དོན་ཏོ། །གོས་ཚགས་བཅོས་ཞེས་པ་ནི་བྱང་ཆུབ་སེམས་དཔའི་སྡོམ་པས་བརྒྱན་ཞེས་པའི་དོན་ཏོ། །ཕྲག་པ་གཅིག་ཏུ་གཟར་ཞེས་པ་ནི་ཐེག་པ་རྣམ་གཅིག་ལ་ཞུགས་ཤིང་བཀྲ་ཤིས་པའི་ཚུལ་སྟོན་པའོ། །པུས་མོ་གཡས་པའི་ལྷ་ང་ས་ལ་བཙུགས་ཞེས་པ་ནི་ཐེག་པ་རྣམ་གཉིས་འཛིན་པའི་སེམས་ཐུལ་ཞེས་པའི་དོན་ཏོ། །སེམས་གཅིག་ཏུ་བྱས་པ་ནི་ཐེག་པ་ཆེན་པོ་གཅིག་པོ་ཚོལ་གྱི་གཞན་མི་སེམས་པའི་དོན་ཏོ། །ཐལ་མོ་སྦྱར་ཞེས་པ་ནི་སེམས་སངས་རྒྱས་ལ་འདུད་པ་དྲང་བ་དང་ངེས་པའི་དོན་བསྟན་པར་མོས་པའི་དོན་དང༌། ལུས་དང་ངག་དང་ཡིད་གསུམ་དགའ་བར་དམིགས་པའི་དོན་ཏོ། །མངོན་དུ་ལྟ་ཞིང་ཞེས་པ་ནི། ལུང་དང་གཞུང་གི་ཚུལ་རྟོགས་པར་འདོད་ཅེས་པའི་དོན་ཏོ། །གསོལ་ཏོ་ཞེས་པ་ནི་དད་པའི་མཚན་ཉིད་བསྟན་ཏོ། །མདོ་ལས་བཅོམ་ལྡན་འདས་བདག་ཅག་རྒས་ཞེས་པ་ནས་བརྩོན་འགྲུས་བརྩམས་པའི་རྡོ་མི་ཐོགས་ཀྱི་ཞེས་པའི་བར་དུ་ནི། འཕགས་པ་བཞི་པོས་སླར་གསོལ་པ་སྟེ། སྔར་ནི་ཚིག་
ལྷུག་པས་གསོལ། དེའི་འོག་ཏུ་ནི་ཚིགས་སུ་བཅད་པས་གསོལ། ཚིག་ལྷུག་པ་ལ་ཡང་རྣམ་པ་གསུམ་སྟེ། ཆོས་ལས་གླེང་བ་དང༌། དཔེས་གླེང་བ་དང༌། གཉི་ག་བསྡུས་ཏེ་གླེང་བའོ། །དེ་ཡང་སྔོན་ཆོས་འདི་ཐོས་བསམ་སྔགས་ཏེ་དེ་མངོན་སུམ་དུ་ཆུད་པའོ། །དེ་ཡང་སྔར་ནི་བསྡུས་ཏེ་བསྟན། ཕྱིས་ནི་རྒྱས་པར་བསྟན་ཏོ། །གསོལ་པ་ལ་ཡང་དགེ་འདུན་གྱི་ནང་ན་གྲལ་མཐོ་བ་དང༌། ན་སོ་རྒན་པ་དང༌། བྱང་ཆུབ་ཐོབ་བཞིན་པ་ཙམ་དུ་སེམས་པ་དང༌། ཡང་བླ་ན་མེད་པའི་བྱང་ཆུབ་ཆེན་པོ་ཚོལ་བར་མི་སེམས་པའོ། །མདོ་ལས་ནམ་བཅོམ་ལྡན་འདས་ཀྱིས་ཆོས་སྟོན་ཅིང་ཞེས་པ་ནས། བདག་ཅག་གིས་མོས་པ་མ་བསྐྱེད་དོ་ཞེས་པའི་བར་དུ་ནི། སྔར་ཆོས་ཀྱི་དོན་གླེང༌། འོག་ཏུ་ནི་དགོངས་པའི་དོན་བསྟན་ཏེ། འདི་ནི་དང་པོ་དང་སྦྱར་རོ། །འཕགས་པ་ཉན་ཐོས་པ་རྣམས་རང་གི་སྤྱོད་པ་བསྒྲུབ་ཅིང་སྔོན་བཅོམ་ལྡན་འདས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་བཤད་པ་ན་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་ཉིད་ལ་སེམས་མི་འཇོག །ཐེག་པ་ཆེན་པོའི་ཆོས་བྱང་ཆུབ་ཀྱི་ཆོས་རྣམས་ལ་མི་སེམས་སོ། །སྔོན་བཅོམ་ལྡན་འདས་ཀྱིས་བྱང་ཆུབ་ཀྱི་ཕྱོགས་ཀྱི་ཆོས་རྣམས་སྟོན་པའང་བདག་ཅག་ལུས་དང་ཡན་ལག་བྲོ་འཚལ་བར་གྱུར་ཞེས་སྨྲས་པ་ཡིན་ཏེ། སྟོང་པ་ནི་བདག་མེད་པའི་སྤྱོད་ཡུལ་ལོ། །མཚན་མ་མེད་པ་ནི་འགོག་པའི་སྤྱོད་ཡུལ་ལོ། །སྨོན་པ་མེད་པ་ནི་མྱ་ངན་ལས་འདས་པའི་འདུས་མ་བྱས་སོ། །འདུས་བྱས་ཀྱི་ཆོས་ཐམས་ཅད་ནི་སྨོན་པ་མེད་པ་སྟེ། ཟག་པ་དང་བཅས་པ་དང༌། ཟག་པ་མེད་པའི་ཤེས་རབ་ཀྱིས་བསྡུས་པའོ། །བྱང་ཆུབ་སེམས་དཔའི་ཆོས་ཞེས་པ་ནི། བྱང་ཆུབ་ཀྱི་ཕྱོགས་རྣམས་ཀྱི་ཆོས་ཏེ། དྲན་པ་ཉེ་བར་གཞག་པ་བཞི་དང༌། ཡང་དག་པར་སྤོང་བ་བཞི་དང༌། རྫུ་འཕྲུལ་གྱི་རྐང་པ་བཞི་དང༌། དབང་པོ་ལྔ་དང༌། སྟོབས་ལྔ་དང༌། བྱང་ཆུབ་ཀྱི་ཡན་ལག་བདུན་དང༌། འཕགས་པའི་ལམ་ཡན་ལག་བརྒྱད་པའོ།། བྱང་ཆུབ་སེམས་དཔའ་ནི་རྣམ་པར་རོལ་པ་ཡང་རྣམ་པ་བཅུ་སྟེ། ལྷའི་སྐུ་ཚེ་སྤང་བ་དང༌། གཞན་དུ་སྐྱེ་བ་སྟོན་པ་དང༌། མངོན་དུ་བཙས་ཏེ་དགྱེས་རོལ་པ་དང༌། ཁབ་ནས་བྱུང་བ་དང༌། དཀའ་ཐུབ་མཛད་པ་དང༌། བྱང་ཆུབ་ཏུ་སེམས་བསྐྱེད་པས། པ་དང༌། བདུད་འདུལ་བ་དང༌། ཏིན་ངེ་འཛིན་གྱི་
དགའ་བ་ལ་བཞུགས་ཤིང༌། ལྷའི་ཡང་ལྷར་གྲུབ་པ་སྟོན་པ་དང༌། ཆོས་ཀྱི་འཁོར་ལོ་བསྐོར་བ་སྟོན་པ་དང༌། མྱ་ངན་ལས་འདས་པ་སྟོན་པའོ། །སངས་རྒྱས་ཀྱི་ཞིང་གི་རྒྱན་དག་ཅེས་པ་ནི། མདོ་ལས་རྒྱུ་རྣམ་པ་བརྒྱད་དེ། བླ་ན་མེད་པའི་བྱང་ཆུབ་ཏུ་སེམས་བསྐྱེད་པས། །ཡིད་གཅིག་ཏུ་མོས་པ་ལྷག་པའི་སྤྱོད་པ་ལ་མཁས་པས་བླ་ན་མེད་པར་མོས་པའི་ཡིད་དང༌། ཕ་རོལ་ཏུ་ཕྱིན་པ་དྲུག་སྤྱོད་པའི་སེམས་དང་ལྡན་པ་དག་གོ །ཚད་མེད་པ་བཞི་དང༌། བསྡུ་བ་རྣམ་བཞི་དང༌། ཐབས་མཁས་པས་བྱང་ཆུབ་ཀྱི་ཕྱོགས་རྣམས་སྤྱོད་པ་ཐམས་ཅད་བླ་ན་མེད་པར་བསྔོ་བ་ནི་བྱང་ཆུབ་ཏུ་སེམས་བསྐྱེད་པའོ། །མདོ་ལས་དེ་ཅིའི་སླད་དུ་ཞེ་ན། བཅོམ་ལྡན་འདས་ཞེས་པ་ནས་མོས་པའི་སེམས་གཅིག་ཀྱང་བསྐྱེད་པར་མ་གྱུར་ཏེ་ཞེས་པའི་བར་དུ་ནི་གཏན་ཚིགས་སྨོས་པ་སྟེ། ལམ་མངོན་དུ་གྱུར་པས་སྡུག་བསྔལ་མི་སྐྱེ་བ་དང༌། རྒས་པས་སྤྱོད་པ་གཞན་ལ་འཇུག་མི་ནུས་ཞེས་པའི་དོན་ཏོ།། མདོ་ལས་བཅོམ་ལྡན་འདས་བདག་ཅག་གིས་བཅོམ་ལྡན་འདས་ཀྱི་དྲུང་ནས་ཞེས་པ་ནས་འདི་ལྟ་བུའི་རིན་པོ་ཆེ་འདི་ཐོབ་སྟེ་ཞེས་པའི་བར་དུ་ནི་འདིར་ཐེག་པ་ཆེན་པོའི་དོན་རྟོགས་པར་བསྟན་ཏེ། ལུང་བསྟན་པ་ཐོས་བ་དང༌། ཆོས་བཤད་པའི་དགའ་བས་ངོམས་པ་དང༌། ཐེག་པ་ཆེན་པོའི་ཆོས་རིན་པོ་ཆེ་ཐོབ་པའོ། །མདོ་ལས་བཅོམ་ལྡན་འདས་འདི་ལྟ་སྟེ་དཔེར་ན་མི་ལ་ལ་ཞིག་འདི་ལྟར་ཞེས་པ་ནི་ཚིག་དང་པོ་དེས་ནི། བྱང་ཆུབ་ཏུ་སེམས་བསྐྱེད་པའི་དཔེར་བསྟན་པ་ལས། ལོགས་ཤིག་ཏུ་སོང་ཞས་པ་ནི་འཁོར་བར་འཁོར་བའི་དཔེ་བསྟན། ནར་སོན་ཏེ་ཞེས་པ་ནི། ཕྱིས་སངས་རྒྱས་སུ་གྲུབ་པའི་དཔེ་བསྟན། ཕས་བུ་དྲན་ཡང་ཞེས་པ་ནི་ཐེག་པ་ཆེན་པོ་ལ་འཇུག་ཏུ་མི་བཏུབ་པའི་དཔེ་བསྟན། ཕས་རྒྱང་ནས་མཐོང་ཞེས་པ་ནི་ཐེག་པ་གཉིས་ཀྱི་དཔེ་བསྟན། ཁྱིམ་བདག་དེ་ལ་མཛོད་དང་ནོར་མང་དུ་ཡོད་ཅེས་པ་ནི་ཐེག་བ་ཆེན་པོའི་དཔེ་བསྟན་ཏོ། །དེ་ན་གཞོན་ཞེས་པ་ནི་བླ་ན་མེད་པའི་བྱང་ཆུབ་ཏུ་སེམས་མ་བསྐྱེད་པ་ལ་བྱའོ། །མདོ་ལས་ཕའི་གནས་ནས་ལོགས་ཤིག་ཏུ་མཆིས་ལ་ཞེས་པ་ནས་ལོ་ལྔ་བཅུར་གནས་ཏེ་ཞེས་པའི་བར་དུ་ནི་འཇིག་རྟེན་དང་འཁོར་བའི་དཔེ་སྟེ། མདོ་ལས་དབང་པོ་རྣོན་པོ་བྱང་ཆུབ་ཏུ་སེམས་བསྐྱེད་པ་ཇི་ལྟར་ཡུན་རིང་དུ་འཁོར་བར་འཁོར་ཡང་ངན་སོང་དུ་མི་ལྟུང་སྟེ། ཕྱིས་ཀྱང་བྱང་ཆུབ་ཀྱི་སེམས་སྐྱེ་ཞེས་པའི་དོན་ཏོ།།
ལས་ཀྱི་སྒྲིབ་པས་ཟིན་ཏེ་ཡིད་གཅིག་ཏུ་ངེས་པས་སངས་རྒྱས་མི་ཚོལ་བའི་ཕྱིར་ཕ་ལས་ལོགས་ཤིག་ཏུ་སོང་ཞེས་བྱའོ། །ཡུལ་ཕྱོགས་གཞན་ཞེས་པ་ནི་སངས་རྒྱས་ཀྱི་ཡུལ་ལས་གཞན་དུ་གྱུར་བ་རྣམས་སོ། །ལོ་ཉི་ཤུ་དང་སུམ་ཅུ་ཞེས་པ་ནི་རྒྱུད་རྣམ་ལྔར་འཁོར་ཞེས་པའི་དོན་ཏོ། །མདོ་ལས་བཅོམ་ལྡན་འདས་དེ་ནས་མི་དེས་ཆེན་པོ་ཞིག་ཏུ་ལགས་ལ་ཞེས་པ་ནས། ཡུལ་ཕྱོགས་ཞིག་ཏུ་ཕྱིན་ཏེ་ཞེས་པའི་བར་དུ་ནི་སངས་རྒྱས་དང་ཕྲད་པའི་དཔེ་བསྟན་ཏེ། བྱང་ཆུབ་ཀྱི་སེམས་མ་སྟོར་བའི་ཕྱིར་ཐེག་པ་ཆེན་པོ་ཐོས་ཤིང་སངས་རྒྱས་སུ་གྲུབ་པ་ཞེས་པའི་དོན་ཏོ། །དེ་ཡང་བུ་ནར་སོན་ཏེ་ཡུལ་འཁོར་དུ་ཕྱིན་པ་ནཱ། ཕས་ཀྱང་སྔ་ནས་བཙལ་བ་ལས་ཕྱིར་ཕྲད་ཅེས་པར་སྦྱར་ཏེ། འདི་ནི་དང་པོའོ། །དང་པོ་ལ་ཡང་རྣམ་པ་དྲུག་ཏུ་དབྱེ་སྟེ། དབང་པོ་ཁད་ཀྱིས་སྨིན་པ་ནི་ནར་སོན་པ་དང་སྦྱར། ཤེས་རབ་མ་བསྒོམས་པ་ནི་དབུལ་པོར་གྱུར་ཞེས་པ་དང་སྦྱར་ཏེ། འཁོར་བར་འཁོར་བ་ནི་ཕྱོགས་དང་ཕྱོགས་མཚམས་སུ་སོན་པ་དང་སྦྱར། སྐྱེ་ཞིང་སྡུག་བསྔལ་ལས་འབྱུང་བར་རྩོལ་བ་ནི་འཚོ་བ་ཚོལ་བ་དང་སྦྱར། ཤེས་རབ་རྣམ་གསུམ་གྱི་ལས་སྤྱོད་པ་ནི་ཁད་ཀྱིས་ཁྱིམ་དུ་ཉེ་བ་དང་སྦྱར་རོ། །མདོ་ལས་དེའི་ཕ་དེ་ཡང་ཞེས་པ་ནས་འཚོ་བ་ཡང་མང་དུ་གྱུར་ཏེ་ཞེས་པའི་བར་དུ་ནི་འདི་མན་ཆད་རྣམ་པ་གསུམ་དུ་བསྡུས་ཏེ། སྔོན་ཚོལ་ཚོལ་བའི་བུ་མཁར་དུ་སླར་ཕྱིན་པ་དང༌། ནོར་དང་འཚོ་བ་མང་བར་གྱུར་བ་དང༌། གཡོག་དང་ཡུལ་ཆེན་པོར་གྱུར་པ་སྟེ། དེ་ལ་ཕ་ཞེས་པ་ནི་སྤྲུལ་པའི་སྐུ་སྟེ། དེ་བཞིན་གཤེགས་པ་ནི་སེམས་ཅན་གྱི་དོན་དང་འདྲེན་པ་མཛད་དུ་ཟིན་གྱིས་ཀྱང༌། སེམས་ཅན་སོ་སོའི་ལས་ཀྱི་དབང་གིས་དེ་བཞིན་གཤེགས་པ་ལ་མི་ཕྱོགས་པ་དང༌། ནོར་སྣ་ཚོགས་མང་ཞེས་པ་ནི་རིན་པོ་ཆེ་སྣ་བདུན་ཏེ། འཕགས་པའི་ནོར་བདུན་དང་སྦྱར། མཛོད་དང་བང་བ་ནི་འདུས་མ་བྱས་ཀྱི་ཆོས་ཀྱི་མཛོད་དང་ལྡན་ཞེས་པའི་དོན་ཏོ། །ཉོན་མོངས་པ་རྣམས་ཀྱི་དབང་དུ་གྱུར་པའི་ཕྱིར་བྲན་དང་འདྲའོ། །ཐབས་མཁས་བས་སྤྱོད་པ་ནི་གཡོག་དང་འདྲའོ། །སྨོན་ལམ་དང་སྟོབས་ལ་སོགས་པ་ནི་ལས་བྱེད་པའི་མི་དང་སྦྱར་རོ། །མངོན་པར་ཤེས་པ་ལྔ་ནི་གླང་པོ་ཆེ་དང་རྟ་དང་སྦྱར། ཐེག་པ་རྣམ་ལྔ་ནི་ཤིང་རྟ་དང་སྦྱར། སྤྱོད་པ་བརྒྱད་ཁྲི་བཞི་སྟོང་ནི། བ་ལང་དང་ལུག་མང་པོ་དང་ལྡན་པ་དང་སྦྱར། དོན་དམ་
པ་དང་ཀུན་རྫོབ་ཀྱི་བསྟན་པ་ནི་ཁ་འདུ་ཞིང་འཕེལ་བ་དང་སྦྱར་རོ། །དེ་བཞིན་གཤེགས་པའི་བསྟན་པ་སྒྲོགས་པ་ནི་འཚོ་བ་མང་བ་ཞེས་སྦྱར་རོ། །དེ་ནས་བཅོམ་ལྡན་འདས་མི་དབུལ་པོ་དེ་ཞེས་པ་ནས། དེར་ཕྱིན་པར་གྱུར་ཏེ་ཞེས་པའི་བར་དུ་ནི། ཐེག་པ་རྣམ་གསུམ་གྱི་སྤྱོད་པ་ནི་གྲོང་དང་གྲོང་ཁྱེར་ཞེས་པའི་དོན་ཏེ། དེ་ལ་ཆོས་བཤད་པ་དང༌། རྫུ་འཕྲུལ་བསྟན་པའི་དོན་ནི་ལྗོངས་དང་རྒྱལ་པོའི་ཕོ་བྲང་དང་སྦྱར་རོ། །ཇི་ལྟར་གནས་ཐམས་ཅད་དུ་འཁྱམས་ཀྱང་རྒྱལ་པོའི་ཕོ་བྲང་དུ་ཕྱིན་པ་བཞིན་བསྟན་པ་སྣ་ཚོགས་ལ་ཞུགས་ཀྱང་རིགས་མ་འགྱུར་ཏེ། དེ་བཞིན་གཤེགས་པའི་རིགས་ཀྱི་གནས་སུ་འཁོར་ཅིང༌། ཡབ་སངས་རྒྱས་བཅོམ་ལྡན་འདས་དང་ཕྲད་ཅེས་པའི་དོན་ཏོ། །མདོ་ལས་དེ་ནས་བཅོམ་ལྡན་འདས་མི་དབུལ་པོའི་ཕ་དེ་ཞེས་པ་ནས་གཞན་སུ་ལ་ཡང་མི་སྨྲ་བར། འདི་སྙམ་དུ་བདག་ནི་ཞེས་པའི་བར་དུ་ནི་ཐེག་པ་ཆེན་པོ་ལ་ཕྱོགས་སུ་མི་བཏུབ་པའི་དཔེ་སྟེ། ལོ་ལྔ་བཅུ་ཞེས་པ་ནི་རྒྱུད་རྣམ་ལྔར་འཁོར་བའི་དོན་ཏོ། །ནང་དུ་གདུད་བ་མ་གཏོགས་པར་གཞན་སུ་ལམ་སྨྲ་ཞེས་པ་ནི་ཐེག་པ་ཆེན་པོའི་དོན་འདི་འཁོར་མང་པོའི་ནང་དུ་མ་གསུངས་ཞེས་པའི་དོན་ཏོ། །གདུང་བ་ཞེས་པ་ནི་འགྲོ་བ་རྣམས་ཐེག་པ་གཅིག་པུ་འདིའི་སྣོད་དུ་མ་གྱུར་པས་གདུང་བ་ཞེས་སྦྱར་རོ། །མདོ་ལས་རྒས་ཤིང་འཁོགས་ཏེ་འདུག་ན་ཞེས་པ་ནས་འདི་ལ་སྤྱོད་བར་གྱུར་ན་ནི་བདག་མྱ་ངན་མེད་པར་སེམས་ན་ཞེན་བའི་བར་དུ་ནི། ཐེག་པ་ཆེན་པོ་ལ་གནས་པར་ཡུན་རིང་བ་དང༌། སྤྱོད་པ་རྫོགས་པའི་ཕྱིར་རྒས་འཁོགས་ཞེས་པའི་དོན་ཏོ། །བསོད་ནམས་དང་ཡེ་ཤེས་ཀྱི་ཚོགས་ཟད་མི་ཤེས་པའི་ཕྱིར་ནོར་ཟས་དང་བང་མཛོད་མང་ཞེས་པའི་དོན་ཏོ། །བྱང་ཆུབ་སེམས་དཔའ་རྣམས་བཞུགས་ཀྱང་ད་རུང་ཉན་ཐོས་པ་རྣམས་ཀྱིས་སངས་རྒྱས་ཀྱི་གདུང་འཚོ་བའི་ཕྱིར་བུ་མེད་པ་ཞེས་པའི་དོན་ཏོ། །སངས་རྒྱས་ནམ་ཞིག་མྱ་ངན་ལས་འདའ་བར་སྟོན་པ་ན། ཐེག་པ་ཆེན་པོའི་ནོར་རྫས་དབང་པོ་སྨོན་པ་རྣམས་ལ་གཏད་དུ་མེད་པའི་ཕྱིར་ཐུགས་རྗེས་མྱ་ངན་དུ་དགོངས་པ་ཞེས་སྦྱར་རོ། །མདོ་ལས་དེ་ནས་བཅོམ་ལྡན་འདས་མི་དབུལ་པོ་དེ་ཞེས་པ་ནས་གང་ན་བདེར་མཆིས་ཏེ་ཞེས་པའི་བར་དུ་ནི་འདི་མན་ཆད་བུ་དེས་ཕ་མཐོང་མ་ཐག་ཏུ་སྐྲག་ནས་བྲོས་པ་དང༌། ཕའི་སྒོ་དྲུང་དུ་
ཕྱིན་པ་དང་ཞེས་པ་ལ་ཚོལ་ཞིང་སོང་སོང་ཞེས་པ་ནི་འབྱུང་བའི་དོན་ཚོལ་བའོ། །ཆེད་དུ་བཙལ་བ་མ་ཡིན་པར་གནས་དེར་སོན་པ་ནི་ཐེག་པ་ཆེན་པོའི་རིགས་ཅན་དུ་འགྱུར་བར་སྨིན་པའི་དུས་ལ་བྱའོ། །ཕའི་གནས་དེར་ཕྱིན་ཞེས་བྱ་བ་ནི་ལུང་དང་རིགས་པའི་སྒོ་ནས་སྤྱོད་པ་ལ་ཞུགས་ཞེས་པའི་དོན་ཏོ། །གནས་གང་ན་བདེར་ཕྱིན་ཞེས་པ་ནི་ཐེག་པ་ཆེན་པོའི་ཕྱོགས་ལ་བསྙེན་ཞེས་པའི་དོན་ཏོ། །འགྲོན་བུ་དང་གསེར་དང༌། འབྲུ་མཛོད་མང་དུ་ཡོད་ཅེས་པ་ནི་ཐེག་པ་ཆེན་པོ་རིན་པོ་ཆེ་ཐམས་ཅད་ཀྱི་འབྱུང་གནས་སུ་གྱུར་པ་ཉིད་ལ་བྱའོ། །མདོ་ལས་དེ་ནས་བཅོམ་ལྡན་འདས་མི་དབུལ་པོ་དེའི་ཕ་ཞེས་པ་ནས། བརྒྱན་པ་ལ་མཆི་སྟེ་ཞེས་པའི་བར་དུ་ནི་འདིས་ཕ་མཐོང་བ་བསྟན་པ་ལ་ཡང་ཕ་བདེ་བར་འདུག་པ་དང་འཁོར་མང་པོས་བསྐོར་བའོ། །མཐོང་ཞེས་པ་ནི་རྒྱང་མ་ནས་མཐོང་ཞེས་པའི་དོན་ཏེ། ཐེག་པ་ཆེན་པོའི་སྤྱོད་པ་ལ་ད་དུང་རིང་ཞེས་པའི་དོན་ཏོ། །ཁྲི་ནི་མི་འཇིགས་པ་བཞིའི་ཁྲི་དང༌། བསམ་གཏན་བཞིའི་ཁྲིའོ། །རྒྱན་སྣ་ཚོགས་ཀྱིས་བརྒྱན་ཞེས་པ་ནི་གདུག་པ་གསུམ་དང་བྲལ་བའི་རྒྱན་གྱིས་བརྒྱན་པའོ། །ལྷག་པའི་ཚུལ་ཁྲིམས་ནི་བྲམ་ཟེ་དང་སྦྱར་རོ། །ལྷག་པའི་ཤེས་རབ་ནི་རྒྱལ་རིགས་དང་སྦྱར་རོ། །ལྷག་པའི་བསམ་གཏན་ནི་རྗེའུ་རིགས་དང་སྦྱར་རོ། །མདོ་ལས་འགྲོན་བུ་བྱེ་བ་བརྒྱ་སྟོང་གིས་སྤྱོད་པ་བགྱིད་དེ་ཞེས་པ་ནས་ལོངས་སྤྱོད་ཆེན་པོས་མཆིས་པ་ཞེས་པ་པའི་བར་ནི་རྒྱན་དེ་ལ་ཡང་རྣམ་པ་གཉིས་ཏེ། དྲན་པ་ཉེ་བར་གཞག་པ་རྣམས་ཀྱིས་ལུས་བརྒྱན་པ་དང༌། སྟོབས་དང་མི་འཇིགས་པ་ལ་སོགས་པས་འཁོར་བྱས་པ་དང༌། ཉོན་མོངས་པ་ཐུལ་བ་ཉིད་བྲན་དུ་བྱས་པ་དང༌། བསྡུ་བ་རྣམ་བཞིའི་སེམས་རྟག་ཏུ་འཛིན་པ་རྔ་ཡབ་བྱས་པ། ཚད་མེད་བཞིའི་བླ་རེ་བྲེས་པ། རྣམ་པར་དག་པའི་ཡན་ལག་བདུན་གྱི་མེ་ཏོག་དང༌། དེ་ལ་སོགས་ཏེ་སྤྱོད་པ་དམ་པ་ཐམས་ཅད་ཀྱིས་བརྒྱན་པའི་གནས་ན་འདུག་ཅེས་པའི་དོན་ཏོ། །བུ་དེས་ཕ་མཐོང་ནས་བྲོས་པ་ནི་རྫོགས་ལོངས་སྤྱོད་པའི་སྐུ་མཐོང་ཞེས་པའི་དོན་ཏོ། །མདོ་ལས་བཅོམ་ལྡན་འདས་མི་དབུལ་པོ་དེས་ཞེས་པ་ནས་འདི་སྙམ་སེམས་སོ་ཞེས་པའི་བར་དུ་མཐོང་ཞེས་པ་ནི་མངོན་དུ་རྟོགས་པ་མ་ཡིན་ཏེ། ཐོས་པ་དང་བསམ་པའི་སྒོ་ནས་དཔོག་པའོ། །ལོངས་སྤྱོད་ཆེ་ཞེས་པ་ནི་སྟོབས་དང་མི་འཇིགས་པ་ལ་སོགས་པའི་མཐུ་ཆེ་
བས་ལོངས་པའོ། །དེ་འདྲ་བའི་ལོངས་སྤྱོད་ཆེན་པོ་བདག་གིས་མ་བསྒྲུབས་ན་མི་འཐོབ་པས་སྐྲག་ཅེས་པའི་དོན་ཏོ། །མདོ་ལས་རྒྱལ་པོའི་བློན་པོ་འདི་དང་ཞེས་པ་ནས་ཕྲད་པར་འགྱུར་དུ་མི་འོང་ངམ་སྙམ་ཞེས་པའི་བར་དུ། རྒྱལ་པོ་ཞེས་པ་ནི་ཆོས་ཀྱི་སྐུའོ། །བློན་པོ་ཞེས་པ་ནི་རྫོགས་ལོངས་སྤྱོད་པའི་སྐུའོ། །དབུལ་པོའི་གནས་སུ་འགྲོ་ཞེས་པ་ནི་ཐེག་པ་རྣམ་གཉིས་ཀྱི་སྤྱོད་པ་ལ་འཇུག་པའོ། །ཟས་དང་གོས་ཀྱིས་ཉོན་མི་མོངས་ཞེས་པ་ནི་བསོད་ནམས་དང་ཡེ་ཤེས་ཀྱི་ཚོགས་དེར་ཡང་བསྒྲགས་སུ་ཡོད་ཅེས་པའི་དོན་ཏོ། །ཚམས་ཟུངས་སུ་ཟུན་པར་མི་འགྱུར་རམ་ཞེས་པ་ནི་ཐེག་པ་ཆེན་པོའི་སྤྱོད་པ་ལ་དབང་མེད་པར་ཞུགས་པར་མི་འགྱུར་རམ་ཞེས་པའི་དོན་ཏོ། །མདོ་ལས་དེ་ནས་བཅོམ་ལྡན་འདས་མི་དབུལ་པོ་དེ་ཞེས་པ་ནས། བརྒྱལ་ཏེ་ས་ལ་འགྱེལ་ནས་མྱོས་པར་གྱུར་ལ་ཞེས་པའི་བར་དུ་ནི་མྱུར་དུ་བྲོས་ཞེས་པ་ནི་རང་གི་ཉམས་ལས་སྤྱོད་པ་ཆེན་པོ་ལ་འཇུག་པར་མི་ནུས་ནས་ལྡོག་ཅེས་པའི་དོན་ཏོ། །ཕས་མྱུར་དུ་འཛིན་དུ་བཅུག་པ་ནི་ཐེག་པ་ཆེན་པོ་ལ་འཇུག་པའི་རྒྱུ་སྨིན་པར་གཟིགས་ནས་དགྱེས་པ་སྐྱེས་ཤིང་འཛིན་དུ་བཅུག་པའོ། །སྲེད་པས་གདུངས་ཞེས་པ་ནི་ཐུགས་རྗེ་ཆེན་པོས་འགྲོ་བ་མང་པོ་ལ་འདྲེན་པར་དགོངས་པ་ཇི་ལྟར་སྲེད་པས་གདུངས་པ་བཞིན་ནོ། །འདི་དག་འཛིན་དུ་བཅུག་ཅེས་པ་ནི་ཚིག་གི་དོན་མཚོན་པ་བསྙེམས་པ་མ་ཡིན་པའི་ཕྱིར་མི་དག་འཛིན་དུ་བཅུག་ཅེས་པའི་དོན་ཏོ། །སྤྱོད་པ་ཆེན་པོ་ལ་འཛེམ་པས་འཇིགས་ཤིང་སྐྲག་པ་དང༌། སྤྱོད་པ་དེ་ལ་ཡིད་ཀྱིས་འཇུག་པར་མི་འདོད་པ་ནི་དངངས་པའི་སྒྲ་དྲག་པོས་ཀུ་ཅོ་འདོན་པ་དང༌། ཐེག་པ་ཆེན་པོ་ལ་དབང་མེད་པར་བཅུག་པ་ནི་མི་རུང་བར་བྱས་པར་སེམས་པའོ། །རིངས་པར་མྱུར་དུ་ཞེས་པ་ནི་ཐུགས་རྗེའི་སེམས་གསོལ་པའོ། །གཟུང་དེ་ཞེས་པ་ནི་ཆུང་དུ་ལས་ཆེན་པོར་བསྐྱུར་བའོ། །མ་རུང་བར་བྱ་ཞེས་པ་ཡང་བྱང་ཆུབ་ཀྱི་སྤྱོད་པ་དཀའ་བ་ལ་བཙུད་པའོ། །བརྒྱལ་ཏེ་ས་ལ་འགྱེལ་ཞེས་པ་ནི་འཁོར་བ་ལ་སྦྱོར་བར་སེམས་པའོ། །མདོ་ལས་དེའི་ཕ་དེ་ཡང་ཉེ་བ་ཞིག་ན་མཆིས་ནས་ཞེས་པ་ནས་གཞན་མི་འཆི་སྟེ་ཞེས་པའི་བར་དུ་ནི་འདི་མན་ཆད་ཐེག་པ་རྣམ་གཉིས་དྲང་ཞིང་གཟུང་པ་ལ་དང་པོར་སེམས་བསྐྱེད་པ་དང༌། མི་དབུལ་པོ་དགའ་བར་བྱ་བ་དང༌། རིན་པོ་ཆེ་བླངས་པ་དང༌། དགེ་བའི་རྩ་བ་ལ་གཟུད་པ་དབུལ་པོའི་མིང་བཏགས་པ་
དང། ཐབས་བསྟན་པའོ། །མ་གཟུད་པར་ཞེས་པ་ནི་ཐབས་ཀྱིས་དྲང་བ་ལ་གཟུད་ཅིང་ཕྱིས་ཆེན་པོ་བསྟན་པའི་དོན་ཏོ། །གདོང་དུ་ཆུས་གཏོར་ཞེས་པ་ནི་སྒྲིབ་པ་དང་རྨོངས་པ་བསལ་བའི་དོན་ཏོ། །མདོ་ལས་ཅིའི་སླད་དུ་ཞེ་ན་ཞེས་པ་ནས་འདི་བདག་གི་པུ་ཡིན་ཞེས་སུ་ལ་ཡང་མི་སྨྲ་སྟེ་ཞེས་པའི་བར་དུ་ནི་ཉན་ཐོས་པ་རྣམས་ཐེག་པ་ཆེན་པོ་ལ་དད་པ་སྐྱེ་བའི་སྐལ་བ་ཆུང་བ་ལ་ཐབས་མཁས་པས་ཁད་ཀྱིས་དྲངས་ནས་དེ་བཞིན་གཤེགས་པའི་རིགས་སུ་འགྱུར་བས་དེའི་བུ་ཡིན་ཡང་སུ་ལ་ཡང་མ་སྨྲ་ཞེས་པའི་དོན་ཏོ། །མདོ་ལས་དེ་ནས་བཅོམ་ལྡན་འདས་ཁྱིམ་བདག་དེས་ཞེས་པ་ནས། གར་དགའ་བར་འགྲོ་ལ་རག་གོ་ཞེས་བགྱིས་པ་ནས། འཚལ་མ་དང་རང་པ་འཚོལ་བའི་སླད་དུ་མཆིས་ཏེ་ཞེས་པའི་བར་དུ་ནི་ཐེག་པ་ཆུང་དུ་དེ་དག་སོ་སོའི་དབང་པོ་དང་སྦྱར་ནས་ཐེག་པ་ཆེན་པོ་ལ་གཟུད་པའི་དུས་ལ་མ་བབ་སྟེ་ཐབས་ཀྱིས་དྲང་བའི་ཕྱིར་སླར་བཏང་ཞེས་པའོ། །ངོ་མཚར་རྨད་དུ་གྱུར་ཞེས་པ་ནི་དང་པོ་སེམས་བསྐྱེད་ནས་ཐེག་པ་རྣམ་པ་གཉིས་ལ་ཞུགས་པའོ། །དབུལ་པོའི་གནས་སུ་སོང་ཞེས་པ་ནི་ཐེག་པ་རྣམ་གཉིས་ཀྱི་ཡོན་ཏན་ཆུང་དུ་ལ་ཞུགས་པའོ། །ཟས་ཚོལ་ཞེས་པ་ནི་ཟག་པ་མེད་པའི་ཆོས་ལ་ཞུགས་པའོ། །མདོ་ལས་དེ་ནས་ཁྱིམ་བདག་དེས་མི་དབུལ་པོ་དེ་དགུག་པའི་སླད་དུ་ཞེས་པ་ནས་ལས་བྱེད་དུ་ཆུག་ཅེས་པའི་བར་དུ་ནི་དྲན་པ་ཉེ་བར་གཞག་པ་ལ་སོགས་པ་བསྒོམ་དུ་གཞུག་ཅིང་རྣམ་པར་གྲོལ་བ་ཐོབ་པར་བྱ་བའི་ཕྱིར་རོ། །མི་གཉིས་ཞས་པ་ནི་ཐེག་པ་རྣམ་གཉིས་ཀྱི་བསྟན་པ་ལ་གཟུད་པའོ། །ཐེག་པ་རྣམ་གཉིས་ཀྱི་བསྟན་པ་རྒྱ་ཆུང་ཞིང་ངེས་པའི་དོན་མ་ཡིན་པས་མདོག་མི་སྡུག་ལ་མདངས་ངན་ཞེས་སྦྱར་རོ། །ཡང་ན་བསྟན་པ་ཕྱོགས་གཅིག་པའི་མདོག་མི་སྡུག་པ་དང༌། གཞུང་མ་རྫོགས་པའི་ཕྱིར་མདངས་ངན་ཞེས་སྦྱར་རོ། །མདོ་ལས་དེ་ལ་གལ་ཏེ་འདི་སྐད་དུ་ལས་ཅི་བྱ་ཞེས་པ་ནས་སྨོས་ཤིག་ཅེས་པའི་བར་དུ་ཕྱག་དར་གྱི་ཕུང་པོ་ཞེས་པ་ནི་ཉོན་མོངས་པའི་ཚོགས་སོ། །མདོ་ལས་དེ་ནས་མི་དེ་གཉིས་ཀྱིས་དབུལ་པོ་དེ་བཙལ་ནས་ཞེས་པ་ནས་མི་དབུལ་པོ་དེ་ཡང་ཁྱིམ་བདག་དེ་ལ་ཕར་འདུ་ཤེས་ཞེས་པའི་བར་དུ་ནི་མི་དེ་གཉིས་ཀྱི་བཀའ་མཉན་ཏེ་ཞེས་པ་ནི་ཐེག་པ་རྣམ་གཉིས་པ་ཉོན་མོངས་པ་སྤོང་བ་
ལ་ཞུགས་ཞེས་པའི་དོན་ཏོ། །སླར་ཡང་མི་ངན་པའི་ལས་བྱེད་ཅིང་ཞེས་པ་ནི་ཐེག་པ་རྣམ་གཉིས་དང་པོ་བྱང་ཆུབ་ཏུ་སེམས་བསྐྱེད་པ་རྣམས་ཀྱང་ཐོས་པ་དང༌། སེམས་པའི་ཤེས་རབ་ལ་འཇུག་པའོ། །དེ་ཉེ་བར་བསྙེན་པ་དང༌། ཐབས་ཀྱིས་དྲང་བའི་ཕྱིར་ཁྱིམ་བདག་དེ་བསྙེན་ཅིང་ཚིག་སྤྲས་པའོ། །མདོ་ལས་ཁྱིམ་བདག་དེ་སྐར་ཁུང་གི་གསེབ་ནས་བུ་ཕྱག་དར་བྱེད་པ་མཐོང་ནས། གོས་དང་རྒྱན་ཕུད་དེ་བུའི་གན་དུ་ཕྱིན་ཞེས་པ་ནི་ལུས་ཀྱི་ཚུལ་འདྲ་བ་བསྟན་པ་ཡང་དང་པོ་ནས་ཐེག་པ་ཆེན་པོ་ལ་གཟུད་པའི་དབང་པོ་དང་མི་ལྡན་པས་བགས་ཀྱིས་ཐབས་ཀྱིས་དྲང་བ་དང༌། བསྙེན་ཞེས་པའི་དོན་ཏེ། བསོད་ནམས་དང་ཡེ་ཤེས་མ་རྫོགས་པའི་ཕྱིར་རྒྱང་མ་ནས་མཐོང་ཞིང་རྒྱན་མེད་པའོ། །ཞིང་རྣམ་པར་དག་པ་ན་བཞུགས་ཤིང༌། རྒྱན་ཐམས་ཅད་ཀྱིས་བརྒྱན་པའི་སྐུ་བསྟན་ན་སྐྲག་ཅིང་ཉེར་མི་བཟོད་པའི་ཕྱིར་ཡུལ་ཁམས་ངན་པ་དང༌། རྒྱན་མེད་པའི་ལུས་ཀྱིས་གདུལ་བར་འོས་པའི་ཕྱིར་གོས་དྲི་མ་ཅན་གྱོན་ཅིང་ལ་གན་ཕྱག་དར་གྱི་སྐོན་པ་ཐོགས་པ་བཞིན་དྲང་བའི་དོན་གྱིས་ཉོན་མོངས་བ་སེལ་བའི་ཕྱིར་ལས་ཀྱིས་གཞན་འདེབས་པར་སྟོན་ཅིང༌། དེ་དང་སྨྲ་བར་བྱེད་པ་ནི། ཐུགས་རྗེའི་ཐབས་ཀྱིས་འདྲེན་ཅིང༌། རྣམ་པར་དག་པའི་ཕྱོགས་ལ་བརྩོན་པར་གཞན་འདེབས་པའོ། །གླ་གཞན་པས་སྐྱེད་དེ་སྦྱིན་ནོ་ཞེས་པ་ནི་སྔར་ཐོས་པ་དང་བསམས་པའི་ཤེས་རབ་ལས་དགེ་བའི་རྩ་བ་རྣམ་པ་བཞིར་སྦང་བ། གཞན་དུ་མ་འགྲོ་ཤིག་པ་ཡང་ལྟ་བ་ངན་པ་གཞན་ལས་ཟློག་པའི་དོན་ཏོ། །ཅི་དང་ཅི་དོགས་པ་ཐམས་ཅད་སྦྱིན་ནོ་ཞེས་པ་ནི་རྣམ་པར་གྲོལ་བའི་མཐུ་ལས་བྱུང་བ་ཚད་མེད་པ་བཞི་ལ་སོགས་པའི་རྒྱུས་བསྐྱེད་པ་འཕགས་པའི་ཡོན་ཏན་ཐམས་ཅད་དོ། །བུམ་པ་དང༌། ཕྲུ་བ་དང༌། ཤིང་དང༌། ལན་ཚ་ཞེས་པ་ནི་ཟག་པ་དང་བཅས་པའི་ཡེ་ཤེས་རྣམ་གཉིས་ཀྱིས་ཟིན་པ་འཕགས་པ་ཉན་ཐོས་རྣམས་ཀྱི་རྫུ་འཕྲུལ་དང༌། སྟོབས་དང་མངོན་པར་ཞེས་པ་དག་གོ། ཁྱོད་ཀྱི་ཕ་ཇི་ལྟ་བ་བཞིན་ཞེས་པ་ནི་འཕགས་པ་ཉན་ཐོས་རྣམས་ཉོན་མོངས་པ་སྤངས་ཤིང་འཕགས་པའི་གནས་སུ་སོན་པའི་ཕྱིར་བུ་ཞེས་བཀའ་སྩོལ། ཡང་དག་པའི་བདེན་པ་ཉིད་མི་མཐོང་བའི་ཕྱིར་ནི་བུ་དང་འདྲ་བ་ཞེས་སྨོས་སོ། །སྒྱུའམ་གྱ་གྱུའམ། གཡོ་ཞེས་པ་ནི་ལུས་དང་ངག་དང་ཡིད་
གསུམ་གྱི་དྲི་མ་སྤོང་ཞེས་པའི་དོན་ཏོ། །མི་དབུལ་པོ་དེ་བུ་ཞེས་མིང་དུ་བཏགས་པ་ཞེས་པ་ནི་འཕགས་པར་གྱུར་ཞེས་པའི་དོན་ཏོ། །འབྲས་བུ་དང་པོ་ལ་གནས་པའོ། །མདོ་ལས་ལོ་ཉི་ཤུ་འདས་པ་དང་ཞེས་པ་ནས་སྤྱིལ་པོ་དེ་ཉིད་ན་གནས་ཤིང་མཆིས་པ་ལ་ཞེས་པའི་བར་དུ་ནི། བསྒོམ་པའི་ལམ་ལ་གནས་པའོ། །ཉི་ཤུ་ཞེས་པ་ནི་ཟག་པ་མེད་པའི་ཆོས་བཅུ་སྤྱོད་པས་ཁམས་གཉིས་ཀྱི་ཉོན་མོངས་པ་སྤོང་བའོ། །སྤྱིལ་པོ་དེ་ཉིད་ན་གནས་པ་ནི་རྡོ་རྗེ་ལྟ་བུའི་ཏིང་ངེ་འཛིན་ལ་གནས་པས་ཏིང་ངེ་འཛིན་ནས་མི་སློབ་པའི་ལམ་ལ་གནས་པ་གང་ཟག་ལ་བདག་མེད་པར་རྟོགས་པའི་རྣམ་པར་གྲོལ་བ་ཐོབ་པ་སྟེ། སེམས་ཅན་སྒྲོལ་བ་ལ་འཇིགས་པ་དང༌། ཐོགས་པ་མེད་པར་གནས་པ། འབྲས་བུ་ཆེན་པོ་སྒྲུབ་པ་ལ་མི་འཇིགས་པའི་ཕྱིར། སྤྱིལ་པོ་དེ་ཉིད་ན་གནས་ཞེས་པའོ། །མདོ་ལས་དེ་ནས་བཅོམ་ལྡན་འདས་ཁྱིམ་བདག་དེ་བྲོ་འཚལ་བར་གྱུར་ཏེ་ཞེས་པ་ནས་དེ་ཐམས་ཅད་ཁྱོད་ཀྱིས་ཤེས་པར་འདོད་དོ་ཞེས་པའི་བར་དུ་ནི་དོན་ཆེན་པོ་ལ་དགའ་བའི་དོན་བསྟན་ཏེ། ཁྱིམ་བདག་དེ་ན་བར་གྱུར་ཞེས་པ་ནི། བཅོམ་ལྡན་འདས་མངོན་པར་རྫོགས་པར་སངས་རྒྱས་ནས། ལོ་བཅུ་གཉིས་ལོན་པ་དང་སེམས་ཅན་རྣམས་ཉོན་མོངས་པ་ཕྱིར་ཞིང་འཕེལ་བར་གྱུར་པས་སེམས་ཅན་ཉོན་མོངས་པའི་ནད་ཀྱིས་བཏབ་པ་ན། བཅོམ་ལྡན་འདས་ཀྱང་བསྙུང་བ་ཞེས་པའི་དོན་ཏོ། །དམ་པའི་ཆོས་འདི་བཤད་པའི་དུས་ནི་བཅོམ་ལྡན་འདས་མྱ་ངན་ལས་འདའ་བའི་དུས་དང་ཉེ་བས་སེམས་ཅན་མ་བསྒྲལ་བ་རྣམས་བསྒྲལ་ཟིན་པའི་ཕྱིར་ཁྱིམ་བདག་གུམ་པའི་དུས་ལ་བབ་པར་མཐོང་ཞེས་བྱའོ། །སངས་རྒྱས་བྱང་ཆུབ་སེམས་དཔའ་རྣམས་འདུས་བྱས་དང་འདུས་མ་བྱས་ཀྱི་ཡོན་ཏན་ཐམས་ཅད་ནི་བང་མཛོད་མང་པོའི་ནོར་ཞེས་བྱའོ། །དེ་ལ་ཡང་ཐེག་པ་ཆེན་པོ་ནི་ཤས་ཆེ་ཐེག་པ་ཆུང་དུ་ནི་ཤས་ཆུང་ཞེས་སོ། །སྦྱིན་པ་དང་སྤ་བར་བྱ་ཞེས་པ་ནི་བླང་བ་ནི་བདག་གི་དོན་ཏོ། །སྦྱིན་པ་ནི་གཞན་གྱི་དོན་ཞེས་པའོ། །ཤེས་པར་བྱོས་ཤིག་ཅེས་བྱ་བ་ནི་ཐེག་པ་ཆེན་པོའི་གཞུང་མི་ཤེས་པ་ཤེས་པར་བྱ་བ་དང༌། སེམས་མ་བསྐྱེད་པ་སྐྱེད་ཅིག་པར་བསྟན་པའོ། །མདོ་ལས་དེ་ཅིའི་ཕྱིར་ཞེན་ཞེས་པ་ནས་ཆུད་མ་གཟན་ཞེས་པའི་བར་དུ་ནི་འདིས་ཐེག་པ་ཆེན་པོ་ལ་མོས་པ་བསྟན་པ་སྟེ། ཇི་ལྟར་འཇིག་
རྟེན་ན་ཕ་དང་བུ་སྤྱོད་པ་མཐུན་པ་ལྟར། དེ་བཞིན་གཤེགས་པ་དང༌། ཐེག་པ་རྣམ་གཉིས་ཀྱང་རྣམ་པར་གྲོལ་བ་དང༌། དེ་བཞིན་ཉིད་མཐུན་པར་བསྟན་པས་ཆོས་ཆེན་པོ་ལ་གཞུག་ཅིང༌། དོན་མཉམ་པར་གྱིས་ཤིག་པར་བསྟན་པའོ། །མདོ་ལས་དེ་ནས་བཅོམ་ལྡན་འདས་མི་དབུལ་པོ་དེ་ཞེས་པ་ནས་ཆུང་ཟད་ཀྱང་རེ་བ་མེད་དོ་ཞེས་པའི་བར་དུ་ནི་རེ་བ་མེད་པར་བསྟན་ཏེ། ཐེག་པ་རྣམ་གཉིས་ཀྱི་དེ་ལྟར་ཐེག་པ་ཆེན་པོའི་ཆོས་ཐོས་སུ་ཟིན་ཀྱང་ད་ཅུང་སེམས་ཞན་པ་སྔོན་གྱིས་འཛིན་ཅིང༌། སྤོབས་པ་མི་ཆེ་བའི་དཔེའོ། །མདོ་ལས་སྤྱིལ་པོ་དེར་གནས་ཤིང་ཞེས་པ་ནས་དེ་ཉིད་ཀྱི་རྗེས་སུ་སེམས་སོ་ཞེས་པའི་བར་དུ་ནི་སེམས་ཞན་པ་ད་དུང་མ་སྤངས་ཞེས་བསྡུས་པའོ། །མདོ་ལས་དེ་ནས་བཅོམ་ལྡན་འདས་ཞེས་པ་ནས། གཉེན་བཤེས་མང་པོ་དང་ཕྲད་དེ་ཞེས་པའི་བར་དུ་ནི་དེས་ཐོབ་པའི་དཔེ་བསྟན་ཏེ། དེ་ཡང་དུས་ལ་བབ་པ་དང༌། མང་པོ་བསྡུས་ཏེ་གཏོད་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནས་དམ་པའི་ཆོས་འདི་བསྟན་པའི་བར་དུ་ནི་ཁད་ཀྱིས་དབང་པོ་འབོགས་པའི་ཕྱིར་ཡོངས་སུ་སྨིན་པར་ཤེས་པའོ། །ཤེས་པ་ནི་སྟོང་པ་རྣམ་གཉིས་ཀྱི་དོན་ཤེས་པའོ། །ཉམ་ང་ཞིང་ངོ་ཚ་བ་ནི་སྔོན་གྱི་སྤྱོད་པ་ཞན་པ་ཐེག་པ་ཆུང་དུ་ལ་ཞུགས་པའི་སེམས་སོ། །འཆི་བའི་དུས་ལ་བབ་པ་ཞེས་པ་ནི་ཡོངས་ལ་གཏད་པ་སྟེ། དམ་པའི་ཆོས་འདི་བཤད་པ་ནས་བཅོམ་ལྡན་འདས་མྱ་ངན་ལས་འདས་པའི་བར་དུ་ལོ་ལྔ་ཞིག་ལུས་པའི་ཕྱིར་འཆི་བའི་དུས་ལ་བབ་པའོ། །གཉེན་བཤེས་མང་པོ་ཞེས་པ་ནི་འཕགས་པ་ཉན་ཐོས་ཆེན་པོ་དག་གོ །རྒྱལ་པོ་དང་བློན་པོ་ཞེས་པ་ནི་བྱང་ཆུབ་སེམས་དཔའི་རིགས་རྣམས་སོ། །མདོ་ལས་ཁྱོད་ཉོན་ཅིག་འདི་ནི་ཁོ་བོའི་སྙིང་གི་བུ་ཁོ་བོས་བསྐྱེད་པ་སྟེ་ཞེས་པ་ནི་སྔོན་གྱི་རྒྱལ་བུ་བཅུ་དྲུག་གི་ཚེ་ན་ངའི་བསྟན་པ་འདི་ལ་སེམས་བསྐྱེད་དེ་དགེ་བའི་རྩ་བ་བཙུགས་པས་ངའི་གསུང་ལས་སྐྱེས་པ་ངའི་ཆོས་ཀྱིས་བསྐྱེད་པ་ཡིན་པས་ཡང་དག་པའི་སྲས་ཞེས་བྱའོ། །མདོ་ལས་གྲོང་ཁྱེར་གྱི་མིང་འདི་འཁྱམས་ནས་ལོ་ལྔ་བཅུ་ལོན་ཏེ་ཞེས་པ་ནི་འཁོར་བར་འཁོར་བ་བསྟན་ཏེ། གྲོང་ཁྱེར་ཞེས་པ་ནི་ཐེག་པ་ཆེན་པོའོ། །ཐེག་པ་ཆེན་པོར་རིགས་ངེས་པ་དང༌། དབང་པོ་རྣོན་པོ་རྣམས་ནི་ལན་ཅིག་སེམས་བསྐྱེད་པས་ཕྱིར་ལྡོག་པར་ཡང་མི་འགྱུར་ན།
དབང་པོ་ཞན་པ་དང༌། རིགས་མ་ངེས་པ་རྣམས་ལྡོག་ཅིང་ལྟུང་བར་འགྱུར་བ་ཡོད་དོ་བར་བསྟན་ཏོ། །མདོ་ལས་འདིའི་མིང་ནི་འདི་ཞེས་བྱ་ཞེས་པ་ནས་དེ་ཀུན་ཀྱང་འདི་ཉིད་ཤེས་སོ་ཞེས་པའི་བར་དུ་ནི་སྔོན་ཡང་དེ་བཞིན་གཤེགས་པ་ངའི་བསྟན་པ་ལ་ཞུགས་པ་ལས་རབ་ཏུ་འཁྱམས་པ་དང༌། དེ་ཡང་ཐེག་པ་ཆེན་པོ་ལ་ཞུགས་ཞེས་པའི་དོན་ཏེ། ཇི་ལྟར་འཕགས་པ་ཤཱ་རིའི་བུ་བསྐལ་པ་དྲུག་ཅུའི་བར་དུ་ཐེག་པ་ཆུང་དུ་སྤྱོད་སྤྱོད་པ་ལས་ད་ཐེག་པ་ཆེན་པོ་ལ་ཞུགས་པ་ཉིད་གྲོང་ཁྱེར་དེ་ན་གནས་པ་ཞེས་བྱའོ། །ཚོལ་ཞེས་པ་ནི་ཐུགས་རྗེས་དགོངས་པའི་དོན་ཏོ། །བྱང་ཆུབ་དང་མྱ་ངན་ལས་འདས་པའི་ནོར་ཐམས་ཅད་ནི་འདི་ལ་གཏད་པ་དང༌། བདག་གི་དོན་དུ་འགྱུར་བ་དང༌། གཞན་ལ་ཕན་འདོགས་པའི་ཡོན་ཏན་ཐམས་ཅད་འདི་ལ་གཏང་ངོ་ཞེས་པའོ། །མདོ་ལས་དེ་ནས་བཅོམ་ལྡན་འདས་ཞེས་པ་ནས་མང་པོ་རྙེད་སྙམ་སེམས་སོ་ཞེས་པའི་བར་དུ་ནི་བུས་ཐོབ་པ་རྣམས་བསྟན་ཏེ། སངས་རྒྱས་ཀྱི་ཡོན་ཏན་ཕུན་སུམ་ཚོགས་པར་རེ་བ་མེད་པ་ལས་རྙེད་ཅེས་པའི་དོན་ཏོ། །མདོ་ལས་དེ་བཞིན་དུ་བཅོམ་ལྡན་འདས་བདག་ཅག་ནི་ཞེས་པ་ནས་ཇི་ལྟ་བ་བཞིན་ནོ་ཞེས་པའི་བར་དུ་ནི་མ་རབས་ཀྱིས་ནས་སེམས་བསྐྱེད་པ་ཙམ་ལ་གནས་པའི་ཕྱིར་སྲས་དང་འདྲ་ཞེས་སྨྲས་སོ། །དམ་པའི་ཆོས་འདི་ཐོས་ཤིང་དབང་པོ་སྨིན་པར་གྱུར་བས། སྲས་ཡང་དག་ཅེས་པའི་དོན་ཏོ། །མདོ་ལས་བཅོམ་ལྡན་འདས་བདག་ནི་སྡུག་བསྔལ་གསུམ་གྱིས་གཟིར་ཏོ་ཞེས་པ་ནས་སྡུག་བསྔལ་ལོ་ཞེས་པའི་བར་དུ་ནི་ཐེག་པ་ཆེན་པོ་ལས་ལྡོག་པས་འཁོར་བའི་རྒྱུ་བསྟན་པའོ། །སྡུག་བསྔལ་བའི་ཡང་སྡུག་བསྔལ་ནི་གནས་དང༌། མཚན་ཉིད་དང། སྤྱོད་ཡུལ་དང༌། དབང་པོ་དང་ལྡན་པའི་ཆོས་ཐམས་ཅད་སྡུག་བསྔལ་ཏེ། ཕུང་པོ་ལྔའི་ཕྱོགས་གཅིག་ནི་སྡུག་བསྔལ་བའི་ཡང་སྡུག་བསྔལ་བ་སྟེ། ཡིད་དང་འགལ་བ་མི་མཐུན་པ་མྱོང་བ་ནི་སྡུག་བསྔལ་བའོ། །སྡུག་བསྔལ་བརྒྱད་ལ་ལྔ་ནི་སྡུག་བསྔལ་བའོ། །བདེ་བར་འཚོ་བའི་བདག་ཉིད་བདེ་བར་འཚོ་བའི་རྗེས་སུ་འབྲང་བ་ཡུལ་ལམ་དབང་པོའམ་ལྡན་པའི་ཆོས་རྣམས་འགྱུར་བས་སྡུག་བསྔལ་བསྐྱེད་པ་སྟེ། །ཕུང་པོ་ལྔའི་ཆ་གཅིག་ནི་འགྱུར་བའི་སྡུག་བསྔལ་ཏེ། སྡུག་བསྔལ་བརྒྱད་ལས་མཛའ་བ་དང་བྲལ་བ་དང༌། འདོད་པ་མི་རྙེད་པའི་སྡུག་བསྔལ་ནི་འགྱུར་བའི་སྡུག་
བསྔལ་ལོ། །བཏང་སྙོམས་ཀྱི་ཚོར་བའི་རང་བཞིན་དང༌། དེའི་རྗེས་སུ་འཇུག་པ་ཡུལ་དང་དབང་པོ་དང་ལྡན་པའི་ཆོས་རྣམས་མི་རྟག་པར་གནས་པའི་འདུ་བྱེད་ཀྱི་སྡུག་བསྔལ་ཏེ། ཟག་པ་དང་བཅས་པའི་ཕུང་པོ་ལ་ཐམས་ཅད་ནི་འདུ་བྱེད་ཀྱི་སྡུག་བསྔལ་བས་ཉེ་བར་ལེན་པའི་ཕུང་པོ་ལྔ་རྣམས་ཀྱང་འདུ་བྱེད་ཀྱི་སྡུག་བསྔལ་ལོ་ཞེས་གསུངས་སོ། །མདོ་ལས་འཁོར་བ་ན་ཆུང་དུ་ལ་དད་པས་བདག་ཅག་བཅོམ་ལྡན་འདས་ཀྱིས་ཆོས་ངན་བ་མང་པོ་ཕྱག་དར་གྱི་ཕུང་པོ་དང་འདྲ་བའི་སེམས་སུ་བཅུག་སྟེ་ཞེས་པ་ནི་ཆུང་དུ་ལ་ཕྱོགས་ཤིང་ཆེན་པོ་བསྒྲུབ་པར་མི་ནུས་པའོ། །མདོ་ལས་དེ་རྣམས་ལ་ཞེས་པ་ནས་འཚོ་ཞིང་གསོལ་ཏེ་ཞེས་པའི་བར་དུ་སེམས་སུ་བཅུག་ཅེས་པ་ནི་བསྒོམ་པ་ལ་སེམས་པའོ། །ཕྱག་དར་གྱི་ཕུང་པོ་ཞེས་པ་ནི་ཉོན་མོངས་པའི་སྒྲིབ་པའོ། །རྩོལ་བ་ནི་བརྩོན་འགྲུས་ཀྱི་སེམས་ཀྱིས་གཅིག་ཏུ་འབད་པས་གཟོད་མྱ་ངན་ལས་འདས་པ་ཐོབ་ཅེས་པའི་དོན་ཏོ། །ཉིན་གཅིག་གིས་སླ་ཞེས་པ་ནི་མྱ་ངན་ལས་འདས་པ་ཆེན་པོ་ནི་བསྐལ་པ་གྲངས་མེད་པ་གསུམ་གྱིས་ཐོབ་པ་ཡིན་ན། བསྐལ་པ་དྲུག་ཅུས་བསྒྲུབས་པའི་རྣམ་པར་གྲོལ་བ་ནི་ཉི་མ་གཅིག་གིས་སླ་ཙམ་མོ་ཡང་ཡང་མྱ་ངན་ལས་འདས་པ་ལས་ཉོན་མོངས་པའི་སྒྲིབ་པ་སྤངས་ཤིང་ཡེ་ཤེས་ཆེན་པོ་ཐོབ་པ་མ་ཡིན་ཞེས་པའི་དོན་ཏོ། །མདོ་ལས་བཅོམ་ལྡན་འདས་བདག་ཅག་མྱ་ངན་ལས་འདས་པ་དེ་སྙེད་ཅེས་པ་འདིས་མ་བསྟན་ཏེ་ཞེས་པའི་བར་དུ་ནི་འདི་མན་ཆད་ཐེག་པ་ཆེན་པོ་རེ་བའི་སེམས་མེད་པ་རྣམ་གསུམ་སྟེ། སྔར་ཉན་ཐོས་པ་ཆོས་ཆུང་དུ་ལ་དགའ་བའི་ཕྱིར་བཅོམ་ལྡན་འདས་ཀྱིས་མ་བཤད་པས་རེ་བ་མེད་པ་དང༌། ཉན་ཐོས་པའི་མྱ་ངན་ལས་འདའ་བ་ཐོབ་པ་ཉིད་ཀྱིས་ཆོག་པར་སེམས་པའི་ཕྱིར་རེ་བ་མེད་པ་དང༌། ཐེག་པ་ཆེན་པོ་བྱང་ཆུབ་སེམས་དཔའི་ཆེད་དུ་བཤད་ཀྱི་ཉན་ཐོས་པ་བདག་ཅག་གི་ཆེད་དུ་མ་བཤད་དོ་ཞེས་རེ་བ་མེད་པ་དང་གསུམ་ལས་འདི་ནི་དང་པོའོ། །བགས་ཀྱིས་བཞག་སྟེ་ཞེས་པ་ནི་ཆུང་དུ་ལ་མོས་པའི་སེམས་མ་སྤངས་ཤིང་དབང་པོ་མ་སྨིན་པའི་ཕྱིར་རེ་ཞིག་བཞག་ཅེས་པའི་དོན་ཏོ། །མདོ་ལས་བཅོམ་ལྡན་འདས་ཐབས་མཁས་པ་ཞེས་པ་ནས་བདག་ཅག་གིས་མང་དུ་བྱས་པར་ཤེས་སོ་ཞེས་པའི་བར་དུ་ནི་ཉན་ཐོས་ཀྱི་མྱ་ངན་ལས་འདའ་བ་ཐོབ་པར་རེ་བ་མེད་པ་བསྟན་ཏེ་ཐབས་མཁས་པས་ཡེ་ཤེས་ཀྱི་
མཛོད་ཀྱི་ཉེ་མཚམས་སུ་བཀོད་པ་ནི་དང་པོ་དྲང་བའི་དོན་གྱིས་བསྟན་ནས་ཡང་དག་པའི་ཡེ་ཤེས་མཐོང་བ་དང་ཉེ་བར་བཞག་ཅེས་པའི་དོན་ཏོ། །མདོ་ལས་བཅོམ་ལྡན་འདས་དེ་བདག་ཅག་གིས་ཞེས་པ་ནས། དེ་མི་འདོད་དོ་ཞེས་པའི་བར་དུ་ནི་ཐེག་པ་ཆེན་པོ་བྱང་ཆུབ་སེམས་དཔའི་ཆེད་དུ་བསྟན་གྱི་ཉན་ཐོས་ཀྱི་ཆེད་དུ་མ་བཤད་པས་རེ་བ་མེད་པ་བསྟན་ཏེ། བྱང་ཆུབ་སེམས་དཔའི་ཆེད་དུ་བཅོམ་ལྡན་འདས་ཀྱི་བྱིན་གྱི་རླབས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་བཤད་པ་ཡང་ཉན་ཐོས་པའི་ཆེད་དུ་མ་ཡིན་པས་མི་འདོད་དོ་ཞེས་པའི་དོན་ཏོ། །མདོ་ལས་དེ་ཅིའི་ཕྱིར་ཞེ་ན་ཞེས་པ་ནས་སྲས་ཡང་དག་པ་ཞེས་གསུངས་པའི་བར་དུ་ནི་སྔོན་ཉན་ཐོས་པའི་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་གསལ་བ་ཉིད་དུ་མ་བསྟན་མོད་ཀྱི་དེ་བཞིན་གཤེགས་པའི་རང་བཞིན་དང་རིགས་ཡོད་པས་སྔོན་ཡང་ཐབས་ཀྱིས་བསྟན་ཏོ་ཞེས་པའོ། །མདོ་ལས་བཅོམ་ལྡན་འདས་ཀྱི་ཞེས་པ་ནས་དེ་བཞིན་གཤེགས་པའི་སྲས་འདི་དག་བཞིན་ནོ་ཞེས་པའི་བར་དུ་ནི་དེ་བཞིན་གཤེགས་པའི་སྲས་སུ་གྱུར་ཏེ། དེ་བཞིན་གཤེགས་པའི་སྲས་ཉིད་ཐོབ་ཅེས་པ་བསྟན་ཏོ། །དེ་ཡང་བཅོམ་ལྡན་འདས་ཆོས་འཆད་པ་མི་མཛད་པ་དང༌། མྱ་ངན་ལས་འདས་པ་ཉིད་ཐེག་པ་ཆེན་པོས་ཐོབ་པར་བསྟན་པ་ཡང་དེ་དག་གི་དོན་བསྡུ་བའོ། །དེ་ལ་འདི་ནི་དང་པོ་དང་སྦྱར་རོ། །རྒྱ་ཆེན་པོས་བྱང་ཆུབ་འཛུད་པ་ནི་གཉིས་པ་དང་སྦྱར་རོ། །ཐམས་ཅད་མཁྱེན་པའི་རིན་པོ་ཆེ་ཐོབ་སྟེ། དེ་བཞིན་གཤེགས་པའི་སྲས་འདི་དག་བཞིན་ནོ་ཞེས་པ་ནི་གསུམ་པ་དང་སྦྱར་རོ། །དེ་བཞིན་གཤེགས་པའི་སྲས་འདི་དག་བཞིན་ནོ་ཞེས་པ་ཡང་ཇི་ལྟར་བྱང་ཆུབ་སེམས་དཔའ་ཐེག་པ་གཅིག་གི་རྒྱུས་འབྲས་བུ་ཆེན་པོ་ཐོབ་པ་བཞིན་འཕགས་པ་ཉན་ཐོས་པ་རྣམས་ཀྱང་དེ་བཞིན་དུ་འགྱུར་ཞེས་པའི་དོན་ཏོ།། །།དམ་པའི་ཆོས་པུཎྜ་རཱི་ཀའི་འགྲེལ་པ། བམ་པོ་བདུན་པ། མདོ་ལས་དེ་ནས་ཚེ་དང་ལྡན་པ་འོད་སྲུངས་ཆེན་པོས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ་ཞེས་འཕགས་པ་ཉན་ཐོས་ཆེན་པོ་བཞིས་དོན་འདི་ཆུད་པ་དང༌། དྲིས་པར་འདྲ་ན་འདིར་འོད་སྲུངས་གཅིག་པུ་སྨོས་པ་དེ་ཅིའི་ཕྱིར་ཞེ་ན། འོད་སྲུངས་སྐུ་བགྲེས་པའི་ཕྱིར་གཙོར་སྨོས་པས་སོ། །འདི་མན་ཆད་ཚིགས་བཅད་བརྒྱད་ཅུ་རྩ་དྲུག་ཅིག་
ཡོད་པ་ལ། བདུན་ཅུ་རྩ་གསུམ་གྱིས་ནི་བཅོམ་ལྡན་འདས་ཀྱི་བཀའ་དྲིན་ཆེན་པོ་ལ་སོགས་པ་བསྟན། ཚིགས་བཅད་བཅུ་གསུམ་གྱིས་ནི་བཅོམ་ལྡན་འདས་ཀྱི་བཀའ་དྲིན་ཟབ་པ་བསྟན་ཏོ། །དུམ་བུ་དང་པོ་ལ་ཡང་གསུམ་དུ་དབྱེ་སྟེ། དང་པོ་ཚིགས་བཅད་གཉིས་ཀྱིས་ནི་དོན་བསྟན། དེའི་འོག་གི་ཚིགས་བཅད་བཞི་བཅུ་རྩ་གཅིག་གིས་ནི་དཔེ་བསྟན། དེའི་འོག་མ་ཚིགས་བཅད་སུམ་ཅུ་རྩ་གཅིག་གིས་ནི་དཔེ་དང་དོན་དུ་སྦྱོར་བ་བསྟན་ཏོ། །དེ་ཡང་ཐོས་པ་ཉི་ཚེ་སྨོས་ཀྱི་ཚིག་གཞན་མ་སྨོས་སོ། །དེ་ལ་ཡང་ཚིག་ཕྱེད་དང་གཉིས་ཀྱིས་ནི་དོན་རྣམ་པ་གཉིས་བསྟན། ཚིགས་བཅད་ཕྱེད་ཀྱིས་ནི་དཔེ་བསྟན། མདོ་ལས་ཇི་ལྟར་སྐྱེས་བུ་བུས་པར་གྱུར་པ་ཞིག །འགྲོ་བའི་བྱིས་པ་རྣམས་ཀྱིས་བསླུས་པ་སྟེ་ཞེས་པ་ནི་འདི་མན་ཆད་ཚིགས་བཅད་བཞི་བཅུ་རྩ་གཅིག་གིས་དཔེ་འཆད་དེ། དེ་ལ་ཡང་གཉིས་སུ་དབྱེའོ། །ཚིགས་བཅད་སུམ་ཅུ་རྩ་བཞིས་ནི་སྔར་རེ་བ་མེད་པ་བསྟན། ཚིགས་བཅད་བདུན་གྱིས་ནི་འདི་ཐོབ་པ་བསྟན་ཏོ། །དེ་ལ་ཡང་དང་པོའི་ཚིགས་བཅད་ཕྱེད་ཀྱིས་ནི་སེམས་བསྐྱེད་པའི་དཔེ་བསྟན། དེའི་འོག་མ་གཅིག་གིས་ནི་འཁོར་བར་ལྡོག་པའི་དཔེ་བསྟན། དེའི་འོག་མ་བདུན་གྱིས་ནི་སངས་རྒྱས་མཐོང་བའི་དཔེ་བསྟན། དེའི་འོག་མ་བཅུ་བཞིས་ནི་ཆེན་པོ་སྒྲུབ་ཏུ་མི་བཏུབ་པའི་དཔེ་བསྟན། དེའི་འོག་མ་ཕྱེད་དང་བཅུས་ནི་ཐེག་པ་རྣམ་གཉིས་དྲང་བའི་དཔེ་བསྟན། དེའི་འོག་མ་གཉིས་ཀྱིས་ནི་ཆེན་པོ་ལ་རེ་བ་མེད་པའི་དཔེ་བསྟན་ཏེ་འདི་ནི་དང་པོའོ། །མདོ་ལས། ཕ་ཡི་གནས་ནས་གལ་ཏེ་སོང་བ་ནི། །ཞེས་པ་ནས། ལོ་ནི་ལྔ་བཅུ་ལས་ཀྱང་མི་ཉུང་བར་ཞེས་པའི་བར་དུ་ནི་འཁོར་བར་ལོག་པའི་དཔེ་བསྟན། ལྔ་བཅུ་ནི་འགྲོ་བ་རྣམ་ལྔའི་དཔེ་སྟེ། གཞན་དུ་འཁྱམས་ཞེས་པའི་དོན་ཏོ། །མདོ་ལས། དེས་ནི་དེ་ལྟ་བུ་དེ་ཚོལ་བན། །ཞེས་པ་ནས། དེ་བཞིན་ཕྱུགས་དང་བ་ལང་ལུག་རྣམས་ཏེ། །ཞེས་པའི་བར་དུ་འདིས་ནི་སངས་རྒྱས་མཐོང་བ་དང༌། དེ་བཞིན་གཤེགས་པའི་ཐུགས་རྗེ་སྐྱེ་བའི་དཔེ་བསྟན་ཏེ། ཕྱོགས་དང་ཕྱོགས་མཚམས་སུ་ཕྱིན་ཞེས་པ་ནི་འཁོར་བར་འཁྱམས་ཞེས་པའི་དོན་ཏོ། གྲོང་ཁྱེར་ཆེན་པོར་ཕྲད་ཅེས་པ་ནི་ཐེག་པ་ཆེན་པོའི་གནས་སུ་སོན་པའི་དོན། ཁྱིམ་བརྩིགས་ཞེས་པ་ནི་ཐུགས་རྗེ་ཆེན་པོས་བསྐྱབ་ཞེས་པའི་དོན། འདོད་པ་རྣམ་ལྔ་ལ་སོགས་པ་ལོངས་སྤྱོད་པ་ནི་ཆོས་རྣམ་པར་
དག་པའི་དབྱིངས་ལ་ལོངས་སྤྱོད་པ་ཤིང་རྟ་དང་བཞོན་པ་རྣམས་ནི་ཐེག་པའི་དོན་ཏོ། །མདོ་ལས། འཕེལ་ཞིང་འདུ་བ་དང་ནི་དེ་བཞིན་ཞིང༌། །ཞེས་པ་ནས། འདི་ལྟར་བདག་ལ་མཛོད་ནི་མང་དུ་ཡོད། །ཅེས་པའི་བར་དུ་ནི་འཇིག་རྟེན་གྱི་ཁམས་ཐམས་ཅད་དུ་དགེ་བ་སྣ་ཚོགས་ཀྱིས་སེམས་ཅན་སྡུད་པ་སྟེ། བསྡུ་བ་དང་འཕེལ་བའི་ཁེ་འཚོལ་བའོ། །ཀུན་གྱིས་གུས་པར་བྱ་ཞིང་བཀུར་བས་སེམས་ཅན་དོན་བྱེད་པ་བསྟན་པའོ། །རྒས་ལ་ཞོམ་ཞིང་ཞེས་པ་ནི་ཐེག་པ་ཆེན་པོའི་ཆོས་ལ་གནས་ཤིང་ཞེས་པའི་རྒྱས་རྒན་པ་ཐུགས་རྗེ་ཆེན་པོས་ཉིན་མཚན་གཅིག་ལ་ལན་དྲུག་དྲུག་སེམས་ཅན་གྱི་ཁམས་སུ་གཟིགས་པས་གདུང་བར་གྱུར་བའོ། །མདོ་ལས། བདག་ནི་འཆི་བའི་དུས་ལ་ཉེ་བར་གྱུར། །ཞེས་པ་ནས། ལ་ལ་སྐྱེད་དང་སྦོགས་ཀྱང་རབ་ཏུ་གཏོང༌། །ཞེས་པའི་བར་དུ་ནི་ཆོས་ཀྱི་ཟས་ཀྱིས་རབ་ཏུ་ཕོངས་པའི་ཕྱིར་བཀྲེས་པའོ། །སྤྱོད་པ་དམ་པ་མ་རྫོགས་པའི་ཕྱིར་རིད་པའོ། །ལྟ་བ་ངན་པས་བསྒྲིབས་པའི་ཕྱིར་གཡན་པ་བྱུང་བ་ལྟ་བུའོ། །ལྷག་པའི་སྡོམ་བསམ་བསྡམས་པའི་ཕྱིར་སྐམ་པོས་གཡོགས་པ་ལྟ་བུའོ། །མཐར་གྱིས་རྒྱུ་ཞེས་པ་ནི་ཡང་དག་པའི་དོན་ཚོལ་བའོ། །ཕའི་ཁྱིམ་དུ་ཕྱིན་ཞེས་པ་ནི་ཐེག་པ་ཆེན་པོ་དབུ་མའི་ལམ་དུ་ཞུགས་པ་ཞེས་པའི་དོན་ཏོ། །སྒོ་ན་འདུག་ཅེས་པ་ནི་འབྲས་བུའི་སྒོ་ནི་རྒྱུ་ཡིན། དོན་དང་བསྟན་པ་ནི་ཕུགས་དང་སྒོ་ལྟ་བུར་བལྟའོ། །བགྲང་བ་ནི་འཕགས་པའི་ནོར་རྣམས་སེམས་པའོ། །སྐྱེད་དང་སྤོགས་གཏོང་ཞེས་པ་ནི་ཕྱི་ནང་གི་སྤྱོད་པས་ཕན་འདོགས་པའོ། །མདོ་ལས། དེ་ནས་དབུལ་པོ་དེས་ནི་དེ་མཐོང་བ། །ཞེས་པ་ནས། ཁྱོད་ནི་གླ་ཡང་ཉིས་འགྱུར་སྦྱིན་པར་བྱས། །ཞེས་པ། འདིར་ནི་ཉེས་པར་གྱུར་ན་མི་རུང་སྟེ། །ཞེས་པ་ཡང་སྔོན་གྱི་སྤྱོད་པ་དང་བྲལ་ཏེ་ཆེན་པོ་སྤྱོད་དུ་མ་བཅུག་གམ་ཞེས་དོགས་པ་སྐྱེའོ། །ཞར་བ་འཐེང་གྲུམ་ཅན་ཞེས་པ་ནི་ཐེག་པ་རྣམ་གཉིས་ཀྱི་བདེན་པ་སྟོན་པ་གཞུང་མ་རྫོགས་པའི་དཔེའོ། །མདོ་ལས། མི་དེས་འདི་ལྟ་བུ་ཡི་སྒྲ་ཐོས་ནས། །ཞེས་པ་ནས། ང་ཡི་བུ་ཡིན་ཡང་དག་གདོན་མི་ཟ། །ཞེས་པའི་བར་དུ་ནི་ཉོན་མོངས་པའི་ཕྱག་དར་བྱས་ཤིང་ཕུང་པོ་ལྔའི་ཁང་པ་གཙང་མར་བྱས་པ་དང༌། རྐང་པ་བསྐུ་ཞེས་པ། རྐང་པ་ནི་རྫུ་འཕྲུལ་གྱི་རྐང་པ་བཞིའོ། །བསྐུ་བ་ནི་སྡོམ་པ་འཛིན་པའི་སྤྱོད་ལམ་མོ།
མདོ་ལས། དེ་ནི་ཁད་ཀྱིས་བགས་ཀྱིས་ཁྱིམ་དུ་བཅུག །ཞེས་པ་ནས། བགས་ཀྱིས་མི་དེ་དེས་ཡིད་རྣམ་པར་ཕབ། །ཅེས་པའི་བར་དུ་ནི་འདིས་འཕགས་པའི་གནས་སུ་སོན་པ་བསྟན་ཏེ། ལོ་ཉི་ཤུ་ཞེས་པ་ནི་ཚིག་ལྷུག་པའི་ནང་ནས་བསྟན་ཟིན་ཏོ། །མདོ་ལས། དེ་ནི་ཤེལ་ལམ་འགྲོན་བུ་མུ་ཏིག་ཀྱང༌། །ཞེས་པ་ནས་ཆུང་དུ་ལ་དད་པའི་ཡོན་ཏན་ཏེ། བཀོལ་བ་དེ་སྙེད་དེ་རིང་ཤིན་ཏུ་བདེ། །ཞེས་པའི་བར་དུ་ནི་རིན་པོ་ཆེ་སྣ་ཚོགས་བསྟན་པ་ཡང་ཆེན་པོ་བསྟན་ཀྱང་རེ་བ་མེད་པའི་ཕྱིར་རོ། །དབུལ་པོའི་བསམ་པ་རྗེས་སུ་ཤེས་པ་ལ་སོགས་པ་ནི་རྙེད་པ་ཆེན་པོ་རྙེད་པའི་དཔེའོ། །འོག་ནས་ལོ་ཉི་ཤུ་ཞེས་པ་ནི་སློབ་པ་དང་མི་སློབ་པའི་འབྲས་བུ་ཐོབ་པ་ཞེས་ཀྱང་སྦྱར་རོ། །ཤིན་ཏུ་བདེ་ཞེས་པ་ནི་འབྲས་བུ་ཆེན་པོ་ཐོབ་པའི་ཕྱིར་ཡོན་ཏན་ཕུན་སུམ་ཚོགས་པ་ཀུན་དང་ལྡན་པའོ། །མདོ་ལས། དེ་བཞིན་རྣམ་པར་འདྲེན་པས་བདག་ཅག་རྣམས། །ཞེས་པ་ནས། ཁྱེད་ཀྱི་ཉན་ཐོས་ང་ཡི་བུ་ཡིན་ན། །ཞེས་པའི་བར་དུ་འདི་ནི་དཔེ་དང་དོན་དུ་སྦྱར་ཏེ་བསྟན་པའོ། །ཆུང་ངུ་ལ་དད་པས་རེ་བ་མེད་པ་བསྟན་པ་ཡང་དེ་བཞིན་གཤེགས་པས་ཡེ་ཤེས་པའི་བསྐལ་པ་བསྟན་པ་སྟེ། ཟག་པ་མེད་པའི་གནས་ཉིད་ཀྱིས་ཆོག་པར་སེམས་པས་རེ་བ་མེད་པའོ། །མདོ་ལས། བདག་ལ་འཇིག་རྟེན་མགོན་གྱིས་བཀའ་སྩལ་པ། །ཞེས་པ་ནས། གང་གིས་ལམ་གོམས་སངས་རྒྱས་འགྱུར་བའོ། །ཞེས་པའི་བར་དུ་ནི་བྱང་ཆུབ་སེམས་དཔའ་ཕྱེད་དུ་བསྟན་གྱི་ཉན་ཐོས་པའི་དོན་དུ་མ་བསྟན་པས་རེ་བ་མེད་པ་བསྟན་ཏེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཞུགས་པ་རྣམས་ལ་ཤོད་ཅིག་པར་སྦྱར་རོ། །མདོ་ལས། དེ་ཕྱིར་བདེ་བར་གཤེགས་པས་བཀའ་སྩལ་ནས། །ཞེས་པ་ནས། བདག་གིས་བླ་ན་མེད་པའི་ལམ་བསྟན་ནས། །ཞེས་པའི་བར་དུ་ནི་ཐེག་པ་རྣམ་གཉིས་ཀྱང་དེ་བཞིན་གཤེགས་པའི་གསུང་ལ་བརྟེན་ཞེས་པའོ། །མདོ་ལས། དེ་ཕྱིར་བདེ་བར་གཤེགས་པས་བཀའ་སྩལ་ནས། །ཞེས་པ་ནས། །ལུང་ནི་མྱ་ངན་འདའ་བ་མཐར་ཐུག་པ། །ཞེས་པའི་བར་དུ་ནི་དེ་བཞིན་གཤེགས་པ་རྣམས་ཀྱིས་ལུང་བསྟན་པ་སྟེ། ཇི་ལྟར་གཅིག་གིས་ལུང་སྟོན་པ་བཞིན་གཞན་དག་ཀྱང་དེ་བཞིན་དུ་གསུངས་ཞེས་པའོ། །ཆོས་ཀྱི་མཛོད་རྣམས་ཡང་དག་གསུངས་པ་ནི་རྒྱལ་བའི་སྲས་ཏེ། བྱང་ཆུབ་སེམས་དཔའ་རྣམས་
བསྟན་པའོ། །རྒྱལ་བའི་ཡེ་ཤེས་རབ་ཏུ་བཤད་མེད་ཀྱི། །ཞེས་པ་ནི་དཔེ་དང་དོན་དུ་སྦྱར་བའོ། །འགོག་པ་དང་སྐྱེ་བ་རྣམ་པར་སྤངས་ན་ཐེག་པ་ཆེན་པོ་ལ་དད་པར་མ་གྱུར་པ་ནི་ཉན་ཐོས་ཀྱི་ཞི་བ་མྱ་ངན་ལས་འདས་པས་ཆོག་པར་སེམས་པའོ། །བདག་ཅག་ནམ་ཡང་འདི་ལ་མི་སྨོན་པ། །ཞེས་པ་ནི་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པར་རིམ་པ་བཞིན་དུ་སྟོན་ཏེ། ཐེག་པ་ཆེན་པོའི་ཡེ་ཤེས་ལ་མི་རེ་ཞེས་པའི་དོན་ཏོ། །མདོ་ལས། ཡུན་རིང་སྟོང་པ་ཉིད་ལ་ཡོངས་སུ་བསྒོམས། །ཞེས་པ་ནས། དེ་ལ་ནམ་ཡང་བདག་ཅག་འདོད་པ་མེད། །ཅེས་པའི་བར་དུ་ནི་ཉན་ཐོས་ཀྱི་མྱ་ངན་ལས་འདའ་བ་རྙེད་པས་དེ་བཞིན་གཤེགས་པའི་དྲིན་བསབ་པའི་ཕྱིར་གཞན་གྱི་ཆོས་བཤད་པ་ཐོས་ཀྱང་རེ་བ་མེད་པ་ནི་ལྷག་མ་དང་བཅས་པའི་མྱ་ངན་ལས་འདས་པ་ལ་གནས་པའི་ཕྱིར་རོ། །མདོ་ལས། བདག་ཅག་འཇིག་རྟེན་སློབ་དཔོན་རང་བྱུང་གི །ཞེས་པ་ནས། །བརྟུལ་ནས་ཡེ་ཤེས་འདི་དག་རབ་ཏུ་བྱིན། །ཞེས་པའི་བར་དུ་ནི་བཅོམ་ལྡན་འདས་ཀྱིས་ཉན་ཐོས་པའི་ཆེད་དུ་འདི་མ་བསྟན་ཏོ་ཞེས་ཚིག་བརྟུལ་བ་སྟེ། དབང་པོ་མ་སྨིན་པའི་ཕྱིར་རོ། །ཇི་ལྟར་ནོར་མང་དུ་བདོག་པའི་སྐྱེས་བུ་ཆུང་དུ་ལ་དད་པ་རྣམས་ཐབས་མཁས་པས་བགས་ཀྱིས་བརྟུལ་ཞིང་སྦྱིན་པ་ནི་དཔེ་དང་དོན་གཉི་ག་སྦྱར་ཏེ་ཕྱིས་ཐོབ་པར་འགྱུར་བ་བསྟན་པའོ། །མདོ་ལས། དེ་རིང་བདག་ཅག་འཕྲལ་ལ་ངོ་མཚར་གྱུར། །ཞེས་པ་ནས། ཚངས་པར་སྤྱོད་པ་མཆོག་རབ་རྣམ་དག་གང༌། །ཞེས་པའི་བར་དུ་ནི། རེ་བ་མེད་པ་ལས་འབྲས་བུ་ཆེན་པོ་ཐོབ་པར་བསྟན་པ་དང༌། དེ་ཡང་ལམ་བསྒོམས་པ་དང་ཚུལ་ཁྲིམས་རྣམ་པར་དག་པའི་རྒྱུ་ལས་འབྲས་བུ་དེ་ཐོབ་ཅེས་པའོ། །མདོ་ལས། འདྲེན་པའི་བསྟན་པ་རྣམས་ལ་ཤིན་ཏུ་བསྙེན། །ཞེས་པ་ནས། འདི་འདྲ་བ་ཡི་དཀའ་བ་གང་མཛད་པ། །ཞེས་པའི་བར་དུ་ནི་འབྲས་བུ་ཆེན་པོ་མངོན་དུ་ཐོབ་སྟེ། འཕགས་པ་ཉན་ཐོས་སུ་ངེས་པ་གཞན་ལ་ཕན་འདོགས་པར་འོས་པ་མཆོད་པའི་གནས་སུ་གྱུར་པ་བསྟན་པའོ། །དེ་བཞིན་གཤེགས་པའི་དྲིན་གྱི་ལན་ལྡོག་པ་ནི་གཞན་གྱིས་མ་ཡིན་གྱི་འདི་འདྲ་བ་ཐོབ་པ་ཞེས་སོ། །མདོ་ལས། མགོ་དང་ལག་པ་དང་ནི་རྐང་པས་ཀྱང༌། །ཞེས་པ་ནས། དེ་ལ་ནམས་ཀྱང་ལན་ལྡོག་མ་གྱུར་ཏོ། །ཞེས་པའི་བར་དུ་ནི། ནང་གི་རྫས་དྲུག་དང༌།
ཕྱིའི་སྤྱོད་པ་རྣམ་པ་བཞི་འདི་དག་གང་བྱས་ཀྱང་ལན་མི་ལོན་ཞེས་པའོ། །མདོ་ལས། ཉིད་ཀྱི་ཆེ་ཆོས་མཚུངས་པ་མེད་པའི་མཐུ། །ཞེས་པ་ནས། མཆན་མ་སྤྱོད་པ་རྣམས་ལ་ཆོས་བཤད་དེ། །ཞེས་པའི་བར་དུ་ནི་འདི་མན་ཆད་ཅི་ཕྱིར་ལན་དཀའ་བའི་གཏན་ཚིགས་རྣམ་པ་གསུམ་ཞིག་འཆད་པ་ལས་སངས་རྒྱས་བཅོམ་ལྡན་འདས་སྤྱོད་པ་ཞན་པ་མཚན་མར་འཛིན་པ་རྣམས་ལ་ཡིད་དང་མཐུན་པར་ཆོས་སྟོན་པ་དང༌། སོ་སོའི་མོས་པ་དང༌། དད་པར་མཐུན་པར་ཆོས་སྟོན་པས་དཀའ་བ་མཛད་པ་དང༌། དབང་པོ་སྨིན་པ་དང༌། མ་སྨིན་པ་རྣམས་ལ་ཆོས་སྟོན་པ་སྟེ། རྣམ་པ་གསུམ་གྱི་ཕྱིར་ལན་གླན་དཀའ་བའོ། །འདི་ནི་དང་པོ་དང་སྦྱར་ཏེ་སྐུ་དག་པ་རྫོགས་ལོངས་སྤྱོད་པའི་ཡོན་ཏན་སྤངས་ཤིང་སྤྲུལ་པའི་སྐུ་འཇིག་རྟེན་རྙོག་པ་ཅན་དུ་གཤེགས་པ་དང་ཡང་དག་པའི་གཞུང་དམ་པ་བསྲི་སྟེ་ཚིག་མང་པོའི་སྒོ་ནས་དོན་སྟོན་པ་དང༌། ཞིང་རྣམ་པར་དག་པ་སྤངས་ཏེ། ཕྱོགས་མ་དག་པར་གཤེགས་ཤིང་མ་རབས་ཀྱི་ཡིད་དང་མཐུན་པར་ཆོས་སྟོན་ཅིང་འདྲེན་པ་དེ་ལན་གླན་དཀའ་བ་མ་ཡིན་ནམ། མདོ་ལས། ཆོས་ཀྱི་དབང་པོ་འཇིག་རྟེན་ཀུན་ལ་མངའ། །ཞེས་པ་ནས། བརྒྱ་ཕྲག་སྟོང་གི་བར་དུ་ཆོས་བཤད་དོ། །ཞེས་པའི་བར་དུ་ནི། སོ་སོའི་མོས་པ་དང་དད་པ་བཞིན་དུ་ཆོས་སྟོན་པ་དང་སྦྱར་རོ། །མདོ་ལས། དེ་བཞིན་གཤེགས་པས་སྤྱོད་པ་རབ་མཁྱེན་ནས། །ཞེས་པ་ནས། བྱང་ཆུབ་མཆོག་རབ་འདི་ནི་ཤིན་ཏུ་བསྟན། །ཞེས་པའི་བར་དུ་ནི་དབང་པོ་སྨིན་པ་དང༌། མ་སྨིན་པ་དང་དབང་པོ་དུལ་བ་དང༌། མ་དུལ་བ་དང༌། བཀྲི་བ་དང༌། ངེས་པའི་དོན་གང་གིས་གདུལ་བར་འོས་པ་རྣམས་ལ་མཐུན་མཐུན་དུ་ཆོས་སྟོན་པའོ།། །།འདི་མན་ཆད་སྨན་གྱི་རྩི་ཤིང་ལས་དཔེ་བསྟན་པའི་ལེའུ་སྟེ། དེ་ལ་ཡང་ཅིའི་ཕྱིར་བཏགས་པ་དང༌། ཅི་ལས་བཏགས་པ་རྣམ་པ་གཉིས་སོ། །གོང་དུ་དབང་པོ་རྟུལ་པོའི་ཆེད་དུ་དཔེ་དང་དོན་དུ་སྦྱར་ཏེ་བསྟན་པས་འཕགས་པ་ཤཱ་རིའི་བུ་ལ་སོགས་པ་ཆོས་རྟོགས་ཤིང་ལུང་བསྟན་པ་དང་ཡང་འདིར་དབང་པོ་བར་མའི་ཆེད་དུ་དཔེས་ཆོས་སྟོན་ཅིང༌། ལུང་བསྟན་པར་བཞེད་པའི་ཕྱིར་དཔེ་འདི་གསུངས་པ་ལས་བཤད་པ་དང་འགྲེལ་པ་ལས་ཀྱང༌། ལེའུ་འདི་ནི་ཐེག་པ་ཆེན་པོ་ལ་ང་རྒྱལ་དུ་འཛིན་པ་དགོངས་པའི་ཕྱིར་ཐེག་པ་གཅིག་ལས་ལོགས་ཤིག་ན་གཉིས་དང་གསུམ་མེད་དོ་བར་
བསྟན་པའི་ཕྱིར་ཏེ། དང་པོར་ཁང་ཁྱིམ་ཚིག་པའི་དཔེས་སེམས་ཅན་མ་རབས་རྣམས་ཐབས་ཀྱིས་དྲངས་ཏེ་ལྷ་དང་མིའི་བདེ་བ་ལ་དགོད་པ་དང༌། དད་པའི་ལེའུ་བསྟན་པའི་ནང་དུ་ཐེག་པ་རྣམ་གཉིས་དེ་བཞིན་གཤེགས་པའི་ཐེག་པ་དང་མཉམ་པར་སེམས་ཤིང་ཐེག་པ་ཆེན་པོ་སྒྲུབ་ཏུ་མི་བཏུབ་པ་ཐེག་པ་ཆེན་པོ་བསྒྲུབ་ཏུ་གཞུག་པ་དང༌། ལེའུ་འདིའི་ནང་ནས་ནི་ཐེག་པ་ཆེན་པོ་པ་གཅིག་ཏུ་ང་རྒྱལ་གྱི་ཐེག་པ་གསུམ་སྤོང་གིས་སོ་སོ་ན་ཡོད་པའི་སེམས་པའི་ང་རྒྱལ་གཞོམ་པར་ཐེག་པ་གཅིག་པོ་བསྟན་པའི་ཕྱིར་ཆར་པ་གཅིག་བབ་པའི་རླན་གྱིས་ཤིང་རྩི་མི་མཐུན་པར་སྐྱེ་བ་བཞིན་དུ་དེ་བཞིན་གཤེགས་པའི་གསུང་གཅིག་གིས་དགེ་བའི་རྩ་བ་སོ་སོར་སྨིན་པ་བཞིན་ཏེ། འཕགས་པ་མྱ་ངན་ལས་འདས་པ་ཆེན་པོའི་མདོ་ལས་ཀྱང༌། དེ་བཞིན་གཤེགས་པ་ཆོས་སྟོན་པ་ན་ཐེག་པ་གཅིག་པ་ལམ་གཅིག་པོས་སྟོན་ཏེ་ཞེས་འབྱུང་སྟེ། བསྟན་པ་གཅིག་ལས་དབང་པོ་སོ་སོར་དབྱེ་བར་བསྟན་པའོ། །ཐབས་མཁས་པའི་ལེའུ་ལས་ཡེ་ཤེས་དང་སྒོ་བསྟན་པ་གཉི་ག་ཡང་ཤིན་ཏུ་ཟབ་པ་ཐེག་པ་གཅིག་ཏུ་སྦྱར་བའོ། །བདེན་པ་བཞི་ལ་དབང་པོ་མི་མཐུན་པས་སོ་སོར་གོ་བ་བཞིན་ནོ། །མིང་ནི་སྨན་གྱིས་ནད་འཚོ་བར་བྱེད་པ་བཞིན་བླ་ན་མེད་པའི་སྨན་དམ་པ་འདིས་ཀྱང་ཉོན་མོངས་པའི་ནད་ཐམས་ཅད་འཚོ་བར་བྱེད་པའི་ཕྱིར་ལུང་དང༌། གཞུང་དང་སྤྱོད་པ་དང༌། འབྲས་བུ་ནི་སྨན་དམ་པ་ཞེས་བྱའོ། །སྨན་ནད་ཆེ་ཆུང་སོ་སོར་ཕན་པ་བཞིན་བླ་ན་མེད་པའི་ཐེག་པ་འདི་ཡང་ཐེག་པ་རྣམ་གསུམ་གཅིག་ཏུ་སྨིན་པའི་ཕྱིར་རོ། །མདོ་ལས་དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཞེས་པ་ནས་དེ་དག་གི་མཐའ་བདེ་བར་མི་རྟོགས་སོ་ཞེས་པའི་བར་དུ་ནི་ལེའུ་འདི་ལ་དང་པོར་བསྟོད་པ་དང༌། འོད་སྲུངས་ཀྱིས་ཤེས་པར་བྱོས་ཤིག་པ་དང༌། དོན་གྱི་མདོ་བསྡུས་ཏེ་ལུང་བསྟན་པ་ལ་འདི་ནི་དང་པོའོ། །དེ་བཞིན་གཤེགས་པའི་ཡོན་ཏན་བརྗོད་པར་དཀའ་བས་མཐའ་མེད་ཅེས་པར་བསྡུས་པའོ། །མདོ་ལས། འོད་སྲུངས་དེ་བཞིན་གཤེགས་པ་ནི། །ཞེས་པ་ནས། །དེ་དག་དེ་བཞིན་དུ་འགྱུར་རོ། །ཞེས་པའི་བར་དུ་ནི་དེ་བཞིན་གཤེགས་པ་འཇིག་རྟེན་དུ་འབྱུང་བ་དང༌། འགོ་བ་མང་པོ་ལ་ཕན་པ་མཛད་པ་དང༌། ཆོས་ཀྱི་དོན་རྟོགས་པ་ནི་མི་མཐུན་པ་དང༌། བདག་ཉིད་ཀྱིས་རིག་པར་དཀའ་བ་སྟོན་པ་ལ་
འདི་ནི་དང་པོ་སྟེ། །དེ་བཞིན་གཤེགས་པའི་བཀའ་ཕུན་སུམ་ཚོགས་པ་མི་བརྫུན་པར་བསྟན་པའོ། །མདོ་ལས་འོད་སྲུངས་དེ་བཞིན་གཤེགས་པས་ཆོས་ཐམས་ཅད་རིག་པར་འཇོག་སྟེ་ཞེས་པ་ནས་དེ་ལྟར་འཇོག་གོ་ཞེས་པའི་བར་དུ་ནི་ཆོས་བཤད་པས་ཕན་འདོགས་པ་སྟེ། དེ་བཞིན་གཤེགས་པ་ཐུགས་རྗེ་ཆེན་པོ་དང༌། ཐབས་མཁས་པ་དང་ལྡན་པས་མཚན་མ་དང་བྲལ་བའི་ཆོས་སྟོན་པས་འགྲོ་བ་སྨིན་པར་བྱེད་དེ། ལུང་ནི་རིགས་པ་ཅན་རིག་པའི་གཞུང་བསྒྲུབས་པས་འབྲས་བུ་ཐོབ་པར་བྱེད་པ་ཉིད་ཡེ་ཤེས་ཀྱིས་ལ་འཇོག་པའོ། །མདོ་ལས་ཆོས་ཐམས་ཅད་ཀྱི་དོན་གྱི་རིམ་པ་ལ་ཞེས་པ་ནས་དམ་པའི་མཆོག་ཐོབ་སྟེ་ཞེས་པའི་བར་དུ་ནི་ཆོས་སྟོན་པའི་རིམ་པ་གསུམ་དུ་མི་མཐུན་པའི་ཕྱིར་སེམས་ཅན་རྣམས་ནི་ཡོད་པ་དང་མེད་པར་ལྟ་བ་གཉིས་ལས་མི་འདའ་བ་དང༌། ཡང་དག་པའི་དོན་གྱི་མཐའ་དང༌། སེམས་ཅན་རྣམས་ཀྱི་སེམས་ཀྱི་སྤྱོད་པ་མི་མཐུན་པས་སྐྱེད་པ་སྟེ། མདོ་ལས་ཀྱང་ཡོད་པ་དང་མེད་པའི་ཕྱོགས་ལ་འཛུད་ཅིང་མོས་པ་དང་མཚན་ཉིད་གསུམ་གྱིས་ཡང་དག་པའི་མཐའ་ལ་འཇུག་པའོ་ཞེས་འབྱུང་སྟེ། སྤྱོད་པ་ཐམས་ཅད་དང་མཐུན་པར་འཇུག་པ་ལ་མཁས་པས་མཁྱེན་པ་ཐོགས་པ་མེད་པའི་ཕྱིར་སེམས་ཅན་གྱི་སེམས་ཀྱི་རིམ་པ་བཞིན་དུ་ཆོས་སྟོན་པའོ། །མདོ་ལས་འོད་སྲུངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ཞེས་པ་ནས་ཡེ་ཤེས་ལ་མངོན་པར་འཇོག་གོ་ཞེས་པའི་བར་དུ་ནི་སེམས་ཅན་རྣམས་ཀྱི་དེ་བཞིན་ཉིད་ཡང་དག་པ་ཇི་ལྟ་བ་བཞིན་རང་གིས་མི་ཤེས་པའི་ཕྱིར་དེ་བཞིན་གཤེགས་པ་གདོན་མི་ཟ་བའི་མཐའ་མཁྱེན་པ་སེམས་ཅན་གྱི་དབང་པོའི་རིམ་པ་མཁྱེན་པས་སེམས་ཅན་རྣམས་ལ་དེ་བཞིན་གཤེགས་པ་ཡེ་ཤེས་བསྟན་ཏེ། མ་བསྟན་པར་ནི་བདག་དང་གཞན་གྱི་མཚན་ཉིད་མི་ཤེས་པའོ། །ཡང་ཆོས་སྟོན་པ་ནི་སྔ་ཕྱིའི་མཚན་ཉིད་སྟོན་པ་ལ་མངའ་བརྙེས་པའི་ཕྱིར་སྟོན་པ་དང༌། ཡང་ན་ཐབས་མཁས་པའི་ཡེ་ཤེས་ཀྱིས་སོ་སོའི་མཚན་ཉིད་སྟོན་པའོ། །དེ་ལ་ཡང་རྣམ་པ་བཞི་སྟེ། བྱང་ཆུབ་དང་མྱ་ངན་ལས་འདའ་བའི་མཚན་ཉིད་འབྱེད་པ་ལ་མཁས་པ་ཐབས་མཁས་པའི་ཡེ་ཤེས་ཀྱིས་སེམས་ཅན་རྣམས་ཀྱི་སྤྱོད་པ་འབྱེད་པ་ལ་མཁས་པ་དང༌། དེ་བཞིན་ཉིད་ཀྱི་མཚན་ཉིད་སེམས་ཅན་རྣམས་ལ་སྟོན་པར་མཁས་པ་དང༌། བྱང་ཆུབ་ཀྱི་ཡེ་ཤེས་དང་འབྲས་བུ་
སེམས་ཅན་རྣམས་ཀྱིས་རྟོགས་པར་བྱེད་པ་ལ་ཐོགས་པ་མེད་པར་འཛུད་པ་དང༌། བདག་ཉིད་སྔོན་དེ་འདྲ་བའི་སྤྱོད་པ་ལ་ཞུགས་པའི་ཕྱིར་གཞན་ཡང་ཡེ་ཤེས་དེ་ལ་འཇོག་པའོ། །ཡང་དེ་དབྱེ་བ་ལ་རྣམ་པ་བཞི་སྟེ། ཆོས་རྣམས་ཀྱི་བདེན་པ་ཉིད་ལ་ཐུག་པ་དང༌། ཡོད་པ་དང་མེད་པ་ལ་མཁས་པ་དང༌། ཡེ་ཤེས་སྐྱེ་བ་ལ་སེམས་དགའ་བ་དང༌། བཀྲི་བ་དང་ངེས་པའི་དོན་སྟོན་པ་ལ་མཁས་པའོ། །ཡང་ཐབས་མཁས་པའི་ཡེ་ཤེས་ནི་བདེན་པ་ཉིད་ནི་ཐ་སྙད་དང་བྲལ་བ་ན་ཚིག་གིས་མཚོན་ཅིང་སྟོན་པ་ནི་ཐབས་མཁས་པའི་ཡེ་ཤེས་སོ། །ཡེ་ཤེས་ཀྱིས་ཞེས་པ་ནི་བརྟེན་པའི་དོན་ཏེ། སངས་རྒྱས་ཀྱི་ཡེ་ཤེས་གཟིགས་པའི་གནས་ནི་ཡང་དག་པའི་མཐའོ། །ཡང་ན་ལུང་ནི་རིགས་པ་ལ་གཞོལ་བ། རིགས་པ་ནི་སྤྱོད་པ་དང་མཐུན་པ། སྤྱོད་པ་ནི་འབྲས་བུ་དང་འབྲེལ་པ་དེ་སངས་རྒྱས་ཀྱི་ས་ཞེས་བརྗོད་དོ། །དེ་བཞིན་གཤེགས་པས་གཟིགས་ཏེ་ཞེས་པ་ནི་ཡོད་པ་དང་མེད་པའི་ཆོས་རྣམས་གཟིགས་ཏེ། ཆོས་རྣམས་ནི་ཀུན་བརྟགས་པ་དང༌། གཞན་གྱི་དབང་དང༌། ཡོངས་སུ་གྲུབ་པའི་མཚན་ཉིད་དེ་གསུམ་མོ། །སེམས་ཅན་རྣམས་ཀྱི་ལྷག་པའི་བསམ་པ་མཁྱེན་པ་ནི་སེམས་ཅན་རྣམས་ཀྱི་སྤྱོད་པ་དང༌། དེའི་ལྷག་པའི་མོས་པ་དང་འཇུག་པ་ཐོགས་པ་མེད་པར་མཁྱེན་པའོ། །ཆོས་རྣམས་ཀྱི་མཆན་ཉིད་ཡང་དག་པ་ཇི་ལྟ་བ་བཞིན་དུ་གཟིགས་པ་དེ་སེམས་ཅན་རྣམས་ལ་ཡང་དེ་བཞིན་དུ་སྟོན་པའོ། །དེ་འདྲ་བར་སྟོན་པ་ཉིད་གདོན་མི་ཟ་བའི་ཡེ་ཤེས་ཏེ། དེ་འདྲ་བའི་བརྙེས་པས་སེམས་ཅན་རྣམས་ལ་ཆོས་གཅིག་སྟོན་པས་དབང་པོ་མི་མཐུན་པ་ཐེག་པ་རྣམ་ལྔར་གྱུར་པ་རྣམས་གཅིག་སྟེ། གཉིས་དང་གསུམ་དུ་མེད་དོ། །མདོ་ལས་འོད་སྲུངས་འདི་ལྟ་སྟེ་དཔེར་ན་ཞེས་པ་ནས་ཇི་སྙེད་སྐྱེས་པ་ཞེས་པའི་བར་དུ་ནི། དཔེ་དེ་དག་ལ་ཡང་རྣམ་པ་གཉིས་སུ་དབྱེ་སྟེ། སྤྱིའི་དཔེ་དང༌། སོ་སོའི་དཔེའོ། །འདི་ནི་དང་པོ་སྟེ། རི་དང་ས་ཞེས་པ་ས་ཡན་ཆད་ནི་བསྐྱེད་པར་བྱའོ། །སྟོང་གསུམ་གྱི་སྟོང་ཆེན་པོ་ཞེས་པ་ནི་བསྐྱེད་པའི་གཞིའོ། །ཤིང་རྩི་དེ་དག་ཀྱང་འཇིག་རྟེན་དང༌། འཇིག་རྟེན་ལས་འདས་པའི་དགེ་བའི་ཆོས་རྣམས་ཀྱི་ས་བོན་གྱི་དཔེ་སྟེ། སྨན་དང་ནགས་ཞེས་པ་ཐེག་པ་རྣམ་ལྔའི་ས་བོན་སོ་སོ་མི་མཐུན་པར་གྱུར་པའི་དཔེའོ། །མདོ་ལས་སྤྲིན་ཆུ་ཆེན་པོ་རྒྱས་པ་ལངས་ཞེས་པ་ནས། སྟོང་ཆེན་པོའི་འཇིག་རྟེན་གྱི་ཁམས་ཞེས་པའི་
བར་དུ་ནི་དཔེ་དེ་དག་རྣམ་པ་བཞིར་དབྱེ་སྟེ་ཆོས་ཀྱི་རྒྱལ་པོ་འཇིག་རྟེན་དུ་བྱུང་བའི་དཔེ་དང་བསྟན་པས་ཕྱོགས་སུ་བརླན་པའི་དཔེ་དང་འབྲས་བུ་མི་མཐུན་པར་སྨིན་པའི་དཔེ་དང་དེ་ལྟར་བརླན་པར་མི་སེམས་པའི་དཔེ་དང་བཞིའོ། །སྤྲིན་རྒྱས་པར་ལངས་ཞེས་པ་ནི་དཔེ་དང་པོ་དང་སྦྱར། དེའི་འོག་མ་ནི་གཉིས་པ་དང་སྦྱར་ཏེ། སྤྲུལ་པའི་སྐུས་ཕན་པའི་དོན་མང་པོ་ལ་ཁྱབ་པར་ཁེབས་པ་ནི་སྤྲིན་གྱི་དོན་ཏོ། །སྤྲིན་དེ་ཡང་ཡོན་ཏན་བཅུ་དང་ལྡན་པ་ནི་ཚིགས་སུ་བཅད་པའི་ནང་ནས་སྟོན་ཏོ། །སྤྲུལ་པའི་སྐུ་གཅིག་གིས་འཇིག་རྟེན་གྱི་ཁམས་ཐམས་ཅད་དུ་སྨོན་ཅིང་ཁྱབ་པར་སྣང་བས་ཁེབས་ཞེས་པའི་དོན་ཏོ། །དུས་གཅིག་ཏུ་ཆར་མཉམ་པར་ཕབ་ཞེས་པས་ནི་འབྲས་བུ་སོ་སོར་སྨིན་ཞེས་པའི་དོན་དང་གསུང་གཅིག་གིས་ཆོས་སྟོན་པའི་དོན་ཏོ། །མདོ་ལས་འདིའི་རྩྭ་དང༌། ཤིང་ཕྲད་པོ་དང་ཞེས་པ་ནས་འཕེལ་ཞིང་རྒྱས་པར་འགྱུར་རོ་ཞེས་པའི་བར་དུ་ནི་འབྲས་བུ་སོ་སོར་སྨིན་པའི་དཔེ་སྟེ། དེ་ལའང་དངོས་བརླན་ཏེ་སྨིན་པ་དང༌། ཞར་ལ་སྨིན་པའོ། །དེ་ལ་འདི་རིགས་རྣམ་གསུམ་ཡོད་པའི་ཕྱིར་ཐེག་པའང་རྣམ་གསུམ་དུ་འགྱུར་ཏེ། དེ་ལ་ཡང་མདོ་ལས་དཔེར་ན་མི་ནད་པ་གསུམ་ཞིག་ཡོད་པ་ལ་གཅིག་ནི་སྨན་པ་མཁས་པ་དང་ཕྲད་ཀྱང་རུང་མ་ཕྲད་ཀྱང་རུང་ངེས་པར་འཚོ་བ་དང༌། ནད་པ་གཅིག་ནི་སྨན་པས་གསོས་ན་འཚོའི་མ་གསོས་ན་མི་འཚོ་བ་དང༌། གཅིག་ནི་སྨན་པས་གསོས་ཀྱང་མི་འཚོ་བ་སྟེ། འབྲས་བུ་ཆེ་ཆུང་གི་རིམ་པའང་དེ་བཞིན་དུ་སྦྱར་རོ། །སྡོང་བུ་ཆེན་པོ་དང་བར་མ་དང༌། ཆུང་དུ་ལ་སྨོས་པ་ཡང་ལུང་དང༌། གཞུང་དང༌། སྤྱོད་པ་དང༌། འབྲས་བུའི་དཔེ་སྟེ། འབྲས་བུ་རིམ་པ་བཞིན་དུ་སྦྱར་རོ། །ཆུ་རོ་གཅིག་པས་ཆུང་དུ་བངས་པ་ནི་མི་ལྡོག་པའི་ས་ལ་གནས་པ་རྣམས་སོ། །ཆེར་བངས་པ་ནི་རྣམ་པ་གཉིས་ཏེ་ས་བདུན་པ་མན་ཆད་ཆུང་དུ་བངས་པ། བརྒྱད་པ་ཡན་ཆད་ནི་ཆེར་བ་ངེས་པའོ། །དེ་ཡངས་དང་པོ་མན་ཆད་ནི་གཅིག་ཏུ་ཟག་པ་དང་བཅས་པའི་བསྒྲུབ་པའོ། །ས་བདུན་པ་མན་ཆད་ནི་ཟག་པ་མེད་པ་གཉིས་ཀའི་བསྒྲུབ་པའོ། །ས་བརྒྱད་པ་ཡན་ཆད་ནི་གཅིག་ཏུ་ཟག་པ་མེད་པའི་བསྒྲུབ་པའོ། །ཡང་ན་ས་དང་པོ་མན་ཆད་ནི་ཆུང་དུ་བངས་པ། ས་དང་པོ་ཡན་ཆད་ནི་མི་ལྡོག་པའི་ས་སྟེ་ཆེར་བངས་པའོ། །མདོ་ལས་དེ་བཞིན་དུ་མེ་ཏོག་དང་
ཞེས་པ་ནས་མིང་ཐོབ་བོ་ཞེས་པའི་བར་དུ་ནི་ལུང་དང་འབྲས་བུ་སོ་སོར་བསྟན་པ་སྟེ། བསྟན་པ་གཅིག་ལས་འབྲས་བུ་མི་མཐུན་པར་གྲུབ་ཅེས་པའི་དོན་ཏོ། །ཆར་པ་གཅིག་གིས་བརླན་པ་ལས་མེ་ཏོག་དང་འབྲས་བུ་སོ་སོར་སྐྱེ་བ་བཞིན་ཏེ། དང་པོ་ཐོས་པ་དང་བསམས་པའི་ཤེས་རབ་ནི་མེ་ཏོག་ལྟ་བུར་བལྟའོ། །བསྒྲུབ་ན་འབྲས་བུ་ཐོབ་པའི་དཔེ་འདི་ནི་འབྲས་བུའི་དཔེའོ། །ཆར་པ་རོ་གཅིག་གིས་ཞེས་པ་ནི་གསུང་རབ་གཅིག་གིས་ཞེས་པའི་དོན་ཏོ། །ལྷག་པའི་ཚུལ་ཁྲིམས་དང༌། ཤེས་རབ་དང༌། ཏིང་ངེ་འཛིན་ཀྱང་སོ་སོའི་དབང་པོ་ལས་ཐེག་པ་ཆེ་ཆུང་གིས་སོ་སོར་མཐོང་བ་འང་དེ་དང་འདྲའོ། །མདོ་ལས་ས་གཅིག་ལ་གནས་པའི་སྨན་མང་པོ་དང་ཞེས་པ་ནས་བངས་པ་དེ་བཞིན་དུ་ཞེས་པའི་བར་དུ་ནི་སོ་སོ་ནས་དེ་ལྟར་བྱས་པར་མི་སེམས་པའི་དཔེ་སྟེ། ཐེག་པ་རྣམ་གསུམ་གྱི་རིགས་ཀྱང་ཡང་དག་པའི་གཞུང་གཅིག་ལ་བརྟེན་པ་ནི། ས་གཅིག་ལ་གནས་པ་དང་འདྲ། དེ་བཞིན་གཤེགས་པ་གཅིག་གིས་བསྟན་པ་ལས་གོ་བ་ནི་ཆར་པའི་རོ་གཅིག་གིས་བངས་པ་བཞིན་ཏེ། འབྲས་བུ་སོ་སོར་སྨིན་པ་དང༌། ཤིང་རྩི་སྣ་ཚོགས་སུ་འགྱུར་བ་ཡང་མི་སེམས་མི་ཤེས་སོ། །མདོ་ལས་འོད་སྲུངས་དེ་བཞིན་གཤེགས་པ་ཞེས་པ་ནས་གསུང་གཅིག་གིས་འཇིག་རྟེན་གྱི་ཁམས་ཐམས་ཅད་ཁེབས་བ་ཞེས་པའི་བར་དུ་ནི་དེ་བཞིན་དུ་དཔེ་དོན་དུ་སྦྱར་བ་སྟེ། མདོ་ལས་འབྱུང་བ་བཞིན་དུ་གོ་བར་གྱིས་ཤིག །མདོ་ལས་འོད་སྲུངས་དེ་བཞིན་གཤེགས་པ་ཞེས་པ་ནས་ཡང་དག་པར་རྫོགས་པའི་སངས་རྒྱས་ཞེས་པའི་བར་དུ་ནི་འབྲས་བུ་བརླན་པ་མི་མཐུན་པའི་དཔེ་སྟེ། སྔར་ནི་དོན་བསྟན། ཕྱིས་ནི་མི་མཐུན་པའི་དཔེ་དང་སྦྱར་བའོ། །དང་པོའང་དེ་བཞིན་གཤེགས་པ་ཉིད་ལས་གླེང་པ་སྟེ། དོན་རྣམ་པ་གསུམ་མོ། །ཡོན་ཏན་གྱི་མཚན་ལས་གླེང་པ་དང༌། དོན་མཛད་པ་ལས་གླེང་པ་དང༌། མཁྱེན་གཟིགས་པ་ལས་གླེང་པ་སྟེ། འདི་ནི་དང་པོའོ། །མདོ་ལས་མ་རྒལ་བ་བསྒྲལ་ལོ་ཞེས་པ་ནས་མྱ་ངན་ལས་བཟླའོ་ཞེས་པའི་བར་དུ་ནི་དོན་མཛད་པ་ལས་གླེང་པ་སྟེ། སྨོན་པ་བཞི་ཡོངས་སུ་རྫོགས་པར་བྱེད་པའོ། །སྡུག་བསྔལ་ལས་བསྒྲལ་བ་དང༌། སྡིག་པ་མི་དགེ་བའི་ལས་ལས་དགྲོལ་བ་དང༌། བདེ་བ་མ་ཐོབ་པ་རྣམས་བདེ་བ་ལ་བཞག་པ་དང༌། མྱ་ངན་ལས་འདས་པ་མ་ཐོབ་པ་ཐོབ་པར་བྱ་བ་སྟེ། སྡུག་བསྔལ་ཤེས་པ་དང༌། ཀུན་འབྱུང་སྤངས་པ་དང༌།
ལམ་བསྒོམ་པ་དང༌། འགོག་པ་མངོན་དུ་བྱ་བ་སྟེ། རིམ་པ་བཞིན་ནོ། །མདོ་ལས་ང་ནི་ད་ལྟར་གྱི་འཇིག་རྟེན་འདི་དང་ཞེས་པ་ནས་ལམ་བསྒོམ་པ་ལ་མཁས་པའོ་ཞེས་པའི་བར་དུ་ནི་ཐམས་ཅད་མཁྱེན་པ་དང༌། ཐམས་ཅད་གཟིགས་པ་སྟོན་ཏེ། དེ་ཡང་རིག་པ་གསུམ་དང༌། ཡེ་ཤེས་གཉིས་དང༌། ཆོས་ཤེས་པ་དག་གསུམ་སྟོན་ཏོ། །རིག་པ་གསུམ་ནི་དུས་གསུམ་རིག་པའོ། །ཡེ་ཤེས་གཉིས་ནི་དོན་དམ་པའི་ཡེ་ཤེས་དང༌། ཀུན་རྫོབ་ཀྱི་ཡེ་ཤེས་སོ། །ཡུལ་རབ་ཏུ་ཤེས་པ་སྤྱོད་པ་རབ་ཏུ་འཆད་པ། འབྲས་བུ་རབ་ཏུ་རིག་པའོ། །ཤེས་པ་ནི་ཡང་དག་པ་དང༌། ཡང་དག་པ་མ་ཡིན་པ་ཤེས་པ། འཆད་པ་ནི་དགེ་བ་དང་མི་དགེ་བ་འཆད་པ། མཁས་པ་ནི་བསྒོམ་པ་དང་བསྒྲུབ་པ་ལ་མཁས་པའོ། །ཡང་ན་ཐེག་པ་རྣམ་གསུམ་རིམ་བཞིན་དུ་སྦྱར་རོ། །མདོ་ལས་དེ་ལྟར་འོད་སྲུངས་སྲོག་ཆགས་མང་པོ་ཞེས་པ་ནས་མཐུ་ཇི་ལྟ་བ་བཞིན་དུ་འཇུག་གོ་ཞེས་པའི་བར་དུ། དབང་པོ་དང་ཞེས་པ་ནི་དབང་པོ་རྣོན་པོའི་ཆེད་དུ་ཐེག་པ་ཆེན་པོ་བསྟན། དབང་པོ་རྟུལ་པོ་ལ་ནི་ཐེག་པ་རྣམ་གཉིས་བསྟན། དབང་པོ་རྣོན་པོའི་ཆེད་དུ་སྡོང་བུའི་སྨན་ཆེན་པོ་བསྟན། དབང་པོ་རྟུལ་པོ་ལ་ནི་སྨན་ཆུང་དུ་བསྟན། བརྩོན་འགྲུས་ཅན་ལ་ནི་སྒྲུབ་པའི་སྤྱོད་པ་བསྟན། ལེ་ལོ་ཅན་ལ་ནི་སངས་རྒྱས་རྗེས་སུ་དྲན་པ་སྟོན་ཏོ། །སེམས་ཅན་རྣམས་ཚེ་འདི་ལ་བདེ་བར་གྱུར་ཅིང་མཐར་གྱིས་ཐམས་ཅད་མཁྱེན་པའི་ཆོས་ལ་སྟོབས་དང་མཐུ་ཇི་ལྟ་བ་བཞིན་དུ་འཇུག་གོ་ཞེས་པ་ནི་སེམས་ཅན་རྣམས་ཆོས་ཐོས་པ་ཙམ་གྱིས་བདེ་བ་ཐོབ་སྟེ། དེ་ཡང་འཇིག་རྟེན་གྱི་བདེ་བ་དང༌། འཇིག་རྟེན་ལས་འདས་པའི་བདེ་བའོ། །འཇིག་རྟེན་གྱི་བདེ་བ་ནི་ཚེ་འདི་ལ་སྤྱོད་པ་ཡིད་དུ་འོང་བ་དང་ལྡན་ཞིང་དགེ་བའི་སྤྱོད་པ་བསྒྲུབས་པས་བདེ་བའི་འབྲས་བུ་ཐོབ་པའོ། །འཇིག་རྟེན་ལས་འདས་པའི་བདེ་བ་ནི་སྒྲིབ་པ་བྱང་བས་ཆོས་ཉིད་ལ་ཞུགས་ཏེ། བྱང་ཆུབ་སེམས་དཔའི་ལམ་མོ། །དེ་ཡང་ལྷག་པའི་མོས་པས་བསྐྱེད་པའི་ལམ་དང༌། ངེས་པའི་ལམ་སྟེ་སྒྲིབ་པ་རྣམ་པ་གཉིས་སྤངས་པ་ལ་རིམ་པ་བཞིན་དུ་འཇུག་གོ །མདོ་ལས་འདི་ལྟ་སྟེ། འོད་སྲུངས་དཔེར་ན་ཞེས་པ་ནས་བདག་བདག་གི་རིགས་དང་ཚད་དུ་སྐྱེའོ་ཞེས་པའི་བར་དུ་ནི་དཔེ་དང་དོན་དུ་སྦྱར་ཏེ། འབྲས་བུ་མི་མཐུན་པར་གྱུར་པའོ། །མདོ་ལས་འོད་སྲུངས་དེ་བཞིན་གཤེགས་པ་ཞེས་པ་ནས་བདག་གིས་བདག་ཤེས་པའམ་རིག་པའམ། རྟོགས་
པ་མེད་དོ་ཞེས་པའི་བར་དུ་ནི་དཔེ་ཕྱི་མ་དང་དོན་དུ་སྦྱར་བ་སྟེ། རོ་གཅིག་ཅེས་པ་ནི་མཚན་མ་མེད་པར་རོ་གཅིག་པ། མཚན་མ་མེད་པའི་རོ་དང༌། ཟག་པ་མེད་པའི་རོ་དང༌། རྣམ་པར་གྲོལ་བའི་རོ་གཅིག་པའོ། །དེ་ལྟར་རོ་གཅིག་གིས་སོ་སོར་སྨིན་པ་དང༌། ཤིང་དང་འབྲས་བུ་སོ་སོར་བརླན་པ་ཡང་བདག་སོ་སོ་ནས་སེམས་པ་མེད་དོ། །མདོ་ལས་དེ་ཅིའི་ཕྱིར་ཞེ་ན། འོད་སྲུངས་ཞེས་པ་ནས་ཇི་ལྟ་བ་བཞིན་དུ་གཟིགས་སོ་ཞེས་པའི་བར་དུ་ནི་དེ་ལའང་སེམས་ཅན་གྱི་སྤྱོད་པ་སྤྱིར་མཁྱེན་པ་དང༌། སོ་སོར་མཁྱེན་པ་དང༌། མཁྱེན་པ་དེ་གཉིས་བསྡུ་བའོ། །སེམས་ཅན་དེ་དག་ཅི་ལྟ་བ་བཞིན་དུ་མཁྱེན་པ་ནི་འདུས་བྱས་སམ། འདུས་མ་བྱས་ཀྱི་ཚུལ་དུའམ། སྤྱོད་པའམ། སེམས་ཀྱི་སྒོ་ནས་ཇི་ལྟ་བ་བཞིན་དུ་མཁྱེན་པའོ། །ཅི་ལ་སེམས་ཞེས་པ་དག་ནི་མཁྱེན་པ་སོ་སོར་སྨོས་པ་སྟེ། ཤེས་རབ་རྣམ་གསུམ་གྱི་སྒོ་ནས་རང་བཞིན་མཁྱེན་པ་དང༌། སྤྱོད་པ་དང༌། དངོས་པོ་མཁྱེན་པ་དང༌། སྤྱོད་པ་གང་གིས་འབྲས་བུ་ཅི་འཐོབ་པ་དང༌། ལུང་གང་གིས་འབྲས་བུ་ཅི་སྒྲུབ་པ་སྟེ། ཆོས་དེ་བཞིའི་རིམ་པ་བཅོམ་ལྡན་འདས་ཀྱིས་མཁྱེན་ཞེས་པའོ། །མངོན་སུམ་དུ་གཟིགས་པ་དང༌། ཇི་ལྟ་བ་བཞིན་དུ་གཟིགས་པ་ནི་མཁྱེན་པ་དེ་དག་བསྡུ་བ་སྟེ། སེམས་ཅན་གྱི་གཞི་དང༌། སེམས་ཀྱི་སྤྱོད་པ་མཚན་མ་དང༌། དངོས་པོ་དང༌། རང་བཞིན་མ་ལུས་པར་གཟིགས་པའི་ཕྱིར་གཟིགས་པའོ། །མདོ་ལས་དེ་དང་དེ་དག་ན་གནས་པའི་སེམས་ཅན་དེ་རྣམས་ཞེས་པ་ནས་ཐམས་ཅད་མཁྱེན་པའི་ཡེ་ཤེས་གློ་བུར་དུ་མི་སྟོན་ཏོ་ཞེས་པའི་བར་དུ་ནི་དེ་བཞིན་གཤེགས་པའི་མཁྱེན་པ་དང༌། སེམས་ཅན་གྱི་མཁྱེན་པ་ཤེས་པ་དེ་གཉིས་བསྡུ་བའི་ཁྱད་པར་བསྟན་པ་སྟེ། དེ་བཞིན་གཤེགས་པའི་ཡེ་ཤེས་ཟབ་པ་དང༌། སེམས་ཅན་གྱི་ཤེས་པ་ཆུང་བར་གྱུར་པས། དེ་བཞིན་གཤེགས་པའི་བསྟན་པ་ཟབ་མོའི་གནས་མ་ཡིན་པར་བསྟན་པའོ། །མདོ་ལས་འོད་སྲུངས་དེ་བཞིན་གཤེགས་པས་ལྡེམ་པོ་ངག་ནི་བཤད་པ་ལ་ཞེས་པ་ནས་ལྡེམ་པོ་ངག་ནི་ཤེས་པར་དཀའོ་ཞེས་པའི་བར་དུ་ནི་འོད་སྲུངས་ཆེན་པོས་ཟབ་མོ་འདི་ཤེས་ཀྱི་གཞན་གྱིས་མི་ཤེས་ཏེ། མཚན་ཉིད་ནི་འོག་ནས་སྟོན་ཏོ། །མདོ་ལས་དེ་ནས་བཅོམ་ལྡན་འདས་ཀྱིས་དེའི་ཚེ་ཞེས་པ་ནས་ཤིན་ཏུ་དད་པ་ཤེས་ནས་སུ་ཞེས་པའི་བར་དུ་ནི་འདི་མན་ཆད་ཚིགས་སུ་བཅད་པས་དོན་གོང་མ་རྣམས་བཟླས་ཏེ་སྟོན་པ་ལ། ཚིགས་བཅད་ལྔ་བཅུ་རྩ་གཅིག་གིས་ནི་གོང་མའི་དོན་བཟླས་འོག་མ་གཅིག་གིས་ནི་བསྡུས་པའི་དོན་བསྟན་
ཏོ། །ཆོས་རྒྱལ་ཞེས་པ་ནི་ཆོས་ལ་མངའ་བརྙེས་པས་ཆོས་ཅི་སྟོན་པ་འཁྲུལ་པ་མི་མངའ་བའི་ཕྱིར་ཆོས་ཀྱི་རྒྱལ་པོའོ། །འབྱུང་བ་འཇོམས་ཞེས་པ་ནི་འཇིག་རྟེན་གསུམ་འཇོམས་པའམ། སྲིད་པ་བཞི་དང་ལྔ་འཇོམས་ཞེས་པའི་དོན་ཏོ། །ཡང་ན་ཚིགས་བཅད་བཞི་པོ་འདི་ལ་ཆོས་ཀྱི་སྐུ་དང༌། རྫོགས་པ་ལོངས་སྤྱོད་པའི་སྐུ་དང༌། སྤྲུལ་པའི་སྐུ་རིམ་པ་བཞིན་དུ་སེམས་ཅན་གྱི་དོན་མཛད་པར་སྦྱར་རོ། །མདོ་ལས། དབང་པོ་ཆེན་པོ་བློ་བསྟན་པ། །ཞེས་པ་ནས། སྲོག་ཆགས་རྣམས་ལ་མི་སྨྲའོ། །ཞེས་པའི་བར་དུ་ནི་དེ་བཞིན་གཤེགས་པ་ཆོས་སྟོན་པ་ངོ་མཚར་དུ་བྱ་བ་སྟེ། བཀྲི་བ་དང་ངེས་པའི་དོན་བཤད་པ་ལ་སོ་སོའི་དབང་པོ་དང་སྦྱར་ཏེ། གཟོད་འཆད་ཀྱི་གློ་བུར་དུ་མི་གསུང་ཞེས་པའི་དོན་ཏོ། །མདོ་ལས། ཡེ་ཤེས་དེ་ནི་ཆུད་དཀའ་བ། །ཞེས་པ་ནས། །དེ་ལྟ་བས་ན་འཁོར་བའོ། །ཞེས་པའི་བར་དུ་ནི་སོ་སོ་ནས་ཐེ་ཚོམ་དང༌། དོགས་པ་སྐྱེ་བས་ཆུད་དཀའ་བསམ་བཤད་ཅེས་པའི་དོན་ཏོ། །མདོ་ལས་བཤད་པ་ཚིག་འདྲ་ཡུལ་དང་ཞེས་པ་ནས། ལྟ་བ་དག་ནི་དྲང་པོར་བྱ། །ཞེས་པའི་བར་དུ་ནི་སེམས་ཅན་རྣམས་དེ་བཞིན་གཤེགས་པའི་གསུང་དང་བྱིན་གྱི་རླབས་ཀྱིས་མ་བསྟན་པར་རང་གིས་རིག་པའི་བློ་མི་སྐྱེ་བས་ཡང་དག་པའི་དོན་བཅོམ་ལྡན་འདས་ཀྱིས་རྣམ་པར་ཕྱེ་བས་སེམས་ཅན་རྣམས་དབང་པོ་ཇི་ལྟ་བ་བཞིན་དུ་དོན་རྟོགས་ཤིང་རིག་པ་སྐྱེ་ཞེས་པའི་དོན་ཏོ། །མདོ་ལས། འོད་སྲུངས་སྤྲིན་ནི་ཇི་ལྟ་བུ། །ཞེས་པ་ནས། ཐམས་ཅད་དུ་ནི་ཆུ་ཡང་གཏོང༌། །ཞེས་པའི་བར་དུ་ནི་དེ་བཞིན་གཤེགས་པ་འཇིག་རྟེན་དུ་འབྱུང་སྟེ། ཆོས་སྟོན་པ་ཡང་ཇི་ལྟར་འཇིག་རྟེན་དུ་བྱུང་སྟེ་ཆར་འབབ་པ་ཀླུའི་རྒྱལ་པོས་ཞག་བདུན་གྱི་བར་དུ་སྤྲིན་བསྡུས་ནས་ཆར་འབེབས་པ་བཞིན་དུ་ཐུགས་རྗེ་ཆེན་པོའི་སྤྲིན་ཕྱོགས་བཅུ་ཐམས་ཅད་དུ་ཁེབས་པར་མཛད་དེ། སེམས་ཅན་གྱི་དབང་པོ་སྨིན་པའི་དུས་དང་སྦྱོར་ཞིང་ཆོས་སྟོན་ཏོ། །སྤྲིན་དེ་ཡང་གློག་གི་ཕྲེང་བ་དང་བཅས་པ་འབྲུག་གི་སྒྲ་གྲག་པ་ཉི་མའི་འོད་སྒྲིབ་པ། དཀྱིལ་འཁོར་ཐམས་ཅད་བསིལ་བར་བྱེད་པ་ལག་གིས་བརྙབ་ཏུ་རུང་བ་འདྲ་བར་འདུག་པ་བཞིན་དེ་བཞིན་གཤེགས་པའི་འོད་ཀྱིས་ཕྱོགས་བཅུར་སྣང་བར་མཛད་པ། ཆོས་ཀྱི་འབྲུག་སྒྲ་སྒྲོགས་པས་བདུད་དང་ལོག་པར་ལྟ་བ་རྣམས་དངང་བར་མཛད་པ། ཐུགས་རྗེའི་སྤྲིན་གྱིས་ཕྱོགས་ཐམས་ཅད་དུ་ཁེབས་པས་འགྲོ་བ་དགའ་བར་མཛད་པ། ལོག་པའི་
ཉི་མ་འཆར་བ་ཟིལ་གྱིས་གནོན་པ། སྡུག་བསྔལ་གྱི་གནས་ཐམས་ཅད་བསལ་ཏེ། མྱ་ངན་ལས་འདས་པའི་གནས་བསིལ་བར་མཛད་པ། ཐུགས་རྗེའི་ལྷུང་ལུས་དང་སེམས་འདུན་པའི་ལག་གིས་བརྙབ་ཏུ་རུང་བ་ཙམ་དུ་སེམས་པའོ། །མདོ་ལས། དེ་ནི་སྙོམས་པར་འབེབས་པ་ཡང༌། །ཞེས་པ་ནས། སྡོང་པོར་གྱུར་པ་གང་ཡང་རུང༌། །ཞེས་པའི་བར་དུ་ནི་སོ་སོར་སྨིན་པར་བྱེད་པ་ལ་ཡོན་ཏན་གྱི་ཆར་འབེབས་པ་དང༌། དངོས་པོ་སོ་སོར་སྐྱེས་པ་དང༌། སྐྱེས་པ་རྣམས་དོན་དུ་འགྱུར་བར་མཛད་པ་སྟེ། མཐོ་དམན་མེད་པར་སྙོམས་པའི་ཐུགས་རྗེས་ཀུན་གྱི་དོན་མཛད་ཅེས་པར་སྦྱར་རོ། །མདོ་ལས། དེ་དང་སྨན་ལྗོངས་རྣམས་ནས་སམ། །ཞེས་པ་ནས། འབྲས་བུ་མེ་ཏོག་རྣམས་ཀྱང་དེ་བཞིན་འཕེལ། །ཞེས་པའི་བར་དུ་ནི་བརླན་པར་བྱ་བའི་དངོས་པོ་བསྟན་ཏེ། དེ་ཡང་སྤྱི་དང་ཁྱད་པར་དུ་དབྱེ་བའོ། །ཐེག་པ་རྣམ་གསུམ་རིགས་སོ་སོར་སྨིན་པ་ནི་སྡོང་པོ་དང་ཡལ་ག་མེ་ཏོག་བཞིན་ནོ། །མདོ་ལས། སྤྲིན་གྱི་ཆར་གྱིས་མང་པོ་སྨན་རྣམས་ལ། །ཞེས་པ་ནས། དེ་ནི་ཆར་པ་རོ་གཅིག་ཕབ་པའོ། །ཞེས་པའི་བར་དུ་ནི་བརླན་པར་བྱ་བ་རྣམས་དོན་དུ་སྒྲུབ་སྟེ། སོ་སོར་སྨིན་པར་བྱེད་པའི་དཔེའོ། །མདོ་ལས། དེ་བཞིན་འོད་སྲུངས་སངས་རྒྱས་འཇིག་རྟེན་འདིར། །ཞེས་པ་ནས། སྲོག་ཆགས་ལ་ནི་ཡང་དག་སྤྱོད་པ་སྟོན། །ཞེས་པའི་བར་དུ་ནི་དཔེ་དང་དོན་དུ་སྦྱར་བ་སྟེ། ཚིག་དང་པོ་གཉིས་ཀྱིས་ནི་སྦྱོར་བ་བསྟན། གཞན་གྱིས་ནི་འབྲས་བུ་མི་མཐུན་པ་བསྟན་ཏེ། འདི་ནི་དང་པོའོ། །མདོ་ལས། དེ་ལྟར་དྲང་སྲོང་ཆེན་པོ་ཡང་དག་སྒྲོག །ཅེས་པ་ནས། ངས་ནི་འདོད་དང་མྱ་ངན་འདའ་བ་སྦྱིན། །ཞེས་པའི་བར་དུ་འདིས་ནི་འབྲས་བུ་སོ་སོར་བརླན་པ་བསྟན་ཏེ། འདི་མན་ཆད་ཆེད་དུ་བསྒྲགས་པ་དང༌། འཁོར་བསྡུ་བ་དང་ཕན་གདགས་ཤིང་དྲང་བ་ཐོས་པ་རྣམས་ཕན་པ་འཐོབ་པ་དང༌། དེ་ཐོས་ནས་འདུ་བ་སྟེ་འདི་ནི་དང་པོའོ། །རིགས་ཡོད་དུ་ཟིན་གྱིས་ཀྱང་དམ་པའི་ཆོས་ཀྱིས་མ་བརླན་པའི་ཕྱིར་ལུས་བསྐམས་པའོ། །མདོ་ལས། ལྷ་དང་མི་ཚོགས་རྣམས་ཀྱང་ང་ལ་ཉོན། ངལ་ལྟ་བའི་ཕྱིར་ནི་ཉེ་བར་གཤེགས། །ཞེས་པས་འཁོར་བསྡུ་བའོ། །མདོ་ལས། ང་ནི་དེ་བཞིན་གཤེགས་པ་བཅོམ་ལྡན་འདས། །ཟིལ་གྱིས་མི་ནོན་ཞེས་པ་ནས། །དེ་ནི་རྣམ་གྲོལ་མྱ་ངན་འདས་པའོ། །ཞེས་པའི་བར་དུ་ཕན་གདགས་པ་སྟེ། དམ་པའི་ཆོས་སྟོན་པ་དང༌། ཐེག་པ་ཆེན་པོའི་རྒྱུ་སྟོན་པ་
དང། ཆོས་སྙོམས་པར་སྟོན་པ་དང༌། གཅིག་ཏུ་ཕན་གདགས་པའི་ཕྱིར་དང༌། བཟང་ངན་བཀོལ་བ་མེད་པ་སྟེ་འདི་ནི་དང་པོའོ། །མདོ་ལས། བྱང་ཆུབ་གཞུག་པའི་ཕྱིར་ནི་རྟག་པར་དེ། །ཞེས་པ་ནས། དབྱངས་གཅིག་གིས་ནི་རབ་ཏུ་ཆོས་བཤད་དེ། །ཞེས་པའི་བར་དུ་ནི་ཐེག་པ་ཆེན་པོའི་རྒྱུ་སྟོན་པ་སྟེ། དྲང་པོའི་དོན་རྣམ་པ་གཉིས་ཀ་ཡང་ཐེག་པ་ཆེན་པོའི་དོན་ཏེ། རྣམ་པ་ཐམས་ཅད་མཁྱེན་པའི་རྒྱུར་གྱུར་པའོ། །མདོ་ལས། དེ་ནི་སྙོམས་པའི་ཡིད་ཀྱིས་མ་སྙོམས་མེད། །ཅེས་པ་ནས། སེམས་ཅན་གཅིག་བཞིན་འགྲོ་བ་གཞན་ལའོ། །ཞེས་པའི་བར་དུ་ནི་འདི་སྙོམས་པར་སྟོན་པའོ། །བདག་དང་བདག་གི་བ་དང་བྲལ་བ་དང༌། བྱམས་སྡང་སྤངས་པ་དང༌། ཉེ་རིང་གི་སེམས་མེད་པ་དང༌། ཆོས་འཆབ་པ་མེད་པ་དང༌། ཕྲག་དོག་མེད་པས་ཐམས་ཅད་ལ་འདྲ་བར་ཆོས་སྟོན་པའོ། །མདོ་ལས། ལས་གཞན་མི་བྱེད་རབ་ཏུ་ཆོས་འཆད་དེ། །ཞེས་པ་ནས། སྤྲིན་གྱིས་ཆར་པ་མངོན་པར་ཕབ་པ་བཞིན། །ཞེས་པའི་བར་དུ་ནི་གཅིག་ཏུ་ཕན་འདོགས་ཤིང་ཆོས་འཆད་པ་སྟེ། བཞུད་ཅེས་པ་ནི་མྱ་ངན་ལས་འདས་པའོ། །བྱོན་ཞེས་པ་ནི་མངོན་པར་བྱང་ཆུབ་པར་སྟོན་པའོ། །བཞུགས་ཞེས་པ་ནི་ཆོས་འཆད་ཅིང་ཕན་འདོགས་པའོ། །ལངས་ཞེས་པ་ནི་སེམས་ཅན་གྱི་དབང་པོ་སྨིན་པ་ལ་བཞེངས་པ་སྟེ། ཐུགས་རྗེ་ཆེན་པོས་ནམ་ཡང་སེམས་ཅན་གྱི་དོན་མཛད་པ་ལ་སྐྱོ་བ་མི་མངའ་བའོ། །མདོ་ལས། འཕགས་པ་དང་ནི་མ་རབས་མཚུངས་པའི་བློ། །ཞེས་པ་ནས། སྐྱོ་བ་ཐམས་ཅད་རབ་ཏུ་རྣམ་སྤངས་ནས། །ཞེས་པའི་བར་དུ་ནི་བཟང་ངན་བཀོལ་བ་མེད་པར་ཆོས་སྟོན་པ་སྟེ། དགེ་བའི་རྩ་བ་ལ་གཟིགས་ཤིང་ཆོས་སྟོན་པའོ། །མདོ་ལས་ངས་ནི་ཡང་དག་ཆོས་ཀྱི་ཆར་པ་ཕབ། །ཅེས་པ་ནས། རྣམ་པ་མང་པོའི་ས་ལ་གནས་འགྱུར་བ། །ཞེས་པའི་བར་དུ་ནི་སེམས་ཅན་རྣམས་སུ་ཐོས་པས་བདེ་བ་རྙེད་པ་སྟོན་ཏེ། དང་པོའི་ཚིག་དགུས་ནི་དཔེ་དང་དོན་དུ་སྦྱར། དེའི་འོག་མ་ཚིག་ཕྱེད་དང་བཞིས་ནི་འབྲས་བུ་དང་མེ་ཏོག་རྒྱུ་མི་མཐུན་པའི་དཔེས་འབྲས་བུ་དང་སྦྱོར་བ་བསྟན། སྡར་ཚིག་བརྒྱད་ཀྱིས་ནི་དོན་བསྟན། ཡང་ཚིག་ཕྱེད་ཀྱིས་ནི་དཔེ་བསྟན། ཚིག་དང་པོ་ལ་ཡང་གཉིས་སུ་ཕྱེ་སྟེ། སྔར་ཚིག་གཅིག་གིས་ནི་སྤྱིར་གླེང༌། ཚིག་བདུན་གྱིས་ནི་སོ་སོར་ཕྱེ་སྟེ་བསྟན་པ་ལ་འདི་ནི་དང་པོའོ། །ས་ལ་གནས་འགྱུར་བ་ཞེས་པ་ནི་ཐེག་པ་ཆེན་པོའི་ས་བཅུ་དང་རིགས་ཀྱིས་དང༌། བརྒྱང་
པ་དང། དེ་བཞིན་གཤེགས་པའི་སའི་བར་དུ་སོ་སོར་ཕྱེ་སྟེ་བསྟན་པའོ། །མདོ་ལས། ལྷ་མིའི་ནང་ནས་ཡིད་དུ་འོང་བ་དང༌། །ཞེས་པ་ནས། དེ་དག་རབ་ཏུ་ཕྲ་ཞིང་ཕྲ་བའི་སྨན། །ཞེས་པའི་བར་དུ་ནི་དཔྱད་ན་རིགས་མེད་པའི་དཔེ་སྟེ། ཇི་ལྟར་རྩ་བར་ཏུ་ཕྲ་ལ་ཆར་གྱིས་བརླན་པ་བཞིན་ནོ། །འཕགས་པ་ཉན་ཐོས་རྣམས་ནི་སྨན་པར་མ་བཞིན་ནོ། །འཕགས་པ་བྱང་ཆུབ་སེམས་དཔའ་རྣམས་ནི་སྨན་གྱི་སྡོང་པོ་ཆེན་པོ་བཞིན་ནོ། །མདོ་ལས། དེ་དག་ཆུང་སྟེ་འཇིག་རྟེན་འདི་ན་གང༌། །ཞེས་པ་ནས། དེ་ནི་སྨན་གྱི་མཆོག་ཅེས་བྱ་བ་ཡིན། །ཞེས་པའི་བར་དུ་ནི་སྨན་གྱི་སྡོང་པོའི་དཔེ་རྣམ་པ་གཉིས་བསྟན་པ་སྟེ། སངས་རྒྱས་སུ་དེ་འདྲ་བའི་སྤྱོད་པ་ཅན་སངས་རྒྱས་སུ་ངེས་ཞེས་པའི་དོན་ཏོ། །བྱང་ཆུབ་སེམས་དཔའ་ས་བདུན་པ་མན་ཆད་ནི་སྨན་ཆུང་དུ་ཞེས་བྱ། ས་བརྒྱད་པ་ཡན་ཆད་ནི། སྨན་གྱི་སྡོང་པོ་ཆེན་པོ་ཞེས་བྱ་སྟེ་སྤྱོད་པ་མི་ཉམས་པ་ཞེས་པའི་དོན་ཏོ། །མདོ་ལས། བདེ་བར་གཤེགས་པའི་སྲས་པོ་གང་བཞུགས་པ། །ཞས་པ་ནས། དེ་ལྟ་བུ་ཡིད་དཔེ་དག་བསྟན་པ་ཡིས། །ཞེས་པའི་བར་དུ་ནི་རིགས་ཅན་གྱིས་ནས་ཐེག་པ་ཆེན་པོའི་འབྲས་བུ་ཐོབ་པ་དང༌། མྱ་ངན་ལས་འདས་པའི་བར་དུ་འབྲས་བུ་ཆེ་ཆུང་ཐོབ་པ་དང༌། གྲུབ་པའི་དཔེ་བསྟན་པ་ཡིན་ནོ། །མདོ་ལས། དེ་བཞིན་གཤེགས་པའི་ཐབས་རྣམས་ཤེས་པར་གྱིས། །ཞེས་པ་ནས། ཕྱོགས་བཅུ་ཀུན་ན་ཇི་ལྟར་མཛེས་པ་བཞིན། །ཞེས་པའི་བར་དུ་ནི་འབྲས་བུ་སོ་སོར་སྨིན་ཅིང་ཐོབ་པ་ཁྱད་པར་དུ་གྱུར་པ་དང་དཔེ་དོན་དུ་སྦྱར་ཏེ་རྒྱས་པར་བསྟན་པའོ། །མདོ་ལས། འདི་ན་རྟག་ཏུ་འཇིག་རྟེན་ཕན་པའི་ཆོས། །ཞེས་པ་ནས། ངོམས་པར་བྱེད་ཅེས་པའི་བར་དུ་ནི་ལྷ་དང་མི་རྣམས་ལ་ཕན་པའི་དོན་བྱས་པའོ། །མདོ་ལས་འཇིག་རྟེན་ཐམས་ཅད་ངོམས་པར་བྱས་ནས་ནི་ཞེས་པ་ནས་སྡོང་པོ་ཆེན་པོ་ཞེས་པ་ནི་དེ་དག་བྱ་ཞེས་པའི་བར་དུ་ནི་འབྲས་བུ་ཆེ་ཆུང་ལས་ཐེག་པ་ཆེ་ཆུང་གི་རིམ་པ་བསྟན་པའོ། །མདོ་ལས། འོད་སྲུངས་འདི་ལྟ་བུ་ཡི་ཆོས་བཤད་པ། །ཞེས་པ་ནས། ང་ཡི་ཉན་ཐོས་ཐམས་ཅད་སངས་རྒྱས་འགྱུར། །ཞེས་པའི་བར་དུ་ནི་དོན་བསྡུ་བ་སྟེ། སྔར་བཀྲི་བའི་དོན་བསྟན། ཕྱིས་ངེས་པའི་དོན་བསྟན་པ་དང༌། འབྲས་བུ་ཐོབ་པའི་ཕྱིར་ལུང་བསྟན་པ་སྟེ། འཕགས་པ་ཉན་ཐོས་པ་རྣམས་ཀྱི་སྤྱོད་པས་སངས་རྒྱས་སུ་འགྱུར་བར་ལུང་བསྟན་པའང་འགྲུབ་པ་ལ་དགོངས་ཏེ་ལུང་བསྟན་
པ་ཡིན་ནོ། །བྱང་ཆུབ་སེམས་དཔའི་སྤྱད་པ་སྤྱོད་པ་དང༌། བྱང་ཆུབ་ཀྱི་སྤྱོད་པ་ལས་ཉམས་པའང༌། ཕྱིས་བྱང་ཆུབ་ཏུ་སེམས་བསྐྱེད་ཅིང༌། དགེ་བའི་རྩ་བ་མ་ཉམས་ན་བླ་ན་མེད་པའི་འབྲས་བུ་ཐོབ་ཅེས་བསྟན་ཏོ།། །།འདི་མན་ཆད་ལུང་བསྟན་པའི་ལེའུ་སྟེ། དེ་ཅིའི་ཕྱིར་ལུང་བསྟན་པ་ཞེས་གདགས་པ་དང༌། མིང་བཤད་པ་དང་རྣམ་པ་གཉིས་སོ། །དེ་ལ་གཏན་ཚིགས་ནི་འཕགས་པ་ཤཱ་རིའི་བུ་དབང་པོ་རྣོན་པོ་ཡིན་པས་ཆོས་ཐོས་པ་ཙམ་གྱིས་གོ་བའི་ཕྱིར་ལུང་བསྟན་པ་དང༌། གཞན་དབང་པོ་བར་མ་རྣམས་དོན་དཔེས་མཚོན་ཏེ་བསྟན་པས་གོ་བའི་ཕྱིར་ལུང་བསྟན་པའོ། །ཡང་ན་ང་རྒྱལ་ཅན་རྣམས་སྤག་བཀོད་པའི་ཕྱིར་ཐེག་པ་ཐམས་ཅད་གཅིག་སྟེ། ཆེ་ཆུང་མེད་པའི་ཕྱིར་ལུང་བསྟན་པའོ། །དེ་ཡང་ལུང་བསྟན་པའི་ཆོས་རྣམ་པ་གསུམ་སྟེ། རང་བཞིན་ཡོད་པའི་ཕྱིར་ལུང་བསྟན་པ་དང༌། ཁྱད་པར་ཡོད་པའི་ཕྱིར་འབྲས་བུ་ཡོད་པས་ལུང་བསྟན་པ་དང༌། ཆེ་བའི་བདག་ཉིད་ཅན་རྣམས་ལ་ཆེ་བའི་གཞུང་འོས་པ་དང༌། རྒྱུ་ཆེ་བ་རྣམས་ལ་འབྲས་བུ་ཆེན་པོར་འོས་པས་ལུང་བསྟན་པ་དང་གསུམ་མོ། །རང་བཞིན་གྱིས་ཡོད་པ་ཡང་ལུང་བསྟན་པར་འོས་པ་དང༌། ལུང་བསྟན་པར་མི་འོས་པ་ནི་མ་རིག་པ་ལ་ཐོག་མ་ཡོད་དམ་མེད་ཅེས་འདྲི་བ་ལ་ལུང་མི་བསྟན་པ་ལྟ་བུའོ། །རྒྱུ་ཁྱད་པར་ཅན་རྣམས་ནི་ལུང་བསྟན་པར་འོས་པའོ། །རྒྱུ་ཆེ་བ་དང༌། འབྲས་བུ་ཆེ་བ་ཡང་ལུང་བསྟན་པར་འོས་པའོ། །རྒྱུ་ཆུང་བ་དང་འབྲས་བུ་ཆུང་བ་རྣམས་ནི་ལུང་བསྟན་པར་མི་འོས་པའོ། །དགེ་བའི་རྩ་བ་སྨིན་པ་རྣམས་མྱུར་དུ་ལུང་བསྟན་པ་དང༌། མ་སྨིན་པ་རྣམས་ཕྱིས་ལུང་བསྟན་པ་དང༌། འཁོར་བ་སྤོང་ཞིང་འབྲས་བུ་མྱུར་དུ་ཐོབ་པར་འདོད་པ་རྣམས་ལ་མྱུར་དུ་ལུང་བསྟན་པ་དང༌། ཐུགས་རྗེ་ཆེ་བས་འཁོར་བར་སྦྱོར་བ་རྣམས་བགས་ཀྱིས་ལུང་བསྟན་པའོ། །ཡང་སྤྱིར་ལུང་བསྟན་པ་དང༌། སོ་སོར་ཕྱེད་སྟེ་ལུང་བསྟན་པའོ། །མིང་དགྲོལ་བ་ནི་རྒྱུ་ཅི་བྱེད་པ་འབྲས་བུ་དེ་ཐོབ་སྟེ། དེ་སོ་སོར་སྟོན་པའི་ཕྱིར་ལུང་སྟོན་པ་ཞེས་བྱའོ། །མདོ་ལས་དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་གསུངས་ནས་ཞེས་པ་ནས་ངན་པའི་ཆོས་འཛིན་པར་འགྱུར་ཞེས་པའི་བར་དུ་ནི་འཕགས་པ་ཉན་ཐོས་བཞི་མངོན་དུ་ལུང་བསྟན་པ་ལ་སྔར་ནི་ཚིག་བརྒྱད་པས་བསྟན། འོག་ཏུ་ནི་ཚིགས་སུ་བཅད་པས་བསྡུས་ཏེ་བསྟན། དེ་ཡང་འཕགས་པ་འོད་སྲུངས་དང་པོར་
ལུང་བསྟན། འཕགས་པ་གཞན་དེའི་འོག་ཏུ་ལུང་བསྟན་ཏོ། །དེ་དག་ཀྱང་སོ་སོའི་དབང་པོ་ལས་ཁ་ཅིག་སྔར་འཕགས་པའི་འབྲས་བུ་ཐོབ་ལ། སངས་རྒྱས་སུ་ཕྱིས་གྲུབ་པ་ཡང་ཡོད་དེ། ཇི་ལྟར་དགེ་སློང་ལྔ་བརྒྱ་ཁྱད་པར་མེད་པ་ལས་སངས་རྒྱས་སུ་སྔ་ཕྱིར་གྲུབ་སྟེ། གཅིག་གིས་གཅིག་ལུང་བསྟན་པ་ལྟ་བུ་དང༌། ཐེག་པ་ཆེན་པོ་ལས་ཀྱང་སློབ་པ་དང་མི་སློབ་པ་རྣམས་ཁྱད་པར་ཡོད་པ་ལས། དུས་གཅིག་ཏུ་སངས་རྒྱས་སུ་གྲུབ་པ་དང༌། ཁ་ཅིག་སྔར་འཕགས་པ་ཐོབ་ལ་ཕྱིས་དེ་བས་ཕྱི་བ་རྣམས་སངས་རྒྱས་སུ་འགྲུབ་པ་ལྟ་བུ་སྟེ། འཕགས་པ་འོད་སྲུངས་ཆེན་པོས་སངས་རྒྱས་ཁྲི་ཕྲག་སུམ་བརྒྱལ་བསྙེན་བཀུར་བྱས། འཕགས་པ་རབ་འབྱོར་གྱིས་སངས་རྒྱས་བྱེ་བ་ཁྲག་ཁྲི་གསུམ་བརྒྱ་ལ་བསྙེན་བཀུར་བྱས། འཕགས་པ་ཀཱ་ཏྱཱ་ཡ་ནས་སངས་རྒྱས་བྱེ་བ་ཁྲག་ཁྲིག་བརྒྱ་ལ་བསྙེན་བཀུར་བྱས། ཕྱིས་ཁྲག་ཁྲིག་གཉིས་ལ་བསྙེན་བཀུར་བྱས། འཕགས་པ་མཽད་གལ་ཆེན་པོས་སྔར་སངས་རྒྱས་བརྒྱད་སྟོང་ལ། བསྙེན་བཀུར་བྱས། ཕྱིས་ཁྲག་ཁྲིག་གཉིས་བརྒྱ་ལ་བསྙེན་བཀུར་བྱས་ཏེ། སངས་རྒྱས་སུ་ལུང་བསྟན་པ་ཡང་སངས་རྒྱས་ལ་བསྙེན་བཀུར་བྱས་པ་ལན་མང་དུ་ཡོད་མོད་ཀྱི་སྤྱོད་པ་རྒྱ་ཆེན་པོ་ལྡོག་པ་རྣམས་དྲང་བའི་ཕྱིར་བསྟན་ཏེ། སོ་སོར་དབང་པོ་རྣོ་རྟུལ་ལས་སྔ་ཕྱིར་ལུང་བསྟན་པ་ཡིན་ནོ། །མདོ་ལས་དེ་ལུས་ཐ་མའི་ཚེ་རྒྱན་ཆེན་པོ་ཞེས་བྱ་བའི་བསྐལ་པ་ལ་ཞེས་པ་ནས་སངས་རྒྱས་བཅོམ་ལྡན་འདས་ཏེ་ཞེས་པའི་བར་དུ་ནི་འབྲས་བུ་ཐོབ་པས་ལུང་བསྟན་པ་སྟེ། ཡང་དག་པའི་ཆོས་མཐོང་བའི་སྣང་བས་མཛེས་པའི་ཕྱིར་འོད་ཟེར་རབ་ཏུ་སྣང་ཞེས་བཏགས་སོ། །མདོ་ལས་དེའི་ཚེ་ཚད་ནི་ཞེས་པ་ནས་མེ་ཏོག་གི་གཏོར་བ་ཞེས་པའི་བར་དུ་ནི་ཞིང་འོད་ཟེར་སྣང་བ་ཐོབ་པའི་ཡོན་ཏན་ལ་བཏགས་པ་དང༌། བསྐལ་པ་སྤྱོད་པ་སྣ་ཚོགས་ཀྱིས་བརྒྱན་པའི་རྒྱན་ལས་བཏགས་པ་དང༌། ཞིང་གི་རྒྱན་དེ་དག་ཀྱང་རྒྱན་དམ་པ་དང་ལྡན་པ། སྡིག་པ་མི་དགེ་བ་མེད་པ། མཉམ་པ་རིན་པོ་ཆེ་བཞི་ལས་གཞི་བྱས་པ། ཤིང་རིན་པོ་ཆེས་བརྒྱན་པའི་ཐིག་གིས་རེའུ་བྲེས་པ། མེ་ཏོག་སྣ་ཚོགས་བཀྲམ་པའི་རྒྱན་དང་ལྡན་པའོ། །མདོ་ལས་དེར་བྱང་ཆུབ་སེམས་དཔའ་བརྒྱད་སྟོང་མང་པོ་འབྱུང་བར་འགྱུར་རོ་ཞེས་པ་ནས་ཆོས་ཀུན་འཛིན་ལ་བརྩོན་པར་འགྱུར་རོ་ཞེས་པའི་བར་དུ་ནི་འཁོར་མང་པོ་ཐམས་ཅད་ཀྱིས་དམ་པའི་ཆོས་བསྲུང་
བ་དང༌། ཡོངས་སུ་འཛིན་ཞེས་པའོ། །མདོ་ལས་དེ་ནས་བཅོམ་ལྡན་འདས་ཞེས་པ་ནས། བླ་ན་མེད་པའི་ཡེ་ཤེས་འདི་བསྒྲུབ་སྟེ་ཞེས་པའི་བར་དུ་ནི་ཚིགས་བཅད་དེ་རྣམས་ཀྱི་ནི་དང་པོ་གླེང་སྟེ་སྒོ་བ་དང༌། ལུང་མངོན་དུ་བསྟན་པ་དང་བསྡུ་བའོ། །མདོ་ལས། དེ་ནི་ཐ་མའི་ལུས་ཚེ་འཇིག་རྟེན་མགོན། །ཞེས་པ་ནས། མཉམ་ཞིང་བཟང་ལ་བལྟ་ན་སྡུག་པར་གྱུར། །ཞེས་པའི་བར་དུ་ནི་དེ་ལ་ཡང་ཚིགས་བཅད་དང་པོ་ཕྱེད་ཀྱིས་ནི་རང་བཞིན་བསྟན། དེའི་འོག་མ་ཚིགས་བཅད་གསུམ་གྱིས་ནི་ངོ་མཚར་ཉིད་བསྟན། དེའི་འོག་མ་གསུམ་གྱིས་ནི་འཁོར་བསྟན། དེའི་འོག་མ་ཚིགས་བཅད་ཕྱེད་ཀྱིས་ནི་ཚེའི་ཚད་བསྟན། ངོ་མཚར་གྱི་མཚན་ཉིད་ནི་མི་དགེ་བ་མེད་པ་ལ་སོགས་པ་རྣམ་པར་དག་པའི་ཞིང་རྒྱན་བརྒྱད་དོ། །སྤོས་དྲི་ཡིད་དུ་འོང་བ་འབྱུང་བ་ནི་ཚིག་རྐྱང་པའི་ནང་ནས་མི་འབྱུང་སྟེ། ཚུལ་ཁྲིམས་ཀྱི་དྲི་དམ་པ་དང་སྦྱར་རོ། །མདོ་ལས། དེ་ནི་བྱང་ཆུབ་སེམས་དཔའ་བྱེ་བ་སྟོང༌། །ཞེས་བྱ་བ་ནས། བསྐལ་པ་འབུམ་གྱི་ཡེ་ཤེས་ཀྱི་གྲངས་ཀྱང༌། །ཞེས་པའི་བར་དུ་ནི་འཁོར་རྣམས་སྟོན་ཏེ། བྱང་ཆུབ་སེམས་དཔའ་དང་འཁོར་རྣམས་ཀྱི་དོན་ཏོ། །མདོ་ལས། དེ་ནི་བར་གྱི་བསྐལ་པ་བཅུ་གཉིས་གནས། །ཞེས་པ་ནས། འོད་ཟེར་བར་སྣང་དེ་ཡི་རྒྱན་འདི་འདྲ། །ཞེས་པའི་བར་དུ་ནི། ཚིགས་བཅད་ཕྱེད་ཀྱིས་ནི་ཚེ་ཚད་བསྟན། ཕྱི་མས་ནི་བསྡུས་པའོ། །མདོ་ལས་དེ་ནས་ཚེ་དང་ལྡན་པ་གནས་བརྟེན་མཽད་གལ་གྱི་བུ་ཆེན་པོ་དང་ཞེས་པ་ནས་འདི་སྐད་གསོལ་ཏོ་ཞེས་པའི་བར་དུ་ནི་འདིས་འཕགས་པ་ཉན་ཐོས་ཆེན་པོ་གསུམ་གྱིས་ལུང་བསྟན་པར་གསོལ་བ་དང༌། བཅོམ་ལྡན་འདས་ཀྱིས་དངོས་སུ་ལུང་བསྟན་པའོ། །ལུས་འདར་ཞིང་མིག་མི་འཛུམས་བར་བལྟ་ཞིང་ཞེས་པ་ནི་གཅིག་ཏུ་འདུན་པའི་སེམས་སོ། །མདོ་ལས། དགྲ་བཅོམ་ཞིང་ནི་ཆེར་དཔའ་བ། །ཞེས་པ་ནས། རྒྱལ་བས་བདག་ཅག་ལུང་སྟོན་ཅིག །ཞེས་པའི་བར་དུ་ནི་ཚིག་དེ་དག་ལ་བསྟོད་དེ་གསོལ་བ་དང་དཔེ་ལས་གླེངས་ཏེ་གསོལ་བ་དང༌། གསོལ་བའི་མདོ་བསྡུས་པ་དང་གསུམ་སྟེ། འདི་ནི་བཅོམ་ལྡན་འདས་ལ་ཡོན་ཆེན་པོའི་སྒོ་ནས་བསྟོད་དེ་གསོལ་བའོ། །མདོ་ལས་མུ་གེ་བྱུང་ཚེ་ལ་ལའི་ཞེས་པ་ནས་ཐུབ་པ་ཆེན་པོ་མཐར་འགྱུར་རོ་ཞེས་པའི་བར་དུ་ནི། མུ་ག་བྱུང་ཚེ་ཞེས་པ་ནི་དཔེ་ལས་གླེངས་ཏེ་གསོལ་བ་སྟེ། ཉན་ཐོས་
པ་རྣམས་ཐེག་པ་ཆེན་པོའི་ཆོས་ཀྱིས་བཀྲེས་པའི་ཕྱིར་མུ་གེ་ཞེས་པའོ། །བཅོམ་ལྡན་འདས་ཀྱིས་ལུང་བསྒོ་བ་ལ། ལྟོས་ཤིང་ཐེག་པ་ཆེན་པོ་འཇུག་པ་ལ་མི་སྤོབས་པ་ཡང་དཔེ་དེ་དང་འདྲའོ། །དཔའ་བོ་ཆེན་པོས་ལུང་སྟོན་ཅིག །ཅེས་པ་ནི་གསོལ་བའི་མདོ་བསྡུས་པའོ། །མདོ་ལས་དེ་ནས་བཅོམ་ལྡན་འདས་ཀྱིས་ཞེས་པ་ནས་བྱང་ཆུབ་བསྒྲུབ་པར་འགྱུར་རོ་ཞེས་པའི་བར་དུ་ནི་འདི་མན་ཆད་ཉན་ཐོས་ཆེན་པོ་གསུམ་སོ་སོར་ལུང་བསྟན་པ་སྟེ། དང་པོ་ཚིག་རྐྱང་པས་སྤྲོ་བ་དང༌། དེའི་འོག་ཏུ་ཚིགས་སུ་བཅད་པས་བསྡུ་བའོ། །ཚིག་རྐྱང་པ་ལ་ཡང་རྣམ་པ་གཉིས་ཏེ། སྔར་ནི་རྒྱུ་བསྟན། དེའི་འོག་ཏུ་འབྲས་བུ་བསྟན་ཏེ། འདི་ནི་རྒྱུའོ། །མདོ་ལས་དེ་ལྟ་བུའི་ལྷག་པའི་བྱ་བ་བྱས་ཏེ་ལུས་ཐམ་ལ་ཞེས་པ་ནས། སངས་རྒྱས་བཅོམ་ལྡན་འདས་ཞེས་པའི་བར་དུ་ནི་འབྲས་བུ་བསྟན་པ་སྟེ། ལུང་བསྟན་པའི་མཚན་ཉིད་དགུ་སྟེ། རང་བཞིན་གྱིས་ལུང་བསྟན་པ་ལ་སོགས་པའོ། །མདོ་ལས་སངས་རྒྱས་ཀྱི་ཞིང་ནི་རིན་པོ་ཆེ་འབྱུང་བ་ཞེས་བྱ་བར་འགྱུར་རོ་ཞེས་པ་ནས་ཉན་ཐོས་བརྒྱ་སྟོང་མང་པོ་འདུལ་ལོ་ཞེས་པའི་བར་དུ་ནི་དེ་བཞིན་གཤེགས་པའི་ཞིང་རྒྱན་སྣ་ཚོགས་ཀྱིས་བརྒྱན་པ་ན་འཁོར་ཕྱི་ནང་རྣམ་གཉིས་དང་བཞུགས་པ་བསྟན་ཏོ། །མདོ་ལས་དེ་ནས་བཅོམ་ལྡན་འདས་ཀྱིས་དེའི་ཚེ་ན་ཞེས་པ་ནས་རབ་ཏུ་རིག་པར་བྱའོ། །ང་ལས་ཉོན་ཞེས་པའི་བར་དུ་ནི་འདི་མན་ཆད་ཚིགས་སུ་བཅད་པ་བཅུ་གཉིས་ལ་གཉིས་སུ་དབྱེ་སྟེ། དང་པོ་ཚིག་གཅིག་གིས་ནི་བསྒོ་བ་བསྟན། དེའི་འོག་མ་བཅུ་གཅིག་གིས་ནི་དངོས་སུ་བསྟན་པ་སྟེ། འདི་ནི་དང་པོའོ། །མདོ་ལས། ང་ཡི་ཉན་ཐོས་གནས་བརྟན་རབ་འབྱོར་འདི། །ཞེས་པ་ནས། དྲང་སྲོང་ཆེན་པོ་གསེར་གྱི་སྡོང་པོ་འདྲ། །ཞེས་པའི་བར་དུ་ནི་འདིས་དངོས་སུ་བསྒོ་བ་སྟེ། རྒྱུ་དང་འབྲས་བུ་སྦྱར་ཏེ་བསྟན་པ་དང༌། ངོ་མཚར་བདུན་དང༌། འཁོར་དང་ཚེའི་ཚད་ལ་སོགས་པ་སྟོན་ཏེ། འདི་ནི་དང་པོའོ། །མདོ་ལས། འཇིག་རྟེན་རྣམས་ལ་ཕན་ཞིང་ཐུགས་བརྩེར་འགྱུར། །ཞེས་པ་ནས། སྲོག་ཆགས་བྱེ་བ་ཁྲག་ཁྲིག་སྒྲོལ་བཞིན་དུ། །ཞེས་པའི་བར་དུ་ནི་ངོ་མཚར་བའི་མཚན་འདི་བསྟན་པའོ། །མདོ་ལས། དེ་ནས་བྱང་ཆུབ་སེམས་དཔའ་མཐུ་ཆེན་མང༌། །ཞེས་པ་ནས། རྫུ་འཕྲུལ་སྟོབས་ནི་བསམ་གྱིས་མི་ཁྱབ་འགྱུར། །ཞེས་པའི་བར་དུ་ནི་འཁོར་རྣམས་སྟོན་ཏེ། །བྱང་ཆུབ་སེམས་དཔའི་འཁོར་དང༌། ཉན་ཐོས་
པའི་འཁོར་རྣམས་ཅི་རིགས་པར་སྦྱར་རོ། །མདོ་ལས། བྱང་ཆུབ་མཆོག་དེར་རབ་ཏུ་བཤད་པ་ན། །ཞེས་པ་ནས། དེ་ལ་རྟག་ཏུ་ཐལ་མོ་སྦྱར་བར་འགྱུར། །ཞེས་པའི་བར་དུ་ནི་དེ་བཞིན་གཤེགས་པས་སྤྲུལ་པ་དང་ཆོས་ཉན་པའི་འཁོར་རྣམས་བསྟན་ཏོ། །མདོ་ལས། དེ་ན་བར་གྱི་བསྐལ་བ་བཅུ་གཅིག་གནས། །ཞེས་པ་ནས། རྐང་གཉིས་མཆོག་གིའོ་ཞེས་པའི་བར་དུ་ནི་ཚེའི་ཚད་བསྟན་པའོ། །མདོ་ལས་དེ་ནས་བཅོམ་ལྡན་འདས་ཀྱིས་དགེ་སློང་གི་དགེ་འདུན་ཐམས་ཅད་ལ་བཀའ་སྩལ་པ་ཞེས་པ་ནས་གསོ་བ་བྱེད་པར་འགྱུར་རོ་ཞེས་པའི་བར་དུ་ནི་འཕགས་པ་ཀཱ་ཏྱཱ་ཡན་ལུང་བསྟན་པ་སྟེ་དབྱེ་བ་དང་ས་བཅད་པ་གོང་མ་དག་འདྲ་བར་སྦྱར་རོ། །མདོ་ལས་སངས་རྒྱས་བཅོམ་ལྡན་འདས་དེ་དག་ཡོངས་སུ་མྱ་ངན་ལས་འདས་ནས་ཡང་ཞེས་པ་ནས་ལྷ་དང་མིའི་མཁན་པོ་སངས་རྒྱས་བཅོམ་ལྡན་འདས་དེ་ཞེས་པའི་བར་དུ་ནི་འཕགས་པ་ཀཱ་ཏྱཱ་ཡ་ན་དེས་སྔོན་གྱི་དུས་དེ་བཞིན་གཤེགས་པ་མང་པོ་ལ་དངོས་སུ་བསྙེན་བཀུར་བགྱིས་པ་དང༌། དེ་མྱ་ངན་ལས་འདས་པའི་འོག་ཏུ་ཡང་རིན་པོ་ཆེའི་མཆོད་རྟེན་བྱས་པ་དང༌། མཆོད་རྟེན་དེ་ལ་མཆོད་པ་སྣ་ཚོགས་བྱས་པ་སྟེ། བྱང་ཆུབ་སེམས་དཔའི་སྤྱོད་པ་མང་དུ་བྱས་ཏེ་འདིར་ལུང་བསྟན་ཏེ། འཕགས་པ་དེ་ཉིད་སྔོན་དགེ་འདུན་གྱི་གནས་ཁང་ཕྱག་དར་བྱས་པ་ལས་ཚེ་རབས་ཐམས་ཅད་དུ་ལུས་གསེར་གྱི་ཁ་དོག་ཅན་དུ་གྱུར་ཏེ་སྤྱོད་ལམ་མཛེས་པ་འོད་དང་ལྡན་པར་གྱུར་པ་ལས་འདི་སངས་རྒྱས་སུ་གྲུབ་པ་ལུང་བསྟན་པའོ། །མདོ་ལས་སངས་རྒྱས་དེའི་ཞིང་ཡོངས་སུ་དག་པ་ཞེས་པ་ནས་མེ་ཏོག་གིས་ཆལ་པར་བཀང་ཞེས་པའི་བར་དུ་ནི་དེ་བཞིན་གཤེགས་པའི་ཞིང་གི་རྒྱན་སྣ་ཚོགས་བསྟན་པའོ། །མདོ་ལས་སེམས་ཅན་དམྱལ་བ་དང་ཞེས་པ་ནས་ཆོས་ཀྱི་གཟུགས་བརྙན་གནས་པར་འགྱུར་རོ་ཞེས་པའི་བར་དུ་ནི་ཞིང་དེ་ན་ངན་སོང་གསུམ་མེད་པ། ལྷ་དང་མི་མང་བ་དང༌། ཕྱི་ནང་གི་འཁོར་མང་དུ་འདུས་པ་དང༌། སྐུ་ཚེའི་ཚད་བསྟན་པའོ། །མདོ་ལས་དེ་ནས་བཅོམ་ལྡན་འདས་ཀྱིས་དེའི་ཚེ་ན་ཞེས་པ་ནས་གཞན་དུ་མ་ཡིན་པའི་ཚིག་སྨྲ་ཞེས་པའི་བར་དུ་ནི་འདི་ཡན་ཆད་སྟོན་པས་ལུང་བསྒོ་བའོ། །མདོ་ལས་ངའི་ཉན་ཐོས་གནས་བརྟན་ཀཱ་ཏྱཱ་ཡ་ན་འདི་ཞེས་པ་ནས་དྲི་དང་མེ་ཏོག་རྣམས་ཀྱིས་མཆོད་པར་འགྱུར་
ཞེས་པའི་བར་དུ་ནི་རྒྱུ་ལས་གླེངས་ཏེ་ལུང་བསྟན་པའོ། །མདོ་ལས། དེ་ཡིས་ཐ་མའི་ལུས་ཐོབ་ནས། །ཞེས་པ་ནས། ལྷར་བཅས་འཇིག་རྟེན་རྣམས་ཀྱིས་བསྐུར་སྟི་བྱས། །ཞེས་པའི་བར་དུ་ནི་ལུང་བསྟན་པའི་འབྲས་བུ་སྟེ། དེ་ཡང་ཞིང་གི་མཚན་ཉིད་དང༌། བསོད་ནམས་ཀྱི་མཚན་ཉིད་དོ། །མདོ་ལས། འོད་བྱེད་གཙོ་བོ་བཅོམ་ལྡན་འདས་འགྱུར་བ། །ཞེས་པ་ནས། ཀུན་ཀྱང་འབྱུང་སྤངས་འབྱུང་བ་མེད་པ་ཡིན། །ཞེས་པའི་བར་དུ་ནི་ཚིག་དང་པོ་གཉིས་ཀྱིས་ནི་རང་བཞིན་བསྟན། ཚིག་ཕྱི་མས་འཁོར་བསྟན་ཏོ། །མདོ་ལས་དེ་ནས་ཡང་བཅོམ་ལྡན་འདས་ཀྱིས་དགེ་སློང་གི་དགེ་འདུན་ཐམས་ཅད་ལ་བཀའ་སྩལ་པ་ཞེས་པ་ནས་གསོལ་བ་བྱེད་པར་འགྱུར་རོ་ཞེས་པའི་བར་དུ་ནི་འཕགས་པ་མཽད་གལ་ལུང་བསྟན་པ་སྟེ། ཚུལ་དབྱེ་བ་ནི་གོང་མ་དང་འདྲའོ། །ལུང་བསྟན་པ་ཡང་སྔ་མའི་དུས་དང་ཕྱི་མའི་དུས་སོ། །སྔ་མའི་དུས་ལ་ཡང་སངས་རྒྱས་མངོན་དུ་བཞུགས་པ་དང༌། མྱ་ངན་ལས་འདས་པ་སྟེ། འདི་ནི་སྔོན་དུ་བཞུགས་པ་དང་སྦྱར་རོ། །མདོ་ལས་སངས་རྒྱས་བཅོམ་ལྡན་འདས་དེ་དག་ཡོངས་སུ་མྱ་ངན་ལས་འདས་ནས་ཀྱང་ཞེས་པ་ནས་རྣམ་པ་མང་པོས་མཆོད་པ་བྱེད་དོ་ཞེས་པའི་བར་དུ་ནི། མྱ་ངན་ལས་འདས་པའི་འོག་ཏུ་བསྐུར་སྟི་བྱེད་པ་སྟེ། སྔར་མཆོད་རྟེན་བརྩིགས་པ་དང༌། དེའི་འོག་ཏུ་མཆོད་པ་བྱས་པའོ། །མདོ་ལས་དེའི་ཕ་རོལ་གྱི་ཡང་ཕ་རོལ་ཏུ་ཞེས་པ་ནས་གསོལ་བར་བྱེད་དོ་ཞེས་པའི་བར་དུ་ནི་ཕྱི་མའི་རྒྱུ་བསྟན་ཏོ། །མདོ་ལས་དེའི་འོག་ཏུ་ལུས་ཐ་མ་ལ་ཞེས་པ་ནས་སངས་རྒྱས་བཅོམ་ལྡན་འདས་ཏེ་ཞེས་པའི་བར་དུ་ནི་དངོས་སུ་འབྲས་བུ་བསྟན་པའོ། །མདོ་ལས་དེའི་སངས་རྒྱས་ཀྱི་ཞིང་ཡིད་མངོན་པར་དགའ་བ་ཞེས་བྱ་བར་འགྱུར་ཞེས་པ་ནས་མེ་ཏོག་སིལ་མ་གཏོར་བ་ཞེས་པའི་བར་དུ་ནི་བསྐལ་པའི་མིང་དང༌། རྒྱུའི་མིང་དང༌། ཞིང་གི་མཚན་ཉིད་ཀྱི་རྒྱན་བསྟན་པའོ། །མདོ་ལས་ཞིང་མང་པོས་རབ་ཏུ་གང་ཞེས་པ་ནས། དམ་པའི་ཆོས་ཀྱི་གཟུགས་བརྙན་གནས་པར་འགྱུར་རོ་ཞེས་པའི་བར་དུ་ནི་དགེ་བ་མང་པོ་བསྐྱེད་པ་དང༌། འཁོར་དང༌། ཚེའི་ཚད་དང་གྲངས་བསྟན་པའོ། །མདོ་ལས་དེ་ནས་བཅོམ་ལྡན་འདས་ཀྱི་དེའི་ཚེ་ཞེས་པ་ནས་སིལ་སྙན་གྱིས་ནི་འཇིག་རྟེན་ཕན་སྐྱོང་བའི་ཞེས་པའི་བར་དུ་ནི་འདིས་ཡོངས་སུ་ལུང་བསྟན་པ་སྟེ། སྔར་ནི་རྒྱུ་བསྟན་ཕྱིས་ནི་
འབྲས་བུ་བསྟན་ཏོ། །རྒྱུ་བསྟན་པ་ལ་ཡང་སངས་རྒྱས་འཇིག་རྟེན་ན་བཞུགས་པ་དང༌། འཇིག་རྟེན་ནས་འདས་པ་ལ་མཆོད་པ་བྱེད་པའོ། །མྱ་ངན་ལས་འདས་ཞེས་པ་ནི་མྱ་ངན་ལས་འདས་པའི་འོག་ཏུ་མཆོད་པ་བྱེད་པའོ། །དེ་ནས་འདི་ལྟར་ཐ་མར་ལུས་ཀྱི་ཚེ་ཞེས་པ་ནས་འདི་མན་ཆད་བཤད་པའི་ཚུལ་གོང་མ་དག་དང་འདྲ་བར་དབྱེའོ།། །།འདི་མན་ཆད་སྔོན་བྱུང་བའི་ལེའུ་འཆད་དེ། སྔོན་དེ་བཞིན་གཤེགས་པས་སངས་རྒྱས་ཀྱི་མཛད་པ་མཛད་ཅིང་ཐེག་པ་ཆེན་པོའི་དོན་སྤྱོད་པ་དེ་བསྟན་ན་རྗེས་སུ་འཇུག་པ་བསྐྱེད་པའི་ཕྱིར་རྒྱུ་དེ་བསྟན་ཅིང་མོས་པ་སྐྱེ་བར་བྱ་བའི་ཕྱིར་ལེའུ་འདི་བསྟན་ཏོ། །འདི་ཅི་ལས་བཏགས་པ་དང༌། དེའི་མིང་དང༌། དེ་དྲིས་པའི་ལན་རྣམ་པ་གསུམ་ཞིག་སྟོན་ཏེ། འདིའི་ནང་ནས་སྔར་དབང་པོ་རྣོན་པོ་དང་བར་མ་ཆོས་ཐོས་པས་རྟོགས་པ་སྐྱེས་ཏེ་ལུང་བསྟན། དབང་པོ་ཐམ་རྣམས་ཆོས་ཐོས་ཀྱང་ད་དུང་རྟོགས་པ་མ་སྐྱེས་པ་རྣམས་སྔོན་ཐེག་པ་ཆེན་པོའི་སྤྱོད་པ་ལ་ཞུགས་པ་རྣམས་ཇི་ལྟར་སྤྱོད་པའི་དཔེ་བསྟན་ན། རྟོགས་པ་སྐྱེ་བར་འགྱུར་བས་སྤྲུལ་པའི་གྲོང་ཁྱེར་གྱི་དཔེ་བསྟན་པ་དང༌། འགྲེལ་པ་ལས་སེམས་ཅན་ང་རྒྱལ་ཅན་བདུན་ཡོད་དེ། ང་རྒྱལ་གྱི་ཉོན་མོངས་པ་དེ་སྤང་བའི་ཕྱིར་འདི་གསུངས་ཏེ། ང་རྒྱལ་དེ་བདུན་ལས་ཀྱང་བཞི་པ་ལྟ་བུ་བསམ་གཏན་སྤྱོད་ཅིང་འཇིག་རྟེན་གྱི་ཏིང་ངེ་འཛིན་ལ་གནས་པ་ཉིད་མྱ་ངན་ལས་འདས་པ་ཙམ་དུ་སེམས་པ་དེའི་གཉེན་པོར་སྤྲུལ་པའི་གྲོང་ཁྱེར་གྱི་དཔེ་བསྟན། ཏིང་ངེ་འཛིན་ལ་གནས་ཤིང་འབྲས་བུ་ཆུང་དུས་ཆོག་པར་སེམས་པ་དེ་ལ་ཐེག་པ་ཆེན་པོའི་མྱ་ངན་ལས་འདས་པའི་གྲོང་ཁྱེར་ཆེན་པོ་ལ་ཐབས་ཀྱིས་གཟུད་པའི་ཕྱིར་སྔོན་གྱི་གཏམ་གྱི་གྲོང་ཁྱེར་གྱི་དཔེ་བསྟན་ན། སློབ་པ་ལ་གནས་པའི་མ་རབས་རྣམས་སྤྲུལ་པའི་གྲོང་ཁྱེར་བསྟི་བའི་གནས་ཙམ་དུ་བསྟན་ནས་ཀྱང་མྱ་ངན་ལས་འདས་པའི་གྲོང་ཁྱེར་ཆེན་པོ་རིན་པོ་ཆེའི་འབྱུང་གནས་ཉིད་དུ་གཟུད་པའི་ཕྱིར་དཔེ་འདི་བསྟན་ཏོ། །བླ་ན་མེད་པ་བཅུ་བསྟན་པའི་ནང་ནས་གཉིས་པ་སྟེ། སྔོན་གྱི་སྤྱོད་པ་བླ་ན་མེད་པ་སྟོན་པ་དང་སྦྱར་ན་དེ་བཞིན་གཤེགས་པ་མངོན་པར་ཤེས་པ་ཆེན་པོའི་ཡེ་ཤེས་ཀྱི་ཟིལ་གྱིས་གནོན་པ་ཞེས་བྱ་བ་བྱང་ཆུབ་ཀྱི་སྤྱོད་པ་དགའ་བ་སྤྱོད་པའི་ཚེ་བསྐལ་པ་མང་པོ་ཞིག་ཏུ་སྤྱད་ནས་གཟོད་མངོན་པར་སངས་རྒྱས་པ་དང་སྦྱར་ན་
ཐེག་པ་པའི་བྱང་ཆུབ་ཏུ་ཉེ་བས་ཐོབ་པ་ཉིད་བསྟི་བའི་གནས་ཡིན་པར་བསྟན་པའོ། །ཡང་བླ་ན་མེད་པ་བཅུའི་གསུམ་པ་ལས་ལྷག་པའི་བརྩོན་འགྲུས་ཀྱི་མཐུས་བསྐྱེད་པ་དང་སྦྱར་ནི་ཚོང་དཔོན་གྱི་དཔེས་དཀའ་བ་སྣ་ཚོགས་སྤྱད་ནས་དོན་གྲུབ་པ་བཞིན་དེ་བཞིན་གཤེགས་པའི་འབྲས་བུ་ཐོབ་པ་ཡང་དེ་དང་འདྲ་བར་སྦྱར་རོ། །ལེའུ་འདིའི་ནང་ནས་དེ་བཞིན་གཤེགས་པ་མངོན་པར་ཤེས་པ་ཆེན་པོའི་ཡེ་ཤེས་ཀྱི་ཟིལ་གྱིས་གནོན་པའི་སྤྱོད་པ་སྟོན་ན་བཅོམ་ལྡན་འདས་དེའི་མཚན་ལས་ལེའུ་འདིའི་མིང་དུ་གདགས་པའི་རིགས་ནས་སྤྲུལ་བའི་གྲོང་ཁྱེར་དང་སྔོན་བྱུང་བ་ཞེས་ཅིའི་ཕྱིར་གདགས། དེ་ནི་ལྷག་པའི་ང་རྒྱལ་ཅན་དག་མྱ་ངན་ལས་འདས་པ་ཉིད་ཐོབ་པར་སེམས་པའི་གཉེན་པོར་གྲོང་ཁྱེར་གྱི་དཔེས་ཆེད་དུ་བཟློག་པའི་ཕྱིར་དེ་བསྟན་པས་དོན་ལ་དྲིས་ཏེ་བཏགས་སོ། །མདོ་ལས་དགེ་སློང་རྣམས་སྔོན་འདས་པའི་དུས་ན་བྱུང་བ་ཞེས་པ་ནས་ཕ་རོལ་གྱི་ཡང་ཕ་རོལ་ན་ཞེས་པའི་བར་དུ་ནི་འདིས་དབང་པོ་ཐ་མ་ལ་བསྟན་པའི་གླེང་པ་སྟེ། སྔར་ཚིག་རྐྱང་པས་རྒྱས་པ་བསྟན། དེའི་འོག་ཏུ་ཚིགས་བཅད་ཀྱིས་བསྡུ་བ་སྟེ། དེ་ལ་ཡང་དང་པོར་ཕྱོགས་སུ་བསྒོ་བ་དང༌། དེའི་འོག་ཏུ་དྲིས་པའི་ལན་ནོ། །དང་པོ་ལ་ཡང་རྣམ་པ་བཞི་སྟེ། དུས་དང༌། ཡུན་དང༌། ཡུལ་དང༌། བསྐལ་པ་སྟེ་འདི་ནི་དང་པོའོ།། མདོ་ལས་འདི་ལྟར་སྔོན་དེའི་ཚེ་དེའི་དུས་ཞེས་པ་ནས་སངས་རྒྱས་བཅོམ་ལྡན་འདས་སོ་ཞེས་པའི་བར་དུ་ནི་དངོས་སུ་བསྟན་པའོ། །མདོ་ལས་དགེ་སློང་དག་དེ་བཞིན་གཤེགས་པ་དེ་བྱུང་ནས་ཞེས་པ་ནས་སའི་ཁམས་དེ་ཐམས་ཅད་བཏགས་ན་ཞེས་པའི་བར་དུ་ནི་འདི་མན་ཆད་དྲིས་པ་དང༌། ལན་གདབ་པ་སྟེ། འདི་ནི་དྲིས་པའོ། །མདོ་ལས་དགེ་སློང་རྣམས་དེ་ཡིད་ལ་ཇི་སྙམ་ཞེས་པ་ནས་བཅོམ་ལྡན་འདས་དེ་མ་ལགས་སོ་ཞེས་པའི་བར་དུ་ནི་དྲིས་པའི་ལན་བཏབ་པའོ། །མདོ་ལས་བཅོམ་ལྡན་འདས་ཀྱི་ཞེས་པ་ནས་ཡོངས་སུ་མྱ་ངན་ལས་འདས་པ་བཞིན་ནོ་ཞེས་པའི་བར་དུ་ནི་འདིས་ནི་མངོན་པར་ཤེས་པ་ཆེན་པོ་སྟོན་ཏེ། ཡེ་ཤེས་ཀྱི་གཟིགས་པས་མཁྱེན་ཞེས་པའོ། །ཡང་དེ་དགོངས་ཤིང་མཁྱེན་པ་ཡང་དགོངས་པ་རྣམ་བཞིའི་ཚུལ་གྱིས་མཁྱེན་ཏེ། མཉམ་པ་ལ་དགོངས་པ་དང༌། དུས་ཐ་དད་པ་ལ་དགོངས་པ་དང༌། དོན་ཐ་དད་པ་ལ་དགོངས་པ་དང༌། སེམས་ཅན་
གྱི་མོས་པ་ལ་དགོངས་པའོ། །མདོ་ལས་དེ་ནས་བཅོམ་ལྡན་འདས་ཀྱི་ཞེས་པ་ནས། མངོན་ཤེས་ཡེ་ཤེས་ཟིལ་གནོན་ཐུབ་ཆེན་པོ། །ཞེས་པའི་བར་དུ་ནི། དུས་ཀྱི་མཐའ་བསྟན་པ་དང༌། མཁྱེན་གཟིགས་བསྟན་པ་སྟེ། དེ་ལ་ཡང་སྔར་ནི་སྒོ། །ཕྱིས་ནི་བསྐལ་པའི་གྲངས་བསྟན་པ་སྟེ། འདི་ནི་དང་པོའོ། །མདོ་ལས། དེའི་ཚེ་བླ་མེད་རྒྱལ་བར་གྱུར། །ཞེས་པ་ནས། བསྐལ་པ་མང་པོ་དེ་སྙེད་ཟད་པར་གྱུར། །ཞེས་པའི་བར་དུ་ནི་བསྐལ་པའི་གྲངས་བསྟན་པའོ། །མདོ་ལས། དེ་ལྟར་འདྲེན་པ་མྱ་ངན་ལས་འདས་པ། །ཡུན་རིང་ཞེས་པ་ནས། དྲན་པ་ཕྲ་ཞིང་ཟག་པ་མེད་པ་པོ། །ཞེས་པའི་བར་དུ་ནི་མཁྱེན་གཟིགས་བསྟན་ཏོ། །མདོ་ལས་དགེ་སློང་འདི་ལྟར་ཡང་མངོན་པར་ཤེས་པ་ཆེན་པོའི་ཡེ་ཤེས་ཀྱི་ཟིལ་གྱིས་གནོན་པ་ཞེས་པ་ནས་ལྔ་བཅུ་རྩ་བཞིར་གྱུར་ཏོ་ཞེས་པའི་བར་དུ་ནི་དྲིས་པའི་དོན་ཉིད་འོག་ནས་སྟོན་ཏོ། །འདི་ནི་དེ་བཞིན་གཤེགས་པའི་ཚེའི་ཚད་དང༌། ཆོས་རྙེད་པར་དཀའ་བ་དང༌། ཆོས་མངོན་དུ་རྙེད་པ་དང་གསུམ་སྟེ། འདི་ནི་དང་པོའོ། །མདོ་ལས་བཅོམ་ལྡན་འདས་དེ་བླ་ན་མེད་པ་ཞེས་པ་ནས་དེས་ཆོས་མངོན་དུ་ནི་མ་གྱུར་ཏོ་ཞེས་པའི་བར་དུ་ནི་འདིས་ཆོས་རྙེད་པར་དཀའ་བ་བསྟན་པ་སྟེ། དེ་མངོན་དུ་བྱ་བར་སྟོན་པ་དང༌། འདུག་ཏུ་བཅུག་པ་དང། མེ་ཏོག་གིས་གཏོར་བ་དང༌། མངོན་དུ་དགའ་བ་བསྟན་པའོ། །འགྲེལ་པ་ལས་ཀྱང་འདིས་བྱང་ཆུབ་ཐོབ་པར་དཀའ་བ་བསྟོན་པ་སྟེ། མདོ་དག་ལས་དོན་རྣམ་པ་བཅུས་བྱང་ཆུབ་ཀྱི་སྙིང་པོ་ལ་གནས་པར་འགྱུར་ཞེས་གསུངས་ཏེ། ས་ཐམས་ཅད་གཡོ་བར་མཛད་པ་ནས་སེམས་ཅན་ཐམས་ཅད་བསྡུ་བར་མཛད་ནས་གདོད་བྱང་ཆུབ་ཀྱི་སྙིང་པོ་ལ་བཞུགས་སོ། །བདུད་བཏུལ་བ་ཡང་སངས་རྒྱས་ཤཱཀྱ་ཐུབ་པ་ནི་སྔར་མངོན་པར་བྱང་ཆུབ་སྟེ། ཕྱིས་བདུད་བཏུལ་ཞེས་ཀྱང་འབྱུང༌། མདོ་གཞན་དག་ལས་སྔར་བདུད་བཏུལ་ཏེ་ཕྱིས་མངོན་པར་བྱང་ཆུབ་ཅེས་ཀྱང་འབྱུང། སངས་རྒྱས་བྱམས་པ་ནི་ནམ་རབ་ཏུ་བྱུང་བའི་ཉིན་པར་བྱང་ཆུབ་ཀྱི་སྙིང་པོ་ལ་རེག་པར་འགྱུར། སངས་རྒྱས་ཤཱཀྱ་ཐུབ་པ་ནི་ལོ་དྲུག་གི་བར་དུ་ནི་དཀའ་བ་སྤྱད་ནས་གཟོད་སངས་རྒྱས་བཅོམ་ལྡན་འདས་འདི་བསྐལ་པ་བཅུའི་བར་དུ་གཞེས་ཤིང་ཆོས་མངོན་དུ་མ་གྱུར་ཏེ་ཞེས་གསུངས་སོ། །
མདོ་ལས་འདི་ལྟར་ཡང་དགེ་སློང་བཅོམ་ལྡན་འདས་དེ་ཞེས་པ་ནས་སེང་གེའི་ཁྲི་ཆེན་པོ་འཕང་དུ་དཔག་ཚད་བརྒྱ་པ་བཤམས་ཞེས་པའི་བར་དུ་ནི་བཞུགས་པ་བསྟན་ཏེ། ལྷ་ཐམས་ཅད་ཀྱིས་བཅོམ་ལྡན་འདས་ཀྱི་གདན་བཤམས་ཞེས་པའི་དོན་ཏོ། །མདོ་ལས་བཅོམ་ལྡན་འདས་དེ་བྱང་ཆུབ་ཀྱི་སྙིང་པོར་བཞུགས་མ་ཐག་ཏུ་ཞེས་པ་ནས་བཅོམ་ལྡན་འདས་དེ་ལ་མངོན་པར་ཕབ་པོ་ཞེས་པའི་བར་དུ་ནི་བཅོམ་ལྡན་འདས་དེ་ལ་མེ་ཏོག་གི་ཕུང་པོ་རི་རབ་ཙམ་སྤུངས་ཏེ་མཆོད་པ་དང་སྦྱར་ན་ལོངས་སྤྱོད་པའི་སྐུ་ཡིན་པར་མངོན་ནོ། །མདོ་ལས་རྒྱལ་ཆེན་བཞིའི་རིས་ཀྱི་ལྷའི་སྲས་པོ་ཞེས་པ་ནས་རྒྱུན་མི་འཆད་པ་རབ་ཏུ་བསིལ་ཏོ་ཞེས་པའི་བར་དུ་ནི་རོལ་མོས་དགྱེས་པ་བསྐྱེད་ཅིང་མཆོད་པའོ། །མདོ་ལས་དེ་ན་དགེ་སློང་རྣམས་ལ་ཞེས་པ་ནས་མངོན་པར་སངས་རྒྱས་སོ་ཞེས་པའི་བར་དུ་ནི་འབྲས་བུ་བརྙེས་པ་བསྟན་ཏོ། །མདོ་ལས་དེ་ལྟར་མངོན་པར་སངས་རྒྱས་མ་ཐག་ཏུ་ཞེས་པ་ནས་ཡེ་ཤེས་འབྱུང་གནས་ཞེས་བྱ་བར་གྱུར་ཏོ་ཞེས་པའི་བར་དུ་ནི་འདི་མན་ཆད་ཆོས་ཀྱི་འཁོར་ལོ་བསྐོར་བ་བསྟན་ཏེ། སྔར་མཆོད་པ་བྱས་ནས་ཆོས་ཀྱི་འཁོར་ལོ་བསྐོར་བར་གསོལ་བ་དང༌། ཕྱིས་ཀྱང་དེ་བཞིན་གཤེགས་པས་ཕྱོགས་བཅུའི་ལྷ་དང་ཚངས་པ་ལ་བཤད་པར་གནང་བ་སྟེ། དང་པོ་ལ་ཡང་སྔར་རྒྱལ་བུ་བཅུ་དྲུག་གིས་མཆོད་དེ་ཆོས་བཤད་པར་གསོལ་བ་དང༌། ཕྱིས་ལྷ་ཚངས་པས་མཆོད་དེ་གསོལ་བའོ། །དེ་ཡང་གཉེན་རྣམས་མངོན་དུ་གྱུར་པ་དང༌། མངོན་དུ་མ་གྱུར་པའོ། །ཆོས་བཤད་པར་གསོལ་བ་ཡང་སྔར་བཅོམ་ལྡན་འདས་ཀྱི་དྲུང་དུ་དོང་བ་དང༌། ཕྱིས་བསྟོད་དེ་མངོན་པར་གསོལ་བའོ། །བཅོམ་ལྡན་འདས་ཀྱི་གན་དུ་འགྲོ་བ་ཡང་སོ་སོའི་འཁོར་དང་གཉེན་དུ་བཅས་ཏེ་དོང་བ་བསྟན་ཏོ། །མདོ་ལས་འདི་ལྟར་དགེ་སློང་རྣམས་རྒྱལ་བུ་གཞོན་ནུ་བཅུ་དྲུག་པོ་དེ་དག་ཅེས་པ་ནས་གང་ན་བ་དེར་དོང་ངོ་ཞེས་པའི་བར་དུ་ནི་བཅོམ་ལྡན་འདས་ཀྱི་གན་དུ་ཆས་པ་བསྟན་ཏོ། །མདོ་ལས་བཅོམ་ལྡན་འདས་འདི་ལ་བཀུར་སྟི་བྱས་ཞེས་པ་ནས། ཁྱོད་ནི་རབ་ཞི་ཟག་པ་མེད་ལ་གནས་ནས་ཞེས་པའི་བར་དུ་ནི་ཕྱག་འཚལ་བ་ནི་ལུས་ཀྱིས་ཕྱག་འཚལ་བ་དང༌། ངག་གིས་བསྟོད་དེ་ཕྱག་འཚལ་བའོ། །བཅོམ་ལྡན་འདས་ལ་བསྟོད་པ་ཡང་དགོངས་པའི་སྨོན་ལམ་
རྫོགས་པའི་སྒོ་ནས་བསྟོད་པ་དང༌། སྔོན་མཛད་པའི་ཡོན་ཏན་གྱི་སྒོ་ནས་བསྟོད་པའོ། །སྟན་གཅིག་དེ་ལ་བཞུགས་ཏེ་ཞེས་པ་ནི་རྣམ་པ་བཅུ་སྟེ། འཁོར་ལོས་སྒྱུར་བའི་རྒྱལ་པོའི་ཚུལ་དུ་བཞུགས་པ་སྟེ་དགེ་བ་བཅུ་ལ་གནས་པ་དང༌། རྒྱལ་པོ་བཞིའི་ཚུལ་དུ་བཞུགས་པ་སྟེ། འཇིག་རྟེན་པ་ཐམས་ཅད་ཀྱིས་དེ་བཞིན་གཤེགས་པའི་ཆོས་སྤྱད་པ་ལ་རང་དབང་ཡོད་པར་མོས་པས་གནས་པ་དང༌། བརྒྱ་བྱིན་གྱི་ཚུལ་དུ་བཞུགས་པ་སྟེ་སེམས་ཅན་ཐམས་ཅད་ལ་དབང་དུ་གྱུར་པས་བཞུགས་པ་དང༌། ཚངས་པའི་ཚུལ་གྱིས་བཞུགས་པ་སྟེ། བདག་དང་གཞན་གྱིས་སེམས་ལ་དབང་དུ་གྱུར་པས་བཞུགས་པ་དང༌། སེང་གེ་བཞིན་ཟབ་མོ་སྟོན་པ་ལ་བསྙེངས་པ་མེད་པས་བཞུགས་པ་དང༌། ཡང་དག་པའི་ཆོས་ལ་བཞུགས་པ་སྟེ། གཟུངས་དང་མཐུ་སྟོན་བར་བཞེད་པས་བཞུགས་པ་དང༌། ཤིན་ཏུ་བརྟན་པའི་ཏིང་ངེ་འཛིན་དུ་བཞུགས་པ་སྟེ། བྱང་ཆུབ་ཆེན་པོའི་མཐའ་ལ་བཞུགས་པ་དང། ཐུགས་རྗེ་ཆེན་པོ་ལ་གནས་པས་སེམས་ཅན་ཐམས་ཅད་དགའ་བ་བསྐྱེད་པ་དང༌། ཐུགས་རྗེ་ཆེན་པོ་ལ་བཞུགས་པ་སྟེ། ཉོན་མོངས་པའི་སྡུག་བསྔལ་ཐམས་ཅད་བཟོད་པར་བཞུགས་པ་དང༌། རྡོ་རྗེ་ལ་བཞུགས་པ་སྟེ། བདུད་དང་ལོག་པར་ལྟ་བ་ཐམས་ཅད་འཇོམས་པས་བཞུགས་པའོ། །དེ་ལ་འདི་ནི་ཤིན་ཏུ་བརྟན་པའི་ཏིང་ངེ་འཛིན་དང་རྡོ་རྗེ་ལ་བཞུགས་པ་དང་སྦྱར་རོ། །ཞི་བ་ཞེས་པ་ནི་སེམས་ཞི་བའོ། །མི་གཡོ་བ་ཞེས་བ་ནི་ལུས་མི་གཡོ་བའོ། །མདོ་ལས། དགེ་བ་དང་ནི་བདེ་བ་དགའ་བ་དང༌། །ཞེས་པ་ནས། མི་དབང་སེང་གེ་བདག་ཅག་དགེ་བར་སྐྱེས། །ཞེས་པའི་བར་དུ་ནི་བཅོམ་ལྡན་འདས་མངོན་པར་བྱང་ཆུབ་བས་འགྲོ་བ་ཐམས་ཅད་དགའ་བ་སྐྱེས་ཞེས་པའི་དོན་ཏོ། །མདོ་ལས། སྐྱེ་དགུ་འདི་ཀུན་མགོན་མེད་སྡུག་བསྔལ་བ། ཞེས་པ་ནས། དེ་ན་རྒྱལ་བའི་སྒྲ་ཡང་ཐོས་པ་མེད། །ཅེས་པའི་བར་དུ་ནི་སེམས་ཅན་རྣམས་སྡིག་པའི་གྲོགས་པོ་དང་བསྟེན་པ་དང༌། དགེ་བའི་བཤེས་གཉེན་དང་ཕྲད་པར་སྟོན་ཏོ། །སྡུག་བསྔལ་ཞེས་པ་ནི་སྡུག་བསྔལ་གྱི་བདེན་པའོ། །མི་ཤེས་ཞེས་པ་ནི་ལམ་གྱི་བདེན་པའོ། །མུན་གང་ཞེས་པ་ནི་ཀུན་འབྱུང་གི་བདེན་པའོ། །ཐར་པ་ཞེས་པ་ནི་འགོག་པའི་བདེན་པ་སྟེ། དེ་མ་སྤངས་ཏེ་མངོན་དུ་མ་བྱས་ཞེས་པའི་དོན་ཏོ། །
མདོ་ལས། འཇིག་རྟེན་རིག་པ་ཁྱོད་ཀྱིས་དེང་ཐོབ་པ། །ཞེས་པ་ནས། མགོན་པོ་ཁྱོད་ལ་རབ་ཏུ་སྐྱབས་སུ་མཆི། །ཞེས་པའི་བར་དུ་ནི་དགེ་བའི་བཤེས་གཉེན་དང་ཕྲད་པ་བསྟན་པའོ། །མདོ་ལས་དེ་ལྟར་དགེ་སློང་རྣམས་ཞེས་པ་ནས་ཚིགས་སུ་བཅད་པའི་འདི་སྐད་གསོལ་ཏོ་ཞེས་པའི་བར་དུ་ནི་ཆོས་ཀྱི་འཁོར་ལོ་བསྐོར་བར་གསོལ་བའོ། །ཕན་པ་ཞེས་པ་ནི་ལེགས་པ་བསྟབས་པའོ། །བདེ་བ་ཞེས་པ་ནི་སྡུག་བསྔལ་ལས་གདོན་པའི་ཕྱིར་ཆོས་བཤད་དུ་གསོལ་ཞེས་པའོ། །མདོ་ལས་བསོད་ནམས་བརྒྱའི་མཚན་ཅན་ཞེས་པ་ནས་འཇིག་རྟེན་རྣམས་ལ་ཤོད་ཅིག་ཅེས་པའི་བར་དུ་ནི་བཅོམ་ལྡན་འདས་ལ་ཕྱི་ནང་གི་ཡོན་ཏན་ཐམས་ཅད་ཚང་པའི་ཕྱིར་ཆོས་བཤད་པར་གསོལ་བ་དང༌། ཕན་བ་ཆེན་པོ་ཐོབ་པ་དང༌། དེ་བཞིན་གཤེགས་པའི་མཁྱེན་པ་བསྒྲགས་པའི་ཕྱིར་ཆོས་བཤད་པར་གསོལ་བའོ། །མདོ་ལས་བདག་ཅག་རྣམས་དང་ཞེས་པ་ནས་སེམས་ཅན་འདི་རྣམས་ཀྱིས་ནི་ཐོབ་པར་རོ་ཞེས་པའི་བར་དུ་ནི་ཕན་པ་ཆེན་པོ་ཐོབ་པའི་ཕྱིར་ཆོས་བཤད་པར་གསོལ་པའོ། །མདོ་ལས་ཀུན་མཁྱེན་པ་ནི་ཞེས་པ་ནས་དམ་པ་རབ་ཏུ་བསྐོར་ཞེས་པའི་བར་དུ་ནི་དེ་བཞིན་གཤེགས་པའི་མཁྱེན་པ་བསྒྲགས་པའི་ཕྱིར་གསོལ་བ་སྟེ། མོས་པ་སྣ་ཚོགས་མཁྱེན་པ་དང༌། ལམ་སྣ་ཚོགས་མཁྱེན་པ་དང༌། དབང་པོ་རབ་འབྲིང་མཁྱེན་པ་དང༌། སྔོན་གྱི་གནས་མཁྱེན་པ་ལ་སོགས་ཏེ་མཁྱེན་པ་འདི་དག་དང་ལྡན་ཞེས་པའོ། །མདོ་ལས་དེ་ནས་དགེ་སློང་རྣམས་ཞེས་བ་ནས་སྣང་བ་ཆེན་པོས་ཁྱབ་པར་གྱུར་ཏོ་ཞེས་པའི་བར་དུ་ནི་ཚངས་པའི་རྒྱལ་པོས་མཆོད་དེ་ཆོས་ཀྱི་འཁོར་ལོ་བསྐོར་བ་དང་གསོལ་བའོ། །དེའི་ཚེ་ནས་གཡོ་བ་དང༌། འོད་ཀྱིས་སྣང་བར་བྱས་པའོ། །མདོ་ལས་འཇིག་རྟེན་ཐམས་ཅད་ཀྱི་བར་གྱི་འཇིག་རྟེན་ན་ཞེས་པ་ནས་ཕན་ཚུན་དུ་སྨྲའོ་ཞེས་པའི་བར་དུ་འཁོར་ཡུག་ཆེན་པོས་བསྐོར་བའི་རི་བྲགས་ཀྱི་ཕུགས་ན་གནས་པའི་སེམས་ཅན་སྣང་བར་བྱས་པའོ། །མདོ་ལས་འཇིག་རྟེན་གྱི་ཁམས་དེ་ཐམས་ཅད་དང་ཞེས་པ་ནས་སྣང་བ་ཆེན་པོ་བྱུང་བར་གྱུར་ཏོ་ཞེས་པའི་བར་དུ་ཚངས་པའི་གཞལ་མེད་ཁང་ལ་སོགས་པ་གཡོ་བར་བྱས་པའོ། །མདོ་ལས་དེ་ནས་ཤར་ཕྱོགས་ཀྱི་འཇིག་རྟེན་གྱི་ཁམས་ཞེས་པ་ནས་ཚིགས་སུ་བཅད་དེ་སྨྲས་པ་ཞེས་པའི་བར་དུ་ནི་དེ་དག་ཆོས་
ཉན་པ་ཡང་དང་པོ་འོད་ཀྱིས་བསྐུལ་བ་དང༌། བཅོམ་ལྡན་འདས་ཀྱི་གན་དུ་ཕྱིན་པ་དང༌། ཆོས་བཤད་པར་གསོལ་བ་དང༌། ཅང་མི་གསུང་བར་གནང་བར་ཤེས་པ་སྟེ། བསམ་གཏན་ལ་གནས་པའི་ལྷ་ཐམས་ཅད་ལྷགས་ཞེས་པའོ། །མདོ་ལས། བདག་ཅག་ཐམས་ཅད་དེ་རིང་ཤིན་ཏུ་དགའ། །ཞེས་པ་ནས། འདི་ལྟར་ཕྱོགས་བཅུ་ཀུན་ཏུ་དེང་དཔལ་འབར། །ཞེས་པའི་བར་དུ་ནི་ལྷ་རྣམས་ཀྱིས་བསྟོད་དེ་ཆོས་བཤད་པར་གསོལ་བའོ། །མདོ་ལས་དེ་ནས་དགེ་སློང་རྣམས་ཞེས་པ་ནས། ནུབ་ཕྱོགས་སུ་དོང་ནས་མཐོང་བ་ཞེས་པའི་བར་དུ་ནི་འོད་གང་ནས་འབྱུང་བ་ལོགས་སུ་ཚོལ་ཞིང་དོང་བ་བསྟན་ཏོ། །མདོ་ལས་དེ་ནས་དགེ་སློང་རྣམས་ཞེས་པ་ནས་གཞལ་མེད་ཁང་བཅོམ་ལྡན་འདས་དེ་ལ་ཕུལ་ཞེས་པའི་བར་དུ་ནི་ལྷའི་གཞལ་མེད་ཁང་བཞེས་པར་གསོལ་པ་དང༌། བཅོམ་ལྡན་འདས་ཅང་མི་གསུང་བས་གནང་བར་ཤེས་པ་དང༌། ཚངས་པ་རྣམས་གཟེངས་བསྟོད་ཅིང་དགེ་བ་ལ་དགོད་པ་སྟེ། འོས་འོས་སུ་སྦྱར་རོ། །མདོ་ལས། ཚད་མེད་རྒྱལ་བ་ངོ་མཚར་འགྱུར། །ཞེས་པ་ནས། འཇིག་རྟེན་རིག་པ་ཇི་ལྟར་དགྱེས་བཞིན་སྤྱོད། །ཞེས་པའི་བར་དུ་ནི་གཞལ་མེད་ཁང་དབུལ་བ་དང༌། བསྟོད་དེ་ཕྱག་འཚལ་བའོ། །མདོ་ལས་དེ་ནས་དགེ་སློང་རྣམས་ཚངས་པ་ཆེན་པོ་དེ་དག་ཅེས་པ་ནས་དེ་བཞིན་གཤེགས་པ་ལ་གསོལ་བ་ལགས་ཞེས་པའི་བར་དུ་ནི་ཆོས་ཀྱི་འཁོར་ལོ་བསྐོར་བར་གསོལ་བའོ། །མདོ་ལས་དགེ་སློང་དག་དེ་ནས་ཚངས་པ་ཆེན་པོ་ཞེས་པ་ནས། དེ་ནས་དགེ་སློང་རྣམས་བཅོམ་ལྡན་འདས་དེས་ཚངས་བ་དེ་རྣམས་ལ་ཅང་མི་གསུང་བར་དེ་ན་བཞུགས་སོ་ཞེས་པའི་བར་དུ་ནི་ཆོས་བཤད་པར་གནང་བའོ། །དེ་ནས་ཡང་དགེ་སློང་རྣམས་ཞེས་པ་ནས་ཕན་ཚུན་དོང་ཞིང་སྨྲའོ་ཞེས་པའི་བར་དུ་ནི་ཚངས་པ་རྣམས་ལ་བསྐུལ་བའོ། །དེ་ནས་དགེ་སློང་རྣམས་ཞེས་པ་ནས་གདོན་མི་ཟ་བར་འབྱུང་བར་འགྱུར་ཞེས་པའི་བར་དུ་ནི་ལྷ་རྣམས་ཀྱིས་གསོལ་བའོ། །དེ་ནས་དགེ་སློང་རྣམས་ཚངས་པ་བྱེ་བ་ཁྲག་ཁྲིག་ཅེས་པ་ནས་གཤེགས་སུ་གསོལ་ཞེས་པའི་བར་དུ་ནི་ཆོས་བཤད་པར་གསོལ་བ་དང༌། མཆོད་པར་གསོལ་བའོ། །དེ་ནས་དགེ་སློང་རྣམས་ཚངས་པ་ཆེན་པོ་དེ་དག་གིས་ཞེས་པ་ནས་ཕྱག་ཀྱང་འཚལ་ཞེས་པའི་བར་
དུ་ནི་བསྟོད་དེ་ཕྱག་འཚལ་བའོ། །མདོ་ལས། ངོ་མཚར་གྱུར་པ་བརྒྱ་ལ་འཇིག་རྟེན་དུ། །ཞེས་པ་ནས་རྟག་ཏུ་མཉམ་པར་གྱུར་ཞེས་པའི་བར་དུ་ནི་འཇིག་རྟེན་དུ་གཤེགས་པ་དཀོན་པ་བསྟན་པའོ། །མདོ་ལས་བསྐལ་པ་ཁྲག་ཁྲིག་བརྒྱད་ཅུ་ཞེས་པ་ནས། བསོད་ནམས་ཀྱིས་ནི་འཇིག་རྟེན་ཞེས་པའི་བར་དུ་ནི་སྤྱན་དུ་གྱུར་པ་དང་སྐྱབས་སུ་གྱུར་བ་བསྟན་ཏོ། །མདོ་ལས་དེ་ནས་དགེ་སློང་རྣམས་ཞེས་པ་ནས་དུལ་ཞིང་ཞི་ལ་རབ་ཏུ་བདེ་བར་འགྱུར་ཞེས་བའི་བར་དུ་ནི་དེ་བཞིན་གཤེགས་པ་ལ་བསྟོད་པ་དང༌། ཞི་ཞིང་དུལ་བས་འཕགས་པའི་ལམ་བསྒྲུབ་པ་བསྟན་ཏོ། །མདོ་ལས་དེ་ནས་དགེ་སློང་རྣམས་བཅོམ་ལྡན་འདས་དེ་ཞེས་པ་ནས་མི་གསུང་བར་བཞུགས་སོ་ཞེས་པའི་བར་དུ་ནི་གནང་བ་བསྟན་ཏོ། །མདོ་ལས་དེ་ནས་ཡང་དགེ་སློང་རྣམས་ཞེས་པ་ནས་ཡང་ན་འདིར་ནི་སངས་རྒྱས་མངོན་པར་བྱུང་ཞེས་བའི་བར་དུ་ནི་གོང་མ་དང་འདྲ་བར་སྦྱར་རོ། །ཆོས་བཤད་པར་གསོལ་བའོ། །མདོ་ལས་དེ་ནས་དགེ་སློང་རྣམས་འཇིག་རྟེན་གྱི་ཁམས་ཞེས་པ་ནས། བདག་ཅག་ལ་ནི་བརྩེ་ཕྱིར་ཡོངས་སུ་སྤྱོད། །ཅེས་པའི་བར་དུ་ནི་བཤད་པའི་ཚུལ་གོང་མ་དག་དང་འདྲ་བར་སྦྱར་རོ། །མདོ་ལས་དེ་ནས་དགེ་སློང་རྣམས་ཚངས་པ་ཆེན་པོ་དེ་དག་ཅེས་པ་ནས་བྱང་ཆུབ་མཆོག་ལ་རེག་པར་རོ་ཞེས་པའི་བར་དུ་ནི་ལམ་འདི་སྡིག་ཅན་ཞེས་པ་ནི་ཁྱིམ་ན་གནས་པས་སྡིག་པ་སྤྱོད་པ་མུ་སྟེགས་ཅན་སྤྱོད་པ་ངན་པ་ལ་གནས་པ་སྡིག་སྤྱོད་པའོ། །བདེ་བའི་འདུ་ཤེས་ནི་གཉེན་པོས་གནས་པ་སྟེ། སྡུག་བསྔལ་སྐད་ཅིག་ཙམ་ཞི་བ་ལ་བདེ་བར་སེམས་པ་ལ་བདེ་བ་དེ་ཉིད་ཀྱང་སྟོར་ཞེས་པའོ། །མདོ་ལས་དེ་ནས་དགེ་སློང་རྣམས་ཚངས་པ་ཆེན་པོ་དེ་དག་གིས་ཞེས་པ་ནས་བསྐལ་པ་བྱེ་བ་སྟོང་དུ་བསྒྲུབས་པའོ་ཞེས་པའི་བར་དུ་ནི་བསྟོད་དེ་བཤད་པར་གསོལ་བའོ། །མདོ་ལས་དེ་ནས་དགེ་སློང་རྣམས་བཅོམ་ལྡན་འདས་མངོན་པར་ཤེས་པ་ཆེན་པོའི་ཡེ་ཤེས་ཀྱི་ཟིལ་གྱིས་གནོན་ཞེས་པ་ནས་རྣམ་པ་བཅུ་གཉིས་སུ་བསྐོར་བ་ཞེས་པའི་བར་དུ་ནི་དེ་ལྟར་ཆོས་བཤད་པར་གནང་ནས་བཤད་དོ་ཞེས་པ་དང༌། གཞན་གྱིས་མི་ནུས་ཞེས་པ་དང༌། བཤད་པའི་དུས་དང༌། བཤད་པས་ཕན་པ་ཐོབ་པ་དང་བཞིར་དབྱེ་སྟེ། འདི་ནི་དང་པོའོ། །ཆོས་ཀྱི་འཁོར་ལོ་གསུམ་དུ་བཟླས་ཏེ་ཞེས་པ་ནི་བདག་གི་དོན་དང༌། གཞན་གྱི་དོན་ལ་འདི་ནི་གཞན་གྱི་དང་སྦྱར་རོ། །
སྡུག་བསྔལ་ཞེས་པ་ནི་སྡུག་བསྔལ་གྱི་བདེན་པ་སྟེ། མཚན་ཉིད་དེ་བསྟན་པའི་ཕྱིར་ཆོས་ཀྱི་འཁོར་ལོ་བསྐོར་བའོ། །འཁོར་ལོའི་དོན་ནི་གོང་དུ་བསྟན་པ་ཡིན། འཁོར་ལོ་དེ་བསྐོར་བས་ཟག་པ་མེད་པའི་ཡེ་ཤེས་སྐྱེ་བར་འགྱུར་བའི་ཕྱིར་བསྟན་ཏོ། །ལན་གསུམ་བཟླས་པ་ཡང་དེ་གཅིག་ཅིང་ཡང་མཚན་ཉིད་བཅུ་གསུམ་དང་ལྡན་པར་སྟོན་པའོ། །དགེ་སྤྱོང་དང༌། ཚངས་པ་གཞན་གྱིས་བསྐོར་མི་ནུས་ཀྱི་བཅོམ་ལྡན་འདས་ཐམས་ཅད་མཁྱེན་པ་ཉག་གཅིག་གིས་ཞེས་པའོ། །མདོ་ལས་འདི་ལྟ་སྟེ་འདི་ནི་སྡུག་བསྔལ་ལོ་ཞེས་པ་ནས་འགྲོ་བ་བསྒྲུབ་པའི་བདེན་པའོ་ཞེས་པའི་བར་དུ་ནི་ཆོས་ཀྱི་འཁོར་ལོ་བསྐོར་བ་ཡང་བདེན་པ་བཞི་ལ་བརྟེན་ཏེ་བསྐོར་བ་དང༌། རྟེན་ཅིང་འབྲེལ་པར་འབྱུང་བ་བཅུ་གཉིས་ལ་བརྟེན་ཏེ་བསྐོར་བའོ། །སྡུག་བསྔལ་བ་ནི་འཇིག་རྟེན་རྣམ་གཉིས་ཀྱི་ཆོས་ཟག་པ་དང་བཅས་པ་ཐམས་ཅད་དོ། །ཀུན་འབྱུང་ནི་སྡུག་བསྔལ་སྐྱེ་ཞིང་འབྱུང་བའི་རྒྱུ་འབྱིན་པ་ལས་དང་ཉོན་མོངས་པའི་རང་བཞིན་ཅན་ནོ། །འགོག་པ་ནི་ཡང་དག་པ་དང་བརྟགས་ཏེ་འགོག་པ་དང༌། མི་གཡོ་བ་དང༌། འདུས་མ་བྱས་འགོག་པའི་བདེན་པ་སྟེ། ཡང་དག་པའི་ལམ་གྱིས་སྡུག་བསྔལ་མི་སྐྱེ་བར་གྱུར་པའོ། །ལམ་ནི་ཟག་པ་མེད་པའི་ཕུང་པོ་ལྔ་སྟེ། ཚོགས་སོགས་པའི་ལམ་དང༌། ལྷག་པར་སྤྱོད་པའི་ལམ་དང༌། མཐོང་བའི་ལམ་དང༌། བསྒོམ་པའི་ལམ་དང༌། མཐར་གྱུར་པའི་ལམ་སྟེ། ལམ་གྱི་འཁོར་རྣམས་ཐམས་ཅད་ནི་ལམ་གྱི་བདེན་པའོ། །བདེན་པ་ཞེས་པ་ནི་འཕགས་པ་རྣམས་ཀྱིས་ཆུད་པའི་ཆོས་པས་འཕགས་པའི་བདེན་པའོ། །མདོ་ལས་རྟེན་ཅིང་འབྲེལ་པར་འབྱུང་བ་ཞེས་བ་ནས་འགག་པར་འགྱུར་རོ་ཞེས་པའི་བར་དུ་ནི་རྟེན་ཅིང་འབྲེལ་པར་འབྱུང་བ་ལུགས་ལས་བཟློག་པ་བསྟན་པ་སྟེ། ཉོན་མོངས་པ་དང༌། རྣམ་པར་བྱང་བའི་ཚུལ་ཅི་རིགས་པར་སྦྱར་རོ། །མ་རིག་པ་ཞེས་པ་ནི་ཉོན་མོངས་པ་མི་ཤེས་པའི་རང་བཞིན་ཅན། འདུ་བྱེད་ནི་ལུས་དང་ངག་དང་ཡིད་གསུམ་གྱི་སྒོ་ནས་དགེ་བ་དང་མི་དགེ་བར་འཇུག་པའོ། །རྣམ་པར་ཤེས་པ་ཞེས་པ་ནི་རྣམ་པར་སྨིན་པའི་རང་བཞིན་ཅན་ས་བོན་གྱི་བག་ཆགས་སུ་གནས་པའི་རྣམ་པར་ཤེས་པའོ། །མིང་དང་གཟུགས་ཞེས་པ་ནི་དེའི་འོག་མའི་རྐྱེན་གསུམ་སྤངས་པ་
ཐམས་ཅད་ནི་མིང་དང་གཟུགས་སོ། །སྐྱེ་མཆེད་དྲུག་ནི་རྣམ་པར་སྨིན་པའི་དབང་པོ་དྲུག་ཅན་ནོ། །རེག་པ་ནི་རྣམ་པར་སྨིན་པའི་རེག་པ་མྱོང་བ་ཉིད་རེག་པའོ། །ཚོར་བ་ནི་རྣམ་པ་གསུམ་མྱོང་བའོ། །སྲེད་པ་ནི་ཕྱི་ནང་གི་ཡུལ་ལ་ཆེ་ཆུང་རྣམ་པ་གསུམ་དུ་ཞེན་པའོ། །ལེན་པ་ནི་ཉོན་མོངས་པའི་བདག་ཉིད་ཅན་གཟུང་བ་དང་འཛིན་པའི་ཆོས་ཀྱི་ཉོན་མོངས་པའི་ཕུང་པོ་ལེན་པའོ། །སྲིད་པ་ནི་རྣམ་པར་སྨིན་པའི་འབྲས་བུ་འཁོར་བ་ལེན་ཅིང་ཁམས་གསུམ་དུ་འབྱུང་ཞེས་པའི་དོན་ཏོ། །སྐྱེ་བ་ནི་རྒྱུས་འཕགས་ནས་འབྲས་བུ་ལེན་པའོ། །རྒས་པ་ནི་འབྲས་བུའི་མཐར་གྱུར་པའོ། །སློས་བའི་མྱ་ངན་ཞེས་པ་ནི་འཆི་ཁར་ཡིད་ཀྱིས་གདུང་བའོ། །སྨྲེ་སྔགས་འདོན་ཞེས་པ་ནི་ཚིག་ཏུ་འདོན་པའོ། །ཡིད་མི་བདེ་བ་དང་འཁྲུག་པ་ནི་ནང་གི་གདུང་བ་སྟེ། ཞིབ་ཏུ་ཆོས་མངོན་པ་དང༌། རྣལ་འབྱོར་སྤྱོད་པ་ལས་འབྱུང་བ་བཞིན་དུ་ཆོས་ཀྱི་འཁོར་ལོ་བསྐོར་བའོ། །མདོ་ལས་དེ་ལྟར་དགེ་སློང་རྣམས་ཞེས་པ་ནས་བསམ་གཏན་བྱེད་པར་གྱུར་ཏོ་ཞེས་པའི་བར་དུ་ནི་སོ་སོ་ནས་བདེ་བ་ཐོབ་པ་བསྟན་ཏོ། །ལེན་པ་ཞེས་པ་ནི་ཆགས་པས་ཏེ། ཆོས་རྣམས་ལ་ཆགས་པ་མེད་པ་ཉིད་རྣམ་པར་གྲོལ་བའོ། །མདོ་ལས་དེ་ནས་ཡང་མཐར་གྱིས་ཞེས་པ་ནས་རྣམ་པར་གྲོལ་ལོ་ཞེས་པའི་བར་དུ་ནི་དེའི་འོག་མ་རྣམས་ཀྱང་དེ་བཞིན་དུ་རྣམ་པར་གྲོལ་བ་ཐོབ་པོ་ཞེས་པའོ། །མདོ་ལས་དེའི་འོག་ཏུ་དགེ་སློང་ཕ་རྣམས་ཞེས་པ་ནས་གྲངས་བསྒྲང་བ་ལས་འདས་པར་གྱུར་པའོ་ཞེས་པའི་བར་དུ་ནི་ཉན་ཐོས་པ་རྣམས་ཀྱི་འཁོར་བསྟན་ཏོ། །མདོ་ལས་དེ་ནས་དགེ་སློང་རྣམས་ཡང་དེའི་ཚེ་ཞེས་པ་ནས་བྱང་ཆུབ་འདོད་པ་ཞེས་པའི་བར་དུ་ནི་རྗེས་སུ་ཆོས་སྟོན་པ་སྟེ། རྒྱལ་བུ་བཅུ་དྲུག་གི་ཡོན་ཏན་ནི་འཁོར་བའི་དྲ་བ་གཅོད་པས་རབ་ཏུ་བྱུང་བ་ཆོས་ཐོས་བས་དབང་པོ་རྣོ་བ། རང་བཞིན་གསལ་བས་ཤེས་རབ་རྣོ་བ། སྔོན་དེ་བཞིན་གཤེགས་པ་ལ་བསྙེན་བཀུར་བྱས་པས་དགེ་བའི་བཤེས་གཉེན་དང་ཕྲད་པ་དང༌། ཚུལ་ཁྲིམས་གཙང་མས་འབྲས་བུ་ཆེན་པོ་ལ་རེ་བའོ། །མདོ་ལས་དེ་ནས་དགེ་སློང་རྣམས་དགེ་སྦྱོང་དེ་དག་གི་ཞེས་པ་ནས་བདག་ཅག་གི་བསམ་པ་ཡང་མཁྱེན་ཏེ་ཞེས་པའི་བར་དུ་ནི་སྔར་ཉན་ཐོས་པ་རྣམས་དེ་དང་མཐུན་པའི་ཆོས་བཤད། བྱང་ཆུབ་སེམས་དཔའི་རིགས་ཅན་
རྣམས་ལ་ཐེག་པ་ཆེན་པོ་བཤད་དུ་གསོལ་ཞེས་པའོ། །མདོ་ལས་དེ་ནས་དེ་དག་དགེ་སློང་རྣམས་དེའི་ཚེ་ན་ཞེས་པ་ནས་རབ་ཏུ་བྱུང་བར་གྱུར་ཏོ་ཞེས་པའི་བར་དུ་ནི་དེ་དང་མཐུན་པའི་འཁོར་རྣམས་རབ་ཏུ་བྱུང་བའོ། །མདོ་ལས་དེ་ནས་དགེ་སློང་རྣམས་ཞེས་པ་ནས་དེ་དག་ཐམས་ཅད་ལ་རྒྱས་པར་བཤད་དོ་ཞེས་པའི་བར་དུ་ནི་འདིས་ནི་སེམས་ཅན་གྱི་དབང་པོ་སྨིན་པའི་ཕྱིར་བསྐལ་པ་སྟོང་ཕྲག་ཉི་ཤུའི་འོག་ཏུ་བཤད་པའི་དུས་ལ་བབ་པ་དང༌། བཤད་པར་བྱ་བའི་ཆོས་གང་ཡིན་པ་བསྟན་པའོ། །མདོ་ལས་དེ་ནས་ཡང་དགེ་སློང་རྣམས་ཞེས་པ་ནས་ཁོང་དུ་ཆུད་དོ་ཞེས་པའི་བར་དུ་ནི་དགེ་སློང་རྣམས་ཀྱིས་ཆུད་པར་བསྟན་ཏོ། །མདོ་ལས་དེ་ནས་དགེ་སློང་རྣམས་ཞེས་པ་ནས་ཐེ་ཚོམ་ཟབ་ཐོབ་པར་གྱུར་ཏོ་ཞེས་པའི་བར་དུ་ནི་འདིས་དབང་པོའི་རིམ་བ་སྟོན་ཏེ། དབང་པོ་རྣོན་པོ་དང་བར་མས་རྣམ་པར་གྲོལ་བ་ཐོབ་པ་དང༌། དབང་པོ་ཐ་མ་ཐེ་ཚོམ་དུ་གྱུར་པ་སྟེ། ཆོས་འདི་གོ་དཀའ་བར་སྟོན་ཏོ། །མདོ་ལས་དེ་ནས་དགེ་སློང་རྣམས་བཅོམ་ལྡན་འདས་ཞེས་པ་ནས་གཙུག་ལག་ཁང་དུ་ཞུགས་སོ་ཞེས་པའི་བར་དུ་ནི་སྲས་རྣམས་དབང་པོ་སྨིན་ཅིང་སེམས་ཅན་སྒྲོལ་ནུས་པར་བསྟན་པའི་ཕྱིར་བཅོམ་ལྡན་འདས་ཏིང་ངེ་འཛིན་དུ་ཞུགས་པ་བསྟན་པའོ། །མདོ་ལས་དེ་ནས་དགེ་སློང་རྣམས་དགེ་སྦྱོང་དེ་དག་གི་ཞེས་པ་ནས་རྒྱས་པར་བཤད་དོ་ཞེས་པའི་བར་དུ་ནི་སྲས་རྣམས་ཆོས་སྟོན་པས་འགྲོ་བ་རྣམས་ཀྱི་བདེ་བ་རྙེད་པ་བསྟན་པའོ། །མདོ་ལས་བྱང་ཆུབ་སེམས་དཔའ་རེ་རེས་ཀྱང་ཞེས་པ་ནས་ཡོངས་སུ་སྨིན་པར་བྱས་སོ་ཞེས་པའི་བར་དུ་ནི། བདེན་པ་དངོས་བསྟན་པ་དང༌། མོས་པ་རྙེད་པ་རྣམས་སྤྲོ་བར་བྱས་པ་དང༌། ཉམས་ཀྱིས་དོགས་པ་རྣམས་གཟེངས་བསྟོད་དེ་དགའ་བར་བྱས་པ་དང༌། འབད་པ་རྣམས་བསྟོད་ཅིང་བྱེད་དུ་གཞུག་པ་ཞེས་པའོ། །མདོ་ལས་དེ་ནས་དགེ་སློང་རྣམས་ཞེས་པ་ནས་བརྒྱ་སྟོང་མང་པོ་ལ་ཆོས་སྟོན་ཏོ་ཞེས་པའི་བར་དུ་ནི་དགེ་སྦྱོང་དྲུག་ཅུ་པོ་དེ་དག་ལ་བསྟོད་པ་དང་ལུང་བསྟན་པ་སྟེ། བསྟོད་པ་ཡང་ངོ་མཚར་དུ་གྱུར་པ་དང༌། དབང་པོ་རྣོ་བ་དང༌། རིག་པ་དང་ལྡན་པ་དང༌། འཕགས་པ་རྣམས་ལ་བསྙེན་བཀུར་བྱས་པ་དང༌། དཀའ་བ་སྤྱོད་པ་དང༌། དེ་བཞིན་གཤེགས་པའི་ཡེ་ཤེས་འཛིན་པ་དང༌། སེམས་ཅན་རྣམས་
ལ་ཆོས་སྟོན་པའོ། །མདོ་ལས་འདི་ལྟ་སྟེ་དགེ་སློང་རྣམས་ཞེས་པ་ནས་སངས་རྒྱས་སོ་ཞེས་པའི་བར་དུ་ནི་སངས་རྒྱས་དེ་དག་ནི་ཉོན་མོངས་པས་མི་བསྒུལ་བ་དང༌། ཡོན་ཏན་འཕགས་པ་དང༌། སེང་གེ་བཞིན་སྒྲ་མི་འཇིགས་པ་སྒྲོགས་པ་དང༌། བདུད་ཀྱི་དཔུང་འཇོམས་པ་ལ་བཏགས་སོ། །མདོ་ལས་ལྷོ་ཕྱོགས་ན་ཞེས་པ་ནས། སངས་རྒྱས་སོ་ཞེས་པའི་བར་དུ་སངས་རྒྱས་ཀྱི་མཚན་དེ་དག་ཉོན་མོངས་པ་འཇོམས་པ་དང༌། ཡོན་ཏན་གྱི་མཚན་ཉིད་ལ་གནས་པ་དང༌། བདག་དང་གཞན་གྱི་དོན་མཛད་པ་ལས་བཏགས་པ་ལས་ཞེས་པར་བྱའོ། །མི་མཇེད་ཅེས་པ་ནི་འཇིག་རྟེན་གྱི་ཁམས་དེ་སྡུག་བསྔལ་སྣ་ཚོགས་སྤྱོད་པ་ལ་ཇི་མི་སྙམ་པའི་ཕྱིར་མི་མཇེད་པ་དང༌། ཤཱཀྱ་ཐུབ་པའི་སངས་རྒྱས་ཀྱི་ཞིང་ངོ༌། །མདོ་ལས་དགེ་སློང་རྣམས་ཞེས་པ་ནས་ཡེ་ཤེས་དེ་ལ་མོས་པར་དཀའོ་ཞེས་པའི་བར་དུ་ནི་མདོ་སྡེ་འདི་ལ་འཇུག་པར་དཀའ་བའི་ཕྱིར་སྔར་དྲང་པའི་དོན་བསྟན། ཕྱིས་ངེས་པའི་དོན་བསྟན་ཅིང་མོས་པ་སྐྱེས་པའོ། །མདོ་ལས་དེ་ཅིའི་ཕྱིར་ཞེ་ན་ཞེས་པ་ནས་དགེ་སློང་རྣམས་ང་བྱང་ཆུབ་སེམས་དཔར་གྱུར་ཏོ་ཞེས་པའི་བར་དུ་ནི་བསྡུས་པའོ། །མདོ་ལས་ང་མྱ་ངན་ལས་འདས་ནས་ཞེས་པ་ནས་མྱ་ངན་ལས་འདའ་བར་འགྱུར་རོ་ཞེས་པའི་བར་དུ་ནི་འཕགས་པ་ཉན་ཐོས་པ་རྣམས་མཐར་བླ་ན་མེད་པའི་སངས་རྒྱས་སུ་གྲུབ་པར་འགྱུར་རོ་ཞེས་པ་ནི་སངས་རྒྱས་བཞུགས་ཏེ། དགེ་བའི་བཤེས་གཉེན་གྱིས་བླ་ན་མེད་པའི་གནས་སུ་བསྒྱུར་བ་བཞུགས་ན་ནི་དེ་ལྟར་ཡང་རུང་ན་སངས་རྒྱས་མི་བཞུགས་པའི་ཁམས་སུ་ཉན་ཐོས་ལ་སོགས་པའི་རིགས་སུ་སེམས་བསྐྱེད་པ་རྣམས་བྱང་ཆུབ་སེམས་དཔའ་སྤྱོད་པ་རྒྱ་ཆེན་པོ་མ་ཐོས་པའི་རྣམས་ཐལ་བྱུང་ཉན་ཐོས་པའི་རིགས་སུ་ལྟུང་ཞིང་ལྷག་མ་མ་ལུས་པའི་མྱ་ངན་ལས་འདས་པར་མི་འཇུག་གམ་ཞེས་པའི་དོགས་པ་བསལ་བའི་ཕྱིར་འདི་སྨྲས་པ་སྟེ། དེ་ལ་ཡང་དང་པོ་གླེང་བ་དང༌། དེ་ཡང་སངས་རྒྱས་སུ་གྲུབ་པ་དང༌། དེ་གྲུབ་པའི་གཏན་ཚིགས་ཏེ། འདི་ནི་དང་པོའོ། །མདོ་ལས་ཡང་དགེ་སློང་རྣམས་འཇིག་རྟེན་གྱི་ཁམས་གཞན་དུ་ཞེས་པ་ནས་ཡེ་ཤེས་ཚོལ་ཞིང་སྐྱེའོ་ཞེས་པའི་བར་དུ་ནི་དེ་སངས་རྒྱས་སུ་གྲུབ་པ་བསྟན་ཏེ། བཅོམ་ལྡན་འདས་ཁམས་འདིར་མྱ་ངན་ལས་འདས་པ་སྟོན་ཀྱང་ཡུལ་ཁམས་གཞན་དུ་སེམས་ཅན་གྱི་དོན་
མཛད་པར་ཉན་ཐོས་རྣམས་ཀྱང་དེར་སྐྱེ་བ་དང༌། དེར་སྐྱེ་བ་ཡང་ཉན་ཐོས་ཀྱི་བསྐལ་བ་སྨིན་པ་དང༌། དེ་བཞིན་གཤེགས་པའི་ཐུགས་རྗེས་ཀྱང་སྐྱབས་ཏེ། དེར་སྐྱེ་བས་སངས་རྒྱས་སུ་ལུང་སྟོན་ཏོ། །མདོ་ལས་དེ་ནས་ཡང་དེ་བཞིན་གཤེགས་པའི་ཞེས་པ་ནས་ཡིན་པར་རིག་པར་བྱ་བ་ཞེས་པའི་བར་དུ་ནི་དེ་གྲུབ་པའི་གཏན་ཚིགས་བསྟན་ཏེ། ཐེག་པ་དེ་གཉིས་ཀྱང་མཐར་ཐེག་པ་ཆེན་པོར་འདུ་སྟེ། མྱ་ངན་ལས་འདས་པར་འགྱུར་གྱིས་ལོགས་ཤིག་ན་མྱ་ངན་ལས་འདས་པ་མེད་དེ། གཉིས་དང་གསུམ་བསྟན་པ་ཡང་སེམས་ཅན་གྱི་དབང་པོ་མི་མཐུན་པ་ལས་ཐབས་ཀྱིས་བཤད་པར་ཟད་ཀྱི་ངེས་པར་གཉིས་དང་གསུམ་དུ་མེད་དོ། །མྱ་ངན་ལས་འདས་པ་ཆེན་པོའི་མདོ་ལས་ཀྱང༌། མྱ་ངན་ལས་འདས་པ་ནི་ཇི་ལྟ་བུ། མྱ་ངན་ལས་འདས་པ་ཆེན་པོ་ནི་ཇི་ལྟ་བུ་ཞེས་དྲིས་པ་དང༌། ཉན་ཐོས་དང་རང་སངས་རྒྱས་བསྐལ་བ་བརྒྱད་ཁྲིའམ། དྲུག་ཁྲིའམ། བཞི་ཁྲིའམ། ཉི་ཁྲིའམ། ཁྲི་གཅིག་གི་བར་དུ་བཞུགས་པའི་གནས་དེ་ནི་མྱ་ངན་ལས་འདས་པའོ། །འཕགས་པ་ཆོས་ཀྱི་རྒྱལ་པོའི་གནས་དེ་ནི་མྱ་ངན་ལས་འདས་པ་ཆེན་པོ་ཞེས་གསུངས་སོ།། །།དམ་པའི་ཆོས་པུཎྜ་རཱི་ཀའི་འགྲེལ་པ། བམ་པོ་བརྒྱད་པ་སྟེ་ཐ་མ། མདོ་ལས་དགེ་སློང་རྣམས་གང་གི་ཚེ་ན་ཞེས་པ་ནས་བསམ་གཏན་ཆེན་པོ་དང་ལྡན་པ་གཟིགས་ན་ཞེས་པའི་བར་དུ་ནི་རྣམ་པ་གསུམ་དུ་དབྱེ་སྟེ། དོན་དང༌། དཔེ་དང༌། བསྡུ་བའོ། །དང་པོ་ལ་ཡང་རྣམ་པ་གཉིས་ཏེ། སྔར་ནི་ངེས་པའི་དོན་བསྟན་ཕྱིས་ནི་དྲང་བའི་དོན་བསྟན་ཡང་སྤྱིར་ནི་རྣམ་པ་གཉིས་ཏེ། དབང་པོ་སྨིན་པའི་དུས་དང༌། ཐེག་པ་གཅིག་ཏུ་བཤད་པའོ། །དབང་པོ་སྨིན་པ་ཡང་མྱ་ངན་ལས་འདའ་བའི་དུས་སུ་བསྟན་པ་དང༌། ཉོན་མོངས་པ་ཟད་ཅིང་རྣམ་པར་བྱང་བ་བསྟན་པ་དང༌། ཐེག་པ་རྣམ་པ་གསུམ་ཉོན་མོངས་པ་ལས་འབྱུང་བར་བསྟན་པ་དང་སྟོང་པ་ཉིད་རྟོགས་པ་དང༌། ཏིང་ངེ་འཛིན་ལ་མཉམ་པར་འཇོག་པ་སྟེ། ཏིང་ངེ་འཛིན་ནི་བསམ་གཏན་བཞི་དང༌། དགུ་ལས་ལྡང་བ་དང༌། འཇུག་པ་བསྟན་ཏོ། །མདོ་ལས་དགེ་སློང་རྣམས་དེ་བཞིན་གཤེགས་པ་ཞེས་པ་ནས་གསུམ་དུ་ལྟ་སྨོས་པའི་བར་དུ་ནི་ཐེག་པ་གཅིག་པོའི་དོན་བསྟན་ཏེ། དགོངས་པ་ངེས་པར་འགྲེལ་པ་ལས་ནི་ཐེག་པ་རྣམ་བཞིར་བསྟན་པ་ནི་ངེས་
པའི་དོན་ཏེ། ཐེག་པ་གཅིག་པུ་སྟོན་པ་ནི་བཀྲི་བའི་དོན་ཞེས་སྟོན་ཏེ། འདིས་ནི་བྱང་ཆུབ་ཀྱི་སེམས་ལས་ལོག་པ་རྣམས་ཟློག་པའི་དོན་དུ་སྟོན་པས་འདིར་ཐེག་པ་གཅིག་པུ་འདི་ངེས་པའི་དོན་དུ་སྟོན་ཏོ། །མདོ་ལས་དགེ་སློང་རྣམས་འདི་ནི་ཞེས་པ་ནས་མྱ་ངན་ལས་འདའ་བ་འཆད་དོ་ཞེས་པའི་བར་དུ་ནི་འདིས་དང་བའི་དོན་གྱི་གཏན་ཚིགས་བསྟན་ཏེ། སེམས་ཅན་དད་པ་མི་མཐུན་པ་རྣམས་སོ་སོའི་ཡིད་དང་མཐུན་པར་ཐབས་ཀྱི་ཆོས་སྟོན་ཏེ། སེམས་ཅན་དབང་པོ་ཞན་པ་འདོད་པ་རྣམ་ལྔ་ལས་ཟློག་པའི་དོན་ཙམ་དུ་འཁོར་བ་ལས་ཟློག་པ་བསྟན། དེ་ལས་བཟླ་བའི་ཕྱིར་ཐེག་པ་གཅིག་པོ་རིན་པོ་ཆེའི་འབྱུང་གནས་སུ་འཛུད་དོ། །མདོ་ལས་འདི་ལྟ་སྟེ་དགེ་སློང་རྣམས་དཔེ་ལས་ཞེས་པ་ནས་ལྷག་པར་གྱུར་ཏོ་ཞེས་པའི་བར་དུ་ནི་དཔེ་འདིས་ནི་སྔར་དྲང་བའི་དོན་གྱི་དཔེ་བསྟན། ཕྱིས་ནི་ངེས་པའི་དོན་གྱི་དཔེ་སྟོན་ཏེ། དེ་དྲང་བའི་དོན་ལ་ཡང་དཔེ་རྣམ་པ་བཞི་སྟེ། མྱ་ངན་དགོན་པ་ལས་བསྒྲལ་བའི་དཔེ་དང༌། འཁོར་རྣམས་སེམས་ནུར་བའི་དཔེ་དང༌། ཚོང་དཔོན་ཐབས་མང་པོ་སྟོན་པའི་དཔེ་དང༌། གླིང་དུ་ལྟ་བ་སྟོན་པའི་དཔེ་དང༌། འདི་ནི་དང་པོའོ། །དཔག་ཚད་ལྔ་བརྒྱ་ཞེས་པ་ནི་འགྲོ་བ་རྣམ་ལྔར་འཁོར་བའོ། །རིན་པོ་ཆེའི་གླིང་ཞེས་པ་ནི་མྱ་ངན་ལས་འདས་པའི་གླིང་ངོ༌།། མདོ་ལས་དེ་དག་ལས་མྱ་ངན་ལས་འདས་པའི་མཚན་མ་གཅིག་པོ་ཞེས་པ་ནས་དེ་དག་སྒྲོལ་ལོ་ཞེས་པའི་བར་དུ། མཚན་མ་ཞེས་པ་ནི་སངས་རྒྱས་བཅོམ་ལྡན་འདས་ཏེ། དེའི་ཡོན་ཏན་ཡང་ལྔའོ། །གསལ་བ་ཞེས་པ་ནི་དབང་པོ་རྣོ་བའོ། །མཁས་པ་ཞེས་པ་ནི་དགེ་ངན་འབྱེད་པའོ། །རིག་པ་ཞེས་པ་ནི་དོན་དམ་པ་དང་ཀུན་རྫོབ་རིག་པའོ། །དགེ་བ་ཞེས་པ་ནི་ཡོན་ཏན་ཐམས་ཅད་དང་ལྡན་པའོ། །ལམ་ལ་སྒྲོལ་བ་ནི་འགྲོ་བ་རྣམ་ལྔ་ལས་སྒྲོལ་བའོ། །མདོ་ལས་དེ་དག་འགྲོ་བ་མང་པོ་ཞེས་པ་ནས་སླར་ལྡོག་གོ་ཞེས་པའི་བར་དུ་ནི་འདིས་ལྡོག་པའི་དཔེ་བསྟན་ཏེ། ཐེག་པ་ཆེན་པོའི་སྒྲུབ་པ་བསྐལ་པ་དྲུག་ཅུའི་བར་དུ་དཀའ་བ་སྤྱོད་པ་བྱང་ཆུབ་སེམས་དཔའ་སྤྱོད་པས་དུབ་པ་དང༌། འཕགས་པའི་སྤྱོད་པས་སྐྲག་ཅིང་འབྲས་བུ་ཆུང་དུ་ལ་གཞོལ་བར་སེམས་པའོ། །མདོ་ལས་དེ་ནས་དགེ་སློང་རྣམས་ཞེས་པ་ནས་གྲོང་ཁྱེར་མངོན་པར་སྤྲུལ་ཞེས་པའི་བར་དུ་ནི་སྤྲུལ་པའི་གྲོང་ཁྱེར་
བསྟན་པའི་དཔེ་སྟེ། དེ་ལ་ཡང་སེམས་སུ་གཞུག་པ་དང༌། གྲོང་ཁྱེར་བསྟན་པ་དང༌། དེར་འཇོག་པ་དང༌། གྲོང་ཁྱེར་དེའི་ཡོན་ཏན་བསྟན་པ་དང་བཞི་སྟེ། འདི་ནི་དང་པོའི་གཉིས་པ་དང་སྦྱར་རོ། །ཐེག་པ་ཆེན་པོ་བསྡུས་པ་ལས་ཀྱང་ཇི་ལྟར་ལྷའི་རྔ་ཆེད་དུ་བསམས་པ་མེད་པ་འབད་པ་མེད་པར་སྒྲ་འབྱུང་བ་བཞིན་དེ་བཞིན་གཤེགས་པའི་ཐུགས་རྗེས་སེམས་ཅན་རྣམས་ལ་ཉིན་ལན་གསུམ་མཚན་ལན་གསུམ་གཟིགས་པ་ཡང་ལྷུན་གྱིས་གྲུབ་པའི་དབང་གིས་དགོངས་ཞེས་པའི་དོན་ཏོ། །དཔག་ཚད་བརྒྱ་འམ་ཉིས་བརྒྱ་ཞེས་པ་ནི་འཁོར་བའི་གནས་དང་སྡུག་བསྔལ་གྱིས་ཅི་རིགས་པར་སྦྱར་རོ། །གྲོང་ཁྱེར་ཞེས་པ་ནི་བསམ་གཏན་དང་ཏིང་ངེ་འཛིན་གྱི་གྲོང་ཁྱེར་ཏེ། ཐེག་པ་ཆེན་པོའི་མྱ་ངན་ལས་འདས་པ་ཉིད་དང་སྦྱར་རོ། །མདོ་ལས་དེས་སྐྱེས་བུ་དེ་དག་ལ་ཞེས་པ་ནས་རིན་པོ་ཆེའི་གླིང་དེར་དོང་ངོ་ཞེས་པའི་བར་དུ་ནི་དེར་གནས་པ་དང༌། འཇིགས་པ་མེད་པ་དང། གྲོང་ཁྱེར་དེར་ཞུགས་པའི་ཡོན་ཏན་བསྟན་ཏོ། །དེར་འཇུག་པའི་ཡོན་ཏན་ཡང་བདེ་བ་ཐོབ་པ་དང༌། སྡུག་བསྔལ་ཞི་བར་གྱུར་པའོ། །མདོ་ལས་དེ་ནས་དགེ་སློང་རྣམས་ཞེས་པ་ནས་བསིལ་བར་འདུ་ཤེས་སོ་ཞེས་པའི་བར་དུ་ནི་དུབ་པ་རྣམས་བསྟི་བའི་དཔེ་བསྟན་པ་སྟེ། དེ་ལ་ཡང་རྣམ་པ་གཉིས་སོ། །སྔར་སློབ་པ་རྣམས་སེམས་བསྡུ་ཞིང་བརྩོན་པ་བསྐྱེད་པ་དང༌། ཕྱིས་མི་སློབ་པ་རྣམས་རྣམ་པར་གྲོལ་བའི་ལམ་ལ་གཟུད་ཅིང་ལྷག་མ་དང་བཅས་པའི་མྱ་ངན་ལས་འདས་པར་འགྱུར་བའི་འཆི་འཕོ་ལས་མ་བྲལ་བའི་ཕྱིར་གྲོང་ཁྱེར་དུ་ཞུགས་པའི་བསམ་པ་བསྐྱེད་པ་དང༌། མི་སློབ་པའི་ས་ཐོབ་པ་འགོག་པ་དང༌། ལམ་གྱི་མཐར་ཕྱིན་པ་དག་ཀྱང་རྒལ་བ་དང་བསིལ་བའི་འདུ་ཤེས་བསྐྱེད་པའོ། །མདོ་ལས་མཚན་མས་ངལ་སོས་པར་ཤེས་ནས་ཞེས་པ་ནས་ཁྱེད་འདོད་ངོ་ཞེས་པའི་བར་དུ་ནི། དཔེ་རྣམ་པ་གཉིས་ལ་འདི་ནི་ངེས་པའི་དོན་བསྟན་ཏེ། སྔར་ནི་སྤྲུལ་པ་བསྟན། ཕྱིས་ནི་ཡང་དག་པ་བསྟན་ཏེ། སྤྲུལ་པའི་གྲོང་ཁྱེར་ཞེས་པ་ནི་ཐེག་པ་རྣམ་པ་གཉིས་ཀྱི་གནས་ཏེ་བསྟི་བའི་གནས་དེ་བསྟི་བའི་གནས་དང་འདྲ་བར་བསྟན་པ་ཡིན་གྱི། ཐེག་པ་ཆེན་པོ་རིན་པོ་ཆེའི་འབྱུང་གནས་དེ་ནས་ཉེ་ཞེས་པར་དཔེ་སྨྲས་པ་ཡིན་ནོ། །མདོ་ལས་
དེ་བཞིན་དུ་དགེ་སློང་རྣམས་ཞེས་པ་ནས་སྤང་བར་བྱའོ་ཞེས་པའི་བར་དུ་ནི་དོན་ཕྱི་མ་དེང་སྦྱར་བ་སྟེ། སྔར་ནི་དྲང་བ་དང་སྦྱར་ཕྱིས་ནི་ངེས་པ་དང་སྦྱར་ཏེ། འཁོར་བ་དང་སྡུག་བསྔལ་ལས་རྒལ་བ་དང་སྤངས་པའོ། །མདོ་ལས་དེ་ནས་སེམས་ཅན་འདི་དག་ཅེས་པ་ནས་མི་རུང་གི་ཞེས་པའི་བར་དུ་ནི་འདིས་ནི་བྱང་ཆུབ་སེམས་དཔའི་སྤྱོད་པ་དཀའ་བ་ལ་སེམས་ཞུམ་པ་བསྟན་པའོ། །མདོ་ལས་དེ་བཞིན་གཤེགས་པས་ཞེས་པ་ནས་ས་གཉིས་བསྟན་ཏོ་ཞེས་པའི་བར་དུ་ནི་དཔེ་དང་དོན་དུ་སྦྱར་བ་སྟེ། ས་གཉིས་ཞེས་པ་ནི་དབང་པོ་གཉིས་ཀྱིས་བསླབ་པར་བྱ་བ་དང༌། ཡེ་ཤེས་གཉིས་པས་ཆུད་པར་བྱ་བའི་སའོ། །མདོ་ལས་དགེ་སློང་རྣམས་གང་གི་དུས་ན་ཞེས་པ་ནས་ཐབས་མཁས་པའོ་ཞེས་པའི་བར་དུ་ནི་དཔེ་འོག་མས་ངེས་པའི་དོན་དང་སྦྱར་བ་སྟེ། བྱ་བ་མ་བྱས་ཞེས་པ་ནི་སྐྱེ་བའི་ལྷག་མ་ལུས་པའོ། །གང་སྐྱེ་བའི་ལྷག་མ་ལུས་པ་ནི་ཚངས་པར་སྤྱོད་པ་མ་སྤྱད་པས་མཐར་མ་ཕྱིན་པ་དང་སྦྱར་རོ། །ལྟོས་ཤིག་རྟོགས་ཤིག་པ་ནི་སྡུག་བསྔལ་དང་ཀུན་འབྱུང་གི་ཡེ་ཤེས་ལ་འཇུག་པའོ། །མདོ་ལས་དེ་ནས་བཅོམ་ལྡན་འདས་ཀྱིས་ཞེས་པ་ནས་རྒྱལ་བ་དེ་ལ་མཆོད་ཅིང་བཀུར་སྟི་བྱེད་ཅེས་པའི་བར་དུ་ནི་འདི་མན་ཆད་ཚིགས་སུ་བཅད་པ་བཞི་བཅུ་རྩ་དགུ་ལས་སུམ་ཅུ་རྩ་ཕྱེད་དང་གཅིག་གིས་ནི་སྔོན་གྱི་རྒྱུ་བསྟན། དེའི་འོག་མ་རྣམས་ཀྱིས་ནི་ད་ལྟར་གྱི་འབྲས་བུ་བསྟན་ཏོ། །མདོ་ལས། དེ་ནས་རྒྱལ་བས་སྡུག་བསྔལ་བ། །ཞེས་པ་ནས། ཚངས་པའི་གཞལ་མེད་ཁང་རྣམས་རབ་ཏུ་བསྐྱོད། །ཅེས་པའི་བར་དུ་ནི་ཆོས་བཤད་པར་གསོལ་བ་སྟེ་ཅི་རིགས་པར་སྦྱར་རོ། །མདོ་ལས་ཤར་ཕྱོགས་སུ་བྱེ་བ་སྟོང་ཕྲག་ནི་ཞེས་པ་ནས། མི་ཡི་འཆི་བདག་དེ་ཡང་ཤེས་པར་བྱ། །ཞེས་པའི་བར་དུ་ནི་ཆོས་བཤད་པར་གསོལ་བ་དང༌། ཡང་དག་པར་སྟོན་པ་འཆད་པ་དང༌། སེམས་ཅན་རྣམས་ཀྱིས་ཕན་པ་ཐོབ་པའོ། །མདོ་ལས། དེ་ཡི་ཆོས་རྣམས་བཤད་མ་ཐག་ཏུ་ནི། །ཞེས་པ་ནས་དེ་དག་མཐར་མི་ཕྱིན་ཞེས་པའི་བར་དུ་ནི་སེམས་ཅན་གྱི་ཕན་པ་ཐོབ་པ་བསྟན་ཏོ། །མདོ་ལས། རྒྱལ་བུ་བཅུ་དྲུག་དེ་དག་ཀྱང༌། །ཞེས་པ་ནས། ཇི་ལྟར་དཔའ་བོ་སྤྱན་གཙང་ཁྱོད་བཞིན་དུ། །ཞེས་པའི་བར་དུ་ནི་ཆོས་ཀྱི་སྲས་ཀྱི་རྒྱུད་བསམ་པ་བསྟན་ཏེ། མདོ་ལས་འབྱུང་
པ་བཞིན་དུ་གོ་བར་གྱིས་ཤིག །མདོ་ལས། རྒྱལ་བ་དེས་ནི་དེ་དག་བསམ་མཁྱེན་ནས། །ཞེས་པ་ནས། དགེ་སློང་གནས་བརྟན་འཇིགས་པར་མ་བྱེད་ཅིག །ཅེས་པའི་བར་དུ་ནི་ཚིག་ལྷུག་པ་དང་སྦྱར་ཞིང་གོ་བར་གྱིས་ཤིག །མདོ་ལས། ཇི་ལྟར་དགོན་པ་མ་རུངས་འཇིགས་པར་འགྱུར། །ཞེས་པ་ནས། དགོན་པ་མྱ་ངན་རབ་ཏུ་འཇིགས་པ་ཡི། །ཞེས་པའི་བར་དུ་ནི་འདི་མན་ཆད་ཚིགས་བཅད་བཅུ་དགུས་འབྲས་བུ་ཐོབ་པ་དང༌། བཀྲི་བའི་དོན་སྤངས་ཤིང་ངེས་པའི་དོན་ལ་འཇུག་པ་བསྟན་ཏོ། །གཅན་གཟན་འཇིགས་པ་ལས་སྒྲོལ་བ་ནི་ཉོན་མོངས་པའི་ལས་སྣ་ཚོགས་སོ། །ཆུ་ཞེས་བྱ་བ་ནི་དེ་བཞིན་གཤེགས་པའི་བསྟན་པས་དབུགས་འབྱིན་ཞེས་པའོ། །མདོ་ལས་སྲོག་ཆགས་བྱེ་བ་སྟོང་པོ་དག་སྐྱེའོ་ཞེས་པ་ནས། ལྡོག་པར་དགའ་ཞེས་པའི་བར་དུ་ནི་ལྡོག་པའི་དཔེ་བསྟན་ཏོ། །མདོ་ལས། དེ་ནས་མཁས་ཤིང་རྟོགས་པ་དེ་ཡིན་ཞེས་པ་ནས་ཕྱིར་ཟློག་པ་ཞེས་པའི་བར་དུ་ནི་སྤྲུལ་པའི་གྲོང་ཁྱེར་ཤོམ་པའི་དཔེའོ། །མདོ་ལས། འདི་ལྟར་ང་ཡི་རྫུ་འཕྲུལ་སྟོབས་ཀྱིས་དེང༌། །ཞེས་པ་ནས། སྐྱེས་པ་བུད་མེད་མཚུངས་མེད་ལྡན། །ཞེས་པའི་བར་དུ་ནི་གྲོང་ཁྱེར་མངོན་པར་སྤྲུལ་པ་ཉིད་བསྟན་ཏེ། གྲོང་ཁྱེར་ཞེས་པ་ནི་མྱ་ངན་ལས་འདས་པའི་གྲོང་ཁྱེར་རོ། །ཁང་པ་ཞེས་པ་ནི་སྟོང་པ་ཉིད་ཀྱི་མཐའ་སྟེ། མདོ་དག་ལས་ཀྱང་དོན་དམ་པའི་སྟོང་པ་ཉིད་ནི་ཁང་པ། བྱང་ཆུབ་ཀྱི་ཡན་ལག་ནི་མེ་ཏོག་གི་རྒྱན། གཟུངས་ནི་སྐྱེད་མོས་ཀྱི་ར་བ། ཆོས་ཆེན་པོ་ནི་ཚལ། བསམ་གཏན་དགུ་ནི་ཆུའོ། །རྣམ་པར་ཐར་པ་བརྒྱད་ནི་རྫིང་བུ། རྣམ་པར་ཐར་པ་གསུམ་ནི་སྒོ་ཁང༌། མཐོ་བ་དང་མཛེས་པར་བརྒྱན་པ་ནི་མུ་སྟེགས་ཅན་ལས་འཕགས་པའི་དཔེ་ཡང་དག་པ། བདེན་པའི་ཆོས་ནི་སྟོང་པ་ཉིད་ཀྱི་ཡེ་ཤེས། སྙིང་རྗེ་ཆེན་པོ་ནི་བུ་མོར་བལྟའོ། །མདོ་ལས། སྤྲུལ་པ་བྱས་ནས་དེ་ལ་འདི་སྐད་སྨྲ། །ཞེས་པ་ནས། ཞུགས་ཏེ་དོན་རྣམས་རབ་ཏུ་མྱུར་བར་བྱོས། །ཞེས་པའི་བར་དུ་ནི་འཇུག་པར་གཞོན་གདབ་པའོ། །མདོ་ལས། མྱ་ངན་འདས་ཤིང་སེམས་ནི་དགའ་བར་བྱོས། །ཞེས་པ་ནས། དེ་ནས་དེ་དག་ཐམས་ཅད་མཐར་འགྲོ་བ། །ཞེས་པའི་བར་དུ་ནི་དུབ་པ་བསྟི་བའི་དཔེ་བསྟན་ཏོ། །མདོ་ལས། ཐམས་ཅད་ངལ་སོས་པ་ཡི་
ཚུལ་རིག་ནས། །ཞེས་པ་ནས། གླིང་དུ་འགྲོ་བའི་ཕྱིར་ནི་བརྩོན་འགྲུས་བསྐྱེད། །ཅེས་པའི་བར་དུ་ནི་ངེས་པའི་དོན་སྟོན་པའི་དཔེའོ། །མདོ་ལས། དགེ་སློང་དེ་བཞིན་ང་ཡང་འདྲེན་པ་སྟེ། ཞེས་པ་ནས་ཁྱེད་ཅག་བྱ་བ་བྱས་ཞེས་པའི་བར་དུ་ནི། འདི་མན་ཆད་དཔེ་དང་དོན་དུ་སྦྱར་བ་དང༌། བཀྲི་བའི་དོན་དང༌། ངེས་པའི་དོན་སྟོན་ཏེ། འདི་ནི་དང་པོའོ། །མདོ་ལས། དུས་སུ་ནམ་ཞིག་གནས་འདིར་འདུག་པ་ཡི། །ཞེས་པ་ནས། ཆོས་འདི་ཇི་བཞིན་ཡང་དག་དོན་བཤད་དོ། །ཞེས་པའི་བར་དུ་ནི་ཡང་དག་པར་སྟོན་པའི་གླེང་བའོ། །མདོ་ལས། དྲང་སྲོང་ཆེན་པོས་ཐེག་པ་གསུམ་བསྟན་པ། །ཞེས་པ་ནས། སངས་རྒྱས་གྱུར་ནས་མྱ་ངན་འདས་པ་ཡིན། །ཞེས་པའི་བར་དུ་ནི་དྲང་བའི་དོན་བོར་ལ། ངེས་པའི་དོན་ལ་ཞུགས་ཞེས་པར་བསྟན་པའོ། །མདོ་ལས། འདྲེན་པ་རྣམས་ཀྱིས་བསྟན་པ་འདི་འདྲའོ། །ཞེས་པ་ནས། ཐམས་ཅད་མཁྱེན་པའི་ཡེ་ཤེས་ཐོབ་པར་བྱེད། །ཅེས་པའི་བར་དུ་ནི་བསྡུས་པ་བསྟན་ཏོ།། །།འདི་མན་ཆད་དགེ་སློང་ལྔ་བརྒྱ་ལུང་བསྟན་པའི་ལེའུ་སྟེ། གཏན་ཚིགས་དང༌། མིང་དང༌། དྲིས་པའི་ལན་དང་གསུམ་དུ་དབྱེའོ། །ལེའུ་འདིའི་མིང་གདགས་པའི་གཏན་ཚིགས་ཀྱང་རྣམ་པ་བཞི་སྟེ། དབང་པོའི་རིམ་པ་བཞིན་དུ་ལུང་སྟོན་པས་དབང་པོ་རྣོན་པོ་རྣམས་ལུང་བསྟན་པའི་འོག་ཏུ་ལུང་སྟོན་པ་འདི་འབྱུང་བ་དང༌། ལྷག་པའི་ང་རྒྱལ་ཅན་བསམ་གཏན་སྤྱོད་པ་མེད་པ་དག་སེམས་གཡེང་བ་བསྡུས་པའི་དོན་ཐེག་པ་ཆེན་པོའི་དགེ་བའི་རྩ་བ་ཡོད་པར་མི་ཤེས་པའི་དཔེར་ལུས་ལ་རིན་པོ་ཆེ་ཐོགས་པའི་དཔེ་བསྟན་ཏེ། ཏིང་ངེ་འཛིན་དང་ཐེག་པ་ཆེན་པོ་ལ་གཞུག་པའི་ཕྱིར་ལེའུ་འདི་སྟོན་པ་དང༌། བླ་ན་མེད་པ་བཅུ་ལས་ཤེས་པར་བྱ་བ་བླ་ན་མེད་པ་བསྟན་པའི་ཕྱིར་ཐེག་པ་ཆེན་པོའི་དགེ་བའི་རྩ་བ་ཡོད་པ་བསྟན་པའི་ཕྱིར་ལེའུ་འདི་བསྟན་པ་དང༌། ལུང་སྟོན་པ་རྣམ་པ་དྲུག་ལ་མཉམ་པ་ལས་དགོངས་ཏེ་ལུང་སྟོན་པ་ཉིད་བསྟན་པའི་ཕྱིར་ལེའུ་འདི་བཤད་པའོ། །ལྔ་བརྒྱ་ནི་གྲངས་སོ། །དགེ་སློང་ཞེས་པ་ནི་དངོས་པོའོ། །ལུང་བསྟན་ཞེས་པ་ནི་དོན་དེ་ལས་མང་དུ་བཏགས་པའོ། །ལེའུ་འདིའི་ནང་ནས་རིན་པོ་ཆེ་ལུས་ལ་ཐོགས་པའི་དཔེས་དོན་སྟོན་ན་མིང་དེ་ལས་མི་གདགས་པར་ཅིའི་ཕྱིར་ལུང་བསྟན་པའི་ལེའུ་ཞེས་གདགས་ཞེས་དྲི་བ་དང་དེ་
ནི་དབང་པོ་སྨིན་པ་སེམས་སྐྱེས་པ་རྣམས་སྔར་ལུང་བསྟན་ཏེ། དེའི་འོག་ཏུ་དཔེ་སྟོན་པའི་ཕྱིར་མིང་དེར་བཏགས་ཀྱང་ཉེས་པ་མེད་དོ། །ཡང་འཁོར་དེར་དགེ་སློང་སྟོང་ཉིས་བརྒྱ་ལུང་བསྟན་པ་ཐོབ་ན་འདིར་ལྔ་བརྒྱ་ཉི་ཚེར་སྨོས་པ་ཅིའི་ཕྱིར་དྲིས་པ་དང༌། དགེ་སློང་དེ་རྣམས་འཁོར་དེ་ཉིད་ན་འདུག་གི་གཞན་དེ་ན་མི་འདུག་པས་མངོན་དུ་གྱུར་པ་རྣམས་ལུང་བསྟན་པ་དང༌། སྟོང་ཉིས་བརྒྱ་ནི་སྤྱིར་ལུང་བསྟན་གྱི། འདི་ནི་ཕྱེ་སྟེ་ལུང་བསྟན་པའི་ཕྱིར་ཞེས་ཀྱང་འཆད་དོ། །མདོ་ལས་དེ་ནས་ཚེ་དང་ལྡན་པ་གང་པོ་མཻ་ཏྲིའི་བུ་ཞེས་པ་ནས་འདི་དག་ཐོས་ནས་ཞེས་པའི་བར་དུ་ནི་བཅོམ་ལྡན་འདས་ལ་དང་པོར་གུས་པ་བསྟན་པ་དང༌། དེའི་འོག་ཏུ་བཀའ་དམ་པ་མནོས་པ་སྟེ། དེའི་དང་པོ་ལ་ཡང་གུས་པའི་ཚུལ་དང༌། མནོས་པའི་དོན་ཏོ། །མནོས་པའི་དོན་ཡང་ངེས་པའི་དོན་དང༌། དྲང་བའི་དོན་ཏོ། །བཅོམ་ལྡན་འདས་ཀྱི་ཆེ་བ་ཉིད་ཅེས་པ་ནི། ཆོས་སྟོན་པར་དགོངས་པའི་ལྟས་འོད་ཀྱིས་ཁྱབ་པར་མཛད་པ་དང༌། ས་གཡོ་བ་དང་མེ་ཏོག་འབྲུལ་བས་འཁོར་གྱི་རྣམ་པ་བསྐུལ་བ་དང་གཟེངས་བསྟོད་པ་ལ་སོགས་པ་མཛད་པའོ། །མདོ་ལས་ངོ་མཚར་དུ་གྱུར་པ་ནས་ཞབས་ལ་ཕྱག་འཚལ་ནས་ཞེས་པའི་བར་དུ་ནི་བཅོམ་ལྡན་འདས་ལ་གུས་པའི་ཚུལ་བསྟན་ཏོ། །མདོ་ལས་ངོ་མཚར་ཏོ་བཅོམ་ལྡན་འདས་ཞེས་པ་ནས་མིག་མི་འཛུམས་པར་བལྟའོ་ཞེས་པའི་བར་དུ་ནི་འདིས་སེམས་ཅན་གྱི་བསམ་པ་མཁྱེན་པ་བསྟན་ཏོ། །སྔར་ནི་དེ་བཞིན་གཤེགས་པའི་ཡོན་ཏན་བསམ་གྱིས་མི་ཁྱབ་པ་བསྟན། དེའི་འོག་ཏུ་ནི་སེམས་ཀྱི་རྣམ་པ་ཅི་དང་ཅིར་དགྲོལ་བ་མཁྱེན་གཟིགས་པ་སྟོན་པ་དེ་ཡང་སངས་རྒྱས་ཉག་ཅིག་གིས་མཁྱེན་གྱི། གཞན་གྱིས་ནི་མི་ནུས་སོ་ཞེས་པར་སྦྱར་རོ། །མདོ་ལས་དེ་ནས་བཅོམ་ལྡན་འདས་ཀྱིས་ཞེས་པ་ནས་མཻ་ཏྲིའི་བུ་ལྟོས་ཤིག་ཅེས་པའི་བར་དུ་ནི་བཅོམ་ལྡན་འདས་ཀྱིས་དྲིས་པ་བསྟན་ཏེ། མངོན་དུ་གྱུར་པ་འདི་ལྟོས་ཤིག་ཅེས་པ་བསྟན་ཏོ། །མདོ་ལས་འདི་ནི་ངས་དགེ་སློང་གི་ཞེས་པ་ནས་མང་པོས་བསྟོད་དོ་ཞེས་པའི་བར་དུ་ནི་ད་ལྟར་གྱི་ཡོན་ཏན་སྟོན་ཏེ། ཡོན་ཏན་དེ་ཡང་སྔར་ནི་ཡོན་ཏན་གྱི་སྤྱི་བསྟན། དེའི་འོག་ཏུ་ནི་ཡོན་ཏན་གྱི་ཁྱད་པར་བསྟན་ཏོ། །མདོ་ལས་རྣམ་པ་མང་པོས་ངའི་བསྟན་པ་འདི་ལ་ཞེས་པ་ནས་གཞན་གྱི་མཐར་ཕྱིན་པར་མི་ནུས་སོ་ཞེས་པའི་བར་དུ་
འདིས་ནི་ཡོན་ཏན་གྱི་ཁྱད་པར་བསྟན་ཏོ། །མདོ་ལས་དགེ་སློང་རྣམས་འདི་ཡིད་ལ་ཇི་སྙམ་དུ་སེམས་ཞེས་པ་ནས་སངས་རྒྱས་བདུན་པོ་དེ་དག་གི་ཐ་མ་ནི་ང་ཡིན་དེ་དག་གི་ཡང་ཆོས་འཆད་པའི་མཆོག་ཏུ་གྱུར་ཏོ་ཞེས་པའི་བར་དུ་ནི་ཡོན་ཏན་གྱི་ཁྱད་པར་དེ་དག་ལ་ཡང་དེ་བཞིན་གཤེགས་པའི་བསྟན་པ་འཛིན་པ་དང། འཁོར་དགའ་ཞིང་ཕན་པ་བསྐྱེད་པ་དང༌། དེ་བཞིན་གཤེགས་པའི་ཆོས་སྒྲོགས་པ་ལ་མཁས་པ་དང༌། ཚངས་པ་མཚུངས་པར་སྤྱོད་པ་རྣམས་ལ་ཕན་བཏགས་པ་དང༌། སྤོབས་པ་ཁྱད་པར་ཅན་དུ་གྱུར་པའོ། །སྟོང་པ་ཉིད་ཀྱིས་འགྲོས་སུ་ཞེས་པ་ནི་དགེ་བའི་བློ་གྲོས་ཀྱི་ས་ལ་གནས་པ་སྟེ། ཐེ་ཚོམ་ཐམས་ཅད་སྤངས་པའོ། །ཡོངས་སུ་སྨིན་པར་བྱས་སོ་ཞེས་པ་ནི་ཆོས་ཀྱི་སྤྲིན་གྱི་ས་ལ་གནས་པས་སེམས་ཅན་མང་པོ་ལ་ཕན་ཐོགས་ཞེས་པའོ། །སངས་རྒྱས་ཀྱི་ཞིང་ཡོངས་སུ་དག་པར་བྱེད་པ་ནི། ལྷག་མ་མ་ལུས་པའི་མྱ་ངན་ལས་འདའ་བ་རྣམས་བྱང་ཆུབ་ཏུ་སེམས་བསྐྱེད་དེ། ཐེག་པ་ཆེན་པོ་ལ་བཀོད་པས་བླ་ན་མེད་པའི་བྱང་ཆུབ་ཏུ་བསྒྱུར་ཏོ། །བྱང་ཆུབ་ཏུ་བསྒྱུར་བ་དེ་ཉིད་གཞན་གྱི་དོན་བྱེད་པ་སྟེ། སངས་རྒྱས་ཀྱི་མཛད་པ་དེས་ཞིང་བརྒྱན་ཞེས་པའོ། །མདོ་ལས་དགེ་སློང་རྣམས་བསྐལ་པ་བཟང་པོ་འདི་ལ་ཞེས་པ་ནས་ཡོངས་སུ་སྨིན་པར་བྱེད་དོ་ཞེས་པའི་བར་དུ་ནི་དེ་བཞིན་གཤེགས་པའི་ཆོས་འཛིན་པ་དང༌། བྱང་ཆུབ་སེམས་དཔའི་སྤྱོད་པ་བསྟན་པའོ། །མདོ་ལས་རྟག་ཏུ་རྒྱུན་མི་གཅོད་དོ་ཞེས་པ་ནས་སངས་རྒྱས་བཅོམ་ལྡན་འདས་ཏེ་ཞེས་པའི་བར་དུ་ནི་སེམས་ཅན་གྱི་དོན་བྱེད་པ་དང༌། བྱང་ཆུབ་སེམས་དཔའི་སྤྱོད་པའི་ལམ་བསྟན་པ་དང༌། དངོས་འབྲས་བུ་མཚོན་ཏེ་ལུང་བསྟན་པའོ། །མདོ་ལས་སངས་རྒྱས་ཀྱི་ཞིང་འདིར་ཞེས་པ་ནས་ཡོངས་སུ་གང་བར་འགྱུར་རོ་ཞེས་པའི་བར་དུ་ནི་དེ་བཞིན་གཤེགས་པའི་ཞིང་གི་རྒྱན་སྟོན་ཏེ། རྒྱན་དེ་ཡང་རིན་པོ་ཆེ་ལས་བྱས་པ་དང་མཉམ་པ་ཞེས་པར་བསྡུའོ། །མདོ་ལས་ལྷའི་གཞལ་མེད་ཁང་དང་ཞེས་པ་ནས་བུད་མེད་ཀྱང་མེད་དེ་ཞེས་པའི་བར་དུ་ནི་དེ་ན་དགེ་བ་འབའ་ཞིག་ཅེས་པའི་དོན་ཏེ། ལྷ་དང་ཉེ་བ་གཅིག་གིས་གཅིག་མཐོང་བ། ངན་སོང་གསུམ་མེད་པ། འདོད་ཆགས་ཀྱི་གཞི་མེད་པས་རྫུས་ཏེ་སྐྱེ་བ་ཤ་སྟག་གོ་བར་སྦྱར་རོ། །མདོ་ལས་རྫུས་ཏེ་སྐྱེ་བ་ཚངས་
པར་སྤྱོད་པ་ཞེས་པ་ནས་ལུས་བརྒྱན་པར་འགྱུར་རོ་ཞེས་པའི་བར་དུ་ནི་ལྷ་དང་མིའི་མཚན་ཉིད་ནི་རྫུ་འཕྲུལ་དང་ལྡན་པ། ལུས་འོད་ཅན་ནམ་མཁའ་ལ་འགྲོ་བ། ཡིད་བརྟན་པ། བརྩོན་འགྲུས་དང་ལྡན་པ། ཤེས་རབ་ཅན་མཚན་དང་ལྡན་པ་ཞེས་དབྱེའོ། །མདོ་ལས་དགེ་སློང་རྣམས་ཡང་དེའི་དུས་ན་ཞེས་པ་ནས་བསམ་གཏན་གྱི་དགའ་བའི་ཟས་སོ་ཞེས་པའི་བར་དུ་ནི་ལུས་ཅིས་བཟུང་བའི་དོན་སྟོན་ཏེ། མདོ་ལས་ཟས་རྣམ་པ་བཞི་དང༌། དགུ་དག་ཏུ་གསུངས་པ་ལ་སྤྱིར་རྣམ་པ་གཉིས་ཏེ། འཇིག་རྟེན་དང་འཇིག་རྟེན་ལས་འདས་པའི་ཟས་སམ། ཟག་པ་དང་བཅས་པ་དང༌། ཟག་པ་མེད་པའི་ཟས་དང༌། འཇིག་རྟེན་གྱི་ཟས་ནི་ཁམ་གྱི་ཟས་དང༌། རེག་པའི་ཟས་དང༌། སེམས་པའི་ཟས་དང༌། རྣམ་པར་ཤེས་པའི་ཟས་སོ། །འཇིག་རྟེན་ལས་འདས་པའི་ཟས་ནི་བསམ་གཏན་གྱི་ཟས་དང༌། སྨོན་ལམ་གྱི་ཟས་དང༌། དྲན་པའི་ཟས་དང༌། རྣམ་པར་ཐར་པ་བརྒྱད་ཀྱི་ཟས་དང༌། དགའ་བའི་ཟས་ཏེ། ཟས་དེ་ལྔ་ལས་གཙོར་སྨོས་པ་འདི་གཉིས་ཀྱི་ཚེ་འདིས་འཛིན་པའི་དོན་ཏོ། །མདོ་ལས། དེའི་བྱང་ཆུབ་སེམས་དཔའ་ཞེས་པ་ནས་བསམ་གཏན་པ་ཤ་སྟག་གོ་ཞེས་པའི་བར་དུ་འདིས་ནི་བྱང་ཆུབ་སེམས་དཔའ་ཉན་ཐོས་རྣམས་ཀྱི་འཁོར་ཏེ། ཡོན་ཏན་གསུམ་དང་ལྡན་པ་ཤ་སྟག་དང་སྦྱར་རོ། །མདོ་ལས་སངས་རྒྱས་ཀྱི་ཞིང་དེ་དེ་ལྟ་བུར་ཚད་མེད་པའི་ཡོན་ཏན་དང་ལྡན་པར་འགྱུར་རོ་ཞེས་པ་ནས་ཇི་ལྟར་བྱང་ཆུབ་སྤྱོད་པ་འདི་སྤྱད་པ་ཞེས་པའི་བར་དུ་ནི་སངས་རྒྱས་ཀྱི་ཞིང་གི་རྒྱན་གྱི་དོན་བསྡུས་པའོ། །བསྐལ་པ་ནི་ཞེས་པ་ནས། ཡང་སྟོན་པ་འདི་སྐད་གསུང་ངོ་ཞེས་པའི་བར་དུ་ནི། བསྐལ་པ་དང་ཞིང་དང༌། སྐུ་ཚེའི་ཚད་དང༌། མཆོད་རྟེན་བསྟན་པའོ། །མདོ་ལས། དགེ་སློང་དོན་འདི་ངལ་སྟོན། །ཞེས་པ་ནས། བྱང་ཆུབ་སེམས་དཔའ་མང་པོ་སྨིན་པར་བྱེད། །ཅེས་པའི་བར་དུ་ནི་ཚིགས་བཅད་ཉི་ཤུ་རྩ་ཕྱེད་དང་གཉིས་སུ་དབྱེ་སྟེ། དང་པོའི་ཚིག་བཅུ་གཉིས་ཀྱིས་ནི་དེ་བཞིན་གཤེགས་པས་གླེངས་པ། ཚིག་དགུས་ནི་སྔོན་དུ་ལུང་བསྟན་པ། ཚིག་གོང་མ་ལ་ཡང་རྣམ་པ་གཉིས་ཏེ། ཚིག་བདུན་གྱིས་ནི་ད་ལྟར་གྱི་ཡོན་ཏན་བསྟན། ཚིག་ལྡས་ནི་ཕྱི་མའི་ཡོན་ཏན་བསྟན་པའོ། །མདོ་ལས་འདི་སྐད་སྨྲས་པ་བདག་ཅག་ཉན་ཐོས་ཞེས་པ་ནས་
སེམས་ཅན་ལྟ་བ་ལ་ཆགས་པ་རིག་པས་ན་ཞེས་པའི་བར་དུ་ནི་ཉན་ཐོས་པའི་གནས་དེ་བཞིན་གཤེགས་པའི་ས་ལས་རིང་བ་དང༌། སེམས་ཅན་གྱི་དོན་བྱེད་པ་ཆུང་བ་དང༌། གནས་དང་ཞིང་ཆུང་དུ་ན་དག་པར་སྟོན་པའོ། །མདོ་ལས། དེ་ཡི་བསྟན་པ་རྣམས་ལ་ཉེ་བར་གནས། །ཞེས་པ་ནས། མི་མཁས་མི་རྣམས་ཤིན་ཏུ་མྱོས་པར་འགྱུར། །ཞེས་པའི་བར་དུ་ནི་བསྡུས་པའོ། །མདོ་ལས། དེ་ཡི་སྤྱོད་པ་ཐམས་ཅད་རབ་བསྟན་པ། །ཞེས་པ་ནས། མང་དུ་ཐོས་ཤིང་འཇིགས་མེད་སྣ་ཚོགས་འཆད། །ཅེས་པའི་བར་དུ་འདི་ནི་འདས་པའི་དུས་ཀྱི་ཡོན་ཏན་བཅུ་སྨོས་པ་ལ་ཚིག་ལྷུག་པ་ལས་མ་བྱུང་བ་ཆོས་སྨྲ་བ་ཁྱད་པར་དུ་འཕགས་པ། མང་དུ་ཐོས་པ། ཤེས་རབ་དང་ལྡན་པ་འདིར་སྨོས་སོ། །མདོ་ལས། རྟག་ཏུ་མི་སྐྱོ་ཡང་དགའ་རབ་ཏུ་བྱེད། །ཅེས་པ་ནས། བདག་གི་ཞིང་མཆོག་རྣམ་པར་དག་པར་བྱེད། །ཅེས་པའི་བར་དུ་འདིས་དོན་རྣམ་པ་བདུན་ཞིག་སྟོན་ཏེ། སྟོན་མཁས་པ་མངོན་པར་ཤེས་པ་དང་ལྡན་པ། ཡང་དག་པར་རིག་པ་བརྙེས་པ། དབང་པོ་རིག་པ། ཆོས་ཀྱི་མཆོག་སྟོན་པ། ཕན་པ་ཆེན་པོ་བྱེད་པ། སངས་རྒྱས་ཀྱི་ཞིང་དག་པར་བྱེད་པའོ། །མདོ་ལས་མ་འོངས་པའི་དུས་ན་དེ་བཞིན་དུ་ཞེས་པ་ནས། རྟག་ཏུ་འཛིན་པར་འགྱུར་རོ་ཞེས་པའི་བར་དུ་ནི་འདིས་ལུང་སྟོན་པ་སྟེ། སྔར་ཚིག་གཉིས་ཀྱིས་ནི་རྒྱུ་བསྟན། ཚིག་བདུན་གྱིས་ནི་འབྲས་བུ་བསྟན་ཏེ། སངས་རྒྱས་རྣམས་ལ་མཆོད་པ་དང༌། ཆོས་སྟོན་པ་དང༌། སངས་རྒྱས་ཀྱི་ཞིང་དག་པར་བྱེད་པ་དང༌། སེམས་ཅན་ལ་ཕན་འདོགས་པའོ། །མདོ་ལས། འཇིག་རྟེན་དུ་ནི་རང་བྱུང་སངས་རྒྱས་གྱུར། །ཞེས་པ་ནས། ངན་སོང་དང་ནི་ངན་འགྲོའི་འཇིགས་པ་མེད། །ཅེས་པའི་བར་དུ་ནི་འབྲས་བུ་བསྟན་ཏེ་དེ་ཡང་དེའི་རང་བཞིན་དང༌། དེའི་ཞིང་དང་དེའི་བསྐལ་པའི་མིང་དང༌། ཞིང་གི་རྒྱན་དང༌། བྱང་ཆུབ་སེམས་དཔའི་འཁོར་རྣམས་ཏེ། གོང་དུ་བཤད་པ་རྣམས་དང་འདྲ་བར་སྦྱར་རོ། །མདོ་ལས། དེ་འདྲ་བ་ཡི་དམ་པའི་ཞིང་དུ་འགྱུར། །ཞེས་པ་ནས། འདི་ནི་ཅུང་ཟད་ཙམ་ཞིག་བཤད་པ་ཡིན། །ཞེས་པའི་བར་དུ་ནི་བྱང་ཆུབ་སེམས་དཔའ་ས་བརྒྱད་པ་ཡན་ཆད་ནས་རྫོགས་ལོངས་སྤྱོད་པའི་སའི་བར་དུ་ནི་ཡིན་བར་སྦྱར་རོ། །མདོ་ལས། དེ་ནི་དབང་དུ་གྱུར་པ་ཞེས་པ་ནས་རྨད་དུ་འགྱུར་རོ་ཞེས་པའི་བར་དུ་ནི་འདི་མན་ཆད་དགེ་སློང་ལྔ་
བརྒྱ་ལུང་བསྟན་པ་སྟེ། སེམས་ཀྱི་རེ་བ་དང༌། བཅོམ་ལྡན་འདས་ཀྱིས་གནང་བ་དང༌། མངོན་དུ་ལུང་བསྟན་པ་དང༌། རྗེས་སུ་འཛིན་པའོ། །དེ་ནས་བཅོམ་ལྡན་འདས་ཀྱིས་ཞེས་པ་ནས། ལུང་བསྟན་ཏོ་ཞེས་པའི་བར་དུ་ནི་བཅོམ་ལྡན་འདས་ཀྱིས་གནང་བ་དང་སྦྱར་རོ། །མདོ་ལས་དེ་ལ་འོད་སྲུངས་ཆེན་པོ་ཞེས་པ་ནས་སངས་རྒྱས་བཅོམ་ལྡན་འདས་ཏེ་ཞེས་པའི་བར་དུ་མངོན་དུ་བསྟན་པ་སྟེ། དེ་ཡང་ཚིག་རྐྱང་པ་དང་ཚིགས་སུ་བཅད་པར་དབྱེའོ། །མདོ་ལས་འོད་སྲུངས་དེ་ནི་ཞེས་པ་ནས་དབང་དུ་གྱུར་པ་ལྔ་བརྒྱའོ་ཞེས་པའི་བར་དུ་ནི་དགེ་སློང་ལྔ་བརྒྱ་ལུང་བསྟན་པ་སྟེ། དེ་ལ་ཁ་ཅིག་ན་རེ་ལྔ་བརྒྱ་པོ་འདི་སྟོང་ཉིས་བརྒྱའི་གྲངས་སུ་གཏོགས་ཞེས་ཀྱང་ཟེར། ལོགས་ཤིག་ཏུ་སྟོན་པ་ཡང་ཡོད་དོ། །མདོ་ལས། དེ་ནས་བཅོམ་ལྡན་འདས་ཀྱིས་དེའི་ཚེ། །ཞེས་པ་ནས། བྱང་ཆུབ་དམ་པ་མཆོག་ཀྱང་སྟོན་པར་འགྱུར། །ཞེས་པའི་བར་དུ་ནི་མངོན་དུ་བསྟན་པ་སྟེ། དེ་ལ་དང་པོ་ཚིག་དྲུག་གིས་ནི་འཕགས་པ་ཅང་ཤེས་ཀྱི་ཕྱིར་གླེངས། དེའི་འོག་མས་ནི་གཞན་གླེང་སྟེ། འདི་ནི་དང་པོའི་རང་བཞིན་བསྟན་པའོ། །མདོ་ལས། བྱང་ཆུབ་སེམས་དཔའ་བརྩོན་པ་རྣམས། །ཞེས་པ་ནས། ལྷ་དང་མི་རྣམས་སྡུག་ཅིང་བསམ་པར་འོང༌། །ཞེས་པའི་བར་དུ་ནི་ཞིང་དང༌། འཁོར་དང༌། ཚེའི་ཚད་བསྟན་པའོ། །མདོ་ལས། རྒྱལ་བ་དེ་དང་མི་མཐུན་འགྱུར་བ་ནི། །ཞེས་པ་ནས། ཇི་ལྟར་འཇིག་རྟེན་ཐམས་ཅད་ངས་བསྟན་བཞིན། །ཞེས་པའི་བར་དུ་ནི་དགེ་སློང་ལྔ་བརྒྱ་ལུང་བསྟན་པའི་རང་བཞིན་དུ་བསྡུས་པ་བསྟན་པའོ། །མདོ་ལས། དེ་ལྟར་དེ་དག་འོད་སྲུངས་ཁྱོད་ཀྱིས་དེང༌། །ཞེས་པ་ནས། དེ་བཞིན་སྒོའོ་ཞེས་པའི་བར་དུ་ནི་འཁོར་འདིར་མ་འདུས་པ་རྣམས་བརྒྱུད་དེ་ལུང་བསྟན་པའོ། །མདོ་ལས་དེ་ནས་དགྲ་བཅོམ་པ་ལྔ་བརྒྱ་པོ་དེ་དག་ཅེས་པ་ནས་ཉེས་པ་དེ་དག་བདག་ཅག་གིས་བཤགས་སོ་ཞེས་པའི་བར་དུ་ནི་དགའ་བའི་སེམས་ཀྱིས་བཀའ་ཡང་དག་པ་མནོས་པ་དང་སྔར་སེམས་ཞུམ་པ་གནོད་པ་གླེངས་པའོ། །མདོ་ལས་བཅོམ་ལྡན་འདས་འདི་ནི་ཞེས་པ་ནས་ཆུང་དུས་ཆོག་གོ་སྙམ་ཞེས་པའི་བར་དུ་ནི་སྔར་ནི་མོས་པ་ཆུང་བས་གླེངས། དེའི་འོག་ཏུ་ནི་ཆུང་བ་སྟོན་པའོ། །མདོ་ལས། དེ་འདི་ལྟ་སྟེ་ཞེས་པ་ནས་གོས་ཀྱི་ཐ་མར་ཕུར་ཏོ་ཞེས་པའི་བར་དུ་འདིས་ནི་དྲང་བའི་དོན་གྱི་དཔེ་བཤད་དོ། །དེ་ལ་ཉམ་ང་བ་ལ་
དབྲལ་བ་མི་དེ་མྱོས་པར་གྱུར་པ་དང༌། ཡུལ་གཞན་དུ་སོང་བ་དང༌། ངུབ་པ་ལྟ་བར་གྱུར་པ་སྟེ། དེ་ནི་དང་པོ་དང་སྦྱར་རོ། །ཁྱིམ་དུ་ཕྱིན་ཞེས་པ་ནི་ཐེག་པ་ཆེན་པོའི་བསྟན་དང་ཕྲད་པའོ། །ར་རོ་ཞེས་པ་ནི་མ་རིག་པ་མ་སྤངས་ཞེས་པའོ། །ཉལ་བ་ནི་འཁོར་བ་ན་གནས་པའོ། །རིན་པོ་ཆེ་ཞེས་པ་ནི་ཐེག་པ་ཆེན་པོ་སྟེ། ཇི་ལྟར་ཡིད་བཞིན་གྱི་རིན་པོ་ཆེ་དགོས་པ་སྣ་ཚོགས་འབྱུང་བ་བཞིན་ཐེག་པ་གཅིག་པུ་ལ་ཕྱོགས་པའི་བྱང་ཆུབ་སེམས་དཔའ་ཡིད་བཞིན་དུ་འགྲུབ་ཅེས་པའོ། །གོས་ཀྱི་མཐར་ཕུར་ཞེས་པ་ནི་སྔོན་གྱི་ཐེག་པ་ཆེན་པོ་པའི་བཤེས་གཉེན་དང་ཕྲད་པའི་བག་ཆགས་སོ། །མདོ་ལས། དེ་ནས་བཅོམ་ལྡན་འདས་དེ་སྐྱེས་བུ་ཞེས་པ་ནས་དེ་མགུ་རབ་ཏུ་དགའོ་ཞེས་པའི་བར་དུ་ནི་སེམས་ནུར་བའི་རྣམས་སྤྲུལ་པའི་གྲོང་ཁྱེར་བསྟན་པ་བཞིན་གཞན་དུ་སོང་སྟེ་ཞེས་པ་ནི་སྤྱོད་པ་གཞན་ལ་ཞུགས་པའོ། །ཐེག་པ་ཆེན་པོའི་དོན་དང་ཆོས་ཀྱི་རོས་ཕོངས་པ་ནི་ཁ་ཟས་དང་གོས་ཚོལ་བའོ། །མདོ་ལས་དེ་ནས་བཅོམ་ལྡན་འདས་ཞེས་པ་ནས་འདི་སྐད་སྨྲས་སོ་ཞེས་པའི་བར་དུ་ནི་ངེས་པའི་དོན་སྟོན་པའི་དཔེའོ། །མདོ་ལས་སྐྱེས་བུ་ཁྱོད་ཟས་དང་སྐོམ་ཞེས་པ་ནས་ཆོག་པར་འཛིན་ཏམ་ཞེས་པའི་བར་དུ་ནི་ངེས་པའི་དོན་སྟོན་པ་སྟེ། འདོད་པ་ཞེས་པ་ནི་བདེ་བ་སྡུག་པ་རྣམ་པ་ལྔ་སྟེ། རང་བཞིན་བདེ་བ་དང། རྒྱུ་བདེ་བ་དང༌། སྤོང་བ་བདེ་བ་དང༌། ཉོན་མོངས་པའི་གཉེན་པོས་བདེ་བ་དང༌། གནོད་པ་མེད་པའི་བདེ་བ་སྟེ། དེ་བཞིན་གཤེགས་པའི་ཆོས་ཀྱི་དབྱིངས་རྣམ་པར་དག་པ་དང༌། ཡེ་ཤེས་བཞི་དང་ལྔ་ཡང་བསྒྲུབ་པར་བྱ་བའི་བདེ་བ་ཞེས་གདགས་པ་དང༌། ཟག་པ་མེད་པའི་ཕུང་པོ་ལྔ་ཡང་བདེ་བར་བྱ་བ་ཉིད་པས་བདེ་བ་ཞེས་གདགས་སོ། །མདོ་ལས་ཀྱེ་སྐྱེས་བུ་ཁྱོད་ཅེས་པ་ནས་བྱ་བ་ཐམས་ཅད་བྱོས་ཤིག་ཅེས་པའི་བར་དུ་ནི་ཐེག་པ་ཆེན་པོ་ལ་ཞུགས་པས་ཡོན་ཏན་ཐམས་ཅད་རྫོགས་ཏེ། ཇི་ལྟར་ཡིད་བཞིན་གྱི་རིན་པོ་ཆེ་བསྒྱུར་བ་བཞིན་ཞེས་པར་སྦྱར་རོ། །མདོ་ལས་དེ་བཞིན་དུ་བཅོམ་ལྡན་འདས་ཞེས་པ་ནས་སེམས་བསྐྱེད་པར་གྱུར་པ་ཞེས་པའི་བར་དུ་ནི་དཔེ་དང་ངས་པའི་དོན་དུ་སྦྱར་བ་སྟེ། སྤོང་བའི་ཡོན་ཏན་དང་སྦྱར་རོ། །མདོ་ལས་དེ་བདག་གིས་མ་རྟོགས་མ་ཆུད་པ་ཞེས་པ་ནི་སེམས་བསྐྱེད་པ་ལས་ལྡོག་པ་བསྟན་ཏོ། །མདོ་ལས་བཅོམ་ལྡན་འདས་དེའི་སླད་དུ་ཞེས་པ་ནས་རྟག་ཏུ་མ་ཉམས་པ་ཞེས་པའི་བར་
དུ་ནི་འཕགས་པ་དགྲ་བཅོམ་པ་དེ་སྤྱོད་པ་དཀའ་བའི་རྣམས་ཆུད་ཟོས་པ་དང་ཐེག་པ་ཆེན་པོར་སྨོན་ལམ་བཏབ་པས་ཡེ་ཤེས་ཆུང་དུས་ཆོག་པར་འཛིན་ཞེས་པའོ། །མདོ་ལས་དེ་ནས་བཅོམ་ལྡན་འདས་བདག་ཞེས་པ་ནས་ཐབས་མཁས་པ་སྟེ་ཞེས་པའི་བར་དུ་ནི་ངེས་པའི་དོན་དང་སྦྱར་བ་མྱ་ངན་ལས་འདས་པའི་མཚན་ཉིད་བསྟན་པའོ། །མདོ་ལས་དེ་ལྟར་བཅོམ་ལྡན་འདས་ཏེ་ཞེས་པ་ནས་ཆོག་པར་འཛིན་པ་བདེ་གཤེགས་བསྟན་པ་ཞེས་པའི་བར་དུ་ཚིགས་སུ་བཅད་པ་ཕྱེད་དང་བཅུ་གསུམ་གྱིས་ནི་ཉེས་པར་གནོད་བཀུར་བ་དང༌། ཤེས་པ་སྐྱེས་པ་བསྟན་ཏོ། །མདོ་ལས་ཇི་ལྟ་བུར་ན་སྐྱེས་བུ་ལ་ལ་ཞིག་ཞེས་པ་ནས་འདོད་པའི་ཡོན་ཏན་ལྔ་དང་ཤིན་ཏུ་ལྡན་ཞེས་པའི་བར་དུ་ནི་དཔེ་དེ་ཡང་དང་པོ་སེམས་བསྐྱེད་པའི་དཔེ་དང༌། བར་དུ་སེམས་ནུར་བའི་དཔེའོ། །སྟོང་པ་ཉིད་བསྟན་པ་དང༌། སྟོང་པ་དེ་ཆུད་པས་བླ་ན་མེད་པའི་བདེ་བ་ཆེན་པོ་དང་ལྡན་པའི་དཔེ་བསྟན་ཏོ། །མདོ་ལས། དེ་བཞིན་བཅོམ་ལྡན་བདག་ཅག་འདི་ལྟ་བུར། །ཞེས་པ་ནས། བདག་ཅག་མྱ་ངན་འདས་ཙམ་མཆོག་ཏུ་གཟུང༌། །ཞེས་པའི་བར་དུ་ནི་སྔར་ནི་དྲང་བའི་དོན་བསྟན་པ་ལ་ཡང་སྤོང་བའི་ཡོན་ཏན་དང༌། བར་དུ་ལྡོག་པའི་དཔེ་བསྟན་པའོ། །མདོ་ལས། བླ་མེད་དེ་ནི་མི་འདོད་མི་ཚོལ་ལོ། །ཞེས་པ་ནས། མགོན་པོ་གཅིག་ལ་གཅིག་ལུང་བསྟན་པའི་ཕྱིར། །ཞེས་པའི་བར་དུ་ནི་དྲང་བ་དང་ངེས་པའི་དོན་བསྡུས་པ་སྟེ་ཅི་རིགས་པར་ཆུད་པར་བྱའོ།། །།འདི་མན་ཆད་དགེ་སློང་ཉིས་སྟོང་ལུང་སྟོན་པའི་ལེའུ་འཆད་དེ། དེ་ཡང་རྣམ་པ་གཉིས་སུ་དབྱེའོ། །ལེའུ་འདི་ཅི་ལས་བཏགས་པའི་གཏན་ཚིགས་དང༌། ལེའུ་འདིའི་མིང་བཤད་པའོ། །དེའི་གཏན་ཚིགས་ཀྱང་རྣམ་པ་གཉིས་ཏེ། དབང་པོ་རྣོན་པོ་རྣམས་སྔར་ལུང་བསྟན་པའི་རྗེས་ལ་འདི་དག་ལུང་སྟོན་པར་འོས་པ་དང༌། ལུང་བསྟན་པ་རྣམ་པ་བཞི་ལས་ལུང་བསྟན་པ་ཐ་མ་དང་སྦྱར་བའི་ཕྱིར་ལེའུ་འདི་བསྟན་ཏོ། །མིང་བཤད་པ་ནི་སློབ་པ་དང་མི་སློབ་པ་རྣམས་འདིའི་ནང་དུ་ལུང་སྟོན་པའི་ཕྱིར་དགེ་སློང་གཞན་ཉིས་སྟོང་ལུང་བསྟན་པའི་ཕྱིར་རོ། །མདོ་ལས། དེ་ནས་ཚེ་དང་ལྡན་པ་དགའ་བོ་ཞེས་པ་ནས་རྣམ་པར་སེམས་ཏེ་སྨོན་ཞེས་པའི་བར་དུ་ནི་རྣམ་པ་གཉིས་ཏེ། འཁོར་རེ་བའི་སེམས་སྐྱེས་པ་དང༌། བཅོམ་ལྡན་འདས་ཀྱིས་རེ་བསྐོང་བའོ། །འཁོར་རེ་བ་ཡང་
སྔར་ནི་སྐྱེས་བུ་གཉིས་ཀྱིས་གསོལ། དེའི་འོག་ཏུ་ནི་འཁོར་ཉིས་སྟོང་གིས་གསོལ་བ་སྟེ། འདི་ནི་དང་པོའོ། །མདོ་ལས་སྟན་ལས་ལངས་ཏེ་ཞེས་པ་ནས་སྐབས་དབྱེར་གསོལ་ཞེས་པའི་བར་དུ་ནི་སྐྱེས་བུ་དེ་གཉིས་ཀྱིས་ལུང་བསྟན་པར་གསོལ་བའོ། །མདོ་ལས་བཅོམ་ལྡན་འདས་བདག་གི་ཞེས་པ་ནས་བཅོམ་ལྡན་འདས་ལ་བལྟ་ཞིང་འདུག་སྟེ་ཞེས་པའི་བར་དུ་ནི་ལུང་བསྟན་པར་གསོལ་བའི་རིགས་པ་དང་ཚུལ་གསོལ་བའོ། །མདོ་ལས་འདི་ཉིད་སེམས་ཤིང་རྣམ་པར་སེམས་ཞེས་པ་ནས་འཇིག་རྟེན་དུ་བྱུང་སྟེ་ཞེས་པའི་བར་དུ་ནི་བཅོམ་ལྡན་འདས་ཀྱིས་དངོས་སུ་ལུང་བསྟན་པ་སྟེ། དེ་ཡང་སྔར་ནི་དགའ་པོ་ལུང་བསྟན། དེའི་འོག་ཏུ་ནི་སྒྲ་གཅན་འཛིན་ལུང་བསྟན། དེའི་འོག་ཏུ་ནི་དགེ་སློང་ཉིས་སྟོང་ལུང་བསྟན་དང་པོ་ལ་ཡང་རྣམ་པ་བརྒྱད་དུ་དབྱེ་སྟེ། སངས་རྒྱས་ཀྱི་མཚན་དང༌། སྔོན་གྱི་སྤྱོད་པ་བསྟན་པ་དང༌། སེམས་ཅན་ལ་ཕན་འདོགས་པ་དང་ཡུལ་གྱི་མིང་དང༌། ཞིང་གི་རྒྱན་དང༌། བསྐལ་པའི་མིང་དང༌། ཚེའི་ཚད་དང། མངོན་པར་བསྟོད་པའོ། །མདོ་ལས་སངས་རྒྱས་བྱེ་བ་ཕྲག་ཞེས་པ་ནས། ཁྲག་ཁྲིག་བརྒྱ་སྟོང་གི་བསྔགས་པ་བརྗོད་པར་འགྱུར་རོ་ཞེས་པའི་བར་དུ་ནི་གོང་དུ་སྨོས་པའི་བརྒྱད་པོ་དང་ཅི་རིགས་པར་སྦྱར་རོ། །མདོ་ལས་དེའི་དུས་ན་བཅོམ་ལྡན་འདས་ཀྱིས་ཞེས་པ་ནས་མ་འོངས་པའི་དུས་ཀྱི་ཚེ་ལ་རྒྱལ་བར་འགྱུར་ཞེས་པའི་བར་དུ་འདིས་རྒྱུ་ལས་དགོངས་ཏེ་ལུང་བསྟན་པའོ། །མདོ་ལས། བདེ་གཤེགས་བྱེ་བ་བརྒྱད་ཅུ་མཆོད་བྱས་ན། །ཞེས་པ་ནས། སངས་རྒྱས་བྱང་ཆུབ་འདི་ལ་རྒྱུ་ཡང་སྐྱེད། །ཅེས་པའི་བར་དུ་འབྲས་བུ་ལས་དགོངས་ཏེ་ལུང་བསྟན་པ་ལ་མཚན་དང༌། ཞིང་གི་རྒྱན་དང། ཡུལ་གྱི་མིང་དང༌། ཕན་འདོགས་པ་དང༌། རྗེས་སུ་བསྔགས་པ་དང༌། སྐུ་ཚེའི་ཚད་དང༌། སེམས་ཅན་ལ་ཕན་འདོགས་པ་དང༌། དེ་བཞིན་གཤེགས་པའི་སྤྱོད་པའི་རྒྱུ་སྒྲུབ་པ་སྟེ། འདི་ནི་ཚིག་དང་པོ་དང་སྦྱར་རོ། །མདོ་ལས་དེ་ནས་འཁོར་དེ་ན་ཞེས་པ་ནས་ཅིའི་རྐྱེན་དུ་འགྱུར་ཞེས་པའི་བར་དུ་ནི་འཁོར་གྱི་ཐེ་ཚོམ་མོ། །མདོ་ལས། དེ་ནས་བཅོམ་ལྡན་འདས་ཀྱིས་ཞེས་པ་ནས་བྱང་ཆུབ་ཏུ་སེམས་བསྐྱེད་དེ་ཞེས་པའི་བར་དུ་ནི་སྔོན་གྱི་རྒྱུ་བསྟན་པ་དང༌། དེའི་འོག་ཏུ་འཕྲལ་གྱི་སྤྱོད་པ་བསྟན་པ་དང༌། བསྡུ་སྟེ་ལུང་སྟོན་པ་ལ་འདི་ནི་དང་པོའོ། །མདོ་ལས་དེ་ན་རིགས་ཀྱི་བུ་འདི་ནི་ཞེས་པ་ནས་བྱང་ཆུབ་
ཏུ་ལུང་བསྟན་པ་ཐོས་ཞེས་པའི་བར་དུ་ནི་སྤྱོད་པ་ཕྱི་མ་བསྟན་པ་དང༌། མདོར་བསྡུས་ཏེ་ལུང་བསྟན་པའོ། །མདོ་ལས། བདག་གིས་སངས་རྒྱས་ཀྱི་ཞིང་གི་ཞེས་པ་ནས། སྔོན་གྱི་སྨོན་ལམ་དྲན་ནོ་ཞེས་པའི་བར་དུ་ནི་དགའ་བོས་མངོན་དུ་རྟོགས་པ་བསྟན་ཏོ། །མདོ་ལས་དེ་ནས་ཚེ་དང་ལྡན་པ་དགའ་བོས་ཞེས་པ་ནས། དམ་པའི་ཆོས་འཛིན་པ་ནི་བྱང་ཆུབ་ཀྱི་ཕྱིར་ཞེས་པའི་བར་དུ་ནི་དགའ་བོས་རང་གི་ཡོན་ཏན་བསྒྲགས་པས་གཞན་དེ་འདྲ་བ་བྱེད་དུ་གཞུག་པའོ། །མདོ་ལས་དེ་ནས་བཅོམ་ལྡན་འདས་ཀྱིས་ཞེས་པ་ནས་འཚང་རྒྱ་བར་འགྱུར་རོ་ཞེས་པའི་བར་དུ་ནི་འདིས་གཉིས་པ་ལུང་བསྟན་པའོ། །མདོ་ལས་དེ་ནས་བཅོམ་ལྡན་འདས་ཀྱིས་དེའི་ཚེ་ན་ཞེས་པ་ནས། འགྱུར་བ་བྱང་ཆུབ་ཚོལ་བ་ན་ཞེས་པའི་བར་དུ་ནི། འདི་མན་ཆད་བཞིར་དབྱེ་སྟེ། རྟག་ཏུ་དེ་བཞིན་གཤེགས་པའི་སྲས་སུ་གྱུར་པ་དང༌། དེ་བཞིན་གཤེགས་པ་གཞན་གྱི་སྲས་སུ་ཡང་སྟོན་པ་དང༌། རྒྱུད་མ་པ་འཆད་པ་དང་རྣམ་པ་བཞི་སྟེ། འདི་ནི་དང་པོའོ། །མདོ་ལས་མི་ཤེས་སྤྱོད་པ་སྒྲ་གཅན་འདི་ཞེས་པ་ནས། དེ་ལྟར་བྱང་ཆུབ་ཀྱི་ཕྱིར་གནས་སོ་ཞེས་པའི་བར་དུ་ནི་མྱ་ངན་ལས་མ་འདས་ཏེ་འཇིག་རྟེན་འདི་ནི་བཞུགས་པ་བསྟན་པའོ། །མདོ་ལས་དེ་ནས་བཅོམ་ལྡན་འདས་ཀྱིས་ཞེས་པ་ནས་གསོལ་བ་མཐོང་ཞེས་པའི་བར་དུ་ནི་སློབ་པ་དང་མི་སློབ་པ་ཉིས་སྟོང་ལུང་བསྟན་པ་སྟེ། དེ་ལ་དྲིས་པ་དང༌། ལན་བཏབ་པ་དང༌། མངོན་དུ་ལུང་བསྟན་པ་དང༌། མངོན་པར་དགའ་བ་དང༌། བཞིར་དབྱེ་བ་ལ་འདི་ནི་དང་པོའོ། །འཇམ་པ་ཞེས་པ་ནི་སེམས་དུལ་བའོ། །མཉེན་པ་ཞེས་པ་ནི་དབང་པོ་སྨིན་པའོ། །མདོ་ལས་བཅོམ་ལྡན་འདས་ཞེས་པ་ནས་དམ་པའི་ཆོས་ཀྱང་མཉམ་པར་གནས་པར་འགྱུར་རོ་ཞེས་པའི་བར་དུ་ནི་ལན་བཏབ་པ་དང༌། རྒྱུ་དང་འབྲས་བུ་བསྟན་པ་དང༌། མཚན་མཐུན་པར་བསྟན་ཏོ། །མདོ་ལས་དེ་ནས་སློབ་པ་དང་མི་སློབ་པ་ཞེས་པ་ནས་ལུང་བསྟན་པ་དང༌། འདི་ཐོས་པ་ཞེས་པའི་བར་དུ་ནི་འཁོར་རྣམས་ཀྱི་དགའ་བའི་ཚིག་གོ། །།འདི་མན་ཆད་ཆོས་སྨྲ་བའི་ལེའུ་སྟོན་ཏེ། ལེའུ་འདིའི་གཏན་ཚིགས་དང༌། མིང་དང༌། དོགས་པ་བསལ་བའོ། །གཏན་ཚིགས་ནི་མདོ་སྡེ་འདི་དང་པོར་ནི་གླེང་གཞིའི་ལེའུ་བསྟན། དེའི་འོག་ཏུ་ལེའུ་བརྒྱད་ཀྱིས་ནི་གཞུང་ཉིད་བསྟན་ཏེ། གཞུང་ནི་ཐེག་པ་གཅིག་པུ་ཐབས་དང་དཔེ་རྣམ་པ་སྣ་
ཚོགས་ཀྱིས་སྟོན་ཅིང་ཐེག་པ་རྣམ་གཉིས་དང་རིགས་མ་ངེས་པ་རྣམས་ཀྱི་ཆེད་དུ་བསྟན་པ་དང༌། ལུང་སྟོན་པའོ། །དེ་མན་ཆད་ལེའུ་བཅུ་དགུས་ནི་རྗེས་སུ་འཛིན་པ་སྟོན་ཏེ། མདོ་སྡེ་འདི་རྒྱ་ཆེ་ཞིང་ཟབ་ལ་དབང་པོ་ཞན་པ་རྣམས་མོས་པར་དཀའ་བའི་ཕྱིར་མདོ་སྡེ་འདི་གཞན་དང་མི་འདྲ་བ་བསྔགས་པ་དང༌། རྗེས་སུ་འཛིན་པའི་ཡོན་ཏན་མང་དུ་བཤད་དོ། །ཡང་རྗེས་སུ་འཛིན་པའི་དོན་སྟོན་པས། སྤྱིར་རྗེས་སུ་འཛིན་པར་གདགས་པ་དང༌། མདོ་སྡེ་འདིའི་གཞུང་སྟོན་པའི་ལེའུ་བཅུ་དགུ་ཡོད་པ་ལ་བཅུ་གཉིས་ཀྱིས་ནི་ཐེག་པ་གཅིག་པོའི་སྤྱོད་ཡུལ་སྟོན་ཏེ། ལེའུ་སྔ་མ་བརྒྱད་ཀྱིས་ནི་དྲང་བ་དང་ངེས་པའི་དོན་དབྱེ་བ་དང༌། དབང་པོ་རྣམ་གསུམ་པོ་རིམ་པར་ལུང་བསྟན་པ་སྟོན། དེའི་འོག་མ་བཞིས་ནི་ཆོས་དང་གང་ཟག་གཉི་གའི་ཡོན་ཏན་སྟོན་པས་འདི་ཡང་རྗེས་སུ་འཛིན་པ་ཉིད་དུ་བསྡུ་བ་དང༌། ཡང་མདོ་འདི་འགྲེལ་པ་ལས་དཔེ་རྣམ་པ་བདུན་དང༌། མཉམ་པ་གསུམ་དང༌། བླ་ན་མེད་པ་བཅུ་སྟོན་པ་ལ། འདིར་བཅུ་པ་སྟེ། སྟོབས་བླ་ན་མེད་པ་ཁྱད་པར་ཅན་སྟོན་ཏོ། །སྟོབས་ལ་ཡང་རྣམ་པ་གཉིས་ཏེ། ཆོས་ཀྱི་སྟོབས་དང་སྤྱོད་པའི་སྟོབས་སོ། །ཆོས་ཀྱི་སྟོབས་ཀྱང་རྣམ་པ་ལྔ་སྟེ། ཆུད་པ་དང༌། མོས་པ་དང༌། མཚམས་ཆོད་པ་དང༌། ཆོས་ཉིད་ཐོབ་པ་དང༌། ཀློག་ཅིང་འཛིན་པའོ། །སྤྱོད་པའི་སྟོབས་ཀྱང་རྣམ་པ་བདུན་ཏེ། རྗེས་སུ་འཛིན་པ་དང། ཆོས་འཆད་པ་དང༌། དཀའ་བ་སྤྱོད་པ་དང༌། སེམས་ཅན་འདུལ་བ་དང༌། སེམས་ཅན་རྣམས་ཀྱི་སྡུག་བསྔལ་བཏོན་པ་དང༌། ཡོན་ཏན་ཁྱད་པར་ཅན་དང༌། ཆོས་འདོན་པའོ། །འཛིན་པའི་སྟོབས་ལ་ལེའུ་གསུམ་སྡུད་དེ། ཆོས་སྨྲ་བའི་ལེའུ་དང༌། བདེ་བ་ལ་གནས་པ་དང༌། རྗེས་སུ་འཛིན་པའི་ལེའུའོ། །ལེའུ་འདིའི་ནང་དུ་གཟུང་བ་དང༌། འཛིན་པ་དང༌། གང་ཟག་དང་ཆོས་གཉི་ག་སྟོན་ཏོ། །མིང་ནི་ཆོས་སྨྲ་བ་ཞེས་པ་ཆོས་འདོན་པ་དང་ལུང་སྨྲ་བའི་གང་ཟག་དེ་ཆོས་སྨྲ་བ་ཡིན་པས་ཆོས་སྨྲ་བའི་ལེའུའོ། །དོགས་པ་བསལ་བ་ནི་ཆོས་སྨྲ་བ་ཞེས་པ་འདི་སངས་རྒྱས་འཇིག་རྟེན་དུ་བཞུགས་པ་དང༌། མི་བཞུགས་པ་གང་གི་ཚེ་ན་ཆོས་སྨྲ་བ་ཞེས་གདགས། དེ་གཉི་ག་ཡང་ཆོས་སྨྲ་བ་ཡིན་མོད་ཀྱི་སངས་རྒྱས་འཇིག་རྟེན་ན་བཞུགས་པའི་ཚེ་ནི་སློབ་པ་ལ་གནས་པས་འཁོར་བརྒྱད་པོ་ཞེས་གདགས་ཀྱི། བཅོམ་ལྡན་འདས་མྱ་ངན་ལས་འདས་པའི་འོག་ཏུ་ཆོས་སྟོན་པ་དེ་ཆོས་སྨྲ་བ་ཞེས་གདགས་སོ། །ལེའུ་འདིའི་ནང་ནས་ཀྱང་ལུང་
སྟོན་པ་འབྱུང་ན་ལུང་བསྟན་པའི་ལེའུ་ཞེས་ཅིའི་ཕྱིར་མི་གདགས་ཤེ་ན། གཙོ་བོ་ལས་དྲས་པའི་ཕྱིར་མི་གདགས་སོ། །མདོ་ལས་དེ་ནས་བཅོམ་ལྡན་འདས་ཀྱིས་ཞེས་པ་ནས་བྱང་ཆུབ་ཏུ་ལུང་སྟོན་ཏོ་ཞེས་པའི་བར་དུ་ནི་ལེའུ་འདི་ཡང་ཚིག་རྐྱང་པ་དང་ཚིགས་སུ་བཅད་པ་གཉིས་སུ་དབྱེའོ། །ཆོས་སྨྲ་བ་ཡང་རྣམ་པ་གཉིས་ཏེ། སངས་རྒྱས་འཇིག་རྟེན་ན་བཞུགས་པའི་ཚེ་ཆོས་སྨྲ་བ་དང༌། མི་བཞུགས་པའི་ཚེ་ཆོས་སྨྲ་བ་གཉིས་ལས་འདི་ནི་དང་པོའོ། །སྨན་གྱི་རྒྱལ་པོ་སྔོན་གྱི་དུས་ན་མདོ་སྡེ་འདི་འཛིན་པའི་ཕྱིར། སྨན་གྱི་རྒྱལ་པོ་ཞེས་ཆེད་དུ་བཀར་ཏེ་བཀའ་སྩལ་ཏོ། །ཆོས་སྤྱོད་པ་བཅུ་ལ་རྗེས་སུ་བསྔགས་ཞེས་པ་ནི་རྗེས་སུ་ཡི་རང་བའོ། །རྗེས་སུ་ཡི་རང་བའི་ཚིག་གཅིག་གིས་བླ་ན་མེད་པའི་བྱང་ཆུབ་ཆེན་པོའི་གཞིར་གྱུར་ཞེས་པའོ། །མདོ་ལས་སྨན་གྱི་རྒྱལ་པོ་གང་ལ་ལ་ཞེས་པ་ནས་བྱང་ཆུབ་ཏུ་ལུང་བསྟན་ཏོ་ཞེས་པའི་བར་དུ་ནི་སངས་རྒྱས་མངོན་དུ་མི་བཞུགས་པའི་ཆོས་སྨྲ་བའི་ཡོན་ཏན་སྟོན་ཏེ། དེ་ཡང་རྗེས་སུ་ཡི་རང་བ་དང༌། མངོན་དུ་སྤྱོད་པ་རྣམ་གཉིས་ལ་འདི་ནི་དང་པོའོ། །རྗེས་སུ་ཡི་རང་བ་ཙམ་གྱིས་ཀྱང་འདི་ལྟ་ན་མངོན་དུ་སྤྱོད་པ་ལྟ་ཅི་སྨོས། མདོ་ལས། སྨན་གྱི་རྒྱལ་པོ་རིགས་ཀྱི་བུའམ། རིགས་ཀྱི་བུ་མོ་ཞེས་པ་ནས་ཐལ་མོ་སྦྱར་བའི་ལས་ཀྱི་མཆོད་ཞེས་པའི་བར་དུ་ནི་འདིས་ཆོས་མངོན་དུ་སྤྱོད་པ་སྟོན་པ་ལ་འདིར་ཆོས་སྤྱོད་པ་རྣམ་པ་དྲུག་སྟོན། དབུས་དང་མཐའ་རྣམ་པར་འབྱེད་པ་ལས་ནི་ཆོས་སྤྱོད་པ་བཅུ་སྟོན་ཏོ། །འདིའི་དྲུག་པོ་ལ་འཛིན་པ་དང༌། ཀློག་པ་དང༌། འདོན་པ་དང༌། མོས་པ་དང༌། འདྲི་བ་དང༌། མཆོད་པའོ། །མཆོད་པ་ནི་ཕྱི་ནང་གི་མཆོད་པའོ། །ཆོས་སྤྱོད་པ་དེ་ལ་ཇི་ལྟར་བཅོམ་ལྡན་འདས་མངོན་དུ་མཐོང་བ་དང་འདྲ་བར་དད་པ་དང༌། གུས་པའི་ལས་བསྐྱེད་པའོ། །མདོ་ལས་སྨན་གྱི་རྒྱལ་པོ་རིགས་ཀྱི་བུ་དང༌། རིགས་ཀྱི་བུ་མོ་གང་ལ་ལ་ཞེས་པ་ནས། འཇིག་རྟེན་དུ་འབྱུང་ངོ་ཞེས་པའི་བར་དུ་འདི་ནི་ཐུགས་རྗེ་དང་སྨོན་ལམ་གྱི་དབང་གིས་དེར་སྐྱེས་པ་དང་རྒྱུ་དམ་པས་འཇིག་རྟེན་དུ་འབྱུང་བའོ། །མདོ་ལས། དེ་ཅིའི་ཕྱིར་ཞེ་ན་ཞེས་པ་ནས། ཕྱག་འཚལ་ཞིང་བཏུད་པ་ལྟ་ཅི་སྨོས་ཞེས་པའི་བར་དུ་ནི་སྔར་གང་ཟག་གི་ཡོན་ཏན་བསྟོད་ཅིང་མཆོད་པར་འོས་པ་དང༌། ཡོན་ཏན་ཆེ་བས་ཐུགས་རྗེ་དང་སྨོན་ལམ་གྱིས་
འདིར་སྐྱེ་ཞིང་ཕན་པ་ཆེན་པོ་བྱེད་པའོ། །མདོ་ལས་སྨན་གྱི་རྒྱལ་པོ་ཞེས་པ་ནས་སྐྱེ་པར་རིག་པར་བྱའོ་ཞེས་པའི་བར་དུ་ནི་ཡོན་ཏན་ཆེན་བོ་དང་ལྡན་པ་སྟེ། ཐུགས་རྗེས་འདིར་སྐྱེ་བར་བསྟན་པ་དང༌། ཆོས་འདི་སྟོན་པ་ཡང་འཕགས་པ་ཡིན་པར་བསྟན་པ་དང༌། ཐེག་པ་རྣམ་གཉིས་ལས་དགར་པའི་ཕྱིར། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་སྨོས་པ་དང༌། སངས་རྒྱས་ཀྱི་ཞིང་ཡངས་པར་མི་སྐྱེ་བ་ཡང་ཐུགས་རྗེས་སེམས་ཅན་ལ་ཕན་འདོགས་པའི་ཕྱིར། ལྷ་དང༌། ཁམས་བླ་མ་གཉིས་སུ་མི་སྐྱེ་བར་འདིར་སྐྱེ་བ་སྟོན་ཏོ། །ཕྱིར་མི་ལྡོག་པའི་བྱང་ཆུབ་སེམས་དཔའ་ཆོས་ལ་མོས་པའི་རྟགས་ནི་ཆོས་ཐོས་པ་ཙམ་གྱིས་སྒྲ་དང་བ་སྤུ་ལྡང་བ་དང་གདུང་བས་མཆི་མ་འབྱུང་བ་དེ་ནི་བྱང་ཆུབ་སེམས་དཔའི་རྟགས་སོ། །མདོ་ལས་སྨན་གྱི་རྒྱལ་པོ་རིགས་ཀྱི་བུའམ་ཞེས་པ་ནས་དེ་བཞིན་གཤེགས་པས་སྐྱེ་བར་རིག་པར་བྱའོ་ཞེས་པའི་བར་དུ་ནི་ཆོས་སྨྲ་བ་རྣམ་པ་དྲུག་ལ་གུས་པ་དང༌། བཙུན་པར་བྱ་བ་བསྟན་ཏེ། གུས་པར་བྱ་བ་ལ་འཆད་པ་ནི་སངས་རྒྱས་ཀྱི་ཕོ་ཉ་ལྟ་བུར་བལྟའོ། །སྨོད་པ་ནི་དེ་བཞིན་གཤེགས་པ་ལ་སྐུར་པས་སྡིག་པ་ཆེ་བར་བསྟན་པ་དང༌། ཀློག་པ་དང༌། འདོན་པ་ནི་དེ་བཞིན་གཤེགས་པ་ལ་རྒྱན་གྱིས་བརྒྱན་པ་བཞིན་བཞུགས་པའི་གནས་ནི་མཆོད་ཅིང་ཕྱག་བྱ་བའི་གནས་སུ་བསྟན་ཏེ། མཆོད་པ་རྣམ་བཞིས་མཆོད་པར་བྱའོ། །ཕོ་ཉ་ཞེས་པ་ནི་དེ་བཞིན་གཤེགས་པའི་དགོངས་པ་དང་མཐུན་པ། སྐྱེ་བ་ཞེས་པ་ནི་གསུང་དང་མཐུན་པ། བྱ་བ་བྱེད་པ་ཞེས་པ་ནི་སྐུའི་ཕྲིན་ལས་དང་མཐུན་པས། དེ་བཞིན་གཤེགས་པའི་མཛད་པ་ཐམས་ཅད་བྱེད་པའོ། །མདོ་ལས་ཡང་སྨན་གྱི་རྒྱལ་པོ་སེམས་ཅན་གང་ལ་ལ་ཞེས་པ་ནས་ཤིན་ཏུ་སྡུག་པར་བཤད་དོ་ཞེས་པའི་བར་དུ་ནི་ཆེས་སྨྲ་བ་ལ་སྨོད་པ་སྡིག་ཆེ་བར་བཤད་པ་སྟེ། དེ་ནི་བཅོམ་ལྡན་འདས་ལ་ངན་སེམས་ཀྱིས་སྨད་པ་ནི་ཕན་པར་སྤྱོད་པ་རྣམ་གཉིས་ཉམས་པར་མི་འགྱུར་བ་ནི་བཅོམ་ལྡན་འདས་ལ་འཁྲུག་པ་མི་མངའ་པའི་ཕྱིར་རོ། །ཆོས་སྨྲ་བ་ལ་སྨད་པས་ནི་ཕན་པར་སྤྱོད་པ་གཉིས་ཉམས་ཤིང་འཁྲུག་པ་སྐྱེ་བའི་ཕྱིར་རོ། །ཡང་སངས་རྒྱས་ལ་སྨད་པས་ནི་བྱམས་སྡང་གི་ཐུགས་མི་དགོངས་ཏེ་སེམས་ཅན་མི་སྤོང་གི་ཆོས་སྨྲ་བ་ནི་དེ་ལྟ་མ་ཡིན་ནོ། །སངས་རྒྱས་འཇིག་རྟེན་ན་བཞུགས་པའི་ཚེ། སེམས་
ཅན་དབང་པོ་བརྟན་པས་འགའ་ཞིག་སྨོད་པ་ཡོད་ཀྱང་གཞན་གྱི་སེམས་ནུར་མི་འགྱུར་གྱི། དེང་སང་གི་ཆོས་སྨྲ་བ་ལ་སྨད་བས་གཞན་གྱི་སེམས་ལྡོག་པའི་ཕྱིར་བདག་དང་གཉི་ག་ལ་གནོད་དོ། །མདོ་དག་ལས་ཀྱང་བྱང་ཆུབ་སེམས་དཔའི་སེམས་དཀྲུགས་པ་ནི་སེམས་ཅན་ཐམས་ཅད་ཆོས་ཀྱི་སྣང་བ་སྒྲིབ་པར་བྱེད་པས་མནར་མེད་པ་ལྔ་བྱས་པ་བས་ཁ་ན་མ་ཐོ་བ་འདི་ཆེ་བར་བཤད་དོ། །བྱང་ཆུབ་ཀྱི་སེམས་དཀྲུགས་ཞེས་པ་ཡང་སངས་རྒྱས་ཀྱི་ཆོས་འཇིག་པའོ། །མདོ་ལས། དེ་ཅིའི་ཕྱིར་ཞེ་ན། སྨན་གྱི་རྒྱལ་པོ་ཞེས་པ་ནས། དེ་བཞིན་གཤེགས་པ་ཕྲག་པ་ལ་ཐོགས་པ་ཡིན་ནོ་ཞེས་པའི་བར་དུ་ནི་དམ་པའི་ཆོས་འདི་འདོན་པ་ཡོན་ཏན་ཐམས་ཅད་ཀྱི་རྒྱན་གྱིས་བརྒྱན་པའི་ཕྱིར་སྡོང་པོས་བརྒྱན་པ་ལས་བྱང་ཆུབ་སེམས་དཔའི་རྒྱན་རྣམ་པ་བཅུས་བརྒྱན་པའམ། དེ་བཞིན་གཤེགས་པའི་རྒྱན་ཐམས་ཅད་ཀྱིས་བརྒྱན་པའོ། །མདོ་ལས་དེ་གང་དུ་འགྲོ་བ་དེར་ཞེས་པ་ནས་ཡོངས་སུ་རྫོགས་པར་འགྱུར་རོ་ཞེས་པའི་བར་དུ་ནི་དམ་པའི་ཆོས་འདི་ཤིན་ཏུ་ཟབ་པའི་ཕྱིར་འཕགས་པ་དགའ་བོ་ལ་མ་གཏད་ཀྱི། བྱང་ཆུབ་སེམས་དཔའ་སྨན་གྱི་རྒྱལ་པོ་ལ་སོགས་པ་ལ་གཏད་པ་ཡང་ཇི་ལྟར་སྨན་པ་ཆེན་པོས་དུག་སྨན་དུ་བསྒྱུར་བ་བཞིན་སྨན་པ་མི་མཁས་པས་མི་ནུས་སོ། །དེ་བཞིན་དུ་ཆོས་འདི་བྱང་ཆུབ་སེམས་དཔའ་ལ་གཏད་པར་འོས་ཀྱི་ཉན་ཐོས་པ་རྣམས་ལ་མ་ཡིན་ཏེ། བྱང་ཆུབ་སེམས་དཔའ་ནི་ཐོས་པ་ཙམ་གྱིས་མཐར་ཕྱིན་པར་འགྱུར་བ་དང་བདག་དང་གཞན་གྱི་དོན་འགྲུབ་པར་འགྱུར་བའི་ཕྱིར་རོ། །མདོ་ལས། དེ་ནས་བཅོམ་ལྡན་འདས་ཀྱིས་དེའི་ཚེ་ཞེས་པ་ནས་འཛིན་པ་ལ་བཀུར་སྟི་བྱ་ཞེས་པའི་བར་དུ་ནི་འདི་མན་ཆད་ཚིག་བཅུ་དྲུག་ལ་རྣམ་པ་གསུམ་དུ་དབྱི་སྟེ། ཚིག་དང་པོ་གཉིས་ཀྱིས་ནི་ཆོས་སྨྲ་བའི་ཡོན་ཏན་དང་མཆོད་པར་འོས་པ་གླེངས། ཚིག་བཅུ་གསུམ་གྱིས་ནི་ཆོས་སྨྲ་བའི་ཡོན་ཏན་ཉིད་གླེངས། ཚིག་གཅིག་གིས་ནི་ཆོས་ཁྱད་པར་ཅན་བསྡུ་བ་བསྟན་ཏོ། །ཚིག་དང་པོ་དེ་ལ་ཡང་རྣམ་པ་གཉིས་ཏེ། ཚིགས་བཅད་གཅིག་གིས་ནི་ལྷུན་གྱིས་གྲུབ་པའི་ཡེ་ཤེས་ཐོབ་པ་བསྟན་ཏེ། ཡང་དག་པའི་ཡེ་ཤེས་དང༌། སྟོང་པ་ཉིད་ཀྱི་ཡེ་ཤེས་སོ། །དེའི་འོག་མས་ནི་ཡང་དག་པའི་ཡེ་ཤེས་ཀྱི་མཚན་ཉིད་སྟོན་ཏེ། རྣམ་པ་ཐམས་ཅད་མཁྱེན་པའི་ཡེ་ཤེས་དང༌། ཕྱིས་ཐོབ་པའི་ཡེ་ཤེས་དང༌། རྩ་བའི་ཡེ་ཤེས་སོ། །སུ་མདོ་འདི་འཛིན་པ་དང༌།
མཆོད་པ་དང༌། བསྟི་སྟང་དུ་བྱེད་པ་ཡེ་ཤེས་དེ་དག་འཐོབ་བ་ལ་ཐེ་ཚོམ་མེད་ཅེས་བྱ་བར་སྦྱར་རོ། །མདོ་ལས། འཇིག་རྟེན་མགོན་གྱི་སྐྱེ་བ་སྟེ། །ཞེས་པ་ནས། བླ་ན་མེད་པའི་མདོ་སྡེ་འདི། །ཞེས་པའི་བར་དུ་ནི་ཚིགས་བཅད་བཅུ་གསུམ་གྱིས་ཆོས་སྨྲ་བའི་ཡོན་ཏན་སྟོན་ཏེ། དེ་ལ་ཡང་ཚིགས་བཅད་གསུམ་གྱིས་ནི་ཆོས་སྨྲ་བའི་ཁྱད་པར་བསྟན། ཚིགས་བཅད་བཅུས་ནི་བཙུན་པ་དང་གུས་པར་བྱ་བ་བསྟན། དང་པོའི་ཚིག་གསུམ་གྱིས་ནི་དེ་བཞིན་གཤེགས་པས་བསྔགས་པ་དང༌། སྐྱེ་བ་བཟང་པོ་བསྟན་པ་དང༌། སྨོན་ལམ་གྱི་དབང་གིས་སྐྱེ་བ་བསྟན་ཏོ། །མདོ་ལས། འཕྲུལ་གྱི་མེ་ཏོག་བཀུར་སྟི་བྱ། །ཞེས་པ་ནས། ཆོས་སྨྲ་དེ་ལ་རིན་ཆེན་འཐོར། །ཞེས་པའི་བར་དུ་ནི་ཚིགས་བཅད་བཅུས་མཆོད་པ་དང་གུས་པར་བྱ་བ་བསྟན་ཏེ། དེ་ལ་ཡང་ཚིགས་བཅད་བཞིས་ནི་ཆོས་སྨྲ་བ་ལ་རིམ་གྲོ་བཀུར་སྟི་བྱ་བ་བསྟན། ཚིགས་བཅད་ཕྱི་མ་དྲུག་གིས་ནི་བསོད་ནམས་ཀྱི་ཁྱད་པར་བསྟན་ཏེ། གུས་པ་སྐྱེ་བ་བསྟན། དང་པོའི་ཚིགས་བཅད་བཞི་ལ་ཡང། དང་པོའི་ཚིག་གཅིག་གིས་ནི་ཆོས་སྨྲ་བ་ཉིད་བསྟན། འོག་མ་གསུམ་གྱིས་ནི་འཛིན་པ་བསྟན་ཏེ་འདི་ནི་དང་པོའོ། །ཆོས་སྨྲ་བ་དེ་འབྲས་བུ་དམ་པ་ཐོབ་པའི་ཕྱིར་རོ། །མདོ་ལས། དེ་དག་རྟག་ཏུ་ཐལ་སྦྱར་ཏེ། །ཞེས་པ་ནས། དེ་བཞིན་གཤེགས་ཀྱི་བྱ་བ་བྱེད། །ཅེས་པའི་བར་དུ་ནི་འདིས་འཛིན་པ་བསོད་ནམས་ཆེ་བ་བསྟན་ཏེ། གུས་པ་དང༌། མཆོད་པ་དང༌། གསུང་མཉན་པ་དང༌། འདོན་ཞིང་ཁ་ཏོན་བྱེད་པའོ། །མདོ་ལས། མི་རུང་འབྱུང་ན་ངས་དེ་བཏང༌། །ཞེས་པ་ནས། སྡིག་པ་ཤིན་ཏུ་དེ་མང་བཤད། །ཅེས་པའི་བར་དུ་ནི་ཚིགས་བཅད་གཉིས་ཀྱིས་ནི་སྡིག་པའི་ཁྱད་པར་བསྟན། ཚིག་བཞིས་ནི་དགེ་བའི་ཁྱད་པར་བསྟན་ཏོ། །མདོ་ལས། མི་གང་ང་ལ་མངོན་བསྟོད་པ། །ཞེས་པ་ནས། དེ་ལ་བསོད་ནམས་ཆེས་མང་རྙེད། །ཞེས་པའི་བར་དུ་ནི་བསོད་ནམས་ཀྱི་ཁྱད་པར་བསྟན་ཏོ། །མདོ་ལས། དགའ་སྐྱེས་ང་ལ་བསྟོད་པ་ནི། །ཞེས་པ་ནས། ངོ་མཚར་ཆེན་པོ་དེས་ཐོབ་འགྱུར། །ཞེས་པའི་བར་དུ་ནི་ཆོས་ཐོས་པའི་བསོད་ནམས་དང༌། ཕྱི་ནང་མཆོད་པ་རྣམ་གཉིས་ཀྱི་ཁྱད་པར་བསྟན་པའོ། །མདོ་ལས། སྨན་གྱི་རྒྱལ་པོ་ཁྱོད་མོས་བར་བྱ་ཞེས་པ་ནས་བཤད་པར་བྱའོ་ཞེས་པའི་བར་དུ་ནི་ཆོས་འདི་ཁྱད་པར་ཅན་དུ་བསྟན་པའོ། །མདོ་ལས། སྨན་གྱི་རྒྱལ་པོ་ཆོས་ཀྱི་གཞུང་འདི་དག །ཅེས་པ་ནས། དད་
པར་མི་འགྱུར་རོ་ཞེས་པའི་བར་དུ་ནི་ཆོས་སྨྲ་བ་ཉིད་སྟོན་ཏོ་སྔར་ནི་ཚིག་རྐྱང་པས་བསྟན། འོག་ཏུ་ཚིགས་སུ་བཅད་པས་བསྡུས་ཏེ། ཚིག་རྐྱང་པ་ལ་ཆོས་ཆུད་པར་དཀའ་བ་དང༌། འདོན་པའི་གནས་ཏེ་མཆོད་རྟེན་དུ་གྱུར་པ་བསྟན་པ་དང༌། འཁོར་རྣམས་ཀྱི་ཚུལ་བསྟན་པའོ། །མདོ་ལས། སྨན་གྱི་རྒྱལ་པོ་འདི་ནི་ཞེས་པ་ནས་ལྟ་ཅི་སྨོས་ཞེས་པའི་བར་དུ་ནི་བཅོམ་ལྡན་འདས་ཞལ་བཞུགས་པ་ན་ཡང་གསངས་ཏེ། ཀུན་ལ་བསྟན་པ་མ་ཡིན་པའང་ཆུད་དཀའ་བའི་ཕྱིར་མ་འོངས་པའི་དུས་ན་དབང་པོ་མ་རྟོགས་པ་རྣམས་ལ་བསྟན་ན་སྐུར་བ་འདེབས་པའི་ཕྱིར་མ་སྟོན་ཅིག་པར་བསྟན་པའོ། །མདོ་ལས་འདི་ལྟར་སྨན་གྱི་རྒྱལ་པོ་ཞེས་པ་ནས་དེ་བཞིན་གཤེགས་པའི་ཕྱག་གིས་བྱུག་པར་འགྱུར་རོ་ཞེས་པའི་བར་དུ་ནི་ཆོས་འདིའི་མཐུས་འདོན་པའི་གང་ཟག་ཡོན་ཏན་ཅན་དུ་འགྱུར་བ་བསྟན་ཏེ། དེ་བཞིན་གཤེགས་པའི་ན་བཟའ་ནི་བཟོད་པ། ཞི་བ། དུལ་བ། བྱམས་པ་དང་སྙིང་རྗེར་ལྡན་པ། ངོ་ཚ་བ་དང་འཛེམ་པ་སྤངས་པ་སྟེ། ན་བཟའ་དེས་བཀབ་པར་གྱུར་པ་དང༌། དབང་པོ་སྨིན་པའི་ཕྱིར། དེ་བཞིན་གཤེགས་པ་རྣམས་ཀྱིས་དགོངས་ཤིང་སྐྱོབ་པར་འགྱུར་བ་དང༌། མོས་པ་ཆེ་བར་འགྱུར་བ་དང༌། སྨོན་ལམ་དང་དད་པ་བཙན་པའི་རང་བཞིན་ཅན་དུ་འགྱུར་བ་དང༌། དགེ་བའི་རྩ་བ་ཅན་དུ་འགྱུར་བ་དང༌། སྟོང་པ་ཉིད་དང་སྙིང་རྗེའི་ཁྱད་པར་བཅོམ་ལྡན་འདས་དང་འདྲ་བར་འཇུག་པ་དང༌། དེ་བཞིན་གཤེགས་པའི་ཕྱག་གིས་བྱུག་ཅིང་གནས་འཚོ་བ་པར་ལུང་བསྟན་པ་འཐོབ་པའོ། །མདོ་ལས་སྨན་གྱི་རྒྱལ་པོ་ཞེས་པ་ནས་མཆོད་པར་བྱའོ་ཞེས་པའི་བར་དུ་ནི་ཆོས་ཀྱི་སྐུ་དང༌། རིང་བསྲེལ་མཆོད་པར་འོས་པ་བསྟན་ཏེ། དེ་ལ་དང་པོ་ཆོས་ཀྱི་སྐུ་དང༌། རིང་བསྲེལ་བསྟན་པ་དང༌། འདི་ལ་བརྟེན་ཏེ་ཆོས་སྨྲ་བ་ཡོན་ཏན་ཅན་དུ་འགྱུར་བ་བསྟན་ཏོ། །ཆོས་དེ་དང་རིང་བསྲེལ་མཆོད་པར་འོས་པ་ནི་གཞུང་དང་ཡེ་ཤེས་ལྡན་པའི་ཕྱིར་ཏེ། སེམས་ཅན་རྣམས་ལ་ཡང་དག་པའི་ཡེ་ཤེས་ཕྱེ་བ་དང། བསྟན་པ་དང་རྟོགས་ཤིང་འཇུག་པར་འགྱུར་བའི་ཕྱིར་རོ། །མདོ་ལས་ཡང་སྨན་གྱི་རྒྱལ་པོ་ཞེས་པ་ནས་ཤིན་ཏུ་ཉེ་བར་གྱུར་པར་རིག་པར་བྱའོ་ཞེས་པའི་བར་དུ་ནི་ཆོས་འདི་ལ་བརྟེན་ནས་ཆོས་སྨྲ་བ་ཡོན་ཏན་ཅན་དུ་འགྱུར་བ་བསྟན་ཏེ། བྱང་ཆུབ་ཏུ་བསྙེན་པ་དང༌། སྤྱོད་པ་དམ་པ་ལ་གཞོལ་བ་དང༌། བྱང་
ཆུབ་ཆེན་པོ་འགྲུབ་པར་འགྱུར་བ་བསྟན་ཏོ། །མདོ་ལས། དེ་ཅིའི་ཕྱིར་ཞེ་ན་ཞེས་པ་ནས་ཉེ་བར་གནས་པ་ཡིན་ནོ་ཞེས་པའི་བར་དུ་ནི་ཆོས་འདི་ཐོས་པས་སྤྱོད་པ་དམ་པ་ལ་གཞོལ་བའི་རྒྱུ་བསྟན་ཏེ། མཐོང་བ་དང༌། ཐོས་པ་དང༌། ཀློག་པ་དང༌། འདོན་པ་དང༌། འདྲི་བ་དང༌། འཛིན་པ་དང༌། མཆོད་པའོ།། དེ་དག་ཀྱང་དཔེ་དང༌། དོན་དང༌། བསྡུ་བ་དང་གསུམ་མོ། །ཡང་མཐོང་བ་དང༌། བསམ་པ་དང༌། བསྒོམ་པའི་ཤེས་རབ་ཅི་རིགས་པར་སྦྱར་རོ། །མདོ་ལས། འདི་ལྟ་སྟེ་དཔེར་ན་སྨན་གྱི་རྒྱལ་པོ་ཞེས་པ་ནས་ཆུ་འདི་ནི་ཐག་ཉེའོ་སྙམ་ཞེས་པའི་བར་དུ་ནི་དཔེ་བསྟན་ཏེ། སློབ་པ་འབྱུང་བ་རྩོལ་བ་འཁོར་བ་ལ་གནས་ཤིང་ཡང་དག་པའི་ལམ་ཚོལ་བའོ། །ཡང་ན་འགྲེལ་པ་ལས་ཀྱང་ཆུ་ནི་དེ་བཞིན་གཤེགས་པའི་རང་བཞིན་ནོ། །རྐོ་ཞེས་པ་ནི་ཡང་དག་པའི་ཤེས་རབ་སྔོན་དུ་བཏང་བས་ལུས་དང༌། ངག་དང་ཡིད་གསུམ་གྱི་ལས་ཀྱིས་འབད་པའོ། །ས་སྐམ་པོ་མཐོང་བ་ནི་ཐེག་པ་རྣམ་གཉིས་ཀྱི་བསྟན་པ་དྲང་བའི་དོན་དུ་བཤད་པ་དང་སྦྱར་རོ། །ས་གཤེར་བ་མཐོང་ཞེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཐེག་པ་ཆེན་པོའི་བསྟན་པ་དང་ཕྲད་པ་སྟེ། བླ་ན་མེད་པའི་བྱང་ཆུབ་དང་ཉེ་ཞེས་པའི་དོན་ཏེ། །འགྲེལ་པ་ལས་ཀྱང་མདོ་འདི་འཛིན་པའི་གང་ཟག་དེ་དེ་བཞིན་གཤེགས་པའི་རང་བཞིན་གྱི་ཆུ་དང་ཕྲད་པས་བླ་ན་མེད་པའི་བྱང་ཆུབ་དང་ཉེ་ཞེས་པའི་དོན་ཏོ། །མདོ་ལས་དེ་བཞིན་དུ་སྨན་གྱི་རྒྱལ་པོ་ཞེས་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྐྱེའོ་ཞེས་པའི་བར་དུ་ནི་འདིས་དཔེ་དང་དོན་དུ་སྦྱར་བ་སྟེ། ཤེས་རབ་རྣམ་གསུམ་དང་ཆོས་སྤྱོད་པ་བཅུ་དང་ཅི་རིགས་པར་སྦྱར་རོ། །མདོ་ལས་དེ་ཅིའི་ཕྱིར་ཞེ་ན་ཞེས་པ་ནས་གསང་བའི་གནས་བཤད་དོ་ཞེས་པའི་བར་དུ་ནི་འདིས་གཏན་ཚིགས་སྟོན་ཏེ། བྱང་ཆུབ་ཆེན་པོའི་ཆོས་འདི་རྒྱུ་དང་བཅས་པ། འབྲས་བུ་དང་བཅས་པ། ཉེ་བའི་རྒྱུ་དང་ལྡན་པ། རིང་བའི་རྒྱུ་དང་ལྡན་པ། ལུང་དང་གཞུང་དང༌། སྤྱོད་པ་དང༌། འབྲས་བུར་བཅས་པ་ཡེ་ཤེས་ཀྱི་མཚན་ཉིད་དང་ཡེ་ཤེས་ཀྱི་རང་བཞིན་དང༌། ཡེ་ཤེས་རྣམ་ལྔ་ཀུན་ཀྱང་མདོ་འདི་ལས་སྐྱེ། མདོ་འདི་ལས་ཐོབ་པའོ། །ལྡེམ་པོ་ངག་མཆོག་འགྲེལ་པ་ནི་དྲང་བ་དང་ངེས་པའི་དོན་འགྲེལ་པའོ། །མདོ་ལས་སྨན་པའི་རྒྱལ་པོ་བྱང་ཆུབ་སེམས་དཔའ་ལ་ལ་ཞེས་པ་ནས་ཡང་དག་པར་སྟོན་ན་ཞེས་པའི་བར་དུ་ནི། ཆོས་ཇི་ལྟར་
བཤད་པའི་ཚུལ་བསྟན་ཏེ། དེ་ལ་ཡང་བཤད་པའི་ཚུལ་དང༌། བཀའ་བཞིན་དུ་མཉན་པས་དེ་བཞིན་གཤེགས་པས་རྗེས་སུ་སྐྱོབ་པའོ། །ཚིག་དང་པོ་ལ་ཡང་དྲིས་པ་དང༌། བཤད་པ་དང༌། བསྡུས་པ་སྟེ། འདི་ནི་དྲིས་པའོ། །མདོ་ལས་སྨན་གྱི་རྒྱལ་པོ་བྱང་ཆུབ་སེམས་དཔའ་དེས་ཞེས་པ་ནས་ཡང་དག་པར་བཤད་དོ་ཞེས་པའི་བར་དུ་འདི་ནི་བསྟན་པའོ། །མདོ་ལས་སྨན་གྱི་རྒྱལ་པོ་ཞེས་པ་ནས་ཆོས་ཀྱི་གཞུང་འདི་འཁོར་བཞི་ལ་ཡང་དག་པར་བསྟན་པའོ་ཞེས་པའི་བར་དུ་ནི་དངོས་སུ་བསྟན་པ་སྟེ། བྱམས་པ་དང་སྙིང་རྗེ་ལ་སྐུ་དང་ཐུགས་རྟག་ཏུ་གནས་པའི་ཕྱིར་གནས་ལྟ་བུར་བལྟའོ། །ཡང་ན་ཐེག་པ་ཆེན་པོ་ཉིད་མཐར་ཕྱིན་པའི་གནས་ཉིད་དོ། །ཞི་ཞིང་དུལ་བ་དང་བཟོད་ཅིང་བྱམས་པས་ལུས་མཛེས་པར་བྱས་པའམ། དེའི་དགོས་པས་ཕྱི་རོལ་གྱི་གནོད་པས་མི་བརྫི་བའི་ཕྱིར་གོས་ལྟ་བུར་བལྟའོ། །ཆོས་སྟོང་པ་ཉིད་དུ་བསྟན་པ་ཡང་མདོ་དག་ལས་ཀྱང་བསམ་གཏན་བཞི་ནི་གདན་ཏེ་ཞེས་པ་སྟོང་པ་ཉིད་དང་མཚན་མ་མེད་པ་ལ་གནས་པ་ཉིད་གདན་ལྟ་བུར་བལྟའོ། །མདོ་ལས་བྱང་ཆུབ་སེམས་དཔའ་མི་ཞན་པའི་སེམས་ཀྱིས་ཞེས་པ་ནས་ཡང་དག་པར་བཤད་པར་བྱའོ་ཞེས་པའི་བར་དུ་ནི་གསུམ་པ་སྟེ་བསྡུས་པའོ། །མདོ་ལས། སྨན་གྱི་རྒྱལ་པོ་ང་འཇིག་རྟེན་གྱི་ཁམས་ཞེས་པ་ནས་ཁ་ཏོན་བྱེད་པ་ནས་སླར་འཐོན་ཏོ་ཞེས་པའི་བར་དུ་ནི་ཚིག་དེ་དང་མཐུན་པར་བྱས་ན་དེ་བཞིན་གཤེགས་པ་ཡང་རྗེས་སུ་སྐྱོབ་ཅིང་ཉན་དུ་འཛུད། མཐོང་བར་བྱེད་མི་བརྗེད་པར་བྱེད་དོ། །སྤྲུལ་པས་སྤྲུལ་པ་བསྡུ་ཞིང་ཆོས་སྟོན་པའོ། །མདོ་ལས་བཅོམ་ལྡན་འདས་ཀྱིས་དེའི་ཚེ་ཞེས་པ་ནས་ཤིན་ཏུ་དད་པ་རྙེད་པར་དཀའ་ཞེས་པའི་བར་དུ་ནི་ཚིགས་སུ་བཅད་པ་བཅོ་བརྒྱད་ལ་རྣམ་པ་གསུམ་དུ་བགོས་ཏེ། ཚིགས་བཅད་དང་པོ་གཅིག་གིས་ནི་མོས་པར་དཀའ་བ་དང༌། ཀུན་ལ་བསྙད་དུ་མི་རུང་བ་བསྟན། ཚིགས་བཅད་བཞིས་ནི་ཆོས་ཀྱི་སྐུ་དང་རིང་བསྲེལ་ལ་མཆོད་པས་བྱང་ཆུབ་ཏུ་ཉེ་བར་བསྟན་པ་དང། ཚིགས་བཅད་བཅུ་གསུམ་གྱིས་ནི་ཆོས་འཆད་པའི་ཚུལ་བསྟན་ཏེ། འདི་ནི་དང་པོའོ། །མདོ་ལས། ཇི་ལྟར་ལ་ལ་ཆུ་འདོད་པ། །ཞེས་པ་ནས། འདི་ནས་ཆུ་ལའང་རིང་མ་ཡིན། །ཞེས་པའི་བར་དུ་ནི་ཚིགས་སུ་བཅད་པ་འདི་བཞིས་ནི་ཆོས་ཀྱི་སྐུ་རིང་བསྲེལ་དུ་བསྒྱུར་བ་ལ་བསྟི་སྟང་བྱས་པས་
བྱང་ཆུབ་ཏུ་ཉེ་བ་བསྟན་པ་སྟེ། དཔེ་དང་དོན་ཅི་ལེགས་པར་སྦྱར་རོ། །མདོ་ལས། དེ་བཞིན་དེ་དག་རྒྱང་རིང་བ། །ཞེས་པ་ནས། ཆུ་དང་མེ་ཞེས་བྱ་བ་བཞིན། །ཞེས་པའི་བར་དུ་ནི་སྦྱར་རོ། །མདོ་ལས། སེམས་ཅན་རྣམས་ལ་ཞེས་པ་ནས་མཆོད་པ་བྱེད་ཅེས་པའི་བར་དུ་ནི་ཚིགས་བཅད་བཅུ་གསུམ་པོ་འདིས་ཆོས་འཆད་པའི་ཚུལ་བསྟན་ཏེ། དེ་ལ་ཚིགས་བཅད་བཅུ་གཅིག་གིས་ནི་ཚུལ་ཉིད་བསྟན། ཚིགས་བཅད་གཉིས་ཀྱིས་ནི་ཉན་པ་དང་འཆད་པ་བསྟན་ཏོ། །མདོ་ལས་འཁོར་རྣམས་ལ་ཡང་ཞེས་པ་ནས་སངས་རྒྱས་མཐོང་ཞེས་པའི་བར་དུ་ནི་དེ་བཞིན་གཤེགས་པས་རྗེས་སུ་གཟུང་བ་བསྟན་ཏེ། ཚིག་གཅིག་གིས་ནི་བཟོད་པ་སྤྱོད་པ་བསྟན། ཚིགས་བཅད་གསུམ་གྱིས་ནི་གཞན་གྱིས་སྤྲུལ་པས་མཆོད་པ་དང་འཁོར་བྱེད་པ་བསྟན། ཚིགས་བཅད་གཅིག་གིས་ནི་སྐྱོ་ཞིང་བསྲུང་བ་བསྟན། ཚིགས་བཅད་གཉིས་ཀྱིས་ནི་ལུས་མངོན་དུ་བསྟན་ཏེ། དམིགས་པ་དྲན་པར་བྱས་པ་བསྟན། ཚིག་གཅིག་གིས་ནི་ཡོན་ཏན་དང་ལྡན་པ་ལ་མངོན་དུ་སྟོན་པ་བསྟན། ཚིག་གཅིག་གིས་ནི་འཁོར་བརྒྱད་རྣམས་ཆོས་ཉན་པ་བསྟན་ཏེ། དེ་དག་ཅི་རིགས་པར་སྦྱར་རོ།། །།འདི་མན་ཆད་རིན་པོ་ཆེའི་མཆོད་རྟེན་བསྟན་པའི་ལེའུ་འཆད་དོ། །དེ་ཡང་རྣམ་པ་གསུམ་དུ་དབྱེའོ། །ལེའུ་འདིའི་གཏན་ཚིགས་དང་དེའི་མིང་དང༌། དོགས་པ་བསལ་བའོ། །གདགས་པའི་གཏན་ཚིགས་ལ་ཡང་རྣམ་པ་བཞི་སྟེ། ཉོན་མོངས་པ་མེད་པའི་གང་ཟག་གིས་ང་རྒྱལ་རྣམས་པ་གསུམ་སྤངས་པའི་ཕྱིར་ཏེ། དེ་གསུམ་ནི་ཐེག་པ་ཐམས་ཅད་ཐ་དད་པར་མོས་པ་དང༌། འཁོར་བ་དང་མྱ་ངན་ལས་འདས་པ་ཐ་དད་པར་མོས་པ་དང། སྐུ་ཐ་དད་པར་མོས་པ་ལ་མཉམ་པ་གསུམ་གྱིས་དེ་སེལ་བར་བྱེད་དེ། མཉམ་པ་ཉིད་གསུམ་ནི་ཐེག་པ་མཉམ་པ་དང༌། འཁོར་དང༌། མྱ་ངན་ལས་འདས་པ་མཉམ་པས། དེ་བཞིན་གཤེགས་པའི་རིན་པོ་ཆེའི་མཆོད་རྟེན་བསྟན་པ་དང༌། སྐུ་ཐ་དད་པར་མོས་པ་རྣམས་རིན་ཆེན་མང་དེ་བཞིན་གཤེགས་པའི་སྐུ་ཉིད་དེ་བཞིན་གཤེགས་པ་ཐམས་ཅད་ཀྱི་སྐུ་ཡང་དེ་ཡིན་ཏེ། བྱེ་བྲག་མེད་པར་བསྟན་པ་དང༌། འགྲེལ་པ་ལས་བླ་ན་མེད་པ་བཅུ་བསྟན་པའི་ནང་ནས་ཞིང་རྣམ་པར་དག་པ་བསྟན་པ་བླ་ན་མེད་པ་ནི་དེ་བཞིན་གཤེགས་པ་རིན་ཆེན་མང་དང་མཆོད་རྟེན་བྱུང་བས་དེ་བཞིན་གཤེགས་པའི་སྤྲུལ་པའི་སྐུ་
ཐམས་ཅད་དེར་འདུས་ཤིང༌། དེ་ནས་འོད་གཅིག་བཏང་བས་ཕྱོགས་ཐམས་ཅད་དུ་ཁྱབ་པར་མཛད་ཅིང་ཞིང་མ་དག་པ་དང༌། དག་པ་བྱེ་བྲག་མེད་པར་དེ་བཞིན་གཤེགས་པའི་ཞིང་དག་པ་ཉིད་དུ་བསྟན་པའི་ཕྱིར་དང༌། དམ་པའི་ཆོས་འདི་སྟོན་ཅིང་བཞུགས་པའི་ས་ཐམས་ཅད་སྔོན་བྱུང་བ་དང་འདྲ་བར་རིན་པོ་ཆེའི་མཆོད་རྟེན་ཉིད་དུ་བསྟན་ཅིང༌། དམ་པའི་ཆོས་ལ་རིམ་གྲོ་བསྐྱེད་པའི་ཕྱིར་ལེའུ་འདི་བསྟན་ཏོ། །མིང་བཤད་པ་ནི་རིན་པོ་ཆེ་ལས་བྱས་པའི་མཆོད་རྟེན་ཡིན་པས་ན་རིན་པོ་ཆེའི་མཆོད་རྟེན་ནོ། །ཡང་ན་དེ་བཞིན་གཤེགས་པ་རིན་ཆེན་མང་གི་མཆོད་རྟེན་ཡིན་པས་ན་རིན་པོ་ཆེའི་མཆོད་རྟེན་ནོ། །དོགས་པ་བསལ་བ་ལེའུ་འདིའི་ཕྱོགས་བཅུའི་དེ་བཞིན་གཤེགས་པ་འདུས་ཤིང་རྣམ་པར་དག་པ་བསྟན་པ་ཡིན་ན་ཅིའི་ཕྱིར་མིང་དེར་མི་གདགས། །མཆོད་རྟེན་དེ་ནམ་མཁའ་ལ་འཕགས་ཤིང་ངོ་མཚར་དུ་གྱུར་པ་ཞིང་རྣམ་པར་དག་པ་སྟོན་པས་དཔེ་གཙོར་བྱས་ཏེ་མིང་དུ་བཏགས་པས་ཉེས་པ་མེད་དོ། །མདོ་ལས། དེ་ནས་བཅོམ་ལྡན་འདས་ཀྱིས་ཞེས་པ་ནས་བར་སྣང་ལ་འདུག་སྟེ་ཞེས་པའི་བར་དུ་ནི་འདི་མན་ཆད་ཚིག་རྐྱང་བ་སྟོན་པ་ལ་རྣམ་པ་གཉིས་ཏེ་མཆོད་རྟེན་བར་སྣང་ལ་འཕགས་ཏེ་བྱུང་བ་བསྟན་པས་དམ་པའི་ཆོས་འདི་ཁྱད་པར་ཅན་དུ་བསྟན་ཏོ། །རིན་པོ་ཆེའི་མཆོད་རྟེན་དེ་ཁ་ཕྱེད་སྟེ་བསྟན་པ་ནི་འཁོར་རྣམས་དད་པ་དང༌། བསྟི་སྟང་བསྐྱེད་པའི་ཕྱིར་རོ། །སྔར་ནི་རིན་པོ་ཆེའི་མཆོད་རྟེན་བསྟན་པ་ཉིད་ཀྱིས་ཡིད་ཆེས་པར་བསྒྲུབས། དེའི་འོག་ཏུ་སྐུ་གདུང་མངོན་པར་བསྟན་པས་ནི་ལུང་ལ་ཡིད་ཆེས་པ་བསྟན་ཏོ། །རིན་པོ་ཆེའི་མཆོད་རྟེན་དེ་ལས་སིལ་སྙན་སྣ་ཚོགས་བྱུང་བ་ནི་མཆོད་རྟེན་མཐོང་བར་བསྟན་པ་དང༌། ཆེ་ཆུང་གི་ཚད་བསྟན་པ་དང༌། ནམ་མཁའ་ལ་འཕགས་པ་བསྟན་པ་དང༌། དེའི་རྒྱན་བསྟན་པའོ། དེའི་དང་པོ་ལ་ཡང་ཡོན་ཏན་རྣམ་པ་གསུམ་སྟེ། བླ་ན་མེད་པ་བཅུའི་ནང་ནས་ཞིང་རྣམ་པར་དག་པ་བླ་ན་མེད་པ་བསྟན་ཏོ། །དེ་བཞིན་གཤེགས་པ་རིན་ཆེན་མང་གི་མཆོད་རྟེན་བསྟན་པ་ཡང་དོན་རྣམ་པ་དགུ་སྟེ། དེ་བཞིན་གཤེགས་པ་ཐམས་ཅད་ཀྱི་ཞིང་རྣམ་པར་དག་པ་དང་དེའི་མཆོད་རྟེན་དང༌། མཆོད་རྟེན་དེའི་ཚད་དང༌། མདོ་བསྟན་པ་དང༌། དེ་འཛིན་ཅིང་བརྟེན་པ་དང༌། དེ་བཞིན་གཤེགས་པ་གྲངས་མེད་པ་སྟོན་པ་དང༌། ཞིང་མ་དག་པ་
རྣམ་པར་སྤོང་བ་དང༌། རིན་ཆེན་མང་བ་དང༌། གདན་གཅིག་ལ་བཞུགས་པ་སྟོན་པ་སྟེ། དེ་དག་ནི་འོག་ནས་འབྱུང་བའི་དཀྱུས་དང་སྦྱར་རོ། །མཆོད་རྟེན་དེའི་ནང་ནས་རིང་བསྲེལ་འབྱུང་བ་བསྟན་པ་ནི་དེ་བཞིན་གཤེགས་པའི་ཆོས་ཀྱི་སྐུ་མདོ་སྡེ་འདི་ལ་གནས་པ་བསྟན་པའོ། །མཆོད་རྟེན་ནམ་མཁའ་ལ་འཕགས་པ་ཡང་དེ་བཞིན་གཤེགས་པའི་ཞིང་རྣམ་པར་དག་པ་ཡང་འཇིག་རྟེན་པའི་དགེ་བའི་རྩ་བ་ལས་ཁྱད་པར་དུ་བསྟན་པའོ། །ལྔ་བརྒྱ་ལ་ཡང་ནམ་མཁའ་ལ་འཕགས་པ་ནི་དེ་བཞིན་གཤེགས་པ་འཁོར་བ་ཐམས་ཅད་ལས་འདས་ཏེ་མྱ་ངན་ལས་འདས་པའི་དབྱིངས་ལ་གནས་པ་བསྟན་ཏོ། །ཡང་ན་ཐེག་པ་གཅིག་པོ་འདིར་ཐེག་པ་གཉིས་པ་ལས་ཁྱད་པར་དུ་འཕགས་པ་བསྟན་ཏོ། །ནམ་མཁའ་བར་སྣང་ཞེས་པ་ནི་ཡང་དག་པ་སྟོང་པ་ཉིད་ལ་གནས་པ་བསྟན་ཏོ། །མདོ་ལས་སྣ་ཚོགས་བལྟ་ན་སྡུག་ཅེས་པ་ནས་འཇིག་རྟེན་གྱི་ཁམས་ཐམས་ཅད་ཁྱབ་པར་གྱུར་ཏོ་ཞེས་པའི་བར་དུ་ནི་རྒྱན་གྱི་མཚན་ཉིད་བསྟན་ཏེ། རྒྱན་བརྒྱད་དང༌། གདུགས་དང༌། བ་དན་ལ་སོགས་པའོ། །མཆོད་རྟེན་རྒྱན་ཐམས་ཅད་ཀྱིས་བརྒྱན་པ་བཞིན་དེ་བཞིན་གཤེགས་པའི་སྐུ་དང་དམ་པའི་ཆོས་འདི་ཡོན་ཏན་ཐམས་ཅད་ཀྱིས་བརྒྱན་པར་སྦྱར་རོ། །རྒྱན་ཐམས་ཅད་ནི་ཡོན་ཏན་སྣ་ཚོགས་ཀྱི་དཔེའོ། །ཁར་ན་ལྔ་སྟོང་ནི་དད་པེ་བརྩོན་འགྲུས་དང་དྲན་པ་དང་ཏིང་ངེ་འཛིན་དང་ཤེས་རབ་ཀྱི་དཔེའོ། །རྟབ་བས་སྟོང་ཕྲག་མང་པོ་ཞེས་པ་ནི་བསམ་གཏན་དང་ཏིང་ངེ་འཛིན་ཏོ། །རྒྱལ་མཚན་དང་བ་དན་ཞེས་པ་ནི་ཡེ་ཤེས་དང་གཟུངས་སུ་བལྟའོ། །ཕྲེང་བ་ནི་དྲན་པ་ཉེ་བར་གཞག་པ་དང་སྦྱར་རོ། །དྲི་དང་སྤོས་དམ་པ་ནི་དེ་བཞིན་གཤེགས་པའི་སྐུ་རྣམས་དང༌། ཉོན་མོངས་པ་ཐམས་ཅད་སེལ་བ་ཡང་དག་པ་དེ་བཞིན་ཉིད་དོ། །མདོ་ལས་དེའི་གདུགས་ཀྱི་ཕྲེང་བཞེས་པ་ནས། ཀར་ཀེ་ཏ་ནའོ་ཞེས་པའི་བར་དུ་ནི་རིན་པོ་ཆེ་སྣ་བདུན་འཕགས་པའི་ནོར་བདུན་དང་སྦྱར་རོ། །མདོ་ལས། མཆོད་རྟེན་དེ་ལ་ཞེས་པ་ནས་ཐལ་མོ་སྦྱར་ཏེ་འཁོད་དོ་ཞེས་པའི་བར་དུ་ནི་མཐོང་ཞིང་འཕགས་པས་འགྲོ་བ་ལས་ཁྱད་པར་དུ་བསྟན་པ་དང། ཡ་མཚན་དུ་གྱུར་པས་འཁོར་རྣམས་དད་པ་སྐྱེད་པ་དང༌། རྫུ་འཕྲུལ་མཛད་པའི་ཡོན་ཏན་གྱིས་མདོ་སྡེ་འདི་དམ་པ་ཡིན་པར་བསྟན་པ་དང༌། མཆོད་རྟེན་བྱུང་བས་གུས་པ་བསྐྱེད་པ་དང༌། འཁོར་རྣམས་ཀྱི་བསམ་པ་རིག་ནས་ཐེ་ཚོམ་མངོན་པར་གསོལ་བ་སྟེ། དེ་ཡན་ཆད་ཅི་རིགས་པར་སྦྱར་རོ། །མདོ་ལས་
དེ་ནས་དེའི་ཚེ་སྤོབས་པ་ཆེན་པོ་ཞེས་བྱ་བ་ནས་འདི་ལྟ་བུའི་སྒྲ་འབྱིན་པ་སུ་ཞེས་པའི་བར་དུ་ནི་དོན་དྲིས་པའོ། །མདོ་ལས། དེ་སྐད་ཅེས་གསོལ་བ་དང་ཞེས་པ་ནས་དེས་སྒྲ་འདི་ཕྱུང་ངོ་ཞེས་པའི་བར་དུ་ནི་བཅོམ་ལྡན་འདས་ཀྱིས་བཀའ་སྩལ་བ་སྟེ། དང་པོར་གླེང་བ་དང་དངོས་སུ་བསྟན་པ་དང་བསྡུས་པའོ། །འགྲེལ་པ་ལས་སྟུག་པོར་གནས་སོ་ཞེས་པ་ནི་དེ་བཞིན་གཤེགས་པ་རྣམས་ཀྱི་ཆོས་ཀྱི་སྐུ་མངའ་བརྙེས་པ་བཞུགས་པའམ། སྤྲུལ་པའི་སྐུ་གསེར་གྱི་མདོག་ཅན་མངའ་བརྙེས་པར་བཞུགས་ཏེ། མདོ་འདི་ཉིད་དང་སྦྱར་རོ། །མདོ་ལས་སྤོབས་པ་ཆེན་པོ་ཤར་ཕྱོགས་སུ་ཞེས་པ་ནས། སངས་རྒྱས་རིན་ཆེན་མང་ཞེས་བྱ་བ་བྱུང་སྟེ་ཞེས་པའི་བར་དུ་ནི་དེ་ཡང་རྣམ་པ་བཞི་སྟེ། དེ་བཞིན་གཤེགས་པའི་སྐུ་དང་སྔོན་གྱི་སྨོན་ལམ་དང༌། ལུང་བསྒོ་བ་དང༌། སྨོན་ལམ་བཞིན་མཛད་པའོ། །རིན་ཆེན་ཞེས་པ་དེ་བཞིན་གཤེགས་པ་གཅིག་གམ་མང་དུ་བཞུགས་འགྲེལ་པ་ལས་མདོ་བསྟན་པ་ལ་དེ་བཞིན་གཤེགས་པ་རིན་ཆེན་མང་གི་སྐུ་གཅིག་བསྟན་པའི་ནང་དུ་དེ་བཞིན་གཤེགས་པ་ཐམས་ཅད་ཀྱི་སྐུ་འདུས་པས་སྐུ་མཉམ་པར་བསྟན་པ་དང༌། ཐེག་པ་གཅིག་པོ་བསྟན་པ་ཡང་ཐེག་པ་ཐམས་ཅད་བསྡུ་བ་དང༌། རིན་པོ་ཆེ་མང་ཡང་རིན་པོ་ཆེའི་རང་བཞིན་མཚུངས་པ་བཞིན། སྤྲུལ་པ་དང་རྫོགས་ལོངས་སྤྱོད་པའི་སྐུ་ཡང་སྐུ་མཚུངས་པ་སྟེ། ལུང་དང་གཞུང་རྣམ་པར་དག་པ་ལ་གཉིས་སུ་མེད་ཅེས་པའོ། །མདོ་ལས་བཅོམ་ལྡན་འདས་དེའི་སྨོན་ལམ་འདི་ལྟ་བུ་ཞེས་པ་ནས་ཡོངས་སུ་རྫོགས་པར་གྱུར་ཏོ་ཞེས་པའི་བར་དུ་ནི་སྔོན་གྱི་སྨོན་ལམ་བསྟན་པའོ། །མདོ་ལས་ཡང་སྤོབས་པ་ཆེན་པོ་བཅོམ་ལྡན་འདས་ཞེས་པ་ནས་མཆོད་རྟེན་ཆེན་པོ་གཅིག་བྱོས་ཤིག་ཅེས་པའི་བར་དུ་ནི་ལུང་བསྒོ་བའོ། །མདོ་ལས་མཆོད་རྟེན་གཞན་ནི་ངའི་ཕྱིར་བྱའོ་ཞེས་པ་ནས་དགེའོ་ཞེས་བྱ་བ་བཞིན་ནོ་ཞེས་པའི་བར་དུ་ནི་སྨོན་ལམ་བཞིན་གྲུབ་པར་མཛད་པའོ། །མདོ་ལས་སྤོབས་པ་ཆེན་པོ་དེ་ལྟ་བས་ན་ཞེས་པ་ནས་དགེའོ་ཞེས་བྱ་བ་བྱིན་ནོ་ཞེས་པའི་བར་དུ་ནི་མདོར་བསྡུས་ཏེ་བསྒོ་བའོ། །མདོ་ལས་དེ་ནས་སྤོབས་པ་ཆེན་པོ་ཞེས་པ་ནས་དེ་བཞིན་གཤེགས་པའི་སྐུ་མཐོང་ངོ་ཞེས་པའི་བར་དུ་ནི་སྔར་གླེང་བ་དང་མཆོད་རྟེན་དབྱེ་བ་སྟེ། དེ་ལ་ཡང་གསོལ་བ་དང༌། ལན་བཏབ་པ་དང༌། བཟླས་ཏེ་གསོལ་བ་དང༌། དབྱེ་བར་སྣང་བའོ། །མདོ་ལས། དེ་སྐད་ཅེས་གསོལ་བ་དང༌། བཅོམ་ལྡན་འདས་ཀྱིས་ཞེས་པ་ནས་འདིར་དགུག་པར་བྱའོ་ཞེས་པའི་བར་དུ་ནི་སྤྲུལ་པའི་སྐུ་སླར་བསྡུ་བ་སྟེ། དེ་འདྲི་བ་ན་རེ་དེ་བཞིན་གཤེགས་
པའི་སྤྲུལ་པ་ནི་སུམ་སྟོང་ལས་མི་འདའོ་ཞེས་གསུངས་ནས། འདིར་ཕྱོགས་བཅུའི་འཇིག་རྟེན་གྱི་ཁམས་སྐུ་མང་པོས་ཁྱབ་ཅེས་གསུངས་པ་ཅིའི་ཕྱིར་དང་པོ་སྤྲུལ་པ་མཐོང་བ་རྣམས་ལ་གྲངས་བསྟན་པར་ཟད་ཀྱི་ཡོན་ཏན་ཚད་མེད་པའི་ཕྱིར་སྐུ་སྤྲུལ་པ་ཡང་གྲངས་མེད་པ་དང༌། སྐུ་ཐ་མི་དད་པའི་ཕྱིར་སྦྲུལ་པ་ཐམས་ཅད་ནི་ངའི་སྐུ་ཞེས་པར་སྦྱར་རོ། །མདོ་ལས་དེ་ནས་སྤོབས་པ་ཆེན་པོ་ཞེས་པ་ནས། བདག་ཅག་གིས་ཕྱག་བགྱིའོ་ཞེས་པའི་བར་དུ་ནི་བཟླས་ཏེ་གསོལ་བའོ། །མདོ་ལས་དེ་ནས་དེའི་ཚེ་བཅོམ་ལྡན་འདས་ཀྱི་ཞལ་གྱི་མཛོད་སྤུ་ནས་ཞེས་པ་ནས། དེ་དག་ཐམས་ཅད་སྣང་ངོ་ཞེས་པའི་བར་དུ་ནི་དབྱེ་བ་སྣང་སྟེ། སྔར་སྦྲུལ་པའི་སྐུ་རྣམས་བསྡུ་བ་དང༌། མཆོད་རྟེན་དངོས་སུ་ཕྱེ་བའོ། །དེའི་ཚིག་དང་པོ་ལ་རྣམ་པ་བཞི་སྟེ། འོད་ཀྱིས་སྣང་བར་མཛད་པ་དང༌། སྤྲུལ་པའི་སངས་རྒྱས་སླར་གཤེགས་པ་དང༌། དེ་བསུ་བ་དང༌། མགོན་པོ་དེ་ལ་མེ་ཏོག་འབུལ་བའོ། །སྤྲུལ་པའི་སྐུ་དེ་དག་འཕགས་པ་དགོངས་པ་དག་པ་རྣམས་འོད་ཀྱིས་བསྐུལ་མི་དགོས་པར་བྱོན་པར་འོས་ན་ཅིའི་ཕྱིར་འོད་ཀྱིས་བསྐུལ། དེ་ནི་འཇིག་རྟེན་པ་རྣམས་དེ་བཞིན་གཤེགས་པའི་རྫུ་འཕྲུལ་བསམ་གྱིས་མི་ཁྱབ་པར་བསྟན་པའི་ཕྱིར་འོད་ཀྱིས་སྦྲན་ཏེ་བྱོན་པར་བསྟན་པའོ། །འོད་ཟེར་བཏང་ཞེས་པ་ནི་ཐེག་པ་གཅིག་པོ་བསྟན་པའི་དོན་ཏོ། །སངས་རྒྱས་མང་པོ་སྣང་བར་མཛད་པ་ནི་དེ་བཞིན་གཤེགས་པ་རྣམས་ཀྱི་མཛད་པ་མཐུན་པ་བསྟན་པའོ། །མདོ་ལས་སངས་རྒྱས་ཀྱི་ཞིང་དེ་དག་ནི་ཤེལ་ལས་བྱས་པ་ཞེས་པ་ནས་གསེར་གྱི་དྲ་བས་གཡོགས་པར་སྣང་ངོ་ཞེས་པའི་བར་ནི་འདིའི་ནང་དུ་དོན་རྣམ་པ་གསུམ་སྟོན་ཏེ། ཞིང་གི་མཚན་ཉིད་དང༌། འཁོར་དང༌། བླ་རེ་ཆེན་པོ་ཅིའི་ཕྱིར་ཞིང་རྣམ་པར་དག་པའི་ཚུལ་དུ་སྟོན་ཞེ་ན། བཅོམ་ལྡན་འདས་རྣམས་ཀྱི་ཡང་དག་པའི་སྤྱོད་ཡུལ་དུ་རིན་པོ་ཆེ་རྒྱན་སྣ་ཚོགས་སྣང་བར་བསྟན་པ་དང༌། ཐེག་པ་གཅིག་པོའི་ནང་དུ་ཡོན་ཏན་ཐམས་ཅད་བསྡུ་བར་བསྟན་པའོ། །མདོ་ལས་དེ་དག་ན་སངས་རྒྱས་བཅོམ་ལྡན་འདས་ཞེས་པ་ནས་ཡོངས་སུ་གང་བར་སྣང་ངོ་ཞེས་པའི་བར་དུ་ནི་ཆོས་སྟོན་པའོ། །མདོ་ལས། དེ་བཞིན་དུ་ཤར་དང་ལྷོ་བྱོགས་ཞེས་པ་ནས་གཤིན་རྗེའི་འཇིག་རྟེན་ཡང་མེད་ཅེས་པའི་བར་དུ་ནི་ཕྱོགས་གཞན་དུ་ཕྱིན་པ་དང་དེ་བཞིན་གཤེགས་པ་གཞན་ཡང་དེར་བྱོན་པ་དང༌། བསུ་སྟེ་གཤེགས་པ་བསྟན་ཏོ། །འཇིག་རྟེན་གྱི་ཁམས་སྤོ་བ་དང༌། དེ་བཞིན་གཤེགས་པ་བཞུགས་པ་དང༌། དེར་བཞུགས་ནས་ཀྱང་རྫུ་འཕྲུལ་ཆེན་པོ་བསྟན་པའོ། །འཇིག་རྟེན་གྱི་ཁམས་སྤེ་བ་ཡང་རྣམ་པར་དག་
པའི་ཞིང་དུ་བསྟན་ཏེ། རི་དང༌། ཆུ་དང༌། ནགས་ལ་སོགས་པ་གསལ་བར་བསྟན་པ་འདིས་ནི་ཞིང་རྣམ་པར་དག་པ་མཉམ་པ་ཉིད་བསྟན་ཏོ། །དང་པོ་རིན་ཆེན་མང་གི་མཆོད་རྟེན་ཞིང་མ་དག་པ་ན་བཞུགས་པ་བསྟན་པ་ནི། ཐེག་པ་རྣམ་པ་གཉིས་དྲང་བའི་དོན་ཏོ། །སྤྲུལ་པའི་སྐུ་འདུས་ནས་ཞིང་རྣམ་པར་དག་པར་གྱུར་པ་ནི་བྱང་ཆུབ་སེམས་དཔའི་དོན་དུ་བསྟན་པའོ། །ཡང་ན་དང་པོ་ཞིང་མ་དག་པ་ནི་མ་རབས་ཀྱིས་བསྟན་ཏོ། །དེའི་འོག་ཏུ་སྟོང་ཆེན་པོ་གཅིག་གིས་བསྒྱུར་བ་ནི་འཕགས་པ་ཉན་ཐོས་པའི་དཔེའོ། །དེའི་འོག་ཏུ་བསྒྱུར་བ་ནི་འཕགས་པ་རང་སངས་རྒྱས་པ་རྣམས་ཀྱི་དཔེའོ། །ཡང་དེའི་འོག་ཏུ་བསྒྱུར་བ་ནི་ཐེག་པ་ཆེན་པོ་ཡོངས་སུ་རྒྱས་པའི་དཔེའོ། །མདོ་ལས། དེའི་ཚེ་མི་མཇེད་ཀྱི་ཁམས་ན་ཞེས་པ་ནས་དེ་ལྟར་དེ་བཞིན་གཤེགས་པ་དེ་དག་ཐམས་ཅད་ཀྱི་རང་རང་གི་ཞམ་འབྲིང་བ་བཀྱེའོ་ཞེས་པའི་བར་དུ་ནི་རྒྱས་པར་བསྒྱུར་ཞིང་སྤོ་བ་སྟེ། དེ་ཡང་གཅིག་གིས་བསྒྲེ་ཞིང་བསྒྱུར་བ་དང༌། བརྒྱར་བསྒྲེ་ཞིང་བསྒྱུར་བ་ནི་དེ་བཞིན་གཤེགས་པ་ཐ་དད་པས་སོ། །དེ་བསྒྱུར་བ་ཡང་དང་པོ་ནི་ཞིང་བསྒྱུར། དེའི་འོག་ཏུ་ནི་སེམས་ཅན་བསྒྱུར་བ་དང༌། དག་པའི་མཚན་ཉིད་བསྒྱུར་བ་དང༌། མ་དག་པ་བསལ་བ་དང༌། རྒྱན་གྱིས་བརྒྱན་པའོ། །འོད་ཀྱིས་སྣང་བར་མཛད་པ་ནི་ཕྱོགས་བཅུའི་དེ་བཞིན་གཤེགས་པ་བསྐུལ་བའོ། །སེམས་ཅན་དམྱལ་བ་མེད་ཅེས་པ་ནི་སེམས་ཅན་བསྒྱུར་བའོ། །རི་དང་མཚོ་ལ་སོགས་པ་མེད་པར་བྱས་པ་ནི་ཞིང་བསྒྱུར་བའོ། །འདི་བཞག་སྟེ་ཞེས་པ་ནི་འཁོར་འདི་དག་ཆོས་ཀྱི་སྣོད་དུ་གྱུར་པ་བསྟན་པའོ། །སངས་རྒྱས་ཀྱི་ཞིང་གཅིག་ཏུ་བྱས་ཞེས་པ་ནི་རྒྱན་གྱིས་བརྒྱན་པ་བསྟན་ཏོ། །མདོ་ལས་དེ་ནས་བཅོམ་ལྡན་འདས་ཤཱཀྱ་ཐུབ་པས་ཞེས་པ་ནས་ནམ་མཁའ་བར་སྣང་ལ་བཞུགས་སོ་ཞེས་པའི་བར་དུ་ནི་མཆོད་རྟེན་དབྱེ་བར་དགོངས་པ་སྟེ། དེ་ཡང་དོན་གྲུབ་ནས་ནམ་མཁའ་ལ་བཞུགས་པ་དང༌། འཁོར་བཞི་པོ་ལངས་ནས་ཞལ་དུ་བལྟ་བ་དང༌། མཆོད་རྟེན་མངོན་པར་ཕྱེ་བའོ། །མདོ་ལས་འཁོར་བཞི་བོ་དེ་དག་སྟན་ལས་ལངས་ནས་ཐལ་མོ་སྦྱར་ཏེ། བཅོམ་ལྡན་འདས་ལགས་སུ་བལྟ་ཞིང་འཁོད་དོ་ཞེས་པ་ནི་འཁོར་ལངས་པ་བསྟན་པའོ། །མདོ་ལས་དེ་ནས་བཅོམ་ལྡན་འདས་ཀྱི་ཞེས་པ་ནས། ས་ལེར་བྱས་སོ་ཞེས་པའི་བར་དུ་ཕྱག་གཡས་པ་ཞེས་པ་ནི་བཀྲ་ཤིས་པར་བྱ་བའོ། །མདོ་ལས་དེ་བཞིན་གཤེགས་པའི་ཞེས་པ་ནས་ཁོ་བོ་འདིར་འོངས་སོ་ཞེས་པའི་བར་དུ་ནི་མཆོད་རྟེན་ཕྱེ་བས་འཆད་པ་དང༌། ཉན་པ་རྣམས་སྤྲོ་བར་བྱ་བའི་གཏན་ཚིགས་བསྟན་ཏེ། སྐུ་མངོན་པར་
སྟོན་ཅིང་གསུང་སྨྲ་བ་དང༌། མེ་ཏོག་འཐོར་བ་གཉིས་ལས་འདི་ནི་དང་པོའོ། །མདོ་ལས་དེ་ནས་འཁོར་བཞི་པོ་དེ་དག་གི་ཞེ་པ་ནས། རིན་པོ་ཆེའི་ཕུང་པོས་གཏོར་ཏོ་ཞེས་པའི་བར་དུ་ནི་མེ་ཏོག་འཐོར་སྟོན་ཏོ། །མདོ་ལས་དེ་ནས་བཅོམ་ལྡན་འདས་རིན་ཆེན་མང་ཞེས་པ་ནས་འདིར་བཞུགས་ཏེ་ངེ་སྐད་གསུང་ངོ་ཞེས་པའི་བར་དུ་ནི་འཁོར་མང་པོ་ལ་མཆོད་ཅིང་ཡོངས་སུ་གཏད་པ་སྟོན་པའོ། །མདོ་ལས་དེ་ནས་ཅོམ་ལྡན་འདས་ཤཱཀྱ་ཐུབ་པ་ཞེས་པ་ནས་བཞུགས་པར་སྣང་ངོ་ཞེས་པའི་བར་དུ་སྐུ་གསུམ་དོན་ཆེན་པོ་མཛད་པར་འདྲ་བར་བསྟན་པའི་ཕྱིར་སངས་གྱས་དེ་གཉིས་གདན་གཅིག་ལ་བཞུགས་པ་དང་ཐེག་པ་གཅིག་ལ་འདུ་བར་བསྟན་པའི་ཕྱིར་གདན་གཅིག་ལ་བཞུགས་པའོ། །མདོ་ལས་དེ་ན་འཁོར་བཞི་པོ་དེ་དག་ཅེས་པ་ནས་བར་སྣང་ལ་འཕགས་པར་བྱའོ་སྙམ་དུ་སེམས་སོ་ཞེས་པའི་བར་དུ་ནི་ཐམས་ཅད་སྟོང་པའི་མཚན་ཉིད་གནས་པར་བྱ་བ་བསྟན་ཏོ། །མདོ་ལས་དེ་ནས་བཅོམ་ལྡན་འདས་ཀྱིས་ཞེས་པ་ནས། བར་སྣང་ལ་བཀོད་དོ་ཞེས་པའི་བར་དུ་ནི་ཐེག་པ་ཆེན་པོ་ཐོས་པས་བླ་ན་མེད་པའི་འབྲས་བུ་འགྲུབ་པ་བསྟན་ཏོ། །མདོ་ལས། བཅོམ་ལྡན་འདས་ཤཱཀྱ་ཐུབ་པ་ཞེས་པ་ནས། ཡོངས་སུ་མྱ་ངན་ལས་འདས་པ་བཞེད་དོ་ཞེས་པའི་བར་དུ་ནི་ཡོངས་སུ་གཏད་པ་བསྟན་ཏོ། །མདོ་ལས། དེ་ནས་བཅོམ་ལྡན་འདས་ཀྱིས་དེའི་ཚེ་ན་ཞེས་པ་ནས། ཆོས་ཀྱི་ཕྱིར་དུ་བརྩོན་འགྲུས་མི་སྐྱེད་ཞེས་པའི་བར་དུ་ནི་འདི་མན་ཆད་ཚིགས་བཅད་བཞི་བཅུ་རྩ་བརྒྱད་ལ་གཉིས་སུ་དབྱེ་སྟེ། ཚིགས་བཅད་བཅུ་གཉིས་ཀྱིས་ནི་མཆོད་རྟེན་མངོན་པར་འབྱུང་བ་བསྟན། ཆོས་ཐོས་པའི་གཏན་ཚིགས་ཀྱིས་དམ་པ་བསྟན། དེའི་འོག་གི་ཚིགས་བཅད་སུམ་ཅུ་རྩ་དྲུག་གིས་ནི་འཁོར་རྣམས་མདོ་འདི་ཐོས་པར་མོས་པ་དང༌། ཡོངས་སུ་གཏད་པ་བསྟན་ཏོ། །མདོ་ལས། ཚིག་དང་པོ་ལ་ཡང་རྣམ་པ་གཉིས་སུ་དབྱེ་སྟེ། ཚིགས་བཅད་ཕྱེད་དང་གཉིས་ཀྱིས་ནི་མཆོད་རྟེན་མངོན་པར་བྱུང་བས་འཁོར་རྣམས་སྤྲོ་བ་བསྐྱེད། དེའི་འོག་གི་ཚིག་ཕྱེད་དང་བཅུ་གཅིག་གིས་ནི་མཆོད་རྟེན་ཕྱེ་སྟེ་འཁོར་ལ་ཆོས་སྟོན་པ་བསྟན་ཏོ། །མདོ་ལས། བསྐལ་པ་བྱེ་མང་མྱ་ངན་ལས་འདས་ཀྱང༌། །ཞེས་པ་ནས་ཡོངས་སུ་རྒྱུ་བ་ཕྱོགས་བཅུ་ཐམས་ཅད་ཅེས་པའི་བར་དུ་ནི་མཆོད་རྟེན་ཕྱེ་སྟེ་འཁོར་རྣམས་སྤྲོ་བ་བསྐྱེད་པ་ལ་ཚིག་དང་པོ་གཉིས་ཀྱིས་ནི་གླེང་གཞི་བསྟན། ཕྱི་མ་ཕྱེད་དང་དགུས་ནི་མཆོད་རྟེན་ཕྱེ་སྟེ་མངོན་པར་སྟོན་པ་བསྟན་ཏོ། །མདོ་ལས། འདི་དག་ཐམས་ཅད་ང་ཡི་
ལུས་གཟུགས་ཏེ། །ཞེས་པ་ནས། རྫུ་འཕྲུལ་གྱིས་ནི་ཡོངས་སུ་དག་པར་བྱས། །ཞེས་པའི་བར་དུ་ནི། འདི་མན་ཆད་ཞིང་བསྒྱུར་བ་དང༌། སངས་རྒྱས་བཞུགས་པ་དང༌། སྐུ་ལས་སྤོས་ཀྱི་དྲི་འབྱུང་བ་དང༌། སེམས་ཅན་གྱི་དོན་ལ་འཇིག་རྟེན་ན་བཞུགས་པའོ། །མདོ་ལས། འདི་ལྟ་བུར་ནི་འདི་དག་ངས་བཤད་པ། །ཞེས་པ་ནས། མུན་ནག་ཆེན་པོའི་ནང་ནས་མེ་བཞིན་ནོ། །ཞེས་པའི་བར་དུ་ནི་སངས་རྒྱས་བཞུགས་པ་བསྟན་ཏོ། །མདོ་ལས། ཕྱོགས་བཅུ་རྣམས་སུ་ཡིད་དུ་འོང་བའི་དྲི། །ཞེས་པ་ནས། ཆོས་ཀྱི་གཞུང་ཡང་འཛིན་པ་ནི་ཞེས་པའི་བར་དུ་ནི་དྲི་འབྱུང་བ་དང༌། སེམས་ཅན་ལ་ཆོས་འཆད་པ་སྟོན་ཏོ། །མདོ་ལས། མྱུར་དུ་ཚིག་རྣམས་རབ་སྨོས་ཤིག །ཅེས་པ་ནས་འདྲེན་པ་མང་པོ་བྱེ་བ་འདིར་ལྷགས་ཞེས་པའི་བར་དུ་ནི་འཁོར་རྣམས་མདོ་འདི་ཐོས་པར་མོས་པ་དང༌། ཡོངས་སུ་གཏད་པའོ། །དེ་ཡང་གསུམ་དུ་དབྱེ་སྟེ། ཚིགས་བཅད་ཕྱེད་དང་བཅུས་ནི་འཁོར་ཆོས་ཉན་པ་མོས་པ་བསྟན། དེའི་འོག་མ་ཚིག་བཅུ་དགུས་ནི་ཁྱད་པར་བསྟན་ཡང་ཚིག་ཕྱེད་དང་བརྒྱད་ཀྱིས་ནི་སྤྱོད་པ་དམ་པ་བསྡུས་པ་བསྟན། དང་པོ་ལ་ཡང་རྣམ་པ་གསུམ་སྟེ། །ཚིག་ཕྱེད་དང་བཞིས་ནི་འཛིན་པ་དང་ཀློག་པ་དང་འདོན་པར་མོས་པ་དང་བསྟན། ཚིག་བཞིས་ནི་ཆོས་བསྲུང་བ་རྣམས་ཡི་དམ་གྱི་མཐར་ཕྱིན་པ་བསྟན། ཡང་ཚིག་གཉིས་ཀྱིས་ནི་ཆོས་འཆད་པར་མོས་པ་རྣམས་བསམ་པ་བཞིན་དུ་གྲུབ་པར་སྟོན་ཏེ་འདི་ནི་དང་པོའོ། །མདོ་ལས། བརྩོན་པ་ཉན་པར་བྱ་བ་རྒྱལ་བའི་བུ། །ཞེས་པ་ནས། དེ་ཡིས་ས་འདི་མཛེས་ཤིང་རྣམ་པར་བཀྲ། །ཞེས་པའི་བར་དུ་ནི་ཆོས་བསྲུང་བར་མོས་པ་རྣམས་ཡི་དམ་གྱི་མཐར་ཕྱིན་པ་བསྟན་པའོ། །མདོ་ལས། དེ་དག་ལ་ཡང་མཆོད་པ་རྒྱ་ཆེ་མཐའ་ཡས་པ། །ཞེས་པ་ནས། སྤྲོ་བ་བྱེད་པ་འདྲེན་པས་སོ། །ཞེས་པའི་བར་དུ་ནི་ཆོས་འཆད་པར་མོས་པ་རྣམས་དེ་བཞིན་གཤེགས་པ་མཐོང་བར་སྟོན་པའོ། །མདོ་སྡེ་སྟོང་ཕྲག་མང་པོ་ཡང༌། །ཞེས་པའི་བར་དུ་ནི་ཀློག་པ་དང༌། འདོན་པ་དང༌། འཛིན་པ་ལ་སོགས་པའི་ཁྱད་པར་བསྟན་པ་དང༌། ཆོས་སྤྱོད་པ་རྣམ་པ་བཅུའི་ཁྱད་པར་བསྟན་ནས་བསྡུས་པ་དང་དེ་བཞིན་གཤེགས་པའི་དགོངས་པ་དང་མཐུན་པར་བསྟན་པ་དང༌། ཡང་དག་པའི་སྤྱོད་པ་ལ་གཞོལ་བསྟན་པ་དང༌། དེ་བཞིན་གཤེགས་པའི་སྲས་ཀྱི་གྲལ་འཚོ་བ་བསྟན་པ་དང༌། འཇིག་རྟེན་པ་འདི་དག་ལ་ཕན་པ་ཆེན་པོ་མཛད་པ་བསྟན་པ་སྟེ། དེ་དག་ནི་མདོའི་ཚིག་དང་ཅི་རིགས་པར་སྦྱར་རོ། །དམ་པའི་ཆོས་པདྨ་དཀར་པོའི་འགྲེལ་པ་ཡུལ་སེང་ག་ལའི་སློབ་དཔོན་སའི་རྩ་ལག་གིས་བྱས་པ་རྫོགས་སྟེ།། །།