གླེང་གཞི་དང་གང་ཟག་བསྡུས་པའི་ཚིག་ལེའུར་བྱས་པ།
བ་ལ་ཤྲཱི་བྷ་དྲ།
རྒྱ་གར་སྐད་དུ། ན་དཱ་ན་པུང་ལ་སཾ་གྲ་ཧ་ཀཱ་རི་ཀཱ། བོད་སྐད་དུ། གླེང་གཞི་དང་གང་ཟག་བསྡུས་པའི་ཚིག་ལེའུར་བྱས་པ། དཀོན་མཆོག་གསུམ་ལ་ཕྱག་འཚལ་ལོ། །ཡོན་ཏན་གཞི་དང་ཡོན་ཏན་རྒྱུད། །ཀུན་མཁྱེན་ལ་ནི་ཕྱག་འཚལ་ནས། །དང་པོ་གླེང་གཞི་
རྣམས་བྱུང་བའི། སྟོན་བྱེད་ཅུང་ཟད་བཤད་པར་བྱ། །མ་ཡི་ཚིག་ནི་ཐོབ་པའི་ཕྱིར། །བཟང་བྱིན་ས་བོན་འདུ་ཤེས་ཀྱིས། །སྤོང་བྱེད་ཡུལ་དུ་འཁྲིག་པ་བྱུང༌། །དང་པོ་ཆུ་བུར་བྱུང་བ་ཡིན། །དེ་མ་ཐག་ཏུ་མ་བྱིན་ལེན། །རབ་ཏུ་འཐོབ་པར་བཤད་པར་བྱ། །རྒྱལ་པོའི་ཁབ་ཏུ་ནོར་ཅན་གྱིས། །ཤིང་ནི་མ་བྱིན་ལེན་པ་བྱུང༌། །མི་སྡུག་ཆོས་དང་ཕྲད་པའི་ཕྱིར། །རི་དགས་དབྱིག་པ་ཅན་ཕྲད་ན། །སྲོག་གཅོད་པ་ཡི་བསླབ་གཞི་འདི། །སྤོང་བྱེད་ཡུལ་དུ་ཀུན་ཏུ་བྱུང༌། །བསོད་ནམས་དོན་དུ་གཉེར་བ་ཡི། །ཡིད་འོང་འགྲམ་གྱི་དགེ་སློང་གིས། །བསམ་གཏན་དེ་མེད་སྟོན་བྱེད་ཕྱིར། །ཡངས་པ་ཅན་དུ་བརྫུན་ཚིག་སྨྲས། །འཆར་ཀ་ཡིས་ནི་མཉན་ཡོད་དུ། །བསོད་སྙོམས་ཕྱིར་ནི་སྔོན་དུ་བྱུང༌། །དེ་ནས་བྱུང་ནས་ཆགས་བཅས་པས། །ཁུ་བ་འབྱིན་པ་བྱུང་བ་ཡིན། །ཆོས་ནི་སྟོན་པར་བྱེད་བཞིན་དུ། །དེ་ཡིས་ཀུན་དུ་ཆགས་པ་ལས། །དགེ་འདུན་ལྷག་མའི་ལྟུང་བ་ནི། །ལུས་ཀྱི་རེག་པ་བྱུང་བ་ཡིན། །དེ་ཉིད་ཀྱིས་དེར་རྒྱ་སོགས་ཀྱིས། །གནས་ངན་ལེན་ཚིག་བྱས་པ་ཡིན། །གལ་ཏེ་དེ་སྟོབས་བཅས་ཡིན་ན། །དེ་ལས་ཉེས་པ་ཡོངས་སུ་འཛིན། །ད་ལྟའི་དགེ་སློང་ཚུལ་ཁྲིམས་ལྡན། །དགེ་བའི་ཆོས་ཅན་ཚངས་སྤྱོད་དེ། །བདག་ལ་བསྙེན་བཀུར་བྱེད་པ་ཡི། །བསྔགས་པ་བརྗོད་པ་འདི་ཡང་བཅས། །དགེ་སློང་ནག་པས་མཉན་ཡོད་དུ། །བུད་མེད་འདོད་པས་ཁྱིམ་རྣམས་སུ། །སྐྱེས་པས་བླང་བར་བྱས་པ་སྟེ། །སྨན་ནི་རྫོགས་པར་བྱས་པ་ཡིན། །དེ་ཡང་ཁང་པར་རབ་གསུངས་པ། །གང་ཚེ་ཚད་ལས་འདས་པ་དང༌། །དགེ་སློང་རྣམས་ཀྱི་ཆོས་ལུགས་འདས། །དེ་ཡིས་ལྟུང་བ་རྫོགས་པར་འགྱུར། །དྲུག་སྡེས་ལྗོན་ཤིང་བཅད་ནས་ནི། །རྗེས་སུ་གནང་བར་མ་བྱས་པར། །གནས་ཁང་དག་ནི་ཆེན་པོར་བྱས། །དགེ་འདུན་ལྷག་མ་ཐོབ་པ་ཡིན། །དགེ་སློང་མཛའ་བོ་ས་ལས་སྐྱེས། །རྒྱལ་པོའི་ཁབ་ཏུ་མཛའ་བོ་ཡིས། །གྱད་བུ་ནོར་ལ་ལྷག་མེད་ཀྱིས། །ཡང་དག་མིན་པར་སྐུར་བ་བཏབ། །དེས་ནི་རི་དགས་མཐོང་བའི་ཕྱིར། །ཉེས་པ་བག་ཙམ་ཕྱོགས་གཏོགས་པ། །ཉོན་མོངས་བཅས་པ་དེ་ལ་ནི། །ཞེ་འགྲས་རྒྱུ་ནི་བཞག་པ་ཡིན། །རྒྱལ་པོའི་ཁབ་དག་ཉིད་དུ་ནི། །ལྷས་མཆོད་
འབྲེལ་བའི་དགེ་འདུན་དག །ལས་ཀྱིས་རྗེས་སུ་འབྲང་ཡིན་ཕྱིར། །ལྷས་བྱིན་གྱིས་ནི་ཐ་དད་ཕྱེ། །དེར་ནི་ཀོ་ཀ་ལི་ཀ་སོགས། །ཆོས་ནི་རྣམ་འགྱུར་བྱེད་པ་ཡི། །དགེ་སློང་སྡིག་པའི་ལས་ཅན་རྣམས། །དེ་དག་དེ་ཡི་གྲོགས་སུ་གྱུར། །རེ་ལྡེ་རི་ལ་གནས་བཅས་པའི། །ནབ་སོ་འགྲོ་མགྱོགས་ལ་སོགས་པས། །ཁྱིམ་རྣམས་སུན་ཕྱུང་མཉན་ཡོད་དུ། །འདིར་ནི་བསླབ་པ་བཅས་པ་ཡིན། །ལྟུང་བ་མི་འདོད་བདུན་པ་ཡིན། །ཀཽ་ཤཱ་མ་བཱི་རུ་དགེ་སློང་ལ། །རྣམ་འགྱུར་བཀའ་བློ་མི་བདེ་བར། །ཉམས་པར་གྲགས་པ་མ་ཡིན་ནམ། །དགེ་འདུན་ལྷག་མ་གླེང་གཞི་རུ། །ཡང་དག་དགོས་པ་བཤད་པ་ཡིན། །ད་ནི་འཆད་པར་འགྱུར་རྣམས་ཀྱི། །མདོར་བསྡུས་ནས་ནི་བཤད་པར་བྱས། །མཉན་ཡོད་དུ་ནི་འཆར་ཀ་ཡིས། །སྦེད་མ་དང་ནི་ལྷན་ཅིག་ཏུ། །བརླ་དང་བརླ་སྤྲད་དབེན་པར་གནས། །དེ་ཚེས་ག་མ་ཡིས་མཐོང༌། །རྒྱལ་པོའི་ཁབ་ཏུ་ཤི་རི་ཀས། །གསོ་སྦྱོང་འཕགས་དང་ལྷན་ཅིག་ཏུ། །ལེགས་སྐྱེས་ཚིག་གིས་རྣམ་པར་བྱས། །འདས་མ་ཐག་པ་དེ་བཞིན་བྱས། །དགེ་སློང་རྣམས་ཀྱིས་མཉན་ཡོད་དུ། །གོས་ལྷག་བྱིན་གྱིས་མ་བརླབས་པར། །ཞག་བཅུ་ལས་ནི་འདས་པར་བཅངས། །དེ་ཕྱིར་སྤངས་བ་ཉིད་དུ་ཤེས། །སྟོད་གཡོགས་སྨད་གཡོགས་བཅས་འགྲོ་བས། །སྐྱ་རེངས་དག་ནི་ཤར་བ་ལས། །དགེ་འདུན་གནང་བ་མ་གཏོགས་པ། །དགེ་སློང་རྣམས་ལ་འབྲལ་བ་བཤད། །གོས་ནི་མང་པོ་མེད་པ་ཡིན། །དགེ་སློང་གི་ནི་ཁ་སོགས་ཕྱིར། །འདོད་པས་བརྟགས་ན་ཟླ་གཅིག་ཏུ། །གཞག་བྱ་ལྷག་པར་མ་ཡིན་ནོ། །ཆོས་བསྟན་པས་ནི་གང་གི་ཚེ། །འཆར་ཀ་ཆགས་ནས་དགེ་སློང་མ། །ཉེ་དུ་མ་ཡིན་སྦེད་མ་ཡི། །ལམ་མཆོག་ཏུ་ནི་གོས་ཁྲུས་བྱས། །ཉེ་དགའ་སྒོ་ན་གནས་པ་ཡིས། །ཨུཏྤ་ལ་ཡི་མདོག་ལ་ནི། །རས་ཀྱི་མཆོག་ནི་བླངས་པ་ལ། །བརྗེ་བ་མ་གཏོགས་བླང་མི་བྱ། །ཉེ་དགའ་ཡིས་ནི་ཁྱིམ་པ་ལ། །ཆོས་བསྟན་ནས་ནི་དུས་བྱུང་གྲོས། །དེ་མེད་པར་ནི་དེ་ཡིས་ཀྱང༌། །མངོན་དུས་ཕྱེད་ཀྱིས་བགོས་པ་ཡིན། །དྲུག་སྡེ་རྣམས་ནི་ཆགས་ནས་ནི། །སྟོད་གཡོགས་སྨད་གཡོགས་བཅས་ལྷག་པར། །སློང་
བ་འཕྲོག་པའི་དགེ་སློང་རྣམས། །རུང་བ་ལ་ནི་བརྟེན་པ་ཡིན། །ཉེ་དགའ་ཡིས་ནི་གཞན་དག་གི །འཁྲིག་པ་ན་ནི་ཆགས་པ་བརྟུལ། །ཇི་སྲིད་རྣམ་པར་སྤགས་པའི་གོས། །དེས་ནི་མངོན་དུས་ཕྱེད་ཀྱིས་བགོས། །གོས་ནི་སོ་སོར་སྤགས་པ་ལས། །ཅུང་ཟད་ཙམ་གྱི་ཕྱོགས་ཀྱིས་ཤེས། །དེས་ནི་དེ་ཡི་ཇི་སྲིད་དུ། །མངོན་དུས་ཕྱེད་ཀྱིས་བསླངས་པ་ཡིན། །དབྱར་འབྱེད་ཀྱིས་ནི་ཕོ་ཉ་ལ། །གཟོད་བྱིན་ནས་ནི་ཉེ་དགའ་དེས། །སྤོས་འཚོང་དེ་ལ་ཆད་པ་དེས། །དགག་པ་རབ་ཏུ་བྱས་པ་ཡིན། །དགེ་སློང་གིས་ནི་སྟན་གྱི་ཕྱིར། །སྲིན་བལ་ལས་ནི་བྱས་པ་ཡིན། །སྲོག་ཆགས་གསོད་པའང་དེ་ཡི་ཕྱིར། །སྟན་ལས་དེ་ནི་ལྡོག་པ་ཡིན། །དེ་བཞིན་དེ་ཉིད་དག་ལ་ནི། །བལ་གྱི་སྟན་ལས་ཆས་སྐྱེས་ཏེ། །བལ་ནི་ནག་པོ་ཚོལ་གྱུར་པས། །དེ་ཕྱིར་ཀློག་པ་ཉམས་པར་གྱུར། །འཁོབ་བལ་གྱིས་ནི་ཆ་གཅིག་དང༌། །དེ་བཞིན་དུ་ནི་དཀར་པོ་དང༌། །བལ་ནི་ནག་པོ་ཕྱེད་ཕྱིན་ཏེ། །འདི་ནི་སྟན་དུ་བྱ་བ་ཡིན། །སྟན་བྱས་ནས་ནི་དགེ་སློང་གིས། །ལོ་དྲུག་པར་དུ་བཅངས་བྱས་ཏེ། །ལས་སར་པ་ནི་མ་གཏོགས་པར། །དེ་ཡི་ནང་དུ་དོར་བྱའི་ཕྱིར། །རབ་ཏུ་དད་བྱས་ཚོང་པ་ཡིས། །གང་ཚེ་གོས་ཀྱི་སྦྱིན་པ་ཕུལ། །མཐོ་གང་བར་གྱིས་གླན་བྱ་བ། །ཞེས་བྱའི་བསླབ་པ་བཅས་པ་ཡིན། །དྲུག་སྡེས་ནེ་བ་ལ་ཡུལ་དུ། །ཕྱིན་ནས་དེ་ནས་སླར་འོངས་ཏེ། །ཤིང་རྟ་ཡི་ནི་ཚོགས་ཀྱི་བལ། །དེ་དག་གིས་ནི་ཁུར་གྱིས་ཁྱེར། །འཕགས་མ་སྐྱེ་དགུ་བདག་མོ་ལ། །འཆར་ཀས་བལ་གྱི་ལས་ཀྱི་ཕྱིར། །ཅུང་ཟད་བལ་རྨེལ་བཅོལ་དེའི་ཕྱིར། །ཉེ་དུ་མིན་པས་རྨེལ་མི་བྱ། །ས་ལེ་སྦྲམ་ལེན་རྒྱལ་ཁབ་ཏུ། །ནོར་བུ་གཙུག་ཕུད་ཅན་གྱིས་བཀག །དྲུག་སྡེ་དག་ནི་དེ་བཞིན་དུ། །ཡོངས་སུ་ལེན་པར་བྱེད་པའང་ཡིན། །མཉན་ཡོད་དུ་ནི་ཉེ་དགའ་ཡིས། །གཅེར་བུ་པ་ལས་ལ་བ་བླངས། །དེ་ཕྱིར་དཀོན་མཆོག་མ་གཏོགས་པར། །མངོན་མཚན་ཅན་ནི་བཀག་པ་ཡིན། །དེ་དག་ཉིད་ལ་མདོར་བསྡུས་ནི། །ཉོ་ཚོང་དག་ནི་བྱུང་བ་ཡིན། །དེ་ཕྱིར་དེ་ནི་ཉོ་ཚོང་དག །དགེ་སློང་རྣམས་ལ་རབ་ཏུ་བཀག །རྙེད་ཅིང་རྙེད་ཅིང་ལྷུང་བཟེད་རྣམས། །སྐྱེས་བུ་ཆེ་བའི་སྟོབས་རྣམས་ནི། །རྨོངས་
པ་ཡིས་ནི་འཆང་བར་བྱེད། །འོན་ཀྱང་ཞག་བཅུ་བཅང་བྱ་སྟེ། །དེ་ལས་ལྷག་པར་བཅང་མི་བྱ། །གང་ཕྱིར་དེ་བཞིན་ཉེ་དགའ་ནི། །བསོད་སྙོམས་པ་ཡི་སྦྱོར་བ་ཡིན། །ལྷུང་བཟེད་ཡོངས་སུ་བཙལ་བར་བྱས། །དེ་ཚེ་ཐུབ་པས་བཀག་པ་ཡིན། །བསླངས་པས་སྔོན་འགྲོ་སྣལ་མ་ཡིས། །དགེ་སློང་ཉེ་དགས་རྒྱལ་པོ་ཡི། །སྐྱེས་བུ་ཆེ་བའི་སྟོབས་ཀྱིས་ནི། །རས་ཡུག་འཐག་ཏུ་བཅུག་པ་ཡིན། །ཆུང་མ་དང་ནི་ལྷན་ཅིག་ཏུ། །ཁྱིམ་བདག་གང་ཞིག་དེ་ཡིས་བཏུལ། །ཇི་སྲིད་དེ་ཡི་ཁྱིམ་སོང་ནས། །འཐག་པ་བསྐྱེད་པར་མི་བྱའོ། །སྦྱིན་པ་བྱིན་པའི་རྒྱུ་ཡིས་སུ། །དགའ་བོས་ཆོས་ལ་སྣམ་སྦྱར་བྱིན། །ཁྲོས་པས་སླར་ཡང་དེ་ལས་བླངས། །དེ་ཕྱིར་སྤང་པའི་ལྟུང་བར་ཤེས། །དབྱར་གནས་ཀྱི་ནི་རྙེད་པ་དག །དབྱར་གྱི་ནང་དུ་བགོ་མི་བྱ། །དྲུག་སྡེ་རྣམས་ཀྱིས་འབད་པ་ཡིས། །དབྱར་གྱི་ནང་དུ་བགོས་པ་ཡིན། །དགོན་པ་པ་ཡི་སྡོམ་བརྩོན་གྱི། །ཆོས་གོས་ཁྱིམ་གཞན་ཡོད་ན་ནི། །ཞག་དྲུག་མཚམས་ཀྱི་ཕྱི་རོལ་དུ། །གནས་བྱ་བདུན་པ་མ་ཡིན་ནོ། །གཅེར་བུས་ཁྲུས་བྱས་ལས་བྱུང་བའི། །དབྱར་གྱི་རས་ཆེན་ཚོལ་ལགས་ན། །རྟག་ཏུ་དུས་མིན་དེ་སྲིད་དུ། །ཐུབ་པ་ཡིས་ནི་དགག་པ་མཛད། །ཁྱིམ་པ་འགའ་ཡིས་དགེ་འདུན་ལ། །སྔར་ནི་ཆོས་གོས་བསྡོམ་པ་ལས། །མཐུ་དང་ལྡན་ཕྱིར་ཉེ་དགའ་ཡིས། །བདག་ཉིད་ལ་ནི་ཡོངས་སུ་བསྒྱུར། །འཕགས་པ་པི་ལིན་ད་པ་ཡི། །སློབ་མས་སྨན་དག་བསྲེས་པ་ལས། །ཇི་སྲིད་འཚོ་བའི་འདུ་ཤེས་ཀྱིས། །རྒྱལ་པོའི་ཁབ་ཏུ་ཟོས་པ་ཡིན། །སྤང་བ་རྣམས་ཀྱི་གླེང་གཞི་ནི། །ཅུང་ཟད་ཕྱོགས་ཙམ་བསྟན་པ་ཡིན། །ད་ནི་དག་པའི་ལྟུང་བྱེད་པའི། །ཡང་དག་བསྒྲུབ་ཕྱིར་བསྟན་པར་བྱ། །སྒྲ་གཅན་དང་ནི་ལག་རྒྱུད་ཀྱི། །དད་པ་ཅན་རྣམས་རྣམ་འགྱུར་ཞིང༌། །རྒོལ་བ་དེ་ལྟར་གྱུར་བ་ཡིན། །རྒྱལ་པོའི་ཁབ་ཏུ་བརྫུན་ཚིག་སྨྲས། །ཁྲོས་པར་གྱུར་པའི་དྲུག་སྡེ་ཡིས། །དགེ་སློང་རྣམས་ལ་མཉན་ཡོད་དུ། །སྐྱེས་བུ་སྨན་པས་སྟོན་བྱེད་ཚིག །ཁྱེད་ནི་ཐེང་པོ་ཡིན་སྨྲས་གྲག །དགེ་སློང་དབྱེ་བའི་བྱེད་པ་པོར། །དེ་ཡང་དེར་ནི་རབ་ཏུ་བསྒྲགས། །འདི་ནས་ཐོས་ནས་གཞན་སོང་སྟེ། །ཕྱིན་ཅི་ལོག་ཏུ་སྨྲ་བར་བྱེད། །ཆོས་ཀྱིས་ཀྱང་ལས་བྱས་པ་ཡང༌། །སྐྱོ་སྤོགས་
བྱེད་པར་ཤེས་ནས་ནི། །ལེགས་བྱས་སླར་ནི་བྱ་བ་ལ། །ཞི་བ་དག་ནི་མ་ཡིན་ཉིད། །ཡན་ལག་ནོར་བུའི་རིགས་ཐོབ་ནས། །བུད་མེད་ཡུལ་ལ་སྟོན་པ་བཀག །དེ་ཡིས་རིག་པ་གནས་པ་དང༌། །ཐེ་ཚོམ་ཅན་ལ་སྟོན་པར་བྱེད། །བྲམ་ཟེ་སྔགས་ནི་འདོན་པ་ལྟར། །དགེ་ཚུལ་རྣམས་དང་ལྷན་ཅིག་ཏུ། །དགེ་སློང་མཉམ་པའི་ཚིག་དག་གིས། །ཆོས་ནི་འདོན་པར་བྱེད་པ་ཡིན། །གནས་བརྟན་འདི་ནི་ཆོས་བསྙེན་བཀུར། །བྲམ་ཟེ་རྣམས་ནི་སྨྲ་བར་བྱེད། །མ་ཡིན་དེ་དག་ལྷག་མ་ཅན། །དྲུག་སྡེ་དག་ནི་སྟོན་པར་བྱེད། །ཆུ་ཀླུང་ཡིད་འོང་འགྲམ་གནས་པའི། །དགེ་སློང་དག་གི་བདེན་པ་ཡིན། །བླ་མའི་ཆོས་ནི་ཟབ་པའི་ཕྱིར། །ཡངས་པ་ཅན་དུ་སྨྲས་པ་ཡིན། །རྒྱལ་པོའི་ཁབ་ཏུ་གྱད་ནོར་ལ། །ཚོགས་པས་གསོལ་བ་བྱས་ནས་ནི། །དགེ་འདུན་གྱིས་ནི་ཆོས་གོས་བྱིན། །མཛའ་བོ་སོགས་ཀྱིས་སྐུར་བ་བཏབ། །མཉན་ཡོད་དུ་ནི་ཟླ་ཕྱེད་ཅིང༌། །སོ་སོར་ཐར་པ་རྟག་ཏུ་འདོན། །ཅི་ཡི་ཕྱིར་ནི་རྨ་སོས་པ། །འདྲལ་བར་བྱེད་པ་དྲུག་སྡེས་ཤེས། །སྔོན་ནི་ཤིང་མཁན་གྱུར་པ་ཡིས། །ཤིང་བཅད་ནས་ནི་གཙུག་ལག་ཁང༌། །བྱས་ཏེ་ལྷ་ཉིད་དག་ལ་ཡང༌། །མཆོག་ཏུ་གནོད་པ་བྱུང་གྱུར་པ། །དགེ་འདུན་གྱི་ནི་ལས་དང་འབྲེལ། །རྒྱལ་པོའི་ཁབ་ཏུ་ཕྱིན་པ་ཡི། །གྱད་ནོར་དེ་ལ་དེ་དག་གིས། །ཡོན་ཏན་སུན་པར་བྱས་པ་ཡིན། །མདོར་བསྡུས་པ་ནི་ཀཽ་ཤཱ་མ་བཱིར། །འདུན་པ་དེ་ཡིས་ལྟུང་ཤེས་ནས། །ཁས་ལེན་པར་ནི་མི་བྱེད་པས། །བསྒོ་བ་རྣལ་གཟོན་པ་ཡིན། །དགེ་སློང་དག་གིས་མཉན་ཡོད་དུ། །གནས་མལ་བླ་གབ་མེད་བོར་ནས། །ཟས་ཀྱི་དོན་དུ་སོང་བར་གྱུར། །དེ་ནས་ཐུབ་པས་གསུངས་མཛད་དོ། །ལྷོ་ཕྱོགས་ནས་ནི་འོངས་པ་ཡི། །བསྙེན་བཀུར་དོན་དུ་དགེ་སློང་དག །རྒྱལ་བྱེད་ཚལ་དུ་ཕྱིན་པ་ཡིན། །རྩྭ་ཡི་སྟན་ནི་བཏིང་ནས་སོང༌། །སྔོན་ནི་འཆར་ཀས་མཉན་ཡོད་དུ། །སློབ་མ་གཙུག་ལག་ཁང་དུ་ཕྱུང༌། །སླར་ནི་བྱ་བ་མ་ཡིན་ཏེ། །བཟློག་པའི་དོན་དུ་བྱས་པ་ཡིན། །དེས་ནི་འདུ་འཛིའི་གཏམ་བྱས་ནས། །ཕྱི་ནས་སྒོ་ནི་འབྱེད་པར་བྱེད། །ཉལ་བ་རྣམས་ཀྱིས་བར་དེ་ནི། །ཉལ་བ་རྣམས་ལ་གནོད་པ་བྱས། །ཁྲོས་པར་གྱུར་པས་ཉེ་དགའ་
ཡིས། །འབྱུང་དུ་རུང་བའི་ཁྲི་རྐང་གིས། །དེར་འོག་འདུག་པའི་གྲོགས་པོ་ཡི། །མགོ་ནི་མཚན་མོ་འགས་པར་བྱས། །འདུན་པ་ཡིས་ནི་ཀཽ་ཤཱ་མ་བཱིར། །སྲོག་ཆགས་དག་དང་བཅས་པ་ཡི། །ཆུ་དང་ས་དག་ངེས་པར་བསྲེས། །ཕྱི་ནས་རྩྭ་དང་ལྕི་སོགས་བསྲེས། །ཆུ་ཁུང་མེད་པ་ཉིད་དང་ནི། །སྦྱང་གི་རྣམ་པ་ལྟ་བུ་ཡི། །འདིར་ནི་གཙུག་ལག་ཁང་པ་བརྩིགས། །དེ་ལྟ་བུ་ནི་མི་བྱའོ། །མཉན་ཡོད་དུ་ནི་དྲུག་སྡེ་ཡིས། །དགེ་སློང་རྣམས་ཀྱིས་མ་བསྐོས་པར། །དགེ་སློང་མ་རྣམས་གདམས་པ་ཡིན། །ཕན་ཚུན་འདོད་པས་གཟུང་བར་བྱས། །དགའ་བྱེད་ཀྱིས་ནི་དུས་མིན་པར། །དགེ་སློང་མ་རྣམས་ཆོས་སྟོན་བྱས། །ཕྱི་རོལ་དུ་ནི་གནས་པའི་བར། །སྐྱེ་བོ་རྣམས་ཀྱིས་སྨན་པ་ཡིན། །ཟང་ཟིང་དག་ནི་ཅུང་ཟད་ཙམ། །དགེ་སློང་མ་ཡི་དགག་དབྱེ་ལ། །འཇིགས་པ་མེད་པར་བྱ་ཕྱིར་ཕུལ། །དེ་ཕྱིར་ཉེ་དགས་སྐུར་པ་བཏབ། །འཆར་ཀས་འདིར་ནི་སྐུད་པ་ཡིས། །སྦེད་མ་ཡི་ནི་ཆོས་གོས་ལ། །སྦེད་མ་འཁྱུད་པ་དང་ལྡན་པའི། །རང་གི་གཟུགས་ནི་བྲིས་པར་གླན། །དགེ་སློང་མ་ནི་བརྩོན་པ་ཡིས། །དགེ་སློང་གིས་ནི་ཆོས་གོས་བྱིན། །ལྷག་མ་མེད་པས་གནོད་པའི་ཕྱིར། །དེ་བཞིན་དུ་ནི་བསླབ་པ་བཅས། །སྦོམ་དགའ་མོ་ཡི་གྲོགས་དང་ནི། །ལྷན་ཅིག་དྲུག་སྡེ་འགྲོ་བར་བྱེད། །ཆུང་མར་སྨྲ་བའི་གླེང་གཞི་ལས། །དེ་ཕྱིར་སྨད་པར་བྱས་པ་ཡིན། །དེ་ཉིད་ཀྱི་ནི་རྒྱུན་གནས་ཏེ། །གྲུ་ཡི་བ་ཞོན་པས་འགྲོ་མི་བྱ། །རྒྱུན་ཕྱོགས་སུ་ཡང་མི་བྱ་ཉིད། །འབད་པ་ཡིས་ནི་ཕ་རོལ་འགྲོ། །སྔོན་གྱི་རྩེད་མོ་རྣམས་དང་ནི།། ཉམས་རྣམས་དང་ནི་དྲན་པ་ཡིས། །འཆར་ཀ་སྦེད་མ་ལྷན་ཅིག་ཏུ། །དབེན་པར་ལྷན་ཅིག་འདུག་སྟེ་གནས། །དེ་ནི་རིམ་པ་དེ་ཉིད་ཀྱིས། །དབེན་པར་གནས་ཏེ་སྤྱོད་མ་ཡིན། །དགེ་སློང་གིས་ནི་དགེ་སློང་མ། །དེ་ཉིད་ཀྱང་ནི་བསྒྲུབ་འདིར་ཤེས། །སྦྱིན་པ་པོ་ནི་དེ་དག་གིས། །ལྔ་པོ་རྣམས་ལ་བསད་སྙོམས་སྤགས། །དྲུག་སྡེ་རྣམས་ལ་དགེ་སློང་མ། །སྦོམ་དགའ་མོ་ཡིས་བསྐོ་ཤམ་བྱས། །དྲག་ཤུལ་ཅན་གྱིས་མགྲོན་བོས་པའི། །དྲུག་སྡེས་ཡངས་པ་ཅན་དུ་ནི། །ཨ་མྲ་དང་ནི་ཁུར་བ་དང༌། །གཞན་དུ་ཟོས་ནས་མ་དད་བྱས། །མཉན་ཡོད་དུ་ནི་ཕྱི་རོལ་ཏུ།
རབ་ཏུ་བྱུང་བ་རྣམས་ཀྱི་ཕྱིར། །ཁྱིམ་པ་ཡི་ནི་འདུག་གནས་བྱས། །དྲུག་སྡེས་དེར་སོང་མ་དད་གྱུར། །གཡས་ཞར་བག་མར་བླངས་པ་ཡིས། །རྒྱུ་མཚན་བཟང་བ་གང་ཡིན་པ། །ལྷུང་བཟེད་བྱུར་བུར་བསྒྲུབ་པ་ཡིས། །དྲུག་སྡེས་བླངས་པས་དེ་མ་གྲུབ། །སྤངས་པ་དང་ནི་མ་སྤངས་པ། །དྲུག་སྡེ་དག་གིས་ཟོས་པ་ཡིན། །དེ་ཕྱིར་ཐམས་ཅད་མཁྱེན་པ་ཡིས། །ཕྱིས་ནི་ལྷག་པོར་རྗེས་སུ་གནང༌། །སློབ་དཔོན་འདི་ཡིས་བདག་ཀུན་དུ། །ཀླན་ཀ་དག་ནི་བཙལ་སྙམ་ནས། །ཡང་ཡང་ལྟུང་བྱུང་རྒན་ཞུགས་དེས། །ལྷག་པོར་མ་བྱས་པས་བསླུས་གྲག །རྒྱལ་པོའི་ཁབ་ཀྱི་གནས་སུ་ནི། །དགེ་སློང་ལྔ་བརྒྱ་དང་ལྷན་ཅིག །ལྷ་སྦྱིན་གྱིས་ནི་བཟའ་བ་ཟོས། །དེ་ཚེ་འདུས་ཤིང་ཟ་བ་དྲན། །མཉན་ཡོད་སྐྱེད་མོས་ཚལ་དུ་ནི། །ཁྱིམ་པ་རྣམས་དང་ལྷན་ཅིག་ཏུ། །བཅུ་བདུན་སྡེ་ཡིས་བཟའ་བ་ཟོས། །དེ་ཕྱིར་དུས་མིན་བསླབ་པ་བཅས། །དགེ་སློང་ནག་པོས་འབྲས་ཆན་ནི། །བསོད་སྙོམས་བྱས་ཏེ་བསྐམ་བྱས་ནས། །བཞག་པར་བྱས་པ་མ་ཡིན་ནམ། །དེ་ཕྱིར་དེ་ནི་བསླབ་པ་བཅས། །དུར་ཁྲོད་གཅན་གཟན་ཟོས་པའི་ཕྱིར། །ནག་པོ་ཆེན་པོ་སྨད་པ་ཡིན། །བྱིན་ལེན་མ་བྱས་པ་ཡི་ཟས། །བཀག་པ་དྲུག་སྡེ་རྣམས་ཀྱིས་ཟོས། །དེ་མ་ཐག་ཏུ་སེར་སྐྱ་བཞིན། །མིང་ཆེན་གྱི་ནི་གནས་སུ་ནི། །ཟ་བཞིན་པ་ཡི་དྲུག་སྡེ་ཡིས། །གཞན་ནས་འོ་མ་བླངས་ནས་སྤྱད། །འདུས་པས་སྲོག་ཆགས་དང་འདྲེས་པའི། །ཆུ་ནི་གང་ཕྱིར་ཉེར་སྤྱད་པ། །དེ་ཕྱིར་བཅོམ་ལྡན་འདས་ཀྱིས་ནི། །ཀཽ་ཤཱམ་བཱིར་ནི་བཀག་ཅེས་གྲགས། །ཚོང་པ་ཆགས་དེ་ལ་གནོད་ཕྱིར། །འཆར་ཀ་ཁྱིམ་དུ་མྱུར་སོང་ནས། །ཆོས་ནི་སྟོན་པར་བྱེད་པ་ཡིས། །གནས་པར་འགྱུར་བ་མ་ཡིན་ནམ། །དེར་དེ་ལྟ་བུའི་རྣམ་པ་རུ། །ཤེས་ནས་འཆར་ཀ་དེ་བཞིན་ཡང༌། །ཁྱིམ་དུ་མྱུར་དུ་སོང་ནས་ནི། །སྒོ་ཡི་རྒྱབ་ཏུ་གནས་པ་ཡིན། །མཉན་ཡོད་སྐུད་འཁལ་རྣམས་ཟས་ལ། །འཕགས་པ་ཀུན་དགའ་ཞལ་ཏ་བྱེད། །གཅེར་བུ་མོ་ལ་འཁུར་བ་གཉིས། །ལྟུང་བས་ཉེས་པ་ཀུན་ནས་སློང༌། །དམག་ནི་འཐབ་ཕྱིར་ཡང་དག་འབྱུང༌། །དྲུག་སྡེས་བོང་བུ་ལྟར་སྨྲས་པས། །ཁྲོས་པར་གྱུར་པ་དེ་ཡི་ཚེ། །
དམག་ལ་ལྟ་བར་གྱུར་པ་བཀག །དེ་ཚེ་དེ་ལྟར་ཉིད་སོང་བ། །དེ་དག་གིས་ནི་སྨད་ཅིང་དཀྲུགས། །གནས་པར་མི་བྱ་རྐྱེན་ཡོད་ན། །ནུབ་གཉིས་བར་དུ་གནས་པར་བྱ། །གང་ཕྱིར་དེ་ན་གནས་པས་ཀྱང༌། །བཤམས་པའི་རིམ་པ་དཀྲུགས་བྱེད་ཅིང༌། །འཇིགས་པ་སྐྱེད་པར་བྱེད་པ་ཉིད། །དེ་ཕྱིར་ཐུབ་པས་བཀག་པ་ཡིན། །ཉེ་དགའ་ལ་ནི་བརྟེན་པ་ནི། །བཅུ་བདུན་སྡེ་རྣམས་བཙོ་བླག་གི །ལས་ཀྱི་དོན་དུ་རབ་ཏུ་བོས། །དེ་དག་མི་ཉན་དེ་ཚེ་རྡེག །དེ་བཞིན་དུ་ནི་ལས་བྱའི་ཕྱིར། །མངོན་བརྗོད་གང་ཚེ་མི་བྱེད་ལ། །དེ་ཡིས་དེ་དག་རྡོག་པར་གཟས། །དེ་ཚེ་བསླབ་པ་བཅས་པ་ཡིན། །དགེ་འདུན་ལྷག་མ་བཅས་པར་ནི། །དགེ་སློང་ཆོས་ཀྱིས་མཐོང་འགྱུར་ཏེ། །ཉེ་དགའ་ཡིས་ནི་བཟློག་བྱས་ཀྱང༌། །དེས་ནི་དགེ་འདུན་ལ་རིག་བྱས། །སྔོན་གྱི་གནོད་པ་བྱེད་པ་ཡི། །རྒྱུ་མཚན་ཡོངས་སུ་བསམས་ནས་ཀྱང༌། །ཉེ་དགས་དགེ་སློང་ཆོས་ཀྱི་ནི། །ཟན་ནི་ཡོངས་སུ་གཅོད་པར་བྱེད། །ལྗོན་པ་ལ་ནི་མེ་བཏང་བས། །སྦྲུལ་ནི་ལྟུང་བར་གྱུར་ཕྱིར་དང༌། །དྲུག་སྡེས་མགལ་མེས་བསྐོར་བྱས་ཕྱིར། །མེ་ལ་རེག་པ་བཀག་པ་ཡིན། །ཉེ་དགའ་གནས་ནས་དབྱུང་བའི་ཕྱིར། །དགེ་སློང་རྣམས་ཀྱིས་སྦྱོར་བ་བརྩམས། །འདུན་པ་བྱིན་པ་དགའ་བ་ཡིས། །སླར་ནི་ཉམས་པར་བྱས་པ་ཡིན། །དགེ་ཚུལ་རྣམས་དང་དགེ་སློང་རྣམས། །ལྷན་ཅིག་ཏུ་ནི་ཉལ་བ་བཀག །སྒྲ་གཅན་འཛིན་ལ་བརྟེན་ནས་ནི། །ནུབ་གཉིས་རྗེས་སུ་གནང་པ་དང༌། །རྒྱལ་པོའི་ཁབ་ཏུ་བད་ཚ་ཆོས། །སྡིག་ཅན་ལྟ་བུ་ཀུན་ཏུ་སྐྱེས། །ཉེས་བ་བྱེད་པའི་འཆི་ལྟས་ནི། །བཟློག་བཞིན་དུ་ཡང་དེ་མི་གཏོང༌། །གནས་ནས་ཕྱུང་ཡང་ཉེ་དགའ་ཡིས། །འདུ་འཛིའི་གཏམ་གྱིས་གནས་པར་བྱེད། །སྔར་སྨོས་ཆོས་དང་ཟང་ཟིང་གིས། །མཆོག་ཏུ་ལྟུང་བ་བཅས་པར་འགྱུར། །ལྟུང་བ་བྱུང་ནས་གྲོལ་བ་ཡང༌། །ཚེར་མ་དང་ནི་ཆེན་པོ་པའི། །མཐོང་བའི་ཡུལ་དུ་གྱུར་བའི་བར། །བསྙིལ་བསྡུད་པ་ཡི་ཉེས་པ་ཡིན། །རི་བོ་ཡིད་འོང་དུས་སྟོན་ཚེ། །གར་མཁན་གྱི་ནི་བཞད་གད་པའི། །དྲུག་སྡེ་དག་གིས་དཀར་པོའི་གོས། །གོན་བྱས་དེ་ནི་མི་བྱའོ། །ལི་ཙྪའི་སྐྱེད་མོས་ཚལ་དང་ནི། །རོལ་མོ་རྒྱན་དང་དེ་བཞིན་དུ། །གཡུལ་འགྱེད་པ་ན་སྤྱོད་པའི་ཕྱིར། །
ཡངས་པར་རིག་པའི་ཉེས་པ་བྱུང༌། །རྒྱལ་པོ་ཁབ་ཀྱི་ཆུ་དྲོན་དུ། །དྲུག་སྡེ་དག་གིས་གཟུགས་ཅན་སྙིང༌། །གནོད་བྱས་དེ་ནི་རབ་ཏུ་བཀག །ཇི་སྲིད་ཟླ་ཕྱེད་རྗེས་སུ་གནང༌། །འཆར་ཀ་ཡིས་ནི་མཉན་ཡོད་དུ། །བསོད་སྙོམས་དོན་དུ་འགྲོ་བྱེད་པས། །འཕོང་ཀི་གནས་སུ་ཞུགས་ནས་ནི། །ཇི་སྲིད་བྱ་རོག་གསད་པར་བྱས། །ཉེ་དགའ་ཡིས་ནི་བགྲོས་བྱས་ནས། །ཤིན་ཏུ་ཐོས་པར་འཛིན་བྱེད་པའི། །གཞོན་ནུ་བཅུ་བདུན་སྡེ་རྣམས་ལ། །འགྱོད་པ་སྐྱེད་པའི་གཏམ་བྱས་སོ། །དེ་རྣམས་ཀྱི་ནི་གནས་དང་གཅིག །དགེ་སྐོས་སུ་ནི་ཡང་དག་སྦྱར། །ཡང་དག་ནང་དུ་ཞུགས་གཉིད་ལོག །དེ་ཁྲོས་ག་ག་ཚིལ་གྱིས་ཤི། །དེ་དག་ཆུ་ཀླུང་གནས་ཅན་དུ། །རྩེད་མོས་ཀུན་ཏུ་གནས་པའི་ཕྱིར། །རྒྱལ་པོས་མི་དག་རིག་པར་བྱེད། །ཆུ་ལ་རྩེ་བ་བཀག་པ་ཡིན། །མ་འགགས་པས་ནི་ལམ་ཞུགས་པས། །སྐྱེས་བུ་མེད་པའི་བུད་མེད་དང༌། །ལྷན་ཅིག་ཁྱིམ་དུ་ཉལ་བྱས་པས། །དེ་ཕྱིར་ཉེས་དམིགས་བྱུང་བར་གྱུར། །ཉེ་དགས་ལ་བ་གྱོན་ནས་ནི། །མཚན་མོ་ཀློག་པ་མངོན་བརྩོན་པའི། །བཅུ་བདུན་སྡེ་ཡི་བདག་ཉིད་དག །ངེས་པ་ཉིད་དུ་སྐྲག་པར་བྱེད། །ཉེ་དགའ་ལ་སོགས་པ་དག་གིས། །ཆུ་ནང་ནུབ་པ་བཅུ་བདུན་སྡེའི། །ལྷུང་བཟེད་ལ་སོགས་སྦ་བྱས་པས། །བཟའ་བའི་དོན་དུ་སོང་བ་ཡིན། །ཉེ་དགས་རང་གི་ཆོས་གོས་ནི། །སློབ་མ་རྣམས་ལ་བྱིན་པ་དག །སླར་ནི་སྤྱད་ནས་སླར་ཡང་ནི། །དེ་བཞིན་དུ་ནི་བཞག་པ་ཡིན། །རྒྱལ་པོའི་ཁབ་ཏུ་དེ་བཞིན་དུ། །གྱད་བུ་ནོར་ལ་དེ་དག་གིས། །ཆོས་གོས་མགོ་ལ་རེག་མཐོང་ནས། དགེ་འདུན་ལྷག་མས་སྐུར་པ་བཏབ། །དགེ་སློང་མཉན་ཡོད་དུ་འགྲོ་ཞིང༌། །ཐག་མཁན་བུད་མེད་དེ་བཞིན་སོང༌། །ང་ཡི་ཆུང་མ་འདིར་ཁྱེར་སྙམ། །ཐག་པ་ཡིས་ནི་བརྡེག་པར་བྱས། །རྒྱལ་པོའི་ཁབ་ཏུ་དགེ་སྦྱོང་ཞིག །ཤོ་གམ་འཇོམས་པའི་ཚོང་པ་དང༌། །ལྷན་ཅིག་འགྲོ་བར་གྱུར་པ་ན། །ཤོ་གམ་པས་མཐོང་བཅོམ་པར་གྱུར། །འཕགས་པ་སྤངས་ནས་སྐྱེས་པ་དེས། །བྱིས་པ་ཉི་ཤུ་མ་ལོན་པ། །བསྙེན་པར་རྫོགས་པར་བྱས་པ་དག །དེ་དག་བཀྲེན་པས་ངུ་བར་བྱེད། །ཉེ་དགའ་ལ་སོགས་རྣམས་ཀྱིས་ནི། །མཉན་ཡོད་དུ་ནི་བརྟེན་བྱས་ནས། །ས་ནི་རྐོའམ་
རྐོར་འཇུག་བྱས། །དེ་ཕྱིར་ཆད་པས་ཀུན་ནས་བསླང༌། །མིང་ཆེན་གྱིས་ནི་ཟླ་བ་བཞིར། །འཕགས་པའི་དགེ་འདུན་བསྟབས་པས་ན། །དྲུག་སྡེ་དེ་ལས་ལྷག་པར་ཡང༌། །སྤོང་བར་བྱེད་པས་དེ་ཕྱིར་བཀག །དགེ་འདུན་གཉིས་གཏོགས་བསླབ་པ་ནི། །ལམ་པ་ཡིས་ནི་བསྒོ་བྱས་པ། །རྨོངས་པ་ཁྱོད་ལ་སུ་ཞིག་སློབ། །དྲུག་སྡེ་དག་གིས་རབ་ཏུ་སྤངས། །བཅུ་བདུན་སྡེ་ཡི་བདག་ཉིད་ནི། །དྲུག་སྡེ་གནས་ནས་དབྱུང་བའི་ཚེ། །མཉན་ཡོད་དུ་ནི་གྲོས་བྱེད་པར། །དེ་དག་སོང་ནས་ཉན་རྣ་བྱས། །ཉེ་དགའ་གནས་ནས་དབྱུང་ལ་སོགས། །དེ་ལྟར་དེ་དག་གིས་བརྩམས་པ། །སྟན་ལ་ལ་བ་བཞག་ནས་ནི། །དེ་ཕྱིར་དགའ་བོ་མི་སྨྲ་སོང༌། །གང་ཚེ་དགེ་འདུན་གྱིས་ངེས་པར། །རྩོད་པ་ཞི་བར་བྱས་པ་ན། །དགེ་སློང་ནག་པ་རྒྱལ་ཁབ་ཏུ། །མ་གུས་པ་ནི་བྱས་པ་ཡིན། །འཕགས་པ་ལེགས་འོང་བཟང་པོ་ཡིས། །ཆང་དང་བསྲེས་པའི་བཏུང་བ་དག། མཉན་ཡོད་དུ་ནི་འཐུངས་ནས་སུ། །མྱོས་པར་གྱུར་པས་སྲང་དུ་འགྱེལ། །གཏུམ་མོའི་མནའ་མའི་ཁྱིམ་དུ་ནི། །འཆར་ཀས་སྟན་ལ་ཉེར་སྤྱད་ཕྱིར། །སོང་བར་གྱུར་ནས་ཇི་སྲིད་དུ། །ཉེ་བར་བསད་པར་གྱུར་པ་ཡིན། །ཁྱིམ་པ་རབ་ཏུ་དད་གྱུར་པས། །ཇི་སྲིད་དེ་ཡི་ཚིག་གིས་ནི།། དགེ་འདུན་མགྲིན་དུ་བོས་པས་ན། །ཉེ་དགའ་ཁྱིམ་གཞན་སོང་ནས་འདུག །དེས་ནི་འཆར་ཀ་མྱུར་རབ་ཏུ། །འཕྲེང་ལྡན་མ་ནི་གློག་པའི་ཕྱིར། །བཙུན་མོའི་ཕོ་བྲང་དུས་མིན་སོང༌། །བསླབ་པ་བཅས་པ་ཀུན་ནས་བསླང༌། །དྲུག་སྡེ་རྣམས་ནི་སོ་སོར་ཐར། །མ་གུས་པས་ནི་ཉན་པར་བྱེད། །འདི་ནི་སངས་རྒྱས་ཀྱིས་བཤད་པར། །ཁོ་བོ་ཅག་གིས་དག་གདོད་ཐོས། །བ་སོ་མཁན་པོ་ཆོས་ཀྱིས་ནི། །རང་བཟོས་དགེ་སློང་མགྲོན་དུ་གཉེར། །སྦྱིན་པའི་སྦྱོར་བས་ལོངས་སྤྱོད་དག །ཟད་པར་ཉེ་བར་སོང་བར་གྱུར། །རྐང་པ་དམའ་བའི་ཁྲི་དག་ཀྱང༌། །སྔོན་ནི་སྡོམ་བརྩོན་ལྟ་བུ་ཡི། །དབང་དུ་བྱས་ནས་བཀག་པ་སྟེ། །ཁྲུ་གང་གི་ནི་ཚད་དང་ལྡན། །དགེ་འདུན་ཁྲི་ནི་ཉེ་དགའ་ཡི། །གཞན་གྱིས་ཐོབ་པར་འགྱུར་སྙམ་དུ། །ཤིང་བལ་གྱིས་ནི་གོས་པར་བྱས། །ཤིང་བལ་གྱིས་ནི་དཀར་པོར་གྱུར། །དགེ་སློང་མང་པོ་ལ་བརྟེན་ནས། །གོས་ཀྱི་ཚོགས་ནི་
མང་དུ་གྱུར། །གདིང་བའི་ཚད་ནི་མཐོ་གསུམ་སྟེ། །ཞེང་དུ་ཕྱེད་ཀྱི་ཚད་ཡིན་ནོ། །གཡན་པའི་ནད་ལ་བརྟེན་ནས་ནི། །གཡན་པ་དག་པ་པར་བཤད་པ་ཡིན། །མཐོ་བཞི་དང་ནི་མཐོ་གཉིས་ཀྱི། །ཚད་དང་ལྡན་པའི་བར་དུ་བྱས། །ཆོས་གོས་བསྲུང་བར་བྱ་བའི་ཕྱིར། །དབྱར་གྱི་གོས་ནི་རས་ཆེན་བྱ། །མཐོ་རྣམས་ཕྱེད་དང་གསུམ་དང་ནི། །དྲུག་དག་ཁོ་ན་ལྷག་མི་བྱ། །ཉེ་དགའ་ཡིས་ནི་མཉན་ཡོད་དུ། །ཐུབ་པ་ཡིས་ནི་ཆོས་གོས་བྱས། །མཐོ་བཅུ་དག་གི་ཚད་དང་ནི། །དྲུག་ཅེས་བྱ་བ་དག་ཀྱང་ཡིན། །ད་ནི་སོ་སོར་བཤགས་པའི་ཆོས། །བཤད་པར་བྱས་ཏེ་གཞན་དག་གི །བྱུང་བ་རྗེས་སུ་འབྲངས་ནས་ནི། །འཆང་བར་འགྱུར་བ་དེ་བཞིན་བཤད། །རྒྱལ་པོའི་ཁབ་ཏུ་ཉ་དགའ་ཡིས། །ཨུཏྤ་ལ་མདོག་དགེ་སློང་མའི། །བསོད་སྙོམས་དག་ནི་རབ་ཏུ་བླངས། །ཀུན་ཏུ་བརྒྱལ་ནས་སལ་འགྱེལ། །དྲུག་སྡེས་བདག་ཅག་མཉན་ཡོད་དུ། །སྦོམ་དགའ་མོ་ལ་སྟོན་མོའི་ཚེ། །གྱ་ནོམ་བསྐོ་ཤམ་གྱིས་ཞེས་བརྗོད། །དེ་ཡིས་ཀྱང་ནི་དེ་ལྟར་བྱས། །ཡངས་པ་ཅན་དུ་སྦྱིན་བཏང་བས། །སེང་གེའི་ལོངས་སྤྱོད་མ་ལུས་འགྲིབ། །དེ་ཕྱིར་ཁྱིམ་དུ་བསོད་སྙོམས་ཕྱིར། །འགྲོ་བར་མི་བྱ་ཞེས་གྲགས་སོ། །དགོན་པ་དྲུག་སྡེ་རྣམས་ལ་ནི། །སེར་སྐྱ་གཞི་ན་གནས་པ་ཡི། །གོས་དང་བྲལ་བའི་བུད་མེད་རྣམས། །དེ་ཡིས་བྱིན་ལེན་སྟོབས་སུ་བཅུག །རི་དགས་གནས་སུ་སྡོམ་བརྩོན་གྱིས། །ཁྱིམ་པ་རྣམས་ཀྱི་ཚུལ་དུ་ནི། །ཆོས་གོས་རྣམས་ནི་གོམས་པར་འགྱུར། །ཟླུམ་པོ་རུ་ནི་དྲུབ་པར་བྱ། །སྨད་གཡོགས་ཀྱི་ནི་དྲུག་དག་དང༌། །སྟོད་གཡོགས་ཀྱི་ནི་གསུམ་རྣམས་ཀྱི། །བྱེད་པ་པོ་ནི་དྲུག་སྡེར་བཤད། །དེ་ཕྱིར་བསླབ་པ་རབ་ཏུ་བསྟན། །ཤིན་ཏུ་བསྡམ་སོགས་ལྔ་རྣམས་དང༌། །མགོ་གཡོགས་སོགས་ཀྱིའང་དེ་བཞིན་དུ། །མཆོད་སོགས་ལྡན་པ་ལྔ་རྣམས་ཀྱི། །ལུས་དག་ལྔ་ནི་དེ་བཞིན་ནོ། །བྲམ་ཟེའི་སྟན་ལ་མཉན་ཡོད་དུ། །ཉེ་དགའ་འདུག་པ་ལ་བརྟེན་ནས། །རྗེས་སུ་གནང་བ་མ་བྱས་པར། །སྟན་ལ་འདུག་པ་བཀག་པ་ཡིན། །འཕགས་པ་འཆར་ཀ་ལ་བརྟེན་ནས། །བྱིས་པ་བསད་པར་གྱུར་པ་ཡིན། །དེ་ཕྱིར་ཁྱིམ་དུ་མ་བརྟགས་པར། །
སྟན་ནི་རབ་ཏུ་བཀག་པ་ཡིན། །བཙུན་མོའི་འཁོར་དུ་མ་སྦྱངས་པའི། །ཁྲིའུ་ལ་ནི་འདུག་པའི་ཕྱིར། །དེ་ཕྱིར་དེ་ལ་བརྟེན་ནས་ནི། །ལུས་ཀུན་གྱིས་ནི་འདུག་པ་དཀའ། །འཆག་པར་འགྱུར་བ་དྲུག་པོ་ཡི། །འདུག་པའི་བདག་ཉིད་དག་གི་ཡང༌། །བྱེད་པོ་དྲུག་སྡེར་ཤེས་བྱ་ཡི། །གཞན་ནི་བརྗོད་པར་མི་བྱ་ཡི། །བྱིས་པ་གསོད་རི་མཉན་ཡོད་དུ། །རྟོགས་ལྡན་ཁྱིམ་དུ་དྲུག་སྡེ་ཉིད། །བྱིན་ལེན་བརྒྱད་ཀྱི་བྱེད་པ་པོར། །ཡང་དག་པར་ནི་བཤད་པ་ཡིན། །ཟས་བྱས་ལེགས་བྱས་ལྔ་རྣམས་ཀྱི། །ཙུག་ཙུག་ལ་ཡང་དེ་བཞིན་ནོ། །ཐ་དད་བྱེད་པ་ལྔ་རྣམས་ཀྱི། །མཉན་ཡོད་དུ་ནི་ཤེས་པར་བྱ། །ལག་པ་ལྡག་པ་ལྔ་རྣམས་དང༌། །འཕྱ་བ་དག་ནི་གསུམ་པོ་དང༌། །རྟོགས་ལྡན་ཁྱིམ་དུ་ཆུ་འབོད་པའི། །གང་ཡིན་པ་ནི་བཞི་པ་ཡི། །ལྷུང་བཟེད་གཅིག་གིས་དྲུག་སྡེ་ཡིན། །དགུ་པོ་ཡིས་ནི་དགེ་སློང་གཞན། །འགྲེང་བར་བྱེད་སོགས་ལྔ་པོ་ནི། །དྲུག་སྡེ་ཞེས་བྱར་རབ་ཏུ་གྲགས། །མགོ་གཡོགས་ལ་སོགས་ལྔ་རྣམས་དང༌། །དེ་བཞིན་གླང་ཆེན་སོགས་ཞོན་བ། །དོ་ཀེར་ཅན་སོགས་ལ་དེ་བཞིན། །འཁར་བ་དྲུག་ལ་དེ་ཉིད་ཤེས། །ཉེ་དགའ་ཡིས་ནི་བཤད་པ་དག །འགྲེངས་ནས་བཏང་པར་བྱས་པ་དག །སེར་སྐྱའི་གྲོང་དུ་དེ་དག་ཉིད། །དེ་ཡིས་རྩྭ་སྔོན་ཉམས་པར་བྱས། །བཙོ་གླག་མཁན་གྱི་བཀྲུ་བཤལ་སར། །ཉེ་དགས་མི་གཙང་བས་བཀང་བའི། །གྱོ་མོ་རབ་ཏུ་བཅུག་པ་ཡིན། །དེ་ཕྱིར་སྨོད་པ་ཀུན་དུ་སློང༌། །མཉན་ཡོད་དུ་ནི་ལྗོན་ཤིང་རྩེར། །མངོན་པར་འཛེག་པར་བྱས་ནས་ནི། །བསོད་སྙོམས་ལེན་པའི་དགེ་སློང་ལ། །ལྟ་བ་རབ་ཏུ་བརྩམས་པ་ཡིན། །འགྱེད་དང་མི་གདམས་པ་དང་ནི། །ལྟུང་དང་བྱ་བ་ཞེས་བྱ་བའི། །རྩོད་པ་བཞི་པོ་འདི་དག་ཉིད། །རྗེས་སུ་རྟོགས་པར་བྱ་བ་ཡིན། །མུ་ཏིག་གིས་ཕུལ་མུ་ཏིག་ལས། །ཆོས་ཀྱི་སྐལ་བ་བགོ་བའི་ཕྱིར། །མདོ་སྡེ་འཛིན་སོགས་རྩོད་པ་ལས། །མཉན་ཡོད་དུ་ནི་དེ་དག་བྱུང༌། །གང་མང་རབ་ཏུ་འབྱེད་པ་དང༌། །གཅིག་ཏུ་ངེས་པར་བྱེད་པ་ཡིས། །གཉིས་ཀྱིས་འགྱེད་པ་ཞི་བྱེད་པ། །སྔོན་ནི་ཐུབ་པས་བསྟན་པ་ཡིན། །མངོན་སུམ་དྲན་དང་མ་སྨྱོས་པས། །མི་གདམས་པ་ནི་ཞི་བར་བྱེད། །ཡང་དག་ལྟུང་བའི་རང་བཞིན་གྱིས། །གསུམ་པ་གཞན་ནི་ཁས་བླངས་
དང། །རྩྭ་བཀྲམ་པ་དང་མངོན་སུམ་དང༌། །དེ་ཉིད་ཚོལ་བས་ཞི་བར་བྱེད། །བྱ་བའི་བདག་ཉིད་ཞི་བ་ནི། །བདུན་པོ་དེ་ཡིས་ངེས་པར་འགྱུར། །བསླབ་པ་འདོད་པའི་དགེ་སློང་གིས། །རྩོད་པ་སྟན་ལ་དབབ་བྱའི་ཕྱིར། །གནས་ནི་རབ་ཏུ་གཟུང་བྱ་སྟེ། །བརྩོན་པས་གནས་ནི་རྣམ་པར་དབྱེ། བསྡུས་པའི་དགེ་པ་འདི་ལས་ནི། །བདག་གིས་བསོད་ནམས་གང་བསགས་དེས། །འདི་ནི་འཇིག་རྟེན་ཉོན་མོངས་དང༌། །ཉེ་བའི་ཉོན་མོངས་སྤོང་བར་ཤོག །བསླབ་པའི་ས་ལ་བརྟེན་ནས་ནི། །མདོ་ཡི་གཞུ་ནི་བཟུང་ནས་ནི། །སེམས་ཀྱི་མདའ་ནི་བཀང་བྱས་ནས། །ཉོན་མོངས་དགྲ་རྣམས་ཉམས་པར་བྱས། །གལ་ཏེ་ཁྱོད་ལ་ཐར་པ་ཡི། །ཁྱིམ་དུ་གནས་པར་འདོད་ཡོད་ན། །དེ་ལྟ་བས་ན་ཁྱོད་ཀྱིས་ནི། །སེམས་ཅན་དོན་བྱེད་ལ་འབད་ཀྱི། །བྱང་ཕྱོགས་ཀྱི་ཁ་ཆེའི་ཡུལ་ནས་བྱུང་བའི་པཎྜི་ཏ་འདུལ་བ་འཛིན་པ་ཤཱཀྱའི་དགེ་སློང་བ་ལ་ཤྲཱི་བྷ་དྲས་མཛད་པ་གླེང་གཞི་དང་གང་ཟག་བསྡུས་པའི་ཚིག་ལེའུར་བྱས་པ་རྫོགས་སོ།། །།ཐོ་ལིང་གི་གཙུག་ལག་ཁང་དུ་རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང༌། ལོ་ཙཱ་བ་ཤཱཀྱའི་དགེ་སློང་གཞོན་ནུ་མཆོག་གིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།