འདུལ་བ་དྲི་བ་རྒྱ་ཆེར་འགྲེལ་པ།
རྒྱ་གར་སྐད་དུ། །བི་ན་ཡ་ཀ་པྲ་ཤྣ་ཊཱི་ཀ །བོད་སྐད་དུ། འདུལ་བ་དྲི་བ་རྒྱ་ཚོར་འགྲེལ་པ། བདེ་བར་གཤེགས་པ་སེང་གེ་མུ་སྟེགས་ཅན་གླང་པོ་ཆེའི་ཚོགས་འཇོམས་པ་ལ་ཕྱག་འཚལ་ལོ། །ཤཱཀྱ་སེང་གེ་ངན་སྨྲ་བའི། །རྐང་གཉིས་འཇོམས་ལ་ཕྱག་འཚལ་ནས། །འདུལ་བའི་དྲི་བ་བསྡུས་པ་ཡི། །དོན་ཙམ་བདག་གིས་བཤད་པར་བྱ། །སྟོན་པ་ལ་གུས་པ་སྐྱེས་པའི་སློབ་མ་རྣམས་ནི་དེས་བསྟན་པའི་དོན་རྣམ་པར་དཔྱད་པའི་རབ་ཏུ་བྱེད་པ་ལ་ཡང་གུས་པ་སྐྱེ་བས་རབ་ཏུ་བྱེད་པར་བརྩམས་པ་ལ་རང་གིས་སྟོན་པ་རབ་ཏུ་བྱེད་པའི་དོན་གསུངས་པའི་ཡོན་ཏན་བརྗོད་པ་སྔོན་དུ་འགྲོ་བའི་ཕྱག་འཚལ་བ་བརྩམ་པར་རྒྱལ་བ་ཉི་མ་ཞེས་བྱ་བ་ལ་སོགས་པ་སྨོས་སོ། །
རྒྱལ་བ་ཉིད་མི་ཤེས་པའི་མུན་པ་སེལ་བའི་ཕྱིར་དང༌། ཡེ་ཤེས་ཀྱི་སྣང་བ་མཛད་པའི་ཕྱིར་ཉི་མ་ཡིན་པས་རྒྱལ་བ་ཉི་མ་སྟེ། སངས་རྒྱས་བཅོམ་ལྡན་འདས་སོ། །དེ་ཉིད་ཀྱི་ཕྱིར་ཐེ་ཚོམ་གྱི་མུན་འཇོམས་ཞེས་བྱ་བ་སྨོས་ཏེ། ཐེ་ཚོམ་ཉིད་མུན་པ་སྟེ་མུན་ནག་གོ །དེ་འཇོམས་པ་ནི་སེལ་བར་མཛད་པ་སྟེ། དངོས་པོ་དང་འབྲེལ་པའི་མི་ཤེས་པ་དྲུངས་ཕྱིན་པར་མཛད་པ་ཞེས་བྱ་བའི་ཐ་ཚིག་གོ །དེ་ལ་ཕྱག་འཚལ་ནས་ཞེས་བྱ་བ་ནི་བྱས་ནས་སོ། །རྒྱལ་བ་ཉི་མ་ཡོན་ཏན་གྱི་ཁྱད་པར་དེ་ལྟ་བུ་དང་ལྡན་པ་དེ་ལ་ཕྱག་འཚལ་ནས་ཅི་ཞིག་བྱ་ཞེ་ན། དྲི་བ་ཀུན་ལས་བཏུས་པ་བཤད་ཅེས་བྱ་བ་སྨོས་ཏེ། དྲི་བ་སྟེ་བརྒལ་ཞིང་བརྟག་པ་རྣམས་བསྡུས་པ་བཤད་དོ། །ཅི་རང་གི་བློས་བྱས་པའི་དྲི་བ་བསླང་ཞིང་བསླངས་ནས་བཤད་དམ་ཞེ་ན། འདུལ་བ་ལས་བཏུས་ཏེ་ཞེས་བྱ་བ་སྨོས་ཏེ། འདུལ་བ་ནི་འདུལ་བའི་སྡེ་སྣོད་ལས་བཏུས་ཏེ། འདིས་སློབ་མ་རྣམས་འདུལ་ཞིང་རྗེས་སུ་སྟོན་པའི་ཕྱིར་རོ། །བྱ་བ་དང་བྱ་བ་མ་ཡིན་པ་ཉེ་བར་སྟོན་པ་གཞུང་གི་ཚད་འབུམ་པའི་ཁྱད་པར་རོ་ཞེས་བྱ་བའི་ཐ་ཚིག་སྟེ་དེ་ལས་སོ། །ཆོས་མངོན་པའི་དྲི་བའི་ཚིག་ལེའུར་བྱས་པ་དག་ཀྱང་ཡོད་པས་དེའི་ཕྱིར་འདུལ་བ་ཞེས་བྱ་བ་སྨོས་སོ། །བཏུས་ཏེ་ཞེས་བྱ་བ་ནི་ཕ་ཀི་ཚུ་ཀི་སིལ་བུར་འདུག་པ་ལས་བཏུས་པ་སྟེ། འདིས་ནི་རང་གི་ཚིག་ལེའུར་བྱས་པ་བྱེད་པ་གཞན་ལ་རག་ལས་པར་རབ་ཏུ་སྟོན་ཏོ། །ཇི་ལྟར་བཏུས་ཏེ་བཤད་ཅེ་ན། ལེགས་ཞེས་བྱ་བ་སྨོས་སོ། །ལེགས་པ་ནི་ཕྱིན་ཅི་མ་ལོག་པ་སྟེ། བདག་གིས་འདི་དག་ཇི་ལྟར་འཕགས་པ་ཉེ་བ་འཁོར་གྱིས་ཞུས་པ་བྱས་པ་རྣམས་བཅོམ་ལྡན་འདས་ཀྱིས་ལན་བཏབ་པ། དེ་བཞིན་དུ་བསྡུས་ཀྱི། རང་གི་བློས་དཔགས་ཏེ་མ་ཡིན་ནོ་སྙམ་དུ་བསམས་པ་ཡིན་ནོ། །མཁས་པ་རྣམས་ནི་དོན་མེད་པའི་རབ་ཏུ་བྱེད་པ་མི་བྱེད་པས་ཅིའི་ཕྱིར་བཤད་ཅེ་ན། གང་ཞིག་གིས་ཞེས་བྱ་བ་ལ་སོགས་པ་སྨོས་ཏེ། གང་ཞིག་ཅེས་བྱ་བ་ནི་འདུལ་བ་ལ་སྡང་བ་སྟེ། མིང་མ་སྨོས་པའི་འདུལ་བ་ལས་ནི་འདི་བྱའོ། །འདི་མི་བྱའོ་ཞེས་བྱ་བ་ནི་འདི་ཙམ་ཞིག་ཡོངས་སུ་ཤེས་པར་འགྱུར་གྱི། འདི་ལས་ཕུང་པོ་དང༌། ཁམས་དང༌། སྐྱེ་མཆེད་དང༌། རྟེན་ཅིང་འབྲེལ་བར་འབྱུང་བ་ལ་སོགས་པའི་ཚིག་གི་དོན་དང་འབྲེལ་བའི་རྣམ་
པར་དཔྱོད་པ་ཡང་མི་བྱེད་ལ། འདིས་དེ་དག་ཡོངས་སུ་ཤེས་པར་ཡང་མི་འགྱུར་བས་རིག་བྱེད་བཞིན་དུ་བླུན་པོར་བྱེད་པའི་ངོ་བོའི་བསྟན་བཅོས་སྐམ་ཐག་ཆད་པ་འདི་རྟོགས་པ་ནི་དོན་མེད་དོ་ཞེས་བྱ་བ་དེ་ལྟ་བུ་ལ་སོགས་པས་བརྙས་པ་སྟེ། ཚིག་གི་དོན་ནི་འདུལ་བའི་ལྔ་ཚན་གྱི་ཡོན་ཏན་མ་ཐོས་པས་བླ་མའི་རིགས་མ་བསྟེན་པ། ངན་སོང་གསུམ་གྱི་གཡང་སར་ལྟུང་བ་ལ་གཅིག་ཏུ་གཞོལ་བ། བདེ་འགྲོ་གཉིས་ལས་ཕྱིར་ཕྱོགས་པ། ཞི་བའི་རྒྱུན་གྱི་གནས་སྐབས་ཐག་བསྲིངས་པ་དང་ཇི་ལྟར་བྲིས་པའི་བསྟན་བཅོས་གཅིག་ཙམ་རྟོགས་པས་བསྟན་བཅོས་ཐམས་ཅད་ཁོང་དུ་ཆུད་པས་འདྲེས་པར་དམ་བཅའ་བ། བདག་ཉིད་བསྟོད་པའི་ཉེས་པ་མ་མཐོང་བ། འདུལ་བ་ལ་སོགས་པའི་བསྟན་བཅོས་རྟོགས་པས་བློ་གསལ་བ། རྣོ་བ་དྲི་མ་མེད་པ། རྣམ་པར་དག་པར་འགྱུར་བ་སྤོང་བར་བྱེད་པའི་ཆེད་དུ་འདི་བརྩམས་སོ་ཞེས་བྱ་བ་ཡིན་ནོ། །དེ་ལ་བརྙས་པ་ནི་མ་གུས་པའམ་སྨོད་པའོ། །དེ་ལ་རིག་པ་ཞེས་བྱ་བ་ནི་འདུལ་བ་ཤེས་པ་སྟེ་འདུལ་བ་འཛིན་པ་ཞེས་བྱ་བའི་ཐ་ཚིག་གོ །རྣམ་སྨོད་ནི་རྣམ་པར་སྨོད་པའོ། །སྙེམས་པ་ནི་དྲེགས་པའམ་ང་རྒྱལ་ལོ། །འཆང་བ་ནི་བསྲེལ་བའོ། །དེའི་ཆེད་དུ་ཞེས་བྱ་བ་ནི་འདུལ་བ་འཛིན་པ་ལ་རྣམ་པར་སྨོད་པའི་ཆེད་དུའོ། །འདི་ཞེས་བྱ་བ་ནི་འདུལ་བའི་དྲི་བ་བསྡུས་པ་སེམས་ལ་གཞག་པའོ། །བརྗོད་དོ་ཞེས་བྱ་བ་ནི་བསྙད་པ་སྟེ། ཕྱི་རོལ་དུ་སྟོན་ཏོ་ཞེས་བྱ་བའི་ཐ་ཚིག་གོ །ཁ་ཅིག་ཞེ་སྡང་གིས་འདུལ་བ་ཤེས་པ་ཁོ་ན་ལ་རྣམ་པར་སྨོད་པར་བྱེད་ཀྱི། འདུལ་བ་ལ་ནི་མ་ཡིན་པས་འདུལ་བ་ལས་ཞེས་བྱ་བ་སྨོས་སོ། །ལ་ལ་ནི་འདི་གཉིས་ལ་སྨོད་པར་བྱེད་ཀྱི་ང་རྒྱལ་གྱིས་ཁོང་གང་བའི་སེམས་ཀྱིས་བདག་ཉིད་ཁོངས་པ་མ་ཡིན་པས་དེའི་ཕྱིར་ཡང་ཞེས་བྱ་བའི་སྒྲས་དེ་ལ་ཡོད་པའི་སྙེམས་པ་བསྡུའོ། །དྲི་བ་ཀུན་ལས་བཏུས་པ་བཤད་དོ་ཞེས་དམ་བཅས་པ་གང་གི་དོན་དུ་འདི་བརྩམས་པ་དེ་བརྗོད་དགོས་པས། སེམས་ཅན་མིའི་འགྲོ་བ་ཡིན་ཞེས་བྱ་བ་ལ་སོགས་པ་སྨོས་ཏེ། སེམས་ཅན་གྱི་སེམས་པ་ཕུན་སུམ་ཚོགས་པའི་ཕྱིར་སེམས་དང་སེམས་ལས་བྱུང་བའི་རྒྱུད་མ་ཉམས་པ་སྟེ། ཐ་སྙད་པའི་བློ་མ་ཉམས་པ་ཞེས་བྱ་བའི་དོན་ཏོ། །སེམས་
ཅན་ཞེས་སྨོས་པས་ནི་སྨྱོན་པ་ལ་སོགས་པ་བཀག་གོ །མིའི་འགྲོ་བ་ནི་མིའི་འགྲོ་བར་སྐྱེས་པ་སྟེ། མིའི་འགྲོ་བ་ཞེས་སྨོས་པས་ནི་མིའི་འགྲོ་བ་མ་ཡིན་པ་བསལ་ཏོ། །བར་ཆད་རྣམས་ཀྱང་བསལ་བ་ལ་ཞེས་བྱ་བ་ནི་མ་བསད་པ་དང་ཕ་བསད་པ་ཉིད་ལ་སོགས་པ་སྡོམ་པ་སྐྱེ་བའི་གེགས་བྱེད་པ་རྣམས་མེད་པའོ། །སྡོམ་པ་ནི་དགེ་ཚུལ་ལ་སོགས་པའི་ངོ་བོ་སྟེ། འཆལ་བའི་ཚུལ་ཁྲིམས་ཀྱི་རྒྱུན་འགོག་པར་བྱེད་པའོ། །མི་འཆགས་པ་ནི་མི་སྐྱེ་བའོ། །གསུངས་པ་ནི་བཅོམ་ལྡན་འདས་ཀྱི་འདུལ་བ་ལས་སོ། །ཇི་ལྟ་བུ་ཡིན་ཞེས་བྱ་བ་ནི་རྣམ་པ་གང་གིས་སོ། །བསྒྲིམས་ཏེ་ཞེས་བྱ་བ་ནི་འབོད་དེ་ཞེས་བྱ་བ་སྟེ། དེ་བཞིན་དུ་འོག་མ་དག་ལ་ཡང་ཤེས་པར་བྱའོ། །འདི་ལ་འདྲི་བའི་བསམ་པ་ནི་མིའི་འགྲོ་བ་ཡང་ཡིན་ལ། སྨྱོན་པ་ལ་སོགས་པ་བར་ཆད་ཀྱི་ཆོས་དང་ཡང་བྲལ་བ་གང་ཡིན་པ་དེ་ལ་སྡོམ་པ་སྐྱེ་བ་ཀོ་ཐེ་ཚོམ་ཡང་མེད་པ་ཁོ་ན་ཡིན་ན། འོན་ཀྱང་བཅོམ་ལྡན་འདས་ཀྱིས་ཁ་ཅིག་ལས་འདི་ལ་སྡོམ་པ་སྐྱེ་བ་མེད་པ་ཉིད་དུ་གསུངས་པ་དེ་འདི་ལ་སྡོམ་པ་སྐྱེ་བའི་གེགས་ཇི་ལྟ་བུ་ཞིག་ཡོད་པར་གསུངས་པ་ཁྱོད་ཀྱིས་འབོད་དེ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། བྱང་གི་སྒྲ་མི་སྙན་པའི་མིའི་དབང་དུ་མཛད་ནས་དེ་སྐད་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་རྣམས་ཀྱིས་བྱང་གི་སྒྲ་མི་སྙན་པའི་གང་ཟག་གཅིག་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་བགྱིའམ། མ་རྫོགས་པ་ཞེས་བགྱི། ཉེ་བ་འཁོར་བསྙེན་པར་མ་རྫོགས་པའོ་ཞེས་བྱ་བ་ཡིན་ནོ། །གལ་ཏེ་བྱང་གི་སྒྲ་མི་སྙན་པ་ཡང་བར་ཆད་ཡིན་ནོ་ཞེ་ན་མ་ཡིན་ཏེ། བཀོལ་བ་ཆད་པ་ཡན་ཆད་ཡིན་ནོ། །འདི་ལ་སྐྱེ་བའི་ཆོས་ཉིད་མེད་པར་འདྲའོ། །དེ་ལྟ་བུའི་རྟགས་ཅན་ནི་བསྙིལ་བར་བྱ་བ་འདིར་བར་ཆད་ཀྱི་ཆོས་ཀྱི་ནང་དུ་མ་བསྟན་པའི་ཕྱིར་རོ། །དེ་བཞིན་དུ་འོག་མ་དག་ལའང་ཅི་རིགས་པར་ཤེས་པར་བྱའོ། །རྣམ་པ་གཅིག་ཏུ་ན་མཁན་པོ་དགེ་སློང་མ་ཡིན་པ་ཉིད་དུ་ཤེས་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། མཁན་པོ་རྐུ་ཐབས་སུ་གནས་པ་ཞིག་གིས་བསྙེན་པར་རྫོགས་པར་འཚལ་བར་བསྙེན་པར་རྫོགས་པར་བགྱིད་
ན་བསྙེན་བར་རྫོགས་པ་ཞེས་བགྱིའམ་བསྙེན་པར་མ་རྫོགས་པ་ཞེས་བགྱི། བཀའ་སྩལ་པ། གལ་ཏེ་བདག་གི་མཁན་པོ་རྐུ་ཐབས་སུ་གནས་པ་ཡིན་ནོ་ཞེས་བྱ་བར་ཤེས་ན་བསྙེན་པར་མ་རྫོགས་པ་ཞེས་བྱའོ། །གལ་ཏེ་མི་ཤེས་ན་བསྙེན་པར་རྫོགས་བ་ཞེས་བྱའོ་ཞེས་བྱ་བ་ཡིན་ནོ། རྣམ་པ་གཅིག་ཏུ་ན་མཁན་པོ་སྤོང་བ་ལ་དགོངས་ནས་དེ་སྐད་གསུངས་ཏེ། དེ་བཞིན་དུ་འདིར་གཞུང་ནི། བསྙེན་པར་རྫོགས་པར་བགྱིད་པའི་ཚེ་མཁན་པོ་སྤོང་བར་བགྱིད་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། བཀའ་སྩལ་པ། བསྙེན་པར་མ་རྫོགས་པ་ཞེས་བྱའོ་ཞེས་བྱ་བ་ཡིན་ནོ། །རྣམ་པ་གཅིག་ཏུ་ན་བསྙེན་པར་རྫོགས་པར་བྱ་བ་དང་མཁན་པོ་དག་གི་མིང་མ་སྨོས་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། གང་ཟག་གསུམ་ནི་བསྙེན་པར་མ་རྫོགས་པ་ཡིན་ཏེ། བདག་གི་མིང་ནས་མི་བརྗོད་པ་དང༌། མཁན་པོའི་མིང་ནས་མི་བརྗོད་པ་དང༌། བསྙེན་པར་རྫོགས་བར་མི་ཤེས་པའོ། །དེ་བཞིན་དུ་ལས་བྱེད་པས་མཁན་པོ་དང་བསྙེན་པར་རྫོགས་པར་འདོད་པ་དང༌། དགེ་འདུན་ཏེ་གསུམ་གྱི་མིང་མི་སྒྲོགས་ན་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཡང་ན་འདི་ནི་ཁྱིམ་པའམ་མུ་སྟེགས་ཅན་གྱི་རྒྱལ་མཚན་འཆང་བའམ་གཅེར་བུ་པའམ་འཁྲུག་པ་ལ་དགོངས་ནས་གསུངས་པ་ཡིན་ཏེ། འདི་ལ་བདག་གི་ལུང་གི་ཁུངས་ནི་མ་རྙེད་དོ། །མདོ་བྱེད་པ་ལ་བརྟེན་ནས་སྨྲས་པ་ཡིན་པར་བལྟ་བར་བྱ་སྟེ། དེ་བཞིན་དུ་འདི་ལ་མདོ་བྱེད་པས་བཤད་པ་ནི་ཁྱིམ་པ་དང་མུ་སྟེགས་ཅན་གྱི་རྒྱལ་མཚན་ཅན་ལའང་མི་སྐྱེའོ། །སྒྲེན་མོ་དང་འཁྲུག་པ་དང་མཚན་དུག་མ་དག་ལ་ཡང་མི་སྐྱེའོ་ཞེས་བྱ་བ་ཡིན་ནོ། །སྔ་མ་ལ་ཡང་མདོ་བྱེད་པས་བཤད་པ་ནི་མི་མ་ཡིན་པའི་འགྲོ་བ་པ་དང་བྱང་གི་སྒྲ་མི་སྙན་པ་གཉིས་ནི་སྡོམ་པའི་ཞིང་ཉིད་མ་ཡིན་ནོ། །དེ་དགེ་སློང་ཉིད་མ་ཡིན་པར་ཤེས་ན་མི་སྐྱེའོ། །དེའི་ཕྱིར་སྤོང་བ་ལ་ཡང་མི་སྐྱེའོ། །དེ་གཉིས་ཀྱི་མིང་མ་བརྗོད་ན་ཡང་མི་སྐྱེའོ། །དགེ་འདུན་གྱི་ན་ཡང་དེའི་སྐྱེ་གནས་ཀྱི་མི་སྐྱེའོ་ཞེས་བྱ་བ་ཡིན་ནོ། །ཕ་དང་མ་ནི་ཕ་མའོ། །ཆེད་དུ་བསམས་པ་ནི་བློ་སྔོན་དུ་བཏང་བའོ། །ཆེད་དུ་བསམས་པ་ཞེས་སྨོས་པ་
ནི་ཆེད་དུ་བསམས་པ་མ་ཡིན་པ་དེ་དགག་པའི་ཕྱིར་ཏེ། འདི་ལྟར་ཆེད་དུ་མ་བསམས་པར་གྲུབ་པ་ནི་བྱེད་པ་པོ་ཉིད་མ་ཡིན་ནོ་ཞེས་འབྱུང་བས་ཆེད་དུ་བསམས་པ་མ་ཡིན་པར་དེ་དག་བསད་པ་ལ་མཚམས་མེད་པ་ལྡང་བར་མ་གསུངས་པའི་ཕྱིར་རོ། །གསོད་པ་ནི་གསོད་པར་བྱེད་པའོ། །དགེ་སློང་མ་ནི་སུན་ཕྱུང་དང༌། །ཞེས་བྱ་བ་ནི་དགེ་སློང་མ་མ་རུང་བར་བྱེད་པའོ། །དགེ་འདུན་དབྱེན་བྱེད་པ་ནི་དགེ་འདུན་སྟོན་པ་དང་ལམ་གཞན་ལ་འདོད་པ་སྐྱེད་པའི་སྒོ་ནས་རྣམ་གཉིས་སུ་བྱེད་པའི་ཕྱིར་ཏེ། སྟོན་དང་ལམ་གཞན་ལ་བཟོད་པ། །དབྱེ་བའོ་ཞེས་འབྱུང་བའི་ཕྱིར་རོ། །སྡོམ་པའི་ཆེད་དུ་ཞེས་བྱ་བ་ནི་སྡོམ་པ་སྐྱེ་བའི་སྣོད་ཉིད་དུའོ། །འདི་ལ་འདྲི་བའི་བསམ་པ་ནི་མ་གསོད་པ་དང༌། ཕ་གསོད་པ་དང༌། དགེ་སློང་མ་སུན་དབྱུང་བ་དང༌། དགེ་འདུན་གྱི་དབྱེན་བྱེད་པ་ནི་འདི་ལྟར་མཚམས་མེད་པ་ལ་སོགས་པ་བྱེད་པ་ཡིན་པའི་ཕྱིར་བཅོམ་ལྡན་འདས་ཀྱིས་སྡོམ་པ་སྐྱེ་བ་འབྱུང་བར་མི་རུང་བ་ཉིད་དུ་གསུངས་ལ། འོན་ཀྱང་རྣམ་པ་གཞན་འགའ་ཞིག་གིས་སྡོམ་པ་སྐྱེ་བར་འོས་བ་ཉིད་དུ་ཡང་གསུངས་པས་དེ་ལྟ་བུ་ཡིན་པ་ཁོ་བོ་ལ་སྨྲོས་ཤིག་བྱ་བ་འདི་ཡིན་ནོ། །མ་བསད་པ་དང༌། ཕ་བསད་པ་དང༌། དགེ་སློང་མ་སུན་ཕྱུང་བ་དང༌། དགེ་འདུན་གྱི་དབྱེན་བྱེད་པ་འདི་དག་ནི་དགྲ་བཅོམ་པ་བསད་པ་དང༌། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་བ་དག་གི་དཔེ་ཙམ་དུ་ཟད་དོ། །འདི་ལ་ལན་ནི་འདི་ཡིན་ཏེ། གཞན་གྱི་འདུ་ཤེས་ཀྱིས་བསད་པ་ལ་སོགས་པ་ལ་དགོངས་ནས་དེ་སྐད་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་རྣམས་ཀྱིས་མ་བཀུམས་པའི་གང་ཟག་གཅིག་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཉེ་བ་འཁོར་ཁ་ཅིག་ནི་བསྙེན་པར་རྫོགས་པ་ཞེས་བྱ་ལ། ཁ་ཅིག་ནི་བསྙེན་པར་མ་རྫོགས་པ་ཞེས་བྱ་སྟེ། གང་ཞིག་གིས་གཞན་གྱི་འདུ་ཤེས་སམ། གཞན་གྱིས་སྦྱོར་བས་མ་བསད་ན་འདི་ནི་བསྙེན་པར་རྫོགས་པ་ཞེས་བྱ་བས་བསྙེན་པར་རྫོགས་ནས་ཀྱང་བསྙིལ་བར་མི་བྱའོ། །གང་ཞིག་གིས་ཆེད་དུ་བསམས་ཏེ་མ་བསད་པར་གྱུར་ན་འདི་ནི་བསྙེན་པར་མ་རྫོགས་
པ་ཞེས་བྱ་བས་བསྙེན་པར་རྫོགས་ནས་ཀྱང་བསྙིལ་བར་བྱའོ། །མ་བསད་པ་ཇི་ལྟ་བར་ཕ་བསད་པ་དང༌། དགྲ་བཅོམ་པ་བསད་པ་ཡང་དེ་དང་འདྲའོ་ཞེས་བྱ་བ་ཡིན་ནོ། །རྣམ་པ་གཅིག་ཏུ་ན་ཕ་དང་མ་དུད་འགྲོའི་སྐྱེ་གནས་སུ་གཏོགས་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཕ་དང་མ་དག་བཀུམས་ལ་མཐར་ཡང་མི་འགྱུར། མཚམས་མ་མཆིས་པའི་ཁ་ན་མ་ཐོ་བས་རེག་པར་ཡང་མི་འགྱུར་བ་ལྟ་མཆིས་སམ། ཡོད་དེ། གང་གི་ཕ་དང་མ་དུད་འགྲོའི་སྐྱེ་གནས་སུ་གཏོགས་པ་དག་ཡིན་ནའོ་ཞེས་བྱ་བ་ཡིན་ནོ། །རྣམ་པ་གཅིག་ཏུ་ན་སྐྱེད་པར་བྱེད་ཕ་མ་ཡིན་པའི་ཕ་དང་མ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་མས་ནི་བསྐྱེད་ལ་གཞན་གྱིས་ནི་གསོས་པས་གང་ཞིག་བཀུམས་པས་མཐར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བས་ཀྱང་རེག་པར་འགྱུར་བ་ལགས། གང་གིས་བསྐྱེད་པའོ་ཞེས་བྱ་བ་ཡིན་ནོ། །དེ་ཉིད་ཀྱི་ཕྱིར་མདོ་བྱེད་པས་མི་མ་ཡིན་པའི་འགྲོ་བ་པ་གཉིས་ནི་མ་ཡིན་ནོ། །དེ་གཉིས་ལས་མཚམས་མེད་པར་མི་འགྱུར་རོ། །དེ་ནི་སྐྱེད་པར་བྱེད་པ་གཉིས་ལས་དེ་ཡིན་ནོ། །མ་བསད་པ་ལ་སོགས་པ་དེ་བྱས་པ་དེ་ཉིད་གཙོ་བོ་ཞེས་བཤད་དོ། །རྣམ་པ་གཅིག་ཏུ་ནམ་ལ་ཡོད་པའི་ནུར་ནུར་པོ་ཟགས་པ་དེ་གཞན་གྱི་མངལ་དུ་བླུགས་པ་ལས་སྐྱེས་པའི་མ་བསད་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་གང་ལས་ཁྲག་ནི་བྱུང་བ་མ་ཞེས་བཤད་དོ། །ཡང་ན་ཟག་པ་དང་བཅས་པའི་ལས་ཀྱི་སྲིད་པ་དང་སྲེད་པ་བསད་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཕ་བཀུམས་ལ་མཐར་ཡང་མི་འགྱུར། མཚམས་མ་མཆིས་པའི་ཁ་ན་མ་ཐོ་བས་རེག་པར་མི་འགྱུར་བ་ལྟ་མཆིས་ལགས་སམ། ཡོད་དེ། ཟག་པ་དང་བཅས་པའི་ལས་ཀྱི་སྲིད་པ་བསད་ནའོ། །ཉེ་བ་འཁོར་ཟག་པ་དང་བཅས་པའི་ལས་ཀྱི་སྲིད་པ་ནི་མངོན་པར་སྒྲུབ་པའི་དོན་གྱིས་ཕ་ཞེས་བྱའོ། །བཙུན་པ་དགེ་སློང་གིས་མ་བཀུམས་ལ་མཐར་ཡང་མི་འགྱུར། མཚམས་མ་མཆིས་པའི་ཁ་ན་མ་ཐོ་བས་རེག་པར་ཡང་མི་འགྱུར་བ་ལྟ་མཆིས་ལགས་སམ། ཡོད་དེ། གལ་ཏེ་སྲེད་པ་
བསད་ནའོ། །ཉེ་བ་འཁོར་སྲེད་པ་ནི་སྐྱེད་པའི་དོན་གྱིས་མ་ཞེས་བྱ་བ་ཡིན་ནོ། །དེ་ཉིད་ཀྱི་ཕྱིར། མི་ནི་སྲེད་པས་སྐྱེད་པར་བྱེད། །འདི་ཡི་སེམས་ནི་རྣམ་པར་རྒྱུག །སེམས་ཅན་འཁོར་བར་གཏོགས་པ་སྟེ། །དེ་ཡི་ལས་ནི་འཇིགས་པ་ཆེ། །ཞེས་གསུངས་སོ། །དེ་ཉིད་ལ་དགོངས་ནས། ཕ་དང་མ་ནི་བསད་བྱས་ཤིང༌། །རྒྱལ་པོ་གཙང་སྦྲ་ཅན་གཉིས་དང༌། །ཡུལ་འཁོར་འཁོར་དང་བཅས་བཅོམ་ན། །མི་དེ་དག་བར་འགྱུར་ཞེས་བཤད། །ཅེས་གསུངས་སོ། །དེ་བཞིན་དུ་དགེ་སློང་མ་སུན་ཕྱུང་བ་ལ་སོགས་པའི་གཞུང་ཡང་འདི་ཡིན་ཏེ། བཙུན་པ་རེ་ཞིག་དགེ་སློང་རྣམས་ཀྱིས་དགེ་སློང་མ་སུན་ཕྱུང་བ་ཞིག་བསྙེན་པར་རྫོགས་པར་བགྱིད་ན། བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཉེ་བ་འཁོར་ཁ་ཅིག་ནི་བསྙེན་པར་རྫོགས་པ་ཞེས་བྱ་ལ། ཁ་ཅིག་ནི་བསྙེན་པར་མ་རྫོགས་པ་ཞེས་བྱ་སྟེ། གང་གིས་མི་ཚངས་པར་སྤྱོད་པས་དགེ་སློང་མ་སུན་ཕྱུང་བ་དེ་ནི་བསྙེན་པར་མ་རྫོགས་པ་ཞེས་བྱ་བས་བསྙེན་པར་རྫོགས་ན་ཡང་བསྙིལ་བར་བྱའོ། །གང་གིས་ལུས་ཀྱིས་རེག་པས་དགེ་སློང་མ་སུན་ཕྱུང་བ་དེ་ནི་བསྙེན་པར་རྫོགས་པ་ཞེས་བྱ་བས་བསྙེན་པར་རྫོགས་ནས་ཀྱང་བསྙིལ་བར་མི་བྱའོ་ཞེས་བྱ་བ་ཡིན་ནོ། །ཡང་ན་ཉམས་སུ་མྱོང་བ་མེད་པའི་དགེ་སློང་མ་སུན་ཕྱུང་བའི་དབང་དུ་མཛད་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་ཇི་ཙམ་གྱིས་ན་དགེ་སློང་མ་སུམ་ཕྱུང་བ་ཞེས་བགྱི། གང་གིས་མི་ཚངས་པར་སྤྱོད་པས་དགེ་སློང་མ་འདུན་པས་སུན་ཕྱུང་བར་གྱུར་ནའོ་ཞེས་བྱ་བ་ཡིན་ནོ། །དེ་ཉིད་ཀྱི་ཕྱིར་མདོ་བྱེད་པས་ཕམ་པར་འགྱུར་བ་མ་བྱུང་བ་ཉིད་ལ་མི་ཚངས་པར་སྤྱོད་པས་ཉམས་སུ་མྱོང་བ་དག་སུན་ཕྱུང་བ་ཉིད་ཡིན་ནོ་ཞེས་བཤད་དོ། །ཤུགས་ཀྱིས་ན་ཉམས་སུ་མྱོང་བ་མེད་པར་སུན་ཕྱུང་བ་ནི་དགེ་སློང་མ་སུན་ཕྱུང་བ་ཉིད་མ་ཡིན་ནོ་ཞེས་བལྟ་བར་བྱའོ། །ཡང་ན་སོ་སོ་ནས་གཞི་བརྒྱད་ཀྱིས་དགེ་སློང་མ་སུན་ཕྱུང་བ་ཉིད་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་གང་ཟག་བརྒྱད་ཀྱིས་སོ་སོ་ནས་གཞི་བརྒྱད་ཀྱིས་དགེ་སློང་མ་སུན་འབྱིན་པར་བགྱིད་ན་དགེ་སློང་དེ་སུན་ཕྱུང་བ་ཞེས་བགྱིའམ། ཉེ་བ་འཁོར་སུན་
ཕྱུང་བ་ཞེས་བྱའོ། །དེ་ལ་གང་ཞིག་དགེ་སློང་མ་སུན་ཕྱུང་བ་ཞེས་བགྱི། བཀའ་སྩལ་པ། གང་ཡང་མ་ཡིན་ནོ། །བཙུན་པ་དགེ་སློང་རྣམས་ཀྱིས་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ཞིག་བསྙེན་པར་རྫོགས་པར་བགྱིད་ན་བསྙེན་པར་རྫོགས་བ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཉེ་བ་འཁོར་ཁ་ཅིག་ནི་བསྙེན་པར་རྫོགས་པ་ཞེས་བྱ་ལ། ཁ་ཅིག་ནི་བསྙེན་པར་མ་རྫོགས་པ་ཞེས་བྱ་སྟེ། གང་གིས་དེ་བཞིན་གཤེགས་པ་ལ་ཆེད་དུ་བསམས་ཏེ་ངན་སེམས་ཀྱིས་ཁྲག་ཕྱུང་བར་གྱུར་པ་དེ་ནི་བསྙེན་པར་མ་རྫོགས་པ་ཞེས་བྱ་བས་བསྙེན་པར་རྫོགས་ན་ཡང་བསྙིལ་བར་བྱའོ། །གང་གིས་དེ་བཞིན་གཤེགས་པ་ལ་ཆེད་དུ་མ་བསམས་པར་ངན་སེམས་ཀྱིས་ཁྲག་ཕྱུང་བར་གྱུར་པ་དེ་ནི་བསྙེན་པར་རྫོགས་པ་ཞེས་བྱ་བས་བསྙེན་པར་རྫོགས་ནས་ཀྱང་བསྙིལ་བར་མི་བྱའོ་ཞེས་བྱ་བ་ཡིན་ནོ། །འདི་ཉིད་ལ་དགོངས་ནས། སངས་རྒྱས་བཀྲོངས་པར་མི་འདོད་པའི། །མཚམས་མེད་མ་ཡིན་ཞེས་བཤད་དོ། །བཙུན་པ་རེ་ཞིག་གང་ཟག་དགེ་འདུན་གྱི་དབྱེན་བགྱིས་པ་ཞིག་བསླབ་པ་ཕུལ་ནས་བབས་པར་གྱུར་ལ། དེ་སླར་ཡང་ལེགས་པར་གསུངས་བའི་ཆོས་འདུལ་བ་ལ་རབ་ཏུ་འབྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོ་འཚལ་ལ། དེ་དགེ་སློང་རྣམས་ཀྱིས་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཉེ་བ་འཁོར་ཁ་ཅིག་ནི་བསྙེན་པར་རྫོགས་པ་ཞེས་བྱ་ལ། ཁ་ཅིག་ནི་བསྙེན་པར་མ་རྫོགས་པ་ཞེས་བྱ་སྟེ། གང་གིས་ཆོས་མ་ཡིན་པ་ལ་ཆོས་མ་ཡིན་པར་འདུ་ཤེས་པ་དང༌། དབྱེ་བ་ལ་ཆོས་མ་ཡིན་པར་འདུ་ཤེས་པས་དགེ་འདུན་ཕྱེ་བར་གྱུར་པ་དེ་ནི་བསྙེན་པར་མ་རྫོགས་པ་ཞེས་བྱ་བས་བསྙེན་པར་རྫོགས་ནས་ཀྱང་བསྙིལ་བར་བྱའོ། །གང་གིས་ཆོས་མ་ཡིན་པ་ལ་ཆོས་སུ་འདུ་ཤེས་པས་དགེ་འདུན་ཕྱེ་བར་གྱུར་པ་དེ་ནི་བསྙེན་པར་རྫོགས་པ་ཞེས་བྱ་བས་བསྙེན་པར་རྫོགས་ནས་ཀྱང་བསྙིལ་བར་མི་བྱའོ། །ཡང་ན་ལས་ཀྱི་དབྱེན་གྱིས་བདག་ཉིད་ཀྱིས་དགེ་འདུན་གྱི་དབྱེན་ལ་དགོངས་ཏེ་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། ཀཽ་ཤཱམ་བཱིའི་དགེ་འདུན་སུས་ཕྱེ། ཆོས་མ་ཡིན་པ་སྨྲ་བ་དག་གིས་ཏེ། མཚམས་ཀྱི་ནང་ན་མཚུངས་པར་གནས་པ་ལས་
མ་འདྲེས་པའི་ཆོས་གསོ་སྦྱོང་བགྱིས་སོ་ཞེས་བྱ་བ་ཡིན་ནོ། །ཡང་ན་བཞད་གད་ཀྱི་བསམ་པ་ལ་དགོངས་ནས་དེ་སྐད་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། གང་ཞིག་དེ་ལྟར་ཀུ་རེའི་བསམ་པས་རྗེས་སུ་སྒྲོགས་སམ་ཚུལ་ཤིང་འབྲིམ་པར་བགྱི་ན་དགེ་འདུན་བྱེ་ཞེས་བགྱིའམ། ཉེ་བ་འཁོར་མ་ཡིན་ནོ། །ལས་བགྱིད་པ་ལ་ཇི་ལྟར་འགྱུར་ལགས། དབྱེན་གྱི་ཉེར་བསྡོགས་ཀྱི་ནི་ཉེས་པ་སྦོམ་པོར་འགྱུར་རོ་ཞེས་བྱ་བ་ཡིན་ནོ། །ཡང་ན་དགེ་འདུན་དུ་མ་གྱུར་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། ལྔ་པ་སྤངས་པ་ཡིན་ན་དགེ་འདུན་མ་བྱེའོ་ཞེས་བརྗོད་པར་བྱའོ། །དགུ་པ་རྐུ་ཐབས་སུ་གནས་པ་ཞིག་གིས་དགེ་འདུན་ཕྱེ་ན་དགེ་འདུན་མ་བྱེའོ་ཞེས་བརྗོད་པར་བྱའོ། །མཚན་གཉིས་པ་ཞིག་གིས་ཚུལ་ཤིང་བྲིམས་སམ་རྗེས་སུ་སྒྲོགས་པར་བགྱིད་ན་ཅི་དགེ་འདུན་བྱེ་བ་ཞེས་བགྱི་འམ་མ་བྱེ་བ་ཞེས་བགྱི། བཀའ་སྩལ་པ། མ་བྱེ་བ་ཞེས་བྱ་བ་ཡིན་ནོ། །ཡང་ན་མ་འོངས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་ཟ་མས་ཚུལ་ཤིང་བྲིམ་ཞིང་ལས་དག་བགྱིར་དབང་ལགས་སམ། ཉེ་བ་འཁོར་མི་དབང་ངོ༌། །དེ་བཞིན་དུ་མ་ནིང་དང༌། དགེ་སློང་མ་སུན་ཕྱུང་བ་དང༌། མ་བཀུམས་པ་དང༌། ཕ་བཀུམས་པ་དང༌། དགྲ་བཅོམ་པ་བཀུམས་པ་དང༌། མུ་སྟེགས་ཅན་ཞུགས་པ་དང༌། རྐུ་ཐབས་སུ་གནས་པ་དང༌། ཐ་དད་དུ་གནས་པས་ཚུལ་ཤིང་བྲིམ་ཞིང་ལས་དག་བགྱིར་དབང་ལགས་སམ། ཉེ་བ་འཁོར་མི་དབང་ངོ་ཞེས་བྱ་བ་ཡིན་ནོ། །དེ་བཞིན་དུ་འདིར་མདོ་བྱེད་པས་ཀྱང༌། ཆོས་དང་ཆོས་མ་ཡིན་པ་གཉི་ག་ལ་དེ་བཞིན་དུ་ཤེས་ན་མཚམས་མེད་པའོ། །དབྱེ་བ་ལ་ཆོས་སུ་འདུ་ཤེས་པས་ཀྱང་ངོ་ཞེས་བཤད་དོ། །འདི་ལ་འགྲེལ་པ་བྱེད་པས་ཀྱང༌། ཆོས་མ་ཡིན་པ་ལ་ཡང་ཆོས་མ་ཡིན་པ་ཉིད་དུ། ཆོས་ལ་ཡང་ཆོས་ཉིད་ཁོ་ནར་ཤེས་ཤིང་དགེ་འདུན་གྱི་དབྱེན་བྱེད་ན་མཚམས་མེད་པའི་ཁ་ན་མ་ཐོ་བ་དང་ལྡན་གྱི། ཆོས་མ་ཡིན་པ་ལ་ཆོས་སུ་འདུ་ཤེས་པ་དང༌། ཆོས་ལ་ཆོས་མ་ཡིན་པར་འདུ་ཤེས་པ་ལ་ནི་མ་ཡིན་ཏེ། དེ་ལ་བསམ་པ་ལོག་པར་ཞུགས་པ་མེད་པའི་ཕྱིར་རོ་ཞེས་བྱ་བ་ལ་སོགས་པ་བཤད་དོ། །
དེ་བཞིན་དུ་ཆོས་མ་ཡིན་པ་སྨྲ་བ་དག་གིས་དབྱེ་བའི་སེམས་ཀྱིས་མཚམས་ཀྱི་ནང་དུ་ལས་ཐ་དད་པར་བྱས་ན་དེ་དབྱེ་བ་ཡིན་ནོ། །བཞད་གད་ཀྱི་དངོས་པོས་ནི་གང་གིར་ཡང་མི་འགྱུར་རོ། །མི་འཆགས་པའི་བློས་དབྱེན་བྱེད་པ་དང་གནས་ནས་འབྱིན་པ་དག་ལ་ནི་སྦོམ་པོའོ། །དགེ་འདུན་དུ་མ་གྱུར་པ་ཉིད་ན་ཉེས་བྱས་སོ། །དབྱེན་རྗེས་སུ་སྒྲུབ་པ་ནི་གསོལ་བ་དང་འདྲའོ། །གང་ཁ་སྐོང་བར་མི་འོས་པ་དེ་མདུང་དོར་བར་ཡང་ངོ༌། །དགེ་འདུན་གྱི་དབྱེན་ལ་ཡང་འོས་པ་མ་ཡིན་པས་ཚུལ་ཤིང་དག་འབྲིམ་པ་མི་འཆགས་སོ། །དབྱེ་བར་བྱེད་པ་དག་དགེ་འདུན་གྱི་ཚད་མ་ཡིན་པ་དང༌། མཚམས་ཀྱི་ནང་ན་གཞན་དགེ་འདུན་གྱི་ཚད་དག་ཀྱང་མེད་པ་ཉིད་ཡིན་ན་དེ་མི་འཆགས་སོ་ཞེས་བཤད་དོ། །དེ་ཉིད་ལ་དགོངས་ནས། དགེ་སློང་ལྟ་སྤྱད་ཚུལ་ལྡན་པས། །འབྱེད་དོ་གཞན་དུའོ་བྱིས་པ་རྣམས། །སྟོན་དང་ལམ་གཞན་ལ་བཟོད་པ། །བྱེ་བའོ་དེ་ནི་མི་གནས་སོ། །དེ་ནི་འཁོར་ལོའི་དབྱེན་དུ་འདོད། །འཛམ་བུའི་གླིང་དུའོ་དགུ་སོགས་ཀྱིས། །བཤད་དོ། །སྔོན་དུ་ཕས་ཕམ་འགྱུར་བྱས་ལ། །ཞེས་བྱ་བ་ལ་སོགས་པ་ལ་སྔོན་ཕས་ཕམ་པར་འགྱུར་བར་བྱས་པ་ནི་སྔོན་བསྙེན་པར་རྫོགས་པའི་ཚེ་ཕས་ཕམ་པར་འགྱུར་བ་བྱེད་པའི་ངང་ཚུལ་ཅན་ནི་སྔོན་ཕས་ཕམ་པར་འགྱུར་བ་བྱས་པ་སྟེ་སྔོན་ཕམ་པ་བྱུང་བ་ཞེས་བྱ་བའི་ཚིག་གོ །དེ་ལ་ཕས་ཕམ་པར་འགྱུར་བ་ནི་ཕས་ཕམ་པ་སྟེ། དགེ་སློང་གི་དངོས་པོ་དང་དེའི་འབྲས་བུ་འཕགས་པའི་ལམ་ལས་ལྟུང་བ་ཞེས་བྱ་བའི་ཐ་ཚིག་གོ །ཕས་ཕམ་པ་ལས་འབྱུང་བའི་ལྟུང་བ་ནི་ཕས་ཕམ་པར་འགྱུར་བ་སྟེ་དེ་བྱེད་པས་དེ་སྐད་ཅེས་བྱའོ། །དགེ་སློང་རྣམས་ལ་བསྙེན་པར་རྫོགས་པ་གསོལ་བ་ཞེས་བྱ་བ་ནི་དགེ་སློང་གི་དགེ་འདུན་ལ་བསྙེན་པར་རྫོགས་པའི་དོན་དུ་གཉེར་བ་སྟེ། དགེ་འདུན་ལས་བསྙེན་པར་རྫོགས་པར་བྱའོ་ཞེས་འབྱུང་བས་བསྙེན་པར་རྫོགས་པ་ནི་དགེ་འདུན་ལ་རག་ལས་པའི་ཕྱིར་རོ། །དགེ་སློང་ཞེས་སྨོས་པ་ནི་དགེ་སློང་མ་བསལ་བའི་ཕྱིར་ཏེ། འདི་ལྟར་འདིར་དགེ་འདུན་གྱིས་བསྣན་པར་བྱའོ་ཞེས་འབྱུང་བས་དགེ་སློང་མ་རྣམས་ཀྱི་བསྙེན་པར་རྫོགས་པ་ཡང་དགེ་སློང་གི་དགེ་འདུན་ལ་རག་ལས་པ་ཁོ་ན་ཡིན་ནོ། །རབ་བསྒྲིམས་ཏེ་ཞེས་བྱ་བ་ནི་བསམ་པ་ཐག་པ་ནས་ཏེ། མྱ་
ངན་ལས་འདས་པའི་བསམ་པས་ཞེས་བྱ་བའི་དོན་ཏོ། །རབ་ཏུ་བསྒྲིམས་པ་སྨོས་པ་ནི་འཇིགས་སྐྱོབ་ཀྱི་བསམ་པས་སྡོམ་པ་ལེན་པ་སྐྱེ་བ་གང་ཡིན་པ་དེ་བསལ་བའི་ཕྱིར་ཏེ། མྱ་ངན་ལས་འདས་པའི་བསམ་པ་བརྟན་པོ་མེད་པར་སྡོམ་པ་སྐྱེ་བ་མེད་དོ་ཞེས་འབྱུང་བའི་ཕྱིར་རོ། །དེ་ལ་ཞེས་བྱ་བ་ནི་སྔོན་ཕས་ཕམ་པར་འགྱུར་བ་བྱས་པ་ལའོ། །འཆགས་པ་ནི་སྐྱེ་བ་སྟེ་དོན་གྱི་དབང་གིས་ན་བསྙེན་པར་རྫོགས་པར་གཟུང་ངོ༌། །འདི་ལ་འདྲི་བའི་བསམ་པ་ནི་སྔོན་ཕམ་པ་བྱུང་བ་ལ་བཅོམ་ལྡན་འདས་ཀྱིས་བསྙེན་པར་རྫོགས་པ་དགེ་སློང་གི་དངོས་པོ་བཀག་གོ་ཞེས་འབྱུང་བ་འདི་ནི་ལེགས་པར་ཤེས་ན། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་འདི་བསྙེན་པར་རྫོགས་པར་གནང་ངོ་ཞེས་བྱ་བ་འདི་ལྟ་བུ་ཡིན་ལ། ཁོ་བོའི་ཐེ་ཚོམ་དེ་སོལ་ཅིག་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་འདི་ཡིན་ཏེ། དགེ་སློང་མ་ཐུན་མོང་མ་ཡིན་པའི་ཕམ་པར་འགྱུར་བ་བྱས་པ་བསླབ་པ་ཕུལ་ནས་མཚན་གྱུར་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་བཅོམ་ལྡན་འདས་ཀྱིས་སྔར་ཕམ་པ་བྱུང་བ་རབ་ཏུ་དབྱུང་བར་མི་བྱ་ཞིང་བསྙེན་པར་རྫོགས་པར་མི་བྱའོ་ཞེས་བཀའ་སྩལ་པ་གང་ལགས་པ། བཙུན་པ་དགེ་སློང་རྣམས་ཀྱིས་སྔར་ཕམ་པ་བྱུང་བ་ཞིག་རབ་ཏུ་འབྱིན་པར་བགྱིད་ཅིང་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་ཀྱང་བགྱི། ལྟུང་བར་ཡང་མི་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་མ་ཞིག་གིས་ཐུན་མོང་མ་ཡིན་པའི་ཕས་ཕམ་པར་འགྱུར་བའི་ལྟུང་བ་སྤྱད་ལ་དེ་བསླབ་པ་ཕུལ་ནས་བབས་པ་དང་དེ་མཚན་གྱུར་ཏེ་ཕོར་རེད་པ་དང་རབ་ཏུ་འབྱིན་ཅིང་བསྙེན་པར་རྫོགས་པར་བྱེད་ན་ལྟུང་བ་མེད་དོ་ཞེས་བྱ་བ་ཡིན་ནོ། །དེ་བཞིན་དུ་འདིར་མདོ་བྱེད་པས་ཀྱང༌། བུད་མེད་བསླབ་པ་ཕུལ་ནས་སྐྱེས་པ་ཉིད་དུ་གྱུར་པ་ནི་རབ་ཏུ་འབྱུང་བ་དང་བསྙེན་པར་རྫོགས་པར་རུང་བ་ཉིད་དོ། །ཕམ་པར་འགྱུར་བ་ཐུན་མོང་མ་ཡིན་པ་ལྷག་པར་སྤྱད་པ་ཅན་ཡང་ངོ་ཞེས་བཤད་དོ། །བསམ་པ་ཐག་པས་ཞེས་བྱ་བ་ལ་སོགས་པ་ལ་བསམ་པ་ཐག་པ་ཞེས་བྱ་བ་ནི་སྙིང་ཐག་པ་ནས་ཏེ། མི་ལྟ་བའི་
སེམས་ཀྱིས་ཡིན་གྱི་ཚིག་ཙམ་གྱིས་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དཀོན་མཆོག་གསུམ་ནི་སངས་རྒྱས་དང༌། །ཆོས་དང་དགེ་འདུན་ཞེས་བྱ་བ་རིན་པོ་ཆེ་དང་འདྲ་བར་རྙེད་དཀའ་བའི་ཕྱིར་དང༌། རིན་ཐང་མེད་པའི་ཕྱིར་དང༌། ཕན་པ་དཔག་ཏུ་མེད་པ་མཛད་པའི་ཕྱིར་དཀོན་མཆོག་གོ །དེ་ཕྱིར་སྤོང་བར་བྱེད་པ་ལ་སྟེ། ཕྱིར་སྤོང་བ་ནི་འདོར་བ་ཡིན་པས་བདག་ལ་འདིར་མི་དགོས་སོ་ཞེས་དེ་སྐད་སྤོང་བའོ་ཞེས་བྱ་བའི་དོན་ཏོ། །མེད་པར་མི་འགྱུར་བ་ནི་འབྲལ་བར་མི་འགྱུར་བ་སྟེ་ཉམས་པར་མི་འགྱུར་བ་ཞེས་བྱ་བའི་ཐ་ཚིག་གོ །ལན་ནི་ལན་གདབ་པའོ། །རྗོད་ཅིག་ཅེས་བྱ་བ་ནི་སྨྲོས་ཤིག་པའོ། །འདི་ལ་ཕ་རོལ་པོའི་བསམ་པ་ནི་འགའ་ཞིག་སངས་རྒྱས་མ་ཆོས་སམ་དགེ་འདུན་སྤོང་བར་བྱེད་ཅིང་དེ་ལྟར་བསམ་པ་ཐག་པ་ནས་དཀོན་མཆོག་གསུམ་ཡོངས་སུ་སྤོང་བར་བྱེད་པ་གང་ཡིན་པ་དེས་ཐེ་ཚོམ་མེད་པ་ཁོ་ནར་ཕྱིར་སྤངས་པ་ལ་ཡིན་ནོ་ཞེས་བྱ་བ་འདི་ནི་དེ་ལྟར་བསྟན་པ་ལ་ཞུགས་པ་བདེ་བར་གཤེགས་པ་ཐམས་ཅད་ཀྱིས་བདེ་བླག་ཏུ་གོ་ན། འོན་ཀྱང་བཅོམ་ལྡན་འདས་ཀྱིས་དེ་ཕྱིར་སྤངས་པར་མ་གསུངས་སོ་ཞེས་བྱ་བ་ཁོ་བོའི་སེམས་ཐེ་ཚོམ་གྱི་འཕྱང་ཐག་ལ་འཇུ་བ་ཡུན་རིང་པོ་ནས་བསྡོགས་པ་གཡོ་བ་འདི་ལན་ལེགས་པ་ཞིག་གིས་རྣལ་དུ་ཕོབ་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། རྟེན་ནམ་ཐར་པའི་ཚུལ་གཞན་ལ་དགོངས་ནས་དེ་སྐད་དུ་གསུངས་པ་ཡིན་ཏེ། འདི་ལྟར་གཞན་དུ་སྟེགས་ཅན་ལས་རབ་ཏུ་བྱུང་བའི་དགེ་སློང་མ་ནག་མོས་དགེ་སློང་མ་དག་དང་ལྷན་ཅིག་ཐབ་མོ་བྱུང་བ་དང༌། སངས་རྒྱས་སྤོང་ངོ༌། །ཆོས་དང་དགེ་འདུན་སྤོང་ངོ་ཅི་ཤཱཀྱའི་བུའི་དགེ་སློང་དག་ཁོ་ན་ཚུལ་ཁྲིམས་དང་ལྡན་པ་དང༌། ཡོན་ཏན་དང་ལྡན་པ་དང༌། དེས་པ་དང་དགེ་བའི་ཆོས་ཅན་ཡིན་ནམ། དགེ་སློང་གཞན་དག་ཀྱང་ཚུལ་ཁྲིམས་དང་ལྡན་པ་དང༌། ཡོན་ཏན་དང་ལྡན་པ་དང༌། དེས་པ་དང་དགེ་བའི་ཆོས་ཅན་དག་ཡོད་ཀྱིས་བདག་གིས་དེ་དག་གི་ཐད་དུ་ཚངས་པར་སྤྱད་པ་སྤྱོད་དེ་ཞེས་བྱ་བ་ལ་སོགས་པ་སྨྲས་སོ། །དེའི་ཚེ་བཅོམ་ལྡན་འདས་ཀྱིས་ཆོས་འདི་ནི་དེའི་ལྟུང་བ་དང་པོ་སྟེ། ངེས་པར་འབྱུང་བ་ཡིན་ནོ་ཞེས་བྱ་བ་ལ་སོགས་པ་བཀའ་སྩལ་པས་དེ་ལ་དགེ་འདུན་གྱི་ལྷག་མར་འགྱུར་བར་
གསུངས་སོ། །དེ་བཞིན་དུ་འགྲེལ་པ་བྱེད་པས་ཀྱང་རྟེན་ནམ་ཐར་པའི་ཚུལ་གཞན་ཡོད་དེ། འདི་ནི་རྟེན་ནམ་ཐར་པའི་ཚུལ་མ་ཡིན་ནོ་སྙམ་པའི་བསམ་པ་འདིས་ཕྱིར་སྤང་ན་ནི་སྤངས་པར་མི་འགྱུར་རོ། །དེ་ལྟ་བུ་ཅུང་ཟད་ཡོད་དོ་ཞེའམ། དེ་ལྟ་བུ་ཅུང་ཟད་ཀྱང་མེད་དོ་ཞེའམ། དེ་ལྟ་བུ་ཡོད་ཀྱང་རུང་མེད་ཀྱང་རུང་སྟེ། རེ་ཞིག་བདག་ལ་ནི་དེ་དགོས་སོ་ཞེས་བྱ་བའམ། ཐར་པའི་ཚུལ་མེད་པ་ཉིད་དོ། ཚུལ་དེ་ཡོད་ཀྱང་རུང་མེད་ཀྱང་རུང་རེ་ཞིག་བདག་ལ་ནི་དེ་མི་དགོས་སོ་ཞེས་བྱ་བ་དེ་ལྟ་བུ་དག་ཏུ་རྣམ་པར་མི་རྟོག་ན་ནི་ཕྱིར་སྤངས་པ་ཡིན་ནོ་ཞེས་བཤད་དོ། །ཡང་ན་ཉམས་པའི་བསམ་པའི་དབང་དུ་མཛད་ནས་དེ་སྐད་དུ་བཤད་དེ། དེ་བཞིན་དུ་ཞུ་བའི་གཞུང་ཁ་ཅིག་ལས། བཙུན་པ་དགེ་སློང་ལ་ཁྱོད་སུ་ཡིན་ཞེས་དྲིས་པ་ལས། ང་དགེ་སྦྱོང་མ་ཡིན་ནོ་ཞེས་སྨྲས་ན་བསླབ་པ་ཕུལ་བ་ཞེས་བགྱིའམ། ཉེ་བ་འཁོར་མ་ཡིན་ནོ། །ཅིར་འགྱུར་ལགས། ཤེས་བཞིན་དུ་བརྫུན་སྨྲས་པས་ལྟུང་བྱེད་དུའོ། །དེ་བཞིན་དུ་དགེ་ཚུལ་མའོ་ཞེས་བགྱི་བ་དང༌། དགེ་སློང་མའོ་ཞེས་བགྱི་བ་དང༌། ཁྱིམ་ན་གནས་པའོ་ཞེས་བགྱི་བ་དང༌། ཀུན་དུ་རྒྱུའོ་ཞེས་བགྱི་བ་དང༌། གཞན་མུ་སྟེགས་ཅན་ནོ་ཞེས་བགྱི་བ་དང༌། ཀླུའོ། །གནོད་སྦྱིན་ནོ། །དྲི་ཟའོ། །མི་འམ་ཅིའོ། །ཡི་དགས་སོ། །ཤ་ཟའོ། །གྲུལ་བུམ་མོ་ཞེས་བགྱིས་ན་ཐམས་ཅད་དུ་བསླབ་པ་ཕུལ་བ་ཞེས་བགྱིའམ། ཉེ་བ་འཁོར་མ་ཡིན་ཏེ། འོན་ཀྱང་ཤེས་བཞིན་དུ་བརྫུན་སྨྲས་པས་ལྟུང་བྱེད་དུ་འགྱུར་རོ་ཞེས་བཤད་དོ། །དེ་བཞིན་དུ་རྣམ་པར་འབྱེད་པ་ལས་ཀྱང་ཉམས་པའི་བསམ་པ་ཁོ་ནས་སྤངས་པ་ཡིན་པར་གསུངས་པ་ཡིན་ཏེ། འདི་སྐད་དུ་འདི་ལྟར་དགེ་སློང་དགའ་བར་གྱུར་ཀྱང་རུང༌། མི་དགའ་ཡང་རུང༌། བབས་པར་འདོད་ཀྱང་རུང༌། དགེ་སློང་དོན་དུ་མི་གཉེར་བ་ཡང་རུང༌། དགེ་སྦྱོང་གིས་གནོང་ཞིང་ངོ་ཚ་ནས་སྨོད་པར་བྱེད། རྣམ་པར་སྨོད་པར་བྱེད་ཅིང་དགེ་སློང་གི་དྲུང་དུ་སོང་སྟེ་འདི་སྐད་ཅེས། ཚེ་དང་ལྡན་པ་དགོངས་ཤིག །བདག་མིང་འདི་ཞེས་བྱ་བ་བསླབ་པ་འབུལ་ལོ་ཞེས་སྨྲས་ན་ཞེས་བྱ་བ་ལ་སོགས་པ་འབྱུང་ངོ༌། །ནག་མོས་ཕྱིར་སྤངས་པ་བཤད་མ་ཐག་པ་ཡང་འདིར་སྦྱར་བར་བྱ་སྟེ། དེ་བཞིན་དུ་འགྲེལ་པ་བྱེད་པས་
ཀྱང། འདི་ལ་ནི་ཉམས་པའི་བསམ་པ་དགོས་སོ་ཞེས་བྱ་བ་ལ་སོགས་པ་བཤད་དོ། །སྔོན་དུ་ཞེས་བྱ་བ་ལ་སོགས་པ་ལ་སྔོན་དུ་ཞེས་བྱ་བ་ནི་མི་ཚངས་པར་སྤྱོད་པ་སྤྱད་པའི་སྔོན་རོལ་དུ་སྟེ། སྔོན་དུ་སྨོས་པ་ནི་དེ་ལས་གཞན་པའི་བར་ཆད་ཀྱི་ཆོས་མེད་པ་བསྟན་པ་ཡིན་ནོ། །ལས་ཀྱི་ཆོ་ག་ཡིས་ཞེས་བྱ་བ་ལ་སོགས་པ་ལ་ལས་ནི་གསོལ་བ་དང་བཞིའི་ལས་ཀྱིས་སོ། །ཆོ་གས་ཞེས་བྱ་བ་ནི་ཡང་དག་པའི་ཆོ་གས་ཏེ། དགེ་འདུན་དུ་ཚང་བ་དང༌། ལས་བྱེད་པ་དགེ་སློང་ཉིད་ཡིན་པ་དང༌། ཉན་པ་པོ་རྣམས་གོར་བཏུབ་པ་ཉིད་ཅེས་བྱ་བ་ལ་སོགས་པ་ཆོས་བཞིན་དུ་ཞེས་བྱ་བའི་དོན་ཏོ། །ཆོ་ག་སྨོས་པ་ནི་ལས་ལེགས་པར་མ་བྱས་པ་བསལ་བའི་ཕྱིར་རོ། །ལེགས་པར་ཞེས་བྱ་བ་ནི་བསམ་པ་ཐག་པ་ནས་ཏེ་མྱ་ངན་ལས་འདས་པའི་བསམ་པ་ཅན་ལ་དགེ་སློང་གི་སྡོམ་པ་སྐྱེ་བའི་ཕྱིར་མྱ་ངན་ལས་འདས་པའི་བསམ་པས་ཞེས་བྱ་བའི་ཐ་ཚིག་གོ །བསྙེན་པར་རྫོགས་པར་བྱས་ཏེ་ཞེས་བྱ་བ་ནི་དགེ་སློང་གི་དངོས་པོ་བསྒྲུབ་པས་ཏེ་དགེ་སློང་གི་སྡོམ་པ་སྐྱེས་པའོ་ཞེས་བྱ་བའི་དོན་ཏོ། །འཁྲིག་འབྱུང་ཞེས་བྱ་བ་ལ་འཁྲིག་པ་ནི་ཟུང་སྟེ་ཕོ་དང་མོ་ཞེས་བྱ་བ་ཡིན་ནོ། །དེ་ལས་བྱུང་བ་ནི་འཁྲིག་འབྱུང་སྟེ། ཉོན་མོངས་པ་ཅན་གྱི་བདེ་བ་སྤྱོད་པ་ཡིན་ཏེ། བཅུག་པའི་རེག་པ་བདག་གིར་བྱེད་པའི་མཚན་ཉིད་ཅེས་བྱ་བའི་ཐ་ཚིག་གོ །ཕྱིས་ཞེས་བྱ་བ་ནི་འཁྲིག་པ་སྤྱོད་པའི་འོག་རོལ་དུའོ། །ཅིའི་ཕྱིར་ཞེས་བྱ་བ་ནི་རྒྱུ་གང་གི་ཕྱིར་རོ། །དགེ་སློང་མིན་ཞེས་བྱ་བ་ནི་ཕས་ཕམ་པར་འགྱུར་བར་བྱེད་པའོ། །མི་འདོད་ཅེས་བྱ་བ་ནི་མི་འགྱུར་བའོ། །འདི་ལ་འདྲི་བའི་དོན་ནི་གང་ཞིག་ཡང་དག་པའི་ཆོ་གས་ལེགས་པར་བསྙེན་པར་རྫོགས་ཤིང་དགེ་སློང་གི་སྡོམ་པ་སྐྱེ་བ་ལ་ཕྱིས་མི་ཚངས་པར་སྤྱོད་པ་འཁྲིག་པ་བསྟེན་པ་དེ་དག་གོ །འདི་ལྟར་ཕས་ཕམ་པར་འགྱུར་བ་སྤྱད་པས་དགེ་སློང་མ་ཡིན་པར་འགྱུར་རོ་ཞེས་བྱ་ཐེ་ཚོམ་ཡང་མེད་པ་ཉིད་དེ། འདི་ནི་ལེགས་པར་ཤེས་ན། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་འདི་དགེ་སློང་ཉིད་དུ་གསུངས་པ་དེ་རྒྱུ་གང་གིས་ཡིན་པ་ཁོ་བོ་ལ་སྨྲོས་ཤིག་ཅེས་བྱ་བ་ཡིན་ནོ། །འདི་ལ་ལན་ནི་འདི་ཡིན་ཏེ། ལས་དང་པོ་བ་ལ་དགོངས་ནས་གསུངས་པའམ། ཡང་ན་སྨྱོན་པ་
ལ་བསྟེན་པའམ། ཡང་ན་སེམས་འཁྲུགས་པ་ལ་དགོངས་པའམ། ཡང་ན་ཚོར་བས་ཉེན་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། ལས་དང་པོ་པ་དང༌། སྨྱོས་པ་དང༌། སེམས་འཁྲུགས་པ་དང༌། ཚོར་བས་ཉེན་པ་ལ་ཉེས་པ་མེད་དོ་ཞེས་བྱ་བ་ཡིན་ནོ། །རྣམ་པ་གཅིག་ཏུ་ན་འདི་ནི་བསླབ་པ་བྱིན་པ་ལ་དགོངས་ནས་གསུངས་པ་ཡིན་ཏེ། འདི་ལྟར་བསླབ་པ་བྱིན་པ་སྟེ་ཕས་ཕམ་པར་འགྱུར་བ་སྤྱད་པ་ཡིན་ཡང་དགེ་སློང་ཉིད་དེའི་སོ་ན་འདུག་པ་ཁོ་ན་སྟེ། འདི་ལྟར་དེ་ལ་ཡང་ཕས་ཕམ་པར་འགྱུར་བ་དང་དགེ་འདུན་ལྷག་མ་ལ་སོགས་པའི་ལྟུང་བ་རྣམས་རྣམ་པར་གཞག་པའི་ཕྱིར་རོ། །དེ་བཞིན་དུ་འདིར་གཞུང་ནི། དགེ་སློང་ལ་མི་ཚངས་པར་སྤྱོད་པའི་རྐྱེན་གྱིས་མཐར་འགྱུར་བ་དེ་བཞིན་དུ་བསླབ་པ་བྱིན་པ་དང༌། དགེ་སློང་མ་ལ་ཡང་མཐར་འགྱུར་ཏེ་ཞེས་བྱ་བ་ལ་སོགས་པ་ལྟུང་བའི་རིགས་ལྔ་ཅི་རིགས་པར་བརྗོད་པར་བྱ་བ་ཡིན་ནོ། །དེ་བཞིན་དུ་འདི་ལ་མདོ་བྱེད་པས་ཀྱང་བསླབ་པ་བྱིན་པ་ནི་འདྲ་བ་ཉིད་དོ་ཞེས་བཤད་དོ། །ཡང་ན་རྨའི་སྒོ་ཉམས་པ་དག་ཏུ་མི་ཚངས་པར་སྤྱོད་པ་བྱེད་པ་ཐུགས་ལ་བཞག་ནས་དེ་སྐད་གསུངས་པ་ཡིན་ཏེ། འདི་ལ་ནི་ཉེས་པ་སྦོམ་པོར་བསྟན་པའི་ཕྱིར་རོ། །དེ་བཞིན་དུ་འདིར་གཞུང་ནི། འདི་ལྟར་དགེ་སློང་བསྟེན་པ་འཁྲིག་པ་ལ་གཞོལ་བ་དང༌། བསྟེན་པ་ལ་འབབ་པ་དང༌། བསྟེན་པ་ལ་བབ་པའི་སེམས་སུ་གྱུར་ཅིང༌། དེ་བསྟེན་པ་ལ་གཞོལ་བ་དང༌། བསྟེན་པ་ལ་འབབ་པ་དང༌། བསྟེན་པ་ལ་བབ་པའི་སེམས་ཀྱིས་མིའི་བུད་མེད་གསོན་པ་ཉམས་པ་ལ་བར་ཆད་དང་བཅས་པས་བར་ཆད་དང་བཅས་པ་དང༌། བར་ཆད་མེད་པས་བར་ཆད་མེད་པར་ཟག་བྱེད་དུ་ཟག་བྱེད་འཇུག་པར་བྱེད་ན་ཉེས་པ་སྦོམ་པོར་འགྱུར་རོ་ཞེས་བྱ་བ་ལ་སོགས་པ་ཡིན་ནོ། །འདི་ལ་གཞུང་གཞན་ནི་བཙུན་པ་དགེ་སློང་མི་ཚངས་པར་སྤྱོད་པས་ཕས་ཕམ་པར་འགྱུར་ཞིང༌། འོན་ཀྱང་མི་ཚངས་པར་སྤྱོད་པ་བགྱིས་པས་ཕས་ཕམ་པར་འགྱུར་བའི་ལྟུང་བར་མི་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། གང་ཞིག་གསོན་པོ་ཉམས་པ་དང་ལྷན་ཅིག་མི་ཚངས་པར་སྤྱོད་པ་བྱེད་པ་
དེ་ནི་ཕས་ཕམ་པར་འགྱུར་ལ། གང་ཞིག་གསོན་པོ་ཉམས་པ་དང་ལྷན་ཅིག་མི་ཚངས་པར་སྤྱོད་པ་བྱེད་པ་ལ་ནི་ཕས་ཕམ་པར་འགྱུར་བའི་ལྟུང་བར་མི་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། ཉམས་པ་དག་ལས་ནི་སྦོམ་པོ་ཞེས་བཤད་དོ། །ཡང་ན་དེ་ནི་བར་ཆད་དང་བཅས་པར་མི་ཚངས་པར་སྤྱོད་པ་བྱེད་པའི་དབང་དུ་མཛད་ནས་གསུངས་པ་ཡིན་ཏེ། འདི་ལ་གཞུང་ནི་བཤད་མ་ཐག་པ་དེ་ཉིད་ཡིན་ནོ། །དེ་བཞིན་དུ་འདི་ཉིད་ལ་གཞུང་གཞན་ནི། བཙུན་པ་རེ་ཞིག་དགེ་སློང་གིས་གོས་སྟུག་པོའམ་ཕྱིང་བུས་དཀྲིས་ནས་འཇུག་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་རོ། །དེ་བཞིན་དུ་མདོ་བྱེད་པས་ཀྱང༌། མཐའ་ཉིད་བརྗོད་པའི་གཡོགས་པ་ནི་བསྒྲིབས་པ་སྟེ་དེས་གཡོགས་པ་ལ་ཐམས་ཅད་ཀྱི་ཐམས་ཅད་དུ་རེག་པར་མི་འགྱུར་བ་མ་ཡིན་ནོ། །གཞན་གྱིས་གཡོགས་པ་ཉིད་ནི་མི་རེག་པར་འཇུག་པས་རྣམ་པ་བཤད་པ་ཡིན་ནོ་ཞེས་བཤད་དོ། །ཡང་ན་མ་རེག་པར་བཅུག་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་བཤང་བའི་ལམ་མམ་གཅི་བའི་ལམ་མམ། ཁའི་ལམ་དུ་མ་རེག་པར་འཇུད་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ་ཞེས་བྱ་བ་ཡིན་ནོ། །ཡང་ན་བལྟབས་ཏེ་བཅུག་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་བལྟབས་ནས་འཇུད་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ་ཞེས་བྱ་བ་ཡིན་ནོ། །དེ་བཞིན་མདོ་བྱེད་པས་བལྟབས་པ་དང་མི་རེག་པར་བཅུག་པ་གཉིས་སོ་ཞེས་བཤད་དོ། །ཡང་ན་རྨའི་ཁ་གསུམ་གྱི་མཚམས་སྦྱར་བ་འཕྲོ་མངོན་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་བུད་མེད་ཕྱེད་དུ་བཙལ་བའི་ཚལ་བ་གཉིས་སྦྱར་ནས་འཇུག་པར་བགྱིད་ན་ཅིར་འགྱུར་ལགས། གལ་ཏེ་འཕྲོ་མི་མངོན་ན་མཐར་འགྱུར་རོ། །འོན་ཏེ་འཕྲོ་མངོན་ན་ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་འདི་ལ་གཞུང་གཞན་ནི། བཙུན་པ་རེ་ཞིག་བུད་མེད་ཕྱེད་དུ་བཀུམས་པར་གྱུར་ཅིང་དེའི་རྨའི་སྒོ་གསུམ་པོ་དག་
ཀྱང་ཉམས་པར་གྱུར་ལ། དེ་དག་ཀྱང་དགེ་སློང་གི་ཁམ་ཚད་དང་ཁམ་ཚད་དུ་འཕྲོ་སྤྱར་ནས་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་བསྟན་པར་བྱ་བའི་དབུས་ཕྱེ་བའི་མཚམས་མི་མངོན་པ་ལ་ཡང་ངོ༌། །མངོན་པ་ལ་ནི་ཚིག་འོག་མར་འགྱུར་རོ་ཞེས་བཤད་དོ། །ཡང་ན་མགོ་བཅད་པ་དང་མི་ཚངས་པར་སྤྱོད་པ་བྱེད་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་བུད་མེད་མགོ་བཀུམས་པ་དང་ལྷན་ཅིག་མི་ཚངས་པར་སྤྱོད་པ་འཁྲིག་པའི་ཆོས་བསྟེན་པར་གྱུར་ན་ཅིར་འགྱུར་ལགས། གལ་ཏེ་བཤང་བའི་ལམ་མམ་གཅི་བའི་ལམ་དུ་བསྟེན་པར་བྱེད་ན་མཐར་འགྱུར་རོ། །འོན་ཏེ་ཁའི་ལམ་མམ་མིད་པ་འམ་མཚན་ཁུང་དུ་བསྟེན་པར་བྱེད་ན་ཉེས་པ་སྦོམ་པོར་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་མགོ་བཅད་པའི་ཁར་རོ་ཞེས་བཤད་དོ། །ཡང་ན་མཚམས་ཀྱི་ཕྱི་རོལ་དུ་མི་ཚངས་པར་སྤྱོད་པ་བྱེད་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་སོའི་སླད་རོལ་གྱི་མཆུར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་མཆུ་གཉིས་ལའོ། །ཕྱི་རོལ་གྱི་མཚམས་ལ་ཐུག་པར་རོ་ཞེས་བཤད་དོ། །གང་ཞིག་དགེ་སློང་ཉིད་ཅེས་བྱ་བ་ལ་སོགས་པ་ལ། གང་ཞིག་ཅེས་བྱ་བ་ནི་སྤྱིར་བསྟན་པའོ། །དགེ་སློང་གི་དངོས་པོ་ནི་དགེ་སློང་ཉིད་དོ། །དགེ་སློང་གི་སྒྲ་འཇུག་པའི་རྒྱུ་མཚན་ཞེས་བྱ་བའི་ཐ་ཚིག་སྟེ། གང་གི་དབང་གིས་འདི་དགེ་སློང་ཡིན་ནོ་ཞེས་ཐ་སྙད་འདོགས་པའོ་ཞེས་བྱ་བའི་དོན་ཏོ། །དེ་ལ་གནས་པ་ནི་རྣམ་པར་གནས་པ་སྟེ། དགེ་སློང་གི་སྡོམ་པ་སྐྱེས་པ་ཞེས་བྱ་བའི་ཐ་ཚིག་གོ །འདོད་པ་ལ་ཡང་བསྟེན་ཞེས་བྱ་བ་ནི་མི་ཚངས་པར་སྤྱོད་པའོ། །དེ་ལ་ཞེས་བྱ་བ་ནི་དགེ་སློང་ལའོ། །མཐའ་ནི་ཕས་ཕམ་པར་འགྱུར་བ་སྟེ། ལྟུང་བ་འདི་ནི་ཐ་མ་དང༌། ཐ་མལ་པ་དང༌། ཐ་ཆད་པ་དང༌། མི་མཐུན་པ་དང་མི་འཕྲོད་པ་ཡིན་ནོ་ཞེས་འབྱུང་བའི་ཕྱིར་རོ། །མ་གསུངས་པ་ནི་བཀའ་
མ་སྩལ་བའོ། །ཅིའི་ཕྱིར་ཞེས་བྱ་བ་ནི་རྒྱུ་གང་གི་ཕྱིར་རོ། །དྲི་ཡིས་ཞེས་བྱ་བ་ནི་རྨས་ཞེས་བྱ་བ་ཡིན་ནོ། །དེ་ནི་ཞེས་བྱ་བ་ནི་འདོད་པ་བསྟེན་པ་སྤྱད་པ་མཐར་མ་གསུངས་པའོ། །སྨྲོས་ཞེས་བྱ་བ་ནི་ཤོད་ཅིག་པའོ། །འདི་ལ་འདྲི་བའི་བསམ་པ་ནི་གང་ཞིག་དགེ་སློང་གི་སྡོམ་པ་ལེགས་པར་སྐྱེས་ལ་མི་ཚངས་པར་སྤྱོད་པ་བྱེད་པ་དེ་ནི་ངེས་པར་ཕས་ཕམ་པར་འགྱུར་བའི་ལྟུང་བ་བྱུང་བ་ཡིན་ནོ་ཞེས་བྱ་བ་དེ་གོ་གསལ་བ་ཁོ་ནར་རྟོགས་ན། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་ཕས་ཕམ་པར་མ་གསུངས་བ་དེ་ཁོ་བོ་ལ་རྒྱས་པར་རབ་ཏུ་སྟོན་ཅིག་ཅེས་བྱས་པ་འདི་ཡིན་ནོ། །འདིར་ནི་སྤྱིར་མཐར་མ་གསུངས་མོད་ཀྱི། འོན་ཀྱང་ལ་ལར་ནི་ལྟུང་བ་མེད་པ། ལ་ལར་ནི་ཉེས་བྱས། ལ་ལར་ནི་ཉེས་པ་སྦོམ་པོར་གསུངས་ཏེ་ཅི་རིགས་པར་སྦྱར་རོ། །འདི་ལ་ལན་ནི་འདི་ཡིན་ཏེ། ལས་དང་པོ་པའི་དགེ་སློང་གི་དབང་དུ་མཛད་ནས་དེ་སྐད་གསུངས་པ་ཡིན་ནོ། །ཡང་ན་སྨྱོན་པའམ། སེམས་འཁྲུགས་པའམ། ཚོར་བས་ཉེན་པའི་དབང་དུ་མཛད་པ་ཡིན་ཏེ། འདི་ལ་གཞུང་ནི་སྔ་མ་བཞིན་ནོ། །ཡང་ན་སྔར་ཕམ་པ་བྱུང་བའམ། རྐུ་ཐབས་སུ་གནས་པའམ། དང་པོ་ནས་མི་མཐུན་པ་ཅན་ནམ། ཟ་མ་འམ། དགེ་སློང་མ་སུན་ཕྱུང་བ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་མིའི་བུད་མེད་དང་ལྷན་ཅིག་ཉམས་པར་བགྱིད་ལ། མཐར་མི་འགྱུར་བ་ལྟ་མཆིས་ལགས་སམ། ཡོད་དེ། སྔོན་ཕམ་པ་བྱུང་བའམ། རྐུ་ཐབས་སུ་གནས་པའམ། དང་པོ་ནས་མི་མཐུན་པ་ཅན་ནམ། ཟ་མའམ། དགེ་སློང་མ་སུན་འབྱིན་པ་ཞིག་གིས་ཉམས་པར་བགྱིད་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་ཉམས་པ་དང་མ་སྐྱེས་པ་གཉིས་ལྟུང་བ་ལ་སྦྱོར་བ་ནི་ཉེས་བྱས་སོ་ཞེས་བཤད་དོ། །འདིར་ནི་བདག་ཉིད་དགེ་སློང་གི་ཚུལ་དུ་ཉེ་བར་སྟོན་པས་དགེ་སློང་ཉིད་དུ་ཤེས་པར་བྱའི་ཁྱད་པར་དུ་ནི་མ་ཡིན་ནོ། །དེ་ཉིད་ཀྱི་ཕྱིར་འགྲེལ་བ་བྱེད་པས། གང་དུ་བདག་ཉིད་ཚུལ་དུ་ཉེ་བར་སྟོན་པ་དེ་ནི་དེ་དང་མཐུན་པ་མ་ཡིན་ཏེ་ཆགས་ན་དེ་ལ་ཉེས་བྱས་ཀྱི་ངོ་བོ་ཞེས་བཤད་དོ། །ཡང་ན་ཉམས་པའི་དགེ་སློང་གི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། འདི་
ལ་ཡང་དགེ་སློང་ཉིད་ཀྱི་ཐ་སྙད་འདོགས་པ་སྟེ། དགེ་སློང་འདི་ཡང་ཕས་ཕམ་པར་གྱུར་པ་ཡིན་གྱི་གནས་པར་མི་བྱའོ་ཞེས་བྱ་བ་དང༌། དེ་བཞིན་དུ་དགེ་སློང་ཚུལ་ཁྲིམས་འཆལ་པ་ཡིན། སྡིག་པའི་ཆོས་ཅན་ཡིན་ཞེས་བྱ་བ་དང༌། དེ་བཞིན་དུ་དགེ་སྦྱོང་བཞི་སྟེ་ལྔ་པོ་མེད་དོ་ཞེས་འབྱུང་ངོ༌། །འདི་ཉིད་ལ་དགོངས་ནས། བུ་ལོན་ནོར་བཞིན་ཁ་ཅེ་རྣམས་འབྱུང་བ་ལ་ནི་གཉིས་སུ་འདོད་ཅེས་བཤད་དོ། །ཡང་ན་དེའི་རྨའི་སྒོ་ཉམས་པའི་དབང་དུ་མཛད་ནས་གསུངས་བའམ། བར་ཆད་དང་བཅས་པར་འཇུག་པ་ཞེས་བྱ་བ་དེའི་དབང་དུ་མཛད་པའམ། མ་རེག་པར་འཇུད་པའམ། བལྟབས་ཏེ་འཇུག་པའམ། རྨའི་སྒོ་གསུམ་མཚམས་སྦྱར་བའམ། མགོ་བཅད་པར་རམ། མཚམས་ཀྱི་ཕྱི་རོལ་དུ་འཇུག་པ་ལ་དགོངས་པ་ཡིན་ཏེ། དེ་བཞིན་དུ་འདིར་གཞུང་ནི་ཚིག་ལེ་འུར་བྱས་པ་བཤད་མ་ཐག་པ་ལས་དགེ་སློང་སྨོས་པ་བསླབ་པ་བྱིན་པ་མ་གཏོགས་པ་རྣམས་ཡིན་ནོ། །གཞུང་དེ་ཐམས་ཅད་ལ་ཡང་མི་ཚངས་པར་སྤྱད་པ་སྤྱོད་པ་ལ་མཐར་མ་གསུངས་ཀྱི། འོན་ཀྱང་ཉེས་པ་སྦོམ་པོར་གསུངས་པས་ཉེས་པ་སྦོམ་བོའི་སྐབས་ཀྱིས་ཀྱང་དྲི་བ་དང་ལན་དག་རུང་ངོ༌། །དགེ་སློང་གཅིག་པུ་ཞེས་བྱ་བ་ལ་སོགས་པ་ལ། གཅིག་པུ་ཞེས་བྱ་བ་ནི་གྲོགས་མེད་པའོ།། གནས་ནི་གནས་ལྔ་ལ་སོགས་པ་གནས་སོ། །གནས་ན་གྲོགས་དང་བཅས་པ་ཡོད་པས་གཅིག་པུ་ཞེས་བྱ་བ་སྨོས་སོ། །ཟླ་མེད་པར་ཞེས་བྱ་བ་ནི་ཟླ་གྲོགས་མེད་པ་སྟེ། ཟླ་ཞེས་བྱ་བའི་སྦྱོར་བ་ནི་འདིར་ཟླ་གྲོགས་ཀྱི་ཡུལ་ཅན་ཡིན་པར་བལྟ་བར་བྱའོ། །འདི་ལ་ཟླ་གྲོགས་མེད་པས་ན་ཟླ་མེད་པ་སྟེ་དེའོ།། ཇི་ལྟ་བུ་ཞེས་བྱ་བ་ནི་དྲི་བའོ། །སྡོམ་བརྩོན་ཞེས་བྱ་བ་ནི་དགེ་སློང་ངོ༌། །སོམས་ཏེ་ཞེས་བྱ་བ་ནི་གཟོབས་ཏེའོ། །འདི་ལ་ཕ་རོལ་བོའི་བསམ་པ་ནི་ཟླ་ལ་ལྟོས་ནས་མི་ཚངས་པར་སྤྱོད་པ་ལ་སོགས་པའི་ཕས་ཕམ་པར་འགྱུར་བ་བྱུང་ན། ཅི་དེ་གཅིག་པུ་ལ་དེ་འབྱུང་བ་གང་ཡིན་པ་སྲིད་པ་ཡོད་དམ་ཞེས་བྱ་པ་དེ་ལེགས་པར་རྟོགས་ཏེ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཟླ་དང་བཅས་པའི་མི་ཚངས་པར་སྤྱོད་པ་ལ་སོགས་པར་གཏོགས་པའི་སྦྱོར་བ་བྱེད་པའི་དབང་དུ་མཛད་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་
གཅིག་པུ་སྡུམ་པ་ལ་ཞུགས་པ་ལ་མི་ཚངས་པར་སྤྱོད་པའི་རྐྱེན་གྱིས་མཐར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། དཔེར་ན་མཚན་རིངས་དད་རྒྱབ་མཉེན་ལྟ་བུ་ཞེས་བྱ་བ་ཡིན་ཏེ། དེ་ལ་དོན་ནི་འདི་ཡིན་ཏེ། ཟླ་གྲོགས་སྐྱེས་བ་དང་བུད་མེད་ལ་སོགས་པ་དང་ལྷན་ཅིག་པ་ལས་ཕས་ཕམ་པར་འགྱུར་བའི་རྣམ་པར་གཞག་པ་གང་ཡིན་པའི་ངེས་པ་དེ་ནི་མེད་ཀྱི། འོན་ཀྱང་གཅིག་པུ་ལ་ཡང་སྲིད་པ་ཉིད་དེ། དཔེར་ན་མཚན་རིངས་དང་རྒྱབ་མཉེན་ལྟ་བུའོ། །ཁྱིམ་བདག་གི་བུ་ཞིག་ཕོ་མཚན་ཚད་ལས་འདས་པར་གྱུར་བ་དང་གཞི་དེས་དེའི་གཉེན་རྣམས་ཀྱིས་མཚན་རིངས་ཞེས་བྱ་བར་མིང་བཏགས་སོ། །རེ་ཞིག་ཅིག་ན་དེ་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཕོ་མཚན་དེ་རང་གི་བཤང་བའི་ལམ་དུ་བཅུག་སྟེ་རེག་པ་བདག་གིར་བྱས་སོ། །དེ་བཞིན་དུ་ཁྱིམ་བདག་གི་བུ་ཞིག་དཔེར་ན་རི་བོང་ངམ་བྱི་ལ་ལྟ་བུར་རྒྱབ་མཉེན་པོར་གྱུར་པ་དང་དེ་ལ་བརྟེན་ནས་དེའི་མིང་རྒྱབ་མཉེན་དུ་བཏགས་སོ། །རེ་ཞིག་ཅིག་ན་དེ་ཡང་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་ནས་ཕོ་མཚན་ཁའི་ནང་དུ་བཅུག་ནས་རེག་པ་བདག་གིར་བྱས་སོ་ཞེས་བྱ་བ་འདི་རྒྱས་པར་རྣམ་པར་འབྱེད་པ་ལས་འབྱུང་ངོ༌། །དེ་བཞིན་དུ་འདི་ཉིད་ལ་གཞུང་གཞན་ནི། བཙུན་པ་དགེ་སློང་གཅིག་པུ་གཙུག་ལག་ཁང་དུ་ཞུགས་ལ་ཕས་ཕམ་པར་འགྱུར་བ་བཞི་སྤྱོད་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ་མི་ཚངས་པར་སྤྱོད་པའི་རྐྱེན་གྱིས་ཇི་ལྟ་བུ་ལགས། དཔེར་ན་མཚན་རིངས་དང་རྒྱབ་མཉེན་ལྟ་བུའོ། །མ་བྱིན་པར་ལེན་པའི་རྐྱེན་གྱིས་ཇི་ལྟ་བུ་ལགས། འདི་ལྟར་དགེ་སློང་གིས་སྦྱོར་བ་བྱས་ནས་གཙུག་ལག་ཁང་དུ་ཞུགས་པ་དང་དེའི་ཡང་བརྐུས་པ་ལྟ་བུའོ། །བཀུམས་པའི་རྐྱེན་གྱིས་ཇི་ལྟ་བུ་ལགས། འདི་ལྟར་དགེ་སློང་གིས་གསོད་པའི་སྦྱོར་བ་བྱས་ནས་གཙུག་ལག་ཁང་དུ་ཞུགས་པ་དང་དེ་ཡང་བསད་པ་ལྟ་བུའོ། །སྨྲ་བའི་རྐྱེན་གྱིས་ཇི་ལྟ་བུ་ལགས། འདི་ལྟར་དགེ་སློང་འདི་སྐད་ཅེས་ང་ནི་དགྲ་བཅོམ་པ་སངས་རྒྱས་སོ་ཞེས་ཟེར་བ་ལྟ་བུའོ། །གང་གིས་ཡན་ལག་ལྔ་ལྡན་པར་ཞེས་བྱ་བ་ལ་སོགས་པ་ནི་དགེ་སློང་གང་གི་ཕས་ཕམ་པ་འབྱུང་བའི་རྒྱུ་ལྔའོ། །མ་བྱིན་པ་ལེན་པ་ཉིད་དང༌། མ་
ཤ་ཀ་ལྔ་ཉིད་དང༌། རྐུ་སེམས་ཉིད་དང༌། མིའི་འགྲོ་བས་བཟུང་བ་ཉིད་དང༌། དེར་འདུ་ཤེས་པ་ཉིད་དང་ཞེས་བྱ་བ་དང་ལྡན་ཞིང་འབྱོར་བ་སྟེ། ཡན་ལག་ལྔ་ཞེས་སྨོས་པ་ནི་ཡན་ལག་གཅིག་མ་ཚང་ན་སྨད་པར་གསུངས་པ་དག་གོ །གཞན་གྱི་ནོར་ནི་གཞན་སྐྱེས་པ་དང༌། བུད་མེད་དང་མ་ནིང་ལ་སོགས་པས་བདག་གིར་བྱས་པའི་ནོར་ཏེ་འདིས་ནི་རང་གི་ནོར་བསལ་ཏོ། །ནི་ཞེས་བྱ་བ་ནི་ཁྱད་པར་དུ་བྱའོ། །རྐུ་ཞེས་བྱ་བ་ནི་བླང་བ་བྱས་པའོ། །དེ་ལ་ཞེས་བྱ་བ་ནི་དགེ་སློང་ལའོ། །དེ་ནི་ཞེས་བྱ་བ་ནི་གཞན་གྱི་ནོར་རྐུ་བར་གཏོགས་པའི་ཕས་ཕམ་པར་འགྱུར་བར་མ་གསུངས་པའོ། །གསལ་བར་སྨྲོས་ཞེས་བྱ་བར་སྦྱར་ཏེ། གསལ་བར་ཞེས་བྱ་བ་ནི་གསལ་པོར་རོ། །དེ་ལ་དོན་ནི་འདི་ཡིན་ཏེ། བཅོམ་ལྡན་འདས་ཀྱིས་དགེ་སློང་གང་ཞིག་གཞན་གྱི་ནོར་གྱི་རིགས་པར་བྱིན་པ་ཉིད་ལ་སོགས་པ་ཡན་ལག་ལྔ་དང་ལྡན་པ་རྐུ་བ་དེ་ལ་ཕས་ཕམ་པར་འགྱུར་བར་གསུངས་ན། འོན་ཀྱང་རྣམ་གྲངས་འགའ་ཞིག་གིས་དེ་ལ་ཕས་ཕམ་པར་འགྱུར་བར་མ་གསུངས་པ་དེ་ཁོ་བོ་ལ་ངེས་པར་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་གཞན་གྱི་དོན་དུ་རྐུ་བའི་སྐབས་ཀྱིས་གསུངས་པ་ཡིན་ནོ། །འདི་ལྟར་ཡན་ལག་ཐམས་ཅད་ཡོད་ཀྱང་གཞན་གྱི་དོན་དུ་རྐུ་བ་ལ་ཉེས་པ་སྦོམ་པོར་གསུངས་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་མ་སྨྲས་པར་གཞན་གྱི་དོན་དུ་རྐུ་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་འདིར་གཞུང་གཞན་ནི་དགེ་སློང་གིས་དགེ་སློང་ཞིག་ལ་འདི་སྐད་ཅེས་ཁྱོད་ཀྱིས་དགེ་སློང་ཆེ་གེ་མོ་ཞིག་གེ་ཡོ་བྱད་དེ་ལྟ་བུ་དང་དེ་ལྟ་བུ་ཤེས་སམ། ཤེས་སོ། །སོང་ལ་དེ་རྐུས་ཤིག །གནས་ནས་གནས་སུ་སྤོགས་ཤིག་ཅེས་སྨྲས་ལ། གལ་ཏེ་རྐུ་བའི་སེམས་ཀྱིས་དེ་བརྐུས་རྫས་གནས་ནས་གནས་སུ་སྤོགས་ནས་བྱེད་པ་མཚུངས་པར་འགྱུར་རོ། །འོན་ཏེ་དེ་འདི་སྙམ་དུ་འདི་ནི་ཁོ་བོའི་ཡིན་ནོ་སྙམ་ན་ལེན་པ་ལ་ཉེས་པ་མེད་དོ། །རྐུར་འཇུག་པ་གང་ཡིན་པ་དེ་ལ་ནི་དངོས་པོ་ཇི་ལྟ་བ་བཞིན་དུ་འགྱུར་རོ་ཞེས་བྱ་བ་ཡིན་ནོ། །ཡང་ན་བྱང་གེ་སྒྲ་མི་སྙན་གྱི་གླིང་ནས་བརྐུས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་བྱང་གི་
སྒྲ་མི་སྙན་གྱི་གླིང་ནས་བརྐུས་ན་ཅིར་འགྱུར་ལགས། ཉེ་བ་འཁོར་དེ་ན་མ་བྱིན་པར་ལེན་པ་ནི་མེད་དེ། གལ་ཏེ་དེར་རྐུ་བའི་སེམས་བསྐྱེད་ན་ནི་ཉེས་པ་སྦོམ་པོར་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་ལས་ཀྱང༌། བྱང་གི་སྒྲ་མི་སྙན་ན་ནི་ཡོངས་སུ་འཛིན་པ་མེད་པ་ཉིད་དོ། །དེ་ནི་རང་གི་དང་འདྲའོ་ཞེས་བཤད་དོ། །ཡང་ན་ཕྱོགས་བཞིའི་དགེ་འདུན་གྱི་བརྐུས་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་ལུང་ནི། བཙུན་པ་རེ་ཞིག་དགེ་སློང་གིས་ཕྱོགས་བཞིའི་དགེ་འདུན་གྱིས་མ་སྩལ་བ་བརྐུས་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། བདག་པོ་ཐ་དད་པ་མ་ཡིན་པ་ནི་རང་གི་དང་འདྲའོ་ཞེས་བཤད་དོ། །ཡང་ན་འགྲོ་བ་གཞན་གྱི་ལ་བརྟེན་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། མི་མ་ལགས་པའི་མ་སྩལ་བ་ལ་མི་མ་ལགས་པའི་འདུ་ཤེས་ཀྱིས་བརྐུས་ན་ཅིར་འགྱུར་ལགས། ཉེས་བྱས་སུའོ། །མི་མ་ལགས་པའི་མ་སྩལ་བ་ལ་མིའི་འདུ་ཤེས་ཀྱིས་བརྐུས་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་མིའི་རྒྱུད་ཀྱིས་ཡོངས་སུ་གཟུང་བའོ། །དེར་འདུ་ཤེས་པས་སོ་ཞེས་བཤད་དོ། །ཡང་ན་ཉེས་བྱས་སུ་གསུངས་པ་ནི་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་གསུངས་པ་ཡིན་ཏེ། འདིར་ཡང་གཞུང་ནི་སྔ་མ་བཞིན་ནོ། །སྡོམ་བརྩོན་ཞེས་བྱ་བ་ལ་སོགས་པ་ལ་སྡོམ་བརྩོན་ནི་དགེ་སློང་ངོ༌། །བློ་ལྡན་ཞེས་བྱ་བ་ནི་སྔ་ཕྱི་བརྟགས་པ་སྟེ་ཆེད་དུ་བསམས་ནས་ཞེས་བྱ་བའི་དོན་ཏོ། །བློ་ལྡན་ཞེས་བྱ་བ་ནི་གྱི་ནར་བསླང་བ་སྩལ་བ་ཡིན་ནོ། །གྲངས་འདས་ཞེས་བྱ་བ་ནི་མ་ཤ་ཀ་ལྔ་ལས་ལྷག་པའི་ཚད་དང་ལྡན་པ་སྟེ་བརྒྱ་སྟོང་རི་བ་ཡང་ཞེས་བྱ་བའི་ཐ་ཚིག་གོ །དེ་ཞེས་བྱ་བ་ནི་སྡོམ་བརྩོན་ནོ། །ཅི་སྟེ་ཞེས་བྱ་བ་ནི་དྲི་བའོ། །དེ་ནི་ཞེས་བྱ་བ་ནི་སྨྲས་མ་ཐག་པའི་དངོས་པོའོ། །མྱུར་དུ་ཞེས་བྱ་བ་ནི་སྐྱེན་པར་རོ། །སྨྲོས་ཞེས་བྱ་བ་ནི་སྨྲོས་ཤིག་པའོ། །འདི་ལ་གཞན་གྱི་བསམ་པ་ནི་འདི་ཡིན་ཏེ། བརྒྱ་སྟོང་རི་བ་ཡང་རྐུ་ལ་ཡན་ལག་ཐམས་ཅད་ཀྱང་ཡོད་ན་གདོན་མི་ཟ་བར་ཕས་ཕམ་པར་འགྱུར་ན། འོན་ཀྱང་བཅོམ་ལྡན་འདས་ཀྱིས་སྐབས་འགའ་ཞིག་གིས་འདི་ཕས་ཕམ་པ་
འགྱུར་བ་འབྱུང་བ་མ་གསུངས་པ་དེ་བདག་ལ་མ་ཐོགས་པར་སྨྲོས་ཤིག་ཅེས་བྱ་བའི་ཐ་ཚིག་གོ །འདི་ལ་ལན་ནི་འདི་ཡིན་ཏེ། དེ་ནི་མ་ཤ་ཀ་རེ་རེ་ནས་བརྐུ་བ་ལ་བརྟེན་ནས་ཡིན་ནོ། །དེ་བཞིན་དུ་འདིར་གཞུང་ནི་བཙུན་པ་བཅོམ་ལྡན་འདས་ཀྱིས་མ་ཤ་ཀ་བརྐུས་ན་མཐར་འགྱུར་རོ་ཞེས་བཀའ་སྩལ་པ་གང་ལགས་པ། བཙུན་པ་དགེ་སློང་གིས་མ་ཤ་ཀ་ལྔ་བརྐུས་ལ་མཐར་ཡང་མི་འགྱུར་བ་ལྟ་མཆིས་ལགས་སམ། ཡོད་དེ། གལ་ཏེ་མ་ཤ་ཀ་རེ་རེ་ནས་སམ། གཉིས་གཉིས་སམ། གསུམ་གསུམ་མམ། བཞི་བཞི་རྐུ་ནའོ། །དེ་བཞིན་དུ་མདོ་བྱེད་པས་ཀྱང༌། ཕུང་པོ་ལས་རྐུན་ལན་རེ་རེ་ཞིང་བླངས་པ་ཐ་དད་དོ་ཞེས་བཤད་དོ། །ཡང་ན་བོར་བར་འདུ་ཤེས་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་བཅོམ་ལྡན་འདས་ཀྱིས་མ་ཤ་ཀ་ལྔ་རྐུ་ན་མཐར་འགྱུར་རོ་ཞེས་བཀའ་སྩལ་པ། གང་ལགས་པ། བཙུན་པ་དགེ་སློང་གིས་མ་ཤ་ཀ་སྟོང་བརྐུས་ལ་མཐར་ཡང་མི་འགྱུར་བ་ལྟ་མཆིས་ལགས་སམ། ཡོད་དེ། གལ་ཏེ་བོར་བའི་འདུ་ཤེས་ཀྱིས་རྐུ་ནའོ། །བོར་བའི་འདུ་ཤེས་ཞེས་བྱ་བ་ནི་འདིར་ཡོངས་སུ་བཏང་བའི་འདུ་ཤེས་དང་ངེས་པར་མ་བཏང་བའི་འདུ་ཤེས་ཞེས་བྱ་བའི་ཐ་ཚིག་གོ །སྡོམ་བརྩོན་རིན་ཐང་ཚང་བའི་ཞེས་བྱ་བ་ལ་སོགས་པ་ལ། རིན་ཐང་ཚང་བ་ནི་མ་ཤ་ཀ་ལྔ་ལ་སོགས་པའི་ཚད་གསུངས་པའོ། །ཡོ་བྱད་ནི་གསེར་དང་དངུལ་ལ་སོགས་པ་སྟེ། འདིས་འཚོ་བ་སྦྱོར་བར་བྱེད། སྐྱོང་བར་བྱེད་པའི་ཕྱིར་རོ། །གནས་ནས་ཞེས་བྱ་བ་ནི་བཞག་པའི་ཕྱོགས་ནས་ཏེ། འདིར་བཞག་པས་ན་གནས་སོ། །མ་སྤགས་པ་ཞེས་བྱ་བ་ནི་མ་བསྐྱོད་པར་རོ། །འགྱུར་བ་ནི་ཐོབ་སྟེ་མཐའི་ལྟུང་བ་དང་ལྡན་པར་འགྱུར་རོ། །ཀྱེ་ཞེས་བྱ་བ་ནི་བོད་པའོ། །ངེས་པར་སྨྲོས་ཞེས་བྱ་བར་སྦྱར་ཏེ། ངེས་པར་ཞེས་བྱ་བར་སྦྱར་བ་ནི་གཏན་ལ་ཕབ་པར་རོ། །ལེགས་པ་ཞེས་བྱ་བ་ནི་བཟང་པོར་ཏེ་སྔ་ཕྱི་མི་འགལ་བར་ཞེས་བྱ་བའི་ཐ་ཚིག་གོ །འདི་ལ་གཞན་གྱི་བསམ་པ་ནི་གསེར་དང་དངུལ་ལ་སོགས་པའི་ནོར་མ་ཤ་ཀ་ལྔ་རི་བ་གནས་ནས་སྤགས་པ་ཙམ་ཁོ་ནས་ཕས་ཕམ་པར་འགྱུར་ན། འོན་ཀྱང་བཅོམ་ལྡན་འདས་ཀྱིས་གནས་ནས་ཀྱང་མ་སྤགས་པ་འདི་ལ་ཕས་ཕམ་པར་འགྱུར་བ་གསུངས་
པ་དེ་ཀྱེ་དགེ་སློང་ཁོ་བོ་ལ་ངེས་པར་ཁ་ན་མ་ཐོ་བ་མེད་པར་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་ས་ཕྱོགས་ནོར་དང་བཅས་ཏེ་སྤགས་པ་ཐུགས་ལ་བཞག་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་བཅོམ་ལྡན་འདས་ཀྱིས་ཡོ་བྱད་རིན་ཐང་ཚང་བ་གནས་ནས་སྤགས་ན་མཐར་འགྱུར་རོ་ཞེས་བཀའ་སྩལ་པ་གང་ལགས་པ། བཙུན་པ་དགེ་སློང་གིས་ཡོ་བྱད་རིན་ཐང་ཚང་བ་གནས་ནས་མ་སྤགས་ལ་མཐར་ཡང་འགྱུར་བ་ལྟ་མཆིས་ལགས་སམ། ཡོད་དེ། དཔེར་ན་གནས་ཁང་པ་ན་འདུག་པ་དང་བཅས་ཏེ་བརྐུས་པ་ལྟ་བུའོ། །གང་དུ་བཞག་པར་འགྱུར་བའི་གནས་ནས་བརྐུས་ནའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། གནས་དང་བཅས་པ་ཡང་མ་ཡིན་ནོ་ཞེས་བཤད་དོ། །སྡོམ་བརྩོན་རྐུ་བའི་སེམས་ཀྱིས་ཞེས་བྱ་བ་ལ་སོགས་པ་ལ། རྐུ་བའི་སེམས་ཀྱིས་ཞེས་བྱ་བ་ནི་བརྐུ་བར་བྱ་སེམས་ཀྱིས་སོ། །མ་བྱིན་པ་ཞེས་བྱ་བ་ནི་བྱིན་པར་མ་གྱུར་པ་སྟེ་གཞན་གྱི་རྫས་ཞེས་བྱ་བའི་ཐ་ཚིག་གོ །སྤགས་པ་ལ་ཞེས་བྱ་བ་ནི་བསྐྱོད་པ་ལའོ། །རྒྱུ་ཞེས་བྱ་བ་ནི་གཏན་ཚིགས་སོ། །འདི་ལ་འདྲིའོ་བསམ་པ་ནི་འདི་ཡིན་ཏེ། གཞན་གྱི་ནོར་གནས་ནས་སྤགས་པའི་དགེ་སློང་ཁོ་ན་ཕས་ཕམ་པར་འགྱུར་བར་རྣམ་པར་བཞག་ན། འོན་ཀྱང་རྣམ་པ་འགའ་ཞིག་གིས་འདི་ལ་ཕམ་པར་མ་གསུངས་པ་དེ་ཁོ་བོ་ལ་སྒྱུ་ཐབས་བརྗོད་པར་གྱིས་ཤིག་ཅེས་བྱ་བའི་དོན་ཏོ། །འདི་ལ་དོན་ནི་འདི་ཡིན་ཏེ། དེ་ནི་ཕྱོགས་གཅིག་གནས་ནས་མ་འཕགས་པའི་རྐུ་བ་ལ་དགོངས་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི་བཙུན་པ་བཅོམ་ལྡན་འདས་ཀྱིས་དགེ་སློང་གིས་ཡོ་བྱད་རིན་ཐང་ཚང་བ་གནས་ནས་གནས་སུ་སྦེད་པར་བྱེད་ན་མཐར་འགྱུར་རོ་ཞེས་བཀའ་སྩལ་པ་གང་ལགས་པ། དགེ་སློང་གི་ཡོ་བྱད་རིན་ཐང་ཚང་བ་ཤིན་ཏུ་རིང་བར་འཚལ་ཀྱང་མཐར་མ་འགྱུར་བ་ལྟ་མཆིས་ལགས་སམ། ཡོད་དེ། དགེ་སློང་གི་ཡོ་བྱད་རིན་ཐང་ཚང་བ་མཐའ་གཅིག་ནས་བཟུང་སྟེ་ཤིན་ཏུ་ཐག་རིང་པོར་དྲངས་ཀྱང་མཐའ་ཅིག་ཤོས་གནས་དེ་ནས་མ་འཕགས་ན་ཉེས་པ་སྤོམ་པོར་འགྱུར་རོ་ཞེས་བྱ་བ་ཡིན་ནོ། །འདི་ལ་མདོ་བྱེད་པས་ཀྱང༌། ཕྱོགས་གཅིག་གནས་ནས་མ་འཕགས་པ་ཡང་མ་ཡིན་ནོ། །བཤལ་བ་ལ་ནི་ངོས་
ཀྱི་གཞིའི་མཚམས་ལས་ངོས་ཅིག་ཤོས་འདས་ནའོ་ཞེས་བཤད་དོ། །དགེ་སློང་ཚུལ་ཁྲིམས་ལྡན་པ་ཡིས། །ཞེས་བྱ་བ་ལ་སོགས་པ་ལ། ཚུལ་ཁྲིམས་ལྡན་པ་ནི་ཕས་ཕམ་པར་འགྱུར་བ་མ་བྱུང་བ་སྟེ། ཚུལ་ཁྲིམས་དང་ལྡན་པ་སྨོས་པ་ནི་ཚུལ་ཁྲིམས་འཆལ་པ་ལ་སོགས་པ་བསལ་བའི་ཕྱིར་རོ། །ཡན་ལག་ལྔ་ལྡན་ཞེས་བྱ་བ་ནི་མ་བྱིན་པ་ཉིད་ལ་སོགས་པ་ཡན་ལག་ལྔ་དང་ལྡན་པ་སྟེ། ཡན་ལག་ལྔ་དང་བཅས་པར་ཞེས་བྱ་བའི་ཐ་ཚིག་གོ །ལྟུང་བ་མེད་པར་ཞེས་བྱ་བ་ནི་ལྟུང་བ་ཡོང་པ་མ་ཡིན་པའོ། །ཉེས་པ་མེད་པ་ཞེས་བྱ་བའི་དོན་ཏེ་འདི་ལ་ཉེས་པ་མེད་པས་སོ། །ཐེ་ཚོམ་ནི་སོ་མ་ཉིའོ། །ཆོད་ཅེས་བྱ་བ་ནི་སོལ་ཅིག་པའོ། །འདི་ལ་དོན་ནི་གལ་ཏེ་དགེ་སློང་བསྙེན་པར་རྫོགས་པ་དང་བཅས་ཤིང་མ་ཉམས་པས་གཞན་གྱི་ནོར་རྫས་མ་བྱིན་པ་ཉིད་ལ་སོགས་པ་ཡན་ལག་ལྔ་དང་ལྡན་པར་བརྐུས་ན་དེའི་ཚེ་དེ་ལ་གདོན་མི་ཟ་བར་ཕས་ཕམ་པར་འགྱུར་བ་འབྱུང་ན། འོན་ཀྱང་བཅོམ་ལྡན་འདས་ཀྱིས་མ་བྱིན་པར་ལེན་པ་དེ་ལྟ་བུ་ལ་ལྟུང་བ་འགའ་ཡང་མ་གསུངས་པ་ཞེས་བྱ་བ་ནི་བདག་གི་ཐེ་ཚོམ་ཡུན་རིང་པོ་ནས་སོལ་ཅིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་ལས་དང་པོ་པ་དང༌། སྨྱོན་པ་དང༌། སེམས་འཁྲུགས་པ་དང༌། ཚོར་བས་ཉེན་པ་ལ་བརྟེན་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། ལས་དང་པོ་བ་དང༌། སྨྱོས་པ་དང༌། སེམས་འཁྲུགས་པ་དང༌། ཚོར་བས་ཉེན་པ་ལ་ལྟུང་བ་མེད་དོ་ཞེས་བྱ་བ་ཡིན་ནོ། །ཡང་ན་དེ་ནི་ཆོས་རྐུ་བ་ལ་བརྟེན་ནས་བསྟན་པ་ཡིན་ཏེ། དེ་བཞིན་དུ་འདིར་ནི། བཙུན་པ་རྐུ་བ་དུ་ཞིག་མཆིས་ལགས། ཉེ་བ་འཁོར་དྲུག་སྟེ། བཅོམ་ནས་རྐུ་བ་དང༌། ནན་གྱིས་རྐུ་བ་དང༌། ཕྱིར་སྦྱིན་པ་རྐུ་བ་དང༌། བཞག་པ་རྐུ་བ་དང༌། གཏམས་པ་རྐུ་བ་དང༌། ཆོས་རྐུ་བའོ། །བཙུན་པ་བཅོམ་ལྡན་འདས་ཀྱིས་རྐུ་བ་དྲུག་གསུངས་པ་གང་དག་ལགས་པ་དེ་དག་ལས་གང་གིས་མཐར་འགྱུར་ལགས། ཉེ་བ་འཁོར་ཆོས་རྐུ་བ་མ་གཏོགས་པ་ལྷག་མ་རྣམས་ཀྱིས་མཐར་འགྱུར་རོ་ཞེས་བྱ་བ་ཡིན་ནོ། །མདོ་བྱེད་པས་ཀྱང༌། དཔེ་བྲི་བ་ལ་ནི་ཉེས་པ་མེད་པ་ཉིད་དོ་ཞེས་བཤད་དོ། །ཡང་ན་ཕས་ཕམ་པར་འགྱུར་བའི་ལྟུང་བ་མེད་པ་ལ་དགོངས་ནས་ལྟུང་བ་མེད་པར་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་མ་སྩལ་
བ་བླངས་པས་ཕས་ཕམ་པར་འགྱུར་ཞིང༌། འོན་ཀྱང་མ་སྩལ་བར་བླངས་ན་ཕས་ཕམ་པར་འགྱུར་བའི་ལྟུང་བར་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གང་གིས་མི་རྣམས་ཀྱི་ཡོ་བྱད་རིན་ཐང་ཚང་བ་མ་བྱིན་པར་བླངས་པ་དེ་ནི་ཕས་ཕམ་པར་འགྱུར་རོ། །གང་གིས་མི་མ་ཡིན་པ་རྣམས་ཀྱི་ཡོ་བྱད་རིན་ཐང་ཚང་བ་མ་བྱིན་པར་བླངས་པ་དེ་ལ་ནི་ཕས་ཕམ་པའི་ལྟུང་བར་མི་འགྱུར་རོ། །འདི་ལ་མདོ་བྱེད་པས་ཀྱང༌། མིའི་རྒྱུད་ཀྱིས་ཡོངས་སུ་བཟུང་བའོ་ཞེས་བཤད་དོ། །དུད་འགྲོའི་མངལ་ན་ཞེས་བྱ་བ་ལ་སོགས་པ་ལ། དུད་འགྲོའི་ཞེས་བྱ་བ་ནི་དུད་འགྲོའི་སྐྱེ་གནས་སུ་གཏོགས་པ་ཕྱུགས་ལ་སོགས་པ་ཞེས་བྱ་བའི་དོན་ཏོ། །མངལ་ན་གནས་པ་ཞེས་བྱ་བ་ནི་མངལ་ན་འདུག་པའོ། །བུ་ཞེས་བྱ་བ་ནི་བུ་ཆགས་པ་ལ་སོགས་པའོ། །གསད་སེམས་ཀྱིས་ཞེས་བྱ་བ་ནི་གསོད་པའི་བསམ་པས་སོ། །གསད་ན་ཞེས་བྱ་བ་ནི་བཅོམ་ནའོ། །ན་ཞེས་བྱ་བ་ནི་དོན་གཞན་ཉེ་བར་བསྟན་པའི་ཕྱིར་ཏེ་དེས་ན་གསད་པར་གྱུར་ན་ཞེས་བྱ་བའི་དོན་ཏོ། །ཐུབ་པ་ཞེས་བྱ་བ་ནི་ཉོན་མོངས་པས་བྱས་པའི་བརྗོད་པ་མི་མངའ་བའི་ཕྱིར་ཏེ་དེས་སོ། །དེ་ཉིད་མཁྱེན་པ་ཡིས་ཞེས་བྱ་བ་ནི་བླང་བ་དང་དོར་བར་བྱ་བའི་དེ་ཁོ་ན་ཉིད་ཐབས་དང་བཅས་པ་མཁྱེན་པས་དེ་ཐམས་ཅད་མཁྱེན་པ་ཞེས་བྱ་བའི་ཐ་ཚིག་གོ །འདི་ལ་འདྲི་བའི་དོན་ནི་བཅོམ་ལྡན་འདས་ནི་ཁོ་བོ་ཅག་ལ་དུད་འགྲོའི་འདུ་ཤེས་ཀྱིས་སྲོག་དང་བྲལ་བའི་བསམ་པས་དུད་འགྲོའི་འགྲོ་བ་པ་གསོད་ཅིང་སྲོག་དང་ཡང་བྲལ་ན་ལྟུང་བྱེད་དུ་འགྱུར་རོ་ཞེས་བསྟན་ལ། འོན་ཀྱང་བཅོམ་ལྡན་འདས་ཀྱིས་དེ་ལ་ཕས་ཕམ་པར་གསུངས་པ་དེ་ཇི་ལྟ་བུ་ཡིན་པ་དེ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དུད་འགྲོའི་མངལ་ན་མིའི་འགྲོ་བ་པའི་བུ་ཡོད་པ་བསད་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་དུད་འགྲོའི་སྐྱེ་གནས་སུ་གཏོགས་པའི་བུད་མེད་ཀྱི་མངལ་ན་མཆིས་པའི་མི་བཀུམས་ན་ཅིར་འགྱུར་ལགས། མཐར་འགྱུར་རོ་ཞེས་བྱ་བ་ཡིན་ནོ། །སྡོམ་བརྩོན་ཞེས་བྱ་བ་ལ་སོགས་པ་ལ། གསད་པའི་སེམས་ལྡན་གྱིས་ཞེས་བྱ་བ་ནི་སྲོག་བཅད་པའི་བསམ་པས་སོ། །མིའི་ཞེས་བྱ་བ་ནི་མིའི་འགྲོ་བར་གཏོགས་པའོ། །ལྟུང་བྱེད་པ་ཞེས་བྱ་བ་ནི་གསོད་པར་བྱེད་པ་སྟེ་མངལ་རླུགས་པ་
ལ་སོགས་པའི་སྦྱོར་བས་གསོད་པར་བྱེད་པ་ཞེས་པའི་ཐ་ཚིག་གོ །གལ་ཏེ་ཞེས་བྱ་བ་ནི་ཇི་སྟེའོ། །མཐུ་ཡོད་ཅེས་བྱ་བ་ནི་ནུས་པ་ཡོད་ནའོ། །འདི་ལ་བསྡུས་པའི་དོན་ནི་དགེ་སློང་གིས་མིའི་འགྲོ་བར་སྐྱེས་པའི་བུད་མེད་ཀྱི་མངལ་ལྟུང་བར་བྱེད་ན་ཕས་ཕམ་པར་འགྱུར་རོ་ཞེས་བྱ་བ་ནི་ལེགས་པར་གྲགས་ན། འོན་ཀྱང་ལ་ལར་འདི་ལ་ཕས་ཕམ་པར་མ་གསུངས་སོ་ཞེས་པ་འདི་ལ་གལ་ཏེ་ཁྱོད་ལ་སྨྲ་བའི་ནུས་པ་ཞིག་ཡོད་ན་དེ་ཁོ་བོ་ལ་ལན་ཐོབ་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་མིའི་འགྲོ་བ་པའི་བུད་མེད་ཀྱི་མངལ་ན་དུད་འགྲོའི་སྐྱེ་གནས་པའི་བུ་ཡོད་པ་བསད་པ་ལ་བརྟེན་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་མིའི་བུད་མེད་ཀྱི་མངལ་ན་དུད་འགྲོའི་སྐྱེ་གནས་སུ་གཏོགས་པའི་བུ་མཆིས་པ་གསོད་པར་བགྱིད་ན་ཅིར་འགྱུར་ལགས། ལྟུང་བྱེད་དུའོ་ཞེས་བྱ་བ་ཡིན་ནོ། །ཕ་མ་བསམས་བཞིན་བསད་པ་ལ་ཞེས་བྱ་བ་ལ་སོགས་པ་ལ། མནར་མེད་པ་ཞེས་བྱ་བ་ནི་མནར་མེད་པའི་དམྱལ་བར་འགྲོ་བའི་མཚམས་མེད་པ་བྱེད་པ་ཞེས་བྱ་བའི་ཐ་ཚིག་སྟེ། འདི་ལ་བདེ་བར་སྣང་བའི་བར་སྐབས་མེད་པས་སོ་ཞེས་བྱ་བ་ནི་བཤད་མ་ཐག་པ་སྐད་དུའོ། །མདུན་དུ་ཞེས་བྱ་བ་ནི་མངོན་སུམ་དུའོ། །འདི་ལ་བསྡུས་པའི་དོན་ནི་བློ་སྔོན་དུ་བཏང་སྟེ་ཕ་དང་མ་བསད་ན་གདོན་མི་ཟ་བར་ཕས་ཕམ་པ་དང་མཚམས་མེད་པར་འགྱུར་ན། འོན་ཀྱང་བཅོམ་ལྡན་འདས་ཀྱིས་ཕས་ཕམ་པར་འགྱུར་བ་ཡང་མ་གསུངས་ལ་མཚམས་མེད་པར་ཡང་མ་གསུངས་སོ་ཞེས་བྱ་བ་འདི་ལ་ཁོ་བོ་ལ་རྒྱུ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཕ་མ་དུད་འགྲོའི་སྐྱེ་གནས་སུ་གཏོགས་པ་བསད་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་ལུང་ནི། བཙུན་པ་དགེ་སློང་གིས་ཕ་མ་བཀུམས་ལ་མཐར་ཡང་མི་འགྱུར་མཚམས་མ་མཆིས་པའི་ཁ་ན་མ་ཐོ་བས་ཀྱང་རེག་པར་མི་འགྱུར་བ་ལྟ་མཆིས་ལགས་སམ། ཡོད་དེ། གང་གིས་ཕ་མ་དུད་འགྲོའི་སྐྱེ་གནས་སུ་གཏོགས་པ་དག་ཡིན་ནའོ། །དེ་བཞིན་དུ་མདོ་བྱེད་པས་ཀྱང༌། མི་མ་ཡིན་པའི་འགྲོ་བ་པ་གཉིས་ནི་མ་ཡིན་ནོ། །དེ་གཉིས་ལས་མཚམས་མེད་པར་མི་འགྱུར་རོ་ཞེས་བཤད་དོ། །ཡང་ན་སྐྱེད་
པར་བྱེད་པ་མ་ཡིན་པའི་ཕ་མ་དག་ལ་དགོངས་ནས་དེ་སྐད་དུ་བཤད་པ་ཡིན་ཏེ། དེ་བཞིན་དུ་འདིར་ལུང་ནི། བཙུན་པ་མས་མ་བསྐྱེད་ལ་གཞན་གྱིས་ནི་བསྐྱེད་ན་གང་ཞིག་བཀུམས་པས་མཐར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བས་ཀྱང་རེག་པར་འགྱུར་ལགས། སྐྱེད་པར་བྱེད་པ་གང་ཡིན་པའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། དེ་ནི་སྐྱེད་པར་བྱེད་པ་གཉིས་ལས་ཏེ་ཞེས་བཤད་དོ། །ཡང་ན་ཟག་པ་དང་བཅས་པའི་ལས་ཀྱིས་སྲིད་པ་དང་སྲེད་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཕ་བཀུམས་ལ་མཐར་ཡང་མི་འགྱུར། མཚམས་མ་མཆིས་པའི་ཁ་ན་མ་ཐོ་བས་རེག་པར་ཡང་མི་འགྱུར་བ་ལྟ་མཆིས་ལགས་སམ། ཡོད་དེ། ཟག་པ་དང་བཅས་པའི་ལས་ཀྱིས་སྲིད་པ་བསད་ནའོ། །ཉེ་བ་འཁོར་ཟག་པ་དང་བཅས་པའི་ལས་ཀྱིས་སྲིད་པ་ནི་མངོན་པར་བསྒྲུབ་པའི་དོན་གྱིས་ཕ་ཞེས་བྱའོ། །བཙུན་པ་དགེ་སློང་གིས་མ་བཀུམས་ལ་མཐར་ཡང་མི་འགྱུར་མཚམས་མ་མཆིས་པའི་ཁ་ན་མ་ཐོ་བས་རེག་པར་ཡང་མི་འགྱུར་བ་ལྟ་མཆིས་ལགས་སམ། ཡོད་དེ། གལ་ཏེ་སྲེད་པ་བསད་ནའོ། །ཉེ་བ་འཁོར་སྲེད་པ་ནི་སྐྱེད་པའི་དོན་གྱིས་མ་ཞེས་བྱའོ་ཞེས་བྱ་བ་ལ་སོགས་པ་ཡིན་ནོ། །དོན་འདི་ནི་བཤད་མོད་ཀྱི་ཕས་ཕམ་པར་འགྱུར་བའི་སྐབས་ཀྱིས་ཡང་བཤད་དོ། །བརྡ་ཕྲད་མདུན་དུ་ཞེས་བྱ་བ་ལ་སོགས་པ་ལ་བརྡ་སྤྲད་མདུན་ཞེས་བྱ་བ་ནི་དོན་གོ་བའི་མངོན་སུམ་དུ་སྟེ། བརྡ་ཕྲད་པ་ཞེས་སྨོས་པ་ནི། །བརྫུན་ཚིག་འདུ་ཤེས་གཞན་བསྒྱུར་བས། །ཚིག་དོན་མངོན་པར་གོ་བའོ། །ཞེས་འབྱུང་བའི་བརྡ་མི་ཕྲད་པའི་དྲུང་དུ་ནི་ན་སྨད་པར་བཤད་པའི་ཕྱིར། སངས་རྒྱས་ཞེས་བྱ་བ་ནི་འདས་པ་དང་མ་འོངས་པ་དང་ད་ལྟར་བྱུང་བའི་དོན་ལག་མཐིལ་དུ་སྐྱུ་རུ་ར་བཞག་པ་བཞིན་གསལ་བར་མཁྱེན་པའི་ཕྱིར་རོ། །དགྲ་བཅོམ་པ་ནི་ཉོན་མོངས་པའི་དགྲ་བཅོམ་པའི་ཕྱིར་དང༌། འགྲོ་བ་མཐའ་དག་གིས་མཆོད་པར་འོས་པའི་ཕྱིར་དང༌། མི་སྐྱེ་བའི་ཆོས་ཅན་གྱི་ཕྱིར་རོ། །སྟོན་པ་ནི་ཕན་པ་དང་མི་ཕན་པ་ཉེ་བར་སྟོན་པའི་ཕྱིར་རོ། །དོན་དུ་གཉེར་གྱིས་ཞེས་བྱ་བ་ནི་བཅོལ་གྱིས་ཞེས་བྱ་བའོ། །དེས་ན་ཚིག་གི་དོན་ནི་གང་གི་ཚེ་དགེ་སློང་གིས་བརྡ་ཕྲད་པའི་མདུན་དུ་ང་ནི་སངས་རྒྱས་སོ། །ང་ནི་དགྲ་བཅོམ་པའོ། །ང་ནི་སྟོན་པའོ་
ཞེས་སྨྲས་པ་དེའི་ཚེ་དེ་ལ་གདོན་མི་ཟ་བར་ཕས་ཕམ་པར་འགྱུར་ན། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་དེས་ཕས་ཕམ་པར་འགྱུར་བ་མ་ཡིན་པར་གསུངས་པ་དེ་ཇི་ལྟ་བུ་ཡིན་པ་དེ་ཁོ་བོ་ལ་ཇི་ལྟ་བ་བཞིན་དུ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། མིང་མཐུན་པའི་དོན་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་འདི་སྐད་དུ་སངས་རྒྱས་ཡིན་ནོ་ཞེས་སྨྲས་ན་ཅིར་འགྱུར་ལགས། གལ་ཏེ་སྡིག་པ་མི་དགེ་བའི་ཆོས་རྣམས་རྟོགས་པ་ཉིད་དང༌། རྟོགས་པར་བྱེད་པ་ཉིད་ལ་བསམས་ནས་ལུང་སྟོན་ན་ནི་ཉེས་པ་སྦོམ་པོར་འགྱུར་རོ། །འོན་ཏེ་སངས་རྒྱས་ཀྱི་ཆོས་མེད་པ་ལུང་སྟོན་པར་བྱེད་ན་ནི་མཐར་འགྱུར་རོ། །བཙུན་པ་རེ་ཞིག་དགེ་སློང་གིས་འདི་སྐད་དུ་ང་ནི་སྟོན་པའོ་ཞེས་སྨྲས་ན་ཅིར་འགྱུར་ལགས། གལ་ཏེ་འདི་སྙམ་དུ་བདག་ནི་འདོམས་པར་བྱེད་པའོ། །རྗེས་སུ་སྟོན་པར་བྱེད་པའོ་ཞེས་བྱ་བར་བསམས་ཏེ་སྨྲས་ན་ཉེས་པ་སྦོམ་པོར་འགྱུར་རོ། །འོན་ཏེ་སྟོན་པའི་ཆོས་ལུང་སྟོན་པར་བྱེད་ན་ནི་མཐར་འགྱུར་རོ། །བཙུན་པ་རེ་ཞིག་དགེ་སློང་གིས་འདི་སྐད་དུ་ང་ནི་མི་སློབ་པའོ་ཞེས་སྨྲས་ན་ཅིར་འགྱུར་ལགས། གལ་ཏེ་ཉོན་མོངས་པ་སྤངས་པར་ལུང་སྟོན་ན་མཐར་འགྱུར་རོ། །འོན་ཏེ་འདི་སྙམ་དུ་བདག་ནི་བཟོ་འགའ་ལ་ཡང་མི་སློབ་བོ་ཞེས་བྱ་བར་བསམས་ཏེ་སྨྲས་ན་ཉེས་པ་སྦོམ་པོར་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། བླ་མ་བརྗོད་པའི་འདུན་པས་མིང་མཐུན་པའི་དོན་བརྗོད་ན་སྦོམ་པོའི་ཞེས་བཤད་དོ། །ཡང་ན། དེ་ནི་ལས་དང་པོ་པ་དང་སྨྱོན་པ་དང་སེམས་འཁྲུགས་པ་དང་ཚོར་བས་ཉེན་པ་ལ་དགོངས་ནས་གསུངས་པའམ། མི་མ་ཡིན་པའི་འགྲོ་བའི་མངོན་སུམ་དུ་སྨྲས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་མི་མ་ལགས་པའི་འདུ་ཤེས་ཀྱིས་མིའི་ཆོས་བླ་མ་ལུང་སྟོན་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ལ་སོགས་པ་ཡིན་ནོ། །ཡང་ན་སྨྱོན་པ་དང་སེམས་འཁྲུགས་པའི་མངོན་སུམ་དུ་སྨྲས་པ་ལ་བརྟེན་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་སྨྱོན་པའི་དྲུང་དུ་མིའི་ཆོས་བླ་མ་བརྗོད་ན་ཅིར་འགྱུར་ལགས། ཉེས་པ་སྦོམ་པོར་རོ། །
སེམས་འཁྲུགས་པ་ལ་སོགས་པ་ལ་ཡང་དེ་བཞིན་དུ་བལྟ་བར་བྱའོ་ཞེས་བྱ་བ་ཡིན་ནོ། །ཡང་ན་དེ་ནི་དབུས་པ་ལ་མཐའ་འཁོབ་པའི་ཚིག་ཏུ་སྨྲས་པ་ལ་བརྟེན་ནས་གསུངས་པ་ཡིན་པར་ཤེས་པར་བྱ་སྟེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་དབུས་པ་ཞིག་གིས་མཐའ་འཁོབ་པའི་སྐད་དུ་སྨྲ་བ་ལ་མིའི་ཆོས་བླ་མ་བརྗོད་ལ། དབུས་པས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ལ་སོགས་པ་ཡིན་ནོ། །འདི་ལ་མདོའི་ཁུངས་ཀྱང་གོ་རིམས་བཞིན་དུ་མ་བཅས་པ་ཉིད་ལ་ཡང་ངོ༌། །ཐ་སྙད་དུ་རུང་བའི་འདུ་ཤེས་ཉམས་པ་ལ་ནི་ཕམ་པར་འགྱུར་བ་མན་ཆད་ཀྱི་ལྟུང་བ་ཡང་མི་འབྱུང་ངོ༌། །མིའི་འགྲོ་བ་ལ་ནི་ཐ་སྙད་དུ་བྱ་བ་ཉིད་ཡིན་ནོ། །རང་བཞིན་ཉམས་པ་ནི་མ་ཡིན་ནོ། །རྣམ་པར་རིག་བྱེད་ལ་ནི་དོན་གོ་བའོ་ཞེས་བཤད་དོ། །ཡང་ན་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་གཞུང་ནི་སྔར་བཤད་པ་བཞིན་ནོ། །ཡང་ན་མངོན་པའི་ང་རྒྱལ་ལ་བརྟེན་པ་ཡིན་ཏེ། འདིར་གཞུང་ནི། བཙུན་པ་དགེ་སློང་གིས་བདག་ཉིད་ལ་མིའི་ཆོས་བླ་མ་མཆིས་ཤིང་བདོག་བཞིན་དུ་བརྗོད་ན་ཕས་ཕམ་པར་འགྱུར་ཞིང༌། འོན་ཀྱང་བདག་ཉིད་ལ་མིའི་ཆོས་བླ་མ་མཆིས་ཤིང་མི་བདོག་བཞིན་དུ་བརྗོད་ན་ཕས་ཕམ་པར་འགྱུར་བའི་ལྟུང་བར་མི་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། གཡོས་ཤེས་པ་ལུང་སྟོན་ན་ཕས་ཕམ་པར་འགྱུར་རོ། །མངོན་པའི་ང་རྒྱལ་གྱིས་ཀུན་ཤེས་པ་ལུང་སྟོན་ན་དེ་ལ་ཕས་ཕམ་པར་འགྱུར་བའི་ལྟུང་བར་མི་འགྱུར་རོ་ཞེས་བྱ་བ་ཡིན་ནོ། །ཁྱོད་འབྲས་ཐོབ་ཅེས་དེ་སྐད་དྲིས་ཞེས་བྱ་བ་ལ་སོགས་པ་ལ། ཁྱོད་ཅེས་བྱ་བ་ནི་ཁྱོད་ཀྱིས་སོ། །འབྲས་བུ་ནི་རྒྱུན་དུ་ཞུགས་པ་ལ་སོགས་པ་འཕགས་པའི་ལམ་གྱི་འབྲས་བུ་སྟེ། དགེ་སློང་ཚུལ་ནི་དྲི་མེད་ལམ། །འབྲས་བུ་འདུས་བྱས་འདུས་མ་བྱས། །ཞེས་འབྱུང་བའི་ཕྱིར་རོ། །དེ་སྐད་ཅེས་བྱ་བ་ནི་སྨྲས་མ་ཐག་པའི་སྐད་དུའོ། །དེ་བཞིན་དུ་ཞེས་བྱ་བ་ནི་དེ་ལྟར་ཡིན་ནོ་ཞེས་བྱ་བ་སྟེ་ཁས་ལེན་པའི་དོན་ཏོ། །སྨྲས་ན་ཞེས་བྱ་བ་ནི་བརྗོད་ནའོ། །དོན་བཞིན་ཞེས་བྱ་བ་ནི་དོན་གྱི་རྗེས་སུ་འབྲངས་ནས་ཏེ་དོན་ཇི་ལྟ་བ་བཞིན་དུ་ཞེས་བྱ་བའི་ཐ་ཚིག་གོ །འདི་ལ་དོན་འདིར་ལ་ལ་ཞིག་ལ་
འགའ་ཞིག་གིས་ཁྱོད་ཀྱིས་འབྲས་བུ་ཐོབ་བམ་ཞེས་དྲིས་ལ། དེས་ཀྱང་འདི་སྐད་དུ་དེ་བཞིན་ནོ་ཞེས་ཁས་བླངས་ན། འོན་ཀྱང་དེ་ལ་ཕས་ཕམ་པར་མ་གསུངས་སོ་ཞེས་བྱ་བ་དེ་ཁོ་བོ་ལ་ངེས་པར་གསལ་བར་སྨོས་ཤིག་ཅེས་བྱ་བ་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ཡང་མིང་མཐུན་པའི་དོན་བརྗོད་པའི་དབང་དུ་མཛད་ནས་གསུངས་པ་ཡིན་པར་བལྟ་བར་བྱ་སྟེ། ལུང་ལས་འབྱུང་བ་གཞན་ཉིད་ལ་བརྟེན་ནས་ཡང་བཀོད་དོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་ལ་ཁྱིམ་བདག་ཅིག་གིས་ཁྱོད་ཀྱིས་འབྲས་བུ་ཐོབ་བམ་ཞེས་དྲིས་པ་དང༌། དེས་ཀྱང་ལོ་མ་དང་འབྲས་བུ་དང་མེ་ཏོག་དང༌། འབྲས་བུ་མ་སྨིན་པ་དག་ཅིག་བླངས་ནས་དེས་འདི་སྐད་དུ་དེ་བཞིན་ནོ་ཞེས་སྨྲས་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །ཡང་ན་དེ་ནི་ལས་དང་པོ་པ་ལ་སོགས་པ་ལ་དགོངས་ནས་གསུངས་པ་ཡིན་ནོ། །བརྡ་ཕྲད་པའི་མིའི་མདུན་དུ་ཞེས་བྱ་བ་ལ་སོགས་པ་ལ། བརྡ་ཕྲད་པའི་ཞེས་བྱ་བའི་རྟོགས་པའོ། །མིའི་ཞེས་བྱ་བ་ནི་སྐྱེས་པ་སྟེ་མིའི་འགྲོ་བ་པའི་ཞེས་བྱ་བའི་ཐ་ཚིག་གོ །སྐྱེས་པ་སྨོས་པ་ནི་ཉེ་བར་མཚོན་པར་ཟད་དེ་བུད་མེད་ཀྱི་ཡུལ་ལ་ཡང་དེ་དང་འདྲ་བར་བལྟ་བར་བྱའོ། །མདུན་དུ་ཞེས་བྱ་བའི་དོན་ནི་བཤད་ཟིན་ཏོ། །འབྲས་བུ་རྣམ་པ་བཞི་ནི་འབྲས་བུ་བཞི་པོ་རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ལན་ཅིག་ཕྱིར་མི་འོང་བ་དང༌། དགྲ་བཅོམ་པ་ཉིད་ཀྱི་མཚན་ཉིད་ཀྱི་འབྲས་བུ་རྣམ་པ་བཞིའོ། །དེ་ཉིད་གཟིགས་པས་ཞེས་བྱ་བ་ནི་དོན་དམ་པ་གཟིགས་པ་སྟེ། ཡང་དག་པར་རྫོགས་པའི་སངས་རྒྱས་ཀྱིས་ཞེས་བྱ་བའི་ཐ་ཚིག་གོ ། མ་ཡིན་ཞེས་བྱ་བ་ནི་དགག་པའིའོ། །འདི་ལ་འདྲི་བའི་དོན་ནི་གང་གི་ཚེ་རྒྱུན་དུ་ཞུགས་པ་ལ་སོགས་པའི་འབྲས་བུ་བཞི་མིའི་འགྲོ་བར་གཏོགས་པ་བརྡ་ཕྲད་པའི་མདུན་དུ་ལྟུང་སྟོན་པ་དེའི་ཚེ་དེ་ལ་གདོན་མི་ཟ་བར་ཕས་ཕམ་པའི་ལྟུང་བར་འགྱུར་རོ་ཞེས་བྱ་བ་དེ་ཙམ་ནི་ཤིན་ཏུ་ངེས་ལ། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་དེ་ལ་ཕས་ཕམ་པར་འགྱུར་བར་མ་གསུངས་སོ་ཞེས་བྱ་བའི་རྒྱུ་དེ་བདག་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ཡང་མིང་མཐུན་པའི་དོན་བརྗོད་པ་ལ་བརྟེན་ནས་གསུངས་པ་ཡིན་པར་ཤེས་པར་བྱ་སྟེ། སྐབས་བཞིན་དུ་གསུངས་པའི་གཞུང་ལས་བསམས་ནས་
ཡང་བཀོད་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་འདི་སྐད་དུ་བདག་གིས་རིམ་གྲོར་ནི་རྒྱུན་དུ་ཞུགས་པའི་འབྲས་བུའོ། །བྱ་སྐྱིབས་ངོགས་སུ་ནི་ལན་ཅིག་ཕྱིར་འོང་བའི་འབྲས་བུའོ། །བྱ་རྒོད་ཀྱི་ཕུང་པོ་ལ་ནི་ཕྱིར་མི་འོང་བའི་འབྲས་བུའོ། །འོད་མའི་ཚལ་དུ་ནི་འབྲས་བུ་མཆོག་དགྲ་བཅོམ་པའོ་ཞེས་སྨྲ་ན་ཅིར་འགྱུར་ལགས། གལ་ཏེ་འདི་སྙམ་དུ་བདག་གིར་འདིར་ལུང་མནོས་ཁ་ཏོན་བྱས་ཏེ་བདག་གིས་ལེ་ལོ་མ་བྱས་སོ་ཞེས་བྱ་བ་ལས་བསམས་ནས་སྨྲས་ན་ནི་ཉེས་པ་སྦོམ་པོར་འགྱུར་རོ། །འོན་ཏེ་དགེ་སྦྱོང་གི་ཚུལ་གྱི་འབྲས་བུ་དག་ལུང་སྟོན་ན་ནི། མཐར་འགྱུར་བའོ། །དགེ་སློང་འབྲས་གཅིག་སྨྲ་བྱས་ལས། །ཞེས་བྱ་བ་ལ་སོགས་པ་ལ། འབྲས་གཅིག་ཅེས་བྱ་བ་ནི་རྒྱུན་དུ་ཞུགས་པའི་འབྲས་བུ་ལ་སོགས་པའི་ནང་ནས་བརྗོད་པར་འདོད་པའི་འབྲས་བུ་གང་ཡང་རུང་བ་ཞིག་གོ །འབྲས་བུ་གཞན་ཞེས་བྱ་བ་ནི་རྒྱུན་དུ་ཞུགས་པའི་འབྲས་བུ་ལས་ལན་ཅིག་ཕྱིར་འོང་བའི་འབྲས་བུ་ལ་སོགས་པ་གཞན་དེ་བརྗོད་པར་མི་འདོད་པའོ། །འདི་ལ་དོན་ནི་རྒྱུན་དུ་ཞུགས་པའི་འབྲས་བུ་ལ་སོགས་པ་སྨྲ་བར་འདོད་པའི་དགེ་སློང་གིས་གལ་ཏེ་འབྲས་བུ་གཞན་ལན་ཅིག་ཕྱིར་འོང་བའི་འབྲས་བུའམ། ཕྱིར་མི་འོང་བའི་འབྲས་བུའམ། དགྲ་བཅོམ་པ་ཉིད་ཅིག་ལུང་སྟོན་ན་ཅིའི་ཕྱིར་དེ་ལ་ཕས་ཕམ་པར་འགྱུར་བར་མ་གསུངས་ཞེས་བྱ་བར་བསྙད་པར་བྱ་བ་ལ་ཁྱོད་ཀྱིས་ཁོ་བོ་ལ་འབྲེལ་བ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་མངོན་པར་འདོད་པ་མ་ཡིན་པའི་འབྲས་བུ་བརྗོད་པ་ལ་བརྟེན་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་རྒྱུན་དུ་ཞུགས་པའི་འབྲས་བུ་ལུང་བསྟན་ཏོ་སྙམ་པ་ལས་ལན་ཅིག་ཕྱིར་འོང་བའི་འབྲས་བུ་ལུང་བསྟན་ཏམ། ལན་ཅིག་ཕྱིར་འོང་བའི་འབྲས་བུ་ལུང་བསྟན་ཏོ་སྙམ་པ་ལས་ཕྱིར་མི་འོང་བའི་འབྲས་བུ་ལུང་བསྟན་ཏམ། ཕྱིར་མི་འོང་བའི་འབྲས་བུ་ལུང་བསྟན་ཏོ་སྙམ་པ་ལས་དགྲ་བཅོམ་པ་ཉིད་ཀྱི་འབྲས་བུ་ལུང་བསྟན་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་འདི་ལ་མདོ་བྱེད་པས་ཀྱང་ནོར་ན་ཡང་ངོ་ཞེས་བཤད་དོ། །འདུལ་བ་དྲི་བའི་ཚིག་ལེའུར་བྱས་པ་ལེའུ་དང་པོའི་གཏན་ལ་དབབ་པའོ།། །།
ཡན་ལག་བཅུ་ལྡན་འབྱིན་བྱེད་པ། །ཞེས་བྱ་བ་ལ་སོགས་པ་ལ། འབྱིན་བྱེད་པ་ཞེས་བྱ་བ་ནི་ཁུ་ཆུ་འབྱིན་པར་བྱེད་པ་སྟེ། དང་པོའི་གནས་ནས་སྤོས་པའི་ཞེས་བྱ་བའི་ཐ་ཚིག་གོ །གྱི་ནར་ཡང་འབྱུང་བ་ཡོད་པ་དེའི་ཕྱིར་ཡན་ལག་བཅུ་ལྡན་ཞེས་བྱ་བ་སྨོས་སོ། །གང་ལ་ཡང་ཡན་ལག་བཅུ་ཡོད་པ་དེ་ནི་ཡན་ལག་བཅུ་ལྡན་པ་སྟེ། རྒྱུ་བཅུ་དང་ལྡན་པར་ཁུ་ཆུ་འབྱིན་པའི་ཐ་ཚིག་གོ །ཡན་ལག་བཅུ་པོ་དེ་དག་ནི་འདི་ལྟ་སྟེ། ཕྱུང་བ་དང༌། དབྱུང་བར་འདུན་པ་དང༌། རང་གི་ཁུ་ཆུ་དང༌། དང་པོའི་གནས་དང༌། ཕོ་མཚན་དང༌། དེ་ལ་བརྩལ་བ་དང༌། དེ་ལ་རེག་པ་དང༌། དེ་གཞན་གྱི་རྒྱུད་དུ་གཏོགས་པས་ཀྱང་རུང་བ་དང༌། སེམས་ཅན་དུ་བགྲང་བ་ཉིད་དང༌། སེམས་ཅན་དུ་བགྲང་བའི་རྣམ་པར་གནས་པ་ཉིད་དོ། །དགེ་འདུན་ལྷག་མ་བྱེད་པ་ནི་གང་ལ་ལྟུང་བ་ཕྱིར་བཅོས་པའི་ཕྱིར་ལྷག་མ་ཉི་ཤུ་ལ་སོགས་པའི་དགེ་འདུན་ཡོད་པ་དེ་ནི་ལྷག་མ་སྟེ། ལྟུང་བ་དེ་ནི་དགེ་འདུན་ལ་རག་ལུས་པ། དགེ་འདུན་ཁ་ན་ལས་པ་དགེ་འདུན་ལ་བརྟེན་པས་ཏེ། དགེ་འདུན་གྱི་ལྟུང་བ་ལས་ལྡང་བར་འགྱུར་གྱི་གང་ཟག་ལས་ནི་མ་ཡིན་ནོ་ཞེས་འབྱུང་བའི་ཕྱིར་རོ། །དེ་བྱེད་པའི་ངང་ཚུལ་ཅན་ནི་དགེ་འདུན་ལྷག་མ་བྱེད་པ་སྟེ། དགེ་འདུན་ལྷག་མའི་ལྟུང་བ་བྱུང་བ་ཞེས་བྱ་བའི་ཐ་ཚིག་གོ །བདེ་བར་གཤེགས་པ་ནི་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་བག་ཆགས་དང་བཅས་ཏེ་བྲལ་བ་དང༌། དངོས་པོ་མ་ལུས་པའི་དེ་ཁོ་ན་ཉིད་ལེགས་པར་རྟོགས་པའོ། །གཞན་དག་ན་རེ་ཕྱིར་མི་ལྡོག་བར་མ་ལུས་པར་གཤེགས་པའམ། དེ་ཁོ་ན་ཉིད་བསྟན་པའི་ཁྱད་པར་མ་ལུས་པར་མཁྱེན་པའི་ཕྱིར་བཀྲ་ཤིས་པ་ཡིན་ནོ་ཞེས་ཟེར་ཏེ། དོན་དུ་ན་དེ་བཞིན་གཤེགས་པའོ། །མ་གསུངས་པ་ཞེས་བྱ་བ་ནི་བཀའ་མ་སྩལ་པའོ། །ཇི་ལྟར་ཞེས་བྱ་བ་ནི་རྣམ་པ་གང་གིས་སོ། །རྒྱུ་ཞེས་བྱ་བ་ནི་བྱེད་རྒྱུའོ། །འདི་ལ་གཞན་གྱིས་བསམ་པ་ནི་གང་གི་ཚེ་དགེ་སློང་གིས་ཕྱུང་བ་ལ་སོགས་པ་ཡན་ལག་བཅུ་དང་ལྡན་པར་རང་གི་ཁུ་ཆུ་འབྱིན་པ་དེའི་ཚེ་དེ་ལ་དགེ་འདུན་གྱི་ལྷག་མའི་ལྟུང་བར་འགྱུར་རོ་ཞེས་བྱ་བ་ཡང་གོ་ཐེ་ཚོམ་ཡང་མེད་ན། འོན་ཀྱང་དེ་ལ་དགེ་འདུན་གྱི་ལྷག་མའི་ལྟུང་བར་མ་གསུངས་སོ་ཞེས་བྱ་བ་འདི་ལ་ཁྱོད་ཀྱིས་ཁོ་བོ་ལ་རྒྱུ་ཅུང་ཟད་ཅིག་གདོན་མི་ཟ་བར་
བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་ཤུགས་བཏང་བ་ལ་དགོངས་ནས་གསུངས་པ་ཡིན་པར་ཤེས་པར་བྱ་སྟེ། དེ་བཞིན་དུ་འདིར་གཞུང་ནི། ཤུགས་བཏང་ནས་ཁུ་ཆུ་བྱུང་ན་ཉེས་པ་སྦོམ་པོར་འགྱུར་རོ་ཞེས་བྱ་བ་འདི་ཡིན་ནོ། །དེ་བཞིན་དུ་མདོ་བྱེད་པས་ཀྱང་ཤུགས་ཀྱི་གནས་སྐབས་སུ་བཏང་བ་རྫོགས་པར་མ་བྱས་པ་ཉིད་དོ་ཞེས་བཤད་དོ། །ཡང་ན་མཚན་གྱུར་པ་ལ་བརྟེན་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་དགེ་འདུན་གྱི་ལྷག་མའི་ལྟུང་བར་འགྱུར་བའི་གཞི་དེས་དགེ་འདུན་གྱི་ལྷག་མའི་ལྟུང་བར་མི་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་གིས་ཆེད་དུ་བསམས་ཏེ་ཁུ་ཆུ་ཕྱུང་ནས་དགེ་འདུན་ལྷག་མར་འགྱུར་རོ། །དགེ་སློང་མས་ཕྱུང་ན་དེ་ལ་དགེ་འདུན་གྱི་ལྷག་མའི་ལྟུང་བར་མི་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་ཁུ་ཆུ་འབྱིན་པར་བགྱིད་པ་ལས་མཚན་གྱུར་ཏེ་དགེ་སློང་མར་རེད་ན་ཅིར་འགྱུར་ལགས། ལྟུང་བྱེད་དུའོ་ཞེས་བྱ་བ་ཡིན་ནོ། །ཡང་ན་དེ་ནི་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་ལུང་ནི་སྔ་མ་བཞིན་ནོ། །འདོད་ཆགས་ལ་སོགས་མཚུངས་ལྡན་པའི། །ཞེས་བྱ་བ་ལ་སོགས་པ་ལ། འདོད་ཆགས་དང་མཚུངས་པར་ལྡན་པའི་སེམས་ནི་འདོད་པའི་འདོད་ཆགས་མངོན་དུ་གྱུར་པའི་སེམས་སོ། །སོགས་པ་ཞེས་བྱ་བ་སྨོས་པས་ནི་དེའི་བདེ་བ་ཉམས་སུ་མྱོང་བའི་འདུན་པ་ཞེས་བྱ་བ་སྟེ་བསྡུས་ཏེ། གོ་རིམས་བཞིན་དུ་དྲལ་ཅིང་ཡོངས་སུ་འགྱུར་བའི་སེམས་ཀྱིས་ཞེས་བྱ་བའི་དོན་ཏོ། །བཟོད་པ་ལ་ཞེས་བྱ་བ་ནི་མི་ཚངས་པར་སྤྱོད་པ་བསྟེན་པར་སྤྱོད་པར་བཟོད་པ་ལའོ། །རེག་པ་ནི་ལུས་སྤྲོད་པར་བྱེད་པའོ། །དགེ་འདུན་ལྷག་མ་ནི་འདི་ལ་ལྷག་མ་དང་དགེ་འདུན་ཡོད་པས་ན་དགེ་འདུན་ལྷག་མ་ཞེས་བྱ་བ་དེ་སྐད་དུའོ། །འདི་ལ་འདྲི་བའི་དོན་ནི་དགེ་སློང་གང་ཞིག་གིས་དྲལ་ཅིང་ཡོངས་སུ་གྱུར་པའི་སེམས་ཀྱིས་མི་ཚངས་པར་སྤྱད་པ་བརྟེན་པར་བྱ་བ་བཟོད་པའི་བུད་མེད་དང་ལུས་སྤྲོད་པར་བྱེད་པ་དེ་ལ་ལུས་ལ་རེག་པའི་དགེ་འདུན་ལྷག་མར་འགྱུར་བར་གསལ་ན། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་
དེ་ལ་དགེ་འདུན་ལྷག་མར་མ་གསུངས་སོ་ཞེས་བྱ་བ་འདི་ལ་རྒྱུ་གང་ཡིན་པ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་དེ་ནི་འགྲོ་བ་གཞན་པའི་བུད་མེད་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་འགྲོ་བ་གཞན་པའི་བུད་མེད་དང་ལྷན་ཅིག་ལུས་སྤྲོད་ན་ཅིར་འགྱུར་ལགས། ཉེས་པ་སྦོམ་པོར་རོ། །དེ་བཞིན་དུ་མདོ་བྱེད་པས་ཀྱང་རེག་པ་ནི་ཐ་སྙད་དང་འདྲའོ་ཞེས་བཤད་དོ། །ཡང་ན་གོས་ཀྱིས་བར་དུ་ཆོད་པའི་བུད་མེད་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བུད་མེད་བཟོད་པ་ལ་དགེ་འདུན་ལྷག་མར་འགྱུར་བ་གང་ཡིན་པ་དེ་ནི་གོས་ཀྱིས་བར་དུ་ཆོད་པ་ལ་ཉེས་པ་སྦོམ་པོའོ་ཞེས་བྱ་བ་ཡིན་ནོ། །དེ་བཞིན་དུ་འདིར་གཞུང་གཞན་ནི། བཙུན་པ་རེ་ཞིག་དགེ་སློང་གིས་བར་ཆད་དང་བཅས་པ་ལ་བར་ཆད་དང་བཅས་པར་འདུ་ཤེས་པས་ལུས་རེག་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་གོས་ཀྱིས་བར་དུ་ཆོད་པ་ལ་ནི་འོག་མར་རོ་ཞེས་བཤད་དོ། །ཡང་ན་དེ་ནི་བུད་མེད་གཞན་གྱི་འདུ་ཤེས་ཀྱིས་རེག་པ་ལ་བརྟེན་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་བུད་མེད་གཞན་དང་ལྷན་ཅིག་ཀུན་དུ་ཆགས་ལ། བུད་མེད་གཞན་དང་ལྷན་ཅིག་ལུས་སྤྲོད་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་བསམས་པ་ནི་དེ་ཉིད་ཡིན་ནོ་ཞེས་བཤད་དོ། །ཡང་ན་དེ་ནི་ལུས་ཀྱི་དབང་པོ་ཉམས་པ་ལ་དགོངས་ནས་བཤད་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་བུད་མེད་ཀྱི་ལུས་ཀྱི་དབང་པོ་ཉམས་ལ་དགེ་སློང་གིས་དེ་དང་ལྷན་ཅིག་ལུས་སྤྲོད་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་རོ། །བཙུན་པ་རེ་ཞིག་དགེ་སློང་ལུས་ཀྱི་དབང་པོ་ཉམས་ལ། དེ་ནི་བུད་མེད་དང་ལྷན་ཅིག་ལུས་སྤྲོད་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་རོ། །བཙུན་པ་རེ་ཞིག་གཉིས་ཀ་ལུས་ཀྱི་དབང་པོ་ཉམས་ལ་དེ་དག་ལུས་སྤྱོད་པར་བགྱིད་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་རེག་པར་བྱ་བ་ཉིད་ནི་མ་ཉམས་པའོ་ཞེས་བཤད་
དོ། །ཡང་ན་མཉེན་པ་དང༌། འཇམ་པ་དང༌། དྲོ་བར་བསམས་པས་རེག་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་མཉེན་པའི་བསམ་བས་ལུས་རེག་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་རོ། །འཇམ་པའི་བསམ་པ་དང༌། དྲོ་བའི་བསམ་པ་ཡང་དེ་དང་འདྲའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། འཇམ་པ་དང་དྲོ་བ་དང་སྙིང་བ་ཉིད་སྦོམ་པོའོ་ཞེས་བཤད་དོ། །ཡང་ན་དེ་ནི་སྔོན་ཕམ་པ་བྱུང་བ་ལ་སོགས་པའི་སྐབས་སམ་ལས་དང་པོ་པ་ལ་སོགས་པའི་དབང་གིས་གསུངས་པ་ཡིན་ཏེ་སྔ་མ་བཞིན་ནོ། །སྡོམ་བརྩོན་བསམས་བཞིན་དགེ་འདུན་གྱི་ཞེས་བྱ་བ་ལ་སོགས་པ་ལ། དགེ་འདུན་གྱི་ལྷག་མ་ནི་ཁུ་ཆུ་འབྱིན་པ་ལ་སོགས་པའོ། །ཅི་བསམས་བཞིན་དུའམ་བསམས་བཞིན་དུ་མ་ཡིན་ཞེ་ན། བསམས་བཞིན་དུ་ཞེས་བྱ་བ་སྨོས་ཏེ་བློ་སྔོན་དུ་བཏང་སྟེའོ། །འདི་ནི་བསམས་བཞིན་མ་ཡིན་པ་སྩལ་ཏོ། །ཆོ་ག་བཞིན་ཞེས་བྱ་བ་ནི་ཆོ་ག་ལས་མ་འདས་པར་ཏེ། ཆོ་ག་དང་མཐུན་པར་ཞེས་བྱ་བའི་ཐ་ཚིག་གོ །མ་བྱས་པར་ཞེས་བྱ་བར་སྦྱར་ཏེ། དེས་ན་འདུལ་བ་ལས་བཤད་ན་སྦོམ་པོ་ལ་སོགས་པ་སྤྱད་པའི་མཚན་ཉིད་ཀྱི་ཆོ་གའི་རིམ་པ་མ་བྱས་བར་ཞེས་བྱ་བའི་དོན་ཡིན་ནོ། །ཅི་ཞིག་མ་བྱས་པར་ཞེ་ན། བཤགས་པ་ལ་སོགས་ཞེས་བྱ་བ་ལ་སོགས་པ་སྨོས་ཏེ། བཤགས་པ་ནི་འདིར་གོ་བར་བྱ་བའོ། །ཡང་ནི་བཤགས་པ་ཡིན་ཏེ་འདུལ་བ་འཛིན་པ་ལ་སོགས་པ་དགེ་སློང་གཅིག་གི་མདུན་དུ་མི་བྱ་བའི་བསམ་པས་དགེ་འདུན་ལྷག་མའི་ལྟུང་བ་ལན་གསུམ་སྒྲོགས་པ་ཡིན་ནོ། །སོགས་པ་སྨོས་པས་ནི་སྤོ་བ་དང་མགུ་བར་བྱ་བ་དང་དབྱུང་བ་རྣམས་འཕངས་སོ། །དེ་མ་བྱས་པར་ཏེ་ཕྱིར་བཅོས་པ་མ་བྱས་པར་རོ། །དག་ཅེས་བྱ་བ་ནི་ལྟུང་བ་མེད་པ་སྟེ་ལྟུང་བ་ལས་ལངས་པ་ཞེས་བྱ་བའི་ཐ་ཚིག་གོ །འདི་ལ་འདྲི་པའི་བསམ་པ་ནི་གང་འགའ་ཞིག་གིས་བསམས་བཞིན་དུ་ཁུ་ཆུ་འབྱིན་བ་ལ་སོགས་པའི་ལྟུང་བ་སྤྱད་ལ། ཕྱིས་སྤོ་བ་དང་མགུ་བར་བྱ་བ་དབྱུང་བའི་རིམ་གྱིས་ཆོ་ག་བཞིན་དུ་སྒྲུབ་ན་ཡོངས་སུ་དག་པར་འགྱུར་རོ་ཞེས་བྱ་བ་འདི་ནི་གསལ་བར་ངེས་ན། འོན་ཀྱང་ཆོ་ག་བཞིན་དུ་མ་བྱས་པའི་དགེ་སློང་ཡང་བཅོམ་ལྡན་འདས་ཀྱིས་
རྣམ་པ་གཞན་གྱིས་ཇི་ལྟར་དག་པ་ཁོ་ནར་གསུངས་པ་ཞེས་བྱ་བ་དེ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །དེ་ལ་ལན་ནི་འདི་ཡིན་ཏེ། དེ་ནི་མཚན་གྱུར་པ་ལ་བརྟེན་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་དགེ་འདུན་གྱི་ལྷག་མའི་ལྟུང་བ་འབྱུང་བ་འཆགས་པར་ཡང་མི་བགྱིད། སླར་འཆོས་པར་ཡང་མི་བགྱིད་ལ། ལྟུང་བ་ལས་ལྡང་བར་ཡང་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་ཐུན་མོང་མ་ཡིན་པའི་དགེ་འདུན་གྱི་ལྷག་མའི་ལྟུང་བ་བྱུང་བར་གྱུར་པ་ལ་དེ་མཚན་གྱུར་ནས་དགེ་སློང་མར་རེད་ན་ལྟུང་བ་ལས་ལངས་པ་ཞེས་བྱའོ། །དགེ་འདུན་གྱི་ལྷག་མར་འགྲོ་བར་གྱུར་པའི་ཉེས་བྱས་ཀྱི་ལྟུང་བ་ནི་བཤགས་པར་བྱའོ། །དེ་བཞིན་དུ་འདིར་གཞུང་གཞན་ནི། དགེ་སློང་གི་ཚེ་ལྟུང་བ་བྱུང་ལ་དགེ་སློང་མ་ལགས་པའི་ཚེ་ལྡང་བར་འགྱུར་བ་ཇི་ལྟ་བུ་ལགས། འདི་ལྟར་དགེ་སློང་ཐུན་མོང་མ་ཡིན་པའི་དགེ་འདུན་གྱི་ལྷག་མའི་ལྟུང་བ་ཕྱུང་ལ་དེ་མཚན་གྱུར་ནས་དགེ་སློང་མར་རེད་ན་ལྟུང་བ་ལས་ལངས་པ་ཞེས་བྱའོ། །དེ་བཞིན་དུ་འདིར་གཞུང་གཞན་ནི། བཙུན་པ་དགེ་སློང་ཐུན་མོང་མ་ལགས་པའི་ལྟུང་བའི་རིས་བཞི་བྱུང་བ་འཆགས་པར་ཡང་མི་བགྱིད། ཕྱིར་འཆོས་པར་ཡང་མི་བགྱིད་ལ། ལངས་པ་ཞེས་ཀྱང་བགྱི། ལྟུང་བ་མ་མཆིས་པར་ཡང་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་བ། ཡོད་དེ། མཚན་གྱུར་ནའོ། །བཙུན་པ་དགེ་སློང་མ་ཐུན་མོང་མ་ལགས་པའི་ལྟུང་བའི་རིས་ལྔ་བྱུང་བ་འཆགས་པར་ཡང་མི་བགྱིད། ཕྱིར་འཆོས་པར་ཡང་མི་བགྱིད་ལ། ལངས་པ་ཞེས་ཀྱང་བགྱི་ལྟུང་བ་མ་མཆིས་པར་ཡང་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། མཚན་གྱུར་ནའོ། །དེ་བཞིན་དུ་མདོ་བྱེད་པས་ཀྱང་ཞིང་མ་ཡིན་པ་ཉིད་ལ་ནི་ཉམས་སོ་ཞེས་བཤད་དོ། །ཡང་ན་ལས་དང་པོ་པ་ལ་སོགས་པ་ལ་བརྟེན་ནས་དེ་སྐད་གསུངས་པ་ཡིན་ཏེ་སྔ་མ་བཞིན་ནོ། །གང་ཟག་གཅིག་ལ་སྤོ་བ་དང་ཞེས་བྱ་བ་ལ་སོགས་པ་ལ། གང་ཟག་ནི་སེམས་ཅན་ཏེ་དགེ་སློང་ཞེས་བྱ་བའི་ཐ་ཚིག་གོ །གཅིག་ལ་ཞེས་བྱ་བ་ནི་དགེ་འདུན་གྱི་ལྷག་མ་བྱུང་བ་ལའོ། །སྤོ་བ་ནི་དགེ་འདུན་གྱི་ལྷག་མ་བྱུང་བ་བཅབས་པའི་ཉེས་པ་གཞོམ་པའི་ཕྱིར་ཇི་ལྟར་བཅས་
པ་བཞིན་ཆད་པའི་ལས་སྤྱད་པའི་ཕྱིར་རོ། །སྤྱད་པ་ཉིད་ནི་སྤོ་བ་སྤྱད་པ་སྟེ་བཅབས་པ་བཞིན་ཆད་པའི་ལས་སྤྱད་ལ་ད་དུང་མགུ་བར་བྱ་བ་མ་ཡིན་པའི་ཕྱིར་རོ། །མགུ་བར་བྱ་བ་ནི་སྤོ་བ་སྤྱད་པ་ལ་དགེ་སློང་རྣམས་ཀྱིས་སེམས་མགུ་བར་བྱ་བའི་ཕྱིར་ན་ཞག་དྲུག་ཏུ་མགུ་བར་བྱ་བ་སྦྱིན་པའི་ཕྱིར་རོ། །སྤྱད་པ་ཉིད་ནི་མགུ་བར་བྱ་བ་སྤྱད་པ་སྟེ་མགུ་བར་བྱ་བ་སྤྱད་ཟིན་པས་ཞེས་བྱ་བའི་ཐ་ཚིག་གོ །དེ་ལ་མགུ་བ་ནི་ཡིད་ལ་འཐད་ཅིང་ཡིད་འབབ་སྟེ་སེམས་རངས་པ་ཞེས་བྱ་བའི་ཐ་ཚིག་གོ །བཞི་པོ་དག་སྲིད་པ་ཞེས་བྱ་བར་སྦྱར་ཏེ་བཞི་པོ་སྤོ་བ་དང༌། སྤོ་བ་སྤྱད་པ་དང༌། མགུ་བར་བྱ་དང༌། མགུ་བར་བྱ་བ་སྤྱད་པའི་མཚན་ཉིད་ཀྱི་ཚིག་བཞི་པོ་དག་གོ །གང་གིས་ཞེས་བྱ་བ་ནི་རྒྱུ་གང་གིས་སོ། །སྲེད་པ་ནི་བཏུབ་པའོ། །འདི་ལ་གཞན་གྱིས་བསམས་པ་ནི་དགེ་འདུན་གྱི་ལྷག་མའི་ལྟུང་བ་བྱུང་བའི་གང་ཟག་གཅིག་ཁོ་ན་སྤོ་བ་པའམ། སྤོ་བ་སྤྱད་པའམ། མགུ་བར་བྱ་བ་སྤྱད་པ་ཞིག་ཏུ་འགྱུར་རོ་ཞེས་བྱ་བ་དེ་ཙམ་ཞིག་ནི་ཚིག་རྣམས་ཐ་དད་པར་གྱུར་པའི་ཕྱིར་ཤིན་ཏུ་མངོན་ན་འོན་ཀྱང་བཅོམ་ལྡན་འདས་ཀྱིས་ལྟུང་བ་བྱུང་བ་གཅིག་ཁོ་ན་ལ་བཞི་སྲིད་པར་གསུངས་པ་དེ་ཇི་ལྟ་བུ་ཡིན་པ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་སྲིད་པའི་དབང་དུ་མཛད་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གང་ཟག་དེ་ཉིད་སྤོ་བ་ཡང་ལགས། དེ་ཉིད་སྤོ་བ་སྤྱད་པ་ཡང་ལགས། དེ་ཉིད་མགུ་བ་པ་ཡང་ལགས། དེ་ཉིད་མགུ་བར་བགྱི་བ་སྤྱད་པ་ཡང་ལགས་པ་ལྟ་མཆིས་ལགས་སམ། ཡོད་དེ་གང་ཟག་སྤོ་བ་བྱ་བ་སྤྱད་པ་ཞིག་ཏུ་དགེ་འདུན་གྱི་ལྷག་མའི་ལྟུང་བ་འཆབ་པ་མེད་པ་བྱུང་ལ། དེ་དགེ་འདུན་གྱི་དྲུང་དུ་སོང་ནས་མགུ་བར་བྱ་བ་གསོལ་ཏེ། དེ་མགུ་བར་བྱ་བ་ཕལ་ཆེར་སྤྱད་ནས་དགེ་འདུན་གྱི་ལྷག་མའི་ལྟུང་བ་གཅིག་ཞག་གཅིག་བཅབས་པ་དང༌། གཉིས་པ་ཞག་གཉིས་བཅབས་པ་དང་གཉིས་ཤིག་བྱུང་བ་དང༌། དེ་དག་དགེ་འདུན་གྱི་དྲུང་དུ་སོང་སྟེ་སྤོ་བ་གསོལ་བ་ལས་དེ་ལ་དགེ་འདུན་གྱིས་སྤོ་བ་བྱིན་ན་དེ་ལྟུང་བ་གཅིག་གི་ནི་སྤོ་བ་སྤྱད་པ་མ་ཡིན་ནོ། །གཉིས་པའི་ནི་སྤོ་བ་སྤྱད་པ་ཡིན་ནོ། །གསུམ་པའི་ནི་མགུ་བར་བྱ་བ་སྤྱད་པ་ཡིན་ནོ། །བཞི་པའི་ནི་མགུ་བར་བྱ་བ་སྤྱད་པ་ཡིན་ནོ། །ཇི་སྲིད་འཚོ་བར་ཞེས་བྱ་བ་ལ་སོགས་པ་ལ། ཇི་སྲིད་
འཚོའི་བར་ནི་ཇི་སྲིད་འཚོ་བ་མཐར་ཐུག་པའི་བར་རོ། །རང་གི་གོས་ནི་བདག་ཉིད་ཀྱི་གོས་དག་གིའོ། །རབ་ཏུ་མང་པོ་ནི་བཅུ་ལ་སོགས་པ་དཔག་ཏུ་མེད་པ་དག་གོ །མ་བསྔོས་ཤིང་ཞེས་བྱ་བ་ནི་མཁན་པོ་ལ་སོགས་པའི་མིང་གིས་སྔགས་སྔོན་དུ་འགྲོ་བའི་བདག་གིར་མ་བྱས་ཤིང་ངོ༌། །བྱིན་གྱིས་མ་བརླབས་པར་ཞེས་བྱ་བ་ནི་སྔོན་དུ་འགྲོ་བ་ཁོ་ནའི་བདག་གིར་མ་བྱས་པར་རོ། །ཡང་ཞེས་བྱ་བ་ནི་འོན་ཀྱང་ངོ༌། །དྲི་མ་མེད་པར་ཞེས་བྱ་བ་ནི་སྤངས་པའི་ལྟུང་བའི་དྲི་མ་དང་བྲལ་བའོ། །འདི་ལ་འདྲི་བའི་དོན་ནི་གང་གི་ཚེ་བྱིན་གྱིས་མ་བརླབས་ཤིང་མ་བསྔོས་པའི་གོས་གཅིག་ཀྱང་ཞག་བཅུ་འདས་པར་འཆང་ན་དེའི་ཚོད་ལ་བཅོམ་ལྡན་འདས་ཀྱིས་ཞག་བཅུ་པའི་སྤང་བར་འགྱུར་རོ་ཞེས་གསུངས་ན་འོན་ཀྱང་ཡང་འདི་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་འདི་ལ་ཁོ་བོ་ལ་རྒྱུ་བརྗོད་པར་བྱའོ་ཞེས་བྱ་བ་ཡིན་ནོ། །འདི་ལ་ལན་ནི་འདི་ཡིན་ཏེ། རིམ་གྱིས་བྱིན་གྱིས་རློབ་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་གོས་བྱིན་གྱིས་མ་བརླབས་ཤིང་མ་བསྔོས་པ་བརྒྱད་དམ་དགུ་ཇི་སྲིད་འཚོའི་བར་དུ་བཅངས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་གིས་ཉིན་རེ་ཉིན་རེ་ཞིང་ཆོས་གོས་ཀྱི་སྔགས་བྱུང་ལ་གཞན་བྱིན་གྱིས་བརླབས་ནའོ། །ཡང་དེ་ཞག་བཅུ་ཚུན་ཆད་ཅིག་ཏུ་ཤི་བ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་གོས་ལྷག་པ་བཅངས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཞག་བཅུ་ཚུན་ཆད་ཅིག་ཏུ་ཤི་བར་གྱུར་ནའོ། །ཡང་ན་རུང་བ་མ་ཡིན་པའི་གོས་འཆང་བ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་གོས་ལྷག་པ་ཞག་བཅུ་ལས་འདས་པར་བཅངས་ལ་སྤང་བའི་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་གོས་ཀྱི་སྤུན་རུང་ལ་རྒྱུ་རུང་བ་མ་ཡིན་པ་དང༌། རྒྱུ་རུང་ལ་སྤུན་རུང་བ་མ་ཡིན་པ་དང༌། གཉིས་
ཀ་རུང་བ་མ་ཡིན་པའོ། །རུང་བ་མ་ཡིན་པ་ནི་རྔ་བལ་དང༌། རང་གི་སྤུ་དང༌། རི་དགས་ཀྱི་བལ་དང་བསྲེས་པ་དང༌། མ་བཏགས་པ་སྟེ། གོས་དེ་ལྟ་བུ་ཞག་བཅུ་ལས་འདས་པར་འཆང་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། རབ་ཏུ་བྱུང་བའི་རྫས་དག་ལ་ནི་རུང་བ་ཉིད་དང་ཞེས་བཤད་དོ། །འོག་མ་དག་ལ་ཡང་ལུགས་ནི་འདི་ཡིན་ནོ། །ཡང་ན་གཞན་གྱི་ཆེད་དུ་འཆང་བའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་ལྷུང་ཟེད་འཆང་བའི་སྐབས་ནས་རབ་ཏུ་འབྱུང་བར་འདོད་བའི་ཆེད་དུ་འཆང་ན་ལྟུང་བ་མེད་དོ་ཞེས་གསུངས་སོ། །ལྷུང་བཟེད་ལ་དེ་སྐད་དུ་གསུངས་མོད་ཀྱི་འོན་ཀྱང་གོས་ལ་ཡང་རུང་ངོ་ཞེས་བྱ་བར་ཤེས་པར་བྱའོ། །དེ་བཞིན་མདོ་བྱེད་པས་འདིར་སྤྱིར་རབ་ཏུ་བྱུང་བའི་དོན་དུ་ངེས་པར་བྱས་པ་ཡང་དེ་ཉིད་དོ་ཞེས་བཤད་དོ། །འགྲེལ་པ་བྱེད་པས་ཀྱང་འདི་ལ་ནི་ལྷུང་བཟེད་ལ་རབ་ཏུ་བྱུང་བར་འདོད་པའི་ཆེད་དུ་འཆང་ན་ལྟུང་བ་མེད་དོ་ཞེས་གསུངས་པ་གང་ཡིན་པ་དེའི་བཤད་པ་ཡིན་ནོ་ཞེས་རྗེས་སུ་བཟླས་སོ། །ཡང་ན་ལས་དང་པོ་པ་ལ་སོགས་པའམ་སྔོན་ཕམ་པ་བྱུང་བ་ལ་སོགས་པ་ལ་བརྟེན་ནས་དེ་སྐད་དུ་གསུངས་པ་ཡིན་ནོ་ཞེས་བྱ་བར་ཤེས་པར་བྱའོ། །དྲི་བ་དང་ལན་འདི་ནི་ལྷུང་བཟེད་དུ་གཏོགས་པ་ལ་ཡང་རུང་བས་མ་བཤད་ཀྱང་ཐམས་ཅད་བདག་ཉིད་ཀྱིས་བརྟག་པར་བྱའོ། །ཐ་དད་མཚམས་ནི་སྤངས་པའི་གནས། །གཅིག་ན་གནས་པའི་དགེ་སློང་ལ། །ཞེས་བྱ་བ་ལ་སོགས་པ་ལ། གནས་གཅིག་ན་ཞེས་བྱ་བ་ནི་གནས་ཁང་ལ་སོགས་པ་འདུག་གནས་གཅིག་པ་སྟེ། གནས་གཅིག་སྨོས་པས་ནི་འདུག་གནས་གཉིས་དང༌། གསུམ་དང༌། བཞི་ལ་སོགས་པ་བཀག་པ་ཡིན་ནོ། །གནས་པ་ཞེས་བྱ་བ་ནི་འདུག་པའོ། །གཅིག་ཡིན་ཡང་བཀད་པ་ལ་སོགས་པ་གནས་ཆེན་པོ་ལ་ནང་ན་ཆུ་ལ་སོགས་པས་མཚམས་ཐ་དད་པ་ཉིད་ཀྱང་སྲིད་ན་དེ་ཅི་ལ་རྣམ་པར་བཞག་པ་ཉིད་ཡིན་ནམ་ཞེ་ན། ཐ་དད་མཚམས་ནི་སྤངས་པ་ཡིན། །ཞེས་བྱ་བ་སྨོས་ཏེ། ཆུ་ལ་སོགས་པས་མཚམས་ཐ་དད་པ་དང་བྲལ་བའི་ཡིན་ཏེ་མཚམས་གཅིག་པའི་ཞེས་བྱ་བའི་ཐ་ཚིག་གོ །འབྲལ་བའི་དྲི་མས་ཞེས་བྱ་བ་ནི་འབྲལ་བའི་སྤང་བའི་ལྟུང་བས་སོ། །དྲི་མ་དང་འདྲ་
བས་དྲི་མ་སྟེ། ལྟུང་བའི་དྲི་མ་ཞེས་བྱ་བའི་དོན་ཏོ། །དྲི་མ་དང་བཅས་པའི་ཞེས་བྱ་བ་ནི་ཉེས་པ་དང་བཅས་པ་སྟེ། ལྟུང་བའི་དྲི་མས་ཉེ་བར་གོས་ཞེས་བྱ་བའི་ཐ་ཚིག་གོ །འདི་ལ་འདྲི་བའི་དོན་ནི་རང་འཁྲུངས་དང་བཅོས་མས་མཚམས་བཅད་པ་མེད་པའི་གནས་ཆེན་པོ་ཡང་རུང༌། ཆུང་ངུ་ཡང་རུང༌། གཅིག་ན་གནས་པའི་དགེ་སློང་ལ་གདོན་མི་ཟ་བར་འབྲལ་བའི་སྤང་བའི་ལྟུང་བྱེད་འབྱུང་མི་སྲིད་དོ་ཞེས་བྱ་བ་འདི་ནི་མངོན་ན། འོན་ཀྱང་ཅི་རྣམ་གྲངས་འགའ་ཞིག་གིས་གནས་དེ་ལྟ་བུ་ལ་གནས་པ་ལ་འབྲལ་བའི་སྤང་བའི་ལྟུང་བ་འབྱུང་བར་འགྱུར་རམ་ཞེས་བྱ་བ་ནི་ཁོ་བོ་ལ་བརྗོད་པར་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། མུ་སྟེགས་ཅན་གྱི་གནས་ཀྱི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་དགབ་པ་གཅིག་པའི་གནས་གཅིག་ན་མཆིས་ཤིང་དེ་ཉིད་དུ་དེའི་ཆོས་གོས་དེ་དང་འབྲལ་བར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་གནས་ཏེ་མུ་སྟེགས་ཅན་གྱི་དགེ་སྦྱོང་དང༌། རྒྱུ་བ་པ་དང༌། ཀུན་དུ་རྒྱུ་སྣ་ཚོགས་པའམ། སྤུན་ནི་ནོར་བགོས་པ་རྣམས་ཀྱི་ཡིན་ནའོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་འདིར། ནོར་ལས་དང་ལྟ་བ་ལས་ཐ་དད་པ་མ་ཡིན་པའི་ཡང་ངོ་ཞེས་བཤད་དོ། །དེ་བཞིན་དུ་འདིར་གཞུང་གཞན་ནི། དགེ་འདུན་གྱི་གཙུག་ལག་ཁང་མུ་སྟེགས་ཅན་རྣམས་དང་ཉེར་སྤྱོད་ཀྱིས་གཅིག་པ་ན་གནས་པ་རྣམས་ལས་གང་ཞིག་སྒོ་གང་ལ་གནས་པ་ལ་ནི་ལྟུང་བ་མེད་དོ་ཞེས་བྱ་བ་ཡིན་ཏེ། དེའི་ཕྱིར་འདིས་ནི་ཐ་དད་པ་ཉིད་ཡིན་ནོ་ཞེས་བཤད་པ་ཡིན་ནོ། །དེ་བཞིན་དུ་འདིར་གཞུང་གཞན་ནི། བཙུན་པ་དགེ་སློང་མཚམས་ཀྱི་ནང་མཆིས་ལ་ཆོས་གོས་ཀྱང་མཚམས་ཀྱི་ནང་ན་བཞག་ན་ཆོས་གོས་དེ་དང་འབྲལ་བར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། མཚམས་བཅད་པ་བྱས་ལ་ཆོས་གོས་དང་མི་འབྲལ་བའི་སྡོམ་པ་མ་བྱས་ནའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། དེར་གནང་བ་བྱས་ན་ནི་ཆོས་གོས་ངག་དང་འབྲལ་བར་མི་འགྱུར་རོ་ཞེས་བཤད་དོ། །ཡང་ན་གནས་གཅིག་གམ་མཚམས་གཅིག་ན་གནས་པ་ལ་ཞེས་བྱ་བ་ལ་སོགས་པ་ལྟ་བུར་འདྲི་བ་རྣམ་པ་
གཉིས་བྱ་ལ་ལན་ཡང་བཤད་མ་ཐག་པ་དེ་ལྟ་བུའི་གཞུང་རྣམ་པ་གཉིས་བརྗོད་པར་བྱའོ། །ཡང་ན་ལས་དང་པོ་པ་ལ་སོགས་པའམ་སྔོན་ལྟུང་བ་བྱུང་བ་ལ་སོགས་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། སྔ་མ་བཞིན་ནོ། །ཟླ་བ་པའི་གོས་དགེ་སློང་གིས་ཞེས་བྱ་བ་ལ་སོགས་པ་ནི་ཅིའི་ཕྱིར་ལྟུང་བ་མེད་པར་གསུངས་ཞེས་བྱ་བར་སྦྱར་ཏེ། ཟླ་བའི་གོས་ནི་ཟླ་བ་འདས་པའི་གོས་སོ། །མ་སྤངས་པ་ཞེས་པ་ནི་མ་བཏང་བའོ། །ལྟུང་བ་མེད་པ་ནི་ཁ་ན་མ་ཐོབ་མེད་པའོ་ཞེས་གསུངས་ཞེས་བྱ་བ་ནི་དེ་སྐད་དུ་གསུངས་པའོ། །གསལ་བར་སྨྲོས་ཞེས་བྱ་བ་ནི་གསལ་པོར་ཤེས་པའོ། །འདི་ལ་གཞན་གྱི་བསམ་པ་ནི་ཟླ་བའི་སྤངས་པ་ནི་ཟླ་བ་འདས་པ་ཁོ་ནས་བྱུང་ངོ་ཞེས་བྱ་བ་དེ་ནི་ཁོ་བོ་ཅག་ལ་ངེས་པ་ཁོ་ན་ཡིན་ན། འོན་ཀྱང་བཅོམ་ལྡན་འདས་ཀྱིས་རྣམ་པ་གཞན་གྱིས་ཇི་སྲིད་འཚོའི་བར་དུ་འཆང་པའི་དགེ་སློང་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་འདི་ལ་ཅི་སྟེ་འདི་སྐད་དུ་གསུངས་ཞེས་བྱ་བའི་རྒྱུ་ཁོ་བོ་ལ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཟླ་བ་གཅིག་ཚུན་ཆད་དུ་ཤི་བ་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཇི་སྲིད་འཚོའི་བར་དུ་བཞག་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཟླ་བ་གཅིག་ཚུན་ཆད་དུ་ཤི་ནའོ་ཞེས་བྱ་བ་ཡིན་ནོ། །ཡང་ན་ཆོས་གོས་རུང་བ་མ་ཡིན་པ་ལ་དགོངས་ན་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཆོས་གོས་དགུང་ཟླ་བ་གཅིག་ཕན་ཆད་དུ་བཞག་ལ་སྤང་བའི་ལྟུང་བྱེད་དུ་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ཆོས་གོས་དེ་སྤུན་རུང་ལ་རྒྱུ་རུང་བ་མ་ཡིན་པ་དང་ཞེས་བྱ་བ་ཡིན་ཏེ་སྔ་མ་བཞིན་ནོ། །ཡང་ན་སྲ་བརྐྱང་བཏིང་བ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཆོས་གོས་དགུང་ཟླ་དྲུག་ཏུ་བཞག་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཆོས་གོས་རྙེད་ནས་ཞག་སུམ་ཅུ་ལོན་པ་དང་སྲ་བརྐྱང་བཏིང་བར་གྱུར་ནའོ་ཞེས་བྱ་བ་ཡིན་ནོ། །མདོ་བྱེད་པས་ཀྱང༌། འདི་གསུམ་ནི་སྲ་བརྐྱང་བཏིང་བ་ལ་མི་འབྱུང་ངོ་ཞེས་བཤད་དོ། །ཡང་ན་སྔོན་ཕམ་པ་བྱུང་བ་ལ་
སོགས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། སྔ་མ་བཞིན་ནོ། །སྡོམ་བརྩོན་ཅན་ནི་ཕ་མ་ལས་ཞེས་བྱ་བ་ལ་སོགས་པ་ལ། ཕ་མ་ལས་ཞེས་བྱ་བ་ནི་ཕ་དང་མ་དག་ལས་སོ། །རུང་བ་ནི་བཏགས་པ་ལ་སོགས་པ་སྟེ། དཔག་བསམ་གྱི་གོས་ལ་སོགས་པ་མ་ཡིན་པ་ཞེས་བྱ་བའི་ཐ་ཚིག་གོ །རུང་བ་ཞེས་བྱ་བ་སྨོས་པ་ནི་རུང་བ་མ་ཡིན་པ་བཀག་གོ །བླང་བྱས་ན་ཞེས་བྱ་བ་ནི་རང་གིས་བྱས་ནའོ། །སྤངས་པའི་ཉེས་པ་ཡིས་ཞེས་བྱ་བ་ནི་སྤང་བའི་ལྟུང་བས་སོ། །དྲི་མ་ཅན་དུ་གྱུར་པ་ཞེས་བྱ་བ་ནི་མ་རུང་བར་རོ། །འདི་ལ་དོན་ནི་དགེ་སློང་གིས་ཕ་མ་ལས་ཆོས་གོས་རུང་བ་བླངས་པ་ནི་ཉེས་པ་མེད་པ་ཁོ་ནའོ་ཞེས་བྱ་བ་དེ་ནི་ཁོ་བོ་ལ་གསལ་བ་སྙམ་བྱེད་ན། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་དེ་ལ་སྤང་བའི་ལྟུང་བྱེད་དུ་གསུངས་སོ་ཞེས་བྱ་བ་དེ་ལྟ་བུ་ཡིན་ཞེས་བྱ་བ་འདི་ལ་ཁྱོད་ཀྱིས་ཅུང་ཟད་ཅིག་བརྗོད་པར་བྱའོ་ཞེས་བྱ་བ་ནི་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དགེ་འདུན་ལ་བསྔོས་པ་དང་རང་གིར་བྱེད་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཕ་མ་ལས་ཆོས་གོས་བླངས་ལ་སྤང་བའི་ལྟུང་བྱེད་དུ་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ཆོས་གོས་ཕ་མས་དགེ་འདུན་ལ་བསྔོས་པ་ཡིན་ལ་ངེས་ཤེས་བཞིན་དུ་གང་ཟག་བདག་ཉིད་ཀྱིས་སྒྱུར་བར་བྱེད་ན་ཆོས་གོས་གྲུབ་ན་སྤང་བའི་ལྟུང་བྱེད་དོ་ཞེས་བྱ་བ་ཡིན་ནོ། །འདི་ལ་ཞུ་བ་ལས་བྱུང་བ་གཞུང་གཞན་ཡང་བཅོམ་ལྡན་འདས་ཀྱིས་ཉེ་དུ་མ་ཡིན་པ་ལས་ཆོས་གོས་ལེན་ན་སྤང་བའི་ལྟུང་བྱེད་དུ་འགྱུར་རོ་ཞེས་བཀའ་སྩལ་པ་གང་ལགས་པ། དགེ་སློང་གིས་དགེ་སློང་མ་ལས་ཆོས་གོས་བླངས་ལ་དེ་ཡང་སྤང་བའི་ལྟུང་བར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གལ་ཏེ་དེས་དགེ་འདུན་ལ་སྤགས་པ་ཡིན་ལ། དགེ་སློང་གིས་བདག་ཉིད་ལ་སྦྱོར་བར་བྱེད་ནའོ་ཞེས་འབྱུང་ངོ༌། །འདི་ལ་མདོ་བྱེད་པས་ཀྱང་གཞན་གྱིས་གང་ཟག་གཞན་ནམ། དགེ་འདུན་ལ་བསྔོས་པའི་རྙེད་པ་ཤེས་བཞིན་དུ་བདག་ཉིད་ལ་བསྒྱུར་ཏེ་ཐོབ་ནའོ་ཞེས་བཤད་དོ། །ཞག་བདུན་པའི་སྨན་དག་ནི་ཞེས་བྱ་བ་ལ་སོགས་པ་ལ། བྱིན་གྱིས་བརླབས་པ་དུས་ཞག་བདུན་གྱི་
མཐར་ཐུག་པར་འཆང་བའི་ཕྱིར་ཏེ། མར་སར་དང་འབྲུ་མར་ལ་སོགས་པའི་སྨན་ནི་ཞག་བདུན་པའི་སྨན་ཞེས་བྱའོ། །སྨན་དག་བཅངས་ན་ཞེས་བྱ་བར་སྦྱར་ཏེ། བཅངས་ན་ཞེས་བྱ་བ་ནི་བཞག་ནའོ། །ལྟུང་བ་མེད་པར་གསུངས་པ་ཞེས་བྱ་བ་ནི་སྡོམ་བརྩོན་ཞེས་བྱ་བར་སྦྱར་རོ། །འབོད་དེ་སྨྲ་བར་གྱིས་ཞེས་བྱ་བ་ནི་བསྒྲིམས་ཏེ་སྨྲོས་ཤིག་པའོ། །འདི་ལ་ཚིག་ལེའུར་བྱས་པའི་དོན་ནི་ཞག་བདུན་པའི་སྨན་ནི་ཞག་བདུན་འདས་པ་ཁོ་ནས་སྤང་བའི་ལྟུང་བྱེད་ཀྱི་ལྟུང་བ་འབྱུང་བར་འགྱུར་རོ་ཞེས་བྱ་བ་དེ་ནི་ཁོ་བོ་ཅག་ལ་ངེས་ན། འོན་ཀྱང་བཅོམ་ལྡན་འདས་ཀྱིས་ཞག་བདུན་པའི་སྨན་ཇི་སྲིད་འཚོའི་བར་དུ་བཅངས་པ་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་དེ་ཅིའི་ཕྱིར་དེ་སྐད་དུ་བཀའ་སྩལ་པ་སྙིང་ནས་སོམས་ལ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཞག་བདུན་ཚུན་ཆད་དུ་ཤི་བ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཞག་བདུན་པའི་སྨན་ཇི་སྲིད་འཚོའི་བར་དུ་བཅངས་པ་སྤངས་པའི་ལྟུང་བྱེད་དུའང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཞག་བདུན་ཚུད་ཆད་དུ་ཤི་ནའོ། །ཡང་ན་རུང་བ་མ་ཡིན་པའི་སྨན་འཆང་བ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགུང་བདུན་པའི་སྨན་དགུང་བདུན་ལས་འདས་པར་བཅངས་ལ་སྤང་བའི་ལྟུང་བྱེད་དུ་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། སྨན་རུང་བ་མ་ཡིན་པ་དང་འདྲེས་པར་གྱུར་པ་དེ་གང་དགེ་སློང་རྣམས་ཀྱིས་སྤྱད་དུ་རུང་བ་མ་ཡིན་ནོ་ཞེས་བྱ་བ་ཡིན་ནོ། །ཡང་ན་ལས་དང་པོ་པའམ་སྔོན་ཕམ་པ་བྱུང་བ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། ཤེས་བཞིན་དུ་ནི་བརྫུན་གྱི་ཚིག་ཅེས་བྱ་བ་ལ་སོགས་པ་ལ། ཤེས་བཞིན་དུ་ཕྱིན་ཅི་ལོག་པའི་འདུ་ཤེས་ཉམས་སུ་མྱོང་བ་སྟེ་ཆེད་དུ་བསམས་ནས་ཞེས་བྱ་བའི་ཐ་ཚིག་གོ །བརྫུན་ནི་དོན་ལོག་པའོ། །ཚིག་ནི་དོན་བརྗོད་པ་སྟེ་ཤེས་བཞིན་དུ་སླུ་བ་ལ་སོགས་པའི་ཆེད་དུ་དོན་གཞན་དུ་རྣམ་པར་གནས་པ་གཞན་དུ་བརྗོད་པ་ཞེས་བྱ་བའི་ཐ་ཚིག་གོ །ཤེས་བཞིན་དུ་སྨོས་པས་ནི་བློ་སྔོན་དུ་བཏང་བའི་བརྫུན་གྱི་ཚིག་བསལ་ཏོ། །དེ་སྨྲས་ན་སྟེ་བརྗོད་ནའོ། །ལྟུང་བྱེད་མེ་ཡིས་ནི་ཞེས་བྱ་བ་ལ་ལྟུང་བྱེད་ནི་དམྱལ་བ་ལ་སོགས་པར་ལྟུང་བར་བྱེད་པའི་
ཕྱིར་ཏེ་ངན་སོང་ངན་འགྲོ་ལོག་པར་ལྟུང་བ་དམྱལ་བ་དང་དུད་འགྲོ་དང་ཡི་དགས་རྣམས་སུ་སྲེག་པར་བྱེད། འཚེད་པར་བྱེད། ལྟུང་བར་བྱེད་པས་ཞེས་བྱ་བས་སོ། །དེ་ཉིད་མེ་ཡིན་ཏེ་སྡུག་བསྔལ་བའི་རྒྱུ་ཡིན་པའི་ཕྱིར་རོ། །ཤིན་ཏུ་སྲེག་ཅེས་བྱ་བ་ནི་ཤིན་ཏུ་སྡུག་བསྔལ་བསྐྱེད་པས་སོ། །མིན་ཞེས་ལྟུང་བྱེད་བཀག་པ་སྨོས་པས་ཉེས་བྱས་སུ་བརྗོད་པ་ནི་གནང་བ་ཡིན་ཏེ། འོག་མ་དག་ལ་ཡང་དེ་བཞིན་ཁོ་ནར་ཤེས་པར་བྱའོ། །གསལ་པོར་སྨྲོས་ཞེས་བྱ་བ་ནི་ངེས་པར་སྨྲོས་ཤིག་པའོ། །འདི་ལ་གཞན་གྱིས་བསམ་པ་ནི་གང་དགེ་སློང་འགའ་ཞིག་གི་ཆེད་དུ་བསམས་ཏེ་བརྫུན་སྨྲས་ན་དེ་ལ་གདོན་མི་ཟ་བར་ལྟུང་བྱེད་བྱུང་ན། འོན་ཀྱང་བཅོམ་ལྡན་འདས་ཀྱིས་དེ་ལ་ལྟུང་བྱེད་མ་གསུངས་སོ་ཞེས་བྱ་བ་དེ་ལ་རྒྱུ་ཅི་ཞིག་ཡོད་ཅེས་བྱ་བ་དེ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་སྨྱོས་པ་ལ་སོགས་པའི་མདུན་དུ་སྨྲས་པའི་དབང་དུ་མཛད་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་སྨྱོན་པའི་དྲུང་དུ་བརྫུན་སྨྲས་ན་ཅིར་འགྱུར་ལགས། ཉེས་བྱས་སུའོ། །དེ་བཞིན་དུ་སེམས་འཁྲུགས་པ་དང༌། ཚོར་བས་ཉེན་པ་དང་གླེན་པ་དང་འོན་པ་དང་གཉིད་ཀྱིས་ལོག་པ་དང༌། མྱོས་པ་དང་རབ་ཏུ་མྱོས་པ་དང༌། སྨྱོན་པར་ཞུགས་པ་དང༌། འགྲོ་བ་གཞན་པའི་དྲུང་དུ་བརྫུན་སྨྲས་ན་ཅིར་འགྱུར་ལགས། ཉེས་བྱས་སོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། རང་བཞིན་ཉམས་པ་ནི་མ་ཡིན་ནོ། །མིའི་འགྲོ་བ་ནི་ཐ་སྙད་དུ་བྱ་བ་ཉིད་ཡིན་ནོ་ཞེས་བཤད་དོ། །འོག་མ་དག་ལ་ཡང་དེ་བཞིན་དུ་ཤེས་པར་བྱའོ། །ཡང་ན་དབེན་པ་ལ་དབེན་པར་འདུ་ཤེས་པ་ལ་བརྟེན་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་དབེན་པ་ལ་དབེན་པའི་འདུ་ཤེས་ཀྱིས་བརྫུན་སྨྲས་ན་ཅིར་འགྱུར་ལགས། ཉེས་བྱས་སོ་ཞེས་བྱ་བ་ལ་སོགས་པ་ཡིན་ནོ། །ཡང་ན་དབུས་པས་དབུས་པ་ལ་མཐའ་འཁོབ་པའི་སྐད་དུ་སྨྲས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་དབུས་པས་དབུས་པ་ལ་མཐའ་འཁོབ་པའི་སྐད་དུ་བརྫུན་སྨྲས་ལ་དེས་ཀྱང་མཐའ་འཁོབ་པའི་སྐད་དམ་འཚལ་ན་ཅིར་འགྱུར་
ལགས། ཉེས་བྱས་སུའོ་ཞེས་བྱ་བ་ལ་སོགས་པ་ཡིན་ནོ། །མདོ་བྱེད་པས་ཀྱང༌། འདི་ལ་རྣམ་པར་རེག་བྱེད་ལ་ནི་དོན་གོ་བའོ་ཞེས་བཤད་དོ། །འོག་མ་དག་ལ་ཡང་དེ་བཞིན་དུ་ཤེས་པར་བྱའོ། །དེ་ཉིད་ལ་དགོངས་ནས། བརྫུན་ཚིག་འདུ་ཤེས་གཞན་བསྒྱུར་བའི། །ཚིག་དོན་མངོན་པར་གོ་བའོ། །ཞེས་བཤད་དོ། །ཡང་ན་ལས་དང་པོ་པ་དང་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་དེ་སྐད་གསུངས་པ་ཡིན་ཏེ་སྔ་མ་བཞིན་ནོ། །དགེ་སློང་གིས་དགེ་སློང་ལ་ཞེས་བྱ་བ་ལ་སོགས་པ་ནི་ཁྱིམ་པ་དང་རབ་ཏུ་བྱུང་བ་ལ་སོགས་པ་ལ་ཡང་མིའི་སྐྱོན་ནས་སྨྲ་སྲིད་པས་དགེ་སློང་ལ་ཞེས་སྨོས་སོ། །སྐྱོན་ནས་སྨྲ་བ་ནི་ཁྱོད་ནི་ཞར་བའོ། །ཐེང་པོ་སྒུར་པོ་སྤྱི་ཅེར་རོ། །མགོ་སྐྱའོ། །ཁྲོ་བའོ་ཞེས་བྱ་བ་ལ་སོགས་པས་སྐྱོན་ཉིད་ནས་སྨྲ་ཞིང་བརྗོད་པ་སྟེ། སྨད་པའི་བསམ་པས་སྨྲས་པའི་ཐ་ཚིག་གོ །དེ་རབ་ལ་ཞེས་བྱ་བ་ནི་བྱེད་པ་པོ་ལ་སྟེ། ཡི་གེ་ལྷག་པ་ལས་ན་དོན་ལྷག་པ་ཡོད་པས་སྐྱོན་བརྗོད་པར་འདོད་པའི་འདུན་པས་ཞེས་བྱ་བའི་ཁྱད་པར་བལྟ་བར་བྱའོ། །དེ་ལྟར་ཡང་དགེ་སློང་གིས་མིའི་སྐྱོན་བརྗོད་པའི་བསམ་པས་ཞེས་གསུངས་སོ། །ཀུན་མཁྱེན་ནི་ཐམས་ཅད་མཁྱེན་པའོ། །ངེས་པར་སྨྲོས་ཞེས་བྱ་བ་ནི་གཏན་ལ་བབ་པར་སྨྲོས་ཤིག་པའོ། །འདི་ལ་གཞན་གྱིས་བསམ་པ་ནི་གང་གི་ཚེ་དགེ་སློང་གིས་དགེ་སློང་གི་ཡུལ་འདིའི་སྐྱོན་ཉིད་བརྗོད་དོ་སྙམ་པའི་བསམ་པ་དེས་མིའི་སྐྱོན་ནས་སྨྲ་བ་རབ་ཏུ་སྦྱོར་བ་དེའི་ཚེ་དེ་ལ་ཐེ་ཚོམ་མེད་པ་ཁོ་ནར་ལྟུང་བྱེད་དུ་འགྱུར་ན། འོན་ཀྱང་བཅོམ་ལྡན་འདས་ཀྱིས་རྣམ་པ་འགའ་ཞིག་གིས་དེ་ལ་དེ་འབྱུང་བར་མ་གསུངས་སོ་ཞེས་བྱ་བ་འདི་ལ་ཁོ་བོ་ལ་རྒྱུ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་མིའི་སྐྱོན་ནས་སྨྲ་བ་ཕོ་ཉ་ལ་བཏང་བ་ཀུན་ཏུ་སྤྱོད་པ་ལ་དགོངས་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་མིའི་སྐྱོན་ནས་སྨྲ་བ་ཕོ་ཉ་ལ་བཏང་པས་ཀུན་ཏུ་སྤྱད་ན་ཅིར་འགྱུར་ལགས། ཉེས་བྱས་སུའོ། །དེ་བཞིན་དུ་ཡི་གེ་དང༌། ལག་བརྡ་དང༌། གཞན་ལ་སྙད་འདོགས་པ་དང༌། བརྒྱུད་པས་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་ངག་གིའོ། །རང་གིའོ། །
བདག་ཉིད་དང་འབྲེལ་བའོ་ཞེས་བཤད་དོ། །ཡང་ན་སྨྱོན་པ་ལ་སོགས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི་སྔ་མ་བཞིན་ནོ། །ཡང་ན་དབུས་པས་དབུས་པའི་དགེ་སློང་ལ་མཐའ་འཁོབ་པའི་སྐད་དུ་སྨྲས་པ་ལ་བརྟེན་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི་སྔ་མ་བཞིན་ནོ། །ཡང་ན་ལས་དང་པོ་པ་དང་སྔོན་ཕམ་པ་བྱུང་བ་ལ་དགོངས་ནས་གསུངས་པ་ཡིན་ཏེ་སྔ་མ་བཞིན་ནོ། །དགེ་སློང་ཉོན་མོངས་ཅན་སེམས་ཀྱིས། །ཞེས་བྱ་བ་ལ་སོགས་པ་ལ། དགེ་སློང་སྨོས་པས་ནི་དགེ་སྦྱོང་ལ་སོགས་པ་བསལ་བའི་ཕྱིར་རོ། །ཉོན་མོངས་ཅན་སེམས་ཀྱིས་ཞེས་བྱ་བ་ནི་དབྱེ་བའི་བསམ་པ་སྟེ། ཉོན་མོངས་ཅན་ཞེས་སྨོས་པས་ནི་ཉོན་མོངས་པ་ཅན་མ་ཡིན་པའི་སེམས་བཀག་པའོ། །དགེ་སློང་གིས་སྨྲས་ཞེས་བྱ་བ་ནི་དགེ་སློང་གིས་སྨྲས་པའོ། །ཕྲ་མ་ནི་དབྱེན་གྱི་ཚིག་གོ །དགེ་སློང་ལ་ཞེས་བྱ་བ་ནི་དགེ་སློང་གི་ཡུལ་ལའོ། །དག་ཅེས་བྱ་བ་ནི་ལྟུང་བ་མེད་པར་རོ། །བཅོལ་ཞེས་བྱ་བ་ནི་དོན་དུ་གཉེར་གྱིས་ཞེས་བྱ་བའོ། །འདི་ལ་གཞན་གྱིས་བསམ་པ་གང་གི་ཚེ་དགེ་སློང་ཞིག་གིས་དགེ་སློང་གི་ཡུལ་ལ་དགའ་ཡང་རུང་མི་དགའ་ཡང་རུང་དགེ་སློང་ཞིག་གིས་མངོན་སུམ་དུ་འདི་ནི་ཁྲོ་བའོ། །འཆབ་པའོ། །ཚིག་པའོ། །མཛེ་ཅན་ནོ་ཞེས་ཟེར་རོ་ཞེས་བྱ་བ་ལ་སོགས་པ་བདེན་ཡང་རུང་བརྫུན་ཡང་རུང་བ་སྨྲ་ལ་དེ་ཡང་གལ་ཏེ་དགེ་སློང་གིས་སྨྲས་པ་དེ་དགེ་སློང་གི་ཡུལ་ལ་དབྱེན་གྱི་བསམ་པས་སྨྲས་ན་དེས་ན་དེ་ལ་ལྟུང་བྱེད་དུ་འགྱུར་རོ་ཞེས་བྱ་བ་གསལ་བ་ཉིད་ན། འོན་ཀྱང་བཅོམ་ལྡན་འདས་ཀྱིས་དེས་འགྱུར་བར་མ་གསུངས་སོ་ཞེས་བྱ་བ་འདི་ལ་ཁྱོད་ཀྱིས་ཁོ་བོ་ལ་རྒྱུ་ཉེ་བར་བསྟན་པར་བྱའོ་ཞེས་བྱ་བ་ནི་འདི་ཡིན་ནོ། །འདི་ལ་ལན་ནི་མིའི་སྐྱོན་ནས་སྨྲ་བ་ལ་བཤད་པ་ཐམས་ཅད་ཡིན་པ་ཉིད་ལ། ལུང་དང་མདོ་ལས་བཤད་པའི་གཞུང་ཡང་དེ་ཉིད་ཡིན་ཏེ་སྔ་མ་བཞིན་ནོ། །སྡོམ་བརྩོན་ཅན་གྱིས་རུང་བའི་ཞེས་བྱ་བ་ལ་སོགས་པ་ལ་རུང་བ་ནི་རུང་བ་ཞེས་བྱ་བ་མེ་དང་རྨ་བྱུང་བ་དང་མཚོན་དང་སེན་མོ་དང་ནེ་ཅོ་དང་རྙིས་པ་དང་བཀྲུམ་པ་དང་བཀས་པ་དང་བཅད་པ་ཞེས་བྱ་བ་དག་གིས་ཅི་རིགས་པར་རུང་པར་བྱས་པ་སྟེ། ཆོ་ག་བྱས་པ་ཞེས་བྱ་བའི་དོན་ཏོ། །ས་བོན་རྣམ་པ་
ལྔ་ནི་རྩ་བ་དང༌། སྡོང་བུ་དང༌། རྩེ་མོ་དང༌། འགས་པ་དང༌། ས་བོན་གྱི་ས་བོན་ཞེས་བྱ་བ་དག་གོ །ལྟུང་བྱེད་བྱེད་པ་ཞེས་བྱ་བ་ནི་ལྟུང་བྱེད་ཀྱི་ལྟུང་བ་དང་ལྡན་པར་རོ། །འདི་ལ་གཞན་གྱི་བསམ་པ་ནི་གང་ཞིག་རྩ་བ་ལ་སོགས་པ་ས་བོན་གྱི་རིས་ལྔ་པོ་རྨ་བྱུང་བ་ལ་སོགས་པའི་ཆོ་གས་རུང་བར་བྱས་པ་ཟ་བ་དེ་ལ་ནི་ལྟུང་བྱེད་ཀྱི་ལྟུང་བ་མེད་པ་ཉིད་དོ་ཞེས་བྱ་བ་དེ་ནི་ལེགས་པར་ཤེས་ན། འོན་ཀྱང་བཅོམ་ལྡན་འདས་ཀྱིས་ལ་ལར་དེ་ལ་ལྟུང་བྱེད་དུ་གསུངས་སོ་ཞེས་བྱ་བ་འདི་ཁོ་བོ་ལ་འབད་དེ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། རུང་བར་བྱས་པ་རྣམས་མྱུ་གུ་སྐྱེས་པ་ཡོངས་སུ་ལོངས་སྤྱོད་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ས་བོན་གྱི་རིས་ལྔ་པོ་ཞུགས་ཀྱིས་རུང་བ་བགྱིས་ཏེ། འཚལ་ལ་ལྟུང་བྱེད་ཀྱི་ལྟུང་བར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ས་བོན་གྱི་རིས་ལྔ་པོ་རུང་བར་བྱས་པ་ས་ལ་བཞག་པའམ་སྣོད་དུ་བཞག་པའམ་གདང་ལ་བཏགས་པ་ལས་མྱུར་དུ་སྐྱེས་པར་གྱུར་ནའོ་ཞེས་བྱ་བ་ཡིན་ཏེ། འདིར་མེས་རུང་བར་བྱ་བ་ནི་རྨད་བྱུང་བ་ལ་སོགས་པ་གཞན་དག་གི་དཔེ་ཙམ་དུ་ཟད་པར་ཤེས་པར་བྱའོ། །གཡོགས་མ་མེད་པར་ཞེས་བྱ་བ་ལ་སོགས་པ་ནི་གཡོགས་མ་མེད་པར་གནས་མལ་རུང་བ་བཤམས་ནས་མ་བྲུ་བས་ཤིང་མ་བལྟས་པར་སོང་ན་ཇི་ལྟར་དག་པར་གསུངས་ཞེས་བྱ་བར་སྦྱར་རོ། །དེ་ལ་གཡོགས་མ་མེད་པར་ཞེས་བྱ་བ་ནི་བླ་གབ་མེད་པར་རོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །གནས་མལ་ནི་ཁྲི་དང་ཁྲིའུ་དང་སྟན་ནང་ཚངས་ཅན་ལ་སོགས་པའོ། །རུང་བ་ཞེས་བྱ་བ་ནི་ཁྲི་དང་སྟན་ནང་ཚངས་ཅན་ལ་སོགས་པ་བ་སོ་དང་གསེར་དང་དངུལ་ལ་སོགས་པ་ལས་བྱས་པ་དང་དཔག་བསམ་གྱི་ཤིང་གི་གོས་དང༌། ཚད་ལས་ལྷག་པ་ལ་སོགས་པ་དང་བྲལ་ཞིང་ཚད་དང་ལྡན་པ་ཞེས་བྱ་བའི་ཐ་ཚིག་གོ །བཤམས་ཞེས་བྱ་བ་ནི་མ་བཀྲམ་ནས་སོ། །མ་བྲུབས་ཞེས་བྱ་བ་ནི་མ་བརྟུལ་ཅིང་ངོ༌། །མ་བལྟས་པར་ཞེས་བྱ་བ་ནི་བལྟ་བ་མ་བྱས་པར་ཏེ་མ་བཅོལ་བར་ཞེས་བྱ་བའི་དོན་ཏོ། །སོང་ན་ཞེས་བྱ་བ་ནི་མཚམས་ལས་འདས་ནའོ། །ཇི་ལྟ་བུར་ན་ཞེས་བྱ་བ་ནི་རྒྱུ་གང་གིས་ནའོ། །དག་པར་ཞེས་བྱ་བ་ནི་ལྟུང་བ་མེད་པར་རོ། །འདི་
ལ་འདྲི་བའི་དོན་ནི་གང་འགའ་ཞིག་གིས་དགེ་འདུན་གྱི་གནས་མལ་དུ་རུང་བ་ལ་ཁྲི་དང་ཁྲིའུ་ལ་སོགས་པ་བདག་ཉིད་ཀྱིས་བླ་གབ་མེད་པར་བཤམས་ལ། ཕྱིས་དགེ་སློང་ལ་སོགས་པ་ལ་བལྟར་མ་བཅུག་པར་མཚམས་ཀྱི་ཕྱི་རོལ་དུ་འགྲོ་ན་དེའི་ཕྱིར་དེ་ལ་ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བ་དེ་ནི་ཤིན་ཏུ་ངེས་ན། འོན་ཀྱང་བཅོམ་ལྡན་འདས་ཀྱིས་ཁ་ཅིག་ཏུ་དེ་ལ་ལྟུང་བ་མེད་པར་གསུངས་སོ་ཞེས་བྱ་བ་འདི་ལ་ཁྱོད་ཀྱིས་ཅི་སྟ་ད་སྐད་གསུངས་པ་ཁོ་བོ་ལ་རྒྱུ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། བར་ཆད་ཀྱི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགེ་འདུན་གྱི་གནས་མལ་བཀྲམ་མམ་འགྲེམས་སུ་སྩལ་ནས། མ་བྲུབས་ཤིང་འབྲུམ་དུ་ཡང་མ་སྩལ། དགེ་སློང་གཞི་པ་ལ་བལྟར་ཡང་མ་སྩལ་བར་ཉེ་འཁོར་ལས་འདས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་ལ་གཙུག་ལག་ཁང་དེར་བར་ཆད་བརྒྱད་ལས་བར་ཆད་གང་ཡང་རུང་བ་ཅིག་ཉེ་བར་གནས་པར་གྱུར་ནའོ་ཞེས་བྱ་བ་ཡིན་ནོ། །དེ་བཞིན་དུ་གཞན་ལས་ཀྱང་རྐྱེན་དེ་ལྟ་བུ་ནི་མ་གཏོགས་སོ་ཞེས་གསུངས་སོ། །མདོ་བྱེད་པས་ཀྱང་ཉམ་ང་བ་དང་ཕྲད་པ་ལ་ཡང་མི་འབྱུང་ངོ་ཞེས་བཤད་དོ། །ཡང་ན་དེ་ནི་ལས་དང་པོ་པ་དང་སྔོན་ཕམ་པ་བྱུང་བ་ལ་སོགས་པ་ལ་བརྟེན་ནས་གསུངས་པ་ཡིན་པར་ཤེས་པར་བྱ་སྟེ་སྔ་མ་བཞིན་ནོ། །སྡོམ་བརྩོན་ཅན་གྱིས་ཞེས་བྱ་བ་ལ་སོགས་པ་ནི་སྡོམ་བརྩོན་ཅན་གྱིས་ཆོས་གོས་རུང་བ་དགེ་སློང་མ་ཉེ་དུ་མ་ཡིན་པ་ལ་བྱིན་ན་ཅིའི་ཕྱིར་ལྟུང་བ་མེད་པ་ཞེས་གསུངས་ཞེས་བྱ་བར་སྦྱར་རོ། །དེ་ལ་རུང་བ་ནི་རྔ་མོ་དང་གནག་དང་རི་དགས་ཀྱི་སྤུ་ལ་སོགས་པ་དང་བྲལ་བའོ། །གོས་ནི་བགོ་བ་སྟེ་སྣམ་སྦྱར་བླ་གོས་དང་མཐར་གོས་ལ་སོགས་པའོ། །ཉེ་དུ་ནི་ཕ་མ་དག་ནས་བདུན་པ་ཚུན་ཆད་ལས་སྔ་མ་གཅིག་ལས་སྐྱེས་པའོ། །ཉེ་དུ་མ་ཡིན་པ་ནི་ཉེ་དུ་མིན་པ་སྟེ་དེ་ལའོ། །བྱིན་ཞེས་བྱ་བ་ནི་ཡོངས་སུ་བཏང་ནའོ། །ལྟུང་བ་མེད་པ་ཞེས་བྱ་བ་ནི་ཉེས་པ་མེད་པའོ་ཞེས་གསུངས་པ་ཞེས་བྱ་བ་ནི་བཅོམ་ལྡན་འདས་ཀྱིས་དེ་སྐད་དུ་བཀའ་སྩལ་པ་སྟེ་ངེས་པར་སྨྲོས་ཞེས་བྱ་བར་སྦྱར་རོ། །འདི་ལ་དོན་ནི་གང་གི་
ཚེ་དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་གོས་རུང་བ་བྱིན་པ་དེའི་ཚེ་དེ་ལ་ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བ་དེ་ནི་ངེས་ན། འོན་ཀྱང་བཅོམ་ལྡན་འདས་ཀྱིས་རྣམ་པ་འགའ་ཞིག་གིས་དེ་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་འདི་ལ་ཁྱོད་ཀྱིས་ཁོ་བོ་ལ་རྒྱུ་སྨྲོས་ཤིག་ཅེས་བྱ་བ་འདི་ཡིན་ནོ། །དེ་ལ་ལན་ནི་འདི་ཡིན་ཏེ། དེ་ནི་ཚད་དུ་མཆོག་པ་དང་ལྷག་པ་ལ་བརྟེན་ནས་གསུངས་པ་ཡིན་པར་བལྟའོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགེ་སློང་མ་ཉེ་དུ་མ་ལགས་པ་ལ་གོས་སྩལ་ལ་ལྟུང་བར་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གོས་ཁྲུ་གང་དུ་མཆོག་པའམ་བདེ་བར་གཤེགས་པའི་ཆོས་གོས་ཀྱི་ཚད་ཡིན་ནོ། །ཡང་ན་དེ་ནི་རིན་དུ་བྱིན་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགེ་སློང་མ་ཉེ་དུ་མ་ལགས་པ་ལ་གོས་སྩལ་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། རིན་དུ་བྱིན་ལ་རིན་བླངས་ནའོ་ཞེས་བྱ་བ་ཡིན་ནོ། །ཡང་ན་དེ་ནི་དགེ་འདུན་ལ་གོས་འབུལ་བར་བྱེད་པའམ། ལེགས་པར་སྨྲ་བའམ། བསྙེན་པར་རྫོགས་པར་བྱེད་པའམ། བོར་རླག་བྱུང་བའམ། སྐྱིན་པར་བྱིན་པ་ལ་བརྟེན་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། དགེ་འདུན་ལ་གོས་འབུལ་བར་བྱེད་དམ། ལེགས་པར་སྨྲ་བ་ལ་བྱིན་ནམ། བསྙེན་པར་རྫོགས་པར་བྱེད་པ་ལ་སྦྱིན་ནམ། བོར་རླག་བྱུང་བའམ། སྐྱིན་པར་སྦྱིན་པ་ལ་ལྟུང་བ་མེད་དོ་ཞེས་བྱ་བ་ཡིན་ནོ། །ཡང་ན་ལས་དང་པོ་པ་ལ་སོགས་པ་ལ་དགོངས་ནས་གསུངས་པ་ཡིན་ཏེ་སྔ་མ་བཞིན་ནོ། །མཚམས་གཅིག་གནས་པའི་ཞེས་བྱ་བ་ནི་མཚམས་ཀྱི་ནང་ན་གནས་པའོ། །མང་པོ་ཞེས་བྱ་བ་ནི་བཞི་ལ་སོགས་པའོ། །ཁ་ཟས་མ་སྩལ་བར་ཞེས་བྱ་བ་ནི་འདི་དག་ལ་ཁ་ཟས་བཟའ་བ་དང་བཅའ་བ་ལ་སོགས་པ་ཨ་རུང་ཙམ་ཡང་བསྲུལ་ཞིང་བསྐུར་བ་མེད་པས་ཟས་མ་སྩལ་བར་རོ། །ཐ་དད་ཅེས་བྱ་བ་ནི་སོ་སོར་རོ། །བཟའ་བ་ནི་ཟ་བར་བྱེད་པ་སྟེ། དགེ་སློང་དག་ཅེས་བྱ་བར་སྦྱར་རོ། །འདི་ལ་བསམ་པ་ནི་གང་གི་ཚེ་མཚམས་གཅིག་ན་དགེ་སློང་བཞི་ལ་སོགས་པ་སོ་སོར་སྡེར་བཅས་ནས་ཟན་ཟ་བ་དེའི་ཚེ་དེ་དག་ལ་འདུས་ཤིང་ཟ་བའི་ལྟུང་བྱེད་དུ་འགྱུར་
ལ། གལ་ཏེ་ཁ་ཟས་ཀྱིས་བསྲུལ་བ་བྱས་ན་ནི་དེའི་ཚེ་ལྟུང་བ་མེད་པ་ཁོ་ནར་འགྱུར་རོ་ཞེས་བྱ་བ་ནི་ངེས་པ་ཁོ་ན་ཡིན་ན། འོ་ན་བཅོམ་ལྡན་འདས་ཀྱིས་ཁ་ཅིག་ཏུ་ལྟུང་བ་མེད་པ་ཁོ་ནའོ་ཞེས་གསུངས་པ་འདི་ལ་ཁྱེད་ཀྱིས་རྒྱུ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དུས་ཡོད་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། དུས་མ་གཏོགས་པར་འདུས་ཤིང་ཟ་བ་ལ་ལྟུང་བྱེད་དུ་འགྱུར་རོ་ཞེས་བྱ་བ་ལ་སོགས་པ་ཡིན་ནོ། །དེ་བཞིན་དུ་འདི་ལ་གཞུང་གཞན་ནི། བཙུན་པ་དགེ་སློང་གིས་འདུས་ཤིང་འཚལ་བ་བགྱིས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། དུས་དྲུག་ལས་དུས་གང་ཡང་རུང་བ་ཞིག་ཉེ་བར་གྱུར་ནའོ་ཞེས་བྱ་བ་ཡིན་ནོ། །ཡང་ན་དགེ་སློང་གསུམ་ཟན་ཟ་བ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་གནས་གཅིག་ཏུ་མཚམས་གཅིག་ན་དགེ་སློང་མང་པོ་དག་སོ་སོར་འཚལ་མ་འཚལ་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གལ་ཏེ་གསུམ་ཟན་ཟའི་བཞི་མ་ཡིན་ནའོ་ཞེས་བྱ་བ་ཡིན་ནོ། །ཡང་ན་ཟས་ཀྱི་གནས་སོ་སོར་ངེས་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་འདུས་ཤིང་འཚལ་བ་བགྱིས་པ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ཟས་ཀྱི་གནས་སོ་སོར་ངེས་པ་ཡིན་ནའོ་ཞེས་བྱ་བ་ཡིན་ནོ། །ཡང་ན་ལས་དང་པོ་པ་ལ་སོགས་པ་ལ་དགོངས་ནས་གསུངས་པ་ཡིན་ཏེ་སྔ་མ་བཞིན་ནོ། །ཁ་ཟས་བཅའ་བར་བྱ་བ་ལ་སོགས་པ་ཞེས་བྱ་བ་ནི་ཁ་ཟས་བཅའ་བར་བྱ་བ་ལ་སོགས་པ་རུང་བ་དུས་མ་ཡིན་པར་ཟན་ཇི་ལྟར་དག་པ་ཞེས་བྱ་བར་གསུངས་ཞེས་བྱ་བར་སྦྱར་རོ། །དེ་ལ་ཁ་ཟས་ནི་མིད་པར་བྱ་བའོ། །མིད་པར་བྱ་བའི་ཟས་བུ་རམ་ཧགས་ལ་སོགས་པ་ཡང་ཡོད་པས་བཅའ་བར་བྱ་བ་ལ་སོགས་པ་ཞེས་བྱ་བ་སྨོས་ཏེ། བཅའ་བར་བྱ་བ་ཞེས་བྱ་བ་ནི་བཅའ་བར་བྱ་བ་ལྔ་པོ་བཅའ་བར་བྱ་བ་རྩ་བ་དང༌། སྡོང་བུ་དང༌། ལོ་མ་དང༌། མེ་ཏོག་དང༌། འབྲས་བུ་ཞེས་བྱ་བ་རྣམས་སོ། །སོགས་པ་ཞེས་སྨོས་པས་ནི་བཟའ་བར་བྱ་བ་ལྔ་པོ་འབྲས་
ཆན་དང༌། ཟན་དྲོན་དང༌། ལྡེ་གུ་དང༌། ཤ་དང༌། སྣུམ་ཁུར་ཞེས་བྱ་བ་རྣམས་བསྡུས་ཏེ། བཅའ་བར་བྱ་བ་དང་བཟའ་བར་བྱ་བ་ཞེས་བྱ་བའི་ཐ་ཚིག་གོ །བཅའ་བར་བྱ་བ་དང་བཟའ་བར་བྱ་བ་དེ་ཡང་རུང་བ་མ་ཡིན་པ་གླང་པོ་ཆེ་དང༌། རྟའི་ཤ་ལ་སོགས་པ་དང་རུང་བ་མ་ཡིན་པ་དང་འདྲེས་པ་ཡང་ཡོད་པས་རུང་བ་ཞེས་བྱ་བ་སྨོས་ཏེ་རུང་བར་གྱུར་པའོ། །དུས་མིན་ཅེས་བྱ་བ་ལ་དུས་ནི་སྐྱ་རེངས་ཤར་ནས་ཉི་མ་ཕྱེད་ཀྱི་མཐར་ཐུག་པའི་བར་ཡིན་ནོ། །དེ་ལས་བཟློག་པ་ནི་དུས་མ་ཡིན་པ་སྟེ་དེར་རོ། །ཟླ་བྱེད་ལ་ཞེས་བྱ་བ་ནི་མིད་པར་བྱེད་པའོ། །དག་པ་ནི་ལྟུང་བ་མེད་པའོ། །ཐེ་ཚོམ་གཏན་ལ་དབབ་པར་ཞེས་བྱ་བ་ནི་ཐེ་ཚོམ་བསལ་བར་རོ། །འདི་ལ་བསྡུས་པའི་དོན་ནི་གང་གི་ཚེ་དགེ་སློང་གིས་དུས་མ་ཡིན་པར་བཅའ་བར་བྱ་བ་མ་ཡིན་པ་བཟའ་བར་བྱ་བ་ཟོས་པ་དེའི་ཚེ་དེ་ལ་ལྟུང་བྱེད་ཀྱི་ལྟུང་བ་འབྱུང་བར་འགྱུར་རོ་ཞེས་བྱ་བ་དེ་ལ་ནི་ཁོ་བོ་ཅག་མི་མཐུན་པ་ཡང་མེད་ན། འོན་ཀྱང་བཅོམ་ལྡན་འདས་ཀྱིས་ཚུལ་འགའ་ཞིག་གིས་དེ་ལ་ལྟུང་བ་མེད་པ་ཁོ་ནར་གསུངས་པས་དེའི་ཕྱིར་ཁོ་བོའི་ཡིད་གཉིས་བཟློག་པར་གྱིས་ཤིག་ཅེས་བྱ་བ་འདི་ཡིན་ནོ། །འདི་ལ་ཐེ་ཚོམ་བཅད་པ་ནི་འདི་ཡིན་ཏེ། དེ་ནི་གླིང་གཞན་དུ་སོང་བ་དུས་མ་ཡིན་པར་ཟ་བའི་རྒྱུ་མཚན་ལ་བརྟེན་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དུས་མ་ལགས་པར་བཅའ་བར་བགྱི་བ་དང་བཟའ་བར་བགྱི་བ་འཚལ་ལ་ལྟུང་བར་ཡང་མི་འགྱུར་པ་ལྟ་མཆིས་ལགས་སམ། ཉེ་བ་འཁོར་ཡོད་དེ། གླིང་གསུམ་པོ་དག་ཏུ་འཛམ་བུའི་གླིང་གི་དུས་སུ་ཟ་ནའོ་ཞེས་བྱ་བ་ཡིན་ནོ། །ཡང་ན་ལྷའི་བདུད་རྩི་ཡོངས་སུ་ལོངས་སྤྱོད་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཅོམ་ལྡན་འདས་དགེ་སློང་གིས་དུས་མ་ལགས་པར་གཡར་ཟས་འཚལ་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ལྷའི་བདུད་རྩི་ཟ་ནའོ་ཞེས་བྱ་བ་ཡིན་ནོ། །ཡང་ན་ནད་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་ནད་པ་ལ་བཅས་པའི་ཁ་ན་མ་ཐོ་བ་ཐམས་ཅད་གནང་བར་གཏོགས་པའི་གཞུང་ནི། བཙུན་པ་བྲོ་འཚལ་བ་ལ་ཇི་ལྟར་རིམ་གྲོ་བགྱི་ལགས། ཉེ་བ་འཁོར་རང་བཞིན་གྱིས་ཁ་ན་མཐོ་བ་མ་གཏོགས་པ་ཇི་ལྟར་ནད་པ་སོས་པར་འགྱུར་བ་
ལྟར་རོ་ཞེས་བྱ་བ་ཡིན་ནོ། །དེ་བཞིན་དུ་འདིར་གཞུང་གཞན་ནི། བཙུན་པ་བྲོ་འཚལ་བ་ལ་ཇི་ལྟར་རིམ་གྲོ་བགྱི་ལགས། ཉེ་བ་འཁོར་སྟོན་པའི་འདུ་ཤེས་ཉེ་བར་བཞག་ལ་ཕན་པ་དང་མཐུན་པའི་སྨན་དག་གིས་རིམ་གྲོ་བྱའོ། །བཙུན་པ་བོ་འཚལ་བ་ལ་ཅི་ཞིག་སྩལ་བར་བགྱི། ཉེ་བ་འཁོར་རང་བཞིན་གྱིས་ཁ་ན་མ་ཐོ་བ་མ་གཏོགས་པ་གང་གིས་ནད་པ་སོགས་པར་འགྱུར་བ་དེ་སྦྱིན་པར་བྱའོ་ཞེས་བྱ་བ་ཡིན་ནོ། །དེ་བཞིན་དུ་འདིར་གཞུང་གཞན་ནི། བཙུན་པ་བྲོ་འཚལ་བ་ལ་ཅི་ཞིག་སྩལ་བར་བགྱི། ཉེ་བ་འཁོར་བཅས་པའི་ཁ་ན་མ་ཐོ་བ་གང་གིས་ནད་པ་འཚོ་བར་འགྱུར་བ་དེ་ནད་པ་ལ་སྦྱིན་པར་བྱའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། རང་བཞིན་གྱི་ཁ་ན་མ་ཐོ་བ་དང་བཅས་པ་ལས་གཞན་པ་ཐམས་ཅད་ལ་གསོ་བའི་དོན་ཉིད་མ་གཏོགས་པ་ཞེས་བྱ་བའི་ལྷག་མའོ་ཞེས་བྱ་བ་དང༌། དེ་བཞིན་དུ་གསོ་བའི་ཕྱིར་ནུབ་མོ་ཟ་བ་ནི་ཚུལ་དང་མི་མཐུན་པ་མ་ཡིན་ནོ་ཞེས་བཤད་དོ། །དགེ་སློང་ཆོ་ག་སྔོན་འགྲོ་བ་ཞེས་བྱ་བ་ནི་ཆོ་ག་གང་གིས་བྱིན་ལེན་བྱང་བས་ཏེ་མངོན་སུམ་དུ་མཚམས་ཀྱི་ནང་དུ་འཐོབ་པའི་ཕྱོགས་སུ་གནས་པ་ལག་པ་བཀན་པས་ལུས་སམ་དེ་དང་འབྲེལ་བས་གྱེན་དུ་འདེགས་ནུས་པ་རྫོགས་པར་མ་བསྙེན་པ་མི་མ་ཡིན་པ་ལས་ཀྱང་སྦྱིན་པར་འདོད་པས་ཡན་ལག་གིས་སམ་དེ་དང་འབྲེལ་པས་བྱིན་པ་མནོས་པ་ནི་བྱིན་ལེན་ནོ་ཞེས་བྱ་བའི་ཆོ་ག་དེ་བསྒྲུབ་པ་སྟེ། ཆོ་ག་ཡང་དག་པར་སྤྱོད་པས་ཡིན་གྱི། གྱི་ན་ནི་མ་ཡིན་ནོ་ཞེས་བྱ་བའི་དོན་ཏོ། །བྱིན་ལེན་བྱས་ནས་ཞེས་བྱ་བ་ནི་མཚམས་ཀྱི་ནང་དུ་རུང་བ་བྱེད་པ་ལ་སོགས་པ་འཐོབ་ཏུ་རུང་བར་གནས་པ་ལས་མངོན་སུམ་དུ་བླངས་ནས་སོ། །ཅི་ཞིག་ཅེ་ན། བཅའ་བར་བྱ་བ་ལ་སོགས་པ་ཞེས་བྱ་བར་སྦྱར་རོ། །ལྟུང་དང་བཅས་ཞེས་བྱ་བ་ནི་ཉེས་པ་དང་བཅས་པའོ། །འདི་ལ་དོན་ནི་དགེ་སློང་གང་ཞིག་ཇི་སྐད་བཤད་པའི་ཆོ་ག་བརྗོད་ཅིང་བཅའ་བར་བྱ་བ་དང་བཟའ་བར་བྱ་བ་དེ་ལ་བྱིན་ལེན་བྱས་ཏེ་ཟ་བ་དེ་ལ་ལྟུང་བ་མེད་པ་ཁོ་ནའོ་ཞེས་བྱ་བ་དེ་ནི་ཤེས་པ་ཉིད་ན། འོན་ཀྱང་བཅོམ་ལྡན་འདས་ཀྱིས་དེ་ལ་ལྟུང་བ་དང་བཅས་པ་ཉིད་དུ་གསུངས་པ་དེ་གལ་ཏེ་ཁྱོད་ལ་འདིར་འདུལ་བ་ལ་གསལ་བར་ཤེས་པའི་ནུས་པ་ཞིག་ཡོད་པ་དེ་ལྟ་ན་ཁོ་བོ་ལ་ལན་ཐོབ་ཤིག་ཅེས་བྱ་བ་འདི་ཡིན་ནོ། །འདི་ལ་
ལན་ནི་འདི་ཡིན་ཏེ། དེ་བཞིན་དུ་དེ་ནི་གཞན་གྱིར་འདུ་ཤེས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་བཅའ་བར་བགྱི་བ་བྱིན་ལེན་བགྱིས་པ་འཚལ་ལ་ལྟུང་བ་དང་བཅས་པར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གཞན་གྱི་འདུ་ཤེས་ཀྱིས་བྱིན་ལེན་བྱས་ནས་ཟ་ནའོ། །ཡང་ན་དེ་ནི་བྱིན་པར་རུང་བ་མ་ཡིན་པ་གསོག་འཇོག་བྱས་པ་དུས་མ་ཡིན་པར་ཟ་བའི་དབང་དུ་མཛད་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་འཚལ་མ་ལན་ཅིག་འཚལ་ལ་ལྟུང་བ་ལན་ཅིག་བཞི་འབྱུང་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། བྱིན་ལེན་མ་བྱས་པ་རུང་བ་མ་ཡིན་པ་གསོག་འཇོག་བྱས་པ་དུས་མ་ཡིན་པར་ཟ་ནའོ། །དགེ་སློང་གིས་དགེ་སློང་ལ་ཞེས་བྱ་བ་ལ་སོགས་པ་ལ། ཉོན་མོངས་སེམས་ཀྱིས་ཞེས་བྱ་བ་ནི་ཉོན་མོངས་པ་དང་མཚུངས་པར་ལྡན་པའི་སེམས་ཀྱིས་སོ། །གསལ་བར་ལན་ཐོབ་ཤིག་ཅེས་བྱ་བ་ནི་ངེས་བར་སྨྲོས་ཤིག་པའོ། །འདི་ལ་དོན་ནི་གང་གི་ཚེ་དགེ་སློང་གིས་ཁྲོས་ནས་དགེ་སློང་ལ་རྡེག་པ་དེའི་ཚེ་དེ་ལ་ཐེ་ཚོམ་མེད་པར་ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བ་དེ་ནི་ཤེས་པ་ཉིད་ན། འོན་ཀྱང་བཅོམ་ལྡན་འདས་ཀྱིས་ཉེས་བྱས་སུ་གསུངས་སོ་ཞེས་བྱ་བ་དེ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་འདྲེན་ཐོར་ལ་སོགས་པ་ལ་དགོངས་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགེ་སློང་ལ་བརྒྱབ་པ་ལྟུང་བྱེད་དུ་ཡང་མི་འགྱུར་བ་ལ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདྲེན་ཐོར་གྱི་བསམ་པའམ། གསད་པའི་བསམ་པས་རྡེག་ནའོ་ཞེས་བྱ་བ་ཡིན་ནོ། །ཡང་ན་གཞན་གྱི་དོན་དུ་རྡེག་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་གཞན་གྱི་སླད་དུ་དགེ་སློང་ལ་བརྒྱབ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་གཞན་རྡེག་ཏུ་འཇུག་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་དགེ་སློང་ལ་གཞན་གྱིས་རྡེག་ཏུ་སྩོལ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་
བ་ཡིན་ནོ། །ཡང་ན་དགེ་སློང་སྨྱོན་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་དགེ་སློང་སྨྱོན་པ་ལ་བརྒྱབ་ན་ཅིར་འགྱུར་ལགས། ཉེས་བྱས་སུའོ། །དེ་བཞིན་དུ་དགེ་སློང་སེམས་འཁྲུགས་པ་དང་ཚོར་བས་ཉེན་པ་དང་གླེན་པ་དང་འོན་པ་དང་གཉིད་ཀྱིས་ལོག་པ་དང་མྱོས་པ་དང་སྙོམས་པར་ཞུགས་པ་དང་འགྲོ་བ་གཞན་དུ་གནས་པ་ལ་བརྒྱབ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ་སྔ་མ་བཞིན་ནོ། །སྡོམ་བརྩོན་མེ་ལ་རེག་བྱེད་པ། །ཞེས་བྱ་བ་ལ་སོགས་པ་ནི་ཐམས་ཅད་མཁྱེན་པས་མེ་ལ་རེག་པ་ཅིའི་ཕྱིར་ཉེས་བྱས་ཀྱི་ལྟུང་བར་གསུངས་པ་ངེས་པར་ཁོ་བོ་ལ་སྨྲོས་ཤིག་ཅེས་བྱ་བར་སྦྱར་ཏེ། དེ་ལ་མེ་ལ་རེག་པ་བྱེད་པ་ཞེས་བྱ་བ་ནི་མེ་ལེན་པར་བྱེད་པའོ། །རེག་པར་བྱེད་པ་ཞེས་སྨོས་པ་ནི་རེག་པ་ཡང་བསྡུ་སྟེ། ཡང་དགེ་སློང་གང་མི་ན་བར་འདོད་ནས་བདག་ཉིད་ཀྱི་ཕྱིར་མེ་ལ་རེག་གམ་རེག་ཏུ་འཇུག་ན་ཞེས་འབྱུང་བའི་ཕྱིར་རོ། །ཀུན་མཁྱེན་ནི་འདས་པ་དང་མ་འོངས་པ་དང་ད་ལྟར་བྱུང་བའི་དོན་བླང་བར་བྱ་བ་དང༌། དོར་བར་བྱ་བའི་མཚན་ཉིད་ཐབས་དང་བཅས་པ་ཐམས་ཅད་ལག་མཐིལ་དུ་སྐྱུ་རུ་ར་བཞག་པ་བཞིན་དུ་ཡོངས་སུ་མཁྱེན་པའི་ཕྱིར་རོ། །ཐུགས་རྗེ་དང་ལྡན་པའི་ཞེས་བྱ་བ་ནི་ཐུགས་རྗེ་ཆེན་པོ་དང་ལྡན་པས་སོ། །འདི་ལ་དོན་ནི་གང་གི་ཚེ་དགེ་སློང་གིས་མེ་ལ་རེག་གམ་རེག་ཏུ་འཇུག་པ་དེའི་ཚེ་ལ་ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བ་དེ་ནི་ངེས་པ་ཉིད་ཡིན་ན། འོན་ཀྱང་བཅོམ་ལྡན་འདས་ཀྱིས་དེ་ལ་ཉེས་བྱས་སུ་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །དེ་ལ་ལན་ནི་འདི་ཡིན་ཏེ། དེ་ནི་གཞན་གྱི་དོན་དུ་རེག་པ་ལ་དགོངས་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་གཞན་དུ་ཞུགས་པ་ལ་རེག་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་འདི་ཡིན་ནོ། །དེ་བཞིན་དུ་མདོ་ལས་ཀྱང༌། འདི་སྐད་དུ་ཡང་དགེ་སློང་གང་མིན་བར་བདེ་བར་འདོད་ནས་བདག་གི་ཕྱིར་མེ་ལ་རེག་གམ་རེག་ཏུ་འཇུག་ན་ལྟུང་བྱེད་དོ་ཞེས་འབྱུང་སྟེ་བདག་ཅིས་སྨོས་པའི་ཕྱིར་གཞན་གྱི་ཆེད་དུ་ནི་ཉེས་
བྱས་སུའོ་ཞེས་བྱ་བར་མངོན་ནོ། །དེ་བཞིན་དུ་མདོ་བྱེད་པས་ཀྱང༌། རང་གི་དོན་ཉིད་གཙོ་ཆེར་ཡོད་པའོ། །ཞེས་བཤད་དོ། །ཡང་ན་ཕོ་ཉ་ལ་རེག་ཏུ་འཇུག་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཕོ་ཉ་ལ་ཞུགས་ལ་རེག་ཏུ་སྩོལ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །དེ་བཞིན་དུ་ཡི་གེ་དང་ལག་བརྡ་དང་གཞན་ལ་སྙད་འདོགས་པ་དང༌། བརྒྱུད་པས་རེག་ཏུ་སྩོལ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ཏེ། འདི་ལ་མདོ་བྱེད་པས་བཤད་པ་ཡང་སྔ་མ་བཞིན་ནོ། །དགེ་སློང་ནུབ་གཉིས་ལས་ལྷག་པར་ཞེས་བྱ་བ་ལ་སོགས་པ་ནི་དགེ་སློང་ནུབ་གཉིས་ལས་ལྷག་པར་བསྙེན་པར་རྫོགས་པ་དང་བྲལ་བ་དང་ཉལ་བར་བྱེད་པ་ཇི་ལྟར་ཉེས་བྱས་ཀྱི་ལྟུང་བ་བྱེད་པར་གསུངས་ཞེས་བྱ་བར་སྦྱར་རོ། །ཅི་བསྙེན་པར་མ་རྫོགས་པ་དང༌། ལྷན་ཅིག་རྟག་ཏུ་ཁྱིམ་ན་ཉལ་བ་ལ་ལྟུང་བ་རྣམ་པར་གཞག་གམ་ཞེ་ན། ནུབ་གཉིས་ལས་ལྷག་པར་ཞེས་བྱ་བ་སྨོས་ཏེ། ནུབ་གཉིས་ཀྱི་འོག་ཏུ་ཞེས་བྱ་བའི་ཐ་ཚིག་གོ །སུ་དང་ལྷན་ཅིག་ཅེ་ན། བསྙེན་པར་རྫོགས་པ་དང་བྲལ་བ་ཞེས་བྱ་བ་སྨོས་ཏེ། བསྙེན་པར་རྫོགས་པ་དང་བྲལ་བ་བསྙེན་པར་མ་རྫོགས་པ་དང་དགེ་སྦྱོང་ལ་སོགས་པ་དང་ལྷན་ཅིག་ཅེས་བྱ་བའི་དོན་ཏོ། །དེ་ལ་རྫོགས་པ་ནི་བཀྲ་ཤིས་པ་སྟེ། མྱ་ངན་ལས་འདས་པ་ཞེས་བྱ་བའི་ཐ་ཚིག་གོ །དེ་ནི་སྡུག་བསྔལ་ཐམས་ཅད་མེད་པའི་ཕྱིར་དང༌། གཅིག་ཏུ་ཞི་བའི་མཚན་ཉིད་ཡིན་པའི་ཕྱིར་རྫོགས་པ་ཞེས་བྱ་བའི་སྒྲར་བརྗོད་དེ། དྲི་མ་ཐམས་ཅད་བཅོམ་ནས་ནི། །མྱ་ངན་ལས་འདས་རྫོགས་པ་ཐོབ། །སྡུག་བསྔལ་ཐ་མར་བྱེད་པ་སྟེ། །ཐམས་ཅད་ཕུན་སུམ་ཚོགས་པར་འགྱུར། །ཞེས་འབྱུང་བའི་ཕྱིར་རོ། །དགེ་སློང་ཉིད་རྫོགས་པ་དང་ཉེ་བར་བསྙེན་པའི་ངོ་བོར་འདུག་པའི་ཕྱིར་བསྙེན་པར་རྫོགས་པར་བརྗོད་པར་བྱ་བར་ཤེས་པར་བྱ་སྟེ། ངའི་དགེ་སློང་ཚུལ་ཁྲིམས་དྲི་མ་མེད་པ་དེ་ལ་མཐོ་རིས་ནི་རས་ཡུག་གིས་ཆོད་པ་ཙམ་ལ་ཐར་པ་ནི་ཡོལ་བས་ཆོད་པ་ཙམ་མོ་ཞེས་འབྱུང་བའི་ཕྱིར་རོ། །དེ་དང་བྲལ་བ་སྟེ་བསྙེན་པར་རྫོགས་པ་མེད་པ་དང་ཞེས་བྱ་བའི་ཐ་ཚིག་གོ །ཉལ་བ་ནི་ཉལ་ཏེ་གཉིད་ཀྱིས་ལོག་པའི་མཚན་ཉིད་དེ། ཉལ་ན་
ཞེས་བྱ་བ་ནི་གཉིད་ཀྱིས་ལོག་ནའོ་ཞེས་འབྱུང་བའི་ཕྱིར་རོ། །བྱེད་པ་ཞེས་བྱ་བ་ནི་ལྷག་པར་སྤྱོད་པའོ། །ཉེས་བྱས་ལྟུང་བ་བྱེད་པར་ཞེས་བྱ་བ་ནི་ཉེས་བྱས་ཀྱི་ལྟུང་བ་དང་ལྡན་པར་རོ། །འདི་ལ་བསྡུས་པའི་དོན་ནི་དགེ་སློང་གང་ཟག་བསྙེན་པར་མ་རྫོགས་པ་དགེ་སྦྱོང་ལ་སོགས་པ་དང་ལྷན་ཅིག་ཁྱིམ་གཅིག་ཏུ་ནུབ་གཉིས་ཉལ་ནས་ནུབ་གསུམ་པ་ལ་དེ་ཉིད་དང་ལྷན་ཅིག་ཉལ་ན་དེའི་ཕྱིར་དེ་ལ་ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བ་དེ་ནི་ཤིན་ཏུ་གྲགས་ན། འོན་ཀྱང་དགེ་སློང་བསྙེན་པར་མ་རྫོགས་པ་དང་ལྷན་ཅིག་ཉལ་ན་དེ་ལ་ལྟུང་བྱེད་དུ་འགྱུར་བར་མ་གསུངས་ཀྱི་ཉེས་བྱས་སོ་ཞེས་བྱ་བ་དེ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་གནས་མ་བསྐོར་བའམ་མ་གཡོགས་པའི་དབང་དུ་མཛད་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གང་ཟག་བསྙེན་པར་མ་རྫོགས་པ་དང་ལྷན་ཅིག་ཏུ་སྡུམ་པར་ནུབ་གཉིས་ལྷག་པར་མཆིས་ཉལ་བར་བགྱིད་ལ་ལྟུང་བྱེད་དུ་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་གནས་དེ་ཀུན་ནས་གཡོགས་ལ་མ་བསྐོར་བའམ། ཕྱེད་བསྐོར་བ་ཡིན་པའམ། ཀུན་ནས་བསྐོར་ལ་མ་གཡོགས་པའམ། ཕྱེད་གཡོགས་པ་ཡིན་ལ་གནས་དེ་ལྟ་བུར་ཉལ་བར་བྱེད་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་འདི་ལ་ཕལ་ཆེར་གཡོགས་པ་དང་བསྐོར་བ་ནི་གནས་ཀྱི་མཐའ་ཡིན་ནོ་ཞེས་བཤད་དོ། །ཡང་ན་རིའི་ཕུག་ལ་སོགས་པར་ཉལ་བར་བྱེད་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ་དེ་བཞིན་དུ་འདིར་གཞུང་ནི་བཙུན་པ་རེ་ཞིག་དགེ་སློང་རི་ཕུག་གམ་ཤིང་གི་བུ་ག་དག་གམ་རྩིག་པའི་བུ་ག་དག་ཏུ་གང་ཟག་བསྙེན་པར་མ་རྫོགས་པ་དང་ལྷན་ཅིག་ནུབ་གཉིས་ལས་ལྷག་པར་གནས་སུ་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་གིས་ཤིང་དྲུང་དུ་གང་ཟག་བསྙེན་པར་མ་རྫོགས་པ་དང་ལྷན་ཅིག་ནུབ་གཉིས་པས་ལྷག་པར་གནས་སུ་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་འདི་ལ་ཤིང་ལྗོན་པའི་དྲུང་དང༌། རྩིག་པའི་བར་དང༌། ཚང་ཚིང་གི་དྲུང་དག་ནི་ཕྱེད་ཉིད་དོ་ཞེས་བཤད་དོ། །ཡང་ན་སྨྱོན་པ་དང་ལྷན་ཅིག་ཏུ་ཉལ་བར་བྱེད་པ་ལ་དགོངས་ནས་
དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་སྨྱོན་པ་དང་ལྷན་ཅིག་ནུབ་གཉིས་སྡུམ་པར་མཆིས་ཉལ་ལ་ནུབ་གསུམ་པ་ལ་རང་བཞིན་དུ་གནས་པ་དང་ལྷན་ཅིག་མཆིས་ཉལ་ན་ཅིར་འགྱུར་ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་རང་བཞིན་དུ་གནས་པ་དང་ལྷན་ཅིག་ནུབ་གཉིས་མཆིས་ཉལ་ལ་ནུབ་གསུམ་པ་ལ་སྨྱོན་པ་དང་ལྷན་ཅིག་མཆིས་ཉལ་ན་ཅིར་འགྱུར་ལགས། ཉེས་བྱས་སུའོ། །དེ་བཞིན་དུ་སེམས་འཁྲུགས་པ་དང་ཚོར་བས་ཉེན་པ་དང་གླེན་པ་དང་འོན་པ་དང་འགྲོ་བ་གཞན་ན་གནས་པ་དང་ལྷན་ཅིག་མཆིས་ཉལ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་སྔར་ཕམ་པ་བྱུང་བ་ལ་སོགས་པ་ལ་དགོངས་ནས་གསུངས་པ་ཡིན་ཏེ་སྔ་མ་བཞིན་ནོ། །དྲི་བ་དང་ལན་འདི་དག་ནི་བུད་མེད་དང་ལྷན་ཅིག་ཉལ་བ་ལ་ཡང་རུང་བས་དེ་ལ་ཡང་ནུབ་གཉིས་ལས་ལྷག་པར་ལྷན་ཅིག་གནས་ན་ཉལ་བ་མ་གཏོགས་པར་ཅི་རིགས་པར་བརྟག་པར་བྱ་སྟེ། དེ་ལ་གཞུང་ནི། བཙུན་པ་རེ་ཞིག་དགེ་སློང་བུད་མེད་དང་ལྷན་ཅིག་རིའི་ཕུག་དག་གམ་ཤིང་དྲུང་ངམ་ཚང་ཚིང་གི་ནང་ངམ་ཤིང་གི་པུ་ག་དག་ཏུ་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་བུད་མེད་དང་ལྷན་ཅིག་ཀུན་ནས་གཡོགས་པ་ལ་མ་བསྐོར་བར་རམ། ཕྱེད་བསྐོར་བར་མཆིས་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་བུད་མེད་དང་ལྷན་ཅིག་ཀུན་ནས་བསྐོར་ལ་མ་གཡོགས་པའམ་ཕྱེད་གཡོགས་པར་མཆིས་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་དུད་འགྲོའི་སྐྱེ་གནས་སུ་གཏོགས་པའི་བུད་མེད་དང་ལྷན་ཅིག་སྡུམ་པ་ན་མཆིས་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་བུད་མེད་དང་ལྷན་ཅིག་སྟེང་གི་ནམ་མཁའ་མཆིས་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་སྨྱོན་པ་དང་ལྷན་ཅིག་སྡུམ་ན་མཆིས་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ། །དེ་བཞིན་དུ་སེམས་འཁྲུགས་པ་དང་ཚོར་བས་ཉེན་པ་དང་འགྲོ་བ་གཞན་དུ་གནས་པ་དང་ལྷན་ཅིག་སྡུམ་པ་ན་མཆིས་ཉལ་བར་བགྱིད་ན་ཅིར་འགྱུར་ལགས།
ཉེས་བྱས་སུའོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་འདི་ལ་རང་བཞིན་ཉམས་པ་ནི་མ་ཡིན་ནོ། །མིའི་འགྲོ་བ་པ་ནི་ཐ་སྙད་དུ་བྱ་བ་ཉིད་ཡིན་ནོ་ཞེས་བཤད་དོ། །སྡོམ་བརྩོན་ཚོན་རྩི་སྣ་གསུམ་གྱིས། །ཞེས་བྱ་བ་ལ་སོགས་པ་ལ། ཚོན་རྩི་སྣ་གསུམ་ནི་རམས་དང༌། བཙག་དང༌། བསྐ་བ་ཞེས་བྱ་བ་དག་གོ །གོས་ནི་གོས་སོ། །གྱོན་པ་ནི་བགོས་པའོ། །བཅོལ་བ་ནི་གསོལ་བ་གདབ་པ་སྔོན་དུ་འགྲོ་བའི་དོན་དུ་གཉེར་བའོ། །འདི་ལ་དྲི་བའི་དོན་ནི་དགེ་སློང་གིས་གང་གི་ཚེ་གོས་ལྷག་ཅིག་རྙེད་ནས་ཚོན་རྩི་གསུམ་པོ་རམས་དང༌། བཙག་དང༌། བསྐ་བ་ཞེས་བྱ་བས་ཁ་དོག་བསྒྱུར་བ་མ་བྱས་པ་གྱོན་ན་དེའི་ཚེ་དེ་ལ་ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བ་བསྟན་པ་ནི་བསྟན་པ་འདི་ལ་ཞུགས་པ་རྣམས་ལ་གྲགས་པ་ཡིན་ནོ། །འོན་ཀྱང་བཅོམ་ལྡན་འདས་ཀྱིས་དེ་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་དེ་འདི་ལ་རྒྱུ་ཅི་ཞིག་ཡོད་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། རང་བཞིན་གྱི་ཚོན་གྱིས་ཁ་བསྒྱུར་བའི་གོས་གྱོན་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཆོས་གོས་ཁ་དོག་ངན་པར་བགྱི་བ་གསུམ་པོ་དག་ལས་གང་ཡང་རུང་བ་ཞིག་གིས་ཁ་དོག་ངན་པར་མ་བགྱིས་པར་འཚལ་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་གིས་རང་བཞིན་གྱི་ཚོན་ཅན་གྱི་གོས་གྱོན་པའོ་ཞེས་བྱ་བ་ཡིན་ནོ། །ཡང་ན་ཚད་དུ་མཆོག་པའམ་ལྷག་པ་ལ་བརྟེན་ནས་དངོས་གཞི་མེད་པ་ལ་དགོངས་ནས་ལྟུང་བ་མེད་པར་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་རད་པ་ཁྲུ་གང་དུ་མ་འཚལ་བའམ་བདེ་བར་གཤེགས་པའི་ཆོས་གོས་ཀྱི་ཚད་གཅིག་ཁ་དོག་ངན་པར་བགྱི་བ་གསུམ་པོ་གང་ཡང་རུང་བ་ཞིག་གིས་ཁ་དོག་ངན་པར་མ་བགྱིས་པར་འཚལ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་གོས་རྙིང་པའི་དབང་དུ་མཛད་པ་ཡིན་ཏེ། འདི་ལ་ལན་ནི། གོས་སར་པ་རྙེད་ནས་ཞེས་བྱ་བ་ལ་སོགས་པ་ཡིན་ནོ། །སར་པ་སྨོས་པ་ནི་རྙིང་པ་ཁ་དོག་མ་བསྒྱུར་བ་གྱོན་ན་ཞེས་ཤུགས་ཀྱིས་ཉེས་བྱས་སུ་ཤེས་
པར་བྱ་བ་ཡིན་ནོ། །འདིར་དེ་ལྟར་ཡིན་པར་རྣམ་པར་འབྱེད་པ་ལས། སར་པ་ཞེས་བྱ་བ་ནི་སར་པ་གཉིས་ཏེ་སར་པའི་སྒེ་ནས་སར་པ་དང༌། རྙེད་པའི་སྒོ་ནས་སར་པའོ། །དོན་འདི་ལ་ནི་སར་པའི་སྒོ་ནས་སར་པ་ཡིན་པར་དགོངས་ནས་ཞེས་བཤད་དོ། །ཡང་ན་དེ་ནི་ལས་དང་པོ་པ་ལ་སོགས་པ་ལ་དགོངས་ནས་གསུངས་པ་ཡིན་ཏེ་སྔ་མ་བཞིན་ནོ། །སྡོམ་བརྩོན་ཚོན་རྩི་རྣམ་གསུམ་གྱིས། །ཞེས་བྱ་བ་ལ་སོགས་པ་ལ། ལེགས་ཕར་ཁ་བསྒྱུར་ཅེས་བྱ་བ་ནི་ཏེ་པོར་ཁ་བསྒྱུར་བའོ། །གྱོན་པ་ནི་བགོས་པའོ། །མཆོག་ནི་ཕུལ་དུ་ཕྱིན་པའོ། །ཆོད་ཅིག་ཅེས་བྱ་བ་ནི་སོལ་ཅིག་པ་སྟེ། འདི་ལ་ཁོ་བོ་ལ་ཏེ་པོར་ཐེ་ཚོམ་ཡོད་ཀྱི་དེ་སོལ་ཅིག་ཅེས་བྱ་བའི་དོན་ཏོ། །འདི་ལ་གཞན་གྱི་བསམ་པ་ནི་དགེ་སློང་གིས་གང་གི་ཚེ་ཚོན་རྩི་སྣ་གསུམ་གྱིས་ཁ་བསྒྱུར་བའི་གོས་བགོས་པ་དེའི་ཚེ་དེ་ལ་ལྟུང་བ་མེད་པར་འགྱུར་བ་གསལ་བ་ཉིད་ན། འོན་ཀྱང་བཅོམ་ལྡན་འདས་ཀྱིས་རྣམ་པ་འགའ་ཞིག་གིས་ལྟུང་བ་ཁོ་ནར་གསུངས་སོ་ཞེས་བྱ་བ་འདི་ལ་རྒྱུ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་ཚོན་རུང་བ་མ་ཡིན་པས་ཁ་བསྒྱུར་བའི་གོས་གྱོན་པ་ལ་བརྟེན་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་སར་པ་ཁ་དོག་ངན་པར་བགྱི་བ་གསུམ་པོ་དག་ལས་གང་ཡང་རུང་བ་ཞིག་གིས་ཁ་དོག་ངན་པར་བགྱིས་ཏེ་འཚལ་ལ་ལྟུང་བ་དང་བཅས་པ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ཚོན་ཆེན་པོས་ཁ་དོག་བསྒྱུར་ནའོ། །དེ་ལ་འདི་དག་ཚོན་ཆེན་པོ་ཡིན་ཏེ། ལི་ཁྲི་དང་ཐིང་ཤིང་དང་རྒྱ་སྐྱེགས་དང་མཚལ་དང་གུར་གུམ་དང༌། བཙོད་དང་རྨ་ཤིང་དང་ལེ་བརྒན་རྩིའོ། །ཚོན་དེ་ལྟ་བུ་དག་གིས་ཁ་བསྒྱུར་བ་འཚལ་ན་ཅིར་འགྱུར་ལགས། ཉེས་བྱས་སོ། །མདོ་བྱེད་པས་ཀྱང༌། འདི་ལ་ཁ་དོག་ཚན་བོར་བསྒྱུར་བའི་གོས་བསྟེན་པར་མི་བྱའོ་ཞེས་བཤད་དོ། །ཡང་ན་གོས་ཐམས་ཅད་སྔོན་པོ་དང་སེར་པོ་དང༌། དམར་བོ་གྱོན་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་རང་པ་ཁ་དོག་ངན་པར་བགྱི་བ་གསུམ་པོ་གང་ཡང་རུང་བ་ཞིག་གིས་ཁ་དོག་ངན་པར་མ་བགྱིས་པར་འཚལ་ལ་ལྟུང་བ་དང་བཅས་
པ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་གིས་གོས་ཐམས་ཅད་སྔོན་པོའམ་དམར་པོ་བགོས་ནའོ། །མདོ་བྱེད་པས་ཀྱང་འདིར་ཐམས་ཅད་སྔོན་པོ་བགོས་ན་ཉེས་བྱས་སུ་བཤད་དོ། །ཡང་ན་རུང་བ་མ་ཡིན་པ་ཁ་དོག་མ་བསྒྱུར་བ་གྱོན་པ་ལ་བརྟེན་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་སར་པ་སར་པ་ལ་ཁ་དོག་ངན་པ་བགྱི་བ་གསུམ་པོ་གང་ཡང་རུང་བ་ཞིག་གིས་ཁ་དོག་ངན་པར་མ་བགྱིས་པར་འཚལ་ལ་ལྟུང་བྱེད་དུ་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གོས་རུང་བ་མ་ཡིན་པ་གྱོན་ནའོ། །དེ་ལ་རུང་བ་མ་ཡིན་པ་ནི་འདི་དག་ཡིན་ཏེ། རྔ་བལ་དང་གནག་གི་སྤུ་དང་རི་དགས་ཀྱི་བལ་དང་བསྲེས་པ་དང་ཐགས་སུ་མ་བཏགས་པའི་གོས་གྱོན་ན་ཅིར་འགྱུར་ཞེ་ན། ཉེས་བྱས་སུ་འགྱུར་བའོ། །མདོ་བྱེད་པས་ཀྱང་འདི་ལ་རབ་ཏུ་བྱུང་བའི་རྫས་དག་ལ་ནི་རུང་བ་ཉིད་དང་ཞེས་བཤད་དོ། །ཡང་ན་སྔར་ལྟུང་བ་བྱུང་བ་ལ་སོགས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ་སྔ་མ་བཞིན་ནོ། །སྡོམ་བརྩོན་རིན་ཆེན་ལ་རེག་ན། །ཞེས་བྱ་བ་ལ་སོགས་པ་ནི་ཀྱེ་མཛའ་བོ་སྡོམ་བརྩོན་ཅན་གྱིས་རིན་པོ་ཆེ་ལ་རེག་ན་ཇི་ལྟར་དགེ་འདུན་གྱི་ལྷག་མ་དང་སྦོམ་པོར་གསུངས་པ་མྱུར་དུ་སྨྲོས་ཤིག་ཅེས་བྱ་བར་སྦྱར་ཏེ། རིན་ཆེན་ལ་རེག་ན་ཞེས་བྱ་བ་ལ་རིན་པོ་ཆེ་ནི་ནོར་བུ་དང་མུ་ཏིག་དང་བཻ་ཌཱུཪྻ་དང་ཤང་ཀ་ཤི་ལ་དང་བྱི་རུ་དང་དངུལ་དང་གསེར་དང་རྡོའི་སྙིང་པོ་དང་སྤུག་དང་དམར་པོ་དང་གཡས་དུས་འཁྱིལ་བ་ལ་སོགས་པ་བདེ་བ་སྒྲུབ་པའི་ཕྱིར་རོ། །དེ་ལ་རེག་པ་ནི་རེག་པར་བྱེད་པ་སྟེ་རེག་པ་ཡོད་ནའོ། །སྦོམ་ཞེས་བྱ་བ་ནི་ཉེས་པ་སྦོམ་པོའོ། །འདི་ལ་ལྟུང་བ་སྦོམ་ཞིང་ལྕི་བ་ཡོད་པ་སྟེ་དགེ་སློང་མང་པོ་ཚོགས་པ་ལ་བཤགས་པས་ལྡང་བའི་ཕྱིར་རོ། །མཛའ་བོ་ཞེས་བྱ་བ་ནི་མཛའ་བོ་ཞེས་བརྗོད་པས་འབོད་པ་ཡིན་ནོ། །བརྟན་པོ་ཞེས་བྱ་བ་ནི་བརྟན་པའོ། །དེ་ལ་དོན་ནི་དགེ་སློང་གིས་རིན་པོ་ཆེ་བདག་ཉིད་ཀྱི་ཡིན་ལ་ངེ་རུང་བམ་བྱས་པ་ལ་རེག་ན་སྤང་བའི་ལྟུང་བར་འགྱུར་རོ། །འོན་ཏེ་གཞན་གྱི་ཡིན་ན་དེའི་ཚེ་དེ་ལ་རེག་པ་ལ་ལྟུང་བྱེད་འབའ་ཞིག་ཏུ་འགྱུར་རོ་ཞེས་བྱ་བ་དེ་ནི་ཁྱོད་དང་ཁོ་བོས་ཀྱང་ཤེས་པ་ཉིད་ན། འོན་ཀྱང་བཅོམ་ལྡན་འདས་ཀྱིས་རིན་པོ་ཆེ་ལ་
རེག་ན་དགེ་འདུན་གྱི་ལྷག་མ་དང་ཉེས་པ་སྤོམ་པོར་གསུངས་པ་དེ་ལ་རྒྱུ་ཅི་ཞིག་ཡོད་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། བུད་མེད་རིན་པོ་ཆེ་དང༌། ཁྱིམ་བདག་དང༌། བློན་པོ་དང༌། གླང་པོ་ཆེ་དང༌། རྟ་རིན་པོ་ཆེ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་རང་གི་སུག་པས་རིན་པོ་ཆེ་ལ་བཟུང་ན་ལྟུང་བྱེད་དུ་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། བུད་མེད་རིན་པོ་ཆེ་ལ་སོགས་པ་རིན་པོ་ཆེ་ལྔ་ལ་བཟུང་ནས་གཞི་ཇི་ལྟ་བ་བཞིན་འགྱུར་རོ། །འོན་ཏེ་ནོར་བུ་རིན་པོ་ཆེའམ་འཁོར་ལོ་རིན་པོ་ཆེ་ལ་བཟུང་ན་ལྟུང་བྱེད་དུ་འགྱུར་རོ་ཞེས་བྱ་བ་ཡིན་ནོ། །འདི་ལ་གཞི་ནི་ཇི་ལྟ་བ་བཞིན་གྱི་དོན་ནི་འདི་ཡིན་ཏེ། ཀུན་དུ་ཆགས་པའི་སེམས་ཀྱིས་བུད་མེད་རིན་པོ་ཆེ་ལ་རེག་ན་དགེ་འདུན་གྱི་ལྷག་མའོ། །གལ་ཏེ་མ་ཡིན་ན་ཉེས་བྱས་སོ། །ཁྱིམ་བདག་དང་བློན་པོ་རིན་པོ་ཆེ་དག་ལ་འདོད་ཆགས་དང་མཚུངས་པར་ལྡན་པའི་སེམས་ཀྱིས་རེག་ན་སྦོམ་པོའོ། །གལ་ཏེ་མ་ཡིན་ན་ལྟུང་བ་མེད་དོ། །གླང་པོ་ཆེ་དང་རྟ་རིན་པོ་ཆེ་དག་ལ་ཀུན་དུ་ཆགས་པའི་སེམས་ཀྱིས་རེག་ན་ཉེས་བྱས་སོ། །གལ་ཏེ་མ་ཡིན་ན་ལྟུང་བ་མེད་དོ། །རིན་པོ་ཆེ་དང་དེར་སྨོས་པ་ཞེས་བྱ་བ་ལ་སོགས་པ་ལ། རིན་པོ་ཆེ་ནི་འདི་སྐད་བཤད་པའི་ངོ་བོའོ། །དེར་སྨོས་པ་ནི་རིན་པོ་ཆེར་སྨོས་པ་སྟེ། རོལ་མོའི་འཚོག་ཆད་པ་ཝང་དང་འོད་མ་དང་བ་ལ་རི་དང་མ་ཧཱ་ཏི་དང་སུ་གྷོ་ཤ་ལ་སོགས་པ་རྩེད་མོ་བྱ་བའི་ཆ་བྱད་དང༌། གཡུལ་ངོའི་ཆ་བྱད་རལ་གྲི་དང་རལ་གྲི་ཀྱོག་པོ་དང་རལ་གྲི་སོ་གཅིག་པ་དང་མདུང་ཐུང་དང་འཕང་མདུང་དང་ལྕགས་ཀྱོ་ལ་སོགས་པ་དང་ལྕགས་མདའ་དང་མདའ་ཕྱེད་ལྕགས་ལ་སོགས་པ་མཚོན་ཆའོ། །དེ་བཞིན་དུ་མདོ་བྱེད་པས་ཀྱང༌། ནོར་བུ་དང༌། མུ་ཏིག་དང༌། བཻ་ཌཱུཪྻ་དང་ཤང་ཀ་ཤི་ལ་དང་བྱེ་རུ་དང་དངུལ་དང་གསེར་དང་རྡོའི་སྙིང་པོ་དང་སྦུག་དང་དམར་པོ་དང་གཡས་སུ་འཁྱིལ་པ་ལ་སོགས་པའི་རིན་པོ་ཆེའོ། །རེག་གམ་རེག་ཏུ་བཅུག་ན་བྱེད་པ་བོ་ཉིད་ཡིན་ནོ་ཞེས་བྱ་བ་དང༌། དེར་སྨོས་པ་ཡང་དེ་ནི་གཡུལ་དུ་སྤྱད་པའི་མཚོན་ཆ་དང་རོལ་མོར་སྤྱད་པའི་ལག་ཆའོ་ཞེས་བཤད་དོ། །དེ་དག་ཀྱང་རིན་པོ་ཆེ་བཞིན་དུ་བདེ་བ་བསྒྲུབ་པའི་ཕྱིར་རིན་པོ་ཆེ་དང་འདྲ་བས་རིན་པོ་ཆེར་སྨོས་པ་ཞེས་བྱའོ། །ཁོ་བོ་ཞེས་བྱ་བ་ནི་
བདག་གིའོ། །ཐེ་ཚོམ་བསལ་བ་ཞེས་བྱ་བ་ནི་ཐེ་ཚོམ་བཅད་པས་སོ། །རངས་པར་ཞེས་བྱ་བ་ནི་མགུ་བར་རོ། །འདི་ལ་གཞན་གྱི་བསམ་པ་ནི་དགེ་སློང་གིས་རིན་པོ་ཆེ་དང་རིན་པོ་ཆེར་སྨོས་པ་དག་ལ་རེག་ན་ལྟུང་བྱེད་དུ་འགྱུར་རོ་ཞེས་བྱ་བ་དེ་ཙམ་ཞིག་ནི་ཤེས་པ་ཉིད་ན། འོན་ཀྱང་བཅོམ་ལྡན་འདས་ཀྱིས་ཉེས་བྱས་སུ་གསུངས་སོ་ཞེས་བྱ་བ་འདིར་ཁྱོད་ཀྱིས་ཁོ་བོའི་ཐེ་ཚོམ་ཡུན་རིང་པོ་ནས་བསྡོགས་པ་བསལ་བས་ཡིད་བདེ་བར་གྱིས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་ལྷའི་རིན་པོ་ཆེ་དང་རིན་པོ་ཆེར་སྨོས་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་རིན་པོ་ཆེ་འམ་རིན་པོ་ཆེར་སྨོས་པ་ལ་བཟུང་བ་ལྟུང་བྱེད་དུ་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ལྷའི་རིན་པོ་ཆེར་སྨོས་པ་ལ་བཟུང་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །ཡང་ན་དེ་ནི་རིན་པོ་ཆེ་འམ་རིན་པོ་ཆེར་སྨོས་པ་སྤྲུལ་པ་ལ་རེག་པ་ལ་དགོངས་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་རིན་པོ་ཆེའམ། རིན་པོ་ཆེར་སྨོས་པ་སྤྲུལ་པ་ལ་བཟུང་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་རིན་པོ་ཆེའམ་རིན་པོ་ཆེར་སྨོས་པ་ཉམས་པ་ལ་རེག་པ་ལ་བརྟེན་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་རིན་པོ་ཆེའམ་རིན་པོ་ཆེར་སྨོས་པ་ཉམས་པ་ལ་རེག་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་དེ་ནི་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་གསུངས་པ་ཡིན་ཏེ་སྔ་མ་བཞིན་ནོ། །དགེ་སློང་རིན་ཆེན་ལ་རེག་པ་ཞེས་བྱ་བ་ལ་སོགས་པ་ནི་དགེ་སློང་རིན་པོ་ཆེ་ལ་རེག་པ་ཇི་ལྟ་བུར་ཐུབ་པས་ལྟུང་བ་མེད་པར་གསུངས་ཞེས་བྱ་བ་ཡང་གསལ་པོར་སྨྲོས་ཤིག་ཅེས་བྱ་བར་སྦྱར་ཏེ། ལྟུང་བ་མེད་ཅེས་བྱ་བ་ནི་ཉེས་པ་མེད་པའོ་ཞེས་བྱ་བ་དེ་སྐད་དུ་གསུངས་པ་སྟེ་རེག་ན་ཡང་ལྟུང་པ་མེད་པ་ཁོ་ནར་གསུངས་ཞེས་བྱ་བའི་དོན་ཏོ། །དོན་གཉེར་ཞེས་བྱ་བ་ནི་བཅོལ་བའོ། །འདི་ལ་གཞན་གྱི་བསམ་པ་ནི་དགེ་སློང་གིས་རིན་པོ་ཆེ་ལ་རེག་ན་གདོན་མི་ཟ་པར་ལྟུང་བྱེད་དམ་ཉེས་བྱས་སུ་འགྱུར་ན། འོན་ཀྱང་བཅོམ་ལྡན་འདས་ཀྱིས་རྣམ་པ་འགའ་ཞིག་གིས་ལྟུང་བ་
མེད་པར་གསུངས་སོ་ཞེས་བྱ་བ་འདི་ལ་རྒྱུ་ཅི་ཞིག་ཡོད་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། སྦས་པ་ལེན་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་རིན་པོ་ཆེ་ལ་བཟུང་ན་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། སྦས་པ་ལེན་ནའོ་ཞེས་བྱ་བ་ཡིན་ནོ། །ཡང་ན་དེ་ནི་ལྷའི་གནས་ལ་སོགས་པར་སྣོད་དང་ཟས་དང་སྟན་དང་གདིང་བ་ལ་སོགས་པ་ལ་བརྟེན་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་རིན་པོ་ཆེ་ལ་བཟུང་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ལྷའི་གནས་སམ། ཀླུའི་གནས་སམ། གནོད་སྦྱིན་གྱི་གནས་སམ། རྒྱལ་པོའི་ཕོ་བྲང་ངམ། བློན་པོ་ཆེན་པོའི་གནས་དག་ཏུ་སོན་ལ་དེ་ཡང་སྟན་ནམ། སྣོད་གཞན་མེད་ནའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་འཇིགས་པར་འགྱུར་ན་རང་གི་ལ་མི་གནོད་ན་དགེ་འདུན་གྱི་དང་མཆོད་རྟེན་གྱི་དབྱིག་དང་གསེར་སྦས་ནས་སམ་ཁྱེར་ནས་འགྲོ་བར་བྱའོ། །དད་པ་ཅན་ནམ་དགེ་ཚུལ་གྱིས་སོ། །མེད་ན་རང་གིས་སོ། །དེས་བརྐོ་བར་བྱའོ། །བྲལ་ན་སྦྱིན་ནོ། །བྲུ་བ་ཡང་དེ་དང་འདྲའོ་ཞེས་བཤད་དོ། །དགེ་སློང་གིས་དགེ་སློང་ལ་ཞེས་བྱ་བ་ལ་སོགས་པ་ལ། གཞན་གྱིས་བསམ་པ་ནི་གང་གི་ཚེ་དགེ་སློང་གིས་ག་ག་ཚིལ་བྱ་བའི་བསམ་པས་དགེ་སློང་ལ་ག་ག་ཚིལ་བྱེད་པ་དེའི་ཚེ་དེའི་དུས་ན་ལྟུང་བྱེད་དུ་འགྱུར་རོ་ཞེ་བྱ་བ་དེ་ནི་ཤེས་པ་ཉིད་ན། འོན་ཀྱང་བཅོམ་ལྡན་འདས་ཀྱིས་རྣམ་པ་འགའ་ཞིག་ཏུ་དེ་ལ་ཉེས་བྱས་བྱེད་པར་གསུངས་སོ་ཞེས་བྱ་བ་དེ་དོན་འདི་ལ་ཁོ་བོ་ཁྱོད་ལ་གསོལ་བ་འདེབས་ཀྱི་ཡང་དག་པ་ཇི་ལྟ་བ་བཞིན་སྨྲས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ལུས་ཀྱི་དབང་པོ་ཉམས་པས་ག་ག་ཚིལ་བྱེད་པའི་རྒྱུ་མཚན་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་ལུས་ཀྱི་དབང་པོ་ཉམས་པས་ལུས་ཀྱི་དབང་པོ་མ་ཉམས་པ་ལ་ག་ག་ཚིལ་བྱ་བ་བགྱིས་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །བཙུན་པ་རེ་ཞིག་དགེ་སློང་ལུས་ཀྱི་དབང་པོ་མ་ཉམས་པས་ལུས་ཀྱི་དབང་པོ་ཉམས་པ་ལ་ག་ག་
ཚིལ་བགྱིས་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་རེག་པར་བྱ་བ་ཉིད་ནི་མ་ཉམས་པའོ། །ག་ག་ཚིལ་བྱེད་པ་ལ་ཡང་ངོ་ཞེས་བཤད་དོ། །ཡང་ན་བར་ཆད་དང་བཅས་པར་ག་ག་ཚིལ་བྱེད་པ་ལ་བརྟེན་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་རྨ་ནས་ག་ག་ཚིལ་བགྱིས་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་རྨར་གཏོགས་པའི་ག་ག་ཚིལ་བྱེད་པའི་རྒྱུ་མཚན་གྱིས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་རྨ་ནས་ག་ག་ཚིལ་བགྱིས་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་ལུས་ཀྱི་ཕྱོགས་གཞན་གྱིས་ག་ག་ཚིལ་བྱེད་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། འདིར་གཞུང་ནི། །བཙུན་པ་རེ་ཞིག་དགེ་སློང་གིས་སོ་སོར་མོས་ག་ག་ཚིལ་བགྱིད་པ་མ་ལགས་པ་དེ་ལས་གཞན་པའི་ལུས་ཀྱི་ཕྱོགས་མགོ་འམ་དཔུང་མགོ་འམ་གྲུ་མོ་འམ་བུས་མོ་འམ་རྟིང་པའམ་ཞུགས་ཤིང་ངམ་གོར་མ་འམ་བོང་བས་ག་ག་ཚིལ་བགྱིད་ན་ཅིར་འགྱུར་ལགས། །ཉེས་བྱས་སུའོ། །སོ་དང་སེན་མོ་དང་སྤུ་དག་གིས་ཀྱང་དེ་བཞིན་དུ་བརྗོད་པར་བྱའོ་ཞེས་བྱ་བ་ཡིན་ནོ། ཡང་ན་སྔོ་ཕམ་པ་བྱུང་བ་ལ་སོགས་པ་ལ་དགོངས་ནས་དེ་སླད་དུ་གསུངས་པ་ཡིན་ཏེ་སྔ་མ་བཞིན་ནོ། །ལོ་ནི་ཉི་ཤུར་མ་ལོན་པ་ཞེས་བྱ་བ་ལ་སོགས་པ་ནི་ཉི་སུར་མ་ལོན་པར་བསྙེན་པར་རྫོགས་པར་བྱེད་ན་ཇི་ལྟར་ལྟུང་བ་མེད་པ་དང་དེ་དོན་དུ་གཉེར་བ་ལ་ཡང་འཆགས་པར་གསུངས་ཞེས་བྱ་བར་སྦྱར་ཏེ། ཅི་ཞིག་མ་ལོན་ཞེ་ན། ལོ་ནི་ཞེས་བྱ་བ་སྨོས་སོ། །ལོ་གྲངས་ཇི་སྙེད་ཅིག་ཏུ་ཞེ་ན་ཉི་ཤུར་ཞེས་བྱ་བ་སྨོས་སོ། །ཅི་ཞིག་བྱེད་པ་ལ་ལྟུང་བ་མེད་ཅེ་ན། བསྙེན་པར་རྫོགས་པར་བྱེད་པ་ལ་ཞེས་སྨྲས་སོ། །འོ་ན་བསྙེན་པར་རྫོགས་པར་བྱ་བ་ལ་ཅིར་འགྱུར་ཞེ་ན། དེ་དོན་གཉེར་ལའང་འཆགས་ཞེས་བྱ་བ་ལ་སོགས་པར་སྨོས་ཏེ། སྡོམ་པ་སྐྱེ་བར་འགྱུར་ཞེས་བྱ་བའི་ཐ་ཚིག་གོ །དེ་དོན་གཉེར་ལ་ཞེས་བྱ་བ་ནི་བསྙེན་པར་རྫོགས་པ་དོན་དུ་གཉེར་བ་ལ་སྟེ་བསྙེན་པར་རྫོགས་པར་འདོད་པ་ལ་ཞེས་བྱ་བའི་ཐ་ཚིག་གོ །ཡང་ཞེས་བྱ་བའི་སྒྲ་ནི་བསྡུ་བ་སྟེ། མཁན་པོ་ལ་སོགས་པ་
ལ་ལྟུང་བ་མེད་པ་འབའ་ཞིག་ཏུ་མ་ཟད་ཀྱི། བསྙེན་པར་རྫོགས་པར་འདོད་པ་ལ་ཡང་དོམ་པ་འཆགས་པ་སྙམ་དུ་བསམས་པ་ཡིན་ནོ། །འདི་ལ་འདྲི་བའི་བསམ་པ་ནི་འདི་ཡིན་ཏེ། གང་གི་ཚེ་ལོ་ཉི་ཤུ་མ་ལོན་པར་བསྙེན་པར་རྫོགས་པར་བྱེད་པ་དེའི་ཚེ་མཁན་པོ་ལ་སོགས་པ་ལ་ཡང་ལྟུང་བ་མེད་པ་ལ་བསྙེན་པར་རྫོགས་པར་འདོད་པ་ལ་ཡང་བསྙེན་པར་རྫོགས་པ་འཆགས་སོ་ཞེས་བྱ་བ་དེ་ལྟ་བུ་ཞིག་འདིར་ལོ་ཉི་ཤུ་མ་ལོན་པར་བསྙེན་པར་རྫོགས་པར་བྱེད་ན་མཁན་པོ་ལ་ནི་ལྟུང་བྱེད། གཞན་དག་ལ་ནི་ཉེས་བྱས། བསྙེན་པར་རྫོགས་པ་ལ་ནི་མི་འཆགས་པར་བསྟན་ཏོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ལོ་ཉི་ཤུ་མ་ལོན་པར་ཁྱིམ་སོ་བཟུང་བ་ཞིག་བསྙེན་པར་རྫོགས་པར་བྱེད་པའི་དབང་དུ་མཛད་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་ལོ་ཉི་ཤུ་མ་ལགས་པ་ཞིག །དགུང་ལོ་ཉི་ཤུར་མ་ལགས་པའི་འདུ་ཤེས་ཀྱིས་བསྙེན་པར་རྫོགས་པར་བགྱིད་ལ་ལྟུང་བྱེད་ཀྱི་ལྟུང་བར་ཡང་མི་འགྱུར་ལ། བསྙེན་པར་ལེགས་པར་རྫོགས་པ་ཡང་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ལོ་ཉི་ཤུ་མ་ལོན་པ་ཁྱིམ་སོ་བཟུང་བ་ཞིག་བསྙེན་པར་རྫོགས་པར་བྱེད་ནའོ་ཞེས་བྱ་བ་ཡིན་ནོ། །ཡང་ན་ལོ་ཉི་ཤུ་ལོན་པར་འདུ་ཤེས་པའམ་མི་ཤེས་པའམ་མི་དྲན་པ་འམ་ཐེ་ཚོམ་ཟ་བ་དང་ལྡན་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་དགུང་ལོ་ཉི་ཤུར་མ་ལགས་པ་ཞིག་དགུང་ལོ་ཉི་ཤུ་མ་ལགས་པའི་འདུ་ཤེས་ཀྱིས་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་བགྱིའམ། ཉེ་བ་འཁོར་དང་པོ་ནས་མི་མཐུན་པ་ཅན་གཉིས་མ་གཏོགས་པར་ལྷག་མ་བརྒྱད་ནི་བསྙེན་པར་རྫོགས་པ་ཞེས་བྱ་བའོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་འདི་ལ་ཅིག་ཤོས་ལ་ནི་ལོན་པར་འདུ་ཤེས་པ་ཉིད་ནའོ། །མི་ཤེས་པ་དང་མི་དྲན་པ་དང་ཡིད་གཉིས་ཟ་བ་དག་ལ་ཡང་ངོ་ཞེས་བཤད་དོ། །ཡང་ན་ལས་དང་པོ་པ་ལ་སོགས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ་སྔ་མ་བཞིན་ནོ། །སྡོམ་བརྩོན་མྱོས་འགྱུར་འདུ་ཤེས་ཀྱིས། །ཞེས་བྱ་བ་ལ་སོགས་པ་ལ་མྱོས་འགྱུར་འདུས་ཤེས་ཀྱིས་ཞེས་བྱ་བ་ནི་གང་ལ་འདི་ནི་མྱོས་པ་བསྐྱེད་པ་
ཡིན་ནོ་སྙམ་པ་དེ་འདི་ལྟ་བུའི་འདུ་ཤེས་ཏེ་སེམས་ཡོད་པ་དེ་ལ་འདི་སྐད་ཅེས་བྱའོ། །འབྲུའི་ཆང་དང་བཅོས་པའི་ཆང་མྱོས་པ་སྐྱེད་པ་འཐུང་བ་ནི་མིད་པར་མིད་པའོ། །དོགས་པ་མེད་པར་ཞེས་བྱ་བ་ནི་བློ་ལ་ཐེ་ཚོམ་མེད་པར་རོ། །འདི་ལ་འདྲི་བའི་བསམ་པ་ནི་འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་འཐུང་ན་ལྟུང་བྱེད་དུ་འགྱུར་རོ་ཞེས་བྱ་བ་དེ་ནི་ངེས་པ་ཉིད་ན། འོན་ཀྱང་བཅོམ་ལྡན་འདས་ཀྱིས་དེ་ལ་ཉེས་བྱས་སུ་གསུངས་སོ་ཞེས་བྱ་བ་དེ་ཇི་ལྟ་བ་ཡིན་པར་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ལྷའི་ཆང་འཐུང་བ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་སྐྱེམས་འཚལ་ལ་ལྟུང་བྱེད་དུ་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡང་དེ། ལྷའི་ཆང་དག་འཐུངས་ན་ཅིར་འགྱུར་ཞེ་ན། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ་སྔ་མ་བཞིན་ནོ། །སྡོམ་བརྩོན་མཚན་མོ་རིན་ཆེན་དག །ཅེས་བྱ་བ་ལ་སོགས་པ་ནི་སྡོམ་བརྩོན་ཅན་གྱིས་མཚན་མོ་རིན་པོ་ཆེ་དག་འདུག་བཞིན་དུ་རྒྱལ་པོའི་བཙུན་མོའི་གནས་ན་ཡོད་པའི་གཏན་པའི་རྟེན་ལ་གཏུགས་ན་ཇི་ལྟར་ལྟུང་བ་མེད་ཅེས་བྱ་བར་སྦྱར་རོ། །དེ་ལ་མཚན་མོ་ཞེས་སྨོས་པ་ནི་ཉིན་པར་བཀག་སྟེ་དེ་ལ་ཉེས་བྱས་སུ་གསུངས་པའི་ཕྱིར་རོ། །རིན་ཆེན་ནི་མར་མེ་དང་བསྲུང་བ་ལ་སོགས་པའི་ཆེད་ཀྱི་ནོར་བུ་ལ་སོགས་པའོ། །རིན་ཆེན་ཞེས་སྨོས་པས་ནི་སྐབས་ཀྱིས་ན་རིན་པོ་ཆེར་སྨོས་པར་ལ་གྲི་དང་པི་ཝང་དང་འོད་མ་ལ་སོགས་པས་བསྲུང་བ་དང་རྩེད་མོའི་ཆ་བྱད་རྣམས་ཀྱང་བསྡུས་སོ། །འདུག་བཞིན་དུ་ཞེས་བྱ་བ་ནི་མ་བསྡུས་པར་ཏེ་རང་གི་གནས་ནས་མ་བཏོན་པར་རོ། །འདིས་ནི་བཅུན་མོའི་གནས་རྣལ་མར་མི་འདུག་ན་དེའི་ཉེན་ཆེན་པོའི་གནས་སུ་གྱུར་པའི་ཕྱིར་འཇུག་པ་ཤིན་ཏུ་འོས་པ་མ་ཡིན་ནོ་ཞེས་བྱ་བ་བསྟན་ཏོ། །གཏན་རྟེན་ནི་རྒྱལ་པོའི་བཙུན་མོའི་གནས་ཀྱི་སྒོ་བཅད་པའི་ཤིང་ངོ༌། །དེ་ནི་དབང་པོས་ལྷ་མ་ཡིན་རྣམས་འཇུག་ཏུ་མི་སྟེར་བ་བཞིན་དུ་ཕུར་པས་འདེབས་པར་བྱེད་པ་འགོག་པར་བྱེད་པའི་ཕྱིར་རོ། །རོ་ལངས་མི་ལྡང་བར་བྱ་བ་ལ་ཇི་སྐད་དུ་སྒོར་གཏན་པའི་རྟེན་བཙུགས་ན་ཞེས་བྱ་
བ་ལ་སོགས་པ་ལྟ་བུའོ། །གཏན་པའི་རྟེན་དེ་གང་ན་ཡོད་པ་ཞིག་ཅེ་ན། བཙུན་མོའི་གནས་ཡོད་ལ་ཞེས་བྱ་བ་སྨོས་ཏེ། བཙུན་མོའི་གནས་ནི་རྒྱལ་པོའི་བཙུན་མོ་གནས་པའི་གནས་སོ། །དེ་ན་ཡོད་ཅིང་དེ་དང་འབྲེལ་པ་ནི་བཙུན་མོའི་གནས་ཡོད་དེ། རྒྱལ་པོའི་བཙུན་མོ་གནས་པའི་གནས་ནི་ཉེན་ཆེན་པོའི་གནས་སུ་གྱུར་པ་ཉིད་ཀྱི་ཕྱིར་ལྟུང་བྱེད་དུ་འགྱུར་ལ། དེ་ལས་གཞན་པ་དང་འབྲེལ་པའི་གཏན་པའི་རྟེན་ལ་གཏུགས་པ་ལ་ནི་ཉེས་བྱས་སུ་གསུངས་པའི་ཕྱིར་རོ། །གཏུགས་ན་ནི་ཞེས་བྱ་བ་ནི་ཞུགས་ནའོ། །འདི་ལ་ནི་དོན་ནི་གང་གི་ཚེ་དགེ་སློང་གིས་མཚན་མོ་རིན་པོ་ཆེ་དང་རིན་པོ་ཆེར་སྨོས་པ་དག་མ་བསྡུས་པར་རྒྱལ་པོའི་བཙུན་མོའི་གནས་ཀྱི་གཏན་པའི་རྟེན་ཙམ་དུ་ཡང་ཞུགས་ན་དེའི་ཚེ་དེ་ལ་ལྟུང་བྱེད་དུ་འགྱུར་རོ་ཞེས་བྱ་བ་དེ་ནི་ཁོ་བོས་ཤེས་ན་འོན་ཀྱང་བཅོམ་ལྡན་འདས་ཀྱིས་ཁ་ཅིག་ལས་དེ་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པར་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་བཙུན་མོའི་གནས་སྟོང་པར་ཞུགས་པའི་དབང་དུ་མཛད་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགུང་ལ་སང་སྐྱ་རེངས་མ་ཤར་བར་རིན་པོ་ཆེའམ་རིན་པོ་ཆེར་སྨོས་པ་དག་མ་བསྡུས་པར་དག་པའི་མཐའི་གཏན་པའི་རྟེན་པ་ལ་གཏུགས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་གིས་བཙུན་མོའི་གནས་སྟོང་པར་ཞུགས་ན་ཞེས་བྱ་བ་ཡིན་ནོ། །དེ་ལ་དོན་ནི་འདི་ཡིན་ཏེ། འདི་ལ་དག་པ་མ་འདྲེས་པ་གཞན་དག་ཐུན་མོང་མ་ཡིན་པ་རྒྱལ་པོ་དང་ཉེ་བ་ཡོད་པས་ན་དག་པའི་མཐའ་ཡིན་ནོ། །ཡང་ན་དེ་ནི་དེ་ལྟ་བུའི་རྐྱེན་གྱིས་འཇུག་པ་ལ་བརྟེན་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། རྒྱལ་པོས་བོས་སམ་བཙུན་མོའམ་རྒྱལ་བུའམ། ཁྲོམ་གྱི་རུ་འམ་གྲོང་མི་འམ་ལྗོངས་ཀྱི་མིས་བོས་ན་ལྟུང་བ་མེད་དོ་ཞེས་བྱ་བ་ཡིན་ནོ། །ཡང་ན་ལས་དང་པོ་པ་ལ་སོགས་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ་སྔ་མ་བཞིན་ནོ། །གྲོང་ནས་དགེ་སློང་མ་ལ་ནི་ཞེས་བྱ་བ་ལ་སོགས་པ་ནི་གྲོང་ན་གནས་པའི་དགེ་སློང་མ་ལ་ཞེས་བྱ་བར་སྦྱར་ཏེ། དེ་ན་གནས་ཞེས་བྱ་བ་ནི་གྲོང་ན་གནས་པའོ། །དེ་སུ་ཞིག་ཅེ་ན་སྡོམ་བརྩོན་ཞེས་བྱ་བ་སྨོས་ཏེ་དགེ་སློང་ཞེས་བྱ་
བའི་དོན་ཏོ། །ཅི་གཞན་ལེན་དུ་འཇུག་པ་ཡང་ཡིན་ནམ་ཞེ་ན། བདག་གིས་ཞེས་བྱ་བ་སྨོས་ཏེ། བདག་གཉིད་ཀྱིས་ཡིན་གྱི་གཞན་གྱིས་ནི་མ་ཡིན་ནོ་ཞེས་བྱ་བའི་ཚིག་གོ །གྲོང་ན་གནས་པས་ཅི་ཞིག་བྱས་ཤེ་ན། བླངས་ན་ཞེས་བྱ་བ་སྨོས་ཏེ། ཀུན་དུ་བླངས་ནའོ། །ཅི་ཞིག་བླངས་ཤེ་ན། ཁ་ཟས་ཞེས་བྱ་བ་སྨོས་ཏེ། བཅའ་བར་བྱ་བའི་བདག་ཉིད་ཀྱི་ཁ་ཟས་སོ། །ཉེས་མེད་ཅེས་བྱ་བ་ནི་ཉེས་པ་མེད་པར་རོ། །ཅི་ཐམས་ཅད་ཀྱི་ཐམས་ཅད་དུ་ཉེས་པ་མེད་པར་གསུངས་སམ་ཞེ་ན། སོ་སོར་བཤགས་བྱའི་ཞེས་བྱ་བ་ནི་སྨོས་ཏེ། སོ་སོར་བཤགས་དགོས་པ་ནི་སོ་སོར་བཤགས་པར་བྱ་བའོ། །དེ་སྟེ་སོ་སོར་བཤགས་པར་བྱ་བའི་ཉེས་པ་དང་མི་ལྡན་པར་གསུངས་ཀྱི་ཐམས་ཅད་དུ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལ་སོ་སོར་བཤགས་པར་བྱ་བ་ནི་རབ་ཏུ་བསྒྲགས་བ་ཙམ་གྱིས་ལྟུང་བ་བཟློག་པའི་ཕྱིར་ཏེ། དེ་སྨྲ་བའི་རྣམ་པར་བརྗོད་པ་ལས་སོ་སོར་བཤགས་པ་ཉིད་དུ་བརྗོད་ཀྱི་བཤགས་པ་ནི་མ་ཡིན་ནོ། །གཞན་དག་ན་རེ་ཇི་ལྟར་བཤགས་པ་ལྟུང་བྱེད་ཀྱི་ལྟུང་བ་གཅིག་ཅིག་གི་མདུན་དུ་བཤགས་པར་བྱ་བ་ལྟར་འདི་ཡང་དེ་དང་འདྲའོ་ཞེས་ཟེར་རོ། །འདི་ལ་འདྲི་བའི་བསམ་པ་ནི་གང་གི་ཆོ་དགེ་སློང་གྲོང་ན་གནས་པས་དགེ་སློང་མ་གྲོང་ན་གནས་པ་ཞིག་ལས་བཅའ་བར་བྱ་བ་དང་བཟའ་བར་བྱ་བ་བླངས་ཏེ་འཆོས་སམ་ཟོས་ན་དེའི་ཙེ་དེ་ལ་སོ་སོར་བཤགས་པར་བྱ་བའི་ལྟུང་བར་འགྱུར་རོ་ཞེས་བྱ་བ་དེ་ནི་ཤེས་ན། འོན་ཀྱང་བཅོམ་ལྡན་འདས་ཀྱིས་དེ་ལ་ཉེས་བྱས་ཀྱི་ལྟུང་བ་ཁོ་ནར་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་ཞེས་བྱ་བ་ཡིན་ནོ། །འདི་ལ་ལན་འདི་ཡིན་ཏེ། ཁ་ཟས་རུང་བ་མ་ཡིན་པ་ལེན་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགེ་སློང་མ་ཉེ་དུ་མ་ལགས་པ་ཤུལ་པོ་ཆེ་ན་མཆིས་པ་ལ་བསོད་སྙོམས་བླངས་ཏེ་འཚལ་ལ་སོ་སོར་བཤགས་པར་བགྱི་བའི་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཁ་ཟས་རུང་བམ་ཡིན་པ་བླངས་ནས་ཟ་བར་བྱེད་ན་ནའོ་ཞེས་བྱ་བ་ཡིན་ནོ། །ཡང་ན་དགེ་སློང་མ་སྨྱོན་པ་ལ་སོགས་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་དགེ་སློང་མ་
སྨྱོན་མ་ཤུལ་པོ་ཆེ་ན་མཆིས་པ་ལ་བསོད་སྙོམས་རང་གི་སུག་པར་བླངས་ཏེ་འཚལ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ཏེ། སེམས་འཁྲུགས་མ་ལ་སོགས་པས་ཀྱང་དེ་བཞིན་དུ་བརྗོད་པར་བྱ་སྟེ་སྔ་མ་བཞིན་ནོ། །ཡང་ན་སྔོན་ཕམ་པ་བྱུང་བ་ལ་སོགས་པ་ལ་ཉེས་བྱས་སུ་འགྱུར་བ་ཡིན་ཏེ་སྔ་མ་བཞིན་ནོ། །འདུལ་བ་དྲི་བའི་ཚིག་ལེའུར་བྱས་པ་ལེའུ་གཉིས་པའི་གཏན་ལ་དབབ་པའོ།། །།དགེ་སློང་སོ་སོར་ཐར་བའི་ཞེས་བྱ་བ་ལ་སོགས་པ་ནི་དགེ་སློང་གིས་སོ་སོར་ཐར་པའི་མདོ་འདོན་པ་ལྔ་ཆར་ཡང་མ་བཏོན་པར་ཇི་ལྟར་དེས་གསོ་སྦྱོང་བྱས་པར་འགྱུར་བ་དྲིས་སྨྲོས་ཤིག་ཅེས་བྱ་བར་སྦྱར་རོ། །དེ་ལ་སོ་སོར་ཐར་པའི་མདོ་འདོན་པ་ནི་གླེང་གཞི་དང་ཕམ་པར་འགྱུར་བ་དང༌། དགེ་འདུན་ལྷག་མ་དང༌། མ་ངེས་པ་དང༌། རིལ་གྱིས་འདོན་པའི་མཚན་ཉིད་དག་གོ །དེ་དག་མ་བཏོན་པར་ཞེས་བྱ་བ་ནི་དགེ་འདུན་གྱི་ནང་དུ་མ་བརྗོད་པར་རོ། །དེ་དག་གང་དག་འབྲེལ་པ་ཞེ་ན། སོ་སོར་ཐར་པའི་ཞེས་སྨོས་སོ། །སོ་སོར་ཐར་པ་ནི་དེས་དང་པོར་སྡིག་པ་ལས་ཐར་པའི་ཕྱིར་དེ་དེའི་ཡིན་ནོ། །དེ་ཡིས་ཞེས་བྱ་བ་ནི་དགེ་སློང་གིས་སོ། །གསོ་སྦྱོང་ནི་ཚུལ་ཁྲིམས་གསོ་བའི་ཕྱིར་དང་སྡིག་པ་རྣམ་པར་སྦྱོང་བའི་ཕྱིར་ཏེ། འདི་ལྟར། དགེ་བ་མཐའ་དག་ཡང་དག་གསོ་བྱེད་ཅིང༌། །སྡིག་པ་མཐའ་དག་ཡང་དག་འདིར་སྦྱོང་བ། །དེ་གསོ་ཕྱིར་དང་སྡིག་པ་རྣམ་སྦྱོང་ཕྱིར། །དེ་བཞིན་གཤེགས་པས་གསོ་སྦྱོང་ཞེས་གསུངས་སོ། །ཞེས་གསུངས་པ་ལྟ་བུའོ། །འདི་ལ་དོན་ནི་གང་གི་ཆོ་དགེ་སློང་གིས་སོ་སོར་ཐར་པའི་མདོ་བཏོན་པ་ལྔ་པོ་དག་ལས་སོ་སོར་ཐར་པའི་མདོ་འདོན་པ་འགའ་ཙམ་བཏོན་ན་ཡང་དེའི་ཚེ་དེས་གསོ་སྦྱོང་བྱས་པར་གྱུར་པ་ཡིན་ནོ་ཞེས་བྱ་བ་ནི་ཤེས་ན། འོན་ཀྱང་འགའ་ཡང་མ་བཏོན་ལ་གསོ་སྦྱོང་ཡང་བྱས་པར་འགྱུར་རོ་ཞེས་བྱ་བ་དེ་ཇི་ལྟ་བུ་ཡིན་པ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པའི་རྒྱུ་ནི་འདི་ཡིན་ཏེ། དགག་དབྱེ་ལ་བརྟེན་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་སོ་སོར་ཐར་བའི་མདོ་འདོན་པ་ལྔ་པོ་དག་ལས་སོ་སོར་ཐར་པའི་མདོ་འདོན་པ་གང་ཡང་རུང་པ་མ་བཏོན་ལ་གསོ་སྦྱོང་ཡང་བགྱིས་པར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། དགག་དབྱེའི་ཚེ་དག་དབྱེ་བྱེད་ནའོ། །དེ་བཞིན་དུ་མདོ་བྱེད་པས་
ཀྱང་དགག་དབྱེ་བྱས་ན་འདི་མ་གྲུབ་པ་ཉིད་མ་ཡིན་ནོ་ཞེས་བཤད་དོ། །སོ་སོར་ཐར་བའི་མདོ་མི་འདོན་ཅིར་ཞེས་བྱ་བ་ལ་སོགས་པ་ལ། སོ་སོར་ཐར་བ་ཞེས་བྱ་བ་དང༌། གསོ་སྦྱོང་ཞེས་བྱ་བའི་དོན་དེ་ནི་བཤད་ཟིན་ཏོ། །དེ་མི་འདོན་ཅིང་ཞེས་བྱ་བ་ནི་དགེ་འདུན་གྱི་ནང་དུ་མི་བརྗོད་པའོ། །དེ་བས་ན་འདི་ནི་མཐུན་པའི་གསོ་སྦྱོང་བསལ་ཏོ། །བྱིན་གྱིས་བརླབས་པ་ནི་རྒྱུད་དག་པའོ། །དེ་ལྟར་ན་འོ་ན་གཞན་ཉེ་ན་བྱིན་གྱིས་རློབ་པར་འགྱུར་རོ་ཞེ་ན། གཞན་གྱི་དྲུང་དུ་བྱིན་མི་རློབ། །ཅེས་བྱ་བ་ལ་སོགས་པ་སྨོས་ཏེ། གཞན་གྱི་དྲུང་དུ་ཞེས་བྱ་བ་ནི་དགེ་སློང་ཚུལ་ཁྲིམས་དང་ལྟ་བ་དང་ལྡན་པའི་མདུན་དུ་སྟེ། གསོ་སྦྱོང་བྱིན་གྱིས་མི་རློབ་པ་ཞེས་བྱ་བར་སྦྱར་རོ། །དེ་བས་ན་འདིས་ནི་གསོ་སྦྱོང་བྱིན་གྱིས་བརླབ་པ་བཀག་གོ །འདིར་ཞེས་བྱ་བ་ནི་གསོ་སྦྱོང་བྱས་པ་ཡིན་ལའོ། །འདི་ལ་ཚིག་གི་དོན་ནི་གང་གི་ཚེ་དགེ་སློང་གིས་སོ་སོར་ཐར་པའི་མདོ་འདོན་པས་ཀྱང་གསོ་སྦྱོང་མི་བྱེད་ལ། དགེ་སློང་གཞན་གྱི་དྲུང་དུ་ཡང་བྱིན་གྱིས་མི་རློབ་ན་དེའི་ཚེ་མ་བྱས་པ་ཡིན་ནོ་ཞེས་བྱ་བ་དེ་ནི་ཁོ་བོ་ལ་ངེས་ན། འོན་ཀྱང་བཅོམ་ལྡན་འདས་ཀྱིས་དེས་གསོ་སྦྱོང་བྱས་པར་འགྱུར་རོ་ཞེས་གསུངས་པ་དེ་ཇི་ལྟ་བུ་ཡིན་པ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། སེམས་བསྐྱེད་པའི་བྱིན་གྱིས་བརླབ་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཚིག་ཏུ་ཡང་མ་སྨྲས་པ་ལ་གསོ་སྦྱོང་ཡང་བགྱིས་པར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དོ། །སེམས་ཀྱིས་ནའོ་ཞེས་བྱ་བ་ཡིན་ནོ། །འདི་ལ་གཞུང་གཞན་ཡང། བཙུན་པ་དགེ་སློང་གིས་གསོ་སྦྱོང་ལྔ་པོ་དག་ལས་གསོ་སྦྱོང་གང་ཡང་རུང་བ་ཞིག་ཉམས་སུ་མྱོང་བར་མི་བགྱིས་པ་གསོ་སྦྱོང་བགྱིས་པར་ཡང་འགྱུར་ལ། ལྟུང་བ་ཡང་མ་མཆིས་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། གསོ་སྦྱོང་བྱིན་གྱིས་བརླབས་ནའོ་ཞེས་བྱ་བ་ཡིན་ནོ། །དེ་བཞིན་དུ་འདི་ལ་གཞུང་གཞན་ནི། དགེ་སློང་དག་ལྔ་པོ་འདི་དག་ནི་སེམས་བསྐྱེད་པས་འགྲུབ་པར་འགྱུར་བ་སྟེ། གསོ་སྦྱོང་དང༌། དགག་དབྱེ་དང༌། གོས་བྱིན་གྱིས་བརླབ་པ་དང༌། གོས་བསྔོ་བ་དང༌། གང་ཟག་མགྲོན་དུ་བོས་པའོ་ཞེས་བྱ་བ་ཡིན་ནོ། །
དགེ་འདུན་རྙེད་པ་དགེ་སློང་ནི། །ཞེས་བྱ་བ་ལ་སོགས་པ་ལ། དགེ་འདུན་ལ་འབྱུང་བ་ནི་དགེ་འདུན་གྱིའོ། །རྙེད་པ་ནི་གོས་ཀྱི་རྙེད་པ་ལ་སོགས་པའོ། །གཅིག་པུས་ཞེས་བྱ་བ་ནི་གྲོགས་མེད་པར་རོ། །བླངས་ནས་ཞེས་བྱ་བ་ནི་རང་གིར་བྱས་ནའོ། །ཉེས་མེད་ཅེས་བྱ་བ་ནི་ལྟུང་བ་མེད་པ་ཉིད་དུའོ། །གསལ་བར་ངེས་པར་སྨྲོས་ཞེས་བྱ་བར་སྦྱར་ཏེ། འདི་ལ་དོན་ནི་དགེ་འདུན་ལ་བསྔོས་པའི་རྙེད་པ་དགེ་སློང་གིས་རང་གིར་བྱས་ན་སྤང་བའི་ལྟུང་བ་འབྱུང་ངོ་ཞེས་བྱ་བ་ནི་ངེས་པ་ཁོ་ན་ཡིན་ནོ། །འོན་ཀྱང་བཅོམ་ལྡན་འདས་ཀྱིས་ལྟུང་བ་མེད་པ་ཉིད་དུ་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པ་ངེས་པར་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། གཅིག་པུ་གནས་པས་རྙེད་པ་རང་གིར་བྱས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གཅིག་པུས་དགེ་འདུན་གྱི་རྙེད་པ་རང་གིར་བགྱིས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་གཅིག་པུ་ཞིག་གནས་ལ། དེར་ཡང་མི་དག་གིས་དགེ་འདུན་གྱི་ཆེད་དུ་གོས་ཕུལ་ནའོ་ཞེས་བྱ་བ་ཡིན་ནོ། །དེ་བཞིན་དུ་འདི་ལ་གཞུང་གཞན་ནི། བཙུན་པ་དགེ་སློང་གཅིག་པུ་གནས་ན་མཆིས་ལ་དེར་ཡང་མི་དག་གིས་དགེ་འདུན་ལ་གོས་བགོར་བཏུབ་པ་དགེ་འདུན་མངོན་དུ་གྱུར་པ་ལ་བགོ་བར་བགྱི་བ་ཞིག་ཕུལ་ན་དེས་ཇི་ལྟར་བྱིན་གྱིས་བརླབ་པར་བགྱི་ལགས། ཉེ་བ་འཁོར་དགེ་སློང་དེས་གོས་བྱུང་བ་ལས། གནས་འདི་ན་ནི་བདག་གཅིག་པུ་གནས་པ་དགེ་འདུན་གྱིས་གོས་བྱུང་བ་འདི་ནི་བགོར་བཏུབ་པ་དགེ་འདུན་མངོན་དུ་གྱུར་པ་ལས་བགོ་པར་བྱ་བ་ཡིན་པས། གོས་འདི་བདག་གི་སྐལ་བ་ཡིན་ཏེ་བཅོས་ལེགས་བྱའོ། །སྦ་བར་བྱའོ། །བདག་གིས་བྱིན་གྱིས་བརླབ་པོ། །བདག་གིས་གོས་འདི་བཅོས་ལེགས་བྱའོ། །བདག་གིར་བྱིན་གྱིས་བརླབ་པོ་ཞེས་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱའོ། །འོན་ཏེ་དེ་ལྟར་མ་བྱས་ན་དགེ་སློང་དེ་གཅིག་བུས་གོས་དེ་རང་གིར་མི་བྱ་སྟེ། གལ་ཏེ་རང་གིར་བྱེད་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་དབང་བ་གཅིག་ཉིད་ཀྱིས་ཤིན་ཏུ་མང་པོ་ཐོབ་པ་ལ་ནི་མི་དབང་བའི་རྒྱུར་འགྱུར་བ་མེད་དོ་ཞེས་བཤད་དོ། །འགྲེལ་པ་བྱེད་པས་ཀྱང་
འདི་ལ་འདི་ལྟར་དེད་དཔོན་ཞིག་གིས་དགེ་འདུན་གྱི་ཆེད་དུ་རྙེད་པ་རབ་ཏུ་མང་པོ་གཙུག་ལག་ཁང་དུ་བསྐུར་བ་དང་གཙུག་ལག་ཁང་དེ་ན་དགེ་སློང་གཅིག་པུ་ཞིག་གནས་པ་མི་རུང་ངོ་སྙམ་ནས་ལེན་པར་མི་བྱེད་པ་དང༌། བཅོམ་ལྡན་འདས་ཀྱིས་དེ་ནི་དེ་ན་གང་གནས་པ་དེ་དབང་ངོ་ཞེས་རྗེས་སུ་གནང་ངོ་ཞེས་བཤད་དོ། །སྡོམ་བརྩོན་ཅན་གྱིས་དགེ་འདུན་གྱི་ཞེས་བྱ་བ་ལ་སོགས་པ་ལ། རུང་བ་ནི་ཁ་ན་མ་ཐོ་བ་མེད་པ་སྟེ། རུང་བ་ཞེས་སྨོས་པ་ནི་རུང་བ་མ་ཡིན་པ་གསེར་དང་དངུལ་ལ་སོགས་པའམ་རུང་བ་མ་ཡིན་པའི་གོས་རྔ་བལ་དང་གནག་གི་སྤུ་དང་རི་དགས་ཀྱི་བལ་ལ་སོགས་པའམ་སྤངས་པའམ་ཟས་ཀྱི་རྙེད་པ་སོག་འཇོག་བྱས་པའམ། བྱིན་ལེན་མ་བྱས་པའམ། ནང་དུ་ཞག་ལོན་པ་ལ་སོགས་པའམ། མཚམས་ཀྱི་ཕྱི་རོལ་ན་འདུག་པའམ་སྦྱིན་པར་བྱ་བ་མ་ཡིན་པ་བསལ་ཏོ་ཞེས་བྱ་བ་ནི་དེ་སྐད་དུའོ། །རྒྱུ་ཅི་ཡོད་ཅེས་བྱ་བ་ནི་འབྲེལ་པ་ཅི་ཡོད་ཅེས་བྱ་བའོ། །འབོད་དེ་སྨྲོས་ཤིག་ཅེས་བྱ་བར་སྦྱར་ཏེ། འབོད་དེ་ཞེས་བྱ་བ་ནི་སྔ་ཕྱི་བརྟགས་ཏེའོ། །རེ་ཞིག་དགེ་སློང་གོས་ཀྱི་རྙེད་པའམ་ཟས་ཀྱི་རྙེད་པའམ་རུང་བ་རང་གིར་བྱེད་པ་ལ་ནི་ལྟུང་བ་མེད་པ་ཉིད་དུ་གནང་ན། འོན་ཀྱང་བཅོམ་ལྡན་འདས་ཀྱིས་དེ་ལ་ལྟུང་བ་ཁོ་ནར་གསུངས་སོ་ཞེས་བྱ་བ་ལ་རྒྱུ་ཅི་ཞིག་ཡོད་པ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དགེ་འདུན་གྱི་རྙེད་པར་བསྔོས་པ་རང་གིར་བྱེད་པ་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགེ་འདུན་གྱི་རྙེད་པ་རུང་བ་རང་གིར་བགྱིས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། དགེ་འདུན་ལ་བསྔོས་པ་ཡིན་ནའོ་ཞེས་བྱ་བ་ཡིན་ནོ། །འདི་ལ་གཞུང་གཞན་ཡང༌། བཙུན་པ་དགེ་སློང་གིས་ཕ་མ་ལས་བླངས་ལ་སྤང་བའི་ལྟུང་བྱེད་དུ་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ཕ་མས་གོས་དེ་དགེ་འདུན་ལ་བསྔོས་པ་ཡིན་ལ། དེ་དགེ་སློང་གིས་ཤེས་བཞིན་དུ་གང་ཟག་བདག་ཉིད་ཀྱིར་སྒྱུར་བ་བྱེད་ན་གོས་སྔོན་དུ་གྲུབ་ན་སྤང་བའི་ལྟུང་བྱེད་དོ་ཞེས་བྱ་བ་ཡིན་ནོ། །མཆོད་རྟེན་ལ་ཕུལ་བ་རྙེད་པ་དག་ཅེས་བྱ་བ་ནི་མཆོད་རྟེན་ལ་ཕུལ་བའི་རྙེད་པ་མཆོད་རྟེན་དེ་ལས་དགེ་སློང་གིས་བླངས་ན་ཇི་ལྟར་ལྟུང་བ་མེད་པ་ཞེས་གསུངས་ཞེས་བྱ་བ་དེ་བཞིན་
དུ་སྡོམ་བརྩོན་སྨྲོས་ཤིག་ཅེས་བྱ་བར་སྦྱར་ཏེ་དེ་ལ་ཕུལ་བ་ནི་བྱིན་པའོ། །གང་ལ་ཞེ་ན་མཆོད་རྟེན་ལ་ཞེས་བྱ་བ་སྨོས་སོ། །དེ་ལ་དྲན་པ་ཉེ་བར་གཞག་པ་དང༌། ཡང་དག་པར་སྤོང་བ་དང༌། རྫུ་འཕྲུལ་གྱི་རྐང་པ་དང༌། དབང་པོ་དང༌། སྟོབས་དང༌། བྱང་ཆུབ་ཀྱི་ཡན་ལག་དང༌། ལམ་ལ་སོགས་པའི་ཡོན་ཏན་གྱི་གཟུགས་བརྙན་དུ་གྱུར་པའི་ཕྱིར་དང༌། འཇིག་རྟེན་པའི་ཡོན་ཏན་དག་ལས་ཡང་དག་པར་འཕགས་པའི་ཕྱིར་མཆོད་རྟེན་ཏེ་དེ་ལའོ། །རྙེད་པ་ནི་གོས་དང་རྒྱན་ལ་སོགས་པའི་རྫས་སོ། །དེ་ལས་ཞེས་བྱ་བ་ནི་མཆོད་རྟེན་ལས་སོ་ཞེས་བྱ་བ་ནི་དེ་སྐད་དུའོ། །རྒྱལ་བ་ནི་བདུད་བཞིའི་དགྲ་ལས་ངེས་པར་རྒྱལ་བ་སྟེ། སྡིག་པའི་ཆོས་ལས་ང་རྒྱལ་བས། །དེ་བས་ཉེ་འགྲོ་ང་རྒྱལ་བ། །ཞེས་པ་འབྱུང་བའི་ཕྱིར་ཏེ། འདི་ལ་དོན་ནི་སྤྱིར་མཆོད་རྟེན་ལ་ཕུལ་བའི་རྫས་བླངས་ན་གདོན་མི་ཟ་བར་ལྟུང་བར་འགྱུར་ན། འོན་ཀྱང་བཅོམ་ལྡན་འདས་ཀྱིས་དེ་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཉན་ཐོས་ཀྱི་མཆོད་རྟེན་ལ་བསྔོས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། དབྱར་གྱི་ནང་རོལ་དག་ཏུ་མཆོད་རྟེན་དང་མཆོད་རྟེན་ལ་འདུ་བའི་རྙེད་པ་བགོས་ལ་ལྟུང་བར་མི་འགྱུར་ཞིང༌། རུང་བར་ཡང་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཉན་ཐས་ཀྱི་མཆོད་རྟེན་ལ་བསྔོས་པ་ཡིན་ལ་ཤི་བའི་ཡོ་བྱད་ཡིན་པར་བསམས་ནས་བགོས་ནའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་ཉན་ཐོས་ཀྱི་མཆོད་རྟེན་ལ་ཕུལ་བ་ནི་ཚངས་པ་མཚུངས་པར་སྤྱོད་པ་རྣམས་དབང་བ་ཉིད་ཡིན་ནོ་ཞེས་བཤད་དོ། །ཡང་ན་དྲི་བ་དང་ལན་འདི་ནི་དོན་གྱི་དབང་གིས་གཞན་དུ་ཡང་སྦྱར་བར་རུང་བས། ཉན་ཐོས་ཀྱི་ལ་བསྔོས་པའི་རྫས་ཞེས་བྱ་བ་ལ་སོགས་པ་སྨོས་ཏེ། ཉན་ཐོས་ཀྱི་མཆོད་རྟེན་ལ་བསྔོས་པའི་རྫས་སྔོམ་ཅན་གྱིས་བླངས་ན་ཇི་ལྟར་ཐུབ་པས་ལྟུང་བ་དང་བཅས་པར་གསུངས་པ་སྔོམ་བརྩོན་ཅན་སྨྲོས་ཤིག་ཅེས་བྱ་བར་སྦྱར་རོ། །བསྔོས་པ་ནི་ངེས་པར་བཏང་བ་སྟེ་བྱིན་པ་ཞེས་བྱ་བའི་དོན་ཏོ། །དེ་ཅི་ཞིག་ཅེ་ན། རྫས་ཞེས་བྱ་བ་སྨོས་ཏེ། གོས་དང་རྒྱན་ལ་སོགས་པའོ། །གང་ལ་བསྔོས་པ་ཞེ་ན་མཆོད་རྟེན་ལའོ། །མཆོད་རྟེན་ལ་སྟེ་དེའི་དོན་ནི་བཤད་
ཟིན་ཏོ། །འོག་ནས་མཆོད་རྟེན་ལས་ཞེས་འཆད་པར་འགྱུར་ཏེ། དེས་ན་དོན་གྱི་དབང་གིས་རྣམ་པར་དབྱེ་བ་སྒྱུར་ལ་མཆོད་རྟེན་ལ་ཞེས་བདུན་པར་བྱའོ། །མཆོད་རྟེན་ལ་ཞེས་བྱ་བ་ནི་དེ་བཞིན་གཤེགས་པའི་མཆོད་རྟེན་ལ་ཡང་ཡོད་པས་གང་དང་འབྲེལ་པའི་མཆོད་རྟེན་ལ་ཞེ་ན། ཉན་ཐོས་ཀྱི་ལ་ཞེས་སྨོས་སོ། །ཀུན་ཤེས་པའི་འབྲས་བུ་སྒྲོགས་པས་ན་ཉན་ཐོས་དེ་དགྲ་བཅོམ་པ་ལ་སོགས་པ་ལ་ཞེས་བྱ་བའི་ཐ་ཚིག་གོ །རྫས་གང་ལས་བླངས་ན་ཞེ་ན། མཆོད་རྟེན་ལས་ཞེས་བྱ་བ་སྨོས་སོ། །སྡོམ་བརྩོན་ཞེས་བྱ་བ་ནི་བོད་པའོ། །དེས་ན་དོན་གྱིས་ཉན་ཐོས་ཀྱི་མཆོད་རྟེན་ལ་ཕུལ་བའི་རྫས་ནི་བཅོམ་ལྡན་འདས་ཀྱིས་ཚངས་པ་མཚུངས་པར་སྤྱོད་པ་རྣམས་ཁོ་ན་ལ་འོས་པ་ཉིད་ཡིན་ནོ་ཞེས་བཀའ་སྩལ་པ་ལྟུང་བ་མེད་པ་ཉིད་དུ་གསུངས་ན། འོན་ཀྱང་བཅོམ་ལྡན་འདས་ཀྱིས་རྣམ་པ་འགའ་ཞིག་དེ་ལྟུང་བ་དང་བཅས་པ་ཉིད་དུ་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པ་དེ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། འཕགས་པ་བ་ར་དྭ་ཛ་བསོད་སྙོམས་ལེན་ལ་སོགས་པ་བཞུགས་པའི་ཉན་ཐོས་ཀྱི་མཆོད་རྟེན་གྱི་དཀོར་བླངས་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། དབྱར་གྱི་ནང་དག་ཏུ་མཆོད་རྟེན་དང་མཆོད་རྟེན་ལ་འདུ་བའི་རྙེད་པ་བགོས་ན་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཉན་ཐོས་ཀྱི་མཆོད་རྟེན་ལ་བསྔོས་པ་ཡིན་ལ་ཤི་བའི་ཡོ་བྱད་ཡིན་པར་བསམས་ནས་བགོས་ནའོ་ཞེས་བྱ་བ་ཡིན་ནོ། །འདིས་ནི་འཕགས་པ་ཤཱ་རིའི་བུ་ལ་སོགས་པ་ཡོངས་སུ་མྱ་ངན་ལས་འདས་པའི་མཆོད་རྟེན་ལ་ཕུལ་བའི་རྫས་ནི་ཤི་བའི་ཡོ་བྱད་ཡིན་པར་བསམས་ནས་བགོ་བར་བྱ་བ་ཉིད་ཡིན་གྱི། འཕགས་པ་བ་ར་དྭ་ཛ་བསོད་སྙོམས་ལེན་ལ་སོགས་པ་ཡོངས་སུ་མྱ་ངན་ལས་འདས་པའི་ནི་མ་ཡིན་ནོ་ཞེས་བསྟན་པ་ཡིན་ནོ། །དེ་ན་བསྟན་པ་ཡོངས་སུ་བསྲུང་བའི་ཕྱིར་འཁོར་དགྲ་བཅོམ་པ་ལྔ་བརྒྱ་ད་རུང་ཀླུའི་རྒྱལ་པོ་རུ་རུའི་གནས་ན་བཞུགས་ཞེས་བརྗོད་དོ། །སྤོ་བ་སྤྱོད་གཉིས་གནས་གཅིག་ན། །ཞེས་བྱ་བ་ལ་སོགས་པ་ནི་སྤོ་བ་སྤྱོད་པ་དང་ལྡན་པ་གཉིས་གནས་གཅིག་ན་སྟེ་གནས་པར་བྱེད་ཅིང་ཞག་ཏུ་གནས་པས་གནས་པར་བྱེད་ན་ཅིའི་ཕྱིར་ཉེས་པ་མེད་པ་དེ་ཉིད་
ཅེས་བྱ་བ་ཁོ་བོ་ལ་ཏེ་པོར་སྨྲོས་ཤིག་ཅེས་བྱ་བར་སྦྱར་ཏེ། ཏེ་པོར་ཞེས་བྱ་བ་ནི་ཤིན་ཏུའོ། །འདི་ལ་དོན་ནི་སྤོ་བ་སྤྱོད་པ་གཉིས་གནས་གཅིག་ན་གནས་པར་བྱེད་ན། བཅོམ་ལྡན་འདས་ཀྱིས་ཉེས་བྱས་དང་ཞག་གི་བུལ་དུ་མི་ཆུད་པར་གསུངས་ན། འོན་ཀྱང་དེ་གཉིས་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་དེ་འདི་ལ་གལ་ཏེ་ཁྱོད་ལ་འདུལ་བ་ཡོངས་སུ་ཤེས་པའི་ནུས་པ་ཅི་ཞིག་ཡོད་ཅེ་ན། དེ་ནུས་པ་དང་མཐུན་པར་ཁོ་བོ་ལ་མྱུར་དུ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། མུ་སྟེགས་ཅན་སྤོ་བའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་བཅོམ་ལྡན་འདས་ཀྱིས་སྤོ་བ་པ་གཉིས་གནས་གཅིག་ན་གནས་པར་མི་བྱའོ་ཞེས་བཀའ་སྩལ་པ་གང་ལགས་པ། བཙུན་པ་སྤོ་བ་པ་གཉིས་གནས་གཅིག་ན་གནས་ན་ལྟུང་བར་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གཞན་མུ་སྟེགས་ཅན་དག་ཅིག་སྤོ་བ་ལ་གནས་པ་ཡིན་ནའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། དེ་དང་མུ་སྟེགས་ཅན་གནས་པ་ལ་གནས་པ་དང་དེར་ལྷན་ཅིག་པ་ལ་ཉེས་པ་མེད་དོ་ཞེས་བཤད་དོ། །ནམ་ཡང་ལྟུང་བ་མི་བྱེད་པ་ཞེས་བྱ་བ་ལ་སོགས་པ་ནི་ནམ་ཡང་ལྟུང་བ་མི་བྱེད་ན་ཅིའི་ཕྱིར་ཐུབ་པས་སྤོ་བར་འོས་པར་གསུངས་པ་སྙིང་རྗེ་དང་ལྡན་པ་ཁྱོད་གསལ་བར་སྨྲོས་ཤིག་ཅེས་བྱ་བར་སྦྱར་ཏེ། ནམ་ཡང་ཞེས་བྱ་བ་ནི་ཚེའི་མཐས་གཏུགས་ཀྱི་བར་དུའོ། །ལྟུང་བ་ནི་དགེ་འདུན་ལྷག་མའོ། །མི་བྱེད་པ་ཞེས་བྱ་བ་ནི་དགག་པའོ། །སྤོ་བར་འོས་པ་སྤོ་བར་སྤྱད་པར་བཤད་པའོ། །བརྩེ་ལྡན་ནི་སྙིང་རྗེ་དང་ལྡན་པའོ། །འདི་ལ་དོན་ནི་ཚེའི་མཐར་ཐུག་གི་བར་དུ་དགེ་འདུན་ལྷག་མའི་ལྟུང་བ་འགའ་ཡང་མི་བྱེད་ན། འོན་ཀྱང་བཅོམ་ལྡན་འདས་ཀྱིས་སྤོ་བ་པ་ཁོ་ནར་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པ། གཞན་ལ་ཕན་པ་ལ་བརྩོན་པ་ཁྱོད་ཁོ་བོ་ལ་གསལ་བར་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། མུ་སྟེགས་ཅན་སྤོ་བ་བྱིན་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་ནམ་ཡང་ལྟུང་བ་མི་འབྱིན་ལ་དེ་ཡང་སྤོ་བ་པ་ལགས་ལ་ལྟ་མཆིས་ལགས་སམ། ཉེ་བ་འཁོར་ཡོད་དེ། མུ་སྟེགས་ཅན་སྤོ་བ་པ་
ཡིན་ནའོ། །ལྟུང་བ་ཡོད་པ་མ་ཡིན་ལ་ཞེས་བྱ་བ་ལ་སོགས་པ་ལ་ལྟུང་བ་ཡོད་པ་མ་ཡིན་པ་ལ་གལ་ཏེ་སྤོ་བ་སྦྱིན་པར་བྱེད་ན་ཅིའི་ཕྱིར་ཐུབ་པས་ལྟུང་བ་མེད་པར་གསུངས་པ་ཁོ་བོ་ལ་ངེས་པར་སྨྲོས་ཤིག་ཅེས་བྱ་བར་སྦྱར་ཏེ། དེ་ལ་ལྟུང་བ་ཡོད་པ་མ་ཡིན་པ་ནི་དགེ་འདུན་ལྷག་མ་མི་སྤྱོད་པའོ། །སྤོ་བ་ནི་ཆད་པའི་ལས་སོ། །དེས་ན་དགེ་འདུན་གྱི་ལྷག་མ་བྱུང་བ་ལ་དགེ་འདུན་གྱིས་ཅིའི་ཕྱིར་སྤོ་བ་བྱིན། འོན་ཀྱང་དགེ་འདུན་ལ་ལྟུང་བ་འགར་ཡང་མ་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པ་ཁོ་བོ་ལ་སྨྲོས་ཤིག །འདི་ལ་ལན་ནི་འདི་ཡིན་ཏེ། མུ་སྟེགས་ཅན་སྤོ་བ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་འདུན་གྱིས་ལྟུང་བ་མ་བྱུང་བ་ཞིག་ལ་སྤོ་བ་སྩལ་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། མུ་སྟེགས་ཅན་ལའོ་ཞེས་བྱ་བ་ཡིན་ནོ། །གསར་བུས་རྒན་པོ་ལས་འདས་ན་འོ་ཞེས་བྱ་བ་ལ་སོགས་པ་ལ། འདས་ན་ཞེས་བྱ་བ་ནི་ཐོད་རྒལ་དུ་སྟེ་རྒན་རིམས་ལས་རྒལ་ན་ཞེས་བྱ་བའི་ཐ་ཚིག་གོ །སུ་ཞིག་ལས་འདས་ན་ཞེ་ན་རྒན་པོ་ལས་ཞེས་བྱ་བ་སྨོས་སོ། །སུ་ཞིག་གིས་ཤེ་ན། གསར་བུས་ཞེས་བྱ་བ་སྨོས་ཏེ། གཞོན་རབས་ཀྱིས་སོ། །གནས་མལ་ནི་གཙུག་ལག་ཁང་ལ་སོགས་པ་སྟེ་འདིར་གནས་ཤིང་འདུག་པས་སོ། །བཟློག་པར་གྱིས་ཤིག་ཅེས་བྱ་བ་ནི་གསོལ་གཅིག་པའོ། །དེས་ན་གང་གི་ཚེ་དགེ་སློང་གསར་བུས་རྒན་རིམས་བཀོལ་ནས་གནས་མལ་གཙུག་ལག་ཁང་དང་ཁྲི་དང་ཁྲིའུ་ལ་སོགས་པ་དང་པོར་ལེན་ན་དེའི་ཚེ་རྒན་རིམས་ལས་འདས་པའི་ཕྱིར་ཉེས་བྱས་ཀྱི་ལྟུང་བར་འགྱུར་རོ་ཞེས་བྱ་བ་ནི་ངེས་པ་ཉིད་ན། ཤིང་དག་ཀྱང་རྒན་རིམས་བཞིན་དུ་བསྐོར་བར་བྱའོ་ཞེས་འབྱུང་ལ། དེ་བཞིན་དུ་ཐམས་ཅད་ལ་ཡང་རྒན་རིམས་བཞིན་དུ་ཞེས་གསུངས་ན། འོན་ཀྱང་བཅོམ་ལྡན་འདས་ཀྱིས་རྒན་རིམས་ཇི་ལྟ་བ་ལས་འདས་པ་འདི་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པ་བརྗོད་དགོས་སོ། །འདི་ལ་ལན་ནི་འདི་ཡིན་ཏེ། གཞིའི་སྤང་བ་ཐོབ་པ་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་བཅོམ་ལྡན་འདས་ཀྱིས་དགེ་སློང་གཞོན་རབས་ཀྱིས་དགེ་སློང་རྒན་རབས་བཀོལ་ཏེ་
གནས་མལ་ནོད་པར་མི་བྱའོ་ཞེས་བཀའ་སྩལ་པ་གང་ལགས་པ། བཙུན་པ་དགེ་སློང་གཞོན་རབས་ཀྱིས་དགེ་སློང་རྒན་རབས་བཀོལ་ཏེ་གནས་མལ་མནོས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གང་གིས་དགེ་འདུན་ལས་གཞིའི་སྤང་བའམ་རིམ་གྲོའི་སྤང་བ་འཐབ་པའམ་འཇིགས་པ་དང་བཅས་ནས་ཕྱོགས་ནས་འབྲོས་པར་འདོད་པ་ཡིན་ནའོ་ཞེས་བྱ་བ་ཡིན་ནོ། །གནས་མལ་དེ་ཉིད་སྤྱོད་པ་ལ་ཞེས་བྱ་བ་ལ་སོགས་པ་ནི་གནས་མལ་དེ་ཉིད་སྤྱོད་པ་ལ་ནི་ཅིའི་ཕྱིར་ཐུབ་པས་ཉེས་པ་མེད་པ་དང་ཉེས་པ་དང་བཅས་པར་གསུངས་པའོ། །འབོད་དེ་ཁོ་བོ་ལ་གསལ་བར་སྨྲོས་ཤིག་ཅེས་བྱ་བར་སྦྱར་ཏེ། གནས་མལ་ནི་གདིང་བ་དང་གདིང་བའི་གདིང་བ་ལ་སོགས་པའོ། །དེ་ཉིད་ཅེས་བྱ་བ་ནི་བརྗོད་པར་འདོད་པའོ། །ཉེས་པ་མེད་པ་ནི་ལྟུང་བ་མེད་པའོ། །དང་ཞེས་བྱ་བ་ནི་བསྡུ་བའོ། །ཉེས་བཅས་ཞེས་བྱ་བ་ནི་ལྟུང་བ་དང་བཅས་པའོ། །འདི་ལ་དོན་ནི་གནས་མལ་ལ་རེས་འགའ་ཆོས་ཉམས་པར་སྤྱོད་ན་ལྟུང་བ་ཁོ་ནར་འགྱུར་ལ། འོན་ཏེ་ཆོ་ག་ལས་འབྱུང་བ་བཞིན་སྤྱད་ན་ནི་ལྟུང་བ་མེད་པ་ཁོ་ན་ཡིན་ནོ། །འོན་ཀྱང་བཅོམ་ལྡན་འདས་ཀྱིས་ཡུལ་གཅིག་ལ་ལྟུང་བ་དང་ལྟུང་བ་མེད་པར་མ་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པར་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། གང་ཟག་གི་དགེ་འདུན་གྱི་གནས་མལ་སྤྱོད་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གནས་མལ་དེ་ཉིད་སྤྱོད་པ་ལ་ལྟུང་བ་དང་བཅས་ཤིང་དེ་ཉིད་སྤྱོད་པ་ལ་ལྟུང་བ་མ་མཆིས་པ་ལྟ་མཆིས་ལགས་སམ། ཉེ་བ་འཁོར་ཡོད་དེ། གང་ཟག་གི་གནས་མལ་ཁ་དོག་ངན་པར་མ་བྱས་པའམ། ཁ་ཚར་རིང་པོ་སྤྱོད་ན་ལྟུང་བ་དང་བཅས་སོ། །དགེ་འདུན་གྱི་སྤྱོད་ན་ལྟུང་བ་མེད་དོ་ཞེས་བྱ་བ་ཡིན་ནོ། །དགེ་འདུན་གྱི་གནས་མལ་ལ་ཞེས་བྱ་བ་ལ་སོགས་པ་ལ། དགེ་འདུན་གྱི་ཞེས་བྱ་བ་ལ་ནི་དགེ་འདུན་མང་བའོ། །གནས་མལ་ཞེས་བྱ་བ་ནི་སྤྱོད་པ་ཞེས་བྱ་བར་སྦྱར་རོ། །རང་གི་གོས་ཀྱིས་ནི་ཞེས་བྱ་བ་ནི་གང་ཟག་གི་གདིང་བ་དང་གདིང་བའི་གདིང་བས་སོ། །མ་གཡོགས་པར་ཞེས་བྱ་བ་ནི་མ་བཀབ་པར་རོ། །བརྟུལ་ཞུགས་ཅན་ཞེས་བྱ་བ་ནི་དགེ་སློང་ལ་འབོད་པ་སྟེ། འདི་ལྟར་བརྟུལ་ཞུགས་
དགེ་སློང་གི་སྡོམ་པ་ཡོད་པས་སོ། །ངེས་ཚིག་གི་དོན་ནི་གང་གི་ཚེ་དགེ་འདུན་གྱི་གནས་མལ་སྟན་ནང་ཚངས་ཅན་ལ་སོགས་པ་ལ་གང་ཟག་གི་གདིང་བའི་གདིང་བས་མ་གཡོགས་པར་སྤྱོད་ན་དེའི་ཚེ་དེ་ལ་ཉེས་བྱས་ཀྱི་ལྟུང་བར་འགྱུར་ན། འོན་ཀྱང་དགེ་སློང་གི་དགེ་འདུན་གྱི་གནས་མལ་ལ་གདིང་བའི་གདིང་ངས་མ་གཡོགས་པར་སྤྱོད་ཀྱང་ལྟུང་བ་མེད་དོ་ཞེས་གསུངས་སོ་ཞེས་བྱ་བ་དེ་དགེ་སློང་ཁོ་བོ་ལ་སྨྲོས་ཤིག་ཅེས་བྱ་བ་འདི་འབྱུང་ངོ༌། །འདི་ལ་ལན་ནི་འདི་ཡིན་ཏེ། དེ་ནི་གདིང་བ་བགོ་བ་ཉིད་དུ་ཕུལ་བ་སྤྱོད་པ་ལ་བརྟེན་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་བཅོམ་ལྡན་འདས་ཀྱིས་དགེ་སློང་གི་དགེ་འདུན་གྱི་གཞི་ལ་བར་དུ་མ་བཅད་པར་སྤྱད་པར་མི་བྱའོ་ཞེས་བཀའ་སྩལ་པ་གང་ལགས་པ། བཙུན་པ་དགེ་སློང་གི་བར་དུ་མ་བཅད་པར་སྤྱད་པར་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ཁྱིམ་བདག་གིས་གདིང་བའི་གདིང་བའམ། བགོ་བ་བར་ཆད་མ་བྱས་པར་སྤྱད་པར་དགེ་འདུན་ལ་ཕུལ་བ་ཡིན་ནའོ་ཞེས་བྱ་བ་ཡིན་ནོ། །འདུལ་བ་དྲི་བའི་ཚིག་ལེའུར་བྱས་པ་ལེའུ་གསུམ་པའི་གཏན་ལ་དབབ་པའོ།། །།ལྟུང་བ་ཞེས་བྱ་བ་ལ་སོགས་པ་ནི་ལྟུང་བ་རྣམ་པར་རིག་བྱེད་ཡིན་ནམ། ཅི་ཞིག་ཅེས་བྱ་བ་ལ་སོགས་པ་མྱུར་དུ་ཁོ་བོ་ལ་དོན་ཇི་ལྟ་བ་བཞིན་དུ་སྨྲོས་ཤིག་ཅེས་བྱ་བར་དྲི་བ་རེ་རེ་ལ་སྦྱར་བར་བྱའོ། །རྣམ་པར་རིག་བྱེད་ནི་གཞན་དག་ལ་གོ་བར་བྱེད། ཁོང་དུ་ཆུད་པར་བྱེད་པའི་ཕྱིར་ཏེ། གཞན་དག་ལ་བདག་ནི་དགེ་བ་དང་མི་དགེ་བ་དང༌། ལུང་དུ་མ་བསྟན་པའི་སེམས་དང་སེམས་ལས་བྱུང་བ་ལ་འཇུག་པ་དག་གིས་ཀུན་ནས་བསླང་ངོ་ཞེས་བྱ་བར་གོ་བར་བྱེད་པ་ཞེས་བྱ་བའི་དོན་ཏོ། །ཅི་ཞིག་ཅེས་བྱ་བ་ནི་འདྲི་བའོ། །གཟུགས་ཅན་ནི་འདི་ལ་གཟུགས་ཡོད་པའི་ཕྱིར་རོ། །བསྟན་མོད་ཅེས་བྱ་བ་ནི་འདི་ནའོ། །ཆེ་གེ་མོ་ཞིག་ནའོ་ཞེས་བསྟན་པར་ནུས་པའི་ཕྱིར་རོ། །ཐོགས་དང་བཅས་པ་ནི་སྒྲིབ་པ་ཐོགས་པས་རང་གི་ཡུལ་དུ་གཞན་འབྱུང་བའི་གགས་བྱེད་པའི་ཕྱིར་རོ། །ཟག་བཅས་ནི་ཟག་པ་ཡོད་པའི་ཕྱིར་རོ། །འདུས་བྱས་ནི་རྒྱུ་དང་རྐྱེན་གྱིས་བྱས་པའི་ཕྱིར་རམ། འདུས་བྱས་ཀྱི་མཚན་ཉིད་དང་ལྡན་པའི་ཕྱིར་རོ། །འོན་ཏེ་ཞེས་བྱ་བ་ནི་འདྲི་བའོ། །ཅི་ཞེས་བྱ་བ་ནི་ཡང་འདྲི་བ་ཉིད་དོ། །འཇིག་
རྟེན་པ་ནི་འཁོར་བའི་ཁོངས་སུ་གཏོགས་པའི་ཕྱིར་རོ། །ཕུང་པོར་ལྡན་པ་ནི་གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ཞེས་བྱ་བ་སྤུངས་པའི་མཚན་ཉིད་ཕུང་པོ་དག་གི་ཁོངས་སུ་གཏོགས་པ་སྟེ་ཕུང་པོར་གཏོགས་པ་ཞེས་བྱ་བའི་ཐ་ཚིག་གོ །ཁམས་དང་ལྡན་པ་ནི་ཡུལ་དང༌། དབང་པོ་དང༌། རྣམ་པར་ཤེས་པ་ཞེས་བྱ་བ་རྣམ་པ་བཅོ་བརྒྱད་ཀྱི་ངོ་བོ་ཉིད་ཀྱིས་ཁམས་རྣམས་ཀྱི་ཁོངས་སུ་གཏོགས་པའི་ཕྱིར་ཏེ་ཁམས་དང་ལྡན་པ་ཞེས་བྱ་བའི་ཐ་ཚིག་གོ །སྐྱེ་མཆེད་དང་ལྡན་པ་ནི་ཡུལ་དང་དབང་པོ་དང༌། ཡིད་དང༌། ཆོས་ཞེས་བྱ་བ་སེམས་དང་སེམས་ལས་བྱུང་བ་སྐྱེ་བའི་སྒོར་གྱུར་པའི་སྐྱེ་མཆེད་དག་གི་ནང་དུ་ཆུད་པའི་ཕྱིར་ཏེ་སྐྱེ་མཆེད་དུ་གཏོགས་པ་ཞེས་བྱ་བའི་ཐ་ཚིག་གོ །ཟིན་པ་ནི་སེམས་དང་སེམས་ལས་བྱུང་བ་རྣམས་ཀྱི་གནས་ཀྱི་ངོ་བོར་ཉེ་བར་བཟུང་བ་སྟེ་ཕན་པ་དང་གནོད་པ་དག་གིས་ཕན་ཚུན་རྗེས་སུ་བྱེད་པའི་ཕྱིར་རོ། །ལུང་བསྟན་ཞེས་བྱ་བ་ནི་འབྲས་བུ་ཡིད་དུ་འོང་བའི་ཕྱིར་རམ། དགེ་བ་དང་མི་དགེ་བའི་ངོ་བོར་ལུང་དུ་བསྟན་པའི་ཕྱིར་བསྟན་པ་ཞེས་བྱ་བའི་ཐ་ཚིག་གོ །འབྱུང་བ་ནི་ས་དང༌། ཆུ་དང༌། མེ་དང༌། རླུང་གི་མཚན་ཉིད་དོ། །དེ་བཞིན་ཞེས་བྱ་བ་ནི་བསྡུ་བའོ། །འབྱུང་བ་ལས་གྱུར་པ་ནི་འབྱུང་བ་དག་ལ་ཡོད་པའི་ཕྱིར་ཏེ་འབྱུང་བ་ལ་བརྟེན་པ་ཞེས་བྱ་བའི་ཐ་ཚིག་གོ །དེ་ནི་མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱའི་ཕྱོགས་གཅིག་དང་རྣམ་པར་རིག་བྱེད་མ་ཡིན་པའི་མཚན་ཉིད་དོ། །ཀུན་སྦྱོར་ནི་འཆིང་བའི་བདག་ཉིད་ཡིན་པའི་ཕྱིར་རོ། །བསྒྲིབས་པ་ནི་ཉོན་མོངས་པའི་དྲི་མས་ཁེབས་པའི་ཕྱིར་རོ། །འམ་ཞེས་བྱ་བ་ནི་རྣམ་པར་རྟོག་པ་སྟེ། འོག་མ་དག་ལ་ཡང་དེ་དང་འདྲའོ། །ཉོན་མོངས་ཅན་ནི་མི་དགེ་བའི་ཕྱིར་རོ། །ཟང་ཟིང་དང་བཅས་པ་ནི་འདོད་ཆགས་ལ་སོགས་པའི་ཉོན་མོངས་པ་ཀུན་དུ་སྤྱོད་ན་དེས་མངོན་པར་འདོད་པའི་དངོས་པོ་ཐོབ་པར་རོ་མྱང་བའི་བྱ་བ་ཡིན་པའི་ཕྱིར་རོ། །འོན་ཏེ་ཞེས་བྱ་བ་ནི་དྲི་བའོ། །ཞེན་པ་རྟེན་པ་ནི་འདོད་པའི་ཡོན་ཏན་དང་ལྡན་པའི་ཕྱིར་རོ། །འཐབ་བཅས་ནི་འདོད་ཆགས་ལ་སོགས་པའི་ཉོན་མོངས་པ་རྣམས་ནི་བདག་དང་གཞན་ལ་གནོད་པར་བྱེད་པའི་བདག་ཉིད་
ཀྱི་ཕྱིར་འཐབ་པ་ཞེས་བྱ་སྟེ་དེ་དང་དེར་ལྷན་ཅིག་འབྲེལ་པར་སྤྱོད་པའི་ཕྱིར་རོ། །དམིགས་པ་དང་བཅས་པ་ནི་ཡུལ་འཛིན་པའི་ཕྱིར་རོ། །སེམས་ནི་རྣམ་པར་ཤེས་པའི་ངོ་བོ་སྟེ། དགེ་བ་དང་མི་དགེ་བ་དང་ལུང་དུ་མ་བསྟན་པ་ལ་སོགས་པའི་ཕྱིར་རམ། དགེ་བ་དང་མི་དགེ་བ་དང་ལུང་དུ་མ་བསྟན་པའི་ཆོས་རྣམས་ཀྱིས་བསྩགས་པའི་ཕྱིར་རོ། །ལས་བྱ་བའི་ངོ་བོ་ཉིད་ཡིན་པའི་ཕྱིར་རོ། །འམ་ཞེས་བྱ་བའི་སྒྲ་ནི་འོན་ཏེ་ཞེས་བྱ་བ་དང་བཅས་ཏེ་དྲི་བའི་དོན་ཡིན་པར་ཤེས་པར་བྱའོ། །རྣམ་སྨིན་བཅས་པ་ནི་འབྲས་བུ་ཡིད་དུ་འོང་བ་དང་ཡིད་དུ་འོང་བ་མ་ཡིན་པའི་ཕྱིར་ཏེ་རྣམ་པར་སྨིན་པ་ཡོད་པས་སོ། །དེ་ལས་གཞན་པ་ནི་བཤད་པ་ལས་བཟློག་པའོ། །དེ་བས་ན་ཐམས་ཅད་ལ་སོ་སོའི་དྲི་བ་འདི་སྦྱར་བར་བྱ་སྟེ། དེས་ན་དེ་ལས་གཞན་ཞེས་བྱ་བའི་སྒྲས་ལྟུང་བ་ཅི་ཞིག་རྣམ་པར་རིག་བྱེད་མ་ཡིན་པ་ཞིག་གམ། གཟུགས་ཅན་མ་ཡིན་པ་ཞིག་གམ། བསྟན་དུ་མེད་པ་ཞིག་གམ། ཐོགས་པ་མེད་པ་ཞིག་གམ། ཟག་པ་མེད་པ་ཞིག་གམ། འདུས་མ་བྱས་པ་ཞིག་གམ། འཇིག་རྟེན་ལས་འདས་པ་ཞིག་གམ། ཕུང་པོ་དང༌། ཁམས་དང༌། སྐྱེ་མཆེད་དང་མི་ལྡན་པ་ཞིག་གམ། མ་ཟིན་པ་ཞིག་གམ། ལུང་དུ་མ་བསྟན་པ་ཞིག་གམ། ཀུན་དུ་སྦྱོར་བ་མ་ཡིན་པ་ཞིག་གམ། མ་བསྒྲིབས་པ་ཞིག་གམ། ཉོན་མོངས་པ་མ་ཡིན་པ་ཞིག་གམ། ཟང་ཟིང་མེད་པ་ཞིག་གམ། ངེས་པར་འབྱུང་བ་ལ་བརྟེན་པ་ཞིག་གམ། འཐབ་པ་དང་བཅས་པ་མ་ཡིན་པ་ཞིག་གམ། དམིགས་པ་མེད་པ་ཞིག་གམ། སེམས་མ་ཡིན་པ་ཞིག་པ་ཞིག་གམ། ལས་མ་ཡིན་པ་ཞིག་གམ། རྣམ་པར་སྨིན་པ་མ་ཡིན་པ་ཞིག་ཅེས་བྱ་བ་དེ་རྣམས་གོ་རིམས་བཞིན་དུ་འཕགས་པར་བལྟ་བར་བྱའོ། །འདས་པ་ནི་འདས་པའི་དུས་སུ་བསྡུས་པ་སྟེ། བྱེད་པ་ཞེས་བྱ་བའི་ཐ་ཚིག་གོ །འམ་ཞེས་བྱ་བ་ནི་དྲི་བའོ། །མ་འོངས་པ་ནི་མ་འོངས་པའི་དུས་སུ་བསྡུས་པ་སྟེ། བྱེད་པ་མ་ཐོབ་པ་ཞེས་བྱ་བའི་ཐ་ཚིག་གོ །ད་ལྟར་ནི་ད་ལྟར་གྱི་དུས་སུ་བསྡུས་པ་སྟེ་བྱེད་པ་ཞེས་བྱ་བའི་དོན་ཏོ། །ཡིན་ཞེས་བྱ་བ་ནི་ཡིན་པའོ། །དགེ་བ་ནི་རྣམ་པར་སྨིན་པ་ཡིད་དུ་འོང་བའི་ཕྱིར་རོ། །དེ་ལས་གཞན་ཞེས་བྱ་བ་ནི་རྗེས་བསྙགས་ཏེ་དེས་ན་ཅི་ཞིག་མི་དགེ་བའམ་ཞེས་བྱ་བའི་ཐ་ཚིག་ཏུ་
འགྱུར་རོ། །ལུང་དུ་མ་བསྟན་པའི་དྲི་བ་ནི་སྔར་བཤད་ཟིན་ཏོ། །འདོད་པའི་ཁམས་དང་ལྡན་པ་ནི་འདོད་པའི་ཁམས་དང་ལྡན་པ་སྟེ། འདོད་པ་ན་སྤྱོད་པའི་སྲེད་པས་བདག་གིར་བྱས་པ་ཞེས་བྱ་བའི་དོན་ཏོ། །དེ་བཞིན་དུ། གཟུགས་ཁམས་ལྡན་ཞེས་བྱ་བ་ནི་གཟུགས་ཀྱི་ཁམས་དང་ལྡན་པ་སྟེ། གཟུགས་ན་སྤྱོད་པའི་སྲེད་པས་བདག་གིར་བྱས་སོ་ཞེས་བྱ་བའི་ཐ་ཚིག་གོ །ཡང་ཞེས་བྱ་བའི་སྒྲས་ནི་གཟུགས་མེད་པའི་ཁམས་དང་ལྡན་པའམ་ཞེས་བྱ་བ་བརྗོད་དེ། དེས་ན་ཅི་ཞིག་གཟུགས་དང་ལྡན་པ་ཞིག་ཡིན་ནམ་ཞེས་བྱ་བ་ཡིན་ནོ། །གཟུགས་མེད་པའི་ཁམས་དང་ལྡན་པ་སྟེ། གཟུགས་མེད་པ་ན་སྤྱོད་པའི་སྲེད་པས་བདག་གིར་བྱས་བ་ཞེས་བྱ་བའི་ཐ་ཚིག་གོ །སློབ་པ་ནི་འཕགས་པའི་གང་ཟག་བདུན་གྱི་རྒྱུད་ལ་སྐྱེས་པའི་ཕྱིར་རོ། །འོན་ཏེ་ཞེས་བྱ་བ་ནི་དྲི་བའོ། །མི་སློབ་པ་ནི་དགྲ་བཅོམ་པའི་རྒྱུད་ལ་སྐྱེས་པའི་ཕྱིར་རོ། །དེ་གཉིས་སྤངས་པ་ནི་སློབ་པ་དང་མི་སློབ་པའི་མཚན་ཉིད་རྣམ་གཉིས་དང་བྲལ་བ་སྟེ། ཅི་ཞིག་སློབ་པ་ཡང་མ་ཡིན་མི་སློབ་པ་ཡང་མ་ཡིན་པ་ཞིག་གམ་སྙམ་དུ་བསམས་པ་བཞིན་ནོ། །བསྒོམ་པས་སྤང་བྱ་ཞེས་བྱ་བ་ནི་བསྒོམ་པས་སྤང་བར་བྱ་ན་ཞེས་བྱ་བའི་དོན་ཏོ། །བསྒོམ་པ་ནི་གོམས་པའོ། །དེས་ན་གང་ཞིག་འཕགས་པའི་ལམ་ཡང་དང་ཡང་དུ་བསྒོམ་པས་སྤང་བར་བྱ་བ་དེ་ལ་དེ་སྐད་ཅེས་བྱའོ། །འོན་ཏེ་ཞེས་བྱ་བ་ནི་དྲི་བའོ། །མཐོང་བས་ཞེས་བྱ་བ་ནི་སྤང་བར་བྱ་བ་ཞེས་བྱ་བའི་རྗེས་བསྙེག་གོ །དེས་ན་དྲི་བའི་དོན་ནི་ཅི་ཞིག་མཐོང་བས་སྤང་བར་བྱ་བ་ཞིག་གམ་ཞེས་བྱ་བར་འབྱུང་སྟེ། བདེན་པ་བཞི་མཐོང་བས་སྤང་བར་བྱ་བ་ཞིག་ཅེས་བྱ་བའི་ཐ་ཚིག་གོ །ལུས་ཀྱི་ནི་ལུས་ལ་བརྟེན་ནས་བསྐྱེད་པའི་ཕྱིར་རོ། །ངག་གི་ནི་ངག་ལ་བརྟེན་ནས་བསྐྱེད་པའི་ཕྱིར་རོ། །སེམས་ཀྱི་ནི་སེམས་ལ་བརྟེན་ནས་བསྐྱེད་བའི་ཕྱིར་རོ། །འདིར་ཇི་སྐད་བསྟན་པའི་རྣམ་པར་གཞག་པ་ནི་འདི་ཡིན་ཏེ། དེ་ལ་ལྟུང་བ་ནི་ཅི་ཞིག་རྣམ་པར་རིག་བྱེད་དམ། རྣམ་པར་རིག་བྱེད་མ་ཡིན་པ་ཞིག་ཡིན་སྨྲས་པ། གང་ཡིན་པ་དེ་ལ་བཤད་པ་ནི་འདི་ཡིན་ཏེ། ལྟུང་བ་ནི་རྣམ་པར་རིག་བྱེད་དམ་རྣམ་པར་རིག་བྱེད་མ་ཡིན་པའི་ངོ་བོ་ཡིན་ནོ། །དེ་བཞིན་དུ་འདིར་གཞུང་ནི། ཉེ་བ་འཁོར་ལྟུང་བ་ནི་རྣམ་པར་རིག་བྱེད་ཅེས་ཀྱང་བྱ་ལ། རྣམ་པར་རིག་བྱེད་མ་ཡིན་པ་
ཞེས་ཀྱང་བྱའོ་ཞེས་བྱ་བ་ཡིན་ཏེ། དེ་བཞིན་དུ་འོག་མ་དག་ལ་ཡང་ལན་ཅི་རིགས་པར་སྦྱར་རོ། །གཟུགས་ཅན་ནམ། གཟུགས་ཅན་མ་ཡིན་པ་ཞེས་འདྲི་བ་ལ། ལྟུང་བ་ནི་གཟུགས་ཅན་དུ་བརྗོད་པའོ། །བསྟན་དུ་ཡོད་པའམ། བསྟན་དུ་མེད་པ་ཞེས་འདྲི་བ་ལ། བསྟན་དུ་མེད་པར་བརྗོད་པར་བྱའོ། །ཐོགས་པ་དང་བཅས་པའམ། ཐོགས་པ་མེད་པ་ཞེས་འདྲི་བ་ལ། ཐོགས་པ་མེད་པ་ཞེས་བརྗོད་པར་བྱའོ། །ཟག་པ་དང་བཅས་པའམ། ཟག་པ་མེད་པ་ཞེས་འདྲི་བ་ལ། ཟག་པ་དང་བཅས་པར་བརྗོད་པར་བྱའོ། །འདུས་བྱས་སམ་འདུས་མ་བྱས་ཞེས་འདྲི་བ་ལ། འདུས་བྱས་སུ་བརྗོད་པར་བྱའོ། །འཇིག་རྟེན་པའམ་འཇིག་རྟེན་ལས་འདས་པ་ཞེས་འདྲི་བ་ལ་འཇིག་རྟེན་པར་བརྗོད་པར་བྱའོ། །ཕུང་པོ་དང་ཁམས་དང་སྐྱེ་མཆེད་དུ་གཏོགས་སམ་མ་གཏོགས་ཞེས་འདྲི་བ་ལ། ཕུང་པོ་དང་ཁམས་དང་སྐྱེ་མཆེད་དུ་གཏོགས་པར་བརྗོད་པར་བྱའོ། །ཟིན་པའམ་མ་ཟིན་པ་ཞེས་འདྲི་བ་ལམ་ཟིན་པ་ཞེས་བརྗོད་པར་བྱའོ། །ལུང་དུ་བསྟན་པའམ་ལུང་དུ་མ་བསྟན་པ་ཞེས་འདྲི་བ་ལ། ལུང་དུ་བསྟན་པ་ཡང་ཡིན་ལ། ལུང་དུ་མ་བསྟན་པ་ཡང་ཡིན་པར་བརྗོད་པར་བྱའོ། །འབྱུང་བའམ་འབྱུང་བ་ལས་གྱུར་པ་ཞེས་འདྲི་བ་ལ། འབྱུང་བ་ལས་གྱུར་པར་བརྗོད་པར་བྱའོ། །ཀུན་དུ་སྦྱོར་བའམ་སྦྱོར་བ་མ་ཡིན་པ་ཞེས་འདྲི་བ་ལ། ཀུན་དུ་སྦྱོར་བར་བརྗོད་པར་བྱའོ། །བསྒྲིབས་པའམ་མ་བསྒྲིབས་པ་ཞེས་འདྲི་བ་ལ། བསྒྲིབས་པར་བརྗོད་པར་བྱའོ། །ཉོན་མོངས་པ་ཅན་ནམ། ཉོན་མོངས་པ་ཅན་མ་ཡིན་པ་ཞེས་འདྲི་བ་ལ་ཉོན་མོངས་པ་ཅན་དུ་བརྗོད་པར་བྱའོ། །ཟང་ཟིང་དང་བཅས་པའམ། ཟང་ཟིང་མེད་པ་ཞེས་འདྲི་བ་ལ་ཟང་ཟིང་དང་བཅས་པར་བརྗོད་པར་བྱའོ། །ཞེན་པ་རྟེན་པའམ་ངེས་པར་འབྱུང་བ་རྟེན་པ་ཞེས་འདྲི་བ་ལ། ཞེན་པ་རྟེན་པ་ཞེས་བརྗོད་པར་བྱའོ། །འཐབ་པ་དང་བཅས་པའམ། འཐེབ་པ་མེད་པ་ཞེས་འདྲི་བ་ལ་འཐབ་པ་དང་བཅས་པར་བརྗོད་པར་བྱའོ། །དམིགས་པ་དང་བཅས་པ་འམ་དམིགས་པ་མེད་པ་ཞེས་འདྲི་བ་ལ། དམིགས་པ་མེད་པར་བརྗོད་པར་བྱའོ། །སེམས་སམ་སེམས་མ་ཡིན་པ་ཞེས་འདྲི་བ་ལ། སེམས་མ་ཡིན་པར་བརྗོད་པར་
བྱའོ། །ལས་སམ་ལས་མ་ཡིན་པ་ཞེས་འདྲི་བ་ལ་ལས་སུ་བརྗོད་པར་བྱའོ། །རྣམ་པར་སྨེན་པ་དང་བཅས་པའམ་རྣམ་པར་སྨིན་པ་མེད་ཅེས་འདྲི་བ་ལ། རྣམ་པར་སྨིན་པ་དང་བཅས་པ་ཡང་ཡིན་ལ་རྣམ་པར་སྨིན་པ་མེད་པ་ཡང་ཡིན་པར་བརྗོད་པར་བྱའོ། །འདས་པའམ་མ་འོངས་པའམ་ད་ལྟར་ཞེས་འདྲི་བ་ལ། འདས་པའང་མ་ཡིན་ལ་མ་འོངས་པ་འང་མ་ཡིན་ད་ལྟར་ཡང་མ་ཡིན་པར་བརྗོད་པར་བྱའོ། །དགེ་བ་འམ་མི་དགེ་བའམ་ལུང་དུ་མ་བསྟན་པ་ཞེས་འདྲི་བ་ལ། མི་དགེ་བ་དང་ལུང་དུ་མ་བསྟན་པར་བརྗོད་པར་བྱའོ། །འདོད་པ་དང་གཟུགས་དང་གཟུགས་མེད་པའི་ཁམས་དང་ལྡན་པ་ཞེས་འདྲི་བ་ལ། འདོད་པའི་ཁམས་སུ་གཏོགས་པར་བརྗོད་པར་བྱའོ། །སློབ་པ་འམ་མི་སློབ་པའམ་སློབ་པ་ཡང་མ་ཡིན་མི་སློབ་པ་ཡང་མ་ཡིན་ཞེས་འདྲི་བ་ལ། སློབ་པ་ཡང་མ་ཡིན་མི་སློབ་པ་ཡང་མ་ཡིན་པར་བརྗོད་པར་བྱའོ། །མཐོང་བའམ་བསྒོམ་པས་སྤང་བར་བྱ་ཞེས་འདྲི་བ་ལ། བསྒོམ་པས་སྤང་བར་བརྗོད་པར་བྱའོ། ལུས་ཀྱི་འམ་དག་གི་འམ་སེམས་ཀྱི་ཞེས་འདྲི་བ་ལ། ལུས་ཀྱི་ཡང་ཡིན་ངག་གི་ཡང་ཡིན་སེམས་ཀྱི་ཡང་ཡིན་པར་བརྗོད་པར་བྱའོ། །འདྲི་བའི་ལན་བཅོམ་ལྡན་འདས་ཀྱིས་གསུངས་པ་ཁོ་ནར་བལྟ་བར་བྱ་སྟེ། བདག་གིས་གཞུང་མངས་པས་འདིར་མ་སྨོས་སོ། །འདྲི་བའི་ལན་འདི་དག་ནི་བདག་གིས་ཅི་རིགས་པར་གཞུང་བླ་མའི་རྒྱ་ཆེར་བཤད་པའི་ནང་དུ་བཀོད་པས་བརྟག་པར་བྱ་སྟེ་གཞུང་མངས་པས་འདིར་མ་སྨོས་སོ། །ཅི་དངོས་དེ་ཉིད་བྱེད་པ་ལ། །ཞེས་བྱ་བ་ལ་སོགས་པ་ལ་དངོས་ནི་དོན་ཏོ། །དེ་ཉིད་ཅེས་བྱ་བ་ནི་སྤྱིར་སྨོས་པའོ། །བྱེད་པ་ལ་ཞེས་བྱ་བ་ནི་ལྷག་པར་སྤྱོད་པ་ལའོ། །གཉིས་སུ་འགྱུར་བ་ནི་དངོས་པོ་གཉིས་སུ་འགྱུར་བའོ། །སྲིད་ཡོད་དམ་ཞེས་པ་ནི་བཏུབ་བམ་ཞེས་པའོ། །དེ་ཉིད་བསྟན་པ་ལྟུང་དང་ཞེས་བྱ་བ་ལ་སོགས་པ་སྨོས་ཏེ། དང་ཞེས་བྱ་བ་ནི་བསྡུ་བའོ། །མྱུར་དུ་ཞེས་བྱ་བ་ནི་མྱུར་བར་རོ། །འདི་ལ་དོན་ནི་གཞི་གཅིག་པ་རྟག་པ་དང་མི་རྟག་པ་ལྟ་བུར་འགལ་བའི་ཆོས་ཉིད་གཉིས་སུ་འགྱུར་བ་མི་སྲིད་པར་ནི་ཤེས་པ་ཉིད་ན། ཅི་གཞི་གཅིག་ལ་ལྟུང་བ་དང་ལྟུང་བ་མེད་པ་དག་འབྱུང་བ་གང་ཡིན་པ་དེ་སྲིད་པ་ཡོད་དམ་ཞེས་བྱ་བ་དེ་ཁོ་བོ་ལ་མྱུར་དུ་སྨྲོས་ཤིག་ཅེས་བྱ་བ་འདི་ཡིན་
ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། སྲ་བརྐྱང་བཏིང་བ་དང་མ་བཏིང་བ་དང་གནས་སུ་འབྲལ་བ་ལ་སོགས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དངོས་པོ་དེ་ཉིད་སྤྱོད་པ་ལ་ལྟུང་བར་འགྱུར་ཞིང་དངོས་པོ་དེ་ཉིད་སྤྱོད་པ་ལ་ལྟུང་བ་མ་མཆིས་པར་འགྱུར་བ་ལྟ་མཆིས་ལགས་སམ། བཀའ་སྩལ་པ། དངོས་པོ་དེ་ཉིད་སྤྱོད་པ་ལ་ལྟུང་བར་འགྱུར་ཞིང་དངོས་པོ་དེ་ཉིད་སྤྱོད་པ་ལ་ལྟུང་པ་མེད་པར་འགྱུར་བ་ཡོད་དོ། །བཙུན་པ་དངོས་པོ་དེ་ཉིད་སྤྱོད་པ་ལ་ལྟུང་བར་འགྱུར་བ་ཇི་ལྟ་བུ་ལགས། འདི་ལྟར་དགེ་སློང་གིས་སྲ་བརྐྱང་མ་བཏིང་བའི་གནས་སུ་གོས་རུང་བ་མ་ཡིན་པ་ཅི་ཙམ་འདོད་པ་བཅངས་པའམ། སྣམ་སྦྱར་མེད་པར་གྲོང་དུ་འཇུག་གམ། མགྲོན་དུ་མ་བོས་པར་གྲོང་དུ་འཇུག་གམ། འདུས་ཤིང་ཟའམ། ཡང་ཡང་ཟ་ན་ལྟུང་བར་འགྱུར་རོ། །ལྟུང་བ་མ་མཆིས་པར་འགྱུར་བ་ཇི་ལྟ་བུ་ལགས། འདི་ལྟར་དགེ་སློང་གིས་སྲ་བརྐྱང་བཏིང་བའི་གནས་སུ་གོས་རུང་བ་མ་ཡིན་པ་ཅི་ཙམ་འདོད་པ་བཅངས་པའམ། སྣམ་སྦྱར་མེད་པར་གྲོང་དུ་འཇུག་གམ། མགྲོན་དུ་མ་བོས་པར་གྲོང་དུ་འཇུག་གམ། འདུས་ཤིང་ཟའམ། ཡང་ཡང་ཟན་ལྟུང་བ་མེད་པར་འགྱུར་ཏེ། དེ་ལྟར་ན་དངོས་པོ་དེ་ཉིད་སྤྱོད་པ་ལ་ལྟུང་བར་འགྱུར་ཞིང༌། དངོས་པོ་དེ་ཉིད་སྤྱོད་པ་ལ་ལྟུང་བ་མེད་པར་འགྱུར་རོ་ཞེས་བྱ་བ་ཡིན་ནོ། །ཅི་གཞི་གང་གིས་ལྷག་མ་མེད་པར་ཞེས་བྱ་བ་ལ་སོགས་པ་ལ། གང་གིས་ཞེས་བྱ་བ་ནི་སྤྱིར་སྨོས་པའོ། །ལྷག་མ་མེད་པ་ནི་འདི་ལ་དགེ་སློང་གི་དངོས་པོ་ལས་ལྷག་མ་མ་ལུས་པའི་ཕྱིར་རོ། །དེ་ཉིད་ཀྱིས་ཞེས་བྱ་བ་གཞི་རྣམ་པར་སྤྱོད་པའི་ཕྱིར་ངེས་པར་གཟུང་བ་ཡིན་ནོ། །ལྷག་མ་དང་བཅས་པ་ནི་དགེ་འདུན་ལྷག་མ་ལ་སོགས་པ་སྟེ་དེ་དག་ལྷག་པར་སྤྱད་ན་དགེ་སློང་གི་དངོས་པོ་མེད་པར་མི་འགྱུར་བའི་ཕྱིར་ཏེ། ཕས་ཕམ་པར་འགྱུར་བའི་ཆོས་བཞི་པོ་དག་ནི་ལྷག་མ་མེད་པ་ཡིན་གྱི། འདི་ནི་ལྷག་མ་དང་བཅས་པའོ་ཞེས་གསུངས་པའི་ཕྱིར་རོ། །འདི་ལ་དོན་ཅིག་ཞི་གཅིག་ལྷག་པར་སྤྱོད་པ་ལ་ཕས་ཕམ་པར་འགྱུར་བ་དང་དགེ་འདུན་ལྷག་མར་འགྱུར་བ་གཉིས་ཀ་སྲིད་དམ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཐུན་མོང་མ་ཡིན་
པའི་ཕས་ཕམ་པར་འགྱུར་བ་ལྷག་པར་སྤྱོད་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་ལྷག་མ་མ་མཆིས་པའི་ལྟུང་བར་འགྱུར་བའི་གཞི་དེས་ལྷག་མར་བཅས་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་མས་ཐུན་མོང་མ་ཡིན་པའི་ཕས་ཕམ་པར་འགྱུར་བ་གཞི་ལྷག་པར་སྤྱད་ན་ལྷག་མ་མེད་པར་འགྱུར་རོ། །དགེ་སློང་གིས་སྤྱད་ན་དགེ་འདུན་ལྷག་མའོ་ཞེས་བྱ་བ་ཡིན་ནོ། །ཅི་གཞི་གང་གིས་ཕས་ཕམ་པའི་ཞེས་བྱ་བ་ལ་སོགས་པའི་ནི་གཞི་གང་གིས་ཞེས་བྱ་བར་སྦྱར་ཏེ། གཞི་གང་ཞིག་ལྷག་པར་སྤྱོད་པའི་གཞི་དེ་ཉིད་ཀྱིས་སོ། །གཞི་དེས་དགེ་འདུན་ལྷག་མར་འགྱུར་རམ་ཞེས་བྱ་བར་སྦྱར་རོ། །བསྒྲེ་བ་བསྟན་པའི་ཕྱིར་དེ་བཞིན་ཞེས་བྱ་བ་སྨོས་ཏེ། དེ་བཞིན་ཞེས་བྱ་བ་དེ་དང་འདྲ་བར་རོ། །ཇི་ལྟར་འགྱུར་ཞེས་བྱ་བར་སྦྱར་ཏེ། ཇི་ལྟར་ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བའི་ཐ་ཚིག་གོ །དེས་ན་ཅི་གཞི་གང་གིས་ཕས་ཕམ་པར་འགྱུར་བའི་ལྟུང་བར་འགྱུར་བའི་གཞི་དེས་ལྟུང་བྱེད་ཀྱི་ལྟུང་བར་འགྱུར་རམ་ཞེས་བྱ་བའི་དོན་ཡིན་ནོ། །འདི་ལ་གཏན་ལ་དབབ་པའི་སྦྱར་བ་ནི་འདི་ཡིན་ཏེ། ཐུན་མོང་མ་ཡིན་པའི་ཕམ་པར་འགྱུར་བ་ལྷག་པར་སྤྱོད་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་ཕས་ཕམ་པར་འགྱུར་བའི་ལྟུང་བར་འགྱུར་བའི་གཞི་དེས་དགེ་འདུན་ལྷག་མར་འགྱུར་བ་ལྟ་མཆིས་ལགས་སམ། བཀའ་སྩལ་པ། ཡོད་དེ། དགེ་སློང་མས་ལུས་རེག་པ་སྤྱད་ན་པས་ཕམ་པར་འགྱུར་ལ། དགེ་སློང་གིས་སྤྱད་ན་དགེ་འདུན་ལྷག་མར་འགྱུར་རོ། །གཞི་གང་གིས་ཕས་ཕམ་པའི་ལྟུང་བར་འགྱུར་བའི་གཞི་དེས་ལྟུང་བྱེད་དུ་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། དགེ་སློང་མས་ཤེས་བཞིན་དུ་དགེ་སློང་མའི་གནས་ངན་ལེན་གྱི་ལྟུང་བ་འཆབ་པར་བྱེད་ན་སྐྱ་རེངས་ཤར་ནས་ཕས་ཕམ་པར་འགྱུར་ལ། དགེ་སློང་གིས་བཅབས་ན་ལྟུང་བྱེད་དུ་འགྱུར་རོ་ཞེས་བྱ་བ་ཡིན་ནོ། །གང་གིས་དགེ་འདུན་ལྷག་མར་འགྱུར་བའི་ཞེས་བྱ་བ་ལ་སོགས་པ་ན་འདི་ཡང་ཉེས་བྱས་ལ་བསྒྲེ་བ་ལ་བསྟན་པའི་ཕྱིར་དེ་བཞིན་དུ་བྱ་བ་ལ་སོགས་པ་སྨོས་ཏེ། ཡང་
ཞེས་བྱ་བ་ནི་དྲི་བའོ། །དེས་ན་དོན་ནི་སྤྱིའི་ངོ་བོའི་གཞི་གང་ཞིག་ལྷག་པར་སྤྱད་པས་དགེ་འདུན་ལྷག་མའི་ལྟུང་བར་འགྱུར་བའི་གཞི་དེ་ཉིད་ཀྱིས་ལྟུང་བྱེད་ཀྱི་ལྟུང་བར་འགྱུར་རམ། དེ་བཞིན་དུ་གཞི་གང་གིས་དགེ་འདུན་ལྷག་མའི་ལྟུང་བར་འགྱུར་བའི་གཞི་དེ་ཉིད་ཀྱིས་ཅི་ཉེས་བྱས་ཀྱི་ལྟུང་བར་འགྱུར་རམ་ཞེས་བྱ་བ་ཡིན་ནོ། །འདི་ལ་ལན་ནི་འདི་ཡིན་ཏེ། ཐུན་མོང་མ་ཡིན་པའི་ཁུ་ཆུ་འབྱིན་པ་ལྷག་པར་སྤྱོད་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་དགེ་འདུན་ལྷག་མར་འགྱུར་བའི་གཞི་དེས་ལྟུང་བྱེད་དུ་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་གིས་ཆེད་དུ་བསམས་ཏེ་ཁུ་ཆུ་འབྱིན་པར་བྱེད་ན་དགེ་འདུན་ལྷག་མར་འགྱུར་ལ། དགེ་སློང་མས་ཕྱུང་ན་ལྟུང་བྱེད་དོ། །དགེ་སློང་མ་ཞིག་སྡེ་ཞིང་གནས་ན་དགེ་འདུན་ལྷག་མར་འགྱུར་ལ། དགེ་སློང་གནས་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །ཅི་གཞི་གང་གིས་ལྟུང་བྱེད་ཀྱི་ཞེས་བྱ་བ་ལ་སོགས་པ་ལ། ཇི་ལྟར་འདོད་བཞིན་ཞེས་བྱ་བ་ནི་ཇི་ལྟར་དགའ་བ་བཞིན་དུ་སྟེ། ཇི་ལྟར་བསམས་པ་བཞིན་དུ་ཞེས་བྱ་བའི་ཐ་ཚིག་གོ །འདི་ལ་དོན་ནི་གཞི་གང་གིས་གང་ཞིག་ལྷག་པར་སྤྱད་པས་ལྟུང་བྱེད་ཀྱི་ལྟུང་བར་འགྱུར་བའི་གཞི་དེ་ཉིད་ཀྱིས་ཅི་སོ་སོར་བཤགས་པར་བྱ་བའི་ལྟུང་བར་འགྱུར་རམ་ཞེས་བྱ་བ་དེ་ཇི་ལྟར་བསམས་པ་བཞིན་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཐུན་མོང་མ་ཡིན་པའི་ལྟུང་བ་ལྷག་པར་སྤྱོད་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་ལྟུང་བྱེད་ཀྱི་ལྟུང་བར་འགྱུར་བའི་གཞི་དེས་སོ་སོར་བཤགས་པར་བགྱི་བའི་ལྟུང་བར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་གིས་ཉེ་དུ་མ་ཡིན་པ་དག་ལས་ཁ་ཟས་བསོད་པ་བླངས་ན་ལྟུང་བྱེད་དུ་འགྱུར་ལ། དགེ་སློང་མས་བླངས་ན་སོ་སོར་བཤགས་པར་བྱ་བར་འགྱུར་རོ་ཞེས་བྱ་བ་ཡིན་ནོ། །ཅི་གཞི་གང་གིས་ལྟུང་བྱེད་ཀྱི་ཞེས་བྱ་བ་ལ་སོགས་པ་ལ། ཁྱོད་ཅེས་བྱ་བ་ནི་ཁྱོད་ལའོ། །ནུས་པ་ནི་མཐུའོ། །དེས་ན་ཚིག་གི་དོན་ནི། དགེ་སློང་གིས་གང་
ཞིག་ལྷག་པར་སྤྱད་པས་ལྟུང་བྱེད་ཀྱི་ལྟུང་བར་གསུངས་པ་དེས་ཅི་ཉེས་བྱས་ཀྱི་ལྟུང་བ་རྣམ་པར་གཞག་པ་སྲིད་དམ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཐུན་མོང་མ་ཡིན་པའི་ལྟུང་བྱེད་ལྷག་པར་སྤྱོད་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི་བཙུན་པ་གཞི་གང་གིས་ལྟུང་བྱེད་ཀྱི་ལྟུང་བར་འགྱུར་བའི་གཞི་དེས་ཉེས་བྱས་སུ་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་མས་རྩྭ་སྔོན་པོ་ཡོད་པའི་ཕྱོགས་སུ་བཤང་བ་དང་གཅི་བ་དག་བྱས་ན་ལྟུང་བྱེད་དུ་འགྱུར་ལ། དགེ་སློང་གིས་བྱས་ན་ཉེས་བྱས་སོ་ཞེས་བྱ་བ་ཡིན་ནོ། །གང་གིས་སོ་སོར་བཤགས་པ་ལ་སོགས་པ་ལ་སྲིད་དམ་ཞེས་བྱ་བ་ནི་བཏུབ་བམ་ཞེས་བྱ་བའོ། །བདག་གི་མདུན་དུ་ཞེས་བྱ་བ་ནི་བདག་གི་ཐད་དུའོ། །དེས་ན་དོན་ནི་རྣམ་པ་གང་གིས་སོ་སོར་བཤགས་པར་བྱ་བའི་ལྟུང་བར་རྣམ་པར་གཞག་པ་དེ་ཉིད་ཀྱིས་ཅི་ཉེས་བྱས་ཀྱི་ལྟུང་བར་འགྱུར་བ་སྲིད་དམ་ཞེས་བྱ་བ་དེ་དགེ་སློང་གལ་ཏེ་ཁྱོད་ལ་མཐུ་ཡོད་ན་ཁོ་བོའི་མངོན་དུ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་ཐུན་མོང་མ་ཡིན་པའི་སོ་སོར་བཤགས་པར་བྱ་བའི་ལྟུང་བའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་སོ་སོར་བཤགས་པར་འགྱུར་བའི་ལྟུང་བར་འགྱུར་བའི་གཞི་དེས་ཉེས་བྱས་སུ་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་གིས་ནགས་ཚལ་གྱི་བསེལ་བ་མ་བསྐོས་པར་ཀུན་དགའ་ར་བའི་ཕྱི་རོལ་དུ་བཅའ་བར་བྱ་བ་དང་བཟའ་པར་བྱ་བ་ལེན་ན་སོ་སོར་བཤགས་པར་བྱ་བར་འགྱུར་ལ། དགེ་སློང་མས་བླངས་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །ཇི་ལྟར་དགེ་སློང་ལུང་མ་བསྟན་པའི་ཞེས་བྱ་བ་ལ་སོགས་པའི་སེམས་གནས་ཞེས་བྱ་བའི་སྒྲ་ནི་གཉིས་ཀ་ལ་ཡང་སྦྱར་ཏེ། དགེ་བའི་སེམས་ལ་གནས་པ་དང༌། ལུང་དུ་མ་བསྟན་པའི་སེམས་ལ་གནས་པའི་ཞེས་བྱ་བའི་དོན་ཏོ། །ཕ་མ་ནི་ཕ་དང་མ་དག་གོ །མནར་མེད་པ་བྱ་བ་ནི་མཚམས་མེད་པར་བྱེད་པར་རོ། །མི་དགེ་བའི་སེམས་ལ་གནས་པ་ལ་མཚམས་མེད་པར་མ་གསུངས་ཞེས་བྱ་བར་སྦྱར་ཏེ། མི་དགེ་བས་སྨོས་པས་ནི་ལུང་དུ་མ་བསྟན་པའི་
སེམས་ལ་གནས་པ་བསྡུའོ། །འདི་ལ་དོན་གང་གི་ཚེ་དགེ་སློང་གིས་དགེ་བ་སྟེ། འབྲས་བུ་ཡིད་དུ་འོང་བ་དང་ཡིད་དུ་མི་འོང་བ་དང་བྲལ་བའི་སེམས་ཀྱིས་ཕ་དང་མ་སྲོག་དང་བྲལ་ན་དེའི་ཚེ་མཚམས་མེད་པ་ཡིན་པར་གསུངས་ཀྱི་མི་དགེ་བ་སྟེ། འབྲས་བུ་ཡིད་དུ་མི་འོང་བ་དང་ལུང་དུ་མ་བསྟན་པའི་སེམས་ཀྱིས་ནི་མ་ཡིན་ནོ་ཞེས་བྱ་བ་འདི་ལ་རྒྱུ་ཅི་ཡོད་ཅེས་པ་འདི་ཡིན་ནོ། །འདི་ལ་བསམ་པ་ནི་དེ་ནི་ཕ་དང་མ་ནད་ཚོར་བ་དྲག་པོ་ཉམས་སུ་མྱོང་བ་དག་བསོད་ནམས་ཀྱི་བློས་གསད་པ་ལ་དགོངས་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་ཅི་ལགས། དགེ་སློང་གིས་དགེ་བའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་ལ། མི་དགེ་བའི་སེམས་ཀྱིས་མ་སྲོག་དང་ཕལ་ན་ཡང་ཕས་ཕམ་པར་མི་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་མི་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཉེ་བ་འཁོར་ཡོད་དེ། དགེ་སློང་གིས་དགེ་བའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་ལ། མི་དགེ་བའི་སེམས་ཀྱིས་མ་སྲོག་དང་ཕྲལ་ན་ཡང་ཕམ་པར་མི་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་བ་ཡོད་དེ། དེ་བཞིན་དུ་མི་དགེ་བ་དང་ལུང་དུ་མ་བསྟན་པའི་སེམས་ཀྱིས་ཀྱང་རྒྱས་པར་བརྗོད་པར་བྱའོ། །བཙུན་པ་ཇི་ལྟར་དགེ་སློང་གིས་དགེ་བའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་འགྱུར་ལ་མཚམས་མཆིས་པའི་ཁན་མ་ཐོ་བའི་ལས་ཀྱིས་ཀྱང་རེག་པར་ཡང་འགྱུར་ལ། མི་དགེ་བའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་མི་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་མི་འགྱུར་ལགས། ཉེ་བ་འཁོར་འདི་ལྟར་དགེ་སློང་གིས་མ་ནད་པ་ཞིག་སྟེ་ཡུན་རིང་པོར་སྡུག་བསྔལ་བའི་ཚོར་བ་མི་ཟད་པ་རྩུབ་པ་དྲག་པ་ཡིད་དུ་མི་འོང་བ་མྱོང་པ། དེས་དེ་རྐྱེན་དེས་སྲོག་དང་ཕྲལ་ན་ཕས་ཕམ་པར་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་ཡང་འགྱུར་རོ། །
དེ་བཞིན་དུ་མདོ་བྱེད་པས་ཀྱང་ཕན་པར་འདོད་པ་ཉིད་ཀྱིས་འཆི་བའི་ཕྱིར་སྨན་མ་ཡིན་པ་བྱིན་པ་ལ་ནི་ན་སྨད་པ་མེད་དོ་ཞེས་བཤད་དོ། །འདི་ལྟར་དགེ་སློང་གིས་མ་ནད་པ་ལ་འབྲས་ཆན་མངར་ཐུག་གམ་འུ་ཤའམ་ཤ་བྱིན་པ་ལ་དེ་ཡང་རྐྱེན་དེས་དུས་ལས་འདས་ན་དེ་ལ་ཕས་ཕམ་པའི་ལྟུང་བར་ཡང་མི་འགྱུར་ལ་མཚམས་མེད་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་ཡང་མི་འགྱུར་རོ། །དེ་བཞིན་དུ་མདོ་བྱེད་པས་ཀྱང༌། མིད་པར་བྱ་བ་མི་འཕྲོད་པས་སྦྱིན་ནའོ་ཞེས་བཤད་དོ། །བཙུན་པ་ཇི་ལྟར་དགེ་སློང་གིས་མི་དགེ་བའི་སེམས་ཀྱིས་མ་སྲོག་དང་ཕྲལ་ན་ཕས་ཕམ་པར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་ལ། མི་དགེ་བའི་སེམས་ཀྱི་ས་མ་སྲོག་དང་ཕྲལ་ན་ཡང་ཕས་ཕམ་པར་མི་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་མི་འགྱུར་ལགས། ཉེ་བ་འཁོར་ཡོད་དེ། འདི་ལྟར་དགེ་སློང་གིས་ནོར་རམ་དབང་གིས་བསླུ་བའི་ཕྱིར་མ་སྲོག་དང་ཕྲལ་བ་ནི་ཕས་ཕམ་པར་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་རོ། །འདི་ལྟར་དགེ་སློང་གིས་མི་དགེ་བའི་སེམས་ཀྱིས་གནག་གམ་ལུག་གམ་ར་ལ་བསྣུན་པར་བྱས་ལ། ལས་དེ་ཡང་མ་ལ་བསྣུན་པ། དེ་ཡང་རྐྱེན་དེས་དུས་ལས་འདས་ལ་ཕས་ཕམ་པས་ལྟུང་བར་ཡང་མི་འགྱུར་བ་ལ་མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་ཡང་མི་འགྱུར་རོ། །བཙུན་པ་ཇི་ལྟར་དགེ་སློང་གིས་ལུང་དུ་མ་བསྟན་པའི་སེམས་ཀྱིས་མ་སྲོག་དང་ཕྲལ་ན་ཕས་ཕམ་པར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་ལ། ལུང་དུ་མ་བསྟན་པའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་མི་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་མི་འགྱུར་ལ། འདི་ལྟར་དགེ་སློང་གིས་མ་གསད་པའི་སྦྱོར་བ་བྱེད་ཅིང་དེས་མ་གསད་པའི་སྦྱོར་བ་བྱས་ནས་ཉལ་ལ་དེ་གཉིད་ལོག་པ་དང་མ་སྲོག་དང་ཕྲལ་ན་ཕས་ཕམ་པར་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་རོ། །དེ་ལ་དགེ་སློང་གིས་ལུང་དུ་མ་བསྟན་པའི་སེམས་ཀྱིས་ས་འམ་ཤིང་ངམ་ལོ་མའི་སྤྱིལ་བུ་ལ་བསྣུན་པར་བྱས་པ་ལས། དེ་ཡང་མ་ལ་བསྣུན་ལ་དེ་ཡང་རྐྱེན་
དེས་དུས་ལས་འདས་ན་དེ་ལ་ཕས་ཕམ་པའི་ལྟུང་བར་ཡང་མི་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་ཡང་མི་འགྱུར་ཏེ། ཕ་དང་དགྲ་བཅོམ་པ་སྲོག་དང་འབྲལ་བར་བྱད་ན་ཡང་དེ་བཞིན་དུ་བརྗོད་པར་བྱའོ་ཞེས་བྱ་བ་ཡིན་ནོ། །དགེ་སློང་རུང་བ་གནས་གཅིག་དང་ཞེས་བྱ་བ་ལ་སོགས་པ་ལ་རུང་བ་ནི་ཚུལ་ཁྲིམས་དང་ལྟ་བ་དང་ལྡན་པ་སྟེ་ཚོགས་ཀྱི་ཁ་བསྐང་བར་འོས་པ་ཞེས་བྱ་བའི་ཐ་ཚིག་གོ །དེ་ནི་གནས་ཀྱང་ཡིན་ལ་གཅིག་ཀྱང་ཡིན་པས་གནས་གཅིག་གོ །དེ་ནི་མཚམས་ཀྱང་ཡིན་ལ་གཅིག་ཀྱང་ཡིན་པས་མཚམས་གཅིག་གོ ། གནས་གཅིག་མཚམས་གཅིག་ནི་གནས་གཅིག་དང་མཚམས་གཅིག་གོ །གནས་གཅིག་དང་མཚམས་གཅིག་ན་གནས་པས་ན་གནས་གཅིག་དང་མཚམས་གཅིག་ན་གནས་པ་སྟེ་དེ་ཡོད་པ་བཞིན་དུའོ། །གནས་གཅིག་སྨོས་པས་ནི་གནས་མང་པོ་བཀག་གོ །གནས་གཅིག་པ་ཉིད་ཡིན་ཡང་རེས་འགའ་བར་དུ་ཆུ་ལ་སོགས་པས་རྣམ་པར་ཆོད་པས་མཚམས་ཐ་དད་པ་ཉིད་དུ་ཡང་འགྱུར་བས་དེའི་ཕྱིར་མཚམས་གཅིག་ཅེས་སྨོས་སོ། །དེས་ན་མཚམས་ཐ་དད་པ་མ་ཡིན་པའི་གནས་གཅིག་ན་གནས་པའི་གནས་པ་ཞེས་བྱ་བའི་དོན་ཏོ། །དེའི་ཚིག་ཅེས་བྱ་བ་ནི་བཤད་མ་ཐག་པའི་དགེ་སློང་གི་ཚིག་གི་ངག་སྟེ། འདུན་པ་བྱིན་པ་ཞེས་བྱ་བའི་ཐ་ཚིག་སྟེ་དེ་མེད་པར་རོ། །ཉེས་བྱེད་མིན་ཞེས་བྱ་བ་ནི་ལྟུང་བ་མེད་པར་ཏེ་ཚུལ་ཁྲིམས་དང་ལྟ་བ་དང་ལྡན་པ་འོས་པ་མཚམས་ཀྱི་ནང་ན་གནས་པའི་འདུན་པ་མ་བྱིན་པ་ལ་སོགས་པའི་ལས་དེས་བསྙེན་པར་རྫོགས་པ་ལ་སོགས་པ་ནི་ལྟུང་བ་མེད་པ་ཞེས་བྱ་བའི་ཐ་ཚིག་གོ །འདི་ལ་གཞན་གྱི་བསམ་པ་ནི་གང་གི་ཚེ་མཚམས་དེ་ན་འདུག་པ་ཚོགས་ཀྱི་ཁ་བསྐང་བར་འོས་པ་ལུས་སམ་འདུན་པའི་སྒོ་ནས་ཚོགས་པར་མ་ཞུགས་པ་དེ་ལས་གཞན་པའི་དགེ་སློང་དགེ་འདུན་དུ་གྱུར་པས་གསོལ་བ་ལ་སོགས་པའི་ལས་བྱས་ན་དེའི་ཚེ་མི་མཐུན་པ་ཉིད་ཀྱིས་ལས་སུ་མི་འགྱུར་རོ་ཞེས་བྱ་བ་དེ་ནི་ལེགས་པར་གྲགས་ན། འོན་ཀྱང་གང་གི་ཚེ་དགེ་སློང་དེ་ལྟ་བུ་ཡོད་བཞིན་དུ་དགེ་འདུན་གྱི་ལས་བྱས་ན་དེའི་ཚེ་ལྟུང་བ་མེད་དོ་ཞེས་གསུངས་སོ་ཞེས་བྱ་བ་དེ་གོ་ཇི་ལྟ་བུ་ཞིག་ཅེས་བྱ་བ་ཡིན་ནོ། །འདི་ལ་བཤད་པ་ནི་འདི་ཡིན་ཏེ། དེ་ནི་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་དབང་དུ་མཛད་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་འདུན་གྱིས་དགེ་སློང་དང་པོ་ནས་མ་བསྙིལ་བར་མཚམས་ཀྱི་ནང་ན་མཚུངས་པར་གནས་པར་གྱུར་པ་དེའི་ཚེ་ཚིག་མཆིས་པར་ལས་ཐམས་ཅད་བགྱིས་ན་བགྱིས་པ་ཞེས་ཀྱང་བགྱི་ཞིང་ལྟུང་བ་ཡང་མ་མཆིས་པར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡིན་ནའོ། །ངས་འདི་སྐད་དུ་མཽད་གལ་གྱི་བུ་དེ་ལྟ་བས་ན་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་ཐོན་ཅིག་ཅེས་བཀའ་སྩལ་ཏོ། །སོ་སོར་ཐར་པ་སྟོན་པར་མཛད་པ་དེ་བཞིན་གཤེགས་པ་བྱོན་ཏོ་ཞེས་ནི་བཀའ་མ་སྩལ་ཏོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། རྒྱལ་བ་ནི་མི་མཐུན་པ་བྱེད་པ་ཉིད་མ་ཡིན་ནོ། །ཁ་སྐོང་པར་བྱེད་པ་ཉིད་ཀྱང་མ་ཡིན་ནོ་ཞེས་བཤད་དོ། །ཁྱིམ་པ་གནས་བཞིན་དགེ་འདུན་གྱིས། །ཞེས་བྱ་བ་ལ་སོགས་པ་ལ། ཁྱིམ་པ་ནི་ཁྱིམ་ཅན་ཏེ་འདི་ལ་ཁྱིམ་ཞེས་བྱ་བ་ཁང་ཁྱིམ་ཡོད་པས་སོ། །གནས་བཞིན་ཞེས་བྱ་བ་ནི་འཁོར་བཞིན་དུ་སྟེ་འདུག་བཞིན་དུ་ཞེས་བྱ་བའི་ཐ་ཚིག་གོ །དགེ་འདུན་གྱིས་ཞེས་བྱ་བ་ནི་བཞིའི་ཚོགས་ལ་སོགས་པའི་དགེ་འདུན་གྱིས་སོ། །ལས་ཤིག་བྱས་ན་ཞེས་བྱ་བ་ནི་ལས་བརྒྱ་རྩ་གཅིག་ཉམས་སུ་མྱོང་བར་བྱས་ན་སྟེ། ལས་ཀྱང་བྱས་པར་འགྱུར་ཞེས་བྱ་བ་དང་འདིར་སྦྱར་རོ། །དེ་ཡིས་ཞེས་བྱ་བ་ནི་ཁྱིམ་པ་འདུག་པར་གྱུར་བའི་ལས་ཀྱིས་སོ། །ལས་བྱས་པ་ནི་ཆོས་དང་མཐུན་པར་ལས་བྱས་པའི་ཕྱིར་ཏེ། དགེ་འདུན་གྱི་ལས་ཀྱང་བྱས་པར་འགྱུར་ཞིང་ཞེས་བྱ་བར་སྦྱར་རོ། །ཡང་ཞེས་བྱ་བ་ནི་བསྡུ་བའོ། །འདི་ལ་གཞན་གྱི་བསམ་པ་ནི་བཅོམ་ལྡན་འདས་ཀྱིས་ཐམས་ཅད་ཚུལ་ཁྲིམས་ཡོངས་སུ་དག་པ་དང༌། ལྟ་བ་མཚུངས་པ་དག་དང་ལྷན་ཅིག་གསོལ་བ་དང༌། གསོལ་བ་དང་གཉིས་དང་གསོལ་བ་དང་བཞིའི་ལས་བྱ་བར་གསུངས་ཀྱི་ཁྱིམ་པ་འདུག་པ་ལ་ནི་མ་ཡིན་ནོ་ཞེས་བྱ་བ་ལ་སོགས་པ་གསུངས་ན། འོན་ཀྱང་བཅོམ་ལྡན་འདས་ཀྱིས་ཁྱིམ་པ་འདུག་བཞིན་དུ་དགེ་སློང་དག་གི་ལས་བྱས་པ་ཞེས་ཀྱང་བྱ་ལ་ལྟུང་བ་ཡང་མེད་དོ་ཞེས་གསུངས་པ་དེ་ཇི་ལྟ་བུ་ཡིན་པ་
ཁོ་བོ་ལ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་རྒྱལ་པོ་དད་པ་བསྐྱེད་པའི་ཕྱིར་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་བཅོམ་ལྡན་འདས་ཀྱིས་ཁྱིམ་པ་འདུག་པར་དགེ་འདུན་གྱིས་གསོ་སྦྱོང་མི་བྱའོ་ཞེས་གསུངས་པ་གང་ལགས། ཁྱིམ་པ་མཆིས་བཞིན་དུ་དགེ་འདུན་གྱིས་གསོ་སྦྱོང་བགྱི་ཞིང་སོ་སོར་ཐར་པའི་མདོ་གདོན་པ་བཏོན་ན་བཏོན་པ་ཞེས་ཀྱང་བགྱི་ལ། ལྟུང་བ་ཡང་མ་མཆིས་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། ངས་འདི་སྐད་དུ་དགེ་སློང་དག་ཁྱེད་ཀྱིས་རྒྱལ་པོའི་ཁྲོམ་རྣམས་སོགས་ལ་རྒྱལ་པོ་གསལ་རྒྱལ་གྱི་མདུན་དུ་སོ་སོར་ཐར་པ་ཐོན་ཅིག་དང་དེ་དད་པར་འགྱུར་རོ་ཞེས་བཀའ་སྩལ་ཏོ་ཞེས་བྱ་བ་ཡིན་ནོ། །དེ་བཞིན་དུ་འདིར་གཞུང་གཞན་ནི། །ཀུན་དགའ་བོ་ཁྱོད་ཀྱིས་ཉེས་ཏེ་གལ་ཏེ་རྒྱལ་པོ་གཟུགས་ཅན་སྙིང་པོས་སོ་སོར་ཐར་པ་ཐོས་པར་གྱུར་ན་ལྷག་པར་དད་པར་འགྱུར་ཞིང་དད་ནས་ཀྱང་དད་པའི་ལྷག་པའི་བྱ་བ་བྱེད་པར་འགྱུར་བ་གང་ཡིན་པ་དེ་དག་གནས་ཡོད་དོ། །ཀུན་དགའ་བོ་དེ་ལྟ་བས་ན་རྗེས་སུ་གནང་གི་སྐྱེ་བོ་གཙོ་བོ་དད་པ་ཅན་དེ་ལྟ་བུ་གང་དག་ཡིན་པ་དེ་དག་ལ་བསྒྲགས་པར་བྱའོ། །འདི་ལ་ཁ་ཅིག་དབང་ཕྱུག་ལགས་ན་དེ་དག་དད་པ་ཅན་མ་ལགས་སོ། །ཁ་ཅིག་ནི་དད་པ་ཅན་ལགས་ལ་དེ་དག་དབུལ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དག་ལ་ཡང་བསྒྲགས་པར་བྱའོ་ཞེས་གསུངས་པ་ཡིན་ནོ། །དེ་བཞིན་དུ་མདོ་བྱེད་པས་ཀྱང༌། དད་པ་ཅན་དང་གཙོ་བོ་དག་དགའ་བར་འགྱུར་བ་ལྟ་ན་ཆོ་ག་རྗེས་སུ་བསྒྲགས་པ་ལ་ཁ་ན་མ་ཐོ་བ་མེད་དོ། །དྲུང་དུ་གསོ་སྦྱོང་བྱེད་པ་ལ་ཡང་ངོ་ཞེས་བཤད་དོ། །དགེ་དང་ལུང་མ་བསྟན་སེམས་ལ། །ཞེས་བྱ་བ་ལ་སོགས་པ་ལ་སེམས་ཞེས་བྱ་བའི་སྒྲ་དང་གནས་པ་ཞེས་བྱ་བའི་སྒྲ་ནི་གཉིས་ཀ་དང་སྦྱར་བར་བྱ་སྟེ། དེས་ན་ཚིག་གི་དོན་ནི་དགེ་བའི་སེམས་ལ་གནས་པ་དང་ལུང་དུ་མ་བསྟན་པའི་སེམས་ལ་གནས་པ་ལ་ཞེས་བྱ་བར་འགྱུར་རོ། །དེ་ལ་དགེ་བའི་སེམས་ནི་དད་པ་ལ་སོགས་པ་དང་མཚུངས་པར་ལྡན་པའི་སེམས་ཏེ། རྣམ་པར་སྨིན་པ་ཡིད་དུ་འོང་བ་ཅན་ཞེས་བྱ་བའི་དོན་ཏོ། །ལུང་དུ་མ་བསྟན་
པའི་སེམས་ནི་བཟོ་འདྲུབ་པ་ལ་སོགས་པ་དང་མཚུངས་པར་ལྡན་པའི་སེམས་ཏེ། རྣམ་པར་སྨིན་པ་ཡིད་དུ་འོང་བ་དང་མི་འོང་བ་དང་བྲལ་ཞེས་བྱ་བའི་ཐ་ཚིག་གོ །དྲི་ཡིས་བདག་གི་བདག་ཏུ་ཇི་ལྟར་འདོད་པར་སྨྲས་ཞེས་བྱ་བར་སྦྱར་ཏེ། བདག་ཅེས་བྱ་བ་ནི་བདག་གིའོ། །ཇི་ལྟར་འདོད་པའི་ཞེས་བྱ་བ་ནི་དགའ་བར་རོ། །འདི་ལ་གཞན་གྱིས་བསམས་པ་ནི་འབྲས་བུ་ནི་རྒྱུ་དང་མཐུན་པར་འགྱུར་རོ་ཞེས་འབྱུང་བས་རེ་ཞིག་མི་དགེ་བའི་སེམས་ལ་གནས་པ་ལ་ནི་ལྟུང་བ་འབྱུང་བར་མཐོང་སྟེ་སཱ་ལུའི་ས་བོན་ལས་སཱ་ལུའི་མྱུ་གུ་ལྟ་བུ་ཡིན་ན། དེས་ན་ཅི་དགེ་བ་དང་ལུང་དུ་མ་བསྟན་པའི་སེམས་ལ་ཡང་དེ་འབྱུང་ངམ་ཞེས་བྱ་བ་དེ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། མཆོད་རྟེན་གྱི་འཁོར་སར་རྩྭ་སྔོམ་མེད་པར་བྱེད་པ་དང་བསམས་བཞིན་མ་ཡིན་པར་བསླབ་པའི་གཞི་ལས་འདས་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་ཅི་ལགས་དགེ་སློང་དགེ་བའི་སེམས་དང་ལྡན་པ་ལ་ལྟུང་བ་འབྱུང་བ་ལགས་སམ། འོན་ཏེ་མི་དགེ་བའི་སེམས་དང་ལྡན་པའམ། འོན་ཏེ་ལུང་དུ་མ་བསྟན་པའི་སེམས་དང་ལྡན་པ་ལ་ལྟུང་བ་འབྱུང་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དགེ་སློང་དགེ་བའི་སེམས་དང་ལྡན་པ་ལ་ཡང་ལྟུང་བ་འབྱུང་ལ། མི་དགེ་བའི་སེམས་དང་ལྡན་པ་ལ་ཡང་ལྟུང་བ་འབྱུང༌། ལུང་དུ་མ་བསྟན་པའི་སེམས་དང་ལྡན་པ་ལ་ཡང་འབྱུང་ངོ༌། །དགེ་བའི་སེམས་དང་ལྡན་པ་ལ་ཇི་ལྟ་བུ་ཞེ་ན། འདི་ལྟར་དགེ་སློང་གསར་བུ་བསླབ་པའི་ལོ་རྒྱུས་ཀྱིས་མཁས་པ་མཆོད་རྟེན་གྱི་འཁོར་སར་རྩྭ་སྔོན་པོ་མེད་པར་བྱེད་ཅིང་འཆག་པའི་སྲང་དག་ནས་མེ་ཏོག་དག་འཐོག་པར་བྱེད་པ་སྟེ། དེ་ལྟར་ན་དགེ་བའི་སེམས་དང་ལྡན་པ་ལ་འབྱུང་བར་འགྱུར་རོ། །མི་དགེ་བའི་སེམས་དང་ལྡན་པ་ལ་ཇི་ལྟ་བུ་ཞེ་ན། གང་ཞིག་བསམས་བཞིན་དུ་སངས་རྒྱས་ཀྱི་བསླབ་པའི་གཞི་བཅས་པ་ལས་འདའ་བར་བྱེད་པ་སྟེ། དེ་ལྟར་ན་མི་དགེ་བའི་སེམས་དང་ལྡན་པ་ལ་འབྱུང་བར་འགྱུར་བ་ཡིན་ནོ། །ལུང་དུ་མ་བསྟན་པའི་སེམས་དང་ལྡན་པ་ལ་ཇི་ལྟ་བུ་ཞེ་ན། གང་ཞིག་བསམས་བཞིན་དུ་མ་ཡིན་པར་སངས་རྒྱས་ཀྱི་བསླབ་པའི་གཞི་བཅས་པ་ལས་འདའ་བར་བྱེད་པ་སྟེ། དེ་ལྟར་ན་ལུང་དུ་
མ་བསྟན་པའི་སེམས་དང་ལྡན་པ་ལ་འབྱུང་བར་འགྱུར་རོ་ཞེས་བྱ་བ་ཡིན་ནོ། །དེ་ཉིད་ཀྱི་ཕྱིར། རབ་ཏུ་འཇུག་བྱེད་དགེ་སོགས་ལས། །རྗེས་སུ་འཇུག་པའང་རྣམ་པ་གསུམ། །ཞེས་བཤད་དོ། །མི་དགེ་བའི་སེམས་དང་ལྡན་པ་ལས་ལྟུང་བ་འབྱུང་བ་ལ་ནི་ཐེ་ཚོམ་མེད་པས་འདིར་དྲི་བ་མ་བྱས་སོ་ཞེས་བྱ་བར་ཤེས་པར་བྱའོ། །ཅི་དགྲ་བཅོམ་པ་ལ་ལྟུང་བ་འབྱུང་ངམ་ཞེས་བྱ་བ་ལ་སོགས་པ་ནི་དགྲ་བཅོམ་པ་ལ་ལྟུང་བ་འབྱུང་ངམ་ཞེས་བྱ་བ་ཁོ་བོའི་མདུན་དུ་འབོད་དེ་སྨྲོས་ཤིག །འདི་ལྟར་ཁོ་བོ་ལ་ནི་དགྲ་བཅོམ་པའི་ཡུལ་འདི་ལ་མི་དགེ་བའི་ཆོས་ཐམས་ཅད་སྤངས་པའི་ཕྱིར་ལྟུང་བ་འབྱུང་ངོ་ཞེས་བྱ་ཏེ་པོར་ཐེ་ཚོམ་ཡོད་དོ་ཞེས་བྱ་བའི་ཐ་ཚིག་གོ །འབྱུང་ངམ་ཞེས་བྱ་བ་ནི་སྐྱེ་འམ་ཞེས་པ་སྟེ། དགྲ་བཅོམ་པའི་ཡུལ་འདི་ལ་ལྟུང་བ་འབྱུང་ན་བདག་ལ་ཐེ་ཚོམ་བརྟན་པོ་ཡོད་ཀྱིས་ཞེས་བྱ་བར་སྦྱར་རོ། །འདི་ལ་དོན་ནི་རེ་ཞིག་མི་དགེ་བའི་སེམས་དང་ལྡན་པ་ལ་ནི་ལྟུང་བ་འབྱུང་ན་དགྲ་བཅོམ་པའི་སེམས་ནི་མི་དགེ་བའི་སེམས་ཐམས་ཅད་སྤངས་པ་ཁོ་ན་ཡིན་ན་དེ་ཅི་འདི་ལ་ལྟུང་བ་འབྱུང་ངམ། འོན་ཏེ་མ་ཡིན་ཞེས་བྱ་བ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ལུང་དུ་མ་བསྟན་པའི་སེམས་དང་ལྡན་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་ཅི་ལགས་དགེ་སློང་དགྲ་བཅོམ་པ་དགེ་བའི་སེམས་དང་ལྡན་པ་ལ་ལྟུང་བ་འབྱུང་བར་འགྱུར་རམ། འོན་ཏེ་ལུང་དུ་མ་བསྟན་པའི་སེམས་དང་ལྡན་པ་ལ་འབྱུང་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དགྲ་བཅོམ་པ་ལ་ལྟུང་བ་གང་ཅུང་ཟད་ཅི་འབྱུང་བ་དེ་ཐམས་ཅད་ནི་ལུང་དུ་མ་བསྟན་པའི་སེམས་དང་ལྡན་པ་ལ་འབྱུང་བར་བརྗོད་པར་བྱའོ། །བཙུན་པ་ཇི་ལྟར་དགེ་སློང་དགྲ་བཅོམ་པ་ལ་ལྟུང་བ་གང་ཅུང་ཟད་ཅི་འབྱུང་བ་ཐམས་ཅད་ལུང་དུ་མ་བསྟན་པའི་སེམས་དང་ལྡན་པ་ལ་འབྱུང་བར་བརྗོད་པར་བགྱི་ལགས་སམ། ཉེ་བ་འཁོར་འདི་ལྟར་བརྒྱ་ལ་ངེས་འགའ་ཞིག་དྲན་པ་བརྗེད་ནས་གོས་རུང་བ་མ་ཡིན་པ་ཅི་ཙམ་འདོད་པ་འཆང་ངམ། སྣམ་སྦྱར་མེད་པར་གྲོང་དུ་འཇུག་གམ། མགྲོན་དུ་མ་བོས་པར་གྲོང་དུ་འགྲོ་འམ། ཡང་ཡང་ཟའམ། འདུས་ཤིང་ཟ་འམ། གཉིད་ལོག་པ་ལས་མལ་སྟན་མཐོན་པོ་དང་མལ་སྟན་ཆེན་པོ་
ལ་བཞག་གམ། བུད་མེད་ཀྱི་མལ་དུ་བསྙལ་ལམ། ནུབ་གསུམ་པ་ལ་བསྙེན་པར་མ་རྫོགས་པ་དག་ཕྱུང་སྟེ་ཉལ་བ་ལས་དེའི་འོག་ཏུ་བསྙེན་པར་མ་རྫོགས་པ་དག་ཞུགས་ན་དེ་དག་དང་བསད་ནས་ལྟུང་བ་དེ་ཆོས་བཞིན་དུ་སླར་འཆོས་པ་སྟེ། དེ་ལྟར་ན་དགེ་སློང་དགྲ་བཅོམ་པ་ལ་ལྟུང་བ་གང་ཅུང་ཟད་ཅིག་འབྱུང་བ་དེ་ཐམས་ཅད་ནི་ལུང་དུ་མ་བསྟན་པའི་སེམས་དང་ལྡན་པ་ལ་འབྱུང་བར་བརྗོད་པར་བྱའོ་ཞེས་བྱ་བ་ཡིན་ནོ། །དགེ་འདུན་དབྱེན་བྱེད་གང་ཡང་རུང༌། །ཞེས་བྱ་བ་ལ་སོགས་པ་ལ། གང་དུ་ཡང་རུང་ཞེས་བྱ་བ་ནི་མིང་མ་སྨོས་པའོ། །བསྐལ་པ་ནི་བར་གྱི་བསྐལ་པ་ལ་སོགས་པ་དུས་ཀྱི་བྱེ་བྲག་གོ །དེར་གནས་པས་ན་བསྐལ་པར་གནས་པ་སྟེ། མནར་མེད་པའི་བར་གྱི་བསྐལ་པར་གནས་པའི་ཕྱིར་རོ་སྙམ་དུ་བསམས་པ་ཡིན་ནོ། །བྱམས་ན་ཞེས་བྱ་བ་ནི་འགྲོགས་བཤེས་ཡིན་ཏེ། བཤེས་པ་ཡིན་ན་ཞེས་བྱ་བའི་ཐ་ཚིག་གོ །ཐེ་ཚོམ་མྱུར་དུ་སོལ་ཅིག་ཅེས་བྱ་བར་སྦྱར་ཏེ། མྱུར་དུ་ཞེས་བྱ་བ་ནི་སྐྱེན་པར་རོ། །སོལ་ཅིག་ཅེས་བྱ་བ་ནི་བོར་ཅིག་པའོ། །འདི་ལ་གཞན་གྱི་བསམ་པ་ནི་གང་ལ་ལ་དགེ་འདུན་གྱི་དབྱེན་བྱེད་པ་དེ་ཐམས་ཅད་བསྐལ་པར་གནས་པར་འགྱུར་རོ་ཞེས་བྱ་བ་དེ་ནི་ངེས་ན། ཅི་དགེ་འདུན་གྱི་དབྱེན་བྱེད་པ་ཡིན་ལ་བསྐལ་པར་གནས་པ་ཡང་མ་ཡིན་ནོ་ཞེས་བྱ་བ་དེ་སྲིད་པ་ཡོད་དམ་ཞེས་བྱ་བ་དེ་ཁོ་བོའི་ཐེ་ཚོམ་དེ་ལྟ་བུ་སོལ་ཅིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། མུ་བཞི་སྲིད་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། གང་ལ་ལ་དགེ་འདུན་གྱི་དབྱེན་བྱེད་པ་དེ་ཐམས་ཅད་བསྐལ་པར་གནས་པ་ཡང་ཡིན་ནམ། གང་ལ་ལ་བསྐལ་པར་གནས་པ་དེ་ཐམས་ཅད་ཀྱིས་དགེ་འདུན་གྱི་དབྱེན་བྱེད་པ་ཡང་ཡིན་ནམ་ཞེ་ན། དགེ་འདུན་གྱི་དབྱེན་བྱེད་པ་ཡིན་ལ་བསྐལ་པར་གནས་པ་མ་ཡིན་པ་ཡོད། བསྐལ་པར་གནས་པ་ཡིན་ལ་དགེ་འདུན་གྱི་དབྱེན་བྱེད་པ་མ་ཡིན་པ་ཡོད། དགེ་འདུན་གྱི་དབྱེན་བྱེད་པ་ཡིན་ལ་བསྐལ་པར་གནས་པ་ཡིན་པ་ཡང་ཡོད། དགེ་འདུན་གྱི་དབྱེན་བྱེད་པ་ཡང་མ་ཡིན་ལ་བསྐལ་པར་གནས་པ་ཡང་མ་ཡིན་པ་ཡང་ཡོད་དོ། །ཉེ་བ་འཁོར་དགེ་འདུན་གྱི་དབྱེན་བྱེད་པ་ཡིན་ལ་བསྐལ་པར་གནས་པ་མ་ཡིན་པ་ཡང་གང་ཞེ་ན། གང་གིས་ཆོས་མ་ཡིན་
པ་ལ་ཆོས་སུ་འདུ་ཤེས་ཤིང་བྱེ་བ་ལ་ཡང་ཆོས་མ་ཡིན་པར་འདུ་ཤེས་པས་དགེ་འདུན་ཕྱེ་བར་གྱུར་པ་སྟེ། འདི་ནི་དགེ་འདུན་གྱི་དབྱེན་བྱེད་པ་ཡིན་ལ་བསྐལ་པར་གནས་པ་མ་ཡིན་ནོ། །བསྐལ་པར་གནས་པ་ཡིན་ལ་དགེ་འདུན་གྱི་དབྱེན་བྱེད་པ་མ་ཡིན་པ་གང་ཞེ་ན། ཀླུའི་རྒྱལ་པོ་ས་སྲུང་གི་བུ་དང༌། ཀླུའི་རྒྱལ་པོ་རབ་གནས་དང༌། ཀླུའི་རྒྱལ་པོ་ཡིད་ལས་བྱུང་དང༌། ཀླུའི་རྒྱལ་པོ་དགའ་བོ་དང༌། ཉེ་དགའ་བོ་དང༌། ཀླུའི་རྒྱལ་པོ་ལ་བ་ཅན་དང༌། མགྱོགས་འགྲོ་དག་དང༌། ཀླུའི་རྒྱལ་པོ་གཤིན་རྗེ་དང༌། ཚངས་རིས་ཀྱི་ལྷ་རྣམས་ཏེ། འདི་དག་ནི་བསྐལ་པར་གནས་པ་ཡིན་ལ་དགེ་འདུན་གྱི་དབྱེན་བྱེད་པ་མ་ཡིན་ནོ། །དགེ་འདུན་གྱི་དབྱེན་བྱེད་པ་ཡང་ཡིན་ལ་བསྐལ་པར་གནས་པ་ཡང་ཡིན་པ་གང་ཞེ་ན། ལྷ་སྦྱིན་ཏེ། འདི་ནི་དགེ་འདུན་གྱི་དབྱེན་བྱེད་པ་ཡང་ཡིན་ལ་བསྐལ་པར་གནས་པ་ཡང་ཡིན་ནོ། །དགེ་འདུན་གྱི་དབྱེན་བྱེད་པ་ཡང་མ་ཡིན་ལ་བསྐལ་པར་གནས་པ་ཡང་མ་ཡིན་པ་གང་ཞེ་ན། རྣམ་པ་དེ་དག་མ་གཏོགས་པའོ་ཞེས་བྱ་བ་ཡིན་ནོ། །དགེ་སློང་མིན་པས་ལྟུང་བྱས་ལ། །ཞེས་བྱ་བ་ལ་སོགས་པ་ལ། དགེ་སློང་མིན་ཞེས་བྱ་བ་ནི་དགེ་སློང་ཉིད་དང་བྲལ་བས་སོ། །ལྡང་འགྱུར་ཞེས་བྱ་བ་ནི་ལྟུང་བ་མེད་པའོ། །དང་ཞེས་བྱ་བ་ནི་དོན་གཞན་དྲང་པའི་ཕྱིར་ཏེ་འོག་མ་དག་ལ་ཡང་དེ་བཞིན་ནོ། །བཟློག་པ་ནི་ཇི་སྐད་བཤད་པ་ལས་བཟློག་པའོ། །དེ་ལ་བཟློག་པའི་དོན་ནི། །དགེ་སློང་གིས་ནི་ལྟུང་བྱས་ལ། །དགེ་སློང་མིན་པས་ཇི་ལྟར་ལྡང༌། །ཞེས་བྱ་བ་འདི་ཡིན་ནོ། །ཐེ་ཚོམ་མྱུར་དུ་སོལ་ཅེས་བྱ་བར་སྦྱར་ཏེ། མྱུར་དུ་ཞེས་བྱ་བ་ནི་མི་ཐོགས་པར་རོ། །ཆོད་ཅེས་བྱ་བ་ནི་སོལ་ཅིག་པའོ། །འདི་ལ་དོན་ནི་གང་གི་ཚེ་དགེ་སློང་མ་ཡིན་པ་དགེ་སྦྱོང་ལ་སོགས་པས་ལྟུང་བ་ལྷག་པར་སྤྱད་པ་དེའི་ཚེ། དགེ་སློང་དུ་གྱུར་ནས་ཇི་ལྟར་ལྡང་བར་གསུངས་པའམ། གང་གི་ཚེ་དགེ་སློང་གིས་ལྟུང་བ་བྱུང་བ་དེའི་ཚེ་དགེ་སློང་མ་ཡིན་པར་གྱུར་ནས་ལྟུང་བ་ལས་ཇི་ལྟར་ལྡང་བར་འགྱུར་ཞེས་བྱ་བ་བདག་གི་ཐེ་ཚོམ་དེ་ལྟ་བུ་མྱུར་དུ་སོལ་ཅིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། མཚན་གྱུར་པའི་དབང་དུ་མཛད་ནས་དེ་སྐད་དུ་གསུངས་པའི་ཚེ་ཡིན་ནོ། །དེ་བཞིན་དུ་འདིར་གཞུང་ནི། བཙུན་
པ་དགེ་སློང་མ་ལགས་པས་ལྟུང་བ་བྱུང་ལ་དགེ་སློང་དུ་གྱུར་ནས་ལྡང་བར་འགྱུར་ཞིང༌། དགེ་སློང་གིས་ལྟུང་བ་ཕྱུང་ལ་དགེ་སློང་མ་ལགས་པར་གྱུར་པས་ལྡང་བར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དོ། །དགེ་སློང་མ་ལགས་པས་ལྟུང་བ་བྱུང་ལ་དགེ་སློང་དུ་གྱུར་པས་ལྡང་བར་འགྱུར་བ་ཇི་ལྟ་བུ་ལགས། འདི་ལྟར་དགེ་སློང་མས་ཐུན་མོང་མ་ཡིན་པའི་དགེ་འདུན་ལྷག་མའི་ལྟུང་བ་ཕྱུང་ལ་དེའི་མཚན་གྱུར་ནས་དགེ་སློང་དུ་རེད་ན་ལངས་པ་ཞེས་བརྗོད་པར་བྱ་སྟེ། དེ་ལྟར་ན་དགེ་སློང་མ་ཡིན་པས་ལྟུང་བ་ཕྱུང་ལ་དགེ་སློང་དུ་གྱུར་ནས་ལྡང་བ་ཡིན་ནོ། །དགེ་སློང་གིས་ལྟུང་བ་ཕྱུང་ལ་དགེ་སློང་མ་ལགས་པར་གྱུར་ནས་ལྡང་བ་ཇི་ལྟ་བུ་ལགས། འདི་ལྟར་དགེ་སློང་གིས་ཐུན་མོང་མ་ཡིན་པའི་དགེ་འདུན་ལྷག་མའི་ལྟུང་བ་ཕྱུང་ལ་དེའི་ཚེ་མཚན་གྱུར་ཏེ། མཚན་གྱུར་ནས་དགེ་སློང་མར་རེད་ན་ལངས་བ་ཞེས་བརྗོད་པར་བྱ་བ་སྟེ། དེ་ལྟར་དགེ་སློང་གིས་ལྟུང་བ་ཕྱུང་ལ་དགེ་སློང་མ་ཡིན་པར་རེད་ནས་ལྡང་བ་ཡིན་ནོ་ཞེས་བྱ་བ་ཡིན་ནོ། །དགེ་སློང་གཉིད་མ་ལོག་པའི་ཚེ་ཞེས་བྱ་བ་ལ་སོགས་པ་ལ། གཉིད་མ་ལོག་པ་ནི་མ་ཉལ་བའོ། །བྱས་ནས་ཞེས་བྱ་བ་ནི་ལྟུང་བ་ཞེས་བྱ་བར་སྦྱར་རོ། །གཉིད་ལོག་ནས་ཞེས་བྱ་བ་ནི་ཉལ་ནའོ། །དང་ཞེས་བྱ་བའི་སྒྲས་ནི་བཟློག་པ་ཡང་གསལ་བར་སྨྲོས་ཤིག་ཅེས་བྱ་བ་བསྡུས་ཏེ། བཟློག་པ་ནི་བཤད་པ་ལས་བཟློག་པའོ། །དེ་ལས་བཟློག་པའི་དོན་ནི། དགེ་སློང་གཉིད་ལོག་ལྟུང་བྱས་ནས། །སད་ནས་ཇི་ལྟར་ལྡང་བར་འགྱུར། །དྲི་ཡིས་ཁྱོད་ནི་སྨྲ་བར་གྱིས། །ཞེས་བྱ་བ་འདི་ཡིན་ནོ། །དེ་ལ་གཏན་ལ་དབབ་པ་འདི་ཡིན་ཏེ། ལས་བརྗོད་པ་དང་གཞན་གྱི་ཐོ་འཚམས་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཉིད་ཀྱིས་མ་ལོག་པ་ན་ལྟུང་བ་བྱུང་ལ་གཉིད་ཀྱིས་ལོག་ནས་ལྟུང་བ་ལས་ལྡང་ཞིང་གཉིད་ཀྱིས་ལོག་པ་ན་བྱུང་ལ་གཉིད་སད་ནས་ལྡང་བར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། གཉིད་ཀྱིས་མ་ལོག་པ་ན་ལྟུང་བ་བྱུང་ལ་གཉིད་ཀྱིས་ལོག་ནས་ལྡང་བར་འགྱུར་བ་ཇི་ལྟ་བུ་ལགས། འདི་ལྟར་དགེ་སློང་དགེ་འདུན་ལྷག་
མ་བྱུང་བ་དབྱུང་བར་བྱ་བའི་ལས་རྗོད་པར་བྱེད་པ་ན་གསོལ་བ་ཐོས་ནས་ཉལ་ཏེ་དེ་གཉིད་ལོག་པ་དང་ལས་བརྗོད་པ་གསུམ་པ་མཐར་ཕྱིན་ནས་ཏེ། དེ་ལྟར་གཉིད་ཀྱིས་མ་ལོག་པ་ལས་ན་ལྟུང་བ་ཕྱུང་ལ་གཉིད་ཀྱིས་ལོག་ནས་ལྡང་བར་འགྱུར་བ་ཡིན་ནོ། །གཉིད་ཀྱིས་ལོག་པ་ན་ལྟུང་བ་བྱུང་ལ་གཉིད་སད་ནས་ལྡང་བར་འགྱུར་བ་ཇི་ལྟ་བུ་ལགས། འདི་ལྟར་དགེ་སློང་གཉིད་ལོག་པ་ལས་མལ་སྟན་མཐོན་པོ་དང་མལ་སྟན་ཆེན་པོ་ལ་བཞག་པའམ། གཉིད་ལོག་པ་ལས་བུད་མེད་ཀྱིས་མལ་དུ་བསྙལ་བའམ། ནུབ་གསུམ་པ་ལ་བསྙེན་པར་མ་རྫོགས་པ་དག་ཕྱིར་ཕྱུང་ཏེ་ཉལ་བ་ལས་དེའི་འོག་ཏུ་བསྙེན་པར་མ་རྫོགས་པ་དག་ཞུགས་ན། དེ་དེ་དག་དང་སད་ནས་ལྟུང་བ་དེ་ཆོས་བཞིན་སླར་འཆོས་པ་སྟེ། དེ་ལྟར་ན་གཉིད་ལོག་པ་ན་ལྟུང་བ་འབྱུང་ལ་གཉིད་སད་ནས་ལྡང་བར་འགྱུར་བ་ཡིན་ནོ་ཞེས་བྱ་བ་ལ་སོགས་པ་ཡིན་ནོ། །སྟན་གཅིག་ལ་འདུག་པའི་ཞེས་བྱ་བ་ལ་སོགས་པ་ནི་སྟན་གཅིག་ལ་འདུག་པའི་དགེ་སློང་ལ་རྒྱུ་གང་གིས་ལྟུང་བའི་རིས་ལྔ་འབྱུང་ཞེས་བྱ་བར་སྦྱར་རོ། །སྟན་ནི་ཁྲིའུ་ལ་སོགས་པ་སྟེ། འདིར་གཞན་འདུག་ཅིང་གནས་པས་སོ། །འདུག་པ་ནི་གནས་པའོ། །རྒྱུ་གང་གིས་ཞེས་བྱ་བ་ནི་བྱེད་རྒྱུ་གང་གིས་སོ། །ལྟུང་བའི་རིས་ནི་ལྔ་པོ་དག་ཅེས་བྱ་བ་ནི་ཕས་ཕམ་པར་འགྱུར་བ་དང་དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པར་བྱ་བ་དང༌། ཉེས་བྱས་ཞེས་བྱ་བ་རིས་ལྔ་པོ་དག་གོ །འདི་ལ་འདྲི་བའི་བསམ་པ་ནི་ཕན་ཚུན་འགྲོ་བ་དང་བྱ་བའི་ལྟུང་བའི་རིས་ལྔ་པོ་དག་མ་བྱུང་བར་མཐོང་གི་སྟན་གཅིག་ཁོ་ན་ལ་འདུག་པ་ལ་ནི་མ་ཡིན་ན། འདི་ལ་ཁྱོད་ཀྱིས་རྒྱུ་གང་གིས་འདི་དག་འབྱུང་བའི་རྒྱུ་ཁོ་བོ་ལ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། སྟན་གཅིག་ལ་འདུག་པ་དང༌། འབྲེལ་པའི་ལྟུང་བ་སྲིད་པ་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་སྟན་གཅིག་ལ་མཆིས་པ་ལ་ལྟུང་བའི་རིས་ལྔ་པོ་ཐམས་ཅད་འབྱུང་བར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། ཆོས་གོས་
མེད་པར་ཟན་ཟ་ན་ཉེས་བྱས་སུ་འགྱུར་རོ། །བསླབ་པའི་སྡོམ་པས་བསྡམས་པའི་སློབ་པའི་ཁྱིམ་དག་ནས་རང་གི་ལག་གིས་བཅའ་བར་བྱ་བ་དང་བཟའ་བར་བྱ་བ་དག་ལེན་ན་སོ་སོར་བཤགས་པར་འགྱུར་རོ། །བུད་མེད་ལ་ཚིག་ལྔའམ་དྲུག་ལས་ལྷག་པར་ཆོས་སྟོན་ན་ལྟུང་བྱེད་དུ་འགྱུར་རོ། །བུད་མེད་ལ་གནས་ངན་ལེན་བརྗོད་པ་སྨྲ་ན་དགེ་འདུན་ལྷག་མར་འགྱུར་རོ། །བདག་ཉིད་མིའི་ཆོས་བླ་མ་མེད་ཅིང་མི་བདོག་བཞིན་དུ་བརྗོད་ན་ཕས་ཕམ་པར་འགྱུར་རོ་ཞེས་བྱ་བ་ནི། དགེ་སློང་སྦྱོར་བ་གཅིག་གིས་ནི་ཞེས་བྱ་བ་ནི་དགེ་སློང་གཅིག་གིས་སྦྱོར་བ་གཅིག་གིས་ཇི་ལྟར་ལྟུང་བ་སྟོང་བྱེད་པར་འགྱུར་ཞེས་བྱ་བར་སྦྱར་རོ། །སྦྱོར་བ་གཅིག་གིས་བྱ་བ་ནི་བྱེད་པ་གཅིག་གིས་ཏེ་རྩོམ་པ་གཅིག་གིས་ཞེས་བྱ་བའི་ཐ་ཚིག་གོ །སྟོང་ཞེས་བྱ་བ་ནི་བརྒྱ་དང་སྟོང་མཚོན་པ་ཡིན་ནོ། །དེ་ཉིད་རིག་པ་ནི་དོན་དམ་པ་རིག་པ་སྟེ་འདུན་པའི་དོན་ཁོང་དུ་ཆུད་པ་ཞེས་བྱ་བའི་དོན་ཏོ། །འདི་ལ་བསམ་པ་ནི་སྦྱོར་བ་ཐ་དད་པ་ཉིད་ལ་ནི་ལྟུང་བ་མང་པོ་དག་འབྱུང་བར་བཏུབ་ཀྱི་སྦྱོར་བ་གཅིག་གིས་ནི་མ་ཡིན་ན་དེ་ཇི་ལྟ་བུ་ཞིག་ཡིན་པར་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། ཁྲོས་ནས་གཞན་དག་ལ་བྱེ་མ་ལ་སོགས་པའི་སྤར་བས་བསྣུན་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་སྦྱོར་བ་གཅིག་གིས་ལྟུང་བ་བརྒྱའམ་ལྟུང་བ་སྟོང་ངམ། དེ་ལས་ལྷག་པ་འབྱུང་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་ཁྲོས་འཁྲུགས་རྔམ་མ་རངས་ནས་སྐྱེ་བོ་ཕལ་པོ་ཆེ་འདུས་ཤིང་འཁོད་པ་ལ་སྲན་སྤར་གྱིས་བཏབ་བམ། མོན་སྲན་སྡེའུ་སྤར་གྱིས་བཏབ་བམ། བྱེ་མ་སྤར་གྱིས་བཏབ་སྟེ་བསྣུན་ན་ཇི་སྙེད་ཕོག་པ་དེ་སྙེད་ཀྱི་ལྟུང་བར་འགྱུར་རོ་ཞེས་བྱ་བ་ཡིན་ནོ། །བསམ་གཏན་དང་པོ་ལ་སོགས་ལ་ཞེས་བྱ་བ་ལ་སོགས་པ་ལ། བསམ་གཏན་དང་པོ་ནི་རྟོག་པ་དང་བཅས་ཤིང་དཔྱོད་པ་དང་བཅས་པ། བསམ་གཏན་ནི་མཉམ་པར་གཞག་པ་དགེ་བ་རྩེ་གཅིག་པའོ། །སོགས་པ་ཞེས་སྨོས་པས་ནི་རྟོག་པ་ཡང་མེད་དཔྱོད་པ་ཡང་མེད་པ་ལ་སོགས་པའི་མཚན་ཉིད་བསམ་གཏན་གཉིས་པ་ལ་སོགས་པ་བསྡུའོ། །ཅིའི་ཕྱིར་
ཞེས་བྱ་བ་ནི་རྒྱུ་གང་གིས་སོ། །འདི་ལ་དོན་ནི་རེ་ཞིག་དགེ་བའི་སེམས་ལ་གནས་པ་ལ་ཡང་ལྟུང་བ་འབྱུང་བ་མེད་པས་བསམ་གཏན་དང་པོ་ལ་སོགས་པ་ལ་སྙོམས་པར་ཞུགས་པ་ལ་ལྟ་སྨོས་ཀྱང་ཅི་དགོས་ན་དེ་ལ་འབྱུང་ངོ་ཞེས་བྱ་བ་དེ་ཇི་ལྟ་བུ་ཡིན་པར་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། ཁང་པ་བྱ་བ་བསྐོ་བའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་བསམ་གཏན་དང་པོ་ལ་སྙོམས་པར་མ་ཞུགས་པ་ལ་དགེ་འདུན་ལྷག་མར་འགྱུར་བའི་གཞི་དེས་བསམ་གཏན་དང་པོ་ལ་སྙོམས་པར་ཞུགས་པ་ལ་དགེ་འདུན་ལྷག་མར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་བསམ་གཏན་དང་པོ་ལ་སྙོམས་པར་ཞུགས་པའི་ཚེ་ངའི་ཁང་པ་རྩིགས་ཤིག་ཅེས་བསྒོ་ཞིང་བསྒོས་ནས་བསམ་གཏན་དང་པོ་ལ་སྙོམས་པར་ཞུགས་པ་དེ་བསམ་གཏན་དང་པོ་ལ་སྙོམས་པར་ཞུགས་པ་དང༌། ཁང་པ་མཐར་ཕྱིན་པར་གྱུར་ན་དགེ་འདུན་ལྷག་མར་འགྱུར་རོ། །གཞི་གང་གིས་བསམ་གཏན་གཉིས་པ་ལ་སོགས་པ་ལ་སྙོམས་པར་མ་ཞུགས་པ་ལ་དགེ་འདུན་ལྷག་མར་འགྱུར་བའི་གཞི་དེས་བསམ་གཏན་གཉིས་པ་དང༌། གསུམ་པ་དང༌། བཞི་པ་ལ་སོགས་པར་ཞུགས་པ་ལ་དགེ་འདུན་ལྷག་མར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་བསམ་གཏན་གཉིས་པ་དང༌། གསུམ་པ་དང༌། བཞི་པ་ལ་སོགས་པར་འཇུག་པའི་ཚེ་ངའི་ཁང་པ་རྩིགས་ཤིག་ཅེས་བསྒོ་ཞིང་བསྐོས་ནས་བསམ་གཏན་བཞི་པའི་བར་ལ་སྙོམས་པར་ཞུགས་ལ། དེ་བསམ་གཏན་བཞི་པའི་བར་ལ་སྙོམས་པར་ཞུགས་པ་དང་ཁང་པ་མཐར་ཕྱིན་པར་གྱུར་ན་དགེ་འདུན་ལྷག་མར་འགྱུར་རོ་ཞེས་བྱ་བ་ཡིན་ནོ། །དགེ་སློང་ཐ་ན་ཉེས་བྱས་ཀྱིས་ཞེས་བྱ་བ་ལ་སོགས་པ་ལ། ཐ་ན་ཞེས་བྱ་བ་ནི་ཆུང་དུ་ནའོ། །ནམ་དུ་འང་ཞེས་བྱ་བ་ནི་གཞར་ཡང་སྟེ། འདིས་ནི་གཏན་དུ་མི་འབྱུང་བར་སྟོན་པར་བྱེད་དོ། །འོན་ཀྱང་ཞེས་བྱ་བ་ནི་དེ་ལྟ་ན་ཡང་ངོ༌། །འདི་ལ་འདྲི་བའི་དོན་ནི་གང་ལ་ལས་ཕས་ཕམ་པར་འགྱུར་བ་ལྷག་པར་
སྤྱོད་པ་དེ་དགེ་སློང་མ་ཡིན་པར་གསུངས་ཀྱི། ཉེས་བྱས་ཀྱི་ལྟུང་བ་འབྱུང་བ་ཡང་ནི་མ་ཡིན་ནོ། །འོན་ཀྱང་དགེ་སློང་མ་ཡིན་པ་ཞེས་གསུངས་པ་དེ་ཇི་ལྟ་བུ་ཡིན་པར་བརྗོད་པར་བྱའོ་ཞེས་བྱ་བ་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། མཚན་གྱུར་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ནམ་ཡང་ཐ་ན་ཉེས་བྱས་ཀྱི་ལྟུང་བ་ཡང་མ་བྱུང་ལ། འོན་ཀྱང་དགེ་སློང་མ་ལགས་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་མཚན་གྱུར་ནའོ་ཞེས་བྱ་བ་ཡིན་ནོ། །དགེ་སློང་མ་ནི་ནམ་དུ་ཡང་ཞེས་བྱ་བ་ལ་སོགས་པ་ལ་ནམ་དུ་ཡང་ཞེས་བྱ་བ་ནི་གཞར་ཡང་ངོ༌། །མི་བྱེད་ཅེས་བྱ་བ་ནི་དགག་པའོ། །འདི་ལ་སྐབས་ཀྱི་དོན་ནི་ཐུན་མོང་ངམ་ཐུན་མོང་མ་ཡིན་པའི་ཕས་ཕམ་པར་འགྱུར་བ་ལྷག་པར་སྤྱོད་ན་དགེ་སློང་མ་མ་ཡིན་པ་རྣམ་པར་གཞག་གི །དགེ་སློང་མ་ཉེས་བྱས་ཀྱི་ལྟུང་བ་ལྷག་པར་སྤྱོད་པ་ཡང་ནི་མ་ཡིན་ནོ། །འོན་ཀྱང་དགེ་སློང་མ་ཡིན་ཞེས་གསུངས་པ་ཇི་ལྟ་བུ་ཡིན་པ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་མཚན་གྱུར་པ་ལ་དགོངས་ཏེ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། དགེ་སློང་མས་ནམ་དུ་ཡང་ཐ་ན་ཉེས་བྱས་ཀྱི་ལྟུང་བ་ཡང་མ་བྱུང་ལ། འོན་ཀྱང་དགེ་སློང་མ་མ་ལགས་པར་འགྱུར་བ་ལྟ་མཆིས་ལགས་སམ། ཡོད་དེ། དགེ་སློང་མ་མཚན་གྱུར་ནའོ་ཞེས་བྱ་བ་ཡིན་ནོ། །གལ་ཏེ་དགེ་སློང་དགྲ་བཅོམ་མིན། །ཞེས་བྱ་བ་ལ་སོགས་པ་ལ་དགྲ་བཅོམ་མིན་ཞེས་བྱ་བ་ནི་དགྲ་བཅོམ་པ་ལས་གཞན་པ་སྡེ་སོ་སོའི་སྐྱེ་བོའོ། །ཕ་མིན་ཞེས་བྱ་བ་ནི་ཕ་ལས་གཞན་པའི་སེམས་ཅན་མིའི་འགྲོ་བར་སྐྱེས་པའོ། །དེ་བཞིན་དུ་ཞེས་བྱ་བ་ནི་གཞན་འདྲེན་པ་དེ་ཇི་ལྟ་བུར་ཕས་ཕམ་པར་འགྱུར་བར་གསུངས་ཞེས་བྱ་བར་སྦྱར་རོ། །འདི་ལ་དོན་ནི་གང་དགེ་སློང་འགའ་ཞིག་གིས་དགེ་སློང་དགྲ་བཅོམ་པ་མ་ཡིན་པ་སོ་སོའི་སྐྱེ་བོ་ཞིག་བསད་ན་དེ་ལ་ཕས་ཕམ་པར་འགྱུར་བ་འབའ་ཞིག་ཏུ་ཟད་ན། འོན་ཀྱང་དེས་ཕས་ཕམ་པ་དང་མནར་མེད་པར་ཡང་གསུངས་སོ་ཞེས་བྱ་བ་དེ་ལྟ་བུ་ཡིན་པ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་
ཏེ། མཚན་གྱུར་པ་ལ་བརྟེན་ནས་དེ་སྐད་དུ་གསུངས་པ་ཡིན་ཏེ། འདིར་གཞུང་ནི། བཙུན་པ་དགེ་སློང་ཞིག་གིས་དགེ་སློང་ཞིག་གི་སྲོག་བཀུམ་ལ་དེ་ཕ་ཡང་མ་ལགས་དགྲ་བཅོམ་པ་ཡང་མ་ལགས་ན། འོན་ཀྱང་ཕས་ཕམ་པར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་གིས་མ་རབ་ཏུ་ཕྱུང་ཞིང་བསྙེན་པར་རྫོགས་པར་གྱུར་ན། དེ་མཚན་གྱུར་ཏེ་མཚན་གྱུར་ནས་བསད་ན་ཕས་ཕམ་པར་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་རོ་ཞེས་བྱ་བ་ཡིན་ནོ། །འདི་ལ་འདྲི་བའི་དོན་ནི། དགེ་སློང་མ་ནི་དགྲ་བཅོམ་མིན། །མ་མིན་བསད་ན་ཇི་ལྟ་བུར། །མཚམས་མེད་པ་དང་དེ་བཞིན་དུ། །ཕས་ཕམ་འགྱུར་བ་གསུངས་པར་སྨྲོས། །ཞེས་བྱ་བ་ཡང་རུང་སྟེ། དེ་ལ་དགྲ་བཅོམ་མིན་ཞེས་བྱ་བ་ནི་དགྲ་བཅོམ་པ་ལས་གཞན་པ་སོ་སོའི་སྐྱེ་བོའོ། །མ་མིན་པ་ཞེས་བྱ་བ་ནི་མ་ལས་གཞན་པའི་སེམས་ཅན་མིའི་འགྲོ་བར་སྐྱེས་པའོ། །འདིར་ཡང་ལན་ནི་འདི་ཡིན་ཏེ། ཕ་མཚན་གྱུར་པ་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་མས་དགེ་སློང་མ་ཞིག་བཀུམ་ལ་དེ་ཡང་མ་ཡང་མ་ལགས། དགྲ་བཅོམ་པ་ཡང་མ་ལགས་ན། འོན་ཀྱང་ཕས་ཕམ་པར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་མ་གང་གིས་ཕ་རབ་ཏུ་བྱུང་ཞིང་བསྙེན་པར་རྫོགས་པར་གྱུར་ལ། དེ་མཚན་གྱུར་ནས་བསད་ན་ཕས་ཕམ་པར་ཡང་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་ཡང་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་མཚན་གྱུར་པ་གཉིས་ལས་ཀྱང་ངོ་ཞེས་བཤད་དོ། །གཞན་གྱིས་ཚིག་སྨྲས་གཞན་ལ་ནི། །ཞེས་བྱ་བ་ལ་སོགས་པ་ལ། གཞན་གྱིས་ཞེས་བྱ་བ་ནི་དགེ་སློང་ལ་སོགས་པས་སོ། །ཚིག་སྨྲས་པ་ནི་ཚིག་ཏུ་བརྗོད་པའོ། །གཞན་ལ་ཞེས་བྱ་བ་ནི་བརྗོད་པར་འདོད་པའི་དགེ་སློང་འགའ་ཞིག་ལའོ། །མྱུར་དུ་
ཞེས་བྱ་བ་ནི་སྐྱེན་པར་རོ། །འདི་ལ་དོན་ནི་ལྟུང་བའི་རིས་ལྔ་པོ་དག་ནི་ཅི་རིགས་པར་རང་གི་ངག་དང་འབྲེལ་པ་ཡིན་ན། འོན་ཀྱང་གཞན་གྱིས་ཚིག་སྨྲ་བ་བྱས་ནས་དགེ་སློང་ལ་འདི་དག་འབྱུང་བ་དེ་ཇི་ལྟ་བུ་ཡིན་པ་དེ་བརྗོད་པར་བྱའོ་ཞེས་བྱ་བ་ཡིན་ནོ། །འདི་ལ་ལན་ནི་འདི་ཡིན་ཏེ། ལས་བརྗོད་པ་ལ་སོགས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། བཙུན་པ་གཞན་གྱིས་ཚིག་སྨྲས་ལ་དེས་སྨྲས་པའི་རྐྱེན་གྱིས་གཞན་ཕས་ཕམ་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་མས་དགེ་སློང་གི་དགེ་འདུན་མཐུན་པས་དགེ་སློང་ཞིག་མ་མཐོང་བའི་ཕྱིར་བསྐྲད་པར་ཤེས་བཞིན་དུ་རྗེས་སུ་ཕྱོགས་ཤིང་དགེ་འདུན་གྱི་ནང་དུ་ལན་གསུམ་གྱི་བར་དུ་བསྒོ་ཡང་གཏོང་དུ་མི་བཏུབ་ན་ཕས་ཕམ་པར་འགྱུར་རོ། །བཙུན་པ་གཞན་གྱིས་ཚིག་སྨྲས་ལ་དེས་སྨྲས་པའི་རྐྱེན་གྱིས་གཞན་དགེ་འདུན་ལྷག་མར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་དགེ་འདུན་གྱི་དབྱེན་བྱེད་པ་དང༌། དེའི་རྗེས་སུ་ཕྱོགས་པ་དང༌། ཁྱིམ་སུན་འབྱིན་པ་དང༌། བཀའ་བློ་མི་བདེ་བ་དགེ་འདུན་གྱི་ནང་དུ་ལན་གསུམ་གྱི་བར་དུ་བསྒོ་ཡང་གཏོང་དུ་མི་བཏུབ་ན་དགེ་འདུན་ལྷག་མར་འགྱུར་རོ། །བཙུན་པ་གཞན་གྱིས་ཚིག་སྨྲས་ལ་དེས་སྨྲས་པའི་རྐྱེན་གྱིས་གཞན་ལ་ལྟུང་བྱེད་དུ་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་གིས་སྡིག་པ་ཅན་གྱི་ལྟ་བ་ཡང་དག་པར་བླངས་ལ་བླངས་ནས་འདོར་དུ་མི་བཏུབ་ན་ལྟུང་བྱེད་དུ་འགྱུར་རོ། །བཙུན་པ་གཞན་གྱིས་ཚིག་སྨྲས་ལ་དེས་སྨྲས་པའི་རྐྱེན་གྱིས་གཞན་ལ་སོ་སོར་བཤགས་པར་བགྱི་བར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་ཁྱིམ་དག་ཏུ་མགྲོན་དུ་བོས་ཏེ་ཟན་ཟ་ལ་དེ་ན་ཡང་དགེ་སློང་མ་བསྐོ་ཤམ་བྱེད་པ་ཞིག་ཡོད་དེ་འདི་ལ་ནི་བཟའ་བ་བྱིན་ཅིག །འདི་ལ་ནི་འབྲས་ཆན་བྱིན་ཅིག །འདི་ལ་ནི་སྲན་ཚོད་བྱིན་ཅིག་འདི་ལ་ནི་མང་དུ་བྱིན་ཅིག་ཟེར་ལ། དེ་ལ་མ་བསྒོ་བར་ཟན་སོ་སོར་བཤགས་པར་བྱ་བར་འགྱུར་རོ། །བཙུན་
པ་གཞན་གྱིས་ཚིག་སྨྲས་ལ་དེས་སྨྲས་པའི་རྐྱེན་གྱིས་གཞན་ལ་ཉེས་བྱས་སུ་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་སོ་སོར་ཐར་པའི་མདོ་གདོན་པར་འདོད་པའི་ཚེ་དགེ་འདུན་གྱི་དབུས་སུ་ལན་གསུམ་གྱི་བར་དུ་བསྒྲགས་ཀྱང་ལྟུང་བ་དྲན་བཞིན་དུ་མི་འཆགས་ན་དེས་སྨྲས་པའི་རྐྱེན་གྱིས་ཉེས་བྱས་སུ་འགྱུར་རོ་ཞེས་བྱ་བ་ལ་སོགས་པ་ཡིན་ནོ། །ཇི་ལྟར་དགེ་སློང་གཅིག་པུ་ལ་ཞེས་བྱ་བ་ལ་སོགས་པ་ལ། གཅིག་པུ་ཞེས་བྱ་བ་ནི་གྲོགས་མེད་པ་ལ་བྱའོ། །ཕས་ཕམ་པར་འགྱུར་བ་བཞི་ཞེས་བྱ་བ་ནི་མི་ཚངས་པར་སྤྱོད་པ་དང༌། མ་བྱིན་པར་ལེན་པ་དང༌། གསོད་པ་དང༌། སྨྲ་བ་དང་ཞེས་པ་དག་གོ །དོན་བཞིན་དུ་ཞེས་བྱ་བ་ནི་ཡང་དག་པ་ཇི་ལྟ་བ་བཞིན་དུའོ། །འདི་ལ་བསམ་པ་ནི་ཟླ་ཞིག་ཡོད་ན་ཕས་ཕམ་པར་འགྱུར་བ་རྣམས་འབྱུང་ངོ་ཞེས་བྱ་བ་དེ་ནི་ཤིན་ཏུ་གྲགས་ན། ཅི་གཅིག་པུ་ཁོ་ན་ལ་ཕས་ཕམ་པ་བཞི་འབྱུང་བ་གང་ཡིན་པ་དེ་སྲིད་པ་ཡོད་དམ་མེད་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པར་བྱ་བ་ནི་འདི་ཡིན་ཏེ། དུས་གཞན་ན་སྦྱོར་བ་བྱས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གཅིག་པུ་གཙུག་ལག་ཁང་དུ་ཞུགས་པ་ལ་ཕས་ཕམ་པ་བཞི་འབྱུང་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། མི་ཚངས་པར་སྤྱོད་པའི་རྐྱེན་གྱིས་ཇི་ལྟ་བུ་ལགས། དཔེར་ན་མཚན་རིངས་དང་རྒྱབ་མཉེན་ལྟ་བུའོ། །མ་བྱིན་པར་ལེན་པའི་རྐྱེན་གྱིས་ཇི་ལྟ་བུ་ལགས། འདི་ལྟར་དགེ་སློང་གིས་སྦྱོར་བ་བྱས་ནས་གཙུག་ལག་ཁང་དུ་ཞུགས་ནས་དེ་བརྐུས་ནའོ། །གསོད་པའི་རྐྱེན་གྱིས་ཇི་ལྟ་བུ་ལགས། འདི་ལྟར་དགེ་སློང་གིས་སྦྱོར་བ་བྱས་ནས་གཞལ་ཡས་ཁང་དུ་ཞུགས་ལ་དེ་ཡང་བསད་ནའོ། །སྨྲ་བའི་རྐྱེན་གྱིས་ཇི་ལྟ་བུ་ལགས། འདི་ལྟར་དགེ་སློང་གིས་འདི་སྐད་དུ་བདག་ནི་དགྲ་བཅོམ་པ་བདག་ནི་སངས་རྒྱས་སོ་ཞེས་སྨྲས་སོ་ཞེས་བྱ་བ་ཡིན་ཏེ། དོན་འདི་ནི་བཤད་ཟིན་མོད་ཀྱིས་ཕས་ཕམ་པ་བཞི་འབྱུང་བའི་སྐབས་ཀྱིས་ཡང་བཤད་དོ། །འདུལ་བ་དྲི་བའི་ཚིག་ལེའུར་བྱས་པ་ལེའུ་
བཞི་པའི་གཏན་ལ་དབབ་པའོ།། །།འདི་ལ་གསོལ་བའི་ལས་དང་ནི། །ཞེས་བྱ་བ་ལ་སོགས་པ་ལ་འདི་ལ་ཞེས་བྱ་བ་ནི་ལས་དག་ལའོ། །གསོལ་བ་ནི་བྱེད་པར་འགྱུར་བའི་ལས་གོ་བར་བྱེད་པའོ། །གསོལ་བ་ཉིད་ལས་ཡིན་པས་གསོལ་བའི་ལས་སོ། །དེ་བས་ན་གསོལ་བའི་བདག་ཉིད་ཀྱི་ལས་དག་ནི་གསོལ་བའི་ལས་ཏེ། དེ་དག་དུ་ཞིག་ཡོད་ཅེས་བྱ་བ་གྲངས་སུ་ཞེས་བྱ་བའི་ཐ་ཚིག་གོ །དང་ཞེས་བྱ་བ་ནི་བསྡུ་བ་སྟེ། འོག་མ་ལ་ཡང་དེ་དང་འདྲའོ། །གསོལ་བར་བཅས་པའི་ལས་ཞེས་བྱ་བར་སྦྱར་ཏེ། ལས་ནི་བརྗོད་པ་བཟླས་པ་ཞེས་བྱ་བའི་ཐ་ཚིག་གོ །དེས་ན་གསོལ་བ་དང་བཅས་པའི་ལས་ནི་དུ་ཞིག་ཡོད་ཅེས་བྱ་བར་སྦྱར་རོ། །ལེགས་གྲགས་ཞེས་བྱ་བ་ནི་ཀུན་གྱིས་ཤེས་པ་སྟེ། དེ་ནི་དོན་མི་གསལ་བ་མ་ཡིན་ནོ་ཞེས་བྱ་བའི་ཐ་ཚིག་གོ །དེ་ཞེས་བྱ་བ་ནི་བཤད་མ་ཐག་པའོ། །རྣམ་པར་དབྱེ་བ་སྨྲ་བར་གྱིས་ཞེས་བྱ་བར་སྦྱར་ཏེ། རྣམ་པར་དབྱེ་བ་ནི་ཐ་དད་པ་ཉིད་དོ། །དོན་གང་ལས་དེ་སྐད་དུ་གསུངས་ཞེས་བྱ་བའི་དོན་ཏེ། འབོད་དེ་སྨྲ་བར་གྱིས་ཞེས་སྦྱར་བར་བྱའོ། །འདི་ལ་དོན་ནི་གསོལ་བ་དང༌། གསོལ་བ་དང་གཉིས་དང༌། གསོལ་བ་དང་བཞིའི་ལས་ཇི་སྙེད་ཡོད་པ་དང་དེ་དག་གི་རྣམ་པར་དབྱེ་བ་ཇི་ལྟ་བ་བཞིན་དེ་ནི་ཀུན་ལ་གྲགས་ཏེ། དེ་ལས་ཟབ་པ་ཅི་ཡང་མེད་པས་དེ་ནི་གསོལ་བ་ཉིད་ལས་དེ་ཁོ་བོ་ལ་འབོད་དེ་སྨྲོས་ཤིག་ཅེས་བྱ་བ་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་ལས་བརྒྱ་རྩ་གཅིག་གི་དབང་དུ་མཛད་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། ལས་དུ་ཞིག་གིས་ལས་ཐམས་ཅད་བསྡུས་ལགས། བཅོམ་ལྡན་འདས་ཀྱིས་བཀའ་སྩལ་པ། གསུམ་གྱིས་ཏེ། གསོལ་བ་དང་ལས་དང༌། གསོལ་བ་དང་གཉིས་དང༌། གསོལ་བ་དང་བཞིས་སོ། །བཙུན་པ་བཅོམ་ལྡན་འདས་ཀྱིས་ལས་བརྒྱ་རྩ་གཅིག་བཀའ་སྩལ་པ་གང་ལགས་པ། དེ་ལ་གསོལ་བའི་ལས་ཀྱིས་ནི་དུ་ཞིག་བསྡུས་ལ། གསོལ་བ་དང་གཉིས་ཀྱི་ལས་ཀྱིས་ནི་དུ་ཞིག་བསྡུས། གསོལ་བ་དང་བཞིའི་ལས་ཀྱིས་ནི་དུ་ཞིག་བསྡུས་ལགས། བཅོམ་ལྡན་འདས་ཀྱིས་བཀའ་སྩལ་པ། གསོལ་བའི་ལས་ནི་ཉི་ཤུ་རྩ་བཞིའོ། །གསོལ་བ་དང་གཉིས་ཀྱི་ལས་ནི་
བཞི་བཅུ་རྩ་བདུན་ནོ། །གསོལ་བ་དང་བཞིའི་ལས་ནི་སུམ་ཅུའོ་ཞེས་བྱ་བ་ཡིན་ནོ། །འདི་དག་ནི་རྣམ་པར་དབྱེ་བ་ཡང་མདོ་བྱེད་པས་བཤད་དེ། གསང་དང་ནང་དུ་དྲི་ཕྱིར་དང༌། །གསོ་སྦྱོང་དེ་ལ་ལྟུང་བཅས་དང༌། །དེ་ལ་དགེ་འདུན་ཡིད་གཉིས་དང༌། །རྩོད་དང་ངེས་ཉིད་མ་ཡིན་དང༌། །དེ་ཡི་དོན་དུ་ལྔ་པོ་དག །ཐམས་ཅད་དགག་དབྱེར་གཏོགས་པ་ཡིན། །དབྱར་གནས་ཁས་བླངས་ཉིད་དང་ནི། །ཤི་བའི་རྫས་དང་ནོར་འདྲ་དང༌། །ཆོས་གོས་སྦྱིན་པར་བྱ་བ་དང༌། །གནས་ངན་ལེན་ནི་བརྗོད་པ་དང༌། །གྲངས་སུ་གཞུག་པ་བཞི་དག་དང༌། །ཁྱིམ་གྱི་སྡོམ་དང་དེ་གཞིག་དང༌། །ལྷུང་བཟེད་ཁས་བུབ་བྱ་བ་དང༌། །དེ་ཉིད་བཟློག་པར་བྱ་བ་དག །གསོལ་བ་འབའ་ཞིག་ལས་ཡིན་ནོ། །གནས་དང་མཚམས་ནི་གཉིས་པོ་དང༌། །མི་འབྲལ་སྨྱོས་དང་དགག་དབྱེ་དང༌། །གནས་མལ་སྟོབས་པར་བྱེད་པ་དང༌། །རུང་བའི་ས་གཞི་བསྐོ་བ་དང༌། །སྲ་བརྐྱང་དང་ནི་དེ་གདིང་དང༌། །སྤོང་དང་ལག་གི་བླ་དང་ནི། །གནས་ཁང་བསྐོ་ལ་སོགས་པ་དང༌། །གཟུ་དང་གསལ་དང་སྦེད་པ་དང༌། །ཚུལ་ཤིང་འདྲིམ་པར་བྱེད་པ་དང༌། །ཁང་པ་ཁང་ཆེན་བསྟན་པ་དང༌། །གླེང་དང་འབྲལ་བར་མི་འགྱུར་དང༌། །སྟན་དང་ལྷུང་བཟེད་འདྲི་མ་པ་དང༌། །མ་དང་གོ་བྱར་བྱ་བ་དང༌། །སྟོན་པ་དང་ནི་ནགས་ཉུལ་དང༌། །ཕྱག་མི་བྱ་དང་མང་ཕྱིར་དང༌། །ཁར་བ་དྲ་བའི་ཕྱིར་དང་ནི། །རྙེད་པ་གཅིག་ཏུ་བྱ་ཕྱིར་དང༌། །བསླབ་པ་སྦྱིན་དང་ཉེར་གནས་དང༌། །བུ་དང་ཉེ་དུ་ཕྱིར་འགྲོ་དག །གསོལ་དང་གཉིས་ཀྱི་ལས་ཡིན་ནོ། །བསྙེན་པར་རྫོགས་པར་བྱ་བ་དང༌། །མུ་སྟེགས་གནས་དང་མཚམས་དགྲོལ་དང༌། །མཐུན་སྦྱིན་གསོ་སྦྱོང་བདུན་པོ་དང༌། །བརྒྱད་དང་དྲན་དང་མ་སྨྱོས་དང༌། །དེ་ཉིད་ཚོལ་དུ་གཞུག་པ་དང༌། །བསྒོ་བར་བྱ་བ་རྣམས་དང་ནི། །ཉམས་པ་སྦྱིན་པར་བྱ་བ་དག །གསོལ་དང་བཞི་ཡི་ལས་ཡིན་ནོ། །འདི་ཉིད་ལ་བརྒལ་བ་དང་ལན་དུ་བཅས་པའི་ཚིག་ལེའུར་བྱས་བ་དག་ཅིག་ཀྱང་ཡོད་དོ། །ཁོ་བོས་བྱས་པའི་ལས་བརྒྱ་རྩ་གཅིག་རྣམ་པར་དབྱེ་བ་ཡོད་པས་དེ་ཡང་བལྟ་བར་བྱའོ། །གཞུང་མངས་ཀྱིས་དོགས་ནས་འདིར་ནི་ཉེ་བར་མ་བཀོད་དོ། །ཚིག་ཏུ་ཡང་ནི་མི་སྨྲ་ལ། །ཞེས་བྱ་བ་ལ་སོགས་པ་
ལ། ཚིག་ཏུ་སྨྲ་བ་ནི་ཚིག་ཏུ་བརྗོད་པའོ། །མི་སྨྲ་ལ་ཞེས་བྱ་ནི་དགག་པའོ། །ལུས་ཀྱིས་རྩོལ་བར་མི་བྱེད་པ། །ཞེས་བྱ་བར་སྦྱར་ཏེ། འང་ཞེས་བྱ་བ་ནི་བསྡུ་བའོ། །མི་བྱེད་པ་ནི་དགག་པའོ། །ལུས་ཀྱིས་རྩོལ་བ་ནི་ལུས་ཀྱིས་བྱེད་པའོ། །ཕས་ཕམ་པ་འབྱུང་བར་འགྱུར་བ་ཇི་ལྟ་བུ་ཡིན་ཞེས་བྱ་བར་སྦྱར་རོ། །འདི་ལ་དོན་ནི་ཕས་ཕམ་པར་འགྱུར་བ་ནི་ཡང་ན་ནི་ཚིག་རྣམ་བཞག་སྟེ། དཔེར་ན་བླ་མ་སྨྲ་བ་ལྟ་བུའོ། །ཡང་ན་ལུས་ཀྱིས་བྱེད་པ་སྟེ། དཔེར་ན་མི་ཚངས་པར་སྤྱོད་པ་ལྟ་བུ་ཡིན་ནོ། །འོན་ཀྱང་ལུས་དང་ངག་གི་བྱེད་པ་མེད་པར་དེ་འབྱུང་ངམ་མི་འབྱུང་བ་ཇི་ལྟ་བ་བཞིན་དུ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཕས་ཕམ་པར་འགྱུར་བ་བཅབས་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་ཚིག་ཏུ་ཡང་མི་སྨྲ་ལུས་ཀྱིས་རྩོལ་བ་ཡང་མི་བགྱིད་པར་འོན་ཀྱང་དགེ་སློང་མ་མ་ལགས་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་མས་དགེ་སློང་མ་ཞིག་ཕས་ཕམ་པར་འགྱུར་བའི་ལྟུང་བ་བྱུང་བ་མཐོང་ལ། དེ་བཅབས་ཏེ་སྐྱ་རེངས་ཤར་ན་ཕས་ཕམ་པར་འགྱུར་རོ་ཞེས་བྱ་བ་ཡིན་ནོ། །ལྟུང་བའི་རིས་བྱས་ན་ནི་ཞེས་བྱ་བ་ལ་སོགས་པ་ལ་བྱས་ན་ཞེས་བྱ་བ་ནི་ལྷག་པར་སྤྱད་ནས་སོ། །ནི་ཞེས་བྱ་བ་ནི་མ་བཟོད་པའོ། །ཡང་ནི་ཞེས་བྱ་བ་ནི་བསྡུ་བའོ། །མི་བྱེད་ཅིང་ཞེས་བྱ་བ་ནི་དགག་པའོ། །ཕྱིར་འཆོས་པ་ནི་ལྡོག་པའི་བསམ་པའོ། །དག་པར་ཞེས་བྱ་བ་ནི་ལྟུང་བ་མེད་པར་རོ། །འདི་ལ་དོན་ནི་ཉེས་བྱས་ཙམ་བྱས་ནས་གལ་ཏེ་ཕྱིར་མ་བཅོས་ན། དེའི་ཚེ་དེ་ངེས་པར་མ་དག་པ་ཞེས་བྱས་ན་ལྟུང་བའི་རིས་ལྔ་རིལ་འབྱུང་ལ་མ་དག་པར་འགྱུར་བ་ལྟ་སྨོས་ཀྱང་ཅི་དགོས་ཏེ། སྲིད་པ་ཡང་མེད་པ་ཉིད་ནའོ། །འོན་ཀྱང་བཅོམ་ལྡན་འདས་ཀྱིས་དག་པ་ཉིད་དུ་གསུངས་སོ་ཞེས་བྱ་བ་དེ་ཇི་ལྟ་བུ་ཉིད་དུ་ཡིན་ན། བརྗོད་པར་བྱའོ་ཞེས་བྱ་བ་འདི་ཡིན་ནོ། །འདེ་ལ་བཤད་པ་ནི་འདི་ཡིན་ཏེ། མཚན་གྱུར་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་མས་ཐུན་མོང་མ་ལགས་པའི་ལྟུང་བ་རིས་ལྔ་བྱུང་ལ། འཆགས་པར་ཡང་
མི་བགྱིད། ཕྱིར་འཆོས་པར་ཡང་མི་བགྱིད་པར་ལངས་པར་ཞེས་ཀྱང་བརྗོད་ལ། ལྟུང་བ་མ་མཆིས་པར་ཡང་འགྱུར་བལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། མཚན་གྱུར་ནའོ། །འདི་ལ་གཞུང་གཞན་ཡང་དགེ་སློང་ཐུན་མོང་མ་ལགས་པའི་ལྟུང་བ་རིས་ལྔ་ཕྱུང་ལ་དེ་མཚན་གྱུར་ནས་དགེ་སློང་དུ་རེད་ན་ལངས་པ་ཞེས་བརྗོད་པར་བྱའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་ཞིང་མ་ཡིན་པ་ཉིད་ལ་ནི་ཉམས་སོ་ཞེས་བཤད་དོ། །གཞན་གྱིས་ཕས་ཕམ་པར་འགྱུར་ལ་ཞེས་བྱ་བ་ལ་སོགས་པ་ལ། གཞན་གྱིས་ཞེས་བྱ་བ་ནི་མངོན་པར་འདོད་པའི་དགེ་སློང་ལ་སོགས་པ་འགའ་ཞིག་གིས་སོ། །དེ་ནི་ཞེས་བྱ་བ་ནི་སྨོས་མ་ཐག་པའོ། །ད་ལྟར་ཞེས་བྱ་བ་ནི་ངའོ། །འདི་ལ་དོན་ནི་དགེ་སློང་བདག་ཉིད་གྱིས་ཕས་ཕམ་པར་འགྱུར་བ་ལྷག་པར་སྤྱད་ན། ཕས་ཕམ་པར་འགྱུར་བའི་ལྟུང་བ་རྣམ་པར་གཞག་གི །གཞན་གྱིས་བྱས་ན་གཞན་ལ་ལྟུང་བ་འབྱུང་བ་མ་ཡིན་ན་ཞེས་བྱ་བ་འདི་ཡིན་ཏེ། འདི་ནི་ཐེ་ཚོམ་ཅན་གྱི་བློ་གྲོས་ཅན་འདྲི་བ་ཡིན་ནོ། །འདི་ལ་ལན་ནི་འདི་ཡིན་ཏེ། དགེ་སློང་མ་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞན་གྱིས་མི་ཚངས་པར་སྤྱད་པ་བགྱིས་ལ། གཞན་གྱིས་ཕས་ཕམ་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་མས་དགེ་སློང་མ་ཞིག་མི་ཚངས་པར་སྤྱོད་པ་བྱེད་པ་མཐོང་ལ། དེ་བཅབས་ནས་སྐྱ་རེངས་ཤར་ན་ཕས་ཕམ་པར་འགྱུར་རོ་ཞེས་བྱ་བ་ཡིན་ནོ། །ལྟུང་བ་ཀུན་ལ་གང་གིས་ནི། །ཞེས་བྱ་བ་ལ་སོགས་པ་ལ། ལྟུང་བ་ཀུན་ལ་ཞེས་བྱ་བ་ནི་ལྟུང་བའི་རིས་ལྔ་པོའོ། །གང་གིས་ཞེས་བྱ་བ་ནི་རྒྱུ་གང་གིས་སོ། །བསྟན་པ་ནི་ཐ་སྙད་དུ་བྱ་བའོ། །བསྡུ་བ་ནི་ཁོངས་སུ་བསྡུ་བའོ། །འགྱུར་ཞེས་བྱ་བ་ནི་བཏུབ་པའོ། །ངག་གིས་ཀུན་ནས་བསླང་བ་ནི་ངག་ལ་བརྟེན་ནས་བྱུང་བའོ། །ཁ་ན་མ་ཐོ་བ་ཆེན་པོ་ནི་ཉེས་པ་ཆེན་པོ་སྐྱེད་པ་སྟེ། དམྱལ་བ་དག་ཏུ་དུས་མཐའ་ཡས་པ་སྡུག་བསྔལ་བ་སྐྱེད་པའི་ཕྱིར་རོ་ཞེས་བྱ་བའི་ཐ་ཚིག་གོ །ལུས་ཀྱི་ཞེས་བྱ་བ་ནི་ལུས་ལ་བརྟེན་ནས་ཞེས་བྱ་བ་སྟེ། ཁ་ན་མ་
ཐོ་བ་ཆེན་པོའི་ལྟུང་བ་གང་ཡིན་པ་ཞེས་སྦྱར་བར་བྱའོ། །དགེ་འདུན་གང་ཟག་ལས་བྱུང་ཞེས་བྱ་བ་ནི་དགེ་འདུན་ལ་བརྟེན་ནས་བྱུང་བ་སྟེ། དགེ་འདུན་གྱིས་ཀུན་ནས་བསླང་ཞེས་བྱ་བའི་དོན་ཏོ། །དེ་བཞིན་དུ་གང་ཟག་ལས་བྱུང་བ་ནི་གང་ཟག་ལ་བརྟེན་ནས་བྱུང་བ་སྟེ། གང་ཟག་གིས་ཀུན་ནས་བསླང་བ་ཞེས་བྱ་བའི་ཐ་ཚིག་གོ །འདོད་ཅེས་བྱ་བ་ནི་མངོན་པར་འདོད་པ་སྟེ། མངོན་པར་བསམས་ཞེས་བཤད་པར་འགྱུར་རོ། །སྲོག་གཅོད་ཅེས་བྱ་བ་ནི་སྲོག་གཅོད་པས་ཀུན་ནས་བསླང་བ་སྟེ། ཐམས་ཅད་དུ་ཁ་ན་མ་ཐོ་བ་ཆེན་པོ་གང་ཡིན་ཞེས་བྱ་བར་སྦྱར་རོ། །དང་ཞེས་བྱ་བའི་སྒྲ་ཡང་ཐམས་ཅད་དུ་བསྡུ་བ་ཡིན་ཏེ། གསལ་བར་བདག་ལ་སྨྲ་བར་གྱིས་ཤིག་ཅེས་བྱ་བར་སྦྱར་རོ། །འདི་ལ་དོན་ནི་རྒྱུ་གང་གིས་ལྟུང་བ་ཐམས་ཅད་ཀྱི་བསྟན་པ་དང་དེ་བཞིན་དུ་བསྡུ་བ་རྣམ་པར་གཞག །ངག་གིས་ཀུན་ནས་བསླང་བའི་ལྟུང་བ་ཁ་ན་མ་ཐོ་བ་ཆེན་པོ་ནི་གང་ཡིན། དེ་བཞིན་དུ་ལུས་ཀྱིས་ཀུན་ནས་བསླང་པའི་ནང་ནས་ཁ་ན་མ་ཐོ་བ་ཆེན་པོ་ནི་གང་ཡིན། ཕྲ་མས་ཀུན་ནས་བསླང་བ་དང༌། གང་ཟག་གིས་ཀུན་ནས་བསླང་བ་དང༌། དགེ་འདུན་གྱིས་ཀུན་ནས་བསླང་བ་དང༌། སྲོག་གཅོད་པ་དང༌། མ་བྱིན་པར་ལེན་པ་དང༌། མི་ཚངས་པར་སྤྱོད་པ་དང༌། བརྫུན་དུ་སྨྲ་བས་ཀུན་ནས་བསླང་བའི་ལྟུང་བ་སྡུག་བསྔལ་དཔག་ཏུ་མེད་པ་སྐྱེད་པར་བྱེད་པ་ནི་གང་ཡིན་པ་དྲིས། དེ་རིམ་པ་གསལ་བ་ཡང་དག་པ་ཇི་ལྟ་བ་བཞིན་དུ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། བསྟན་པ་ནི་སྡོམ་པ་མ་ཡིན་པའོ། །བསྡུ་བ་ཡང་སྡོམ་པ་མ་ཡིན་པའོ། །ངག་གིས་ཀུན་ནས་བསླང་བ་ལ་ནི་དེ་བཞིན་གཤེགས་པ་ལ་མི་སྙན་པར་བརྗོད་པའོ། །ལུས་ཀྱིས་ཀུན་ནས་བསླང་བ་ལ་ནི་ངན་སེམས་ཀྱིས་ཁྲག་འབྱིན་པའོ། །ཕྲ་མས་ཀུན་ནས་བསླང་བ་ལ་ནི་དགེ་འདུན་གྱི་དབྱེན་ནོ། །དགེ་འདུན་གྱིས་ཀུན་ནས་བསླང་བ་ལ་ནི་དགེ་འདུན་གྱི་དབྱེན་ཉིད་དེ། །གང་ཟག་གིས་ཀུན་ནས་བསླང་བ་ལ་ནི་ཡང་དག་པ་མ་ཡིན་པར་སྐུར་བ་འདེབས་པའོ། །སྲོག་གཅོད་པས་ཀུན་ནས་བསླང་བ་ལ་ནི་རང་སངས་རྒྱས་གསོད་པའོ། །མ་བྱིན་པར་ལེན་པས་ཀུན་ནས་བསླང་བ་ལ་ནི་དགེ་འདུན་གྱི་འདུ་བའི་སྒོ་འཕྲོག་
པའོ། །མི་ཚངས་པར་སྤྱོད་པས་ཀུན་ནས་བསླང་བ་ལ་ནི་དགྲ་བཅོམ་མ་མི་ཚངས་པར་སྤྱོད་པས་སུན་འབྱིན་པའོ། །བརྫུན་དུ་སྨྲ་བས་ཀུན་ནས་བསླང་བ་ལ་ནི་ཕྲ་མ་སྨྲ་བའོ། །དེ་བཞིན་དུ་འདིར་གཞུང་གི་དོན་གོ་རིམས་བཞིན་ཏེ། དགེ་སློང་དག་རྒྱུ་གཅིག་གིས་ལྟུང་བ་ཐམས་ཅད་བསྟན་པ་ཡིན་ཏེ། འདི་ལྟ་སྟེ་སྡོམ་པ་མ་ཡིན་པས་སོ། །འདི་ལ་དོན་ནི་འདི་ཡིན་ཏེ། སྡོམ་པ་མ་ཡིན་པས་ཞེས་བྱ་བ་ནི་མི་ལྡོག་པའི་བསམ་པ་སྟེ། མི་ལྡོག་པའི་བསམ་པ་ཅན་ལ་ནི་བཤགས་པ་ལ་སོགས་པའི་སྒྲུབ་པ་ཡོད་དུ་ཟིན་ཀྱང་ལྟུང་བ་ཡོད་དོ་ཞེས་བྱ་བར་བསྟན་ཅིང་ཐ་སྙད་གདགས་པ་འཇུག་གོ་ཞེས་བྱ་བའི་ཐ་ཚིག་གོ །མདོ་བྱེད་པས་ཀྱང་གཞན་ལ་ནི་དེ་དང་བཅས་པའི་བཤགས་པའོ་ཞེས་བཤད་པའི་ཕྱིར་རོ། །རྒྱུ་གཅིག་གིས་ལྟུང་བ་ཐམས་ཅད་བསྡུས་པར་འགྱུར་ཏེ། འདི་ལྟ་སྟེ་སྡོམ་པ་མ་ཡིན་པས་སོ། །འདི་ལ་ཡང་དོན་ནི་དེ་ཁོ་ནར་ཟད་དོ། །ངག་གིས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་དེ་བཞིན་གཤེགས་པ་ལ་ཡང་དག་པ་མ་ཡིན་པས་མི་སྙན་པར་བརྗོད་པ་གང་ཡིན་པའོ། །ལུས་ཀྱིས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་གང་ཡིན་པའོ། །ཕྲ་མས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་དབྱེ་བར་རྩོམ་པ་གང་ཡིན་པའོ། །དགེ་འདུན་གྱིས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་འདི་ལྟ་སྟེ་དགེ་འདུན་གྱི་དབྱེན་ནོ། །གང་ཟག་གིས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི། འདི་ལྟ་སྟེ་ཡང་དག་པ་མ་ཡིན་པས་སྐུར་པ་འདེབས་པའོ། །སྲོག་གཅོད་པས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་རང་སངས་རྒྱས་གསོད་པ་གང་ཡིན་པའོ། །མ་བྱིན་པར་ལེན་པས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱི་འདུ་བའི་སྒོ་འཕྲོག་པ་གང་ཡིན་པའོ། །མི་ཚངས་པར་སྤྱོད་པས་
ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་མ་དགྲ་བཅོམ་པ་སུན་འབྱིན་པའོ། །བརྫུན་དུ་སྨྲ་བས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་སྡིག་པ་ཆེ་བ་ནི་མིའི་ཆོས་བླ་མ་བྱེད་ཅིང་མི་བདོག་བཞིན་དུ་བརྗོད་པའོ་ཞེས་བྱ་བ་ཡིན་ནོ། །འདི་ལྟར་མཇུག་བསྡུ་བའི་ཐབས་ཀྱིས་དྲི་བ་གཅིག་ཁོ་ན་ཞིག་བཤམ་པའི་རིམ་པས་དྲི་བར་བྱ་བའི་ཕྱིར། མང་དུ་སྨྲ་ཡང་ཅི་ཞིག་དགོས། །ཞེས་བྱ་བ་ལ་སོགས་པ་སྨོས་ཏེ། མང་དུ་སྨྲ་ཞེས་བྱ་བ་ནི་བཤད་མ་ཐག་པའི་ཚུལ་ལམ། འདུལ་བར་གཏོགས་པ་མ་བཤད་པའོ། །ཅི་ཞིག་དགོས་ཞེས་བྱ་བ་ནི་ཅིར་ཡང་མི་དགོས་པ་ཉིད་དོ་ཞེས་བྱ་བའི་ཐ་ཚིག་གོ །མདོར་སྡུས་ཤིག་ཅེས་བྱ་བ་ནི་སྤྲོས་པ་དང་བྲལ་བ་སྟེ། གང་གི་ཕྱིར་དྲི་བ་ཟབ་མོ་རྣམས་ཧ་ཅང་ཟབ་མོ་བྱས་ན། ཡུན་རིང་པོ་ཞིག་ཏུ་ཉོན་མོངས་པ་དང༌། ཁྱོད་ཁོ་པོ་ལ་མ་རངས་པར་འགྱུར་བ་དེའི་ཕྱིར། ཁོ་བོས་ཁྱོད་ལ་མདོར་བསྡུས་པའི་ཚིག་གཅིག་ཁོ་ན་ཅིག་སྨྲའོ་ཞེས་བྱ་བའི་དོན་ཏོ། །ཁྲོ་སྤངས་ཞེས་བྱ་བ་ནི་མི་དགའ་བ་ཡོངས་སུ་བཏང་སྟེའོ། །མཛའ་བར་གྱུར་བྱས་ནས་ཞེས་བྱ་བ་ནི་བཤེས་སུ་བྱས་ནས་ཏེ། ཁྲོ་སྤངས་ཕན་པར་འདོད་པས་གཡོ་དང་སྒྱུ་མེད་པས་ཁྱོད་ལ་སྨྲའི་བརྙས་པར་འདོད་པས་ནི་མ་ཡིན་ནོ་ཞེས་བྱ་བའི་ཐ་ཚིག་གོ །སྡོམ་པ་ཀུན་ལ་བརྟན་ཞེས་བྱ་བ་ནི། དགེ་བསྙེན་དང༌། དགེ་བསྙེན་མ་དང༌། དགེ་སྦྱོང་དང༌། དགེ་སྦྱོང་མ་དང༌། བསྙེན་གནས་ལ་གནས་པ་དག་ལའོ། །ཀུན་མཁྱེན་གྱིས་ཞེས་བྱ་བ་ནི་ཐམས་ཅད་མཁྱེན་པས་སོ། །སྐྱབས་ཞེས་བྱ་བ་ནི་དཀོན་མཆོག་གསུམ་ལ་སྐྱབས་སུ་འགྲོ་བ་སྟེ། འདིར་ངན་སོང་དམྱལ་བ་ལ་སོགས་པའི་སྡུག་བསྔལ་འཇིགས་པར་འགྱུར་བས་སོ། །དགེ་སློང་ཉིད་ལས་ཞེས་བྱ་བ་ནི་དགེ་སློང་གི་སྡོམ་པ་ལའོ། །གསལ་བར་ཞེས་བྱ་བ་ནི་སལ་སལ་པོར་ཁོ་བོ་ལ་སྨྲོས་ཤིག་ཅེས་བྱ་བར་སྦྱར་རོ། །འདི་ལ་དོན་ནི་འདུལ་བར་གཏོགས་པའི་དྲི་བ་ཟབ་མོ་གཞན་ཡང་མང་པོ་ཞིག་ཡོད་དེ་དེ་དག་ལ་ཁོ་བོས་ཁྱོད་ལ་དྲི་བ་དྲིས་ན་ཡུན་རིང་མོ་ཞིག་ཏུ་ཉོན་མོངས་པར་འོང་བས། དེའི་ཕྱིར་རེ་ཞིག་ལག་སྤྲད་པས་སྔོན་དུ་འགྲོ་བའི་གནས་པས་ཕན་པར་འདོད་ཅིང་དེའི་ཕྱིར་དགེ་སློང་
གི་སྡོམ་པ་ཡང་དག་པར་བླངས་པའི་དུས་ན་ནི། དཀོན་མཆོག་གསུམ་ལ་སྐྱབས་སུ་འགྲོ་བ་མ་གསུངས་ལ། སྐྱབས་སུ་མ་སོང་བ་ལ་མིན་ཞེས་འབྱུང་བས་གཞན་དག་ལ་ནི་གསུངས་ཞེས་བྱ་བའི་དྲི་བ་གཅིག་ཅིག་དྲིས་ཏེ། ཁོ་བོ་ལ་ཡང་དག་པ་ཇི་ལྟ་བ་བཞིན་དུ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། བསྙེན་པར་རྫོགས་པ་ཞེས་སྨོས་པས་སྐྱབས་སུ་འགྲོ་བ་གྲུབ་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། དགེ་འདུན་བཙུན་པ་རྣམས་ཀྱིས་བདག་བསྙེན་པར་རྫོགས་པར་བྱ་བར་མཛད་དུ་གསོལ། དགེ་འདུན་བཙུན་པ་རྣམས་ཀྱིས་བདག་རྗེས་སུ་གཟུང་དུ་གསོལ་ཞེས་བྱ་བ་ལ་སོགས་པ་ཡིན་ནོ། །དེ་བཞིན་དུ་འགྲེལ་པ་བྱེད་པས་བསྙེན་པར་རྫོགས་ཞེས་བྱ་བའི་སྒྲ་ཁོང་ནས་དེའི་དོན་འགྲུབ་པའི་ཕྱིར་ཏེ། བྱ་བ་མ་ཡིན་པ་ཐམས་ཅད་ལས་ལྡོག་པའི་མཚན་ཉིད་ཡིན་པའི་ཕྱིར་རོ། །བདག་ཉིད་ཐམས་ཅད་ཀྱིས་མྱ་ངན་ལས་འདས་པ་ཁས་ལེན་པ་ནི་བསྙེན་པར་རྫོགས་པ་སྟེ། འདི་ལྟར་བསྙེན་པར་རྫོགས་པ་ནི་མྱ་ངན་ལས་འདས་པ་ལ་ཁང་བསྙེན་ཏེ་རྣམ་པར་གནས་པ་ཡིན་ནོ་ཞེས་བཤད་དོ། །དེ་བཞིན་དུ་ཡང་ངའི་ཉན་ཐོས་ཚུལ་ཁྲིམས་ལྡན་པ་དེ་ལ་མཐོ་རིས་ནི་རས་ཡུག་གིས་བར་དུ་ཆོད་པ་ཙམ་མོ། །ཐར་པ་ནི་ཡོལ་བས་ཆོད་པ་ཙམ་མོ་ཞེས་གསུངས་སོ། །ཡང༌། རབ་ཏུ་བསྔགས་དང་ནོར་རྙེད་དང༌། །ཕ་རོལ་མཐོ་རིས་དགའ་བ་ཡིས། །བདེ་བ་གསུངས་དོན་གཉེར་བྱེད་པ། །བློ་དང་ལྡན་པས་ཚུལ་ཁྲིམས་བསྟེན། །གནས་གསུམ་དེ་དག་ལེགས་མཐོང་བའི། །མཁས་པས་ཚུལ་ཁྲིམས་བསྟེན་པར་བྱ། །འཕགས་པའི་མཐོང་བའི་ཕུན་ཚོགས་ཏེ། །འཇིག་རྟེན་ན་ནི་ཞི་པ་བསྟེན། །ཞེས་གསུངས་སོ། །དེ་ལྟར་རྣམ་པ་སྣ་ཚོགས་མང་པོ་བརྗོད་པས་གཞན་སྤོབས་པ་མེད་པར་བྱས་ནས་མཇུག་བསྡུ་བ་དང༌། དེ་ལྟས་འདུལ་བ་རྒྱ་མཚོ་ལས། །ཞེས་བྱ་བ་ལ་སོགས་པ་སྨོས་ཏེ། དེ་ལྟས་ཞེས་བྱ་བ་ནི་བཤད་མ་ཐག་པའི་རྣམ་པར་རོ། །བསྡུས་པ་ནི་ཕྱུང་བའོ། །གང་ལས་ཤེ་ན། རྒྱ་མཚོ་ལས་ཞེས་བྱ་བ་སྨོས་ཏེ། འདུལ་བ་རྒྱ་མཚོ་ཆེན་པོ་ལས་སོ། །ཇི་ལྟར་རྒྱ་མཚོ་དེ་གཏིང་དང་ཕ་རོལ་མེད་
ཅེས་གྲགས་པ་དེ་བཞིན་དུ། འདུལ་བ་རྒྱ་མཚོ་འདི་ཡང༌། བྱུང་བ་དང་བཅའ་བ་དང༌། སྔོན་གྱི་གཏམ་དང༌། རྟོགས་པ་བརྗོད་པ་དང༌། སྐྱེས་པ་རབས་དང༌། འཁོར་ལོ་ལྟར་སྦྱར་བ་དང༌། མུ་བཞི་པ་ལ་སོགས་པས་གཏིང་དང་མཐའ་མེད་དེ། དེའི་ཕྱིར་རྒྱ་མཚོ་ཉིད་ཀྱིས་ཉེ་བར་དཔག་གོ །དེ་ལས་ཇི་ཙམ་ཅིག་བཏུས་ཤེ་ན། དྲི་བ་ཐིགས་པ་ཙམ་ཞེས་བྱ་པ་སྨོས་སོ། །ཐིགས་པ་ཙམ་ནི་ཉུང་ཞིག་སྟེ། ཙམ་ཞེས་བྱ་བ་སྨོས་པས་ནི། བརྟགས་པས་ཧ་ཅང་རྣམ་པ་མང་པོ་བསལ་ཏོ། །བརྒྱ་ཞིག་ཅེས་བྱ་བ་ནི་རྟོགས་པར་དཀའ་བའི་དོན་དྲི་བ་བརྒལ་ཞིང་བརྟག་པ་བརྒྱ་ཞིག་སྟེ། ཚིགས་སུ་བཅད་པ་བཀོད་པ་དོན་ཡོངས་སུ་རྫོགས་ལ། ཕལ་ཆེ་བ་ལས་བརྩམས་ནས། བརྒྱ་ཞིག་ཅེས་སྨོས་ཏེ། འོན་ཀྱང་ལྟུང་བ་རྣམ་པར་རིག་བྱེད་ཅིག་ཡིན་ནམ། གཟུགས་ཅན་ཞིག་གམ། བསྟན་དུ་ཡོད་པ་ཞིག་གམ་ཞེས་བྱས་ཏེ། དེ་ལྟ་བུ་ལ་སོགས་པ་ཚིགས་སུ་བཅད་པའི་སྐབས་ན། དྲི་བ་ལྷག་པ་དག་ཀྱང་ཡོད་དོ། །བདག་ནི་ཞེས་བྱ་བ་ནི་འདུལ་བ་དྲི་བའི་ཚིག་ལེའུར་བྱས་པ་བྱེད་པ་བདག་ཉིད་ཡིན་པར་སྟོན་ཏོ། །འབད་དེ་ཞེས་བྱ་བ་ནི་བསྒྲིམས་ནས་སོ། །འདིས་ནི་དྲི་བ་རྣམས་ཟབ་པ་ཉིད་དུ་བསྟན་ཏེ། དོན་ཟབ་མོ་དཔྱད་པར་བྱ་བ་ལ། བདག་ལྟ་བུ་བློ་རྩིང་པོ་རྣམས་ཀྱིས་བློ་བབ་ཅོལ་དུ་གཏིང་མི་སླེབས་སོ་ཞེས་བྱ་བ་བརྩམས་པའོ། །ཅིའི་ཕྱིར་ཞེ་ན། མ་རངས་ནས་ཞེས་བྱ་བ་སྨོས་ཏེ་མ་མགུ་ནས་སོ། །ཡུལ་གང་ལ་མ་རངས་ཤེ་ན། བརྙས་བྱེད་ལ་ཞེས་བྱ་བ་སྨོས་ཏེ། བརྙས་བྱེད་ཅེས་བྱ་བ་ནི་ཁྱད་དུ་གསོད་པར་བྱེད་པའོ། །འདི་ལ་དོན་ནི་བདག་ཀྱང་སོ་སོའི་སྐྱེ་བོར་རད་པས་འདུལ་བ་དང་འདུལ་བ་འཛིན་པ་ལ་བརྙས་པར་བྱེད་པས། ཐུགས་ཐུབ་ཅན་ཉིད་གོ་བདག་ཉིད་ཀྱི་ཚོད་ཀྱང་མི་འཛིན་པར། ཇི་ལྟར་གཞན་ལ་བརྙས་པར་བྱེད་སྙམ་ནས་མ་རངས་ཏེ། འདུལ་བ་རྒྱ་མཚོ་ལས་དྲི་བ་ཉུང་ཤས་འདི་བཏུ་བར་བྱས་སོ་ཞེས་བྱ་བ་ཡིན་ནོ། །ད་ནི་དྲི་བ་ཕྱེད་པས་བདག་ཉིད་ཀྱི་ཚིག་དང་དོན་ངེས་པར་འཛིན་པར་གཏོགས་པའི་ཉེས་པ་བཤགས་ཤིང་བླ་མ་དག་ལ་ཡང་བཟོད་པ་གསོལ་བ་ནི། ནོངས་བགྱིས་བླ་མས་ཐུགས་རྗེས་ཀྱང༌། །ཞེས་བྱ་བ་ལ་སོགས་པ་སྨོས་ཏེ། ནོངས་བགྱིས་ཞེས་བྱ་བ་ནི་དྲི་བ་བྱེད་པས་
ཚིག་དང་དོན་དུ་གཏོགས་པའི་ཉེས་བྱས་སོ། །བླ་མས་ཞེས་བྱ་བ་ནི་མཁན་པོ་དང༌། འདུལ་བ་འཛིན་པ། འདུལ་བར་གཏོགས་པའི་དོན་གྱི་རང་གི་ངོ་བོ་རྟོགས་པར་དཀའ་པ་མ་ལུས་པར། རབ་ཏུ་རྣམ་པར་འབྱེད་པའི་སྒོ་ནས། སེམས་དང་སེམས་ལས་བྱུང་བའི་རྒྱུད་གསལ་བར་བྱས་པ་རྣམས་ཀྱིས་སོ། །བཅོས་ཤིང་ཞེས་བྱ་བ་ནི་དོན་གྱི་བདག་ཉིད་དང་ཚིག་གི་བདག་ཉིད་ཀྱིས་བཅོས་ཤིང་ངོ༌། །བཟོད་པ་མཛད་དུ་གསོལ་ཞེས་བྱ་བ་ནི། ཉེས་པ་བཟོད་པར་བྱས་ཏེ། ཉེས་པ་བཀོད་པར་གཏོགས་པའི་ཉེས་པ་བདག་ལ་བཟོད་པ་མཛོད་ཅིག་པའོ། །ཅི་ཚིག་ཙམ་གྱིས་སམ་ཞེ་ན། ཐུགས་རྗེ་ཞེས་བྱ་བ་སྨོས་ཏེ། ཐུགས་རྗེ་ནི་སྡུག་བསྔལ་དང་སྡུག་བསྔལ་གྱི་རྒྱུ་ལས་དྲང་བར་འདོད་པའི་བརྩེ་བ་སྟེ་ངེས་སོ། །ཀྱང་ཞེས་བྱ་བ་ནི་བསྡུ་བ་སྟེ། བཅོས་པ་འབའ་ཞིག་ཏུ་མ་ཟད་ཀྱི་ཐུགས་རྗེ་རྒྱུར་གྱུར་པས་བཟོད་པ་མཛོད་ཅིག་པ་སྟེ། བདག་ཉིད་ཆེན་པོ་དེ་དག་ཉེས་པ་དུ་མ་ཞིག་གིས་སྐྱོན་ཆགས་སུ་ཟིན་ཀྱང༌། དེ་དག་གིས་བྱས་པའི་ཉེས་པ་ལས་གདོན་པར་འདོད་པས། ཐོག་མར་དྲངས་པའི་སྙིང་རྗེས་སེམས་ཀྱི་རྒྱུད་བརླན་པས་ཉེས་པ་ཆེན་པོ་ཡང་བཟོད་དོ། །དེ་ཉིད་ཀྱི་དོན་གཞན་ཉེ་བར་དགོད་པས་བསྟན་པར་བྱ་བའི་ཕྱིར། མཐོང་བ་རྣམས་ཀྱིས་ལོང་བ་ནི། །ཞེས་བྱ་བ་ལ་སོགས་པ་སྨོས་ཏེ། མཐོང་བ་རྣམས་ཀྱིས་ཞེས་བྱ་བ་ནི་ཡང་དག་པའི་ལྟ་བ་ཕུན་སུམ་ཚོགས་པ་རྣམས་ཀྱིས་སོ། །ལོང་བ་ནི་ཤེས་རབ་དང་བྲལ་བ་སྟེ། ལོང་པ་དང་འདྲ་བར་ལོང་བ་ཡིན་པས་སོ། །དམ་པའི་ལམ་ཞེས་བྱ་བ་ནི་ཡང་དག་པའི་ལམ་ལའོ། །ཅི་ཞེས་བྱ་བ་ནི་དྲི་བའོ། །མི་གཟུང་བ་ཞེས་བྱ་བ་ནི་མི་དགོད་པ་སྟེ། དམ་པའི་ལམ་ལ་དགོད་པར་བྱ་བ་ཉིད་དོ་སྙམ་དུ་བསམས་པའོ། །འདི་ལ་དོན་གྱི་ཕྱོགས་གང་ན་གང་ཟག་འདུལ་བ་འཛིན་པ་གནས་པའི་ཕྱོགས་དེ་སྣང་བར་འགྱུར་བར་སྣང་ངོ༌། །གསལ་བར་འགྱུར་པ་དང༌། རབ་ཏུ་གསལ་བར་འགྱུར་བར་སྣང་ངོ་ཞེས་གསུངས་པས། བླ་མ་མི་ཤེས་པའི་མུན་པའི་རབ་རིབ་ཀྱི་ལིང་ཏོག་གི་ཚོགས་དང་རྣམ་པར་བྲལ་བ། རིག་པ་ཁ་ན་མ་ཐོ་བ་མེད་པས་གསལ་བར་བྱས་པའི་མིག་ཅན་རྣམས་ཀྱི་འདུལ་བར་གཏོགས་པའི་དོན་གྱི་རང་གི་ངོ་བོ་མཐུན་པ་དང༌། མི་མཐུན་པར་རབ་ཏུ་སྟོན་པ་ལ། བརྩོན་པ་ཉིད་ཀྱིས་
འཇིག་རྟེན་གྱི་མིག་ཏུ་གྱུར་པ་ཡིན་ལ། དབང་གིས་སྔ་ཕྱི་བརྟག་པའི་མིག་དང་བྲལ་བས་ལོང་བ་ལྟ་བུ་སྟེ། དེ་བས་ན་མ་རིག་པའི་མུན་པས་དྲི་མ་ཅན་དུ་བྱས་པའི་ཡིད་དང་ལྡན་པ་དག་དམ་པ་མ་ཡིན་པའི་ལམ་ལས་བཟློག་སྟེ། ལོང་བས་ཐག་རིང་པོ་དང་ཕྲ་བ་དང༌། བསྒྲིབས་པ་མི་མཐོང་བ་བཞིན་དུ་ལམ་དམ་པ་ལ་ཤོག་ཤིག་ཅེས་བྱ་བ་འདི་ཡིན་ནོ། །ད་ནི་འདུལ་བ་དྲི་བའི་ཚིག་ལེའུར་བྱས་པས་ཀུན་ནས་བསླང་བའི་དགེ་བ་མངོན་བར་འདོད་པའི་འབྲས་བུའི་ཁྱད་པར་དུ་ཡོངས་སུ་བསྔོ་བར་བྱ་བ་འདུལ་བའི་དྲི་བ་རྣམས་བྱས་ནས་ཞེས་བྱ་བ་ལ་སོགས་པ་སྨོས་སོ། །འདུལ་བ་དྲི་བ་རྣམས་ཞེས་བྱ་བ་ནི་འདུལ་བར་གཏོགས་པའི་དྲི་བ་ནི་འདུལ་བའི་དྲི་བ་སྟེ། ཆོས་མངོན་པར་གཏོགས་པའི་དྲི་བ་དག་ཀྱང་ཡོད་པས་དེའི་ཕྱིར་འདུལ་བའི་ཞེས་ཁྱད་པར་དུ་བྱས་སོ། །བྱས་ནས་ཞེས་བྱ་བ་ནི་བརྩམས་ནས་སམ་སྨྲས་ནས་སོ། །དགེ་བ་ནི་དགེ་ལེགས་སོ། །དཀར་པོ་ནི་དཀར་བའོ། །ཇི་ལྟ་བུ་ཞིག་ཅེ་ན། ཟླ་བ་ལྟ་བུར་ཞེས་བྱ་བ་སྨོས་ཏེ་ཟླ་བ་འདྲ་བའོ། །དྲི་མ་མེད་པ་ཞེས་བྱ་བ་ནི་ཚིག་སྟེ་དགེ་བ་དེས་སོ། །འགྲོ་བ་ནི་ཁམས་གསུམ་པའོ། །རྟག་ཏུ་ཞེས་བྱ་བ་ནི་དུས་ཐམས་ཅད་དུའོ། །དགེ་བ་ཞེས་བྱ་བ་ནི་བཀྲ་ཤིས་པར་རོ། །ཤོག་ཅེས་བྱ་བ་ནི་གྱུར་ཅིག་པའོ། །འདི་ལ་དོན་ནི་བདག་གིས་འདུལ་བ་དྲི་བའི་ཚིག་ལེའུར་བྱས་པ་བསྡེབས་ནས། བསོད་ནམས་སྟོན་ཁའི་ཟླ་པའི་འོད་ཟེར་ལྟ་བུར་ཤིན་ཏུ་དཀར་བ་བསྒྲུབས་པ་དེས་ཁམས་གསུམ་པའི་འགྲོ་བ་འདིའི་ཉོན་མོངས་པ་ཐམས་ཅད་རྣམ་པར་ཟློག་པར་གྱུར་ཅིག་ཅེས་བྱ་བ་ཡིན་ནོ། །བདག་གིས་འདུལ་བའི་དྲི་བ་ནི། །བསྡུས་པ་རྣམ་པར་ཕྱེ་ནས་གང༌། །དགེ་བ་ཐོབ་པ་དེ་ཡིས་ནི། །འཇིག་རྟེན་དགེ་བཤེས་བྱེད་པར་ཤོག །འདུལ་བ་དྲི་བའི་ཚིག་ལེའུར་བྱས་པ་ལྔ་པའི་གཏན་ལ་དབབ་པ་རྫོགས་ཏེ། འདུལ་བ་དྲི་བའི་ཚིག་ལེའུར་བྱས་པའི་གཏན་ལ་དབབ་པ། སློབ་དཔོན་མདོ་སྡེ་འཛིན་པ་ཀ་ལྱཱ་ཎ་མི་ཏྲས་མཛད་པ་རྫོགས་སོ།། །།གལ་ཏེ་བདག་ནི་རྨོངས་པ་ཡིས། །ལན་ཞིག་ལེགས་པར་མ་ཐབས་ན། །འདི་ནི་ཕྱོགས་ཙམ་བསྟན་པར་བྱས། །མཁས་པས་བདེ་ལེགས་གདབ་ཏུ་གསོལ། །སྡུག་ཅིང་གདུང་བ་སེལ་བྱེད་པ། །ཇི་ལྟར་འདོད་པའི་འབྲས་བུ་སྟེར།།
གྲིབ་མ་སྟུག་པོའི་ཤིང་མཆོག་ལྟར། །གཞན་དོན་དགའ་བའི་ཕྱིར་འཁྲུངས་པ། །ཀུན་དགའ་གོ་ཆས་བདག་ལ་ནི། །ཤིན་ཏུ་བཅོལ་ཏེ་དེ་ཡི་ཕྱིར། །ཅི་དྲན་བ་ཞིག་འབད་དེ་བྱས། །ང་རྒྱལ་གྱི་ནི་ཕྱིར་མ་ཡིན། །རྒྱ་གར་གྱི་མཁན་པོ་དྷརྨཱ་ཀ་ར་དང༌། ཞུ་ཆེན་གྱི་ལོ་ཙཱ་པ་བནྡེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། ཤློ་ཀ་སྟོང་དྲུག་བརྒྱ་དྲུག་ཅུ་རྩ་བཞི་ཡོད་དོ།།