ཚིག་ལེའུར་བྱས་པ་སུམ་བརྒྱ་པའི་རྣམ་པར་བཤད་པ།
འདུལ་བའི་ལྷ།
རྒྱ་གར་སྐད་དུ། ཏྲིང་ཤ་ཏ་ཀཱ་ཏིཀཱ་བྱཱ་ཁྱཱན། བོད་སྐད་དུ། ཚིག་ལེའུར་བྱས་པ་སུམ་བརྒྱ་བའི་རྣམ་པར་བཤད་པ། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བདེ་གཤེགས་བསླབ་པ་ཚད་མེད་ཡོན་ཏན་དཔག་ཏུ་མེད་ལྡན་པ་དག་བླངས་ནས་སྐྱོང་བྱེད་ཅིང༌། །བསྟན་བཅོས་རྣམ་པ་སྣ་ཚོགས་པ་ལ་མངོན་པར་སྦྱོར་བས་བློ་གྲོས་ངན་པ་རབ་སྤངས་པ། །སྒྲ་རྣམས་ཉེས་པ་མ་ལུས་བསལ་ཞིང་དགའ་བའི་ཚིག་མཆོག་ལེགས་པར་སྦྱར་བ་དོན་མཆོག་དང༌། །མདོ་སྡེ་ཆོས་མངོན་བསྟན་བཅོས་རིགས་མང་འདུལ་བས་ཐམས་ཅད་ཡོད་སྨྲ་རྩ་བར་གྱུར་པ་རྒྱལ་གྱུར་ཅིག །འགྲོ་གཞན་མ་ལུས་པ་ཡི་དོན་མཛད་ནས། །ཐམས་ཅད་མཁྱེན་པའི་གྲུབ་མཆོག་བརྙེས་གྱུར་པའི། །བདེ་གཤེགས་དེ་ལ་སྤྱི་བོས་ཕྱག་འཚལ་ལོ། །དགེ་ཚུལ་ཚིག་ལེའུར་བྱས་པ་རྣམ་དབྱེ་བྱ། །ཇི་སྟེ་ཚིག་ལེའུར་བྱས་བཤད་གཞག་མཛད་ཀྱང༌། །དེ་ནི་དགེ་ཚུལ་དག་ལ་མཆོག་མིན་པས། །དོན་འདི་རྣམ་པར་དཔྱད་ནས་བདག་གིས་ནི། །སློབ་མ་ལ་ཕན་རྒྱས་བཤད་བྱས་པ་ཡིན། །དེ་ལ་གཞི་ཐམས་ཅད་ཡོད་པར་སྨྲ་བའི་སློབ་དཔོན་གྱིས་མངོན་པར་འདོད་པའི་རྒྱུ་མཚན་བཅོམ་ལྡན་འདས་ལ་ཕྱག་འཚལ་བ་སྔོན་དུ་འགྲོ་བ་ཅན་གྱི་སྤྱོད་པ་ཡང་དག་པར་བསྡུ་བར་བཞེད་ནས། དཔལ་འབྱོར་གནས་དང་ཞེས་བྱ་བ་ལ་སོགས་པས་ཚིག་ལེའུར་བྱས་པ་བརྩམས་པ་ཡིན་ཏེ། དེ་ལ་ངེས་པར་འབྱུང་བའི་ཚུལ་ཁྲིམས་བཤད་པར་བྱ་ཞེས་བྱ་བའི་བཤད་པ་འདི་སྦྱར་བར་བྱའོ། །དེ་ལ་འགྲོ་བས་བྱུང་བ་སྟེ་བྱུང་བ་ཞེས་བྱ་བ་དངོས་པོ་སྒྲུབ་པར་བྱེད་
པ་གཟུང་གི་འདིས་འགྲོ་བར་བྱེད་པས་ན་ཞེས་བྱ་བར་ནི་མ་ཡིན་ཏེ། བྱུང་བ་ནི་འདིར་ཐོབ་པ་ལ་བྱའི་འགྲོ་བར་བྱེད་པ་ལ་ནི་མ་ཡིན་ནོ། །ཅིའི་ཕྱིར་ཞེ་ན། ལམ་དང་འགྲོ་བར་བྱེད་པ་དེ་དག་ནི་གཙོ་བོ་མ་ཡིན་པ་ཉིད་ཀྱི་ཕྱིར་རོ། །ལྷག་མ་མ་ལུས་བར་བྱུང་བ་ནི་ངེས་པར་འབྱུང་བ་སྟེ། ཡང་ཕྱིར་མི་ལྡོག་པ་དང་ཁམས་གསུམ་པ་ལས་ཤིན་ཏུ་འདས་པའི་མཚན་ཉིད་ཡིན་པས་ཞེས་བྱ་བའི་བར་དུའོ། །དེ་བས་ན་འདིས་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ཡང་དག་པར་ཐོབ་པར་བསྟན་པ་ཡིན་ནོ། །དེའི་དོན་ནམ་དེའི་རྒྱུ་མཚན་ནམ་དེ་ཐོབ་པར་བྱེད་པའི་ཚུལ་ཁྲིམས་ནི་ངེས་འབྱུང་ཚུལ་ཏེ། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ཐོབ་པར་བྱེད་པ་ཞེས་བྱ་བའི་བར་དུ་སྟེ། །དེ་ནི་དོན་བཤད་པ་ཡིན་ནོ། །བསྡུ་བ་ཉིད་ནི་ངེས་པར་འབྱུང་བ་འམ། ངེས་པར་འབྱུང་བའི་ཚུལ་ཁྲིམས་ནི་ངེས་པར་འབྱུང་བའི་ཚུལ་ཏེ། ཚུལ་ཁྲིམས་དེས་བྱ་བ་དེ་ནི་དེའི་དོན་ཁོ་ན་ཡིན་པའི་ཕྱིར་རོ། །ཚུལ་ཁྲིམས་ཀྱང་འདིར་དགེ་སྦྱོང་གི་བསླབ་པའི་གཞི་ལ་བྱའོ། །ཅི་ཞིག་བྱས་ནས་བཤད་པར་བྱ་ཞེ་ན། སངས་རྒྱས་ལ་ནི་མགོས་གཏུགས་ཞེས་བྱ་བ་སྨོས་ཏེ། །དངོས་པོ་མ་ལུས་པ་ཐུགས་སུ་ཆུད་པའི་ཕྱིར་སངས་རྒྱས་སམ་མི་ཤེས་པའི་གཉིད་ལས་སད་པའི་ཕྱིར་སངས་རྒྱས་ཏེ། །སྐྱེས་བུ་གཉིད་སད་པ་བཞིན་ནོ། །དེ་བས་ན་སངས་རྒྱས་བཅོམ་ལྡན་འདས་དེ་ལ་ཕྱག་བཙལ་ནས་སོ། །ཅིས་ཤེ་ན། མགོས་ཞེས་སྨོས་ཏེ་སྤྱི་བོས་སོ། །འདི་སྐད་དུ་དེ་བཞིན་གཤེགས་པ་ལ་ཡན་ལག་གི་མཆོག་མགོ་བོས་མངོན་པར་གཏུགས་ཏེ་ངེས་པར་འབྱུང་བའི་ཚུལ་ཁྲིམས་བཤད་པར་བྱའོ་ཞེས་བསྟན་པ་ཡིན་ནོ། །ཁྱད་པར་ཇི་ལྟ་བུ་དང་ལྡན་པའི་ངེས་པར་འབྱུང་བའི་ཚུལ་ཁྲིམས་ཞེན་དཔལ་འབྱོར་གནས་དང་ཞེས་བྱ་བ་སྨོས་ཏེ་དཔལ་གྱི་འབྱོར་པ་ནི་དཔལ་འབྱོར་ཏེ། འབྱོར་བ་ནི་ཕུན་སུམ་ཚོགས་པ་སྟོན་པར་བྱེད་པ་ཡིན་ནོ། །དེའི་གཞི་དང་རྟེན་དང་རྒྱུ་དང་གནས་ཡིན་པས་ས་དང་འདྲ་བར་གནས་ཡིན་ནོ་ཞེས་བྱ་བ་དེའི་ཕྱིར་དེ་བཤད་པར་བྱའོ་ཞེས་བྱ་བར་སྦྱར་རོ། །འདིས་ནི་འདིར་ཚངས་པ་ལ་སོགས་པ་མངོན་པར་མཐོ་བའི་མཚན་ཉིད་ཀྱི་ཆོས་ཀྱི་རྒྱུ་ཡིན་ནོ་ཞེས་བསྟན་པར་འགྱུར་རོ། །ཚུལ་ཁྲིམས་ཀྱིས་དེ་དག་ཐོབ་པ་ཡིན་ནོ་ཞེས་བྱས་ནས་ཡང་ཚུལ་ཁྲིམས་དེ་ཁྱད་པར་དུ་
བྱེད་དོ། །ཚུལ་ཁྲིམས་གང་གིས་ཕུང་པོ་ལྔའི་བདག་ཉིད་ཀྱི་སྡུག་བསྔལ་སྤངས་ཤིང་བསལ་ཏེ་བོར་བ་དེ་ནི་སྡུག་བསྔལ་སྤོང་འགྱུར་རོ། །ཕུང་པོ་ལྔ་ཡང་འདིར་གཟུགས་ཀྱི་ཕུང་པོ་དང༌། །ཚོར་བའི་ཕུང་པོ་དང༌། འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་དང༌། རྣམ་པར་ཤེས་པའི་ཕུང་པོ་ཞེས་བྱའོ། །དེ་དག་ཉིད་སྡུག་བསྔལ་ཡིན་ཏེ། སྡུག་བསྔལ་གསུམ་ཉིད་དང་འབྲེལ་བའི་ཕྱིར་རོ། །ཅི་འདིས་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་རྒྱུ་ཡིན་ནོ་ཞེས་བཤད་པ་ཡིན་ནོ། །ཚུལ་ཁྲིམས་དེ་ཁྱད་པར་ཅི་ལྟ་བུ་ཞེ་ན། འཇིག་ཚོགས་ལྟ་བ་ཞེས་བྱ་སྨོས་ཏེ། འཇིག་པར་བྱེད། ཉམས་པར་བྱེད། ཟད་པར་བྱེད་པས་ན་འཇིག་པའོ། །ཚེགས་ནི་ཕུང་པོ་ཡིན་ནོ། །འཇིག་པ་ཡང་དེ་ཡིན་ལ་ཚོགས་ཀྱང་དེ་ཡིན་པས་འཇིག་ཚོགས་ཏེ། དོན་གཅིག་གི་སྒོ་ནས་ཁྱད་པར་དུ་བྱེད་པ་ཞེས་བྱ་བའི་བསྡུ་བ་ཡིན་ནོ། །འཇིག་ཚོགས་སུ་ལྟ་བ་ནི་འཇིག་ཚོགས་ལྟ་བའོ། །ལྟ་བ་ནི་ཕྱོགས་ཏེ་ཤེས་རབ་ཀྱི་ཁྱད་པར་ཡིན། །ཇི་ལྟར་ཡང་སྤྱི་ཉིད་ཀྱི་སྒོ་ནས་དེ་སྐད་དུ་བཤད་པ་དེ་ལྟ་ན་ཡང་བདག་དང་བདག་གི་རྣམ་པར་རབ་ཏུ་འཇུག་པའི་ཤེས་རབ་ཁོ་ན་འཇིག་ཚོགས་སུ་ལྟ་བར་བཤད་པ་ཡིན་ཏེ། བཀའ་ལས་ཀྱང་གསུངས་པའི་ཕྱིར་རོ། །གདོན་ནི་ཤ་ཟ་ལ་སོགས་པ་སྟེ་གདོན་དང་འདྲ་བས་གདོན་ཏེ། གསོ་དཀའ་བ་ཉིད་ཡིན་པའི་ཕྱིར་རོ། །འཇིག་ཚོགས་ལ་ལྟ་བ་ཡང་དེ་ཡིན་ལ་གདོན་ཡང་དེ་ཡིན་པས་ན་འཇིག་ཚོགས་ལྟ་ལ་ཞེན་པའི་གདོན་ནོ། །རྩ་བ་ནི་རྒྱུ་ལ་བྱ་སྟེ་འཇིག་ཚོགས་ལྟ་ལ་ཞེན་པའི་གདོན་ཡང་ཡིན་ལ་རྩ་བ་ཡང་ཡིན་པའི་ཕྱིར་འཁོར་བའི་འཇིག་ཚོགས་ལྟ་ལ་ཞེན་པའི་གདོན་གྱི་རྩ་བའོ། །དེ་བས་ན་ཚུལ་ཁྲིམས་དེ་ནི་དེ་འཇོམས་པར་བྱེད་པའི་ཕྱིར་འཇིག་ཚོགས་ལྟ་ལ་ཞེན་པའི་གདོན་གྱི་རྩ་བ་འཛོམས་པའོ། །འདིས་ཀྱང་འདི་སྐད་དུ་ཚུལ་ཁྲིམས་དེ་ནི་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་དབྱིངས་ཀྱི་རྒྱུ་ཡིན་ནོ་ཞེས་བསྟན་པ་ཡིན་ཏེ། གང་གི་ཕྱིར་འཇིག་ཚོགས་སུ་ལྟ་བ་ལས་ཉོན་མོངས་པ་རབ་ཏུ་སྐྱེ་བ་དེའི་ཕྱིར་དེ་སྤངས་པས་ཉོན་མོངས་པ་ཐམས་ཅད་སྤང་བར་འགྱུར་རོ། །ཡང་ན་དེ་སྤངས་མ་ཐག་ཏུ་གཞན་འདོད་ཆགས་ལ་སོགས་པ་འགའ་ཞིག་ནི་དུས་མཉམ་དུ་འགའ་ཞིག་ནི་རིམ་གྱིས་ཕྱིས་སྤོང་བར་འགྱུར་བ་དེ་བས་ན་
གདོན་མི་ཟ་བར་མྱ་ངན་ལས་འདས་པའི་རྒྱུ་ཡིན་ནོ། །གང་གི་ཕྱིར་བདག་མེད་པར་བསྟན་པས་ནི་ཐོབ་པ་ཡིན་ན་དགེ་སློང་གི་ཚུལ་ཁྲིམས་ཀྱིས་ཇི་ལྟར་ཐར་པ་ཐོབ་པར་འགྱུར་ཞེ་ན། དེ་ལ་ཉེས་པ་མེད་དེ། གང་གི་ཕྱིར་ཚུལ་ཁྲིམས་ལ་གནས་ནས་ཐོས་པ་དང་བསམ་པ་དང་ལྡན་པ་བསྒོམ་པ་ལ་རབ་ཏུ་སྦྱོར་བ་དེ་ལས་རིམ་གྱིས་ཡེ་ཤེས་སྐྱེ་བར་འགྱུར་པའི་ཕྱིར་བརྒྱུད་པས་མྱ་ངན་ལས་འདས་པ་གཉིས་ཀྱི་རྒྱུར་འགྱུར་ཏེ། ཕུང་པོའི་བདུད་ལས་རྒྱལ་བ་དང༌། གཉིས་པས་ཉོན་མོངས་པའི་བདུད་ལས་རྒྱལ་བ་བསྟན་པ་ཡིན་ནོ། །གཞན་ཡང་མེ་ཏོག་མདའ་འཇོམས་ཞེས་བྱ་བ་ལ་སོགས་པས་ངེས་པར་འབྱུང་བའི་ཚུལ་ཁྲིམས་ཁྱད་པར་དུ་བྱེད་དེ། །མེ་ཏོག་དང་འདྲ་བའི་མདའ་གང་ལ་ཡོད་པ་དེ་ནི་མེ་ཏོག་མདའ་ཅན་ཏེ་འདོད་པའི་ལྷ་ཡིན་ལ། དེ་བཅོམ་པ་ནི་ཕམ་པ་ཡིན་ནོ། །དེའི་རྒྱུ་ཉིད་ཡིན་པའི་ཕྱིར་ཚུལ་ཁྲིམས་དེ་ནི་མེ་ཏོག་མདའ་འཇོམས་སོ། །གང་གི་ཕྱིར་དེ་ལ་གནས་ནས་ལྷའི་བུའི་བདུད་ཀྱི་ཡུལ་ཡོངས་སུ་སྤངས་པའི་ཕྱིར་དེ་ཕམ་པར་བྱེད་པར་འགྱུར་ཏེ། འདིས་ཀྱང་ལྷའི་བུའི་བདུད་ལས་རྒྱལ་བའི་རྒྱུ་ཉིད་ཡིན་པར་བསྟན་ཏོ། །ཡང་ན་ཁྱད་པར་དེ་དག་བཅོམ་ལྡན་འདས་ཉིད་ཀྱི་ཡིན་གྱི་ངེས་པར་འབྱུང་བའི་ཚུལ་ཁྲིམས་ཀྱི་ནི་མ་ཡིན་ཏེ། དེ་ལ་སངས་རྒྱས་ལ་ནི་མགོས་གཏུགས་ནས། ངེས་པར་འབྱུང་བའི་ཚུལ་ཁྲིམས་བཤད་པར་བྱའོ་ཞེས་བྱ་བར་སྦྱར་རོ། །ཁྱད་པར་ཇི་ལྟ་བུ་དང་ལྡན་པའི་སངས་རྒྱས་བཅོམ་ལྡན་འདས་ཤེ་ན། དཔལ་འབྱོར་གནས་དང་ཞེས་བྱ་བ་སྨོས་ཏེ། དཔལ་གྱིས་འབྱོར་བ་ནི་དཔལ་འབྱོར་ཡིན་ལ། དེ་ཡང་རྣམ་པ་གཉིས་ཏེ། བསོད་ནམས་ཀྱི་ཚོགས་ཀྱི་མཚན་ཉིད་དང༌། ཡེ་ཤེས་ཀྱི་ཚོགས་ཀྱི་མཚན་ཉིད་དོ། །དེའི་གནས་ནི་གཞི་སྟེ། སངས་རྒྱས་བཅོམ་ལྡན་འདས་བསོད་ནམས་དང་ཡེ་ཤེས་ཀྱི་ཚོགས་དང་ཡང་དག་པར་ལྡན་པ་ཉིད་ཀྱི་ཕྱིར་རོ། ཡང་ན་བཅོམ་ལྡན་འདས་ནི་འཇིག་རྟེན་པ་དང་འཇིག་རྟེན་ལས་འདས་པའི་དཔལ་འབྱོར་བའི་གནས་ཏེ། འབྱུང་བའི་གནས་ཡིན་ནོ། །གང་གི་ཕྱིར་བཅོམ་ལྡན་འདས་བསོད་ནམས་ཀྱི་ཞིང་བླ་ན་མེད་པ་ལ་བརྩམས་ནས་སྦྱིན་པ་དང་མཆོད་པ་ལ་སོགས་པས་དེ་དག་ཐོབ་པར་འགྱུར་བ་དེ་ཉིད་ཀྱི་ཕྱིར་བཅོམ་ལྡན་འདས་རྐང་གཉིས་ཀྱི་མཆོག་བསོད་ནམས་ཀྱི་ཞིང་ཞེས་བྱའོ། །གཞན་ཡང་སྡུག་བསྔལ་
སྤོང་འགྱུར་ཞེས་བྱ་བས་ཁྱད་པར་དུ་བྱེད་དེ། བཅོམ་ལྡན་འདས་གང་གིས་འཁོར་བའི་སྡུག་བསྔལ་སྤངས་ཤིང་བསལ་བ་དེ་ནི་སྡུག་བསྔལ་སྤོང་འགྱུར་ཏེ། གང་གི་ཕྱིར་བཅོམ་ལྡན་འདས་ནི་བསོད་ནམས་ཀྱི་ཚོགས་དང་ལྡན་པ་ཉིད་ཀྱི་ཕྱིར་སྐུའི་བདེ་བ་མངའ་ལ། ཡེ་ཤེས་ཀྱི་ཚོགས་དང་ཡང་དག་པར་ལྡན་པ་ཉིད་ཀྱི་ཕྱིར་ཐུགས་ཀྱི་བདེ་བ་མངའ་བ་དེའི་ཕྱིར་སྡུག་བསྔལ་སྤངས་པར་གྱུར་པ་ཡིན་ནོ། །ཡང་ན་བཅོམ་ལྡན་འདས་གང་གིས་ཕུང་པོ་ལྔའི་བདག་ཉིད་ཀྱི་སྡུག་བསྔལ་སྤངས་པ་དེ་ནི་སྡུག་བསྔལ་སྤོང་འགྱུར་རོ། །འདིས་ཀྱང་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ཐོབ་པར་བསྟན་པས་བཅོམ་ལྡན་འདས་ལ་བསྟོད་པར་འགྱུར་ལ། སྔ་མས་ནི་བསོད་ནམས་དང་ཡེ་ཤེས་ཀྱི་ཚོགས་དང་ཡང་དག་པར་ལྡན་པའི་སྒོ་ནས་བསྟོད་པ་ཡིན་ནོ། །གཞན་ཡང་འཇིག་ཚོགས་ལྟ་ལ་ཞེས་བྱ་བ་ལ་སོགས་པས་བཅོམ་ལྡན་འདས་ཁྱད་པར་དུ་བྱེད་དེ། སེམས་ཅན་རྣམས་ཀྱི་འཇིག་ཚོགས་སུ་ལྟ་བའི་གདོན་གྱི་རྩ་བ་འཇོམས་པར་མཛད་པའི་ཕྱིར་འཇིག་ཚོགས་ལྟ་ལ་ཞེན་པའི་གདོན་གྱི་རྩ་བ་འཇོམས་པ་སྟེ། བདག་ཉིད་ཀྱི་འཇིག་ཚོགས་སུ་ལྟ་བ་སྤངས་པ་མེད་པར་འཇིག་རྟེན་གྱིས་མི་ནུས་པའི་ཕྱིར་ཤུགས་ཀྱིས་བཅོམ་ལྡན་འདས་ནི་འཇིག་ཚོགས་སུ་ལྟ་བ་སྤངས་པར་བསྟན་པར་འགྱུར་རོ་ཞེས་དེ་དག་མ་ལུས་པ་ནི་ཚིག་གཅིག་པོ་འདིས་བཤད་པ་ཡིན་ནོ། །གཞན་ཡང་མེ་ཏོག་མདའ་འཇོམས་ཞེས་བྱ་བས་ཁྱད་པར་དུ་བྱེད་དེ། ལྷའི་བུ་གང་ལ་མེ་ཏོག་གི་མདའ་ཡོད་པ་དེ་འཇོམས་པའི་རྒྱུ་ཉིད་ཡིན་པའི་ཕྱིར་ན། བཅོམ་ལྡན་འདས་ནི་མེ་ཏོག་མངའ་འཇོམས་ཏེ། བཅོམ་ལྡན་འདས་ཀྱིས་ལྷའི་བུའི་བདུད་འཁོར་དུ་མ་ཅན་བྱམས་པས་ཕམ་པར་མཛད་པའི་ཕྱིར་རོ། །ལྷག་མ་ནི་སྔ་མ་བཞིན་ནོ། །ད་ནི་གང་ཞིག་སྲོག་གཅོད་ཅེས་བྱ་བ་ལ་སོགས་པས་བཤད་མ་ཐག་པའི་ངེས་པར་འབྱུང་བའི་ཚུལ་ཁྲིམས་ཀྱི་རང་གི་ངོ་བོ་འཆད་པར་བྱེད་དེ། ལྡོག་པར་བྱེད་པས་ན་ལྡོག་པ་སྟེ་སོ་སོར་ལྡོག་པ་ཞེས་བྱ་བའི་བར་དུའོ། །སོ་སོར་འཇུག་པས་ན་ངེས་པར་འབྱུང་བའི་ཚུལ་ཁྲིམས་ཏེ་སྲོག་གཅོད་པ་ལ་སོགས་པ་ལས་ལྡོག་པ་གང་ཡིན་པ་དེ་ནི་ཚུལ་ཁྲིམས་ཡིན་ནོ་ཞེས་བྱ་བར་སྦྱར་རོ། །ད་ནི་གང་དག་ལས་ལྡོག་པ་དེ་བཤད་པར་བྱ་སྟེ། སྲོག་ཅེས་བྱ་བ་ནི་འཚོ་བའི་མཚན་ཉིད་ཅན་གྱི་ཆོས་ཡིན་ལ།
དེ་གང་ལ་ཡོད་པ་དེ་ནི་སྲོག་ཆགས་སོ། །དེ་གཅོད་པ་ནི་འགོག་པར་བྱེད་པ་ཡིན་ཏེ། རྟེན་ཉམས་པར་བྱེད་པ་དེ་ནི་སྲོག་གཅོད་པ་ཡིན་པས་དེ་ལས་སོ། །གཞན་གྱི་ནོར་ནི་གཞན་གྱི་ཏེར་ཏེ་གཞན་གྱི་རྫས་ཞེས་བྱའོ། །དེ་འཕྲོག་པར་བྱེད་པས་ན་འཕོག་པ་སྟེ་དེ་ལས་སོ། །ཚངས་པའི་སྒྲ་ནི་མྱ་ངན་ལས་འདས་པ་ཡིན་ལ། དེའི་ཆེད་དུ་སྤྱོད་པ་ནི་ཚངས་པར་སྤྱོད་པ་སྟེ་བསྡུ་བ་ནི་ངེས་པར་འབྱུང་བའི་ཚུལ་ཁྲིམས་དང་འདྲའོ། །ཚངས་པར་སྤྱོད་པ་མ་ཡིན་པ་ནི་མི་ཚངས་པར་སྤྱོད་པ་སྟེ། དེ་ལས་བཟློག་པའོ། །ཇི་ལྟར་ཡང་སྲོག་གཅོད་པ་ལ་སོགས་པ་སྤྱིར་གཟུང་བར་བྱ་བ་ཡིན་པ་དེ་ལྟ་ན་ཡང་གྲགས་པས་འཁྲིག་པའི་ཆོས་ཁོ་ན་ལ་གཟུང་བར་བྱའི་གཞན་ལ་ནི་མ་ཡིན་ནོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་སོ་སོར་ཐར་པ་ལས་མི་ཚངས་པར་སྤྱོད་པ་ཞེས་གསུངས་པ་དེ་བས་ན་དེ་ལས་སོ། །བརྫུན་མ་ཡིན་པ་ནི་བདེན་པ་ཡིན་ལ་བདེན་པ་མ་ཡིན་པ་ནི་བརྫུན་པ་སྟེ་དེ་ལས་སོ། །བཅོས་ཆང་ནི་མྱོས་པར་བྱེད་པའི་ཁྱད་པར་ཡིན་ཏེ། དེ་དང་པོར་བྱས་པའི་སྦྱར་བའི་ཆང་ལ་སོགས་པ་གང་ཡིན་པ་དེ་ནི་བཅོས་ཆང་ལ་སོགས་པ་སྟེ་དེ་ལས་སོ། །གང་དང་པོར་བྱས་པའི་གླུ་ལ་སོགས་པ་གང་ཡིན་པ་དེ་ནི་གར་སོགས་སོ། །ཕྲེང་བ་དང་པོར་བྱས་པའི་ཁ་དོག་འཆང་བ་ལ་སོགས་པ་གང་ཡིན་པ་དེ་ནི་ཕྲེང་སོགས་སོ། །ཆེན་པོ་ཡང་དེ་ཉིད་ཡིན་ལ་མཐོན་པོ་ཡང་དེ་ཉིད་ཡིན་པས་ན་ཆེ་མཐོའོ། །ཆེ་མཐོ་ཡར་ཡིན་ལ་མལ་སྟན་ཡང་ཡིན་པས་ན་མལ་སྟན་ཆེ་མཐོའོ། །མལ་སྟན་གྱི་སྒྲ་ནི་ཁྱད་པར་གྱི་གཞི་ཡིན་ལ་ཆེ་མཐོའི་སྒྲ་ནི་ཁྱད་པར་ཡིན་ཏེ། ཁྱད་པར་གྱི་གཞི་དེ་ཡང་སྤྱིར་མལ་སྟན་དང་ཆེན་པོ་དང༌། མཐོན་པོ་ལ་ཡང་འཇུག་པ་དེ་བས་ན་ཁྱད་པར་དང་ཁྱད་པར་གྱི་གཞི་གཞི་གཅིག་པ་ཡིན་ནོ། །དེའི་ཕྱིར་ཡང་མལ་སྟན་ཆེན་པོ་དད། མལ་སྟན་མཐོན་པོ་ཞེས་བྱ་བའི་དོན་དུ་འགྱུར་རོ། །དུས་མ་ཡིན་པའི་ཟས་ནི་ཕྱི་དྲོའི་ཟས་སོ། །དེ་ལ་འདི་ལྟར་གར་ལ་སོགས་པ་དང༌། ཕྲེང་བ་ལ་སོགས་པ་དང༌། མལ་སྟན་ཆེ་མཐོ་དང༌། ཕྱི་དྲོའི་ཟས་ཞེས་གང་དུ་བྱ་སྟེ་ཟླས་དབྱེ་བའི་དོན་ལ་ཚོགས་པ་གཙོ་བོར་གྱུར་པ་ལ་གཅིག་བཞིན་དུ་འགྱུར་བ་དང་མ་ནིང་གི་རྟགས་སུ་འགྱུར་རོ། །དངུལ་ལས་བྱུང་བས་ན་དངུལ་ནི་རིན་པོ་ཆེ་གཞན་གྱིས་ཉེ་བར་མཚོན་པ་ཡིན་ནོ། །
དེ་བས་ན་བསླབ་པའི་གཞི་བཅུ་པོ་དེ་དག་ལས་ལྡོག་པ་གང་ཡིན་པ་དེ་ནི་ངེས་པར་འབྱུང་བའི་ཚུལ་ཁྲིམས་ཡིན་ནོ་ཞེས་བྱ་བའི་དོན་འདིར་འགྱུར་རོ། །ད་ནི། དེ་ནི་དགེ་ཚུལ་བརྟུལ་ཞུགས་ཆུ་ལོན་བརྩིགས། །ཞེས་བྱ་བ་ལ་སོགས་པས་ལྡོག་པའི་ཁྱད་པར་དུ་བྱེད་དེ། དགེ་ཚུལ་གྱི་བརྟུལ་ཞུགས་ནི་དགེ་ཚུལ་གྱི་བརྟུལ་ཞུགས་སོ། །དེ་གང་ཞེ་ན་ཁྱིམ་པའི་རྟགས་ཡོངས་སུ་སྤོང་བ་སྔོན་དུ་འགྲོ་བ་ཅན་གྱི་རབ་ཏུ་བྱུང་བའི་རྟགས་ཡང་དག་པར་ལེན་པའོ། །ཆུ་ལོན་བརྩིགས་པ་དང་འདྲ་བས་ན་དེའི་ཆུ་ལོན་བརྩིགས་པའོ། །དེ་གང་ཞེ་ན་ལྡོག་པ་ཡིན་ཏེ། ཇི་ལྟར་ཆུ་ལ་མི་འགྲོ་བར་བྱ་བའི་ཕྱིར་ཆུ་ལོན་བརྩིགས་བ་དེ་ལྟར་བརྟུལ་ཞུགས་རྗེས་སུ་བསྲུང་བར་བྱ་བའི་ཕྱིར་སྡོམ་པ་ཡིན་ནོ། །དེ་ཁྱད་པར་ཇི་ལྟ་བུ་དང་ལྡན་ཞེ་ན། སྨྲས་པ། མཐར་བྱེད་པ་ནི་སྲོག་གཏོང་བའི་མཚན་ཉིད་ཀྱི་འཆི་བ་ཡིན་པའི་ཕྱིར་མཐར་བྱེད་པའོ། །དེའི་འཆི་བ་ནི་སོ་སོའི་ཁྱད་པར་ཡིན་ནོ། །དེ་དབྱུང་བར་བྱ་བའི་ཆེད་ཀྱི་ཐབས་ནི་དབྱུང་བའི་ཐབས་ཏེ། དེ་ཉིད་ལྡོག་པ་ཡིན་ཏེ། འདིས་ཀྱང་འཆི་བདག་གི་བདུད་ཕམ་པར་བྱེད་པའི་ཐབས་སུ་འགྱུར་བ་ཡིན་ནོ་ཞེས་བསྟན་པར་འགྱུར་རོ། །གང་གི་ཕྱིར་སྡོམ་པ་ལ་གནས་ན་རིམ་གྱིས་ཐར་པ་ཐོབ་པས་འཆི་བདག་གི་བདུད་ཕམ་པར་འགྱུར་རོ། །གཞན་ཡང་རྫོགས་པའི་བྱང་ཆུབ་ཅེས་བྱ་བ་ལ་སོགས་པས་དེ་ཉིད་ཁྱད་པར་དུ་བྱེད་པ་ཡིན་ཏེ། རྫོགས་པའི་བྱང་ཆུབ་ནི་ཡང་དག་པར་རྫོགས་པའི་བྱང་ཆུབ་སྟེ། དེ་ཉིད་དཔལ་ཡིན་ལ་དེ་མནོད་པ་སྟེ། ཐོབ་པའི་ཕྱིར་དབང་བསྐུར་བ་དང༌། དབང་གཏོད་པར་བྱེད་ཅེས་བྱ་བའི་བར་དུའོ། །གང་གི་ཕྱིར་དགེ་ཚུལ་ལ་སྡོམ་པ་སྦྱིན་པས་སངས་རྒྱས་ཉིད་ཀྱི་ཆེད་དུ་དབང་བསྐུར་བ་ཡིན་ནོ། །བྱང་ཆུབ་རྣམ་པ་གསུམ་གྱི་ཕྱིར་དབང་བསྐུར་བ་མ་ཡིན་ནམ། དེ་ཅི་ལྟར་ན་རྫོགས་པའི་བྱང་ཆུབ་དཔལ་ཞེས་བྱ་བ་ལ་སོགས་པ་སྨོས་ཤེ་ན། དེ་ལ་ཉེས་པ་མེད་དེ། གང་གི་ཕྱིར་གཙོ་བོའི་རྒྱུ་ཉིད་དུ་བསྟན་པས་བྱང་ཆུབ་གཞན་དག་གི་རྒྱུ་ཉིད་དུ་ཡང་བཤད་པར་འགྱུར་རོ། །དེ་ལྟ་བུར་གྱུར་པའི་ལྡོག་པ་དེ་ཅིའི་ཕྱིར་བཅོམ་ལྡན་འདས་སྟོན་པར་མཛད་ཅེ་ན། ཉོན་མོངས་དགྲའི་གཡུལ་ལས་ཞེས་བྱ་བ་ལ་སོགས་པ་སྨོས་ཏེ། ཉོན་མོངས་པ་ནི་འདོད་ཆགས་ལ་སོགས་པའོ། །དགྲ་ནི་དགྲ་བོ་སྟེ། དེ་ཉོན་མོངས་པའི་དགྲའོ། །དེའི་
གཡུལ་ནི་གཡུལ་འགྱེད་པ་སྟེ་དེ་ལས་རྒྱལ་བར་བྱེད་པ་ཡིན་ནོ། །དེའི་ཕྱིར་བཅོམ་ལྡན་འདས་ཀྱིས་ཉོན་མོངས་པའི་དགྲའི་གཡུལ་ལས་རྒྱལ་བར་བྱེད་པར་བསྟན་པ་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །གང་གི་ཕྱིར་སྡོམ་པ་ལ་གནས་ན་རིམ་གྱིས་ཉོན་མོངས་པ་སྤར་བར་འགྱུར་པའི་ཕྱིར་ཉོན་མོངས་པའི་དགྲའི་གཡུལ་ལས་རྒྱལ་བྱེད་དེ། འདིས་ནི་སྡོམ་པའི་དགོས་པ་བསྟན་པ་ཡིན་ནོ། །ད་ནི་ངེས་པར་འབྱུང་བའི་ཚུལ་ཁྲིམས་བཤད་པར་བཞེད་ནས་དང་པོར་སྤྱིར་བཏང་བ། འདུ་ཤེས་གཙོ་ལ་ཇི་བཞིན་དོན་གྱུར་ན། །ཞེས་བྱ་བ་ལ་སོགས་པས་སྟོན་པར་བྱེད་དོ། །བསླབ་པའི་གཞི་ནི་རྣམ་པར་གཉིས་ཏེ། འདུ་ཤེས་གཙོ་བོར་གྱུར་པ་དང༌། དངོས་པོ་གཙོ་བོར་གྱུར་པའོ། །དེ་ལ་དངོས་པོ་གཙོ་བོར་གྱུར་པ་གང་ཡིན་པ་དེ་ནི་དངོས་པོ་གཙོ་བོར་གྱུར་པ་སྟེ། དངོས་པོའི་སྒྲས་ནན་ཏན་དུ་བྱ་བ་ལ་སོགས་པ་ཡོད་པ་ཙམ་ལ་བྱ་སྟེ། དཔེར་ན་མི་ཚངས་པར་སྤྱོད་པ་ལྟ་བུའོ། །གང་གི་ཕྱིར་འདུ་ཤེས་མ་གཏོགས་པ་དེ་དངོས་པོ་ཙམ་ལ་ཀུན་དུ་སྤྱོད་པ་ཡིན་པའི་ཕྱིར་རོ། །ཅིག་ཤོས་ཀྱང་བསླབ་པའི་གཞི་གང་དག་འདུ་ཤེས་གཙོ་བོར་གྱུར་པ་དེ་ནི་འདུ་ཤེས་གཙོ་བོར་གྱུར་པ་སྟེ། དེ་ཡང་སྲོག་གཅོད་པ་ལ་སོགས་པ་ཡིན་ནོ། །བསླབ་པའི་གཞི་དེ་དག་ལས་འདས་ན་ཅིར་འགྱུར་ཞེ་ན། ཇི་བཞིན་དོན་འགྱུར་ན་ཞེས་བྱ་བ་ལ་སོགས་པ་སྨོས་པ་ཡིན་ཏེ། འདུ་ཤེས་ཇི་ལྟ་བ་བཞིན་དུ་དོན་དེ་བཞིན་དུ་ཡོད་པར་གྱུར་པའི་ཕྱིར། ཇི་བཞིན་དོན་འགྱུར་ཏེ་དེའི་དངོས་པོ་ནི་དོན་ཇི་ལྟ་བ་བཞིན་དུ་གྱུར་པ་ཉིད་དོ། །དེའི་ཕྱིར་འདུ་ཤེས་ཇི་ལྟ་བ་བཞིན་དུ་གྱུར་ན་ཉེས་པ་རྫོགས་པར་འགྱུར་རོ། །ཉེས་པའི་སྒྲས་ཉེས་བྱས་རྗོད་པར་བྱེད་དེ། དཔེར་ན་སྲོག་ཆགས་དང་བཅས་པའི་ཆུ་ལ་སྲོག་ཆགས་དང་བཅས་པར་འདུ་ཤེས་པས་སྲོག་ཆགས་བསད་པར་གྱུར་ན་ཉེས་བྱས་སྦོམ་པོར་འགྱུར་བ་ལྟ་བུའོ། །ཇི་བཞིན་དོན་མིན་ཆུང་བར་འགྱུར། །ཞེས་བྱ་བ་ནི་ཉེས་པ་ཆུང་བ་སྟེ། །དམན་པར་འགྱུར་རོ། །གང་གི་ཚེ་ཞེ་ན་སྨྲས་པ། དོན་ཇི་ལྟ་བ་བཞིན་མ་ཡིན་པ་ནི་ཇི་བཞིན་མིན་ཏེ། འདུ་ཤེས་ལས་དོན་གཞན་དུ་གྱུར་པའོ། །དེའི་དངོས་པོ་ནི་དོན་ཇི་ལྟ་བ་བཞིན་མ་ཡིན་པ་ཉིད་དོ། །དོན་ཇི་ལྟ་བ་བཞིན་མ་ཡིན་པ་ཉིད་དེ་ལ་ཆུང་བར་འགྱུར་རོ། །དཔེར་ན་སྲོག་ཆགས་མེད་པ་
ལ་སྲོག་ཆགས་དང་བཅས་པར་འདུ་ཤེས་པས་དེ་ཉེ་བར་ལོངས་སྤྱོད་པ་ལ་སོགས་པ་བྱས་ན་ཉེས་བྱས་ཀྱི་ལྟུང་བ་ཆུང་བར་འགྱུར་བ་ལྟ་བུའོ། །དེས་ནི་ངེས་པར་ཉེས་པར་འགྱུར་བ་བསྟན་པ་ཡིན་ནོ། །ད་ནི། ཡིད་གཉིས་དང་ནི་འདུ་ཤེས་འདྲ་བར་གཞག །ཅེས་བྱ་བས་ཡིད་གཉིས་ཀྱི་ཉེས་པ་སྟོན་པར་བྱེད་པ་ཡིན་ཏེ། ཡིད་གཉིས་ནི་ཐེ་ཚོམ་དུ་གྱུར་པའོ། །འདུ་ཤེས་པར་བྱེད་པས་ན་འདུ་ཤེས་ཏེ་དེ་དང་འདྲ་བར་གཞག་པ་ནི་ཉེས་པར་རྣམ་པར་གཞག་པའོ། །དེ་ལ་འདིར་སྲོག་ཆགས་དང་བཅས་པའི་ཚུལ་ངེས་པས་དེ་ཉེ་བར་སྤྱོད་པ་ལ་སོགས་པ་བྱས་པ་ལས་ཉེས་པར་འགྱུར་པ་དེ་བཞིན་དུ་ཡིད་གཉིས་ལ་ཡང་འགྱུར་རོ། །འདི་ལྟར་སྲོག་ཆགས་མེད་པའི་ཆུ་ལ་ངེས་པས་ཉེས་པ་ཆུང་ངུར་འགྱུར་བ་ཇི་ལྟ་བ་དེ་བཞིན་དུ་ཡིད་གཉིས་ལ་ཡང་འགྱུར་རོ་ཞེས་བྱ་བའི་ཐ་ཚིག་གོ །ད་ནི་བསླབ་པའི་གཞི་ཐམས་ཅད་ཀྱི་ཕྱོགས་སུ་གཏོགས་པའི་སྤྱིའི་ཡིད་ཀྱི་ཉེས་པར་འགྱུར་བ་བཤད་པར་བྱ་སྟེ། བླངས་པ་ནི་ཡང་དག་པར་བཟུང་བའོ། །དེ་དག་གང་ཞེ་ན། སྲོག་གཅོད་པ་ལ་སོགས་པ་བསླབ་པའི་གཞི་བཅུ་པོ་དག་ཡིན་ནོ། །གང་གི་ཕྱིར་དེ་དག་ནི་དེས་རབ་ཏུ་བྱུང་བའི་དུས་སུ་བླངས་པ་དག་གོ །དེ་དག་གི་ཕྱོགས་སུ་གཏོགས་པ་ནི་དེ་དང་ཆ་འདྲ་བ་ཡིན་ཏེ་འབྲུམ་བུ་མ་སྨིན་པ་ལ་སོགས་པའི་རང་བཞིན་དེ་ལས་བྱུང་བའི་ཉེས་པ་འདས་པའི་མཚན་ཉིད་དེ་ནི་བླངས་པར་གཏོགས་པ་ཡིན་ནོ། །གང་གི་གང་ཕྱོགས་དང་མཐུན་པ་ཡིན་པ་དེ་ནི་དེ་ཉིད་དུ་སྟོན་པར་འགྱུར་རོ། །དེ་བས་ན་དེ་དག་ཡིད་ཀྱི་ཉེས་པར་འགྱུར་བ་ཡིན་པས་ཡིད་ཀྱིར་འགྱུར་བ་སྟེ། སེམས་ཁོ་ནས་ཕྱིར་བསླང་བར་བྱ་བ་གང་ཡིན་པ་དེ་ཉིད་ཀྱི་ཉེས་པར་འགྱུར་བ་ཡིན་ནོ་ཞེས་བྱ་བའི་དོན་ཏོ། །འདི་མན་ཆད་བསླབ་པའི་གཞི་འཆད་པ་ཡིན་ཏེ། དེ་ལ་ཉེས་པ་ཡང་རྣམ་པ་གསུམ་སྟེ་མཐར་འགྱུར་བ་དང༌། ཉེས་བྱས་དང༌། ཡིད་ཀྱིར་འགྱུར་བའོ། །དེ་ལ་མཐར་འགྱུར་བ་ནི་གང་གིས་རྣམ་པ་ཐམས་ཅད་དུ་རབ་ཏུ་བྱུང་བ་ལས་ཉམས་པར་བྱེད་ཅིང་སླར་ཡང་གསོ་བའི་སྐལ་བ་མེད་པར་འགྱུར་བའོ། །ཉེས་བྱས་ནི་བཤགས་པས་འདག་པར་འགྱུར་བའོ། །ཡིད་ཀྱིར་འགྱུར་བ་ནི་བསྟན་པ་ཡིན་ནོ། །དེ་ལ་མཐར་འགྱུར་བ་ནི་མི་གཞན་ཞེས་བྱ་བ་ལ་སོགས་པས་འཆད་
པར་བྱེད་དེ། གང་གིས་ཞེས་བྱ་བས་ནི་དགེ་ཚུལ་གྱི་སྐབས་ཉིད་ཡིན་པའི་ཕྱིར་དེ་དང་སྦྱར་རོ། །དེ་བས་ན་འདི་ལྟར་དགེ་ཚུལ་གང་གིས་མི་གཞན་ལ་བརྒྱབ་སྟེ་ཤི་བར་གྱུར་ན་བརླག་པར་འགྱུར་རོ་ཞེས་བཤད་པ་ཡིན་ནོ། །བརླག་པ་ནི་ཉམས་པར་གྱུར་པ་སྟེ། རྩ་བའི་ཉེས་བྱས་འཐོབ་པར་འགྱུར་རོ་ཞེས་བྱ་བའི་དོན་ཏོ། །མི་ཞེས་སྨོས་པ་ནི་དུད་འགྲོ་ལ་སོགས་པ་རྣམ་པར་བཅད་པའི་ཕྱིར་རོ། །གཞན་ཞེས་སྨོས་པ་ནི་བདག་ཉིད་རྣམ་པར་གཅད་པའི་ཕྱིར་རོ། །ཅི་ཇི་ལྟར་ཡང་རུང་བས་སམ་ཞེ་ན། འདུ་ཤེས་ཞེས་བྱ་བ་སྨོས་པ་ཡིན་ཏེ་མི་ཉིད་དུ་འདུ་ཤེས་པ་ནི་མིར་འདུ་ཤེས་པ་སྟེ། དེ་ཁོ་ནས་ཡིན་གྱི་གཞན་དུ་མ་ཡིན་ནོ་ཞེས་བྱ་བའི་ཐ་ཚིག་གོ །དེ་འདིར་སྨྲས་པ། གང་གི་ཚེ་མི་དུད་འགྲོའི་གཟུགས་སུ་རྣམ་པར་གནས་པ་ལ་དུད་འགྲོའི་འདུ་ཤེས་ཀྱིས་བསད་པར་གྱུར་ན་ཉེས་པ་ཆུང་ངུར་འགྱུར་ཏེ་མིར་འདུ་ཤེས་པ་མེད་པའི་ཕྱིར་རོ། །དེ་བཞིན་དུ་དུད་འགྲོ་མིའི་གཟུགས་སུ་རྣམ་པར་གནས་བ་ལ་མིང་འདུ་ཤེས་པས་བསད་པར་གྱུར་ན་ཡང་ཉེས་པ་ཆུང་བ་ཁོ་ནར་འགྱུར་ཏེ། དངོས་སུ་མི་མ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་སློབ་དཔོན་ཡོན་ཏན་འོད་ཀྱིས་དོན་དེ་ཉིད་གཟིགས་ནས་རྒྱུད་གཞན་གྱི་རྣམ་པ་བསྟེན་པ་བསད་ན་ཞེས་བཤད་པ་མཛད་པ་ཡིན་ནོ། །དེ་འདིར་གཞན་དུ་གྱུར་པས་རང་གི་རྒྱུད་མ་ཡིན་པ་མ་ཡིན་ནོ་ཞེས་བྱ་བས་རང་གི་རྒྱུད་མ་ཡིན་པ་ཉིད་ཅེས་བྱ་བ་རྗེས་སུ་འཇུག་པར་འགྱུར་བས་རྒྱུ་གཅིག་ལ་གཞན་པའི་རྒྱུད་ནི་རྒྱུད་གཞན་ཡིན་ལ། དེའི་རྣམ་པ་ནི་གཟུགས་ཡིན་ནོ། །དེ་བསྟན་པ་ནི་ཉམས་སུ་མྱོང་བ་སྟེ་རང་གི་རྒྱུད་མ་ཡིན་པ་ཉིད་ཡིན་ནོ་ཞེས་བཤད་པ་ཡིན་ནོ། །དེས་ཅིར་འགྱུར་ཞེ་ན། རང་གི་རྒྱུད་ཁོ་ན་ཡིན་ཏེ། གང་ཞིག་རྒྱུད་གང་གི་ཡིན་པའི་རྒྱུད་དེ་ཉིད་ཡིན་ནོ་ཞེས་བྱ་བའི་དོན་ཏོ། །གང་དུ་ཞེ་ན། བསད་ན་ཞེས་སྨོས་པ་ཡིན་ཏེ། སྲོག་གཅོད་པ་ལའོ། །དེ་བས་ན་མི་ལས་ཅིག་ཤོས་ཀྱི་གཟུགས་སུ་རྣམ་པར་གནས་པ་དེ་ལ་དེར་འདུ་ཤེས་པས་སོམ་གཞན་དུ་འདུ་ཤེས་པས་བསད་པར་གྱུར་ན་རྩ་བར་འགྱུར་ལ་དུད་འགྲོ་མིའི་གཟུགས་སུ་གནས་པ་དེ་ལ་དེར་འདུ་ཤེས་པའམ། གཞན་དུ་འདུ་ཤེས་པས་བསད་པར་གྱུར་ན་ཆུང་བར་འགྱུར་རོ། །གལ་ཏེ་དེ་ལྟ་ཡིན་ན་དེ་ལ་ཇི་ལྟར་འདུ་ཤེས་གཙོ་ཆེར་བྱད་པ་ཞེས་བྱ་ཞེ་ན། སྦྱོར་བའི་ཉེས་པ་
འདུ་ཤེས་ཀྱི་དབང་གིས་རྣམ་པར་གཞག་པ་ཡིན་པས་འདུ་ཤེས་བསླབ་པའི་གཞིར་བརྗོད་པ་དེ་ཉིད་ཀྱི་ཕྱིར། སློབ་དཔོན་གྱིས་འདུ་ཤེས་སྦྱོར་བའི་ཡན་ལག་ཡིན་ནོ་ཞེས་མདོར་མཛད་དོ། །སྦྱོར་བའི་གནས་སྐབས་ལ་འདུ་ཤེས་ཡན་ལག་ཡིན་ཏེ། འདུ་ཤེས་ཀྱི་དབང་གིས་སྦྱོར་བའི་ཉེས་བྱས་སུ་འགྱུར་བ་དེ་ལྟ་ན་འདུ་ཤེས་གཙོ་ཆེར་བྱེད་པ་བསླབ་པའི་གཞིར་བཤད་པ་ཡིན་ནོ། །གཞན་དག་ཉེས་པ་དེ་སྤང་བའི་ཕྱིར་མི་གཞན་ཡིན་པའམ། མེར་མེར་པོ་ལ་སོགས་པ་ཞེས་ཚིག་ལེའུར་བྱས་པ་རྣམ་པར་གཞན་དུ་འདོན་པར་བྱེད་དོ། །འདིར་ཡང་མི་སྨོས་པ་ཁོ་ནས་མེར་མེར་པོ་ལ་སོགས་པ་གཟུང་བ་མ་ཡིན་ནམ། དེ་ཡང་སྨོས་པ་དོན་མེད་དོ་ཞེ་ན། མ་ཡིན་ཏེ་མི་སྨོས་པས་ནི་སྐྱེས་པ་དང་བུད་མེད་དང་མ་ནིང་དང་མངལ་དུ་ཞུགས་པ་སྐྱེ་མཆེད་དྲུག་དོད་པ་གཟུང་བ་ཡིན་ལ། མེར་མེར་པོ་སྨོས་པས་སྐྱེ་མཆེད་དྲུག་མ་དོད་པ་ཡིན་ནོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་སོ་སོར་ཐར་པ་ལས་མི་འམ་མིར་ཆགས་པ་ཞེས་གསུངས་ཏེ། མིར་ཆགས་པའི་སྒྲས་མེར་མེར་པོ་ལ་སོགས་པ་བསྟན་ཏོ། །དགེ་ཚུལ་ཁྱད་པར་ཇི་ལྟ་བུ་ཞེ་ན། ཐ་མལ་པ་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཐ་མལ་པ་ནི་རང་བཞིན་དུ་གནས་པ་སྟེ། སྨྱོས་པ་དང་སེམས་འཁྲུགས་པ་དང་། ཚོར་བས་གཟིར་བར་མ་གྱུར་པའོ། །གཞན་ཡང་དེ་ཉིད་ཁྱད་པར་དུ་བྱེད་དེ། སྡོམ་པའི་ངོ་བོའི་བསླབ་པ་དང་བཅས་པའི་ཕྱིར་བསླབ་བཅས་ཏེ་གང་གིས་གཞན་རིག་པའི་སྐྱེས་པ་ལ་བདག་ལ་བསླབ་པ་མི་དགོས་སོ་ཞེས་བྱ་བ་ལ་སོགས་པས་བསླབ་པ་ཕུལ་བ་ཡིན་ནོ། །བསམ་པ་ཇི་ལྟ་བུས་ཤེ་ན། གསོད་སེམས་ཞེས་བྱ་བ་སྨོས་ཏེ། གསོད་སེམས་ནི་སྲོག་གཅོད་པའི་བསམ་པ་སྟེ་བརྡེག་པའི་བསམ་པས་ནི་མ་ཡིན་པ་དེའི་ཕྱིར་དེས་སོ། །ཅི་འཁྲུལ་པས་ཀྱང་འགྱུར་རམ་ཞེ་ན་སྨྲས་པ། འཁྲུལ་པ་ནི་ངེ་ཁོ་ན་མ་ཡིན་པ་ལ་དེ་ཁོ་ན་ཉིད་དུ་རྟོགས་པ་སྟེ། དེ་དང་བྲལ་བ་ཡིན་ཏེ་དཔེར་ན་ལྷས་བྱིན་གསད་པར་བྱའོ་སྙམ་པས་མཆོད་སྦྱིན་མ་བསམས་པ་འཁྲུལ་པའི་དབང་གིས་བསད་པར་གྱུར་ན་རྩ་བ་ཉིད་དུ་མི་འགྱུར་བ་ལྟ་བུའོ། །ཅི་དེ་ཙམ་གྱིས་བསླབ་པ་མེད་པར་འགྱུར་རམ་ཞེ་ན། བརྒྱབ་སྟེ་མི་ཤིན་ཞེས་བྱ་བ་སྨོས་པ་ཡིན་ཏེ། རྒྱུ་དེས་དེའི་ཚེ་འམ་གཞན་གྱི་ཚེ་ཤི་བར་གྱུར་ན་ཞེས་བྱ་
པའི་ཐ་ཚིག་གོ །ཤི་ན་ཞེས་བཤད་པ་འདིར་ཡང་བཤད་མ་ཐག་པའི་མི་ཞེས་བྱ་བ་ཁོང་དུ་ཆུད་མོད་ཀྱི། དེ་ལྟ་ན་ཡང་མི་སྨོས་པ་གསལ་པོར་བྱ་བའི་ཕྱིར་རོ། །ཅི་རྨི་ལམ་དུ་ཡང་འགྱུར་རམ་ཞེ་ན། རྨི་ལམ་མ་གཏོགས་པ་ཞེས་བྱ་བ་སྨོས་པ་ཡིན་ཏེ། རྨི་ལམ་མ་གཏོགས་པ་ནི་རྨི་ལམ་སྤངས་པ་སྟེ་གཞན་དུའོ། །དེ་ལྟར་ཡང་རྨི་ལམ་གྱིས་འཁྲུལ་པ་ལངས་ནས་གཞན་བསད་པར་གྱུར་པ་དེ་ཡང་དགག་པའི་ཕྱིར་སྨྲས་པ་ཡིན་ཏེ། བདག་ཉིད་ཀྱིས་རྨི་ལམ་ཉིད་ཀྱི་ནང་དུ་གཞན་བསང་པར་གྱུར་བ་མཐོང་ཡང་མཐར་འགྱུར་པའི་ཉེས་བྱས་མེད་པ་ཡིན་ནོ། །ཐ་མལ་པ་ཞེས་སྨོས་པས་དེ་ཡང་ཁོང་དུ་ཆུད་པ་མ་ཡིན་ནམ་དེ་ཅིའི་ཕྱིར་གཟུང་ཞེ་ན། འདིར་སྨྲས་པ། འགའ་ཞིག་གི་རྨི་ལམ་གྱིས་བསླད་པའི་ལུས་དང་དག་གི་ཀུན་དུ་སྤྱོད་པ་ལ་འཇིག་རྟེན་སྨོས་པ་ཞེས་མི་སྨྲ་སྟེ། དེའི་ཕྱིར་ལོགས་ཤིག་ཏུ་སྨོས་པ་ཡིན་ནོ། །ད་ནི། སྔགས་སོགས་ཐབས་རྣམས་ཀྱིས་ཀྱང་བསད་གྱུར་ཏམ། །ཞེས་བྱ་བ་ལ་སོགས་པས་གཞན་ཐབས་ཀྱིས་གསོད་པར་བྱེད་ན་མཐར་འགྱུར་བ་སྟོན་ཏེ། གསང་སྔགས་དང་པོར་བྱས་པའི་ཐབས་གང་ཡིན་པ་དེ་ནི་སྔགས་སོགས་ཐབས་སོ། །སོགས་པ་སྨོས་པས་འཇིགས་པ་དང་བཅས་པའི་ཕྱོགས་སུ་གཏོང་བ་ལ་སོགས་པ་བསྡུའོ། །དེ་བས་ན་དགེ་ཚུལ་གང་དེ་དག་གིས་ཀྱང་མི་གཞན་བསད་པར་གྱུར་ན་དེ་ལ་ཡང་ཐ་མ་སྟེ། རྩ་བའི་ཉེས་བྱས་ཐོབ་པར་འགྱུར་རོ་ཞེས་བྱ་བའི་དོན་ཏོ། །ཐབས་རྣམས་ཞེས་མང་པོའི་ཚིག་ཏུ་བྱས་པ་ནི་ཐབས་མང་བ་ཉིད་ཀྱི་ཕྱིར་རོ། །ཀྱང་གི་སྒྲ་ནི་རང་གི་ལག་འབའ་ཞིག་ཁོ་ན་མ་ཡིན་ནོ་ཞེས་བསྡུ་བའི་དོན་ཏོ། །ཡང་གི་སྒྲ་གཉིས་པ་ནི་སྔར་རང་གི་ལག་གིས་བསད་ན་རྩ་བར་འགྱུར་རོ་ཞེས་བྱ་བ་འབའ་ཞིག་མ་ཡིན་གྱི། གཞན་གསོད་པར་སྦྱོར་བལ་རྗེས་སུ་ཡི་རང་བ་འདི་ཡང་འགྱུར་རོ། །གསོད་པ་སྟེ་སྲོག་གཅོད་པ་ལ་སྦྱོར་བ་གང་ཡིན་པ་དེ་ལ་དག་གམ་ལུས་ཀྱི་གཡོ་འགུལ་ལ་སོགས་བས་རྗེས་སུ་ཡི་རང་བ་སྟེ། རྗེས་སུ་ཡི་རང་བ་དེས་གཞན་གསོད་པར་འགྱུར་ན་དེ་ཡང་མཐར་འགྱུར་ཏེ། དཔེར་ན་ཕན་ཚུན་གསོད་པར་བྱེད་པ་ལ་ཁྱོད་ཀྱི་རྩོམ་པ་ནི་དགེའོ་ཞེས་ངག་གིས་རྗེས་ཡི་རང་བ་དང༌། ལུས་ཀྱིས་མཚོན་ཆ་བསྟབས་པ་དང༌། ཐ་ན་སེ་གོལ་བརྡབས་པ་ལྟ་བུའོ། །གལ་ཏེ་
ཡིད་ཀྱིས་ཀྱང་གསོད་པར་སྦྱོར་བ་ལེགས་སོ་སྙམ་པས་རྗེས་སུ་ཡི་རང་བར་བྱས་ན་ཡིད་ཀྱི་ཉེས་བྱས་སུ་འགྱུར་བ་ཡིན་ནོ། །ཅི་དགེ་ཚུལ་གཞན་གྱི་གཟུགས་སུ་གནས་ནས་གསོད་པར་བྱེད་ན་དེ་ལ་ཡང་རྩ་བར་འགྱུར་བར་འདི་ལ་ངེས་པ་མེད་དོ་ཞེས་བསྟན་པའི་ཕྱིར། དེ་ལྟར་སེམས་ཅན་གསད་ཕྱིར་བྱོལ་སོང་རྒྱུད། །ཅེས་བྱ་བ་ལ་སོགས་པ་སྨོས་པ་ཡིན་ཏེ། སྡོམ་ཅན་གྱི་དངོས་པོ་ནི་སྡོམ་ཅན་ཉིད་དེ། དེར་འདུ་ཤེས་པ་ཡིན་ལ་ཅི་སྟེ་ཞེས་བྱ་བ་ནི་གལ་ཏེའི་དོན་ཏོ། །སྡོམ་ཅན་ནི་དགེ་ཚུལ་ཡིན་ནོ། །གལ་ཏེ་བདག་ནི་དགེ་ཚུལ་ཡིན་ནོ་ཞེས་སྡོམ་ཅན་ཉིད་དུ་འདུ་ཤེས་པར་གྱུར་པ་དེའི་ཚེ་རྩ་བའི་ཉེས་པར་འགྱུར་རོ། །དེ་ལྟར་ཞེས་བྱ་བ་ནི་ཇི་ལྟར་གོང་དུ་མིའི་གཟུགས་སུ་གནས་པས་གསོད་པར་བྱེད་ན་རྩ་བར་འགྱུར་བ་དེ་བཞིན་དུ་འདི་བཞིན་དུ་འདི་ལ་ཡང་འགྱུར་བའོ། །ཉིད་ནི་རྣམ་པ་གཞན་དུ་མི་འགྱུར་རོ་ཞེས་ངེས་པར་གཟུང་བའོ། །རྩ་བ་ནི་དངོས་གཞིའི་མཚན་ཉིད་དེ་སྲོག་གཅོད་པ་རྗེས་སུ་སྒྲུབ་པར་བྱེད་པ་ཞེས་བྱ་བའི་དབང་དུ་བྱས་ནས་རྩ་བའི་ལྟུང་བ་ཞེས་བྱའོ། །གང་གི་ཚེ་ཞེ་ན། སེམས་ཅན་གསོད་ཕྱིར་ཞེས་བྱ་བ་སྨོས་པ་ཡིན་ཏེ། སེམས་ཅན་གསོད་པ་ལ་སྟེ་སེམས་ཅན་སྲོག་དང་འབྲལ་བར་བྱེད་པའི་དུས་སུའོ། །ཇི་སྟེ་སྡོམ་ཅན་ཉིད་དུ་འདུ་ཤེས་པ་མེད་ན་ཞེས་བྱ་བར་སྦྱར་རོ། །སྡོམ་ཅན་དུ་འདུ་ཤེས་པ་མེད་ན་དེའི་ཚེ་ཉེས་པ་ཆུང་ངུ་བཤགས་པར་བྱ་བ་ཞེས་བྱ་བའི་ཉེས་བྱས་དང་ལྡན་པ་སྟེ། འཕེལ་བར་འགྱུར་རོ། །འདི་སྐད་དུ་དེས་ཉེས་པ་དང་བཅས་པར་འགྱུར་རོ་ཞེས་བསྟན་པ་ཡིན་ནོ། །ཅི་ཞིག་བྱས་ནས་ཤེ་ན། སྨྲས་པ། ཡོ་བར་འགྲོ་བས་ན་བྱོལ་སོང་ངོ༌། །དེའི་འགྲོ་བ་ནི་བྱོལ་སོང་རྒྱུད་དོ། །དེའི་རྗེས་སུ་མཐུན་པ་ནི་རྣམ་པ་འདྲ་བའོ། །དེའི་བདག་ཉིད་ཇི་ལྟ་བུ་ཞེ་ན། གཟུགས་བསྒྱུར་བ་སྟེ་བྱས་པའོ། །གང་གིས་ཤེ་ན་བདག་གིས་ཞེས་སྨོས་པ་ཡིན་ནོ། །འདི་སྐད་དུ་བྱོལ་སོང་གི་གཟུགས་སུ་གནས་པ་ཉིད་ལ་བདག་ཉིད་རབ་ཏུ་བྱུང་བའི་གཟུགས་སུ་དྲན་པས་གཞན་གསོད་པར་བྱེད་ན་དེའི་ཚེ་རྩ་བར་འགྱུར་ལ། མེད་ན་ཆུང་བ་ཉིད་དོ་ཞེས་བསྟན་པར་འགྱུར་རོ། །ད་ནི་རྨི་ལམ་ཞེས་བྱ་བ་ལ་སོག་པས་ཡན་ལག་མ་ཚང་བ་ལས་ཉེས་པར་མི་འགྱུར་བ་སྟོན་པར་བྱེད་དེ་རྨི་ལམ་གྱི་དོན་ནི་སྔར་བཤད་པ་ཡིན་ནོ། །དེ་ལ་གལ་ཏེ་རྨི་ལམ་དུ་བསད་པར་གྱུར་ན་ཉེས་པ་
མེད་དེ་ཉེས་པར་མི་འགྱུར་རོ། །དེ་བཞིན་དུ་བསླབ་པ་མེད་པར་གྱུར་པ་གང་ཡིན་པ་དེ་ནི་བསླབ་པ་མེད་དེ་བསླབ་པ་བཏང་བ་ཞེས་བྱ་བའི་ཐ་ཚིག་གོ །དེས་ཀྱང་གཞན་བསད་པར་གྱུར་ན་ཉེས་པ་མེད་དོ། །དེ་བཞིན་དུ་གསོད་པའི་བསམ་པ་ནི་སྲོག་གཅོད་པའི་བསམ་པ་སྟེ། དེ་གང་ལ་ཡོད་པ་དེ་ནི་གསོང་སེམས་སོ། །གསོད་པའི་བསམ་པ་མེད་པ་ནི་གསོད་པའི་སེམས་མེད་པ་སྟེ། དེ་འམ་སྨྱོས་པས་གལ་ཏེ་གཞན་བསད་པར་གྱུར་ན་ཉེས་པ་མེད་དོ། །སྨྱོས་པ་སྨོས་པས་སེམས་འཁྲུགས་པ་དང་ཚོར་བས་གཟིར་བ་ཡང་གཟུང་བ་ཡིན་ནོ། །གང་གི་ཕྱིར་སྨོས་པ་ཞེས་བྱ་བས་རང་བཞིན་དུ་གནས་པ་མ་ཡིན་པ་བསྟན་པ་ཡིན་ཏེ། དེ་ཡང་གནས་སྐབས་གཞན་ཡིན་པའི་ཕྱིར་རོ། །ཅི་བཞི་པོ་དེ་དག་ལ་ཅིར་ཡང་མི་འགྱུར་རམ་ཞེ་ན། སྨྲས་པ། དེ་དག་རྗེས་སུ་བརྟེན་ན་བསྡམ་པར་བྱ་བའི་ཁ་ན་མ་ཐོ་བར་འགྱུར་གྱི་གཞན་ནི་མེད་དོ་ཞེས་བྱ་བའི་དོན་ཏོ། །དེ་དག་ལ་སྲོག་གཅོད་པར་གཏོགས་པའི་ཁ་ན་མ་ཐོ་བ་ནི་མེད་ཀྱི། འོན་ཀྱང་སེམས་ཀྱི་འགྱོད་པ་བསལ་བའི་ཕྱིར་དེ་སྐད་དུ་བསྟན་པ་ཡིན་ནོ། །དེ་བས་ན་འདི་སྐད་དུ་བཞི་པོ་དེ་དག་ལས་ཡན་ལག་གང་ཡང་རུང་བ་མ་ཚད་ན་ཡང་ཉེས་པར་ནི་མི་འགྱུར་བ་ཁོ་ནའོ་ཞེས་བསྟན་ཏོ། །ཡན་ལག་ལྷག་མ་མ་ཚང་ན་ཅིར་འགྱུར་ཞེ་ན། གསོད་པའི་ཡན་ལག་མ་ཚང་ཞེས་བྱ་བ་ལ་སོགས་པ་སྨོས་པ་ཡིན་ཏེ། བཤད་མ་ཐག་པ་མ་གཏོགས་པ་གཞན་གསོད་པའི་ཡན་ལག་ལྷག་མ་དེ་དག་གི་གང་ཡང་རུང་བ་མ་ཚང་བ་ནི་བྲལ་བ་སྟེ། ཉེས་པ་ཆུང་ངུར་འགྱུར་རོ། །འདི་ལྟར་གོང་དུ་མི་གཞན་ཡིན་ལ་ཞེས་བྱ་བ་འདིས་ཡན་ལག་བརྒྱད་དུ་བསྟན་པ་དེ་དག་གི་ནང་ནས་རང་བཞིན་དུ་གནས་པ་དང༌། རྨི་ལམ་མ་ཡིན་པ་དང༌། བསླབ་པ་བཅས་པ་དང༌། གསོད་སེམས་ཞེས་བྱ་བ་ཡན་ལག་བཞི་པོ་ལས་གང་ཡང་རུང་བ་ནི་མ་ཚང་ལ་ལྷག་མ་བདུན་པོ་དག་ཡོད་ན་ཉེས་བྱས་སུ་འགྱུར་ལ། ཅིག་ཤོས་མིང་དང༌། གཞན་དང་འཁྲུལ་པ་མེད་པ་དང༌། ཤི་བ་ཞེས་སྨོས་པ་དེ་དག་ལས་གང་ཡང་རུང་བ་གཅིག་མ་ཚང་ན་གཞན་བདུན་པོ་ཡོད་ན་ཉེས་པ་ཆུང་ངུར་འགྱུར་རོ་ཞེས་བྱ་བའི་དོན་ཏོ། །ད་ནི། འཁྲུལ་པ་མེད་ཅིང་གསོད་པའི་སེམས་ཡོད་པས། །རིགས་གཞན་གསད་པར་གྱུར་ན་ཉེས་བྱས་འགྱུར། །མ་
བརྟགས་པ་ཡི་ཆུ་ཡི་བུམ་པ་ཡང༌། །ཞེས་བྱ་བ་ལ་སོགས་པས་རིགས་གཞན་བསད་པ་ལ་ཉེས་པར་འགྱུར་བ་སྟོན་པར་བྱེད་དེ། མིའི་འགྲོ་བ་ལས་གཞན་པའི་རིགས་གང་ཡིན་པ་དེ་ནི་རིགས་གཞན་ཏེ། དེ་བསད་པར་གྱུར་ན་ཉེས་བྱས་ཀྱི་ཉེས་པར་འགྱུར་རོ་ཞེས་བྱ་བའི་དོན་ཏོ། །ཅི་འཁྲུལ་པས་སམ་ཞ་ན། འཁྲུལ་པ་མེད་པས་ཞེས་བྱ་བ་སྨོས་པ་ཡིན་ཏེ། འཁྲུལ་པ་ནི་སྔར་བཤད་པ་ཡིན་ཏེ་དེ་དང་བྲལ་བའོ། །ཅི་རྡེག་པའི་བསམ་པས་ཀྱང་འགྱུར་རམ་ཞེ་ན། སྨྲས་པ་སྲོག་ཆགས་གསད་པའི་སེམས་ཡོད་པས། །ཞེས་བྱ་བས་འདིའི་རང་གི་ངོ་བོ་བཤད་པ་ཡིན་ནོ། །དེ་ལ་མི་གཞན་ཡིན་ལ་ཞེས་བྱ་བ་ལ་སོགས་པས་མཐར་འགྱུར་པའི་ཉེས་བྱས་ཀྱི་ཡན་ལག་བརྒྱད་བསྟན་པ་དེ་ལས་མི་ཞེས་བྱ་བའི་ཡན་ལག་གཅིག་མ་བཏོགས་པ་གཞན་ཉིད་དང༌། རྨི་ལམ་མ་ཡིན་པ་ཉིད་དང༌། བསླབ་པ་དང་བཅས་པ་ཉིད་དང༌། འཁྲུལ་པ་མེད་པ་ཉིད་དང༌། གསོད་སེམས་དང༌། གསད་པ་ཞེས་བྱ་བའི་ཡན་ལག་བདུན་དུ་འགྱུར་རོ། །དེ་ལ་རིགས་གཞན་ཞེས་བྱ་བ་ནི་གཞན་ཉིད་ཡིན་ལ་འཁྲུལ་པ་མེད་པ་ཞེས་བྱ་བ་ནི་འཁྲུལ་པ་མེད་པ་ཉིད་དོ། །གསོད་སེམས་ནི་རང་གི་ངོ་བོ་ཉིད་ཀྱིས་བསྟན་པ་ཡིན་ཏེ། གསུམ་པོ་དེ་དག་ནི་ཡན་ལག་ལྟག་མ་བཞི་པོ་ཉེ་བར་མཚོན་པར་བྱེད་པ་ཡིན་ནོ། །ནའི་སྒྲ་ནི་གང་གི་ཕྱིར་གྱི་དོན་ཡིན་ཏེ། གང་གི་ཕྱིར་གསོད་པའི་ཡན་ལག་མེད་པ་དེའི་ཕྱིར་མ་བརྟགས་པ་སྟེ། མངོན་སུམ་དུ་མ་བྱས་པའི་ཆུའི་བུམ་པ་བརྙ་བ་དག་ལ་བྱིན་ན་ཉེས་པ་མེད་པ་སྟེ། ཉེས་བྱས་ཉིད་དུ་མི་འགྱུར་རོ་ཞེས་བྱ་བའི་ཐ་ཚིག་གོ །ཡང་གི་སྒྲ་ནི་བརྟགས་པའི་ཆུའི་བུམ་པ་བྱིན་པ་ལ་ཉེས་པ་མེད་པར་མ་ཟད་ཀྱི་འོན་ཀྱང་མ་བརྟགས་པ་ལ་ཡང་ངོ་ཞེས་བསྟན་པའི་ཕྱིར་རོ། །གསོད་པའི་ཡན་ལག་ཡོད་ན་ནི་འགྱུར་བ་ཁོ་ན་ཡིན་ནོ། །ད་ནི། སྲོག་ཆགས་བཅས་པའི་ཆུ་ལ་སོགས་པ་འཐུངས་སམ་ཞེས་བྱ་བ་ལ་སོགས་པས་དེ་ཉིད་ཀྱི་སྤྲོས་པ་སྟོན་པ་ཡིན་ཏེ། སྲོག་ཆགས་དང་བཅས་པར་འཇུག་པའི་ཕྱིར་སྲོག་ཆགས་དང་བཅས་པའོ། །དེ་གང་ཞེ་ན་ཆུའོ། །དེ་ལ་སོགས་པ་གང་ཡིན་པ་དེ་ནི་ཆུ་ལ་སོགས་པ་ཡིན་ནོ། །སོགས་པ་སྨོས་པས་ཕྱི་དང་ནང་གི་ལོངས་སྤྱད་པར་བྱ་བ་ལ་སོགས་པ་སྟེ། རང་སྐྱུར་ལ་སོགས་པ་དང་
ཤིང་ལ་སོགས་པ་བསྡུའོ། །ད་དང་དེ་དགེ་ཚུལ་གྱི་ལོངས་སྤྱོད་པ་གང་ཡིན་པ་དེ་ལ་སྲོག་ཆགས་རེ་རེའི་ཉེས་པར་འགྱུར་རོ་ཞེས་བྱ་བར་སྦྱར་རོ། །འཐུངས་པ་ཞེས་བྱ་བ་ནི་ཕྱི་དང་ནང་དུ་ལོངས་སྤྱོད་པས་སོ། །བོར་བར་གྱུར་པ་ནི་བོར་བའོ། །གང་དུ་ཞེ་ན་ཆུ་དྲོན་ལ་སོགས་པ་ཞེས་སྨོས་པ་ཡིན་ཏེ། །ཆུ་དྲོན་ལ་སོགས་པ་གང་ཡིན་པ་དེ་ནི་ཆུ་དྲོན་ལ་སོགས་པ་སྟེ། སོགས་པའི་སྒྲས་ས་དང་ཚྭ་ཆུ་ལ་སོགས་པ་གཟུང་ངོ༌། །དེ་ལས་ཅིར་འགྱུར་ཞེ་ན། སྲོག་ཆགས་རེ་རེ་ཞེས་བྱ་བ་སྨོས་པ་ཡིན་ཏེ། སྲོག་ཆགས་རེ་རེའི་ཉེས་པར་འགྱུར་བ་སྟེ་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །ཅི་ལྟར་མི་སྣང་བ་བསད་པས་ཀྱང་འགྱུར་རམ་ཞེ་ན། སྐྱེ་བོ་བལྟར་སྣང་ཞེས་བྱ་བ་སྨོས་ཏེ། བལྟར་སྣང་བ་ནི་མཐོང་བའི་ཡུལ་དུ་གྱུར་བའི་སྐྱེ་བོ་སྟེ་སྲོག་ཆགས་བསད་པས་འགྱུར་རོ། །ཉེས་པའི་ཁྱད་པར་ཇི་ལྟ་བུ་ཞེ་ན། སྨྲས་པ། ལྕི་བ་སྟེ་ཤིན་ཏུ་ལྕི་བར་འགྱུར་རོ་ཞེས་བྱ་བའི་དོན་ཏོ། །འདི་སྐད་དུ་ཇི་ཙམ་དུ་མིག་གིས་གྲངས་ཡོངས་སུ་ཆོད་པའི་སྐྱེ་བོ་བསད་པའི་གྲངས་ཆོད་པ་དེ་ཙམ་གྱིས་བཤགས་པར་བྱ་བའི་ཉེས་བྱས་ལྕི་བར་འགྱུར་རོ་ཞེས་བསྟན་པ་ཡིན་ནོ། །ད་ནི། ཆུ་མི་གཡོ་ཞིང་རྙོག་པ་མེད་ལ་བརྟག །ནད་མེད་ཐ་མལ་པ་ཡི་མིག་གཉིས་ཀྱིས། །བུམ་པ་གང་བ་ལ་ནི་བརྟག་པར་བྱ། །ཞེས་བྱ་བ་ལ་སོགས་པས་ཆུའི་ནང་ན་ཡོད་པའི་སྲོག་ཆགས་གནོད་པ་ལས་བསྲུང་བའི་དོན་གྱི་ཐབས་བརྗོད་པར་བྱ་སྟེ། ཆུ་གང་ལ་གཡོ་བ་དང་འགུལ་བསྐྱོད་མེད་པ་དེ་ནི་ཆུ་མི་གཡོ་བའོ། །ཁྱད་པར་ཇི་ལྟ་བུ་ཞེ་ན། རྙོག་པ་མེད་པ་ཞེས་བྱ་བ་ནི་དགག་པའི་བསྡུ་བ་ཡིན་ནོ། །དེ་བས་ན་དེ་ལྟར་གྱུར་པ་ལ་བརྟགས་པ་སྟེ་སོ་སོར་བརྟག་པར་བྱའོ། །གང་གིས་ཤེ་ན། ནད་མེད་ཐ་མལ་པའི་མིག་ཅེས་བྱ་བ་སྨོས་པ་ཡིན་ཏེ། ཐ་མལ་པ་ཡང་ཡིན་ལ་མིག་ཀྱང་ཡིན་པས་ན་ཐ་མལ་པའི་མིག་གོ །ཉིད་ནི་དེའི་ཕྱིར་ཐ་མལ་པའི་མིག་དེའི་ཉིད་ཀྱིས་ཡིན་གྱི་ལྷའི་ནི་མ་ཡིན་ནོ་ཞེས་ངེས་པར་གཟུང་བའོ། །གཞན་ཡང་ཁྱད་པར་ཇི་ལྟ་བུ་ཞེ་ན། འདི་ནད་མེད་པའི་ཕྱིར་ནད་མེད་པའོ། །དེས་ན་འདི་སྐད་དུ་རབ་རིབ་ལ་སོགས་པས་ཉམས་པར་མ་གྱུར་པ་ཐ་མལ་པའི་མིག་གིས་ཆུ་བརྟག་པར་བྱའོ་ཞེས་བསྟན་པར་འགྱུར་རོ། །འདིར་ཆུ་བརྟག་པའི་སྣོད་ལ་ནི་ཉེས་པ་མེད་དེ། ཐམས་ཅད་
དུ་སྣོད་གང་ལ་ཇི་ཙམ་དུ་ཆུས་ངེས་པར་གྱུར་པ་དེ་འདིར་མ་བསྟན་དུ་ཟིན་ཀྱང་ཤུགས་ཀྱིས་ཁོང་དུ་ཆུད་པར་བྱའོ། །གང་གི་ཚེ་བུམ་པ་ལ་རྟོག་པར་བྱེད་པ་དེའི་ཚེ་བུམ་པ་གང་བ་ཁོ་ན་ལ་བརྟག་པར་བྱ་བ་སྟེ། སོ་སོར་བརྟག་པར་བྱ་བ་ཡིན་གྱི་མ་གང་བ་ལ་ནི་མ་ཡིན་ནོ། །བུམ་པ་སྨོས་པ་ནི་ཆུ་ཟངས་ལ་སོགས་པ་ཡོངས་སུ་གཟུང་བའི་ཕྱིར་རོ། །ནིའི་སྒྲ་ནི་ངེས་པར་གཟུང་བའོ། །གང་གི་ཚེ་འདམ་གྱི་མཚན་ཉིད་ཀྱི་རྡུལ་དང་བཅས་པར་གྱུར་པ་ནི་ལྡན་པ་སྟེ། །ཆུ་རྡུལ་ཅན་དུ་འགྱུར་བའོ། །དེའི་ཚེ་ཇི་ལྟར་བྱ་ཞེ་ན། །ཀ་ཏ་ཀ་ཞེས་བྱ་བ་སྨོས་ཏེ། ཀ་ཏ་ཀ་དག་གིས་དང་བར་བྱ་བ་ནི་རྙོག་པ་མེད་པར་བྱ་བ་སྟེ། ཆུ་དང་བར་བྱའོ་ཞེས་བྱ་བའི་དོན་ཏོ། །གཞན་དུ་ན་སྲོག་ཆགས་རྣམས་མཐོང་བར་མི་འགྱུར་རོ། །ཀ་ཏ་ཀའི་སྒྲས་ཀ་ཏ་ཀའི་འབྲས་བུ་བརྗོད་པ་ཡིན་ནོ། །མང་པོའི་ཚིག་ཏུ་བྱས་པ་ནི་ལན་ཚྭ་དང་ཟན་གྱི་རི་ལུ་དག་ཡོངས་སུ་གཟུང་བའི་ཕྱིར་རོ། །དུས་ཇི་སྲིད་དུ་ཆུ་བརྟག་པར་བྱ་བ་ཡིན་ཞེ་ན། ཇི་སྲིད་ཡིད་ཀྱིས་ཡང་དག་པར་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཡིད་དེ་སེམས་ཀྱི་དག་པ་ནི་རྣམ་པར་དག་པའོ། །དག་པ་ཡང་སྲོག་ཆགས་མེད་དོ་ཞེས་བྱ་བར་ངེས་པ་ཡིན་ནོ། །ཇི་སྲིད་ཅེས་བྱ་བ་ནི་དུས་ཇི་སྲིད་དུ་སེམས་དེ་དག་པར་འགྱུར་བ་དུས་དེ་སྲིད་དུ་འདིར་ཆུ་བརྟག་པར་བྱའོ། །འདིས་དུས་རིང་པོར་རྟོག་པར་བྱེད་པ་ཐོབ་པ་དེའི་ཚེ་མི་རིང་བར་བརྟག་པར་བྱའོ་ཞེས་བསྟན་པ་ཡིན་ནོ། །གཞན་ཡང་ཐུང་བ་ཐོབ་པར་འགྱུར་བས་དེ་ཡང་མི་ཐུང་སྟེ།།ཤིན་ཏུ་མྱུར་བ་མ་ཡིན་པ་ཞེས་བྱ་བ་ལས་གསལ་བ་ཡིན་ཏེ། བ་ལང་དྲུང་གིས་དྲངས་པ་ཡི། །ཤིང་རྟ་ཇི་སྲིད་ལྡོག་གྱུར་པའམ། །ཡང་ན་གླང་པོ་དྲུག་ཅུ་པ། །དུས་དེ་ཆུ་ལ་ངེས་པ་ཡིན། །དུས་དེ་ཙམ་དུ་བདག་ཉིད་ཀྱིས་མི་ནུས་ན་གཞན་གྱིས་བརྟག་པར་བྱ་བ་ཡིན་གྱི། རང་ཉིད་ཀྱིས་ཡུན་རིང་པོར་ནི་བྱ་བ་མ་ཡིན་ནོ། །བརྟགས་ཟིན་པའི་ཆུ་ལ་ཡང་རྟོག་པར་བྱེད་པ་མི་རིགས་སོ་ཞེས་བསྟན་པར་བྱ་བའི་ཕྱིར་བླའོ་གཅེས་བྱ་བ་སྨོས་པ་ཡིན་ཏེ། ཆུ་བརྟགས་པའི་དུས་ཕྱིས་སོ། །ཡང་དང་ཡང་དུ་ཞེས་བྱ་བ་ནི་ཇི་ལྟར་རིང་བའམ་ཐུང་བར་བརྟག་པར་མི་བྱ་བ་དེ་ལྟར་མ་ངེས་པའི་ཆུ་ཉིད་ལ་ཡང་དང་ཡང་དུ་གདོང་གཞན་གྱིས་ལྟ་བ་ལ་སོགས་པས་བརྟག་པར་མི་བྱའོ། །ཇི་སྐད་དུ་ཇི་ལྟར་རིང་བ་དང་ཐུང་བ་ལ་སོགས་པའི་བྱེ་བྲག་
གིས་ཆུ་བརྟག་པར་བྱ་བ་མ་ཡིན་པ་དེ་ལྟར་བླ་འོག་ཏུ་ཡང་དང་ཡང་དུ་མི་བྱའོ་ཞེས་བསྟན་པ་ཡིན་ནོ། །དང་གི་སྦྲ་ནི་བླ་འོག་དང་ཡང་དང་ཡང་དུ་ཞེས་བྱ་བའི་སྒྲ་སྡུད་པ་ཡིན་ནོ། །ཅི་སྲོག་ཆགས་ཐམས་ཅད་ཀྱིས་ཀྱང་སྲོག་ཆགས་དང་བཅས་པ་ཉིད་དུ་འགྱུར་རམ་ཞེ་ན། གློ་བུར་བ་ཞེས་སྨོས་པ་ཡིན་ཏེ། གྲོག་མོ་ལ་སོགས་པ་ཆུ་ལས་སྐྱེས་པ་མ་ཡིན་ཡང་ཆུ་ནང་དུ་ལྟུང་བར་འགྱུར་བའི་སྦྲང་བུ་མཆུ་རིངས་ལ་སོགས་པ་ཆུ་ཚགས་མེད་པར་ཐ་དང་པར་བསལ་ནུས་པ་ཡིན་ཏེ། དེ་ལྟར་གྱུར་པ་ངེས་ན་སྐྱེ་བོ་དང་བཅས་པར་འཇུག་པ་ཞེས་བྱ་བ་ནི་སྲོག་ཆགས་དང་བཅས་པ་ཡིན་ལ། དེའི་དངོས་པོ་ནི་སྲོག་ཆགས་དང་བཅས་པ་ཉིད་དེ་གློ་བུར་བ་དེས་ཆུ་སྲོག་ཆགས་དང་བཅས་པ་ཉིད་དུ་མི་འགྱུར་ཏེ། དེ་ཡང་ལག་པས་བསལ་ནས་ཡོངས་སུ་ལོངས་སྤྱད་པར་བྱའོ། །དེ་ལྟར་བླ་འོག་ཅེས་བྱ་བས་རྣམ་པ་ཐམས་ཅད་དུ་དགག་པ་ཐོབ་པས། ད་ནི། དེ་ལན་ཅིག་བརྟགས་ནས་ཞེས་བྱ་བ་ལ་སོགས་པས་སྟོན་པར་བྱེད་དེ། ལྟེང་ཀ་སྣོད་ཀྱི་ཆུ་ལན་ཅིག་སྟེ་འོར་གཅིག་བརྟགས་ཤིང་མངོན་སུམ་དུ་བྱས་པ་སྤྱད་པར་རུང་སྟེ། །ཡོངས་སུ་ལོངས་སྤྱད་པར་རུང་བའོ་ཞེས་བྱ་བའི་ཐ་ཚིག་གོ །ཅི་ཐེ་ཚོམ་གྱིས་སམ་ཞེ་ན། ཐེ་ཚོམ་མེད་པར་ཞེས་བྱ་བར་སྨོས་པ་ཡིན་ཏེ་ཐེ་ཚོམ་དང་མི་ལྡན་པ་གང་ཡིན་པ་དེ་ནི་ཐེ་ཚོམ་མེད་པ་སྟེ། བར་ཆད་མེད་པར་ཐེ་ཚོམ་སྤངས་བའི་སེམས་ཀྱིས་སོ་ཞེས་བྱ་བ་ནི་ལྷག་མའོ། །དུས་ཇི་སྲིད་ཀྱི་བར་དུ་ཞེ་ན། ཉི་མ་ཤར་བར་དུ་ཞེས་སྨོས་པ་ཡིན་ཏེ། ཉི་མ་སྟེ་ཉིན་ཞག་གཞན་གྱི་ཉི་མ་འཆར་བར་དེ་སྲིད་དུ་ཞེས་བྱ་བའི་དོན་ཏོ། །དེ་ལས་འོག་ཏུ་ནི་མ་ཡིན་ཏེ་ཤར་ནས་ཀྱང་ཡང་བརྟག་པར་བྱའོ་ཞེས་བྱ་བ་ནི། དགག་པ་སྔ་མའི་ཁྱད་པར་ཡིན་ནོ། །ལྟེང་ཀ་ཞེས་བྱ་བ་མང་པོའི་ཚིག་ནི་རྫིང་བུ་ལ་སོགས་པ་ཡོངས་སུ་བསྡུ་བའི་ཕྱིར་རོ། །འདིར་དང་ནི་ཕྱིས་པ་ཡིན་པར་རིག་པར་བྱའོ། །ཅི་གཞན་དག་ཀྱང་ཞེན། སྣོད་ཆེན་ཞེས་བྱ་བ་སྨོས་པ་ཡིན་ཏེ། སྣོད་ཆེན་ལ་སོགས་པའི་ཆུ་བརྟག་པར་བྱ་བ་དེ་ལ་ཕྱོགས་བཞི་ཀུན་དུ་ཉེ་འཁོར་གྱི་ཆ་འདོམ་གང་ཁོ་ར་ཡུག་སྟེ། ཉེ་འཁོར་ནི་གནས་པར་བྱེད་སྟེན་པར་བྱེད་པ་ཞེས་བྱ་བའི་དབང་དུ་བྱས་པའོ། །འདོམ་གང་ཞེས་བྱ་བ་ནི་ཁྲུ་བཞི་ཡིན་ནོ། །དེ་ནི་ལོངས་སྤྱད་
དུ་རུང་བ་སྟོན་པར་བྱེད་པ་ཡིན་ཏེ། ཁྲོན་པ་དང་པོར་བྱས་པའི་ཆུའི་རྟེན་གང་ཡིན་པ་དེ་ནི་ཁྲོན་པ་ལ་སོགས་པ་སྟེ། དེའི་དག་པ་ནི་བརྟགས་པས་སྲོག་ཆགས་མེད་པ་ཉིད་དེ། དེས་ན་ཁྲོན་པ་དག་སོགས་སོ། །གྲུ་གསུམ་ཡང་དེ་ཡིན་ལ་བཟང་པོ་ཡང་ཡིན་པ་གྲུ་གསུམ་བཟང་པོ་སྟེ། གང་སྲོག་ཆགས་ཕྲ་མོ་ཡང་འཛིན་པར་བྱེད་པ་ཡིན་ནོ། །དེ་དང་པོར་བྱས་པའི་ཆུ་ཚགས་གཞན་གང་ཡིན་པ་དེ་ནི་གྲུ་གསུམ་བཟང་པོ་ལ་སོགས་པའོ། །དགེ་སློང་ཞེས་བྱ་བ་འདི་ཡང་དགེ་སློང་སྟེ་བསླབ་པ་འདོད་པའི་ཕྱིར་ཡིད་ཆས་པའི་ཡུལ་ཡིན་ནོ། །དགེ་སློང་སྨོས་པ་ནི་རབ་ཏུ་བྱུང་བ་རྣམས་ཀྱི་ཉེ་བར་མཚོན་པ་ཡིན་ནོ། །དགེ་འདུན་ཞེས་བྱ་བ་འདི་ཡང་དགེ་འདུན་ཏེ་རྣམ་པ་ཐམས་ཅད་དུ་མ་བཙགས་ཤིང་མ་བརྟགས་པའི་ཆུ་ལོངས་སྤྱོད་པར་མི་མཛད་པའི་ཕྱིར་ཏེ། བསླབ་པ་ལ་གུས་པར་བྱེད་པ་ཉིད་དུ་མཚོན་པར་བྱེད་པ་ཡིན་ནོ། །དང་པོ་གཅིག་ནི་སྡུད་པར་བྱེད་པ་ཡིན་ལ་གཉིས་པ་ནི་ཚིག་གི་ཁ་བསྐང་བའི་ཕྱིར་རོ། །ཇི་ལྟར་དེ་དག་ཁ་ན་མ་ཐོ་བ་མེད་པ་དེ་བཞིན་དུ་ཡིད་ཆེས་པ་ཡང་ཡིན་ཏེ། སྲོག་ཆགས་མེད་པར་ལྷག་པར་ཡིད་ཆེས་པའི་ཕྱིར་ཡིད་ཆེས་པ་སྟེ་བཀོད་མའོ། །དེ་ཉིད་འདུལ་བ་ལས་བཀོད་མས་རུང་བ་ཞེས་གསུངས་པ་ཡིན་ནོ། །ཉིན་ཞག་གིས་རུང་བ་ཡང་ཡིད་ཆེས་པ་ཁོ་ན་ཡིན་ཏེ། དེ་ནི་ལན་ཅིག་བརྟགས་པས་ཉི་མ་ཤར་བར་དུ་ཞེས་བྱ་བས་བ་སྡུས་པ་ཡིན་ནོ། །ཉེས་པ་བྱུང་བའི་སྐབས་མི་འབྱེད་པས་ན་རུང་བ་ཞེས་བྱ་སྟེ། ལོངས་སྤྱད་དུ་རུང་བའི་ཆུ་ལྔ་པོ་དེ་དག་ཀྱང་ཆུ་སྤྱད་དུ་རུང་བ་ལ་སོགས་པར་བདག་གིར་བྱས་པ་དེར་འགྱུར་གྱི་འདི་ལ་འགྱོད་པར་བྱ་བ་ནི་མ་ཡིན་ནོ། །རྣམ་པ་གཞན་དུ་ན་ཆུ་ཡོངས་སུ་ལོངས་སྤྱད་པར་བྱ་བ་མ་ཡིན་པར་འགྱུར་རོ། །ཡང་གི་སྒྲ་ནི་ལྔ་པ་དག་མཚུངས་པ་ཉིད་དུ་བསྟན་པའི་ཕྱིར་རོ། །ལྔ་པོ་དེ་དག་ལས་ཆུ་ཚགས་ལ་སོགས་པ་གཅིག་མེད་ལ་གཞན་དག་ཀྱང་མེད་པའི་ཕྱིར་ཆུ་ཚགས་ཀྱིས་བྱ་བ་ཅི་ཡང་མེད་དོ་སྙམ་དུ་དོགས་པ་ལ་སྨྲས་པ། འདི་ལྟར་ཡང་འདི་ལ་ཆུ་ཚགས་དང་མི་ལྡན་པའི་ཕྱིར་ཆུ་ཚགས་མེད་པ་སྟེ། དེ་ལྟར་གྱུར་པས་གནས་པའི་སྐལ་བ་མེད་དོ་ཞེས་བྱ་བའི་བར་དུའོ། །དང་ནི་ངེས་པར་གཟུང་བའི་ཕྱིར་རོ། །གང་དེ་ལ་རུང་བའི་ཆུ་ཡོད་ཀྱང་ཆུ་ཡོད་ཀྱང་ཆུ་ཚགས་
ཉེ་བར་འཇག་པར་མི་བྱེད་ན་དེ་ལ་ཉེས་བྱས་ཀྱི་ཉེས་པར་འགྱུར་བར་བསྟན་པས་གང་ཡང་ཆུ་ཚགས་ཡོད་དུ་ཟིན་ཀྱང་བོར་ནས་འགྲོ་ན་ཅིར་འགྱུར་ཞེ་ན། གང་ཞིག་རིལ་བ་གྲུ་གསུམ་དབྱངས་ཚགས་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ། དགེ་ཚུལ་གང་ཞིག་ཆུ་ཚགས་མེད་པར་འགྲོ་བ་སྟེ། རྒྱུ་བར་གྱུར་ན་དགེ་ཚུལ་དེ་ལ་ཡིད་ཀྱི་ཉེས་བྱས་ཉིད་དུ་འགྱུར་གྱི། གཞན་བཤགས་པར་བྱ་བའི་ཉེས་བྱས་སུ་མི་འགྱུར་རོ། །ཉིད་ནི་ངེས་པར་གཟུང་བའི་དོན་ཏོ། །ཀུན་ནས་ཡོངས་སུ་ཆུ་འཚག་པར་བྱེད་པས་ན་ཆུ་ཚགས་ཏེ། སྤྱིའི་ཚིག་ཡིན་ནོ། །ད་ནི་ཚུ་ཚགས་ཀྱི་དབྱེ་བ་བསྟན་པར་བྱ་སྟེ། རིལ་བ་དང༌། གྲུ་གསུམ་དང༌། དཔྱངས་ཚགས་ཞེས་བྱ་བ་ནི་བསྡུ་བའོ། །རིལ་བའི་སྒྲས་ནི་ཟླུམ་པོ་སྐྱིབས་ཅན་ཁ་གཉིས་པ་དེ་བརྗོད་པ་ཡིན་གྱི་འདི་ཡང་སྤྱི་བླུགས་བཞིན་དུ་ཉེ་བར་སྤྱོད་པ་ནི་མ་ཡིན་ནོ། །གྲུ་གསུམ་ཞེས་བྱ་བ་ནི་ཆུ་ཚགས་གྲུ་གསུམ་ཡོད་པའོ། །དབྱངས་ཚགས་ཞེས་གྲགས་པའི་མིང་གང་ལ་ཡོད་པ་དེ་ནི་དབྱངས་ཚགས་ཏེ། ཆུ་ཚགས་ཡུ་བ་ཅན་དེའི་མིང་ཡིན་ནོ། །ཆོས་ཞེས་བྱ་བའི་མིང་གང་ལ་ཡོད་པ་དེ་ནི་ཆོས་ཞེས་བྱ་བ་སྟེ། རིལ་བ་ཞབས་ཚགས་ཅན་ཡིན་ནོ། །གྲོལ་བར་བྱེད་པའི་རས་ཞེས་བྱ་བ་ནི་རས་ཀྱི་དུམ་བུ་ཟུར་བཞི་པ་དེའི་ལྷག་པའི་ཚིག་གོ །དང་གི་སྒྲ་ནི་དེ་ལྟ་བུར་གྱུར་པ་གཞན་དང་གཞན་དག་ཀྱང་མེད་པར་འགྲོན་ཡིད་ཀྱི་ཉེས་བྱས་སུ་འགྱུར་རོ་ཞེས་བསྟན་པའི་ཕྱིར་རོ། །གལ་ཏེ་དེར་སོང་ན་རྙེད་པར་ཡང་འགྱུར་ན་འགྲོ་བར་བྱའམ་ཞེ་ན། སོང་ཡང་གྲོལ་བར་བྱེད་པའི་རས་སོགས་ཡོད། །དེ་ཚེ་ཆུ་ཚགས་མེད་ན་རྒྱང་གྲགས་དག ། ལྔ་ཉིད་སོང་བླ་ཞེས་བྱ་བ་སྨོས་པ་ཡིན་ཏེ། དེ་གང་དུ་འགྲོ་བར་འགྱུར་བ་དེང་སོང་བན་བཤད་མ་ཐག་པའི་གྲོལ་བར་བྱེད་པའི་རས་ལ་སོགས་པ་ཡོད་པ་སྟེ་རྙེད་པར་འགྱུར་ན་ཞེས་བྱ་བའི་དོན་ཏོ། །དེའི་ཚེ་ཆུ་ཚགས་མེད་པ་ནི་ཆུ་ཚགས་མེད་པར་གྱུར་པ་སྟེ་སོང་བ་དང་འགྲོ་བར་བྱའོ་ཞེས་བྱ་བའི་བར་དུའོ། །ཆུ་ཚགས་ཡོད་པར་གྱུར་པ་འབའ་ཞིག་ནི་མ་ཡིན་ནོ་ཞེས་བྱ་བ་ནི་ཡང་གི་སྒྲའི་དོན་ཡིན་ནོ། །རིང་ཐུང་ཇི་ཙམ་དུ་ཞེ་ན། དེ་རྒྱང་གྲགས་ལྔར་འགྲོ་བར་བྱའོ། །ཉིད་ཀྱི་སྒྲ་ནི་དེ་ལས་འདས་པར་ནི་མ་ཡིན་ནོ་ཞེས་ངེས་པར་གཟུང་བའི་དོན་ཏོ། །གལ་ཏེ་དེར་སོང་ན་རྙེད་པར་མི་འགྱུར་བ་དེ་ལྟ་ན་
ཡང་འགྲོ་བར་བྱ་འམ་ཞེ་ན། ཇི་སྟེ་མེད་ན་ནི། ཕྱིར་འོང་འདོད་ན་དཔག་ཚད་ཕྱེད་དུ་སོང༌། །ཞེས་བྱ་བ་སྨོས་པ་ཡིན་ཏེ། གལ་ཏེ་དེར་སོང་ལ་ཆུ་ཚགས་སམ་ཆུ་ཁ་ན་མ་ཐོ་བ་རྙེད་པར་མི་འགྱུར་བ་དེའི་ཚེ་རྐྱེན་དེ་ལྟ་བུ་ཞིག་ཡོད་ན་འཕྲལ་ཁོ་ན་ལ་ལྡོག་པའི་བསམ་པས་དཔག་ཚད་ཕྱེད་དུ་འགྲོ་བར་བྱའོ། །དེ་ལྟར་ན་ནིའི་སྒྲ་སྔ་མ་ལས་ཁྱད་པར་དུ་བྱེད་པའི་དོན་ཏོ། །ཅི་ཡིད་བརྟན་པའི་ཚིག་གིས་ཀྱང་འགྲོ་བར་བྱའམ་ཞེ་ན། ཡིད་བརྟན་ཚིག་གིས་ལམ་དུ་ཞུགས་ན་ནི། །ཞེས་བྱ་བ་ལ་སོགས་པ་སྨོས་པ་ཡིན་ཏེ། ཡིད་བརྟན་རབ་ཏུ་བྱུང་བའི་ཚིག་གིས་གལ་ཏེ་འདི་སྐད་དུ་ཁྱོད་ཉིད་ཤོག་ཤིག་དང་ཆུ་ལོངས་སྤྱོད་པའི་དུས་སུ་ཁོ་བོས་ཆུ་ཚགས་སྦྱིན་པར་བྱའོ་ཞེས་སྨྲས་པའོ། །དེ་དག་གི་ཚིག་གིས་རིང་དུ་སོང་ཡང་ཞེས་བྱ་བའི་རྒྱང་གྲགས་ལྔ་འམ་གཉིས་འབའ་ཞིག་ཏུ་མ་ཟད་ཀྱི་ཆུ་ཚགས་མེད་པར་འགྲོ་བ་ལ་ཡང་ཉེས་པ་མེད་པ་ཡིན་ཏེ། རིང་དུ་སོང་བ་ལ་ནམ་ཡང་ཉེས་པ་ཡིན་ཏེ། རིང་དུ་སོང་བ་ལ་ནམ་ཡང་ཉེས་པར་མི་འགྱུར་རེ་ཞེས་བྱ་བའི་དོན་ཏོ། །ཡིད་བརྟན་པ་ཞེས་བྱ་བ་ནི་ལམ་དུ་ཆུ་ཚགས་སྦྱིན་པར་ཁས་བླངས་པ་ལ་སླུ་བར་མི་བྱེད་པ་གང་ཡིན་པ་དེ་ལ་བྱའོ། །ཆུ་ཚགས་མེད་པར་ཀླུང་གི་འགྲམ་ནས་མར་འགྲོ་བ་ན་བརྟགས་པའི་ཆུ་ལོངས་སྤྱོད་པ་ལ་ཉེས་པར་འགྱུར་རོ་སྙམ་དུ་དོགས་པ་ལ། ཀླུང་གི་འགྲམ་ནས་མར་ནི་ཞེས་བྱ་བ་ལ་སོགས་པ་སྨོས་པ་ཡིན་ཏེ། དགེ་ཚུལ་ཚུ་ཆགས་མེད་པར་ཡང་ཀླུང་གི་འགྲམ་ནས་མར་འགྲོ་བ་ནའོ། །མིག་གིས་བལྟས་པས་ངག་པ་སྟེ་སོ་སོར་བརྟགས་ཤིང་དག་པར་བྱས་པའོ། །བལྟས་པས་དག་པ་ཡང་དེ་ཡིན་ལ་ཆུ་ཡང་ཡིན་པས་ན་ཞེས་བྱ་བ་ནི་ཁྱད་པར་གྱི་བསྡུ་བའོ། །དེ་ལྟར་གྱུར་བའི་ཆུ་འཐུངས་པ་ལ་ཉེས་པ་མེད་པ་སྟེ་ཉེས་བྱས་སུ་མི་འགྱུར་རོ་ཞེས་བྱ་བའི་དོན་ཏོ། །ཡང་གི་སྒྲ་ནི་སྔར་ཆུ་ཚགས་མེད་པར་འགྲོ་བ་ལ་ཉེས་པར་བཤད་པ་ཡིན་པས། ཀླུང་གི་འགྲམ་ནས་མར་འགྲོ་བར་བྱེད་པ་ན་ཆུ་ཚགས་མེད་ཀྱང་བརྟགས་ན་ས་ལོངས་སྤྱོད་པ་གང་ལ་ཡང་ཉེས་པ་མེད་དོ་ཞེས་བྱ་བ་བསྟན་པའི་ཕྱིར་རོ། །དེ་ལ་ཅི་འཇུག་ངོགས་རེ་རེ་བརྟག་པར་བྱ་འམ་ཞེ་ན། རྒྱུན་བཞིན་འགྲོ་ལ་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་ལ་ཞེས་བྱ་བ་ནི་ཀླུང་ལའོ། །རྒྱང་གྲགས་དང་རྒྱང་གྲགས་ནི་རྒྱང་གྲགས་རེ་རེའོ། །བརྟག་པ་ནི་བརྟག་པར་བྱ་བ་སྟེ་མཐར་ཐུག་
པར་སོ་སོར་བརྟག་པར་བྱའོ་ཞེས་བྱ་བའི་དོན་ཏོ། །ཁྱད་པར་ཇི་ལྟ་བུར་ཞེ་ན། རྒྱུན་བཞིན་འགྲོ་ལ་ཞེས་སྨོས་པ་ཡིན་ཏེ། རྒྱུན་གྱིས་འབབ་པར་བྱེད་པས་ན་རྒྱུན་བཞིན་འགྲོ་བ་སྟེ་ཆུ་བོ་དང་མྱུར་འབབ་ཅེས་བྱ་བའི་བར་དུའོ། །ཆུ་འདི་དཔའ་ཀློང་འཁྲུག་པ་ནི་ཆུ་གཞན་ཏེ་ཆུ་རབ་ཏུ་འབབ་པའོ། །འདྲེས་པ་མེད་པ་ནི་མ་འདྲེས་པ་སྟེ་དགག་པའི་བསྡུ་བའོ། །ཆུའི་དཔའ་རླབས་གཞན་དང་འདྲེས་པར་མ་གྱུར་ཅེས་བྱ་བའི་ཐ་ཚིག་གོ །ཀླུང་གང་ལ་ཆུ་གཞན་དང་མ་འདྲེས་པ་ཡོད་པ་དེ་ནི་ཆུ་གཞན་མ་འདྲེས་པ་སྟེ་དོན་གཞན་མང་པོ་པ་ཞེས་བྱ་བའི་བསྡུ་པའོ། །གཞན་ཡང་རྒྱུན་བཞིན་འབབ་པ་ཡང་ཡིན་ལ་ཆུ་གཞན་དང་མ་འདྲེས་པ་ཡང་ཡིན་པས་ཞེས་བྱ་བ་ནི་དོན་གཅིག་གི་སྒོ་ནས་ཁྱད་པར་གྱི་བསྡུ་བའོ། །དེ་ལྟར་གྱུར་པའི་ཀླུང་དེ་ལ་ལན་ཅིག་བརྟགས་ནས་རྒྱང་གྲགས་ཀྱི་བར་དུ་ལོངས་སྤྱད་པར་བྱ་སྟེ། འདི་ལ་འགྱོད་པར་མི་བྱ་ཞིང་དེ་བཞིན་དུ་གཞན་དག་ཏུ་ཡང་རྒྱང་གྲགས་ཞེས་བྱ་བའི་བར་དུའོ། །དེ་བས་ན་གཞན་དག་ཏུ་ཇི་ལྟར་ཁོང་དུ་ཆུད་པར་བྱ་ཞེ་ན། གཞན་དག་ཏུ་ནི་ཞེས་བྱ་བ་སྨོས་པ་ཡིན་ཏེ། གཞན་དག་ཏུ་ཞེས་བྱ་བ་ནི་ཆུ་མྱུར་དུ་འབབ་པ་ལས་གཞན་པ་སྟེ། ཀླུང་དལ་གྱིས་འབབ་པ་དང་མྱུར་དུ་འབབ་ཀྱང་ཆུ་རླབས་གཞན་དག་དང་གལ་ཏེ་འདྲེས་པར་གྱུར་པ་དེ་ལ་ནི་ཆུ་འགྲམ་རེ་རེ་ཉིད་དུ་བརྟག་པར་བྱའོ། །ཉིད་ནི་ངེས་པར་གཟུང་བའོ། །ཏུའི་སྒྲ་ནི་ཡང་གི་དོན་ཏེ་ཇི་ལྟར་གོང་དུ་ཉེས་པ་མེད་པ་དེ་བཞིན་དུ་འདིར་ཡང་ཞེས་སྡུད་པར་བྱེད་པའོ། །འདི་གང་གི་ཚུལ་ཡིན་ཞེ་ན། ཆུ་ཚགས་མེད་པར་ཞེས་བྱ་བ་སྨོས་པ་ཡིན་ཏེ། ཆུ་ཚགས་དང་འགྲོ་བའི་ངང་ཚུལ་ཅན་འདི་ཡིན་པས་ན་ཆུ་ཚགས་ཡོད་པར་འགྲོ་བའོ། །ཆུ་ཚགས་ཡོད་པས་འགྲོ་བ་མ་ཡིན་པ་ནི་ཆུ་ཚགས་མེད་པར་འགྲོ་བ་སྟེ། དགག་པའི་བསྡུ་བ་ཡིན་ནོ། །དེའི་ཚུལ་འདི་ནི་དེའི་རིམ་པའོ། །དགེ་ཚུལ་ཆུ་ཚགས་ཡོད་པ་འམ་མེད་པ་གང་ཡིན་པ་དེ་འགྲམ་ནས་འགྲོ་བན་ཆུ་བཙགས་པ་འམ་བརྟགས་པས་ལོངས་སྤྱོད་པ་ལ་འདོད་པས་འཇུག་པར་བྱའོ། །སྔ་མ་ལ་ཡང་ཆུ་ཚགས་མེད་པའི་ཕྱིར་རྣམ་པ་ཐམས་ཅད་དུ་ཆུ་ལོངས་སྤྱད་པར་མི་བྱའོ་སྙམ་དུ་འབའ་ཞིག་གི་དོགས་པ་བསལ་བའི་དོན་དུ་འདིར་རྒྱུན་གྱི་དབང་དུ་བྱས་ནས་དེ་སྐད་དུ་བསྟན་པ་ཡིན་གྱི་རྒྱུན་ལས་བཟློག་ཕྱོགས་ཁོ་ན་ལས་ནི་དེ་སྐད་དུ་བརྗོད་པ་མ་ཡིན་ཏེ། ཆུ་ཚགས་
མེད་པར་འགྲོ་བ་འདི་ལ་ཡང་འཇུག་དོགས་རེ་རེ་ཉིད་ཀྱི་ཚུལ་ཡིན་ནོ། །སྲོག་ཆགས་དང་བཅས་པའི་ཆུ་ལ་ཁྲུས་རུང་ངམ། འོན་ཏེ་མ་ཡིན་ཞེས་བསྟན་པའི་ཕྱིར་སྨྲས་པ། སྦུ་དང་བཅས་པར་འཇུག་པས་ན་ཁྲུས་རས་སྤུ་ཅན་ཏེ་སྤུས་ཁེབས་པའི་གོས་ལ་སོགས་པའོ། །དེ་བས་ན་སྲོག་ཆགས་ཏེ་སྐྱེ་བོ་དེ་དང་བཅས་པས་འཇུག་པའི་སྲོག་ཆགས་དང་བཅས་པའི་ཆུ་དེ་ལ་ཁྲུས་ཀྱི་ཆོ་ག་སྟེ། ཁྲུས་ཀྱི་བྱ་བ་བཀག་པ་ཡིན་ནོ། །ཁྲུས་རས་ཉིས་རིམ་གང་ཡིན་པ་དེ་ནི་ཉིས་རིམ་སྟེ་དེ་ཡང་བཀག་པ་ཡིན་ནོ། །དང་གི་སྒྲ་ནི་སྡུད་པའི་དོན་ཏོ། །རིམ་པ་གཅིག་ནི་མ་བཀག་པར་ཤུགས་ཀྱིས་ཤེས་པར་འགྱུར་རོ། །དེ་ཡང་གལ་ཏེ་ཁྲུས་རས་སྤུ་ཅན་དང་ཉིས་རིམ་གྱིས་ཁྲུས་བྱེད་ན་ཤི་བར་གྱུར་ཅིག་སྙམ་པ་ལས་སྲོག་ཆགས་ཤི་བར་གྱུར་ན་ཡོངས་སུ་རྫོགས་པའི་ཉེས་བྱས་ཀྱི་ཉེས་པར་འགྱུར་ལ། ཤི་བར་མ་གྱུར་ན་ཉེས་པ་ཆུང་ངུར་འགྱུར་རོ་ཞེས་རིག་པར་བྱའོ། །ཡང་གང་དུ་སྲོག་ཆགས་ལྷག་པར་མང་བའི་ཆུ་དེ་ལ་ཇི་ལྟར་བྱ་ཞེ་ན། གང་ན་སྲོག་ཆགས་ཞེས་བྱ་བ་ལ་སོགས་པ་སྨོས་པ་ཡིན་ཏེ། གང་ན་སྟེ་ཆུ་གང་ལ་སྲོག་ཆགས་ཏེ་སྐྱེ་བོ་ལྷག་པར་ཡོད་པའོ། །གང་ལས་ཤེ་ན། ཆུ་ལས་སོ། །ཀྱང་ཞེས་བྱ་བ་ནི་རིམ་པ་གཞན་སྟོན་པ་ཡིན་ཏེ་འདིར་རིམ་པ་གཅིག་ཁོ་ནས་ཀྱང་ཁྲུས་མི་བྱའོ། །ཁོ་ན་ནི་ཁྲུས་མི་བྱ་བར་ངེས་པར་གཟུང་བ་ཡིན་ནོ། །ཀྱང་གི་སྒྲ་ནི་རིམ་པ་གཉིས་འབའ་ཞིག་ཏུ་མ་ཟད་ཀྱི་རིམ་པ་གཅིག་གིས་ཀྱང་ཞེས་བྱ་བའི་དོན་ཏོ། །ཡང་གི་སྒྲ་སྔ་མ་ནི་ཆུ་བས་ཀྱང་ཞེས་སྲོག་ཆགས་ལྷག་པར་མང་བ་ཉིད་དུ་བསྟན་པའི་ཕྱིར་རོ། །དུས་མ་ཡིན་པའི་ཟས་ཀྱི་ཕྱོགས་སུ་གཏོགས་པ་ཡིན་ཀྱང་ཆུའི་སྐབས་འདིར་ཆུང་ཞིག་བསྟན་པའི་ཕྱིར་རྫིང་བུའི་ཆུ་ཁྱད་པར་ཇི་ལྟ་བུ་ཞེ་ན། རྫིང་བུའི་ཆུ་ནི་ཟས་སོགས་འདྲེས་གྱུར་པ། །བཙགས་ནས་ཁ་ཟས་མེད་པར་གྱུར་དེ་དང༌། །གང་ཚེ་ཁྱིམ་པའི་བསྟི་སའི་ཆུ་དག་ཀྱང༌། །དག་གྱུར་ཕྱི་དྲི་དོགས་པ་མེད་པར་བཏུང༌། །ཞེས་བྱ་བ་སྨོས་པ་ཡིན་ཏེ། ཟས་ལ་སོགས་པའི་ཟང་ཟིང་གང་ལ་ཡོད་པ་དེ་ནི་ཟས་ལ་སོགས་པ་སྟེ། དེས་འདྲེས་པར་གྱུར་པ་ནི་བཅས་པར་གྱུར་པ་ཡིན་ནོ། །བཙགས་པ་ནི་ཡོངས་སུ་བཙགས་པ་སྟེ་འདི་ཟང་ཟིང་དང་མི་ལྡན་པའི་ཕྱིར་ཆུ་ལ་ཟས་མེད་པར་གྱུར་པ་ཡིན་པས་རུང་བ་མ་ཡིན་ནོ་ཞེས་དོགས་པར་མི་བྱའོ། །
བསྟི་སའི་ཆུ་ཡང་ཟང་ཟིང་དང་ངེས་པར་འདྲེས་པ་སྲིད་པས་དེ་ལ་ཇི་ལྟར་བསྒྲུབ་པར་བྱ་ཞེ་ན། ཁྱིམ་པའི་བསྟི་ས་ཞེས་བྱ་བ་སྨོས་པ་ཡིན་ཏེ། ཁྱིམ་གང་ལ་ཡོད་པ་དེ་ནི་ཁྱིམ་པའོ། །ཁྱིམ་པ་སྨོས་པ་ནི་ཉེ་བར་མཚོན་པའོ། །བསྟི་ས་ནི་ཆུའི་གནས་ཡིན་ནོ། །གང་གི་ཚེ་ཆུ་དག་པར་གྱུར་པ་སྟེ། གལ་ཏེ་བརྟགས་པས་དག་པར་གྱུར་པའི་ཆུ་དེ་དང་དེ་ཡང་ཟང་ཟིང་མེད་པ་ཡིན་གྱི་གོང་དུ་སྨོས་པ་འབའ་ཞིག་ནི་མ་ཡིན་ནོ། །དང་གི་སྒྲ་ནི་སྡུད་པའི་དོན་ཏོ། །ཡང་གི་སྒྲིན་དེ་དང་དེ་ཡང་ཡིན་པས་ཆུ་གོང་མ་འབའ་ཞིག་མ་ཡིན་གྱི། འདི་ཡང་དུས་དང་དུས་མ་ཡིན་པར་བཏུང་བར་བྱའོ་ཞེས་བསྟན་པའི་ཕྱིར་རོ། །ཅི་བཏུང་བར་བྱ་འམ་ཞེས་དོགས་པ་ལ་དོགས་པ་མེད་པར་ཞེས་སྨོས་པ་ཡིན་ཏེ་དོགས་པའམ་རྟོག་པ་མེད་པ་གང་ཡིན་པ་དེ་ནི་དོགས་ང་མེད་པ་སྟེ་དོགས་པ་དོར་ལ་བཏུང་བར་བྱའོ་ཞེས་བྱ་བའི་དོན་ཏེ། ཆུ་གཞན་མེད་པའི་ཚུལ་ཡིན་ནོ། །ད་ནི་ཇི་ལྟར་ཆུ་ཉམ་ང་བ་མེད་པར་བཅགས་པར་བྱ་བ་དེ་སྟོན་པར་བྱེད་དེ། ཤིང་གསུམ་ཚོགས་པ་ནི་ཤིང་གསུམ་མོ། །དེ་ལ་གྲུ་གསུམ་གྱི་གྲྭའི་སྲད་བུ་བཏགས་ནས་ཆུ་བཙག་པར་བྱའོ། །ཤིན་ཏུ་ཞེས་བྱ་བ་ནི་འདིས་ཁྱད་པར་དུ་ཉམ་ང་བ་མེད་པར་ཆུ་བཙགས་པའི་ཕྱིར་ནུས་པའོ། །དེའི་ཕྱིར་ཤིན་ཏུའི་སྒྲ་ནི་འདི་ལ་འབད་པར་བྱའོ་ཞེས་བསྟན་པའི་ཕྱིར་རོ། །གང་གི་ཚེ་ཆུ་ཚགས་སྲབ་པར་གྱུར་པ་ཉིད་ཀྱི་ཕྱིར་དང༌། ཕྲ་བ་ཉིད་ཀྱི་ཕྱིར་སྲོག་ཆགས་མི་འཛིན་པ་དེའི་ཚེ་ཇི་ལྟར་བྱ་ཞེ་ན། ཆུ་ཆགས་ཞེས་བྱ་བ་སྨོས་པ་ཡིན་ནོ། །ཁྱད་པར་ཇི་ལྟ་བུ་ལ་ཞེ་ན། སྲབ་པ་སྟེ། རྙིང་པར་གྱུར་པ་ལ་གདབ་པར་བྱའོ། །ཅི་ཞིག་གདབ་པར་བྱ་ཞེ་ན། ལྕི་བ་ཞེས་སྨོས་པ་ཡིན་ཏེ། ལེགས་པར་བསྐམས་པ་ཡང་དེ་ཡིན་ལ་ལྕི་བ་ཡང་དེ་ཡིན་པས་ལྕི་བ་སྐམ་པོ་གང་མ་སྟེ། བ་ལྕི་སྐམ་པོ་གཏང་མ་ཞེས་བྱ་བའི་དོན་ཏོ། །ལྕི་བ་སྐམ་པོ་གཙང་མ་བཏགས་པའི་ཕྱེ་མས་གདབ་པར་བྱའོ་ཞེས་བྱ་བར་སྦྱར་ཏེ་མཐུག་པོར་བྱ་ཞེས་བྱ་བའི་དོན་དུ་རྟོགས་པར་བྱའོ། །ནིའི་སྒྲ་ནི་སྲབ་པ་ལ་གདབ་པར་བྱའི་ཅིག་ཤོས་ལ་ནི་མ་ཡིན་ནོ་ཞེས་ཁྱད་པར་དུ་བྱེད་པའི་དོན་ཏོ། །ཤིན་ཏུ་མཐུག་པ་ཉེད་ཀྱི་ཕྱིར་ཆུ་འཛག་ཏུ་མི་བཏུབ་པ་དེ་ལ་ཇི་ལྟར་བྱ་ཞེ་ན། ཡང་དང་ཡང་དུ་ཞེས་སྨོས་པ་ཡིན་ཏེ། ཡང་དང་ཡང་དུ་གདབ་པར་བྱ་བ་དེ་བརྡེག་པར་བྱའོ། །ཕྱི་མ་དེས་སམ་རང་བཞིན་
གྱིས་མཐུག་པར་གྱུར་པ་ཉིད་ལ་ཞེས་ཤུགས་ཀྱིས་ཁོང་དུ་ཆུད་པར་འགྱུར་རོ། །ཅིས་བྱ་བ་ཡིན་ཞེ་ན། འོད་མའི་ཚལ་པས་ཞེས་བྱ་བ་སྨོས་པ་ཡིན་ཏེ། འོད་མ་བཀས་པའི་ཚལ་པས་སོ། །ཅིའི་ཕྱིར་ཞེ་ན། ཆུ་འཇག་བྱ་ཕྱིར་ཞེས་སྨོས་པ་ཡིན་ཏེ། ཆུ་འཛག་པའི་ཕྱིར་དང་ཆུ་འབྱུང་བའི་ཕྱིར་ཞེས་བྱ་བའི་བར་དུའོ། །དང་ནི་ཤིང་ལེབ་ཀྱིས་ཀྱང་གདབ་པར་བྱའི། འོད་མའི་ཚལ་བ་འབའ་ཞིག་གིས་ནི་མ་ཡིན་ཞེས་མ་བསྟན་པ་སྡུད་པའི་དོན་ཏོ། །ད་ནི་གྲུ་གསུམ་དུ་ཆུད་པའི་སྲོག་ཆགས་བསྲུང་བར་བྱ་བའི་ཕྱིར། སྲོག་ཆགས་བསྲུང་ཕྱིར་ཞེས་བྱ་བ་ལ་སོགས་པ་སྨོས་པ་ཡིན་ཏེ། སྣོད་དེ་སའི་སྣོད་དམ་ཟངས་མའི་སྣོད་གཞག་པར་བྱའི། ལྕགས་ཀྱི་སྣོད་ནི་མ་ཡིན་ཏེ། ཆུས་དེ་ཉམས་པར་འགྱུར་པའི་ཕྱིར་རོ། །གང་དུ་གཞག་པར་བྱ་ཞེ་ན། སྨྲས་པ། འོག་ནི་ཞབས་སུ་ཞེས་བྱ་བའི་དོན་ཏོ། །གྲུ་གསུམ་གྱིས་ཞེས་བྱ་བར་ཤུགས་ཀྱིས་རྟོགས་པར་འགྱུར་རོ། །ཁྱད་པར་ཇི་ལྟ་བུ་དང་ལྡན་པ་ཞེ་ན། ལྕགས་ཀྱི་ལུ་གུ་རྒྱུད་ཅེས་བྱ་བ་སྨོས་པ་ཡིན་ཏེ་ལྕགས་ཀྱི་ལུ་གུ་རྒྱུད་ནི་ལྕགས་ཀྱི་ལུ་གུ་རྒྱུད་དེ། དེ་དང་པོར་བྱས་པ་གང་ཡིན་པ་དེ་བརྟགས་པའོ། །ཅིའི་ཕྱིར་ཞེ་ན། སྲོག་ཆགས་བསྲུང་ཕྱིར་ཞེས་སྨོས་པ་ཡིན་ཏེ། ཆུའི་ནང་དུ་ཆུང་བའི་སྲོག་ཆགས་བསྲུང་བའི་ཕྱིར་རོ། །རྣམ་པ་གཞན་དུ་ན་ཆུ་ཐམས་ཅད་བྱུང་བ་དང་སྲོག་ཆགས་དག་འཆི་བར་འགྱུར་རོ། །བྲངས་མ་ལས་བྱས་པ་ལ་ནི་ལྕགས་ཀྱི་ལུ་གུ་རྒྱུད་གདགས་པར་བྱ་ཞིང་ས་ལས་བྱས་པ་ལ་ནི་སྲད་བུ་གདགས་པར་བྱའོ་ཞེས་གསུངས་པ་མ་ཡིན་ནམ། དེ་ཅིའི་ཕྱིར་སྤྱིར་བསྟན་ཞེ་ན། དགོས་པ་གཙོ་བོར་གྱུར་པ་ཉིད་ཀྱི་ཕྱིར་རྫས་ཞེས་ཁྱད་པར་དུ་མ་བསྟན་ཏེ། ཁྱད་པར་གྱི་ཚིག་ནི་ཡོད་པའི་དབང་དུ་བྱས་པ་ཡིན་ནོ། །གང་དུ་ལྟེང་ཀ་ལ་སོགས་པ་ཡོད་པ་དེ་ནི་ལྟེང་ཀ་ལ་སོགས་པར་གནོད་པ་སྤང་བའི་ཕྱིར་སྲོག་ཆགས་དང་བཅས་པའི་ཆུ་དོར་བར་བྱ་བ་ཡིན་ན་ཕྱོགས་གང་དུ་ཁྲོན་པ་ལ་སོགས་པའི་ཆུ་རྙེད་པར་དཀའ་བ་དེར་ཇི་ལྟར་བྱ་ཞེ་ན། སྲོག་ཆགས་དེ་དག་གནོད་པ་སྤང་བའི་ཕྱིར་ཞེས་བྱ་བ་ལ་སོགས་པ་སྨོས་པ་ཡིན་ཏེ། སྲོག་ཆགས་ཏེ་སྐྱེ་བོ་དང་བཅས་པར་འཇུག་པའི་ཕྱིར་སྲོག་ཆགས་ཡོད་པའི་ཆུ་ཡིན་ཏེ་ཁྲོན་པར་གཏང་བར་བྱ་ཞིང་དོར་བར་བྱའོ། །གང་གིས་ཤེ་ན་གྲོལ་བར་བྱེད་པ་ཞེས་བྱ་བ་སྨོས་པ་
ཡིན་ཏེ། གྲོལ་བར་བྱེད་པའི་དོན་གྱིས་སྣོད་ནི་གྲོལ་བར་བྱེད་པའི་སྣོད་ཡིན་ཏེ་དེས་སོ། །དེ་ལྟར་སྟེང་གི་ཆ་དང་འོག་གི་ཆ་སྲད་བུས་གཟུང་དུ་རུང་བ་དེ་ལྟར་སྣོད་དེ་བྱའོ། །ཁྱད་པར་ཇི་ལྟ་བུས་ཤེ་ན། གང་གི་ཁ་དང་ཞབས་ལ་སྲད་བུ་གཉིས་བཏགས་པར་དེས་ཏེ། ཁ་ནི་སྟེང་གི་ཆ་ཡིན་ལ་ཞབས་ནི་འོག་གི་ཆ་ཡིན་ནོ། །དེ་ཅིའི་ཕྱིར་ཞེ་ན། སྲོག་ཆགས་དེ་དག་གནོད་པ་སྤང་བའི་ཕྱིར་ཞེས་སྨོས་པ་ཡིན་ཏེ། སྲོག་ཆགས་དེ་དག་སྟེ་ཆུའི་ཁོངས་སུ་གཏོགས་པའི་སྲོག་ཆགས་དག་གོ །གནོད་པ་སྟེ་ཉོན་མོངས་པ་སྤང་བར་བྱ་བའི་ཕྱིར་དང༌། དོར་བར་བྱ་བའི་ཕྱིར་རོ། །གང་གི་མཐུས་ཤེ་ན། སྙིང་རྗེའི་མཐུས་ཞེས་སྨོས་པ་ཡིན་ཏེ། སྙིང་རྗེ་ནི་སེམས་ཅན་གྱི་སྡུག་བསྔལ་སྤོང་བར་འདོད་པ་ཉིད་ཡིན་ལ་དེའི་མཐུ་ནི་དེའི་ངོར་ཞེས་བྱ་བའི་དོན་ཏོ། །ཆུའི་སྐབས་སུ་གཞན་དང་གཞན་དག་ཀྱང་ཆུང་ཞིག་བརྗོད་པར་བྱ་སྟེ། སྤྱི་བླུགས་བཟློག་པ་ནི་ཁ་སྦུབ་པའོ། །གང་ལ་ཞེ་ན་ཁ་ལ་ཞེས་སྨྲས་པ་ཡིན་ཏེ། ཁ་ལ་སྤྱི་བླུགས་བཟློག་ནས་ཆུ་བཏུང་བར་མི་བྱའོ། །འཕགས་པ་ཞེས་བྱ་བ་ནི་དགེ་ཚུལ་ཡིན་ཏེ་འཕགས་པ་འདོད་ཆགས་དང་བྲལ་བའི་ཆོས་སྲོག་གཅོད་པ་ལ་སོགས་པ་ལས་ལྡོག་པའི་མཚན་ཉིད་ཀྱི་རྗེས་སུ་འཇུག་པའི་ཕྱིར་འཕགས་པ་ཞེས་བྱའོ། །གང་དུ་བཏུང་བར་མི་བྱ་ཞེ་ན། འཇིག་རྟེན་ཞེས་སྨོས་པ་ཡིན་ཏེ། འཇིག་རྟེན་གྱི་མངོན་སུམ་སྟེ་མདུན་དུའོ། །ཅི་རྣམ་པ་ཐམས་ཅད་དུ་བཏུང་བར་མི་བྱ་འམ་ཞེ་ན། ལོ་མ་ལ་སོགས་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། ལོ་མ་ལ་སོགས་པ་གང་ཡིན་པ་དེ་ནི་ལོ་མ་ལ་སོགས་པ་སྟེ། དེ་མི་རྙེད་ཅིང་མེད་ན་ཁ་ལ་སྤྱི་བླུགས་བཟློག་པས་འཐུང་ན་དགེ་ཚུལ་ལ་ཉེས་པ་མེད་དེ་ཉེས་བྱས་སུ་མི་འགྱུར་བ་ཉིད་དོ་ཞེས་བྱ་བའི་དོན་ཏོ། །གང་དུ་ཞེན་དཔེན་པ་ཞེས་སྨོས་པ་ཡིན་ཏེ། དབེན་པར་སོང་བ་ནི་དབེན་པར་ཞུགས་པ་སྟེ། སྐྱེ་བོ་མེད་པའི་ཕྱོགས་ལ་དབེན་པ་ཞེས་བྱའོ། །ཅིའི་ཕྱིར་ཞེ་ན། སྐོམ་པའི་ཕྱིར་ནི་ཞེས་བྱ་བ་སྨོས་པ་ཡིན་ནོ། །ཕྱིར་ནི་དེའི་ངོར་རོ། །གང་གི་ཞེ་ན་སྐོམ་པ་ནི་སྐོམ་པས་གདུངས་པར་གྱུར་པའོ། །འབའ་ཞིག་ནི་སྐོམ་པས་ཞེས་གསུམ་པའི་མཐའ་ཅན་དུ་འདོན་པ་དེ་ལ་ཡང་སྐོམ་པ་བྱེད་པ་པོར་གྱུར་པས་གང་གི་ངོར་བྱས་པ་དེའི་ཕྱིར་ཞེས་བྱ་བ་དེའི་དོན་འདིར་འགྱུར་རོ། །ད་ནི་ཆུ་སྣོད་གྱི་ཆོག་བརྗོད་པར་བྱ་སྟེ།
དུས་ཀྱི་དུས་ཕྱི་མ་ནི་ཕྱིས་ཀྱི་དོན་ཏོ། །མི་ཟད་པའི་བསྡུ་བ་ཡིན་ལ། དེའི་འོག་ཏུ་དུས་ཀྱི་དུས་ཕྱི་མ་ནི་དུས་དུས་སུ་ཞེས་བྱ་བ་དྲུག་པའི་བསྡུ་བའོ། །དེའི་ཕྱིར་དུས་དང་དུས་སུ་ཞེས་ཟློས་པའི་དོན་དུ་ཁོང་དུ་ཆུད་པར་བྱའོ། །ཅི་ཞིག་བྱ་བ་ཡིན་ཞེ་ན། བུམ་པ་ཞེས་སྨོས་པ་ཡིན་ཏེ་བུམ་པ་ནི་ཆུའི་སྣོད་ཡིན་ལ་སྐམ་པ་ནི་སྐེམ་པར་བྱེ་སྤ་སྟེ། ཚད་པ་ལ་ཞེས་བྱ་བ་ནི་ལྷག་མའོ། །དེ་བསྐམས་པར་གྱུར་པ་དང་བཀྲུ་བར་བྱ་བ་ཡིན་ནོ། །གང་གིས་ཤེ་ན། ཁྲུད་ཤིང་ནི་ཞེས་བྱ་བ་ལ་སོགས་པ་ཡིན་ཏེ། ཁྲུད་ཤིང་གཙང་མ་སྟེ་འོད་མའི་ཚལ་པ་འམ་ལྕུག་མ་ལ་སོགས་པའི་རྩེ་མོའི་ཆ་འཇམ་པོར་བྱས་ཤིང་གཅང་མར་གྱུར་པས་ཞེས་བྱ་བའི་དོན་ཏོ། །གཙང་མ་ཡང་ཟང་ཟིང་མེད་པ་ཉིད་དང༌། རྙོག་པའི་དྲི་མ་དང་མི་གཙང་བ་སྤངས་པ་ཉིད་དུ་རིག་པར་བྱའོ། །བུམ་པ་ལ་སོགས་པ་དེ་དག་གི་ཁོངས་སུ་གཏོགས་པའི་དྲི་མ་བསལ་བར་བྱ་བའི་ཕྱིར་སྤྱིའི་ཚིག་ཏུ་བསྟན་པ་ཡིན་ནོ། །ལོ་མ་ལ་སོགས་ཞེས་བྱ་བས་གཞན་རུང་བ་བྱས་པའི་སྣོད་ཁྱད་པར་དུ་བྱ་བ་སྟོན་པར་བྱེད་དེ། ལོ་མ་དང་པོར་བྱས་པའི་གོས་ལ་སོགས་པའི་ཁ་གང་གང་ཡིན་པ་དེ་ནི་ལོ་མ་ལ་སོགས་པ་སྟེ་དེ་དག་པ་པའོ། །ཁ་ལོ་མ་ལ་སོགས་པས་དགབ་པ་དེ་ཁྱད་པར་དུ་བྱེད་པ་ནི་ཁ་ལ་ལེགས་པར་དགབ་པར་བྱའོ་ཞེས་བྱ་བའི་དོན་ཏོ། །ཁ་དེ་གང་གི་ཞེ་ན། རུང་བར་བྱས་པ་ཞེས་བྱད་སྨོས་པ་ཡིན་ཏེ། རུང་བ་དེ་ཟང་ཟིང་མེད་པའི་ཆུའི་སྣོད་ནི་རུང་བར་བྱས་པའི་སྣོད་ཡིན་པ་དེའི་ཕྱིར་རོ། །ཅེ་དེ་དག་སྐད་ཅིག་གམ་ཞེ་ན། རྟག་པར་ཞེས་བྱ་སྨོས་ཏེ། རྟག་པ་སྟེ་དུས་དང་དུས་ཐམས་ཅད་དུའོ། །འདི་སྐད་དུ་རུང་བར་བྱས་པའི་སྣོད་དག་གི་ཁར་རྡུལ་འཇུག་པ་ཡོངས་སུ་སྤང་བར་བྱ་བའི་ཕྱིར་ལོ་མ་ལ་སོགས་པས་ལེགས་པར་དགབ་པར་བྱའོ་ཞེས་བསྟན་པར་འགྱུར་རོ། །གང་གི་ཚེ་རུང་བའི་ཆུ་འཚག་པར་བྱེད་པ་ནི་ལག་པ་བཀྲུས་སུ་ཟིན་ཀྱང་འཇམ་པ་ཉིད་དུ་གྱུར་པ་དེའི་ཚེ་ཡང་ཉེས་པ་མེད་དོ་ཞེས་བསྟན་པའི་ཕྱིར་སེམས་ཀྱིས་གཉིས་སམ་གསུམ་དུ་ཞེས་བྱ་བ་ལ་སོགས་པ་སྨོས་པ་ཡིན་ཏེ། ལན་གཉིས་ལན་གསུམ་དུ་བྱས་པ་ནི་གཉིས་སམ་གསུམ་མོ། །དེ་གང་ཞེ་ན། བཀྲུས་པ་སྟེ་ལག་པ་རབ་ཏུ་བཀྲུས་པར་གྱུར་པ་ན་ཞེས་བྱ་བ་ནི་ལྷག་མ་འོ། །ཅི་གཡོས་སམ་ཞེ་ན། སེམས་ཀྱིས་ཞེས་བྱ་
བ་སྨོས་པ་ཡིན་ཏེ་སེམས་ནི་བསམ་པ་སྟེ། ཡང་དག་པའི་དངོས་པོ་གཟུང་བ་དེ་བས་ན་ལག་པ་འཇམ་ཞིང་སྣུམ་དུ་ཟིན་ཀྱང་དག་པ་ཉིད་དུ་འགྱུར་རོ། །དག་པ་ཉིད་ཀྱི་དངོས་པོ་ནི་དག་པ་ཉིད་དེ་རབ་ཏུ་བཀྲུས་པ་ཉིད་ཅེས་བྱ་བའི་བར་དུའོ། །འདི་སྐད་དུ་གཡོ་སྤངས་པའི་སེམས་ཀྱིས་ལག་པ་ལན་གཉིས་ལན་གསུམ་དུ་བཀྲུས་ན་འཇམ་དུ་ཟིན་ཀྱང་འཇམ་པ་ཉིད་ལ་ཉེས་པ་མེད་དོ་ཞེས་བསྟན་པ་ཡིན་ནོ། །ཀྱང་གི་སྒྲ་ནི་འཇམ་དུ་ཟིན་ཀྱང་ཉེས་པ་མེད་དོ་ཞེས་ཁྱད་པར་དུ་བསྟན་པའི་ཕྱིར་རོ། །གལ་ཏེ་ཆུ་རྙོག་པ་ཅན་དུ་གྱུར་པ་དེའི་ཚེ་ཇི་ལྟར་བྱ་ཞེ་ན། བཞིན་གྱི་གཟུགས་བརྙན་ཞེས་བྱ་བ་ལ་སོགས་པ་སྨོས་པ་ཡིན་ཏེ། རྙོག་པ་སྟེ་རྡུལ་ཅན་གྱི་ཆུ་ལེགས་པར་བཙགས་པར་བྱའོ། །ཇི་ལྟ་ཇི་ལྟར་ཡང་རུང་བས་སམ་ཞེ་ན། ལེགས་པ་སྟེ་འབད་པས་སོ། །ཇི་སྲིད་ཅིག་གི་བར་དུ་ཞེ་ན། ཇི་སྲིད་བཞིན་གྱི་གཟུག་བརྙན་སྣང་བར་གྱུར་པ་དེ་སྲིད་ལེགས་པར་འབད་པས་ཡོངས་སུ་བཙགས་པར་བྱའོ་ཞེས་བྱ་བའི་དོན་ཏོ། །བཞིན་གྱི་གཟུགས་བརྙན་འབྱུང་བ་ནི་དང་བ་ཉིད་མཚོན་པར་བྱེད་པ་ཡིན་ནོ། །འདི་སྐད་དུ་ཀ་ཏ་ཀའི་འབྲས་བུ་ལ་སོགས་པའི་སྦྱོར་བས་ཇི་སྲིད་ཆུ་དང་བ་ཉིད་དུ་འགྱུར་བ་དེ་སྲིད་དུ་རྙོག་པའི་ཆུ་ཡོངས་སུ་བཙགས་པར་བྱའོ་ཞེས་བསྟན་པར་འགྱུར་རོ། །དགེ་ཚུལ་ལ་བྱིན་ལེན་མ་བྱས་པ་ལ་ཉེས་པ་མེད་པ་ཉིད་མ་ཡིན་ནམ་ཅིའི་ཕྱིར་དེ་སྐད་བསྟན་ཞེ་ན། སློབ་དཔོན་དང་མཁན་པོའི་དབང་དུ་བྱས་ནས་གསུངས་པའི་ཕྱིར་ཉེས་པ་མེད་དོ། །ཆུའི་སྐབས་སུ་གཞན་དག་ཀྱང་ཅུང་ཞིག་བརྗོད་པར་བྱ་སྟེ། ཁྲོན་པ་དང་པོར་བྱས་པའི་ལྟེང་ཀ་ལ་སོགས་པ་གང་ཡིན་པ་དེ་ནི་ཁྲོན་པ་ལ་སོགས་པའོ། །དེ་དག་ལས་ཆུ་བླངས་པ་ནི་བུམ་པ་ལ་སོགས་པ་དག་གིས་ལེན་པར་བྱེད་པ་ན་ཚིགས་བཅད་བཀླག་པར་བྱའོ། །ཅིའི་ཕྱིར་ཞེ་ན། ཁྲོན་པ་ལ་སོགས་བྱས་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ་སྦྱིན་པ་རྣམ་པར་སྦྱོང་བའི་ཕྱིར་རོ། །ལུང་ཞེས་མ་བསྟན་དུ་ཟིན་ཀྱང་དཔེར་ན་ཟན་ཟ་བ་ན་སྦྱིན་པ་རྣམ་པར་སྦྱང་བའི་དོན་དུ་ལུང་གི་ཚིགས་སུ་བཅད་པ་འདོན་པ་དེ་ལྟར་འདི་ལ་ཡང་ཁོང་དུ་ཆུད་པར་བྱའོ། །གང་དག་གི་དོན་དུ་ཞེ་ན། ཁྲོན་པ་ལ་སོགས་ཞེས་བྱ་བ་སྨོས་པ་ཡིན་ཏེ། ཐོག་མ་ཁྲོན་པ་ལ་
སོགས་པ་བྱེད་པ་ཡིན་པས། ཁྲོན་པ་ལ་སོགས་བྱས་པ་སྟེ། ཁྲོན་པ་ལ་སོགས་པའི་བྱེད་པ་པོ་དང་བྱེད་དུ་འཇུད་པ་ཉིད་ཡིན་ནོ། ཆུ་དེའི་ལྷ་ནི་ཆུ་ལྷ་ཉིད་དོ། །ཁྲོན་པ་ལ་སོགས་པ་བྱས་པ་དང་ཆུ་དེའི་ལྷ་ཉིད་ཅེས་བརྗོད་ལ་ཁྲོན་པ་ལ་སོགས་པ་བྱས་ལ་དེ་དང༌། ཆུ་ལྷ་དེ་ཉིད་ཀྱི་དོན་གྱི་ཕྱིར་རོ། །ཅི་ཆུ་ལེན་པའི་ཚེ་དེ་ལྟར་བཀླག་པར་བྱའམ་ཞེ་ན། འཐུངས་སམ་བཀྲུས་ཀྱང་ཞེས་བྱ་བ་སྨོས་པ་ཡིན་ཏེ་འཐུངས་པ་ནི་ཆུ་འཐུང་བའོ། །ཁྲུས་ནི་ལུས་བརླན་པར་བྱེད་པའོ། །འཐུང་བ་དང་ཁྲུས་ནི་འཐུངས་སམ་བཀྲུས་པ་སྟེ། ཟླས་དབྱེ་བའི་བསྡུ་བ་ཡིན་ནོ། །དེ་དག་ནི་རྐང་པ་འཁྲུད་པ་ལ་སོགས་པ་ཆུ་ཉེ་བར་ལོངས་སྤྱོད་པའི་ཉེ་བར་མཚོན་པ་ཡིན་པས་དེ་ལ་ཇི་ལྟར་ཆུ་ལན་བ་ལ་ཚིགས་བཅད་ཀློག་པ་དེ་བཞིན་དུ། འཐུངས་སམ་ཁྲུས་བྱེད་པའི་སྐབས་འདིར་ཡང་ཚིགས་སུ་བཅད་པ་གདོན་པར་བྱའོ། །ཀྱང་གི་སྒྲ་ནི་གོང་མ་འབའ་ཞིག་ལ་ཡང་མ་ཡིན་ནོ་ཞེས་བྱ་བའི་དོན་ཏོ། །གང་གི་ཚེ་དགེ་འདུན་ནམ་གང་ཟག་གི་འབྲུ་སྲོག་ཆགས་དང་བཅས་པར་གྱུར་པ་དེའི་ཚེ་བྱ་བ་ནི་བལ་སྲན་ལ་སོགས་ཞེས་བྱ་བ་སྨོས་པ་ཡིན་ཏེ། བལ་སྲན་དང་པོར་བྱས་པའི་འབྲས་ལ་སོགས་པའི་འབྲུ་གང་ཡིན་པ་དེ་ནི། བལ་སྲན་ལ་སོགས་ཏེ་བལ་སྲན་ལ་སོགས་པ་དེ་ཡང་ཡིན་ལ་འབྲུ་ཡང་ཡིན་པས་བལ་སྲན་ལ་སོགས་འབྲུ་སྟེ། གལ་ཏེ་སྲོག་ཆགས་དང་ལྡན་ཞིང་སྲོག་ཆགས་དང་བཅས་པར་གྱུར་པ་དེའི་ཚེ་འབྲུ་དེ་གཞག་ཅིང་བྲུབ་པར་བྱ་བ་ཡིན་ནོ། །གང་དུ་ཞེ་ན། བདེ་ཞིང་བསིལ་བ་ཞེས་སྨོས་པ་ཡིན་ཏེ། བདེ་བ་ཡང་དེ་ཉིད་ཡིན་ལ་བསིལ་བ་ཡང་ཡིན་པས་བདེ་ཞིང་བསིལ་བའི་གནས་ཏེ། གང་བདེ་བར་གྱུར་པ་དང་བསིལ་བར་གྱུར་པའི་སའི་ཕྱོགས་གནོད་པ་མེད་པ་ངག་ཏུའོ། །དེ་ལྟར་བྱས་ཀྱང་བྲལ་བར་མ་གྱུར་པ་དེའི་ཚེ་ཇི་ལྟར་བྱ་ཞེ་ན། འོན་ཀྱང་སྲོག་ཆགས་བྲལ་བར་མ་གྱུར་ན། །ཞེས་སྨོས་པ་ཡིན་ཏེ། འོན་ཀྱང་གི་སྒྲ་ནི་ཤིན་ཏུ་དེ་ལྟར་བྱས་ཀྱང་ཞེས་བྱ་བ་ཡིན་པས་དེ་བས་ན་གལ་ཏེ་འབྲུ་ལ་སོགས་པ་སྲོག་ཆགས་ཏེ་སྐྱེ་བོ་དང་བྲལ་བར་མ་གྱུར་ཅིང་བྱེ་བར་མ་གྱུར་པའི་ཕྱིར་ཡང་སླར་གནས་སུ་བྲུབས་ཏེ་གཞག་ཅིང་གཞུག་པར་བྱའི། དེ་ཡོངས་སུ་ལོངས་སྤྱད་པའམ་བཙོང་བར་བྱ་བ་མ་ཡིན་ནོ། །གོས་ལ་ཆགས་པའི་སྲོག་ཆགས་ཀྱི་གནོད་པ་ཡོངས་སུ་སྤང་བར་བྱ་བའི་ཕྱིར། ཤིག་
རྣམས་ཞེས་བྱ་བ་ལ་སོགས་པ་སྨོས་པ་ཡིན་ཏེ། རང་ནི་རས་མ་སྟེ་གོས་ཀྱི་དུམ་བུར་ཤིག་རྣམས་དལ་གྱིས་བཏུས་ཏེ་གཞག་པར་བྱའོ། །ཇི་ལྟར་བྱ་ཞེ་ན། རྩིག་པ་ལ་སོགས་ཞེས་སྨོས་པ་ཡིན་ཏེ། རྩིག་པ་དང་པོར་བྱས་པའི་ཀ་བ་ལ་སོགས་པ་གང་ཡིན་པ་དེ་ནི་རྩིག་པ་ལ་སོགས་པའོ། །དེའི་བུ་ནི་བུག་པ་དག་ཡིན་པས་དེ་དག་ཏུ་གཞུག་ཅིང་གཞག་པར་བྱའོ། །ཀྱང་གི་སྒྲ་ནི་ཆུའི་ཁོངས་སུ་གཏོགས་པའི་སྲོག་ཆགས་དག་གི་གནོད་པ་སྤང་བར་བྱ་བའི་ཕྱིར་གྲོལ་བར་བྱ་བའི་སྣོད་ཀྱིས་གཏང་བར་བྱ་བ་འབའ་ཞིག་ཏུ་མ་ཟད་ཀྱི། འདི་དག་ཀྱང་ཇི་ལྟར་གནོད་པར་ནི་འགྱུར་བ་དེ་ལྟར་དལ་གྱིས་གཟུང་ཞིང་གཞག་པར་བྱའོ་ཞེས་སྡུད་པའི་དོན་ཡིན་ནོ། །ཤིག་འབའ་ཞིག་ཏུ་མ་ཟད་ཀྱི་མད་ཀུ་ཏ་ཡང་གཞག་པར་བྱའོ་ཞེས་སྡུད་པར་བྱེད་པའི་དོན་ཡིན་ལ། དེ་བཞིན་ཞེས་བྱ་བ་ནི་དལ་གྱིས་བཏུས་ནས་གཞག་པར་བྱའོ། །གང་དུ་ཞེ་ན། རྩྭར་བཅས་ཞེས་སྨོས་པ་ཡིན་ཏེ། རྩྭ་སྔོན་དང་བཅས་པར་འཇུག་པའི་ཕྱིར་རྩྭར་བཅས་ཏེ་དོར་རོ། །ཁྱད་པར་ཇི་ལྟ་བུ་ཅན་ཞེ་ན་བསིལ་བ་ཡང་དེ་ཉིད་ཡིན་པས་ན་བསིལ་བའི་ལ་ཕྱོགས་ཏེ། དེ་ལྟར་གྱུར་པའི་ས་ཕྱོགས་དེར་མད་ཀུ་ཏ་གཞག་པར་བྱའི་ཚད་པ་ལ་སོགས་པ་དག་ཏུ་ནི་མ་ཡིན་ནོ། །རྩྭར་བཅས་ཞེས་སྨོས་པ་ནི་ཚད་པས་གདུངས་པ་ལ་སོགས་པ་གནོད་པ་བྱེད་པ་རྣམ་པར་བཅད་པའི་ཕྱིར་ཡིན་གྱི། རྩྭ་སྔོན་དང་བཅས་པ་ཁོ་ན་ཞེས་ངེས་པར་གཟུང་བའི་ཕྱིར་ནི་མ་ཡིན་ནོ། །རྩྭ་ནི་རྩ་སྔོན་པོ་ལ་བྱའོ། །ཇི་ལྟར་ཤིག་ལ་སོགས་པ་དེ་དག་དོར་བར་བྱ་བ་དེ་བཞིན་དུ་གཞན་སྤྲུལ་ལ་སོགས་པ་གང་ཡིན་པས་གཏུམ་སོགས་ཞེས་སྨོས་པ་ཡིན་ཏེ། སྤྲུལ་ཐོག་མར་བྱས་པའི་སྡིག་པ་ལ་སོགས་པ་གང་ཡིན་པ་དེ་དག་ནི་སྦྲུལ་ལ་སོགས་སོ། །དེ་ཁྱད་པར་ཇི་ལྟ་བུ་ཞེ་ན། གནོད་བྱེད་ཅེས་སྨོས་པ་ཡིན་ཏེ། གནོད་པ་དེ་སྡུག་བསྔལ་བར་བྱེད་པའི་ཕྱིར་གནོད་བྱེད་ཡིན་ལ། དེ་དག་གི་རང་གི་ཡུལ་ཞེས་བྱ་བ་ཡང་གང་དང་གང་གི་རང་གི་སྤྱོད་ཡུལ་མ་ཡིན་པ་སྟེ་དཔེར་ན་སྤྲུལ་གྱི་ནི་གྲོག་མཁར་ལྟ་བུའོ། །དེར་སོ་སོར་བསྐྱལ་བར་བྱ་སྟེ་གྲོལ་བར་བྱ་བར་རིགས་པ་ཡིན་ནོ། །སྦྱིན་པ་གང་གིས་ཤན་བཟུང་བས་སོ། །ད་ནི་སྔར་བཤད་པ་རྗེས་སུ་བསྟན་པར་བྱ་བ་ཉེས་
པ་དང་བཅས་པ་བརྗོད་པར་བྱ་བའི་ཕྱིར། ཐ་མ་འདི་ནི་ཞེས་བྱ་བ་སྨོས་པ་ཡིན་ཏེ། འདི་ཐ་མ་ཡིན་པའི་ཕྱིར་ཐ་མ་སྟེ་མི་གཞན་ཡིན་ལ་གང་གིས་མིར་འདུ་ཤེས་ཞེས་བྱ་བ་ལ་སོགས་པས་ཐ་མར་གྱུར་པའི་ཉེས་པ་བསྟན་པ་ཡིན་ལ། དེ་ཡང་ཉེས་བྱས་ཏེ་འཁྲུལ་པ་མེད་ཅིང་གསོད་པའི་སེམས་ཡོད་པ་ཞེས་བྱ་བ་ལ་སོགས་པ་དང་བཅས་ཏེ་བཤད་པ་ཡིན་ཏེ་བཤད་པ་ནི་རྣམ་པར་བཤད་པའོ། །ད་ནི་ཞེས་བྱ་བ་ནི་ཕྱིས་ཀྱང་སྲོག་གཅོད་པ་སྟེ་སྲོག་ཆགས་གསོད་པར་བྱེད་པའི་ཕྱོགས་སུ་གཏོགས་པ་བཤད་པར་བྱ་བ་སྟེ། ཡིད་ཀྱི་ཉེས་བྱས་སུ་འགྱུར་རོ་ཞེས་བསྟན་པར་བྱའོ་ཞེས་བྱ་བའི་དོན་ཏོ། །ཇི་ལྟར་ཞེས་བྱ་བ་ནི་ཉེ་བར་སྟོན་པའི་དོན་ཏོ། །ཕྱོགས་སུ་གཏོགས་པ་དེ་དག་གང་ཞེ་ན། ནད་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། ནད་པ་ནི་ནད་ཀྱིས་ཉོན་མོངས་པར་གྱུར་པ་ཡིན་ཏེ་དེ་དག་ལའོ། །དུག་དང་མཚོན་ནི་དུག་དང་མཚོན་ཡིན་ཏེ། དེ་སྦྱིན་པ་དང༌། དེ་བཞིན་དུ་བཏུང་བ་ལ་སོགས་པ་མི་འཕྲོད་པ་གང་ཡིན་པ་དེ་ནི་བཏུང་བ་ལ་སོགས་པ་མི་མཐུན་པའོ། །མཐུན་པ་ནི་ཕན་ཞིང་འཕྲོད་པ་ཡིན་ལ། མི་མཐུན་པ་ནི་མི་འཕྲོད་པ་སྟེ། དེ་སྦྱིན་པར་བྱེད་པ་ནི་ཡང་དག་པར་སྦྱིན་པ་ཞེས་བྱའོ། །གལ་ཏེ་ནད་པ་ཚོར་བས་གཟིར་བ་ཞིག་དུག་གམ་མཚོན་སློང་བ་དེའི་ཚེ་བསམ་པ་དང་སེམས་དག་པས་དེ་ཕྱིན་ན་ཁ་ན་མ་ཐོ་བ་མེད་དོ་ཞེས་ཤེས་པར་བྱ་ཞིང༌། བཟློག་པས་ནི་རྩ་བའི་ཉེས་པ་དང་ལྡན་པར་འགྱུར་ཏེ་དེ་བཞིན་དུ་གཞན་དག་ལ་ཡང་སྦྱར་བར་བྱའོ། །ནད་པ་ལ་སྨན་ཇི་ལྟར་སྦྱིན་པར་བྱ་ཞེ་ན། རྒན་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ། རྒན་པ་ནི་རྣམ་པ་གཉིས་ཏེ། ན་སོས་དང༌། བསླབ་པས་སོ། །ཁྱད་པར་ཇི་ལྟ་བུ་ཞེ་ན། མཁས་པ་སྟེ་ནད་རབ་ཏུ་ཞི་བར་བྱེད་པ་ལའོ། །ནའི་སྒྲ་ནི་དེ་ལྟ་བུར་གྱུར་པ་དེ་ལ་དྲིས་པ་ཉིད་ཀྱིས་ཞེས་ངེས་པར་གཟུང་བའི་དོན་ཡིན་ནོ། །སྨན་པ་དང་ཞེས་བྱ་བའི་དང་ནི་རིམ་པ་གཞན་སྡུད་པའི་དོན་ཡིན་པར་བལྟ་བར་བྱའོ། །ནད་པ་ནད་ཀྱིས་ཉོན་མོངས་པར་གྱུར་པ་ལ་སྨན་རྗེས་སུ་སྦྱིན་པར་བྱའི། དེ་ལྟ་དེ་ལྟ་བུ་ཉིད་ཀྱིས་ནི་མ་ཡིན་ནོ། །དེའི་ནད་གཡོག་གླེན་ལས་ཞེས་བྱ་བ་ལ་ཇི་ལྟར་ཞེས་བྱ་བ་རྗེས་སུ་འཇུག་སྟེ། ཇི་ལྟར་ནད་པ་ལ་ལ་དུག་ལ་སོགས་པ་སྦྱིན་པར་བྱ་བ་མ་ཡིན་པ་དེ་བཞིན་དུ་གླེན་པ་སྟེ་
རྨོངས་པར་གྱུར་པ་ཕན་པ་དང་མི་ཕན་པ་མི་ཤེས་པ་དག་ཡིན་ནོ། །དེ་ལྟ་བུར་གྱུར་པའི་ནད་གཡོག་བསྙེན་བཀུར་བར་མི་བསྐོ་སྟེ། གང་གི་ཕྱིར་འདིས་བྱ་བ་དང་བྱ་བ་མ་ཡིན་པ་ཤེས་པ་མ་ཡིན་ནོ། །ཅི་རྣམ་པ་ཐམས་ཅད་དུ་བསྐོ་བར་མི་བྱའམ་ཞེ་ན། མེད་ན་ཞེས་སྨོས་པ་ཡིན་ཏེ་ཡོད་པ་ནི་མཁས་པ་ཡོད་པར་གྱུར་པའོ། །ཡོད་པ་མ་ཡིན་པ་ནི་དེ་མེད་པ་དང་མི་སྣང་ན་ཞེས་བྱ་བའི་བར་དུའོ། །དེ་མིད་ན་ནད་གཡོག་གླེན་པ་ཉིད་ལ་འདི་ནི་བྱ་བ་ཡིན་འདི་ནི་བྱ་བ་མ་ཡིན་ཞེས་ལེགས་པར་བསྒོ་ཞིང་བསླབས་ནས་བསྒོ་བར་བྱའི་ཤེས་པ་ཡོད་པ་ནི་མ་ཡིན་ནོ། །ནད་པ་ལ་ནི་དེ་ལྟའི་ཆོས་མ་བརྗོད་ཅེས་བྱ་བ་ནི་ཆོས་མ་ཡིན་ཡང་ཆོས་ཀྱི་སྒྲས་བརྗོད་ཅིང་རང་གི་མཚན་ཉིད་འཛིན་པའི་ཕྱིར་གང་གིས་ཆོས་བརྗོད་པས་དེའི་སེམས་འཆི་བའི་ཕྱིར་ཏེ། འཆི་བའི་དོན་དུ་སེམས་སྐྱེ་བ་ནི་འཆི་བའི་ཕྱིར་ངེས་པར་གྱུར་ཅེས་བྱ་བའི་དོན་ཏོ། །དེ་ལྟ་བུར་གྱུར་པའི་ཆོས་ནད་པའི་མདུན་དུ་མི་བརྗོད་པ་སྟེ་སྨྲ་བར་བྱ་བ་མ་ཡིན་ནོ། །འདི་ལྟར་ནད་པ་ཚུལ་ཁྲིམས་དང་ལྡན་པའམ། ཚུལ་ཁྲིམས་འཆལ་པ་ལ་ཡང་ཇི་སྲིད་འཚོ་ཞིང་གནས་པར་གྱུར་པ་དེ་སྲིད་ལུས་ཅན་སྡུག་བསྔལ་བར་འགྱུར་ཞིང་འཆི་བ་ནི་མཐོ་རིས་ལ་སོགས་པ་བདེ་བ་དང་བསོད་ནམས་མང་ཞིང་སྡིག་པ་མེད་པར་འགྱུར་རོ་ཞེས་བྱ་བ་ལ་སོགས་པ་ནད་པ་ལ་རིམ་པ་ཇི་ལྟ་བ་བཞིན་དུ་ཆོས་བསྟན་པར་མི་བྱའོ་ཞེས་བྱ་བའི་དོན་ཏོ། །ཡང་ཇི་ལྟར་བརྗོད་པར་བྱ་ཞེ་ན། རིང་དུ་འཚོ་ཞིང་ཞེས་བྱ་བ་ལ་སོགས་པ་སྨོས་པ་ཡིན་ཏེ། ནད་པ་དེ་ལ་བརྗོད་ཅིང་བསྟན་པར་བྱའོ་ཞེས་བྱ་བའི་བར་དུའོ། །ཇི་ལྟར་བརྗོད་པར་བྱ་ཞེ་ན། རིང་དུ་འཚོ་ཞིང་རིང་དུ་གནས་པ་ཞེས་རིང་བའི་སྒྲ་དང་སྦྱར་བར་བྱ་བ་ཡིན་ཏེ། ཡུན་རིང་དུ་སྲོག་འཛིན་པ་ཞེས་བྱ་བའི་ཐ་ཚིག་གོ །དོན་དུ་ན་དེ་ཉིད་རྣམ་གྲངས་ཡིན་ནོ། །དེ་ལྟ་བུར་གྱུར་པའི་དགེ་བའི་ཚིག་གི་རྣམ་པ་དེ་ལ་བརྗོད་པར་བྱའི་རྣམ་པ་གཞན་དུ་ནི་མ་ཡིན་ནོ་ཞེས་ངེས་པར་གཟུང་བའི་དོན་དུ་རྣམ་གྲངས་ཀྱི་ཚིག་བརྗོད་པ་ཡིན་གྱི། རྣམ་པ་གཞན་དུན་རྣམ་གྲངས་ཀྱི་ཚིག་དོན་མེད་པར་འགྱུར་རོ། །གཞན་ཡང་ཇི་ལྟར་བརྗོད་པར་བྱ་ཞེ་ན། བདེར་གྱུར་ཅེས་བྱ་བ་སྨོས་པ་ཡིན་ཏེ། བདེ་བར་གྱུར་པ་ནི་བདེ་བ་དང་ལྡན་པར་གྱུར་པའོ། །ཁྱད་པར་ཇི་ལྟ་བུ་ཞེ་ན་ནད་ནི་གཟེངས་མཐོ་བ་ཟད་པར་བྱེད་པའོ། །དེའི་ཕྱིར་ནད་ཀྱི་འཇིགས་པ་ནད་ཀྱི་འཇིགས་པ་སྟེ། འཇིགས་ཤིང་སྡངས་
པར་བྱེད་པ་ཞེས་བྱ་བ་ཡིན་པ་དེའི་ཕྱིར་དེའི་དེ་ལས་རྣམ་པར་གྲོལ་བའོ། །མངོན་པར་མཐོ་བ་དང་ངེས་པར་ལེགས་པའི་རྒྱུ་ནི་བསོད་ནམས་ཡིན་ཏེ་ཆོས་ཞེས་བརྗོད་ལ་དེ་ཡང་དང་ཡང་དུ་སྤྱོད་པའི་ཕྱིར་ཆོས་སྤྱོད་པའོ། །ཇི་སྲིད་རིང་དུ་སྟེ་དུས་རིང་པོར་འཚོ་བར་གྱུར་པ་དེ་སྲིད་དུ་འཕེལ་བར་འགྱུར་རོ། །དེ་གང་ཞེ་ན། དགེ་བའི་རྒྱུན་ཞེས་སྨོས་པ་ཡིན་ཏེ། དགེ་བ་སྟེ་བསོད་ནམས་ཀྱི་རྒྱུན་ནི་དགེ་བའི་རྒྱུན་ཡིན་པ་དེ་བས་ན་ཇི་སྲིད་དགེ་བ་དེ་འཕེལ་བར་འགྱུར་བ་དེའི་ཕྱིར་ནད་པ་ལ་ཁྱེད་རིང་དུ་འཚོ་ཞིང་ཞེས་བྱ་བ་ལ་སོགས་པ་བརྗོད་པར་བྱ་བ་ཡིན་ནོ། །བསྐྱོད་པ་སྟེ་གཞན་དུ་གཞག་པར་གྱུར་ན་བདག་འཆི་བར་འགྱུར་རོ་ཞེས་དེ་སྐད་དུ་གལ་ཏེ་ནད་པ་ཟེར་བ་སྟེ། ཇི་སྟེ་རྗོད་པར་བྱེད་ན་ནད་གཡོག་གམ་གཞན་དག་གིས་ཀྱང་མི་བྱ་ཞིང་མི་བསྒྲུབ་བོ། དེ་བཞིན་དུ་ལྷུང་བཟེད་དང་པོར་བྱས་པའི་ཆོས་གོས་ལ་སོགས་པ་གང་ཡིན་པ་དེ་ནི་ལྷུང་བཟེད་ལ་སོགས་པའོ། །དེའི་ཕྱིར་ནི་རྒྱུ་དང་རྒྱུ་མཚན་ཞེས་བྱ་བའི་བར་དུའོ། །ལྷུང་བཟེད་ལ་སོགས་ཕྱིར་ཡང་སྟེ། དེའི་དོན་དུ་ཡང་མི་བྱའོ། །ཡང་གི་སྒྲ་ནི་དེ་ལྟ་ཞོག་གི་གཞན་ཡང་ཞེས་བྱ་བའི་དོན་ཏོ། །ཇི་ལྟར་མི་བྱ་ཞེ་ན། གདོལ་བ་བཞིན་དུ་ཞེས་བྱ་བ་སྨོས་པ་ཡིན་ཏེ། གདོལ་པ་ནི་རིགས་ངན་ཡིན་ལ་དེའི་བསམ་པ་ལྟར་བྱེད་པ་ནི་གདོལ་བ་བཞིན་དུའོ། །ཁྱད་པར་ཇི་ལྟ་བུ་ཞེ་ན། གང་གི་ཕྱིར་བརྩེ་བ་སྟེ། སྙིང་རྗེ་མེད་པའི་བསམ་པ་ཅན་དེ་ནི་བརྩེ་བ་མེད་དོ། །ཆགས་པ་ནི་སྲེད་པ་སྟེ་དེ་དང་ལྡན་པའི་སེམས་ནི་ཆགས་སེམས་ཡིན་ནོ། །བརྩེ་བ་མེད་པ་ཡང་དེ་ཡིན་ལ་ཆགས་སེམས་ཀྱང་ཡིན། བརྩེ་མེད་ཆགས་སེམས་ཏེ་དེ་ལྟ་བུར་གྱུར་པའི་སེམས་ཀྱིས་མི་བྱའོ་ཞེས་བྱ་བའི་བར་དུའོ། །དེ་བཞིན་དུ་རྩོད་པ་སྟེ་ཅ་ཅོ་སྐྱེད་པར་བྱེད་པའི་དངོས་པོ་གང་དག་ཡིན་པ་དེ་དག་ནི་རྩོད་པའི་དངོས་པོ་དག་སྟེ། རྩོད་པའི་རྒྱུ་ང་རྒྱལ་ལ་སོགས་པ་དེ་དག་གང་གི་ཚེ་མི་གཏོང་བ་ནི་མི་འདོར་བ་ཡིན་ཏེ། དེ་ལྟ་ན་ཡང་ཕྱོགས་སུ་གཏོགས་པ་ཉིད་དུ་འགྱུར་རོ། །དེ་བཞིན་དུ་ནན་གྱིས་ཏེ་སྟོབས་ཀྱིས་འདུག་པར་འགྱུར་རོ། །གང་ལ་ཞེ་ན། གཞན་གྱི་ཁྲི་དང་ཁྲིའུ་སྟེ་གཞན་དག་གི་ཁྲི་དང་ཁྲིའུ་ལའོ། །དེ་བཞིན་དུ་གཞན་ལ་བརྟེན་པ་ཞེས་བྱ་བ་ནི་དགེ་སློང་དང་དགེ་ཚུལ་དང་ཁྱིམ་པ་དག་ལའོ། །གཟས་
ཀྱང་རུང་ཞེས་བྱ་བ་ནི་བརྡེག་པའི་ཕྱིར་ལག་པའམ་དབྱིག་པ་འདེགས་པར་བྱེད་ཅེས་བྱ་བའི་ཐ་ཚིག་གོ །སྔ་མ་ནི་ལག་པ་ལ་སོགས་པས་མངོན་པར་བསྡིགས་པ་ཡིན་ལ་འདིར་ནི་གཟས་པ་ཡིན་པའི་ཕྱིར་ཁྱད་པར་ཡོད་དོ། །དེ་བཞིན་དུ་གཞན་ལ་བསྡིགས་པར་གྱུར་ཏམ་ཞས་བྱ་བར་སྦྱར་རོ། །བསྡིགས་པ་ནི་ཞུམ་པར་བྱེད་པ་ཡིན་ཏེ། ལུང་ལས་ཇི་ལྟར་རབ་ཏུ་བྱུང་བ་གཞན་དགུན་གྱི་དུས་སུ་གནས་ཁང་ལས་བསྐྲད་ཅིང་དེ་གྲང་བས་གཟིར་བ་དང༌། གཞན་ཡང་སོ་གའི་དུས་སུ་དེ་གནས་ཁང་དུ་བཅུག་ཅིང་དེ་སྒོ་བཅད་ནས་ཚ་བས་གདུངས་པར་གྱུར་པ་ཞེས་འབྱུང་བ་ཡིན་ནོ། །སྡངས་པར་བྱེད་པ་ལ་སོགས་པ་གང་ཡིན་པ་དེ་ནི་སྡངས་པར་བྱེད་པ་ལ་སོགས་པ་སྟེ། སྡངས་པར་བྱེད་པ་ནི་གཞན་ལ་འཇིགས་པ་སྐྱེད་པའི་ཕྱིར་མུན་པར་གནས་ནས་སྐད་བསྒྱུར་བ་ལ་སོགས་པ་ཡིན་པར་རིག་པར་བྱའོ། །སོགས་པའི་སྒྲས་ཀྱང་དེ་ལྟ་བུའི་རིགས་ཅན་གཞན་དག་ཀྱང་བསྡུ་བའི་ཕྱིར་རོ། །སྡོམ་པ་ཡོད་པའི་ཕྱིར་སྡོམ་ཅན་དེ་གཤེ་ཞིར་ཁྲོས་པའི་སྒོ་ནས་དཀའ་ཐུབ་ཅན་ཏེ་ཟས་དང་བྲལ་བར་བྱས་པ་ནི་སྨྱུང་བ་བྱས་ཞེས་བྱ་བའི་ཐ་ཚིག་གོ །ཁྲོས་པས་ཞེས་བྱ་བའི་ཚིག་ནི་ནང་པ་ལ་ཕན་སེམས་ཀྱིས་བྱས་ན་ཉེས་པར་མི་འགྱུར་རོ་ཞེས་བསྟན་པའི་ཕྱིར་རོ། །དང་ནི་སྔར་བསྟན་པའི་དེ་བཞིན་ཞེས་བྱ་བའི་སྒྲ་རྗེས་སུ་འདྲེན་པར་བྱེད་པའི་དོན་ཡིན་ཏེ། གཞན་ཁྲོས་པས་སྨྱུང་བ་བྱེད་དུ་བཅུག་པ་ཉེས་བྱས་སུ་འགྱུར་པ་འབའ་ཞིག་མ་ཡིན་གྱི་འོན་ཀྱང་གཞན་ལ་ཁྲོས་པའི་སྒོ་ནས་རང་ཉིད་ཀྱིས་ཀྱང་སྨྱུངས་བ་བྱས་ན་ཡིད་ཀྱི་ཉེས་བྱས་སུ་འགྱུར་བར་རེག་པར་བྱའོ། །སྡོམ་ཅན་ཞེས་བྱ་བ་འདིར་ཡང་རྗེས་སུ་འབྲང་བ་ཡིན་པས་ན་སྡོམ་ཅན་མྱུར་དུ་འགྲོ་བ་ན་ལམ་གྱིས་དལ་བར་གྱུར་པའི་སྐེ་བ་ལ་སོགས་པ་ལས་ལག་པས་གཟུང་ཞིང་གལ་ཏེ་ཕུལ་བར་གྱུར་ན་ཡིད་ཀྱི་ཉེས་བྱས་སུ་འགྱུར་རོ། །རྒྱལ་ནི་རྒྱལ་པོ་ཡིན་ལ། རྐུན་པོ་ནི་རྫས་འཕྲོག་པར་བྱེད་པའམ་སྲོག་འཕྲོག་པར་བྱེད་པ་དག་ཡིན་ནོ། །འབུལ་བ་ནི་གཏོད་པར་བྱེད་པའོ། །དར་ནི་དེ་ལྟར་བྱམས་ཞེས་རྣམ་པར་རྟོག་པའི་དོན་ཏོ། །ངན་པར་བྱས་པས་འགྱོད་པ་སྟེ་ཕྱི་རོལ་གྱི་དངོས་པོ་ཡིན་ལ། འདི་ནི་དེ་ལ་དམིགས་པ་སེམས་ལས་བྱུང་བའི་ཚེས་ཡིན་པས་ན་འགྱོད་
བ་ཞེས་བྱ་བའི་སྒྲས་བརྗོད་པ་ཡིན་ནོ། །རྣམ་པའི་སྒྲ་ནི་རང་བཞིན་གྱི་ཚིག་ཡིན་ཏེ། དཔེར་ན་ལོག་པར་ལྟ་བའི་རྣམ་པ་ཞེས་བྱ་བ་ལ་ལོག་པའི་ལྟ་བའི་རང་བཞིན་ཞེས་རྟོག་པར་འགྱུར་བ་ལྟ་བུའོ། །དེ་བཞིན་དུ་གཞན་དག་ལ་ཡང་ཆེད་དུ་སྟེ། བློ་སྔོན་དུ་སོང་བས་གཞན་ལ་འགྱོད་པའི་རྣམ་པ་སྟེ་འགྱོད་པའི་རང་བཞིན་དེ་བསྐྱོད་རྣ་ཡིད་ཀྱི་ཉེས་བྱས་སུ་འགྱུར་རོ་ཞེས་བྱ་བ་ནི་ཚིག་གི་ལྷག་མ་ཡིན་ནོ། །དཔེར་ན་ཁྱོད་རབ་ཏུ་བྱུང་བ་མ་ཡིན་ཁྱོད་ཀྱི་མཁན་པོ་ཚུལ་ཁྲིམས་འཆལ་བ་དག་ཡིན་ནོ་ཞེས་བྱ་བ་ལྟ་བུ་ཡིན་ནོ། །བཙིར་བ་སྟེ་གཞན་སྡུག་བསྔལ་སྐྱེད་པར་བྱེད་ཅེས་བྱ་བ་ནི་ལྷག་མའོ། །དཔེར་ན་འགའ་ཞག་སྒོ་གླེགས་སམ་གཞན་དག་ཏུ་བཙིར་བ་ལྟ་བུའོ། །ག་ག་ཚིལ་ནི་གཡའ་དགག་པ་སྟེ་དེ་ལ་སོགས་པ་གང་ཡིན་པའོ། །སོགས་པའི་སྒྲས་གཞན་དགོད་པའི་རྒྱུ་མཚན་དང་སྲོག་རྒུད་པར་བྱེད་པའི་རྒྱུ་མཚན་དུ་གྱུར་པ་དག་ཀྱང་བསྡུས་པ་ཡིན་ནོ། །བཙིར་བ་དང་ག་ག་ཚིལ་ནི་བཙིར་དང་ག་ག་ཚིལ་སོགས་སྐྱེད་པ་ཞེས་བྱ་བར་སྦྱར་རོ། །དེ་བཞིན་དུ་ནགས་མེ་ནི་མེ་གཏོང་བར་བྱེད་པ་ཡིན་ཏེ། འདིར་སྲོག་ཆགས་མང་བའི་བློ་ཙམ་ཡོད་པ་ཡིན་གྱི། གསད་པའི་བསམ་པས་ནི་མ་ཡིན་ནོ། །ཇི་ལྟར་ཡང་གསོད་སེམས་ཀྱིས་མི་འཆི་བར་གྱུར་ཅིག་སྙམ་དུ་ནི་མཐའི་ཉེས་བྱས་སུ་འགྱུར་ལ། འོན་ཏེ་དུད་འགྲོ་འཆི་བར་གྱུར་ཅིག་སྙམ་ན་ནི་ཉེས་བྱས་ཀྱི་ཉེས་པར་འགྱུར་ཞིང༌། སྤྱིར་གཙེ་བར་བྱའོ་སྙམ་པའི་བསམ་པས་ཡིན་ན་ནི་ཉེས་བྱས་ཀྱི་ཉེས་པར་འགྱུར་རོ། །དེའི་ཕྱིར་གསོད་པའི་བསམ་པ་མ་གཏོགས་པ་སྤྱིར་སེམས་ཅན་ཡོད་དོ་སྙམ་དུ་ཤེས་པས་གཙོ་བའི་བསམ་པས་ནགས་མེ་གཏོང་ན་ཡིད་ཀྱི་ཉེས་བྱས་སུ་འགྱུར་རོ་ཞེས་ཤེས་པར་བྱའོ། །མ་སྨིན་པ་ཡང་དེ་ཡིན་ལ་འབྲུམ་བུ་ཡང་ཡིན་པས་ན་འབྲུམ་བུ་མ་སྨིན་པ་སྟེ། ནད་ཡོངས་སུ་སྤང་བའི་ཕྱིར་རྟོལ་བར་བྱེད་པ་ཡིན་ནོ། །འདི་སྐད་དུ། ཡོངས་སུ་མ་སྨིན་པའི་སྲིན་བུ་རྟོལ་བར་བྱེད་ཅེས་བསྟན་པར་འགྱུར་རོ། །ད་ནི་དེ་བཞིན་ཞེས་བྱ་བ་རྗེས་སུ་འདྲེན་པར་བྱེད་པའི་དོན་ཏེ། མ་སྨིན་པ་བརྟོལ་ན་ནད་དུ་འགྱུར་ཞེས་བྱ་བའི་དབང་དུ་བྱས་ནས་ཡིད་ཀྱི་ཉེས་པར་རིག་པར་བྱའོ། །འདི་ལ་ཁྱད་པར་མེད་པའི་ཕྱིར་བདག་དང་གཞན་གྱིས་ཤེས་པར་བྱའོ། །
ཡན་ལག་སྟེ་ལུས་གཅོད་པར་བྱེད་པའི་ཕྱིར་ཁྲོས་པས་བདག་གམ་གཞན་གྱི་སོར་མོ་ལ་སོགས་པ་གཅོད་པར་བྱེད་ཅེས་བྱ་བ་ནི་ཚིག་གི་ལྷག་མའོ། །ཡང་ན་འབིགས་པ་སྟེ་ཡན་ལག་ཅེས་བྱ་བ་དང་སྦྱར་བར་བྱའོ། །ཡང་ན་ཞེས་བྱ་བ་ནི་ཕྱོགས་གཞན་སྟོན་པའི་དོན་ཏེ། ཡན་ལག་གཅོད་པར་བྱེད་དམ་ཡང་ན་འབིགས་པར་བྱེད་པ་སྟེ། དེ་ལྟར་ནའང་ཡིད་ཀྱི་ཉེས་པར་འགྱུར་རོ་ཞེས་བསྟན་པར་འགྱུར་རོ། །དེ་དག་སྲོག་གཅོད་པའི་ཕྱོགས་སུ་གཏོགས་པ་ཡིན་ནོ་ཞེས་བྱ་བ་ནི་ལྷག་མ་ཡིན་ཏེ། དེ་ནི་ཇི་ལྟར་ནད་པ་དུག་དང་མཚོན་སྦྱིན་དང༌། །ཞེས་བྱ་བ་ལ་སོགས་པ་ཐམས་ཅད་ལ་བརྗོད་པར་བྱའོ། །དེ་ཙམ་ཞིག་ཕྱོགས་དང་མཐུན་པ་ཡིན་པར་མ་ཟད་ཀྱི་སྔར་བསྟན་པ་དག་ཀྱང་ཡིན་ནོ་ཞེས་བྱ་བ་ནི་ཀྱང་གི་སྒྲའི་དོན་ཏོ། །དེ་ལྟར་བཤད་མ་ཐག་པའི་རྣམ་པས་བསླབ་པའི་གཞིར་སྲོག་གཅོད་པའི་རྗེས་སུ་འགྲོ་ཞིང་རྗེས་སུ་བྱེད་པའི་ཕྱིར་སྲོག་གཅོད་པའི་རྗེས་སུ་མཐུན་པ་དག་ཡིན་ནོ། །དེ་དག་གི་ཕྱོགས་ཙམ་སྟེ་ཆ་ཙམ་ཞིག་བསྟན་པ་ཡིན་ཞེས་བྱ་བ་ནི་ལྷག་མའོ། །ཕྱོགས་ཙམ་ཞེས་བྱ་བ་སྨོས་པས་དེ་ཙམ་ཞིག་ནི་མ་ཡིན་གྱི་གཞན་དག་ཀྱང་ཡོད་དོ་ཞེས་སྟོན་པར་བྱེད་པ་ཡིན་ནོ། །དགེ་ཚུལ་གྱི་བསླབ་པ་ལས་བསླབ་པའི་གཞི་དང་པོའོ།། །། ད་ནི་རྐུ་སེམས་དང་ནི་འདོད་པ་དེ་ཉིད་དང༌། །ཞེས་བྱ་བ་ལ་སོགས་པས་མ་བྱིན་པར་ལེན་པའི་བསླབ་པའི་གཞིའི་ཚིག་ལེའུར་བྱས་པ་རྣམ་པར་བཤད་པར་བྱ་སྟེ། དགེ་ཚུལ་གང་ནོར་ཏེ་རྫས་རྐུ་བར་བྱེད་པ་དེ་བསྙིལ་བར་རིགས་པ་ཡིན་ཏེ་དགེ་ཚུལ་ཉིད་མ་ཡིན་པའི་ཕྱིར་རོ། །ཁྱད་པར་ཇི་ལྟ་བུ་ཞེ་ན། མ་བྱིན་ཞེས་བྱ་བ་སྨོས་པ་ཡིན་ཏེ། མ་བྱིན་པ་ནི་བྱིན་པ་མ་ཡིན་པ་སྟེ་རྫས་དེ་གང་གི་ཡིན་པ་དེས་མ་བྱིན་པ་ཞེས་བྱ་བའི་ཐ་ཚིག་གོ །ཁྱད་པར་གཞན་ཡང་རིན་ཐང་ཡོངས་སུ་ཚད་བ་གང་ཡིན་པ་དེ་ནི་རིན་ཐང་ཚང་བ་སྟེ་གོས་ལ་སོགས་པའོ། །ནོར་དེ་གང་གི་ཡིན་ཞེ་ན་སྨྲས་པ་གཞན་ཡང་དེ་ཡིན་ལ་མི་ཡང་དེ་ཡིན་པའི་ཕྱིར་མི་གཞན་ཏེ། དེའི་ནོར་ཡིན་ནོ་ཞེས་བྱ་བའི་དོན་ཏོ། །དེའི་ཁྱད་པར་ཇི་ལྟ་བུ་ཞིག་ཅེ་ན། མི་ཡིས་བདག་གིར་བྱས་ཞེས་བྱ་བ་སྨོས་པ་ཡིན་ཏེ། མི་ཡིས་བདག་གིར་བྱས་པ་ཁོ་ན་བདག་གིར་བྱས་པ་སྟེ། བདག་གི་ཡིན་ནོ་ཞེས་དབང་དུ་བྱས་པ་ཡིན་ནོ་ཞེས་བྱ་
བའི་དོན་ཏོ། །གཞན་ཡང་དེ་ཉིད་ཁྱད་པར་དུ་བྱེད་པ་ནི་གང་ཁོ་ན་རྐུ་བ་ཉིད་དུ་འདོད་པ་ནི་བསམས་པ་སྟེ། དེ་ཉིད་གལ་ཏེ་རྐུ་བར་བྱེད་ན་འགྱུར་གྱི་གཞན་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལ་ཁྱད་པར་ཇི་ལྟ་བུ་ཞེ་ན། དུར་ཁྲོད་པ་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ། དུར་ཁྲོད་ན་ཡོད་པའི་ཕྱིར་དུར་ཁྲོད་བ་སྟེ་གོས་ལ་སོགས་པའོ། །དབང་བ་ནི་ཐོབ་པར་ངེས་པ་ལ་བྱ་ལ། དབང་བ་མ་ཡིན་པ་ནི་མི་དབང་བ་སྟེ་ཐོབ་པར་ངེས་པ་མ་ཡིན་ནོ་ཞེས་བྱ་བའི་དོན་ཏོ། །མི་དབང་བ་ཡང་དེ་ཉིད་ཡིན་ལ་བསོད་སྙོམས་ཀྱང་ཡིན་པས་མི་དབང་བསོད་སྙོམས་ཏེ། གཡོས་སུ་བྱས་པའི་ཟས་ཞེས་བྱ་བའི་དོན་ཏོ། །འདི་ནི་ཁྱད་པར་གྱི་བསྡུ་བའོ། །འདིར་དུར་ཁྲོད་པ་དང་མི་དབང་བསོད་སྙོམས་ཞེས་བྱ་བ་ནི་ཟླས་དབྱེ་བའི་བསྡུ་བ་ཡིན་ནོ། །དེའི་ཕྱིར་གང་དུར་ཁྲོད་པ་དང་མི་དབང་བའི་བསོད་སྙོམས་དག་ལས་གཞན་པའི་རྫས་དག་གོ །དགེ་ཚུལ་ཁྱད་པར་ཇི་ལྟ་བུས་རྐུས་པར་གྱུར་ཞེ་ན། མི་ཡིར་འདུ་ཤེས་དང་ཞེས་བྱ་བ་སྨོས་པ་ཡིན་ཏེ། མི་རང་གི་རྫས་ཞེས་འདུ་ཤེས་པ་གང་ལ་ཡོད་པ་དེ་ནི་མི་ཡིར་འདུ་ཤེས་པས་སོ། །ཅི་བསམ་པ་གང་ཡང་རུང་བས་སམ་ཞེ་ན། སྨྲས་པ། རྐུ་བ་ནི་རྐུ་འཕྲོག་སྟེ་དེའི་བསམ་པ་ནི་རྐུ་སེམས་སོ། །སེམས་པ་ནི་མངོན་པར་བསམས་པ་ཡིན་ཏེ་དེས་སོ། །ཅི་སྦྱོར་བ་དུ་མ་དག་གིས་སམ་ཞེ་ན། སྦྱོར་བ་གཅིག་པ་དང་ཞེས་བྱ་བ་སྨོས་པ་ཡིན་ཏེ། གཅིག་ཀྱང་དེ་ཡིན་ལ་སྦྱོར་བ་ཡང་ཡིན་པའི་ཕྱིར་སྦྱོར་བ་གཅིག་པ་ཡིན་པ་དེའི་ཕྱིར་དེས་སོ། །གང་གི་དོན་དུ་ཞེ་ན། བདག་གི་ཕྱིར་ཞེས་སྨོས་པ་ཡིན་ཏེ། བདག་གི་སྒྲ་ནི་རང་ཉིད་རྗོད་པར་བྱེད་པ་ཡིན་ལ་ཕྱིར་གྱི་སྒྲས་དགོས་པ་བརྗོད་པ་དེའི་ཕྱིར་ཡང་བདག་གི་ཕྱིར་ཏེ། བདག་ཉིད་ཀྱི་དགོས་པ་ཞེས་བྱ་བའི་དོན་འདིར་འགྱུར་རོ། །བསྡུ་བ་ཡང་འདི་ལྟར་བྱ་བ་ཡིན་ཏེ། བདག་དང་རང་ཉིད་ཀྱི་ཕྱིར་ཏེ། དངོས་པོ་གང་ལ་ཡོད་པ་དེ་ནི་བདག་གི་ཕྱིར་གཞན་གྱི་ནོར་རྐུ་བར་བྱེད་པ་ཡིན་གྱི། གཞན་གྱི་ཕྱིར་ནི་མ་ཡིན་ནོ། །དེ་བཞིན་གྱི་སྦྲ་ནི་ཡན་ལག་རེ་རེ་ལ་ཡང་སྦྱར་བར་བྱ་བ་ཡིན་པ་དེ་བས་ན་ཇི་ལྟར་མི་གཞན་ནོར་དང་ཞེས་བྱ་བ་འདི་ཡན་ལག་ཡིན་པ་དེ་བཞིན་དུ་ཇི་སྐད་དུ་བཤད་པ་ཐམས་ཅད་ཀྱང་ཡན་ལག་ཁོ་ན་ཡིན་ནོ་ཞེས་བྱ་བའི་དོན་འདིར་འགྱུར་རོ། །ཅི་ཡན་ལག་དེ་ཙམ་ཁོ་ན་དག་གིས་
བསྙིལ་བར་བྱ་བ་ཡིན་ནམ་ཞེ་ན། སྨྲས་པ། གནས་དང་དུས་ནི་གནས་དང་དུས་ཏེ། རྫས་དེ་རྐུ་བའི་གནས་དང་དུས་དག་ཡིན་ལ། དེའི་རིན་ཐང་ནི་གནས་དང་དུས་དེའི་རིན་ཐང་སྟེ། དེའི་དབང་གིས་བསྙིལ་བར་བྱ་བ་ཡིན་གྱི། གནས་དང་དུས་གཞན་གྱི་རིན་ཐང་གི་དབང་གིས་ནི་མ་ཡིན་ནོ། །ཅི་རྫས་ཐམས་ཅད་བརྐུས་པས་བསྙིལ་བར་བྱ་བ་ཡིན་ནམ་ཞེ་ན། དད་པས་རྒྱལ་བའི་རིང་བསྲེལ་བརྐུས་དེ་མིན། །ཞེས་བྱ་བ་སྨོས་པ་ཡིན་ཏེ། གལ་ཏེ་དད་པ་མེད་པར་རྒྱལ་བ་སྟེ་བཅོམ་ལྡན་འདས་ཀྱི་རིང་བསྲེལ་དེ་རྐུ་བར་བྱེད་ན་དེའི་ཚེ་བསྙིལ་བར་བྱ་བ་ཡིན་ནོ་ཞེས་བྱ་བའི་དོན་ཏོ། །ཡི་གེའི་བསྡུ་བ་བསྟན་ནས་ད་ནི་ཡན་ལག་གི་དགོས་པ་དཔྱད་པར་བྱ་སྟེ། གང་གི་ཕྱིར་མི་གཞན་ནོར་དང་ཞེས་བྱ་བ་ལ་སོགས་པའི་ཡན་ལག་ཡོད་པར་གྱུར་ན་མཐའི་ཉེས་པར་འགྱུར་རོ་ཞེས་བརྗོད་པར་བྱ་བ་ཡིན་ན། མ་བྱིན་པ་ཞེས་ཅིའི་ཕྱིར་སྨོས་ཤེ་ན། མ་ཡིན་ཏེ་གང་གི་ཕྱིར་མ་བྱིན་ལ་མི་གཞན་ནོར་ཞེས་བྱ་བ་ལ་སོགས་པའི་ཡན་ལག་གཞན་མ་ལུས་པར་ཡོད་པ་དེའི་ཚེ་མཐའི་ཉེས་པར་འགྱུར་བར་འདོད་ཀྱི། གལ་ཏེ་དེ་ལས་གཞན་པ་རྐུ་སེམས་ལ་སོགས་པ་ཡོད་ན་ཡང་མ་བྱིན་པར་ལེན་པ་ཉིད་མེད་པའི་ཕྱིར་གཞན་གྱི་རྫས་མ་ཡིན་ལ། འོན་ཀྱང་རང་གི་རྫས་ཡིན་པ་དེའི་ཕྱིར་མཐའི་ཉེས་པར་ནི་མི་འགྱུར་གྱི་འོན་ཀྱང་ཉེས་བྱས་ཉིད་དུ་འགྱུར་རོ། །དེ་ལྟ་ན་ཡང་བརྗོད་པར་བྱ་བ་མ་ཡིན་ཏེ། གང་གི་ཕྱིར་མི་གཞན་ནོར་དང་ཞེས་བྱ་བ་སྨོས་པའི་ཤུགས་ཀྱིས་མ་བྱིན་པ་ཞེས་ཁོང་དུ་ཆུད་པར་འགྱུར་བ་མ་ཡིན་ནམ་ཞེ་ན། འདི་ལ་ཉེས་པ་མེད་དེ་གང་གི་ཚེ་མི་གཞན་གྱི་ནོར་ཡིན་པར་གྱུར་ལ་དེས་ཀྱང་བྱིན་པར་གྱུར་པ་ན་ཉེས་པ་མེད་པ་དེའི་ཕྱིར་དེ་རྣམ་པར་བཅད་པའི་ཕྱིར་སྨོས་པ་ཡིན་ནོ། །བྱིན་པ་བརྐུས་པར་ཇི་ལྟར་འགྱུར་ཞེ་ན། བྱིན་པ་ཡིན་ནོ་ཞེས་དེ་ལྟར་མི་ཤེས་པ་ཡིན་ཏེ། དེ་ལྟར་ཁོང་དུ་ཆུད་པར་བྱའོ། །གང་གི་ཕྱིར་གཞན་གྱི་རྫས་བརྐུས་ན་ཉེས་པར་འགྱུར་བ་ཡིན་ནོ་རིན་ཐང་ཚང་བ་ཞེས་སྨོས་པ་ཅིའི་ཕྱིར་ཞེ་ན། གང་གི་ཕྱིར་དེ་མ་གཏོགས་པ་གཞན་གྱིས་མ་བྱིན་པ་ཙམ་ཡིན་ན་ནི་ཚང་བའམ་མ་ཚང་བ་བརྐུས་པས་མཐའ་ཞེས་བྱ་བའི་ཐ་མར་འགྱུར་ན་དེ་ལྟར་ཡང་མི་འདོད། འོན་ཀྱང་རིན་ཐང་ཚང་བར་གྱུར་ན་ཡིན་གྱི་མ་ཚང་ན་ནི་ཉེས་བྱས་ཀྱི་
ཉེས་པར་འགྱུར་བ་དེའི་ཕྱིར་ཇི་སྐད་དུ་བཤད་པ་ལེགས་པ་ཡིན་ནོ། །ཚང་བ་ཞེས་བྱ་བ་ནི་རྐུ་བའི་ཡུལ་དང་དུས་ཀྱི་ཐ་སྙད་དུ་བྱེད་པའི་ན་ན་ཀའི་བཞི་ཆ་རྗོད་པར་བྱེད་པ་ཡིན་ནོ། །རན་ཐང་སྨོས་པ་ཅིའི་ཕྱིར་ཞེ་ན། གོས་ལ་སོགས་པ་ཡོངས་སུ་བསྡུ་བའི་ཕྱིར་ཏེ། རྣམ་པ་གཞན་དུ་ན་ན་ཀའི་བཞི་ཆ་བརྐུས་པ་ཁོ་ན་ལ་ཉེས་པར་འགྱུར་རོ། །རིན་ཐང་ཚང་བ་ཞེས་བྱ་བ་གོས་ལ་སོགས་པ་ཡིན་པར་བརྗོད་པ་མ་ཡིན་ནམ་ན་ན་ཀའི་བཞི་ཆའི་རིན་ཐང་སྨོས་པ་དེ་ཅིའི་ཕྱིར་ཞེ་ན། སྨྲས་པ་རིན་ཐང་ཁོ་ནའི་དབང་དུ་བྱས་ནས་གོས་ལ་སོགས་པ་བརྐུས་པ་ལ་ཉེས་པར་རྣམ་པར་གཞག་པ་དེ་བས་ན་རིན་ཐང་གཙོ་བོ་ཡིན་ནོ། །དེ་བས་ན་མ་སྨོས་སུ་ཟིན་ཀྱང་དེ་ལེགས་པ་ཁོ་ནར་སྨོས་པར་འགྱུར་རོ། །གཞན་ཞེས་སྨོས་པ་ཅིའི་ཕྱིར་ཞེ་ན། གང་གི་ཕྱིར་དེ་མ་ཡིན་པའི་མིའི་ནོར་བརྐུས་པས་རྩ་བར་འགྱུར་རོ་ཞེས་བརྗོད་པ་ན་བདག་ཉིད་ཀྱང་མི་ཞེས་བྱ་བ་ཡིན་པས་བདག་ཉིད་ཀྱི་བརྐུས་ན་ཡང་འགྱུར་ཏེ། དེ་ལྟར་ནའང་མི་འདོད་དེ་འོན་ཀྱང་མི་གཞན་ཞེས་བྱ་བ་སྨོས་པས་བདག་གི་བརྐུས་ན་ཆུང་བར་འགྱུར་རོ། །ཇི་ལྟར་ན་བདག་གི་བརྐུས་པར་འགྱུར་ཞེ་ན། བདག་གི་མ་ཡིན་ནོ་ཞེས་འཁྲུལ་པའི་དབང་གིས་སོ། །འདོད་པ་དེ་ཉིད་ཅེས་སྨོས་པ་འདིས་ཀྱང་གཞན་གྱིས་བརྐུ་བ་ཉིད་དུ་འདོད་མ་ཡིན་གྱི། བདག་ཉིད་ཀྱི་ལ་འདོད་པ་ནི་མ་ཡིན་པ་མ་ཡིན་ནམ། འོན་ཀྱང་གཞན་གྱི་འདོད་པ་དེའི་ཕྱིར་ཡང་དེ་ཉིད་ཁོ་ནས་རྟོགས་པར་འགྱུར་བའི་ཕྱིར་འདིས་ཅི་བྱ་ཞེ་ན། བདེན་ཏེ་འོན་ཀྱང་དེ་རྫས་སྤྱད་པའི་དབང་དུ་བྱས་པ་ཡིན་ལ། འདི་ནི་བདག་པོ་སྤྱད་སྤྱོད་པ་ཡིན་པའི་ཕྱིར་ཉེས་པ་མེད་དོ། །ཡང་ན་གཞན་དག་གིས་གནས་ཁང་དུ་སྦས་ཏེ་བཞག་པ་འདི་ནི་བདག་གི་ཡིན་ནོ་ཞེས་ཤེས་སུ་ཟིན་ཀྱང་འགའ་ཞིག་གིས་ཀྱང་མཐོང་བར་མ་གྱུར་ཅིག་སྙམ་པས་རྐུ་བར་བྱེད་པ་ཡོད་ཅིང་བསམ་པ་ངན་པ་སྲིད་པའི་ཕྱིར་རོ། །མི་ཞེས་སྨོས་པ་ཅིའི་ཕྱིར་ཞེ་ན། དུད་འགྲོ་ལ་སོགས་པ་རྣམ་པར་བཅད་པའི་ཕྱིར་ཏེ། དེའི་བརྐུས་པས་ཆུང་བར་འགྱུར་རོ། །མི་སྨོས་པས་མིའི་རིགས་བསྡུས་པ་ཡིན་པ་དེའི་ཕྱིར་བུད་མེད་དང་སྐྱེས་པ་དང༌། མ་ནིང་དང་གཟུང་ངོ༌། །དེ་བཞིན་དུ་མི་ཞེས་སྨོས་པ་གཞན་དག་ཏུ་ཡང་ངོ༌། །གང་ལས་མི་གཞན་ཞེས་བྱ་བ་འདི་ཉིད་ཀྱིས་རྟོགས་པ་ཡིན་ཏེ་
གང་གི་ཕྱིར་གང་གི་ཡིན་པ་དེ་ནི་དེའི་ཡིན་པ་དེས་ངེས་པར་བདག་གིར་བྱས་པ་ཡིན་ན། མི་ཡིས་བདག་གིར་བྱས་པ་ཞེས་བྱ་བ་ཅིའི་ཕྱིར་ཞེ་ན། མ་ཡིན་ཏེ་མི་གཞན་གྱི་ནོར་ཡིན་པར་གྱུར་ཀྱང་མིས་བདག་གིར་མ་བྱས་པ་ལ་འགལ་བ་ཅི་ཡོད། གལ་ཏེ་མི་གཞན་གྱི་ནོར་དེ་ཇི་ལྟར་བདག་གིར་མ་བྱས་པ་ཡིན་ཞེ་ན། ཇི་ལྟར་སའམ་གཞན་དག་ཏུ་རྫས་ཏེ་གང་གིས་སྦས་པ་དེ་ཡང་ཅི་ལས་དུས་ལས་འདས་པར་གྱུར་ལ། བདག་གི་ཕ་ལ་སོགས་པས་སྦས་པ་ཡིན་ནོ། །དེའི་བུས་ཤེས་པར་མ་གྱུར་ཀྱང་དེ་ནི་དེ་ཉིད་ཀྱི་ཡིན་ཏེ་དེའི་བུ་ཡིན་པའི་ཕྱིར་ལ་འདི་ནི་བདག་གི་ཡིན་ནོ་ཞེས་དེས་བདག་གིར་བྱས་པ་ནི་མ་ཡིན་ཏེ་མི་ཤེས་པ་ཉིད་ཀྱི་ཕྱིར་རོ། །དེ་རྩ་བ་ཆད་པར་གྱུར་ནས་དེའི་བདག་པོ་རྒྱལ་པོ་ཡིན་དུ་ཟིན་ཀྱང་དེ་བདག་གིར་མ་བྱས་པ་ཡིན་ཏེ་དེ་ལྟ་བུར་གྱུར་བ་འདིས་རྣམ་པར་གཅོད་པར་བྱེད་པ་ཡིན་ནོ། །མང་པོའི་ཚིག་ནི་གཞན་དང་གཞན་དག་གིས་ཀྱང་བདག་གིར་བྱས་པ་ཞེས་བསྟན་པའི་ཕྱིར་རོ། །འདོད་པ་དེ་ཉིད་ཅེས་བྱ་བ་ཅིའི་ཕྱིར་ཞེ་ན། གང་གི་ཕྱིར་གཞན་བརྐུ་བར་བྱའོ་སྙམ་པ་ལས་ཅིག་ཤོས་བརྐུས་པར་གྱུར་ཆུང་བར་འགྱུར་ལ། དེ་ཉིད་བརྐུས་པར་གྱུར་ན་རྩ་བར་འགྱུར་རོ་ཞེས་རབ་ཏུ་བསྟན་པའི་ཕྱིར་རོ། །དཔེར་ན་དཀར་པོ་བརྐུ་བར་བྱའོ་སྙམ་པའམ། །འདི་ཆེ་གེ་མོ་ཞིག་གི་ཡིན་ནོ་ཞེས་མ་བསམས་པར་འཁྲུལ་པའི་དབང་གིས་བརྐུས་པར་གྱུར་ཏམ། སྦྱོར་བ་ཙམ་བྱའོ་སྙམ་དུ་ཤེས་པས་གལ་ཏེ་ལེན་པར་མི་བྱེད་ན་ཆུང་བར་འགྱུར་ལ། དེ་ལྟ་མ་ཡིན་ན་འདོད་པ་དེ་ཉིད་ཅེས་བྱ་བའི་དབང་དུ་བྱས་ནས་འདི་ཉིད་རྩ་བར་འགྱུར་བ་ལྟ་བུའོ། །དེ་ཉིད་ཀྱི་ཕྱིར་སློབ་དཔོན་ཡོན་ཏན་འོད་ཀྱིས་མ་བསམས་པ་མ་ཡིན་པ་ལ་ལྟུང་བར་འགྱུར་རོ་ཞེས་གསུངས་པ་ཡིན་ནོ། །དེ་ལ་དུར་ཁྲོད་པ་དང་མི་དབང་བསོད་སྙོམས་གཞན་ཞེས་བྱ་བས་ནི་དུར་ཁྲོད་པ་ལ་སོགས་པ་རྣམ་པར་བཅད་པ་ཡིན་ནོ། །ཅི་འདི་ནི་ཕྱིས་རྣམ་པར་དཔྱད་པར་བྱའོ། །མི་ཡིར་འདུ་ཤེས་ཞེས་བྱ་བ་ཅིའི་ཕྱིར་ཞེ་ན། གང་གི་ཕྱིར་མི་གཞན་གྱི་ནོར་ཡིན་ལ་མིས་ཀྱང་བདག་གིར་བྱས་པ་ཞེས་བྱ་བ་ལ་སོགས་པའི་ཡན་ལག་ཡོད་པར་གྱུར་ན་འདི་ནི་མིའི་ཡིན་གྱི་དུད་འགྲོ་ལ་སོགས་པའི་ནི་མ་ཡིན་ཏེ། འོན་ཀྱང་འགའ་ཞིག་གིས་བདག་གིར་མ་བྱས་པ་མ་ཡིན་པའི་ཕྱིར་འདུ་ཤེས་
གང་ཡིན་པ་དེ་མེད་ན་མཐར་ནི་མི་འགྱུར་གྱི་འདི་ལྟར་ཉེས་བྱས་སུ་འགྱུར་རོ་ཞེས་བསྟན་པར་བྱ་བའི་ཕྱིར་མི་ཡིར་འདུ་ཤེས་བརྗོད་པ་ཡིན་ནོ། གཞན་གྱི་རྫས་རྐུ་བར་བྱེད་པ་གང་ཡིན་པ་དེ་ལ་རྐུ་སེམས་ཉིད་ཡོད་པ་ཁོ་ན་ཡིན་ན་ཅིའི་ཕྱིར་འདི་སྨོས་ཤེ་ན། འདི་ལ་གདོན་མི་ཟ་བར་རྐུ་སེམས་ཉིད་ཡོད་པ་ཉིད་དུ་འགྱུར་རོ་ཞེས་ངེས་པ་ནི་མེད་དེ། གང་གི་ཕྱིར་འགའ་ཞིག་ཏུ་བདག་ཉིད་ཀྱི་བསམ་པས་འདི་ནི་བདག་གི་ཡིན་ནོ་ཞེས་པའམ། འགའ་ཞིག་ཏུ་དུས་དེ་སྲིད་ཅིག་ལས་ཕྱིར་ཡང་བཟློག་པར་བྱའོ་སྙམ་པའམ། འགའ་ཞིག་ཏུ་བདག་གི་གྲོགས་པ་ཤེས་ཞེས་བྱ་བ་ལ་སོགས་པས་ཡང་བརྟན་པ་མེད་པར་ཡང་རྐུ་སེམས་ཡོད་པའི་ཕྱིར་འདི་སྨོས་པ་ཡིན་ནོ་ཞེས་ཤེས་པར་བྱའོ། །སྦྱོར་བ་གཅིག་པ་ཡི་ཞེས་ཅིའི་ཕྱིར་བརྗོད་དེ་གང་གི་ཕྱིར་སྦྱོར་བ་དུ་མས་མ་སྦྱོར་བ་གཅིག་གིས་ན་ན་གའི་བཞི་ཆ་བརྐུས་པར་གྱུར་ན་དངོས་གཞིར་བྱེད་པ་ཁོ་ན་བརྐུས་པ་ཉིད་ཡིན་ནོ་ཞེ་ན། བདེན་ཏེ་འོན་ཀྱང་སྦྱོར་བ་དུ་མས་རྐུ་བར་བྱེད་ན་སྦྱོར་བ་དུ་མའི་ཉེས་བྱས་སུ་འགྱུར་གྱི་དངོས་གཞི་ནི་མ་ཡིན་ལ་གང་གི་ཚེ་སྦྱོར་བ་གཅིག་གིས་རིན་ཐང་ཚང་བ་བརྐུས་པ་དེའི་ཚེ་འགྱུར་རོ་ཞེས་བསྟན་པར་བྱ་བའི་ཕྱིར་འདི་བརྗོད་པ་ཡིན་ནོ། །བདག་གི་ཕྱིར་ཞེས་པ་ཅིའི་ཕྱིར་ཞེ་ན། གང་གི་ཕྱིར་རྐུ་བར་བྱེད་པ་གང་ཡིན་པ་དེ་ལ་དེས་པ་ཁོ་ནར་རང་གི་དོན་ཡིན་པར་འདི་ལ་ངེས་པ་མེད་དོ། གང་གི་ཕྱིར་གཞན་གྱི་དོན་ནམ་ཆུད་གཟན་པའི་ཕྱིར་རྐུ་བར་བྱེད་པ་སྲིད་པ་ཡིན་པས་དེའི་ཕྱིར་གཞན་གྱི་དོན་དུ་རྐུ་བར་བྱེད་ན་ཉེས་བྱས་སུ་འགྱུར་ལ། ཆུད་གཟན་པ་ཡང་ཕྲོགས་ཏེ། ཆུད་གཟན་པ་ནི་ཆུང་ངུར་འགྱུར་ཞེས་འཆད་པར་འགྱུར་བ་དེ་བས་ན་བདག་གི་ཕྱིར་ཞེས་སྨོས་པ་ཡིན་ནོ། །གནས་དང་དུས་དེའི་རིན་ཐང་དབང་གིས་བསྐྲད། །ཅེས་བྱ་བ་ཅིའི་ཕྱིར་ཞེ་ན། གནས་གཞན་ལ་སོགས་པ་རྣམ་པར་བཅད་པའི་ཕྱིར་ཏེ། གནས་གང་དང་དུས་གང་ལ་བརྐུས་པའི་གནས་དང་དུས་དེའི་རིན་ཐང་གང་ཡིན་པ་དེའི་དབང་གིས་ཉེས་པར་འགྱུར་གྱི། དུས་གཞན་ལ་སོགས་པའི་དབང་གིས་ནི་མ་ཡིན་ནོ། །དེ་ལ་འདིར་རང་གི་གནས་དང་དུས་དེའི་རིན་ཐང་གིས་དངོས་གཞིར་འགྱུར་ལ། ཅི་སྟེ་མ་ཡིན་ན་ཆུང་བར་འགྱུར་རོ་ཞེས་ཁོང་དུ་ཆུད་པར་བྱའོ། །དད་པས་རྒྱལ་བའི་རིང་བསྲེལ་བརྐུས་དེ་མིན། །ཞེས་ཅིའི་ཕྱིར་སྨོས་ཤེ་ན། དད་
པ་མ་ཡིན་པར་འཚོ་བའི་དོན་དུ་བཅོམ་ལྡན་འདས་ཀྱི་རིང་བསྲེལ་བརྐུས་ན་དངོས་གཞིར་འགྱུར་རོ་ཞེས་བསྟན་པར་བྱ་བའི་ཕྱིར་རོ། །དེ་ལ་བརྐུ་བ་ལ་ནི་ཞེས་བྱ་བ་ལ་སོགས་པས་ཡན་ལག་མ་ལུས་པས་ནི་དངོས་གཞིར་འགྱུར་ཞིང༌། ཡན་ལག་མ་ཚང་བས་ན་ཉེས་པར་འགྱུར་བ་དང་མི་འགྱུར་བ་སྟོན་པར་བྱེད། དེ་ལ་རྐུ་སེམས་ཀྱི་དངོས་པོ་ནི་རྐུ་སེམས་ཉིད་དེའི་རྒྱུའི་གཙོ་བོ་ཡིན་ནོ། །གང་ལ་ཞེ་ན་སྨྲས་པ། གཞན་གྱི་རྫས་རྐུ་ཞིང་འཕྲོག་པ་ལ་ཞེས་བྱ་བ་ལྷག་མའོ། །གང་གི་ཕྱིར་དེ་ལྟར་གྱུར་པ་དེའི་ཕྱིར་གཅིག་པོ་དེ་ཉིད་དང་བྲལ་བ་སྟེ། མེད་ན་དངོས་གཞིའམ་སྦྱོར་བའི་ཉེས་པ་ཉིད་དུ་མི་འགྱུར་རོ། །ཁོ་ནའི་སྒྲ་ནི་གཞན་དུ་མ་ཡིན་ནོ་ཞེས་གཞན་རྣམ་པར་བཅད་པའི་དོན་ཏོ། །འདི་སྐད་དུ་ཡན་ལག་ལྷག་མ་ཐམས་ཅད་ཡོད་ཀྱང་གཅིག་པོ་འདི་ཉིད་མེད་ན་ཉེས་པ་མེད་དོ་ཞེས་བསྟན་པར་འགྱུར་རོ། །གལ་ཏེ་སྦྱོར་བའི་གནས་སྐབས་སྐབས་ན་རང་གི་བསམ་པ་ལ་སོགས་པས་འཇུག་པའི་ཕྱིར་རྐུ་སེམས་མེད་ན་དངོས་གཞིའི་གནས་སྐབས་སུ་ནི་རང་གི་བསམ་པ་ལ་སོགས་པ་ལྡོག་པ་དེ་བས་ན་དངོས་གཞིར་འགྱུར་ལ་བཟློག་པས་ནི་སྦྱོར་བའི་ཉེས་པར་འགྱུར་གྱི་དེ་དངོས་གཞི་ནི་མ་ཡིན་ནོ་ཞེས་རིག་པར་བྱའོ། །རྐུ་སེམས་ལས་གཞན་པ་ལྷག་མ་དེ་དག་ནི་ཡན་ལག་ལྷག་མ་སྟེ་ལྷག་མ་ཡང་དེ་ཡིན་ལ་ཡན་ལག་ཀྱང་ཡིན་པས་ཞེས་བྱ་བ་ནི་ཁྱད་པར་གྱི་བསྡུ་བའོ། །དེ་དག་དང་མི་ལྡན་པ་དང་མེད་པ་དང་མི་སྣང་བ་ཞེས་བྱ་བ་དོན་གཅིག་པ་ཡིན་པ་དེའི་ཡན་ལག་ལྷག་མ་དང་མི་ལྡན་པ་ནི་མེད་པ་ཉིད་ཡིན་ཏེ་ཉེས་བྱས་ཆུང་ངུར་འགྱུར་རོ་ཞེས་བྱ་བ་ནི་ལྷག་མའོ། །འདི་སྐད་དུ་ཡན་ལག་ལྷག་མ་དག་ལས་གཞན་འགའ་ཞིག་ནི་མེད་ཀྱང་རྐུས་མས་ཡོད་ནི་ན་ཆུང་བར་འགྱུར་རོ་ཞེས་བསྟན་པར་འགྱུར་རོ། །ནིའི་སྒྲ་ནི་གོང་མ་ལས་ཁྱད་པར་དུ་བྱེད་པའི་དོན་ཏོ། །རྐུ་སེམས་དང་བྲལ་བ་འབའ་ཞིག་གིས་ཉེས་པ་མེད་པ་མ་ཡིན་གྱི། འོན་ཀྱང་གཞན་དག་ལ་ཡང་འགྱུར་ཏེ་གང་གི་ཕྱིར་རང་བཞིན་དུ་གནས་པ་རྨི་ལམ་མ་ཡིན་པ་བསླབ་པ་དང་བཅས་པ་ཞེས་བྱ་བ་དེ་དག་རྗེས་སུ་འཇུག་པའི་ཕྱིར་རྨི་ལམ་ལ་སོགས་ཞེས་སྨོས་པ་ཡིན་ཏེ། རྨི་ལམ་དང་པོར་བྱས་པ་གང་ཡིན་པ་དེ་ནི་རྨི་ལམ་ལ་སོགས་པ་སྟེ། སོགས་པའི་སྒྲས་བཤད་མ་ཐག་པ་སྡུད་པར་བྱེད་དོ། །དེ་ལ་རྨི་ལམ་ལ་
སོགས་པ་ལ་ཉེས་པ་ཉིད་ཡོད་པ་མ་ཡིན་ཏེ། ཉེས་བྱས་སུ་མི་འགྱུར་རོ་ཞེས་བྱ་བའི་བར་དུའོ། །འདིར་ཇི་ལྟར་རྐུ་སེམས་མེད་ན་ཡན་ལག་ལྷག་མ་ཐམས་ཅད་ཡོད་ཀྱང་ཉེས་པར་མི་འགྱུར་བ་དེ་ལྟར་རྨི་ལམ་ལ་སོགས་པ་འདི་ལ་ཡང་གང་ཡང་རུང་བ་རེ་རེ་མེད་ན་གཞན་ཡོད་ཀྱང་ཉེས་པར་མི་འགྱུར་རོ་ཞེས་ཁོང་དུ་ཆུད་པར་བྱའོ། །ནིའི་སྒྲ་ནི་རྨི་ལམ་ལ་སོགས་པ་ནམ་ཡང་ཉེས་པ་ཡོད་པ་མ་ཡིན་པ་ཞེས་ངེས་པར་གཟུང་བའོ། །ད་ནི་དང་པོ་སེམས་བསྐྱེད་པ་ལ་བསྡམ་པར་བྱ་ཞེས་བྱ་བ་ལ་སོགས་པས། བསླབ་པའི་གཞི་ཐམས་ཅད་ཀྱི་གནས་སྐབས་གང་ལ་ཁ་ན་མ་ཐོ་བ་ཅིར་འགྱུར་བ་དེ་བརྗོད་པར་བྱ་སྟེ། དང་པོ་ཞེས་བྱ་བ་ནི་འདས་པ་ཐམས་ཅད་ཀྱི་སྦྱོར་བ་ཐམས་ཅད་ལ་རབ་ཏུ་འཇུག་པའི་སེམས་གང་ཡིན་པ་དེ་སྐྱེད་པ་སྟེ་འདི་དང་འདི་བྱའོ་ཞེས་ངེས་པའི་མཚན་ཉིད་ཅན་གྱི་ཡིད་ཀྱི་རྣམ་པར་རྟོག་པ་སྐྱེ་བ་ཡིན་ནོ། །དེ་ལ་དེ་ལྟ་བུར་གྱུར་པའི་སེམས་བསྐྱེད་པ་ནི་ཡིད་ཁོ་ནས་བསྡམ་པར་བྱ་ཞིང་ཕྱིར་གསོ་བར་རིགས་པའི་ཕྱིར་བསྡམ་པར་བྱ་བ་སྟེ་ཡིད་ཀྱི་ཁ་ན་མ་ཐོ་བར་འགྱུར་རོ། །གང་ཞིག་རྐུ་བ་ལ་སོགས་པའི་དོན་གྱི་སྦྱོར་བ་བརྐུ་བར་བྱ་བའི་རྫས་འདྲེན་པར་བྱེད་པ་ལ་སོགས་པའི་ཕྱིར་སྔར་ལྡང་བ་དང་འགྲོ་བ་ལ་སོགས་པའི་མཚན་ཉིད་བྱ་བ་ནི་སྦྱོར་བ་ཡིན་པ་དེའི་ཕྱིར་སྦྱོར་བ་ལ་ནི་ཉེས་བྱས་ཁོ་ན་སྟེ་བཤགས་པར་བྱ་བ་ཉིད་དུ་ཤེས་ཤིང་ཁོང་དུ་ཆུད་པར་བྱའོ། །ཉིད་ནི་གཞན་དུ་མ་ཡིན་ནོ་ཞེས་ངེས་པར་གཟུང་བའི་དོན་ཏོ། །སྦྱོར་བའི་དུས་ཕྱིས་ཞེས་བྱ་བ་ནི་རྗེས་སུ་སྦྱོར་བ་སྟེ། སྦྱོར་བའི་སྦྱོར་བ་ཡིན་ལ་དེ་ལ་ཡང་ཉེས་བྱས་ཉིད་དུ་འགྱུར་གྱི་སྦྱོར་བ་འབའ་ཞིག་ལ་ནི་མ་ཡིན་ནོ། །ཡང་གི་སྒྲ་ནི་གང་ཞིག་རྐུ་བའི་དོན་གྱི་སྦྱོར་བ་བརྐུ་བར་བྱ་བའི་རྫས་འདྲེན་པ་ལ་སོགས་པའི་རང་བཞིན་དེ་ལ་ཡང་ཉེས་བྱས་སུ་འགྱུར་རོ་ཞེས་བྱ་བའི་དོན་ཏོ། །དང་གི་སྒྲ་ནི་བཤད་ཟིན་པའི་སྒྲ་སྡུད་པ་ཡིན་ལ་ཉིད་ནི་སྔ་མ་དང་འདྲའོ། །འདིར་ཞེས་བྱ་བ་ནི་སྲོག་གཅོད་པ་ལ་སོགས་པ་ཀུན་ལའོ། །རྩ་བ་ཉིད་ནི་སྲོག་གཅོད་པ་རྗེས་སུ་སྒྲུབ་པར་བྱད་པ་ཡིན་ལ། གཞན་ཡང་བརྐུ་བར་བྱ་བའི་རྫས་གནས་ནས་སྐྲོད་པར་བྱེད་པའི་མཚན་ཉིད་ཀྱི་རྩ་བར་གྱུར་པའི་ཕྱིར་རྩ་བ་ཉིད་ཀྱི་ཉེས་པར་འགྱུར་ཏེ། དང་པོའི་བཞི་པོ་སྡོམ་པ་འཇིག་པར་བྱེད་པ་དང༌། གཞན་བཤགས་པར་བྱ་བའི་དངོས་གཞི་ཉིད་དུ་འགྱུར་
རོ་ཞེས་བྱ་བའི་དོན་ཏོ། །དཔེར་ན་འགའ་ཞིག་གིས་སྤྱོད་ལམ་བཞི་པོ་དག་ལས་གང་ཡང་རུང་བས་འདུག་སྟེ། རྐུ་བའི་ཕྱིར་རྣམ་པར་རྟོག་པར་བྱེད་པ་དེ་ལས་ཡིད་ཀྱིར་འགྱུར་ལ། དེའི་འོག་ཏུ་འཇུག་པར་བྱེད་ཅིང་ཇི་སྲིད་ནོམ་པར་མི་བྱེད་ཉུག་པར་མི་བྱེད་ཀྱི་བར་དུ་ཉེས་བྱས་སུ་འགྱུར་རོ། །དེའི་འོག་ཏུ་ཡང་གནས་ནས་གནས་སུ་སྦེད་པར་བྱེད་པ་དེ་ལ་ཡང་ཉེས་བྱས་སུ་འགྱུར་ལ། གནས་ནས་བསྐྱེད་པ་ན་རྩ་བར་འགྱུར་ཏེ། དེ་བཞིན་དུ་གཞན་དག་ལ་ཡང་བལྟ་བར་བྱའོ། །ཇི་ལྟར་ཡང༌། ཡན་ལག་ལྷག་མ་མི་ལྡན་ཆུང་བར་འགྱུར། །ཞེས་སྤྱིར་ཉེས་པ་ཆུང་ངུར་འགྱུར་བ་བསྟན་པ་དེ་ལྟར་ཡང་ཕྲོགས་ཏེ་པར་མི་བྱེད་ཀྱི་བར་མ་ཚང་བའི་སྤྲོས་པ་སྟོན་པར་བྱེད་དེ། འདི་ཡིར་མ་གྱུར་ཅིག་བདག་གིར་ཡང་མ་གྱུར་ཅིག་སྙམ་པའི་བློ་ནི་ཆུད་གཟོན་པ་སྟེ་ཕྲོགས་ཏེ་ཆུད་གཟོན་པ་ནི་ཆུང་བ་ཉིད་དུ་འགྱུར་ཏེ། བཤགས་པར་བྱ་བ་ཁོ་ནའི་ཉེས་པར་འགྱུར་རོ། །ཉིད་ནི་གཞན་དུ་མ་ཡིན་ནོ་ཞེས་ངེས་པར་བཟུང་བའི་དོན་ཏོ། །རྒྱ་ནི་གང་གིས་ཆུ་ལས་ཉ་འདོན་པར་བྱེད་པ་སྟེ། དེ་ལ་སོགས་པ་དེ་ལྟ་བུའི་རིགས་ཅན་གང་ཡིན་པ་དེ་ནི་རྒྱ་ལ་སོགས་པའོ། །འཁྲུལ་འཁོར་ནི་རི་དག་ས་ལ་སོགས་པ་གསད་པའི་ཕྱིར་ཤིང་གི་སྦྱོར་བདག་ཡིན་ནོ། །འཁྲུལ་འཁོར་རྒྱ་ལ་སོགས་པ་དང་བཅས་པར་འཇུག་པའི་ཕྱིར་འཁྲུལ་འཁོར་བཅས་པའི་རྒྱ་ལ་སོགས་པ་སྟེ། དེ་ཆུད་གཟན་པ་ནི་ཉེས་བྱས་ཆུང་བ་ཉིད་དུ་འགྱུར་རོ། །དང་ནི་སྡུད་པར་བྱེད་པའི་དོན་ཡིན་ནོ། །འདི་ལ་ཆུད་གཟན་པའི་བསམ་པ་ཉིད་ཡོད་པའི་ཕྱིར་རྐུ་སེམས་ཀྱང་མེད་ལ་བདག་གི་ཕྱིར་ཡང་མ་ཡིན་ནོ། །མི་དབང་བསོད་སྙོམས་ཡོངས་སུ་བླངས་གྱུར་ན། །ཞེས་བྱ་བ་ནི་ཡོངས་སུ་བླངས་པ་ཞེས་བྱ་བ་ནི་འཕྲོག་པར་བྱེད་པ་སྟེ། དེ་ལ་ཡང་ཉེས་བྱས་ཁོ་ནར་འགྱུར་རོ། །ཉིད་ནི་ངེས་པར་གཟུང་བའི་ཕྱིར་རོ། །ཀྱང་གི་སྒྲ་ནི་གཡོས་སུ་བྱས་པའི་ཟས་རིན་ཐང་ཚང་དུ་ཟིན་ཀྱང་ཆུང་བ་ཁོ་ན་ཡིན་ནོ་ཞེས་ཁྱད་པར་དུ་བྱ་བའི་དོན་ཏེ། རྒྱུ་གང་གིས་ཤེ་ན། འཇིག་རྟེན་ཐ་སྙད་ཚུལ་གྱིས་ཞེས་བྱ་བ་སྨོས་པ་ཡིན་ཏེ། འཇིག་རྟེན་པའི་ཐ་སྙད་ཀྱི་ཚུལ་ནི་འཇིག་རྟེན་ཐ་སྙད་ཚུལ་ཡིན་པ་དེ་བས་ན་དེས་སོ། །གང་གི་ཕྱིར་གཡོས་སུ་བྱས་པའི་ཟས་ལ་ན་ན་ཀ་
ཇི་ལྟ་བ་དེ་བཞིན་དུ་འཇིག་རྟེན་པ་ལ་འཛིན་པ་མེད་པ་དེའི་ཕྱིར་མཆོག་གམ་ཁྱད་པར་ཅན་མ་ཡིན་པས་འཇིག་རྟེན་པ་འདི་ལ་རྐུ་བའི་བློ་སྐྱེ་བར་མི་འགྱུར་རོ། །དེ་བས་ན་མིས་བདག་གིར་བྱེས་པ་དང་རིན་ཐང་ཚང་བ་མེད་པའི་ཕྱིར་མི་ཡིས་བདག་གིར་བྱས་པ་ཞེས་བྱ་བ་འདི་ལ་མེད་པས་ཉེས་པ་ཆུང་བར་འགྱུར་རོ། །མི་དབང་ཞེས་བྱ་བའི་དོན་ནི་སྔར་བཤད་པ་ཡིན་ཏེ། དེ་བས་ན་དོན་འདི་ནི་དབང་བ་མ་ཡིན་པའི་བསོད་སྙོམས་ཏེ་འཇིག་རྟེན་པའི་བརྙས་པའི་ཡུལ་ཡིན་པའི་ཕྱིར་སྙིང་བརྩེ་བའི་བློ་ནི་མི་སྐྱེ་བ་དེ་བས་ན་ཉེས་པ་ཆུང་བར་འགྱུར་རོ་ཞེས་བྱ་བའི་དོན་ཏོ། །གང་གི་ཚེ་འགའ་ཞིག་གིས་དུས་དེ་སྲིད་ཅིག་གོས་ལ་སོགས་པ་བྱིན་པ་ལྟོས་པ་མེད་པར་ལོངས་སྤྱད་ན་ཅིར་འགྱུར་བ་བསྟན་པར་བྱ་བའི་ཕྱིར། གཞན་གོས་གཏན་དུ་བྱིན་ལྟར་སྤྱོད་པ་དང་ཞེས་བྱ་བ་སྨོས་པ་ཡིན་ཏེ། གོས་དག་གཏན་དུ་བྱིན་པའི་ཚུལ་གང་ཡིན་པ་སྟེ་དེ་ལྟ་བུ་དེས་སོ། །གཞན་དག་གོས་ཡོངས་སུ་ལོངས་སྤྱོད་པ་ནི་དེ་ལ་ཞེན་པ་ཡིན་ཏེ། གཞན་དག་གི་གོས་ལོངས་སྤྱད་ན་ཉེས་བྱས་སུ་འགྱུར་རོ། །དང་ནི་རིམ་པ་གཞན་སྡུད་པར་བྱེད་པ་ཡིན་ཏེ། འདི་སྐད་དུ་དུས་དེ་སྲིད་ཅིག་རྙེད་པ་ལ་རྣམ་པ་ཐམས་ཅད་དུ་རྙེད་པ་ཡོངས་སུ་ལོངས་སྤྱད་པ་ལྟར་འགྱོད་པ་མེད་ཅིང་ལྟོས་པ་མེད་པར་སྤྱོད་པར་བྱེད་ན་ཉེས་བྱས་སུ་འགྱུར་རོ་ཞེས་བསྟན་པར་འགྱུར་རོ། །མི་རིགས་པར་སྤྱོད་པས་སྙིང་པོ་ལེན་པར་བྱེད་པ་ཡིན་གྱི། ཅི་ཞིག་ཀྱང་བརྐུས་པ་ནི་མེད་པའི་ཕྱིར་རྐུ་སེམས་དང་རྐུ་བའི་ཡན་ལག་གཞན་དག་ཀྱང་མེད་ལ་བསམ་པ་ནི་ངན་པར་གྱུར་བ་ཡིན་ནོ། །སྨན་དང་སྔགས་ནི་སྨན་དང་སྔགས་ཏེ་དེ་དག་གིས་ཀྱང་གོས་ལ་སོགས་པ་སྦྱིན་དུ་འཇུག་ན་ཉེས་བྱས་སུ་འགྱུར་རོ། །ཀྱང་གི་སྒྲ་ནི་སྡུད་པར་བྱེད་པ་ཡིན་ཏེ། དཔེར་ན་སྔགས་ཀྱི་སྦྱོར་བ་དང་གཞན་མ་གུ་བར་བྱ་བའི་ཐབས་སུ་གྱུར་པ་མེ་ཏོག་ལ་སོགས་པ་བྱིན་པས་སྦྱིན་དུ་འཇུག་ན་ཉེས་བྱས་སུ་འགྱུར་བ་ལྟ་བུའོ། །སྦྱིན་པ་པོ་དེ་ལ་བདག་ཉིད་འདོད་པས་སྦྱིན་པ་ལ་འཇུག་པ་ནི་མེད་ཀྱི། འོན་ཀྱང་འདི་ལྟར་སྔགས་ལ་སོགས་པའི་དབང་ངམ་སྟོབས་ཀྱི་རྣམ་པས་འཇུག་པ་ཡིན་པའི་ཕྱིར་རྐུ་སེམས་ཉིད་ནི་མེད་དེ། འདི་ལྟར་ལོག་པའི་འཚོ་བ་ནི་ཡིན་པ་དེའི་ཕྱིར་མ་བྱིན་པར་ལེན་པར་གཏོགས་པའི་ཉེས་པར་མི་འགྱུར་རོ། །འདོད་པ་ནི་མངོན་པར་
བསམས་པ་སྟེ་དེ་རྐུ་བ་ནི་འདོད་པ་རྐུ་བའོ། །དེའི་ཕྱིར་མང་པོའི་ནང་དུ་རྣམ་པར་འབྱེད་པར་བྱེད་ཅིང་ཐ་དད་པར་བྱེད་ན་ཉེས་བྱས་སུ་འགྱུར་རོ། །འདོད་པ་བརྐུ་བར་བྱའོ་སྙམ་པས་མང་པོའི་ནང་ནས་རྣམ་པར་འབྱེད་པར་བྱེད་ཀྱི། གནས་ནས་སྐྱོད་པར་མི་བྱེད་ན་ཡང་ཉེས་བྱས་ཡིན་གྱི། དངས་གཞིར་ནི་མི་འགྱུར་ཏེ། གང་གི་ཚེ་འདོད་པ་གནས་ལས་སྐྱོད་པར་བྱེད་པ་དེའི་ཚེ་དངོས་གཞིར་འགྱུར་བར་རིག་པར་བྱའོ། །གཞན་གྱི་དོན་ནི་གཞན་དོན་ཏེ་དེའི་དོན་དུའོ། །དོན་གྱི་སྒྲ་ནི་དགོས་པའི་ཚིག་ཡིན་ནོ། །ལེན་ཅིང་བླངས་ལ་འགྱེད་པ་སྟེ་རྣམ་པར་འགོད་ན་ཉེས་བྱས་སུ་འགྱུར་རོ། །དང་ནི་སྡུད་པར་བྱེད་པ་ཡིན་ནོ། །དཔེར་ན་གཞན་གྱིས་ཁྱེད་ཅག་གིས་འདི་དང་ཆེ་གེ་མོ་ལ་མཆོད་སྟོན་ལ་སོགས་པ་འདི་དང་འདི་གྱིས་ཤིག་ཅེས་གཞན་གྱི་ལག་ཏུ་བྱིན་པ་དང་དེ་དག་གིས་དེ་ཡང་བླངས་ནས་འགོད་པར་བྱེད་ན་ཉེས་བྱས་སུ་འགྱུར་རོ་ཞེས་བྱ་བའི་དོན་ཏོ། །འདི་ཇི་ལྟར་ན་ཉེས་བྱས་སུ་འགྱུར་ཏེ། གང་གི་ཕྱིར་མི་གཞན་གྱི་ནོར་ཡང་ཡིན་ལ་རྐུ་སེམས་ཀྱང་ཡོད་པའི་ཕྱིར་དངོས་གཞིར་འགྱུར་རོ་ཞེ་ན། སྨྲས་པ། མི་ཡིས་བདག་གིར་བྱས་པ་ཞེས་བྱ་བའི་བདག་གིར་བྱས་པ་ཉིད་འདི་ལ་མེད་དོ། །གང་གི་ཕྱིར་ཆེ་གེ་མོ་ལ་མཆོད་སྟོན་ལ་སོགས་པ་གྱིས་ཤིག་ཅེས་དེ་གང་ལ་བསྟབས་པ་དེས་བདག་ལ་མཆོད་སྟོན་གྱི་ཕྱིར་བྱིན་པ་ཡིན་ནོ་ཞེས་འདི་མི་ཤེས་ལ། གང་གིས་བྱིན་པ་དེས་ཀྱང་ཡོངས་སུ་སྤངས་པ་དེའི་ཕྱིར་འགས་ཀྱང་བདག་གིར་མ་བྱས་པ་ཡིན་ནོ། དེ་ལྟར་ན་ཡང་དངོས་སུ་བདག་པོ་དང་བཅས་པ་ཁོ་ན་ཡིན་ཡང་བདག་པོས་མི་ཤེས་པའི་སྒོ་ནས་བདག་པོ་དང་བཅས་པ་མ་ཡིན་པའི་ཕྱིར་ཉེས་བྱས་སུ་འགྱུར་བར་རིག་པར་བྱའོ། །འགེད་པ་སྨོས་པ་ནི་མང་པོའི་དབང་དུ་བྱས་པ་ཡིན་པ་དེའི་ཕྱིར་གཅིག་གིས་བླངས་སུ་ཟིན་ཀྱང་ཉེས་བྱས་སུ་འགྱུར་རོ། །ཕྱོགས་བཞི་གང་ལ་ཡོད་པ་དེ་ནི་ཕྱོགས་བཞི་པའོ། །དེ་དག་གི་ཚོགས་ནི་ཕྱོགས་བཞི་པའི་ཚོགས་ཏེ། ཕྱོགས་བཞི་པའི་ཚོགས་དེའི་འཕགས་པའི་ཚོགས་ནི་འཕགས་པའི་དགེ་འདུན་གྱི་དཀོར་རོ། །ཕྱོགས་བཞིའི་དོན་དུ་བརྐུས་ན་ཆུང་བ་སྟེ། ཉེས་བྱས་ཆུང་ངུར་འགྱུར་རོ་ཞེས་བྱ་བའི་དོན་ཏོ། །དཔེར་ན་གཞན་ཕྱོགས་བཞི་པའི་དགེ་འདུན་གྱི་ཚོགས་ཀྱི་དཀོར་གཞན་ཕྱོགས་བཞི་པའི་དོན་དུ་གནས་གཞན་
དུ་སྐྱོད་པར་བྱེད་ན་བཤགས་པར་བྱ་བའི་ཉེས་བྱས་སུ་འགྱུར་བ་ལྟ་བུའོ། །འདིར་གནས་གཞན་དུ་སྐྱོད་པ་ཙམ་ཡིན་གྱི་བདག་པོའི་དབྱེ་བ་ནི་མ་ཡིན་པ་དེའི་ཕྱིར་བསམ་པའི་ཉེས་པའི་དབང་གིས་ཉེས་བྱས་སུ་རྣམ་པར་གཞག་པ་ཡིན་ནོ། །ནོར་གཅིག་པའི་སྤུན་འདྲ་བའི་དགེ་འདུན་ལ་ཞེས་བྱ་བའི་དབང་དུ་བྱས་ན་གནས་གང་དུ་བདག་པོ་ཐ་དད་པར་གྱུར་པ་དེ་དག་ཏུ་ནི་ཅིག་ཤོས་ལས་གཞན་དུ་སྐྱོད་པར་བྱེད་ན། རྐུ་བ་པོ་ཡང་དེར་འདུས་པའི་ཕྱིར་དངོས་གཞི་ཁོ་ནར་འགྱུར་རོ། །འོན་ཏེ་མ་ཡིན་ན་ཆུང་བ་ཡང་ཡིན་ཏེ་བདག་གི་ཕྱིར་ཞེས་བྱ་བའི་ཡན་ལག་མེད་པའི་ཕྱིར་རོ། །གང༌། དུར་ཁྲོད་པ་དང་མི་དབང་བསོད་སྙོམས་གཞན། །ཞེས་བྱ་བ་དེ་སྔར་ཕྱིས་རྣམ་པར་དཔྱད་པར་བྱའོ་ཞེས་བསྟན་པ་དེ་ལས་མི་དབང་བསོད་སྙོམས་ཞེས་བྱ་བ་ལ་སོགས་པས་གཅིག་གི་རྣམ་པར་དཔྱད་ཟིན་ལ་དུར་ཁྲོད་གནས་ཀྱི་ཞེས་བྱ་བ་ལ་སོགས་པས་གཉིས་པ་རྣམ་པར་དཔྱད་པར་བྱ་སྟེ། དེ་ལ་དུར་ཁྲོད་ནི་ཀུན་ནས་སྲེག་པར་བྱེད་པ་ཡིན་ཏེ། དེའི་གནས་ཡིན་པ་དེའི་ཕྱིར་དུར་ཁྲོད་གནས་ཀྱིའོ། །ཁྱད་པར་ཇི་ལྟ་བུ་ཞེ་ན། མིའི་ཡོངས་སུ་འཛིན་པ་དང་བཅས་པར་འཇུག་པའི་ཕྱིར་འཛིན་བཅས་ཏེ། འཛིན་པ་དང་བཅས་པ་དེ་ལས་སོ། །གོས་ལ་སོགས་པ་གང་ཡིན་པ་དེ་ནི་གོས་ལ་སོགས་པའོ། །དེ་བརྐུས་པར་གྱུར་ན་ཇི་ལྟར་གོང་དུ་ཆུང་བར་འགྱུར་བ་དེ་བཞིན་དུ་འདིར་ཡང་ཆུང་བར་འགྱུར་རོ་ཞེས་བྱ་བའི་ཐ་ཚིག་གོ །ད་ནི་འདི་རྣམ་པར་དཔྱད་པར་བྱ་སྟེ། དེ་ལ་གལ་ཏེ་དུར་ཁྲོད་པའི་དངོས་པོ་མི་ཡིས་བདག་གིར་བྱས་ཤིང་རིན་ཐང་ཚང་བར་གྱུར་ལ། ཡན་ལག་གཞན་དག་ཀྱང་ཡོད་ན་ཉེས་པ་ཡོངས་སུ་རྫོགས་པ་ཁོ་ནའོ། །འོན་ཀྱང་མེད་ན་འདི་འབའ་ཞིག་ཏུ་མ་ཟད་ཀྱི་གཞན་དག་ལ་ཡང་ཆུང་བ་ཁོ་ནར་འགྱུར་རོ། །དུར་ཁྲོད་གནས་ཀྱི་ཡོངས་སུ་འཛིན་བཅས་ལས། །ཞེས་བྱ་བའི་ཁྱད་པར་ཅིའི་ཕྱིར་ཞེ་ན། སྨྲས་པ། དུར་ཁྲོད་ཀྱི་གནས་ནི་རྣམ་པ་གཉིས་ཏེ། འཛིན་པ་དང་བཅས་པ་དང་འཛིན་པ་མེད་པའོ། །དེ་ལ་འཛིན་པ་དང་བཅས་པ་ཡང་རྣམ་པ་གཉིས་ཏེ། ལུས་ཀྱིས་ལས་སུ་བྱས་པ་དང་ཉོས་པའོ། །དེ་ལ་ལུས་ཀྱིས་ལས་སུ་བྱས་པ་ན་འདིར་གང་འབྱུང་བ་དེ་བདག་གི་ཡིན་ཏེ། བདག་གི་ལུས་ཀྱིས་ཁྱེད་ཀྱི་ལས་བསྒྲུབ་པར་བགྱིའོ་ཞེས་རྒྱལ་པོའི་ཐད་ལས་བདག་གིར་
བྱས་པར་གྱུར་པའོ། །ཉོས་པ་ཡང་འདིར་རབ་ཏུ་གྲགས་པ་ཁོ་ན་ཡིན་ཏེ། འདིར་ནོར་ཁས་བླངས་པ་ཇི་ལྟར་བསྒྲུབས་པ་ལ་སོགས་པའི་འཇིགས་པས་འབད་རྩོལ་གྱིས་སྲིང་བར་བྱེད་པ་དེའི་ཕྱིར་ཡང་འདི་ལ་བདག་གིར་བྱས་པ་ཤིན་ཏུ་ཆེ་བ་ལྟར་སྔ་མ་ལ་ནི་མ་ཡིན་ཏེ། གང་གི་ཕྱིར་ལུས་ཀྱིས་ལས་སུ་བྱས་པ་དེ་ལ་ནི་ལུས་ཀྱི་གཡོ་འགུལ་ཙམ་ལས་ཅུང་ཞིག་ཀྱང་སྦྱིན་པར་མི་བྱེད་པ་དེའི་ཕྱིར་བདག་གིར་བྱས་པའི་ཤ་ཤིན་ཏུ་ཆུང་པ་ཡིན་པ་དེ་བས་དེའི་དབང་དུ་བྱས་ནས་འཛིན་བཅས་ཞེས་སྨོས་པ་ཡིན་ནོ། །ཅིག་ཤོས་ལས་ནི་མཚན་ཉིད་ཇི་ལྟ་བ་དང་བསམ་པ་ཇི་ལྟ་བ་བཞིན་དུ་ཉེས་པར་འགྱུར་བར་རིག་པར་བྱའོ། །དེ་ལྟར་ན་རྐུ་སེམས་ཞེས་བྱ་བ་ལ་སོགས་པས་རྐུ་བར་བྱེད་ན་དངོས་གཞི་ཡན་ལག་ཚང་བ་དང་མ་ཚང་བ་ལས་དངོས་གཞིའི་ཉེས་པ་དང་ཉེས་པ་ཆུང་ངུར་འགྱུར་བར་བཤད་པ་ཡིན་ནོ། །ད་ནི་གང་གིས་གནས་སྐབས་གང་དང་གང་ལ་རྐུ་བ་དེ་བརྗོད་པར་བྱ་བ་དེ་ཉིད་ཀྱི་ཕྱིར། །ད་ནི་རྐུ་བའི་དབྱེ་བ་བརྗོད་པར་བྱ། །ཞེས་སྨོས་པ་ཡིན་ཏེ་ད་ནི་ཞེས་བྱ་བ་ནི་ད་ལྟར་རོ། །རྐུ་བར་བྱེད་པ་ནི་རྐུ་བ་སྟེ་དེའི་དབྱེ་བ་འཆད་པར་འགྱུར་བའི་རྣམ་པས་བརྗོད་པར་བྱ་བ་ནི་ཇི་སྟེ་འདུས་པར་བརྩད་པས་ཞེས་བྱ་བ་ལ་སོགས་པས་བསྟན་པར་བྱའོ། །ས་ནི་ས་ཡིན་ཏེ་ཞིང་ལ་སོགས་པ་དེའི་སའོ། །ཚིག་རྣམ་པ་དུ་མ་རྣམ་པ་སྣ་ཚོགས་པ་ནི་བརྩད་པ་ཡིན་ཏེ། དེས་རྐུ་བ་ནི་རྐུ་བར་བྱེད་པའོ། །དེ་ལ་བརྐུས་པར་གྱུར་པ་ཇི་ཙམ་ན་བརྐུས་པར་འགྱུར་ཞེ་ན། གང་གི་ཚེ་ཁྱིམ་པས་སྦྱོར་བཏང་ཞེས་སྨོས་པ་ཡིན་ཏེ། བཏང་བ་ནི་ཡོངས་སུ་སྤངས་ཤིད་གང་གིས་ས་ལ་བརྟེན་པའི་ཐ་སྙད་ཀྱི་སྦྱོར་བ་དེ་བཏང་སྟེ། སའི་བདག་པོ་ཁྱིམ་པ་དེས་གང་གི་ཚེ་སྦྱོར་བ་བཏང་བར་གྱུར་པ་དེའི་ཚེ་བརྐུས་པར་འགྱུར་པ་ཡིན་ནོ་ཞེས་བྱ་བའི་བར་དུའོ། །ཁྱིམ་པ་སྨོས་པ་ནི་ཉེ་བར་མཚོན་པ་ཡིན་ཏེ། གཞན་དག་ལ་ཡང་ས་ལ་བརྟེན་པའི་ཐ་སྙད་དུ་བྱ་བ་ཡོད་པའི་ཕྱིར་རོ། །དེ་གང་དུ་ཞེ་ན། ཅི་སྟེ་འདུས་པར་ཞེས་བྱ་བ་སྨོས་ཏེ། ཅི་སྟེ་བྲམ་ཟེ་ལ་སོགས་པའི་འདུས་པར་དེ་རྩོད་པར་གྱུར་པ་དེའི་ཚེ་འདི་བརྐུས་པ་ཡིན་ནོ། །གཞན་དག་ཏུ་ཇི་ལྟར་འགྱུར་ཞེ་ན། གལ་ཏེ་བླར་ནི་རྒྱལ་བ་ཉིད་ན་བརྐུས། །ཞེས་སྨོས་ཏེ། བླ་ནི་རྒྱལ་པོ་ཡིན་ཏེ་གལ་ཏེ་རྩོད་པ་སྨྲ་བ་དེས་རྒྱལ་བར་གྱུར་པ་དེའི་ཚེ་དེ་རྒྱལ་བ་ཉིད་ན་
བརྐུས་པར་འགྱུར་རོ། །ཉིད་ནི་སྦྱོར་བ་མ་ཡིན་ནོ་ཞེས་ངེས་པར་གཟུང་བའི་དོན་ཏོ། །གང་གི་ཕྱིར་དེར་གཏན་ལ་ཕབ་པར་ཡང་ཐ་སྙད་ཀྱི་སྒོ་ནས་རྣམ་པ་གཞན་དུ་བྱེད་པར་མི་ནུས་པ་ཡིན་ཏེ། གང་ལས་བཅོམ་ལྡན་འདས་ཀྱིས་དགེ་སློང་དག་རྒྱལ་པོ་ནི་ཐམས་ཅད་ལ་དབང་བྱེད་པ་ཡིན་པའི་ཕྱིར་བླ་ཡིན་ནོ་ཞེས་གསུངས་པས། བྲམ་ཟེའི་འདུས་པར་རྒྱལ་བ་ནི་སྦྱོར་བ་ཁོ་ན་ཡིན་ནོ། །ས་དང་ཁང་ཁྱིམ་དག་རྩིག་པ་ལ་སོགས་པས་ཡོངས་སུ་བསྐོར་བ་ཇི་ཙམ་ན་བརྐུས་པར་འགྱུར་ཞེ་ན། བསྐོར་བའི་དབང་གིས་ཞེས་སྨོས་ཏེ། བསྐོར་བ་ནི་རྩིག་པ་ལ་སོགས་པས་ཀུན་ནས་བསྐོར་ཅིང་ཡོངས་སུ་བསྐོར་བ་སྟེ། ཀུན་ནས་བསྒྲིབས་པ་དེའི་དབང་གིས་རྐུ་བར་བྱེད་པ་ན་ས་ཕྱོགས་གང་དུ་མཚམས་སུ་བྱས་པ་དེར་མཚམས་ཀྱིས་སྔར་གང་གི་ཚེ་འབྱོར་བར་གྱུར་པ་དེའི་ཚེ་བརྐུས་པ་ཡིན་ཏེ། དེ་ཙམ་ན་རྐུ་བ་ཡོངས་སུ་རྫོགས་པར་གྱུར་ཏོ་ཞེས་བྱ་བའི་དོན་ཏོ། །རྣམ་པ་མང་པོས་མི་རྐུ་བར་བྱེད་དེ། དེ་དག་གི་ནང་ནས་ཇི་ལྟར་བརྡས་བརྐུ་བར་འགྱུར་ཞེ་ན། བརྡའི་ཚུལ་གྱིས་ཞེས་བྱ་བ་ལ་སོགས་པ་སྨོས་ཏ། མི་རྐུ་བ་ནི་མི་རྐུ་བ་ནའོ། །མི་ཞེས་བྱ་བ་ནི་རིགས་གཟུང་བ་ཡིན་པ་དེའི་ཕྱིར་སྐྱེས་པ་དང་བུད་མེད་དང་མ་ནིང་དག་གཟུང་ངོ༌། །དེ་ལ་མི་རྐུ་བར་བྱེད་པ་ན་གང་གི་དབང་གིས་ཉེས་པར་འགྱུར་ཞེ་ན། བརྡ་གྲུབ་དབང་གིས་ཞེས་སྨོས་ཏེ། བརྡ་གྲུབ་པའི་ནི་རྡ་གྲུབ་པ་སྟེ་དེའི་དབང་གིས་སོ། །དེའི་ཕྱིར་བརྡ་གྲུབ་པའི་དབང་གིས་ཉེས་བྱས་སུ་འགྱུར་རོ་ཞེས་བྱ་བར་སྦྱར་རོ། །རྣམ་པ་གང་གིས་རྐུ་བ་ཡིན་ཞེ་ན། བརྡའི་ཚུལ་གྱིས་ཞེས་བྱ་བ་སྨོས་པ་ཡིན་ཏེ། བརྡ་ཡང་དེ་ཡིན་ལ་ཚུལ་ཡང་དེ་ཡིན་པས་ན་བརྡའི་ཚུལ་གྱིས་སོ། །ཚུལ་ནི་སྦྱོར་བ་ལ་བྱ་སྟེ་བརྡའི་རང་བཞིན་གྱིས་སྦྱོར་བ་ཞེས་བྱ་བའི་དོན་ཡིན་པ་དེ་བས་ན་དེས་རྐུ་བ་ནི་རྣམ་པ་དེ་ལྟ་བུས་བརྐུས་པར་འགྱུར་ཞེས་བྱ་བའི་ཐ་ཚིག་གོ །བཅོམ་ལྡན་འདས་ཀྱིས་མི་རྐུ་བ་ནི་གསུམ་སྟེ་གསུམ་གང་ཞེ་ན། ཡུལ་ཕྱོགས་དང་བརྡ་དང་མཚན་མ་ཞེས་གསུང་པ་མ་ཡིན་ནམ། བརྡའི་ཚུལ་གྱིས་ཞེས་བྱ་བ་ནི་དེ་ཅིའི་ཕྱིར་སྨོས་ཤེ་ན། སྨྲས་པ་དེ་ལ་ཡུལ་ཕྱོགས་ནི་ལྷ་རྟེན་ཡིན་ལ། བརྡ་ནི་སྔ་དྲོ་ལ་སོགས་པའོ། །མཚན་མ་ནི་སྒྲ་དང་ཁ་སྤུ་ལ་སོགས་པ་བྲེགས་ནས་རིང་པོ་མ་ལོན་པ་
དག་ཡིན་ནོ། །དེ་ལ་ཡུལ་ཕྱོགས་ལ་སོགས་པ་གསུམ་པོ་དག་ལ་དོན་སྣ་ཚོགས་པ་ཡོད་དུ་ཟིན་ཀྱང་སྔ་དྲོ་ལ་སོགས་པའི་ཁྱད་པར་ཉེ་བར་མཚོན་པར་དཀའ་བ་ཡིན་པའི་ཕྱིར་ཀུན་ལ་བརྡའི་སྒྲའི་སྤྱིས་བསྟན་པ་ཡིན་ནོ། །ཡང་ན་བརྡ་སྨོས་པ་ནི་ཡུལ་ཕྱོགས་དང་མཚན་མ་གཉིས་ཀྱི་ཉེ་བར་མཚོན་པར་བྱེད་པ་ཡིན་ནོ། །ཇི་ལྟར་ན་ཡུལ་ཕྱོགས་ཀྱིས་བརྐུས་པར་འགྱུར་ཞེ་ན། དགེ་ཚུལ་རྐུ་བའི་བསམ་པ་ཅན་གྱིས་མི་ལ་འདི་སྐད་དུ་ཡུལ་གཞན་དུ་སོང་ཞིག་དང་དེར་འདི་དང་འདི་སྦྱིན་པར་བྱའོ་ཞེ་འམ། འདི་དང་འདི་གྱིས་ཤིག་ཅེ་འམ། རིག་པ་ལྷན་ཅིག་བསླབ་པར་བྱའོ་ཞེས་སྨྲས་པ་ན། དེས་ཀྱང་དེ་ལྟར་དགེའོ། །ཡུ་བུ་གང་དུ་མཇལ་བར་བགྱི་ཞེས་སྨྲས་ལ། དེར་ཕྱིན་པར་གྱུར་ན་བདག་གི་དབང་དུ་འགྱུར་རོ་སྙམ་པའི་བསམ་པས། རྐུ་བ་པོས་ལྷ་རྟེན་ལ་སོགས་པ་ཆེ་གེ་མོ་ཞིག་ཏུའོ་ཞེས་སྨྲ་བར་བྱེད་དེ། དེས་ཀྱང་དེར་ཕྱིན་པར་གྱུར་ན་བརྐུས་པར་རྫོགས་པར་བརྗོད་པར་བྱའོ། །ཇི་ལྟར་ན་མཚན་མས་ཤེ་ན། སྔ་མ་བཞིན་ཐམས་ཅད་བརྗོད་པར་བྱའོ། །དེ་ལ་ཁྱད་པར་ནི་ཇི་ཙམ་ན་མཇལ་བར་བགྱི། དགེ་ཚུལ་གྱིས་སྨྲས་པ། བདག་གིས་སྐྲ་དང་ཁ་སྤུ་ལ་སོགས་པ་བྲེགས་ནས་རིང་པོ་མ་ལོན་པ་མཐོང་བར་གྱུར་པ་དེའི་ཚེ་ཁྱོད་ཁོ་བོའི་ཐད་དུ་ཤོག་ཤིག་ཅེས་བྱ་བ་དེ་ལྟ་བུ་ནི་མཚན་མ་དག་གིས་ཡིན་ནོ། །ཇི་ལྟར་ན་བརྡས་ཡིན་ཞེ་ན། སྔ་མ་བཞིན་དུ་འདིར་ཡང་ཐམས་ཅད་བརྗོད་ནས་ཁྱད་པར་འདི་ལྟར་བརྗོད་པར་བྱ་སྟེ་ཇི་ཙམ་ན་ཁོ་བོ་ཁྱོད་ཀྱི་ཐད་དུ་འོང་བར་བྱ་ཞེས་དགེ་ཚུལ་ལ་དྲིས་པ་ན། ཉི་མ་ཕྱེད་སྒང་ལ་སོགས་པ་དག་ཏུའོ་ཞེས་སྨྲས་པ་དང༌། དེས་ཀྱང་དེར་ཕྱིན་པར་གྱུར་པ་ན་བརྐུས་པར་བརྗོད་པར་བྱ་སྟེ། དེ་ལྟ་བུ་ནི་བརྡ་ཡིས་ཡིན་ནོ། །གཞན་ཡང་རྣམ་པ་གཞན་སྟོབས་ཀྱིས་འདྲེན་པར་བྱེད་པ་དང༌། བཏེག་པ་དང༌། སྔགས་དང་སྨན་གྱིས་རྨོངས་པར་བྱས་པ་དང༌། བཅིངས་པ་ཐར་པར་བྱས་པ་དང༌། འཇིགས་པའི་རྒྱུ་མཚན་བསྟན་པས་བཀྲི་བ་དང༌། སྔགས་ཀྱིས་འདྲེན་པར་བྱེད་པ་ཞེས་བྱ་བ་ལ་སོགས་པས་དེ་ལྟ་བུ་དག་ནི་ངེས་པར་དཔྱད་ནས་མཚན་ཉིད་ཇི་ལྟ་བ་བཞིན་དུ་འདིར་བརྐུས་པར་ཤེས་པར་བྱའོ། །ཇི་ལྟར་དུད་འགྲོ་བཅིངས་པ་བརྐུས་པར་འགྱུར་ཞེ་ན། བྱོལ་སོང་རྒྱུད་ཅེས་བྱ་བ་ལ་སོགས་པ་
སྨོས་ཏེ། བྱོལ་སོང་གི་རྒུད་ཐག་པ་ལ་སོག་པས་ཤིང་ལ་སོགས་པ་ལ་བཅིངས་པའོ། །རྐུ་བ་ནི་རྐུ་བར་བྱེད་པའི་དུས་སུའོ། །བཅིངས་པ་ཁོ་ནར་བཅིངས་པ་ཙམ་སྟེ་དེ་བཀྲལ་བ་ནི་བཅིངས་པ་ཙམ་བཀྲོལ་མ་ཐག་ཏུའོ། །དེ་བརྐུས་པར་འདོད་པ་ནི་བརྐུས་པར་དགོངས་པའོ། །ཙམ་སྨོས་པ་ནི་བརྐུ་བར་བྱ་བ་གཞན་ལ་མི་ལྟོས་པ་ཉིད་དུ་སྟོན་པར་བྱེད་པ་ཡིན་ཏེ། གང་གི་ཕྱིར་དེ་ནི་འདིར་གནས་ནས་བསྐྱོད་པ་ཡིན་པས་སོ། །ཇི་ལྟར་ན་ཁྱུ་ལས་བཀར་པ་ལ་སོགས་པས་བརྐུས་པ་ཡིན་ཞེ་ན། བཀར་ཏམ་ཞེས་བྱ་བ་ལ་སོགས་པ་སྨོས་ཏེ། བཀར་བ་ནི་དུད་འགྲོ་ཁྱུ་ལས་ཐ་དད་པར་བྱས་ནས་ཁྱེར་བའོ། །བཏགས་པ་ནི་ཁྱུ་དང་ལྷན་ཅིག་འགྲོ་བ་ཤིང་གི་རྩ་བ་ལ་སོགས་པ་ལ་བཏགས་པའོ། །བཀར་བ་དང་བཏགས་པ་ནི་བཀར་བ་དང་བཏགས་པ་སྟེ། དེ་བས་ན་དུད་འགྲོའི་རྒྱུད་ཅིག་ཁྱུ་ལས་བཀར་ཏམ། བཏགས་པར་གྱུར་པས་སོ། །སྣང་བར་གྱུར་པ་ནི་སྣང་བ་སྟེ། མཐོང་བ་ཉིད་དུ་གྱུར་ཅེས་བྱ་བའི་དོན་ཏོ། །སྣང་བ་མ་ཡིན་པ་ནི་མི་སྣང་བ་སྟེ་དེ་ལས་བཟློག་པའོ། །དེར་གྱུར་པའི་ཕྱིར་དེའི་བདག་པོ་འམ་སྲུང་ཞིང་སྐྱོང་བ་ལ་མི་སྣང་བར་གྱུར་པ་ནའོ། །དེ་ལ་མཆོག་ཏུ་གཏོད་པ་གཞན་འགའ་ཞིག་ལས་བརྐུས་པར་ནི་འབྲེལ་པ་མེད་ལ་ཇི་སྲིད་ཁྱུ་ལས་མི་སྣང་བ་ཉིད་དུ་གྱུར་ན་ཞེས་བྱ་བ་ནི་རུང་བ་ཙམ་ཉིད་གཟུང་བ་ཡིན་ཏེ། ཅི་སྟེ་གཅིག་པུ་ཞིག་ན་གནས་གང་ལས་བསྐྱོད་པ་དེ་ལས་ཞེས་བྱ་བར་ཤེས་པར་བྱ་ཞིང་དེ་ཙམ་དུ་གྱུར་པ་ལ་རྐུ་བའི་བློ་གནས་པ་ཡིན་ནོ། །གལ་ཏེ་བླ་མའི་གོས་སོགས་བསྐུར་བ་ན། །ཞེས་བྱ་བ་ལ་སོགས་པས་ལམ་དུ་འགྲོ་བའི་རྐུ་བརྗོད་པར་བྱེད་དེ། བླ་མ་དེ་སློབ་དཔོན་དང་མཁན་པོའི་གོས་ལ་སོགས་པ་བསྐུར་བ་ནའོ། །གོམ་པ་གྱུར་བ་སྔོན་དུ་མགྱོགས་པར་འགྲོ་བས་སོ། །ཡང་ན་གོམ་པ་བསྣུར་བ་ནི་གོམ་པ་ཕྱིར་བསྣུར་བ་སྟེ་རྒྱབ་ཕྱོགས་སུ་འགྲོ་བས་སོ། །མཐོང་བའི་ཕྱིར་སྣང་བ་སྟེ་མཐོང་བ་མ་ཡིན་པ་ནི་མི་སྣང་བའོ། །དེའི་དངོས་པོ་ནི་མི་སྣང་བ་ཉིད་ཡིན་པ་དེའི་ཕྱིར་གང་གི་ཚེ་རེ་ལྡེ་ལ་སོགས་པ་སྟེ། སབ་མོ་ལ་སོགས་པའི་ཕག་ཏུ་མི་སྣང་བར་གྱུར་པ་དེའི་ཚེ་རྩ་བར་འགྱུར་རོ། །བླ་མ་སྨོས་པ་ནི་ཉེ་བར་མཚོན་པ་ཡིན་ཏེ། གཞན་དག་ལ་དེ་ལྟ་བུ་སྲིད་པའི་ཕྱིར་རོ། །འདི་འབའ་ཞིག་མ་ཡིན་གྱི་མངོན་སུམ་དུ་རྐུ་བ་ནི་མངོན་སུམ་རྐུ་བ་སྟེ་དེ་ལ་ཡང་
ངོ༌། །དེ་དང་འདྲ་བ་སྟེ་སྔ་མ་བཞིན་དུ་རྩ་བར་འགྱུར་ཏེ། འདི་ལ་ཡང་ཇི་སྲིད་དེ་སྣང་བར་གྱུར་པ་དེ་སྲིད་དུ་གཉི་གའི་བརྐུས་པའི་བློ་མི་འབྱུང་བ་ཡིན་ནོ། །ཇི་ལྟར་གྲུ་བརྐུས་པར་འགྱུར་བ་མཚོའམ་ཐང་ངམ་ཞེས་བྱ་བ་ལ་སོགས་པ་སྟོན་པར་བྱེད་དེ་རྩ་བ་ཞེས་བྱ་བ་རྗེས་སུ་འཇུག་པས་ཇི་ལྟར་བྱོལ་སོང་གི་རྒྱུད་མི་སྣང་བར་གྱུར་པ་ན་བརྐུས་པ་ཡིན་པ་དེ་བཞིན་དུ་གྲུ་ཡང་མི་སྣང་བར་གྱུར་པ་ན་བརྐུས་པ་ཡིན་ནོ། །འདི་གང་དུ་བརྐུས་པར་འགྱུར་ཞེ་ན། སྨྲས་པ། ཡངས་པ་ཡང་དེ་ཡིན་པས་ཡངས་པའི་ཆུ་སྟེ་མཚོའོ། །དཔེར་ན་རྒྱ་མཚོའི་ཆུ་འམ་གཞན་དག་ལྟ་བུའོ། །དེ་ལ་མཚོ་འབའ་ཞིག་མ་ཡིན་གྱི་འདིར་ཐང་ཡང་ཡིན་ཏེ་ཐང་ནི་ས་སྐམ་དག་ཡིན་ནོ། །དེ་ལ་ཡང་བཏེག་པས་སམ་ཆུ་པོའི་རྒྱུན་ལ་འདྲེན་པར་བྱེད་ན་གྲུ་མི་སྣང་བར་གྱུར་པ་ན་བརྐུས་པ་ཡིན་ནོ། །ཀླུང་ལ་སོགས་པ་གང་ཡིན་པ་དེ་ནི་ཀླུང་སོགས་སོ། །མཐའ་སྟེ་ཕ་རོལ་གྱི་དོགས་གང་ཡིན་པ་སྣང་བ་ནི་ཀླུང་སོགས་མཐའ་སྣང་བའོ། །མཐའ་སྣང་བ་མ་ཡིན་པ་ནི་ཀླུང་སོགས་མཐའ་མི་སྣང་བའོ། །དེ་ལ་ཀླུང་ལ་སོགས་པ་དང་ཆུ་བོ་ལ་སོགས་པའི་ཐད་ཀར་རྐུ་བ་ན་དོགས་ཅིག་ཤོས་ལ་སོགས་པའི་རྒལ་སའི་དོགས་སུ་ཁྱེར་བ་ནི་དེ་བཞིན་དུ་མི་སྣང་བར་གྱུར་པ་ཁོ་ན་ནི་བརྐུས་པར་འགྱུར་རོ། །གང་གི་ཚེ་ཕ་རོལ་སྣང་བར་གྱུར་པ་དེ་ལ་ཇི་ལྟར་འགྱུར་ཞེན་སྣང་ན་ཞེས་བྱ་བ་སྨོས་ཏེ་ཀླུང་ལ་སོགས་པའི་ཕ་རོལ་གྱི་དོགས་སྣང་བ་ལ་ནི་ཚུལ་རོལ་ནས་བཤད་མ་ཐག་པའི་ཕ་རོལ་ཏུ་ཕྱིན་ན་དེའི་ཚེ་བརྐུས་པར་རིག་པར་བྱའོ། །ཀླུང་གི་སྒྲས་ནི་ཆུ་བོ་རྗོད་པར་བྱེད་པ་ལ་སོགས་པའི་སྒྲས་ནི་ལྟེང་ཀ་ལ་སོགས་པ་གཟུང་ངོ༌། །ནིའི་སྒྲ་ནི་སྔ་མ་ལས་ཁྱད་པར་དུ་བྱེད་པའི་དོན་ཏོ། །གང་གི་ཚེ་རྒྱུན་ལས་བཟློག་ཕྱོགས་སུ་རྐུ་བར་བྱེད་པ་དེའི་ཚེ་ཇི་ལྟར་འགྱུར་ཞེ་ན། རྒྱུན་ལས་ཞེས་སྨོས་ཏེ། རྒྱུན་ལས་བཟློག་པ་ནི་བཟློག་པ་དང་མི་མཐུན་པ་ཡིན་པའི་ཕྱིར་མི་མཐུན་པ་དང༌། འབབ་ཕྱོགས་མ་ཡིན་པ་ཞེས་བྱ་བའི་དོན་ཏོ། །ནིའི་སྒྲ་ནི་སྔ་མ་ལས་ཁྱད་པར་བྱེད་པའི་དོན་ཡིན་ནོ། །དེ་ལ་རྒྱུན་གྱི་བཟློག་ཕྱོགས་སུ་ཁྲིད་པར་གྱུར་ན་གྲུ་བརྐུས་པར་འགྱུར་རོ། །ཇི་ལྟར་བརྐུས་པར་འགྱུར་ཞེ་ན། གྲུ་ཚུགས་འདས་ན་ཞེས་བྱ་བ་སྨོས་ཏེ། གྲུ་ཚུགས་ལས་ཤིན་ཏུ་འདས་པའི་ཕྱིར་གྲུ་
ཚུགས་འདས་པ་སྟེ། དེ་ལས་སོ། །གང་གི་གྲུ་ཚུགས་ལས་འདས་པར་གྱུར་པ་ཞེ་ན། རྒལ་བའི་སའོ། །འདི་སྐད་དུ་ཕ་རོལ་དུ་འདྲི་བའི་ཕྱིར་ཇི་སྲིད་གྱེན་ཕྱོགས་སུ་ཁྲིད་པར་བྱེད་པའི་ངོགས་དེ་གྲུ་ཚུགས་ཞེས་བསྟན་པར་འགྱུར་རོ། །རྒྱུན་བཟློག་ཕྱོགས་སུ་ཁྲིད་པར་གྱུར་ན་དེ་ལས་འདས་པར་གྱུར་ན་བརྐུས་པར་འགྱུར་རོ་ཞེས་བྱ་བ་དེ་ནི་དེའི་གནས་ཡིན་ནོ། །ཞེས་བྱ་བའི་དབང་དུ་བྱས་པ་ཡིན་ལ་རྒལ་སའི་གྲུ་ཚུགས་མེད་ན་གདགས་པའི་ཚད་ཙམ་གནས་ཉིད་ཡིན་པ་དེའི་ཕྱིར་དེའི་དེ་ལས་འདས་ན་བརྐུས་པ་ཡིན། ཇི་ལྟར་སྔགས་ལ་སོགས་པའི་སྦྱོར་བས་རྐུ་བར་བྱེད་ཅན། བརྐུ་གྱ་སྔགས་ཀྱིས་རྐུ་བར་བྱེད་པ་ན། །ཞེས་བྱ་བ་ལ་སོགས་པ་སྨོས་ཏེ། བརྐུ་བར་བྱ་གཏེར་ལ་སོགས་པ་གཞན་དག་གི་རྫས་རང་གི་མིག་སྟེ་བདག་ཉིད་ཀྱི་མིག་གིས་མཐོང་བ་ཉིད་ན་བརྐུ་བྱ་དེ་བརྐུས་པར་འགྱུར་རོ། །ཉིད་ནི་གནས་གཞན་དུ་སྤོས་པ་ལ་སོགས་པའི་མཚན་ཉིད་ཅན་དག་ནི་མ་ཡིན་ནོ་ཞེས་རྣམ་པར་དཔྱོད་པའི་དོན་ཏོ། །སྔགས་ཀྱིས་ཞེས་མང་པོའི་ཚིག་ཏུ་བྱས་པ་ནི་སྨན་ཡོངས་སུ་བསྡུ་བའི་ཕྱིར་རོ། །མཐོང་བ་སྨོས་པ་ནི་དེ་མཐོང་བར་གྱུར་པ་ན་གྲུབ་པའི་བློ་གྲོས་ཀྱི་དབང་དུ་བྱས་པ་ཡིན་ནོ། །ཆུ་ལ་སོགས་པ་དག་ཏུ་སྤྱིངས་པས་རྐུ་བ་ལ་ཇི་ལྟར་འགྱུར་ཞེ་ན། རྫས་ཀྱི་སྟེང་ཕྱོགས་ཞེས་བྱ་བ་ལ་སོགས་པ་སྨོས་ཏེ། ཆུ་ལ་སོགས་པར་ནུབ་པར་གྱུར་པ་ནི་འོག་ཏུ་སྤྱིངས་པར་གྱུར་པ་སྟེ་དེས་བརྐུས་པར་འགྱུར་རོ་ཞེས་བྱ་བར་དགོངས་སོ། །བརྐུ་བར་བྱ་བའི་རྫས་ཀྱི་སྟེང་གི་ཕྱོགས་ནི་རྫས་ཀྱི་སྟེང་ཕྱོགས་ཏེ། དེ་ཆུ་ལ་སོགས་པ་གང་དུ་ནུབ་པར་གྱུར་པ་དེའི་གནས་ཀྱི་སྟེང་ཕྱོགས་ལས་དེ་འདས་ཤིང་ཕྱིན་པར་གྱུར་ན་བརྐུས་པར་འགྱུར་རོ། །སྤྱིངས་པས་རྐུ་བར་བྱེད་པ་ན་རྫས་ཀྱི་སྟེང་གི་ཆ་ཆུ་ལ་སོགས་པ་གནས་ཀྱི་སྟེང་གི་ཆར་ནུབ་པར་གྱུར་ན་བརྐུས་པར་འགྱུར་རོ་ཞེས་བྱ་བའི་དོན་ཏོ། །འདི་ལྟར་རྐུ་བ་པོ་ནི་སྤྱིངས་ནས་ཕྱིས་བརྐུ་བར་བྱའོ་སྙམ་པ་མ་ཡིན་ནམ་ཞེ་ན། བདེན་ཏེ་འོན་ཀྱང་དེ་ནི་བརྐུས་པ་བསྐུར་བའི་བློ་ཡིན་པར་བལྟ་བར་བྱ་སྟེ། དེ་ཉིད་ཀྱི་ཕྱིར་མདོ་མཛད་པས་ཕྱིས་བརྐུའོ་སྙམ་པའི་བློ་གང་ཡིན་པ་དོ་ནི་བླང་བའི་ཡིན་ནོ་ཞེས་གསུངས་སོ། །ལུས་ལ་བཏགས་པའི་རྒྱན་རྣམས་ཇི་ལྟར་བརྐུས་པར་འགྱུར་ཞེ་ན། ལུས་ཀྱི་རྒྱན་རྣམས་ཞེས་བྱ་བ་ལ་སོགས་པ་སྨོས་ཏེ། ལུས་ཀྱི་
ཡན་ལག་ཡིན་ལ་རྒྱན་ནི་མཛེས་པར་བྱེད་པའོ། །བཀྲོལ་བར་གྱུར་པ་ནི་ལུས་ཀྱི་ཡན་ལག་ལས་ཐ་དད་པར་བྱས་པར་གྱུར་པ་ན་བརྐུས་པ་ཡིན་ཏེ། དེ་ནི་འདིར་གནས་ནས་སྐྱོད་པ་ཡིན་ནོ། །གང་གི་ཕྱིར་ལུས་ལ་བཏགས་པའི་རྒྱན་གྱིས་ནི་གནས་ལུགས་ཀྱི་ཕྱོགས་གཅིག་མ་ཡིན་ཏེ། གང་གིས་བཏགས་པའི་ཕྱོགས་ལས་གཞན་དུ་བཀྲུལ་བས་ཀྱང་བཅོལ་བའི་རྫས་འདྲེན་པར་བྱེད་པ་དང་འདྲ་བར་ཉེས་བྱས་སུ་འགྱུར་རོ། །དཔེར་ན་ལག་ངར་ལ་བཏགས་པའི་གསེར་གྱི་གདུ་བུ་དཔུང་མགོ་ལ་ཐུག་པར་བཀྲུལ་ན་ཡང་ཉེས་པར་འགྱུར་ན། དེ་ལྟ་ནི་མ་ཡིན་པ་དེའི་ཕྱིར་ཇི་སྐད་དུ་བཤད་པ་བརྐུས་པ་ཡིན་པར་ཁོང་དུ་ཆུད་པར་བྱའོ། །ད་ནི་ཤོ་གམ་ཞེས་བྱ་བ་ལ་སོགས་པས་ཤོ་གམ་རྐུ་བ་འཆད་པར་བྱེད་དེ། བརྐུས་པར་འགྱུར་ཞེས་བྱ་བ་རྗེས་སུ་འཇུག་པ་ཡིན་ནོ། །ས་ནི་འདིར་ཤོ་གམ་གྱིས་ཡིན་པར་དགོངས་སོ། །དེའི་སྐབས་ཡིན་པ་དེའི་ཕྱིར་ཡུལ་གང་དུ་སའི་ཆ་ཇི་སྲིད་ཅིག་ཏུ་ཕྱིན་པར་གྱུར་ན་ཤོ་གམ་གཞལ་དགོས་པ་དེ་ཉིད་ཤོ་གམ་གྱི་ས་ཡིན་པ་དེ་བས་ནས་དེ་ཉིད་ལས་ཡིན་གྱི་ནམ་མཁའ་ལས་ནི་མ་ཡིན་ནོ། །འདས་པ་ནི་རྒལ་བ་ཡིན་ཏེ་དེ་ལས་འདས་ན་ཤོ་གམ་བརྐུས་པར་འགྱུར་རོ། །གང་ལས་འདས་པ་ཞེ་ན། གནས་ནས་ཞེས་སྨོས་པ་ཡིན་ཏེ། གནས་ནི་ཤོ་གམ་གྱིས་ཞེས་བྱ་བའི་དོན་ཏོ། །ས་ཉིད་ཅེས་བྱ་བའི་ཉིད་ནི་ས་གཞན་ལས་འདས་པ་ལ་ཉེས་པ་མེད་པའི་ཕྱིར་དེ་རྣམ་པར་གཅོད་པར་བྱེད་པ་ཡིན་ལ། ས་ལ་གནས་པའི་སྔགས་ལ་སོགས་པའི་སྟོབས་དང༌། ནམ་མཁའ་ནས་འདྲེན་པར་བྱེད་པ་དེ་ཡང་དོན་དམ་པར་ས་ཉིད་ལས་འདྲེན་པར་བྱེད་པ་ཡང་མ་ཡིན་ཏེ། གང་གི་ཕྱིར་རྫུ་འཕྲུལ་དང་སྔགས་དང་སྨན་གྱི་སྟོབས་ཀྱིས་ཤོ་གམ་གྱིས་དང་རྗེས་སུ་འབྲེལ་པ་མེད་པར་འདྲེན་པར་བྱེད་པ་གང་ཡིན་པ་དེ་ཡང་རྣམ་པར་གཅོད་པར་བྱེད་པ་ཡིན་ནོ། །ཤོ་གམ་ཞེས་བྱ་བ་ནི་ཤོ་གམ་པ་ལ་སྦྱིན་པར་བྱ་བ་ཡིན་ཏེ། ཤོ་གམ་དུ་འོས་པའི་རྫས་གནོད་པར་བྱེད་ན་ཤོ་གམ་འདས་པ་ཞེས་བྱ་བའི་ཉེས་པ་འདི་ཉིད་དུ་འགྱུར་རོ། །ཤོ་གམ་དུ་འོས་པའི་རྫས་ཁྱད་པར་རྫས་ཁྱད་པར་ཇི་ལྟ་བུ་ཞེ་ན། འཇིག་རྟེན་གྱིས་རྣམ་པར་གཞག་པའི་ཟོང་དུ་གྱུར་པ་ཉིད་ཡིན་གྱི་ཡོངས་སུ་ལོངས་སྤྱད་པར་བྱ་བའི་དོན་གྱི་གོས་ལ་སོགས་པ་ཡང་མ་ཡིན་ལ། གཞན་
ལ་བསྡོས་པ་ཡང་མ་ཡིན་ཞིང་གསེར་ཡང་མ་ཡིན་ཏེ། རྣམ་པར་གཞག་པ་བསྟན་པ་ལས་སྟོབས་ཀྱིས་ཤོ་གམ་ལེན་པར་བྱེད་པའི་ཤོ་གམ་པ་དག་རྐུན་པོར་གྱུར་པ་ཉིད་ཡིན་པའི་ཕྱིར་ཤོ་གམ་དང་བྲོས་པར་གྱུར་པ་ལ་ཡང་ཉེས་པ་མེད་པ་ཡིན་ནོ། །རྐུན་པོ་ལ་ལམ་ལ་སོག་པ་སྟོན་པར་བྱེད་པའི་སྒོ་ནས་གྲོགས་སྒྲུབ་པར་བྱེད་པ་ན་ཁ་ན་མ་ཐོ་བར་འགྱུར་རོ་ཞེས་སྟོན་པར་བྱེད་པ་ལ། རྐུན་པོ་ནི་རྫས་འཕྲོག་པར་བྱེད་པ་ཡིན་ནོ། །གྲོགས་བྱེད་པ་ནི་ཐན་གྲོགས་བྱེད་ནའོ། །དེ་གང་གིས་ཤེ་ན། སྡོམ་ཅན་ཏེ་དགེ་ཚུལ་གྱིས་སོ། །རྣམ་པ་གང་གིས་ཤེ་ན། ལམ་སོགས་ཞེས་བྱ་བ་སྨོས་ཏེ། ལམ་དང་པོར་བྱས་པའི་ཁྱིམ་དེན་བུད་མེད་ཀྱི་ཚོགས་ནི་མང་ལ་སྐྱེས་པའི་ཚོགས་ནི་ཉུང་ཤིང་ཉེ་བ་ན་ནགས་ཐིབས་པོ་མེད་ལ་མི་སྲུན་པ་མེད་དོ་ཞེས་བྱ་བ་དེ་ལྟ་བུ་ལ་སོགས་པ་གང་དག་ཡིན་པ་དེ་དག་ལམ་སོགས་ཡིན་ཏེ། དེ་དག་ཉེ་བར་སྟོན་པས་བསྟན་པ་དེ་ནི་ལམ་སོགས་བསྟན་པ་སྟེ། ཐན་གྲོགས་སྒྲུབ་པར་བྱེད་ཅེས་བྱ་བའི་དོན་ཏོ། །སྐལ་བ་ནི་སོ་སོའི་ཐོབ་སྐལ་དང་ཆ་ཡིན་ལ་དེ་འདོད་པ་ན་སྲེད་པ་ཡིན་པ་དེ་བས་ན། སྐལ་བ་འདོད་ཕྱིར་ཏེ་རྒྱུ་དེས་དགེ་ཚུལ་གྱི་བརྟུལ་ཞུགས་ཉམས་པར་འདོད་པ་སྟེ་བརྟུལ་ཞུགས་ཉམས་པར་འགྱུར་ཞེས་བྱ་བའི་དོན་ཏོ། །ཅེ་ཉེ་བར་སྟོན་པ་ཙམ་ཁོ་ནས་འགྱུར་རམ་ཞེ་ན། སྐལ་བ་ཐོབ་ན་ཞེས་བྱ་བ་སྨོས་པ་ཡིན་ཏེ། སྐལ་བ་ཐོབ་པར་གྱུར་ན་དེར་འགྱུར་རོ་ཞེས་བྱ་བའི་ཐ་ཚིག་གོ །གང་གི་ཚེ་དགེ་སློང་དག་ཉེ་དུ་འམ་གཞན་དག་ལ་གཞན་གང་གིས་ཆད་པས་གཅོད་པར་བྱེད་པར་འགྱུར་པ་དེའི་ཚེ་ཡང་ཉེས་པར་འགྱུར་རོ་ཞེས་གསུངས་པ་དེ་ཡང་གང་གི་ཚེ་འགྱུར་ཞེ་ན། ཚུལ་མིན་ཆད་པས་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཚུལ་ནི་ཉེས་པ་དང་རྗེས་སུ་མཐུན་པ་བསྟན་བཅོས་ལས་བསྟན་པ་གཟུང་ངོ༌། །དེ་ལས་རྣམ་པ་གཞན་དུ་སྨོས་པ་ནི་ཚུལ་མིན་བཅད་པའོ། །ཚུལ་མིན་ཆད་པ་དེས་ཆད་པ་ཐོབ་ན་རིན་ཐང་ཇི་ལྟ་བ་དང་བསམ་པ་ཇི་ལྟ་བ་བཞིན་དུ་ཞེས་པར་འགྱུར་རོ། །ཇི་ལྟ་ཡང་བཅོམ་ལྡན་འདས་ཀྱིས་དགེ་སློང་དག་ཞིང་ལས་ནི་ཁ་ན་མ་ཐོ་བ་ཆེན་པོ་བཅས་པ་ཡིན་ནོ་ཞེས་ཞིང་གི་ལས་བཀག་པ་མཛད་པ་དེ་ལྟན་ཡང་ཞིང་ལས་ཙམ་གྱིས་མཐའི་ཉེས་པར་འགྱུར་བ་ནི་མ་ཡིན་མོས་ཀྱི་འོན་ཀྱང་སྲོག་ཆགས་མང་པོ་དག་འཆི་བར་འགྱུར་བ་
དེ་བས་ཀྱང་བཅས་པ་ཇི་ལྟ་བ་བཞིན་དུ་ཉེས་པར་འགྱུར་པ་དེ་ཉིད་ཀྱི་ཕྱིར། བཅོམ་ལྡན་འདས་ཀྱིས་ཁ་ན་མ་ཐོ་བ་ཆེན་པོ་དང་བཅས་པ་ཡིན་ནོ་ཞེས་གསུངས་པ་ཡིན་ནོ། །དེ་ལྟ་ན་ཡང་གལ་ཏེ་བྱས་པ་ལས་མཐའི་ཉེས་པ་འགྱུར་བ་ནི་བདག་ལ་ལེགས་ཤིང་ཞེས་བྱ་བ་ལ་སོགས་པས་ཇི་ལྟ་བ་ད་ལྟར་སྟོན་པར་བྱེད་པ་ཡིན་ཏེ། གཞན་གྱི་ཞིང་ནི་གཞན་དག་གི་ཞིང་ལའོ། །གལ་ཏེ་དགེ་ཚུལ་གྱིས་གཞན་གྱི་ཞིང་དེ་ལ་ཆུ་འདྲེན་པར་བྱད་པ་དང་གཅོད་པར་བྱེད་པ་ནི་ཆུ་འདྲེན་གཅོད་བྱེད་ན་སྟེ་འདི་ལ་རྩ་བ་ཉིད་དུ་འགྱུར་རོ། །འདི་ལ་ཞེས་བྱ་བ་ནི་འདྲེན་པར་བྱེད་པ་ལ་སོགས་པ་ལའོ། །ཆུ་འདྲེན་ཞེས་བྱ་བ་ནི་གང་གི་ཚེ་ཆུ་མང་བར་གྱུར་པ་དེའི་ཚེ་བདག་ཉིད་ཀྱི་ཞིང་ལས་བོར་ཞིང་གཞན་གྱི་ཞིང་ལ་ཆུ་འདྲེན་པར་བྱེད་པ་ཡིན་ལ། གཅོད་པ་ནི་ཆུའི་ཚོགས་ཉུང་བར་གྱུར་པ་ན་གཞན་དག་གི་ལས་ཟློག་པར་བྱེད་པ་ཡིན་ཏེ། བཅད་པ་ཙམ་ལས་བདག་གི་རྙེད་པ་ཡང་མ་ཡིན་པའི་ཕྱིར་བཅད་པ་སྔོན་དུ་སོང་བའི་བདག་ཉིད་ཀྱི་ལ་འདྲེན་པར་བྱེད་པ་སྟེ་འདིར་གཅོད་པར་བྱེད་པ་ཡིན་པར་གཟུང་ངོ༌། །བསམ་པ་གང་གིས་ཤེ་ན། བདག་ལ་ལེགས་ཤིང་ཞེས་བྱ་བ་སྨོས་ཏེ། ནས་འབྲུ་བདག་ལ་ལེགས་པར་གྱུར་ཅིག་གཞན་ལ་ཉེས་པར་གྱུར་ཅིག་ཅེས་བྱ་བའི་བསམ་པ་འདིས་བྱས་ན་རྩ་བར་འགྱུར་རོ་ཞེས་བྱ་བའི་དོན་ཏོ། །ཅི་དེ་ཙམ་ཞིག་བྱས་པས་རྩ་བར་འགྱུར་རམ་ཞེ་ན། མ་ཡིན་ཏེ་བདག་གི་འབྲུ་རྙེད་པར་གྱུར་པ་ནི་བདག་གི་འབྲུ་རྙེད་ན་སྟེ་བདག་གི་འབྲུ་རྙེད་པར་གྱུར་པ་དེ་ལའོ། །གལ་ཏེ་དེ་ཡང་རྙེད་ལ་གཞན་གྱི་འབྲུ་ཉམས་པར་གྱུར་པ་དེའི་ཚེ་བ་རྐུས་པ་ཡིན་ནོ། །འདི་སྐད་དུ་བདག་གི་འབྲུ་ལེགས་པར་གྱུར་ཅིག་གཞན་གྱི་འབྲུ་ཉེས་པར་གྱུར་ཅིག་ཅེས་བྱ་བའི་བསམ་པས་ཆུའི་ཚོགས་མང་པོར་གྱུར་པ་ན་བདག་ཉིད་ཀྱི་ཞིང་ལས་བཅད་ནས་གཞན་གྱི་ལ་འདྲེན་པར་བྱེད་ལ། བདག་གི་ལེགས་པར་གྱུར་ཅིག་ཅེས་གཞན་གྱི་ཞིང་ཉམས་པར་གྱུར་ན། དེ་ལ་དངོས་པོ་ཇི་ལྟ་བ་བཞིན་དུ་ཉེས་པར་འགྱུར་རོ་ཞེས་བསྟན་པར་འགྱུར་ཏེ། གང་དུ་ཞིང་འདུས་བྱས་པའི་ཁྱད་པར་གྱི་དབང་ལས་རྙེད་པར་འགྱུར་བ་དེ་བརྐུས་པ་མ་ཡིན་ཞིང༌། གང་ཆུ་འདྲེན་པར་བྱེད་པ་ལ་སོགས་པ་ལས་རྙེད་པ་དེ་འདིར་གཞན་དག་ལས་བརྐུས་པ་ཡིན་ནོ། །རང་གི་
ལས་ཀྱི་མཐའ་འདུས་བྱས་པའི་ཁྱད་པར་གྱི་དབང་དང༌། ཞིང་གི་ཡོན་ཏན་ལས་ནི་མ་ཡིན་ཏེ་དཔེར་ན་བདག་གི་ཞིང་དང་གཞན་གྱི་ཞིང་ཆུ་མཉམ་པོའི་སྒོ་ནས་ཐམས་ཅད་དུ་གལ་ཏེ་ཁལ་གཉིས་གཉིས་མཉམ་པོར་གྱུར་པ་ཡིན་ལ། བདག་ཉིད་ཀྱི་ཞིང་འདུས་བྱས་པའི་ཁྱད་པར་དང༌། ཆུ་བཅུས་བ་ལ་སོགས་པ་བྱས་པ་དེ་ལས་གཞན་གྱི་ལས་ནི་ཁལ་གཅིག་འབྱུང་ལ་བདག་ཉིད་ཀྱི་ལས་ནི་ཁལ་གསུམ་འབྱུང་བར་གྱུར་ན་དེ་ལ་གལ་ཏེ་ཆུ་མཉམ་པོར་བཅུས་པར་གྱུར་པ་ལས་གཞན་གྱིས་ནི་ཁལ་ཕྱེད་དང་གཉིས་ཡིན་ལ། བདག་གི་ཁལ་ཕྱེད་དང་གསུམ་བྱུང་བ་ལས་ཆུ་མཉམ་པོ་ནི་ཕྱེད་དང་གཉིས་ཡིན་ལ། གཅིག་ནི་ཞིང་འདས་བྱས་པའི་ཁྱད་པར་ལས་ཡིན་པ་དེའི་ཕྱིར་གཞན་གྱི་ཁལ་ཕྱེད་ཉམས་པར་གྱུར་པ་དེ་འདིར་བསྡུས་པ་ཡིན་ཏེ། དེ་བརྐུས་པ་ཡིན་གྱི་ཞིང་འདུས་བྱས་པའི་དབང་ལས་བྱུང་བ་ཅིག་ཤོས་ནི་མ་ཡིན་ནོ། །དེ་ཉིད་ཀྱི་ཕྱིར། བདག་གི་འབྲུ་རྙེད་གཞན་གྱི་འབྲུ་ཉམས་ན། །ཞེས་བྱ་བ་ནི་ཕ་རོལ་པོའི་འབྲུ་ཉམས་པར་གྱུར་པས་བདག་ཉིད་ཀྱི་འབྲུ་རྙེད་པ་ཡིན་ནོ་ཞེས་བྱ་བའི་ཚིག་གོ །དེ་ཉིད་ཀྱི་ཕྱིར་སློབ་དཔོན་གྱིས་རང་གི་ལས་ཀྱི་མཐའ་གྲུབ་པ་དེའི་དོན་དུ་ཅིག་ཤོས་ཉམས་པར་བྱས་ནས་ཞེས་བྱ་བ་ལ་སོགས་པ་མདོར་མཛད་པ་ཡིན་ཏེ། དེ་ཡང་འདིར་རང་གི་ལས་ཀྱི་མཐའ་གྲུབ་པ་གང་ཡིན་པ་དེ་བརྐུས་པར་འགྱུར་རོ། །ཁྱད་པར་ཇི་ལྟ་བུ་ཞེ་ན། ཉམས་པར་བྱས་པ་སྟེ་ལས་ཀྱི་མཐའ་འདུས་བྱས་པའི་རྒྱུ་ལས་འབྱུང་བའི་ལྷག་མར་གྱུར་པ་དང་བྲལ་ཞིང་ཉམས་པ་ནི་གྲུབ་པ་ཡིན་ཏེ། ཉམས་པ་ཞེས་བྱ་བའི་དོན་དུ་འགྱུར་རོ། །ཉམས་པ་ཞེས་བྱ་བའི་གྲུབ་པ་ཁྱད་པར་དུ་བྱེད་པ་ཡིན་ཏེ། དེ་ལྟ་བུར་གྱུར་པའི་གྲུབ་པ་བརྐུས་པ་ཡིན་ནོ། །རྒྱུན་དུ་གཏོགས་པའམ་ཞིང་གི་ཁོངས་སུ་འདུས་པའི་ཆུ་ཞེས་ཁྱད་པར་མེད་པར་ཁོང་དུ་ཆུད་པར་བྱའོ། །ཆུ་འདྲེན་པར་བྱེད་པའི་སྒོ་ནས་གྲུབ་པ་བརྐུས་པ་ཡིན་གྱི་ཆུ་བརྐུས་པ་ནི་མ་ཡིན་ཏེ། རྣམ་པ་གཞན་དུ་ན་བདག་ཉིད་ཀྱི་ལས་ཀྱི་མཐའ་ལས་ཆུ་འདྲེན་པར་བྱེད་པའམ་ཟོག་པར་བྱེད་ཅིང་གཞན་གྱི་ལས་ཀྱི་མཐའ་ལ་འདྲེན་པར་བྱེད་ན་ཉེས་པ་མེད་པར་འགྱུར་རོ། །རྩ་བ་ཉིད་དུ་འགྱུར་ཞེས་བྱ་བའི་ཚིག་གིས་དངོས་པོ་ཡོངས་སུ་ཚད་ན་དངོས་གཞི་ཉིད་དུ་འགྱུར་རོ་ཞེས་རིག་པར་བྱའོ། །བདག་ལ་ལེགས་
ཞེས་བྱ་བའི་ཚིག་ཅིའི་ཕྱིར་ཏེ། གང་གི་ཕྱིར་གཞན་ལ་ཉེས་བྱས་འགྱུར་ཞེས་བྱ་བའི་ལན་དེ་ཙམ་ལ། བདག་ཉིད་ཀྱི་འབྲུ་ལྟོས་པ་དང་བཅས་པ་ཡིན་པས་གཞན་གྱི་ཉམས་པར་གྱུར་ལ། དངོས་པོ་ཡོངས་སུ་ཚང་ན་ཡང་དངོས་གཞིར་འགྱུར་བ་ཡིན་ནོ་ཞེ་ན། ཆུད་གཟན་པར་ཐལ་བར་དགོངས་པ་དེའི་ཕྱིར་ཚིག་འདི་སྨོས་པ་ཡིན་ནོ། །གཞན་ལ་ཉེས་གྱུར་ཅེས་བྱ་བ་ཅིའི་ཕྱིར་ཏེ། གང་གི་ཕྱིར་གཞན་དག་གི་རྫས་ཉམས་པར་འགྱུར་པའི་འཚེ་བ་མེད་པར་བདག་གི་ལེགས་པར་མི་འགྱུར་རོ་ཞེ་ན། ཆུ་གཅོད་པ་ལ་སོགས་པའི་འཚོ་བ་ཙམ་ཁོ་ན་ལས་ལེགས་པར་བརྐུས་པར་འགྱུར་རོ་ཞེས་འཇིག་རྟེན་གྱིས་བརྐུས་པར་རྣམ་པར་འཇོག་པ་ཡིན་ན་ནི་འཇིག་རྟེན་པ་ཡང་བདག་གི་ལེགས་པ་ཙམ་གྱི་བསམ་པའི་དབང་ལས་རྐུ་བ་རྣམ་པར་འཇོག་པར་མི་བྱེད་དོ། །བདག་གི་འབྲུ་རྙེད་ཅེས་བྱ་བ་ཅིའི་ཕྱིར་ཞེ་ན། རང་གི་ལེགས་པ་མེད་པར་གཞན་གྱི་འབྲུ་ཉམས་པ་ཙམ་ཁོ་ན་ལས་བརྐུས་པར་མི་འགྱུར་ཏེ་གང་གི་ཕྱིར། ཅུང་ཞིག་ཀྱང་དེས་བརྐུས་པ་མེད་པའི་ཕྱིར་འདི་སྨོས་པ་ཡིན་ནོ། །གཞན་གྱི་འབྲུ་ཉམས་པ་ཞེས་བྱ་བ་ཅིའི་ཕྱིར་ཞེ་ན། གང་གི་ཕྱིར་གཞན་དག་གི་འབྲུ་ཉམས་པ་མེད་པར་རང་ཉིད་ཀྱི་གྲུབ་པ་ཙམ་ལས་གཞན་གྱི་ཅུང་ཞིག་ཀྱང་བརྐུས་པ་མེད་པའི་ཕྱིར་འདི་སྨོས་པ་ཡིན་ནོ། །རྫས་ཤིག་ཅེས་བྱ་བ་ལ་སོགས་པས་ས་ལ་རྫས་བཤལ་བས་རྐུ་བ་སྟོན་པར་བྱེད་དེ། བརྐུ་བར་བྱ་བའི་རྫས་ས་ལ་བཤལ་བ་ནི་འདྲེན་པ་ལ་བྱའོ། །འདྲེན་པར་བྱེད་པ་དེ་ལས་རྐུ་བ་ན་ཇི་ལྟར་བརྐུས་པར་འགྱུར་ཞེ་ན། རྫས་ཤིག་ཅེས་བྱ་བ་ལ་སོགས་པ་སྨོས་པ་ཡིན་ཏེ། བརྐུ་བར་བྱ་བའི་རྫས་ལ་ངོས་བཞི་ཡོད་པར་འགྱུར་བ་དེ་ལ་ངོས་ཀྱི་སྣ་གང་ནས་བཤལ་བ་དེ་ལས་རྒྱབ་ཕྱོགས་སུ་གྱུར་པའི་ངོས་ན་ངོས་གཞན་ཡིན་ཏེ་ངོས་གཞན་དེའི་རྟེན་དུ་གྱུར་པའི་ས་གང་ཡིན་པ་དེ་ནི་ངོས་གཞན་ས་ཡིན་པ་དེ་མཚམས་ཡིན་པས་དེ་སྐད་ཅེས་བྱའོ། །མཚམས་ཀྱི་སྒྲས་རིབ་མ་དང༌། གས་པ་དང༌། ཡི་གེ་དང༌། ཚིག་དང༌། ཆོད་པ་དག་བསྡུས་པ་ཡིན་ནོ། །འདི་སྐད་དུ་གང་དུ་ཡི་གེ་བྲིས་པ་ལ་སོགས་པས་རྣམ་པར་བཅད་པ་མཚམས་ཡིན་པར་རྟོགས་པར་བྱ་ཞེས་བསྟན་པར་འགྱུར་རོ། །དེ་བས་ན་གལ་ཏེ་ངོས་གཞན་ཅིག་ཤོས་དེ་འདས་པ་སྟེ་རྒལ་ཞིང་
སོང་བར་གྱུར་ན་དེའི་ཚེ་བརྐུས་པར་འགྱུར་རོ། །བརྐུ་བར་བྱ་བའི་རྫས་ཀྱི་ངོས་གཅིག་ངོས་གཞན་གྱི་རྟེན་དུ་གྱུར་པའི་སའི་མཚམས་ལས་ཕོག་པར་གྱུར་ན་བཤལ་བས་བརྐུས་པ་ཡིན་ནོ་ཞེས་བྱ་བའི་དོན་ཏོ། །འདིས་ནི་མཚམས་གཞན་དུ་ཕྱིན་ན་བརྐུས་པ་ཡིན་ནོ་ཞེས་བསྟན་ཏོ། །དེ་ཉིད་ཀྱི་ཕྱིར་བརྐུ་བར་བྱ་བའི་རྫས་ཀྱིས་ཁྱབ་པའི་སའི་ཆའི་དབུས་སུ་གྱུར་པའི་ཕྱོགས་ལ་མཚམས་ཡོད་ན་མཚམས་གཞན་དུ་ཕྱིན་པ་མེད་པའི་ཕྱིར་ཞེས་བྱ་བའི་དབང་དུ་བྱས་ན་རྫས་ཀྱི་ངོས་གཞན་སའི་མཚམས་ཞེས་བྱ་བ་ལ་སོགས་པའི་སྒོ་ནས་བརྐུས་པ་མ་ཡིན་ཏེ། གང་གི་ཕྱིར་རྫས་དེས་མཚམས་གཉིས་ཁྱབ་པ་དེའི་ཕྱིར། དེ་ལས་འདས་ཤིང་མཚམས་གཞན་དུ་ཕྱིན་ན་བརྐུས་པར་འགྱུར་རོ། །ཇི་ལྟར་ན་ལེན་པར་བྱེད་པས་རྐུ་བ་ཡིན་ཞེ་ན། ལེན་པར་བྱེད་ན་ས་ལས་ཞེས་བྱ་བ་སྨོས་ཏེ། ས་ལས་བསྐྱོད་པ་ནི་ས་ལས་འཕགས་པ་ཡིན་ཏེ། ས་ལས་འཕགས་པར་གྱུར་པ་དེ་ཉིད་ཁོ་ན་ལེན་པར་བྱེད་པས་བརྐུས་པ་ཡིན་ཏེ། དེ་ནི་བཏེག་སྟེ་རྐུ་བ་ཞེས་བྱ་བར་འགྱུར་རོ། །ནིའི་སྒྲ་ནི་ཁོ་ནའི་དོན་ཏོ། །འདིར་ས་ནི་རྫས་ཀྱི་རྟེན་སྤྱི་རྣམ་པར་སྟོན་པར་བྱེད་པ་ཡིན་ཏེ། གོས་ཀྱི་གདང་བུ་མ་གཏོགས་པའི་གནས་ལས་ལེན་པར་བྱེད་ན་འཕགས་པར་གྱུར་པ་ཁོ་ན་བརྐུས་པར་འགྱུར་རོ་ཞེས་བྱ་བའི་ཐ་ཚིག་གོ །བརྒྱབ་པའི་སྒོ་ནས་ཤིང་ལ་སོགས་པའི་འབྲས་བུ་ལྟུང་བར་བྱེད་པས་རྐུ་བརྗོད་པར་བྱེད་དེ། དབྱུག་པ་ལ་སོགས་པ་བརྒྱབ་པར་གྱུར་པ་ནི་དབྱུག་སོགས་བརྒྱབ་པ་སྟེ། དབྱུག་པ་བསྣུན་པ་དེའི་སྒོ་ནས་འབྲས་བུ་རྐུ་བ་ན་འོག་ཏུ་ལྟུང་ན་བརྐུས་པ་ཡིན་པར་བཅོམ་ལྡན་འདས་ཀྱིས་གསུངས་ཀྱི། ལྟུང་བར་གྱུར་པའི་གནས་ནས་བསྐྱོད་པ་ལ་ནི་མ་ཡིན་ནོ། །འོག་ཏུ་ལྟུང་ན་ཞེས་བྱ་བ་ནི་གཞི་ཉིད་དུ་རྣམ་པར་སྟོན་པར་བྱེད་པ་ཡིན་ཏེ། སའི་བདག་ཉིད་ཀྱི་གནས་སམ་གོས་ཀྱི་བདག་ཉིད་དེ་ལ་གང་ཞིག་ལྟུང་བར་གྱུར་པ་ནི་འོག་ཏུ་ལྟུང་བ་ཡིན་པར་རིག་པར་བྱའོ། །གང་གི་ཚེ་གྲོགས་པོ་མང་པོ་བློ་ཐ་དད་པས་རྐུ་བར་བྱེད་ན་དེ་ཇི་ལྟར་བརྐུས་པར་འགྱུར་ཞེ་ན། གྲོགས་པོ་མང་པོ་འདུས་པས་ཞེས་བྱ་བ་ལ་སོགས་པ་སྨོས་ཏེ། མང་པོ་འདུས་པར་གྱུར་པས་སོ། །ཁྱད་པར་ཇི་ལྟ་བུ་ཞེ་ན། གྲོགས་པོར་གྱུར་པས་སོ། །ཕན་ཚུན་སྟོབས་ཀྱིས་འདུ་ཤེས་ཤིང་གཅིག་ཏུ་
གྱུར་པས་གཞན་གྱི་རྫས་རྐུ་བར་བྱེད་ན་དེ་ནམ་གྱི་ཚེ་ན་བརྐུས་པར་འགྱུར་ཞེ་ན། སྐལ་པ་ཐོབ་ན་ཞེས་བྱ་བ་སྨོས་ཏེ། སྐལ་བ་སྟེ་བགོ་སྐལ་ཐོབ་པར་གྱུར་པ་ན་བརྐུས་པ་ཡིན་ནོ། །སྔར་མ་ཡིན་ཞེས་བྱ་བ་ནི་གནས་ནས་སྤགས་པ་ནི་མ་ཡིན་ནོ་ཞེས་བྱ་བའི་དོན་ཏོ། །གང་གི་ཕྱིར་གནས་ནས་བསྐྱོད་པའི་དུས་སུ་འགའ་ཞིག་གིས་ཀྱང་བདག་གིར་བྱས་པ་མེད་ཀྱི་གང་གི་ཕྱིར་དེ་དག་བློ་ཐ་དད་པར་གྱུར་པས་རྐུ་བར་བྱེད་པ་ཡིན་ལ། དེ་དག་གིས་ཀྱང་བརྐུས་ནས་སྤྱིར་སོ་སོའི་སྐལ་བ་བདག་གིར་བྱའོ་ཞེས་དེ་ལྟར་རྣམ་པར་གཞག་པ་མ་བྱས་ཤིང༌། གང་གིས་བརྐུས་པ་དེའི་དེ་ཡིན་ནོ་ཞེས་རྣམ་པར་གཞག་པ་ཡང་མ་བྱས་པའི་ཕྱིར་སྤྱིར་སྔར་ཚིག་ཏུ་བརྗོད་པ་མེད་པར་རྐུས་བར་བྱེད་པ་ཡིན་པར་ཁོང་དུ་ཆུད་པར་བྱའོ། །སྤྱིར་སོ་སོའི་སྐལ་བའི་བསམ་པ་ཡོད་པ་ཡིན་ན་ནི་གནས་ནས་བསྐྱོད་པ་ཁོ་ན་ན་བརྐུས་པ་ཡིན་པར་རིག་པར་བྱ་ཞིང༌། གང་གིས་བརྐུས་པ་དེ་དེ་ཡིན་ནོ་ཞེས་རྣམ་པར་གཞག་པ་ཡོད་ན་གཞན་གྱིས་ཕྲོགས་པར་གྱུར་ན་གཞན་གྲོགས་པོར་གྱུར་པ་དེ་ལ་ཉེས་བྱས་སུ་འགྱུར་རོ་ཞེས་བྱ་བའི་ཚུལ་འདི་ཡང་ཁོང་དུ་ཆུད་པར་བྱའོ། །གང་གི་ཚེ་སྐྱེ་བོ་མང་པོ་ལ་ཡོད་པའི་རྫས་རྐུ་བར་བྱེད་པ་དེ་ལ་ཇི་ལྟར་ཉེས་པར་རྣམ་པར་གཞག་ཅེ་ན། སྐྱེ་བོ་མང་པོའི་ཞེས་བྱ་བ་ལ་སོགས་པས་རྣམ་པར་འཆད་པར་བྱེད་དེ། སྐྱེ་བོ་མང་པོ་ནི་སྐྱེ་བོའི་ཚོགས་ཡིན་ཏེ། སྐྱེ་བོ་མང་པོ་དེའི་ནོར་ནི་སྐྱེ་བོ་མང་པོའི་ནོར་ཡིན་ནོ། །དེ་བརྐུས་པ་ནི་རྐུ་བར་བྱེད་པ་སྟེ་སྐྱེ་བོ་མང་པོའི་ནོར་བརྐུས་པར་གྱུར་པ་དེ་ལ་ཉེས་པ་སྟེ་ལྟུང་བར་འགྱུར་བའོ། །གང་གི་ཚེ་ཞེ་ན། གང་ཚེ་ཞེས་བྱ་བ་ལ་སོགས་པ་སྨོས་པ་ཡིན་ཏེ། གང་གི་ཚེ་ཐ་སྙད་དུ་བྱེད་པའི་ན་ན་ཀའི་བཞི་ཆ་གཅིག་གི་རིན་ཐང་ཚང་བར་གྱུར་པ་དེའི་ཚེ་བརྐུས་པར་གྱུར་པ་ཡིན་ནོ། །ཅི་སྤྱིར་རམ་ཞེ་ན་མ་ཡིན་ཏེ། འོན་ཀྱང་ནོར་གྱི་བདག་པོ་རེ་རེའི་སྐལ་བ་ནི་སོ་སོའི་ཆ་ཡིན་ཏེ། རེ་རེའི་སྐལ་བ་དེ་ལས་འགྱུར་གྱི་རྫས་སྤྱིར་བརྐུས་པ་ཙམ་ལ་ནི་མ་ཡིན་ཏེ། འདི་སྐད་དུ་སྐྱེ་པོ་མང་པོའི་ནོར་ཏེ་བདག་པོའི་རྫས་སོ་སོ་ལས་རིན་ཐང་ཚང་བར་གྱུར་ན་ཞེས་བསྟན་པར་འགྱུར་རོ། །ད་ནི་འདི་རྣམ་པར་དཔྱད་པར་བྱ་སྟེ། གང་གི་ཚེ་སྐྱེ་བོ་མང་པོའི་ནོར་གྱི་ནང་ནས་ནོར་གྱི་བདག་པོ་སོ་སོའི་རྫས་རིན་ཐང་ཚང་བར་གྱུར་པ་དེའི་
ཚེ་དངོས་གཞིར་འགྱུར་ཏེ། དེ་ལ་གཅིག་གི་རྫས་ཀྱང་རིན་ཐང་ཚང་བར་གྱུར་ན་དེ་བཞིན་དུ་ཡང་འགྱུར་རོ། །འདིར་གཅིག་གི་རྫས་ཀྱང་རིན་ཐང་ཚང་བར་གྱུར་ན་དེས་ཀྱང་དངོས་གཞིར་འགྱུར་ཏེ་གང་གི་ཕྱིར་དེས་ནོར་གྱི་བདག་པོ་རིན་ཐང་ཚང་བར་གྱུར་པ་བརྐུས་པ་དེའི་ཕྱིར། གཞན་གྱི་ཆ་ལ་མ་ཚང་དུ་ཟིན་ཀྱང་དངོས་གཞིའི་ཁ་ན་མ་ཐོ་བར་འགྱུར་རོ་ཞེས་བཤད་པ་ཡིན་ནོ། །གང་གི་ཚེ་འགྲོ་བ་མང་པོས་གཞན་དག་ལ་ཡོད་པ་རྐུ་བར་བྱེད་ན་དེ་ཇི་ལྟར་འགྱུར་ཞེ་ན། གང་གི་ཚེ་སྐྱེ་བོ་མང་པོས་ཀྱང་གཞན་གྱི་རྐུ་བར་བྱེད་པ་དེའི་ཚེ་རང་གི་སྐལ་བ་སྟེ། རང་གི་སྐལ་བ་ཡང་ཡིན་ལ་རིན་ཡང་དེ་ཡིན་པས་རང་སྐལ་ཡིན་ཏེ། བདག་ཉིད་ཀྱི་སྐལ་བའི་མཚན་ཉིད་ཅན་གྱི་སོ་སོའི་ཆ་དང་ན་ན་ཀའི་བཞི་ཆ་གཅིག་ཅེས་བྱ་བའི་བར་དུའོ། །སྐྱེ་བོ་མང་པོས་རྐུ་བར་བྱེད་པ་དེའི་ཚེ་སྟེ་དེའི་དུས་སུ་རང་གི་སྐལ་བ་དེས་ཉེས་པར་རྣམ་པར་གཞག་པར་བྱའོ། །འདི་སྐད་དུ་བརྐུ་བར་བྱ་བའི་རྫས་གང་ལ་གལ་ཏེ་རྐུ་བ་པོ་རེ་རེ་ལ་རིན་ཐང་ཚང་བར་གྱུར་པ་དེའི་ཚེ་དངོས་གཞིར་འགྱུར་གྱི་སྤྱིར་བསྡུས་པ་ལ་ནི་མ་ཡིན་ནོ། །གང་གི་ཚེ་སྐྱེ་བོ་མང་པོའི་རྫས་སྐྱེ་བོ་མང་པོས་རྐུ་བར་བྱེད་པ་དེའི་ཚེ་ཡང་རྫས་ཀྱི་བདག་པོ་རེ་རེའི་ནོར་ལ་རྐུ་བ་པོ་རེ་རེ་ལ་རིན་ཐང་ཚང་བར་གྱུར་ན་ཞེས་བྱ་བ་དེ་ཡང་ཚིག་འདི་གཉིས་ཀྱིས་རྣམ་པར་བསྟན་པར་རིག་པར་བྱའོ། །གང་གི་ཚེ་སྐྱེ་བོ་མང་པོ་ལ་ཡོད་པ་རྐུ་བར་བྱེད་པ་དེའི་ཚེ། འཕགས་པ་ཉེར་སྦས་ཀྱིས་གལ་ཏེ་དེ་ལ་སྐྱེ་བོ་མང་པོས་སྲུང་མ་གཞག་པར་གྱུར་ན་དེ་ཉིད་ལས་ཉེས་པར་འགྱུར་གྱི། སྐྱེ་བོ་མང་པོ་ལས་ནི་མ་ཡིན་པ་དེའི་ཕྱིར་གལ་ཏེ་སྲུང་མ་གཅིག་ཡོད་པར་གྱུར་ན་ཡང་གཅིག་པོ་དེ་ལས་ན་ན་ཀའི་བཞི་ཆ་གཅིག་ལས་ཀྱང་མཐའི་ཉེས་པར་འགྱུར་རོ་ཞེས་གསུངས་པ་ཡིན་ནོ། །ནོར་གཅིག་པའི་སྤུན་འདྲའི་དགེ་འདུན་ལ་ཞེས་བྱ་བ་ལ་སོགས་པས་དགེ་འདུན་གྱི་དོན་དུ་རྐུ་བའི་ཉེས་པ་སྟོན་པར་བྱེད་དེ། ནོར་གཅིག་པའི་སྤུན་གང་ཡིན་པ་དེ་ནི་ནོར་གཅིག་པ་སྟེ། ནོར་གཅིག་པ་ཡང་དེ་ཡིན་ལ་སྤུན་ཡང་དེ་ཡིན་པས་ན་ནོར་གཅིག་པའི་སྤུན་ཏེ་གཏེར་མ་བགོས་པ་ཞེས་བྱ་བའི་ཐ་ཚིག་གོ །དེ་དང་འདྲ་བར་འཇུག་པ་ཡིན་པའི་ཕྱིར་ནོར་གཅིག་པའི་སྤུན་འདྲའི་དགེ་འདུན་ནོ། །དཔེར་ན་སྤུན་ནོར་མ་བགོས་པ་དག་སོ་སོར་བགོ་སྐལ་གྱི་བདག་པོ་ཉིད་ཡིན་པ་དེ་བཞིན་དུ། དགེ་སློང་
དག་ཀྱང་དགེ་འདུན་གྱི་ལ་སོ་སོ་ནས་བདག་གིར་བྱེད་ཅེས་བྱ་བའི་དོན་ཏོ། །གང་གི་ཕྱིར་འདི་ལྟར་གཅིག་གམ་གཉིས་མང་པོས་དགེ་འདུན་གྱི་དོན་དུ་རྐུ་བར་བྱེད་པ་ན་ཉེས་པར་འགྱུར་བ་སྤྱོད་པའི་ཚེ་དགེ་འདུན་དུ་གྱུར་པའི་དགེ་སློང་ཐམས་ཅད་ཀྱི་ཡང་སྐལ་བར་འགྱུར་རམ་མ་ཡིན་ཞེས་བརྟག་པར་མི་བྱ་ཞིང་དེ་ལྟར་བསམ་པར་མི་བྱའོ། །ཉིད་ནི་རིམ་པ་གཞན་དུ་སྦྱར་བར་བྱའོ། །གང་གི་ཕྱིར་གལ་ཏེ་དགེ་འདུན་གྱི་དོན་དུ་དེ་རྐུ་བར་བྱེད་ལ་དེ་ལྟ་ན་ཡང་རང་གི་དོན་ཉིད་ཅེས་བྱ་བའི་དབང་དུ་བྱས་ནས་དགེ་འདུན་ལ་ཅིའི་ཕྱིར་ཉེས་པར་རྣམ་པར་མ་གཞག་ཅེ་ན། གང་གི་ཕྱིར་སྔར་བཤད་པའི་རྐུ་སེམས་དང་ནི་ཞེས་བྱ་བ་ལ་སོགས་པའི་ཡན་ལག་དག་མེད་པ་དེའི་ཕྱིར་རྣམ་པར་མ་བཞག་པ་ཡིན་ནོ། །བཅོམ་ལྡན་འདས་ཀྱིས་ཞིང་རྐུས་པ་ཉེས་པར་འགྱུར་བ་ནི་གལ་ཏེ་དངོས་པོ་ཚང་ན་མཐའི་ཉེས་པར་འགྱུར་ལ། མ་ཡིན་ན་ཉེས་པ་ཆུང་བར་འགྱུར་རོ་ཞེས་གསུངས་པ་མ་ཡིན་ནམ་ཞེ་ན་གལ་ཏེ་དེ་ལྟར་དེ་ལྟ་བུ་དག་ཀྱང་དགེ་འདུན་གྱི་དབང་དུ་མཛད་ནས་བཀའ་དེ་ཡང་གསུངས་པ་ཡིན་ཏེ། ཞིང་ནི་བགོ་མིན་ཕྱིར་རོ། །གང་གི་ཕྱིར་ཞིང་ནི་བཙོང་བའི་ཕྱིར་འགོད་པར་མི་བྱེད་ལ་ཞིང་ཉིད་ཀྱང་འགོད་པར་མ་བྱེད་དེ། བགོ་བར་བྱ་བ་མ་ཡིན་པ་ཁོ་ནར་བཅོམ་ལྡན་འདས་ཀྱིས་གསུངས་པ་ཉིད་ཀྱི་ཕྱིར་རོ། །སྡོམ་ཅན་མང་འགྱུར་ཕྱིར་ཞེས་ཁས་བླངས་པ་སྟོན་པ་ཡིན་ཏེ། བགོ་བཤའ་བྱས་སུ་ཟིན་ཀྱང་སྡོམ་ཅན་དེ་བསྟན་པ་འདི་ལ་རབ་ཏུ་བྱུང་བ་ངག་མང་བར་འགྱུར་བའི་རྒྱུའི་ཕྱིར་དགེ་འདུན་གྱི་དབང་དུ་བྱས་ནས་ཉེས་པར་འགྱུར་བ་དཔྱད་པ་ནི་མ་ཡིན་གྱི། འོན་ཀྱང་རྐུ་བ་ཁོ་ནའི་དབང་དུ་བྱས་པ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཞིང་བཙོང་བའི་ཕྱིར་རམ་ཞིང་ཉིད་འགོད་པར་བྱེད་པ་དེའི་ཚེ་ཉེས་པ་རྣམ་པར་གཞག་པར་བྱ་བ་ཡིན་ན་དེ་ཡང་དགེ་འདུན་དུ་གྱུར་པའི་དགེ་སློང་ཐམས་ཅད་ལ། བཅོམ་ལྡན་འདས་ཀྱིས་བཀག་པར་མཛད་ལ། དེ་ལྟ་ན་ཡང་ཇི་སྟེ་འགོད་པར་བྱེད་ན་ནི་རིན་ཐང་ཚང་བར་མི་འགྱུར་ཏེ། རབ་ཏུ་བྱུང་བ་མང་བ་ཉིད་ཀྱི་ཕྱིར་ཞེས་བྱ་བའི་བར་དུའོ། །གཞན་དུ་ཞེས་བྱ་བ་ནི་ཅི་དེ་ལྟར་བཀག་པ་མཛད་པས་རྐུ་བ་པོ་ལ་ཉེས་པར་འགྱུར་གྱི། དགེ་འདུན་ལ་ནི་མ་ཡིན་ནོ། །དེའི་ཚེ་ཡང་གལ་ཏེ་དངོས་པོ་ཚང་ན་རྩ་བའི་ཉེས་པར་
འགྱུར་ལ། དངོས་པོ་མ་ཚང་ན་ཉེས་པ་ཆུང་བར་འགྱུར་རོ་ཞེས་རིན་ཐང་བརྟག་པ་ཁོ་ནར་མི་འགྱུར་ཏེ། འགའ་ཞིག་ཏུ་ཡང་འཚོད་བར་མི་བྱེད་པ་ཉིད་ཀྱི་ཕྱིར་དང༌། ཐམས་ཅད་ལ་ན་ན་ཀའི་བཞི་ཆ་གཅིག་ཚང་བར་མི་འགྱུར་བའི་ཕྱིར་རོ། །དེ་ལྟ་ན་ཅིའི་ཕྱིར་ཉེས་པ་ཆུང་བར་འགྱུར་ཞེས་བསྟན་ཅེ་ན། །བཅོམ་ལྡན་འདས་ཀྱིས་ལུང་ལས་རིན་ཐང་བརྟག་པ་གསུངས་པ་དེའི་ཕྱིར་དེ་ཉིད་ཀྱི་དབང་དུ་བྱས་པ་ཡིན་ནོ། །དེ་ནི་མཚམས་ཀྱི་ཁོངས་སུ་གཏོགས་པའི་རྙེད་པ་ཡིན་ལ། དེ་ལ་ཡང་འགའ་ཞིག་གི་ཚེ་ན་ནི་ཉུང་ཞིང༌། འགའ་ཞིག་གི་ཚེ་ན་ནི་མང་བ་ཡིན་པས་གང་གི་ཚེ་ཉུང་བར་གྱུར་པ་དེའི་ཚེ་རིན་ཐང་ཚང་བར་འགྱུར་བ་མ་ཡིན་ནོ། །སྡོམ་ཅན་མང་འགྱུར་ཕྱིར་ཞེས་བྱ་བ་དེ་ཅིའི་ཕྱིར་བསྟན་ཞེ་ན། དེ་ནི་ཡིན་ན་འོན་ཀྱང་བསྟན་བཅོས་མཛད་པའི་དགོངས་པ་འདི་བཅོམ་ལྡན་འདས་ཀྱིས་དངོས་པོ་ནི་རྣམ་པ་གསུམ་སྟེ། ཟས་དང༌། སྣོད་སྤྱད་དང༌། གཞག་པར་བྱའོ་ཞེས་གསུངས་སོ། །དེ་ལ་བཟའ་བ་ནི་བཟའ་བའི་དོན་གྱི་འབྲུ་ལ་སོགས་པ་ཡིན་ཏེ། བཟའ་བར་བྱ་བ་ཡིན་པའི་ཕྱིར་རོ། །སྣོད་སྤྱད་ནི་ཆོས་གོས་དང་ལྷུང་བཟེད་ལ་སོགས་པ་ཡིན་ཏེ། བགོ་བར་བྱ་བ་ཡིན་པའི་ཕྱིར་རོ། །གཞག་པར་བྱ་བ་ནི་ཞིང་དང་ཁང་ཁྱིམ་དང༌། ཚོང་ཁང་ལ་སོགས་པ་ཡིན་ཏེ། ཕྱོགས་བཞི་པའི་དགེ་འདུན་གྱི་དོན་དུ་གཞག་པར་བྱ་བ་ཡིན་པའི་ཕྱིར་རོ། །དེ་ལ་འདིར་ཡང་ཕྱོགས་བཞི་པར་ཞུགས་པའི་དགེ་འདུན་མང་བ་ཉིད་ཀྱི་ཕྱིར་རོ་ཞེས་བྱ་བར་ཤེས་པར་བྱའོ། །འདིར་སྨྲས་པ། དེ་ལྟ་ན་ཡང་མཚམས་དང་གནས་ཐ་དད་པའི་ཞིང་ལ་སོགས་པའི་སྐལ་བ་ཇི་ལྟར་རིགས་པ་ཉིད་ཡིན་ཞེ་ན། མཚམས་ནང་ན་གནས་པ་ཁོ་ན་ལ་རིགས་པ་ཡིན་ཏེ། དེ་ཡང་འགའ་ཞིག་ཏུ་ཉུང་བར་གྱུར་པས་རིན་ཐང་ཚང་བར་གྱུར་པ་དེའི་ཕྱིར་ཡང་རྣམ་པར་དཔྱད་པར་བྱ་བ་ཡིན་ན། འོན་ཀྱང་གཞན་དག་གཞན་དུ་དགེ་འདུན་ལ་ཉེས་པར་འགྱུར་བ་ཟློག་པར་བྱེད་ལ། འདུལ་བ་ལ་ལས་ཀྱང་འདི་སྐད་དུ་དགེ་སློང་གཉུག་མར་གནས་པ་ཞིག་གིས་དགེ་འདུན་གྱི་ཞིང་རྨོར་བཅུག་པ་ལ། དེ་དང་ཧ་ཅང་ཐག་མི་རིང་བ་ཞིག་ན་ཁྱིམ་བདག་གི་ཞིང་ཡོད་པ་དེ་ཡང་རྨོར་བཅུག་པ་དང༌། ཁྱིམ་བདག་དེ་ཡང་འོངས་ནས་བཙུན་པ་ཅིའི་ཕྱིར་བདག་གི་ཞིང་ཁྱོད་ཀྱིས་རྨོར་བཅུག་ཅེས་སྨས་པ་དང༌། ཞིང་འདི་ནི་ཁྱོད་
ཀྱི་མ་ཡིན་གྱི་དགེ་འདུན་གྱི་ཡིན་ནོ། །དེས་བཙུན་པ་མི་མ་ཡིན་པའི་ཆེ་བཞི་དག་བསྟན་པར་བྱའོ་ཞེས་སྨྲས་ནས། ཁྱིམ་བདག་དེས་སྔོན་ས་མཚམས་ཀྱི་མུ་ཕུར་བ་བཙུགས་པ་དེ་བརྐོས་ནས་བསྟན་པ་དང༌། དགེ་སློང་གིས་ཞིང་རྨོ་བ་བོར་རོ། །ཁྱིམ་བདག་དེ་སོང་བ་དང་དེས་ཕུར་པ་དེ་ནང་དུ་འཇུགས་སུ་བཅུག་ནས་ཞིང་དེ་རྨོར་བཅུག་པ་ན་ཁྱིམ་བདག་དེ་ཡང་འོངས་ནས་བཙུན་པ་ཁྱོད་ཁར་རྩང་བདག་གིས་ཕམ་པར་བྱས་ན་ཅི་ད་ཡང་རྨོར་འཇུད་དམ་ཞེས་སྨྲས་པ་དེ་ཡང་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དངོས་པོ་ཚང་ན་མཐའི་ཉེས་བྱས་སུ་འགྱུར་ལ། འོན་ཏེ་དངོས་པོ་མ་ཚང་ན་ཉེས་བྱས་ཆུང་བར་འགྱུར་རོ་ཞེས་འབྱུང་བ་ཡིན་ནོ། །དེ་ལ་འདི་སྐད་དུ་གང་གིས་བརྐུས་ཤིང་གང་འགྱོད་པ་སྐྱེས་ལ་རྐུ་བའི་སེམས་གང་ལ་ཡོད་པ་དེ་ཉིད་ལ་ཉེས་པར་རྣམ་པར་གཞག་པར་བྱ་སྟེ། གནས་སྐབས་དེ་ནི་དགེ་འདུན་གྱི་སྐབས་མ་ཡིན་པ་ཉིད་ཀྱི་ཕྱིར་དང༌། རྐུ་སེམས་ལ་སོགས་པ་མེད་པའི་ཕྱིར་རོ་ཞེས་བྱ་བ་ནི་ལན་ནོ། །མེ་ཏོག་ལ་སོགས་པ་བཏུས་པས་རྐུ་བ་ཇི་ལྟར་བརྐུས་པར་འགྱུར་ཞེ་ན། གང་ཞིག་བཏུས་དང་ཞེས་བྱ་བ་ལ་སོགས་པ་སྨོས་ཏེ། མེ་ཏོག་ལ་སོགས་པ་གང་ཞིག་བཏུས་པ་ནི་བཏུས་ནས་རྐུ་བའོ། །གོས་ལ་སོགས་པར་གང་ཞིག་བསྡུས་པ་ནི་བརྟུལ་ཏེ་རྐུ་བའོ། །སྐྱེད་ཤིང་ཡང་རུང་བ་ནི་གང་ཞིག་རྐུ་བའོ། །རྐུ་བ་དེ་ལ་མེ་ཏོག་དང་འབྲས་བུ་བཏུས་པའི་ཕུང་པོ་དང་ཚོགས་བསྐྱོད་པ་ཁོ་ན་བརྐུས་པ་ཡིན་ཏེ། ས་ལས་སྦགས་པར་གྱུར་ཅེས་བྱ་བའི་དོན་ཏོ། །དེ་བཞིན་དུ་གོས་ལ་སོགས་པའི་ཚོགས་བསྡུས་པ་དང༌། སྐྱེད་ཤིང་དག་ཀྱང་ངོ༌། །སྐྱེད་ཤིང་ཞེས་བྱ་བ་ནི་མེ་ཏོག་ལ་སོགས་པའི་ཤིང་དག་ཉེ་བར་མཚོན་པར་བྱེད་པ་ཡིན་ནོ། །ཇི་ལྟར་ཡང་ཟློག་པའི་སྦྱོར་བ་མེད་པ་དེ་ལྟ་ན་ཡང་བཏུས་ཤིང་ཞེས་ཟློས་པའི་དོན་དུ་བལྟ་བར་བྱའོ། །གཞན་དུ་བཏུས་དང་བརྟུལ་ཏེ་ཞེས་བྱ་བ་དོན་མེད་པར་འགྱུར་ཏེ། སྤྱིར་གནས་ནས་སྤགས་པ་རྐུ་བ་ཉིད་དུ་བསྟན་པ་ཉིད་ཀྱི་ཕྱིར་རོ། །དང་ནི་སྡུད་པར་བྱེད་པ་ཡིན་ལ་ཉིད་ནི་ངེས་པར་གཟུང་བའོ། །མེ་ཏོག་ལ་སོགས་པའི་ཤིང་ནི་ཕྱུང་ནས་བརྐུས་ཞེས་རྒྱས་པ་ལས་ཞེས་བྱ་བ་ནི་དེ་ལྟར་གཞུང་རྒྱས་པ་ལས་ཞེས་བྱ་བའི་དོན་ཡིན་ནོ། །
རྒྱས་པ་ཞེས་བྱ་བ་ནི་རྣམ་པར་འབྱེད་པ་ལ་བྱ་བ་དེའི་ཕྱིར་སྔར་ཕྱུང་ནས་ཕྱིས་རྐུ་བར་བྱེད་ཅེས་བྱ་བའི་དོན་འདིར་འགྱུར་བ་མ་ཡིན་ནམ། དེ་བས་ན་ཕྱུང་བ་ནི་སྦྱོར་བ་ཡིན་ལ་གལ་ཏེ་ཕྱིས་རྐུ་བར་བྱེད་ན་དངོས་པོ་ཇི་ལྟ་བ་བཞིན་དུ་ཉེས་པར་འགྱུར་ཞིང་མ་ཡིན་ན་སྦྱོར་བའི་ཉེས་བྱས་ཙམ་ཁོ་ནར་འགྱུར་རོ་ཞེས་ངེས་པར་བྱས་པ་ཡིན་ན། དེ་ཇི་ལྟར་ན་སྐྱེད་ཤིང་ཡང་རུང་སྤགས་པ་ཉིད་ན་བརྐུས་ཞེས་བརྗོད་ཅེ་ན། དེ་ལ་ཉེས་པ་ཡོད་པ་མ་ཡིན་ཏེ་དུས་མཚུངས་པ་ཉིད་ཀྱི་ཕྱིར་རོ། །ཅི་དེ་ལྟ་བུ་མཐོང་ངམ་ཞེ་ན། མཐོང་སྟེ་ཁ་གདངས་ནས་ནི་ཞེས་བྱ་བ་ལ་སོགས་པ་སྨོས་པ་ཡིན་ནོ། །ཁ་གདངས་ནས་ནི་ཉལ་བ་ཇི་བཞིན་ནོ་ཞེས་བྱ་བ་ནི་ཇི་ལྟ་བ་བཞིན་དུ་ཞེས་བྱ་བའི་དོན་ཡིན་ཏེ། སྔར་ཁ་གདངས་ནས་ཕྱིས་གཉིད་ལོག་པ་ནི་མ་ཡིན་གྱི་འོན་ཀྱང་དུས་མཚུངས་པ་ཁོ་ན་ལ་ཡིན་ནོ། །དེ་བཞིན་དུ་མིག་བཙུམས་ནས་དགོད་ཅེས་བྱ་བ་དང༌། རྟེན་ཅིང་འབྲེལ་པར་འབྱུང་བ་ཞེས་བྱ་བ་དེ་ལྟ་བུ་ལ་སོགས་པ་དུས་མཚུངས་པ་ཁོ་ན་ལ་ཡིན་པ་དེ་བས་ན་ཤིང་ཕྱུང་ནས་རྐུ་བར་བྱེད་ཅེས་བྱ་བའི་དོན་འདིར་འགྱུར་རོ། །ཇི་ལྟར་ཡང་རབ་ཏུ་བྱུང་བ་རྒྱན་འགྱེད་པ་མི་གནང་བ་དེ་ལྟ་ན་ཡང་འགའ་ཞིག་གལ་ཏེ་སྤྱོད་ན་ཉེས་པར་འགྱུར་བ་རྒྱན་པོ་དོར་བྱས་ཞེས་བྱ་བ་ལ་སོགས་པས་འཆད་པར་བྱེད་པ་ཡིན་ཏེ། རྒྱན་དེ་རྒྱན་འགྱེད་པའི་ཡུལ་ལ་ལོག་པའི་ཐ་སྙད་དུ་བྱ་བའི་སྒོ་ནས་གཞན་ལ་དོར་བྱས་ཏེ་རྒྱལ་བར་གྱུར་ན། དངོས་པོ་ཇི་ལྟ་བ་བཞིན་དུ་ཉེས་པར་འགྱུར་ཏེ། དཔེར་ན་ཨུ་ཤུད་ཀྱི་རྒྱན་གཏོང་བར་བྱེད་པ་ན་རྒྱན་གྱི་མིག་ཇི་ལྟ་བ་བཞིན་དུ་ཤ་རི་ཀ་སྤོ་བར་བྱ་བ་ཡིན་ལ། གཞན་དུ་གཏོང་བར་བྱེད་པ་དེས་གལ་ཏེ་རྒྱལ་བར་གྱུར་ན་དངོས་པོ་ཇི་ལྟ་བ་བཞིན་དུ་ཉེས་པར་འགྱུར་རོ་ཞེས་བྱ་བའི་ཐ་ཚིག་གོ །རྒྱན་ལ་སོགས་པ་གང་ཡིན་པ་དེ་ནི་རྒྱན་པོ་ལ་སོགས་པའོ། །དེའི་ཁོངས་སུ་གཏོགས་པའི་གྲངས་ཏེ་རྩིས་དེས་ཕ་རོལ་པོ་ལ་དོར་བྱེད་པ་ནི་རྒྱན་པོ་ལ་སོགས་པའི་གྲངས་ལ་དོར་བྱེད་པའོ། །དོར་བྱེད་པ་ཞེས་བྱ་བ་ནི་གཞན་གྱི་ནོར་འཕྲོག་པའི་ཆེད་དུ་ལོག་པའི་ཐ་སྙད་བྱེད་པ་ཡིན་ཏེ། དཔེར་ན་གཉིས་དང་གསུམ་དང་བཞི་ཞེས་བགྲང་བར་བྱ་བ་ལ་བདག་ཉིད་ཀྱི་བགྲང་བའི་ཚེ་གཉིས་དང་བཞི་དང་དྲུག་ཅེས་བགྲང་བར་བྱེད་པ་གང་ཡིན་པ་དེ་ནི་དོར་བྱེད་པ་ཞེས་བྱ་བ་ཡིན་པ་ལྟ་བུའོ། །དེའི་ཕྱིར་དེས་རྐུ་བ་ནི་དོན་གྲུབ་
མ་ཐག་པ་ལ་བྱ་བ་སྟེ། ཐོབ་པའམ་ཁས་བླངས་པའམ་གཞན་དུ་བསྒྲུབས་པ་དེ་ཁོ་ནས་བརྐུས་པར་འགྱུར་རོ། །དེ་བཞིན་དུ་མཚན་མ་སྟེ་གཅིག་ལ་སོགས་པའི་ཨང་ག་སྐྱེད་པ་ནི་བདག་ཉིད་ཀྱི་གཅིག་གི་དོན་གྱི་ཨང་ག་བྱ་བ་ཡིན་པ་ལ་བཅུ་ལ་སོགས་པའི་དོན་གྱི་ཨང་ག་བྱེད་ཅིང་ཐམས་ཅད་ཀྱི་ཐམས་ཅད་དུ་མེད་པ་དེ་སྐྱེད་པར་བྱེད་པའོ། །གཞན་དག་གི་ལོག་པར་བྱེད་ཅིང་ཐམས་ཅད་ཀྱི་ཐམས་ཅད་དུ་གཞན་དུ་དོར་བ་ན་ཕྱི་བའོ། །དེའི་ཕྱིར་དེས་མཚན་མ་དེ་ཉིད་གནས་གཞན་དང་པོ་ལ་སོགས་པར་གཞག་པར་བྱ་བ་གང་ཡིན་པ་གཉིས་པ་ལ་སོགས་པར་འཇོག་པ་ནི་གཞན་དུ་བཞག་པ་ལ་བྱའོ། །བོར་བ་ནི་གཞན་དག་གིས་ལོག་པར་བྱས་པའི་སྒོ་ནས་ཡིན་ཏེ། དེའི་ཕྱིར་དེ་གཉིས་ནི་གནས་གཞན་དུ་ནི་བཞག་གམ་བོར་བའོ། །སྡེ་པ་གཞན་དུ་བགྲང་ཞིང་བསྙོན་པ་དང་ཞེས་བྱ་བ་ནི་གལ་ཏེ་སྦྱིན་བདག་གིས་སྡོམ་ཅན་རབ་ཏུ་མང་བ་ཉིད་ཀྱི་ཕྱིར་རྩོད་པ་མེད་པར་བྱ་བའི་དོན་དུ་སྡེ་པར་བྱས་ནས་སྦྱིན་པ་སྦྱིན་པར་བྱེད་པ་ན། ཅི་དེ་ལ་དགེ་ཚུལ་རྐུ་སེམས་དང་བཅས་པ་ཉིད་ཀྱིས་བདག་ཉིད་སྡེ་པ་གཞན་ལ་བགྲང་བར་བྱེད་པ་དེའི་ཚེ་ཡང་སྦྱིན་བདག་གིས་ཅི་ཁྱོད་གཞན་དུ་གྲངས་པ་མ་ཡིན་ནམ་ཞེས་དྲིས་པ་ན་དེས་ཀྱང་བདག་དེར་མ་བགྲངས་སོ་ཞེས་སྙོན་པར་བྱེད་པ་དེ་ལྟར་ན་སྡེ་པ་གཞན་དུ་བགྲང་ཞིང་བསྙོན་པའོ། །དང་ནི་སྡུད་པར་བྱེད་པའི་དོན་ཡིན་གྱི་རྣམ་པར་རྟོག་པའི་དོན་ནི་མ་ཡིན་ཏེ། དེ་ལ་མི་སྲིད་པའི་ཕྱིར་རོ། །རྣམ་པར་རྟོག་པ་ནི་ཕྱོགས་ཉིད་ལ་འགྱུར་ན་དེ་འདི་ལ་མེད་པས་དེ་བཞིན་དུ་གཞན་ལ་ཡང་བལྟ་བར་བྱའོ། །ཚིག་མང་པོ་ལ་ནི་སྡེ་བ་སྦྱོར་ཉམས་པ་སྤང་བའི་དོན་ཏོ། །དེ་བཞིན་དུ་ཚུལ་མིན་ཞེས་བྱ་བ་ནི་ཚུལ་མ་ཡིན་པས་ཐོབ་པར་བརྗོད་ཅིང་སྟོན་པས་ན་ཚུལ་མིན་པས་ནི་ཐོབ་པར་བརྗོད་པ་སྟེ། དེས་རྐུ་བ་ཡང་གྲུབ་མ་ཐག་ཁོ་ན་ན་བརྐུས་པར་འགྱུར་རོ་ཞེས་བྱ་བར་ཐམས་ཅད་ལ་སྦྱར་བར་བྱ་སྟེ། དཔེར་ན་དབྱར་གནས་པའི་ཡོན་བདག་གིས་ཡོན་སྦྱིན་པར་གྱུར་པ་ན་གཞན་དུ་ཚུལ་དུ་ཞུགས་པའི་དགེ་ཚུལ་གྱིས་ཀྱང་སྨྲས་པ། བདག་ཀྱང་འདིར་གནས་པ་ཡིན་གྱི་རྙེད་པ་དེ་བདག་ལ་ཡང་བྱིན་ཅིག་ཅེས་སྨྲས་ནས་དེར་རྙེད་པ་གྲུབ་ན་དངོས་པོ་ཇི་ལྟ་བ་དང་བསམ་པ་ཇི་ལྟ་བ་བཞིན་དུ་ཉེས་པར་འགྱུར་བར་རིག་པར་བྱ་བ་ལྟ་བུའོ། །གཞན་གྱི་ཁ་བརྐུས་ལ་སོགས་ཚུལ་གྱིས་ཞེས་བྱ་བ་ནི་གཞན་ཏེ་ཕ་རོལ་
པོའི་ཁ་བརྐུས་པ་ནི་སྙད་བཏགས་པ་ཡིན་པས་ན་གཞན་གྱི་ཁ་བརྐུས་པ་སྟེ་འདི་ལྟར་ཆེ་གེ་མོ་ཞིག་གིས་དངོས་པོ་ཆེ་གེ་མོ་བྱིན་ཅིག་ཅེས་ཟེར་རོ་ཞེས་སྨྲ་བ་དེ་ནི་གཞན་གྱི་ཁ་རྐུ་བའོ། །དེ་ལ་སོགས་པའི་རྣམ་པ་དེ་ལྟ་བུ་གང་དག་ཡིན་པ་དེ་དག་ནི་གཞན་གྱི་ཁ་བརྐུས་ལ་སོགས་སོ། །གཞན་གྱི་ཁ་བརྐུས་ལ་སོགས་ཀྱང་དེ་ཡིན་ལ་ཚུལ་ཡང་ཡིན་པས་གཞན་གྱི་ཁ་བརྐུས་ལ་སོགས་ཚུལ་ལོ། །ཚུལ་ནི་ལུགས་ཡིན་པ་དེ་བས་ན་དེས་རྐུ་བ་ནི་གྲུབ་མ་ཐག་ཁོ་ནར་བརྐུས་པར་འགྱུར་རོ་ཞེས་འདོད་པ་སྟེ་དགོངས་པའོ། །དང་ནི་སྔ་མ་དང་འདི་མཚུངས་པར་སྡུད་པར་བྱེད་པ་ཡིན་ནོ། །ད་ནི་ཇི་ལྟར་ན་བསྐྱིས་པ་བརྐུས་པར་འགྱུར་བ་བསྐྱིས་པར་གྱུར་ཏམ་ཞེས་བྱ་བ་ལ་སོགས་པས་སྟོན་པར་བྱེད་དེ། བསྐྱིས་པས་བསྒྲུབས་པ་ནི་བསྐྱིས་པར་གྱུར་པ་སྟེ། བུན་དུ་བླངས་པར་གྱུར་ཅེས་བྱ་བའི་ཐ་ཚིག་གོ །དེ་ནི་འདིར་དོན་གྱི་དོར་བྱས་ནས་བསྐྱིས་པར་གྱུར་བ་ཞེས་བསྟན་ཏོ། །གཞན་གྱིས་བཅོལ་བ་ནི་གཏམས་པ་ཞེས་བྱ་སྟེ། འདི་ཉིད་གཞག་པ་བྱ་བར་གྲགས་པ་ཡིན་ནོ། །བརྙས་པ་ཞེས་བྱ་བ་ནི་དུས་དེ་སྲིད་ཅིག་ཏུ་བླངས་པ་ཡིན་པ་དེ་བས་ན་དེ་དག་ལ་བསྙོན་པར་གྱུར་པ་ནི་སྙོན་པར་བྱེད་པའོ། །དེའི་ཕྱིར་དེས་གཏན་ལ་ཕབ་པ་ལས་ཉེས་པར་གྱུར་ཏེ། ཐམས་ཅད་ཀྱི་ཐམས་ཅད་དུ་གཞན་གྱི་བསམ་པ་རྒྱུན་བཅད་པར་གྱུར་པ་ལ་གཏན་ལ་བབ་ན་ཞེས་བྱ་སྟེ། དཔེར་ན་བདག་གིས་ནོར་དེ་ཡོངས་སུ་གཏང་བར་བྱའོ། །བདག་གིས་ཀུན་ནས་ཉོན་མོངས་པ་འདིས་དགོས་པ་མེད་དོ་ཞེས་བྱ་བ་ལྟ་བུའོ། །གཏམས་པ་ཡང་རྣམ་པ་གཉིས་ཏེ་གྲངས་རྒྱ་ཆད་པར་བྱས་ནས་བཅོལ་བའི་མངོན་སུམ་དུ་གཏད་པ་དང༌། སྣོད་དུ་ཆུད་པར་བྱས་ནས་རྒྱས་བཏབ་པའོ། །དེ་ལ་སྔར་སྨོས་པ་ནི་གོང་དུ་བསྟན་པས་ད་ནི་གཉིས་པ་བཞག་པ་དང་གཏམས་པར་གྱུར་པས་ཞེས་བྱ་བ་ལ་སོགས་པས་འཆད་པར་བྱེད་དེ། བཞག་པ་ཡང་དེ་ཡིན་ལ་གཏམས་པ་ཡང་ཡིན་པས་བཞག་པ་དང་གཏམས་པར་གྱུར་པ་སྟེ། སྣོད་དུ་བཅུག་ནས་བཅོལ་བར་གྱུར་པ་ཞེས་བྱ་བའི་ཐ་ཚིག་གོ །དེ་རྐུ་བ་ནི་གཏན་ལ་ཕབ་པ་ཁོ་ན་བརྐུས་པ་ཡིན་ནོ། །དེ་ལ་བསམ་པའི་རྒྱུད་གཅོད་པ་མཚོན་པར་བྱེད་པའི་གཏན་ལ་ཕབ་པའི་རྐུ་བའི་དབྱེ་བ་རྣམ་པ་གསུམ་དུ་འགྱུར་རོ། །ད་ནི་དབྱེ་བ་དེ་ཡང་སྤགས་པ་དང་མཉམ་པར་ཞེས་བྱ་བ་ལ་སོགས་པ་སྟོན་པར་བྱེད་དེ། སྤགས་
པ་ནི་གནས་བསྐྱོད་ནས་པའོ། །སྤགས་པ་དང་མཉམ་པ་ནི་དུས་མཚུངས་པའོ། །དེས་གཏན་ལ་འབེབས་པ་སྟེ་གཏན་ལ་འབེབས་པར་བྱེད་པ་ཁོ་ནས་ཉེས་པར་འགྱུར་རོ། །སྔར་སྨོས་པའི་ཉིད་འདར་ཡང་རྗེས་སུ་དྲང་བར་བྱའོ། །ཡང་ན་ནི་སྤགས་པའི་འོག་ཏུ་ཞེས་བྱ་བ་ལ་ཡང་གི་སྒྲ་ནི་ཕྱོགས་གཞན་སྟོན་པར་བྱེད་པ་ཡིན་པའི་ཕྱིར་ཡང་ན་གནས་ལས་སྤགས་པའི་འོག་ཏུ་གཏན་ལ་ཕབ་པར་གྱུར་ན། དེ་ལ་ཡང་གཏན་ལ་བབ་པ་ལས་ཉེས་པར་འགྱུར་བར་རིག་པར་བྱའོ་སྔར་གཏན་ལ་འབེབས་པ་སྦྱོར་བ་ཡིན་ཞེས་བྱ་བ་ནི་གནས་ནས་སྤགས་པའི་གོང་དུ་གཏན་ལ་འབེབས་པ་ནི་སྦྱོར་བ་ཡིན་ཏེ། སྦྱོར་བའི་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །དེ་བཞིན་བསྙོན་ན་ཞེས་བྱ་བ་ནི་ཁྱོད་ཀྱིས་མ་གཏམས་སོ་ཞེས་བྱ་བ་ལ་སོགས་པས་བརྫུན་གྱི་མཚན་ཉིད་ཅན་གྱི་སྙོན་པར་བྱེད་པ་སྟེ། སྦྱོར་བ་གཞན་ཡིན་ནོ་ཞེས་བྱ་བའི་དོན་ཏོ། །འདིར་རྩ་བར་འགྱུར་ཞེས་བྱ་བ་ནི་གནས་ནས་སྦགས་པ་བརྐུས་ན་དངོས་གཞིར་འགྱུར་རོ་ཞེས་བྱ་བའི་ཐ་ཚིག་གོ །དེ་བས་ན་འདིར་སྦྱོར་བ་ནི་གཉིས་སུ་འགྱུར་ཏེ། དེ་ལ་བདག་ཉིད་ཐ་སྙད་དུ་བྱེད་པས་ནོར་གྱི་བདག་པོ་ལ་གཏན་ལ་འབེབས་པར་བྱེད་པ་དང༌། གཞན་གྱིས་གནས་ནས་སྐྱོད་པར་བྱེད་པ་དང༌། བཟློག་པའི་སྒོ་ནས་ཡིན་ཏེ། དེ་ལྟར་གཞན་དུ་ཡང་སྦྱར་བར་བྱའོ། །ཇི་སྐད་དུ་བཅོམ་ལྡན་འདས་ཀྱིས་འདུལ་བ་གཅིག་ལས་འཕྲོས་པ་ལས་འཕགས་པ་ཉེ་བ་འཁོར་གྱིས་བཙུན་པ་རྐུ་བ་དུ་མཆིས་ཞེས་ཞུས་པ་དང༌། ཉེ་བ་འཁོར་དྲུག་གོ །དྲུག་པོ་གང་ཞེ་ན། ནན་ཁུགས་ཀྱིས་རྐུ་བ་དང༌། སྒྱུ་ཐབས་ཀྱིས་རྐུ་བ་དང༌། གཏམས་པ་རྐུ་བ་དང༌། ཕྱིར་བསབ་པ་རྐུ་བ་དང༌། དང་ན་འཐེན་གྱིས་རྐུ་བ་དང༌། ཆོས་རྐུ་བའོ། །དེ་དག་གི་ནང་ནས་དུ་ཞིག་གིས་ནི་ཉེས་པར་འགྱུར། དུ་ཞིག་གིས་ནི་ཉེས་པར་མི་འགྱུར་ཞེ་ན། ཡང་དྲུག་པ་ཆོས་རྐུ་བ་གཅིག་པོ་མ་གཏོགས་སོ་ཞེས་གསུངས་པ་ཡིན་ནོ། །དེ་དག་ཀྱང་འདིར་ཉེས་པར་འགྱུར་བ་དང་ཉེས་པར་མི་འགྱུར་བ་བསྟན་པར་བྱ་སྟེ། དེ་ལ་ཆོས་རྐུ་བ་ཇི་ལྟར་འགྱུར་ཞེ་ན། ཡིད་བརྟན་གཞན་ལ་གོ་བར་བྱས་ནས་ནི་ཁྱེར་ཡང་ཉེས་པ་མེད་ཅེས་བྱ་བ་འདིས་བསྟན་པ་ཡིན་ཏེ། དེ་ནི་གཞན་གྱི་དཔེ་བརྐུས་ནས་དཔེ་བཤུས་པ་ཉེ་བར་མཚོན་པ་ཡིན་ནོ། །དེ་ཉིད་སློབ་དཔོན་གྱིས་དཔེ་རྐུ་བ་ལ་ཉེས་པ་མེད་ཅེས་གསུངས་
སོ། །སྒྱུས་རྐུ་བ་ནི་རྣམ་པ་གཉིས་ཏེ། ཆོམ་པོས་དང༌། དོར་ཐབས་ཀྱིས་སོ། །དེ་ལ་ཆོམ་པོས་ལེན་པ་ནི། རྐུ་སེམས་དང་ནི་འདོད་པ་དེ་ཉིད་དང༌། །ཞེས་བྱ་བ་ལ་སོགས་པས་བསྟན་ཏོ། །དོར་ཐབས་ཀྱིས་རྐུ་བ་ནི་རྒྱན་པོ་དོར་བྱས་རྒྱལ་ན་ཞེས་བྱ་བས་བསྟན་ཏོ། །གཏམས་པ་རྐུ་བ་ཡང་རྣམ་པ་གཉིས་ཏེ། བགྲངས་ནས་གཏམས་པ་དང༌། རྒྱས་བཏབ་ནས་གཏམས་པའོ། །བགྲངས་ནས་གཏམས་པ་རྐུ་བ་དང༌། ཕྱིར་བསབ་པ་རྐུ་བ་ནི། བསྐྱིས་པར་གྱུར་ཏམ་གཏམས་དང་བརྙས་པ་ལས། །ཞེས་བྱ་བས་བསྟན་ཏོ། །རྒྱས་བཏབ་ནས་གཏམས་པ་རྐུ་བ་ནི། གཞག་དང་གཏམས་པར་གྱུར་བ་རྐུ་བ་ནི། །ཞེས་བྱ་བ་ལ་སོགས་པས་བསྟན་ཏོ། །ནན་ཁུགས་ཀྱིས་རྐུ་བ་ནི། མངོན་སུམ་ཕྲོགས་པའང་དེ་དང་འདྲ། །ཞེས་བྱ་བ་འདིས་བསྟན་པ་ཡིན་ནོ། །དང་ན་འཐེན་གྱིས་རྐུ་བ་ནི་ཤོ་གམ་འཇོམས་པ་ཡིན་ཏེ། དེ་ནི་སྦྱིན་པར་བྱ་བ་འཇོམས་པར་བྱེད་པ་ཉེ་བར་མཚོན་པར་བྱེད་པ་ཡིན་ཏེ། སློབ་དཔོན་གྱིས་ནན་ཁུགས་ཀྱིས་འཇོམས་པ་རྐུ་བ་ཡིན་ནོ་ཞེས་གསུངས་པ་ཡིན་ནོ། །ཤོ་གམ་འཇོམས་པ་དེ་ཡང་རྣམ་པ་གཉིས་ཏེ། ནན་ཁུགས་དང༌། འཇབ་བུའོ། །དེ་ལ་ནན་ཁུགས་ཀྱིས་འཇོམས་པ་ནི་མངོན་སུམ་རྐུ་བ་ཞེས་བྱ་བས་བསྟན་ཏོ། །ཅིག་ཤོས་ནི་རྐུ་སེམས་དང་ནི་ཞེས་བྱ་བ་ལ་སོགས་པས་བསྟན་ཏོ། །ད་ནི་འདིར། དེ་ལྟར་རྐུ་དབྱེས་རྐུ་བ་རབ་ཕྱེ་བ། །འདི་ནི་འདུལ་བ་རྒྱ་མཚོ་དག་ལས་བསྡུས། །ཞེས་བྱ་བས་སྔར་བཤད་པའི་རྐུ་བའི་རབ་ཏུ་དབྱེ་བའི་ཉེ་བར་བསྡུ་བ་འཆད་པར་བྱེད་དེ་དེ་ལྟར་གྱི་སྒྲ་ནི་དེ་ལྟར་གྱི་དོན་ཏེ། དེ་ལྟར་བཤད་མ་ཐག་པའི་རྣམ་པས་ཞེས་བྱ་བའི་དོན་ཏོ། །རྐུ་བ་ནི་བརྐུ་བར་བྱ་བའི་རྫས་ཡིན་ལ་དབྱེ་བ་ནི་བརྐུ་བར་བྱ་བའི་དབྱེ་བ་ཡིན་པ་དེ་བས་ན་དེས་བསྡུས་པ་སྟེ། ཡང་དག་པར་བསྡུས་པ་ཡིན་ནོ། །བསྡུས་པ་དེ་གང་ཞེ་ན། འདི་ནི་ཞེས་བྱ་བ་སྨོས་ཏེ། བཤད་མ་ཐག་པའི་རྐུ་བའི་རབ་ཏུ་དབྱེ་བ་ཡིན་ཏེ་རྐུ་བར་བྱེད་པས་ན་རྐུ་བ་སྟེ། གཞན་གྱི་ནོར་འཕྲོག་པ་ཞེས་བྱ་བའི་བར་དུའོ། །དེ་ལ་རྐུ་བའི་དབྱེ་བ་ནི་ཉེས་པའི་དབྱེ་བ་ཡིན་ནོ། །དབྱེ་བའི་ཚིག་ལས་ཇི་ལྟར་ན་ཉེས་བྱས་ཀྱི་དབྱེ་བ་འཐོབ་པར་འགྱུར་ཞེ་ན། སྨྲས་པ། ཉེས་པ་དབང་དུ་བྱས་པ་ཉིད་ཡིན་པའི་ཕྱིར་རོ། །འདི་སྐད་དུ་བརྐུ་བར་བྱ་བའི་རྫས་ཀྱི་ཁྱད་པར་གྱི་སྒོ་ནས་དབྱེ་བ་བསྡུས་པ་ཡིན་ནོ་ཞེས་བསྟན་པར་འགྱུར་
ཏེ། འདི་ལྟར། མི་དབང་བསོད་སྙོམས་ཡོངས་སུ་བླངས་གྱུར་ན། །དེ་ནི་འཇིག་རྟེན་ཐ་སྙད་ཚུལ་གྱིས་འགྱུར། །གཞན་གས་གཏན་དུ་བྱིན་ལྟར་སྤྱོད་པ་དང༌། །སྨན་དང་སྔགས་ཀྱིས་ཀྱང་ནི་སྦྱིན་དུ་འཇུག །ཅེས་བྱ་བ་ལ་སོགས་པ་བལྟ་བར་བྱའོ། །གང་ཁོ་ན་ལས་བསྡུས་ཤེ་ན། འདུལ་བ་རྒྱ་མཚོ་ལས་ནི་ཞེས་བྱ་བ་སྨོས་ཏེ་ལུས་དང་ངག་གི་འཁྲུལ་པ་ལས་སེམས་རྣམ་པར་སྦྱོང་བར་བྱེད་ཅིང་ཁྱད་པར་དུ་འདིས་འདུལ་བར་བྱེད་པས་ན་འདུལ་བ་སྟེ། དེ་ཉིད་རྒྱ་མཚོ་ཡིན་པས་ན་རྒྱ་མཚོ་ཆེན་པོའོ། །གང་གི་ཕྱིར་རྒྱ་མཚོ་ཆེན་པོ་ཤིན་ཏུ་ཟབ་པ་དང༌། དཔག་པར་དཀའ་བ་དེ་བཞིན་དུ་འདུལ་བ་ཡང་ཡིན་པའི་ཕྱིར་འདུལ་བ་རྒྱ་མཚོ་ཞེས་བསྟན་ཏོ། །དེའི་ཕྱིར་དེ་ལས་བསྡུས་པ་ནི་བཤད་པ་ཡིན་ཞེས་བྱ་བའི་ཐ་ཚིག་གོ །དེ་སྐད་དུ་བརྗོད་པས་འདི་ནི་རང་གི་རྣམ་པར་རྟོག་པས་སྦྱར་བ་མ་ཡིན་ནོ་ཞེས་སྟོན་པར་འགྱུར་རོ། །ད་ནི་རང་གཞན་བང་ཆེན་ཞེས་བྱ་བ་ལ་སོགས་པས་རང་དང་གཞན་གྱི་བྱ་བའི་རྐུ་བ་ལ་ཁྱད་པར་མེད་པར་སྟོན་པར་བྱེད་དོ། དགེ་སྦྱོང་བདག་ཉིད་རྐུ་བ་དང་གཞན་རྐུར་བཅུག་པ་དང༌། བང་ཆེན་གཅིག་ནས་གཅིག་ཏུ་བརྒྱུད་པས་རྐུ་བར་བྱེད་པ་གང་ཡིན་པ་དེ་དག་ཐམས་ཅད་ཀྱང་དགེ་སྦྱོང་ཁོ་ནས་བརྐུས་པ་ཡིན་ནོ། །དེ་ལ་བདག་ཉིད་རྐུ་བ་ཞེས་བྱ་བ་ནི་གཞན་གྱི་བྱ་བ་ལ་ལྟོས་པ་མེད་པར་བདག་ཉིད་ཁོ་ན་རྐུ་བར་བྱེད་ཅེས་བྱ་བའི་དོན་ཏོ། །གཞན་དག་གིས་རྐུ་བར་བྱེད་པ་ནི་བདག་ཉིད་ཀྱིས་བྱིན་གྱིས་བརླབས་ནས་གཞན་བྱེད་པར་གྱུར་པའི་སྒོ་ནས་རྐུ་བར་བྱེད་པ་ཡིན་ནོ། །བང་ཆེན་དག་གིས་གཅིག་ནས་གཅིག་ཏུ་བརྒྱུད་པ་ནི་བང་ཆེན་གཅིག་ནས་གཅིག་སྟེ། བང་ཆེན་རྐུ་བ་པོས་མངགས་པ་ནི་ལུང་ཕོག་པ་ཉིད་ཡིན་པའི་ཕྱིར། འགའ་ཞིག་གམ་འགའ་ཞིག་གི་རྫས་ལྐོག་ཏུ་གྱུར་པ་ཁྱེར་ལ་ཤོག་ཤིག་ཅེས་དེ་ལ་གོ་བར་བྱས་པ་ཡིན་ལ། དེ་ལས་གཞན་པ་ནི་བང་ཆེན་གཅིག་ནས་གཅིག་ཡིན་ནོ། །དེ་ལ་སོགས་པ་གང་དག་ཡིན་པ་དེ་དག་ནི་བང་ཆེན་གཅིག་ནས་གཅིག་ལ་སོགས་པ་སྟེ། དང་པོའི་བང་ཆེན་དང་དུས་ཕྱིས་བྱུང་བའི་བང་ཆེན་ཀུན་ལ་བལྟ་བར་བྱའོ། །དེའི་ཕྱིར་བང་ཆེན་གཅིག་ནས་གཅིག་ལ་སོགས་པ་དེ་དག་གིས་ཀྱང་རྐུ་བར་བྱེད་ན། གང་དེས་ཀྱང་བརྐུས་པར་འགྱུར་ཏེ་བདག་ཉིད་འབའ་ཞིག་གིས་ནི་མ་ཡིན་གྱི། འོན་ཀྱང་སྐྱེས་བུ་གཞན་བྱེད་པར་གྱུར་པ་དག་གིས་
ཀྱང་བརྐུས་པ་ཡིན་ནོ། །ལམ་གྱི་སྒྲ་ནི་བང་ཆེན་གཅིག་ནས་གཅིག་ལ་སོགས་པས་ཀྱང་ཞེས་བྱ་བར་ཀྱང་གི་དོན་དུ་བལྟ་བར་བྱའོ། །ད་ནི་བང་བ་ལ་སོགས་པའི་སྣོད་ཕུག་ནས་དེར་བཅུག་པའི་འབྲུ་ལ་སོགས་པ་དང་བུམ་པ་ལ་སོགས་པ་ཕུག་ནས་དེར་ཆུད་པ་འཇུ་བའི་རྫས་བརྐུས་ན་ཇི་ལྟར་འགྱུར་ཞེ་ན། གཞི་ནས་རྒྱུན་གྱིས་རྐུ་བར་བྱེད་པ་ན། །ཀུན་དུ་འབྲེལ་བའི་རྒྱུན་ནི་གཅིག་ཉིད་ཡིན། །ཞེས་བྱ་བ་སྨོས་ཏེ། གཞི་ནི་སྤྱིར་འབྲུའི་སྣོད་དང་འཇུ་བའི་རྫས་ཀྱི་སྣོད་ཀྱི་སྤྱི་གཟུང་བ་ཡིན་ནོ། །དེ་ལ་དང་པོར་བུག་པ་བཏོད་ནས་འབྲུ་ལ་སོགས་པ་འཛག་པར་གྱུར་པ་ནི་གཞི་ནས་རྒྱུན་འབྱུང་བ་ཡིན་ནོ། །དེ་ལས་རྐུ་བ་ནི་རྣམ་པ་དེས་རྐུ་བ་ན་འབྲུ་ལ་སོགས་པ་གཅིག་ཏུ་གྱུར་པ་དེ་བརྐུས་བ་ཡིན་ནོ། །ཁྱད་པར་ཇི་ལྟ་བུ་ཞེ་ན། ཀུན་ཏུ་འབྲེལ་བ་སྟེ་ཡང་དག་པར་འབྲེལ་བའི་འབྲུ་ལ་སོགས་པའི་རྒྱུན་གང་ཡིན་པ་དེ་ནི་ཀུན་དུ་འབྲེལ་བའི་རྒྱུན་ནོ། །དེ་བརྐུས་པ་ཡིན་ཏེ། དཔེར་ན་བང་བ་ལ་སོགས་པ་ཕུག་ནས་འབྲུ་ལ་སོགས་པ་རྐུ་བ་ན་དང་པོ་འབྱུང་བ་ནས་བརྩམས་ཏེ་ཐ་མར་བྱུང་གི་བར་དུ་རྒྱུན་མི་འཆད་པར་འབྱུང་བ་དེ་ལ་དངོས་པོ་ཚང་ན་དངོས་གཞིར་འགྱུར་ལ་མ་ཡིན་ན་དངོས་པོ་ཇི་ལྟ་བ་བཞིན་དུ་འགྱུར་རོ། །ཡང་ན་རྒྱུན་བཅད་པ་དེ་ལ་རྒྱུན་འཆད་པ་རེ་རེ་ལ་ཡང་དངོས་པོ་མ་ཚང་ན་ཉེས་བྱས་ཆུང་བ་ཁོ་ན་རེ་རེར་འགྱུར་ལ་འོན་ཏེ་གཅིག་ལ་ཡང་དངོས་པོ་ཚང་ན་དངོས་གཞི་ཁོ་ནར་འགྱུར་བར་རིག་པར་བྱ་བ་ལྟ་བུའོ། །ད་ནི་དེ་ལྟར་ཁ་དོག་གཅིག་པ་གནས་གཅིག་སྟེ་ཞེས་བྱ་བ་ལ་སོགས་པས་གནས་གཅིག་པ་ཉིད་བསྟན་པ་བསྟན་པའི་སྒོ་ནས་རྐུ་བ་སྟོན་པར་བྱེད་དེ། ཇི་ལྟར་གོང་དུ་ཀུན་ནས་འབྲེལ་བའི་རྒྱུན་གཅིག་ཉིད་ཡིན་པ་དེ་ལྟར་འདིར་ཡང་བརྐུ་བར་བྱ་བའི་རྫས་ཀྱིས་ནོན་པའི་གནས་གཅིག་པ་ཉིད་ཡིན་པ་དེ་བས་ན་འདས་པར་གྱུར་ན་ཉེས་པར་འགྱུར་རོ་ཞེས་བྱ་བར་སྦྱར་བར་བྱའོ། །ཁྱད་པར་ཇི་ལྟ་བུ་ཞེ་ན། ཁ་དོག་གཅིག་པ་སྟེ་སྔོན་པོ་ལ་སོགས་པ་དེ་དག་ནི་ཁ་དོག་གཅིག་པའོ། །དེ་ཁྱད་པར་ཇི་ལྟ་བུ་ཞེ་ན། རི་མོ་སྟེ་རྡོ་རྒྱུས་ལ་སོགས་པའི་རི་མོ་ཡིན་ཏེ། དེ་ལ་སོགས་པ་གང་ཡིན་པ་དེ་ནི་བང་རིམ་ལ་སོགས་པའོ། །དེ་མེད་པ་ནི་བྲལ་བར་གྱུར་པའོ། །དེ་ལ་གཞན་ཡང་ཁྱད་པར་དུ་བྱེད་པ་ནི་མཐོན་དམན་དང་བྲལ་བའི་སའི་ཆ་སྟེ། ཡན་ལག་གང་ཡིན་པ་དེ་གཞི་མཉམ་པའོ། །དེའི་ཕྱིར་དེ་ལ་ཇི་སྐད་
དུ་བཤད་པའི་གནས་གཅིག་པ་ཉིད་གང་ཡིན་པ་དེ་ནི་རྫས་བཞག་པའི་གནས་ཡིན་ཏེ། དེ་ལས་གཞན་དུ་བསྐྱོད་པར་གྱུར་ན་དངོས་པོ་ཇི་ལྟ་བ་བཞིན་དུ་ཉེས་པར་འགྱུར་རོ་ཞེས་བྱ་བའི་ཐ་ཚིག་གོ །གླང་ཆེན་ལ་སོགས་ཞེས་བྱ་ལ་སོགས་པས་སྲོག་ཆགས་ཀྱི་ཡན་ལག་དག་གནས་ཉིད་དུ་བརྗོད་པར་བྱེད་དེ། གླང་པོ་དང་པོར་བྱས་པའི་གཞན་རྟ་དང་མ་ཧེ་ལ་སོགས་པ་ཡིན་པ་དེ་བས་ན་དེའིའོ། །ཁྱད་པར་ཇི་ལྟ་བུ་ཞེ་ན། མངོན་པ་སྟེ་ཤེས་པར་གྱུར་པའི་ཡན་ལག་རྩིབ་ལོགས་ལ་སོགས་པའི་མཚན་ཉིད་གང་ཡིན་པ་དེ་ནི་ཕྱོགས་མངོན་པར་གྱུར་པའོ། །ཕྱོགས་མཐོང་བར་མ་གྱུར་པས་ན་ཕྱོགས་ནི་མི་མངོན་པ་སྟེ། ཡང་ལག་གསལ་པོར་མ་གྱུར་པའོ། །ཤ་དང་ཁྲག་དང་པགས་པ་རྒྱས་པར་གྱུར་པའི་ཕྱིར་དེ་ཡང་གནས་གཅིག་པ་ཉིད་ཡིན་ནོ། །ནིའི་སྒྲ་ནི་ཡང་གི་དོན་ཡིན་གྱི། གླང་ཆེན་ལ་སོགས་ཀྱང་ཞེས་བྱ་བ་སྔ་མ་ལས་བྱེ་བྲག་ཏུ་བྱེད་པའི་དོན་ནི་མ་ཡིན་ནོ། །གཞན་དུ་ན་གླང་པོ་ཆེ་ལ་སོགས་པའི་ཕྱོགས་མི་མངོན་པ་ཁ་དོག་ཐ་དད་པ་རི་མོ་དང་ལྡན་པའི་གནས་ཀྱང་གནས་གཅིག་པ་ཉིད་དུ་འགྱུར་ཏེ། ནིའི་སྒྲ་མ་ལས་ཁྱད་པར་དུ་བྱེད་པ་ཉིད་ཡིན་པའི་ཕྱིར་རོ། །དེ་ལྟ་ན་བཤད་མ་ཐག་པའི་ཁ་དོག་གཅིག་པ་ཙམ་གྱིས་ཀྱང་གནས་གཅིག་པ་ཉིད་དུ་ཐོབ་པར་འགྱུར་ཏེ། དེ་ལྟ་ནི་མ་ཡིན་པ་དེའི་ཕྱིར་དོན་སྔ་མ་ཁོ་ན་རིགས་པ་ཡིན་ནོ། །དོང་གི་ནང་གི་འབྲུ་གནས་གཅིག་པ་ཉིད་དུ་སྟོན་པར་བྱེད་པ་ལ། དེ་ལྟར་ཞེས་བྱ་བ་རྗེས་སུ་འཇུག་པ་དེ་བས་ན་འབྲུ་གནས་གཅིག་པ་ཉིད་ཡིན་ནོ་ཞེས་བྱ་བའི་དོན་འདིར་འགྱུར་རོ། །ཁྱད་པར་ཇི་ལྟ་བུ་ཞེ་ན། ཁ་དོག་མཚུངས་པ་སྟེ་རིགས་འདྲ་བར་གྱུར་པའི་འབྲུའི་ཡན་ལག་གང་ཡིན་པ་དེ་ནི་ཁ་དོག་མཚུངས་ཆ་ཅན་ནོ། །དེ་ཁྱད་པར་ཇི་ལྟ་བུ་ཞེ་ན། དོང་གནས་ཏེ་དོང་ནི་བང་བའི་ཁྱད་པར་ཡིན་ཏེ། དེ་ན་ཡོད་པའི་ཕྱིར་དོང་ན་གནས་པ་ཡིན་ནོ། །དེ་ལ་འདིར་ཡང་དེ་ལྟ་བུར་གྱུར་པ་ཡང་ཞེས་བྱ་བར་ཡང་གི་སྒྲ་བལྟ་བར་བྱའོ། །ཁ་དོག་མཚུངས་ཆ་ཅན་འདི་དང་སྔར་གྱི་ཕྱོགས་ནི་མི་མངོན་པ་ཞེས་བྱ་བ་ནི་ཉེ་བར་མཚོན་པར་བྱེད་པ་ཡིན་པ་དེ་བས་ན། དེ་ལྟར་ཁ་དོག་གཅིག་པ་གནས་གཅིག་སྟེ། །ཞེས་བྱ་བ་ལ་སོགས་པ་གོང་དུ་བཤད་པ་ཐམས་ཅད་ཀྱི་མཚན་ཉིད་ཡིན་པར་བལྟ་བར་བྱའོ། གལ་ཏེ་དེ་ལྟ་
ཡིན་ན་དེ་གཉིས་ཅིའི་ཕྱིར་བརྗོད་དེ། དེ་ལྟར་ཁ་དོག་གཅིག་པ་གནས་གཅིག་སྟེ། །ཞེས་བྱ་བ་འདིས་རྟོགས་པ་ཉིད་ཀྱི་ཕྱིར་རོ། །བདེན་ཏེ་དེ་ལྟ་ན་ཡང་ཁ་ཅིག་དག་གླང་པོ་ཆེ་ལ་སོགས་པའི་སྲོག་ཆགས་ལ་མཐོན་དམན་ཡོད་ཀྱང་གཅིག་ཉིད་དུ་འཁྲུལ་པར་འགྱུར་བ་དང༌། དོང་ན་གནས་པའི་འབྲུ་རིགས་ཐ་དད་པ་དང་འདྲས་སུ་ཟིན་ཀྱང་གནས་གཅིག་པ་ཉིད་ཡིན་ནོ་ཞེས་འདོད་པ་དེ་བསལ་བར་བྱ་བའི་ཕྱིར་རོ། །དེ་ལྟར་ཞེས་བྱ་བ་དང༌། ཡང་གི་སྒྲ་རྗེས་སུ་འཇུག་གོ །རྩ་རྣམས་ཀྱིས་བཀྲམ་པ་ནི་རྩྭ་རྣམས་བཀྲམ་པའོ། །དེ་ལ་རྩྭ་རྣམས་བཀྲམ་པ་ཁྱད་པར་ཇི་ལྟ་བུ་ཞེ་ན། གཤིབས་པ་སྟེ་བར་མ་ཆད་པར་འདབ་འབྱོར་བའོ། །འདྲ་བ་ནི་ཁ་དོག་མཚུངས་པར་གྱུར་པའོ། །དེ་ལྟར་རྩྭ་རྣམས་བཀྲམ་པ་ཡང་གནས་གཅིག་པ་ཉིད་ཡིན་ནོ། །ཁྱད་པར་དག་བསྟན་ནས་སྤྱི་བརྗོད་པར་བྱ་བའི་ཕྱིར་གཞན་དག་ལ་ཡང་ཞེས་བྱ་བ་ལ་སོགས་པ་སྨོས་ཏེ། དེ་ལྟར་ཞེས་བྱ་བ་དང་ཡང་གི་སྒྲ་ཡང་རྗེས་སུ་འཇུག་གོ །དེ་ལྟར་གཞན་རྡོ་བྲག་ལ་སོགས་པ་ལ་ཡང་ཅི་རིགས་པར་དཔྱད་པར་བྱ་བ་ནི་རྡོ་ཁ་དོག་མཚུངས་པ་དང༌། རི་མོ་ལ་སོགས་པ་མེད་པ་ཉིད་དང༌། མཐོ་བ་དང་དམའ་བ་ལ་སོགས་པ་དང་བྲལ་བ་ཉིད་དུ་དཔྱད་པར་བྱ་སྟེ། ས་གཡོས་པ་ཉིད་ཀྱི་ཕྱིར་དེ་ཉིད་གནས་ཉིད་ཡིན་གྱི་ས་ནི་མ་ཡིན་ནོ། །ད་ནི་གཞན་དག་གི་རྫས་སྨན་ལ་སོགས་པས་རྣམ་པར་ཉམས་པར་བྱས་ནས་རྐུ་བ་གནས་སྐབས་ཅི་ཙམ་ན་བརྐུས་པར་འགྱུར་ཞེ་ན། སྨྲས་པ། སྨན་དང་སྔགས་ལ་སོགས་པས་ཉམས་པར་བྱས་ནས་རྐུ་བར་བྱེད་པ་ནི་ཉམས་པར་བྱས་པ་རྐུ་བར་བྱེད་པ་ནའོ། །ཉམས་བྱས་ངོ་བོ་སྟེ། རང་བཞིན་གང་ཡིན་པ་དེ་ནི་ཉམས་བྱས་ངོ་བོའོ། །དེ་གང་ཞེ་ན། གསེར་དང་དངུལ་ནི་གསེར་དང་དངུལ་ཏེ། དེ་ཉིད་བརྐུས་པ་ཡིན་པར་འདོང་ཅིང་བརྐུ་བར་བྱ་བ་ཉིད་དུ་དགོངས་པ་ཡིན་ནོ་ཞེས་བྱ་བའི་བར་དུའོ། །ཉམས་པར་མ་བྱས་པའི་གནས་སབས་ནི་མ་ཡིན་ནོ། །ནིའི་སྒྲ་ནི་སྔ་མ་ལས་ཁྱད་པར་དུ་བྱེད་པའི་དོན་ཏེ། ཇི་ལྟར་གོང་དུ། རྐུ་སེམས་དང་ནི་འདོད་པ་ཉིད། །ཅེས་བྱ་བ་ལ་སོགས་པས་རྫས་ཉམས་པར་མ་བྱས་པ་གནས་ནས་བསྐྱོད་ནས་བརྐུས་པ་དེ་ལྟར་ཉམས་པར་བྱས་པ་རྐུ་བར་བྱེད་པ་ལ་ཡང་གནས་སྐབས་སྔ་མ་ཉིད་བརྐུས་པ་མ་ཡིན་པས་གལ་ཏེ་
ཉམས་པར་བྱས་པའི་གནས་སྐབས་ལ་རིན་ཐང་ཚང་བར་གྱུར་ན་དེའི་ཚེ་དངོས་གཞིར་འགྱུར་ལ། མ་ཡིན་ན་ཆུང་བར་འགྱུར་རོ། །ཉམས་པར་བྱེད་པ་ནི་སྦྱོར་བའི་ཉེས་བྱས་སུ་རིག་པར་བྱའོ། །ལུག་ལ་སོགས་པ་ལ་བརྒྱབ་པས་རྐུ་བར་བྱེད་པ་ན། བསད་པར་གྱུར་བས་སམ། འོན་ཏེ་གནས་ནས་བསྐྱེད་པས་བརྐུས་པར་འགྱུར་ཞེས། སྨྲས་པ། ལུག་ལ་སོགས་པ་དག་བསད་པར་གྱུར་པ་ཉིད་ཀྱིས་བརྐུས་པར་ནི་འགའ་ཞིག་ཏུ་ཡང་མི་འགྱུར་གྱི། །འོན་ཀྱང་དུས་ཕྱིས་གནས་ནས་བསྐྱོད་པ་ན་བརྐུས་པ་ཡིན་པས་འདི་ནི་རྐུ་བ་ཉིད་ཀྱི་སྦྱོར་བ་ཡིན་ནོ། །གང་ལ་ཞེ་ན། བརྐུ་བ་ལའོ། །བཤད་པར་བྱ་བ་ནི་རྣམ་པར་བསྟན་ཅིང་བརྗོད་པར་བྱའོ་ཞེས་བྱ་བའི་ཐ་ཚིག་གོ །འདིར་རྐུ་བའི་བློས་གསོད་པར་བྱེད་ན་ནི་གསོད་པར་སྦྱོར་བ་ཡིན་ལ། འདིར་ཉམས་པར་བྱེད་པའི་བསམ་པས་ཡིན་ན་ནི་ཆུད་གཟོན་པའི་བསམ་པ་ཉིད་ཡིན་པའི་ཕྱིར་དེར་གཏོགས་པའི་ཁ་ན་མ་ཐོ་བར་འགྱུར་རོ་ཞེས་བྱ་བར་རིག་པར་བྱའོ། །དང་ནི་བརྐུ་བྱ་གཅིག་དང་ཞེས་བྱ་བ་ལ་སོགས་པས་སྔར་བཤད་པ་ཁོ་ན་སྟོན་པར་བྱེད་དེ་བརྐུ་བར་བྱ་བ་སྟེ་དབྲོག་པར་བྱ་བ་གཅིག་ཉིད་ནི་བརྐུ་བྱ་གཅིག་དང་གཞི་ནི་བརྐུ་བར་བྱ་བའི་རྫས་ཀྱི་གནས་ཡིན་ཏེ། དེའི་རྣམ་པའི་གཅིག་ཉིད་ནི་གཞིའི་རྣམ་པ་གཅིག་ཉིད་ཡིན་ནོ། །ཇི་ལྟར་འགྱུར་བ་དེ་ལྟར་བཤད་པ་ནི་གོ་རིམས་ཇི་ལྟ་བ་བཞིན་དུ་གཞི་ནས་རྒྱུན་གྱིས་རྐུ་བར་བྱེད་པ་ན། ཀུན་དུ་འབྲེལ་བའི་རྒྱུན་ནི་གཅིག་ཉིད་ཡིན། དེ་ལྟར་ཁ་དོག་གཅིག་པ་གནས་གཅིག་སྟེ། རི་མོ་ལ་སོགས་མེད་ཅིང་གཞི་མཉམ་པའོ། །ཞེས་བྱ་བ་ལ་སོགས་པས་སོ། །དང་ནི་ཐམས་ཅད་དུ་སྡུད་པར་བྱེད་པ་ཡིན་ནོ། །བརྐུ་བར་བྱ། དབྲོག་པར་བྱ་བདེའི་རང་གི་ངོ་བོ་ཡང་ཇི་ལྟར་འགྱུར་བ་དེ་ཡང་དེ་ལྟར། གསེར་དང་དངུལ་གྱི་རྣམ་པ་ཉམས་བྱས་རྐུ་བྱེད་ན། །ཞེས་བྱ་བ་ལ་སོགས་པས་བསྟན་ཏོ། །འདིས་ནི་འདི་སྐད་དུ་ཞུས་པ་ལས་རྣམ་པ་བཞིར་བཀོད་དེ། བདག་པོ་དཔྱད་པ་དང༌། རྫས་དཔྱད་པ་དང༌། གནས་དཔྱད་པ་དང༌། རྐུ་བའི་སྦྱོར་བ་དཔྱད་པའོ། །དེ་ལ་རྫས་དཔྱད་པ་ནི། གསེར་དངུལ་རྣམ་པ་ཉམས་བྱས་རྐུ་བྱེད་ན། །ཞེས་བྱ་བ་ལ་སོགས་པ་དང༌། གནས་དཔྱད་པ་ནི་དེ་ལྟར་ཁ་དོག་གཅིག་པ་གནས་གཅིག་པ་
སྟེ། ཞེས་བྱ་བ་ལ་སོགས་པ་དང༌། རྐུ་བའི་སྦྱོར་བ་དཔྱད་པ་ནི་གཞི་ནས་རྒྱུན་གྱིས་རྐུ་བར་བྱེད་པ་ན་ཞེས་བྱ་བ་ལ་སོགས་པ་དང་བདག་པོ་དཔྱད་པ་ནི་འཆད་པར་འགྱུར་བས་བསྡུས་པ་ཡིན་པས་ཅི་བདག་ཉིད་ཀྱིས་རང་གི་འདོད་པས་བྱས་པ་མ་ཡིན་ནོ་ཞེས་བྱ་བར་འགྱུར་རོ། །ད་ནི་ནོར་གྱི་བདག་པོ་མི་འམ་རི་དགས་ཞེས་བྱ་བ་ལ་སོགས་པས་བདག་པོའི་རྣམ་པ་སྟོན་པར་བྱེད་དེ། རྒྱུན་ལ་སོགས་པའི་ནོར་བརྐུ་བར་བྱ་བའི་བདག་པོ་དབང་བ་ནི་ནོར་བདག་སྟེ། རི་དགས་ལ་སོགས་པ་དང་དེའི་བདག་པོ་དག་ཡིན་ནོ། །དེ་དག་མ་ངེས་པ་ནི་གཏན་ལ་མ་ཕབ་པ་སྟེ་ཅི་ནོར་གྱི་བདག་པོ་མི་འམ་འོན་ཏེ་རེ་དགས་ཞེས་ཐེ་ཚོམ་དུ་གྱུར་ན་དངོས་པོའི་དབང་གིས་རྣམ་པར་གཞག་པར་རིག་པར་བྱའོ། །དེ་ལ་འདི་ལྟར་དངོས་པོའི་དབང་གིས་རྣམ་པར་གཞག་པ་ནི་གལ་ཏེ་དེ་དོན་དམ་པར་མིའི་ཡིན་ན་དེའི་ཚེ་དེའི་ཁོངས་སུ་གཏོགས་པའི་ཁ་ན་མ་ཐོ་བར་འགྱུར་ལ། ཡང་ན་བྱོལ་སོང་གི་ཡིན་ན་དེའི་རྒྱུད་དུ་གཏོགས་པའི་ཁ་ན་མ་ཐོ་བར་འགྱུར་ཏེ། ཡིད་གཉིས་དང་ནི་འདུ་ཤེས་འདྲ་བར་བཞག །ཅེས་བྱ་བའི་ཚིག་གི་ཕྱིར་རོ། །གོས་དང་སྣོད་སོགས་ཞེས་བྱ་བ་ལ་སོགས་པས་གཞན་གྱིས་ཁྱེར་བའི་ཡོ་བྱད་བདག་གིར་བྱས་པ་ཉེས་པ་ཅིར་འགྱུར་པ་འདིར་བརྗོད་པར་བྱ་སྟེ་གོས་དང་དེའི་སྣོད་ནི་གོས་དང་སྣོད་ཡིན་ལ། དེ་དང་པོར་བྱས་པའི་ལྷུང་བཟེད་ལ་སོགས་པ་གང་ཡིན་པ་དེ་ནི་གོས་དང་སྣོད་སོགས་ཏེ། དེ་ཁྱེར་བ་ནའོ། །གང་གིས་ཤེ་ན། རྐུན་པོས་ཞེས་བྱ་བ་སྨོས་པ་ཡིན་ཏེ། བཤད་མ་ཐག་པའི་གོས་དང་སྣོད་ལ་སོགས་པ་དེ་ལ་བདག་གི་མེད་པ་ཡིན་ནོ། །གང་ལ་ཞེ་ན། དགེ་ཚུལ་གང་ལ་བདག་གིར་བྱེད་པའི་མཚན་ཉིད་ཀྱི་བསམ་པ་མེད་པ་དེ་ནི་རེ་བ་མེད་པ་སྟེ། དེ་ལ་ཞེས་བྱ་བའི་དོན་ཏོ། །དེ་ལས་ཅིར་འགྱུར་ཞེ་ན། དེ་ལས་ཞེས་སྨོས་ཏེ་ལྟོས་པ་མེད་པའི་རྒྱུ་དེའི་ཕྱིར་རྐུན་པོ་དེ་ལས་ནན་གྱིས་ཏེ། སྟོབས་ཀྱི་རྣམ་པས་ལེན་པར་བྱེད་ན་མཐའ་མའི་དངོས་པོའི་མཐའི་ཉེས་པར་འགྱུར་རོ། །ནན་གྱི་ཚིག་སྨོས་པའི་ཕྱིར་ཆོས་བཤད་པའམ་རིན་གྱིས་ལེན་པར་བྱེད་པ་ལ་ཉེས་པ་མེད་པར་ཤེས་པར་བྱའོ། །དེ་འདིར་དཔྱད་པར་བྱ་སྟེ་ནན་གྱིས་ཁྱེར་ན་ཞེས་སྨོས་པ་གང་ཡིན་པ་འདི། དེ་ནི་བདག་གི་ཡིན་ཞེས་བདག་ཉིད་ཀྱི་བསམ་པས་ཡིན་ནམ། ཡང་ན་གཞན་གྱི་ཡིན་པའི་བསམ་པས་ཡིན་ཞེ་ན། གལ་
ཏེ་དེ་ལ་རང་ཉིད་ཀྱི་བསམ་པས་ཡིན་ན་ནི་གཞན་གྱི་བསམ་པ་མ་གཏོགས་པར་བདག་ཉིད་ཀྱི་བསམ་པས་ནན་གྱིས་ལེན་པ་ལ་ཇི་ལྟར་མཐར་འགྱུར་ཏེ། བདག་ཉིད་ཀྱི་བསམ་པས་ལེན་པ་ལ་ལྟུང་བ་མེད་དོ་ཞེས་གསུངས་པའི་ཕྱིར་རོ། །ཇི་སྟེ་ཡང་འདི་ལྟར་བདག་གི་བསམ་པས་ཡོངས་སུ་བཏང་བ་དེ་ལྟ་ན་ཡང་ལེན་པའི་དུས་སུ་འདི་ནི་བདག་གི་ཡིན་པར་ཤེས་པ་ཡིན་ནོ་ཞེས་སེམས་པ་དེ་ལྟ་ན་ཡང༌། གཞན་དག་གི་བསམ་པ་མེད་པར་ཇི་ལྟར་ན་ཐ་མར་འགྱུར། དེ་བས་ན་བདག་གི་བསམ་པ་མ་གཏོགས་པར་གཞན་གྱི་བསམ་པས་ལེན་ན་མཐར་འགྱུར་རོ་ཞེས་ཁྱད་པར་དུ་བརྗོད་པར་བྱའོ། །བསམ་པ་སྟེ་བདག་གིར་བྱེད་པའི་སེམས་ཀྱིས་མ་བཏང་ཡོངས་སུ་མ་སྤངས་པར་དེའི་ནན་གྱིས་ལེན་ན་ཡང་ཉེས་པ་མེད་པ་ཡིན་ནོ། །རང་གི་བསམ་པས་ཞེས་བརྗོད་པར་བྱ་ཞིང་འདི་ལ་ཡང་རྩ་བའི་དངོས་གཞིའི་ཉེས་པའི་མཚན་ཉིད་ཀྱི་ཉེས་བྱས་མེད་དོ་ཞེས་བསྟན་པར་བྱའོ། །ཉེས་སུ་ནི་འགྱུར་ཏེ་དེ་བཞིན་དུ་བདག་གིར་བྱས་པ་ལ་མེད་པ་མ་ཡིན་ནོ་ཞེས་གསུངས་པའི་ཕྱིར་རོ། །སློབ་མ་གཞན་གྱིས་དབང་བྱས་པ། །ཞེས་བྱ་བ་ལ་སོགས་པས་སྔགས་དང་སྨན་ལ་སོགས་པས་སློབ་མ་གཞན་གྱིས་དབང་བྱས་པ་ལས་ཉེས་པར་འགྱུར་བ་སྟོན་པར་བྱེད་དེ། གཞན་གྱིས་སྟོབས་ལ་སོགས་པ་དབང་དུ་བྱས་པའོ། །དེ་གང་ཞེ་ན། སློབ་མ་ཞེས་སྨོས་པ་ཡིན་ནོ། །དེ་བས་ན་དེ་ལ་བདག་གི་སྟེ། མཁན་པོ་ལ་བདག་གིར་བྱ་བ་མེད་པ་ཡིན་ནོ། །གང་དུ་ཞེ་ན། འདིར་ཞེས་སྨོས་པ་ཡིན་ཏེ། འདི་ནི་རྐུ་བའི་ཐ་སྙད་དུ་བྱ་བའི་རྒྱུ་སྟོན་པར་བྱེད་དེ། གང་གི་ཕྱིར་མཁན་པོ་ལ་བདག་གི་མེད་དེ་ཞེས་སྨོས་པའི་ཕྱིར་རྐུ་བའི་ཤུགས་ཀྱིས་དེ་ལ་ཉེས་པར་འགྱུར་རོ་ཞེས་བྱ་བར་ཁོང་དུ་ཆུད་པར་བྱའོ། །ཇི་ལྟར་ཡང་རང་ཉིད་བྲོས་པར་གྱུར་པ་དེའི་ཚེ་ཇི་ལྟར་འགྱུར་ཞེ་ན། བདག་ཉིད་ཅེས་བྱ་བ་སྨོས་ཏེ། བདག་ཉིད་རྐུ་བ་ནི་བདག་ཉིད་རྐུ་བ་སྟེ། དེ་ནས་ཡང་ཡོད་པ་མ་ཡིན་པ་དེའི་དབང་གིས་ཉེས་པར་མི་འགྱུར་རོ། །ཞེས་བྱ་བའི་དོན་ཏོ། །དགེ་ཚུལ་ལ་སློབ་མ་མེད་པ་ཉིད་མ་ཡིན་ནམ། དེ་ཇི་ལྟར་ན་བདག་གི་མིན་ཞེས་བརྗོད་པས་ཉེས་པར་འགྱུར་ཞེ་ན། བདེན་ཏེ་འོན་ཀྱང་ལུང་གི་རྗེས་སུ་འབྲངས་ནས་དེ་ལྟར་བདོར་བྱས་པ་ཡིན་ནོ། །ལུང་
ལས་ཀྱང་སློབ་མ་སྨོས་པ་ནི་གནས་བརྟན་གྱི་དབང་དུ་བྱས་པ་ཡིན་པ་དེའི་ཕྱིར་དགེ་ཚུལ་ལ་མཁན་པོ་གཅིག་པ་དང་སློབ་པར་བྱེད་པ་ལ་སོགས་པ་ཡོད་པ་ཡིན་ཏེ། དེ་དག་རྐུ་བར་བྱེད་ན་ཉེས་པར་འགྱུར་བར་རིག་པར་བྱའོ། །ཉེས་པ་དེ་ཡང་བསམ་པའི་དབང་ལས་རྣམ་པར་གཞག་པར་བྱ་བ་ཡིན་ཏེ། གལ་ཏེ་འདི་ལྟར་དེ་དག་གི་ཐད་ལས་བདག་གིས་བསྙེན་བཀུར་ལ་སོགས་པ་བདག་གིར་བྱའོ་སྙམ་པའི་བསམ་པ་བྱུང་ན་ནི་དེའི་དབང་ལས་མཐར་འགྱུར་ལ། ཡང་ན་དེ་དག་རབ་ཏུ་བྱུང་བའི་བར་ཆད་དུ་མ་གྱུར་ཅིག་སྙམ་པ་ནི་གཞན་གྱི་དོན་ཉིད་ཡིན་པའི་ཕྱིར་ཉེས་པར་མི་འགྱུར་ཏེ། མགོན་མེད་ཟས་སྦྱིན་གྱི་ཆུང་མ་ལ་སོགས་པ་ཐར་པར་བྱས་པ་དང་འདྲ་བའི་ཕྱིར་རོ། །དེ་ལྟ་ན་ནི་བཅོམ་ལྡན་འདས་ཀྱིས་ཅིའི་ཕྱིར་མཐར་འགྱུར་བར་གསུངས་ཤེ་ན། བསམ་པའི་དབང་ལས་ཡིན་ཏེ་བསམ་པའི་དབང་དེ་ཡང་བཤད་མ་ཐག་པ་ཁོ་ན་ཡིན་ནོ། །བྱོལ་སོང་ནོར་ནི་ཞེས་བྱ་བ་ལ་སོགས་པས་བྱོལ་སོང་གིས་ཡོངས་སུ་བཟུང་བའི་རྒྱུན་ལ་སོགས་པ་བརྐུས་ན་ཇི་ལྟར་ཉེས་པར་འགྱུར་བ་སྟོན་པར་བྱེད་པ་ལ། བྱོལ་སོང་གི་བདག་པོ་ནི་བྱོལ་སོང་བདག་པོ་སྟེ། བྱོལ་སོང་བདག་པོ་ནི་སྐྱེས་བུ་ཡིན་ནོ། །བྱོལ་སོང་གི་ནོར་དེའི་བདག་པོ་ནི་བྱོལ་སོང་གི་ནོར་གྱི་བདག་པོ་ཡང་དེ་ཡིན་ཏེ། གང་གི་ཕྱིར་བུ་དང་འདྲ་བར་རྒྱན་ལ་སོགས་པར་གདགས་པ་ཉིད་ཡིན་པའི་ཕྱིར་རོ། །སྐྱོང་བའི་བློ་རྣམ་པར་གནས་པ་དང་ལྟོས་པ་དང་བཅས་པ་ཡིན་པ་དེའི་ཕྱིར་བྱོལ་སོང་གི་བདག་པོ་གང་ཡིན་པ་དེ་ནི་བྱོལ་སོང་གི་ནོར་གྱི་ཡང་བདག་པོ་ཡིན་ནོ། །ནིའི་སྒྲ་ནི་གང་གི་ཕྱིར་གྱི་དོན་ཏོ། །ཡང་ནི་སྡུད་པར་བྱེད་པའོ། །རྙེད་ཕྱིར་ཞེས་བྱ་བ་ལ་སོགས་པ་བཤད་པར་འགྱུར་བ་དེ་དག་ཐམས་ཅད་ཀྱང་རྒྱུའི་ཚོགས་ཁོ་ནས་ཉེས་པར་འར་འགྱུར་བ་ཤུགས་ཀྱིས་བསྟན་པ་ཡིན་ཏེ། གང་གི་ཕྱིར་ནོར་དེའི་བདག་པོ་གཉི་ག་ཡིན་ན་དེ་ལས་གལ་ཏེ་འདི་དག་ཚུལ་གྱིས་བྱའི་རྒྱན་བརྐུ་བར་བྱའོ་སྙམ་པའི་བསམ་པས་ནི་ཉེས་པ་ཆུང་བར་འགྱུར་ལ། ཡང་ན་མིའི་བརྐུ་བར་བྱའོ་སྙམ་པས་ནི་དོན་ཇི་ལྟ་བ་བཞིན་དུ་འགྱུར་རོ། །ཤིན་ཏུ་ཆགས་པའི་དམིགས་ཀྱིས་བསལ་བ་ནི་ཟས་ཤིག་ཅེས་བྱ་བ་སྨོས་ཏེ། བཟའ་བར་བྱ་བ་ཡིན་པས་ན་ཟས་དེ་བཟའ་བར་བྱའོ། །དེ་ལ་ཟས་བྱིན་
བར་གྱུར་ན་བྱོལ་སོང་ཉིད་བདག་པོ་སྟེ། གཙོ་བོར་གྱུར་པ་ཉིད་ཡིན་ཏེ། གཞན་ལ་ལྟོས་པ་མེད་པའི་ཕྱིར་དང་བྱིན་པར་གྱུར་པ་ཉིད་ཀྱི་ཕྱིར་རོ། །དེ་བས་ན་དེའི་དབང་ལས་ཉེས་པར་འགྱུར་གྱི་བདག་པོ་མ་ཡིན་ནོ་སྙམ་པའི་འདུ་ཤེས་ནི་འཁྲུལ་པ་ཉིད་ཡིན་པའི་ཕྱིར་ཆུང་བར་འགྱུར་རོ། །རྙེད་ཕྱིར་ཞེས་བྱ་བ་ལ་སོགས་པས་རྔོན་པས་རི་དགས་ལ་སོགས་པ་གཙེས་པར་གྱུར་པའི་བདག་པོ་ཉིད་བསྟན་པའི་སྒོ་ནས་ཉེས་པ་ཉིད་དུ་འགྱུར་བ་སྟོན་པར་བྱེད་དེ། མེ་དང་པོར་བྱས་པའི་འཚེ་བར་བྱེད་པའི་ཐབས་གང་དག་ཡིན་པ་དེ་དག་ནི་མེ་ལ་སོགས་པའོ། །དེའི་ཕྱིར་དེ་དག་གིས་གཙེས་པར་གྱུར་པ་ནི་འདས་པར་གྱུར་པ་ནའོ། །རི་དགས་དང་པོར་བྱས་པའི་ཕག་ལ་སོགས་པ་གང་དག་ཡིན་པ་དེ་དག་ནི་རི་དགས་ལ་སོགས་པ་སྟེ། དེའི་བདག་པོ་ནི་གཙོ་བོ་ལ་བྱའོ། །འཚེ་བྱེད་ནི་མེ་ལ་སོགས་པ་གང་གིས་རི་དགས་ལ་སོགས་པ་དག་ལ་འཚེ་བར་བྱེད་པ་སྟེ་དེ་ལ་བརྗོད་དོ། །ཅིའི་ཕྱིར་འཚེ་བར་བྱེད་ཅེ་ན། རྙེད་ཕྱིར་ཞེས་སྨོས་ཏེ། རྙེད་པའི་ཕྱིར་ཏེ་བཟུང་བའི་ཕྱིར་ཡིན་གྱི་རྩེད་མོའི་ཕྱིར་ནི་མ་ཡིན་པ་དེའི་ཕྱིར་རྔོན་པ་བདག་ཉིད་རི་དགས་ལ་སོགས་པའི་བདག་པོ་ཉིད་ཡིན་པས་དངོས་པོ་ཇི་ལྟ་བ་བཞིན་དང༌། འདུ་ཤེས་ཇི་ལྟ་བ་བཞིན་དུ་ཞེས་པར་འགྱུར་རོ། །བཅོམ་ལྡན་འདས་ཀྱིས་འདུལ་བ་ལས་རི་དགས་ཁོ་ན་གསུངས་ཀྱི་གཞན་ནི་མ་ཡིན་ནམ། འདིར་ཅིའི་ཕྱིར་སོགས་པ་སྨོས་ཤེ་ན། རྒྱས་པ་ལས་ནི་རི་དགས་ཞེས་བྱ་བ་ལ་སོགས་པ་སྨོས་པ་ཡིན་ཏེ། གང་གི་ཕྱིར་འདི་ལྟར་འདུལ་བ་རྒྱས་པ་ལས་རི་དགས་གསུངས་པ་དེ་ནི་ས་འཛིན་གྱི་དོན་ཡིན་པ་དེའི་ཕྱིར་ཡང་རྟ་དང་ཕག་ལ་སོགས་པ་གཞན་དག་ལ་ཡང་སྦྱར་བར་བྱའོ། །དེ་ནི་ཞེས་བྱ་བ་ནི་གཞན་གྱི་ནོར་བརྐུས་པ་ལ་ཡིན་གྱི་རི་དགས་འབའ་ཞིག་ལ་མ་ཡིན་པ་དེ་བས་ན་སོགས་པ་སྨོས་པ་ཡིན་ནོ། །རྔོན་པས་གཙེས་པར་གྱུར་པའི་རི་དགས་ཤིག་ཅེས་བྱ་བ་ལ་སོགས་པས་འདིའི་དམིགས་ཀྱིས་བསལ་བ་བྱེད་པ་ཡིན་ཏེ། རྔོན་པས་གཙེས་པར་གྱུར་པའི་རི་དགས་ཀྱང་སྲུང་བར་བྱེད་པ་ཡིན་ནོ། །དེ་ལ་ཞེས་བྱ་བ་ལ་ནི་རི་དགས་ལའོ། །ཁྱད་པར་ཇི་ལྟ་བུ་ཞེ་ན། སྐྱབས་སུ་འོངས་པར་གྱུར་བ་ནི་སྐྱབས་སུ་འོངས་པའོ། །སྐྱབས་ཀྱི་སྒྲ་ནི་གཙུག་ལག་ཁང་ལ་བྱ་སྟེ། སྐྱབས་ཀྱི་སྟེང་དུ་འཛེགས་ནས་ཞེས་གསུངས་པའི་ཕྱིར་རོ། །ཡང་
ན་སྐྱབས་སུ་འོངས་པའི་སྒྲ་ནི་སྐྱབས་ཀྱི་དོན་ཡིན་ཏེ། དེ་ལྟར་ནི་འཇིག་རྟེན་པ་དག་འདི་སྐད་དུ་བདག་ལ་སྐྱབས་སུ་འོངས་ཞེས་སྨྲ་བ་ཡིན་ནོ། །དེར་འོངས་པ་ནི་ཕྱིན་པར་གྱུར་པའོ། །ཁྱད་པར་ཇི་ལྟ་བུ་ཞེ་ན། བྲོས་ནས་འོངས་པ་ནི་བྲོས་ཏེ་འོངས་པའོ། །བྲོས་པ་སྨོས་པ་ནི་འཚེ་བར་བྱེད་པ་ཉིད་ཡིན་པར་རབ་ཏུ་བསྟན་པའི་ཕྱིར་ཡིན་གྱི། རང་རྒྱུད་ལ་ནི་མ་ཡིན་ནོ། །གལ་ཏེ་ཤི་བར་གྱུར་ན་ཇི་ལྟར་བྱ་ཞེ་ན། ཤི་ན་དེ་ནི་ཞེས་བྱ་བ་ལ་སོགས་པ་སྨོས་པ་ཡིན་ཏེ། རི་དགས་ཤི་བར་གྱུར་ན་དེ་ནི་སླར་སྦྱིན་པར་བྱའོ། །གང་ལ་ཞེ་ན། དེ་ལ་ཞེས་སྨོས་པ་ཡིན་ནོ། །ཉིད་ནི་རྔོན་པ་ཁོ་ན་ལ་བྱའི་གཞན་དག་ལ་ནི་མ་ཡིན་ཞེས་ངེས་པར་གཟུང་བ་དང་རིམ་པ་གཞན་དུ་བསྟན་པའི་དོན་ཏོ། །དེ་དག་མེད་པར་གྱུར་ན་ནི་བོར་བར་བྱའོ། །དགེ་ཚུལ་ཕ་ལ་སོགས་པས་ཁྲིད་པར་གྱུར་པ་དེ་ལ་ཅི་གཟུང་བར་བྱའམ་འོན་ཏེ་མི་བྱ་ཞེ་ན། དེའི་ཕྱིར་སྨྲས་པ། གང་དགེ་ཚུལ་ལ་སོགས་པའི་སྡོམ་ཅན་མཐུས་ཁྲིད་པར་གྱུར་པ་ནའོ། །གང་དག་གིས་ཤེ་ན། སྐྱེ་བོ་རྩ་ལག་ཅེས་སྨོས་ཏེ་རྩ་ལག་ཏུ་གྱུར་པའོ། །སྐྱེ་བོ་ནི་སྐྱེ་བོ་རྩ་ལག་སྟེ་ཕ་ལ་སོགས་པ་ཡིན་པ་དེ་བས་ན་དེས་སོ། །དེ་ལ་ཇི་ལྟར་བྱ་ཞེ་ན། དེ་ནི་ཞེས་བྱ་བ་ལ་སོགས་པ་སྨོས་ཏེ། བསྟན་མ་ཐག་པའི་སྡོམ་ཅན་འབད་པས་གཟུང་བར་བྱའི། ཤིན་ཏུ་འགལ་བར་མི་བྱའོ་ཞེས་བྱ་བའི་དོན་ཏོ། །འདི་ཅིའི་ཕྱིར་སྙམ་དུ་དོགས་པ་ལ། ཕ་ལ་སོགས་པས་ཡོངས་སུ་བཟུང་བ་བཟུང་ན་མ་བྱིན་པར་ལེན་པའི་ཕྱོགས་སུ་གཏོགས་པ་ཉིད་ཡིན་པའི་ཕྱིར་བྱ་བ་མ་ཡིན་ཏེ། འདི་ལྟར་བདག་གིར་བྱས་པ་གཏང་བར་མི་བྱའོ་སྙམ་དུ་འབའ་ཞིག་དོགས་པར་གྱུར་པ་ལ་ཞེས་བཤད་པ་དེ་བས་ན་བསམ་པ་དེ་ཉིད་ཀྱི་སྒོ་ནས་གཟུང་བར་བྱ་བ་འདི་བསླབ་པའི་གཞི་འདིར་བསྟན་པ་ཡིན་ནོ། །དེ་ལ་འགྲོ་འདོད་པར་འགྱུར་བ་དེའི་ཚེ་ཇི་ལྟར་བྱ་ཞེ་ན། ཇི་སྟེ་སྐྱེ་བོ་རྩ་ལག་ཅེས་བྱ་བ་ལ་སོགས་པ་སྨོས་ཏེ། སྡོམ་ཅན་གང་གི་སེམས་ཏེ་བསམ་པ་ཤེས་སོ། །ཁྱད་པར་ཇི་ལྟ་བུ་ཞེ་ན། སྐྱེ་བོ་རྩ་ལག་དང་རྗེས་སུ་མཐུན་པར་གྱུར་པར་རོ། །དེ་དག་གང་གི་སྒོ་ནས་ཤེས་པར་བྱ་ཞེ་ན། སྨྲས་པ་རྟགས་ཏེ་ཚིག་ལ་སོགས་པ་ལས་སོ། །དེས་དགེ་ཚུལ་དེ་གཟུང་བར་མི་བྱའི་འོན་ཀྱང་གཏང་བར་བྱའོ། །ཇི་ལྟར་འདུལ་བ་ལས་ཉེ་དུས་ལག་པ་གཅིག་ནས་བཟུང་བ་ན་རབ་ཏུ་བྱུང་བས་གཉིས་པ་ལས་གཟུང་བར་བྱ་ཞིང༌། དེ་ལ་དེས་འདི་སྐད་དུ་ལག་པ་གང་ན་ཞེས་དྲི་བར་
བྱའོ། །གལ་ཏེ་ཉེ་དུ་དག་གིས་ཞེས་སྨྲ་བར་བྱེད་ན་གཟུང་བར་བྱའོ། །འོན་ཏེ་ཁྱེད་ཅག་དག་གིས་ཞེས་སྨྲ་བར་བྱེད་ན། ཀྱེ་མའོ་འགྲོ་འདོད་པའོ་ཞེས་བྱ་བའི་དབང་དུ་བྱས་ན་གཟུང་བར་མི་བྱའོ་ཞེས་འབྱུང་བ་ཡིན་ནོ། །དབྱར་གནས་པའི་རྒྱུ་མཚན་ལས་རྙེད་པའི་རྙེད་པ་གང་དབང་བར་འགྱུར་ཞེ་ན། དབྱར་གནས་ཞེས་བྱ་བ་ལ་སོགས་པ་སྨོས་པ་ཡིན་ཏེ། དབྱར་གནས་པར་གྱུར་པ་ནི་དབྱར་གནས་ཏེ་དེ་དབང་ཞིང་བདག་པོར་འགྱུར་རོ། །ཁྱད་པར་ཇི་ལྟ་བུ་ཞེ་ན། ཡུན་རིང་བར་ཡང་ཞེས་བྱ་བ་ནི་བྱ་བ་ཁྱད་པར་དུ་བྱེད་པ་ཡིན་ཏེ། མང་དུ་ཞེས་བྱ་བར་འཇུག་གོ་ཡང་གི་སྒྲ་ནི་འདི་སྐད་དུ། མ་ལུས་པར་གནས་པ་འབའ་ཞིག་མ་ཡིན་གྱི་འོན་ཀྱང་ཡུན་རིང་བར་དབྱར་གནས་པར་གྱུར་པ་ཡང་ཞེས་བྱ་བའི་དོན་དུ་བསྟན་པར་འགྱུར་རོ། །འདིར་ཟླ་བ་ཕྱེད་དང་གཉིས་ལས་ལྷག་པ་དང་བཅས་པར་གནས་པར་གྱུར་པ་དེ་ནི་ཡུན་རིང་བར་ནི་དབྱར་གནས་པ་ཞེས་བྱ་བ་ཡིན་ཏེ། རབ་ཏུ་བྱུང་བ་དེ་ཤི་བར་གྱུར་ན་ཡང་དབང་བར་འགྱུར་གྱི་ཡུལ་གཞན་དུ་སོང་བར་གྱུར་པ་འབའ་ཞིག་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དེ་དབང་བའི་རྙེད་པ་གང་ཡིན་ཞེ་ན། དབྱར་གནས་ཞེས་བྱ་བ་སྨོས་ཏེ། དབྱར་གནས་པ་ནི་འདུག་པར་གྱུར་པ་སྟེ། དབྱར་གནས་ཤིང་འདུག་པར་གྱུར་པའི་ཕྱིར་དབྱར་གནས་པའི་བྱེད་རྒྱུ་དང་རྒྱུ་མཚན་དེའི་སྒོ་ནས་རྙེད་པའི་རྣམ་པ་འབྱུང་བ་ནི་རྙེད་པ་ཁོ་ན་རྙེད་པའི་རྣམ་པ་ཉིད་ཡིན་པ་དེ་ལ་དེ་སྐད་ཅེས་བྱ་སྟེ། དེ་ལ་དེ་ལྟ་བུར་གྱུར་པའི་རྙེད་པའི་བདག་པོར་འགྱུར་རོ་ཞེས་བྱ་བའི་ཐ་ཚིག་གོ །དཀོན་མཆོག་གསུམ་གྱི་ཆེད་དང་ཆོས་ཉིད་ལ་ཕུལ་བའི་རྙེད་པ་གང་ལ་རིགས་པ་ཡིན་ཞེ་ན། སྨྲས་པ་སངས་རྒྱས་ལ་ཕུལ་པ་ཡིན་བ་དེ་ནི་བཅོམ་ལྡན་འདས་ཀྱི་གཙང་ཁང་དང་མཆོད་རྟེན་ལ་སོགས་པ་ལ་ཉེ་བར་སྦྱར་བར་བྱ་བ་ཡིན་ལ། དགེ་འདུན་ལ་ཕུལ་བ་ནི་བགོ་བར་བྱ་བ་ཡིན་ནོ། །ཆོས་ལ་ཕུལ་བ་ནི་མི་ཤེས་པས་ཇི་ལྟར་བྱ་ཞེ་ན། ཆོས་ཀྱི་རྙེད་པ་ཞེས་བྱ་བ་ལ་སོགས་པ་སྨོས་པ་ཡིན་ནོ། །ཆོས་ཀྱི་རྙེད་པ་གང་དག་དབང་བར་འགྱུར་ཞེ་ན་དམ་ཆོས་ཞེས་བྱ་བ་ལ་སོགས་པ་སྨོས་ཏེ། དམ་པའི་ཆོས་ཀྱི་ཚིགས་བཅད་ནི་དམ་ཆོས་ཚིགས་བཤད་དོ། །ཚིགས་བཤད་ནི་བཀའ་ལ་བྱ་སྟེ། སྨན་པ་ཉེ་བར་མཚོན་པར་བྱེད་པ་ཡིན་གྱི་ཁྱད་པར་ཅན་མ་ཡིན་པ་དེའི་ཕྱིར་ཡང་དེ་ཙམ་དེ་ཡང་རབ་ཏུ་བྱུང་བ་གང་གིས་ཀླགས་པར་གྱུར་པ་དེ་དག་
ཁོ་ན་ལ་དབང་བ་སྟེ། བདག་པོར་འགྱུར་རོ་ཞེས་བྱ་བའི་ཐ་ཚིག་གོ །ཡང་གི་སྒྲ་ནི་མདོ་སྡེ་ལ་སོགས་བ་ཀླགས་པ་དེ་དག་འབའ་ཞིག་དབང་བར་འགྱུར་བ་མ་ཡིན་ནོ་ཞེས་བྱ་བའི་དོན་ཏོ། །ནིའི་སྒྲ་ནི་དེ་ཁོ་ན་ཞེས་བྱ་བར་ངེས་པར་གཟུང་བ་ཡིན་ནོ། །འདིར་ཆོས་འདི་གང་ཡིན་ཞེས་རྣམ་པར་དཔྱད་པར་བྱའོ་ཞེ་ན། འདིར་སྨྲས་པ་ཆོས་ནི་རྣམ་པ་གཉིས་ཏེ། བསྟན་པའི་ཆོས་དང༌། དོན་དམ་པའི་ཆོས་སོ། །དེ་ལ་བསྟན་པའི་ཆོས་ནི་མདོའི་སྡེ་དང༌། དབྱངས་ཀྱིས་བསྙད་པ་དང༌། ལུང་དུ་བསྟན་པ་ཞེས་བྱ་བ་ལ་སོགས་པ་བཀའ་ཡན་ལག་བཅུ་གཉིས་སོ། །དོན་དམ་པའི་ཆོས་ནི་མྱ་ངན་ལས་འདས་པའོ། །དེ་ལ་བསྟན་པའི་ཆོས་ཀྱི་ཆེད་དུ་ཕུལ་བའི་རྙེད་པ་ནི་འདིར་བགོ་བར་བྱ་བ་ཡིན་ལ། མྱ་ངན་ལས་འདས་པའི་ཆོས་ཀྱི་ཆེད་དུ་ཕུལ་བ་ནི་སངས་རྒྱས་ལ་ཕུལ་བ་དང་འདྲ་བར་བགོ་བར་བྱ་བ་མ་ཡིན་ཏེ། མྱ་ངན་ལས་འདས་པ་དེ་ནི་དེའི་རང་བཞིན་ཡིན་པའི་ཕྱིར་རོ། །དེ་ལ་ཇི་ལྟར་དེ་དག་བགོ་བར་ཤེས་པར་བྱ་ཞེ་ན། སྨྲས་པ་གང་གི་ཚེ་སྦྱིན་པ་པོ་བདག་ཉིད་ཀྱིས་རྣམ་པར་ཕྱེ་ནས་འབུལ་བར་བྱེད་པ་དེའི་ཚེ་རབ་ཏུ་སྦྱིན་པར་བྱ་ཞིང༌། རྣམ་པར་མ་ཕྱེ་བ་ཡིན་ན་ནི་སྦྱིན་པ་པོ་དེས་ཆོས་གང་དག་གི་ཆེད་དུ་ཕུལ་བ་ཡིན་ཞེས་དྲི་བར་བྱའོ། །དེ་ལ་ཡང་གལ་ཏེ་བསྟན་པའི་ཆོས་འབྲི་བའི་ཆེད་དུའོ་ཞེས་ཟེར་ན། དེ་དེ་ཁོ་ན་བཞིན་དུ་བྱའི་བགོ་བར་མི་བྱའོ། །ཇི་ལྟར་ཡོན་བདག་གིས་རྙེད་པ་ངེས་པར་རྣམ་པར་གཞག་པ་བཞིན་དུ་ཞེས་གསུངས་པའི་ཕྱིར་རོ། །གཙུག་ལག་ཁང་དུ་མར་དབྱར་གནས་པར་འགྱུར་བ་གང་ཡིན་པ་དེ་ལ་གཙུག་ལག་ཁང་ཀུན་གྱི་རུང་ངམ་ཞེ་ན། གཙུག་ལག་ཁང་དུ་མར་ཞེས་བྱ་བ་ལ་སོགས་པ་སྨོས་ཏེ། གཙུག་ལག་ཁང་དུ་མ་ནི་གཙུག་ལག་ཁང་མང་པོ་སྟེ། དེ་དག་ཁས་བླངས་ཤིང་དམ་བཅས་པ་བྱས་པ་ནའོ། །གཙུག་ལག་ཁང་གཅིག་ཁོ་ན་ལས་རྙེད་པ་ཞེས་བྱ་བ་དབྱར་གྱི་རྙེད་པ་སྟེ། དེ་ལེན་དུ་དབང་བ་མ་ཡིན་ནོ། །དང་ནི་ངེས་པར་གཟུང་བའོ། །ཀྱང་གི་སྒྲས་གཅིག་ཏུ་གནས་པར་ཁས་བླངས་པ་གཅིག་ནས་རྙེད་པ་དབང་བ་འབའ་ཞིག་ཏུ་མ་ཟད་ཀྱི་འོན་ཀྱང་གཙུག་ལག་ཁང་དུམ་དག་ལ་ཡང་ཞེས་སྡུད་པར་བྱེད་པའོ། །འོན་ཏེ་ཐམས་ཅད་ནས་ལེན་པར་འདོད་པར་འགྱུར་བ་དེའི་ཚེ་ཡང༌། ཀུན་དུ་ཞེས་བྱ་བ་ལ་སོགས་པ་སྨོས་པ་ཡིན་ནོ། །གལ་ཏེ་གཙུག་ལག་ཁང་ཐམས་ཅད་ནས་རྙེད་པ་ལེན་
པའི་བསམ་པ་ཡོད་པར་འགྱུར་བ་དེའི་ཚེ་ཇི་ལྟར་ཁས་བླང་བར་བྱ་ཞེ་ན། གཙུག་ལག་ཁང་ཀུན་རྙེད་པ་ཞེས་བྱ་བ་སྨོས་ཏེ། གཙུག་ལག་ཁང་ཐམས་ཅད་ཀྱི་རྙེད་པ་ནི་གཙུག་ལག་ཁང་ཀུན་རྙེད་པ་སྟེ། གཙུག་ལག་ཁང་ཐམས་ཅད་ཀྱི་རྙེད་པ་གཅིག་ཏུ་བསྡུས་པ་དེ་ལས་སོ། །གཅིག་ཀྱང་ཡིན་ལ་སྐལ་བ་ཡང་ཡིན་པས་སྐལ་བ་གཅིག་གོ །སྐལ་བ་གཅིག་ཙམ་སྟེ། དགེ་ཚུལ་དེས་དེ་ཙམ་ཞིག་བླང་བར་བྱ་བ་ཡིན་ནོ། །དེ་ལ་སྐལ་བ་གཅིག་ཙམ་ཞེས་བྱ་བ་ནི་དེ་གང་དུ་ཁས་བླངས་པའི་གཙུག་ལག་ཁང་དེ་དག་ཏུ་གང་བཤད་པར་གྱུར་པའི་དགེ་ཚུལ་གྱི་སྐལ་བ་སྟེ། རྙེད་པ་གཅིག་པོ་དེ་གཙུག་ལག་ཁང་དེ་དག་གིས་གྲངས་ལས་ཆར་བྱས་པ་གང་ཡིན་པ་དེ་ནི་འདིར་སྐལ་བ་གཅིག་ཡིན་ཏེ་དེ་ཙམ་ཞིག་དེས་བླང་བར་བྱའོ་ཞེས་བྱ་བའི་དོན་ཏོ། །དོན་འདི་ཉིད་སློབ་དཔོན་ཡོན་ཏན་འོད་ཀྱིས་འདིར་ཁས་བླང་ས་བདག་ལ་བདག་ཉིད་ཀྱི་གྲངས་ལས་ཆ་ཉིད་དོ་ཞེས་གསུངས་སོ། །འདིར་ཡང་དོན་ནི་འདི་ཡིན་ཏེ་ཁས་བླངས་པ་དེས་སྔགས་ཀྱིས་གཙུག་ལག་ཁང་དག་ཏུ་ཁས་བླངས་པའི་གཙུག་ལག་ཁང་རང་གི་གྲངས་དེ་ལས་ཆ་སྟེ་སྐལ་བ་སྦྱིན་པར་བྱ་བ་གང་ཡིན་པ་དེ་ནི་བདག་ཉིད་ཀྱི་གྲངས་ཀྱི་ཆའོ། །དེའི་དངོས་པོ་ནི་བདག་ཉིད་ཀྱི་གྲངས་ཀྱི་ཆ་ཉིད་དོ། །གཙུག་ལག་ཁང་གི་གྲངས་ལས་རྙེད་པ་སྟེ། སྐལ་བར་བྱས་ནས་གཙུག་ལག་ཁང་ཐ་དད་པའི་དགེ་སློང་དག་གིས་སྦྱིན་པར་བྱའི་ལྷག་པར་ནི་མ་ཡིན་ནོ་ཞེས་བྱ་བའི་ཐ་ཚིག་གོ །འཇིག་རྟེན་པའི་ཡང་ཚུལ་འདི་ཉིད་ཡིན་ནོ། །ཇི་ལྟར་དགེ་སློང་དབྱར་གནས་ལ་སོགས་པའི་རྙེད་པ་ཐོབ་པ་དེ་བཞིན་དུ། དགེ་ཚུལ་དག་ཡིན་ནམ་འོན་ཏེ་རྣམ་པ་གཞན་དུ་ཡིན་ཞེ་ན། དགེ་སློང་གཅིག་གི་ངེས་དང་མཚུངས་པ་ལས། །ཞེས་བྱ་བ་ལ་སོགས་པ་སྨོས་ཏེ། དགེ་སློང་གཅིག་གི་ངེས་པ་སྟེ་རྙེད་པ་ལས་ཆ་གཉིས་བླང་བར་བྱའོ་ཞེས་བྱ་བ་ནི་རྒྱས་པ་ལས་བྱུང་བ་ཡིན་ཏེ། དབྱར་གྱི་རྒྱུ་མཚན་ནམ་གཞན་དག་ལས་དགེ་སློང་གཅིག་གི་རྙེད་པའི་ངེས་པ་གང་ཡིན་པ་དེ་ལས་དགེ་ཚུལ་གྱི་ཆ་གཉིས་བླང་བར་བྱའོ། །ནི་ཞེས་བྱ་བ་ནི་གང་གི་ཕྱིར་གྱི་དོན་ཡིན་ལ་དེ་ཞེས་བྱ་བ་ནི་དེ་སྐད་དུ་ཞེས་བྱ་བའི་དོན་ཡིན་པས་གང་གི་ཕྱིར་དེ་སྐད་དུ་རྒྱས་པ་ལས་གསུངས་པའི་ཕྱིར་དང༌། རྙེད་པ་ལེན་པ་དཔྱད་པ་ལས་ཀྱང་ཞེས་
བྱ་བ་ལ་ལྟོས་པར་བྱ་སྟེ། དགེ་སློང་གཅིག་གི་སྐལ་བའི་ཚད་ཀྱི་རྙེད་པ་ཆ་གསུམ་དུ་གང་བྱས་པ་ལས་དགེ་ཚུལ་གྱི་ཆ་གཉིས་བླང་བར་བྱའོ་ཞེས་འདུལ་བ་རྙེད་པར་དཔྱད་པ་ལས་གསུངས་པ་ཡིན་ནོ་ཞེས་བྱ་བའི་དོན་ཏོ། །བསྙེན་པར་རྫོགས་པར་འདོད་པ་ལ་ཡང་དེ་ཁོ་ན་བཞིན་དུ་ཡིན་ནམ་མ་ཡིན་ཞེ་ན་འདི་ལྟར་བསྙེན་པར་རྫོགས་པར་འདོད་པ་ལ་ནི་རྙེད་པ་མཉམ་པོ་ཡིན་ཞིང་ཟས་ལ་སོགས་པ་དེ་དང་ཤི་བའི་གོས་ཀྱང་ཡིན་ཏེ། བསྙེན་པར་རྫོགས་པར་འདོད་པ་གང་ཡིན་པ་དེ་ནི་བསྙེན་པར་རྫོགས་པར་འདོད་པ་སྟེ་རྙེད་པ་མཉམ་པོ་ཁོ་ན་དབང་བར་འགྱུར་རོ། །ནིའི་སྒྲ་ནི་གང་གི་ཕྱིར་གྱི་དོན་ཡིན་ཏེ། གང་གི་ཕྱིར་དགེ་སློང་གི་དངོས་པོ་ཐོབ་པར་འདོད་པ་ཡིན་པ་དེའི་ཕྱིར་མཉམ་པོ་དབང་བར་འགྱུར་རོ། །འདི་ཟས་ལ་སོགས་པ་ལ་ཡང་ཡིན་ནམ་སྔར་བཤད་པའི་ཆ་གཉིས་དག་ཡིན་ཞེ་ན། ཟས་ལ་སོགས་པ་ཞེས་བྱ་བ་ལ་སོགས་པ་སྨོས་ཏེ། ཟས་དང་པོར་བྱས་པའི་བཟའ་བ་ལ་སོགས་པ་གང་ཡིན་པ་དེ་ནི་ཟས་ལ་སོགས་པ་སྟེ། དེ་ལ་དེ་ནི་བཤད་མ་ཐག་པའི་ཚད་མཉམ་པོའི་མཚན་ཉིད་ཁོ་ན་ཡིན་པར་བལྟ་བར་བྱའོ། །ཡང་གི་སྒྲ་ནི་འདི་འབའ་ཞིག་ལ་མ་ཡིན་གྱི་རབ་ཏུ་བྱུང་བ་ཤི་བའི་གོས་ལ་སོགས་པ་གང་ཡིན་པ་དེ་ནི་ཤི་བའི་རྫས་ཡིན་ཏེ་དེ་ལ་མཉམ་པོ་ཁོ་ནར་འགྱུར་རོ་ཞེས་སྡུད་པར་བྱེད་པ་ཡིན་ནོ། །དོན་འདི་ཉིད་ནི་སློབ་དཔོན་ཡོན་ཏན་འོད་ཀྱིས་དགེ་ཚུལ་དང་དགེ་ཚུལ་མ་དག་ནི་ཆ་གཉིས་བ་དང་གསུམ་པ་དག་གོ །ཟས་ལ་ནི་མཉམ་པོ་ཉིད་དོ། །དགེ་སློང་མ་དང་བསྙེན་པར་རྫོགས་པར་འདོད་པ་དག་ཀྱང་ངོ༌། །ཤི་བའི་གོས་ནི་ཐམས་ཅད་ལ་འོས་པ་ཉིད་དོ་ཞེས་གསུངས་པ་ཡིན་ནོ། །འདྲི་བའི་དོན་འདི་ནི་དགེ་ཚུལ་དང་དགེ་ཚུལ་མ་དག་ལ་ནི་ཆ་གསུམ་པ་དོར་བའི་རྙེད་པ་སྦྱིན་པར་བྱ་ཞིང་ཟས་ནི་མཉམ་པོར་སྦྱིན་པར་བྱའོ། །བསྙེན་པར་རྫོགས་པར་འདོད་པ་དེ་དག་དང༌། སྔར་བསྟན་པའི་དགེ་སློབ་མ་བསྙེན་པར་རྫོགས་པར་འདོད་པ་མ་ཡིན་དུ་ཟིན་ཀྱང་མཉམ་པོ་ཡིན་ཞིང༌། ཤི་བའི་ཡོ་བྱད་ཀྱང་དགེ་སློང་ཇི་ལྟ་བ་དེ་བཞིན་དུ་དགེ་ཚུལ་ལ་ཡང་ཞེས་བྱ་བའི་དོན་ཏེ། བསྙེན་པར་རྫོགས་པར་འདོད་པ་དག་ཆོས་གོས་མེད་པའི་ཕྱིར་དང༌། བསྙེན་པར་རྫོགས་པའི་ཡན་ལག་མ་ཚང་བའི་ཕྱིར་ཞེས་པ་དག་ཡིན་ནོ་ཞེས་བྱ་བར་རིག་པར་བྱའོ། །གང་གི་ཚེ་གཅིག་གམ་གཉིས་སམ་གསུམ་དག་
གཙུག་ལག་ཁང་ན་གནས་པར་བྱེད་ན་དེ་གཙུག་ལག་ཁང་ཉིད་ཀྱི་རྙེད་པ་དེ་དག་བདག་པོ་ཉིད་ཡིན་ནམ། འོན་ཏེ་མ་ཡིན་སྙམ་དུ་དོགས་པ་ལ་འདོད་པ་དེ་བསལ་བར་བྱ་བའི་ཕྱིར། གཙུག་ལག་ཁང་ན་གཅིག་པུ་སུ་གནས་པ་ཞེས་བྱ་བ་ལ་སོགས་པ་སྨོས་ཏེ། གཙུག་ལག་ཁང་གང་དུ་དགེ་ཚུལ་གཅིག་ཅིག་ཀྱང་གནས་པར་བྱེད་ནའོ། །ཀྱང་གི་སྒྲས་མང་པོ་དག་ཀྱང་ཡིན་ཏེ། གཙུག་ལག་ཁང་དེའི་རྙེད་པ་དེ་ཉིད་བདག་པོ་ཡིན་གྱི་དགེ་འདུན་ནི་མ་ཡིན་ནོ། །དགེ་འདུན་གྱི་གཙུག་ལག་ཁང་དུ་བྱུང་བའི་རྙེད་པ་ནི་དགེ་འདུན་ཁོ་ན་དབང་བ་ཡིན་གྱི་གང་ཟག་ནི་མ་ཡིན་ནོ་ཞེས་རྣམ་པར་རྟོག་པ་བསལ་བའི་ཕྱིར་བརྗོད་པ་ཡིན་ནོ། །གནས་པ་ཞེས་བྱ་བ་ནི་ཐམས་ཅད་དུ་ཡིན་གྱི་དབྱར་ཁོ་ན་ནི་མ་ཡིན་ནོ། །རྙེད་པ་ཞེས་བྱ་བ་ནི་དབྱར་གྱི་འམ་གཞན་དག་གི་སྟེ་དེ་ལྟར་ནི་གཙུག་ལག་ཁང་འགའ་ཞིག་ཏུ་དགེ་ཚུལ་གྱི་མཁན་པོ་འམ། གནས་ཀྱི་སློབ་དཔོན་ཤི་བར་གྱུར་པའམ། ཡུལ་གཞན་དུ་སོང་བའམ་བབས་པར་གྱུར་པས་གཅིག་པུ་ཞིག་འདིར་གནས་པར་གྱུར་པ་ན། དབྱར་གྱི་དུས་སམ་གཞན་གྱི་ཚེ་དེར་ཡང་ཡོན་བདག་གིས་ཡོན་བསྟབས་པར་གྱུར་པ་དེ་ཉིད་ཀྱི་ཡིན་གྱི་གཞན་གྱི་མ་ཡིན་པས་བགོ་བར་མི་བྱའོ། །དེའི་རྙེད་པ་ལ་དེ་ཉིད་བདག་པོ་ཡིན་པས་གལ་ཏེ་དབྱར་གྱི་རྙེད་པ་བྱུང་ན་དེ་ཁོ་ན་བཞིན་དུ་བདག་གིར་བྱ་ཞིང༌། གཞན་དུ་རྙེད་པ་བྱུང་ན་སྔགས་ཀྱིས་བྱིན་གྱིས་བརླབས་ནས་བདག་གིར་བྱའོ། །གལ་ཏེ་བྱིན་གྱིས་མ་བརླབས་པར་བདག་གིར་བྱེད་ན་ཉེས་བྱས་ཀྱི་ཉེས་པར་འགྱུར་ཏེ། ཕྱིས་འོངས་པ་གང་ཡིན་པ་དེ་དག་ཐམས་ཅད་ཀྱང་སྐལ་བ་མཉམ་པོར་འགྱུར་བས་དེ་དག་དང་ལྷན་ཅིག་བགོ་བར་བྱའོ། །རྣམ་པ་གཞན་དུ་ན་དངོས་པོ་ཇི་ལྟ་བ་དང་བསམ་པ་ཇི་ལྟ་བ་བཞིན་དུ་ཉེས་པར་འགྱུར་རོ། །དེ་ལ་སྔགས་ནི་འདི་ཡིན་ཏེ་གནས་འདི་ན་བདག་གཅིག་པུ་གནས་པར་བགྱིས་པ་ན་དགེ་འདུན་གྱི་གོས་ཀྱི་རྙེད་པ་བྱུང་བ་འདི་ཡང་དགེ་འདུན་གྱིས་བགོ་བར་བྱ་ཞིང༌། དགེ་འདུན་གྱིས་བསྟེན་དུ་རུང་བ་བདག་གིས་རྙེད་ལ་བདག་གིས་གོས་འདི་བདག་གིར་བྱའོ་ཞེས་བྱ་བ་ནས་བདག་གིར་བགྱི་བར་བྱིན་གྱིས་བརླབ་པོ་ཞེས་བྱ་བའི་བར་དུ་སྟེ། གལ་ཏེ་དེ་ལྟར་བྱེད་ན་བྱིན་གྱིས་བརླབས་པ་ཡིན་པར་བརྗོད་པར་བྱ་ཞིང་གཞན་དག་འོངས་པ་རྣམས་ལ་སྦྱིན་པར་མི་བྱའོ། །འོན་ཏེ་དེ་ལྟར་མི་བྱེད་ན་བྱིན་
གྱིས་བརླབས་པ་མ་ཡིན་པས་དེས་བདག་གིར་མི་བྱའོ། །བདག་གིར་བྱེད་ན་ཉེས་བྱས་ཀྱི་ཉེས་པར་འགྱུར་རོ། །ཤི་བའི་ཡོ་བྱད་ཇི་ལྟར་བགོ་བར་བྱ་བ་ཡིན་ཞེ་ན། །སྡོམ་ཅན་ཤི་ན་བཀུར་སྟི་བྱས་ནས་ནི། །ཞེས་བྱ་བ་ལ་སོགས་པ་སྨོས་པ་ཡིན་ཏེ། །སྡོམ་ཅན་རབ་ཏུ་བྱུང་བ་ཤི་ན་དེ་ལ་བཀུར་སྟི་བྱས་ནས་ཏེ་དེ་ལྟར་བྱས་ནས་ཤི་བ་དེའི་གོས་ལ་སོགས་པ་བགོ་བར་བྱའི་གཞན་དུ་ནི་མ་ཡིན་ནོ་ཞེས་བྱ་བའི་དོན་ཏོ། །བཀུར་སྟི་ནི་རོལ་མོའི་སྒྲ་དང་ལུས་བསྲེགས་ཏེ། ཆོས་མཉན་པ་སྦྱིན་པ་དང༌། རྒྱུན་ཆགས་གསུམ་པ་འདོན་པ་དང༌། གནས་ཀྱི་མཆོད་རྟེན་ལ་ཕྱག་བྱ་བ་ཡིན་པར་རིག་པར་བྱའོ། །ཤི་བའི་ཡོ་བྱད་ལྷུང་བཟེད་ལ་སོགས་པ་དྲུག་པོ་གང་དབང་བར་འགྱུར་ཞེ་ན། ནད་པ་དེའི་ནད་གཡོག་གང་ཡིན་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། སྡོམ་ཅན་ནད་པའི་བསྙེན་བཀུར་བར་གྱུར་པ་གང་ཡིན་པ་དེ་ནི་ནད་གཡོག་ཡིན་ནོ། །དེ་གང་ཞེ་ན། སྡོམ་ཅན་ཞེས་བྱ་བ་སྨོས་ཏེ། དེ་ལྷུང་བཟེད་ལ་སོགས་པ་དྲུག་པོ་དབང་བ་ནི་བདག་པོ་ཡིན་ཏེ། དེའི་ཐོབ་སྐལ་ཡིན་ཞེས་བྱ་བ་ནི་ཚིག་གི་དོན་ཡིན་ནོ། །ལྷུང་བཟེད་ལ་སོགས་པ་དྲུག་པོ་ཞེས་བྱ་བ་ནི་ལྷུང་བཟེད་དང༌། ཆོས་གོས་གསུམ་དང་གདིང་བ་དང་ཆུ་ཚགས་དག་ཡིན་པར་རིག་པར་བྱའོ། །གལ་ཏེ་ནད་གཡོག་མང་པོ་དག་ཡོད་པར་གྱུར་པ་དེའི་ཚེ་ཇི་ལྟར་ཁོང་དུ་ཆུད་པར་བྱ་ཞེ་ན། གང་ཚེ་ནད་གཡོག་མང་དུ་ཡོད་ན་ཡང༌། །ཞེས་བྱ་བ་ལ་སོགས་པ་སྨོས་ཏེ། གང་གི་ཚེ་བསྙེན་བཀུར་བྱེད་པ་མང་བ་ཉིད་ཡོད་པར་གྱུར་པ་དེའི་ཚེ་ཡང་བཤད་མ་ཐག་པའི་དྲུག་པོ་དེ་ཉིད་དེ། ལྷུང་བཟེད་ལ་སོགས་པ་དྲུག་པོ་དག་ནད་གཡོག་དེ་དག་སྤྱིར་དབང་བར་འགྱུར་རོ། །ཉིད་ནི་གཞན་ནི་མ་ཡིན་ནོ་ཞེས་ངེས་པར་གཟུང་བའི་དོན་ཏོ། །དང་ནི་རིམ་པ་གཞན་ཏེ། ཡང་གི་སྒྲའི་དོན་ཡིན་པས་ན་དྲུག་པོ་དེ་ཡང་རབ་དང་འབྲིང་དང་ཐ་མ་དག་ལས་སྦྱིན་པར་བྱའི་གཅིག་གི་རང་བཞིན་ཁོ་ན་ལས་ནི་མ་ཡིན་ནོ། །གང་གི་ཚེ་ནད་པའི་ནད་གཡོག་གཞན་དུ་སོང་བར་གྱུར་ལ། ནད་པ་ཡང་དུས་ལས་འདས་པར་འགྱུར་བ་ན་དེའི་ཚེ་ཇི་ལྟར་བྱ་ཞེ་ན། ནད་པའི་དོན་དུ་གཞན་དུ་སོང་བའི་ཚེ་ཞེས་བྱ་བ་ལ་སོགས་པ་སྨོས་ཏེ། ནད་པ་དག་གི་ཆེད་ནི་ནད་པའི་དོན་ཏེ་ནད་པའི་དགོས་པ་དེ་ཉིད་ཀྱི་ཕྱིར་གཞན་དུ་སོང་ན་ཡང་ལྷུང་བཟེད་ལ་སོགས་པ་དྲུག་པོ་དག་དབང་ངོ༌། །ནིའི་སྒྲ་ནི་ནད་གཡོག་བདག་ཉིད་ཀྱི་
དོན་དུད་ན་མ་ཡིན་ནོ་ཞེས་རྣམ་པར་བཅད་པའི་ཕྱིར་རོ། །གང་གི་ཚེ་ཞེ་ན། སྡོམ་ཅན་ནད་པ་ཤི་ན་ཞེས་བྱ་བ་སྨོས་ཏེ། ནད་པ་ཡང་དེ་ཡིན་ལ་སྡོམ་ཅན་ཡང་ཡིན་པས་ན་སྡོམ་ཅན་ནད་པ་སྟེ་སྡོམ་ཅན་ནད་པ་དེ་ཤི་ནའོ། །གལ་ཏེ་དགེ་འདུན་གྱིས་ལྷུང་བཟེད་ལ་སོགས་པ་དེ་བགོས་བར་གྱུར་ན་དེའི་ཚེ་ཡང་སྦྱིན་པར་བྱ་བ་ཡིན་ནམ་ཞེ་ན། ཇི་སྟེ་བགོས་པར་གྱུར་ཀྱང་སྡོམ་ཅན་གྱིས། །མྱུར་དུ་བསྡུས་ཏེ་ནད་གཡོག་སྦྱིན་པར་བྱ། །ཞེས་བྱ་བ་སྨོས་ཏེ། གལ་ཏེ་གང་གི་ཚེ་སྡོམ་ཅན་རབ་ཏུ་བྱུང་བས་ལྷུང་བཟེད་ལ་སོགས་པ་དྲུག་པོ་དགོས་པར་གྱུར་པ་སྟེ་ཆར་བཤིག་པར་གྱུར་པ་དེའི་ཚེ་ཡང་སྡོམ་ཅན་རབ་ཏུ་བྱུང་བས་མྱུར་དུ་བསྡུས་ནས་ནད་གཡོག་ལ་སྦྱིན་པར་བྱའོ། །ཇི་སྟེ་ཞེས་བྱ་བའི་སྒྲ་ནི་གལ་ཏེ་དེའི་དོན་ཡིན་ཏེ། བདག་གིར་མི་བྱའོ་ཞེས་བྱ་བའི་དོན་ཏོ། །གལ་ཏེ་ནད་གཡོག་མཚན་ཐ་དད་པར་གྱུར་པའམ་ཁྱིམ་པ་དག་བྱེད་པ་དེའི་ཚེ་ཇི་ལྟར་བྱ་ཞེ་ན། ཇི་སྟེ་བུད་མེད་མཚན་ལྡན་ནད་གཡོག་བྱེད་པ་འམ། །ཁྱིམ་པ་ཞིག་ན་ཞེས་བྱ་བ་སྨོས་ཏེ། བུད་མེད་ཀྱི་མཚན་ནི་བུད་མེད་མཚན་ཏེ། །དེའི་མཚན་ནི་མཚན་དང་ལྡན་པ་གང་ཡིན་པ་དེ་ནི་དེའི་མཚན་ལྡན་ཏེ། མཚན་གྱི་སྒྲ་གཅིག་ཕྱི་བ་ཡིན་ནོ། །ཇི་སྟེ་དེ་ལྟ་བུར་གྱུར་པ་དེ་ནད་གཡོག་བྱེད་པའམ་ཡང་ན་ཁྱིམ་པ་ནད་གཡོག་བྱེད་པར་གྱུར་ན་ཞེས་བྱ་བར་སྦྱར་རོ། །དྲུག་བོ་ཞེས་བྱ་བ་ནི་ལྷུང་བཟེད་ལ་སོགས་པ་དྲུག་པོ་དག་གོ །དེ་མི་དབང་ཞེས་བྱ་བ་ནི་ཤི་བའི་ཡོ་བྱད་དག་གོ །ཇི་སྟེ་ཞེས་བྱ་བ་ནི་གལ་ཏེའི་དོན་ཡིན་ནོ། །འམ་ཞེས་བྱ་བ་ནི་ཡང་ན་ཞེས་བྱ་བའི་དོན་ཡིན་ཏེ། མཚན་མཐུན་པ་ཁོ་ན་ལ་རིགས་པ་ཡིན་ནོ་ཞེས་བྱ་བའི་ཐ་ཚིག་སྟེ། གང་དུ་ཡང་མཚན་མི་མཐུན་པའི་ནད་གཡོག་དག་ཁོ་ན་མེད་པ་མ་ཡིན་པ་དེའི་ཚེ་འདི་དེས་པ་མ་ཡིན་ནོ་ཞེས་རྟོགས་པར་བྱའོ། །གང་གི་ཚེ་བུ་ལོན་བླངས་བཞིན་དུ་རབ་ཏུ་བྱུང་བ་ཤི་བར་གྱུར་པ་དེའི་ཚེ་གང་ལས་སྦྱིན་པར་བྱ་ཞེ་ན། ཇི་སྟེ་སྡོམ་ཅན་བུ་ལོན་ཆགས་བཞིན་ཤི། །ཞེས་བྱ་བ་ལ་སོགས་པ་སྨོས་ཏེ། གལ་ཏེ་སྡོམ་ཅན་རབ་ཏུ་བྱུང་བ་བུ་ལོན་ཆགས་བཞིན་དུ་ཤི་བར་གྱུར་པ་དེའི་ཚེ་ཤི་བ་དེའི་ཡོ་བྱད་དེ་དེའི་སྣོད་སྤྱད་ཤི་བའི་ཡོ་བྱད་དག་ལས་བུ་ལོན་བསབ་པར་བྱ་ཞེས་བྱ་བར་སྦྱར་རོ། །གལ་ཏེ་ཡོད་ན་བསབས་པའི་ལྷག་མ་བགོ་བར་བྱའོ། །དེའི་ཡོ་བྱད་རྣམས་ཀྱིས་ཞེས་བ་
བ་འདིས་ནི་འདི་སྐད་དུ་ནོར་གྱི་བདག་པོ་གང་ཡིན་པ་དེ་ནི་ནོར་མེད་ཀྱང་བདག་པོ་ཡིན་པའི་ཕྱིར་དེའི་བུ་ལོན་དགེ་འདུན་གྱི་མ་ཡིན་ནོ་ཞེས་བསྟན་པར་འགྱུར་བ་དེ་བས་ན་ཡོད་ན་དེའི་ཁོ་ན་ལས་བསབ་པར་བྱ་ཞིང་དེའི་རྫས་མེད་ན་ཉེས་པ་མེད་དོ་ཞེས་བྱ་བའི་དོན་ཏེ། དེ་ལ་ལས་སར་བྱེད་པས་ལས་སར་གྱི་དོན་དུ་བུ་ལོན་བླངས་པར་གྱུར་པ་དེའི་ཚེ་ཡང་དགེ་འདུན་དོན་དུ་ལས་སར་བྱེད་པས་བླངས་ཞེས་བྱ་བ་ལ་སོགས་པ་སྨོས་ཏེ། ལས་སར་བྱེད་པས་ཞེས་བྱ་བ་ནི་དགེ་འདུན་གྱིས་ལས་སར་བྱེད་པས་སོ། །དགེ་འདུན་དོན་དུ་ཞེས་བྱ་བ་ནི་དགེ་འདུན་གྱི་ལས་སར་རྒྱུ་མཚན་གྱིས་བུ་ལོན་བླངས་པས་སོ། །དགེ་འདུན་ལས་ཀྱང་གཞལ་ཞེས་བྱ་བ་ནི་དགེ་འདུན་གྱིས་རབ་ཏུ་སྦྱིན་པར་བྱ་ཞེས་བྱ་བའི་དོན་ཏོ། །དགེ་འདུན་ལས་ཞེས་སྤྱིར་བསྟན་པས་ཇི་ལྟར་སྦྱིན་བར་བྱ་ཞེ་ན། དཔང་རྒྱ་བལྟས་ཏེ་ཞེས་བྱ་བ་ལ་སོགས་པས་སྨོས་ཏེ། དབང་རྒྱ་བལྟས་ཤིང་དཔྱད་ནས་ཚད་དེ་ཁོ་ན་ཙམ་དེ་སྦྱིན་པར་བྱའོ་ཞེས་བྱ་བའི་དོན་ཏོ། །ཤི་བའི་རྫས་ཀྱི་བདག་པོ་ཉིད་གང་ཡིན་ཞེ་ན། གསོལ་བྱས་དང་པོ་ཐ་མ་གང་ཡོད་པ། །ཞེས་བྱ་བ་ལ་སོགས་པ་སྨོས་ཏེ། གསོལ་བ་བྱས་པར་གྱུར་པའམ། ཡང་ན་དང་པོ་དང་ཐ་མ་བྱས་པར་གྱུར་པ་ན་གཙུག་ལག་ཁང་དེའི་མཚམས་སུ་ཆུད་པའི་རབ་ཏུ་བྱུང་བ་གང་ཡོད་བ་སྟེ། སྲིད་པར་གྱུར་པ་དེ་དག་ཉིད་ཤི་བ་དེའི་གོས་ལ་སོགས་པའི་དབང་པོ་ཡིན་གྱི། དུས་ཕྱིས་འོངས་པར་གྱུར་པ་ནི་མ་ཡིན་ནོ། །དང་ནི་ངེས་པར་གཟུང་བའོ། །གསོལ་བ་ནི་སྔགས་ཀྱི་ཁྱད་པར་ཡིན་ནོ། །དང་པོ་ཐ་མ་ཞེས་བྱ་བ་ལ། །དང་པོ་དགེ་འདུན་གྱི་གནས་བརྟན་ནོ། །ཐ་མ་སྟེ་གང་འོག་ན་མེད་ཅིང་ཐ་མར་གྱུར་པ་དེ་ནི་དགེ་འདུན་གྱི་གཞོན་རབས་སོ། །འདི་ལྟར་ཤི་བའི་ཡོ་བྱད་དག་ལས་ཨ་རུ་ར་ལ་སོགས་པ་ཅུང་ཞིག་བླངས་ནས་ཀྱང་དགེ་འདུན་གྱི་རྒན་པོ་དང་གཞོན་ནུ་ལ་སྦྱིན་པར་བྱ་བའམ་གསོལ་བར་བྱའོ། །དེ་ནི་འདི་ལྟར་མ་བགོས་ཀྱང་བགོས་པ་བཞིན་དུ་བལྟ་བར་བྱ་བ་ཡིན་པས་ན། གང་དག་གིས་ཕྱིས་འོངས་པ་དེ་དག་ལ་སྦྱིན་པར་མི་བྱའི་དེའི་ཚེ་དེ་དག་ཁོ་ནས་བགོ་བར་བྱའོ། །བཤད་མ་ཐག་པའི་སྒོ་ནས་བགོ་བར་མི་ནུས་པ་འོན་ཏེ་འགོད་པར་བྱེད་ན་ཐམས་ཅད་དབང་བ་ཡིན་ནོ་ཞེས་བྱ་བའི་དབང་དུ་བྱས་ནས་དངོས་པོ་ཇི་ལྟ་བ་དང་བསམ་པ་བཞིན་དུ་ཉེས་པར་འགྱུར་རོ། །
འདིས་ནི་གསོལ་བ་ལ་སོགས་པ་བྱས་པའི་དུས་ཕྱིས་འོངས་པ་རྣམ་པར་གཅོད་པ་ཡིན་གྱི། དུས་སྔ་མར་འོངས་པ་ནི་མ་ཡིན་ནོ། །གང་གི་ཚེ་སྡོམ་ཅན་ནད་པའམ་གཞན་དག་བདག་ཇི་སྲིད་འཚོ་བ་དེ་སྲིད་བདག་ཉིད་ཀྱི་ཡིན་ལ། བདག་ཤི་བར་གྱུར་ན་འདི་ཆེ་གེ་མོ་ཞིག་ལ་བྱིན་ཅིག་ཅེས་ཟེར་བ་ཇི་ལྟར་རྟོགས་པར་བྱ་ཞེ་ན། བདག་ཤི་བའི་འོག་ཏུ་བྱིན་ཞེས་བསྔོས་པ་ནི་ཞེས་བྱ་བ་ལ་སོགས་པ་སྨོས་པ་སྟེ། བདག་ཤི་སྟེ་བདག་ཞིག་པར་གྱུར་པའི་འོག་ཏུའོ། །འདི་བྱིན་ཞེས་བྱ་བ་ནི་སྦྱིན་པར་བསྡོས་ནས་ཇི་སྟེ་དེ་ཤི་བར་གྱུར་པ་དེའི་ཚེ་སྡོམ་ཅན་དག་གིས་བྱིན་པའི་རྫས་དེ་ནི་བགོ་བར་བྱ་སྟེ། བགོ་བཤའ་དག་བྱའི་དེ་དེ་ལ་སྦྱིན་པར་མི་བྱའོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། སྡོམ་ཅན་བུ་ལ་སོགས་པའི་བསམ་དང་བྲལ། །རེ་བཅས་སྦྱིན་པ་སྦྱིན་པར་མི་འགྱུར་རོ། །ཞེས་བྱ་བ་སྨོས་ཏེ། བུ་ལ་སོགས་པའི་བསམ་པ་ནི་སྲེད་པ་དེ་ལྟ་བུ་ལ་སོགས་པའི་བསམ་པས་བདག་ཤི་བར་གྱུར་ན་འདི་བུ་ལ་སོགས་པ་དག་གིར་འགྱུར་རོ་ཞེས་བྱ་བའི་སྲེད་པ་གང་ཡིན་པ་དེ་དང་བྲལ་བ་སྟེ་མེད་པའི་ཕྱིར་རོ། །སྡོམ་ཅན་གང་དག་ལྟོས་པ་དང་བཅས་པའི་སྦྱིན་པ་དག་ཇི་སྲིད་འཚོའི་བར་དུ་ནི་བདག་ཉིད་ཀྱི་ཡིན་ལ། ཤི་བར་གྱུར་ན་ཆེ་གེ་མོ་དག་གིའོ་ཞེས་བྱ་བ་དེ་ནི་སྦྱིན་པ་ཁོ་ན་མ་ཡིན་ཏེ། གང་གི་ཕྱིར་ཁྱིམ་པ་ཁོ་ནའི་སྦྱིན་པ་ཡིན་གྱི། རབ་ཏུ་བྱུང་བ་དག་གི་ནི་མ་ཡིན་པའི་ཕྱིར་རོ། །བཅོམ་ལྡན་འདས་ཀྱིས་ཀྱང་ཁྱིམ་པ་ནི་ལྟོས་པ་དང་བཅས་པས་དུས་འདས་པར་འགྱུར་གྱི། རབ་ཏུ་བྱུང་བ་དག་ནི་ལྟོས་པ་མེད་པ་ཡིན་ནོ་ཞེས་གསུངས་པ་ཡིན་ནོ། །ནད་པས་ཆེ་གེ་མོ་འདི་ལ་བྱིན་ཅིག་ཅེས་ཟེར་བ་ན་གལ་ཏེ་བྱ་བ་གཞན་གྱིས་བྲེལ་བ་བྱུང་བ་དང༌། བརྗེད་ཅིང་གཡེངས་པར་གྱུར་ནས་མ་བྱིན་ན་དེ་ལ་ཇི་ལྟར་བསྒྲུབ་པར་བྱ་ཞེ་ན། ནད་པས་སྦྱིན་པར་བྱ་བར་བསྐུལ་བ་ལས། །ཞེས་བྱ་བ་སྨོས་ཏེ། འདི་ལ་འདི་བྱིན་པར་བསྐུལ་བར་གྱུར་པ་ལས། གལ་ཏེ་བྲེལ་བ་བྱུང་བ་སྟེ་བྱ་བ་གཞན་ཉེ་བར་ལྷགས་པ་དེའི་ཕྱིར་ནད་གཡོག་གམ་གཞན་གང་གིས་ཀྱང་མ་བྱིན་ནའོ། །ནད་པ་དེ་ཡང་ཤི་བར་གྱུར་པ་དེའི་ཚེ་ཇི་ལྟར་བྱ་ཞེ་ན། ཤི་ཡང་དེ་ཡི་ཚིག་དང་མཐུན་པར་ནི། །སྡོམ་ཅན་གྱིས་ནི་ཞེས་བྱ་བ་ལ་སོགས་པ་སྨོས་ཏེ། ཤི་ཡང་དེ་ཡི་ཚིག་དང་མཐུན་
པར་ནི། །ཞེས་བྱ་བ་ནི་ནད་པའི་ཚིག་དང་རྗེས་སུ་མཐུན་པར་རོ། །དེའི་ནོར་གྱི་ཕུང་པོ་ནི་དེའི་རྫས་ཀྱི་ཕུང་པོ་སྟེ། བགོ་བར་མི་བྱ་བ་དང་ལྟོས་པ་དང་བཅས་པ་སྦྱིན་པ་མ་ཡིན་ཞེས་བྱ་བའི་དབང་དུ་བྱས་ནས་རྫས་ཀྱི་ཕུང་པོའི་ཐད་དེ་ལས་སྡོམ་ཅན་རབ་ཏུ་བྱུང་བ་དག་གིས་སྦྱིན་པར་བྱ་བ་ཡིན་ནོ། །འགའ་ཞིག་གིས་དགེ་འདུན་གྱི་དོན་དུ་སྦྱིན་པ་བྱིན་པ་ན་སྡོམ་ཅན་རབ་ཏུ་མང་བ་ཉིད་ཀྱི་ཕྱིར་སོ་སོར་སྦྱིན་པར་མི་ནུས་པས་བཅུ་ལ་སོགས་པའི་སྡེ་ཚན་གྱིས་འགོད་པར་བྱེད་པ་ན་དེ་ལས་འགའ་ཞིག་ཤི་བར་གྱུར་ན་དེའི་སྐལ་བ་སུ་དབང་བར་འགྱུར་ཞེ་ན། རང་གི་སྡེ་ཚན་རྫས་ནི་འགེད་པ་ན་ཞེས་བྱ་བ་ལ་སོགས་པ་སྨོས་ཏེ། སྡེ་ཚན་གང་དུ་ཤི་བ་དེ་ཉིད་ནི་རང་གི་སྡེ་ཚན་ཏེ་དེའི་རྫས་འགེད་ཅིང་བགོ་བཤ་འབྱེད་པ་ན་རང་གི་སྡེ་ཚན་གྱི་སྡོམ་ཅན་རབ་ཏུ་བྱུང་བ་ཤི་བར་གྱུར་ནའོ། །ཁྱད་པར་ཇི་ལྟ་བུ་ཞེ་ན། འདིས་སྐལ་བ་སྟེ། ཆ་ཤས་མ་བླངས་ཤིང་མ་མནོས་པའི་ཕྱིར་སྐལ་བ་མ་བླངས་སོ། །ཤི་ཞེས་བྱ་བ་ནི་ཤི་བར་གྱུར་པ་ཁོ་ན་ཤི་བ་ཞེས་བསྟན་པ་ཡིན་གྱི་ཕྱིས་ཤི་བར་འགྱུར་བ་ཞེས་བྱ་བ་ནི་མ་ཡིན་ནོ། །གཞན་དུ་ན་སྡོམ་ཅན་ཤི་བར་གྱུར་པ་དེའི་ལ་ཇི་ལྟར་གཞན་དག་བདག་པོ་ཉིད་དུ་འགྱུར། དེའི་ཚེ་འདི་སྡེ་ཚན་གང་དུ་ཤི་བར་གྱུར་པའི་སྡེ་ཚན་དེ་ཉིད་དེའི་སྐལ་བ་དེ་དབང་ངོ་ཞེས་བྱ་བ་ནི་ཤི་བའི་སྐལ་བ་སྟེ། ཐོབ་སྐལ་གང་ཡིན་པ་དེ་ནི་བདག་ཉིད་ཀྱི་སྡེ་ཚན་དེ་དབང་བར་འགྱུར་རོ་ཞེས་བྱ་བའི་དོན་ཏོ། །ཉིད་ནི་གཞན་རྣམ་པར་བཅད་པའི་དོན་ཏོ། །གང་གི་ཚེ་སྐལ་བ་ཐོབ་ནས་ཀྱང་ཤི་བར་གྱུར་པ་དེའི་ཚེ་སུ་དབང་བར་འགྱུར་ཞེ་ན། སྐལ་བ་ཐོབ་ན་ཤི་བའི་སྐལ་བ་ཉིད་ཅེས་བྱ་བ་སྨོས་ཏེ། གལ་ཏེ་སྐལ་བ་སྟེ་ཆ་ཤས་ཐོབ་ནས་ཤི་བ་དེའི་ཚེ་ཤི་བར་གྱུར་པས་ཤི་བའི་སྐལ་བ་ཉིད་ཡིན་ནོ། །ཉིད་ནི་ཤི་བའི་ཡོ་བྱད་ཁོ་ན་ཡིན་གྱི་སྡེ་ཚན་གྱི་མ་ཡིན་ནོ་ཞེས་ངེས་པར་གཟུང་བའི་དོན་ཏོ། །ནིའི་སྒྲ་ནི་གོང་མ་ལས་ཁྱད་པར་དུ་བྱེད་པའི་དོན་ཡིན་ཏེ། གང་གི་ཕྱིར་ཤི་བའི་ཡོ་བྱད་ཡིན་པ་དེའི་ཕྱིར་དགེ་འདུན་མ་ལུས་པ་དབང་བ་ཡིན་ནོ་ཞེས་བསྟན་པར་རིག་པར་བྱའོ། །དེ་ལ་སྐལ་བ་ཕྱིས་འབྱུང་བ་ལེན་པ་ལས་སྔ་མ་ཁོ་ནར་ཤི་བར་གྱུར་ན་ནི་སྡེ་ཚན་དེ་ཉིད་ཀྱིར་འགྱུར་ལ། སྐལ་བ་ཐོབ་ནས་ཤི་ན་ནི་ཤི་བའི་ཡོ་བྱད་ཉིད་ཡིན་པའི་ཕྱིར་དགེ་འདུན་མ་ལུས་པ་དབང་བར་འགྱུར་རོ་ཞེས་བྱ་བ་འདི་ནི་བསྡུས་པའི་དོན་ཡིན་ནོ། །
གང་གི་རྩ་བའི་བགོ་བཤའ་ལས་ཀྱང་སྔ་མ་ཁོ་ནར་སྡེ་ཚན་གྱི་ནང་དུ་ཤི་བར་གྱུར་ན་དེ་དང་ལྷན་ཅིག་སྐལ་བ་ལེན་པའི་སྡེ་ཚན་དུ་མ་བྱས་པ་ཡིན་ལ། འོན་ཀྱང་སྐལ་བ་བླངས་པར་གྱུར་པ་དེ་ལྟ་ན་ཡང་དེ་ཉིད་དུ་བསྡུ་བར་བྱ་བ་ཡིན་པའི་ཕྱིར་དེ་ཡང་འདི་ཉིད་ཀྱིས་བསྟན་པར་རིག་པར་བྱའོ། གཞན་གྱིས་གཞན་ལ་གོས་ལ་སོགས་པ་བསྐུར་བ་ན་གང་བདག་བོ་ཉིད་ཡི་ན་ཞེ་ན། གོས་ལ་སོགས་པ་གཞན་དུ་བསྐུར་བ་ནི་ཞེས་བྱ་བ་ལ་སོགས་པ་སྨོས་པ་སྟེ། གཞན་དུ་ཞེས་བྱ་བ་ནི་སྡོམ་ཅན་གཞན་གྱི་རྒྱུ་མཚན་དུའོ། །གོས་ལ་སོགས་པའི་རྫས་གང་ཡིན་པ་དེ་ནི་གོས་ལ་སོགས་པའོ། །གོས་ལ་སོགས་པ་ཡང་ད་ཡིན་ལ་བསྐུར་བ་ཡང་ཡིན་པས་ན་གོས་ལ་སོགས་པ་བ་སྐུར་བ་ནའོ། །དེ་བཞིན་དུ་ཞེས་བྱ་བ་ནི་གཙུག་ལག་ཁང་གཞན་དང་གྲོང་གཞན་དག་ཏུ་ཞེས་ཤེས་པར་བྱ་སྟེ། གང་རབ་ཏུ་བྱུང་བ་དེ་ལ་བསྐུར་བ་ནི་ཞེས་བྱ་བར་སྦྱར་བར་བྱའོ། །གོས་ལ་སོགས་བ་གང་ལ་བསྐུར་བ་དེ་ཉིད་ཀྱིས་ཡིན་ཏེ། དེའི་འདི་ཡིན་བས་ན་དེ་ཉིད་ཀྱིའོ་ཞེས་བྱ་བས་ནི་ངེས་པར་གཟུང་བ་དང་རིམ་པ་གཞན་དུ་བསྟན་པའོ། །ནིའི་སྒྲ་ནི་དངོས་པོ་བསྐུར་བའི་རིམ་པ་ནི་འདི་ཡིན་ནོ་ཞེས་སྔ་མ་ལས་ཁྱད་པར་དུ་བྱེད་པའི་དོན་ཏོ། །འོན་ཏེ་མི་འདོད་ན་གང་བདག་པོ་ཉིད་ཡིན་ཞེ་ན། གལ་ཏེ་བསྐུར་བ་ན་གང་ལ་བསྐུར་བ་དེ་མ་འདོད་ན་ཞེས་བྱ་བར་སྦྱར་རོ། །གོས་ལ་སོགས་པ་བསྐུར་བ་གང་ཡིན་པ་དེ་ནི་བསྐུར་བ་པོ་དེ་ཉིད་དབང་བ་སྟེ་བདག་པོ་ཡིན་ནོ་ཞེས་བྱ་བའི་ཐ་ཚིག་གོ །འོན་ཏེ་དེ་ཡང་ཇི་སྟེ་མི་འདོད་པ་སྟེ་བདག་གིས་དེ་ལ་བཏང་བ་ཡིན་ནོ་ཞེས་དེ་ལྟར་གོས་ལ་སོགས་པ་དག་མི་འདོད་ཀྱང་གོས་ལ་སོགས་པ་འདི་ཉིད་བསྐུར་བ་པོ་ཉིད་དབང་བ་ཉིད་དུ་འགྱུར་རོ་ཞེས་བྱ་བར་སྦྱར་བར་བྱའོ། །ཉིད་ནི་སྔ་མ་དང་འདྲའོ། །དེ་ལ་འདི་ནི་བསྐུར་བ་ཡང་དག་པར་སྦྱིན་པ་མ་སྤངས་པར་ཤི་བར་གྱུར་པ་དེའི་ཚེ་དེའི་ཡིན་ནོ་ཞེས་ཤི་བའི་ཡོ་བྱད་དུ་བྱིན་གྱིས་བརླབ་པར་བྱའོ། །འོན་ཏེ་བསྐུར་བ་པོ་ཤི་བར་གྱུར་ན་དེའི་ཡིན་ནོ་ཞེས་བྱིན་གྱིས་བརླབ་པར་མི་བྱའོ། །བྱིན་གྱིས་རློབ་པར་བྱེད་ན་བྱིན་གྱིས་མ་བརླབས་པར་འགྱུར་ལ་ཡང་དག་པར་བྱིན་པ་སྤངས་ན་ནི་ཕྱིན་ཅི་ལོག་མ་ཡིན་ཏེ་དོན་དམ་པར་དེ་ཉིད་ཁོ་ནའི་ཡིན་པའི་ཕྱིར་རོ་ཞེས་བྱ་བ་བསྡུས་པའི་དོན་ཡིན་ནོ། །ཡིད་གཅུགས་པས་ལོངས་སྤྱོད་པ་ལ་ཡང་ཚུལ་འདི་ཉིད་ཡིན་ནོ། །
ཤི་བའི་ཡོ་བྱད་གང་དབང་བ་ཡིན་ཞེ་ན། འདྲ་བ་ཡོད་ན་ཤི་བའི་གོས་རྣམས་ནི་ཞེས་བྱ་བ་ལ་སོགས་པ་སྨོས་ཏེ། ཤི་བའི་གོས་རྣམས་ནི་ཤི་བའི་གོས་དག་སྟེ་དེ་དག་དབང་བ་མིན། དབང་བ་ནི་བདག་པོར་གྱུར་པ་ཡིན་ལ། དབང་བ་མ་ཡིན་པ་ནི་དབང་བ་མ་ཡིན་པའོ། །དེའི་དངོས་ནི་དབང་བ་མ་ཡིན་པ་ཉིད་དོ། །གང་ཞེ་ན་ཐ་དད་གྱུར་པའི་མཚན་ནི་ཞེས་བྱ་བ་སྨོས་ཏེ། འདིས་མཚོན་པར་བྱེད་པས་ན་མཚན་ཏེ་སྐྱེས་པ་དང་བུད་མེད་དག་གི་དབང་པོའོ། །དེས་ཐ་དད་པར་གྱུར་པའི་མཚན་ནི་ཐ་དད་པར་གྱུར་པའི་མཚན་ཏེ་མཚན་ཐ་དད་པར་གྱུར་པ་ཞེས་བྱ་བའི་དོན་ཏོ། །དེ་གང་གི་ཚེ་ན། འདྲ་བ་ཡོད་ན་ཞེས་བྱ་བ་སྨོས་ཏེ། འདྲ་བ་ནི་འདྲ་བ་ཡིན་ལ་ཡོད་པ་ནི་སྲིད་པར་གྱུར་པ་སྟེ། ཤུགས་ཀྱིས་དེ་ཉིད་བདག་པོ་ཉིད་ཡིན་པར་ཁོང་དུ་ཆུད་པར་བྱའོ། །དེ་བཞིན་དུ་བཀར་བ་ཡང་བདག་པོ་ཉིད་མ་ཡིན་ནོ། །གང་གི་ཚེ་ཞེ་ན། སྨྲས་པ་སྡོམ་ཅན་གཞན་མ་བཀར་བ་མངོན་སུམ་དུ་ཡོད་ནམ་བཀར་བའི་ཤི་བའི་ཡོ་བྱད་འབའ་ཞིག་ཙམ་ནི་མ་ཡིན་ནོ། །བཀར་བ་ནི་ཆད་པའི་ལས་ཀྱི་བྱེ་བྲག་ཡིན་ལ། དེ་གང་གིས་ཐོབ་པ་དེའི་ནོར་ཏེ་རྫས་ནི་བཀར་བའི་དོན་ཡིན་ལ་དེའི་ཡང་བདག་པོ་ནི་བཀར་བ་མ་ཡིན་ནོ་ཞེས་བྱ་བར་སྦྱར་རོ། །ཡང་གི་སྒྲ་ནི་གཉི་ག་ལ་སྦྱར་བར་བྱའོ། །རང་བཞིན་དུ་གནས་པ་མཚན་འདྲ་བ་མེད་ན་ནི་བདག་པོ་ཉིད་དུ་འགྱུར་བ་ཡིན་ཏེ། གཞན་དུ་ན་འདྲ་བ་ཡོད་ན་ཞེས་བྱ་བ་ལ་སོགས་པ་སྨོས་པ་དོན་མེད་པར་འགྱུར་རོ། །གཙུག་ལག་ཁང་གཉིས་ཀྱི་བར་ཏེ་དབུས་མར་སྡོམ་ཅན་ཤི་བ་དེའི་རྫས་གང་དབང་བ་ཡིན་ཞེ་ན། གཙུག་ལག་ཁང་གཉིས་མཚམས་ཀྱི་བར་དུ་ཤི་།ཞེས་བྱ་བ་ལ་སོགས་པ་སྨོས་ཏེ། གཙུག་ལག་ཁང་གི་མཚམས་ནི་གཙུག་ལག་ཁང་གི་མཚམས་ཏེ། དེའི་གཉིས་ནི་མཚམས་གཉིས་ཞེས་བྱ་བའི་ཐ་ཚིག་གོ །གཙུག་ལག་ཁང་གཉིས་ཀྱི་མཚམས་དེའི་བར་དེར་ཤི་ཞིང་རླག་པར་གྱུར་པ་ནི་གཙུག་ལག་ཁང་གཉིས་ཀྱི་བར་དུ་དེ་ཤི་བར་གྱུར་པའོ། །ཤི་བ་དེའི་ལུས་ནི་དེའི་ལུས་ཏེ་དེ་དང་འབྲེལ་བའི་རས་ལ་སོགས་པའི་རྫས་ནི་རས་ལ་སོགས་པ་ཡང་དེ་ཡིན་ལ་རྫས་ཀྱང་ཡིན་པས་རས་སོགས་རྫས་སོ། །དེ་གང་དབང་ཞེ་ན། གང་དུ་དེ་བཞག་པ་སྟེ་མཚམས་གང་དུ་རས་ལ་སོགས་པའི་སྣོད་སྤྱད་དེ་ཉིད་ལྷུང་བར་འགྱུར་བ་མཚམས་དེ་པ་དབང་བར་འགྱུར་རོ། །ནིའི་སྒྲ་ནི་རས་ལ་སོགས་པ་ཁོ་ན་གང་དུ་གཞག་པ་ཡིན་གྱི་མགོ་
བོ་འམ་ཡན་ལག་གཞན་དག་ནི་མ་ཡིན་ནོ་ཞེས་ངེས་པར་གཟུང་བ་དང་རིམ་པ་གཞན་དུ་བསྟན་པའོ། །མཚམས་གཉི་གར་བཞག་པ་གང་གིར་འགྱུར་ཞེ་ན། ཇི་སྟེ་གཉི་ག་སྟེ་མཚམས་གཉི་ག་ན་གནས་པ་དེ་དག་དབང་བར་འགྱུར་ཏེ། འདི་སྐད་དུ་མཚམས་གཅིག་རས་ལ་སོགས་པ་དེས་ཁྱབ་པར་གྱུར་ན་དེའི་ཁོངས་སུ་འདུས་པ་དག་དབང་བར་འགྱུར་ལ། མཚམས་གཉི་ག་ཁྱབ་པར་གྱུར་ན་ནི་དེ་གཉི་ག་དག་དབང་བར་འགྱུར་རོ། །དོན་འདི་ནི་གང་གི་མཚམས་ན་ཤི་བའི་གོས་ལ་སོགས་པ་ཞེས་བྱ་བ་ལ་སོགས་པ་བཤད་པར་གྱུར་པས་རྟོགས་པར་འགྱུར་མོད་གྱི། དེ་ལྟ་ན་ཡང་གསལ་བའི་དོན་དུ་ཡིན་པར་རིག་པར་བྱའོ། །ཁྱིམ་གྱི་ནང་དུ་བཞག་པའི་གོས་དེ་ཡང་གང་ཡིན་པར་འགྱུར་ཞེ་ན། ཤི་བའི་གོས་སོགས་ཁྱིམ་གྱི་ནང་བཞག་པ། །ཞེས་བྱ་བ་ལ་སོགས་པ་སྨོས་ཏེ། ཁྱིམ་གྱི་ནང་དུ་བཞག་པར་གྱུར་པའི་ཕྱིར་ཁྱིམ་གྱི་ནང་དུ་བཞག་པའོ། །ཁྱིམ་གྱི་ནང་དེར་བཞག་པའི་ཤི་བའི་གོས་དག་ནི་ཁྱིམ་པ་རབ་ཏུ་བྱུང་བ་གང་ལ་དད་པ་སྟེ་མངོན་པར་དད་ནས་དེ་ལ་ཕུལ་བ་དེ་དབང་བར་འགྱུར་རོ། །ཁྱིམ་པ་དེ་ཞེས་བྱ་བ་ནི་གང་གི་ཁྱིམ་གྱི་ནང་དུ་ལྷུང་བཟེད་ལ་སོགས་པ་བཞག་པར་གྱུར་པ་དེ་ལ་དེ་སྐད་ཅེས་བྱའོ། །གང་ལ་བྱིན་པ་དེ་ཡང་ཆོས་གོས་ལ་སོགས་པ་མེད་པར་གྱུར་པ་ཞེས་བྱ་བར་མ་བསྟན་དུ་ཟིན་ཀྱང་གྲུབ་པ་ཡིན་པར་རིག་པར་བྱའོ། །ཡོད་པར་གྱུར་ན་ནི་བླངས་ནས་གཞན་དག་ལ་སྦྱིན་པར་བྱ་སྟེ། ལྷག་པ་ནི་མི་མཁོ་བའི་ཡོ་བྱད་ཉིད་ཡིན་པའི་ཕྱིར་རོ། །རབ་ཏུ་བྱུང་བ་གཞན་དུ་ཤི་བར་གྱུར་ཅིང་དེའི་ཡོ་བྱད་གཞན་ན་ཡོད་པ་དེ་གང་གིས་བྱིན་གྱིས་བརླབ་པར་བྱ་བ་ཡིན་ཞེ་ན། གང་གི་མཚམས་ན་ཤེ་པའི་གོས་ལ་སོགས། །ཞེས་བྱ་བ་ལ་སོགས་པ་སྨོས་ཏེ། རབ་ཏུ་བྱུང་བ་གང་དག་གི་མཚམས་སུ་ཤི་བའི་གོས་ལ་སོགས་པ་གཞག་པར་གྱུར་པ་ཞེས་བྱ་བའི་ཚིག་གི་ལྷག་མའོ། །སོགས་པའི་སྒྲ་ནི་ཡོ་བྱད་མ་ལུས་པ་འཕེན་པར་བྱེད་པའོ། །དེ་དག་ཁོ་ནས་བྱིན་གྱིས་བརླབས་ནས་དབང་བ་ཡིན་ཏེ། བྱིན་གྱིས་བརླབས་ནས་དབང་བ་ཉིད་ནི་སྔགས་ཀྱིས་བྱིན་གྱིས་བརླབས་ནས་བདག་གིར་བྱས་པ་ཡིན་ནོ། །འདི་ལྟར་བྱིན་གྱིས་བརླབ་པར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ་ཞེས་བྱ་བ་ནས་གནས་འདི་ཉིད་དུ་མིང་ཆེ་གོ་མོ་ཞེས་བྱ་བ་དུས་ལས་འདས་པར་གྱུར་ན་གལ་ཏེ་དགེ་འདུན་གྱི་དུས་ལ་བབ་ཅིང་
བཟོད་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་སྡོམ་ཅན་ཆེ་གེ་མོ་ཤི་བའི་ཡོ་བྱད་བགོ་བར་བྱ་བ་ཆོས་གོས་དང་ཆོས་གོས་ཀྱི་སྣོད་སྣང་བ་དང་མི་སྣང་བ་བྱིན་གྱིས་བརླབ་པར་བགྱིའོ་ཞེས་བྱ་བའི་བར་དུའོ། །གཙུག་ལག་ཁང་འགའ་ཞིག་ཏུ་རབ་ཏུ་བྱུང་བ་ཤི་བར་གྱུར་པ་དེ་ལས་དེར་རམ་གཞན་དུ་དེའི་དངོས་པོ་གང་གི་ལག་ཏུ་བཞག་པ་དེ་ཡང་གཙུག་ལག་ཁང་གཞན་དུ་སོང་བར་གྱུར་པ་དེ་ལ་ཇི་ལྟར་བྱ་བ་ཡིན་ཞེ་ན། གནས་གཞན་དག་ཏུ་བཞག་པའི་གོས་རྣམས་ཀྱང་ཞེས་བྱ་བ་སྨོས་ཏེ། ཇི་ལྟར་གོང་དུ་གནས་གཞན་དུ་བཞག་པ་བྱིན་གྱིས་བརླབས་པ་དེ་བཞིན་དུ་གནས་གཞན་དུ་བཞག་པའི་གོས་ཡོད་པ་ལ་ཡང་གོས་དེ་དག་བྱིན་གྱིས་བརླབ་པར་བྱའོ་ཞེས་བྱ་བ་ནི་ཚིག་གི་ལྷག་མ་ཡིན་ནོ། །གཙུག་ལག་ཁང་གཅིག་གི་མཚམས་ལས་མཚམས་གཞན་ཏེ་དེར་བཞག་པ་དག་གི་སྒོ་ནས་བྱིན་གྱིས་བརླབ་པར་བྱ་ཞེ་ན། དངོས་དང་འདྲ་བར་བྱིན་གྱིས་བརླབ་པར་བྱ་ཞེས་བྱ་བ་སྨོས་ཏེ། ལྐོག་ཏུ་གྱུར་བ་ཡིན་ཡང་དངོས་དང་འདྲ་བའི་དབང་གིས་བྱིན་གྱིས་བརླབས་ན་བྱིན་གྱིས་བརླབས་པ་ཡིན་ནོ་ཞེས་བྱ་བའི་དོན་འདིར་བསྟན་པར་འགྱུར་རོ། །དེ་ལྟར་ཡང་མདོ་མཛད་པས་འདིར་ཤི་བའི་གནས་ཉིད་རྒྱུ་མ་ཡིན་ནོ་ཞེས་གསུངས་ཏེ་དེ་ལ་འདིའི་དོན་ནི་དངོས་དང་འདྲ་བ་དེ་ནི་ཤི་བའི་རྫས་ཀྱི་དངོས་དང་འདྲ་བ་སྟེ། དེ་གང་དུ་སོང་བ་དེར་གནས་པ་དག་གིས་དངོས་དང་འདྲ་བའི་མདུན་དུ་གནས་གཞན་ན་ཡོད་པའི་རྫས་བྱིན་གྱིས་བརླབ་པར་བྱ་བ་འམ། ཡང་ན་མཚམས་གང་ན་ཡོད་པའི་རྫས་དེ་འབའ་ཞིག་ལ་དེར་གནས་པ་དག་གིས་བྱིན་གྱིས་བརླབ་པར་བྱ་ཞིང་བདག་གིར་བྱའོ། །གང་དུ་རབ་ཏུ་བྱུང་བ་གྱུར་པ་དེའི་ཁོངས་སུ་གཏོགས་པ་དག་གིས་ནི་མ་ཡིན་ནོ། །གང་གི་ཕྱིར་འདིར་ཤི་བའི་གནས་ཉིད་ནི་རྒྱུ་མ་ཡིན་པ་དེ་ཉིད་ཀྱི་ཕྱིར་བགོའོ། །བཞག་པར་གྱུར་པ་ཡང་རྒྱུ་མ་ཡིན་ནོ། །དངོས་དང་འདྲ་བས་ཞེས་བསྟན་པའི་དངོས་དང་འདྲ་བ་དེ་གང་ཡིན་ཞེ་ན། གང་ལ་རྫས་རྣམས་བཞག་པར་གྱུར་པའི་ཞེས་བྱ་བ་ལ་སོགས་པ་སྨོས་ཏེ། ཤི་བ་དེའི་རྫས་ནི་དེའི་རྫས་སོ། །བཞག་པར་གྱུར་པ་ཞེས་བྱ་བ་ནི་མི་གང་ལ་ཤི་བའི་རྫས་དེ་བཞག་པར་གྱུར་པ་དེ་ནི་དངོས་དང་འདྲ་བ་ཞེས་བརྗོད་པ་སྟེ། དངོས་དང་འདྲ་བ་ཞེས་བརྗོད་པའི་མི་གང་ལ་ཡོད་པ་ཞེས་བྱ་བའི་དབང་དུ་བྱས་ནས། ནིའི་སྒྲ་ནི་གང་གི་ཕྱིར་གྱི་དོན་ཏེ་གང་གི་ཕྱིར་དེའི་དེ་ནི་རྫས་ཀྱི་གཞིར་གྱུར་
པ་ཉིད་ཡིན་པའི་ཕྱིར་དང༌། ཤི་བའི་བརྗེད་མར་གྱུར་པ་ཡིན་པ་དེའི་ཕྱིར་དེ་དངོས་དང་འདྲ་བ་ཞེས་བྱའོ། །འདི་ལྟར་དངོས་དང་འདྲ་བ་བྱིན་གྱིས་བརླབ་པར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ་ཞེས་བྱ་བ་ནས་འདིར་དགེ་སློང་ངམ་དགེ་ཚུལ་ཆེ་གེ་མོ་དུས་ལས་འདས་པར་གྱུར་ལ། དེ་གལ་ཏེ་དགེ་འདུན་གྱི་དུས་ལ་བ་བཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་ངམ་དགེ་ཚུལ་ཆེ་གེ་མོའི་དངོས་དང་འདྲ་བའི་དགེ་སློང་ངམ་དགེ་ཚུལ་ཆེ་གེ་མོ་ལ་ཤི་བའི་ཡོ་བྱད་བགོ་བར་བྱ་བ་ཆོས་གོས་སམ་ཆོས་གོས་ཀྱི་སྣོད་སྣང་བའམ་མི་སྣང་བ་གང་ཡིན་པ་བྱིན་གྱིས་བརླབ་པར་བྱའོ་ཞེས་བྱ་བའི་བར་དུའོ། །འགའ་ཞིག་ལ་ལྷུང་བཟེད་ལ་སོགས་པ་གཏོད་པར་བྱེད་པའི་དུས་གཏད་པར་གྱུར་ནས་གང་སྨྲ་བ་ནི་བག་ཡོད་པར་བྱ་བའི་དོན་དུ་དེ་སྐད་དུ་བརྗོད་པ་ཡིན་ཏེ། ལག་ནས་ལག་ཏུ་སྣོད་ལ་སོགས་པ་གཏོད་པར་བྱེད་པ་ནི་དེས་སྣོད་ལ་སོགས་པ་འདི་ཁྱོད་ཀྱིས་ཟིན་ཏམ། ཇི་ཁོ་བོས་ནི་བཏང་ངོ་ཞེས་ལེན་པ་པོ་དེས་ཤེས་པར་བྱས་ནས་སྣོད་ལ་སོགས་པ་དེ་བྱིན་པར་བྱའོ། །གང་གི་ཚེ་ཞེ་ན། གྲུ་དང་པོར་བྱས་པའི་གཞན་གང་ཡིན་པ་དེ་ནི་གྲུ་སོགས་སོ། །དེ་ལ་འཛེག་པར་སྟེ་འཛེག་པའི་དུས་དེའི་ཚེའོ། །དེ་སྐད་ཅེས་བྱ་བའི་སྒྲས་ནི་དེ་སྐད་ཅེས་བྱ་བ་དང་རིམ་པ་གཞན་གྱི་དོན་ཡིན་ཏེ་སྔ་མ་བཞིན་དུ་བལྟ་བར་བྱའོ། །གལ་ཏེ་གཏོད་པར་བྱེད་པ་དེས་དེ་སྐད་དུ་སྨྲས་པ་ན། ལེན་པ་པོ་དེས་ཀྱང་ཁས་བླངས་ནས་སྣོད་ལ་སོགས་པ་དེ་ཆུ་ལ་སོགས་པར་ལྷུང་བའི་སྒོ་ནས་པོར་བར་གྱུར་ན་དེའི་ཚེ་སྣོད་ལ་སོགས་པ་ལེན་པ་པོ་དེ་ལ་དེའི་རིན་དབབ་པར་བྱ་བ་ཡིན་ནོ། །ཇི་ལྟ་ཞེ་ན། དོགས་པ་མེད་པར་ཏེ་གང་གི་ཕྱིར་དེས་སྨྲས་པ་དེས་ཁས་བླངས་པར་གྱུར་པ་དེའི་ཕྱིར་རིན་ཕ་བ་པ་ལ་ཉེས་པ་ཡོད་པ་མ་ཡིན་ནོ་ཞེས་བྱ་བ་དེ་ཙམ་ཞིག་བསྟན་གྱི། །འོན་ཀྱང་འདི་བསླབ་པའི་གཞི་ཡིན་ནོ་ཞེས་ཁོང་དུ་ཆུད་པར་བྱ་བ་མ་ཡིན་ནོ། །གཞན་གྱི་རྙེད་པ་བླང་བར་ཁས་བླངས་ནས་རྙེད་པ་དེ་མ་བླངས་ན་དེ་ཡང་དབབ་པར་བྱ་བ་ཡིན་ནོ་ཞེས་འདི་ཉིད་ཀྱིས་བསྟན་པར་རིག་པར་བྱའོ། །དམ་པ་མ་ཡིན་པ་ལས་གོས་ལ་སོགས་པ་ལེན་པར་བྱེད་ལ་དབང་མེད་པ་དེ་དག་ལས་ནི་གོས་ལ་སོགས་པ་ཞེས་བྱ་བ་ལ་སོགས་པས་འགོག་པར་བྱེད་དེ། སྦྱིན་པའི་ཡུལ་ལ་དབང་མེད་པར་གྱུར་པ་བསྲུང་བའི་བྱ་བ་ཁོ་ན་བྱེད་ཅིང་
སྦྱིན་པའི་ཕྱིར་མ་ཡིན་པ་དེ་ལ་དེ་སྐད་ཅེས་བྱའོ། །དབང་མེད་པ་དེ་ལས་ཏེ་གོས་ལ་སོགས་པ་སྦྱིན་པའི་ཕྱིར་གཙོ་བོ་མ་ཡིན་པ་ཉིད་ལ་གོས་ལ་སོགས་པ་དེ་བླང་བར་མི་བྱའོ། །གོས་དང་པོར་བྱས་པའི་གསེར་ལ་སོགས་པ་གང་ཡིན་པ་དེ་ནི་གོས་ལ་སོགས་པའོ། །རྒྱུ་ཅིའི་ཕྱིར་ཞེ་ན། དེ་ནི་སྦྱིན་བདག་མིན་ཞེས་བྱ་བ་སྨོས་པ་ཡིན་ནོ། །ནིའི་སྒྲ་ནི་གང་གི་ཕྱིར་གྱི་དོན་ཏེ། གང་གི་ཕྱིར་སྦྱིན་པའི་ཕྱིར་གཙོ་བོར་གྱུར་པ་མ་ཡིན་པ་དེའི་ཕྱིར་སྦྱིན་བདག་ཁོ་ན་མ་ཡིན་པ་དེ་དབང་མེད་པར་གྱུར་པ་ཁོ་ན་ཡིན་པའི་ཕྱིར་རོ་ཞེས་བྱ་བ་ནི་ཚིག་གི་ལྷག་མ་ཡིན་ནོ། །སྦྱིན་བདག་གི་སྒྲས་རྫས་ཀྱི་བདག་པོ་བརྗོད་པ་ཡིན་ཏེ། ཚིག་འདིས་ནི་གང་གི་ཚེ་སྟོབས་པར་བྱེད་པ་དེའི་ཚེ་བླང་བར་བྱ་བ་ཡིན་ནོ་ཞེས་ཁོང་དུ་ཆུད་པར་བྱའོ། །གང་ཡང་ལས་བྱེད་པར་འགྱུར་བ་སྦྱིན་པ་དང་ལེན་པར་ནུས་པ་གང་ཡིན་པ་དེ་ལ་སོགས་པ་ཇི་ལྟར་བླང་བར་བྱ་ཞེ་ན། ཕོངས་པར་གྱུར་ན་ནད་པས་ལས་བྱེད་ལ་ཞེས་བྱ་བ་སྨོས་ཏེ། གལ་ཏེ་སྨན་ལ་སོགས་པའི་ཐབས་མེད་པ་དེའི་ཚེ་བླང་བར་བྱའོ་ཞེས་བྱ་བའི་དོན་ཏོ། །བདག་ཉིད་ཀྱི་ཡིན་པས་ན་བདག་གི་འདི་ཡིན་ནོ་ཞེས་བྱ་བར་གང་གིས་ཡོངས་སུ་གཟུང་བ་དེ་ནི་ལས་བྱེད་པ་ཡིན་པར་ཤེས་པར་བྱའོ། །འདི་གང་གིས་བླང་བར་བྱ་བ་ཡིན་ཞེ་ན། ནད་པས་ཞེས་སྨོས་ཏེ་ནད་པ་དེ་བཞིན་དུ་གནས་པ་མ་ཡིན་པས་སོ། །དེ་ཡང་རང་བཞིན་དུ་གནས་པར་གྱུར་ནས་སླར་སྦྱིན་པར་བྱའོ། །སྦྱིན་པར་འདོད་པ་ནི་སླར་སྦྱིན་པར་ནི་འདོད་པ་སྟེ། དེ་ཉིད་ཀྱིས་བླང་བར་བྱའོ་ཞེས་བྱ་བར་སྦྱར་བྱའོ། །ནིའི་སྒྲ་ནི་སྔ་མ་ལས་ཁྱད་པར་དུ་བྱེད་པ་དང་རིམ་པ་ཐ་དད་པའི་དོན་ཏོ། །ཡང་གི་སྒྲ་ནི་རང་གི་དོན་ཡིན་ལ་ཉིད་ནི་ངེས་པར་གཟུང་བའི་དོན་ཡིན་ནོ། །ནད་པས་དེ་བཞིན་གཤེགས་པའི་དཀོར་ལས་སྨན་ལ་སོགས་པ་བྱའོ་ཞེས་བསྟན་པའི་ཕྱིར་སྨན་ཟོང་ནོར་དང་བྲལ་བར་གྱུར་པ་ལ། དེ་བཞི་གཤེགས་པའི་ཡང་དཀོར་གྱིས་བསྡུད་ཅེས་བྱ་བ་ལ་སོགས་པ་སྨོས་ཏེ། འདི་དེ་བཞིན་གཤེགས་པའི་ཡིན་པས་ན་དེ་བཞིན་གཤེགས་པའི་སྟེ་རྒྱན་ལ་སོགས་པ་ཡིན་ལ། དེས་ཀྱང་སྨན་གྱི་བྱ་བ་དག་བྱའོ། །གང་གིས་ཤེ་ན་སྨན་ཟོང་ནོར་དང་ཞེས་བྱ་བ་སྨོས་ཏེ། ནོར་དང་བྲལ་བ་ནི་ནོར་དང་བྲལ་བར་གྱུར་པ་སྟེ། ནོར་མེད་པ་ཞེས་བྱ་བ་ནི་བར་དུ་ཡིན་པས་ན་ནོར་དང་མི་ལྡན་པའི་སྡོམ་ཅན་དེས་སོ། །ཡང་གི་སྒྲ་ནི་འདི་སྐད་དུ་དང་པོ་བདག་ཉིད་ཀྱི་ལས་སོ། །དེ་
མེད་ན་ཡང་དག་པར་བླངས་ནས་སོ། །ད་ཡང་མེད་ན་དེ་བཞིན་གཤེགས་པའི་གསེར་ལ་སོགས་པའི་དབྱིག་ལས་སོ། །དེ་ཡང་མེད་ན་དེ་བཞིན་གཤེགས་པའི་རྒྱན་གྱིས་བསྡུད་པར་བྱའོ་ཞེས་བསྟན་པ་ཡིན་ནོ། །སྨན་ཟོང་འབའ་ཞིག་ལ་མ་ཡིན་གྱི་དེའི་ཆེད་དུ་བཅོམ་ལྡན་འདས་ལ་མཆོད་པ་དང༌། བསྙེན་བཀུར་བ་ལ་ཡང་བསྟུད་པར་བྱའོ་ཞེས་བྱ་བར་ཡང་བལྟ་བར་བྱའོ། །རང་བཞིན་དུ་གནས་པར་གྱུར་པས་བྱ་བ་ནི་སོས་པར་གྱུར་ནས་ཞེས་བྱ་བ་ལ་སོགས་པ་སྨོས་ཏེ། སོས་པའི་དངོས་པོ་ནི་སོས་པ་ཉིད་དེ་དེར་གྱུར་པ་ན་དེ་བཞིན་གཤེགས་པའི་དཀོར་བླངས་པ་དེ་སླར་ཡང་བསབ་པར་བྱའོ། །ནིའི་སྒྲ་ནི་སྔ་མ་ལས་ཁྱད་པར་དུ་བྱེད་པའི་དོན་ཡིན་ནོ། །ནོར་དང་བྲལ་བའི་ནད་པས་བླངས་པ་སོས་པར་གྱུར་ནས་བསབ་པར་བྱའོ་ཞེས་བྱ་བ་ནི་ནོར་ཡོད་པ་ལ་འདི་ངེས་པ་ཡིན་ནོ། །ནོར་མེད་གྱུར་ན་དེ་ལ་ཉེས་པ་མེད། །ཅེས་བྱ་བ་ནི་སྡོམ་ཅན་ལའོ། །ཡོད་པ་མ་ཡིན་པ་ནི་མེད་པ་སྟེ་ཐ་ན་བསླང་བའི་སྒོ་ནས་ཀྱང་ཞེས་བྱ་བའི་ཐ་ཚིག་སྟེ། ཕའི་ནོར་ལ་རིགས་པས་བུ་དབང་བ་ཡིན་ནོ་ཞེས་བྱ་བའི་དབང་དུ་བྱས་པ་ཡིན་ནོ། །བཅོམ་ལྡན་འདས་ཀྱིས་དགེ་འདུན་གྱི་དོན་དུ་ཡུལ་དང་ཞིང་ཡོངས་སུ་བླང་བར་བྱའོ་ཞེས་གསུངས་པས་དེ་ལ་དགེ་འདུན་གྱི་ཡུལ་དུ་ཉེས་པ་ལས་བྱུང་བའི་རྒྱལ་པོའི་སྐལ་བསླང་དུ་རུང་ངམ་འོན་ཏེ་མ་ཡིན་སྙམ་དུ་དོགས་པ་ལ། ཉེས་བཅུ་ལ་སོགས་ཆོས་ཀུན་སྨྲ་བ་ནི། །ཞེས་བྱ་བ་ལ་སོགས་པ་སྨོས་ཏེ། ཉེས་པ་ཡང་དེ་ཉིད་ཡིན་ལ་བཅུ་ཡང་ཡིན་པས་ན་ཉེས་བཅུའོ། །དེ་ལ་སོགས་པ་གང་དག་ཡིན་པ་དེ་དག་ནི་ཉེས་བཅུ་ལ་སོགས་ཏེ། གང་དག་བྱུང་བ་དེ་དག་ཡོད་ན། རྒྱལ་པོས་གནང་ན་རྒྱལ་པོའི་སྐལ་བ་ནི། བླང་བར་བྱ་བ་སྟེ་ཞེས་བྱ་བར་སྦྱར་རོ། །རྒྱལ་པོའི་སྐལ་བ་ནི་རྒྱལ་པོའི་སྐལ་བ་སྟེ། རྒྱལ་པོས་ཉེས་པ་ལས་ཐོབ་ཅིང་བྱིན་པའོ། །རྒྱལ་པོས་རྗེས་སུ་གནང་བ་ནི་རྒྱལ་པོས་གནང་བ་སྟེ། དགེ་འདུན་གྱི་ཞེས་བྱ་བས་འགྲོ་བ་དང་བྲལ་བའི་ཡོ་བྱད་དུ་ཞེས་བྱ་པའི་དོན་ཏོ། །རྒྱལ་པོས་གནང་བ་དང་རྒྱལ་པོའི་སྐལ་བ་དག་ནི་ཞེས་བྱ་བ་ནི་ཁྱད་པར་གྱི་བསྡུ་བ་ཡིན་ནོ། །དེ་བླང་བ་དག་ཀྱང་ཁྱད་པར་དུ་བྱེད་དེ་ཆོས་དང་ལྡན་པས་སྨྲས་པ་དེ་བས་ན་དེ་ཞེས་བྱ་བ་ནི་ཚིག་གི་ལྷག་མའོ། །འདིར་ཆོས་དང་ལྡན་པ་ནི་ཆོས་བསྟན་བཅོས་སྨྲ་བ་པོ་སྟེ་དྲང་སོང་ཡིད་ལ་སོགས་
བདག་ཡིན་པར་རིག་པར་བྱའོ། །ཆོས་ཀྱི་གཞིར་གནས་པ་མ་ཡིན་པ་དེ་དག་ནི་སྔ་ནས་ཆོས་མ་ཡིན་པ་སྨྲ་བར་འགྱུར་བའི་ཕྱིར་རོ། །བླང་བར་སྟེ་ཞེས་བྱ་བ་ནི་གཞན་གྱི་སྐབས་མ་ཡིན་པའི་ཕྱིར་དགེ་འདུན་གྱི་བྱ་བ་ལ་འཇུག་པའི་དགེ་ཚུལ་གྱིས་ཞེས་བྱ་བར་ཤུགས་ཀྱིས་འོངས་པ་ཡིན་ནོ། །དེ་ལ་ཉེས་བཅུ་ནི་རྣ་བ་གཅོད་པ་དང༌། གཞན་གྱི་ཆུང་མ་ཉེད་པ་ལ་སོགས་པ་ཡིན་པར་གཟུང་སྟེ། འཇིག་རྟེན་གྱི་གྲགས་པ་དག་ལས་ཤེས་པར་བྱའོ། །དེ་ལ་རྩོད་པའི་དུས་སུ་དགེ་བསྙེན་དག་རབ་ཏུ་སྦྱར་བར་བྱ་བ་ཡིན་པས་ན། །བརྩད་འགྲུབ་པར་ནི་བརྩད་པ་ཉིད། །བརྩད་པས་གྲུབ་པ་དེའི་ཕྱིར་རོ། །རྫས་དེ་ཅིའི་ཕྱིར་བལྟ་བར་མི་བྱ་ཞེ་ན། སྡོམ་ཅན་ཏེ་རབ་ཏུ་བྱུང་བ་ལྟ་བར་སྟོན་པ་བཅོམ་ལྡན་འདས་ཀྱིས་བཀའ་མ་གནང་བ་ཉིད་ཀྱི་ཕྱིར་རོ། །ནིའི་སྒྲ་ནི་ངེས་པར་གཟུང་བ་ཡིན་ཏེ་ཁོ་ནའི་དོན་ཏོ། །གང་གི་ཕྱིར་སྡོམ་ཅན་རྩོད་པ་ལྟ་བུར་བྱེད་པ་ཚུལ་མ་ཡིན་པ་དེའི་ཕྱིར་དགེ་བསྙེན་ངེས་པར་སྦྱར་བར་བྱའོ། །དེ་ལ་ཡང་དག་པར་འབྱུང་བ་ཆོས་དང་ལྡན་པའི་རྒྱལ་པོའི་སྐལ་བ་རྒྱལ་པོས་གནང་བ་ས་གཞི་དང་འདྲ་བར་བསམ་པ་དག་པས་མ་བྱིན་པར་ལེན་པའི་ཉེས་པ་སྤངས་པས་ལེན་པར་བྱེད་པ་ལ་ཉེས་པ་མེད་དོ་ཞེས་དེ་ལྟ་བུའི་རྣམ་པའི་ཚིག་ཏུ་འདི་རྣམ་པར་གནས་པ་ཡིན་ནོ། །ཁབ་རལ་ལ་སོགས་ཞེས་བྱ་བ་ལ་སོགས་པས་དགེ་འདུན་གྱི་ས་གཞི་ལ་དངོས་པོ་ལྟུང་བ་མཐོང་བ་ཇི་ལྟར་བྱ་བ་དེ་སྟོན་པར་བྱེད་དེ་ཁབ་དང་པོར་བྱས་པའི་རབ་ཏུ་བྱུང་བའི་ཡོ་བྱད་གཞན་གང་ཡིན་པ་དེ་ནི་ཁབ་རལ་ལ་སོགས་པའོ། །ཁབ་ལ་སོགས་པ་ཡང་དེ་ཡིན་ལ་རྫས་སྤྱད་ཀྱང་དེ་ཡིན་པས་ཁབ་རལ་ལ་སོགས་ཏེ། དགེ་འདུན་གྱི་འམ་མཆོད་རྟེན་གྱིས་གཞིར་ལྟུང་བ་མཐོང་བར་གྱུར་ན། དགེ་ཚུལ་གྱིས་ཁང་སྐྱོང་དག་ལ་བཤད་མ་ཐག་པ་དེ་གཏད་པར་བྱའོ། །ནིའི་སྒྲ་ནི་ཁྱད་པར་དུ་བྱེད་པའི་དོན་ཏེ། ལྷུང་བ་དེ་བདག་པོ་ལས་ཡོངས་སུ་ལྷུང་བར་གྱུར་བ་མཐོང་བར་གྱུར་པས་སོ། །ཁང་སྐྱོང་གིས་ཀྱང་ཁབ་རལ་ལ་སོགས་པ་དེ་བླངས་ནས་འདི་གང་གི་ཡིན་ཞེས་བསྒྲགས་ནས་ཚོགས་ཏེ་དགེ་འདུན་ལ་ཁ་བ་རལ་ལ་སོགས་པ་དེ་དབུལ་བར་བྱའོ། །གང་ལ་བསྒྲགས་ནས་ཤེ་ན། ཚོགས་ཀྱི་ནང་དུ་ཞེས་བྱ་བ་སྨོས་ཏེ། ཚོགས་ཀྱི་ནང་དང་རེ་རེ་ལ་ཞེས་བྱ་བ་འདིར་ཡང་བལྟ་བར་བྱའོ། །ཅི་དེ་ལྟ་དེ་ལྟ་ཉིད་དུ་དབུལ་བར་བྱའམ་ཞེ་ན། ཇི་སྟེ་བདག་པོ་མེད་ན་ཞེས་བྱ་བ་སྨོས་
ཏེ། གལ་ཏེ་བདག་པོ་འབའ་ཞིག་གིས་ཤེས་པ་མེད་པར་གྱུར་པ་དེའི་ཚེ་དབུལ་བར་འགྱུར་རོ་ཞེས་བྱ་བར་སྦྱར་རོ། །ཅི་ཞིག་བྱས་ནས་ཤེ་ན། དེའི་འོང་བ་བསྡད་ནས་ཞེས་བྱ་བ་སྨོས་ཏེ། ཁབ་རལ་ལ་སོགས་པ་དེའི་བདག་པོ་འོང་བ་ནི་དེའི་འོང་བ་སྟེ་དེ་ལ་བསྡད་ནས་སོ། །དུས་ཇི་སྲིད་ཅིག་ཏུ་ཞེ་ན། ཉི་མ་གསུམ་དུ་ཞེས་བྱ་བ་སྨོས་ཏེ་ཉི་མ་གསུམ་དུ་ནི་ཉི་མ་གསུམ་དག་ཏུའོ། །ཡང་གི་སྒྲ་ནི་གང་གིས་མཐོང་བ་དེས་དགེ་སྐོས་ལ་གཏད་པར་བྱ་ཞིང་དེས་ཀྱང་འདི་གང་གི་ཡིན་ཞེས་བསྒྲག་པར་བྱའོ། །དང་གོང་མ་ནི་སྡུད་པར་བྱེད་པ་ཡིན་ལ། གཉིས་པ་ནི་ཚིག་གི་ཁ་བསྐང་བ་སྟེ་བསྒྲག་པ་དང་ཉི་མ་གསུམ་དུ་བསྡད་པར་བྱ་ཞེས་སྡུད་པ་ཡིན་ནོ། །དངུལ་ལ་སོགས་པ་མཐོང་བར་གྱུར་པ་གང་ཡིན་བ་དེ་བརྗོད་པར་བྱ་སྟེ། དངུལ་དང་པོར་བྱས་པའི་གསེར་ལ་སོགས་པ་གང་ཡིན་པ་དེ་ནི་དངུལ་ལ་སོགས་སོ། །དེ་ལྟུང་བ་མཐོང་ན་ཡང་ཇི་ལྟར་བྱ་ཞེ་ན། མཛོད་དུ་བཅུག་ཅེས་བྱ་བ་སྨོས་ཏེ། མཛོད་དུ་བཅུག་པ་ནི་དགེ་འདུན་གྱི་བང་མཛོད་དུ་གཞག་པར་བྱའོ་ཞེས་བྱ་བའི་ཐ་ཚིག་གོ །དུས་ཇི་སྲིད་ཅིག་ཏུ་ཞེན། ཟླ་བ་དྲུག་ཏུ་ཞེས་བྱ་བ་སྨོས་ཏེ། ཟླ་བདག་གི་དྲུག་ནི་ཟླ་བ་དྲུག་ཏུའོ། །ནིའི་སྒྲ་ནི་ཁབ་རལ་སོགས་པ་ལ་ཁྱད་པར་དུ་བྱེད་པའི་དོན་ཏོ། །ཅི་ཞིག་བྱས་ནས་ཤེ་ན། ཞག་བརྒྱད་བར་དུ་ཞེས་བྱ་བ་ལ་སོགས་པ་སྨོས་ཏེ། ནོར་གྱི་བདག་པོའི་འོང་བ་ཞག་བརྒྱད་ཀྱི་བར་དུ་བསྡད་ནས་ཏེ་ཞག་བརྒྱད་ཀྱི་འོག་ཏུ་མཛོད་དུ་གཞུག་པར་བྱའོ་ཞེས་བྱ་བའི་ཐ་ཚིག་གོ །དང་ནི་མཐོང་ནས་ཞེས་བྱ་བ་སྡུད་པར་བྱེད་པའོ། །དུས་དེར་མ་འོངས་ན་ཟླ་བ་དྲུག་པོ་འདིའི་འོག་ཏུ་རྫས་དེ་སྣོད་དུ་བསྡུ་བར་བྱའོ་ཞེས་བྱ་བ་ནི་ཚིག་གི་ལྷག་མའོ། །ནིའི་སྒྲ་ནི་ངེས་པར་གཟུང་བ་དང༌། རིམ་པ་གཞན་གྱི་དོན་ཡིན་ཏེ་སྣོད་སྨོས་པ་ནི་ཡུན་རིང་པོར་གནས་པའི་རྫས་སྤྱད་ཉེ་བར་མཚོན་པ་ཡིན་པ་དེ་བས་ན་ཡུན་རིང་པོར་གནས་པ་གང་ཡིན་པ་དེའི་ཡོ་བྱད་སྣོད་ཙམ་ནི་མ་ཡིན་ནོ་ཞེས་ངེས་པར་གཟུང་བའི་དོན་ཏོ། །དགེ་འདུན་གྱིས་གཞི་ལ་འདི་ངེས་པ་ཡིན་གྱི་སངས་རྒྱས་ཀྱི་ནི་རྒྱན་དུ་བྱས་ནས་བཅོམ་ལྡན་འདས་ལ་མཆོད་པར་བྱའོ་ཞེས་ཤུགས་ཀྱིས་བལྟ་བར་བྱའོ། །དེ་ནས་ཇི་སྟེ་འོངས་ནས་སློང་ན་ཡང༌། འོན་ཀྱང་སྦྱིན་པར་བྱ་སྟེ་སྐྱེད་ནི་མེད་ཅེས་བྱ་བ་ལ་དེ་ནས་ཏེ་ཟླ་བ་དྲུག་གི་འོག་ཏུ་སྣོད་དུ་བྱས་པའི་དུས་ཕྱིས་དེ་གལ་ཏེ་འགའ་ཞིག་ནས་འོངས་ནས་ཀྱང་སློང་བར་བྱེད་
པ་དེ་ལྟ་ན་ང་སྦྱིན་པར་བྱའོ་ཞེས་བྱ་བ་ནི་ཇི་ལྟར་ཡང་རྫས་དེ་སྣོད་དུ་བྱས་པར་གྱུར་པ་དེ་ལྟ་ན་ཡང་སྦྱིན་པར་བྱའོ་ཞེས་བྱ་བའི་ཐ་ཚིག་གོ །གལ་ཏེ་ཁྱོད་ཀྱིས་དུས་འདི་སྲིད་དུ་ལོངས་སྤྱད་པ་ཡིན་ནོ་ཞེས་སྐྱེད་སློང་བར་བྱེད་ན་ཅི་སྦྱིན་པར་བྱ་འམ་ཞེ་ན། སྐྱེད་ནི་མེད་ཅེས་བྱ་བ་སྨོས་པ་ཡིན་ནོ། །ནི་ནི་སྐྱེད་སྦྱིན་པར་མི་བྱ་བ་ཁོ་ནའོ་ཞེས་ངེས་པར་གཟུང་བའོ། །ལས་སར་བྱེད་པས་སྤྱད་དུ་མི་རུང་ཞིང༌། །རྙེད་དེ་དེ་ཡིས་གནང་ན་བླང་བར་བྱ། །ཞེས་བྱ་བ་ལ། དགེ་འདུན་གྱི་ལས་སར་བ་ལ་མཁོ་བའི་ཤིང་བདག་གིར་བྱས་པ་མ་ཡིན་པ། གལ་ཏེ་ལས་སར་པ་ལ་མཁོ་བ་མ་ཡིན་པ་དག་ལས་སར་བྱེད་པ་ལས་རྙེད་པར་གྱུར་པ་དེའི་ཚེ་ལས་སར་བྱེད་པ་དེས་གནང་ན་སྤྱད་དུ་མི་རུང་བའི་ཤིང་དེ་བླང་བར་བྱའི། དེ་ལྟ་དེ་ལྟར་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟར་བདག་པོ་ཐ་དད་ཅེས་བྱ་བ་འདིས་ནི་སྔར་བཤད་པའི་མདོར་བསྡུ་བ་སྟོན་པར་བྱེད་པ་ཡིན་ཏེ། མི་འམ་རི་དགས་ཞེས་བྱ་བ་ལ་སོགས་པས་དེ་ལྟར་བཤད་མ་ཐག་པའི་རྣམ་པས་བདག་པོའི་དབྱེ་བ་སྟེ་ནོར་གྱི་བདག་པོའི་དབྱེ་བ་བརྗོད་པ་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །དེ་ནས་ཉེས་བྱས་ཀྱི་ཞེས་བྱ་བ་ལ་དེ་ལ་ཞེས་བྱ་བ་ནི་དབང་དུ་བྱེད་པའི་དོན་ཏེ། འདི་མན་ཆད་ནས་ཡིད་བརྟན་གཞན་ལ་ཞེས་བྱ་བ་དེའི་གོང་མའི་བར་ནི་ཉེས་བྱས་ཀྱིས་རབ་ཏུ་དབྱེ་བ་ཡིན་ཏེ། འདི་ནས་ཇི་ལྟར་ཞེས་བྱ་བ་ལ་སོགས་པས་བརྗོད་པ་ཡིན་ནོ། །ཇི་ལྟར་ཞེས་བྱ་བའི་སྒྲ་ནི་ཉེ་བར་སྟོན་པའི་དོན་ཏེ། ཉེས་བྱས་དེ་གང་ཞེ་ན། མ་བོས་པར་ནི་ཞེས་བྱ་བ་ལ་སོགས་པ་སྨོས་ཏེ། མ་བོས་པ་ནི་མགྲོན་དུ་མ་བོས་པ་ཞེས་བྱ་བའི་དོན་ཏེ། དེ་ལ་འམ་དེས་ཟན་ཟོས་པ་ནི་མ་བོར་བར་ནི་ཟན་ཟོས་པ་སྟེ། ཉེས་བྱས་ཀྱི་ཉེས་པར་འགྱུར་རོ་ཞེས་བྱ་བ་ནི་ཚིག་གི་ལྷག་མའོ། །ཟན་ནི་རྣམ་པ་གཉིས་ཏེ་མགྲོན་དུ་བོས་པ་དང་མ་བོས་པའོ། །དེ་ལ་མགྲོན་དུ་བོས་པ་ལ་ནི་ཉེས་པར་མི་འགྱུར་བ་ཁོ་ནའོ་ཞེས་ཤེས་པར་འགྱུར་ན། མ་བོས་པ་ལ་ཇི་ལྟར་ཉེས་པར་འགྱུར་ཞེ་ན། བཟའ་བ་དེའི་དབྱེ་བ་ཡང་རྣམ་པ་གཉིས་ཏེ་དེ་ཉིད་ལ་ངན་ངོན་ཙམ་དང༌། ཁྱད་པར་དུ་བྱེད་པའོ། །དེ་ལ་ཁྱད་པར་དུ་བྱེད་པ་ནི། མི་དབང་བསོད་སྙོམས་ཡོངས་བླངས་གྱུར། །ཞེས་བྱ་བ་ལ་སོགས་པས་ཉེས་བྱས་ཆེས་ལྕི་བར་གྱུར་ཏོ། །གང་དེ་ཉིད་དུ་ཟན་ཟོས་པ་དེ་ལ་ཡང་རྣམ་པ་གཉིས་ཏེ། ཡོན་བདག་གིས་ངས་སྤྱན་མ་དྲངས་
པ་ཡིན་ནོ་ཞེས་ཤེས་པར་འགྱུར་བ་དེར་བཟའ་བའི་དོན་དུ་འགྲོ་བར་བྱེད་པ་ལ་སོགས་པ་ལ་ནི་ཉེས་བྱས་སུ་མི་འགྱུར་ཏེ། བཟའ་བ་ལ་ཉེས་པ་མེད་པར་རྗེས་སུ་གནང་བ་ཉིད་ཡིན་པའི་ཕྱིར་རོ། །མི་ཤེས་པ་ལ་ནི་ཉེས་བྱས་སུ་འགྱུར་བའི་དབང་དུ་བྱས་ནས་དེ་སྐད་དུ་སྨྲས་པ་ཡིན་པར་རིག་པར་བྱའོ། །རྒྱ་སོགས་ཟིན་པས་གཟིར་བ་དེ་དག་ལས། །རྒྱ་དང་པོར་བྱས་པའི་འཁྲུལ་འཁོར་ལ་སོགས་པ་གཞན་གང་ཡིན་པ་དེ་ནི་རྒྱ་སོགས་ཏེ། དེས་ཟིན་པ་ནི་རྒྱ་ལ་སོགས་པས་ཟིན་ཅིང་རྣམ་པར་བཅིངས་པར་གྱུར་པ་དེ་ཉིད་སྡུག་བསྔལ་ཡིན་པ་དེས་གཟིར་བར་གྱུར་པའོ། །གང་ཞེ་ན། བསོད་ནམས་སེམས་ཀྱིས་སྲོག་ཆགས་ཐར་བྱས་ན། །ཞེས་བྱ་བ་སྨོས་ཏེ། སྲོག་འཛིན་པར་བྱེད་པ་གང་ཡིན་པ་དེ་ནི་སྲོག་ཆགས་ཏེ། དེ་ལྟ་བུར་གྱུར་པའི་སྲོག་ཆགས་དེ་དག་བསོད་ནམས་ཀྱི་བསམ་པས་རྒྱ་ལ་སོགས་པ་ལས་ཐར་པར་བྱས་ན་ཉེས་བྱས་སུ་འགྱུར་རོ་ཞེས་བྱ་བ་ནི་ཚིག་གི་ལྷག་མ་སྟེ། བསོད་ནམས་ཀྱི་སེམས་ཀྱིས་ཞེས་བྱ་བའི་དོན་དུ་རིག་པར་བྱའོ། །དད་པས་རྒྱལ་བའི་རིང་བསྲེལ་བརྐུས་ཏེ་མིན། །ཞེས་བྱ་བ་སྔར་བསྟན་པས་དེ་ལ་དད་པས་བརྐུས་ན་ཉེས་བྱས་སུ་འགྱུར་བར་སྟོན་ཏེ། དེ་ལ་བཅོམ་ལྡན་འདས་ལ་མོས་པ་ནི་དེ་ལ་མོས་པ་སྟེ། དེས་དེ་ཉིད་ལ་མཆོད་པའི་ཕྱིར་ཏེ། དགོས་པས་རྐུ་བར་བྱེད་པ་གང་ཡིན་པ་དེ་ནི་དེ་ལ་མོས་པས་མཆོད་པའི་ཕྱིར་རོ། །དེའི་དངོས་པོ་ནི་དེ་ལ་མོས་པས་མཆོད་པའི་ཕྱིར་ཉིད་ཡིན་པ་དེའི་ཕྱིར་དེས་བརྐུས་ན་ཉེས་བྱས་ཀྱི་ཉེས་པར་འགྱུར་རོ། །དང་ནི་སྔ་མ་འབའ་ཞིག་ལ་མ་ཡིན་གྱི་འདི་ལ་ཡང་ཉེས་བྱས་སུ་འགྱུར་རོ་ཞེས་སྡུད་པར་བྱེད་པ་ཡིན་ནོ། །སངས་རྒྱས་ཀྱི་རིང་བསྲིལ་དེ་ཁྱད་པར་ཇི་ལྟ་བུ་ཞེ་ན། རིན་ཐང་མེད་པའི་ཞེས་བྱ་བ་ལ་སོགས་པ་སྨོས་ཏེ། གང་ལ་རིན་ཐང་གི་ཚད་མེད་པ་དེ་ནི་རིན་ཐང་མེད་པ་སྟེ། སངས་རྒྱས་ཀྱི་རིང་བསྲེལ་གང་ཡིན་པ་དེ་ནི་རིན་ཐང་མེད་པའོ། །དེ་ལ་ཡང་ཞེས་བྱ་བའི་ཡང་གི་སྒྲས་འདི་སྐད་དུ་དེ་ལ་སངས་རྒྱས་ཀྱི་རིང་བསྲེལ་ལ་འདི་ནི་འདི་རིའོ་ཞེས་བྱ་བས་རིན་ཐང་མེད་པ་ཡིན་ནོ་ཞེས་བསྟན་པར་འགྱུར་རོ། །དེ་ལྟར་ཡང་མདོ་མཛད་པས། དཀོན་མཆོག་ནི་མཚུངས་པ་མད་པའོ། །འདིར་སངས་རྒྱས་ཀྱི་རིང་བསྲེལ་ཡང་ཞེས་བསྟན་ཏེ། འདི་ལྟར་སངས་རྒྱས་ལ་ཡང་མཆོད་པའི་བསམ་པས་རྐུ་བར་བྱེད་ན་ཉེས་བྱས་ཁོ་ནར་འགྱུར་གྱི།
དངོས་གཞིར་ནི་མི་འགྱུར་རོ། །དེ་ལྟར་ཡང་ཞེས་བྱ་བ་ལ་སོགས་པ་ཇི་ལྟར་སྔར་ཉེས་བྱས་སུ་འགྱུར་བ་དག་ཡིན་པ་དེ་ལྟར་འདི་དག་ཀྱང་ཉེས་བྱས་སུ་འགྱུར་རོ་ཞེས་བསྟན་པའི་ཕྱིར་དེ་ལྟར་གྱི་སྒྲ་ཡིན་ལ། ཡང་ནི་སྡུད་པར་བྱེད་པ་ཡིན་ནོ། །ནི་ནི་འཁྲུལ་འཁོར་གྱི་ཁྱད་པར་ཏེ་རི་དགས་ལ་སོགས་པ་གསད་པའི་ཕྱིར་བྱས་པ་ཡིན་ནོ། །འདིས་རྣམ་པར་བཤིག་པས་ན་རྣམ་པར་བཤིག་པ་སྟེ། རྒྱ་ལ་སོགས་པ་དག་ཡིན་པར་རྟོགས་པར་བྱའོ། །རྙི་དང་རྣམ་པར་བཤིག་པ་དག་ནི་རྙི་དང་རྣམ་པར་བཤིག་པ་སྟེ། དེ་དང་པོར་བྱས་པའི་སེམས་ཅན་གསོད་པར་བྱེད་པའི་རྒྱུ་གཞན་གང་ཡིན་པ་དེ་མ་རུང་བར་བྱས་ན་ཉེས་བྱས་སུ་འགྱུར་རོ། །གང་གི་དབང་གིས་ཤེ་ན། སྙིང་རྗེའི་དབང་གིས་ཞེས་བྱ་བ་སྨོས་ཏེ། སྙིང་རྗེ་དེ་སེམས་ཅན་རྣམས་ལ་བརྩེ་བ་དེའི་དབང་ནི་དེ་ལ་རག་ལས་པ་དེའི་ཕྱིར་སྙིང་རྗེའི་དབང་དེས་རྙི་ལ་སོགས་པ་མ་རུང་བར་བྱས་པ་དེ་ལྟ་བུ་དེ་དག་གིས་ཉེས་བྱས་སུ་འགྱུར་ཏེ། སྙིང་རྗེའི་དབང་གིས་ཞེས་བྱ་བའི་དོན་ཏོ། །ཕུག་རོན་དང་པོར་བྱས་པའི་བྱེའུ་ལ་སོགས་པ་གང་ཡིན་པ་དེ་ནི་ཕུག་རོན་ལ་སོགས་པའོ། །དེའི་ཁྱིམ་གང་ཡིན་པ་དེ་འཇོམས་པ་གང་ཡིན་པ་དེ་དང་པོར་བྱས་པའི་མེས་བསྲེགས་པ་ལ་སོགས་པ་གང་ཡིན་པ་དེ་ནི་ཚང་འཇིག་པར་བྱེད་པ་ལ་སོགས་པས་ཉེས་བྱས་སུ་འགྱུར་རོ་ཞེས་བྱ་བ་ནི་ཚིག་གི་ལྷག་མའོ། །དེ་དག་ལས་ཀྱང་ཉེས་མེད་བརྗོད་པར་བྱ། །ཞེས་བྱ་བ་ནི་ཉེས་བྱས་སུ་བརྗོད་པ་དེ་དག་ལས་འོག་ཏུ་ཉེས་པ་མེད་པ་ཡང་བརྗོད་པར་བྱ་ཞིང་བསྟན་པར་བྱའོ་ཞེས་བྱ་བའི་དོན་ཏོ། །ཉེས་བྱས་སུ་འགྱུར་བ་འབའ་ཞིག་ནི་མ་ཡིན་གྱི་ཉེས་པར་མི་འགྱུར་བ་ཡང་ཞེས་བྱ་བ་ནི་ཀྱང་གི་དོན་ཡིན་ནོ། །ཡིད་བརྟན་ཚིག་གཞན་ཤེས་པར་བྱས་ནས་ནི། །ཞེས་བྱ་བ་ལ་སོགས་པས་ཉེས་པར་མི་འགྱུར་བ་སྟོན་པར་བྱེད་དེ། དགེ་ཚུལ་གང་ལ་མ་བྱིན་པར་ལེན་པའི་ཉེས་པ་མེད་པ་དེ་ནི་ཉེས་པ་ཡོད་པ་མ་ཡིན་ནོ་ཞེས་བྱ་བའི་ཐ་ཚིག་གོ །ཅི་ཞིག་བྱས་ནས་ཤེ་ན། ཁྱེར་ན་ཞེས་སྨོས་ཏེ། གཞན་དག་གིས་མ་བྱིན་པར་ཁྱེར་ན་ཞེས་བྱ་བ་ནི་ཚིག་གི་ལྷག་མའོ། །བསམ་པའི་ཁྱད་པར་ཇི་ལྟ་བུ་ཞེ་ན། ཡིད་དགེ་བས་ནི་ཞེས་བྱ་བ་སྨོས་ཏེ་ཡིད་གེ་བ་ཉིད་ཀྱིས་ཏེ་རྐུ་སེམས་དང་བྲལ་བ་ཉིད་ཀྱིས་སོ། །ཅི་ཞིག་བྱས་ནས་ཤེ་ན། ཡིད་གཏན་ཚིགས་གཞན་ཤེས་པར་བྱས་ནས་ནི་ཞེས་བྱ་བ་སྨོས་ཏེ་ཡིད་བརྟན་བྱས་པ་ཡིན་གྱི་དེ་ཙམ་ཞིག་ནི་མ་
ཡིན་ཏེ། འོན་ཀྱང་གཞན་བརྟུལ་ཞུགས་ཅན་ལ་བདག་གིས་ཆེ་གོ་མོ་འདིའི་བཀྱེར་ར་ཞེས་ཡིད་བརྟན་ལ་ཤེས་པར་བྱས་ནས་ཁྱེར་ན་ཉེས་པ་དང་ལྡན་པ་མ་ཡིན་ནོ་ཞེས་བྱ་བའི་དོན་ཏེ། གཞན་ལ་ཤེས་པར་བྱས་པ་ནི་རྩོད་པ་ངན་པའི་སྐབས་མེད་པར་བྱ་བ་དང་ཡིད་བརྟན་པ་དབང་དུ་བྱ་བ་ཉིད་ཀྱི་ཕྱིར་རོ། །ཡིད་བརྟན་པའི་ཡུལ་རབ་ལ་སོགས་པའི་དབྱེ་བས་རྣམ་པ་གསུམ་དུ་འགྱུར་བ་དེ་བཞིན་དུ་ཡིད་བརྟན་པ་རྣམ་པ་གསུམ་དུ་འགྱུར་རོ་ཞེས་བསྟན་པའི་ཕྱིར་གྲོགས་པོ་ར་བ་དང་འབྲིང་དང་ཐ་མ་རྣམས་ཞེས་བྱ་བ་སྨོས་ཏེ། རབ་ནི་གྲོགས་པོ་མཆོག་ཏུ་གྱུར་པ་དེ་རྫས་མང་པོ་ཁྱེར་ཀྱང་སེམས་རྣམ་པ་གཞན་དུ་མི་འགྱུར་བ་ཡིན་ལ། འབྲིང་ནི་གང་རས་དང་རས་ཕྲན་ཙམ་ཁྱེར་བ་དང༌། ཐ་མ་ནི་གང་སོ་དག་པར་བྱེད་པའི་སོ་ཤིང་ལ་སོགས་པ་ཁྱེར་ན་སེམས་གཞན་དུ་འགྱུར་བ་མེད་པ་ཡིན་པར་རིག་པར་བྱའོ། །རབ་དང་འབྲིང་དང་ཐ་མ་ནི་རབ་དང་འབྲིང་དང་ཐ་མ་རྣམས་ཏེ། དེ་དག་ཁོ་ན་གྲོགས་པོ་ཡིན་ནོ། །དེའི་དངོས་པོ་ནི་གྲོགས་པོ་རབ་དང་འབྲིང་དང་ཐ་མ་ཉིད་དོ། །དེ་ལ་ཡིད་བརྟན་གོ་རིམས་དག་ཀྱང་བྱ། །ཞེས་བྱ་བ་ནི་ཡིད་བརྟན་པའི་དངོས་པོ་ནི་ཡིད་བརྟན་པ་ཉིད་དེ་དེའི་གོ་རིམས་དག་ཀྱང་རིམ་པ་བཞིན་དུ་བྱ་བ་སྟེ། བསྒྲུབ་པར་བྱའོ། །ཀྱང་གི་སྒྲ་ནི་ཡུལ་གྱི་དབྱེ་བ་འབའ་ཞིག་མ་ཡིན་གྱི་ཡིད་བརྟན་པའི་དབྱེ་བ་ཡང་ཡོད་དོ་ཞེས་བསྟན་པའི་ཕྱིར་རོ། །ཆུང་ངུ་ལ་ནི་ཆུང་ངུ་དང་འབྲིང་ལ་ནི་འབྲིང་དང༌། ཆུང་ངུ་ཡང་སྟེ་རབ་ལ་ཐམས་ཅད་ཉིད་ཅེས་བྱ་བས་རིམ་པ་གང་གིས་ཡིད་བརྟན་པར་བྱ་བ་དེ་བརྗོད་པར་བྱ་སྟེ། ཆུང་ངུ་ནི་གྲོགས་པོ་ཐ་མ་སྟེ་ཡིད་བརྟན་པ་ཆུང་ངུ་བྱའི་ཅིག་ཤོས་དག་ནི་མ་ཡིན་ནོ། །འབྲིང་ནི་གྲོགས་པོ་འབྲིང་ཡིན་ཏེ་ཡིད་བརྟན་པ་འབྲིང་དང་ཆུང་ངུ་དག་ཀྱང་བྱ་བ་ཡིན་ལ་ནིའི་སྒྲ་ནི་སྔ་མ་ལས་ཁྱད་པར་དུ་བྱེད་པའི་དོན་ཏོ། །དང་ནི་སྡུད་པར་བྱེད་པའོ། །རབ་ཏུ་བྱེད་པ་ལས་སྔར་བསྟན་པ་ནི་རབ་སྟེ་གྲོགས་པོ་མཆོག་དེ་ལས་ཇི་སྐད་དུ་བཤད་པའི་ཡུལ་གྱི་ཉེས་པ་ཐམས་ཅད་ཉིད་ཡིད་བརྟན་པར་བྱ་བ་ཡིན་ནོ། །ཉིད་ཀྱིས་ནི་འདི་སྐད་དུ་རབ་བཟོད་པ་གང་ཡིན་པ་དེས་ཅིག་ཤོས་ཀྱང་བཟོད་པར་འགྱུར་བ་དེའི་ཕྱིར་ཐམས་ཅད་བྱས་པ་ལ་ཉེས་པ་ཡོད་པ་མ་ཡིན་ནོ་ཞེས་བསྟན་པར་འགྱུར་རོ། །སློབ་མ་ལ་སོགས་ར་ལུག་ནོར་གྱི་རྒྱུད། །ཅེས་བྱ་བ་ལ་སོགས་པ་ལ་སློབ་མ་དང་པོར་བྱས་པའི་ལུང་ཕོག་པ་ལ་སོགས་གཞན་
གང་ཡིན་པ་དེ་ནི་སློབ་མ་ལ་སོགས་སོ། །སོགས་པའི་སྒྲས་གཞན་རག་ལས་པ་དག་ཀྱང་གཟུང་བ་ཡིན་ཏེ། སློབ་མ་ལ་སོགས་རྐུན་པོས་ཁྱེར་བཏང་ན་དགེ་ཚུལ་ལ་ཉེས་པར་མི་འགྱུར་རོ། །རྣམ་པར་བཤད་པ་ཉན་པ་ལ་སོགས་པའི་སྒོ་ནས་ལྷན་ཅིག་གནས་པ་ལ་སློབ་མའི་སྒྲར་བསྟན་གྱི་རྣམ་པ་གཞན་དུ་དགེ་ཚུལ་སློབ་མ་ཡོད་པ་ནི་མ་ཡིན་ནོ། །ཡང་གི་སྒྲ་ནི་དེ་འབའ་ཞིག་མ་ཡིན་གྱི་ར་ལུག་ཁོ་ན་ནོར་གྱི་རྒྱུད་ཡིན་པ་དེ་ཡང་རྐུན་མས་ཁྱེར་བ་ཐད་པར་བྱས་པ་ལ་ཉེས་པར་མི་འགྱུར་རོ་ཞེས་སྡུད་པ་དང་རིམ་པ་གཞན་ཡིན་ནོ། །ཇི་ལྟ་ཞེ་ན། སྙིང་རྗེའི་དབང་གིས་རྫུ་འཕྲུལ་བསྟན་ནས་ནི། །ཞེས་བྱ་བ་སྨོས་ཏེ། དགྲ་བཅོམ་པ་སྲུང་དབང་གི་བུ་ལ་སོགས་པ་གང་ཡིན་པ་དེ་ནི་སྲུང་དབང་བུ་ལ་སོགས་པ་སྟེ། སོགས་པའི་སྒྲས་འཕགས་པ་མཽད་གལ་གྱི་བུ་གཟུང་ངོ༌། །རྗེས་སུ་མཐུན་པའི་དངོས་པོ་ནི་དབང་ཡིན་ཏེ་སྙིང་རྗེའི་རྗེས་སུ་མཐུན་པ་ཡིན་པ་དེའི་ཕྱིར་སྙིང་རྗེའི་དབང་ཡིན་ཏེ་སྙིང་རྗེའི་དབང་དེའི་ཕྱིར་དེ་སྲུང་དབང་བུ་ལ་སོགས་པས་ཇི་ལྟར་རྫུ་འཕྲུལ་བསྟན་ནས་ཐར་པར་བྱས་པ་ལ་ཉེས་པ་མེད་པ་དེ་བས་ན་དེ་བཞིན་དུ་དགེ་ཚུལ་གྱིས་རྫུ་འཕྲུལ་བསྟན་ནས་བཏང་བ་ལ་ཉེས་པ་མེད་པ་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟར་ནི་འདུལ་བ་ལས། འཕགས་པ་སྲུང་དབང་གི་བུས་ཚ་བོ་གཉིས་རྐུན་པོས་ཁྱེར་བ་བཏང་བ་དང༌། དེ་བཞིན་དུ་འཕགས་པ་མོད་གལ་གྱི་བུས་མགོན་མེད་ཟས་སྦྱིན་གྱི་བུ་ཐར་པར་བྱས་པ་དང༌། དེ་བཞིན་དུ་འཕགས་པ་སྲུང་དབང་གི་བུ་ས་ལྷ་འབངས་ཀྱི་ནོར་རྐུན་པོས་ཁྱེར་བ་ཐར་པར་བྱས་སོ་ཞེས་གཏམ་རྒྱུད་ཐོས་པ་ཡིན་ནོ། །གོང་དུ་ཕུག་རོན་ལ་སོགས་པའི་ཚང་བ་ཤིག་པ་ལ་སོགས་པ་ལས་ཉེས་བྱས་སུ་འགྱུར་བར་བསྟན་པ་སྟེ། གཙུག་ལག་ཁང་གི་ཁྱམས་ན་གང་ཚེ་ཚང༌། །ཞེས་བྱ་བ་ལ་སོགས་པས་དམིགས་ཀྱིས་བསལ་བ་བྱས་པ་ཡིན་ཏེ། གཙུག་ལག་ཁང་གི་ཁྱམས་གང་ཡིན་པ་དེ་ནི་ཚང་སྟེ་ཕུག་རོན་ལ་སོགས་པ་ཞེས་བྱ་བའི་གནས་བཅས་པར་གྱུར་པ་དེ་སྡོམ་ཅན་དགེ་ཚུལ་གྱིས་དབང་བར་བྱའོ། །གང་གི་ཚེ་ཞེ་ན་དེ་དག་གང་གི་ཚེ་སྒོ་ང་ཡོད་པ་མ་ཡིན་པའི་སྒོ་ང་མེད་པ་སྟེ། དེའི་ཚེ་དབྱུང་བར་བྱའི་སྒོ་ང་དང་བཅས་པར་གྱུར་པ་ནི་མ་ཡིན་ནོ། །ཚིག་དེ་ལས་གང་དུ་ཕུག་རོན་ལ་སོགས་ཞེས་བྱ་བ་དེར་ནི་གཙུག་ལག་ཁང་ལས་གཞན་དུ་སྒོ་ང་དང་བཅས་པ་དང་སྒོ་ང་མེད་པར་བྱུང་ན་ཉེས་པར་འགྱུར་བར་རྟོགས་པར་
བྱའོ། །བཅོམ་ལྡན་འདས་ཀྱིས་བའི་རྒྱ་དབྱུང་བར་བྱའོ་ཞེས་གསུངས་པ་མ་ཡིན་ནམ། དེ་ཇི་ལྟར་སྤྱིར་ཚང་ཞེས་བྱ་བར་བརྗོད་ཅེ་ན། དེའི་ཕྱིར་བའི་རྒྱ་ཡང་རུང་སྟེ་དཔེར་བཞག་ཙམ་ཞེས་བྱ་བ་སྨོས་ཏེ་བདག་གི་རྒྱ་ནི་བའི་རྒྱ་སྟེ་གནས་དེ་དག་ནི་དཔེ་ཙམ་ཡིན་ཏེ་དཔེ་ནི་དཔེར་བྱ་བ་སྟེ། དེ་ཙམ་ཉིད་ནི་དཔེ་ཙམ་ཡིན་གྱི་དངོས་སུ་ནི་མ་ཡིན་ནོ། །འདི་སྐད་དུ་དེ་དག་ནི་ཉེ་བར་མཚོན་པ་ཙམ་ཡིན་ནོ་ཞེས་བསྟན་པར་འགྱུར་རོ། །བའི་སྒྲས་བ་མོ་བརྗོད་པ་ཡིན་ནོ། །ད་ནི་མ་བྱིན་ཕྱོགས་གཏོགས་བརྗོད་པར་བྱ། །ཞེས་བྱ་བ་ལ་ཕྱོགས་སུ་གྱུར་པ་ནི་ཕྱོགས་སུ་གཏོགས་པའོ། །མ་བྱིན་པའི་ཕྱོགས་སུ་གཏོགས་པ་ནི་མ་བྱིན་ཕྱོགས་ཏེ། མ་བྱིན་པར་ལེན་པ་དང་ཆ་འདྲ་བ་བསྟེན་པ་གང་ཡིན་པ་དེ་ལ་དེ་སྐད་ཅེས་བྱའོ། །ད་ནི་ད་ལྟར་སྟོན་པའོ། །ནིའི་སྒྲ་ནི་གོང་དུ་ཉེས་པར་འགྱུར་བ་བསྟན་ནས། ད་ནི་མ་བྱིན་པར་ལེན་པའི་ཕྱོགས་སུ་གཏོགས་པ་བརྗོད་པར་བྱ་བ་ཡིན་ནོ་ཞེས་ཁྱད་པར་དུ་བསྟན་པའི་དོན་ཏོ། །ཕན་དང་མལ་སྟེན་ལ་སོགས་བྱིན་པ་ལས་ཞེས་བྱ་བ་ལ་སོགས་པས་དེ་སྟོན་པར་བྱེད་པ་ཡིན་ཏེ། གལ་ཏེ་གང་གིས་འགའ་ཞིག་ལ་ཕན་དང་མལ་སྟན་ལ་སོགས་པ་བྱིན་ནས། འགྱོད་པ་ཁོ་ན་མེ་ཡིན་པས་ན་འགྱོད་པའི་མེ་སྟེ། ཕྱི་ནས་འགྱོད་པས་གདུངས་པར་གྱུར་པ་དེ་འབར་ཞིང་རབ་ཏུ་མཆེད་པར་གྱུར་པ་དེའི་ཚེ་དེས། དེ་ལ་འགྱོད་པའི་མེ་ནི་རབ་ཏུ་འབར་འགྱུར་བ། །མ་ལུས་པར་ནི་ཞི་བར་བྱ་ཞིང་བསལ་བར་བྱའོ། །ཞེས་བྱ་བའི་བར་དུའོ། །གང་དག་གིས་ཤེ་ན་དེ་ལ་སླར་དངུལ་སྐྱོགས་ཆུས་ཞེས་བྱ་བ་སྨོས་ཏེ། ཆུས་ཡོངས་སུ་བཀང་བའི་སྐྱོགས་ནི་སྐྱོགས་ཆུ་སྟེ་སླར་གཏད་པའི་སྐྱོག་ཆུ་དེས་ཞེས་བྱ་བའི་ཐ་ཚིག་གོ །རྒྱུ་མཚན་ཅིའི་ཕྱིར་ཞེ་ན། བསྡམ་བྱ་དགྲོལ་བའི་ཕྱིར་ཞེས་བྱ་བ་སྨོས་ཏེ། བསྡམ་པར་བྱ་བ་སྟེ་བསྡམ་པར་བྱ་བའི་ཉེས་པ་དགྲོལ་བའི་རྒྱུ་མཚན་དེའི་ཕྱིར་ཞེས་བྱ་བ་ནི་ཚིག་གི་དོན་ཡིན་ནོ། །ཕན་གྱི་སྒྲས་གོས་བརྗོད་པ་ཡིན་ལ་མལ་སྟན་ཞེས་བྱ་བ་ནི་མལ་དང་སྟན་དེ་ལ་དེ་སྐད་ཅེས་བྱའོ། །དེ་དང་པོར་བྱས་པའི་སྣོད་ལ་སོགས་པ་གང་ཡིན་པ་དེ་དག་ནི་དེ་ལ་སོགས་པ་ཡིན་ནོ། །གནང་བ་མེད་པར་གཞན་གོས་སྤྱོད་པ་དང་ཞེས་བྱ་བ་ལ། གཞན་གང་ཡིན་པ་དེའི་གོས་དེས་མ་གནང་བར་དེའི་གོས་ཡོངས་སུ་ལོངས་སྤྱོད་པ་སྟེ། གཞན་གྱི་གོས་ཡོངས་སུ་ལོངས་སྤྱོད་ན་ཉེས་བྱས་སུ་འགྱུར་རོ། །ཡིད་བརྟན་པ་མེད་པ་དང་རྐུ་སེམས་མེད་པ་ཇི་ལྟ་ཇི་
ལྟར་ཡང་རུང་བར་གཙོར་ལོངས་སྤྱོད་པར་བྱེད་པ་དེ་ཁོ་ན་ལ་གོང་དུ་ཉེས་པ་མེད་པར་བསྟན་ལ། འོག་ཏུ་ནི་ཆེས་ལྕི་བ་ཉིད་ཡིན་པའི་ཕྱིར་ཉེས་པར་འགྱུར་བར་རིག་པར་བྱའོ། །ཁྱིམ་ལ་མ་བསྟབས་སྟན་ལ་འདུག་པ་ཞེས་བྱ་བ་ལ། ཁྱིམ་སྟེ་ཁང་ཁྱིམ་གྱི་ནང་དུ་སྡོམ་ཅན་ཞུགས་ནས་བདག་པོ་འམ་གཞན་གྱི་ཁྱིམ་གྱི་ཁོངས་སུ་འདུས་པ་དག་གིས་མ་བསྟབས་མ་གནང་བར་སྟན་ལ་འདུག་པ་ནི་མ་བསྟབས་སྟན་ལ་འདུག་པ་སྟེ་ཉེས་བྱས་སུ་འགྱུར་རོ། །རབ་ཏུ་ཞུགས་པ་དང་སྟན་ནི་འདིར་མལ་གྱི་ཉེ་བར་མཚོན་པ་ཡིན་ཏེ། དེ་ལྟར་ནི་ཁྱིམ་དུ་ཞུགས་ནས་ཇི་སྲིད་དེའི་ཁོངས་སུ་གཏོགས་པའམ་འགའ་ཞིག་གིས་སྟན་ནམ་ཁྲིའུ་གནང་བ་མ་བསྟབས་པ་དེ་སྲིད་དུ་འདུག་པར་མི་བྱའོ་ཞེས་བྱ་བའི་ཐ་ཚིག་གོ །དེ་ནས་སྡོམ་ཅན་གོས་སོགས་བྱིན་ནས་ནི། །ཁྲོས་དང་ལྡན་པའི་སེམས་ཀྱིས་ཕྲོགས་པ་དང༌། །ཞེས་བྱ་བ་ལ། དེ་ནས་བརྟུལ་ཞུགས་ཅན་ལ་གོས་ལ་སོགས་པ་བྱིན་པའི་དུས་ཕྱིས་ཏེ་དུས་གཞན་གྱི་དགེ་ཚུལ་གྱིས་ཕྲོགས་ན་ཉེས་བྱས་སུ་འགྱུར་རོ། །དེ་ལ་དེ་ནས་ཀྱི་སྒྲ་ནི་ཚིག་ཉེ་བར་བཀོད་པ་ཡིན་ལ་སོགས་པ་སྨོས་པ་ནི་སྣོད་ལ་སོགས་པ་གཟུང་བ་ཡིན་ནོ། །གང་གིས་ཤེ་ན། ཁྲོས་དང་ལྡན་པའི་སེམས་ཀྱིས་ཞེས་བྱ་བ་སྨོས་ཏེ། ཁྲོ་བ་གང་ལ་ཡོད་པ་དེ་ནི་ཁྲོས་དང་ལྡན་པའི་སེམས་ཏེ། དེས་ཕྲོགས་པར་གྱུར་ན་ཞེས་བྱ་བའི་ཐ་ཚིག་གོ །ཁྲོས་པ་སྨོས་པ་ནི་ཕན་པར་འདོད་པས་ཡུལ་གཞན་དུ་འགྲོ་བའི་བར་ཆད་བྱ་བའི་ཕྱིར་ཉེས་པ་མེད་དོ་ཞེས་བྱ་བའི་དོན་ཏོ། །དེ་བཞིན་དུ་སྣོད་ལ་སོགས་པ་ལ་ཆགས་པ་ནི་སྣོད་སོགས་ཆགས་པ་སྟེ། སྣོད་ལ་སོགས་པ་ལ་སྲེད་པར་གྱུར་པའི་དགེ་ཚུལ་གང་ཡིན་པ་དེ་ནི་དེའི་ནན་ནི་ནན་ཏེ། དེས་སློང་བ་ནི་ཤིན་ཏུ་ལྟོས་བ་དང་བཅས་པར་སྣོད་ལ་སོགས་པ་བླངས་པ་ཞེས་བྱ་བའི་བར་དུའོ། །སོགས་པའི་སྒྲས་ནི་གོས་ལ་སོགས་པ་གཟུང་སྟེ། འདི་སྐད་དུ་ཡོ་བྱད་མེད་པའི་དབང་གིས་ཞེས་བྱ་བ་དགོས་པ་ཙམ་གྱི་ཆེད་དུ་ནན་མ་ཡིན་པར་སློང་བ་ལ་སོགས་པ་འཇུག་པར་བྱའི་བཟང་པོ་ལ་ཆགས་པ་མ་ཡིན་ནོ་ཞེས་བྱ་བར་བསྟན་པར་འགྱུར་རོ། །རྩེད་མོར་ལྟུང་བཟེད་ལ་སོགས་སྡེད་པ་དང༌། །ཞེས་བྱ་བ་རྩེད་མོའི་ཕྱིར་ལྷུང་བཟེད་ལ་སོགས་པ་སྦེད་པར་བྱེད་པ་ལས་ཉེས་བྱས་སུ་འགྱུར་རོ་ཞེས་བྱ་བར་སྦྱར་རོ། །རྩེད་མོ་སྨོས་པ་ནི་ཡུལ་གཞན་དུ་འགྲོ་བ་དགག་པའི་དོན་ལ་ནི་ཉེས་པ་མེད་དོ། །ཞེས་ཤེས་པར་
བྱེད་པ་ཡིན་ནོ་ཞེས་བྱ་བའི་དོན་ཏོ། །དང་ནི་ཉེས་བྱས་སྡུད་པར་བྱེད་པའོ། །ཁྲོས་པས་སྡོམ་ཅན་གཙུག་ལག་ཁང་སྐྲོད་སོགས། །ཁྲོས་ནས་ཏེ། ཁྲོས་པའི་སྒོ་ནས་སྡོམ་ཅན་གཙུག་ལག་ཁང་ལས་སྐྲོད་ཅིང་བསྐྱོད་པ་དང་འབྱིན་པར་བྱེད་པའོ། །སོགས་པའི་སྒྲས་ནི་རྣམ་པར་འཚེ་བ་གཞན་ཡང་གཟུང་བ་ཡིན་ཏེ། དཔེར་ན་གྲང་བའི་དུས་སུ་གནས་ཁང་ལས་ཕྱུང་ནས་སྐབས་མེད་པའི་ལྷགས་པས་གདུངས་པར་བྱེད་པ་དང༌། དྲོ་བའི་ཚེ་འོག་ཁང་དུ་བཅུག་ནས་སྒོ་གླེགས་བཅད་དེ་ཚད་པས་གདུངས་པར་བྱེད་པ་ལ་སོགས་པ་ལྟ་བུའོ། །གཙུག་ལག་ཁང་སྨོས་པ་ནི་གནས་ཁང་གི་ཉེ་བར་མཚོན་པའོ། །ཁྲོས་པ་སྨོས་པ་ནི་དེ་ལ་འམ་དགེ་འདུན་ལ་ཉེས་དམིགས་བསྟན་པ་ལ་ཉེས་པ་མེད་དོ། །ཞེས་བསྟན་པའི་ཕྱིར་རོ། །དེ་བཞིན་དུ། རྐུན་པོས་དབེན་པར་བོར་བ་ཁྱེར་བ་དང༌། །ཞེས་བྱ་བ་ལ་རྐུན་པོས་གོས་ལ་སོགས་པ་བརྐུས་ནས་བོར་བ་ཁྱེར་ཞིང་ལེན་པར་བྱེད་ནའོ། །གང་དུ་ཞེ་ན། དབེན་པར་ཞེས་བྱ་བ་སྨོས་ཏེ་སྐྱེ་བོས་དབེན་པ་ཞེས་བྱ་བ་ནི་སྐྱེ་བོ་མེད་པ་དང་སྐྱེ་བོ་མི་སྣང་བ་ཞེས་བྱ་བའི་དོན་ཏེ། དེ་ལྟ་བུར་གྱུར་པའི་ས་ཕྱགས་སུའོ། །དབེན་པ་སྨོས་པས་ནི་འདི་སྐད་དུ་ཕྱག་དར་ཁྲོད་ཀྱི་ཚུལ་དུ་སྐྱེ་བོ་མང་པོ་ཉེ་བར་འདུས་པར་བསམ་པ་དག་པས་ལེན་པར་བྱེད་པ་དེ་ལ་འདི་ཉིད་ཀྱིས་བརྐུས་སོ་སྙམ་པའི་ཡང་དག་པ་མ་ཡིན་པ་མི་སྲིད་ལ་འགས་ཀྱང་དབེན་པ་དག་ཏུ་བསམ་པ་དག་པས་བླངས་པ་ཡིན་དུ་ཟིན་ཀྱང་དུས་གཞན་དག་ཏུ་མཐོང་ནས་འདི་ཉིད་ཀྱིས་བརྐུས་སོ་སྙམ་པའི་ཡང་དག་པ་མ་ཡིན་པ་སྲིད་དོ་ཞེས་སྟོན་པར་འགྱུར་རོ། དོམ་ཅན་སྔ་ནས་གནས་པ་ནན་གྱིས་ནི། །ཉལ་ལམ་འདུག་པར་ཡོངས་སུ་རྟོག་པ་དང༌། །ཞེས་བྱ་བ་ལ་ནན་གྱིས་ཏེ་སྟོབས་ཀྱི་རྣམ་པས་ཕྱིས་ནོན་བྱས་ནའོ། །དགེ་འདུན་གྱི་གནས་སམ་གཞན་དུ་སྔ་ན་གནས་པ་སྟེ། སྔར་འཁོད་ཅིང་ཐོག་མར་རྣམ་པར་གནས་པར་གྱུར་པ་ཉིད་ལ་ཞེས་བྱ་བའི་བར་དུའོ། །ཕྱི་འོངས་ནས་མལ་སྟན་ལ་ཉལ་བ་དང་འདུག་པར་ཡོངས་སུ་རྟོག་པ་སྟེ་བསྒྲུབས་ན་ཉེས་བྱས་སུ་འགྱུར་རོ། །སྔ་ན་གནས་པ་སྨོས་པ་ནི་གནས་དང་པོ་ཉིད་ནས་ནོན་པ་ཉིད་ཀྱི་ཕྱིར་དེ་དག་ལ་ཉེས་པར་མི་འགྱུར་རོ་ཞེས་བསྟན་པའི་ཕྱིར་རོ། །རྙེད་པ་གཞན་དུ་ཡོངས་སུ་བསྔོས་པ་དང༌། །ཞེས་བྱ་བ་ལ། རང་ངམ་གཞན་གྱི་རྙེད་པ་གཞན་ལ་བསྔོས་པ་ཡིན་པར་ཤེས་བཞིན་དུ་དེ་ལས་གཞན་དུ་ཡོངས་སུ་བསྔོས་ན་ཉེས་བྱས་སུ་
འགྱུར་ཏེ། ད་ནི་མ་བྱིན་ཕྱོགས་གཏོགས་བརྗོད་པར་བྱ། །ཞེས་བྱ་བ་ནས་བརྩམས་ཏེ། སྔར་བཤད་པད་དག་ཐམས་ཅད་ནི་ཉེས་བྱས་དག་ཡིན་ནོ། །གཞན་གྱི་ནོར་གྱི་ཕྱོགས་སུ་གཏོགས་པར་སྟན་ཞེས་བྱ་བ་ལ་གཞན་གྱི་ནོར་ནི་གཞན་གྱི་ནོར་ཏེ། གཞན་གྱི་རྫས་ཡིན་ལ། དེའི་ཕྱོགས་སུ་གཏོགས་པ་ནི་འདྲ་བ་ཡིན་ཏེ། དེའི་ཆའི་རྗེས་སུ་བྱེད་པ་ཡིན་པས་ན་དེ་བསྟན་ཏོ། །འདི་སྐད་དུ་མ་བྱིན་པར་ལེན་པ་དང་ཆ་དང་འདྲ་བ་དེ་དག་ནི་ཉེས་བྱས་ཀྱི་ཉེས་པར་འགྱུར་རོ་ཞེས་སྟོན་པར་འགྱུར་རོ། །བསྟན་པའི་ཚིག་གིས་ཀྱང་དེ་ལྟ་བུའི་རིགས་དག་ལ་བལྟ་བར་བྱའོ། །དགེ་ཚུལ་གྱི་ཚིག་ལེའུར་བྱས་པ་ལས་བསླབ་པའི་གཞི་གཉིས་པའོ།། །།ཡན་ལག་ཆ་ཀུན་བཟུང་བར་བཟོད་པ་ཡི། །ཞེས་བྱ་བ་ལ་སོགས་པས་བསླབ་པའི་གཞི་ཚིག་ལེའུར་བྱས་པ་གསུམ་པ་འཆད་པ་ཡིན་ཏེ། ཇི་ལྟར་ཡན་ལག་གི་ཆ་ཐམས་ཅད་བཟུང་བར་བཟོད་པ་ལ་ནད་མེད་ཅིང་ལས་སུ་རུང་བའི་ནོར་བུ་འདས་པར་གྱུར་པ་ན་དགེ་ཚུལ་འཇིགས་པ་མེད་ཅིང་ངོ་ཚ་མེད་པས་རེག་པའི་བདེ་བ་ཉམས་སུ་མྱོང་བར་གྱུར་ན་དེ་མ་རུངས་པ་སྟེ་དངོས་གཞིའི་ཉེས་བྱས་ཀྱི་ཉེས་པར་འགྱུར་རོ། །དེ་ལྟ་བུ་དེ་ནི་བསྡུས་པའི་དོན་ཡིན་ནོ། །དེ་ལ། ཡན་ལག་ཆ་ཀུན་བཟུང་བར་བཟོད་པ་ཡི། །ཞེས་བྱ་བ་ལ་ཡན་ལག་དང་ཆ་ནི་ཡན་ལག་ཆའོ། །ཐམས་ཅད་ཀྱང་དེ་ཡིན་ལ་ཡན་ལག་ཆ་ཡང་ཡིན་པས་ན་ཡན་ལག་ཆ་ཀུན་ནོ། །ཡན་ལག་ནི་ལུས་ཡིན་ཏེ་དེ་ཡང་བརྟེན་པར་བྱ་བ་དང༌། རྟེན་པར་བྱེད་པ་དག་གིས་ཞེས་བྱ་བས་ལུས་ལས་ཡན་ལག་ཉིད་ཐ་དད་པར་བྱས་པ་དག་ཡིན་ནོ། །ལུས་ཀྱི་སྒྲས་ལུས་བརྗོད་པ་ཡིན་པས་དེ་ལ་བསྟེན་པར་བྱ་བ་དང༌། སྟེན་པར་བྱེད་པ་བུད་མེད་དང་སྐྱེས་པའི་དབང་པོ་ཐ་དད་པར་བྱས་པ་ནི་ལྟར་སྲིད་པར་བཅུག་པའི་རེག་པ་བདག་གིར་བྱས་ན་ཆུང་བར་བསྟན་པ་ནི་དེ་ལྟར་མགོ་བཅད་པའི་ཁར་ཞེས་བྱ་བས་མགོ་བོ་བཅད་པའི་ཁ་གང་ཡིན་པ་དེ་ལ་ནི་ཉེས་པ་ཆུང་བར་འགྱུར་བའི་དབང་དུ་བྱས་ནས་བཤད་པ་ཡིན་ལ། ལུས་ལ་ཡན་ལག་ཉིད་དུ་བྱས་པ་མ་ཡིན་པ་མ་གཏོགས་པར་ནི་ཚིག་དེ་དག་རིགས་པའི་ཚུལ་དུ་མི་འགྱུར་བ་དེ་བས་ན་འདི་ལ་ཡན་ལག་ཉིད་དུ་རིག་པར་བྱའོ། །ལུས་དེ་ཡང་མ་ལུས་པའམ་མ་ལུས་པ་མ་ཡིན་པ་ཀུན་ཀྱང་ཡན་ལག་ཉིད་ཡིན་ཏེ། དེ་ལྟར་ནི་ལུས་ཕྱེད་བཅད་པ་ལ་ཡང་ཁ་ན་མ་ཐོ་བ་རྫོགས་པ་ཁོ་ན་ཡིན་ཏེ། བགྲོད་པར་བྱ་བ་ཕྱེད་བཅད་པ་ཉིད་ལ་ཡང་ན་
སྨད་པ་མེད་དོ་ཞེས་འབྱུང་བ་ཡིན་ནོ། །བགྲོད་པར་བྱ་བའི་སྒྲས་ནི་སྐྱེས་པ་དང༌། བུད་མེད་དང༌། མ་ནིང་དག་བརྗོད་པ་ཡིན་ནོ། །ཕྱེད་ནི་ལུས་ཀྱི་ཕྱེད་ཡིན་ལ་དེ་བཅད་པ་ཉིད་ནི་འདིར་བུད་མེད་ཀྱི་དབང་པོའོ། །པགས་པ་དང༌། ཁ་ཤུན་དང༌། ཁར་བཅུག་པ་ནི་རེག་པ་བདག་གིར་བྱས་པ་ལ་ན་སྨད་པ་ནི་མེད་དེ་འོན་ཀྱང་དངོས་གཞི་ཁོ་ནར་འགྱུར་རོ། །ཆའི་སྒྲས་ནི་ཆ་ཤས་བརྗོད་པ་ཡིན་ཏེ་ལག་པ་དང་རྐང་པ་དང་མདོམས་དང་ཚིགས་དག་ཡིན་ནོ། །ཉམས་པ་མེད་ཅིང་སྤྱད་དུ་རུང་བའི་ལམ་ཞེས་བྱ་བ་ལ་སོགས་པས་མཚན་འཆད་པ་ཉིད་ཡིན་པའི་ཕྱིར། ཡན་ལག་ཆ་ཀུན་གཟུང་བ་གཉིས་ཀྱིས་གཉིས་སྙོམས་པར་འཇུག་པར་བཟོད་ཅིང་རུང་བ་གང་ལ་ཡོད་པ་དེ་ནི་ཡན་ལག་ཆ་ཀུན་བཟུང་བར་བཟོད་པ་སྟེ། འདིས་ནི་བུད་མེད་ཤིན་ཏུ་སྟོབས་དང་ལྡན་པ་ཉིད་དུ་སྟོན་ཏོ། །དེ་ལྟར་ནི་འདུལ་བ་མདོ་ལས་ལག་པས་ལག་པར་དང༌། རྐང་པས་རྐང་པར་དང༌། ཚིགས་ཀྱིས་ཚིགས་སུ་དང༌། མདོམས་ཀྱིས་མདོམས་སུ་བསྐྱོད་པར་མི་རུང་ནའོ་ཞེས་འབྱུང་བ་ཡིན་ནོ། །ལག་པས་ལག་པ་ནས། རྐང་པས་རྐང་པར་བསྐྱོད་པ་མི་རུང་བ་ཉིད་ལ་ནི་ཆུང་བར་འགྱུར་གྱི་འོན་ཀྱང་སྐྱོད་པར་བྱེད་པ་ལ་ནི་མ་ཡིན་ནོ། །བསྐྱོད་པ་ནི་གཡོ་འགུལ་ཏེ་རྒྱུ་ཡིན་ནོ། །ལག་པ་ཞེས་བྱ་བ་ནི་དཔུང་བའི་རྩ་བ་ནས་བརྩམས་པ་ལག་པའི་མིང་ཡིན་ནོ། །རྐང་པ་ཞེས་བྱ་བ་ནི་བརླ་ནས་རྐང་མཐིལ་ལ་ཐུག་པའོ། །མདོམས་ཞེས་བྱ་བ་ནི་མཚན་ཡན་ཆད་ནས་ལྟེ་བ་མན་ཆད་ཡིན་ནོ། །ཚིགས་ཞེས་བྱ་བ་ནི་མཚན་གྱི་ཕྱོགས་ཀྱི་གོང་ཡན་ཆད་ཀྱི་མིང་ཡིན་ནོ། །དེ་ལ་དེ་ལྟ་བུར་གྱུར་པ་འདི་ལ་ཡང་འགའ་ཞིག་ཏུ་སྤྱད་དུ་རུང་བའི་ལམ་མ་ཡིན་པར་འགྱུར་བ་ཡང་ཡོད་དེ། །དཔེར་ན་མ་ནིང་ལྟ་བུའོ། །དེ་ལྟར་ཡང་འདུལ་བ་མདོ་ལས། བསྟེན་པར་བྱ་བ་མ་ནིང་སྦུབས་མེད་པ་ལ་ཡང་འབྱུང་བ་ཡིན་ནོ། །བསྟེན་པར་བྱ་བ་བུད་མེད་ཀྱི་དབང་པོའི་སྦུབས་མེད་པ་ཁྱད་པར་ཇི་ལྟ་བུ་ཞིག་ཅེ་ན། སྐྱེས་པའི་དབང་པོ་བཅུག་པའི་སྐབས་མེད་པ་ལ་ཉེས་བྱས་ཆུང་བར་འགྱུར་པའི་དབང་དུ་བྱས་ནས་བཀྲོལ་བ་ཡིན་ནོ། །དོན་དེ་ནི་སྤྱད་དུ་རུང་བའི་ལམ་ཞེས་བྱ་བ་སྨོས་པ་ཡིན་ཏེ། སྤྱད་པའི་སྒྲས་ནི་འཁྲིག་པའི་ཆོས་བརྗོད་པ་ཡིན་པས་དེ་ལ་རུང་བའི་ལམ་ནི་སྤྱད་དུ་རུང་བའི་ལམ་ཡིན་ནོ། །དེ་ནི་དེ་ལྟར་ཡང་འདུལ་བ་མདོ་ལས། སྤྱད་དུ་མི་རུང་བ་ཞེས་འབྱུང་བ་ཡིན་ཏེ། བགྲོད་པར་བྱ་བ་ཡིན་པས་རུང་བ་ཡིན་ལ། རུང་བ་མེད་པ་ནི་མི་རུང་བ་སྟེ། ཤིན་
ཏུ་ཡང་འཁྲིག་པ་བསྟེན་པའི་མཚན་ཉིད་ཀྱི་སྤྱད་དུ་མི་རུང་བའོ། །སྤྱད་དུ་རུང་བ་དེ་ཡང་ཁྱད་པར་ཇི་ལྟ་བུ་ཞེ་ན། ཉམས་པ་མེད་ཅིང་ཞེས་བྱ་བ་སྨོས་ཏེ། ཉམས་པ་མེད་པ་དང་ཞིག་པར་མ་གྱུར་པ་ཞེས་བྱ་བའི་བར་དུའོ། །དེ་ལྟར་ནི་འདུལ་བ་མདོ་ལས་ཕྱོགས་ཀྱི་དང་པོ་ཅུང་ཟད་ཟིན་པ་ཉིད་དང༌། སྐྲངས་པ་ཉིད་དང༌། རུལ་བ་ཉིད་དང༌། མྱགས་པ་ཉིད་དང༌། སྲོག་ཆགས་དག་གིས་ཟོས་པ་ཉིད་ལྟ་བུ་ནི་ཉམས་པ་མེད་དོ་ཞེས་འབྱུང་བ་ཡིན་ཏེ། དེ་ལ་ཕྱི་དང་ནང་ཉམས་པར་གྱུར་པ་ནི་ཉམས་པ་ཉིད་དུ་འདོད་ཀྱི་ཕྱོགས་གཅིག་ནི་མ་ཡིན་ནོ། །ཕྱོགས་ཀྱི་དང་པོར་ཞེས་བྱ་བ་ནི་མཚན་ཐམས་ཅད་མ་ཡིན་ནོ་ཞེས་བྱ་བའི་དོན་ཏོ། །པགས་པ་ནི་བུད་མེད་ཀྱི་དབང་པོའི་ལྤགས་རིམ་མོ། །ཁ་ཤུན་ནི་བཤང་བའི་སྦུབས་སོ། །སོ་ཞེས་བྱ་བ་ནི་སོའི་རིམ་པ་དག་སྟེ། པགས་པ་དང་ཁ་ཤུན་དང་སོ་ནི་པགས་པ་ཁ་ཤུན་སོ་དག་གོ །དེ་ལས་འདས་པ་ཞེས་བྱ་བ་ནི་ཕ་རོལ་དུ་ཞེས་བྱ་བའི་ཐ་ཚིག་གོ །དེ་ཉིད་ཀྱི་ཕྱིར་མདོ་མཛད་པས་ཁའི་དང་པོ་ནི་ཕན་ཆད་དོ། །བཤད་པའི་ལམ་ནི་བུ་གུའི་སྦུབས་ཀྱི་མཐའ་ཡན་ཆད་དོ། །ཟག་བྱེད་ཀྱི་ནི་ལྤགས་རིམ་ཡན་ཆད་དོ་ཞེས་གསུངས་པ་ཡིན་ནོ། །ནད་མེད་ལས་སུ་རུང་བའི་ཞེས་བྱ་བ་ལ་ནད་ཡོད་པ་མ་ཡིན་པས་ན་ནང་མེད་པ་སྟེ། སྐྱེས་པའི་མཚན་ཡིན་ནོ། །དེ་ལྟར་ཡང་འདུལ་བ་མདོ་ལས་ཡན་ལག་གི་རྣམ་པ་རྡོལ་བའི་ཕྱིར་མ་མྱོང་ནའོ་ཞེས་འབྱུང་བ་ཡིན་ཏེ། ཡན་ལག་ལས་སྐྱེས་རྡོལ་བའི་ཕྱིར། །འདོད་པའི་འདོད་ཆགས་མ་སྐྱེས་ཤིང་ཉམས་པ་དེ་ཉིད་ཀྱི་རྒྱུས་ཀྱང་ཉེས་པ་ཆུང་བར་འགྱུར་རོ། །ལས་སུ་རུང་བ་ནི་ལེགས་པར་ལས་སུ་རུང་བ་སྟེ། དེ་ལྟ་བུ་དེ་ཙམ་གྱི་འདོད་པའི་འདོད་ཆགས་མྱོང་བར་འགྱུར་གྱི་གཞན་དུ་ནི་མ་ཡིན་ནོ། །དེ་ལྟར་ན་འདུལ་བ་མདོ་ལས། ལས་སུ་མི་རུང་བ་བཅུག་ནའོ་ཞེས་འབྱུང་བ་ཡིན་ནོ། །ནད་མེད་པ་དང་ལས་སུ་རུང་བ་ཞེས་བྱ་བའི་འོག་ཏུ་ནོར་བུའི་སྒྲས་ལྷན་ཅིག་ཁྱད་པར་གྱི་བསྡུ་བ་འམ། དྲུག་པའི་བསྡུ་བ་བྱའོ། །དེའི་ཕྱིར་དེ་ལྟ་བུར་གྱུར་པའི་ནོར་བུམ་ལུས་པར་འདས་པ་ཡིན་གྱི་ཕྱོགས་གཅིག་ཙམ་ནི་མ་ཡིན་ནོ་ཞེས་བྱ་བར་རྟོགས་པར་བྱ་བ་ཡིན་ནོ། །དེ་ལྟར་ནི་འདུལ་བ་མདོ་ལས། དེའི་ནོར་བུ་བཅུག་པ་ཉིད་ནི་དེའི་མཐའོ་ཞེས་འབྱུང་བ་ཡིན་ཏེ། ཟག་བྱེད་དེའི་ནོར་བུ་བཅུག་པ་ཉིད་ནི་བཅུག་པའི་མཐའ་ཐུག་པ་ཡིན་ལ། བཅུག་པར་གྱུར་པ་བདག་གིར་བྱས་པ་དེ་ཙམ་གྱིས་ཀྱང་གང་གི་ཕྱིར་བཅུག་པའི་རེག་པ་བདག་གིར་བྱས་པ་
ཉེས་པར་འདོད་དོ་ཞེས་བྱ་བའི་དབང་དུ་བྱས་ན་དངོས་གཞིར་འགྱུར་རོ་ཞེས་བྱ་བའི་ཐ་ཚིག་གོ །རེག་པའི་བདེ་བ་ཞེས་བྱ་བ་ལ་རེག་པ་ནི་རྣམ་པ་གཉིས་ཏེ། གསུམ་འདུས་པའི་མཚན་ཉིད་དང་རེག་བྱའི་མཚན་ཉིད་དོ། །དེ་ལ་གསུམ་ནི་ཡུལ་དང༌། དབང་པོ་དང༌། ཤེས་པ་དག་ཡིན་ཏེ། དེ་དག་འདུས་པ་ན་བདེ་བ་ལ་སོགས་པའི་མཚན་ཉིད་ཅན་གྱི་ལས་སྐྱེད་པར་བྱེད་པའི་ཤུགས་ཀྱིས་སོ། །གཉིས་པ་ནི་ཕྱི་རོལ་གྱི་འཇམ་པ་ཉིད་ལ་སོགས་པ་ཡིན་ཏེ་སྔ་མ་ནི་རེག་པས་ན་རེག་པ་ཞེས་བྱ་བ་དངོས་པོ་བསྒྲུབས་པ་ཡིན་ལ། ཕྱི་མ་ནི་རེག་པར་བྱ་བ་ཡིན་པས་ན་རེག་པ་སྟེ། ལས་སྒྲུབ་པ་ཡིན་ནོ། །དེ་གཉི་གའི་མཚན་ཉིད་ལ་རེག་པར་གྱུར་པ་ན་རེག་པའམ་དེས་བསྐྱེད་པའི་བདེ་བ་དག་ནི་རེག་པའི་བདེ་བའོ། །རེག་པ་དེ་ཡང་གཉིས་ཏེ་སེམས་ཅན་དུ་བགྲང་བ་དང༌། དེ་གཙོ་བོ་མ་ཡིན་པ་ཉིད་ཀྱི་ཕྱིར་གང་ཡང་སེམས་ཅན་དུ་བགྲང་བ་མ་ཡིན་པའོ། །གལ་ཏེ་ཡན་ལག་ཐམས་ཅད་སེམས་ཅན་དུ་བགྲང་བ་བཞིན་དུ་འཇམ་པའི་མཚན་ཉིད་ཀྱི་རེག་པ་སྟེར་བར་བྱེད་ན་དེ་ཡང་རེག་པར་མཚུངས་པ་ཉིད་ཀྱི་ཕྱིར་དངོས་གཞིར་འགྱུར་ལ། འོན་ཏེ་མཚན་དོད་པ་ཡིན་ན་ནི་ཁ་ན་མ་ཐོ་བ་ཆུང་བར་འགྱུར་རོ། །དེ་ལྟར་ནི་འདུལ་བ་མདོ་ལས། ཤིང་དང་བསོ་དང༌། རྡོ་བ་དང་གོས་ལས་བུ་མོའི་གཟུགས་སུ་བྱས་པ་ལ་བསྩལ་བ་ན་གལ་ཏེ་དབང་པོ་ཅི་དོད་པ་ལས་ཆུང་བར་འགྱུར་ལ་ཡན་ལག་ཐམས་ཅད་ལ་རེག་པ་སྟེར་ན་དངོས་གཞིའོ་ཞེས་འབྱུང་བ་ཡིན་ནོ། །མྱོང་འགྱུར་ཞེས་བྱ་བ་ནི་ལུས་ཀྱི་རྣམ་པར་ཤེས་པའི་དུས་ཕྱིས་འབྱུང་བ་ཡིད་ཀྱི་རྣམ་པར་ཤེས་པས་སོ། །དེ་ལྟར་ཡང་འདུལ་བ་མདོ་ལས་ཕྲད་པའི་གཡོ་བ་ཉིད་ཙམ་ལའོ་ཞེས་འབྱུང་བ་ཡིན་ཏེ། གཡོ་བ་ཉིད་ནི་ལུས་ཀྱི་རྣམ་པར་ཤེས་པ་ཙམ་ཅུང་ཞིག་འགྱུར་བ་ཡིན་ལ་དེའི་དུས་ཕྱིས་འབྱུང་བའི་རྣམ་པར་རྟོག་པ་ཡིད་ཀྱི་རྣམ་པར་ཤེས་པས་ཉམས་སུ་མྱོང་བར་གྱུར་ན་ཞེས་བྱ་བའི་ཐ་ཚིག་གོ །འཇིགས་མེད་ངོ་ཚ་མེད་ན་ཞེས་བྱ་བ་ནི་འཇིགས་ཤིང་སྐྲག་པ་དང༌། ངོ་ཚ་གང་ལ་མེད་པ་ཞེས་བྱ་བའི་དབང་དུ་བྱས་ནས་སོ། །དེ་ལྟ་བུར་གྱུར་པ་ཡང་འདིར་སྐྲག་པ་དང་ངོ་ཚ་དག་གཟུང་བར་བྱ་བ་གང་གིས་འདོད་པའི་འདོད་ཆགས་མ་སྐྱེས་པའོ། །དེ་ལྟར་ནི་འདུལ་བ་མདོ་ལས་སྐྲག་པ་དང་ངོ་ཚ་བས་ཀུན་དུ་འདོད་ཆགས་མ་སྐྱེས་ནའོ་ཞེས་འབྱུང་བ་ཡིན་ཏེ། གང་གི་ཕྱིར་སྐྲག་པ་དང་ངོ་ཚ་བས་ཀུན་དུ་འདོད་ཆགས་པས་ཏེ། འདོད་པའི་འདོད་
ཆགས་མ་སྐྱེས་པ་དེའི་ཕྱིར་ཆུང་བར་འགྱུར་རོ་ཞེས་བྱ་བའི་ཐ་ཚིག་གོ །ཅི་ཡན་ལག་དེ་ཙམ་གྱིས་འགྱུར་རམ་གཞན་དག་ཀྱང་ཡོད་ཅེ་ན། ཐ་མལ་རྨི་ལམ་མ་ཡིན་བསླབ་བཅས་རྣམས། །འདིར་སྦྱར་དེ་བཞིན་འོག་མ་དག་ཏུ་ཡང༌། །ཞེས་བྱ་བ་སྨོས་ཏེ། རང་བཞིན་དུ་གནས་པ་དང༌། རྨི་ལམ་མ་ཡིན་པ་དང༌། བསླབ་པ་དང་བཅས་པ་ཞེས་བྱ་བ་སྔར་བཤད་པའི་བསླབ་པའི་གཞི་གང་ཡིན་པ་དེ་དག་ནི་མི་ཚངས་པར་སྤྱོད་པ་ཉིད་ལ་སྦྱར་བར་བྱ་ཞིང༌། དེ་བཞིན་དུ་བསླབ་པའི་གཞི་འོག་མ་ཐམས་ཅད་ལ་ཡང་སྦྱར་བར་བྱ་བ་ཁོ་ནའོ་ཞེས་བྱ་བར་སྦྱར་བར་བྱའོ། །དེ་དག་ཀྱང་བཤད་ཟིན་པ་ཡིན་ཏེ། དེ་ལས་ཀྱང་ཐ་མལ་པ་ཞེས་བྱ་བ་དེ་ལྟ་བུ་ལ་སོགས་པ་སྔར་བཤད་པའི་ཡན་ལག་གསུམ་པོ་སྲིད་པ་སྟེ། ཡོད་ན་དངོས་གཞིར་འགྱུར་ལ། འོན་ཏེ་རང་བཞིན་དུ་གནས་པ་ལ་སོགས་པ་གསུམ་པོ་དག་ལས་གང་ཡང་རུང་བ་དག་ཀྱང་མེད་ན་ཉེས་པ་མེད་ཅིང༌། གཞན་དག་ལས་གང་ཡང་རུང་བ་མེད་ན་ཆུང་བར་འགྱུར་བར་རིག་པར་བྱའོ། །ད་ནི་བདག་གི་སྒོར་ཡང་གཞན་གྱི་ཡན་ལག་དང་ཞེས་བྱ་བ་ལ་སོགས་པས་སྔར་བཤད་པའི་ཡན་ལག་ཉིད་གསལ་པོར་བྱས་པའི་ཕྱིར་སྤྲོས་པ་སྟོན་པར་བྱེད་དེ། གང་གི་ཕྱིར། པགས་པ་ཁ་ཤུན་སོ་ལས་ཕར་འདས་ན། །ཞེས་བྱ་བ་ནི་སྐྱེས་པ་དང་བུད་མེད་དང་མ་ནིང་དང༌། བདག་ཉིད་ཀྱི་ཁ་དང་བཤད་པའི་ལམ་སྤྱིའི་དབང་དུ་བྱས་ནས་བསྟན་པ་ཡིན་པའམ། ཡང་ན་བུད་མེད་ཀྱི་ལམ་གསུམ་ཁོ་ནའི་དབང་དུ་བྱས་ནས་དེ་སྐད་དུ་བསྟན་པ་ཡིན་པའི་ཕྱིར་འདིར་མ་ཐོབ་པ་སྒྲུབ་པར་བྱེད་པ་ཡིན་ནོ། །བདག་གི་སྒོར་ཡང་ཞེས་བྱ་བ་ནི་བདག་ཉིད་ཀྱི་ཡང་ཁ་དང་བཤད་པའི་ལམ་གྱི་མཚན་ཉིད་ཅན་གྱི་སྒོར་རོ། །ཡང་གི་སྒྲ་ནི་སྐྱེས་པ་དང་བུད་མེད་དང་མ་ནིང་འབའ་ཞིག་ནི་མ་ཡིན་གྱི་བདག་ཉིད་ཀྱི་མཚན་དུ་བཅུག་པ་བདག་གིར་བྱེད་ན་མཐའི་ཉེས་པར་འགྱུར་ཏེ། བདག་ཉིད་ཀྱི་ལ་ཡང་ཞེས་བསྟན་པའི་ཕྱིར་རོ། །སྐྱེས་བུ་གཞན་གྱི་ཡན་ལག་གི་སྦུབས་ཏེ། སྐྱེས་བུའི་མཚན་དུ་བཅུག་པ་བདག་གིར་བྱེད་པ་ནི་རེག་པའི་བདེ་བ་དག་ཡིན་ཏེ། དེས་རྡོ་རྗེས་གནོད་འདྲའི་རྩ་བ་ཐོབ་པར་འགྱུར་རོ་ཞེས་སྦྱར་བར་བྱའོ། །ཡང་ན་བདག་ཉིད་ཀྱིས་བཅུག་པ་བདག་གིར་བྱེད་པའམ། འོན་ཏེ་བདག་གི་ཡན་ལག་གི་སྦུབས་ཁ་དང་བཤད་བའི་ལམ་དུ་བཅུག་པའི་རེག་པའི་བདེ་བ་བདག་གིར་བྱས་ན་དེས་ཀྱང་རྡོ་རྗེས་གནོད་འདྲའི་རྩ་བ་ཐོབ་པར་འགྱུར་རོ།།
དེ་བཞིན་དུ་ནན་ཏེ་སྟོབས་ཀྱི་རྣམ་པ་ལ་སོགས་པ་གང་ཡིན་པ་ནི་ནན་ལ་སོགས་པ་སྟེ། ནན་ལ་སོགས་པ་དེ་དང་ལྡན་ཞིང་འབྲེལ་པས་སྐྱེས་པ་དང་བུད་མེད་གནོན་པར་གྱུར་ན་དེ་ལས་ཀྱང་རྡོ་རྗེས་གནོད་འདྲའི་རྩ་བ་ཐོབ་པར་འགྱུར་རོ། །གང་གི་ཚེ་ཕྱིས་རེག་པའི་བདེ་བ་བདག་གིར་བྱེད་པ་ཡིན་གྱི། སྔར་བཅུག་པའི་དུས་ན་བདག་གིར་བྱས་པ་མ་ཡིན་ཏེ། སྟོབས་ཀྱི་རྣམ་པས་བཅུག་པ་ཉིད་ཡིན་པའི་ཕྱིར་རོ། །གལ་ཏེ་ཕྱིས་རེག་པའི་བདེ་བ་བདག་གིར་བྱེད་པ་ཡིན་པ་དེ་ལྟ་ན་ཡང་རྩ་བར་འགྱུར་རོ་ཞེས་བྱ་བའི་དོན་ཏོ། །ཡང་གི་སྒྲ་ནི་རང་བཞིན་དུ་གནས་པ་འབའ་ཞིག་མ་ཡིན་ནོ། །རྣམ་པ་ཀུན་དུ་ཞེས་བྱ་བ་ནི་རྣམ་པ་ཐམས་ཅད་དུ་རང་གི་སྒོར་རམ་གཞན་གྱི་སྒོར་རམ། རང་དང་གཞན་གྱི་སྦུབས་སུ་ནན་གྱི་རྣམ་པས་བཅུག་པ་བདག་གིར་བྱེད་ན་ཡང་དངོས་གཞིར་འགྱུར་གྱི། འདི་ལ་ཁྱད་པར་ནི་ཅུང་ཟད་ཀྱང་ཡོད་པ་མ་ཡིན་ནོ་ཞེས་བྱ་བའི་ཐ་ཚིག་གོ །ནིའི་སྒྲ་ནི་གང་གི་ཕྱིར་གྱི་དོན་ཡིན་ཏེ། གང་གི་ཕྱིར་བཤད་མ་ཐག་པའི་རྣམ་པས་ཀུན་དུ་རེག་པའི་བདེ་བ་བདག་གིར་བྱེད་པ་རྒྱུ་དེའི་ཕྱིར་རྡོ་རྗེས་གནོད་འདྲའི་རྩ་བ་ཐོབ་པར་འགྱུར་རོ། །རྡོ་རྗེའི་སྒྲས་རྡོ་རྗེ་བསྟན་པ་ཡིན་ལ། རྩ་བ་ཁོ་ན་རྡོ་རྗེ་ཡིན་པ་དེས་གནོད་པ་ནི་རྩ་བའི་རྡོ་རྗེས་གནོད་པ་སྟེ། དགེ་ཚུལ་གྱིས་ཐོབ་པར་འགྱུར་རོ་ཞེས་བྱ་བར་སྦྱར་རོ། །སོགས་པའི་སྒྲས་ནི་འདིར་གཉིད་ལོག་པ་དང་སྨྱོས་པ་དང༌། ཚོར་བས་གཟིར་བ་ཡོངས་སུ་བཟུང་བའི་ཕྱིར། གནས་སྐབས་དེར་བཅུག་ལ་སད་པའི་གནས་སུ་བདག་གིར་བྱེད་ན་རྩ་བར་འགྱུར་རོ་ཞེས་བྱ་བའི་དོན་ཏོ། །དང་ནི་བུད་མེད་ལ་སོགས་པའི་སྒོ་དང༌། འགྲོ་བ་དང༌། རྒྱུད་ཐ་དད་པས་ཐ་དད་པ་དག་ལ་ཁྱད་པར་ཡོད་པ་ནི་མ་ཡིན་ནོ་ཞེས་བསྟན་པར་བྱ་བའི་ཕྱིར། བུད་མེད་ལ་སོགས་རྒྱུད་རིགས་ཐ་དད་སྒོ། །ཞེས་བྱ་བ་ལ་སོགས་པ་སྨོས་ཏེ། བུད་མེད་དང་པོར་བྱས་པའི་སྐྱེས་པ་དང༌། མ་ནིང་གང་ཡིན་པ་དེ་ནི་བུད་མེད་ལ་སོགས་ཏེ་བུད་མེད་ལ་སོགས་དེའི་སྒོ་གསུམ་པོ་དག་དང་རྒྱུད་དང་རིགས་ལས་རྩ་བའི་ཉེས་པ་ལ་བརྟེན་པའི་ཁྱད་པར་ཉིད་ནི་མེད་པ་ཡིན་ཏེ། བྱེ་བྲག་ཉིད་ཡོད་པ་མ་ཡིན་ནོ་ཞེས་བྱ་བའི་ཐ་ཚིག་གོ །ཐ་དད་པའི་སྒྲ་ནི་སོ་སོར་སྦྱར་བར་བྱ་བ་ཡིན་ནོ། །རྒྱུད་ཅེས་བྱ་བ་ནི་རྒྱུད་ལྔ་ལ་བྱ་སྟེ་དེ་ལ་ཇི་ལྟར་སྲིད་པར་སྦྱར་བར་བྱ་བ་ཡིན་པས་ན་དགེ་སློང་དག་དམྱལ་བ་དང་ལྷན་ཅིག་ནི་འགལ་བ་ཡོད་པ་ཡིན་ལ། ལྷ་དང་ནི་སྲིད་པ་ཁོ་ན་ཡིན་ནོ། །སྲིན་པོ་དག་དང་ལྷན་
ཅིག་ནི་འགལ་བ་ཡིན་ལ་ཡི་དགས་དང་ཡང་སྲིད་པ་ཁོ་ན་ཡིན་ཏེ། དེ་དག་ནི་མཐོང་བའི་སྤྱོད་ཡུལ་དུ་གྱུར་པ་ཉིད་ཡིན་པའི་ཕྱིར་རོ། །དུད་འགྲོ་དག་དང་ཡང་སྲིད་པ་ཡིན་ཏེ་འཇུག་པ་ཉིད་ཀྱི་ཕྱིར་རོ། །རིགས་ཐ་དད་པ་ན་བྲམ་ཟེ་ལ་སོགས་པའི་དབྱེ་བ་དག་གིས་སོ། །རྒྱུད་དང་རགས་ནི་རྒྱུད་རིགས་ཏེ་དེ་དག་གི་ཐ་དད་པ་དེའི་ཕྱིར་ཞེས་བྱ་བའི་ཐ་ཚིག་གོ །ཉིད་ནི་གང་གི་ཕྱིར་མིའི་རྒྱུད་དག་ཁོ་ན་ལ་རྩ་བའི་ཉེས་པར་འགྱུར་གྱི་གཞན་ལ་ནི་ཡོངས་སུ་རྫོགས་པའི་རོ་མྱང་བ་མེད་པའི་ཕྱིར་དང༌། །དེ་བཞིན་དུ་བྲམ་ཟེའི་རིགས་དག་དང་བྲམ་ཟེའི་རིགས་དག་ཁོ་ན་ལས་ཡིན་གྱི། རིགས་ཅིག་ཤོས་ལས་ནི་མ་ཡིན་ནོ་ཞེས་བྱ་བར་ཁྱད་པར་ཡོད་པ་མ་ཡིན་པ་ཁོ་ནའོ་ཞེས་ངེས་པར་གཟུང་བའི་དོན་ཡིན་པ་དེའི་ཕྱིར་ཐམས་ཅད་དུ་རྩ་བའི་ཉེས་པར་འགྱུར་རོ་ཞེས་བྱ་བ་ནི་ཚིག་གི་ལྷག་མའོ། །དེ་བཞིན་དུ། ཤི་དང་མ་ཤི་ཉིད་ལའང་ཁྱད་པར་མེད། །ཅེས་བྱ་བ་ལ་འདི་ལྟར་ཤི་བ་དང་མ་ཤི་བ་ནི་ཤི་དང་མ་ཤི་བའོ། །དེའི་དངོས་པོ་ནི་ཤི་དང་མ་ཤི་བ་ཉིད་དེ་སྐྱེས་པ་དང་བུད་མེད་དང་མ་ནིང་ཤི་བ་དང་མ་ཤི་བ་ཉིད་དེ་ཡང་ཉེས་པ་བསྟེན་པ་ལ་ཁྱད་པར་ཡོད་པ་མ་ཡིན་ནོ་ཞེས་པའི་དོན་ཏོ། །ཕྱེད་དུ་བཅད་ཀྱང་སླར་ནི་སྦྱར་བའི་རྨ། །ཞེས་བྱ་བ་ལ་སོགས་པ་ལ་ལུས་ཕྱེད་དུ་བཅད་པའི་རྨ་གསུམ་པོ་དག་ཏུ་ཡང་ནོར་བུ་བཅུག་པའི་རེག་པ་བདག་གིར་བྱས་ན་རྩ་བར་འགྱུར་ཞེས་བྱ་བ་ནི་ཚིག་གི་ལྷག་མའོ། །དེ་བཞིན་དུ་ལུས་སྒང་ཚལ་དུ་བཀས་པར་གྱུར་པ་སླར་སྦྱར་བ་ལ་ཡང༌། ཁྱད་པར་ཇི་ལྟ་བུ་ཞེ་ན་འདིའི་མཚམས་མི་མངོན་པའི་ཕྱིར་མཚམས་མི་མངོན་པའོ། །བུ་ག་བུད་མེད་ཀྱི་མཚན་དེ་ལ་ཡང་རྩ་བར་འགྱུར་རོ་ཞེས་བྱ་བར་སྦྱར་རོ། །བུད་མེད་ཀྱི་ལུས་ཕྱེད་དུ་བཀས་པའི་མཚམས་མི་མངོན་པའི་ལམ་དང་མཚན་དུ་བདག་ཉིད་ཀྱི་ཟག་བྱེད་བཅུག་པ་བདག་གིར་བྱེད་ན་རྩ་བར་འགྱུར་རོ་ཞེས་བྱ་བའི་ཐ་ཚིག་གོ །ཡང་གི་སྒྲ་ནི་འདིར་སྔ་མ་དང་ཤི་བ་ཉིད་དང༌། མ་ཤི་བ་ཉིད་དང༌། མ་བཀས་པ་ཉིད་དང༌། བཀས་པ་ཉིད་སླར་སྦྱར་བ་ཞེས་བྱ་བ་སྡུད་པར་བྱེད་པ་ཡིན་ནོ། །མངོན་པར་གྱུར་ན་ཇི་ལྟར་བྱ་ཞེ་ན། མཚམས་སླར་སྦྱར་ཀྱང་མངོན་པར་གྱུར་པ་དང༌། །ཞེས་བྱ་བ་སྨོས་ཏེ། བཀས་པར་གྱུར་བའི་མཚམས་སླར་སྦྱར་བ་ཡང་མངོན་པར་གྱུར་པའི་ཟག་བྱེད་ཀྱི་ལམ་དུ་ཟག་བྱེད་བཅུག་པའི་རེག་པའི་བདེ་བ་དགེ་ཚུལ་གྱིས་བདག་གིར་བྱས་ན་ཉེས་བྱས་ཆུང་བར་འགྱུར་རོ། །དེའི་ཕྱིར་དེ་ཉིད་དགེ་ཚུལ་གྱིས་བཤགས་པར་བྱ་
བ་ཡིན་ནོ་ཞེས་བྱ་བ་ནི་ཐམས་ཅད་དུ་ཚིག་གི་ལྷག་མ་ཡིན་ནོ། །དེ་བཞིན་དུ། སྤུ་མེད་ཕག་ལ་སོགས་པའི་རྨ། །ཞེས་བྱ་བ་ལ་ཕག་ལ་སོགས་པའི་གང་ཡིན་པ་དེ་ནི་ཕག་ལ་མོས་པ་སྟེ། རིགས་རྗོད་པར་བྱེད་པ་ཡིན་གྱི་གསལ་བ་བརྗོད་པ་ནི་མ་ཡིན་ནོ། །སོགས་པའི་སྒྲས་ནི་སྤྲེའུ་ལ་སོགས་པ་གཟུང་ངོ༌། །དེ་ཁྱད་པར་ཇི་ལྟ་བུ་ཞེ་ན། སྤུ་མེད་པར་གྱུར་པ་གང་ཡིན་པ་དེ་ནི་སྤུ་མེད་པའོ། །སྤུ་མེད་པ་ཡང་ཡིན་ལ་བཅོས་པ་ཡང་ཡིན་པས་ཞེས་བྱ་བ་ནི་ཁྱད་པར་གྱི་བསྡུ་བའོ། །བཅོས་པ་ཞེས་བྱ་བ་ནི་བསྲེགས་པ་སྟེ། དེ་ལྟ་བུར་གྱུར་པ་སྤུ་མེད་པ་བཅོས་པའི་ཕག་ལ་སོགས་པ་དེའི་རྨར་སྐྱེས་པའི་དབང་པོ་བཅུག་ན་ཞེས་བྱ་བ་སྔ་མ་བཞིན་དུ་ཐམས་ཅད་བརྗོད་པར་བྱའོ། །དེ་ལྟར་མགོ་ནི་བཅད་པར་གྱུར་པའི་ཁ། །ཞེས་བྱ་བ་བཅད་པ་ཡང་ཡིན་ལ་མགོ་ཡང་ཡིན་པས་མགོ་ནི་བཅད་པ་སྟེ། དེའི་ཁ་ལ་བཅུག་ན་ཞེས་ཐམས་ཅད་སྔ་མ་བཞིན་ནོ། །དང་ནི་ཀུན་ལ་ཉེས་པར་མཚུངས་པར་སྟོན་པའི་སྒོ་ནས་སྡུད་པར་བྱེད་པ་ཡིན་ནོ། །དང་གཉིས་པ་ནི་བཤད་པ་སྡུད་པར་བྱེད་པ་ཡིན་ཏེ། དཔེར་ན་རྨ་བཅོས་མ་དེ་ལ་ཡང་ཇི་ལྟ་བ་བཞིན་དུ་འགྱུར་རོ་ཞེས་བྱ་བ་ལྟ་བུའོ། །ནི་ནི་གང་གི་ཕྱིར་བསྟན་མ་ཐག་པ་ནི་ཆུང་བ་ཉིད་དེ་བཤགས་པར་བྱ་བའི་ཉེས་བྱས་སུ་འགྱུར་རོ། །བཅོས་པ་ནི་ཉམས་པ་ཉིད་ཡིན་པའི་ཕྱིར་ཉེས་པ་ཆུང་བ་ཉིད་དུ་གྲུབ་པ་ལ་ཡང་བརྗོད་པ་ནི་མིའི་འཇམ་པའི་བྱ་བ་ཙམ་ཡོད་པས་རྩ་བའི་ཉེས་པར་འགྱུར་རོ་ཞེས་འདིར་དོགས་པ་ཟློག་པའི་ཕྱིར་རོ། །དེ་བཞིན་དུ་གོས་ཀྱིས་དཀྲིས་པ་དང་བལྟབ་པར་གྱུར་པ་དང་ཞེས་བྱ་བ་ལ། གོས་ཀྱིས་དཀྲིས་པ་ནི་གོས་ཀྱིས་དཀྲིས་པ་སྟེ། སྐྱེས་པའི་དབང་པོའམ་བུད་མེད་ཀྱི་དབང་པོའམ་དེ་གཉི་ག་གོས་ཀྱིས་དཀྲིས་པ་དང༌། དེ་བཞིན་དུ་མཚན་ཉིས་བལྟབ་ཏུ་བྱས་པ་དང༌། སྒོ་ལམ་རེག་པ་སྟེ། བུད་མེད་ཀྱི་དབང་པོའི་མཚན་ཉིད་ལ་སྐྱེས་པའི་དབང་པོ་གང་གི་སྒོ་ལ་མ་རེག་པ་དེ་ནི་དེ་ལ་བཅུག་པ་ན་ཉེས་པ་ཆུང་བར་འདོད་དེ། བཅོམ་ལྡན་འདས་བཞེད་པ་ཡིན་ནོ། །དེ་བཞིན་དུ་བུད་མེད་ལ་སོགས་པའི་སྒོར་སྐྱེས་པའི་དབང་པོ་མ་བཅུག་པར་བསྟེན་པར་བྱ་བའི་ཕྱི་རོལ་ལ་ཀུན་ནས་རེག་པ་ཙམ་ལ་ཆུང་བར་བཞེད་དོ་ཞེས་བྱ་བའི་ཐ་ཚིག་གོ །གང་གི་ཕྱིར་གོས་ཀྱིས་དཀྲིས་པའི་སྐྱེས་པ་དང་བུད་མེད་ཀྱི་དབང་པོ་གང་ཡིན་པ་ཕན་ཚུན་རེག་པ་མེད་པ་ཡིན་ནོ་ཞེས་བྱ་བ་དང༌། དེ་བཞིན་དུ་མཚན་ཉིས་བལྟབ་ཏུ་བྱས་པའི་ནོར་བུ་ལ་བུད་མེད་ཀྱི་དབང་པོས་རེག་པ་མེད་བ་དང༌། སྒོ་ལ་མ་རེག་པ་
ནི་སྐྱེས་པའི་དབང་པོ་ལ་རེག་པའི་བདེ་བ་ཉམས་སུ་མྱོང་བ་མེད་པའི་ཕྱིར་དེ་ལ་ཉེས་བྱས་ཆུང་བར་འགྱུར་རོ། །འདིར་སྒོ་ལ་མ་རེག་པ་ཉིད་ནི་ལམ་ཡངས་པ་ཉིད་ཀྱི་ཕྱིར་རོ་ཞེས་བྱ་བར་རྟོགས་པར་བྱའོ། །གོས་ཀྱིས་དཀྲིས་པ་ལ་སོགས་པ་གོང་མ་གསུམ་པོ་དག་ལ་རེག་པའི་བདེ་བ་ཉམས་སུ་མྱོང་བ་རྩ་བར་གྱུར་པའི་ཡན་ལག་མེད་པའི་ཕྱིར་ཉེས་པ་ཆུང་བར་འགྱུར་བ་ནི་འོག་ཏུ་བཅུག་པའི་མཚན་ཉིད་ཅན་གྱི་རྩ་བའི་ཡན་ལག་མེད་པའི་ཕྱིར་རོ། །འདུལ་བ་ལས་བར་དང་བཅས་ཤིང་བར་ཆད་མེད་པ་དང༌། བར་ཆད་མེད་ཅིང་བར་དང་བཅས་པ་དང༌། བར་དང་བཅས་ཤིང་བར་ཆད་དང་བཅས་པ་ཞེས་བྱ་བ་འདིས་རྩ་བའི་ཉེས་པར་གསུངས་པ་མ་ཡིན་ནམ་གོས་ཀྱིས་དཀྲིས་པ་དེ་ཇི་ལྟར་ན་ཉེས་པ་ཆུང་བར་བརྗོད་ཅེ་ན། གོས་ཏེ་སྟུག་པར་གྱུར་ན་ཞེས་བྱ་བ་སྨོས་ཏེ། གོས་སྟུག་པོ་མང་པོས་དཀྲིས་པ་ཉིད་ལ་རེག་པའི་བདེ་བ་ཉམས་སུ་མྱོང་བ་མེད་པའི་ཕྱིར་ཆུང་བར་འདོད་པ་སྟེ། བཅོམ་ལྡན་འདས་ཉེས་བྱས་ཆུང་བར་བཞེད་པ་ཡིན་ནོ། །བཅོམ་ལྡན་འདས་ཀྱིས། བུད་མེད་ཀྱི་དབང་པོས་སྐྱེས་པའི་དབང་པོ་ལ་མ་རེག་པར་བཅུག་པ་ལ་ཉེས་པ་ཆུང་བར་གསུངས་པའི་ཤུགས་ཀྱིས། དཀྲིས་པ་ལ་ཡང་ཉེས་པ་ཆུང་བར་བསྟན་པ་ཡིན་གྱི་འོན་ཀྱང་གྲགས་པའི་ཚིག་ཡོད་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །སྲབ་མོས་རྩ་བར་འགྱུར་ཏེ་འགལ་བ་མེད། །ཅེས་བྱ་བ་ལ། གོས་སྲབ་མོས་དཀྲིས་པ་ཉིད་ལ་ནི་རྩ་བར་འགྱུར་ཏེ་ཞེས་བྱ་བ་དང་འདི་ལ་འགལ་བ་མེད་ཅེས་བྱ་བ་ནི་སྔར་བཤད་པའི་ཉེས་པ་ཡིན་ནོ། །ནིའི་སྒྲ་ནི་གོང་མ་ལས་ཁྱད་པར་དུ་བྱེད་པ་ཡིན་ཏེ། གང་གི་ཕྱིར་སྔ་མ་ལ་ནི་རེག་པའི་བདེ་བ་ཉམས་སུ་མྱོང་བ་མེད་ལ་འདི་ལ་ནི་ཡོད་པའི་ཡང་ཕྱིར་རོ་ཞེས་བྱ་བའི་ཐ་ཚིག་གོ །ད་ནི་གནས་སྐབས་འདི་ལ་ཉེས་པ་འདིར་འགྱུར་རོ་ཞེས་བསྟན་པའི་ཕྱིར་སེམས་སྐྱེད་ཡིད་ཀྱིར་འགྱུར་ཏེ་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཚུལ་མ་ཡིན་པའི་ཡིད་ལ་བྱེད་པ་དང་མཚུངས་པར་ལྡན་པ་ངེས་པའི་མཚན་ཉིད་ཅན་གྱི་འདི་དང་འདི་བྱའོ་ཞེས་སྐྱེད་པ་དེ་ནི་དང་པོར་སྐྱེད་པ་ཡིན་ཏེ་སྦྱོར་བར་འགྱུར་རོ། །ཡིད་ལ་བྱེད་པའི་བློ་དེ་ཡང་བསྡམ་པར་བྱ་བའི་ཁ་ན་མ་ཐོ་བ་ཡིན་གྱི་བཤགས་པར་བྱ་བ་ནི་མ་ཡིན་ནོ་ཞེས་བྱ་བའི་དོན་ཏོ། །གང་ཚུན་ཆད་དུ་ཞེ་ན། སོ་ལ་སོགས་པ་རེག་པར་འགྱུར་བར་དུ། །ཞེས་བྱ་བ་སྨོས་ཏེ། སོ་དང་པོར་བྱས་པའི་གཞན་གང་ཡིན་པ་དེ་ནི་སོ་ལ་སོགས་པའོ། །སོགས་པའི་སྒྲས་བཤང་བའི་ལམ་དང༌། ཟག་བྱེད་ཀྱི་ལམ་བསྡུ་བ་ཡིན་ཏེ།
དེ་ལ་ཀུན་ནས་རེག་པས་ན་རེག་པ་སྟེ་དེའི་བར་དུ་ཞེས་བྱ་བའི་ཐ་ཚིག་གོ །སོ་ལ་སོགས་པའི་མཚམས་འདས་རྩ་བར་འགྱུར། །ཞེས་བྱ་བ་ལ་སོགས་པའི་མཚམས་ནི་ཁ་ལ་སོགས་པའི་མཚམས་ཏེ་ཚིག་ཡིན་པ་དེ་བས་ན། སོ་ལ་སོགས་པའི་མཚམས་འདས་ཤིང་ཁར་བཅུག་ན་རྩ་བར་འགྱུར་རོ་ཞེས་བྱ་བའི་ཐ་ཚིག་གོ །དུའི་སྒྲ་ནི་ཁྱད་པར་དུ་བྱེད་པ་དང་གོང་མ་ལས་རིམ་པ་གཞན་གྱི་དོན་ཡིན་ནོ། །ནིའི་སྒྲ་ནི་གང་གི་ཕྱིར་གྱི་དོན་ཏེ་གང་གི་ཕྱིར་སོ་ལ་སོགས་པ་ནི་ཁ་ལ་སོགས་པའི་དང་པོ་ཡིན་པ་དེའི་ཕྱིར་དེ་ལས་ཤིན་ཏུ་འདས་པར་གྱུར་ན་རྩ་བར་འགྱུར་རོ་ཞེས་བྱ་བའི་ཐ་ཚིག་གོ །འདི་སྐད་དུ་དགེ་ཚུལ་འདོད་པའི་འདོད་ཆགས་ལ་ཡོངས་སུ་གནས་པས་འདི་དང་འདི་བྱའོ་ཞེས་སྐྱེད་པར་བྱེད་པ་དེ་ལ་དང་པོར་སོ་ལ་སོགས་པ་ལ་རེག་པ་ལས་ཉེས་བྱས་སུ་འགྱུར་ལ། ཕར་འདས་པ་ལས་ནི་རྩ་བར་འགྱུར་རོ་ཞེས་བསྟན་པར་འགྱུར་རོ། །ཇི་ལྟར་སྲོག་གཅོད་པ་ལ་སོགས་པ་འདུ་ཤེས་གཙོ་ཆེར་བྱེད་པ་ཉིད་ཡིན་པ་དེ་བཞིན་དུ་ཅི་འདི་ལ་ཡིན་ནམ་ཞེ་ན། འཁྲིག་པ་ལ་ནི་འདུ་ཤེས་གཙོ་བོ་མེད། །ཅེས་བྱ་བ་སྨོས་ཏེ། བསླབ་པའི་གཞི་གང་ལ་འདུ་ཤེས་གཙོ་བོ་སྟེ་གཙོ་ཆེར་བྱེད་པ་དེ་ནི་འདུ་ཤེས་གཙོ་བོའོ། །དེའི་དངོས་པོ་ནི་འདུ་ཤེས་གཙོ་བོ་ཉིད་དོ། །འཁྲིག་པ་སྟེ་འཁྲིག་པའི་བསླབ་པའི་གཞི་ལ་གང་ལ་དེ་ཡོད་པ་མ་ཡིན་ནོ། །བཤད་མ་ཐག་པའི་ལམ་གསུམ་པོ་ལ་ལམ་དུ་འདུ་ཤེས་པས་ལམ་གང་ཡང་རུང་བར་བཅུག་ན་མཐའི་ཉེས་པར་འགྱུར་ལ། དེ་བཞིན་དུ་གཞན་དུ་ཤེས་པས་བུད་མེད་གཞན་དང་ལྷན་ཅིག་གམ་ལམ་ལ་ལམ་མ་ཡིན་པར་འདུ་ཤེས་པས་རྩ་བར་འགྱུར་ལ། ལམ་མ་ཡིན་པ་ལ་ལམ་དུ་འདུ་ཤེས་པས་རུང་བར་འགྱུར་རོ་ཞེས་ཁོང་དུ་ཆུད་པར་བྱའོ། །དེ་ནི་ཡིད་ཀྱི་ཉེས་པར་འགྱུར་བ་མི་ཚང་སྤྱོད་དང་ཞེས་བྱ་བ་ལ་སོགས་པས་འཆད་པར་བྱེད་དེ། མི་ཚངས་པར་སྤྱོད་པ་དང་འདྲ་བ་ནི་ཆ་འདྲ་བ་སྟེ། མི་ཚངས་པར་སྤྱོད་པའི་ཆའི་རྗེས་སུ་བྱེད་པ་ཞེས་བྱ་བའི་དོན་ཏེ། དེའི་ཚུལ་ནི་རང་བཞིན་ཏེ། དེ་ནི་མི་ཚངས་པར་སྤྱོད་པའི་ཚུལ་དང་འདྲ་བར་གསུངས་པ་ཡིན་ནོ། །དེ་གང་ཞེ་ན། ཇི་ལྟར་ཆེད་དུ་བྱ་བ་ཕྱུང་བ་དང་ཞེས་བྱ་བ་ལ་སོགས་པ་སྨོས་ཏེ། ཆེད་དུ་སྟེ་བློ་སྔོན་དུ་སོང་བས་བདག་ཉིད་ཀྱི་ཁུ་བ་ཕྱུང་ནའོ། །ཇི་ལྟར་ཞེས་བྱ་བའི་སྒྲ་ནི་ཡིད་ཀྱི་འགྱུར་བ་བདག་ཉེ་བར་སྟོན་པའི་དོན་ཏོ། །ཆེད་དུ་ཞེས་བྱ་བ་སྨོས་པ་ནི་རྨི་ལམ་ལ་སོགས་པའི་གནས་སྐབས་ལ་ཉེས་པ་མེད་པར་བསྟན་པའི་ཕྱིར་རོ། །
ཆགས་པས་འཁྱུད་པར་བྱེད་དང་སྟེག་པས་ཞེས་བྱ་བ་ལ་ཆགས་པའི་སྒོ་ནས་བུད་མེད་ལ་འཁྱུད་པར་བྱེད་པ་སྟེ། །ཡོངས་སུ་འཁྱུད་པས་ཡིད་ཀྱི་ཉེས་པར་འགྱུར་རོ་ཞེས་བཤད་པར་འགྱུར་ཏེ་ཐམས་ཅད་ལ་སྦྱར་བར་བྱའོ། །དེ་བཞིན་དུ་ཆགས་པའི་སྒོ་ནས་སྟེག་པ་ནི་ལུས་དང་ངག་གི་རྣམ་པར་འགྱུར་བའི་མཚན་ཉིད་ཅན་གྱི་གཡོ་འགུལ་ཡིན་ཏེ་དཔེར་ན་འཁྲིག་པའི་རྒྱུ་མཚན་ཉེ་བར་སྟོན་པར་བྱེད་པ་དག་ལྟ་བུའོ། །དེ་བཞིན་དུ་འཁྲིག་པའི་ཚིག་རྣམས་སྨྲ་བར་བྱེད་པ་སྟེ། བུད་མེད་ཀྱི་མདུན་དུ་འགའ་ཞིག་འདི་ལྟར་གཉིས་ཀྱིས་གཉིས་སྙོམས་པར་འཇུག་པའི་མཚན་ཉིད་ཅན་གྱི་འཁྲིག་པའི་ཚིག་སྒྲ་དག་སྨྲ་བར་བྱེད་པ་ནི་སྨྲ་བ་སྟེ། དཔེར་ན་རྒྱ་རྣ་རུ་ལ་སོགས་པའི་སྒྲ་ཡིན་ཏེ། དེ་དག་སྨྲ་བར་བྱེད་ཅེས་བྱ་བའི་དོན་ཡིན་ནོ། །དེ་བཞིན་དུ། ཟས་བཅས་ཁྱིམ་དུ་རྒོད་པས་ལྟད་མོའི་ཕྱིར། །ཞེས་བྱ་བ་ལ། རྒོད་པས་ཏེ་བརྟག་པས་ལྟ་ཞིང་རྟོག་པ་ཡིན་པས་ན་རྒོད་པས་ལྟ་བའོ། །དེའི་དངོས་པོ་ནི་རྒོད་པས་ལྟད་མོ་ཉིད་ཀྱི་ཕྱིར་འདུག་པར་གྱུར་བ་ཉིད་དོ། །གང་དུ་ཞེ་ན། ཟས་བཅས་ཁྱིམ་དུ་ཞེས་བྱ་བ་སྨོས་ཏེ། བཟའ་བར་བྱ་བ་ཡིན་པས་ན་ཟས་ཏེ། སྐྱེས་པ་དང་བུད་མེད་ཀྱི་ཡིན་ཏེ་གང་གི་ཕྱིར་བུད་མེད་སྐྱེས་པས་ལོངས་སྤྱོད་པར་བྱ་བ་ཡིན་ལ། སྐྱེས་པ་ཡང་བུད་མེད་ཀྱིས་ལོངས་སྤྱད་པར་བྱ་བ་ཡིན་ནོ་ཞེས་བྱ་བའི་དབང་དུ་བྱས་ནས་སོ། །སྐྱེས་པ་ལོངས་སྤྱད་པར་བྱ་བ་བུད་མེད་ཀྱི་ཡུལ་དང་བཅས་པས་འཇུག་པའི་ཕྱིར་ཟས་བཅས་ཏེ་ཁྱེར་བ་དེར་རོ། །གང་དུ་སྐྱེས་པ་དང་བུད་མེད་གཉིས་གཉིས་ཀྱིས་སྙོམས་པར་འཇུག་པར་འགྱུར་བ་དེར་རོ་ཞེས་བྱ་བའི་དོན་ཏོ། །ཡང་ན་སྨྱན་བྱེད་དང་ཞེས་བྱ་བ་ལ། སྨྱན་གྱི་ཆོས་དག་ནི་སྨྱན་བྱེད་པ་ཡིན་ཏེ། དཔེར་ན་སྐྱེས་པ་འཁྲིག་པའི་བསམ་པ་ཅན་གྱི་ཚིག་བླངས་ནས་བུད་མེད་ལའམ། བུད་མེད་ཀྱི་ཚིག་བླངས་ནས་སྐྱེས་པ་ལ་སྨྲ་བར་བྱེད་ཅིང་གཉི་ག་དག་ལ་ཡང་ཕྲིན་ལན་གོ་བར་བྱས་པ་དེས་ཕྲད་པར་གྱུར་ན་ཡིད་ཀྱི་ཁ་ན་མ་ཐོ་བར་འགྱུར་རོ་ཞེས་བྱ་བའི་ཐ་ཚིག་གོ །དེ་བཞིན་དུ་དུས་མ་ཡིན་པར་གྲོང་དུ་འཕྱན་པ་དང་ཞེས་བྱ་བ་ལ། དུས་མ་ཡིན་པ་སྟེ་ཉི་མ་གུང་ལ་དུས་གཞན་དུ་འཕྱན་པ་ནི་དུས་མ་ཡིན་པར་འཕྱན་ཞིང་འགྲོ་བའོ། །གང་དུ་ཞེ་ན། གྲོང་དུ་ཞེས་བྱ་བ་སྨོས་ཏེ། གྲོང་སྟེ་ཁྱིམ་གྱི་ནང་དུ་བསྟན་པ་འདི་ལ་རབ་ཏུ་བྱུང་བ་གཞན་ལམ་བསྒོ་བར་ཞེས་བྱ་བ་ནི་ཚིག་གི་ལྷག་མའོ། །དེ་ལ་བསྒོ་བ་ནི་གྲོང་ངམ་ཁྱིམ་ནང་དུ་མཆིའོ་ཞེས་བྱ་བ་ཡིན་པར་ཁོང་དུ་ཆུད་
པར་བྱའོ། །དེ་བཞིན་དུ། མིག་ཟུར་རྒོད་དང་ཟུར་སྟེག་བྱེད་པ་དང༌། །ཞེས་བྱ་བ་དེ་ལ། ཟུར་མིག་ནི་མིག་ཟུར་གྱིས་ལྟ་བར་བྱེད་པ་ཡིན་ལ། རྒོད་པ་ནི་ཆགས་པས་ལུས་སེམས་རྣམ་པར་གཡོ་བ་ཡིན་ནོ། །སྟེག་པ་ནི་དེ་ཉིད་ཀྱིས་སེམས་དང་ངག་གི་རྣམ་པར་འགྱུར་བའོ། །གོང་དུ་ཆགས་པ་ལ་སོགས་པའི་རྣམ་པས་ཞེས་འགྲིག་པའི་རྒྱུ་མཚན་བསྟན་པ་གང་ཡིན་པ་དེ་ནི་འདིར་ཡང་རྒྱུ་མཚན་དུ་གྱུར་པ་ནི་མ་ཡིན་མོད་ཀྱི། ཆགས་པ་ཐ་མལ་པས་བསླད་པར་གྱུར་པ་དེས་ལུས་ངག་གཡོ་བར་བྱེད་ཅེས་བྱ་བ་ནི་ལྷག་མའོ། །བཤད་མ་ཐག་པའི་དེ་དག་ཐམས་ཅད་ནི་ཡིད་ཀྱིར་འགྱུར་རོ་ཞེས་བྱ་བར་རིག་པར་བྱའོ། །གོང་དུ་ཉེས་པ་གསལ་པོ་བྱས་པ་ཉིད་དང༌། དགག་པ་ཉེ་བར་བསྟན་པ་དང༌། ཅིག་ཅར་བསྟན་པའི་སྒོ་ནས་ཉེས་པར་འགྱུར་བ་བཤད་པ་ཡིན་ལ། ད་ནི། ཡང་དང་ཡང་དུ་བུད་མེད་ངོར་མི་ལྟ། །ཞེས་བྱ་བ་ལ་སོགས་པས་བྱ་བ་འགོག་པའི་སྒོ་ནས་ཉེས་པར་འགྱུར་བ་སྟོན་ཏེ། ཡང་དང་ཡང་སྟེ་ཕྱི་ཕྱིར་བུད་མེད་ཀྱི་ངོ་གདོང་ལ་དགེ་ཚུལ་གྱིས་མི་བརྟག་གོ་ཞེས་བྱ་བའི་ཐ་ཚིག་གོ །ཡང་དང་ཡང་དུ་ཞེས་སྨོས་པ་ནི་དགོས་པའི་དབང་གིས་བུད་མེད་ཀྱི་ཡུལ་ལ་ལྷག་པར་ལྟ་བར་བྱེད་པ་ན་ལན་ཅིག་ལྟ་བ་ལ་ཉེས་པ་མེད་དོ་ཞེས་བསྟན་པའི་ཕྱིར་ཏེ། དེ་ལ་ཡང་འདོད་ཆགས་མེད་པའི་སེམས་ཀྱིས་ཞེས་བྱ་བར་རིག་པར་བྱའོ། །དེ་ལྟར་ཡང་བཙུན་པ་བཅོམ་ལྡན་འདས་ཉིད་ཡོངས་སུ་མྱ་ངན་ལས་འདས་ནས་བདག་གིས་བུད་མེད་ཀྱི་ཡུལ་ལ་ཇི་ལྟར་བསྒྲུབ་པར་བགྱི། ཀུན་དགའ་བོ་མི་ལྟ་བས་སོ་ཞེས་འབྱུང་བ་ཡིན་ཏེ། ཡང་དང་ཡང་བལྟས་པ་ལས་རྒྱུ་མཚན་འཛིན་པར་འགྱུར་ལ་དེ་ལས་ཆགས་པ་ཡོངས་སུ་བསྟེན་པར་འགྱུར་རོ། །དེ་ལས་ལོག་པར་བསྒྲུབ་པའི་ཕྱིར་བུད་མེད་ཀྱི་ཡུལ་ལ་ལྟ་བ་ནི་རབ་ཏུ་འབྱུང་བའི་བར་དུ་གཅོད་པ་ཡིན་ནོ། །ངོར་ཞེས་སྨོས་པ་ནི་ཤས་ཆེར་གདོང་ནི་ཆགས་པ་གསལ་པོར་བྱེད་པ་ཡིན་གྱི། དེ་མཐོང་བ་ན་ཆགས་པ་འཇུག་པར་འགྱུར་བའི་ཕྱིར་ཡན་ལག་གཞན་མཐོང་བ་ལ་ནི་ཉེས་པ་མེད་དོ་ཞེས་བསྟན་པའི་ཕྱིར་ནི་མ་ཡིན་ཏེ། དེ་ལ་ཡང་ཉེས་དམིགས་མཚུངས་པ་ཉིད་ཀྱི་ཕྱིར་རོ། །རེག་པའི་དུག་ལ་ནམ་ཡང་རེག་མི་བྱ། །ཞེས་བྱ་བ་ནི་རེག་པ་གང་ཁོ་ན་དུག་ཡིན་པ་དེ་ནི་རེག་པའི་དུག་ཡིན་ཏེ། བུད་མེད་དེ་ལ་དགེ་ཚུལ་སེམས་དག་པའམ་མ་དག་པས་ཀྱང་རེག་པར་མི་བྱ་སྟེ། གང་གི་ཕྱིར་བུད་མེད་ཀྱི་ཡུལ་ལ་རེག་པའམ་བུད་མེད་ཀྱི་ཡུལ་གྱིས་རེག་པ་
ན་ཆགས་པ་དང་རྗེས་སུ་མཐུན་པ་ཡིན་ལ་དེ་ལས་ཀྱང་ཡོངས་སུ་བསྟེན་པར་འགྱུར་རོ་ཞེས་བྱ་བ་ལ་སོགས་པ་སྔ་མ་བཞིན་ནོ། །དེ་ཉིད་ཀྱི་ཕྱིར་འདི་སྐད་དུ་བཅོམ་ལྡན་འདས་ཀྱིས་བུད་མེད་ཀྱི་ཡུལ་ནི་རེག་པའི་དུག་ཡིན་ནོ་ཞེས་གསུངས་ཏེ། ཇི་ལྟར་རེག་པའི་དུག་ལ་རེག་ན་སྲོག་དང་བྲལ་བར་འགྱུར་བ་དེ་བཞིན་དུ་བུད་མེད་ཀྱི་ཡུལ་ལ་སྔར་བཤད་པའི་རིམ་པའི་ཚུལ་གྱིས་རེག་པར་བྱེད་ན་སྡོམ་པའི་བར་དུ་གཅོད་པར་འགྱུར་རོ། །དང་ནི་བུད་མེད་ཀྱི་ངོར་བལྟ་བར་མི་བྱ་རེག་པར་ཡང་མི་བྱའོ་ཞེས་སྡུད་པར་བྱེད་པ་ཡིན་ནོ། །ཆུད་ཟོས་པ་རྗེས་སུ་གཟུང་བའི་ཕྱིར་རེག་པ་ལ་ཉེས་པ་མེད་པར་བསྟན་པའི་ཕྱིར་རོ། །ཇི་སྟེ་ཆུ་དང་མེས་འཆི་དེ་ཡི་ཚེ། །ཞེས་བྱ་བ་ལ་སོགས་པ་སྨོས་ཏེ། ཆུ་དང་མེ་ནི་ཆུ་དང་མེ་ཡིན། དེ་བས་ན་མེ་དང་ཆུ་དེས་ཇི་སྟེ་བུད་མེད་འཆི་བ་དེའི་ཚེ་ནི་དགེ་ཚུལ་གྱིས་རེག་པར་བྱའོ། །ཅི་ཞིག་བྱས་ནས་ཤེ་ན་སའི་འདུ་ཤེས་གཞག་སྟེ་ཞེས་བྱ་བ་སྨོས་ཏེ། ཆུ་འམ་མེས་འཆི་བར་གྱུར་པ་དེ་ནི། འདི་ནི་ས་ཡིན་ཏེ་ས་དང་མཚུངས་པ་འདི་ལ་ཆགས་པ་སྐྱེད་པ་མི་རིགས་སོ་སྙམ་པའི་འདུ་ཤེས་བཞག་ལ་སྙིང་རྗེའི་དབང་གིས་ལག་པའམ་སྐྲ་ལ་བཟུང་ནས་ཆུ་དང་མ་ལས་དྲང་བར་བྱའོ་ཞེས་བྱ་བའི་ཐ་ཚིག་གོ །ནིའི་སྒྲ་ནི་སྔ་མ་ལས་ཀྱང་ཁྱད་པར་དུ་བྱ་བའི་དོན་ཏོ། །ཇི་སྟེ་བུད་མེད་སྡོམ་ཅན་མཐོང་ཆགས་འགྱུར། །དེ་ལ་སྡོམ་ཅན་དེ་ནི་རིང་མི་གནས། །ཞེས་བྱ་བ་ལས་ཕྱོགས་གང་དུ་གནས་ན་སྡོམ་ཅན་མཐོང་ནས་བུད་མེད་ཆགས་པར་འགྱུར་བ་དེར་རམ། བུད་མེད་མཐོང་ནས་དགེ་ཚུལ་ཆགས་པར་འགྱུར་བ་དེར་ཡུན་རིང་པོ་དུས་རིང་པོར་གནས་པར་མི་བྱའོ། །ཉེས་དམིགས་ཡོངས་སུ་སྤང་བའི་ཕྱིར་དེ་དག་ནི་འགྲོ་བ་ཉེ་བར་མཚོན་པར་བྱེད་པ་ཡིན་ནོ། །རྡོ་ལ་སོགས་པས་ཡན་ལག་བརྡུང་མི་བྱ། །ཞེས་བྱ་བ་ལ་ཆགས་པའི་མེས་གདུངས་པར་གྱུར་པའི་དགེ་ཚུལ་གྱིས་ཡན་ལག་སྦུ་བུ་སྟེ། སྐྱེས་པའི་དབང་པོ་རྡོ་ལ་སོགས་པས་བརྡུང་བར་མི་བྱ་ཞིང་བརྡེག་པར་མི་བྱའོ་ཞེས་བྱ་བའི་ཐ་ཚིག་གོ །སོགས་པའི་སྒྲས་ནི་ཐོ་བ་ལ་སོགས་པ་ཡོངས་སུ་བསྡུའོ། །འོ་ན་འདོད་ཆགས་ཀྱི་མེ་ཇི་ལྟར་ཞི་བར་བྱ་ཞེ་ན། འདོད་ཆགས་མེ་ནི་མི་སྡུག་ཆུས་ཞི་བྱེད། །ཅེས་བྱ་བ་སྨོས་ཏེ། འདོད་ཆགས་ཁོ་ན་མེ་ཡིན་པས་ན་འདོད་ཆགས་མེ་སྟེ། ཡོངས་སུ་སྲེག་པར་བྱེད་པ་ཉིད་ཀྱི་ཕྱིར་རོ། །མི་སྡུག་ཆུས་ཞི་བྱེད་ཅེས་བྱ་བ་དེ་ལ་མི་སྡུག་པ་ཁོ་ན་ཆུ་ཡིན་པ་དེ་བས་ན་མི་སྡུག་ཆུས་སོ། །མི་སྡུག་པ་ཞེས་བྱ་བ་ནི་མི་གཙང་བའི་
སྒོམ་པ་སྟེ་དེ་ལྟ་བུར་གྱུར་པའི་ཆུས་འདོད་ཆགས་ཀྱི་མེ་ཞི་བར་འགྱུར་གྱི་གཞན་གྱིས་ནི་མ་ཡིན་ནོ། །ཉིད་ནི་ངེས་ངེས་པར་གཟུང་བའོ། །བུད་མེད་གྱེན་དུ་གདོང་བལྟས་འཐུང་བ་ལ། །རང་གི་རྒྱུན་མི་འཆད་པར་ཆུ་མི་བླུད། །ཅེས་བྱ་བ་ལ་བར་མི་འཆད་པའི་རྒྱུན་ཆུ་གང་ལ་ཡོད་པ་དེ་ནི་རྒྱུན་མི་འཆད་པའི་ཆུ་སྟེ། དེ་ནི་གྱེན་དུ་གདོང་བལྟས་ནས་འཐུང་བ་ལ་བླུད་པར་མི་བྱའོ། །སུ་ལ་ཞེ་ན་བུད་མེད་ལ་ཞེས་སྨོས་པ་ཡིན་ནོ། །རང་གི་སྒྲ་ནི་གཞན་གྱིས་སྦྱོར་བ་ལ་ཉེས་པ་མེད་དོ་ཞེས་བསྟན་པར་བྱ་བའི་ཕྱིར་རོ། །གང་གི་ཕྱིར་རྒྱུན་མི་འཆད་པར་བཏུང་བར་བྱ་བ་བྱིན་པ་ལས་བུད་མེད་ཀྱི་ཡུལ་གྱེན་དུ་གདོང་ལྟ་བས་འཐུང་བ་ན་མིག་དང་མིག་གི་གཟུགས་ཕྲད་པར་འགྱུར་ལ། དེ་ལས་རྒྱུ་མཚན་འཛིན་པ་ལ་སོགས་པ་སྔ་མ་དང་འདྲ་བ་དེའི་ཕྱིར་རང་གི་སྙིམ་པ་བཀང་བས་ཆུ་སྦྱིན་པར་བྱའི་རྒྱུན་མི་འཆད་པས་ནི་མ་ཡིན་ནོ་ཞེས་བྱ་བའི་ཐ་ཚིག་གོ །ཁུར་བ་བྱིན་ལྟར་འགྱུར་བས་ཟས་ལ་སོགས། །རང་གི་ལག་གིས་མི་སྦྱིན་གོས་མེད་ལ། ཞེས་བྱ་བ་ལ། གོས་མེད་ནི་ནམ་མཁའི་གོས་ཅན་ཏེ། དེ་དག་ལ་ཟས་ལ་སོགས་པ་རང་གི་ལག་གིས་ཏེ་བདག་ཉིད་ཀྱི་ལག་པ་ནས་སྦྱིན་པར་མི་བྱའོ་ཞེས་བྱ་བའི་དོན་ཏོ། །གཞན་ཡང་བདག་ཉིད་ཀྱི་མངོན་སུམ་དུ་སྦྱིན་དུ་མི་གཞུག་གོ །ཅིའི་ཕྱིར་ཞེ་ན། ཁུར་བ་བྱིན་ལྟར་འགྱུར་བས་ཞེས་བྱ་བ་སྨོས་ཏེ། ཁུར་པ་དག་སྦྱིན་པ་ནི་ཁུར་བ་བྱིན་པ་བཞིན་ཏེ། ཁུར་བ་བྱིན་པ་ལྟར་མ་གྱུར་ཅིག་པའོ། །འདི་སྐད་དུ་བསྟན་པར་འགྱུར་ཏེ། ཇི་ལྟར་འཕགས་པ་ཀུན་དགའ་བོས་ཁུར་བ་བྱིན་པ་ན་སྐུར་བ་བཏབ་པའི་ཉེས་པ་ལྟར་འདིར་མ་གྱུར་ཅིག་ཅེས་བྱ་བའི་ཐ་ཚིག་གོ །དེ་ལྟར་ནི་འདུལ་བ་ལས་འཕགས་པ་ཀུན་དགའ་བོས་ཁུར་བ་བླངས་ནས་དགེ་འདུན་ཟས་ཀྱི་ཕྱིར་འཁོད་པ་ལ་འབྲིམ་པའི་ཚེ། གཅེར་བུ་མ་སློང་མོ་མདུན་དུ་གཉེར་བ་དག་ལ་ཁུར་བ་བྱིན་པ་ན་དེ་ལ་གཅིག་ནི་གཞོན་ལ་གཉིས་པ་ནི་རྒན་པས་དེར་བྱ་རོག་དང་ཏ་ལའི་ཚུལ་དུ་གཞོན་ནུ་མའི་ལག་པར་ཁུར་བ་གཉིས་བྱིན་ལ་རྒན་མོའི་ལག་པར་གཅིག་བྱིན་པས་རྒན་མོ་དེས་གཞོན་ནུ་མལ། ཀུན་དགའ་བོ་ཁྱོད་དོན་དུ་གཉེར་བར་བྱེད་དོ་ཞེས་སྨྲས་སོ་ཞེས་འབྱུང་བ་ཡིན་ནོ། །བུད་མེད་ཀྱི་ཡུལ་ལ་ཇི་ལྟར་ཆོས་བཤད་པར་བྱ་ཞེ་ན། གདོང་དུ་འབྲུ་ཚུགས་སུ་ནི་ལྟ་བ་དང༌། །ཆགས་མེད་མིག་གིས་བུད་མེད་ཆོས་ཤོད་ཅིག །ཅེས་བྱ་བ་ལ་སོགས་པ་སྨོས་ཏེ། བུད་མེད་ལ་དགེ་ཚུལ་གྱིས་བཤད་ཅིང་བསྟན་པར་བྱའོ། །
བཤད་པ་དེ་ཁྱད་པར་ཇི་ལྟ་བུ་ཞེ་ན། སྨྲས་པ་བུད་མེད་ཀྱི་ཡུལ་ལ་མིག་ཆགས་པ་མེད་ཅིང་ཐོགས་པ་མེད་པའི་ཕྱིར་ཆགས་མེད་མིག་སྟེ། དེས་བཤད་པར་བྱའི་གཞན་དུ་མ་ཡིན་ནོ། །གདོང་དུ་འབྲུ་ཚུགས་སུ་ནི་ལྟ་བ་དང༌། །ཞེས་བྱ་བ་ལ་འབྲུ་ཚུགས་ཀྱང་དེ་ཡིན་ལ་ལྟ་བ་ཡང་ཡིན་པས་ན་འབྲུ་ཚུགས་སུ་ལྟ་བ་དེ་བས་ན་དེས་བུད་མེད་ཀྱི་ཡུལ་གྱི་གདོང་ལ་བལྟ་བས་ཆོས་བཤད་པར་མི་བྱའོ། །གལ་ཏེ་དེ་ལ་ཡང་ཆོས་སྟོན་པར་བྱེད་ན། དེར་རིག་པའི་སྐྱེས་པ་ཡོད་པ་འགྱུར་ན་སྔར་བཤད་པའི་ཚུལ་དུ་ཇི་སྲིད་འདོད་པར་བཤད་པར་བྱ་བ་འམ། ཡང་ན་ཚིག་ལྔའམ་དྲུག་དག་གི་ཆོས་བཤད་པར་བྱ་བ་ཡིན་ཏེ། དཔེར་ན་སངས་རྒྱས་རྗེས་སུ་དྲན་པ་དང༌། གཟུགས་ཀྱི་ཕུང་པོ་ནས་ཚོར་བའི་ཕུང་པོའི་བར་དུ་ཞེས་བྱ་བ་ཡིན་གྱི་གཞན་དུ་ན་ལོག་པར་སྦྱར་བའི་ཞི་བའི་ལས་ཀྱི་བདག་ཉིད་ཀྱིས་སྲོག་འཇོམས་པར་འགྱུར་བ་ལྟ་བུའོ། །དེ་བཞིན་དུ། ཉལ་དང་འདུག་དང་འགྲོ་སོགས་བུད་མེད་སྤང༌། །ཞེས་བྱ་བ་ལ། དགེ་ཚུལ་གྱིས་བུད་མེད་དང་ལྷན་ཅིག་གཅིག་དུ་ཆགས་པས་དབེན་པར་ཉལ་བ་དང་འདུག་པ་དང་ཡུལ་གཞན་དུ་འགྲོ་བ་སྤང་བར་བྱའོ། །སོགས་པའི་སྒྲས་ནི་བསོད་སྙོམས་ལ་འཇུག་པ་དང༌། གཞན་དབེན་པར་འདུག་པ་ཡང་སྤང་བར་བྱ་བ་ཡིན་ནོ། །དེ་ལ་འདིར་ཆོས་བསྟན་པ་ལ་སོགས་པ་ལ་ཉེས་པ་ཡོད་པ་མ་ཡིན་པ་ནི། ཇི་སྟེ་སྐྱེས་པ་ཡོད་ན་ཉེས་པ་མེད། །ཅེས་བྱ་བ་སྨོས་ཏེ་ཉལ་བ་ལས་གཞན་དུ་ཇི་སྐད་དུ་བཤད་པའི་རིག་པའི་སྐྱེས་པ་ལེགས་པར་བཤད་པ་ལ་སོགས་པ་ཡོངས་སུ་གོ་བ་དང་འཛིན་ནུས་པ་ཡོད་ནའོ། །ཉལ་བ་ལ་ནི་ཁྱོ་དང་བུ་དང་མིང་པོ་ལ་སོགས་པ་གང་ལས་འཇིགས་པ་དང་ངོ་ཚ་བར་འགྱུར་བ་གཟུང་བར་བྱའོ། །དགེ་ཚུལ་གྱི་ཚིག་ལེའུར་བྱས་པ་ལས་མི་ཚངས་པར་སྤྱོད་པ་ལས་སླར་ལྡོག་པའི་གཞི་གསུམ་པའོ།། །།ད་ནི། བླ་མ་དེ་བརྗོད་བློ་ཡིས་མི་ཆོས་ལས། བླ་མ་ཞེས་བྱ་བ་ལ་ཡོད་དོ་ཞེས། །ང་རྒྱལ་མ་གཏོགས་མི་ལ་བརྫུན་དུ་སྨྲས། །གཞན་གྱིས་གོ་བར་གྱུར་ན་བསྐྲད་པར་བྱ། །ཞེས་བྱ་བ་ལ་སོགས་པས་བཞི་པ་འཆད་པར་བྱེད་ལ། མིའི་ཆོས་ལས་བླ་མར་གྱུར་པ་བདག་ལ་ཡོད་ཅེས་གཞན་རིག་པའི་མི་ལ་དེ་བརྗོད་པའི་སེམས་ཀྱིས་བརྫུན་དུ་སྨྲས་ནས་གཞན་གྱིས་གོ་བར་གྱུར་ན་དངོས་གཞིའི་ཉེས་པར་འགྱུར་ཏེ། མངོན་པའི་ང་རྒྱལ་ནི་མ་གཏོགས་སོ་ཞེས་བྱ་བ་ནི་བསྡུས་པའི་དོན་ཡིན་ནོ། །ཡན་ལག་གི་དོན་བརྗོད་པར་བྱ་བ་ལ་མིའི་ཆོས་ནི་མི་ཆོས་ཏེ་དེ་ཡང་རྣམ་པ་
གཉིས་ཏེ། བླ་མར་གྱུར་པ་དང༌། བླ་མར་གྱུར་པ་མ་ཡིན་པའོ། །དེ་ལ་སྒྲིབ་པ་ལྔ་ལ་སོགས་པ་ནི་མི་ཆོས་བླ་མ་མ་ཡིན་པ་ཡིན་ཏེ། དམན་པ་ཉིད་ཡིན་པའི་ཕྱིར་རོ། །མིའི་ཆོས་ལས་བླ་མར་གྱུར་པ་བསམ་གཏན་ལ་སོགས་པ་ནི་བླ་མ་གྱུར་པ་ཉིད་ཡིན་ཏེ། སྒྲིབ་པ་ལྔ་ལ་སོགས་པ་ལ་ལྟོས་ན་ཁྱད་པར་དུ་འཕགས་པ་ཁོ་ན་ཡིན་པའི་ཕྱིར་རོ། །མི་ཆོས་ཉིད་ནི་མི་དག་གིས་ཐོབ་པར་བྱ་བ་ཉིད་ཡིན་པའི་ཕྱིར་རོ། །བླ་མ་ཞེས་བྱ་བ་ནི་བླ་མ་ཞེས་བྱ་བའི་མིང་གང་ལ་ཡོད་པ་ཞེས་བྱ་བའི་དབང་དུ་བྱས་ནས་གང་དེ་ལྟ་བུར་གྱུར་པའི་ཆོས་དེ་ནི་བླ་མ་ཞེས་བྱ་བ་ཡིན་ཏེ། དགེ་ཚུལ་གྱིས་སྨྲས་ན་དེ་བསྐྲད་པར་བྱ་ཞིང་བསྙིལ་བར་བྱ་སྟེ། འོག་ཏུ་ལྟུང་བ་ཉིད་ཀྱི་ཕྱིར་རོ་ཞེས་བྱ་བ་ནི་ཚིག་གི་ལྷག་མའོ། །དེ་ཉིད་ཅེས་བྱ་བ་ནི་ངེས་པར་བཟུང་བ་ཡིན་པར་བལྟ་བར་བྱའོ། །དེའི་ཕྱིར་གཞན་བརྗོད་པའི་བསམ་པས་གཞན་བརྗོད་ན་ཆུང་བར་འགྱུར་རོ། །སུ་ལ་སྨྲས་པས་ཤེ་ན། མི་ལ་ཞེས་བྱ་བ་སྨོས་ཏེ་མི་ཞེས་བྱ་བ་ནི་མིའི་རིགས་གཟུང་བ་ཡིན་ནོ། །ཇི་སྐད་སྨྲས་པས་ཤེ་ན། ང་ལ་ཡོད་ཅེས་བྱ་བ་སྨོས་པ་ཡིན་ནོ། །དེ་ནི་རྣམ་པ་གཞན་མཚོན་པར་བྱེད་པ་ཡིན་ཏེ་དཔེར་ན་ངས་ཐོབ་པོ་ངས་ཤེས་སོ་ཞེས་བྱ་བ་ལ་སོགས་པའི་ཚིག་ལྟ་བུའོ། །བསམ་པ་གང་གིས་ཤེ་ན། བླ་མ་དེ་བརྗོད་བློ་ཡིས་ཞེས་བྱ་བ་སྨོས་ཏེ། བླ་མའི་བརྗོད་པ་ནི་བླ་མ་བརྗོད་པ་སྟེ། །དེའི་བློ་དང་བསམ་པ་ནི་བླ་མ་བརྗོད་བློ་ཡིན་ཏེ། དེའི་ཕྱིར་དེས་སོ། །འདི་སྐད་དུ་མིའི་ཆོས་ལས་བླ་མར་གྱུར་པ་སྨྲ་བའི་བསམ་པས་ཞེས་བསྟན་པར་འགྱུར་རོ། །དེ་ལ་འགའ་ཞིག་ཏུ་མིའི་ཆོས་ལས་བླ་མར་གྱུར་པ་རྟོགས་པ་མེད་པར་སྔར་རྟོགས་པའི་བསམ་པས་བདག་གིས་མིའི་ཆོས་ལས་བླ་མར་གྱུར་པ་རྟོགས་སོ་ཞེས་བྱ་བ་དེ་ལྟ་བུ་གསལ་བར་བྱས་པའི་ཕྱིར། །ང་རྒྱལ་མ་གཏོགས་ཞེས་བྱ་བ་སྨོས་པ་ཡིན་ཏེ་མངོན་པའི་ང་རྒྱལ་དག་མེད་པར་ཞེས་བྱ་བའི་ཐ་ཚིག་གོ །མངོན་པའི་ང་རྒྱལ་ནི་ཉེས་པ་མེད་དོ། བརྫུན་ཞེས་བྱ་བ་ནི་འདུ་ཤེས་མེད་པའི་ཕྱིར་རོ། །གང་གི་ཚེ་བསྐྲད་པར་བྱ་བ་ཡིན་ཞེ་ན། གཞན་གྱིས་གོ་བར་གྱུར་པ་ནི་གཞན་གྱིས་རྟོགས་པར་གྱུར་པ་ནའོ། །གཞན་ཞེས་བྱ་བ་ནི་བཤད་མ་ཐག་པའི་མིའི་རྒྱུད་ཡུལ་ཉིད་དུ་གང་མཚོན་པར་བྱ་བ་འམ། གཞན་གྱིས་དེ་རྟོགས་པར་འགྱུར་ན་ཞེས་བྱ་བའི་ཐ་ཚིག་གོ །གཞན་ལ་བརྗོད་པའི་བསམ་པས་མི་གཞན་ལ་སྨྲས་པ་ན་ཆུང་བར་
འགྱུར་ཞིང་བཟློག་པ་དང༌། དེ་བཞིན་དུ་ཡིད་གཉིས་ཀྱང་ཆུང་བར་འགྱུར་རོ། །གོ་བར་གྱུར་ན་ཞེས་སྨོས་པ་ནི་གཉིད་ལོག་པ་དང༌། ར་རོ་བ་དང༌། སེམས་འཁྲུགས་པ་དང༌། སྐད་མི་གོ་བ་ཡོངས་སུ་སྤང་བའི་ཕྱིར་རོ། །ནིའི་སྒྲ་ནི་གང་གི་ཕྱིར་གྱི་དོན་ཡིན་ཏེ། གང་གི་ཕྱིར་གཞན་གྱིས་གོ་བར་གྱུར་ན་སྡོམ་པ་འཇིག་པར་འགྱུར་བ་དེའི་ཕྱིར་བསྐྲད་པར་བྱ་བ་ཡིན་ཏེ། གོང་དུ་བསྟན་པ་ལས་བཟློག་པ་ནི་ཐམས་ཅད་དུ་ཉེས་པ་ཆུང་བར་འགྱུར་རོ་ཞེས་ཤུགས་ཀྱིས་བརྗོད་པར་འགྱུར་རོ། །མིའི་ཆོས་ལས་བླ་མར་གྱུར་པ་དེ་ཡང་གང་ཡིན་ཞེ་ན། བསམ་གཏན་སོགས་དང་མངོན་ཤེས་འབྲས་བུར་བཅས། །ཞེས་བྱ་བ་ལ་སོགས་པ་སྨོས་ཏེ། བསམ་གཏན་དང་པོར་བྱས་པ་གང་ཡིན་པ་དེ་ནི་བསམ་གཏན་ལ་སོགས་པའོ། །སོགས་པའི་སྒྲས་ནི་གཟུགས་མེད་པའི་སྙོམས་པར་འཇུག་པ་གཟུང་ཞིང་གཞན་ཡང་དེ་ལྟ་བུར་གྱུར་པ་སྐྱེ་མཆེད་ཀྱི་མཚན་ཉིད་ཅན་བྱམས་པ་ལ་སོགས་པའི་ཏིང་ངེ་འཛིན་བསྡུའོ། །བསམ་གཏན་ནི་གཟུགས་ན་སྤྱོད་པའི་སེམས་ཀྱི་བྱེ་བྲག་ཡིན་ལ། གཟུགས་མེད་པའི་སྙོམས་པར་འཇུག་པ་ནི་གཟུགས་མེད་པའི་སྙོམས་པར་འཇུག་པའི་སེམས་ཀྱི་བྱེ་བྲག་ཡིན་ནོ། །མངོན་པར་ཤེས་པ་ནི་མངོན་པར་ཤེས་པ་ལྔ་འམ། མངོན་པར་ཤེས་པ་དྲུག་དག་ཡིན་ནོ། །དེ་ལ་མངོན་པར་ཤེས་པ་ལྔ་ནི་ལྷའི་མིག་དང༌། རྣ་བ་དང༌། སྔོན་གྱི་གནས་རྗེས་སུ་དྲན་པ་དང༌། གཞན་གྱི་སེམས་ཤེས་པ་དང༌། རྫུ་འཕྲུལ་གྱི་རྐང་པའོ། །ཟག་པ་ཟད་པ་ཤེས་པའི་མངོན་པར་ཤེས་པས་བསྲེས་པ་དག་ནི་དྲུག་པར་འགྱུར་རོ། །འབྲས་བུ་ནི་བཞི་སྟེ། རྒྱུན་དུ་ཞུགས་པའི་འབྲས་བུ་དང༌། ལན་ཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བ་དང༌། དགྲ་བཅོམ་པའི་འབྲས་བུའོ། །འབྲས་བུ་དང་བཅས་པར་འཇུག་པས་ན་འབྲས་བུར་བཅས་པའོ། །ཡོན་ཏན་ནི་ཡོན་ཏན་དུ་བྱེད་གོམས་པར་བྱེད་པས་ན་ཡོན་ཏན་ཏེ། དྲན་པ་ཉེ་བར་གཞག་པ་བཞི་ནས་བརྩམས་ནས་འཕགས་པའི་ལམ་ཡན་ལག་བརྒྱད་ཅེས་བྱ་བའི་བར་དུ་སྟེ། དེ་དག་ནི་འབྲས་བུར་བཅས་པའི་ཡོན་ཏན་དག་ཡིན་ནོ། །བསླབ་པའི་ཚིག་འདིར་མིའི་ཆོས་ལས་བླ་མར་གྱུར་པ་བསྟན་པ་ཡིན་ནོ། །ད་ནི་བསམ་གཏན་དང་པོ་ལ་སོགས་པ་འབའ་ཞིག་མ་ཡིན་གྱི། འོན་ཀྱང་དེ་དག་ཀྱང་ཡིན་ནོ་ཞེས་སྡུད་པར་བྱེད་པའོ། །བླ་མར་གྱུར་པ་བཤད་པ་དེ་ལྟར་དེ་ཙམ་སྤྱིར་བསྟན་ནས་ད་ནི། བརྗོད་པར་བྱ་
བ་རྣམ་པ་མང་པོ་དག །ད་ནི་བཤད་པར་བྱ་ཡིས་ཉན་པར་གྱིས། །ད་ནི་ད་ལྟར་ཏེ་མིའི་ཆོས་བླ་མར་གྱུར་པ་འདི་བརྗོད་བྱ་གཞན་ལ་སྨྲ་བར་བྱ་བ་དེ་བཤད་པར་བྱ་ཡིས་མཉན་པར་ཏེ་རྣ་གཏོད་པར་གྱིས་ཤིག་པའོ། །ཁྱད་པར་ཇི་ལྟ་བུ་ཞེ་ན། རྣམ་པ་མང་པོ་ཞེས་བྱ་བ་ལ། བརྗོད་པར་བྱ་བ་རྣམ་པ་མང་པོའོ། །དང་ནི་ཡང་གི་དོན་ཏེ་བཤད་པར་བྱ་བ་རབ་ཏུ་བསྟན་པར་བྱ་བ་བླ་མར་གྱུར་པ་དེ་མང་པོར་གྱུར་པ་འབའ་ཞིག་ཏུ་མ་ཟད་ཀྱི་འོན་ཀྱང་འཆད་པར་བྱེད་པ་ཡང་རྣམ་པ་མང་པོ་ཉིད་ཡིན་ནོ། །རྣམ་པ་མང་པོ་དེ་ཡང་ཁ་ཅིག་ཏུ་ནི་འབྲས་བུའི་སྒོ་ནས། ཁ་ཅིག་ཏུ་ནི་དངོས་སུ། ཁ་ཅིག་ཏུ་ནི་དེའི་ཆོས་བརྗོད་པའི་སྒོ་ནས། ཁ་ཅིག་ཏུ་ནི་ཉམས་པའི་སྒོ་ནས། ཁ་ཅིག་ཏུ་ནི་གཞན་ལ་སྙན་འདོགས་པའི་སྒོ་ནས། ཁ་ཅིག་ཏུ་ནི་དོན་འདྲ་བ་བརྗོད་པའི་སྒོ་ནས། ཁ་ཅིག་ཏུ་ཟུར་གྱིས་གླེངས་པའི་སྒོ་ནས། ཁ་ཅིག་ཏུ་ནི་ཕྱི་མ་ཡང་དག་པའི་སྒོ་ནས། ཁ་ཅིག་ཏུ་ནི་མི་སྨྲ་བས་དང་དུ་ལེན་པའི་སྒོ་ནས་ཞེས་བྱ་བ་རྣམ་པ་མང་པོས་བཤེས་པར་བྱ་ཡིས་མཉན་པར་གྱིས་ཞེས་བྱ་བའི་ཐ་ཚིག་གོ །དེ་དག་ཀྱང༌། ལྷ་ལ་སོགས་མཐོང་ལྷ་མིན་ལ་སོགས་བདག །ཅེས་བྱ་བ་ལ་སོགས་པས་གོ་རིམས་བཞིན་དུ་རྗོད་པར་བྱེད་པ་ལ། ལྷ་ལ་སོགས་པ་གང་ཡིན་པ་དེ་ནི་ལྷ་ལ་སོགས་པ་སྟེ། མཐོང་ངོ་ཞེས་བྱ་བར་སྦྱར་རོ། །ལྷའི་མིག་གིས་ཞེས་བྱ་བ་ནི་ཚིག་གི་ལྷག་མའོ། །སོགས་པའི་སྒྲས་ནི་ཀླུ་དང་གནོད་སྦྱིན་ལ་སོགས་པ་གཟུང་ངོ༌། །འཆི་བ་མེད་པས་ན་འཆི་མེད་དེ་ལྷ་དག་ཡིན་ནོ། །དེ་དག་ལ་སོགས་པ་གང་ཡིན་པ་དེ་ནི་ལྷ་ལ་སོགས་ཏེ། དེ་དག་བདག་ལ་ལྟ་ཞིང་ཞེས་བྱ་བར་སྦྱོར་རོ། །བདག་ཉིད་ཀྱིས་མངོན་སུམ་དུ་གྱུར་པའི་མཐོང་བ་ཁས་བླངས་ནས་དེ་སྐད་དུ་སྨྲ་བ་ཡིན་ནོ་ཞེས་བྱ་བར་ཤེས་པར་བྱའོ། །དང་ནི་འགྲོ་བ་ལ་སོགས་པ་ཕན་ཚུན་དུ་འཕེལ་བ་ཉིད་ཡིན་པར་རིག་པར་བྱའོ། །དེ་དག་ནི་འབྲས་བུ་ཉེ་བར་སྟོན་པའི་སྒོ་ནས་སྨྲ་བ་ཡིན་ནོ། །སྡུག་བསྔལ་ལ་སོགས་ཤེས་པ་དང༌། །ཞེས་བྱ་བ་ལ། སྡུག་བསྔལ་ནི་སྡུག་བསྔལ་གྱི་བདེན་པ་ཡིན་ཏེ། དེའི་དངོས་པོ་ནི་སྡུག་བསྔལ་ཉིད་དོ། །དེ་ལ་སོགས་པ་གང་ཡིན་པ་དེ་ནི་སྡུག་བསྔལ་ལ་སོགས་པའོ། །སོགས་པའི་སྒྲས་ནི་བདེན་པ་གཞན་དག་སྡུད་པར་བྱེད་པ་ཡིན་ནོ། །འདིས་ནི་བླ་མར་གྱུར་པའི་ཆོས་དངོས་སུ་རབ་ཏུ་སྟོན་པར་བྱེད་པའོ། །དང་ནི་བསམ་གཏན་ལ་སོགས་པ་ཡོངས་སུ་
སྡུད་པ་ཡིན་ཏེ། བདག་གི་བསམ་གཏན་ཁོང་དུ་ཆུད་དོ་ཞེས་བྱ་བ་ལ་སོགས་པ་ལྟ་བུའོ། །དེ་ལྟ་ན་དང་ནི་གཉི་གར་སྦྱར་བར་བྱའོ། །ཟག་པ་ཟད་པའི་ངེས་པའི་ཁྱད་པར་དང༌། །ཞེས་བྱ་བ་ལ་སོགས་པས་དེའི་ཆོས་ཉིད་བརྗོད་པས་ལུང་སྟོན་པར་བྱེད་པ་ཡིན་ཏེ། འདོད་ཆགས་ལ་སོགས་པའི་ཟག་པ་ཟད་པ་གང་དག་ཡིན་པ་དེ་དག་ནི་ཟག་པ་ཟད་པ་སྟེ། འདོད་ཆགས་དང་བྲལ་བའོ། །དེ་དག་གི་ངེས་པ་ནི་སོ་སོར་ངེས་པའི་ཁྱད་པར་ཏེ་གཞན་དག་ལ་ཡང་ཞེས་བྱ་བའི་དབང་དུ་བྱས་ནས། སྟན་བཀྲ་ལ་སོགས་པའི་མཚན་ཉིད་ཀྱི་བྱེ་བྲག་དག་ཡིན་པ་དེའི་ཕྱིར་དེ་དང་བདག་ཉིད་ཁོ་ན་ཡང་དག་པར་ལྡན་པར་སྨྲ་བར་བྱེད་པའོ། །ཉིད་ནི་བདག་ཉིད་ཀྱིས་གཞན་ལྡན་པར་སྨྲས་ན་ཉེས་པ་ཆུང་བར་འགྱུར་རོ་ཞེས་བསྟན་པའི་ཕྱིར་རོ། །ད་ནི་དེའི་དཔེར་བྱེད་པ། གང་དུ་སྟན་བཀྲ་ལ་སོགས་དགྲ་བཅོམ་ཐོབ། །ཅེས་བྱ་བ་ལ་སོགས་པས་སྟོན་པར་བྱེད་དེ། བཀྲ་བ་སྟེ་སྣ་ཚོགས་པའི་སྟན་ལ་སོགས་པ་གང་ཡིན་པ་དེ་དག་ནི་སྟན་བཀྲ་ལ་སོགས་པ་ཡིན་པ་དེའི་ཕྱིར་དེ་ཁྱིམ་གྱི་ནང་དུ་ཐོབ་པའོ། །ཅི་ཐམས་ཅད་ཀྱིས་སམ་འོན་ཏེ་དགྲ་བཅོམ་པས་ཤེ་ན། དགྲ་བཅོམ་ཞེས་བྱ་བ་སྨོས་པ་ཡིན་ནོ། །དེ་ལྟར་འདོད་ཆགས་དང་བྲལ་བ་ལ་ངེས་པ་ཉིད་ཡིན་པར་བསྟན་པའི་འོག་ཏུ། དེ་ནི་བདག་གིས་ཐོབ་སྟ་གཞན་གྱིས་མིན། །ཞེས་བྱ་བ་སྨྲ་བའོ། །དེ་སྐད་དུ་བསྟན་པ་ན་གཞན་གྱིས་འདི་ཡང་དགྲ་བཅོམ་པ་དག་ཡིན་ནོ་ཞེས་བྱ་བར་རྟོགས་པར་འགྱུར་རོ། །དང་ནི་བདག་ཉིད་འདོད་ཆགས་དང་བྲལ་བ་དང་མཚུངས་པར་སྡུད་པ་ཡིན་ནོ། །དེ་ཉིད་དུ་ནི་ཞེས་བྱ་བ་ནི་ཁྱིམ་གང་དུ་དགྲ་བཅོམ་པས་ཐོབ་པ་གཞན་གྱིས་མིན་ཏེ། གཞན་ཉིད་ཀྱིས་མ་ཡིན་ནོ་ཞེས་བྱ་བའི་དོན་ཏོ། །ཉམས་པའི་དབང་དུ་བྱས་ནས། དགེ་སྦྱོང་ལམ་ལས་ཡོངས་སུ་བདག་ཉམས་ཞེས་བྱ་བ་ལ་སོགས་པ་སྨོས་ཏེ། ཡོངས་སུ་སྟེ་ཀུན་ནས་འཕགས་པའི་ལམ་ལ་སོགས་པ་ལས་ཉམས་ཤིང་ཡོངས་སུ་ཉམས་པར་གྱུར་ཅས་བྱ་བ་ནི་ལྷག་མའོ། །དེ་ཡང་རྣམ་པ་གཉིས་ཏེ་འཕགས་པའི་ལམ་ཐོབ་པ་དང་མ་ཐོབ་པའོ། །གང་གི་ཕྱིར་འཕགས་པའི་ལམ་མ་ཐོབ་པ་ལ་ཡང་ཉམས་པ་ཞེས་བརྗོད་པ་དེའི་ཕྱིར་ཁྱད་པར་དུ་བྱ་བའི་ཁྱད་པར་ཐོབ་པ་ལས་ཉམས་པར་གྱུར་ཏོ་ཞེས་དགེ་ཚུལ་སྨྲ་ན་ཞེས་བྱ་བར་སྦྱར་རོ། །གཞན་ལས་ཁྱད་པར་དུ་བྱ་བ་ཡིན་པས་ན་ཁྱད་པར་ཏེ། འཕགས་པའི་ལམ་ཡིན་པ་དེའི་ཕྱིར་
གལ་ཏེ་ཐོབ་པ་ལས་ཉམས་སོ་ཞེས་སྨྲ་བར་བྱེད་པ་དེའི་ཚེ་བཤད་མ་ཐག་པའི་ཉེས་པར་འགྱུར་རོ་ཞེས་བྱ་བའི་ཐ་ཚིག་གོ །ད་ནི་དེ་ཉིད་དཔེར་བྱེད་པ། དགེ་སྦྱོང་ལམ་ལས་ཡོངས་སུ་བདག་ཉམས་ཞེས་བྱ་བས་སྟོན་པར་བྱེད་པ་ཡིན་ཏེ། དགེ་སྦྱོང་གི་དངོས་པོ་ནི་དགེ་སྦྱོང་ཉིད་དེ་འཕགས་པའི་ལམ་ཡིན་ཏེ། གང་གི་ཕྱིར་བསྟན་བཅོས་ལས། དགེ་སྦྱོང་ཉིད་ནི་དྲི་མ་མེད་པའི་ལམ་ཡིན་ནོ་ཞེས་རབ་ཏུ་གྲགས་པ་ཡིན་ནོ། །དགེ་སྦྱོང་ཡང་དེ་ཡིན་ལ་འཕགས་པའི་ལམ་ཡང་ཡིན་པས་ན་ཞེས་བྱ་བ་ནི་ཁྱད་པར་གྱི་བསྡུ་བའོ། །དེ་ལས་བདག་ཉམས་སོ་ཞེས་དགེ་ཚུལ་བདག་ཉིད་སྨྲ་བ་ཡིན་ནོ། །མ་ཐོབ་པ་ལས་ཉམས་པའི་བསམ་པས་ནི་ཉེས་པ་ཆུང་བར་བཤད་པར་འགྱུར་རོ། །དགེ་སྦྱོང་གི་ལམ་ནི་མིའི་ཆོས་གཞན་གྱིས་ཉེ་བར་མཚོན་པར་བྱེད་པའོ། །དེ་ལས་ཅིར་འགྱུར་ཞེ་ན། བླ་མའི་ཚིག་རྣམས་དེ་དང་ལྡན་པའི་ཕྱིར། །ཞེས་བྱ་བ་སྨོས་ཏེ། དེ་ལྟ་བུའི་བླ་མའི་ཚིག་བརྗོད་པ་དང་ལྡན་ཞིང་འབྲེལ་པར་བརྗོད་པའི་ངག་འདི་ལ་ཞེས་བྱ་བའི་དོན་ཡིན་པ་དེ་བས་ན་ཚིག་དང་རབ་ཏུ་ལྡན་པའི་ཕྱིར་རོ། །བཅོམ་ནས་དམྱལ་བར་འགྲོ་ཞེས་བྱ་བ་ནི་རྩ་བའི་ཉེས་བྱས་ཀྱིས་རྣམ་པར་བཅོམ་ཞིང་བཤིག་ནས་དམྱལ་བར་འགྲོ་ཞེས་བྱ་བའི་ཐ་ཚིག་གོ །མི་མ་ཡིན་པ་ཐམས་ཅད་ལ་རིམ་པ་འདི་ཡིན་ནམ་ཞེ་ན། ཕྱག་དར་ཁྲོད་ཅེས་བྱ་བ་ལ་སོགས་པ་སྨོས་ཏེ་ཕྱག་དར་ཁྲོད་ཀྱི་འདྲེ་ནི་འདྲེ་ཁ་འབར་མ་ཡིན་ལ། དེ་དག་དང་སོ་སོར་འབྲེལ་བ་དག་ལ་ཉེས་པ་ཆུང་བ་སྟེ། བཤགས་པར་བྱ་བའི་ཉེས་བྱས་སུ་འགྱུར་རོ་ཞེས་བྱ་བའི་དོན་ཏོ། །ལྷ་ལ་སོགས་པའི་དངོས་གཞིའི་ཡན་ལག་གི་སྐབས་སུ་ཕྱག་དར་ཁྲོད་ཀྱི་འདྲེའི་ཚིག་ཡོད་པ་དེའི་ཕྱིར། ཕྱག་དར་ཁྲོད་ཀྱི་འདྲེ་མཐོང་ངོ་ཞེས་བྱ་བ་ལ་སོགས་པ་སྨྲས་ན་ཆུང་བར་འགྱུར་རོ་ཞེས་བྱ་བ་ནི་ཚིག་གི་ལྷག་མའོ། །དང་ནི་དེ་བཞིན་དུ་རང་གི་མཚན་ཉིད་འཛིན་པའི་རྒྱུ་མཚན་ཡང་ཆུང་བར་འགྱུར་རོ་ཞེས་སྡུད་པར་བྱེད་པ་ཡིན་ནོ། །རང་གི་མཚན་ཉིད་འཛིན་པར་བྱེད་པས་ན་རང་གི་མཚན་ཉིད་འཛིན་པ་སྟེ་ཤེས་པའི་ཁྱད་པར་བསམ་གཏན་གྱི་དངོས་གཞི་འཛིན་པར་བྱེད་པ་དང༌། ཆགས་པ་ཀུན་ནས་འཛིན་པར་བྱེད་པའོ། །གང་གི་ཕྱིར་ཤེས་པའི་དངོས་པོ་དེ་ཉིད་ལ་རང་གི་མཚན་ཉིད་སོ་སོར་སྣང་བ་དེའི་རྒྱུ་མཚན་དང་བྱེད་རྒྱུ་བགྲོད་པར་བྱ་བ་ཡོངས་སུ་མ་རྫོགས་པའི་གནས་སྐབས་ཀྱི་མཚན་ཉིད་ཡིན་ལ་དེ་ཡང་དེ་ལ་
ཅུང་ཞིག་མི་གསལ་བར་སྣང་བ་སྨྲ་བར་བྱེད་ན་དེ་ལ་ཡང་ཉེས་པ་ཆུང་བར་འགྱུར་རོ་ཞེས་བྱ་བའི་དོན་ཡིན་པའམ་ཡང་ན་རང་གི་མཚན་ཉིད་འཛིན་པ་ཡང་ཡིན་ལ་རྒྱུ་མཚན་ཡང་ཡིན་པས་ན་ཞེས་བྱ་བ་ནི་ཁྱད་པར་གྱི་བསྡུ་བ་ཡིན་ནོ། །གང་གི་ཕྱིར་དེ་ལ་ཡང་རང་གི་མཚན་ཉིད་སོ་སོར་སྣང་བ་མི་གསལ་བའི་རྒྱུ་མཚན་བགྲོད་པར་བྱ་བ་ཡོངས་སུ་མ་རྫོགས་པ་ལ་སོགས་པ་ཞེས་བྱ་བ་སྡུག་བསྔལ་ལ་སོགས་པ་ཤེས་པ་དང་ཞེས་སྨོས་པའི་དངོས་གཞིའི་ཡན་ལག་གི་གནས་སུ་འདི་བལྟ་བར་བྱ་བ་ཡིན་ནོ། །དེ་བས་ན་འདི་བདག་ལ་ཡོད་དོ་ཞེས་ལུང་སྟོན་པར་བྱེད་ན་ཉེས་བྱས་ཀྱི་ཉེས་པར་འགྱུར་བར་རིག་པར་བྱའོ། །གཞན་ལ་སྙད་འདོགས་པའི་དབང་དུ་བྱས་ནས། སྡོམ་ཅན་གང་དག་ལྷ་སྒྲ་ཐོས་ཡོད་ཅེས། །ཇི་བཞིན་གཞན་ལ་སྙད་འདོགས་སྨྲ་བྱེད་པ། །ཞེས་བྱ་བ་ལ་སོགས་པ་སྨོས་ཏེ། ཕ་རོལ་པོ་གཞན་ལ་སྙད་འདོགས་པ་ནི་གཞན་ལ་སྙད་འདོགས་པ་སྟེ། གཞན་གྱི་མིང་གིས་ཞེས་བྱ་བའི་དོན་ཡིན་པ་དེའི་ཕྱིར་གཞན་ལ་སྙད་འདོགས་པས་སྨྲ་བར་བྱེད་ན་ཡང་ངོ༌། །ཡང་གི་སྒྲ་ནི་སྔ་མ་ལ་ཇི་ལྟ་བ་དེ་བཞིན་དུ་འདི་ལ་ཡང་འགྱུར་རོ་ཞེས་སྡུད་པར་བྱེད་པའོ། །དེའི་དཔེར་བྱེད་པ། སྡོམ་ཅན་གང་དག་ལྷ་སྒྲ་ཐོས་ཡོད་ཅེས། །ཞེས་བྱ་བས་སྟོན་པར་བྱེད་པ་ཡིན་ཏེ། གནས་སྐབས་འགའ་ཞིག་ཏུ་བདག་ཉིད་ལ་བསམས་ནས། སྡོམ་ཅན་གང་དག་ལྷ་དག་གི་སྒྲ་ཐོས་པ་ཡོད་དོ་ཞེས་བྱ་བའི་ཚིག་དེ་ལས་དེ་ནི་ངེས་པར་འདི་ཉིད་ཡིན་ནོ་ཞེས་གཞན་སེམས་པར་འགྱུར་ཏེ། འདིར་དེ་ཉིད་ཆུང་བའོ། །ཅིའི་ཕྱིར་ཆུང་བར་འགྱུར་ཞེ་ན། སྨྲས་པ། བདག་ཅེས་བྱ་བ་དེ་དང་བྲལ་བ་དེ་ནི་ཆུང་བར་འགྱུར་ཞེས་བྱ་བར་སྦྱར་བར་བྱའོ། །དེ་ནི་ཆུར་ཞེས་བྱ་བ་ལ་དེ་ཡང་དེ་ཡིན་ལ་ཆུང་བ་ཡང་ཡིན་པས་ན་ཞེས་བྱ་བའི་དབང་དུ་བྱས་ནས་སོ། །དེ་ཡང་བཤད་མ་ཐག་པའི་ཉེས་བྱས་ཆུང་བར་འགྱུར་བར་ཤེས་པར་བྱའོ། །གཞན་ལ་སྙད་འདོགས་པས་སྨྲ་བ་ཡང་དེ་བཞིན་དུ་འགྱུར་རོ་ཞེས་བྱ་བར་སྤྱིའི་ཚིག་ཏུ་བསྟན་པས་འདིས་དེ་དག་གི་དཔེར་བྱེད་པ་ཡིན་ཏེ། འདི་སྐད་དུ་བདག་ལ་བསམས་ནས་གཞན་གྱི་མིང་གིས་སྤྱི་མིའི་ཆོས་བླ་མ་སྨྲ་བར་བྱེད་ན་ཉེས་པ་ཆུང་བར་འགྱུར་ཏེ། བཤད་མ་ཐག་པའི་བདག་གི་སྒྲ་མ་བརྗོད་པའི་ཕྱིར་རོ་ཞེས་བྱ་བ་ལྟ་བུའོ། །གང་གི་ཚེ་བདག་ཅེས་བྱ་བ་ཡང་བརྗོད་པར་གྱུར་བ་དེའི་ཚེ་ཇི་ལྟར་འགྱུར་ཞེ་ན།
བདག་གི་སྒྲ་དང་ལྡན་ན་རྩ་བར་འགྱུར། །ཞེས་བྱ་བ་སྨོས་ཏེ། གཞན་ལ་སྙད་འདོགས་པས་གོ་བར་བྱས་པའི་ཕྱིར་དེ་ནི་བདག་ཉིད་ཡིན་ནོ་ཞེས་བདག་ཉིད་སྒྲུབ་པར་བྱེད་པ་དང་ལྡན་ཞིང་འབྱོར་བའི་ཚིག་གང་ཡིན་པ་དེ་ལ་དེ་སྐད་ཅེས་བྱའོ། །དེ་བས་ན་ཚིག་དེས་སྨྲས་ན་རྩ་བར་འགྱུར་རོ། །ནི་ནི་སྔ་མ་ལས་ཁྱད་པར་དུ་བྱེད་པའི་དོན་ཏོ། །དེ་བཞིན་དུ་གཞན་ལ་སྙད་འདོགས་པ་གཞན་ལ་ཡང་བལྟ་བར་བྱའོ། །དོན་འདྲ་བ་བརྗོད་པ་བསྟན་པའི་ཕྱིར་ཇི་ལྟར་མཚུངས་པར་འགྱུར་བའི་སྒྲ་བརྗོད་པ་ཞེས་བྱ་བ་ལ་སོགས་པ་སྨོས་ཏེ། མཚུངས་པ་ཡང་དེ་ཡིན་ལ་སྒྲ་ཡང་ཡིན་པས་ན་མཚུངས་པར་གྱུར་པའི་སྒྲ་དག་སྟེ། གང་དག་སྒྲ་མཚུངས་ལ་དོན་ཐ་དད་པ་ནི་དཔེར་ན་འབྲས་བུའི་སྒྲ་དགེ་སྦྱོང་གི་འབྲས་བུ་དང༌། ཨ་མྲའི་འབྲས་བུ་ལ་གང་འཇུག་པའི་ཕྱིར་རོ། །དེ་བཞིན་དུ་གཞན་དག་ལ་ཡང་བལྟ་བར་བྱའོ། །ཡང་ན་མཚུངས་པ་དེ་འདྲ་བའི་སྒྲ་དོན་གང་ལ་ཡོད་པ་དེ་ནི་མཚུངས་པར་གྱུར་པའི་སྒྲ་དང་ལྡན་པའོ། །དེའི་ཕྱིར་དེ་དང་བདག་ཉིད་ཡང་དག་པར་ལྡན་པར་སྨྲ་བར་བྱེད་པ་ལས་ཞེས་བྱ་བར་སྦྱར་ཏེ། གོང་དུ་མཚུངས་པའི་སྒྲས་མིའི་ཆོས་བླ་མ་དང་ལྡན་པ་ཉིད་དུ་བརྗོད་པའི་ཕྱིར་རོ། །དང་ནི་ཇི་ལྟར་ཞེས་བྱ་བ་གོང་དུ་ཇི་ལྟ་བ་དེ་བཞིན་དུ་འདིར་ཡང་ཞེས་སྡུད་པར་བྱེད་པ་ཡིན་ནོ། །བསླབ་ལ་གནས་ནས་བདག་ནི་བསླབ་ཅེ་འམ། །ཞེས་བྱ་བ་ལ་སོགས་པས་དཔེ་སྟོན་པར་བྱེད་དེ། བསླབ་པ་ནི་སྤྱོད་པ་སྟེ་ཚུལ་ཁྲིམས་ལ་གནས་པ་ཞེས་བྱ་བའི་བར་དུའོ། །དེ་ལ་བསམ་པ་ནི་སེམས་པའོ། །དེ་ལ་བསླབ་པ་ལ་བསམས་ནས་ཞེས་བྱ་བ་ནི་ཀུན་དུ་སྤྱོད་པ་ལ་སེམས་པའི་སྒོ་ནས་ཞེས་བྱ་བའི་དོན་ཏེ་བསམས་པ་དེས་སོ། །བདག་ནི་སློབ་པ་ཞས་བྱ་བ་སྨོས་ཏེ། གང་གི་ཕྱིར་ཐ་མའི་འཕགས་པ་མ་གཏོགས་པ་སློབ་པ་བདུན་ལ་བྱ་སྟེ། སྤང་བར་བྱ་བ་མ་ལུས་པ་སྤོང་བ་ལ་སློབ་པའི་ཕྱིར་རོ། །དེ་ལ་འདི་ནི་བཀའ་ལས་རབ་ཏུ་གྲགས་པའི་ཚུལ་ཡིན་ནོ། །སོ་སོའི་སྐྱེ་བོ་འགའ་ཞིག་ཀྱང་སོ་སོར་ཐར་པའི་བསླབ་པ་ལ་སློབ་པའི་ཕྱིར་ཞེས་བྱ་བའི་ངས་པའི་ཚིག་གི་ཚུལ་གྱིས་དེ་ཡང་སློབ་པར་འགྱུར་རོ། །དེའི་ཕྱིར་བསམ་པས་སྨྲས་ན་ཆུང་བར་འགྱུར་རོ་ཞེས་བྱ་བའི་ཐ་ཚིག་གོ །ཡང་ན། །ལམ་ལ་ཞུགས་ནས་བདག་ནི་ལམ་གནས་ཤེས། །བྱ་བ་ལ་སོགས་པས་ཀྱང་དོན་འདྲ་བ་ཉིད་སྟོན་པར་བྱེད་དེ། ལམ་དུ་ཞུགས་ནས་འཕགས་པའི་ལམ་ལ་
གནས་པ་ཉིད་གོ་བར་བྱེད་པའི་བསམ་པས་བདག་ནི་ལམ་ལ་གནས་པ་ཡིན་ནོ་ཞེས་སྨྲས་པ་དེ་ལྟ་ན་ཡང་ཉེས་པ་ཆུང་བར་འགྱུར་རོ་ཞེས་བྱ་བའི་དོན་ཏོ། །ལམ་ཞེས་བྱ་བ་ནི་རྣམ་པ་གཞན་སྟོན་པར་བྱེད་པའོ། །སོགས་པ་དེ་དག་དེ་བཞིན་ནོ་ཞེས་བྱ་བ་ལ་དེ་དག་ནི་དེ་ལྟ་བུའི་དོན་ཏེ་དེ་ལྟ་བུ་ལ་སོགས་པའི་མཚུངས་པའི་སྒྲ་དག་གིས་སྒྲུབ་པར་བྱེད་པ་དག་ནི་སྔར་ཇི་ལྟར་ཆུང་བར་འགྱུར་བ་དེ་བཞིན་དུ་འདི་ལ་ཡང་ཞེས་བྱ་བའི་དོན་ཏོ། །སོགས་པའི་སྐྲས་ནི་མཚུངས་པ་གཞན་རྒྱུན་དུ་ཞུགས་པ་ལ་སོགས་པ་དག་ཀྱང་ཡིན་པར་རིག་པར་བྱ་སྟེ། དཔེར་ན་རྒྱུན་ལ་གནས་ནས་བདག་ནི་རྒྱུན་དུ་ཞུགས་པ་ཡིན་ནོ་ཞེས་བྱ་བ་ལྟ་བུའོ། །རྒྱུན་གྱི་སྒྲ་ནི་འཕགས་པའི་ལམ་དང༌། ཆུ་བོའི་རྒྱུན་ལ་ཡང་བྱ་བ་དེའི་ཕྱིར་དོན་མཚུངས་པ་ཡིན་ནོ། །དེ་བཞིན་དུ་ཀུན་དུ་སྤྱོད་པའི་འཚང་བ་ལས་གྲོལ་བ་ལ་བསམས་ནས་བདག་ནི་འཆིང་བ་ལ་སོགས་པ་ལས་གྲོལ་བར་གྱུར་ཏོ་ཞེས་བྱ་བ་ལ། གང་གི་ཕྱིར་འཆིང་བའི་སྒྲས་འདོད་ཆགས་ལ་སོགས་པ་བརྗོད་པ་དེ་འདོད་ཆགས་ཀྱི་བཅིང་བ་དང༌། ཞེ་སྡང་གི་བཅིང་བ་ཞེས་བྱ་བ་ལ་སོགས་པས་ཀུན་དུ་སྤྱོད་པ་ལ་སོགས་པ་དང༌། འགོག་པ་ཞས་བྱ་བར་དོན་མཚུངས་པ་ཉིད་ཀྱི་ཕྱིར་རོ། །འགའ་ཞིག་སྣོད་ལ་སོགས་པ་ཅུང་ཟད་མེད་པ་ལས་བསམས་ཏེ་ཅུང་ཟད་སྤངས་པ་གོ་བར་བྱ་བའི་ཕྱིར་བདག་ལ་ཅུང་ཞིག་ཀྱང་མེད་དོ་ཞེས་བྱ་བ་སྨྲས་ཏེ། འདི་ལ་ཅུང་ཟད་མེད་པའི་སྒྲས་རྫས་དང་ཉོན་མོངས་པ་ལ་བྱ་བ་ཡིན་ཏེ། འདི་གཉིས་མེད་པར་དོན་མཚུངས་པའི་ཕྱིར་རོ། །སོ་སོའི་སྐྱེ་བོ་དང་དགྲ་བཅོམ་པ་ལ་ཅུང་ཟད་ཀྱང་མེད་དོ་ཞེས་མཚུངས་པའི་སྒྲ་བརྗོད་པར་བྱ་བ་ཡིན་ནོ་ཞེས་བྱ་བ་དེ་ལྟ་བུ་ལ་སོགས་པ་དག་ཏུ་བལྟ་བར་བྱའོ། །གང་གི་ཕྱིར་སློབ་པ་ལ་སོགས་པའི་སྒྲས་གོ་བར་བྱེད་པ་བཤད་མ་ཐག་པའི་རྣམ་པས་བདག་ལ་གཞན་གྱིས་ཟག་པ་མེད་པའི་ཆོས་དང་ལྡན་པ་དང༌། སློབ་པ་ལ་སོགས་པ་ཡིན་པར་སོ་སོར་ཤེས་པར་འགྱུར་རོ་སྙམ་པ་དེ་ལ་རང་གི་བསམ་པའི་དབང་དང༌། གཞན་གྱིས་དེ་བཞིན་རྟོགས་པ་དག་ལས་ཉེས་པར་འགྱུར་བ་དང༌། མ་ཡིན་ན་ཆེས་ཆུང་བར་འགྱུར་བར་རིག་པར་བྱའོ། །བསམ་པ་དང་གཞན་ཡིད་ཆེས་པ་ཐམས་ཅད་ལ་ཐམས་ཅད་དུ་བརྗོད་པར་བྱ་བ་ཡིན་ནོ། །ཨེ་མའོ་ཇི་ལྟར་བདག་འདྲ་ཁྱོད་གྱུར་ཅིག །འོན་ཏང་ཕྱིར་མི་འོང་བའི་འབྲས་ལྡན་འགྱུར། །
ད་ལྟར་དེ་ལྟར་འཕགས་པ་བདག་མིན་ཞེས། །ཟུར་གྱིས་རྗོད་པར་བྱེད་ན་ཆུང་བ་ཉིད། །ཅེས་བྱ་བས་ཟུར་གྱིས་སྨྲ་བ་སྨོས་པ་ཡིན་ཏེ། ཟུར་གྱིས་སྨོས་པ་ནི་ཆ་ཙམ་སྨྲས་པ་ཡིན་པ་དེའི་ཕྱིར་ཟུར་གྱིས་བརྗོད་ཅིང་སྨྲ་བ་ལས་ཉེས་པ་ཆུང་བར་འགྱུར་གྱི་དངོས་གཞིར་ནི་མི་འགྱུར་རོ་ཞེས་ཉིད་ནི་ངེས་པར་གཟུང་བ་ཡིན་ནོ། །དེའི་དཔེར་བྱེད་པ། ཨེ་མའོ་ཇི་ལྟར་བདག་འདྲ་ཁྱོད་གྱུར་ཅིག །ཅེས་བྱ་བ་ལ་སོགས་པས་སྟོན་པར་བྱེད་པ་ཡིན་ཏེ། ཨེ་མའོ་ཇི་ལྟར་བདག་ཅི་འདྲ་བ་སྟེ་བདག་ཇི་ལྟར་དེ་བཞིན་དུ་ཁྱོད་ཀྱང་དེ་དང་འདྲ་བར་གྱུར་ཅིག་པའོ། །ཨེ་མ་ནི་འདོད་པ་བསྔགས་པའི་སྨྲ་སྔགས་ཡིན་ནོ། །དེ་སྐད་དུ་སྨྲས་པའི་འོག་ཏུ། འོན་ཏང་ཕྱིར་མི་འོང་བའི་འབྲས་ལྡན་འགྱུར། །ཞེས་བྱ་བ་ལ་སོགས་པས་བདག་ཇི་ལྟ་བ་དེ་བཞིན་དུ་འགྱུར་རོ་ཞེས་སྐད་དུ་སྨྲས་པར་གྱུར་ན་ཞེས་བྱ་བ་ནི་དྲང་བར་བྱའོ། །ནིའི་སྒྲ་ནི་གང་གི་ཕྱིར་གྱི་དོན་ཡིན་ཏེ། གང་གི་ཕྱིར་དེ་ལྟ་བུ་ཉིད་དུ་གྱུར་ན་ཅིར་འགྱུར་ཞེ་ན། སྨྲས་པ། ཕྱིར་མི་འོང་བའི་འབྲས་བུ་དང་ལྡན་པར་འགྱུར་རོ། །ད་ལྟར་ཏེང་དེ་སྐད་དུ་སྨྲས་ན་གཞན་ཡིད་ཆེས་པར་འགྱུར་རོ། །འོན་ཀྱང་ཕྱིར་མི་འོང་བ་ཡིན་པས་རང་ཉིད་ཀྱང་བདག་དང་མཉམ་པ་ཉིད་དུ་ཀུན་དུ་བསྟན་པའི་ཕྱིར་དེ་ལས་གཞན་གྱིས་བདག་ཕྱིར་མི་འོང་བ་ལ་སོགས་པའི་འབྲས་བུ་དང་ལྡན་པར་སོ་སོར་ཤེས་པར་འགྱུར་རོ་ཞེས་རྣམ་པ་གཞན་འདིས་སྨྲ་བར་བྱེད་པ་དག་ལ་ཆུང་བར་འགྱུར་རོ། །གལ་ཏེ་ཡང་ཕྱིས་འདི་སྐད་དུ། ད་ལྟར་འཕགས་པ་བདག་མིན་ཞེས། །ཞེས་བྱ་བ་སྨྲས་པ་དེ་ལྟ་ན་ཡང་ཟུར་གྱིས་སྨྲས་པ་ཁོ་ནར་འགྱུར་རོ། །དེ་བཞིན་དུ། བསམ་གཏན་སྙོམས་ཞུགས་དེང་ནི་བདག་མ་ཡིན། །ཞེས་བྱ་བ་ལ་སོགས་པ་ལ་གཞན་ཡང་འདི་སྐད་དུ་བདག་ནི་དེང་བསམ་གཏན་ལ་སྙོམས་པར་ཞུགས་པ་མ་ཡིན་ནོ་ཞེས་ཟུར་གྱིས་སྨྲས་ན་ཉེས་པ་ཆུང་བར་འགྱུར་རོ་ཞེས་བྱ་བར་སྦྱར་རོ། །འོན་ཏེ་ཞེས་བྱ་བ་ནི་ཟུར་གྱིས་སྨྲ་བའི་རྣམ་པ་དག་ཉེ་བར་བསྟན་པའི་ཕྱིར་རོ། །ཇི་ལྟར་བསམ་གཏན་ལ་སྙོམས་པར་ཞུགས་པ་མ་ཡིན་ནོ་ཞེས་ཟུར་གྱིས་སྟོན་པ་དེ་བཞིན་དུ་ཁར་རྩང་མ་ཡིན་ཞེས་བྱ་བ་ལ་སོགས་པ་ལ་ཁར་རྩང་ཞེས་བྱ་བ་ནི་འདས་མ་ཐག་པའི་ཉིན་ཞག་ལ་བྱ་སྟེ་དབང་དུ་བྱེད་པ་གཙོ་བོ་ཡིན་པའི་ཕྱིར་ཁར་རྩང་བསམ་གཏན་ལ་སྙོམས་པར་ཞུགས་པ་ཞེས་བྱ་བ་ནི་འདས་པའི་ཉིན་
ཞག་ལ་སྙོམས་པར་ཞུགས་ཞེས་བྱ་བའི་ཐ་ཚིག་གོ །དེ་བཞིན་དུ་ཁར་ཉིན་ཕན་ཆད་མིན་ཞེས་བྱ་བ་ལ་ཁར་ཉིན་ཞེས་བྱ་བ་ནི་འདས་མ་ཐག་པའི་ཉི་མ་ཁར་རྩང་ཞེས་བྱ་བ་ལ་ལྟོས་པ་ཕན་ཆད་དེ། ཁར་ཉིན་ཕན་ཆད་དུ་སྙོམས་པར་ཞུགས་པ་མ་ཡིན་ནོ་ཞེས་བྱ་བ་དེ་བུ་ལ་སོགས་པའི་ཟུར་གྱིས་སྨྲ་བ་ནི་ཉེས་པ་ཆུང་བར་འགྱུར་རོ་ཞེས་བྱ་བའི་དོན་ཏོ། །གང་གི་ཕྱིར་བདག་དེང་བསམ་གཏན་ལ་སྙོམས་པར་ཞུགས་པ་མ་ཡིན་ནོ་ཞེས་སྨྲས་པ་ན། གཞན་འདི་སྙམ་དུ་འདི་ནི་ངེས་པར་བསམ་གཏན་ཐོབ་པ་ཡིན་ཏེ། དེ་ཉིད་ལས་སུ་བྱ་བ་གཞན་དག་ཉེ་བར་ལྷགས་པས་སྙོམས་པར་མ་ཞུགས་པ་ཡིན་ནོ་ཞེས་སྔ་མ་བཞིན་དུ་བསམ་པ་བརྗོད་པར་བྱའོ། །ཕྱི་མ་ཡང་དག་པ་ནི། འདོད་ཆགས་བྲལ་བའི་ཁྱིམ་འདི་གང་ཡིན་པ། །ཞེས་བྱ་བ་ལ་སོགས་པས་སྟོན་པར་བྱེད་དེ། རབ་ཏུ་བྱུང་བའི་ཁྱིམ་དེ་གང་ཡིན་པ་དེ་ནི་འདོད་ཆགས་དང་བྲལ་བའི་ཡིན་ནོ་ཞེས་བསྒྲུབས་ནས་ཕྱིས་འདི་སྐད་དུ་བདག་གི་དེ་ཡིན་ཞེས་སྨོས་པ་ཡིན་ནོ། །ཉིད་ནི་གཞན་གྱི་མ་ཡིན་ཞེས་ངེས་པར་གཟུང་བའོ། །དེ་ཞེས་བྱ་བ་ནི་བསྟན་མ་ཐག་པའི་ཁྱིམ་འདྲེན་པར་བྱེད་པ་ཡིན་ཏེ། གོང་དུ་འདི་ཞེས་མངོན་སུམ་དུ་བྱས་པ་ཁོ་ན་ལས་ལྐོག་ཏུ་གྱུར་པའི་དབང་དུ་བྱས་ནས་དེ་ཞེས་བྱ་བ་ཡིན་ནོ། །དེ་སྐད་དུ་ཟུར་གྱིས་སྨྲས་པར་གྱུར་པའི་འོག་ཏུ་འདོད་ཆགས་བདག་མ་བྲལ་ཞེས་སྨྲས་ཏེ། འདོད་ཆགས་ལ་སོགས་པའི་མཚན་ཉིད་དང་བྲལ་ཞིང་དྲི་མ་མེད་པ་གང་ཡིན་པ་དེ་ནི་འདོད་ཆགས་དང་བྲལ་བ་སྟེ་དེ་ནི། བདག་ཡིན་འདོད་ཆགས་བདག་མ་བྲལ་བའོ། །དང་ནི་བདག་ཁོ་ན་མ་ཡིན་ནོ་ཞེས་ངེས་པར་གཟུང་བའི་དོན་ཡིན་ནོ། །དེ་སྐད་སྟོན་པའི་ཕྱི་མ་ཡང་དག་པ་ཉིད་ཡིན་དུ་ཟིན་ཀྱང་ཟུར་གྱིས་སྟོན་པ་ཁོ་ན་ཡིན་ཏེ། འདི་ལྟར་ཕྱི་མ་ཡང་དག་པ་ལས་ཟུར་གྱིས་སྨྲ་བ་མ་བྱུང་བ་མ་ཡིན་ནོ་ཞེས་བྱ་བའི་ཐ་ཚིག་གོ །མི་སྨྲ་བར་གྱུར་པ་ནི། བཙུན་པ་ཅི་སྟེ་དགྲ་བཅོམ་བདག་བསོད་སྙོམས། །ཞེས་བྱ་བ་ལ་སོགས་པས་སྟོན་པར་བྱེད་དེ། གལ་ཏེ་ཁྱོད་དགྲ་བཅོམ་པར་གྱུར་པ་ཡིན་པ་དེའི་ཚེ་བདག་གི་བསོད་སྙོམས་བཞེས་ཤིག་ཅེས་སྨྲས་པ་ན་ཅང་མི་སྨ་བར་གྱུར་པས་དེ་ཁོ་ན་བཞིན་དུ་ཁས་བླངས་ནས་གལ་ཏེ་བསོད་སྙོམས་ལེན་པར་བྱེད་པ་དང༌། དེ་བཞིན་དུ་འདི་ཉོན་མོངས་པའི་ཟག་པ་ཟད་པའི་ཕྱིར་ཟག་པ་ཟད་པ་སྟེ། ཟག་པ་ཟད་པར་གྱུར་ཏམ་
ཞེས་གཞན་གྱིས་དྲིས་པར་གྱུར་པ་ན་དེ་ཁོ་ན་བཞིན་དུ་ཅང་གི་སྨྲ་བའི་རྣམ་པས་ཏེ་མི་སྨྲ་བར་གྱུར་པས་གང་གི་ཚེ་ཁས་བླངས་པར་གྱུར་པ་ནའོ། །དང་ནི་འདིར་ཐམས་ཅད་དུ་ཉེས་བྱས་ཆུང་བར་འགྱུར་རོ་ཞེས་སྡུད་པར་བྱེད་པ་ཡིན་ནོ་འདི་ལ་ཡང་སྔ་མ་བཞིན་དུ་བསམ་པ་ལས་འགྱུར་རོ། །ད་ནི། དེ་དག་བླ་མར་བརྗོད་པའི་བློས་བརྫུན་སྨྲས། །ཞེས་བྱ་བས་སྔར་བཤད་པའི་མཇུག་སྡུད་པ་ཡིན་ཏེ། བླ་མར་བརྗོད་ཅིང་སྨྲ་བ་དེའི་བློ་དང་སེམས་པ་དག་ནི་བླ་མར་བརྗོད་པའི་བློས་སོ། །དེ་དག་གི་སྒྲ་ནི་དེ་ལྟར་གྱི་དོན་ཡིན་པ་དེ་བས་ན་དེ་ལྟར་བླ་མར་བརྗོད་པའི་བློས་བརྫུན་དུ་སྨྲ་བ་ཡིན་པར་རིག་པར་བྱའོ། །དེ་དག་ནི་ཉེ་བར་མཚོན་པར་བྱེད་པ་ཡིན་ཏེ། མིའི་ཆོས་བླ་མར་གྱུར་པར་བསྟན་པ་རྣམ་པ་གཞན་ཐམས་ཅད་ལ་ཡང་མཚན་ཉིད་ཇི་ལྟ་བ་བཞིན་དུ་ཉེས་པར་འགྱུར་བར་ཤེས་པར་བྱའོ་ཞེས་བྱ་བའི་དོན་འདིར་འགྱུར་རོ། །ད་ནི། གཞན་པའི་བརྫུན་དུ་སྨྲ་བ་ད་ཉོན་ཅིག །ཅེས་བྱ་བ་ལ་སོགས་པས་སྟོན་པར་བྱེད་དེ། ད་ནི་ད་ལྟར་ཏེ་མིའི་ཆོས་བླ་མར་གྱུར་པའི་བརྫུན་དུ་སྨྲ་བ་ལས་གཞན་པའི་བརྫུན་དུ་སྨྲ་བ་བརྗོད་པར་བྱ་ཡིས་ཉོན་ཅིག་ཅེས་བྱ་བ་ནི་ཚིག་གི་ལྷག་མའོ། །ནིའི་སྒྲ་ནི་སྔ་མ་ལས་ཁྱད་པར་དུ་བྱེད་པའི་དོན་ཏོ། །འདུ་ཤེས་གཞན་པའི་ཚིག་ནི་གང་ཡིན་པས། །ཞེས་བྱ་བ་ལ་སོགས་པས་བརྫུན་དུ་སྨྲ་བ་གཞན་འཆད་པར་བྱེད་པ་ཡིན་ཏེ། དོན་ཇི་ལྟ་བ་བཞིན་དུ་འདུ་ཤེས་ཡོད་པ་མ་ཡིན་པ་གང་ཡིན་པ་དེ་དག་ནི་འདུ་ཤེས་གཞན་པ་སྟེ། གཞན་པའི་ཚིག་གང་དག་ཡིན་པ་དེ་ཁོ་ན་ལ་བརྫུན་དུ་འགྱུར་གྱི་ཅིག་ཤོས་ལས་ནི་མ་ཡིན་ནོ་ཞེས་ཉིད་ནི་ངེས་པར་གཟུང་བའི་ཕྱིར་རོ། །དེ་གང་ལ་ཡིན་ཞེ་ན། སྒྲ་དོན་ཤེས་པ་ཞེས་བྱ་བ་སྨྲས་ཏེ། སྒྲའི་དོན་ནི་སྒྲ་དོན་ཏེ་སྒྲའི་ཚིག་གི་དོན་གང་ཡིན་པ་དེ་རྣམ་པར་ཤེས་པ་ནི་སྒྲ་དོན་ཤེས་པའོ། །འདིས་གཉིད་ལོག་པ་དང་སྨྱོས་པ་དང༌། སྐད་མི་ཤེས་པ་དག་བསལ་བ་ཡིན་ནོ། །དེ་ལ་སྒྲའི་དོན་རྣམ་པར་ཤེས་པ་ཡུལ་དུ་གྱུར་པ་ལ་ཚིག་དེ་བརྫུན་དུ་འགྱུར་རོ། །ཅི་ཐམས་ཅད་ལ་འགྱུར་རམ་ཞེ་ན། མི་ཞེས་སྨོས་ཏེ་མིའི་ནི་མིའི་རིགས་དག་ལ་བྱའི་མི་མ་ཡིན་པའི་རིགས་དག་ནི་མ་ཡིན་ཏེ། གང་གི་ཕྱིར་འཇིག་རྟེན་གྱི་ཐ་སྙད་ཀྱི་ཁོངས་སུ་མ་འདུས་པའི་ཕྱིར་རོ། །དེ་ལྟར་ཡང་མིང་རྟོགས་པའི་ཐ་སྙད་ཉིད་ལ་ཞེས་གསུངས་པ་ཡིན་ནོ། །ཚིག་འདིའི་དོན་གསལ་ཏེ། བླ་མར་བརྗོད་པའི་བློས་ཞེས་བྱ་བ་འདི་ཉིད་
ཀྱིས་དངོས་གཞིའི་ཡན་ལག་དང་བྲལ་བ་ནི་ཉེས་བྱས་སུ་འགྱུར་བ་དང༌། གཞན་པའི་བརྫུན་དུ་སྨྲ་བ་དག་རབ་ཏུ་གྲུབ་པ་ཉིད་ཀྱི་ཕྱིར་རོ། །ཅིའི་ཚིག་ཁོ་ན་བརྫུན་ཡིན་ནམ་འོན་ཏེ་གཞན་གྱིས་ཀྱང་ཡིན་ཞེ་ན། སྨྲས་པ། དེ་ལ་འཇིག་རྟེན་པའི་ཚུལ་ནི་འདི་ཡིན་ཏེ་ཚིག་བརྫུན་པ་ཡིན་པ་དེ་ལྟ་ན་ཡང་གལ་ཏེ་ཡང་འདི་ལྟར་ཚིག་གིས་བརྗོད་པར་བྱ་བའི་དོན་ཇི་ལྟ་བུ་ལུས་ཀྱིས་ཀྱང་གོ་བར་བྱེད་ན་ལུས་ཀྱིས་ཀྱང་ཡིན་ཏེ་ངག་འབའ་ཞིག་གིས་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དེའི་ཚེ་ཉེས་བྱས་ཁོ་ན་ཉེས་པ་ཆུང་བ་མ་ཡིན་པ་མ་ཡིན་ལ། འོན་ཀྱང་ཉེས་བྱས་ཀྱི་ཉེས་པ་ཆུང་བ་ཡིན་ཏེ་ཡོངས་སུ་མ་རྫོགས་པ་ཞེས་བྱ་བའི་ཐ་ཚིག་གོ །ཅིའི་ཕྱིར་ཡོངས་སུ་མ་རྫོགས་པ་ཡིན། གང་ལས་ཏེ་གང་གི་ཕྱིར་ཚིག་ཏུ་བརྗོད་པའི་ཤུགས་ལས་བྱ་བའི་ཐ་སྙད་འདི་ལ་མེད་པ་དེའི་ཕྱིར་ཆུང་བར་འགྱུར་རོ། །འདུལ་བ་ལས་ཐ་སྙད་ཀྱི་རྩ་བར་གྱུར་པ་ནི་གསུམ་སྟེ། འདི་མཐོང་བ་དང་ཐོས་པ་དང་དོགས་པ་ཞེས་གསུངས་པ་ཡིན་ནོ། །རང་གིས་རྟོགས་པ་དེ་ནི་མཐོང་བ་ཡིན། །ཞེས་བྱ་བ་ལ་སོགས་པས་དེ་དག་གི་རང་བཞིན་འཆད་པར་བྱེད་པ་ཡིན་ཏེ། གང་ཁོ་ན་རང་གི་མངོན་སུམ་མམ་རྗེས་སུ་དཔག་པས་རྟོགས་ཤིང་ཡང་དག་པར་ཡིད་ཆེས་པར་གྱུར་པ་དེ་ཁོ་ན་ལ་མཐོང་བ་ཞེས་བྱའོ། །རབ་ཏུ་བྱུང་བ་འམ་ཁྱིམ་པ་ཡིད་ཆེས་པ་མི་སླུ་བར་བྱེད་པ་གང་ཁོ་ན་ལས་ཐོས་པ་ཐོས་པ་ཡིན་ནོ། །ཁོ་ན་ནི་ངས་པར་གཟུང་བ་དང་རིམ་པ་གཞན་གྱི་དོན་ཏོ། །གཅིག་ཏུ་ངེས་པའི་རྟགས་གོ་བར་བྱེད་པ་གཟུང་བ་ནི་མཚན་མ་ངེས་པར་གཟུང་བ་ཡིན་ལ། དེ་ལས་གཞན་པ་ནི་མཚན་མ་ངེས་པར་མ་བཟུང་བ་ཡིན་ནོ། །དེ་ལ་དོགས་པ་ཞེས་བྱའོ།། གང་དུ་མཚན་མ་ངེས་པར་མ་བཟུང་བ་ནི་དཔེར་ན་ཐིབས་པོ་ལ་སོགས་པ་ལས་བུད་མེད་ཀྱི་ཡུལ་བྱུང་བ་དང༌། དེ་ཉིད་དེ་ཁོ་ན་ལས་རབ་ཏུ་བྱུང་བ་ཡང་བྱུང་བ་དེ་དག་མཐོང་བ་ལས་ཅི་འདིར་འདི་གཉིས་ཀྱིས་བྱས་པར་གྱུར་ཏོ་ཞེས་དོགས་པར་འགྱུར་གྱི་ངེས་པ་ནི་མེད་དེ་ཐ་སྙད་དུ་བྱ་བ་མ་མཐོང་བ་ཉིད་ཀྱི་ཕྱིར་མཚན་མ་ངེས་པར་མ་བཟུང་བ་ཉིད་ཀྱི་ཕྱིར་རོ། །དེ་ལྟར་བཤད་མ་ཐག་པའི་ཐ་སྙད་ཀྱི་རྩ་བར་གྱུར་པ་གསུམ་པོ་འདི་དག་གིས་སྨྲས་ནས་གཞན་གྱིས་གོ་བར་གྱུར་པ་ལ་ཉེས་པ་མེད་དེ་འདི་ལ་ཉེས་པར་མི་འགྱུར་རོ་ཞེས་བྱ་བའི་ཐ་ཚིག་གོ །དེ་ལ་ཡང་མཐོང་བ་ལ་མཐོང་བ་དང༌། ཐོས་པ་ལ་ཐོས་པ་དང༌། དོགས་
པ་ལ་དོགས་སོ་ཞེས་སྨྲ་བར་བྱའི་གཞན་དུ་ན་ཉེས་པར་འགྱུར་རོ་ཞེས་རྟོགས་པར་བྱའོ། །ཕ་རོལ་པོས་དྲིས་པ་ལ་ལན་ཇི་ལྟར་སྦྱིན་པར་བྱ་ཞེ་ན། གཞན་གྱིས་གང་དྲིས་དེ་ཉིད་བརྗོད་པར་བྱ། །ཞེས་པ་སྨོས་ཏེ། གཞན་གྱིས་གང་ཁོ་ན་དྲིས་པར་གྱུར་པ་དེ་ཁོ་ན་བརྗོད་པར་བྱ་སྟེ། དེ་དང་རྗེས་སུ་མཐུན་པ་བརྗོད་པར་བྱའོ་ཞེས་བྱ་བའི་དོན་ཏོ། །གཞན་ལ་གནོད་བྱའི་ཕྱིར་ནི་གཞན་དུ་མིན། །ཞེས་བྱ་བ་ལ་གཞན་གྱིས་དྲིས་པ་ཡང་གཞན་དུ་ལུང་སྟོན་པར་བྱེད་ན་ཐམས་ཅད་དུ་ཉེས་བྱས་གྱི་ཉེས་པར་འགྱུར་རོ་ཞེས་བྱ་བའི་ཐ་ཚིག་གོ །ཉིད་ནི་ངེས་པར་གཟུང་བ་དང་རིམ་པ་གཞན་ཉིད་ཡིན་ནོ། །འདིའི་དམིགས་ཀྱིས་བསལ་བ་ནི། །གསད་བྱ་བྲོས་ན་ཇི་ལྟར་གཤེད་མ་ཡིས། །ཞེས་བྱ་བ་ལ་སོགས་པ་སྨོས་ཏེ། གསད་པར་བྱ་བ་ནི་རྐུན་པོའམ་གཞན་འགའ་ཞིག་རྒྱལ་པོས་གཟུང་བར་གྱུར་པའོ། །དེ་བྲོས་པར་གྱུར་པ་ལ་གལ་ཏེ་གཤེད་མ་དེས་འཕགས་པས་འགའ་ཞིག་བྲོས་པར་གྱུར་པ་མ་གཟིགས་སམ་ཞེས་དྲིས་པ་ན། འདྲི་བ་དེ་ལ་ཅི་འདི་རྗེས་སུ་གཟུང་བའི་བློས་ཚོལ་བར་བྱེད་དམ། འོན་ཏེ་གསད་པའི་བློས་ཞེས་བརྟགས་ནས་གང་གི་ཚེ་རྗེས་སུ་གཟུང་བའི་བློས་ཞེས་ཤེས་པར་གྱུར་པ་དེའི་ཚེ་སྨྲས་པ་ལ་ཉེས་པ་ཡོད་པ་མ་ཡིན་ནོ། །འོན་ཏེ་གསད་པའི་བསམ་པས་ཡིན་ནོ་དེའི་ལན་དེའི་ཚེ་དེ་ལ་ཇི་སྐད་བརྗོད་ཅེས་བྱ་བ་ལ་སོགས་པས་འཆད་པར་བྱེད་པ་ཡིན་ཏེ། དེའི་ཚེ་དེའི་དུས་སུ་འདི་སྐད་བརྗོད་ཅེས་བྱ་བ་ནི་འདི་ཉིད་བརྗོད་པར་བྱ་ཞེས་བྱ་བའི་དོན་ཏོ། །འདི་སྐད་ཅེས་བྱ་བ་ནི་བཤད་པར་བྱ་བའི་རྣམ་པ་ལ་ལྟོས་པ་ཡིན་ལ། ཉིད་ནི་དོན་ཇི་ལྟ་བ་བཞིན་དུ་ལན་བརྗོད་པ་རྣམ་པར་དཔྱོད་པ་ཡིན་པར་བལྟ་བར་བྱའོ། །ཏུ་སཱ་མ་ནི་གོང་མ་ལས་ཁྱད་པར་དུ་བྱེད་པའི་དོན་ཏོ། །ཚུར་ཤོག་ནམ་མཁའ་འམ་ནི་སེན་མོ་མཐོང༌། །ཞེས་བྱ་བ་ལ་སོགས་པས་གསད་པར་བྱ་བ་མཐོང་བའི་དྲིས་པའི་ལན་བརྗོད་པར་བྱའོ། །ཚུར་ཤོག་འདུག་ལ་ངལ་སོ་ཤིག་ཅེས་བྱས་པ་དང༌། དེས་བརྒྱ་ལ་ཁོ་མི་འདུག་གི་དྲིས་པ་མཐོང་ངམ་ཞེས་སྨྲ་ན་དེའི་ཚེ་ནམ་མཁའ་ལ་བལྟས་ནས་ནམ་མཁའ་མཐོང་ངོ༌། །སེན་མོ་ལ་བལྟས་ནས་སེན་མོ་མཐོང་ངོ་ཞེས་བྱ་བ་དེ་ལ། གཞན་འདི་སྙམ་དུ་བདག་གིར་མ་མཐོང་ངོ་ཞེས་བྱ་བ་འདིས་བརྗོད་པ་ཡིན་ནོ་ཞེས་སེམས་པར་འགྱུར་རོ། །གལ་ཏེ་དེ་ཚིག་ཀུན་གོ་བ་ཡིན་ན་ཁོ་བོས་ཁྱོད་
ལ་ནམ་མཁའ་མཐོང་བ་དང༌། སེན་མོ་མཐོང་བ་དྲིས་པ་ནི་མ་ཡིན་གྱི་འོན་ཀྱང་གསད་པར་བྱ་བ་མཐོང་བ་ཡིན་ནོ་ཞེ་ན། དེའི་ཚེ་བརྗོད་པར་བྱ་བ། ལུས་ཅན་རྣམས་གྱིས་དེ་ཉིད་མ་མཐོང་ངོ༌། །ཞེས་བྱ་བ་སྨོས་པ་ཡིན་ནོ། །ལུས་ཡོད་པའི་ཕྱིར་ན་ལུས་ཅན་ཏེ་ལུས་ཅན་རྣམས་ཀྱིས་དེ་ཉིད་བདག་ལ་བསམས་ནས་ཁྱོད་ཀྱི་མི་མཐོང་ངོ་ཞེས་བྱས་པ་ན་གཞན་འདི་ལ་ཡང་གསད་པར་བྱ་བའི་དབང་དུ་བྱས་ནས་འདིས་དེ་སྐད་དུ་བརྗོད་པ་ཡིན་ནོ་སྙམ་དུ་སེམས་པར་འགྱུར་རོ། །དེ་ལ་སོགས་པའི་ཐབས་ནི་དེ་ལྟ་བུ་ལ་སོགས་པའི་རྣམ་པས་གཞན་དང་གཞན་གྱི་རྗེས་སུ་འབྲངས་ནས་སྨྲས་ན་ཉེས་པ་ཡོད་པ་མ་ཡིན་པར་སྔར་བཤད་པ་ཡིན་ནོ་ཞེས་བྱ་བའི་དོན་ཏོ། །དོན་ཅིའི་ཕྱིར་ཞེ་ན། གཙེས་པ་རྣམས་ནི་ཡོངས་སུ་བསྲུང་ཕྱིར་རོ། །ཞེས་བྱ་བ་སྨོས་ཏེ། གཙེས་པའི་སེམས་ཅན་རྣམས་ཡོངས་སུ་བསྲུང་བའི་ཕྱིར་ཡིན་གྱི་གཞན་ལ་གནོད་པའི་བསམ་པས་ནི་མ་ཡིན་ནོ་ཞེས་བྱ་བའི་དོན་ཏོ། །ད་ནི། བརྫུན་དུ་སྨྲ་བའི་རྣམ་པའི་དབྱེ་བ་སྨྲས། །ཞེས་བྱ་བས་མཇུག་སྡུད་པར་བྱེད་པ་ཡིན་ཏེ། བརྫུན་དུ་སྨྲ་བའི་རྣམ་པའི་རབ་ཏུ་དབྱེ་བ་སྟེ་རྣམ་པ་དུ་མ་གང་ཡིན་པ་དེ་ནི་སྨྲས་པ་ཡིན་ནོ། །འདིས་ནི་འདི་སྐད་དུ། དངོས་གཞིའི་ཉེས་པ་དང༌། ཉེས་བྱས་ཀྱི་ཉེས་པའི་དབྱེ་བ་རྣམ་པ་དུ་མར་རབ་ཏུ་བསྟན་ཏོ་ཞེས་བཤད་པར་འགྱུར་རོ། །དེ་མ་ཐག་ཏུ་ད་ནི་ད་ལྟར་རོ། །བརྫུན་དུ་སྨྲ་བ་ནི་བརྫུན་དུ་སྨྲས་པའོ། །བརྫུན་དུ་སྨྲ་བ་དེའི་ཕྱོགས་སུ་གཏོགས་པ་བརྗོད་པར་བྱ། སྨྲ་བར་བྱ། ཡིད་ཀྱི་ཉེས་པར་བཤད་པར་བྱའོ་ཞེས་བྱ་བའི་ཐ་ཚིག་གོ །ནིའི་སྒྲ་ནི་དོན་འདི་ཉིད་ཁྱད་པར་དུ་བསྟན་པའི་ཕྱིར་རོ། །དེ་ཡང་བྱ་བའི་ཚུལ་དང་བྱ་བ་མ་ཡིན་པའི་ཚུལ་ལོ། །དེ་ལ་བྱ་བའི་ཚུལ་ལ་མི་བྱེད་པ་དང༌། བྱ་བ་མ་ཡིན་པའི་ཚུལ་ལ་བྱེད་པ་དག་ནི་ཐམས་ཅད་དུ་ཡིད་ཀྱིར་འགྱུར་རོ། །དེ་ད་དྲིས་ན་ཆོས་བཞིན་དུ་ནི་སླར་སྨྲོས་ཤིག་ཅེས་བྱ་བ་ལ་སོགས་པས་སྟོན་པར་བྱེད་པ་ཡིན་ཏེ། དངོས་པོ་ཅུང་ཞིག་འགའ་ཞིག་གིས་དྲིས་པར་གྱུར་པ་ན་སླར་སྨྲ་བར་བྱེད་པ་དང༌། ལན་གདབ་པར་བྱའོ་ཞེས་བྱ་བའི་བར་དུའོ། །ཁྱད་པར་ཇི་ལྟ་བུ་ཞེ་ན། ཆོས་བཞིན་དུ་ཞེས་སྨོས་ཏེ། ཆོས་བཞིན་ནི། ཆོས་ཀྱི་རྗེས་སུ་མཐུན་པའོ། །འོན་ཀྱང་མི་སྨྲ་བར་འདུག་པས་ནི་མ་ཡིན་ནོ། །ཅིའི་ཕྱིར་ཞེ་ན། གཙོ་བའི་ཕྱིར་ནི་ཞེས་བྱ་བ་སྨོས་པ་ཡིན་ནོ། །གཙོ་བའི་ཕྱིར་འགལ་བའི་ལན་གྱི་ཚིག་ནི་གཞན་
གྱིས་གང་དྲིས་ཞེས་བྱ་བ་ལ་སོགས་པས་སྔར་བཀག་པ་ཁོ་ན་ཡིན་ནོ། །འདིར་ནི་གཙེ་བའི་ཕྱིར་ཅང་མི་སྨྲ་བར་གྱུར་བ་དགག་པའི་ཕྱིར་སྨྲ་བ་ཞེས་བྱེ་བྲག་ཏུ་བྱས་པ་ཡིན་ནོ། །དང་ནི་འགལ་བའི་ཚིག་འབའ་ཞིག་མི་སྨྲ་བ་མ་ཡིན་གྱི་འོན་ཀྱང་མི་སྨྲ་བ་ཁོ་ནས་ཀྱང་འདུལ་བར་མི་བྱའོ་ཞེས་སྡུད་པར་བྱེད་པ་ཡིན་ནོ། །དེ་བཞིན་དུ་མཁན་པོ་དང་སློབ་དཔོན་དང་རྒྱལ་པོའི་བཀའ་མཉན་པར་བྱ་བ་ཡིན་ནོ། །ཅི་དེ་ལྟ་བུས་སམ་འོན་ཏེ་ཚིག་དེ་དག་འདུལ་བ་དང་ལྡན་པ་ཡིན་ནམ་འོན་ཏེ་མ་ཡིན་ཞེས་དཔྱད་པར་བྱ། །དེ་ཇི་ལྟར་བྱ་ཞེ་ན་སྨྲས་པ། རིགས་པ་ཡིན་ན་མཉན་ཏེ་འདུལ་བ་དང་རྗེས་སུ་མཐུན་པ་ཡིན་ཞེས་བྱ་བའི་ཐ་ཚིག་གོ །གལ་ཏེ་དཔྱད་པ་ན་འདུལ་བ་དང་རྗེས་སུ་མཐུན་པ་མ་ཡིན་པ་དང་འདུལ་བ་དང་འགལ་བར་གྱུར་པ་དེའི་ཚེ་བརྡ་སྤྲད་པ་སྟེ། ལན་གྱི་ཚིག་མི་རིགས་པ་དང་རུང་བ་མ་ཡིན་ནོ་ཞེས་རབ་ཏུ་སྦྱིན་པར་བྱའི་ཅང་མི་སྨྲ་བའི་བྱ་བ་དང༌། ཡན་འགལ་བའི་ཚིག་གི་ལན་གདབ་པར་མི་བྱའོ། །དེ་བཞིན་དུ་དགེ་འདུན་གྱི་གནས་བརྟན་གྱི་བཀའ་ཡང་མཉམ་པར་བྱའོ། །དགེ་འདུན་གྱི་གནས་བརྟན་སྨོས་པས་དགེ་འདུན་ཡང་བསྡུས་པ་ཡིན་ལ། དགེ་འདུན་གྱིས་བསྐོས་པའི་དགེ་སྐོས་ཀྱང་ཡིན་ཏེ། གལ་ཏེ་སངས་རྒྱས་བཅོམ་ལྡན་འདས་མངོན་སུམ་དུ་གྱུར་པའི་ནི་དཔྱད་པར་མི་བྱ་བ་ཡིན་ལ། གལ་ཏེ་ལྐོག་ཏུ་གྱུར་པ་ཉིད་ཡིན་ན་ནི་བཀའ་གཞན་དག་གིས་རྣམ་པར་དཔྱད་ཅིང་གལ་ཏེ་མཚུངས་པར་གནང་ན་ནན་ཏན་དུ་བྱ་ཞིང༌། གལ་ཏེ་གཞན་དུ་ན་སྨྲ་བ་པོ་ལ་སྔ་མ་བཞིན་དུ་བརྡ་སྤྲད་པར་བྱའོ། །དེ་ལ་བླ་མ་ཞེས་བྱ་བས་ནི་སློབ་དཔོན་གཟུང་བ་ཡིན་ཏེ། མཁན་པོ་མངོན་སུམ་དུ་སྨོས་པའི་ཕྱིར་རོ། །རྒྱལ་པོ་ནི་འགྲོ་བའི་དབང་ཕྱུག་ལ་བྱའོ། །དང་ནི་སྡུད་པར་བྱེད་པ་ཡིན་ནོ། །དེ་བཞིན་དུ། སྐྱེ་བོ་རྣམས་ལ་འདྲེ་སྐད་སྐད་ངན་དང༌། །ཞེས་བྱ་བ་ལ་སོགས་པ་ལ། བདག་སྟེ་རང་ཉིད་ཀྱིས་བསྡིགས་པར་མི་བྱ་ཞིང་གཞན་ཏེ་ཕ་རོལ་པོས་ཀྱང་མི་བྱའོ། །རྣམ་པ་གང་གིས་ཤེ་ན། སྨྲས་པ་འདྲེའི་སྐད་ནི་འདྲེ་སྐད་དེ་འདྲེའི་སྐད་དེ་དང་འདྲ་བའི་སྐད་ངན་ནི་སྐད་ཀྱི་བྱེ་བྲག་ཡིན་ལ་དེ་ནི་འདྲེ་སྐད་སྐད་ངན་ཡིན་ཏེ་དེས་སོ། །དཔེར་ན་མུན་ཁུང་དུ་ཞུགས་ནས་གཞན་འཇིགས་པ་སྐྱེད་པའི་དོན་དུ་འདྲེ་སྐད་དང་འདྲ་བའི་སྒྲ་འདོན་པར་མི་བྱ་བ་དང༌། གཙིགས་པ་དང་འདྲ་བའི་
མཆེ་བ་ནི་མཆེ་བ་གཙིགས་པ་སྟེ། རྣམ་པར་འགྱུར་བའི་མཆེ་བ་ཅན་ཞེས་བྱ་བའི་ཐ་ཚིག་གོ །གཟུགས་མི་སྡུག་པ་བརྗོད་ཅིང་སྨྲ་བ་དང་སྒྲོགས་པས་ཕ་རོལ་པོ་ལ་འཇིགས་པ་བསྐྱེད་པའི་དོན་དུ་དེ་ལྟ་བུར་གྱུར་པའི་འདྲེའི་གཟུགས་ཉིད་དང༌། ཁྱོད་ཟོས་པར་འགྱུར་རོ་ཞེས་བྱ་བའི་སྒྲ་དེ་དག་ནི་འདྲེ་སྐད་སྐད་ངན་དང༌། མཆེ་བ་གཙིགས་པ་མི་སྡུག་བརྗོད་པ་ཡིས། །ཞེས་བྱ་བའི་དོན་ཡིན་ནོ། །ཅི་རྣམ་པ་ཐམས་ཅད་དུ་ཉེས་པར་འགྱུར་རམ་ཞེ་ན། ཅི་སྟེ་ཕན་ཕྱིར་བྱས་ན་ཉེས་པ་མེད། །ཅེས་བྱ་བ་སྨོས་ཏེ། འདྲེ་སྐད་ལ་སོགས་པ་དེ་དག་བརྗོད་པ་ཕན་པའི་ཕྱིར་བྱས་ན་ནི་གལ་ཏེ་འདི་ལྟར་གྱུར་བའི་འདྲེ་ནི་ཐ་དད་པར་གནས་པ་དང༌། ལེ་ལོས་གནོད་པར་གྱུར་པ་དག་ཟ་བར་བྱེད་པ་ཡིན་ནོ་ཞེས་ཡང་དག་པར་རིག་པར་བྱ་བའི་དོན་ཡིན་ཏེ། འབྲས་བུ་ལ་བསམས་ནས་ཐབས་བརྗོད་པ་ལ་ཉེས་པ་ཡོད་པ་མ་ཡིན་ནོ། །འདི་འཇིགས་པ་སྐྱེད་པའི་ཚུལ་ཉིད་ཡིན་པའི་ཕྱིར་སྲོག་གཅོད་པའི་ཕྱོགས་སུ་གཏོགས་པ་ཉིད་ཡིན་ཏེ། །ཚིག་གི་བདག་ཉིད་ཡིན་ནོ་ཞེས་བྱ་བའི་དབང་དུ་བྱས་ནས་དེ་འདིར་བཀོད་པ་ཡིན་ནོ། །དེ་བཞིན་དུ། རྒྱལ་གཟུགས་པ་དང་མན་འདོར་མི་སྨྲ་བཅས། །དེ་དག་མ་གནང་ཞེས་བྱ་བ་ལ་རྒྱལ་ལ་སོགས་པས་འཛུགས་པ་ནི་རྒྱལ་གཟུགས་པ་སྟེ། རྒྱལ་ལ་སོགས་པས་ངེས་པ་ཡིན་ནོ། །དཔེར་ན་གལ་ཏེ་འདི་ལྟར་གྱུར་ན་བདག་གི་ཡིན་གྱི་དེ་སྟོན་ཅིག་ཅེས་བྱ་བ་ལྟ་བུའོ། །མནའ་ནི་མནའ་འདོར་བར་བྱེད་པའོ། །ཆེ་གེ་མོའི་ཞབས་ལ་རེག་གི་ཞེས་བྱ་བ་ལ་སོགས་པ་ལྟ་བུའོ། །མི་སྨྲ་བ་ནི་སྨྲ་བ་ལས་ཐམས་ཅད་དུ་ལྡོག་པའམ་ཡི་དམ་དུ་བྱས་པའི་ཚུལ་ཡིན་ནོ། །མི་སྨྲ་བ་དང་བཅས་པས་འཇུག་པ་ནི་མན་འདོར་མི་སྨྲ་བཅས་པ་སྟེ། དེ་དག་ཐམས་ཅད་མ་གནང་བ་ཡིན་ནོ། །གང་གི་ཕྱིར་རབ་ཏུ་བྱུང་བ་ལ་ད་དག་ཚུལ་མ་ཡིན་ཏེ། གང་རྒྱལ་གཟུགས་པ་ནི་ཁྱིམ་པའི་ཆོས་ཀྱི་དབང་དུ་བྱས་པ་ཡིན་ལ། རབ་ཏུ་བྱུང་བ་ཡིན་པ་དེ་བས་ན་མན་འདོར་པ་ཚུལ་དང་མི་མཐུན་པ་ཡིན་ཏེ། སྡོམ་ཅན་དག་བརྫུན་སྨྲ་བ་ནི་མན་འདོར་བའི་སྒོ་ནས་བདག་ཉིད་བདེན་པར་སྨྲ་བར་སྒྲུབ་པར་བྱེད་དོ། མི་སྨྲ་བ་ནི་མུ་སྟེགས་ཀྱི་རྒྱལ་མཚན་ཡིན་པའི་ཕྱིར་སྤང་བར་བྱ་བ་ཡིན་ནོ། །ལམ་དུ་ཞུགས་པ་ནི་ཇི་ལྟར་བྱ་བ་ཡིན་ཞེ་ན། མི་སྨྲ་བའི་དངོས་པོ་ནི་མི་སྨྲ་བ་
ཉིད་དུ་བྱའི། བུད་མེད་ལ་སོགས་གཏམ་ངན་མི་བྱ་སྟེ། །བུད་མེད་ཀྱི་ཡུལ་གྱི་གཏམ་མ་མ་ཟས་ལ་སོགས་པའི་གཏམ་ནི་འདོད་ཆགས་ཀྱི་རྗེས་སུ་མཐུན་པ་ཉིད་ཡིན་པས་མི་བྱ་ཞིང༌། སྐྱོ་བ་དང་རྗེས་སུ་མཐུན་པ་ཡང་བྱ་བ་མ་ཡིན་པ་དེའི་ཕྱིར་གཏམ་ངན་གྱི་ཚིག་བྱས་པ་ཡིན་ནོ། །སོགས་པའི་སྒྲ་ནི་དེ་ལྟ་བུའི་རིགས་ཅན་ཐམས་ཅད་ཡོངས་སུ་གཟུང་བའི་ཕྱིར་རོ། །ཡང་གི་སྒྲ་ནི་ཚིག་གི་ཁ་བསྐང་བའོ། །གང་ལམ་ལ་སོགས་པ་འགའ་ཞིག་ཏུ་ངལ་བ་སོ་བ་དེར། གུས་པ་སྟེ་མོས་པས་སངས་རྒྱས་བཅོམ་ལྡན་འདས་ཀྱི་ཚིགས་སུ་བཅད་པ་བཀླག་པར་བྱའོ། །རྒྱུད་གསུམ་ཚོགས་པར་གྱུར་པ་ནི་རྒྱུད་གསུམ་པ་སྟེ། དེ་ལས་སྤྱན་དྲང་བ་དང་གཤེགས་སུ་གསོལ་བ་དང༌། བར་དུ་མདོ་འདོན་པ་ནི་རྒྱུད་གསུམ་པ་མེད་ན་དེས་ལུང་གི་ཚིགས་སུ་བཅད་པ་བཀླག་པར་བྱའོ། །གཙུག་ལག་ཁང་དུ་གནས་པར་གྱུར་ན་གཙུག་ལག་ཁང་གི་བདག་པོ་དང་ལྷ་ཉིད་ཀྱི་ཆེད་དུ་ཚིགས་སུ་བཅད་པ་གཉིས་བཀླག་པར་བྱ་སྟེ། འདི་དག་ཐམས་ཅད་དེའི་རྗེས་སུ་འབྲངས་ནས་ཤེས་པར་བྱའོ། །འོན་ཏེ་ལྷ་གཞན་གྱི་རྟེན་མཐོང་བར་གྱུར་པ་དེའི་ཚེ་ཇི་ལྟར་བྱ་བ་ཡིན་ཞེ་ན། སེ་གོལ་བརྡབས་ཏེ་དེར་ཡང་ཚིགས་བཅད་ཀླག །ཅེས་བྱ་བ་སྨོས་ཏེ། དེ་ལ་ལྷ་སྟེགས་སུ་ཞུགས་པ་ན་སེ་གོལ་བརྡ་བྱས་ནས་བཙམ་པར་བྱ་ཞིང་ཞེས་བྱ་བ་ལ་སོགས་པའི་ཚིགས་སུ་བཅད་པ་བཀླག་པར་བྱའོ། །དང་ནི་ཐམས་ཅད་དུ་མཚུངས་པར་སྡུད་པར་བྱེད་པ་ཡིན་ལ། ཡང་ན་ཞེས་བྱ་བ་ནི་ཚིག་ཉེ་བར་དགོད་པ་ཡིན་ནོ། །དེ་ལ་མཛའ་བོ་འབྱེད་པར་བྱེད་པ་སྤང་བར་བྱའོ། །འདིས་ནི་འདི་སྐད་དུ་ཕྲ་མ་མི་བྱའོ་ཞེས་བསྟན་པར་འགྱུར་རོ། །དེ་བཞིན་དུ་ཚིག་རྩུབ་མོ་སྤང་བར་བྱ་སྟེ། ཚིག་རྩུབ་མོ་ནི་ཕན་པ་མ་ཡིན་པའི་ཚིག་ཡིན་ནོ། །དེ་བཞིན་དུ་སྐྱོན་ནས་བརྗོད་པར་མི་བྱ་སྟེ། དཔེར་ན་ཁྱོད་ནི་དམངས་རིགས་ལས་རབ་ཏུ་བྱུང་བ་ཡིན་ནོ་ཞེས་བྱ་བ་ལྟ་བུ་དེ་དག་ནི་སྤང་བར་བྱ་བ་ཡིན་ནོ། །དང་ནི་སྤང་བར་བྱ་བའི་སྒྲ་རེ་རེ་ལ་སྦྱར་བར་བྱ་བའི་དོན་ཏོ། །འདུལ་བ་ལས་ཕྲ་མ་ལ་སོགས་པ་བྱས་པས་དགེ་ཚུལ་དག་ལ་ཉེས་བྱས་སུ་འགྱུར་བར་གསུངས་པ་མ་ཡིན་ནམ། དེ་ཇི་ལྟར་ན་ཡིད་ཀྱིར་འགྱུར་ཞེ་ན། དེའི་ཕྱིར། དབྱེ་བའི་འདུལ་བ་ལས་གསུངས་ཉེས་བྱས་གང༌། །ཞེས་བྱ་བ་ལ་
སོགས་པ་སྨོས་ཏེ། འདུལ་བ་ལས་ཉེས་པའི་དབྱེ་བ་གང་གསུངས་པ་གང་ཡིན་པ་འདིར་ཉེས་བྱས་ཀྱི་དབྱེ་བར་བྱས་པ་དེ་ནི་ཡིད་ཀྱི་ཉེས་བྱས་ཀྱི་དབང་དུ་བྱས་ནས་ཉེས་བྱས་ཀྱི་ཉེས་པ་བསྟན་པ་ཡིན་གྱི་བཤགས་པར་བྱ་བ་དག་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དེ་ཉིད་ཀྱི་ཕྱིར་གཞན་ཉིད་ནི་མ་ཡིན་ཏེ་ཉེས་བྱས་ནི་སྨད་པར་བྱ་བ་ཡིན་ནོ་ཞེས་བསྟན་པར་འགྱུར་རོ། །དགེ་ཚུལ་གྱི་ཚིག་ལེའུར་བྱས་པ་ལས་བརྫུན་དུ་སྨྲ་བ་ལས་སླར་ལྡོག་པ་སྟེ་བསླབ་པའི་གཞི་བཞི་པའོ།། །།འབྲས་བུ་ལ་སོགས་པ་ཁུ་བ་མནན་པ་ནི་ཞེས་བྱ་བ་ལ་སོགས་པས་བསླབ་པའི་གཞི་ལྔ་པ་འཆད་པར་བྱེད་དེ། དེ་ལ་དང་པོར་མྱོས་པར་འགྱུར་བའི་རང་གི་ངོ་བོ་བསྟན་པར་བྱ་སྟེ། དགག་པའི་ཡུལ་ཉིད་ཡིན་པའི་ཕྱིར་རོ། །དེ་ལ་མྱོས་པར་བྱེད་པ་ནི་རྣམ་པ་གཉིས་ཏེ། འབྲས་བུའི་ཆང་དང༌། འབྲུའི་ཆང་ངོ༌། །དེ་ལ་འབྲས་བུའི་ཆང་བཤད་པར་བྱ་སྟེ། །འབྲས་བུ་དང་པོར་བྱས་པ་གང་ཡིན་པ་ཞེས་བྱ་བ་ནི་འབྲས་བུ་ལ་སོགས་པ་སྟེ། དེ་བཙིར་བའི་ཁུ་བ་མནན་ཞིང་ཡོངས་སུ་སྦྱར་བ་ནི་འབྲས་བུའི་ཆང་ཡིན་ནོ་ཞེས་མྱོས་བྱེད་ཤེས་པ་དག་སྨྲའོ། །དེའི་དབྱེ་བ་དག་སྟོན་པ་ལ། རྒུན་ཆང་བུ་རམ་གྱི་ཆད་ཞེས་བྱ་བ་ནི་རྒུན་ཆང་དང་བུ་རམ་གྱི་ཆང་དང་དེ་དང་འདྲ་བ་ནི་རྒུན་ཆང་བུ་རམ་ཆང་འདྲ་སྟེ། རྒྱུན་ཆང་དང་བུ་རམ་ཆང་དུ་བྱས་པ་ནི་ཆང་ཡིན་ལ་བུ་རམ་ཤིང་གི་ཆང་དུ་བྱས་པ་ཡང་ངོ༌། །དེ་དང་འདྲ་བ་ནི་ན་ལི་ཀེ་ར་ལ་སོགས་པ་དང༌། མེ་ཏོག་གི་ཆང་དག་ཡིན་ནོ། །དེའི་སྒྲ་ནི་ཕྱིས་པར་རིག་པར་བྱའོ། །དེ་ལྟ་བུར་གྱུར་པའི་བཅོས་པའི་ཆང་བསྟན་ནས་འབྲུའི་ཆང་གི་རང་གི་ངོ་བོ་འབྲུ་བཏགས་མནན་ལས་གྱུར་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཀོ་ཏྲ་བ་ལ་སོགས་པའི་འབྲུ་བཏགས་པ་དང་གཞན་དག་ཀྱང་རུང་བ་རྩ་བ་ལ་སོགས་པའི་སྨན་དང༌། མནན་པར་གྱུར་པ་ནི་འབྲུའི་ཆང་དུ་འགྱུར་རོ་ཞེས་བྱ་བའི་དོན་ཏོ། །ནིའི་སྒྲ་ནི་གོང་མ་ལས་ཁྱད་པར་དུ་བྱ་བ་དང༌། རིམ་པ་གཞན་དུའི་དོན་ཏོ། །རྣམ་པ་དེ་གཉི་ག་ཡང་རྩྭའི་མཆོག་མ་ནི་རྩྭ་མཆོག་སྟེ། ཕྲ་མོ་བསྙུགས་པ་དེས་ཀྱང་བཏུང་བར་མི་བྱའོ་ཞེས་བྱ་བའི་ཐ་ཚིག་གོ །བཏུང་བར་མི་བྱ་བ་དེ་ཁྱད་པར་ཇི་ལྟ་བུ་ཞེ་ན། མྱོས་འགྱུར་ཞེས་སྨོས་ཏེ། མྱོས་པར་འགྱུར་བ་ཞེས་བྱ་བའི་ཐ་ཚིག་གོ །རྩྭ་མཆོག་ཙམ་ཡང་ཞེས་བྱ་བའི་ཚིག་ནི་ཐལ་ཆེས་པ་སྤང་བའི་ཕྱིར་ཏེ། རྫས་ཀྱི་ནུས་པ་ཡོངས་
སུ་ཤེས་པར་མི་ནུས་པའི་ཕྱིར་རོ། །དེ་ལ་བཅོས་པའི་ཆང་དང་སྦྱར་བའི་ཆང་མྱོས་པར་བྱེད་པ་བག་མེད་པའི་གནས་ལས་སླར་ལྡོག་པར་བགྱིའོ་ཞེས་བྱ་བའི་བཅས་པ་ཅིའི་ཕྱིར་ཞེ་ན། དེའི་དགོས་པ། འབྲུ་ཆང་འབྲས་བུའི་ཆང་གཉིས་སྨོས་པ་ནི། །ཞེས་བྱ་བ་ལ་སོགས་པ་སྟོན་པར་བྱེད་དེ། འབྲུ་ཆང་འབྲས་བུའི་ཆང་ཞེས་བྱ་བ་ནི་དེ་ལྟ་བུ་གཉིས་བསྟན་ཞིང་གཉིས་སྨོས་པ་ནི་དངོས་པོ་བསྟན་པའོ། །དེ་ཅིའི་ཕྱིར་ཞེ་ན། ཀོ་ཏྲ་བ་ལ་སོགས་པ་དགག་ཕྱིར་རོ། །ཞེས་བྱ་བ་སྨོས་ཏེ། འབྲུའི་ཆང་དང་འབྲས་བུའི་ཆང་སྨོས་པ་ནི་ཀོ་ཏྲ་བ་ལ་སོགས་པ་དགག་པའི་ཕྱིར་ཏེ་མྱོས་པར་བྱེད་པའི་ཀོ་ཏྲ་བ་ལ་སོགས་པ་གསལ་བའི་ཕྱིར་དང༌། མྱོས་པར་བྱེད་པའི་འབྲས་བུ་གསལ་བའི་ཕྱིར་རོ་ཞེས་བྱ་བའི་ཐ་ཚིག་གོ །ཇི་སྟེ་འདི་སྐད་དུ་རྩ་བའི་ཉེས་པར་མི་འགྱུར་བའི་དབང་དུ་བྱས་ནས་མྱོས་པར་བྱེད་པ་དེ་དག་ཀྱང་ལོངས་སྤྱོད་པར་འཐོབ་པ་ཡིན་ནོ། །འབྲུའི་ཆང་དང་འབྲས་བུའི་ཆང་སྨོས་པས་ཀོ་ཏྲ་བ་ལ་སོགས་བ་གསལ་བར་གྱུར་པ་ཡིན་ཏེ། དེའི་ཕྱིར་ཀོ་ཏྲ་བ་ལ་སོགས་པས་མྱོས་པར་བྱེད་པ་ལོངས་སྤྱོད་པ་ནི་དེའི་ཕྱོགས་སུ་གཏོགས་པ་ཉིད་ཡིན་པའི་ཕྱིར་ཡིད་ཀྱིར་འགྱུར་བ་སུས་ཟློག་པར་བྱེད། དང་གི་སྒྲ་ནི་སྡུད་པར་བྱེད་པའོ། །མྱོས་པར་འགྱུར་བ་སྨོས་པ་ཅིའི་ཕྱིར་ཞེ་ན། མ་རེད་ཉམས་ཕྱིར་མྱོས་པར་འགྱུར། །ཞེས་བརྗོད་ཅེས་བྱ་བ་སྨོས་པ་ཡིན་ཏེ། དགག་པའི་ཕྱིར་ཞེས་བྱ་བར་སྦྱར་རོ། །མྱོས་པར་འགྱུར་ཞེས་སྨོས་པ་ནི་མྱོས་འགྱུར་ཞེས་བརྗོད་པ་སྟེ་མྱོས་པར་འགྱུར་བའི་སྒྲ་ཉེ་བར་གཟུང་བ་ཡིན་ནོ། །མ་རེད་པ་དང་ཉམས་པ་ནི་གང་མྱོས་བྱེད་ཀྱི་དངོས་པོར་མ་རེད་པ་དང༌། མྱོས་བྱེད་ཀྱི་དངོས་པོ་ལས་ཉམས་པ་དེ་ལ་དེ་སྐད་ཅེས་བྱའོ། །དེའི་དངོས་པོ་དེ་བཟློག་པའི་ཕྱིར་དེར་སྨྲས་པ་ཡིན་ནོ་ཞེས་བྱ་བའི་དོན་ཏོ། །དེ་དག་གང་ལོངས་སྤྱོད་པ་དེའི་ཕྱིར་འཆད་པར་འགྱུར་རོ། །བག་མེད་པའི་ཚིག་སྨོས་པ་ཅིའི་ཕྱིར་ཞེ་ན། ལྡོག་པའི་རྒྱུར་ནི་བག་མེད་པ་ཞེས་བརྗོད་ཅེས་བྱ་བ་སྨོས་ཏེ། བག་མེད་པའི་གནས་ལས་སླར་ལྡོག་པར་བགྱི་ཞེས་བྱ་བའི་བག་མེད་པའི་ཚིག་གང་ཡིན་པ་དེ་ནི་ལྡོག་པའི་རྒྱུ་སྟེ། ལྡོག་པའི་བྱེད་པའི་རྒྱུར་ཉེ་བར་བཀོད་པ་ཡིན་ནོ་ཞེས་བྱ་བའི་ཐ་ཚིག་གོ །གང་གི་ཕྱིར་མྱོས་པར་བྱེད་པའི་ལྟུང་བ་ནི་བག་མེད་པའི་གནས་སུ་གནས་པ་ཡིན་ཏེ། འདི་ལ་བག་
མེད་པ་འབྲས་བུའི་ཚུལ་དུ་ཞེས་བྱ་བས་གནས་དང་རྒྱུ་ཡིན་པ་དེའི་ཕྱིར་ལྡོག་པ་འབྲས་བུ་ཡིན་ནོ་ཞེས་བསྟན་པའི་ཕྱིར་རོ། །ད་ནི། གང་གིས་མྱོས་ཤེས་མྱོས་འགྱུར་བཏུང་བ་ནི། །ཞེས་བྱ་བ་ལ་སོགས་པས་ཉེས་བྱས་སྟོན་པར་བྱེད་དེ། མྱོས་པར་འགྱུ་བ་ཡིན་ནོ་སྙམ་དུ་འདུ་ཤེས་པ་ནི་མྱོས་འགྱུར་འདུ་ཤེས་ཏེ། དེ་གང་ལ་ཡོད་པ་དེ་ནི་མྱོས་ཤེས་ཡིན་ནོ། །བཏུང་བར་བྱ་བ་ཡིན་པས་ན་བཏུང་བ་སྟེ། མྱོས་པར་འགྱུར་བ་ཡང་དེ་ཡིན་པས་ན་མྱོས་འགྱུར་བཏུང་བའོ། །དེ་དགེ་ཚུལ་གང་གིས་མྱོས་བྱེད་དུ་འདུ་ཤེས་པས་མྱོས་པར་འགྱུར་བའི་བཏུང་བ་འཐུངས་ན་དགེ་ཚུལ་དེ་ལ་ཉེས་བྱས་ཁོ་ནར་འགྱུར་རོ། །འདུ་ཤེས་སྨོས་པས་ནི་འདི་སྐད་དུ་བསླབ་པའི་གཞི་དེ་ནི་འདུ་ཤེས་གཙོ་ཆེར་བྱེད་པ་ཡིན་ནོ་ཞེས་བསྟན་པར་འགྱུར་རོ། །ཅི་ཐམས་ཅད་དུ་འམ་ཞེ་ན་མྱོས་འགྱུར་ཞེས་སྨོས་ཏེ། གལ་ཏེ་མྱོས་འགྱུར་ཏེ་མྱོས་པར་འགྱུར་བ་དེ་ལ་ཡོངས་སུ་རྫོགས་པའི་ཉེས་བྱས་སུ་འགྱུར་རོ་ཞེས་བྱ་བའི་དོན་ཏོ། །ཉིད་ནི་ཉེས་བྱས་ཀྱི་ཉེས་པ་ཁོ་ནར་འགྱུར་གྱི་ཐ་མ་ནི་མ་ཡིན་ནོ་ཞེས་ངེས་པར་གཟུང་བའོ། །མྱོས་པར་འགྱུར་བའི་ལྟུང་བ་འབའ་ཞིག་མ་ཡིན་གྱི། འོན་ཀྱང་སྙིགས་མ་ཟ་བ་ལ་ཡང་ཉེས་པར་འགྱུར་རོ་ཞེས་སྟོན་པར་བྱེད་དེ། སྙིགས་མ་དག་ཟ་བ་ནི་སྙིགས་མ་ཟོས་པ་སྟེ། སྙིགས་མ་ཟ་བ་དེ་ལས་ཉེས་བྱས་ཀྱི་གནོད་པར་འགྱུར་ཞིང་སྤང་མ་ཟོས་པ་ཡང་ད་བཞིན་དུ་འགྱུར་རོ་ཞེས་བྱ་བར་སྦྱར་རོ། །བཅོས་པའི་ཆང་གི་ནུར་རྩི་ནི་སྙིགས་མ་ཡིན་ལ་སྦྱར་བའི་ཆང་གི་ནུར་རྩི་ནི་སྤང་མ་ཡིན་ཏེ། དེ་དག་ཟོས་ན་ཡང་ཇི་ལྟར་མྱོས་འགྱུར་འཐུངས་ན་ཡོངས་སུ་རྫོགས་པའི་ཉེས་བྱས་སུ་འགྱུར་བ་དེ་བཞིན་དུ་ཉེས་བྱས་ཀྱི་རྡོ་རྗེའི་གནོད་པར་འགྱུར་རོ་ཞེས་བྱ་བ་ནི་ཚིག་གི་ལྷག་མ་ཡིན་ནོ། །རྡོ་རྗེའི་གནོད་པ་ནི་རྡོ་རྗེའི་གནོད་པའོ། །ཉེས་བྱས་ཁོ་ནའི་རྡོ་རྗེའི་གནོད་པ་ནི་ཉེས་བྱས་རྡོ་རྗེའི་གནོད་པར་འགྱུར་ཏེ་རྡོ་རྗེས་གནོད་པ་བཞིན་དུ་ཉེས་བྱས་ཀྱི་ཉེས་པ་ཡང་གདུང་བར་བྱེད་པ་ཉིད་ཡིན་པའི་ཕྱིར་རོ། །དང་ནི་ཉེས་བྱས་སུ་སྡུད་པར་བྱེད་པའོ། །ད་ནི། གལ་ཏེ་ཕབས་དང་རྩ་བ་ལ་སོགས་པ། །མྱོས་སྐྱེད་ཟ་བ་ཆུང་བ་ཉིད་དུ་འགྱུར། །ཞེས་བྱ་བས་ཉེས་བྱས་ཆུང་བ་སྟོན་པར་བྱེད་དེ། གལ་ཏེ་ཕབས་ཀྱི་རིལ་བུ་ཟོས་ན་དགེ་ཚུལ་དེ་ལ་ཉེས་བྱས་ཆུང་བར་འགྱུར་རོ། །ནིའི་སྒྲ་ནི་སྔ་མ་ལས་ཁྱད་པར་དུ་བྱེད་
པའི་དོན་ཏེ། རྩ་བ་ལ་སོགས་པ་ཟ་ན་ཞེས་བྱ་བ་ལ་སོགས་པར་སྦྱར་རོ། །ཁྱད་པར་ཇི་ལྟ་བུ་ཞེ་ན། མྱོས་སྐྱེད་ཅེས་བྱ་བ་སྨོས་ཏེ། གལ་ཏེ་རྩ་བ་ལ་སོགས་པ་མྱོས་པ་སྐྱེད་པར་བྱེད་པ་གང་ཡིན་པ་དེ་ནི་དེ་ལྟ་བུར་གྱུར་པ་ཞེས་བྱ་བའི་ཐ་ཚིག་གོ །དེ་ལ་ཕབས་ཀྱི་རྡོག་ནི་མྱོས་པར་འགྱུར་བའི་དོན་གྱིས་བོན་གང་ཞིག་སྦྱར་བ་ཡིན་ནོ། །གང་དག་ལ་མྱོས་པར་འགྱུར་བ་མེད་པ་དེ་ཅི་བཏུང་བར་བྱ་བའམ་ཞེ་ན། གང་ལ་མྱོས་འགྱུར་རོ་དང་དྲི་ཡོད་པ། །མྱོས་འགྱུར་མེད་ཀྱང་བཏུང་བར་བྱ་བ་མིན། །ཞེས་བྱ་བ་སྨོས་ཏེ། མྱོས་པར་འགྱུར་བ་ནི་མྱོས་འགྱུར་ཏེ། མྱོས་པར་འགྱུར་བ་དེ་ཉིད་ལ་མེད་དུ་ཟིན་ཀྱང་བཏུང་བར་བྱ་བ་མ་ཡིན་ནོ། །ཅིའི་ཕྱིར་བཏུང་བར་མི་བྱ་ཞེ་ན། སྨྲས་པ། གང་ལ་མྱོས་འགྱུར་དྲི་དང་རོ་ཡོད་པ་སྟེ། མྱོས་པར་འགྱུར་པའི་དྲི་དང་རོ་རྫས་གང་དག་ལ་ཡོད་ཅིང་དེ་ལྟ་བུར་གྱུར་བ་གང་ཡིན་པ་དེ་ནི་མྱོས་པར་བྱེད་པ་མ་ཡིན་དུ་ཟིན་ཀྱང་བཏུང་བར་མི་བྱའོ། །ཀྱང་གི་སྒྲ་ནི་མྱོས་པར་འགྱུར་བ་འབའ་ཞིག་མ་ཡིན་གྱི་འོན་ཀྱང་མྱོས་པར་འགྱུར་བ་མ་ཡིན་ཡང་བཏུང་བར་མི་བྱའོ་ཞེས་བསྟན་པའི་ཕྱིར་རོ། །ནིའི་སྒྲ་ནི་གང་གི་ཕྱིར་གྱི་དོན་ཏེ་གང་གི་ཕྱིར་མྱོས་པར་འགྱུར་བ་མེད་ཀྱང་དྲི་དང་རོ་ཡོད་པ་དེའི་ཕྱིར་སྤང་བར་བྱ་བ་ཡིན་ནོ་ཞེས་བསྟན་པ་དང་རིམ་པ་གཞན་དུ་བལྟ་བར་བྱ་བའི་དོན་ཡིན་ནོ། །འདི་ལ་ཡང་ཉེས་པ་ཆུང་བར་བཤད་པར་བྱའོ། །ལུས་ལ་བསྐུ་བ་ལ་སོགས་པ་ནད་ཀྱི་གཉེན་པོའི་ཕྱོགས་ཀྱི་དོན་དུ་ནད་པ་ཁོ་ནས་བྱའི་གཞན་དག་གིས་ནི་མ་ཡིན་ནོ་ཞེས་བསྟན་པའི་ཕྱིར་དང༌། ལུས་ལ་བསྐུ་དང་ཁུར་བར་བཅང་བ་ནི། །མྱོས་འགྱུར་ནད་པ་མ་གཏོགས་མ་བྱེད་ཅིག །ཅེས་བྱ་བ་སྨོས་ཏེ། ཆང་གིས་ལུས་ལ་བསྐུ་བ་དང་ཁུར་བར་བཅང་བར་བྱའོ་ཞེས་སྡུད་པ་དེའི་ཕྱིར་གཞན་དུ་ནད་ཀྱི་རྒྱུ་མཚན་གྱིས་ཀྱང་བཏུང་བར་བྱ་བ་མ་ཡིན་ནོ་ཞེས་བཤད་པར་འགྱུར་རོ། །ཅི་སྟེ་ཡང་མྱོས་བྱེད་བཏུང་བ་ནི་བཅས་པའི་ཁ་ན་མ་ཐོ་བ་དང་བཅས་པ་དེ་ལྟ་ན་ཡང་ནད་ཀྱི་རྒྱུ་མཚན་གྱིས་ལུས་ལ་བསྡུ་བ་དང༌། ཁུར་བར་བཅང་བ་མ་གཏོགས་པ་གཞན་གྱི་དོན་དུ་མི་བྱ་སྟེ། ནད་གྱི་གཉེན་པོའི་ཕྱིར་བཏུང་བར་བྱ་བ་ཡང་མ་ཡིན་པ་དེ་ཉིད་ཀྱི་ཕྱིར། མྱོས་འགྱུར་རྩྭ་མཆོག་ཙམ་ཡང་བཏུང་མི་བྱ། །ཞེས་བརྗོད་པ་ཡིན་ནོ། །བསྐོལ་བར་
གྱུར་ཏམ་ཞེས་བྱ་བ་ལ་སོགས་པས་སྔར་བཤད་པའི་དམིགས་ཀྱིས་བསལ་བ་སྨྲས་པ་ཡིན་ཏེ། བསྐོལ་བ་དེ་མྱོས་པར་འགྱུར་བ་བསྐོལ་བར་གྱུར་པ་གང་གི་ཚེ་འཐུངས་པར་གྱུར་པ་དེའི་ཚེ་ཉེས་པ་མེད་པ་ཡིན་ནོ། །ཉིད་ནི་གང་གི་ཕྱིར་བསྐོལ་བས་མྱོས་པར་འགྱུར་པའི་དངོས་པོ་ལས་ཉམས་པར་གྱུར་པ་དེའི་ཕྱིར་འཐུངས་པ་ལ་ཉེས་པ་མེད་པ་ཁོ་ན་ཡིན་ཞེས་ངེས་པར་གཟུང་བའོ། །དེ་བཞིན་དུ་དེ་དང་ཁ་དོག་ཙམ་འདྲ་བར་གྱུར་ཏམ་ཞེས་བྱ་བ་ལ་མྱོས་པར་འགྱུར་བ་དེ་དང་ཁ་དོག་ཙམ་འདྲ་བར་གྱུར་པ་ཡང་འཐུངས་ན་ཉེས་པ་མེད་དོ་ཞེས་བྱ་བ་སྦྱར་རོ། །འམ་ནི་སྡུད་པར་བྱེད་པ་ཡིན་ནོ། །དེ་བཞིན་དུ་མ་རེད་གང་ཡིན་ཞེས་བྱ་བ་ལ་སོགས་པ་ལ་གང་ཡང་མ་རེད་པ་དང༌། ཉམས་པ་མྱོས་པར་འགྱུར་བའི་དངོས་པོ་གང་ལ་ཡོད་པ་དེ་ཡང་འཐུངས་པ་ལ་ཉེས་པ་མེད་དོ་ཞེས་བྱ་བར་སྦྱར་བར་བྱའོ། །འམ་གྱི་སྒྲ་ནི་ཀྱང་གི་སྒྲའི་དོན་ཡིན་ནོ། །གང་གི་ཕྱིར་ཞེ་ན། གང་གི་ཕྱིར་བསླབ་པའི་གཞི་འདི་ལ་མྱོས་པར་འགྱུར་བའི་རྒྱུ་སྤངས་པ་དེའི་ཕྱིར་ཉེས་པ་མེད་དོ་ཞེས་བྱ་བའི་ཐ་ཚིག་གོ །ད་ནི་མྱོས་འགྱུར་ཕྱོགས་སུ་གཏོགས་པ་ཞེས་བྱ་བ་ལ་སོགས་པས་ཡིད་ཀྱི་ཉེས་བྱས་འཆད་པར་བྱེད་དེ། འདི་ལྟ་སྟེ། བཙོང་དང༌། རི་སྒོག་དང༌། སྒོག་སྐྱ་ནི་མྱོས་འགྱུར་གྱི་ཕྱོགས་སུ་འདོད་ཅིང་སེམས་ཏེ། ཇི་ལྟར་མྱོས་པར་འགྱུར་བ་ཤིན་ཏུ་སྨད་པ་དེ་བཞིན་དུ་འདི་ཡང་ཞེས་བསྟན་པར་བྱ་བའི་ཕྱིར་རོ། །འདི་ལྟ་སྟེའི་སྒྲ་ནི་ཡང་གི་སྒྲ་ཡིན་པས་ནི་འདི་སྐད་དུ་མྱོས་པར་འགྱུར་བའི་ཕྱོགས་སུ་གཏོགས་པ་ཡིན་པ་འབའ་ཞིག་ཏུ་མ་ཟད་ཀྱི་དུས་མ་ཡིན་པའི་ཟས་ཀྱི་ཕྱོགས་སུ་གཏོགས་པ་ཡང་ཡིན་ནོ་ཞེས་བསྟན་པར་འགྱུར་རོ། །དེ་ལྟར་ཡང་ནི་ཞེས་བྱ་པ་ཉེ་བར་དགོད་པར་བྱ་བ་ཡིན་ཏེ་མྱོས་པར་འགྱུར་བ་དང་འདྲ་བར་ཤིན་ཏུ་སྨད་པར་བྱ་བ་ཉིད་ཡིན་པའི་ཕྱིར་རོ་ཞེས་དེ་ལྟར་འདུལ་བ་རྣམ་པར་འབྱེད་པ་ལས་རྣམ་པར་དཔྱད་པ་ཡིན་ནོ། །དེ་ལྟར་ཡང་བཅོམ་ལྡན་འདས་ཀྱིས་ནད་པ་ལ་རྗེས་སུ་གནང་བ་ཡིན་གྱི་གཞན་དག་ལ་ནི་ཉེས་པ་དག་ཏུ་འགྱུར་ཏེ། མྱོས་པར་བྱེད་པ་དང་འདྲ་བར་དྲེགས་པར་བྱེད་པའི་རྒྱུ་ཉིད་ཡིན་པའི་ཕྱིར་རོ། །དེ་དག་མཁས་པའི་ལུང་གིས་ནད་པ་ལ་ཞེས་བྱ་བ་ལ་སོགས་པས་དེ་སྟོན་པར་བྱེད་དེ། བཙོང་ལ་སོགས་པ་དེ་དག་གནང་བ་ནི་བཅོམ་ལྡན་འདས་ཀྱིས་བཅས་པ་མཛད་པའོ། །མཁས་པའི་ལུང་ནི་སྨན་པའི་ལུང་ལས་ཞེས་བྱ་བའི་ཐ་ཚིག་
གོ །གང་དུ་ཞེ་ན། མ་དད་མངོན་སུམ་མིན་ཞེས་བྱ་བ་སྨྲས་ཏེ། མི་མ་དད་བའི་མངོན་སུམ་མིན་ཏོ། མཐོང་བའི་ཕྱོགས་སུ་མ་ཡིན་ཏེ་དེ་ལ་སྨོད་པ་སྲིད་པའི་ཕྱིར་རོ། །དེ་ལ་ལོངས་སྤྱོད་པའི་དོན་དུ་ཇི་ལྟར་བྱ་ཞེ་ན། གཙུག་ལག་ཁང་གི་ཕྱི་རོལ་ཁྱིམ་བྱས་ལ་ཞེས་བྱ་བ་ལ་སོགས་པ་སྨོས་ཏེ། གཙུག་ལག་ཁང་གི་ཕྱི་རོལ་དུ་ཁྱིམ་བྱས་པ་ལ་ཞུགས་ནས་སོ། །ཅིའི་ཕྱིར་ཞེ་ན། ཕན་པར་བྱ་ཕྱིར་ཞེས་སྨོས་པ་ཡིན་ནོ། །ཁྱིམ་ཁྱད་པར་ཇི་ལྟ་བུ་ཞེ་ན། དབེན་པར་ཞེས་བྱ་བ་སྨོས་ཏེ། སྐབས་དང་མཐོངས་བསྒྲིབས་པར་གྱུར་པ་གང་ལ་ཡོད་པ་དེ་ནི་དབེན་པ་ཡིན་ཏེ་དེར་ཞུགས་ནས་ཞེས་བྱ་བའི་དོན་ཏོ། །དེ་ལ་ཕན་པ་བྱེད་པའི་དུས་དེར་ཡང་དགེ་འདུན་གྱི་མལ་སྟན་དག་ནད་པ་ལ་ནམ་ཡང༌། བཅོམ་ལྡན་འདས་ཀྱིས་གནང་བ་ཡང་མེད་དེ། དྲི་ངན་པས་སྨེ་བར་འགྱུར་རོ་ཞེས་བྱ་བའི་དོན་དུ་ཁོང་དུ་ཆུད་པར་བྱའོ། །ཅི་ཙམ་ན་གཙུག་ལག་ཁང་དུ་འཇུག་པར་བྱ་བ་ཡིན་ཞེ་ན། དྲི་ང་བྲལ་བར་གྱུར་ནས་དེའི་འོག་ཏུ། །ཞེས་བྱ་བ་སྨོས་ཏེ། དགེ་ཚུལ་གང་གི་ལུས་དྲི་ང་བ་དང་བྲལ་བར་གྱུར་པ་ན་སྟེ། ཞག་བདུན་དག་ན་དྲི་ང་བ་ཡང་ལུས་དང་བྲལ་བར་གྱུར་པའི་འོག་ཏུ་གཙུག་ལག་ཁང་དུ་འཇུག་ཅིང་རབ་ཏུ་འཇུག་པར་བྱའོ། །ཅིའི་ཕྱིར་ཞེ་ན། རང་གཞན་གནས་ནས་ཞེས་བྱ་བ་སྨོས་པ་ཡིན་ནོ། །ནིའི་སྒྲ་ནི་ངེས་པར་གཟུང་བའོ། །དགེ་ཚུལ་གྱི་ཚིག་ལེའུར་བྱས་པ་ལས་མྱོས་པར་བྱེད་པ་བཏུང་བ་ལས་སླར་ལྡོག་པ་སྟེ་བསླབ་པའི་གཞི་ལྔ་པའོ།། །།ད་ནི། གར་དང་གླུ་དང་བརྡུང་བར་བྱ་བ་རྣམས། །སྡོམ་ཅན་བདག་དང་གཞན་གྱིས་བྱ་བ་མིན། །ཞེས་བྱ་བ་ལ་སོགས་པས་བསླབ་པའི་གཞི་དྲུག་པ་འཆད་པར་བྱེད་པ་ཡིན་ཏེ། གར་དང་གླུ་དང་བརྡུང་བར་བྱ་བ་དག་སྡོམ་ཅན་བདག་རང་གིས་མི་བྱ་ཞིང་གཞན་གྱིས་ཀྱང་བྱ་བ་མ་ཡིན་ནོ། །གང་ཅུང་ཞིག་རྒོད་པའི་བསམ་པས་ལུས་རབ་ཏུ་སྐྱོད་པར་བྱེད་པ་ནི་གར་ཡིན་ལ། གང་ཅུང་ཞིག་དེ་ཉིད་ཀྱི་བསམ་པས་དབྱངས་ལེན་པར་བྱེད་པ་ནི་གླུ་ཡིན་ནོ། །བརྡུང་བར་བྱ་བ་དག་ནི་གང་འགའ་ཞིག་ཏུ་རྫ་རྔ་དང་རྔ་བོ་ཆེ་དག་ལ་ཐ་ན་སོར་མོ་དག་གིས་ཀྱང་རིམ་གྱིས་སམ། གོ་རིམས་མ་ཡིན་པས་རྡུང་བར་བྱེད་ཅིང་རབ་ཏུ་སྐྱོད་པར་བྱེད་པ་ཡིན་ཏེ། རང་གི་བརླ་ལ་སོགས་པ་ལ་བརྡེག་པ་ལ་སོགས་པས་ཀྱང་ཞེས་བྱ་བའི་ཐ་ཚིག་གོ །བསླབ་པའི་གཞི་འདི་ནི་འདུ་ཤེས་གཙོ་བོར་གྱུར་བ་
ཉིད་ཡིན་པས་གང་གི་ཕྱིར་བློ་སྔོན་དུ་བཏང་བས་བྱས་ན་བློ་སྔོན་དུ་སོང་བས་ཞེས་བྱ་བའི་དབང་དུ་བྱས་ནས་ཉེས་པ་ཡོད་པ་ཡིན་ནོ། །ཅི་འདི་རྒྱུ་གང་གིས་མི་བྱ་བ་ཡིན་ཞེ་ན། འདི་དག་འཁོར་བར་ཆགས་པར་བྱེད་པའི་རྒྱུ་ཞེས་བྱ་བ་སྨོས་ཏེ། འཁོར་བ་ལ་ཆགས་པ་ནི་འཁོར་བར་ཆགས་པ་སྟེ། ཀུན་ནས་ཞེན་པ་ཞེས་བྱ་བའི་དོན་ཏོ། །གར་ལ་སོགས་པ་བྱེད་པ་འདི་ནི་འདིར་རྒྱུ་སྟེ་བྱེད་པའི་རྒྱུ་ཞེས་བྱ་བའི་དོན་ཏོ། །གང་གི་ཕྱིར་གར་ལ་སོགས་པ་ལ་རབ་ཏུ་དགའ་བ་ནི་སྐྱོ་བར་མི་འགྱུར་བ་དེའི་ཕྱིར་མངོན་པར་དགའ་བ་ནི་འཁོར་བའི་རྒྱུ་ཡིན་ནོ། །དེ་ལྟ་བུར་གྱུར་པ་བྱས་ན་ཅིར་འགྱུར་ཞེ་ན། འོན་ཀྱང་ཇི་སྟེ་བྱས་ན་ཉེས་བྱས་སུ་འགྱུར་ཞེས་བྱ་བ་སྨོས་ཏེ། གང་ལ་སོགས་པ་འོན་ཀྱང་ཉེས་བྱས་སུ་འགྱུར་རོ། །འདི་ལ་ཉེས་བྱས་ཡོད་པའི་ཕྱིར་ཉེས་བྱས་དང་དགེ་ཚུལ་ལྡན་པར་འགྱུར་རོ། །འོན་ཀྱང་ཞེས་བྱ་བ་ནི་གལ་ཏེ་ཡང་འཁོར་བར་ཆགས་པའི་རྒྱུ་ཡིན་པ་དེ་ལྟ་ན་ཡང་ཞེས་བྱ་བའི་ཐ་ཚིག་གོ །བཅོམ་ལྡན་འདས་ལ་མཆོད་པའི་དོན་དུ་ཇི་ལྟར་བསྒྲུབ་པར་བྱ། །དེའི་ཕྱིར་ཡང་མི་བསྐུལ་ལམ་ཞེ་ན་སྨྲས་པ། དེ་ལ་གཞན་གྱི་དོན་ལྟ་ཞོག །བཅོམ་ལྡན་འདས་ལ་མཆོད་པ་བྱ་བའི་དོན་དང་དགོས་པ་འདིས་ཞེས་བྱ་བ་ནི་མཆོད་པའི་ཕྱིར་ཏེ། དེའི་དངོས་པོ་དེ་ལ་ཡང་མཆོད་པའི་རྒྱུ་མཚན་དུ་ཡང་བསྐུལ་བར་མི་བྱའོ། །ཇི་ལྟར་མི་བསྐུལ་ཞེས། བརྡུང་བ་དང་གླུ་ལོང་ཞེས་བྱ་བ་སྨོས་པ་ཡིན་ནོ་ཞེས་ནི་དེ་ལྟར་ཞེས་བྱ་བའི་དོན་ཡིན་ཏེ། འདི་སྐད་དུ་དེ་ལྟ་བུར་གྱུར་པའི་དངོས་ཀྱི་ཚིག་བརྗོད་པར་མི་བྱའོ་ཞེས་བསྟན་པར་འགྱུར་རོ། །དེ་བཞིན་དུ་གར་ལ་ཡང་དེ་སྐད་དུ་བརྗོད་པར་མི་བྱའོ། །འོ་ན་ཇི་ལྟར་བཅོམ་ལྡན་འདས་ལ་མཆོད་པ་བྱ་བའི་ཕྱིར་བསྐུལ་བར་བྱ་ཞེ་ན། །ལྷ་དང་ལྷ་མིན་ཞེས་བྱ་བ་ལ་སོགས་པ་སྨོས་ཏེ། ལྷ་དང་ལྷ་མ་ཡིན་ནི་ལྷ་དང་ལྷ་མིན་དབང་པོ་སྟེ། དེས་མཆོད་པའི་ཞགས་ཀྱི་རྡུལ་སངས་རྒྱས་གང་ལ་མངའ་བ་དེ་ནི་ལྷ་དང་ལྷ་མིན་དབང་པོས་མཆོད་པའི་ཞབས་རྡུལ་ཅན་ཏེ། དེ་ལ་རང་གི་བཟོས་མཆོད་པ་གྱིས་ཞེས་བྱ་བ་ནི་ཚིག་གི་ལྷག་མའོ། །འོན་ཀྱང་ཞེས་བྱ་བ་ནི་ཇི་སྟེ་ཡང་ཞེས་བྱ་བའི་དོན་ཡིན་ནོ། །གླུའི་དམིགས་ཀྱིས་བསལ་བ་ནི། ཆོས་རྣམས་དབྱངས་སུ་འདོན་ལ་ཉེས་པ་མེད། །ཅེས་བྱ་བ་ལ་སོགས་པ་ལ། །ཆོས་མཉན་པ་སྦྱིན་པའི་གླུ་ལ་ནི་ཉེས་པ་ཡོད་པ་མ་ཡིན་ནོ། །ནིའི་སྒྲ་ནི་སྔ་མ་ལས་ཁྱད་པར་དུ་བྱ་བ་དང༌། རིམ་པ་གཞན་
དུའི་དོན་ཏོ། །སྟོན་པའི་ཡོན་ཏན་བརྗོད་ཀྱང་དེ་བཞིན་ནོ། །ཞེས་བྱ་བ་ལ། ཇི་ལྟར་སྔ་མ་ལ་ཉེས་པ་ཡོད་པ་མ་ཡིན་པ་དེ་བཞིན་དུ་སྟོན་པ་བཅོམ་ལྡན་འདས་ཀྱི་ཡོན་ཏན་བརྗོད་པ་སྟེ། སྟོན་པས་ཉེ་བར་མཆོད་པ་ལ་ཉེས་པ་ཡོད་པ་མ་ཡིན་ནོ་ཞེས་བྱ་བའི་ཐ་ཚིག་གོ །གང་ཡང་དབྱངས་མི་ཤེས་པ་ཡིན་ན་ཇི་ལྟར་བྱ་ཞེ་ན། དབྱངས་ལ་མི་མཁས་དམ་པའི་ཆོས་ཀྱི་ཕྱིར། །ཞེས་བྱ་བ་ལ་སོགས་པ་སྨོས་ཏེ། དབྱངས་མི་ཤེས་པ་ནི་དབྱངས་ལ་མི་མཁས་པའི་དགེ་ཚུལ་དབེན་པར་ཞུགས་ཏེ་བསླབ་པར་བྱའོ། །ཅིའི་རྒྱུ་མཚན་གྱིས་ཤེ་ན། དམ་པའི་ཆོས་ཀྱི་ཕྱིར་ཞེས་སྨྲས་པ་ཡིན་ནོ། །ནིའི་སྒྲ་ནི་འདིར་ཡང་དབྱངས་ལ་མི་མཁས་ན་ཞེས་སྔ་མ་ལས་ཁྱད་པར་དུ་བྱེད་པའི་དོན་ཏོ། །ཉིད་ནི་དོན་གཞན་རྣམ་པར་གཅོད་པའོ། །དབེན་པར་ཞུགས་ཏེ་ཞེས་སྨོས་པ་ནི་བག་མེད་པ་རྣམ་པར་སྤང་བའི་ཕྱིར་རོ། །བསླབ་པར་བྱ་ཞེས་བྱ་བ་ནི་འདི་བསླབ་པའི་གཞི་ནི་མ་ཡིན་གྱི། གལ་ཏེ་དམ་པའི་ཆོས་ལ་བསྟོད་པས་ཉེ་བར་མཆོད་པའི་ཕྱིར་བསླབ་པ་ལ་ཉེས་པ་ཡོད་པ་མ་ཡིན་ནོ་ཞེས་བྱ་བ་དེ་ལྟ་བུའི་ཚིག་དེ་དག་ནི་མཆོག་ཏུ་ཞེས་བྱ་བར་ཤེས་པར་བྱའོ། །འདིར་གར་ལ་སོགས་པ་བདག་ཉིད་བྱེད་པ་དང༌། གཞན་བྱེད་དུ་བཅུག་ན་ཡོངས་སུ་རྫོགས་པའི་ཉེས་བྱས་སུ་འགྱུར་ལ། གལ་ཏེ་མཆོད་པའི་རྒྱུ་མཚན་གྱིས་བྱེད་ན་དེའི་ཚེ་ན་སྣད་དོ། ད་ནི་གར་ལ་སོགས་གཏོགས་པ་ཞེས་བྱ་བ་ལ་སོགས་པས་ཡིད་ཀྱིར་འགྱུར་བ་འཆད་པར་བྱེད་དེ། ཆུའི་རྔ་ལ་སོགས་པ་གང་ཡིན་པ་དེ་ནི་ཆུའི་རྔ་ལ་སོགས་པའོ། །གང་དེ་ནི་གར་ལ་སོགས་པའི་ཕྱོགས་སུ་གཏོགས་པ་ཡིན་པ་དེའི་ཕྱིར་ཡིད་ཀྱིར་འགྱུར་ཏེ། ཆུའི་ཡུལ་ལ་རྩེ་བ་ཉམས་སུ་མྱོང་བར་བྱེད་ན། ཞེས་བྱ་བའི་ཐ་ཚིག་གོ །སོགས་པའི་སྒྲ་ནི་རྒྱལ་ལ་།སོགས་པའི་བསྡུའོ། །ཆུའི་རྔ་ནི་ཆུ་ལ་བརྡུང་བ་ཡིན་ནོ། །དེ་བཞིན་དུ་ཆུ་ལ་བྱི་འཛུལ་བྱེད་པ་ནི་འོག་ཏུ་འགྲོ་བར་བྱེད་པའོ། །དེ་བཞིན་དུ་རིང་དུ་འགྲོ་བ་ཞེས་བྱ་བ་ནི་ཆུའི་ནང་དུ་ནུབ་པར་གྱུར་པ་ཉིད་ཀྱིས་དུང་འགྲོ་བཞིན་དུ་འགྲོ་བར་བྱེད་པའོ། །འབྱུང་བ་ནི་འོག་ཏུ་འཇུག་པ་ལས་སྟེང་དུ་འབྱུང་བར་བྱེད་པའོ། །དེ་བཞིན་དུ་མཆོང་བ་དང་རྒྱུག་པ་ནི་མཆོད་བ་དང་རྒྱུག་པ་སྟེ། དེ་ལ་སོགས་པ་གང་ཡིན་པ་དེ་ལ་དེ་སྐད་ཅེས་བྱའོ། །མཆོང་བ་ནི་ལྟེང་ཀ་ལ་སོགས་པའོ། །སོགས་པ་སྨོས་པས་ནི་རྐང་བ་ཕྱུང་ཞིང་ཕྱུང་ཞིང་འགྲོ་བ་འམ། བགྲད་པར་
བྱས་ནས་འགྲོ་བ་བསྡུའོ། །དེ་དག་ཐམས་ཅད་རྩེད་མོའི་རྒྱུ་མཚན་ཡིན་ན་བཀག་པ་ཡིན་ནོ། །དེ་དག་ཉེས་པའི་གཉེན་པོའི་ཕྱིར་རླུང་ལ་སོགས་པ་ལ་ཉེས་པར་མི་འགྱུར་རོ་ཞེས་བསྟན་པའི་ཕྱིར་རྩེད་མོ་སྨོས་པ་ཡིན་ནོ། །སོ་སྣང་གྱུར་ཅིང་དེ་བཞིན་སྒྲ་ཆེ་བ། །འཕགས་པས་རྟ་གང་དང་ནི་གཏམ་མི་བྱ། །ཞེས་བྱ་བ་ལ། སོ་སྣང་བར་གྱུར་བ་ནི་གསལ་པོར་གྱུར་པས་འཕགས་པ་སྟེ། རབ་ཏུ་བྱུང་བས་དགོད་པར་མི་བྱ་ཞིང་གཏམ་མི་བྱ་ཞེས་བྱ་བར་སྦྱར་རོ། །དེ་བཞིན་གྱི་སྒྲ་ནི་དེ་བཞིན་སྒྲ་ཆེ་བར་བཤད་མ་ཐག་པ་དེ་མི་བྱའོ་ཞེས་བྱ་བར་སྦྱར་བར་བྱ་བའི་ཕྱིར་རོ། །དང་ནི་སྡུད་པར་བྱེད་པ་ཡིན་ནོ། །སྒྲ་ཆེ་བ་སྨོས་པས་ཅུང་ཞིག་དགོད་པ་ལ་ཉེས་པ་མེད་པ་ཡིན་ཏེ། དེ་སྐད་དུ་ཡང་བཞིན་གྱི་མདོག་གསལ་བ་དང༌། འཛུམ་པ་སྔོན་དུ་འགྲོ་བས་ཞེས་བྱ་བ་ལ་སོགས་པ་འབྱུང་བ་ཡིན་པས་ཁ་ཤིན་ཏུ་གདངས་པར་མི་བྱའོ། །གང་གི་ཚེ་ཁ་གླལ་བར་འགྱུར་བ་དེའི་ཚེ་ཇི་ལྟར་བྱ་བ་ཡིན་ཞེ་ན། གླ་ལ་བྱུང་ན་ནི་ལག་པའམ་ཆོས་གོས་ཀྱི་གྲ་ཡང་རུང་སྟེ། ཁ་ནི་དག་བ་པར་བྱ་ཞེས་བྱ་བ་སྨོས་ཏེ། ལག་པའམ་གོས་ཀྱི་མཐའ་མ་དག་གིས་ཁ་ལེགས་པར་བཀག་སྟེ་གླལ་བར་བྱའོ། །འོན་ཏེ་འགའ་ཞིག་ཏུ་གཞན་གྱི་དབང་གིས་མི་ནུས་པ་དེའི་ཚེ་ན་ཉེས་པ་མེད་དེ། དང་ནི་མ་བསྟན་པ་སྡུད་པར་བྱེད་པ་ཡིན་ཏེ། དཔེར་ན་ཁ་གདངས་ནས་ཆུ་བཏུང་བ་དེ་ལྟ་བུའོ། །སྔར་བཤད་པའི་འབྱུང་བ་ལ་སོགས་པའི་དམིགས་ཀྱིས་བསལ་བ་ནི། སྨན་པའི་ལུང་ངམ་ཡང་ན་བསླབ་པའི་ཕྱིར། །ཞེས་བྱ་བ་ལ་སོགས་པ་སྨོས་ཏེ། ནད་པ་ལ་ཕན་པའི་དོན་དུ་སྨན་པའི་ལུང་གིས་དབེན་པའི་ས་ཕྱོགས་སུ་འབྱུང་བ་ལ་སོགས་པ་བྱས་ན་ཉེས་པ་མེད་པ་ཡིན་ཏེ། སྨན་པའི་ལུ་ང་ཁོ་ནས་རྒྱལ་བ་ལ་ཉེས་པ་ཡོད་པ་མ་ཡིན་ནོ་ཞེས་བརྗོད་པར་བྱའོ། །ཡང་ན་བསླབ་པའི་ཕྱིར་ཏེ། དེ་ལྟ་ན་ཡང་དབེན་པའི་ཕྱོགས་སུ་རྐྱལ་པ་ལ་ཉེས་པ་མེད་དོ། །ཨ་ཐའི་སྒྲ་ནི་ཡང་ན་ཞེས་བྱ་བའི་དོན་ཡིན་ནོ། །གང་དུ་བུད་མེད་སྒྲུབ་བྱེད་ཁུང་བྱེད་པ། །མུ་དེ་ཐག་རིང་དུ་ནི་སྤང་བར་བྱ། །ཞེས་བྱ་བ་ལ་གང་དུ་བུད་མེད་ཁྲུས་བྱེད་པ་དང༌། གང་དུ་སྒྲུབ་པར་བྱེད་པ་གླང་པོ་ལ་སོགས་པ་ཁྲུས་བྱེད་པའམ། ཆུ་འཐུང་བའི་མུ་དེ་ཐག་རིང་སྟེ། རིང་བ་ནས་རིང་པོར་སྤང་བར་བྱ་བ་ཡིན་ནོ། །འདོད་ཆགས་སྐྱེད་པའི་རྒྱུ་མཚན་རབ་ཏུ་བཅོམ་པར་བྱ་བའི་ཕྱིར་དང༌། ཀུན་ནས་རྩོད་
པ་ཡོངས་སུ་སྤང་བར་བྱ་བའི་ཕྱིར་ཞེས་བྱ་བའི་དགོས་པ་ཡོད་པར་རིག་པར་བྱའོ། །དགེ་ཚུལ་གྱི་ཚིག་ལེའུར་བྱས་པ་ལས་གར་ལ་སོགས་པ་ལས་སླར་ལྡོག་པ་སྟེ། བསླབ་པའི་གཞི་དྲུག་པའོ།། །།ད་ནི་དྲིའི་བྱུག་པའམ་མེ་ཏོག་ཕྲེང་བའང་རུང་ཞེས་བྱ་བ་ལ་སོགས་པས་བསླབ་པའི་གཞི་བདུན་པ་འཆད་པ་ཡིན་ཏེ། ཙན་དན་ལ་སོགས་པའི་དྲིས་རྗེས་སུ་བསྐུས་པ་དེ་ནི་དྲིའི་བྱུག་པ་སྟེ། དགེ་ཚུལ་གང་གིས་བཅངས་ན། གླེན་པ་དེ་ནི་ཉེས་བྱས་ཉིད་ཀྱིས་གཙེས་པར་འགྱུར་ཞེས་བྱ་བར་སྦྱར་བར་བྱའོ། །དེ་བཞིན་དུ་མེ་ཏོག་ཕྲེང་བ་སྟེ། བརྒྱུད་མ་དེ་ཡང་མགོ་བོ་འམ་སྐེ་ལ་བཏགས་ན་དེ་ཡང་ཉེས་བྱས་ཉིད་ཀྱིས་གཙེས་པར་འགྱུར་རོ་ཞེས་བྱ་བར་སྦྱར་རོ། །ཕྲེང་པ་ནི་མེ་ཏོག་ཙམ་གྱི་ཉེ་བར་མཚོན་པར་བྱེད་པ་ཡིན་ནོ། །དེ་ལྟར་ལུས་ལ་གུར་གུམ་ལ་སོགས་པའི་མདོག་གི་ཁ་དོག་གིས་བཅངས་པ་དེ་ཡང་གཙེས་པར་འགྱུར་རོ་ཞེས་བྱ་བར་སྦྱར་བར་བྱའོ། །གང་ལ་ཞེ་ན། ལུས་ལ་ཞས་སྨོས་པ་ཡིན་ནོ། །ཁྱད་པར་ཇི་ལྟ་བུ་ཞེ་ན། མི་གཙང་སྣོད་ཀྱི་ཞེས་བྱ་བ་ལ་མི་གཙང་བ་ནི་གཙང་བ་མ་ཡིན་པ་སྟེ། དེའི་སྣོད་དུ་གྱུར་པ་དེ་ལ་ཞེས་བྱ་བའི་དོན་ཏོ། །གཙེས་པ་ནི་རྣམ་པར་གཙེས་པ་ཞེས་བྱ་བའི་དོན་ཏོ། །ཉིད་ནི་ཉེས་བྱས་ཀྱི་ཉེས་པས་གཙེས་པ་ཁོ་ན་ཞེས་རིམ་པ་གཞན་དང་ངེས་པར་གཟུང་བ་ཡིན་ནོ། །འདི་སྐད་དུ་དགེ་ཚུལ་ཉེས་བྱས་ཀྱི་ཉེས་པར་འགྱུར་རོ་ཞེས་བསྟན་པར་འགྱུར་རོ། །དེ་བཞིན་དུ། དག་བྱེད་དང་ནི་ཆོས་གོས་བདུག་པ་དང༌། །ཞེས་བྱ་བ་ལ་སོགས་པ་ལ། དག་བྱེད་དང་ཆོས་གོས་ལ་སྤོས་ཀྱིས་བདུག་པ་དང༌། སེན་མོ་བདར་བས་འཆོས་པ་དང༌། མིག་སྨན་དང༌། མཆུ་དམར་པོར་བྱེད་པ་དང༌། དེ་བཞིན་དུ་ལོང་མོ་ཡན་ཆད་དེ་གོང་དུ་སོ་ཕག་གིས་བདར་ཞིང་དྲི་མ་མེད་པར་སྦྱངས་པ་ཞེས་བྱ་བ་ལ་སོགས་པ་དེ་ལྟ་བུ་ལ་སོགས་པ་ཀུན་དུ་སྤྱོད་པ་ན་ཉེས་བྱས་སུ་འགྱུར་རོ། །ཅི་ཐམས་ཅད་དུའམ་ཞེ་ན། གཡན་པ་མེད་པར་ཞེས་སྨྲས་ཏེ། གལ་ཏེ་གཡན་པ་ཡོད་པ་དེའི་ཚེ་ཉེས་པར་མི་འགྱུར་རོ། །དག་བྱེད་ཅེས་བྱ་བ་ནི་རྫས་དྲི་བཟང་བ་ཅན་གྱིས་དག་བྱེད་དུ་བྱས་པ་མགོ་ལ་བཅངས་པའོ། །གཞན་ཡང་ཆོས་གོས་ལ་དྲི་བཟང་པོས་བདུག་པར་བྱེད་པ་དང༌། སེན་མོ་འཆོས་པ་ཞེས་བྱ་བ་ནི་འཚེར་བར་བྱེད་པའི་བསམ་པས་ཡིན་གྱི་དྲི་མ་བསལ་བར་བྱེད་པའི་
ཕྱིར་ནི་མ་ཡིན་ནོ། །གཞན་ཡང་མཆུ་དམར་པོར་བྱེད་པ་ནི་སོ་རྩི་ཟབ་ལ་སོགས་པས་སོ། །གཡན་པ་ནི་ཚིག་རླུང་དང་ཁྲག་ལ་སོགས་པའི་ཉེས་པར་མཚོན་པར་བྱེད་པ་ཡིན་ཏེ། ལོང་མོའི་འོག་མན་ཆད་ལ་ནི་ཉེས་པ་མེད་དོ། །ཉེས་བྱས་ཉིད་ཅེས་བྱ་བ་ཉིད་ནི་ལྷག་མ་ཡང་མ་ཡིན་ལ་ཡིད་ཀྱིར་འགྱུར་བ་ཡང་མ་ཡིན་ནོ་ཞེས་བཤད་པའི་ཕྱིར་རོ། །བཅས་པའི་ཁ་ན་མ་ཐོ་བ་ཉིད་ཡིན་པའི་ཕྱིར་དྲིའི་བྱུག་པ་ཉེས་བྱས་སུ་འགྱུར་བ་དེ་ལྟ་ན་ཡང་ནང་པ་དེས་དབེན་པར་འདུག་སྟེ་ནད་ལ་ཕན་པའི་ཕྱིར་ཙན་དན་ལ་སོགས་པས་བསྐུ་བར་བྱའོ། །ཅིའི་ཕྱིར་ཞེ་ན། སྤྲས་པ་འཇིག་རྟེན་གྱི་མ་དད་པ་ནི་འཇིག་རྟེན་མ་དད་པར་འགྱུར་བ་སྟེ། དེ་སྤང་བར་བྱ་བའི་ཕྱིར་རོ། །གང་གི་ཕྱིར་དེ་འདྲ་བ་མཐོང་བར་འགྱུར་ན་མ་དད་པ་སྟེ། དད་པ་མ་ཡིན་པ་སྐྱེ་བར་འགྱུར་བ་དེའི་ཕྱིར་ཡོངས་སུ་སྤང་བར་བྱ་བ་ཡིན་ནོ། །གང་གི་ཚེ་ཆོས་སྟོན་པ་ལ་སོགས་པས་ཉེ་བར་འཁོད་པ་ན་ཡོན་བདག་གིས་དྲི་བྱིན་ན་དེ་ཅི་ལྟར་བྱ་ཞེ་ན། དད་པ་དག་གིས་རྐང་པ་དྲིས་བསྐུས་ན་ཞེས་བྱ་བ་ལ་སོགས་པ་སྨོས་ཏེ། དད་པ་དགེ་བསྙེན་གྱིས་རྐང་པ་ལ་དྲིས་བསྐུས་ན་སྡོམ་ཅན་གྱིས་ཆོས་སྟོན་གྱི་དུས་ཕྱིས་བཀྲུ་བར་བྱའོ། །གང་གི་ཚེ་ཞེ་ན། སྨྲས་པ་ཡོན་བདག་གིས་མ་མཐོང་བར་རོ། །ནི་ནི་སྔ་མ་ལས་ཁྱད་པར་དུ་བྱེད་པའི་དོན་ཡིན་ནོ། །དེ་བཞིན་དུ་དད་པས་ཕུལ་བའི་མེ་ཏོག་དྲི་ཞིམ་པོ་ཅན་འཕགས་པ་སྟེ་རབ་ཏུ་བྱུང་བས་བསྣམ་པར་བྱའོ་ཞེས་བྱ་བར་སྦྱར་རོ། །ཅི་ཞིག་བྱས་ནས་ཤེ་ན། མིག་ལ་ཕན་ནོ་ཞེས་སྨོས་ཏེ། མེ་ཏོག་དྲི་ཞིམ་པོ་ཅན་ཐམས་ཅད་མིག་ལ་ཕན་ནོ་ཞེས་བྱ་བ་ནི་དབང་དུ་བྱས་ནས་སོ། །ཆགས་པའི་བློ་གྲོས་ནི་ཆགས་བློ་སྟེ་ཉེས་བྱས་ཆུང་བར་འགྱུར་རོ། །ད་ནི་དྲི་ལ་སོགས་པའི་སྐབས་དབྱེའོ། །ཞེས་བྱ་བ་ལ་སོགས་པ་ཡིད་ཀྱིར་འགྱུར་བ་རྗོད་པར་བྱེད་པ་ཡིན་ཏེ། དྲི་ལ་སོགས་པའི་ཕྱོགས་སུ་གཏོགས་པ་གང་ཡིན་པ་དེ་དག་གི་སྐབས་འབྱེད་པའོ། །ད་ནི་ད་ལྟར་ཏེ་ཉེས་བྱས་ཀྱི་དེ་མ་ཐག་པའི་སྐབས་སུ་ཞེས་བྱ་བའི་དོན་ཏོ། །ཆུ་ལ་སོགས་པར་གདོང་ནི་བལྟ་མི་བྱ། །ཞེས་བྱ་བ་ལ་སོགས་པས་དེ་སྟོན་པ་ཡིན་ཏེ། ཆགས་པའི་སེམས་ཀྱིས་ཆུ་ལ་སོགས་པ་དག་ལ་གདོང་བལྟ་བར་མི་བྱའོ། །སོགས་པའི་སྒྲས་ནི་མེ་ལོང་ལ་སོགས་པ་གཟུང་ངོ༌། །ཅི་རྣམ་པ་ཐམས་ཅད་དུ་ཉེས་པར་འགྱུར་རམ་ཞེ་ན། སྔོན་དང་ད་ལྟར་བདག་
ལུས་ཅིར་འགྱུར་ཞེ་འམ། །ཞེས་བྱ་བ་ལ་སོགས་པ་སྨོས་ཏེ། རང་གི་ལུས་དང་ཁོག་པའི་སྔོན་དང་ད་ལྟར་གྱི་གནས་སྐབས་གང་ལ་རྣམ་པར་དཔྱོད་པའི་བསམ་པ་དང༌། སྐྱོ་བ་སྐྱིད་པའི་ཕྱིར་སྔོན་བདག་གི་ལུས་ངར་ལ་བབ་པ་ད་ལྟར་གྱི་གནས་སྐབས་ཇི་འདྲ་སྙམ་པས་གདོང་ལ་ལྟན་ཉེས་པ་མེད་དོ། །ཅི་ངོ་གདོང་དུ་གཏོགས་པའི་རྨ་འདི་དྲུབས་སམ་འོན་ཏེ་མ་ཡིན་ཞེས་རྣམ་པར་བརྟག་པའི་ཕྱིར་བལྟ་བ་ལ་ཉེས་པ་མེད་དོ། །གང་གི་ཚེ་ཞེ་ན། ཉེས་པར་མི་འགྱུར་རོ་ཞེས་སྨོས་པ་ཡིན་ནོ། །གང་གི་གདོང་ལ་སོགས་པ་ལ་ལྟ་བ་ལ་ཉེས་པར་མི་འགྱུར་ཏེ་བསམ་པའི་དབང་གིས་ཞེས་བྱ་བའི་ཐ་ཚིག་གོ །སེ་རལ་ཁ་དང་མཛུབ་རིས་ཚུད་གསུམ་དང༌། །རྒྱན་རྣམས་ཐམས་ཅད་ཡོངས་སུ་སྤང་བར་བྱ། །ཞེས་བྱ་བ་ལ་སེ་རལ་ཁ་ནི་ཚངས་པའི་སྐུད་པའོ། །མཛུབ་རིས་ནི་དཔྲལ་བའི་ཕྱོགས་སུ་ཐལ་བ་འམ། གཞན་འགའ་ཞིག་གིས་མཛུབ་རིས་བྱས་པའོ། །ཚུད་གསུམ་ནི་བཀྲ་ཤིས་པའི་ཕྱིར་ལ་གདར་གྱི་ཕྱོགས་སུ་སྐུད་པ་བཏགས་པའོ། །སེ་རལ་ཁ་དང་མཛུབ་རིས་དང་ཚུད་གསུམ་ནི་ཞེས་བརྗོད་པར་བྱའོ། །བཤད་མ་ཐག་པ་དེ་དག་སོར་གདུབ་ལ་སོགས་པའི་རྒྱུན་གཞན་དང་གཞན་ཐམས་ཅད་ཀྱང་ཡོངས་སུ་སྤང་བར་བྱའོ། །ནད་སོགས་ཞི་ཕྱིར་དཔུང་བ་གཡོན་པ་ལ། །སྔགས་ལ་སོགས་པའི་ཞེས་བྱ་བ་ལ་སོགས་པས་དེའི་དམིགས་ཀྱིས་བསལ་བ་སྨྲས་ཏེ། ནད་ལ་སོགས་པ་ཞི་བར་བྱེད་པ་ནི་ནད་སོགས་ཞི་བའོ། །སོགས་པའི་སྒྲས་ནི་མི་མ་ཡིན་པ་ལ་སོགས་པ་ཡོངས་སུ་བསྡུས་པ་ཡིན་ནོ། །དེའི་དོན་ནི་ནད་སོགས་ཞི་ཕྱིར་སྔགས་ལ་སོགས་པའི་སྐུད་པ་སྡོམ་ཅན་གྱིས་གདགས་པར་བྱའོ། །སྔགས་ལ་སོགས་པ་གང་ཡིན་པ་དེ་ནི་སྔགས་ལ་སོགས་པ་སྟེ། སོགས་པའི་སྒྲས་སྨན་ཡོངས་སུ་བསྡུའོ། །དེ་དང་ལྡན་པའི་སྐུད་པ་ནི་སྔགས་ལ་སོགས་པའི་སྐུད་པ་སྟེ། སྡོམ་ཅན་དགེ་ཚུལ་གྱིས་བཅང་བར་བྱའོ་ཞེས་བྱ་བའི་དོན་ཏོ། །གང་དུ་གདགས་པར་བྱ་བ་ཡིན་ཞེ་ན། དཔུང་པ་གཡོན་པར་ཞེས་སྨྲས་ཏེ། དེ་ཡང་དཔུང་པའི་རྩ་བར་ཞེས་བྱ་བར་རིག་པར་བྱའོ། །ནིའི་སྒྲ་ནི་ནང་ལ་སོགས་པའི་གཉེན་པོར་གདགས་པ་ལ་ཉེས་པ་ཡོད་པ་མ་ཡིན་ནོ་ཞེས་སྔ་མ་ལས་ཁྱད་པར་དུ་བྱེད་པའི་དོན་ཏོ། །ཀྱང་གི་སྒྲ་ནི་གཞན་རང་བཞིན་
གྱིས་ཁ་ན་མ་ཐོ་བ་ནད་ཀྱི་གཉེན་པོའི་དོན་དུ་གདགས་པར་བྱ་བ་མ་ཡིན་པ་འབའ་ཞིག་ཏུ་མ་ཟད་ཀྱི་འོན་ཀྱང་སྔགས་ལ་སོགས་པའི་སྐུད་པ་དག་ཀྱང་ཞེས་སྡུས་པ་མ་ཡིན་པ་དང༌། རིམ་པ་གཞན་ཡིན་ནོ། །ནད་ལ་སོགས་པ་སོས་པར་གྱུར་ན་ཇི་ལྟར་བྱ་ཞེ་ན། ནད་སོས་ནས་ནི་སྐུད་པ་བཀྲོལ་ནས་ཀྱང་ཞེས་བྱ་བ་ལ་སོགས་པ་སྨོས་ཏེ། ནད་སོས་ཤིང་བྲལ་བར་གྱུར་ནས་སྐུང་པ་དེ་དཔུང་བ་ལས་བཀྲོལ་ནས་གཞག་པར་བྱའོ། །གང་དུ་ཞེ་ན། བུ་ག་གཙང་མའི་ཕྱོགས་སུ་ཞེས་བྱ་བ་སྨོས་ཏེ། །གཙང་མར་གྱུར་པའི་བུ་གའི་ཆ་ནི་བུ་ག་གཙང་མའི་ཕྱོགས་ཏེ། ཀ་བ་ལ་སོགས་པའི་ཞེས་བྱ་བ་ནི་ཚིག་གི་ལྷག་མ་ཡིན་ནོ། །གཙང་བ་ཉིད་ཀྱང་གནོད་པ་མེད་པར་གྱུར་པ་ཉིད་ཡིན་པའི་ཕྱིར་རོ། །སྡོམ་ཅན་གྱིས་ནི་སྣ་ཚོགས་གདུགས་མི་བཅང༌། །གྲོང་དུ་ཡུ་བ་བསྒྲེང་བ་གནང་བ་མེད། །ལོ་མ་དང་ནི་སྨྱུག་མ་གཉིས་ཀྱི་གདུགས། །ཡུ་བའི་ཚད་ནི་གདུགས་ཀྱི་ཚད་ཙམ་ཡིན། །ཞེས་བྱ་བ་ལ། སྡོམ་ཅན་གྱིས་གདུགས་བཅང་བར་མི་བྱའོ། །ཁྱད་པར་ཇི་ལྟ་བུ་ཞེ་ན། སྣ་ཚོགས་ཞེས་བྱ་བ་སྨོས་ཏེ། རྨ་བྱའི་གདུགས་ལྟ་བུའོ། །སྣ་ཚོགས་པ་བཀག་པས་ཁྲ་བོ་མ་ཡིན་པ་བཅངས་པ་ལ་ནི་ཉེས་པ་མེད་དོ། །དེའི་ཚེ་ཡང་གྲོང་དུ་གནང་བ་མེད་པ་སྟེ་བཀག་པ་ཡིན་ནོ། །ཁྱད་པར་ཇི་ལྟ་བུ་ཞེ་ན། ཡུ་བ་བསྒྲེང་བ་སྟེ་ཡུ་བ་གྱེན་དུ་བསྒྲེང་བ་ཡིན་པ་དེའི་ཕྱིར་གྲོང་གི་ནང་དུ་གདུགས་ལོགས་སུ་བསྙལ་ནས་འགྲོ་བར་བྱའོ། །དང་ནི་སྣ་ཚོགས་པ་བཀག་པ་འབའ་ཞིག་ཏུ་མ་ཟད་ཀྱི་ཕྲ་བོ་མ་ཡིན་པ་ཡང་གྲོང་དུ་བཀག་པ་ཡིན་ནོ། །ཞེས་སྡུད་པར་བྱེད་པའོ། །གདུགས་དེ་ཡང་རྣམ་པ་གཉིས་ཏེ་ཞེས་བསྟན་པའི་ཕྱིར་ལོ་མ་དང་ནི་སྨྱུག་མ་གཉིས་ཀྱི་གདུགས་ཞེས་བྱ་བ་སྨོས་ཏེ། ལོ་མ་ལས་བྱས་པ་ནི་ལོ་མའི་ཡིན་ཏེ་ལོ་མ་ཞེས་བྱ་བ་ནི་ཤིང་ལོ་རྗོད་པར་བྱེད་པ་ཡིན་ཏེ། དཔེར་ན་ཏ་ལའི་གདུགས་ལྟ་བུའོ། །སྨྱུག་མ་ལས་བྱས་པ་ནི་སྨྱུག་མའི་ཡིན་ཏེ། རྣམ་པ་འདིས་གདུགས་རྣམ་པ་གཉིས་སུ་འགྱུར་རོ། །ཚད་པ་ལས་སྐྱོབ་པར་བྱེད་པས་ན་དེ་ནི་གདུགས་ཞེས་བྱའོ། །དེ་ལྟ་བུར་གྱུར་པ་བཤད་ཅིང་གནང་བའི་གདུགས་དེའི་ཚད་ཙམ་ཞེས་བྱ་བ་ལ་གདུགས་ཀྱི་ཚད་དུ་ཡུ་བ་བཤད་པ་ཡིན་ཏེ། ཁོག་པའི་ཚད་ཀྱི་ཡུ་བ་བྱའོ་ཞེས་བྱ་བའི་ཐ་ཚིག་གོ །དང་ནི་ལོ་མ་ལ་
སོགས་པའི་གདུགས་བཤད་པ་དང༌། དེའི་ཚད་ཀྱི་ཡུ་བ་བཤད་པ་ཡིན་ནོ་ཞེས་སྡུད་པར་བྱེད་པའོ། །དགེ་ཚུལ་གྱི་ཚིག་ལེའུར་བྱས་པ་ལས་དྲི་ལ་སོགས་པ་ལས་སླར་ལྡོག་པ་སྟེ་བསླབ་པའི་གཞི་བདུན་པའོ།། །།ད་ནི། ཆེ་ཞིང་མཐོ་བའི་མལ་སྟན་ཉལ་བ་ནི། །ཞེས་བྱ་བ་ལ་སོགས་པས་བསླབ་པའི་གཞི་བརྒྱད་པ་འཆད་པ་ཡིན་ཏེ་མལ་སྟན་ཆེན་པོ་ལ་དགེ་ཚུལ་ཉལ་བར་བྱེད་ན་གཟིར་བར་འགྱུར་རོ། །གང་གིས་ཤེ་ན། ཉེས་བྱས་བཀྲ་མི་ཤིས་པས་ཞེས་བྱ་བ་སྨོས་ཏེ། ཉེས་བྱས་ཁོ་ན་བཀྲ་མི་ཤིས་པ་ཡིན་པས་ཉེས་བྱས་བཀྲ་མི་ཤིས་པ་སྟེ། ཤིས་པ་མ་ཡིན་པ་དེའི་ཕྱིར་དེས་ཞེས་བྱ་བའི་དོན་ཏོ། །ཡང་ན་མལ་སྟན་མཐོན་པོ་ལ་ཉལ་བ་སྟེ་དེ་ལ་ཡང་ཉལ་བར་བྱེད་ན་གཟིར་བར་འགྱུར་རོ་ཞེས་བྱ་བ་ཐམས་ཅད་བརྗོད་པར་བྱ་བ་ཡིན་ཏེ། དེ་ལ་ཉལ་ན་ཉེས་བྱས་ཀྱི་ཉེས་པར་འགྱུར་རོ་ཞེས་བྱ་བའི་ཐ་ཚིག་གོ །མལ་སྟན་དེ་གཉིས་ཀྱི་རང་བཞིན་ཅི་ཡིན་ཞེས་བསྟན་པའི་ཕྱིར། ཁྲུ་གང་ཚད་ལས་འདས་པ་མཐོ་བ་ཡིན། །ཞེས་བྱ་བ་ལ་སོགས་པ་སྨོས་ཏེ། ཁྲུ་གང་ཚད་ལས་འདས་པ་ཞེས་བྱ་བ་ནི་ཁྲུའི་ཚད་ལས་ལྷག་པར་གྱུར་པའོ། །ནིའི་སྒྲ་ནི་གང་གི་ཕྱིར་གྱི་དོན་ཡིན་ཏེ། གང་གི་ཕྱིར་དེ་ལྟ་བུར་གྱུར་པ་དེ་ནི་མཐོན་པོ་ཡིན་པ་དེའི་ཕྱིར་འདི་ལ་ཉལ་བར་མི་བྱའོ། །རིན་ཆེན་ལ་སོགས་རྐང་རྒྱན་ཆེ་བ་ཡིན། །ཞེས་བྱ་བ་ལ་རིན་པོ་ཆེ་ལ་སོགས་པས་རྐང་བ་རྣམ་པར་སྤྲས་པའི་ཕྱིར་རིན་ཆེན་ལ་སོགས་རྐང་རྒྱན་ཏེ། དེ་ལྟ་བུར་གྱུར་པ་དེ་ནི་མལ་སྟན་ཆེན་པོ་ཡིན་ནོ། །སོགས་པའི་སྒྲས་ནི་གསེར་ལ་སོགས་པ་བསྡུའོ། །ནིའི་སྒྲ་ནི་སྔ་མ་ལས་ཁྱད་པར་དུ་བྱེད་པའི་དོན་ཏོ། །མཐོ་བའི་མལ་སྟན་རིན་ཆེན་འོད་སྤྲས་པ། །ཞེས་བྱ་བ་ལ་སོགས་པས་དམིགས་ཀྱིས་བསལ་བ་སྨྲས་པ་ཡིན་ཏེ། སྟན་མཐོན་པོ་ལ་འཛེགས་ནས་ཆོས་བསྒྲགས་པ་རབ་ཏུ་སྦྱིན་པར་བྱའོ། །གང་གི་ཕྱིར་བདེ་བར་གཤེགས་པའི་ཆོས་སྲི་ཞུ་བྱ་བ་དང༌། མཆོད་པར་བྱ་བ་ཡིན་པའི་ཕྱིར་རོ། །ཁྱད་པར་ཇི་ལྟ་བུ་ཞེ་ན། རིན་ཆེན་འོད་སྤྲས་ཞེས་བྱ་བ་སྨོས་ཏེ། རིན་པོ་ཆེ་དག་གི་འོད་ནི་རིན་ཆེན་འོད་ཟེར་དེ་དང་འདྲ་བར་འབར་བའི་གཟི་བརྗིད་བཟང་པོ་དང་ལྡན་པ་དེ་ལྟ་བུར་གྱུར་པ་དེ་ལ་འཛེགས་ནས་ཞེས་བྱ་བའི་ཐ་ཚིག་གོ །ཅི་ཞིག་མངོན་སུམ་དུ་བྱས་ནས་ཤེ་ན། འདིར་ནི་འདུ་བྱེད་འཇིག་
པར་བསམས་ནས་ནི། །ཞེས་བྱ་བ་ལ་སོགས་པ་སྨོས་ཏེ། འདུ་བྱེད་རྣམས་འཇིག་ཅིང་ཉམས་པ་དེ་ནི་འདུ་བྱེད་འཇིག་པར་བསམ་པ་སྟེ། དམིགས་ནས་ཞེས་བྱ་བའི་དོན་ཏོ། །འདིར་ནི་ཞེས་བྱ་བ་ནི་ཆོས་སྒྲོགས་པའི་དུས་སུའོ། །དེ་ལྟ་བུར་དམིགས་པས་རིན་པོ་ཆེ་ལ་སོགས་པས་སྤྲས་པའི་སྟན་ལ་འཛེགས་ནས་ཆོས་བསྒྲགས་པ་སྦྱིན་པ་ལ་ཉེས་པ་ཡོད་པ་མ་ཡིན་ནོ། །གནོད་སྦྱིན་གནས་དང་ལྷ་ཡི་གནས་དག་དང༌། །ཀླུ་ཡི་གནས་སུ་རིན་ཆེན་འབར་པ་རྣམས། །ཁྱིམ་པས་བསྟབས་ཀྱང་སྡོམ་ཅན་མི་དག་པར། །བསྒོམས་ནས་འདུག་པར་གྱུར་ཀྱང་ཉེས་པ་མེད། །དེ་བཞིན་དུ་ཁྱིམ་གྱི་ནང་དུ་ཁྱིམ་པས་བསྟབས་པ་སྟེ་ཁྱིམ་གྱི་ནང་དེར་ཁྱིམ་པས་བསྟབས་པའི་སྟན་ལ་ཆོས་བསྒྲགས་པ་སྦྱིན་པ་ལས་དུས་གཞན་གྱི་ཚེ་ཡང་འདུག་པར་བྱའོ། །ཁྱད་པར་ཇི་ལྟ་བུ་ཞེ་ན། རིན་པོ་ཆེ་དེ་དག་གི་འོད་ཟེར་འབར་བ་དེས་གསལ་བར་བྱས་པ་ལ་ཡང་ངོ༌། །འདི་སྐད་དུ་ཁྱིམ་པས་ཁྱིམ་ནང་དུ་རིན་པོ་ཆེ་ལ་སོགས་པས་སྤྲས་པའི་སྟན་བཤམས་པ་ལ་རྗེས་སུ་གཟུང་བའི་བློས་འདུག་པར་བྱའོ་ཞེས་བསྟན་པར་འགྱུར་རོ། །ཇི་ལྟར་བསམས་ནས་འདུག་པར་བྱ་ཞེ་ན། མི་རྟག་པར་བསྒོམས་ནས་ཞེས་བྱ་བ་སྨོས་ཏེ། མི་རྟག་པར་བསྒོམས་པ་ནི་མངོན་སུམ་དུ་བྱས་པ་ཡིན་ཏེ། འདུས་བྱས་ཐམས་ཅད་ནི་མི་རྟག་པའོ་ཞེས་བསྒོམས་པ་འདིས་དེའི་རྒྱུ་ཅན་སེམས་རྒོད་པ་མངོན་པར་བཅོམ་ནས་ཡོན་བདག་གི་བསོད་ནམས་སྤེལ་བར་བྱ་བའི་ཕྱིར་འདུག་པར་བྱའོ། །དེ་བཞིན་དུ་གནོད་སྦྱིན་གྱི་གནས་ཏེ་ཁྱིམ་པ་དེ་དང་དེ་བཞིན་དུ་ལྷའི་གནས་ཏེ་ཁྱིམ་དུ་སྡོམ་ཅན་ཡིད་ལ་བྱེད་པ་དེས་འདུག་པ་དེ་ལ་ཉེས་པ་ཡོད་པ་མ་ཡིན་ནོ། །ཀླུའི་གནས་ཏེ་ཁྱིམ་དུ་བསམ་པ་དེ་ཉིད་ཀྱིས་འདུག་པ་དེ་ལ་ཉེས་པ་ཡོད་པ་མ་ཡིན་ཏེ། གང་གི་ཕྱིར་ས་གཞི་དང་ཐེམ་སྐས་རིན་པོ་ཆེའི་རང་བཞིན་ནི་དེ་དག་གི་བསོད་ནམས་ལས་བྱུང་བའི་ཕྱིར་རོ། །དང་ནི་ཐམས་ཅད་དུ་སྡུད་པའོ། །ཇི་ལྟར་ཡང་བསླབ་པའི་གཞི་འདི་དངོས་པོ་གཙོ་བོར་གྱུར་པ་ཡིན་ཏེ། རྟོག་པ་སྤངས་པ་ཙམ་གྱིས་གནས་པ་ལ་སོགས་པ་ལ་ཉེས་པར་འགྱུར་བ་དེ་ལྟ་ན་ཡང་མི་རྟག་པའི་ཡིད་ལ་བྱེད་པའི་རྣམ་པ་མེད་པར་འདུག་ན་ཁ་ན་མ་ཐོ་བ་ཆུང་བར་འགྱུར་ལ། ཡིད་ལ་བྱེད་པའི་རྣམ་པ་དེས་ཀྱང་ཡོད་པ་མ་ཡིན་པར་རིག་པར་བྱའོ། །ད་ནི། མཐོ་ལ་
སོགས་ཕྱོགས་ཉིན་པར་ཉལ་བ་དང༌། ཞེས་བྱ་བ་ལ་སོགས་པས་ཡིད་ཀྱི་ཉེས་པར་འགྱུར་བ་འཆད་པ་ཡིན་ཏེ། ཉིན་པར་ཉལ་ན་སྟན་མཐོན་པོ་ལ་སོགས་པའི་ཕྱོགས་སུ་གཏོགས་པར་འགྱུར་བ་ཡིན་ནོ་ཞེས་བྱ་བའི་དོན་ཡིན་པ་དེའི་ཕྱིར་ཉིན་པར་ཉལ་བ་ཡིད་ཀྱི་ཉེས་པར་འགྱུར་རོ་ཞེས་བྱ་བའི་ཐ་ཚིག་གོ །དེ་ལ་གཉིད་ཀྱིས་ཟིལ་གྱིས་མནན་པར་གྱུར་པ་དེའི་ཚེ་ཇི་ལྟར་བསྒྲུབ་པར་བྱ་བ་ཡིན་ཞེ་ན། གཉིད་ཀྱི་ནད་དུ་གྱུར་པ་ཞེས་བྱ་བ་སྨོས་ཏེ། གལ་ཏེ་གཉིད་ཀྱིས་ནད་དུ་གྱུར་ཅིང་གཅིང་བར་གྱུར་པ་དེ་དག་ལ་གནང་བ་སྟེ། བཅོམ་ལྡན་འདས་ཀྱིས་ཉིན་པར་ཉལ་བ་དེ་རྗེས་སུ་གནང་བ་ཡིན་ནོ་ཞེས་བྱ་བ་ནི་ལྷག་མའོ། །དུས་ཅི་སྲིད་ཅིག་ཏུ་ཞེ་ན། ཅུང་ཟད་ཅེས་བྱ་བ་སྨོས་པ་ཡིན་ནོ། །ཅུང་ཟད་ཅེས་བྱ་བའི་ཚིག་ནི་དུས་ཅི་ཙམ་གྱིས་གཉིད་སངས་པར་གྱུར་ནས་དགེ་བའི་ཕྱོགས་ལ་སྦྱོར་བར་བཟོད་པ་དེ་ཙམ་ཉེ་བར་མཚོན་པར་བྱེད་པ་ཡིན་པར་རྟོགས་པར་བྱའོ། །ནད་པ་དང་ནི་ནད་གཡོག་མ་གཏོགས་པར། །སྡོམ་ཅན་མར་མེ་སྣང་ལ་ཉལ་མ་གནང༌། །ཞེས་བྱ་བ་ལ། མར་མེའི་སྣང་བ་ལ་ཉལ་བ་ནི་མར་མེ་སྣང་ལ་ཉལ་བ་སྟེ། ཉི་མ་དང་ཟླ་བའི་སྣང་བ་ལས་སྣང་བ་དང་ལྡན་པའི་ཕྱོགས་གཞན་དེ་ལ་སྡོམ་ཅན་མ་གནང་བ་ཡིན་ནོ་ཞེས་བྱ་བའི་ཐ་ཚིག་གོ །ཅི་ཐམས་ཅད་དམ་ཞེ་ན། སྨྲས་པ། ནད་པ་མ་གཏོགས་པ་དང་ནད་པ་དེའི་ནད་གཡོག་བྱེད་པའི་སྡོམ་ཅན་མ་གཏོགས་པར་སྡོམ་ཅན་གཞན་དག་ཅེས་བྱ་བའི་དོན་ཏོ། །དང་ནི་སྡུད་པར་བྱེད་པ་ཡིན་ནོ། །གདིང་བ་མེད་པར་ཉལ་བ་རིགས་པ་མིན། །ཞེས་བྱ་བ་ལ། དགེ་འདུན་གྱི་མལ་སྟན་ལས་གདིང་བ་མེད་ཅིང་གདིང་བ་དང་བྲལ་བས་ཉལ་བར་རིགས་པ་མ་ཡིན་པ་དེའི་ཕྱིར། དགེ་འདུན་གྱི་མལ་སྟན་གདིང་བས་གཡོགས་ནས་ཡོངས་སུ་ལོངས་སྤྱད་པར་བྱ་བ་ཡིན་ནོ། །ལོངས་སྤྱོད་པ་དེ་ལ་ཡང་གཡོགས་མ་མེད་པ་ཉིད་ལ་གདིང་བས་གཡོགས་པ་ཉིད་ནི་འདུག་པ་ལ་བར་དུ་ཆོད་པའི་དགོས་པ་ཉིད་ཡིན་པའི་ཕྱིར་རོ། །དེ་ཡང་འདིར་ཁྲི་དང་ཁྲིའུ་ལས་གཞན་པ་ཉིད་ལ་ཞེས་རྟོགས་པར་བྱ་སྟེ། དེ་ཉམས་པར་འགྱུར་པའི་ཕྱིར་རོ། །གཞན་ཡང༌། མལ་སྟན་ཀོ་ལྤགས་ནམ་ཡང་གནང་བ་མེད། །ཅེས་བྱ་བ་ལ། ཀོ་ལྤགས་ཀྱི་མལ་སྟན་ལོངས་སྤྱོད་པ་ནམ་ཡང་གནང་བ་མེད་པ་ཁོ་ན་ཡིན་ཏེ། ཀོ་ལྤགས་
ཀྱི་མལ་སྟན་ཡོངས་སུ་ལོངས་སྤྱོད་པར་བྱེད་ན་ཉེས་བྱས་ཀྱི་ཉེས་པར་འགྱུར་རོ་ཞེས་བྱ་བའི་ཐ་ཚིག་གོ །ཅི་རྣམ་པ་ཐམས་ཅད་ཀྱི་ཐམས་ཅད་དུ་མ་གནང་བ་ཡིན་ནམ་ཞེ་ན། སྨྲས་པ། ཁྱིམ་པའི་ཁྱིམ་དུ་སྟན་ཙམ་ཉི་ཚེ་གནང་ཞེས་བྱ་བ་ལ། ཁྱིམ་པའི་ཁྱིམ་དུ་སྟན་ཉི་ཚེ་ཙམ་ཡོངས་སུ་ལོངས་སྤྱོད་པར་གནང་བ་ཡིན་ནོ། །ནིའི་སྒྲ་ནི་གཞན་གཙུག་ལག་ཁང་ལ་སོགས་པར་མ་ཡིན་ནོ་ཞེས་ཁྱད་པར་དུ་བསྟན་པའི་ཕྱིར་རོ། །ཙམ་ཞེས་སྨོས་པ་ནི་མལ་སྟན་རྣམ་པར་བཅད་པ་ཡིན་ནོ། །ཅི་ཐམས་ཅད་དུ་ཚུལ་འདི་ཡིན་ནམ་ཞེ་ན། རྡོ་འཇོག་ཏུ་ནི་གཉི་ག་འང་གནང་བ་ཡིན། །ཞེས་བྱ་བ་ལ། རྡོ་འཇོག་ཅེས་བྱ་བ་ནི་ཡུལ་མཐའ་འཁོབ་ཡིན་ཏེ། དེ་ལ་མལ་དང་སྟན་གཉི་ག་ཡང་གནང་བ་སྟེ། བཅོམ་ལྡན་འདས་ཀྱི་གནང་ངོ་ཞེས་བྱ་ནི་ལྷག་མའོ། །རྡོ་འཇོག་ལས་གཞན་འགའ་ཞིག་ཏུ་ཡང་ཀོ་ལྤགས་ཀྱི་མལ་སྟན་ལོངས་སྤྱོད་པར་གནང་བ་མེད་པ་དེ་ཉིད་ཀྱི་ཕྱིར་སློབ་དཔོན་ཡོན་ཏན་ཡོད་ཀྱིས། ཨ་མྲ་པ་རནྟ་དག་ཏུ་ཀོ་ལྤགས་མི་བཅང་བར་མི་བྱའོ་གསུངས་པ་ཡིན་ནོ། །ཁ་ཅིག་ཡུལ་གྱི་དབུས་སུ་མལ་སྟན་ཀོ་ལྤགས་མིན། །ཡུལ་གྱི་མཐའ་འཁོབ་ཏུ་ནི་གཉི་གའང་གནང༌། །ཞེས་འདོན་པ་དེ་ནི་མི་རིགས་པར་སྣང་སྟེ། གང་གི་ཕྱིར་བཅོམ་ལྡན་འདས་ཀྱི་དགེ་སློང་དག་ལ་རྡོ་འཇོག་ཁོ་ན་དག་ཏུ་ཀོ་ལྤགས་ཀྱི་སྟན་ལ་སོགས་པ་ཡོངས་སུ་ལོངས་སྤྱོད་པ་དང༌། རྟག་ཏུ་ཁྲུས་གནང་བ་དེའི་ཕྱིར་གཞན་དུ་འདོན་པ་མི་རིགས་སོ་ཞེས་ཁོ་བོ་སེམས་སོ། །བ་གླང་རྟ་དང་སྟག་དང་སེང་གེ་དང༌། །དོམ་དང་བྱི་ལའི་པགས་པ་རུང་བ་མིན། །ཞེས་བྱ་བ་ལ། བ་གླང་ནི་གླང་པོ་ཆེ་ཡིན་ལ་རྟ་ནི་མགྱོགས་འགྲོ་སྟེ་དེ་གཉིས་ཀྱི་པགས་པ་མི་རུང་བ་ཡིན་པས་འདི་གཉིས་ཀྱི་པགས་པའི་ལྷམ་བཅང་བར་མི་བྱ་ཞིང་རྡོ་འཇོག་དག་ཏུ་ཡང་དེ་དག་ལས་བྱས་པའི་མལ་སྟན་ལ་ལོངས་སྤྱད་པར་མི་བྱའོ་ཞེས་བྱ་བའི་ཐ་ཚིག་གོ །ནིའི་སྒྲ་ནི་ཐམས་ཅད་ཀྱི་ཐམས་ཅད་དུ་རུང་བ་མ་ཡིན་ནོ་ཞེས་སྔ་མ་ལས་བྱེ་བྲག་ཏུ་བྱ་བའི་དོན་ཡིན་ནོ། །དེ་བཞིན་དུ་སྟག་དང་སེང་གེ་དང༌། དོམ་དང་དྲེད་དང་བྱི་ལ་ཞེས་བྱ་བ་ལ། སྟག་དང་སེང་གེ་དང་དོམ་དང་བྱི་ལ་དག་ཅེས་སྦྱར་རོ། །དེ་དག་གི་པགས་པ་རུང་བ་མ་ཡིན་པས་ཞེས་བྱ་བ་ལ་སོགས་པ་སྔ་མ་བཞིན་དུ་ཐམས་ཅད་ལ་བརྗོད་པར་བྱའོ། །བལ་བ་ཛ་དང་གྲེས་མ་རྩྭ་སོགས་ལས། །བྱས་པའི་ལྷམ་ནི་བཅང་བར་བྱ་བ་མིན། །ཞེས་བྱ་བ་ལ་
པལ་བ་ཛ་ནི་རྩྭའི་བྱེ་བྲག་ལ་བྱའོ། །གྲེས་མ་ནི་རྩྭ་མུན་ཛ་ལ་བྱའོ། །རྩྭ་ནི་སྨྱུག་ཤུན་ཏེ་ཟླས་དབྱེ་བའི་བསྡུ་བ་བྱའོ། །རྩྭ་དེ་དག་ལས་བྱས་པའི་ལྷམ་བཅང་བར་བྱ་བ་མ་ཡིན་ནོ། །ཡང་གི་སྒྲས་ནི་འདི་སྐད་དུ་སྡོམ་ཅན་གྱིས་རུང་བ་མ་ཡིན་པའི་པགས་པ་འབའ་ཞིག་མ་ཡིན་པ་ཤིང་ལས་བྱས་པའི་ལྷམ་ཡང་གནང་བ་མེད་དོ་ཞེས་བཤད་པར་བྱ་བའི་ཕྱིར་རོ་ཞེས་བསྟན་པར་འགྱུར་རོ། །གང་དུ་ཞེ་ན་གཙུག་ལག་ཁང་སྟེང་གནས་ཁང་ཁྱམས་རྣམས་སུ་ཞེས་བྱ་བ་སྨོས་ཏེ། གཙུག་ལག་ཁང་གི་སྟེང་སྟེ་སྟེང་གི་བླ་གབ་མེད་པ་དང་གནས་ཁང་དང་ཁྱམས་དག་ཏུ་ལོངས་སྤྱོད་པར་གནང་བ་མེད་དོ། །རྟག་ཏུ་ཞེས་བྱ་བ་ནི་རྣམ་པ་ཐམས་ཅད་དུ་གནང་བ་མེད་པས་དེ་འགའ་ཞིག་ཏུ་ཡང་ཞེས་བྱ་བའི་དོན་ཏོ། །ནིའི་སྒྲ་ནི་ཤིང་གི་ལྷམ་ནམ་ཡང་གཙུག་ལག་ཁང་གི་སྟེང་ལ་སོགས་པ་དག་ཏུ་གནང་བ་མེད་དོ་ཞེས་སྔ་མ་ལས་བྱེ་བྲག་ཏུ་བྱ་བའི་ཕྱིར་རོ། །ནིའི་དམིགས་ཀྱིས་བསལ་བ་ནི། གཅི་བ་དང་བཤང་བའི་གནས་ཕྱོགས་དང་ཞེས་བྱ་བ་ལ་སོགས་པ་སྨོས་ཏེ། གཅི་བ་དང་བཤང་བ་ནི་གཅི་བ་དང་བཤང་པའོ། །དེ་གཉིས་ཀྱི་གནས་ནི་གཅི་བ་དང་བཤང་བའི་གནས་སོ། །དེ་གཉིས་ཀྱི་ཕྱོགས་ནི་ཉེ་འཁོར་དང་ནང་ཡིན་ཏེ། དེ་དག་ཏུ་ཤིང་གི་ལྷམ་དེ་ལོངས་སྤྱོད་པ་ལ་ཉེས་པ་མེད་དོ། །ཁྱད་པར་ཇི་ལྟ་བུ་ཞེ་ན། ཁྱིམ་གྱི་ནང་བཅས་མ་བསྐུས་ཞེས་བྱ་བ་སྨོས་ཏེ། ཁྱིམ་གྱི་ནང་དང་ལྷན་ཅིག་འཇུག་པའི་ཕྱིར་ཁྱིམ་གྱི་ནང་བཅས་སུའོ། །ཁྱད་པར་ཇི་ལྟ་བུ་ཞེ་ན། མ་བསྐུས་པ་སྟེ་བསྐུ་པ་ལས་གཞན་པའི་ས་ཕྱོགས་དེ་ལ་ཉེས་པ་མེད་དོ་ཞེས་བྱ་བའི་དོན་ཡིན་ཏེ། བྱི་དོར་བྱས་པ་ཉིད་ལ་ནི་ཉེས་པར་འགྱུར་རོ་ཞེས་རིག་པར་བྱའོ། །མཛེ་ཅན་གྱིས་ནི་དགེ་འདུན་ཁྲི་ལ་སོགས། །ཞེས་བྱ་བ་ལ་དགེ་འདུན་གྱི་ཁྲི་ལ་སོགས་པ་སྤང་བྱ་སྟེ། ཡོངས་སུ་ལོངས་སྤྱོད་པར་མི་བྱའོ་ཞེས་བྱ་བའི་དོན་ཏོ། །སོགས་པའི་སྒྲས་ནི་ཆོལ་ཟངས་ལ་སོགས་པ་བསྡུ་བའི་ཕྱིར་རོ། །དེ་བཞིན་དགེ་འདུན་ལ་སོགས་ཞེས་བྱ་བ་ལ། དགེ་འདུན་འདུ་ཞིང་ཚོགས་པར་གྱུར་པ་ནི་དགེ་འདུན་འདུ་བ་སྟེ། དེ་ལ་སོགས་པ་གང་ཡིན་པ་དེ་ནི་དགེ་འདུན་འདུལ་སོགས་པའོ། །དེ་བཞིན་གྱི་སྒྲ་ནི་ཇི་ལྟར་གོང་དུ་སྤང་བར་བྱ་ཞེས་བསྟན་པ་དེ་ལྟར་འདིར་ཡང་སྤང་བར་བྱའོ་ཞེས་བཤད་པའི་ཕྱིར་རོ། །སོགས་པའི་སྒྲས་ནི་དགེ་འདུན་ཡོངས་སུ་ལོངས་སྤྱོད་པའི་གནས་
ཡོངས་སུ་སྣང་བའི་ཕྱིར་བའི་ཕྱིར་ཏེ། དཔེར་ན་གཅི་བའི་ཁང་པ་ལ་སོགས་པ་བསྡུའོ། །དགེ་འདུན་གྱིས་དེ་ཇི་ལྟར་བྱ་བ་ཡིན་ཞེ་ན། དགེ་འདུན་གྱིས་ཀྱང་དེ་ནི་དབེན་བཞག་ནས། །ཞེས་བྱ་བ་ལ་སོགས་པ་སྨོས་ཏེ། མཛེ་ཅན་དེ་ནི་དགེ་འདུན་གྱིས་ཀྱང་ཡོངས་སུ་བསྐྱང་བར་བྱའོ། །ཇི་ལྟ་ཞེ་ན། སྨན་གྱི་སྦྱོར་བས་ཞེས་བྱ་བ་སྨོས་ཏེ། སྨན་གྱི་སྦྱོར་བ་ནི་སྨན་གྱི་སྦྱོར་བ་སྟེ། སྨན་གྱི་སྦྱོར་བས་སྨན་སྦྱིན་པ་དང༌། ནད་གཡོག་སྦྱིན་པ་དེས་ཡོངས་སུ་བསྐྱང་བར་བྱ་ཞེས་བྱ་བའི་དོན་ཡིན་ནོ། །གང་དུ་བཞག་ནས་ཤེ་ན། དབེན་ཞེས་བྱ་བ་སྨོས་ཏེ། སྐྱེ་བོ་ཉེ་བར་འཚོགས་པ་ལས་དབེན་པར་གྱུར་པར་གཞག་ཅིང་བཅུག་ནས་ཞེས་བྱ་བའི་ཐ་ཚིག་གོ །མཛེ་ཅན་འབའ་ཞིག་ལམ་ཡིན་གྱི། འོན་ཀྱང་ནད་པ་ཐམས་ཅད་ལ་སྨན་དང༌། ནད་གཡོག་སྦྱིན་པས་ན་ཡོངས་སུ་བསྐྱང་བར་བྱ་བ་ཡིན་པས་ན། ནད་པ་ཐམས་ཅད་ནད་གཡོག་རྣམས་ཀྱིས་ནི། །འཚོ་བ་ཤིན་ཏུ་དཀོན་པར་བསམས་ནས་ཀྱང༌། །རང་བཞིན་སྡིག་པ་མ་གཏོགས་བསྒྲིབས་ནས་ཀྱང༌། བཅས་པའི་ཁ་ན་མ་ཐོས་བསྐྱང་བར་བྱ། །ཞེས་བྱ་བ་ལ། རང་བཞིན་གྱི་ཁ་ན་མ་ཐོ་བ་ནི་རང་བཞིན་གྱི་ཁ་ན་མ་ཐོ་བ་དང་བཅས་པ་ཡིན་ཏེ། སྲོག་གཅོད་པ་ལ་སོགས་པ་གང་ཡིན་པ་དེ་ནི་ཡོངས་སུ་སྤང་བར་བྱ་བ་ཉིད་ཡིན་པའི་ཕྱིར། བཅས་པའི་ཁ་ན་མ་ཐོ་བས་ཀྱང་ནད་པ་ཡོངས་སུ་བསྐྱང་བར་བྱ་བ་ཡིན་ནོ། །ཡང་གི་སྒྲས་ནི་འདི་སྐད་དུ། ནད་གཡོག་ལ་སོགས་པ་སྦྱིན་པ་ལ་སོགས་པས་བསྐྱང་བ་དེ་ལྟ་ཞོག་གི །བཅས་པའི་ཁ་ན་མ་ཐོ་བས་ཀྱང་ཞེས་བྱ་བར་བསྟན་པར་འགྱུར་རོ། །བཅས་པའི་ཁ་ན་མ་ཐོ་བ་ནི་བཅས་པའི་ཁ་ན་མ་ཐོ་བ་དང་བཅས་པ་ཡིན་ཏེ། དེ་ནི་བཅོམ་ལྡན་འདས་ཀྱིས་ཉེས་དམིགས་བསྟན་པའི་སྒོ་ནས་བཀག་པ་མཛད་པ་ཡིན་གྱི། སྲོག་གཅོད་པ་ལ་སོགས་པ་བཞིན་དུ་ཁ་ན་མ་ཐོ་བ་དང་བཅས་པ་ཉིད་ཀྱི་ཕྱིར་ནི་མ་ཡིན་ནོ། །ཅི་ཞིག་བྱས་ནས་ཤེ་ན། འཚོ་བ་ཤིན་ཏུ་དཀོན་པར་བསམས་ཞེས་བྱ་སྨོས་ཏེ། གང་གི་ཕྱིར་སྡོམ་ལ་གནས་པའི་འཚོ་བ་ཤིན་ཏུ་རྙེད་པར་དཀའ་བ་ཡིན་པར་བསམས་ཤིང་ཤེས་ནས་ཞེས་བྱ་བའི་དོན་ཏོ། །ནིའི་སྒྲ་ནི་གང་གི་ཕྱིར་གྱི་དོན་ཡིན་ཏེ། གང་གི་ཕྱིར་འཚོ་བ་ཤིན་ཏུ་རྙེད་པར་དཀའ་བ་དེའི་ཕྱིར་ནད་པ་བསྐྱང་བར་བྱ་བ་ཡིན་ནོ། །དགེ་ཚུལ་གྱི་ཚིག་ལེའུར་བྱ་སྤ་ལས་མལ་སྟན་ཆེ་མཐོ་ལས་སླར་ལྡོག་པ་སྟེ་བསླབ་པའི་གཞི་བརྒྱད་པའོ།། །
ད་ནི་བསླབ་པའི་གཞི་དགུ་པ་འཆད་པ་ཡིན་ཏེ་དེ་ལ་དང་པོར་དུས་བསྟན་ན་གང་བརྗོད་པ་དེ་ཁོ་ནས་དུས་མ་ཡིན་པ་ཡང་ཤེས་པར་འགྱུར་རོ་ཞེས་བྱ་བའི་དབང་དུ་བྱས་ནས། སྐྱ་རེངས་སྔོན་པོ་ལ་སོགས་བཟུང་ནས་ནི། །རང་གླིང་ཉི་མ་མ་ཡོལ་བར་དུ་དུས། །ཞེས་བྱ་བ་ལ་སོགས་པ་ལ། རང་གི་གླིང་གི་སྐྱ་རེངས་སྔོན་པོ་ལ་སོགས་པ་གཟུང་བ་ནས། རང་གི་གླིང་ཁོ་ནའི་ཉི་མ་མ་ཡོལ་བའི་བར་ཞས་ནི་དུས་མ་ཡིན་པའི་བྲས་ཀྱི་བསླབ་པའི་གཞིའི་སྐབས་འདིར་དུས་ཡིན་ནོ་ཞེས་བྱ་བར་སྦྱར་ཞིང་དེ་གཉི་ག་ལ་རང་གླིང་ཞེས་སྨོས་པ་མངོན་པར་སྦྱར་བར་བྱའོ། །དེ་ལ་སྐྱ་རེངས་སྔོན་པོ་ཞེས་བྱ་བ་ནམ་མཁའ་ལ་སྔོན་པོར་སྣང་བ་ཤར་བ་དེ་དང་པོར་བྱས་ནས་བདག་ཉིད་ཀྱི་གླིང་གི་ཉི་མ་ཕྱེད་སྒང་ཞེས་བྱ་བ་དེ་ནི་འདིར་དུས་ཡིན་ནོ་ཞེས་བྱ་བའི་སྒྲ་ནི་བསྟན་མ་ཐག་པ་ལ་བསྙེགས་པའོ། །སྐྱ་རེངས་ནི་རྣམ་པ་གསུམ་སྟེ་སྐྱ་རེངས་སྔོན་པོ་དང་སྐྱ་རེངས་སེར་པོ་དང༌། སྐྱ་རེངས་དམར་པོའོ། །དེ་ལ་ཐུན་ཐ་མ་ལ་ཤར་ཕྱོགས་ནས་སྔར་བཤད་པའི་རྣམ་པ་འཆར་བ་ནི་སྐྱ་རེངས་སྔོན་པོ་ཞེས་བྱའོ། །དེའི་འོག་ཏུ་སྐྱ་རེངས་སེར་པོ་ཤར་ན་ནམ་མཁའ་ལ་སེར་པོ་རྣམ་པར་སྣང་བར་འགྱུར་བ་དེ་ནི་སྐྱ་རེངས་སེར་པོ་ཞེས་བྱའོ། །དེའི་འོག་ཏུ་སྐྱ་རེངས་དམར་པོ་ཤར་ན་ནམ་མཁའ་དམར་པོ་རྣམ་པར་སྣང་བར་འགྱུར་བ་དེ་ནི་སྐྱ་རེངས་དམར་པོ་ཞེས་བྱ་སྟེ། དེ་ལྟར་ནི་སྐར་མའི་བསྟན་བཅོས་ལས། སྐྱ་རེངས་སྔོན་པོ་ཤར་ན་ནི། །ཤར་ཕྱོགས་སུ་ནི་སྔོར་སྣང་ཞིང༌། །སྐར་མའི་གདོང་གི་འོད་ཉམས་ལ། །ནམ་མཁའ་སྔོ་སྐྱར་གྱུར་པ་ཡིན། །སྐྱ་རེངས་སེར་པོ་ཤར་ན་ནི། །དེ་ལས་ཤར་ཕྱོགས་དམར་སྐྱ་ཞིང༌། །སྐར་མའི་འོད་ནི་ཆུང་བར་འགྱུར། །ནམ་མཁའ་སེར་སྐྱར་འགྱུར་བ་ཡིན། །སྐྱ་རེངས་དམར་པོ་ཤར་ན་ནི། །སྐར་མའི་འོད་ནི་མེད་གྱུར་པས། །མཚམས་ཉིད་སྐྱ་རེངས་དག་ཏུ་ཤར། །ཉི་མ་འཆར་ཕྱིར་མཚམས་ཀྱང་ཡིན། །ཞེས་འབྱུང་བ་ཡིན་ནོ། །ལྷག་མ་འདི་ཙམ་ལུས་པའི་དུས་སུ་སྐྱ་རེངས་སྔོན་པོ་འཆར་བར་འགྱུར་རོ་ཞེས་འཇིག་རྟེན་པ་དག་ལས་དེ་དག་ཤེས་པ་ཡིན་ནོ་ཞེས་བྱ་བའི་དབང་དུ་བྱས་ནས་འདི་ལ་བཅོམ་ལྡན་འདས་ཀྱིས་དུས་མ་ཡིན་པའི་ཟས་སུ་མ་གསུངས་སོ། །དེ་ལྟར་ཡང་མཚན་གྱི་བརྒྱད་ཆ་གཅིག་ལུས་པ་ན་རྒྱལ་པོའི་ཐུན་ཚོད་ཀྱིས་རྔ་བརྡུང་བར་བྱའོ་ཞེས་སྐར་མའི་བསྟན་བཅོས་
ལས་རྣམ་པར་གཞག་པ་དེའི་ཕྱིར་འདིར་ཡང་ཚུལ་འདི་ཉིད་ཡིན་པར་རིག་པར་བྱའོ། །རང་གླིང་སྨོས་པ་ནི་གླིང་གཞན་རྣམ་པར་བཅད་པའི་ཕྱིར་རོ། །དེ་ལྟར་ནི། མཚན་ཕྱེད་ཉི་མ་ནུབ་པ་དང༌། །ཉི་མ་ཕྱེད་དང་འཆར་དུས་གཅིག །ཅེས་འབྱུང་བ་ཡིན་ཏེ། གང་བྱང་གི་སྒྲ་མི་སྙན་དུ་མཚན་ཕྱེད་དུ་གྱུར་པ་དེའི་ཚེ་ཤར་གྱི་ལུས་འཕགས་སུ་ཉི་མ་ནུབ་ལ་དེ་ཉིད་ཀྱི་ཉི་མ་ཕྱེད་ན་འཛམ་བུའི་གླིང་དང༌། ནུབ་ཀྱི་བ་གླང་སྤྱོད་དག་ཏུ་ཡང་ཉི་མ་ཤར་བར་འགྱུར་རོ་ཞེས་བྱ་བ་དེ་ལྟར་དུས་གཅིག་ཁོ་ནར་འགྱུར་རོ། །དེ་བཞིན་དུ་བཟློག་པའི་སྒོ་ནས་ཐམས་ཅད་ལ་སྦྱར་བར་བྱའོ། །དེའི་ཕྱིར་རང་གི་གླིང་གི་དུས་ཀྱི་ཞེས་བྱ་བའི་དབང་དུ་བྱས་ནས། གང་ཞིག་འཛམ་བུའི་གླིང་དུ་སྐྱེས་པ་དེ་གླིང་གཞན་དུ་འགྲོ་ན་ཡང་རང་གི་གླིང་གི་དུས་ཀྱི་དབང་གིས་མཚན་ཕྱེད་དང་ཉི་མ་ནུབ་པའི་དུས་སུ་ཡང་བཟའ་བར་བྱ་སྟེ། འདི་ལ་འགྱོད་པར་མི་བྱའོ། །གླིང་གཞན་ན་གནས་པའི་ཡང་ཚུལ་ནི་འདི་ཉིད་ཡིན་པར་ཁོང་དུ་ཆུད་པར་བྱའོ། །ཇི་སྟེ་དུས་མ་ཡིན་པར་སྒྲེགས་པ་བྱུང་ན་ཇི་ལྟར་བྱ་བ་ཡིན་ཞེ་ན། ཇི་སྟེ་སྒྲེགས་པ་བྱུང་ན་ཞེས་བྱ་བ་ལ་སོགས་པ་སྨོས་ཏེ། ཟོས་པ་སློན་ཐབས་སུ་བྱུང་བ་ནི་སྒྲེགས་པ་ཡིན་ནོ། །དེ་གལ་ཏེ་བྱུང་ཞིང་འོངས་ནས་སྒྲེགས་པ་བོར་ནས་གུས་པར་བྱས་ཏེ། རུང་བའི་ཆུས་ཁ་བཤལ་བར་བྱ་ཞིང་དུས་མ་ཡིན་པར་དུས་མ་ཡིན་པའི་ཟས་ཀྱི་ཉེས་པར་འགྱུར་བ་ཡོངས་སུ་སྤང་བར་བྱ་བའི་ཕྱིར་རོ་ཞེས་བྱ་བ་ནི་ཚིག་གི་ལྷག་མ་ཡིན་ནོ། །དུས་སུ་ཡང་བཀྲུ་བ་ནི་ཟང་ཟིང་གི་དྲི་མ་ཡོངས་སུ་སྤང་བའི་ཕྱིར་རོ་འོན་ཀྱང་མ་བྱས་ན་ནི་དུས་མ་ཡིན་པའི་ཟས་ཀྱི་ཉེས་པར་འགྱུར་རོ། །ཇི་སྟེ་ཞེས་བྱ་བ་ནི་གལ་ཏེའི་དོན་ཡིན་ནོ། །སྡོམ་ཅན་གང་ཞིག་བ་ལང་དང་འདྲ་བར་མིད་པ་གཉིས་ཡོད་དེ། གཅིག་གིས་ནི་ཟས་ཟ་བར་བྱེད་ལ་གཉིས་པས་ནི་སྐྱུགས་ལྡད་འབྱིན་པར་བྱེད་ན་དེ་ཇི་ལྟར་བྱ་བ་ཡིན་ཞེ་ན། མིད་པ་གཉིས་ཡོད་ན་ནི་ཅི་དགར་མིད་ཅེས་བྱ་བ་སྨོས་ཏེ། མིད་པ་གཉིས་གང་ལ་ཡོད་པ་དེ་ནི་མེད་པ་གཉིས་ཡོད་པ་སྟེ་བ་ལང་དང་འདྲ་བར་དེ་ལྟ་བུར་གྱུར་པ་དེས་སྒྲེགས་པ་མིད་པར་བྱའོ་ཞེས་བྱ་བར་སྦྱར་རོ། །ཇི་ལྟར་ཞེ་ན། ཅི་དགར་ཞེས་བྱ་བ་སྨོས་ཏེ་ཇི་ལྟར་དགའ་བ་སྟེ་འདོད་པ་མ་བཟླས་པས་ཞེས་བྱ་བའི་དོན་ཏོ། །འདི་སྐད་དུ་དུས་མ་ཡིན་པར་མིད་པ་གཉིས་ཡོད་པས་ཀྱང་སྒྲེགས་པ་གཅིག་
བོར་ལ་རུང་བའི་ཆུས་ཁ་བཀྲུས་ལ་ཕྱིས་ཇི་ལྟར་འདོད་པར་མིད་པར་བྱའོ་ཞེས་བྱ་བའི་དོན་ཡིན་ནོ་ཞེས་བསྟན་པར་འགྱུར་རོ། །ནིའི་སྒྲ་ནི་སྔ་མ་ལ་བྱེ་བྲག་ཏུ་བྱ་བའི་དོན་ཏོ། །ལས་ཀྱི་དབང་གིས་བ་གླང་བདག་བཞིན་དུ། །ཞེས་བྱ་བ་ནི་ཇི་ལྟར་དགྲ་བཅོམ་པ་གླང་བདག་ལ་མིད་པ་གཉིས་ཡོད་པས། བཅོམ་ལྡན་འདས་ཀྱིས་སྒྲེགས་པ་མིད་པར་གྱིས་ཤིག་ཅེས་རྗེས་སུ་གནང་བ་མཛད་པ་དེ་བཞིན་དུ་གཞན་དེ་ལྟ་བུར་གྱུར་བས་ཀྱང་བྱས་པ་ལ་ཉེས་པ་མེད་དོ་ཞེས་བྱ་བའི་ཐ་ཚིག་གོ །ད་ནི། སྡོམ་ལ་གནས་པའི་ཚེ་ནི་ཉིན་གཅིག་ཀྱང༌། །ཞེས་བྱ་བ་ལ་སོགས་པས་དུས་མ་ཡིན་པའི་ཟས་དམིགས་ཀྱིས་བསལ་བ་ཡིན་ཏེ། གང་གི་ཕྱིར་བསྟན་པ་འདི་ལ་རབ་ཏུ་བྱུང་བ་དག་ནི་ཚེ་སྟེ་སྲོག་ནི་ཉིན་གཅིག་སྟེ་ཉི་མ་གཅིག་ཙམ་ཡང་འདོད་ཅིང་དགོས་པ་ཡིན་གྱི་ཡུན་རིང་པོ་འབའ་ཞིག་ནི་མ་ཡིན་ནོ་ཞེས་བསྟན་པའི་ཕྱིར་རོ་ཞེས་བྱ་བ་ནི་ཡང་གི་དོན་ཏོ། །གང་ལ་ཞེ་ན། སྡོམ་ལ་གནས་པ་ཞེས་བྱ་བ་སྨོས་ཏེ། སྡོམ་པ་ནི་བསྟན་པ་འདི་ལ་རབ་ཏུ་བྱུང་བའི་བསླབ་པའི་གཞི་ཡིན་ནོ། །དེ་ལ་གནས་པའི་ཕྱིར་སྡོམ་ལ་གནས་པ་ཞེས་བྱའོ། །གང་གི་ཕྱིར་དེ་ཇི་སྲིད་འཚོ་བར་གྱུར་པ་དེ་སྲིད་དུ་བསོད་ནམས་འཕེལ་བར་འགྱུར་རོ་ཞེས་བྱ་བའི་དབང་དུ་བྱས་ནས་ད་ལྟ་བུར་གྱུར་པ་དེ་ལ་ཞེས་བརྗོད་པར་བྱའོ། །གང་གི་ཕྱིར་དེ་ལྟ་བུར་གྱུར་པ་དེའི་ཕྱིར་ནད་པ་ལ་མཁས་པའི་ལུང་ཉིད་བཟའ་བའི་དུས་ཡིན་ལ་ལུང་འབོགས་པར་བྱེད་པའི་ཕྱིར་ལུང་སྟེ་བཟའ་བའི་དུས་སུའོ། །མཁས་པ་ཞེས་བྱ་བ་ནི་སྨན་པ་ཁོ་ན་ལ་མི་བྱའི་འོན་ཀྱང་གཞན་དག་ཀྱང་ཡིན་ཏེ། གང་འགའ་ཞིག་གིས་ནད་པའི་བཟའ་བའི་དུས་ཤེས་པར་བྱས་ནས་ལུང་འབོགས་པར་བྱེད་ན་དེ་ཉིད་མཁས་པ་ཡིན་ལ། བདག་ཉིད་ཀྱིས་ཀྱང་ཤེས་པར་བྱས་ནས་འདི་ནི་ངའི་བཟའ་བའི་དུས་ཡིན་ནོ་ཞེས་ལུང་སྟོན་པར་བྱེད་པ་དེ་ཉིད་ཀྱི་ཕྱིར་མཁས་པ་ཞེས་སྨྲས་པ་ཡིན་ནོ། །འདི་སྐད་དུ་གང་ཞིག་གིས་ནད་པ་ལ་ཕན་པའི་དུས་ཤེས་པ་དེ་ཉིད་ལ་སྨན་པ་ཞེས་བྱའོ་ཞེས་བསྟན་པར་འགྱུར་རོ། །དང་ནི་ཚིག་གི་ཁ་བསྐང་བའོ། །རབ་ཏུ་གནོད་གྱུར་པ་ལ་དུས་མིན་མེད། །ཅེས་བྱ་བ་ལ། རབ་ཏུ་གནོད་པ་ནི་མུ་གེ་དང་མི་ངས་ཀྱི་དགོན་པ་ཡིན་ཏེ། དུས་གང་གི་ཚེ་ཆོས་སྟོན་མི་རྙེད་པ་དེ་ལྟ་བུར་གྱུར་པ་ཐོབ་ཅིང་རྙེད་པ་དེ་ལ་ནི་རྣམ་པ་ཐམས་ཅད་དུ། དུས་མ་ཡིན་པ་ཡོད་པ་མ་ཡིན་པས་དེ་ལ་གང་གི་ཚེ་རྙེད་པར་
གྱུར་པ་དེའི་ཚེ་ཡོངས་སུ་སྤྱད་པར་བྱ་ཞིང་མི་ངས་ཀྱི་དགོས་པར་ཡང་དུས་མ་ཡིན་པར་འབྲས་བུ་དང་རྩ་བ་དག་ཡོངས་སུ་བཟའ་བར་བྱ་སྟེ། འདི་ལ་འགྱོད་པར་མི་བྱའོ། །འདི་ལ་ཡང་སྡོམ་ལ་གནས་པའི་ཞེས་བྱ་བ་ལ་སོགས་པ་སྔར་བསྟན་པའི་རྒྱུ་བརྗོད་པར་བྱ་བ་ཡིན་ནོ། །འདུལ་བ་ལས་ཉ་དང་ཤ་བཟའ་བར་གསུངས་པ་དེ་ཁྱད་པར་ཇི་ལྟ་བུ་བཟའ་བར་བྱ་བ་ཡིན་ཞེ་ན། དམ་པས་ཉ་དང་ཤ་གནང་གང་ཡིན་པ། །གནོད་དང་བརྩེ་མེད་རོ་ལ་སོགས་ཆགས་དང༌། །ཡོངས་སུ་བཙལ་བའི་སེམས་རྣམས་སྤངས་ནས་ཀྱང༌། །ལྷུང་བཟེད་འོངས་པ་བརྟགས་ཏེ་བཟའ་བར་བྱ། །ཞེས་བྱ་བ་སྨོས་ཏེ། དམ་པ་སྟེ་འཇིག་རྟེན་པའི་དྲང་སྲོང་དག་གིས་གནང་བའི་བཟའ་བར་བྱ་བ་གང་ཡིན་པ་དེ་བརྟགས་ནས་བཟའ་བར་བྱའོ་ཞེས་བྱ་བའི་ཐ་ཚིག་གོ །ལྷུང་བཟེད་འོངས་པ་ཞེས་བྱ་བའི་ཚིག་གིས་ཉ་དང་ཤ་དག་བྱེད་པ་དང་བྱེད་དུ་བཅུག་པ་ལ་བཀག་པ་ཡིན་ཏེ། གང་གི་ཕྱིར་བདག་ཉིད་སྒྲུབ་ཅིང་འཚེད་པ་དང་གཞན་བྱེད་དུ་བཅུག་པས་ཉ་དང་ཤ་དག་བཟའ་བར་མི་བྱའི་འོན་ཀྱང་ཟས་ལ་བཀད་པའམ་བསོད་སྙོམས་ལ་འཇུག་པ་ན་ལྷུང་བཟེད་དུ་འོངས་པར་གྱུར་པ་ཅང་མི་སྨྲ་བའི་སྒོ་ནས་དེ་ལྟ་བུར་གྱུར་པ་དེ་ཡོངས་སུ་ཟོས་པ་ལ་ཉེས་པ་ཡོད་པ་མ་ཡིན་ནོ། །ཇི་ལྟར་བཟའ་བར་བྱ་བ་ཡིན་ཞེ་ན། གནོད་པ་དང་བརྩེ་མེད་ཅེས་བྱ་བ་ལ་སོགས་པ་སྨོས་ཏེ། གནོད་པ་དང་བརྩེ་བ་མེད་པ་དང༌། རོ་ལ་སོགས་པ་ལ་ཆགས་པ་དང༌། ཡོངས་སུ་བཙལ་བ་སྟེ་ཟླས་དབྱེ་བའི་བསྡུ་བའོ། །གནོད་པ་ལ་སོགས་པ་དང་ལྡན་པ་ཡང་དེ་དག་ཡིན་ལ། སེམས་ཀྱང་ཡིན་པས་ཞེས་བྱ་བའི་བར་གྱི་ཚིག་ཕྱི་མར་བྱ་སྟེ། ཁྱད་པར་གྱི་བསྡུ་བ་ཡིན་ནོ། །དེ་ལྟ་བུར་གྱུར་པ་དེས་རྣམ་པར་སྤངས་ནས་ཀྱང་དེ་བཟའ་བར་བྱའི། འོན་ཀྱང་བཙལ་བས་ནི་མ་ཡིན་ནོ། །དེ་ལ་གནོད་པ་ནི་སེམས་ཅན་ལ་འཚེ་བའོ། །བརྩེ་བ་མེད་པ་ནི་སེམས་ཅན་གྱི་ཡུལ་ལ་སྙིང་རྗེ་དང་བྲལ་བས་སྙིང་བརྩེ་བ་མེད་པའོ། །རོ་ལ་སོགས་ཆགས་ཞེས་བྱ་བ་ནི་དྲི་དང་རོ་ལ་སོགས་པ་ལ་སྲེད་པར་གྱུར་པའོ། །ཡོངས་སུ་བཙལ་བ་ནི་གང་ནས་རྙེད་པར་འགྱུར་སྙམ་པའི་སེམས་ཀྱིས་གང་ལུས་དང་ངག་གིས་ཡོངས་སུ་བཙལ་བ་སྟེ་ཚོལ་བར་བྱེད་པ་ཡིན་ནོ། །ལྷུང་བཟེད་འོངས་པ་ཞེས་བྱ་བ་སྨོས་པ་ཉིད་ཀྱིས་བཀག་པ་ཉིད་ཡིན་པའི་ཕྱིར་རོ། །ཇི་སྟེ་ཡང་བཅོམ་ལྡན་འདས་ཀྱིས་མ་གསུངས་པ་དེ་ལྟ་ན་ཡང་བཟའ་བ་ལོངས་
སྤྱོད་པའི་ཆོ་ག་གཞན་ལ་ཡང་ཁོང་དུ་ཆུད་པར་བྱའོ། །དེ་ལྟར་ནི་ཟས་ལ་ནི་སྨན་གྱི་འདུ་ཤེས་གཞག་པར་བྱ་ཞིང་བདག་ཉིད་ལ་ནི་ནད་པའི་འདུ་ཤེས་གཞག་པས་བཟའ་བར་བྱའི། གཞན་དུ་ནི་མ་ཡིན་ནོ་ཞེས་གསུངས་སོ། །དེ་ཉིད་ཀྱི་ཕྱིར་ཤ་ལ་སོགས་པ་ཤིན་ཏུ་ལེགས་པར་བཀག་པ་ཡིན་ནོ། །གང་གི་ཕྱིར་བཟའ་བ་ཙམ་གྱི་རོལ་ཆགས་པ་ཡང་ཅུང་ཟད་ལྟོགས་པ་བསལ་བའི་ཕྱིར། བཟའ་བར་བྱེད་པ་ཉིད་ཡིན་པ་དེ་ལྟ་བུ་དེ་ཡང་བཀག་པ་ཡིན་ནོ། །འོན་ཀྱང་རོལ་ཆགས་པས་ཤ་ཡོངས་སུ་ལོངས་སྤྱོད་པ་ཡིན་པ་དེའི་ཕྱིར་ཡང་འདིར་ཕྲ་བ་བཀག་པས་རགས་པ་བཀག་པ་ཤིན་ཏུ་ལེགས་པར་བྱ་བར་རིག་པར་བྱའོ། །གང་དུ་ཉེས་པ་དེ་དག་མེད་པ་དེར་ནི་ཟས་དང་འདྲ་བར་བྲུ་བ་ཚ་བ་ཟློག་པ་ཉིད་ཀྱི་ཕྱིར་ཉེས་པ་མེད་པར་ཤེས་པར་བྱའོ། །དེ་ཉིད་ཀྱི་ཕྱིར། ནས་ཆན་འབྲས་ཆན་ཁུར་བ་ཉ་དང་ཤ །སྲོག་གནས་ཕྱིར་ནི་འདི་དག་བཟའ་བར་གསུངས། །ཞེས་འཆད་པར་འགྱུར་རོ། །དགེ་ཚུལ་བའི་སྨན་ནི་རྣམ་པ་གཉིས་ཏེ། དུས་སུ་རུང་བ་དང༌། དུས་སུ་རུང་བ་མ་ཡིན་པའོ། །དུས་སུ་རུང་བ་དེ་ཡང་རྣམ་པ་གཉིས་ཏེ། བཟའ་བར་བྱ་བ་དང་བཅའ་བར་བྱ་བའོ། །དེ་ལ། ནས་ཆན་འབྲས་ཆན་ཁུར་བ་ཉ་དང་ཤ །ཞེས་བྱ་བ་ལ་སོགས་པས་བཟའ་བ་འཆད་པར་བྱེད་པ་ཡིན་ཏེ། ནས་ཆན་དང་འབྲས་ཆན་དང་ཁུར་བ་དང་ཉ་དང་ཤ་ནི་ཞེས་བྱ་བ་ནི་ཟླས་དབྱེ་བའི་བསྡུ་བའོ། །ནས་ཆན་ལ་སོགས་པ་དེ་དག་ནི་རབ་ཏུ་བྱུང་བའི་སྲོག་གནས་ཕྱིར་ཏེ། སྲོག་གནས་པའི་དོན་དུ་བཟའ་བ་ཡིན་པར་བཅོམ་ལྡན་འདས་ཀྱིས་གསུངས་སོ་ཞེས་བྱ་བ་ནི་ཚིག་གི་ལྷག་མ་ཡིན་ནོ། །དེ་ལ་ནས་ཆན་ནི་ཏིལ་དང་མ་ཤ་དང་འབྲས་དག་ལས་གྲུབ་པའོ། །ཁུར་བ་ནི་སྣུམ་ཁུར་རོ། །ལྷག་མ་དག་ནི་གྲགས་པ་ཡིན་ནོ། །འདི་སྐད་དུ་བཤད་པར་བྱ་སྟེ། བཅོམ་ལྡན་འདས་ཀྱིས་རབ་ཏུ་བྱུང་བ་དག་གི་སྲོག་གནས་པའི་ཕྱིར་སྨན་གྱི་ཚུལ་དུ་བཟའ་བར་བྱའོ་ཞེས་གསུངས་པ་དེ་ཉིད་ཀྱི་ཕྱིར་ཟས་ལ་སྨན་ཞེས་བྱའོ། །སྡོང་བུ་འབྲས་བུ་ཨུཏྤ་ལ་ལ་སོགས་རྩ། །ཞེས་བྱ་བ་ལ་སོགས་པས་བཅའ་བར་བྱ་བ་འཆད་པར་བྱེད་པ་ཡིན་ཏེ། བུ་རམ་ཤིང་གི་སྡོང་བུ་ནི་བཅའ་བར་བྱ་བ་ཡིན་ནོ། །དེ་བཞིན་དུ་འབྲས་བུ་ནི་ཆུ་ཤིང་གི་འབྲས་བུ་ལ་སོགས་པ་དང༌། མ་ཤའི་གོང་བུ་ལ་སོགས་པའོ། །ཨུཏྤལ་ལ་སོགས་རྩ་ཞེས་བྱ་བ་ལ། ཨུཏྤལ་ལ་སོགས་པའི་རྩ་བ་གང་ཡིན་པ་དེ་ནི་
བཅའ་བར་བྱ་བ་ཡིན་ནོ། །ཨུཏྤ་ལ་ཞེས་བྱ་བས་ནི་ཨུཏྤ་ལ་སྔོན་པོ་དང་ཨུཏྤལ་དམར་པོ་གཟུང་ངོ༌། །སོགས་པའི་སྒྲས་ནི་པད་མ་ལ་སོགས་པ་གཟུང་ངོ༌། །བཅའ་བ་ནི་རྣམ་པ་གཉིས་ཏེ་དུས་སུ་རུང་བ་དང༌། དུས་སུ་རུང་བ་མ་ཡིན་པའོ། །དེ་ཁྱད་པར་བྱ་བའི་དོན་དུ་དེ་དག་སྔ་དྲོའི་དུས་སུ་བཅའ་བར་བྱ་ཞེས་བྱ་བ་སྨོས་སོ། །བསྟན་མ་ཐག་པ་དེ་དག་ནི་སྔ་དྲོའི་དུས་སུ་ཞེས་བྱ་བ་ལ་དེ་དག་ཅས་བྱ་བའི་སྒྲ་ཕྱིས་པ་ཡིན་པར་རིག་པར་བྱའོ། །ནིའི་སྒྲ་ནི་དུས་མ་ཡིན་པ་ལས་ཁྱད་པར་དུ་བྱེད་པའི་དོན་ཏོ། །ད་ནི། དུས་ཀྱི་མ་ཡིན་རུང་བའི་ཆུས་འདྲེས་པ། །ཞེས་བྱ་བ་ལ་སོགས་པས་དུས་མ་ཡིན་པར་རུང་བརྗོད་པར་བྱེད་དེ། ཆུ་ཤིང་འབྲས་བུ་ལ་སོགས་པའི་བཏུང་བ་ནི་ཆུ་ཤིང་གི་འབྲས་བུ་ལ་སོགས་པའི་བཏུང་བ་སྟེ། གང་ཆུ་ཤིང་གི་འབྲས་བུ་ལ་སོགས་པ་ལས་བྱས་པར་གྱུར་པའོ། །ཁྱད་པར་ཇི་ལྟ་བུ་ཞེ་ན། ཚགས་བཙགས་ཞེས་བྱ་བ་སྨོས་ཏེ། ཚགས་ལས་བཙགས་པ་ནི་ཚགས་བཙགས་ཏེ་ཆུ་ཚགས་ལས་བཙགས་པར་གྱུར་པ་ཞེས་བྱ་བའི་དོན་ཏོ། །གཞན་ཡང་ཁྱད་པར་དུ་བྱེད་པ་ནི་རུང་བའི་ཆུས་འདྲེས་པ་ཞེས་བྱ་བ་སྨོས་ཏེ། དུས་མ་ཡིན་པར་རུང་བ་གང་ཡིན་པ་དེ་ལ་རུང་བའི་ཆུས་འདྲེས་ཤིང་གཏོང་བ་སྟེ། དེ་ལྟ་བུར་གྱུར་པའི་བཏུང་བ་ནི་དུས་མ་ཡིན་པར་རུང་བ་ཡིན་པར་རིག་པར་བྱའོ། །དེ་ལ་ཆགས་བཙགས་ཞེས་བྱ་བ་ནི་བཏུང་བའི་རྫས་དུས་སུ་རུང་བ་ཉིད་ཡིན་པའི་ཕྱིར། ཚགས་ལས་བཙགས་པ་དུས་མ་ཡིན་པ་དག་ཏུ་འཐུངས་ན་ཡང་ཉེས་པ་མེད་པར་ཤེས་པར་བྱའོ། །སོགས་པའི་སྒྲས་ནི་རྒུན་འབྲུ་ལ་སོགས་པའི་བཏུང་བའི་རྫས་དག་སྡུད་པ་ཡིན་ནོ། །དེ་བཞིན་དུ། དར་བ་དག་ནི་དར་བས་དང་བ་སྟེ། །སྙོག་པ་མེད་པ་ཞེས་བྱ་བའི་བར་དུའོ། །དེ་ལྟ་བུར་གྱུར་པའི་དར་བ་དང་བ་ཚགས་ལས་བཙགས་པ་རུང་བའི་ཆུས་འདྲེས་པ་དེ་ཁོ་ན་བཞིན། དུས་མ་ཡིན་པར་རུང་བ་ཡིན་པར་རིག་པར་བྱའོ། །དེ་བཞིན་དུ་འདས་མ་ཐག་པ་ཐམས་ཅད་ལ་ཤེས་པར་བྱའོ། །དེ་ལྟར། རྩབ་མོ་ཞོག་ཆུ་དང་བཅོས་ཚ་དང༌། །ཞེས་བྱ་བ་ནི་གཅིག་བཞིན་དུ་གྱུར་པའི་ཟླས་དབྱེ་བའི་བསྡུ་བའོ། །དེ་ལྟ་བུར་གྱུར་པ་དེ་དག་ནི་དུས་མ་ཡིན་པར་རུང་བ་མ་ཡིན་པར་རིག་པར་བྱའོ། །ཞོ་ག་ཆུ་ཞེས་བྱ་བ་ནི་ཞོའི་ཞོ་ག་ཆུའོ། །དེ་བཞིན་དུ། བུ་རམ་ཤིང་ཁུ་དེ་བཞིན་ཚྭ་གང་ཡིན། །ཞེས་བྱ་བ་ལ། དེ་ལྟ་བུར་གྱུར་པ་ཚགས་ལས་
བཙགས་ཤིང་རུང་བའི་ཆུས་གཏོར་བ་སྔ་མ་ཇི་ལྟ་བ་དེ་ཁོ་ན་བཞིན་དུ་དུས་མ་ཡིན་པར་རུང་བ་མ་ཡིན་ནོ་ཞེས་བྱ་བའི་དོན་ཏོ། །དེ་ལ་བཅོས་པའི་ཚ་ནི་ཇི་ལྟར་བུ་རམ་ཤིང་གི་ཁུ་བ་ལ་སོགས་པ་ཀུན་དུ་སྦྱར་བའི་བཅོས་པའི་ཆང་ཉམས་ཤིང་སྐྱུར་པོར་གྱུར་པ་གང་ཡིན་པ་དེ་ལ་དེ་སྐད་ཅེས་བྱའོ། །གང་ཞིག་འབྲུ་དང་བཅས་པའི་ཀོ་ཏྲ་བ་ལ་སོགས་པ་ལས་བྱས་པ་སྦྱར་བའི་ཆང་གི་རྫས་ཉམས་ཤིང་སྒྱུར་བོར་གྱུར་པ་གང་ཡི་པ་ལ་འབྲུ་ཚ་ཞེས་བྱའོ། །བུ་རམ་སྦྲང་སྦྲང་རྩི་ཏིལ་མར་མར་སར་དང༌། །ཁཎྜ་ཞག་དང་ཁ་རར་བཅས་པ་ཉིད། །ཅེས་བྱ་བ་ལ། བུ་རམ་དང་སྦྲང་རྩི་དང་ཏི་ལ་མར་དང་མར་སར་དང་ཁཎྜ་དང་ཁ་རར་བཅས་པ་ཉིད་དང༌། པག་ལ་སོགས་པ་རུང་བའི་ཤར་འདོད་པའི་ཞག་ནི། བུ་རམ་སྦྲང་རྩི་ཏིལ་མར་མར་སར་ལ་སོགས་པ་སྟེ། དེ་དག་ཐམས་ཅད་ནི་བཙགས་ཤིང་དང་བའི་ཆུས་གཏོར་བ་དེ་ལྟ་བུར་གྱུར་པ་དག་དང༌། བུ་རམ་ལ་སོགས་པ་ལ་རུང་བའི་ཆུས་གཏོར་བ་དག་ནི་དུས་མ་ཡིན་པར་རུང་བ་ཡིན་ནོ་ཞེས་བྱ་བར་རིག་པར་བྱའོ། །བཅས་པ་ཉིད་ཅེས་བྱ་བ་ནི་ཁ་ར་དང་བཅས་པའི་ཁཎྜ་དུས་མ་ཡིན་པར་རུང་བ་ཡིན་ཏེ། འདི་སྐད་དུ་ཇི་ལྟར་ཁཎྜ་དུས་མ་ཡིན་པར་རུང་བ་ཡིན་པ་དེ་བཞིན་དུ་ཁ་ར་ཡང་ཡིན་ནོ་ཞེས་བསྟན་པར་འགྱུར་རོ། །དང་ནི་སྡུད་པའི་དོན་ཡིན་ནོ། །ཡུང་དང་སྒེ་གཤེར་གླ་སྒང་ལ་སོགས་རྩ་དེ་བཞིན་ནོ། །ཞེས་བྱ་བར་སྦྱར་ཏེ། རྩ་བ་ཡང་དེ་བཞིན་དུ་དུས་མ་ཡིན་པར་རུང་བ་ཡིན་ནོ། །གང་ཞེ་ན། ཡུང་དང་ཞེས་བྱ་བ་ལ་སོགས་པ་སྨོས་ཏེ། ཡུང་དང་སྒེ་གཤེར་དང་གླ་སྒང་ལ་སོགས་པ་དང་ཞེས་བྱ་བ་ནི་གཅིག་བཞིན་དུ་གྱུར་པའི་ཟས་དབྱེ་བའི་དོན་ཏོ། སོགས་པའི་སྒྲས་ནི་བོང་ང་དཀར་པོ་ལ་སོགས་པ་རྩ་བར་གྱུར་པ་དག་གཟུང་ངོ༌། །དེ་བཞིན་དུ་སྡོང་བུ་ཡང་དུས་མ་ཡིན་པར་རུང་བ་ཡིན་པར་རིག་པར་བྱའོ། །གང་ཞེ་ན། གུ་རུ་ཙི་དང་ཙན་དན་སོགས་སྡོང་བུ། །ཞེས་བྱ་བ་སྨོས་ཏེ། གུ་རུ་ཙི་དང་ཙན་དད་དམར་པོ་ལ་སོགས་པ་དང་ཞེས་སྔ་མ་བཞིན་དུ་བསྡུ་བར་བྱའོ། །ཙན་དན་ནི་ཙན་དན་དམར་པོ་ཡིན་ནོ། །སོགས་པའི་སྒྲས་ནི་སྲེག་ཤིང་ལ་སོགས་པ་སྡོང་བུའི་སྨན་གྱི་རང་བཞིན་དུ་གྱུར་པ་བསྡུ་བ་ཡིན་ནོ། །དེ་བཞིན་དུ་བཅོམ་ལྡན་འདས་ལོ་མ་དུས་མ་ཡིན་པར་རུང་བ་བཞེད་ཅིང་དགོངས་སོ་ཞེས་བྱ་བ་ནི་ཚིག་གི་ལྷག་མ་ཡིན་ནོ། །གང་
ཡིན་ཞེ་ན། ནིམ་པ་པ་ཏོ་ལ་སོགས་ཞེས་བྱ་བ་སྨོས་པ་ཡིན་ནོ། །སོགས་པའི་སྒྲས་ནི་བ་ཤ་ཀ་ལ་སོགས་པ་བསྡུས་པ་ཡིན་ནོ། །དེ་བཞིན་དུ་མེ་ཏོག་དག་དུས་མ་ཡིན་པར་རུང་བ་ཡིན་པར་ཤེས་པར་བྱའོ། །གང་དག་ཡིན་ཞེ་ན། བ་ཤ་ཀ་དང་དྷ་ན་ཀ་ལ་སོགས་པ་ཞེས་བྱ་བ་སྨོས་པ་ཡིན་ནོ། །སོགས་པའི་སྒྲ་ནི་འདིར་ཕྱིས་པ་ཡིན་པར་བལྟ་བར་བྱ་སྟེ། ཀོ་ཤ་ཏ་ཀི་ལ་སོགས་པ་བསྡུ་བའི་ཕྱིར་རོ། །འབྲས་བུ་དུས་མ་ཡིན་པར་རུང་བ་ཡིན་པར་རྟོགས་པར་བྱའོ། །ཨ་རུ་བ་རུ་སྐྱུ་རུ་ན་ལེ་ཤམ། །ཞེས་བྱ་བ་ལ་སོགས་པས་དེ་འཆད་པར་བྱེད་དེ། ཨ་རུ་ར་དང༌། བ་རུ་ར་དང༌། སྐྱུ་རུ་ར་དང༌། ན་ལེ་ཤམ་དང༌། ཞེས་སྔ་མ་བཞིན་དུ་བསྡུ་བ་བྱའོ། །ཀ་ཀོ་ལ་དང་སུག་སྨེལ་པི་པི་ལིང་འབྲས་དང༌། །ཞེས་བྱ་བ་ལ་ཀ་ཀོ་ལ་དང༌། སུག་སྨེལ་དང༌། པི་པི་ལིང་སྟེ། དེ་དག་ཐམས་ཅད་དུས་མ་ཡིན་པར་རུང་བ་ཡིན་པར་རིག་པར་བྱའོ། །དང་གཅིག་ནི་སྡུད་པར་བྱེད་པ་ཡིན་ལ། གཉིས་པ་དང༌། ཡང་གི་སྒྲ་ནི་ཚིག་གི་ཁ་བསྐང་པ་ཡིན་ནོ། །འགྱུར་བྱེད་དུས་མ་ཡིན་པར་རིག་པར་བྱའོ། །གང་ཞེ་ན། ཏིལ་སོགས་ཐལ་བ་དང་ནི་ལན་ཚྭ་ལྔ། །ཞེས་བྱ་བ་སྨོས་པ་ཡིན་ནོ། །སོགས་པའི་སྒྲས་ནི་ནས་ལ་སོགས་པ་གཟུང་ངོ༌། །དུས་སུ་རུང་བ་མ་ཡིན་པའི་ལན་ཚྭ་ནི་ལྔ་སྟེ། རྒྱམ་ཆ་དང༌། ཁ་རུ་ཚ་དང༌། རྩལ་རུ་ཚ་དང༌། ལན་ཚྭ་དང༌། རྒྱ་མཚོའི་ཚའོ། །ཐང་ཆུ་དུས་སུ་རུང་བ་མ་ཡིན་པ་གང་ཞེ་ན། ཤིང་ཀུན་སྤྲ་ཚིལ་སྲ་རྩི་རྒྱ་སྐྱེགས་དག །ཅེས་བྱ་བ་སྨོས་ཏེ། ཤིང་ཀུན་དང༌། སྤྲ་ཚིལ་དང༌། སྲ་རྩི་དང༌། རྒྱ་སྐྱེགས་ཞེས་སྔ་མ་བཞིན་དུ་བསྡུ་བར་བྱའོ། །སྲ་རྩི་ནིས་རྫ་ར་ས་ཡིན་ནོ། །སྤྲ་ཚིལ་ནི་སྦྲང་རྩིའི་སྦྲ་ཚིལ་ལོ། །བཏུང་བ་ལ་སོགས་པ་གང་ཡིན་པ་དེ་ཐམས་ཅད་ནི་གཞན་རིགས་འདྲ་བའི་སྨན་གང་དག་གི་ཉེ་བར་མཚོན་པར་བྱེད་པ་ཡིན་པ་དེ་ཉིད་ཕྱིར། བྲུ་བ་བསལ་ཕྱིར་བཟའ་མིན་གང་ཡིན་པ། །ཞེས་བྱ་བ་ལ་སོགས་པ་སྨོས་པ་ཡིན་ཏེ། རྣམ་པ་ཐམས་ཅད་དུ་བྲུ་བ་སྟེ། ལྟོགས་པ་བསལ་བའི་གཉེན་པོའི་དོན་དུ་བཟའ་བར་བྱ་བ་མ་ཡིན་པའི་རྫས་གང་ཡིན་པ་དེ་ནི་དུས་སུ་རུང་བ་མ་ཡིན་པའི་སྨན་དུ་མ་ཤིའི་བར་དུ་གསུངས་པ་བཞིན་བསྟན་པ་ཡིན་ནོ། །ནིའི་སྒྲ་ནི་གང་གི་ཕྱིར་གྱི་དོན་ཡིན་ཏེ། གང་གི་ཕྱིར་ཟས་དར་འདྲ་བ་བྲུ་བ་བསལ་བའི་ཕྱིར་བཟའ་བར་བྱ་བ་མ་ཡིན་གྱི་
འོན་ཀྱང་ནད་ཀྱི་ཕྱིར་ཨ་རུ་ར་ལ་སོགས་པ་དང་འདྲ་བར་དུས་སུ་རུང་བ་མ་ཡིན་པའི་སྨན་དེ་ནི་སངས་རྒྱས་བཅོམ་ལྡན་འདས་ཀྱིས་སམ་འདུལ་བ་ལ་མཁས་པ་དག་གིས་ཇི་སྲིད་འཚོ་བར་གསུངས་པ་ཡིན་ནོ། །མ་ཤིའི་བར་དུ་ཞེས་བྱ་བ་ནི་ཤི་བ་ལ་ཐུག་པའི་བར་དུ་རུང་བ་ཡིན་ནོ་ཞེས་བྱ་བའི་དབང་དུ་བྱས་པ་དེ་ཉིད་ཀྱི་ཕྱིར་ཇི་སྲིད་འཚོ་བ་ཞེས་བྱ་བ་ཡིན་ལ། ཇི་སྲིད་འཚོ་བ་རུང་བ་ཡིན་ནོ་ཞེས་བྱ་བའི་དབང་དུ་བྱས་ནས་དུས་མ་ཡིན་པར་ཡང་བཟར་རུང་བའི་ཕྱིར་དུས་སུ་རུང་བ་མ་ཡིན་པ་མ་ཡིན་ནོ། །གང་གི་ཚེ་དུས་སུ་རུང་བ་མ་ཡིན་པ་ལ་དུས་སུ་རུང་བ་འདྲེས་པར་གྱུར་ན་དེ་ཇི་ལྟར་ལོངས་སྤྱོད་པར་བྱ་བ་ཡིན་ཞེ་ན། དུས་མིན་པ་ལ་དུས་རུང་གང་འདྲེས་པ། །དེ་དག་དུས་ཀྱི་དབང་དུ་བཟའ་བར་བྱ། །ཞེས་བྱ་བ་སྨོས་ཏེ། གང་གི་ཚེ་དུས་སུ་རུང་བ་མ་ཡིན་པ་ལ་དུས་སུ་རུང་བ་ཟས་འདྲེས་པར་འགྱུར་བ་དེ་ནི་དུས་སུ་རུང་བ་ཁོ་ནའི་དབང་དུ་བཟའ་བར་བྱ་བ་ཡིན་ནོ་ཞེས་ཁོང་དུ་ཆུད་པར་བྱའོ། །འདི་སྐད་དུ་དུས་སུ་རུང་བ་དང་འདྲེས་པ་གང་ཡིན་པ་དེ་གལ་ཏེ་དུས་སུ་རུང་བ་དེ་དང་ཐ་དད་པར་བྱེད་ནུས་པ་ནི་གང་བུ་རམ་ལ་སོགས་པ་ལ་འབྲས་ལ་སོགས་པ་ཞུགས་པར་གྱུར་པ་བཀྲུས་ནས་ཟང་ཟིང་མེད་པར་བྱེད་པར་ནུས་པ་དེའི་ཚེ་དུས་སུ་རུང་བ་མ་ཡིན་པར་རིག་པར་བྱའོ་ཞེས་བསྟན་པར་འགྱུར་རོ། །ཉིད་ནི་ངེས་པར་གཟུང་བའོ། །ད་ནི་དུས་མིན་ཕྱོགས་ནི་ཞེས་བྱ་བ་ལ་སོགས་པས་དུས་མ་ཡིན་པའི་ཟས་ཀྱི་ཕྱོགས་བརྗོད་པ་ཡིན་ནོ། །དུས་མ་ཡིན་པའི་ཟས་ཀྱི་ཕྱོགས་སུ་གཏོགས་པ་སྟེ། ཟས་ཀྱི་སྒྲ་ཕྱིས་པ་ཡིན་ནོ། །གང་ཞེ་ན། སྣོད་གཅིག་བཟའ་ཞེས་བྱ་བ་སྨོས་ཏེ། སྣོད་གཅིག་ལ་གཉིས་ཀས་བྱིན་གྱིས་བརླབས་ནས་སྣོད་གཅིག་ཏུ་བཟའ་བར་བྱེད་པ་ནི་སྣོད་གཅིག་ཏུ་ཟ་བ་ཡིན་ཏེ། དེ་དག་ནི་དུས་མིན་ཕྱོགས་ཞེས་བྱ་བ་ཡིན་ནོ། །ནིའི་སྒྲ་ནི་སྔ་མ་ལས་ཁྱད་པར་དུ་བྱེད་པའི་དོན་ཏོ། །གང་གི་ཚེ་ཞེ་ན། སྣོད་གཞན་ཡོད་པར་གྱུར་ན་འཇིགས་མེད་ཕྱོགས་སུ་ཞེས་བྱ་བ་སྨོས་ཏེ། སྣོད་གཞན་ཡོད་ཅིང་འབྱོར་པ་ནའོ། །གང་དུ་ཞེ་ན། འཇིགས་མེད་ཕྱོགས་སུ་ཞེས་བྱ་བ་སྨོས་ཏེ། འཇིགས་པ་ཡོད་པ་མ་ཡིན་པ་གང་ཡིན་པ་དེ་ནི་འཇིགས་མེད་དེ། འཇིགས་པ་མེད་པའི་ས་ཕྱོགས་དེར་ཞེས་བྱ་བའི་ཐ་ཚིག་གོ །འདི་སྐད་དུ་འཇིགས་པ་མེད་པའི་ས་ཕྱོགས་སུ་སྣོད་གཞན་ཡོད་ན་ཡང་གཉིས་པ་དང་ལྷན་ཅིག་ཏུ་སྣོད་གཅིག་ཏུ་ཟན་ཉེས་བྱས་སུ་འགྱུར་
ལ། འཇིགས་པ་དང་བཅས་པའི་ས་ཕྱོགས་སུ་སྣོད་གཞན་ཡོད་ན་གཞན་དང་ལྷན་ཅིག་ཏུ་ཟ་ན་ཡང་ཉེས་པར་གྱུར་ཞིང་འཇིགས་པ་དང་བཅས་པར་སྣོད་གཞན་མེད་ན་ཉེས་པར་མི་འགྱུར་རོ་ཞེས་བསྟན་པར་འགྱུར་རོ། །འདིའི་དམིགས་ཀྱིས་བསལ་བ་ཡང༌། ཕམ་དང་ཡང་སྣོད་གཅིག་བཟའ་བར་ནི།། དུས་ཀྱིས་འཆུ་ན་དབེན་པར་ཉེས་མེད་དོ། །ཞེས་བྱ་བ་སྨོས་ཏེ། དབེན་པ་ནི་སྐྱེ་བོས་དབེན་པར་གྱུར་པའི་ས་ཕྱོགས་དང༌། སྟེང་ཁར་འོག་ཁང་ལ་སོགས་པར་ཕ་མ་དང་ལྷན་ཅིག་སྣོད་གཅིག་ཏུ་ཟ་བ་ལ་ཉེས་པ་མེད་པ་ཁོ་ནའོ་ཞེས་བྱ་བའི་དོན་ཏོ། །གང་གིས་ཤེ་ན། དུས་ཀྱིས་འཆུ་ན་ཞེས་བྱ་བ་སྨོས་པ་ཡིན་ནོ། །ནིའི་སྒྲ་ནི་འདིར་ཡང་གཞན་དང་ལྷག་པར་ཉེས་པར་འགྱུར་ལ། ཕ་མ་དང་ནི་ཉེས་པ་མེད་དོ་ཞེས་ཁྱད་པར་དུ་བྱ་བའི་ཕྱིར་རོ། །ད་ནི་མཛེས་དགའ་ལ་སོགས་མདོར་གསུངས་ཚུལ་དུ་བཟའ། །ཞེས་བྱ་བ་ལ་སོས་པས་ཇི་ལྟར་བཟའ་བར་བྱ་བ་དེ་ལྟར་སྟོན་པར་བྱེད་དེ། མཛེས་དགའ་ལ་སོགས་པའི་མདོ་ལས། བཅོམ་ལྡན་འདས་ཀྱིས་གསུངས་པའི་ཚུལ་ཏེ། རིགས་པ་དེས་བཟའ་བ་དག་བཟའ་བར་བྱའོ་ཞེས་བྱ་བའི་ཐ་ཚིག་གོ །དེ་ལྟར་ནི་མཛེས་དགའི་མདོ་ལས། བཅོམ་ལྡན་འདས་ཀྱིས་མཛེས་དགའ་དཔེར་ན་ཤིང་རྟ་མཁན་གྱི་སྐྱེས་བུས་ཤིང་རྟའི་མིག་ལ་མིག་སྨན་སྐུད་པར་བྱེད་པ་ནི་སྤྲས་པར་བྱ་བའི་ཕྱིར་མ་ཡིན། བརྒྱན་པར་བྱ་བའི་ཕྱིར་མ་ཡིན་གྱི་ཞེས་བྱ་བ་ནས་ཤིང་རྟ་ཉིད་ཁུར་འདེགས་པའི་ཕྱིར་ཡིན་པ་དེ་ལྟ་དེ་ལྟར་རིགས་ཀྱི་བུ་ཟས་ཟ་བར་བྱེད་པ་སྤྲས་པར་བྱ་བའི་ཕྱིར་མ་ཡིན་བརྒྱན་པར་བྱ་བའི་ཕྱིར་མ་ཡིན་གྱི། འོན་ཀྱང་ཇི་སྲིད་ལུས་གནས་པ་དང༌། འཛིན་པ་ཉིད་ཀྱི་ཕྱིར་རོ་ཞེས་བྱ་བའི་བར་དུ་གསུངས་སོ། །དེའི་ཕྱིར་ཇི་སྲིད་ལུས་གནས་པར་འགྱུར་བ་དེ་ཙམ་དེའི་བསམ་པས་ལུས་གནས་པར་བྱ་བའི་དོན་དུ་བཟའ་བར་བྱའོ། །ལྷག་པར་ནི་མ་ཡིན་ཏེ། དགོས་པ་མེད་པའི་ཕྱིར་རོ། །དད་པས་ཕྱིན་པ་ལྷག་པར་ཟོས་པ་ལས་ཉེས་པ་བྱུང་བའི་ཕྱིར་ཡང་ཆུང་བ་ཡིན་ཏེ། དགོས་པ་དང་ལྡན་པ་མ་ཡིན་པའི་ཕྱིར་རོ། །སོགས་པའི་སྒྲ་ནི་འདིར་མདོ་སྡེ་ཉེ་བར་མཚོན་པར་བྱེད་པའི་དོན་ཡིན་ནོ། །དང་ནི་གུས་པར་བྱ་བ་དང་བཟའ་བར་བྱའོ་ཞེས་རྗེས་སུ་དྲང་བའི་དོན་ཏོ། །ཚོད་དང་ལྡན་པར་བཟའ་ཞེས་བྱ་བ་འདི་ལ་ཡང་དང་ནི་རྗེས་སུ་འབྲེལ་བས་བཟའ་བར་བྱ་བའི་སྒྲས་
འདྲེན་པ་ཡིན་ནོ། །དེ་ལ་ལྡན་པ་ཞེས་བྱ་བ་ནི་བྱ་བ་ཁྱད་པར་དུ་བྱེད་པ་ཡིན་ནོ། །ཇི་ལྟར་བཟའ་བར་བྱ་བ་ཡིན་ཞེ་ན། ཚོང་དང་ལྡན་པར་ཞེས་བྱ་བར་ཚོད་དང་ལྡན་པ་ནི་ཚོད་དང་ལྡན་པ་སྟེ། ཚོད་རིག་པའི་འདུ་ཤེས་ཀྱིས་བཟའ་བར་བྱའོ་ཞེས་བྱ་བའི་ཐ་ཆག་གོ །གུས་པར་བྱས་ཏེ་ཞེས་སྨོས་པ་དེ་ནི། །ཁམ་ཆེ་འམ་ཡང་ན་ཆུང་བར་རིགས་པ་མིན། །ཞེས་བྱ་བ་ལ་སོགས་པ་ཀུན་ནས་འཆད་པར་བྱེད་དེ་ཁམ་ཆེན་པོ་བཟའ་བའི་ཕྱིར་རིགས་པ་མ་ཡིན་ཞིང་ཆུང་བ་ཡང་རིགས་པ་མ་ཡིན་པ་དེའི་ཕྱིར་ཁམ་པར་མ་དག་གིས་བཟའ་བར་བྱ་བ་ཡིན་ནོ། །ཁམ་དང་བཅས་པར་འཇུག་པ་ཡིན་པའི་ཕྱིར་ཁམ་བཅས་ཏེ་དེས་ནམ་ཡང་སྨྲ་བ་སྟེ། བརྗོད་པར་མི་བྱའོ་ཞེས་བྱ་བའི་ཐ་ཚིག་གོ །སྨད་དང་བཏུ་བས་བཟའ་བར་བྱ་བ་མིན། །ཞེས་བྱ་བ་ལ། སྨད་པར་བྱས་ནས་བཟའ་མི་བྱ་སྟེ། །དཔེར་ན་འདི་ནི་བསོད་པ་མ་ཡིན་པ་དང་ཞེས་བྱ་བ་ལྟ་བུའོ། །བཟའ་བ་ཁྱིམ་བྱ་བཞིན་དུ་བཏུས་ནས་བཟའ་བར་མི་བྱའོ། །མཆོད་རྟེན་འདྲ་བྱས་བཅོམ་སྟེ་ཞེས་བྱ་བ་ལ་མཆོད་རྟེན་གྱི་རྣམ་པ་ལྟ་བུར་ཕུང་པོར་བྱས་ནས་བཅོམ་ཞིང་བཤིག་པས་བཟའ་བར་མི་བྱའོ་ཞེས་བྱ་བར་སྦྱར་རོ། །དེ་ལྟར་གུས་པར་བྱས་ནས་བཟའ་བར་རིགས་པ་ཡིན་ནོ། །སྟག་གིས་ཟོས་པའི་གོད་ཀྱི་ཤ་རྣམས་དང༌། །བདག་ཕྱིར་བསང་པའི་ཤ་རྣམས་བཟའ་མི་བྱ། །ཞེས་བྱ་བ་ལ། སྟག་གི་ལྷག་མར་བྱས་པ་སྟག་གིས་ཟོས་པའི་གོད་ཀྱི་ཤ་རྣམས་ཟ་བ་ནི་མ་བྱིན་པར་ལེན་པའི་ཕྱོགས་སུ་གཏོགས་པ་ཡིན་ཏེ། དེ་དག་ནི་དྲས་ཀྱི་སྐབས་ཡིན་པའི་ཕྱིར་འདིར་བསྟན་པར་རིག་པར་བྱའོ། །དུས་མ་ཡིན་པའི་ཟས་ཀྱི་ཕྱོགས་སུ་གཏོགས་པ་ཡིན་ནོ་ཞེས་འགའ་ཞིག་བརྗོད་པ་གང་ཡིན་པ་དེ་ནི་རིགས་པ་མ་ཡིན་ཏེ། གང་གི་ཕྱིར་བཅོམ་ལྡན་འདས་ཉིད་ཀྱིས་རི་དགས་ཀྱི་རྒྱལ་པོ་སེང་གེ་ནི་རི་དགས་བསད་ནས་ཤའི་མཆོག་དང་ཁྲག་གི་མཆོག་ཟོས་ཤིང་འཐུངས་ནས་ལྟོས་པ་མེད་པར་འགྲོ་བར་བྱེད་ལ་དེ་ལས་གཞན་པའི་གཅན་གཟན་ཕྲ་མོས་ནི་སྦས་ནས་ཤ་རུལ་པ་ཟ་བར་བྱེད་པ་ཡིན་པ་དེའི་ཕྱིར། སྟག་ལ་སོགས་པས་བོར་བ་བདག་གིར་བྱས་པ་ལས་ཕྲོགས་པར་འགྱུར་པ་ཡིན་པའི་ཕྱིར་མ་བྱིན་པར་ལེན་པའི་ཕྱོགས་སུ་གཏོགས་པ་ཡིན་ནོ་ཞེས་བསྒྲུབས་པ་ཡིན་ནོ། །བདག་གི་ཕྱིར་བསད་པ་ཉིད་ཀྱང་བཟའ་བར་མི་བྱའོ་ཞེས་
བྱ་བར་སྦྱར་རོ། །ཆེད་དུ་གསད་པ་དག་ནི་བཟའ་བར་མི་བྱ་ལ། གཞན་པ་དག་ནི་སྔར་བཤད་པའི་ཆོ་གས་བཟའ་བར་བྱའོ། །དང་ནི་སྡུད་པར་བྱེད་པ་ཡིན་ལ་ཉིད་ནི་ངེས་པར་གཟུང་བའོ། །ཁྭ་ཡི་མཆུ་ཡིས་རེག་འགྱུར་ཁ་ཟས་རྣམས། མཆུ་ཡི་ཐན་ཀོར་བོར་ཏེ་བཟའ་བར་བྱ། །ཞེས་བྱ་བ་ལ། ཁྭས་ཟོས་པའི་ལྷག་མ་བཟའ་བར་བྱའོ། །ཅི་ཞིག་བྱས་ནས་ཤེས་ན། དེའི་མཆུའི་ཐན་ཀོར་བོར་ཏེ་ཞེས་བྱ་བ་སྨོས་ཏེ། མཆུས་རེག་པར་གྱུར་པ་ལ་མཆུའི་སྒྲས་བརྗོད་པ་ཡིན་ཏེ། དེའི་ཐན་ཀོར་དང་བཅས་པ་བོར་ཞིང་དོལ་ལ་ལྷག་མ་གཞན་བཟའ་བར་བྱའོ་ཞེས་བྱ་བའི་ཐ་ཚིག་གོ །ལྷུང་བཟེད་གཞི་ལ་རྐང་ཆས་མནན་བཞིན་མིན། །ཞེས་བྱ་བ་ལ་ལྷུང་བཟེད་ཀྱི་གཞི་སྟེ་ལྷུང་བཟེད་ཀྱི་རྟེན་དུ་གྱུར་པ་ལའོ། །གང་གིས་མནན་པར་མི་བྱ་ཞེ་ན་རྐང་ཆས་ཞེས་བྱ་བ་སྨོས་ཏེ། རྐང་པའི་ཆ་ནི་རྐང་པའི་ཆས་ཏེ་སོར་མོ་ལ་སོགས་པ་དེས་ཞེས་བྱ་བའི་དོན་ཏོ། །མནན་པའི་ཚིག་ནི་ཁྱད་པར་དུ་རེག་པ་ལ་བྱ་བ་ཡིན་པ་དེའི་ཕྱིར་ལྷུང་བཟེད་ཀྱི་གཞི་ལ་རེག་པར་མི་བྱའོ་ཞེས་འབྱུང་བ་ཡིན་ནོ། །མཆིལ་ལྷམ་གྱོན་བཞིན་མིན་ཞེས་བྱ་བ་མཆིལ་ལྷམ་ལ་བརྟེན་པའི་ཕྱིར་མཆི་ལ་ལྷམ་གོན་པ་སྟེ། མཆིལ་ལྷམ་ལ་འཛེགས་པས་བཟའ་བར་མི་བྱའོ་ཞེས་བྱ་བའི་དོན་ཏོ། །གོས་གཅིག་མིན་ཞེས་བྱ་བ་ལ། གོས་གཅིག་གང་ལ་ཡོད་པ་དེ་ནི་གོས་གཅིག་པ་སྟེ། གོས་དང་བྲལ་བས་བཟའ་བར་མི་བྱའོ་ཞེས་བྱ་བའི་ཐ་ཚིག་གོ །མཆིལ་ལྷམ་གྱོན་བཞིན་མིན་ཞེས་བྱ་བ་བཀག་པས་ལྷམ་ཀྱང་བཀག་པ་དེའི་ཕྱིར་ནད་པས་ཇི་ལྟར་བཟའ་བར་བྱ་ཞེ་ན། སྨན་པས་བསྒོ་ན་ནད་པས་མཆིལ་ལྷམ་གྱི། །སྟེང་དུ་རྐང་བཞག་ཅི་བདེར་བཟའ་བར་བྱ། །ཞེས་བྱ་བ་ལ་ནད་པས་སྨན་པས་ཇི་སྐད་དུ་བསྒོ་བ་དེ་བཞིན་དུ་ཇི་ལྟར་བདེ་ཞིང་འདོད་པར་བཟའ་བར་བྱའོ། །འདི་སྐད་དུ་སྨན་པའི་ལུང་ཕོག་པ་བཞིན་དུ་ཇི་ལྟར་འདོད་པ་བཞིན་དུ་བཟའ་བར་བྱའོ་ཞེས་བསྟན་པར་འགྱུར་རོ། །མཆིལ་ལྷམ་གྱི་སྟེང་དུ་རྐང་པ་གང་གིས་བཞག་པ་དེ་ནི་མཆིལ་ལྷམ་གྱི་སྟེང་དུ་རྐང་པ་བཞག་པ་ཅན་བརྟེན་པས་བཟའ་བར་བྱའོ། །ནིའི་སྒྲ་ནི་སྔ་མ་ལས་ཁྱད་པར་དུ་བྱེད་པ་ཡིན་ནོ། །སྦྱིན་བདག་གི་ནི་འབྲིམ་པར་བྱེད་པ་ལ། །འདི་དང་འདི་ལས་བྱིན་ཞེས་བརྗོད་མི་བྱ། །ཞེས་བྱ་བ་ལ། ཟས་ལ་སོགས་པ་ལ་བཀོད་ནས་བཟའ་
བ་དང་བཅའ་བ་འབྲིམ་པ་ན་རྫས་ཀྱི་རྣམ་པ་དང༌། ཟས་ཀྱི་ཡུལ་ལས་འདི་བྱིན་ཅེས་བརྗོད་པར་མི་བྱའོ། །དེ་གང་དག་ལ་བརྗོད་པར་མི་བྱ་ཞེ་ན། སྦྱིན་བདག་གམ་ནི་འབྲིམ་པར་བྱེད་པ་ལ། །ཞེས་བྱ་བ་སྨོས་ཏེ། ཟས་དེའི་བདག་པོའམ། འབྲིམ་པར་བྱེད་པའམ། འབྲིམ་པར་བྱེད་པ་པོ་ལ་བརྗོད་པར་མི་བྱའོ་ཞེས་བྱ་བར་སྦྱར་རོ། །འམ་གྱི་སྒྲ་ནི་དགག་པ་སྡུད་པར་བྱེད་པ་ཡིན་ནོ། །འོ་ན་ཇི་ལྟར་བཟའ་བར་བྱ་ཞེ་ན། གྲལ་རིམས་བབ་པར་འཕགས་པས་བཟའ་བར་བྱ། །ཞེས་བྱ་བ་སྨོས་ཏེ། གྲལ་རིམས་སུ་ཐོབ་པས་ནི་གྲལ་རིམས་བབ་པ་སྟེ། ཇི་ལྟར་བྱུག་རིས་ལ་བབ་པ་བཞིན་དུ་འཕགས་པ་སྟེ་རབ་ཏུ་བྱུང་བས་བཟའ་བར་བྱའི་འོན་ཀྱང་ཉེ་བར་བསགས་པ་ལས་ཇི་ལྟར་འདོད་པ་བཞིན་དུ་བསླངས་ནས་བཟའ་བར་མི་བྱའོ། །ཇི་ལྟར་ནད་པ་ལ་ཡང་དེ་དག་བཀག་པ་ཡིན་ནམ་ཞེ་ན། འདི་ལ་ནད་པ་དག་ལ་དགག་པ་མེད། །ཅེས་བྱ་བ་སྨོས་ཏེ། རབ་ཏུ་བྱུང་བ་ནད་པ་དེ་དག་ལ་དགག་པ་ཡོད་པ་མ་ཡིན་ཏེ། དེ་དག་ལ་མ་བཀག་གོ་ཞེས་བྱ་བའི་ཐ་ཚིག་གོ །འདི་སྐད་དུ་ནད་པས་རང་རྗེས་སུ་མཐུན་པ་བསླངས་ནས་བཟའ་བར་བྱའོ་ཞེས་བསྟན་པར་འགྱུར་རོ། །ཟས་ཀྱི་ལྷག་མ་ལས་ནི་ཆང་གཅིག་གཞག །ཅེས་བྱ་བ་ལ། ཟོས་པའི་ལྷག་མ་ཉིད་ནི་ཟས་ཟོས་པའི་ལྷག་མ་སྟེ་དེ་ལས་ཆང་གཅིག་གཞག་པར་བྱ་བ་ཡིན་པའི་ཕྱིར་ལྷག་མ་སྨོས་པ་ཡིན་གྱི། གཙོ་བོར་གྱུར་པ་མ་ཡིན་པ་དེའི་ཕྱིར། ཆང་གཅིག་ཙམ་ནི་ཟས་ཤིན་ཏུ་ཆུང་བར་གྱུར་ཀྱང་གཞག་པར་བྱའོ་ཞེས་བྱ་བའི་དོན་དུ་ཤེས་པར་བྱའོ། །ཆང་གཅིག་པོ་དེ་ཡང་སྲོག་ཆགས་འགའ་ཞིག་ལ་ཡང་བསྡོས་ནས་གཞག་པར་མི་བྱའི། འོན་ཀྱང་བྱེ་བྲག་མ་ཕྱེ་བར་དུད་འགྲོ་ཙམ་ལ་བསྔོས་ནས་བཞག་པར་བྱའོ། །འདིར་བཀག་པའི་རྒྱུ་གང་ཡིན་ཞེ་ན། འདིར་ཁྭ་དགག་པའི་རྒྱུ་ཉིད་ཡིན་ཞེས་བྱ་བ་སྨོས་ཏེ། བསྔོས་ནས་བཞག་པ་དེའི་དགག་པའི་རྒྱུ་ནི་ཁྭ་ཡིན་ཏེ། དེ་དང་འདྲ་བའི་ཉེས་དམིགས་སུ་མ་གྱུར་ཅིག་ཅེས་བཀག་པ་ཡིན་ནོ། །དེ་ལྟར་ནི་འདུལ་བ་ལས་རབ་ཏུ་བྱུང་བ་དགོན་པ་པས་དུད་འགྲོའི་ཆང་གཅིག་པོ་ཅི་སྤྱང་ལ་ནི་སྦྱིན་པར་བྱེད་ལ། ཁྭ་ལ་འགོག་པར་བྱེད་པ་ན། དེ་ཁྲོས་པར་གྱུར་ནས་ཞེས་བྱ་བ་ནས་དེས་ཆོམ་རྐུན་གྱི་སྡེ་དཔོན་ལ། སྡེ་དཔོན་དགེ་སློང་འདི་ལ་དོང་ཙེ་རབ་ཏུ་མོང་པོ་དག་ཡོད་དོ་ཞེས་སྨྲས་པ་དང༌། སྡེ་དཔོན་
དེ་ཡང་བྱའི་སྐད་ལ་མཁས་པར་གྱུར་པ་ཞིག་ཡིན་པས་དེ་སོང་ནས་སྡོམ་ཅན་དེ་བཟུང་ནས་བརྡེག་པར་བརྩམས་སོ་ཞེས་བྱ་བ་ལ་སོགས་པའི་བར་དུ་འབྱུང་བ་ཡིན་ནོ། །ད་ནི་འདག་ཆལ་དག་དང་རུང་བྱས་པའི་ཆུས་ཞེས་བྱ་བ་ལ་སོགས་པས་བཟའ་བའི་བྱ་བ་བྱས་ནས་ཁྭ་ཇི་ལྟར་བྱ་བ་དེ་བརྗོད་པ་ཡིན་ཏེ། ཁྭ་འདི་ལ་ཁ་ཟས་མེད་པར་གྱུར་པ་དེ་ནི་ཁ་ཟས་མེད་པར་གྱུར་པ་ཡིན་ཏེ། ཟས་ཀྱི་བྱ་བ་བྱས་ནས་དེ་ལྟ་བུར་གྱུར་པ་དེ་བྱའོ་ཞེས་བྱ་དོན་ཏོ། །གང་གིས་བྱ་ཞེ་ན། འདག་ཆལ་དག་དང་རུང་བར་བྱེད་པའི་ཆུས། །ཞེས་བྱ་བ་སྨོས་ཏེ། འདག་ཆལ་ནིས་དང་བ་ལྕི་དག་གཅིག་ཏུ་སྦྱར་བར་གྱུར་པའོ། །ཚིག་མང་པོ་པ་ནི་སོ་ཤིང་བསྡུ་བའི་ཕྱིར་རོ། །འདི་སྐད་དུ་ཟས་ཀྱི་བྱ་བ་བྱས་ནས་སོ་ཤིང་དོར་བའི་འོག་ཏུ་རུང་བ་ཟང་ཟིང་མེད་པའི་ཆུས་བཀྲུ་བར་བྱའོ་ཞེས་བསྟན་པར་འགྱུར་རོ། །དང་ནི་སྡུད་པར་བྱེད་པ་ཡིན་ཏེ། ཟས་ཟོས་ནས་ལུང་གི་ཚིགས་སུ་བཅད་པ་གདོན་པར་བྱའོ། །དེ་ནི་ཁྲོན་པ་ལ་སོགས་པ་ནས་ཆུ་བླངས་ན། །ཁྲོན་པ་ལ་སོགས་བྱས་དང་ཆུ་ལྷའི་ཕྱིར། །ཞེས་བྱ་བ་ལ་སོགས་པས་དེ་གྲུབ་པ་ཡིན་པའི་ཕྱིར་འདིར་མ་བསྟན་ཏོ། །དགེ་ཚུལ་གྱི་ཚིག་ལེའུར་བྱས་པ་ལས་དུས་མ་ཡིན་པའི་ཟས་ལས་སླར་ལྡོག་པ་སྟེ་བསླབ་པའི་གཞི་དགུ་པའོ།། །།ད་ནི། གསེར་དང་དངུལ་གྱི་རྣམ་པ་ལེན་བྱེད་ན། །ཞེས་བྱ་བ་ལ་སོགས་པས་བསླབ་པའི་གཞི་བཅུ་པ་རྣམ་པར་འཆད་པར་བྱེད་པ་ཡིན་ཏེ། གསེར་དང་དངུལ་ནི་གསེར་དང་དངུལ་ལོ། །དེའི་རྣམ་པ་དག་ནི་གསེར་དངུལ་རྣམ་པ་སྟེ། དེ་ལེན་པའི་རྒྱུ་ལས་དགེ་ཚུལ་ལ་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །འདི་ལ་ཉེས་བྱས་སུ་འགྱུར་བ་ཡོད་པས་ན་ཉེས་བྱས་སུ་འགྱུར་བའོ། །རྣམ་པའི་ཚིག་གིས་ནི་རིན་པོ་ཆེ་ཐམས་ཅད་བཀག་པ་ཡིན་ཏེ། རིན་པོ་ཆེའི་རིགས་ཉིད་ཡིན་པའི་ཕྱིར་རོ། །དེ་དག་ལ་རེག་པ་ལ་ནི་མ་ཡིན་གྱི་འོན་ཀྱང་ཡོན་བདག་གི་ཐད་ལས་ལེན་པ་བཀག་པ་ཡིན་པས་ན། དགེ་ཚུལ་དག་རེག་པ་ལ་ནི་ཉེས་པ་ཡོད་པ་མ་ཡིན་ནོ། །གང་ལས་ཤེ་ན། འཕགས་པ་ཉེ་བ་འཁོར་གྱིས་ཞུས་པ་ལས། བཅོམ་ལྡན་འདས་ཀྱིས་གསེར་དང་དངུལ་ལེན་པ་ནི་དགེ་ཚུལ་གྱི་བསླབ་པའི་གཞི་བཅུ་པ་ཡིན་ནོ་ཞེས་གང་གསུངས་པ་དང༌། བཅོམ་ལྡན་འདས་ཀྱིས་དགེ་ཚུལ་རྣམས་ཀྱིས་དེ་བསྐུར་བར་བྱའོ་ཞེས་གསུངས་པ་
དེ་ཇི་ལྟ་བུ་ལགས། བཅོམ་ལྡན་འདས་ཀྱི་བཀའ་སྩལ་པ། ཉེ་བ་འཁོར་ངས་ལེན་པ་ལ་དགོངས་ནས་གསུངས་པ་ཡིན་གྱི་བསྐུར་བ་ལ་ནི་མ་ཡིན་ནོ། །དེ་བས་ན་ལེན་པར་བྱེད་པ་བཀག་པ་ཡིན་ནོ། །འདིའི་དམིགས་ཀྱིས་བསལ་བ་ནི། གོས་ཀྱི་ཕྱིར་དང་རྒྱགས་ཕྱིར་དང༌། ལུས་ཀྱི་ཕྱིར་དང་ཡང་ན་སྨན་གྱི་ཕྱིར། །ཆོས་ཀྱི་ཕྱིར་ན་ཉེས་པར་འགྱུར་བ་མེད། །ཅེས་བྱ་བ་སྨོས་ཏེ། གོས་ལ་ཕན་པས་ན་གོས་ཀྱི་ཕྱིར་དང༌། ལམ་གྱི་རྒྱགས་ཀྱི་ཕྱིར་དང༌། ལུས་ཀྱི་ཕྱིར་ནི་དེའི་ཟས་ཀྱི་ཕྱིར་དང༌། ཡང་ན་སྨན་གྱི་ཕྱིར་ཞེས་བྱ་བ་ནི་སྨན་གྱི་ཕྱིར་དང༌། ཆོས་ཀྱི་སྦྱིན་པ་དང་འབྱོར་པ་ནི་ཆོས་དང་ལྡན་པ་ཡིན་ཏེ། ཆོས་དང་ལྡན་པ་དེའི་ཕྱིར་ལེན་པར་བྱེད་ན་ཉེས་པར་འགྱུར་བ་མེད་དོ་ཞེས་བྱ་བ་ཐམས་ཅད་ལ་སྦྱར་རོ། །ཆོས་དང་ལྡན་པ་ནི་དཀོན་མཆོག་གསུམ་དང་ཚངས་པ་མཚུངས་པར་སྤྱོད་པ་ལ་ཉེ་བར་མཁོ་བ་ཡིན་པར་རིག་པར་བྱའོ། །ད་ནི་བདག་གི་བྱ་ཞེས་བྱ་བ་ལ་སོགས་པས་ཡིད་ཀྱིར་འགྱུར་བ་འཆད་པར་བྱེད་དེ། གསེར་དངུལ་ལེན་པའི་རྗེས་སུ་མཐུན་པ་སྟེ་ཆ་འདྲ་བའི་ཉེས་པར་འགྱུར་རོ། །དེ་གང་ཞེ་ན། འདི་ལྟར་ཡང༌། ཆོས་གོས་ལ་སོགས་ཡོད་ཀྱང་གོས་སོགས་སློང༌། །ཞེས་བྱ་བ་ལ་སོགས་པས་སྟོན་པར་བྱེད་དེ། ཆོས་གོས་ལ་སོགས་པ་ཡོད་པར་གྱུར་ན་ཡང་གོས་ལ་སོགས་པ་སློང་ན་ཡིད་ཀྱིར་འགྱུར་རོ་ཞེས་བྱ་བ་ནི་ཚིག་གི་ལྷག་མ་ཡིན་ནོ། །ནིའི་སྒྲ་ནི་གང་གི་ཕྱིར་གྱི་དོན་ཡིན་ཏེ། གང་གི་ཕྱིར་ཆོས་གོས་ལ་སོགས་པ་ཡོད་བཞིན་དུ་དེ་བྱེད་པ་ལས་ཡིད་ཀྱིར་འགྱུར་རོ། །སོགས་པའི་སྒྲས་ནི་ཆོས་གོས་ལ་སོགས་པ་དང༌། རིན་གཉི་ག་གཟུང་བ་ཡིན་ཏེ། འདི་སྐད་དུ་ཆོས་གོས་དང༌། ཆོས་གོས་ཀྱི་རིན་དང༌། སྨན་དང་སྨན་གྱི་རིན་ཡོང་བཞིན་དུ་གོས་ལ་སོགས་པ་སློང་བར་བྱེད་ན་ཞེས་བསྟན་པར་འགྱུར་རོ་ཞེས་བྱ་བའི་ཐ་ཚིག་གོ །ཁ་བ་རལ་རྭ་དང་བ་སོ་རུས་པ་ལས། །བྱ་བ་མ་ཡིན་ཞེས་བྱ་བ་ལ། རྭའི་རང་བཞིན་དང༌། བ་སོའི་རང་བཞིན་དང༌། རུས་པའི་རང་བཞིན་ཞེས་རང་བཞིན་གྱི་སྒྲ་རེ་རེ་ལ་སྦྱར་བར་བྱ་བ་ཡིན་ནོ། །རྭའི་སྒྲ་ནི་སྲོག་ཆགས་ཀྱི་རྭ་ལ་བྱ་སྟེ། དེ་ལྟ་བུར་གྱུར་པའི་ཁབ་རལ་དགེ་ཚུལ་གྱིས་མི་བྱའོ། །དེ་བཞིན་དུ་གསེར་གྱིས་སྤྲས་པའང་མིན་ཞེས་བྱ་བ་ལ། གསེར་གྱི་སྒྲ་ནི་མདོག་བཟངས་ལ་བྱ་སྟེ། དེས་སྤྲས་པ་བཅང་བར་མི་བྱའོ་ཞེས་བྱ་བར་སྦྱར་
བའི་ཕྱིར་འང་གི་སྒྲ་སྨོས་པ་ཡིན་ནོ། །གསེར་ནི་རིན་པོ་ཆེ་གཞན་གྱི་ཉེ་བར་མཚོན་པར་བྱེད་པའོ། །ཁེ་ཡི་ཕྱིར་ན་ཉོ་དང་ཚོང་ལ་སོགས། །བྱ་བ་མ་ཡིན་ཞེས་བྱ་བ་ལ། རྙེད་པའི་བསམ་པས་རྙེད་པ་བདག་ལ་གྲུབ་པར་གྱུར་ཅིག་སྙམ་པའོ། །རིན་ཤིན་ཏུ་ཆུང་ངུས་གོས་ལ་སོགས་པ་ལེན་པ་ནི་ཉོ་བའོ། །བླངས་ནས་ཀྱང་རིན་གྱི་བསམ་པ་དེ་ཉིད་ཀྱིས་སྟར་བ་ནི་འཚོང་བའོ། །སོགས་པའི་སྒྲ་ནི་སྐྱེད་ལ་སོགས་པ་སྡུད་པ་ཡིན་ཏེ། དེ་དག་ཐམས་ཅད་དགེ་ཚུལ་གྱིས་བྱ་བ་མ་ཡིན་ཞེས་བྱ་བ་ནི་ཚིག་གི་ལྷག་མ་ཡིན་ནོ། །འདིའི་དམིགས་ཀྱིས་བསལ་བ་ནི། དགོས་པ་ཡོད་ན་ཉེས་པ་མེད། །ཅེས་བྱ་བ་སྨོས་ཏེ། དགོས་པ་ཡོད་དེ་སྲིད་པ་གྱུར་ན་ཉོ་ཚོང་བྱ་བ་ལ་ཉེས་པ་མེད་དེ། དེ་ལ་དགོས་པ་དང་ལྡན་པ་སྟེ་སྨན་ལ་སོགས་པ་མེད་ན་གོས་ལ་སོགས་པ་བཙོངས་ན་ཉེས་པར་མི་འགྱུར་རོ། ཇི་སྟེ་ཉོ་འདོད་ཅེས་བྱ་བ་ལ། དགེ་ཚུལ་གྱིས་གོས་ཉོ་བའི་ཕྱིར་རོ། །གལ་ཏེ་ཉོ་འདོད་པ་དེའི་ཚེ་ཇི་ལྟར་བྱ་ཞེ་ན། ཁྱིམ་པ་ལ་ཡང་བཅོལ་ཞེས་བྱ་བ་སྨོས་ཏེ་དགེ་ཚུལ་གྱིས་ཀྱང་ཉོས་ལ་གོས་ལ་སོགས་པ་ཁོ་བོ་ལ་བྱིན་ཅིག་ཅེས་ཁྱིམ་པ་ལ་བཅོལ་ནས་ཉོ་བར་བྱའི། བདག་ཉིད་དེ་རང་གིས་ཀྱང་ཉོ་བར་མི་བྱའོ། །ཡང་གི་སྒྲ་ནི་སྨན་ལ་སོགས་པ་མེད་པ་འབའ་ཞིག་ལ་ནི་མ་ཡིན་ནོ་ཞེས་བྱ་བ་དང་ཉིད་ཀྱི་སྒྲ་ནི་བདག་ཉིད་རྣམ་པར་གཅོད་པ་ཡིན་ནོ། །ཇི་སྟེ་བཅོལ་བ་སྒྲིན་པོ་མེད་ན་ཞེས་བྱ་བ་ལ་སོགས་པ་ལ། གལ་ཏེ་བཅོལ་བ་སྒྲིན་པོ་འགའ་མེད་ན་དེའི་ཚེ་དགེ་ཚུལ་གྱིས་ཚིག་གསུམ་གྱི་བར་དུ་བརྗོད་པ་སྟེ། སྨྲས་ནས་ཞེས་བྱ་བའི་ཐ་ཚིག་གོ །སྒྲིན་པོ་སྟེ་ཚོང་ལ་མཁས་པའི་ཁྱིམ་པ་མེད་ན་དགེ་ཚུལ་གྱིས་རིན་འདི་ཙམ་དུ་བྱིན་ཅིག་ཅེས་ཚིག་གསུམ་བརྗོད་ནས་བླང་བར་བྱའོ་ཞེས་བྱ་བའི་དོན་ཏོ། །རྒས་པས་འཁོགས་དང་ནད་པ་མ་གཏོགས་པར། །སྡོམ་ཅན་གཞན་གྱིས་བུས་འཁྱུད་བཅང་མི་བྱ། །ཞེས་བྱ་བ་ལ་རྒས་པས་འཁོགས་པ་དང༌། ནད་པ་དེ་དག་མ་གཏོགས་པ་སྡོམ་ཅན་གཞན་གྱིས་པུས་འཁྱུད་དེ་རྣལ་འབྱོར་གྱི་ཐ་གུ་བཅང་བར་མི་བྱའོ། །འདི་དང་གཞན་དག་ཏུ་ནད་པའི་ཚད་ནི་སྦྱོར་མི་ནུས་པའི་མཚན་ཉིད་ཅན་ཡིན་ནོ། །གཞན་ཡང་རྙེད་པ་འདོད་པའམ་བསྙེན་བཀུར་འདོད་པས་ཚུལ་འཆོས་དང༌། ཁ་གསག་དང༌། ཐོབ་ཀྱི་འཇལ་བ་དང༌། གཞོགས་སློང་སྡོམ་ཅན་བདག་ཉིད་ཀྱིས་མི་བྱའོ།།
དེ་དག་ཀྱང་བྱེད་ན་ཡིད་ཀྱིར་འགྱུར་རོ། །དེ་དག་གི་མཚན་ཉིད་རྙེད་ཕྱིར་སྤྱོད་ལམ་ཚུལ་འཆོས་ཡིན་པར་བསྟན། ཆགས་པས་གཞན་ལ་སྨོད་པ་ཐོབ་ཀྱིས་འཇལ། །གཞན་ལ་སྟོད་པ་བྱེད་པ་གཞོགས་སློང་ཡིན། །ཞེས་བྱ་བས་འཆད་པར་བྱེད་དེ། བདག་ལ་རྙེད་པ་གྲུབ་པར་གྱུར་ཅིག་སྙམ་པས་སྤྱོད་ལམ་འཆོས་པ་དང༌། །གོས་ཚགས་འཆོས་པ་ནི་ངེས་པར་ཚུལ་འཆོས་ཡིན་པར་བཅོམ་ལྡན་འདས་ཀྱིས་བསྟན་ཅིང་གསུངས་པ་ཡིན་ནོ། །ཐོབ་ཀྱིས་འཇལ་བ་ནི་ཆགས་པས་གཞན་ལ་སྨོད་པ་སྟེ། ཆགས་པ་སྲེད་པས་གཞན་གྱི་མདུན་དུ་གཞན་ལ་བཀྲེན་པ་འདི་ཞེས་བྱ་བ་ལ་སོགས་པས་སྨོད་པ་ནི་ཐོབ་ཀྱིས་འཇལ་བ་ཡིན་ནོ། །ཕ་རོལ་པོ་ལྐོག་ཏུ་གྱུར་པ་ཉིད་ལ་རྙེད་པ་གྲུབ་པའི་ཕྱིར་ཞེས་བྱ་བའི་དོན་འདིས་གཞོགས་སློང་ནི་ཕ་རོལ་པོ་ལ་སྟོད་པ་བྱེད་པ་ཞེས་བྱ་བ་རྙེད་པའི་དོན་དུ་ཕ་རོལ་པོ་གཞན་གྱི་མདུན་དུ་སྟོད་པར་བྱེད་པ་ནི་གཞོགས་སློང་ཞེས་བྱ་བ་ཡིན་ཏེ། རྙེད་པའི་དོན་ཉིད་ཀྱི་ཕྱིར་སྟོན་པར་བྱེད་ཅིང་རྒྱུ་མཚན་བསྟན་པ་ནི་གཞོགས་སློང་ཞེས་བྱ་བ་ཡིན་ཏེ། རྙེད་པའི་དོན་ཉིད་ཀྱི་ཕྱིར་སྟོན་པར་བྱེད་ཅིང་རྒྱུ་མཚན་བསྟན་པ་ནི་གཞོག་སློང་ཡིན་ནོ། །ནིའི་སྒྲ་ནི་སྔ་མ་ལས་བྱེ་བྲག་ཏུ་བྱེད་པའི་དོན་ཏོ། །ཉུང་ངུ་བྱིན་ལ་མང་དུ་འདོད་པ་ཡང༌། །ཞེས་བྱ་བ་ལ་བསྟན་པར་བྱ་བ་ལ་སོགས་པ་ཉུང་ཟད་བྱིན་ནས་ན་མང་དུ་འདོད་ཅིང་ཚོལ་བ་དང་སློང་བ་ཡང་གཞོགས་སློང་ཞེས་བྱ་སྟེ། རྒྱུ་མཚན་དེས་སློང་བར་བྱེད་པ་ཉིད་ཀྱི་ཕྱིར་རོ། །ཡང་ནི་སྡུད་པར་བྱེད་པ་ཡིན་ནོ། །རྙེད་ཕྱིར་གཅམ་དང་སྙན་པར་སྨྲ་བ་རྣམས། །ཐམས་ཅད་ཁ་གསག་ཡིན་པར་འཕགས་པས་གསུངས། །ཞེས་བྱ་བ་ལ། རྙེད་ཕྱིར་ཏེ་དགོས་པས་གཅམ་པ་དང་སྙན་པར་སྨྲ་བ་རྣམས་ཞེས་བྱ་བ་འདི་ལ་དེ་ལྟ་བུར་གྱུར་པ་དེ་ཐམས་ཅད་ནི། གང་གཅམ་པ་དང་སྙན་པར་སྨྲ་བ་ཞེས་བྱ་བའི་དབང་དུ་བྱ་ནས་ཁ་གསག་ཡིན་ནོ་ཞེས་འཕགས་པ་སྟེ་སངས་རྒྱས་བཅོམ་ལྡན་འདས་ཀྱི་གསུངས་པ་ཡིན་ནོ། །བསྟན་མ་ཐག་པའི་ཚུལ་འཆོས་ལ་སོགས་པ་དེ་དག་དང་འདྲ་བ་ཐམས་ཅད་དང༌། གཞན་ཡང་གང་གི་ཕྱིར་ལོག་པར་རྩོལ་བས་འཚོ་བའི་དཔེར་བྱ་བ་སྟེ། ཉེ་བར་མཚོན་པར་བྱེད་པ་དེ་དག་རྟག་ཏུ་སྤང་བར་བྱའོ། །དགེ་ཚུལ་གྱི་ཚིག་ལེའུར་བྱས་པ་ལས་གསེར་དངུལ་ལེན་པར་བྱེད་པ་ལས་ལྡོག་པ་སྟེ། བསླབ་པའི་གཞི་བཅུ་པའོ།། །།
རབ་ཏུ་བྱུང་བའི་དུས་སུ་ཁྱིམ་པའི་རྟགས་ཡོངས་སུ་སྤོང་ངོ་ཞེས་པ་དེའི་ཕྱིར། ཁྱིམ་པའི་ཆ་ལུགས་སྤང་བར་སྨྲས་པས་ན། །དེ་དང་འགལ་ཕྱོགས་ཡོངས་སུ་སྤང་བར་བྱ། །ཞེས་བྱ་བ་ལ། ཁྱིམ་ན་གནས་པའི་རྟགས་ནི་ཁྱིམ་པའི་རྟགས་ཏེ། །ཁྱིམ་པའི་ཆ་ལུགས་གང་དེ་སྤང་བར་བྱ་བ་གང་ཡིན་པ་དེ་སྨྲས་པ་ཡིན་ནོ། །དཔེར་ན་ཁྱིམ་པའི་རྟགས་ནི་ཡོངས་སུ་སྤོང་ངོ་ཞེས་སྨྲས་པའི་རྒྱུའི་ཕྱིར་རོ། །དེ་དང་འགལ་ཕྱོགས་ཡོངས་སུ་སྤང་བར་བྱ། །ཞེས་བྱ་བ་ལ་ཁྱིམ་པའི་རྟགས་སྤང་བ་དང་འགལ་བ་ནི་ཁྱིམ་པའི་རྟགས་ཡང་ལེན་པ་ཡིན་ལ། དེའི་ཕྱོགས་ཏེ་དེ་དང་ཆ་འདྲ་བ་དང་རྗེས་སུ་འགྲོ་བའི་ཉེས་པར་འགྱུར་པ་ཡོད་པ་དེ་ལ་དེ་སྐད་ཅེས་བྱ་སྟེ། དགེ་ཚུལ་གྱིས་དེ་ཡང་ཡོངས་སུ་སྤང་བར་བྱའོ། །ད་ནི། ཁྱིམ་པ་བཞིན་དུ་གོས་རྣམས་བགོ་མི་བྱ། །ཞེས་བྱ་བ་ལ་སོགས་པས་དེ་དག་འཆད་པར་བྱེད་པ་ཡིན་ཏེ། ཁྱིམ་པ་དང་འདྲ་བར་གོས་བགོ་བ་སྟེ་ཇི་ལྟར་ཁྱིམ་ན་གནས་པ་བཞིན་དུ་གོས་བགོ་བར་མི་བྱའོ། །འོ་ན་ཇི་ལྟར་བགོ་བར་བྱ་ཞེ་ན། ཇི་ལྟར་གནས་གཙང་མའི་རིས་ཀྱི་ལྷའི་བུ་གོན་པ་བཞིན་དུ་ཞེས་ལུང་ལས་འབྱུང་བ་ཡིན་ནོ། །གལ་ཏེ་ཅིའི་ཕྱིར་ཞེ་ན། བླ་མ་བརྒྱུད་པ་རྒྱུན་མ་ཆད་པ་ཉིད་ཀྱི་ཕྱིར་རོ་ཞེས་རྟོགས་པར་བྱའོ། །ཁ་དོག་གཅིག་དང་ཁ་ཚར་བཅས་དཀར་མིན། །ཞེས་བྱ་བ་ལ། ཤམ་ཐབས་དང་བླ་གོས་ཐམས་ཅད་སྔོན་པོ་འོག་ཏུ་མི་བགོ་ཞིང་སྟེང་དུ་ཡང་བགོ་བར་མི་བྱའོ་ཞེས་བྱ་བ་ནི་ཚིག་གི་ལྷག་མའོ། །ཁ་ཅིག་ནི་ཐམས་ཅད་སྔོན་པོ་དང་ཐམས་ཅད་སེར་པོ་ཞེས་བྱ་བ་ལ་སོགས་པར་བརྗོད་དེ་ཆ་ལུགས་དེ་དག་ལ་དད་པར་མི་འགྱུར་ཏེ། དེ་ཉིད་ཀྱི་ཕྱིར་སློབ་དཔོན་ཡོན་ཏན་འོད་ཀྱིས་ཐམས་ཅད་སྔོན་པོ་དང་ཁ་ཚར་དང་བཅས་པ་ཞེས་མདོར་མཛད་པ་ཡིན་ནོ། །ཁ་ཚར་དང་བཅས་པར་འཇུག་པའི་ཕྱིར་ཁ་ཆར་དང་བཅས་པ་སྟེ། སྨད་དུ་མི་བགོ་ཞིང་སྟེང་དུ་ཡང་བགོ་བར་མི་བྱའོ། །དང་གི་སྒྲ་ནི་དཀར་པོ་དང་སྔོན་པོས་སྨད་གཡོགས་མི་བྱ་ཞིང་སྟོད་གཡོགས་ཀྱང་མི་བྱའོ་ཞེས་སྡུད་པར་བྱེད་པ་ཡིན་པས་དེ་བས་ན་དགག་པ་སྡུད་པ་ཡིན་ནོ། །འདིའི་དམིགས་ཀྱིས་བསལ་བ་ནི། ཕྱི་རོལ་ནས་ནི་ངུར་སྨྲིག་གོས་གཡོགས་ནས། །ཞེས་བྱ་བ་ལ་སོགས་པ་སྨོས་ཏེ། གལ་ཏེ་གོས་དཀར་པོ་གོན་པ་དེའི་ཚེ་གོས་ངུར་སྨྲིག་གིས་ཕྱི་རོལ་ཏེ་སྟེང་ནས་གཡོགས་པ་དེ་ལྟ་བུར་གྱུར་པའི་གོས་དཀར་པོ་དེ་བགོ་བར་གནང་བ་ཡིན་ནོ། །དགེ་འདུན་
གྱི་ཞེས་བྱ་བ་འདི་ལས་ཡང་རྟོགས་པར་བྱའོ། །དེ་ལྟར་དགེ་འདུན་ཁྲི་དང་ཁྲིའུ་དག་དང་ནི། །བེའུ་རས་ལ་སོགས་གདིང་བཏིང་སྤྱད་པར་རུང༌། །ཞེས་བྱ་བ་ལ། ཁྲི་དང་ཁྲིའུ་དང་བེའུ་རས་ལ་སོགས་པ་དང༌། གཅིག་བཞིན་དུ་གྱུར་པའི་ཟླས་དབྱེ་བ་བྱས་ལ། དེ་ནས་ཁྱད་པར་གྱི་བསྡུ་བ་བྱའོ། །དགེ་འདུན་གྱི་སྒྲས་དེ་ལྟ་བུར་གྱུར་པའི་དགེ་འདུན་གྱི་ཁྲི་ལ་སོགས་པ་དེ་གདིང་བས་གཡོགས་ནས་སྤྱད་པར་རུང་བ་ཡིན་ནོ་ཞེས་བྱ་བར་སྦྱར་རོ། །དེ་ལྟར་བྱས་པ་མ་གཏོགས་གཞན་དུ་བཀག་པ་ཡིན་ཏེ། ཉམས་པར་འགྱུར་བ་སྲིད་པའི་ཕྱིར་རོ། །ཁྲིའུའི་སྒྲས་ནི་གོས་དང་བླས་པའི་སྟན་གྱི་མཆོག་སྡུད་པ་ཡིན་གྱི་ཤིང་གི་ཁྲིའུ་ནི་མ་ཡིན་ཏེ། དེ་ལ་ཉམས་པར་འགྱུར་བ་མེད་པའི་ཕྱིར་སྟན་དེ་ལ་འདུག་པ་ན་བར་དུ་གཅོད་པ་མ་བསྒྲུབས་པ་ཡིན་ནོ། །གོས་ནི་གང་ཟག་གི་ཡང་ཞེས་བྱ་བར་རྟོགས་པར་བྱའོ། །སོགས་པའི་སྒྲས་ནི་སྟན་སྡུད་པ་ཡིན་ནོ། །ཚོན་དུ་གོས་དག་བཙོ་བར་བྱ་ཞེ་ན། ཚོན་གསུམ་གྱིས་ནི་ཆོས་གོས་བཙོ་བར་གནང༌། །ཞེས་སྨོས་སོ། །གང་ཞེ་ན། ངུར་སྨྲིག་དང་ནི་རམས་དང་བཙག་རྣམས་ཏེ། །ཞེས་བྱ་བ་སྨོས་ཏེ། ངུར་སྨྲིག་དང་རམས་དང་བཙག་སྟེ། གསུམ་པོ་དེ་དག་གིས་སོ། །དེ་ལ་ངུར་སྨྲིག་ནི་མེ་ཏོག་དང་ལོ་མ་དང་འབྲས་བུ་དང་ཤིང་ཤུན་དག་བསྐོལ་བའོ། །རམས་ནི་ཚོས་སྔོན་པོ་ཡིན་ནོ། །བཙག་ནི་ས་རྡུལ་ལས་གྱུར་པའི་ཚོས་དག་ལ་ཡང་གཟུང་སྟེ། ཚོས་གསུམ་པོ་དེ་དག་བཅོམ་ལྡན་འདས་ཀྱིས་གནང་བ་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །དང་ནི་སྡུད་པའོ། །ངུར་སྨྲིག་ལ་སོགས་པ་གསུམ་པོ་གསུངས་པའི་ཕྱིར་མཚལ་ལ་སོགས་པའི་ཚོན་གཞན་དག་བཀག་པར་གྲུབ་པ་ལས་གསལ་བར་བྱ་བའི་ཕྱིར། མཚལ་དང་རྒྱ་སྐྱེགས་ཡང་ན་བཙོད་རྣམས་དང༌། །གུར་ཀུམ་དང་ནི་མཐིང་ཤིང་ལི་ཁྲི་དང༌། །ཞེས་བྱ་བ་ལ་སོགས་པ་སྨོས་ཏེ། མཚལ་གྱི་ཆོས་གོས་བཙོར་མི་རུང་པོ་ཞེས་བྱ་བར་སྦྱར་རོ། །རྒྱ་སྐྱེགས་ཞེས་བྱ་བ་ནི་རྒྱ་སྐྱེགས་ཀྱིས་ཀྱང་བཙོར་མི་རུང་ངོ༌། །དེ་བཞིན་དུ་བཤད་པར་གྱུར་པ་དག་ལ་ཡང་སྦྱར་བར་བྱ་བ་ཡིན་པས། ཡང་ན་བཙོད་དང་གུར་ཀུམ་དང་མཐིང་ཤིང་ཡང་མི་རུང་ངོ་ཞེས་བྱ་བར་སྦྱར་བར་བྱའོ། །དེ་ལྟར་ལི་ཁྲི་དང་རྨ་ཤིང་དང་ལེ་བརྒན་ཞེས་བྱ་བར་དབྱེ་བའི་བསྡུ་བ་བྱས་ན་རྩི་དང་ཁྱད་པར་གྱི་བསྡུ་བ་བྱའོ། །བརྒྱད་པོ་དེ་དག་
ཚོན་ཆེན་པོ་ཡིན་པ་སྟེ། ཚོན་ཆེན་པོ་ཡིན་པའི་རྒྱུའི་ཕྱིར་བཀག་པ་ཡིན་ནོ། །གང་གི་ཕྱིར་དེ་དག་རྒོད་བག་གི་ཚུལ་དུ་སྣང་བ་དེའི་ཕྱིར་ཞེས་བྱ་བའི་ཐ་ཚིག་གོ །སེན་མོ་ཇི་ལྟར་གཅད་པར་བྱ་ཞེ་ན། སེན་མོ་སྟེའུ་སྤུ་གྲིའི་སོ་བཞིན་དུ། །བཅད་པར་བྱ་སྟེ་ཞེས་བྱ་བ་སྨོས་ཏེ། སྟེའུ་དང་སྤུ་གྲིའི་སོ་ཇི་ལྟ་བ་དེ་བཞིན་དུ་གཅད་པར་བྱ་བ་ཡིན་ནོ། །དེ་ལས་གཞན་དུ་མིན་ཞེས་བྱ་བ་ནི་གང་གི་ཕྱིར་བསྟན་མ་ཐག་པ་ལས་གཞན་པ་རྣམ་པ་གཞན་ལ་སོགས་པའི་སྣ་དང་འདྲ་བའི་དབྱིབས་གང་ལ་ཡོད་པ་དེ་ནི་དེ་ལས་གཞན་པའི་དབྱིབས་ཉིད་དེ་གཅད་པར་མི་བྱའོ། །དང་གི་སྒྲ་ནི་ཡང་ན་ཞེས་བྱ་བའི་དོན་ཡིན་ནོ། །དགོན་པར་གནས་པས་སྐྲ་དང་ཁ་སྤུ་དག །སོར་གཉིས་ནས་ནི་འདས་པར་གཞག་མི་བྱ། །ཞེས་བྱ་བ་ལ། དགོན་པར་གནས་པའི་ཕྱིར་དགོན་པར་གནས་པ་སྟེ། དགེ་ཚུལ་གྱིས་སོ། །སོར་གཉིས་ནི་སོར་གཉིས་ཀྱི་ཚད་ལས་འདས་པའོ། །མགོ་བོ་ལས་སྐྱེས་པའི་ཕྱིར་སྐྲ་སྟེ་སྐྲ་དང༌། ཁ་སྤུ་དེ་ལྟ་བུར་གྱུར་པ་དེ་གཞག་པར་མི་བྱའོ། །གྲོང་གནས་དེ་བས་ཐུང་གི་ལྷག་པར་མིན། །ཞེས་བྱ་བ་ནི་གྲོང་ན་གནས་པའི་ཕྱིར་གྲོང་གནས་ཏེ་སོར་གཉིས་ལས་ཐུང་བ་གཞག་གི་སོར་གཉིས་ལས་ལྷག་པར་ནི་མ་ཡིན་ནོ། །སྔ་མ་ལ་ནི་འབྲེག་མཁན་རྙེད་དཀའ་བའི་ཕྱིར་དང༌། ཕྱི་མ་ལ་ནི་འདིར་རྙེད་སླ་བའི་ཕྱིར་རོ་ཞེས་བྱ་བ་ནི་ངེས་པར་ཡིན་ནོ། །གཞན་ཡང་བ་ལང་སྤུ་བཞིན་སྐྲ་ནི་འབྲེག་པ་སྤང༌། །ཞེས་བྱ་བ་ལ། བ་ལང་གི་སྤུ་ནི་བ་ལང་སྤུ་སྟེ། དེ་དང་འདྲ་བའི་ཚད་དུ་སྐྲ་འབྲེག་པ་ནི་བ་ལང་གི་སྤུ་བཞིན་དུ་སྐྲ་འབྲེག་པ་ཡང་སྤང་བར་བྱ་ཞིང་དོར་བར་བྱའོ། །དགེ་ཚུལ་གྱིས་ཆགས་པས་འབྲེག་པར་བྱ་བ་མ་ཡིན་ནོ། །གཞན་ཡང་བྱིན་པ་མིག་དང་མཆན་ཀུང་རྐེད་སྤུ་དང༌། །དེ་བཞིན་སྨིན་མ་བྲེག་པར་རིང་དུ་སྤང༌། བྱིན་པ་དང༌། མིག་དང༌། མཆན་ཀུང་དང༌། རྐེད་སྤུ་བྲེག་པ་ལ་སོགས་པ་གང་ཡིན་པ་དེ་ནི་དེ་ལ་སོགས་པའོ། །སོགས་པའི་སྒྲས་ནི་སྙིང་ཁ་འབྲེག་པ་བསྡུ་བ་ཡིན་ནོ། །དེ་དག་སྤང་བར་བྱ་བ་ཡིན་པ་བཞིན་དུ་སྨིན་མ་བྲེག་པ་ཡང་རིན་དུ་སྤང་བར་བྱའོ། །སྐྲ་བྲེགས་ནས་ཅི་ཞིག་བྱ་བ་ཡིན་ཞེ་ན། སྐྲ་བྲེགས་འོག་ཏུ་ཁྲུས་ཀྱང་བྱ་བ་ཡིན། །ཡང་ན་ཡན་ལག་ལྔ་ཙམ་བཀྲུ་བར་བྱའོ། །སྐྲ་བྲེགས་པའི་འོག་ཏུ་ཁྲུས་བྱའོ། །ནི་ནི་བྲེག་པ་ལ་ལྟོས་ནས་སྡུད་པར་བེད་པའོ། །ཡང་ན་ཡན་ལག་ལྔ་ཙམ་བཀྲུ་བར་བྱའོ། །དེ་
ལ་ཡན་ལག་ལྔ་ནི་མགོ་བོ་དང་རྐང་པ་གཉིས་དང་ལག་པ་གཉིས་ཡིན་ནོ། །ཡང་ནའི་སྒྲ་ནི་ལུས་ཀྱི་ཁྲུས་བྱ་བའམ། ཡན་ལག་ཙམ་བཀྲུ་བར་བྱ་ཞེས་རྣམ་པར་རྟོག་པའི་དོན་ཡིན་པ་དེའི་ཕྱིར་རྐྱེན་དེ་ཙམ་ལ་ནི་བཀྲུ་བར་བྱ་ཞིང་གཞན་གྱི་ཚེ་ནི་ཁྲུས་བྱ་བ་ཡིན་ནོ་སྙམ་དུ་བསམ་པར་མི་བྱའོ། །ཅི་སྐྲ་འབྲེག་པ་ལ་རིམ་པ་ཡོད་དམ་ཞེ་ན། ཁ་སྤུ་སྐྲ་གཉིས་སྔ་ཕྱིར་གར་བདེར་ཟད། །ཅེས་བྱ་བ་སྨྲས་ཏེ། ཁ་སྤུ་འམ་སྐྲ་འབྲེག་པར་བྱ་བ་ལ་རྣམ་པ་ཐམས་ཅད་དུ་ངེས་པ་ཡོད་པ་ནི་མ་ཡིན་ཏེ། འོན་ཀྱང་གར་བདེར་ཏེ་འདོད་པས་འཇུག་པར་བྱའོ་ཞེས་བྱ་བའི་ཐ་ཚིག་གོ །དེ་ཡི་འོག་ཏུ་སྣ་ཡི་སྤུ་ཡང་བཏོག་ཅེས་བྱ་བ་ལ། སྐྲ་དེ་བྲེགས་མ་ཐག་ཏུ་ཡང་སྣའི་བུ་གུའི་སྤུ་ཡང་བཏོག་པར་བྱ་སྟེ། དེ་ན་ཡོད་པའི་སྤུ་བཏོག་པར་བྱའོ་ཞེས་བྱ་བའི་ཐ་ཚིག་གོ །ཅི་ཐམས་ཅད་ལ་ངེས་པ་འདི་ཡིན་ནམ་ཞེ་ན། སྨྲས་པ་མ་ཡིན་ཏེ་འོན་ཀྱང༌། ལག་པ་རྐང་པའི་སེན་མོ་རིམ་བཞིན་བཅད། །ཅེས་བྱ་བར་སྦྱར་རོ། །དེ་ལྟར་བསྟན་མ་ཐག་པའི་རིམ་པས་བསྟན་མ་ཐག་པའི་འབྲེག་མཁན་གྱི་ལས་བྱའོ། །དང་ནི་སྡུད་པ་དང་རིམ་པ་གཞན་དུའོ། །གཞན་ཡང་གོས་ཀྱི་མཐར་ནི་མདུད་པ་པོར་བར་བྱའོ། །གང་གི་ཚེ་ཞེ་ན། སྐས་ལ་འཛེག་གམ་ཞེས་བྱ་བ་ལ་སོགས་པ་སྨོས་ཏེ། སྐས་ལ་འཛེག་པའི་དུས་དང༌། དེ་བཞིན་དུ་ཉིན་པར་ཉལ་བའི་ཚེ་མདུད་པ་པོར་བར་བྱའོ་ཞེས་བྱ་བའི་དོན་ཏོ། །ཉིན་པར་ཉལ་བ་ནི་ཉེ་བར་མཚོན་པ་ཡིན་པ་དེ་བས་ན་སྲུང་མ་རབ་ཏུ་བྱུང་བ་གཞག་པར་བྱ་ཞིང་ཁང་པའི་སྒོ་གཅད་པར་བྱའོ། །ཚིག་དེ་དག་ནི་གསང་བ་དང་འགལ་བའི་ཡོངས་སུ་སྤང་བའི་དོན་ཡིན་པར་རིག་པར་བྱའོ། །སྡོམ་ཅན་གྱིས་ནི་ཁུར་ལྕི་བསྐུར་མི་བྱ། །སྐྱེས་བུ་ཐ་མལ་པའི་ཁུར་ཚད་ནི་ལྕི་བ་ཡིན་ཏེ། དེ་སྡོམ་ཅན་གྱིས་བསྐུར་པར་མི་བྱའོ། ཡང་ཡང་ཕྲག་པ་རྐེད་པ་མིན། །ཡང་བ་ནི་སྔར་སྨོས་པའི་ཕྱེད་ཡིན་ལ་རྐེད་པ་ནི་རྐེད་པ་ཉིད་ཡིན་ནོ། །བསྐུམ་དང་ཕྲལ་དང་གཡོགས་པ་མེད་བཞིན་དང༌། ཡང་ན་ཅོག་བུར་འདུག་པར་བྱ་བ་མིན། །ཞེས་བྱ་བ་ལ། སྐང་པའི་ཁྲིའི་འོག་ཏུ་སྡུད་པ་ནི་བསྐུམ་པ་ཡིན་ལ། ཕྲལ་བ་སྟེ་རྐང་པ་རྣམ་པར་ཕྲལ་བ་དང༌། བརྐྱང་པ་ཉིད་ཀྱིས་འདུག་པར་བྱ་བ་ཉིད་མ་ཡིན་ནོ། །ཤམ་ཐབས་ཀྱི་ཐ་མ་ནང་དུ་བསྡུས་ནས་འདུག་པར་བྱའི་མདོམས་སྣང་བ་ཉིད་ཀྱིས་འཇུག་པར་ཡང་མི་བྱ་སྟེ། འོན་
ཀྱང་དེ་དག་གཡོགས་ནས་འདུག་པར་བྱའོ་ཞེས་བྱ་བའི་ཐ་ཚིག་གོ །ཡང་ན་ཙོག་པུར་ཞེས་བྱ་བ་ལ་ཙོག་པུ་ཁོ་ནས་ཀྱང་འདུག་པར་བྱ་བ་མ་ཡིན་ནོ། །སྔར་སྨོས་པ་ང་དག་ཐམས་ཅད་ལ་ཁྱིམ་གྱི་ནང་དུ་ཞེས་བྱེ་བྲག་ཏུ་ཁོང་དུ་ཆུད་པར་བྱ་ཞིང་གཞན་དག་ཏུ་ཡང་དེ་དེ་དག་གི་རྗེས་སུ་འབྲང་བར་བྱ་བ་ཡིན་པའི་ཕྱིར་མང་དུ་སྤྲོ་བ་ཅི་དགོས། གཙུག་ལག་བཤད་པའི་སྤྱོད་ལམ་ལྟ་བུར་ནི། །བྱ་བ་ཡིན་ཏེ་ཞེས་བྱ་བ་ནི་འདུལ་བའི་གཙུག་ལག་དེ་ལས་གསུངས་པའི་སྤྱོད་ལམ་གང་ཡིན་པ་རུང་བ་ཡིན་ནོ་སྙམ་སེམས་པས་དེ་བྱ་བ་ཡིན་ཏེ། གང་གི་ཕྱིར་བསྟན་མ་ཐག་པའི་སྤྱོད་ལམ་རུང་བ་འདི་དག་དཔེར་བྱས་པ་ཡིན་པའི་ཕྱིར་གཞན་དང་ལག་པ་མི་སྤྲེལ་ཞེས་བྱ་བ་ལ་སོགས་པ་དག་ལ་ཡང་ཁོང་དུ་ཆུད་པར་བྱའོ་ཞེས་བྱ་བའི་དོན་ཏོ། །དང་ནི་སྡུད་པར་བྱེད་པའོ། །བསླབ་པའི་གཞི་བཅུ་པའི་ཡིད་ཀྱི་ཉེས་པར་འགྱུར་བའི་སྐབས་དང༌། གཞན་དག་ཏུ་ཡང་ཆོ་ག་ལས་འདས་ན་ཡིད་ཀྱིར་འགྱུར་བར་ཤེས་པར་བྱ་སྟེ། དཔེར་ན་ཕྱིར་འོང་འདོད་ན་དཔག་ཚད་ཕྱེད་དུ་སོང༌། །ཇི་སྟེ་མེད་ན་རྒྱང་གྲགས་ལྔར་མ་འགྲོ། །ཞེས་བྱ་བ་ལ་སོགས་པ་དང༌། ཁྱིམ་པའི་ཆ་ལུགས་ལས་ལྡོག་པའི་ཕྱོགས་སུ་གཏོགས་པ་ལ་སོགས་པ་བཞི་པོ་དག་ལ་ཐམས་ཅད་དུ་ཆོ་ག་ལས་འདས་ཤིང་རབ་ཏུ་གྲགས་པ་ལས་སྤྱོད་ན་ཡིད་ཀྱིར་འགྱུར་རོ། །ཁྱིམ་པའི་ཆ་ལུགས་ལས་སླར་ལྡོག་པའི་ཕྱོགས་སུ་གཏོགས་པ་སྟེ་བསླབ་པའི་གཞི་བཅུ་གཅིག་པའོ།། །།ཁྱིམ་པའི་རྟགས་ཡོངས་སུ་སྤོང་བར་སྨྲས་པའི་རྗེས་ཐོགས་སུ་རབ་ཏུ་བྱུང་བའི་རྟགས་ཡང་དག་པར་ལེན་ཏོ་ཞེས་འབྱུང་བ་དེའི་ཕྱིར། སྡོམ་ཅན་ཆ་ལུགས་ཁས་བླངས་བརྗོད་པ་ལས། །ཞེས་བྱ་བ་ལ་སོགས་པས་དེར་གཏོགས་པ་དང་འགལ་བའི་ཕྱོགས་བརྗོད་པ་ཡིན་ཏེ། སྡོམ་ཅན་གྱི་དངོས་པོ་ནི་སྡོམ་ཅན་རབ་ཏུ་བྱུང་བའོ། །དེའི་ཆ་ལུགས་ནི་རྟགས་སོ། །དེ་ཁས་བླངས་ཤིང་མངོན་པར་ཁས་བླངས་པ་དེ་བརྗོད་ཅིང་སྨྲ་བ་ལས་ཏེ་རབ་ཏུ་བྱུང་བའི་རྟགས་ཡང་དག་པར་ལེན་ཏོ་ཞེས་སྨྲས་པའི་རྒྱུའི་ཕྱིར་རོ། །དེ་དང་འགལ་བའི་ཕྱོགས་ནི་སྤང་བྱ་སྟེ། །ཞེས་བྱ་བ་ལ་སྡོམ་ཅན་གྱིས་ཆ་ལུགས་ཁས་བླངས་པ་དེ་དང་འགལ་བ་གང་ཡིན་པ་དེ་ནི་གང་དག་གི་ཕྱོགས་དང་ཆ་འདྲ་བ་དང༌། རྗེས་སུ་བྱེད་པ་ཡིན་པ་དེ་བས་ན་དེ་དག་ལས་བྱུང་བའི་ཉེས་པ་དེ་ལ་དེ་སྐད་ཅེས་བྱ་སྟེ།
དེ་དགེ་ཚུལ་གྱིས་སྤང་བར་བྱའོ། །འདི་ལྟར་མུ་སྟེགས་རྒྱལ་མཚན་འཆང་བ་དང༌། །ཞེས་བྱ་བ་ལ་སོགས་པས་དེ་དག་འཆད་པར་བྱེད་དེ། མུ་སྟེགས་ཏེ་ཕྱི་རོལ་པའི་རབ་ཏུ་བྱུང་བའི་རྒྱལ་མཚན་ཏེ། ཁ་ཊཱི་གལ་སོགས་པའི་རྟགས་དེ་དག་འཆང་བར་བྱེད་པའོ། །ནིའི་སྒྲ་ནི་གང་གི་ཕྱིར་གྱི་དོན་ཡིན་ཏེ་གང་གི་ཕྱིར་དེ་དག་ནི་མུ་སྟེགས་ཀྱི་རྒྱལ་མཚན་གྱི་ཚུལ་ཡིན་པ་དེའི་ཕྱིར་དེ་དག་འཆང་བར་བྱེད་པ་སྤང་བར་བྱ་བ་ཡིན་ཏེ། དེ་བཞིན་དུ་ཐམས་ཅད་ལ་བརྗོད་པར་བྱའོ། །འདི་ལྟར་གྱི་སྒྲ་ནི་ཉེ་བར་སྟོན་པའི་དོན་ཏོ། །གཅེར་བུའི་དངོས་པོ་ནི་གཅེར་བུ་ཉིད་དོ། །དེ་བཞིན་དུ་མགོ་བོའི་སྐྲ་འབལ་བར་བྱེད་པས་ན་སྐྲ་འབལ་བ་སྟེ། ཉེ་བར་བཏགས་པ་ཉིད་ཡིན་པའི་ཕྱིར་རོ། །ལག་པའི་སྣོད་དུ་གྱུར་པ་ལ་ཟ་བ་ནི་ལག་པར་ཟ་བ་སྟེ་སྐྲ་འབལ་བ་དང༌། ལག་པར་ཟ་བ་དང་ཞེས་བྱ་བ་ནི་ཚོགས་པ་གཙོ་བོར་གྱུར་པའི་གཅིག་བཞིན་པའི་བསྡུ་བའོ། །བྲག་སྟེ་རི་བོ་ལས་མཆོད་པར་བྱེད་པའོ། །བྲག་ཅེས་སྨོས་པ་ནི་ཆུ་དོགས་ལ་མཆོང་བ་ལ་སོགས་པ་དག་གི་ཉེ་བར་མཚོན་པ་ཡིན་ནོ། །ཉི་མར་གདོང་བལྟ་བ་ནི་ཉི་མ་ལ་མངོན་དུ་ཕྱོགས་པས་འདུག་ནས་ལུས་གདུང་བར་བྱེད་པ་ཡིན་པར་རིག་པར་བྱའོ། །དེ་བཞིན་དུ། མེ་ལྔ་བསྟེན་ལ་སོགས་པ་སྤང་བར་བྱ། །ཞེས་བྱ་བ་དེ་ལ། མེ་ལྔ་ནི་ཕྱོགས་བཞི་དག་གི་མེ་དང༌། སྟེང་ནས་ཉི་མའི་མི་ཞེས་བྱ་བ་ནི་མི་ལྔ་ཡིན་ཏེ། དེ་དག་གི་དབུས་སུ་ཞུགས་ཤིང་བསྟེན་པ་དེ་ལ་དེ་སྐད་ཅེས་བྱའོ། །སོགས་པའི་སྒྲས་ནི་མེ་དང་ཆུར་འཇུག་པ་ལ་སོགས་པ་གཟུང་བ་ཡིན་ཏེ། དེ་དག་སྤང་བར་བྱའོ། །ནི་ནི་སོ་སོ་བ་ཀུན་ལ་སྡུད་པར་བྱེད་པའི་དོན་ཏོ། །མཆིལ་མ་ལ་སོགས་སེ་གོལ་བརྔབས་ནས་ཀྱང༌། །ཞེས་བྱ་བ་ལ། མཆིལ་མ་ལ་སོགས་པ་དག་སེ་གོལ་གྱི་སྒྲས་བརྡ་བྱས་ནས་འོག་ཏུ་དོར་བར་བྱའི་སྟེང་དུ་ནི་མ་ཡིན་ཏེ། ཕྱིར་ལྡོག་པའི་ཉེས་པ་སྤང་བར་བྱ་བའི་ཕྱིར་རོ། །སོགས་པའི་སྒྲས་ནི་གཅི་བ་ལ་སོགས་པ་བསྡུའོ། །གང་དུ་དོར་བར་བྱ་བ་ཡིན་ཞེ་ན། གནང་བའི་ས་ཕྱོགས་སུ་ནི་ཞེས་བྱ་བ་སྨོས་ཏེ། གལ་ཏེ་ས་ཕྱོགས་གནང་བར་གྱུར་པ་དེ་ནི་གནང་བའི་ས་ཕྱོགས་ཏེ། དེར་ནི་མཆིལ་མ་ལ་སོགས་པ་དོར་བར་བྱ་བ་ཡིན་ནོ། །གང་དུ་གནང་བར་གྱུར་བའི་ས་ཕྱོགས་དེ་ནི་གནང་བའི་ས་ཕྱོགས་ཏེ། དེ་དག་ཏུ་ཞེས་བྱ་བའི་ཐ་ཚིག་གོ །བཤད་པ་དང་ནི་གཅི་བའི་ཉེ་འཁོར་དུ། །སྣ་ཚོགས་
གཏམ་གྱིས་ཡུན་རིང་གནས་མི་བྱ། །ཞེས་བྱ་བ་ལ་བཤད་པ་དང༌། གཅི་བའི་ཁང་པའི་ཉེ་འཁོར་དག་ཏུ་སྣ་ཚོགས་པའི་གཏམ་སྟེ། ཀུན་དུ་བརྗོད་པ་མང་པོས་ཡུན་རིང་པོར་གནས་པར་མི་བྱའོ། །དེར་གཏོགས་པའི་དགོས་པའི་དབང་གིས་དུས་དེ་སྲིད་ཙམ་དུ་འདུག་པ་ལ་ནི་ཉེས་པ་མེད་དོ། །གཞན་ཡང་བཟླས་དང་བཙོ་བླག་ལ་སོགས་དེར་མི་བྱ། །ཞེས་བྱ་བ་ལ། སྨྲ་བ་དང༌། ཀུན་ནས་བརྗོད་པས་འདུག་པར་མི་བྱའོ་ཞེས་བཀག་པས་བཙོ་བླག་གི་ལས་ལ་སོགས་པ་ལ་ཉེས་པ་མེད་པ་ཐོབ་པར་གྱུར་པས་ཚིག་འདི་སྨོས་པ་ཡིན་ནོ། །སོགས་པའི་སྒྲས་ནི། ཀློག་པ་དང་འཆད་པ་ལ་སོགས་དག་གཟུང་ངོ༌། །སྒྲས་བརྡ་བྱས་ནས་བརྟགས་ཏེ་འཇུག་པར་བྱ། །ཞེས་བྱ་བ་ལ། བཤང་ཁང་ངམ་གཅི་བའི་ཁང་པ་དེར་འཇུག་པ་ན་སེ་གོལ་གྱི་སྒྲའི་བརྡས་འགའ་ཞིག་ཡོད་དམ་མེད་ཅེས་བརྟགས་ནས་འཇུག་པར་བྱའི་དེ་ལྟ་དེ་ལྟར་ནི་མ་ཡིན་ནོ། །དང་ནི་སྡུད་པར་བྱེད་པའོ། །གལ་ཏེ་ཡང་བཤང་ཁང་དང་གཅི་བའི་ཁང་པ་ཞེས་བྱ་བའི་ཚུལ་འདིས་ཐ་དད་པ་ཉིད་ཐོབ་མོད་ཀྱི། དེ་ལྟ་ན་ཡང་ངེས་པར་མི་འགྱུར་བས་ངེས་པར་བྱ་བའི་དོན་དུ། བཤང་བའི་ས་དང་གཅི་བའི་ས་གཉིས་ནི། །སོ་སོར་བྱ་ཞིང་ཞེས་བྱ་བ་སྨོས་ཏེ། བཤང་བའི་ས་སྟེ་བཤང་བའི་ཁང་པ་དང་གཅི་བའི་ས་ཡང་སོ་སོར་ཏེ་ཐ་དད་པར་བྱའི་གཞན་འབའ་ཞིག་ནི་མ་ཡིན་ནོ། །ཡང་གི་སྒྲ་ནི་དེར་ཞུགས་ནས་ཀྱང་བཤང་བར་མི་བྱ་སྟེ། སྦ་བའི་གནས་ཉིད་ཡིན་པའི་ཕྱིར་རོ་ཞེས་བྱ་བའི་དོན་དུ་རྟོགས་པར་བྱའོ། །དང་ནི་ཉེ་འཁོར་དུ་འདུག་པར་མི་བྱ་བ་དང༌། དེར་ཀུན་དུ་སྨྲ་བར་མི་བྱའོ་ཞེས་སྡུད་པ་དང༌། རིམ་པ་གཞན་གྱི་དོན་ཡིན་ནོ། །བཤང་དང་གཅི་བ་དྲག་ཏུ་འབྱུང་འགྱུར་ན། །དལ་གྱིས་གཏང་བར་བྱ་སྟེ་ཞེས་བྱ་བ་ལ། དྲག་ཏུ་འབྱུང་བ་གང་ཡིན་པ་དེ་ནི་བཤང་བ་དང་གཅི་བ་དྲག་ཏུ་འབྱུང་བར་འགྱུར་ནའོ། །དེ་རིམ་གྱིས་དལ་བུས་གཏང་བར་བྱ་སྟེ་དུམ་བུར་ཞེས་བྱ་བའི་ཐ་ཚིག་གོ །དེ་བཞིན་དུ་རླུང་ཉིད་ཀྱང་རིམ་གྱིས་གཏང་བར་བྱ་སྟེ་སྒྲ་དང་བཅས་པའི་རླུང་གི་ལས་མི་བྱའོ་ཞེས་བྱ་བའི་དོན་ཏོ། །གཞན་ཡང་འབྱུང་བ་དགག་པར་ནམ་ཡང་འདོད་མ་ཡིན། །ཞེས་བྱ་བ་ལ། གཅེ་བ་ལ་སོགས་པའི་འབྱུང་བ་དགག་པ་སྟེ། ཟློག་པར་ནམ་ཡང་བཅོམ་ལྡན་འདས་མི་བཞེད་དེ། འབྱུང་བ་དེ་དགག་པར་མི་བྱའོ་ཞེས་བྱ་བའི་དོན་ཏོ། །སྔ་ནས་ཐན་ཀོར་འཇམ་
པོས་ཕྱིས་ནས་ཀྱང༌། །ཞེས་བྱ་བ་ལ་སོགས་པས་ཁྲུས་ཀྱི་ཆོ་ག་འཆད་པར་བྱེད་པ་ཡིན་ཏེ། ཁྲུས་བྱེད་པའི་སྔ་རོལ་ཁོ་ནར་ཐན་ཀོར་ཏེ་བཤད་པའི་ལམ་རྫས་འཇམ་པོ་འགའ་ཞིག་གིས་ཕྱིས་ནས། དེའི་འོག་ཏུ་ལག་པ་གཡོན་པས་ས་ཕུང་བདུན་བླུགས་ཤིང་ཉེ་བར་སྦྱར་ལ། ཆུ་མང་པོ་དག་གིས་ཀྱང་ཐན་ཀོར་བཀྲུ་བར་བྱའོ། །མང་པོའི་སྒྲ་གཉི་ག་ལ་ཡང་སྦྱར་བར་བྱ་བ་ཡིན་ནོ། །དེ་ནས་ས་ཕུང་བདུན་གྱིས་ལག་གཉིས་ཀྱང༌། །ཞེས་བྱ་བ་ལ། དེ་ནས་དེ་ལག་པ་གཡོན་པ་མ་བཀྲུས་པའི་དུས་ཕྱིས་ལག་པ་གཉི་ག་ལ་ཡང་ས་ཕུང་བདུན་ཁོ་ན་བླུག་པར་བྱ་བ་ཡིན་གྱི། ལག་པ་གཡོན་པ་འབའ་ཞིག་ལན་བདུན་གྱི་བར་དུ་བཀྲུ་བར་ནི་མ་ཟད་དེ་ལག་པ་གཉི་ག་དག་ལ་ཡང་བདུན་པོ་དག་ཁོ་ནས་ཞེས་བྱ་བའི་ཐ་ཚིག་གོ །ས་དེ་དག་ཀྱང་སོ་སོར་རིམ་བཞིན་གཞག །ཅེས་བྱ་བ་ལ། སྔར་བསྟན་པ་དེའི་རིམ་པ་བཞིན་དུ་སྟེ། གོ་རིམས་བཞིན་དུ་སོ་སོར་ཐ་དད་པར་གཞག་པར་བྱའི། ཕུང་པོར་བྱ་བ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །ཀྱང་ནི་ཆོ་ག་སྡུད་པར་བྱེད་པ་ཡིན་ཏེ། འདི་སྐད་དུ་ས་སྔོན་དུ་སོང་བ་ཁོ་ནས་གཙང་སྦྲ་བྱེད་པ་ཡིན་པའི་ཕྱིར། ཐ་དད་པས་ཏེ་སོ་སོར་གཞག་པར་བྱ་བ་ཡིན་ནོ་ཞེས་བསྟན་པར་འགྱུར་རོ། །ཆུ་མང་པོས་ཀྱང་ལག་གཉིས་བཀྲུ་བར་བྱ། །ཞེས་བྱ་བ་ལ། ལག་པ་གཉིས་ལ་སྔར་བཤད་པའི་ཚད་ཀྱི་ས་ཕུང་བདུན་དང་ཆུ་མང་པོ་དག་གིས་ཀྱང་སྔར་བཤད་པའི་ཆོ་ག་བཞིན་དུ་བཀྲུ་བར་བྱ་བ་ཡིན་ནོ། །དེ་ནས་འབད་པས་ལག་ངར་བྱིན་བཅས་བྱུག །ཅེས་བྱ་བ་ལ་སོགས་པ་ལ། དེའི་འོག་ཏུ་ལག་ངར་དང་བཅས་པ་འབྱུག་པའི་ཕྱིར་ལག་ངར་བྱིན་བཅས་ཏེ། དེ་དག་ཡོངས་སུ་བྱུག་ནས་ཀྱང༌། །ལག་པ་གཉིས་བཀྲུ་བར་བྱ་ཞིང་དེའི་འོག་ཏུ་སྤྱི་བླུགས་དང༌། རྐང་པ་གཉིས་ཀྱང་བཀྲུ་བར་བྱའོ་ཞེས་བྱ་བར་སྦྱར་རོ། །དང་ནི་སྡུད་པར་བྱེད་པའི་དོན་ཏོ། །ཅིའི་ཕྱིར་བཅོམ་ལྡན་འདས་ཀྱིས་ཚད་ཡོངས་སུ་ཆད་པའི་ས་དག་གིས་གཙང་སྤྲ་བྱ་བ་གསུངས་ཤེ་ན། སེམས་ཀྱི་དག་པ་གཙང་སྦྲར་གསུངས་པ་ཡིན། །ཞེས་བྱ་བ་ལ་སོགས་པ་ལ། དྲི་དང་ཆགས་པ་མི་གཙང་བ་གང་ཡིན་པ་དང་བྲལ་བ་ཙམ་དེ་ཁོ་ན་ལ་འཇིག་རྟེན་ཀྱི་ཐ་སྙད་ཀྱི་དབང་དུ་མཛད་ནས་གཙང་སྤྲར་བཅོམ་ལྡན་འདས་ཀྱིས་གསུངས་པ་ཡིན་ཏེ། གང་གི་ཕྱིར་དེ་ཙམ་ཁོ་ནས་སེམས་དག་པར་འགྱུར་བ་མིན་ནོ་ཞེས་བྱ་
བ་ནི་ཚིག་གི་ལྷག་མའོ། །བཅོམ་ལྡན་འདས་ཀྱིས་དོན་དམ་པའི་གཙང་སྤྲ་ཇི་ལྟར་གསུངས་ཤེ་ན། ལུས་སོགས་སྡིག་པ་རྣམ་སྤངས་གང་ཡིན་པ། །ཞེས་བྱ་བ་ལ་སོགས་པ་སྨོས་ཏེ། བཅོམ་ལྡན་འདས་ཀྱིས་དངོས་སུ་ནང་གི་གཙང་སྤྲ་ཁོ་ན་ལ་གཙང་སྤྲ་ཉིད་དུ་གསུངས་ཤིང་བཀའ་སྩལ་པ་ཡིན་ནོ། །གཙང་སྦྲ་དེ་ཡང་གང་ཞེ་ན། སྨྲས་པ་ལུས་ལ་སོགས་པའི་སྡིག་པ་སྟེ་སྲོག་གཅོད་པ་ལ་སོགས་པ་སྤངས་པ་གང་ཡིན་པ་དེ་ཁོ་ན་གཙང་སྦྲར་གསུངས་པ་ཡིན་ནོ་ཞེས་བྱ་བར་སྦྱར་རོ། །སོགས་པའི་སྒྲས་ནི་ངག་དང་ཡིད་ཀྱི་ཞེས་བྱ་བ་སྡུད་པ་ཡིན་ནོ། །ཅི་གང་དང་གང་དུ་གཅི་བ་ལ་སོགས་པ་བྱ་བ་ཡིན་ཞེ་ན། གཅི་དང་བཤད་དང་སོ་ཤིང་བཟའ་བ་རྣམས། །སྡོམ་ཅན་གྱིས་ནི་དབེན་པའི་ཕྱོགས་སུ་བྱ། །ཞེས་བྱ་བས་སྟོན་པར་བྱེད་པ་ཡིན་ཏེ། སྡོམ་ཅན་གྱིས་དབེན་པའི་ས་ཕྱོགས་ཁོ་ནར་གཅི་བ་གཏང་བར་བྱ་ཞིང༌། དེ་བཞིན་དུ་བཤང་བ་དང་སོ་སྦྱང་བ་དག་ཀྱང་དབེན་པའི་ས་ཕྱོགས་ཁོ་ནར་བྱ་བ་ཡིན་ནོ། །དབེན་པ་ཞེས་བྱ་བ་ནི་འདུ་འཛི་མེད་པ་ཞེས་བྱ་བའི་དོན་ཡིན་ནོ། །ནིའི་སྒྲ་ནི་ངེས་པར་གཟུང་དང་རིམ་པ་གཞན་གྱི་དོན་ཏོ། །སོ་ཤིང་ཇི་ལྟར་དོར་བར་བྱ་བ་ཡིན་ཞེ་ན། ཆུ་མང་པོས་ཀྱང་བཀྲུས་ནས་དོར་བར་བྱ། །ཞེས་བྱ་བ་ལ་སོགས་པ་སྨོས་ཏེ། སོ་ཤིང་ཆུ་དག་གིས་བཀྲུས་ནས་དོར་བར་བྱ་བ་ཡིན་ནོ། །ཆུ་མེད་པ་ཇི་ལྟར་བྱ་ཞེ་ན། ཅི་སྟེ་ཆུ་མེད་གྱུར་ན་སོ་ཤིང་ནི། །ཞེས་བྱ་བ་ལ་སོགས་པ་སྨོས་ཏེ། འབད་པས་ས་ལ་བྲུད་པར་བྱས་ནས་ལྕེའི་དྲི་མ་བསལ་ཏེ་དོར་བར་བྱའོ་ཞེས་བྱ་བའི་ཐ་ཚིག་གོ །ཅིའི་ཕྱིར་ཞེ་ན། ལྕེ་ཡི་དྲི་མས་གནོད་པར་གྱུར་ཏ་རེ། །ཞེས་བྱ་བ་སྨོས་ཏེ། སྔོན་རབ་ཏུ་བྱུང་བས་སོ་ཤིང་མ་བཀྲུས་པར་བོར་བ་དེ་ལ་སྦྲང་བུ་བབས་པར་གྱུར་ནས་སོ་ཤིང་ལ་ཆགས་པའི་མཆིལ་མ་གཞི་བས་པར་གྱུར་པ་ན། སོའི་དུག་གིས་དུས་ལས་འདས་པར་གྱུར་པ་ལ། དེ་ལས་སྲོག་ཆགས་གཞན་དག་དང་དེ་ལས་ཀྱང་སྲོག་ཆགས་གཞན་ཡང་ཞེས་བྱ་བ་དེ་ལྟ་བུ་ལ་སོགས་པ་དེ་དག་ཐམས་ཅད་དུས་ལས་འདས་པར་གྱུར་པ་དེ་བཞིན་དུ་ལྕེའི་དྲི་མས་སྲོག་ཆགས་དག་ལ་འདི་ཉིད་དུ་ཡང་གནོད་པར་མ་གྱུར་ཅིག་ཅེས་བྱ་བའི་དོན་ཏོ། །སྡོམ་ཅན་གཞན་དག་གི་ལྷུང་བཟེད་རྣམ་པ་དུ་ཡིན་ཞེ་ན། ལྷུང་བཟེད་གཉིས་ཏེ་ཞེས་བྱ་བ་ལ་སོགས་པ་སྨོས་པ་ཡིན་ཏེ། ས་ལས་བྱས་པ་དང་ལྕགས་ལས་བྱས་པ་ཞེས་བྱ་སྟེ་གཉིས་དག་ཡིན་
གྱི། གཞན་ཟངས་མ་ལ་སོགས་པ་ལས་བྱས་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །མི་ཆེ་མི་ཆུང་སྐྱ་མ་ཡིན། །ཞེས་བྱ་བ་ལ། ཆུང་བ་མ་ཡིན་པ་དང༌། ཆེ་བ་མ་ཡིན་པ་དང༌། སྐྱ་བ་མ་ཡིན་ནོ་ཞེས་བྱ་བ་ནི་ཚིག་གི་ལྷག་མ་ཡིན་ནོ། །དང་ནི་ཐམས་ཅད་སྡུད་པར་བྱེད་པའི་དོན་ཏོ། །ལྷུང་བཟེད་སྐྱ་བ་ནི་ལྷུང་བཟེད་དཀར་པོའོ། །དེ་ལ་ལྷུང་བཟེད་ནི་རྣམ་པ་གསུམ་སྟེ། རབ་དང་འབྲིང་དང་ཆུང་ངུའོ། །དེ་ལ་རབ་ནི་མ་ག་དྷཱའི་བྲེའུ་ཆུང་དོ་སྲན་ཚོད་དང་བཅས་ཚོད་མ་དང་བཅས་པ་ཤོང་བ་ཡིན་ལ། ཆུང་ཚད་ནི་བྲེའུ་ཆུང་གང་ཙམ་དང༌། འབྲིང་ཚད་ནི་བར་མ་དག་ཡིན་ཏེ། དེའི་ཕྱིར་རབ་ཚད་དང་ཆུང་ཚད་ལས་གོ་རིམས་བཞིན་དུ་ལྷག་པ་དང་ཆུང་བ་གང་ཡིན་པ་བཅང་བར་མི་བྱའོ་ཞེས་བྱ་བའི་ཐ་ཚིག་གོ །བསོད་སྙོམས་ལ་འཇུག་པའི་དུས་སུ་འཁར་གསིལ་དཀྲོལ་བར་བྱའོ་ཞེས་བྱ་བ་ནི་ཚིག་གི་ལྷག་མ་ཡིན་པར་ཁོང་དུ་ཆུད་པར་བྱའོ། །དེའི་ཕྱིར་གཞན་དུ་འདོད་པས་འཇུག་པར་བྱ་བ་ཡིན་ནོ། །ཁྱད་པར་ཇི་ལྟ་བུ་ཞེ་ན། གོ་བར་བྱ་བ་དང་ནི་ཁྱི་སྐྲོད་ཕྱིར། །ཞེས་བྱ་བ་ལ་སོགས་པ་སྨོས་པ་ཡིན་ནོ། །ནིའི་སྒྲ་ནི་སྒྲ་དང་ལྡན་པ་ཁོ་ན་ལས་བཅང་བར་བྱའི་གཞན་ནི་མ་ཡིན་ནོ་ཞེས་ངེས་པར་གཟུང་བའི་ཕྱིར་རོ། །གང་གི་ཕྱིར་དགེ་འདུན་གྱིས་མ་གནང་བ་མ་ཡིན་པ་གཞན་རྙེད་པར་གྱུར་ན་ཞེས་བྱ་བ་དེའི་དབང་དུ་བྱས་པ་ཡིན་ནོ། །རང་བཞིན་དེ་ཡང་ཅིའི་ཕྱིར་ཞེ་ན། སྨྲས་པ། བསོད་སྙོམས་ལ་འཇུག་པ་ན་བུད་མེད་ཀྱི་ཡུལ་གོས་མེད་པ་དག་གོ་བར་བྱ་བ་དང༌། ཁྱི་བསྐྲད་པར་བྱ་བའི་ཕྱིར་ཏེ། ལེགས་པར་ཀུན་ནས་གོ་བར་བྱེད་པ་དང༌། ཁྱི་སྐྲོད་པར་བྱེད་པའི་ཕྱིར་དེ་སྐད་ཅེས་བྱའོ། །ཁྱི་ནི་དུད་འགྲོ་གཞན་དག་གི་ཉེ་བར་མཚོན་པར་བྱེད་པ་ཡིན་ལ། དང་ནི་སྡུད་པར་བྱེད་པའི་དོན་ཡིན་ནོ། །རབ་ཏུ་བྱུང་བའི་རྟགས་ཁས་བླངས་པ་དང་འགལ་བའི་ཕྱོགས་ཞེས་བྱ་བ་སྟེ། བསླབ་པའི་གཞི་བཅུ་གཉིས་པའོ།། །།རབ་ཏུ་འབྱུང་བའི་དུས་སུ་སློབ་དཔོན་དགོངས་སུ་གསོལ་ཞེ་འམ་མཁན་པོ་དགོངས་སུ་གསོལ་ཞེས་བྱ་བ་ལ་སོགས་པས་མཁན་པོར་གསོལ་བ་འདེབས་པ་ཡང་འབྱུང་བས། བླ་མར་གསོལ་བ་བཏབ་དང་འགལ་ཕྱོགས་ནི། །ཞེས་བྱ་བ་ལ་སོགས་པས་འཆད་པར་བྱེད་དེ། བླ་མའི་སྒྲ་ནི། མཁན་པོ་ལ་བྱ་སྟེ། མཁན་པོ་ལ་གསོལ་བ་འདེབས་པ་དེ་ནི། །སློབ་དཔོན་དགོངས་སུ་གསོལ། །
སློབ་དཔོན་གྱིས་བདག་མིང་འདི་ཞེས་བགྱི་བའི་མཁན་པོར་གསོལ་བ་འདེབས་ཀྱི། སློབ་དཔོན་གྱིས་བདག་གི་མཁན་པོ་མཛད་དུ་གསོལ་ཞེས་བྱ་བ་ལ་སོགས་པ་ཡིན་ཏེ། དེ་ཡོངས་སུ་གཏོང་ཞིང་བཤིག་པ་དེ་ནི་འགལ་བ་ཡིན་ལ། དེའི་ཕྱོགས་སུ་གྱུར་པ་ནི་དེ་ལས་བྱུང་བ་ཡིན་པས་ན། བླ་མར་གསོལ་བ་བཏབ་པ་དང་འགལ་ཕྱོགས་སོ། །དེ་ལྟ་བུར་གྱུར་པ་དེ་ཡང་གང་ཞེ་ན། རང་གི་བླ་མ་ལ་ནི་བསྟི་སྟང་མེད། །ཅེས་བྱ་བ་ལ་སོགས་པ་སྨོས་པ་ཡིན་ཏེ། རང་གི་བླ་མ་སྟེ་བདག་ཉིད་ཀྱི་བླ་མ་ལ་གུས་པ་མེད་པ་གང་ཡིན་པ་དེ་ཉིད་དེའི་ཕྱོགས་སུ་གཏོགས་པ་ཡིན་པར་རིག་པར་བྱའོ། །གྲོགས་ཚངས་པ་མཚུངས་པར་སྤྱོད་པ་གཞན་དག་ལ་ཡང་གུས་པ་མེད་པ་ཉིད་ནི་ཁ་ན་མ་ཐོ་བའི་རྒྱུ་ཡིན་པས་དེ་ཡང་ཆུང་བར་འགྱུར་བར་ཁོང་དུ་ཆུད་པར་བྱའོ། །དེའི་ཕྱིར་འདི་སྐད་དུ་ལུང་ལས་གནས་བརྟན་རྣམས་དང༌། བར་མ་རྣམས་དང༌། གསར་བུ་རྣམས་ལ་གུས་པ་དང་བཅས་པ་དང༌། རྗེས་དང་བཅས་པ་དང༌། འཇིགས་པའི་དབང་དུ་འགྱུར་བས་གནས་པར་བྱའོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །མཁན་པོ་ཡང་སློབ་དཔོན་ཐམས་ཅད་ཀྱི་ཉེ་བར་མཚོན་པ་ཡིན་ནོ། །དེ་དག་ལ་ཇི་ལྟར་བྱ་བ་ཡིན་ཞེ་ན། ཕ་ལ་རབ་སྡུག་བླ་མར་བྱེད་པ་ལྟར། །བདག་ཉིད་འདོད་པས་བླ་མ་ལ་རྗེས་གནས། །ཞེས་བྱ་བ་སྨོས་ཏེ། ཕ་ལ་རབ་ཏུ་སྡུག་པ་ནི་གཉེན་པ་སྟེ། ཕ་ལ་རབ་ཏུ་སྡུག་པ་དང་བླ་མར་བྱེད་པ་ལྟར། རང་གི་བླ་མ་ལ་ཡང་རྗེས་སུ་གནས་པ་སྟེ་ཉེ་བར་གནས་པར་བྱའོ་ཞེས་བྱ་བའི་དོན་ཏོ། །དེ་གང་གིས་ཤེ་ན། བདག་ཉིད་འདོད་པས་ཞེས་བྱ་བ་སྨོས་ཏེ། སྡོམ་ཅན་བདག་ཉིད་འདོད་པ་གང་ཡིན་པ་དེ་བདག་ཉིད་ཤེས་པས་ཞེས་བྱ་བའི་ཐ་ཚིག་གོ །བླ་མར་བྱེད་པ་ཞེས་བྱ་བ་ནི་ཡོན་ཏན་ལ་དམིགས་པ་སྔོན་དུ་སོང་བས་ལུས་དང་ངག་གི་འཇུག་པ་ཡང་བག་འཁུམས་པས་འཇུག་པ་ཡིན་ནོ། །དེ་སྐད་དུ་བདག་ཉིད་ཤེས་པ་རྣམས་ཀྱིས་རང་གི་བླ་མ་ལ་སྡུག་པ་དང་གུས་པས་ཉེ་བར་གནས་པར་བྱའོ་ཞེས་བྱ་བའི་དོན་དུ་བསྟན་པར་འགྱུར་རོ། །ད་ནི་བྱ་བར་གཏོགས་པ་རྗོད་པར་བྱེད་པ་ཡིན་ཏེ། བྱ་བ་ཐམས་ཅད་དྲིས་ནས་བྱ་བ་ཡིན་གྱི་མ་དྲིས་པར་ནི་མ་ཡིན་ཏེ། དེ་དག་ཀྱང་དྲིས་ནས་བྱའོ་ཞེས་བྱ་བའི་ཐ་ཚིག་གོ །དང་ནི་སྡུད་པར་བྱེད་པའི་དོན་ཏོ། །དེ་ལ་ཇི་ཙམ་ཞིག་མ་གཏོགས་པ་ཡིན་ཞེ་ན།
བཤད་དང་གཅི་དང་སོ་ཤིང་བཟའ་བ་དང༌། །མཚམས་གྱི་ནང་དུ་རྒྱལ་ལ་ཕྱག་བྱ་དང༌། །ཆུ་བཏུང་བ་དང་དེ་དག་མ་གཏོགས་པར། །ཞེས་བྱ་བ་སྨོས་ཏེ། གཙུག་ལག་ཁང་རྩིག་པ་ལ་སོགས་པས་ཡོངས་སུ་བསྐོར་བའི་ནང་གི་མཚམས་ཏེ། རྩིག་པ་ལ་སོགས་པའི་མཚམས་དེར་རོ། །རྒྱལ་བ་ལ་ཕྱག་བྱ་བ་སྟེ། མཆོད་རྟེན་ལ་ཕྱག་འཚལ་བ་དག་མ་གཏོགས་སོ། །ཆུ་བཏུང་བ་དང་པོར་བྱས་པ་གང་ཡིན་པ་དེ་ནི་ཆུ་བཏུང་བ་ལ་སོགས་པ་སྟེ་དེ་དག་མ་གཏོགས་པར་གཞན་དག་མི་བྱའོ་ཞེས་བྱ་བའི་ཐ་ཚིག་གོ །དང་ནི་འདིར་ཡང་སྔ་མ་དང་འདྲའོ། །བླ་མ་མ་ལངས་སྔ་རོལ་སྔར་ལངས་ཏེ། །ཞེས་བྱ་བ་ལ་སོགས་པས་བླ་མ་ལ་སློབ་མ་དང༌། ཉེ་གནས་ཀྱི་བྱ་བ་དེ་སྟོན་པར་བྱེད་པ་ཡིན་ཏེ། བླ་མ་མ་ལངས་སྔ་རོལ་ཏེ་ཐོ་རངས་ལངས་ནས་སོ་ཤིང་སྔོན་དུ་སོང་བའི་ཁྲུས་བྱས་པའི་འོག་ཏུ་བླ་མ་ལ་ཡང་གདོང་བཀྲུ་བར་བྱ་བའི་ཕྱིར་ཆུ་ལ་སོགས་པ་ཉེ་བར་བསྟབས་ལ། བདེ་བར་གཤེགས་པ་ལ་གུས་པ་དང་བཅས་པས་ཕྱག་བྱའོ། །དེའི་འོག་ཏུ་བླ་མ་ལ་གུས་པར་ཕྱག་བྱས་ནས་སྐུ་ལ་མཉམ་པ་སྟེ། རང་བཞིན་དུ་གནས་སམ་ཞེས་གུས་པར་གྱུར་པ་དེས་དེ་ལ་ཕྱིས་ཁྱེད་ཀྱི་སྐུ་དགེ་འམ་ཞེས་བྱ་བ་ལ་སོགས་པས་དྲི་བར་བྱའོ། །དེ་ནས་ཅི་ཞིག་བྱ་བ་ཡིན་ཞེ་ན། བགྱི་བ་ཅི་མཆིས་ལུང་མནོད་དེའི་འོག་ཏུ། །ཞེས་བྱ་བ་སྨོས་པ་ཡིན་ཏེ། བགྱི་བ་ནི་བྱ་བ་དག་ཡིན་ཏེ་ཀློག་པ་དང་འདོན་པ་ལ་སོགས་པ་དེའི་དངོས་པོའི་བྱ་བ་དེའི་ལུང་མནོད་པའོ། །དེའི་འོག་ཏུ་སྟེ། མཁན་པོ་དགོངས་སུ་གསོལ་ཞེས་བྱ་བ་དང་བགྱི་བ་བགྱིད་དོ་ཞེས་བྱ་བའི་རྗེས་ལའོ། །དེ་ཡི་གནས་ཁང་ཉེ་འཁོར་ཕྱག་དར་བྱ། །ཞེས་བྱ་བ་ལ་བླ་མ་དེའི་གནས་ཁང་གི་ཉེ་འཁོར་དེར་དཀྱིལ་འཁོར་ལ་སོགས་པ་བྱས་ནས་སྟན་བཤམ་པར་བྱའོ་ཞེས་བྱ་བ་ནི་ཚིག་གི་ལྷག་མ་ཡིན་ནོ། །དེ་ནས་རྒྱལ་བ་ལ་ཡང་དཀྱིལ་འཁོར་བྱ། །ཞེས་བྱ་བ་ལ་སོགས་པ་ལ། དེ་ནས་ཏེ་དུས་ཕྱིས་རྒྱལ་བ་བཅོམ་ལྡན་འདས་ལ་དཀྱིལ་འཁོར་བྱས་ནས་བཅོམ་ལྡན་འདས་ལ་གཡས་སུ་བསྐོར་བ་བྱ་ཞིང་མཆོད་རྟེན་ལ་ཕྱག་བྱའོ། །སྔ་དྲོའི་དུས་སུ་ཞེས་བྱ་བར་རིག་པར་བྱ་སྟེ། གང་གི་ཕྱིར་ཚོགས་པའི་དུས་ལ་བབ་པོ་ཞེས་བྱ་བ་ལ་སོགས་པས་དེའི་ཚེ་མཆོད་རྟེན་ལ་ཕྱག་བྱ་བ་འབྱུང་བ་ཡིན་ནོ། །ཇི་ལྟར་བྱ་བ་ཡིན་ཞེ་ན། ཉེ་བའི་སྡོམ་
ཅན་རྒན་ལ་ཕྱག་བྱས་རྗེས། །དགེ་བས་ལུས་ལས་སྙིང་པོ་བླང་བར་བྱ། །ཞེས་བྱ་བ་སྨོས་ཏེ། དད་པས་ཕྱག་འཚལ་བ་ནི་དད་པས་ཕྱག་བྱས་པའི་རྗེས་ཏེ། དུས་ཕྱིས་ཞེས་བྱ་བའི་དོན་ཏོ། །བཅོམ་ལྡན་འདས་དང་བླ་མ་ལ་ཕྱག་འཚལ་བའི་དུས་སུ་ཐག་ཉེ་བའི་རྒན་པོ་གང་ཡིན་པ་དེ་དག་ལ་ཡང་ཕྱག་བྱས་ནས་དགེ་བས་ལུས་ལས་སྙིང་པོ་བླང་བྱ་སྟེ། །གང་གི་ཕྱིར་བཅོམ་ལྡན་འདས་ཀྱིས་སྙིང་པོ་མ་ཡིན་པའི་ལུས་ལས་སྙིང་པོ་བླང་བར་བྱའོ་ཞེས་གསུངས་པའི་ཕྱིར་རོ། །གཞན་ཡང༌། བླ་མ་བསྙེན་བཀུར་བྱེད་པས་བཟའ་བ་དང༌། །བཏུང་བ་ལ་སོགས་ཞིམ་པོ་ཐམས་ཅད་དབུལ། །ཞེས་བྱ་བ་ལ་བསྙེན་བཀུར་བྱས་པས་ན་བསྙེན་བཀུར་བྱེད་པ་སྟེ། དེས་བདག་ཉིད་ཀྱི་འམ་དགེ་འདུན་གྱི་ཟས་སམ་བསོད་སྙོམས་ལ་བརྒྱུས་པ་ལས་ཟང་ཟིང་གི་རྙེད་པ་གང་བྱུང་བ་དེ་ལས་བཏུང་བ་ལ་སོགས་པ་ཞིམ་པོ་བསྟབས་ནས་ཕྱིས་བདག་ཉིད་བཟའ་བར་བྱའོ། །སོགས་པའི་སྒྲས་གོས་ལ་སོགས་པ་གཟུང་ངོ༌། །ལུས་ཀྱི་བསྙེན་བཀུར་འབའ་ཞིག་མ་ཡིན་གྱི། །ཟང་ཟིང་གིས་ཀྱང་བྱའོ་ཞེས་བྱ་བ་ནི་ཡང་གི་སྒྲའི་དོན་ཡིན་ནོ། །ནིའི་སྒྲ་ནི་ངེས་པར་གཟུང་བའོ། །གཞན་ཡང་ཕྱག་བྱེད་པའི་དུས་སུ་ཡང་སྡོམ་ཅན་མི་མཐུན་པ་ཉེ་བར་ལྷགས་ན་ཇི་ལྟར་རྟོགས་པར་བྱ་བ་ཡིན་ཞེ་ན། སྡོམ་ཅན་མི་མཐུན་པ་ཞིག་ལམ་དུ་ལྷགས། །འོན་ཀྱང་བསྐོལ་བར་མི་བྱ་ཕྱག་བྱོས་ཤིག །ཅེས་བྱ་བ་ལ་སོགས་པ་སྨོས་ཏེ། ཕྱག་བྱ་བར་གཏོགས་པ་ནི་རྒན་པོ་ཕྱག་བྱ་བར་འོས་པ་སྟེ། དེའི་དངོས་པོ་ནི་ཕྱག་བྱ་བར་གཏོགས་པ་ཉིད་དོ། །སྡོམ་ཅན་མི་མཐུན་པ་སྟེ་ལམ་དང་ཉེ་བའི་ཉེ་འཁོར་དུ་ལྷགས་ཤིང་ཕྱིན་པར་གྱུར་པ་ལ་དེས་ཀྱང་མ་བཀོལ་བར་ཕྱག་བྱོས་ཤིག་ཅེས་བྱ་བའི་དོན་ཏོ། །ཀྱང་གི་སྒྲ་ནི་མཐུན་པར་གྱུར་པ་ལྟ་ཞོག་གི །མི་མཐུན་པ་སྟེ་འཐབ་ཀྲོལ་ཅན་གྱིས་ཀྱང་དེ་བཀོལ་བར་མི་བྱའོ་ཞེས་བྱ་བའི་ཐ་ཚིག་གོ །སྡོམ་ཅན་མི་མཐུན་པ་དེས་ཀྱང་ཇི་ལྟར་བྱ་ཞེ་ན། དེས་ཀྱང་ནད་མེད་ཅིག་ཅེས་བརྗོད་པར་བྱ། །ཞེས་སྨོས་ཏེ། སྡོམ་ཅན་མི་མཐུན་པས་ཕྱག་བྱ་བར་འོས་པ་དེས་ཀྱང་ནད་མེད་པར་གྱུར་ཅིག་ཅེས་བརྗོད་པར་བྱའོ། །ཅིའི་ཕྱིར་ཞེ་ན། འཇིག་རྟེན་གསུམ་སྟོན་བཀའ་དང་མི་འགལ་ཕྱིར། །ཞེས་བྱ་བ་སྨོས་ཏེ། འཇིག་རྟེན་གསུམ་གྱི་སྟོན་པ་བཅོམ་ལྡན་འདས་དེའི་བཀའ་སྟེ། སྡོམ་ཅན་མི་མཐུན་པ་ཞིག་ཕྱག་
བྱ་བར་འོས་པ་ཉེ་བར་ལྷགས་པ་ལ་ཞེས་བསླབ་པའི་གཞི་བཅའ་བ་མཛད་པའི་ཕྱིར་རོ་ཞེས་བྱ་བའི་དོན་ཏོ། །ཉིད་ནི་ངེས་པར་གཟུང་བ་དང་རིམ་པ་གཞན་གྱི་དོན་ཡིན་ནོ། །ཀྱང་གི་སྒྲ་ནི་ཅིག་ཤོས་ཀྱིས་ཀྱང་ནད་མེད་པར་གྱུར་ཅིག་ཅེས་བརྗོད་པར་བྱའོ་ཞེས་སྡུད་པར་བྱེད་པའོ། །དང་ནི་ཚིག་གི་ཁ་བསྐང་བའོ། །སྦྲིད་པ་བྱུང་བ་ལ་ཇི་ལྟར་བྱ་བ་ཡིན་ཞེ་ན། རྒན་ཞུགས་ཤིན་ཏུ་རྒན་ལ་སྦྲིད་བྱུང་དང༌། །ཞེས་བྱ་བ་ལས་སོགས་པ་སྨོས་ཏེ། ན་ཚོད་ཀྱིས་ཤིན་ཏུ་རྒན་པོར་གྱུར་པ་དེ་ཡང་རྒན་ཞུགས་ཏེ་རྒན་ཞུགས་ཀྱི་རིགས་ཅན་བླང་བ་དང༌། དོར་བ་མི་ཤིས་པའི་ཕྱིར་རིང་དུ་འཚོ་བར་འདོད་པ་དེ་ལྟ་བུར་གྱུར་པ་དེ་དག་ཀྱང་སྦྲིད་པ་བྱུང་ན་སོས་པར་གྱུར་ཅིག་ཅེས་བརྗོད་པར་བྱའོ། །དེ་དག་འབའ་ཞིག་མ་ཡིན་གྱི། །ཁྱིམ་པ་སྦྲིད་པ་བྱུང་བ་ལ་འང་ཞེས་བྱ་བ་ལ། ཁྱིམ་པ་འཚོ་བར་འདོད་པ་ཐམས་ཅད་ལ་ཡང་སོས་ཤིག་ཅེས་བརྗོད་པར་བྱའོ། །གསར་བུ་སྦྲིད་བྱུང་ནད་མེད་ཤོག་ཅེས་བརྗོད། །ཅེས་བྱ་བ་ལ་གསར་བུ་སྟེ་གཞོན་རབས་རྒན་ཞུགས་ཀྱི་རིགས་ལས་གཞན་པ་ལ་སྦྲིད་པ་བྱུང་ན་ནད་མེད་པར་གྱུར་ཅིག་ཅེས་བརྗོད་པར་བྱའོ། །ཉིད་ནི་མོས་ཞེས་བརྗོད་པ་རྣམ་པར་གཅོད་པའི་ཕྱིར་རོ། །རྒན་པོ་སྦྲིད་བྱུང་ཕྱག་འཚལ་ཞེས་ཀྱང་བརྗོད། །ཅེས་བྱ་བ་ལ་རྒན་ཞུགས་ལས་གཞན་པའི་རྒན་རབས་སྦྲིད་པ་བྱུང་ན་སྦྲིད་པ་དང་ལྡན་པ་ལ་ཕྱག་འཚལ་ལོ་ཞེས་བརྗོད་པར་བྱ་བའི་ཡན་ལག་ལྔ་དང་བྱིན་པ་ནས་བཟུང་བའི་རང་བཞིན་ཅན་ནི་མ་ཡིན་ནོ། །དང་ནི་མ་བསྟན་པ་སྡུད་པར་བྱེད་པའི་དོན་ཏེ། དེས་ནི་བདག་ཉིད་སྦྲིད་པ་བྱུང་ན་ནད་མེད་པར་གྱུར་ཅིག་པ་དང༌། ཕྱག་འཚལ་བར་བྱེད་པའི་རྒན་རབས་དང་གཞོན་རབས་དག་ལ་གོ་རིམས་བཞིན་དུ་ཕྱག་འཚལ་བ་དང་ནད་མེད་པར་གྱུར་ཅིག་ཅེས་བརྗོད་པར་བྱའོ། །མངོན་པར་བསྟོད་པས་ཕྱག་བྱ་བ་ལ་སོགས་པས་ཕྱག་བྱས་པ་ཡང་རྣམ་པ་མང་པོ་ཡོད་པས་དེ་དག་གི་ནང་ནས་གུས་པས་ཕྱག་བྱ་བ་དུ་ཡོད་ཅེ་ན། འདི་ལ་གུས་པར་ཕྱག་བྱ་རྣམ་གཉིས་ཏེ། །ཡན་ལག་ལྔས་གཏུགས་བྱིན་པ་གཟུང་བའོ། །ཞེས་བྱ་བ་སྨོས་ཏེ། འདི་ལ་ཞེས་བྱ་བ་ནི་བསྟན་པ་འདི་ལའོ། །རྣམ་པ་གཉིས་ཡོད་པའི་ཕྱིར་གུས་པར་ཕྱག་བྱ་བ་རྣམ་པ་གཉིས་ཁོ་ནའོ། །ཁོ་ནའི་སྒྲ་ནི་རྣམ་པ་གསུམ་པ་རྣམ་པར་བཅད་པའི་ཕྱིར་རོ། །ནིའི་སྒྲ་
ནི་གང་གི་ཕྱིར་གྱི་དོན་ཏེ། གང་གི་ཕྱིར་ཡན་ལག་ལྔ་དང་བྱིན་པ་ནས་བཟུང་བའི་རང་བཞིན་ཅན་ནི་གུས་པར་ཕྱག་བྱས་པ་ཡིན་པ་དེའི་ཕྱིར་རྣམ་པ་གཉིས་ཡིན་ནོ། །དེ་ལ་ལག་པ་གཉིས་དང༌། པུས་མོ་གཉིས་ས་ལ་ཕབ་ནས་ཡན་ལག་གི་མགོ་བོས་ས་ལ་གཏུགས་པ་སྟེ། ཡན་ལག་ལྔ་པོ་དེ་དག་གིས་ཕྱག་བྱས་པ་ནི་འདིར་ཡན་ལག་ལྔས་ཕྱག་བྱས་པ་ཡིན་ལ། ཚིག་སྔོན་དུ་སོང་བའི་ཙོག་པུས་འདུག་སྟེ་ཕྱག་བྱ་བར་འོས་པའི་བྱིན་པ་ལ་ལག་པ་གཉིས་ཀྱིས་གཟུང་བ་དེ་ལྟ་བུའི་རང་བཞིན་ཅན་གུས་པར་ཕྱག་བྱས་པ་གཉིས་པ་ཡིན་ནོ་ཞེས་བྱ་བའི་དོན་ཏོ། །མུན་པར་བླ་མ་སྤྱི་བོ་སར་གཏུགས་པའི་ཕྱག་བྱ་མིན་ཏེ་ཞེས་བྱ་བ་ལ། མུན་པར་བླ་མ་ལ་ཕྱག་མི་བྱའོ། །བླ་མ་ཉེ་བར་མཚོན་པ་ཉིད་ཡིན་པའི་ཕྱིར་གཞན་དག་ལ་ཡང་ཕྱག་མི་བྱའོ། །ཇི་ལྟ་ཞེ་ན་སྨྲས་པ། སར་ཏེ་ས་གཞི་ལ་སྤྱི་བོའི་གཙུག་གིས་གཏུགས་པའོ། །འོ་ན་ཇི་ལྟར་ཕྱག་བྱ་ཞེ་ན། བསྟན་པའི་ཕྱིར་ཚིག་གིས་ཕྱག་བྱ་ཞེས་བྱ་བ་སྨོས་ཏེ། ཕྱག་བྱའོ་ཞེས་བྱ་བ་ནི་ཐལ་མོ་སྦྱར་བ་སྔོན་དུ་སོང་བའི་ཚིག་གིས་ཕྱག་བྱ་བ་ཡིན་ནོ། །ཏུ་ནི་ངེས་པར་གཟུང་བའོ། །གཞན་ཡང་སྡོམ་ཅན་ཕྱག་བྱ་བར་འོས་པ་ཟས་ཟ་བ་དེ་ལ་ཕྱག་བྱའམ་མི་བྱ་ཞེ་ན། སྡོམ་ཅན་བཟའ་བ་ཅུང་ཟད་ཟ་བ་དང༌། །ཞེས་བྱ་བ་ལ་སྡོམ་ཅན་གཞན་ཕྱག་བྱ་བར་འོས་པ་གང་ཡིན་པ་དེ་བཟའ་བ་ཅུང་ཟད་ཟ་ཞིང་འདུག་པ་ལ། དེས་ཕྱག་མི་བྱའོ་ཞེས་བྱ་བའི་ཐ་ཚིག་གོ །དང་ནི་སྡུད་པར་བྱེད་པའོ། །དེ་བཞིན་དུ། མི་གཙང་ཕྱོགས་ནི་བཀྲུ་བ་མ་བྱས་དང༌། །གོས་གཅིག་པ་དང་ཁ་གདོང་མ་བཀྲུས་པ། །དེ་ལ་ཕྱག་མི་བྱ་ཞིང་དེས་ཀྱང་མིན། །ཞེས་བྱ་བ་ལ་མི་གཙང་བའི་ལམ་གྱི་ཕྱོགས་མ་བཀྲུས་མ་སྦྱངས་པ་གང་ཡིན་པ་དེ་ནི། མི་གཙང་ཕྱོགས་ནི་བཀྲུ་བ་མ་བྱས་པའོ། །མི་གཙང་བའི་ལམ་གྱི་ཕྱོགས་ཞེས་བྱ་བ་ནི་གཅི་བ་དང་བཤད་པའི་ལམ་དག་གཟུང་སྟེ། དེ་ལྟ་བུར་གྱུར་པ་དེ་ལ་ཕྱག་མི་བྱ་ཞིང་དེས་ཀྱང་མི་བྱའོ། །གོས་གཅིག་གང་ལ་ཡོད་པ་དེ་ནི་གོས་གཅིག་པ་སྟེ། སྟོད་གཡོགས་མེད་པ་དེ་ལ་ཕྱག་མི་བྱ་ཞིང་དེས་ཀྱང་ཕྱག་མི་བྱའོ། །ཁ་གདོང་མ་བཀྲུས་པ་ལ་སོགས་ཞེས་བྱ་བ་ནི་འདིའི་ཁ་གདོང་ཟང་ཟིང་དང་བཅས་པར་འཇུག་པ་གང་ཡིན་པ་དེ་ལ་ཡང་ཕྱག་མི་བྱ་ཞིང་དེས་ཀྱང་ཕྱག་མི་བྱའོ། །དེ་
ལྟར་ཐམས་ཅད་ལ་སྦྱར་བར་བྱའོ། །ད་ནི། ཟས་ལ་བཀད་དང་ཞེས་བྱ་བ་ལ་སོགས་པས་ཕྱག་བྱ་བ་མ་ཡིན་པ་འབའ་ཞིག་འཆད་པར་བྱེད་དེ། ཟས་ནི་ཆོས་སྟོན་ཏེ་ཟ་འདོད་པས་བཀད་པ་སྟེ་འདུག་པའོ། །ཆད་པ་སྤྱོད་པ་སྟེ་ཆད་པའི་ལས་སྤྱོད་པའི་ཕྱིར་དེ་ལ་དེ་སྐད་ཅེས་བྱའོ། །ཁྱིམ་ན་གནས་པས་ནའམ། ཡང་ན་རབ་ཏུ་བྱུང་བ་ཁྱིམ་ནང་ན་འདུག་པས་ན་དེ་དག་ནི་ཁྱིམ་གནས་ཏེ། དེ་གཉི་ག་ལ་ཡང་གྲགས་པ་དང་ངེས་པའི་ཚིག་གི་ཚུལ་གྱིས་ཁྱིམ་ན་གནས་པ་ཡིན་པར་རྟོགས་པར་བྱའོ། །ཚུལ་ཁྲིམས་འཆལ་བ་ནི་བདག་ཉིད་ཉེས་པ་བྱུང་བར་གྱུར་པའོ། །ལུས་སྒྲེན་མོ་ནི་པུས་མོའི་དཀྱིལ་འཁོར་དང་ལྟེ་བའི་དཀྱིལ་འཁོར་མཐང་གོས་སམ་བླ་གོས་དག་གིས་མ་གཡོགས་པ་སྟེ། ལུས་མ་གཡོགས་པ་ཉིད་ནི་སྒྲེན་མོ་ཉིད་ཡིན་ལ་ལུས་སྒྲེན་མོ་གང་ལ་ཡོད་པ་དེ་ནི་ལུས་སྒྲེན་མོ་རྣམས་སོ། །ཟས་ལ་བཀད་པ་དང༌། ཆད་པ་སྐྱོད་པ་དང༌། ཁྱིམ་ན་གནས་པ་དང༌། ཚུལ་ཁྲིམས་འཆལ་བ་དང༌། སྒྲེན་མོ་དང་ཞེས་གཅིག་ལ་གཅིག་སྦྱོར་བའི་བསྡུ་བ་བྱའོ། །དེ་དག་ལ་ཕྱག་མི་བྱའོ། །དེ་དག་འབའ་ཞིག་ལ་ཕྱག་མི་བྱ་བར་མ་ཟད་ཀྱི་འོན་ཀྱང་གཞན་ཡང་ཕྱག་བྱ་བ་མ་ཡིན་པ་ལ་ཕྱག་མི་བྱ་བ་ཡང་མེད་དེ། གཉིད་ལོག་པ་དང༌། སྙོམས་པར་ཞུགས་པ་ལ་སོགས་པ་ལྟ་བུའོ། །ཕྱག་བྱ་བ་དུ་ཡོད་ཅེ་ན། རྟག་པར་ནི། བདེ་གཤེགས་དང་ནི་རྒན་གཉིས་ཕྱག་བྱའོ། །ཞེས་བྱ་བ་སྨོས་ཏེ། བདེ་བར་གཤེགས་པ་བཅོམ་ལྡན་འདས་དང༌། རབ་ཏུ་བྱུང་བ་སྡོམ་ཅན་རྒན་པ་གཉིས་པོ་དེ་དག་ཁོ་ན་ཉིད་ཕྱག་བྱ་བ་ཡིན་གྱི་གཞན་ལ་བྱ་བ་མ་ཡིན་ནོ་ཞེས་བྱ་བའི་དོན་ཏོ། །དང་ནི་སྡུད་པར་བྱེད་པའོ། །སྔགས་ཀློག་པ་ཡིས་ལྷ་གཞན་ཕྱག་མི་བྱ། །ཞེས་བྱ་བ་ནི་དབང་ཕྱུག་ཆེན་པོ་ལ་སོགས་པའི་སྔགས་ཀློག་པའི་ལྷ་གཞན་ལ་ཕྱག་མི་བྱའོ། །ཅིའི་ཕྱིར་ཞེ་ན། གང་ཕྱིར་དེ་དག་སྡོམ་པས་རྒན་པ་མིན། །ཞེས་བྱ་བ་སྨོས་ཏེ། གང་གི་ཕྱིར་ལྷ་དེ་དག་ནི་སྡོམ་པས་རྒན་པ་མ་ཡིན་པ་དེའི་ཕྱིར་རོ་ཞེས་བྱ་བའི་དོན་ཡིན་ནོ། །འི་འི་སྒྲ་ནི་ཚིག་གི་ཁ་བསྐང་བའོ། །འོ་ན་གཞན་གྱིས་བྱས་པའི་སྔགས་ཀློག་པས་ཇི་ལྟར་བརྗོད་པར་བྱ་ཞེ་ན། གཞན་གྱིས་བྱས་པའི་སྔགས་ཀློག་དཀོན་མཆོག་གསུམ། །ཞེས་བྱ་བ་ལ་སོགས་པ་སྨོས་ཏེ།
དཀོན་མཆོག་གསུམ་པོ་ཁོ་ན་ལ་དཀོན་མཆོག་ལ་ཕྱག་འཚལ་ལོ་ཞེས་ཕྱག་འཚལ་བའི་མཆོད་པས་མཆོད་ནས་ཕྱིས་གཞན་གྱིས་བྱས་པའི་སྔགས་ཁོ་ན་ཀློག་ཅིང་བརྗོད་པར་བྱའོ། །འི་འི་སྒྲ་ནི་རིམ་པ་གཞན་དུ་ངེས་པར་གཟུང་བའོ། །གང་ཡང་གཞན་ལ་ཕྱག་འཚལ་བར་བྱེད་པ་དེས་ཅིར་འགྱུར་ཞེ་ན། སྐྱབས་འོས་སངས་རྒྱས་སྐྱབས་སུ་སོང་བ་ལས། །ཞེས་བྱ་བ་ལ་སོགས་པ་སྨོས་ཏེ། རབ་ཏུ་བྱུང་བ་གང་ཞིག་སྐྱབས་སུ་འོས་པ་སངས་རྒྱས་ལ་སྐྱབས་སུ་སོང་ནས་ལྷའི་བྱེ་བྲག་གཞན་ཉིད་ལ་བསམ་པ་སྟེ། སེམས་ཀྱིས་ཕྱག་འཚལ་བར་བྱེད་པ་དེ་ལྟ་བུར་གྱུར་པ་དེ་ནི་གྲོང་སྟེ། ལྗོངས་ཀྱི་བསོད་སྙོམས་འབར་བ་ཟ་བར་བྱེད་པ་ཡིན་ནོ། །ཅི་ཞིག་བྱས་ནས་ཤེ་ན། ཤཱཀྱའི་རིགས་ཀྱི་རྟགས་ནི་བསླུས་གྱུར་ནས། །ཞེས་བྱ་བ་སྨོས་ཏེ། ཤཱཀྱའི་རིགས་ཏེ་བཅོམ་ལྡན་འདས་ཀྱི་རྟགས་ཆ་ལུགས་བསླུས་ཤིང་གཙེས་པར་གྱུར་ཅེས་བྱ་བའི་དོན་ཏོ། །དང་ནི་གང་གི་ཕྱིར་ཆ་ལུགས་གཞན་དང༌། བསམ་པ་གཞན་དང༌། བྱ་བ་གཞན་དང༌། དཀོན་མཆོག་གསུམ་ལས་གཞན་དུ་ཞེས་སྡུད་པར་བྱེད་པའོ། །མཁན་པོར་གསོལ་བ་བཏབ་པ་དང་འགལ་བའི་ཕྱོགས་ཏེ་བསླབ་པའི་གཞི་བཅུ་གསུམ་པའོ།། །།ད་ནི། དེ་ནས་སྡོམ་པ་འཇིག་པའི་ཕྱོགས་བཤད་དེ། །ཞེས་བྱ་བ་ལ་སོགས་པས་སྡོམ་པ་མཐའ་དག་འཇིག་པའི་ཕྱོགས་དང་མཐུན་པ་བརྗོད་པ་ཡིན་ནོ། །དེ་ནས་ནི་བསྟན་མ་ཐག་པའི་འོག་ཏུའོ། །སྡོམ་པ་སྟེ་དགེ་ཚུལ་གྱི་བསླབ་པའི་གཞི་མཐའ་དག་འཇིག་ཅིང་ཡོངས་སུ་བཏང་ལ་ཕུལ་བ་དེའི་ཕྱོགས་སུ་གཏོགས་པ་དེའི་དངོས་པོ་དེ་ལ་དེ་སྐད་ཅེས་བྱའོ། །དེ་དག་ཀྱང་གང་ཞེ་ན། དཀོན་མཆོག་གསུམ་ལ་གུས་པ་མེད་པ་དང༌། །ཞེས་བྱ་བ་ལ་སོགས་པས་དེ་སྟོན་པར་བྱེད་པ་ཡིན་ཏེ། དཀོན་མཆོག་གསུམ་ལ་གུས་པ་མེད་པ་ནི་བརྙས་པར་བྱེད་པ་ཡིན་ཏེ། དེས་གསུངས་པ་ལ་ནན་ཏན་དུ་མི་བྱེད་པའི་ཕྱིར་ཞེས་བྱ་བ་ལ་སོགས་པ་ལྟ་བུའོ། །ཆོས་འདིས་ཅི་ཞིག་བྱ་ཞེས་བྱ་བ་ལ་སོགས་པ་ནི་ཆོས་ལ་བརྙས་པ་ཡིན་ནོ། །གནང་བ་བྱིན་པ་མེད་པར་དེའི་བཀའ་ལས་ཤིན་ཏུ་འདས་སོ་ཞེས་བྱ་བ་ལ་སོགས་པ་ནི་བརྙས་པ་ཡིན་པའི་ཕྱིར་དགེ་འདུན་ལ་མ་གུས་པ་ཡིན་ནོ། །དེ་བཞིན་དུ་དེ་ལྟར་གྱི་སྒྲ་ཐམས་ཅད་དུ་བལྟ་བར་བྱ་
སྟེ། དེ་ལྟར་འོག་ཏུ། ཉི་མ་ལྔ་ལས་ལྷག་པར་གནས་མེད་དང༌། །ཞེས་བྱ་བ་ལ་གནས་ཤིའམ་བསླབ་པ་བཏང་ངམ་ཡུལ་གཞན་དུ་སོང་བ་ན་གནས་ཚོལ་བའི་ཕྱིར་ཞུགས་ན་ཉི་མ་ལྔ་ལས་ལྷག་པར་གནས་མེད་པར་གནས་པ་དེ་ལ་ཁ་ན་མ་ཐོ་བ་དང་བཅས་པ་མ་ཡིན་པར་མི་འགྱུར་རོ། །འམ་ནི་རྣམ་པར་རྟོག་པའི་དོན་ཏེ། ཚོལ་བ་ལ་འཇུག་པ་ཉིད་ལས་མ་རྙེད་པར་གྱུར་ན་ཉིན་ཞག་དང་པོ་ནས་བརྩམས་ཏེ་ཞེས་བྱ་བ་དང༌། གནས་མེད་པར་ཡུལ་གཞན་དུ་སོང་ན་གནས་སུ་ཕྱིན་པ་ན་ཉི་མ་གསུམ་པའི་འོག་ཏུ་གནས་མེད་པར་གནས་པ་ཡིན་ནོ་ཞེས་བྱ་བ་དེ་དག་ཁོང་དུ་ཆུད་པར་བྱའོ། །འདིར་ཇི་སྐད་བཤད་པའི་ཉིན་ཞག་ལས་ལྷག་པར་གནས་མེད་པར་འདུག་པ་འབའ་ཞིག་ལ་ཡིད་ཀྱིར་འགྱུར་བར་མ་ཟད་ཀྱི། འདི་རྙེད་པ་དང་བཟའ་བ་ཡང་མི་དབང་ངོ༌། །སྐབས་དབྱེ་བ་དང་གསོ་སྦྱོང་ལས་ཉམས་རྣམས། །ཞེས་བྱ་བ་ལ་དགག་དབྱེ་དང་གསོ་སྦྱོང་དེ་དག་གི་ལས་ཏེ་བྱ་བ་དེ་ཉམས་པ་ནི་མི་བྱེད་པ་ཡིན་ནོ། །འདི་སྐད་དུ་དགག་དབྱེ་དང༌། གསོ་སྦྱོང་གི་ལས་དགེ་ཚུལ་མི་བྱེད་ན་ཡིད་ཀྱིར་འགྱུར་རོ་ཞེས་བསྟན་པར་འགྱུར་རོ། །དགེ་ཚུལ་ལ་གསོ་སྦྱོང་བྱ་བར་གསུངས་པ་ཉིད་ཀྱི་ཕྱིར་ཉེས་པ་མེད་དོ་སྙམ་དུ་སེམས་པར་འགྱུར་བའི་ཕྱིར། ཅི་སྟེ་ཆོ་ག་མངོན་སུམ་མེད་ཀྱང་ནི། །ཞེས་བྱ་བ་ལ་སོགས་པ་སྨོས་པ་ཡིན་ཏེ། ཇི་སྟེ་མངོན་སུམ་སྟེ་དངོས་སུ་གསོ་སྦྱོང་བྱེད་པའི་ཆོ་ག་དགེ་ཚུལ་དག་གིས་གསོ་སྦྱོང་བྱའོ་ཞེས་བྱ་བ་མེད་པ་དེ་ལྟ་ན་ཡང་དགག་དབྱེ་བཤད་པ་སྟེ། འདུལ་བ་འདིར་དགེ་ཚུལ་དག་གི་དགག་དབྱེ་བཤད་ཅིང་བསྟན་པའི་ཕྱིར་གསོ་སྦྱོང་ཡོད་པ་ཡིན་ནོ། །གང་གི་ཕྱིར་བཅོམ་ལྡན་འདས་ཀྱིས་དགེ་སློང་རྣམས་ཀྱི་དགག་དབྱེ་བྱས་ནས་དགེ་ཚུལ་དག་གི་དགག་དབྱེ་བྱའོ། །ཞེས་གསུངས་པ་དེའི་ཕྱིར་དེ་དག་གི་གསོ་སྦྱོང་ཡང་ཡོད་པ་ཡིན་ནོ་ཞེས་ཁོང་དུ་ཆུད་པར་བྱ་སྟེ། འདི་གཉིས་ལ་དོན་ཐ་དད་པ་མེད་པའི་ཕྱིར་ཇི་ལྟར་ན་ཚིག་གཅིག་གིས་ཅིག་ཤོས་ཐོབ་པར་རུང་སྙམ་པའི་བློས་དོགས་པ་ལ། སྐབས་དབྱེ་བ་ནི་དག་པ་བརྗོད་པའི་དོན། །ཞེས་བྱ་བ་ལ་སོགས་པ་སྨོས་ཏེ། དག་པ་སྟེ་ཉེས་པ་མེད་པ་དེ་ཉིད་ཀྱི་ཕྱིར་བརྗོད་ཅིང་བསྟན་པའི་དོན་ཏོ། །དགག་དབྱེའི་དགོས་པ་གང་ཡིན་པ་དེ་ནི། །ཞེས་བྱ་བའི་དོན་ཏེ་དེ་ལྟར་རིག་པར་བྱའོ། །དེ་གང་ཞེ་ན།
དེ་དང་གསོ་སྦྱོང་དོན་ནི་ཐ་དད་མེད། །ཅེས་བྱ་བ་སྨོས་ཏེ། གསོ་སྦྱོང་གི་དོན་ཏེ་དགོས་པ་དེ་ཉིད་དགག་པ་བརྗོད་པའི་མཚན་ཉིད་ཀྱི་རྒྱུ་ཡིན་པའི་ཕྱིར་འདིར་དགག་དབྱེའི་ཐད་ལས་གསོ་སྦྱོང་གི་དོན་ཐ་དད་པ་མེད་དེ་ལྷག་པ་མེད་ཅེས་བྱ་བའི་དོན་ཏོ། །དེའི་ཕྱིར་གསོ་སྦྱོང་གི་དགོས་པ་ཡང་དག་པ་ཁོ་ན་ཡིན་པའི་ཕྱིར་མ་གསུངས་སུ་ཟིན་ཀྱང་ཚིག་ཅིག་ཤོས་ཀྱིས་གྲུབ་པ་ཉིད་ཡིན་ནོ། །དེ་ཉིད་ཀྱི་ཕྱིར་དགག་དབྱེ་བྱས་ནས་ཡང་གསོ་སྦྱོང་བྱ་བ་མ་ཡིན་ཏེ། དགག་པ་ཉིད་དུ་གྲུབ་པའི་ཕྱིར་རོ། །འདིའི་སྔགས་གང་ཡིན་ཞེ་ན། བཙུན་པ་དགོངས་ཤིག །དེང་འདིར་འཕགས་པའི་ཞེས་བྱ་བ་ལ་སོགས་པ་སྨོས་ཏེ། འདིར་དེ་ལྟ་བུའི་སྔགས་ཀྱི་མཚན་ཉིད་སྨྲ་ཞིང་བརྗོད་པར་བྱ་བ་ཡིན་ནོ། །བཙུན་པ་དགོངས་ཤིག་ཅེས་བྱ་བ་ལ་སོགས་པས་དེ་འཆད་པར་བྱེད་པ་ཡིན་ཏེ། ཀྱེ་བཙུན་པ་དགོངས་སུ་གསོལ། དེང་འཕགས་པའི་དགེ་འདུན་གྱི་གསོ་སྦྱོང་བཅོ་ལྔ་པའམ་བཅུ་བཞི་པ་ལགས་ལ། དེ་ལྟར་དེང་བདག་དགེ་ཚུལ་གྱི་ཡང་གསོ་སྦྱོང་བཅོ་ལྔ་པའམ་བཅུ་བཞི་པ་ལགས་ཏེ། ཡང་དག་པར་དགག་པ་བདག་ཉིད་ཀྱིས་བརྗོད་པར་བྱའོ་ཞེས་བྱ་བ་དེ་ལྟ་བུ་ནི་སྔགས་ཡིན་ཏེ། དེ་དག་ནི་སྔགས་ཀྱི་ཉེ་བར་མཚོན་པ་ཡིན་ནོ། །སྔགས་དགེ་སློང་གི་མདུན་དུ་འདི་ལྟར་བརྗོད་པར་བྱ་སྟེ། བཙུན་པ་དགོངས་སུ་གསོལ། །དེང་དགེ་འདུན་གྱི་གསོ་སྦྱོང་བཅོ་ལྔ་པའམ། བཅུ་བཞི་པ་ལགས་ལ། བདག་དགེ་ཚུལ་མིང་འདི་ཞེས་བགྱི་བའི་གསོ་སྦྱོང་ཡང་བཅོ་ལྔ་པའམ། བཅུ་བཞི་པ་ལགས་ཏེ། བདག་དགེ་ཚུལ་མིང་འདི་ཞེས་བགྱི་བ་དེའི་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་བདག་ཉིད་སྨྲའོ་ཞེས་བྱ་བ་ཡིན་ནོ། །མཆོད་རྟེན་ཉེ་འཁོར་ཅི་ནུས་ཕྱགས་ནས་ཀྱང༌། །ཞེས་བྱ་བ་ལ་སོགས་པས་གསོ་སྦྱོང་དགག་དབྱེའི་ཐོག་མར་བྱ་བ་སྟོན་ཏེ། གསོ་སྦྱོང་ལ་སོགས་པའི་དང་པོ་སྟེ། ཐོག་མར་མཆོད་རྟེན་གྱི་ཉེ་འཁོར་སྐུ་གདུང་གི་ཉེ་འཁོར་དད་པས་ཅི་ནུས་ཕྱགས་པ་དང༌། སྐྱང་ནུ་ལ་བྱས་ནས་སོ། །བདུག་པ་མེ་ཏོག་རྣམས་ཀྱིས་གཏོར་བར་བྱ། །ཞེས་བྱ་བ་ལ་མེ་ཏོག་རྣམས་ཀྱིས་གཏོར་ཞིང་གཅལ་དུ་བཀྲམ་པ་བྱས་ནས་སོ། །དེ་ལྟར་བྱས་པའི་འོག་ཏུ་བདག་ཉིད་ཀྱིས་བདག་ཉིད་ཀྱི་རྒྱུད་ལ་བསམས་ཤིང་བདག་ལ་ཉེས་པ་བྱུང་བར་གྱུར་ཏམ་ཞེས་སོ་སོར་རྟོག་པར་འདོད་
པས་རྒྱུད་ལ་དཔྱད་པར་བྱའོ་དེ་ནས་ཕྱིས་སྡོམ་ཅན་གྱི་མདུན་དུ་ཉེས་པ་དེ་ཉེས་བྱས་སོ་སོར་བཤགས་པར་བྱའོ། །སོ་སོར་བཤགས་པར་བྱ་ཞེས་བྱ་བ་འདིས་འདི་སྐད་དུ་ཐོག་མར་བསྒྲགས་ནས་ཕྱིས་སྤྱིར་བདག་གིས་ཇི་སྐད་དུ་བརྗོད་པ་ཞེས་བཤགས་པར་མི་བྱའི། འོན་ཀྱང་སྔགས་ཀྱིས་ཀྱང་ཉེས་པ་སོ་སོར་བརྗོད་པར་བྱ་བ་ཡིན་ནོ། །རྣམ་པ་གཞན་དུ་ན་བཤགས་པ་མ་བྱས་པར་འགྱུར་ཏེ་བསྒྲགས་པ་ཉིད་ཀྱི་ཕྱིར་རོ་ཞེས་བསྟན་པར་འགྱུར་རོ། །ཉེས་པ་བཤགས་པ་དང་གསོ་སྦྱོང་བྱིན་གྱིས་བརླབས་པ་དང༌། དགག་དབྱེ་དགེ་ཚུལ་གྱིས་དགེ་སློང་གི་མདུན་དུ་ཞེས་ཁོང་དུ་ཆུད་པར་བྱའོ། །ད་ནི། ཉི་མ་ལྔ་ལས་ལྷག་པར་གནས་མེད་དང༌། །ཞེས་སྔར་བསྟན་པའི་གནས་དེའི་རང་གི་ངོ་བོར་བསྟན་པའི་ཕྱིར། ཚུལ་ཁྲིམས་ལྡན་ཞིང་འདུལ་ལ་མཁས་པ་དང༌། །ཞེས་བྱ་བ་ལ་སོགས་པ་སྨོས་ཏེ། ཚུལ་ཁྲིམས་ནི་འཆལ་བའི་ཚུལ་ཁྲིམས་ཀྱི་སྐབས་མ་ཡིན་པའི་ཕྱིར་སྲོག་གཅོད་པ་ལ་སོགས་པ་ལས་སླར་ལྡོག་པའི་མཚན་ཉིད་འདུལ་བ་ལས་གསུངས་པ་དང༌། གཞན་དགེ་བར་སྤྱོད་པ་དང༌། དྲང་པོའི་རང་བཞིན་ཅན་དང༌། གཉེན་པ་ཉིད་དང༌། ཕན་པར་འདོད་པ་ཉིད་དང༌། ཕན་པ་སྤྱོད་པ་ཉིད་ཅེས་བྱ་བ་དེ་ལྟ་བུ་ལ་སོགས་པ་གང་གིས་དགེ་བའི་ངང་ཚུལ་ཅན་ཡིན་ནོ་ཞེས་འཇིག་རྟེན་པ་དག་སེམས་ཏེ། དེ་དང་ལྡན་ཞིང་ཡང་དག་པར་འབྱོར་པ་ནི་ཚུལ་ཁྲིམས་དང་ལྡན་པ་ཞེས་བྱའོ། །གང་གི་ཕྱིར་དེ་ལྟ་བུར་གྱུར་པ་ཁོ་ནས་སེམས་ཅན་སྡུད་པར་ནུས་ཀྱི་གཞན་གྱིས་ནི་མ་ཡིན་ཏེ། ལྡོག་པའི་རང་བཞིན་ཉིད་ཡིན་པའི་ཕྱིར་རོ། །དེ་ཉིད་ཀྱི་ཕྱིར་སློབ་དཔོན་ཡོན་ཏན་འོད་ཀྱིས་ཚུལ་ཁྲིམས་དང་ལྡན་པ་མང་དུ་ཐོས་པ་དང་སྦྱར་བ་ཞེས་བསྟན་པ་ཡིན་ནོ། །འདུལ་བ་ལ་མཁས་པ་ནི་ལྟུང་བ་དང་ལྟུང་བ་མ་ཡིན་པའི་རྣམ་པ་ཤེས་པའི་ཕྱིར་མཁས་པའོ། །ནད་པ་དག་དང་གནས་པ་དག་ལ་སྨན་དང་ནད་གཡོག་བྱེད་པ་ལ་སོགས་པས་སྙིང་བརྩེ་བ་ནི་ནད་པ་ལ་སྙིང་བརྩེ་བའོ། །འཁོར་དག་དང་ཞེས་བྱ་བ་ལ་འཁོར་ནི་སློབ་མ་དང་ཉེ་གནས་ཡིན་ཏེ། དེ་དག་གལ་ཏེ་ཚུལ་ཁྲིམས་དང༌། ལྟ་བ་དང༌། སྤྱོད་པ་དང༌། འཚོ་བ་ལ་སོགས་པས་ཡོངས་སུ་དག་པར་འགྱུར་བ་དེ་ལྟ་བུ་དེས་ནི་གནས་ཀྱི་འཁོར་དག་པ་ཡིན་པར་འགྱུར་རོ། །ཆོས་དང་ཟང་ཟིང་
ཕན་འདོགས་དེ་མཆོག་བྱེད། །ཅེས་བྱ་བ་ལ་ཆོས་ནི་དམ་པའི་ཆོས་ཀློག་པ་ལ་སོགས་པ་ཡིན་ལ། ཟང་ཟིང་ནི་ལྷུང་བཟེད་དང་ཆོས་གོས་ལ་སོགས་པ་ཡིན་པས་ན་དེ་གཉིས་ཀྱིས་རྗེས་སུ་ཕན་འདོགས་པ་སྟེ་ཡང་དག་པར་སྦྱིན་པ་དག་གིས་དེ་དག་ལ་ཕན་འདོགས་པ་ལ་གཞོལ་བས་ན། ཆོས་དང་ཟང་ཟིང་ཕན་འདོགས་དེ་མཆོག་ཅེས་བརྗོད་དོ། །དུས་སུ་སྟོན་པ་ཞེས་བྱ་བ་གང་ཞིག་གང་གདམས་པའི་དུས་དང༌། རྗེས་སུ་སྟོན་པའི་དུས་དེ་ནི་དེ་ལ་དུས་སུ་སྟོན་པ་ཡིན་པའི་ཕྱིར་དེ་སྐད་ཅེས་བྱའོ། །དཔེར་ན་གདམས་པར་འོས་པའི་ཉེ་གནས་དག་ལ་དུས་ཏེ་གནས་སྐབས་དབེན་པར་རྗེས་སུ་བསྟན་པར་བྱ་བ་ཡིན་གྱི་རྣམ་པ་གཞན་དུ་ན་སྐྱོན་མེད་པ་ལ་རྒྱབ་ཀྱིས་ཕྱོགས་པ་སྐྱེ་བར་འགྱུར་བ་དང༌། ཕ་རོལ་པོ་དང་ཐག་ཉེ་བར་གྱུར་པས་སྟོན་པར་འགྱུར་ཏེ། ངོ་ཚ་བ་དང་བྲལ་བར་གྱུར་པའི་ཕྱིར་རོ། །དེའི་སྒྲ་ནི་དེ་ལྟར་ནའི་དོན་ཡིན་ཏེ་དེ་ལྟར་བཤད་མ་ཐག་པའི་ཡོན་ཏན་དང་ལྡན་པའི་བླ་མ་དེ་ནི་སེམས་ཅན་སྡུད་པ་ལ་བསྔགས་པ་ཡིན་ནོ། །གང་གི་ཕྱིར་དེ་ལྟ་བུ་ཡིན་པ་དེའི་ཕྱིར་དེ་ལྟ་བུར་གྱུར་པའི་ཐད་ལས་གནས་གཟུང་བར་བྱའོ། །དང་ནི་རིམ་པ་གཞན་དང་སྡུད་པའི་དོན་ཏོ། །དེ་ལྟར་ཡང་གནས་གཟུང་བ་ནི་རྐང་པ་གཉིས་ལ་ཕྱག་བྱ་ཞིང་ཕྱག་བྱས་ནས་བྱིན་པ་གཉིས་དང༌། རྐང་པ་གཉིས་ཀྱི་མཐིལ་བཅངས་ནས་འདི་སྐད་དུ། བཙུན་པ་དགོངས་སུ་གསོལ། བདག་དགེ་ཚུལ་མིང་འདི་ཞེས་བགྱི་བ་བཙུན་པ་ལ་གནས་པར་གསོལ་ན། བཙུན་པས་བདག་ལ་གནས་སྩལ་དུ་གསོལ། བདག་བཙུན་པའི་ཐ་ན་གནས་པར་བགྱིའོ་ཞེས་བརྗོད་པ་ན་གནས་ཀྱིས་ཐབས་ཡིན་ནོ་ཞེས་བརྗོད་པར་བྱ་ཞིང༌། བདག་ཉིད་ཀྱིས་ལེགས་སོ་ཞེས་བརྗོད་པར་བྱའོ། །ད་ནི། སློབ་དཔོན་ལ་ནི་དད་ཅིང་ཚུལ་ཁྲིམས་གཙང༌། །ཞེས་བྱ་བ་ལ་སོགས་པས་གནས་པའི་མཚན་ཉིད་སྟོན་ཏེ། སློབ་དཔོན་ལ་དད་པ་ནི་སློབ་དཔོན་ལ་དད་པ་སྟེ། འདི་སྐད་དུ་སློབ་དཔོན་ལ་མཉན་པ་དང་གུས་པ་དག་གིས་སྟེན་པར་བྱེད་ཅེས་བསྟན་པར་འགྱུར་རོ། །ཚུལ་ཁྲིམས་གཙང་ཞེས་བྱ་བ་ནི་ཚུལ་ཁྲིམས་ཡོངས་སུ་དག་པ་གང་ལ་ཡོད་པ་ཞེས་བྱ་བའི་དབང་དུ་མཛད་ནས་བསླབ་པ་འདོད་ཅེས་བྱ་བའི་ཐ་ཚིག་གོ །བསམ་གཏན་དང་ནི་ཀློག་ལ་རྟག་ཏུ་བརྩོན། །ཞེས་བྱ་བ་ནི་བསྒོམ་པ་དང་དམ་པའི་ཆོས་ཀློག་པ་ལ་རྟག་ཏུ་བརྩོན་པ་སྟེ་ལེ་ལོས་
གནོད་པར་མ་གྱུར་ཅིག་ཅེས་བྱ་བའི་ཐ་ཚིག་གོ །ཀློག་པ་སྨོས་པ་ནི་མཉེན་པ་ལ་སོགས་པའི་ཉེ་བར་མཚོན་པར་བྱེད་པའོ། །དང་ནི་སྡུད་པའི་དོན་ཏོ། །སྒྲིན་ཞིང་དུལ་ལ་དེས་དང་ལྡན་པ་ནི། །ཞེས་བྱ་བ་ལ་སྒྲིན་པ་ནི་གནས་འཆའ་བར་བྱེད་པ་ལ་ལེ་ལོའི་རྣམ་པ་དང་མི་ལྡན་པ་ཡིན་ཏེ། གཞན་ཀློག་པ་ལ་སོགས་ལ་རྟག་ཏུ་བརྩོན། །ཞེས་བྱ་བ་སྨྲས་པའི་ཕྱིར་རོ། །ལུས་དང་ངག་གི་བྱ་བ་ལ་ཁྱད་པར་དུ་འདུལ་ཞིང་ཐུལ་བས་ན། དེ་དུལ་བ་སྟེ་རྒོད་པ་སྤངས་པ་དང་བྲལ་བ་ཞེས་བྱ་བའི་བར་དུའོ། །དེས་པ་སྟེ་བཟོད་པ་དང་ལྡན་ཞིང་འབྱོར་བ་དེ་ལྟ་བུར་གྱུར་པའི་སྡོམ་ཅན་གནས་འཆའི་ཆོས་དང་ལྡན་པར་ཤེས་པར་བྱའོ། །འདི་སྐད་དུ་དེ་ལྟ་བུར་གྱུར་པའི་གནས་པ་ཞེས་བསྟན་པར་འགྱུར་རོ། །དགག་དབྱེ་བཤད་པས་འདིར་ཡང་གསོ་སྦྱོང་ཡོད། །ཅེས་སྔར་སྨོས་པས་དབྱར་ཚུལ་དུ་ཞུགས་པ་ལ་དགག་དབྱེ་ཡོད་པའི་ཕྱིར། དབྱར་ཡང་ཚུལ་དུ་འཇུག་པར་བྱ་བ་སྟེ། །ཞེས་བྱ་བས་དེ་སྟོན་པ་ལ། དབྱར་ཏེ་དབྱར་གྱི་དུས་སུ་དབྱར་གནས་པར་ཁས་ལེན་པར་བྱེད་པ་ནི་དབྱར་ཚུལ་དུ་འཇུག་པ་སྟེ། ཁས་ལེན་པ་དམ་བཅའ་བའི་སྔགས་ཀྱིས་འདིར་གནས་པར་བགྱིའོ་ཞེས་ཚུལ་དུ་འཇུག་པ་དགེ་ཚུལ་གྱིས་རབ་ཏུ་བྱ་བ་ཡིན་ནོ། །དེ་ལ་དབྱར་ཚུལ་དུ་འཇུག་པ་ཞེས་བྱ་བ་འདིར། དབྱར་གྱི་སྒྲས་དབྱར་ཟླ་འབྲིང་པོའི་དང་པོའི་ཞག་གམ་དེ་མ་ཐག་པའི་ཟླ་བའི་ཞག་ལ་བྱ་སྟེ། དེ་ལ་སོགས་པ་དབྱར་གྱི་དུས་རྣམ་པར་གཞག་པ་ཡིན་པའི་ཕྱིར་རོ། །ཇི་ལྟར་ཁས་བླང་བར་བྱ་ཞེ་ན། གྲོང་ལ་སོགས་པའི་མིང་བརྗོད་རིམ་པ་བཞིན། །ཞེས་བྱ་བ་སྨོས་པ་ཡིན་ཏེ། གྲོང་དང༌། སྦྱིན་བདག་དང༌། ཞལ་ཏ་བ་དང༌། ནད་གཡོག་དག་གི་མིང་སྨོས་པའི་རིམ་པ་བཞིན་དུ་ཚུལ་དུ་འཇུག་པར་བྱ་བ་ཞེས་བྱ་བའི་ཐ་ཚིག་གོ །དེ་ལ་འདི་ལྟར་ཁས་བླང་བར་བྱ་སྟེ། དབྱར་ཟླ་ར་བའི་དེ་མ་ཐག་པ་དབྱར་ཟླ་འབྲིང་པོའི་ཉིན་ཞག་དང་པོའི་མཚན་མོ་དགེ་སློང་གི་མདུན་དུ། བཙུན་པ་དགོངས་སུ་གསོལ། དེང་དགེ་འདུན་གྱི་དབྱར་ཉེ་བར་བསྒྲུབ་པའི་དབྱར་ཟླ་འབྲིང་པོའི་ཚེས་བཅུ་དྲུག་ལགས་ལ། བདག་དགེ་ཚུལ་མིང་འདི་ཞེས་བགྱི་བའི་ཡང་དབྱར་ཉེ་བར་བསྒྲུབ་པའི་དབྱར་ཟླ་འབྲིང་པོའི་ཚེས་བཅུ་དྲུག་ལགས་ཏེ། བདག་དགེ་ཚུལ་མིང་འདི་ཞེས་བགྱི་བ་གནས་འདིར་འདི་ལྟ་སྟེ་གནས་རལ་བ་དང༌། འདྲུམས་པ་བཅོས་པའི་
སླད་དུ་སྦྱིན་བདག་མིང་འདི་ཞེས་བགྱི་བ་དང༌། ཞལ་ཏེ་བ་ཆེ་གེ་མོ་ཞིག་ཅེས་བགྱི་བ་དང༌། སྤྱོད་ཡུལ་གྱི་གྲོང་ཆེ་གེ་མོ་ཞེས་བགྱི་བ་དང༌། ནད་གཡོག་ཆེ་གེ་མོ་ཞེས་བགྱི་བས་དབྱར་སྔ་མ་ཟླ་བ་གསུམ་གནས་པར་ཁས་བླང་ངོ༌། །བདག་དབྱར་འདི་ན་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ། ཅིག་ཤོས་ཀྱིས་ཐབས་ཡིན་ནོ། །ཞེས་བརྗོད་པར་བྱ་ཞིང་བདག་ཉིད་ཀྱིས་ལེགས་སོ་ཞེས་བརྗོད་པར་བྱ་བ་ཡིན་ཏེ། དེ་ལྟ་བུའི་སྔགས་ཀྱིས་ཁས་བླང་བར་བྱའོ། །དབྱར་གྱི་ནང་དུ་གཞན་དུ་འགྲོ་དགོས་པའི་རྐྱེན་བྱུང་ན་ཇི་ལྟར་བྱ་ཞེ་ན། ཇི་སྟེ་དེ་ནི་གཞན་དུ་འགྲོ་འདོད་ན། །ཞེས་བྱ་བ་ལ་སོགས་པ་སྨོས་ཏེ། གལ་ཏེ་དབྱར་ཚུལ་དུ་ཞུགས་པའི་གནས་ལས་དེ་གཞན་དུ་འགྲོ་བར་བྱེད་པ་དེའི་ཚེ་དགེ་སློང་མདུན་དུ་ཉི་མ་བདུན་སྔགས་ཀྱིས་བྱིན་གྱིས་བརླབས་ཏེ་འགྲོ་བ་ལ་ཉེས་པ་ཡོད་པ་མ་ཡིན་ནོ་ཞེས་བྱ་བའི་ཐ་ཚིག་གོ །ཉི་མ་བདུན་སྨོས་པ་ནི་ཆེས་མཆོག་ཏུ་བྱ་བ་ཡིན་ཏེ། ཉི་མ་གཅིག་ལ་ཡང་བྱིན་གྱིས་བརླབ་པ་འདུལ་བ་ལས་གསུངས་པའི་ཕྱིར་རོ། །འདི་ལྟར་བྱིན་གྱིས་བརླབ་པར་བྱ་སྟེ། བཙུན་པ་དགོངས་སུ་གསོལ། བདག་དགེ་ཚུལ་མིང་འདི་ཞེས་བགྱི་བ་ནང་མཚམས་དང་བཅས་པའི་གནས་འདིར་དབྱར་སྔ་མ་ཟླ་བ་གསུམ་གནས་པར་ཁས་བླངས་པ་ལས། བདག་མིང་འདི་ཞེས་བགྱི་བ་ཆོས་དང་ལྡན་པའི་དགེ་འདུན་གྱི་བྱ་བ་ཞིག་གི་སླད་དུ་དགུང་བདུན་མཚམས་ཀྱི་སླད་རོལ་དུ་མཆི་བ་དང༌། དེ་ཚུན་ཆད་ཀྱིས་སླར་མཆི་བར་བཙུན་པའི་སྤྱན་སྔར་བྱིན་གྱིས་བརླབ་བོ། །བདག་འདི་ན་མཆིས་ཤིང་བདག་གི་དབྱར་གྱི་གནས་འདི་ལགས་སོ་ཞེས་བརྗོད་པར་བྱའོ། །ཚུལ་ཁྲིམས་ཉམས་པ་ངལ་སོར་གཞུག་མི་བྱ། །ཞེས་བྱ་བ་ནི་ཚུལ་ཁྲིམས་ཉམས་ཤིང་ཞིག་པ་གང་ཡིན་པ་ནི་ཚུལ་ཁྲིམས་ཉམས་པ་སྟེ། མཐའི་ཉེས་པ་བྱུང་བ་གང་ཡིན་པ་དེ་གལ་ཏེ་ཤེས་པའམ་དོགས་པའམ་ཡིད་ཆེས་པ་ལས་ཐོས་པ་དེ་ལྟ་བུར་གྱུར་པ་དེ་ངལ་སོར་གཞུག་པར་མི་བྱ་སྟེ། ལུས་དུབ་ཅིང་ཉམ་ཆུང་བར་གྱུར་པ་ངལ་སོ་བར་བྱེད་པའོ། །དེ་ནི་ཐ་ན་སོ་ཤིང་བསྟབ་པ་ཙམ་གྱི་བསྙེན་བཀུར་དུ་བྱ་བ་ཐམས་ཅད་ཀྱི་ཉེ་བར་མཚོན་པར་བྱེད་པའོ། །དེ་དང་གནས་དང་ལོངས་སྤྱོད་བྱ་བ་མིན། །ཞེས་བྱ་བ་ཚུལ་ཁྲིམས་འཆལ་བ་དེ་དང༌། ལྷན་ཅིག་གནས་གཅིག་ཏུ་གནས་པ་ཐ་ན་ནུབ་གཅིག་དག་ཀྱང་ངོ༌། །ལོངས་སྤྱོད་ནི་རྣམ་པ་གཉིས་ཏེ། ཟང་ཟིང་གི་ལོངས་སྤྱོད་དང༌། ཆོས་ཀྱི་
ལོངས་སྤྱོད་དོ། །དེ་ལ་ཟང་ཟིང་གི་ལོངས་སྤྱོད་ནི་གཅིག་ཏུ་དགའ་བས་གནས་པ་དང༌། བཟའ་བ་འམ་བཏུང་བ་ཀུན་དུ་ལོངས་སྤྱོད་པ་དང༌། དེ་ལ་བྱིན་པའམ་དེ་ལས་ལེན་པ་དེ་དག་ཐམས་ཅད་ཡིན་པར་ཁོང་དུ་ཆུད་པར་བྱའོ། །ཆོས་ཀྱི་ལོངས་སྤྱོད་ནི་དེ་ལས་དམ་པའི་ཆོས་ཀྱི་གདམས་ངག་མནོད་པ་དང་འཛིན་པ་ལ་སོགས་པ་དང༌། གསོ་སྦྱོང་ལ་སོགས་པ་ཉམས་སུ་མྱོང་བ་ཡིན་ཏེ། དེ་ཉིད་ཀྱི་ཕྱིར་དེ་ལྟ་བུར་གྱུར་པ་གང་ཡིན་པ་དེ་དང་ལྷན་ཅིག་གནས་པ་དང་ལོངས་སྤྱད་པར་མི་བྱའོ་ཞེས་བྱ་བའི་ཐ་ཚིག་གོ །ཤིན་ཏུ་ཐལ་བར་འགྱུར་བའི་དམིགས་ཀྱིས་བསལ་བ་ནི། ཕམ་དང་ནི་བླ་མ་ནད་པ་རྣམས། །ཞེས་བྱ་བ་ལ་སོགས་པ་སྨོས་ཏེ། ཕ་དང་མ་ནི་ཕ་མའོ། །དེ་དག་དང་བླ་མ་སྟེ་སློབ་དཔོན་དང༌། མཁན་པོ་དག་དང་ནད་པ་རྣམས། །ཞེས་བྱ་བའི་ནད་པ་དག་ཚུལ་ཁྲིམས་ཉམས་པ་སྟེ། ཚུལ་ཁྲིམས་དང་བྲལ་བར་གྱུར་ཀྱང་བསྙེན་བཀུར་བྱ་བ་ཡིན་ཏེ། ཕན་འདོགས་པའི་ཞིང་ཉིད་ཡིན་པའི་ཕྱིར་དང༌། སྙིང་རྗེའི་ཞིང་ཉིད་ཡིན་པའི་ཕྱིར་དེ་དག་ནི་ཚུལ་ཁྲིམས་རྗེས་སུ་བརྟག་པར་བྱ་བ་མ་ཡིན་ནོ། །ཡང་ནའི་སྒྲ་ནི་ངག་ཉེ་བར་བཀོད་པ་ཡིན་ལ་དང་ནི་སྡུད་པའི་དོན་ཏོ། །འཐབ་ཀྲོལ་བྱེད་པ་དག་ཇི་ལྟར་བྱ་ཞེ་ན། འཐབ་ཀྲོལ་ཅན་དང་ཁྱིམ་སུན་འབྱིན་པ་དང༌། །ཞེས་བྱ་བ་ལ་སོགས་པས་སྟོན་ཏེ། འཐབ་ཀྲོལ་ཅན་ཏེ་རྩོད་པ་བྱེད་པ་དག་ལ། གལ་ཏེ་བཟློག་ཏུ་ཟིན་ཀྱང་རྩོད་པ་མི་གཏོང་བ་དེའི་ཚེ་བསྐྲད་པར་བྱ་བ་ཡིན་ནོ། །ཁྱིམ་སྟེ་བྲམ་ཟེ་དང་ཁྱིམ་བདག་དག་ཆང་བཏུང་བ་ལ་སོགས་པ་མ་དད་པའི་དངོས་པོ་ཀུན་དུ་སྤྱོད་པས་སུན་འབྱིན་པར་བྱེད། མ་དད་པར་བྱེད་པ་གང་ཡིན་པ་དེ་ཡང་བསྐྲད་པར་བྱའོ། །དེ་དག་འབའ་ཞིག་བསྐྲད་པར་བྱ་བར་མ་ཟད་ཀྱི་གསུམ་པ་ཡང་བསྐྲད་པར་བྱ་བ་ཡིན་ནོ། །དེ་གང་ཞེ་ན། འདིར་ཚུལ་ཁྲིམས་ཉམས་པ་ཞེས་བྱ་བ་སྨོས་ཏེ། འདིར་ཞེས་བྱ་བ་ནི་ཆོས་འདུལ་བ་འདིར་རོ། །ཚུལ་ཁྲིམས་ཉམས་ཤིང་ཚུལ་ཁྲིམས་འཆལ་པར་གྱུར་པ་དེ་ཡང་བསྐྲད་པར་བྱའོ། །ཅི་ཞིག་བྱས་ནས་ཤེ་ན། གཎྜཱི་བརྡུངས་ནས་ཞེས་བྱ་བ་སྨོས་ཏེ། གཎྜཱི་བརྡུངས་ཤིང་དགེ་འདུན་གྱི་ཚོགས་ནས་རྣམ་པར་དཔྱད་དེ་བསྐྲད་པར་བྱ་བ་ཡིན་གྱི་དེ་ལྟ་དེ་ལྟར་ནི་བསྐྲད་པར་བྱ་བ་མ་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །
ཇི་ལྟར་བྱས་ནས་བསྐྲད་པར་བྱ་བ་ཡིན་ཞེ་ན། རུལ་བའི་རོ་བཞིན་དུ་ནི་ཞེས་བྱ་བ་སྨོས་ཏེ། རོ་དང་རུལ་པ་ཞེས་བྱ་བ་ནི་རུལ་བའི་རོ་སྟེ་རྣམ་པ་དེ་ལྟ་བུར་རོ། །དེ་བཞིན་དུ་ནི་རྣམ་པ་འདི་ལྟར་ཞེས་རྟོག་པའི་ཕྱིར་ཏེ། འདི་ལྟར་ཤི་བའི་རོ་རུལ་པར་གྱུར་པ་དང་ལྷན་ཅིག་གནས་པར་མི་ནུས་ཏེ་སྐྱོ་བར་བྱེད་པ་ཉིད་ཡིན་པའི་ཕྱིར་རོ། །དེ་བས་ན་དེ་བཞིན་དུ་དེ་དག་ཀྱང་རུལ་བའི་རོ་བཞིན་དུ་བྱའོ། །གཎྜཱི་བརྡུང་བ་ནི་དགེ་འདུན་བསྡུ་བའི་དོན་ཡིན་གྱི། བསྐྲད་པའི་ཕྱིར་ནི་མ་ཡིན་ཏེ། དེའི་དོན་དུ་གཎྜཱི་བརྡུང་བ་མ་གསུངས་པའི་ཕྱིར་རོ། །ཅི་འཐབ་རྩོད་བྱས་ནས་སམ་ཞེ་ན། འཐབ་རྩོད་མེད་པར་ཞེས་བྱ་བ་སྨོས་ཏེ། རྩོད་པ་མ་བྱས་པ་ཁོ་ནར་ཏེ་ལུས་ཀྱི་འཐབ་རྩོད་ལ་སོགས་པ་དེའི་དོན་དུ་མ་བྱེས་པར་ཞེས་བྱ་བའི་ཐ་ཚིག་གོ །བསྐྲད་པར་བྱ་བ་དེ་དག་གི་རྟེན་དུ་གྱུར་པ་དེ་དག་ཇི་ལྟར་བྱ་ཞེ་ན། མདོ་འཛིན་གཞན་ཡང་རྟེན་གྱུར་གང་ཡིན་པ། །ཞེས་བྱ་བ་ལ་སོགས་པ་སྨོས་ཏེ། མདོ་སྡེ་འཛིན་པ་དང་དེ་བཞིན་དུ་གཞན་ཡང་འདུལ་བ་འཛིན་པ་དང༌། མ་མོ་འཛིན་པ་དང༌། མང་དུ་ཐོས་པ་རྟེན་དུ་གྱུར་པ་དེ་དག་ཀྱང་བསྐྲད་པར་བྱའོ། །ཇི་ལྟར་ཞེ་ན། ཆོ་ག་བཞིན་དུ་བརྟགས་ཏེ་ཞེས་བྱ་བ་སྨོས་ཏེ། འདུལ་བའི་ཆོ་ག་བཞིན་དུ་དཔྱད་ནས་ཞེས་བྱ་བའི་ཐ་ཚིག་གོ ། དང་ནི་སྡུད་པའི་དོན་ཏོ། །གང་གི་ཚེ་རྟེན་བྱེད་པ་བཏང་བར་གྱུར་པ་དེའི་ཚེ་རྟེན་བྱེད་པ་གྲོལ་བར་གྱུར་པ་ཡིན་པས་ཡང་གཞག་པར་བྱའོ། །གལ་ཏེ་མ་བཅུག་ན་དེའི་ཚེ་གདོན་མི་ཟ་བར་ཉེས་པར་འགྱུར་ཏེ། འདི་སྐད་དུ་གལ་ཏེ་བཟོད་པ་བྱ་བར་འོས་པ་དང༌། རྒྱུ་མཚན་བཏང་བ་དག་འཇུག་ཏུ་མ་བཅུག་གམ། བཟོད་པ་མ་བྱས་པ་དེའི་ཚེ་གདོན་མི་ཟ་བར་བཟོད་པ་མ་བྱས་པ་ལས་ཉེས་པ་ཁོ་ནར་འགྱུར་རོ་ཞེས་བསྟན་པར་འགྱུར་རོ། །གྲངས་ཅན་ལ་སོགས་བློ་དམན་གང་ཀློག་པ། །དེ་ལ་ཁ་ཟས་ཙམ་ཡང་དུག་ཏུ་འགྱུར། །ཞེས་བྱ་བ་ལ་གྲངས་ཅན་ལ་སོགས་པའི་ཕྱི་རོལ་གྱི་བསྟན་བཅོས་བློ་དམན་པ་གང་ཞིག་ཀློག་པར་བྱེད་ན་དགེ་ཚུལ་དེ་ལ། གྲོང་ངམ་དགེ་འདུན་གྱི་ཁ་ཟས་ཟ་བ་དུག་ཉིད་དུ་འགྱུར་ཏེ་དེ་ལྟ་བུ་ལ་མངོན་པར་སྤྱོད་པ་དེ་དག་ལ་གནང་བ་མེད་དོ་ཞེས་བྱ་བའི་ཐ་ཚིག་གོ །དེ་ལྟར་ན་ཕྱི་རོལ་གྱི་བསྟན་བཅོས་རུང་བ་མ་ཡིན་པ་འདོན་པར་བྱེད་པ་དེ་
ཐམས་ཅད་ཀྱི་ཐམས་ཅད་དུ་བཀག་པ་ཡིན་ནོ། རུང་བ་དག་ཀྱང་ཇི་ལྟར་གདོན་པར་བྱ་ཞེ་ན། སྟོན་པའི་གཞུང་ལ་ཉིན་མཚན་ཆ་གཉིས་དག །གོམས་བྱ་གཞན་གྱིས་དང་བ་མིན་པ་བཀླག །ཅེས་བྱ་བ་ལ། སྟོན་པ་བཅོམ་ལྡན་འདས་ཀྱི་གཞུང་སྟེ་བཀའ་གང་ཡིན་པ་དེ་ལ་ཉིན་མཚན་གྱི་ཆ་གཉིས་མངོན་པར་སྦྱོར་བར་བྱ་ཞིང་བློ་དམན་པ་མ་ཡིན་པ་གཞན་བློ་རྣོན་པོ་དག་གིས་ཆ་གསུམ་པ་ལ་ཕྱི་རོལ་གྱི་བསྟན་བཅོས་དམ་པ་བཀླག་པར་བྱའོ་ཞེས་བྱ་བ་ནི་ཚིག་གི་ལྷག་མའོ། །དམ་པ་སྨོས་པ་ནི་ཉན་པ་ལ་སོགས་པ་ཉེ་བར་མཚོན་པ་ཡིན་ནོ། །བཅོམ་ལྡན་འདས་དང་རྒན་རིམས་ལ་སོགས་པའི་མཚན་ཇི་ལྟར་གཟུང་བར་བྱ་བ་ཡིན་ཞེ་ན། ཡོན་ཏན་སྔར་སྨོས་སྟོན་པའི་མཚན་བརྗོད་བྱ། །ཞེས་བྱ་བ་ལ། འདི་ལྟར་སྟོན་པ་བཅོམ་ལྡན་འདས་ཤཱཀྱ་ཐུབ་པ་གཞོན་ནུ་དོན་གྲུབ་ཅེས་བྱ་བ་ལ་སོགས་པས་མཚན་བརྗོད་ཅིང་སྨྲ་བར་བྱའོ། །ཇི་ལྟ་ཞེ་ན། ཡོན་ཏན་སྔར་སྨོས་ཞེས་སྨོས་པ་ཡིན་ཏེ། ཡོན་ཏན་སྨོས་པ་ནི་ཡོན་ཏན་དག་བརྗོད་པའོ། །དེ་སྔར་ཏེ་ཐོག་མར་གྱུར་པ་གང་ཡིན་པ་ཞེས་བྱ་བའི་དབང་དུ་བྱས་ནས་ཡོན་ཏན་བརྗོད་པ་ནི། དཔེར་ན་སངས་རྒྱས་བཅོམ་ལྡན་འདས་ཐམས་ཅད་མཁྱེན་པ་ཞེས་བྱ་བ་དེ་ལྟ་བུ་ལ་སོགས་པའི་ཡོན་ཏན་བརྗོད་པ་སྔོན་དུ་སོང་བ་ཅན་གྱིས་བཅོམ་ལྡན་འདས་ཀྱི་མཚན་བརྗོད་པར་བྱའོ་ཞེས་བྱ་བ་ནི་ཚིག་གི་ལྷག་མའོ། །དེ་ཉིད་ཀྱི་ཕྱིར་དེ་བཞིན་གཤེགས་པའི་མཚན་རིགས་ཀྱི་སྒོ་ནས་བརྗོད་པར་མི་བྱའི། འོན་ཀྱང་ཡོན་ཏན་བརྗོད་པ་སྔོན་དུ་སོང་བ་ཅན་གྱི་ཞེས་བྱ་བ་ལ་སོགས་པ་གསུངས་པ་ཡིན་ནོ། །བླ་མ་སློབ་དཔོན་མིང་ཚིག་བརྗོད་མི་བྱ། །སློབ་དཔོན་གྱི་མིང་སློབ་དཔོན་གྱི་ཚིག་མ་སྨོས་པར་བརྗོད་པར་མི་བྱའོ་ཞེས་བྱ་བའི་ཐ་ཚིག་གོ །བཏུད་དེ་དོན་ལ་སོགས་པའི་ཚིག་ལྡན་པས། །མཁན་པོར་གྱུར་པའི་མིང་ནས་བརྗོད་པར་བྱ། །ཞེས་བྱ་བ་ནི་དོན་གྱི་སླད་དུ་མཚན་ནས་སྨོས་ཏེ་ཞེས་བྱ་བའི་ཚིག་དང་བཅས་པས་མཁན་པོར་གྱུར་པའི་མིང་བཏུད་དེ་གུས་པ་དང་བཅས་པས་བརྗོད་པར་བྱ་སྟེ། དེ་དག་སྔོན་དུ་སོང་བ་ཞེས་བྱ་བའི་ཐ་ཚིག་གོ །རྒན་ལ་བཙུན་པའི་ཉེ་བའི་ཚིག་གིས་བརྗོད། །ཅེས་བྱ་བ་ལ་རྒན་པོ་ལ་བཙུན་པ་ཇི་ལྟར་ཞེས་བྱ་བའི་ཉེ་བའི་ཚིག་འདིས་བརྗོད་པར་བྱའོ། །འདི་
སྐད་དུ་བཙུན་པའི་ཉེ་བའི་ཚིག་གི་སྔོན་དུ་རྒན་པོའི་མིང་གཟུང་བར་བྱའོ་ཞེས་བསྟན་པར་འགྱུར་རོ། །གཞོན་ལ་ཚེ་དང་ལྡན་པའི་ཉེ་ཚིག་བརྗོད། །ཅེས་བྱ་བ་ལ་གཞོན་པ་སྟེ་གཞན་དག་ལ་ཡང་བརྗོད་པར་བྱའོ། །ཇི་ལྟ་ཞེ་ན། ཚེ་དང་ལྡན་པའི་ཉེ་ཚིག་ཅེས་བྱ་བ་སྨོས་ཏེ། ཚེ་དང་ལྡན་པ་ཞེས་བྱ་བ་ལ་སོགས་པའི་ཉེ་བའི་ཚིག་གིས་གཞོན་པ་དག་ལ་ཡང་བརྗོད་པར་བྱའོ། །འདི་སྐད་དུ་གཞོན་པ་ལ་ཡང་ཚེ་དང་ལྡན་པའི་སྒྲ་བརྗོད་ལ་མིང་གཟུང་བར་བྱའོ་ཞེས་བྱ་བའི་དོན་ཏོ། །དེ་ལྟར་ན་འདུལ་བའི་ཐ་སྙད་འདིར་མིང་གཟུང་བའི་གོ་རིམས་ཅན་དུ་རིག་པར་བྱའོ་ཞེས་བྱ་བ་ནི་ཚིག་གི་ལྷག་མའོ། །དགེ་ཚུལ་གྱི་ཚིག་ལེའུར་བྱས་པ་ལས་སྡོམ་པ་ཐམས་ཅད་འཇིག་པའི་ཕྱོགས་ཞེས་བྱ་བ་སྟེ། བསླབ་པའི་གཞི་བཅུ་བཞི་པའོ།། །།དེ་ལྟར་དེ་དག་རྒྱས་པར་བསྟན་ནས་མདོར་བསྡུས་པ་ཡང་སྟོན་པར་བྱེད་དེ། གནང་དང་མི་གནང་གང་ཡིན་པ། །ཞེས་བྱ་བ་ལ་གནང་བ་མ་ཡིན་པ་སྟེ། རྗེས་སུ་གནང་བ་གང་ཡིན་པ་ཁྱེད་རྣམས་ཀྱིས་ཀྱང་བཀག་ཅིང་མི་བྱའོ་ཞེས་བྱ་བ་གང་ཡིན་པ་དེ་ལྟ་བུར་གྱུར་པ་ནི་གཟུང་བར་བྱ་བའམ་སྤང་བར་བྱ་བ་མ་ཡིན་ནོ། །ཇི་ལྟ་ཞེ་ན། དེ་ནི་གསུང་དང་མཐུན་པ་སྟེ། གསུངས་པ་དང་འདྲ་བར་བརྟགས་ནས་སོ། །འདི་སྐད་དུ་བཅོམ་ལྡན་འདས་ཀྱིས་རྗེས་སུ་གནང་བ་མ་ཡིན་བ་དང་བཀག་པ་མེད་པ་གང་ཡིན་པ་རྗེས་སུ་གནང་བ་དང་མཐུན་པ་སྟེན་པ་དེའི་ཚེ་གཟུང་བར་བྱ་ཞིང་གཞན་དུ་ན་མི་བྱའོ་ཞེས་བསྟན་པར་འགྱུར་རོ་ཞེས་བྱ་བའི་ཐ་ཚིག་གོ །དེ་ནི་ཞེས་བྱ་བའི་སྒྲ་ནི་ངག་ཉེ་བར་བཀོད་པའོ། །དཔེར་ན་བཅོམ་ལྡན་འདས་ཀྱིས་སོ་རྩི་ཟ་བ་བཅས་པ་ཡང་མ་མཛད་བཀག་པ་ཡང་མ་མཛད་པ། ཨ་རུ་ར་ལ་སོགས་པ་ལྟར་སྨན་གྱི་བློས་ཉེ་བར་ལོངས་སྤྱོད་ན་ཉེས་པར་མི་འགྱུར་ལ། འོན་ཏེ་རྒྱགས་པའི་བསམ་པས་ནི་མ་ཡིན་ན་ནི་དྲིས་བྱུགས་པ་ལ་སོགས་པ་དང་འདྲ་བར་འགྱུར་བའི་རྒྱུ་ཉིད་ཡིན་པའི་ཕྱིར་ཉེས་པར་འགྱུར་ཏེ། དེ་བཞིན་དུ་གཞན་དག་ལ་ཡང་བལྟ་བར་བྱའོ། །དེ་བཞིན་དུ་འདི་ནི་མར་མེ་དང་འདྲ་བ་ནི་མར་མེ་དང་མཐུན་པ་སྟེ། བླ་བ་དང་དཀའ་བ་ནས་གསལ་བར་བྱེད་པའི་ཕྱིར་བདེ་བར་གཤེགས་པ་བཅོམ་ལྡན་འདས་ཀྱིས་གསུངས་པ་འདུལ་བ་མདོར་བསྡུས་པ་ཞེས་བྱ་བ་གཞན་ཁྱེད་ཡིན་ནོ། །འདུལ་བ་མདོར་བསྡུས་པ་ཞེས་བྱ་བ་སྟེ་བཅོ་ལྔ་པའོ།། །།ད་ནི། དགེ་ཚུལ་བསླབ་པ་བསྡུས་ལས་བྱུང་བ་ཡི། །ཞེས་བྱ་བ་ལ་སོགས་པ་དེ་ལས་བྱུང་བའི་
དགེ་བ་ཡོངས་སུ་སྔོ་བར་བྱེད་དེ། དགེ་ཚུལ་བ་རྣམས་ཀྱི་བསླབ་པ་ནི་ཀུན་དུ་སྤྱོད་པ་ཡིན་ལ་དེ་བསྡུས་པ་ནི་སྡུད་པའོ། །འདི་ལས་བྱུང་བས་ན་བྱུང་བ་སྟེ་རྒྱུ་བསྟན་པ་ཡིན་ནོ། །དགེ་ཚུལ་གྱི་བསླབ་པ་བསྡུས་པ་ཁོ་ན་ལས་བྱུང་བའི་རྒྱུས་བསོད་ནམས་སྐྱེས་པ་གང་ཡིན་པ་དེ་དགེ་ཚུལ་བསླབ་པ་བསྡུས་ལས་བྱུང་བའི་བསོད་ནམས་གང་སྐྱེས་པའོ། །རྣམ་པ་དེ་ལྟ་བུའི་བསོད་ནམས་སྐྱེས་པ་གང་ཡིན་པ་དེས། འཇིག་རྟེན་འདི་དག་ཡང་དག་པར་རྫོགས་པའི་བྱང་ཆུབ་དཔལ་གནས་ཏེ། སངས་རྒྱས་ཀྱི་སར་དེང་བར་གྱུར་ཅིག །གང་གིས་ཤེ་ན། ཤཱཀྱ་འོད་ཀྱིས་བསྟན་པའི་ལམ་ཉིད་ནས། །ཞེས་བྱ་བ་སྨོས་ཏེ། ཤཱཀྱའི་རིགས་སུ་འཁྲུངས་པ་ཉིད་ཀྱི་ཕྱིར་བཅོམ་འདས་ནི་ཤཱཀྱའོ། །དེའི་བཀའ་ནི་རབ་ཏུ་གསལ་བའི་ཕྱིར་འོད་ཡིན་ཏེ། བླ་བ་དང་དཀའ་བ་གསལ་བར་བྱེད་པ་ཉིད་ཡིན་པའི་ཕྱིར་རོ། །བཀའ་འོད་དུ་གྱུར་པ་དེས་ཀུན་ནས་བསྟན་ཅིང་གསལ་བར་མཛད་པའི་ལམ་དེ་ནས་དོང་བར་གྱུར་ཅིག་ཅེས་བྱ་བར་སྦྱར་རོ། །ཡང་ན་ཤཱཀྱ་འོད་ཅེས་བྱ་བ་ནི་ཚིག་ལེའུར་བྱེད་པ་མཛད་པའི་སློབ་དཔོན་དེ་ཉིད་ཀྱི་མཚན་ཡིན་པས་ན་དེ་ཀུན་ནས་བསྟན་པའི་ལམ་ནས་ཏེ། ཚིག་ལེའུར་བྱེད་པའི་ལམ་ནས་སོ། །འདི་སྐད་དུ་འཇིག་རྟེན་རྣམས་སློབ་དཔོན་ཤཱཀྱ་འོད་ཀྱིས་བསྟན་པའི་ཚིག་ལེའུར་བྱས་པའི་ལམ་ནས་ཡང་དག་པར་རྫོགས་པའི་བྱང་ཆུབ་ཀྱི་གནས་སུ་དེང་བར་གྱུར་ཅིག་ཅེས་བསྟན་པར་འགྱུར་རོ། །ད་ནི། བདེ་གཤེགས་གསུངས་པ་འདུལ་བ་རྒྱ་མཚོ་ལས། །ཞེས་བྱ་བ་ལ་སོགས་པས་བདག་ཉིད་གཞན་གྱི་དབང་གིས་འཇུག་པ་སྟོན་པར་བྱེད་དེ། བདེ་བར་གཤེགས་པས་གསུངས་པའི་བསླབ་པ་ཉིད་ནི་རིན་པོ་ཆེ་ཡིན་ཏེ། བསོད་ནམས་དང་མི་ལྡན་པ་རྣམས་ཀྱིས་རྙེད་དཀའ་བ་ཉིད་ཡིན་པའི་ཕྱིར་རོ། །ཁྱད་པར་ཇི་ལྟ་བུ་ཞེ་ན། འབར་བ་སྟེ་འོད་དང་ལྡན་པ་དང་མཆོག་ཏུ་གྱུར་པ་ཞེས་བྱ་བའི་བར་དུའོ། །འདུལ་བ་ཁོ་ན་རྒྱ་མཚོ་ཡིན་ཏེ། ཤིན་ཏུ་རྒྱ་ཆེ་བ་ཉིད་དང༌། ཤིན་ཏུ་ཕྲ་བ་རྣམ་པར་སྤྱོད་པའི་ཕྱིར་དེ་ནི་གཏིང་དཔག་པར་དཀའ་བའི་ཕྱིར་རོ། །དེ་ལས་རིན་པོ་ཆེ་བཏུས་པ་ཡིན་ནོ། །གང་གིས་ཤེ་ན། དབང་པོའི་རྡོ་རྗེས་ཞེས་བྱ་བ་སྨོས་ཏེ། ཇི་ལྟར་དབང་པོའི་རྡོ་རྗེས་རིན་པོ་ཆེ་ཕུག་ནས་རྒྱན་དུ་བྱེད་པ་དེ་བཞིན་དུ། འདུལ་བ་དེ་ལས་བསླབ་པའི་ཚིག་བཏུས་ནས་དབང་པོའི་རྡོ་རྗེའི་སྡེབ་སྦྱོར་གྱིས་བསླབ་པ་རིན་པོ་ཆེ་ཕུག་ནས་ཕྲེང་བར་བརྒྱུས་ཞེས་བྱ་བའི་ཐ་ཚིག་གོ །དབང་པོའི་རྡོ་རྗེས་ཞེས་བྱ་བའི་ཚིག་འདི་ནི་ཕལ་ཆེ་བའི་དབང་དུ་
བྱས་པ་ཡིན་ཏེ། ཉེ་བའི་དབང་པོའི་རྡོ་རྗེ་ཡང་ཡོད་པའི་ཕྱིར་རོ། །དཔེར་ན། འདི་དག་བདག་པོ་ཐ་དད་ཉེས་བྱས་རྣམས། །ཞེས་བྱ་བ་ལ་སོགས་པ་ལྟ་བུའོ། །ཡང་ན་ཉེ་བའི་དབང་པོའི་རྡོ་རྗེ་ལ་ཡང་དབང་པོའི་རྡོ་རྗེའི་སྒྲ་བརྗོད་པ་ཡིན་ཏེ། ཕྱོགས་གཅིག་ཆོས་མཐུན་པ་ཉིད་ཀྱི་ཕྱིར་ཉེས་པ་མེད་དོ། །གང་གི་ལུགས་སུ་ཕྱེ་བ་ཡིན་ཞེ་ན། གཞི་ཀུན་ཡོད་པར་སྨྲ་བའི་འོ། །གང་གི་ངོར་ཕྱེ་ཞེ་ན། ཤཱཀྱའི་གྲོགས་ངོར་ངེས་པར་འདི་ཕྱེ་སྟེ། །ཞེས་བྱ་བ་སྨོས་ཏེ། ལས་དང་འབྲས་བུ་ལ་སོགས་པ་ཐམས་ཅད་ཡོད་དོ་ཞེས་སྨྲ་བ་གང་དག་ཡིན་པ་དེ་དག་ནི། ཐམས་ཅད་ཡོད་པར་སྨྲ་བ་ཡིན་ཏེ་བཅོམ་ལྡན་འདས་ཀྱིས་ཉན་ཐོས་ཀྱི་རྩ་བར་གྱུར་བ་ཡང་དེ་ཡིན་ལ། ཐམས་ཅད་ཡོད་པར་སྨྲ་བ་ཡང་ཡིན་པས་གཞི་ཐམས་ཅད་ཡོད་པར་སྨྲ་བ་ཡིན་ནོ། །དེ་དག་གི་བསླབ་པ་ངེས་པར་ཕྱེ་ཞིང་བཀོད་པ་གང་ཡིན་པ་དེས་དགེ་ཚུལ་དག་གི་རྒྱན་དུ་བྱ་བའི་ཕྱིར། འདི་ཕྲེང་བར་བརྒྱུས་པ་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །གཞིར་གྱུར་པ་ཞེས་བྱ་བ་གང་ལས་ཤེ་ན། སྨྲས་པ། ལེགས་པར་སྦྱར་བའི་སྐད་ཀྱི་ཐ་སྙད་དུ་བྱེད་པའི་ཕྱིར་རོ། །དེ་ལྟར་ཡང་ཡ་རབས་དག་ནི་ལེགས་པར་སྦྱར་བས་ཐ་སྙད་དུ་བྱེད་ཀྱི། ཐ་མལ་བའི་སྐྱེ་བོ་ནི་མ་ཡིན་ནོ་ཞེས་ཟེར་རོ། །དོན་དེ་ནི་ཡ་རབས་སུ་ཤེས་པར་བྱ་བའི་ཕྱིར་སྒྲའི་མཚན་ཉིད་བསྟན་པ་ཡིན་ལ། ཡ་རབས་ཀྱང་འཇིག་རྟེན་ན་གཞིར་གྱུར་པ་ཡིན་ཏེ། དེ་དག་ལས་འཇིག་རྟེན་གྱི་ཐ་སྙད་འབྱུང་བ་ཡིན་པའི་ཕྱིར་རོ། །གཞི་ཐམས་ཅད་ཡོད་པར་སྨྲ་བ་དེ་དག་ཀྱང་དེ་དང་འདྲ་བ་ཡིན་ཏེ། དེ་ལས་སྡེ་བར་གཞན་གྱི་ཐ་སྙད་དུ་བྱ་བ་འདོན་པ་ཡིན་གྱི། གཞན་དག་ལས་ནི་མ་ཡིན་ཏེ། ཐ་མལ་བ་དང༌། ཟུར་ཆག་དང༌། འབྲིང་དུ་འདོན་པས་བརྗོད་པའི་ཕྱིར་དང༌། དུས་ཕྱིས་བྱུང་བ་ཉིད་ཡིན་པའི་ཕྱིར་རོ། །འདི་སྐད་དུ་ཡང་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་རིང་པོ་མ་ལོན་པར་དགྲ་བཅོམ་པ་ལྔ་བརྒྱ། རྒྱལ་པོའི་ཁབ་ཏུ་འདུག་ནས་སྡེ་སྣོད་གསུམ་བསྡུ་བ་མཛད་ལ། དེའི་འོག་ཏུ་མྱ་ངན་ལས་འདས་ནས་ལོ་བརྒྱ་རྩ་བཅུ་ལོན་པ་ན་འཕགས་པ་ཐམས་ཅད་འདོད་པ་ལ་སོགས་པ་ནས་སྒུར་པོ་དང༌། ཞིང་ལྡན་ལ་ཐུག་པར་དགྲ་བཅོམ་པ་བདུན་བརྒྱ་ཡངས་པ་ཅན་དུ་འདུས་ནས། བསྡུ་བ་གཉིས་པ་མཛད་དེ་ཧུ་ལུ་ཧུ་ལུ་ཀའི་རུང་བ་
ལ་སོགས་པ་བཅུ་བསལ་བ་ཡིན་ཏེ། རྒྱ་ཆེར་ནི་ཕྲན་ཚེགས་ལས་འབྱུང་ངོ༌། །དེ་ནས་རྒྱལ་པོ་དྷརྨ་ཨ་ཤོ་ཀ་ཤི་བ་དང་དགྲ་བཅོམ་པ་རྣམས་ཀྱིས་ཐ་མལ་པ་དང༌། ཟུར་བཅག་པ་དང༌། བར་མར་འདོན་པའི་ཚིག་ལ་མངོན་པར་ཞེན་པའི་གདུལ་བའི་དབང་གི་ཕྱིར་རིམ་གྱིས་གཞུང་གཞན་དང་གཞན་དུ་སྦྱར་ཏེ། རྒྱ་ཆེན་པོའི་སྐད་དུ་སྦྱར་བའི་མདོ་སྡེ་ལ་སོགས་པ་ལྟ་བུ་སྟ། བསྟན་པ་རྣམ་པ་བཅོ་བརྒྱད་དུ་གྱུར་པ་ཡིན་ནོ། །ཤཱཀྱའི་གྲོགས་ངོར་ཞེས་བྱ་བ་ལ། ཤཱཀྱ་ནི་བཅོམ་ལྡན་འདས་ཡིན་ཏེ། ཤཱཀྱའི་རིགས་སུ་འཁྲུངས་པའི་ཕྱིར་རོ། དེའི་གྲོགས་ནི་བཤེས་གཉེན་ཏེ་ཟག་པ་མེད་པའི་ལམ་ཡིན་ཏེ། དེའི་སྟོབས་ཀྱིས་སངས་རྒྱས་ཉིད་ཀྱི་གོ་འཕང་ཐོབ་པའི་ཕྱིར་རོ། །དེའི་ངོར་ཞེས་བྱ་བ་ནི་དེ་ཐོབ་པར་བྱེད་པའི་རྒྱུ་མཚན་ཞེས་བྱ་བའི་ཐ་ཚིག་གོ །ཡང་ན་ཤཱཀྱ་ནི་བཅོམ་ལྡན་འདས་ཡིན་ཞིང་དེ་ཉིད་འགྲོ་བའི་དགེ་བའི་བཤེས་གཉེན་གང་ཡིན་པ་དེ་དང་འདྲ་བར་གྲོགས་པོ་ཡིན་ཏེ། ཤཱཀྱའི་གྲོགས་པོས་འགྲོ་བའི་ངོར་ཏེ། དེ་རྣམ་པར་གྲོལ་བར་བྱ་བའི་ཕྱིར་རོ་ཞེས་བྱ་བའི་ཐ་ཚིག་གོ །ཡང་ན་ཤཱཀྱའི་གྲོགས་པོ་ཞེས་བྱ་བ་ནི་དགེ་སློང་གི་མིང་ཡིན་ལ་དེའི་ངོར་ནི་དེས་གསོལ་བ་བཏབ་པའི་ཞེས་བྱ་བའི་ཐ་ཚིག་གོ །དགེ་བའི་འབྱུང་གནས་གང་གི་བློ་འཇུག་པ། དེ་ཡི་ངོར་ནི་བདག་གིས་རྣམ་བཀྲོལ་བ། །གང་ཕྱིར་གུས་པ་མེད་ཀྱང་གཞན་ངོར་ཏེ། །དེའི་ཕྱིར་བདག་སྟོབས་རྟོག་པས་འཇུག་པ་མིན། །བདག་ཉིད་སློབ་དཔོན་བདག་གཞན་དོན་གྱི་བསྟན་བཅོས་མཁྱེན་པའི་རིན་ཆེན་འབྱུང་གནས་བཞེང་གཞུང་དག །ཐོས་ནས་ཡོན་ཏན་འོད་ཀྱིས་སྦྱར་བའི་བསྟན་བཅོས་རྣམ་པར་ཕྱེ་བ་ལ་ནི་བརྟེན་ནས་ཀྱང༌། །བདག་ཉིད་ནུས་པའི་རྣམ་པར་འཕྲུལ་པས་སློབ་མ་ལ་ཕན་རྣམ་པར་བཤད་པ་བྱས་པ་ལས། །བདག་གི་བསོད་ནམས་བསགས་རེས་འགྲོ་བ་ཡོན་ཏན་གཏེར་མཆོག་སངས་རྒྱས་གོ་འཕང་ཐོབ་པར་ཤོག །དགེ་ཚུལ་གྱི་ཚིག་ལེའུར་བྱས་པ་སུམ་བརྒྱ་པའི་རྣམ་པར་བཤད་པ། སློབ་མ་ལ་ཕན་པ་ཞེས་བྱ་བ། སློབ་དཔོན་དུལ་བའི་ལྷས་མཛད་པ་རྫོགས་སོ།། །། རྒྱ་གར་གྱི་མཁན་པོ་བུདྡྷ་ཤཱནྟི་དང༌། །ལོ་ཙཱ་བ་དགེ་སློང་དགེ་བའི་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། །འདི་ལ་ཤློ་ཀ་སྟོང་ཕྲག་ཕྱེད་དང་བཞི་ཡོད་དོ།།