དགེ་ཚུལ་གྱི་དང་པོའི་ལོ་དྲི་བ།
རྒྱ་གར་སྐད་དུ། ཤྲ་མ་ཎེ་ར་པཪྵཱ་གྲཾ། བོད་སྐད་དུ། དགེ་ཚུལ་གྱི་དང་པོའི་ལོ། སངས་རྒྱས་ལ་ཕྱག་འཚལ་ལོ། །མཁན་པོ་དགོངས་སུ་གསོལ། ཕྱག་འཚལ་ལོ།། དགུང་ལ་ཀུན་དུ་བདེའམ་ཞེས་དྲི། ཆག་ཆག་དང་ཕྱག་དར་དང་དཀྱིལ་འཁོར་བགྱིད། ཀློག་པ་དང༌། ཁ་ཏོན་དང་དགེ་བའི་ཕྱོགས་ཀྱི་ཀུན་དུ་སྤྱོད་པ་རྣམས་ལ་ཆོས་དང་མཐུན་པར་བགྱིད། གཎྜཱིའི་དུས་སུ་བརྗོད་པར་བྱ་བ་ཡང་ངོ༌། །མཁན་པོ་དགོངས་སུ་གསོལ། །ཕྱག་འཚལ་ལོ། །བདེ་བར་གསོལ་ལམ་ཞེས་དྲི། ཀློག་པ་དང་ཁ་ཏོན་བགྱིད། ངལ་བསོ་བ་ཡང་ངོ༌། །མཁན་པོ་དགོངས་སུ་གསོལ། ཕྱག་འཚལ་ལོ། །གདུགས་ལ་ཀུན་དུ་བདེའམ་ཞེས་དྲི། རྐང་པ་དག་བཀྲུ། མཆིས་མལ་བཤམ། སྲོད་དང་ཐོ་རངས་ལ་མི་ཉལ་བར་སྦྱོར་བ་བགྱིད།
ངལ་སོ་བ་ཡང་ངོ༌། །སློབ་དཔོན་དགོངས་སུ་གསོལ། ཕྱག་འཚལ་ལོ། །དགུང་ལ་ཀུན་ཏུ་བདེའམ་ཞེས་དྲི། ཆག་ཆག་དང་ཕྱག་དར་ཡང་དེ་བཞིན་ནོ། །བདག་དཀྱིལ་འཁོར་བགྱིད་ཅེས་སོ། །ཀློག་པ་དང་ཁ་ཏོན་དང་དགེ་བའི་ཕྱོགས་ཀྱི་ཀུན་དུ་སྤྱོད་པ་སྦྱིན་པ་ལ་སོགས་པའོ། །གཎྜཱིའི་དུས་སུ་ཡང་ཟས་སོ། །འཆག་པ་དང་འདུག་པ་དང་ཞབས་ལ་བསྐུ་མཉེ་ལ་སོགས་པའོ། །ཐོས་པ་དང་བསམ་པ་ལ་སོགས་པ་ཐམས་ཅད་བགྱིད། དེ་ནི་ཁྱོད་ཀྱི་རྗེས་སུ་གནང་བས་སོ། །རྒྱལ་པོ་ཤག་བྱུང་བའི་དུས་ན་ལོ་དགུ་བརྒྱ་བཞི་བཅུ་རྩ་ལྔ་ལོན་པའི་འོག་ཏུ་དཔལ་ལྡན་ས་སྐྱོང་ལྷ་རྣམ་པར་རྒྱལ་བས་རྒྱལ་སྲིད་མཛད་ནས་ལོ་བཅུ་དགུ་འདས་པ་ན། དབྱར་ཟླ་ར་བའི་མར་གྱི་ངོའི་ཚེས་གསུམ་ལ་ཡུལ་མ་ག་དྷཱའི་དཔལ་སེང་གེ་གོ་ཆ་འབྱུང་བའི་གཙུག་ལག་ཁང་ཆེན་པོར་རབ་ཏུ་བྱུང༌། བདག་ཉིད་ནི་ཤཱཀྱའི་དགེ་ཚུལ་མཐའ་ཡས་དཔལ་སྐྱོང་ངོ༌། །ཚེ་དང་ལྡན་པ་ཁྱོད་ལོ་དུ་ལོན་ཞེ་ན། ལོ་དུ་ལོན་པའམ་མ་ལོན་ནོ། །དུས་གང་ཞེ་ན་སོ་གའོ། །སོ་ག་ནས་ཅི་ཙམ་ན་ཐོབ་ཅེ་ན། ཞག་གཉིས་དམན་པའི་ཟླ་བ་གསུམ་མོ། །ཟས་ཀྱི་སྔ་རོལ་ལམ་ཟས་ཀྱི་འོག་རོལ་ཞེ་ན། བདག་ཟས་ཀྱི་སྔ་རོལ་ལོ། །སྐྱེས་བུ་དང་རྩ་བའི་ཚད་དུ་ཞེ་ན། སྐྱེས་བུ་དང་རྩ་བ་གཅིག་གི་ཚད་ཀྱི་གྲིབ་མའོ། །མཁན་པོ་གང་ཡིན་ཞེ་ན། དོན་གྱི་སླད་དུ་མཚན་ནས་སྨོས་ཏེ་བླ་མ་མཁན་པོ་ལྷ་དབང་སྐྱོང་ངོ༌། །སློབ་དཔོན་གང་ཞེ་ན། བདག་གི་སློབ་དཔོན་རིན་ཆེན་འབྱུང་གནས་སྐྱོང་ངོ༌། །དུས་གང་ཞེ་ན། ལྔ་རྣམས་སོ། །ལྔ་རྣམས་གང་ཞེ་ན། དགུན་དང༌། སོ་ག་དང༌། དབྱར་དང༌། དབྱར་ཐུང་དུ་དང༌། དབྱར་རིང་པོའོ། །དེ་ལ་དགུན་གྱི་ཚད་ཇི་ཙམ་ཞེ་ན། ཟླ་བ་བཞི་རྣམས་སོ། །བཞི་པོ་རྣམས་གང་ཞེ་ན། དགུན་ཟླ་ར་བ་དང༌། དགུན་ཟླ་འབྲིང་པོ་དང༌། དགུན་ཟླ་ཐ་ཆུངས་དང༌། དཔྱིད་ཟླ་ར་བའོ། །སོ་ག་ཇི་ཙམ་ཞེ་ན། ཟླ་བ་བཞི་རྣམས་སོ། །བཞི་པོ་རྣམས་གང་ཞེ་ན། དཔྱིད་ཟླ་འབྲིང་པོ་དང༌། དཔྱིད་ཟླ་ཐ་ཆུངས་དང༌། དབྱར་ཟླ་ར་བ་དང༌། དབྱར་ཟླ་འབྲིང་བོ་རྣམས་སོ། །དབྱར་གྱི་ཚད་ཇི་ཙམ་ཞེ་ན། ཟླ་བ་གཅིག་སྟེ། དབྱར་ཟླ་ཐ་ཆུངས་སོ། །དབྱར་ཐུང་དུའི་ཚད་ཇི་ཙམ་ཞེ་ན། ཉིན་ཞག་གཅིག་
གོ །ཉིན་ཞག་གཅིག་པོ་གང་ཞེ་ན། སྟོན་ཟླ་ར་བའི་ཚེས་གཅིག་གི་ཉིན་ཞག་གཅིག་གོ །དབྱར་རིང་པོའི་ཚད་ཇི་ཙམ་ཞེ་ན། ཉིན་ཞག་དེས་མ་ཆོག་པའི་ཟླ་བ་གསུམ་མོ། །ཟླ་བ་གསུམ་པོ་གང་ཞེ་ན། སྟོན་ཟླ་ར་བ་དང༌། སྟོན་ཟླ་འབྲིང་པོ་དང༌། སྟོན་ཟླ་ཐ་ཆུངས་སོ། །ཡང་སྨྲས་པ། གཅིག་གིས་དམན་པའི་ཟླ་བ་རྣམས། །བཞི་རྣམས་དེ་བཞིན་བཞི་པོ་རྣམས། །ཟླ་བ་གཅིག་ཡིན་ཞག་གཅིག་ཡིན། །ཞེས་བྱ་དུས་རྣམས་ལྔ་པོར་དྲན། །སྡེ་པ་གང་ཞེ་ན། འཕགས་པ་གཞི་ཐམས་ཅད་ཡོད་པར་སྨྲ་བའི་སྡེའོ། །སྡེ་པ་དུ་ཞེ་ན། བཞི་རྣམས་སོ། །བཞི་པོ་རྣམས་གང་ཞེ་ན། འཕགས་པ་ཐམས་ཅད་ཡོད་པར་སྨྲ་བ་དང༌། འཕགས་པ་དགེ་འདུན་ཕལ་ཆེན་པ་དང༌། འཕགས་པ་དགེ་འདུན་མང་བོས་བཀུར་བ་དང༌། འཕགས་པ་གནས་བརྟན་པའོ། །དེ་དག་ལ་དབྱེ་ན་དུ་ཡོད་ཅེ་ན། བཅོ་བརྒྱད་དོ། །བཅོ་བརྒྱད་པོ་རྣམས་གང་ཞེ་ན། ཐམས་ཅད་ཡོད་པར་སྨྲ་བ་རྣམས་ཀྱི་དབྱེ་བ་ནི་བཞིའོ། །དེ་བསྟན་པར་བྱ་སྟེ། འོད་སྲུངས་པ་དང་ས་སྟོན་སྡེ། །ཆོས་སྲུང་བ་ཡི་མིང་ཅན་རྣམས། །གཞི་ཀུན་ཡོད་པར་སྨྲ་བ་སྟེ། །འདོད་པའི་བྱེ་བྲག་འབའ་ཞིག་གི །རྒྱུ་ཡིས་འདི་དག་ཐ་དད་བྱས། །སྟོན་པ་ཐ་དད་ཡོད་མ་ཡིན། །དགེ་འདུན་པ་ལ་ཆེན་དབྱེ་བ་ནི། །དྲུག་སྡེ་ཤར་གྱི་རི་བོ་དང༌། །དེ་བཞིན་བྱང་གི་རི་བོ་དང༌། །དབུས་པ་ཞེས་བྱ་དེ་ལས་གཞན། །རྣམ་པར་ཕྱེ་སྟེ་སྨྲ་བ་དང༌། །གཞན་ནི་དེ་བཞིན་བཏགས་པར་སྨྲ། །འཇིག་རྟེན་འདས་པར་སྨྲ་བ་སྟེ། །དེ་དག་ཏུ་ནི་ཡང་དག་སྨྲ། །མང་པོས་བཀུར་བའི་དབྱེ་བ་ནི། །རྣམ་པ་ལྔར་ནི་མཁས་པས་བསྔགས། །གོས་དམར་བ་དང་སྲུང་བ་པ། །ས་སྒྲོགས་རིས་དང་དེ་བཞིན་གཞན། །མང་དུ་ཐོས་རྣམས་སྨྲ་བ་དང༌། །གནས་མའི་བུ་ཡི་མིང་ཅན་རྣམས། །རྒྱལ་བྱེད་ཚལ་ན་གནས་པ་དང༌། །འཇིགས་བྱེད་རི་ལ་གནས་པ་དང༌།། གཙུག་ལག་ཁང་ཆེན་ལ་གནས་པ། །གནས་བརྟན་རྣམས་ནི་གསུམ་དུ་འདོད། །ཤཱཀྱ་སེང་གེའི་བསྟན་པ་ནི། །དེ་ལྟར་དབྱེ་བ་བཅོ་བརྒྱད་དུ། །གྱུར་ཏེ་འགྲོ་བའི་བླ་མ་དེའི། །སྔོན་གྱི་ཕྲིན་ལས་ངེས་པ་ཡིན། །བསླབ་པ་རྣམས་དུ་ཞེ་ན། བཅུ་རྣམས་སོ། །བཅོ་པོ་རྣམས་གང་
ཞེ་ན། གང་ཞིག་སྲོག་གཅོད་གཞན་གྱི་ནོར་འཕྲོག་དང༌། །མི་ཆངས་སྤྱོད་བརྫུན་བཅོས་པའི་ཆང་ལ་སོགས། །གར་སོགས་ཕྲེང་སོགས་མལ་ཆེན་མཐོ་བ་དང༌། །དུས་མིན་ཟས་དང་གསར་དངུལ་སྤོང་བ་སྟེ། །དགེ་ཚུལ་བརྟུལ་ཞུགས་ཆུ་ལོན་བརྩིགས་པ་དང༌། །མཐར་བྱེད་ང་ཡི་མཚེ་བ་འབྱུང་བའི་ཐབས། །རྫོགས་པའི་བྱང་ཆུབ་དཔལ་ནོད་དབང་བསྐུར་ཡིན། །ཉོན་མོངས་དགྲ་ཡི་གཡུལ་ལས་རྒྱལ་བྱེད་ཚུལ། །ལྟུང་བར་འགྱུར་བའི་ཆོས་དུ་ཞེ་ན། བཞི་རྣམས་སོ། །བཞི་པོ་རྣམས་གང་ཞེ་ན། སྲོག་གཅོད་པ་དང༌། མ་བྱིན་པར་ལེན་པ་དང༌། མི་ཚངས་པར་སྤྱོད་པ་དང༌། མིའི་ཆོས་བླ་མའི་ཚིག་སྨྲ་བའོ། །དགེ་སྦྱོང་དུ་བྱེད་པའི་ཆོས་རྣམས་དུ་ཞེ་ན། བཞི་རྣམས་སོ། །བཞི་པོ་རྣམས་གང་ཞེ་ན། ཁྲོས་ཀྱང་སླར་མི་ཁྲོ་བ་དང༌། གཤེ་ཡང་སླར་མི་གཤེ་བ་དང༌། མཚང་བྲུས་ཀྱང་སླར་མི་བྲུ་བ་དང༌། རྡེག་ཀྱང་སླར་མི་རྡེག་པའོ། །ཡིད་བརྟན་པ་རྣམས་དུ་ཞེ་ན། ལྔ་རྣམས་སོ། །ལྔ་པོ་རྣམས་གང་དག་ཅེ་ན། ཆུ་ཚགས་ཡིད་བརྟན་པ་དང༌། བཀོད་མ་ཡིད་བརྟན་པ་དང༌། རྫིང་བུ་ཡིད་བརྟན་པ་དང༌། དགེ་སློང་ཡིད་བརྟན་པ་དང༌། དགེ་འདུན་ཡིད་བརྟན་པའོ། །ཡོངས་སུ་ལོངས་སྤྱད་པ་རྣམས་དུ་ཞེ་ན། ལྔ་རྣམས་སོ། །ལྔ་རྣམས་གང་ཞེ་ན། བདག་པོས་ཡོངས་སུ་ལོངས་སྤྱད་པ་དང༌། བྱིན་པས་ཡོངས་སུ་ལོངས་སྤྱད་པ་དང༌། རྗེས་སུ་གནང་བས་ཡོངས་སུ་ལོངས་སྤྱད་པ་དང༌། སྐྱིན་པོས་ཡོངས་སུ་ལོངས་སྤྱད་པ་དང༌། ཡོངས་སུ་ལོངས་མ་སྤྱད་པ་དང་ལྔའོ། །དེ་སྐད་དུ་ཡང༌། མི་སློབ་པ་ནི་བདག་པོར་བཤད། །སློབ་པ་བྱིན་ལེན་སྤྱོད་པ་ཡིན། །བསམ་གཏན་འདོན་དང་ལྡན་པ་དང༌། །རྗེས་སུ་གནང་རྣམས་དཀའ་ཐུབ་ཅན། །སྐྱིན་པོས་སྤྱོད་པ་ལྷག་མ་རྣམས། །ལེ་ལོས་ཉམས་པའི་བདག་ཉིད་ཡིན། །གཙུག་ལག་ཁང་སོགས་ཉེར་ལོངས་སྤྱོད། །ཚུལ་འཆལ་རྣམས་ཀྱིས་བཀག་པའོ། །ཞེས་སོ། །ལོ་ཚོགས་རྣམས་ཀྱི་གསོ་སྦྱོང་དུ་ཞེ་ན། ཉི་ཤུ་རྩ་བཞི་རྣམས་སོ། །རྒྱལ་དང་དབོ་དང་ས་ག་ཅན། །ཆུ་སྟོད་ཁྲུམས་སྨད་སྨིན་དྲུག་ཅན། །འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྤྱོད་བཅུ་བཞི་པའོ། །ལྷག་མ་རྣམས་ནི་བཅོ་ལྔ་པའོ། །དགེ་ཚུལ་
གྱི་དང་པོའི་ལོ་དྲི་བ་རྫོགས་སོ།། །།ཁ་ཆེའི་མཁན་པོ་ན་ར་ས་དེ་བ་དང༌། ལོ་ཙཱ་བ་ཤཱཀྱའི་དགེ་སློང་རྒྱལ་བའི་ཤེས་རབ་ཀྱིས་བསྒྱུར་བའོ།། །།