གཏན་ཚིགས་ཐིགས་པའི་འགྲེལ་པ།
རྒྱ་གར་སྐད་དུ། ཧེ་ཏུ་བིནྡུ་བི་བ་རཎ། བོད་སྐད་དུ། གཏན་ཚིགས་ཐིགས་པའི་འགྲེལ་པ། བཅོམ་ལྡན་འདས་རྡོ་རྗེ་འཆང་བ་ལ་ཕྱག་འཚལ་ལོ། །སྐྱེ་བོའི་ཚོགས་ཀྱི་ཉོན་མོངས་སྐྱོབ་པའི་ཕྱིར་ན་ཐུགས་རྗེ་ཆེན་པོ་ཡང་དག་བསྐྱེད་བ་ཅན། །བསོད་ནམས་ཡེ་ཤེས་བདག་ཉིད་རབ་ཏུ་བསགས་པ་རྒྱ་ཆེ་བ་ཡི་རྒྱུ་དག་ངལ་བ་རྣམ་པར་བསལ། །ཤེས་བྱ་མ་ལུས་རབ་འབྱམས་དྲི་མ་མེད་པའི་ཤེས་རབ་འཆར་བའི་རི་བོ་ལ་བརྟེན་ནས། །འཇིག་རྟེན་སྙིང་གི་མུན་པ་འཇོམས་མཛད་རྒྱལ་བ་ཉི་མ་གང་ཡིན་དེ་ལ་སྤྱི་བོས་ཕྱག་འཚལ་ལོ། །ཆོས་ཀྱི་གྲགས་པའི་རྣམས་ལ་ནི།། དཔྱད་ཟིན་ཀྱང་ནི་དཔྱད་པ་མཛེས། །རྒུན་ནི་བཙིར་བ་གྱུར་ཀྱང་ནི། །མངར་བ་ཅིས་ན་འདོར་འགྱུར་རམ། །འགྲོ་རྣམས་ཕྱོགས་གཅིག་གང་གི་བློ། །རིགས་ལམ་གནས་ནས་གཞལ་གྱུར་ན། །རྒྱལ་གྱུར་དེ་གསུང་ཟབ་མོ་གང༌། །བདག་བློ་བླུན་པོས་ག་ལ་ཡིན། །དེ་ལྟ་ན་ཡང་བདག་ལས་ཀྱང༌།། གང་དག་ཁ་ཅིག་བློ་དམན་པ། །ཡོད་པ་རྣམས་ལ་བདག་གིས་ནི། །གཏན་ཚིགས་ཐིགས་པར་རྣམ་པར་དབྱེ། །ཁ་ཅིག་ནི་དོན་ལྐོག་ཏུ་གྱུར་པ་ལ་སོགས་པ་རབ་ཏུ་བྱེད་བ་རྩོམ་པའི་དགོས་པ་གསུངས་པ་བ་དེ་ཡང་ཉན་པའི་སྐྱེ་བོ་འཇུག་པའི་དོན་ཡིན་ནོ་ཞེས་བྱ་བ་དེ་ལ། །བསྟན་བཅོས་ཐམས་ཅད་ཉིད་དམ་ནི། །ཡང་ན་བྱ་བ་འགའ་ཞིག་ལ། །ཇི་སྲིད་དགོས་པ་མ་བརྗོད་པར། །དེ་སྲིད་གང་གིས་གཟུང་བར་བྱ། །ཞེ་ན། དེ་ནི་མི་རིགས་ཏེ། གང་གིས་རབ་ཏུ་བྱེད་པ་འདིའི་དགོས་པ་འདི་ཡིན་ནོ་ཞེས་བརྗོད་པས་དགོས་པའི་ཁྱད་པར་དག་གི་རབ་ཏུ་བྱེད་པ་ནི་ཐབས་སུ་ངེས་པ་ཡིན་ཏེ། ཐབས་མ་ཡིན་པ་ལ་མི་འཇུག་པའི་ཕྱིར་དེ་དོན་དུ་གཉེར་བའི་རྟོག་པ་དང་ལྡན་པས་རབ་ཏུ་བྱེད་པ་མཉམ་པ་ལ་སོགས་པ་འཇུག་པར་འགྱུར་རོ་ཞེས་རྗོད་པར་བྱེད་པ་དོན་དང་ལྡན་པར་སྨྲ་བ་དེ་སྐད་སྟོན་པ་དེ་ནི་མི་རིགས་ཏེ། གང་གི་ཕྱིར་རྟོག་པ་དང་ལྡན་པ་རྣམས་ཀྱིས་དགོས་པ་དོན་དུ་གཉེར་བ་རྣམས་ནི་དེའི་ཐབས་ངེས་པ་དེ་ཡོད་པ་ལས་ཡིན་ཏེ། དཔེར་ན་ཞིང་རྨོ་བ་ལ་སོགས་པ་རྣམས་ལོ་ཐོག་ལ་སོགས་པའི་ཐབས་ས་བོན་ལ་སོགས་པ་ས་བོན་མ་ཡིན་པ་ལས་དབེན་པའི་ས་བོན་ལ་སོགས་པ་ངེས་པར་འགྱུར་བ་བཞིན་ནོ། །གཞན་དུ་ན་ཐབས་མ་ངེས་པའི་ཐབས་ལས་བྱུང་བ་དོན་དུ་གཉེར་བ་ནི་རྟོག་
པ་དང་ལྡན་པ་རྣམས་སྤོང་བར་འགྱུར་ཏེ། ཐབས་ལས་བྱུང་བའམ་འབྱུང་བར་འགྱུར་བ་ལ་ཚད་མའི་བྱ་བ་མི་སྲིད་པའི་ཕྱིར་རོ། །མ་ངེས་སུ་ཟིན་ཀྱང་འབྲེལ་པ་མ་ཚང་བ་མེད་བའི་ཐབས་ངེས་བར་རུང་བ་འདི་དག་བརྗོད་པར་འདོད་པའི་འབྲས་བུ་བསྒྲུབ་པར་འགྱུར་བ་སྲིད་པས་རྟོག་པ་དང་ལྡན་པ་འཇུག་པར་འགྱུར་བས་དེས་ན་ཡོངས་སུ་མི་སྤོང་ངོ༌། །ངེས་པ་ཡང་ཚད་མ་ཁོ་ནས་ཡིན་ན་དགོས་པའི་ངག་ལ་ཚད་མ་མེད་དེ། སྒྲ་རྣམས་དང་ཕྱི་རོལ་གྱི་དོན་ལ་འབྲེལ་བ་མེད་པའི་ཕྱིར་རོ། །བརྗོད་པར་འདོད་པའི་ཚད་མ་དེ་ལ་ཡང་ཇི་ལྟ་བའི་དངོས་པོ་ལ་འཇུག་པའི་ངེས་པ་མེད་པའི་ཕྱིར་དེས་ན་རབ་ཏུ་བྱེད་པའི་དགོས་པ་ཁྱད་པར་གྱི་ཐབས་ལ་ངེས་པ་མེད་དོ། །གང་གིས་ཇི་ལྟར་དོན་གང་བརྗོད་པར་འདོད་པ་དེ་ཇི་ལྟ་བར་དེས་རྗེས་སུ་མི་སྒྲུབ་པོ། །གཞན་བསམས་ནས་གཞན་དུ་བརྗོད་པས་འཇུག་པ་ན་སླུ་བ་མཐོང་བའི་ཕྱིར་འཇིག་རྟེན་པ་ཐམས་ཅད་ལ་ཡིད་བརྟན་དུ་མེད་པས་སོ། །གལ་ཏེ་དགོས་པའི་ཁྱད་པར་ཉེ་བར་དགོད་བ་དེའི་ཐབས་སུ་གྱུར་པའི་རབ་ཏུ་བྱེད་པའི་ཡུལ་ལ་ཐེ་ཚོམ་སྐྱེ་བ་དེའི་ཕྱིར་དེ་ནི་ཞིང་རྨོ་བ་ལ་སོགས་པ་ཉིད་ལས་ས་བོན་དང་ས་བོན་མ་ཡིན་པར་ངེས་པས་འཇུག་པར་བརྗོད་དོ་ཞེ་ན། མ་ཡིན་ཏེ། དགོས་པའི་ཁྱད་པར་གྱི་ཐབས་ལ་ཐེ་ཚོམ་སྐྱེ་བ་ནི་དེ་བརྗོད་པ་ལས་སྔར་ཡོང་པས་སྒྲུབ་པར་བྱེད་པ་དང༌། གནོད་པར་བྱེད་པའི་ཚད་མ་མེད་པ་དེ་ནི་རིགས་པའི་སྟོབས་ལས་འོངས་པའི་ཕྱིར་རོ། །རྗེས་སུ་དཔག་པ་དེའི་དགོས་པ་ལ་སོགས་པ་བསྟན་པའི་ཕྱིར་རབ་ཏུ་བྱེད་པ་རྣམས་མཐོང་བས་ཅི་འདི་རྗེས་སུ་དཔག་པ་བསྟན་པའི་དགོས་པའམ། གཞན་ཅུང་ཟད་ཅིག་ཡིན་ཞེས་དེ་ལྟ་བུའི་དངོས་པོའི་ཐེ་ཚོམ་སྔར་འཇུག་པ་ན་གང་གིས་བསལ་བར་ནུས། གཞན་ཡང་ཅི་འདི་དགོས་པ་མེད་པ་འམ། ཡང་ན་ཁོ་བོ་ཅག་མངོན་པར་འདོད་པའི་དགོས་པ་དང་ལྡན་པ་ཡིན་ནོ་ཞེས་ཤེས་པར་འདོད་པ་འཇུག་པ་སྲིད་པས་དགོས་པའི་ངག་ཉེ་བར་དགོད་པ་དོན་མེད་དོ། །དེའི་ཕྱིར་གང་དགོས་པ་སྤངས་པའི་ངག་གམ་དེའི་དོན་ལ་རྟོག་པ་དང་ལྡན་པ་རྩོམ་པ་བྱེད་པའམ་སྟོན་པར་མི་འགྱུར་ཏེ། དཔེར་ན་སེའུ་བཅུ་པ་ཞེས་བྱ་བ་ལ་སོགས་པའི་ངག་དང༌། བྱ་རོག་གི་སོ་རྟོག་པ་བཞིན་ནོ། །འདི་འམ་འདིའི་དོན་ཀྱང་དགོས་པ་མེད་པས་ཞེས་བྱ་བ་ནི་ཁྱད་པར་བྱེད་པ་མི་
དམིགས་པས་རྒོལ་བ་ན། དེ་མ་གྲུབ་པར་བརྗོད་པའི་ཕྱིར་ཐོག་མར་དགོས་པའི་ངག་ཉེ་བར་བཀོད་དོ། །དེ་ལ་དེ་བསྟན་པའི་ཕྱིར་ཞེས་བྱ་བའི་ཚིག་གི་བདག་ཉིད་འདིས་ནི་རབ་ཏུ་བྱེད་པའི་དགོས་པ་གསུངས་ཏེ། ཇི་ལྟར་ངག་གིས་བརྗོད་པར་བྱ་བ་རྟོགས་པ་ནི་ངག་གི་དགོས་པ་ཡིན་ཏེ། དེ་ཡང་འདི་ལ་ཡོད་དེ་ཚིག་གི་ནང་ཚན་རྣམས་དང་དག་ཕན་ཚུན་དུ་འབྲེལ་པ་ལས་བསྡུས་པའི་དོན་རྟོགས་སོ། །དེ་ལྟ་ན་རབ་ཏུ་བྱེད་པ་འདིར་རྗེས་སུ་དཔག་པ་བསྟན་ཏོ་ཞེས་བྱ་བ་དེ་ནི་བརྗོད་པར་བྱ་བ་ཡིན་ཏེ། དེའི་སྒྲ་ནི་དེ་ཉིད་དང་འབྲེལ་པའི་ཕྱིར་རོ། །གལ་ཏེ་ལྐོག་ཏུ་གྱུར་པའི་དོན་རྟོགས་པའི་ཞར་ལ་རྗེས་སུ་དཔག་པ་བྱུང་བ་དེ་ལྟ་ན་ཡང་སྨྲ་བ་པོའི་བསམ་པ་དང་རྗེས་སུ་འབྲེལ་པའི་སྒྲ་འཇུག་པས་དེའི་སྒྲ་རབ་ཏུ་སྦྱར་གྱི། གཞན་དུ་ན་གཙོ་བོ་ལ་སྦྱར་བར་ཡང་ཇི་ལྟར་འགྱུར། སྒྲ་རྣམས་ཀྱི་རང་གི་ངོ་བོ་ནི་དོན་དང་འབྲེལ་པ་མེད་པའི་ཕྱིར་དང་ཕྱོགས་ཀྱི་ཆོས་ཞེས་བྱ་བ་ལ་སོགས་པས་རྗེས་སུ་དཔག་པ་བསྟན་པའི་ཕྱིར་རོ། །རང་གི་ངོ་བོ་ཕྱིན་ཅི་མ་ལོག་པར་རྟོགས་པ་དེ་བསྟན་པ་ནི་རབ་ཏུ་བྱེད་པའི་དགོས་པ་ཡིན་ཏེ། དེ་བསྒྲུབ་པར་བྱ་བའི་ཕྱིར་རོ། །དེ་ཉིད་ཀྱི་ཕྱིར་རྗེས་སུ་དཔག་པ་བསྟན་པའི་ཡུལ་ནི་རབ་ཏུ་བྱེད་པའི་བྱ་བ་ཡིན་པ་བསྟན་ཏེ། དེ་བསྟན་པའི་ཕྱིར་ཞེས་བྱ་བ་ཎི་ཙའི་རྐྱེན་གྱིས་བསྟན་ཏེ། དེས་ཀྱང་རབ་ཏུ་བྱེད་པ་དག་གི་དགོས་པ་ནི་བསྒྲུབ་པར་བྱ་བ་དང༌། སྒྲུབ་པར་བྱེད་པའི་མཚན་ཉིད་འབྲེལ་པར་བསྟན་པ་ཡིན་ནོ། །གལ་ཏེ་སྒྲ་འཇུག་པའི་ཡུལ་བསྟན་པས་རབ་ཏུ་བྱེད་པའི་བྱ་བ་གཙོ་བོ་ཡིན་པར་བསྟན་པ་དེ་ལྟ་ན་ཡང་དངོས་པོའི་འཇུག་པ་ཁོ་ན་གཙོ་བོ་ཡིན་པར་བསྟན་ཏེ། དེ་ནི་དེའི་བསྒྲུབ་པར་བྱ་བ་ཡིན་པའི་ཕྱིར་རོ། །ཅིག་ཤོས་ཀྱི་ཐབས་དེ་ནི་དོར་བར་བྱ་བ་ཡིན་ཏེ་གཙོ་བོ་མ་ཡིན་པའི་ཕྱིར་རོ། །དེའི་ཕྱིར་རྗེས་སུ་དཔག་པ་བསྟན་པ་ཁོ་ན་དགོས་པར་རྟོགས་པས་རབ་ཏུ་བྱེད་པའི་བྱ་བ་ནི་མ་ཡིན་ནོ་ཞེས་བྱའོ། །དོན་ལྐོག་ཏུ་གྱུར་པ་རྟོགས་པ་ནི་རྗེས་སུ་དཔག་པ་ལ་བརྟེན་པའི་ཕྱིར་ཞེས་བྱ་བ་ལ་སོགས་པ་འདིས་ནི་རབ་ཏུ་བྱེད་པའི་དོན་རྗེས་སུ་དཔག་པའི་མཚན་ཉིད་ཀྱི་དགོས་པ་གསུངས་སོ། །དག་རང་གི་དོན་རྟོགས་པའི་མཚན་ཉིད་ཀྱི་དགོས་པ་ཉིད་ལ་རྟོག་པ་དང་ལྡན་པ་འཇུག་པར་མི་འགྱུར་རོ། །འོན་ཀྱང་དེའི་བརྗོད་པར་བྱ་བའི་དོན་སྐྱེས་བུ་ལ་ཉེ་བར་མཁོ་བ་
ཡིན་ཏེ། དེ་ཡང་དེ་ལ་ཡོད་དེ། གང་གི་ཕྱིར་ལྐོག་ཏུ་གྱུར་བའི་དོན་རྟོགས་པ་གང་ཡིན་པ་དེ་ནི་ངེས་བའོ། །རྗེས་སུ་དཔག་པའི་ཚུལ་གསུམ་པའི་རྟགས་དེ་རྒྱུ་ལ་འབྲས་བུ་ཉེ་བར་བཏགས་པའི་ཕྱིར་ཐབས་གཞན་མ་ཡིན་པ་བསྒྲུབ་པར་བྱ་བ་དེ་བསྟན་པས་གཞན་གྱི་འདོད་པ་བསལ་བའི་ཕྱིར་རོ། །རྟེན་ནི་རྒྱུའོ། །རྗེས་སུ་དཔག་པའི་རྟེན་གང་ཡིན་པ་ཞེས་བྱ་བ་ཐུན་མོང་དུ་རྣམ་པར་སྦྱོར་རོ། །དེས་ན་རྗེས་སུ་དཔག་པ་རྟེན་ཡིན་པས་ཞེས་བྱ་བ་བྱེ་བྲག་གང་གི་ཡིན་ཞེས་བྱ་བ་རྟོགས་པ་ན་གལ་ཏེ་ཡང་དོན་ལྐོག་ཏུ་གྱུར་པ་རྟོགས་པ་ནི་སྒྲའི་འབྲེལ་པ་མོ་རྟགས་སུ་གོ་བ་དེ་ལྟ་ན་ཡང་དེ་ཚིག་གི་སྦྱོར་བའི་དུས་སུ་ཉེ་བ་མ་ཡིན་པས་ཕྱི་རོལ་དུ་གྱུར་པའི་ཕྱིར་མོ་རྟགས་ཀྱི་རྒྱུ་མཚན་མ་ཡིན་ཏེ། དཔེར་ན་འདི་བྲམ་ཟེ་མོར་བདེན་ནོ་ཞེས་པ་དང༌། སྣོད་འདི་འབྲུ་བཞག་པ་ཞེས་བྱ་བ་བཞིན་ནོ། །འདིས་ཀྱང་དོན་ལྐོག་ཏུ་གྱུར་པ་རྟོགས་པ་ཐམས་ཅད་ཚད་མར་གྱུར་པ་ལས་ཡིན་གྱི་གཞན་གྱིས་དེ་རྟོགས་སོ། །མི་རིགས་པའི་ཕྱིར་ཚུལ་གསུམ་པའི་རྟགས་ལ་བརྟེན་པ་ཁོ་ན་བཤད་པ་ཡིན་ཏེ། རྗེས་སུ་དཔག་པ་ཉིད་ལ་བརྟེན་པའི་ཕྱིར་ཞེས་ངེས་པར་གཟུང་བའི་ཕྱིར་རོ། །དེས་ཀྱང་སྒྲ་ལ་སོགས་པ་རྣམས་ཡིན་ན་ནི་རྗེས་སུ་དཔག་པའི་ཚད་མ་མ་ཡིན་ཏེ། གཞན་དུ་ན་དེ་རྣམས་ཀྱང་བསྟན་པར་ཐལ་བར་འགྱུར་ཏེ་རྒྱུ་མཚན་མཚུངས་པའི་ཕྱིར་རོ། །དེ་ལྟ་ན་ལྐོག་ཏུ་གྱུར་པའི་དོན་ཐམས་ཅད་རྟོགས་པ་ནི་ཚད་མའི་བདག་ཉིད་ལས་ཡིན་གྱི་རང་དགས་ནི་མ་ཡིན་ནོ། །དེ་རང་གི་དོན་དང་འབྲེལ་པ་མེད་པས་ངེས་པ་ན་དེ་མི་སླུ་བར་རིགས་པ་མ་ཡིན་པའི་ཕྱིར་དང༌། ཚད་མ་ནི་མི་སླུ་བ་མཚན་ཉིད་ཡིན་པའི་ཕྱིར་རོ། །གཞན་ཡང་འབྲེལ་པ་མེད་པ་ལས་མ་ཡིན་པའི་ཕྱིར་དེ་ཐམས་ཅད་ལས་ཐམས་ཅད་རྟོགས་པར་ཐལ་བར་འགྱུར་རོ། །ཆོས་ཅན་དང་མ་འབྲེལ་དུ་ཟིན་ཀྱང་ཐམས་ཅད་ལ་རྟོགས་པ་སྐྱེ་སྟེ་ཉེ་བ་ལ་བསྐལ་བ་མེད་པའི་ཕྱིར་རོ། །དེ་ལྟར་གྱུར་པ་ཚུལ་གསུམ་པའི་རྟགས་ཁོ་ན་ལས་ཡིན་པའི་ཕྱིར་ལྐོག་ཏུ་གྱུར་པའི་དོན་ཐམས་ཅད་རྟོགས་པ་ནི་ཚུལ་གསུམ་པའི་རྟགས་ལས་སྐྱེས་པ་ཉིད་རྗེས་སུ་དཔག་པ་ལས་ཐ་དད་པ་ནི་མ་ཡིན་ནོ་ཞེས་བྱའོ། །དོན་འདི་ཡང་ཕྱོགས་ཆོས་དེ་ཆས་ཁྱབ་པ་ནི། གཏན་ཚིགས་སུའི་ཞེ་ན། ལྐོག་ཏུ་གྱུར་པའི་དོན་རྟོགས་པ་ཡིན་ནོ་ཞེས་རང་
བཞིན་འབྲེལ་བ་བཤད་དོ། །ཕྱོགས་ཀྱི་ཆོས་ཉིད་དང་དེའི་ཆས་ཁྱབ་པ་ཉིད་ལྐོག་ཏུ་གྱུར་བའི་དོན་རྟོགས་པའི་གཏན་ཚིགས་སོ་ཞེས་ངེས་པར་གཟུང་བའི་ཕྱིར་རོ། །དོན་སྨོས་པ་ནི་ལྐོག་ཏུ་གྱུར་པའི་དོན་རྟོགས་སོ་ཞེས་བྱ་བ་རྗེས་སུ་དཔག་པ་ཡང་རང་གི་མཚན་ཉིད་ཀྱི་ཡུལ་ཅན་གྱི་ཚད་མར་བསྟན་ཏེ། དོན་བྱེད་པར་ནུས་པ་ནི་དོན་ཡིན་ཏེ། རང་གི་མཚན་ཉིད་ཁོ་ནའི་བདག་ཉིད་དོ། །དེ་ཉིད་ཀྱི་ཕྱིར་དངོས་པོ་ལ་བརྟེན་ནས་ཚད་མ་རྣམ་པར་གཞག་པ་ནི་ཡིན་ནོ་ཞེས་འཆད་པར་འགྱུར་རོ། །གཞན་དུ་ན་དོན་བྱེད་པ་དོན་དུ་གཉེར་བ་རྗེས་སུ་དཔག་པ་ལས་འཇུག་པར་མི་འགྱུར་རོ། །སྤྱིའི་དངོས་པོ་ཡང་ཤེས་པ་ཙམ་གྱི་མཚན་ཉིད་ཡིན་པའི་ཕྱིར། དེའི་དོན་བྱེད་པ་ཡིན་ཏེ། དེ་ཡང་དེ་ལས་སྐྱེ་བ་ཁོ་ནར་གྲུབ་པའི་ཕྱིར་རོ། །རིགས་ནི་བཙོ་བ་དང་བསྲེག་པ་ལ་སོགས་པ་ལ་ཉེ་བར་མཁོ་བ་མེད་དེ། །རང་གི་མཚན་ཉིད་ཁོ་ན་དེ་ལ་ཉེ་བར་མཁོ་བའི་ཕྱིར་རོ། །གལ་ཏེ་དེ་དང་འབྲེལ་བར་དེ་ལ་འཇུག་པར་འགྱུར་རོ་ཞེ་ན། མ་ཡིན་ཏེ་རྟག་པ་ལ་ཕན་གདགས་པར་བྱ་བ་འགའ་ཞིག་དང་འབྲེལ་པ་མེད་པའི་ཕྱིར་རོ། །འབྲེལ་པ་ཡོད་དུ་ཟིན་ཀྱང༌། ཇི་ལྟར་གཞན་རྟོགས་པ་ན་གཞན་ལ་འཇུག་པ་ཡིན་ན་ཧ་ཅང་ཐལ་བར་འགྱུར་རོ། །གལ་ཏེ་འདུ་བ་ན་ཕྱེ་བ་ཉིད་ཀྱིས་ཐ་དད་པར་མི་ངེས་པས་དེ་ངེས་པ་ལ་འཁྲུལ་པས་དེ་ལ་འཇུག་པར་འགྱུར་རོ་ཞེ་ན། དེ་ལྟ་ན་འོན་ཏེ་འཁྲུལ་པ་ཁོ་ན་ཡིན་པ་བླའི་བར་དུ་ལྷག་པའི་སྤྱིས་ཅི་ཞིག་བྱ། གལ་ཏེ་འཁྲུལ་པ་ལས་ས་བོན་མེད་པ་མི་རིགས་པའི་ཕྱིར་རོ་ཞེ་ན། དེ་ཁོ་ན་གསལ་བས་འབྲས་བུ་གཅིག་པ་དེ་ཅིས་ན་ས་བོན་མ་ཡིན། ཁ་དོག་དང་དབྱིབས་ཀྱི་རྣམ་པ་མཚུངས་པ་ལས་སྤྱིར་ཤེས་པ་ཡིན་ནོ། །སྤྱི་ཡང་དེའི་ངོ་བོ་མ་ཡིན་ཏེ། །དེ་ཇི་ལྟར་འཁྲུལ་པའི་ས་བོན་ཡིན། གཞན་དག་ནི་འདྲ་བའི་རྒྱུ་མཚན་ལས་འཁྲུལ་པར་འདོད་པ་དེ་སྤྱི་ཤེས་པ་ནི་གསལ་བ་ཁོ་ན་རིགས་མི་མཐུན་པ་ལས་ལྡོག་པ་རྣམ་པ་འདྲ་བ་དེ་དང༌། དེ་ཁོ་ན་འཁྲུལ་པའི་རྒྱུ་མཚན་ཡིན་ཏེ། དེ་མ་ཡིན་པ་ལས་ལྡོག་པ་དེའི་རང་བཞིན་ཡིན་པའི་ཕྱིར་སྤྱི་དངོས་པོར་གྱུར་པ་དང་འབྲེལ་པ་མེད་པས་དེ་རྣམས་ལ་ཡོད་པར་མི་རུང་བའི་ཕྱིར་རོ། །གང་ཡང་གསལ་བའི་བདག་ཉིད་ཁོ་ན་ལ་སྤྱིར་བཏགས་ཏེ། །དེ་རང་གི་མཚན་ཉིད་ཀྱི་ཡུལ་ཅན་གྱི་རྗེས་སུ་དཔག་པར་ཁས་བླངས་པར་འགྱུར་རོ། །རང་གི་
མཚན་ཉིད་ཀྱི་སྤྱི་ཡིན་ན་རྗེས་སུ་དཔག་པ་ལ་ཇི་ལྟར་སོ་སོར་སྣང་བ་ཡིན་ཞེས་བསམ་པར་བྱ་སྟེ། གསལ་བའི་དངོས་པོ་སྤྱི་ལས་གཞན་པའི་ངོ་བོའི་སྤྱི་མི་འདོད་པས་བྱེ་བྲག་པའི་ལྟ་བ་ཁས་ལེན་པར་ཐལ་བར་འགྱུར་རོ། །དེ་ལ་ཡང་སྔར་བཤད་པའི་སྐྱོན་གྱིས་ལྐོག་ཏུ་གྱུར་པ་རང་གི་ངོ་བོས་རྟོགས་པར་མི་ནུས་པས་རྟགས་ལ་བརྟེན་པས་མངོན་སུམ་ལས་རྗེས་སུ་དཔག་པ་ལོགས་ཤིག་ཏུ་བཤད་དེ། དེ་ཉིད་ཀྱང་རང་གི་མཚན་ཉིད་དེ་མ་ཡིན་པ་ལས་ལྡོག་པ་ལ་སྤྱིའི་མཚན་ཉིད་དུ་བཤད་ཟིན་ཏོ། །འདིས་མཚོན་པར་བྱེད་པས་ན་མཚན་ཉིད་ནི་ཞེས་སྤྱིའི་མཚན་ཉིད་དུ་བྱས་པ་དེས་ན་རྗེས་སུ་དཔག་པའི་མཚན་ཉིད་ཡུལ་ཡིན་པ་ལ་འགལ་བ་མེད་པའི་ཕྱིར་རྒྱ་ཆེར་མི་བཤད་དོ། །མདོར་བསྡུས་ནས་ཞེས་བྱ་བ་ནི་ཟློས་པར་དོགས་པ་བསལ་བ་ཡིན་ཏེ། རྒྱ་ཆེར་ནི་རྣམ་འགྲེལ་ལ་སོགས་པར་བཤད་པའི་ཕྱིར་རོ། །རྟགས་ཀྱི་མཚན་ཉིད་རྗེས་སུ་དཔག་པ་བསྟན་པ་ནི། རང་གི་ངོ་བོ་དང༌། རབ་ཏུ་དབྱེ་བ་དང༌། ཚད་མ་དང༌། དེ་ངེས་པའོ། །དེ་ལ་ཕྱོགས་ཆོས་དེའི་ཆས་ཁྱབ་པ་ནི། གཏན་ཚིགས་ཞེས་བྱ་བས་ནི་རང་གི་ངོ་བོ་བསྟན་ཏོ། །དེ་ནི་རྣམ་གསུམ་ཉིད་ཅེས་བྱ་བས་རབ་ཏུ་དབྱེ་བའོ། །མེད་ན་མི་འབྱུང་ཞེས་བྱ་བ་ལ་སོགས་པས་ནི་རབ་ཏུ་དབྱེ་བ་ངེས་པར་བྱེད་པའི་ཚད་མ་ཉེ་བར་བཀོད་དོ། །རྣམ་གསུམ་གྱི་རབ་ཏུ་དབྱེ་བ་ཡང་རྟགས་གསུམ་པོ་རྣམས་ཀྱི་ངོ་བོ་དང་རེ་རེའི་ངོ་བོ་ངེས་པར་བྱེད་པའི་ཚད་མ་འཇུག་པ་བཤད་པར་བྱའོ། །དེ་ལ་ཕྱོགས་ཀྱི་ཆོས་ནི་ཕྱོགས་ཀྱི་ཆའི་ཆོས་ཀྱིས་ཁྱབ་པ་མེད་ན་མི་འབྱུང་བ་ཡིན་ནོ་ཞེས་མཚན་ཉིད་བསྟན་ཏོ། །གཏན་ཚིགས་ཞེས་བྱ་བས་ནི་མཚན་གཞི་བསྟན་ཏོ། །གཏན་ཚིགས་དེ་ནི་རྣམ་གསུམ་ཉིད། །ཅེས་བྱ་བས་དབྱེ་བ་བརྗོད་དོ། །འོན་ཏེ་གཏན་ཚིགས་གཞན་མེད་པར་ངེས་པར་གྱུར་ན་རྣམ་པ་གསུམ་ཁོ་ན་ཞེས་བྱ་བ་རིགས་ཀྱི་འགྲན་ཟླ་མེད་པར་ངེས་པས་ཡོད་པ་རྣམས་ལ་ངེས་པར་གཟུང་བ་དང་བཅས་པར་གཏན་ལ་དབབ་པོ། །དེ་སྨྲས་པ། གང་ཕྱིར་འདི་ཁོ་ན་ཡིན་ཞེས། །འདི་ཡོད་པར་ནི་གཏན་ལ་འབེབས། །དངོས་གཞན་མེད་པར་རིགས་པ་ཅི། །རྗེས་འགྲོ་མེད་ན་འདི་མ་ཡིན། །ཞེའོ། གཏན་ཚིགས་མེད་པར་ནི་མངོན་སུམ་གྱིས་མི་རྟོགས་ཏེ། །དེ་ཡུལ་མེད་པ་དང་འགལ་བའི་ཕྱིར་རོ། །དེ་ལྟ་ན་དངོས་པོ་མེད་པ་ནི་དངོས་པོའི་བདག་ཉིད་ཀྱི་
ཆའི་མེད་པའི་མཚན་ཉིད་ཡིན་ན་དེའི་དབང་པོ་དང་ཉེ་བ་མེད་པའི་ཕྱིར་མངོན་སུམ་གྱི་ཡུལ་ཡིན་པར་འགལ་ལོ། །གང་ཡང༌། རེ་ཞིག་དབང་པོས་འདི་མེད་ཅེས། །བློ་ནི་སྐྱེད་པར་བྱེད་པ་ཡིན། །དངོས་པོའི་ཆ་དང་འབྲེལ་ཉིད་ཀྱི། །དབང་པོ་རུང་བ་ཡིན་ཕྱིར་རོ། །ཞེས་བྱ་བ་སྨོས་སོ། ཡང་ན་ནུས་པ་ཐམས་ཅད་ཀྱིས་སྟོང་བའི་མཚན་ཉིད་དེ་ཡང་དོན་གྱི་ནུས་པ་ལ་ལྟོས་པའི་མངོན་སུམ་གྱི་ཡུལ་དུ་འགལ་བའི་ཕྱིར་རོ། །རྗེས་སུ་དཔག་པས་ཀྱང་གཏན་ཚིགས་གཞན་མེད་པ་མི་རྟོགས་ཏེ། །དེ་ནི་རྟགས་རྣམ་པ་གསུམ་ལ་བརྟེན་པ་ཁོ་ནར་བཤད་པས་སོ། །རྣམ་གསུམ་ཉིད་ཅེས་བྱ་བ་ད་ནི་བཤད་པར་བྱ་སྟེ། །དེ་ལ་འབྲས་བུ་དང་རང་བཞིན་དག་ནི་སྒྲུབ་པ་སྒྲུབ་པར་བྱེད་པའི་ཕྱིར་དགག་པ་མི་བྱེད་ལ་མི་དམིགས་པ་ལས་ཀྱང་གཏན་ཚིགས་གཞན་མེད་པར་ངེས་པ་མ་ཡིན་ནོ། །གང་གི་ཕྱིར་དེ་ནི་རྣམ་པ་བཞིར་གནས་ཏེ། །རང་བཞིན་དང་འབྲས་བུ་དང་ཁྱབ་པར་བྱེད་པ་མི་དམིགས་པ་དང་འགལ་བ་དམིགས་པ་སྒྲུབ་པ་སྟེ་དེ་ལ་མཚུངས་པར་རུང་བའི་ངོ་བོ་ཤེས་པ་གཅིག་ལ་འདྲེ་བ་རང་བཞིན་མི་དམིགས་པ་ནི་གཞན་གྱི་ངོ་བོ་མི་དམིགས་པས་མེད་པའི་ཐ་སྙད་ཀྱི་གཏན་ཚིགས་སུ་འདོད་པ་དང༌། གཏན་ཚིགས་གཞན་གཏན་མེད་པར་ཁས་བླངས་པས་རྗེས་སུ་བསྟན་པའི་ངོ་བོ་མ་ཡིན་ནོ། །གལ་ཏེ་ཞིག་ན་ཡུལ་ལ་སོགས་པ་ཁོ་ན་ལ་འགོག་ན་ནི་འདིར་འགྱུར་གྱི་གཏན་མེད་པ་ནི་མ་ཡིན་ཏེ། རྒྱུ་དང་ཁྱབ་པར་བྱེད་པ་མི་དམིགས་པ་དག་ཀྱང་འབྲས་བུ་ཁྱབ་པར་བྱ་བ་མེད་པའི་གཏན་ཚིགས་ཀྱི་དངོས་པོ་ཡིན་ན་གཏན་ཚིགས་གཞན་ནི་གཏན་མེད་པར་ཁས་བླངས་པ་ལ་རྣམ་པ་འདི་ལྟ་བུ་མི་སྲིད་དོ། །དེ་ཇི་ལྟར་དེ་དག་གིས་དེ་མེད་པར་གོ་བར་འགྱུར། འགལ་བ་ཡང་རྒྱུ་མ་ཚང་བ་མེད་པར་འབྱུང་བ་གཞན་ཡོད་ན་མེད་པར་གོ་བར་བྱ་བ་ཡིན་པའི་ཕྱིར་འགལ་བ་དམིགས་པ་ཡང་མི་སྲིད་དོ། །སྲིད་པ་ཡང་འབྲས་བུ་མི་དམིགས་པ་ལ་སོགས་པ་རྣམས་ཇི་ལྟར་གཏན་ཚིགས་འགོག་པར་བྱེད་པ་ཡིན་ཞེས་དོགས་པ་ལ། གཏན་ཚིགས་ལྟར་སྣང་དེ་ལས་གཞན། །ཅེས་བྱ་བ་སྨོས་ཏེ། དེས་ན་གང་གི་ཕྱིར་གཏན་ཚིགས་རྣམ་པ་གསུམ་ལས་གཞན་པའི་གཏན་ཚིགས་ལྟར་སྣང་བ་ཡིན་པ་དེའི་ཕྱིར། དེ་ནི་རྣམ་གསུམ་ཉིད་ཅེས་དེ་ལྟར་དགོངས་སོ། །འདིར་ནི་གང་དང་གང་ངེས་པ་དེ་དང་དེ་ལས་བཟློག་པ་ལ་མི་མཐུན་པའི་
ཕྱོགས་ཀྱིས་ཁྱབ་པ་དེའི་ངེས་པ་གྲུབ་པ་ཡིན་ཏེ། དཔེར་ན་གང་ཡོད་པ་དེ་སྐད་ཅིག་མ་ཁོ་ནའོ་ཞེས་པས་ཡོད་པ་སྐད་ཅིག་མ་རྣམས་ལ་ངེས་པར་བརྗོད་པས་ཡོད་པ་ལས་བཟློག་པ་མེད་པས་སྐད་ཅིག་མའི་མི་མཐུན་པའི་ཕྱོགས་སྐད་ཅིག་མ་མ་ཡིན་པ་ལ་ཁྱབ་པ་གྲུབ་པ་དེ་བཞིན་དུ་འདིར་ཡང་གཏན་ཚིགས་རྣམ་པ་གསུམ་དུ་ངེས་པས་གཏན་ཚིགས་ལས་བཟློག་པའི་གཏན་ཚིགས་ལྟར་སྣང་བ་ལ་གྲངས་གསུམ་ལས་ཕྱི་རོལ་དུ་གྱུར་པའི་དོན་གྱིས་ཁྱབ་པས་གྲངས་གསུམ་ཁོ་ནར་ངེས་པ་ཡིན་ནོ། །དེས་ན་གཏན་ཚིགས་རྣམ་པ་གསུམ་པོ་ལས་ཐ་དད་པའི་དོན་རྣམས་ཀྱིས་གཏན་ཚིགས་ལྟར་སྣང་བ་བསྟན་ཏོ། །དེས་ན་རང་བཞིན་འགལ་བ་དམིགས་པ་དང་འབྲས་བུ་དང་རང་བཞིན་དང་མི་དམིགས་པ་ལས་ཐ་དད་པའི་དོན་རྣམས་ནི་གཏན་ཚིགས་མ་ཡིན་པར་ངེས་པའི་ཕྱིར་རོ། །གཏན་ཚིགས་དང་དེར་སྣང་བ་དག་ཕན་ཚུན་སྤངས་ཏེ་གནས་པའི་མཚན་ཉིད་དེ་ཉིད་གཏན་ཚིགས་སུ་རྟོག་པའི་དུས་ཁོ་ནར་འགལ་བར་རྟོགས་ཏེ། དེའི་བདག་ཉིད་དུ་དེ་ངེས་པར་སྣང་པའི་ཤེས་པ་ཉིད་དེ་ལས་བཟློག་པ་གཞན་པ་དེ་སྣང་བར་རྟོགས་པ་ནི་ཕན་ཚུན་གཅིག་ལ་གཅིག་མེད་པར་ངེས་པའི་ཕྱིར་རོ། །དེ་ལ་གཏན་ཚིགས་རྣམ་པ་གསུམ་ལས་བཟློག་པའི་དོན་རྣམས་ལ་གཏན་ཚིགས་ལྟར་སྣང་བ་ཉེ་བར་དམིགས་པས་རང་ཉིད་དང་འགལ་བའི་གཏན་ཚིགས་གསལ་བ་དེ་ཡང་གཏན་ཚིགས་གསུམ་ལས་ཕྱི་རོལ་དུ་གྱུར་པའི་དོན་ནི་གཏན་ཚིགས་མེད་པར་ཁས་མ་བླངས་སོ། །འོན་ཀྱང་དེ་རྣམས་ལ་གཏན་ཚིགས་དགག་པ་ནི་གཏན་ཚིགས་སུ་རྨོངས་པ་འབའ་ཞིག་གིས་གཞན་ལ་གྲགས་པ་དེ་ཉིད་དེ་ལ་སྒྲོ་འདོགས་པ་འམ་ཐེ་ཚོམ་ཟ་བ་དེ་འགལ་བ་དམིགས་པས་བསལ་ཏོ། །གཏན་མེད་ན་ཇི་ལྟར་འགལ་བ་ཡིན་ཞེས་དེ་ཇི་སྟེ་བརྗོད། ལྷན་ཅིག་མི་གནས་པའི་མཚན་ཉིད་ཀྱི་འགལ་བ་མེད་ན་གང་གིས་ན་དེའི་རིགས་པས་ཐམས་ཅད་ལ་ཉེ་བར་བརྗོད་དམ། གང་དང་གང་འགོག་པ་དེ་དང་དེ་ལ་འགལ་བར་རྟོགས་པ་མ་ཡིན་ན་གང་གིས་ཇི་ལྟར་མེད་པ་འགའ་ཞིག་དང་འགལ་བར་རྟོགས་ཞེས་རྩོད་པ་ཡིན་ཏེ། འདི་ན་གྲང་བའི་རེག་པ་མེད་དེ་མེ་ཡོད་དོ་ཞེས་བྱ་བ་བསྒྲུབ་པར་བྱ་བའི་ཆོས་ཅན་ཁོ་ན་ལ་གྲང་བའི་རེག་པ་དང་མེ་འགལ་བར་མི་འབྱུང་ལ། ཇི་ལྟར་རྟོགས་པ་ཉིད་འདི་གཞན་ལ་འགལ་བར་རྟོགས་པའི་
མེས་བསྒྲུབ་པར་བྱ་བའི་ཆོས་ཅན་ལ་འགོག་པ་དེ་བཞིན་དུ་གཏན་ཚིགས་ལྟར་སྣང་བ་ཉེ་བར་དམིགས་པས་གཏན་ཚིགས་རྣམ་པ་གསུམ་ལས་ཕྱི་རོལ་དུ་གྱུར་པའི་དོན་རྣམས་ལ་བཀག་པ་ཡིན་ན། ཐམས་ཅད་ལ་གཏན་མེད་པ་ཡང་མཚན་ཉིད་ཀྱི་འགལ་བར་རྟོགས་ཏེ། དཔེར་ན་སྐད་ཅིག་མ་བཞིན་དུ་སྐད་ཅིག་མ་མ་ཡིན་པ་དེ་ནི་དངོས་པོ་འགའ་ཞིག་ལ་ཡང་མི་སྲིད་པའི་ཕྱིར་རོ། །དེ་བཞིན་དུ་ཡོད་པ་དང་མེད་པ་ཡང་ངོ༌། །ནུས་པ་ཐམས་ཅད་དང་བྲལ་བའི་མཚན་ཉིད་ཡིན་པའི་ཕྱིར་བློ་གྲོས་ངན་པའི་འདོད་པ་དེ་རྣམས་ལ་ཤིན་ཏུ་གྲུབ་པས་ཆོག་གོ །གཏན་ཚིགས་རྣམ་པ་གསུམ་ཁོ་ནར་ངེས་པས་དེ་ལས་བཟློག་པ་ལ་དེའི་མི་མཐུན་པའི་ཕྱོགས་ཀྱིས་ཁྱབ་པར་གྱུར་པ་འདི་གནས་པ་ཡིན་ཏེ། །དེ་ལ་ངེས་པར་གྱུར་པ་ཡིན་ནོ་ཞེས་དགོས་པ་དང་ལྡན་པས་བཟློག་པ་ལ་ཁྱབ་པ་བསྟན་པའི་ཕྱིར་གཏན་ཚིགས་ལྟར་སྣང་དེ་ལས་གཞན་ཞེས་བྱ་བ་འདི་གསུངས་སོ། །དེ་ལྟར་གྱུར་ན་དེ་ནི་སྐད་ཅིག་མའི་མི་མཐུན་པའི་ཕྱོགས་ལ་ཡོད་པ་ལས་བཟློག་པས་ཁྱབ་པ་ལ་གནོད་པར་བྱེད་པའི་ཚད་མས་ངེས་ཀྱི། །འདིར་ནི་གསུམ་གྱི་གྲངས་ལས་ཕྱི་རོལ་དུ་གྱུར་པའི་དོན་རྣམས་ལ་གཏན་ཚིགས་ལྟར་སྣང་བས་ཁྱབ་པ་ལ་ཚད་མས་གང་ཞིག་གིས་ངེས་ཤེ་ན། །མེད་ན་མི་འབྱུང་ངེས་ཕྱིར་རོ། །ཞེས་བྱ་བ་གསུངས་སོ། །གཏན་ཚིགས་རྣམ་པ་གསུམ་ལས་ཐ་དད་པའི་རྟགས་ཁས་ལེན་པའམ། ཐེ་ཚོམ་ཟ་བ་ཉིད་ལ་དངོས་པོ་ལ་ཕྱོགས་ཀྱི་ཆོས་ཉིད་ཡོད་དུ་ཟིན་ཀྱང་མེད་ན་མི་འབྱུང་བ་མེད་དོ་ཞེས་བྱ་བའི་དོན་ཏོ། །དེ་ལྟར་ཡང་འཆད་པར་འགྱུར་ཏེ་དེ་ནི་གཏན་ཚིགས་རྣམ་པ་གསུམ་ལས་གཞན་ཡོད་པ་མ་ཡིན་ནོ་ཞེས་ངེས་པར་བརྗོད་པའི་ཕྱིར་རོ། །མེད་ན་མི་འབྱུང་བ་མ་ཚང་ན་གཏན་ཚིགས་ལྟར་སྣང་བ་མ་གྲུབ་པ་དང་འགལ་བ་དང་མ་ངེས་པ་ཆོས་མཚུངས་པས་ཁྱབ་པའི་གཞལ་བྱ་ཉིད་ལ་སོགས་པར་ངེས་པ་བཞིན་དུ་གཏན་ཚིགས་ལྟར་སྣང་བ་ནི་བསྒྲུབ་པར་བྱའོ། །མེད་ན་མི་འབྱུང་བ་མ་ཚང་ལས་ཞེས་བྱ་བས་རང་བཞིན་གྱི་གཏན་ཚིགས་སོ། །མེད་ན་མི་འབྱུང་བ་མ་ཚང་བ་ཡང་གཏན་ཚིགས་རྣམ་པ་གསུམ་ལ་ཐ་དད་པ་ཡིན་པའི་ཕྱིར་དེ་ལས་གཞན་པའི་དོན་རྣམས་ཁྱབ་པར་བྱེད་པ་མི་དམིགས་པས་དེ་གྲུབ་པ་ཡིན་ཏེ། །དེ་ལྟར་དེའི་བདག་ཉིད་དང་དེ་ལས་བྱུང་བ་དག་གིས་མེད་ན་མི་འབྱུང་བ་ལ་ཁྱབ་བོ། །དེ་
དག་དེ་ལ་གདོན་མི་ཟ་བར་ཡོད་ལ་དེ་ཡང་དེ་དག་ཁོ་ན་ལ་ཡོད་དེ་དེའི་རང་བཞིན་མ་ཡིན་པ་དང་དེ་ལས་བྱུང་བ་མ་ཡིན་པ་ནི་དེ་ལ་རག་ལས་པ་མེད་པས་དེ་ལ་མི་འཁྲུལ་པར་ངེས་པ་མེད་པའི་ཕྱིར་རོ། །རྒྱུ་དང་འབྲས་བུའི་དངོས་པོ་འམ། །རང་བཞིན་ངེས་པར་བྱེད་པ་ལས། །མེད་ན་མི་འབྱུང་ངེས་པ་སྟེ། །མ་མཐོང་ལས་མིན་མཐོང་ལས་མིན། །གཞན་དུ་གཞན་ནི་གཞན་དག་དང༌། །ངེས་པར་ཡོད་པའི་ངེས་པ་གང༌། །དོན་གཞན་རྒྱུ་མཚན་ཅན་གྱི་ཆོས། །ཡིན་ན་གོས་ལ་ཚོན་བཞིན་ནོ། །ཞེས་གསུངས་སོ། །གཟུགས་ལ་སོགས་པ་ཡང་རོ་ལ་སོགས་པ་མེད་ན་མི་འབྱུང་བ་རང་གི་ངོ་བོ་ནི་མ་ཡིན་ལ་འོན་ཀྱང་རང་གི་རྒྱུ་ལ་མི་འཁྲུལ་བའི་སྒོ་ནས་དེའི་རྒྱུ་ལས་བྱུང་བ་ཁོ་ན་མེད་ན་མི་འགྱུར་བའི་རྒྱུ་མཚན་ཡིན་ནོ་ཞེས་བྱ་བའི། གཞན་དུ་ན་དེའི་བདག་ཉིད་མ་ཡིན་པ་དང༌། །དེ་ལ་རག་ལས་པ་འམ་རྒྱུ་ལ་རག་ལས་པ་དེ་མེད་ན་མི་འབྱུང་བར་བརྟགས་ན་ནི་ཐམས་ཅད་ཀྱི་དོན་མེ་མེད་ན་མི་འབྱུང་བར་འགྱུར་ཏེ། ཁྱད་པར་མེད་པའི་ཕྱིར་རོ། །གལ་ཏེ་དོན་གཅིག་ཏུ་འདུ་བའི་རྒྱུ་མཚན་གཟུགས་དང་རོ་ལ་སོགས་པ་མེད་ན་མི་འབྱུང་བ་ཡིན་ནོ་ཞེ་ན། འོན་ཏེ་འདུ་བ་ཡང་བརྟེན་པ་དང་རྟེན་དུ་གྱུར་པར་ཉེ་བར་བརྗོད་དེ། དེ་ཡང་རྟེན་དང་བརྟེན་པའི་དངོས་པོའི་བདག་ཉིད་ཡིན་ན་ཕན་འདོགས་པ་མེད་པར་ཧ་ཅང་ཐལ་བར་འགྱུར་བས་མི་འགྲུབ་པོ། །ཚོགས་པ་གཅིག་ལ་རག་ལས་པ་ཁོ་ན་ལ་དོན་གཅིག་ཏུ་འདུ་བ་ཡིན་ཏེ། ཇི་ལྟར་འདུ་བའམ་གཞན་པའི་འབྲེལ་པ་མི་སྲིད་པ་དེ་ལྟར་འབྲེལ་བ་བརྟག་པར་བསྟན་བཅོས་མཛད་པས་རྒྱས་པར་བསྟན་པས་དེ་ཉིད་དུ་ངེས་པར་བྱའོ། །གལ་ཏེ་དེས་དེ་རྒྱུའམ་བསྐྱེད་པར་བྱ་བ་དང༌། སྐྱེད་པར་བྱེད་པའི་དངོས་པོ་འམ་དེའི་བདག་ཉིད་དུ་ཟིན་ཀྱང་དེས་ན་མི་འབྱུང་བ་ལས་གཞན་མ་ཡིན་ནོ་ཞེས་འདིར་དངོས་པོའི་རང་བཞིན་གྱི་ལན་བརྗོད་དེ། གང་འདི་ལྟར་གྱུར་པ་ནི་ཁོ་བོ་འབའ་ཞིག་མ་ཡིན་གྱི་ཁྱོད་ཀྱིས་ཀྱང་མཐོང་ངོ་ཞེ་ན། དེ་ལྟ་ན་སློ་བུར་བདེ་དངོས་པོ་རྣམས་ཀྱི་རང་བཞིན་ཡིན་ནོ་ཞེས་བྱ་བར་འགའ་བ་ཞིག་མི་འགྱུར་བ་མ་ཡིན་ན། གཏན་ཚིགས་ཡུལ་དང་དུས་དང་རྫས་ངེས་པར་མི་རུང་ངོ༌། །དེ་ཅུང་ཟད་གཅིག་ལ་ལར་འཇིག་པ་འམ་མ་ཡིན་པ་དང་གང་གང་ལ་ཅུང་ཟད་ཅིག་རག་ལས་པའམ་རག་ལས་པ་མེད་པ་དེ་ལྟ་མ་ཡིན་ན་ཁྱད་པར་མེད་པའི་ཕྱིར་
འདོད་པའི་ཡུལ་དང་དུས་རྫས་བཞིན་དུ་ཡུལ་ལ་སོགས་པ་གཞན་ན་ཡོད་པ་ལ་གང་གིས་ན་བསལ་པར་ནུས། དེའི་ཕྱིར་གང་གང་ཞིག་ལས་མེད་ཀྱང་འབྱུང་བར་མཐོང་བ་དེ་དང་དེ་ནི་འཁྲུལ་པའི་རྒྱུ་ཡིན་པ་དེ་ཁོ་ན་ཉིད་སེམས་པས་འདི་བརྗོད་ཀྱི། རྐང་པ་བརྐྱང་བའི་དམིགས་པ་ནི་མ་ཡིན་ནོ། །དེ་ཡང་མི་འཁྲུལ་པའི་རྒྱུ་ཇི་ལྟར་བཤད་པ་ལས་གཞན་དུ་རྗེས་སུ་སྦྱོར་ན་ནི་དེ་མ་ཚང་བས་གཏན་ཚིགས་ཀྱི་མཚན་ཉིད་ལ་བརྟེན་པ་མ་ཡིན་ནོ་སྙམ་ན། དེ་སྐད་དུ་ཡང༌། ལྡན་པ་ལ་སོགས་པ་གང་རྣམས་ལ། །འབྲེལ་པ་དེ་འདྲ་ཡོད་མིན་ན། །དེ་ནི་གཏན་ཚིགས་མིན་ཞེས་བཤད། །འཁྲུལ་པ་སྲིད་པ་ཉིད་ཀྱི་ཕྱིར། །ཞེས་གསུངས་སོ། །འདིར་སྦྱོར་བ་ནི་གང་དང་གང་དེའི་བདག་ཉིད་དང་དེ་ལས་བྱུང་བ་མེད་པ་དེ་དང་དེ་ནི་མེད་ན་མི་འབྱུང་བ་མ་ཡིན་ཏེ། དཔེར་ན་གཞལ་བྱ་ལ་སོགས་པས་མི་རྟག་པ་བཞིན་ནོ། །རང་བཞིན་དང་འབྲས་བུ་དང་མི་དམིགས་པ་ལས་ཐ་དད་པའི་དོན་དེ་རྣམས་ཀྱང་འགའ་ཞིག་ཏུ་དེའི་བདག་ཉིད་དང་དེ་ལས་བྱུང་བ་མེད་པས་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའོ། །རང་བཞིན་མི་དམིགས་པ་ནི་རང་བཞིན་གྱི་གཏན་ཚིགས་ཀྱི་ནང་དུ་འདུས་པའི་ཕྱིར་འདི་ནི་དེའི་བདག་ཉིད་ཀྱི་མཚན་ཉིད་ཀྱི་འབྲེལ་པ་ཁོ་ནའོ། །ཁྱབ་པར་བྱེད་པ་དང༌། རྒྱུ་མི་དམིགས་པ་ཡང་དེའི་བདག་ཉིད་དང་དེ་ལས་བྱུང་བའི་མཚན་ཉིད་ཀྱི་འབྲེལ་པ་ཁོ་ནས་ཁྱབ་པར་བྱ་བ་དང་འབྲས་བུ་ལྡོག་པ་སྒྲུབ་པར་བྱེད་དོ། །དེ་སྐད་དུ་ཡང༌། དེའི་ཕྱིར་དེ་ཙམ་དང་འབྲེལ་བ། །ངོ་བོ་ཉིད་ཀྱིས་ངོ་བོ་ཉིད། །ལྡོག་པར་འགྱུར་བའམ་རྒྱུ་ཡིས་ནི། །འབྲས་བུ་འཁྲུལ་པ་མེད་པ་ཡིན། །ཞེས་གསུངས་སོ། །དེ་ལྟར་དེས་གཏན་ཚིགས་ཀྱི་མཚན་ཉིད་དང་གྲངས་ངེས་པ་དང༌། དེའི་འཐད་པ་ཞེས་བྱ་བ་དོན་རྣམ་པ་གསུམ་ཚིགས་སུ་བཅད་པ་འདིར་རྒྱས་པར་བཤད་དོ། །ཡང་ན་རྣམ་གསུམ་ཉིད་ཅེས་བྱ་བ་ནི་ཕྱོགས་ཀྱི་ཆོས་དེ་རྣམ་པ་གསུམ་སྟེ། རང་བཞིན་དང༌། འབྲས་བུ་དང་མི་དམིགས་པར་བཤད་པ་ནི་དེའི་ཆས་ཁྱབ་པ་ལས་གཞན་མ་ཡིན་ཏེ། དེ་ཡང་དེའི་ཆས་ཁྱབ་པ་རྣམ་པ་གསུམ་ཡིན་ནོ་ཞེས་བྱ་བར་འབྲེལ་ཏོ། །ཅིའི་ཕྱིར་ཞེ་ན། མེད་ན་མི་འབྱུང་བར་ངེས་པའི་ཕྱིར་རོ། །མེད་ན་མི་འབྱུང་བ་ལ་ཁྱབ་པའི་ཕྱོགས་ཀྱི་ཆོས་རྣམ་པ་གསུམ་ཁོ་ན་དང༌། ཕྱོགས་ཀྱི་ཆོས་ངེས་པ་རྣམ་པ་གསུམ་སྟེ། མེད་ན་མི་འབྱུང་བར་
ངེས་པའི་ཕྱོགས་ཀྱི་ཆོས་ངེས་པར་རང་བཞིན་དང་འབྲས་བུ་དང་མི་དམིགས་པའི་བདག་ཉིད་ཕྱོགས་ཀྱི་ཆོས་ཐ་དད་པ་རྣམ་པ་གསུམ་མོ། །དེའི་ཆས་ཁྱབ་པ་མ་ཡིན་པ་ནི་གཏན་ཚིགས་མ་ཡིན་ཏེ་འབྲས་བུ་དང༌། རང་བཞིན་དང་མི་དམིགས་པའི་བདག་ཉིད་རྣམ་པ་གསུམ་ལ་ཕྱོགས་ཆོས་དེའི་ཆས་ཁྱབ་པ་ཁོ་ན་ཡིན་པའི་ཕྱིར་དེ་ནི་གཏན་ཚིགས་མེད་པ་མ་ཡིན་ནོ་ཞེས་བཤད་ཟིན་ཏོ། །དེའི་ཕྱིར་གཏན་ཚིགས་རྣམ་པ་གསུམ་ལས་ཕྱི་རོལ་ཏུ་འགྱུར་བ་ལ་མེད་ན་མི་འབྱུང་བ་མེད་པའི་ཕྱིར་གཏན་ཚིགས་ཀྱི་ཐ་སྙད་དུ་བྱེད་པ་གཏན་ཚིགས་རྣམ་པ་གསུམ་ལ་མེད་ན་མི་འབྱུང་བ་གདོན་མི་ཟ་བར་ཡོད་པས་དེ་གཏན་ཚིགས་མ་ཡིན་པར་བརྗོད་པ་བསལ་བ་ཡིན་ནོ། །དེ་ལྟ་ན་ཡང་དེ་ནི་གཏན་ཚིགས་ལྟར་སྣང་བ་ཡང་མཚན་ཉིད་འདི་བརྗོད་ན། དེ་ལ་སློབ་མ་རྣམས་གཏན་ཚིགས་ཀྱི་ཐ་སྙད་ལྡོག་པར་འགྱུར་རོ་སྙམ་ནས། གཏན་ཚིགས་ལྟར་སྣང་དེ་ལས་གཞན། ཞེས་བྱ་བ་སྨོས་སོ། །དེ་བས་ན་ཕྱོགས་ཆོས་དེའི་ཆས་ཁྱབ་པ་ནི་ཞེས་བྱ་བ་གཏན་ཚིགས་ཀྱི་མཚན་ཉིད་ལ་གཞན་པ་དེ་དག་ནི་མཚན་ཉིད་མ་ཚང་བའོ། །གཏན་ཚིགས་ལྟར་སྣང་བ་གི་བར་འགྱུར་རོ་སྙམ་ནས་དེའི་མཚན་ཉིད་མ་བརྗོད་དོ། །འདི་ལྟར་ཕྱོགས་ཆོས་ཞེས་བརྗོད་པས་གང་ལ་ཕྱོགས་ཆོས་མེད་དེ་གཏན་ཚིགས་མ་ཡིན་ནོ། །དེའི་ཆས་ཁྱབ་པ་ཞེས་བྱ་བ་བརྗོད་པས་གང་ལ་དེའི་ཆས་ཁྱབ་པ་དང་བྲལ་བའི་ཁྱབ་པར་བྱ་བ་དང་ཁྱབ་པར་བྱེད་པ་ཕྱིན་ཅི་ལོག་པའོ། །དེ་ལ་ཡོད་པ་དང་མེད་པ་དེའི་གཏན་ཚིགས་ཀྱི་ཚུལ་མ་ཚང་བ་ནི་མ་གྲུབ་པའམ་གལ་བ་འམ་མ་ངེས་པའི་གཏན་ཚིགས་ལྟར་སྣང་བར་གོ་བར་བྱའོ། །འདི་ལྟར་མཚན་ཉིད་གང་གི་དོན་གང་ཡིན་སློབ་མ་ལ་བསྟན་པས་དེའི་མཚན་ཉིད་དང་བྲལ་བ་ལ་དེའི་ཐ་དད་རྣམ་ལ་རང་ཉིད་འཇུག་པར་མི་འགྱུར་རོ། །དེ་མ་ཡིན་པའི་ངོ་བོ་ཡོངས་སུ་སྤངས་ནས་དེའི་ངོ་བོ་རྟོགས་པའི་ཕྱིར་དེ་ནི་འབད་པ་མེད་པའི་འབྲས་བུ་དང་ལྡན་པ་ཡིན་ནོ། །གཞན་དུ་གཏན་ཚིགས་ལྟར་སྣང་བ་བསྟན་པ་གང་ཡིན་པ་དེ་བློ་དམན་པའི་དབང་དུ་བྱས་པའོ། །རབ་ཏུ་བྱེད་པ་འདི་ནི་བློ་རྒྱ་ཆེ་བ་རྣམས་ལ་བསྟན་ན་མཛེས་ཏེ་མདོར་བསྡུས་ནས་བརྗོད་པའི་ཕྱིར་རོ། །དེ་ཉིད་ནི་མདོར་བསྡུས་ནས་ཇི་ལྟ་བར་བཤད་པ་བཞིན་དུ་རྟོགས་པར་ནུས་པས་བློ་དམན་པ་དག་ནི་
མ་ཡིན་ཏེ། དེ་དག་ནི་རྒྱས་པར་བརྗོད་པ་ལས་གཞན་པ་ཇི་ལྟ་བ་བཞིན་དུ་དོན་རྟོགས་པ་མེད་པའི་ཕྱིར་རོ། །དེ་ཉིད་ཀྱི་ཕྱིར་ན་དོན་གྱིས་འཕངས་པའི་ཉེ་བར་བཀོད་པ་སྔ་མ་ཁོ་ན་བཞིན་དུ་གཏན་ཚིགས་ལྟར་སྣང་བའི་མཚན་ཉིད་དང་དེ་ལ་ཉེ་བར་བརྗོད་དོ། །དེ་ནི་འདིར་གཏན་ཚིགས་ཀྱི་མཚན་ཉིད་དང་གྲངས་ངེས་པ་དང་དེ་ནི་གཏན་ཚིགས་རྣམ་པ་གསུམ་དུ་ངེས་པས་བཟུང་བར་བཤད་དོ། །དེ་ནི་གཉི་གའི་རྒྱུ་ཡིན་པའི་ཕྱིར་གཉི་ག་དང་འབྲེལ་བར་བཤད་པ་དང་གཏན་ཚིགས་ལྟར་སྣང་བའི་མཚན་ཉིད་ཤུགས་ཀྱིས་བཤད་པས། རྗོད་པར་བྱེད་པའི་རྒྱུ་མཚན་མ་ཡིན་ནོ་སྙམ་ནས་ཚིགས་སུ་བཅད་པའི་དོན་རྣམ་པ་དྲུག་ཏུ་རྒྱས་པར་བཤད་དོ། །གཞན་ཡང་འདི་དག་ཀྱང་ལེགས་པར་མཐོང་སྟེ། རྣམ་གསུམ་ཉིད་ཅེས་བྱ་བ་ནི། རང་བཞིན་དང༌། འབྲས་བུ་དང༌། མི་དམིགས་པ་ཐ་དད་པ་གཏན་ཚིགས་དེ་ནི་ཐ་དད་པའོ། །དེ་བཞིན་དུ་རྣམ་གསུམ་ཉིད་ནི་ཕྱོགས་ཀྱི་ཆོས་དང་རྗེས་སུ་འགྲོ་བ་དང་ལྡོག་པའི་ངོ་བོ་ཐ་དད་པ་རྣམ་པ་གསུམ་ནི་ཚུལ་གསུམ་ཁོ་ནའོ། །དེའི་ཆས་ཁྱབ་ཅེས་བརྗོད་པས་རྗེས་སུ་འགྲོ་བ་དང་ལྡོག་པ་དག་བརྗོད་དོ། །གནོད་པ་མེད་པའི་ཡུལ་ཅན་ལ་སོགས་པའི་ཚུལ་གཞན་རུང་བ་ཡིན་དུ་ཟིན་ཀྱང་དེ་ནི་གཏན་ཚིག་མ་ཡིན་ནོ། །གང་ལས་ཤེ་ན། གང་གི་ཕྱིར་གཏན་ཚིགས་ལྟར་སྣང་བ་རང་བཞིན་ལ་སོགས་པ་རྣམ་པ་གསུམ་པོ་དེ་ལས་སམ་ཕྱོགས་ཀྱི་ཆོས་ལ་སོགས་པ་ཚུལ་གསུམ་པོ་དང་འབྲེལ་པ་ལས་གཞན་ནི་ཡང་དག་པར་ལྡན་པ་ལ་སོགས་པ་གཞན་དང་གནོད་པ་མེད་པའི་ཡུལ་ཅན་ལ་སོགས་པ་ལས་ཐ་དད་པའི་ཚུལ་དང་ལྡན་པ་ཁོ་ནའོ། །ཅིའི་ཕྱིར་ཞེ་ན། མེད་ན་མི་འབྱུང་བ་རྣམ་པ་གསུམ་ཡིན། རྣམ་པ་གསུམ་ཁོ་ན་དང་ཚུལ་གསུམ་པོ་ཁོ་ནའི་གཏན་ཚིགས་ངེས་པ་གཞན་ལ་རང་བཞིན་ལ་སོགས་པ་ལས་ཐ་དད་པ་དང་ཚུལ་གཞན་ལ་རུང་བ་མེད་དོ་ཞེས་བྱ་བའི་དོན་ཏོ། །རང་བཞིན་ལ་སོགས་པ་ལས་ཐ་དད་པའི་འབྲེལ་པའི་རྒྱུ་མཚན་མེད་ན་མི་འབྱུང་བ་མི་སྲིད་པ་དེ་བཞིན་དུ་ཚུལ་གཞན་ཡང་མེད་དོ། །ཇི་ལྟར་མེད་ན་མི་འབྱུང་བའི་ཚུལ་གཞན་ཡང་སྲིད་པ་ཁོ་ན་ཡིན་ནོ་ཞེས་བྱ་བ་དེ་ལྟར་མཚན་ཉིད་རྣམ་པ་དྲུག་ལ་སོགས་པའི་སྐབས་སུ་ཕྱོགས་ཀྱི་ཆོས་ཞེས་བྱ་བ་འདིར་གཏན་ཚིགས་ཀྱི་མཚན་ཉིད་ཀྱི་དབང་དུ་བྱས་པའོ། །གལ་ཏེ་ཕྱོགས་
སྤྱི་ཡིན་པར་ཉེ་བར་བཟུང་ན་ནི་གང་རྗེས་སུ་དཔག་པའི་ཡུལ་ཐམས་ཅད་ལ་གཏན་ཚིགས་མ་གྲུབ་པར་འགྱུར་བའམ། གྲུབ་ན་ནི་རྗེས་སུ་དཔག་པ་དོན་མེད་པ་ཡིན་ནོ་ཞེ་ན། ཕྱོགས་ནི་ཆོས་ཅན་ནོ་ཞེས་བྱ་བ་སྨོས་སོ། །གལ་ཏེ་སྤྱིའི་ཚིག་ཡིན་ན་ཇི་ལྟར་ཕྱོགས་ཀྱི་སྒྲ་ཆོས་ཙམ་ལ་འཇུག་པ་ཡིན་ཞེ་ན། ཡན་ལག་ལ་སྤྱིར་ཉེ་བར་བཏགས་པའི་ཕྱིར་རོ། །ཕྱོགས་ཀྱི་སྒྲ་ནི་ཆོས་དང༌། ཆོས་ཅན་ཡན་ལག་གཉི་གའི་སྤྱི་ཡིན་ཏེ་དེ་ནི་འདིར་ཆོས་ཅན་ཙམ་ལ་སྤྱིར་ཉེ་བར་བཏགས་ནས་ཕྱོགས་ཀྱི་སྒྲ་འཇུག་པའི་ཕྱིར་རོ། །དེའི་ཕྱོགས་གཅིག་ཏུ་གྱུར་པའི་རྒྱུ་མཚན་གྱིས་སྤྱིར་ཉེ་བར་བཏགས་པའི་ཕྱིར། བསྒྲུབ་པར་བྱ་བའི་ཆོས་ཅན་ལས་གཞན་པ་དེ་ཐལ་བར་མི་འགྱུར་རོ། །དེ་སྐད་དུ། སྤྱི་དོན་བསྒྲུབ་བྱ་ཉིད་ཡིན་པས། །ཆོས་ཙམ་ཡང་ན་ཆོས་ཅན་ལ། །གཙོ་བོ་མིན་ཡང་ཉེ་བར་བཏགས། །བསྒྲུབ་བྱའི་ཕྱོགས་གཅིག་ཡིན་པའི་ཕྱིར་རོ། །ཞེས་གསུངས་ཏེ། དེ་འདིར་སློབ་དཔོན་གྱིས་བཤད་པ་ལ། དབང་ཕྱུག་སྡེ་སྤོང་བའི་ལན་བཏབ་པར་འདོད་པས་ཕྱོགས་སྔ་མ་ནི། གལ་ཏེ་དགོས་པ་མེད་པའི་ཕྱིར། །ཞེས་བྱ་བ་ལ་སོགས་པ་སྨོས་ཏེ། དགོས་པ་མེད་ན་དངོས་ཀྱི་སྒྲའི་དོན་ཁྱད་དུ་གསད་པར་མི་འདོད་པའི་ཕྱིར་དགོས་པ་མེད་པས་ཉེ་བར་གདགས་པར་མི་རིགས་སོ། །དེའི་ཕྱིར་ཆོས་ཅན་གྱི་ཆོས་ཡིན་བ་བློའི་སྙམ་དུ་གཞན་སེམས་ན། དགོས་པ་མེད་པ་མ་ཡིན་ཏེ། གང་ལས་ཤེ་ན་ཐམས་ཅད་ནི་རྩོད་པའི་གཞི་འམ་གཞན་པའི་ཆོས་ཅན་ནོ། །དེའི་ཆོས་དེ་དགག་པའི་དོན་དུ་ཉེ་བར་བཏགས་པའི་དགོས་པ་དེ་ཡང་ཡོད་པ་དེའི་ཕྱིར་ཉེ་བར་བཏགས་པ་ནི་ཆོས་ཅན་ཐམས་ཅད་ཀྱི་ཆོས་དགག་པའི་ཕྱིར་ཞེས་བྱ་བ་དགོས་པ་མེད་པ་མ་ཡིན་པས་གཏན་ཚིགས་མ་གྲུབ་པ་ཡིན་ནོ། །གལ་ཏེ་དེ་ལྟར་ཡོན་ཏན་ཅི་ཞིག་ཏུ་འགྱུར་ཞེ་ན། དེ་ལྟ་ན་མིག་གིས་གཟུང་བར་བྱ་བ་ཡིན་ན་པའི་ཕྱིར་ཞེས་བྱ་བ་ལ་སོགས་པ་སྨོས་ཏེ། ཁྭའི་ནག་པོ་ཞེས་བྱ་བ་ལ་སོགས་པ་སྨོས་པ་ནི་གཞི་ཐ་དད་པས་མ་གྲུབ་པ་ཡིན། ཡོངས་སུ་སྤངས་པ་ནི་གཏན་ཚིགས་ཀྱིས་བསལ་བ་ཡིན་ནོ། །ཆོས་ཅན་གྱི་ཆོས་ཞེས་ཐུང་མོང་དུ་བརྗོད་པ་དེ་དག་གིས་ཀྱང་དེ་གཏན་ཚིགས་སུ་འགྱུར་བས་ཆོས་ཅན་སྨོས་པས་ཀྱང་དེ་གྲུབ་པས་ཉེ་བར་བཏགས་སུ་མེད་དོ། །དེའི་ཕྱིར་ཉེ་བར་
བཏགས་པ་ཁོ་ན་དོན་མེད་དོ་སྙམ་ནས་གཞན་གྱིས། ཆོས་བརྗོད་པས་ཀྱང་ཞེས་བྱ་བ་སྨོས་ཏེ། ཆོས་ཅན་འབའ་ཞིག་བརྗོད་པ་ནི་མ་ཡིན་ཏེ། ཆོས་ཅན་ཡིན་པར་གཞི་ལྟར་གྲུབ་སྟེ་གཞི་ཆོས་ཅན་ཡིན་པས་གཞི་སྨོས་པ་དེ་གྲུབ་པ་དེ་ལས་ཡིན་ནོ། །གལ་ཏེ་ཡང་ཆོས་ནི་ཆོས་གཞན་ལ་བརྟེན་པའི་རྒྱུ་མཚན་ཅི་ཞིག་ཡིན་ཅེ་ན། ཆོས་ནི་གཞན་ལ་བརྟེན་པ་ཡིན་པས་ཞེས་བྱ་བ་སྨོས་ཏེ། གཞན་གྱི་དབང་ཡིན་པའི་ཕྱིར་གདོན་མི་ཟ་བར་འདིས་ཆོས་ཅན་འཕངས་པ་ཡིན་ནོ། །དེའི་ཕྱིར་ཆོས་ཅན་ལྷག་པར་བརྗོད་པས་བསྒྲུབ་པ་བྱ་བའི་ཆོས་ཅན་ཁོ་ན་བྱེ་བྲག་ཏུ་བསྟན་པས་གང་ཡང་རུང་བ་ནི་མ་ཡིན་ནོ། །ཆོས་ཅན་སྨོས་པས་མངོན་པར་འདོད་པའི་ཁྱད་པར་ཅན་གྱི་ཆོས་ཅན་འབའ་ཞིག་རྟོགས་པ་དེ་ཡང་བསྒྲུབ་པར་བྱ་བའི་ཆོས་ཅན་ཡིན་ནོ་སྙམ་དུ་འདོད་པས་ག་ལས་ཤེ་ན། ཉེ་བ་ཡིན་པའི་ཕྱིར་ཞེས་བྱ་བའི་གྲགས་པ་སྨོས་ཏེ། ཉེ་བ་ཡང་ཆོས་ཅན་བརྗོད་པས་མངོན་པར་འདོད་པ་ཁོ་ནར་རིག་པར་བྱའོ། །ཆོས་ཅན་བརྗོད་པ་ཡང་ཆོས་ཅན་ཙམ་འཕངས་པ་ཁྱབ་པའི་རིགས་པ་ཡིན་ན་ནི། ཆོས་ཅན་བརྗོད་པ་དོན་མེད་པའི་ཕྱིར་རོ། །ཉེ་བར་གྱུར་པ་འདི་བསྒྲུབ་པ་བྱ་བའི་ཆོས་ཅན་ཡིན་ཏེ། དེ་ལ་ཐོག་མར་གཏན་ཚིགས་བསྟན་པའི་ཕྱིར་རོ། །གལ་ཏེ་བསྒྲུབ་པར་བྱ་བའི་ཆོས་ཅན་ཉེ་བར་བརྗོད་པ་མ་ཡིན་ནོ། །ག་ལས་ཤེ་ན། དཔེའི་ཆོས་ཅན་ཡང་ཡིན་ཏེ་བསྒྲུབ་པར་བྱ་བའི་ཆོས་ཅན་འབའ་ཞིག་ཉེ་བ་མ་ཡིན་ཏེ། རེས་འགའ་ཁྱབ་པ་བསྟན་པ་སྔོན་དུ་འགྲོ་བའི་གཏན་ཚིགས་ཀྱི་སྦྱོར་བ་ལ་དཔེའི་ཆོས་ཅན་ལ་ཡང་ཐོག་མར་གཏན་ཚིགས་ཡོད་པར་སྟོན་པའི་ཕྱིར་རོ། །གལ་ཏེ་ཉེ་བར་བསྒྲུབ་པར་བྱ་བའི་ཆོས་ཅན་དུ་མ་གྲུབ་པ་དེ་ལྟར་ཡོངས་སུ་ལྷག་པ་ལས་ཡིན་ཏེ། གང་གི་ཕྱིར་གཏན་ཚིགས་དེའི་ཆས་ཁྱབ་པ་ནི་དཔེའི་ཆོས་ཅན་ལ་ཡོད་པར་གྲུབ་པས་དཔེ་མེད་ན་གཏན་ཚིགས་དང་བསྒྲུབ་པར་བྱ་བའི་ཁྱབ་པ་བསྟན་པར་མི་ནུས་སོ་སྙམ་དུ་བསམས་ནས། ཆོས་ཅན་ལྷག་པར་སྨོས་པ་དེས་ན་བསྒྲུབ་པར་བྱ་བའི་ཆོས་ཅན་ཡོངས་སུ་གཟུང་ངོ༌། །དེའི་ཆས་ཁྱབ་པ་ཞེས་བྱ་བ་ཀྱང་དེའི་སྒྲ་ནི་བརྗོད་པ་ལ་ལྟོས་ནས་ཆོས་ཅན་དང་འབྲེལ་པའི་ཕྱིར་དེའི་འབྲེལ་པའི་དོན་ཀྱང་ཆོས་ཅན་སྨོས་པར་དགོས་པར་མི་བྱའོ། །གང་ལ་དགོས་པ་མེད་ན་མི་འབྱུང་བ་
དེ་ནི་ཡོངས་སུ་ལྷག་པའི་ཡུལ་ཡིན་ཏེ། ཆོས་ཅན་བརྗོད་པ་དང་དགོས་པ་གཞན་དང་འབྲེལ་པ་ཡིན་ན་ནི། དེ་ཡོངས་སུ་ལྷག་པ་ག་ལ་ཡིན་ཆོས་ཅན་བརྗོད་པས་ནི་བསྒྲུབ་པར་བྱ་བའི་ཆོས་ཅན་ཡོངས་སུ་བཟུང་ངོ་སྙམ་དུ་སེམས་ན་གྲུབ་པའི་མཐའ་སྨྲ་བས། གྲུབ་ཀྱང་ཞེས་བྱ་བ་སྨོས་ཏེ། དེའི་ཆས་ཁྱབ་པ་དཔེའི་ཆོས་ཅན་ལ་ཡོད་པ་ལ་ཡང་ཆོས་ཅན་བརྗོད་པས་དཔེའི་ཆོས་ཅན་ཁོ་ནའི་ཆོས་གང་ཡིན་པ་དེ་གཏན་ཚིགས་ཡིན་ནོ་ཞེས་བསྣན་པའི་དོན་དུ་དོགས་པ་དེས་ན་མིག་གིས་བཟུང་བ་ལ་སོགས་པ་ཁོ་ན་ཡང་གཏན་ཚིགས་སུ་འགྱུར་གྱི་བྱས་པ་ལ་སོགས་པ་མ་ཡིན་པས་མི་འདོད་པ་ཉིད་དུ་འགྱུར་བ་དེའི་ཕྱིར་ཉེ་བར་བཏགས་པར་བྱས་སོ། །ཅི་རྟོག་གེའི་བསྟན་བཅོས་ལ་བསྣན་པའི་ཕྱིར་བརྗོད་པ་མཐོང་ངམ་ཞེ་ན། མཐུན་པ་ལ་ཡོད་པ་ཁོ་ནས་ཞེས་བྱ་བ་ལ་སོགས་པ་སྨོས་ཏེ། དེ་ལ་ཡང་མཐུན་པ་ལ་ཡོ་པ་ཞེས་བྱ་བ་འདིར་གཏན་ཚིགས་ཀྱི་མཚན་ཉིད་དེ། རིགས་མཐུན་པ་ཁོ་ན་ལ་ཡོད་པ་ཞེས་བྱ་བ་ངེས་པར་གཟུང་བས་གཏན་ཚིགས་ཀྱི་ལྡོག་པ་གྲུབ་མོད། གང་ལ་ཞེ་ན། བསྒྲུབ་པར་བྱ་བ་མེད་པའོ། །གང་འདི་མེད་པ་དེ་ནི་འདི་ཡིན་ནོ་ཞེས་བ་བས་མེད་པ་མེད་པར་སྨོས་པ་ནི་བསྣན་པའི་དོན་དུ་སློབ་དཔོན་གྱིས། མེད་པ་ལ་མེད་པ་ཞེས་བྱ་བ་བཤད་པས་ཇི་ལྟ་བ་མེད་ན་ནི་གཞན་པ་དང་འགལ་བ་ལ་མ་ཡིན་པ་བཞིན་དུ། དེ་ལྟ་ན་འདིར་ཡང་ཆོས་ཅན་གྱི་ཆོས་ཞེས་བརྗོད་པས་བསྣན་པའི་དོན་དུ་དོགས་པར་འགྱུར་རོ། །གང་གི་ཚེ་ཞེ་ན། དཔེའི་ཆོས་ཅན་ལ་ཡོད་པར་གྲུབ་ཀྱང་ངོ༌། །ག་ལས་ཤེ་ན། དེའི་ཆས་ཁྱབ་པ་ཞེས་སྨོས་པས་སོ། །གང་ལ་ཞེ་ན། ཡོད་པ་བསྣན་པའི་དོན་ཡིན་པས་སོ། །དེ་ཉིད་ལ་དཔེའི་ཆོས་ཅན་ལ་ཡོད་པར་དོགས་པ་སྲིད་དོ། །གང་ལས་ཤེ་ན། ཡོངས་སུ་ལྷག་པས་བསྒྲུབ་པ་བྱ་བའི་ཆོས་ཅན་ཡོངས་སུ་བཟུང་བ་ནའོ། །འོ་ན་ནི་ཕྱོགས་ཀྱི་ཆོ་མེད་ན་གཏན་ཚིགས་མེད་པའི་ཕྱིར་བསྣན་པའི་དོན་དུ་དོགས་པར་མི་བྱ་སྟེ། དེ་ལྟ་ན་བསྒྲུབ་པར་བྱ་བའི་ཆོས་ཅན་གྱིས་ཁྱབ་པའི་ཆོས་ཀྱང་གལ་ཏེ་ཆོས་ཅན་ཁ་ཅིག་ལ་ཉེ་བར་དམིགས་པ་དེ་དང་དེ་ཉིད་ལ་རང་གི་ཁྱབ་པར་བྱེད་པ་ལ་རྟོག་པ་སྐྱེའོ་གཞན་དུ་ན་ཉེ་བ་དང༌། རིང་པའི་རིམ་པ་བལྟ་བར་མི་འགྱུར་རོ། །ཆོས་ཅན་ཁ་ཅིག་ལ་མི་
དམིགས་ན་ཇི་ལྟར་གོ་བར་བྱེད་པ་ཡིན་དེ་ལྟར་ཡིན་ན་ཡང་ཐམས་ཅད་དུ་རུང་གི་ཁྱབ་པར་བྱེད་པ་རྟོགས་པར་འགྱུར་ཏེ། ཉེ་བ་དང་རིང་བ་མེད་པའི་ཕྱིར་རོ་ཞེ་ན། དེས་ན་ཤུགས་ཀྱིས་ཞེས་བྱ་བ་ལ་སོགས་པ་སྨོས་ཏེ། གལ་ཏེ་འདི་དེ་མ་ཐག་ཏུ་ཤུགས་ཀྱིས་ཉེ་བར་བརྗོད་པ་དེའི་ཕྱིར་ཤུགས་ཀྱི་དོན་ནི་བསྒྲུབ་པར་བྱ་བའི་ཆོས་ཅན་གྱི་མཚན་ཉིད་ཡོངས་སུ་བཟུང་བ་ཉན་པ་པོ་བློ་རྣོན་པོས་རྟོགས་པར་འགྱུར་ཏེ། འོན་ཀྱང་སྒྲ་མེད་པའི་དོན་ལ་རང་ཉིད་རྗེས་སུ་ཞུགས་ནས་རྟོགས་པར་དཀའ་བར་འགྱུར་བ་དང༌། དེ་ལ་ཉེ་བར་བཏགས་པ་ཙམ་གྱིས་རང་ཉིད་སྒྲ་མེད་པའི་དོན་ལ་རྟོག་པ་ན། ཆོས་ཅན་གྱི་ཆོས་ཞེས་བྱ་བ་འདི་དང་ཕྱོགས་ཆོས་ཞེས་བྱ་བ་ཡི་གེ་མཉམ་པ་དང་རྟོགས་པར་དཀའ་བ་ཡང་ཡོངས་སུ་སྤངས་པ་ཡིན་ནོ་ཞེས་བྱ་བའོ། །འདིར་ཡང་གི་སྒྲ་ནི་གང་གཞན་གྱིས་བསྟན་པ་ལ་རེ་བ་དང་བཅས་པ་དེས་ན་དོན་འདིའི་མཚན་ཉིད་བརྗོད་པས་རྟོགས་པར་མི་འགྱུར་རོ་ཞེས་བྱ་བའོ། །ཇི་ལྟར་མཚན་ཉིད་རྟོགས་པའི་ཕྱོགས་ཀྱི་ཆོས་མེད་པས་གཏན་ཚོགས་མེད་ན་དོགས་པ་འདི་གང་ལ་ཡིན་སྙམ་པས་དེའི་ཕྱིར་དེ་དག་མཚན་ཉིད་ཀྱི་རྗེས་སུ་འབྲང་བ་རྣམས་ལ་བསྣན་པའི་དོན་དུ་དགོས་པ་ཡོངས་སུ་སྤང་པའི་ཕྱིར་ཡང་ཉེ་བར་བཏགས་པ་བྱས་སོ། །འདིར་སྒྲའི་སྦྱོར་བ་ལ་གདོན་མི་ཟ་བར་རྣམ་པར་གཅོད་པའི་འབྲས་བུ་ཅན་ཉིད་དུ་ངེས་པར་གཟུང་བར་བྱ་སྟེ། ཕྱོགས་ཀྱི་ཆོས་ཞེས་བྱ་བ་འདིར་དྲུག་པའི་བསྡུ་བ་ཡིན་གྱི། གཞན་གྱི་བསྡུ་བ་ནི་སྲིད་པ་མ་ཡིན་ནོ། །དེ་ལྟ་ན་ཡང་ཕྱོགས་ཀྱི་ཆོས་ཞེས་བྱ་བ་ཁོ་ནར་ངེས་པ་བཟུང་བས་དེའི་ཆས་ཁྱབ་པ་དང་འགལ་བ་ཡིན་ནོ་ཞེས་འགལ་བའི་མཚན་ཉིད་བརྗོད་པ་ན། གལ་ཏེ་ཕྱོགས་ཆོས་ཞེས་བྱ་བ་ལ་སོགས་པ་སྨོས་ཏེ། ཕྱོགས་ཀྱི་ཁྱད་པར་གཞན་རྣམ་པར་གཅོད་པ་ལ་ལྟོས་པའི་ཕྱིར། དེའི་ཁྱད་པར་ལ་ལྟོས་པའི་ཆོ་ནི་གཞན་ལ་ཕྱོགས་སུ་བྱས་པ་དང་གཞན་གྱི་ཚེའི་མཐུན་པའི་ཕྱོགས་ལ་རྗེས་སུ་མི་འཇུག་གོ །དེ་ལྟར་ན་ཕྱོགས་ཀྱིས་ཁྱད་པར་དུ་བྱ་བ་ནི་མཐུན་པའི་ཕྱོགས་ཁོ་ན་ཡིན་གྱི་གཞན་དུ་ནི་མ་ཡིན་ཏེ། དཔེར་ན་ལྷ་སྦྱིན་གྱི་བུ་གང་ཡིན་པ་དེ་ཁོ་ནའི་ཡིན་གྱི། མཆོད་སྦྱིན་གྱི་མ་ཡིན་བ་བཞིན་དུ་དེས་ན་གཞན་ལ་མི་འཇུག་པས་ཐུན་མོང་མ་ཡིན་པ་ཉིད་དུ་ཐུན་མོང་བ་ནི་མ་ཡིན་པས་དེའི་
ཆས་ཁྱབ་པ་དང་འགལ་ལོ་ཞེས་བྱ་བའི་དོན་ཏོ། །དེའི་ཆས་ཁྱབ་པ་ནི་བསྟན་པའི་ཕྱིར་ཐུན་མོང་བ་ཡིན་པ་དེས་ན་ཕྱོགས་ཀྱི་ཆོས་ནི་དེའི་ཆས་ཁྱབ་པ་མ་ཡིན་ལ། ཡང་ན་དེའི་ཆས་ཁྱབ་པ་ནི་ཕྱོགས་ཀྱི་ཆོས་མ་ཡིན་པས་འགལ་བའི་མཚན་ཉིད་ཡིན་ནོ་ཞེས་བྱའོ། །འོན་ཀྱང་དེའི་ཆས་ཁྱབ་པ་ནི་བསྒྲུབ་པར་བྱ་བའི་ཆོས་ཁྱབ་པར་བྱེད་པ་དེ་ནི་གཏན་ཚིགས་སུ་འགྱུར་བ་གཞི་ཆོས་ཅན་དེ་ལ་ཡོད་པ་ཁོ་ནའམ། ཡང་ན་ཁྱབ་པར་བྱ་བའི་གཏན་ཚིགས་དེ་ཉིད་ནི་ཁྱབ་པར་བྱེད་པ་བསྒྲུབ་བྱའི་ཆོས་སུ་གྱུར་པ་ཁོ་ན་ལ་ཡོད་པ་ཞེས་བྱ་བ་རང་གིས་བསྒྲུབ་པར་བྱ་བ་དང༌། མེད་ན་མི་འབྱུང་བའི་མཚན་ཉིད་འཆད་པར་འགྱུར་རོ། །འདིས་ཀྱང་ཕྱོགས་སུ་བྱས་པས་གཞན་ལ་འཇུག་པ་གདོན་མི་ཟ་བར་འཕངས་པ་ནི་མེད་ན་གང་གི་མཚན་ཉིད་ལ་གནོད་པར་དོགས་པ་ཡིན། དེ་ལྟ་ན་ཕྱོགས་སུ་བྱས་པ་དེ་ཉིད་ལ་ཡོད་པ་ཁོ་ན་བསྒྲུབ་པར་བྱ་བའི་ཆོས་ཅན་ལ་གཏན་ཚིགས་གནས་པ་དོན་དེའི་ཆས་ཁྱབ་པ་བསྟན་པ་ཡིན་ནོ། །གང་ཞིག་དེའི་ཆོས་ཅན་ལ་རང་གི་བསྒྲུབ་པར་བྱ་བ་མེད་ན་མི་འབྱུང་བ་དེ་ཉིད་གོ་བར་བྱེད་པའི་རྒྱུ་མཚན་ཡིན་པའི་ཕྱིར་གཞན་གྱི་ཆོས་ཅན་དེ་ལ་ཡང་རང་གི་བསྒྲུབ་པར་བྱ་བ་མེད་ན་མི་འབྱུང་བའི་རྒྱུ་མཚན་ནི་སྒྲུབ་པར་བྱེད་པའི་ཚད་མའི་རྒྱུ་མཚན་མ་ཡིན་ནོ། །ལ་ལར་མཐུན་པའི་ཕྱོགས་ཕལ་ཆེ་བ་འམ་ལྷན་ཅིག་ཡོད་པ་ཙམ་མཐོང་བ་རྒྱུ་མཚན་མ་ཡིན་ཏེ། དཔེར་ན་རྡོ་རྗེ་ལ་མཚོན་གྱིས་གཅོད་པ་ཡིན་ཏེ་ས་ཡིན་པའི་ཕྱིར་ཤིང་བཞིན་ནོ་ཞེས་བྱ་བ་ལ་སོགས་པས་གཞན་ལ་མཚོན་གྱིས་གཅོད་པ་མེད་ན་མི་འབྱུང་བ་ཡང་རྡོ་རྗེ་ལ་དེ་བཞིན་དུ་ཡོད་པར་འགྱུར་བ་མ་ཡིན་ནོ། །གལ་ཏེ་ཕྱོགས་སུ་བྱས་པ་ལས་གཞན་ཁོ་ན་ལ་ཁྱབ་པ་བསྟན་པར་བྱའོ་ཞེས་བྱ་བའི་ངེས་པ་དེ་ཇི་ལྟར་ཡིན། ཡོད་པ་ཉིད་སྐད་ཅིག་མའི་དངོས་པོ་རྣམས་ལ་བསྟན་པ་གང་ཡིན་པ་ནི་དོན་ཐམས་ཅད་པ་ཉིད་སྐད་ཅིག་མའི་དངོས་པོ་རྣམས་ལ་བསྟན་པ་གང་ཡིན་པ་སྐད་ཅིག་མས་ཁྱབ་པར་འདོད་པས་དེ་ལས་འགའ་ཞིག་ཀྱང་མཐུན་པའི་ཕྱོགས་སུ་གྱུར་བ་མེད་དོ། གང་ཞིག་མེ་ལྕི་འབར་བ་ལ་སོགས་པ་འབའ་ཞིག་ལ་སྐད་ཅིག་མ་ཁས་བླངས་སུ་ཟིན་ཀྱང་དེ་ཡང་མངོན་སུམ་མ་ཡིན་ཏེ། སྐད་ཅིག་མའི་ཐ་དད་པར་གྱུ་པ་ནི་ཤིན་ཏུ་ཕྲ་བས་ཉེ་བར་མི་རྟོགས་པའི་ཕྱིར་རོ། །གཞན་ཁོ་ན་ལ་ཁྱབ་པ་མ་བསྟན་པར་བསྒྲུབ་པར་བྱ་བའི་ཆོས་ཅན་ལ་མ་ཡིན་ནོ་ཞེས་བྱ་བའི་རིགས་པ་འདི་ཅི་ཞིག་ཡིན། །
དེ་ལྟ་ན་གཏན་ཚིགས་ཀྱི་མཚན་ཉིད་བསྟན་པ་བརྟག་པ་ཡིན་གྱི། དངོས་པོའི་སྟོབས་ཀྱིས་ཞུགས་པ་མ་ཡིན་ནོ། །དེའི་ཕྱིར་རང་གི་བསྒྲུབ་པར་བྱ་བ་དང་འབྲེལ་པ་ལས་ཀྱང་གཏན་ཚིགས་ལ་ཁྱབ་པ་འགྲུབ་སྟེ། དེ་ཡང་མི་མཐུན་པའི་ཕྱོགས་ལ་གནོད་པ་ཅན་གྱི་ཚད་མ་ཡོད་ན་བསྒྲུབ་པར་བྱ་བའི་ཆོས་ཅན་ལ་ཡང་འགྲུབ་པའི་ཕྱིར་གཞན་ལ་རྗེས་སུ་འབྲང་བ་ལ་ཅུང་ཟད་ཀྱང་ལྟོས་པ་མ་ཡིན་པས་སོ། །དེ་ཉིད་ཀྱི་ཕྱིར། གཞན་དུ་གང་དང་གང་ལ་འགའ་ཞིག་ཏུ་མཐོང་བ་དེའི་འབྲེལ་པར་རིག་པ་ནི། དེ་དང་དེ་ནི་དེ་ལ་གོ་བར་བྱེད་པ་ཡིན་ནོ་ཞེས་དངོས་པོ་གོ་བར་བྱེད་པ་མཚུངས་ཏེ། གང་ཡང་རྗེས་སུ་དཔག་པ་དང༌། །དེ་མཚུངས་ལ་ཡང་ཡོད་གྱུར་པ། །ཞེས་བྱ་བ་ལ་སོགས་པའི་མཚན་ཉིད་ནི་དེ་ལ་བསྒྲུབ་པར་བྱ་བའི་ཆོས་དང་ལྡན་པ་ནི། མཐུན་པའི་ཕྱོགས་སུ་བརྗོད་དོ། །དེས་ན་ཡོད་པ་ཉིད་ནི་བསྒྲུབ་པར་བྱ་བའི་ཆོས་ཡོད་པ་ཡིན་ནོ་ཞེས་བྱ་བ་དེ་བཞིན་དུ་དེ་དང་དེའི་ཆོས་ཀྱིས་བསྒྲུབ་པར་བྱ་བའི་ཆོས་ཅན་ཡང་མཐུན་པའི་ཕྱོགས་ཀྱི་དངོས་པོ་ལས་ལྡོག་པ་མ་ཡིན་ནོ། །བསྒྲུབ་པར་བྱ་བར་འདོད་པ་ཉིད་ཀྱིས་འདོད་པས་གཞན་པའི་ཕྱོགས་ཀྱི་མཚན་ཉིད་དེ་བསལ་བར་མི་ནུས་པའི་ཕྱིར་རོ། །དེའི་ཕྱིར། དེའི་ཆས་ཁྱབ་པ་ཞེས་བརྗོད་པ་རང་གི་བསྒྲུབ་པ་བྱ་བ་དང༌། མེད་ན་མི་འབྱུང་བའི་འབྲེལ་པའི་རྒྱུ་མཚན་ལས་གཞན་དུ་མི་རིགས་པར་བརྗོད་དོ། །གདོན་མི་ཟ་བར་གཞན་ལ་མི་འཇུག་པས་འཕངས་སོ་ཞེས་ཇི་ལྟར་དོགས་པ་ཡིན་ཞེ་ན། བདེན་ཏེ། གཏན་ཚིགས་ཐམས་ཅད་ཕྱོགས་སུ་བྱས་པ་ཁོ་ནའི་ཆོས་ཅན་ལ་རང་གི་བསྒྲུབ་པར་བྱ་བ་དང་འབྲེལ་པ་ཚད་མས་ངེས་པར་ནུས་ན་ནི་འདིས་དོགས་པར་མི་བྱ་སྟེ། དཔེར་ན་ཡོད་པའི་མཚན་ཉིད་ཀྱི་རང་བཞིན་གྱི་གཏན་ཚིགས་ནི་སྐད་ཅིག་མ་བསྒྲུབ་པར་བྱ་བའི་བདག་ཉིད་ལས་བཟློག་པ་ལ་གནོད་པ་ཅན་གྱི་ཚད་མ་མཇུག་པ་བཞིན་དུ། འབྲས་བུའི་གཏན་ཚིག་ནི་ཕྱོགས་སུ་བྱས་པའི་ཆོས་ཅན་དང་རང་བཞིན་གྱི་གཏན་ཚིགས་འགའ་ཞིག་གི་འབྲེལ་པ་ནི་མངོན་སུམ་དང་མི་དམིགས་པས་སྒྲུབ་ན། ཇི་ལྟར་ལྐོག་ཏུ་གྱུར་པའི་བསྒྲུབ་པའི་བྱ་བའི་ཆོས་གཟུང་བར་བྱ་བ་ཡིན། དེའི་ཕྱིར་གཞན་ལ་རབ་ཏུ་གྲུབ་པ་དེ་ལས་ཡིན་ནོ་ཞེས་བྱའོ། །དེ་ལ་ལྟོས་པས་གཞན་ལ་མི་འཇུག་པས་ཐུན་མོང་མ་ཡིན་པ་སྲིད་པར་
དོགས་པས་དེ་ནི་བསྒྲུབ་པར་བྱ་བ་དང་བཟློག་པ་གཞན་དག་ལ་འཇུག་པ་མ་ངེས་པ་ནི་དེ་གཉི་ག་ལས། དེའི་ཆོས་ཅན་ཕྱི་རོལ་དུ་གྱུར་བ་མི་རིགས་པས་མ་ངེས་པ་དང༌། བསྒྲུབ་བར་བྱ་བ་ལ་འཇུག་པ་དང་རྣམ་པར་གཅོད་པ་དག་གིས་ཐམས་ཅད་བསྡུས་པས་གཏན་ཚིགས་དེ་ལ་ཐེ་ཚོམ་ཟ་བར་འགྱུར་རོ། །ལ་ལར་སྔར་རྟེན་ལ་ཡོད་པར་བཟུང་བ་བརྗེད་པ་ལ་འབྲེལ་པ་སྒྲུབ་པའི་ཚད་མས་དྲན་པ་ནི་གཞན་ལ་འཇུག་པ་ལ་ལྟོས་པ་ཡིན་སྙམ་སེམས་ནས་འདི་དག་གི་ལན་ནི་མ་ཡིན་ཏེ་ཞེས་བྱ་བ་སྨོས་ཏེ། གཞན་ལ་མི་འཇུག་པ་ནི་མ་ཡིན་ནོ། །ག་ལས་ཤེ་ན་མ་འབྲེལ་པ་ནི་འབྲེལ་པ་མེད་པའོ། །རྣམ་པར་གཅོད་པས་བྱེ་བྲག་ཏུ་བྱས་པའི་ཕྱིར་ཡིན་གྱི་ཕྱོགས་ནི་གཞན་དང་ལྡན་པ་རྣམ་པར་གཅོད་པས་བྱེ་བྲག་ཏུ་བྱས་པ་མ་ཡིན་ནོ། །དེ་ལྟ་ན་ཡང་མ་འབྲེལ་པ་རྣམ་པར་གཅོད་པ་ཡང་ཆོས་ཅན་ལ་ཆོས་ཡོད་པར་གང་ལ་ཐེ་ཚོམ་ཟ་བ་དེ་ལ་མ་འབྲེལ་པ་རྣམ་པར་གཅོད་པའི་རིགས་པ་ཐོབ་པའི་ཕྱིར་ཏེ། དཔེར་ན་ནག་པ་འཕོང་སྐྱེན་ནོ་ཞེས་བྱ་བ་ལྟ་བུའོ། །ནག་པ་འཕོང་སྐྱེན་པ་ཅི་ཡོད་དམ་མེད་ཅེས་ཐེ་ཚོམ་ཟ་བ་དེའི་ཕྱིར་ནག་པ་འཕོང་སྐྱེན་ནོ་ཞེས་བྱ་བ་དེ་ལ་ཡོད་པར་སྟོན་པར་བྱེད་པ་ཐོས་ནས་ཕྱོགས་གཞན་ཡོད་པར་གྱུར་པ་ཉན་པ་པོ་དོགས་པར་རྣམ་པར་གནས་པ་བསལ་བའི་ཕྱིར་མ་འབྲེལ་པ་རྣམ་པར་གཅོད་པའི་རིགས་པ་འདིར་ཐོབ་པའི་ཕྱིར་རོ། །གཞན་གྱི་འདོད་པའི་རྣམ་པར་གཅོད་པ་བསལ་བར་འདོད་པ་ནི། གཞན་དང་ལྡན་པ་རྣམ་པར་གཅོད་པས་ཁྱད་པར་དུ་བྱས་པ་མ་ཡིན་ནོ་ཞེས་བྱ་བ་སྨོས་ཏེ་གཞན་ལ་རྗེས་སུ་མི་འཇུག་པས་ཐུན་མོང་མ་ཡིན་པ་ཞེས་བྱ་བར་སྦྱར་རོ། །འདིར་ཡང་དཔེ་ནི་དཔེར་ན། སྲིད་སྒྲུབ་འཕོང་སྐྱེན་ནོ་ཞེས་བྱ་བ་ལྟ་བུའོ། །སྒྲ་མཚུངས་ཀྱང་འདི་འཕོང་སྐྱེན་ནོ་ཞེས་བྱ་བའི་སྒྲའི་ནུས་པས་ཡོན་ཏན་ཁྱད་པར་ཅན་ལ་འཇུག་སྟེ། སྲིད་སྒྲུབ་འཕོང་སྐྱེན་པར་གྲུབ་པའི་ཕྱིར་མ་འབྲེལ་པ་དོགས་པ་མེད་དེ་འདི་འདྲའི་ཁྱད་པར་བཅས་པ་གཞན་ལ་ཡང་ཡོད་དམ་མེད་ཅེས་གཞན་དང་ལྡན་པའི་ཉན་པ་པོ་དགོས་པ་ན་གང་གི་ཚེ་སྲིད་སྒྲུབ་འཕོང་སྐྱེན་ནོ་ཞེས་བརྗོད་པ་དེའི་ཚེ་གཞན་དང་ལྡན་པ་རྣམ་པར་གཅོད་པའི་རིགས་པ་འཐོབ་པོ། །བསྟན་པར་བྱ་བ་ལ་ཐེ་ཚོམ་གནས་པའི་ཕྱོགས་དག་ཕན་ཚུན་མི་མཐུན་པའི་ཕྱིར་གཅིག་ལ་བསྟན་པ་
དེས་གཞན་རྣམ་པར་བཅད་པར་རིགས་པའི་སྟོབས་ཀྱིས་འོངས་པའི་ཕྱིར་རོ། །དེ་འདིར་ཕྱོགས་ལ་ཆོས་འདི་ཡོད་དམ་མེད་ཅེས་དོགས་པ་ལ་ཕྱོགས་ཀྱི་ཆོས་ཞེས་དེ་ལ་ཡོད་པ་ཉིད་བསྟན་པའི་མ་འབྲེལ་པ་རྣམ་པར་གཅོད་པ་ཡིན་གྱི། གཞན་དང་ལྡན་པ་ནི་མ་ཡིན་ནོ། །དེའི་ཆོས་ཁྱབ་པའི་དེ་བསྟན་པས་ན་དེ་ལ་ཐེ་ཚོམ་ཟ་བར་འགྱུར་རོ་སྙམ་ནས་དེའི་ཆ་ནི་དེའི་ཆོས་སོ། །དེའི་སྒྲས་ནི་ཕྱོགས་ཁྱད་པར་དུ་བྱེད་ཀྱི་ཆོས་ནི་མ་ཡིན་ཏེ། ཆོས་ལ་ཆོས་རྟེན་པ་མི་སྲིད་པའི་ཕྱིར་རོ། །ཆ་ནི་ཆོས་ལ་བྱའི་ཕྱོགས་གཅིག་མ་ཡིན་ཏེ། ཕྱོགས་ཀྱི་སྒྲ་ཆོས་ཅན་ཙམ་བརྗོད་པའི་ཕྱིར་རོ། །དེའི་ཆ་ནི་ཆ་ཤས་མ་ཡིན་ཏེ་ཕྱོགས་གཅིག་མེད་པའི་ཕྱིར་རོ། །ཕྱོགས་ཀྱི་ཆོས་ལ་ཡོད་པ་དེའི་ཁྱབ་པ་ནི་གང་ཁྱབ་པར་བྱ་བ་དང༌། གང་ཁྱབ་པར་བྱེད་པ་དེ་གཉི་གའི་ཆོས་སུ་རྟོགས་པ་ཡིན་ཏེ། གང་གི་ཚེ་ཁྱབ་པར་བྱེད་པ་བརྗོད་པར་འདོད་པ་དེའི་ཚེ་ཁྱབ་པར་བྱེད་པར་གོ་བར་བྱའོ། །དེ་ལ་ཞེས་བྱ་བ་ནི་ཡོད་པའི་འདུན་པའི་དོན་གཙོ་བོ་ཡིན་གྱི་འདིར་ངེས་པར་གཟུང་བ་ནི་མ་ཡིན་ཏེ། ཆོས་ལ་ཆོས་མི་རྟེན་པའི་ཕྱིར་རོ། །དེས་ན་འདིའི་དོན་ནི་དེ་ལ་ཁྱབ་པ་ནི་ཆོས་ཅན་གང་ལ་ཁྱབ་པར་བྱ་བ་ཡོད་པ་དེ་ལ་ཁྱབ་པར་བྱེད་པ་ཡོད་པ་ཁོ་ན་སྟེ། བདག་ཉིད་དུ་གྱུར་པའི་ཆོས་ཀྱིས་ཁྱབ་པ་ཡིན་ནོ། །དེ་ཡང་ཁྱབ་པར་བྱ་བ་ཡོད་པ་ལ་ལྟོས་ནས་ཁྱབ་པར་བྱེད་པ་ཁོ་ནའི་ཁྱབ་པར་རྟོགས་སོ། །དེ་བཞིན་དུ་ངེས་བཟུང་གིས་ཁྱབ་པར་བྱེད་པ་ཁོ་ན་དེ་ལ་ཡོད་པ་ནི་མ་ཡིན་ཏེ། གཏན་ཚིགས་མེད་པར་ཐལ་བར་འགྱུར་བས་ཁྱབ་པར་བྱེད་པ་མ་ཡིན་པ་ལུས་ཅན་ཉིད་ལ་སོགས་པ་དེ་ཡོད་པའི་ཕྱིར་རོ། །དེ་ཁོ་ན་ལ་ཡོད་པ་ཡང་མ་ཡིན་ཏེ། རྩོལ་བ་ལས་བྱུང་བ་ལ་སོགས་པ་གཏན་ཚིགས་མ་ཡིན་པར་འགྱུར་བ་དང༌། ཐུན་མོང་གི་གཏན་ཚིགས་སུ་འགྱུར་ཏེ། གཞལ་བྱ་ལ་སོགས་པ་ཉིད་མི་རྟག་པ་ལ་ཡོད་པའི་ཕྱིར་རོ། །གང་གི་ཚེ་ཁྱབ་པར་བྱ་བའི་ཆོས་བརྗོད་པར་འདོད་པ་དེའི་ཚེ་ཁྱབ་པར་བྱ་བའི་གོ་བར་བྱེད་པ་ནི་ཁྱབ་པར་བྱེད་པ་དེ་ཁོ་ན་ལ་ཡོད་པའོ། །ཆོས་ཅན་གང་ལ་ཁྱབ་པར་བྱེད་པ་ཡོད་པ་དེ་ཁོ་ན་ལ་ཡོད་པ་ན་དེ་མེད་དུ་ཟིན་ཀྱང་ཁྱབ་པ་ཡིན་ནོ། །འདི་ཡང་ཁྱབ་པར་བྱ་བ་ཁོ་ན་དེ་ལ་ཡོད་པ་ཞེས་ངེས་པར་བཟུང་བ་ནི་གཏན་ཚིགས་མེད་པ་ཐལ་བར་འགྱུར་བས་བརྟེན་པར་མི་བྱ་སྟེ། ཁྱབ་པར་བྱ་བ་མ་ཡིན་པ་ཡང་ཡོད་པའི་
པའི་ཕྱིར་རོ། །ཁྱབ་པར་བྱ་བ་ནི་དེ་ལ་ཡོད་པ་ཁོ་ན་ཡང་མ་ཡིན་ཏེ། །མཐུན་པའི་ཕྱོགས་ཀྱི་ཕྱོགས་གཅིག་ལ་ཡོད་པ་གཏན་ཚིགས་སུ་མི་འགྱུར་བ་དང་ཐུན་མོང་བ་གཏན་ཚིགས་སུ་འགྱུར་ཏེ། །གཞལ་བྱ་ནི་རྟག་པ་རྣམས་ལ་གདོན་མི་ཟ་བར་ཡོད་པའི་ཕྱིར་རོ། །ཁྱབ་པར་བྱ་བ་དང༌། །ཁྱབ་པར་བྱེད་པར་བརྗོད་པའི་ཁྱབ་པ་ནི་གཉི་ག་ལ་ཆོས་མཚུངས་པས་གཅིག་ཏུ་རྟོགས་ན་ནི་ལྡན་པ་ལ་སོགས་པ་གཞན་དུ་མ་གྱུར་ཅིག་ཅེས་བྱ་བའི་ཕྱིར་བསྟན་ཏོ། །འདི་ལྟར་སྔར་མི་ལྡན་པར་རྣམ་པར་བཅད་པས་ངེས་པར་བཟུང་ནས་ཕྱིས་གཞན་དང་ལྡན་པའི་རྣམ་པར་གཅོད་པ་ཡིན་ན་གཉི་ག་ལ་རྣམ་པ་གཅིག་གིས་ཁྱབ་པོ་ཞེས་བྱ་བ་ལས་ཡིན། དེ་སྐད་དུ་ཡང༌། རྟགས་ལ་རྟགས་ཅན་ཡོད་ཉིད་དང༌། །ཅིག་ཤོས་རྟགས་ཅན་ཁོ་ན་ལའོ། །ངེས་པ་ལས་ནི་བཟློག་པ་ལ། །རྟགས་དང་རྟགས་ཅན་འབྲེལ་པ་མེད། །ཅེས་བྱ་བ་གསུངས་ཏེ། དེས་ན་སློབ་དཔོན་གྱིས་ལྡན་པའི་སྟོབས་ཀྱིས་གོ་བར་བྱེད་པ་གཞན་དག་ལ་ཉེས་པ་བརྗོད་དོ། །ལྡན་ཡིན་མེ་དང་དུ་བ་ན། །ཆ་འགའ་ཞིག་གིས་མ་ཡིན་ཏེ། །དུ་བ་དེས་ནི་ཐམས་ཅད་ཀྱི། །གསལ་བྱེད་ཐོབ་པར་འགྱུར་ཕྱིར་ཏེ། །འདི་ལ་འཇུག་པ་མ་ཡིན་ནོ། །ཞེས་བཤད་དོ། །འདི་ལྟར་ལྡན་པ་ནི་གཉི་ག་ལ་ཁྱད་པར་མེད་པར་ཐལ་བར་འགྱུར་བས་ཁྱབ་པ་མ་ཡིན་ནོ། །ཁྱབ་པར་བྱེད་པའི་ཆོས་ཀྱིས་ཁྱབ་པ་ཅི་འདྲ་བ་ཁྱབ་པར་བྱ་བ་ཆོས་དེ་འདྲ་བ་ནི་མ་ཡིན་ནོ་སྙམ་ནས། དེ་སྐད་དུ། གང་ཚེ་འབྲེལ་པ་གཉིས་ལ་གནས། །རྟགས་དང་རྟགས་ཅན་ལྷན་ཅིག་སྟེ། །རྟེན་དང་བརྟེན་པའི་ཡོད་པ་བཞིན། །ལྡན་པ་ལ་ནི་དེ་མེད་དོ། །ཞེས་གསུངས་སོ། །དེས་ན་ཁྱབ་པར་བྱེད་པ་ནི་ཁྱབ་པར་བྱ་བ་མ་ཡིན་ལ་ཁྱབ་པར་བྱ་བ་དང་ཁྱབ་པར་བྱེད་པ་མ་ཡིན་ནོ། །དེའི་ཆས་ཁྱབ་པ་ནི་གཏན་ཚིགས་ཞེས་བརྗོད་པས། ལྡན་པའི་ཕྱོགས་བརྗོད་པའི་སྐྱོན་དུ་མི་འགྱུར་བ་དང་གཉི་ག་གོ་བར་བྱ་བ་དང་གོ་བར་བྱེད་པར་ཐལ་བར་མི་འགྱུར་རོ། །ཇི་སྐད་དུ་བཤད་པའི་གཏན་ཚིགས་ཀྱི་མཚན་ཉིད་ཀྱི་ཁྱབ་པར་བྱེད་པ་ནི་གོ་བར་བྱ་བར་རྟོགས་ལ་ཁྱབ་པར་བྱ་བ་ནི་གོ་བྱེད་དུ་རྟོགས་སོ། །གལ་ཏེ་དེ་ལྟ་ན་ཕྱོགས་ཆོས་དེའི་ཆས་ཁྱབ་པ་ཞེས་བྱ་བ་དེ་ཙམ་གཏན་ཚིགས་ཀྱི་མཚན་ཉིད་ཡིན་པ་དེའི་ཕྱིར་ཕྱོགས་ཀྱི་ཆོས་དང་དེའི་ཆས་
ཁྱབ་པ་ཞེས་བྱ་བ་གཏན་ཚིགས་ཀྱི་ཚུལ་གཉིས་སུ་འགྱུར་ལ། གཞན་དུ་ཚུལ་གསུམ་དུ་བཤད་པ་དང་ཇི་ལྟར་འགལ་བར་མི་འགྱུར་ཞེ་ན། དེའི་ཆས་ཁྱབ་པ་ཞེས་བྱ་བའི་ཚིག་འདིས་རྗེས་སུ་འགྲོ་བ་དང་ལྡོག་པ་དག་བཤད་པར་རིག་པར་བྱའོ་ཞེས་བྱ་བར་སྦྱར་ཏེ། རྗེས་སུ་འགྲོ་བ་དང་ལྡོག་པ་དག་གི་ཚུལ་ཉིད་ཀྱིས་ཁྱབ་པ་ཡོད་པའི་ཕྱིར་རོ། །འདི་ལྟར་གང་ཁོ་ནའི་རྗེས་སུ་འགྲོ་བ་དང་གང་ལྡོག་ན་ལྡོག་པ་དེ་ཉིད་དེས་ཁྱབ་པར་བརྗོད་དེ་དེའི་བདག་ཉིད་ཡིན་པའི་ཕྱིར་ན་ཁྱབ་པ་ཡིན་ནོ། །ཁྱབ་པ་བརྗོད་པས་རྗེས་སུ་འགྲོ་བ་དང༌། ལྡོག་པ་བརྗོད་དེ། དེའི་ཕྱིར་ཁྱབ་པའི་ཚིག་གིས་རྗེས་སུ་འགྲོ་བ་དང་ལྡོག་པ་བརྗོད་པས་འགལ་བ་མེད་པའི་ཕྱིར་རོ། །དེས་ན་ཤེས་པར་བྱེད་པའི་གཏན་ཚིགས་ཀྱི་དབང་དུ་བྱས་ནས་ངེས་པ་ཡིན་ནོ། །ངེས་པ་ཡང་ཚད་མ་དུ་མ་ཁོ་ནས་སམ་ཡང་ན་བདག་ཉིད་ཇི་ལྟ་བ་གང་དང་གང་གི་ཚད་མ་དེས་ངེས་བ་སྟེ། ཚད་མ་གང་དང་གང་ཡིན་པ་དེ་ནི་ཕྱིས་བཤད་པར་བྱའོ། །འམ་གྱི་སྒྲས་ནི་རྗེས་སུ་འགྲོ་བ་དང་ལྡོག་པ་དག་ནི་དོན་མཚུངས་པར་བསྟན་གྱི་ཚིག་ནི་མ་ཡིན་ནོ། །དེས་ན་མཐུན་པའི་ཕྱོགས་སམ་མི་མཐུན་པའི་ཕྱོགས་དག་གི་སྦྱོར་བ་གཅིག་གིས་གཉི་ག་རྟོགས་ཏེ། དཔག་པ་དང་སྒྲུབ་པའི་ཚུལ་དག་གི་འཇུག་པ་ཐ་དད་ཀྱང་དོན་དམ་པ་དེའི་བདག་ཉིད་ཡིན་པས་གཉི་ག་རྟོགས་པར་བསྟན་ཏོ། །ལྡོག་པ་ནི་བསྒྲུབ་བྱ་ལྡོག་པས་རྟགས་ལྡོག་པའི་ཆོས་ཡིན་ཏོ། རང་བཞིན་གཅིག་ཏུ་གྱུར་པའི་ཆོས་ཡིན་ན་ནི་རྗེས་སུ་འགྲོ་བའི་ངོ་བོ་འདི་དངོས་པོ་ལ་འདི་འགལ་བ་མེད་དོ། །ཅི་ཕྱོགས་ཀྱི་ཆོས་ཀྱང་ཡིན་ནམ་ཞེ་ན། བདག་ཉིད་ཇི་ལྟ་བའི་ཚད་མས་བཤད་པ་ཡིན་ནོ་ཞེས་བྱ་བར་སྦྱར་ཏེ། ངེས་པའི་ཞར་ལ་དེ་ཡང་འདིར་བསྟན་པའི་ཕྱིར་རོ། །གལ་ཏེ་ངེས་པ་གོ་བར་བྱེད་པ་ཉིད་དུ་བཤད་པས་ཇི་ལྟར་སླར་ཡང་རྗེས་སུ་འགྲོ་བའི་དོན་གྱིས་ཁྱབ་པ་ཡིན་ཞེ་ན། གང་གི་ཚེ་གཏན་ཚིགས་ཐམས་ཅད་ལ་ཞེས་བྱ་བ་སྨོས་ཏེ། གཏན་ཚིགས་གང་དང་གང་ལ་བསྒྲུབ་པར་བྱ་བ་དེ་དང་དེ་ལས་མེད་པ་དེའི་ཚེ་བསྒྲུབ་པར་བྱ་བའི་ཆོས་དེས་གཏན་ཚིགས་དེ་ལ་ཁྱབ་པ་མི་འགྲུབ་པོ། །དེའི་ཕྱིར་གཏན་ཚིགས་གང་དང་གང་ལ་བསྒྲུབ་པར་བྱ་བའི་ཆོས་དེ་དང་དེ་ལ་ཡོད་པ་ནི་ཁྱབ་པར་བྱེད་པའི་ཆོས་ཀྱི་ངོ་བོ་ཁྱབ་པ་ཡིན་ནོ་ཞེས་བྱ་བ་ནི་རྗེས་སུ་འགྲོ་བའི་ངོ་བོའི་ཁྱབ་པའོ། །གང་དང་གང་ལྡོག་པ་ངེས་པས་དེ་ཡང་ལྡོག་
པ་དེས་ཁྱབ་པར་འགྲུབ་ཀྱི་བཟློག་པ་ནི་མ་ཡིན་ནོ། །དེས་ན་ཁྱབ་པར་བྱ་བའི་ངོ་བོའི་ཁྱབ་པ་ནི་ལྡོག་པའི་བདག་ཉིད་ཡིན་པའི་ཕྱིར་རོ། །ཡང་ན་བསྒྲུབ་པར་བྱ་བའི་ཆོས་ཁྱབ་པར་བྱེད་པ་མེད་ན་ཁྱབ་པ་མི་འགྲུབ་པའི་ཕྱིར་རོ། །དེ་ན་གཏན་ཚིགས་ཀྱི་ཁྱབ་པར་བྱ་བ་སྤངས་པ་ཡིན་ནོ།། བསྒྲུབ་པར་བྱ་བའི་ཆོས་ཁྱབ་པར་བྱེད་པ་མེད་པ་ག་ལས་ཤེ་ན། བདག་ཉིད་ལྡོག་ན་གཏན་ཚིགས་ལྡོག་པ་མེད་པའི་ཕྱིར་རོ། །ལྡོག་པའི་བདག་ཉིད་ནི་ལྡོག་པར་བྱེད་པ་ཁྱབ་པར་བྱེད་པ་ཡིན་པའི་ཕྱིར། ཅིག་ཤོས་དེ་མེད་པ་ལ་མེད་པ་ཁོ་ན་ཁྱབ་པར་བྱ་བ་ཡིན་པའི་ཕྱིར་རོ། །དེའི་ཕྱིར་ལྡོག་པ་ཡོད་པ་ཉིད་ཀྱིས་བསྒྲུབ་པར་བྱ་པ་ཁྱབ་པ་ལྡོག་པའི་བདག་ཉིད་ཁོ་ན་ལ་ཡོད་པར་རྟོགས་ཏེ་ཁྱབ་པར་བྱ་བའི་ཆོས་ཀྱི་མཚན་ཉིད་གྲུབ་པ་ཡིན་ནོ། །དེ་བས་ན་དེའི་ཆས་ཁྱབ་པའི་ཚིག་གིས་གང་གི་ཕྱིར་རྗེས་སུ་འགྲོ་བ་དང་ལྡོག་པ་བཤད་པའི་ཕྱིར་རོ། །དེ་ལྟར་དེའི་ཕྱིར་རྗེས་སུ་འགྲོ་བ་དང་ལྡོག་པ་དག་བདག་ཉིད་ཇི་ལྟ་བའི་ཚད་མས་ངེས་པ་དག་གིས་དེའི་ཆས་ཁྱབ་པ་ངེས་པ་ཡིན་ནོ། །ཇི་སྐད་བཤད་པའི་བདག་ཉིད་ཇི་ལྟ་བའི་ཚད་མས་རྗེས་སུ་འགྲོ་བ་དང་ལྡོག་པ་དང་ཕྱོགས་ཆོས་ངེས་པ་བཤད་པའི་ཕྱིར་རོ། །དེ་ལ་ཚད་མ་གང་དང་གང་གིས་ངེས་པ་དེ་བསྟན་པའི་ཕྱིར་དེ་ལ་ཞེས་བྱ་བ་ལ་སོགས་པ་སྨོས་ཏེ། དེ་ལ་ཕྱོགས་ཀྱི་ཆོས་ལ་སོགས་པ་དེ་རྣམས་ལའོ། །ཕྱོགས་ཀྱི་ཆོས་ངེས་པའི་སྐབས་ཕྱིས་བསྟན་དུ་ཟིན་ཀྱང་མདོའི་རིམ་པས་ཐོག་མར་བརྗོད་བས་ཕྱོགས་ཀྱི་ཆོས་ངེས་པ་ཞེས་བྱ་བར་སྦྱར་རོ། །རབ་ཏུ་གྲུབ་པ་འདི་ཅི་ཞིག་ཡིན་ཞེ་ན་རྟོགས་པའོ། །གང་ལ་ཞེ་ན། བསྒྲུབ་པར་བྱ་བའི་ཆོས་ཅན་ལའོ། །གང་གིས་ཤེ་ན། མངོན་སུམ་དང་རྗེས་སུ་དཔག་པའི་སྒོ་ནས་སོ། །ཕྱོགས་ཀྱི་ཆོས་ཐམས་ཅད་མངོན་སུམ་དང་རྗེས་སུ་དཔག་པས་ངེས་པ་ནི་མ་ཡིན་ཏེ། འོན་ཀྱང་འགའ་ཞིག་ལ་ཁ་ཅིག་གིས་ཡིན་ནོ་ཞེས་བསྟན་པའི་ཕྱིར་འམ་གྱི་སྒྲ་སྨོས་པ་ཡིན་ནོ། །མངོན་སུམ་གྱིས་ཀྱང་རང་ཉིད་ཀྱི་རང་གི་མཚན་ཉིད་ཀྱི་རྣམ་པ་ཉིད་ཡིན་དུ་ཟིན་ཀྱང་དེ་མ་ཐག་ཏུ་སྤྱིར་རྟོག་པའི་རྣམ་པ་སྐྱེད་པའི་ཕྱིར་རབ་ཏུ་གྲུབ་པ་ལ་ཉེ་བར་བརྟགས་ནས་ངེས་པར་བརྗོད་དོ། །མངོན་སུམ་གྱི་རྗེས་ལས་བྱུང་བའི་རྣམ་པར་རྟོག་པ་ལ་མ་གཏོགས་པ་རྟོགས་པ་མེད་དོ་ཞེས་བསྟན་ཏོ། །དེས་ན་གལ་ཏེ་སྤྱིའི་ངོ་
པོའི་རྟགས་རྣམ་པར་འཇོག་པ་དེ་ལྟ་ན་ཡང་རང་གི་མཚན་ཉིད་རྟོགས་པ་ཁོ་ན་དེ་རྣམ་པར་འཇོག་པའི་རྒྱུ་མཚན་ཡིན་པའི་ཕྱིར་ཕྱོགས་ཀྱི་ཆོས་མངོན་སུམ་ཡིན་པར་བསྒྲུབ་པར་བྱ་བའི་ཆོས་ཅན་རབ་ཏུ་གྲུབ་པ་ཞེས་བརྗོད་དོ། །འདི་ཡང་དེ་མ་ཐག་ཁོ་ནར་གསལ་བར་བྱེད་བར་འགྱུར་རོ། །ཡང་ན་རྗེས་སུ་དཔག་པར་བསྒྲུབ་པར་བྱ་བའི་ཆོས་ཅན་ལ་ཕྱོགས་ཀྱི་ཆོས་རབ་ཏུ་གྲུབ་པར་ངེས་པ་དང༌། ཚད་མ་དང་འབྲས་བུ་ཐ་དད་ནི་རྗེས་སུ་དཔག་པ་དང་རྗེས་སུ་དཔག་པས་ངེས་སོ། །འདིར་དཔེ་ནི་རིམ་པ་ཇི་ལྟ་བ་བཞིན་དུ་དཔེར་ནས་ཕྱོགས་ལ་དུ་བ་ཞེས་བྱ་བ་སྨོས་སོ་གང་ཞིག་དུ་བའི་སྤྱི་མངོན་སུམ་གྱིས་ངེས་སོ་སྙམ་དུ་སེམས་ནས་ས་ཕྱོགས་དང་འབྲེལ་པའི་མེ་མངོན་སུམ་མ་ཡིན་ལ། གང་ཡང་མངོན་སུམ་ལ་ནམ་མཁའི་ཆའི་ངོ་བོ་སྣང་བ་ལ་སོགས་པ་དུ་བའི་བདག་ཉིད་དང་ལྡན་པར་མཐོང་བ་འདི་མེ་དང་ལྡན་པར་མཐོང་བ་ནི་མེད་པ་དེའི་ཕྱིར་ཇི་ལྟར་ས་ཕྱོགས་ཀྱི་དུ་བ་མངོན་སུམ་ལ་རབ་ཏུ་གྲུབ་པ་ཡིན་ན། དེའི་ཕྱིར་དུ་བ་ཁོ་ན་ཆོས་ཅན་དུ་རིགས་ཏེ། དུ་བ་འདི་མེ་དང་བཅས་པ་ཡིན་ཏེ། དུ་བ་ཡིན་པའི་ཕྱིར་ཞེས་བསྒྲུབ་པར་བྱ་བ་ཡིན་ནོ་ཞེ་ན། མེ་དང་བཅས་པའི་དུ་བའི་ཆ་ཤས་ཡོངས་སུ་སྣང་ན་སྟེང་དུ་གནས་པའི་ཆ་མེ་དང་ལྷན་ཅིག་ཏུ་ཡོད་པ་མ་ཡིན་ཏེ། མངོན་སུམ་མ་ཡིན་པའི་ཕྱིར་ཇི་ལྟར་དུ་བའི་སྤྱིའི་ཆོས་ཅན་མངོན་སུམ་མ་ཡིན། གལ་ཏེ་དུ་བའི་ཡན་ལག་མངོན་སུམ་དུ་གྲུབ་པ་ཡིན་ནོ་ཞེ་ན། ཡན་ལག་ལས་ཐ་དད་པ་མེད་པའི་ཕྱིར་འཇིག་རྟེན་པ་གཅིག་ཏུ་མངོན་པར་ཞེན་པའམ། ས་ཕྱོགས་ཀྱང་དེ་ཙམ་དུ་གཅིག་ཏུ་བརྟགས་པ་གསལ་བར་མི་ནུས་སོ། །ས་ཕྱོགས་ཉིད་ལ་ཡང་མེ་བསྟན་པར་བྱ་བ་ཡིན་གྱི་དུ་བ་ནི་མ་ཡིན་ནོ། །འབྲས་བུའི་གཏན་ཚིགས་ཡུལ་དང་དུས་ལ་སོགས་པ་ལ་ལྟོས་ནས་གོ་བར་བྱེད་པ་ནི་གང༌། འགལ་འབྲས་ལ་ཡང་ཡུལ་དང་ནི། །དུས་ལ་སོགས་པ་ལྟོས་པར་འདོད། །གཞན་དུ་འཁྲུལ་འགྱུར་མི་གྲང་བ། །སྒྲུབ་པ་ལ་ནི་ཐལ་བ་བཞིན། །ཞེས་བྱ་བ་སྨོས་ཏེ། དེའི་ཕྱིར་ཡུལ་ལ་སོགས་པ་ལ་ལྟོས་པ་མེ་སྒྲུབ་པར་བྱེད་པའི་དུ་བ་དང་ལྡན་པའི་ས་ཕྱོགས་ཆོས་ཅན་དུ་བཟུང་ན་འགལ་བ་མེད་དོ། །དཔེར་ན་ཆུ་སྐྱར་དང་ལྡན་པའི་ཤིང་ལ་སོགས་པ་ཡུལ་ལ་སོགས་པ་ལ་ལྟོས་ནས་ཆུ་སྒྲུབ་པར་བྱེད་པའམ། །སྒྲ་ལ་བྱས་པ་ནི་རྐྱེན་ཐ་དད་པས་ཐ་དད་པའི་ཕྱིར་ཞེས་བྱ་བ་ལ་སོགས་བ་རྗེས་སུ་
དཔོག་པ་བཞིན་ནོ། །འདིར་ཇི་ལྟར་མངོན་པར་བརྗོད་པའི་མངོན་སུམ་གྱིས་བསྒྲུབ་པར་བྱ་བའི་ཆོས་ཅན་ཕྱོགས་ཀྱི་ཆོས་སུ་རབ་ཏུ་གྲུབ་པ་དགོས་པ་མ་རྟོགས་ནས་གཞོན་ནུ་མ་ལེན་གྱིས་ཇི་ལྟར་སྤྱིའི་བདག་ཉིད་དུ་བ་ལ་སོགས་པའི་རྟགས་མངོན་སུམ་དུ་རྟོགས་པ་མེད་པ་ལས་ཡིན། རང་གི་ངོ་བོ་འཛིན་པ་འམ་ཆོས་ཅན་ལ་ཡང་དེ་ཙམ་ཞིག་ཉེ་བར་སྦྱོར་བ་ན་འདི་དག་གི་འབྲེལ་པ་གང་གིས་འཛིན་པ་ཡིན་སྙམ་ནས་སླར་རྩོད་པ་ནི་དེས་ན་མངོན་སུམ་སྔོན་དུ་སོང་བ་དང་རྗེས་སུ་དང་ག་བ་ལ་སོགས་པའི་ཆོས་ཀྱི་རྒྱུ་མཚན་ཡིན་ནོ་ཞེས་རྣམ་བཤད་བྱེད་པས། མངོན་སུམ་སྔོན་དུ་འགྲོ་ཉིད་ཀྱིས། །རྗེས་དཔག་ལ་སོགས་ཇི་ལྟར་འགྱུར། །གལ་ཏེ་རྟོགས་མེད་དབང་པོའི་བློ། །དྲན་པ་ལ་ནི་མི་སྟོས་ན། །རྟགས་དང་ཆོས་ཅན་འབྲེལ་པ་དག །དེ་ལྟར་རྟོགས་པ་མེད་པས་ཀྱང༌། །མི་འཛིན་ཅེས་བྱ་བ་ལ་རྟགས་ལ་སོགས་པ་མངོན་སུམ་གྱིས་འཛིན་པ་སྤངས་པ་ཡིན་ན་རྣམ་པར་རྟོག་པ་མེད་པའི་ཕྱིར། རྣམ་རྟོག་དེ་ལ་དོན་དངོས་ཀྱིས། །ཕན་འདོགས་པར་ནི་མི་འདོད་ཕྱིར། །སྔ་མ་ལྟ་བའི་ཤེས་པ་ནི། །དང་པོར་རྣམ་རྟོག་མེད་པར་ཡོད། །བྱིས་པ་ལྐུགས་སོགས་ཤེས་པ་དང༌། །འདྲ་བ་ཉི་ཚེའི་དངོས་ལས་སྐྱེས། །དེ་ལས་གཞན་ཡང་དངོས་ཆོས་ནས། །རིགས་ལ་སོགས་པ་གང་གང་གི །ངེས་པར་བྱེད་པའི་བློ་དེ་ཡང༌། །མངོན་སུམ་ཉིད་དུ་འདོད་པ་ཡིན། །ཞེས་སྨྲས་ན། བདེ་བར་གཤེགས་པ་ཁོ་ན་ལ་འདིར་རྟགས་དག་དང་ཆོས་ཅན་གྱི་འབྲེལ་པ་འཛིན་པའི་མཚན་ཉིད་རྣམ་པར་རྟོག་པ་མེད་པའི་མངོན་སུམ་འདི་དག་སྐྱོན་ཡིན་གྱི། ཁོ་བོ་ཅག་རྟོག་པ་དང་བཅས་པའི་མངོན་སུམ་འདོད་པ་ལ་བཤད་པ་ལྟར་མི་འགྱུར་སྙམ་ན། དེའི་ཕྱིར། དེ་ཡིས་སྐྱོན་བརྗོད་པ་བསལ་བའི་ཕྱིར་དུ་བ་དང་བཅས་པའི་ཕྱོགས་ཞེས་བྱ་བ་ལ་སོགས་པ་སྨོས་ཏེ། དེའི་འདིར་བསྡུས་པའི་དོན་ནི་འདི་ཡིན་ཏེ། མངོན་སུམ་ནི་མདུན་ན་གནས་པའི་རྟེན་དང་བརྟེན་པ་དུ་བ་དང་ས་ཕྱོགས་ལ་སོགས་པ་བསྒྲུབ་པའི་ངོ་བོས་དུ་བ་ལ་སོགས་པ་རིགས་མཐུན་པ་དང་རིགས་མི་མཐུན་པ་ལས་ལྡོག་པ་ནི་རང་རང་གི་ངོ་བོ་ལ་རྣམ་པར་གནས་པས་ཐམས་ཅད་ཀྱི་ནུས་པ་རྣམས་ཕན་ཚུན་མ་འདྲེས་པའི་ངོ་བོ་ཡིན་པའི་ཕྱིར། དེའི་ནུས་པ་ལས་འབྱུང་བའི་ཇི་ལྟར་
གནས་པའི་རྗེས་སུ་བྱེད་པ་ལས་ཕྱིས་དགག་པ་དང་སྒྲུབ་པའི་རྣམ་པར་རྟོག་པ་གཉིས་སྐྱེ་བར་འགྱུར་རོ། །གང་གིས་ས་ཕྱོགས་ཀྱི་དུ་བ་ཆོས་དང་ཆོས་ཅན་དུ་གྲགས་པ་དེ་ཡང་རྟེན་དང་བརྟེན་པ་བཞིན་དུ་འདིར་ཡིན་གྱི་གཞན་དུ་ནི་མ་ཡིན་ནོ་ཞེས་བརྟག་པ་སྟེ། ཇི་ལྟར་ཉམས་སུ་མྱོང་བ་གོམས་པ་བསལ་བ་དང༌། ལྷན་ཅིག་བྱེད་པའི་རྐྱེན་གཞན་གྱིས་རྣམ་པར་རྟོག་པ་སྐྱེའོ། །དེའི་ཕྱིར། ཆོས་དང་ཆོས་ཅན་གྱི་ངོ་བོ་ངེས་བ་དང་འབྲེལ་པ། ངེས་པ་མངོན་སུམ་གྱི་རྒྱུ་མཚན་གྱིས་འགྲུབ་པར་འགྱུར་རོ། །དེ་ལྟ་ན་དུ་བ་དེ་ཉིད་ཕྱོགས་ལ་འབྲེལ་པར་ངེས་པ་ནི་གང་འདི་ལ་འདིའོ་ཞེས་ངེས་པར་བྱེད་པ་དང༌། དེ་ནི་རྣམ་པར་རྟོག་པས་ཀྱང་མངོན་སུམ་གྱིས་ཇི་སྐད་དུ་བཤད་པའི་རྣམ་པ་གྲུབ་པ་ཁོ་ན་ཡིན་ཏེ། རྟེན་དང་བརྟེན་པའི་རྣམ་པར་གནས་པ་མེད་པའི་ཕྱིར་རོ། །དངོས་པོ་རྣམ་པ་གཉིས་ལས་གཞན་ཁོ་ན་རྟེན་དང་བརྟེན་པའི་མཚན་ཉིད་འགའ་ཞིག་གི་འབྲེལ་པ་གང་ཡིན་པ་དེ་ནི་མེད་དོ། །མངོན་སུམ་གྱིས་ཉམས་སུ་མྱོང་བ་ལས་ཕྱི་ནས་རྣམ་པར་འགྱུར་ཏེ། དངོས་པོ་ལས་གྱུར་པ་དེ་བཞིན་དུ་བཀག་པའི་ཕྱིར་རོ། །དེའི་ཕྱིར་དེ་ཉིད་དེ་བཞིན་དུ་གནས་པ་དོན་གཉིས་ལ་བརྟེན་ནས་རྣམ་པར་རྟོག་པ་དཱི་སྒྲོ་འདོགས་པ་ཁོ་ན་སྟེ། དེ་ནི་འབྲེལ་པ་དང་འབྲེལ་པ་ཅན་དང་ཐ་དད་པ་ཁྱབ་པར་གཞན་སྤོང་བ་དང་མི་སྤོང་བ་དག་གིས་འཇིག་རྟེན་ན་ཆོས་ཅན་གྱི་ཐ་སྙད་དུ་བྱེད་ཀྱི་དོན་དམ་པར་མ་ཡིན་ནོ། །སྤྱིའི་ཐ་སྙད་ཀྱང་རིགས་མི་མཐུན་པའི་ལྡོག་པ་དངོས་པོ་ལ་མི་བརྟེན་པ་ནི་མ་ཡིན་པར་རྒྱ་ཆེར་བྱས་སོ། །དེ་དག་ཉིད་ཐ་དད་ཀྱང་ཉམས་སུ་མྱོང་བའི་སྒོ་ནས་རིགས་མི་མཐུན་པ་ལས་ལྡོག་པས་དབེན་པའི་ངོ་བོ་ཅན་ནི་གཅིག་ཏུ་ངེས་པའི་ཤེས་པའི་རྒྱུ་ཡིན་པའི་ཕྱིར་རོ། །དེ་སྐད་དུ་ཡང༌། གཅིག་རྟོགས་དོན་ཤེས་ལ་སོགས་པ། །དོན་གཅིག་སྒྲུབ་ལ་ཁ་ཅིག་ནི། །ཐ་དད་ཡིན་ཡང་རང་བཞིན་གྱིས། །ངེས་ཏེ་དབང་པོ་ལ་སོགས་བཞིན། །ཞེས་བྱ་བ་གསུངས་སོ། །དེས་ན་སྤྱིའི་རྣམ་པར་རྟོག་པའི་དྲན་པ་ཁོ་ན་བཟང་བ་ལ་འཛིན་པ་ཡིན་ལ། དེར་སྣང་བའི་དུ་བའི་རྣམ་པ་དང་རིགས་མི་མཐུན་པ་ལས་ལྡོག་པ་ནི་མངོན་སུམ་ཁོ་ནས་འཛིན་པའི་ཕྱིར་རོ། །རིགས་མི་མཐུན་པ་ལས་ལྡོག་པ་ནི་ལོག་པ་ལས་གཞན་མ་ཡིན་ཏེ། གང་འགའ་ཞིག་མངོན་སུམ་གྱིས་མི་འཛིན་པར་འགྱུར་རོ། །དེའི་ཕྱིར་
ཇི་ལྟར་མཐོང་བའི་དུ་བ་ལ་སོགས་པ་རང་གི་མཚན་ཉིད་གཞན་ལས་ལྡོག་པ་ནི་བདག་གིས་བརྟགས་པ་ཡིན་ནོ་ཞེས་རྟོགས་པར་བྱེད་པ་པོ་ཡང་ངེས་པའི་དབང་གིས་དྲན་པ་ཉིད་ཀྱི་རྣམ་པར་རྟོག་པ་ཡང་རྣམ་པ་གཉིས་ཏེ། །མངོན་སུམ་གྱི་སྟོབས་ལས་བྱུང་བ་ཉིད་ནི་དངོས་པོའི་ཡུལ་མེད་པ་ཡང་ཡིན་ནོ། །དེའི་ཕྱིར་གང༌། སྤྱི་ནི་ཉམས་མྱོང་མེད་པས་ན། །དྲན་དང་རྣམ་པར་ཤེས་པ་འདི། །ཐ་དད་མེད་པར་གང་བརྗོད་ན། །ངེས་པར་དྲན་པའི་ནུས་པ་ཡིས། །མོ་གཤམ་བུ་ཡང་ཡོད་པར་འགྱུར། །ཞེས་བྱ་བ་བཤད་པ་དེ་དག་ཀྱང་གསལ་བ་ཡིན་ནོ། །ཡང་ན་གཞོན་ནུ་མ་ལེན་གྱིས་སྨྲས་པ་མངོན་སུམ་གྱི་ཡུལ་ནི་རང་གི་མཚན་ཉིད་ཡིན་ལ་རྗེས་སུ་དཔག་པའི་ཡུལ་ནི་སྤྱིའི་མཚན་ཉིད་ཡིན་ནོ་ཞེས་བརྗོད་པས་དུ་བ་ལ་སོགས་པའི་སྤྱི་ནི་རྗེས་སུ་དཔག་པའི་གཟུང་བ་ཁོ་ན་སྟེ། །དེ་ལ་རྟགས་འཛིན་པ་ཡང་ཐུག་པ་མེད་པར་འགྱུར་ཏེ་རྗེས་སུ་དཔག་པ་དེ་ནི་གཞན་གྱི་སྟོབས་ཀྱིས་སྐྱེ་ལ་དེ་ཡང་སྤྱིའི་ངོ་བོ་སྟེ། དེ་རྗེས་སུ་དཔག་པ་གཞན་གྱི་ཡུལ་ཅན་ཡིན་པའི་ཕྱིར་རོ། །དེ་བཞིན་དུ་གཞན་དེ་ཡང་འགའ་ཞིག་གི་རྟགས་གཅིག་ཀྱང་དུས་སྟོང་ཕྲག་གིས་ཀྱང་རྟོགས་པར་བྱེད་པ་མེད་ན་ཀྱེ་མ་ཅི་སྐྱེས་བུའི་ཚེ་ཐུང་དུ་ཡིས་ཡིན་ནམ། དེ་སྐད་དུ། །རྗེས་སུ་དཔག་པ་མེད་ན་ནི། །གང་གི་སྤྱི་རྟོགས་མེད་པ་དང༌། །རྟགས་ནི་རྣམ་པར་བསལ་བ་ན། །རྗེས་སུ་དཔག་བ་འཇུག་པ་མེད། །སྤྱི་མ་ཡིན་པའི་རྟགས་ཀྱང་ནི། །འགའ་ཞིག་ཀྱང་ནི་མི་འདོད་ན། །རྟགས་ནི་རྟོགས་པ་མེད་པ་ཡི། །ཅུང་ཟད་ཡོད་པར་བསྟན་དུ་མེད། །དེ་ཡང་རྗེས་སུ་དཔག་པ་ནི། །གཞན་གྱིས་རྟོགས་པར་འགྱུར་ན་སླར། །དེ་ལས་བྱུང་བའི་རྟགས་ལས་ནི། །སྤྱི་ཤེས་པ་དང་འབྲེལ་པ་ལས། །དེའི་ཡང་རྗེས་སུ་དཔག་པ་ཉིད། །རྟགས་ལས་ཀྱང་ནི་ཡང་དག་བྱུང༌། །རྗེས་སུ་དཔག་པ་གཞན་ཉིད་ཀྱི། །དེ་བཞིན་ཤེས་པར་བརྟག་ན་ནི། །རྟགས་དང་རྟགས་ཅན་རྗེས་དཔག་དག །མཐའ་ཡས་ཕྱིར་ན་རྟགས་གཅིག་ལ། །དུས་མི་སྟོང་ཕྲག་མང་པོས་ཀྱང༌། །རྟོགས་པར་བྱེད་པ་ཡོད་མ་ཡིན། །ཅེས་དོགས་པ་ལ་དུ་བ་དང་བཅས་པའི་ཕྱོགས་ཞེས་བ་ལ་སོགས་པ་སྨོས་པ་ནི་འདི་སྙམ་དུ་དགོས་པ་ཡིན་ཏེ། རྗེས་སུ་དཔག་པ་ལས་གཞན་གང་གིས་སྤྱི་རྟོགས་པ་མེད་ན་ནི་ཁྱོད་ཟེར་བའི་སྐྱོན་
འདིར་འགྱུར་ན། ཁོ་བོ་ཅག་མངོན་སུམ་གྱི་རྗེས་ལས་བྱུང་བའི་རྣམ་པར་རྟོག་པས་ཀྱང་རང་བཞིན་གྱིས་འཁྲུལ་པས་སྤྱི་རྟོགས་ཏེ། དཔེར་ན་ནོར་བུའི་འོད་ལས་ནོར་བུ་འཁྲུལ་པ་བཞིན་དུ་རྟགས་ཀྱི་རྣམ་པར་རྟོག་པ་རང་གི་མཚན་ཉིད་ལ་རྟེན་པའི་ཕྱིར་བརྒྱུད་པས་དངོས་པོ་དང་འབྲེལ་པས་མི་སླུ་བ་ཡིན་ནོ། །འབྲས་བུའི་གཏན་ཚིགས་ཉིད་ཀྱང་རྣམ་པར་རྟོག་པ་ལ་སྣང་བའི་དུ་བའི་སྤྱི་རྟགས་སུ་འཇོག་པ་ནི་དུ་བ་མཐོང་བ་ལ་བརྟེན་ནས་དེར་ངེས་པ་ཡིན་ནོ། །དུ་བའི་རང་གི་མཚན་ཉིད་ཀྱི་དུ་བ་ནི་རྟགས་སུ་གཞག་པར་རིགས་པ་མ་ཡིན་ནོ། །དེ་ཐུན་མོང་མ་ཡིན་པ་མཐུན་པའི་ཕྱོགས་ལ་འཇུག་པ་མེད་པའི་ཕྱིར་དེའི་ཆས་ཁྱབ་པ་མི་རིགས་སོ། །བསྒྲུབ་བྱ་སྒྲུབ་བྱེད་བརྟགས་པ་ལ། དངོས་པོ་མཐོང་བ་མེད་པའི་ཕྱིར། །ཞེས་པ་དང༌། སྤྱིའི་མཚན་ཉིད་ནི་རྗེས་སུ་དཔག་པའི་ཡུལ་ཡིན་ནོ་ཞེས་བྱ་བ་ཡང་གང་གསུངས་པ་ན། དེ་ལ་སྤྱིའི་མཚན་ཉིད་ནི་རྗེས་སུ་དཔག་པ་ཁོ་ནའི་ཡུལ་ཡིན་ནོ་ཞེས་ངེས་པར་གཟུང་བར་མི་བྱ་སྟེ། མངོན་སུམ་གྱི་རྗེས་ལས་བྱུང་བའི་རྣམ་པར་རྟོག་པ་དང༌། དེ་ནི་རྣམ་པར་རྟོག་པ་གཞན་གྱི་འང་ཡུལ་ཡིན་པའི་ཕྱིར་རོ། །འོན་ཀྱང་སྤྱིའི་མཚན་ཉིད་ཁོ་ན་རྗེས་སུ་དཔག་པའི་ཡུལ་ཡིན་ནོ་ཞེ་ན། ངེས་པར་གཟུང་བས་རང་གི་མཚན་ཉིད་ཡུལ་ཡིན་པ་དགག་པའི་ཕྱིར་རོ། །དེ་ལ་དུ་བ་དང་ལྷན་ཅིག་ཏུ་གནས་པ་ནི་དུ་བ་དང་བཅས་པའི་ཞེས་བྱ་བས་ཕྱོགས་ཀྱི་ཆོས་ཀྱི་དོན་བསྟན་པ་ཉིད་རིགས་པ་དང༌། སྒྲུབ་པའི་རྣམ་པར་རྟོག་པ་འདིའི་ས་བོན་དུ་བ་དང་བཅས་པ་མཐོང་བ་དང་ལྡན་པ་མངོན་སུམ་གྱིས་ཞེས་བྱ་བར་འབྲེལ་ཏོ། །ཅི་འདྲ་བ་ཞེ་ན། དོན་གཞན་གྱིས་དབེན་པའི་ངོ་བོའོ། །དོན་གཞན་ནི་རིགས་མཐུན་པ་དང༌། རིགས་མི་མཐུན་པའོ། །དབེན་པ་ནི་མ་འབྲེལ་པའོ་ཞེས་འདིར་རྣམ་པར་སྦྱར་རོ། །དངོས་པོ་ཐམས་ཅད་རང་རང་གི་ངོ་བོ་ལ་རྣམ་པར་གནས་པ་ཡིན་ཏེ། རང་གི་ངོ་བོ་ལ་འདྲེ་བ་མི་སྲིད་པའི་ཕྱིར་རོ། །དེ་ལྟ་མ་ཡིན་ན་ཐམས་ཅད་ཐམས་ཅད་ལ་ཉེ་བར་སྦྱོར་བར་ཐལ་བར་འགྱུར་རོ།། འདིས་ནི་དགག་པའི་རྣམ་པར་རྟོག་པའི་རྒྱུ་མཚན་བཤད་པ་དང་སྤྱིར་ཉེ་བར་རྟོགས་པའི་ས་བོན་ཡིན་ཏེ། དེ་སྐད་དུ། །མིང་དོན་གང་ལྡན་ཕན་ཚུན་དུ། །ཐ་དད་པ་འདི་ས་བོན་ཡིན། །ཅེས་བཤད་དོ། །འདི་ལྟར་དོན་གཞན་ལས་ལྡོག་པ་ནི་ཕན་ཚུན་ཐ་དད་ཀྱང་སྤྱིར་ཉེ་བར་མཐོང་བས་དེ་དག་ཐ་དད་པའི་ངོ་བོ་
མི་མངོན་བ་ལ་ཐ་མི་དད་པའི་རང་བཞིན་དུ་སྒྲོ་བཏགས་ནས་རྣམ་པར་རྟོག་པ་སྐྱེའོ། །ཐུན་མོང་མ་ཡིན་པའི་བདག་ཉིད་ཅེས་བྱ་བ་ནི་དོན་གཞན་ལས་ཐ་དད་པའི་ངོ་བོ་སྟེ། ཇི་ལྟར་གཞོན་ནུ་མ་ལེན་གྱིས་དོན་གཞན་གྱིས་དབེན་པའི་ངོ་བོ་དངོས་པོ་མེད་པའི་ཚད་མས་བཟུང་བ་ཡིན་གྱི་མངོན་སུམ་གྱི་ངེས་པ་ནི་མ་ཡིན་ནོ་སྙམ་དུ་བསམ་པ་ལྟར་མ་ཡིན་ཏེ། དངོས་པོའི་ནུས་པ་ལས་བྱུང་བའི་མངོན་སུམ་ལས་གཞན་དུ་མཐོང་བ་ནི་མི་སྲིད་དེ་འཁྲུལ་བ་ཐལ་བར་འགྱུར་བའི་ཕྱིར་རོ། །དེ་ན་བདག་ཉིད་མཐོང་བ་དང་ལྡན་པར་གྱུར་པའི་སྐྱེས་བུ་ལ་དེ་མ་ཐག་ཏུ་དྲན་པ་རྟགས་ཤེས་པ་སྐྱེའོ་ཞེས་བྱ་བར་འབྲེལ་ཏོ། །དྲན་པ་ནི་དྲན་པའོ། །རྟགས་སྣང་བའི་ཤེས་པ་ནི་རྟགས་ཤེས་པའོ། །འདི་མངོན་སུམ་གྱི་རྗེས་ལ་བྱུང་བའི་རྟོགས་པ་ལ་སྤྱི་སྣང་བས་ངེས་རྟགས་རྣམ་པར་འཇོག་གོ །དོན་དམ་པ་ཡུལ་ཅི་ཞིག་ཡིན་ཞེ་ན། འདི་ལྟར་མཐོང་བ་ཐ་དད་པའི་ཡུལ་ཅན་ཞེས་བྱ་བ་སྨོས་སོ། །གང་དང་གང་དུ་བ་ལ་སོགས་པ་མཐོང་བ་ནི་ཇི་ལྟར་མཐོང་བའོ། །དེ་ཐ་དད་པ་ནི་དོན་དམ་པར་དེ་གཞན་ལས་ལྡོག་པའི་ཡུལ་ཅན་གྱི་རྟགས་ཤེས་པ་གང་དགག་པ་དང་སྒྲུབ་པའི་བདག་ཉིད་དོ། །དེ་ནི་དེ་སྐད་དུ། ངེས་པའི་ཤེས་པ་རྣམས་ནི་སྒྲོ་འདོགས་པ་རྣམ་པར་གཅོད་པའི་འབྲས་བུ་ཅན་ཡུལ་མེད་ཀྱང་དེའི་ཡུལ་དུ་བརྗོད་དོ་ཞེས་གསུངས་སོ། །རྟོགས་པར་བྱེད་པ་པོས་ངེས་པའི་དོན་ནི་ཇི་ལྟར་མཐོང་བ་ཐ་དད་པ་དེའི་ཡུལ་ཅན་ཡིན་པ་དེའི་ཕྱིར་དྲན་པའི་ངོ་བོ་དོན་དམ་པ་མ་ཡིན་ནོ། །རྣམ་པར་རྟོག་པས་ཇི་ལྟར་མཐོང་བའི་དངོས་པོ་ལས་གྱུར་པ་ཐ་དད་པ་ལ་རེག་པ་མེད་པའི་ཕྱིར་རོ། །འོ་ན་ནི་ཁྱེད་དེ་ལྟར་བརྗོད་པ་ན་ཁོ་བོ་ཅག་གི་འདོད་པའི་རྗེས་སུ་འབྲངས་པ་ཁོ་ན་སྟེ། རང་དང་གཞན་གྱི་ངོ་བོ་ཡོད་པ་དང་མེད་པ་དག་གི་བདག་ཉིད་ཁོ་ནའི་དངོས་པོ་མཐོང་བ་ནི་དགག་པ་སྒྲུབ་པའི་རྟོགས་པ་ཁས་བླངས་པའི་ཕྱིར་དང་མཐོང་བའི་ལྟ་བའི་ཤེས་པའི་མིང་ཡིན་ནོ། །ཁོ་བོ་ཅག་མངོན་སུམ་སྒྲུབ་པའི་རྣམ་པར་རྟོག་པ་ལ་ཁྱེད་ཀྱང་མངོན་སུམ་གྱི་ཚད་མ་ཉིད་དེར་སྣང་བར་བརྗོད་དོ། །ཐམས་ཅད་རིགས་མཐུན་པའི་རྗེས་སུ་འགྲོ་བའི་སྤྱིའི་ངོ་བོ་མཐོང་བས་མ་རྟོགས་པ་རྟོགས་པ་ཡིན་པའི་ཕྱིར་རོ། །དེ་ནི་སྔར་མེད་དོན་ཤེས་པ། །ངེས་པ་གནོད་པ་སྤངས་པ་དང༌། །མ་ཉམས་རྒྱུ་ལས་བྱུང་བ་ནི། །ཚད་མར་འཇིག་རྟེན་ཡང་དག་འདོད། །ཅེས་བྱ་བའི་ཚད་མའི་མཚན་
ཉིད་དང་ལྡན་པ་དང་ཡོད་པའི་དོན་དང་འབྲེལ་པར་གྱུར་པ་དང་དབང་པོ་རྣམས་ཡོད་པའོ། །དགག་པའི་རྣམ་པར་རྟོག་པ་ཡང་མེད་པའི་ཚད་མའི་འབྲས་བུ་དངོས་པོ་མེད་པར་བཤད་པ་ནི་ཚད་མ་གཞན་གྱི་ཡིན་ནོ། །དངོས་པོའི་ཡུལ་ཅན་གྱི་རྣམ་པར་ཤེས་པ་མངོན་སུམ་ལ་སོགས་པ་དེས་ནི་མེད་པའི་ཆ་མ་ཡིན་ལ་དངོས་པོ་ཉིད་རྟོགས་པ་ཡིན་ཏེ། དེ་ནི་ཡོད་པའི་ཆའི་ཡུལ་ཅན་ཡིན་པའི་ཕྱིར་རོ། །དེའི་ཕྱིར་དགག་པའི་རྣམ་པར་རྟོག་པ་སྐྱེད་པར་བྱེད་པ་ཉིད་ཀྱིས་དེ་དངོས་པོ་མེད་པའི་ཚད་མར་བཤད་དོ། །ཇི་ལྟར་གཟུགས་ལ་སོགས་པ་ཤེས་པ་བསྐྱེད་པ་ཉིད་ཀྱི་དབང་པོའི་མངོན་སུམ་ཞེས་བྱའོ། །དེ་ལ་དེ་ལྟ་བུ་ཉིད་འབའ་ཞིག་ནི་དྲན་པའི་རྟགས་ཤེས་པ་ཞེས་བྱ་བ་མི་རིགས་ཏེ། སྒྲུབ་པའི་རྣམ་པར་རྟོག་པ་ནི་སྤྱི་མ་བཟུང་བས་དྲན་པ་ཉིད་སྲིད་པའི་ཕྱིར་རོ། །དགག་པའི་རྣམ་པར་རྟོག་པ་ལ་ཡང་རྟགས་ཤེས་པ་མི་འདོད་དོ། །འདི་ག་ལས་ཤེ་ན་དྲན་པ་ཉིད་དེས་སྤྱི་བཟུང་བ་ལ་འཛིན་པ་དང༌། མེད་པའི་ཆ་འཛིན་པ་ཡིན་ནོ་ཞེས་རྒྱལ་དཔོག་པ་རྣམས་ཀྱིས་བརྗོད་པའི་དོགས་པའི་གནས་སྐབས་མཐོང་ནས་དགག་པ་དང་སྒྲུབ་པའི་རྣམ་པར་རྟོག་པ་ཚད་མ་དང་ཚད་མ་མ་ཡིན་པ་དཔྱད་པ་རྩོམ་པ་ནི་དེ་ལ་དེ་རྣམས་མཐོང་བ་ལ་དགག་པ་དང་སྒྲུབ་པའི་རྣམ་པར་རྟོག་པ་རྣམས་ཀྱི་དང་པོ་གང་ཡིན་པ་འདི་ནི། སྔ་མར་ལྟ་བའི་ཤེས་པ་ནི། །ཐོག་མར་རྟོག་པ་མེད་པ་ཡོད། །ཅེས་བྱ་བ་ལ་སོགས་པ་རྣམ་པར་རྟོག་པ་མེད་པའི་རབ་ཏུ་འཇུག་པ་ཞེས་བྱ་བ་དང་པོར་བཤད་པ་ཡུལ་ཐུན་མོང་མ་ཡིན་པ་ནི་རང་གི་མཚན་ཉིད་ཀྱི་ཡུལ་བསྟན་པ་དེ་ཉིད་ཚད་མ་ཡིན་གྱི་དགག་པ་དང་སྒྲུབ་པའི་རྣམ་པར་རྟོག་པ་ཡང་མ་ཡིན་ཏེ་དེ་ཉིད་ལ་ཚད་མའི་མཚན་ཉིད་རིགས་པའི་ཕྱིར་དང་ཅིག་ཤོས་ལ་མི་སྲིད་པའི་ཕྱིར་རོ། །འདི་ལྟར་མ་རྟོགས་པའི་ཡུལ་ཅན་དང་དོན་བྱེད་པ་སྒྲུབ་པར་བྱེད་པའི་ཡུལ་ཅན་གྱི་ཚད་མའི་མཚན་ཉིད་བསྟན་པ་ཉིད་མཐོང་བ་ལ་ཡོད་པ་ཡིན་ཏེ། དེ་ལ་དང་པོ་ཞེས་བྱ་བ་ནི་སྔར་མེད་པའི་དོན་གྱི་རྣམ་པར་ཤེས་པ་བཤད་དོ། །ཡུལ་ཐུན་མོང་མ་ཡིན་པ་ཞེས་བྱ་བ་ནི་དོན་བྱེད་བ་སྒྲུབ་པའི་ཡུལ་ཉིད་དེ། རང་གི་མཚན་ཉིད་ཀྱིས་དོན་བྱེད་པ་སྒྲུབ་པར་ནུས་པའི་ཕྱིར་རོ། །དེ་ལ་རེ་ཞིག་དགག་པའི་རྣམ་པར་རྟོག་པ་ནི་མངོན་སུམ་གྱིས་བཟུང་བའི་དོན་གྱི་ཡུལ་གྱི་ས་དྲན་པ་བསྟན་པ་ཡིན་ཏེ། དེ་ལ་ཞེས་བྱ་བ་སྨོས་ཏེ། ཐུན་མོང་མ་ཡིན་བ་དེ་ལྟར་གྱུར་པ་དོན་གཞན་
དང་མ་འབྲེལ་པའི་ངོ་བོ་མཐོང་བས་མ་འདྲེས་པའི་ངོ་བོའི་ནུས་པ་ལས་བྱུང་བ་མཐོང་བ་རྟོགས་པར་གྱུར་པ་དེ་ལྟ་ན་ཡོད་པའི་ཆ་ལས་ཐ་དད་པ་མེད་པའི་ཆ་འདོད་པ་ཡང་ཡོད་པའི་ཆའི་རང་བཞིན་མ་འདྲེས་པའི་ངོ་བོའི་བརྟགས་པ་ན་གཞན་དུ་ནི་མེད་པའི་ཆ་དེ་ཉིད་མི་འགྲུབ་བོ། །རང་བཞིན་གྱིས་མ་འདྲེས་པའི་ངོ་བོ་མེད་ན་མེད་པའི་ཆ་ཡོད་པར་གྱུར་པ་ཡང་རིགས་པ་མ་ཡིན་ནོ། །འདྲེས་པའི་ངོ་བོ་ནི་རང་གི་རྒྱུའི་སྟོབས་ལས་འོངས་པ་ཅུང་ཟད་ཅིག་ཀྱང་བྱེད་པ་མེད་པའི་ཆས་སྲིད་ཀྱང་སྤང་བར་མི་རིགས་པའི་ཕྱིར་དང༌། དེ་ཉིད་ཀྱིས་ན་དེ་འཇིག་པ་ལ་འཇིག་པའི་རྒྱུ་མི་རིགས་སོ་ཞེས་འཆད་པར་འགྱུར་བའི་ཕྱིར་རོ། །ངེས་འདྲེས་པའི་ངོ་བོ་འཇིག་པ་ནི་རང་གི་རྒྱུ་ཁོ་ནའི་རང་བཞིན་མ་འདྲེས་པའི་ངོ་བོ་ལས་སྐྱེས་ན་མཛེས་ཀྱི། ཅི་དཀའ་ཐུབ་ཀྱི་ལ་ཏུ་བའི་རིགས་པ་ཁས་ལེན་པར་བྱེད་དམ། དེའི་ཕྱིར་རང་བཞིན་ཁོ་ན་ཡོད་པ་རྣམ་ལ་གཞན་པའི་ངོ་བོ་བརྟག་པའི་ཕྱིར་མེད་པའི་ཆ་ནི་བཞིན་མ་ཡིན་ནོ། །དེ་ཡང་དེ་ལྟར་མཐོང་ནས་འཛིན་པ་ཁོ་ནའོ། །དེའི་ཚེ་དེ་ལྟར་གྱུར་པ་དེའི་དོན་གང་དང་གང་གིས་ཐུན་མོང་མ་ཡིན་པར་མཐོང་བའི་དངོས་པོ་ནི་སྤྱིའི་ངོ་བོ་མ་ཡིན་ཏེ། དེའི་ངོ་བོ་མ་ཚང་བའི་རང་བཞིན་ཡིན་པའི་ཕྱིར་རོ། །དེ་ཐུན་མོང་མ་ཡིན་པ་དེ་དང་དེས་མ་ཡིན་པའི་ངོ་བོ་ནི་སྤྱིའི་རང་བཞིན་མ་ཡིན་པ་དེ་དག་ཉིད་གསལ་བར་བྱེད་དོ། །དེའི་ཕྱིར་དོན་གཞན་ལས་ཐ་དད་པ་མཚན་ཉིད་མི་མཐུན་པའི་དི་གཞན་གྱི་ངོ་བོ་མ་ཡིན་པའི་ཕྱིར་རོ། །མངོན་པར་བརྗོད་པ་ནི་མངོན་དུ་སྨྲས་པའོ། །མཚན་ཉིད་མི་མཐུན་པར་རབ་ཏུ་འཇུག་པར་མཐོང་བའི་མངོན་སུམ་གྱི་སྟོབས་ཀྱིས་དྲན་པ་སྐྱེས་པ་ཡིན་གྱི། གང་རྟགས་ཀྱི་སྟོབས་ཀྱིས་བསྐྱེད་པའི་རྣམ་པར་བཅད་པའི་ཡུལ་ལ་ཡང་དྲན་པ་ཡོད་པ་ནི་མ་ཡིན་པའི་ཕྱིར་རོ། །ཡུལ་ཅི་ཞིག་ཅེ་ན། དེ་མ་ཡིན་པ་ལ་ལྡོག་པའི་ཡུལ་ཅན་ནོ། །དེའི་སྒྲས་ནི་མཐོང་བའི་ཡུལ་གྱི་དངོས་པོ་ལ་སྙེགས་སོ། །དེ་མ་ཡིན་པ་ནི་རིགས་མི་མཐུན་པ་དེ་མ་ཡིན་པའོ། །དེ་ལས་ལྡོག་པ་ནི་དེ་མ་ཡིན་པ་ལས་ལྡོག་པའོ། །དེའི་ཡུལ་གང་ཡིན་པ་དེ་ནི་དེ་བཞིན་དུ་སྟེ། ཇི་ལྟར་མཐོང་བ་ཉིད་དོན་གཞན་དག་ལས་ཐ་དད་པར་བརྟགས་པ་ནི་རྟོགས་པར་བྱེད་པ་པོས་མངོན་པར་ཞེན་ནས་དེ་སྐད་བརྗོད་ཀྱི་དོན་དམ་པར་ཡུལ་མེད་པའི་ཕྱིར་རོ། །དེ་ཚད་མ་ཡིན་པ་ནི་མེད་པ་ཚད་མའི་འབྲས་བུ་མ་ཡིན་ནོ་ཞེས་བྱ་བའི་དོན་ཏོ། །དྲན་པ་
སྐྱེད་པར་བྱེད་པས་ཚད་མར་མི་རིགས་སོ། །ཅིའི་ཕྱིར་ཚད་མ་མ་ཡིན་ཞེ་ན། ཇི་ལྟར་མཐོང་བའི་རྣམ་པ་གསལ་བ་ལ་སོགས་པ་རྐྱེན་གཞན་ལ་ལྟོས་པ་དང་བཅས་པའི་བྱེ་བྲག་དེ་འཛིན་པའི་ཕྱིར་རོ། །མཐོང་ངོ་ཞེས་བྱ་བ་ནི་རྣམ་པར་རྟོག་པའི་གཟུང་བར་བྱ་བའི་མ་ཡིན་ཏེ། མཐོང་བར་ཁྱད་པར་མེད་པའི་ཕྱིར་རྣམ་པ་ཐམས་ཅད་ལ་རྣམ་པར་རྟོག་པ་སྐྱེ་བར་ཐལ་བར་འགྱུར་རོ། །འོན་ཀྱང་འགའ་ཞིག་གོམས་པ་ལ་སོགས་པའི་རྐྱེན་ལ་ལྟོས་པའི་ཕྱིར་རྣམ་པ་འཛིན་པར་བརྗོད་དོ། །ཁྱེད་ཀྱང་ཇི་ལྟར་མཐོང་བའི་རྣམ་པ་འཛིན་པ་ཡིན་ཡང༌། ཅིའི་ཕྱིར་ཚད་མའི་མཚན་ཉིད་བརྗོད་པ་དེ་བསལ་བར་བསྟན་པའི་ཕྱིར་སྔ་མ་ལྟ་བའི་ཤེས་པ་སྐྱེ་བའི་དུས་སུ་ཐུན་མོང་མ་ཡིན་ལ་མ་འདྲེས་པའི་ངོ་བོ་མཐོང་ནས་ཐུན་མོང་མ་ཡིན་པ་ནི་དོན་གཞན་གྱི་ངོ་བོར་མི་འགྱུར་རོ་ཞེས་མངོན་པར་བརྗོད་པ་ནི་མངོན་པར་བརྟགས་པའོ། །དགག་པའི་རྣམ་པར་རྟོག་པ་ནི་སྔོན་མེད་པའི་དོན་རྟོགས་པ་མེད་པའི་ཕྱིར་སྔོན་མེད་པའི་དོན་རྣམ་པར་ཤེས་པ་སྤངས་པ་ཡིན་ནོ། །སྔར་མེད་པའི་དོན་གྱི་རྣམ་པར་ཤེས་པ་ཚད་མ་ཡིན་ནོ་ཞེས་ཁྱེད་ཀྱིས་བརྗོད་དོ། །ཇི་སྐད་བཤད་པའི་རྣམ་པས་དགག་པའི་རྣམ་པར་རྟོག་པ་ཚད་མ་མ་ཡིན་ནོ། །དེ་ལྟ་ན་ནི་སྒྲུབ་པའི་རྣམ་པར་རྟོག་པ་ཚད་མར་འགྱུར་ཏེ། དེ་སྔོན་མེད་པའི་རྣམ་པར་ཤེས་པ་མི་སྲིད་པ་མ་ཡིན་ཏེ། དེ་སོ་སོར་སྣང་བའི་རྗེས་སུ་བྱེད་པའི་སྤྱིའི་རྣམ་པ་ནི་ཐུན་མོང་མ་ཡིན་པའི་ངོ་བོ་ལ་དམིགས་པ་ནི་མ་མཐོང་བས་མ་རྟོགས་པས་རྟོགས་པའི་ཕྱིར། དེ་གང་གིས་ན་ཚད་མ་མ་ཡིན། དེ་སྐད་དུ། དེ་ལས་གཞན་ཡང་དངོས་ཆོས་ནི། །ཞེས་བྱ་བ་ལ་སོགས་པ་སྨྲས་པ་འདི་དག་གཞོན་ནུ་མ་ལེན་གྱིས་བརྗོད་པའི་དོགས་པ་བསུ་ནས་སྒྲུབ་པའི་རྣམ་པར་རྟོག་པའི་ཚད་མ་ཡང་བསལ་བ་ནི། དོན་བྱེད་པ་བསྒྲུབ་པ་ཞེས་བྱ་བ་སྨོས་ཏེ། རང་གི་མཚན་ཉིད་ལ་ལྟ་བའི་ཤེས་པས་མཐོང་བའི་ཕྱིར་དང༌། དེ་བསྒྲུབ་པ་མཐོང་བ་མེད་པ་ནི་དོན་བྱེད་པ་སྒྲུབ་པའི་ངོ་བོ་རྣམ་པར་རྟོག་པས་རྟོགས་པ་མེད་པས་སྒྲུབ་པའི་རྣམ་པར་རྟོག་པ་ཚད་མ་མ་ཡིན་ནོ། །གལ་ཏེ་དེས་ཀྱང་མ་རྟོགས་པའི་སྤྱི་རྟོགས་པ་ཡིན་ནོ་ཞེས་བརྗོད་པ་དེ་ལྟ་ན་ཡང་དེའི་དོན་བྱེད་པ་སྒྲུབ་པ་མ་ཡིན་པའི་ཕྱིར་དེའི་རྟོག་པ་ནི་རབ་རིབ་ཅན་གྱི་ཤེས་པ་ལ་སོགས་པ་བཤད་པ་བཞིན་དུ་སྒྲུབ་པའི་རྣམ་པར་རྟོག་པ་ཚད་མ་མ་ཡིན་ནོ། །དེ་ལ་གཞན་ཡང་དངོས་ཆོས་ནི། །
རིགས་ལ་སོགས་པ་གང་གང་གི །བློ་ཡིས་ངེས་པ་ཞེས་བརྗོད་དོ། །དེ་ལས་གཞན་ཡང་དངོས་པོ་འཛིན་པ་རྣམ་པར་མི་རྟོག་པའི་མངོན་སུམ་གྱི་ཡུལ་ཉིད་ནི་དངོས་པོའོ། །རིགས་ལ་སོགས་པ་ནི་བྱེ་བྲག་ཏུ་རྟོགས་པ་ནི་བློ་ཡིས་མངོན་བར་ཞེན་པར་བརྗོད་དེ། དེ་ནི་རྣམ་པར་མི་རྟོག་པའི་ཤེས་པས་རྟོགས་པས་དེ་ལ་ཚད་མ་ཡིན་གྱི། རིགས་ནི་དོན་བྱེད་པ་སྒྲུབ་པ་མེད་པའི་ཕྱིར། སྐྲ་ཤད་ལ་སོགས་པའི་ཤེས་པ་བཞིན་དུ་མ་རྟོགས་པ་རྟོགས་པ་ཚད་མ་མ་ཡིན་ནོ། །དེ་ཉིད་ཀྱི་ཕྱིར་དོན་བྱེད་པའི་ནུས་པས་སྟོང་པའི་སྤྱི་ནི་དབང་པོ་དང་འབྲེལ་པ་མེད་པའི་ཕྱིར་མངོན་སུམ་སྲིད་པ་མ་ཡིན་ནོ། །དང་གི་སྒྲས་ནི་དྲན་པ་ཉིད་དང་ཞེས་སྔར་བཤད་ཟིན་པ་བསྡུའོ། །དྲན་པ་ཉིད་ཀྱང་ཕྱིས་བཤད་པར་བྱའོ། རྗེས་སུ་དཔག་པ་བཞིན་ཅེས་བྱ་བའི་ཆོས་མི་མཐུན་པའི་དཔེ་ཡིན་ནོ། །ཇི་ལྟར་མངོན་སུམ་གྱིས་དོན་བྱེད་པ་སྒྲུབ་པའི་ས་ཕྱོགས་ཆོས་ཅན་རྟོགས་ཀྱང་མེ་དོན་བྱེད་པ་སྒྲུབ་པའི་སྤྱིའི་རྣམ་པ་ལྐོག་ཏུ་གྱུར་པ་རྟོགས་པ་མེད་དོ། །རང་གི་མཚན་ཉིད་ཀྱིས་རྣམ་པར་རྟོག་པར་མི་ནུས་པའི་ཕྱིར་རོ། །རྟོགས་པར་བྱེད་པ་པོས་སྒྲུབ་པའི་རྣམ་པར་རྟོག་པ་སྤྱིའི་རྣམ་པ་དོན་བྱེད་པ་སྒྲུབ་པ་མ་རྟོགས་པ་རྟོགས་པ་མེད་དོ། །དེ་ལྟ་བའི་ཤེས་པས་རྟོགས་པ་དེའི་ཕྱིར་དྲན་པ་ཞེས་བྱ་བ་འདིར་ཚད་མ་མ་ཡིན་ནོ། །གལ་ཏེ་དོན་བྱེད་པ་སྒྲུབ་པར་བྱེད་པའི་ཡུལ་ཁོ་ན་ལ་ཚད་མ་ཡིན་གྱི་ཅིག་ཤོས་ལ་མ་ཡིན་ནོ་ཞེས་བྱ་བ་ག་ལས་ཤེས་ཤེ་ན། གང་གི་ཕྱིར་དོན་བྱེད་པ་དོན་དུ་གཉེར་བའི་སྐྱེས་བུ་ནི་ཕན་པ་དང་མི་ཕན་པ་ཐོབ་པ་དང༌། ཡོངས་སུ་སྤངས་པ་ཐམས་ཅད་དོན་དུ་གཉེར་གྱི་བྱ་རོག་དང་ཏ་ལའི་རིགས་པས་ནི་འགའ་ཞིག་ཀྱང་མ་ཡིན་ཏེ། རྟོག་པ་དང་ལྡན་པ་བློ་སྔོན་དུ་གཏོང་བ་ཚད་མ་འམ་ཚད་མ་མ་ཡིན་པ་ཞིག་ཡིན། ཚད་མ་ལས་ནི་ཐམས་ཅད་དུ་འཇུག་པར་བྱེད་ཀྱི། ཚད་མ་མ་ཡིན་པས་ནི་འགའ་ཞིག་གི་ཚེ་ཡང་མ་ཡིན་ཏེ། སླུ་བ་སྲིད་པའི་ཕྱིར་རོ་ཞེས་གཉི་ག་ཚོལ་བ་ཡིན་གྱི་ཉོན་མོངས་པ་ནི་མ་ཡིན་ནོ། །དེའི་ཕྱིར་དོན་བྱེད་པ་སྒྲུབ་པར་བྱེད་པའི་ཡུལ་ཁོ་ན་ལ་ཚད་མར་བརྗོད་དེ། དེའི་དོན་བྱེད་པ་སྒྲུབ་པ་ནི་འཇུག་པའི་ཡན་ལག་ཡིན་པའི་ཕྱིར་དང༌། ཅིག་ཤོས་ནི་བཟློག་པ་ཡིན་པའི་ཕྱིར་རོ། །དེ་ལྟར་ནི་ཚད་མ་ནི་མི་སླུ་བར་བྱེད་པ་མ་འཁྲུལ་བ་ཞེས་འཇིག་རྟེན་ཡང་
བརྗོད་དོ། །གང་དོན་བྱེད་པ་སྒྲུབ་པ་མ་རྟོགས་ན་དེ་ལ་འཇུག་པ་མེད་པས་འདི་ག་ལས་ཐོབ་བ་ཡིན། དེ་ཇི་ལྟར་མི་སླུ་བར་བྱེད་པ་དེ་རྟོགས་པ་སྔོན་དུ་གཏོང་བར་བྱེད་པས་ཚད་མར་བརྗོད་པར་འགྱུར། གལ་ཏེ་དེ་ལྟ་ན་སྤྱི་ཡང་དོན་བྱེད་པ་སྒྲུབ་པ་ཉིད་དེས་དེའི་ཡུལ་ལ་སྒྲུབ་པའི་རྣམ་པར་རྟོག་པ་ཚད་མར་འགྱུར་རོ་ཞེ་ན། སྤྱིས་ནི་ཞེས་བྱ་བ་སྨོས་ཏེ། ཅུང་ཟད་ཅིག་ཀྱང་དེས་བསྒྲུབ་པར་བྱ་བ་ཁས་མ་བླངས་ཏེ། ཐ་མི་དད་པའི་ཤེས་པའི་མཚན་ཉིད་བརྗོད་པ་འམ་གཞན་ལ་ནི་བསལ་བས་བསྒྲུབ་པར་བྱ་བའི་དོན་བྱེད་པར་ཉེ་བར་བཏགས་པ་ཡིན་ནོ། །ཅི་འདྲ་བ་ཞེ་ན། རང་གི་མཚན་ཉིད་རྟོགས་པའོ།། གསལ་བ་རྟོགས་པ་ནི་ལྟ་བའི་ཤེས་པའི་མིང་ཡིན་ནོ། །འོག་ཏུ་ནི་དུས་ཕྱིས་དེའི་མཐུ་ལས་སྐྱེས་པའི་རྣམ་པར་རྟོག་པ་ཅན་གྱི། རྣམ་པར་ཤེས་པའི་བཟུང་བ་ཡིན་པས་སོ། །དེའི་སྒྲ་ནི་རང་གི་མཚན་ཉིད་རྟོགས་པ་དང་འབྲེལ་ཏོ། །དེ་ལས་གཞན་པའི་དངོས་པོ་ཡང་ཞེས་བྱ་བ་ལ་སོགས་པ་གཞན་གྱིས་བརྗོད་པ་ནི་ཇི་སྐད་དུ་བརྗོད་པས་མཐོང་བའི་རྗེས་ལ་རྣམ་པར་རྟོག་པ་ནི་མངོན་སུམ་གྱི་ཚད་མ་ཉིད་དོ་ཞེས་བསལ་བ་ཡིན་ཏེ། ཕྱིས་ནི་ཐམས་ཅད་དུ་ཅུང་ཟད་ཅིག་ཀྱང་དོན་བྱེད་པར་ཉེ་བ་བཏགས་པ་མེད་དོ། །རྗེས་སུ་དཔག་པའི་རྣམ་པར་རྟོག་པའི་གཟུང་བར་བྱ་བའི་སྤྱི་ནི་རྒྱུ་འམ་ཁྱབ་པར་བྱེད་པ་དང། རྟགས་འབྲེལ་པ་ངེས་པའི་སྒོ་ནས་དོན་བྱེད་པ་སྒྲུབ་པའི་ཡུལ་མ་རྟོགས་པའི་དོན་བྱེད་པ་རྟོགས་པའི་ཕྱིར་དེའི་ཡུལ་ཚད་མ་ཡིན་གྱི། འདི་ནི་དེ་ལྟར་རྟོགས་པ་མེད་པའི་ཕྱིར་དོན་བྱེད་པ་སྒྲུབ་པར་བྱེད་པ་ནི་ལྟ་བའི་ཤེས་པ་ཡིན་ནོ་ཞེས་བྱའོ། །འདིར་དཔེ་ནི། དཔེར་ན་སྔོན་པོ་མཐོང་བ་ན་སྔོན་པོའོ་སྙམ་དུ་ཤེས་པ་སྣང་བཞིན་ཏེ་ཞེས་བྱ་བ་ནི་ལྷག་མའོ། །སྤྱི་ནི་ཅུང་ཟད་ཅིག་ཀྱང་དོན་བྱེད་པར་ཉེ་བར་བརྟག་པར་མི་བྱའོ་ཞེས་རྣལ་མ་དང་སྦྱར་རོ། །འོ་ན་འདི་རྟགས་ཀྱི་རྣམ་པ་ལ་སྣང་བའི་སྤྱིའི་གནས་སྐབས་སུ་དེ་ལ་དཔེ་གཞན་གྱིས་ཅི་ཞིག་བྱ་ཞེ་ན། མཐོང་བ་ཐམས་ཅད་ཀྱི་རྗེས་ལས་བྱུང་བའི་རྣམ་པར་རྟོག་པ་མངོན་སུམ་གྱི་ཚད་མ་དང་མཚུངས་པར་གཞན་གྱིས་ཁས་བླངས་པ་བསལ་བའི་ཕྱིར་རོ། །གལ་ཏེ་སྔོན་པོ་ཡིན་ནོ་ཞེས་མཐོང་བའི་རྗེས་ལས་བྱུང་བའི་རྣམ་པར་རྟོག་པ་ལས་སྣང་བའི་སྤྱི་དོན་བྱེད་པར་ཅིས་ན་བརྟག་པར་མི་བྱ། གསལ་བའི་བསྒྲུབ་པར་བྱ་བའི་དོན་དེ་ཡང་དོན་གཞན་
གྱིས་དེའི་དོན་བྱེད་པ་བརྟག་པར་མི་བྱ་བའི་ཕྱིར་དེ་ཡང་དོན་བྱེད་པ་སྒྲུབ་པ་མེད་པས་ན་དངོས་པོ་མེད་པར་ཐལ་བར་འགྱུར་རོ། །འོ་ན་ཏེ་ཐ་མི་དད་པའི་ཤེས་པའི་མཚན་ཉིད་དང་བརྗོད་པའི་རང་བཞིན་བསྒྲུབ་པར་བྱ་བ་སྒྲུབ་པར་བྱེད་པ་ཡིན་པས་མ་གྲུབ་པ་ཡིན་ཏེ། རང་གི་བསྒྲུབ་པར་བྱ་བའི་རྒྱུ་ཡིན་པའི་ཕྱིར་རོ་སྙམ་དུ་དོགས་པ་ལ། དེ་ཉིད་ཅེས་བྱ་བ་སྨོས་ཏེ། །ལྟ་བའི་ཤེས་པས་ཉེ་བར་དམིགས་པ་གང་ཡིན་པ་དེ་ནི། །སྔོན་པོའི་རང་གི་མཚན་ཉིད་ནི་སྔོན་པོའི་གསལ་བའོ། །རྣམ་པ་དེ་ལྟ་བུས་བསྒྲུབ་པར་བྱ་བའི་དོན་བྱེད་པ་ཡིན་ཏེ། རྣམ་པ་དེ་ལྟ་བུའི་སྒྲས་ནི་སྤྱི་ཙམ་དུ་མངོན་པར་འདོད་པ་ནི་འདྲ་བ་ཉིད་མིང་གི་རྣམ་གྲངས་ཡིན་པའི་ཕྱིར་ཐུན་མོང་བའི་ངོ་བོ་འདི་ཡང་འདྲ་བའི་ཕྱིར་རོ། །དེས་ན་རྣམ་པ་དེ་ལྟ་བུའི་བསྒྲུབ་པར་བྱ་བ་ནི་སྔོན་པོའི་སྤྱི་བསྒྲུབ་པར་བྱ་བ་ཐ་མི་དད་པའི་ཤེས་པར་བརྗོད་པའི་མཚན་ཉིད་དོན་གྱི་བྱ་བ་བྱེད་པར་ནུས་པ་ནི་རང་གི་མཚན་ཉིད་འདི་ཡིན་ནོ་ཞེས་དེ་བཞིན་དུ་བཤད་དོ། །འདི་སྙམ་དུ་དགོངས་པ་ཡིན་ཏེ། འདི་ལྟར་གསལ་བ་ཐ་དད་པ་ཡང་འགའ་ཞིག་དང་ཉེ་བར་གྱུར་པ་ལས་དང་འབྲས་བུ་གཅིག་ཏུ་ངེས་པའི་མཚན་ཉིད་དུ་མཚུངས་པ་གཅིག་ཐ་མི་དད་པ་བྱེད་པས་ན། དེ་ལས་གཞན་པའི་སྤྱི་དང་ལྡན་པ་མེད་དེ། དེ་ལྟ་མ་ཡིན་ན་ཐུག་པ་མེད་པར་ཐལ་བར་འགྱུར་རོ། །དེ་ལྟར་ན་ཐ་མི་དད་པའི་ཤེས་པ་དང་བརྗོད་པའི་བདག་ཉིད་ཀྱི་དོན་བྱ་བ་སྒྲུབ་པར་བྱེད་དོ། །གང་གི་ཕྱིར་ཚད་མ་མེད་པ་དང་ཚད་མས་གནོད་པའི་སྤྱི་ཡང་ཁས་བླངས་པས་ཅི་ཞིག་བྱ། འདི་ལྟར་རྗེས་སུ་དཔག་པ་ལ་སོགས་པའི་ཤེས་པ་ལ་ཇི་ལྟ་བའི་རྣམ་པ་འདི་མི་གསལ་བའི་ངོ་བོ་སྣང་བ་ལ་དེ་ལྟ་བུའི་རྣམ་པ་གསལ་བ་མཐོང་བ་རྣམས་ལ་དེ་ཉེ་བར་མི་རྟོགས་སོ། །གསལ་བ་གཅིག་ཁོ་ན་མཐོང་བའི་དུས་སུ་སྔོན་པོ་ལ་སོགས་པའི་ངོ་བོ་གསལ་བར་སྣང་བ་ན་དེ་ཇི་ལྟར་མཐོང་བ་མེད་པར་བརྟགས་ནས་བདག་ཉིད་ལ་བདག་ཉིད་སླུ་བར་བྱེད་དམ། གལ་ཏེ་གསལ་བའི་ངོ་བོ་དང་འདྲེས་པས་འདི་ལྕགས་ཀྱི་གོང་བུའི་མེ་བཞིན་དུ་སྣང་བ་ཡིན་ནོ་ཞེ་ན། མ་ཡིན་ཏེ། ཐམས་ཅད་དུ་ཐ་དད་པ་དང༌། །ཐ་མི་དད་པའི་རྣམ་པར་གཞག་པ་མེད་པར་ཐལ་བར་འགྱུར་ཏེ། འདིའི་ལན་ནི་གཞན་དུ་ཡང་རྙེད་པར་སླ་བའི་ཕྱིར་རོ། །
སྤྱིའི་ངོ་བོ་ལ་གསལ་བ་དང་མི་གསལ་བ་རྣམ་པ་གཉིས་ནི་མེད་དེ། གང་གི་གཅིག་ནི་མཐོང་བའི་རྣམ་པ་དང༌། གཞན་རྗེས་སུ་དཔག་པ་ལ་སོགས་པའི་ཤེས་པའི་དོན་གཉིས་སུ་ཁས་བླངས་པར་ཐལ་བར་འགྱུར་ཏེ། སོ་སོར་སྣང་བ་ཐ་དད་པ་ཉིད་ཐམས་ཅད་དུ་དངོས་པོ་ཐ་དད་པར་རྣམ་པར་གཞག་པའི་རྒྱུ་མཚན་ཡིན་པའི་ཕྱིར་རོ། །སྤྱི་ལ་སྤྱི་གཞན་ཡོད་པར་ཐལ་བར་འགྱུར་བ་སྤྱི་གཞན་མེད་པར་ཁས་བླངས་པའི་ཕྱིར་རོ། །འདིས་ནི། དངོས་རྣམས་ཀུན་ལ་ལྡོག་པ་དང༌། །རྗེས་སུ་འགྲོ་བའི་བདག་ཉིད་བློ། །སྐྱེ་བའི་བདག་ཉིད་གཉིས་མེད་ན། །དེ་ཡང་རིགས་པ་མ་ཡིན་ནོ། །གང་རུང་འདིར་ནི་འཁྲུལ་པ་དང༌། །ཉེ་བར་བཏགས་པར་མི་འདོད་དོ། །ཐམས་ཅད་དུས་སུ་བློ་བརྟེན་ཕྱིར། །འཁྲུལ་པར་བརྗོད་པ་དེ་འཁྲུལ་པ། །ཞེས་བྱ་བ་གང་སྨྲས་པ་དེ་དག་ཀྱང་བསལ་བ་ཡིན་ནོ། །གལ་ཏེ་གང་གི་ཕྱིར་དབང་པོའི་བློར་མངོན་པར་བརྗོད་པར་འདོད་པ་དེའི་ཚེ་མ་གྲུབ་པ་ཡིན་ཏེ། སྔོན་པོ་ལ་སོགས་པ་མི་གསལ་བའི་རྣམ་པ་སྔོན་པོ་ལ་སོགས་པ་གསལ་བའི་རྣམ་པ་དེ་ལ་ཉེ་བར་མི་རྟོག་པའི་ཕྱིར་རོ། །གསལ་བ་ཡང་གཉིས་པའི་རྗེས་སུ་འགྲོ་བ་དང་དེ་ཡོད་ན་འགྱུར་ན་གསལ་བ་གཉིས་ཀྱི་བར་དུ་མ་ཁྱབ་པ་དང་ལྡན་པ་དེ་ཇི་ལྟར་དེའི་རྗེས་སུ་འགྲོ་བ་ཡིན། ཡང་ན་ཁྱབ་པར་ཉེ་བར་དམིགས་པར་འགྱུར་ན་དེ་ནི་དེ་ལ་རྟོགས་པ་མེད་པ་ག་ལ་ཡིན། གསལ་བ་མི་གསལ་བའི་ངོ་བོར་མི་སྲིད་དེ་གཅིག་པའི་ཕྱིར་རོ། །དེ་སྐད་དུ། གལ་ཏེ་རིགས་ནི་ཀུན་ལ་ཡོད། །གཅིག་དེ་གསལ་བས་གསལ་བ་ཉིད། །ཐ་དད་མེད་ཕྱིར་ཀུན་ལ་མཐོང༌། །དེ་ཡང་གསལ་བ་ལ་ལྟོས་མིན། །ཅེས་བྱ་བ་སྨོས་ཏེ། གསལ་བ་གཅིག་ལ་ཉེ་བར་དམིགས་པར་གྱུར་ན་ཡང་འཇིག་རྟེན་ན་གསུམ་པོ་མ་ལུས་པ་ཁྱབ་པའི་ངོ་བོ་འམ་མ་ལུས་པའི་རྟེན་ལ་ཁྱབ་པ་མཐོང་བར་འགྱུར་ན། །གང་ལ་ཅུང་ཟད་གཅིག་ཀྱང་སྐད་ཅིག་མ་ལ་སོགས་པ་བཞིན་དུ་མཐོང་བ་དང་མ་མཐོང་བ་ནི་མི་འཐད་དོ། །གལ་ཏེ་མཐོང་བ་ཡང་རྟེན་གཅིག་ལ་མཐོང་བར་མཐོང་བར་ཞེན་གྱི་ཐམས་ཅད་ལ་མ་ཡིན་ནོ་ཞེ་ན། མ་ཡིན་ཏེ། རྣམ་པར་རྟོག་པས་དེ་མཐོང་བར་ཁས་བླངས་པའི་ཕྱིར་རོ། །ངེས་པས་ཡུལ་དུ་བྱས་པ་མ་ངེས་པ་ཡིན་ནོ་ཞེས་བྱ་བ་མི་རིགས་ཏེ། དེས་ན་ཐམས་ཅད་
དུ་སོང་བའི་ངོ་བོ་མཐོང་ན་དོན་ཐམས་ཅད་མཐོང་བར་ཐལ་བར་འགྱུར་རོ། །དེ་ནི་མཐོང་བ་དེ་དང་ལྷན་ཅིག་ཉེ་བར་དམིགས་པའམ། དེ་དང་ཐ་མི་དད་པ་རང་བཞིན་ཉེ་བར་མི་དམིགས་པ་རིགས་པ་མ་ཡིན་ན། དེ་ཇི་ལྟར་དབང་པོའི་བློ་ཡིས་གཉིས་ཀྱི་བདག་ཉིད་ཡིན། ཡང་ན་རྗེས་སུ་དཔག་པ་ལ་སོགས་པའི་བློའི་ཡིན་ན། དེ་ཡང་རང་གི་མཚན་ཉིད་སྣང་བ་མེད་པས་གང་ལས་གཉིས་ཀྱི་བར་དུ་འགྱུར། དེ་རྣམས་ཀྱི་སྤྱི་འཛིན་པ་རྣམས་ལ་གསལ་བ་ལྟ་བུའི་མཚན་ཉིད་གསལ་བ་ནི་མེད་དེ། རང་གི་མཚན་ཉིད་ལ་སྣང་བ་དེ་མེད་ཀྱང་དེ་སྲིད་པའི་ཕྱིར་དང། རྣམ་པ་གཞན་རང་གི་ཤེས་པ་ལ་སོ་སོར་སྣང་བའི་ཕྱིར་རོ། །གཅིག་ལ་རྣམ་པ་དུ་མ་མི་རིགས་པས་ཧ་ཅང་ཐལ་བར་འགྱུར་བའི་ཕྱིར་རོ། །དེའི་ཕྱིར་ཐ་དད་པའི་དོན་གྱི་གཟུང་བར་བྱ་བ་འདི་ཐ་མི་དད་པའི་སྤྱིའི་བློ་ལ་སོ་སོར་སྣང་བ་ནི་རང་གི་མཚན་ཉིད་སྣང་བ་མ་ཡིན་ཏེ། འོན་ཀྱང་ཐོག་མ་མེད་པའི་ཕྱིན་ཅི་ལོག་གི་རྣམ་པར་རྟོག་པ་གོམས་བའི་བག་ཆགས་ལས་སྐྱེ་བ་ཡོད་པ་དེ་བཞིན་དུ་སྣང་བའི་ཕྱིར་དང༌། བརྟེན་པའི་ཕྱིར་བློ་ནི་འཇིག་པ་མེད་པར་འགྱུར་ན་སྐད་ཅིག་མར་ཁས་བླངས་པའི་ཕྱིར་རོ། །འོན་ཀྱང་གནོད་པ་མེད་པ་ཉིད་དེ་ཡང་འདི་མི་སྲིད་དེ་གནོད་པར་བྱེད་པའི་ཆ་ཙམ་བཤད་པའི་ཕྱིར་རོ། །རྒྱས་པ་ཡང་ཡོད་པ་འཇིག་པ་ཇི་ལྟ་བའི་གནས་སྐབས་འདི་ཉིད་དེ་དང་དེར་བཤད་པའི་གནོད་པར་བྱེད་པ་ངེས་པར་གཟུང་བར་བྱའོ། །དེའི་ཕྱིར་ཇི་ལྟར་གསལ་བ་ལ་སྤྱི་གཞན་མེད་ཀྱང་གཅིག་པ་བྱེད་པ་དེ་ལྟ་ན་ཐ་མི་དད་པའི་ཤེས་པ་བརྗོད་ལ་འཇུག་པར་ཡང་བྱེད་པའི་ཕྱིར། དེ་ཉིད་སྔོན་པོའི་རང་གི་མཚན་ཉིད་དག་སྤྱི་བསྒྲུབ་པར་བྱ་བའི་དོན་བྱེད་པར་ཁས་བླངས་པའི་ཕྱིར་རོ། །གང་ཡང༌། གལ་ཏེ་སྤྱི་གཞན་མི་འདོད་ན། །དེ་ཡི་འཇུག་པ་ངེས་པ་ཅན། །བ་ལང་ཉིད་ཀྱང་མེད་ན་ནི། །ཅི་ཕྱིར་བ་ལང་བློར་མི་ངེས། །ཇི་ལྟར་ཐ་དད་ཉིད་མཚུངས་ཀྱང༌། །ལྡོག་རྣམས་འགའ་ལ་འཇུག་བ་ནི། །བ་ལང་ཉིད་སོགས་རྒྱུ་མཚན་ནི། །མེད་ཀྱང་དེ་བཞིན་བློ་འབྱུང་འགྱུར། །ཞེས་བྱ་བ་ཕྱོགས་སྔ་མར་བྱས་ནས། ཡུལ་མེད་ན་ནི་བློ་རྣམས་ནི། །སྐྱེ་བ་མེད་པར་འདོད་པ་ཡིས། །གཞན་ལས་བྱེ་བྲག་འདོད་པ་ན། །དེས་ན་སྤྱི་དེ་ངེས་པ་ཡིན། །
དེས་ན་དེ་མེད་སྐྱེ་ན་ནི། །ཡུལ་མེད་ཕྱིན་ཅི་ལོག་ཏུ་འགྱུར། །གཞན་མེད་ན་ནི་མི་འགག་ན། །སྤྱི་འདི་ལ་ནི་ཉེས་པ་མེད། །ཅེས་བྱ་བ་གང་ཡང་ཕྱིན་ཅི་ལོག་པའི་ཐལ་བར་འགྱུར་བའི་སྐྱོན་བརྗོད་པ་འདི་དེ་བཞིན་གཤེགས་པའི་གཞུང་ལུགས་ཀྱི་རིགས་པ་དྲི་མ་མེད་པའི་བློ་ལ་གནོད་པ་མེད་དོ། །སྤྱིའི་བློ་རྣམས་ནི་གནོད་པ་བྱེད་པའི་རྐྱེན་གྱི་མཚན་དང་ལྡན་པའི་ཕྱིན་ཅི་ལོག་ཏུ་ཁས་བླངས་པའི་ཕྱིར་རོ། །ཅི་ཕྱིར་ནོག་སོགས་ལྡན་རྣམས་ལ། །བ་ལང་གང་ཕྱིར་དེ་བདག་ཉིད། །ཅི་ཕྱིར་འདི་དེའི་བདག་ཅེ་ན། །རང་བཞིན་ཡིན་ཞེས་གོ་བར་བྱ། །ཞེས་བྱ་བ་སྨོས་པ་ནི། །གསལ་བའི་རང་བཞིན་ཐུན་མོང་མ་ཡིན་བ་གསལ་བ་སྐྱེ་བ་དང་འཇིག་པ་དག་གི་སྤྱི་སྐྱེ་བ་མེད་པ་དང་ལྡན་པ་མི་རིགས་ཏེ་འགལ་བའི་ཆོས་དང་ལྡན་པར་ཐ་དད་པར་ཐལ་བར་འགྱུར་བའི་ཕྱིར་རོ། །གལ་ཏེ་དེ་ཡིས་བདག་ཉིད་འདོད། །གསལ་བའི་སྐྱེ་དང་སྐྱེ་མེད་དང༌། །འཇིག་དང་འཇིག་མེད་ཅི་སྟེ་འདོད། །དེ་བཞིན་རྗེས་འགྲོ་མེད་ཅེས་མིན། །གསལ་བའི་སྐྱེ་བས་མི་སྐྱེ་གྲང༌། །རྟེན་གཞན་ལས་ནི་འོང་མེད་པ། །དེ་ཡི་ཡུལ་ན་སྔར་ཡོད་མིན། །དེ་ཡིས་ཇི་ལྟར་འབྲེལ་པ་ཡིན། །གལ་ཏེ་གསལ་འཇིག་མི་འཇིག་ན། །གསལ་བ་གཞན་ལ་མེད་འགྲོ་བ། །དེས་སྟོང་ཡུལ་ལ་གནས་པ་མེད། །རིགས་དེ་གང་ལ་ཡོད་པ་སྨོས། །གལ་ཏེ་གསལ་བའི་སྐྱེ་བ་དང༌། །རིགས་དེ་འབྲེལ་པར་མི་འདོད་ན། མ་བསླད་པ་ཡི་བློ་ཅན་ལ། །དེ་ཡི་བདག་ཉིད་ཇི་ལྟར་འདོད། །གལ་ཏེ་སྔོན་པོ་ལ་སོགས་པའི་རང་གི་མཚན་ཉིད་ཁོ་ན་སྤྱིའི་དོན་གྱི་བྱ་བ་བྱེད་བར་དེ་ཉིད་དེས་རྟོགས་ན་རྣམ་པར་རྟོག་པ་ཚད་མར་འགྱུར་རོ་ཞེ་ན། །དེའི་སྔོན་པོའི་རང་གི་མཚན་ཉིད་ཅེས་བྱ་བ་སྨོས་ཏེ། །བདག་ཉིད་དེས་སྔོན་པོའི་བསྒྲུབ་པར་བྱ་བའི་དོན་བྱ་བ་བྱེད་པར་རང་བཞིན་མཐོང་བ་ཉིད་ལྟ་བའི་ཤེས་པ་ཞེས་བའོ། །དེའི་ཕྱིར་བྱ་བ་གྲུབ་པ་ལས་ཁྱབ་པར་མི་བྱེད་པའི་རྣམ་པར་རྟོག་པའི་ཤེས་པ་ཇི་ལྟར་ཚད་མར་འགྱུར། །འོན་ཏེ་སྤྱི་ཉིད་དེ་ལྟར་ལྷག་པར་རྟོགས་པའི་སྔོན་པོའི་རྣམ་པར་རྟོག་པའི་ཚད་མ་ཡོད་དོ། །སྤྱི་དོན་མེད་པའི་བྱ་བ་བྱེད་པ་ནི་མ་ཡིན་ཏེ་སྔོན་པོ་བསྒྲུབ་པར་བྱ་བའི་དོན་བྱེད་པའི་སྔོན་པོ་དང་ལྷན་ཅིག་ཏུ་བྱུང་ནས་བྱེད་པར་འགྱུར་བའི་
གསལ་བའི་རང་བཞིན་ཉིད་སྤྱི་ཡིན་པར་འདོད་དོ་ཞེ་ན། །དེའི་རང་གི་མཚན་ཉིད་བཟུང་བའི་དུས་བྱིས་བྱུང་བའི་སྔོན་བོ་ཞེས་བྱ་བ་སྨོས་ཏེ། །གསལ་བའི་དུས་ཕྱིས་བྱུང་བར་ནུས་པའོ། །གལ་ཏེ་རྟགས་བཟུང་བའི་དུས་ཕྱིས་བྱུང་བ་ནི་སྔར་བཤད་པའི་རྣམ་པ་གསལ་བའི་བསྒྲུབ་པར་བྱ་བའི་དོན་བྱ་བ་བྱེད་པ་ནི་སྤྱིའི་རྣམ་པར་རྟོག་པས་གཞག་པར་ནུས་པ་ཡིན་ནོ་སྙམ་ནས། །སྔོན་པོའི་རྣམ་པར་རྟོག་པའི་ཡུལ་གྱི་སྔོན་པོའི་སྤྱིས་སྔོན་པོའི་དོན་གྱིས་བསྒྲུབ་པར་བྱ་བ་བྱེད་པ་གཙོ་བོ་ལ་སོགས་པ་བྱེད་པ་ཡིན་ནོ། །དེ་གསལ་བ་ནི་རང་བཞིན་དུ་རུང་བར་གྱུར་པ་ལ་རྣམ་པར་རྟོག་པའི་ངོ་བོ་དེ་མི་སྲིད་པའི་ཕྱིར་རོ། །རྟག་པའི་རང་བཞིན་དེ་འཛིན་པ་ནི་སྔོན་པོའི་རྣམ་པར་རྟོག་པའི་ཡུལ་གྱིས་ནི་སྔོན་པོའི་བསྒྲུབ་པར་བྱ་བ་འམ་གཞན་པའི་དོན་བྱ་བ་མི་བྱེད་དེ། །རིམ་དང༌། ཅིག་ཅར་ལ་སོགས་པས་འགལ་བའི་ཕྱིར་རོ་སྙམ་མོ། །དེ་ལྟར་སྔོན་པོ་དེ་མཐོང་བ་ན་སྔོན་པོའོ་ཞེས་ཤེས་པ་ལ་སོ་སོར་སྣང་བའི་སྤྱི་ནི་ཅུང་ཟད་ཅིག་ཀྱང་དོན་བྱེད་པར་ཉེ་བར་བཏགས་པར་མི་བྱའོ། །བསྒྲུབ་པར་བྱ་བའི་དོན་བྱེད་པ་མེད་པའི་ཡུལ་ཡིན་ན་ཡང་མངོན་སུམ་གྱིས་རྗེས་ལས་བྱུང་བའི་རྣམ་པར་རྟོག་བ་ཚད་མར་ཐལ་བར་འགྱུར་ན་ནི་ཧ་ཅང་ཁྱབ་ཆེས་སོ་སྙམ་ནས། དེ་ལ་སྔ་ན་མེད་པའི་དོན་གྱི་རྣམ་པར་ཤེས་པ་ཡིན་ནོ་ཞེས་ཚད་མའི་མཚན་ཉིད་དཔྱོད་པ་བས་ཁྱད་པར་ཅན་ཉེ་བར་བསྟན་པའི་ཕྱིར་བཤད་པ་ནི། དེ་ལྟ་བས་ན་ཞེས་བྱ་བ་སྨོས་ཏེ། གང་གི་ཕྱིར་དེ་ལྟར་དོན་བྱེད་པ་མེད་པ་སྒྲུབ་པའི་ཡུལ་གྱིས་ནི་མཐོང་བའི་རྗེས་ལས་བྱུང་བའི་རྣམ་པར་རྟོག་པ་ཡང་ཚད་མར་མི་རིགས་སོ། །དེའི་ཕྱིར་ཁོ་བོ་ཅག་འདོད་པའི་ཚད་མ་མི་སླུ་བ་ཅན་ཤེས་པ་ཞེས་བྱ་བའི་ཚད་མའི་མཚན་ཉིད་བསལ་ནས་མ་རྟོགས་པའི་དོན་གྱི་ཡུལ་ཅན་ནི་ཚད་མ་སྟེ། དེ་ལ་སྔ་ན་མེད་པའི་དོན་རྣམ་པར་ཤེས་པ་ཡིན་ནོ་ཞེས་འདིར་ཡང་བདག་གིས་ཀྱང་བྱ་སྙམ་ནས་ཚད་མའི་མཚན་ཉིད་གཞན་བྱེད་པ་ཧ་ཅང་ཁྱབ་ཆེས་པས་དེ་ཡོངས་སུ་སྤངས་ནས་ཁྱད་པར་གྱི་ཁྱད་པར་ཅན་དུ་ཉེ་བར་བསྟན་པ་སྟེ། ཁྱད་པར་ཇི་ལྟར་ཡིན་ཞེ་ན། རང་གི་མཚན་ཉིད་མ་རྟོགས་པ་ཡིན་ནོ་ཞེས་བྱ་བ་ཁྱད་པར་ལ་འདིས་རྗེས་སུ་དཔག་པའི་རྣམ་པར་རྟོག་པ་ཡང་ཚད་མར་གྲུབ་ལ། ལྟ་བའི་
ཤེས་པའི་རྗེས་ལས་བྱུང་བའི་རྣམ་པར་རྟོག་པ་ཚད་མ་ཡིན་པ་བསལ་བ་ཡིན་ནོ་ཞེས་བྱ་བར་ཐམས་ཅད་ལེགས་པར་གནས་སོ། །དེ་ལྟ་ན་སྒྲུབ་པའི་རྣམ་པར་རྟོག་པ་དོན་བྱ་བ་མེད་པ་སྒྲུབ་པར་བྱེད་པའི་ཡུལ་གྱིས་སྤྱི་མ་རྟོགས་པ་རྟོགས་པའི་ཚད་མ་ཡང་བསལ་ཏོ། །རང་གི་ཚིག་ནི་བསྡུས་པ་ཡིན་ཏེ་དྲན་པ་ཉིད་དགག་པའི་རྣམ་པར་རྟོག་པ་ཐུན་མོང་པ་ཚད་མ་མ་ཡིན་པའི་རྒྱུ་ནི། རང་གི་མཚན་ཉིད་རྟོགས་ནས་ཞེས་བྱ་བ་སྨོས་ཏེ། ལྟ་བའི་ཤེས་པ་དེའི་མཐུ་ལས་སྐྱེས་པ་ཅན་རང་གི་མཚན་ཉིད་རྟོགས་པའི་སྟོབས་ཀྱིས་བྱུང་བའི་རྣམ་པར་རྟོག་པ་ནི་དེའི་རྗེས་ལས་དངོས་སུ་སྐྱེས་པ་ནི་མ་ཡིན་པའི་ཕྱིར་དང༌། མཐོང་བའི་འདུ་བྱེད་པས་འཕངས་པའི་དབང་གིས་སྔོན་པོའི་རང་གི་མཚན་ཉིད་ཀྱི་རྣམ་པ་མི་གསལ་བའི་རྗེས་སུ་བྱེད་པ་ནི་སྣང་བ་དང༌། བརྟག་པར་བྱ་བ་དག་གཅིག་ཏུ་བྱེད་པར་བརྗོད་དོ། །དངོས་པོ་ཡོད་པའི་ཅུང་ཟད་ཅིག་ཀྱང་འདི་ཉིད་རྗེས་སུ་བྱེད་པ་མེད་པ་དེ་ནི་དྲན་པ་ཁོ་ནའོ། །ག་ལས་ཤེ་ན། དངོས་པོའི་ཡུལ་གྱི་འབྲས་བུ་ཡིན་པའི་ཕྱིར་དོན་དམ་པ་མ་ཡིན་ནོ། །སྐྱེས་བུ་རང་གི་མཚན་ཉིད་ལ་འཇུག་པ་འདིའི་འབྲས་བུ་སྟེ་དེར་མངོན་པར་ཞེན་པས་སོ། །གང་གི་ཕྱིར་དེའི་ཡུལ་ཅན་གྱི་འབྲས་བུ་ཡིན་པའི་ཕྱིར་དྲན་པ་ཁོ་ན་ཡིན་པ་དེ་བས་ན་མཐོང་བའི་སྟོབས་ལས་སྐྱེས་པའི་རྣམ་པར་རྟོག་པ་ཚད་མ་མ་ཡིན་ཏེ། དེ་ལྟ་ན་དྲན་པས་ཉམས་སུ་མྱོང་བའི་རང་གི་མཚན་ཉིད་ཀྱི་ཆའི་ཡུལ་ཡིན་དུ་ཟིན་ཀྱང་དོན་དམ་པ་དེའི་ཡུལ་མ་ཡིན་པ་ཉིད་དེ། རང་གི་མཚན་ཉིད་ཀྱི་དབང་པོའི་བློ་འགྱུར་བ་གསལ་བའི་ངོ་བོ་དྲན་པ་ལ་སྣང་བ་མེད་པའི་ཕྱིར་རོ། །འོན་ཀྱང་ཇི་སྐད་བཤད་པའི་འབྲས་བུ་ཁོ་ན་སྟེ། དེ་ཡང་སྒྲུབ་པའི་རྣམ་པར་རྟོག་པ་དང་མཚུངས་པའི་ཕྱིར་ཇི་ལྟར་འདི་དྲན་པར་མི་འགྱུར། འོན་ཏེ་དེ་ལ་འདིར་རྗེས་སུ་དཔག་པའི་རྣམ་པར་རྟོག་པ་དྲན་པའི་ངོ་བོ་ཡིན་ཡང་ཚད་མར་འདོད་དེའི་ལྟར་གང་མེ་མ་ཡིན་པ་ལས་ལྡོག་པ་ཁོ་ནའི་དངོས་པོ་ཙམ་ཚང་བ་ངལ་སོགས་པ་ཉམས་སུ་མྱོང་བར་གྱུར་པ་དེ་ཉིད་ཕྱོགས་ཀྱི་ཁྱད་པར་ལ་དུ་བ་མཐོང་བས་དྲན་པ་ཡིན་པ་དེ་བཞིན་དུ་སྒྲུབ་པའི་རྣམ་པར་རྟོག་པ་ཡང་ཚད་མར་འགྱུར་རོ་ཞེ་ན། དངོས་པོའི་ངོ་བོ་མ་རྟོགས་པ་རྟོགས་པ་མེད་པའི་ཕྱིར་ཞེས་བྱ་བ་སྨོས་སོ། །འདི་སྙམ་དུ་དགོངས་
པ་ཡིན་ཏེ། ཚང་བང་ལ་སོགས་པ་མེ་མ་ཡིན་པ་ལས་ལྡོག་པའི་དངོས་པོ་ཙམ་སྔར་ཉམས་སུ་མྱོང་བ་གང་ཡིན་པ་དེ་ཡུལ་ལ་སོགས་པ་དང་འབྲེལ་པ་ཉིད་ལ་རྗེས་སུ་དཔག་པ་ནི་དྲན་པ་མ་ཡིན་ནོ། །འོན་ཀྱང་ཕྱོགས་གང་ལ་སྔར་ཉམས་སུ་མྱོང་བ་དེ་དང་འབྲེལ་པ་དེ་བས་ན་བསྒྲུབ་པར་བྱ་བའི་ཆོས་ཅན་ལ་དང་དཔེ་ལ་བཟུང་བ་གཉི་ག་མེ་མ་ཡིན་པ་ལས་ལྡོག་པའི་དངོས་པོའི་ངོ་བོ་མ་རྟོགས་པ་མ་འབྲེལ་པ་རྣམ་པར་བཅད་ནས་རྟོགས་པར་བཤད་པས་འདི་ཚད་མ་ཡིན་གྱི་མཐོང་བའི་རྗེས་ལས་བྱུང་བའི་རྣམ་པར་རྟོག་པ་ནི་མ་ཡིན་ཏེ། དེ་ཕྱིན་ཅི་ལོག་པའི་ཕྱིར་རོ། །གལ་ཏེ་དངོས་པོའི་ངོ་བོ་མ་རྟོགས་པ་རྟོགས་པ་མེད་པའི་ཚད་མ་ཡིན་པར་ཅིའི་ཕྱིར་ན་མི་འགྱུར་ཞེ་ན། དངོས་པོའི་རྟེན་ཅན་ཡིན་པའི་ཕྱིར་རོ་ཞེས་བྱ་བ་ལ་སོགས་པ་སྨོས་ཏེ། ཚད་མའི་རྣམ་པར་གཞག་པ་ནི་དངོས་པོའི་རྟེན་ཅན་ཉིད་དོ། །ཚད་མའི་ཡུལ་བྱ་བ་མངོན་པར་འདོད་པས་བརྗོད་ཀྱི་དམིགས་པའི་མཚན་ཉིད་ནི་མ་ཡིན་ནོ། །དེ་ལྟ་མ་ཡིན་ན་རྗེས་སུ་དཔག་པས་ཀུན་དུ་བརྟགས་པའི་སྤྱི་ལ་དམིགས་པ་ནི་དངོས་པོ་ལ་རྟེན་པ་མེད་པའི་ཕྱིར་མཚན་ཉིད་རྣམ་པར་གཞག་པ་མ་ཁྱབ་པར་འགྱུར་རོ། །གལ་ཏེ་དངོས་པོ་ལ་བརྟེན་ནས་ཚད་མ་རྣམ་པར་འཇོག་ན། བསྐལ་བའི་ཡུལ་ལ་དམིགས་པ་ཇི་ལྟར་ཚད་མ་ཡིན་ཞེ་ན། འདིར་ཡང་གཙོ་བོ་ལ་སོགས་པའི་རྣམ་པར་རྟོག་པ་ཉིད་དངོས་པོ་ཉེ་བར་ལེན་པ་དེས་བསྒྲུབ་པར་བྱ་བའི་ཕྱིར། གཞན་ཡང་དངོས་པོ་ལ་རྟེན་པ་ཅན་ཉིད་ཡོད་པའི་ཕྱིར་ཉེས་པ་མེད་དོ། །འོན་ཏེ་ཚད་མའི་རྣམ་པར་གཞག་པ་ནི་དངོས་པོ་ལ་རྟེན་པ་ཅན་ཁོ་ནའོ་ཞེས་བྱ་བ་ག་ལས་ཤེ་ན། དོན་བྱེད་པ་ཞེས་བྱ་བ་སྨོས་ཏེ། བདེ་བ་དང་སྡུག་བསྔལ་གྱི་མཚན་ཉིད་དུ་རུང་བ་གང་ཡིན་པ་དེ་ནི་ནུས་པའི་ཡུལ་ཅན་ཡིན་པའི་ཕྱིར་རོ། །དེ་དོན་དུ་གཉེར་བ་ནི་ཐོབ་པ་དང་འདོར་བའི་མཚན་ཉིད་ཀྱི་དོན་བྱེད་པ་དོན་དུ་གཉེར་བ་འཇུག་གོ །གལ་ཏེ་དོན་བྱེད་པར་རུང་བ་ལ་དོན་དུ་གཉེར་བ་འཇུག་པ་དེ་ལྟ་ན་ཡང་ཇི་ལྟར་ཚད་མའི་རྣམ་པར་གཞག་པ་དངོས་པོ་ལ་བརྟེན་པ་ཡིན། དོན་བྱེད་པར་རུང་བ་ལ་བརྟེན་པ་དེ་ལྟ་ཡིན་ན་ནི་འགྱུར་རོ་ཞེ་ན། དངོས་པོ་དོན་བྱེད་རྣམས་ལ་རུང་བ་གང་ཡིན་པ་དེའི་མཚན་ཉིད་དོ། །དེའི་ཕྱིར་དོན་བྱེད་པར་རུང་བ་ལ་རྟེན་
པ་ཁོ་ན་དངོས་པོ་ལ་བརྟེན་པ་ཡིན་ན་ཇི་ལྟར་མ་ཡིན་ཞེས་བྱ་བར་འགྱུར་སྙམ་དུ་བསམས་པའོ། །འདིར་ཚད་མའི་རྣམ་པར་གཞག་པ་ནི་དངོས་པོ་ལ་བརྟེན་པ་བསྟན་པ་ནི་རང་གི་མཚན་ཉིད་མ་རྟོགས་པ་ཞེས་ལྷག་པར་བརྗོད་དོ་ཞེས་བརྒྱ་ལ་གཞན་སྨྲ་ན་དངོས་པོ་ཙམ་གྱི་རྒྱུ་མཚན་གྱི་ཚད་མ་རྣམ་པར་གཞག་པ་ནི་རང་གི་མཚན་ཉིད་ལ་བརྟེན་པ་ཉིད་མ་ཡིན་ནོ། །གང་གི་ཕྱིར། གལ་ཏེ་ཡང་མ་རྟོགས་པ་ནི་རང་གི་མཚན་ཉིད་རྟོགས་པ་མ་ཡིན་པ་དེ་ལྟ་ན་དངོས་པོའི་ངོ་བོ་མ་རྟོགས་པའི་རྣམ་པར་རྟོག་པ་ཚད་མར་འགྱུར་རོ་སྙམ་ནས་མ་གྲུབ་པའི་དོན་བརྗོད་པ་ན། དངོས་པོའི་ངོ་བོ་མ་རྟོགས་པ་ཞེས་བྱ་བ་ལ་སོགས་པ་བཤད་ཟིན་ཏོ། །དེ་མ་གྲུབ་པར་བརྗོད་པ་ནི་དངོས་པོའི་རང་གི་ངོ་བོ་མ་རྟོགས་པ་རྟོགས་པ་ཚད་མ་ཡིན་གྱི་ཅིག་ཤོས་ནི་མ་ཡིན་ནོ་ཞེས་ག་ལས་ཡིན་ཞེ་ན། དོན་བྱེད་པར་རུང་བའི་ཞེས་བྱ་བའི་བརྒལ་ཞིང་བརྟག་པ་བཤད་ཟིན་ཏོ། །དེ་ལྟ་ན་དངོས་པོའི་ཡུལ་ཅན་གྱི་ཚད་མ་བརྗོད་པ་ནི་རང་གི་མཚན་ཉིད་ཀྱི་ཡུལ་ཅན་ཁོ་ན་བཤད་པ་ཡིན་ཏེ། དེ་ཉིད་དོན་བྱེད་པར་ནུས་པའི་མཚན་ཉིད་ཡིན་པའི་ཕྱིར་དང༌། སྤྱི་ནི་བཟློག་པ་ནི་ཡིན་པའི་ཕྱིར་ཞེས་བྱ་བར་བསམས་པའོ། །ཉམས་སུ་མྱོང་བའི་དུས་ཕྱིས་བྱུང་བའི་སྔོན་པོའི་རྣམ་པར་རྟོག་པའི་ཚད་མ་ཡང་གསལ་བའི་གཏན་ཚིགས་ལྷག་པར་བཤད་པ་ནི། དེ་ལས་ཀྱང་ཞེས་བྱ་བ་སྨོས་ཏེ། ཇི་སྐད་བཤད་པའི་སྒྲུབ་པའི་རྣམ་པར་རྟོག་པ་འབའ་ཞིག་མ་ཡིན་ཏེ། སྔོན་པོ་རང་གི་མཚན་ཉིད་ཉམས་སུ་མྱོང་བའི་ཕྱིར་དངོས་པོ་ཉིད་རང་གི་མཚན་ཉིད་དོ། །དེ་ལ་མངོན་པར་ཞེན་པ་ནི་རང་གི་མཚན་ཉིད་ལ་མངོན་པར་ཞེན་པས་ཡིན་གྱི་གཞན་དུ་ན་དེ་ལ་འཇུག་པར་མི་རིགས་སོ། །སྐྱེས་བུའི་འཇུག་པ་ནི་རང་རང་གི་མཚན་ཉིད་མ་རྟོགས་པ་ནི་དེའི་མཐུ་ལས་སྐྱེས་པ་རྣམ་པར་རྟོག་པ་ཚད་མ་མ་ཡིན་ནོ་ཞེས་བྱ་བར་འབྲེལ་ཏོ། །སྔར་མ་རྟོགས་པའི་དོན་མ་རྟོགས་པ་ཚད་མ་མ་ཡིན་པར་བཤད་དོ། །ཕྱིས་རྟོགས་པ་ཉིད་རྟོགས་པའི་ཕྱིར་སྒྲུབ་བ་དང་དགག་པའི་ངོ་བོ་ཐ་དད་པ་དག་སྐྱེ་བ་ཡིན་ནོ། །ཡང་ན། གལ་ཏེ་དེའི་ཡུལ་གྱི་འབྲས་བུ་ཡིན་པའི་ཕྱིར་ཞེས་གང་བཤད་པ་དེ་ཉིད་ལྷག་པའི་གཏན་ཚིགས་ཐབས་ཀྱིས་བསལ་བར་བྱས་སོ། །གལ་ཏེ་དེ་ལ་མངོན་པར་གཞན་ནས་དངོས་པོ་ལ་སྐྱེས་བུ་འཇུག་
པ་དེ་ལྟ་ན་ཡང་སྤྱི་མ་རྟོགས་པ་འཛིན་པ་མཐོང་བས་ཐ་དད་པའི་ཚད་མ་ཅིས་ན་མི་འདོད་ཅེ་ན། བདེན་ཏེ། རང་གི་མཚན་ཉིད་ཁོ་ན་ལ་ཞུགས་ན་ཞེས་བྱ་བ་སྨོས་ཏེ། མངོན་སུམ་ལྟ་བའི་ཤེས་པར་གྲགས་པ་དང༌། གྲུབ་པ་དང་བདེ་བ་ཐ་མི་དད་པའི་ཕྱིར་རོ། །གྲུབ་པ་ནི་མ་མཐོང་བའི་ཡུལ་ཡོངས་སུ་གཅད་པའི་མཚན་ཉིད་ཐོབ་པའོ། །བདེ་བ་ནི་དེའི་དོན་བྱེད་པ་རྗེས་སུ་སྒྲུབ་པའི་མཚན་ཉིད་ཡོངས་སུ་སྐྱོང་བའོ། །གྲུབ་པ་དང་བདེ་བ་ཐ་མི་དད་པ་ནི་འདི་ཡིན་ནོ་ཞེས་དེ་བཞིན་དུ་བཤད་དོ། །དེ་ལ་རྣམ་པར་རྟོག་པ་དང་རྣམ་པར་མི་རྟོག་པ་མངོན་སུམ་ཐ་མི་དད་པ་གྲུབ་པ་ནི་རང་གི་མཚན་ཉིད་ལྷག་པར་ཞེན་པའོ། །ཐ་མི་དད་པའི་བདེ་བ་ནི་ལྟ་བའི་ཤེས་པ་ལ་སོགས་པ་སྒྲུབ་པའི་རྣམ་པར་རྟོག་པར་ཡང་རང་གི་མཚན་ཉིད་ཁོ་ན་ལ་འཇུག་གོ །འདིའི་དགོས་པ་ནི་འདི་ཡིན་ཏེ། གང་གི་ཚེ་རྟོགས་པ་དང་མི་རྟོགས་པའི་སེམས་གཞལ་བར་བྱ་བ་གཞན་གྱི་ཡུལ་ཡིན་པ་དེའི་ཚེ་དེ་ལ་སྐྱེས་བུ་འཇུག་ཅིང་བསྒྲུབ་པར་བྱ་བའི་དོན་བྱེད་པར་རྟོགས་པའམ་འཇུག་པ་ཉིད་ནི་མེད་དོ། །དེའི་ཡུལ་ཉིད་དུ་མངོན་པར་འདོད་པའི་སྤྱི་ཐ་མི་དད་པའི་ཤེས་པ་ཁོ་ནའི་དོན་བྱེད་པར་ཁས་བླངས་པས་རྣམ་པར་རྟོག་པ་སྐྱེ་བར་གྲུབ་པ་ཡིན་ནོ། །སྔོན་པོར་ཉམས་སུ་མྱོང་བ་ལས་གཞན་པའི་གཞལ་བྱ་སེར་པོ་ལ་སོགས་པའི་ཡུལ་གྱི་ཤེས་པས་ནི་སྔོན་པོའི་དངོས་པོ་ལ་སྐྱེས་བུ་འཇུག་པ་མ་ཡིན་ཏེ། སྒྲུབ་པར་བྱེད་པའི་དོན་བྱེད་པ་ཡང་འགའ་ཞིག་ཏུ་ཡིན་པའི་ཕྱིར་རོ། །དེའི་ཕྱིར་ལྟ་བའི་ཤེས་པ་ཉིད་གཞལ་བྱ་ལས་གཞན་གྱི་ཡུལ་གྱི་བྱེ་བྲག་ཅན་དག་ལ་དེ་བཞིན་བཤད་པ་ནི་རྣམ་པར་མི་རྟོག་པ་ཅན་ལས། །གཉིས་ཀྱི་བདག་ཉིད་དངོས་པོ་འཛིན་ཞེས་བྱ་བ་བཤད་པ་ནི་མ་ཡིན་ནོ། །དེའི་ཕྱིར་སྔོན་པོ་མཐོང་བ་ཁོ་ན་རྣམ་པར་མི་རྟོག་པའི་ཚད་མར་རིགས་སོ། །དེ་ཐ་མི་དད་པ་ལ་ཉེ་བར་སྦྱོར་བའི་དྲན་པའི་རྣམ་པར་རྟོག་པ་ཉིད་ཀྱང་མཐོང་བ་ལས་ཐ་དད་པ་ནི་མ་ཡིན་ཏེ། དེ་ལྟ་མ་ཡིན་ན་ཚད་མ་གཞན་དུ་རྟོག་པར་བྱེད་པ་ནི་འབྲས་བུ་མེད་དེ། དྲན་པ་དང༌། འདོད་པ་དང༌། སྡང་བ་དང༌། རྩོལ་བ་ལ་སོགས་པ་ཚད་མར་ཐལ་བར་འགྱུར་བས་ཚད་མ་འདི་ཙམ་ངེས་པ་རྣམ་པར་ཉམས་པར་འགྱུར་རོ། །གང་གི་ཚེ་སྔོན་པོ་ལ་སོགས་པའི་དངོས་
པོ་གཅིག་ལ་རྒྱུན་མི་འཆད་པར་དབང་པོའི་ཤེས་པ་སྐྱེ་བ་དེའི་ཚེ་སྔ་མ་དང་གྲུབ་པ་དང་བདེ་བ་ཐ་མི་དད་པའི་ཕྱིར་ཕྱི་མའི་དབང་པོའི་ཤེས་པ་རྣམས་ཚད་མ་མ་ཡིན་པར་ཐལ་བར་འགྱུར་བས་མ་ངེས་པ་ཡིན་ནོ་ཞེས་ཚད་མ་བསླད་པར་སྨྲ་བས་བསྟན་པ་ནི། གལ་ཏེ་མངོན་སུམ་སྔ་མ་དང་ཕྱི་མ་ཞེས་བྱ་བ་ལ་སོགས་པ་སྨོས་ཏེ། འདི་དག་གི་ལན་ནི་ཕྱི་མ་ཚད་མ་མ་ཡིན་པར་ཐལ་བར་མི་འགྱུར་ཏེ། གང་གི་ཕྱིར་དུ་མ་ལ་གྲུབ་པ་དང་བདེ་བ་ཐ་དད་པའི་ཕྱིར་རོ། །འདི་ལྟར་སྐད་ཅིག་མ་རེ་རེའི་ཡོངས་སུ་གཅོད་པའི་ཡུལ་གྱི་མཚན་ཉིད་ནི་གྲུབ་པའོ། །དེའི་དོན་བྱེད་པ་སྒྲུབ་པའི་མཚན་ཉིད་ནི་བདེ་བ་ཡོངས་སུ་སྐྱོང་བ་སྟེ་ངོ་བོ་ཐ་དད་པའོ། །དེའི་ཕྱིར་མི་མཐུན་པའི་ཕྱོགས་ལས་ལྡོག་པས་གཏན་ཚིགས་མ་ངེས་པ་མ་ཡིན་ནོ། །གང་གི་ཚེ་དུ་མ་གྲུབ་པ་དང་བདེ་བ་ཐ་དད་པ་ནི། སྐད་ཅིག་མའི་བྱེ་བྲག་གིས་བསྒྲུབ་པར་བྱ་བའི་དོན་དུ་འདོད་པ་ནའོ། །གང་གི་ཚེ་སྐད་ཅིག་མའི་བྱེ་བྲག་གིས་ཕན་པ་དང་མི་ཕན་པའི་མཚན་ཉིད་ཐོབ་པ་དང་ཡོངས་སུ་སྤོང་བར་འདོད་པའི་རྣལ་འབྱོར་པ་རྣམས་ནི་གཞན་པ་ལ་ཕན་པ་ཉེ་བར་བསྟན་པ་ཡིན་ཏེ། འགའ་ཞིག་གི་རྣམ་པ་འགས་ལ་ལར་ཉེ་བར་མཁོ་བ་ཡིན་པ་དེའི་ཚེའོ། །དཔེར་ན་མཐོང་བ་འདི་ལམ་གྱི་སྡུག་བསྔལ་ལ་ཆོས་ཤེས་པའི་བཟོད་པ་མཐོང་བས་བག་ལ་ཉལ་གྱི་བག་ཆགས་འགོག་པ་བཞིན་ནོ། །དེའི་གཞི་ལ་འགལ་བ་སྐྱེ་བའི་ཕྱིར་རོ། །སྡུག་བསྔལ་ལ་ཆོས་ཤེས་པ་ནི་ཉོན་མོངས་པས་དབེན་པའི་མྱ་ངན་ལས་འདས་པའི་མཚན་ཉིད་ཀྱི་ཐོབ་པ་སྐྱེད་པ་ཡིན་ནོ། །བག་ལ་ཉལ་དང་འགལ་བའི་རྟེན་ལ་བརྟན་པ་སྐྱེད་ནས། །དེས་དེ་དག་འཛིན་པ་ནི་གཞན་གྱི་སེམས་པ་ལ་ཐ་དད་བའི་ཚད་མ་ཡིན་ནོ། །གཞན་ལ་ཕན་པའི་སྦྱིན་པ་དང་དབང་བསྐུར་བ་དང་ལྡན་པ་དངོས་པོ་མ་ལུས་པ་རྒྱ་ཆེ་བ་ལ་ཁྱབ་པའི་སྣང་བ་ལ་གཟིགས་པ་ནང་གི་བདག་ཉིད་ཀྱི་བཅོམ་ལྡན་འདས་ནི་དོན་གྱི་སྐད་ཅིག་མ་འགའ་ཞིག་གིས་འགའ་ཞིག་གི་གཞན་གྱི་དོན་དུ་རྗེས་སུ་བཟུང་བའམ་འཆིང་བ་ཡིན་ནོ་ཞེས་བྱའོ། །དངོས་པོ་ཐམས་ཅད་ཀྱི་སྐད་ཅིག་མ་རེ་རེ་རྣམས་ཀྱི་མཚན་ཉིད་ལ་གཟིགས་པ་རྣམས་ཀྱི་མངོན་སུམ་གྱི་སེམས་དེའི་ཡུལ་སྐད་ཅིག་མ་རྣམས་ལ་ཐ་དད་པའི་དོན་བྱེད་པ་དང་བཅས་པར་ཉེ་བར་སྦྱོར་བའི་གྲུབ་པ་དང་བདེ་བ་ཐ་དད་པའི་ཕྱིར་རོ། །
དེ་གང་གི་ཚེ་མངོན་སུམ་རྣམས་སྐད་ཅིག་མ་ཐ་དད་པ་མཐོང་བའི་དབང་དུ་བྱས་པར་བརྗོད་པ་དེའི་ཚེ་ཐ་དད་པ་ལ་ཉེ་བ་སོ་སོ་བ་ཉིད་ལ་མ་ངེས་པ་མེད་དོ། །ཡང་ན་དོན་ཐམས་ཅད་གཅིག་ཏུ་བྱེད་པར་འདོད་པས་མངོན་པར་ཞེན་པ་ཐ་སྙད་དུ་བྱེད་པར་སྐྱེས་བུ་མངོན་པར་འདོད་པས་བརྗོད་ན། དེའི་ཚེ་མ་ལུས་པ་ཉིད་ཀྱིས་སྔོན་པོའི་རྒྱུན་གྱི་དོན་གཅིག་པ་དང༌། །བརྟེན་པའི་ངོ་བོར་བསྒྲུབ་པར་བྱ་བའི་དོན་གཅིག་པའི་བདག་ཉིད་དུ་མངོན་པར་ཞེན་པའི་ཕྱིར་ཕྱི་མ་ཡང་ཚད་མར་མི་འདོད་པས་མ་ངེས་པ་ག་ལ་ཡིན་ཅེས་བསྟན་པ་ནི་འབྲས་བུ་ཐུན་མོང་པ་ཞེས་བྱ་བ་སྨོས་ཏེ། དེ་རྒྱུན་དུ་གནས་པའི་སྐད་ཅིག་མ་ཐམས་ཅད་ལ་གཅིག་ཏུ་མངོན་པར་ཞེན་ནས་ཐ་སྙད་དུ་བྱེད་དོ། །གང་ཐུན་མོང་པའི་སྐད་ཅིག་རེ་རེ་ལ་ཕན་ཚུན་དུ་རྒྱུ་བྱེད་པས་ཐ་དད་དུ་ཚུག་ཀྱང་དོན་དམ་པར་ཕྱིན་ཅི་ལོག་པས་གཅིག་ཏུ་མངོན་པར་འདོད་པའི་འཆོས་པ་ལ་སོགས་པ་སྔོན་པོ་ལ་སོགས་པའི་འབྲས་བུའོ། །དེ་ལ་ཕྱི་མའི་ཤེས་པའི་སྐད་ཅིག་མ་དེ་དག་གི་མཐུས་དོན་ཐོབ་པར་བྱེད་པའི་ནུས་བ་ཐ་དད་པ་མེད་དོ། །མངོན་སུམ་སྔ་མའི་ཡུལ་གྱི་སྐད་ཅིག་མ་ཁོ་ན་ལ་དེ་རྣམས་འཇུག་པ་ན་དང་པོ་འདི་ཉིད་དེ་ལ་ཚད་མ་ཡིན་ནོ། །དེ་ལྟ་ན་དོན་བྱེད་པ་དོན་དུ་གཉེར་བ་རྣམས་དེ་སྒྲུབ་པར་བྱེད་པ་ཐོབ་པར་ནུས་པའི་ཤེས་པ་ཚད་མའི་ཐ་སྙད་དུ་བྱེད་དོ། །བློ་མ་ཉམས་པའི་དོན་བྱེད་པའི་སྒྲུབ་པར་བྱེད་པ་ཐ་དད་པ་ཉིད་ཀྱིས་ཚད་མ་ལས་ཐ་དད་པའི་ཐ་སྙད་ཤེས་པ་རྣམས་ལ་རིགས་སོ། །དེ་ལྟ་མ་ཡིན་ན་དྲན་པ་ལ་སོགས་པ་ཡང་ཚད་མར་ཐལ་བར་འགྱུར་བས་བསལ་བར་བྱ་བའམ་འབྲས་བུ་མེད་པའི་ཚད་མ་རྣམ་པར་འཇོག་པ་ལ་རྟོགས་པ་དང་ལྡན་པ་ཇི་ལྟར་གུས་པར་བྱེད། དེ་དག་ཐུན་མོང་གི་འབྲས་བུའི་ནུས་པ་ཐ་མི་དད་པ་གང་ཞིག་ཡིན་སྙམ་ན། དུ་བ་གཞན་དང་གཞན་གྱིས་ཞེས་བྱ་བ་སྨོས་ཏེ། དེའི་གཞལ་བར་བྱ་བ་མེ་དེ་དང་ཉེ་བ་དེ་རྣམས་ལ་དེའི་ཡུལ་ལྟ་བུ་རྗེས་སུ་དཔག་པའི་ཤེས་པས་མེ་ཙམ་བསྒྲུབ་པར་བྱ་བའི་དོན་ལ་འབར་བ་ལ་སོགས་པ་ལ་སུ་ཞིག་སླུ་བ་ཡིན། དེའི་དོན་བྱ་བ་སྒྲུབ་པར་བྱེད་པ་ཐོབ་པར་ནུས་པ་ཐ་དད་པ་མེད་པས་ཇི་ལྟར་ཚད་མ་ཐ་དད་པར་མཁས་པ་ལ་མི་རིགས་པ་དེ་བཞིན་དུ་འདིར་ཡང་ཡིན་ནོ། །གང་གི་ཚེ་གདུང་བ་ལྔ་པས་གདུང་བར་འདོད་པར་གྱུར་པ་དེའི་ཚེ་དུ་བ་གཞན་
དང་གཞན་གྱིས་གཞལ་བར་བྱ་བའི་མེ་དང་ཉེ་བའི་ཡུལ་ལ་ཡང་རྗེས་སུ་དཔག་པའི་ནུས་པ་ཐ་དད་པའི་ཚད་མ་བསལ་བར་མི་ནུས་སོ། །དེ་ལྟར་ན་ཇི་ལྟར་སྔོན་པོ་མཐོན་ནས་སྔོན་པོའོ་སྙམ་པའི་ཤེས་པ་ཞེས་བྱ་བའི་དཔེས་སྔོན་པོའི་རྣམ་པར་རྟོག་པ་ཚད་མ་ཡིན་པ་བསལ་ནས་རྣལ་མའི་དོན་ལ་ཉེ་བར་སྦྱོར་བ། འདིས་ནི་ཞེས་བྱ་བ་སྨོས་ཏེ། སྔོན་པོའི་རང་གི་མཚན་ཉིད་མཐོང་བའི་དུས་ཕྱིས་བྱུང་བའི་སྔོན་པོའི་རྣམ་པར་རྟོག་པ་ཚད་མ་བསལ་བ་ཉིད་དོ། །དེ་མིན་འདོད་བའི་ཕྱིར་རྣམ་པར་རྟོག་པ་ལ་ཡང་དོན་གྱིས་ཕན་འདོགས་སོ་ཞེས་གཞོན་ནུ་མ་ལེན་གྱིས་སྨྲས་པ་ན། ཕྱོགས་ལ་སོགས་པ་མཐོང་བའི་དུས་ཕྱིས་བྱུང་བ་ཆོས་ཅན་གྱི་རྣམ་པར་རྟོག་པ་དང༌། དེ་དང་འབྲེལ་པ་རྟོགས་པའི་དུས་སུ་མེའི་རང་གི་མཚན་ཉིད་མཐོང་བའི་དུས་ཕྱིས་བྱུང་བའི་མེའི་སྤྱིའི་ཡུལ་ལ་བསྒྲུབ་བྱའི་ཆོས་ཀྱི་རྣམ་པར་རྟོག་པ་དང༌། དུ་བ་མཐོང་བའི་ཤེས་པའི་རྗེས་ལས་བྱུང་བའི་སྤྱི་སྣང་བའི་རྟགས་ཀྱིས་རྣམ་པར་རྟོག་པ་དང༌། སོགས་པ་སྨོས་པས་ཆོས་དང་ཆོས་ཅན་གྱི་འབྲེལ་པའི་རྣམ་པར་རྟོག་པ་དང་ཚད་མའི་རྗེས་ལས་བྱུང་བའི་ཆོས་ལ་སོགས་པའོ། །རང་གི་ངོ་བོ་ཙམ་གྱི་ཡུལ་ལ་ལྟ་བའི་མིང་ཅན་གྱི་མངོན་སུམ་དུ་སོང་བ་ཡིན་གྱི་རྣམ་པར་རྟོག་པ་མེད་པ་ནི་རྟགས་དང་ཆོས་ཅན་གྱི་འབྲེལ་པ་དེ་བཞིན་དུ་མི་འཛིན་ནོ་སྙམ་པའི་འཇིགས་པས་ཚད་མར་ཁས་བླངས་པ་གང་ཡིན་པ་དེ་བསལ་བ་ནི་སྤངས་པ་ཡིན་ནོ། །སྔ་མ་རང་གི་མཚན་ཉིད་ཀྱི་ཡུལ་མཐོང་བ་གང་ཡིན་པ་ལ་གཞན་གྱི་ལྟ་བའི་ཤེས་པ་ཞེས་ཐ་སྙད་བྱེད་པ་དེ་ཉིད་ཚད་མ་ཡིན་གྱི། དེའི་སྟོབས་ལས་བྱུང་བའི་རྣམ་པར་རྟོག་པ་ནི་མ་ཡིན་ཏེ། ཇི་སྐད་བཤད་པའི་རིགས་པས་དེ་དག་ལེགས་པར་གནས་སོ། །ཕྱོགས་ཀྱི་ཆོས་དང་བསྒྲུབ་པར་བྱ་བའི་ཆོས་ཅན་མངོན་སུམ་དང་རྗེས་སུ་དཔག་པས་གྲུབ་པར་ངེས་པའི་ཕྱིར་རོ། །དེ་ཉིད་ཀྱིས་མངོན་སུམ་གྱི་ཕྱོགས་ཀྱི་ཆོས་ངེས་པར་བརྗོད་པས་ཞར་ལ་མཐོང་བའི་རྗེས་ལས་བྱུང་བའི་རྣམ་པར་རྟོག་པ་ཚད་མ་ཡིན་པ་བསལ་བས་མངོན་སུམ་མ་རྟོགས་པ་དང་བྲལ་ཞིང་མ་འཁྲུལ་བ་ཡིན་བར་བསྟན་ཏོ། །གལ་ཏེ་དེ་ལྟ་ན་ཅིའི་ཕྱིར་རྗེས་སུ་དཔག་པ་བསྟན་པའི་ཕྱིར་འདི་ཙམ་པ་ཡིན་གྱི་ཡང་དག་པའི་ཤེས་པ་བསྟན་པའི་ཕྱིར་ཞེས་ཐུན་མོང་དུ་མ་ཡིན་ནོ་ཞེ་ན། གྲངས་ལ་
སོགས་པ་ལ་ལོག་པར་རྟོག་པ་ཉིད་བསལ་བས་ཀྱང་འདིར་དེའི་ཡུལ་ཡང་བསལ་བ་ཡིན་ཏེ། ལྐོག་ཏུ་གྱུར་པ་རྟོགས་པ་ནི་རྗེས་སུ་དཔག་པ་ལ་བརྟེན་པ་ཡིན་ནོ། །ཅིའི་ཕྱིར་ཞེ་ན། ཕྱོགས་ཆོས་ཁོ་ན་དང༌། དེའི་ཆས་ཁྱབ་བ་ཉིད་དང༌། གཏན་ཚིགས་དང་རྒྱུ་མཚན་དང་དེ་ལས་གཞན་མ་ཡིན་ནོ་ཞེས་བརྗོད་པས་ལྐོག་ཏུ་གྱུར་པའི་དོན་གྱི་ཡུལ་ཅན་གྱི་ཚད་མ་ཐམས་ཅད་རྗེས་སུ་དཔག་པའི་ནང་དུ་འདུས་པས་གྲངས་ལ་ལོག་པར་རྟོག་པ་བསལ་བས་ནི་ཡང་དག་པའི་ཤེས་པའི་ཡུལ་ལ་ལོག་པར་རྟོག་བ་བསལ་ཏོ། །དེ་ལྟར་ཁྱབ་པར་བྱེད་པའི་ཆ་གོ་བར་བྱ་བར་རྟོགས་པས་དེའི་ཆས་ཁྱབ་པར་བརྗོད་པས་རྗེས་སུ་དཔག་པའི་ཡུལ་ནི་སྤྱི་ཡིན་ལ་མངོན་སུམ་གྱི་ཡུལ་ནི་རང་གི་མཚན་ཉིད་ཡིན་ནོ་ཞེས་བསྟན་པར་འགྱུར་ཏེ། དེ་ཐུན་མོང་ཡིན་པའི་ཕྱིར་རོ། །ཐུན་མོང་མ་ཡིན་པ་ཡིན་ན་ཡང་ཁྱབ་པར་བྱེད་པར་མི་རིགས་པའི་ཕྱིར་དང༌། རྣམ་པར་རྟོག་པའི་ཡུལ་ཡིན་པའི་ཕྱིར་རོ། །དེ་ལ་དང་པོར་ཐུན་མོང་མ་ཡིན་པའི་ཡུལ་ཡིན་ནོ་ཞེས་བརྗོད་པས་རང་གི་མཚན་ཉིད་མངོན་སུམ་གྱི་ཡུལ་ཁོ་ནར་བཤད་དོ། །མཐོང་བ་ཉིད་ཚད་མ་ཡིན་ནོ་ཞེས་བྱ་བ་བཤད་པས་ཚད་མའི་འབྲས་བུ་ཉིད་བསྟན་པ་ཡིན་ཏེ། དེ་ནི་དོན་རྟོགས་པའི་ངོ་བོ་ཡིན་པའི་ཕྱིར་དང༌། དེ་བཞིན་དུ་དེའི་ངོ་བོ་ཡིན་པའི་ཕྱིར་རོ། །དེ་བཞིན་དུ་དེའི་སྦྱོར་བ་རྣམ་པ་གཉིས་བསྟན་པར་བྱ་བའི་ཕྱིར་གཞན་གྱི་དོན་གྱི་རྗེས་སུ་དཔག་པ་བཤད་པར་བྱ་བ་ཡིན་ཏེ། དེའི་ཚུལ་གསུམ་པའི་རྟགས་བཤད་པའི་ངོ་བོ་ཡིན་པའི་ཕྱིར་རོ། །མདོར་བསྡུས་ནས་རྗེས་སུ་དཔག་པ་བསྟན་པར་འདོད་པ་ཡིན་ན་དེ་ཡང་ཐམས་ཅད་ཀྱང་ཡོད་པའི་ཕྱིར་ན་འདིར་ཅིའི་ཕྱིར་རྗེས་སུ་དཔག་བ་བསྟན་པའི་ཕྱིར་ཞེས་བཤད་པར་བྱ་ཞེ་ན། བདེན་ན་གཙོ་བོ་ཡིན་པའི་ཕྱིར་དེ་སྨོས་སོ། །འདི་ལྟར་གཙོ་བོ་ནི་སྐྱེས་བུ་ལ་ཉེ་བར་མཁོ་བའི་དེ་ཁོ་ན་ཉིད་འཕགས་པའི་བདེན་པ་བཞིའི་རྗེས་སུ་དཔག་པ་ཁོ་ནས་ངེས་པ་ཡིན་པ་དེ་གཙོ་བོ་ཡིན་ནོ། །དེ་ལྟར་མངོན་སུམ་གྱི་ཡུལ་ལ་ཡང་སླུ་བ་སྲིད་པས་རྗེས་སུ་དཔག་པ་གཞན་གཏན་ལ་འབེབས་པའི་རྒྱུ་མཚན་ཡིན་པ་དེའི་ཕྱིར་དེ་གཙོ་བོ་ཡིན་པ་དང་འཇུག་པར་བྱེད་པ་ཡིན་པ་འདིའི་གཙོ་བོ་ཡིན་ནོ། །དེ་ལྟ་ན་ཡང་གང་ཉམས་སུ་མྱོང་བའི་འབྲས་བུ་བདེ་
བ་དང་སྡུག་བསྔལ་སྒྲུབ་པར་བྱེད་པའམ་ཉམས་སུ་མྱོང་བར་གྱུར་པ་འབྲས་བུ་མཐོང་བ་ལ་དེ་འཇུག་པའི་ཡུལ་མ་ཡིན་ཏེ། འབྲས་བུ་གྲུབ་པའི་ཕྱིར་རོ། །དེའི་ཕྱིར་གང་མ་འོངས་པའི་འབྲས་བུ་བདེ་བ་དང་སྡུག་བསྔལ་སྒྲུབ་པར་བྱེད་པའི་མངོན་སུམ་དེ་ལ་ཡང་རྗེས་སུ་དཔག་པ་ཁོ་ན་རབ་ཏུ་འཇུག་གོ།། དེ་མ་འོངས་པའི་བདེ་བ་དང་སྡུག་བསྔལ་དུ་རུང་བ་ཉིད་ནི་མངོན་སུམ་གྱིས་ངེས་པ་མ་ཡིན་ཏེ། འབྲས་བུ་ལྐོག་ཏུ་གྱུར་པའི་ཕྱིར་རོ། །དེ་སྐད་དུ། མངོན་སུམ་མ་ཡིན་པའི་རྒྱུ་ལས་འབྲས་བུ་དངོས་པོ་མི་རྟོགས་སོ་ཞེས་བཤད་དོ། །དེའི་ཕྱིར་སྔར་ཉམས་སུ་མྱོང་བའི་བདེ་བ་དང་སྡུག་བསྔལ་སྒྲུབ་པར་བྱེད་པ་དང་ཆོས་མཐུན་པ་མངོན་སུམ་གྱི་ཡུལ་ཡིན་དུ་ཟིན་ཀྱང་མ་འོངས་པའི་དངོས་པོ་རུང་བ་མངོན་སུམ་གྱིས་ངེས་པར་མི་ནུས་སོ། །དེ་སྐད་དུ། དཔེར་ན་མཐོང་བ་དང་ཆོས་མཐུན་པ་དེ་བཞིན་དུ་སྒྲུབ་པར་བྱེད་པའི་རྗེས་སུ་དཔག་པ་དེ་ཉིད་ཐོབ་བོ་ཞེས་བྱ་བ་སྨོས་སོ། །དེ་ལྟ་ན་གཉི་ག་ཡང་འཇུག་པར་བྱེད་པ་ཉིད་དེ་གཉི་གས་དོན་ཡོངས་སུ་བཅད་ནས་འཇུག་གོ་ཞེས་བཤད་པ་ཇི་ལྟར་ཡིན་ཞེ་ན། བདེ་བ་དང་སྡུག་བསྔལ་སྒྲུབ་པར་བྱེད་པ་མེ་དང་ཆུ་ལ་སོགས་པ་རང་གི་ངོ་བོ་མངོན་སུམ་དུ་གྲུབ་ལ་མ་འོངས་པའི་འབྲས་བུ་རུང་བའི་ཡུལ་ནི་རྗེས་སུ་དཔག་པས་ཡིན་པའི་ཕྱིར་གཉི་ག་ཡང་འཇུག་པར་བྱེད་པ་དང༌། ཡང་དག་པའི་ཤེས་པ་སྔོན་དུ་སོང་བ་ཉིད་ཕན་པ་དང་མི་ཕན་པ་ཐོབ་པ་དང་ཡོངས་སུ་སྤངས་པ་དག་ལ་མ་འོངས་པའི་འབྲས་བུའི་རུང་བའི་ཡུལ་ལ་མངོན་སུམ་གྱིས་ངེས་པ་མ་ཡིན་ནོ་ཞེས་བཤད་ཟིན་ཏོ། །ཚུ་རོལ་མཐོང་བས་མ་འོངས་པའི་འདྲས་བུ་རུང་བ་ངེས་པ་དེའི་ཕྱིར་རྗེས་སུ་དཔག་པ་གཙོ་བོ་ཡིན་པས་དེ་སྨོས་སོ་ཞེས་བྱ་བ་སྤྲོས་པས་ཆོག་པས་རྒྱ་ཆེར་མི་སྦྱར་རོ། །དེ་ལ་རང་བཞིན་མི་དམིགས་པ་དང༌། འབྲས་བུའི་ཕྱོགས་ཀྱི་ཆོས་ངེས་པའི་བསྒྲུབ་པར་བྱ་བའི་ཐབས་མཚུངས་པས་ཐ་མི་དད་པར་བཤད་དོ། །རྗེས་སུ་འགྲོ་བ་དང་ལྡོག་པ་ངེས་པ་ཡང་བསྒྲུབ་པར་བྱ་བའི་ཐབས་ཐ་དད་པས་ཐ་དད་པར་བསྟན་པ་འབྲས་བུ་ཡིན་ནོ། །རེ་ཞིག་རང་བཞིན་གྱི་གཏན་ཚིགས་ཀྱི་རྗེས་སུ་འགྲོ་བ་ངེས་པར་རང་གི་ཚད་མས་རྒྱུ་མཚན་བསྟན་པ་ནི། རྗེས་སུ་འགྲོ་བ་ངེས་པ་ཡང་ཞེས་བྱ་བ་སྨོས་ཏེ། ཕྱོགས་ཀྱི་ཆོས་ངེས་པ་འབའ་ཞིག་བསྟན་པ་ནི་
མ་ཡིན་ནོ། །འོན་ཏེ་རྗེས་སུ་འགྲོ་བ་ངེས་པ་གང་ཡིན་པ་ཡང་རང་བཞིན་གྱི་གཏན་ཚིགས་ལ་བརྗོད་དོ་ཞེས་བྱ་བ་ལྷག་མའོ། །སྒྲུབ་པར་བྱེད་པའི་ཆོས་ཀྱི་ཡོད་པ་ཙམ་ནི་ཐོབ་པ་ལ་སོགས་པ་རྒྱུ་མཚན་གཞན་ལ་ལྟོས་པ་མ་ཡིན་ནོ། །དེ་དང་རྗེས་སུ་འབྲེལ་པའི་རྗེས་སུ་འགྲོ་བའི་ཁྱབ་པ་དེ་གྲུབ་པ་གང་ཡིན་པ་དེ་ནི་རང་ཞིན་གྱི་གཏན་ཚིགས་ཀྱི་འབྲེལ་བ་ངེས་པའོ། །སྒྲུབ་པར་བྱེད་པའི་ཆོས་ཀྱི་དངོས་པོ་ཙམ་དང་འབྲེལ་པར་སུ་ཞིག་ལ་གྲུབ་ཅེ་ན། བསྒྲུབ་པར་བྱ་བའི་ཆོས་དང་ངོ༌། །བསྒྲུབ་པར་བྱ་བ་ནི་འདིར་ཆོས་དང་ཆོས་ཅན་གྱི་སྤྱིའི་ཕྱོགས་གཅིག་ཡིན་པའི་ཕྱིར་ཆོས་ཡིན་ནོ་ཞེས་བྱ་བ་དེ་བཞིན་བཤད་དོ། །གང་དང་གང་ལ་སྒྲུབ་པར་བྱེད་པའི་ཆོས་ཡོད་པ་དེ་དང་དེ་ལ་བསྒྲུབ་པར་བྱ་བའི་ཆོས་ཀྱང་རྒྱུ་མཚན་གཞན་ལ་མི་ལྟོས་པར་ཡོད་པའི་ཕྱིར་དོན་དེ་ནི་རང་བཞིན་གྱི་གཏན་ཚིགས་ཀྱི་རྗེས་སུ་འགྲོ་བ་ངེས་པར་གྲུབ་པ་ཡིན་ནོ། །ཇི་ལྟར་བསྒྲུབ་པར་བྱ་བའི་ཆོས་དང་སྒྲུབ་པར་བྱེད་པའི་ཆོས་ཡོད་པ་ཙམ་ལ་རག་ལས་པ་ཡང་ཡིན་ཞེ་ན་དེ་ཡོང་པ་ན་སྒྲུབ་པར་བྱེད་པའི་ཆོས་དེ་ཡོད་པ་ནི་འདིའི་རང་བཞིན་ཡིན་ཏེ་དེ་ཡོད་པ་དེས་དེ་ཡོད་པ་ཡིན་པས་སོ། །གང་གི་ཚེ་སྒྲུབ་པར་བྱེད་པའི་ཆོས་དང་བསྒྲུབ་པར་བྱ་བའི་ཆོས་དེའི་རང་བཞིན་གྱིས་དེ་ཙམ་དང་འབྲེལ་བ་ཇི་ལྟར་ཡིན་ཞེ་ན། རང་བཞིན་མེད་པར་ཐལ་བར་འགྱུར་བའི་ཕྱིར་རོ། །འོ་ན་ནི་དེའི་རང་བཞིན་ཐ་མི་དད་པའི་ཕྱིར་ཇི་ལྟར་བསྒྲུབ་པར་བྱ་བ་དང་སྒྲུབ་པར་བྱེད་པ་ཡིན་ཞེ་ན། དངོས་སུ་ན་ཞེས་བྱ་བ་སྨོས་ཏེ། དོན་དམ་པར་རོ། །བསྒྲུབ་པར་བྱ་བ་དང་སྒྲུབ་པར་བྱེད་པའི་རྣམ་པར་རྟོག་པའི་དུས་སུ་དེ་མ་ཡིན་པ་ལས་ཕན་ཚུན་ལྡོག་པའི་དོན་གྱི་རྒྱུ་མཚན་རྟོག་པ་ཅན་གྱི་བློ་ཐ་དད་པར་སྣང་བས་བསྒྲུབ་པར་བྱ་བ་དང༌། སྒྲུབ་པར་བྱེད་པ་ལ་ཉམས་པ་མེད་དོ། །འདི་དོན་དམ་པར་ན་སྒྲུབ་པར་བྱེད་པ་དང་བསྒྲུབ་པར་བྱ་བའི་ཆོས་དང་ཆོས་ཅན་དང་བྱས་པ་ལ་སོགས་པ་ཐ་དད་པར་དམིགས་པར་བྱ་བ་མེད་དེ། འབྲེལ་པ་མེད་པས་བསྒྲུབ་པར་བྱ་བ་དང་སྒྲུབ་པར་བྱེད་པ་མི་རིགས་པའི་ཕྱིར་རོ། །གལ་ཏེ་བྱས་པ་དང་མི་རྟག་པ་ལ་སོགས་པ་ལ་འདུ་བའི་འབྲེལ་པ་ཡིན་ནོ་ཞེ་ན། མ་ཡིན་ཏེ། དེ་ཡང་དོན་གཞན་ལ་འདིས་དོན་འདི་ལ་འདུ་བ་ཞེས་བྱ་བ་འབྲེལ་པ་མེད་པར་འགྱུར་བ་དེའི་གནས་སྐབས་ཡིན་པར་འབྲེལ་པ་གཞན་བརྟག་
དགོས་པས་ཐུག་པ་མེད་བར་ཐལ་བར་འགྱུར་བ་དང༌། འདུ་བའི་ཡོད་པར་བརྟག་ན་ནི་བྱས་བ་ལ་སོགས་པ་རྟག་པ་དང་བདག་ལ་སོགས་པ་འདོད་ན་འང་འགྱུར་རོ། །གང་བྱས་པ་ཉིད་ལ་སོགས་བ་སྒྲ་ཁོ་ན་ལ་འདུ་བ་སྟོབས་གང་ཡིན་བས་དེ་ཉིད་ལ་འཇུག་པར་འགྱུར་ན། དེ་ཉིད་རྟག་པ་མངོན་པར་འདོད་པ་རྣམས་ལ་ཡང་གཅིག་པ་ཉིད་དུ་ཁས་ལེན་པའི་ཕྱིར་བྱས་པ་ལ་སོགས་པ་བདག་ལ་སོགས་པ་འཇུག་པ་གང་གིས་ན་བསལ་བར་ནུས། འོན་ཏེ་གང་མ་བྱུང་བ་ལས་བྱུང་བའི་ཆོས་དང་བྱུང་ནས་ཀྱང་མེད་པའི་ཆོས་ནི་མི་བརྟན་པའི་ངོ་བོར་ཡོད་པ་དེ་ཉིད་ལ་བྱས་པ་ལ་སོགས་པ་འཇུག་གོ་ཞེས་རྣམ་པར་གཞག་གོ་ཞེ་ན། དེ་ལྟ་ན་དེ་ཉིད་མ་བྱུང་བ་ལས་བྱུང་བ་རང་བཞིན་ནམ་བྱུང་ཟིན་པ་མི་བརྟེན་པའི་དངོས་པོ་ཉིད་ལ་དེ་ཕྱིན་ཅི་ལོག་ཏུ་སྒྲོ་འདོགས་པ་རྣམ་པར་གཅད་པའི་ཡུལ་ཅན་གྱི་རྣམ་པར་རྟོག་པའི་བློ་རྒྱུ་མཚན་དུ་ཅི་སྟེ་མི་འདོད། དེ་ཉིད་ཀྱིས་དོན་དམ་པར་ཐ་མི་དད་པ་དང་ལྡན་པའི་ཆོས་དང་ཆོས་ཅན་འཇུག་ན་བར་དུ་ལྷག་པས་ཅི་ཞིག་བྱ། བྱས་པའི་ཕྱིར་ཞེས་བྱ་བ་ལ་སོགས་པ་ལྡོག་པ་དང་ལྡན་པ་ནི་ཁས་བླངས་དགོས་སོ། །དེ་ལྟ་ན། ཡོད་པ་ཙམ་གྱིས་བྱས་པའི་ཕྱིར། །ཞེས་བྱ་བ་ལ་སོགས་པའི་ཆོས་ཀྱི་བསྒྲུབ་པར་བྱ་བའི་ཆོས་རྟོགས་པའི་རྒྱུ་མཚན་མ་ཡིན་ནོ། །དེ་དག་རྟག་དུ་ཉེ་བ་ཉིད་ཀྱིས་གཏན་ཏུ་དེའི་ཆོས་རྟོགས་པར་ཐལ་བར་འགྱུར་རོ། །འོན་ཀྱང་རྣམ་པར་རྟོག་པའི་སྣང་བ་ཁོ་ན་སྟེ། དེ་ཡང་རྣམ་པར་རྟོག་པའི་རང་གི་སྣང་བ་ཉིད་ཀྱི་རྣམ་པ་ཕྱི་རོལ་དངོས་པོ་ལྟ་བུར་མངོན་པར་ཞེན་པའི་རྗེས་སུ་འབྲངས་ནས་བྱས་པས་མི་རྟག་པ་ལ་སོགས་པའི་དངོས་པོའི་ངོ་བོ་རྟོགས་པར་བྱེད་ཀྱི། དོན་དམ་པར་ན་རེག་པ་མེད་ཀྱང་དེའི་ངོ་བོ་བརྒྱུད་པས་དེའི་རྒྱུ་ཡིན་པའི་ཕྱིར་རོ། །ལྡོག་པའི་ཆོས་ཀྱང་དེ་སྐྱེ་བའི་རྒྱུ་མཚན་ཙམ་གྱིས་ཡོངས་སུ་བརྟག་པར་བྱ་བ་ཡིན་ནོ། །དེ་རྣམ་པར་རྟོག་པའི་རྒྱུ་མཚན་གང་ཡིན་པ་དེ་ཉིད་རྣམ་པར་རྟོག་པ་སྐྱེ་བའི་རྒྱུ་མཚན་དུ་ཡོད་པ་དེ་མཆོག་ཡིན་པས་གདོན་མི་ཟ་བར་ཁས་བླངས་བར་བྱ་བའི་ཕྱིར་དང༌། ལྡོག་པ་དང་ལྡན་པས་ཆོས་གྲུབ་ཟིན་པའི་དོན་དུ་ཁས་བླང་བའི་ཕྱིར་དེ་བརྟགས་པས་ཆོག་གོ །གདོན་མི་ཟ་བར་མི་རྟག་པ་ཐ་དད་པའི་སྒོ་ནས་ཀྱང་དངོས་པོ་ཁོ་ན་ལ་གནས་པའི་བདག་ཉིད་དུ་རྟོགས་པར་
བྱ་བ་ཡིན་ཏེ། དེ་དང་རྗེས་སུ་མཐུན་པ་དོན་བྱེད་པ་དོན་དུ་གཉེར་བ་རབ་ཏུ་འཇུག་པའི་ཕྱིར་རོ། །གཞན་དུ་ན་མི་རྟག་པ་ལས་ཐ་དད་པའི་རྟག་པ་ཡིན་པའི་ཕྱིར་དེ་ཁོང་དུ་ཆུང་བ་དོན་དུ་གཉེར་བ་སྒྲ་འདི་མི་རྟག་པར་བསྒྲུབ་པར་བྱ་བ་དོན་བྱེད་པ་དོན་དུ་གཉེར་བས་སྒྲ་རྟག་པ་ལ་སོགས་པར་བསམས་ནས་ཅི་མི་རྟག་པ་ཕན་བ་མེད་པ་དཔྱོད་པར་བྱེད་དམ། གལ་ཏེ་རྟག་པ་ལ་ཡང་མི་རྟག་པ་ཁོང་དུ་ཆུད་པས་དེ་ཉིད་ལ་འཇུག་ཏེ་ཅིས་ན་སྒྲ་མི་རྟག་པའི་བདག་ཉིད་ཡིན། དེའི་སྒོ་ནས་རབ་ཏུ་རྟོགས་སོ་ཞེ་ན། །ཅི་བར་དུ་གཅོད་པ་འདིས་ཅི་ཞིག་བྱ། བར་དུ་གཅོད་པ་མེད་པ་ཁོ་ནས་རྟོགས་པ་ཡོང་ན་མཛེས་ཏེ། དེ་ཉིད་དོན་དུ་གཉེར་བའི་ཕྱིར་རོ། །དེ་འདིར་ཤིན་ཏུ་སྤྲོས་པ་ནི་ཡོངས་སུ་རྫོགས་པར་དཀའ་བས་ཆོག་གོ །རྒྱལ་དཔོག་པ་གང་དག་གིས་བསམས་པ། གང་དག་ཤིན་ཏུ་ཐ་དད་པ་དང་ལྡན་པའི་ཆོས་དེ་དག་ཉིད་འདི་ནི་རིགས་པ་ཅན་ལ་སོགས་པ་ལ་སྐྱོན་ཡིན་གྱི་ཁོ་བོ་ཅག་རྣམ་པ་འགས་ཐ་དད་པ་དང༌། ཐ་མི་དད་པ་དང་ལྡན་པའི་ཆོས་རྣམས་ཀྱི་རང་བཞིན་ལ་སྐྱོན་མེད་དོ་ཞེ་ན། དེ་དག་ཀྱང་དངོས་པོའི་ངོ་བོ་སྒྲུབ་པར་བྱེད་པའི་ཆོས་ཀྱི་ངོ་བོ་ཁས་བླངས་ནས་བསྒྲུབ་པར་བྱ་བ་ཆོས་རྣམ་པ་འགའ་ཞིག་ཐ་དད་པར་ཁས་བླངས་པའི་འབྲས་བུ་ཅུང་ཟད་ཅིག་ཉེ་བར་མ་མཐོང་སྟེ། བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་ནི་རྣམ་པར་རྟོག་པ་ཐ་དད་པའི་སྒོ་ནས་འཐད་པ་ཡང་ཡིན་ནོ། །བདག་ཉིད་གཅིག་པ་ལ་རྣམ་པ་འགའ་ཞིག་ཐ་དད་པ་ནི་རིགས་པ་མ་ཡིན་ཏེ། རང་བཞིན་གཅིག་པ་ལ་ཐ་མི་དད་པའི་ཕྱིར་རོ། །གལ་ཏེ་དེ་ལས་ཀྱང་དེ་དག་རྣམ་པ་འགའ་ཞིག་གིས་ཐ་དད་པ་དང་ཐ་མི་དད་པ་དེ་ཉིད་ཡིན་ནོ་ཞེ་ན། མ་ཡིན་ཏེ། ཐུག་པ་མེད་པར་ཐལ་བར་འགྱུར་བའི་ཕྱིར་རོ། །དེ་ལྟ་ན་ཆོས་དེ་དག་གི་རང་བཞིན་གཅིག་པ་ཡིན་དུ་ཟིན་ཀྱང་ཐ་དད་པ་ལྡན་པ་དེས་ན་རང་བཞིན་གྱིས་རྣམ་པ་འགའ་ཞིག་ཐ་མི་དད་པའི་རྒྱུ་མཚན་ནི་ཐ་མི་དད་པ་གཞན་པ་ཞིག་གི་རང་བཞིན་ཁས་བླང་བར་བྱ་དགོས་ཏེ། དེ་བཞིན་དུ་དེ་ལས་གཞན་པ་ཡིན་ནོ་ཞེས་ཐ་དད་པ་དང་ཐ་མི་དད་པ་མཐའ་ཡས་པའི་རང་བཞིན་བརྒྱུད་པ་བློས་བརྟགས་སུ་ཟིན་ཀྱང༌། གཉིས་གའི་ངོ་བོ་མཐའ་ཡས་པའི་རང་བཞིན་བརྒྱུད་པ་སྣང་བ་ནི་མེད་པའི་ཕྱིར་
དེ་བཏགས་པས་བདག་ཉིད་ཅི་སླུ་བར་བྱེད་དམ། ཁྱད་རྣམ་པ་འགས་ཐ་དད་པ་ཁས་བླངས་པས་ན་ཐ་དད་པའི་ཕྱོགས་རྣམས་ཀྱི་ཇི་ལྟར་སྐྱོན་གྱི་གནས་སྐབས་མེད་པ་ཡིན། གང་བདག་ཉིད་ཀྱི་མདུན་ན་གནས་པ་ལ་འདི་ཆོས་སོ་འདི་ཆོས་ཅན་ནོ་ཞེས་རྣམ་པར་གཞག་པར་བྱའོ། །གལ་ཏེ་དེས་ཐ་དད་པ་དེ་ནི་ཐ་དད་པ་ཁོ་ན་ཡིན་པའི་ཕྱིར་མ་ངེས་པར་རྩོད་པ་ག་ལ་ཡིན། འོན་ཏེ་ཐ་མི་དད་ན་འདི་སྒྲུབ་པར་བྱེད་པའི་ཆོས་སམ་འདི་བསྒྲུབ་པར་བྱ་བའི་ཆོས་སམ་འདི་ནི་ཆོས་ཅན་ཞེས་ཐ་དད་པ་དེ་ཇི་ལྟར་དོན་དམ་པར་རྣམ་པ་གསུམ་འགྲུབ་པ་ཡིན། དེའི་ཕྱིར་དེ་དང་དེ་ལས་གཞན་པའི་ངོ་བོ་ལྡོག་པའི་བརྟེན་པ་ནི་བློས་བརྟགས་ནས་ཐ་དད་པ་དང་ལྡན་པ་ལྟ་བུའི་ཆོས་དང་ཆོས་ཅན་དུ་སྣང་བས་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་དེ་ཙམ་དང་རྗེས་སུ་འབྲེལ་པའི་དངོས་པོ་དེ་དང་དེའི་རང་བཞིན་ཡིན་པར་རིགས་སོ་སྙམ་དུ་བསམས་པའོ། །དེའི་དངོས་པོ་ནི་ངོ་བོའི་ཚིག་གིས་བཤད་དོ། །འདིར་ཡང་དངོས་པོ་དེ་ངོ་བོ་གང་དང་གང་གི་རྒྱུ་ལས་བྱུང་བ་བསྒྲུབ་པར་བྱ་བའི་ཆོས་དང༌། སྒྲུབ་པར་བྱེད་པའི་ཆོས་ཀྱི་ངོ་བོ་ཙམ་དང་རྗེས་སུ་འབྲེལ་པ་སུ་ཞིག་ཡིན་ཞེ་ན། སྒྲུབ་པ་ཞེས་བྱ་བ་སྨོས་སོ། །དེ་ནི་དངོས་སུ་དེའི་རང་བཞིན་ཡིན་པ་བསྒྲུབ་པར་བྱ་བ་ལས་ལྡོག་པའི་མི་མཐུན་པའི་ཕྱོགས་དེ་ལ་གཏན་ཚིགས་ཀྱི་གནོད་པར་བྱེད་པའི་ཚད་མ་གང་ཡིན་པ་དེས་བཟློག་པའི་ཆོས་དང་མི་མཐུན་པར་འཇོག་པའོ། །གང་གིས་བསྒྲུབ་པར་བྱ་བའི་གཏན་ཚིགས་དེ་ལ་མི་འཇུག་སྟེ་འགལ་བ་གཉིས་གཅིག་ལ་ལྷན་ཅིག་པར་མི་སྲིད་པས་དེ་ལ་འཇུག་པ་ནི་གནོད་པ་ཅན་གྱི་ཚད་མ་རབ་ཏུ་འཇུག་པ་དང༌། བསྒྲུབ་པར་བྱ་བ་ཉིད་ཀྱི་དངོས་སུ་དེའི་རང་བཞིན་ཡིན་པས་གནོད་པ་ཅན་གྱི་ཚད་མ་འཇུག་པ་བཤད་དོ། །དེའི་མི་མཐུན་པའི་ཕྱོགས་ལ་གཏན་ཚིགས་ལྡོག་པ་ཡོད་པ་ནི། །བསྒྲུབ་པར་བྱ་བའི་ཆོས་ཅན་ལ་འཇུག་པའི་ཕྱིར་བསྒྲུབ་པར་བྱ་བའི་ཆོས་ཅན་ལ་དོན་གཞན་ལ་མེད་པའི་སྒྲུབ་པར་བྱེད་པའི་ཆོས་ནི་རང་བཞིན་དུ་གྲུབ་བོ། །དེ་ཡང་དངོས་སུ་དེའི་ངོ་བོ་ཉིད་ཡིན་པས་སྒྲུབ་པར་བྱེད་པའི་ཆོས་ཡོད་པ་ཙམ་དང་རྗེས་སུ་འབྲེལ་པ་ནི་བསྒྲུབ་པར་བྱ་བའི་ཆོས་སུ་འགྲོ་བ་ངེས་པ་ཡིན་ནོ། །གང་དང་གང་ལ་སྒྲུབ་པར་བྱེད་པའི་ཆོས་ཡོད་པ་དེ་
དང་དེ་ལ་བསྒྲུབ་པར་བྱ་བ་ཡོད་དོ་ཞེས་དེ་ལྟར་དངོས་པོ་ཉེ་བར་སྐྱེའོ། །འདིའི་དཔེ་ནི། དཔེར་ན་གང་ཡོད་པ་དེ་ནི་སྐད་ཅིག་མ་ཁོ་ན་ཡིན་ནོ་ཞེས་ངེས་པར་བཟུང་བས་ནི་ཁྱབ་བ་སྨྲས་པ་ཡིན་ནོ། །སྒྲུབ་པའི་ཆོས་ཀྱི་ངོ་བོ་ཙམ་དང་རྗེས་སུ་འབྲེལ་བ་དེ་དག་གི་ངོ་བོ་བཤད་པ་ཡིན་ནོ། །རྒྱུ་མཚན་གཞན་མེད་པས་ཡོད་པ་ཁོ་ན་སྐད་ཅིག་མ་ཡིན་ནོ་ཞེས་བྱ་བར་བསྟན་པས་དེ་ཡང་དངོས་སུ་ན་དེའི་རང་བཞིན་ཡིན་པས་གྲུབ་པས་ཡིན་ནོ། །དེ་གྲུབ་པའི་ཐམས་གནོད་པར་བྱེད་པའི་ཚད་མ་ཡོད་པར་བསྟན་པ་ནི། སྐད་ཅིག་མ་མ་ཡིན་པ་སྐད་ཅིག་མ་ཉིད་ལས་བཟློག་པས་ཡོད་པའི་དོན་བྱེད་ནུས་པ་དང་འགལ་བའི་ཕྱིར་དོན་གྱི་འབྲས་བུའི་བྱ་བ་གྲུབ་པས་དེ་དང་འགལ་བའོ། །དེའི་མཚན་ཉིད་ནི་དོན་བྱེད་པའི་མཚན་ཉིད་དོ། །དངོས་པོ་ཉིད་ཀྱི་དོན་བྱེད་པར་ནུས་པའི་བདག་ཉིད་གང་ཡིན་བ་དེ་ནི་དེ་བཞིན་དུ་བཤད་དོ། །དོན་བྱེད་པ་ནི་དེའི་གནས་པའི་ངོ་བོའི་དངོས་པོ་ཉིད་མཚན་པར་བྱ་བ་སྟེ། དེ་རྣམ་པ་དེ་ལྟ་བུས་དངོས་པོ་ཉིད་ཉམས་པ་ནི་ལྡོག་པའོ། །དེ་ལས་བཟློག་པའི་ངོ་བོས་མེད་པ་ཉིད་འདྲེན་པའི་ཕྱིར་ན། གནོད་པར་བྱེད་པའི་ཚད་མ་འདི་ཡང་ཁྱབ་པར་བྱེད་པ་མི་དམིགས་པའི་ངོ་བོ་སྟེ་ཕྱིས་སྐབས་སུ་བབ་པ་དང་རང་ཉིད་ཆད་པར་འགྱུར་རོ། །དེ་ནི་གནོད་པར་བྱེད་པའི་ཚད་མ་ཡོད་པ་འདིས་བསྒྲུབ་པར་བྱ་བའི་ཆོས་ཀྱི་ངོ་བོ་སྒྲུབ་པར་བྱེད་པའི་ཆོས་རང་བཞིན་དུ་གྲུབ་བོ། །དེ་ཡང་དངོས་སུ་ན་དེའི་རང་བཞིན་ཡིན་པས་སྒྲུབ་པར་བྱེད་པའི་ཆོས་ཙམ་དང་རྗེས་སུ་འབྲེལ་པར་གྲུབ་པོ། །དེ་ལྟར་ན་རང་བཞིན་གྱི་གཏན་ཚིགས་ལ་བཟློག་པ་ལ་གནོད་པ་ཅན་གྱི་ཚད་མ་ཡོད་པ་དེའི་བདག་ཉིད་དུ་གྲུབ་པས་རྗེས་སུ་འགྲོ་བ་ངེས་པ་བཤད་པ་ཡིན་ནོ། །འབྲས་བུའི་གཏན་ཚིགས་བསྟན་པར་བྱ་བ་ནི། འབྲས་བུའི་གཏན་ཚིགས་ཀྱི་རྗེས་སུ་འགྲོ་བ་ངེས་པ་ཞེས་བྱ་བའི་སྐབས་ཡིན་ཏེ། འདིར་རྒྱུ་ཉིད་དང་འབྲས་བུ་དག་གི་ངོ་བོ་ཅི་ཞིག །རྒྱུ་ཉིད་དང་འབྲས་བུ་ཉིད་དང༌། །དེར་གྲུབ་པ་ནི་རྟོགས་པ་ཞེས་བྱའོ། །དེ་ནི་འབྲས་བུའི་གཏན་ཚིགས་ཀྱི་རྗེས་སུ་འགྲོ་བ་ངེས་པ་དང༌། ཇི་ལྟར་རྒྱུ་དང་འབྲས་བུའི་དངོས་པོར་གྲུབ་པ་དེ་ལྟར་བསྟན་པ་ནི། འདི་ལྟར་སྟེ་ཞེས་བྱ་བ་སྨོས་སོ། །འདི་ལྟ་སྟེ་ཞེས་བྱ་བའི་སྒྲ་ནི་ཉེ་བར་མཚོན་པའོ། །དུ་བ་ལ་སོགས་པ་འདི་མེ་འདི་དམིགས་ན་
ཉེ་བར་དམིགས་སོ་ཞེས་བྱ་བ་འབྲེལ་པའོ། །འདིས་ནི་རྒྱུ་དང་འབྲས་བུའི་དངོས་པོར་གྲུབ་པ་མངོན་སུམ་གྱི་བྱེད་པ་ཡིན་ནོ། །མངོན་སུམ་འབའ་ཞིག་གིས་རྒྱུ་དང་འབྲས་བུའི་དངོས་པོ་དངོས་པོ་ཐེ་ཚོམ་མེད་པར་གྲུབ་པ་མ་ཡིན་ཏེ། འོན་ཀྱང་སྔར་མི་དམིགས་པ་འཇུག་པ་དང་ལྷན་ཅིག་བརྟན་པར་བྱ་བ་ནི། དམིགས་པའི་རིག་བྱར་གྱུར་པའི་མི་དམིགས་པ་ཞེས་བྱ་བ་སྨོས་ཏེ། གལ་ཏེ་དུ་བ་ལ་སོགས་པ་དེ་དམིགས་པའི་རིག་བྱར་གྱུར་བའི་ཉེ་བར་དམིགས་པའི་རྐྱེན་ཡོད་ལ་སྣང་བའི་བདག་ཉིད་ཀྱི་ཡོད་པ་ནི་དམིགས་པར་འགྱུར་རོ། །མེ་ལ་སོགས་པའི་ཚོགས་པ་ཉེ་བ་ལས་སྔར་མེ་ལ་སོགས་པའི་ཚོགས་པ་ཉེ་བར་དམིགས་པ་ལས་འབྲས་བུ་ཡོད་པར་ཉེ་བར་དམིགས་པ་འགྲུབ་བོ། །ཉེ་བར་དམིགས་པའི་རྐྱེན་གཞན་མ་ཚང་ན་ནི་མི་སྐྱེ་བར་ཉེ་བར་དམིགས་པའི་ངོ་བོ་ཡོད་པ་དེའི་ཡུལ་ཉེ་བ་ཡིན་དུ་ཟིན་ཀྱང་དམིགས་པའི་རིག་བྱར་མ་གྱུར་པས་མེ་ལ་སོགས་པའི་ཚོགས་པ་ཉེ་བར་གྱུར་པ་ལས་སྔོན་དུ་ཉེ་བར་དམིགས་པ་ནི་མེད་དོ། །དམིགས་པའི་རིག་བྱར་གྱུར་བ་ལས་མི་དམིགས་བ་མེ་ལ་སོགས་པའི་ཚོགས་པ་ཉེ་བ་སྐྱེ་བ་ལས་སྔར་གཞན་ནས་འོངས་པའམ་དེ་ཡུལ་དང་དུས་ཉེ་བས་རྩིག་པ་དང་རེ་ལྡེ་ལ་སོགས་པ་ལ་དེ་སྐྱེ་བའམ་དེའི་ཡུལ་ན་ཡོད་པ་ཡིན་ཞེས་བྱ་བ་རྣམ་པ་གསུམ་གསལ་བ་ཡིན་ནོ། །རྣམ་པ་འདི་རྣམས་ཀྱིས་དེ་མ་ཡིན་པའི་འབྲས་བུ་འགྱུར་ན་ནི་འགྱུར་རོ། །དེའི་ཕྱིར་མི་དམིགས་པས་དེ་མ་ཡིན་པའི་འབྲས་བུའི་དོགས་པ་བསལ་ནས་དེ་ཡོད་ན་ཡོད་པར་མངོན་སུམ་གྱིས་བཟུང་བའི་རྒྱུ་མཚན་གྱིས་རྒྱུ་དང་འབྲས་བུའི་འབྲེལ་པ་ཐེ་ཚོམ་མེད་པར་གྲུབ་པོ། །གལ་ཏེ་མེ་དང་བུད་ཤིང་ལ་སོགས་པའི་དངོས་པོ་ངེས་པ་ཉེ་བ་ན་མི་སྣང་བའི་བདག་ཉིད་འགའ་ཞིག་ལས་དུ་བ་འབྱུང་བར་འགྱུར་རོ་ཞེས་དོགས་པ་ལ། མེ་དང་བྱད་ཤིང་ལ་སོགས་པ་ཐ་དད་པས་རྗེས་སུ་བྱེད་པའི་དུ་བ་ནི་ཙན་དན་དང་ག་བུར་དང༌། ཨ་ཀ་རུ་དང༌། སྐྲ་དང་བལ་ལ་སོགས་པའི་བུད་ཤིང་ཐ་དད་པ་དེའི་རྗེས་སུ་མཐུན་པའི་ངོ་བོ་ཐ་དད་པ་འདི་མཐོང་བའི་ཕྱིར་དང༌། བུད་ཤིང་གི་འགྱུར་བ་ཆེ་བ་དང་ཆུང་བའི་བྱེད་པས་མེ་དེ་དང་རྗེས་སུ་མཐུན་བ་དང་མེ་དང་བུད་ཤིང་ལ་སོགས་པ་ཉེ་བ་མི་སྣང་བའི་བདག་ཏུ་ངེས་པ་ཉེ་བ་ལས་མི་རིགས་ཏེ། འབྲེལ་པ་མེད་པའི་ཕྱིར་རོ། །འབྲེལ་པ་
ཉིད་ནི་རྒྱུ་འམ་འབྲས་བུའི་དངོས་པོ་ལས་ཡིན་ནོ། །དེའི་འབྲས་བུ་ཡིན་ན་མེ་དང་བུད་ཤིང་ཕྲད་པས་རྒྱུན་མི་འཆད་པར་དུ་བ་སྐྱེ་བར་མི་འགྱུར་རོ། །དེ་ཡོད་ན་ཡོང་པའི་རྗེས་སུ་བྱེད་པ་འདི་ཡང་འབྲས་བུ་ཉིད་ཡིན་ན། དེ་ཡང་དུ་བ་ལ་ཡང་མཚུངས་སོ། །བུད་ཤིང་ལ་སོགས་པ་མི་སྣང་བའི་བདག་ཉིད་ནི་རྒྱུ་མ་ཡིན་ཏེ་བུད་ཤིང་ལ་སོགས་པ་རང་གི་རྒྱུ་ཤིང་ལ་སོགས་བ་ལས་འབྱུང་བ་མཐོང་བའི་ཕྱིར་དེ་ལ་ཡང་དེ་བཞིན་དུ་དངོས་པོ་རྟོགས་ན་དེ་ཉིད་ཀྱི་ལན་བརྗོད་པར་བྱའོ། །ཡང་རྩོད་ན་ཡང་དེ་ཁོ་ན་ལ་ལན་ཡིན་པས་ཐུག་པ་མེད་པར་འགྱུར་རོ། །འདིས་ཚོགས་པ་གཅིག་ལ་རག་ལས་པ་ཡང་བསལ་བ་ཡིན་ནོ། །དེའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་དུ་བ་ཉིད་ཀྱི་རྒྱུ་བརྟག་པར་བྱའོ། །གལ་ཏེ་དེ་ཡང་མེ་དང་མཚུངས་པར་དེ་ཡང་རྒྱུ་ཡོད་པ་ཡིན་ནོ་ཞེ་ན། མེ་ལ་སོགས་པ་ཡོད་ན་གདོན་མི་ཟ་བར་ཡོད་པ་ལ་གཞན་ཡང་རྒྱུ་ཉིད་དུ་བརྟག་པར་མི་བྱ་སྟེ་རྒྱུ་མཚན་མེད་པའི་ཕྱིར་རོ། །འབྲས་བུ་ལ་ཐ་དད་པའི་རྒྱུ་མཚན་གྱིས་རྒྱུའི་དངོས་པོར་བརྟག་ན། ཇི་ལྟར་མེ་དང་བུད་ཤིང་ལ་སོགས་པའམ་གཞན་གང་ཡང་རུང་བ་ཡོད་ན་ཡོང་བ་འམ་གཞན་ཡང་དེ་ཡོད་པར་ངེས་པའི་ཉེ་བའི་རྒྱུ་ལས་ཡིན་ན་དེ་ཙམ་གྱིས་ནི་མེ་ལ་སོགས་པའི་རྒྱུ་ཉམས་པ་ནི་མ་ཡིན་ནོ། །གང་ལས་དུ་བ་ལ་སོགས་པ་མཐོང་བའི་ཕྱིར་ངེས་པས་དེ་ལ་འཇུག་ན་དེ་ནི་སླུ་བར་འགྱུར་རོ། །སེམས་ཅན་ཐམས་ཅད་ཀྱི་ལས་ཀྱི་དབང་གིས་སྐྱེ་བ་ཉིད་ཀྱང་འགྲོ་བ་སྣ་ཚོགས་སུ་མཐོང་བའི་རྒྱུ་ཉམས་པ་ནི་མ་ཡིན་ནོ། །དེའི་འབྲས་བུ་མཐོང་བའི་ཕྱིར་འཇུག་པར་འགྱུར་བ་ན་དེ་མ་ཡིན་པ་ཐོབ་པ་མེད་པའི་ཕྱིར་རོ། །ཞར་ལ་འོངས་པས་ཆོག་གོ །ཅི་ཡང་འདིར་རྒྱུ་དང་འབྲས་བུའི་དངོས་པོ་ལ་མི་དམིགས་པ་དང་ལྷན་ཅིག་པའི་མངོན་སུམ་གྱི་རྒྱུ་མཚན་གྱི་ངོ་བོ་ཡིན་ཞེ་ན་དེ་ཡོད་ན་ནི་ཡོད་ལ་མེད་ན་ནི་མེད་པས་ཞེས་བྱ་བ་སྨོས་ཏེ། རྒྱུར་མངོན་པར་འདོད་པ་གང་ཡིན་པ་དེ་ཁོ་ན་ཡོད་ལ་འབྲས་བུར་མངོན་པར་འདོད་པ་ཡོད་པ་ཁོ་ན་དང༌། དེ་མེད་པ་ནི་རྒྱུར་མངོན་པར་འདོད་པ་དེ་མེད་ན་མེད་པ་ཉིད་ནི་འབྲས་བུར་མངོན་པར་འདོད་པ་མེད་པའོ། །དེ་ཉིད་རྒྱུ་དང་འབྲས་བུའི་ཡོད་པ་ལས་གཞན་མ་ཡིན་ནོ། །དེ་ནི་དེ་དག་ལས་གཞན་གྱི་རང་བཞིན་དུ་གྱུར་པ་རྒྱུ་དང་འབྲས་བུའི་ངོ་བོར་མ་རྟོགས་པ་
འམ། ཡང་ན་རང་བཞིན་དུ་གྱུར་པ་ཁོ་ནའི་རྒྱུ་དང་འབྲས་བུའི་བདག་ཉིད་ཡིན། གང་གི་ཚེ་དང་པོའི་ཕྱོགས་ཡིན་པ་དེའི་ཚེ་ཐམས་ཅད་རྒྱུ་དང་འབྲས་བུའི་དངོས་པོར་འགྱུར་ཏེ། རྒྱུའི་དངོས་པོ་ངེས་པ་མེད་པ་དེས་ན་ཐམས་ཅད་ཐམས་ཅད་ཀྱི་འབྲས་བུར་ཐལ་བར་འགྱུར་བ་དང༌། རང་བཞིན་གྱིས་དེའི་ངོ་བོ་ཡིན་ན་ནི་གཞན་དང་འབྲེལ་པ་ཡང་དེའི་ངོ་བོ་མ་ཡིན་ནོ། །དངོས་པོ་སོ་སོར་ངེས་པའི་ངོ་བོ་སྤངས་ནས་གཞན་དང་ལྡན་པ་ཡང་མ་ཡིན་ཏེ། ངོ་བོ་གཞན་ལ་མི་བརྟེན་པས་སོ། །གང་གིས་གཞན་དང་ལྡན་པ་དེ་དག་གིས་སྔ་མའི་ངོ་བོ་ནི་འཇིག་པ་ཡིན་ཏེ། འཇིག་པའི་རྒྱུ་ནི་མི་རིགས་པར་ཕྱིས་བཤད་པར་བྱའོ། །སྔར་མེད་པ་ཡང་སྐྱེ་བ་མ་ཡིན་ཏེ། དེ་ལས་དོན་གཞན་པ་ཉིད་དུ་ཐལ་བར་འགྱུར་རོ། །དེ་རྣམས་ལ་གྲུབ་པ་རྣམས་སྔར་མ་གྲུབ་བ་ཐ་མི་དད་པའི་རྒྱུ་ཅན་ནི་དེའི་རང་བཞིན་དུ་མི་རིགས་པ་འམ་ཐ་དད་པ་དང་ཐ་མི་དད་པ་འདི་དག་རྒྱུ་མེད་པར་འགྱུར་རོ། །དངོས་པོ་རྣམས་ལ་གང་ཆོས་འགལ་བ་གནས་པ་དང་རྒྱུ་ཐ་དད་པས་སོ། །དེའི་ཕྱིར་རྒྱུ་མཚན་གཞན་མེད་པས་ཐ་དད་པ་མེད་པ་དེ་ལྟ་ན་སྣ་ཚོགས་པ་གཅིག་པར་འགྱུར་བ་ལ་སོགས་པ་ཐལ་བར་འགྱུར་རོ། །སོ་སོར་སྣང་བ་ཐ་དད་པ་ཡང་གཅིག་ལ་གཅིག་མེད་པའི་ངོ་བོས་འགལ་བའི་ཆོས་གནས་པ་ལས་འདའ་བ་ནི་མེད་དོ། །དེའི་ཕྱིར་སྔ་མའི་དངོས་པོ་དེའི་གནས་སྐབས་ཁོ་ན་ཡིན་པའི་ཕྱིར་དེ་དག་གཞན་དང་ལྡན་པ་ཡང་རྒྱུ་དང་འབྲས་བུའི་ངོ་བོ་ཐོབ་པ་མེད་དོ། །ཡང་ན་ཕྱོགས་གཉིས་པ་ཡིན་པ་དེའི་ཚེ་རང་བཞིན་ཁོ་ནས་རྒྱུ་དང་འབྲས་བུའི་ངོ་བོ་ཡིན་པའི་ཕྱིར་དེའི་རང་བཞིན་གཞན་དོན་མེད་པ་ཇི་ལྟར་ཉམས་སུ་མྱོང་བར་མི་འགྱུར། རྒྱུ་དང་འབྲས་བུའི་བློ་ཡང་དེ་ཁོ་ན་ཡོད་པ་ཉིད་ཙམ་དང་རྗེས་སུ་འབྲེལ་པས། །དོན་གཞན་པའི་རྒྱུ་མཚན་དེ་ནི་དམིགས་པའི་རིག་བྱར་གྱུར་པ་ལས་རྒྱུ་དང་འབྲས་བུའི་ངོ་བོས་དབེན་པའི་ངོ་བོས་གཞན་མི་སྣང་བའི་ཕྱིར་རོ། །རྣམ་པ་དེ་ལྟ་བུ་ཡང་བཟུང་ནས་བརྟག་ན་ནི་ཧ་ཅང་ཐལ་བར་འགྱུར་རོ། །དེའི་དོན་གཞན་པའི་རྒྱུ་དང་འབྲས་བུའི་བློའི་རྒྱུ་མཚན་ནི་མི་དམིགས་པའི་མཚན་ཉིད་དང་ལྡན་པས་ཇི་ལྟར་རང་ཡོད་པ་ཙམ་གྱིས་དེའི་བློ་འཇུག་པར་མི་འགྱུར་རྟག་ཏུ་ཉེ་བ་ཉིད་ཀྱིས་དེ་དག་འདིར་ཐམས་
ཅད་ཀྱི་ཚེ་སྐྱེ་བར་ཐལ་བར་འགྱུར་རོ། །བྱེ་བྲག་མ་བཟུང་བར་བྱེ་བྲག་ཏུ་བྱ་བ་ཡང་རང་ཉིད་བྱེ་བྲག་ཅན་དུ་ཤེས་པའི་རྒྱུ་མཚན་མི་རིགས་ཏེ། དེ་མི་དམིགས་པའི་མཚན་ཉིད་ཀྱིར་གྱུར་བ་ཡིན་ནོ། །མཐོང་བ་ཡང་མི་རྟོགས་པར་མི་རིགས་ཏེ། རྒྱུ་དང་འབྲས་བུའི་བློ་ལ་དེའི་རྒྱུ་མཚན་ཁས་བླངས་པའི་ཕྱིར་རོ། །གང་གི་རྒྱུ་མཚན་གྱིས་གཞན་ལ་དེའི་བློ་རྟེན་ཅིང་ངེས་པ་གང་ཡིན་པ་དེ་ནི་དེའི་ཉེ་བར་མཚོན་པར་མི་རིགས་པ་ཉིད་དེ་དབྱིག་པས་དབྱིག་པ་ཅན་ངེས་པར་བྱེད་པ་མེད་ན་ལྷ་སྦྱིན་དབྱུག་པ་ཅན་ཉེ་བར་མི་མཚོན་པ་བཞིན་ནོ། །རྒྱུ་དང་འབྲས་བུ་དག་གི་འབྲེལ་པ་དོན་གཞན་པ་ནི་འཐད་པ་མ་ཡིན་ལ། འབྲེལ་པ་གཞན་བརྟགས་ན་ནི་ཐུག་པ་མེད་པར་ཐལ་བར་འགྱུར་བ་དང༌། །རྒྱུ་དང་འབྲས་བུའི་ངོ་བོ་ཁས་བླངས་པ་ཡང་རྒྱུ་དང་འབྲས་བུ་དག་ལྷན་ཅིག་མི་འབྱུང་བར་དེ་ཡོད་པ་དང༌། དེ་བས་ན་རྒྱུ་དང་འབྲས་བུ་དེ་ཉེ་བ་མ་ཡིན་པས་ཇི་ལྟར་རྒྱུ་དང་འབྲས་བུའི་བློར་འགྱུར། འགགས་པ་དག་དེའི་ཤེས་པས་སྒྲོ་བཏགས་ནས་བརྟགས་པ་ལ་རྟོགས་པའི་ཡུལ་ཉིད་ཀྱི་རྒྱུ་དང་འབྲས་བུར་མངོན་པར་ཞེན་པ་ཡིན་ན་ནི་དངོས་པོའི་ཡུལ་ནི་མ་ཡིན་ནོ། །དེ་ཡང་ཁྱད་པར་ཅན་ཡོད་པ་དང་མེད་པའི་རྒྱུ་མཚན་ཁས་བླངས་པའི་ཕྱིར་ཅི་དོན་གཞན་དུ་བརྟགས་ནས་རྟོགས་པའི་ཡུལ་དེར་མངོན་པར་ཞེན་པ་དེ་དོན་མེད་དོ། །རྒྱུ་དང་འབྲས་བུ་ཅིག་ཅར་ན་ཡིན་ཏེ། ལྷན་ཅིག་ཏུ་འདི་དག་སྐྱེ་བ་མེད་དོ། །སོ་སོར་སྐྱེ་ན་ཡང་ཇི་ལྟར་རྒྱུ་དང་འབྲས་བུའི་ངོ་བོ་ཡིན། གང་གི་ཚེ་རྒྱུ་ལས་སྐྱེ་བ་དེའི་ཚེ་ཅི་རང་གི་འབྲས་བུ་ལྷན་ཅིག་སྐྱེའམ་ཡང་ན་འབའ་ཞིག་ཡིན། འབའ་ཞིག་ཀྱང་ཅིག་རང་གི་འབྲས་བུའི་སྔར་རམ་ཡང་ན་ཕྱིས་ཡིན། གལ་ཏེ་རང་གི་འབྲས་བུ་དང་ལྷན་ཅིག་གཉི་ག་གཞན་ལས་ཡོད་པས་ཕན་ཚུན་འབྲེལ་པ་མེད་པའི་ཕྱིར་འབྲས་བུའི་འབྲེལ་པ་མེད་པ་ཉམས་པ་ཡིན་ནོ། །ཡང་ན་འབའ་ཞིག་རང་གི་འབྲས་བུ་ལས་སྔར་དེ་སྐད་ཅིག་མ་རྒྱུ་ཡིན་པས་དེ་ཉིད་སྐྱེ་བར་འགྱུར་བ་ཉིད་ན་ཞིག་པའི་ཕྱིར་ཇི་ལྟར་འབྲས་བུ་བྱེད་པ་ཡིན། དེ་ཡང་ཡོད་ན་ཇི་ལྟར་རྒྱུ་འདི་ལ་ལྟོས་པ་ཡིན། དེ་མེད་པ་ལས་ཡིན་ན་ཇི་ལྟར་རྒྱུ་མ་ཡིན་པས་འབྲས་བུ་རྒྱུ་དང་འབྲེལ་བ་ལས་སྐྱེ་བ་ཡིན། ཡང་ན་རང་གི་འབྲས་བུ་བྱས་ཟིན་ནས་ཕྱིས་
སྐྱེ་ན་ནི་དེ་ཡང་འབྲས་བུའི་ཚེ་ཞིག་པའི་ཕྱིར་མེད་པ་དེ་དུས་ཕྱིས་འབྱུང་བའི་རྒྱུ་དང་འབྲས་བུའི་དངོས་པོ་སྐྱེད་པ་ག་ལ་ཡིན་དེའི་དངོས་པོ་ཡང་འབྲེལ་པ་བརྗོད་ན། རྒྱུ་དང་འབྲས་བུ་ནི་ལྷན་ཅིག་མི་འབྱུང་བའི་ཕྱིར་གཉིས་ལ་གནས་པར་གལ་འགྱུར་དེ་མེད་ན་ཇི་ལྟར་འབྲེལ་པ་ཡིན། སྐད་ཅིག་མ་མ་ཡིན་པ་ཉིད་ཀྱང་རྒྱུ་དང་འབྲས་བུ་དག་སྐྱེས་པ་ལས་སྔར་དེ་རྟེན་ལ་ཡོད་པ་མ་གཏོགས་པ་དག་ཕྱི་ནས་ཀྱང་རང་བཞིན་གཞན་ལ་འཇུག་པས་དེ་མ་ཡིན་པ་ལ་བརྟེན་པ་ཉིད་དང་རྟེན་མེད་པས་དེ་དངོས་པོའི་རྐྱེན་ནམ་རྒྱུ་མ་ཡིན་ནོ། །ཡང་ན་འདུ་བའི་རྒྱུ་མཚན་ཉིད་ཀྱིས་རྒྱུ་དང་འབྲས་བུར་བརྗོད་པ་དང་ཤེས་པ་དག་ཡིན་དེའི་ཚེ་འདུ་བ་ཅན་གྱི་རྒྱུ་ཉིད་ཀྱི་འབྲས་བུ་ནི་འདུ་བ་ལས་རྒྱུ་ཉིད་དུ་འགྱུར། རྒྱུ་མཚན་དང་འདུ་བ་མེད་པའི་རྒྱུ་དང་མ་ཡིན་ཏེ། འབྲས་བུ་ནི་དེ་འདྲ་བའི་འབྲས་བུ་ཉིད་དེ། དེ་ཡང་ཐམས་ཅད་ལ་བྱེ་བྲག་མེད་པས་དངོས་པོ་ཐམས་ཅད་ཕན་ཚུན་རྒྱུ་དང་འདྲས་བུའི་ངོ་བོར་འགྱུར་རོ། །སྔ་མ་དང་ཕྱི་མ་ཡོང་པ་དང་མེད་པའི་བྱེ་བྲག་གིས་དེ་ཡང་འདིར་དེ་ནི་འབྲེལ་བ་མེད་པར་མི་རིགས་པས་བོགས་དབྱུང་དུ་མེད་པ་ལ་དེ་མི་རིགས་སོ། །དེ་དག་ཉིད་དམ་དེའི་ཁྱད་པར་དག་དེའི་མཚན་ཉིད་ཡིན་ནོ་ཞེས་དགོངས་ནས་དེ་ཡོང་ན་ནི་ཡོད་ལ་དེ་མེད་ན་ནི་མེད་པས་རྒྱུ་དང་འབྲས་བུའི་ངོ་བོ་ཞེས་བཤད་དོ། །དེ་ལྟར་རེ་ཞིག་མི་དམིགས་པ་དང་ལྷན་ཅིག་པའི་མངོན་སུམ་དག་གིས་རྒྱུ་དང་འབྲས་བུ་དག་ཡོད་ན་ཡོད་པའི་ཡུལ་ལ་རྒྱུ་དང་འབྲས་བུ་ཡོད་པ་ཡིན་ཏེ། དེ་ཡོད་ན་ནི་ཡོད་ལ་དེ་མེད་ན་ནི་མེད་པ་མཚན་ཉིད་སྒྲུབ་པར་བྱེད་པ་བཤད་དོ། །རེས་འགའ་ཞིག་མི་དམིགས་པ་འམ་མངོན་སུམ་སྔོན་པས་རྒྱུ་དང་འབྲས་བུ་སྒྲུབ་པའི་ཕྱིར་དེའི་ཡུལ་རེ་ཞིག་བསྟན་པ་ནི། རྒྱུ་གཞན་རྣམས་ཡོད་ཀྱང་ཞེས་བྱ་བ་སྨོས་ཏེ། དུ་བ་ལ་སོགས་པའི་འབྲས་བུ་མེ་དང་བུད་ཤིང་ལ་སོགས་པའི་སྐྱེ་བོའི་ཚོགས་པ་ཅན་དག་ནི་ཚོགས་པ་ལས་གཞན་མ་ཡིན་ཏེ། ཚོགས་པ་རྣམས་རྒྱུ་མེད་པ་ཉིད་དུ་ཐལ་བར་འགྱུར་རོ། །འབྲས་བུ་དེ་ལ་ལྟོས་པ་མ་ཡིན་ན་དངོས་པོ་མེད་པར་ཐལ་བར་འགྱུར་རོ། །གལ་ཏེ་དེ་དང་འབྲས་པས་དེ་ལ་ལྟོས་པ་ཡིན་ནོ་ཞེ་ན། །འདིར་སུ་ཞིག་སྐྱེད་པར་བྱེད་པ་མ་ཡིན་ན་དོན་གཞན་དང་འབྲེལ་པས་
ཡིན། སྐྱེད་པར་བྱེད་ན་ཡང་ཚོགས་པའི་རང་གི་ངོ་བོ་ཁོ་ནས་སྐྱེད་བར་བྱེད་པ་ཡིན་ཏེ། །འབྲས་བུ་གཅིག་བྱེད་པ་ལ་འདི་དག་ནུས་པ་མེད་དམ་གང་གིས་ན་གཞན་ཞིག་བསྟན་པར་བྱ། དེ་ལ་ཡང་གཞན་གྱི་ཚོགས་པ་དང་འབྲེལ་ལ་ལྟོས་པ་ཡིན་ན་ནི་ཐུག་པ་མེད་པར་འགྱུར་རོ། །དེའི་ཕྱིར་ཚོགས་པ་ཁོ་ནས་སྐྱེད་བར་བྱེད་པ་དེ་དག་ཀྱང་རྒྱུ་རེ་རེ་ཐབས་ཀྱིས་འབྲས་བུ་ཐ་དད་པ་དེ་དཔག་པར་བྱའོ་སྙམ་ནས། རྒྱུ་གཞན་རྣམས་ཡོད་ཀྱང་ཞེས་བྱ་བ་སྨོས་ཏེ། ཚོགས་པ་ཅན་གྱི་ནང་དུ་གཏོགས་པའི་རྒྱུའི་སྐྱེད་པར་བྱེད་པ་རྣམས་ནི་སོ་སོར་དེ་དག་ཀྱང་སྐྱེད་པར་བྱེད་པའི་ཕྱིར་འདི་སྐྱེད་པར་བྱེད་པ་མེད་པ་ཉིད་དུ་བཟུང་ནས། བརྗོད་པར་འདོད་པའི་མེད་པ་ལས་ཡོད་པ་མ་ཡིན་ནོ་ཞེས་བྱ་བ་འདིས་མི་དམིགས་པའི་ཡུལ་བཤད་དོ། །ཡང་ན་མངོན་སུམ་གྱི་འཇུག་པ་ནི་སྔར་བཤད་པའི་མི་དམིགས་པས་སྤངས་ནས་དེ་ཡོད་ན་ཡོད་པ་འཛིན་པ་ནི་སྲིད་པ་ཡིན་ཏེ། དེ་བཞིན་དུ་འདིར་ཡང་དེ་ཡོད་ན་ཡོད་ལ་དེ་མེད་ན་ནི་མེད་པའི་རྒྱུ་དང་འབྲས་བུའི་དངོས་པོ་སྒྲུབ་པར་བྱེད་པ་ཅི་ཞིག་སྙམ་ན། མངོན་སུམ་དང་མི་དམིགས་པས་སྒྲུབ་པར་བྱེད་དོ་ཞེས་བྱ་བ་སྨོས་སོ། །མངོན་སུམ་སྔོན་དུ་སོང་བའི་མི་དམིགས་པ་དོན་གཞན་གྱིས་དབེན་པ་འཛིན་པར་བྱེད་པ་མངོན་སུམ་གྱི་བདག་ཉིད་འདི་སྒྲུབ་པར་བྱེད་པ་ཡིན་ནོ་ཞེས་མངོན་སུམ་དང་མི་དམིགས་བས་རྒྱུ་དང་འབྲས་བུའི་ངོ་བོ་སྒྲུབ་པར་བྱེད་བ་ཡིན་གྱི་གང་མི་དམིགས་བ་ལ་ལྟོས་པ་དང་བཅས་པའི་མངོན་སུམ་གྱིས་བསྒྲུབ་པར་བྱའོ་ཞེས་སྔར་བཤད་དོ། །དེ་མི་དམིགས་པ་སྔོན་དུ་སོང་བའི་མངོན་སུམ་འདི་སྒྲུབ་པར་བྱེད་པའི་ཕྱིར་མི་དམིགས་པ་དང་མངོན་སུམ་སྒྲུབ་པར་བྱེད་པར་བརྗོད་བར་བྱའོ། །རྒྱུ་དང་འབྲས་བུའི་དངོས་པོ་དེའི་རྗེས་སུ་འགྲོ་བ་ལྡོག་པ་གྲུབ་པར་ངེས་པ་དག་ཇི་སྐད་བཤད་པ་ནི་མངོན་སུམ་དང་མི་དམིགས་པ་དང་རྒྱུ་དང་འབྲས་བུའི་འབྲེལ་པ་ངེས་པ་ཡིན་ནོ་ཞེས་བྱ་བར་སྦྱར་རོ། །འོ་ན་ནི་འབྲས་བུའི་གཏན་ཚིགས་ཀྱི་རྗེས་སུ་འགྲོ་བ་ངེས་པ་ཐམས་ཅད་དུ་འབྲས་བུ་འབྱུང་བ་ནི་རང་གི་རྒྱུ་ཡོད་པའི་རྗེས་སུ་འགྲོ་བ་ཡིན་ནོ་ཞེས་བྱ་བར་སྒྲུབ་པའི་སྐབས་ཡིན་ན་ཇི་ལྟར་རྒྱུ་དང་འབྲས་བུའི་དངོས་པོར་སྒྲུབ་བ་ཉིད་འདིར་བརྗོད་སྙམ་དུ་དོགས་པ་ལ། རྒྱུ་དང་འབྲས་བུའི་དངོས་པོ་གྲུབ་བ་
རྒྱུ་མཚན་ཡིན་པའི་ཕྱིར་རྗེས་སུ་འགྲོ་བ་ངེས་པ་ནི་རྒྱུ་ལ་འབྲས་བུ་ཉེ་བར་བཏགས་ནས་གཞན་མ་ཡིན་པའི་ཐབས་ཀྱིས་བསྒྲུབ་བར་བྱ་བ་བསྟན་པ་ནི་མཐོང་བ་ཙམ་གྱི་རྒྱུ་མཚན་གང་དག་འདོད་པ་དེའི་འདོད་པ་བསལ་བའི་ཕྱིར་འདི་བསྟན་པའི་ཕྱིར་བཤད་དོ། །རྒྱུ་དང་འབྲས་བུའི་ངོ་བོ་ཉིད་ཅེས་བྱ་བ་སྨོས་ཏེ། །རྒྱུ་དང་འབྲས་བུའི་ངོ་བོ་ཉིད་ནི་ཡོད་པའོ། །ནི་ཞེས་བྱ་བ་ནི་གང་གི་ཕྱིར་རོ། །དོན་གཞན་པ་ནི་བསྒྲུབ་པར་བྱ་བ་ལས་ཐ་དད་པའོ། །གང་ཐ་མི་དད་པ་དེ་ནི་བཟློག་པ་ལ་གནོད་པ་ཅན་གྱི་ཚད་མ་འཇུག་པས་དེའི་བདག་ཉིད་དུ་ངེས་པ་ཁོ་ནའི་རྗེས་སུ་འགྲོ་བ་སྔར་བཤད་པའི་ཕྱིར་རོ།། དོན་གཞན་སྨོས་པ་ནི་དེ་ནི་དོན་གཞན་པ་ཉིད་ལའང་དེ་ལྟར་འགྱུར་རོ། །ཇི་ལྟར་གང་ན་ལ་ལར་དུ་བ་ཡོད་པ་དེ་ལ་མེ་གདོན་མི་ཟ་བར་ངེས་པས་མེ་དེ་ལ་ཡོད་དོ་ཞེས་བྱ་བ་འདིས་གཟུགས་ཀྱི་རྗེས་སུ་འགྲོ་བ་ཡང་ཡིན་ཏེ། གང་རྒྱུ་དང་འབྲས་བུའི་ངོ་བོ་མ་ཡིན་ཡང་རོ་དོན་གཞན་པ་གཟུགས་ལས་རྗེས་སུ་འགྲོ་བ་ངེས་པ་དེ་ནི་ཚོགས་པ་གཅིག་ལ་རག་ལས་པས་དེའི་རང་གི་རྒྱུའི་སྒོ་ནས་མི་འཁྲུལ་པའི་ཕྱིར་ཉེས་པ་མེད་དོ། །ཡང་ན་གལ་ཏེ་མེའི་འབྲས་བུ་དུ་བ་ཡིན་པ་དེ་ལྟ་ན་ཡང་གང་ན་འདི་ཡོད་པ་དེ་ལ་གདོན་མི་ཟ་བར་མེ་ཡོད་པ་ཅིས་ན་ཡིན། གང་གི་རྒྱུ་དང་འབྲས་བུ་ཡོད་པར་གྲུབ་པའི་རྒྱུ་མཚན་གྱི་རྗེས་སུ་འགྲོ་བ་བརྗོད་དོ་སྙམ་ན། མེ་ཡོད་ན་ཡོད་པ་ཁོ་ན་ཞེས་བྱ་བ་སྨོས་ཏེ། ནི་ཞེས་བྱ་བ་ནི་གང་གི་ཕྱིར་རོ། །ཡོད་ན་ཡོད་པ་འབྲས་བུ་ཉིད་དུ་བ་ཡིན་པའི་ཕྱིར་རོ། །དེའི་ཕྱིར་རྒྱུ་དང་འབྲས་བུ་ལ་ཡོད་ན་ཡོད་པ་ཉིད་ཇི་སྐད་བཤད་པ་ནི་རྗེས་སུ་འགྲོ་བ་ངེས་པ་ཡིན་ནོ། །གལ་ཏེ་གང་ན་དུ་བ་ཡོད་པ་དེ་ལ་གདོན་མི་ཟ་བར་མེ་ཡོད་བར་མ་གྱུར་ལ་དེ་མེ་མེད་ཀྱང་ཡོད་བས་མེའི་ཡོད་པའི་དངོས་པོའི་མཚན་ཉིད་ཀྱི་རྒྱུ་དང་འབྲས་བུ་ཉམས་པར་འགྱུར་རོ། །ད་ནི་མི་དམིགས་པའི་འབྲེལ་པ་ངེས་པ་བསྟན་པའི་ཕྱིར། མི་དམིགས་པ་ཞེས་བྱ་སྨོས་ཏེ། རང་བཞིན་དང་འབྲས་བུའི་གཏན་ཚིགས་འབའ་ཞིག་གི་རྗེས་སུ་འགྲོ་བ་ངེས་བ་བཤད་པ་མ་ཡིན་གྱི་འོན་ཀྱང་མི་དམིགས་པའི་རྗེས་སུ་འགྲོ་བ་ངེས་པ་ཡང་བརྗོད་པར་བྱ་ན་འདིའི་ངོ་བོ་ཅི་ཞིག་ཡིན་ཅེ་ན། མེད་པའི་ཐ་སྙད་ཀྱི་ཞེས་བྱ་བ་སྨོས་ཏེ་བསྒྲུབ་པར་བྱ་བའི་ཆོས་སུ་རུང་བ་ནི་བསྒྲུབ་པར་བྱ་བ་ཡིན་པའི་ཕྱིར། དེ་མེད་པའི་
ཐ་སྙད་དུ་རུང་བར་མངོན་པར་འདོད་དོ། །དེ་ནི་དམིགས་བའི་རིག་བྱར་གྱུར་པའི་མི་དམིགས་པ་དེ་ནི་གཞན་མི་དམིགས་པའི་ངོ་བོའོ། །དེ་ཙམ་ནི་རྒྱུ་མཚན་ལ་མི་ལྟོས་པར་མེད་པའི་ཐ་སྙད་ལ་འཇུག་པའོ། །དེ་སྒྲུབ་པར་བྱེད་པ་ནི་རྗེས་སུ་འགྲོ་བ་ངེས་པར་གྲུབ་པའོ། །ཡང་མེད་པའི་ཐ་སྙད་ཙམ་ལ་འཇུག་པར་འགྱུར་བ་ག་ལས་ཤེ་ན། རྒྱུ་མཚན་གཞན་མེད་པར་མཐོང་བའི་ཕྱིར་རོ་ཞེས་བྱ་བ་སྨོས་སོ། །གང་མེད་པའི་ཐ་སྙད་ཀྱང་ཇི་སྐད་བཤད་པའི་མི་དམིགས་པ་ལས་ཐ་དད་པའི་བློ་དང་སྒྲ་དོན་བྱེད་ནུས་པས་སྟོང་པ་ལ་སོགས་པ་རྒྱུ་མཚན་མ་ཡིན་ནོ་ཞེས་བྱ་བ་བསྒྲུབ་པ་དེའི་ཚེ་ཇི་སྐད་བཤད་པའི་མི་དམིགས་བ་ཙམ་གྱི་འཇུག་པས་གྲུབ་བ་མ་ཡིན་ཏེ། དེའི་ཚེ་མི་དམིགས་པའི་རྗེས་སུ་འགྲོ་བ་གྲུབ་པ་ཡིན་ནོ། །དེ་ལྟ་མ་ཡིན་ན་རྒྱུ་མཚན་གཞན་ལ་ལྟོས་བར་དོགས་པ་ཡང་བདེན་ནོ། །ཇི་སྐད་བཤད་པའི་མི་དམིགས་པར་གདོན་མི་ཟ་བར་མེད་པའི་ཐ་སྙད་མི་འགྱུར་ན་གང་ལས་རྗེས་སུ་འགྲོ་བ་ངེས་པ་ཡིན་སྙམ་ན། རྒྱུ་མཚན་གཞན་མེད་པ་ནི་རྩོད་པའི་རིགས་པར་རྒྱ་ཆེར་བཤད་པས་དེ་ཉིད་དུ་ངེས་པར་གཟུང་བར་བྱའོ། །ཡང་ན་ཡོད་པའི་ཐ་སྙད་ཀྱི་རྒྱུ་མཚན་དམིགས་པའི་རིག་བྱར་གྱུར་བ་ལས་ཡོད་པ་དེ་ནི་མེད་པའི་ཐ་སྙད་ཀྱི་རྒྱུ་མཚན་ཡིན་པའི་ཕྱིར་རྒྱུ་མཚན་ནི་དེ་ལ་མི་དམིགས་པས་མེད་པ་ཉེ་བར་བསྟན་པའི་ཚད་མ་གང་ཡིན་པ་དེ་ཉིད་ཀྱིས་བཤད་དོ། །དེས་ན་ཡོད་པའི་དངོས་པོ་ནི་མི་སྲིད་པར་ངེས་པས་མི་དམིགས་པའི་རྗེས་སུ་འགྲོ་བ་ངེས་པའི་ལྡོག་པ་དཔྱད་པའི་ཚེ་བཤད་པར་བྱའོ། །དེ་ཉིད་ནི་གཏན་ཚིགས་རྣམ་པ་གསུམ་པོའི་བདག་ཉིད་ཇི་ལྟ་བའི་ཚད་མ་བཤད་པ་ཡིན་ནོ། །རང་བཞིན་གྱི་གཏན་ཚིགས་ལས་བཟློག་པ་ལ་གནོད་པ་ཅན་གྱི་ཚད་མ་ཡོད་པ་དེའི་བདག་ཉིད་འབྲེལ་པ་གྲུབ་པའི་ཕྱིར་དང༌། འབྲས་བུའི་གཏན་ཚིགས་ནི་མངོན་སུམ་དང་མི་དམིགས་པ་དག་གིས་རྒྱུ་དང་འབྲས་བུའི་དངོས་པོའི་རྒྱུ་མཚན་གྲུབ་པའི་ཕྱིར་རོ། །མི་དམིགས་པ་ལ་རྒྱུ་མཚན་གཞན་མེད་པས་སྒྲུབ་བར་བྱེད་བའི་ཚད་མས་དེ་མེད་པས་གཏན་ཚིགས་སུ་གྲུབ་པའི་ཕྱིར་རོ། །རེ་ཞིག་གཏན་ཚིགས་རྣམ་པ་གསུམ་ཡང་རང་རང་གི་ཚད་མས་ལྡོག་པ་ངེས་པའི་རྒྱུ་
མཚན་བསྟན་ཏོ། །ལྡོག་པ་ངེས་པ་ཡང་རྗེས་སུ་འགྲོ་བ་ངེས་པ་འབའ་ཞིག་མ་ཡིན་ཏེ། བདག་ཉིད་ཇི་ལྟ་བའི་ཚད་མ་དག་གི་རྒྱུ་མཚན་བཤད་ཀྱང་འབྲས་བུ་རང་བཞིན་གྱི་གཏན་ཚིགས་ཀྱི་ལྡོག་པ་ངེས་པ་ཡང་བདག་ཉིད་ཇི་ལྟ་བའི་ཚད་མའི་རྒྱུ་མཚན་བརྗོད་དོ།། ཡང་ཅི་འདིར་བསྒྲུབ་པར་བྱ་བ་མེད་ན་མེད་པར་གྲུབ་པ་གང་དེའི་བདག་ཉིད་ཡིན་ནམ། བསྒྲུབ་པར་བྱ་བ་མེད་ན་མེད་བར་གྲུབ་པ་དེ་དག་ཚད་མ་གང་གིས་ཡིན་ཞེ་ན། རྒྱུ་དང་ཁྱབ་པར་བྱེད་པ་མི་དམིགས་པ་དག་ལས་འབྲས་བུའི་གཏན་ཚིགས་ནི་རྒྱུ་མི་དམིགས་པས་བསྒྲུབ་པར་བྱ་བ་མེད་ན་མེད་པར་ངེས་པ་ཡིན་ནོ། །རང་བཞིན་གྱི་གཏན་ཚིགས་ནི་ཁྱབ་བར་བྱེད་པ་མི་དམིགས་པས་སོ། །ནམ་ཞིག་ན་མི་དམིགས་པ་དེ་སྒྲུབ་བར་འགྱུར། རྒྱུ་དང་འབྲས་བུ་དང་ཁྱབ་པར་བྱ་བ་དང༌། ཁྱབ་པར་བྱེད་པའི་ངོ་བོར་གྲུབ་ནའོ། །མངོན་སུམ་དང་མི་དམིགས་པ་དག་གི་རྒྱུ་དང་འབྲས་བུའི་ངོ་བོར་གྲུབ་པ་བདེན་ན་རྒྱུ་མི་དམིགས་པས་འབྲས་བུའི་གཏན་ཚིགས་ཀྱི་བསྒྲུབ་བར་བྱ་བ་མེད་ན་སྒྲུབ་པར་བྱེད་པ་མེད་པ་འགྲུབ་པོ། །བཟློག་པ་ལ་གནོད་པ་ཅན་གྱི་ཚད་མ་དེ་ཡོད་པའི་རྒྱུ་མཚན་འཇུག་པ་ན་གྲུབ་པས་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོར་གྲུབ་པ་ཡོད་ན། ཁྱབ་པར་བྱེད་པ་མི་དམིགས་པས་རང་བཞིན་གྱི་གཏན་ཚིགས་ཀྱི་བསྒྲུབ་པར་བྱ་བ་མེད་ན་སྒྲུབ་པར་བྱེད་པ་མེད་པ་འགྲུབ་པོ། །དེ་ནི་དེ་སྐད་དུ་བརྗོད་པས་གང་ལ་དེའི་བདག་ཉིད་དང་དེ་ལས་བྱུང་བའི་མཚན་ཉིད་ཀྱི་འབྲེལ་པ་ངེས་པ་ཉིད་ཀྱིས་གཉི་གའི་རྗེས་སུ་འགྲོ་བ་དང་ལྡོག་པ་བཤད་པ་ཡིན་ནོ། །དེ་ཉིད་ཀྱིས་ན་གཞན་དུ་རྒྱུ་དང་འབྲས་བུའི་ངོ་བོ་ཡིན་ནོ་ཞེས་བཤད་ཟིན་ཏོ། །ཅི་འདྲ་བ་དག་ཡིན་ཞེ་ན། ཇི་སྐད་བཤད་པའི་བལྟར་རུང་བའི་ཡུལ་གང་དག་ཡིན་པ་དེ་དག་ལའོ། །གང་གི་ཚེ་རྒྱུ་དང་ཁྱབ་པར་བྱེད་པ་དམིགས་པའི་རིག་བྱར་གྱུར་པ་ལས་མི་དམིགས་པ་དེའི་ཚེ་མི་དམིགས་པ་དེའི་བསྒྲུབ་པར་བྱ་བ་མེད་ན་སྒྲུབ་པར་བྱེད་པ་མེད་དོ་ཞེས་བྱ་བའི་དོན་ཏོ། །ནམ་ཞིག་ན་དེ་དག་སྣང་དུ་རུང་བའི་ཡུལ་གྱི་བྱེ་བྲག་ལ་ལྟོས་པ་དང་བཅས་པ་ཡིན་ཞེ་ན། ཉེ་བར་བསྟན་པའི་ཡུལ་ལ་ཞེས་བྱ་བ་སྨོས་ཏེ། ཉེ་བར་བསྟན་པ་ནི་བརྗོད་
བའོ། །ཡུལ་ནི་ཆོས་མི་མཐུན་པའི་དཔེའི་གཞིའི་མཚན་ཉིད་གང་བསྒྲུབ་བར་བྱ་བའི་ཆོས་མེད་ན་མེད་པ་དེ་ཉེ་བར་བསྟན་པ་ནི་བྱ་བ་ཡིན་ནོ། །གལ་ཏེ་དེ་ལ་ཡང་སྣང་དུ་རུང་བའི་ཡུལ་ལ་ཅིའི་ཕྱིར་ལྟོས་ཤེ་ན། མི་དམིགས་པ་ཞེས་བྱ་བ་ལ་སོགས་པ་སྨོས་ཏེ་གཞན་དུ་ན་ནི་གལ་ཏེ་སྣང་དུ་རུང་བའི་ཡུལ་གྱི་བྱེ་བྲག་གི་མི་དམིགས་པ་ལ་མི་ལྟོས་པ་ནའོ། །གང་དམིགས་པའི་རིག་བྱར་མ་གྱུར་བའི་ཡུལ་གྱི་ཆོས་མི་མཐུན་པའི་དཔེ་བསྟན་པ་དེའི་ཚེ་དམིགས་པའི་རིག་བྱར་མ་གྱུར་བ་དེ་ནི་རྒྱུ་དང་ཁྱབ་པར་བྱེད་པ་ཡིན་ནོ་ཞེས་མི་དམིགས་པའི་མཚན་ཉིད་ཀྱིར་གྱུར་པའི་རྒྱུའམ་ཁྱབ་པར་བྱེད་པ་ལ་ལར་བསྐལ་བའི་ཡུལ་རི་རབ་ལ་སོགས་པ་མེད་པར་མི་འགྲུབ་ན་ཅི་བསྒྲུབ་པར་བྱ་བ་མེད་པས་སྒྲུབ་པར་བྱེད་པ་མེད་བ་དག་ཇི་ལྟར་འགྲུབ་བར་འགྱུར་སྙམ་ན། རྒྱུ་དང་ཁྱབ་པར་བྱེད་པ་མི་དམིགས་པ་ཉིད་དུ་གྲུབ་པས་འགྲུབ་པའི་ཕྱིར་རོ་སྙམ་དུ་དགོངས་སོ། །འོན་ཏེ་ཡུལ་ཉེ་བར་མ་བསྟན་ཀྱང་མེད་པ་ཉེ་བར་བསྟན་པའི་མི་དམིགས་པ་སྣང་བའི་ཡུལ་གྱི་བྱེ་བྲག་ལ་ཅིས་ན་ལྟོས་པར་བྱ་བ་མ་ཡིན་ཞེ་ན། ཡུལ་ཉེ་བར་མ་བསྟན་པ་ཞེས་བྱ་བ་སྨོས་ཏེ། ཡུལ་ཉེ་བར་མ་བསྟན་པ་ནི་ཆོས་མི་མཐུན་པའི་དཔེའི་ངོ་བོའོ། །གང་ལ་བསྒྲུབ་བར་བྱ་བ་མེད་པ་ལ་མེད་པ་བཤད་པས་དེའི་འབྲེལ་པ་ཙམ་གྲུབ་སྟེ་ཡོད་ན་སྣང་བའི་ཡུལ་གྱི་བྱེ་བྲག་མེད་ཀྱང་གང་གི་ཕྱིར་འགྲུབ་པ་དེའི་ཕྱིར་དེ་ལ་ཡུལ་ཉེ་བར་མ་བསྟན་པ་ནི་ལྡོག་པ་སྒྲུབ་པར་བྱེད་པའི་མི་དམིགས་པ་བལྟར་རུང་བའི་ཡུལ་གྱི་བྱེ་བྲག་ལ་ལྟོས་པ་མ་ཡིན་པ་ནི་ཡན་ལག་ཏུ་མི་བྱེད་དོ། །དེ་ལྟ་ན་དོན་མཐའ་དག་ཡོངས་སུ་མ་བཟུང་བའི་སྤྱིར་བརྗོད་པ་ཡང་དང་གང་ལ་འབྲེལ་པའི་རང་བཞིན་དེའི་བདག་ཉིད་དམ་དེ་ལས་བྱུང་བ་དེ་དག་ནི་དེ་མེད་མེད་ན་གདོན་མི་ཟ་བར་མེད་པ་ཡིན་ཏེ། རང་བཞིན་དང་རྒྱུ་མ་ཡིན་པར་ཐལ་བར་འགྱུར་རོ། །དེ་སྐད་དུ། རང་བཞིན་ལ་ཡང་མེད་མི་འབྱུང༌། །ཡོད་པ་ཙམ་དང་འབྲེལ་པ་ཡིན། །དེ་མེད་པར་ནི་རང་ཡོད་དག །མེད་འགྱུར་ཐ་དད་མེད་ཕྱིར་རོ། །དེ་བཞིན་དུ། མེ་ཡི་འབྲས་བུ་དུ་བ་སྟེ། །དུ་བ་ཆོས་ཀྱི་རྗེས་འཇུག་པ། །དེ་མེད་པར་ནི་དེ་ཡོད་ན། །རྒྱུ་དང་ལྡན་པ་ལས་འདས་འགྱུར། །ཅེས་བཤད་དོ། །དེ་དང་
དེ་ནི་སྣང་བའི་ཡུལ་ལ་ལྟོས་པར་བྱ་བ་ལ་ཕན་འདོགས་པར་མི་བྱེད་ན། །དེ་དག་ནི་ཅུང་ཟད་ཅིག་ཀྱང་མེད་དོ། །འབྲེལ་པ་ཙམ་གྲུབ་པ་ཡིན་ནོ་ཞེས་བྱ་བ་འདིས་འབྲེལ་པའི་གཏན་ཚིགས་བརྗོད་པ་མ་ཡིན་ཏེ། འོན་ཀྱང་མཐོང་བ་ཙམ་ཉིད་ཀྱིས་ལྡོག་པ་བརྗོད་པ་མི་སྲིད་དོ་ཞེས་བསྟན་ཏོ། །དེ་ལྟ་ན་འབྲེལ་པ་མེད་ཀྱང་གང་གི་ཚེ་བསྒྲུབ་པ་བྱ་བ་ཐམས་ཅད་སྤངས་པའི་དོན་མཐོང་བར་འགྱུར་བ་དེའི་ཚེ་དེ་རྣམ་བར་མི་དམིགས་པའི་སྒྲུབ་བར་བྱེད་བས་མེད་པར་གྲུབ་པོ་སྙམ་ནས་གཞོན་ནུ་མ་ལེན་གྱིས་དེ་ཡང༌། ཡུལ་དེ་དག་ཏུ་བགྲོད་སོང་ན། །དོན་གཞན་ཉེ་བར་མི་དམིགས་པ། །དེ་རྒྱུ་གཞན་ནི་མེད་པའི་ཕྱིར། །མེད་པ་ཡིན་ཅེས་རྟོགས་པར་བྱ། །ཞེས་སྨྲས་ཏེ། ཡུལ་ལ་སོགས་པ་བསྐལ་པའི་མི་སྣང་བ་ཡོད་ཀྱང་དེ་ལ་གཏན་ཚིགས་མི་དམིགས་པ་ཙམ་སྲིད་པས་ཐེ་ཚོམ་ཟ་བ་ཡིན་ནོ། །འདིར་ནི་བསྒྲུབ་བར་བྱ་བ་མ་ལུས་པ་མེད་ན་ལྡོག་པའི་མཚན་ཉིད་ཡིན་ཏེ། རྣམས་དེ་ལྟ་བུ་ཉིད་གང་དང་གང་ལ་བསྒྲུབ་པར་བྱ་བ་མེད་པ་དེ་དང་དེ་ལ་སྒྲུབ་པར་བྱེད་པ་མེད་དོ་ཞེས་སླར་ཡང་ཚིག་དག་གིས་བརྗོད་པའི་ཕྱིར་རོ། །རྗེས་སུ་འགྲོ་བ་ངེས་པ་ཡང་སྔར་འབྲེལ་པའི་རྒྱུ་མཚན་ཉིད་བརྗོད་དོ། །དེའི་ཕྱིར་དེས་ཀྱང་གཞན་དག་མཐོང་བ་ཙམ་གྱི་རྒྱུ་མཚན་གྱིས་རྗེས་སུ་འགྲོ་བ་གྲུབ་པར་འདོད་པས་མེད་པར་བརྗོད་པ་ཁོ་ནའོ། །དོན་ཐམས་ཅད་ཀྱི་གཏན་ཚིགས་སུ་འདོད་པ་བསྒྲུབ་པར་བྱ་བའི་ཆོས་དང་ལྡན་པར་རྗེས་སུ་དཔོག་པར་བྱེད་པ་རྣམས་ཀྱིས་མཐོང་བར་མི་ནུས་པའི་ཕྱིར་རོ། །མ་ལུས་པའི་ཡུལ་དང་ཕྱོགས་ལ་སོགས་པའི་བསྒྲུབ་པར་བྱ་བའི་དོན་རྗེས་སུ་འགྲོ་བ་ནི་གང་དང་གང་ལ་གཏན་ཚིགས་ཡོད་པ་དེ་དང་དེ་ལ་བསྒྲུབ་པར་བྱ་བ་ཡོད་དོ་ཞེས་མ་ལུས་པར་བསྟན་པའི་ཕྱིར་རོ། །ཡུལ་ལ་སོགས་པ་ཉུང་ཟད་ཅིག་ཏུ་བསྒྲུབ་པར་བྱ་བའི་ཆོས་དང་སྒྲུབ་པ་བྱེད་པའི་ཆོས་ལྷན་ཅིག་ཏུ་ཡང་དང་ཡང་ཁྱབ་པ་གྲུབ་པ་མཐོང་ཡང་འབྲེལ་པ་མེད་པ་ནི་ལ་ལར་ཕལ་ཆེར་དེ་བཞིན་དུ་མཐོན་ཀྱང་སྲིད་པས་མི་སྲིད་པ་ལ་གནོད་པར་བྱེད་པའི་ཚད་མ་མེད་པའི་ཕྱིར་རོ། །མི་དམིགས་པའི་གཏན་ཚིགས་ཀྱི་དབང་དུ་བྱས་ནས་ད་ནི། མི་དམིགས་པའི་ལྡོག་པ་ངེས་པ་ཞེས་བྱ་བ་སྨོས་སོ། །བརྗོད་དོ་ཞེས་བྱ་བ་ལྷག་མའོ། །འདིའི་བདག་ཉིད་
ཅི་ཡིན་ཞེ་ན། དམིགས་པའི་རིག་བྱར་གྱུར་པ་ཞེས་བྱ་བ་སྨོས་ཏེ་ཡོད་པའོ། །མི་དམིགས་པ་ནི་ཤེས་པ་གཞན་གྱིས་སམ་བལྟར་རུང་བའི་རང་བཞིན་ནོ། །དེ་ནི་ཡོད་བའི་ཕྱིར་བསྒྲུབ་པར་བྱ་བ་མེད་པའི་ངོ་བོས་མི་དམིགས་པ་དེ་ཉེ་བར་དམིགས་པའི་བདག་ཉིད་ཀྱི་མེད་པའོ། །དེ་གང་འཛིན་པ་ནི་མངོན་སུམ་མོ། །དེ་ཡོད་པའི་མཚན་ཉིད་དུ་དེ་བསྟན་པ་ནི་བསྟན་པར་བྱ་ཞིང་ཤེས་པར་བྱ་བ་འདིས་བསྟན་པ་ནི་ཉེ་བར་བསྟན་པ་ཅན་གྱི་ཚད་མས་དེའི་བདག་ཉིད་ཀྱི་མི་དམིགས་པའི་ལྡོག་པ་ངེས་པ་དང་དེའི་གཏན་ཚིགས་དེ་ནི་ཚད་མ་དེ་བཞིན་དུ་བརྗོད་དོ། །གལ་ཏེ་ཡོད་ན་ནི་གཞན་ཉེ་བར་དམིགས་པའི་ཤེས་པ་ལ་སྣང་དུ་རུང་བའི་རང་བཞིན་དུ་འགྱུར་ཏེ། འོན་ཀྱང་ཉེ་བར་མི་དམིགས་ན་ཇི་ལྟར་འདི་སྣང་དུ་རུང་བའི་བདག་ཉིད་དུ་འགྱུར་གང་ཞིག་ཡོད་པ་གཞན་རྣམས་ཀྱང་དམིགས་པའི་རྐྱེན་དུ་ཡོད་པ་ནི་མངོན་སུམ་དུ་འགྱུར་བ་དེ་ཉིད་དུ་སྣང་དུ་རུང་བར་བཤད་དོ། །དེས་ན་རྣམ་པ་དེ་ལྟ་བུ་ཉེ་བ་ལས་གདོན་མི་ཟ་བར་རྣམ་པ་དེ་ལྟ་བུའི་མངོན་སུམ་འཇུག་པར་འགྱུར་རོ། །གཞན་དུ་ན་རེས་འགའ་ཞིག་ཀྱང་མངོན་སུམ་གྱི་ཡུལ་དུ་མི་འགྱུར་ཏེ་ཁྱད་པར་མེད་པའི་ཕྱིར་རོ། །གང་དང་གང་ལ་རྒྱུ་མཚན་ཙམ་ཡོད་པ་དེ་དང་དེ་ལ་ངེས་པར་འགྱུར་ཏེ། དཔེར་ན་ས་བོན་ལ་སོགས་པ་ཚོགས་པ་ཙམ་གྱི་རྒྱུ་མཚན་གྱིས་མྱུ་གུ་བཞིན་ནོ། །ཡོད་པའི་དངོས་པོ་ཡང་ཇི་སྐད་བཤད་པའི་དམིགས་པའི་རིག་བྱར་གྱུར་པ་ཙམ་གྱི་རྒྱུ་མཚན་དང་ལྡན་པའི་ཕྱིར་རྣམ་པ་དེ་ལྟ་བུའི་མངོན་སུམ་དུ་འགྱུར་རོ་ཞེས་བྱ་བ་རང་བཞིན་གྱི་གཏན་ཚིགས་སོ། །ཚད་མ་འདིས་ནི་རང་བཞིན་མ་དམིགས་པའི་བསྒྲུབ་པར་བྱ་བ་མེད་ན་མེད་པའི་མཚན་ཉིད་ཀྱི་ལྡོག་པ་ངེས་པའོ། །འདི་ཡང་རྗེས་སུ་འགྲོ་བ་ངེས་པའི་རྒྱུ་མཚན་གྱི་ཚད་མ་འདིས་ཀྱང་མི་དམིགས་པ་ལ་རྒྱུ་མཚན་གཞན་མེད་པར་བསྟན་པའི་ཕྱིར་རོ། །རྒྱུ་དང་ཁྱབ་པར་བྱེད་པ་མི་དམིགས་པ་རྗོད་པར་འདོད་པ་དག་འབྲེལ་པ་ཉིད་གྲུབ་པའི་ཐབས་ཁོ་ནས་རྗེས་སུ་འགྲོ་བ་དང་ལྡོག་པ་གྲུབ་པའི་རྒྱུ་མཚན་ཡིན་ནོ། །དེ་ཡང་འབྲས་བུ་དང་རང་བཞིན་གྱི་གཏན་ཚིགས་ཉེ་བར་བསྟན་པ་ཉིད་ཀྱིས་ཐ་དད་པར་མ་བརྗོད་དོ། །དེ་བཞིན་དུ་རྒྱུ་དང་ཁྱབ་པར་བྱེད་པ་དག་མེད་པས་
འབྲས་བུ་དང་ཁྱབ་པར་བྱ་བ་དག་མེད་པར་གདོན་མི་ཟ་བར་རྗེས་སུ་འགྲོའོ། །འབྲས་བུ་དང་ཁྱབ་པར་བྱ་བ་མེད་པ་ལས་ལྡོག་པའི་ཡོད་པ་དེ་ནི་ཡོད་པའི་མཚན་ཉིད་ལ་གདོན་མི་ཟ་བར་ལྡོག་པས་ཁྱབ་པར་བྱེད་པ་དང་རྒྱུ་དག་ཡོད་པའི་ཕྱིར་རོ། །དེ་ལྟ་མ་ཡིན་ན་འབྲས་བུ་དང་ཁྱབ་པར་བྱ་བ་དག་རྒྱུ་མེད་པ་འམ་རང་བཞིན་མ་ཡིན་པར་ཐལ་བར་འགྱུར་བའི་ཕྱིར་ཅུང་ཟད་ཅིག་ཀྱང་ཐ་དད་པར་བརྗོད་པ་མེད་དོ། །གཞུང་འདི་ཙམ་གྱིས་ནི་ཕྱོགས་ཆོས་དེའི་ཆས་ཁྱབ་པའི་གཏན་ཚིགས་ཞེས་བྱ་བ་དེ་བཤད་པ་ཡིན་ནོ། །ད་ནི་རྣམ་གསུམ་ཉིད་ཅེས་བྱ་བ་དེ་བཤད་པར་བྱ་སྟེ། མཚན་ཉིད་འདིས་ཞེས་བྱ་བ་སྨོས་ཏེ་ཕྱོགས་ལ་ཆོས་ཡོད་པ་དེའི་ཆས་ཁྱབ་པ་དེ་ནི་གཏན་ཚིགས་ཡིན་ནོ་ཞེས་དེའི་མཚན་ཉིད་གང་ཡིན་པ་དེ་ཉིད། གཏན་ཚིགས་དེ་ནི་རྣམ་གསུམ་སྟེ། །ཞེས་པའི་མཚན་ཉིད་དོ། །དེ་ཞེས་བཤད་པ་ནི་གཏན་ཚིགས་རྣམས་སོ། །རྣམ་གསུམ་སྟེ་ཞེས་བྱ་བའི་འབྲེལ་པ་ནི་རྣམ་གསུམ་ཁོ་ནའོ། །གཏན་ཚིགས་དེ་རྣམས་ཀྱི་རང་རང་གི་མིང་གྲགས་པ་ནི། རང་བཞིན་དང་འབྲས་བུ་དང་མི་དམིགས་པའོ། །དང་ཞེས་བྱ་བ་ནི་གཏན་ཚིགས་ཀྱི་བསྡུ་བའི་ཕྱིར་རོ་ཞེས་བྱ་བ་ནི་རྫོགས་པར་བསྟན་པས་ངེས་པར་བཟུང་བའི་དོན་ཁོ་ནར་གསལ་ལོ། །དཔེར་ན་སྒྲ་འགའ་ཞིག་ལ་མི་རྟོགས་པ་བསྒྲུབ་པར་བྱ་བ་ཡོད་པ་ལྟ་བུའོ་ཞེས་བྱ་བ་རང་བཞིན་གྱི་གཏན་ཚིགས་ཉེ་བར་བསྟན་པ་དང་མེ་དང་ལྡན་པར་ས་ཕྱོགས་ལ་བསྒྲུབ་པར་བྱ་བ་དུ་བ་ལྟ་བུའོ་ཞེས་བྱ་བ་འབྲས་བུའི་གཏན་ཚིགས་བསྟན་པ་དང་མེད་པ་ལ་ཞེས་བྱ་བ་ནི་མེད་པའི་ཐ་སྙད་དོ། །དམིགས་པའི་རིག་བྱར་གྱུར་པའི་མི་དམིགས་པ་ཞེས་བྱ་བ་ནི་མི་དམིགས་པ་ཉེ་བར་བཀོད་པའོ། །ཅིའི་ཕྱིར་གཏན་ཚིགས་རྣམ་པ་གསུམ་ཁོ་ན་ཡིན་ཞེས་དོགས་པ་ལ། གཏན་ཚིགས་རྣམ་པ་གསུམ་ལས་ཐ་དད་པའི་དོན་རྣམས་ཀྱི་གཏན་ཚིགས་ལྟར་སྣང་བ་དང་གཏན་ཚིགས་འགལ་བས་ཁྱབ་པས་གཏན་ཚིགས་གསུམ་ཉིད་དུ་ངེས་པ་ཡིན་ཏེ་གཏན་ཚིགས་ལྟར་སྣང་བ་ཚད་མ་ཡིན་པ་དེ་ལས་ལྡོག་པ་སྟེ་ཉེ་བ་བསྟན་པ་ནི། འདི་ཁོ་ན་ཞེས་བྱ་བ་སྨོས་ཏེ། རང་བཞིན་དང་འབྲས་བུ་དང་མི་དམིགས་པར་བཤད་པའི་གཏན་ཚིགས་རྣམ་པ་གསུམ་མེད་
ན་མི་འབྱུང་བར་ངེས་པ་ཞེས་བྱའོ། །གཏན་ཚིགས་རྣམ་པ་གསུམ་གྱི་ལྡོག་པ་ནི་དེ་རྣམས་ཀྱི་དོན་ལ་མེད་ན་མི་འབྱུང་བས་གང་མེད་པ་ཞེས་བྱ་བའི་དོན་ཏོ། །དེས་ཀྱང་མེད་ན་མི་འབྱུང་བ་མ་ཚང་བ་ཡིན་པའི་ཕྱིར་རང་བཞིན་དང༌། འབྲས་བུ་དང༌། མི་དམིགས་པ་ལས་ཐ་དད་པ་ནི་གཏན་ཚིགས་ལྟར་སྣང་བ་སྟེ། གཞལ་བར་བྱ་བ་ལ་སོགས་པ་བཞིན་དུ་འགྱུར་རོ་ཞེ་ན། མེད་ན་མི་འབྱུང་བ་མེད་པས་གཏན་ཚིགས་རྣམ་པ་གསུམ་ལྡོག་པ་ཡིན་པའི་ཕྱིར་དེའི་བདག་ཉིད་དང་དེ་ལས་བྱུང་བ་མེད་ན་ཁྱབ་པ་མེད་དོ་ཞེས་བྱ་བ་ན་ཁྱབ་པར་བྱེད་པ་མི་དམིགས་པས་རྟགས་སོ། །འོན་ཏེ་མེད་ན་མི་འབྱུང་བ་ཞེས་བྱ་བ་ཅི་ཞིག་སུ་ཞིག་གིས་ཡིན། འདི་ཇི་ལྟར་རྣམ་པ་གསུམ་དུ་ངེས་པར་བརྗོད་ཅེ་ན། ཇི་སྐད་བཤད་པ་ཞེས་བྱ་བ་སྨོས་ཏེ། ཁྱབ་པར་བྱེད་པ་འམ་དེའི་རྒྱུ་དེ་དག་ཡོད་པ་དེས་ན་གང་ལ་དེ་ཁྱབ་པར་བྱ་བ་དང་འབྲས་བུ་དག་ཉེ་བ་དེ་ལ་ཡོད་པ་ཉིད་དོ།། གང་ལ་ཁྱབ་པར་བྱ་བ་དང་འབྲས་བུའི་རང་བཞིན་དེའི་རྒྱུ་ཡོད་པར་བསྟན་པའམ་ཁྱབ་པར་བྱེད་པ་ཉེ་བའི་ཆོས་ཅན་དེ་ཉིད་ལ་དེ་མེད་ན་མི་འབྱུང་བ་ཡིན་ནོ་ཞེས་ཁྱབ་པར་བྱ་བ་དང་ཁྱབ་པར་བྱེད་པའི་ཆོས་ཀྱི་ཁྱབ་པར་བཤད་པ་ནི་ཇི་སྐད་དུ་བཤད་པའི་མེད་ན་མི་འབྱུང་བ་ཡིན་ནོ། །སུའི་ཞེ་ན། ཕྱོགས་ཀྱི་ཆོས་བསྒྲུབ་པར་བྱ་བའི་ཆོས་ཅན་གྱི་ཆོས་དེ་ཉིད་ཀྱི་ངོ་བོའི་མེད་ན་མི་འབྱུང་བ་གཏན་ཚིགས་རྣམ་པ་གསུམ་ཇི་སྐད་དུ་བཤད་པའོ། །གཏན་ཚིགས་ལས་དེ་གཞན་ལ་དེ་ལྡོག་པའི་དོན་གྱིས་ཡོད་པའོ། །འདིར་ཡང་རྣམ་པ་གསུམ་ཡོད་བ་ལ་དེའི་བདག་ཉིད་དང་དེ་ལས་བྱུང་བའི་མེད་ན་མི་འབྱུང་བའི་ཁྱབ་བ་དག་ཡོད་པའི་ཕྱིར་བྱས་པ་ཉིད་དང་མི་རྟག་པ་བཞིན་དུ་འདིས་ཁྱབ་པར་བྱ་བ་དང་ཁྱབ་པར་བྱེད་པ་ཡོད་པ་དེ་ནི་ཁྱབ་པ་མཉམ་པས་གཅིག་ལ་ཅི་མི་འཁྲུལ་བ་ཡིན་ནོ། །དེའི་ཕྱིར་གཏན་ཚིགས་རྣམ་པ་གསུམ་པོ་འདི་ཉིད་ལས་དེ་གཞན་པ་ལ་མེད་པའི་སྒོ་ནས་ངེས་པར་བརྗོད་དོ། །དེས་ན་གཏན་ཚིགས་ལྟར་སྣང་དེ་ལས་གཞན་ཞེས་བྱ་བ་མེད་ན་མི་འབྱུང་བའི་ངེས་པའི་འཐད་པ་དང་ལྷན་ཅིག་ཏུ་དེའི་དོན་བཤད་དོ། །ཇི་ལྟར་གཏན་ཚིགས་རྣམ་པ་གསུམ་ལས་གཞན་པ་ནི་མེད་ན་མི་འབྱུང་བ་མེད་པ་དེ་ལྟར་སྔར་བཤད་ཟིན་ཏོ། །ཡང་ན་གལ་ཏེ་རང་བཞིན་ལས་
གཞན་པའི་དོན་ནི་དོན་གཞན་འབྲས་བུ་ལས་ཀྱང་གཞན་རྒྱུ་འམ་གཉི་ག་མ་ཡིན་པ་དང༌། མི་དམིགས་པ་ལས་གཞན་ཇི་སྐད་དུ་བཤད་པའི་མི་དམིགས་པ་ཙམ་འམ་ཉེ་བར་དམིགས་པ་འམ་དགག་པའམ་དེ་ལས་གཞན་པ་ཡང་འགལ་བའམ། མི་འགལ་བའོ། །དེ་ལ་དོན་གཞན་ནི་བརྒྱ་ལ་དེ་མ་ཐག་པའི་འབྲས་བུ་ཡིན་ན་ནི་ཚུ་རོལ་མཐོང་བས་རྟོགས་པར་མི་ནུས་པའི་ཕྱིར་རྟགས་མ་ཡིན་ནོ། །འབྲས་བུ་མཐོང་ནས་ཐ་དད་པར་ངེས་པར་བྱེད་པ་ཡང༌། བསྒྲུབ་པ་གྲུབ་པའི་དུས་ཕྱིས་འབྱུང་བའི་ཕྱོགས་ཀྱི་ཆོས་དང་རྗེས་སུ་འགྲོ་བ་རྟོགས་པ་དོན་མེད་དོ། །འབྲས་བུ་དང་བར་དུ་ཆོད་པའི་རྒྱུ་རྣམས་ལས་ཀྱང་འབྲས་བུ་དེའི་རྟགས་མ་ཡིན་ཏེ། བར་དུ་ཆོད་པ་ལ་གེགས་བྱེད་པས་མ་ཚང་བས་སྲིད་པས་འཁྲུལ་པའི་ཕྱིར་རོ། །དེ་སྐད་དུ། ཚོགས་པའི་འབྲས་བུའི་ནུས་པ་རྣམས། །འགྱུར་བ་དང་འབྲེལ་འབྲས་བུ་ཡང༌། །མ་ངེས་པ་ནི་ཉིད་ཡིན་ཏེ། །གགས་བྱེད་པ་དག་སྲིད་ཕྱིར་རོ། །ཞེས་གསུངས་སོ། །རུང་བ་རྗེས་སུ་དཔག་པ་ནི་དོན་གཞན་པའི་རྟགས་མ་ཡིན་ནོ། །གཉི་ག་མ་ཡིན་པ་ཡང་འབྲེལ་པ་མེད་པས་གཏན་ཚིགས་སུ་མི་རུང་ངོ༌། །ཇི་ལྟར་སྨིན་དྲུག་ཤར་བ་ལས་སྣར་མ་ཡོད་པར་རྣམ་པར་ཤེས་པ་ངེས་པ་ཡིན་ཞེ་ན། འོན་ཏེ་དེ་ཡང་འབྲེལ་པ་མེད་པར་མི་རིགས་ཏེ་ཁྱད་པར་མེད་པའི་ཕྱིར་ཐམས་ཅད་ཀྱི་ཐམས་ཅད་རྟོགས་པར་ཐལ་བར་འགྱུར་རོ་ཞེས་བཤད་པའི་ཕྱིར་རོ། །དེའི་ཕྱིར་རྒྱུ་སྐར་གྱི་འཁོར་ལོའི་འཕོང་བ་ནི་གཏན་ཚིགས་ཁོ་ན་ཡིན་ཏེ། དུས་ཀྱིས་བར་དུ་ཆོད་པར་འགའ་ཞིག་གིས་བརྟག་པར་བྱའོ། །དཔེར་ན་འབྱུང་བ་འཁྲུག་པ་ལས་དུས་ཕྱིས་ཆར་འབྱུང་བ་བཞིན་དུ་གཏན་ཚིགས་ཀྱིས་རྒྱུའི་ཆོས་རྗེས་སུ་དཔོག་པར་འབྲས་བུའི་རྟགས་ལས་སྐྱེད་པར་བརྟག་པར་བྱའོ། །མི་དམིགས་པ་ཙམ་ཡང་ཐེ་ཚོམ་ཟ་བའི་གཏན་ཚིགས་ཏེ་ཚད་མ་ལྡོག་པས་ཀྱང་དོན་མེད་པར་མི་འགྲུབ་པོ། །ཉེ་བར་དམིགས་པའི་དགག་པ་ཡང་ཇི་ལྟར་དངོས་པོ་མེད་པར་སྒྲུབ་པར་བྱེད་པ་ཡིན། ཉེ་བར་དམིགས་པ་མ་འཁྲུལ་པས་མེད་པར་མི་རིགས་སོ། །འགལ་བ་དམིགས་པ་ཡང་མི་མཐུན་པའི་དངོས་པོ་སྒྲུབ་པར་བྱེད་པ་ཡིན་ཏེ། འོན་ཀྱང་འགལ་བ་དེ་ཡོད་པ་ན་གཞན་ཉེ་བར་མི་དམིགས་པ་ཁོ་
ནས་གྲུབ་པའི་ཕྱིར་དེའི་སྒོ་ནས་མི་དམིགས་པ་ཉིད་སྦྱོར་བར་རིགས་པར་འགྱུར་གྱི། དེ་ལྟ་མ་ཡིན་ན་དམིགས་སུ་ཡོད་པ་ལ་དགག་པ་མི་འགྲུབ་པོ། །འགལ་བ་མེད་པ་ཉེ་བར་དམིགས་པ་ཡང་དགག་པར་མ་ངེས་པ་ཡིན་ཏེ། འགལ་བ་མེད་པ་རྣམས་ནི་ལྷན་ཅིག་ཡོད་པ་སྲིད་པས་སོ། །རྣམ་པ་གཞན་ཡང་མི་སྲིད་པས་མེད་ན་མི་འབྱུང་བ་ལས་གཞན་ཡོད་པ་མ་ཡིན་པའི་ཕྱིར་རོ། །ད་ནི་རང་བཞིན་གྱི་གཏན་ཚིགས་ཀྱི་ཡོད་པའི་མཚན་ཉིད་ནི་དེ་ལ་ཞེས་བྱ་བ་སྨོས་ཏེ། གཏན་ཚིགས་རྣམ་པ་གསུམ་ལས་རེ་ཞིག་རང་བཞིན་གྱི་གཏན་ཚིགས་ཀྱི་མཚན་ཉིད་བརྗོད་དོ། །བསྒྲུབ་པར་བྱ་བ་ལ་གང་གིས་དེ་སྒྲུབ་པར་བྱེད་པ་དེའི་ཆོས་དེའི་ངོ་བོ་ནི་དེའི་ངོ་བོ་དེ་ཉིད་ཀྱིས་སྒྲུབ་པར་བྱེད་པའི་ཆོས་ཀྱི་ངོ་བོ་ཙམ་དང་དེའི་རྗེས་སུ་འགྲོ་བ་གང་ཡིན་པ་དེ་ཡོད་དེ། བསྒྲུབ་པར་བྱ་བའི་ཆོས་ཀྱི་ཆ་ཤས་ལ་སྤྱི་ཉེ་བར་བཏགས་ནས་དེ་ལ་རང་བཞིན་གྱི་གཏན་ཚིགས་ཡིན་ནོ། །བསྒྲུབ་པར་བྱ་བའི་ཆོས་ནི་མཉན་པར་བྱ་བ་ཡིན་པའི་ཕྱིར་དེ་ཉིད་རང་བཞིན་ཡིན་ནོ་ཞེས་རྟོགས་པར་བྱའོ། །ཇི་ལྟར་འདི་བསྒྲུབ་པར་བྱ་བའི་ཆོས་ཀྱི་རང་བཞིན་ཇི་སྙེད་པ་ཐ་མི་དད་པར་རྟོགས་པ་ཡིན་ཞེ་ན། ཕན་ཚུན་ཞེས་བྱ་བ་སྨོས་ཏེ། མེད་པ་དང་མི་རྟག་པ་མ་ཡིན་པ་ལ་སོགས་པ་ལས་ལྡོག་པའི་གཏན་ཚིགས་སུ་གྱུར་བས་བསྒྲུབ་པར་བྱ་བའི་ཆོས་དང་སྒྲུབ་པར་བྱེད་པའི་ཆོས་དག་ཐ་དད་པ་དེ་ལ་ཡོད་ཀྱང་དངོས་པོ་ནི་དོན་དམ་པར་རྟགས་ཅན་གྱི་རང་བཞིན་ཁོ་ན་བསྒྲུབ་པར་བྱ་བའི་ཆོས་ཀྱི་རང་བཞིན་ཉིད་དོ། །དེ་ལྟ་ན་མེད་པ་ལས་ལྡོག་པ་གང་ཡིན་པ་དེ་ཉིད་སྐད་ཅིག་མ་ལ་སོགས་པ་དེ་ཉིད་ཆོས་ཅན་གཅིག་ལ་ཐ་མི་དད་པས་བསྒྲུབ་པར་བྱ་བ་དང་བསྒྲུབ་པར་བྱེད་པའི་ཆོས་ཀྱང་དོན་དམ་པར་ཐ་དད་པ་མེད་པའི་ཕྱིར་རོ། །གལ་ཏེ་དངོས་སུ་ན་རྟགས་ཅན་གྱི་རང་བཞིན་གྱི་སྒྲུབ་པར་བྱེད་པའི་ཆོས་ཅིའི་ཕྱིར་སྒྲུབ་པར་བྱེད་པའི་ཆོས་ཡོད་པ་ཙམ་དང་རྗེས་སུ་འབྲེལ་པ་ནི་བསྒྲུབ་པར་བྱ་བའི་ཆོས་ཀྱིས་ཁྱད་པར་དུ་བྱ་བ་ཡིན། གང་གི་རང་བཞིན་གང་ཡིན་པ་དེ་ནི་ཇི་ལྟར་དེ་ཙམ་གྱི་རྗེས་སུ་འགྲོ་བ་ཡིན། རང་བཞིན་མ་ཡིན་པར་ཐལ་བར་འགྱུར་བས་དེའི་རང་བཞིན་ཡིན་ནོ་སྙམ་ནས་གང་གི་ཕྱིར། གཏན་ཚིགས་ཀྱི་རང་བཞིན་ཞེས་བྱ་བ་སྨོས་ཏེ། གང་གི་བསྒྲུབ་པར་བྱ་བའི་ཆོས་
དེ་ལ་གཏན་ཚིགས་ཀྱི་རང་བཞིན་ནི་བསྒྲུབ་པར་བྱ་བའི་ཆོས་ཀྱི་རྗེས་སུ་འགྲོ་བ་ལས་འཁྲུལ་པ་མེད་པས་སྒྲུབ་པར་བྱེད་པའི་ཆོས་ཡོད་པ་ཙམ་གྱི་རྗེས་སུ་འགྲོ་བ་དེ་ལ་འཁྲུལ་པ་མེད་པ་དང་འཁྲུལ་པ་སྲིད་ན་ནི་ཁྱད་པར་རྣམས་རིགས་སོ། །འདིར་ཡང་འཁྲུལ་པ་མི་སྲིད་པ་ཉིད་ཀྱི་ཕྱིར་ཁྱབ་པར་མི་རིགས་པ་ཉིད་དོ་ཞེ་ན། དེ་ལྟར་ཡང་རང་བཞིན་གྱི་གཏན་ཚིགས་ཀྱི་མཚན་ཉིད་བྱེད་པ་དང༌། གང་འདི་དག་བསྒྲུབ་པར་བྱ་བའི་ཆོས་དེ་ཙམ་གྱི་རྗེས་སུ་འགྲོ་བའི་སྒྲུབ་པར་བྱེད་པའི་ཆོས་ཡོད་པ་ཙམ་གྱི་རྗེས་སུ་འགྲོ་བའི་ཁྱད་པར་ནི་གཞན་གྱི་འདོད་པ་ལ་ལྟོས་པ་ནི་རིགས་པ་ཅན་ལ་སོགས་པའི་འདོད་པ་ལ་ལྟོས་པའོ། །དེ་ཉིད་ཕ་རོལ་པོའི་ལོག་པར་རྟོག་པ་བསྟན་པ་ནི། གཞན་ཞེས་བྱ་བ་སྨོས་ཏེ། རིགས་པ་ཅན་ལ་སོགས་པ་གང་དོན་གཞན་གྱི་རྒྱུ་མཚན་གྱིས་སྐྱེད་པར་བྱེད་པའི་དོན་གྱིས་དོན་གཞན་ལ་བསྣུན་པའི་རྫས་དང་ལྡན་པ་ལ་སོགས་པ་གང་ཡིན་པ་དེའི་རྒྱུ་མཚན་ཡིན་ནོ། །དེ་ཉིད་འདི་ལྟར་བསྣུན་པས་རྫས་དང་ལྡན་པ་ཆ་ཤས་རྣམས་ལ་བྱ་བ་སྐྱེད་པ་ཡིན་ཏེ། དེ་རྣམས་ཀྱི་ཆ་ཤས་སུ་བྱེ་བས་ལྡན་པ་ཞིག་གོ །དེ་ན་རྩོམ་པའི་འབྲས་བུའི་རྫས་ཞིག་པ་ཡིན་ནོ་ཞེས་སྨྲའོ། །དེ་ལྟར་ན་དོན་གཞན་ལ་ལྟོས་པའི་རྒྱུ་མཚན་ནི་བྱས་པ་ཉིད་ལ་སོགས་པ་ཡོད་ཀྱང་དེ་མེད་པས་སོ། །དེ་མ་ཡིན་པ་ཡོད་པ་ཙམ་གྱི་རྗེས་སུ་འགྲོ་བ་དེ་བྱིས་པ་ཉིད་ལ་སོགས་པ་ཡོད་ན་ཡོད་པ་ཁོ་ན་དེ་ཙམ་ནི་དེའི་རྗེས་སུ་འགྲོ་བ་ཡོད་པ་གང་ཡིན་པ་དེ་ནི་བསྒྲུབ་པར་བྱ་བའི་ཆོས་མི་རྟག་པའི་མཚན་ཉིད་དོ། །དེ་ལས་བཟློག་པ་ཡང་བྱས་པ་ཉིད་ལ་སོགས་པའི་རང་བཞིན་དུ་འདོད་དོ། །གང་གི་ཕྱིར་ཁྱད་པར་དུ་བྱས་པ་དེའི་ཕྱིར་དེས་ན་ཁྱད་པར་གྱི་རྣམ་པ་དེ་ལྟ་བུའི་དོན་གཞན་པའི་རྒྱུ་མཚན་ཅན་གྱི་འཇིག་པ་དེའི་རང་བཞིན་མ་ཡིན་ཏེ། མཚན་ཉིད་ཁྱད་པར་དུ་བྱས་པ་ཞེས་བྱ་བ་སྨོས་ཏེ། རང་ཡོད་ཙམ་གྱིས་འབྱུང་བ་ཉིད། །རང་བཞིན་ཉིད་ནི་གཞན་ལ་མིན། །ཞེས་བྱ་བས་ཁྱབ་པར་བསྟན་ཏོ། །དེ་བཞིན་དུ་དེ་ལ་དོན་གཞན་པའི་རྒྱུ་མཚན་ནི། །བསྒྲུབ་པར་བྱ་བ་ལ་གཏན་ཚིགས་བྱ་བ་ལ་སོགས་པ་འཁྲུལ་པས་མ་ངེས་པ་ཡིན་ཏེ་འདིར་དཔེ་ནི་དཔེར་ན་འཇིག་པར་བསྒྲུབ་པར་བྱ་བ་ལ། རྒྱུ་དང་ལྡན་པའི་བྱས་པ་
ལྟ་བུའོ་ཞེས་བྱ་བ་སྨོས་ཏེ། གཏན་ཚིགས་ཀྱི་རང་བཞིན་མ་ཡིན་པས་འཁྲུལ་པ་ཡིན་ནོ། །འོ་ན་ནི་ཐ་དད་པར་ཁས་བླངས་པས་བྱས་པའི་རང་བཞིན་ཡིན་པའི་མི་རྟག་པ་ནི་གཞན་དག་མི་འདོད་པ་དེས་ཅི་ཞིག་བརྗོད་ཅེ་ན། དེས་ཡོད་པ་ཙམ་དང་རྗེས་སུ་འབྲེལ་པའི་རང་བཞིན་དུ་འདོད་པ་ཡང་ཡིན་ནོ་སྙམ་དུ་དེ་ལྟར་སེམས་ན་ནི་བྱས་པ་དང་མི་རྟག་པའི་ཆོས་ཀྱི་རྟོག་པ་ཡང་ཁས་བླངས་པ་རྣམས་ཀྱིས་གདོན་མི་ཟ་བར་མ་བྱུང་བ་ལས་བྱུང་བ་དང༌། བྱུང་ནས་ཀྱང་མེད་པའི་མི་གནས་པའི་རང་བཞིན་ཁས་བླང་བར་བྱ་དགོས་ཏེ། གཞན་དུ་ན་བདག་ལ་སོགས་པ་དང་བྱས་པ་ཉིད་དང་མི་རྟག་པ་ཉིད་ཁྱབ་པར་མེད་པ་ཡོད་པར་འགྱུར་རོ། །དེའི་ཕྱིར་གང་མ་བྱུང་བ་ལས་བྱུང་བ་དང་བྱུང་ནས་མེད་པས་མི་གནས་པ་དེ་དག་ཉིད་དེ་ནི་མཐོང་བའི་སྟོབས་ལས་སྐྱེས་པའི་བྱས་པ་དང་མི་རྟག་པའི་ཆོས་ཐ་དད་པར་རྟོག་པ་ལ་སྣང་བའི་སྒོ་ནས་བསྒྲུབ་པར་བྱ་བ་དང༌། སྒྲུབ་པར་བྱེད་པ་དག་ལས་ཅིས་ཐ་དད་པའི་ཆོས་གནས་པ་ཡིན། བརྟགས་སུ་ཟིན་ཀྱང་དངོས་པོའི་བདག་ཉིད་དོན་བྱེད་པའི་རྒྱུ་མཚན་དེ་དོན་དུ་གཉེར་བ་རྣམས་ཀྱིས་བསམས་པའི་ཕྱིར་རོ། །དེ་སྐད་དུ་ཡང༌། ཡོད་མེད་ཕྱོགས་ནི་ཐ་དད་པས། །སྒྲ་དོན་སྐུར་འདེབས་མེད་རྣམས་ཀྱིས། །གང་ལ་འབྲེལ་པས་འབྲས་སྐྱེད་པའི། །དངོས་པོ་ཁོ་ན་དཔྱད་པར་བྱ། །དོན་བྱེད་ནུས་པ་མེད་པ་ལ། །དེ་འདོད་བརྟགས་པས་ཅི་ཞིག་བྱ། །མ་ནིང་གཟུགས་བཟང་མི་བཟང་ཞེས། །འདོད་ལྡན་རྣམས་ཀྱིས་བརྟག་ཅི་ཕན། །ཞེས་བཤད་དོ། །དེའི་ཕྱིར་མཐོང་དུ་ཟིན་ཀྱང་དངོས་པོ་འགའ་ཞིག་གིས་བདག་ཉིད་དུ་མ་ཡིན་པ་གཞན་ལས་ལྡོག་པའི་རྣམ་པ་འགའ་ཞིག་ངེས་སོ། །དེ་མ་ཡིན་པ་གཞན་གྱིས་ཀྱང་དེ་ཡིན་པའི་ངོ་བོ་ལས་ལྡོག་པའི་བདག་ཉིད་ལ་འཁྲུལ་པའི་རྒྱུ་ཡོད་པ་སྲིད་པས་མ་ངེས་པ་ཡིན་པས་མ་ངེས་པ་ཉིད་དོ། །ངེས་པ་དག་གི་ངོ་བོ་ནི་ཚད་མ་གཞན་གྱི་འབྲེལ་པ་ངེས་པས་མདུན་ན་གནས་པ་ལ་རྗེས་སུ་དཔག་པ་ཡིས་ངེས་པའི་ཕྱིར་མི་རྟག་པའི་རང་བཞིན་དུ་གྱུར་པའི་བྱས་པ་ཉིད་ཀྱིས་འཇིག་པའི་རྟགས་སུ་རིགས་སོ། །དེ་བཞིན་དུ་འཇིག་པའི་རང་བཞིན་ཁོ་ན་གཏན་ཚིགས་སུ་ཇི་སྐད་བཤད་པའི་རིགས་
པས་དེ་འདོད་པ་ཡིན་ཏེ། དེ་ནི་དེ་ཙམ་དང་རྗེས་སུ་འབྲེལ་པ་ཉིད་ལ་དོན་གཞན་གྱི་རྒྱུ་མཚན་གྱིས་བྱེ་བྲག་ནི་རང་བཞིན་མ་ཡིན་པར་བརྗོད་དོ། །གལ་ཏེ་བྱས་པ་ཉིད་ཀྱི་དངོས་སུ་རྒྱུ་དང་ལྡན་པར་འདི་རྗེས་སུ་དཔག་པར་བྱ་སྟེ། དེས་ན་སྔར་ཞིག་པ་མེད་པའི་བྱེ་བྲག་གིས་ཡོད་པ་དེ་འདུ་བའི་འབྲེལ་པས་མི་རྟག་པ་རྣམ་པར་གཞག་གོ །འདི་ཉིད་བདག་ལ་སོགས་པ་རྟག་པ་ལ་ཐལ་བར་འགྱུར་བ་མེད་ལ་འཇིག་པ་ཞེས་བྱ་བ་ནི་ཡོད་པ་མེད་པ་འཇིག་པའི་མཚན་ཉིད་དུ་འདོད་པ་ན། བྱས་པ་ཉིད་འདུ་བའི་སྲིད་པའི་འབྲེལ་པའི་ཁྱད་པར་གྱིས་འཇིག་པའི་རང་བཞིན་དུ་བསྟན་པ་ལ་ཅུང་ཟད་ཅིག་ཀྱང་མི་འདོད་པ་མེད་དོ་སྙམ་དུ་སེམས་པ་ན་དེ་ནི་མི་རིགས་ཏེ། རྣམ་པ་དེ་ལྟ་བུའི་འཇིག་པ་ནི་རྒྱུ་དང་ལྡན་པ་འགལ་བའི་ཕྱིར་རོ་ཞེས་སློབ་དཔོན་རང་ཉིད་འདི་འཆད་པར་འགྱུར་རོ། །འདི་ནི་རྗེས་སུ་དཔག་པར་བྱེད་ན་ཅུང་ཟད་ཅིག་ཀྱང་དོན་བྱེད་པར་ནུས་པ་མེད་པ་བརྟག་པའི་ཕྱིར་རོ། །བདེ་བ་དང་སྡུག་བསྔལ་སྒྲུབ་པར་བྱེད་པ་ཤེས་པ་ཇི་ལྟར་རིགས་པ་རྟོགས་པར་འདོད་པ་ནི་ཅུང་ཟད་ཅིག་ཡོངས་སུ་བརྟག་པར་བྱེད་དོ། །དེའི་ཕྱིར་འདིར་མི་བརྟན་པའི་རང་བཞིན་གྱི་ཡོད་པ་ཉིད་རྗེས་སུ་དཔག་པར་བྱ་སྟེ་དེ་ཉིད་ཀྱི་རྒྱུ་དང་ལྡན་པ་བརྟག་པར་བྱའོ། །དེ་ལྟ་མ་ཡིན་ན་མེད་པས་དབེན་པའི་སྐད་ཅིག་མའི་དུས་སུ་མེད་པ་ཐོབ་པ་ལ་སོགས་པས་བསྐྱེད་པ་ནི་དངོས་པོ་ལ་ཉེ་བར་མི་མཁོ་བའི་ཕྱིར་རོ། །དེ་ཡོད་པ་ནི་དེ་ཉིད་དུ་གནས་པ་ཁོ་ན་ཡིན་ཏེ། ཇི་ལྟར་དེའི་ཁྱད་པར་གྱིས་སམ་ཡོད་པ་དེ་འདུ་བས་མི་རྟག་པར་འགྱུར། དངོས་པོ་མི་འགྱུར་ཐོབ་པ་ལ་སོགས་པས་བྱས་ནས་ཞིག་ནས་མེད་པའི་ཁྱད་པར་གྱིས་ཡོད་པ་ལྡན་པའི་འབྲེལ་པས་གལ་ཏེ་མི་རྟག་པ་ཡིན་ནོ་ཅི་སྟེ། བདག་ལ་སོགས་པ་ལ་ཡང་ཐལ་བར་འགྱུར་བ་གནས་པ་ཡིན་ནོ། །རང་གི་རྒྱུ་ལས་མ་བྱུང་བ་ལས་བྱུང་བ་ལ་ཡོད་པ་དང་འདུ་བ་ནི་མི་འདོད་དེ་མི་འགྲུབ་པས་སོ། །མ་བྱུང་བ་ལས་བྱུང་བ་གང་ཡོད་པ་དེ་ཉིད་ལ་བྱས་པ་ཉིད་ཅེས་བརྗོད་དོ། །ཡོད་པ་ལ་འདུ་བའི་འབྲེལ་པས་མི་རྟག་པར་ཁས་བླང་པར་མི་བྱ་སྟེ། བོགས་དབྱུང་དུ་མེད་པའི་ཕྱིར། སྔ་མ་ཞིག་ནས་མེད་པའི་བྱེ་བྲག་མི་རིགས་སོ། །མ་བྱུང་བ་ལས་འབྱུང་བར་ཁས་བླངས་པ་དེ་ཉིད་ནི་བྱས་པ་ཉིད་ཀྱི་མི་བརྟེན་པའི་རྣག་བཞིན་གྱི་
འཇིག་པ་ཡོད་ན་འབྲས་བུ་བྱེད་པ་ཚད་མ་མེད་ཅིང་ཚད་མས་གནོད་པའི་དོན་གཞན་བརྟགས་པས་ཅི་ཞིག་བྱ། དེ་ལྟར་ན་བྱས་པ་འཇིག་པ་དེའི་བདག་ཉིད་དུ་ཕ་རོལ་པོས་ཀྱང་གདོན་མི་ཟ་བར་ཁས་བླང་བར་བྱ་དགོས་སོ། །དེའི་ཕྱིར་འཇིག་བ་མི་གནས་པའི་མཚན་ཉིད་ལ་དོན་གཞན་པའི་རྒྱུ་མཚན་ཁས་བླངས་ནས་བྱས་པ་ཉིད་མ་ཡིན་པའི་རང་བཞིན་གྱི་བྱེ་བྲག་ཏུ་བསྟན་ན་དེ་གྲུབ་པ་དང་མ་གྲུབ་པ་དང་ཐ་དད་པའི་རྒྱུ་ཅན་ནི་དེའི་རང་བཞིན་དུ་མི་རིགས་པས་དེ་ལྟར་བསྒྲུབ་པར་བྱ་བ་དེ་ལ་བྱས་པ་ཉིད་མ་ངེས་པ་ཡིན་ནོ། །གང་དང་གང་རྒྱུ་མཚན་གཞན་ལ་ལྟོས་པ་དེ་དང་དེ་ནི་གདོན་མི་ཟ་བར་འབྱུང་བ་མ་ཡིན་ཏེ། དཔེར་ན་གོས་ཁ་བསྒྱུར་བ་བཞིན་ནོ། །བྱས་པ་ཉིད་རྣམས་ཀྱི་འབྱུང་བ་ཞིག་ནས་མེད་པ་ཡང་རྒྱུ་མཚན་གཞན་ལྟོས་པས་ཞེས་བྱ་བ་འགལ་བས་ཁྱབ་པ་དམིགས་པ་ཡིན་ནོ། །འོན་ཏེ་གོས་ལ་ཚོན་གྱིས་བསྒྱུར་བ་ནི་ཚད་ཡོད་པའི་རྒྱུ་ཡིན་པའི་ཕྱིར་དེ་ཡང་རང་གི་རྒྱུ་ལ་རག་ལས་པས་ཉེ་བ་ན་དེའི་རྟེན་ལ་མི་མཐུན་པའི་རྐྱེན་དང་ཕྲད་པས་མི་བརྟན་པས་ན་གདོན་མི་ཟ་བར་འབྱུང་བ་མི་རིགས་ཀྱི་འཇིག་པ་ལ་ནི་མ་ཡིན་ཏེ། རྒྱུ་རྣམས་ནི་མཐའ་ཡས་པས་གདོན་མི་ཟ་བར་བུམ་པ་ལ་སོགས་པ་འགའ་ཞིག་ལ་ཉེ་བ་དང་འཇིག་པའི་རྟེན་པ་ལ་སྔ་མའི་རྒྱུ་དེ་ཉེ་བས་ཁ་ཅིག་ཉེ་བར་འཇིག་སྟེ། གང་གི་ཕྱིར་དེ་མེད་ན་འཇིག་པ་མི་རྩོམ་མོ་ཞེ་ན། དེ་ནི་མི་རིགས་ཏེ། གལ་ཏེ་ཡང་གང་གི་ཕྱིར་འཇིག་པའི་རྒྱུ་མང་པོ་ཡོད་པ་དེ་ལྟ་ན་ཡང་རང་གི་རྒྱུ་གང་ཡིན་པ་ཉེ་བའི་ཕྱིར་རོ། །དེ་བཞིན་དུ་དེའི་རྒྱུ་རྣམས་དང་ཉེ་བ་ན་ཡང་དེ་དང་འགལ་བ་མཐའ་ཡས་པ་ཡོད་པས་དེའི་ནུས་པ་ལ་གེགས་བྱེད་པས་གདོན་མི་ཟ་བར་རྒྱུ་ནི་འབྲས་བུ་དང་ལྡན་པ་མ་ཡིན་པའི་ཕྱིར་འགའ་ཞིག་ཞིག་པ་ཡང་མ་ངེས་འཇིག་པ་མ་ཡིན་ནོ། །འོན་ཏེ་གོས་ལ་ཚོན་ལ་སོགས་པ་འདི་ནི་ལྟོས་པ་དང་བཅས་པར་ཡང་གལ་ཏེ་ཐམས་ཅད་དུ་ཉེ་བར་དམིགས་པ་དེས་ན་གདོན་མི་ཟ་བར་ཅིས་ན་འབྱུང་བ་མ་ཡིན་ཞེ་ན། གལ་ཏེ་དེ་བཞིན་དུ་ཉེ་བར་དམིགས་ཀྱང་དེ་ནི་གཞན་དུ་འཛིན་ཏོ། །གལ་ཏེ་དེ་ལྟ་ན་དེ་བཞིན་དུ་ཐམས་ཅད་ཞིག་པ་ཉེ་བར་དམིགས་པ་ལས་གཞན་དུ་ཡོད་པར་དོགས་པ་ལ་ཡིད་སྐྱོ་བར་མི་བྱའོ་ཞེ་ན། །ཅི་དངོས་པོ་མ་ལུས་པའི་ངོ་བོ་རྒྱ་ཆེ་བ་ལ་ཡང་
ཤེས་པའི་སྣང་བས་ཁྱབ་པ་ཡིན་པར་གང་གིས་བརྗོད་ན་ནི་དེ་ལྟར་ཡིན་ན་ཡང་ཇི་ལྟར་རྗེས་སུ་དཔག་པ་མི་འཇུག་པར་ཐལ་བ་ལས་འཇུག་པ་མཐོང་བས་ན་དོན་མེད་པ་ལ་བརྟེན་པར་འགྱུར་ཏེ། གང་ཞིག་རྒྱུས་བྱས་པའི་འཇིག་པ་མཐོང་དུ་ཟིན་ཀྱང་རྒྱུ་གང་ཞིག་ལས་གཞན་དུ་སྐྱེ་བར་ཡང་མཐོང་བས་དོགས་པ་སྐྱེ་སྟེ། །ཡུལ་དང་དུས་དང་རང་བཞན་གྱིས་བསྐལ་བ་རྣམས་ལ་ཇི་ལྟར་དེ་བཞིན་དུ་ཡོད་པར་ངེས་པ་ཡིན། བྱས་པ་ཉིད་ལ་ཡང་འདི་ཡོད་པ་དང་མེད་པའི་མཚན་ཉིད་ཀྱི་འཇིག་པ་ནི་རྟག་པར་ཁས་བླངས་པས་དེའི་འཇིག་པ་ཁས་བླངས་པ་ནི་དངོས་པོ་ལས་སྐྱེ་བར་ཐལ་བར་འགྱུར་བ་དང༌། བུམ་པ་ལ་སོགས་པ་བཞིན་དུ་འཇིག་པའི་རྒྱུ་འགའ་ཞིག་ཉེ་བར་མི་དམིགས་སོ། །དེ་སྐད་དུ། དཔེར་ན་བུམ་པ་ལ་སོགས་པར། །འཇིག་པའི་རྒྱུ་ནི་མཐོང་བ་ཡིན། །དེ་བཞིན་འཇིག་དེ་རྒྱུ་མེད་ལས། །དེ་ཡི་སྐྱེ་བ་ཅི་ལྟར་ཡིན། །ཞེས་བྱ་བ་སྨྲས་པ་དེའི་ཕྱིར་བྱས་པ་ཉིད་ལ་ནི་སྒྲུབ་པ་དེ་ཉིད་ཀྱིས་མ་ངས་པ་ཅིས་ནི་མ་མཐོང༌། གལ་ཏེ་དངོས་པོ་རྣམས་ཀྱི་གཅིག་ཏུ་ངེས་པ་ཆོས་ཉིད་ཡིན་ནོ་ཞེ་ན། དེ་དག་ཁོ་ན་ཡིན་པར་ག་ལས་ངེས། གལ་ཏེ་དེ་དག་ལས་གཞན་པ་ཡོད་པར་ཉེ་བར་མི་དམིགས་སོ་ཞེ་ན། འོ་ན་ནི་འདི་མི་དམིགས་པར་འགྱུར་ཞེ་ན། བདག་ལ་སོགས་པ་ལ་ཡང་ཅིའི་ཕྱིར་ལྡོག་པར་མི་འགྱུར་ཇི་ལྟར་འདིར་གཞན་དུ་ཡོད་པ་ལྡོག་པར་འགྱུར་རོ། །དེས་རྗེས་སུ་དཔག་པས་ཉེ་བར་དམིགས་སོ་ཞེས་བརྗོད་ན་རྗེས་སུ་དཔག་པ་དེ་དང་དེ་ལ་མི་མཐུན་པའི་ཕྱོགས་ལས་ལྡོག་པ་ནི་མི་དམིགས་པར་ཁོ་ནས་གཏན་ཚིགས་ཅི་ལྟར་ལྡོག་པར་འགྱུར་འདི་ནི་ཅི་ཡང་མ་ཡིན་ནོ། །དེའི་ཕྱིར་རྒྱུ་དང་ལྡན་པའི་འཇིག་པ་ནི་བྱས་བ་ཉིད་ཀྱི་རང་བཞིན་མ་ཡིན་པ་དང༌། འཁྲུལ་པས་ན་ལེགས་བར་བཤད་པ་སྨྲས་པས་ཆོག་གོ །ད་ནི་རང་གི་དོན་གྱི་རྗེས་སུ་དཔག་པའི་སྐབས་གང་ཡིན་པ་དེ་དག་ན་ཡང་འགའ་ཞིག་སྦྱོར་བའི་ཡན་ལག་ཉིད་བསྟན་པའི་ཕྱིར་རང་གི་དོན་གྱི་རྗེས་སུ་དཔག་པ་ཡང་སྲིད་པས་ཞར་ལ་གཞན་གྱི་དོན་གྱི་རྗེས་སུ་དཔག་པའི་སྦྱོར་བ་བསྟན་པ་ནི། དེའི་སྦྱོར་བ་ཞེས་བྱ་བ་སྨོས་ཏེ་རང་བཞིན་གྱི་གཏན་ཚིགས་ནི་རྣམ་པ་གཉིས་སོ། །མཚན་ཉིད་གསུམ་བསྟན་པའི་ཚིག་གི་དཔེ་ནི་སྦྱོར་བའོ། །དེ་ཉིད་བསྟན་པ་ནི་ཆོས་མཐུན་པ་
མཚུངས་པ་གང་ཡིན་པ་དེ་ནི་དེ་ལ་ཡོད་པ་དེས་ན་ཆོས་མཐུན་པ་སྟེ། སྦྱོར་བ་གཅིག་དང་གཞན་ཆོས་མི་མཐུན་པ་མི་འདྲ་བ་གང་ཡིན་པ་དེ་ལ་ཡོད་པ་དེས་ན་ཆོས་མི་མཐུན་པའོ། །རིམ་པ་ཇི་ལྟ་བ་འདིས་དེའི་དཔེ་བརྗོད་པ་ནི། དཔེར་ན་གང་དང་གང་ཡོད་པ། །ཞེས་བྱ་བ་སྨོས་ཏེ། གང་གི་སྒྲ་ནི་ཟློས་པ་གཙོ་བོ་ཡིན་ནོ། །དེ་ཐམས་ཅད་ཅེས་བྱ་བ་ནི་དེའི་སྒྲ་ཡང་ཟློས་པ་གཙོ་བོ་ཉིད་དོ། །ཐམས་ཅད་སྨོས་པ་ནི་མ་ལུས་པ་ཡོངས་སུ་བཟུང་བས་ཕྱི་རོལ་གྱི་ཁྱབ་པ་བསལ་བ་ཡིན་ནོ། །དཔེར་ན་བུམ་པ་ཞེས་བྱ་བ་ནི་གང་ཡོད་པ་དང་སྐད་ཅིག་མ་འབྲེལ་བསྒྲུབ་པར་བྱེད་པའི་ཚད་མ་བུམ་པ་ལ་སོགས་པ་ལ་འཇུག་པ་དེ་ལ་དྲན་པ་ཀུན་ནས་སློང་བའི་ཕྱིར་དཔེར་བརྗོད་ཀྱི་དཔེ་ཙམ་ལས་སྒྲུབ་པ་མེད་པའི་ཕྱིར་རོ། །གཅིག་ལ་ཡོད་པ་དེ་བཞིན་དུ་ཐམས་ཅད་ལ་ཡོད་པ་མ་ཡིན་ནོ། །ཧ་ཅང་ཐལ་བར་འགྱུར་བའི་ཕྱིར་རོ། །སྒྲ་ལ་ཡང་ཡོད་པས་ཞེས་བྱ་བ་ནི་ཕྱོགས་དེ་ལ་ཆོས་བསྡུ་བའོ། །ཆོས་མི་མཐུན་པའི་སྦྱོར་བའི་དཔེ་ནི། དེ་བཞིན་དུ་ཞེས་བྱ་བ་ལ་སོགས་པའོ། །དེ་བཞིན་དུ་ཞེས་བྱ་བ་སྨོས་པ་ནི་ཆོས་མི་མཐུན་པའི་སྦྱོར་བའི་དཔེ་བསྡུས་པ་ཡིན་ནོ། །འདིར་ཡང་ཐམས་ཅད་ཅེས་བྱ་བ་དེ་ནི་རྣམ་པར་དབྱེ་བ་འགྱུར་བར་འབྲེལ་པ་ཡིན་ཏེ་སྐད་ཅིག་མ་ཉིད་མེད་པ་ཐམས་ཅད་ལ་ཡོད་པ་ཉིད་མེད་པ་ཡིན་ཞེས་བྱ་བ་ནི་སྦྱོར་བ་གཉི་ག་ལ་ཡང་ཐམས་ཅད་སྨོས་པ་འབྲས་བུར་བསྟན་པ་ཡིན་ནོ། །ཐམས་ཅད་ནི་བསྒྲུབ་པར་བྱ་བའི་ཆོས་ཅན་དང་དཔེའི་ཆོས་ཅན་ཉིད་དོ། །བསྒྲུབ་པར་བྱ་བའི་ཆོས་ཉེ་བ་བསྡུ་བ་ནི་ཉེ་བར་བསྡུས་པ་དང་བསྡོམས་པ་དེས་ན་ཁྱབ་པར་བྱ་བ་ནི་ཁྱབ་པར་བྱེད་པ་དེ་ཁོ་ན་ལ་ཡོད་པ་ལ་ཞེས་པ་ལ་སོགས་པའི་ངོ་བོའོ། །དེ་བསྟན་པ་ནི་རབ་ཏུ་བཤད་པའོ། །དེའི་མཚན་ཉིད་ནི་གང་དང་གང་དེ་སྐད་དུ་བཤད་པའོ། །དེའི་ཕྱིར་གང་བསྒྲུབ་པར་བྱ་བའི་ཆོས་ཅན་ཡོངས་སུ་སྤངས་ནས་ཕྱི་རོལ་གྱི་ཁྱབ་པ་བསྟན་པ་ནི་གལ་ཏེ་ཡང་དཔེའི་ཆོས་ཅན་ལ་བསྒྲུབ་པར་བྱ་བའི་ཆོས་ཀྱིས་སྒྲུབ་པར་བྱེད་པའི་ཆོས་ལ་ཁྱབ་པ་དེ་ཙམ་གྱིས་ཐམས་ཅད་ལ་དེ་བཞིན་དུ་ཡོད་པ་དང་མེད་པ་ལས་བསྒྲུབ་པར་བྱ་བ་འགྲུབ་པར་མི་རིགས་པས་བསལ་བ་ཡིན་ནོ། །ཡང་ན་ཐམས་ཅད་དུ་བསྒྲུབ་པར་བྱ་བའི་
ཆོས་ཀྱིས་སྒྲུབ་པར་བྱེད་པར་ཆོས་ལ་ཁྱབ་པ་ཡོད་པར་འགྱུར་ན་ནི་རྣམ་པ་དེ་ལྟ་བུ་ཅིས་ན་མ་བསྟན། གང་གིས་ཕྱིའི་ཁྱབ་པ་ལ་ནུས་པ་མེད་པར་བཤད་པ་ནི་དེ་ནི་སྔོ་བསངས་ཡིན་ཏེ་དེའི་བུ་ཡིན་པའི་ཕྱིར་སྔོ་བསངས་ཀྱི་བུ་མཐོང་བ་བཞིན་ནོ་ཞེས་བྱ་བ་དེའི་བུ་ཡིན་པས་སྔོ་བ་སངས་སུ་བསྒྲུབ་པར་བྱ་བ་ཕྱི་རོལ་དུ་མཐོང་བའི་བུ་ལ་ཁྱབ་པ་བསྟན་ཀྱང་བསྒྲུབ་པར་བྱ་བ་འགྲུབ་པར་མི་འགྱུར་རོ། །དེའི་ཕྱིར་ཐམས་ཅད་ཀྱི་ཉེ་བར་བསྡུས་པའི་འབྲེལ་པ་ཚད་མས་གྲུབ་པའི་རྒྱུ་མཚན་གྱིས་ཤུགས་ལ་བསྒྲུབ་པར་བྱ་བ་གྲུབ་པ་གང་ཡིན་པ་དེ་དྲན་པ་བསྟན་ཏོ། །ཐམས་ཅད་ཉེ་བར་བསྡུས་ནས་ཁྱབ་པ་བསྟན་པ་ཡང་ཆོས་ཀྱིས་ཁྱད་པར་བྱས་པའི་ཆོས་ཅན་དེ་ཉིད་ཤེས་པ་མེད་པས། གང་གི་ཕྱིར་ཕྱོགས་ཀྱི་ཆོས་བསྟན་པའི་དེ་མ་ཐག་པའི་དུས་ཕྱིས་འབྱུང་བའི་རྗེས་སུ་དཔག་པ་ན་དྲན་པ་ཉིད་དུ་འགྱུར་ན་དེ་བསྒྲུབ་པར་བྱ་བའི་ཆོས་ཅན་མེད་ན། མི་འབྱུང་བ་ཆོས་རྟོག་པའི་རྒྱུ་མཚན་ཉིད་ཀྱི་དེ་བསྟན་པ་ལས་སྔར་ནི་མི་སྲིད་པའི་ཕྱིར་རོ། །དེ་ནི་ཁྱབ་པ་སྔོན་དུ་སོང་བའི་དེ་མ་ཐག་ཏུ་བྱེ་བྲག་གི་ཡུལ་ལ་རྗེས་སུ་དཔོག་པ་ན་ཇི་ལྟར་དྲན་པར་འགྱུར། འོ་ན་ཆོས་མཐུན་པའི་སྦྱོར་བས་ཁྱབ་པ་བསྟན་པའི་མཚན་ཉིད་ནི་རིགས་ཏེ། སྒྲུབ་པར་བྱེད་པའི་ཆོས་ཡོད་ན་བསྒྲུབ་པར་བྱ་བའི་ཆོས་གདོན་མི་ཟ་བར་ཡོད་པར་བསྟན་པས་སོ། །ཆོས་མི་མཐུན་པའི་སྦྱོར་བ་ནི་བསྒྲུབ་པར་བྱ་བ་མེད་པས་གཏན་ཚིགས་མེད་པ་འབའ་ཞིག་ཇི་ལྟར་དེ་ལ་བརྗོད་གཏན་ཚིགས་ཡོད་པས་བསྒྲུབ་པར་བྱ་བ་ཡོད་པ་ནི་མ་ཡིན་ནོ་ཞེ་ན། དེ་དག་གི་སྐྱོན་ནི་མེད་དེ་འདིར་བསྒྲུབ་པར་བྱ་བ་མེད་ན་གཏན་ཚིགས་མེད་པ་ནི་དངོས་པོའི་ངོ་བོ་བསྟན་པ་དེའི་གཏན་ཚིགས་ཀྱི་ཁྱབ་པར་བསྟན་པའི་མཚན་ཉིད་ཀྱི་ངོ་བོ་འགལ་བ་དང་ལྡན་པ་མ་ཡིན་ནོ། །དངོས་པོའི་ཆོས་ཀྱི་ཡོད་པ་ལ་སོགས་པའི་གཏན་ཚིགས་དེའི་བདག་ཉིད་མེད་པར་ཇི་ལྟར་འགྱུར་ཏེ། གང་ལས་གཏན་ཚིགས་ཚུལ་གསུམ་པར་འགྱུར། འོན་ཀྱང་བསྒྲུབ་པར་བྱ་བ་ལྡོག་པ་ལས་ལྡོག་པའི་ཆོས་ཉིད་རང་གི་ཆོས་སུ་གཏོགས་པ་དེ་ལྟ་བུ་བསྟན་པ་ནི་ཆོས་མི་མཐུན་པའི་སྦྱོར་བས་རྣམ་པ་དེ་ལྟ་བུའི་སྒྲུབ་པར་བྱེད་པའི་ཆོས་ལས་གདོན་མི་ཟ་བར་བསྒྲུབ་པར་བྱ་བ་རྟོགས་པ་ཡིན་གྱི་གཞན་དུ་ན་ལྡོག་པ་དང་ལྡན་པ་གཅིག་པ་ཉིད་
དུ་མི་རིགས་པའི་ཕྱིར་ཁྱབ་པའི་མཚན་ཉིད་བསྟན་པ་མེད་ན་ཆོས་མི་མཐུན་པའི་སྦྱོར་བར་མི་རིགས་སོ། །འོ་ན་ནི་སྦྱོར་བ་རྣམ་པ་གཉིས་ལ་དམ་བཅའ་བའི་སྦྱོར་བ་མ་བསྟན་པའི་དེ་ཇི་ལྟར་ཤུགས་ཀྱིས་གོ་བས་དེའི་དོན་རྟོགས་པར་འགྱུར། གང་ཡང་སྒྲུབ་པར་བྱེད་པའི་སྦྱོར་བར་མངོན་པར་མི་འདོད་ཅན། འདིར་ནི་ཞེས་བྱ་བ་སྨོས་ཏེ་སྦྱོར་བའོ། །ཕྱོགས་ཀྱི་ཆོས་དང་འབྲེལ་པ་བརྗོད་པའི་ཤུགས་ཁོ་ནས་ཞེས་འཆད་པར་འགྱུར་རོ། །དམ་བཅས་པའི་དོན་ནི་ཆོས་དང་ཆོས་ཅན་གྱི་སྤྱིའི་མཚན་ཉིད་བསྒྲུབ་བྱར་རྟོགས་པའི་ཕྱིར་གཏན་ཚིགས་ལས་དམ་བཅའ་བའི་སྦྱོར་བ་བསྟན་པར་མི་བྱའོ། །གལ་ཏེ་གཞན་ཤུགས་ཀྱིས་བརྗོད་པ་ནི། རབ་ཏུ་མ་བསྟན་པ་ཞེས་བྱ་བ་སྨོས་ཏེ་མ་བརྗོད་པའོ། །གཞལ་བར་བྱ་བ་ནི་བསྒྲུབ་པར་བྱའོ། །ཇི་ལྟར་ནི་རྣམ་པ་འགའ་ཞིག་མི་རྟོགས་པའོ། །གལ་ཏེ་དམ་བཅས་པའི་དོན་དེ་བཞིན་དུ་རྟོགས་པ་ཡིན་ནོ་སྙམ་དུ་སེམས་ན། རང་གི་དོན་གྱི་རྗེས་སུ་དཔག་པའི་སྐབས་སུ་དེ་རང་ཉིད་ལ་གཞན་གྱིས་བསྟན་པ་མེད་པར་རྟོགས་ན་གཞལ་བྱ་ཉ་བར་སྟོན་པར་བྱེད་པ་སུ་ཞིག་ཡོད་ཅེས་བྱ་བ་ནི་སུ་ཡང་མ་ཡིན་ནོ། །རང་ཉིད་ཀྱིས་བསྒྲུབ་པར་བྱ་བ་མེད་ན་མི་འབྱུང་བའི་སྒྲུབ་པར་བྱེད་པའི་ཆོས་མཐོང་བས་གཞལ་བྱ་རྟོགས་པ་ཡིན་ནོ། །དེ་བཞིན་དུ་གཞན་གྱི་དོན་གྱི་རྗེས་སུ་དཔག་པ་ལས་ཡང་དེ་ཉིད་ཀྱིས་དེ་རྟོགས་ན་དམ་བཅའ་བ་བརྗོད་པས་ཅི་ཞིག་བྱ། གལ་ཏེ་རང་ཉིད་རྟོགས་པའི་དུས་ན་གཞལ་བར་བྱ་བ་འགའ་ཞིག་ཉེ་བར་བསྟན་པ་མེད་པ་དེ་ལྟ་ན་དེ་ཇི་ལྟར་རྟོགས་ཤེ་ན། ཕྱོགས་ན་ཡོད་པ་ཞེས་བྱ་བ་སྨོས་ཏེ་བསྒྲུབ་པར་བྱ་བའི་ཆོས་ཅན་ལ་ཡོད་པའོ། །དུ་བསྒྲུབ་པར་བྱེད་པའི་ཆོས་ཉེ་བར་དམིགས་པ་ནི་མངོན་སུམ་གྱིས་མཐོང་བ་ལྡན་པའོ། །དུ་བ་དེ་དང་དེ་ལ་བསྒྲུབ་པར་བྱ་བའི་ཆོས་མེ་དང་འབྲེལ་པ་ཚད་མས་ངེས་པའི་སྟོབས་ཀྱིས་སྔར་ཁྱབ་པ་རྟོགས་ལ་མེད་ན་མི་འབྱུང་བ་དྲན་པར་འགྱུར་བའི་མཐུ་ཁོ་ནས་ཕྱོགས་ཀྱི་ཆོས་ཁོ་ན་བཟུང་བ་དང་ཁྱབ་པར་དྲན་པའི་མཐུ་ཁོ་ནས་དམ་བཅའ་བའི་སྦྱོར་བ་སྤངས་པ་ལས་འདི་ན་མེ་ཡོད་དོ་ཞེས་དེ་ལྟ་བུའི་ངོ་བོ་དམ་བཅའ་བའི་དོན་ཤེས་པར་འགྱུར་རོ། །དེ་ལ་འདིར་ཡང་ཤ་ཟ་ལ་སོགས་པ་འགའ་ཞིག་གིས་གཞལ་བར་བྱ་བ་རྣ་བར་བརྗོད་པས་དེ་ལྟར་འགྱུར་རོ་སྙམ་དུ་སེམས་ན།
དེ་ན་འདི་ལ་ཞེས་བྱ་བ་སྨོས་ཏེ། དེ་ལ་རང་གི་དོན་གྱི་རྗེས་སུ་དཔག་པ་དུས་སུ་ཤ་ཟ་ལ་སོགས་པ་འགའ་ཞིག་མི་སྣང་བའི་མེ་འདི་ན་དེ་ལྟར་ཡོད་དོ་ཞེས་གཞལ་བར་བྱ་བ་འདི་རྟོགས་པར་བྱེད་པ་སྟོན་ཅིང་བརྗོད་པ་ནི་མེད་དོ། །གལ་ཏེ་ཁྱོད་བདེན་པར་སྨྲ་བས་ཡིན་ན་དེ་ལྟར་བརྗོད་པར་ནི་མི་རིགས་ལ། དེ་བཞིན་དུ་ཁོ་བོས་ཀྱང་ས་ཕྱོགས་ལ་ཡོད་པའི་དུ་བ་མཐོང་ནས་དེ་མེས་ཁྱབ་པར་དྲན་པ་ལ་ལྟོས་ནས་མེའི་རྟོགས་པ་འབྱུང་ངོ༌། །ཡོད་པར་འགའ་ཞིག་བརྗོད་པར་མི་བྱེད་ན་ཡང་མེ་འདི་ན་ཡོད་དོ་ཞེས་དེ་རྟོགས་པར་བྱེད་པ་དེ་བཞིན་དུ་དེ་ནི་གཞན་ལ་ཡང་རིམ་པ་དང་བཅས་པས་རྟོགས་པ་ཁོ་ན་ཡིན་པའི་ཕྱིར་རོ། །གལ་ཏེ་འགའ་ཞིག་སྟོན་པ་མེད་པ་དེ་ལྟ་ན་ཡང་རང་ཉིད་ཀྱིས་གཞལ་བྱ་རྣམ་པར་གཞག་པ་རྟོགས་པ་ན་རྟོགས་ཀྱི་རྗེས་སུ་འབྲང་བར་འདོད་དོ་ཞེ་ན། བདག་ཉིད་ཀྱི་ཞེས་བྱ་བ་སྨོས་ཏེ། གལ་ཏེ་འགའ་ཞིག་སྟོན་པར་མི་བྱེད་ན་རང་ཉིད་འབའ་ཞིག་གིས་ཀྱང་རྟགས་ཀྱི་བྱེད་པ་ལས་སྔར་ཅུང་ཟད་ཅིག་ཀྱང་མེ་ལ་སོགས་པ་རྟོགས་པ་མེད་དོ། །གལ་ཏེ་ཅིའི་ཕྱིར་ཞེ་ན་ཚད་མ་ནི་རྒྱུའོ། །མེད་པ་ནི་སྟོང་པའོ། །མེ་འདི་ན་ཡོད་དོ་ཞེས་དེ་ལྟར་རྟོགས་པའི་རྒྱུ་མཚན་མེད་པའི་ཕྱིར་དེ་ལྐོག་ཏུ་གྱུར་པ་རྟོགས་པའི་རྒྱུ་མཚན་ཚུལ་གསུམ་བའི་གཏན་ཚིགས་མེད་ན་དེ་ཇི་ལྟར་འགྱུར། གལ་ཏེ་རྟགས་མེད་ཀྱང་དེ་ལྟར་རྟོགས་པར་འགྱུར་རོ་ཞེས་སྨྲ་ན་དེའི་ཚེ་དེ་ལྟར་རྟོགས་པར་འདོད་པ་ཡིན་ན་རྟགས་དོན་མེད་དོ། །དེ་ནི་རྗེ་སུ་དཔག་པར་བྱ་བའི་རྟོགས་པའི་ཆེད་ཡིན་པའི་ཕྱིར་དེ་མེད་ཀྱང་དེ་རྟོགས་ན་དེ་ཇི་ལྟར་འདི་དགོས་པ་མེད་པར་མི་འགྱུར་གཞན་དག་ཤིན་ཏུ་རྨོངས་པར་སྟོན་པ་ནི་བདག་ཉིད་ཅེས་བྱ་བ་སྨོས་ཏེ། །རང་དགར་འདི་ལ་མེ་ཡོད་དོ་ཞེས་རྣམ་པར་འཇོག་པ་ནི་ཇི་ལྟར་བ་བཅོལ་དུ་རྣམ་པར་གཞག་པར་བྱ་བ་ཡིན་ནོ། །ཅིའི་ཕྱིར་ཚད་མ་མེད་ཀྱང་རྣམ་པར་འཇོག་པར་འགྱུར། དེ་རྟོགས་པ་ནི་རྒྱུ་མཚན་ནི་གཞལ་བྱ་རྣམ་པར་གཞག་པ་རྟོགས་པའི་ཆེད་དུ་ཕྱི་ནས་རྟགས་དེའི་རྒྱུ་མཚན་གྱི་རྗེས་སུ་འབྲང་ངོ་ཞེས་བྱ་བ་རྟོགས་པའི་རིམ་པ་ཆར་ཕྱེ་བ་འདི་ཅི་ཞིག་ཡིན། དེ་ལྟ་ན་དང་པོ་རྟགས་ཀྱི་རྗེས་སུ་འབྲངས་པ་དེ་ལས་བསྒྲུབ་པར་བྱ་བ་རྟོགས་སོ་ཞེས་བྱ་བ་རིམ་པ་འཐད་པ་ཡིན་ན། གང་སྔར་རྗེས་སུ་དཔག་པར་བྱ་བ་ཡིན་ནོ་ཞེས་བྱ་བ་དེ་ནི་ཕྱིན་ཅི་ལོག་ལ་བརྟེན་
པའི་ཕྱིར་བཞད་གང་དུ་འགྱུར་ཏེ། འཇིག་རྟེན་ན་སྐྲ་བྲེགས་ནས་སྐར་མ་འདྲིའོ་ཞེས་བྱ་བ་གང་ཡིན་པ་དེའི་གྲུ་དེ་དང་རིམ་པ་འདི་མཚུངས་པའི་ཕྱིར་རོ། །དེའི་ཕྱིར་ཕྱོགས་ཀྱི་ཆོས་བཟུང་ནས་ཁྱབ་པར་དྲན་པའི་མཐུ་ཁོ་ནས་རང་ཉིད་རྟོགས་པ་ཡིན་ནོ། །དེ་ཡང་སྟོན་པར་བྱེད་པས་བརྗོད་པ་ཡིན་ནོ་ཞེས་བྱ་བ་ནི་ཅུང་ཟད་ཅིག་ཀྱང་གཞལ་བྱ་བསྟན་པ་མེད་དོ། །གལ་ཏེ་རང་གི་དོན་རྗེས་སུ་དཔག་པའི་དུས་སུ་རང་ཉིད་ཀྱིས་བསྒྲུབ་པར་བྱ་བ་རྟོགས་པ་ནི་རིགས་ཏེ་བརྟག་ཀྱང་དེ་ལ་བདག་ཉིད་ཁོ་ནས་རྟོགས་སོ་ཞེས་དེ་སྐད་དུ་བཤད་ཀྱི། གཞན་གྱི་དོན་གྱི་རྗེས་སུ་དཔག་པ་ནི་གཞན་གྱིས་ཇི་ལྟར་རྟགས་བསྟན་པ་དེ་བཞིན་དུ་གཞལ་བྱེར་བྱ་བ་ཡང་གཞན་ཁོ་ནས་བསྟན་པར་བྱ་བ་དེའི་ཕྱིར་དམ་བཅའ་བའི་སྦྱོར་བ་རིགས་སོ་སྙམ་ན། དེ་གཞན་གྱིས་ཤེས་བརྗོད་ན་ཡང༌། །ཞེས་སྨོས་ཏེ། བདག་ཉིད་ཁོ་ན་ཉིད་ཚེ་སྔར་རྣམ་པར་འཇོག་པར་བྱེད་ན་བསླད་པ་ཡིན་ཏེ། གཞན་རྒོལ་བས་དེའི་གཞལ་བར་བྱ་བ་བརྗོད་པ་ཡང་བསླད་པ་ཉིད་དོ། །དེ་བརྗོད་པ་ནི་དོན་ལ་ཐེ་ཚོམ་ཟ་བ་རྗོད་པར་བྱེད་དེ། དེ་ནི་ངེས་པའི་ཡན་ལག་མ་ཡིན་པས་གཞལ་བར་བྱ་བ་ཟབ་པ་རྟོགས་པར་དཀའ་བ་བརྒྱུད་པས་ཀྱང་དེ་མ་ཡིན་པ་དང་འབྲེལ་པ་བརྗོད་པར་འདོད་པ་ཙམ་གྱི་རྒྱུ་མཚན་གྱིས་སྟོང་པར་གནས་པ་ཡིན་ནོ། །ཅིའི་ཕྱིར་བསླད་པ་ཡིན་ཞེ་ན། ཉེ་བར་མཁོ་བ་མེད་པའི་ཕྱིར་རོ། །འདིར་བསྒྲུབ་པར་བྱ་བ་རྟོགས་པ་ལ་ཉེ་བར་མཁོ་བ་ཅུང་ཟད་ཅིག་ཀྱང་མེད་དེ། །དེ་ཤེས་པ་དང་ཤུགས་ལ་དབྱེར་མེད་དོ་ཞེས་བྱ་བའི་དོན་ཏོ། །གཞན་དག་ནི་འགའ་ཞིག་ཏུ་ཉེ་བར་མཁོ་བ་ཡོད་དོ་ཞེས་དགོངས་པས་ཡུལ་ཉེ་བར་བསྟན་པ་ཞེས་བྱ་བ་སྨོས་ཏེ། གཏན་ཚིགས་ཀྱི་ཡུལ་ནི་བསྒྲུབ་པར་བྱ་བ་གང་ཡིན་པ་དེ་བསྟན་པ་སྟེ། དམ་བཅའ་བའི་ཚིག་ཉེ་བར་མཁོ་བ་ཡིན་ཞེ་ན། དེ་ཉིད་ཀྱིས་ཞེས་བྱ་བ་སྨོས་ཏེ་ཡུལ་ལོ། །རེ་ཞིག་སྨོས་པ་ནི་རིམ་གྱིས་སོ། །ཡུལ་ཉེ་བར་བསྟན་པས་དོན་དང་ལྡན་པ་ཡིན་དེ་བསྟན་ན་ནི་དམ་བཅའ་བའི་ཚིག་དོགས་པར་འགྱུར་ན། ཡུལ་བསྟན་པ་ཉིད་ཀྱིས་ཅི་ཞིག་ཕན་ཏེ་དགོས་པ་ཅི་ཞིག་ཡོད་ཅེས་བྱའོ། །གལ་ཏེ་དེ་ནི་བསྒྲུབ་པར་བྱ་བ་རྟོགས་པ་དང༌། ཆོས་མཐུན་པ་ཅན་གྱི་སྦྱོར་བ་ལ་སོགས་པ་རྟོགས་པའི་ཡུལ་ཉེ་བར་བསྟན་པའི་དོན་དེ་དང་དེ་
བསྟན་པ་ལ་དམ་བཅའ་བའི་ཚིག་བརྗོད་དགོས་ཏེ་དེ་ལྟ་ན་བསྒྲུབ་པར་བྱ་བ་བསྟན་པར་བྱ་སྟེ། བྱས་པ་ཉིད་མི་རྟག་གོ་ཞེས་བརྗོད་པ་འདིར་ཅི་ཞིག་ཆོས་མཐུན་པ་ཅན་གྱི་སྦྱོར་བ་ཡིན། ཡང་ན་ཆོས་མི་མཐུན་པ་ཅན་ཡང་མི་ཤེས་ཏེ། འདིར་གཉི་ག་ལ་དོགས་པ་སྐྱེ་སྟེ། བྱས་པ་ཉིད་ཀྱིས་མི་རྟག་པ་བསྒྲུབ་པར་བྱ་བ་དང་ཆོས་མཐུན་པ་ཅན་དང་རྟག་པ་ནི་མ་བྱས་པ་ཉིད་ནི་ཆོས་མི་མཐུན་པ་ཞེས་བྱ་བ་སྒྲ་ནི་མི་རྟག་སྟེ་བྱས་པ་ཉིད་དོ་ཞེས་དམ་བཅའ་བའི་ཚིག་གིས་ཐེ་ཚོམ་མེད་པར་རྟོགས་པ་དང༌། གཏན་ཚིགས་འགལ་བ་དང་མ་ངེས་པ་རྟོགས་པར་མི་འགྱུར་ཏེ། དམ་བཅའ་པ་སྔོན་དུ་སོང་བའི་སྦྱོར་བ་ནི་སྒྲ་མི་རྟག་སྟེ་བྱས་པའི་ཕྱིར་ཞེས་གཏན་ཚིགས་ཡོད་པར་རྟོགས་པ་ལས་བྱས་པའི་ཕྱིར་རྟག་གོ་ཞེས་བྱ་བ་ནི་འགལ་བ་དང༌། རྩོལ་བ་ལས་བྱུང་བ་ཡིན་ཏེ་བྱས་པའི་ཕྱིར་ཞེས་བྱ་བ་ནི་མ་ངེས་པ་དང༌། གཏན་ཚིགས་ཚུལ་གསུམ་པའི་རྟགས་གོ་བར་བྱ་བར་མི་འགྱུར་ཏེ་དེ་བསྒྲུབ་པར་བྱ་བ་ལྟོས་པའི་ཕྱིར་རོ། །དམ་བཅའ་བའི་ཚིག་ནི་ཆ་ཤས་ལ་སྤྱི་བརྟགས་པའི་ཕྱིར་རོ། །བསྒྲུབ་པར་བྱ་བའི་ཆོས་ཅན་ལ་ཕྱོགས་ཞེས་བྱ་བ་སྟེ། དེ་ལ་ཡོད་པའི་བྱས་པ་ཉིད་ནི་ཕྱོགས་ཀྱི་ཆོས་སོ། །བསྒྲུབ་པར་བྱ་བའི་ཆོས་ནི་སྤྱིའི་དོན་ནི་ཕྱོགས་སོ། །དེ་ལ་འཇུག་པ་ནི་མཐུན་པའི་ཕྱོགས་ལ་ཡོད་པ་དང༌། མི་མཐུན་པའི་ཕྱོགས་ལ་མེད་པ་སྟེ་མཐུན་པའི་ཕྱོགས་ཞེས་བྱ་བ་བསྒྲུབ་པར་བྱ་བའི་ཆོས་སྤོང་བ་ནི་མི་འཇུག་པའོ། །མི་མཐུན་པའི་ཕྱོགས་ལ་མེད་པར་རྟོགས་པ་ཡིན་ནོ་ཞེས་དོགས་པ་ལ། གལ་ཏེ་ཞེས་བྱ་བ་སྨོས་ཏེ། བསྒྲུབ་པར་བྱ་བའི་ཆོས་ཀྱི་མཚན་ཉིད་ངེས་པ་དང༌། ཆོས་མཐུན་པ་ཅན་གྱི་སྦྱོར་བ་ལ་སོགས་པ་རང་གི་ངོ་བོ་ངེས་པར་བཟུང་བའི་བདག་ཉིད་ལས་གཞན་དུ་ན་ནི་དམ་བཅའ་བའི་ཚིག་མེད་པ་ནའོ། །དེ་ནི་མི་རིགས་ཏེ་བསྒྲུབ་པར་བྱ་བ་འགྲུབ་པ་དོན་དུ་ཆོས་མཐུན་པ་ཅན་གྱི་སྦྱོར་བ་ལ་སོགས་པ་ཤེས་པའི་དོན་ལ་ཡུལ་ཉེ་བར་བསྟན་པར་བྱ་བ་ཡིན་ན་ནི་དེ་ཐམས་ཅད་ལེགས་པར་འགྱུར་རོ། །ཇི་སྲིད་དུ་རང་གི་དོན་རྗེས་སུ་དཔག་པའི་དུས་སུ་དམ་བཅའ་བའི་ཚིག་མེད་ཀྱང་ཕྱོགས་ཀྱི་ཆོས་བཟུང་ནས་འབྲེལ་བ་དྲན་པས་བསྒྲུབ་པར་བྱ་བ་འགྲུབ་པའི་མཚན་ཉིད་རྟོགས་པ་ཡིན་ནོ་ཞེས་བཤད་པ་དེ་བཞིན་དུ་གཞན་གྱི་དོན་གྱི་རྗེས་
སུ་དཔག་པ་ལ་ཡང་འགྱུར་ཏེ། གང་གི་ཕྱིར་དེ་ལྟ་བས་ན་དམ་བཅའ་བའི་སྦྱོར་བར་སྨྲ་བ་ནི་གང་གི་ཚེ་རང་ཉིད་ཀྱིས་བསྒྲུབ་པར་བྱ་བ་རྟོགས་པ་དེའི་ཚེ་བདག་ཉིད་ཀྱི་བསྒྲུབ་པར་བྱ་བ་རྟོགས་པས་ཡུལ་རྣམ་པར་འཇོག་པར་བྱེད་ན་གང་གིས་ན་ཡུལ་དམ་བཅའ་བའི་ཚིག་གི་སྒོ་ནས་སྐྱེས་བུ་འགའ་ཞིག་གིས་དེ་མེད་ཀྱང་རྟོགས་པས་བསྒྲུབ་པར་བྱ་བ་ངེས་པ་ནི་རྟགས་ཀྱི་མཐུ་ཁོ་ན་ལས་ཡིན་ནོ། །ཁོ་བོ་ཅག་གིས་རྟོགས་པ་གང་ཡིན་པ་དེ་ནི་ཁོ་བོ་ཅག་དོན་དུ་གཉེར་བ་མཐོང་བ་ནི་བསལ་བའོ། །དམ་བཅའ་བའི་སྦྱོར་བ་མཚན་ཉིད་ནི་ཅི་དུས་སྟོན་གྱི་བྲམ་ཟེ་བཞིན་དུ་རྙེད་པ་ཚོལ་བར་བྱེད་དམ། དཔེར་ན་ཡོད་མེད་ཀྱང་གཞན་དག་གི་ཁྱིམ་དུ་བྲམ་ཟེ་ལ་གཞན་དག་དད་པ་ཅན་ལ་སོགས་པ་དུས་སྟོན་དོན་དུ་གཉེར་བ་ན་དད་པ་ཅན་ལ་སྨྲས་པ་མར་གྱིས་བཀང་ཞིང་སོ་སོར་ཡོན་སྟེར་ན་ནི་ཁོ་བོ་ཟའི་གཞན་དུ་ན་མ་ཡིན་ནོ་ཞེས་བྱ་བ་དེ་དང་མཚུངས་པར་ཁྱོད་ལ་ཡང་ཡིན་ནོ། །གཞན་ཡང་གལ་ཏེ་སྨྲས་པ་གཞན་གྱི་དོན་གྱི་རྗེས་སུ་དཔག་པའི་དུས་སུ་ཇི་ལྟར་རྟགས་གཞན་གྱིས་མ་བརྗོད་ན་རྟོགས་པ་མེད་དོ་ཞེས་བསྟན་པ་དེ་བཞིན་དུ་བསྒྲུབ་པར་བྱ་བ་ཡིན་ནོ་ཞེས་བརྗོད་ན། ནམ་གྱི་ཚེ་དགོས་པ་ཡིན། གལ་ཏེ་འདི་རྒོལ་བས་བརྗོད་པ་ཙམ་གྱིས་རྟགས་ཀྱང་ངེས་ལ་དེའི་རྗེས་སུ་འབྲངས་ནས་བསྒྲུབ་བྱ་རྟོགས་པར་འགྱུར་བ་དང་གཞན་ལ་རྟོགས་པ་དོན་དུ་གཉེར་བ་ཡིན་ན་ཁོ་བོ་ཡང་རྟགས་བརྗོད་པ་སྤངས་ནས་དམ་བཅའ་བ་ལ་ཅིས་ན་སྦྱོར་བ་མི་བྱེད། ཁོ་བོ་ཅག་གི་ཚིག་ཉེད་དེ་རྟོགས་པའི་ཚད་མ་ཡིན་པ་དེ་ཉིད་ཀྱི་རྗེས་སུ་དཔག་པར་བྱ་བ་རྟོགས་པ་ནི་བརྗོད་པས་གྲུབ་པའི་ཕྱིར་ན་དེ་ན་ཡོད་པ་མ་ཡིན་ནོ། །གང་གི་ཕྱིར་ཁོ་བོ་ཅག་གི་ཚིག་འབའ་ཞིག་གིས་ཀྱང་མ་ཡིན་ཏེ། རང་གི་དོན་རྗེས་སུ་དཔག་པའི་དུས་སུ་ཁོ་བོ་ཅག་གིས་བརྗོད་པ་མེད་པའི་ཕྱིར་རོ། །ཀྱང་གི་སྒྲས་ནི་འོན་ཀྱང་གང་གི་ཚེ་ཁོ་བོ་ཅག་གི་བརྗོད་པ་འཇུག་པ་དེའི་ཚེ་ཡང་ཁོ་བོ་ཅག་གི་ཚིག་ལས་རྟགས་ཀྱང་རྟོགས་པ་མེད་ན་གང་ཁོ་ན་ལས་བསྒྲུབ་བྱ་འགྲུབ་པའི་རྗེས་སུ་འབྲང་བར་འགྱུར། འོན་ཀྱང་གང་གི་ཚེ་དེའི་རྟགས་ཚད་མ་འགའ་ཞིག་ལས་དེ་འདིར་རང་ཉིད་གྲུབ་པར་གྱུར་པ་དེ་ལ་ཁོ་བོ་ཅག་གིས་དྲན་པ་སྐྱེད་པར་བྱེད་པ་ཙམ་ཡིན་པ་
དེའི་ཚེ་རྟགས་བདག་ཉིད་གྲུབ་པའི་རྗེས་སུ་འབྲངས་ནས་བསྒྲུབ་པར་བྱ་བ་རྟོགས་ཀྱི་ཚིག་གིས་ནི་མ་ཡིན་ནོ། །དེའི་ཕྱིར་གང་གིས་ན་དམ་བཅའ་བ་བརྗོད་པ་དང་མ་བརྗོད་པའི་བདག་ཉིད་ཀྱི་གནས་སྐབས་འདི་གཉིས་ལ་ཁྱད་པར་མེད་དེ་རྟགས་ཀྱི་བདག་ཉིད་གྲུབ་པའི་ནུས་པ་ཁོ་ནས་བསྒྲུབ་པར་བྱ་བ་རྟོགས་པས་ཅི་ཡང་མ་ཡིན་ནོ། །དེས་ན་རང་དང་གཞན་གྱི་དོན་རྗེས་སུ་དཔག་པ་རྟགས་ཀྱི་བདག་ཉིད་ཀྱི་རྗེས་སུ་འབྲངས་པ་དེས་བསྒྲུབ་བྱ་རྟོགས་ཏེ། བསྒྲུབ་བྱ་རྟོགས་པ་ལ་བྱེ་བྲག་མེད་པའི་ཕྱིར་གཞན་གྱི་རྗེས་སུ་དཔག་པ་ལ་དམ་བཅའ་བ་དོན་མེད་པ་ཉིད་དེ་རྟགས་ཀྱང་རེ་ཞིག་འདིར་མ་བརྗོད་པ་ཡིན་ན། གང་དེ་སྔར་གྲུབ་པའི་བདག་ཉིད་རྗེས་སུ་དྲན་པས་མ་ཡིན་ན་ཅི་ཐེ་ཚོམ་ཟ་བའི་དོན་བརྗོད་པར་བྱ་བའི་དམ་བཅའ་བ་བརྗོད་པར་ཁས་ལེན་པ་ཡིན། གལ་ཏེ་བསྒྲུབ་པར་བྱ་བ་འགྲུབ་པ་ལ་དམ་བཅའ་བ་མི་བརྗོད་པ་ཉེ་བར་མི་མཁོ་བས་དེའི་དོན་ལ་འདི་སྦྱོར་བ་མ་ཡིན་གྱི་ཆོས་མཐུན་པའི་སྦྱོར་བ་ལ་སོགས་པ་ཤེས་པའི་ཕྱིར་དེ་བརྗོད་པ་ལ་གནས་པ་ཉིད་དེ་དེ་བཞིན་དུ་ན་རྟོགས་པ་མེད་པའི་ཕྱིར་རོ་སྙམ་ན་དམ་བཅའ་བ་སྨོས་པ་མེད་པ་ཞེས་བྱ་བ་སྨོས་ཏེ། ཆོས་མཐུན་པའི་སྦྱོར་བ་ལ་སོགས་པ་དམ་བཅའ་བ་བརྗོད་པ་མེད་པར་ཡང་རྟོགས་པ་མཐོང་བ་དེའི་ཕྱིར་དེའི་དོན་ལ་དམ་བཅའ་བ་ཉེ་བར་དགོད་པ་མཛེས་པ་མ་ཡིན་ནོ། །ཆོས་མཐུན་པའི་སྦྱོར་བ་ལ་སོགས་པ་མེད་ན་ཡང་བསྒྲུབ་པར་བྱ་བ་བསྟན་པ་རྟོགས་པ་ག་ལ་ཡིན་ཞེ་ན། ཕྱོགས་ཀྱི་ཆོས་དང་འབྲེལ་པ་སྨོས་པ་ཙམ་གྱིས་ཞེས་བྱ་བ་སྨོས་ཏེ། འདི་སྙམ་དུ་དགོངས་པ་ཡིན་ཏེ་འགའ་ཞིག་བྱས་པ་ཡིན་པ་དེ་ནི་མི་རྟག་གོ་ཞེས་བྱ་བ་དེ་ཙམ་བརྗོད་པ་ཙམ་གྱིས་མ་ཡིན་ཏེ། བཏང་སྙོམས་སུ་འདུག་པ་དང༌། སྒྲུབ་པར་བྱེད་པ་མ་ཚང་བ་གང་ཡིན་པ་ཁོ་ནས་ཕན་པའི་ཕྱིར་རོ། །འོན་ཀྱང་གཏན་ཚིགས་ཆོས་ཅན་ལ་ཉེ་བར་བསྡུ་བ་ནི་གདོན་མི་ཟ་བར་བྱ་བ་ཡིན་ནོ། །དེ་ལ་གང་གི་ཚེ་སྒྲ་ཡང་བྱས་པས་ཤེས་བརྗོད་པ་དེའི་ཚེ་ཆོས་མཐུན་པ་ཅན་གྱི་སྦྱོར་བ་རྟོགས་པའམ། ཡང་ན་གང་གི་ཚེ་བརྟག་པ་བརྗོད་པ་དེའི་ཚེ་ཆོས་མི་མཐུན་པ་ཅན་ཡིན་ནོ་ཞེས་འབྲེལ་པ་བརྗོད་པ་སྔོན་དུ་སོང་བའི་ཕྱོགས་ཀྱི་ཆོས་བརྗོད་པས་སྦྱོར་བ་གཉི་ག་རྟོགས་པ་
ཡིན་ནོ། །གཏན་ཚིགས་འགལ་བ་དང་མ་ངེས་པ་ཡང་ཕྱོགས་ཀྱི་ཆོས་སྨོས་པ་ཙམ་གྱིས་རྟོགས་སོ། །གང་གི་འབྲེལ་པ་རྗོད་པར་བྱེད་པ་དེའི་ཚེ་ཇི་ལྟར་མི་རྟོགས། དེ་ལྟ་ན་གང་བྱས་པ་དེ་ནི་མི་རྟག་པ་ཡིན་ནོ་ཞེས་བྱ་བ་ནི་ཕྱོགས་ཀྱི་ཆོས་བརྗོད་པ་ན་འབྲེལ་པ་བཤད་པ་ལ་གཏན་ཚིགས་སུ་ཁོང་དུ་ཆུད་པ་ནི་བསྒྲུབ་པའི་རྗེས་སུ་བཟླས་པས་ཁྱབ་པ་ཡིན་ནོ། །གང་བྱས་པ་དེ་ནི་རྟག་པ་ཡིན་ནོ་ཞེས་བརྗོད་པ་ནི་འགལ་བ་སྟེ་ཁྱབ་པ་ཕྱིན་ཅི་ལོག་པ་ཡིན་ལ། གང་བྱས་པ་དེ་ནི་རྩོལ་བ་ལས་བྱུང་བ་ཡིན་ནོ་ཞེས་བྱ་བ་བསྟན་པ་ནི་འཁྲུལ་པས་མ་ངེས་པ་ཡིན་པར་ངེས་སོ། །ཚུལ་གསུམ་པས་རྟགས་གོ་བར་བྱ་བ་ཡིན་ཏེ་གང་གི་ཕྱིར་ཁྱབ་པ་སྟོན་པའི་དུས་སུ་ཁྱབ་པར་བྱེད་པའི་ཆོས་བསྒྲུབ་པར་བྱ་བ་རྟོགས་པར་བྱའོ། །གང་ལ་ཁྱབ་པར་བྱ་བའི་ཆོས་ཅན་ལ་ཉེ་བར་སྡུད་པ་དེ་ཁྱབ་པར་བྱེད་པའི་ཆོས་ཁྱད་པར་ཅན་རྟོགས་པར་བྱ་སྟེ། བསྒྲུབ་པར་བྱ་བའི་སྤྱིའི་ཕྱོགས་གཅིག་ཕྱོགས་ཡིན་ནོ་ཞེས་ཉེ་བར་བསྡུ་བ་ནི་ཁྱབ་པར་བྱ་བའི་ཆོས་ཕྱོགས་ཀྱི་ཆོས་ཉིད་དུ་རྟོགས་པར་བྱའོ། །དེ་ཡང་ཁྱབ་པ་ཆོས་ཅན་གང་ཉེ་བར་བསྟན་པ་དེ་ནི་བསྒྲུབ་པར་བྱ་བའི་ཆོས་ཀྱི་སྤྱི་དང་དོན་མཐུན་པ་ལ་མཐུན་པའི་ཕྱོགས་སུ་ཤེས་པར་བྱའོ་ཞེས་མཐུན་པའི་ཕྱོགས་ལ་ཡོད་པ་ཡང་རྟོགས་པ་དང༌། ཤུགས་ཀྱིས་ཁྱབ་པར་བྱེད་པ་ལྡོག་པས་ཁྱབ་པར་བྱ་བ་ལྡོག་པ་གང་ལ་ངེས་པ་དེ་ནི་མི་མཐུན་པའི་ཕྱོགས་ལ་མེད་པ་ཡང་ངེས་པ་ཡིན་ནོ། །གལ་ཏེ་ཕྱོགས་ལ་སོགས་པ་རྣམས་ཀྱང་ཤེས་པ་ནི་ཅུང་ཟད་ཅིག་དོགས་པ་ནི་ཐ་སྙད་དུ་བྱེད་པ་རྣམས་ཕྱོགས་ལ་སོགས་པའི་བརྡ་ལ་ལྟོས་ནས་ལྐོག་ཏུ་གྱུར་པའི་དོན་རྟོགས་པ་མ་ཡིན་གྱི། གང་ལ་ལར་དཔེ་གང་ལ་འབྲེལ་པའི་རྣམ་པ་དེ་དང་དེས་རྟོགས་པ་དེ་ལ་འཇིག་རྟེན་པ་དངོས་པོ་རྟོགས་པར་གྱུར་པ་ནི་ཕྱོགས་ལ་སོགས་པ་བརྡ་བཟུང་པ་ལ་ལྟོས་པ་མ་ཡིན་ནོ། །དེ་ལ་བསྟན་བཅོས་བྱེད་པ་ཇི་ལྟར་འདོད་པའི་ལུང་གི་ངོ་བོ་རྟོགས་པ་རང་ཉིད་ཀྱི་བརྡ་ལ། གཞན་པའི་མཚན་ཉིད་བྱེ་པ་ཡང་ཐ་སྙད་ཀྱི་དུས་སུ་དེའི་རྗེས་སུ་འབྲང་བ་རྣམས་ལ་འབའ་ཞིག་ཏུ་ཉེ་བར་མཁོ་བ་མེད་དོ། །དེའི་བརྡ་བསྟན་པ་ཉིད་ནི་ཇི་སྐད་བཤད་པའི་
ལུང་གི་ངོ་བོ་ལ་ཉེ་བར་མཁོ་བའི་ཐ་སྙད་དུ་བྱེད་པ་རྣམས་གལ་ཏེ་དེ་ལས་རྟོགས་པ་དེ་ཙམ་ཉིད་ཀྱི་བསྒྲུབ་བྱ་འགྲུབ་པ་སྐྱེད་པའི་ཕྱིར་ཕྱོགས་དང་མཐུན་པའི་ཕྱོགས་ལ་སོགས་པའི་བརྡ་ཡོངས་སུ་ཤེས་པ་ལ་ཡང་ཅུང་ཟད་ཉམས་པ་མེད་དོ། །དེ་ཉིད་ཀྱི་ཕྱིར་སློབ་དཔོན་གྱིས་མེད་ན་མི་འབྱུང་བའི་དོན་བསྟན་པ་དེ་རྗེས་སུ་དཔག་པ་ཡིན་ནོ་ཞེས་གོ་བར་བྱེད་པའི་ངོ་བོ་ཙམ་གྱི་ཕྱོགས་ལ་བརྡ་ལ་མི་ལྟོས་པར་རྩོད་པ་བསྒྲུབ་པར་བཤད་དོ། །རང་གི་ཤེས་རབ་ཀྱིས་ཉེས་པས་ཡིན་གྱི། དེ་ལ་ཅུང་ཟད་ཅིག་ཀྱང་སྐྱོན་དུ་གྲགས་པ་མེད་པའི་ཕྱིར་འདིར་ཅི་ཞིག་བརྗོད་པར་བྱ། དེའི་ཆོས་མཐུན་པ་ཅན་གྱི་སྦྱོར་བ་ལ་སོགས་པ་ཤེས་པའི་ཕྱིར་དམ་བཅའ་བ་བརྗོད་པ་ཡིན་ན། ཕྱོགས་ཀྱི་ཆོས་དང་འབྲེལ་པ་བརྗོད་པ་ཙམ་ཁོ་ནས་ཇི་སྐད་བཤད་པའི་རྣམ་པ་རྟོགས་པར་མི་ཡོད་དེ། ཅི་ཡང་མེད་པ་ཡོད་དེ། ཅི་ཡང་མེད་པ་ཁོ་ནའོ། །རང་ཉིད་ཀྱང་འདི་བརྗོད་པའི་རིམ་པ་གནག་གིས་རྗེས་སུ་དཔག་པར་བྱ་བ་རྟོགས་པ་དེ་ཁྱབ་པར་དུ་བསལ་ནས་གཞན་ལ་རྟོགས་པ་རིམ་གཞན་ལ་བརྟེན་པ་ནི་གཞན་སླུ་བ་གཡོ་ཅན་གྱི་རྟོགས་པ་ཁོ་ན་ཡིན་གྱི་བདེན་པ་མ་ཡིན་ནོ་ཞེས་བསྟན་པ་ནི་རང་ལ་ངེས་པ་བཞིན་དུ་ཞེས་བྱ་པ་ལ་སོགས་པ་སྨོས་ཏེ། ཇི་ལྟར་རང་ལ་པ་སྐྱེས་པར་བྱས་པ་དེ་བཞིན་དུ་གཞན་ལ་ཡང་ངེས་པ་སྐྱེས་པར་བྱེད་པ་ནི་གཞན་ལ་ཡང་ཕན་པར་དགའ་བས་སྒྲུབ་པ་བརྗོད་དོ། །དེ་ལ་ནི་དེའི་རིགས་པར་གྱུར་པ་ལའོ། །བདག་ཉིད་ནི་རྒོལ་བ་འདིའོ། །གཞན་བྱ་ཉེ་བར་བསྟན་པ་ནི་ཉེ་བར་བསྟན་པ་སུ་ཞིག་གིས་བརྗོད་པ་མེད་ཀྱང་རང་གི་དོན་གྱི་རྗེས་སུ་དཔག་པའི་དུས་སུ་གཞལ་པར་བྱ་བ་ལ་རྟོགས་ལ་གཞན་ལ་ཐེ་ཚོམ་ཟ་བ་ལ་སོགས་པ་ལ་སྟོན་པ་ནི་བདག་ཉིད་ཀྱིས་རྟོགས་པའི་གཞལ་བྱ་ཁོང་དུ་ཆུད་པ་སྔར་རང་ཉིད་ཀྱིས་རྟོགས་པའི་དུས་སུ་གང་སྔ་མའི་གཞལ་བྱ་རྟོགས་པའི་ཐབས་ཀྱི་རིམ་པ་ཉམས་སུ་མྱོང་བ་དེ་ལས་གཞན་ལ་བརྟེན་པ་ཡིན་ནོ་ཞེས་བྱ་བ་འདི་ལ་རིམ་པ་གཞན་ལ་བརྟེན་པའི་རྒྱུ་ཅི་ཞིག་ཡོད། ཅི་ཡང་མེད་པ་ཉིད་དེ་གཞན་དག་རྨོངས་པར་འགྱུར་བས་སྤང་བར་བྱའོ། །འདི་ལྟར་གང་གི་ཚེ་བདག་ཉིད་ཀྱིས་རྟོགས་པའི་རིམ་པས་
རྟོགས་པའི་རྒྱུ་མཚན་ཡིན་ན་ཅིས་ན་དེས་ཡོངས་སུ་སྤངས་ནས་རིམ་པ་གཞན་ལ་བརྟེན་པ་ཡིན། ཡང་ན་རྟོགས་པའི་རྒྱུ་མཚན་མ་ཡིན་པའི་རིམ་པ་གཞན་ལ་བརྟེན་པ་ཡིན་ན་ནི་ཇི་ལྟར་དེས་རང་ཉིད་ཀྱིས་རྟོགས་པ་དང་ལྡན་པ་ཁྱེད་ཀྱི་ཡིན་པའི་ཕྱིར་རོ། །དེ་ལྟ་བས་ན་གང་གི་ཕྱིར་དེ་ལྟར་ནའོ། །གཞལ་བར་བྱ་བ་བསྒྲུབ་པར་བྱ་བ་སྨོས་ཏེ། དམ་བཅའ་བ་བརྗོད་པ་ནི་ཅུང་ཟད་ཅིག་ཀྱང་དགོས་པ་མེད་དོ། །གང་ལས་གཞན་དུ་ཡང་ནི་མེད་ཀྱང་དེས་རྟོགས་པ་སྟེ་བསྒྲུབ་པར་བྱ་བའི་རྟོགས་པ་སྐྱེ་བའི་ཕྱིར་ཞེས་བྱ་བ་མཇུག་བསྡུ་བའོ། །དེ་ལྟར་དམ་བཅའ་བའི་ངག་སྒྲུབ་པར་བྱེད་པ་ཡིན་པ་བསལ་བས་གཞན་དག་གི་ཉེ་བར་སྦྱར་བ་དང་མཇུག་བསྡུ་བ་ལ་སོགས་པ་གཞན་དག་གིས་ཡོངས་སུ་བརྟགས་པའི་སྒྲུབ་པར་བྱེད་པའི་དག་བསལ་བ་ནི་རིགས་པ་ལྷག་པར་བཤད་པ་ནི་འདིས་ནི་ཞེས་བྱ་བ་སྨོས་ཏེ། གཞན་ལས་ཀྱང་རྟོགས་པ་སྐྱེ་བ་ཡིན་ནོ་ཞེས་བྱ་བའི་རིགས་པ་ནི་ཉེ་བར་གཏོད་པ་དང་མཇུག་བསྡུ་བ་ལ་སོགས་པའོ། །སོགས་པ་སྨོས་པ་ནི་ཐེ་ཚོམ་ཟ་བས་ཤེས་པར་འདོད་པ་ལ་སོགས་པ་སྤངས་ཤིང་བསལ་བ་ཡིན་ནོ། །དེ་ལ་དཔེ་ལ་ལྟོས་པ་དེ་བཞིན་དུ་ཉེ་བར་སྦྱར་བ་འམ། དེ་བཞིན་དུ་མ་ཡིན་པ་ལས་བསྒྲུབ་པར་བྱ་བ་ནི་ཉེ་བར་གཏོད་པའོ། །དམ་བཅའ་བ་སླར་བརྗོད་པ་ནི་མཇུག་བསྡུ་བའོ་ཞེས་བྱ་བ་འདིས་བསྒྲུབ་པར་བྱ་བའི་མཚན་ཉིད་བསྟན་པ་ནི་དམ་བཅའ་བ་ཡིན་པས་དམ་བཅའ་བའོ་།འདིས་ནི་ཞེས་བྱ་བས་དེ་ཉིད་བསྟན་པ་ཡིན་ཏེ་འདི་ཙམ་ཉིད་ཀྱིས་ཕྱོགས་ཀྱི་ཆོས་དང་འབྲེལ་པ་བརྗོད་པ་ཙམ་གྱིས་ཉེ་བར་གཏོད་པ་ལ་སོགས་པ་སྤངས་ནས་བསྒྲུབ་བྱ་རྟོགས་པ་བཏུབ་པའི་ཕྱིར་ནི་སྐྱེའོ། །འདིར་འོད་ཀྱི་སྨྲས་པ་རེ་ཞིག་དམ་བཅའ་བ་ནི་ཡུལ་ཉེ་བར་བསྟན་པའི་ཕྱིར་གདོན་མི་ཟ་བར་བརྗོད་པར་བྱ་སྟེ། འཇིག་རྟེན་སྔར་གཅད་པར་བྱ་བ་ལ་སོགས་པའི་ལས་ངེས་པར་དཔྱད་པ་དེའི་ཕྱིར་སྟ་རེ་ལ་སོགས་པ་སྒྲུབ་པར་བྱེད་དོ། །ཉེ་བར་གཏོད་པ་ཡང་ཇི་སྲིད་དུ་དཔེ་མཐོང་བ་ནུས་པས་གཏན་ཚིགས་ཆོས་ཅན་ལ་ཉེ་བར་མ་བསྡུས་པ་དེ་སྲིད་དུ་གང་ལས་བསྒྲུབ་བྱ་རྟོགས་པར་འགྱུར། རང་གི་དོན་གྱི་རྗེས་སུ་དཔག་པ་དང་མཐོང་བ་ནི་ངེས་པའི་ཤེས་པ་
འདིས་དོན་སྟོན་ཏོ། །དེ་ལྟར་རང་གི་དོན་གྱི་རྗེས་སུ་དཔག་པ་ནི་ཐོག་མར་ས་ཕྱོགས་ལ་དུ་བ་མཐོང་ན་དེ་ནི་གང་དང་གང་ལ་དུ་བ་བདག་གིས་མཐོང་བ་དེ་དང་དེ་ལ་མེ་ཡོད་དོ་ཞེས་མེས་ཁྱབ་པ་དྲན་པ་དང༌། དེས་ན་འདི་ན་ཡང་དུ་བ་ཡོད་དོ་ཞེས་སླར་ངེས་སོ། །དེ་སོ་སོར་ངེས་པའི་དོན་གཞན་གྱི་རྗེས་སུ་དཔག་པ་ལ་ཉེ་བར་གཏོད་པ་ཞེས་བརྗོད་དོ། །མཇུག་བསྡུ་བ་ཡང་གདོན་མི་ཟ་བར་བརྗོད་པར་བྱ་སྟེ། གང་གི་ཕྱིར་གང་ཡང་སྔར་སྒྲ་མི་རྟག་གོ་ཞེས་བརྗོད་པ་དེ་ཙམ་གྱིས་ངེས་པ་སྐྱེ་བ་མ་ཡིན་གྱི་ད་ལྟར་ཚད་མའི་སྟོབས་ཀྱིས་འོངས་པའི་དོན་དེ་ཤེས་པའི་དོན་འདིས་མཇུག་བསྡུ་བ་ཡིན་ནོ།། མ་ལུས་པའི་ཚད་མའི་བྱ་བ་འདིས་ཉེ་བར་སྡུད་པ་ཡིན་ཏེ། འདི་ལྟར་དམ་བཅའ་བ་ནི་ལུང་ངོ༌། །གཏན་ཚིགས་ནི་རྗེས་སུ་དཔག་པའོ། །དཔེ་ནི་མངོན་སུམ་མོ། །ཉེ་བར་གཏོད་པ་ནི་ཉེ་བར་འཇལ་བའོ། །དེས་ན་ཚད་མ་རྣམ་པ་བཞི་པོའི་དེ་དག་གི་བྱ་བ་ཡང་མཇུག་བསྡུ་བས་ཉེ་བར་སྡུད་པ་ཡིན་པའི་ཕྱིར་ཇི་ལྟར་འབྲས་བུ་དང་བཅས་པ་མ་ཡིན་སྙམ་པ་དེ་དག་བསྟན་པ་ནི། རེ་ཞིག་ཁ་བྱའི་ཆགས་པ་ཡོངས་སུ་དོར་ཞེས་བྱ་བ་ལ་སོགས་པ་སྨོས་ཏེ། ཁ་བྱ་ནི་གཅེར་བུ་སློབ་དཔོན་ནོ། །དེ་ནི་འབྲས་བུ་མེད་པའི་མིང་རྩེག་མ་འབྲི་བ་ལ་ཆགས་པ་དེས་ན་དེ་ལྟ་བུ་གཞན་གྱིས་བཤད་པའི་དེའི་སྟེང་དུ་གདོན་མི་ཟ་བར་མི་རིགས་པ་འབྲས་བུ་མེད་པར་ཡང་བརྗོད་པར་བྱེད་པ་ཡིན་པའི་ཕྱིར་གནས་མེད་པ་ལ་མངོན་པར་ཞེན་པ་ནི་སྤང་བར་བྱའོ། །མིག་ཚུགས་ལ་ཞེས་བྱ་བ་ནི་རྣམ་པར་གཡེང་བ་ཉེ་བར་བསྡུས་པ་ལ་སོགས་པའོ། །རེ་ཞིག་འདི་ཙམ་གྱི་ཕྱོགས་ཀྱི་ཆོས་དང་འབྲེལ་པ་སྨོས་པ་ཙམ་གྱི་དག་གིས་བསྒྲུབ་བྱ་རྟོགས་པར་གྱུར་པ་ཅིས་ནམ་ཡིན་ཇི་སྲིད་དུ་ཇི་སྙེད་པའི་གཞན་གྱི་དོན་གྱི་རྗེས་སུ་དཔག་པའི་དོན་བརྗོད་པ་ན་ཁོ་བོ་ཅག་རྣམས་ཀྱིས་རྗེས་སུ་རང་དོན་ཇི་ལྟ་བ་བཞིན་ཤེས་ལ་དེ་སྲིད་དུ་ཉུང་བ་དང་ལྷག་པར་ཆགས་པ་མེད་པའི་རང་གི་དོན་གྱི་རྗེས་སུ་དཔག་པའི་རྟོགས་པ་ལ་ཡང་གཏན་ཚིགས་དང༌། དཔེ་དེའི་ནུས་པ་ལ་ཉམས་པ་ཅི་ཞིག་ཡོད། འདི་གཞན་གྱི་དོན་གྱི་རྗེས་སུ་དཔག་པ་ལ་ཡང་གང་གིས་རྟོགས་པ་མི་སྐྱེ། དེ་ཙམ་གྱིས་རྟོགས་པས་དམ་བཅའ་བ་དང་ཉེ་བར་གཏོད་པ་དང་མཇུག་བསྡུ་བའི་མཚན་ཉིད་སྨོས་པའི་ཕྲེང་བས་ཅི་ཞིག་བྱ། ཡང་ན་བྱིས་པ་
འཇུག་པར་བྱེད་པ་དེ་ལ་ཉེ་བར་མཁོ་བ་ཉེ་བར་བརྗོད་པ་ནི་མཚན་ཉིད་ཡིན་ནོ། །དེ་ལྟ་ན་དམ་བཅའ་བ་ཉེ་བར་གཏོད་པ་དང་མཇུག་བསྡུ་བའི་མཚན་ཉིད་སྤྲོས་པའི་ཕྲེང་བས་ཅི་ཞིག་བྱ། ཡང་བྱིས་པ་འཇུག་པར་བྱེད་པ་དེ་ལ་ཉེ་བར་མཁོ་བ་ཉེ་བར་བརྗོད་པ་ནི་མཚན་ཉིད་ཡིན་ནོ། །དེ་ལྟ་ན་དམ་བཅའ་བ་ནི་ཉེ་བར་གཏོད་པ་དང་མཇུག་བསྡུ་བའི་སྦྱོར་བ་ཡང་གལ་ཏེ་ཚད་མས་དེས་ན་རང་གི་བསྒྲུབ་བྱས་ཁྱབ་པའི་སྒྲུབ་པར་བྱེད་པའི་ཆོས་སུ་མི་འགྱུར་བའམ། བསྒྲུབ་པར་བྱ་བའི་ཆོས་ཅན་ལ་ཡོད་པ་ཡིན་པ་དེ་འདིར་གཏན་ཚིགས་སུ་མི་འགྱུར་རོ། །དེའི་གཏན་ཚིགས་ཡོད་པ་ཡིན་ན་དམ་བཅའ་བ་མེད་ཀྱང་རང་གི་དོན་རྗེས་སུ་དཔག་པ་ལྟ་བུའི་གོ་བར་བྱེད་པའི་ངོ་བོ་མ་ཚང་བ་མེད་པས། དེའི་བསལ་བར་མི་བྱ་བའི་ཕྱིར་གནས་མེད་པ་ལ་ཅིས་ན་ཞེན་པར་བྱེད། སྒྲུབ་པར་བྱེད་པའི་ཆོས་འཕེན་པའི་ནུས་པས་སྟོང་བའི་བསྒྲུབ་པར་བྱ་བའི་ཆོས་བརྗོད་པ་ཙམ་གྱིས་རྒོལ་བ་བསྒྲུབ་པར་བྱ་བ་ངེས་པར་རིགས་པ་མ་ཡིན་ཏེ། གཏན་ཚིགས་ཉེ་བར་བཀོད་པ་དོན་མེད་པར་ཐལ་བར་འགྱུར་བའི་ཕྱིར་རོ། །དེ་དེས་འཕངས་པའི་ནུས་པ་ཉིད་ཀྱིས་དམ་བཅས་པ་ཡིན་ནོ། །གང་གིས་དམ་བཅའ་བའི་ཡུལ་ཉེ་བར་བསྟན་པ་ནི་གཞན་དུ་བསྟན་བཅོས་བྱེད་པ་ཉིད་ཀྱིས་བཤད་པས་སྨྲས་པའི་ལན་བཏབ་ཟིན་ཏོ། །གང་ཡང་སྒྲུབ་པར་བྱེད་པ་ལ་རབ་ཏུ་སྦྱར་བ་དེས་ན་ཁོ་བོ་སྒྲུབ་པར་བྱེད་པ་འདིས་བསྒྲུབ་པར་བྱ་བ་ཆེ་གེ་མོ་ཞིག་རྟོགས་པར་བསྒྲུབ་པར་བྱའོ་སྙམ་པས། ལས་ལ་ངེས་པར་དཔྱད་པ་ཉིད་དེ་ལ་རབ་ཏུ་སྦྱར་བའི་ཕྱིར་འཇིག་རྟེན་པའི་རིགས་ལས་འདས་པ་མ་ཡིན་ནོ། །དེ་ལྟར་མ་ཡིན་ན་གལ་ཏེ་སྒྲུབ་པར་བྱེད་པ་ལས་གང་གི་བསྒྲུབ་པར་བྱ་བ་རྟོགས་པ་སྐྱེ་བ་དེས་ན་ལས་ལ་ངེས་པར་དཔྱོད་པ་དེ་མེད་པར་གྱུར་པའི་རང་གི་དོན་གྱི་རྗེས་སུ་དཔག་པའི་བསྒྲུབ་བྱ་འགྲུབ་པ་ནི་སྒྲུབ་པར་བྱེད་པའི་རྒྱུ་མཚན་ལས་ཇི་ལྟར་འགྱུར། ནང་ཡང་མེ་དང་དུ་བའི་འབྲེལ་པ་སེམས་ལ་རྣམ་པར་གནས་ཀྱང་གང་ན་མེ་ཡོད་ཅེས་མེ་ཚོལ་བ་ན་དུ་བ་དང་པ་སྐྱེ་བ་དེས་ན་ལས་ལ་ངེས་པར་དཔྱོད་པ་དེ་མེད་པར་གྱུར་ཇི་ལྟར་རང་གི་དོན་གྱི་རྗེས་སུ་དཔག་པ་ལ་ངེས་པའི་ཤེས་པའི་ཤེས་པས་ཤེས་པར་འགྱུར། ཡང་ན་རེས་འགའ་དེ་ལ་
མཐོང་ངོ་ཞེས་གཞན་གྱི་དོན་ལ་བསྟན་པ་ཡིན་ན་ནི་དེའི་ཚེ་ཞོ་ལ་སོགས་པ་ཞོ་ལ་སོགས་པ་ཟོས་ནས་རེས་འགའ་དུ་བ་ལས་མེ་རྟོགས་པ་ཡང་ཡིན་ནོ་ཞེས། ཞོ་ལ་སོགས་པ་ཟོས་པ་ཡང་རེས་འགའ་ཞིག་ཅིས་ན་སུ་ཞིག་གིས་བརྟེན་པ་བྱ་བ་མ་ཡིན་གང་ཕྱིར་བརྗོད་པ་ལུང་ཡིན་ནོ་ཞེས་བྱ་བ་དེ་ལ་གལ་ཏེ་རྒོལ་བའི་ཚིག་ཉིད་ལུང་ཡིན་པ་དེའི་ཚེ་དེ་ཉིད་ལས་བསྒྲུབ་པར་བྱ་བ་འགྲུབ་པར་གཏན་ཚིགས་བསྟན་པ་དོན་མེད་དོ། །ཡང་ན་དམ་བཅའ་ལུང་དུ་སྨྲ་ན་ལུང་དམ་བཅའ་བ་ཡིན་པ་དེའི་ཚེ། ཕྱོགས་འདི་ན་མེ་ཡོད་དོ་ཞེས་ལུང་འགའ་ཞིག་ལས་བཤད་པ་མེད་ན་ཇི་ལྟར་ལུང་དམ་བཅའ་བ་ཡིན། གཏན་ཚིགས་རྗེས་སུ་དཔག་པ་ཡིན་ནོ་ཞེས་བྱ་བ་ཡང་མི་རིགས་ཏེ་ཕྱོགས་ཀྱི་ཆོས་ཙམ་གཏན་ཚིགས་མ་ཡིན་གྱི་དེ་ནི་ཚུལ་གསུམ་པ་ཡིན་པའི་ཕྱིར་རོ། །དཔེ་ཐམས་ཅད་ཀྱང་མངོན་སུམ་མ་ཡིན་པའི་ཕྱིར་ཇི་ལྟར་དཔེ་མངོན་སུམ་དུ་འགྱུར། ཉེ་བར་གཏོད་པ་ཡང་ཚད་མ་མ་ཡིན་ན་ཇི་ལྟར་དེའི་བྱེད་པ་ཉེ་བར་བསྡུ་བ་ཡིན། ཉེ་བར་གཏོད་པ་ནི་གལ་ཏེ་ངེས་པར་དཔེ་མཐོང་བའི་ནུས་པས་གཏན་ཚིགས་ཆོས་ཅན་ལ་ཉེ་བར་གཏོད་པ་དེ་ནི་ཉེ་བར་གཏོད་པར་བླའི། །ཅི་བྱས་པའི་ཕྱིར་ཞེས་བྱ་བ་ལ་ཕྱོགས་ཀྱི་ཆོས་བསྟན་པ་ཡིན་དེ་ཉིད་མཐོང་བའི་ནུས་པས་གཏན་ཚིགས་ཉེ་བར་བསྡུ་བར་འགྱུར་བས་ཕྱོགས་ཀྱི་ཆོས་བསྟན་པར་མི་བྱ་བས་ཅི་ཡང་མ་ཡིན་ནོ། །དེས་ན་གང་ལ་དམ་བཅའ་བ་ཐོག་མ་ཁོ་ནར་སྦྱོར་བ་མི་འདོད་དེ། དེ་ལ་དེ་ཡང་བརྗོད་པ་གང་ལས་མཇུག་བསྡུ་བར་འགྱུར་སྙམ་ན། ཕྱིར་ཞེས་བྱ་བ་སྨོས་ཏེ་དེའི་ཕྱིར་ན་འདི་ཉིད་ཕྱོགས་ཀྱི་ཆོས་དང་འབྲེལ་པ་ཙམ་གྱིས་སྒྲུབ་པར་བྱེད་པའི་བདག་ཉིད་ཀྱང་གང་གི་སྦྱོར་བས་སྦྱོར་བ་ན་ཚིག་ཡན་ལག་ལྔ་པའི་བདག་ཉིད་མ་ཡིན་ནོ་ཞེས་བྱ་བར་གནས་སོ། །འདི་བསྒྲུབ་པར་བྱ་བའི་ངག་གིས་དམ་བཅའ་བ་ལ་སོགས་པ་འབའ་ཞིག་སྦྱོར་བ་མི་རིགས་ཏེ། སྔར་གཞན་གྱིས་ཁས་བླངས་པ་གཏན་ཚིགས་ཀྱི་སྦྱོར་བའི་དཔེ་ཡིན་ནོ་ཞེས་བྱ་བའི་རིམ་པ་ངེས་པ་ནི་འགའ་ཡང་མེད་དོ། །ག་ལས་ཤེ་ན་ཐམས་ཅད་དུ་གང་གི་ཚེ་སྔར་གཏན་ཚིགས་ཡིན་ལ་ཕྱི་ནས་ཁྱབ་པའམ། ཡང་ན་སྔར་ཁྱབ་པ་ཡིན་ལ་ཕྱིས་ཕྱོགས་ཀྱི་ཆོས་ལ་རབ་ཏུ་སྦྱར་བ་དེ་ལྟ་ན་ཡང་གོ་བར་བྱེད་པའི་ཕྱིར་རོ། །འོ་ན་ནི་དེའི་སྦྱོར་བ་རྣམ་པ་གཉིས་ཡིན་ནོ་ཞེས་བྱ་བ་མི་རིགས་པར་བཤད་པ་ཡིན་ཏེ་གང་གི་ཕྱིར་རིགས་པ་ཅན་གྱི་གཏན་
ཚིགས་ནི་རྣམ་པ་གསུམ་སྟེ། རྗེས་སུ་འགྲོ་བ་དང༌། ལྡོག་པ་དང༌། རྗེས་སུ་འགྲོ་བ་དང་ལྡོག་པ་དང་ལྡན་པའོ། །དེས་ན་དེའི་སྦྱོར་བ་ནི་རྣམ་པ་གསུམ་སྟེ། ཆོས་མཐུན་པ་དང་ཆོས་མི་མཐུན་པ་དང་ཆོས་མཐུན་པ་དང་ཆོས་མི་མཐུན་པ་ཅན་དག་གོ་ཞེས་བརྗོད་པར་བྱའོ་ཞེ་ན། འབྲེལ་བ་སྨོས་པ་དག་གིས་ཀྱང་ཞེས་བྱ་བ་སྨོས་ཏེ། རིམ་པ་ངེས་པ་འབའ་ཞིག་ནི་རིགས་པ་མ་ཡིན་ཏེ། འོན་ཀྱང་གཉི་ག་ལ་ཡང་དོན་ཐ་དད་པ་ནི་འགའ་ཡང་མེད་དེ་གང་ལ་ཡང་ཚུལ་གསུམ་ཡོད་པར་གྱུར་པ་དེའི་ཕྱིར་གཏན་ཚིགས་ཐམས་ཅད་རྗེས་སུ་འགྲོ་བ་དང་ལྡོག་པ་ཉིད་དང་རྗེས་སུ་འགྲོ་བ་ཅན་ནམ། ལྡོག་པ་ཅན་གྱི་གཏན་ཚིགས་འགའ་ཞིག་མེད་པ་དེས་ན་གང་ལས་སྦྱོར་བ་རྣམ་པ་གསུམ་དུ་འགྱུར་བར་སེམས་པ་ཡིན། །གལ་ཏེ་གང་ལས་དོན་ཐ་དད་པ་མེད་པ་ཡང་ཡིན་ན་གཉིས་ཀ་སྨོས་སོ་ཞེ་ན། གཉིས་ཀ་ཞེས་བྱ་བ་སྨོས་ཏེ་ཆོས་མཐུན་པ་དང་ཆོས་མི་མཐུན་པ་སྦྱོར་བ་ལ་སོགས་པ་ལ་ཡང་དགག་པ་དང་སྒྲུབ་པའི་ངོ་བོས་ཆོས་ཐ་དད་པར་རྟོགས་སོ། །དེ་ལྟ་ན་སྒྲུབ་པར་བྱེད་པའི་ཆོས་དེ་ཡོད་པ་ཉིད་བསྒྲུབ་པར་བྱ་བའོ། །རང་བཞིན་དུ་གྱུར་པ་ཁོ་ན་ཆོས་མཐུན་པ་དང༌། ཆོས་མི་མཐུན་པའི་སྦྱོར་བ་དག་གིས་བཤད་པའི་ཕྱིར་རོ། །འོ་ན་ནི་ཆོས་མཐུན་པའི་སྦྱོར་བ་ནི་གཏན་ཚིགས་ཡོད་ན་བསྒྲུབ་བྱ་ཡོད་པ་དང༌། ཆོས་མི་མཐུན་པ་བསྒྲུབ་པར་བྱ་བ་མེད་ན་གཏན་ཚིགས་མེད་པར་སྒྲ་ལས་རྟོགས་ཀྱི་དེའི་བདག་ཉིད་མ་ཡིན་ན་དེ་ཅིས་ན་བརྗོད། གལ་ཏེ་དེའི་རང་བཞིན་དུ་བསྟན་པའི་ཕྱིར་ཞེ་ན་དེའི་རང་བཞིན་མ་ཡིན་པ་ཞེས་བྱ་བ་སྨོས་ཏེ་གང་གི་ཚེ་ཆོས་མཐུན་པའི་སྦྱོར་བས་དེའི་རང་བཞིན་དུ་མ་འཕངས་པ་དེའི་ཚེ་སྒྲུབ་པར་བྱེད་པ་དེའི་རང་བཞིན་དུ་མ་གྱུར་པ་ཅི་དེ་ལྟར་གཅིག་ཏུ་ངེས་པར་གདོན་མི་ཟ་བར་བསྒྲུབ་པར་བྱ་བར་འགྱུར་ཏེ། རེས་འགའ་བ་ཞིག་ཏུ་འགྱུར་སྲིད་དོ། །གང་བྱས་པ་དེ་མི་རྟག་པ་ཡིན་ནོ་ཞེས་བྱ་བར་གཅིག་ཏུ་ངེས་པར་གྱུར་བའི་གཏན་ཚིགས་ལ་བསྒྲུབ་བྱས་ཁྱབ་པ་ནི་ཆོས་མཐུན་པ་ལ་སོགས་པའི་སྦྱོར་བར་བརྗོད་དོ། །དེ་ཡང་དེའི་བདག་ཉིད་མ་ཡིན་ན་ནི་དོན་གཞན་ལ་ཤུགས་ཀྱིས་དེ་འཕེན་པ་མི་སྲིད་པའི་ཕྱིར་རོ། །ཇི་ལྟར་དེའི་རང་བཞིན་དུ་གྱུར་བའི་གཅིག་ཏུ་ངེས་པ་ལས་གཞན་ལ་
ཡོད་པ་མ་ཡིན་ཞེ་ན། བྱས་པ་ཉིད་ཡོད་ན་ཞེས་བྱ་བ་ལ་སོགས་པ་སྨོས་སོ། །གལ་ཏེ་རྩོལ་བ་ལས་བྱུང་བ་ཉིད་མེད་དུ་ཟིན་ཀྱང་བྱས་པ་ཉིད་ཡོད་པས་དེའི་རང་བཞིན་མ་ཡིན་པས་མི་རྟག་པ་ཡང་འདི་ཉིད་ཀྱི་ལུགས་ཀྱིས་དེ་ཡང་དེའི་བདག་ཉིད་སྤངས་པའི་ཕྱིར་ན་རྩོལ་བ་ལས་བྱུང་བ་ཉིད་མི་རྟག་པའི་རྗེས་སུ་འགྲོ་བས་མི་འགྱུར་བ་འམ། ལྡོག་ན་ལྡོག་པར་མི་འགྱུར་བས་ཇི་ལྟར་དེ་ལས་དེ་རྟོགས་པར་འགྱུར་ཞེ་ན། ཉེས་པ་འདི་དག་མེད་དེ། རྩོལ་བ་ལས་བྱུང་བའི་དོན་གྱི་རང་བཞིན་གྱིས་མི་རྟགས་པ་ཉིད་དེས་སྒྲུབ་པར་བྱེད་པ་དེ་ལ་ཡང་དེའི་བདག་ཉིད་ཡོད་པས་རྗེས་སུ་འགྲོ་བ་དང་ལྡོག་པ་དང་བསལ་བར་མི་ནུས་སོ། །བྱས་པ་ཉིད་མི་རྟག་པ་ཉིད་ཙམ་ལ་ལྟོས་པ་དེའི་བདག་ཉིད་ནི་འདིས་སྤོང་བར་བྱེད་བར་འདོད་པའི་ཕྱིར་རོ། །འོ་ན་ནི་མེ་ལྡོག་པས་དེའི་རང་བཞིན་མ་ཡིན་པའི་དུ་བ་ལྡོག་པ་དང་རྗེས་སུ་འགྲོ་བ་ཡང་མཐོང་ངོ་ཞེ་ན། འབྲས་བུ་མ་ཡིན་པ་ཞེས་བྱ་བ་སྨོས་ཏེ། རྗེས་སུ་འགྲོ་བ་དང་ལྡོག་པ་དག་ནི་འབྲེལ་པའི་རྒྱུ་མཚན་དེས་དེ་ལ་ཁྱབ་པ་ན། དེ་མེད་ན་དེ་མེད་པའི་ཕྱིར་དང༌། དེ་ལ་དོན་གཞན་པའི་དུ་བ་མེ་དེ་ལས་བྱུང་བའི་མཚན་ཉིད་ཀྱི་འབྲེལ་བ་ནི་རྗེས་སུ་འགྲོ་བ་དང་ལྡོག་པའི་རྒྱུ་མཚན་དུ་ཡོད་པར་གྱུར་པའོ། །དེ་དག་གང་ལ་དོན་གཞན་མ་ཡིན་པར་བརྗོད་པ་དེ་ནི་གདོན་མི་ཟ་བའི་བདག་ཉིད་ཡིན་ནོ་ཞེས་བྱ་བར་དགོངས་སོ། །འདིར་དཔེ་ནི་དཔེར་ན་བྱས་པ་ཉིད་དང་རྩོལ་བ་ལས་བྱུང་བ་དེ་དག་ཉིད་ལས་བྱུང་བ་ཟློག་པ་སྟེ་གཅིག་ལྡོག་པས་གཞན་ལྡོག་པ་ནི་མ་ཡིན་ཏེ་གང་རྩོལ་བ་ལས་བྱུང་བ་མ་ཡིན་པ་དེ་ནི་བྱས་པ་ཡང་ཡིན་ནོ་ཞེས་བྱ་བ་དེ་ལྟ་བུའི་ངོ་བོ་ཡིན་ནོ། །གང་གི་ཕྱིར་དེ་ལྟར་ན་དེའི་ཕྱིར་རྗེས་སུ་འགྲོ་བ་དང་ལྡོག་པ་དག་ལས་མཚན་ཉིད་ཇི་ལྟ་བའི་གཏན་ཚིགས་ཡོད་ན་བསྒྲུབ་པར་བྱ་བ་གདོན་མི་ཟ་བར་ཡོད་པ་དང༌། བསྒྲུབ་བྱ་མེད་ན་གཏན་ཚིགས་གདོན་མི་ཟ་བར་མེད་པའི་ཕྱིར་ཆོས་མཐུན་པའི་སྒོ་ནས་སམ་ཆོས་མི་མཐུན་པའི་སྒོ་ནས་སྦྱོར་བ་གཅིག་གིས་གཉིས་པ་འཕེན་པས་བདག་ཉིད་ལ་ཁྱབ་པར་བྱེད་པའི་རྒྱུ་མཚན་གྱིས་འཕངས་པས་དེ་ཡང་ཅིག་ཤོས་ནི་ཁྱབ་པར་བྱ་བ་ཡིན་པ་དེའི་ཕྱིར་གང་ལ་ཡང་ཚུལ་གསུམ་པ་རྟོགས་པས་གཅིག་ནི་ཚིག་གིས་ཡིན་ལ་གཞན་ནི་དོན་གྱིས་ཡིན་ནོ་ཞེས་འབྲེལ་པ་བརྗོད་བའི་སྦྱོར་བ་
ཁོ་ནས་དགག་པའི་སྒོ་ནས་སམ་སྒྲུབ་པའི་སྒོ་ནས་ཐ་དད་ཀྱི་དོན་ནི་མ་ཡིན་ནོ་ཞེས་བྱ་བར་གྲུབ་པོ། །དེའི་ཕྱིར་དེའི་སྦྱོར་བ་གཉིས་ཏེ་ཆོས་མཐུན་པ་དང་ཆོས་མི་མཐུན་པའོ། །ཆོས་མཐུན་པ་དང་ཆོས་མི་མཐུན་པ་དག་གཉིས་བསམ་ཡིན་ལ། དེའི་དོན་གྱིས་ཡིན་ཏེ་གང་ཡང་རུང་བ་ཁོ་ནས་སྟོན་པའི་ཕྱིར་རོ། །གཏན་ཚིགས་ཐམས་ཅད་རྗེས་སུ་འགྲོ་བ་དང༌། ལྡོག་བའི་དངོས་བོ་ཅན་དེ་རྗེས་སུ་འགྲོ་བ་ཅན་ནམ་ལྡོག་པ་ཅན་གྱིས་མ་ཡིན་ནོ་ཞེས་བྱ་འདི་དག་ཀྱང་ཉེ་བར་བསྡུ་བ་ནི་གཉིས་པ་འཕེན་པས་ཞེས་བྱ་བ་སྨོས་ཏེ། གཅིག་པུ་ནི་མ་ཡིན་ནོ། །རྗེས་སུ་འགྲོ་བའི་སྒོ་ནས་སམ་ལྡོག་པའི་སྒོ་ནས་སྒྲུབ་པར་བྱེད་པའི་ངག་གཉིས་ཀྱིས་རྗེས་སུ་འགྲོ་བ་དང་ལྡོག་པ་དག་གི་སྦྱོར་བ་དངོས་སུ་སྒྲ་ཡིས་བསྟན་པར་འདོད་པ་ནི་དོན་མེད་པས་རྟོགས་པའི་ཤེས་པ་ལ་དགོས་བ་མེད་པའི་ཕྱིར་རོ། །དོན་དེ་ཉིད་གཞན་གྱི་བསལ་བ་རྟོགས་པར་བྱ་བ་ནི་དེའི་རང་བཞིན་ཡིན་པ་ཉིད་ཅེས་བྱ་བ་ལ་སོགས་པ་སྨོས་ཏེ། གང་གི་ཚེ་དེའི་རང་བཞིན་གྱིས་བསྒྲུབ་བྱ་དང་གཏན་ཚིགས་ཀྱི་རྗེས་སུ་འགྲོ་བ་གྲུབ་བོ། །དེའི་རང་བཞིན་ཡིན་པ་དེ་ཉིད་ཀྱི་ཕྱིར་དེ་མེད་ན་མེད་པར་ཡང་གྲུབ་པ་ཉིད་དོ། །དེའི་རང་བཞིན་མེད་པ་ནི་གང་གི་བདག་ཉིད་མེད་པས་མེད་པར་རིགས་པའི་ཕྱིར་རོ། །དེ་བཞིན་དུ་དེའི་རང་བཞིན་གྱིས་བསྒྲུབ་པར་བྱ་བ་མེད་ན་སྒྲུབ་པར་བྱེད་པ་མེད་པར་གྲུབ་པ་བདེན་པ་དེ་ཉིད་ཀྱི་ཕྱིར་གཏན་ཚིགས་གྲུབ་པ་དང་རྗེས་སུ་འགྲོ་བ་ཡང་གྲུབ་པ་ཡིན་ནོ། །ཁ་ཅིག་ཆོས་མཐུན་པ་ཅན་གྱི་སྦྱོར་བ་བཤད་པ་ན་དེ་མེད་པ་ཉིད་ནི་གཏན་ཚིགས་མི་མཐུན་པའི་ཕྱོགས་ལ་མེད་པར་གསུངས་པ་ཇི་ལྟར་གཞན་པ་དང་འགལ་བ་མི་མཐུན་པའི་ཕྱོགས་ཡིན་ན་གཏན་ཚིགས་མེད་པར་ཐལ་བར་འགྱུར་བ་དང་འགལ་བ་ཁོ་ནས་རྣམ་པར་བཅད་པ་ཐལ་བར་འགྱུར་པས་ན་བསྣན་པ་བསྟན་པའི་ཕྱིར་ལྡོག་པའི་སྦྱོར་བ་ཡིན་ནོ་ཞེ་ན། དེ་དང་དེའི་དོན་དུ་ཡང་མི་རིགས་ཏེ། གང་གི་ཕྱིར་གཞན་པ་དང་འགལ་བ་དག་ཀྱང་ཡིན་ཏེ། དེ་མེད་པ་འབའ་ཞིག་གིས་མི་མཐུན་པའི་ཕྱོགས་ཡིན་ན་ཆོས་གཞན་དང་ལྡན་པས་གཞན་ཡིན་ན། བརྗོད་པར་འདོད་པའི་ཆོས་ཀྱི་རྟེན་མ་ཡིན་པ་མ་ཡིན་ནོ། །འགལ་བ་ཉིད་ཁོ་ན་མི་མཐུན་པའི་ཕྱོགས་མ་ཡིན་ཏེ་
ལྷན་ཅིག་མི་གནས་པའི་མཚན་ཉིད་འགལ་བ་དང༌། ཕན་ཚུན་སྤངས་ཏེ་གནས་པའི་མཚན་ཉིད་ཀྱིས་སོ། །དེའི་མི་རྟག་པ་ལས་གཞན་པ་དག་མེད་པ་ལ་སོགས་པའི་ཆོས་དང་ལྡན་པའི་དོན་ལ་བྱས་པ་ཉིད་ལ་སོགས་པ་འཇུག་པ་ནི་གཏན་ཚིགས་མེད་པར་ཐལ་བར་འགྱུར་རོ། །དྲོ་བ་བསྒྲུབ་པར་བྱ་བའི་མེའི་མཚན་ཉིད་ཀྱི་གཏན་ཚིགས་དང་འགལ་བ་ནི་གྲང་བ་སྟེ་གྲང་བ་ཡང་མ་ཡིན་དྲོ་བ་ཡང་མ་ཡིན་པ་གཞན་ཡང་རྣམ་པར་བཅད་པར་ཐལ་བར་འགྱུར་བས་དྲོ་བ་གཅིག་ཏུ་ངེས་པ་མེས་གོ་བ་བྱེད་པར་མི་འགྱུར་རོ་ཞེས་བྱ་བ་དེ་འདིའི་སྐྱོན་དུ་འགྱུར་གྱི། སློབ་དཔོན་གྱིས་བཤད་པ་གང་གི་ཚེ་གཅིག་ཏུ་མི་མཐུན་པའི་ཕྱོགས་སུ་འདོད་པ་དེའི་ཚེ་དེ་མེད་པ་མི་མཐུན་པའི་ཕྱོགས་ཡིན་གྱི་འགལ་བ་དང་གཞན་ནི་མ་ཡིན་ན་དེ་ནི་གཞན་ལ་ཡང་བརྗོད་པར་འདོད་པའི་ཆོས་མི་རྟེན་པ་དང་འགལ་བ་ཡང་ཡོད་པས་དེ་མེད་པ་ལས་གཞན་པ་དག་ནི་རིགས་པ་མ་ཡིན་ནོ། །ཁོ་བོ་ཅག་ནི་མི་མཐུན་པའི་ཕྱོགས་ཀྱང་རྣམ་པ་གསུམ་འདོད་པ་དང༌། བརྗོད་པར་འདོད་པའི་ཆོས་ཀྱི་རྟེན་མ་ཡིན་པ་གཞན་ཡིན་ནོ་ཞེས་བྱ་བ་ཡོད་པ་མ་ཡིན་ནོ། །གལ་ཏེ་རང་བཞིན་གྱི་གཏན་ཚིགས་ཀྱི་རྗེས་སུ་འགྲོ་བ་དང་ལྡོག་པ་དག་ནི་སྒྲུབ་པར་བྱེད་པའི་ཆོས་བསྒྲུབ་པར་བྱ་བའི་རང་བཞིན་དུ་གྱུར་པའི་རྒྱུ་མཚན་གྱིས་རྗེས་སུ་འགྲོ་བས་སམ། ལྡོག་པས་ཆོས་མཐུན་པ་དང་ཆོས་མི་མཐུན་པ་ཅན་གྱི་སྦྱོར་བ་དག་བརྗོད་པས་དེའི་བདག་ཉིད་ཀྱི་སྒོ་ནས་དོན་གྱིས་ཅིག་ཤོས་འཕངས་པར་བརྗོད་དོ། །དེའི་ཚེ་ཚད་མ་གྲུབ་པ་ཉིད་དེ་དེའི་རང་བཞིན་དུ་གྱུར་པ་དེའི་རྒྱུ་མཚན་གྱིས་ཡིན་གྱི་སྒྲ་ཙམ་ཤེས་པས་ནི་མ་ཡིན་ནོ་ཞེས་བྱ་བར་དགོངས་སོ་སྙམ་ནས། གཞན་གྱིས་གང་གིས་ན་ཞེས་བྱ་བ་ལ་སོགས་པ་སྨོས་ཏེ། གང་གིས་ན་ཞེས་བྱ་བ་ནི་ཡོད་པ་འཇིག་པའི་རང་བཞིན་དུ་གྱུར་པ་ཉིད་ཀྱིས་ཡོད་པའི་མཚན་ཉིད་ཀྱི་གཏན་ཚིགས་སྐད་ཅིག་མ་ཉིད་ཀྱི་རང་བཞིན་དུ་གྱུར་པ་ཡིན་ནོ་ཞེས་བྱ་བའི་དོན་ཏོ། །འདི་འདྲི་བའི་བསམ་པ་ནི་ཡོད་པ་ནི་རྣམ་པ་གཉིས་ཏེ། བྱས་པ་བུམ་པ་ལ་སོགས་པ་དང་མ་བྱས་པ་ནམ་མཁའ་ལ་སོགས་པའོ། །དེ་ལ་གང་རེ་ཞིག་མ་བྱས་པར་ཡོད་པ་རྒྱུ་མེད་པ་ནི་རྟག་པའི་མཚན་ཉིད་དང་ལྡན་པ་ནི་མི་རྟག་པ་ཁོ་ནར་མི་འགྱུར་ཏེ། གང་ཁོ་
ན་ལས་སྐད་ཅིག་མ་ཡིན་ཞེས་བྱ། ཡོད་པ་ནི་སྐད་ཅིག་མའི་རང་བཞིན་མ་ཡིན་ནོ། །གང་ཡང་ཡོད་པ་དང་བྱས་པ་ཉིད་དེ་དག་ཀྱང་ཐོ་བ་ལ་སོགས་པའི་རྗེས་སུ་འགྲོ་བ་དང༌། ལྡོག་པའི་རྗེས་སུ་བྱེད་པས་འཇིག་པ་ནི་རྒྱུ་དང་བཅས་པའི་ཕྱིར་དེའི་རྒྱུ་ཉེ་བར་འཇིག་གོ །བྱས་པའི་བདག་ཉིད་ཡིན་དུ་ཟིན་ཀྱང་ཡོད་པ་མ་ལུས་པ་ཉིད་སྐད་ཅིག་མའི་རང་བཞིན་མ་ཡིན་ཏེ་རྗེས་སུ་འགྲོ་བ་དང་ལྡོག་པ་དག་མི་སྲིད་པའི་ཕྱིར་གདོན་མི་ཟ་བར་འཇིག་པ་ནི་དབྱུག་པ་ལ་སོགས་པའི་རྗེས་སུ་འགྲོ་བ་དང་ལྡོག་པའི་རྣམ་པས་མཐོང་བའི་ཕྱིར་རོ། །དེ་སྐད་དུ་ཡང༌། བསྣུན་དང་མེ་དང་འབྲེལ་པ་ནི། །འཇིག་པའི་རྐྱེན་དུ་ཉེ་བ་ཡིན། །གང་གི་ཚོགས་པ་མེད་པ་ནི། །བུམ་པ་ལ་སོགས་འཇིག་པ་མེད། །ཅེའོ། །བདེ་བར་གཤེགས་པ་པས་གཞན་ལ་ཡང་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཉིད་རྒྱུ་དང་ལྡན་པའི་ཐ་སྙད་དུ་བྱེད་པའི་རྒྱུ་མཚན་དུ་ཁས་བླངས་པས་དེ་འདིར་ཡང་ཡོད་པ་ཡིན་ནོ་ཞེས་དེའི་ཐ་སྙད་ཅིས་ནི་འཇུག་པར་མི་འགྱུར་ཞེ་ན། འོ་ན་ནི་རྗེས་སུ་འགྲོ་བ་ངེས་པ་ཡང་བསྟན་ཏེ་གནོད་པར་བྱེད་པའི་ཚད་མ་འཇུག་པའི་དབང་གིས་རང་བཞིན་ཡིན་པ་སྔར་བསྟན་ཟིན་ལ། རྗེས་སུ་འགྲོ་བ་ངེས་པ་ཡང་རང་བཞིན་གྱི་གཏན་ཚིགས་ལ་སོགས་པ་ལ་བརྗོད་པས་དེ་གང་གིས་ཕྱོགས་སྔ་མའི་གོ་སྐབས་སུ་འགྱུར་རོ་ཞེ་ན། །བདེན་ཏེ་འོན་ཀྱང་སྔོན་གྱི་སློབ་དཔོན་གྱིས་བྱས་པ་ཉིད་སྐད་ཅིག་པ་ཉིད་བསྒྲུབ་པར་བྱ་བ་ལ་མཐར་གཞན་གྱིས་བྱས་པ་སྟེ། གདོན་མི་ཟ་བར་འཇིག་པའི་རྒྱུ་དང་འབྲེལ་པར་ཁས་ལེན་པའི་ཕྱིར། དེའི་རྒྱུ་དང་མི་ལྡན་པར་བསྟན་པས་ལྟོས་པ་མེད་པར་འཇིག་པ་ལས་བཟློག་པ་ལ་གནོད་པ་ཅན་གྱི་ཚད་མ་རྣམས་ཀྱིས་དེའི་བདག་ཉིད་དུ་སྒྲུབ་པར་བྱེད་པར་བཤད་པ་དེའི་ཞར་ལ་བྱུང་བས་བྱས་པ་དང་ཡོད་པའི་མཚན་ཉིད་ནི་དེའི་བདག་ཉིད་གོ་བར་བྱེད་པ་ཡིན་གྱི་གཞན་དུ་བསྟན་པར་མི་བྱ་སྟེ་དོན་བྱེད་པའི་མཚན་ཉིད་དང་འགལ་བས་ན་ཡོད་པ་ཐམས་ཅད་ནི་དངོས་པོ་ཙམ་ཁོ་ན་ཞེས་སྔར་བཤད་དུ་ཟིན་ཀྱང༌། སྤྲོས་པར་འདོད་ནས་ཕྱོགས་སྔ་མ་ཉེ་བར་བཀོད་དོ། །མ་བྱས་པའི་མཚན་ཉིད་ཅན་གྱི་ཡོད་པ་ནི་མི་སྲིད་པ་ཁོ་ནར་ངེས་ཏེ་རྒྱུ་མེད་ན་ཡུལ་དང་དུས་དང་རང་བཞིན་ངེས་པར་མི་རིགས་པའི་ཕྱིར་
རོ། །དེས་ན་སྔོན་གྱི་སློབ་དཔོན་གྱིས་ཡོད་པ་རྒྱུ་མེད་པ་ཅན་གྱི་རྟག་པ་ནི་ཡན་ལག་མ་ཚང་བ་ཉིད་ཀྱི་རྟག་པ་མི་སྲིད་པའི་ཕྱིར་དེའི་བདག་ཉིད་དུ་དེ་ལ་འབད་པ་མ་མཛད་དོ། །བསྟན་བཅོས་བྱེད་པ་ནི་ཡོད་པའི་སྤྱི་དང་བྱས་པའི་མཚན་ཉིད་ཀྱང་སྐད་ཅིག་མའི་རང་བཞིན་དུ་ཡུལ་དང་དུས་དང་རང་བཞིན་གྱིས་བསྐལ་དུ་ཟིན་ཀྱང་དེའི་བདག་ཉིད་དུ་དངོས་པོ་ལ་གནས་པ་ཁོ་ན་སྟེ། གཞན་གྱིས་ཁས་བླངས་པའི་དོན་བྱེད་པར་འགལ་བ་དང་ཕྱིས་གདོན་མི་ཟ་བར་འཇིག་པ་རྒྱུ་མེད་པ་ནི་ཁྱད་པར་མེད་པས་སྐྱེ་བ་ཙམ་མེད་པར་ཐལ་བར་འགྱུར་བར་བསྟན་པར་བྱའོ། །དེ་ལ་སྔོན་གྱི་སློབ་དཔོན་གྱིས་ཡོད་པ་དང་བྱས་པ་ཐམས་ཅད་ལ་མཐར་རྒྱུས་བྱས་པའི་འཇིག་པར་གདོན་མི་ཟ་བ་ཡིན་ནོ་ཞེས་གང་ཕ་རོལ་པོ་འདོད་པ་ནི་དེ་ནི་ལྟོས་པ་མེད་པའི་རིམ་པས་འཇིག་པའི་རྒྱུ་མི་རིགས་པའི་ཕྱིར་རོ་ཞེས་བཤད་དོ། །གལ་ཏེ་འཇིག་པའི་རྒྱུ་མེད་པ་དེ་ལྟ་ན་དེ་དག་གི་བྱས་པ་འཇིག་པ་སྟེ། གདོན་མི་ཟ་བར་འབྱུང་བ་ནི་འཇིག་གོ་ཞེས་བྱ་བ་གང་ལས་ཡིན་དེ་གློ་བུར་བ་འབའ་ཞིག་གི་རང་བཞིན་མི་རིགས་ཤེ་ན། རང་གི་ངོ་བོ་ཁོ་ནས་ཞེས་བྱ་བ་སྨོས་ཏེ། ཁོ་བོ་ཅག་དེ་ལས་འབྱུང་བ་འབྲས་བུ་ཡིན་པས་དངོས་པོའི་རྒྱུའི་སྒྲས་བརྗོད་དོ། །རང་གི་རྒྱུ་ཁོ་ནས་འཇིག་པ་ནི་འཇིག་པའི་ངང་ཅན་ནི་ཁབ་ཀྱི་རྩེ་མོར་ཡུངས་ཀར་གྱི་གནས་མེད་པ་བཞིན་དུ་རང་གི་བདག་ཉིད་དངོས་པོ་ལས་སྐྱེ་བ་དེ་དག་བྱས་པའི་མཚན་ཉིད་ཀྱི་ཡོད་པའི་དངོས་པོ་རྣམས་རང་གི་རྒྱུ་ལས་གྲུབ་པ་ནི་གཞན་གྱིས་བཅོལ་བ་ལ་སོགས་པས་འཇིག་པ་སྐྱེད་པ་ནི་མ་ཡིན་ནོ། །གང་ལས་ཡིན་ཞེ་ན། དེ་བཅོམ་པ་མེ་དང་འབྲེལ་པ་ལ་སོགས་པ་ལ་རྒྱུར་ཁས་བླངས་པ་དེ་ནི་ནུས་པ་མེད་པའི་ཕྱིར་རོ། །མེ་དང་འབྲེལ་པ་ལ་སོགས་པ་ཆ་རྣམ་པ་གསུམ་དུ་དཔྱད་པར་བྱ་སྟེ། དེ་ཉིད་ཤིང་ལ་སོགས་པ་འཇིག་པའམ་སོལ་བ་ལ་སོགས་པ་གནས་སྐབས་གཞན་པ་འམ་ཤིང་ལ་སོགས་པ་ལྡོག་པའི་མཚན་ཉིད་ཀྱིས་དངོས་པོ་མེད་པ་ཅན་མ་ཡིན་པའི་ངོ་བོ་ཞིག་ཡིན། གང་ལ་མེ་ལ་སོགས་པ་དང་འབྲེལ་པའི་བྱེད་པ་ལས་གཞན་ནི་བསམ་པར་མི་བྱའོ། །རེ་ཞིག་དངོས་པོར་གྱུར་པ་ལ་ལ་ཞིག་ལ་འདིར་འཇིག་པ་རྒྱུའི་ནུས་པས་ནི་མི་རིགས་སོ། །གང་གི་ཕྱིར་འཇིག་
པའི་རྒྱུ་ཡོད་པ་ཡིས་བུད་ཤིང་ལ་སོགས་པ་རང་གི་རྒྱུ་ལས་བསྟན་པའི་ངོ་བོར་སྐྱེས་པའི་རང་བཞིན་ཁོ་ན་མི་བརྟེན་པའི་བདག་ཉིད་ཀྱི་མཚན་ཉིད་ཅན་དུ་མི་བྱེད་དོ། །གང་གིས་ཤེ་ན། བུད་ཤིང་ལ་སོགས་པ་རང་གི་རྒྱུ་ཁོ་ན་ལྡོག་པས་སོ། །གནས་པའི་བདག་ཉིད་ལྡོག་པ་མེད་པ་གཞན་དུ་དངོས་པོ་མེད་པ་དེའི་བདག་ཉིད་དུ་བྱེད་པར་ནུས་པ་མ་ཡིན་ནོ། །དེའི་རྒྱུ་གཞན་གྱིས་ཕྱིས་འབྱུང་བ་ནི་དོན་གཞན་པ་ཉིད་དུ་ཐལ་བར་འགྱུར་ན་དེ་ནི་གཞན་དུ་རིགས་པ་མ་ཡིན་ཏེ་དེ་ལ་རྒྱུའི་བྱེད་པ་བརྟག་པར་མི་ནུས་པའི་ཕྱིར་རོ། །ཡང་ན་ཇི་སྲིད་དུ་རྣམ་གསུམ་བརྟག་པར་བྱ་སྟེ། འཇིག་པ་ནི་ཤིང་ལ་སོགས་པའི་རང་བཞིན་མེ་དང་འབྲེལ་པ་ལ་སོགས་པས་འཇིག་པ་རྒྱུས་བྱེད་པར་འགྱུར་ན་དེའི་རང་གི་རྒྱུ་ཁོ་ནས་ལྡོག་པའི་ཕྱིར་རོ། །གཞོན་ནུ་མ་ལེན་གྱིས་བསམ་པ་མེ་དང་འབྲེལ་པ་ལ་སོགས་པས་མེད་པའི་རང་བཞིན་དུ་བྱེད་པ་ནི་མ་ཡིན་ཏེ། འོན་ཀྱང་བུད་ཤིང་ལ་སོགས་པས་ཞིག་ནས་མེད་པ་དེ་ཡང་བུད་ཤིང་ལ་སོགས་པའི་ངོ་བོ་མ་ཚང་བ་ན་སོལ་བ་ལ་སོགས་པ་ཕྱིས་བྱུང་བ་ཁོ་ན་སྟེ། དེ་ནི་ཞོ་ལ་འོ་མ་མེད་པ་ལ་ཞིག་ནས་མེད་པར་བཤད་པའི་རྣམ་པ་དེ་བཞིན་དུ་མེད་པ་རྒྱུ་དང་ལྡན་པར་ཁས་བླང་པར་བྱ་བ་ལ་འགལ་བ་མེད་དོ། །དེ་བཞིན་དུ་གཞན་ཞིག་ཀྱང༌། དངོས་པོ་གཞན་གྱིས་དབེན་པ་ཡི། །མི་དམིགས་པ་ལས་སྲིད་པ་ན། །དེ་ཡི་དེ་ནི་དངོས་མེད་འདོད། །ཅིས་ན་རྒྱུ་ལས་འབྱུང་མ་ཡིན། །ཞེས་སྨྲས་ཏེ། །གཞོན་ནུ་མ་ལེན་གྱིས་འདོད་པ་དེ་དང་དེ་དག་བསལ་བ་ནི་དངོས་པོ་རྣམས་ཀྱི་ཞེས་བྱ་བ་ལ་སོགས་པ་སྨོས་ཏེ། འབྲས་བུའི་བདག་ཉིད་ཕྱི་མ་ནི་དངོས་པོ་གཞན་ཁོ་ན་མེད་པ་གང་ཡིན་པ་དེ་ནི་མེ་དང་འབྲེལ་པ་ལ་སོགས་པ་ལས་སོལ་བ་ལ་སོགས་པ་འབྱུང་བ་ནི་ཁོ་བོ་ཅག་མངོན་པར་འདོད་པ་ཉིད་དེ། འོན་ཀྱང་དངོས་པོ་གཞན་རྒྱུར་ཁས་བླངས་པ་ན་མེ་ལ་སོགས་པ་བུད་ཤིང་ལ་བྱེད་པ་མེད་པར་དངོས་པོའི་བུད་ཤིང་ལ་སོགས་པའི་གནས་སྐབས་ཁོ་ནར་འགྱུར་རོ། །དེས་ན་ཡང་ཇི་ལྟར་མེ་ལ་སོགས་པ་དང་འབྲེལ་པ་ལས་སྔར་བུད་ཤིང་ལ་སོགས་པ་ཉེ་བར་དམིགས་པ་ལས་གཞན་པ་དེའི་བསྒྲུབ་པར་བྱ་བའི་ཡང་དོན་བྱེད་པ་དེ་བཞིན་དུ་སོལ་བ་ལ་སོགས་པ་སྐྱེད་པ་ན་ཉེ་བར་དམིགས་པར་ཐལ་བར་འགྱུར་རོ། །ཅི་སྟེ་དངོས་པོ་
གཞན་ཞིག་ནས་མེད་པའི་ངོ་བོ་དེ་སྐྱེད་པ་ནི་བུད་ཤིང་ལ་སོགས་པ་ཞིག་ནས་མེད་པས་ཇི་ལྟར་ཉེ་བར་དམིགས་པར་ཐལ་བར་འགྱུར་ཞེ་ན། འདི་སྙམ་དུ་དགོངས་པ་ཡིན་ཏེ་འཇིག་པ་འདི་བུད་ཤིང་ལ་སོགས་པ་ལས་གཞན་བ་ལང་ལ་སོགས་པ་དག་ཀྱང་དངོས་པོ་དེ་ལྟར་མ་གྱུར་ཅིག་སྙམ་ནས་སོལ་བ་ལ་སོགས་པ་ལ་ཞིག་པ་རྣམ་པར་འཇིག་པའི་རྒྱུ་མཚན་བརྗོད་པ་ཡིན་ནོ། །གལ་ཏེ་འདི་ཡོད་པ་ལས་དེ་ལྡོག་པ་ཡིན་ནོ་ཞེ་ན། ཚིག་ལ་མཁས་པའི་ངོ་མཚར་དེ་གང་ཡོད་པས་ལྡོག་པ་ཡིན། ཅི་ཡང་མ་ཡིན་པའི་རང་བཞིན་ནི་ཁས་མ་བླངས་པས་དེ་ཉིད་དངོས་པོ་གཞན་པ་སོལ་བ་ལ་སོགས་པ་ལ་ལྡོག་པར་བརྗོད་ན། དེའི་དོན་འདི་གྲུབ་ཟིན་པས་སོལ་བ་ལ་སོགས་པའི་དངོས་པོའི་སོལ་བ་ལ་སོགས་པ་ཡོད་པས་སོལ་བ་ལ་སོགས་པ་ལ་ཞིག་པ་ཞེས་བྱའོ། །སོལ་བ་ལ་སོགས་པ་དེ་ཡོད་པས་དེ་ཡོད་པ་ནི་མ་ཡིན་ནོ། །རང་གི་བདག་ཉིད་ཀྱི་རྒྱུའི་དངོས་པོ་མི་རིགས་ཏེ་མེ་ལ་སོགས་པས་དེ་སྐྱེད་པར་བརྗོད་པའི་ཕྱིར་རོ། །བུད་ཤིང་ཉེ་བར་བཅོམ་པས་སོལ་བ་ལ་སོགས་པ་འབྱུང་བས་འདི་འཇིག་པའི་ངོ་བོ་ཡིན་ནོ་ཞེ་ན། ཉེ་བར་བཅོམ་པ་ཞེས་བྱ་བ་འདི་ཅི་ཞིག །གལ་ཏེ་ལྡོག་པ་ནི་སོལ་བ་སོགས་པའི་མཚན་ཉིད་དུ་ཁས་ལེན་ན་སྔ་མ་ལས་ཁྱད་པར་མེད་དོ། །དེའི་ཕྱིར་རང་གི་ངང་གིས་ལྡོག་པ་ན་ཤིང་ལ་སོགས་པ་ལ་མེ་ལ་སོགས་པས་སོལ་བ་ལ་སོགས་པ་སྐྱེད་པ་ཉིད་ནི་མཛེས་ཏེ། དེ་ལྟ་ན་ཡིན་ན་ཤིང་ལ་སོགས་པ་དེ་བཞིན་དུ་ཉེ་བར་དམིགས་པ་ལ་སོགས་པ་ཐལ་བར་ཇི་ལྟར་འགྱུར། གཞན་ཡང༌། གལ་ཏེ་དངོས་པོ་གཞན་པ་ལ་ཞིག་ནས་མེད་པ་འདིའི་འགྱུར་བ་རྗེས་སུ་སྐྱེས་པ་ཡིན་ན་ནི་མར་མེ་དང་བློ་ལ་སོགས་པ་ཞིག་པ་དེ་དག་གང་ལས་དངོས་པོ་གཞན་པའི་ཞིག་པ་རྣམ་པར་གཞག་པར་བྱ། གལ་ཏེ་དེ་ཡང་མི་གསལ་བའི་བདག་ཉིད་ཀྱི་དངོས་པོ་འགྱུར་བ་ཁོ་ན་ལ་ཞིག་པར་དམིགས་སོ་ཞེ་ན། མར་མེ་ལ་སོགས་པའི་ངོ་བོ་མི་གསལ་བར་འགྱུར་བ་ལ་ཚད་མ་མེད་པའི་ཕྱིར་རོ། །གང་གི་ཚེ་ནུས་པའི་ངོ་བོ་ཐོབ་མི་གསལ་བ་ཡིན་པ་དེའི་ཚེ་ནུས་པ་ནི་འབྲས་བུ་མཐོང་བ་ལས་དཔག་པར་བྱ་བའི་ངོ་བོ་ཡིན་པའི་ཕྱིར་མེད་པ་ཇི་ལྟར་མར་མེ་ལ་སོགས་པའི་ནུས་པའི་བདག་ཉིད་དུ་གནས་པར་བརྟགས་པར་བྱ། ཡང་ན་མ་ཚང་བ་མེད་པའི་བདག་ཉིད་ཐོབ་
པའི་ཉེ་བར་དམིགས་སུ་རུང་བ་མི་གསལ་བ་ཡིན་ན་འདི་ལ་ཡང་དེའི་བདག་ཉིད་དུ་གནས་པའི་ཚད་མ་མེད་པ་ཉིད་དོ། །མཁས་པ་ནི་ཚད་མ་མེད་པའི་ཚིག་ལ་གུས་པར་མི་བྱེད་པ་དང༌། བདག་ཉིད་མེད་པའི་ཕྱིར་ཇི་ལྟར་ཡོད་པ་ཡིན། བློ་ལ་སོགས་པ་རྣམས་ཀྱི་འགྱུར་བ་དང་ཡོངས་སུ་འགྱུར་བ་གཞན་དུ་བྱས་པའི་བརྟག་བ་རྒྱས་པ་ཞར་ལ་བྱུང་བས་ཆོག་གོ །གལ་ཏེ་དངོས་པོ་གཞན་སོལ་བ་ལ་སོགས་པ་ནི་སྒྲིབ་པ་ཡིན་པས་བུད་ཤིང་ལ་སོགས་པ་ཉེ་བར་དམིགས་པར་མི་འགྱུར་རོ་ཞེས་བྱ་བར་འདོད་དོ་ཞེ་ན། ངོ་བོ་ཉིད་གཞན་ནི་ཞེས་བྱ་བ་ལ་སོགས་པ་སྨོས་ཏེ། རང་བཞིན་གཞན་པ་འདི་བུད་ཤིང་ལ་སོགས་པ་སྒྲིབ་པར་རིགས་པ་མ་ཡིན་ནོ། །དེ་སོ་ན་འདུག་པའི་ངོ་བོ་བུད་ཤིང་ལ་སོགས་པ་དེ་ལ་གྱུར་པ་སྒྲིབ་པར་ཡང་ཉེ་བར་དམིགས་སུ་མེད་པས་མི་རུང་བའི་ཕྱིར་རོ། །དངོས་པོ་འབའ་ཞིག་གི་རང་བཞིན་མ་ཡིན་ལ། དངོས་པོ་གཞན་ནི་འཇིག་པའི་རྒྱུས་མི་བྱེད་པས་སོ། །དངོས་པོ་དང་དངོས་པོ་མེད་པ་ཡང་བྱེད་པ་མེད་དོ་སྙམ་ནས། འཇིག་པའི་རྒྱུས་ཞེས་བྱ་བ་ལ་སོགས་པ་སྨོས་ཏེ། ག་ལས་ཤེ་ན། དངོས་པོ་མེད་པ་སྒྲུབ་པ་དང་མ་ཡིན་པར་དགག་པར་ཡང༌། བརྗོད་པས་འདོད་པ་མ་ཡིན་ཏེ་མེད་པ་མི་གཞན་གྱི་འབྲས་བུར་ཁས་ལེན་པར་བྱེད་པ་ན་ཅི་བུད་ཤིང་ལ་སོགས་པའི་ངོ་བོ་ལས་དོན་གཞན་པ་ཞེས་བྱ་བ་འམ། ཐ་དད་པ་དང་ཐ་དད་པ་མ་ཡིན་པར་རྣམ་པར་རྟོག་པ་ལས་མ་འདས་པའི་ཕྱིར་རོ། །དེ་ལ་ཡང་བཤད་ཟིན་པའི་སྐྱོན་ཉིད་དོ། །འོ་ན་ནི་མེད་པར་དགག་པ་ཅི་ཡང་མ་ཡིན་པའི་ངོ་བོ་འདི་མེ་ལ་སོགས་པ་ལས་སྐྱེ་བར་ཁས་ལེན་ཏེ་དེ་ཡོད་ཀྱང་བུད་ཤིང་ལ་སོགས་པ་རང་བཞིན་མེད་པ་གང་ལ་ནི། སྔ་མའི་སྐྱོན་དུ་འགྱུར་རོ། །དེ་ཡང་ངེས་པར་མེ་ལ་སོགས་པ་ཡོད་པ་དང་མེད་པའི་རྗེས་སུ་བྱེད་པས་དེའི་འབྲས་བུ་དེའི་ཡོད་པའི་ཐ་སྙད་དུ་བྱེད་ལ་གཞན་ཡང་དེའི་རྒྱུ་མཚན་གྱིས་ཡིན་པའི་ཕྱིར་རོ། །དེ་སྐད་དུ། ཤེས་པའི་སྤྱོད་ཡུལ་གྱུར་པ་ན། །དེ་ཡོད་པར་ནི་ཉེ་བར་དམིགས། །ཞིག་ལ་ཞིག་པའི་ངོ་བོ་དེ། །ཇི་ལྟར་འབྲས་བུར་འགྲོ་བ་མིན། །དཔེར་ན་སྔོན་མེད་ལས་བྱུང་བའི། །དངོས་པོ་རྒྱུ་ལས་སྐྱེ་བ་ཡིན། །བྱུང་ཟིན་པ་ནི་མི་འགྱུར་བ། །དེ་ནི་རྒྱུ་ལས་བྱུང་མ་ཡིན། །ཅེས་སྨྲ་བ་ན། དངོས་པོ་
དགག་པ་ཞེས་བྱ་བ་ལ་སོགས་པ་སྨོས་ཏེ། །འདིའི་དགོངས་པ་ནི་གང་གི་ཚེ་དངོས་པོ་གཞན་པའི་ཚོགས་པ་ལ་ལྟོས་པ་མེད་པ་ཙམ་ཉིད་ན་ཅི་ཡང་མ་ཡིན་པའི་ངོ་བོའི་ཞིག་པ་ཡིན་པ་དེའི་ཚེ་དེ་ལ་བྱེད་པ་པོའི་བྱེད་པ་མི་སྲིད་དེ་སྲིད་ན་ནི་ཆོས་ཅན་ཁོ་ན་ལ་དེ་སྲིད་པའི་ཕྱིར་རོ། །གལ་ཏེ་དེ་ཡང་མ་བྱུང་བ་ལས་བྱུང་བར་ཁས་བླངས་པས་འབྲས་བུ་ཉིད་དུ་འགལ་བ་མེད་དོ་ཞེ་ན། མ་ཡིན་ཏེ་བྱུང་བ་ཆོས་ཅན་ལ་ཡོད་པའི་ངོ་བོ་ཐོབ་པ་ན་དངོས་པོ་མེད་པ་ཉམས་པ་ཡིན་ནོ། །གང་གི་ཕྱིར་བྱུང་བ་ཞེས་བྱ་བ་ཡོད་པར་བརྗོད་ཀྱིས་མྱུ་གུ་ལ་སོགས་བ་ལ་ཡང་ཡོད་པའི་སྒྲ་འཇུག་པའི་རྒྱུ་མཚན་མ་ཡིན་ནོ། །གལ་ཏེ་དོན་བྱེད་པར་ནུས་པ་ཡིན་ནོ་ཞེ་ན། ནུས་པ་ཐམས་ཅད་ཀྱིས་སྟོང་པ་དེ་ལྟ་ན་ཇི་ལྟར་ཤེས་པའི་ཡུལ་དུ་འགྱུར། རྒྱུ་མ་ཡིན་པ་ནི་ཡུལ་མ་ཡིན་ཏེ་ཧ་ཅང་ཐལ་བར་འགྱུར་བའམ། དེའི་ཡུལ་མ་ཡིན་ན་ཇི་ལྟར་རྒྱུ་དང་ལྡན་པར་རྟོགས་པ་ཡིན། དངོས་པོར་གང་གིས་བརྗོད། ཅི་ཡང་མ་ཡིན་པའི་ངོ་བོ་ཁོ་ན་དངོས་པོ་ཡིན་ནོ་སྙམ་ནམ་ཤེས་པ་སྐྱེད་པར་བྱེད་པ་ཉིད་ཇི་ལྟར་ནུས་པ་དེ་དག་འབྲེལ་པ་མ་ཡིན། གལ་ཏེ་ཤེས་པའི་ཡུལ་མེད་ན་ཇི་ལྟར་ཡོད་པར་འགྱུར། འདི་ནི་འབྲས་བུ་ཡང་ཇི་ལྟར་ཡིན། གལ་ཏེ་རང་གི་རྒྱུ་ཡོད་པ་ལས་ཡོད་པ་ཡིན་ནོ་ཞེ་ན། དེ་ལྟ་ན་འབྲས་བུར་ཡོད་པ་དེ་ཤེས་པའི་ཡུལ་ཡིན་ནོ། །འདི་ལྟར་གལ་ཏེ་རང་གི་རྒྱུ་ཡོད་པ་ལས་བྱུང་ངོ་ཞེས་ཤེས་པ་ན་ཡོད་དོ་ཞེས་པ་ཡང་ཤེས་སོ། །གང་གི་ཕྱིར་ཡོད་དོ་ཞེས་པ་དང་བདོག་གོ་ཞེས་མཁས་པས་བརྗོད་པ་ནི་ཡོད་པ་དང་ཡིན་པ་དང་མཆིས་པ་དང་བདོག་པ་སྒྲའི་མིང་ཡིན་གྱི་དོན་དམ་པར་ན་དོན་ལ་ཐ་དད་པ་འགའ་ཞིག་ཀྱང་མེད་དོ། །གལ་ཏེ་མེད་པའི་བདག་ཉིད་དེ་བྱུང་བ་འདི་ཡིན་ནོ་ཞེ་ན། མ་ཡིན་ཏེ་འགལ་བའི་ཕྱིར་གང་གི་ཕྱིར་མ་བྱུང་བའོ་ཞེས་བྱ་བ་མེད་པར་བརྗོད་ན་དེ་ཇི་ལྟར་བྱུང་བ་ཡིན་ནོ་ཞེས་བསྟན་པར་བྱ། གལ་ཏེ་ངོ་བོ་འགའ་ཞིག་གིས་རབ་ཏུ་གནས་པ་ཤེས་པའི་བདག་ལ་སོ་སོར་སྣང་བས་ཡོད་པ་མ་ཡིན་ནོ་ཞེ་ན། ཤིན་ཏུ་ལྐོག་ཏུ་གྱུར་པའི་མིག་ལ་སོགས་པ་མེད་པར་འགྱུར་རོ། །མ་ཡིན་ཏེ་དེ་དག་ཤེས་པའི་རྒྱུའི་ངོ་བོར་སྣང་བའི་ཕྱིར་རོ་ཞེ་ན། འདི་ཡང་འབྱུང་བར་བྱེད་པའི་ངོ་བོར་སྣང་བའི་ཕྱིར་དང་དངོས་པོ་ཐམས་ཅད་ཀྱིས་དབེན་པ་ཇི་ལྟར་བྱུང་བ་
དང་འབྲེལ་པ་ཡིན། ངོ་བོ་ཅུང་ཟད་ཅིག་གིས་མངོན་པར་གྱུར་པ་དང་ཤེས་པའི་ཡིན་པས་ཀྱང་རྒྱུའི་ངོ་བོར་སྣང་བ་མཚུངས་པའི་ཕྱིར་དང་རྒྱུ་མ་ཡིན་པ་ཡུལ་ཉིད་དུ་མི་རིགས་པའི་ཕྱིར་རོ། །ཁོ་བོ་ཅག་ཀྱང་དངོས་པོ་མེད་པའི་བློ་ནི་རང་གི་བག་ཆགས་ཡོངས་སུ་སྨིན་པའི་རྗེས་སུ་འགྲོ་བས་ཡུལ་མེད་པ་ཉིད་དོ། །དངོས་པོ་མེད་པ་འབྱུང་བར་བྱེད་པ་ལ་ཇི་ལྟར་མ་ཡིན་པར་དགག་པ་དང་མེད་པར་དགག་པ་ཐ་དད་པར་བརྗོད་པ་ཡིན། གལ་ཏེ་དེའི་ངོ་བོར་མི་བྱེད་པས་མ་ཡིན་པར་དགག་པ་ལས་དེ་ཐ་དད་དོ་ཞེ་ན། མ་ཡིན་ཏེ་མེད་པའི་ངོ་བོ་ཡང་འབྱུང་བ་ལས་འགལ་བ་མེད་པའི་ཕྱིར་རོ། །བྱུང་ངོ་ཞེས་བྱ་བ་བྱུང་ཟིན་པའི་ཡོད་པ་ལ་མི་སླུ་བ་སྟེ། དེ་ལ་ཇི་ལྟར་ཡོད་པའི་ངོ་བོའི་རྣམ་པས་མ་ཡིན་པར་དགག་པ་ཡིན། དེ་ཉིད་དགག་པའི་དོན་དུ་གཅིག་པར་འགྱུར་ཏེ་ཐམས་ཅད་དུ་སྒྲུབ་པ་གཙོ་བོ་ཡིན་པའི་ཕྱིར་རོ། །གང་གི་ཚེ་དེ་ལྟར་ན་ཅུང་ཟད་ཅིག་རྣམ་པ་འགས་ལྡོག་པ་ཡིན་པ་དེའི་ཚེ་དེ་ནི་དེ་མ་ཡིན་པ་ལས་ཐ་དད་པས་དེ་ལས་བཟློག་པར་ཤེས་སོ། །དེ་ཡང་མེད་པ་ནི་ཐམས་ཅད་ལས་ལྡོག་པ་ཡིན་པར་བཤད་ལ་དངོས་པོ་ཉིད་ནི་འགའ་ཞིག་གིས་བྱེད་པ་དེ་བཞིན་དུ་འདིས་དངོས་པོ་ལ་དམིགས་པར་བཤད་པར་འགྱུར་ན། དེ་དག་ཐ་དད་པ་ནི་མེད་དོ། །ཐ་དད་པ་མེད་ན་མ་ཡིན་པར་དགག་པ་མ་ཡིན་པ་དང༌། སྐབས་མ་ཡིན་པ་བརྗོད་པར་ཡང་འགྱུར་ཏེ་དངོས་པོ་ལྡོག་པའི་སྐབས་སུ་མེད་པའི་བདག་ཉིད་ཀྱི་དངོས་པོ་གཞན་བརྗོད་པའི་ཕྱིར་རོ། །རང་གི་ངོ་བོས་མེད་པའི་བདག་ཉིད་ནི་མ་ཡིན་ཏེ། རང་གི་ངོ་བོས་མེད་ན་འབྲས་བུ་ཉིད་དུ་འགལ་བའི་ཕྱིར་རོ། །གཞན་གྱི་ངོ་བོས་ཡིན་ན་ནི་དངོས་པོ་ཐམས་ཅད་མེད་པའི་བདག་ཉིད་དུ་འགྱུར་ཏེ་བུམ་པ་དང་ལ་ལ་ཞིག་ཁྱད་པར་མེད་དོ། །ཡང་ན་ཡིན་དུ་ཆུག་ན་མེད་པ་འདི་མེ་ལ་སོགས་པ་དག་ལས་དེ་འབྱུང་བ་ཡིན་ན་ཅིས་ན་ཤིང་ལ་སོགས་པ་ཉེ་བར་མི་འགྱུར། འདི་ལྟར་མེ་ལ་སོགས་པ་གཞན་གྱི་བྱེད་པར་དོན་འདི་གྲུབ་པའི་ཕྱིར་བུད་ཤིང་ལ་སོགས་པ་ལྡོག་པ་མེད་པས་ན་སྔ་མ་བཞིན་དུ་ཉེ་བར་དམིགས་པར་འགྱུར་རོ། །གལ་ཏེ་དེ་ཉེ་བར་བཅོམ་པ་ལས་ཞིག་པ་སྐྱེ་བ་ཡིན་ནོ་ཞེ་ན། ཇི་ལྟར་དེ་ཉེ་བར་བཅོམ་པ་ཡིན། རེ་ཞིག་ཞིག་པ་མེད་པ་མ་ཡིན་ཏེ་བུད་ཤིང་ཡོད་པའི་དུས་སུ་དེ་མེད་པའི་ཕྱིར་རོ། །
མེ་ལ་སོགས་པ་རྣམས་ཀྱིས་ཞིག་པ་ནི་མ་ཡིན་ཏེ། མི་མངོན་པ་ཉིད་དུ་དེ་དག་བྱེད་པར་ཁས་བླངས་པའི་ཕྱིར་རོ། །བཅོམ་པ་ན་ཞིག་པའི་མེད་པ་མ་ཡིན་ཏེ་བུད་ཤིང་ལ་སོགས་པ་ཉམས་པ་དང་དུས་མཉམ་པར་ཐལ་བར་འགྱུར་བས་ཞིག་པ་དང་འཇིག་པ་དེ་ལ་རྣམ་པར་རྟོག་པ་རྣམ་པ་གསུམ་རྣམ་པར་གནས་པའི་ཕྱིར་རོ། །དེས་ན་ཐུག་པ་མེད་པ་ཡིན་ནོ། །གལ་ཏེ་དེ་ཉིད་ཞིག་པ་བུད་ཤིང་ལ་སོགས་པ་ལ་མེ་ལ་སོགས་པ་སྐྱེ་བ་ན་ལྡོག་པ་དེས་ན་འདི་མི་དམིགས་པ་ཡིན་ནོ་ཞེ་ན། ཇི་ལྟར་གཞན་གྱིས་གཞན་ལྡོག་པ་ཡིན་ན་ཧ་ཅང་ཐལ་བར་འགྱུར་རོ། །གལ་ཏེ་འདི་རྒྱུ་དང་ལྡན་པ་དེ་དག་ཉིད་ཐ་དད་པས་ཐ་དད་པར་ཅིས་ན་མི་འགྱུར། འབྲས་དང་ནས་ཀྱི་མྱུ་གུ་ཡང་རྒྱུ་ཐ་དད་པ་བདག་ཉིད་ཐ་དད་པ་ཤིན་ཏུ་མཚན་ཉིད་མི་མཐུན་པར་མངོན་སུམ་གྱིས་ཉམས་སུ་མྱོང་བ་ཉིད་དུ་ངེས་པ་ཡིན་ནོ། །འདི་ལྟར་དངོས་པོ་གཞན་གྱི་ཚོགས་པ་ལ་མི་ལྟོས་པའི་འཕོ་བ་ཙམ་གྱི་མཚན་ཉིད་ནི་ཞིག་པ་མ་ཡིན་ཏེ་མེ་ལ་སོགས་པ་དང་ཕྲད་པའི་རྒྱུ་ཐ་དད་ཀྱང་དེ་ལ་གནོད་པ་མེད་དེ་ཅི་ཡང་མ་ཡིན་པའི་ངོ་བོར་རོ་གཅིག་པར་ཤེས་པའི་བདག་ཉིད་ལ་སྣང་བས་དངོས་པོའི་སྟོང་པ་ཉིད་སྤངས་ན་གཞན་པ་དེ་ལ་ངོ་བོ་ཅུང་ཟད་ཅིག་མཐོང་བ་ནི་མེད་དོ། །དེ་ཡང་རྒྱས་པར་ནི་སྐད་ཅིག་མ་འཇིག་པར་གྲུབ་པར་དཔྱད་ཟིན་པ་དེ་རེ་ཞིག་འདིར་གཞག་གོ །དེའི་ཕྱིར་མེ་ལ་སོགས་པ་དང་འབྲེལ་པ་དེ་ཅུང་ཟད་ཅིག་འབྱུང་ངམ་མི་འབྱུང་ཞེས་ཁས་བླངས་པར་མི་རིགས་སོ། །གང་དག་ཞིག་པ་ཞེས་བྱ་བ་འདི་ཅུང་ཟད་ཅིག་འབྱུང་བ་མེད་དེ་འོན་ཀྱང་གང་གི་ཕྱིར་རང་ཉིད་མི་གནས་པའི་ངོ་བོ་བྱུང་ཟིན་པ་མ་ཡིན་པ་དེའི་ཕྱིར་ཞིག་པ་ཞེས་བྱ་བའི་མེད་པ་ནི་འདིའི་འམ་གཞན་པ་ཅུང་ཟད་ཅིག་འབྱུང་བ་མེད་དོ། །དེ་ལྟར་ན་འབྱུང་བའི་ཆོས་འགའ་ཞིག་མེད་པས་ན་དངོས་པོ་གཞན་པའི་དངོས་པོ་བྱེད་པ་མ་ཡིན་པས་མེ་ལ་སོགས་པ་དང་ཕྲད་པས་ནི་བྱ་བ་དགག་པ་ཉིད་དུ་འགྱུར་རོ། །དེ་ལྟར་ན་མེ་ལ་སོགས་པ་དང་འབྲེལ་པ་ལས་བྱེད་པ་པོ་ཡོད་པར་མི་འགྱུར་རོ་ཞེས་བྱ་བས། བྱེད་པ་པོ་མ་ཡིན་པ་རྒྱུ་ཉིད་མ་ཡིན་པ་དེའི་ཕྱིར་འཇིག་པའི་རྒྱུ་འགའ་ཞིག་ཡང་མེད་དོ། །འགའ་ཞིག་མི་ནུས་པས་འཇིག་པའི་རྒྱུ་མི་རིགས་པ་དང་དེ་ཉིད་དོན་མེད་པའི་ཡང་ཕྱིར་རོ། །གལ་ཏེ་དངོས་པོའི་རང་གི་ངོ་བོ་འཇིག་པ་ཞེས་བྱ་བ་སྨོས་ཏེ། འཇིག་པའི་ངང་ཚུལ་ཅན་ཏེ། རང་གི་ངོ་བོས་མི་
གནས་ན་གནས་པར་མི་ནུས་ཏེ་ཁབ་རྩེར་ཡུངས་ཀར་བཞིན་དུ་དེ་ལ་འཇིག་པའི་རྒྱུ་ནི་ཅི་ཡང་མ་ཡིན་ཏེ་རྒྱུ་གཅིག་ཡིན་ཞེ་ན། བདག་ཉིད་འཇིག་པའི་ཕྱིར་རོ། །དེའི་རང་གི་ངོ་བོ་ཉིད་ནི་མི་གནས་པའི་རང་བཞིན་ཉིད་དེ། རང་བཞིན་ནི་གནས་པར་མི་ནུས་ཏེ་ཁབ་རྩེར་ཡུངས་ཀར་མི་གནས་ན་འབད་པས་འབྲས་བུ་དང་ལྡན་པར་མི་འགྱུར་རོ། །འདིར་ཁྱབ་པ་བསྟན་པ་ནི་གང་ཞིག་གང་གིས་ཞེས་བྱ་བ་ལ་སོགས་པ་སྨོས་ཏེ། དེའི་ངོ་བོ་ནི་རང་བཞིན་གྱི་སྐྱེད་པར་བྱེད་པའི་རྒྱུ་ལས་ཡིན་གྱི་རྒྱུ་གཞན་ལ་ལྟོས་པ་ནི་མ་ཡིན་ནོ། །བསལ་བ་ལ་སོགས་པ་ཞེས་བྱ་བས་ནི་དཔེ་རྣམ་པར་འགྲེལ་ཏོ། །དེའི་བདག་ཉིད་ལ་རྒྱུ་གཞན་ལ་མི་ལྟོས་པས་ཁྱབ་ལ། དེའི་བདག་ཉིད་དུ་སྒྲུབ་པར་བྱེད་པའི་ཚད་མ་བསྟན་པ་ནི། དེའི་བདག་ཉིད་ལ་གང་གི་རང་བཞིན་ཡིན་པ་དེའི་རང་བཞིན་གྱི་དེའི་བདག་ཉིད་མེད་པ་རྒྱུ་གཞན་ལ་ལོས་པ་ན་ནི་རང་གི་རྒྱུ་ལས་སྒྲུབ་པའི་རང་གི་ངོ་བོ་ཉིད་མེད་པས་བདག་ཉིད་མེད་པ་ནི་རང་བཞིན་མེད་པར་ཐལ་བར་འགྱུར་བས་སོ། །དེ་དང་འདྲ་བ་ནི་གསལ་བ་ལ་སོགས་པ་དང་ལྡན་པའོ། །ཡང་ནི་ཕྱི་ནས་སོ། །དེའི་བདག་ཏུ་བྱས་པའི་ཕྱིར་ནི་མི་གནས་པའི་ཆོས་ཅན་དུའོ། །རྒྱུ་གཞན་ལ་མི་ལྟོས་སོ་ཞེས་བྱ་བ་ནི་ཚད་མའི་འབྲས་བུའོ། །གལ་ཏེ་མི་གནས་པའི་ཆོས་ཅན་ཞིག་ཡིན་ན་ནི་འཇིག་པའི་རང་གི་ངོ་བོ་ཉིད་ཀྱིས་རང་གི་རྒྱུ་ལས་གྲུབ་བོ་ཞེས་བྱ་བར་ནི་ཕྱོགས་ལ་ཆོས་བསྡུ་བའོ། །འགལ་བས་ཁྱབ་པ་དམིགས་པ་འདི་ནི་རྒྱུ་གཞན་ལ་ལྟོས་པ་དང་མི་ལྟོས་པ་དག་ཕན་ཚུན་སྤངས་ཏེ་གནས་པའི་མཚན་ཉིད་དེས་འགལ་བའི་ཕྱིར་རོ། །རྒྱུ་གཞན་ལ་མི་ལྟོས་པ་ནི། དེའི་རང་གི་ངོ་བོས་ཁྱབ་པའི་ཕྱིར་རོ། །འདིར་གཞན་གྱི་ཚིག་གི་དོགས་པའི་གོ་སྐབས་ནི་ས་བོན་ལ་སོགས་པ་བཞིན་དུ་ཞེས་བྱ་བ་ལ་སོགས་པ་སྨོས་སོ། །འདི་སྙམ་དུ་ཞེས་བྱ་བ་ལ་སོགས་པ་སྨོས་ཏེ། དེ་ཉིད་རྣམ་པར་དབྱེ་བ་ནི་འབའ་ཞིག་སྐྱེད་པར་མི་བྱེད་དོ་ཞེས་བྱའོ། །གང་ལས་ཡིན་ཞེ་ན། ཆུ་དང་ཞིང་ལ་སོགས་པ་རང་གི་རྒྱུ་ནས་ཐ་དད་པ་མྱུ་གུ་ལ་སོགས་པ་སྐྱེད་པའི་རང་བཞིན་ཡང་ས་བོན་ལ་སོགས་པ་རྣམས་ཀྱི་བདག་ཉིད་ལ་ལྟོས་པའི་ཕྱིར་རོ། །དེས་ན་དེའི་རང་བཞིན་ནི་རྒྱུ་གཞན་ལ་ལྟོས་པ་མ་ཡིན་ནོ་ཞེས་བྱ་བ་མ་ངེས་པ་ཡིན་ནོ། །དེ་བཞིན་དུ་བུད་ཤིང་ལ་
སོགས་པ་རང་གི་རྒྱུ་ལས་འཇིག་པའི་བདག་ཉིད་དུ་གྲུབ་པའི་འཇིག་པ་ནི་བདག་ཉིད་འཇིག་པ་ཡིན་ནོ་ཞེས་བྱ་བ་ནི་དཔེ་དོན་ཡིན་ནོ་ཞེ་ན། ས་བོན་ལ་སོགས་ལ་བཞིན་དུ་མ་ངེས་པ་མ་ཡིན་ནོ། །གང་ལས་ཤེ་ན། དེའི་རང་བཞིན་དུ་མྱུ་གུ་ལ་སོགས་པ་སྐྱེད་པར་བྱེད་པའི་ས་བོན་ལ་སོགས་པས་མྱུ་གུ་ལ་སོགས་པ་སྐྱེད་པའི་ཕྱིར་དེའི་བདག་ཉིད་འདི་རྒྱུ་གཞན་ལ་མི་ལྟོས་པས་སོ། །ཕྱི་ནས་ཞིང་ལ་སོགས་པ་ལ་ལྟོས་ནས་སྐྱེད་པ་མ་ཡིན་པ་དང་སྦྱང་བ་ལ་སོགས་པ་ན་གནས་པས་ཀྱེད་པ་ལ་སོགས་མ་ཡིན་ཏེ་དེའི་ངོ་བོ་ཉིད་མ་ཡིན་པའི་རང་བཞིན་ཉིད་ཀྱི་མྱུ་གུ་ལ་སོགས་པ་སྐྱེད་པའི་ངོ་བོ་ཉིད་མེད་པས་དེ་ནི་དེའི་བདག་ཉིད་ཀྱི་མཚན་ཉིད་ཅན་གྱི་རྒྱུར་གནས་པ་མ་ཡིན་པའི་ཕྱིར་རོ། །དེས་ན་མ་ངེས་པ་མ་ཡིན་ནོ། །འོ་ན་ནི་ངོ་ཤེས་པའི་མངོན་སུམ་ཁོ་ནས་ས་བོན་ལ་སོགས་པ་གཅིག་གི་ངོ་བོ་ཉིད་དུ་རྟོགས་སོ། །དེ་ལ་འདི་སྐྱེད་པར་བྱེད་པའི་རང་བཞིན་ཉིད་དང་སྐྱེད་པ་མ་ཡིན་པའི་རང་བཞིན་ཉིད་ཀྱི་མཚན་ཉིད་ཐ་དད་པ་ག་ལས་ཡིན། གང་གི་ཕྱིར་མ་ངེས་པར་མི་འགྱུར་ཞེ་ན། ངོ་ཤེས་པ་ཚད་མ་མ་ཡིན་པ་ནི་མ་ཡིན་ཏེ་དེ་ལ་སྔར་མེད་པའི་དོན་རྣམ་པར་ཤེས་པ་ཞེས་བྱ་བ་ལ་སོགས་པ་ཚད་མའི་མཚན་ཉིད་དང་ལྡན་པའི་ཕྱིར་ཡོད་པ་དང་ཡང་དག་པར་འབྲེལ་པའི་དབང་པོ་རྣམས་ལས་བྱུང་བ་ངོ་ཤེས་པ་ནི་མངོན་སུམ་ཁོ་ན་ཡིན་ཏེ་མངོན་སུམ་ལས་གཙོ་བོའི་ཚད་མ་ནི་ཡོད་པ་མ་ཡིན་ནོ། །གང་ལས་དེའི་ཡུལ་ཐ་དད་པར་གྲུབ་པའི་གནོད་པ་ཡོད་པས་འདི་དག་ཚད་མ་མ་ཡིན་པར་འགྱུར་ཞེས་དོགས་པ་ལ། དེ་ཉིད་ཀྱི་ཞེས་བྱ་བ་སྨོས་ཏེ་སྐྱེད་པར་བྱེད་པ་དང༌། སྐྱེད་པར་ངེས་པ་མ་ཡིན་པ་འགལ་བའི་ཆོས་གནས་བས་སོ། །དེ་དག་གི་གནས་སྐབས་ནི་སྐྱེད་པར་བྱེད་པ་དང་སྐྱེད་པར་བྱེད་པ་མ་ཡིན་པའི་གནས་སྐབས་ས་བོན་ལ་སོགས་པའི་དངོས་པོ་ཐ་དད་པའོ། །དངོས་པོ་ཐ་དད་པར་ངེས་པ་ནི་ཞེན་པས་སོ། །འདི་ལྟར་འབྲས་ཀྱི་ས་བོན་ནི་དེའི་མྱུ་གུའི་རྒྱུའི་རང་བཞིན་ཡིན་ཏེ་དེ་ཡོད་ན་འབྲས་ཀྱི་མྱུ་གུ་ཡོད་པ་མཐོང་བའི་ཕྱིར་མངོན་སུམ་གྱིས་ཁོང་དུ་ཆུད་དོ། །ནས་ཀྱི་ས་བོན་ཡང་དེ་སྐྱེད་པའི་རང་བཞིན་དེ་ཡོད་ན་འབྲས་ཀྱི་མྱུ་གུ་མི་དམིགས་སོ། །དེས་དབེན་པའི་ནས་ཀྱི་ས་བོན་འཛིན་པ་ནི་མངོན་སུམ་གྱི་ངོ་བོས་རྟོགས་སོ། །དེ་བཞིན་དུ་འདིར་ཡང་གནས་སྐབས་
ཀྱི་ས་བོན་ནི་དེའི་མྱུ་གུས་དབེན་པ་དང་དབེན་པ་མ་ཡིན་པའི་གནས་སྐབས་འཛིན་པ་ནི་མངོན་སུམ་གྱི་སྟོབས་ཉིད་ཀྱིས་རང་གི་མྱུ་གུ་སྐྱེད་པར་བྱེད་པ་དང་སྐྱེད་པར་མི་བྱེད་པའི་རང་བཞིན་ཅིས་ན་ངེས་པར་མི་འགྱུར། གལ་ཏེ་གནས་སྐབས་ཐ་དད་པར་འདོད་པ་ཉིད་དེ་གནས་སྐབས་ཅན་ཐ་མི་དད་པ་ཡིན་ནོ་ཞེ་ན། དེའི་གནས་སྐབས་ཀྱི་ངོ་བོ་གཞན་གྱིས་དབེན་པ་མངོན་སུམ་ལ་སྣང་བར་ཐལ་བར་འགྱུར་རོ། །བདག་ཉིད་ཀྱི་ངོ་བོ་མ་ཡིན་པས་དབེན་པར་རང་གི་ཤེས་པ་ལ་སྣང་བ་གང་ཡིན་པ་དེ་ནི་མངོན་སུམ་དུ་མི་རིགས་པ་མ་ཡིན་ནོ། །གལ་ཏེ་གནས་སྐབས་ཅན་དང་ལྡན་པའི་རང་བཞིན་ཐ་དད་པ་མེད་པས་ཇི་ལྟར་ངོ་བོ་གཞན་ཡིན་ཞེ་ན། འོ་ན་ནི་གནས་སྐབས་རྣམས་མཐོང་བའི་ངོ་བོ་ནི་ཐ་དད་པའི་གནས་སྐབས་ལྟ་བུར་བདག་ཉིད་ཐ་དད་པ་དེ་ཐ་དད་པ་ཡོད་པ་ཐ་མི་དད་པ་དང་འབྲེལ་པ་མ་ཡིན་ནོ། །དེས་ན་འདི་གནས་སྐབས་བཞིན་དུ་ཐ་དད་པར་ཉམས་སུ་མྱོང་བས་ཇི་ལྟར་གནས་སྐབས་སུ་བྱེད་པ་པོ་ཡིན་གལ་ཏེ་གནས་སྐབས་ཐ་དད་པས་ཀྱང་ཐ་དད་པའི་ངོ་བོར་དེ་བཞིན་དུ་རྣམ་པར་འཇོག་པའི་ཕྱིར་རྣམ་པ་འགའ་ཞིག་གིས་ཀྱང་ཐ་དད་པས་ཉེས་པ་མེད་དོ་ཞེ་ན། གང་ཞིག་མདུན་ན་གནས་པའི་བདག་ཉིད་ལ་འདི་གནས་སྐབས་སོ་ཞེས་བརྗོད་པ་དེས་གནས་སྐབས་དེ་དང་ལྡན་པ་ཐ་དད་པ་དང་དེ་ཐ་མི་དད་པ་ཉིད་ནི་རྣམ་པ་འགས་ཡིན་ནོ་ཞེས་བྱ་བ་འདི་ནི་ལོང་བའི་འདོད་པའོ། །དེས་ན་འདི་མངོན་སུམ་གྱིས་དེའི་བདག་ཉིད་མ་ཡིན་པའི་ངོ་བོ་གཞན་དུ་སྣང་བར་ཐལ་བར་འགྱུར་བ་མི་བཟློགས་སོ། །དེས་ན་བདག་ཉིད་ཐ་དད་པའི་གནས་སྐབས་བཞིན་པར་ཐལ་བར་འགྱུར་བའམ། གནས་སྐབས་ཅན་དེ་བཞིན་དུ་གནས་སྐབས་རྣམས་ཐ་མི་དད་པར་འགྱུར་རོ། །དེ་དག་ཀྱང་རྣམ་པ་འགའ་ཞིག་ཐ་དད་པ་དང་ཐ་མི་དད་པ་བསམ་པར་བྱ་སྟེ། དེ་ལྟ་ན་གནས་སྐབས་ཅན་དང་དེའི་གནས་སྐབས་ནི་བདག་ཉིད་ཐ་མི་དད་པ་དང་ལྡན་པ་ན། རྣམ་པ་འགས་ཐ་མི་དད་པའི་རྒྱུ་མཚན་དངོས་པོ་གཞན་ཞིག་འདོད་པར་བྱ་བ་དང༌། དེ་བཞིན་དུ་དེ་ཡང་དེ་རྣམ་པ་འགས་ཐ་དད་པ་ཡང་གཞན་ཡིན་ནོ། །དེ་རང་བཞིན་གཅིག་པར་ཤིན་ཏུ་ཐ་མི་དད་པའི་གནས་སྐབས་དང་ལྡན་པ་ནི་བརྒྱུད་པས་ཤིན་ཏུ་ཐ་དད་པ་དང་ཐ་མི་དད་པ་དངོས་པོ་གཞན་པ་ཞིག་ཏུ་ཐལ་བར་འགྱུར་བ་དང༌། རྣམ་པ་འགའ་ཞིག་ཐ་དད་པའི་
རྒྱུ་མཚན་གྱི་ངོ་བོ་ནི་གཞན་ཡིན་པ་ལ་དེ་བཞིན་དུ་དེ་ལས་གཞན་པ་ལ་ཡང་ཡིན་པའི་ཕྱིར་དངོས་པོ་རེ་རེ་ལ་དཔག་ཏུ་མེད་པར་ཐལ་བར་འགྱུར་རོ། །དཔག་ཏུ་མེད་པའི་ངོ་བོ་སྣང་བ་ནི་མངོན་སུམ་གྱིས་ཉམས་སུ་མྱོང་བ་མེད་དེ་ཉམས་སུ་མྱོང་བ་མེད་ན་ཇི་ལྟར་བརྟག་པ་བདག་ཉིད་བསླུ་བར་བྱ་བའམ། དེའི་ཕྱིར་གནས་སྐབས་ཀྱི་ངོ་བོ་རྣམ་པར་དཔྱད་ན་དམིགས་པའི་རིག་བྱར་གྱུར་པ་ལས་མི་དམིགས་པའི་ཕྱིར་དང༌། དཔག་ཏུ་མེད་པའི་ངོ་བོར་ཐལ་བར་འགྱུར་བའི་ཕྱིར་རྣམ་པ་འགས་ཐ་དད་པ་དང་ཐ་མི་དད་པ་དང་ལྡན་པའི་གནས་སྐབས་ཅན་གྱི་མེད་པ་ཁོ་ནའོ། །དེ་ཡང་སྐྱེད་པར་བྱེད་པ་དང༌། སྐྱེད་པར་མི་བྱེད་པའི་རང་བཞིན་གྱི་གནས་སྐབས་ཐ་དད་པ་དང་ལྡན་པར་མངོན་སུམ་གྱིས་རྟོགས་པའི་ཕྱིར་རོ། །དེ་གཅིག་པ་ཉིད་དུ་མངོན་པར་ཞེན་པའི་ངོ་བོ་ཤེས་ལ་ཉམས་སུ་མྱོང་བས་གནོད་པས་ཇི་ལྟར་ཚད་མར་འགྱུར། གང་གི་ཕྱིར་ས་བོན་ལ་སོགས་པ་རྣམས་མྱུ་གུ་ལ་སོགས་པ་སྐྱེད་པའི་རང་བཞིན་ཅན་ཡང་དེའི་བདག་ཉིད་ཀྱི་རྒྱུ་གཞན་ལ་ལྟོས་ཀྱང་སྔ་མའི་གཏན་ཚིགས་མ་ངེས་པར་མི་འགྱུར་རོ། །གནས་སྐབས་ཅན་འགའ་ཞིག་ཡོད་དུ་ཆུག་ཀྱང་དེ་ཡང་དེ་ཉིད་ཀྱིས་ཐ་དད་པ་སྐྱེད་དོ། །དེ་ལྟ་ན་དེ་དག་སྐྱེད་པར་བྱེད་པ་དང་སྐྱེད་པར་མི་བྱེད་པའི་གནས་སྐབས་དག་ཡིན་ནོ་ཞེས་བྱ་བ་འདི་ནི་བདུན་པའི་གཉིས་པའི་ཚིག་ཡིན་པས་དེའི་ཚེ་འགྱུར་རོ། །དེས་ན་དོན་འདི་སྐྱེད་པར་བྱེད་པའི་གནས་སྐབས་དང༌། འདི་སྐྱེད་པར་མི་བྱེད་པའི་གནས་སྐབས་ནི་དངོས་པོའི་ཆོས་ཀྱི་མཚན་ཉིད་ཐ་དད་པའི་རང་བཞིན་དུ་མ་ཡིན་པ་དེ་ཉིད་ཀྱི་ཕྱིར་སྐྱེད་པར་བྱེད་པར་དང་སྐྱེད་པར་མི་བྱེད་པའི་རང་གི་ངོ་བོ་ཡིན་པར་མངོན་སུམ་གྱིས་ངེས་པར་གྲུབ་བོ། །ཐ་དད་པར་ངེས་པའི་མཚན་ཉིད་དུ་དེ་ལ་ཐ་སྙད་བྱེད་པའི་ཡུལ་ལ་ཆོས་འགལ་བ་གནས་པའི་མཚན་ཉིད་བསྟན་པའི་ཕྱིར་རོ། །གནས་སྐབས་ཁོ་ན་མྱུ་གུ་ལ་སོགས་པའི་སྐྱེད་པའི་རང་བཞིན་དུ་བརྗོད་པར་ནུས་པ་མ་ཡིན་པས་གནས་སྐབས་མེད་པའི་ཕྱིར་ནུས་པ་ཐམས་ཅད་སྤངས་པའི་མཚན་ཉིད་ནི་མེད་པར་ཐལ་བར་འགྱུར་རོ། །དེའི་ཕྱིར་ཡོད་པ་གཅིག་ཏུ་ངོ་ཤེས་པ་རྣམས་ལ་དངོས་པོ་རྣམས་ཀྱི་སྔ་མ་དང་ཕྱི་མའི་དུས་དག་སྐྱེད་པའི་བྱེད་པ་དང་སྐྱེད་པར་མི་བྱེད་པའི་རང་བཞིན་ཐ་དད་པར་རྣམ་པར་འཇོག་པའི་མངོན་སུམ་གྱིས་ཉམས་སུ་མྱོང་བའི་རྒྱུ་མཚན་གྱིས་
གནོད་པར་ཇི་ལྟར་ཚད་མར་འགྱུར། དེའི་སྣང་བ་ཐ་དད་པ་མེད་པའི་ངོ་བོ་ནི་བརྫུན་པ་ཉིད་དོ། །དབང་པོ་ལས་བྱུང་བའི་ཉམས་སུ་མྱོང་བ་འཇུག་པ་ཡོད་པ་འདི་ལ་རབ་ཏུ་སྦྱོར་བ་མེད་པའི་ཕྱིར་རབ་རིབ་ལ་སོགས་པས་བསྐྱེད་པ་བཞིན་དུ་མངོན་སུམ་དུ་ག་ལ་འགྱུར། དོན་བྱེད་པའི་རྒྱུ་མཚན་ཅན་གྱི་ངོ་བོ་ཡང་ས་བོན་ལ་སོགས་པ་ལས་གཞན་མ་ཡིན་ཏེ་དོན་དམ་པ་ཡིན་པའི་ཕྱིར་རོ། །རང་བཞིན་གྱིས་ཡོད་པ་གང་ཁོང་དུ་ཆུད་པའི་ཕྱིར་ངོ་ཤེས་པ་ཚད་མར་འགྱུར་ན་དོན་བྱེད་པའི་ནུས་པའི་མཚན་ཉིད་ཡིན་པའི་ཕྱིར་དོན་དམ་པར་ཡོད་པའོ། །དེའི་ཕྱིར་འདྲ་བ་གཞན་བྱུང་བའི་རྒྱུ་མཚན་འདི་ཡིན་ཏེ། སྐྲ་ཤད་དང་ཆུ་ཤིང་གི་སྡོང་པོ་ལ་སོགས་པ་བཞིན་དུ་རྣམ་པ་འདྲ་བ་ཙམ་གྱིས་སྙིང་འཕྲོགས་པ་རྣམས་འཁྲུལ་པ་ཉིད་དུ་དེ་ཁོ་ན་ཉིད་ངེས་པས་བསམ་པར་བྱའོ། །དེས་ན་ཡོད་ཀྱང་སྐད་ཅིག་མ་རེ་རེའི་ཐ་དད་པ་ཉེ་བར་མི་རྟོགས་པས་བྱིས་པ་རྣམས་གང་གི་ཚེ་མི་མཐུན་པའི་རྐྱེན་དང་ཕྲད་པས་མི་འདྲ་བའི་དངོས་པོ་གཞན་སྐྱེད་པ་དེའི་ཚེ་འདིའི་དེ་ཁོ་ན་ངེས་པར་གྱུར་ན་ངོ་ཤེས་པའི་དམིགས་པ་མི་འབྱུང་ངོ༌། །དེ་རྣམས་པ་གཅིག་ཏུ་ངེས་པའི་ཤེས་པ་སྐྱེད་པར་བྱེད་པ་ལ་གཞན་ཞིག་འདྲ་བ་ཐ་དད་པ་ཡང་མེད་དེ་རང་གི་རྒྱུའི་སྟོབས་ལས་འོངས་པའི་རང་བཞིན་གྱི་དབང་གིས་ཁ་ཅིག་ཏུ་རྣམ་པ་གཅིག་ཏུ་ངེས་པའི་ཤེས་པའི་མཚན་ཉིད་དམ། དོན་ཤེས་པ་ལ་སོགས་པའི་མཚན་ཉིད་དོན་གྱི་བྱ་བ་བྱེད་པ་ལས་གཞན་ནི་མེད་དོ་ཞེས་མཁས་པ་བསྟན་བཅོས་མཛད་པས་རྣམ་འགྲེལ་དུ་བཤད་པས་འདིར་མི་སྨྲའོ། །གདོན་མི་ཟ་བར་ས་བོན་ལ་སོགས་པ་སྐྱེད་པར་བྱེད་པ་དང་སྐྱེད་པར་མི་བྱེད་པའི་གནས་སྐབས་ནི་དངོས་པོ་ཐ་དད་པས་ཇི་སྐད་བཤད་པ་བཞིན་དུ་ཁོང་དུ་ཆུད་པར་བྱའོ་ཞེས་བསྟན་པའི་ཕྱིར་ཐ་མི་དད་པ་ལ་རྗེས་སུ་དཔག་པས་གནོད་པ་ནི་དངོས་པོ་རྣམས་ཞེས་བྱ་བ་སྨོས་ཏེ། ས་བོན་ལ་སོགས་པ་རྣམས་རང་གི་འབྲས་བུ་སྐྱེད་པར་བྱེད་པས་སོ། །རང་གི་ངོ་བོ་དེ་དང་དེ་རྣམས་ལ་ཡོད་པ་ལས་གཞན་དུ་གྱུར་པ་མེད་པའི་ཕྱིར་རེས་འགའ་བའི་སྐྱེད་པར་བྱེད་པ་ནི་མི་སྲིད་པའི་ཕྱིར་རོ། །དེའི་ངོ་བོ་མྱུ་གུ་ལ་སོགས་པ་སྐྱེད་པའི་རང་གི་ངོ་བོ་ཕྱིས་བཞིན་དུ་ནི་འབྲས་ལ་སོགས་པའི་རྒྱུ་ཉེ་བ་བཞིན་དུའོ། །སྔ་མ་སྦྱང་ལ་སོགས་པ་ན་གནས་པའི་དུས་སུ་ཡང་རང་གི་
འབྲས་བུ་སྐྱེད་པར་ཐལ་བར་འགྱུར་རོ། །དེ་ལྟ་ན་འབྲས་བུ་ལ་སོགས་པ་ཉེ་བ་ཡང་ས་བོན་ལ་སོགས་པའི་རང་གི་ངོ་བོ་ཁོ་ནས་འབྲས་བུ་སྐྱེད་ཀྱི་གཞན་གྱི་ངོ་བོས་ནི་མ་ཡིན་ནོ། །གང་ཡང་འདི་དེའི་ཚེ་འབྲས་བུ་སྐྱེད་པར་བྱེད་པའི་རང་བཞིན་ཕྱིས་ཡོད་པ་གང་ཡིན་པ་དེ་ཉིད་ཡིན་ནོ་ཞེས་ངོ་ཤེས་པས་མདུན་ན་གནས་པའི་སྐྱེད་པར་བྱེད་པའི་རང་བཞིན་སྔ་མའི་ངོ་བོ་ལ་ཐ་མི་དད་པར་ངེས་པ་ཡིན་པ་ངེས་ན་སྔར་ཡང་ཅིས་ན་དེའི་འབྲས་བུ་བྱེད་པ་མ་ཡིན། སྦྱོར་བ་ནི་གང་དང་གང་གི་ཚེ་སྐྱེད་པའི་རང་བཞིན་དེ་དང་དེ་ནི་དེའི་ཚེ་སྐྱེད་པར་བྱེད་པ་ཉིད་དེ། སྐྱེད་པར་མི་བྱེད་པ་དང་སྐྱེད་པར་བྱེད་པ་འགལ་བའི་ཕྱིར་གཞན་ཡང་དེའི་རང་བཞིན་ཐོབ་པར་འགྱུར་རོ། །དཔེར་ན་དེ་ཉིད་ཀྱིས་ས་བོན་ལ་སོགས་པ་ཉེ་བའི་དུས་བཞིན་ནོ། །སྦྱང་ལ་སོགས་པ་ན་ས་བོན་ལ་སོགས་པ་འདི་ཡང་རང་གི་འབྲས་བུ་སྐྱེད་པར་བྱེད་པའི་རང་བཞིན་ཉིད་དུ་ངོ་ཤེས་པས་རྣམ་པར་འཇོག་པའི་ཕྱིར་ཞེས་བྱ་བ་ནི་ཐལ་བར་རང་བཞིན་གྱི་གཏན་ཚིགས་སོ། །དེ་སྐྱེད་པ་ནི་མ་ཡིན་ཏེ་དེའི་ཕྱིར་དེ་སྐྱེད་པའི་རང་བཞིན་མ་ཡིན་ནོ་ཞེས་བྱ་བ་ནི་བཟློག་པའི་སྦྱོར་བའོ། །གང་དང་གང་གི་ཚེ་སྐྱེད་པའི་རང་བཞིན་ལ་ལོག་པའི་འབྲས་བུ་མི་སྐྱེད་པ་དེ་དང་དེ་ནི་དེའི་ཚེ་སྐྱེད་པའི་རང་བཞིན་མ་ཡིན་ཏེ། དཔེར་ན་འབྲས་ཀྱི་མྱུ་གུ་སྐྱེ་བའི་རང་བཞིན་ལས་ལོག་པའི་འབྲས་བུ་མི་སྐྱེད་པའི་ཀོ་ཏྲ་བའི་ས་བོན་བཞིན་ནོ། །འབྲས་ལ་སོགས་པའི་རྒྱུ་ཉེ་བ་ལས་སྔར་འབྲས་བུ་སྐྱེད་པའི་རང་བཞིན་ལས་ལྡོག་པ་ཅན་གྱི་འབྲས་བུའི་ས་བོན་ལ་སོགས་པ་ཡིན་པའི་ཕྱིར་ཞེས་བྱ་བ་འདི་ཁྱབ་པར་བྱེད་པ་མི་དམིགས་པའོ། །དེའི་ཕྱིར་རྗེས་སུ་དཔག་པས་ཀྱང་གནོད་པར་ཉམས་སུ་མྱོང་བས་ངོ་ཤེས་པ་ཇི་ལྟར་ཚད་མར་འགྱུར། འདིས་གནོད་པར་བྱེད་པས་ཚད་མ་མ་ཡིན་པའི་ཕྱིར་ཇི་ལྟར་གནོད་པར་བྱེད་པར་འགྱུར། ཚད་མས་མ་ངེས་པར་གྱུར་ན་གང་གིས་ན་གནོད་པ་གཅིག་ལ་གཅིག་བརྟེན་པར་འགྱུར། ངོ་ཤེས་པ་ཚད་མ་མ་ཡིན་པས་འདི་རྗེས་སུ་དཔག་ཚད་མ་གནོད་པ་མེད་དེ་འོན་ཀྱང་རང་གི་བསྒྲུབ་བྱ་ལ་འབྲེལ་པའི་ཕྱིར་རོ། །དེ་ཡང་བཟློག་པ་ལ་གནོད་པར་བྱེད་པ་ནི་ཚད་མའི་སྟོབས་ཀྱིས་ངེས་པའི་ཕྱིར་རོ། །མ་ཡིན་ཏེ་མངོན་སུམ་ནི་གཞན་པས་ཚད་མའི་གཙོ་བོ་ཡིན་ནོ་ཞེ་ན། ངོ་ཤེས་པ་མངོན་སུམ་དུ་གྲུབ་པ་མེད་དོ་ཞེ་ན་རྗེས་སུ་དཔག་པས་མངོན་སུམ་གྱི་
བདག་ཉིད་དུ་ཡོད་པ་ལ་གནོད་པ་ཡིན་ནོ་ཞེས་ནི་མི་སྨྲའི། མངོན་སུམ་སྟོབས་དང་ལྡན་པས་ཅི་ཞིག་བྱེད། དེ་ནི་དོན་མེད་ན་མེད་པའི་ཕྱིར་ཚད་མར་བརྗོད་དོ། །རྗེས་སུ་དཔག་པ་དེ་ཡང་དོན་དང་འབྲེལ་པའི་རྟགས་ལས་སྐྱེད་པས་མཚུངས་པའི་ཕྱིར་ཁྱད་པར་ཅི་ཡང་མེད་དོ། །གལ་ཏེ་རྗེས་སུ་དཔག་པ་དང་འགལ་བར་བརྗོད་ཀྱང་ངོ་ཤེས་པའི་ཚད་མ་དེ་དང་རྣམ་པ་མཚུངས་པས་གཅིག་ཏུ་སྟོན་ན་ནི་སྔོན་པོ་དང་ཅིག་ཤོས་ཀྱི་མེ་ཏོག་ལ་སོགས་པ་ཁ་ཕྱེ་བའི་དངོས་པོར་གཅིག་ནས་ཚད་མ་མ་ཡིན་ནོ། །མེ་ཏོག་གི་འབྲས་བུ་ལ་སོགས་པའི་འབྲས་བུ་མཐོང་བས་དཔག་པ་ནས་ཐ་དད་པ་ནི་མ་ཡིན་ཏེ། མངོན་སུམ་གྱིས་དེ་ལྟར་མེད་པར་མྱོང་བ་དང་ངོ་ཤེས་པའི་ཚད་མ་འགེགས་པའི་སྐད་ཅིག་མའི་འཇིག་པའི་གྲུབ་པར་རྒྱས་པར་བྱས་པས་ཆོག་གོ །གང་གི་ཕྱིར་དེ་ལྟར་གནས་པའི་རྣམ་པར་སྐྱེད་པར་བྱེད་པ་དང་སྐྱེད་པ་མེད་པའི་གནས་སྐབས་ཀྱི་ས་བོན་གྱི་དངོས་པོ་ཐ་དད་པ་དེའི་ཕྱིར་མཐའ་མའི་གནས་དང་ཁྱད་པར་མེད་པ་དེ་མ་ཐག་ཏུ་མྱུ་གུ་ལ་སོགས་པའི་འབྲས་བུ་སྐྱེད་པ་གང་ཡིན་པ་དེ་ཁོ་ན་མྱུ་གུ་སྐྱེད་པའི་རང་བཞིན་ནོ། །འབྲས་བུ་མཐོང་བས་དཔག་པའི་ངོ་བོ་ཉིད་དེ་སྐྱེད་པའི་རང་བཞིན་ཡིན་པས་སོ། །གལ་ཏེ་དེ་ལྟ་ན་དེ་ཁོ་ན་མྱུ་གུ་སྐྱེད་པའི་རང་བཞིན་ཡིན་ལ་སྔར་བྱུང་བའི་གནས་སྐབས་ནི་དེ་སྐྱེད་པའི་རང་བཞིན་མ་ཡིན་པའི་ཕྱིར་ཇི་ལྟར་དེ་རྣམས་ལ་དེའི་རྒྱུར་བཤད། མྱུ་གུ་དོན་དུ་གཉེར་བ་རྣམས་ཀྱིས་དེ་ཉེ་བར་ལེན་ཏོ་ཞེ་ན། སྔོན་གྱི་གནས་སྐབས་ཞེས་བྱ་བ་སྨོས་ཏེ། སྦྱང་ལ་སོགས་པ་ན་གནས་པའི་དུས་སུ་ཡོད་པའི་གནས་སྐབས་དང་ཁྱད་པར་མེད་པའི་མྱུ་གུ་ལ་སོགས་པའི་རྒྱུ་ཐ་མའི་གནས་སྐབས་དང་ཁྱད་པར་མེད་པའི་རྒྱུ་ནི་རྐྱེན་གཞན་ལ་རག་ལས་པའི་ཁྱད་པར་གྱིས་ཡིན་ནོ། །བརྒྱུད་པས་སྐྱེ་བ་དེའི་ཕྱིར་དེ་རྣམས་ནི་བཏགས་པའི་ཕྱིར་རོ། །མྱུ་གུ་དོན་དུ་གཉེར་བ་རྣམས་ཀྱིས་རྒྱུར་བརྗོད་པ་ཉེ་བར་ལེན་ཏོ། །གང་གི་ཕྱིར་ས་བོན་ལ་སོགས་པ་དེའི་ངོ་བོ་རྒྱུ་གཞན་ལ་ལྟོས་པ་ནི་སྐྱེད་པར་བྱེད་པ་དེ་ལ་ལྟོས་པའི་ཕྱིར་དེའི་དེ་སྐྱེད་པའི་ངོ་བོ་ཉིད་ཡིན་ནོ་ཞེས་བྱའོ། །དེའི་ཕྱིར་ས་བོན་ལ་སོགས་པ་དང་ལྡན་པས་མ་ངེས་པ་མ་ཡིན་ཏེ་དེའི་ངོ་བོ་ཉིད་ཡིན་པའི་ཕྱིར་ཞེས་བྱ་བས་གཏན་ཚིགས་ཀྱི་མཇུག་བསྡུ་བ་ཡིན་ནོ། །དེ་ལྟ་ན་དེ་ནི་གང་གི་ཚེ་རེ་ཞིག་ངོ་ཤེས་པ་མངོན་སུམ་གྱི་ཚད་མ་རྟག་པ་གྲུབ་བར་
གཞན་དག་བརྗོད་པས་ས་བོན་ལ་སོགས་པ་དང་ལྡན་པས་མ་ངེས་པར་བསྟན་པ་དེའི་ཚེ་སྔར་བཤད་པའི་རྣམ་པས་མངོན་སུམ་དང་རྗེས་སུ་དཔག་པ་དག་གིས་གནོད་པའི་ཕྱིར་དེའི་བདག་ཉིད་མེད་པ་ཡིན་ན་གང་གིས་ན་དེ་ལས་གཅིག་པ་ཉིད་དུ་ཡོད་པ་ཡིན། གང་གི་ཕྱིར་མ་ངེས་པར་འགྱུར་ཞེས་བསྟན་ཟིན་ཏོ། །གང་གི་ཚེ་ངོ་ཤེས་པ་ཡིན་པའི་ཕྱིར་ས་བོན་ལ་སོགས་པ་སྔ་མ་དང་ཕྱི་མའི་དུས་དག་རང་བཞིན་གཅིག་པ་ཡིན་ནོ་ཞེས་གཏན་ཚིགས་སུ་གཞན་དག་བརྗོད་ན། དེ་ནི་འདིར་གཏན་ཚིགས་མ་གྲུབ་པ་ཡིན་ཏེ་ལ་ལར་དངོས་སུ་ཡོད་པ་ནི་མ་ཡིན་ཏེ། འདིར་སྐད་ཅིག་མའི་དངོས་པོ་རྣམས་ལ་གཅིག་པ་ཉིད་མེད་པའི་ཕྱིར་རོ་ཤེས་ཁོ་བོ་ཅག་འདོད་དོ་ཞེས་བྱ་བར་སྦྱར་རོ། །འོན་ཏེ་གང་མང་སྐད་ཅིག་མའི་དངོས་པོ་དེ་ཡང་ས་བོན་ལ་སོགས་པའི་སྐད་ཅིག་མ་རེ་རེའི་གཅིག་པའི་ངོ་བོ་བྱེ་བྲག་ཀྱང་མི་རྟོགས་པའི་ཕྱིར་སྐད་ཅིག་མ་ཐ་མ་བཞིན་དུ་ཐམས་ཅད་ཀྱང་སྐྱེད་བར་བྱེད་པའི་རང་བཞིན་ཡིན་ཏེ། དེའི་ངོ་བོ་ནི་ཆུ་ལ་སོགས་པ་ལ་ལྟོས་པའི་ཕྱིར་དེའི་གནས་སྐབས་ཀྱི་མ་ངེས་པ་ཡིན་ནོ་ཞེས་དོགས་པ་ལ། གཞན་དང་གཞན་སྐྱེ་བས་ཞེས་བྱ་བ་ལ་སོགས་པ་སྨོས་ཏེ། སྐད་ཅིག་མ་ལ་མ་ངེས་པ་མེད་དོ། །རྐྱེན་གཞན་དང་གཞན་ལས་སྐད་ཅིག་མ་སོ་སོར་སྐྱེ་བས་སྐད་ཅིག་མ་རྣམས་ཐ་དད་པས་ནུས་པའི་ཕྱིར་སྐད་ཅིག་མ་ཐ་མ་བཞིན་དུ་སྐྱེད་པར་བྱེད་པའི་རང་བཞིན་སྤངས་ནས་དེ་ཡང་གང་གིས་ན་མ་ངེས་པ་ཡིན། རྒྱུ་ཐ་དད་པ་ལ་རག་ལས་པའི་སྐྱེ་བ་རྣམས་ནི་བྱེ་བྲག་ཉེ་བར་རྟོགས་སུ་ཟིན་ཀྱང་ཐ་མི་དད་པར་མི་རིགས་སོ། །རྒྱུ་ཐ་དད་པའི་རྗེས་སུ་མི་བྱེད་ན་རྒྱུ་མེད་པར་ཐལ་བར་འགྱུར་རོ། །དེ་སྐད་དུ་ཡང་འདུ་བྱེད་པའི་རྒྱུན་ལས་གཞན་དང་གཞན་པའི་རྐྱེན་དང་ལྡན་པས་སྐད་ཅིག་མ་རེ་རེ་ལ་ནུས་པ་ཐ་དད་པ་ཅན་དག་འགའ་ཞིག་མཚུངས་པས་ངོ་བོ་འདྲ་བར་ཤེས་མོད་ཀྱི་དེ་ལྟ་ན་དེ་དག་གི་ངོ་བོ་ཐ་དད་པ་ཁོ་ན་ཡིན་ཏེ། དེས་ན་འགའ་ཞིག་གི་རྒྱུ་ཡིན་ཞེས་གསུངས་སོ། །ཇི་སྐད་དུ་དེའི་ངོ་བོ་ཉིད་བསྐྱེད་པའི་ཕྱིར་ཞེས་བྱ་བ་ལ་སོགས་པ་ལ་གཞན་དག་མ་ངེས་པ་བརྗོད་པ་ནི་དེ་ཞེས་བྱ་བ་སྨོས་ཏེ། ས་བོན་དང་ཞིང་ལ་སོགས་པའོ། །མཐའ་མ་ནི་ཐ་མའི་དངོས་པོ་སོ་སོར་མྱུ་གུ་སྐྱེད་པར་ནུས་པ་རྒྱུ་རྣམས་གྱེས་ནས་འབྲས་བུ་སྐྱེད་པར་མེད་པར་ཁྱེད་རྣམས་འདོད་པ་ཡིན་ཡང་ཅིའི་ཕྱིར་རེ་རེ་སྐྱེད་པར་མི་བྱེད། དེས་ན་འདི་
རྣམས་ཀྱི་རེ་རེ་ཉིད་འགའ་ཞིག་ལས་མྱུ་གུ་སྐྱེ་བར་འགྱུར་གྱི་དོ་དག་གཞན་དེའི་ངོ་བོ་ཡིན་དུ་ཟིན་ཀྱང་མི་སྐྱེད་པ་ཡིན་ན་ནི་དེའི་ངོ་བོ་སྐྱེད་པ་ཡིན་ནོ་ཞེས་བྱ་བ་མ་ངེས་པ་ཡིན་པས་དེ་བཞིན་དུ་སྦྱར་བ་ལ་སོགས་པ་ན་གནས་བ་ས་བོན་ལ་སོགས་པ་ཡང་མྱུ་གུ་ལ་སོགས་པ་སྐྱེད་པའི་རང་བཞིན་ཡིན་དུ་ཟིན་ཀྱང་མི་སྐྱེད་པར་འདོད་པའི་ཕྱིར་རོ། །དེ་མ་ངེས་པ་ཡིན་པས་དེའི་གནས་སྐབས་ཁོ་ན་ཡིན་ནོ་ཞེས་གཞན་དག་སེམས་པ་ན། འདིར་མི་བྱེད་ཅེ་ན་ཞེས་བྱ་བ་སྨོས་ཏེ། དེ་ལྟར་གལ་ཏེ་གཞན་གྱིས་བསམ་པས་སྤྱིའི་སྒྲོ་ནས་བརྗོད་པ་སྤྱི་ཡིས་ལན་བཏབ་པ་ནི་སྐྱེད་པར་བྱེད་པ་ཁོ་ནའོ་ཞེས་བྱ་བ་སྨོས་པ་སྟེ་འདིར་རང་གི་འབྲས་བུ་སྐྱེད་པའོ། །དེ་ལྟ་མ་ཡིན་ན་དངོས་པོ་སྐྱེད་པར་བྱེད་པ་མ་ཡིན་པར་དོགས་སོ། །གང་ལས་ཤེ་ན། ངོ་བོ་ཉིད་ལྡོག་པ་མེད་པའི་ཕྱིར་རོ། །གལ་ཏེ་སྐྱེད་པར་བྱེད་པའི་རང་བཞིན་མ་ཡིན་ན་སྐྱེད་པར་བྱེད་པར་མི་འགྱུར་ཏེ་དེའི་རང་བཞིན་དུ་འདོད་ན་ནི་གདོན་མི་ཟ་བ་སྐྱེད་པ་ཡིན་ནོ། །དེ་ལྟ་ན་ཡང་གང་ལས་མ་ངེས་པའི་དངོས་པོར་འགྱུར། མཐའ་མའི་སྐྱེད་པར་བྱེད་པ་གཅིག་ཡོད་པས་འབྲས་བུ་གཅིག་པ་ཉིད་སྐྱེད་པ་ཡིན་གྱི་གཞན་དག་ནི་ཉེ་བར་སྦྱོར་བའི་ཡུལ་མེད་པའི་ཕྱིར་སྐྱེད་པར་བྱེད་པ་མ་ཡིན་ནོ་སྙམ་དུ་གཞན་དག་སེམས་པས་གལ་ཏེ་དེ་ལྟ་ན་ལྷན་ཅིག་བྱེད་པ་ཞེས་བྱ་བ་སྨོས་ཏེ། ལྷན་ཅིག་པ་ནི་ཅིག་ཅར་བའི་རྒྱུར་རུང་བ་རྣམས་སོ། །དེའི་འབྲས་བུ་བྱེད་པའི་རུང་བས་ཁས་བླངས་པའི་ཡོད་པའི་འབྲས་བུ་ལ་གཅིག་ཁོ་ནས་བསྐྱེད་པའི་ཕྱིར་གཞན་གྱི་ཉེ་བར་སྦྱོར་བར་ཅི་ཞིག་དགོས་ཏེ་ཅི་ཡང་མ་ཡིན་ནོ། །དེ་སྐྱེད་པར་བྱེད་པ་ཁོ་ནའོ་ཞེས་བྱ་བ་ཅི་ཞིག་བརྗོད་ཅེ་ན། འདིའི་ལན་ནི་དངོས་པོ་རྣམས་ཞེས་བྱའོ། །དངོས་པོ་རྣམས་ནི་ས་བོན་ལ་སོགས་པའོ། །རྟོག་པ་སྔོན་དུ་གཏོང་པར་བྱེད་ཅིང་བློ་སྔོན་དུ་གཏོང་བར་བྱེད་པ་ནི་འགའ་ཡང་མེད་དོ། །གང་གི་ཕྱིར་རྟོག་པ་སྔོན་དུ་གཏོང་པར་བྱེད་པས་འདི་ཁོ་བོ་ཅག་གང་ཡང་རུང་བ་གཅིག་པུས་ཀྱང་འབྲས་བུ་སྐྱེད་པར་ནུས་ན་བདག་ཅག་གིས་ཅི་ཞིག་བྱ་ཞེས་བརྟགས་ནས་གཞན་དག་ལྡོག་པར་འགྱུར་ཞིང་བཏང་སྙོམས་སུ་འདུག་པ་ལ་བརྟེན་པ་ན་དེའི་འབྲས་བུ་སྐྱེད་པར་བྱེད་པ་ནའོ། །གང་གི་ཕྱིར་ས་བོན་ལ་སོགས་པའི་དངོས་པོ་དེ་ནི་སེམས་བ་མེད་པའི་བྱེད་པ་ཅན་ནོ། །དཔྱད་ན་སྟོང་པའི་བྱེད་པ་ནི་གཅིག་གིས་སྐྱེད་པ་ན་གཅིག་གི་འབྲས་བུ་ལ་ཐམས་ཅད་བྱེད་པ་ཁོ་ན་ཡིན་ནོ། །
དངོས་པོ་ཆོས་ཅན་གྱི་འབྲས་བུ་དེ་དག་སྔར་ཡོད་པའི་བྱེད་པ་ལས་དེ་བཞིན་ན་མི་རིགས་སོ། །གང་གི་ཚེ་བྱེད་པ་ཅན་དེ་ལས་གཞན་པའི་བྱེད་པ་ཡིན་པ་དེའི་ཚེ་དེ་ཉིད་ལས་འབྲས་བུ་སྐྱེད་པའི་བྱེད་བ་དང་ལྡན་པས་བྱེད་པ་པོ་ཉིད་དོར་བར་བྱའོ། །གལ་ཏེ་དེ་འདིའི་བྱེད་བ་ནི་བྱེད་བ་པོ་དེ་ལས་དེ་ཡིན་ནོ་ཞེ་ན། འོ་ན་ནི་དེ་ལྟར་བྱེད་པ་པོ་ནི་ཉེ་བར་མཁོ་བ་ཡིན་གྱི། འབྲས་བུ་ལ་ཉེ་བར་མི་མཁོ་བ་ནི་དེ་ལ་བཏགས་པ་ཡིན་པས་དོན་དམ་བར་ན་བྱེད་པ་པོ་དོར་བར་བྱའོ། །བྱེད་པ་འདི་དང་སུ་ཞིག་འབྲེལ་པ་ཡིན་འདུ་བ་ཡིན་ན་ནི་སྔར་བསལ་ཟིན་པའི་ཕྱིར་རོ། །འདུ་བ་ཡང་བྱེད་པ་དང་ལྡན་པ་ཡིན་ན། གཞན་ཡང་དེའི་འབྲས་བུ་ལ་ཉེ་བར་མི་མཁོ་བ་དེ་ཡོད་པར་ཐལ་བར་འགྱུར་རོ། །འདུ་བ་འདིའི་བློའི་རྒྱུ་ཡིན་ནོ་སྙམ་ན་གཅིག་པ་ཉིད་ཀྱིས་ཐམས་ཅད་མཚུངས་པའི་ཕྱིར་རོ། །གལ་ཏེ་མངོན་པར་འདོད་པ་ཉིད་བྱེད་པ་ཡིན་པས་དེའི་བྱེད་པ་བསྐྱེད་པ་ཡིན་པས་ཧ་ཅང་ཐལ་བར་མི་འགྱུར་རོ་ཞེ་ན། འོ་ན་ནི་དེས་ན་དེ་ལས་སྐྱེ་བར་དེ་ཉིད་ལ་འདུ་བར་བརྗོད་དེ་དེ་ཡང་ཐམས་ཅད་ལ་མཚུངས་ཏེ། གང་གིས་བྱེད་པའི་འབད་པས་སྐྱེ་བ་ཡིན་ན། དེས་འབྲས་བུ་ཉིད་ཅིས་ན་མི་སྐྱེད། གང་གིས་བར་དུ་ཆོད་པ་ལ་བརྟེན་པ་དེ་ལྟ་ན་རང་དང་ཉེ་བ་ཙམ་གྱི་བྱེད་པ་འདིས་བསྐྱེད་པ་ཡིན་ནོ། །བྱེད་པ་གཞན་གྱིས་ནི་མ་ཡིན་ཏེ་ཐུག་པ་མེད་པར་ཐལ་བར་འགྱུར་རོ། །དེ་ལྟ་ན་དེ་ཉིད་ཀྱི་ཕྱིར་རང་དང་ཉེ་བ་ཙམ་གྱི་བྱེད་པས་ཡིན་ནོ་ཞེས་བཤད་ཟིན་ཏོ། །དེའི་ཕྱིར་ཕྱིས་འབྱུང་བའི་འབྲས་བུ་ནི་སྔར་ཡོད་པ་རྒྱུའི་བྱེད་པས་ཡིན་ནོ། །དེ་ཡང་ཐམས་ཅད་ལ་ཡོད་པ་ཡིན་ནོ་ཞེས་ཐམས་ཅད་ཀྱི་འབྲས་བུ་སྐྱེད་པའི་བྱེད་པར་བསྟན་ཏེ། འབྲས་བུ་ཐམས་ཅད་སྐྱེད་བར་བྱེད་པ་དེ་ཡོད་པའི་ཕྱིར་རོ། །འབྲས་བུའི་རྒྱུར་མངོན་པར་འདོད་པ་ནི་ཡོད་ན་ཡོད་པ་མ་ཡིན་པ་གཞན་ལས་སྐྱེ་བ་མེད་དོ། །དེ་ལྟར་ཡོད་པ་ནི་དེ་ཉིད་ལ་རྒྱུའི་བྱེད་པས་འབྲས་བུ་བྱེད་པ་འདི་མི་སྲིད་པའི་ཕྱིར་རོ། །དེའི་ཕྱིར་ཡོད་དུ་ཟིན་ཀྱང་རྒྱུ་རྣམས་ལ་ཇི་ལྟར་ཉེ་བར་དམིགས་པར་མི་འགྱུར། གལ་ཏེ་དེ་དང་འབྲེལ་པ་ལས་སྐྱེ་བའི་རྒྱུ་ཡིན་པའི་ཕྱིར་རོ་ཞེ་ན། མ་ཡིན་ཏེ། མེད་པ་དེས་འབྲེལ་པར་མི་རིགས་པའི་ཕྱིར་རོ། །བདག་ཉིད་ཡོད་པ་ཁོ་ནས་སྐྱེད་པའི་དོན་ནི་མི་འཐད་པའི་ཕྱིར་སྐྱེ་བའི་དུས་ན་ཉེ་བར་དམིགས་པའི་བདག་ཉིད་ཡིན་ན་སྔར་ཡང་འབྱུང་བ་བཞིན་དུ་དམིགས་པར་ཐལ་བར་འགྱུར་རོ། །ངོ་བོ་གཞན་གྱིས་ཡོད་པ་ཡིན་ན་
ནི་དངོས་པོར་མི་འགྱུར་རོ། །དངོས་པོ་ནི་མཚན་ཉིད་ཐ་དད་པའི་ཕྱིར་དངོས་པོ་ཐ་དད་དོ། །དེའི་ཕྱིར་ཉེ་བར་དམིགས་པའི་བྱ་བའི་བདག་ཉིད་ཀྱི་སྐྱེ་བ་ལས་སྔར་ཡོད་པའི་མི་དམིགས་པ་དེའི་ཕྱིར་སྐྱེ་བ་ཡང་འབྲེལ་པ་ག་ལ་ཡིན། དེའི་ཕྱིར་འབྲས་བུ་མ་བྱུང་བ་ཉིད་རྒྱུ་ཡོད་པ་ལས་བྱུང་བ་དེས་ན་སྐྱེ་བ་ཡིན་ནོ་ཞེས་ཐམས་ཅད་ཀྱིས་དེ་ལྟར་བསྐྱེད་དོ། །འོན་ཏེ་གཅིག་གིས་ཀྱང་དེ་སྐྱེད་པར་ནུས་ན་གཞན་དག་དེ་ལ་དེ་ཉེ་བའི་མཚན་ཉིད་ཀྱི་བྱེད་པ་དོན་མེད་དོ་སྙམ་ནས་དེ་ལ་གཞན་དག་ཡོད་པ་དང་འབྲེལ་པ་མ་ཡིན་ནོ་ཞེས་ན། རང་གི་རྒྱུ་ཞེས་བྱ་བ་སྨོས་ཏེ། ཞིང་དང་ཆུ་དང་ས་བོན་གྱི་ཚོགས་པའི་མཚན་ཉིད་ཡོངས་སུ་གྱུར་བས་འབྲས་བུ་སྐྱེད་བ་དང་རྗེས་སུ་མཐུན་པའི་ཡོན་ཏན་གྱི་བྱེ་བྲག་དང་ལྡན་པ་ནི་སྐད་ཅིག་མ་རེ་རེ་ཉེ་བར་བསགས་པ་ཕུལ་དུ་བྱུང་བ་ལས་སྐད་ཅིག་མ་གཞན་སྐྱེའོ། །དེས་ན་ཉེ་བ་ནི་འབྲས་བུ་དང་ཡུལ་ཉེ་བ་རྣམས་གང་ཡིན་པ་དེ་ལྟར་གྱུར་བ་ལ་འབྲས་བུ་དང་ཀླན་ཀ་བཙལ་བར་འོས་པ་མ་ཡིན་ནོ། །རྒྱུ་གཅིག་གིས་ཀྱང་དེའི་འབྲས་བུ་ནུས་པའི་ཕྱིར་འདིར་ཁྱེད་ཉེ་བས་ཅི་ཞིག་བྱ་ཞེས་བརྒལ་ཞིང་བརྟག་པར་འོས་པ་མ་ཡིན་ནོ། །དེ་ལ་གཞན་པ་དང་ཉེ་བ་མེད་ན་གཅིག་གིས་ཀྱང་ཡོད་པར་མི་སྐྱེད་དོ། །གང་ལས་དེའི་རང་བཞིན་ཡིན་ཞེ་ན། དེའི་རང་བཞིན་ལས་ཞེས་བྱ་བ་ནི་དངོས་པོ་གཙོ་བོར་བསྟན་ཏེ་ཞིང་དང་ཆུ་དང་ས་བོན་ལ་སོགས་པའི་ཚོགས་པ་ཡོངས་སུ་གྱུར་པ་སྐྱེད་པའི་རང་བཞིན་ཡིན་པའི་ཕྱིར་རེ་རེ་ལ་ནུས་པ་དེ་མེད་དོ་ཞེ་ན། ཚོགས་པའི་སྒྲས་བརྗོད་པ་ཐ་དད་པའི་ནུས་པས་རང་རང་གི་མཚན་ཉིད་གཞན་པ་སྐྱེད་པའི་ཕྱིར་དང་དེ་ཡང་སྐད་ཅིག་མ་རེ་རེ་བསགས་པ་ཕུལ་དུ་བྱུང་བ་སྐྱེད་པའི་ཕྱིར་འབའ་ཞིག་པ་རྣམས་ལ་ནི་དེ་སྐྱེད་པའི་རང་བཞིན་མ་ཚང་བ་དེ་ལས་གཞན་རྐྱེན་ནི་སྐྱེད་བར་རུང་བའི་རང་བཞིན་ཡིན་པའི་ཕྱིར་སྐྱེད་པའི་བྱེད་པར་ནུས་རྒྱུ་ལས་སོ། །འདི་ཡང་ཇི་ལྟར་སྐབས་སུ་བབ་པ་དེ་དང་དེར་བསལ་བར་བྱའོ། །དེའི་ཕྱིར་ཆོགས་པ་སྐྱེ་བའི་རང་བཞིན་དག་ཡོད་པ་གང་ཡིན་པ་དེ་དང་དེ་ལ་གཅིག་མེད་དམ་རྒྱུ་མ་ཚང་བ་ལས་མི་སྲིད་པའི་ཕྱིར་རོ། །ཚོགས་པ་གཅིག་པ་ལས་སྐྱེ་བ་ནི་ལྷན་ཅིག་འབྱུང་བར་ངེས་ཏེ་དེ་དག་ཡོད་ན་ཡོད་པ་ལས་འབྲས་བུ་ཐམས་ཅད་སྐྱེད་པའི་ཕྱིར་རོ། །དེའི་ངོ་བོ་ལས་སྐྱེ་བ་ཡིན་ནོ་ཞེས་བྱ་བ་ལ་སོགས་པ་འདིར་མ་ངེས་པ་མེད་དོ་ཞེས་གང་གིས་བསམས་
ནས་མཐའ་མའི་ནུས་པས་ཅིས་ན་སྐྱེད་པར་མི་བྱེད་ཅེས་སྔར་དེ་བསལ་བར་བཤད་དོ། །གལ་ཏེ་ནུས་པ་དག་ཅེས་བྱ་བ་ལ་སོགས་པ་སྨོས་ཏེ། གྲུབ་པའི་མཐའ་སྨྲ་བས་ཀྱང་མཐའམ་བསྐྱེད་པ་ཡིན་ནོ་ཞེས་བྱ་བའི་དགོངས་པ་གང་ཡིན་པ་དེ་ནི་བཤད་ཟིན་པ་སྟོན་པ་ནི་མ་ཡིན་ཏེ། དེ་ཁོ་ན་ཞེས་བྱ་བ་ལ་སོགས་པ་སྨོས་ཏེ། དེ་དག་ཉིད་བཤད་པ་ནི་གཅིག་པུ་དེ་ཉིད་ཅེས་བྱ་བ་ལ་སོགས་པ་སྨོས་ཏེ། འདིའི་དགོངས་པ་འདི་ནུས་པ་དག་མངོན་སུམ་དང་མི་དམིགས་པའི་གྲུབ་པར་བྱེད་པ་དག་གིས་རྗེས་སུ་འགྲོ་བ་དང་ལྡོག་པ་དག་གི་ཐ་དད་བྱེད་བ་ལས་རྒྱུ་མཚན་གཞན་མེད་པའི་ཕྱིར་རོ། །དེ་ཡང་རྗེས་སུ་འགྲོ་བ་དང་ལྡོག་པ་དག་གཅིག་ལ་མཐོང་བ་ནི་གཞན་དག་གཞན་ལ་མ་ཡིན་ལ། གཅིག་པུ་དེ་ཉིད་བསྐྱེད་པར་བྱ་བར་ནུས་པར་རྟོགས་པར་བྱའོ། །གཞན་དང་གཞན་ནི་བསྐྱེད་པར་བྱ་བ་མ་ཡིན་ནོ། །དེ་ཡང་གང་གི་གནས་སྐབས་སུ་སྐྱེད་པར་མཐོང་བ་དེ་ཅིས་སྐྱེད་པའི་རང་བཞིན་ཡིན། དེ་ཉིད་ཡིན་ནམ་ཡང་ན་སྔར་ཡང་ཡིན་ཞེས་འདིར་བརྩོད་དེ། དེ་ལ་སྔར་ཡང་དེའི་རང་བཞིན་ཡིན་ན་ཕྱི་མ་བཞིན་དུ་ནི་སྔ་མ་ཡང་སྐྱེད་པར་ཐལ་བར་འགྱུར་རོ། །སྐད་ཅིག་མ་རེ་རེ་ཐ་དད་པར་བརྗོད་ན་ནི་སླར་གཞན་གཅེར་བུ་པ་དང༌། རྒྱལ་དཔོག་བདག་མ་ངེས་པ་བརྗོད་ཅིང་སྨྲ་སྟེ། ཐ་དད་པ་ཕན་ཚུན་ལྡོག་པ་མིག་ལ་སོགས་པ་གང་ཡིན་པ་དེ་དག་གི་ལྷན་ཅིག་བྱེད་པ་དག་གིས་ཅིག་ཅར་དུ་བྱེད་པ་རྣམས་ཀྱིས་རྣམ་པར་ཤེས་པའི་མཚན་ཉིད་འབྲས་བུ་གཅིག་པ་སྐྱེད་པ་བདེན་ཏེ་ཕལ་ཆེར་ཐ་དད་པའི་རང་བཞིན་གྱི་རྒྱུ་རྣམས་འབྲས་བུ་གཅིག་ཏུ་ཐ་དད་པའི་རང་བཞིན་ཡིན་ན་ནི་རྒྱུའི་བྱེ་བྲག་ལས་འབྲས་བུའི་བྱེ་བྲག་མེད་པར་འགྱུར་རོ། །དེས་ན་མིག་ལ་སོགས་པ་ཐ་དད་པའི་བདག་ཉིད་ཀྱི་འབྲས་བུ་གཅིག་སྐྱེད་པར་འདོད་པར་མི་བྱ་སྟེ། འོན་ཀྱང་ཐ་མི་དད་པའི་འབྲས་བུ་གཅིག་པ་འདི་སྐྱེད་བར་བྱེད་པ་ནི་སྤྱིར་གྱུར་པའི་ངོ་བོ་ཁས་བླངས་པ་གང་གིས་ཐ་མི་དད་པའི་འབྲས་བུ་སྐྱེད་དོ། །དེ་ཡང་ཚོགས་པའི་གནས་སྐབས་ཉིད་ལ་འབྲས་བུ་སྐྱེའི། །མ་ཚོགས་བའི་གནས་སྐབས་ནི་མ་ཡིན་ནོ། །རེ་རེ་ཡོད་པ་ལ་དེའི་བདག་ཉིད་མེད་པ་ནི་མ་ཡིན་ཏེ། རེས་འགལ་མེད་པ་འགལ་བའི་ཕྱིར་རོ། །དེ་འདི་སྐྱེད་བར་བྱེད་པའི་རང་བཞིན་ནི་སྐྱེད་པར་བྱེད་པ་དང་སྐྱེད་པར་མི་བྱེད་པ་ལྡན་པ་ནི་མ་ཡིན་ཏེ། ཚོགས་པ་དང་ཅིག་ཤོས་ཀྱི་གནས་སྐབས་ཐ་
དད་པ་ཐལ་བར་འགྱུར་རོ། །དེ་ལྟ་ན་ཡང་སྤྱིའི་རང་བཞིན་ཉམས་པ་ཡིན་པ་དེའི་ཕྱིར་མིག་ལ་སོགས་པ་ཚོགས་པ་རྣམས་སྐྱེད་པར་བྱེད་པའི་ངོ་བོ་གང་ཡིན་པ་དེ་ནི་རེ་རེ་ཡོད་དུ་ཟིན་ཀྱང་སྐྱེད་པར་བྱེད་པ་མ་ཡིན་གྱི་དེ་ནི་ངོ་བོ་སྐྱེད་པའི་ཕྱིར་ཞེས་བྱ་བ་མ་ངེས་པ་ཡིན་ནོ་ཞེ་ན། སྒྲུབ་པའི་མཐའ་སྨྲ་བས་མ་ཡིན་ཏེ། བདག་ཉིད་ཇི་ལྟ་བ་ཞེས་བྱ་བ་ལ་སོགས་པ་སྨོས་ཏེ། འདི་སྙམ་དུ་དགོངས་པ་ཡིན་ཏེ། ཅི་བྱེད་ཀྱང་མངོན་པར་འདོད་པའི་རྒྱུ་འདི་མིག་ལ་སོགས་པ་རེ་རེ་ལས་གལ་ཏེ་ཡིན་ན་དེ་མི་རིགས་ལ། །ཚོགས་པའི་རང་བཞིན་ལས་སྐྱེ་བའི་ཕྱིར་འབྲས་བུ་རྒྱུ་ནི་དེ་ཁོ་ན་ཡིན་པའི་ཕྱིར་རོ། །འོ་ན་ནི་དེའི་གནས་སྐབས་ན་རེ་རེ་ལ་སོགས་པའི་སྒྲས་བརྗོད་པ་སྐྱེད་པའི་རང་བཞིན་དུ་ཁས་བླངས་པས་མིག་ལ་སོགས་པ་རེ་རེ་རྒྱུ་ཡིན་ནོ་ཞེ་ན། གལ་ཏེ་དེ་ལྟར་ངེས་པ་འདི་ལ་ཅི་ཞིག་ཡོད། གང་ཁྱེད་དུ་མ་ལས་ཡིན་གྱི་གཅིག་ལས་མ་ཡིན་ནོ་ཞེས་བྱ་བ་ལ་ཟློག་པ་ལ་གནོད་པར་བྱེད་བའི་ཚད་མ་མེད་པའི་ཕྱིར་རོ། །གཅིག་དེའི་འབྲས་བུ་བྱ་དགོས་སོ་ཞེས་བྱ་བ་ངེས་པ་ནི་མ་མཐོང་སྟེ། གཅིག་དེའི་འབྲས་བུ་བྱེད་དོ་ཞེས་བྱ་བ་གང་ལས་ངེས་པ་ཡིན། དེ་ཡོད་པ་ལས་ཡོད་པ་ཡིན་ནོ་ཞེས་བྱ་བ་དེ་འདིར་དུ་མ་ལས་འདི་མཚུངས་སོ། །དེ་སྐད་ཅིག་དེ་ཉིད་སྐྱེད་པར་ནུས་ཀྱི་གཞན་ལ་ནི་མ་ཡིན་པས་གཞན་དང་གཞན་བསྐྱེད་པ་མ་ཡིན་ནོ་ཞེས་བཤད་དོ། །དུ་མ་ཡིན་པ་ལས་དུ་མ་ཐོབ་པ་ནི་མ་ཡིན་ཏེ། གང་གི་ཕྱིར་ཁོ་བོ་ཅག་གིས་ཁྱེད་བཞིན་དུ་རྒྱུ་ཁོ་ནས་འབྲས་བུའི་བདག་ཉིད་དུ་ཁས་མ་བླངས་ཏེ། གང་དུ་མ་ཡོངས་སུ་གྱུར་པ་ལས་དུ་མའི་རང་བཞིན་ཡིན་པའི་ཕྱིར་འབྲས་བུ་དུ་མར་འགྱུར་བ་ཞིག་ན། འོན་ཀྱང་སྔ་མ་ཉིད་འགའ་ཞིག་ཡོད་པར་གྱུར་པ་དེ་ཡང་དུ་མ་ཡོད་པ་ཉིད་ལས་ཡོད་པའི་ཕྱིར་དེའི་འབྲས་བུར་བརྗོད་ན་དེ་གང་ལས་དུ་མར་ཐལ་བར་འགྱུར་བ་ཡིན། གང་ཡང་ཐ་མི་དད་པར་སྐྱེད་པར་བརྗོད་པའི་ཕྱིར། དེ་གཅིག་ཏུ་གནས་ཀྱང་ཁྱེད་ཀྱི་དེའི་འབྲས་བུ་སྐྱེད་པའི་རང་བཞིན་ཉིད་ཡིན་པ་དེའི་ཕྱིར་འབྲས་བུ་སྐྱེད་པར་ཐལ་བར་འགྱུར་རོ། །དེ་གཞན་ཉེ་བ་དང་དེ་ལ་བྱེ་བྲག་མེད་པའི་ཕྱིར་རམ་དེ་ཡང་མི་སྐྱེད་པར་འགྱུར་རོ། །དེའི་ཕྱིར་དེ་རྣམས་ཡོད་པ་དང་མེད་པ་དང་ལྡན་པ་ལས་རང་གི་འབྲས་བུ་ཡོད་པ་དང་མེད་པ་དང་ལྡན་པ་མཐོང་སྟེ་དེ་ཉིད་བྱེ་བྲག་ཏུ་སྐྱེད་པ་ཡིན་པའི་ཕྱིར་མ་ངེས་པ་ག་ལ་ཡིན། འོན་ཏེ་ཚོགས་པའི་རྒྱུ་ལ་བརྟེན་པར་བརྗོད་ན་ནི་རྒྱུ་ཐ་དད་པས་འབྲས་བུ་ཐ་དད་པར་མི་
འགྱུར་རོ་ཞེ་ན། དེ་ནི་མ་ཡིན་ཏེ་ཇི་ལྟར་བདག་ཉིད་གང་དང་གང་གི་ཚོགས་བའི་བདག་ཉིད་ཀྱིས་རང་བཞིན་དེ་ཐ་དད་པས་དེ་ཁྱད་པར་ལ་ཉེ་བར་སྦྱར་ན་དེའི་རྣམ་པར་ཤེས་པ་འབྲས་བུའི་མཚན་ཉིད་གང་གི་ཁྱད་པར་ནི་ཚོགས་པའི་ངོ་བོའི་བྱེ་བྲག་གིས་དེ་རྣམས་ལ་ཉེ་བར་སྦྱོར་བའི་ཕྱིར་རོ། །དེའི་ཉེ་བར་སྦྱོར་བས་ཚོགས་པ་ཐ་དད་པའི་བྱེད་པས་བྱ་བའི་རང་བཞིན་གྱི་ཁྱད་བར་ནི་བྱ་བ་དང་ཁྱད་པར་ཅན་གྱི་རང་བཞིན་དེ་དག་ཚོལ་བ་མེད་པའི་ཕྱིར་རོ། །ཕན་ཚུན་ཐ་དད་པའི་ངོ་བོ་ཡིན་པའི་ཕྱིར་ཚོགས་པ་ཐ་དད་པ་ཐ་མི་དད་པའི་ངོ་བོའི་འབྲས་བུ་ཡིན་ན་ཇི་ལྟར་རྒྱུ་ཐ་དད་བ་ལས་འབྲས་བུ་ཐ་མི་དད་པར་འགྱུར། དེ་ལྟ་ན་ཚོགས་པ་གཅིག་པའི་ཡིད་ལ་བྱེད་པ་ཡོད་པའི་ནུས་པ་ལ་སོགས་པའི་མཚན་ཉིད་དེ་ལས་རྣམ་བར་རྟོག་པའི་ཤེས་པ་བསྐྱེད་དོ། །གཞན་ཡང་འདི་ལ་བྱེད་པ་དང་དབང་པོ་ཙམ་གྱི་མཚན་ཉིད་དེ་ལས་འཁྲུལ་པའི་དབང་པོའི་ཤེས་པ་འབྱུང་ངོ༌། །དེ་ལས་གཞན་ཡུལ་དང་དབང་པོ་དང་ཡིད་ལ་བྱེད་པའི་བདག་ཉིད་དེ་ལས་མ་འཁྲུལ་པའི་རྣམ་པར་ཤེས་པ་འབྱུང་བའི་ཕྱིར་ཚོགས་པ་ཐ་དད་པས་བསྐྱེད་པའི་འབྲས་བུའི་རང་བཞིན་ཁྱད་པར་མ་འཆོལ་བ་ཡོད་པ་ཉིད་དེ་ཚོགས་པའི་མཚན་ཉིད་རྒྱུ་ཐ་དད་པས་འབྲས་བུ་ཐ་དད་པའི་ཕྱིར་རོ། །འོ་ན་ནི་གང་གི་ཚེ་ཡུལ་དང་དབང་པོ་དང་ཡིད་ལ་བྱེད་པ་རྣམས་ཀྱིས་རྣམ་པར་ཤེས་པ་སྐྱེད་པ་དེའི་ཚེ་དེ་དག་ཉེ་བར་སྦྱོར་བའི་ཡུལ་གཅིག་པའི་ཕྱིར་ཇི་ལྟར་འཆོལ་བ་མེད་པ་ཡིན་ཞེ་ན། རྣམ་པ་དེ་ལྟ་བུ་འཆོལ་བ་འདོད་པའི་ཕྱིར་སྐྱོན་མེད་དོ། །དེ་སྐད་དུ་དེ་ལ་གཅིག་པུས་ཀྱང་ནུས་ཞེས་བྱ་བ་ལ་སོགས་པ་བཤད་དོ། །དེ་ལྟ་ན་ཇི་ལྟར་སྐྱེད་བར་བྱེད་པ་ཡིན། གལ་ཏེ་དེ་དག་ཐ་དད་པས་འབྲས་བུ་ཐ་དད་པ་ནི་མེད་དེ། འོན་ཀྱང་ཚོགས་པ་རྣམས་གཞན་དང་གཞན་གྱི་འབྲས་བུ་སྐྱེས་པ་ནི་སྐྱེད་པར་བྱེད་པ་ཉིད་དེ་གང་གི་ཕྱིར་མེད་པར་འགྱུར་ཏེ། དེ་དག་གི་སྐྱེད་པར་བྱེད་པ་དེ་ཡོད་ན་འགའ་ཞིག་ཡོད་པའི་ཕྱིར་རོ། །དེ་ལ་གཅིག་གམ་དུ་མ་ཡོད་པ་དེ་དག་གཅིག་གམ་དུ་མའི་སྐྱེད་པར་བྱེད་པར་བརྗོད་དོ། །འོན་ནི་ཚོགས་པ་གཅིག་དང་ཚོགས་པ་དུ་མའི་དངོས་པོ་སྐྱེད་པས་ཕན་ཚུན་ཐ་དད་པར་འགྱུར་ན། དེ་དང་དེ་མ་ཡིན་པའི་ངོ་བོའི་རྒྱུ་ལས་སྐྱེད་པ་ཉིད་དེ་དང་དེ་མ་ཡིན་པའི་དངོས་པོར་མི་འདོད་དོ། །དེ་ལ་གང་གི་ཚེ་མིག་དང་གཟུགས་དང་ཡིད་ལ་བྱེད་པ་རྣམས་རྣམ་པར་ཤེས་པ་
བསྐྱེད་པའི་བདག་ཉིད་ཡིན་པ་དེའི་ཚེ་མིག་དང་གཟུགས་དག་ཀྱང་རྣམ་པར་ཤེས་པའི་དངོས་པོར་ཐ་མི་དད་པའི་རྒྱུ་ལས་སྐྱེས་པའི་ཕྱིར་དེ་དག་གི་རྣམ་བར་ཤེས་པའི་བདག་ཉིད་རྣམ་པར་ཤེས་པའམ། དེ་གཟུགས་ཉིད་དུ་ཇི་ལྟར་ཐལ་བར་མི་འགྱུར་སྙམ་དུ་ན། །དེ་དང་དེ་མིན་དངོས་པོ་ནི། །དེ་དང་དེ་མིན་རྒྱུ་ལས་སྐྱེས། །གཟུགས་སོགས་ཅིས་ཏེ་ཤེས་པ་ཡིན། །རྣམ་ཤེས་ཐ་དད་རྒྱུ་ལས་སྐྱེས། །ཞེས་བཤད་པས། ཉེས་བ་འདི་དག་མེད་དོ། །དེ་དག་ཇི་ལྟར་རང་རང་གི་ངོ་བོ་ཐ་དད་པའི་རྒྱུ་མཚན་ནི་ཉེ་བར་ལེན་པས་དེར་ཉེ་བར་སྦྱར་རོ། །ཡིད་ལ་བྱེད་པ་ནི་རྣམ་པར་ཤེས་པའི་ཉེ་བར་ལེན་པའི་རྒྱུ་སྟེ། དབང་པོ་ནི་རང་གི་རྣམ་པར་ཤེས་པའི་སྐྱེད་པར་རུང་བ་སྐྱེ་བ་ནི་ལྷན་ཅིག་བྱེད་པའི་རྒྱུ་ཡིན་ནོ། །དེ་བཞིན་གཞན་དག་ལ་ཡང་ཅི་རིགས་བར་བརྗོད་པར་བྱའོ། །དེས་ན་གཞན་འདྲ་བའི་ཚོགས་པ་དབང་པོའི་སྐད་ཅིག་མ་སྐྱེད་པར་བྱེད་པ་ནི་རྣམ་པར་ཤེས་པ་དང་མི་འདྲ་བའི་ཕྱིར་མཚན་ཉིད་མི་མཐུན་པའི་འབྲས་བུ་མཚན་ཉིད་མི་མཐུན་པའོ། །ཅི་སྟེ་དེ་དག་ཐམས་ཅད་ཀྱི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་དེའི་ཚེ་དབང་པོ་ལ་སོགས་པའི་སྐད་ཅིག་མ་འདི་ཐ་དད་བ་ག་ལ་ཡིན་ཞེ་ན། འདི་དག་ཉེ་བར་ལེན་པའི་དངོས་པོས་འདི་ཉེ་བར་སྦྱོར་གྱི་གཞན་ལ་ནི་ལྷན་ཅིག་བྱེད་པའི་རྐྱེན་ཡིན་པའི་ཕྱིར། རྟོགས་པའི་ངོ་བོ་ལ་ཕན་འདོགས་པ་དང་ཕན་མི་འདོགས་པ་དག་སྟེ་ཡོད་པ་ལ་མི་འཁྲུལ་པ་དང་འཁྲུལ་པ་ཡིན་ནོ། །དེ་ལྟ་ན་རྣམ་པར་ཤེས་པ་རྟོགས་པའི་ངོ་བོར་ཡིད་ལ་བྱེད་པས་ཕན་འདོགས་པའི་ཕྱིར་དབང་པོ་བེམས་པོའི་ངོ་བོ་ཉིད་མ་ཡིན་ནོ་ཞེས་གཞན་ལའང་དེ་བཞིན་དུ་ཤེས་བར་བྱའོ། །རྣམ་པར་ཤེས་པ་ཙམ་གྱི་དངོས་པོ་ནི་དེ་མ་ཐག་པའི་རྐྱེན་གྱི་བྱེད་པ་ལས་ཡིན་པར་ངེས་པ་ཉིད་དབང་པོ་ལ་སོགས་པ་ནི་མ་ཡིན་ནོ། །དབང་པོའི་སྐད་ཅིག་མ་ཕྱི་མ་སྐྱེད་པ་ནི་སྔ་མའི་དབང་པོ་ལས་ཕྱི་མ་ཡིན་གྱི་རང་གི་རྣམ་པར་ཤེས་པར་རུང་བའི་རྒྱུ་མཚུངས་པ་དེ་མ་ཐག་པ་ནི་རྐྱེན་མ་ཡིན་ནོ། །དེ་བཞིན་དུ་གཟུགས་ལ་སོགས་པ་ཡང་བརྗོད་པར་བྱའོ། །དེའི་ཕྱིར་གནས་སྐབས་ཐ་དད་ཀྱང་རྣམ་པ་གཅིག་ཏུ་ངེས་པར་བྱེད་པའི་ཤེས་པའི་རྒྱུ་མཚན་གྱིས་རང་གི་རྒྱུན་འབྱུང་བའི་འབྲས་བུ་སྐྱེད་པའི་རྒྱུ་མཚན་ཡིན་ཏེ། དེ་ནི་ཉེ་བར་ལེན་པའི་རྒྱུ་ཡིན་པའི་ཕྱིར་རོ། །གང་རྒྱུན་གཞན་ནི་སྔར་གྱི་གནས་སྐབས་ལ་
ལྟོས་ནས་ཁྱད་པར་ལ་སོགས་པའི་རྒྱུ་མཚན་དེ་ལྷན་ཅིག་བྱེད་པའི་རྒྱུ་ཡིན་ཏེ། དེ་ཡང་དངོས་པོ་འདི་རྣམས་རང་གི་རྒྱུ་བརྒྱུད་པ་ལས་འོངས་པའི་རང་བཞིན་ནོ། །ཅུང་ཟད་ཅིག་རང་གི་འབྲས་བུའི་རྒྱུན་རྣམ་པར་འཇོག་པའི་རྒྱུ་མཚན་སྐྱེད་པ་ཡིན་ཏེ། གཞན་ཡང་རྒྱུན་གཞན་དུ་བརྗོད་པའི་རྒྱུ་མཚན་ཡིན་པའི་ཕྱིར་རོ། །དེ་ཉིད་ཀྱི་ཚོགས་པ་གཞན་གྱིས་བྱེ་བྲག་ཏུ་བྱས་པའི་ཕྱིར་དབང་པོ་དང༌། གཟུགས་དང་རྣམ་པར་ཤེས་པའི་སྐད་ཅིག་མ་རྣམས་ནི་ཕན་ཚུན་མཚན་ཉིད་མི་མཐུན་པ་ལ་འགལ་བ་མེད་དོ། །དེའི་ཕྱིར་གང་གི་ཚེ་རེ་རེའི་རྒྱུ་དུ་མ་ཡིན་པའི་ཕྱིར་འབྲས་བུའི་བྱེ་བྲག་ཉིད་ཡིན་པ་དེའི་ཚེ་འབྲེལ་བ་མེད་པས་མ་ངེས་པར་འགྱུར་ན་དེ་ཡང་ཁས་བླངས་པའི་ཕྱིར་ཅི་ཡང་མེད་དོ། །འོན་ཏེ་ཚོགས་པའི་མཚན་ཉིད་ཀྱི་རྒྱུའི་བྱེ་བྲག་གི་ཚོགས་པ་གཞན་ལས་འབྲས་བུའི་བྱེ་བྲག་ཀྱང་མཚན་ཉིད་མི་མཐུན་པ་དེའི་ཕྱིར་རྒྱུ་རྣམས་ལས་རང་བཞིན་ཐ་དད་པར་བརྗོད་པ་དེའི་ཚེ་དེ་འདིར་མེད་པས་ཇི་ལྟར་རྒྱུའི་བྱེ་བྲག་ལས་འབྲས་བུའི་བྱེ་བྲག་ཏུ་མ་འགྱུར་ཞེས་བྱ་བའི་བསམ་པ་ནི་རྒྱུའི་བྱེ་བྲག་ལས་འབྲས་བུའི་བྱེ་བྲག་ཏུ་མི་འགྱུར་བ་མ་ཡིན་ནོ་ཞེས་གང་ལས་ཡིན་ཞེ་ན། བདག་ཉིད་ཅི་ལྟ་བ་ཞེས་བྱ་བ་ལ་སོགས་པ་བརྗོད་དོ། །གཉིས་ག་ཡང་འདི་དག་གི་འབྲས་བུར་ཚད་མས་མཐོང་བ་ཡིན་ནོ་ཞེས་བྱ་བ་བསྟན་པ་ནི་དཔེར་ན་ཞེས་བྱ་བ་ལ་སོགས་པ་སྨོས་ཏེ། འཇིམ་པའི་གོང་བུ་ལ་སོགས་པ་དག་ལས་བྱུང་པའི་བུམ་པ་རྒྱུ་དུ་མ་ཡིན་དུ་ཟིན་ཀྱང་དུ་མའི་ངོ་བོར་མི་འགྱུར་རོ། །ཆོགས་པ་གཞན་གྱིས་བསྐྱེད་པ་མ་ཡིན་པས་ཐ་མི་དད་པའི་ངོ་བོ་འདི་དཔེ་བརྗོད་པའི་ཕྱིར་རོ། །དེ་ལ་ཚོགས་པ་གཞན་གྱིས་བསྐྱེད་པ་ནི་རེ་ཞིག་ཐ་དད་པར་བསྟན་པ་ནི་འཇིག་པའི་གོང་བུ་ཞེས་བྱ་བ་ལ་སོགས་པ་སྨོས་ཏེ། འདིར་འཇིག་པའི་གོང་བུ་དང་རྫ་མཁན་དང་སྐུད་པ་མ་ཚོགས་པའི་རང་བཞིན་ནི་རྒྱུ་གཞན་པ་དང་ལྷན་ཅིག་པས་སོ་ཕག་ལ་སོགས་པའི་མཚན་ཉིད་གཞན་གྱིས་བསྐྱེད་པས་དངོས་པོ་ཐ་དད་པའི་འབྲས་བུ་རྣམས་སྒྲུབ་པ་ཡིན་ནོ། །ཚོགས་པའི་མཚན་ཉིད་མི་མཐུན་པ་དེ་དག་གིས་བུམ་པའི་བདག་ཉིད་སྐྱེད་པ་དེ་བཞིན་དུ་རྫ་མཁན་ལ་སོགས་པ་ལ་ལྟོས་པ་མེད་པ་འཇིམ་པའི་གོང་བུ་དེ་ལས་གཞན་སྐྱེད་པའི་ཤིང་ལ་སོགས་པ་མཚན་ཉིད་མི་མཐུན་པའི་ཉེ་བར་ལེན་པ་ལས་བྱུང་བས་སའི་བདག་ཉིད་ཀྱི་
འབྲས་བུ་སྐྱེ་བ་མཐོང་ངོ༌། །རྫ་མཁན་ལ་སོགས་པ་དང་ལྷན་ཅིག་པས་ཀྱང་དེའི་བདག་ཉིད་ཀྱི་བུམ་པ་དེའི་རྒྱུས་བྱས་པའི་བྱེ་བྲག་ནི་འཇིམ་པའི་གོང་བུ་འབའ་ཞིག་ལས་ཐ་དད་པའི་ངོ་བོས་དེའི་འབྲས་བུ་ལ་སོགས་པ་དང་མཚན་ཉིད་མི་མཐུན་པ་བྱེད་དོ། །དེ་ལྟར་རྫ་མཁན་ལ་སོགས་པས་ཀྱང་གཞན་གྱི་ཉེ་བར་ལེན་པའི་ལྷན་ཅིག་བྱེད་པའི་དངོས་པོས་འབྲས་བུ་བྱེད་པ་གང་ཡིན་པ་དེ་ནི་མཚན་ཉིད་མི་མཐུན་པ་ཉིད་འཇིམ་གོང་དང་ལྷན་ཅིག་ཏུ་དེའི་རྒྱུས་བྱེད་པའི་བྱེ་བྲག་ཅན་དག་བུམ་པའི་བདག་ཉིད་ཀྱི་འབྲས་བུ་སྐྱེད་དོ་ཞེས་བྱ་བ་ནི་བསྡུས་པའི་དོན་ཏོ། །དེ་ལ་འཇིམ་པའི་གོང་བུ་ལས་ཐ་དད་པའི་རང་བཞིན་བུམ་པ་ལས་གཞན་པའི་ཉེ་བར་ལེན་པའི་རྒྱུ་དེ་ནི་འཇིམ་པའི་ངོ་བོ་མ་ཡིན་པ་ཤིང་ལ་སོགས་པ་དེ་རྣམས་ལས་འབྱུང་ངོ༌། །རྫ་མཁན་དང་འཇིམ་པའི་གོང་བུའི་ཉེ་བར་ལེན་པའི་བྱེད་པ་ཕུལ་དུ་བྱུང་བ་ལ་ལྷན་ཅིག་བྱེད་པའི་དངོས་པོས་ཉེ་བར་སྦྱོར་བས་བུམ་པ་དེ་ཉིད་ཀྱི་འཇིམ་པའི་གོང་བུའི་ཉེ་བར་ལེན་པས་སའི་བདག་ཉིད་ཡིན་པ་དེ་ཉིད་དབྱིབས་ཀྱི་བྱེ་བྲག་ཆུ་འཛིན་པ་ལ་སོགས་པའི་རྣམ་པ་དེའི་བདག་ཉིད་ཀྱིས་དེ་ལས་གཞན་པ་གང་དག་འཇིམ་པའི་གོང་བུ་དེ་ལས་གཞན་པའི་རྒྱུ་མཚན་དང་ཉེ་བར་ལེན་པའི་རྒྱུ་ལྷན་ཅིག་ཏུ་སོ་ཕག་ལ་སོགས་པ་ནི་དེ་དག་ལས་ཐ་དད་པའི་ངོ་བོར་འགྱུར་ཏེ། སྐུད་པ་ལས་ནི་འཇིམ་པའི་གོང་བུ་དང་རྫ་མཁན་གྱི་རྒྱུས་བྱས་པའི་བྱེ་བྲག་ལས་བུམ་པ་དེ་ཉིད་སའི་དབྱིབས་ཀྱི་བྱེ་བྲག་ནི་འཇིམ་པའི་གོང་བུ་ལ་རྫ་མཁན་དག་དེ་སྐྱེད་པའི་ངོ་བོ་ཡིན་ཕྱིར་བུམ་པའི་ངོ་བོར་རིགས་སོ། །དེ་དག་ཀྱང་སྐུད་པའི་རྒྱུས་བྱས་པའི་བྱེ་བྲག་དེ་དག་ལ་མི་ལྟོས་པའི་གནས་སྐབས་ཐ་དད་པའི་བདག་ཉིད་འཁོར་བ་ལ་སོགས་པ་ལས་རྣམ་པར་ཕྱེ་ཞིང་རྣམ་པར་དཔྱད་པའི་རང་བཞིན་དུ་འགྱུར་རོ། །དེའི་ཕྱིར་རྒྱུ་རྣམ་པ་གསུམ་དུ་གནས་པ་ལས་སྐྱེ་བའི་བུམ་པ་དེ་ལས་གཞན་པ་རེ་རེའི་འབྲས་བུ་དང་གཉིས་པའི་འབྲས་བུ་ཐ་དད་པའི་ངོ་བོ་སྐྱེད་པའི་ཕྱིར་ཚོགས་པ་ཐ་དད་པས་ཐ་དད་པའི་རྒྱུ་ཉིད་ཕན་ཚུན་མི་མཐུན་པའི་ངོ་བོར་འགྱུར་རོ། །དེས་ན་ཉེ་བར་སྦྱོར་བའི་འབྲས་བུའི་རང་བཞིན་གྱི་བྱེ་བྲག་མ་འཁྲུལ་པར་གྲུབ་བོ། །དེ་ཡང་རེ་རེ་གནས་སྐབས་སུ་འབྱུང་བ་དེ་ནི་རྒྱུའི་བྱེ་བྲག་གི་རྗེས་སུ་འགྲོ་བ་དང་ལྡེག་པའི་རྗེས་སུ་
བྱེད་པ་དེས་ཆ་ཤས་ཀྱིས་སྐྱེད་བ་ནི་མེད་དོ། །དེ་དག་རེ་རེའི་སྐྱེད་པ་ཉིད་ཀྱང་དངོས་པོ་ཉིད་དེ་རེ་རེའི་རིགས་མི་མཐུན་པའི་རྒྱུ་གཞན་དང་ཉེ་བ་ལས་མཐོང་ལ་དེ་དང་ཉེ་བ་ལས་བྱེ་བྲག་མཐོང་བའི་ཕྱིར་དེ་སྐྱེའོ་ཞེས་བྱ་བ་འདི་ནི་དེ་ཁོ་ན་ཉིད་སེམས་པས་རྣམ་པར་དཔྱད་པ་ཡིན་ནོ། །གང་གི་ཕྱིར་འབྲས་བུའི་བྱེ་བྲག་དོན་དུ་གཉེར་བ་རྒྱུ་དུ་མ་ཡོངས་སུ་བཟུང་བ་བྱས་ནས་ཕན་ཚུན་ཕན་འདོགས་པར་བྱེད་པ་བརྒྱུད་པའི་འབྲས་བུ་ལ་མི་སླུ་བ་ནི་འབྲས་བུ་སྐྱེད་པར་འོས་བའི་རྒྱུའི་ཚོགས་པའི་དངོས་པོ་ཡིན་པའི་ཕྱིར་རོ། །གང་གི་ཕྱིར་དེ་ལྟར་ཚོགས་པའི་བྱེ་བྲག་ལས་བྱེ་བྲག་ཏུ་གྱུར་པའི་སོ་ཕག་དང་འཁོར་ལོས་རྣམ་པར་ཕྱེ་བའི་བུམ་པ་སྟེ། དེས་རྣམ་པར་ཕྱེ་བ་ནི་བུམ་པའི་མཚན་ཉིད་འབྲས་བུར་འགྱུར་རོ། །དེའི་ཕྱིར་དེ་ལྟར་བཤད་པས་རྫ་མཁན་ལས་ནི་འཇིམ་པའི་གོང་བུ་སྤངས་བ་དེ་ནི་ཚོགས་པ་གཞན་པའི་ནང་དུ་འདུས་པའི་འཇིམ་པའི་ངོ་བོ་མ་ཡིན་ཏེ། འབྲས་བུ་འགའ་ཞིག་འཇིམ་པའི་གོང་བུའི་རྒྱུས་ཕན་བཏགས་པའི་བདག་ཉིད་ཁོ་ན་དེ་དང་བྱེ་བྲག་ཏུ་བྱེད་པའི་རྒྱུ་ཡིན་པའི་ཕྱིར་རོ། །འཇིམ་པ་འབའ་ཞིག་ནི་མ་ཡིན་ཏེ། དེ་དང་དེའི་ཚོགས་པ་ལས་ཕྱི་རོལ་ཏུ་གྱུར་པའི་དབྱིབས་ཀྱི་བྱེ་བྲག་རྫ་མཁན་གྱི་ཉེ་བར་ལེན་པས་ཕན་བཏགས་པར་བྱས་པ་ཉིད་ཀྱིས་འཇིམ་པའི་དབྱིབས་ཀྱི་བྱེ་བྲག་གི་བདག་ཉིད་ཀྱི་འབྲས་བུའི་རྒྱུ་ཡིན་པའི་ཕྱིར་རོ། །དེ་ལྟར་ན་ཚོགས་པའི་བྱེ་བྲག་ལས་འབྲས་བུའི་བྱེ་བྲག་ཏུ་འགྱུར་བའི་དཔེ་བསྟན་ནས་ལྷན་ཅིག་བྱེད་པ་ཉིད་དུ་མས་ཀྱང་དུ་མའི་བདག་ཉིད་དུ་འགྱུར་བ་སྤངས་པར་སྟོན་པ་ནི། དེ་ཉིད་ཀྱི་བུམ་པ་ཞེས་བྱ་བ་སྨོས་ཏེ། འཇིམ་པ་དང་རྫ་མཁན་གཉིས་ལྷན་ཅིག་བྱེད་པ་དག་ཕན་ཚུན་ཕན་འདོགས་པར་བྱེད་པའི་བདག་ཉིད་གང་གིས་ནུས་པའི་བྱེ་བྲག་ནི་རྐྱེན་གཞན་དང་ལྷན་ཅིག་པའི་གནས་སྐབས་བྱེ་བྲག་ཅན་དུ་རུང་བ་དེའི་ཡུལ་དེ་ནི་གནས་སྐབས་གཞན་པའི་ཡུལ་ཐ་དད་གྱུར་ཀྱང་ཇི་ལྟར་དེ་གཞན་ལས་ཐ་དད་པ་དེ་ལྟར་ངོ་བོ་ནི་ཐ་དད་པ་མེད་དོ། །འབྲས་བུའི་རང་གི་ངོ་བོ་ཡང་དུ་མ་ཉིད་དང་གཅིག་པ་ཉིད་མ་ཡིན་ཏེ། དེ་རྣམས་ཀྱིས་བསྐྱེད་པའི་འཇིག་པ་དང་དབྱིབས་ཀྱི་བྱེ་བྲག་གི་བདག་ཉིད་དེ་བཞིན་གྱི་ཚོགས་ལས་སྐྱེ་བས་ཐ་དད་པའི་ཕྱིར་ཐ་དད་པའོ། །གལ་ཏེ་དེ་གཞན་ལས་ཡིན་པ་བཞིན་དུ་རང་གི་ངོ་བོ་ལ་ཐ་དད་པ་མེད་དོ་ཞེས་
ཇི་ལྟར་ཤེས་པར་བྱ་ཞེ་ན། འཇིམ་པ་དང་དབྱིབས་དག་ཅེས་བྱ་བ་ལ་སོགས་པ་སྨོས་ཏེ། གང་གི་ཚེ་རྫ་མཁན་དང་འཇིམ་པ་དེའི་གནས་སྐབས་སུ་འབྱུང་བའི་ནུས་པའི་བྱེ་བྲག་གི་ཡུལ་འཛིན་པ་དང་དབྱིབས་དག་གི་བྱེ་བྲག་གི་བདག་ཉིད་དེ་ནི་གཞན་ལས་ཡིན་པ་བཞིན་དུ་རང་གི་ངོ་བོ་དག་ཀྱང་ཐ་དད་པ་དེའི་ཚེ་འཇིམ་པ་དང་དབྱིབས་ཕན་ཚུན་བདག་ཉིད་མ་ཡིན་པ་ཕན་ཚུན་སྤངས་པའི་བདག་ཉིད་ཀྱི་རྒྱུས་དབྱིབས་ཀྱི་ཁྱད་པར་དང་འཇིམ་པའི་ངོ་བོ་དང་དབྱིབས་ཀྱི་བྱེ་བྲག་ནི་དེ་གཞན་གྱི་ངོ་བོ་བཞིན་དུ་སྣང་བ་མེད་དོ། །གང་དང་གང་གི་རང་བཞིན་མ་ཡིན་པ་དེ་དང་དེའི་བདག་ཉིད་ནི་རང་གི་འཛིན་པའི་ཤེས་པ་ལས་སྣང་བ་མེད་དེ་གཟུགས་དང་རོའི་ཤེས་པ་བཞིན་ནོ། །དེ་མ་ཚང་བའི་ནུས་པ་ལས་སྐྱེ་བ་ན་དེའི་ངོ་བོའི་རྗེས་སུ་བྱེད་པར་མི་རིགས་ཏེ་འཁྲུལ་པ་ཉིད་དུ་ཐལ་བར་འགྱུར་བས་དེའི་དབང་གིས་དོན་རྣམ་པར་གཞག་པ་མེད་པར་ཐལ་བར་འགྱུར་རོ། །དེའི་ཕྱིར་འཇིམ་པ་དང་དབྱིབས་དག་གཅིག་གི་བདག་ཉིད་ཡིན་པའི་ཕྱིར་རྒྱུ་དུ་མ་ལས་འབྲས་བུ་དུ་མའི་བདག་ཉིད་ཡིན་པའི་མ་ངེས་པ་ཡིན་ནོ། །མིག་ལ་སོགས་པ་ཐ་དད་པའི་ངོ་བོ་དག་ལྷན་ཅིག་བྱེད་པ་ལས་འབྲས་བུ་གཅིག་བྱེད་པ་འགལ་བ་ཡིན་ནོ། །དེ་དག་ཐུན་མོང་པའི་ཚོགས་པ་ཟེར་གཅིག་པས་འབྲས་བུ་གཅིག་བྱེད་པ་འམ། ཐ་མི་དད་པའི་ངོ་བོས་ཐུན་མོང་མ་ཡིན་པའི་རྒྱུ་དང་འབྲས་བུར་འདོད་པ་ཡིན་ཏེ། འདི་དག་ཀྱང་ཚོགས་པ་གཅིག་པ་ལ་ལྟོས་ནས་རྒྱུ་དང་འབྲས་བུ་གཅིག་པ་ཉིད་བརྗོད་ཀྱི་དོན་དམ་པར་དེའི་ཚོགས་པའི་ནང་དུ་འདུས་པའི་རིགས་མཐུན་པའི་སྐད་ཅིག་མ་གཞན་སྐྱེད་པས་ཚོགས་པ་གཞན་པའི་བདག་ཉིད་ཀྱིས་འབྲས་བུ་གཞན་སྐྱེད་པ་ཡིན་དུ་ཟིན་ཀྱང་ཇི་ལྟར་རྐྱེན་གཅིག་སྐྱེད་པར་བྱེད་པ་ཅུང་ཟད་ཀྱང་མེད་པ་དེ་བཞིན་དུ་རྐྱེན་དུ་མ་ཡང་སྐྱེད་པ་ཡིན་ནོ། །རྒྱུ་དུ་མ་ལས་འབྲས་བུ་དུ་མ་ཉིད་ཁས་བླངས་པ་ལ་རེས་འགའ་ཞིག་ཀྱང་གནོད་པ་མེད་དོ། །དེ་ན་འབྲས་བུ་གཅིག་པ་ལ་ལྟོས་ནས་དུ་མར་ཐལ་བར་འགྱུར་བ་ནི་ལྡོག་པ་ལ་ཐེ་ཚོམ་ཟ་བ་ཡིན་ཏེ། སྒྲུབ་བར་བྱེད་པ་ཐུན་མོང་དུ་གྲུབ་པས་བསྒྲུབ་པར་བྱ་བ་ཡིན་ནོ། །འོ་ན་ནི་འཇིམ་པ་དང་དབྱིབས་ཀྱི་བྱེ་བྲག་དག་ངོ་བོ་གཅིག་ཀྱང་ངོ་ཚ་མེད་བར་གྲངས་ཅན་ལ་སོགས་པ་རྣམས་ཐ་དད་པ་དང་ཐ་མི་དད་པ་འདོད་པ་ཇི་ལྟར་རྐྱེན་དུ་
མ་ལས་སྐྱེ་བ་གཅིག་ཉིད་འདི་དཔེར་འགྱུར། ཐམས་ཅད་དུ་རྫས་དང་རྣམ་གྲངས་དང་མིང་དང་མཚན་ཉིད་དང་འབྲས་བུ་དང་ཐ་དད་པས་ཐ་དད་པ་ཡིན་གྱི། ཡུལ་དང་དུས་དང་ངོ་བོ་ཐ་མི་དད་པར་འདོད་དེ་དཔེར་ན་བུམ་པ་དང་གཟུགས་ལ་སོགས་པ་དེ་བཞིན་དུ་བུམ་པ་ནི་གཅིག་དང་གཟུགས་ལ་སོགས་པ་ནི་མང་པོ་ཞེས་བརྗོད་བ་ནི་གྲངས་སོ། །བུམ་པ་དང་གཟུགས་པ་ལ་སོགས་པ་ཞེས་བྱ་བ་ནི་མིང་ཐ་དད་པའོ། །རྗེས་སུ་འཇུག་པའི་མཚན་ཉིད་རྫས་དང་རྟག་པའོ། །ལྡོག་པའི་མཚན་ཉིད་ཐ་དད་པ་དང་སྐད་ཅིག་མའོ། །རྒྱལ་དཔོག་པས་ཀྱང་ཅུང་ཟད་ཅིག་དུས་གཞན་དུ་གནས་པའི་མཚན་ཉིད་ཀྱང་ཐ་དད་པའོ། །བུམ་པ་ཆུ་འཛིན་པར་བྱེད་ཀྱི་གཟུགས་ནི་མ་ཡིན་ལ། གཟུགས་ཀྱི་དངོས་པོ་ལ་ཆགས་པ་ཞེས་བྱ་བ་འབྲས་བུ་ཐ་དད་དོ། །དེ་ལྟར་ཐམས་ཅད་དུ་རྫས་དང་རྣམ་གྲངས་ལ་སོགས་པ་ཐ་དད་པ་དང་ཡུལ་ལ་སོགས་པ་རྣམས་ཀྱིས་ཀྱང་ཐ་མི་དད་པའི་ཕྱིར་འཇིམ་པ་དང་དབྱིབས་དག་འཇིམ་པ་དང་རྫ་མཁན་དག་གིས་རྣམ་པ་འགའ་ཞིག་སྐྱེད་པས་རྒྱུ་གཅིག་པ་ལ་གཅིག་ཡོད་པ་ཉིད་དོ། །ཇི་ལྟར་གཅིག་པ་དེ་བཞིན་དུ་དེ་རྣམས་ཐ་མི་དད་པའི་བདག་ཉིད་སྐྱེ་བའི་ཕྱིར་རོ། །དུ་མའི་རྒྱུ་གང་ཡིན་པ་དེ་ལས་དུ་མ་ཉིད་དེ་གང་གཅིག་པ་ཉིད་གང་ཡིན་པ་དེ་ནི་ལྷན་ཅིག་བྱེད་པས་ཐ་མི་དད་པའི་ངོ་བོ་གཅིག་པ་ནི་རྒྱུ་གཅིག་པ་ཉིད་ཡིན་པའི་ཕྱིར་འཁྲུལ་པ་མེད་དོ་ཞེ་ན། དེ་ནི་མི་རིགས་ཏེ། རང་བཞིན་གྱིས་ཐ་དད་པར་ཁས་མི་ལེན་ན་གཞན་དུ་ན་ཐ་དད་པར་མི་འགྲུབ་པས་དུ་མ་ལས་གཅིག་པའི་འབྲས་བུ་སྐྱེད་པ་ལ་འགལ་བ་མེད་དོ། །རང་བཞིན་གྱིས་ཐ་དད་པར་ཁས་བླངས་པ་འཇིམ་པ་དང་དབྱིབས་དག་ཐ་དད་པ་མེད་པའི་བདག་ཉིད་དེ། དབྱིབས་དང་འཇིམ་པའི་ངོ་བོའི་བྱེ་བྲག་རྣམས་དེ་དག་སྣང་བ་མེད་པ་ནི་སྤང་བར་དཀའ་བ་ཉིད་དོ། །གལ་ཏེ་རང་བཞིན་གྱིས་ཐ་དད་པ་མེད་པ་ཆོས་དང་ཆོས་ཅན་གྱི་རྣམ་གྲངས་ལ་སོགས་པ་ཐ་དད་དུ་ཟིན་ཀྱང་ཐ་མི་དད་དོ། །གཞན་གྱི་ངོ་བོ་ཐ་དད་པར་གྲངས་ལ་སོགས་པས་ཀྱང་བདག་ཉིད་ཐ་མི་དད་པ་ལ་གནོད་པར་མི་ནུས་སོ། །རེ་ཞིག་གྲངས་ཐ་དད་པས་ནུས་པ་མེད་དེ། རྫས་གཅིག་པ་ལ་ཐ་སྙད་མང་པོ་མཐོང་བའི་ཕྱིར་རོ། །དཔེར་ན་བླ་མ་ཞེས་བྱ་བ་བཞིན་དུ་མང་པོའི་ཚིག་བརྗོད་པ་ལ་ངེས་པ་མ་མཐོང་བའི་ཕྱིར་གཟུགས་ལ་སོགས་པ་འདིར་རྒྱུ་
མཚན་མ་ཡིན་ཏེ། གཟུགས་ལ་སོགས་པ་རྒྱུ་མཚན་ཡིན་ན་ནི་བླ་མ་ཞེས་གཅིག་གི་ཚིག་རེས་འགའ་ཞིག་ཀྱང་མི་བརྗོད་པར་འགྱུར་རོ། །གལ་ཏེ་ཆོས་ཅན་གྱི་ངོ་བོ་བརྗོད་པ་སྲིད་པས་བརྗོད་པར་འདོད་དོ་ཞེ་ན། དེ་གཅིག་པ་ཉིད་བརྗོད་པར་འདོད་པ་ཐམས་ཅད་དང༌། བླ་མ་དག་མི་སྣང་བ་ཡིན་པར་ཐལ་བར་འགྱུར་རོ། །འབྲུ་ཞེས་རིགས་བརྗོད་པ་ན་ཆོས་ཅན་དང༌། གཟུགས་ལ་སོགས་པ་མ་བརྗོད་པས་གཉིས་ཀའི་ངོ་བོ་ཅུང་ཟད་ཀྱང་བཤད་པ་མེད་དེ། །དངོས་པོ་རྣམས་ལ་བླ་མའི་སྒྲས་བརྗོད་པའི་ཕྱིར། ཇི་ལྟར་ཆོས་ཅན་གྱི་ངོ་བོ་ལ་སྲིད་པས་གཅིག་ཏུ་བརྗོད་པ་འདོད་པ་ཡིན་དེའི་ཕྱིར་བླ་མ་གཅིག་པུ་ཞེས་གཞི་མཐུན་པར་བསྟན་པས་རྣམ་གྲངས་པ་ཡང་གཅིག་གི་གྲངས་ཀྱི་ཡུལ་ལ་དེ་ཡང་རྣམ་གྲངས་པའི་ངོ་བོས་ཐ་དད་པ་ཡིན་ནོ། །ཇི་ལྟར་གྲངས་ཐ་དད་པས་ཐ་དད་པར་གྲུབ་པ་ཡིན། མིང་ཡང་བརྡའི་རྒྱུ་མཚན་ཅན་ཏེ། དེ་ཡང་འདོད་པ་ལ་རག་ལས་ནས་འཇུག་པའི་ཕྱིར་གང་ལས་དོན་ཐ་དད་པ་ཡིན། གཅིག་ལ་ཡང་མི་ཐ་དད་པ་མཐོང་ན་ཇི་ལྟར་ཐ་དད་པའི་རྒྱུ་མཚན་ཡིན། དཔེར་ན་དབང་པོ་དང་བརྒྱ་བྱིན་དང་རྩེག་མ་འཛིན་ཅེས་བྱ་བ་བཞིན་ནོ། །འདིར་ཡང་དབང་བྱེད་པ་དང་བརྒྱ་སྟེར་བ་དང༌། རྩེག་མ་འཛིན་པའི་ནུས་པ་ཐ་དད་པར་རྟོགས་སོ་ཞེ་ན། མ་ཡིན་ཏེ། ཐམས་ཅད་བྱ་བ་དང་བྱེད་པ་པོ་མ་ཡིན་པའི་ཕྱིར། དབང་སྟེར་བ་དང༌། བརྒྱ་སྟེར་བར་ནུས་སོ་འཛིན་ཏོ་ཞེས་བྱ་བ་མ་ཡིན་ནོ། །དེ་ལྟ་ན་ཅི་ཞིག་ཡིན། ཆོས་ཅན་གྱི་ངོ་བོ་ཡང་གཅིག་ཏུ་ཁས་བླངས་པའི་ཕྱིར་དང༌། ནུས་སོ་ཞེས་བྱ་བ་ལ་སོགས་པའི་ཚིག་དེ་བརྗོད་པ་ན་གཞི་མཐུན་པ་མཐོང་བའི་ཕྱིར་རོ། །འཁྲུལ་པའི་ཤེས་པའི་ཡུལ་མ་ཡིན་པའི་ཕྱིར་ཉེ་བར་བཏགས་པ་མི་རིགས་སོ། །གང་དག་གི་རྣམ་གྲངས་ཀྱི་དོན་འགའ་ཡང་རྗེས་སུ་རྟོགས་པ་མེད་ན་འདི་དེ་ལ་ཅི་ཞིག་བརྗོད་པར་བྱ། མཚན་ཉིད་ཐ་དད་པའི་གཏན་ཚིགས་ཀྱང་མ་གྲུབ་པའི་ཕྱིར་དང༌། གཅིག་གི་དངོས་པོ་ལ་ལར་རྗེས་སུ་འགྲོ་བར་གྲུབ་པ་མེད་པའི་ཕྱིར་རོ། །དེ་ལྟ་ན་གཏན་དུ་གནས་པའི་རྟག་པས་རྫས་རྟག་པ་མ་ཡིན་པར་ངོ་ཚ་མེད་པར་འདོད་དེ། ཡོངས་སུ་གྱུར་པའི་རྟག་པ་ཁས་བླངས་པའི་ཕྱིར་སྔ་མ་དང་ཕྱི་མའི་སྐད་ཅིག་མའི་རྒྱུན་ཏུ་གནས་པ་འདི་རྣམ་གྲངས་པ་ལྟ་བུ་ནི་མ་ཡིན་ཏེ། རྒྱུན་ཆད་
པའི་ངོ་བོས་རྣམ་གྲངས་པ་ཉིད་དེ། རྣམ་གྲངས་པའི་ངོ་བོ་འགལ་བའི་ཕྱིར་རྫས་རྟག་པ་ཡིན་ནོ་ཞེས་ཁས་བླང་བར་མི་བྱའོ། །འདི་ཡོངས་སུ་གྱུར་པའི་རྟག་པ་ནི་གཏན་དུ་གནས་པའི་རྟག་པ་བཞིན་དུ་སྲིད་བར་མི་འགྱུར་རོ། །རྣམ་གྲངས་ལས་ཐ་དད་པའི་རྫས་མ་གྲུབ་ལ་དེ་དམིགས་པའི་རིག་བྱར་གྱུར་པ་ལས་དེ་ལྟ་བུའི་གཅིག་པ་མི་རྟོགས་སོ། །རྣམ་གྲངས་པ་རྣམས་ནི་བྱ་བ་དང་བྱེད་པ་ངོ་བོ་མཚུངས་པ་རྣམས་ལ་རྫས་སུ་མངོན་པར་ཞེན་ནས་བློ་དམན་པ་རྣམས་ཀྱིས་གཞན་ཡང་མཚན་ཉིད་མི་མཐུན་པ་མི་རྟོགས་སོ། །འབྲས་བུ་ཐ་དད་པ་ནི་ཁོ་བོ་ཅག་ལ་མ་གྲུབ་པ་ཉིད་དེ། གཟུགས་ལ་སོགས་པ་འགའ་ཞིག་གི་བྱ་བ་དང་བྱེད་པ་ཡིན་པའི་ཕྱིར། དེ་བཞིན་དུ་ཁས་བླང་བར་བྱ་བར་བརྗོད་དོ། །འབྲས་བུ་ནི་དུས་མཉམ་པ་དང་མི་མཉམ་པ་རྣམ་པ་གཉིས་ཏེ་དེ་ལ་སྔར་ཡོད་པ་ལས་འདི་འབྱུང་བ་ནི་ཐ་དད་པའི་རྒྱུ་མཚན་ཡིན་ན་དེ་ནི་མི་སྲིད་དེ། ཆོས་དང་ཆོས་ཅན་དུས་མཚུངས་པའི་ཕྱིར་རོ། །དྲུས་མཉམ་པ་འབྲས་བུ་ཐ་དད་པ་ནི་མ་ངེས་པ་ཡིན་ཏེ་རྣམ་པར་ཕྱེ་བའི་ཡོངས་སུ་གྱུར་པ་ནི་སྣམ་བུ་ལ་སོགས་པ་ལ་སྲིད་པའི་ཕྱིར་རོ། །འབྲས་བུ་གཅིག་པ་ཉིད་དུ་བརྗོད་ཀྱི་དོན་དམ་པར་དེའི་ཚོགས་པའི་ནང་དུ་འདུས་པའོ། །སྣམ་བུ་ལ་སོགས་པ་ནི་རྣམ་པར་ཕྱེ་བའི་ཡོངས་སུ་གྱུར་པ་ཡིན་ནོ། །འབྲས་བུ་དུ་མ་བྱེད་པ་མཐོང་ཡང་ཆོས་ཅན་གྱི་ངོ་བོ་ལས་ཐ་དད་པ་མེད་པའི་ཕྱིར་དང༌། གཅིག་ཏུ་མི་བྱེད་པ་ལ་འགལ་བ་མེད་པའི་ཕྱིར། འདིར་རྒྱུ་ཉིད་འབྲས་བུའི་བདག་ཉིད་དུ་ཁས་མ་བླངས་པའི་ཕྱིར་རོ། །གང་གི་ཕྱིར་རྒྱུ་གཅིག་གི་བདག་ཉིད་ལས་འབྲས་བུ་གཅིག་གི་བདག་ཉིད་དུ་ཁས་ལེན་པ་ན། དེ་ལས་གཞན་པའི་ངོ་བོ་མེད་པས་དེ་གཞན་གྱི་བདག་ཏུ་ཁས་བླང་བར་མི་བྱ་སྟེ། འོན་ཀྱང་སྔར་འགའ་ཞིག་ཡོད་པ་ཉིད་ལ་སྔར་མེད་པའི་ཕྱིར་རོ། །དེ་ལ་ཡུལ་དང་དབང་པོ་དང་ཡིད་ལ་བྱེད་པ་གཅིག་ལ་གཅིག་ཉེ་བར་ལེན་བས་བྱས་པའི་ངོ་བོ་ཐ་དད་བ་རྣམས་དང་ཉེ་བའི་བྱེ་བྲག་ཅན་རང་དང་གཞན་པའི་སྐད་ཅིག་མ་རེ་རེར་ཡོད་པ་ན་ཡོད་པ་དེ་རྒྱུ་མཚན་ཡིན་ལ། དེ་ཡང་དུ་མར་བྱེད་པར་རྗེས་སུ་བྱེད་པའི་ཕྱིར་རོ། །དུ་མ་བྱེད་པར་ཁས་བླངས་པ་ལ་འགལ་བ་མེད་དོ། །གང་གི་ཕྱིར་གཅིག་བྱེད་པ་ཡང་དེ་ཡོད་པ་ཡོད་པ་དེ་རྒྱུ་མཚན་ཡིན་ལ། དེ་ཡང་དུ་མ་བྱེད་བར་མཚུངས་སོ། །འོ་ན་ནི་དེ་དང་ཉེ་བའི་རྣམ་པར་ཤེས་པའི་
མཚན་ཉིད་ཀྱི་འབྲས་བུ་སྲིད་པ་དེ་སྐྱེད་པའི་རང་བཞིན་ཁོ་ནར་དེ་དག་ངེས་པ་ཡིན་ནོ། །འབྲས་བུའི་རང་བཞིན་ལ་ལྟོས་ནས་རྒྱུ་སྐྱེད་བར་བྱེད་པར་རྣམ་པར་འཇོག་པ་དེའི་ཕྱིར་རྣམ་པར་ཤེས་པའི་རང་བཞིན་རེ་རེ་དག་གིས་ཇི་ལྟར་གཞན་འབྲས་བུ་སྐྱེད་པ་ཡིན། ཡང་ན་དེ་ཡོད་ན་དེ་དག་སྐྱེད་པའི་རང་བཞིན་དུ་འགྱུར་ན། དེས་ཀྱང་རྣམ་པར་ཤེས་པ་ཁོ་ན་བྱེད་པར་མི་འགྱུར་ཏེ། དེ་གཞན་སྐྱེད་པའི་རང་བཞིན་ཡིན་པའི་ཕྱིར་རོ་ཞེ་ན། འདི་ལ་ཉེས་པ་མེད་དེ། དེ་དག་དུ་མའི་འབྲས་བུ་བྱེད་པ་ནི་རང་བཞིན་ཡིན་པའི་ཕྱིར་རོ། །དེ་ལྟར་ན་དེའི་གནས་སྐབས་སུ་རེ་རེའི་བྱེ་བྲག་གིས་རིགས་མཐུན་པ་དང་ཅིག་ཤོས་ཀྱི་སྐད་ཅིག་མ་སྐྱེད་པའི་བདག་ཉིད་དུ་དེ་དག་དེ་ཡོད་པ་ལས་མཐོང་བའི་ཕྱིར་རོ། །དེ་ལ་རྣམ་པར་ཤེས་པ་སྐྱེད་པའི་རང་བཞིན་ཁོ་ན་ཡིན་པའི་ཕྱིར་དེ་སྐྱེད་པའི་རང་བཞིན་རྒྱུན་མི་འཆད་དོ། །དེ་ཉིད་དང་མི་མཐུན་པའི་ཕྱིར་རང་བཞིན་གཞན་སྐྱེད་པ་མ་ཡིན་ནོ། །དེས་ན་དེ་དག་དུ་མའི་བདག་ཉིད་དུ་མི་འགྱུར་ཏེ། གཅིག་གི་བདག་ཉིད་དུ་ཕུལ་དུ་བྱུང་བའི་འབྲས་བུའི་རྒྱུ་ཡིན་པའི་ཕྱིར་རོ། །དེ་གཞན་ལ་ལྟོས་ནས་མི་མཐུན་པ་ལས་ལྡོག་པ་ལ་ཉེ་བར་བརྟེན་པ་ལ་སྒྲ་དུ་མས་བརྗོད་པ་ན་དངོས་པོ་དུ་མའི་ངོ་བོར་བསྟན་པ་ནི་མེད་དེ། བྱེ་བྲག་དུ་མ་གཅིག་པའི་བདག་ཉིད་ལ་དེ་བཞིན་བརྗོད་པའི་ཕྱིར། དཔེར་ན་གཟུགས་དང་བསྟན་དུ་ཡོད་པ་དང་ཐོགས་པ་དང་བཅས་པ་ཞེས་བྱ་བ་བཞིན་དུ་རང་བཞིན་ཐ་དད་པའི་རྒྱུ་མཚན་ནི་སྒྲ་མ་ཡིན་ཏེ་གཞི་མཐུན་པ་མེད་པར་ཐལ་བར་འགྱུར་བའི་ཕྱིར་རོ། །གལ་ཏེ་དེའི་རྒྱུ་མཚན་གཅིག་པ་ཡོད་པ་མ་ཡིན་ནོ་ཞེ་ན། མ་ཡིན་ཏེ། དེ་དག་གཅིག་པ་ཉིད་ཀྱི་ཕན་འདོགས་པ་ལ་མི་ལྟོས་པ་ནི་མི་རིགས་པའི་ཕྱིར་རམ་ལྟོས་པ་ལ་ཇི་ལྟར་གཅིག་པ་ལས་དུ་མའི་འབྲས་བུར་མི་འགྱུར། གལ་ཏེ་དུ་མ་ཉིད་ཀྱི་བདག་ཉིད་ཉེ་བར་མི་རིགས་པའི་ཕྱིར་རོ་ཞེ་ན། མ་ཡིན་ཏེ་གཞི་མཐུན་པ་མེད་པའི་སྐྱོན་དེའི་གནས་སྐབས་སུ་ཐལ་བར་འགྱུར་བ་མེད་དོ། །སྔོན་པོ་ལ་སོགས་པ་ལ་བདག་ཉིད་ཐ་དད་པ་མངོན་སུམ་གྱིས་མཐོང་བ་མེད་ལ། འབྲས་བུ་ཐ་དད་པས་དེ་དག་ཐ་དད་པར་རྗེས་སུ་དཔག་ན་ནི་འབྲེལ་པ་མེད་པའི་ཕྱིར་དང༌། དེ་འཛིན་པའི་ཚད་མ་མེད་པའི་ཕྱིར་རོ། །སྔོན་གྱི་འབྲས་བུ་མ་ཡིན་དུ་ཟིན་ཀྱང་དངོས་པོ་རྣམས་བདག་ཉིད་གཅིག་པ་ཁོ་ན་རྟོགས་ཏེ་
མར་མེ་ལ་སོགས་པ་བཞིན་ནོ། །རྗེས་སུ་དཔག་པ་ནི་མ་ཡིན་ཏེ། དེ་བཟློག་པ་ལ་ཡང་གནོད་པར་བྱེད་པའི་ཚད་མ་མེད་པའི་ཕྱིར་དང༌། གཅིག་གིས་དུ་མ་བྱེད་པར་ཁས་བླངས་པ་གང་ཡིན་པ་གཟུགས་དང་རོ་དང་དྲི་དང་རེག་བྱའི་བྱེ་བྲག་རྣམས་འདི་ལ་ལར་ལྷན་ཅིག་འབྱུང་བར་ངེས་པའི་ཚད་མས་དེ་ཡོངས་སུ་མཐོང་བར་མི་འགྱུར་ཏེ་ཐ་དད་པའི་རྒྱུ་མཚན་ཅན་ལྷན་ཅིག་འབྱུང་བར་ངེས་པ་མི་རིགས་པའི་ཕྱིར་རོ། །དེའི་རྒྱུ་མཚན་རྣམས་ཀྱང་རྒྱུ་གཅིག་པ་དེ་ལ་རག་ལས་ནས་སྐྱེ་བར་ངེས་པ་ནི་ལྷན་ཅིག་འབྱུང་བ་མེད་པའི་ཕྱིར་རོ། །གལ་ཏེ་ཆོས་ཅན་གཅིག་གི་རང་བཞིན་གྱིས་གཅིག་ལ་ལྷན་ཅིག་འབྱུང་བར་ངེས་སོ་ཞེ་ན། མ་ཡིན་ཏེ་གཅིག་པ་ནི་དུ་མའི་རང་བཞིན་ཁོ་ནར་བསམས་པའི་ཕྱིར་དང༌། དུ་མ་ནི་གཅིག་གི་ངོ་བོ་ཉམས་སུ་མྱོང་བའི་ཕྱིར་དེ་དང་ལྡན་པའི་དུ་མ་ནི་སྤང་བར་དཀའ་བའི་ཕྱིར་རོ། །དེ་ལྟ་མ་ཡིན་ན་ཆོས་དང་ཆོས་ཅན་གྱི་ཐ་དད་པ་ཇི་ལྟར་ངེས་པར་འགྱུར། དེ་ལྟར་ན་བདག་ཉིད་ཀྱི་མདུན་ན་གནས་པ་ལ་འདི་ཆོས་ཅན་དང་རྣམ་གྲངས་སོ་ཞེས་རྣམ་པར་གཞག་པར་འགྱུར་ཏེ། གང་གི་ཚེ་ཐ་དད་པ་དེའི་ཚེ་ཐ་དད་པ་ཉིད་ཡིན་ན་ནི་དུ་མས་ཀྱང་འབྲས་བུ་གཅིག་ཏུ་མི་འགྱུར་ན། ཕན་ཚུན་ཕན་འདོགས་པར་བྱེད་པ་ལ་མི་ལྟོས་ན་ཡུལ་དང་དབང་པོ་དང་ཡིད་ལ་བྱེད་པས་ལྷན་ཅིག་བ་ཁོ་ནས་འབྲས་བུ་གཅིག་རྩོམ་པ་མི་རིགས་ཏེ། གཅིག་པ་ཉིད་ནི་ཅུང་ཟད་ཅིག་ལ་ལར་སྐྱེད་པ་མེད་དོ། །དེའི་ཕྱིར་རྒྱུ་དང་འབྲས་བུ་ཐམས་ཅད་ཀྱི་དངོས་པོ་རྒྱུན་ཆད་པར་འགྱུར་རོ། །གཅིག་པས་དུ་མ་དང་དུ་མས་གཅིག་བྱེད་པ་སྤངས་པ་ན་རྣམ་པ་གཞན་ནི་མི་སྲིད་པའི་ཕྱིར་དང༌། སྣ་ཚོགས་རྒྱུ་མེད་པ་ཉིད་ཀྱང་མ་ཡིན་ཏེ་ཡུལ་དང་དུས་དང་རང་བཞིན་སོ་སོར་ངེས་པའི་ཕྱིར་རོ། །དེའི་ཕྱིར་ཚོགས་པ་གཅིག་ལ་རག་ལས་པའི་སྐྱེ་བ་ཉིད་ལྷན་ཅིག་འབྱུང་བར་ངེས་པའི་དངོས་པོ་རྣམས་འབྲས་བུ་གཅིག་བྱེད་པར་ངེས་པ་ཁོ་ན་ཡིན་ནོ། །དེ་བས་ན་རང་གི་རྒྱུན་གྱི་སྐད་ཅིག་མ་དང་ཅིག་ཤོས་ཀྱི་ཉེ་བར་ལེན་པ་ཅིག་ཅར་བྱེད་པ་ཡིན་ནོ། །ཇི་ལྟར་གཅིག་ལས་དུ་མའི་འབྲས་བུར་མི་འགྱུར། དེའི་ཕྱིར་ཇི་ལྟར་འབྲས་བུ་ཐ་དད་པས་ཐ་དད་པས་ཐ་དད་པར་བརྟག་པ་ཡིན། རྫས་དང་རྣམ་གྲངས་དག་ངོ་བོ་གཅིག་པར་བརྗོད་ན་གཅིག་པས་དུ་མའི་འབྲས་བུ་ནུས་པའི་ཕྱིར་ཇི་ལྟར་མི་སྐྱེད་པ་ཡིན། རང་བཞིན་ནི་དངོས་པོ་ཡིན་པའི་ཕྱིར་རོ། །
དེ་ལྟ་མ་ཡིན་ན་དེ་ནི་རང་བཞིན་མེད་པར་ཐལ་བར་འགྱུར་རོ། །རང་བཞིན་གཅིག་པའི་རྫས་དང་རྣམ་གྲངས་དེ་འབྲས་བུ་ཐ་དད་པ་དངོས་པོ་ནི་གཅིག་དང་འབྲེལ་པ་ཡིན་ནོ་སྙམ་ནས། འབྲས་བུ་ཐ་དད་པས་ཐ་དད་པར་བརྗོད་པ་ན། འདི་ནི་ངོ་ཚ་མེད་པར་བསལ་བས་སྤང་བར་འོས་པ་ཡིན། བྱེ་བྲག་པ་རྣམས་ཀྱང་རྫས་གཅིག་པའི་རྫས་དང༌། ཡོན་ཏན་དང་ལས་དང་འདུ་བའི་རྒྱུར་བརྗོད་པ་ན། ལས་ནི་གཅིག་ལ་འབྲེལ་པའི་བྱེ་བྲག་གི་འདུ་བྱེད་པའི་རྒྱུ་མཚན་ཅན་གཅིག་པ་དུ་མ་བྱེད་པ་སྤོང་བ་ན་རང་གིས་བྱས་པ་ལ་ཞེ་སྡང་བས་སྤོང་བ་ཡིན་ནོ། །འདིར་ནུས་པ་ཐ་དད་པ་ནི་རྒྱུ་མཚན་མ་ཡིན་ཏེ། གང་གི་ཕྱིར་དེ་གཅིག་པ་ལ་མི་ལྟོས་ན་ཇི་ལྟར་དེ་ནུས་པ་ངེས་པའི་དོན་ལ་བརྟེན་ནས་སླར་ཆ་ཤས་མེད་པ་གསལ་བར་བྱེད་པ་ཡིན། གང་ལས་གཅིག་པའི་བདག་ཉིད་ཕུལ་དུ་བྱུང་བས་དུ་མའི་ནུས་པ་ལ་ཕན་འདོགས་པ་དེ་ཁོ་ན་ལས་འབྲས་བུ་དུ་མ་བྱེད་པ་ཡིན་ནོ་ཞེས་བྱ་བརྒྱས་པར་བརྗོད་པས་ཆོག་གོ །ཡུལ་དང་དུས་དང་རང་བཞིན་ཐ་མི་དད་པར་ཁས་བླངས་པ་དེ་ཡང་མི་འཐད་པ་ཉིད་དེ། དེ་ལྟ་ན་ཡུལ་དང་དུས་དག་ཐ་མི་དད་ཀྱང་གཟུགས་དང་ངོ་དང་དྲི་དང་རེག་བྱ་རྣམས་རྣམ་གྲངས་པའི་ངོ་བོས་ཐ་དད་པ་དེའི་ཕྱིར་ཇི་ལྟར་རང་བཞིན་ཡང་ཐ་མི་དད་པར་གྲུབ། གང་གི་ཚེ་རྫས་དང་རྣམ་གྲངས་དག་ཀྱང་གཅིག་ལ་རྗེས་སུ་འཇུག་པ་དང་ལྡོག་པའི་ངོ་བོ་ཡིན་པ་དེའི་ཚེ་བུམ་པ་དང་སྣམ་བུ་བཞིན་དུ་དངོས་པོ་གཉིས་སུ་འགྱུར་གྱི་གཅིག་གི་ངོ་བོ་ནི་མ་ཡིན་པའི་ཕྱིར་རོ། །དེའི་ཕྱིར་ཇི་ལྟར་ཐ་མི་དད་པར་གྲུབ་པ་ཡིན། རྗེས་སུ་འཇུག་པ་དང་ལྡོག་པའི་ངོ་བོར་མི་རིགས་ཏེ། དེ་དག་རྗེས་སུ་འཇུག་པ་ཅན་དང༌། ལྡོག་པ་ཅན་ལ་རག་ལས་པའི་ཕྱིར་དང༌། དེའི་ཕྱིར་རྗེས་སུ་འཇུག་པ་དང་ལྡོག་པ་དང་ལྡན་པ་དག་གི་རང་བཞིན་ལས་གཞན་དུ་ན་བརྗོད་པར་བྱའི། དེ་དག་རྗེས་སུ་འཇུག་པ་དང་ལྡོག་པ་ཉིད་རང་བཞིན་ཡོད་པ་ཉིད་ཀྱིས་ཡོད་པ་ལ་རག་མི་ལས་པའི་ཕྱིར་རོ། །དྲན་པ་དྲན་པར་བྱེད་པ་རང་བཞིན་དུ་མི་འགྱུར་ཏེ་ཁྱབ་པ་དང་ལྡོག་པའི་རང་བཞིན་གྱི་མཚན་ཉིད་ཡིན་པའི་ཕྱིར་རང་བཞིན་ཐ་དད་པར་བརྗོད་པར་བྱའོ། །གལ་ཏེ་ས་ལ་སོགས་པའི་ངོ་བོར་རང་བཞིན་ཡིན་ནོ་ཞེ་ན། འདིར་ཡང་ཐ་མི་དད་དོ་ཞེས་བྱ་བ། གང་གི་ཚེ་འདྲ་བར་བརྗོད་ན་དེ་ནི་ཐ་དད་པ་ཁོ་ན་
ཡིན་ཏེ། འདྲ་བའི་དབང་དུ་བྱེད་པས་འདྲ་བའི་ཕྱིར་རོ། །དེའི་ཕྱིར་དོན་གཉིས་སུ་འགྱུར་ན་གཅིག་ལ་ངོ་བོ་གཉིས་ནི་མེད་དོ། །འོན་ཏེ་གཅིག་ནི་གཉིས་ཀྱི་ངོ་བོ་སྤངས་པ་དེ་ཐ་མི་དད་པར་ཁས་ལེན་ན་དེ་ལྟ་ན་ཇི་ལྟར་གཟུགས་དང་སྒྲ་ངོ་བོ་གཉིས་འདིར་རང་བཞིན་དུ་བརྗོད་པ་ཡིན། དེའི་གཅིག་པ་ཇི་ལྟར་གཉིས་ཀྱི་ངོ་བོ་ཡིན། གཅིག་གི་རང་བཞིན་དེ་བཀག་པས་གཉིས་ཀྱི་ངོ་བོ་ཡིན་ནོ་སྙམ་ན། འོན་ཏེ་རང་བཞིན་གཅིག་པ་ཡང་ཁས་མ་བླངས་པས་དེ་ལྟ་ན་ཇི་ལྟར་དེ་གཅིག་ཏུ་བརྗོད་པ་ཡིན། རེ་ཞིག་དུ་མ་རྣམས་རྒྱུ་གཅིག་ལས་སྐྱེ་བའི་ཕྱིར་ཐམས་ཅད་དུ་ཉེ་བར་ལེན་པའི་རྒྱུ་མཚན་གྱི་བྱེད་པ་ཐ་དད་པས་རྒྱུ་ཐ་དད་པར་མི་འགྲུབ་སྟེ། འབྲས་བུ་གཅིག་བྱེད་པ་མ་ཡིན་པའི་ཡང་ཕྱིར་རོ། །གཅིག་ཀྱང་ཡོངས་སུ་འགྱུར་བའི་རྣམ་པར་དབྱེ་བ་དང་རྣམ་པར་མ་ཕྱེ་བའི་ཡོངས་སུ་འགྱུར་བས་འབྲས་བུ་ཐ་དད་པར་ཁས་བླངས་པའི་ཕྱིར་རོ། །རྗོད་པར་བྱེད་པ་གཅིག་པས་བརྗོད་པར་བྱ་བ་གཅིག་པའི་ཕྱིར་ཡང་གཅིག་པ་ལ་རྣམ་གྲངས་དུ་མ་མི་སྲིད་པའི་ཕྱིར་དང༌། བྱས་པ་དང་མ་བྱས་པ་སྣ་ཚོགས་པའི་རུང་བ་རྣམས་རྗོད་པར་བྱེད་པ་དང་བརྗོད་པར་བྱ་བ་གཅིག་པ་ཉིད་ལ་ལར་མི་སྲིད་པའི་ཕྱིར་རོ། །ནུས་པ་ཐ་དད་པ་ཡུལ་ཐ་དད་པར་བརྗོད་པ་ན་ལན་བཤད་ཟིན་ནོ། །རྣམ་པར་ཤེས་པ་གཅིག་གི་ཡུལ་མ་ཡིན་པའི་དང་རེ་རེ་ལ་ཡང་རྣམ་པར་ཤེས་པ་དུ་མ་སྐྱེ་སྟེ། དེ་ལྟ་ན་ཟླ་བ་ལ་སོགས་པ་ལ་མང་པོས་མཐོང་བ་ན་དེ་ཇི་ལྟར་གཅིག་པ་ཉིད་དུ་ཁས་བླང་བར་བྱ་བ་ཡིན། མང་པོ་རྣམས་ཀྱང་རྣམ་པར་ཤེས་པ་གཅིག་གི་ཡུལ་ཡིན་པར་སྲིད་པས་སྔོན་པོ་ལ་སོགས་པ་རྣམས་གཅིག་ཏུ་ཐལ་བར་འགྱུར་རོ། འདི་ལྟར་གཅིག་གཉིས་ཀྱི་ངོ་བོ་ཡིན་ནོ་ཞེས་བྱ་བ་འདི་དག་ནི་ཐམས་ཅད་དུ་རྣམ་པ་འགའ་ཞིག་ཀྱང་འབྲེལ་པ་མེད་དོ། །རྣམ་པར་ཤེས་པ་ཡང་སྔོན་པོའི་གཟུགས་བརྙན་ལས་སྐྱེས་པ་ན་སེར་པོར་སྣང་བ་རྣམ་པར་བཅད་ནས་བྱེ་བྲག་ཅན་དུ་སྣང་བ་ཡིན་གྱི་འདི་ཡང་ཁྱོད་ཀྱི་གཉིས་ཀྱི་ངོ་བོར་ནི་མེད་དོ། །འོན་ཏེ་རྫས་དང་རྣམ་གྲངས་དག་ཀྱང་ལྷན་ཅིག་འདྲེས་པའི་ཕྱིར་མིའི་སེང་གེ་བཞིན་དུ་གཅིག་པ་འདྲེན་མའི་ངོ་བོ་ཡིན་པའི་ཕྱིར་གཉིས་ཀྱི་ངོ་བོར་བརྗོད་དོ་ཞེ་ན། དེ་མི་རིགས་ཏེ། མིའི་སེང་གེ་འདྲེན་མའི་ངོ་བོར་མ་གྲུབ་སྟེ། རྡུལ་ཕྲ་རབ་དུ་མ་དང་འབྲེལ་པའི་ངོ་བོར་ལྷན་ཅིག་པ་དེ་ཡང་རྡུལ་
ཕྲ་རབ་རེ་རེ་མིའི་སེང་གེའི་ངོ་བོར་མི་འགྱུར་ཏེ། དེའི་སྟེང་གི་ཆ་ནི་སེང་གེའི་གཟུགས་ཡིན་ལ་འོག་གི་ཆ་ནི་མིའི་གཟུགས་ཡིན་ན་རིགས་གཞན་དེ་ཉིད་མིའི་སེང་གེ་ཡིན་པས་འདྲེན་མའི་ངོ་བོ་མེད་དོ། །སྣ་ཚོགས་བའི་ངོ་བོ་ནི་འདྲེན་མར་བརྗོད་དོ། །སྣ་ཚོགས་པ་ནི་དུ་མའི་ངོ་བོ་ཡིན་ཏེ་དུ་མའི་ངོ་བོ་ཡིན་ན་གཅིག་གི་ངོ་བོ་ག་ལ་ཡིན། དུ་མ་ཉིད་དེ་དག་ཀྱང་ནགས་དང་དཔུང་ཞེས་བྱ་བ་བཞིན་དུ་མང་པོ་རྣམས་ལས་འབྲས་བུ་གཅིག་པ་མཐོང་བའི་ཕྱིར་གཅིག་གི་ཐ་སྙད་དུ་བྱེད་དོ། །བླུན་པོ་བློ་ཞན་པ་ཕྱིན་ཅི་ལོག་པ་གང་ཡིན་པ་དེ་དག་དེ་ལྟར་རེ་ཞིག་རྒྱུས་སོ་སོ་བ་ཉིད་དུ་ཡུལ་དང་དུས་དང་རང་བཞིན་རྣམས་གཅིག་སྒྲུབ་པར་བྱེད་པ་ཚོགས་པ་རྣམས་ཀྱང་རྣམ་གྲངས་པ་ལ་འཁྲུལ་པ་ཡིན་ནོ། །དེ་ལྟ་ན་རྣམ་གྲངས་ནི་ཡུལ་དང་དུས་དང་རང་བཞིན་དག་རྣམ་གྲངས་པའི་ངོ་བོས་ཐ་དད་པར་སྔར་བཤད་པ་དང༌། ཆོས་དང་ཆོས་ཅན་བཀག་པས་གཉིས་དང་ལྡན་པ་མི་སྲིད་པའི་ཕྱིར་རོ། །རྫས་དང་རྣམ་གྲངས་ངོ་བོའི་ཕྱིར། །དངོས་པོ་གཉིས་ཀྱི་ངོ་བོར་གྲགས། །དེ་དག་བདག་ཉིད་གཅིག་པ་དང༌། །ཐ་དད་མིང་སོགས་ཀྱིས་འབྱེད་པས། །དབང་པོ་ཡི་ནི་ཤེས་པ་ལ། །དངོས་པོའི་ངོ་བོ་མི་སྣང་བ། །སྒྲ་ཡི་སྤྱོད་ཡུལ་མིན་ན་ཅིས། །དེ་མིང་ཐ་དད་ཐ་དད་འགྱུར། །དོན་དམ་པར་ནི་གཅིག་པ་ཉིད། །ཅེས་བྱ་ལ་སོགས་དེ་བཞིན་གསུངས། །སྒྲ་ཡི་བྱེད་པའི་དོན་དག་ནི། །དབང་པོའི་བློ་ལ་སྣང་མེད་ཕྱིར། །མཐོང་བ་བཞིན་དུ་དེ་ཡི་སྒྲ། །རྟོགས་པ་ཡི་ནི་སྤྱོད་ཡུལ་ལོ། །གལ་ཏེ་རྟགས་དེས་ཐ་དད་ཉིད། །མིང་གིས་ཐ་དད་འགྱུར་ཞེ་ན། །འགའ་ཞིག་ལྡོག་པའི་ཐ་དད་པ། །དངོས་པོ་ལ་ནི་རྣམ་འགགས་མིན། །གྲངས་ཐ་དད་ཀྱང་གཞན་འདོད་པའི། །ཚིག་ལས་ཐ་དད་མེད་ཕྱིར་རོ། །དེ་ཕྱིར་བརྟགས་པ་ཉིད་ཀྱང་ནི། །རྣམ་འགས་ཐ་དད་པར་འགྱུར་གྱི། །གང་དག་གི་ཚིག་དངོས་པོའི་དབང༌། །ཞེས་བྱ་སོགས་ཀྱིས་དངོས་ལ་མིན། །འཇིག་པ་མེད་པ་ལྡོག་མེད་པ། །ལྡོག་པ་འཇིག་པར་བརྗོད་པ་ཡིན། །རྫས་ཀྱི་རྣམ་གྲངས་འཇིག་པ་ན། །འཇིག་ན་བདག་མིན་ཅིས་མི་འདོད། །གལ་ཏེ་རྣམ་གྲངས་ངོ་བོ་ཞེས། །རྫས་ཀྱི་རང་བཞིན་ཉིད་ཡིན་ནོ། །ཅི་དེ་གཞན་བའི་ངོ་བོར་འགྱུར། །གལ་ཏེ་མིན་ན་དེ་བཞིན་འཇིག །ཇི་ལྟར་རྫས་དག་གནས་
པ་ལས། །ཕྱིས་བྱུང་དེ་ཡང་དེ་བདག་གམ། །འགལ་བའི་ཆོས་ནི་གནས་པ་ན། །རྣམ་གྲངས་སུ་ཞིག་ཅི་ཞིག་འགྱུར། །གང་ཕྱིར་དེ་ལ་བརྟག་པ་ཡི། །ཐ་དད་ངོ་བོར་གལ་ཏེ་འདོད། །གལ་ཏེ་རྣམ་གྲངས་ཐ་དད་དངོས། །རྫས་ཀྱི་ངོ་བོས་འགྱུར་ཞེ་ན། །དེ་འདི་ཐ་དད་མེད་གྱུར་པ། །འདི་ལ་འབྲེལ་པ་མེད་ཉིད་ཡིན། །རྫས་དང་རྣམ་གྲངས་རང་བཞིན་དག །གཅིག་པ་ཉིད་དུ་ཁས་ལེན་ན། །གཅིག་ལས་སྐྱེ་དང་མི་སྐྱེ་དང༌། །འཇིག་དང་མི་འཇིག་ཐལ་བར་འགྱུར། །དེའི་ཕྱིར་མཚན་ཉིད་ཐ་དད་པས། །དེ་དག་ཐ་དད་ཉིད་མི་འགྱུར། །གལ་ཏེ་འབྲས་བུ་ཐ་དད་པས། །རང་བཞིན་དེས་ཐ་དད་འགྱུར་ན། །རང་བཞིན་ཐ་དད་མེད་གྱུར་དེས། །ཐ་དད་མེད་ན་དེ་བཞིན་དུ། །རང་བཞིན་ཁོ་ནས་ཐ་དད་པས། །ཅིས་ན་ཐ་དད་གྲགས་མི་འགྱུར། །ཕྱིས་འབྱུང་འབྲས་བུ་ཐ་དད་པས། །དེ་ཡི་ཐ་དད་བྱེད་པ་མིན། །རང་བཞིན་འགྱུར་བ་མེད་པའི་ཕྱིར། །འཇིག་པའི་རྒྱུ་ནི་མི་རིགས་སོ། །གཅིག་དེས་ཐ་དད་མེད་པ་ན། །དེའི་དངོས་པོ་ཡང་དེ་བཞིན་ནོ། །དེ་དག་གི་ནི་ཐ་དད་རྣམས། །གང་གིས་དབྱེར་མེད་ཐ་དད་འགྱུར། །གལ་ཏེ་དེ་དག་ཐ་དད་གྲུབ། །ཐ་དད་དོན་ལ་བརྟག་ཅེ་ན། །དེ་ཡང་གཞན་གྱི་རང་བཞིན་དུ། །གང་དེ་ཐ་དད་མེད་གྲུབ་པའི། །གཞན་གྱི་རང་བཞིན་བརྟག་ན་ནི། །དེ་བཞིན་ཐུག་པ་མེད་པར་འགྱུར། །མཐའ་ཡས་པ་ཡི་རང་བཞིན་ཉིད། །དོན་བྱེད་ནུས་ལས་བྱུང་བ་ཡི། །ཤེས་ལ་སྣང་བ་མེད་པ་ལ། །གང་གི་དེ་བཞིན་ཁས་ལེན་འགྱུར། །གལ་ཏེ་གཅིག་ངེས་དབྱེར་མེད་འགྱུར། །ཐ་དད་མེད་པས་དབྱེར་མེད་ན། །དེ་ནི་གཅིག་ལས་ལྡོག་མེད་ཕྱིར། །ཐ་དད་པ་ཉིད་རྣམ་པར་སྙམ། །ཐ་དད་མེད་ཡོངས་མ་སྤངས་པར། །ཐ་དད་རྟོག་པས་བྱས་པར་འགྱུར། །དེ་ནི་བདེན་པར་ཡོང་གྱུར་ན། །ཐ་དད་མེད་དོན་བརྫུན་པར་འགྱུར། །ཕན་ཚུན་མེད་པའི་ངོ་བོ་རྣམས། །གཞན་མིན་པ་ཡི་རྒྱུ་ཅན་ཡིན། །གང་ཕྱིར་གཅིག་པའི་དངོས་དེའི་ཕྱིར། །གཅིག་ལ་གཉིས་པའི་ངོ་བོ་མེད། །ཕན་ཚུན་མེད་པའི་ངོ་བོ་ཡང༌། །རྣམ་གྲངས་ཡིན་ན་ཐ་དད་མེད། །རྫས་ནི་འཇིག་པ་འམ་མི་འཇིག་འགྱུར། །དེ་ལྟར་དེ་ནི་གཞན་ཞིག་ཡིན། །གཏན་དུ་གནས་པའི་རྟག་པའི་རྫས། །ཐ་དད་སྐད་ཅིག་མས་འཇིག་པར། །ཅིས་ན་མི་
འདོད་འགལ་ཞེ་ན། །ཐ་དད་མཚན་ཉིད་འདོད་བྱ་མིན། །དེ་འདོད་ཅི་ཡི་ཕྱིར་ན་སྤྱི། །གསལ་བ་ཀུན་གྱི་རྗེས་སུ་འགྲོ་བ། །གཅིག་འདོད་ན་ནི་མ་དང་ཡང༌། །ཆུང་མ་ཅིས་ན་གཅིག་མི་འདོད། །ཐ་དད་པ་ཐ་དང་མེད་པའི་སྐྱོན། །བཤད་ཟིན་དེ་དག་འདོད་ན་གང༌། །ཇི་ལྟར་སོ་སོར་ཐལ་མི་འགྱུར། །དེ་ནི་ཇི་ལྟར་གཉིས་འགྱུར་མིན། །བུར་མ་བད་ཀན་རྒྱུར་འགྱུར་ལ། །དོང་གྲ་མཁྲིས་པའི་རྒྱུ་ཡིན་ཞེ། །དེ་ཡི་རྩ་བ་འམ་གཞན་སྦྱར་འདི། །བུ་ར་མ་དོང་གྲའི་མིང་ཅན་ཡིན། །མངར་ཀུན་གྱིས་ནི་བད་ཀན་གྱི། །རྒྱུ་མིན་དཔེར་ན་སྦྲང་རྩི་བཞིན། །དཔེར་ན་མ་ག་དྷཱ་ཅན་བཞིན། །རྣོ་བའང་མཁྲིས་པ་སྐྱེད་པ་མིན། །སོ་སོ་ཉེ་བར་གྱུར་པ་གང༌། །མ་ཤའི་སྣུམ་དང་རྣོ་བ་ཡིས། །བད་ཀན་མཁྲིས་པ་སྐྱེད་པ་བཞིན། །རང་གི་བདག་འདྲེས་ཅི་མི་འདོད། །ནུས་ལ་ལྟོས་པའི་འབྲས་ཡིན་ན། །ཡོན་ཏན་ཙམ་དང་འབྲེལ་བ་ནི། །འགའ་ཞིག་ཅུང་ཟད་ཉིད་ཡིན་གྱི། །དེ་ནི་ཀུན་ལ་ཡོད་པ་མིན། །ཐ་དད་ཐ་མི་དད་ཙམ་གྱིས། །སྐྱོན་གང་ཇི་ལྟར་འབྱུང་བ་ཡིན། །འགལ་བ་ཉེ་བར་འགྱུར་བའི་སྐྱོན། །དེ་ནི་སྐྱེ་བར་གྱུར་ན་ཡང༌། །དེ་ནི་དེ་བདག་ཉིད་གྱུར་པ། །མི་འདོད་ལྡོག་པར་མི་འགྱུར་ན། །དེ་ལྟ་དེ་ལྟར་དབྱིབས་དག་ནི། །ཆ་ཤས་ཉིད་ནི་སྣང་གྱུར་པ། །དེ་བཞིན་འགའ་ཞིག་ཀྱང་མ་ཡིན། །ཆ་ཤས་སྣང་བ་མེད་པའི་ཕྱིར། །དེ་ཡང་སྒྲ་གཅིག་གིས་བརྗོད་པའི། །རྣམ་འགས་ཐ་དད་མེད་པ་མེད། །རང་གི་མཚན་ཉིད་ཤེས་པ་ལ། །སྒྲ་ཡི་དོན་ནི་སྣང་བ་མེད། །སྒྲ་དག་གིས་ནི་དེ་ཉིད་ལ། །མི་གསལ་བ་ཡི་ངོ་བོར་རྟོགས། །དེ་ཕྱིར་ཐ་དད་དབྱེར་མེད་རྟགས། །གང་གིས་འདི་དག་ལྷན་ཅིག་འགྱུར། །ཆ་མེད་པ་ཡང་དུ་མ་ཡི། །ཐ་དད་ཡུལ་སྦྱོར་ཇི་ལྟར་འདོད། །གལ་ཏེ་རྟོགས་སོ་ཞེ་ན་ནི། །སྐད་ཅིག་འཇིག་པར་ཉམས་མྱོང་བའི། །རྣམ་གྲངས་པ་ནི་རྟོགས་པ་ལ། །གནས་པ་འཛིན་པར་ག་ལས་འདོད། །ཚད་མ་གཞན་གྱིས་ཡིན་ཞེ་ན། །དེ་འདིར་གནོད་པ་བྱེད་པར་མཚུངས། །གཅིག་ཡིན་ན་གཞན་གཞན་མིན་ཕྱིར། །ཐ་དད་མེད་བརྗོད་དག །ཕན་ཚུན་དེ་དག་ཐ་དད་པར། །དེས་ན་ཆོས་དང་ཆོས་ཅན་ནི། །དེ་དག་ཀྱང་ནི་ཐ་དད་འགྱུར། །གལ་ཏེ་གང་གི་བདག་ཉིད་དེས། རྣམ་གྲངས་རྫས་དེ་ཡིན་སྙམ་
ན། །གལ་ཏེ་ཐ་དད་དེས་བདག་ན། །ཐ་དད་ལྡན་པའི་མཚན་ཉིད་གྱུར། །གཅིག་པ་གཉིས་ཀྱི་ངོ་བོ་མིན། །རྫས་དང་རྣམ་གྲངས་ངོ་བོ་ལས། །འགའ་ཞིག་འདིར་ནི་གཞན་ཡོད་མིན། །རང་བཞིན་གང་ཡིན་རྒྱུ་མཚན་གྱུར། །དེ་དག་གཅིག་པ་ཉིད་དུ་བརྟགས། །དེ་ཕྱིར་དེ་དག་ཐ་དད་མེད། །རང་གི་བདག་ཉིད་ཉམས་པར་ཐལ། །དེ་ཐ་དད་ཀྱང་དེ་དག་ཡིན། །ཞེ་ན་གང་ཚེ་བདག་ཉིད་གང༌། །ཆོས་དང་ཆོས་ཅན་དེ་འམ་གཞན། །གལ་ཏེ་ཐ་དད་དེ་བདག་ན། །ཐ་དད་ཉིད་དམ་དེ་ལ་ཡང༌། །དེ་ལས་གཞན་དུ་ཡོངས་སུ་བརྟགས། །དེ་དག་ཐ་དད་མེད་གྲུབ་ཕྱིར། །སྔ་མ་བཞིན་དུ་ཐལ་བར་འགྱུར། །དེ་ནི་དེ་དབང་ཡིན་པའི་ཕྱིར། །ཆོས་ཅན་བཞིན་དུ་དེ་འགྱུར་རོ། །དེ་གཞན་དེ་བཞིན་རྟོགས་མེད་པ། །དེས་ན་རྒོལ་ངན་བརྗོད་འདི་བརྟགས། །ལས་ཀྱི་ནུས་པ་རྣམས་ཀྱིས་ཀྱང༌། །ཆ་ནི་མེད་པར་གནས་པ་ན། །གང་ལ་མངོན་པར་ཞེན་པའི་དངོས། །སྒྲོག་ཆགས་རྣམས་ཀྱི་བདེ་སྡུག་སོགས། །ལས་རྣམས་ཀྱིས་ནི་བསྐྱེད་པ་དེ། །དེ་དག་ཉིད་ལས་ཚད་མེད་པར། །ཕན་ཚུན་ཅན་ལ་ལྟོས་ཡོད་པ། །དེ་བཞིན་དུ་ལུས་ནི་གནས་པ་ཡིན། །ཞེས་མང་དུ་བརྗོད་པས་ཆོག་གོ །དེ་ལྟར་འཇིག་པ་དང་དབྱིབས་དག་གཅིག་པའི་རང་བཞིན་ཡིན་པ་དེ་ནི་རྣམ་པ་འགས་ཐ་དད་པ་མི་སྲིད་པའི་ཕྱིར་ལྷན་ཅིག་བྱེད་པ་རྣམས་ཀྱང་འབྲས་བུ་དུ་མ་ཡིན་ནོ་ཞེས་བྱ་བ་འདིར་དཔེར་གྱུར་པ་ནི་འདི་ཡིན་ནོ། །འདི་བྱེ་བྲག་པའི་འདོད་པའི་དོགས་པ་བསུ་བ་ནི་ཡོན་ཏན་ནི་ཞེས་བྱ་བ་ལ་སོགས་པ་སྨོས་ཏེ། དབྱིབས་ནི་ཆ་ཤས་ཀྱི་བཀོད་པ་ཡིན་པར་བརྗོད་དེ། དེ་ཡང་ལྡན་པའི་མཚན་ཉིད་ཡིན་པའི་ཕྱིར། ཡོན་ཏན་གྱི་ངོ་བོ་ཡིན་ནོ། །དེའི་ཕྱིར་འཇིག་པའི་རྫས་ལས་གཞན་པ་ཉིད་དེ་རྫས་དང་དབྱིབས་ནི་མ་འདྲེས་པའི་རང་བཞིན་ཡིན་པའི་ཕྱིར་རོ། །དེས་ན་གང་གི་ཚེ་འཇིམ་པའི་གོང་བུ་ནི་འཇིམ་པའི་བདག་ཉིད་བྱེད་པ་ཡིན་ལ། དེ་ཡང་རྫས་ཁན་གྱིས་ནི་དབྱིབས་ཀྱི་བྱེ་བྲག་བྱེད་པར་བརྗོད་པ་དེའི་ཚེ་དེ་དག་ཤིན་ཏུ་ཐ་དད་པས་རྒྱུ་དུ་མ་ཉིད་ལས་འབྲས་བུ་དུ་མ་ཉིད་འཐོབ་བོ། །གྲུབ་པའི་མཐའ་སྨྲ་བས་བཤད་ཟིན་ཏོ་ཞེས་བྱ་བ་སྨོས་སོ། །འཇིམ་པ་དང་དབྱིངས་རང་བཞིན་ཐ་དད་པ་ལས་འཇིམ་པ་དང༌། དབྱིབས་དག་ཕན་ཚུན་བདག་ཉིད་ཅན་མ་ཡིན་ཞེས་བྱ་བ་
ལ་སོགས་པའི་སྐྱོན་བཤད་ཟིན་ཏོ། །དབྱིབས་ལས་འཇིམ་པའི་རྫས་གཞན་པ་ནི་མ་ཡིན་ཏེ། དེའི་ཕྱིར་འཇིམ་པའི་གོང་བུ་ཉེ་བར་ལེན་པ་ཕུལ་དུ་བྱུང་བས་བྱས་པ་དེའི་འབྲས་བུའི་མཚན་ཉིད་ལ་རྫ་མཁན་ནི་ལྷན་ཅིག་བྱེད་པ་ཡིན་ལ། །དེའི་ཉེ་བར་ལེན་པའི་བདག་ཉིད་ཀྱིས་བྱས་པ་དེའི་འབྲས་བུའི་མཚན་ཉིད་ལ་འཇིམ་པའི་གོང་དུ་ནི་ལྷན་ཅིག་བྱེད་བ་སོ་སོ་བ་འམ། མ་ལུས་པ་ཉིད་ལས་འཇིམ་པའི་དབྱིབས་ཀྱི་བདག་ཉིད་ཀྱི་འབྲས་བུ་བྱེད་པའི་ཕྱིར་རྒྱུ་དུ་མ་ལས་ཀྱང་འདི་དུ་མ་ཉིད་མ་ཡིན་ནོ། །འདིར་གཏན་ཚིགས་ལྷག་པ་བཤད་པ་ནི་གཞན་ཡང་ཞེས་བྱ་བ་ལ་སོགས་པ་སྨོས་ཏེ། བུམ་པར་གཏོགས་པའི་དབྱིབས་གང་ཡིན་པ་དེ། གང་གི་ཚེ་དེ་འཇིམ་པ་ལས་འཇིམ་པ་ཐ་དད་པར་གྱུར་པ་དེའི་ཚེ་རྫ་མཁན་གྱིས་ཅིའི་ཕྱིར་ལོགས་ཤིག་ཏུ་མི་བྱེད་ཐ་དད་པ་ནི་གདོན་མི་ཟ་བར་ལོགས་ཤིག་ཏུ་མི་བྱེད་པ་མ་ཡིན་ནོ། །རྫ་མཁན་གྱི་རྗེས་སུ་འགྲོ་བ་དང་ལྡོག་པ་དག་གིས་དེ་དབྱིབས་ཀྱི་རྒྱུར་རྟོགས་པར་བྱ་བའི་ཕྱིར་དེ་ལོགས་ཤིག་ཏུ་བྱེད་པར་འགྱུར་རོ། །གཞན་ཡང་གལ་ཏེ་ཡོན་ཏན་ཞེས་བྱ་བ་ལ་སོགས་པ་སྨོས་ཏེ་རྫས་ལ་བརྟེན་པའི་ཡོན་ཏན་ལྡན་པ་མ་ཡིན་པ་ལྡན་པའི་རྣམ་པར་དབྱེ་བ་རྣམས་རྒྱུ་མ་ཡིན་པ་ལ་མི་ལྟོས་པ་ཞེས་བྱ་བ་ལ་ཡོན་ཏན་གྱི་མཚན་ཉིད་ཐམས་ཅད་དུ་ཡོན་ཏན་ནི་རྫས་ཀྱི་གཞན་གྱི་དབང་ཡིན་པས་དེ་ཇི་ལྟར་རེས་འགའ་ཞིག་ལོགས་ཤིག་ཏུ་བྱེད་པ་ཡིན། བྱེ་བྲག་པ་ཉིད་སངས་རྒྱས་པ་ལ་རྩོད་པར་དོགས་པ་ནི་གལ་ཏེ་རང་བཞིན་གྱིས་ཞེས་བྱ་བ་ལ་སོགས་པ་སྨོས་ཏེ། གལ་ཏེ་རང་བཞིན་གྱིས་དབྱིབས་ནི་དེའི་ཡོན་ཏན་གྱི་བདག་ཉིད་ཡིན་ཏེ། བྱ་བ་དང་ལྡན་པ་ལས་དང་ལྡན་པ་ཞེས་བྱ་བ་ལ་སོགས་པ་བརྗོད་པས་རྫས་དེ་ནི་རྟེན་གྱི་རང་བཞིན་ནམ། དབྱིབས་ནི་གྱོ་མོག་ནི་རྣམ་པ་དེ་ལྟ་བུའོ། །དེ་ལ་རག་ལས་པ་བདག་ཉིད་ཡིན་ན་དེའི་ཚེ་རྫ་མཁན་གྱི་བྱེད་པ་ལ་ལྟོས་པ་ཅི་ཞིག་དགོས་རང་ཉིད་ཁོ་ན་ཅིའི་ཕྱིར་མ་ཡིན་ཞེས་རྩོད་པའི་བསམ་པས་དེ་ལྟར་བྱེ་བྲག་པ་རྩོད་པར་དོགས་པ་ལ་ལན་བཤད་པ་ནི་མ་ཡིན་ཏེ་དེ་ལས་ཞེས་བྱ་བ་ལ་སོགས་པ་སྨོས་ཏེ། འཇིམ་པའི་རྫས་སུ་ཆུ་འཛིན་པར་བྱེད་པ་ལ་སོགས་པ་གང་ཡིན་པ་དེའི་དབྱིབས་དེ་དག་གི་འབྲས་བུ་དང་འབྲེལ་པ་རྟེན་པ་དང་བརྟེན་པའི་མཚན་
ཉིད་དོ། །དེ་ལ་རུང་བ་གང་ཡིན་པ་དེ་ནི་གཉི་ག་ཡང་ཡིན་ནོ། །དེ་རྫ་མཁན་ལས་གང་ཐོབ་པའི་ཕྱིར་རོ། །དེའི་ཕྱིར་རྫ་མཁན་ལ་ལྟོས་པ་ཡིན་ནོ། །རྫ་མཁན་ལ་མི་ལྟོས་པའི་སྐྱོན་ནི་དེ་ལྟ་མ་ཡིན་ན་ཞེས་བྱ་བ་སྨོས་ཏེ། གང་གི་ཚེ་དེ་དག་ཕན་ཚུན་འབྲེལ་པར་རུང་བ་འདི་རྫ་མཁན་ལ་ལྟོས་པ་མ་ཡིན་ན། དེའི་ཚེ་འཇིམ་པའི་རང་བཞིན་ཁོ་ན་རྣམ་པ་དེ་ལྟ་བུ་དབྱིབས་དང་འབྲེལ་པར་རུང་བ་ཉིད་དོ། །དེ་ལ་ཡང་དངོས་པོ་ཁོ་ནར་གྱུར་པའི་དབྱིབས་དང་འབྲེལ་པར་རུང་བའི་ཆོས་ཡོད་པའི་རྫ་མཁན་དང་ཉེ་བ་ལས་སྔོན་ཡང་དབྱིབས་ཀྱི་ཁྱད་པར་དང་འབྲེལ་པར་འགྱུར་སྙམ་པའི་བྱེ་བྲག་པའི་རྩོད་པའི་ལན་ནི་གྲུབ་པའི་མཐའ་སྨྲ་བས་དེ་ལ་ཡིན་ན་ཞེས་བྱ་བ་སྨོས་ཏེ། གང་གི་ཕན་ཚུན་འབྲེལ་པར་རུང་བ་ནི་རྫ་མཁན་ལ་སོགས་པ་དང་ལྟོས་པ་དེ་ལྟ་ཡིན་ན་འོ་ན་འཇིམ་པའི་རྫས་ཀྱི་རུང་བ་རྫ་མཁན་ལས་གྱུར་བ་འཐོབ་པ་ཡིན་ནོ། །འཇིམ་པའི་རྫས་དང་རུང་བ་འདི་གཉིས་སོ། །རང་བཞིན་ཐ་དད་པ་དུ་མ་མ་ཡིན་པའོ། །གང་གི་ཚེ་རུང་བ་ཉིད་མ་ཡིན་པ་དེ་ནི་རྫས་ལས་ལོགས་ཤིག་ཏུ་བྱེད་པར་སྔ་མ་བཞིན་དུ་ཐལ་བར་འགྱུར་རོ། །ཡང་ན་རུང་བ་ཡིན་ན་ཡང་རྫས་ཀྱི་གཞན་དབང་ཡིན་པས་ལོགས་ཤིག་ཏུ་གྲུབ་པར་བརྗོད་པ་མ་ཡིན་ཏེ། དེའི་ཚེ་དེ་ཡང་དངོས་པོའི་ཆོས་ཉིད་ཁོ་ནས་སྔ་མ་བཞིན་དུ་འབྲེལ་པར་མི་འགྱུར་རོ་སྙམ་ནས་རྫས་དང་ལྷན་ཅིག་འབྲེལ་པར་རུང་བ་དང་གཞན་རྫ་མཁན་ལས་བྱུང་བའི་རུང་བར་འདོད་པར་བྱའོ། །དེ་ཡང་ལོགས་ཤིག་བྱེད་པར་ཐལ་བར་འགྱུར་བས་རྫས་ལ་ཐ་དད་པའི་རང་བཞིན་དུ་ཁས་བླངས་བར་མི་བྱ་སྟེ། ལོགས་ཤིག་བྱེད་པའི་ཐལ་བ་ཡང་འགྱུར་བ་དེ་ཉིད་ཀྱིས་ལན་གདབ་པར་བྱའོ། །ཡང་དེ་ཉིད་ཀྱི་ལན་ཡིན་ན་ནི་ཐུག་པ་མེད་པར་ཐལ་བས་གདོན་མི་ཟ་བར་གཡོ་མོག་གི་བདག་ཉིད་དང་འཇིམ་པའི་རྫས་ཀྱི་རུང་བ་དག་རང་བཞིན་ཐ་མི་དད་པར་ཁས་བླངས་བར་བྱའོ། །དེ་ལྟ་ཡིན་ན་ཅིར་འགྱུར་ཞེ་ན། གྲུབ་པའི་མཐའ་སྨྲ་བས་རེ་ཞིག་ཅེས་བྱ་བ་ལ་སོགས་པ་སྨོས་ཏེ། འཇིམ་པའི་གོང་བུ་དང་རྫ་མཁན་དག་གི་གཡོ་མོག་གི་རྫས་དང་ལྡན་པའི་ཁྱད་པར་གྱི་འབྲེལ་པར་རུང་བ་སྐྱེད་པའི་ཕྱིར་གཅིག་གི་རང་བཞིན་ལ་ཡང་གཅིག་ལ་རྐྱེན་དུ་མས་ཁྱད་པར་དུ་བྱ་བའི་བྱེ་བྲག་ཉིད་གང་ཡིན་པ་དེ་གྲུབ་བོ། །
ཁོ་བོ་ཅག་གི་ཕྱོགས་དེ་ལས་ཀྱང་ཁོ་བོ་ཅག་འཇིམ་པ་དང་དབྱིབས་དག་རང་བཞིན་གཅིག་པ་ཉིད་དུ་སྒྲུབ་པ་ལ་ཤིན་ཏུ་འབད་པས་ཅི་ཞིག་བྱ། གང་གི་ཚེ་རུང་བ་ལ་བརྟེན་ན་ཡང་རྐྱེན་དུ་མས་སྐྱེད་པའི་གཅིག་པ་ཡང་དུ་མ་ཉིད་དུ་ཐལ་བར་འགྱུར་བ་འགྲུབ་སྟེ། འབྲས་བུ་ནི་རྫས་དང་ཡོན་ཏན་དང་ལྡན་པ་སྤངས་པས་འདིར་དོགས་པ་ཅི་ཡང་མེད་ཀྱི་གཞན་པ་ཉིད་དེ་སྤོང་བར་བྱེད་པའི་ཕྱིར་ཞེས་བྱ་བ་དགོངས་པ་ཡིན་ནོ། །འབད་པར་འཛིན་པས་ཀྱང་འཇིམ་པ་དང་དབྱིབས་དག་ཕན་ཚུན་བདག་ཉིད་མ་ཡིན་པ་འདི་གཉིས་དབྱིབས་དང་འཇིམ་པའི་ཁྱད་པར་གྱི་ངོ་བོ་དག་ཏུ་མི་སྣང་བར་ཐལ་བར་འགྱུར་བའི་ཕྱིར་རོ་ཞེས་བྱ་བ་འཐད་པ་འདིས་སྒྲུབ་པ་ཉིད་དེ། འདིས་གཅིག་པ་ཉིད་རིགས་པ་གཞན་སྲིད་ཀྱང་དེ་རྗོད་པར་བྱེད་པའི་མཚན་ཉིད་ལ་འཐད་པ་མི་བྱེད་དེ་རང་བཞིན་གྱིས་གྲུབ་པ་ལས་གཞན་དུ་ཡང་འབྱུང་བ་ཡིན་ནོ་ཞེས་བརྗོད་དོ། །དེ་ལྟ་ན་དེ་ནི་ཚོགས་པ་ཐ་དད་པ་ལས་ཚོགས་པ་གཞན་སྐྱེད་པས་ཐ་དད་པ་ཡིན་ནོ། །ལྷན་ཅིག་བྱེད་པ་རྣམས་དུ་མ་ལས་ཀྱང་འབྲས་བུ་གཅིག་པ་ཉིད་ལ་འགལ་བ་མེད་དེ་ཞེས་བསྟན་པའི་ཕྱིར་མཇུག་བསྡུ་བ་ནི་དེས་ན་དངོས་སུ་ཞེས་བྱ་བ་ལ་སོགས་པ་སྨོས་ཏེ། གང་གིས་རྐྱེན་གཞན་བསགས་པ་དེའི་ཚོགས་པ་མ་ཚང་པ་ལས་ཚོགས་པ་གཞན་སྐྱེད་དོ། །དེ་ཡང་ཚོགས་པ་སྔ་མ་ལས་སྐྱེ་བས་ཐ་དད་པའི་འབྲས་བུ་གཞན་ཉིད་སྐྱེད་པ་དང༌། ཚོགས་པ་གཅིག་པར་བསྟན་པ་ཡུལ་ལ་ལྷན་ཅིག་བྱེད་པ་དུ་མ་ཉིད་ཀྱང་དུ་མ་གཅིག་བྱེད་པ་ལ་འགལ་བ་མེད་པའི་ཕྱིར་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པའི་འབྲས་བུ་གཅིག་མཐོང་བའི་ཕྱིར་རང་བཞིན་གཅིག་པ་ཉིད་སྒྲུབ་པར་བྱེད་པའི་རྒྱུ་དེས་ན་ལྷན་ཅིག་བྱེད་པ་ནི་ལྷན་ཅིག་བྱེད་པའི་ངག་ཚུལ་ཅན་ཚོགས་པ་གཅིག་པའི་ནང་དུ་འདུས་པའོ། །རྐྱེན་ནི་ཚོགས་པ་གཞན་པའི་ལྷན་ཅིག་ལ་ཉེ་བར་སྦྱོར་བ་མེད་དེ་ཡུལ་གཅིག་ལ་ཉེ་བར་སྦྱོར་བ་གང་ཡིན་པ་དེ་མ་ཡིན་ནོ། །ཚོགས་པ་གཞན་པ་ཉིད་ནི་ལྷན་ཅིག་པ་ཐ་དད་པའི་ཡུལ་ལ་ཉེ་བར་སྦྱོར་བའི་རིགས་པའི་སྟོབས་ཀྱིས་རྟོགས་སོ། །གང་སྔར་རྣམ་པར་རྟོགས་པ་འདིས་གང་གི་ཚེ་བྱེད་པའི་སྒྲས་ནི་ཚོགས་པར་བརྗོད་པ་དེའི་ཚེ་ཐ་དད་པ་ཡོད་པ་དེ་ནི་ཚོགས་པ་རྣམས་
ལས་སྐྱེ་བ་ཡིན་ནོ། །འབྲས་ཏུ་ཐ་དད་པ་ཡིན་ནོ་ཞེས་བྱ་བས་ཅི་ཞིག་བརྗོད་ཅེ་ན་རྒྱུ་ཐ་དད་པས་ཐ་དད་པ་ནི་མ་ཡིན་ཏེ། འདི་དག་གི་དཔེ་བསྟན་པའི་མཇུག་བསྡུ་བའོ། །ཡང་ན་རྒྱུའི་སྒྲས་ནི་ཚོགས་པར་བཤད་པའི་ཡུལ་ལྷན་ཅིག་བྱེད་པར་བརྗོད་དོ། །དེའི་ཚེ་ཐ་དད་པས་དུ་མའི་མཚན་ཉིད་ལས་འབྲས་བུ་དུ་མའི་མཚན་ཉིད་ཐ་དད་པར་མི་འདོད་བ་ཁོ་ན་སྟེ། དུ་མའི་བྱེད་པ་ལ་འགལ་བ་མེད་པས་གཅིག་པ་དུ་མ་ཉིད་ལས་སྐྱེ་བ་མཐོང་བའི་ཕྱིར་རོ། །འཇིམ་པ་དང་དབྱིབས་དག་བདག་ཉིད་གཅིག་པར་བསྟན་པའི་མཇུག་བསྡུ་བ་ནི་འཇིམ་པ་དང་དབྱིབས་ཀྱི་བདག་ཉིད་ཀྱི་འབྲས་བུའི་རང་བཞིན་གཅིག་པ་ཉིད་ཀྱང་དུ་མའི་རང་བཞིན་མ་ཡིན་པ་ཡང་ངོ༌། །དངོས་སུ་ནི་དོན་དམ་པར་རོ། །རྣམ་པར་རྟོག་པའི་བློ་ལ་འཇིམ་པ་དང་དབྱིབས་དག་ཐ་དད་པར་སྣང་བའི་ཕྱིར་རོ། །དེ་སྐད་དུ་ཚོགས་པ་ཐ་དད་པས་འབྲས་བུ་ཐ་དད་པ་ནི་དུ་མའི་ཚོགས་པའི་ཡུལ་ལ་རྐྱེན་ཐ་དད་པས་དུ་མའི་འབྲས་བུ་ཡིན་པའི་དཔེ་བསྟན་པ་ནི་མིག་ལ་སོགས་པ་གང་སྐྱེད་པའི་གནས་སྐབས་སོ། །ཇི་ལྟར་ཞེས་བྱ་བ་སྨོས་པ་ནི་དཔེའོ། །རྒྱུ་ཐ་དད་པ་ནི་ཚོགས་པ་ཐ་དད་པའོ། །རྫ་མཁན་མ་ཚང་བའི་འཇིམ་པའི་གོང་བུའི་དང་དེ་ལྷན་ཅིག་སྐུད་པ་དབང་དུ་བྱས་པའི་ཚོགས་པ་རྣམ་པ་གསུམ་གྱི་མཚན་ཉིད་ཐ་དད་པ་རྣམས་རང་བཞིན་དུ་མའི་བྱེ་བྲག་རྣམས་ནི་སོ་ཕག་དང་འཁོར་ལོས་གཅོད་པ་དང་བུམ་པ་དེའི་རྣམ་པར་དབྱེ་བ་ནི་བུམ་པའི་མཚན་ཉིད་ལ་ཉེ་བར་སྦྱོར་བས་འབྲས་བུ་གཅིག་མ་ཡིན་ནོ། །འོན་ཀྱང་འབྲས་བུ་ཐ་དད་པ་ཁོ་ན་སྟེ། དེ་བཞིན་དུ་རྣམ་པ་དེ་ཉིད་ཀྱིས་མིག་ལ་སོགས་པ་ལས་མིག་གི་རྣམ་པར་ཤེས་པ་སྐྱེ་སྟེ། ཚོགས་པ་གཞན་པའི་ཚོགས་པའི་མཚན་ཉིད་ཐ་དད་པའི་རྒྱུ་ལས་འབྲས་བུ་དུ་མ་ཡིན་པར་རིག་པར་བྱའོ། །དེ་ཉིད་རྣམ་པར་དབྱེ་བ་ནི་དེ་བཞིན་དུ་ཞེས་བྱ་བ་ལ་སོགས་པ་སྨོས་ཏེ། གང་མིག་གི་ངོ་བོ་སྤངས་པའི་མཚུངས་པ་དེ་མ་ཐག་པའི་རྐྱེན་དུ་བཤད་པ་ནི་རྣམ་པར་ཤེས་པའི་མཚན་ཉིད་དེ། རྐྱེན་གཞན་ལ་ལྟོས་པ་དང་བཅས་པ་དེ་ལས་རྣམ་པར་རྟོག་པའི་རྣམ་པར་ཤེས་པའམ། ཅིག་ཤོས་དེ་ཉེ་བར་བརྟེན་ནས་རྟོག་པའི་ངོ་བོ་དང་ཉེ་བར་དམིགས་པ་དང་བཅས་པའི་མིག་གི་རྣམ་པར་ཤེས་པ་ཡང་འགྱུར་རོ། །མིག་གི་རྣམ་པར་ཤེས་པ་དེ་ཉིད་ཉེ་བར་དམིགས་པའི་བདག་
ཉིད་ཅི་འདྲ་བ་ཞིག་ཅེ་ན། དེ་ལས་བྱུང་བའི་སྐྱེ་བ་དེ་ཉིད་འབྲས་བུ་གཅིག་བ་སོ་སོར་ངེས་པ་སྟེ་མིག་གི་དབང་པོ་དང་ཉེ་བ་ལ་ལས་ནི་མཚུངས་པ་དེ་མ་ཐག་པའི་ཉེ་བར་ལེན་གྱིས་བྱས་པ་དེ་ལས་གཟུགས་འཛིན་པར་སོ་སོར་ངེས་པའི་གཟུགས་ཀྱི་རྣམ་པ་སོ་སོར་ངེས་པའོ། །སྒྲ་ལ་སོགས་པའི་རྣམ་པས་དབེན་པ་ཉིད་ཀྱི་འབྲས་བུ་སྟེ། མིག་དང་ལྷན་ཅིག་པའི་མཚུངས་པ་དེ་མ་ཐག་པའི་རྐྱེན་གྱིས་ཚོགས་པ་སྐྱེད་པར་བྱེད་པའི་ཕྱིར་ཡུལ་ལ་དབང་བྱེད་པའོ། །མཚུངས་པ་དེ་མ་ཐག་པའི་རྐྱེན་དང་དབང་པོ་དེ་དང་ཡུལ་ནི་འདྲ་བའི་ངོ་བོ་ཉིད་དེ་གཟུགས་དེ་འབའ་ཞིག་པ་སྣང་བ་ནི་འཁྲུལ་པའི་རྣམ་པར་ཤེས་པ་ནི་མ་ཡིན་ནོ་ཞེས་ཡུལ་དང་དབང་པོ་དང་ཡིད་ལ་བྱེད་པ་ཚོགས་པའི་མཚན་ཉིད་ཀྱི་འབྲས་བུ་ཁོ་ནར་བསྟན་ཏོ། །དེ་དང་གཞན་པའི་འབྲས་བུ་གཅིག་པ་དང་གཉིས་སྐྱེ་བ་ནི་རང་ཉིད་ཀྱིས་བརྟགས་པ་ནི་འདི་ཐ་དད་པ་ཡང་དངོས་པོའི་འབྲས་བུ་སྟེ། མིག་གི་རྣམ་པར་ཤེས་པའི་མཚན་ཉིད་ཀྱི་རྒྱུ་རྣམས་ཡུལ་དང་དབང་པོ་དང་ཡིད་པ་བྱེད་པ་རྣམས་ཀྱི་ངོ་བོ་འབའ་ཞིག་དེ་དག་ངོ་བོ་དེ་ལས་ཐ་དད་པ་ཉིད་དེ། དེས་བསྐྱེད་པའི་བྱེ་བྲག་རྣམས་རྟོགས་པའི་ངོ་བོ་ལ་སོགས་པའི་མཚན་ཉིད་དུ་འགྱུར་རོ། །དེའི་ཕྱིར་སྐྱེད་བར་བྱེད་པ་ལ་ལྟོས་ནས་གཅིག་གི་བདག་ཉིད་ཀྱང་དུ་མར་བསྟན་ཏོ། །དེ་ལྟར་ན་གང་གི་ཕྱིར་ཞེས་བྱ་བ་ནི་དེའི་ཕྱིར་ཏེ། རྒྱུ་ཐ་དད་པ་མ་ཡིན་ཡང་ཇི་ལྟར་ཚོགས་པ་གཅིག་གི་ནང་དུ་འདུས་པའི་རྐྱེན་ཀྱང་ཐ་མི་དད་པ་དེ་བཞིན་དུ་ཚོགས་པའི་མཚན་ཉིད་ཐ་དད་ཀྱང་ཐ་མི་དད་དོ། །ཚོགས་པ་གཞན་སྐྱེས་པ་རྣམས་ཀྱི་འབྲས་བུའི་ཁྱད་པར་ནི་འབྲས་བུ་ཁྱད་པར་ཅན་ནོ་ཞེས་བྱ་བ་དེས་གང་བརྗོད་པའོ། །གལ་ཏེ་ལྷན་ཅིག་བྱེད་པ་རྣམས་ཀྱང་འབྲས་བུ་ཐ་མི་དད་པར་འགྱུར་བ་ནི་ཚོགས་པ་ཐ་དད་ཀྱང་ཐ་མི་དད་པ་ཡོད་པ་ཡིན་ནོ། །འོན་ཏེ་ཚོགས་པ་ཐ་དད་པར་འགྱུར་ཏེ། ལྷན་ཅིག་བྱེད་པ་ཐ་དད་ཀྱང་ཅིས་ན་ཐ་མི་དད་པར་འགྱུར་བ་ཡིན། ཁྱད་པར་མེད་པའི་ཕྱིར་རོ་ཞེ་ན། དེ་ནི་བསལ་བ་ཡིན་ཏེ་དེ་ལ་ཕན་ཚུན་འདུས་པ་ལ་བརྟེན་ནས་རྐྱེན་གྱི་ཁྱད་པར་ལས་འབྲས་བུ་གཅིག་བར་བསྟན་པ་དང་གཅིག་ལ་གཅིག་གི་རྒྱུན་ལ་ཕན་འདོགས་པ་སྟེ། ལྷན་ཅིག་བྱེད་པ་སོ་སོར་ངེས་པའི་ནུས་པ་རྣམས་ལས་སྐྱེས་
པའི་འབྲས་བུ་གཅིག་མི་སྐྱེད་དོ། །མཚུངས་པ་དེ་མ་ཐག་པའི་འབྲས་བུ་གཞན་སྐྱེད་པར་ནུས་པ་དང་འབྲེལ་པ་རྣམས་ནི་གཞན་པ་ལས་ཡིན་ཏེ། རང་བཞིན་ཐ་དད་པ་དང་ལྡན་པ་ཡོད་པས་འབྲས་བུ་ཐ་དད་པ་སྐྱེད་པའི་ཕྱིར། གང་ལས་ཁྱད་པར་མེད་པ་ཡིན། འོ་ན་ནི་འབྲས་བུ་སྒྲུབ་པར་བྱེད་པའི་གཞི་ནི་ཇི་ལྟར་རྟེན་པའི་ངོ་བོ་དེ་འབྱུང་བ་དག་གིས་བསྐྱེད་བ་དེ་ནི་གཞན་པ་ཉིད་ལ་བརྟེན་པ་ཡིན་ནོ་ཞེས་ཁྱེད་འདོད་པ་དེ་བཞིན་དུ་གཞན་རྣམ་པར་ཤེས་པ་ལ་སོགས་པའི་འབྲས་བུ་ལ་ཡང་ཡིན་ན། དེའི་ཕྱིར་འདིས་ཀྱང་རྒྱུ་ཅུང་ཟད་ཅིག་ལ་བརྟེན་པ་དང༌། དེའི་རྒྱུ་སྔ་མ་ནི་སྐྱེད་པར་བྱེད་པ་ཉིད་འབྲས་བུ་ཕྱི་མའི་རྟེན་ཉིད་དེ་སྐྱེད་པ་མ་ཡིན་པ་དེའི་ཕྱིར་དེ་ནི་ངོ་བོ་ཡིས་སྐྱེད་པ་ཡིན་ནོ་ཞེས་བྱ་བ་དེ་དག་མ་ངེས་པའི་གནས་སྐབས་སུ་འགྱུར་ཞེ་ན། རྒྱུའི་ནུས་པ་ཐ་དད་པ་དེ་དག་ཁོ་ན་ཞེས་བྱ་བ་སྨོས་ཏེ། བཤད་མ་ཐག་པའི་རྒྱུའི་ནུས་པ་ཐ་དད་པ་ནི་རྒྱུ་རྣམས་ཀྱི་ནུས་པའི་ཁྱད་པར་རོ། །ཅི་འདྲ་བའི་བདག་ཉིད་ཇི་ལྟ་བ་དེ་དག་གི་རྒྱུའི་ནུས་པ་ཐ་དད་པ་རྣམས་ལྷན་ཅིག་བྱེད་པའི་མཚན་ཉིད་གང་གི་བདག་ཉིད་ཀྱི་ཚོགས་པས་སྐྱེད་པའི་ཕྱིར་ཁྱད་པར་ཅན་གྱི་འབྲས་བུ་སྐྱེད་པའོ། །བར་དུ་ཆོད་པ་མེད་པ་ནི་བར་དུ་གཅོད་པ་འམ་གས་བྱེད་པར་མི་ནུས་པ་སྟེ་ནུས་པ་མེད་པ་གང་གི་དངོས་པོ་དེ་དག་གི་ནུས་པ་ཆོད་པ་མེད་པའོ། །གདོན་མི་ཟ་བར་འབྲས་བུ་བྱེད་པར་ནུས་པར་ཉེ་བར་གནས་སོ་ཞེས་བཤད་དོ། །ཚོགས་པ་ཡོད་བའི་འབྲས་བུ་ནི་རྐྱེན་གཅིག་ལས་སྐྱེ་བ་ནི་རེས་འགའ་ཡང་མི་སྲིད་པས་ཐམས་ཅད་ཚོགས་པ་ཁོ་ནས་འབྲས་བུ་བྱེད་པའི་ཕྱིར་ཆོགས་པ་འབྲས་བུའི་ངོ་བོ་ཉིད་གནས་པའི་རྟེན་ཡིན་ནོ་ཞེས་བརྗོད་དོ། །ཅིའི་ཕྱིར་ནུས་པ་ཆོད་པ་ཚོད་པ་མེད་པ་ཡིན་ཞེ་ན། སྐད་ཅིག་མ་ཡིན་པའི་ཕྱིར་རོ། །སྐད་ཅིག་མའི་ནུས་པ་ལ་གགས་བྱ་བར་མི་ནུས་སོ། །རང་བཞིན་གཞན་ལ་བརྟེན་པ་བཞིན་དུ་ཇི་སྲིད་འབྲེལ་པས་བྱེད་པ་དེ་སྲིད་དུ་སྐད་ཅིག་མ་རང་གི་འབྲས་བུ་བྱས་ནས་འགག་བའི་ཕྱིར་རོ། །ཇི་ལྟར་དུས་མི་མཉམ་པའི་རྒྱུ་རྟེན་དུ་སྦྱོར་བ་ཡིན་ཞེ་ན། འདི་ལྟར་ཞེས་བྱ་བ་ལ་སོགས་པ་སྨོས་ཏེ་གང་གི་ཕྱིར་རྣམ་པར་ཤེས་བའི་མཚན་ཉིད་ཀྱི་འབྲས་བུ་དེ་དག་ཀྱང་མིག་ལ་སོགས་པའི་ངོ་བོ་མ་ལུས་པ་དག་ལས་རྟོགས་པ་
པ་ལ་སོགས་པ་གཞན་ལས་དེ་མ་ཡིན་པའི་ཁྱད་པར་ཅན་སྐྱེད་དོ། །རང་གི་ངོ་བོ་ལ་ཆ་ཤས་སུ་འབྲས་བུ་མི་སྐྱེད་པས་རེ་རེ་ལས་མ་ལུས་བ་ཉིད་འབྱུང་བས་གཅིག་སྐྱེད་པ་དེའི་ཕྱིར་རྟེན་དུ་བཤད་དོ། །སྐྱེད་པར་བྱེད་པ་ལས་གཞན་པ་ཉིད་ཕན་འདོགས་པར་བྱེད་པ་ཡིན་གྱི་ཕན་འདོགས་པར་མི་བྱེད་པ་ནི་རྟེན་མ་ཡིན་ཏེ་ཧ་ཅང་ཐལ་བར་འགྱུར་རོ། །དེའི་ཕྱིར་དུས་ཐ་དད་པ་རྟེན་པའི་དངོས་པོར་འགལ་བ་མེད་དོ། །གང་ཡང་འབྱུང་བ་རྣམས་རྟེན་པའི་ངོ་བོ་འཇུག་པར་བརྗོད་དོ། །དེ་ཡང་རང་གི་ཡུལ་འདི་སྐྱེད་པར་བྱེད་པ་ཉིད་ཡིན་ནོ་ཞེས་སྔ་མའི་འབྱུང་བ་སྐྱེད་པར་བྱེད་པ་ནི་ཕྱི་མ་འཇོག་པའི་རྒྱུ་ཡིན་ནོ། །གང་གི་ཕྱིར་མ་ངེས་པ་ཡིན་གཞན་ཡང་དེའི་ངོ་བོ་སྐྱེད་པ་ཡིན་ནོ་ཞེས་བྱ་བ་འདིར་མ་ངེས་པར་བརྗོད་པར་གྱུར་པར་གཞན་དག་དགོས་པ་ན་གལ་ཏེ་ནུས་པ་འགོག་པ་མེད་པ་ཞེས་བྱ་བ་སྨོས་ཏེ། འགོག་པ་མེད་པ་ནི་འགགས་བྱེད་པའི་ནུས་པ་མེད་པའོ། །གང་དག་ནུས་པ་འགོག་པ་མེད་པ་དེ་ནི་འབྲས་བུ་མཇུག་ཐོགས་པ་ཡིན་པའི་ཕྱིར་གང་སྐྱེས་པའི་དུས་ལ་མི་སྡོད་པའི་འབྲས་བུ་བྱེད་པ་དེ་དག་ཀྱང་ནུས་པ་འགོགས་པ་མ་ཡིན་གྱི་སྐྱེས་པའི་མཇུག་ཐོགས་སུ་འབྲས་བུ་བྱེད་དོ། །སྐད་ཅིག་མ་འདི་ཟད་པ་ལ་གནོད་པ་བྱེད་པ་མེད་ལ་ཕན་འདོགས་པ་སྤོང་བར་བརྗོད་པ་ནི་ཁྱད་པར་དུ་བོགས་དབྱུང་དུ་མེད་པ་དག་ཅེས་བྱ་བ་སྨོས་ཏེ། དེ་ཡང་ཁྱད་པར་བོགས་དབྱུང་དུ་མེད་པའི་སྐད་ཅིག་མ་རྣམས་ཞེས་བྱ་བ་འདིས་སྐད་ཅིག་མ་བྱེ་བྲག་ཏུ་བྱེད་པར་མི་ནུས་པའི་ཕྱིར་རོ་ཞེས་བཤད་དོ། །ཁྱད་པར་དུ་བོགས་འབྱིན་པས་ལྷན་ཅིག་འབྱུང་བའི་མཇུག་ཐོགས་ཏེ་སྐྱེ་བའི་ཕྱིར་དང་དེའི་ཚེ་དེ་འགགས་པའི་ཕྱིར་རོ། །དེ་རྣམས་ལ་རྣམ་པ་དེ་ལྟ་བུའི་རྐྱེན་རྣམས་ཕན་ཚུན་ལྷན་ཅིག་བྱེད་པའི་དོན་ཅི་གཞིག་ཡིན་གང་གིས་ལྷན་ཅིག་བྱེད་པར་བརྗོད། འོན་ཏེ་ཁྱད་པར་བོགས་དབྱུང་དུ་མེད་པ་ཉིད་ཀྱིས་ལྷན་ཅིག་བྱེད་པ་ཉིད་མེད་དོ་ཞེས་བསྟན་པའི་དོན་འདི་ཅི་ཞིག་ཡིན། ནུས་པ་འགོག་པ་མེད་དོ་ཞེས་བྱ་བའི་ནུས་པ་འགོག་པར་བྱེད་པའི་ལྷན་ཅིག་བྱེད་པར་བརྗོད་པ་མེད་དོ་ཞེ་ན། བདེན་ཏེ། ཐམས་ཅད་དུ་དེ་ལ་ཅུང་ཟད་ཅིག་བྱེད་པ་མེད་པར་ཤེས་པར་བྱ་བའི་དོན་དུ་འདི་དག་བཤད་དོ། །ནུས་པ་
ལ་གེགས་བྱེད་པ་མེད་པས་ཕན་འདོགས་བ་ཉིད་དུ་བཏགས་པའི་ལྷན་ཅིག་བྱེད་པ་ནི་འགགས་པ་དེའི་ཕྱིར་ཁྱད་པར་ཕུལ་དུ་བྱུང་བ་མི་སྲིད་པའི་ཕྱིར་རོ། །སྐད་ཅིག་མ་རྣམས་རང་གི་རྒྱུ་ཙམ་དང་འབྲེལ་པ་ཉིད་སྐྱེད་པར་བྱེད་པ་ཉིད་དེ་ཡང་རྣམ་པ་དེ་ལྟ་བུའི་ཐམས་ཅད་དུ་ཡོད་པ་འབའ་ཞིག་སྐྱེད་པ་མ་ཡིན་ཏེ་དེའི་ངོ་བོ་སྐྱེད་པ་ཡིན་ནོ་ཞེས་བྱ་བ་མ་ངེས་པ་ཡིན་ནོ་སྙམ་དུ་སེམས་ན། འདི་དག་ཡོངས་སུ་སྤོང་པ་ནི་བོགས་འབྱིན་པ་ཉེ་བར་ལེན་པའི་ལྷན་ཅིག་བྱེད་པ་མ་ཡིན་ནོ། །གང་གི་ཕྱིར་དེ་མེད་པས་ལྷན་ཅིག་བྱེད་པར་མི་འགྱུར། གང་ལ་བོགས་དབྱུང་བའི་ཉེ་བར་ལེན་པ་ནི་ལྷན་ཅིག་བྱེད་པར་ཡང་མི་འགྱུར་ཐམས་ཅད་དུ་ལ་ལར་ཡང་ལྷན་ཅིག་འབྱུང་བ་ཕུལ་དུ་བྱུང་བའི་ཉེ་བར་ལེན་བའི་མཚན་ཉིད་མི་སྲིད་དོ། །དེ་ལྟ་ན་ལྷན་ཅིག་བྱེད་པ་ཅི་ཞིག་ཡིན་ཞེ་ན། མང་པོ་དག་དོན་གཅིག་བྱེད་ཅེས་བྱ་བ་ལ་སོགས་པ་སྨོས་ཏེ། འབྲས་བུ་གཅིག་སྒྲུབ་པའོ། །གང་མང་པོ་དག་ལ་ཡང་སྲིད་དེ་རིགས་པའི་སྟོབས་ཀྱིས་རྣམ་པ་དེ་ལྟ་བུ་ལྷན་ཅིག་བྱེད་བ་ཐམས་ཅད་ལ་སྲིད་པ་ནི་གཞན་མ་ཡིན་ནོ། འདི་དཔེ་ནི་དཔེར་ན་རྒྱུའི་ཚོགས་པ་ཐ་མ་ལྟ་བུ་ཞེས་བྱ་བ་ནི་དེ་མ་ཐག་ཏུ་མྱུ་གུའི་འབྲས་བུའོ། །རྒྱུའི་ཚོགས་བ་ནི་རྐྱེན་གྱི་ཏོགས་པའོ། །འདི་དག་ནི་ཉེ་བར་བཏགས་པར་གྱུར་ན་ལྷན་ཅིག་བྱེད་པ་འདི་དག་ཕུལ་དུ་བྱུང་བ་བསྐྱེད་པས་དངོས་པོ་ཡིན་ནོ་ཞེ་ན། འདི་ཉིད་ཅེས་བྱ་བ་སྨོས་ཏེ། འབྲས་བུ་གཅིག་བྱེད་པ་I་མཚན་ཉིད་ནི་གཙོ་བོ་ཡིན་གྱི་ལྷན་ཅིག་བྱེད་པ་རྣམས་ནི་ཕུལ་དུ་བྱུང་བ་མི་སྲིད་བསྐྱེད་པའི་མཚན་ཉིད་ཉིད་མི་ཕལ་པ་ཡིན་པའི་ཕྱིར་རོ། །འདི་དག་གི་ལན་ནི་ཕྱིས་གདབ་པར་བྱའོ། །འདི་ག་ལས་ཤེ་ན། ཐ་མ་དེ་ཉིད་ཅེས་བྱ་བ་སྨོས་ཏེ། བརྗོད་པར་འདོད་པའི་འབྲས་བུའི་རྒྱུ་ཡིན་པའི་ཕྱིར་རོ། །རྒྱུ་ནི་ལྷན་ཅིག་བྱེད་པར་བཤད་པ་ནི་རྒྱུ་མ་ཡིན་ཏེ། གང་གི་ཕྱིར་ཅར་ལྷན་ཅིག་བྱེད་པ་ནི་ལྷན་ཅིག་བྱེད་པར་བརྗོད་དེ། མཐའ་མའི་རྒྱུའི་ཚོགས་པའི་རྣམ་པ་དེ་ལྟ་བུ་ཡིན་པའི་ཕྱིར་དཔེར་ན་ཐ་མའི་དོན་གཅིག་པའི་ལྷན་ཅིག་བྱེད་པ་ཉིད་ཡིན་པ་དེ་བཞིན་དུ་སྔ་མའི་ཚོགས་པ་ལས་ཕྱི་མ་ཕྱི་མའི་སྐད་ཅིག་མ་ཁྱད་པར་ཅན་ཐ་དད་པར་ངེས་ཏེ་ཐ་མ་ཉིད་དཔེར་བསྟན་པའི་ཕྱིར་རོ། །དེའི་ཕྱིར་མྱུ་གུ་
ལ་སོགས་པའི་འབྲས་བུ་ཐམས་ཅད་ཀྱི་བྱེ་བྲག་གི་མཚན་ཉིད་དུ་མའི་རྐྱེན་གྱིས་བསྐྱེད་པའི་ཕྱིར་རོ། །ཐམས་ཅད་དུ་དོན་གཅིག་བྱེད་པའི་འབྲས་བུ་འཕེལ་པ་དང་འགྲིབ་པའི་རྒྱུ་ནི་ལྷན་ཅིག་བྱེད་པའི་རྒྱུའི་ཚོགས་པ་ཉིད་དུ་ཁྱད་པར་དུ་སྐྱེད་པ་ཡིན་ནོ་ཞེས་བྱའོ། །འདི་དག་དོན་གཅིག་བྱེད་པ་ཡང་དེ་ལ་ལྷན་ཅིག་བྱེད་པ་ཡོད་ན་ཁྱད་པར་དུ་སྐྱེད་པ་མཚན་ཉིད་ཡིན་ནོ་ཞེ་ན། སྐད་ཅིག་མ་དེ་ལ་ཞེས་བྱ་བ་སྨོས་ཏེ། ཐ་མའི་བྱེ་བྲག་ཏུ་བྱེད་པར་མི་ནུས་པ་ཉིད་ན་ལྷན་ཅིག་བྱེད་པས་ཀྱང་ཁྱད་པར་དུ་བྱེད་པ་མ་ཡིན་ནོ། །གང་ལས་ཁྱད་པར་དུ་བྱེད་པར་མི་ནུས་ཤེ་ན། གཅིག་ལ་ཞེས་བྱ་བ་སྨོས་ཏེ། ངོ་བོ་ཉིད་གཅིག་ལ་ཆ་ཤས་དབྱེར་མེད་པ་དེ་ལ་འདི་ཁྱད་པར་དུ་མི་བྱེད་པ་ནི་ཆར་མི་བྱེད་པའོ། །རང་གི་རྒྱུ་ལས་སྐྱེས་པ་འདི་ལྷན་ཅིག་བྱེད་པས་ཁྱད་པར་དུ་བྱེད་པའི་ཕྱིར་བྱེ་བ་ཡོད་པ་མ་ཡིན་ནོ། །གལ་ཏེ་དབྱེར་མེད་པ་ལ་ཁྱད་པར་ཡོད་ན་ཅིའི་ཕྱིར་མི་བྱེད་ཅེ་ན། ཁྱད་པར་དུ་འབྱུང་བའི་མཚན་ཉིད་ནི་ངོ་བོ་ཉིད་གཞན་འབྱུང་བའི་ཕྱིར་རོ་ཞེས་བྱ་བ་སྨོས་སོ། །ཆ་མེད་པ་ག་ལ་ཡིན་ངོ་བོ་ཉིད་གཞན་རྣམ་པར་འཇོག་པ་ན་བདག་ཉིད་ལས་གཞན་པའི་ཁྱད་པར་ཡོད་པ་ཡིན་ནོ་ཞེ་ན། ངོ་བོ་གཞན་འབྱུང་ན་ཞེས་བྱ་བ་ལ་སོགས་པ་སྨོས་ཏེ། གང་གི་ཚེ་དངོས་པོ་གཞན་པའི་མཚན་ཉིད་ཁྱད་པར་དུ་འགྱུར་བ་དེའི་ཚེ་ཐ་མའི་རྒྱུ་ཉམས་པ་ཡིན་ཏེ། གལ་ཏེ་ཉེས་པ་ཅི་ཞིག་ཡོད་ཅེ་ན། དེའི་ཕྱིར་ཐ་མ་མ་ཡིན་པའི་ཕྱིར་མངོན་སུམ་གྱི་རྒྱུར་མི་འགྱུར་རོ། །དེ་ལྟ་བས་ན་གང་གི་ཕྱིར་རྒྱུའི་གཙོ་བོ་ནི་ལྷན་ཅིག་བྱེད་པ་རྣམས་མ་ཡིན་ནོ། །དངོས་སུ་ཁྱད་པར་དུ་སྐྱེད་པའི་ཕྱིར་དོན་གཅིག་བྱེད་པ་ཉིད་ལྷན་ཅིག་བྱེད་པ་ཡིན་ནོ། །འོ་ན་ནི་ལྷན་ཅིག་བྱེད་པ་རྣམས་ཁྱད་པར་དུ་སྐྱེད་པ་མི་བདེན་ན་འབྲས་བུ་སྐྱེད་པའི་ནུས་པ་དེ་དག་མི་རིགས་སོ་ཞེ་ན། དེ་དག་ཅེས་བྱ་བ་ལ་སོགས་པ་སྨོས་ཏེ། གལ་ཏེ་དེ་དག་གི་ངོ་བོ་ཉིད་ཀྱི་ནུས་པས་སྐྱེ་བ་དེ་དང་དེ་དག་ལྷན་ཅིག་བྱེད་པ་དག་གི་ནུས་པ་ལས་སྐྱེ་བར་ཁས་བླངས་པའི་ཕྱིར་རོ། །ཇི་སྲིད་ཐ་མའི་ངོ་བོ་ཉིད་ཀྱི་ནུས་པ་ནི་རྐྱེན་དང་ལྷན་ཅིག་ཏུ་སྐད་ཅིག་མ་ཙམ་ཐོགས་ནས་དེ་དག་སྐད་ཅིག་མ་གཅིག་ལ་སྐྱེད་པ་ངེས་པའི་ཕྱིར་རོ། །དེས་ན་སྔོན་དང་ཕྱི་མ་ཐ་
དད་པའི་ངོ་བོ་མེད་པ་གང་གི་མཇུག་ཐོགས་སུ་འབྲས་བུ་འབྱུང་ཞིང་སྐྱེད་ཀྱི་དུས་གཞན་དུ་ནི་མ་ཡིན་ནོ། །དེ་ལ་ནི་དེ་རྣམས་ལའོ། །རྣམ་པ་དེ་ལྟ་བུ་རྣམས་ལ་བྱ་བ་གཅིག་པ་ཁོ་ནའི་ལྷན་ཅིག་བྱེད་པ་ཉིད་ཡིན་གྱི་ཁྱད་བར་དུ་སྐྱེད་པའི་མཚན་ཉིད་མ་ཡིན་ཏེ། ངོ་བོ་ཉིད་ཀྱིས་ནུས་པའི་དངོས་པོ་དང་ཕན་ཚུན་འགལ་བས་ནུས་པ་ལས་སྐྱེད་པར་ཁས་ལེན་པར་རིགས་པ་མ་ཡིན་ནོ་སྙམ་དུ་གཞན་དག་སེམས་ནས། གལ་ཏེ་ནུས་པ་དེ་དག་གང་ལས་ཞེས་བྱ་བ་སྨོས་སོ། །གྲུབ་པའི་མཐའ་སྨྲ་བས་རང་གི་རྒྱུ་དག་ལས་ཞེས་བྱ་བ་སྨོས་ཏེ། གཞན་གྱི་འདོད་པ་ལ་ལྟོས་ནས་འདིར་ངོ་བོ་ཉིད་ཅེས་བྱ་བ་བཤད་དོ། །གཞན་དག་སྐྱེད་པ་ལ་རྒྱུ་དང་ལྷན་ཅིག་པ་རྣམས་ཀྱི་ནུས་པ་འདོད་ན་ནི་དེ་དགག་པའི་ཕྱིར་གཞན་ལ་ངོ་བོ་ཉིད་ཅེས་བརྗོད་ཀྱི་ངོ་བོ་ཉིད་ཅུང་ཟད་ཅིག་སྐྱེད་པ་མེད་དེ། དེའི་རྒྱུ་གཅིག་ཉིད་དུ་ཐལ་བར་འགྱུར་བའི་ཕྱིར་རོ། །དོན་གཅིག་བྱེད་པར་ངེས་པའི་སྐད་ཅིག་མ་ནི་མི་རིགས་ཏེ། མཐའ་མའི་སྐད་ཅིག་མ་འབའ་ཞིག་དང་འདྲ་བ་མཐོང་བའི་ཕྱིར་རོ། །འདི་ལྟར་འདི་ལྟ་བུའི་ངོ་བོ་དང༌། འདི་ལྟ་བུའི་ངོ་བོ་མ་ཡིན་པ་ཞེས་མཐོང་བ་དང་མ་མཐོང་བ་དག་ལས་རྣམ་པར་འབྱེད་པའི་ཕྱིར་རོ། །དེ་ཞིང་ལ་སོགས་པ་ཅི་འདྲ་བ་དེ་ལ་རྐྱེན་གཞན་དང་ཉེ་བ་ལས་ཉེ་བར་དམིགས་པས་དེ་འདྲ་བ་ཉིད་འབའ་ཞིག་དང་ཡིན་ནོ། །དེའི་ཕྱིར་དེ་ལས་གཞན་པ་དང་ལྷན་ཅིག་པ་ལྟ་བུ་འབའ་ཞིག་གི་ནུས་པ་ལས་ཀྱང་མྱུ་གུ་ལ་སོགས་པ་སྐྱེད་པ་ནི་རང་རང་གི་སྐད་ཅིག་མའི་མཇུག་ཐོགས་སུ་སྐྱེ་བ་ཡིན་ནོ། །འབའ་ཞིག་ཀྱང་མྱུ་གུ་ལ་སོགས་པ་སྐྱེད་པའི་ཕྱིར་རང་བཞིན་མི་སྐྱེད་པ་ཡིན་ན། དེའི་ངོ་བོ་ལས་སྐྱེད་པ་ཡིན་ནོ་ཞེས་བྱ་བ་མ་ངེས་པ་ཡིན་ནོ་སྙམ་དུ་བསམས་ནས་གཞན་གྱིས་གལ་ཏེ་དེ་དག་གིས་ཞེས་བྱ་བ་སྨོས་ཏེ། རང་གི་རྒྱུ་ནི་ཞིང་དང་ས་བོན་ལ་སོགས་པ་ལས་གཞན་པའི་ནུས་པ་ལས་གཞན་པའི་རྐྱེན་གཞན་ཉེ་བ་ཁོ་ནས་སྐྱེད་ལ་ཅིའི་ཕྱིར་འབའ་ཞིག་པས་མ་ཡིན། ལྷན་ཅིག་བྱེད་པ་ནི་ཐམས་ཅད་ཀྱི་ཚེ་མི་སྲིད་པའི་ཕྱིར་རོ་སྙམ་ན། རེས་འགའ་ཞིག་ནི་ཞེས་བྱ་བ་སྨོས་ཏེ། དུས་འགའ་ཞིག་གི་ཚེའོ། །གཞན་དུ་ཡང་ནི་འབའ་ཞིག་པ་ལས་ཀྱང་འབྱུང་བར་འགྱུར་རོ། །འདི་ལྟར་
ནང་གི་བདག་ཉིད་དང་ཕྱི་རོལ་དུ་མཐོང་སྟེ་ལ་ལར་འབྲས་བུ་ཅི་འདྲ་བ་དང་ལྟན་ཅིག་པ་གང་དེ་འདྲ་བ་ཉིད་དེ་སྤངས་པའི་འབའ་ཞིག་པས་ཀྱང་སྐྱེད་པར་འགྱུར་བའི་ནུས་པ་ལ་རྐྱེན་ཅི་ཞིག་ཡོད་ཅེ་ན། དེས་ན་འབའ་ཞིག་ཁོ་ན་ཞེས་བྱ་བ་སྨོས་ཏེ་གཅིག་ཀྱང་སྐྱེད་པར་བྱེད་པ་སྲིད་པས་དུ་མ་ཉི་ཚེ་ནི་མ་ཡིན་ནོ། །འགའ་ཞིག་ཏུ་ཡུལ་ལ་སོགས་པའི་ནུས་པས་སྐྱེད་པ་ནི་ཞིང་དང་ས་བོན་ལ་སོགས་པ་འབྲས་བུ་སྐྱེད་པའོ། །གང་གི་ཚེ་དེའི་རང་བཞིན་ནི་གདོན་མི་ཟ་བར་སྐྱེད་པ་ན་འབའ་ཞིག་སྐྱེད་པ་མ་ཡིན་ནོ། །དེའི་རང་བཞིན་སྲིད་ན་ཡང་དེ་ལས་གཞན་དག་མ་ངེས་པ་ཡིན་ནོ་ཞེས་ཟེར་བའི་ལན་ནི་འདི་ཡིན་ཏེ་གཞན་དང་གཞན་ལ་ཞེས་བྱ་བ་ལ་སོགས་པ་སྨོས་ཏེ་གཞན་དང་གཞན་སྦྱར་ནས་ཁུར་ཁྱེར་པའི་སྐྱེས་བུའི་འབད་པས་སྒྱེ་ལ་སོགས་པར་བཅུག་ན་ཞིང་དུ་འགྲོ་བ་དང་བཙུགས་པ་ལ་སོགས་པའི་རྐྱེན་ཕྱིས་སྦྱོར་བ་གང་ཡིན་པ་དེ་ནི་རྒྱུ་སྐད་ཅིག་མ་ཐ་དད་པའི་ནུས་པ་ནི་རེས་འགའ་ཞིག་ཀྱང་སྔ་མ་དང་ཕྱི་མའི་དུས་སུ་འབྱུང་བ་ནུས་པ་གཅིག་པ་མ་ཡིན་ནོ། །གཞན་དང་གཞན་རྐྱེན་ལྡན་པའི་མཚན་ཉིད་རྒྱུ་ཐ་དད་པ་ཡང་ནུས་པ་ཐ་དད་པ་ནི་རྒྱུ་མེད་པར་ཐལ་བར་འགྱུར་རོ། །གཞན་ཡང་འབྲས་ལ་སོགས་པའི་ས་བོན་གྱི་ནུས་པ་ཐ་དད་པ་ནི་རྒྱུ་མེད་པར་ཐལ་བར་འགྱུར་རོ། །གཞན་ཡང་འབྲས་ལ་སོགས་པའི་ས་བོན་གྱི་ནུས་པ་ཐ་དད་པའི་རྒྱུ་ཐ་དད་པ་དང་འབྲེལ་པའི་ཕྱིར་འདུ་བྱེད་པ་དང་ཉེ་བར་ཚོགས་པའོ། །རྐྱེན་གྱི་བྱེད་པ་རྒྱུད་མ་ལས་རྒྱུ་འབྱུང་ངོ༌། །གལ་ཏེ་ཁ་དོག་དང་དབྱིབས་སམ་གཞན་པ་མཚུངས་པ་ནི་མེད་དེ་རྣམ་པ་ཅུང་ཟད་ཅིག་འདྲ་བས་རྣམ་པ་གཅིག་ཏུ་ཤེས་པ་སྐྱེད་པའི་མཚན་ཉིད་མཚུངས་པའི་ངོ་བོ་དེ་དག་ཡིན་པའི་ཕྱིར་འདྲ་བ་དང་མཚུངས་པར་རྟོགས་པ་ངོ་ཤེས་པ་ཡིན་ནོ། །དེ་ལྟར་བཅོས་མ་དང་མ་བཅོས་པའི་ནོར་བུ་དང་མུ་ཏིག་ལ་སོགས་པ་རྐྱེན་གཞན་དང་འབྲེལ་པའི་མཚན་ཉིད་ཚོགས་པ་ཐ་དད་པས་ཐ་དད་པ་ཉིད་དེ། མི་འདྲ་བ་ཉིད་ལ་ངོ་བོ་ཤེས་པའི་དབང་གིས་ཐ་མི་དད་པ་ནི་མ་ཡིན་ཏེ། ས་བོན་ལ་སོགས་པ་འདི་དག་གི་རང་བཞིན་མཚུངས་པའོ། །དེ་ལྟར་ན་གང་གི་ཕྱིར་ངོ་བོ་ཐ་དད་པས་ནུས་པ་ཐ་དད་པ་གཞན་དང་གཞན་པའི་ཚོགས་པ་སྐྱེད་པ་ཉིད་ཀྱིས་སྐད་ཅིག་མ་གྲུབ་
པོ། །གང་ཅུང་ཟད་ཅིག་ཞིང་དང་ས་བོན་ལ་སོགས་མྱུ་གུ་ལ་སོགས་པ་འབྲས་བུ་འགའ་ཞིག་དེས་སྐྱེད་པར་ནུས་ཀྱི། ཐམས་ཅད་ཀྱིས་ཐམས་ཅད་སྐྱེད་པ་མ་ཡིན་ནོ། །ཞིང་དང་ས་བོན་ལ་སོགས་པ་མ་ཚོགས་པ་ལ་མྱུ་གུ་སྐྱེད་པའི་རང་བཞིན་ནམ་སྐད་ཅིག་མའི་ནུས་པའི་ངོ་བོ་མེད་པས་དེའི་རང་བཞིན་སྐྱེད་པ་དང་མི་སྐྱེད་པའི་ངོ་བོ་ཡིན་པའི་ཕྱིར་འདིར་མ་ངེས་པ་མ་ཡིན་ནོ། །གང་གི་ཕྱིར་གང་དང་གང་གི་ངོ་བོ་ཡིན་པ་དེ་ནི་རང་གི་རྒྱུས་བསྐྱེད་པ་ཉིད་དེ་དང་འདྲ་བར་འགྱུར་གྱི། དེ་ནི་རྒྱུའི་ངོ་བོ་གཞན་ལ་ལྟོས་པ་མེད་ན་ནི་མ་ངེས་པར་འབྱུང་བར་འགྱུར་ན་ངོ་ཤེས་པའི་འདྲ་བའི་ཡུལ་ལ་ཚོགས་པ་ཐ་དད་པའི་ངོ་བོས་གནོད་པས་ཚད་མ་མ་ཡིན་པ་དེས་ན་འདྲ་བ་གྲུབ་པ་མེད་དོ། །སྐད་ཅིག་མ་ཟད་པས་སྔ་མ་དེ་ཉིད་དེ་དག་གི་གནས་སྐབས་ཀྱི་དངོས་པོ་ཐ་དད་པར་ངེས་པ་ཡིན་ནོ་ཞེས་བྱ་བ་ལ་སོགས་པས་ངོ་ཤེས་པ་མེད་པའི་ཡུལ་གཅིག་པ་མེད་པས་བསལ་ཏོ། །དེ་ལྟར་ནི་མཚུངས་པའི་ངོ་བོ་དང་ཡུལ་ཐ་དད་པའི་སྒོ་ནས་འདི་དག་ཀྱང་དེ་ལ་གཞན་དང་གཞན་ལས་སྐྱེ་བ་ཡིན་ནོ་ཞེས་བྱ་བ་འདི་བཤད་ཟིན་པ་དེ་ཡུལ་བསྟན་པའི་དོན་དུ་འདིར་ཉེ་བར་བཀོད་དོ། །ཅུང་ཟད་ཅིག་འགའ་ཞིག་གི་རྒྱུ་ཡིན་ནོ་ཞེས་བཤད་ཟིན་ཏོ། །དེ་ཅི་སུ་ཞིག་གི་རྒྱུ་ཡིན་ཞེས་བྱ་བའི་ནུས་པ་གཅོད་པ་ནང་གི་བདག་ཉིད་ཅན་རྣམས་ལ་རེ་ཞིག་བསྟན་པ་ནི་དེ་ལ་ཞེས་བྱ་བ་ལ་སོགས་པ་སྨོས་ཏེ། དེ་ལ་ནི་དེ་རྣམས་ལའོ། །སྐད་ཅིག་མ་ཐ་མའི་ནུས་པའི་ངོ་བོའི་སྐད་ཅིག་མའི་དངོས་པོ་རྣམས་ལ་བར་དུ་གཅོད་པ་ཅན་ནོ། །སོགས་པ་སྨོས་པ་ནི་གང་བདག་ཉིད་ཤིན་ཏུ་རིང་བའམ་ཉེ་བ་ལ་སོགས་པའོ། །དེའི་ཡུལ་ཆོད་པ་མེད་པ་གང་ལ་དེ་ཆོད་པ་མེད་པའོ། །ཡུལ་ཆོད་པ་མེད་པ་ལ་སོགས་པ་གང་ཡིན་པ་དེ་ནི་ཡུལ་ཆོད་པ་མེད་པ་སྟེ། གཟུགས་དང་དབང་པོ་ལ་སོགས་པས་ནི་ཡིད་ལ་བྱེད་པ་དང་འདྲ་བའི་དབང་པོ་ལ་སོགས་པའོ། །དེ་ཡང་ཚོགས་པ་ནི་ཚོགས་པ་ཅན་གྱི་མཚན་ཉིད་བཤད་དོ། །ཡུལ་ལ་སོགས་པ་མ་ཆོད་པ་ནི་ཡུལ་དང་འདིར་དབང་པོ་ལ་སོགས་པའི་ཚོགས་པ་དེ་རྣམ་པར་ཤེས་པ་སྐྱེད་པར་ནུས་པའི་རྒྱུ་ཡིན་གྱི་གཞན་ནི་མ་ཡིན་ནོ། །དེ་ཡོད་པ་ཉིད་ནི་དེ་ཡོད་ཀྱི་གཞན་ཡོད་ན་ཡང་མེད་པས་འདི་དག་ཙམ་རྒྱུ་
མཚན་ཡིན་པས་ནུས་པ་དང་མི་ནུས་པ་རྣམ་པར་གཞག་གོ །གང་དབང་པོ་ལ་སོགས་པ་དེ་དག་ཕན་ཚུན་ཉེ་བར་སྡུད་པའོ། །སོགས་པ་སྨོས་པ་ནི་བར་དུ་ཆོད་པ་དང་འགྲིབ་པ་ལ་སོགས་པའོ། །རྟེན་དང་རྒྱུ་དང་རྐྱེན་གྱི་ཁྱད་པར་ལ་དངོས་སུ་བྱེད་པའི་རྐྱེན་ལས་ཐ་དད་པའི་རྣམ་པར་ཤེས་པ་དེ་སྐྱེད་པར་ནུས་པའི་རྒྱུ་ནི་དེ་ཡོད་ན་ཡོད་པ་ཉིད་དུ་མཐོང་བ་ཉིད་དོ། །ནུས་པ་དེ་དག་ལས་བྱུང་བ་ཡིན་ཞེ་ན། རང་གི་ཞེས་བྱ་བ་དེ་ཇི་སྐད་བཤད་པའོ། །དེ་ལ་འདི་འདྲ་བ་དང་ནུས་པ་གང་ཡིན་པ་དེ་གཉི་ག་ཡང་དེའི་རྒྱུར་བཤད་དོ། །གང་བཟླས་ནས་བཤད་པ་ནི་གཞན་དག་རྐྱེན་གཞན་དང་ཉེ་བ་ཉིད་ལས་སྐྱེ་བ་ནི་བརྒྱ་ལ་ཞིག་གཞན་དུ་ཡང་འགྱུར་རོ་ཞེས་བྱ་བ་དེའི་ལན་གདབ་པའི་ཕྱིར་དང་དེ་དག་ནུས་པ་དང་མི་ནུས་པའི་རྒྱུ་དེ་རྣམ་པར་གཞག་པ་ནི་སྔོན་མེད་པ་ནི་དངོས་པོ་ཡུལ་རིང་པའམ་ཤིན་ཏུ་རུང་བར་དུ་ཆོད་པ་ལ་སོགས་པའི་དུས་སོ། །ཕན་ཚུན་རྗེས་སུ་འགྲོ་བ་ལ་སོགས་པའི་རྟེན་དང་རྐྱེན་ཉེ་བ་ན་ཕྱིས་མེད་པ་ནི་དེའི་གནས་སྐབས་དོར་བ་དང་བར་དུ་ཆོད་པ་ལ་སོགས་པ་རྟོགས་པའོ། །སོ་སོར་མེད་པ་ནི་དངོས་པོ་རེ་རེའི་དུས་སུ་ཡོད་པའམ་བདོག་པའི་རྒྱུ་མེད་པའི་ཕྱིར་རོ། །དེའི་ཕྱིར་ནུས་ཀྱང་ངོ༌། །ཀྱང་གི་སྒྲས་ནི་རྒྱུའི་ནུས་པ་མང་པོ་ཡང་སྔོན་དང་ཕྱི་མ་དང་སོ་སོར་ཡོད་པ་ལས་བྱུང་བ་ནི་སྔ་མ་དང་ཕྱི་མ་དང་སོ་སོར་ཡོད་པའི་གནས་སྐབས་ཀྱི་ངོ་བོར་གྱུར་པའི་ཚུལ་གང་དག་ལ་རྐྱེན་གཞན་དང་ཉེ་བ་ལས་ཅིའི་ཕྱིར་སྐྱེ་བ་ཡིན། སྔོན་དང་ཕྱིས་དང་སོ་སོར་ཅིས་ན་མི་སྐྱེད་ཅེས་སྐྱོན་བརྗོད་པ་ན་སྔོན་དང་ཕྱིས་དང་སོ་སོར་སྐྱེད་པའི་མཚན་ཉིད་ལ་དེས་མི་གོ་སྟེ་འབྱར་བ་མ་ཡིན་ནོ། །རེས་འགའ་གཞན་དུ་ཡང་འགྱུར་རོ་ཞེས་གང་བཤད་པ་དེ་ཡང་འདིས་བསལ་བ་ཡིན་ནོ་སྙམ་ནས་དེས་ན་ཞེས་བྱ་བ་སྨོས་ཏེ། གང་གིས་གང་དག་གང་གི་གནས་སྐབས་སུ་ངེས་པ་དེ་ནི་གཞན་དུ་འགྱུར་བ་མེད་དེ་སྐད་ཅིག་མ་ཡིན་པའི་ཕྱིར་རོ། །གང་འབྱུང་བ་དེ་ནི་དེ་ཉིད་མ་ཡིན་པའམ་དེ་དང་འདྲ་བ་གཞན་དང་འདྲ་བར་གྱུར་པ་དེས་ན་རྒྱུས་སོ། །དེ་དག་ནི་དབང་པོ་ལ་སོགས་པའོ། །ཕན་ཚུན་ཉེ་བར་འགྲོ་བ་ནི་གཞན་དང་གཞན་རུང་བའི་ཡུལ་དུ་ཚོགས་པའོ། །བར་དུ་ཆོད་པ་སྤང་བའི་རྒྱུ་གང་ཡིན་པ་དེ་
ནི་རྣམ་པར་ཤེས་པ་སྐྱེད་པར་ནུས་པའོ། །རྒྱུ་ནི་དེའི་ལྷན་ཅིག་བྱེད་པའི་རྐྱེན་དབང་པོ་ལ་སོགས་པའི་ནུས་པ་རྣམས་རང་གི་སྐད་ཅིག་མ་སྐྱེད་པའི་ཕྱིར་རོ། །དེ་ལྟར་བྱེད་པ་དེའི་ནུས་པའི་རྒྱུ་ནི་ཕན་ཚུན་ཉེ་བར་འགྲོ་བ་ལ་སོགས་པའི་རྟེན་པའི་རྐྱེན་གྱི་བྱེ་བྲག་གི་ལྷན་ཅིག་བྱེད་པ་དབང་པོ་ལ་སོགས་པ་ནི་རེས་འགའ་ཞིག་གཞན་དུ་འགྱུར་བ་མེད་དོ། །ཕན་ཚུན་ཉེ་བར་འགྲོ་བ་ལ་སོགས་པའི་རྟེན་རྐྱེན་གྱི་བྱེ་བྲག་མེད་ཀྱང་ཡོད་པ་དེས་ཅི་ཞིག་བརྗོད་པ་ཡིན་ན་རེས་འགའ་ཞིག་གཞན་དུ་འགྱུར་བ་བ་ཡང་ཡིན་པའོ། །དེས་ན་འགའ་ཞིག་ཀྱང་ལ་ལར་སྐྱེད་པ་ཡིན་ནོ་ཞེས་བྱ་བ་ལ་གཞན་དུ་འགྱུར་བ་སྲིད་པས་ཕན་ཚུན་ཉེ་བར་འགྲོ་བ་ལ་སོགས་པའི་རྟེན་པའི་རྐྱེན་གྱི་བྱེ་བྲག་གིས་ཉེ་བར་ལེན་པ་དང་ལྷན་ཅིག་བྱེད་པ་རྣམས་ནུས་པའི་རྒྱུ་ཡིན་ཏེ། དབང་པོ་ལ་སོགས་པ་ཉེ་བར་ལེན་པའི་ནུས་པའི་རྒྱུས་དབང་པོ་ལ་སོགས་པ་སྐྱེད་པས་དེ་མེད་ན་ཡོད་པ་ནི་མི་རིགས་སོ། །ལྷན་ཅིག་བྱེད་པ་གང་གིས་འབྲས་བུ་གཅིག་བྱེད་པར་ངེས་པ་དེ་དང་དེ་མེད་ན་དེ་སྐྱེད་པ་མ་ཡིན་ཏེ་དེ་ཉིད་ཚོགས་པ་གཅིག་ལ་རག་ལས་པ་དེ་མི་སྲིད་པའི་ཕྱིར་རོ། །རྣམ་པ་དེ་ལྟ་བུའི་རྒྱུ་དང་འབྲས་བུའི་དངོས་པོ་སོ་སོར་ངེས་པའི་བདག་ཉིད་རྣམས་ལ་རྩོད་པ་མེད་པ་ནི་གཞན་ལ་ཡང་མཐོང་བར་བསྟན་པ་ནི་ཚུལ་འདིས་ཞེས་བྱ་བ་ལ་སོགས་པ་སྨོས་ཏེ། གང་དག་གཞན་པའི་རྒྱུ་དང་འབྲས་བུའི་དངོས་པོ་སོ་སོར་ངེས་པ་ཚུལ་བཤད་པ་གང་ཡིན་པ་དེ་ནི་གཞན་ལ་ཡང་ཐམས་ཅད་དུ་བལྟ་བར་བྱའོ། །ཐམས་ཅད་ལ་ཞེས་བྱ་བ་བརྗོད་པས་སྐད་ཅིག་མ་མ་ཡིན་པ་རྣམས་ལ་སོ་སོར་ངེས་པར་མ་གྱུར་ཅིག་སྙམ་ན། སྐད་ཅིག་མ་རེ་རེ་ལ་ཞེས་བྱ་བ་ལ་སོགས་པ་སྨོས་ཏེ། གང་ལ་སྐད་ཅིག་སྐད་ཅིག་ལས་གཞན་དང་གཞན་གྱི་རང་བཞིན་ཐ་དད་པའི་རྗེས་སུ་འགྲོ་བ་ཅན་གྱི་ནུས་པ་ལས་འབྱུང་བ་དེ་ལ་འདིར་དོན་གཅིག་བྱེད་པ་སོ་སོར་ངེས་པའི་ལྷན་ཅིག་བྱེད་པར་བལྟའོ། །གང་དག་དངོས་པོ་བརྟན་པ་གཅིག་པུའི་ངོ་བོ་ཅན་དག་ནི་མ་ཡིན་པའོ་གཞན་གྱིས་བརྟགས་པའི་ཕྱིར་རོ། །དེ་རྣམས་ལ་ཡང་བརྟན་པ་ནི་རྒྱུན་ལ་བརྟེན་ནས་བཤད་པའོ། །གཅིག་པུ་སྨོས་པ་ནི་སྐད་ཅིག་མ་གཅིག་ཡོད་པའི་ཕྱིར་བརྟན་པར་འཛིན་ཏོ། །ཅིའི་ཕྱིར་དངོས་པོ་བརྟན་པ་ལས་ཡང་གཅིག་པུའི་
ངོ་བོར་མི་འདོད་དོ་ཞེ་ན། ངོ་བོ་ཉིད་ཅེས་བྱ་བ་ལ་སོགས་པ་སྨོས་ཏེ། སུ་དག་དངོས་པོ་རང་ཉིད་ལས་མི་འབྱུང་ན་བདག་ཉིད་ཁོ་ནའི་ངོ་བོ་གཞན་ལས་འབྱུང་བ་མ་ཡིན་ནོ། །དེའི་ཕྱིར་བསྟན་པའི་དོན་ནི་གལ་ཏེ་འབྲས་བུ་སྐྱེད་པར་ནུས་པའི་རང་བཞིན་ཡིན་པ་དེ་བས་ན་མི་བྱེད་པར་མི་འཐད་དེ། ཐམས་ཅད་དུ་བྱེད་པར་འགྱུར་རོ། །གཞན་དུ་ན་ནུས་པ་མེད་པའི་ངོ་བོ་ཡིན་པ་དེ་ཡང་བྱེད་པ་མི་འཐད་པས་ཐམས་ཅད་དུ་དངོས་པོ་བྱེད་པ་མ་ཡིན་ནོ། །གང་ཡང་དེས་འགའ་ཞིག་བྱེད་པ་རེས་འགའ་མ་ཡིན་པ་མི་རིགས་ཏེ། དེས་ན་སྐད་ཅིག་མ་མེད་པ་དག་དེའི་འབྲས་བུ་བྱེད་པར་ནུས་པའི་ངོ་བོ་ཉིད་ལ་ལྷན་ཅིག་པ་དང་ལྷན་ཅིག་མ་ཡིན་པ་གནས་སྐབས་དག་གཅིག་གི་ངོ་བོ་ཡིན་པའི་ཕྱིར་འབའ་ཞིག་པ་དག་ཀྱང་དེའི་འབྲས་བུ་བྱེད་པར་ཐལ་བར་འགྱུར་བས་དོན་གཅིག་བྱེད་པའི་སོ་སོར་ངེས་པའི་མཚན་ཉིད་ནི་ལྷན་ཅིག་བྱེད་པ་རྣམས་ལས་འབྱུང་བར་ག་ལ་འགྱུར། གཞན་གྱིས་འདིར་གཞན་དང་ལྷན་ཅིག་བྱེད་པ་ཞེས་བྱ་བ་ལ་སོགས་པ་སྨོས་ཏེ་གལ་ཏེ་འབའ་ཞིག་པ་འདི་སྐད་ཅིག་མ་མེད་པའི་ནུས་པའི་ངོ་བོ་ཡིན་པ་དེ་ལྟ་ན་ཡང་གཞན་དང་ལྷན་ཅིག་བྱེད་པའི་འབའ་ཞིག་ནི་མ་ཡིན་ཏེ། འདི་ཡང་འདིའི་ངོ་བོ་གཞན་དང་ལྷན་ཅིག་བྱེད་པ་གང་རང་གི་འབྲས་བུ་བྱེད་པའི་ནུས་པའི་ངོ་བོ་ཡོད་པ་འབའ་ཞིག་གིས་ནི་མ་ཡིན་ནོ་ཞེ་ན། གྲུབ་པའི་མཐའ་སྨྲ་བས་ཅི་འབའ་ཞིག་གིས་ཞེས་བྱ་བ་ལ་སོགས་པ་སྨོས་ཏེ། གཞན་དང་ལྷན་ཅིག་པ་ཉིད་ཀྱི་རང་གི་འབྲས་བུ་བྱེད་ཀྱི་འབའ་ཞིག་པས་མ་ཡིན་ནོ་ཞེས་བྱ་བ་དེ་འབའ་ཞིག་པའི་ངོ་བོས་མི་ནུས་པས་མི་སྦྱོར་གྱི་གཞན་གྱིས་ཡིན་ནོ་སྙམ་དུ་བསམས་ནས་གཞན་འདྲི་པ་ནི་མ་གཏོགས་སོ་ཞེས་དགོངས་ནས་ནུས་ན་ཅིའི་ཕྱིར་མི་སྐྱེད་ཅེས་བྱ་བ་སྨོས་ཏེ། སྐད་ཅིག་མ་མེད་པའི་འབའ་ཞིག་པ་ནུས་པའི་ངོ་བོ་ཁོ་ན་གཞན་དུ་ཡོད་ན་ནི་སྐད་ཅིག་མ་མེད་པ་ཉམས་པ་ཡིན་ནོ། །ནུས་ན་ཅིའི་ཕྱིར་མི་བྱེད། ནུས་ན་མི་བྱེད་པ་ནི་ལྷན་ཅིག་པའི་གནས་སྐབས་ཀྱིས་སྦྱོར་རོ་ཞེས་བྱ་བ་ལྷན་ཅིག་པ་ཁོ་ན་བྱེད་པར་འདོད་ཀྱི་འབའ་ཞིག་པ་ནུས་པ་མེད་པའི་ངོ་བོ་ཡིན་པར་ཁོང་དུ་ཆུད་པར་བྱའོ། །ཡང་ན་འབའ་ཞིག་པ་གལ་ཏེ་མགོ་བོ་གཅོད་པ་དེ་ལྟ་ན་ཡང་མི་བྱེད་དོ་ཞེས་འདོད་ན་མི་བྱེད་ན་ཞེས་བྱ་བ་ལ་སོགས་པ་སྨོས་ཏེ་འབའ་ཞིག་པ་ནི་རེས་འགའ་ཞིག་ཀྱང་འབྲས་བུ་བྱེད་པར་ནུས་པ་མེད་ན། ཇི་
ལྟར་ནུས་པར་བརྟག་པར་བྱ། འདིར་གང་ནུས་པའི་ངོ་བོས་གདོན་མི་ཟ་བར་འབྲས་བུ་བྱེད་པར་ངེས་པ་མ་ཡིན་ཏེ། གཞན་ལ་ཡང་མཐོང་ངོ་སྙམ་དུ་སེམས་ནས་གཞན་གྱིས་གལ་ཏེ་ཐག་པ་ལ་སོགས་པ་ཞེས་བྱ་བ་སྨོས་སོ། །གྲུབ་པའི་མཐའ་སྨྲ་བས་བཞད་གད་བྱེད་པ་ནི་རྩེ་བའི་ངང་ཚུལ་ཅན་ཞེས་བྱ་བ་སྨོས་ཏེ། ལྷ་རྣམས་དགའ་བ་ནི་བློན་པོ་དྲང་པོའོ། །དེ་བདེ་པ་སྐྱེད་པའི་ཕྱིར་དགའ་བའི་རང་བཞིན་ཅན་ནོ། །རྩེ་བ་ནི་བྱིས་པའི་ཆོས་སོ། །དེ་དང་ཆོས་མཐུན་པས་ནི་ཤེས་རབ་ཉམས་པར་བཤད་དོ། །སྐྱིད་དེ་བར་སྐྱེས་པ་ནི་བསྟན་བཅོས་ལ་མི་སྦྱོར་བའོ། །མི་སྦྱོར་བའི་བློ་ངན་པ་གང་ཡིན་པ་དེ་ནི་བྱས་ཀྱང་དངོས་པོ་བརྗོད་པའི་ངང་ཚུལ་ཅན་ཡང་བྱེད་པའོ། །བྱས་པ་ནི་རབ་ཏུ་བརྩམས་པའོ། །ཡང་བྱེད་པ་ཞེས་བྱ་བ་ནི་སླར་ཡང་རྩོམ་པའོ། །གང་ལ་སླར་ཡང་རྩོམ་པར་བྱེད་ཅེ་ན། འདི་ལྟར་ཞེས་བྱ་བ་སྨོས་ཏེ། ས་བོན་བཞིན་དུ་མ་ངེས་པ་ཡིན་ནོ་ཞེས་བྱ་བའི་གནས་སྐབས་དེས་འདི་དག་བསལ་བ་ཡིན་ནོ། །འདི་ཉིད་སྐད་ཅིག་མ་མེད་པའི་ནུས་པའི་ངོ་བོ་ཉིད་ལ་ལྷན་ཅིག་བྱེད་པ་ཉིད་ཀྱིས་འབྲས་བུ་གཅིག་བྱེད་པའི་ངོ་བོ་འགལ་བས་འགའ་ཞིག་བྱེད་པར་འཐད་པ་མ་ཡིན་ནོ་ཞེས་བསྟན་པའི་མཇུག་བསྡུ་བ་ནི་དེ་ལྟ་བས་ན་ཞེས་བྱ་བ་སྨོས་ཏེ། འབྲས་བུ་བྱེད་པར་ནུས་པའི་ངོ་བོ་གཞན་དུ་འགྱུར་བ་མི་སྲིད་པའི་ཕྱིར་རེས་འགའ་ཞིག་ཀྱང་མི་ནུས་པས་ན་མི་སྲིད་པས་དེའི་ཆོས་ཀྱི་འབྲས་བུ་བྱེད་པ་འདི་ལྟ་བུ་ནི་ཐ་མའི་གནས་སྐབས་བཞིན་དུ་ལྷན་ཅིག་བྱེད་པའི་གནས་སྐབས་དངོས་པོའི་འབྲས་བུ་བྱེད་པ་བཟློག་ཏུ་མི་རུང་ངོ༌། གལ་ཏེ་སྐད་ཅིག་མ་མེད་པའི་འབའ་ཞིག་ནི་ནུས་པ་མེད་པ་ཉིད་དེ། དེས་ན་འབའ་ཞིག་ནི་མི་བྱེད་པ་ལྷན་ཅིག་པའི་གནས་སྐབས་འདི་ཉིད་ཀྱི་ནུས་པ་དང་ལྷན་ཅིག་བྱེད་པས་སྐྱེའོ། །དེའི་ཕྱིར་ལྷན་ཅིག་བྱེད་པས་བྱེད་དོ་ཞེ་ན། ཐ་མའི་གནས་སྐབས་ན་ཞེས་བྱ་བ་སྨོས་ཏེ། ནུས་པ་ལས་སྐྱེ་བ་འདྲ་བ་སྔོན་ནུས་པ་མེད་པར་ཡོད་པའོ། །དེའི་ནུས་པ་གང་ཡིན་པ་དེ་ལས་སྐྱེ་བ་དེའི་རང་གི་ངོ་བོ་ཉིད་དུ་སྤྱོད་པ་ལ་སོགས་པ་རྣམས་འདོད་པ་དེ་དག་ནུས་པ་དང་མི་ནུས་པའི་ངོ་བོ་ཐ་དད་པར་མངོན་པར་འདོད་པ་ནི་རྣམ་པ་འགས་ཐ་དད་ཀྱང་དེའི་ངོ་བོ་ཉིད་དུ་རྟོགས་པའི་ཕྱིར་རོ་ཞེས་འདོད་ན་དེ་སྔོན་མེད་པ་སྐྱེ་བ་ཉིད་ཡིན་ནོ། །འོ་ན་མེད་པའི་དངོས་པོ་དེ་སྐྱེད་པ་གང་ཡིན་པ་དེ་ནི་ངོ་བོའི་ནུས་པ་ཡིན་ནོ། །ངོ་བོ་གཅིག་པའི་ནུས་པ་ཉིད་སྔར་མེད་པས་སྐྱེད་པར་མི་ནུས་
ཞེས་པ་མི་རིགས་ཏེ། དེ་དག་ངོ་བོ་ཐ་དད་པར་ཐལ་བར་འགྱུར་ཏེ་ཆོས་འགལ་བ་གནས་པས་མཚན་ཉིད་ཐ་དད་པའི་ཕྱིར་རོ། །གལ་ཏེ་ནུས་པ་དང་ལྡན་པ་སྐྱེད་པ་དང་མི་སྐྱེད་པ་ངོ་བོ་ཉིད་གཅིག་པར་རྟོགས་པ་ཁོ་ན་ཇི་ལྟར་སྤོང་བར་ནུས་པ་ཡིན་ནོ་ཞེ་ན། མ་ཡིན་ཏེ། ཚད་མས་རྟོགས་པ་ལས་གཞན་དུ་རྟོགས་པ་ལ་ཁྱེད་རྗེས་སུ་འབྲང་ན་ཟླ་བ་གཉིས་པ་ལ་སོགས་པ་ཡང་སྤང་བར་མི་བྱའོ། །གལ་ཏེ་གནོད་པར་བྱེད་པའི་ཚད་མ་སྲིད་པས་ཁྱད་དུ་གསོད་པ་ཡིན་ནོ་ཞེ་ན། འདིར་ཡང་ངེས་པ་གཅིག་གི་ངོ་བོ་ལ་སྐྱེད་པ་དང་མི་སྐྱེད་པ་ཕན་ཚུད་འགལ་བས་གནོད་པར་ཅིས་ན་མི་འདོད། རྡོ་རྗེ་རྡོ་བའི་ཆོས་ཅན་དེའི་ངོ་བོས་སྐྱེས་པ་ཡིན་ནོ་ཞེས་རྣམ་པར་འབྱེད་པ་ཉིད་ཀྱི་སྔ་མ་དང་ཕྱི་མའི་དུས་དག་ཟད་པ་མེད་ན་ཇི་ལྟར་ཐ་དད་པར་རྟོགས་པར་འགྱུར། རྣམ་པར་ཤེས་པ་ལ་སོགས་པའི་འབྲས་བུ་མི་སྐྱེད་པ་ཅིག་ཅར་སྐྱེད་པར་ཐལ་བར་འགྱུར་རོ། །གལ་ཏེ་མིག་ལ་སོགས་པ་དང་ཉེ་བ་ལས་སྔོན་ནུས་པ་མེད་པ་ལས་སྐྱེ་བ་ནི་རིམ་པ་དང་ལྡན་པ་ཡིན་ནོ་ཞེ་ན། གལ་ཏེ་དེ་ལྟར་རྣམ་པ་གཅིག་པ་སྔ་མ་དང་ཕྱི་མ་དག་གི་དབང་དུ་བྱས་པ་ངོ་ཤེས་པ་སྐྱེ་བ་ན་སྔ་མའི་ནུས་པ་ཐ་དད་པའི་རྡོ་བ་ལ་སོགས་པའི་གཟུང་བར་བྱ་བ་ལ་ཡང་རྗེས་སུ་དཔག་པའམ་དོན་གྱིས་གོ་བས་གནོད་པས་ཉམས་སུ་མྱོང་བ་ཚད་མ་མ་ཡིན་ནོ་ཞེས་ཁས་བླང་པར་བྱའོ། །དེ་ལྟར་སྐྱེད་པ་དང་མི་སྐྱེད་པའི་ངོ་བོ་གཅིག་པ་འགལ་བའི་ཕྱིར་ནུས་པ་ཁོ་ནས་སྔར་མ་མྱོང་བ་སྐྱེད་དོ། །འདྲ་བ་གཞན་འབྱུང་བ་འཛིན་པར་བྱེད་པ་ན་ཚུ་རོལ་མཐོང་བ་གཅིག་ཏུ་འཁྲུལ་པ་དང་སེན་མོ་ལ་སོགས་པ་བྲེགས་ནས་ཡང་སྐྱེ་བ་བཞིན་དུ་ཅིས་ན་མི་འདོད། འོན་ཏེ་ལྷན་ཅིག་བྱེད་པའི་རྐྱེན་དང་ཉེ་བའི་མཚན་ཉིད་ལས་ནུས་པ་དེའི་ངོ་བོ་ཡིན་པའི་ཕྱིར་སྔོན་མེད་པ་སྐྱེ་བར་ཐལ་བར་མི་འགྱུར་རོ་ཞེ་ན། རིགས་པ་ཅན་ལ་སོགས་པ་གཞན་དག་སྨོས་པ་འདིར་མ་ཡིན་པས་དེའི་ངོ་བོ་མ་ཡིན་པ་ཞེས་བྱ་བ་སྨོས་ཏེ། གཞན་གང་དག་ས་བོན་ལ་སོགས་པ་དོན་གྱི་ནུས་པ་ལྟ་བུ་དེའི་ངོ་བོ་ཡོངས་སུ་སྤངས་ནས་ཕྱི་མའི་བྱེད་པ་པོ་ཉིད་ཀྱང་མ་ཡིན་ནོ། །གང་ལས་ཤེ་ན་ནུས་པ་ཞེས་བྱ་བ་བཤད་པ་ནི་དེ་གཞན་པའི་ལྷན་ཅིག་བྱེད་པའི་རྐྱེན་གྱི་མཚན་ཉིད་གང་ཡིན་པ་དེ་ཉིད་ལ་ཁྱད་པར་གྱི་སྒྲས་བརྗོད་དོ་ཞེས་རིགས་པ་ཅན་གྱིས་ཁས་བླངས་པ་དེ་ཉིད་ཀྱི་ཕྱིར་དེ་ཡོད་ན་ཡོད་པ་ཉིད་ཀྱིས་འབྲས་བུ་སྐྱེད་དོ།།
དེ་ཡང་ལྷན་ཅིག་བྱེད་པའི་རྐྱེན་རྣམས་ནི་སྐད་ཅིག་མ་མེད་པ་གང་ཡིན་པ་དེ་རྣམས་ལ་ཐལ་བར་འགྱུར་བ་འདི་མི་འདོགས་པའི་ཕྱིར་རོ། །སྐད་ཅིག་མ་ཉིད་དོན་གཅིག་བྱེད་པར་ངེས་པའི་མཚན་ཉིད་ལ་ལྷན་ཅིག་བྱེད་པ་ཉིད་འདོད་པར་ཁས་བླངས་སོ། །གཞན་ཡང་སྐད་ཅིག་མ་མེད་པ་རྣམས་ལ་དོན་གཅིག་བྱེད་པས་སོ་སོར་ངེས་པ་བསལ་བའི་རྒྱུ་ལྷག་པ་ནི་གཞན་ཡང་ཞེས་བྱ་བ་ལ་སོགས་པ་སྨོས་ཏེ། སྐད་ཅིག་མ་མེད་པ་དངོས་པོ་གང་ཡིན་པ་འདི་ལྷན་ཅིག་བྱེད་པ་མཐའ་དག་དང་ལྡན་པ་རང་གི་འབྲས་བུ་བྱེད་པར་འདོད་པ་ཡིན་ན། རེ་ཞིག་དེ་དང་དེ་ཉིད་ཅིའི་ཕྱིར་མི་བྱེད། རྒྱུ་གང་གིས་དེའི་འབྲས་བུ་བྱེད་པ་ངོ་བོ་ཉིད་ཀྱིས་དེའི་ཚེ་བྱེད་པ་ཡིན་ནོ། །དེ་ཉིད་བསྟན་པའི་རང་བཞིན་ཡིན་པའི་ཕྱིར་སྔོན་ཡང་བྱེད་པར་འགྱུར་བ་དེས་ན་དོན་གཅིག་བྱེད་པར་སོ་སོར་ངེས་པའི་དངོས་པོར་ག་ལ་འགྱུར། ཇི་ལྟ་བ་དེ་མཐོང་བ་ལ་རིགས་པ་གཞན་བཙལ་བས་ཅི་ཞིག་བྱ། དེ་ལྟར་ན་ཐམས་ཅད་ལ་འདི་མི་རིགས་སོ་སྙམ་དུ་གཞོན་ནུ་མ་ལེན་སེམས་ནས་སྐྱེད་པ་མཐོང་སྟེ་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་དེ་ཉིད་དོན་གཅིག་བྱེད་པ་མཐོང་བ་དེས་ན་མཐོང་བའི་སྟོབས་ཀྱིས་བྱེད་པ་ཡིན་ནོ་ཞེས་ཁོ་བོས་སྨྲའོ། །སྔར་བྱེད་པ་མ་མཐོང་བ་དེས་ན་མི་བྱེད་དོ་ཞེས་བྱ་བ་འདི་མཐོང་བའི་རིགས་པའི་འཐད་པས་ཅི་ཞིག་བྱ་སྙམ་ན། སྐད་ཅིག་མ་མེད་པར་ཁས་ལེན་པ་ལ་དོན་གཅིག་བྱེད་པར་མ་གྲུབ་པའི་ཕྱིར་རོ། །རང་གི་མཐོང་བས་འབྲས་བུ་བྱེད་པ་དེའི་ཕྱིར་འདི་བཤད་པར་རིགས་པ་མ་ཡིན་ནོ་ཞེས་བཞད་གད་བྱེད་པ་ནི་མཐུ་ཆེན་པོ་ཅན་ཞེས་བྱ་བ་ལ་སོགས་པ་སྨོས་ཏེ། མཐུ་ཆེན་པོ་ཅན་གྱི་མཐོང་བ་ནི་ནུས་པ་ཆེན་པོར་གྱུར་པའོ། །གང་གི་ཕྱིར་ཁྱེད་ཀྱི་རྒྱུ་དང་འབྲས་བུའི་དངོས་པོ་འདི་དག་མ་ཚང་བར་མི་འགྱུར་ཏེ། གལ་ཏེ་རྒྱུ་དང་འབྲས་བུའི་ངོ་བོ་ཡིན་པའི་ཕྱིར་དངོས་པོའི་འབྲས་བུ་བྱེད་པ་དེ་ཉིད་ཀྱི་ལན་ཅིས་ན་མི་བརྗོད། གང་གིས་འབྲས་བུ་བྱེད་པ་མཐོང་བ་ལན་དུ་བྱེད་པ་ཡིན་ནོ་སྙམ་ན། རང་གི་ངོ་བོ་ཙམ་གྱིས་བྱེད་པ་ནི་བདག་ཉིད་ཡོད་པ་རྩམ་གྱིས་རྣམ་པ་སྣ་ཚོགས་པ་རྣམས་ལ་སྦྱོར་བར་བྱེད་པ་དེ་ཇི་ལྟར་ནུས་པ་ཆེན་པོ་ཙམ་མ་ཡིན་། འདིར་འགའ་ཞིག་གིས་ཀྱང་ནུས་པ་མ་ཡིན་འོན་ཀྱང་བརྒྱ་ལ་འགའ་ཞིག་ཅི་ཞིག་ལྟར་བསྒྲིབས་པའམ་མི་སྡོད་པ་ལ། །འདིར་ཁྱོད་ཀྱི་ཞེས་བྱ་བ་
ནི་ཞེས་བརྗོད་པའོ། །མཐོང་བ་ལས་འདས་པ་ནི་དེ་ལས་རྒལ་བའོ། །དེ་དང་གཞན་དུ་བརྗོད་པ་འདི་དག་སྐྱེད་པའི་ཆོས་དེ་དང་འདི་ནི་མི་སྐྱེད་པའི་ཆོས་ཡིན་པ་དེའི་ཕྱིར་རྒྱུད་མེད་པར་འགྱུར་བས་འདི་ཁོ་བོ་ཅག་གི་བསམ་པ་ནི་སེམས་ལ་གདུང་བར་བྱེད་དོ། །གཞན་གྱིས་ཁོ་བོ་ནི་དེའི་ཞེས་བྱ་བ་ལ་སོགས་པ་སྨོས་ཏེ། ཁོ་བོ་རྒྱུ་དང་འབྲས་བུའི་ངོ་བོ་སྤངས་ནས། དངོས་པོ་རྣམས་ཁོ་བོ་ཅག་གིས་མཐོང་བའི་དབང་གིས་འབྲས་བུ་བྱེད་པར་ནི་མི་སྨྲ་སྟེ། འོན་ཀྱང་ངོ་བོ་ཉིད་ཀྱིས་དེ་ཡོད་པ་དེ་ལ་འབྲས་བུ་བྱེད་པ་ངོ་བོ་ཡིན་པ་དེའི་ཕྱིར་རང་གི་འབྲས་བུ་བྱེད་པ་དེ་མཐོང་བ་འབའ་ཞིག་མི་སྐྱེད་དེ། །དེ་དག་བྱེད་པ་པོའི་རང་བཞིན་དུ་མཐོང་བ་ནི་ཇི་ལྟར་གནས་པའི་དངོས་པོ་ཤེས་པར་བྱེད་ཀྱི་མེད་པའི་རང་གི་ངོ་བོ་བྱེད་པ་ནི་མ་ཡིན་ནོ་ཞེ་ན། གྲུབ་པའི་མཐའ་སྨྲ་བས་འདི་ཡང་ཡོད་པ་བདེན་པ་ཞེས་བྱ་བ་སྨོས་ཏེ། ཁོ་བོ་ཅག་རིགས་པ་ལ་རྗེས་སུ་ཆགས་པ་རིགས་པར་བརྗོད་པ་ལ་ཅིས་ན་བཏང་སྙོམས་སུ་བྱེད་པ་འདིར་ཡང་ཁྱེད་ཀྱིས་ཐམས་ཅད་ཀྱི་ཚེ་རིགས་པ་བརྗོད་པ་སྤངས་པ་ཡང་རས་འགའ་ཞིག་རིགས་པ་དང་ལྡན་པར་སྨྲ་བ་ལ་དགའ་བ་སྐྱེ་སྟེ། འོ་ན་དེ་ཅི་ཡིན་ཞེས་དྲིས་པ་ན། དེ་དག་འབྲས་བུ་སྐྱེད་པ་ཞེས་བྱ་བ་སྨོས་ཏེ། འབྲས་བུ་སྐྱེད་པའི་ཆོས་ནི་དངོས་པོའི་འབྲས་བུ་བྱེད་པའི་ཆོས་སོ། །རྒྱུ་དེས་ན་རྐྱེན་མཐའ་དག་དང་ལྡན་པ་རྣམས་ནི་ལྷན་ཅིག་བྱེད་པའི་ཚོགས་པའོ། །གང་དག་འབྲས་བུ་མི་སྐྱེད་པར་བཏང་སྙོམས་སུ་གྱིན་འདུག་པ་མ་ཡིན་པར་རྟོགས་པའི་ཕྱིར་ཁྱེད་ཀྱིས་རིགས་པ་བརྗོད་པ་འདི་ཡང་ཡོད་པར་བདེན་ནོ། །འོན་ཀྱང་འདི་དག་འདི་ལྟར་བལྟ་བར་བྱ་སྟེ། ཅི་དེ་དག་མི་སྡོད་པར་སྐྱེད་པའི་ཆོས་ཀྱི་ངོ་བོ་ཉིད་དོ། །ཅི་དེ་དག་ཐ་མའི་གནས་སྐབས་དེ་ཁོ་ནའི་ཚེ་ནི་ཚོགས་པའི་གནས་སྐབས་སུ་གང་དེ་མ་ཐག་ཏུ་འབྲས་བུ་སྐྱེད་པ་དེ་ཁོ་ན་སྐྱེས་པ་ཡིན་ནམ། ཡང་ན་སྔོན་ཡང་ཕན་ཚུན་སྤངས་པའི་གནས་སྐབས་སུ་བྱུང་ཟིན་པ་ཡང་ཡིན། དེ་ལ་དེ་ཉིད་སྐྱེས་པ་ཉིད་ཡིན་ན་མེད་པའི་ངོ་བོ་གཞན་སྐྱེས་པས་འདི་བྱེད་པ་པོ་ཉིད་ཡིན་ན་ནི་སྔར་བཤད་པའི་སྐྱོན་གྱིས་འཇིགས་པས། གཞན་གྱིས་ཡོད་པ་གང་ཞིག་ཡིན། །ཞེས་བྱ་བ་སྨོས་སོ། །འཕོ་བ་དང་སྐྱེས་པ་ནི་འཕོ་
བ་དང་སྐྱེས་པ་སྟེ་དེ་བཀག་པ་ནི་མི་འཕོ་བ་དང་མ་སྐྱེས་པའི་བརྟན་པ་གཅིག་པུའི་ངོ་བོ་གང་དག་གི་དངོས་པོ་དེ་དག་ནམ་ཡང་ངོ་བོ་ཉིད་འགའ་ཞིག་འདིར་དམིགས་པ་མེད་པ་འགལ་བའི་ཕྱིར་རོ། །སྐད་ཅིག་མ་རྣམས་ལ་ཇི་སྲིད་དུ་མཐོང་བའི་ངོ་བོ་ལས་གཞན་དུ་འགྱུར་བ་དེ་སྲིད་དུ་དེ་གཞན་ཡིན་པའི་ཕྱིར་མི་འཕོ་བ་དང༌། མི་སྐྱེ་བ་སྔ་མ་དང་ཕྱི་མའི་ངོ་བོ་རྣམས་བརྟན་པའི་ངོ་བོ་མ་ཡིན་ནོ་ཞེ་ན། འདིར་ད་ནི་ཞེས་བྱ་བ་ལ་སོགས་པ་སྨོས་སོ། །འདིའི་ཚིག་འདི་ཁོ་བོ་ཅག་འདྲ་བའི་ཚིག་ཡིན་ནོ་ཞེས་མི་འདོད་ན་དེའི་ཕྱིར་མི་སྡོད་པར་ཞེས་བྱ་བ་སྨོས་ཏེ། གང་གི་ཚེ་འདི་དག་འདིས་མཚུངས་པར་མི་འགྱུར་བ་དེའི་ཚེ་ལྷན་ཅིག་བྱེད་པ་མཐའ་དག་གི་འབྲས་བུའི་གནས་སྐབས་ལས་སྔར་ཡང་མི་སྡོད་པར་སྐྱེད་པའི་ངོ་བོ་ནི་འབྲས་བུ་བྱེད་པའི་ངོ་བོ་མི་ཐོགས་པའོ། །འབྲས་བུ་མི་སྐྱེད་པ་ཡང་ཡིན་ནོ་ཞེས་སྨྲས་པའི་དོན་ཅི་ཞིག་ཡིན། རེག་པ་ཅན་གྱི་བསམས་པ་དངོས་པོ་རྣམས་ཀྱི་ལྷན་ཅིག་བྱེད་པའི་ཉེ་བ་དང་མི་ཉེ་བ་ལ་ལྟོས་པའི་བྱེད་པ་པོ་མ་ཡིན་པའི་རང་བཞིན་གྱི་རྣམ་པར་གཞག་པ་དང༌། ངོ་བོ་ཉིད་དེས་མི་འཕོ་བ་དང༌། མི་སྐྱེ་བ་བརྟན་པ་གཅིག་པུའི་ངོ་བོ་ཉིད་མ་ཡིན་ལ། སྔར་ཡང་རང་གི་འབྲས་བུ་སྐྱེད་པའི་ངོ་བོ་མ་ཡིན་ནོ། །འོན་ཀྱང་ལྷན་ཅིག་བྱེད་པའི་རྐྱེན་མཐའ་དག་ཉེ་བ་ཡིན་ནོ་ཞེས་དེའི་འདོད་པའི་དོགས་པ་བསུ་བ་ནི། གལ་ཏེ་དེའི་ངོ་བོ་ཉིད་ནི་ཞེས་བྱ་བ་ལ་སོགས་པ་སྨོས་སོ། །དེ་དག་བསལ་བ་ནི་འོ་ན་ནི་འབའ་ཞིག་ཀྱང་གཞན་ལ་ཞེས་བྱ་བ་ལ་སོགས་པ་སྨོས་ཏེ། བརྒྱ་ལ་ལྷན་ཅིག་བྱེད་པས་རང་གི་འབྲས་བུ་སྐྱེད་པའི་ངོ་བོ་འབའ་ཞིག་དང་དེ་ལས་བཟློག་པའི་ངོ་བོ་གཞན་མ་ཡིན་པར་ཅིའི་ཕྱིར་མི་འགྱུར་ཞེ་ན། དངོས་པོ་ཐམས་ཅད་ཐ་དད་པ། །ཞེས་བྱ་བ་སྨོས་ཏེ། དངོས་པོ་ཐ་དད་པ་ནི་དངོས་པོའི་མཚན་ཉིད་ཐ་དད་པའོ། །གལ་ཏེ་དེའི་འབྲས་བུ་སྐྱེད་པར་བྱེད་པ་དང་སྐྱེད་པར་མི་བྱེད་པས་ཐ་དད་པ་ཡིན་ཏེ། འབྲས་དང་ནས་ཀྱི་ས་བོན་བཞིན་དུ་ཇི་ལྟར་དངོས་པོ་ཐ་དད་པར་མི་འགྱུར་ཏེ། ངོ་བོ་ལས་གཞན་པའི་དངོས་པོས་ནི་མ་ཡིན་ཏེ་གང་གི་ཕྱིར་དེ་ཐ་དད་ཀྱང་ཐ་མི་དད་ན་རང་བཞིན་མེད་པར་ཐལ་བར་འགྱུར་བའི་ཕྱིར་རོ། །འོ་ན་ནི་བདག་ཉིད་སྐྱེད་པར་བྱེད་པ་དང་སྐྱེད་པར་མི་བྱེད་པའི་ངོ་བོ་སྤངས་པའི་ཕྱིར་རྐྱེན་གཞན་པའི་ངོ་བོ་ལ་ལྟོས་པའི་
ཕྱིར་སྐྱེད་པར་བྱེད་པ་དང༌། སྐྱེད་པར་མི་བྱེད་པའི་ངོ་བོས་དེ་ཐ་དད་ཀྱང་གང་ལས་དངོས་པོ་ཐ་དད་པར་ཐལ་བར་འགྱུར་རོ། །དེ་གཞན་ལ་ལྟོས་པའི་ངོ་བོ་ཉིད་ཐ་དད་པའི་མཚན་ཉིད་ཡིན་པའི་ཕྱིར་རོ། །ལྷན་ཅིག་བྱེད་པ་ཉིད་ཡིན་ཡང༌། །ཞེས་བྱ་བ་ལ་སོགས་པ་སྨོས་ཏེ། གལ་ཏེ་དངོས་པོ་གང་ཡིན་པ་འདི་ལ་ལྷན་ཅིག་བྱེད་པ་གཞན་མངོན་པར་འདོད་ན་ནམ་ཞིག་ཁྱེད་ཀྱི་ལན་འདི་མི་སླུ་བར་འགྱུར། དེའི་རང་གི་ངོ་བོས་ཉེ་བ་ཡིན་པས་མ་ངེས་པར་འགྱུར་རོ། །རང་གི་ངོ་བོས་མ་ཡིན་ན་འདི་དག་ཡོད་པ་མ་ཡིན་ཏེ། དེ་ལྟར་ན་དངོས་པོ་ནི་དོན་དམ་པར་ན་དེ་ཉིད་གཞན་གྱི་བྱེད་པ་པོར་འགྱུར་གྱི་དེ་ལ་བྱེད་པ་པོ་ཉིད་དུ་བཤད་པ་ནི་རྟོགས་པས་སྤྲུལ་པ་ཉིད་མ་ཡིན་ནོ། །རྟོགས་པའི་རྗེས་སུ་བྱེད་པ་ནི་དོན་བྱེད་པ་གཞན་མེད་དེ་བྲམ་ཟེའི་བུ་ལ་སྲེག་པ་ཉེ་བར་བཏགས་བ་སྲེག་པ་རག་ལས་པ་ནི་མ་ཡིན་ནོ། །དེའི་ཕྱིར་ཕན་མི་འདོགས་པའི་དངོས་པོ་ལ་འབྲས་བུ་ལྟོས་པར་མི་འགྱུར་ཏེ། དེ་སྤངས་པ་ཉིད་ལྷན་ཅིག་བྱེད་པ་རྣམས་ལས་འབྱུང་བའམ། གང་དེ་རྣམས་ལས་ཀྱང་མི་འབྱུང་བས་སོ། །དེ་དག་ཀྱང་གཞན་གྱི་ངོ་བོས་བྱེད་པ་ཡིན་གྱི་རང་ཉིད་བྱེད་པ་མ་ཡིན་པའི་ཕྱིར་རོ། །དེས་ན་ཐམས་ཅད་དུ་རང་ཁོ་ན་བྱེད་པ་པོ་ཉིད་མ་ཡིན་ལ་གཞན་གྱི་ངོ་བོས་ཀྱང་བྱེད་པ་པོ་མ་ཡིན་པའི་ཕྱིར་ཐམས་ཅད་དུ་བྱེད་པ་པོ་མེད་པས་ཅུང་ཟད་ཅིག་ཀྱང་འགའ་ཡང་སྐྱེད་པ་མེད་དོ། །དེའི་གང་གི་ངོ་བོ་ཁོ་ནས་དངོས་པོའི་འབྲས་བུ་བྱེད་ཀྱི་གཞན་གྱི་ངོ་བོས་ནི་མ་ཡིན་པས་ལན་གྱི་གོ་སྐབས་མེད་དོ། །དེས་ན་གཞན་དང་ལྷན་ཅིག་དང་གཞན་འབའ་ཞིག་པ་ཞེས་བྱ་བ་དེ་མི་གཡོ་བ་ཉིད་དོ། །ཡང་རང་གི་ངོ་བོ་གང་གིས་སྐྱེད་པར་བྱེད་པ་འདི་ལྷན་ཅིག་པ་དང་ལྷན་ཅིག་པ་མ་ཡིན་པའི་གནས་སྐབས་དག་ཐམས་ཅད་དུ་ཡོད་པ་དེའི་ཚེ་རང་གི་འབྲས་བུ་སྐྱེད་པར་བྱེད་པ་ཡང་བརྟན་པའི་ངོ་བོ་སྔོན་ཡང་ལྷན་ཅིག་མ་ཡིན་པའི་གནས་སྐབས་དེ་ཁོ་ན་གང་ལྷན་ཅིག་པའི་གནས་སྐབས་ཀྱི་དུས་ལ་མི་སྡོད་པར་སྐྱེད་པའི་རང་བཞིན་དུ་འགྱུར་བར་ཟད་དོ། །དེའི་ཕྱིར་ཇི་ལྟར་རེས་འགའ་ཞིག་མི་སྐྱེད་པར་བྲལ་བ་ཡིན། ཡང་རེས་འགའ་གཞན་གྱིས་སྨྲས་པ་རང་གི་རྒྱུ་འདི་རྐྱེན་གཞན་ལ་ལྟོས་ནས་རང་གི་འབྲས་བུ་སྐྱེད་པ་ན་ངོ་བོ་ཉིད་ཀྱིས་སྐྱེའོ་ཞེས་བྱ་བ་འགའ་ཞིག་གིས་བྱེད་པ་ནི་མ་ཡིན་ནོ། །
ལྷན་ཅིག་བྱེད་པ་དང་ལྷན་ཅིག་བྱེད་པ་མ་ཡིན་པའི་གནས་སྐབས་འདི་ངོ་བོ་ཐ་དད་པ་རྐྱེན་གཞན་ལ་ལྟོས་ནས་རང་གི་འབྲས་བུ་སྐྱེད་པའི་རང་བཞིན་ནི་ཐམས་ཅད་དུ་མེད་པ་དེའི་ཕྱིར་ལྷན་ཅིག་པ་ཉིད་དེ་ཡིན་ན་ཡང་ཞེས་བྱ་བ་ལ་སོགས་པ་སྨོས་ཏེ། རང་གི་ངོ་བོ་ཉིད་ཀྱིས་བྱེད་པ་ཡིན་པའི་ཕྱིར་དང་དེ་སྔོན་ཡང་ཡོད་པའི་ཕྱིར་རོ། །རྐྱེན་གཞན་ལ་ལྟོས་པ་དེ་ལས་ཐོབ་པས་དེའི་བདག་ཉིད་ཕུལ་དུ་བྱུང་བ་མི་སྐྱེད་པ་ཕན་འདོགས་པའི་མཚན་ཉིད་འདི་མི་རིགས་པའི་ཕྱིར་རོ། །དེ་ལྟ་མ་ཡིན་ན་ཧ་ཅང་ཐལ་བར་འགྱུར་བས་འབའ་ཞིག་འབྲས་བུ་བྱེད་པ་སེལ་བར་མི་འགྱུར་རོ། །ཇི་ལྟར་ལྷན་ཅིག་བྱེད་པ་དང་ལྷན་ཅིག་བྱེད་པ་མ་ཡིན་པའི་གནས་སྐབས་ཀྱི་དངོས་པོ་ཐ་དད་པར་མི་འགྱུར་བའི་ཕྱིར་རྐྱེན་གཞན་ལ་ལྟོས་པའི་རང་གི་འབྲས་བུ་བྱེད་པའི་རང་གི་ངོ་བོ་ལ་ཡང་གཞན་གྱི་ངོ་བོས་བྱེད་པ་པོ་ཡིན་ཏེ། རྐྱེན་གཞན་དང་ཉེ་བར་རྟོགས་པའི་དུས་སུ་བྱེད་པ་པོ་ཉིད་ཡིན་གྱི་སྔོན་མ་ཡིན་ནོ་ཞེས་བྱ་བ་འདིའི་དོན་ཏོ། །དེས་ཀྱང་འདི་རེས་འགའ་ཞིག་འབྲས་བུ་བྱེད་པའི་ངོ་བོ་ནི་ཐམས་ཅད་དུ་མ་ཡིན་ནོ་ཞེས་བརྗོད་ན། ཇི་ལྟར་ཐམས་ཅད་དུ་རང་གི་འབྲས་བུ་སྐྱེད་པའི་རང་བཞིན་དུ་འདི་བཤད་པར་འགྱུར། འོ་ན་ནི་དེ་ལྟར་ངོ་བོ་ཐ་དད་པ་ཉིད་དུ་དེ་དང་དེ་མ་ཡིན་པའི་དུས་སུ་སྒྲུབ་པར་འགྱུར་རོ། །དེའི་ཕྱིར་སྐད་ཅིག་མ་རྣམས་དོན་གཅིག་བྱེད་པར་ངེས་པའི་མཚན་ཉིད་ལྷན་ཅིག་བྱེད་པ་ཉིད་ཡིན་ནོ་ཞེས་པར་ངེས་སོ། །གཞན་གྱིས་གཞན་དག་སྐྱོན་མཚུངས་པར་བརྗོད་པར་འདོད་པ་ནི་གང་གི་ཞེས་བྱ་བ་ལ་སོགས་པ་སྨོས་པ་ནི་གོ་བླའོ། །གལ་ཏེ་སྐད་ཅིག་མ་རྣམས་དེ་ལྟར་ཡང་ཇི་ལྟར་མི་འགྱུར་ཞེ་ན། ཇི་ལྟ་བུའི་སྐྱེད་པ་ནི་བཤད་ཟིན་ཏོ་ཞེས་བྱ་བ་སྨོས་ཏེ། ལྷན་ཅིག་བྱེད་པ་རྣམས་ཀྱིས་ཐ་མི་དད་པར་སྐྱེད་པར་བྱེད་པས་མཐའ་མའི་རྐྱེན་གྱི་ངོ་བོས་ནུས་པ་ཉིད་དོ། །ལྷན་ཅིག་སྐྱེད་ཀྱང་སྐད་ཅིག་མ་གང་དག་སྔོན་དང་ཕྱིས་དང་སོ་སོར་ནུས་པ་མེད་དོ་ཞེས་བྱ་བ་འདིར་དེ་ཇི་ལྟར་སྐད་ཅིག་མ་ལ་རུང་བ་ཡིན། གང་ལ་མཐའི་སྐད་ཅིག་མ་སྐྱེད་པའི་ངང་ཚུལ་ཅན་གཞན་དུ་འགྱུར། མཐའ་མའི་སྐད་ཅིག་མ་ལས་སྔོན་དང་ཕྱི་མ་དང་ཐ་དད་པའི་ངོ་བོ་གཞན་དུ་འགྱུར་ཏེ། ཐ་མའི་སྐད་ཅིག་མར་གྱུར་པ་དེ་ཉིད་ལྷན་ཅིག་བྱེད་པའི་རྒྱུན་གྱིས་ཕན་འདོགས་པའི་ངོ་བོ་ལ་ལྟོས་ནས་སྐྱེད་པའི་ཆོས་ནི་མ་ཡིན་པའི་ཕྱིར་
སྐད་ཅིག་མ་མེད་པའི་ཕྱོགས་ལ་བཤད་པའི་སྐྱོན་འདིར་མི་འགྱུར་རོ། །སྐད་ཅིག་མ་མ་ཡིན་པའི་ཕྱོགས་ལ་གང་གིས་ཤེ་ན། བྱེད་པ་པོ་དང་བྱེད་པ་པོ་མ་ཡིན་པ་ཞེས་བྱ་བ་ལ་སོགས་པ་སྨོས་ཏེ། བྱེད་པ་པོ་ནི་ཐ་མའོ། །བྱེད་པ་པོ་མ་ཡིན་པ་ནི་དེ་ལས་གཞན་པ་དེ་དག་གི་ངོ་བོའོ། །ཐ་དད་པ་དེ་ཡང་ཐ་མི་དད་པར་བརྗོད་པར་འདོད་པ་ན་གཅིག་པ་ཉིད་དུ་བརྗོད་ལ། དེ་ལྟར་ན་བྱེད་པ་པོ་ནི་གང་མཐའ་རྒྱུ་ལས་སྐྱེས་པ་དང་བྱེད་པ་པོ་མ་ཡིན་པ་རྒྱུ་གང་ཡིན་པ་དེ་ནི་གཞན་པ་སྟེ་དེ་ཡང་ཐ་མི་དད་པར་བརྗོད་པར་འདོད་པ་ནི་གཅིག་པ་ཉིད་དུ་བཤད་པ་དེས་ན་བྱེད་པ་པོ་དང་བྱེད་པ་པོ་མ་ཡིན་པ་དེ་དག་གི་ངོ་བོ་དེ་དག་ཆོས་ཅན་གཅིག་ལ་འགལ་བའི་ཕྱིར་རོ། །དེ་ལྟ་ན་དེ་དག་གི་ངོ་བོ་ལ་སྐྱེད་པར་བྱེད་པ་རྒྱུ་ནི་བྱེད་པ་པོ་གཅིག་གི་ངོ་བོ་དང་སྐྱེད་པར་བྱེད་པ་ལས་གཞན་བྱེད་པ་པོ་མ་ཡིན་པའི་ངོ་བོ་སྐྱེད་པར་བྱེད་པ་དེ་དག་ཀྱང་ཆོས་ཅན་གཅིག་པ་འགལ་བས་གཞན་པ་ཉིད་དེ། བྱེད་པ་པོའི་རང་བཞིན་སྐྱེད་པར་བྱེད་པའི་རྒྱུ་ལས་སྐྱེས་པའང་བྱེད་པ་པོ་མ་ཡིན་ཏེ་ངོ་བོ་གཞན་མ་ཡིན་པའི་ཕྱིར་གང་ཞིག་འགྱུར་བ་དེ་ནི་དེ་ཉིད་མ་ཡིན་ནོ་ཞེས་ཐལ་བ་འདིར་མི་འགྱུར་རོ། །གཞན་ཡང་དེ་ལྟ་མ་ཡིན་པ་བརྟན་པའི་ངོ་བོ་རྣམས་ལ་དོན་གཅིག་བྱེད་པར་ངེས་པར་བརྟགས་པའམ་དངོས་པོ་ཉེ་བར་དགོད་པ་ནི་གང་ཞིག་དེའི་ངོ་བོ་ཞེས་བྱ་བ་ལ་སོགས་པའོ། །དངོས་པོ་ལྟོས་ནས་སྐྱེད་པའི་ཆོས་ཀྱི་ངོ་བོ་ནི་ཐམས་ཅད་ཀྱི་ཚེ་སུ་ཡང་མི་བརྗོད་ཀྱི་ལྷན་ཅིག་བྱེད་པ་ཉེ་བ་ལ་ལྟོས་ནས་དངོས་པོ་རྣམས་བྱེད་པ་པོར་རྣམ་པར་འཇོག་ན་བདག་ཉིད་ཀྱིས་མ་ཡིན་པའི་ཕྱིར་རང་ཉིད་བྱེད་པ་པོ་མ་ཡིན་ན་གཞན་གྱི་ངོ་བོས་བྱེད་པ་པོ་མི་རིགས་པས་བྱེད་པ་པོ་རྒྱུན་ཆད་པར་ཐལ་བར་འགྱུར་རོ། །རྣམ་པ་དེ་ལྟ་བུ་དེ་ནི་རང་གི་ངོ་བོས་རེས་འགའ་ཞིག་ལྷན་ཅིག་བྱེད་པའི་འབྲས་བུ་ལ་མི་ལྟོས་སོ། །གང་གཞན་ལྷན་ཅིག་པ་དང་གཞན་འབའ་ཞིག་པ་ནི་བྱེད་པ་པོ་མ་ཡིན་པ་ཐ་དད་པར་འགྱུར་རོ། །གལ་ཏེ་དེ་ལྟ་ན་དེ་ཐམས་ཅད་དུ་དེའི་ངོ་བོ་འབྲས་བུ་བྱེད་པ་ཅིས་ན་མ་ཡིན་ཞེ་ན། འབྲས་བུ་རྐྱེན་གཞན་ལ་ལྟོས་པའི་ངོ་བོ་དེས་དེ་ལ་སྐྱེད་པར་བྱེད་པ་ཉིད་དུ་གནས་སུ་ཟིན་ཀྱང་འབའ་ཞིག་པ་ལས་མི་འབྱུང་བ་དེ་འདིར་འབྲས་བུ་ཁོ་ནའི་སྐྱོན་ཡིན་ཏེ། གང་དེ་ལ་འབའ་ཞིག་སྐྱེད་པར་བྱེད་པར་གནས་སུ་ཟིན་ཀྱང་རྐྱེན་གཞན་ལ་ལྟོས་པའི་ཕྱིར་རོ། །དེའི་ཕྱིར་
དེའི་འབྲས་བུའི་བདག་ཉིད་ལྷན་ཅིག་བྱེད་པ་རྣམས་ཁོ་ན་ལས་སྐྱེ་བས་དོན་གཅིག་བྱེད་པའི་མཚན་ཉིད་ལྷན་ཅིག་བྱེད་པ་ཉིད་སྐད་ཅིག་མ་མ་ཡིན་པ་ལ་ཡང་འཐད་པའི་ཕྱིར་རོ་ཞེ་ན། གྲུབ་པའི་མཐའ་སྨྲ་བས་སྔ་མའི་སྐྱོན་ལས་མ་འདས་པར་བསྟན་པ་ནི་དེ་ལྟ་ན་ཡང་ཞེས་པ་སྨོས་ཏེ། རྒོལ་བས་ཇི་ལྟར་དེ་རྟག་པར་མངོན་པར་འདོད་པའི་དངོས་པོ་འབའ་ཞིག་གིས་སྐྱེད་པ་ནི་མི་ཐོགས་པར་སྐྱེད་པའི་ཆོས་ཀྱི་ངོ་བོ་ཉིད་ཡོད་དོ་ཞེས་བརྗོད་པས་ལྷན་ཅིག་པ་ཉིད་ལས་འགྱུར་ཏེ། ཚོགས་ཀྱི་ངོ་བོས་སྐྱེད་པ་ཡིན་ནོ་ཞེས་བརྗོད་པ་དེའི་ཕྱིར་འབའ་ཞིག་པ་ལས་མ་ཡིན་ཏེ་དེའི་གནས་སྐབས་འགལ་བ་ཡིན་པར་སྔར་བཤད་དོ། །འདི་ལྟར་གང་ལ་མི་ཐོགས་པར་སྐྱེད་པའི་ཆོས་དེ་ནི་གདོན་མི་ཟ་བར་འདིས་འབྲས་བུ་བྱེད་པ་ཡིན་ནོ། །གདོན་མི་ཟ་བར་བྱེད་པའི་རང་བཞིན་མ་ཡིན་པ་ཇི་ལྟར་ཐོགས་པ་མེད་པའི་ངོ་བོ་ཡིན། མི་ཐོགས་པ་ལས་འབྲས་བུ་མཐོང་བས་ཐོགས་པ་མེད་པར་སྐྱེད་པའི་ངོ་བོར་ཁྱོད་དུ་ཆུད་པར་བྱའི་གཞན་དུ་ནི་མ་ཡིན་ནོ་སྙམ་པའི་གཞན་གྱིས་བསམས་པའི་དོགས་པ་བསུ་བ་ནི་གལ་ཏེ་འབའ་ཞིག་ཅེས་བྱ་བ་ལ་སོགས་པ་སྨོས་ཏེ། ཁོ་བོ་ནི་འབའ་ཞིག་བྱེད་དོ་ཞེས་མི་སྨྲ་སྟེ་འོན་ཀྱང་མི་སྡོད་པར་སྐྱེད་པའི་ངོ་བོ་ཡིན་ནོ་ཞེ་ན། འདིར་དང་ནི་ཇི་ལྟར་ཞེས་བྱ་བ་ལ་སོགས་པ་སྨོས་ཏེ། གལ་ཏེ་བྱེད་པ་ཉིད་ཀྱང་མི་འདོད་ན་ཇི་ལྟར་མི་སྡོད་པར་སྐྱེད་པའི་ངོ་བོ་ཡིན་པར་བརྗོད། འོན་ཏེ་དེ་ལྟར་ཡིན་ནོ་ཞེས་སྨྲ་ན། དེའི་ཚེ་འདི་སྐད་དུ་བརྗོད་པ་འདིས་ཡོངས་སུ་བསྟན་པར་བྱས་པ་མ་ཡིན་ནམ་ཅི་ཤིག་དེ་སྐྱེད་པ་ཡིན་སྙམ་ན། དེ་ཉིད་མི་སྡོད་པར་སྐྱེད་པའི་ངོ་བོའོ། །གང་དང་གང་སྐྱེད་པ་ཡིན་པ་དེ་གདོན་མི་ཟ་བར་སྐྱེད་པའི་ངོ་བོར་དེ་ཇི་ལྟར་འགྱུར། གང་འབྲས་བུ་འདི་ཉིད་གཞན་ལ་རག་ལས་པས་སྐྱེད་པ་བྱེད་པར་གནས་པ་དེ་ཡང་རྐྱེན་གཞན་ལ་རག་ལས་པ་ཡིན་ནོ་ཞེས་བྱ་བ་དེ་ནི་རིགས་ཀྱི། གང་གི་ཕྱིར་འབྲས་བུ་ཡང་སྐད་ཅིག་མ་མེད་པའི་དངོས་པོ་འབའ་ཞིག་པས་ནུས་པ་ཡོད་ཀྱང་རྐྱེན་གཞན་ལ་ལྟོས་ནས་ཇི་ལྟར་བཏང་སྙོམས་སུ་འདུག །མི་ལྟོས་པ་མ་ཡིན་ན་ཡང་ཅི་ཞིག་བྱེད། གཞན་ལ་ཞེས་བྱ་བ་སྨོས་ཏེ། རྐྱེན་གཞན་ལ་མི་འཆོལ་བར་ནི་མ་སྤངས་པར་བྱའོ། །དེའི་འབྲས་བུའི་སྟོབས་ཀྱིས་སྐྱེད་པར་འགྱུར་རོ། །གལ་ཏེ་དེ་ལྟར་ཡིན་ན་ཡོད་ཏན་ཅི་ཞིག་ཡོད་ཅེ་ན། དེ་ལྟ་ན་ཞེས་བྱ་བ་སྨོས་ཏེ།
གཞན་ལ་མི་འཆོལ་བར་སྟོབས་ཀྱིས་རང་གི་འབྲས་བུ་སྐྱེད་པ་འདིས་འབའ་ཞིག་པ་ལ་ཡང་ནུས་པ་ཡོད་པ་གང་ཡིན་པ་དེ་ནི་བདག་ཉིད་འབའ་ཞིག་གིས་ཀྱང་དེ་ནུས་པར་བསྟན་པ་ཡིན་ནོ། །དེ་ལྟ་མ་ཡིན་ན་ལྷན་ཅིག་བྱེད་པ་ཁོ་ན་བྱེད་པས་འབའ་ཞིག་པས་ཀྱང་རེས་འགའ་ཞིག་ཀྱང་མི་བྱེད་པས་འབའ་ཞིག་པ་འདིས་ནུས་པ་མ་ཡིན་ནོ་ཞེས་གཞན་དག་གི་བློར་འགྱུར་ན་དེ་ལས་འདི་སྤངས་ནས་སྐྱེ་བ་ལྟ་བུའི་ཇི་ལྟར་རྗེས་སུ་འབྲང༌། དེའི་ཕྱིར་འབྲས་བུ་རྐྱེན་གཞན་ལ་ལྟོས་པ་ཡིན་ནོ་ཞེས་བྱ་བ་ནི་མི་རིགས་པར་བརྗོད་དོ། །འབྲས་བུ་གཞན་ལ་ལྟོས་པ་འགལ་བ་དེའི་གནས་སྐབས་བསྟན་པ་ནི་འབྲས་བུ་གཞན་ལ་ལྟོས་ནས་ཞེས་བྱ་བ་ལ་སོགས་པ་སྨོས་ཏེ། འབྲས་བུ་གཞན་ལ་ལྟོས་པར་བརྗོད་པ་འབའ་ཞིག་པའི་རྒྱུས་མི་སྐྱེད་དོ་ཞེས་གདོན་མི་ཟ་བར་སྨྲས་པ་ཡིན་ནོ། །འབའ་ཞིག་པ་ངེས་ཀྱང་ནུས་པའི་ཕྱིར་འབའ་ཞིག་པ་དེ་ལས་ཁྱེད་འབྲས་བུ་སྐྱེད་པ་ཡིན་ལ། འདིས་ཀྱང་གཅིག་ཁོ་ནའི་འབྲས་བུ་ཡིན་པ་དེའི་ཕྱིར་གཅིག་ལ་སྐྱེད་པ་དང་མི་སྐྱེད་པ་ཕན་ཚུན་འགལ་པས་ཇི་ལྟར་འབྲས་བུ་གཅིག་པར་བཤད། ཆོས་ཅན་དེ་ལ་ཆོས་འགལ་བ་གནས་པ་ནི་མཚན་ཉིད་ཐ་དད་པ་ཡིན་པའི་ཕྱིར་གཅིག་པར་བརྗོད་པ་ན་མ་ཡང་ཡིན་ལ་མོ་གཤམ་ཡང་ཡིན་ནོ་ཞེས་བརྗོད་པ་འདི་དག་འདྲ་བར་འགྱུར་བའི་སྔར་བཤད་པའི་སྐྱོན་དེ་ལས་མི་འགྲོལ་ལོ། །གང་གི་ཕྱིར་འདི་ལྟར་བརྗོད་པ་ན་འགལ་བར་བརྗོད་པས་མི་རྟོགས་པ་དེ་ལྟ་བས་ན་སྐད་ཅིག་མ་མེད་པར་བརྗོད་པས་སྐད་ཅིག་མའི་ཕྱོགས་ལ་གནོད་པ་མེད་པས་དེའི་རྩོད་པ་རྣམས་རྫོགས་པར་བསྟན་ཏོ། །མི་བཟོད་པའི་མཚན་ཉིད་ནི་ཕྲག་དོག་གོ །ཟུག་རྡུ་ནི་སྡུག་བསྔལ་གྱི་རྒྱུ་ཡིན་པའི་ཕྱིར་རོ། །དེས་ན་གནད་དུ་བསྣུན་པ་ནད་ཀྱིས་ཟུག་པའོ། །ཕྲག་དོག་གི་ཟུག་རྔུས་གནད་དུ་བསྣུན་པས་མཆོག་ཏུ་ཡིད་མི་བདེ་བ་ཅན་འདི་འགལ་བར་བརྗོད་པས་མི་རྟོགས་པ་ནི་འཆལ་བ་སྟེ། སྔ་མ་དང་ཕྱི་མ་མི་འབྲེལ་པས་འཆོལ་པའོ། །འཁང་བས་འགལ་བར་བྱེད་པའི་ཕྱིར་སེམས་ནི་བདེ་ཞིང་བསྐྱེད་པར་འདོད་པ་མི་གུས་པས་དེའི་སྐྱོན་བརྗོད་པ་ན་མྱུར་དུ་སྡུག་བསྔལ་བསྐྱེད་པས་རྨ་ལབ་ཚ་བཏབ་པ་དང་མཚུངས་པའི་ཕྱིར། མཁས་པ་བློ་དང་ལྡན་པས་བཏང་སྙོམས་སུ་བྱ་བར་འོས་སོ། །དེ་ཉིད་སྐད་ཅིག་
མ་མེད་པ་རྣམས་ལ་རྣམ་པ་འགའ་ཞིག་དོན་བྱེད་པས་ངེས་པའི་མཚན་ཉིད་ཀྱི་ལྷན་ཅིག་བྱེད་པ་ཉིད་སྲིད་པ་མ་ཡིན་ནོ་ཞེས་བསྟན་པའི་མཇུག་བསྡུ་བ་ནི་དེ་ལྟ་བས་ན་ཞེས་བྱ་བ་ལ་སོགས་པ་སྨོས་ཏེ། གང་དག་བརྟན་པའི་ངོ་བོ་སོ་སོར་ཡོད་པ་སྲིད་པ་དེ་དག་སྐད་ཅིག་མེད་པ་རྣམས་སོ་སོར་འབའ་ཞིག་པས་འབྲས་བུ་སྐྱེད་པ་སྲིད་པས་ལྷན་ཅིག་མི་བྱེད་པའི་ཕྱིར་ལྷན་ཅིག་བྱེད་པས་ངེས་པ་མི་རིགས་སོ། །དོན་གཅིག་བྱེད་པའི་མཚན་ཉིད་ཀྱི་ལྷན་ཅིག་བྱེད་པ་ཉིད་འདི་སྐད་ཅིག་མ་རྣམས་ཁོ་ན་ལ་དེ་དག་རང་གི་རྒྱུ་ཡོངས་སུ་གྱུར་པ་དང་ཉེ་བའི་ཆོས་ཕན་ཚུན་ཉེ་བར་ལེན་པ་དང་ལྷན་ཅིག་བྱེད་པའི་རྐྱེན་ཚོགས་པ་གཅིག་པ་སྐྱེད་པ་ཐ་དད་པ་སྲིད་པའི་ཕྱིར་རོ། །འོ་ན་ནི་ཕུལ་དུ་བྱུང་བ་བསྐྱེད་པའི་མཚན་ཉིད་ཀྱང་ལྷན་ཅིག་བྱེད་པ་ཉིད་ལས་འབྱུང་བར་མཐོང་བའི་ཕྱིར་དེ་ཇི་ལྟར་ཐམས་ཅད་ཕུལ་དུ་བྱུང་བསྐྱེད་པའི་ལྷན་ཅིག་བྱེད་པ་མ་ཡིན་ནོ་ཞེས་སྔར་བཤད་པ་ཡིན། དེ་ལྟ་ན་མང་པོ་རྣམས་དོན་གཅིག་བྱེད་པ་ཇི་ལྟར་ཡིན་ཞེ་ན། དེས་ན། གང་དུ་རྒྱུན་དུ་ཕན་འདོགས་པས། །ཞེས་བྱ་བ་ལ་སོགས་པ་སྨོས་ཏེ། དོན་གཅིག་བྱེད་པའི་མཚན་ཉིད་ཀྱི་ལྷན་ཅིག་བྱེད་པ་ཉིད་ཐམས་ཅད་དུ་ཕུལ་དུ་བྱུང་བ་སྐྱེད་པ་ནི་མི་སྲིད་དེ་གང་ལ་རྐྱེན་གྱིས་ཕན་འདོགས་པ་སྔ་མ་སྔ་མའི་རྐྱེན་རྣམས་ལས་སྐད་ཅིག་མ་ཕྱི་མ་ཕྱི་མའི་ཁྱད་པར་ཅན་དང་ཁྱད་པར་ཅན་དུ་སྐྱེད་པ་ཡོད་དེ་ལྷན་ཅིག་བྱེད་པར་བརྗོད་པར་འདོད་པ་འབྲས་བུའི་རྒྱུ་ཡིན་པར་བསྟན་ཏེ། དཔེར་ན་འབྲས་ཐུག་པོ་ཆེ་ལ་སོགས་པ་ལས་འབྲས་ཆན་ལ་སོགས་པ་དང༌། མེ་དང་ཆུ་དང་ས་བོན་ལ་སོགས་པ་ལས་མྱུ་གུ་ལ་སོགས་པ་སྐྱེད་པའི་ས་ལ་སོགས་པ་དེ་ལ་ཁྱད་པར་དུ་སྐྱེད་པའི་རྐྱེན་རྣམས་ལྷན་ཅིག་བྱེད་པར་འཇིག་རྟེན་པ་བརྗོད་པ་ནི་རྒྱུན་ལ་བརྟེན་ནས་སྔ་མ་སྔ་མའི་སྐད་ཅིག་མ་རྣམས་ལས་གཉིས་པ་ལ་སོགས་པའི་ཁྱད་པར་གྱི་མཚན་ཉིད་དང་རྒྱུན་གྱི་འབྲས་བུ་མཚན་ཉིད་དུ་བཤད་པ་ལ་བརྟེན་ནས་སྔ་མ་དང་ཕྱི་མའི་སྐད་ཅིག་མ་དག་ཅིག་ཏུ་མངོན་པར་ཞེན་ནས་དེ་ཉིད་འདི་ཡིན་ཞེས་ཁྱད་པར་དུ་འབྱུང་ངོ་ཞེས་བྱ་བའི་རྫས་ལ་བརྟེན་ནས་མ་ཡིན་ཏེ་དངོས་པོ་ལ་བརྟེན་པ་བཏགས་པ་ཡིན་པ་དེས་ན་དོན་དམ་པ་མ་ཡིན་ནོ། །སྔ་མ་དང་སྔ་མའི་རང་གི་རྒྱུ་ཡོངས་སུ་གྱུར་པ་དང་ཉེ་བའི་ཆོས་རྣམས་ལས་ཕྱི་མ་ཕྱི་མ་ཁྱད་པར་ཅན་དུ་སྐྱེད་དེ་རྒྱུའི་ཚོགས་པ་སྔ་མའི་དོན་གཅིག་བྱེད་པའི་མཚན་ཉིད་ནི་
དོན་དམ་པར་ན་ལྷན་ཅིག་བྱེད་པ་ཉིད་ཀྱིས་ཡིན་ནོ་ཞེས་བྱ་བ་དེ་ལ་ཅུང་ཟད་ཅིག་ཀྱང་ཉམས་པ་མེད་དོ། །ཅིའི་ཕྱིར་རྫས་ལ་བརྟེན་ནས་ཁྱད་པར་དུ་འབྱུང་བ་སྐྱེད་པར་མི་འདོད་ཅེ་ན། སྐད་ཅིག་མའི་རྫས་ལ་ཁྱད་པར་ལས་བྱུང་པ་སྐྱེད་པ་མེད་པའི་ཕྱིར་ཞེས་བྱ་བ་ནི་དེ་ནི་དེ་མ་ཐག་པའི་དངོས་པོ་སྐད་ཅིག་མའི་ངོ་བོ་ཡིན་པའི་ཕྱིར་རོ། །གལ་ཏེ་དེ་ལྟ་ན་འབྲས་ཐུག་པོ་ཆེ་ལ་སོགས་པའི་རྫས་སྐད་ཅིག་མ་ལ་ཁྱད་པར་དུ་མི་སྐྱོའོ། །དེ་མ་ཐག་པ་ལས་ཀྱང་འདིར་མི་འགྱུར་བ་དེའི་ཕྱིར་ཇི་ལྟ་པའི་ཕན་ཚུན་ཁྱད་པར་ཅན་དུ་སྒྲུབ་པ་ཡང་སྐད་ཅིག་མ་དང་ལྷན་ཅིག་པ་ཁོ་ནས་བྱེད་ཀྱི་སྐད་ཅིག་མ་མ་ཡིན་པ་འབའ་ཞིག་པ་ལས་ནི་མ་ཡིན་ནོ། །དེས་ན་དེ་དག་དོན་གཅིག་བྱེད་པའི་མཚན་ཉིད་ནི་ལྷན་ཅིག་བྱེད་པ་ལས་འབྱུང་ངོ༌། །གང་དང་གང་སྔར་བྱེད་པ་པོ་མ་ཡིན་པ་དེ་ནི་ཕྱིས་ཀྱང་མ་ཡིན་ནོ་ཞེས་བརྗོད་པར་མི་ནུས་སོ། །དེ་ལྟ་ནི་སྣང་བ་ལས་མུན་ཁུང་དུ་ཞུགས་པའི་དབང་པོས་དོན་རྟོགས་པར་མི་བྱེད་པ་མང་ཕྱིས་ནས་བྱེད་པ་མཐོང་ངོ༌། །དེ་སྐད་དུ། ཁྱིམ་ལ་སོགས་པའི་ནང་རྣམས་སུ། །སྣང་བ་ལ་ནི་ཞུགས་ཙམ་གྱིས། །དབང་པོས་བཟུང་ཡང་མ་ཡིན་ན། །དོན་སྣང་བ་ནི་མེད་པར་འགྱུར། །ཞེས་བཤད་དོ་ཞེ་ན། དེའི་ཕྱིར་འབྲས་ཐུག་པོ་ཆེ་ལ་སོགས་པ་ཞེས་བྱ་བ་ལ་སོགས་པ་སྨོས་ཏེ། ཉེ་བ་དང་མི་ཉེ་བ་ཡང་མཚུངས་པའི་ཕྱིར་ཁྱད་པར་དུ་མི་སྐྱེད་དེ། མེ་ལ་སོགས་པ་ཡོད་ཀྱང་ཐུག་པོ་ཆེ་ལ་སོགས་པ་ལས་འབྲས་ཆན་ལ་སོགས་པ་མི་བསྐྱེད་པའམ། དེ་བཞིན་དུ་སྣང་བ་ནས་མུན་ཁུང་དུ་ཞུགས་པའི་དབང་པོ་ལ་རང་གིས་ཕན་པ་ལས་རིམ་གྱིས་ཁྱད་པར་དུ་བྱུང་བར་མ་བསྟན་ན་དེའི་ཚེ་སྔ་མ་བཞིན་དུ་ཕྱི་ནས་ཀྱང་དོན་རྟོག་པ་བསྐྱེད་པར་མི་འགྱུར་རོ། །དེའི་ཕྱིར་འབྲས་བུ་སྲིད་པ་གང་ལ་མཐོང་བ་གང་ཡིན་པ་དེ་ནི་དེའམ་གཞན་པ་འབྲས་ཀྱིས་བོན་ལ་སོགས་པ་གསོ་མའི་ས་བོན་ལ་སོགས་པ་དང་ཁྱད་པར་དུ་འབྱུང་བ་མེད་པ་ལས་གཞན་པ་ཉིད་ཁྱད་པར་དུ་འབྱུང་བས་དེའི་འབྲས་བུ་བྱེད་པ་མ་ཡིན་ནོ། །རེ་ཞིག་དེ་ལྟར་ན་གང་ལ་ལྷན་ཅིག་བྱེད་པ་ལས་འབྲས་བུར་འགྱུར་བ་དེ་ལ་ཕུལ་དུ་འགྱུར་པར་བསྐྱེད་པའི་མཚན་ཉིད་དུ་རྟག་པ་དང་ལྷན་ཅིག་བྱེད་པས་དོན་གཅིག་བྱེད་པའི་མཚན་ཉིད་ལ་ཡང་ཡོངས་སུ་བསྟན་ཏོ། །གང་ལ་ཉེ་པ་ཙམ་གྱིས་མི་ཐོགས་པར་ལྷན་ཅིག་
བྱེད་པས་འབྲས་བུ་བྱེད་པ་ཡིན་ནོ། །འོན་ཏེ་དེ་ཡང་རྒྱུན་ལ་བསྟན་ནས་ཕུལ་དུ་བྱུང་བའི་མཚན་ཉིད་ཡོད་པ་ཡིན་ནོ་ཞེ་ན། གང་གི་ཕྱིར་ཐོགས་པ་མེད་པར་སྐྱེད་པ་ཞེས་བྱ་བ་ལ་སོགས་པ་སྨོས་ཏེ། གང་བར་དུ་ཆོད་པ་མེད་པ་ལ་སོགས་པའི་ཡུལ་ལ་དབང་པོ་ལ་སོགས་པ་རང་གི་རྒྱུ་ལས་སྐྱེ་བ་དེ་རྣམས་ལ་དུས་མི་རིང་བར་བྱེད་པ་ཁྱད་པར་དུ་སྐྱེད་པ་མེད་དེ་ཕན་ཚུན་འབྱུང་བ་མ་ཡིན་ཏེ། སྐད་ཅིག་མ་ཡིན་པའི་ཕྱིར་ཞེས་སྔར་བཤད་ཟིན་ཏོ། །གལ་ཏེ་ཁྱད་པར་དུ་མི་སྐྱེད་པ་དེའི་ཚེ་ཇི་ལྟར་ཁྱད་པར་མེད་པའི་ཤེས་པ་རྒྱུ་ལས་འབྱུང་བ་ཡིན་ཞེ་ན། གང་གི་ཕྱིར་དེ་ལ་ཞེས་བྱ་བ་སྨོས་ཏེ། བདག་ཉིད་ཇི་ལྟ་བའི་གང་དང་གང་གི་བདག་ཉིད་ཀྱི་རྐྱེན་ཡོད་པ་ཕན་ཚུན་ཉེ་བར་འགྲོ་བ་བར་དུ་མཆོད་པའི་ཡུལ་ལ་སོགས་པའི་རྟེན་དུ་གྱུར་པ་གང་སྐྱེད་པར་རུང་བ་འདི་ཤིན་ཏུ་ཉེ་བ་དང་ཤིན་ཏུ་བསྐལ་བ་སྤངས་པའི་ཡུལ་ལ་སོགས་པ་གང་ཡིན་པ་དེ་ནི་བར་དུ་མ་ཆོད་པའི་ཡུལ་ལ་སོགས་པ་དེ་ལ་གནས་པ་ཅན་གང་ཡིན་པའོ། །དེ་དག་ལྷན་ཅིག་པའི་ངོ་བོར་གྲུབ་པ་དང་ངོ་བོ་མ་ཡིན་པ་ལས་གྲུབ་པ་ཐ་དད་དོ་ཞེས་ཤེས་པའི་རྒྱུ་བྱེད་པ་ཉིད་དུ་དེ་རྟོགས་ན། དེ་ལ་ཅིས་ན་ཕན་ཚུན་ཁྱད་པར་དུ་སྐྱེད་པ་དོན་དུ་ཉེ་བར་འགྱུར། གལ་ཏེ་རང་གི་རྒྱུ་རྣམས་ཁོ་ན་ཕན་ཚུན་ཉེ་བར་འགྲོ་བ་ལ་སོགས་པ་ལ་རྟེན་པ་རྣམས་རང་གི་འབྲས་བུ་སྐྱེད་པར་རུང་བའི་ཡུལ་ལ་སོགས་པ་ན་གནས་པའི་མཚན་ཉིད་ནི་ཁྱད་པར་དུ་སྦྱོར་ཞིང་སྐྱེད་པར་མི་འགྱུར་ན་ཕན་ཚུན་ཁྱད་པར་སྐྱེད་པ་དེ་དང་འདི་དག་དོན་དུ་གཉེར་བར་བྱེད་ན། རག་གི་རྒྱུ་ཁོ་ན་ལས་རྣམ་པ་དེ་ལྟ་བུ་སྐྱེད་པ་ནི་མ་ཡིན་ནོ། །གང་གི་ཕྱིར་དེ་ལྟ་བས་ན་ཞེས་བྱ་བ་ནི་དེའི་ཕྱིར་ཏེ། དབང་པོ་ལ་སོགས་པ་ཐོགས་པ་མེད་པར་གནས་པ་དོན་གཅིག་བྱེད་པ་ཁོ་ན་གཙོ་བོ་ཡིན་ལ་ལྷན་ཅིག་བྱེད་པ་ཉིད་རྒྱུན་ལ་བརྟེན་ནས་རྣམ་པར་གཞག་པ་ནི་མ་ཡིན་ཏེ་ཁྱད་པར་དུ་འབྱུང་བ་སྐྱེད་པ་ནི་ཕལ་པ་ཞེས་བྱའོ། །འོན་ཏེ་ཁྱད་པར་དུ་སྐྱེས་པའི་མཚན་ཉིད་ལ་ལྷན་ཅིག་བྱེད་པ་ཉིད་ཇི་ལྟར་རྣམ་པར་མི་གཞག །དེ་ཡང་འཇིག་རྟེན་ལ་གྲགས་པའི་ཕྱིར་རྣམ་པར་གཞན་པར་བྱའོ་ཞེ་ན། དེའི་ཕྱིར་གང་ལ་ཞེས་བྱ་བ་སྨོས་ཏེ། འབྲས་བུ་བར་དུ་མ་ཆོད་པ་ལས་སོགས་པའི་ཡུལ་དང་ཉེ་བ་ཙམ་གྱིས་དབང་པོ་ལ་སོགས་པ་ལྟ་བུ་ལྷན་ཅིག་བྱེད་པའི་རྐྱེན་དུ་དེར་རྟོགས་སོ། །འོ་ན་ཀྱང་
བརྗོད་པར་འདོད་པའི་འབྲས་བུ་སྐྱེད་པར་ནུས་པའི་སྐད་ཅིག་མ་རེ་རེ་སོ་སོར་ཕྱེ་ནས་ཁྱད་པར་དུ་བྱེད་པ་མ་ཡིན་ནོ། །དེ་ལ་དུས་རིང་པོ་ནས་འབྱུང་བའི་འབྲས་བུ་བྱེད་པའི་རྒྱུའི་རྒྱུན་སྐད་ཅིག་མ་གཞན་དང་གཞན་དུ་ཡོད་པའི་མཚན་ཉིད་ཡུལ་དུ་བྱུང་བའི་བདག་ཉིད་སྐྱེད་པའི་ཕྱིར་ལྷན་ཅིག་བྱེད་པའི་རྐྱེན་གཞན་ལ་ལྟོས་པ་ཡིན་གྱི་དེའི་དུས་མཚུངས་པའི་སྐད་ཅིག་མ་མ་ཡིན་པའི་ཕྱིར་རོ། །དེའི་ཕྱིར་རྐྱེན་གཞན་པ་དེ་དག་ལས་ངོ་བོ་ཉིད་གཞན་པའི་འབྲས་བུ་སྐྱེད་པར་ནུས་པ་ཁྱད་པར་ཅན་བརྒྱུད་པའི་མཚན་ཉིད་ཐོབ་པའི་རྒྱུན་ལ་འཇིག་རྟེན་གཅིག་པ་ཉིད་དུ་བརྗོད་པར་མོས་སོ། །དོན་དམ་པར་ན་དེ་ལ་ཡང་སྔ་མ་སྔ་མའི་ཚོགས་པ་ལ་ཕྱི་མ་ཕྱི་མའི་འབྲས་བུ་སྐྱེད་པར་ནུས་པ་ཁྱད་པར་ཅན་གྱི་མཚན་ཉིད་སྐད་ཅིག་མ་སོ་སོར་ངེས་སོ་ཞེས་བྱ་བའི་དོན་གཅིག་བྱེད་པའི་མཚན་ཉིད་ནི་ལྷན་ཅིག་བྱེད་པ་ཉིད་ནི་རྗེས་སུ་འབྱུང་ངོ༌། །ཇི་ལྟར་ངོ་བོ་གཞན་ཐོབ་པ་དེ་དག་ཀྱང་གང་གིས་ན་རིམ་གྱིས་འབྲས་བུ་ལྡོག་པར་བྱེད་པ་ཡིན་ཞེ་ན། གང་གི་ཕྱིར་རང་གི་ངང་གིས་ཞེས་བྱ་བ་ལ་སོགས་པ་སྨོས་ཏེ། དེ་ལ་ནི་དེ་ནིའོ། །རྒྱུ་ནི་རྒྱུན་གྱི་རྒྱུ་སྟེ་ཉེ་བར་ལེན་པའི་རྒྱུར་བཤད་པའོ། །རྐྱེན་ནི་ལྷན་ཅིག་བྱེད་པའི་མིང་ཅན་དེ་དག་གོ །སྔ་མ་ནི་གང་ཐོག་མར་ཉེ་བར་ཕྲད་པའོ། །སྐད་ཅིག་མ་དེ་དག་འཇིག་པའི་རྒྱུ་ལ་མི་ལྟོས་པར་རང་གི་ངང་གིས་ལྡོག་པ་ནི་བདེན་པའི་སྐད་ཅིག་མ་དང་པོར་དེ་དག་ཁོ་ན་རང་གི་ངང་གིས་ལྡོག་པ་དང༌། འབྲས་བུ་སྐྱེད་པར་ནུས་པའི་ཁྱད་པར་གྱིས་ཁྱད་པར་ཅན་དུ་བསྐྱེད་དོ། །སྐད་ཅིག་མ་གསུམ་པས་དེ་དག་ཀྱང་ནུས་པ་ཁྱད་པར་ཅན་དང་ལྡན་པའི་མཆོག་དང༌། སྐད་ཅིག་མ་བཞི་པས་དེ་དག་ཀྱང་ནུས་པའི་ཁྱད་པར་ཆེས་མཆོག་དང་ལྡན་པ་དེ་བཞིན་དུ་མཐའ་མའི་བར་དུ་ཕུལ་བྱུང་བ་དང་ལྡན་པའོ། །མཐའ་མའི་རྒྱུའི་ཚོགས་པ་ལས་སྐྱེས་པ་དེའི་ཕྱིར་འབྲས་བུ་སྐྱེད་པ་ཞེས་བྱའོ། །དེ་ལྟར་ལྷན་ཅིག་པ་རྣམས་ཀྱིས་ངོ་བོ་གཞན་ཐོབ་པ་མི་ཐོགས་པར་འབྲས་བུ་སྐྱེད་པ་འདིར་གཞན་དག་རྩོད་པ་ནི་ལྷན་ཅིག་བྱེད་པ་ལས་ཞེས་བྱ་བ་སྨོས་ཏེ། ལྷན་ཅིག་བྱེད་པའི་ངང་ཅན་གྱི་རྒྱུ་ལས་སྐྱེས་པ་ནི་གཅིག་གི་ཚིག་ནི་གང་དང་འབྲེལ་པ་ལས་བྱུང་བ་ཁྱད་པར་དུ་བཤད་མ་ཐག་པའི་རྣམ་པས་མཐའི་ཚོགས་
པའི་རྒྱུའི་སྐད་ཅིག་མའི་མཚན་ཉིད་དེ་ལས་མྱུ་གུ་ལ་སོགས་པའི་འབྲས་བུ་སྐྱེད་པར་འདོད་པ་ན། དེ་ཉིད་ཀྱི་ཁྱད་པར་ལ་སོགས་པའི་འབྲས་བུ་འདི་སྐྱེད་པའི་ནུས་པ་གང་རིམ་གྱིས་འཕེལ་བའི་འབྲས་བུ་སྐྱེད་པར་འདོད་པས་དེ་སྐྱེད་པར་ནི་མི་འགྱུར་རོ། །སྐད་ཅིག་མ་དང་པོ་དང་ཉེ་བར་ཕྲད་པ་རྣམས་བརྒྱུད་པས་ཁྱད་པར་སྐྱེད་པའི་ཕྱིར་དང་སྐད་ཅིག་མ་རྣམས་དབྱེ་བ་མེད་པར་ཁས་བླངས་པའི་ཕྱིར་རོ། །ཕན་ཚུན་ཁྱད་པར་མ་ཐོབ་པ་ཉིད་འབྲས་བུ་སྐྱེད་པར་ནུས་པས་ཁྱད་པར་རྩོམ་པ་ཡིན་ནོ་ཞེ་ན། ཁྱད་པར་མ་ཡིན་པ་ལས་ཁྱད་པར་མ་ཡིན་དག་ཅེས་བྱ་བ་སྨོས་ཏེ། ཕན་ཚུན་འབྲས་བུ་སྐྱེད་པའི་ནུས་པས་སྐྱེད་པར་འདོད་ན་ནི་མྱུ་གུ་ལ་སོགས་པ་འབྲས་བུ་གང་ཡང་ཁྱད་པར་མེད་པར་འགྱུར་རོ་ཞེས་བྱ་བར་བསམས་ནས་དེས་ཀྱང་ཕན་ཚུན་ཁྱད་པར་དུ་སྐྱེད་པ་ན་ལྷན་ཅིག་བྱེད་པ་ལ་མི་ལྟོས་པར་འབྲས་བུ་སྐྱེད་པར་འགྱུར་རོ། །གལ་ཏེ་དེ་ལྟར་གྱུར་ན་ཅི་ཞིག་འགྲུབ་པར་འགྱུར་ཞེ་ན། དེས་ཞེས་བྱ་བ་སྨོས་ཏེ། གང་གིས་སྐད་ཅིག་མ་ཡང་ཁྱད་པར་དུ་སྐྱེད་པ་ལ་མི་ལྟོས་པ་ཁོ་ནར་རང་གི་འབྲས་བུ་གཅིག་བྱེད་པའི་མཚན་ཉིད་དུ་ངེས་པ་ནི་ལྷན་ཅིག་བྱེད་པ་ཉིད་དུ་བསྟན་ཏོ། །རྒྱུ་དེས་ན་སྐད་ཅིག་མ་མ་ཡིན་པ་རྣམས་ཀྱང་རྒྱུ་ཉིད་དུ་འགྱུར་ལ། ལྟོས་པར་བྱ་བ་རྣམས་ལ་ངོ་བོ་ཉིད་ཁྱད་པར་དུ་སྐྱེད་པར་མི་འགྱུར་རོ། །སྐད་ཅིག་མ་མ་ཡིན་པར་བརྗོད་པ་རྣམས་སྐད་ཅིག་མ་ལ་ལྟོས་ནས་རང་གི་ཕྱོགས་དང་མཚུངས་པར་སྟོན་པ་ནི་གང་དག །ངོ་ཚ་མེད་པའམ་མི་ཤེས་པ། །མ་གཏོགས་དེ་ལྟར་བརྗོད་པ་གང༌། །གང་ཕྱིར་སུ་ལ་མཛེས་པར་འགྱུར། །སྐད་ཅིག་རྣམས་ལའང་དེ་ཀུན་མཚུངས། །ཁྱད་པར་གྱི་ནི་རྒྱུ་འདི་དག །རྣམ་པ་འགས་ཀྱང་རྐྱེན་དུ་མིན། །སྐད་ཅིག་མ་རྣམས་དབྱེར་མེད་ན། །རྟག་པ་བཞིན་དུ་སྦྱོར་བ་མིན། །ཞེས་སྨྲའོ། །དེ་ལྟར་ནི་འགྱུར་ན་སྐད་ཅིག་མ་དང་པོ་ཡང་ཞིང་ས་བོན་ལ་སོགས་པ་ཕན་ཚུན་འབྲེལ་པར་འབྱུང་བའི་ཁྱད་པར་ཁོ་ན་ཉེ་བ་ལས་ཡིན་ཏེ། གང་དང་དེ་ནི་རྟག་ཏུ་འབྲེལ། །རིང་ན་གནས་ཀྱང་དེ་དང་དེར། །ཞེས་བྱ་བའི་རིགས་པས་ཡུལ་རིང་པོ་ནི་འདུག་པ་ཡང་རྒྱུ་དང་འབྲས་བུར་འགྱུར་རོ་སྙམ་དུ་དོགས་པ་ན་ལྷན་ཅིག་བྱེད་པས་བྱས་པ་ཞེས་བྱ་བ་ལ་སོགས་པ་སྨོས་ཏེ། ལྷན་ཅིག་བྱེད་རྣམས་ཕན་ཚུན་ཕྲད་ནས་མ་ཚང་ཡང་དངོས་
པོའི་ཆོས་ཉིད་ཁོ་ནས་ཕན་ཚུན་ཉེ་བར་སྐྱེད་དེ། ལྷན་ཅིག་བྱེད་པའི་འབྲས་བུ་སྐྱེད་པ་ནི་ནུས་པའི་ཁྱད་པར་གྱིས་སྐྱེད་པའོ། །བྱས་པའི་ཁྱད་པར་ཁོ་ན་ནི་སྲེད་པའི་དུས་སུའོ། །ཉེ་བར་གནས་པར་གྱུར་པ་དེ་ལྟ་ན་ནི་ཐུག་པ་མེད་པར་འགྱུར་རོ། །འདི་ལྟར་དེ་ཁྱད་པར་དུ་སྐྱེད་ན་ཡང་ལྷན་ཅིག་བྱེད་པའི་བྱེ་བྲག་གཞན་གྱིས་བྱས་པར་ཁས་བླང་བར་བྱ་སྟེ། དེ་ལྟར་དེ་ལས་སྐྱེ་བ་ཡང་གཞན་ཡིན་པའི་ཕྱིར་རོ། །འོན་ཏེ་ལྷན་ཅིག་བྱེད་པར་ཕན་ཚུན་འབྲས་བུ་སྐྱེད་པའི་རྗེས་སུ་འབྲང་བའི་ཁྱད་པར་གྱི་རྒྱུ་མཚན་གྱིས་གཞན་པའི་ཁྱད་པར་མི་སྐྱེད་དོ། །རང་བཞིན་ཁོ་ནས་དེ་དག་དེ་ལ་རུང་བའི་ཕྱིར་རོ་ཞེ་ན། དེའི་ཕྱིར་ལྷན་ཅིག་བྱེད་པ་ཞེས་བྱ་བ་ལ་སོགས་པ་སྨོས་ཏེ། ལྷན་ཅིག་བྱེད་པ་རྣམས་ནི་ཞིང་དང་ས་བོན་ལ་སོགས་པ་ཕན་ཚུན་འབྲས་བུ་སྐྱེད་བ་རྗེས་སུ་འབྲང་བའི་ཁྱད་པར་དེ་ལས་སྐྱེད་པར་རུང་བར་རྟག་ཏུ་གནས་པ་མ་ཡིན་ཏེ། གང་གིས་རུང་བའི་གནས་སྐབས་ནི་རྟག་ཏུ་རྗེས་སུ་ནུས་བས་རྟག་ཏུ་རྗེས་སུ་འབྲེལ་པ་ཞིང་དང་ས་བོན་ལ་སོགས་པ་འབྲས་བུ་སྐྱེད་པ་དང་རྗེས་སུ་འབྲེལ་པའི་བྱེ་བྲག་ནི་སྐྱེད་པར་བྱེད་པའི་བྱེ་བྲག་ལས་འགྱུར་ན་གང་གི་ཕྱིར་ཁྱད་པར་མེད་པ་ལས་ཀྱང་ཁྱད་པར་གྱི་འབྲས་བུ་ཡང་སྐྱེ་བར་འགྱུར་རོ་ཞེས་བྱ་བ་འདི་དག་སྤངས་སོ། །འདི་ག་ལས་ཤེ་ན། དེ་ཡོད་པ་དང་ཞེས་བྱ་བ་ལ་སོགས་པ་སྨོས་ཏེ། དེ་དག་ཞིང་དང་ས་བོན་ལ་སོགས་པ་རྣམས་ཡོད་པར་རུང་བའི་ཡུལ་དང་ཉེ་བར་ཕྲད་པའོ། །འབྲས་བུ་གསལ་བར་མཐོང་བའི་ཕྱིར་ནི་འབྲས་བུ་སྐྱེད་པར་མཐོང་བས་སོ། །མེད་པ་ནི་ཕན་ཚུན་ཕྲད་བ་དང་བྲལ་བས་འབྲས་བུ་དང་བྲལ་བ་མཐོང་བས་འབྲས་བུ་མི་སྐྱེད་པ་མཐོང་བས་སོ། །གལ་ཏེ་འབྲས་བུ་སྐྱེད་པར་ནུས་པའི་ཁྱད་པར་དུ་སྐྱེད་པ་ནི་ཐམས་ཅད་ཀྱི་ཚེ་རིང་བར་གནས་པར་འགྱུར་བས་དེའི་ཚེ་ཡང་ཐམས་ཅད་ཀྱི་ཚེ་ཁྱད་པར་དུ་འགྱུར་རོ། །དེ་ཡང་དེ་བརྒྱུད་པས་འབྲས་བུ་འབྱུང་ངོ་སྙམ་ན་དེ་ཡོད་པ་དང་མེད་པ་དག་འབྲས་བུ་སྐྱེད་པ་དང་མི་སྐྱེད་པར་མི་འགྱུར་རོ། །དེའི་ཕྱིར་ལྷན་ཅིག་བྱེད་པའི་འབྲས་བུ་སྐྱེད་པ་ནི་ནུས་པའི་ཁྱད་པར་ལས་རུང་བའི་གནས་སྐབས་ན་སྐྱེའི་ཐམས་ཅད་དུ་མ་ཡིན་ནོ། །གང་གི་ལྷན་ཅིག་བྱེད་པ་ལོགས་ཤིག་ཏུ་གནས་པ་ན་ཐུག་པ་མེད་པའི་འཇིགས་པས་ཁྱད་པར་གྲུབ་པར་ཉེ་བར་གནས་
པ་མེད་དོ། །དེ་ཕན་ཚུན་ཐོག་མར་ཕྲད་པའི་སྐད་ཅིག་མ་འབྱུང་བ་ཡོད་པར་སྦྱོར་བ་མ་ཡིན་པ་ཉིད་དོ། རྒྱུ་དེས་ན་དང་པོའི་ཁྱད་པར་གྱི་འབྲས་བུ་སྐྱེད་པ་དང་རྗེས་སུ་འབྲེལ་པའི་ལྷན་ཅིག་བྱེད་པ་དུས་མཚུངས་པས་ཕན་མི་འདོགས་ཏེ། ཞིང་དང་ས་བོན་ལ་སོགས་པ་མི་སྐྱེད་པ་དང་སྐྱེད་པ་འདི་འདོད་པའི་ཕྱིར་རོ། །དེས་ན་ཚོགས་པའི་གནས་སྐབས་བཞིན་དུ་ཐམས་ཅད་ཀྱི་ཚོགས་པའི་གནས་སྐབས་སུ་འབྱུང་བའི་སྐད་ཅིག་མ་རྣམས་ཀྱང་ཁྱད་པར་དེ་སྐྱེད་པའི་ངོ་བོས་མི་སྐྱེད་པ་ལས་ཚོགས་པའི་གནས་སྐབས་ན་སྐྱེད་པའི་ཕྱིར་དཔེར་ན་སྐད་ཅིག་མ་རྣམས་དོན་གཅིག་བར་བྱེད་པ་སོ་སོར་ངེས་བའི་མཚན་ཉིད་ཀྱི་ལྷན་ཅིག་བྱེད་པ་དེ་བཞིན་དུ་བརྟན་པའི་རང་བཞིན་ཡང་འགྱུར་ཏེ་ཐབས་ཐམས་ཅད་ཟབ་པའི་ཕྱིར་རོ། །སྐད་ཅིག་མ་ཡིན་པར་སྨྲ་བ་ན་ནད་སྙོམས་པ་ཉིད་ལ་ལྷག་པར་སེམས་པ་བཞིན་དུ་དེ་ཉིད་ལ་མཆོག་ཏུ་བྱེད་པར་འགྱུར་རོ། །གྲུབ་པའི་མཐའ་སྨྲ་བས་སྐབས་སུ་གཞན་བཞད་གད་བྱེད་པ་ནི་ཁོ་བོ་ནི་ཡང་དང་ཡང་ཞེས་བྱ་བ་ལ་སོགས་པ་སྨོས་ཏེ། གལ་ཏེ་ཡང་དང་ཡང་བརྗོད་ཀྱང་འཇིག་རྟེན་གྱི་རིགས་རྟོགས་པར་འགྱུར་ན་བརྒྱ་ཕྲག་སྨྲས་པས་ཅི་ཞིག་བྱ། །ལན་གཉིས་དང་གསུམ་གཞན་གྱི་དོན་ལ་མི་འཇུག་པ་ལ་ཁོ་བོ་ཅག་ཡང་དང་ཡང་དུ་རྗོད་པར་བྱེད་པ་ལ་ཅུང་ཟད་ཀྱང་ཡིད་སྐྱོ་བར་མི་འགྱུར་རོ། །དེ་ལྟར་རྒོལ་བ་ལ་བསྟན་བཅོས་བྱེད་པས་རྣམ་གྲངས་གཞན་གྱིས་ལ་ལར་དེ་ཉིད་ཀྱི་དོན་གསལ་བར་བྱེད་པས་ཟློས་པ་ཡོངས་སུ་སྤོང་བ་ལ་འབད་པ་དེ་དག་ནི་གནས་མ་ཡིན་བས་ཡོངས་སུ་ངལ་པ་ཉིད་དོ། །གལ་ཏེ་སྐྱོ་བ་མེད་པ་དེ་ལྷན་སྨོས་ཤིག་ཅེ་ན། གང་གི་ཕྱིར་ལྷན་ཅིག་བྱེད་པ་རྣམས་ནི་ཁྱད་པར་དུ་མི་སྐྱེད་པའི་ཕྱིར་ལྷན་ཅིག་བྱེད་པ་ཉིད་དོན་དམ་པར་ན་འགའ་ཞིག་ཏུ་སྲིད་དེ། གང་གི་ཕྱིར་སྐད་ཅིག་དང་པོ་བྱུང་ན་ས་བོན་ལ་སོགས་པ་དེ་རྣམས་མེད་པའི་ཕྱིར་འབྲས་བུ་སྐྱེད་པ་དང་རྗེས་སུ་མཐུན་པའི་ཁྱད་པར་དུ་བྱེད་པའི་ལྷན་ཅིག་བྱེད་པ་སྤངས་པར་འགྱུར་རོ། །འོན་ཀྱང་དོན་གཅིག་བྱེད་པ་ཁོ་ནའི་ལྷན་ཅིག་བྱེད་པ་རྣམས་ནི་དོན་དམ་པར་ན་ལྷན་ཅིག་བྱེད་བ་ཉིད་དུ་སྔར་བཤད་པའི་རིགས་པ་རྣམས་ཀྱིས་སྲིད་པ་ཡིན་ནོ། །དེ་ཡང་ཐོག་མར་ཕྲད་པ་ལ་རྟེན་པ་ཡོད་པ་ཉིད་ཡིན་ན་ཅིས་ན་ལྷན་ཅིག་བྱེད་པར་མི་
འགྱུར། གཞན་གྱིས་སྨྲས་པ་དོན་གཅིག་བྱེད་པར་ཁས་བླངས་ན་དེའི་ཚེ་སོ་སོའི་གནས་སྐབས་དེ་ན་སྐྱེད་པར་ནུས་པར་ཁས་བླངས་པས་དེའི་གནས་སྐབས་ལྷ་བུར་སོ་སོ་བ་ལ་ཡང་འགྱུར་རོ། །དེ་ལྟ་ན་དེའི་གནས་སྐབས་ཀྱང་ཕན་ཚུན་ཁྱད་པར་མེད་པ་ཁོ་ནར་སྐྱེད་དོ། །དེ་དག་སོ་སོ་བས་ཀྱང་དེ་ཁྱད་པར་དུ་བྱེད་ན་ཇི་ལྟར་ཐལ་བར་མི་འགྱུར། གང་དག་ཚོགས་པ་དང་མ་ཚོགས་པའི་གནས་སྐབས་འགའ་ཞིག་ལ་ཁྱད་པར་ཡོད་པའི་ཕྱིར་རོ། །གལ་ཏེ་ཡིན་ན་ཉེས་པ་ཅི་ཞིག་ཏུ་འགྱུར་ཞེ་ན། དེ་ལྟ་ན་འབྲས་བུ་སྐྱེད་པ་དང་འབྲེལ་པའི་ཁྱད་པར་སོ་སོར་བྱེད་པར་ཐལ་བར་འགྱུར་བ་དེའི་ཕྱིར་ཁྱད་པར་ལས་བྱུང་བའི་ངང་ཚུལ་ཅན་མྱུ་གུ་ལ་སོགས་པའི་འབྲས་བུའི་ཁྱད་པར་བཞིན་དུ་འབའ་ཞིག་བ་ལས་ལྷན་ཅིག་བྱེད་པར་འགྱུར་རོ་ཞེས་སེམས་པ་ན་འདི་དག་ཐམས་ཅད་ཀྱི་ལན་བཏབ་ཟིན་ཏོ། །དེ་ལྟ་ན་ཚོགས་པ་དང་མ་ཚོགས་པའི་གནས་སྐབས་ཁྱད་པར་མེད་པ་ཁོ་ནར་སྐད་ཅིག་མས་འཇིག་པ་ཡིན་ནོ་ཞེས་གང་བརྗོད་པ་དེ་ཅི་ཁྱད་པར་ཙམ་ལ་ལྟོས་པ་ཡིན་ནམ་ཡང་ན་འབྲས་བུ་བསྐྱེད་པར་རྗེས་སུ་འབྲེལ་པའི་ཁྱད་པར་སྐྱེད་པར་བྱེད་བ་ལ་ལྟོས་པ་ཡིན། གལ་ཏེ་རྫས་ལ་སོགས་པར་རྣམ་པར་རྟོག་ན་ནི་དེ་མི་རིགས་སོ། །འགའ་ཞིག་ཁྱད་པར་ཙམ་སྤངས་པའི་གནས་སྐབས་ནི་མི་སྲིད་དེ་ཐམས་ཅད་དུ་རྐྱེན་གཞན་དང་གཞན་རུང་བའི་རྒྱུ་མཚན་གྱིས་གཞན་དང་གཞན་པའི་ཁྱད་པར་བྱུང་བས་རེས་འགའ་ཅུང་ཟད་ཅིག་གཅིག་པ་ཉིད་མ་ཡིན་ཏེ། རྟེན་དང་གྲིབ་མ་དང་ཉི་མ་དང་རླུང་དང་གྲང་བ་ལ་སོགས་བ་བཞིན་དུ་འབྱུང་བ་སྲིད་དོ། །དེ་ཡོད་ཀྱང་དེ་དང་འདྲ་བའི་རྒྱུ་ཐ་དད་པ་མེད་པའི་ཕྱིར་རོ། །འདི་ཙམ་དུ་འགྱུར་ཏེ་འགའ་ཞིག་ལ་ལར་འབྲས་བུ་དང་རྗེས་སུ་འབྲེལ་པས་ཡིན་གྱི་ཐམས་ཅད་ཀྱིས་ཐམས་ཅད་ལ་མ་ཡིན་ནོ་ཞེས་དེ་ཡང་སྔར་བཤད་ཟིན་ཏོ། །བསྟན་པ་ནི་སྐད་ཅིག་མ་རེ་རེ་རྒྱན་གཞན་དང་གཞན་འབྲེལ་པས་སྐད་ཅིག་མ་རེ་རེ་ནུས་པ་ཐ་དད་པའི་འདུ་བྱེད་རྒྱུན་དང་ལྡན་པའོ། །གལ་ཏེ་ཡང་འགའ་ཞིག་ལས་འདྲ་བའི་ངོ་བོར་རྟོགས་བ་དེ་ལྟ་ན་ཡང་ཐ་དད་པ་ཁོ་ན་འདི་དག་ངོ་བོ་ཅུང་ཟད་ཅིག་འགའ་ཞིག་གི་རྒྱུ་ཡིན་ནོ་ཞེ་ན། སྐད་ཅིག་
པའི་ངོ་བོ་རྣམས་གཞན་དང་གཞན་སྐྱེད་པ་ལ་གཅིག་པ་མེད་པའི་ཕྱིར་ཞེས་ཤིན་ཏུ་བསྡུས་པ་འདིར་བཤད་པ་དང༌། དེ་ལྟར་ཁོ་བོ་ཅག་གིས་ཡང་དང་ཡང་དུ་བརྗོད་དོ་ཞེས་གཉི་ག་སྨོས་པ་ཡང་རིགས་སོ། །ཇི་ལྟར་རྣམ་པ་གང་གིས་དངོས་པོའི་རྒྱུན་ལ་ཁྱད་པར་དུ་སྐྱེ་བ་དེ་ཡང་བཤད་ཟིན་ཏོ། །དེ་ལ་སྐད་ཅིག་མ་སྔ་མ་ནི་རང་གི་ངང་གིས་ལྡོག་པ་ཁོ་ནས་ཁྱད་པར་ཅན་གྱི་སྐད་ཅིག་མ་སྐྱེད་པས་ཁྱད་པར་སྐྱེད་པ་ཡིན་ནོ་ཞེས་བྱའོ། །འོན་ཏེ་འབྲས་བུ་སྐྱེད་པར་ནུས་པའི་ཁྱད་པར་སྐྱེད་པར་བྱེད་པའི་ཁྱད་པར་ལ་ལྟོས་པས་སྔ་མ་བཞིན་དུ་ཐོག་མར་ཕྲད་པ་ལ་རྟེན་པར་ཕན་ཚུན་ཁྱད་པར་མེད་པ་ཡིན་ནོ་ཞེས་མངོན་པར་འདོད་པ་དེ་ཡང་མི་རིགས་སོ། །གང་གིས་འབྲས་བུ་སྐྱེད་པར་ནུས་པའི་ཁྱད་པར་སྐྱེད་པར་བྱེད་པ་ནི་ཞིང་དང་ས་བོན་ལ་སོགས་པ་ཅི་འདྲ་བའི་བར་དུ་ཆོད་པ་ལ་སོགས་པ་སྤངས་པའི་ཡུལ་ཉེ་བ་ན་དེ་ཡོད་པ་ཉིད་དེ། ཡོད་པ་དེ་ཙམ་གྱི་རྒྱུ་མཚན་དང་སྐྱེད་པར་བྱེད་པར་རྣམ་པར་གཞག་གོ །རྣམ་པ་དེ་ལྟ་བུ་དེ་ཡང་ཐམས་ཅད་ལ་ཡོད་པ་མ་ཡིན་པའི་ཕྱིར་ཇི་ལྟར་སོ་སོར་ཡང་འབྲས་བུ་སྐྱེད་པ་དང་རྗེས་སུ་མཐུན་པའི་ཁྱད་པར་འདི་དག་སྐྱེད་པར་འགྱུར་རོ། །གང་གི་ཕྱིར་འབའ་ཞིག་པ་ཡང་འབྲས་བུ་བྱེད་པར་ཐལ་བར་འགྱུར་བ་དེ་བསྟན་ཏོ།། གང་དག་ཡུལ་རུང་བ་ཅན་དེ་ནི་རུང་བའི་ཡུལ་དེ་ལས་བྱུང་བས་རུང་བའི་ཡུལ་ཅན་ནོ། །དེ་ལ་སོགས་པ་གང་དག་བར་དུ་མཆོད་བའི་ཡུལ་ཅན་ལ་སོགས་པའི་གནས་སྐབས་ཐ་དད་པ་དེ་བཞིན་དུ་བཤད་དོ། །དེ་ཡང་དེའི་གནས་སྐབས་ཐ་དད་པ་ཡང་དེ་སྐད་དུ་རུང་བའི་ཡུལ་ཅན་ནི་བར་དུ་མ་ཆོད་པའི་ཡུལ་ལ་སོགས་པའི་གནས་སྐབས་ཀྱི་བྱེ་བྲག་ཞིང་དང་ས་བོན་ལ་སོགས་པ་རྣམས་ཀྱིས་ཉེ་བར་བསྐྱེད་པ་གང་ཡིན་པ་དེ་ནི་འབྲས་བུ་སྐྱེད་པར་ནུས་པའི་མཚན་ཉིད་འབྲས་བུ་བྱེད་པའི་ངང་ཚུལ་ཅན་ཏེ། རྣམ་པ་དེ་ལྟ་བུའི་ས་བོན་ལ་སོགས་པས་ཐམས་ཅད་དུ་ནི་མ་ཡིན་ནོ་ཞེས་བཤད་དོ། །ཇི་ལྟར་འདི་དག་སོ་སོར་ཡང་རྣམ་པ་དེ་ལྟ་བུའི་ཁྱད་པར་འགྱུར་ཞེ་ན། འདི་དག་ཀྱང་སྔར་བཤད་ཟིན་ཏོ། །དེ་ལ་བར་དུ་ཆོད་པའི་ཡུལ་ལ་སོགས་པའི་གཟུགས་དང་དབང་པོ་ལ་སོགས་པའི་ཚོགས་པ་གང་ཡིན་པ་དེ་རྣམ་པར་ཤེས་པ་སྐྱེད་པར་ནུས་པའི་རྒྱུ་ཡིན་ནོ་ཞེས་
བརྗོད་པ་དེ་ཡང་དཔེ་ཙམ་ཡིན་པའི་ཕྱིར་རོ། །འདིར་ཡང་དེ་ལ་བར་དུ་མ་ཆོད་པའི་ཡུལ་ལ་སོགས་པའི་ཞིང་དང་ས་བོན་ལ་སོགས་པའི་ཚོགས་པ་གང་ཡིན་པ་དེ་ནི་འབྲས་བུ་སྐྱེད་པ་དང་རྗེས་སུ་འབྲེལ་པའི་ཁྱད་པར་སྐྱེད་བར་ནུས་པའི་རྒྱུ་ཡིན་ནོ་ཞེས་རྟོགས་པ་ཁོ་ནའོ།། དེ་ཡང་རྣམ་པ་དེ་ལྟ་བུའི་ཁྱད་པར་གྱི་སྐྱེད་པར་བྱེད་པ་པོ་ཁྱད་པར་དང་ལྡན་པ་གང་ལས་སྐྱེས་པ་དེ་ནི་དེ་དག་ཕན་ཚུན་ཉེ་བར་འགྲོ་བ་ལ་སོགས་པ་རྟེན་དང་རྐྱེན་གྱི་བྱེ་བྲག་གང་ཡིན་པ་དེ་ནི་དེའི་རྒྱུ་ཡིན་ཏེ་སྐྱེད་པར་ནུས་པའི་རྒྱུ་ཡིན་པའི་ཕྱིར་རོ། །འདི་དག་ཀྱང་སྔར་བཤད་ཟིན་ཏོ། །དེ་དག་ཀྱང་ཞེས་བྱ་བ་སྨོས་ཏེ་འབྲས་བུ་སྐྱེད་པར་ནུས་པའི་ཁྱད་པར་གྱི་སྐྱེད་པར་བྱེད་པ་པོ་ཁྱད་པར་དང་ལྡན་པ་གང་ལས་སྐྱེད་པ་དེ་ནི་ཕན་ཚུན་ཉེ་བར་འགྲོ་བ་ལ་སོགས་པ་རྟེན་དང་རྐྱེན་གྱི་བྱེ་བྲག་གང་ཡིན་པ་དེ་ནི་དེའི་རྒྱུ་ཡིན་ཏེ། སྐྱེད་པར་ནུས་པའི་རྒྱུ་ཡིན་པའི་ཕྱིར་རོ། །དེ་ལྟ་ན་ཕན་ཚུན་ཉེ་པར་འགྲོ་བ་ལ་སོགས་པའི་རྟེན་བདག་ཉིད་ཇི་ལྟ་བའི་རྐྱེན་གྱིས་རུང་བའི་ཡུལ་ལ་སོགས་པ་གནས་སྐབས་ལས་སྐྱེས་པ་དེ་དག་ལྷན་ཅིག་པའི་ངོ་བོ་ཉིད་དུ་གྲུབ་བ་ཤེས་པའི་རྒྱུ་ཉིད་དུ་བསྟན་ཏོ་ཞེས་བྱ་བ་འདིས་འདིར་ཡང་རྟོགས་པར་བྱ་བ་ཡིན་ནོ། །དེའི་ཕྱིར་གལ་ཏེ་འདི་དག་ཀྱང་ཕན་ཚུན་མི་སྐྱེད་ན་ཁྱད་པར་དུ་མི་འགྱུར་ཏེ། རང་གི་རྒྱུས་བྱེད་པ་གང་གིས་བསལ་བར་ནུས། རང་གི་ཁོ་ན་ལས་སྐྱེ་བ་ཁྱད་པར་རྣམས་འབྱུང་བ་ནི་ཕན་ཚུན་དེའི་ཡོན་ཏན་མི་བྱེད་དོ། །གང་གི་ཕྱིར་ཕན་ཚུན་ཁྱད་པར་དུ་རུང་བར་བསྟན་པ་ནི་མཛེས་ཏེ། དེ་དག་འབྲས་བུ་སྐྱེད་པར་རུང་བའི་ཁྱད་པར་སྐྱེད་པར་བྱེད་པ་རྣམས་རེ་རེ་ནུས་ཀྱང་ཆ་ཤས་ཀྱི་འབྲས་བུ་སྐྱེད་པའམ་མ་ལུས་པ་རེ་རེས་བྱེད་པ་ནི་མི་རིགས་སོ། །ཇི་ལྟ་བུའི་འབའ་ཞིག་པ་རྣམས་ཀྱི་བྱ་བ་དང་བྱེད་པ་པོའི་ཁྱད་པར་དུ་མ་ཆོད་པ་ལ་སོགས་པའི་ཡུལ་གྱི་ཞིང་དང་ས་བོན་ལ་སོགས་པ་ཅན་སོ་སོར་རེ་རེ་ནས་ནུས་པའི་དངོས་པོ་ལས་མི་འབྱུང་བའི་ཕྱིར་རོ་ཞེས་བྱ་བ་དེ་དག་སྔོན་ཡང་མེད་ཕྱིས་ཀྱང་མེད་སོ་སོ་བའི་ངོ་བོས་ཀྱང་མེད་པས་ནུས་པ་ཡང་སྔོན་དང་ཕྱིས་དང་ཐ་དད་པའི་ངོ་བོས་འབྱུང་བའི་ཉེས་པ་དག་གིས་གོས་པ་མེད་དོ་ཞེས་བྱ་བ་འདི་དག་ཀྱང་ལན་མང་དུ་བཤད་ཟིན་ཏོ། །དེས་ན་རྣམ་པ་དེ་ལྟ་བུའི་ཁྱད་པར་རང་གི་ཉེ་བར་ལེན་པ་ཅན་དང་རྗེས་སུ་ལ་
འབྲེལ་པ་ཁས་མི་ལེན་པ་དང་འགའ་ཞིག་པ་ལས་ཐལ་བར་མི་འགྱུར་བས་གང་ལས་འབྲས་བུ་སྐྱེད་པར་ནུས་པའི་ཁྱད་པར་དུ་སྐྱེས་པས་འབྲས་བུར་ཡང་འགྱུར། སླར་ཡང་འདི་འདོད་པར་གྱུར་ན་རྙེད་པར་ག་ལ་འགྱུར་གང་གི་ཚེ་མྱུ་གུ་ལ་སོགས་པའི་འབྲས་བུ་ནི་ལྷན་ཅིག་བྱེད་པ་ཕན་ཚུན་འབྲས་བུ་སྐྱེད་པར་ནུས་པའི་ཁྱད་པར་བརྒྱུད་པར་སྐྱེད་པར་བྱེད་པ་ཡིན་ནོ། །འབྲས་བུ་སྐྱེད་པར་ནུས་པའི་ཁྱད་པར་ཡང་བར་དུ་ཆོད་པ་ལ་སོགས་པའི་ཡུལ་གྱི་རིམ་པ་ཙམ་གྱིས་ཡིན་པ་དེའི་ཕྱིར་འབྲས་བུ་རྣམ་པ་གཉིས་སོ་ཞེས་བྱ་བ་སྨོས་ཏེ་གང་གི་ཕྱིར་དེ་ལྟར་རྣམ་པར་ཕྱེ་བ་དེའི་ཕྱིར་རོ། །ཇི་ལྟར་འབྲས་བུ་རྣམ་པ་གཉིས་པ་ཡིན་ཞེ་ན་ལྷན་ཅིག་བྱེད་པས་ཞེས་བྱ་བ་ལ་སོགས་པ་སྨོས་ཏེ། ལྷན་ཅིག་བྱེད་པ་བར་དུ་མ་ཆོད་པ་ལ་སོགས་པའི་ཡུལ་གྱི་མཇུག་ཐོགས་སུ་སྐྱེས་པ་ཅན་ཕན་ཚུན་སྔ་མའི་གནས་སྐབས་ལ་ལྟོས་པའི་ཁྱད་པར་ཅན་གྱི་སྐད་ཅིག་མའི་མཚན་ཉིད་ཀྱི་ཁྱད་པར་དེ་ན་ཕྱི་མ་ཕྱི་མ་ཁྱད་པར་ཅན་དང་ཆོས་ཁྱད་པར་ཅན་ལ་སོགས་པའི་སྐད་ཅིག་མའི་དངོས་པོའི་ངོ་བོ་ཉིད་སྐྱེད་པའི་ཆོས་གང་ཡིན་པ་དེའི་བདག་ཉིད་ཀྱི་འབྲས་བུ་གཅིག་པ་དང་གཞན་ནི་དེ་ལས་བཟློག་པའོ། །གང་ལྷན་ཅིག་བྱེད་པ་ཉེ་བ་ཙམ་འབྱུང་བ་ནི་ཕན་ཚུན་བྱེད་པ་དང་ཁྱད་པར་ཕན་ཚུན་བྱེད་པ་ལ་མི་ལྟོས་སོ། །འདིར་དཔེ་ནི་མྱུ་གུ་ལ་སོགས་པའོ། །སོགས་པའི་སྒྲས་ནི་འབྲས་ཆན་ལ་སོགས་པ་གཟུང་ངོ༌། །མི་སྡོད་པར་སྐྱེད་པའི་རྒྱུའི་ཚུལ་དབང་པོ་གང་ཡིན་པ་དེའི་རྣམ་པར་ཤེས་བ་ལྟ་བུའོ། །སྣང་བ་ལས་མུན་ཁུང་དུ་ཞུགས་པའི་དབང་པོ་བསལ་བའི་ཕྱིར་ཁྱད་པར་འདི་དག་ཡིན་ནོ། །འདི་དག་ག་ལས་ཤེ་ན། རྒྱུ་དང་འབྲས་བུའི་ངོ་བོ་ཉིད་ཐ་དད་པའི་ཕྱིར་རོ། །འབྲས་བུ་འགའ་ཞིག་རྒྱུའི་ཚོགས་པ་དང་ཉེ་བ་ཙམ་ལས་སྐྱེ་བའི་རང་བཞིན་དང་དེ་ལས་གཞན་པ་ནི་དེའི་ཡོངས་སུ་འགྱུར་བ་ལ་ལྟོས་པ་ཡིན་ནོ། །རྒྱུ་རྣམས་ཀྱང་ཅུང་ཟད་ཅིག་རང་དང་ཉེ་བ་ཙམ་གྱིས་འབྲས་བུ་སྐྱེད་པའི་ངོ་བོ་ནི་རང་གི་རྒྱུ་ཁོ་ནས་ཡིན་ནོ། །གང་གིས་ཕན་ཚུན་བྱས་ནས་ཁྱད་པར་བརྒྱུད་པས་རང་གི་འབྲས་བུ་བྱེད་པ་ལ་ལྟོས་པ་ཡིན་གྱི་གཞན་པ་ནི་དེ་ལས་བཟློག་པའི་རང་བཞིན་ཡིན་ནོ། །དཔེར་ན་ཅུང་ཟད་ཅིག་འབྲས་ཀྱི་མྱུ་གུ་སྐྱེད་པའི་ངོ་བོ་དང་གཞན་ནི་དེ་ལས་
བཟློག་པ་སྟེ། འབྲས་ཀྱི་མྱུ་གུ་སྐྱེད་པའི་རང་བཞིན་དེ་ནི་ནས་ཀྱི་མྱུ་གུ་སྐྱེད་པའི་རང་བཞིན་མ་ཡིན་པ་དངོས་པོ་ནི་རང་གི་རྒྱུའི་སྟོབས་ཀྱིས་འོངས་པ་ཚད་མས་རྟོགས་པའི་རང་བཞིན་ལ་བརྒལ་ཞིང་བརྟག་པར་མི་རིགས་སོ། །གང་དང་གང་སྐྱེད་པའི་རང་བཞིན་དུ་ཚད་མས་རྟོགས་བ་དེ་ཅི་ཐམས་ཅད་ཀྱི་རང་བཞིན་དེ་ཡིན་ནམ། ཡང་ན་ནི་དེ་ཉིད་ཀྱི་ཞེས་དེ་ལྟར་དཔྱད་པ་འཇུག་པ་ན། དེ་ལ་ཐམས་ཅད་དུ་དེའི་རང་བཞིན་ཡིན་ན་ནི་ཕྱི་མ་བཞིན་དུ་སྔོན་ཡང་དེའི་འབྲས་བུ་བྱེད་པར་ཐལ་བར་འགྱུར་ལ། གཞན་གྱི་ངོ་བོས་ནི་བྱེད་པ་པོ་མ་ཡིན་པས་རང་བཞིན་ཐ་དད་དོ། །འབྲས་དང་ནས་ཀྱི་ས་བོན་བཞིན་དུ་བྱེད་པ་པོ་མ་ཡིན་པའི་གནས་སྐབས་དཔྱོད་པ་ནི་དེ་ཁོ་ན་ཉིད་སེམས་པར་བརྗོད་དོ། །འདྲེ་བ་གཞན་འབྱུང་བའི་རྒྱུ་མཚན་གྱིས་གཅིག་ཏུ་ངོ་ཤེས་པ་ཡིན་ཏེ་སྐྲ་དང་སེན་མོ་ལ་སོགས་པ་རྣམས་བྲེགས་པ་ལས་སྐྱེ་བ་བཞིན་དུ་འདིར་ཡང་འགལ་བ་མེད་པའི་ཕྱིར་རོ། །གང་གི་ཚེ་རྒྱུ་དང་འབྲས་བུའི་ངོ་བོ་ཉིད་ཐ་དད་པས་འབྲས་བུ་གཉིས་སུ་རིགས་པར་བྱའོ། །དེ་ལ་ནི་དེ་ལྟར་གྱུར་ནའོ། །ལྷན་ཅིག་བྱེད་པ་རྣམས་ནི་ཞིང་དང་ས་བོན་ལ་སོགས་པའོ། །དེ་དག་ཕན་ཚུན་རྒྱུན་གྱིས་ཕན་འདོགས་པ་ལ་ལྟོས་པའི་རྒྱུ་མཐའ་མའི་གནས་སྐབས་སུ་གྱུར་པ་གང་ཡིན་པ་དེ་ནི་མྱུ་གུ་ལ་སོགས་པའི་འབྲས་བུ་གང་ཡིན་པ་དེ་སྐྱེད་པའི་རྒྱུ་མཚན་གྱི་ལྷན་ཅིག་སྐྱེད་པའི་རྐྱེན་སྐད་ཅིག་མ་དང་པོའི་མཇུག་ཐོགས་སུ་སྐད་ཅིག་མ་གཉིས་པའི་དངོས་པོ་ཁྱད་པར་ཅན་གྱི་ངོ་བོ་ནི་གང་ཁྱད་པར་གྱི་འབྲས་བུ་སྐྱེད་པར་ནུས་པའི་དང་པོ་ལས་བྱུང་ངོ༌། །དེ་དང་དེ་དག་ལྷན་ཅིག་བྱེད་པ་རྣམས་ཐོག་མར་ཕྲད་པ་ལ་རྟེན་པའི་ཕན་ཚུན་ཁྱད་པར་དུ་བྱས་པའི་ཁྱད་པར་གང་ཡིན་པ་དེ་ནི་སྐྱེད་པ་ཅན་མ་ཡིན་ཏེ་ཕན་ཚུན་ཉེ་བར་འགྲོ་བ་ལ་སོགས་པ་ལ་བརྟེན་པ་ཉིད་ཀྱི་རྐྱེན་གྱི་བྱེ་བྲག་ལ་དེ་འབྱུང་བའི་ཕྱིར་རོ། །དེས་ན་འབྲས་བུ་སྐྱེད་པ་དང་རྗེས་སུ་མཐུན་པ་ལ་སོགས་པ་གང་གི་ཁྱད་པར་ལས་སྐད་ཅིག་མ་དང་པོ་དང་ཉེ་བའི་ལྷན་ཅིག་བྱེད་པ་རྣམས་དང་གཞན་སྒྲུབ་པའི་ཁྱད་པར་སྐྱེད་པ་ཉིད་དང་མཚུངས་སོ། །དེ་ཕན་ཚུན་གྱི་ཁྱད་པར་ནི་འདྲེན་མ་ཡིན་ཏེ། དེ་ཕྱི་མ་ཕྱི་མའི་སྐད་ཅིག་མའི་དངོས་པོའི་མཚན་ཉིད་སྐྱེད་པའི་ཕྱིར་རོ། །དེ་དང་དེ་དག་སྐྱེ་བའི་ལྷན་
ཅིག་བྱེད་པས་བྱས་པའི་ཁྱད་པར་སྐྱེད་པའོ། །གང་ལས་ཤེ་ན། དེའི་རང་བཞིན་ཡིན་པའི་ཕྱིར་དེ་དང་པོ་འདིའི་ཁྱད་པར་ནི་ཕན་ཚུན་འདུས་པ་ལ་སོགས་པའི་བརྟེན་པའི་རྐྱེན་གྱི་ཁྱད་བར་གྱིས་སྒྲུབ་པ་དང་རྗེས་སུ་མཐུན་པའི་ཁྱད་པར་གྱི་ལྷན་ཅིག་བྱེད་པ་རྣམས་ཕན་ཚུན་ཕན་འདོགས་པ་ལ་མི་ལྟོས་པར་སྐྱེད་པའི་རང་བཞིན་ཡིན་པའི་ཕྱིར་དང༌། འདི་དག་གི་ཁྱད་པར་རྣམས་ལྷན་ཅིག་བྱེད་པས་བྱས་པའི་འབྲས་བུ་སྐྱེད་པ་དང་རྗེས་སུ་མཐུན་པའི་ཁྱད་པར་སྐྱེད་པའི་རང་བཞིན་ཡིན་པའི་ཕྱིར་རོ། །གང་གི་དེ་ལྟ་ཡིན་པ་དེའི་ཕྱིར་ཐུག་པ་མེད་པ་མ་ཡིན་ནོ་ཞེས་གནས་སྐབས་དུ་མར་སྔར་བཤད་ཟིན་ཏོ། །འོན་ཏེ་ལྷན་ཅིག་བྱེད་པ་ཞིང་ལ་སོགས་པ་དང་ས་བོན་ལ་སོགས་པ་དང༌། སྦྱང་ལ་སོགས་པ་ན་གནས་པ་དེ་ལ་ཡང་ཞིང་ལ་སོགས་པས་བྱས་པའི་ཁྱད་པར་ཉེ་བར་གནས་པས་དེ་ལྟར་ཐུག་པ་མེད་པར་འགྱུར་རོ་ཞེ་ན། དེའི་བྱེ་བྲག་ཁས་མ་བླངས་པའི་ཕྱིར་སྐྱེས་བུའི་རྩོལ་བ་ལ་སོགས་པས་ཞིང་ལ་སོགས་པ་རྨོ་བའི་རྒྱུ་བར་དུ་མ་ཆོད་པའི་ས་གཤིན་པ་ས་བོན་དང་ཕྲད་པའི་མཚན་ཉིད་ལས་འབྲས་བུ་སྐྱེད་པར་ནུས་པའི་ཁྱད་པར་དང་སྐྱེད་པར་བྱེད་པའི་ཁྱད་པར་ཁས་བླངས་པའི་ཕྱིར་རོ། །དེ་ལ་གཞན་གྱི་དེ་སྐད་དུ་བཤད་པའི་ཇི་ལྟར་ཐོག་མར་ཕྲད་པ་ལ་བརྟེན་པའི་ཞིང་དང་ས་བོན་ལ་སོགས་པ་ཕན་ཚུན་ཁྱད་པར་དུ་བྱེད་པས་འབྲས་བུ་སྐྱེད་པ་དང་རྗེས་སུ་མཐུན་པའི་ཁྱད་པར་སྐྱེད་ན་ནི་དེ་བཞིན་དུ་བརྟན་པའི་ངོ་བོ་ཡོད་པས་ཀྱང་དེའི་འབྲས་བུ་གཅིག་ཏུ་ངེས་པར་འགྱུར་ཏེ་ཕན་ཚུན་བྱས་པའི་ཁྱད་པར་ལ་མི་ལྟོས་པ་ཁོ་ནར་འབྱུང་བས་དེ་ཡང་ཁས་བླང་བར་གྱིས་ཤིག །གལ་ཏེ་ཞེས་བྱ་བ་ལ་སོགས་པ་སྨོས་ཏེ། སྐད་ཅིག་མ་བཞིན་དུ་སྐད་ཅིག་མ་མ་ཡིན་པ་བརྒྱ་ལ་འབྲས་བུ་སྐྱེད་པར་འགྱུར་རོ་ཞེ་ན། སྐྱེད་ལ་ནི་རག་སྟེ། ཅུང་ཟད་ཅིག་འཛིན་པ་ནི་མེད་དོ། །འོན་ཀྱང་གང་གི་ཕྱིར་ངོ་བོ་ཉིད་ཀྱིས་འབྲས་བུ་བྱེད་པ་དེ་ནི་གལ་ཏེ་མི་ཐོགས་ཤིང་མི་སྡོད་པར་འབྲས་དུ་སྐྱེད་པར་བྱེད་པའི་ཆོས་ཙན་གྱིས་བྱེད་པ་ནི་དེ་ལྟ་བུའི་ངང་ཚུལ་ཅན་གང་ཡིན་པ་དེས་ཡིན་ཏེ། དེ་སྐད་དུ་དེའི་ཚེ་སོ་སོ་ན་ཡོད་པ་འབའ་ཞིག་གིས་ཀྱང་ཡིན་ནོ། །འབའ་ཞིག་པ་ནི་ལྷན་ཅིག་མ་ཡིན་པའོ། །དེ་ལྟར་འགྱུར་བ་ནི་རྒྱུ་དང་འབྲས་བུར་
འགྱུར་རོ་ཞེས་ལན་མང་དུ་བཤད་ཟིན་ཏོ། །དེའི་ངོ་བོ་ཉིད་མ་ཡིན་པ་ནི་མི་སྡོད་པའོ། །སྐྱེད་བར་བྱེད་པ་མ་ཡིན་པ་ནི་མ་ཚང་བའི་ངོ་བོ་ཉིད་དོ། །དེའི་ཚེ་ཡང་ཞེས་བྱ་བ་ནི་ལྷན་ཅིག་པའི་གནས་སྐབས་ན་ཡང་སྔོན་བཞིན་དུ་མི་སྐྱེད་པ་ཉིད་དུ་འགྱུར་རོ། །གཞན་གྱི་ངོ་བོ་སྐྱེད་པར་བྱེད་པ་ཉིད་ནི་སྔར་བཀག་ཟིན་ཏོ། །དེ་ལྟར་ན་དོན་གཅིག་བྱེད་པ་དང་ཁྱད་པར་སྐྱེད་པ་ནི་སྐད་ཅིག་མ་མ་ཡིན་པ་ལ་ལྷན་ཅིག་བྱེད་པ་བཀག་པའི་མཇུག་བསྡུ་བ་ནི་དེ་ལྟ་བས་ན་ཞེས་བྱ་བ་ལ་སོགས་པ་སྨོས་ཏེ། རྣམ་པ་གཉིས་པ་ལ་ཡང་ལྷན་ཅིག་བྱེད་པ་ཉིད་མི་རིགས་ཏེ་སྐད་ཅིག་མ་མ་ཡིན་པ་ལ་ལྷན་ཅིག་བྱེད་པ་འགའ་ཞིག་ཀྱང་མེད་པས་དེ་འབའ་ཞིག་གིས་ཀྱང་སྐྱེད་བར་འགྱུར་རོ། །ལྷན་ཅིག་བྱེད་པའི་རྐྱེན་ལ་ལྟོས་པའི་སྐད་ཅིག་མ་མ་ཡིན་པ་གཞན་དག་རྒྱུར་བརྗོད་པ་ལ་རིགས་པ་ཅི་ཞིག་ཡོད་སྙམ་ནས་བསྟན་པ་ནི་དངོས་པོའི་ཞེས་བྱ་བ་ལ་སོགས་པ་སྨོས་སོ། །རྒྱུ་རྟག་པར་སྨྲ་བ་གང་ཡིན་པ་དེ་ནི་གང་གི་ཚེ་ལྷན་ཅིག་བྱེད་པའི་རྐྱེན་གཞན་ལ་ལྟོས་ནས་འབྲས་བུ་སྐྱེད་པ་ཡིན་ན་ནི་དེའི་ཚེ་རྟག་པའི་རྒྱུ་དེ་ནི་རྐྱེན་གཞན་ལ་ལྟོས་ནས་སྐྱེད་བར་བྱེད་པའི་ངོ་བོ་གཞན་ཞིག་སྐྱེ་ཞེས་བྱ་བར་གདོན་མི་ཟ་བར་གསལ་བ་ཡིན་ནོ། །འབྲས་བུ་མ་ཡིན་པ་དང་འབྲས་བུ་དེར་ཉམས་སུ་མི་མྱོང་བ་མ་ཡིན་པ་ནི་ལྟོས་པར་བརྗོད་དོ། །གང་གི་ཚེ་ལྷན་ཅིག་བྱེད་པ་ཚོགས་ཤིང་ཉེ་བར་གྱུར་པ་གང་ཡིན་པ་དེ་ནི་གནས་པ་ཅན་ནོ། །དེ་ལ་ད་ལྟར་བའི་དངོས་པོ་ནི་རྒྱུན་ནོ། །ཕལ་ཆེར་ནི་མང་པོའོ། །ལྷན་ཅིག་བྱེད་པའི་རྐྱེན་གྱི་ཁྱད་པར་སྐྱེད་པས་རང་གི་འབྲས་བུ་སྐྱེད་པ་མཐོང་སྟེ་ས་བོན་ལ་སོགས་པ་བཞིན་ནོ། །དེའི་ཕྱིར་འདི་ལྟར་རྣམ་པར་དབྱེ་བར་བྱ་སྟེ། ཕལ་ཆེར་སྨོས་པ་ནི་མི་སྡོད་པའི་དབང་པོ་ལ་སོགས་པའི་ཚོགས་པ་རྣམ་པར་གཅད་པའི་ཕྱིར་རོ། །དེ་སྲིད་པར་འགྱུར་བའི་ཚུལ་གྱིས་སྐད་ཅིག་མ་མ་ཡིན་པ་ལ་སོགས་པ་རྣམས་སོ་སོར་ཡོད་པ་སྲིད་པས་རེས་འགའ་བར་བརྟག་པར་ཡང་མི་ནུས་པའི་ཕྱིར་རོ། །སྔོན་སྐྱེད་པར་བྱེད་པ་མ་ཡིན་པ་ཕྱིས་སྐྱེད་པར་བྱེད་པའི་ངོ་བོ་ཉིད་ཀྱིས་སྐྱེད་པ་ལ་འགལ་བ་མེད་དོ། །དེ་ཉིད་སྐྱེད་པར་བྱེད་པ་དེའི་བདག་ཉིད་ཀྱི་ངོ་བོ་ནི་སྐྱེད་པར་མི་
བྱེད་པ་མི་རིགས་ཏེ་དེའི་བདག་ཉིད་མ་ཡིན་ནོ། །དེ་ཉིད་ཀྱི་ཕྱིར་ངོ་བོ་གཞན་གཅིག་འཛིན་ཏོ། །དེ་ལ་འབའ་ཞིག་པའི་སྐྱེད་པར་བྱེད་པའི་རང་བཞིན་རང་གི་ངང་གིས་འགག་པ་ཙམ་དུ་ཁས་བླངས་པས་དེ་ཐམས་ཅད་ལེགས་པར་གནས་པ་ཡིན་ནོ། །ཡང་ན་སྐྱེད་པར་བྱེད་པའི་རང་བཞིན་གཞན་པ་ཡིན་པའི་གཞུང་འདོད་པས་གལ་ཏེ་རྟག་པའི་རྒྱུ་སྔོན་སྐྱེད་པར་བྱེད་པའི་ངོ་བོར་མི་འགྱུར་གྱི་དེ་ནི་སྔར་ཡང་ཡོད་པ་ལས་རྐྱེན་གཞན་ལ་ལྟོས་ནས་དེ་སྐྱེད་པ་ཡང་རིགས་པ་ཡིན་ནོ་ཞེ་ན། སྐྱེད་བར་བྱེད་པའི་ངོ་བོ་ཞེས་བྱ་བ་ལ་སོགས་པ་སྨོས་ཏེ། གང་གི་ཚེ་ཚོགས་པའི་གནས་སྐབས་ལས་སྔོན་ཡང་སྐྱེད་པར་བྱེད་པའི་རང་བཞིན་དུ་གྱུར་པ་དེའི་ཚེ་མི་བྱེད་པ་ནི་མི་རུང་ངོ༌། །ཚོགས་པའི་གནས་སྐབས་ན་ཡང་དེའི་རང་བཞིན་ཡིན་པ་ཁོ་ནས་བྱེད་པས་གཞན་གྱི་ངོ་བོའི་སྐྱེད་པར་བྱེད་པ་སྔོན་བཀག་པའི་ཕྱིར་སྐྱེད་པར་མི་བྱེད་དོ། །དེའི་ཕྱིར་དེ་འདིའི་ངོ་བོར་ཡིན་ན་ནི་སྔོན་མེད་པར་གྱུར་ཏེ། གལ་ཏེ་རྐྱན་གཞན་གྱིས་ཀྱང་འདི་བྱེད་པ་མ་ཡིན་ན་ཅིས་ན་ད་ལྟར་གཞན་ལ་ལྟོས་བ་ཉིད་དུ་འགྱུར་ཞེ་ན། དེ་ལྟར་ན་དེ་དང་དེའི་ངོ་བོས་སྐྱེད་པ་ཡིན་པའི་ཕྱིར་གང་དང་གང་གི་རང་བཞིན་ཡིན་པ་དེ་ནི་རང་གི་རྒྱུ་ཁོ་ན་ལས་དེ་དང་འདྲ་བར་སྐྱེ་བར་འགྱུར་རོ། །དེའི་དངོས་པོ་འདི་ནི་རྒྱུ་གཞན་ལ་ལྟོས་པ་མ་ཡིན་ནོ་ཞེས་བྱ་བ་མ་ངེས་པ་སྤངས་པར་བཤད་པ་ལ་རྣམ་གྲངས་གཞན་གྱིས་མ་ངེས་པ་བརྗོད་པ་དེ་ཡོངས་སུ་སྤོང་བར་འདོད་ནས་ཕན་ཚུན་རྐྱེན་དུ་རུང་བ་ཞེས་བྱ་བ་ལ་སོགས་པ་མཛད་དོ། །དེ་ལ་རིགས་པ་གང་གིས་སྐད་ཅིག་མ་རྣམས་ལ་རྒྱུ་དང་འབྲས་བུ་ཡོད་པ་དེ་ནི་སྐད་ཅིག་མ་མ་ཡིན་པ་རྣམས་ལ་མི་སྲིད་པར་བསྟན་པ་ནི་ཞར་ལ་བྱུང་བ་ཉེ་བར་བཀོད་པ་དེ་རྫོགས་ནས། རྣལ་མ་བརྗོད་པ་ནི་དེ་ལྟ་བས་ན་གང་ག་བདག་ཉིད་ཅེས་བྱ་བ་ལ་སོགས་པ་སྨོས་ཏེ། གལ་ཏེ་ངོ་བོ་ཉིད་ཀྱིས་མི་གནས་པའི་ཆོས་ཉིད་ཀྱི་དངོས་པོ་ལ་འཇིག་པའི་རྒྱུ་དགོས་པ་མེད་ན་ངོ་བོ་ཉིད་ཀྱིས་གནས་པ་ཆོས་འབྱུང་བར་འགྱུར་རམ་ཞེ་ན། དངོས་པོ་གནས་པའི་ཆོས་ཅན་ལ་ཡང་ཞེས་བྱ་བ་ལ་སོགས་པ་སྨོས་ཏེ་གནས་པའི་ཆོས་ཅན་ལ་ནི་འཇིག་པའི་རྒྱུ་དག་ཅུང་ཟད་ཀྱང་མི་དོགས་པས་དེ་ནི་རང་གི་རྒྱུ་ལས་ཡང་དག་པར་སྐྱེའོ། །བརྟན་བའི་
ངོ་བོ་གང་ཡིན་པ་དེ་ནི་གཞན་མི་བརྟན་པར་སྐྱེད་པར་སུ་ཞིག་གིས་ཀྱང་བྱ་བར་མི་ནུས་པའི་ཕྱིར་རོ། །དངོས་པོའི་བདག་ཉིད་མི་འགྱུར་ན། རྒྱུན་ཁོ་ན་ལ་བདག་ཉིད་རང་གི་ངོ་བོ་ཡོངས་སུ་གཏོང་བར་མི་འགྱུར་རོ། །ཡང་ན་རྟག་པའི་ཆོས་ཀྱང་གཞན་དུ་རྟོགས་སོ་ཞེས་འདོད་ན། དེའི་ཚེ་གཞན་དུ་རྟོགས་ན་དེའི་ངོ་བོ་ཁོ་ན་རྟག་པའི་ཆོས་ཅན་གྱི་བདག་ཉིད་དུ་མི་འགྱུར་རོ། །མི་རྟག་པའི་ཆོས་ཀྱི་ངོ་བོ་ནི་སྔར་མེད་པ་ལས་ཕྱིས་བྱུང་བ་རིགས་པ་ཡིན་པའི་བདག་ཉིད་ཡིན་པ་དེ་ལ་ནི་རེས་འགའ་འབྱུང་བར་མི་རིགས་སོ། །དེའི་ངོ་བོ་ཉིད་མ་ཡིན་པར་ཐལ་བར་འགྱུར་ཏེ། འགལ་བའི་ཆོས་ཉེ་བར་གནས་པ་ནི་ཐ་དད་པའི་མཚན་ཉིད་ཡིན་པའི་ཕྱིར་རོ་ཞེས་བཤད་ཟིན་ཏོ། །དེ་ལྟར་གྱུར་ན་སྔ་མ་ཉིད་རྣམ་པར་རྟོག་པའི་ངོ་བོ་ནི་མི་བརྟན་པའི་ཆོས་ཡིན་ནོ་ཞེས་བྱ་བ་དང་དེ་ལ་འཇིག་པའི་རྒྱུ་དོན་མེད་དོ་ཞེས་བྱ་བའི་སྐྱོན་རྣམས་བརྟག་པ་སྔ་མར་ཟད་པས་སྔར་བཤད་ཟིན་ཏོ། །ཡང་ན་འདི་བརྟན་པའི་ངོ་བོ་ཉིད་འབའ་ཞིག་པ་འདི་སྔ་རྨི་བརྟན་པའི་ངོ་བོ་ཡིན་ན་ནི་འཇིག་པའི་རྒྱུ་ལས་སྐྱེ་བ་ཡིན་གྱི། གཞན་དུ་ན་ལྡོག་པར་མི་རིགས་སོ་ཞེ་ན། ཕ་རོལ་ལས་ཞེས་བྱ་བ་སྨོས་ཏེ། འཇིག་པའི་རྒྱུ་ཡིས་གནས་པའི་ཆོས་ཅན་དེ་ལས་གཞན་གྱི་ངོ་བོ་ཉིད་དུ་གནས་པའི་ཆོས་ཉིད་ཀྱི་མཚན་ཉིད་དུ་འགྱུར་ཏེ། དེ་སྔོན་གནས་པའི་ཆོས་ནི་རང་གི་རྒྱུ་ལས་ཡང་དག་བར་འབྱུང་བའི་ཕྱིར་རོ། །ངོ་བོ་ཉིད་ལས་ཕ་རོལ་པོ་ནི་གཞན་གྱི་ངོ་བོ་ཉིད་དེ་དེ་ནི་གྲུབ་པ་དང་མ་གྲུབ་པའི་ཕྱིར་དང་རྒྱུ་ཐ་དད་པའི་ཕྱིར་ཇི་ལྟར་དེའི་ངོ་བོར་འགྱུར། གལ་ཏེ་དའི་བདག་ཉིད་དུ་སྣང་བའི་ཕྱིར་རོ་ཞེ་ན། འདྲ་བ་ལས་ཐ་དད་པར་མི་རྟོགས་པས་དེ་བཞིན་དུ་སྣང་བར་འགྱུར་གྱི་གང་གི་ཚེ་འདི་སྔ་མའི་ངོ་བོར་གྱུར་བ་ལས་གཞན་དུ་འགྱུར་བ་དེ་ལྟ་མ་ཡིན་ན་ཚད་མ་དང་འགལ་བ་གང་གིས་ཟློག་བར་འགྱུར། གལ་ཏེ་གཞན་གྱི་ངོ་བོ་ཡིན་ནོ་ཞེ་ན། གང་ཞིག་གཞན་གྱི་ངོ་བོ་ཡིན་ན་དེ་ཇི་ལྟར་དེ་ཡིན་གཞན་གཞན་གྱི་ངོ་བོ་ཡིན་པ་ནི་མི་རིགས་ཏེ་ཧ་ཅང་ཐལ་བར་འགྱུར་བའི་ཕྱིར་རོ། །གང་ཞིག་གཞན་གྱི་ངོ་བོ་ཡིན་
པ་དེ་ཅིས་དེར་མི་འགྱུར་ཞེ་ན། དངོས་པོ་ཐ་དད་པ་ནི་ཞེས་བྱ་བ་ལ་སོགས་པ་སྨོས་ཏེ། དངོས་པོ་གཞན་པ་ཉིད་དེ་གཞན་པའི་ངོ་བོར་འགྱུར་བ་ལ་ཉེས་པ་ཅི་ཞིག་ཡོད་ཅེ་ན། དེ་ལྟ་ན་ཞེས་བྱ་བ་སྨོས་ཏེ། །དངོས་པོ་གཞན་དུ་འགྱུར་བ་ནི་འཇིག་པའི་རྒྱུ་ལ་སྐྱེས་པའི་རང་བཞིན་ནོ།། དངོས་པོ་སྔ་མ་ནི་རང་གི་རྒྱུ་ལ་སྐྱེས་པའོ། །འཕོ་བ་མེད་པའི་ཆོས་ལ་གནས་པ་ནི་གནས་པ་ལྡོག་པ་ལ་བརྟེན་པར་མི་འགྱུར་བའོ། །འཇིག་པའི་རྒྱུས་དངོས་པོ་གཞན་སྐྱེད་པར་བྱེད་པའི་ཕྱིར་དེ་གནས་པའི་ཆོས་ལ་གཞན་དུ་འགྱུར་བའི་ལྡོག་པ་མེད་དོ། །ཐོ་བ་ལ་སོགས་པས་དངོས་པོ་གཞན་འབྱུང་བ་ན་གཞན་ལྡོག་པར་རིགས་པ་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །དེ་ཉེ་བ་ནས་དེ་སྐྱེད་པ་ཡིན་པ་ཡང་སྔར་བཤད་ཟིན་ཏོ། །འོ་ན་ནི་ཟངས་མ་ལ་སོགས་པ་སྲ་བ་ལ་སོགས་པའི་ངོ་བོ་འཇིག་པའི་རྒྱུས་ཞུ་བ་ལ་སོགས་པའི་རང་བཞིན་གཞན་སྐྱེད་པ་མཐོང་བ་ཉིད་དེ་སྔ་མ་འཕོ་བ་མེད་པའི་ཆོས་མ་ཡིན་ནོ་ཞེ་ན། འདིས་ནི་ཞེས་བྱ་བ་ལ་སོགས་པ་སྨོས་ཏེ། བཤད་མ་ཐག་པའི་སྲ་བ་ལ་སོགས་པའོ། །སོགས་པ་སྨོས་པས་ནི་སྙི་བ་ལ་སོགས་པ་བསྡུའོ། །མེ་དང་གྲང་བ་ལ་སོགས་པས་ཟངས་མ་དང་གསེར་ལ་སོགས་པ་དག་སྙི་བ་དང་སྲ་བ་ལ་སོགས་པ་རང་བཞིན་གཞན་སྐྱེད་པར་རྣམ་པར་གནས་པའི་ངོ་བོ་ཟངས་ལ་སོགས་པ་བསལ་ཞིང་སྤངས་པ་ཡིན་ཏེ་སྐྱོན་མཚུངས་པའི་ཕྱིར་རོ། །དེ་ལྟ་ན་འོན་ཏེ་སྔ་མ་འཕོ་བ་མེད་པའི་ཆོས་ལ་གནས་པ་མེད་པར་མི་རིགས་ཏེ་དེ་ལ་ངོ་བོ་གཞན་འབྱུང་བ་ཡིན་ནོ་ཞེ་ན། དེ་ལ་ཡང་ཞེས་བྱ་བ་སྨོས་ཏེ། སྲ་བ་ལ་སོགས་པའི་ངོ་བོ་ཅན་གྱི་ཟངས་མ་ལ་སོགས་པ་སྔ་མ་སྲ་བ་དང་སྙི་བ་ལ་སོགས་པའི་ངོ་བོ་རང་གི་ངང་གིས་འཇིག་པ་ཅན་ཡིན་པའི་ཕྱིར་འཇིག་པའི་རྒྱུ་དང་འབྲེལ་པས་ཞིག་པ་ཡིན་ནོ། །མེ་ལ་སོགས་པ་སྨོས་པས་ནི་ཆུ་བླུགས་པ་དང་གྲང་བ་དང་རླུང་ལ་སོགས་པ་ལྷན་ཅིག་བྱེད་པ་ཕན་ཚུན་ཉེ་བར་འདུས་པ་ལ་སོགས་པ་རྟེན་གྱི་ཁྱད་པར་གྱིས་ཕུལ་དུ་བྱུང་བར་སྐྱེད་པ་དང༌། ཉེ་བར་ལེན་པ་ལ་རག་ལས་པ་སྲ་བ་ལ་སོགས་པའི་ངོ་བོ་ཅན་གྱི་ཟངས་མ་ལ་སོགས་པ་རང་གི་ངང་གིས་ལྡོག་པ་ཡིན་ནོ། །དེ་ཉིད་ཀྱི་ཕྱིར་ཉེ་བར་ལེན་
པའི་རྒྱུ་དང་མེ་ལ་སོགས་པ་ལྷན་ཅིག་བྱེད་པའི་རྐྱེན་གྱིས་ཉེ་བར་ལེན་པ་ཁྱད་པར་དུ་སྐྱེད་དོ། །གཞན་ཁོ་ན་ནི་སྲ་བ་དང་སྙི་བ་ལ་སོགས་པའི་ངོ་བོ་གཞན་ཞིག་གོ །སྙི་བ་སྨོས་པ་ནི་ཉེ་བར་མཚོན་པ་ཉིད་ཡིན་པས་སྔ་མ་སྲ་བ་དང་སྙི་བ་ལ་སོགས་པའི་ངོ་བོ་ཅན་གྱི་ཟངས་མ་ལ་སོགས་པ་རྣམ་པར་གནས་པའི་བདག་ཉིད་སྲ་བ་དང་སྙི་བ་ལ་སོགས་པར་འགྱུར་བ་ནི་སྐྱེས་པ་ཡིན་གྱི་ཡོངས་སུ་གྱུར་པ་ནི་མ་ཡིན་ནོ། །གཞན་གྱིས་འདིར་དེ་ནི་ཞེས་བྱ་བ་སྨོས་ཏེ། ཇི་ལྟར་གནས་པའི་ཆོས་ཅན་དུ་གྱུར་པ་ལ་འཇིག་པའི་རྒྱུས་མི་བརྟན་པའི་ངོ་བོ་སྐྱེད་དོ། །དེས་ན་འཇིག་པ་ཡིན་ནོ་ཞེས་སུ་ཞིག་གིས་སྨྲས། །གང་གིས་གང་ཡང་ཕ་རོལ་ལས་གཞན་དུ་འགྱུར་བའི་ཕྱིར་ན་གཞན་གྱི་ངོ་བོ་ཡིན་ནོ་ཞེས་བརྗོད་དེ། འོན་ཀྱང་དེ་རང་གིས་གནས་པའི་ཆོས་ཅན་ཁོ་ན་རང་གི་རྒྱུ་ལས་སྐྱེ་བ་ནི་མི་བརྟན་པའི་ངོ་བོ་ཡིན་པས་འཇིག་པའི་རྒྱུ་ལས་མི་སྐྱེ་བར་ཇི་ལྟར་ཤེས་རང་གི་རྒྱུ་ཇི་ལྟ་བ་རྣམས་ཀྱིས་རང་བཞིན་གྱིས་གནས་པའི་ཆོས་ཅན་ཁོ་ན་སྐྱེ་བ་ཡིན་ནོ་སྙམ་ན་ནི་མེ་ལ་སོགས་པ་འཇིག་པའི་རྒྱུ་མི་སྲིད་ན་གནས་པའི་ཕྱིར་རོ། །གང་གི་ཚེ་རང་བཞིན་གྱིས་གནས་པའི་ཆོས་ཅན་རྒྱུ་ལས་སྐྱེ་བར་འགྱུར་བ་དེའི་ཚེ་མི་སྲིད་ཀྱང་གནས་པ་མ་ཡིན་ན་ནི་དེའི་ཕྱིར་དེའི་ངོ་བོ་ཉིད་ཀྱིས་གནས་པའི་ཆོས་ཅན་ཡོད་པ་ལས་རང་གི་རྒྱུ་ཁོ་ནས་འདི་གཞན་གྱི་ངོ་བོར་ངེས་པ་ཡིན་གྱི། དཔེར་ན་མེ་ལ་སོགས་པ་གཞན་དང་འགལ་བ་ལས་འཇིག་པར་བདག་ཉིད་ཀྱིས་སྙམས་སུ་མྱོང་བ་བཞིན་ནོ། །གཞན་གྱིས་ཞེས་བྱ་བ་ནི་ལས་སུ་བྱ་བའི་ལྔ་པ་དབྱེ་བ་བརྗོད་པ་སྟེ། གཞན་ལ་ལྟོས་སོ་ཞེས་བྱ་བའི་དོན་ཏོ། །རང་གི་རྒྱུ་རྣམས་ཀྱིས་འདིའི་ངོ་བོ་ངེས་པར་བསྐྱེད་པ་ཡིན་ཏེ། དཔེར་ན་ཁྱེད་ཀྱི་འགལ་བ་ལ་ལྟོས་ནས་རང་ཉིད་ལྡོག་པར་འགྱུར་བ་བཞིན་ནོ། །དེ་སྐད་དུ། དེ་ཡི་ངོ་བོ་ཡོད་པ་ཡང༌། །གང་ལ་ལྟོས་ནས་ལྡོག་འགྱུར་བ། །དཔེར་ན་གཞན་གྱི་འགལ་བ་དག །བརྗོད་བཞིན་ཐོ་བ་ལ་སོགས་ཡིན། །ཞེས་བཤད་དོ། །གལ་ཏེ་འཇིགས་པ་ནི་འགལ་བ་དང་ཉེ་བ་ན་རང་ཉིད་ལྡོག་པ་ཡིན་
ན་རྒྱུ་མེད་པར་འགྱུར་རོ། །རྒྱུ་མེད་པ་ཡིན་ན་ཡུལ་དང་དུས་དང་ངོ་བོ་ཉིད་ངེས་པ་མི་རིགས་པ་མ་ཡིན་ནམ་ཞེ་ན། དེ་ནི་ཞེས་བྱ་བ་སྨོས་ཏེ་འཇིག་པ་ཞེས་བྱ་བ་འཇིག་པ་ཅན་ལས་གང་གིས་གཞན་པའི་ངོ་བོ་ནི་འགྱུར་བ་མེད་དོ། །འོན་ཀྱང་དངོས་པོ་འཕོ་བ་ཁོ་ན་འཇིག་པ་ཡིན་ཏེ་ཡང་རང་བཞིན་མེད་པའི་ཕྱིར་རྒྱུ་དང་ལྡན་པ་མི་རིགས་སོ། །དེ་ནི་དེའི་མ་ཡིན་ལ་འབའ་ཞིག་པ་ནི་རང་ཉིད་ཁོ་ན་མ་ཡིན་པ་དེའི་ཕྱིར་འབྱུང་བ་མེད་པས་གང་གི་རྒྱུ་དང་ལྡན་པར་རྟོགས་པར་བྱ། གྲུབ་པའི་མཐའ་སྨྲ་བས་ལན་ནི་འདི་ནི་ཞེས་བྱ་བ་སྨོས་ཏེ། རྣམ་པར་རྟོག་པ་གཉིས་ལས་མི་འདའོ་ཞེས་བཤད་ཟིན་ཏོ། །རྣམ་པར་རྟོག་པ་གཉིས་ཅི་འདྲ་བ་ཞིག་ཅེ་ན། ཅི་དངོས་པོའི་ངོ་བོ་རྟོག་པ་ཞིག་གམ་ཞེས་བྱ་བ་ལ་སོགས་པ་སྨོས་སོ། །འོན་ཏེ་དུས་གཞན་ཞིག་ཏུ་གནས་པའི་ཆོས་ཅན་དུ་ཁས་ལེན་པས་རྟག་པར་རྣམ་པར་རྟོག་པའི་གོ་སྐབས་མེད་དོ་ཞེ་ན་མ་ཡིན་ཏེ། དེ་ཁས་བླངས་ན་ཡང་རྟག་པ་ཉིད་ཁས་བླངས་པར་འགྱུར་རོ། །དེ་ལྟ་ན་གང་གི་ཚེ་ལོགས་ཤིག་ཏུ་གནས་པའི་ཆོས་འདིར་རང་གིས་རྒྱུ་རྣམས་ཀྱི་སྐྱེད་པ་དེའི་ཚེ་ལོ་གཅིག་རྫོགས་པ་གང་ཡིན་པ་ཕྱི་མའི་དུས་ཀྱི་ལོར་གནས་པའི་ཆོས་ཀྱི་ངོ་བོ་ཡིན་ནོ། །གང་གི་ཕྱིར་འདི་ལོར་གནས་པ་དེའི་མཐའ་ཡང་དེ་ཉིད་ཡིན་པ་དེའི་ཕྱིར་ལོ་གཞན་དུ་གནས་པ་དེའི་མཐའ་ཡང་ཐོག་མར་ལོར་གནས་པའི་ཆོས་ཀྱི་ངོ་བོ་ཡོངས་སུ་སྤངས་པས་ལོ་གཞན་དུ་གནས་པར་ཐལ་བར་འགྱུར་རོ། །དུས་གཞན་དུ་གནས་པའི་ཆོས་སུ་ཁས་བླངས་ཀྱང་རྟག་པ་ཁས་བླངས་པར་འགྱུར་པས་རྟག་པའི་རྣམ་པར་རྟོག་པ་སྤང་བར་དཀའོ། །འཇིག་པའི་རྒྱུ་དང་ཉེ་བ་ལས་རང་ཉིད་ལྡོག་པ་ཡིན་ནོ་ཞེས་ཁས་བླངས་པས་མི་རྟག་པའི་རྣམ་པར་རྟོག་པ་དང་འཇིག་པའི་བདག་ཉིད་ཀྱི་རྣམ་པར་ཡིན་པ་དེ་ལྟ་ན་འཇིག་པའི་རྒྱུར་མངོན་པར་འདོད་པ་ཉེ་བར་རང་ཉིད་འཇིག་པའི་ངོ་བོ་གང་ཡིན་པ་དེ་ཉིད་ཡོད་པའི་ངོ་བོར་གཅིག་པའི་ཕྱིར་སྐྱེས་པ་ཙམ་དེ་ཉིད་ན་འཇིག་པར་ཐལ་བར་འགྱུར་བས་ཇི་ལྟར་དུས་གཞན་དུ་གནས་པའི་ཆོས་ཉིད་སྲིད་པ་ཡིན། དེ་ལྟར་བརྟག་པར་བྱས་ན་ཕྱི་མའི་རྣམ་པར་རྟོག་པ་ཁས་བླངས་པས་དུས་གཞན་དུ་གནས་པ་འདི་སྤང་པའི་ཕྱིར་རྟག་
པ་ཉིད་འདིར་ཁས་བླང་བར་བྱའོ། །དེ་ལ་འཇིག་པའི་རྒྱུ་དང་ཉེ་བ་ལས་རང་ཉིད་འཇིག་པར་འགྱུར་བ་ཇི་ལྟར་དུས་གཞན་ཁས་བླངས་པ་སྔར་ནི་རྟག་པར་གྱུར་པ་ཉིད་ལ་ཕྱིས་ནི་མི་རྟག་པ་འཛིན་པའི་རང་བཞིན་དུ་བརྗོད་པར་འགྱུར་རོ་ཞེས་དེ་ལྟར་རྣམ་པ་གཉིས་བརྗོད་པར་འགྱུར་རོ། །ཡང་སྨོས་པ་ནི་ཕྱི་མ་རྟོགས་པར་གྱུར་པ་ཉིད་ལ་ཕྱིས་ནི་མི་རྟག་པ་འཇིག་པའི་རང་བཞིན་དུ་བརྗོད་པར་འགྱུར་རོ་ཞེས་དེ་ལྟར་རྣམ་པ་གཉིས་བརྗོད་པར་འགྱུར་རོ། །ཡང་སྨོས་པ་ནི་ཕྱི་མ་ལ་ལྟོས་པའོ། །གཉིས་སུ་འགྱུར་པ་ཇི་འདྲ་བ་ཞིག་ཅེ་ན། རྟག་པ་དང་མི་རྟག་པའི་རང་བཞིན་ཐ་དད་པ་གང་ཡིན་པ་དེ་ལྟར་འདི་སྔར་རྟག་པའི་ངོ་བོ་གང་ཡིན་པ་དེ་ནི་རྟག་པར་མངོན་པར་འདོད་ལ། རང་ཉིད་ཕྱི་ནས་ཞིག་པར་བརྗོད་པ་ནི་ཐམས་ཅད་དུ་སྐད་ཅིག་མ་རེ་རེ་ཁོ་ནའི་འཇིག་པར་བརྗོད་དོ། །དེ་ལྟར་མ་ཡིན་ན་སྔར་བཤད་པ་རིགས་པས་ཕྱིས་འཇིག་པར་མི་སྲིད་པའི་ཕྱིར་རོ། །ཡང་ན་སྐད་ཅིག་མ་རེ་རེ་འདི་འཇིག་པར་མི་འགྱུར་བ་དེའི་ཚེ་ཕྱིས་ཀྱང་དེ་མི་རིགས་པས་ཐམས་ཅད་དུ་མི་འཇིག་པར་རབ་ཏུ་སྨྲས་ཟིན་པས་སྔ་མ་ལ་རྟག་པར་མངོན་པར་འདོད་པའི་རང་བཞིན་ལ་འཇིག་པའི་རྒྱུ་ནུས་པ་ཐོགས་པ་མེད་པ་དེས་ཅི་ཡང་མི་བྱེད་པ་ཉིད་དོ། །འོ་ན་འཇིག་པའི་རྒྱུ་ཉིད་ལ་ནུས་པ་མེད་པར་གཞན་གྱིས་ཁས་མི་ལེན་གྱི་འགལ་བ་དང་ཉེ་བ་ལ་ལྟོས་ནས་རང་ཉིད་འཇིག་པར་ཁས་ལེན་ཏོ་ཞེ་ན། འཇིག་པ་དེ་ཉིད་ཀྱི་རྒྱུ་མཚན་མ་ཡིན་པར་ཐལ་བའི་ཕྱིར་རོ། །དེ་ལྟ་མ་ཡིན་བ་ཅུང་ཟད་ཅིག་བྱེད་པ་མེད་དོ་ཞེས་བྱ་བ་འདི་རྒྱུ་ཡོད་པ་ལ་ལྟོས་པའི་མཚན་ཉིད་ཡིན་པའི་ཕྱིར་རོ། །གལ་ཏེ་རང་གི་རྒྱུ་ཁོ་ནའི་འདི་ཉེས་པ་ཡིན་ཏེ། གང་ཅུང་ཟད་ཅིག་བྱེད་པ་མེད་ཀྱང་དེ་ལ་ལྟོས་ན་འཇིག་པ་ཡིན་ནོ། །སླར་ཡང་གནས་པ་མ་ཡིན་པ་ལ་མངོན་པར་ཞེན་པ་དེ་དག་གིས་ཅི་ཞིག་བྱ། གང་དེ་ལ་དེ་ལྟར་འཇུག་པ་དེའི་ཕྱིར་ཕན་འདོགས་པ་ལ་ལྟོས་པ་ཉིད་ནི་རང་གི་རྒྱུ་ཡིས་ངེས་པར་སྦྱོར་ན་མཛེས་པ་ཡིན་ནོ། །དེ་ལྟ་མ་ཡིན་ན་འབྲས་བུའི་བདག་ཉིད་དེ་ཡང་དེ་ལ་ངེས་པར་སྦྱོར་བ་ལ་གུས་པར་མི་བྱེད་དོ། །ཇི་ལྟར་ཅུང་ཞིག་བྱེད་པ་
མེད་པ་འགལ་བ་ཡིན། འདི་འགལ་བ་མེད་པར་མངོན་པར་འདོད་ན་ཁྱད་པར་འགའ་ཡང་མེད་པས་འདི་ནི་གྱི་ནའོ། །གང་ཡང་དཔེར་ན་སྐད་ཅིག་མར་སྨྲ་བ་གཞན་དག་བུམ་པ་ནི་ཐོ་བ་ལ་སོགས་པ་ལ་ལྟོས་ནས་ཅུང་ཟད་ཅིག་ཀྱང་བྱེད་པ་མེད་ཀྱང་ལྡོག་པ་དེ་བཞིན་དུ་ཁོ་བོ་ཅག་ཀྱང་དུས་གཞན་དུ་གནས་པ་ཅན་གྱི་དངོས་པོ་ཡིན་ནོ་ཞེ་ན། དེ་ཡང་གཞན་གྱི་གཞུང་ལུགས་མི་ཤེས་པར་སྨྲ་བ་ཡིན་ཏེ། ཁོ་བོ་ཅག་ནི་གང་གི་ཕྱིར་རྒྱུན་ཞེས་བྱ་བ་སྐད་ཅིག་མ་ལས་ཐ་དད་པ་ཡོད་པ་ནི་མ་ཡིན་ཏེ་ཐོ་བ་ལ་སོགས་པ་ཉེ་བས་ཅུང་ཟད་ཅིག་ཀྱང་ལྡོག་པ་ལ་བྱེད་པ་མེད་དོ།། སྐད་ཅིག་མ་ཁོ་ན་འབའ་ཞིག་ཡོད་པ་དེ་ཡང་རང་ཉིད་ལྡོག་པས་ཐོ་བ་ལ་སོགས་པ་ལ་ལྟོས་པ་ནི་མ་ཡིན་ཏེ། རང་གི་ངང་གིས་འགོག་པའི་ཕྱིར་རོ། །གང་ཡང་གྱོ་མོ་ལ་སོགས་པ་དེ་དག་བསྐྱེད་པའི་མཚན་ཉིད་མ་ཡིན་པའི་འཇུག་པ་དང་ལྡོག་པ་ཡོད་པ་གང་ཡིན་པ་ནི་འདྲ་བ་གཞན་བྱུང་བའི་འཁྲུལ་པའི་རྒྱུ་མཚན་གྱིས་འཇིག་རྟེན་པ་གཅིག་པ་ཉིད་མངོན་པར་ཞེས་པར་ཁས་ལེན་པས་བུམ་པ་ལ་སོགས་པ་ལྡོག་པ་ཡིན་ནོ་ཞེས་ཐ་སྙད་དུ་བྱེད་དོ། །དེ་ལ་ཐོ་བ་ལ་སོགས་པ་ཅུང་ཟད་ཅིག་ཀྱང་བྱེད་པ་མེད་པ་ཉིད་དུ་ཡོད་པ་མ་ཡིན་ཏེ། དེ་ཡོད་པ་ཉིད་ལས་དེ་དག་འབྱུང་བའི་ཕྱིར་རོ། །མགྱོགས་པ་བསྣུན་པའི་ཐོ་བ་ལ་སོགས་པ་ནི་ལྷན་ཅིག་བྱེད་པའི་རྐྱེན་ཡིན་ཏེ། བུམ་པའི་སྐད་ཅིག་མ་དང་ཕན་ཚུན་ཉེ་བར་འདུས་པ་ལ་སོགས་པའི་རྐྱེན་གྱི་ཁྱད་པར་ལས་གྱོ་མོ་ལ་སོགས་པ་ཕུལ་དུ་བྱུང་བ་སྐྱེད་པར་འགྱུར་བའི་ཆོས་ཡིན་པའི་ཕྱིར་དང༌། དེ་ཡང་དེ་སྐྱེད་པའི་རང་བཞིན་ཡིན་པའི་ཕྱིར་རོ། །ངོ་བོ་གཉིས་སུ་ཁས་བླངས་པར་ཐལ་བར་འགྱུར་བ་ལ་སོགས་པ་དེ་བསལ་བར་འདོད་པས་གཞན་གྱིས་གལ་ཏེ་སྔར་རྟག་པ་ཞེས་བྱ་བ་ལ་སོགས་པ་སྨོས་ཏེ། འདི་ག་ལས་ཤེ་ན། ངོ་བོ་ཉིད་གཅིག་པའི་ཕྱིར་རོ། །ཐམས་ཅད་དུ་ངོ་བོ་གཅིག་པས་ཐམས་ཅད་དུ་རྟག་པ་ཡིན་གྱི། ཕྱི་ནས་མི་རྟག་པའི་ངོ་བོ་ནི་མི་སྲིད་པའི་ཕྱིར་རོ། །གྲུབ་པའི་མཐའ་སྨྲ་བས་འོ་ན་ཞེས་བྱ་བ་སྨོས་ཏེ། དངོས་པོ་ཐམས་ཅད་དུ་རྟག་པའི་ངོ་བོ་ཉིད་ཀྱི་རང་བཞིན་གྱིས་འཇིག་པ་མི་འཇིག་པར་རྟོགས་ན་ཇི་ལྟར་འཇིག་པ་ཞེས་
བྱ་བ་ཡིན། ག་ལས་ཤེ་ན། དེའི་ངོ་བོ་ཉིད་དང་འཇིག་པ་དག་ནི་རྟག་པའི་ངོ་བོ་དང་འཇིག་པ་མི་རྟག་པའི་ངོ་བོ་ཉིད་ནི་ཕན་ཚུན་མེད་པའི་ངོ་བོ་ཡིན་པ་ཉིད་ཀྱི་ཕྱིར་ཕན་ཚུན་ཡོངས་སུ་སྤངས་པའི་ཕྱིར་རོ། །མཇུག་བསྡུ་བ་ནི་དེ་ལྟ་བས་ན་ཞེས་བྱ་བ་སྨོས་ཏེ། རྟག་པའི་ཆོས་ལ་འཇིག་པ་མི་རུང་བ་དེའི་ཕྱིར་འཇིག་པ་ཡོད་པ་གང་གི་ཚེ་གདོན་མི་ཟ་བར་འབྱུང་བའི་བྱས་པའི་ངོ་བོ་དང་འཇིག་པ་ཡོད་པར་ཕ་རོལ་པོ་འདོད་པ་དེའི་ཚེ་འཇིག་པའི་ངོ་བོས་འཇིག་པར་འགྱུར་རོ། །གནས་པ་མེད་པའི་ཕྱིར་འཇིག་པ་སྟེ་བྱེད་པ་པོའི་ཚིགས་ཀྱི་གྷ་ཉའི་རྐྱེན་ཡིན་ནོ། །དེའི་ངོ་བོ་གང་ཡིན་པ་དེས་འཇིག་པའི་རང་བཞིན་གྱིས་མི་གནས་པའི་ཆོས་ཡིན་པ་དེས་ན་བྱས་པའི་ངོ་བོ་དང་ལྷན་ཅིག་པའི་ཡོད་པ་ནི་རང་གི་རྒྱུད་ལས་བྱུང་བ་ཡིན་ནོ། །དེ་ལྟ་མ་ཡིན་ན་གདོན་མི་ཟ་བར་འབྱུང་བར་ཁས་བླངས་པ་བྱས་པའི་བདག་ཉིད་ལ་འཇིག་པ་ཡོད་པ་མི་རིགས་པའི་ཕྱིར་རོ། །གལ་ཏེ་ཡོད་པ་ཉིད་ཡིན་ནོ་ཞེ་ན། དེ་ལྟ་ན་ཡང་ཞེས་བྱ་བ་སྨོས་ཏེ། རང་ཉིད་ཀྱིས་འཇིག་པའི་ངོ་བོ་ཉིད་ཀྱི་ངོ་བོ་མ་ཡིན་ཏེ། གཞན་པ་ཉིད་མི་སྲིད་པའི་ཕྱིར་འཇིག་པའི་རྒྱུ་དོན་མེད་དོ། །རྣམ་པར་རྟོག་པ་དང་པོ་ཉེ་བར་བཀོད་པ་དེ་ཉིད་བཤད་ཟིན་པས་ཡང་བཤད་པར་མི་བྱའོ། །དེས་ན་ཞེས་བྱ་བ་ལ་སོགས་པ་ནི་གོ་བླའོ། །དེ་ལྟར་ན་འཇིག་པ་ལ་ལྟོས་པ་མེད་པས་ནུས་པ་ཡང་དོན་མེད་དོ། །དེའི་རྒྱུ་དང་འབྲེལ་པ་ལས་བྱས་པའི་མཚན་ཉིད་དང་ཡོད་པ་ནི་སྔོན་གྱི་སློབ་དཔོན་རྣམས་ཀྱིས་བསྟན་ཅིང་བཤད་དོ། །དེའི་བཟློག་ན་གནོད་པ་ཅན་གྱི་ཚད་མ་ཇི་ལྟ་བ་དེ་རྗེས་སུ་མྱོང་བ་དེ་བསྟན་པ་ནི་ལྟ་བས་ན་དངོས་པོ་འཇིག་པ་ལ་ཞེས་བྱ་བ་སྨོས་ཏེ། འདི་ལྟར་སྦྱོར་བ་ནི་གང་དང་གང་གི་དངོས་པོ་ཡོད་པ་ལ་ལྟོས་པ་མེད་པ་དེ་དང་དེའི་དངོས་པོར་ངེས་པ་ཡིན་ཏེ། དཔེར་ན་ཐ་མའི་རྒྱུའི་ཚོགས་པ་རང་གི་འབྲས་བུ་བསྐྱེད་པ་ཡིན་ནོ། །བྱས་པའི་ངོ་བོའི་དངོས་པོ་ཡོད་པའི་འཇིག་པ་ནི་གཞན་གྱིས་དངོས་པོ་འབྱུང་བ་གདོན་མི་ཟ་བར་འཇིག་པར་ཁས་བླངས་པ་ཡང་གཞན་ལ་མི་ལྟོས་པའི་ཕྱིར་རོ་ཞེས་བྱ་བ་ནི་རང་བཞིན་
གྱི་གཏན་ཚིགས་སོ། །ཐལ་བར་འགྱུར་བ་བཟློག་པ་ལ་གནོད་པ་ཅན་གྱི་ཚད་མ་སྔོན་གྱི་སློབ་དཔོན་གྱིས་བསྟན་ཏོ། །དེས་ན་དེའི་དངོས་པོར་ངེས་པའི་འཇིག་པ་ནི་རེས་འགའ་བ་ཡིན་པའི་ཕྱིར་སྐྱེས་མ་ཐག་འཇིག་པ་ཡིན་ནོ། །ཡོད་པ་གང་ཡིན་པ་དེ་ནི་བྱས་པའི་མཚན་ཉིད་ཀྱི་དངོས་པོའོ། །འཇིག་པ་ནི་འཇིག་པའི་རང་བཞིན་ཡིན་ནོ། །འཇིག་པ་ཉིད་བསྒྲུབ་པར་བྱ་བའི་ཆོས་ལོག་ན་བྱས་པའི་བདག་ཉིད་ཀྱི་ཡོད་པ་ལྡོག་པ་ཡིན་པའི་ཕྱིར་བྱས་པ་དང་མ་བྱས་པའི་མཚན་ཉིད་ལ་སྐད་ཅིག་མའི་ཡོད་པས་རྗེས་སུ་འགྲོ་བ་དང་ལྡོག་པ་གྲུབ་ཅིང་རྫོགས་པའོ། །མི་ལྡོག་པ་བཤད་པས་ཡོད་པ་དང་སྐད་ཅིག་མ་དེའི་བདག་ཉིད་དུ་གྲུབ་པའི་རྒྱུ་མཚན་གྱིས་རྗེས་སུ་འགྲོ་བ་དང་ལྡོག་པ་དག་ཀྱང་ངེས་པ་ཡིན་ནོ། །དེ་ལྟར་ན་དེ་ནི་སྔོན་གྱི་སློབ་དཔོན་གྱིས་བྱས་པའི་ཡོད་པ་མེད་པའི་མ་བྱས་པའི་ཡོད་པ་རྒྱུ་མེད་པ་ཅན་ནི་རྟག་པ་ཞེས་བྱ་སྟེ། རྟག་པའི་མཚན་ཉིད་སྤངས་པས་དེ་ནི་རྟག་པ་མ་ཡིན་ནོ། །ཡོད་པ་སྐྱེ་བ་དང་ལྡན་པ་གང་ཡིན་པ་དེ་བཤད་པའི་རིགས་པས་གདོན་མི་ཟ་བར་འཇིག་པར་ཁས་བླང་བར་བྱའོ། །གཞན་དུས་གཞན་དུ་གནས་པར་འགྱུར་རོ་ཞེས་བྱ་བའི་ལན་བཤད་ཟིན་ཀྱང་གང་དང་གང་ཡོད་པ་དེ་དང་དེ་ནི་སྐད་ཅིག་མ་ཡིན་ནོ་ཞེས་ཐུན་མོང་དུ་བརྗོད་ཀྱི་བྱས་བ་དང་མ་བྱས་པའི་མཚན་ཉིད་ཀྱི་ཡོད་པ་ཐ་དད་པ་ལ་ལྟོས་པ་མེད་པ་རྒོལ་བ་རྣོན་པོ་ཡིན་ནོ། །བྱས་པ་ཉིད་ཀྱང་གདོན་མི་ཟ་བར་འཇིག་པ་ཡིན་ནོ་ཞེས་གཞན་གྱིས་ཁས་བླངས་པ་ལ་མི་ལྟོས་པ་དེའི་ཚེ་འཇིག་པ་མི་ལྟོས་པ་ཉིད་དུ་ཐམས་ཅད་ལ་མི་འགྲུབ་བོ། །གང་དག་འཇིག་པར་འགྱུར་བ་བུམ་པ་ལ་སོགས་པ་ལ་མཐོང་བ་དེ་དག་ཉིད་ལ་རྒྱུ་མི་རིགས་པས་དེ་ལ་མི་ལྟོས་པ་ནི་རུང་ངོ༌། །གང་ཡང་ཡུལ་ལ་སོགས་པ་བར་དུ་ཆོད་པ་དང་རི་བོ་ལ་སོགས་པ་ལ་འཇིག་པ་དང་མི་འཇིག་པ་མ་མཐོང་བས་དེ་དག་ཉིད་གདོན་མི་ཟ་བར་འཇིག་པར་ཁས་བླངས་པའི་རྒྱུ་མཚན་མེད་པའི་ཕྱིར་རོ། །མཐའ་མ་འཇིག་པ་ནི་ལྟོས་པ་མེད་པ་བཞིན་དུ་འཇིག་པ་ལ་ཁྱད་པར་མེད་པས་དངོས་པོ་ཡང་དེའི་ངོ་བོར་ངེས་པ་ཡིན་ནོ་ཞེས་བརྗོད་པར་མི་ནུས་པའི་ཕྱིར་རོ། །དེའི་ངོ་བོ་ཡང་ལྟོས་
པ་དང་བཅས་པའི་ཕྱིར་འཇིག་པ་ལ་ལྟོས་པ་མེད་པ་ཉིད་མ་གྲུབ་བོ། །མ་བྱས་པ་དང་ནམ་མཁའ་ལ་སོགས་པ་རྣམས་ལ་འཇིག་པའི་ངོ་བོ་ལྟོས་པ་དང་བཅས་པ་བཞིན་དུ་ལྟོས་པ་ཡོད་ན་འཇིག་པའི་རང་བཞིན་དུ་མ་གྲུབ་པོ། །རྗེས་སུ་འགྲོ་བ་དང་ལྡོག་པ་དག་དེའི་རྒྱུ་མཚན་དུ་མི་རིགས་པ་མཐོང་སྟེ། དོན་བྱེད་པར་འགལ་བའི་མཚན་ཉིད་ཡིན་པ་དེའི་ཚེ་གནོད་པ་བྱེད་པའི་ཚད་མས་དེའི་བདག་ཉིད་རབ་ཏུ་སྒྲུབ་པར་བྱེད་པར་བརྗོད་པར་འགྱུར་བ་ཡིན་ནོ་སྙམ་ནས་ཕྱོགས་སྔ་མ་སླང་པ་ནི་གལ་ཏེ་ངོ་བོ་ཉིད་ཀྱིས་འཇིག་པ་ཞེས་བྱ་བ་སྨོས་ཏེ། བཤད་ཟིན་པའི་རིགས་པས་འཇིག་པ་བུམ་པ་ལ་སོགས་པ་ལ་ཡོངས་སུ་མཐོང་དུ་ཟིན་ཀྱང་ཡུལ་ལ་སོགས་པ་བསྐལ་བ་འགའ་ཞིག་གམ། རི་བོ་ལ་སོགས་པ་ལ་བྱས་པ་དང་འཇིག་བ་མི་དམིགས་པ་འམ་ནམ་མཁའ་ལ་སོགས་པ་བྱས་པ་མ་ཡིན་པའི་ཡོད་པ་དེའི་ངོ་བོ་ཡང་མི་འཇིག་པའི་ངོ་བོ་མ་ཡིན་པར་ཡང་འགྱུར་རོ། །ཡང་སྨོས་པ་ནི་སྲིད་པར་འགྱུར་རོ། །འཇིག་པའི་ངོ་བོ་དེའི་སྒྲུབ་པར་བྱེད་པའི་ཚད་མ་མེད་པར་དོགས་པ་དེ་དང་འདི་དག་གིས་འཇིག་པའི་ངོ་བོ་ལྟོས་པ་དང་བཅས་པའི་ཕྱིར་ལྟོས་པ་མེད་པ་མ་གྲུབ་པ་ཡིན་ནོ། །དེའི་དབང་གིས་བསྒྲུབ་པར་བྱ་བ་སྐད་ཅིག་མ་ཉིད་ཡོད་པའི་ངོ་བོར་མ་གྲུབ་པོ། །དེའི་རྒྱུ་མཚན་གྱི་རྗེས་སུ་འགྲོ་བ་དང་ལོག་པ་ཡང་མ་གྲུབ་པའི་ཕྱིར་རོ། །ཡང་འདིར་དོགས་པའི་རྒྱུ་མཚན་ཅི་ཞིག་ཡིན་གང་གིས་ན་འགའ་ཞིག་དེ་མ་ཡིན་པ་ལ་ཡང་དོགས་པ་ཡིན་སྙམ་ན། ཐམས་ཅད་ཀྱི་ངོ་བོ་ཉིད་ཐམས་ཅད་ཡིན་པ་ནི་མེད་པས་ཞེས་བྱ་བ་སྨོས་ཏེ། རྣམ་པ་སྣ་ཚོགས་པའི་དངོས་པོའི་ངོ་བོ་མཐོང་སྟེ། ཁ་ཅིག་ཐོགས་པ་དང་བཅས་པ་དང༌། ཁ་ཅིག་ཐོགས་པ་མེད་པ་དང༌། དེ་བཞིན་དུ་སྔོན་པོ་དང་སྔོན་པོ་མ་ཡིན་པ་ལ་སོགས་པའི་ངོ་བོ་དང༌། དེ་བཞིན་དུ་ཁ་ཅིག་འཇིག་པ་དང་གཞན་ནི་མི་འཇིག་པའི་རང་བཞིན་དུ་ཕྱོགས་སྔ་མ་དོགས་པ་ལ་མ་ཡིན་ཏེ། ཁ་ཅིག་དེའི་ངོ་བོ་མ་ཡིན་པ་ལ་ཡང་འགྱུར་རོ་ཞེས་དོགས་ན་དེ་བཞིན་དུ་དངོས་པོ་དེ་ནི་སྐད་ཅིག་པ་མ་ཡིན་པ་ཉིད་དུ་འགྱུར་བ་དང་དེ་ལ་ཡོད་
པ་དངོས་པོ་ཉིད་དུ་ཐལ་བར་འགྱུར་བས་དེ་མ་ཡིན་པའི་ངོ་བོ་འགྱུར་དོགས་པ་ག་ལ་ཡིན། འོ་ན་ཇི་ལྟར་སྐད་ཅིག་མ་མ་ཡིན་པ་དངོས་པོ་མེད་པར་ཐལ་བར་འགྱུར། དེས་ན་ཡོད་པ་དང་སྐད་ཅིག་མ་ཉིད་ཀྱི་ངོ་བོ་ཡིན་པས་རྗེས་སུ་འགྲོ་བ་དང་ལྡོག་པ་གྲུབ་པོ་ཞེ་ན། དངོས་པོའི་ཞེས་བྱ་བ་ལ་སོགས་པ་སྨོས་ཏེ། འདི་སྙམ་དུ་སེམས་པ་ཡིན་ཏེ་འདིར་རེ་ཞིག་འདི་ཉིད་རྣམ་པར་དཔྱད་པར་བྱ་སྟེ། ཅི་དངོས་པོ་དེ་རྣམས་ཀྱི་མཚན་ཉིད་རིགས་པ་ཡིན་ནམ། དེ་ལ་ཡོད་པ་དང་འབྲེལ་པའི་མཚན་ཉིད་ནི་མ་ཁྱབ་པ་ཡིན་ཏེ་སྤྱི་ལ་སོགས་པ་རྣམས་ལ་མེད་པའི་ཕྱིར་རམ། མོ་གཤམ་གྱི་བུ་ལ་སོགས་པ་ལ་ཡང་ཡོད་པས་ཁྱབ་ཆེས་པ་ཉིད་དོ། །མོ་གཤམ་གྱི་བུ་ལ་སོགས་པ་མེད་པའི་ཕྱིར་ཇི་ལྟར་ཡོད་པ་དང་འབྲེལ་པ་ཡིན་ཞེ་ན། མ་ཡིན་ཏེ་གཅིག་ལ་གཅིག་བརྟེན་པ་ཉིད་ཀྱི་ཕྱིར་རོ། །གང་གི་ཕྱིར་མེད་པ་དེ་དག་ནི་ཡོད་པ་དང་འབྲེལ་པ་སྤངས་པ་ཉིད་དང་དེ་སྤངས་པ་ཡོད་པ་ཡིན་པའི་ཕྱིར་རོ། །གལ་ཏེ་ཡོད་པ་ནི་ཡོད་པ་དང་འབྲེལ་པ་ཡིན་པ་དེ་ལྟ་ན་འོ་ན་ཏེ་གཞན་ལས་ཡོད་པའི་མཚན་ཉིད་དུ་བརྗོད་པའི་ཕྱིར་ཡོད་པ་དང་འབྲེལ་པ་ཡང་དོན་མེད་དོ། །དེ་ཉིད་ཀྱི་ཕྱིར་དངོས་པོ་ཡོད་པའི་ཕྱིར་རོ། །གལ་ཏེ་དོན་བྱེད་པའི་ནུས་པ་ཐམས་ཅད་ཀྱིས་སྟོང་པས་དེ་དག་ཡོད་པ་དང་འབྲེལ་པ་མེད་པ་ཡིན་ནོ་ཞེ་ན། དེ་ལྟར་གྱུར་ན་དོན་བྱེད་ནུས་པའི་མཚན་ཉིད་དང་ལྡན་པ་གང་ཡིན་པ་དེ་ཉིད་ཡོད་པ་དང་འབྲེལ་པས་དོན་བྱེད་ནུས་པ་ཉིད་དངོས་པོ་ཉིད་དུ་འོངས་པས་ཡོད་པ་དང་འབྲེལ་པ་དོན་མེད་དོ། །དེ་ལྟར་ན་དེ་བཞིན་དུ་གཞན་སྤྱི་ལ་སོགས་པ་རྣམས་ཇི་ལྟར་རང་གི་ངོ་བོས་ཡོད་པར་འགྱུར། དོན་བྱེད་ནུས་པ་ནི་འདི་དག་ཐམས་ཅད་ལ་ཡོད་པས་དེ་ཉིད་ཡོད་པའི་མཚན་ཉིད་དོ། །སྐྱེ་བ་དང་འཇིག་པ་དང་གནས་པ་དང་འབྲེལ་པ་ཡོད་པ་ཡིན་ནོ་ཟེར་བ་དེ་དག་ནི་མི་རིགས་སོ། །གནས་པ་དང་སྐྱེ་བ་དང་འཇིག་པ་འགལ་བས་ཆོས་ཅན་གཅིག་ལ་མི་རིགས་སོ། །གལ་ཏེ་རེས་འགའ་སྐྱེ་བ་དང་འགག་པ་ཡིན་ལ་རེས་འགའ་གནས་པ་ཡིན་ནོ་ཞེ་ན། སྐྱེ་བ་དང་འཇིག་པ་ཇི་ལྟ་བ་དེ་བཞིན་དུ་གནས་པ་མེད་དོ། །གནས་པ་ཇི་ལྟ་བ་དེ་བཞིན་
དུ་སྐྱེ་བ་དང་འཇིག་པ་མེད་དོ། །ཇི་སྐད་བཤད་པའི་དངོས་པོ་གཅིག་གི་མཚན་ཉིད་དུ་མི་འགྱུར་རོ། །དེའི་ཕྱིར་དངོས་པོ་གཞན་གྱི་མཚན་ཉིད་དང་འབྲེལ་པའི་ནུས་པ་མཐའ་མ་ས་དེའི་ཤེས་པ་སྐྱེད་པར་ཁས་བླངས་པའི་ཕྱིར་རོ། །གཞན་གྱིས་ཚིག་གི་དོན་དྲུག་ལ་སོགས་པ་རྣམ་པར་གཞག་པ་དེ་ཉིད་ནི་ཡོད་པའི་མཚན་ཉིད་དུ་མི་རིགས་ཏེ། ནུས་པ་ཐམས་ཅད་དང་བྲལ་བ་ཡང་དངོས་པོ་མེད་པའི་མཚན་ཉིད་ཡིན་ནོ། །ཐམས་ཅད་སྨོས་པ་ནི་དངོས་པོ་ཐམས་ཅད་ནི་དངོས་པོ་གཞན་གྱི་ནུས་པ་དང་བྲལ་པའི་ངོ་བོ་ཡིན་པའི་ཕྱིར་མེད་པ་བསལ་བའི་དོན་དུ་གང་ནུས་པ་མེད་པ་གང་ཡིན་པ་དེ་ནི་གཅིག་ཏུ་ངེས་པའི་མེད་པར་བརྗོད་དོ། །ནུས་པའི་མཚན་ཉིད་ནི་སྐད་ཅིག་མའི་ཡོད་པ་ཡིན་ནོ། །དེས་ན་སྐད་ཅིག་མའི་བདག་ཉིད་ནི་མེད་པར་མི་འགྲུབ་པོ། །གང་ལས་རྗེས་སུ་འགྲོ་བ་དང་ལྡོག་པ་ཡིན་ཞེ་ན། སྐད་ཅིག་མ་མ་ཡིན་པ་ནི་འགའ་ཡང་གང་ཡང་རུང་བ་ཐ་མའི་ཤེས་པ་སྐྱེད་པའི་མཚན་ཉིད་ཀྱི་ནུས་པ་སྐད་ཅིག་མ་ཡིན་པ་དེའི་ནུས་པ་དང་བྲལ་བར་འགྱུར། གང་འདིར་ནུས་པ་ཐམས་ཅད་ཀྱིས་སྟོང་པའི་མཚན་ཉིད་ཀྱི་མེད་པ་དང་འགལ་བས་སེལ་བར་བྱེད་པའི་ཡོད་པ་སྐད་ཅིག་མའི་བདག་ཉིད་དུ་ཉམས་སུ་མྱོང་ན་ནི་གང་གི་རྗེས་སུ་འགྲོ་བ་དང་ལྡོག་པ་དེ་ཡིན་ནོ་ཞེ་ན། རིམ་དང་ཅིག་ཅར་དག་གིས་ཞེས་བྱ་བ་ལ་སོགས་པ་སྨོས་ཏེ། སྟོང་པ་དང་ནུས་པ་ཐམས་ཅད་ཀྱིས་སྟོང་པ་སྐད་ཅིག་མ་མ་ཡིན་པ་ནི་མངོན་སུམ་མ་ཡིན་གྱི། འོན་ཀྱང་དེའི་ཁྱད་པར་བྱེད་པ་སྟོང་པའི་ཕྱིར་རོ། །དེ་ལྟ་ན་རིམ་དང་ཅིག་ཅར་དག་གིས་བྱ་བ་བྱེད་པ་ལ་ཁྱབ་སྟེ་རྣམ་པ་གཞན་ནི་མི་སྲིད་པའི་ཕྱིར་རོ། །དེས་ན་སྐད་ཅིག་མ་ཡིན་པ་ལ་ཁྱབ་པར་བྱེད་པའི་ནུས་པ་དེ་དག་དང་འགལ་བས་ཁྱབ་པར་བྱ་བ་ལྡོག་པ་ཡིན་ཏེ། གང་གི་བྱ་བ་བྱེད་པའི་ནུས་པ་ཡང་ལྡོག་པའི་ཕྱིར་རོ། །ནུས་པ་ཐམས་ཅད་ཀྱིས་སྟོང་པའི་མཚན་ཉིད་ཀྱི་མེད་པ་སྐད་ཅིག་མ་མ་ཡིན་པའི་ཁྱབ་པར་བྱེད་པ་མི་དམིགས་པས་འདྲེན་པ་ཡིན་ཏེ། འགལ་བ་དག་གཅིག་ལ་མི་སྲིད་པའི་ཕྱིར་རོ། །དེས་ན་ལྡོག་པ་ཅན་གྱི་ཡོད་པའི་སྐད་ཅིག་མ་རྣམས་ནི་གནས་པ་ཡིན་ཏེ་
དེའི་བདག་ཉིད་ཡིན་པའི་ཕྱིར་རོ། །གང་ཡང་ཡོད་པ་དེ་ནི་སྐད་ཅིག་མ་ཁོ་ན་ཡིན་ནོ་ཞེས་བྱ་བ་ནི་རྗེས་སུ་འགྲོ་བ་དང་ལྡོག་པའི་ངོ་བོས་ཁྱབ་པ་གྲུབ་པར་ངེས་པ་ཡིན་ནོ། །འོ་ན་ནི་རྣམ་པ་གཞན་མི་སྲིད་པས་མྱུ་གུ་ལ་སོགས་པའི་འབྲས་བུ་ལ་ས་བོན་ལ་སོགས་པ་རིམ་དང་ཅིག་ཅར་ལ་སོགས་པ་དག་གིས་བྱེད་པར་བརྗོད་ན། དེ་ཉིད་རྣམ་པ་གཞན་དང་བྲལ་པའི་འབྲས་བུ་སྐྱེ་བར་ག་ལས་གྲུབ་པ་ཡིན། རྣམ་པར་གཞན་ནི་དམིགས་པའི་རིག་བྱར་གྱུར་པ་ཡིན་ན་ཇི་ལྟར་གཏན་མེད་པ་དང༌། ཡུལ་ལ་སོགས་པ་ལ་དགག་པ་འབའ་ཞིག་ཙམ་ཉིད་ཡིན། དམིགས་པའི་རིག་བྱར་མ་གྱུར་པ་ཉིད་ནི་ཡོད་པ་ངེས་པ་མ་ཡིན་ཏེ་བསྐལ་པ་ཡིན་པའི་ཕྱིར་གང་ལས་མེད་པ་གྲུབ་པ་ཡིན། དེའི་ཕྱིར་རྣམ་པར་གཞན་དོན་བྱེད་པ་སྲིད་པས་རིམ་དང་ཅིག་ཅར་ལྡོག་པས་ཀྱང་དོན་བྱེད་ནུས་པ་ལྡོག་པ་མ་ཡིན་ན་གང་ལས་སྐད་ཅིག་མ་ཡིན། ནུས་པ་ཐམས་ཅད་དང་བྲལ་བའི་མཚན་ཉིད་ནི་མེད་པ་ཡིན་ན་གང་གིས་ཡོད་པ་དང་སྐད་ཅིག་མའི་བདག་ཉིད་རྗེས་སུ་འགྲོ་བ་དང་ལྡོག་པར་འགྱུར་ཞེ་ན། མ་ཡིན་ཏེ་གཉི་ག་ལ་ཡང་སྐྱོན་མེད་པའི་ཕྱིར་རོ། །འདི་ལྟར་རིམ་པ་ཞེས་བྱ་བ་ནི་གོ་རིམས་སོ། །འབྲས་བུ་གཞན་དང་ལྷན་ཅིག་པ་མྱུ་གུ་ལ་སོགས་པ་འབའ་ཞིག་གོ །ཅིག་ཅར་ཡང་དེ་ལས་གཞན་པའི་ས་བོན་ལ་སོགས་པ་འབྲས་བུ་དང་ལྷན་ཅིག་པའོ། །རྣམ་པ་གཞན་ནི་མྱུ་གུ་ལ་སོགས་པ་དེ་གཉི་ག་སྤངས་པ་ཡང་གཞན་དུ་གྱུར་པ་རྣམས་སོ། །དེ་ཡང་མྱུ་གུ་ལ་སོགས་པ་གཞན་དང་ལྷན་ཅིག་པ་དང་འབའ་ཞིག་པའོ། །མེད་པ་ནི་མངོན་སུམ་གྱིས་རྟོགས་པར་བྱ་བ་སྟེ་ཡོད་ན་མི་དམིགས་པའི་རིག་བྱར་གྱུར་པ་ཁོ་ནའི་ངོ་བོ་ཡིན་ན་རིམ་དང་ཅིག་ཅར་མེད་པ་དང༌། མི་མངོན་པ་དང་མི་དམིགས་པས་སོ། །དངོས་པོའི་དམིགས་པར་བྱ་བ་དང་གཞན་དང་ལྷན་ཅིག་བ་དང་འབའ་ཞིག་པ་མེད་པའི་ཕྱིར་དེས་དབེན་པའི་ཡུལ་ལ་སོགས་པ་མངོན་སུམ་ལ་སྣང་བ་སྐྱེད་པའི་རང་བཞིན་མི་དམིགས་པ་ཁོ་ན་མེད་པར་ངེས་པ་ལ་སོགས་པའི་མཚན་ཉིད་ཀྱི་ཐ་སྙད་འཇུག་གོ །དེའི་མྱུ་གུ་ལ་སོགས་པའི་རང་བཞིན་གྱི་གནས་སྐབས་གཉིས་ལས་ཕྱི་རོལ་དུ་གྱུར་པ་དགག་པ་ནི་
འགའ་ཞིག་ཡུལ་དང་དུས་དག་ལས་ཡུལ་གཞན་ལ་སོགས་པའི་རིམ་གྱིས་མྱུ་གུ་ལ་སོགས་པ་འབྱུང་བ་ཅིག་ཤོས་ལ་མེད་ཀྱང་ཉེས་པ་ཅུང་ཟད་ཀྱང་མེད་དོ། །དེའི་ཕྱིར་མངོན་སུམ་ཁོ་ནས་རྣམ་པ་གཞན་མེད་པར་གྲུབ་པས་རིམ་དང་ཅིག་ཅར་དག་གིས་ཇི་ལྟར་དོན་བྱེད་པར་ནུས་པ་མ་ཁྱབ་པར་འགྱུར། བསྟན་བཅོས་བྱེད་པས་ཇི་ལྟར་མངོན་སུམ་ཁོ་ནས་རྣམ་པ་གཞན་མེད་པར་གྱུར་པ་དེ་བཞིན་དུ་རང་ཉིད་ཀྱིས་རིམ་པ་དང་རིམ་པ་ཅན་མ་ཡིན་པ་ལ་སོགས་པ་འདི་ཁས་བླངས་པ་བཤད་ཅིང་འཆད་པར་འགྱུར་རོ། །དམིགས་པའི་མཚན་ཉིད་དུ་གྱུར་པ་ཡང་རིམ་དང་ཅིག་ཅར་ལ་སོགས་པ་དག་ཕན་ཚུན་རྣམ་པར་གཅོད་པའི་ངོ་བོ་ཡིན་པའི་ཕྱིར་རྣམ་པ་གཞན་མེད་པར་གྲུབ་བོ། །དེ་ལྟ་ན་ཕན་ཚུན་རྣམ་པར་གཅོད་པའི་ངོ་བོ་ནི་གཅིག་དགག་པ་ནི་གཞན་སྒྲུབ་པ་ཡིན་ལ་དེ་ཡང་དགག་པ་ནི་མ་ཡིན་ཏེ། དགག་པ་དང་སྒྲུབ་པ་དག་འགལ་བས་གཉི་ག་དགག་པའི་བདག་ཉིད་ཀྱི་རྣམ་པ་གཞན་སྲིད་པར་ག་ལ་འགྱུར། འདིར་སྦྱོར་བ་ནི་གང་དང་གང་གི་རྣམ་པ་བཅད་ནས་གང་གི་ཚེ་ཅིག་ཤོས་ཀྱི་རྣམ་པར་རྣམ་པར་གནས་པ་དེ་དང་དེ་ལ་རྣམ་པ་གཞན་མི་སྲིད་དོ། །དཔེར་ན་སྔོན་པོའི་རྣམ་པ་རྣམ་པར་བཅད་ནས་སྔོན་པོ་མ་ཡིན་པའི་རྣམ་པ་རྣམ་པར་གནས་པའི་སེར་པོ་བཞིན་ནོ། །ཐམས་ཅད་དུ་རྒྱུ་དང་འབྲས་བུར་གྱུར་པའི་དངོས་པོ་ལ་ཡང་རིམ་དང་ཅིག་ཅར་ལ་སོགས་པ་དག་ལས་རྣམ་པ་གཞན་རྣམ་པར་གཅོད་པས་དེ་ལས་གཞན་པའི་རྣམ་པ་རྣམ་པར་གནས་པའི་རྣམ་པར་བཅད་པའི་ཡུལ་དུ་བྱེད་པའི་ཕྱིར་ཞེས་བྱ་བ་ནི་རང་བཞིན་འགལ་བ་དམིགས་པའོ། །རྣམ་པར་བཅད་པའི་རྣམ་པས་ཅིག་ཤོས་རྣམ་པར་གནས་པ་ལ་རྣམ་པ་གཞན་ནི་མི་སྲིད་པ་དེའི་ཕྱིར་ཕྱི་རོལ་དུ་གྱུར་པའི་མཚན་ཉིད་ཡིན་ནོ་ཞེས་བྱའོ། །དེས་ན་དངོས་པོ་གཞན་གྱི་ངོ་བོ་དག་ཕན་ཚུན་སྤངས་ཏེ་གནས་པའི་མཚན་ཉིད་ཡིན་པའི་ཕྱིར་རོ། །འདི་ལ་ཡང་གནོད་པར་བྱེད་པ་གཞན་ཡོད་པར་དོགས་པས་ཐུག་པ་མེད་པར་དོགས་པར་མི་བྱ་སྟེ། སྔར་འགལ་བར་རབ་ཏུ་གྲུབ་པ་དྲན་པ་ཙམ་ཡིན་པའི་ཕྱིར་རོ། །འགལ་བ་དམིགས་པ་ནི་ཆོས་ཅན་ལ་ཡོད་པའི་དངོས་པོ་ཉེ་བར་བསྟན་པས་འགལ་བ་
སྒྲུབ་པར་བྱེད་པ་ཉིད་ཀྱི་གནོད་པར་བྱེད་པ་དེ་ཡང་འདི་ལ་ཡོད་དེ། དེས་ན་འགལ་བ་དག་གཅིག་ལ་མི་སྲིད་བས་མི་མཐུན་པའི་དངོས་པོར་ངེས་ཏེ་གྲང་བ་དང་དྲོ་བའི་རེག་བ་ལྟ་བུ་དང་ཡོད་པ་དང་མེད་པ་ལྟ་བུའི་ཞེས་བྱ་བ་ཐུག་པ་མེད་པ་ག་ལ་ཡིན། དེ་ལ་སྐད་ཅིག་མ་མ་ཡིན་པ་རྣམས་རིམ་གྱིས་འབྲས་བུ་མི་བྱེད་པ་ལ་ཁྱད་པར་མེད་པས་མི་བྱེད་པའི་གནས་སྐབས་བཞིན་ནོ། །ལྷན་ཅིག་བྱེད་པ་ལ་ལྟོས་པ་རྣམས་གཉིས་ཀྱང་ལྷན་ཅིག་བྱེད་པར་མི་རིགས་པས་ཉེ་བར་དགོད་པར་མི་བྱའོ། །ཐམས་ཅད་ལ་བྱ་བ་གཅིག་བྱེད་པའི་དུས་དེ་ན་བྱེད་པར་ཐལ་བར་འགྱུར་ཏེ། བྱེད་པ་པོའི་རང་བཞིན་དེ་ཉིད་ཡིན་པའི་ཕྱིར་རོ། །ཅིག་ཅར་ཡང་རིགས་པ་མ་ཡིན་ཏེ་མངོན་སུམ་དང་འགལ་བའི་ཕྱིར་དང༌། སླར་ཡང་བྱེད་པར་ཐལ་བར་འགྱུར་རོ། །གལ་ཏེ་བྱས་ཟིན་པས་མ་ཡིན་ནོ་ཞེ་ན། མ་ཡིན་ཏེ་ནུས་པ་མ་ཞིག་པའི་ཕྱིར་རོ། །དེ་ལྟ་མ་ཡིན་ན་སྔར་ཡང་མི་བྱེད་པར་འགྱུར་ཏེ་མི་བྱེད་པའི་ངོ་བོ་དང་ཁྱད་པར་མེད་པའི་ཕྱིར་རོ། །གལ་ཏེ་བྱས་ཟིན་པས་བྱེད་པར་མི་ནུས་པའི་ཕྱིར་དང་རོ་ཞེ་ན། དེ་ལྟ་ན་ནུས་པ་དང་མི་ནུས་པ་དག་གཅིག་ལ་འབྲས་བུ་ཐལ་བར་འགྱུར་ཏེ། འབྲས་དང་གསོ་མའི་ས་བོན་བཞིན་ནོ། །རྟག་པ་ཡང་གང་གི་ཚེ་ཅིག་ཅར་བྱེད་པ་དེས་ན་སྔར་ཡང་ཡོད་པས་དེ་ཉིད་ཀྱིས་དེ་བྱེད་པར་ཐལ་བར་འགྱུར་དེའི་ཕྱིར་ཆོས་སྔར་ཡང་དེ་བཞིན་དུ་རེས་འགའ་ཞིག་ཅིག་ཅར་བྱེད་པར་མི་འགྱུར་རོ། །སྔ་མ་དང་ཕྱི་མ་དུས་དག་གཅིག་པའི་ཆ་ཅིག་ཅར་བྱེད་པ་ནི་དོན་བྱེད་ནུས་པ་ཐམས་ཅད་ཟླ་བའི་མཚན་ཉིད་ཅན་གྱི་མེད་པར་འགྱུར་རོ། །ཇི་ལྟར་སྐད་ཅིག་མ་མ་ཡིན་པ་ཉིད་རིམ་དང་ཅིག་ཅར་མ་ཡིན་སྙམ་ན། རིམ་པ་མེད་པའི་ཕྱོགས་དེ་ལ་ཡང་སྔར་བཤད་པའི་སྐྱོན་ནོ། །དེ་ལྟར་སྐད་ཅིག་མ་མ་ཡིན་པར་གྱུར་ན་མིག་ལ་སོགས་པ་ལ་རག་ལས་པ་རྣམས་མེད་པར་ཐལ་བར་འགྱུར་བས་སྐད་ཅིག་མ་ཉིད་ཀྱིས་ཡོད་པའི་ཕྱིར་རོ། །གང་ཡོད་པ་དེ་ནི་སྐད་ཅིག་མཁོ་ན་ཡིན་ནོ་ཞེས་ཡོད་པ་འཇིག་པའི་བདག་ཉིད་དུ་གྲུབ་པས་རྗེས་སུ་འགྲོ་བ་དང་ལྡོག་པའི་ངོ་བོའི་ཁྱབ་པ་གྲུབ་པ་ཡིན་ནོ། །བྲམ་ཟེ་ཨ་ཙ་ཏ་ཡིས་རྣམ་པར་སྦྱར་བའི་འགྲེལ་བ་ལས་རང་བཞིན་གཏན་ཚིགས་
ཀྱི་དབང་དུ་བྱས་པའོ།། །།དེ་ལྟར་རང་བཞིན་གྱི་གཏན་ཚིགས་ཀྱི་དེའི་བདག་ཉིད་དུ་གྲུབ་བའི་རྒྱུ་མཚན་གྱི་རྗེས་སུ་འགྲོ་བ་དང་ལྡོག་པ་ངེས་པས་བ་བསྟན་ནས་འབྲས་བུའི་དངོས་པོར་གྲུབ་པ་རྒྱུ་མཚན་ཡིན་པའི་ཕྱིར་དེ་དང་དེ་དག་མངོན་སུམ་དང་མི་དམིགས་པའི་རྒྱུ་མཚན་གྱིས་སྔར་བསྟན་ཟིན་པའི་ཕྱིར་དེར་གཏོགས་ལ་གཞན་ཡང་གཞན་དག་ལ་འཁྲུལ་པའི་རྒྱུ་བསལ་བ་དེའི་ཡུལ་བསྟན་པ་ནི་དོང་ཞན་ཞེས་བྱ་བ་སྨོས་ཏེ། གཏན་ཚིགས་ལས་ཐ་དད་པའི་དངོས་པོ་གོ་བར་བྱ་བ་ལས་འབྲས་བུའི་གཏན་ཚིགས་ཡིན་ཏེ། དོན་གཞན་མ་ཡིན་པ་ནི་རང་བཞིན་གྱི་གཏན་ཚིགས་སོ་ཞེས་བཤད་དོ། །ཅིའི་ཕྱིར་དོན་གཞན་ཉིད་འབྲས་བུའི་གཏན་ཚིགས་ཡིན་ཞེ་ན། འཁྲུལ་པ་མེད་པའི་ཕྱིར་རོ་ཞེས་བྱ་བ་སྨོས་ཏེ། འབྲས་བུ་ཉིད་དོན་གཞན་པ་ལ་མི་འཁྲུལ་པ་ཡིན་གྱི་གཞན་དུ་ནི་མ་ཡིན་ནོ། །དེས་ན་འབྲས་བུ་ཉིད་ལས་གཞན་པའི་རྒྱུ་གོ་བར་བྱ་བར་བརྗོད་དེ། ཡང་དག་པར་ལྡན་པའི་སྟོབས་ཀྱིས་གོ་པར་བྱེད་པ་ཉིད་ཡིན་ན་ཆ་ཤས་འགའ་ཞིག་གིས་མ་ཡིན་ནོ་ཞེས་བྱ་བ་ལ་སོགས་པ་སྔར་ཇི་སྐད་བཤད་པ། གང་ཐམས་ཅད་དུ་གོ་བར་བྱ་བ་དང༌། གོ་བར་བྱེད་པའི་དངོས་པོར་ཐལ་བར་འགྱུར་བར་སློབ་དཔོན་གྱིས་བཤད་པ་དེ་གཞན་གྱིས་འདིར་ཡང་འབྲས་བུའི་གཏན་ཚིགས་འགའ་ཞིག་ལ་ཡང་ཐལ་བར་འགྱུར་རོ་ཞེས་དོགས་པས། གལ་ཏེ་རྒྱུ་དང་འབྲས་བུའི་དངོས་པོ་ཞེས་བྱ་བ་ལ་སོགས་པ་སྨོས་ཏེ། གལ་ཏེ་འབྲས་བུའི་གཏན་ཚིགས་སུ་བརྗོད་པ་དེའི་ཚེ་རྒྱུ་དང་འབྲས་བུའི་དངོས་པོ་ཡིན་པས་རྒྱུའི་གོ་བར་བྱེད་པ་ཉིད་དོ། །དེ་ལྟར་གྱུར་ན་ཐམས་ཅད་དུ་ཤེས་པར་བྱ་བ་དང་ཤེས་པར་བྱེད་པའི་དངོས་པོར་འགྱུར་ཏེ། མེའི་སྤྱིའི་ཆོས་བཞིན་དུ་བྱེ་བྲག་གི་ཆོས་ཀྱང་རྩྭ་དང་ལོ་མ་ལ་སོགས་པ་གོ་བར་བྱ་བར་འགྱུར་རོ། །དུ་བ་ཡང་བྱེ་བྲག་གི་ཆོས་བཞིན་དུ་རྫས་དང་ས་ལ་སོགས་པ་སྤྱིའི་ཆོས་ཀྱང་གོ་བར་བྱེད་པར་འགྱུར་རོ། །གང་ལས་ཤེ་ན། རྣམ་པ་ཐམས་ཅད་དུ་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་ཡིན་པའི་ཕྱིར་རོ། །བསྐྱེད་པར་བྱ་
བ་དང་སྐྱེད་པར་བྱེད་པའི་དངོས་པོ་ནི་རྒྱུ་དང་འབྲས་བུའི་དངོས་པོར་བརྗོད་དོ། །མེ་དང་དུ་བ་དག་ཀྱང་ཆ་ཤས་ཀྱིས་ནི་མ་ཡིན་ཏེ། འོན་ཀྱང་རྣམ་པར་ཐམས་ཅད་ཀྱིས་སོ། །དེ་ལྟར་ན་ཇི་ལྟར་མེ་ཉིད་དང་རྫས་ཉིད་དང་ཡོད་པ་ཉིད་ལ་སོགས་པ་རྣམས་ཀྱི་སྤྱིའི་ཆོས་སྐྱེད་པར་བྱེད་པ་དེ་བཞིན་དུ་རྩྭ་དང་ལོ་མ་ལ་སོགས་པའི་ཁྱད་པར་ཆོས་ཀྱིས་ཀྱང་ཡིན་ནོ། །དཔེར་ན་དུ་བའི་དུ་བ་ཉིད་དང་སྐྱ་བོ་ཉིད་ལ་སོགས་པ་རྣམས་ཀྱི་ཁྱད་པར་གྱི་ཆོས་སྐྱེ་བར་རང་ཉིད་ལ་ངེས་པ་དེ་བཞིན་དུ་སྤྱིའི་ཆོས་ཡོད་པ་ཉིད་དང༌། རྫས་ཉིད་ལ་སོགས་པས་ཀྱང་ཡིན་ནོ། །དེས་ཀྱང་ཇི་ལྟར་དེ་དག་རྒྱུ་དང་འབྲས་བུའི་དངོས་པོ་ཡིན་པ་དེ་བཞིན་དུ་གོ་བར་བྱེད་པ་དང་གོ་བར་བྱ་བར་འགྱུར་རོ། །འདི་དག་དེའི་རྒྱུ་མཚན་ཡིན་ནོ་ཞེས་བྱ་བ་ཕྱོགས་སྔ་མ་བ་དོགས་པ་ལ། འདིར་རྣམ་པ་ཐམས་ཅད་དུ་སྐྱེད་པར་བྱེད་པ་དང་བསྐྱེད་པར་བྱ་བའི་དངོས་པོ་མ་ཡིན་ཏེ། དེས་ཀྱང་དེ་བཞིན་དུ་གོ་བར་བྱ་བ་དང་གོ་བར་བྱེད་པའི་དངོས་པོར་གྱུར་པ་ག་ལ་ཡིན། ཅིའི་ཕྱིར་ཞེ་ན། དེ་མེད་པར་ནི་རྩྭ་དང་ཤིང་ལ་སོགས་པ་དེ་དག་གི་ཁྱད་པར་གྱི་ཆོས་མེད་པར་འབྱུང་བའི་དུ་བ་ཙམ་ཉིད་ལས་ཁྱད་པར་གྱི་ཆོས་འབྱུང་བའོ། །དེ་ལྟར་དེའི་བདག་ཉིད་དང་དེ་ལས་བྱུང་བར་ངེས་པ་མེད་པའི་ཕྱིར་རོ། །དེ་ལྟར་དེ་མེད་པར་ནི་མེ་མེད་པར་རྫས་ལ་སོགས་པ་སྤྱིའི་ཆོས་རྣམས་འབྱུང་བའོ། །མེ་ཁོ་ན་ལས་འདི་འབྱུང་བ་ཡིན་ནོ་ཞེས་བྱ་བ་དེ་ལྟ་བུའི་ངོ་བོ་ནི་དེ་ལས་བྱུང་བར་ངེས་པ་མེད་པས་གང་ལས་བསྐྱེད་པར་བྱ་བ་དང༌། སྐྱེད་པར་བྱེད་པའི་ངོ་བོར་འགྱུར། གང་གིས་ན་ཐམས་ཅད་ཤེས་པར་བྱ་བ་དང་ཤེས་པར་བྱེད་པའི་ངོ་བོ་ཡིན་པ་མེད་ན་དེ་ལས་འབྱུང་བར་ངེས་པའི་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་རྣམ་པར་གཞག་པར་མི་ནུས་སོ། །གང་གི་ཕྱིར་འདི་ལྟར་དེ་བས་ན་འབྲས་བུ་ནི་དུ་བ་ལ་སོགས་པའོ། །ངོ་བོ་ཇི་སྙེད་ཅིག་ནི་དུ་བ་ལ་སོགས་པ་རྣམས་སོ། །འདི་རང་གིར་གཏོགས་པའི་མཚན་ཉིད་ཀྱི་གསུམ་པའོ། །མེད་ན་མི་འབྱུང་བ་ནི་མེད་ན་མི་སྲིད་པའོ། །ཅི་མེད་ན་མི་སྲིད་པ་ཡིན་ཞེ་ན། རྒྱུའི་ངོ་བོ་ཇི་སྙེད་ཅིག་ཡིན་ནོ་ཞེས་འདིར་ཡང་སྦྱར་བར་བྱའོ། །རྒྱུ་ལ་བརྟེན་པའི་ངོ་བོ་ཇི་སྙེད་ཅིག་མེད་ན་འབྲས་བུར་གཏོགས་
པའི་རང་བཞིན་མི་འབྱུང་བར་འདི་དག་གི་རྒྱུ་ཡིན་ནོ་ཞེས་བྱ་བར་སྦྱར་རོ། །ཅི་མེད་ན་མི་འབྱུང་བ་ཡིན་ཞེ་ན། རྒྱུའོ། །རྒྱུའི་དོན་གཞན་པའི་ཡུལ་རྒྱུ་ཡིན་ཏེ་གཞིའི་བདུན་པའོ། །ད་ནི་རྒྱུ་ཡོད་པའི་ངོ་བོ་ཇི་སྙེད་པ་རྣམས་མེའི་རྫས་ལ་སོགས་པ་མེད་ན་མི་འབྱུང་བ་དག་གི་རྒྱུར་གཏོགས་པའི་སྤྱིའི་ཆོས་ནི་རྒྱུའོ། །ཅིའི་ཕྱིར་འབྲས་བུ་གོ་བར་བྱེད་པ་ཡིན་ཞེ་ན། དེའི་འབྲས་བུ་ཉིད་དུ་ངེས་པའི་ཕྱིར་རོ་ཞེས་བྱ་བ་སྨོས་སོ། །དེ་ཉིད་རྒྱུར་གཏོགས་པའི་སྤྱིའི་ཆོས་དེའི་འབྲས་བུ་ཡིན་ནོ་ཞེས་དེ་ལྟ་བུའི་ངོ་བོར་ངེས་པ་ཡོད་པའི་ཕྱིར་རོ། །རྒྱུའི་སྤྱིའི་ཆོས་ལ་རེས་འགའ་ཞིག་ཀྱང་དེའི་འབྲས་བུ་འཁྲུལ་པ་མེད་དོ། །དེ་ལྟར་རྒྱུར་གཏོགས་པའི་ཆ་ཤས་ཀྱི་ཕྱི་མ་དོན་དུ་གཉེར་བས་ངེས་པར་དཔྱད་ན་སྔ་མ་དོན་དུ་གཉེར་བས་འབྲས་བུར་གཏོགས་པའི་ཆ་ཤས་ངེས་པར་དཔྱོད་དོ། །གང་དག་ཅེས་བྱ་བ་ལ་སོགས་པ་སྨོས་ཏེ། འབྲས་བུའི་ཆོས་དང་དེ་དག་ཉིད་ཀྱི་བདག་ཉིད་དུ་གཏོགས་པས་རྒྱུར་གཏོགས་པའི་ཆོས་རྣམས་གོ་བར་བྱེད་དོ། །གང་ཡང་དོན་གཞན་པ་སྲིད་པ་ནི་དུ་བ་ཉིད་དང་སྐྱ་བོ་ལ་སོགས་པ་ཁྱད་པར་གྱི་ངོ་བོ་དེ་ནི་རྒྱུར་གཏོགས་པའི་ཆོས་མེད་ན་མི་འབྱུང་བའོ། །འདིར་ཡང་དེའི་འབྲས་བུ་ཉིད་དུ་ངེས་པ་ལ་ལྟོས་པའོ། །འབྲས་བུར་གཏོགས་པ་དེ་དག་ཉིད་ཀྱི་ཁྱད་པར་གྱི་ཆོས་རྣམས་ཀྱི་རྒྱུར་གཏོགས་པའི་སྤྱིའི་ཆོས་ལ་ལྟོས་ནས་འབྲས་བུ་ཉིད་དུ་ངེས་དུ་ངེས་པའི་ཕྱིར་རོ། །འབྲས་བུར་གཏོགས་པའི་ཁྱད་པར་གྱི་ཆོས་དེ་ནི་རྒྱུར་གྱུར་པའི་སྤྱིའི་ཆོས་མེད་ན་རེས་འགའ་ཞིག་ཀྱང་མི་འབྱུང་ངོ༌། །དེ་ལྟ་ན་དེའི་རྒྱུའི་ནི་སྤྱིའི་ཆོས་ཁོ་ན་གོ་བར་བྱ་བ་ཡིན་ལ་བྱེ་བྲག་གི་ཆོས་ནི་མ་ཡིན་ནོ། །འབྲས་བུ་ཡང་བྱེ་བྲག་གི་ཆོས་ཁོ་ན་གོ་བར་བྱེད་པ་ཡིན་གྱི་སྤྱིའི་ཆོས་ནི་མ་ཡིན་པ་དེས་ན་འབྲས་བུར་ངེས་པས་སོ། །གང་ཡང་རྒྱུའི་བྱེ་བྲག་གི་ཆོས་དེའི་འབྲས་བུ་ཉིད་དུ་ངེས་པའི་འབྲས་བུ་ཙམ་ནི་མེད་པས་དེ་ནི་མི་རྟོགས་སོ། །འབྲས་བུ་སྤྱིའི་ཆོས་ནི་རྫས་ལ་སོགས་པ་གང་ཡིན་པ་དེ་དག་དེའི་འབྲས་བུར་ངེས་པ་མེད་པས་གོ་བར་བྱེད་པ་མེད་དོ། །རྒྱུ་དང་འབྲས་བུ་དངོས་པོ་གོ་བར་བྱེད་
པ་ཡིན་ན་རྣམ་པ་ཐམས་ཅད་དུ་གོ་བར་བྱེད་པར་ཐལ་བར་གལ་ལ་འགྱུར་གཞན་མི་འདོད་པའི་དོགས་པ་བསུ་བ་ནི་གལ་ཏེ་ཆ་ཤས་ཀྱིས་ཞེས་བྱ་བ་ལ་སོགས་པ་སྨོས་ཏེ། གལ་ཏེ་རྒྱུ་སྤྱིའི་ཆོས་གོ་བར་བྱ་བ་ཡིན་ལ་འབྲས་བུའི་བྱེ་བྲག་གི་ཆོས་ཉིད་ཀྱང་གོ་བར་བྱེད་པ་ཡིན་པས་དེ་འབྲས་བུ་ཉིད་དུ་ངེས་པར་འདོད་ན། དེ་ལྟ་ན་ཆ་ཤས་ཀྱིས་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོར་འགྱུར་རོ། །རྒྱུའི་སྤྱིའི་ཆོས་ཁོ་ན་སྐྱེད་པར་བྱེད་པ་ཡིན་ལ་བྱེ་བྲག་ནི་མ་ཡིན་ཏེ། འབྲས་བུའི་བྱེ་བྲག་གི་ཆོས་ཁོ་ན་བསྐྱེད་པར་བྱ་བ་ཡིན་གྱི་སྤྱིའི་ཆོས་མ་ཡིན་ནོ་ཞེས་བྱ་བར་འགྱུར་ཏེ། རྣམ་པ་ཐམས་ཅད་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོར་མངོན་པར་འདོད་པའི་ཕྱིར་ཁས་བླངས་དང་འགལ་ལོ་ཞེ་ན། འདི་དག་གི་ལན་ནི་ཆ་ཤས་ཀྱིས་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོར་ཐལ་བར་མི་འགྱུར་རོ། །དངོས་པོའི་བདག་ཉིད་ཐམས་ཅད་ཆ་ཤས་མེད་པར་དེ་ཁས་བླངས་པའི་ཕྱིར་གོ་བར་བྱ་བ་དང་གོ་བར་བྱེད་པའི་དངོས་པོ་ཡང་རྣམ་པ་ཐམས་ཅད་དུ་མངོན་པར་འདོད་པའི་ཕྱིར་དེ་ནི་ངེས་བསྐྱེད་པར་བྱ་བ་ཞེས་བྱ་བ་ལ་སོགས་པ་སྨོས་ཏེ། གང་འབྲས་བུ་ནི་རྒྱུར་གྱུར་པའི་ཁྱད་པར་གྱི་ཆོས་ཀྱིས་བསྐྱེད་པར་བྱ་བ་ཡིན་ན་ནི་ཁྱད་པར་དེ་གཟུང་བར་བྱ་བ་ཡིན་ལ། དེའི་ཚེ་ངེས་བསྐྱེད་པར་བྱ་བའི་ཁྱད་པར་གཟུང་ནས་རྒྱུར་གྱུར་པའི་ཁྱད་པར་གྱི་ཆོས་གོ་བར་བྱ་བ་ཉིད་དུ་མངོན་པར་འདོད་པའི་ཕྱིར་རོ། །དེ་ལྟ་ན་དུ་བ་ལ་སོགས་པའི་རྟགས་ཀྱི་ཁྱད་པར་གྱི་ངོ་བོའི་བྱེ་བྲག་རྣམས་འབྲས་བུར་གྱུར་པའི་རྫས་ལ་སོགས་པ་སྤྱིའི་གང་ཡིན་པ་དེ་དག་ཀྱང་གོ་བར་བྱེད་པ་ཉིད་དུ་མངོན་པར་འདོད་པའི་ཕྱིར་རོ། །དེ་ལྟ་ན་ཨ་ཀ་རུའི་དུ་བ་བཟུང་བར་གྱུར་པ་ལས་དེ་ཉིད་མེ་རྗེས་སུ་དཔོག་པ་དང༌། དུ་བ་ཉིད་ཀྱི་ཁྱད་པར་རྫས་ལ་སོགས་པས་མེ་རྗེས་སུ་དཔོག་པ་ཡིན་ནོ། །རྣམ་པ་ཐམས་ཅད་དུ་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་ཡོད་པ་ཙམ་གྱིས་གོ་བར་བྱ་བ་དང་གོ་བར་བྱེད་པར་མི་འགྱུར་རོ། །དེ་ནི་ཤོས་པ་ལ་ལྟོས་པའི་ཕྱིར་རོ། །དེ་ལྟ་ན་ཡོད་པ་ཙམ་གྱི་རྟགས་ནི་གོ་བར་བྱེད་པ་མ་ཡིན་ཏེ་དེ་ཤེས་པར་བྱེད་པ་ལ་
ལྟོས་པའི་ཕྱིར་རོ། །ཤེས་པར་བྱེད་པ་ནི་རང་ཉིད་ངེས་པ་ལ་ལྟོས་ནས་ཤེས་བར་བྱ་བའི་དོན་ཤེས་པར་འགྱུར་གྱི་གཞན་དུ་ནི་མ་ཡིན་ནོ། །ཇི་ལྟར་དེ་མེད་པར་འབྱུང་བ་ནི་དེ་ལས་འབྱུང་བར་ངེས་པ་མེད་པའི་ཕྱིར་ཞེས་བཤད་བ་ན། རྣམ་པ་ཐམས་ཅད་དུ་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་ཁས་བླངས་པ་འདི་མེད་པར་འབྱུང་བ་ནི་མེད་པ་ཡིན་ནོ་ཞེ་ན། ཁྱད་པར་ཅན་མ་ཡིན་པ་ཞེས་བྱ་བ་ལ་སོགས་པ་སྨོས་ཏེ། གལ་ཏེ་དེ་སྐྱེད་པའི་ཁྱད་པར་འཛིན་པ་སྤངས་པ་ནི་ཁྱད་པར་ཅན་མ་ཡིན་པའི་འབྲས་བུ་ཙམ་ཁས་བླངས་པའམ། རྟགས་ཀྱི་ཁྱད་པར་སྤངས་པའི་རྫས་ལ་སོགས་པ་ཡིན་པ་དེའི་ཚེ་ཁྱད་པར་མེད་པའི་སྤྱི་ཡང་བརྗོད་པར་འདོད་པ་ཡིན་ནོ། །རྒྱུར་གྱུར་པའི་ཁྱད་པར་ཡོད་པས་ཀྱང་དུ་བ་ཙམ་འབྱུང་བ་དེའི་ཁྱད་པར་ཅན་མ་ཡིན་པའི་རྫས་ལ་སོགས་པ་ནི་མེད་ཀྱང་འབྱུང་བས་འཁྲུལ་པ་ཡིན་པའི་ཕྱིར་རྣམ་པ་ཐམས་ཅད་དུ་བསྐྱེད་པར་བྱ་བ་དང་སྐྱེད་པར་བྱེད་པ་དེ་མེད་པས་གོ་བར་བྱ་བ་དང་གོ་བར་བྱེད་པར་མི་འདོད་དོ། །ཁྱད་པར་ནི་རྗོད་པར་འདོད་པ་མ་ཡིན་ཏེ་དེ་ལ་འཁྲུལ་པ་སྲིད་པའི་ཕྱིར་རོ། །འདི་ལྟར་གལ་ཏེ་དུ་བ་ཙམ་གྱི་རྩྭ་དང་ཤིང་ལ་སོགས་པའི་ཁྱད་པར་མེད་ཀྱང་འབྱུང་བ་ཡིན། སྐྱེད་པའི་ཁྱད་པར་ནི་མ་ཡིན་ཏེ། གང་གི་ཚེ་དེ་འཛིན་པར་ནུས་པ་དེའི་ཚེ་ཁྱད་པར་གོ་བར་བྱ་བ་ཉིད་དུ་ཡོད་པ་ཁོ་ན་སྟེ་རྟགས་ངེས་པའི་ཕྱིར་རོ། །དེ་ལྟ་ན་གལ་ཏེ་རྫས་ཉིད་དང་ཡོད་པ་ཉིད་ཙམ་མེ་ཡོད་པ་ལས་འབྱུང་བ་ཡིན་གྱི་དུ་བའི་བདག་ཉིད་མ་ཡིན་པས་དེའི་ཁྱད་པར་ནི་མི་འཁྲུལ་པའི་གོ་བར་བྱེད་པ་ཡིན་ཡང་བསལ་བར་མི་བྱའོ། །འདི་གཞན་གྱི་དོགས་པ་བརྗོད་པའི་གོ་སྐབས་ནི་གལ་ཏེ་རེས་འགའ་ཞིག་ཅེས་བྱ་བ་སྨོས་ཏེ། འགའ་ཞིག་ནི་དུ་བ་ལ་སོགས་པའོ། །རེས་འགའ་ཞིག་ནི་དུས་ཁ་ཅིག་ཏུའོ། །འགའ་ཞིག་ལས་ནི་མེ་ལ་སོགས་པའོ། །འབྱུང་བ་ཡང་ནི་ཡོད་དོ། །ཐམས་ཅད་ནི་དུ་བའོ། །དེ་དང་འདྲ་བ་ནི། གང་དང་འདྲ་བར་མེ་ལ་སོགས་པ་གཅིག་ལས་འབྱུང་བ་མཐོང་བའོ། །དེ་ལས་སྐྱེས་པ་ནི་རྣམ་པ་དེ་ལྟ་བུའི་སྐྱེ་བ་ནི་རྣམ་པ་ཇི་ལྟ་བ་དེ་གཅིག་ལས་འབྱུང་བར་མཐོང་བ་དེ་འདྲ་བ་ཉིད་སྐྱེ་བ་གང་ཡིན་པ་དེ་ནི་རྣམ་པ་དེ་ལྟ་བུའི་སྐྱེ་བའོ། །འདི་དག་ཚད་མ་གང་ལས་ངེས་པ་ཡིན་ཞེ་ན། འབྲས་བུའི་གཏན་ཚིགས་ཀྱི་རྒྱུ་དང་འབྲས་བུའི་
དངོས་པོ་སྒྲུབ་པའི་རྒྱུ་མཚན་གྱི་རྗེས་སུ་འགྲོ་བ་དང་ལྡོག་པ་གང་ཡིན་བརྗོད་པ་ཡིན་ནོ། །གལ་ཏེ་དེ་ལྟ་ན་མངོན་སུམ་དང་མི་དམིགས་པ་དག་གིས་དུ་བ་འབའ་ཞིག་མེའི་ཚོགས་པའི་འབྲས་བུར་གཏོགས་པ་ཅི་དེ་ཙམ་གྱིས་གཞན་དེ་དང་འདྲ་བའི་དེ་དང་འདྲ་བ་འབྲས་བུ་གྲུབ་པར་འགྱུར་རམ། དེ་ལ་དེའི་རྒྱུ་མཚན་དག་མངོན་སུམ་དང་མི་དམིགས་པ་དག་གིས་བྱེད་པ་མེད་དེ། གང་ལ་དེ་དག་ཁོ་ན་གཞན་གྱིས་བྱེད་པ་དེ་ནི་གཞན་དེའི་འབྲས་བུར་འགྱུར་རོ། །དེ་གཞན་ཡིན་ན་ཅི་ཞིག་ཏུ་འགྱུར། གང་གིས་རྣམ་པ་དེ་ལྟ་བུའི་སྐྱེ་བར་འགྱུར། དེ་ལྟ་ན་དུ་བའི་གསལ་བ་འགའ་ཞིག་མེ་ལ་སོགས་པ་ལས་སྐྱེ་བ་མཐོང་བ་དེ་ཅིས་ན་བུམ་པ་ལ་སོགས་པ་ལས་ཀྱང་ཁས་མི་ལེན་གཞན་པར་ཁྱད་པར་མེད་པའི་ཕྱིར་རོ། །གལ་ཏེ་དེ་དག་ལས་ཉེས་པ་ཅིར་འགྱུར་ཞེ་ན། དེ་ལྟར་གྱུར་ན་ཚད་མ་མེད་པས་དེ་ལྟར་རྣམ་པར་དབྱེ་བའི་བདག་ཉིད་ལ་ངེས་པ་མེད་པས་དེ་དང་མི་འདྲ་བ་ལས་སྐྱེ་བར་དོགས་པ་ན་དེ་འདྲ་བའི་དུ་བ་ལ་སོགས་པ་དང་རྗེས་སུ་འགྲོ་བ་དང་ལྡོག་པ་དག་ལ་ངེས་པ་མེད་ན་གང་གིས་འབྲས་བུ་གཏན་ཚིགས་གོ་བར་བྱེད་པ་ཉིད་ཡིན། ཡུལ་དང་དུས་གཅིག་ན་གནས་པར་ངེས་པ་གང་ཡིན་པ་དེ་ཁོ་ནའི་མེའི་ཁྱད་བར་གྱི་རྒྱུ་ཅན་གྱི་དུ་བ་མངོན་སུམ་དང་མི་དམིགས་པས་རྟོགས་ཀྱི་དེ་ཉིད་ཀྱི་རྗེས་སུ་འགྲོ་བ་དང་ལྡོག་པ་རྟོགས་པ་ནི་མེད་དེ་དེ་ཡུལ་གཞན་ན་མི་སྲིད་པའི་ཕྱིར་རོ། །དེ་ལྟ་ན་འོན་ཏེ་དེ་འདྲ་བའི་སྤྱིའི་བདག་ཉིད་རྟགས་ཡིན་པས་དེའི་རྣམ་པ་དེ་ལྟ་བུ་ཡང་སྐྱེ་བས་སེམས་རྣམ་པ་དེ་ལྟ་བུའི་རྗེས་སུ་འགྲོ་བའམ་ལྡོག་པ་ག་ལ་ཡིན། དེ་སྐད་དུ། ཡུལ་དང་དུས་དང་གནས་སྐབས་རྣམས། །ཐ་དད་ནུས་པ་ཐ་དད་ལ། །དངོས་རྣམས་རྗེས་སུ་དཔག་པ་ཡིས། །རྟོགས་པ་ཤིན་ཏུ་རྙེད་པར་དཀའ། །ཞེས་བཤད་དོ་ཞེ་ན། གྲུབ་པའི་མཐའ་སྨྲ་བ་ལ་མ་ཡིན་ཏེ། དེ་ལས་བྱུང་བ་ཞེས་བྱ་བ་ལ་སོགས་པ་སྨོས་ཏེ། འདིར་ལན་ཅིག་དུ་བ་ལ་སོགས་པའི་ཚོགས་བ་ལས་འབྱུང་བ་མངོན་སུམ་དང་མི་དམིགས་པ་དག་གིས་ངེས་པའི་ངོ་བོ་ཡང་དེ་འདྲ་བ་དང་དེ་དང་མི་འདྲ་བ་ཡོད་པ་དག་ཇི་ལྟར་བར་ཡོངས་སུ་མཐོང་བ་ལས་གཞན་པ་ཉིད་དང་མཚུངས་པར་དོགས་པ་དང༌། དེ་ལ་མེ་ལ་སོགས་པའི་ཚོགས་པ་ལས་སྐྱེ་
བའི་དུ་བའི་ཁྱད་བར་ལན་ཅིག་ངེས་པ་གང་ཡིན་པ་དེ་ལ་ལྟོས་བ་ནི་དེ་ལས་གཞན་པའི་ཁྱད་པར་དེ་དང་འདྲ་བ་དང་གང་དེ་དང་མི་འདྲ་བའི་དངོས་པོ་རྣམས་ཀྱང་ནུས་པ་སྣ་ཚོགས་པ་དང་དེ་ལས་འབྱུང་ངོ་ཞེས་དོགས་པ་ལ། དེ་བཞིན་དུ་དེ་ཡང་ལན་ཅིག་མེ་ལ་སོགས་པའི་ཚོགས་པ་ལས་འབྱུང་བར་ངེས་བ་དེའི་ཚེ་དང་འདྲ་བ་ཉིད་ནི་གཞན་ལ་ལྟོས་པའོ། །དེ་ལ་གང་གི་ཚེ་དེ་ལས་གཞན་པ་དེ་འདྲ་བ་ལས་དེ་དང་འདྲ་བ་སྐྱེ་བར་འགྱུར་བ་དེའི་ཚེ་དེ་དང་མི་འདྲ་བའི་ངོ་བོ་ནི་མེ་ལ་སོགས་པའི་ཚོགས་པ་ལས་སྐྱེ་བའི་ངོ་བོ་མ་ཡིན་ཏེ། ཡོངས་སུ་མ་མཐོང་བའི་དུ་བ་དེ་ཡང་མེའི་ཚོགས་པ་རྒྱུ་ཡིན་པར་འགྱུར་རོ། །དེ་དང་འདྲ་བའི་ངོ་བོ་ནི་མེ་ལ་སོགས་པའི་ཚོགས་པ་དང་མཚན་ཉིད་མི་འདྲ་བའི་རྒྱུའི་ངོ་བོ་ལས་སྐྱེ་བའི་ཕྱིར་དང༌། དེས་ན་མེ་ལ་སོགས་པའི་ཚོགས་བ་རྒྱུ་མ་ཡིན་པའི་ཕྱིར་དེ་ཉིད་ལྷན་ཅིག་པ་དེ་ལས་བྱུང་བར་མཐོང་བའི་དུ་བ་གང་ཡིན་པ་དེ་ཡང་མི་འབྱུང་བར་འགྱུར་རོ། །གང་འདིའི་རྒྱུ་མ་ཡིན་པ་དེ་དང་དེ་ནི་ལན་འགའ་ཡང་དེ་ལས་འབྱུང་བར་མི་འགྱུར་ཏེ་དེ་རྒྱུ་མེད་པར་ཐལ་བའི་ཕྱིར་རོ། །དེ་ལས་འབྱུང་བ་མ་ཡིན་པ་ཞེས་བྱ་བ་ལས་དེ་སྨོས་བ་ནི་མེ་ལ་སོགས་པའི་རྒྱུ་བརྗོད་པར་འདོད་པ་གཟུང་ངོ༌། །དེ་མ་ཡིན་པ་ནི་དེ་མེད་པའོ། །དེ་དང་མཚན་ཉིད་མི་མཐུན་པ་དང་དེ་དང་མི་འདྲ་བ་བརྒྱ་བྱིན་གྱི་སྤྱི་བོ་ལ་སོགས་པའོ། །དེའི་ཕྱིར་འབྱུང་བའི་ངང་ཚུལ་ཅན་དེ་ནི་དེ་ལས་བྱུང་བའོ། །དེ་དང་འདྲ་བའི་མཚན་ཉིད་དེའི་དུ་བའི་དངོས་པོའོ། །ལན་འགའ་ཡང་ནི་ལན་ཅིག་ཀྱང་ངོ༌། །མེ་ལ་སོགས་པ་དེ་ལས་མི་འབྱུང་བས་ཡོད་པར་འགལ་བའི་ཕྱིར་རོ། །དེ་འདྲ་བ་ཡིན་དུ་ཟིན་ན་མེ་ལ་སོགས་པའི་ཚོགས་པ་དེ་ལས་དེ་དང་འདྲ་བའི་ངོ་བོ་ནི་དེ་དང་འདྲ་བ་ཉིད་རྒྱུ་ཡིན་ནོ་ཞེས་ལན་ཅིག་འབྱུང་བ་ཁོ་ནས་མངོན་སུམ་དང་མི་དམིགས་པ་དག་གིས་རྟོགས་པར་བྱ་བ་ཡིན་ན། གང་ལས་འཁྲུལ་པར་དོགས་པར་བྱ། དེས་ན་ཅི་འདྲ་བའི་དུ་བ་དང་མེ་ལ་སོགས་པའི་ཚོགས་པ་ལས་བྱུང་བར་མཐོང་བ་དེ་འདྲ་བ་དེ་ནི་དེའི་ངོ་བོས་དེ་དང་འདྲ་བ་ཉིད་དུ་འབྱུང་བས་སོ། །གང་དུ་བ་ཡོད་པ་དེ་ལ་མེའི་ཚོགས་པ་ཡོད་པར་རྗེས་སུ་འགྲོ་བ་དང་ལྡོག་པ་ངེས་པ་ཡིན་ནོ། །ཡང་ན་གཞན་དུ་བཤད་པར་
བྱ་སྟེ། འདིར་མངོན་སུམ་དང་མི་དམིགས་པ་རྒྱུ་མཚན་གྱི་འབྲས་བུ་དང་རྒྱུའི་དངོས་པོར་གྲུབ་པོ་ཞེས་སྔར་བཤད་ཟིན་ཏོ། །དེའི་རྒྱུ་མཚན་གྱི་རྗེས་སུ་འགྲོ་བ་དང་ལྡོག་པ་དག་བསྟན་པར་འདོད་པ་དེ་ནི་མི་རིགས་ཏེ། འདི་ལྟར་དུ་བ་འགའ་ཞིག་མེ་ལ་སོགས་པའི་ཚོགས་པ་ལས་གཞན་ལ་འབྱུང་བ་སྟེ། རེས་འགའ་ཞིག་འདི་ཐོག་མར་སྐྱེ་བའི་དུས་དང་པོ་ནི་མེ་ལ་སོགས་པའི་ཚོགས་པ་ལས་ཀྱང་སྐྱེའོ། །ཐམས་ཅད་དུ་དེ་དང་འདྲ་བ་ནི་མ་ཡིན་ཏེ་དུ་བའི་སྐད་ཅིག་མ་དང་པོ་ཅི་འདྲ་བ་འབྱུང་བའི་སྐད་ཅིག་མ་གཉིས་པ་ལ་སོགས་རྣམས་ཀྱང་མངོན་སུམ་ཁོ་ནས་དེ་དང་འདྲ་བ་དེ་ནི་སྔ་མ་དང་མཚན་ཉིད་མི་མཐུན་པར་རྟོགས་ཏེ། རྣམ་པ་དེ་ལྟ་བུའི་སྐྱེ་བ་ཞེས་བྱ་བ་ནི། ཇི་ལྟ་བུའི་རྣམ་པའི་མེ་དང་བུད་ཤིང་གི་ཚོགས་པའི་མཚན་ཉིད་དང་པོར་དུ་བ་སྐྱེས་པའི་རྣམ་པ་དེ་ལྟ་བུ་སྐྱེ་བ་གང་ཡིན་པ་དེ་ནི་རྣམ་པ་དེ་ལྟ་བུའི་སྐྱེ་བ་ཡིན་ནོ་ཞེས་བྱ་བ་འདི་གང་གིས་མ་ཡིན། དེ་ནི་དུ་བ་ལས་ཀྱང་འབྱུང་བའི་ཕྱིར་རོ། །དེ་ལྟར་གང་དང་གང་ལས་མཐོང་བ་དེ་ནི་གཞན་ལ་ཡང་ཡོད་པར་མཐོང་བས་ཐམས་ཅད་ལ་ཡིད་བརྟན་དུ་མེད་དོ་སྙམ་དུ་སེམས་པས་དེ་ལྟར་ན་ཞེས་བྱ་བ་སྨོས་ཏེ། མེ་མ་ཡིན་པའི་དུ་བ་ལས་ཀྱང་དུ་བ་འབྱུང་ལ་བརྒྱ་བྱིན་གྱི་སྤྱི་བོ་ལ་སོགས་པ་ལས་ཀྱང་འབྱུང་བས་འགལ་བ་མེད་དོ། །མེ་དང་དུ་བ་ལ་རྗེས་སུ་འགྲོ་བ་དང་ལྡོག་པ་དག་མ་ཡིན་ནོ་ཞེས་སེམས་པ་ཕྱོགས་སྔ་མའི་དོགས་པས་འདི་སྐད་དུ། སྐད་ཅིག་དངོས་པོ་ཁ་ཅིག་ཏུ། །ཇི་ལྟར་རག་ལས་འཇུག་པ་ཡིན། །རྒྱུར་གྲགས་པ་ནི་ཡོད་པ་ལས། །འདི་འབྱུང་དེ་ལས་ཡོད་པ་ཡིན། །དེ་ཕྱིར་མེས་མིན་དུ་བ་ལས། །དུ་བ་སྲིད་ཡིན་ཇི་ལྟ་བའི། །བརྒྱ་བྱིན་སྤྱི་བོ་དེ་བཞིན་དེ། །སྲིད་པ་གང་གིས་བསལ་བར་ནུས། །ཞེས་བཤད་དོ་ཞེ་ན། གྲུབ་པའི་མཐའ་སྨྲ་བས་མ་ཡིན་ཏེ་ཞེས་བྱ་བ་སྨོས་ཏེ། བུད་ཤིང་གི་ཚོགས་པ་ལས་སྐྱེས་པ་ཅི་འདྲ་བའི་དུ་བ་དེ་འདྲ་བ་ཁོ་ན་དུ་མ་ལས་ཀྱང་འབྱུང་བ་ཡང་མ་ཡིན་ཏེ། རྒྱུའི་ནུས་པ་ཐ་དད་པས་བདག་ཉིད་འགའ་ཞིག་ལས་འདྲ་བར་ངེས་པ་ཡང་མི་འདྲ་བ་ཡིན་པའི་ཕྱིར་རོ། །དེ་དང་འདྲ་བ་མེ་དང་བུད་ཤིང་གིས་ཚོགས་པའི་སྐད་ཅིག་མ་
གཞན་ལས་སྐྱེས་པ་དང་པོ་ཁོ་ན་ལས་གཞན་པའི་སྐད་ཅིག་མ་ཡིན་པ་དེ་བཞིན་དུ་དེ་ལས་གཞན་པའི་དངོས་པོ་ཉིད་མེ་དང་བུད་ཤིང་གི་ཚོགས་བ་གཞན་ལས་སྐྱེ་བས་དེ་འདྲ་བའི་དུ་བ་ནི་དུས་འབྱུང་བ་མི་སྲིད་དོ། །ལ་ལར་འབྲས་བུ་ལ་ཡིད་བརྟན་དུ་མེད་པ་མ་ཡིན་ནོ། །དེ་བཞིན་དུ་ཅི་འདྲ་བའི་སྐད་ཅིག་མ་གཉིས་པ་ལ་འབྱུང་བ་ནི་དུ་བའི་སྐད་ཅིག་མ་དང་པོ་ལ་སྐྱེ་བའི་དུ་བའི་སྐད་ཅིག་མ་དེ་དང་འདྲ་བ་དུ་བ་གཞན་གྱི་སྐད་ཅིག་མ་དང་པོ་ལས་སྐྱེས་བ་ཅན་གྱི་དུ་བའི་སྐད་ཅིག་མ་གཉིས་པ་དང་གསུམ་པ་ལ་སོགས་པའོ། །དེ་བཞིན་དུ་སྐད་ཅིག་མ་གསུམ་ལ་སོགས་པའི་མྱུ་གུ་ལ་སོགས་པ་རྣམས་ལ་ཡང་ཐམས་ཅད་དུ་བརྗོད་པར་བྱའོ། །གང་ལས་འདིའི་རྣམ་པར་དབྱེ་བར་བྱ་བ་ཡང་ཡིན་ཞེ་ན། དེ་ལས་འབྱུང་བ་ཅན་མ་ཡིན་པ་ནི་མེ་དང་བུད་ཤིང་ལ་སོགས་པའི་ངོ་བོ་དེ་ལས་མ་ཡིན་བའི་དུ་བ་ལས་འབྱུང་བའི་ངང་ཚུལ་ཅན་སྐད་ཅིག་མ་དང་པོ་དང་མཚན་ཉིད་མི་མཐུན་པའི་དུ་བ་ནི་ལན་འགའ་ཡང་ནི་ལན་གཅིག་ཀྱང་ངོ༌། །དེ་ལས་ནི་མེ་ལ་སོགས་བའི་ཚོགས་པ་ལས་མི་འབྱུང་བའི་ཕྱིར་འབྱུང་བ་མི་རིགས་སོ། །དཔེར་ན་སྐད་ཅིག་མ་དང་པོ་ལ་ལྟོས་པའི་གཉིས་པ་དེ་དང་འདྲ་བ་དེ་བཞིན་དུ་སྐད་ཅིག་མ་དང་པོ་ལ་ལྟོས་པ་དེ་ཡང་དེ་འདྲ་བ་ཉིད་དུ་ཁྱད་པར་མེད་པས་དེ་དང་འདྲ་བ་ཡིན་ནོ། །མེ་མ་ཡིན་པ་ལས་འབྱུང་བ་ཅན་མེ་ལས་སྐྱེས་པ་དེ་དང་འདྲ་བའི་ངོ་བོ་མེད་པས་ལན་འགའ་ཡང་དེ་ལས་མི་འབྱུང་བའི་ཕྱིར་རོ། །དེས་བསྐྱེད་པར་བྱ་བའི་ངོ་བོ་ཡིན་ན་ནི་བདག་ཉིད་ཡིན་པས་མི་འདྲ་བར་ག་ལ་འགྱུར། དེའི་ཕྱིར་མི་འདྲ་བ་ལས་བྱུང་བ་ལས་མི་འདྲ་བ་མ་ཡིན་པ་དེས་ན་འཁྲུལ་པ་མེད་དོ། །གལ་ཏེ་དུ་བའི་སྐད་ཅིག་མ་ཐམས་ཅད་ནི་མགུལ་པ་སྐམ་པ་དང་མཆི་མ་འབྱུང་བ་དང༌། ཁ་དོག་གནག་པར་བྱེད་པ་ལ་སོགས་པའི་དོན་བྱེད་པ་ཉེ་བར་མཁོ་བས། ཇི་ལྟར་དེ་དང་འདྲ་བའི་རང་བཞིན་དུ་མི་འགྱུར་ཞེ་ན། དེ་ལ་ཡང་དོན་བྱེད་པ་མེད་དེ་སྐད་ཅིག་མ་ཐ་དད་པ་ལ་རག་ལས་པའི་ངོ་བོ་ནི་དེ་དང་འདྲ་བ་མེད་པས་དེ་ལས་སྐྱོན་མཚུངས་པའི་ཕྱིར་རོ། །གལ་ཏེ་དེ་ལྟ་ན་འཇིག་རྟེན་པ་ཐམས་ཅད་ཇི་ལྟར་དུ་བའི་ཐ་སྙད་པ་ཡིན་ཞེ་ན། འདྲ་བ་གཞན་འབྱུང་བའི་རྒྱུ་མཚན་
གཅིག་ཏུ་མངོན་པར་ཞེན་པའི་དབང་གིས་སྐད་ཅིག་མའི་ཐ་སྙད་དུ་རུང་ངོ༌། །གལ་ཏེ་འདྲ་བ་དེ་དང་འདྲ་བ་ཇི་ལྟར་མ་ཡིན་ཞེ་ན། འདྲ་བ་ནི་དེ་དང་འདྲ་བ་ལས་གཞན་ཡིན་པའི་ཕྱིར་རོ། །དེ་ལྟ་ན་བ་ལང་དང་འདྲ་བར་གྱུར་པའི་བ་མེ་ན་ནི་དེ་དང་འདྲ་བ་མ་ཡིན་གྱི་བ་ལང་ཉིད་གཞན་དེ་དང་འདྲ་བའི་ཕྱིར་རོ། །དོན་དམ་པར་ན་དེ་དང་འདྲ་བ་མེད་ཀྱང་བློ་དམན་པ་རྣམས་དེ་དང་འདྲ་བ་འདོད་བ་འབྱུང་བ་གང་གིས་བསལ་བར་ནུས་དེ་ལྟ་ན་ཚུ་རོལ་མཐོང་བ་དེ་མ་ཡིན་པ་རེ་ཞིག་དེར་མངོན་པར་ཞེན་པ་བསལ་བར་ནུས་པ་མ་ཡིན་ན། དེ་དང་འདྲ་བ་མངོན་པར་ཞེན་པ་ལ་ཅི་ཞིག་བྱར་ཡོད། དེ་སྐད་དུ། དབྱིབས་དང་ཁ་དོག་མཚུངས་པ་ཡི། །རྒྱུ་གཞན་སྐྱེ་བར་གྱུར་པ་ལ། །དེ་མིན་དེ་བློའི་སྐྱེ་བོ་ནི། །རྒྱུན་གཅིག་པ་ལའང་ཅི་བྱར་ཡོད། །ཅེས་བཤད་དོ། །དེ་ཁོ་ན་ཉིད་སེམས་པས་ནི་དེ་དང་འདྲ་བ་དེ་དང་མི་འདྲ་བའི་རྒྱུ་ཐ་དད་པས་དེ་དང་འདྲ་བ་དང་དེ་དང་མི་འདྲ་བ་རྣམས་རྗེས་སུ་དཔོག་གོ །དེ་འདྲ་བ་ཉིད་མ་ཡིན་པ་གང་གི་ཚེ་དེ་དང་འདྲ་བ་མ་ཡིན་པ་ལ་ཡང་དེ་དང་འདྲ་བ་མེད་པ་དེའི་ཚེ་དེ་སྐྱེད་པའི་ངོ་བོ་མ་ཡིན་པའི་ཕྱིར་དེ་ལས་འབྱུང་བ་ཅན་མ་ཡིན་པ་ནི་ལན་འགའ་ཡང་དེ་ལས་འབྱུང་བར་མི་འགྱུར་རོ། །དོན་བྱེད་པར་ནུས་པ་ནི་ཕན་ཚུན་ལྟོས་པས་ཞེས་བྱ་བ་ལ་སོགས་པ་སྨོས་ཏེ། རྒྱུ་ལ་ལྟོས་ནས་བསྐྱེད་པར་བྱ་བའི་རྒྱུ་དང་འབྲས་བུའི་ངོ་བོ་ལ་ལྟོས་པའོ་ཞེས་ཤེས་སོ། །དེ་ལྟ་མ་ཡིན་ན་དེ་ལས་བྱུང་བ་དག་ཅིག་ཤོས་མི་རིགས་པས་དེས་བསྐྱེད་པར་བྱ་བར་མི་རུང་བའི་ཕྱིར་རོ། གལ་ཏེ་དེ་ལྟར་དེ་ལས་དཔག་ཕས་ཅི་ཞིག་འགྲུབ་ཅེ་ན། དེ་ལ་ཞེས་བྱ་བ་སྨོས་ཏེ། དེ་ལ་རིག་པར་གྱུར་པའོ། །གལ་ཏེ་དུ་བ་ཅི་འདྲ་བ་དང་པོར་མེ་ལ་སོགས་པའི་ཚོགས་པ་ལས་སྐྱེས་པ་སྐད་ཅིག་མ་གཉིས་པ་ལ་སོགས་པར་བྱུང་བ་དེ་དང་འདྲ་བའོ། །མེ་ལ་སོགས་པའི་ཚོགས་པའི་ནི་བུད་ཤིང་ལ་སོགས་པའི་ཚོགས་པས་དེ་སྐྱེད་པར་བྱེད་པའི་ངོ་བོའོ། །དེ་སྤངས་པ་ནི་དེ་ལས་གཞན་པའོ། །མེ་དང་བུད་ཤིང་ལ་སོགས་པའི་ཚོགས་པས་བསྐྱེད་པར་བྱ་བ་དེ་ལས་གཞན་པ་ལས་དུ་བའི་སྐད་ཅིག་མ་འབྱུང་བར་གྱུར་ན་དེ་ནི་
དེ་དང་འདྲ་བའི་ངོ་བོ་འདིའོ། །དེས་བསྐྱེད་པར་བྱ་བ་ནི་མེའི་ཚོགས་བས་བསྐྱེད་པར་བྱ་བའི་ངོ་བོ་མ་ཡིན་ནོ། །འོན་ཀྱང་དུ་བ་བསྐྱེད་པར་བྱ་བ་ཁོ་ན་བྱས་ཟིན་པ་ལན་འགའ་ཡང་མེ་ལ་སོགས་པའི་ཚོགས་པ་ལས་མི་འབྱུང་ངོ༌། །དེ་དང་འདྲ་བའི་དུ་བའི་ངོ་བོ་གཞན་ལས་འབྱུང་ན་དེས་བསྐྱེད་པར་བྱའི་ངོ་བོ་ནི་མ་ཡིན་པ་ལ་སོགས་པས་བསྐྱེད་པར་བྱ་བའི་ངོ་བོའོ། །གང་ལས་ཤེ་ན། ལན་འགའ་ཡང་དེ་ལས་འབྱུང་བར་མི་རིགས་སོ། །འདིར་དཔེ་ནི་དོན་གཞན་པ་བཞིན་ནོ་ཞེས་བྱ་བ་ནི་དཔེར་ན་མྱུ་གུ་ལས་དོན་གཞན་པ་དེ་མ་ཡིན་པས་བསྐྱེད་པར་བྱ་བར་མངོན་པར་འདོད་པ་ནི་གཞན་ལས་འབྱུང་བས་དེ་མ་ཡིན་པས་བསྐྱེད་པའི་ངོ་བོ་སྟེ། མེ་ལ་སོགས་པའི་ཚོགས་པ་ལས་སྐྱེ་བའི་ངོ་བོ་མ་ཡིན་པའི་ཕྱིར་ལན་ཅིག་ཀྱང་དེ་ལས་འབྱུང་བར་མི་འགྱུར་བ་དེ་བཞིན་དུ་དེ་དང་འདྲ་བའི་དུ་བ་ཡང་དེ་ལས་བྱུང་བ་དང་མི་འདྲ་བ་ཉིད་འདིར་རྟོགས་པར་བྱའོ། །གལ་ཏེ་མེ་ལ་སོགས་པའི་ཚོགས་པས་འདི་དེ་མ་ཡིན་པས་བསྐྱེད་པར་བྱ་བའི་ངོ་བོ་ཡིན་ཡང་དེ་དང་འདྲ་བར་སྟོབས་ཀྱིས་སྐྱེད་པར་བྱེད་ལ་རག་ལས་ན་དེའི་ཉེས་པ་ཡིན་ནོ་ཞེས་འདོད་ན། དེ་སྐྱེད་པ་ཞེས་བྱ་བ་སྨོས་ཏེ། དེ་སྐྱེད་པའི་ངོ་བོ་མ་ཡིན་པའི་བདག་ཉིད་འབའ་ཞིག་དེ་ལས་མི་འབྱུང་ངོ༌། །འོན་ཀྱང་མེ་ལ་སོགས་བའི་ཚོགས་པ་དེས་ཀྱང་དེ་དང་འདྲ་བའི་དུ་བ་སྐད་ཅིག་མ་གཉིས་པ་འབྱུང་བ་ཅི་འདྲ་བར་མི་སྐྱེད་དོ། །གང་ལས་ཤེ་ན། དེ་སྐྱེ་བའི་ངོ་བོ་མ་ཡིན་པའི་ཕྱིར་རོ། །དེ་དང་འདྲ་བ་གཞན་ལས་འབྱུང་ན་ནི་དེ་ཁོ་ན་དེས་བསྐྱེད་པའི་ངོ་བོ་ཡིན་ཏེ་མེ་ལ་སོགས་པའི་ཚོགས་པ་དེ་སྐྱེད་པའི་ངོ་བོ་མ་ཚང་ན་ཇི་ལྟར་དེ་སྐྱེད་པར་འགྱུར། འདིར་དཔེ་ནི་ཚོགས་པ་གཞན་ཡིན་ནོ། །དཔེར་ན་ཚོགས་པ་གཞན་དེ་མ་ཡིན་པ་སྐྱེད་པར་མངོན་པར་འདོད་པའི་ངོ་བོ་ནི་དེས་བསྐྱེད་པ་མ་ཡིན་པ་དེ་བཞིན་དུ་མེ་ལ་སོགས་པའི་ཚོགས་པ་ལས་ཀྱང་ཡིན་ནོ། །དེ་ལྟ་ན་དེ་བདག་ཉིད་ཀྱི་ངོ་བོའི་རྗེས་སུ་འབྲང་བས་འཇུག་པ་ཡིན་ནོ། །དེའི་ཕྱིར་ཚོགས་པའི་སྟོབས་ཀྱིས་འདི་སྐྱེ་བར་ག་ལ་འགྱུར། གལ་ཏེ་མེ་ལ་སོགས་པའི་ཚོགས་པ་ལས་སྐྱེ་བའི་ངོ་བོ་ལས་ཀྱང་དེ་དང་འདྲ་བའི་དུ་བའི་ངོ་
བོ་སྐྱེད་པ་ཡང་ཡིན་ཏེ། དཔེར་ན་དུ་བ་དེ་ཉིད་བུད་ཤིང་ལས་སྐྱེ་བའི་ངོ་བོ་དང་མེ་ལས་སྐྱེ་བའི་ངོ་བོ་གཉི་ག་ཡང་ཡིན་པ་དེ་བཞིན་དེ་འདྲ་བ་དུ་བ་ཡང་ཚོགས་པས་བསྐྱེད་པར་བྱ་བའི་ངོ་བོ་ཡིན་པས་གཉིས་ལས་འབྱུང་བར་འགྱུར་རོ་ཞེ་ན། དུ་བ་དེ་ནི་ཞེས་བྱ་བ་སྨོས་ཏེ་དེ་དང་འདྲ་བའི་དུ་བ་དེ་དང་དེ་མ་ཡིན་པས་བསྐྱེད་པར་བྱ་བ་ནི་མེ་ལ་སོགས་པའི་ཚོགས་པས་བསྐྱེད་པར་བྱ་བ་དང་དུ་བས་བསྐྱེད་པའི་ངོ་བོར་རིགས་པ་མ་ཡིན་ན་རིགས་པ་དང་འབྲེལ་པ་ག་ལ་ཡིན། ངོ་བོ་གཅིག་ཡིན་པའི་ཕྱིར་ན་དེ་དང་འདྲ་བའི་དུ་བ་ཐ་དད་པ་མེད་པའི་ཕྱིར་རོ་།དེའི་དུས་ཐ་དད་པས་ཀྱང་དེའི་ངོ་བོ་ཐ་དད་པར་མི་འགྱུར་པ་མ་ཡིན་ནོ། །ཐ་དད་པ་ནི་མི་འདྲ་བ་ལས་བྱུང་བའི་མི་འདྲ་བ་བརྩད་པར་མི་རིགས་སོ། །གང་གི་ཚེ་དེའི་དེ་འདྲ་བ་དང་དེ་མི་འདྲ་བའི་རྒྱུས་བསྐྱེད་པ་དེ་ནི་དེ་འདྲ་བ་དང་དེ་མི་འདྲ་བ་ངོ་བོ་ཉིད་དུ་འགྱུར་རོ། །དེ་ཉིད་བསྟན་པ་ནི་དུ་བ་དང་དུ་བ་མ་ཡིན་པ་ཞེས་བྱ་བ་ལ་སོགས་པ་སྨོས་ཏེ། དུ་བ་སྨོས་པ་ནི་ཅི་འདྲ་བའི་མེ་ལ་སོགས་པའི་ཚོགས་པ་ལ་སྐྱེས་པ་དེ་དང་འདྲ་བའི་ངོ་བོར་མངོན་པར་འདོད་དོ། །དུ་བ་མ་ཡིན་པ་སྨོས་པས་ཀྱང་མི་འདྲ་བའི་རྒྱུ་ལས་སྐྱེས་པའི་དུ་བ་མ་ཡིན་པ་མི་འདྲ་བའོ། །དེ་དག་ཀྱང་དེ་དང་འདྲ་བ་དང་མི་འདྲ་བའི་རྒྱུ་ལས་སྐྱེས་པས་དེ་དང་འདྲ་བ་དང་དེ་དང་མི་འདྲ་བའི་ངོ་བོར་འཆད་པར་མི་འགྱུར་བའི་རིགས་པས་ཁོང་དུ་ཆུད་པར་བྱའོ། །དེས་ན་མེ་དང་དུ་བའི་མཚན་ཉིད་ལས་དུ་བ་ལས་དུ་བ་སྐྱེད་པའི་ངོ་བོ་ནི་དེ་དང་དེ་མི་འདྲ་བ་སྐྱེད་པའི་ངོ་བོ་ཡིན་པས་དེ་དང་འདྲ་བ་དང་དེ་མི་འདྲ་བ་དག་འབྱུང་བ་ཡིན་ན་དུ་བ་དང་དུ་བ་མ་ཡིན་པ་དང་དེ་འདྲ་བ་དང་དེ་མི་འདྲ་བར་འགྱུར་རོ། །གང་ལས་འདྲ་བ་ཉིད་ཡིན་ཞེས་ག་ལས་ཤེ་ན། འབྲས་བུའི་ངོ་བོ་ཉིད་རྣམས་ཞེས་བྱ་བ་ལ་སོགས་པ་སྨོས་ཏེ། འབྲས་བུའི་ངོ་བོ་ཉིད་རྣམས་ནི་ཕན་ཚུན་འབྱུང་བ་གང་ཡིན་པ་དེ་ནི་ཕན་ཚུན་མཚན་ཉིད་མི་མཐུན་པར་རྒྱུའི་ཚོགས་པའི་རང་བཞིན་གྱིས་བྱས་པ་ཡིན་གྱི་ངོ་བོ་ཉིད་ཀྱིས་ནི་མ་ཡིན་ཏེ། རྒྱུ་མེད་པར་ཐལ་བར་འགྱུར་རོ། །དེའི་ཕྱིར་དེ་འདྲ་བ་དང་དེ་མི་འདྲ་བ་ལས་བྱུང་བའི་དུ་བ་དེ་འདྲ་བ་དང་དེ་མི་འདྲ་བའི་ངོ་བོར་མི་འགྱུར་རོ། །
གལ་ཏེ་དེ་འདྲ་བ་དང་དེ་མི་འདྲ་བའི་ངོ་བོ་ནི་རྒྱུ་དེ་འདྲ་བ་དང་དེ་མི་འདྲ་བ་ལ་ལྟོས་ནས། འབྲས་བུ་སྐྱེད་པ་ཙམ་ཁོ་ན་རྒྱུ་ལ་ལྟོས་བ་ཡིན་པར་འདོད་དོ་ཞེ་ན། རྒྱུ་ལ་མི་ལྟོས་ཞེས་བྱ་བ་སྨོས་ཏེ། དེ་འདྲ་བ་དང་མི་འདྲ་བའི་ངོ་བོ་དག་དེ་དང་འདྲ་བ་དང་དེ་མི་འདྲ་བའི་རྒྱུ་ལ་མི་ལྟོས་ན་དེ་དང་འདྲ་བ་དང་དེ་མི་འདྲ་བ་དག་རྒྱུ་མེད་པ་ཉིད་དུ་ཐལ་བར་འགྱུར་བའི་ཕྱིར་རོ། །དེ་འདྲ་བ་དང་དེ་མི་འདྲ་བའི་ངོ་བོ་མ་བྱུང་བ་ལས་ཐ་དད་པ་གཞན་འགའ་ཞིག་སྐྱེ་བ་ནི་མེད་དོ། །གང་ལ་དེ་འདྲ་བ་དེ་མི་འདྲ་བའི་རྒྱུ་ལ་མི་ལྟོས་པ་རྣམས་ཀྱང་དེ་ལ་ལྟོས་པར་འགྱུར་རོ། །དེ་ལྟ་བས་ན་སྐྱེད་པ་སྨོས་བས་ནི་དེ་དང་འདྲ་བ་དང་དེ་མི་འདྲ་བའི་ངོ་བོ་ཉིད་བརྗོད་དོ་ཞེས་བྱའོ། །དེ་ལ་རྒྱུ་ལ་ལྟོས་པར་ཁས་བླངས་པ་ཇི་ལྟར་དེ་འདྲ་བ་དང་དེ་མི་འདྲ་བ་རྒྱུ་ལ་མི་ལྟོས་པ་ཡིན། དེའི་ཕྱིར་ཚོགས་པ་ནི་དེ་འདྲ་བ་དང་དེ་མི་འདྲ་བ་ཡིན་པས་རྒྱུ་རྣམས་དེ་འདྲ་བ་དང་དེ་མི་འདྲ་བའི་ངོ་བོ་རྣམ་པར་དབྱེ་བར་བྱ་བ་ཡིན་ན་གང་གིས་ན་མི་འདྲ་བ་ལས་འདྲ་བར་འབྱུང་བར་འགྱུར་རོ་ཞེས་དེ་ནི་བཤད་ཟིན་ཏོ། །དཔེར་ན་དུ་བ་གཅིག་ཀྱང་མེ་དང་བུད་ཤིང་མཚན་ཉིད་མི་མཐུན་པ་དག་ལས་སྐྱེ་བར་འགྱུར་བ་དེ་བཞིན་དུ་འབྲས་བུ་གཅིག་པ་ཡང་མི་མཐུན་པའི་ཚོགས་པ་གཞན་ལས་ཀྱང་འབྱུང་བར་འགྱུར་རོ་ཞེ་ན། དེ་ནི་མི་རིགས་ཏེ། གང་གི་ཕྱིར་ཁོ་བོ་ཅག་ཀྱང་མཚན་ཉིད་མི་མཐུན་པ་རྣམས་སྐྱེད་པར་བྱེད་པ་ཉིད་སེལ་བར་ནི་མི་བྱེད་ཀྱི་བསྐྱེད་པར་བྱ་བ་ཉིད་ཕན་ཚུན་མཚན་ཉིད་མི་མཐུན་པ་ཡང་རང་གི་རྒྱུ་ཡོངས་སུ་གྱུར་པ་ལས་སྐྱེས་པའི་ཆོས་དེའི་གནས་སྐབས་ངེས་བའོ། །དེའི་འབྲས་བུ་གཅིག་པ་དེ་ནི་དེ་དག་ཕན་ཚུན་ལྟོས་ནས་བསྐྱེད་པར་བྱ་བ་དང་སྐྱེད་པར་བྱེད་པའི་ངོ་བོ་ཉིད་དུ་ངེས་པས་དེ་དང་འདྲ་བ་ལས་དེ་འདྲ་བ་ཁོ་ན་སྐྱེ་བར་བརྗོད་ཀྱི་མི་འདྲ་བ་ལས་མ་ཡིན་ཏེ། དེ་ནི་དེས་བསྐྱེད་པའི་ངོ་བོ་ཡིན་པའི་ཕྱིར་རོ།། དེ་མེད་ཀྱང་གཞན་ཡོད་པས་དེ་སྐྱེད་པ་ངེས་པ་ནི་མི་སྲིད་པས་རྒྱུ་དང་འབྲས་བུའི་དངོས་པོ་མ་ངེས་པ་ནི་མི་རིགས་པའི་ཕྱིར་རོ། །གལ་ཏེ་མེ་དང་བུད་ཤིང་གི་ཉེ་བར་ལེན་པས་ཕན་བཏགས་པ་ནི་བུད་ཤིང་བཞིན་དུ་དེའི་ཉེ་བར་ལེན་པས་ཕན་བཏགས་པ་དེའི་གནས་སྐབས་ངེས་པ་ནི་དེ་རིགས་
མི་མཐུན་པ་ལས་ཀྱང་དུ་བ་ལ་སོགས་པ་རིགས་མཐུན་པའི་དུ་བ་སྐྱེ་བར་འགྱུར་ན་མངོན་སུམ་དང་མི་དམིགས་པ་དག་གིས་ཀྱང་དེ་བཞིན་གོ་བར་འགྱུར་རོ། །དེ་ནི་མེ་ལ་སོགས་པ་བཞིན་དུ་དེ་ཡང་དེ་བསྐྱེད་པའི་རང་བཞིན་དུ་ངེས་པས་རིགས་འདྲ་བ་སྐྱེད་པར་བྱེད་པར་ཅིས་ན་རྗེས་སུ་མི་དཔག །དེ་མེད་ཀྱང་རིགས་མཐུན་པ་འབྱུང་བས་དེ་བསྐྱེད་པར་བྱ་བ་དང་སྐྱེད་པར་བྱེད་བར་ངོ་བོས་ངེས་པ་མེད་དོ། །གང་གིས་ན་རྒྱུད་དང་འབྲས་བུར་དེ་དག་གིས་རིགས་མཐུན་པ་དང་རིགས་མི་མཐུན་པའི་དངོས་པོའི་རྒྱུ་ཅན་དུ་འགྱུར་བ་གང་གི་ཕྱིར། དེ་ལྟར་ན་དེའི་ཕྱིར་དེ་བུད་ཤིང་ལ་སོགས་པའི་ཚོགས་པའི་ཁྱད་པར་དང་ལྡན་པ་དང་པོར་དུ་བ་སྐྱེད་བ་གང་ཡིན་པ་དེའི་དུ་བ་ནི་དང་པོར་དུ་བ་སྐྱེད་བ་གང་ཡིན་པ་དེའི་དབུ་བ་ནི་དང་པོར་མེ་ལ་སོགས་པའི་ཚོགས་པའི་ཁྱད་པར་ལས་སྐྱེ་བ་ཁོ་ན་ཡིན་གྱི་གཞན་ནི་མ་ཡིན་ནོ་ཞེས་རྒྱུ་དང་འབྲས་བུ་གྲུབ་པ་དག་གྲུབ་པ་དེ་ལྟར་ཇི་སྐད་བཤད་པའི་རིགས་པས་བསྐྱེད་པར་བྱ་བ་དང༌། སྐྱེད་པར་བྱེད་པའི་རང་བཞིན་དུ་ངེས་པར་མཐོང་ངོ༌། །གང་རྒྱུ་རྣམས་ལན་འགའ་མངོན་སུམ་དང་མི་དམིགས་པ་དག་གིས་ངེས་པའི་ཕྱིར་རོ། །རིགས་མི་མཐུན་པ་ནི་མི་འདྲ་བའི་རྒྱུ་ལས་སྐྱེ་བ་དེ་དང་འདྲ་བའི་འབྲས་བུ་མ་ཡིན་གྱི་མི་འདྲ་བ་སེལ་བ་ནི་མ་ཡིན་ནོ། །དེ་ལྟར་ན་དེ་ནི་དེ་འདྲ་བ་དང་དེ་མི་འདྲ་བའི་རྒྱུ་བྱས་པ་ཉིད་དེ་དང་འདྲ་བ་དང་དེ་མི་འདྲ་བའི་ངོ་བོར་རྟོགས་པར་བྱ་བའི་མཇུག་བསྡུ་བ་ནི་དེ་ལྟ་བས་ན་ཞེས་བྱ་བ་སྨོས་ཏེ། ཅི་འདྲ་བའི་འབྲས་བུ་ནི་ཅི་འདྲ་བའི་རྒྱུ་ལས་རྒྱུ་ལས་བྱུང་བར་མངོན་སུམ་དང་མི་དམིགས་པ་དག་གིས་མཐོང་བས་ལན་ཅིག་ངེས་པ་དེ་ནི་དེ་ལ་འཁྲུལ་པ་མེད་དོ། །དེ་འདྲ་བ་མི་འདྲ་བ་ལས་མི་འབྱུང་སྟེ་རྒྱུ་གང་ཡིན་པ་དེས་ན་རྒྱུ་དང་འབྲས་བུའི་དངོས་པོ་གྲུབ་པོ། །དེ་འདྲ་བའི་འབྲས་བུ་ནི་དེ་འདྲ་བའི་རྒྱུ་ཁོ་ན་ལས་ངེས་པར་གྱུར་པས། ཇི་སྐད་བཤད་པའི་རིགས་པས་འབྲས་བུ་ལ་རྒྱུས་ཁྱབ་པའི་རྗེས་སུ་འགྲོ་བ་དང་ལྡོག་པའི་ངོ་བོ་གྲུབ་པ་ཡིན་ནོ། །རིགས་མི་མཐུན་པ་ལས་བྱུང་བ་ལས་བྱུང་བར་མཐོང་སྟེ་རྒྱུ་རིགས་མི་མཐུན་པ་ལས་རྒྱུ་དང་མི་འདྲ་བ་མི་སྐྱེ་བ་མ་ཡིན་ནོ་ཞེས་དོན་མེད་པར་བསྟན་པ་ནི་རིགས་མཐུན་པའི་རྒྱུ་ལས་འབྲས་བུ་མི་སྐྱེའོ་ཞེས་བྱ་བ་འདིའི་
དོན་འདིར་མངོན་པར་འདོད་དོ་སྙམ་ནས་གཞན་དག་རྩོད་པ་ནི་གལ་ཏེ་རང་ཉིད་རིགས་མི་མཐུན་པ་ལས་ཀྱང་འབྲས་བུ་ཅུང་ཟད་འབྱུང་བ་མཐོང་ན། དེ་རིགས་མི་མཐུན་པ་ལས་མི་སྐྱེའོ་ཞེས་བྱ་བ་ཇི་ལྟར་མཐོང་བ་དང་འགལ་བར་མི་འགྱུར་རོ། །དཔེ་ཇི་ལྟ་བུ་ཞེ་ན། དཔེར་ན་བ་ལང་གི་ལྕི་བ་ཞེས་བྱ་བ་སྨོས་ཏེ། སོགས་པ་སྨོས་བས་ནི་རྭ་དང་ཆུ་ཤེལ་ལ་སོགས་པའོ། །ཤ་ལུ་ཀ་ལ་སོགས་པ་སྨོས་པས་ནི་སྨྱུག་མ་དང་ཆུ་ལ་སོགས་པའོ། །གྲུབ་པའི་མཐའ་གཞན་གྱི་འཁྲུལ་བར་བསྟན་པ་ནི་རིགས་མི་མཐུན་པ་ལས་བྱུང་བ་མ་ཡིན་ཏེ་ཞེས་བྱ་བ་སྨོས་ཏེ། གང་གི་ཕྱིར་རྒྱུ་གང་ལས་འབྱུང་བར་མཐོང་བ་དེ་དང་དེ་ནི་མི་འདྲ་བ་ལས་མི་འབྱུང་ངོ་ཞེས་བྱ་བ་འདིའི་དོན་འདིར་བརྗོད་པར་འདོད་ཀྱི་འབྲས་བུ་རིགས་མི་མཐུན་པ་ལས་མ་ཡིན་པའི་ཕྱིར་དེ་ལ་འཁྲུལ་པ་མེད་དོ། །དེ་ནི་དེ་ལྟ་བུ་ཁོ་ནའི་ཞེས་བྱ་བ་སྨོས་ཏེ། བ་ལང་གི་ལྕི་བ་ལ་སོགས་པའི་ངོ་བོ་དེ་དང་འདྲ་བའི་ཨུཏྤལ་ལ་སོགས་པའི་དང་པོའི་རྒྱུ་མཚན་དེ། ཨུཏྤལ་ལ་སོགས་པའི་རྒྱུན་གྱི་དང་པོ་ཐོག་མར་རྩོམ་པའི་སྐད་ཅིག་མ་དེའི་རྒྱུ་ཡིན་པར་གྲུབ་པས་ཨུཏྤལ་ལ་སོགས་པའི་རྒྱུན་དུ་གྱུར་པ་ལས་རྒྱུ་ཐ་དད་བ་མི་འདྲ་བས་སྐྱེད་པ་ནི་མ་ཡིན་ནོ། །ཐམས་ཅད་ཀྱི་ས་དེའི་ཚེ་དང་པོར་བ་ལང་གི་ལྕི་བ་ལ་སོགས་པ་རྒྱུ་མཚན་ཡིན་པའི་ཕྱིར་རོ། །གང་གི་ཚེ་རྒྱུན་གྱི་སྔོན་མའི་སྐད་ཅིག་མ་རྒྱུ་མཚན་ཡིན་པས་ཕྱི་མ་ཕྱི་མའི་སྐད་ཅིག་མ་རྣམས་རྒྱན་གྱིས་བསྐྱེད་པའི་མཚན་ཉིད་དུ་འཇུག་པར་འགྱུར་བ་དེའི་ཚེ་སྨྱུག་མ་ལས་སྨྱུག་མ་འབྱུང་ངོ༌། །དེ་ནི་དེ་བཞིན་དུ་གང་གི་རྒྱུན་རྭ་ལ་སོགས་པ་དག་ལས་འབྱུང་བ་ནི་སྨྱུག་མ་དེ་དང་འདྲ་བ་མ་ཡིན་ནོ། །གང་ཡང་སྨྱུག་མ་དེ་ལས་ཕྱི་མ་ཕྱི་མ་འབྱུང་བ་དེ་དང་རྭ་ལས་བྱུང་བ་མི་འདྲ་བའི་ཕྱིར་རིགས་མི་མཐུན་པའི་རྒྱུ་ལས་མཐོང་བ་དང་འདྲ་བ་མི་སྲིད་པས་འབྲས་བུའི་གཏན་ཚིགས་ཀྱི་རྗེས་སུ་འགྲོ་བ་དང་ལྡོག་པ་ངེས་སོ། །གང་གི་ཚེ་ཨུཏྤལ་སོགས་པ་སྔ་མ་སྔ་མ་རིགས་མཐུན་པ་དང་རྗེས་སུ་འབྲེལ་བ་ཐོག་མ་མེད་པ་ནས་རྒྱུན་དུ་འབྱུང་བར་འདོད་པ་དེའི་ཚེ་ཡང་བ་ལང་གི་ལྕི་བ་ལ་སོགས་པ་ཡང་བརྒྱ་ལ་འབྱུང་བ་ཡང་དེ་དང་
འདྲ་བ་མེད་པས་འཁྲུལ་པ་ཡིན་ནོ་ཞེས་བསྟན་པ་ནི་ཡང་ན་ཞེས་བྱ་བ་ལ་སོགས་པ་སྨོས་ཏེ། ཨུཏྤལའི་རྒྱུན་གང་ཡིན་པ་དང་བ་ལང་གི་ལྕི་བ་ལ་སོགས་པའི་རྒྱུན་གང་ཡིན་པ་ཡང་ཐམས་ཅད་དུ་རིགས་མཐུན་པའི་རྒྱུ་མཚན་དག་གིས་བ་ལང་གི་ལྕི་བ་དང༌། ཅིག་ཤོས་ལས་སྐྱེ་བ་ཅན་གྱི་ཨུཏྤལ་ངོ་བོ་ཉིད་ཐ་དད་པ་ཡོད་དོ། །གལ་ཏེ་ཕན་ཚུན་མི་འདྲ་བ་ཉིད་ཀྱི་གཟུགས་ཀྱི་རྣམ་པ་ཐ་དད་པར་གྱུར་པ་ལ་ཡང་རྣམ་པ་མཚུངས་པ་ཡིན་ན་ཇི་ལྟར་མི་འདྲ་བ་ཡིན་ཞེ་ན། དངོས་པོ་རྣམས་ཀྱི་རྣམ་པ་མཚུངས་པ་ཁོ་ནའི་ཞེས་བྱ་བ་སྨོས་ཏེ། ནི་ཞེས་བྱ་བ་ནི་གང་གི་ཕྱིར་རོ། །དེ་ཉིད་དེ་དང་འདྲ་བའི་རྒྱུ་མཚན་ནི་བ་ལང་གི་ལྕི་བ་དང་ཅིག་ཤོས་ལས་སྐྱེ་བ་ཅན་གྱི་ཨུཏྤལ་དག་རྣམ་པ་མཚུངས་པར་འགྱུར་གྱི། རིགས་ཐ་དད་པའི་རྒྱུ་མ་ཡིན། འདི་ག་ལས་ཤེ་ན། རྣམ་པ་ཐ་དད་པ་མ་ཡིན་པ་ཞེས་བྱ་བ་ལ་སོགས་པ་སྨོས་ཏེ། གང་དག་རྣམ་པ་མཚུངས་པ་ཉིད་ཁ་ཅིག་གིས་དངོས་པོ་དེ་དག་ཀྱང་གང་ལས་རྣམ་པ་ལས་ཁྱད་པར་གཞན་གྱི་སྒོ་ནས་ཐ་དད་པར་མཐོང་བའི་ཕྱིར་རོ། །དེའི་ཕྱིར་རྣམ་པ་མཚུངས་པ་ཉིད་རིགས་གཅིག་པའི་རྒྱུ་མཚན་མ་ཡིན་ནོ། །དེ་ལྟར་ན་རྣམ་པ་མཚུངས་ཀྱང་ཁ་ཅིག་མེ་ཏོག་ཐ་དད་པ་མཐོང་སྟེ་སྔོན་པོ་དང་ཅིག་ཤོས་ཀྱི་ཀུ་སུ་མའི་ཞྭ་མོ་ལྟ་བུའོ། །ལ་ལར་འབྲས་བུའི་སྒོ་ནས་གཞན་པ་ཅིག་ཤོས་ཀྱི་ཀརྐོ་ཏ་ལྟ་བུའོ། །ལ་ལར་རོའི་སྒོ་ནས་གཞན་པ་དང་ཅིག་ཤོས་ཀྱི་ག་གོན་ལྟ་བུའོ། །ལ་ལར་དྲིའི་སྒོ་ནས་ཤིང་དང་ཅིག་ཤོས་ལས་བྱུང་བའི་ཙམ་པ་ཀ་ལྟ་བུའོ། །ལ་ལར་ནུས་པའི་སྒོ་ནས་རེག་པ་དང་ཟོས་པ་ལས་འཁྲུ་བའི་ཨ་རུ་ར་ལྟ་བུའོ། །དེའི་ཕྱིར་རྣམ་པ་མཚུངས་པའི་རྒྱུ་མཚན་གྱིས་གང་ལ་དེ་ཉིད་འདི་ཡིན་ནོ་ཞེས་ངོ་ཞེས་པ་སྐྱེད་པའི་བ་ལང་གི་ལྕི་བ་དང་ཅིག་ཤོས་ལས་སྐྱེས་པ་ལ་ཨུཏྤལར་ཉེ་བར་རྟོག་གོ །དེ་བཞིན་དུ་མཚན་ཉིད་མི་མཐུན་པའི་ཚོགས་པ་ལས་སྐྱེས་པ་དེ་དག་རིགས་ཐ་དད་པ་ཉིད་དུ་རྟོགས་པར་བྱ་སྟེ་རིགས་གཅིག་པ་མ་ཡིན་ནོ། །དེ་ཉིད་ཀྱི་ཕྱིར་ངོ་ཤེས་པ་ནི་འཁྲུལ་པ་ཉིད་དེས་དེ་དང་འདྲ་བར་བརྟགས་པ་ནི་བརྫུན་པའི་ཕྱིར་རོ། །གལ་ཏེ་བ་ལང་གི་ལྕི་བ་དང་ཅིག་ཤོས་ལ་སོགས་པ་ལས་སྐྱེས་པའི་
ཨུཏྤལ་ལ་སོགས་པའམ། མེ་ལས་སྐྱེས་པའི་དུ་བ་ལ་སོགས་པ་ལ་དུ་བ་ངོ་ཤེས་པའི་དབང་གིས་མཚན་ཉིད་མི་མཐུན་པའི་ཚོགས་པའི་རྒྱུ་མཚན་ཅན་ཡང་མཚུངས་པའི་ངོ་བོ་ཉིད་དུ་འགྱུར་བ་ལ་ཉེས་པ་ཅི་ཞིག་ཡོད་ཅེ་ན། དེ་ལྟ་མ་ཡིན་ན་ཞེས་བྱ་བ་ལ་སོགས་པ་སྨོས་ཏེ། གལ་ཏེ་རིགས་མཐུན་པའི་མཚན་ཉིད་ཅན་གང་ཡིན་པ་དང་རྐྱེན་གཞན་དང་ལྷན་ཅིག་པའི་ཚོགས་པ་རིགས་མཐུན་པ་ལ་མི་ལྟོས་པའི་བ་ལང་གི་ལྕི་བ་ལ་སོགས་པའི་ངོ་བོ་ལས། ཨུཏྤལ་ལ་སོགས་པ་འམ། དུ་བ་ནི་མེ་དང་བུད་ཤིང་ལ་སོགས་པའི་མཚན་ཉིད་ཅན་ནམ་བརྒྱ་བྱིན་གྱི་སྤྱི་བོ་ལ་སོགས་པའི་ངོ་བོ་ལས་དུ་བའི་བདག་ཉིད་ཅན་ཡིན་པ་དེའི་ཕྱིར་མཚན་ཉིད་མི་མཐུན་པའི་ཚོགས་པ་ཡང་མཚན་ཉིད་མེད་པས་དེ་དང་འདྲ་བའི་འབྲས་བུ་དུ་བ་དང་ཨུཏྤལ་སོགས་པ་སྐྱེ་བ་ཡིན་ན་ནི་དེའི་ཚེ་རྒྱུ་ནི་ཚོགས་པའི་ངོ་བོའོ། །ཐ་དད་པ་དང༌། ཐ་དད་པ་མ་ཡིན་པ་དག་ལས་ནི་མཚན་ཉིད་མི་མཐུན་པའི་དང་མཚན་ཉིད་མི་མཐུན་པ་མེད་པའོ། །དེ་དང་རིགས་མཐུན་པ་དང་རིགས་མི་མཐུན་པའི་བདག་ཉིད་དུ་གྱུར་པའི་ཕྱིར་སྣ་ཚོགས་པར་གྲུབ་པའི་དོན་ཐམས་ཅད་ཀྱི་ཚོགས་ཐ་དད་པ་དང་ཐ་མི་དད་པ་དང༌། རིགས་མཐུན་པ་དང་རིགས་མི་མཐུན་པ་དག་རྒྱུ་མེད་པར་འགྱུར་རོ། །དེའི་ཕྱིར་གང་ལ་མཚན་ཉིད་མི་མཐུན་པའི་ཕྱོགས་ཡོད་པ་དེ་རྣམ་པ་འགའ་ཞིག་གིས་གཟུགས་མཚུངས་ཀྱང་རིགས་མི་མཐུན་པའི་འབྲས་བུ་ཁོ་ནའོ། །གལ་ཏེ་མེ་དང་བུད་ཤིང་ལ་སོགས་པའི་ཚོགས་པ་ཐ་དད་ཀྱང་དུ་བ་ལ་རིགས་ཐ་དད་པ་མེད་པར་མཚུངས་པར་མཁས་པས་དེ་མ་ཡིན་པའི་ངོ་བོ་དང་གཞན་ལ་གནས་པ་གཉི་ག་ལ་ཡང་མཚུངས་པར་རྟོགས་སོ་ཞེ་ན། སྐྱོན་འདི་ནི་མེད་སྐད་ཅིག་མ་ཐ་དད་པ་ཕྲ་བ་ལ་བརྟེན་པ་ལ་ནང་ཚན་གྱི་རིགས་ཐ་དད་ཀྱང་རྒྱུན་རགས་པ་ལ་བརྟེན་པ་ནི་རིགས་མི་མཐུན་པ་ལས་ལྡོག་པར་མཚུངས་པའི་ཕྱིར་རོ། །ཁྲ་མོ་ལ་སོགས་པ་ནང་ཚན་གྱི་རིགས་ཐ་དད་ཀྱང་བ་ལང་མ་ཡིན་པ་ལས་ལྡོག་པའི་རྒྱུ་མཚན་གྱིས་བ་ལང་གི་རིགས་དང་བ་མེན་བཞིན་ནོ། །དུ་བ་ཐམས་ཅད་རིགས་གཅིག་པར་རྣམ་པར་འཇོག་པ་ནི་ཉེ་བར་ལེན་པའི་རྒྱུའི་སྐད་ཅིག་མ་ཐ་དད་པ་ཡང་རྣམ་པ་གཅིག་ཏུ་ཤེས་པའི་རྒྱུ་
མཚན་གྱིས་མཚུངས་པའི་ཕྱིར་རོ། །གལ་ཏེ་དང་པོ་འདི་བུད་ཤིང་ལས་བྱུང་བ་ཇི་ལྟར་ཡིན་ཞེ་ན། མ་ཡིན་ཏེ་དུ་བ་ཐམས་ཅད་ནི་བུད་ཤིང་གི་རིགས་ཀྱི་རྗེས་སུ་བྱེད་པས་སོ། །དེ་ལྟ་ན་ཨ་རུ་ར་དང་ག་པུར་དང་ཙནྡན་ལ་སོགས་པའི་རིགས་ཐ་དད་པའི་རྗེས་སུ་བྱེད་པའི་དུ་བ་དེ་དང་ལུད་པ་འབྱིན་པ་ལ་སོགས་པ་འཇོམས་པའི་རྫས་ལས་བྱས་པའི་རེང་བུའི་དུ་བ་དེ་ནི་ཐ་དད་པས་དེའི་རོ་དང་ནུས་པ་དང་སྨིན་པའི་འབྲས་བུའི་རྗེས་སུ་བྱེད་པའི་ཕྱིར་རོ། །རིགས་མི་མཐུན་པའི་རྒྱུ་ལས་བྱུང་བ་ནི་མ་ཡིན་ནོ། །གང་གི་ཕྱིར་རྣམ་པ་ཐ་དད་པ་དང་ཐ་མི་དད་པའི་རྒྱུ་མཚན་གྱི་རིགས་མཐུན་པ་དང་རིགས་མི་མཐུན་པ་ནི་མ་ཡིན་པའི་ཕྱིར་རོ། །འབྲས་ཀྱི་མྱུ་གུ་ལ་སོགས་པ་དེ་ནི་ས་བོན་གྱི་རྣམ་པའི་རྗེས་སུ་མི་བྱེད་དོ། །དེའི་རིགས་དེ་ནི་འབྲས་བུ་མ་ཡིན་པ་ལ་སོགས་པ་ལས་ལྡོག་པ་ཉམས་སུ་མ་མྱོང་བ་ཡིན་ནོ། །དེའི་ཕྱིར་བུད་ཤིང་རྣམས་ནི་དེའི་ཉེ་བར་ལེན་པའི་རྒྱུ་ཡིན་ལ་མེ་ལ་སོགས་པ་ནི་ལྷན་ཅིག་བྱེད་པའི་རྐྱེན་ལས་བྱེ་བྲག་ཏུ་སྐྱེད་དོ། །རྣམ་པ་དེ་ལྟ་བུའི་དུ་བ་དང་མྱུ་གུ་ལ་སོགས་པའི་འབྲས་བུ་ཐ་དད་པར་བྱས་ནས་སྐྱེད་པས་ཞར་ལ་བྱུང་བས་ཆོག་གོ །འོ་ན་ནི་གང་གི་ཚེ་ཚོགས་པ་ཐ་དད་པས་ཀྱང་འབྲས་བུ་ཐ་མི་དད་པ་དེའི་ཚེ་རྒྱུ་ཐ་དད་པ་ཡོད་ཀྱང་དེ་མེད་པས་དེ་རྒྱུ་མེད་པ་ཅན་དུ་འགྱུར་ན་ཐ་མི་དད་པ་ག་ལས་འོངས་པ་ཡིན། དེས་ན་གཉི་ག་ཡང་རྒྱུ་མེད་པ་ཅན་དུ་བརྗོད་པ་ནི་འདི་ལྟར་ཞེས་བྱ་བ་ལ་སོགས་པ་སྨོས་ཏེ། གལ་ཏེ་ཚོགས་པ་ཐ་དད་པ་ཡོད་ཀྱང་འབྲས་བུ་ཐ་དད་པ་མི་སྐྱེ་ན་དེ་རྒྱུ་མེད་པ་ཉིད་དུ་འགྱུར་རོ། །དེའི་རྒྱུར་གྱུར་པ་མེད་ན་རེས་འགའ་ཞིག་ཀྱང་རྒྱུ་དང་ལྡན་པར་འཐད་པ་མ་ཡིན་ནོ། །དེའི་ཚེ་ཐམས་ཅད་ཀྱི་འབྲས་བུ་ཐ་དད་པ་གང་ཡིན་པ་དེ་ཡང་རྒྱུ་ཐ་དད་པ་ལས་ཡིན་པའི་ཕྱིར་ཐ་དད་པ་མེད་པར་སྐྱེས་པ་དེ་ཡང་རྒྱུ་དང་ལྡན་པ་ག་ལ་ཡིན། གལ་ཏེ་རྒྱུར་གྱུར་པ་མེད་པ་ནི་རྒྱུ་དང་ལྡན་པ་མ་ཡིན་ནོ། །དེ་ལྟར་རྒྱུ་མེད་ཀྱང་འབྱུང་བ་ནི་རྒྱུ་དང་ལྡན་པར་ག་ལ་འགྱུར། གལ་ཏེ་རྒྱུ་ཐ་དད་པ་ཉིད་ཀྱི་ཐ་མི་དད་པ་རྒྱུ་མཚན་ཡིན་པའི་ཕྱིར་མ་ཡིན་ནོ་ཞེ་ན། དེ་ལྟ་ན་ཐ་དད་པ་འདི་ལ་ལ་ཞིག་དང་མ་འབྲེལ་པར་མི་འགྱུར་རོ། །འབྲས་བུ་དང་རྩོམ་ལ་སོགས་པ་
ཡང་རྒྱུ་ཐ་དད་པའམ་ཐ་མི་དད་པ་ཉིད་ལས་རྒྱུ་མཚན་གཞན་པའི་ཁྱད་པར་བརྟག་པ་མེད་པའི་ཕྱིར་རོ། །སོ་སོར་སྣང་བ་ཐ་དད་པ་འགའ་ཞིག་གི་འཁྲུལ་བའི་རྒྱུ་མཚན་ལས་དོན་དམ་པར་ཉེ་བར་མཚོན་པའི་ཕྱིར་རོ། །གལ་ཏེ་དེ་དག་དེ་དང་འདྲ་བ་ལས་ཀྱང་འདྲ་བ་འབྱུང་བར་འདོད་པ་གང་ཡིན་པ་དེའི་ཐ་དད་པ་ཐ་མི་དད་པ་ནི་རྒྱུ་མེད་པ་ཅན་དུ་འདོད་ལ། དངོས་པོ་ཁོ་ན་འབའ་ཞིག་རྒྱུ་དང་ལྡན་པ་ཡིན་ནོ་ཞེས་འདོད་དོ་ཞེ་ན། དེ་ལ་མ་གཏོགས་པ་ཞེས་བྱ་བ་ལ་སོགས་པ་སྨོས་ཏེ། ཐ་དད་པ་དང་ཐ་དད་པ་མ་ཡིན་པ་ལས་ལོགས་ཤིག་པའི་དངོས་པོ་ངོ་བོ་ནི་འགའ་ཡང་ཡོད་པ་མ་ཡིན་པས་དེ་དག་རྒྱུ་མེད་པ་ཅན་ཉིད་ཀྱང་རྒྱུ་དང་ལྡན་པར་འགྱུར་རོ། །དེ་ནི་དེ་ཉིད་དམ་གཞན་ཉིད་དམ་འདི་ཐ་དད་པའམ་ཐ་མི་དད་པའི་རྣམ་པ་དང་འབྲེལ་པ་མེད་པར་ཐལ་བར་འགྱུར་བས་སོ། །དེ་ལ་འབྲེལ་པ་གཞན་ཞིག་བརྟགས་ན་ནི་ཐུག་པ་མེད་པར་ཐལ་བར་འགྱུར་རོ། །གཞན་མ་ཡིན་ན་ཡང་ཐ་དད་པ་དང་ཐ་མི་དད་པའི་དངོས་པོའི་ངོ་བོ་དག་རང་ཉིད་ཀྱི་གནས་སྐབས་ལ་ཕན་མི་འདོགས་ན་གང་ལས་འབྲེལ་པ་ཡིན། ཕན་འདོགས་པར་བརྟགས་ན་ཡང་གལ་ཏེ་དངོས་པོའི་རང་བཞིན་ལ་རང་གི་བདག་ཉིད་ཀྱིས་ཐ་དད་པ་དང་ཐ་མི་དད་པ་འགའ་ཡང་སྐྱེད་པར་མི་འདོད་པ་དེའི་ཚེ་དེ་ཡོད་ཀྱང་རང་བཞིན་ལས་གཞན་པ་མེད་པ་ལ་གང་ལས་ཐ་དད་པ་དང་ཐ་མི་དད་པའི་དངོས་པོའི་ངོ་བོར་འགྱུར་ན་ཡང་ཐ་དད་པའི་སྟོབས་ཀྱིས་དངོས་པོ་ལས་ཐ་དད་པ་དང་ཐ་མི་དད་པར་བསྟན་པའོ། །དེ་ཡང་གལ་ཏེ་ཐ་དད་པ་དེའི་ཚེ་དངོས་པོའི་ངོ་བོའི་གནས་སྐབས་ཁོ་ན་ཡིན་ཏེ་དེའི་ངོ་བོ་ལ་ཐ་དད་པ་དང༌། ཐ་མི་དད་པ་འགའ་ཡང་མེད་པའི་ཕྱིར་རོ། །སླར་ཡང་དེའི་དབང་གིས་ཐ་དད་པ་དང་ཐ་མི་དད་པར་བརྟགས་པའི་དངོས་པོ་དེའི་གནས་སྐབས་སམ་གནས་སྐབས་མ་ཡིན་པ་ཐ་དད་པ་དང་ཐ་མི་དད་པ་དག་གོ ། ཡང་ན་ཐ་དད་པ་དང་ཐ་མི་དད་པ་དེའི་ཚེ་དངོས་པོའི་ངོ་བོ་ཐ་དད་པ་དང་ཐ་མི་དད་པར་བྱས་སོ་ཞེས་བྱ་བར་འགྱུར་རོ། །དེའི་ངོ་བོ་ལས་གཞན་པའི་རྒྱུ་མི་སྲིད་པའི་ཕྱིར་རོ། །དེ་རྒྱུ་གཞན་ཉིད་ལས་ཕྱིས་བྱུང་བ་ནི། དེ་ལས་གཞན་པ་ཉིད་དུ་འགྱུར་རོ། །དངོས་པོའི་ངོ་བོ་ཉིད་ཀྱི་བྱེད་པ་
མ་ཡིན་ཏེ་དེའི་རང་གི་རྒྱུ་ཉིད་ལྡོག་པས་སོ། །རང་གི་རྒྱུ་ཁོ་ན་ལས་དངོས་པོ་ངོ་བོ་རེས་འགའ་ཞིག་ཐ་དད་པ་དང་ཐ་མི་དད་པའི་བདག་ཉིད་དུ་སྐྱེ་བར་བརྟག་ན། ཐ་དད་པ་དང་ཐ་མི་དད་པ་ལ་མ་གཏོགས་པ་ནི་དོན་མེད་དོ། ཐ་དད་པ་དང་ཐ་མི་དད་པའི་བློ་ཡང་དེ་ཉིད་ཀྱིས་གྲུབ་བོ། །དེའི་ཕྱིར་བྱེ་བྲག་པ་ལ་སོགས་པས་བརྟགས་པའི་ཐ་དད་པ་དང༌། ཐ་མི་དད་པའི་བྱེ་བྲག་གི་སྤྱིའི་བདག་ཉིད་ནི་མི་རིགས་སོ། །དངོས་པོའི་ངོ་བོ་ཉིད་ཁོ་ན་ཐ་དད་པ་དང་ཐ་མི་དད་པའི་སྒྲར་བརྗོད་དོ། །དེ་དག་རྒྱུ་མེད་པ་ཉིད་ཀྱིས་དངོས་པོའི་ངོ་བོ་ཉིད་རྒྱུ་མེད་པར་འགྱུར་རོ། །དེའི་ཕྱིར་དངོས་པོ་རྣམས་རྒྱུ་མེད་པ་ཅན་ཡིན་པའི་ཕྱིར་རྟག་ཏུ་ཡོད་པ་འམ་མེད་པ་ཞིག་ཏུ་འགྱུར་ཏེ་རྒྱུ་མེད་པ་ནི། གལ་ཏེ་དངོས་པོ་རྣམས་རེས་འགའ་ཞིག་ཡོད་པ་དུས་ཐམས་ཅད་དུ་ཡོད་པར་འགྱུར་རོ། །ཡང་ན་རེས་འགའ་ཞིག་མེད་པ་དེ་ཡང་དུས་ཐམས་ཅད་དུ་འགྱུར་གྱི་རེས་འགའ་ཞིག་ཡོད་པ་ནི་མི་རིགས་སོ། །ཅིའི་ཕྱིར་ཞེ་ན། རྒྱུར་གྱུར་པ་ལ་རེས་འགའ་ཞིག་ཀྱང་ལྟོས་པ་མེད་པའི་ཕྱིར་རོ། །གང་གི་ཕྱིར་ལྟོས་པ་ནི་རྒྱུ་ཡོད་ན་ཡོད་ལ་མེད་ན་མེད་པ་གང་ཡིན་པ་དེ་ནི་ལྟོས་པ་སྟེ་རེས་འགའ་བའོ། །རེས་འགའ་བའི་དངོས་པོ་ནི་རིགས་གཞན་ནི་མ་ཡིན་ནོ། །དེའི་ཕྱིར་མཚན་ཉིད་མི་མཐུན་པ་ལས་མཚན་ཉིད་མི་མཐུན་པ་མེད་པའི་འབྲས་བུ་སྐྱེད་པར་ཁས་བླངས་པ་ལ་ཇི་སྐད་བཤད་པའི་རིགས་པས་རྒྱུ་མེད་པར་ཐལ་བར་འགྱུར་རོ། །སླར་ཡང་མཚན་ཉིད་མི་མཐུན་པའི་ཕྱོགས་ལས་མཚན་ཉིད་མི་མཐུན་པ་མེད་པའི་འབྲས་བུ་སྐྱེད་པའི་སྐྱོན་གཞན་ཡང་བསྒྲུབ་པར་བྱ་བ་སྨོས་ཏེ། སོ་སོར་ངེས་པའི་བསྒྲུབ་པར་བྱ་བ་རྣམས་ནི་བུམ་པ་དང་སྣམ་བུ་ལ་སོགས་པ་རྣམས་སོ། །སྒྲུབ་པར་བྱེད་པ་ནི་འཇིམ་པ་ལ་སོགས་པ་རྣམས་འཇིག་རྟེན་པ་ཉེ་བར་སྦྱོར་བའོ། །བུམ་པ་ལ་སོགས་པ་དོན་དུ་གཉེར་བ་འཇིམ་པའི་གོང་བུ་ལ་སོགས་པ་དེ་ལ་ངེས་པར་སྦྱོར་རོ། །སྣལ་མ་ལས་སྣམ་བུ་དོན་དུ་གཉེར་གྱི་སྣལ་མ་ཡང་མ་ཡིན་འཇིམ་པའི་གོང་བུ་ཡང་མ་ཡིན་པས་དེར་མི་འགྱུར་རོ། །ཅིའི་ཕྱིར་ཞེ་ན། རྒྱུའི་ནུས་པ་ཞེས་བྱ་བ་སྨོས་ཏེ་ཚོགས་པ་གང་གིས་ནུས་པའི་བདག་ཉིད་དུ་ཕུལ་དུ་བྱུང་
བའི་མཚན་ཉིད་དེ་དང་དེ་ནི་སོ་སོར་ངེས་པ་འགའ་ཞིག་གི་ཚོགས་པ་ཁ་ཅིག་གིས་འབྲས་བུ་ལ་ཉེ་བར་སྦྱོར་གྱི་གཞན་གྱིས་ནི་དེ་ལྟ་བུའི་ངོ་བོ་མ་ཡིན་ནོ། །གང་གི་ཕྱིར་ས་ལ་སོགས་པ་ཅུང་ཟད་ཅིག་གིས་བུམ་བ་ལ་སོགས་པ་འབའ་ཞིག་སྒྲུབ་པར་བྱེད་པས་ཁྱད་པར་དུ་བྱེད་ཀྱི། གཞན་ནི་དེ་དང་མཚན་ཉིད་མཐུན་པ་སྣལ་མ་ལ་སོགས་པ་ལས་མ་ཡིན་ནོ། །ཅིའི་ཕྱིར་ཞེ་ན། འཇིམ་པ་ལ་སོགས་པ་དེ་ཉིད་བུམ་པ་ལ་སོགས་པ་དེ་ལ་ནུས་པར་རུང་བའི་ཕྱིར་དང་གཞན་ནི་དེ་ཁོ་ན་ལ་མི་ནུས་སོ། །གལ་ཏེ་ཅིའི་ཕྱིར་དེ་ཉིད་ཀྱིས་དེ་ལ་ནུས་ཀྱི་གཞན་གྱིས་མ་ཡིན་ཞེ་ན། དེ་གཉིས་ཞེས་བྱ་བ་སྨོས་ཏེ། ས་ལ་སོགས་པ་དང་སྣལ་མ་ལ་སོགས་པ་དེ་སྐྱེད་པའི་ངོ་བོ་ཉིད་བུམ་པ་ལ་སོགས་པ་སྐྱེད་པའི་ངོ་བོ་ཉིད་དང་ཅིག་ཤོས་ཀྱི་ངོ་བོ་ཉིད་ཀྱིས་བུམ་པ་ལ་སོགས་པ་སྐྱེད་པ་ཐ་དད་པའི་ཕྱིར་གཞན་ཉིད་ནི་མེད་པས་སོ། །འཇིམ་པ་ལ་སོགས་པ་དང་སྣལ་མ་ལ་སོགས་པའི་ངོ་བོ་དེ་ལས་གཞན་པ་དེས་བསྐྱེད་པའི་ཅིག་ཤོས་ཀྱི་ངོ་བོ་མ་ཡིན་ནོ། །གང་གི་ཚེ་ཚོགས་པ་ཕན་ཚུན་མཚན་ཉིད་མི་མཐུན་པའི་ནུས་པ་སོ་སོར་ངེས་པ་མི་འདོད་ན་མཚན་ཉིད་མི་མཐུན་པ་ལས་ཀྱང་མཚན་ཉིད་མི་མཐུན་པ་མེད་པའི་འབྲས་བུ་ཁས་བླངས་པས་དེའི་ངོ་བོ་མ་ཡིན་པ་མཚན་ཉིད་མི་འདྲ་བ་ལས་ཀྱང་འདུ་བ་ལ་སོགས་པ་སྐྱེད་པའི་ངོ་བོར་འགྱུར་རོ། །མེ་དང་བུད་ཤིང་ལ་སོགས་པའི་རྒྱུའི་ཚོགས་པའི་མཚན་ཉིད་གང་ཡིན་པ་དེ་དང་མཚན་ཉིད་མི་མཐུན་པའི་བརྒྱ་བྱིན་གྱིས་སྤྱི་བོ་ལ་སོགས་པའམ། སྐད་ཅིག་མ་ལ་བརྟེན་པའི་དུ་བ་ནི་མེད་དང་བུད་ཤིང་གི་ཚོགས་པ་ལས་ཀྱང་བྱུང་ཡང་དུ་བ་དེའི་སྐད་ཅིག་མ་སྐྱེད་པར་འདོད་ན་དེ་སྐྱེད་པར་ནུས་པ་ངེས་པ་མེད་པ་བརྗོད་པར་འདོད་དེ། དུ་བ་ལ་སོགས་པའི་འབྲས་བུ་སྐྱེད་པའི་ནུས་པ་སོ་སོར་ངེས་པ་མེད་པས་སོ། །པས་ཞེས་བྱ་བ་ནི་དེའི་ཕྱིར་ཏེ་ཅི་ཡང་རུང་བའི་འབྲས་བུར་འགྱུར་རོ། །རྒྱུ་གང་ཡང་རུང་བ་ལས་འབྱུང་བར་འགྱུར་ཏེ། ཇི་ལྟར་མཐོང་བ་དང་ཇི་ལྟར་མ་མཐོང་བའི་ཐམས་ཅད་ལས་ཐམས་ཅད་སྐྱེ་བར་འགྱུར་རོ་ཞེས་བྱ་བའི་དོན་ཏོ། །དེའི་ཕྱིར་ནུས་
པ་སོ་སོར་ངེས་པའི་རྒྱུ་རྣམས་ཁས་བླང་བར་བྱའོ། །དེའི་ཕྱིར་མཚན་ཉིད་མི་མཐུན་པའི་ཕྱོགས་ལས་འབྲས་བུ་འགའ་ཞིག་ལས་མཚུངས་ན་ནི་འདྲ་བའི་ཉེ་བར་མཚོན་པས་ཀྱང་མི་འདྲ་བ་ཡིན་པས་ཐམས་ཅད་དུ་དེ་དང་འདྲ་བ་རྣམ་པ་དེ་ལྟ་བུའི་སྐྱེ་བར་གྲུབ་བོ། །གལ་ཏེ་མཚན་ཉིད་མི་མཐུན་པའི་ཚོགས་པ་ལས་ཀྱང་དེའི་འབྲས་བུའི་མཚན་ཉིད་སྐྱེད་པར་ནུས་པ་མཚུངས་པའི་ཕྱིར་དེའི་འབྲས་བུའི་མཚན་ཉིད་འབྱུང་བར་འགྱུར་རོ། །འགའ་ཞིག་ལས་དེ་བཞིན་དུ་འབྱུང་བ་ནི་ཇི་སྐད་བཤད་པའི་སྐྱོན་གྱི་སྐབས་སུ་འགྱུར་རོ་ཞེ་ན། དེ་སྐྱེད་པར་ནུས་པ་མཚུངས་ཞེས་བྱ་བ་ལ་སོགས་པ་སྨོས་ཏེ། རེ་ཞིག་འདིར་ཕྱོགས་སྔ་མས་དུ་བ་དེ་མ་ཡིན་པ་ལས་སྐྱེ་བའི་ངོ་བོ་མ་ཡིན་ནོ་ཞེས་བྱ་བ་ལ་སོགས་པའི་སྐྱོན་ཁས་བླངས་པ་ནི་བཤད་ཟིན་ཏོ། །ཅི་འདྲ་བའི་མེའི་ལྷན་ཅིག་བྱེད་པའི་རྐྱེན་དེ་ལ་རག་ལས་བ་ནི་བུད་ཤིང་གི་འགྱུར་བ་ལ་སོགས་པའི་རང་བཞིན་ཐ་དད་པའི་རྒྱུའི་ནུས་པའི་བདག་ཉིད་དུ་ཕུལ་དུ་བྱུང་བ་དེ་འདྲ་བའམ་བརྒྱ་བྱིན་གྱི་སྤྱི་བོ་ལ་སོགས་པའོ། །གང་གི་ཚེ་དེའི་ཚོགས་པ་ལས་སྐྱེ་བའི་དུ་བ་མཚན་ཉིད་མི་མཐུན་པ་ལས་ནུས་པའི་བདག་ཉིད་ཕུལ་དུ་བྱུང་བའི་མཚན་ཉིད་ཀྱི་འབྲས་བུ་སྐྱེད་པ་ཡིན་པ་དེའི་ཚེ་དེ་ནུས་པ་མཚུངས་པ་ནི་དེ་ཉིད་ཡིན་པས་མེ་དང་བུད་ཤིང་ལ་སོགས་པ་ཉིད་ལས་གཞན་དུ་བརྗོད་པ་མ་ཡིན་ཏེ། དེ་དང་མཚན་ཉིད་མི་མཐུན་པ་དང༌། དེ་དང་མཚན་ཉིད་མི་མཐུན་པ་མེད་པའི་བདག་ཉིད་ཕུལ་དུ་བྱུང་བ་མི་སྲིད་པའི་ཕྱིར་རོ། །དེ་ཉིད་མེ་དང་བུད་ཤིང་ལ་སོགས་པའི་འགྱུར་བ་ལས་དང་པོ་དུ་བ་སྐྱེད་པ་མ་ཡིན་ཏེ་དེ་ཡང་བུད་ཤིང་གང་མེ་ལ་རག་ལས་པའི་འགྱུར་བས་དུ་བ་རང་གི་རིགས་ཀྱི་རྗེས་སུ་བྱེད་པ་ཡིན་ཏེ། གལ་ཏེ་བརྒྱ་བྱིན་གྱི་སྤྱི་བོ་ལ་སོགས་པ་ཡང་དེ་ལྟ་བུའི་ངོ་བོར་ཁས་བླངས་པ་དེའི་ཚེ་འབའ་ཞིག་ལ་རྩོད་པ་མེད་པར་འགྱུར་བའི་དོན་དུ་ཁས་བླང་བར་བྱ་བ་དེ་བཞིན་དུ་བརྗོད་པའི་ཕྱིར་རོ། །གང་གི་ཕྱིར་དེ་ལྟ་བས་ན་ཞེས་བྱ་བ་ནི་དེའི་ཕྱིར་ཏེ་དུ་བ་ལ་སོགས་པ་འབྲས་བུར་ལན་ཅིག་མཐོང་བ་མངོན་སུམ་དང་མི་དམིགས་པ་དག་གིས་ངེས་པ་སྟེ། དེ་མ་ཡིན་པའི་ངོ་བོ་ལས་ལྡོག་པའི་
བདག་ཉིད་ཀྱི་རྒྱུ་བུད་ཤིང་ལ་སོགས་པའི་རྒྱུན་ལ་ལྟོས་པའམ་སྐད་ཅིག་མ་ལ་ལྟོས་པ་ལ་འཁྲུལ་པ་མེད་དེ། དེ་དང་མཚན་ཉིད་མི་མཐུན་པའི་ཕྱིར་རོ། །འབྲས་བུའི་གཏན་ཚིགས་ཀྱི་རྗེས་སུ་འགྲོ་བ་དང༌། ལྡོག་པ་ངེས་པར་གྲུབ་པའི་ཕྱིར་གཞན་དུ་འགྱུར་བ་མ་ཡིན་ནོ། །གཏན་ཚིགས་ཐིགས་པའི་འགྲེལ་པ་བྲམ་ཟེ་ཨ་ཙ་ཏས་རྣམ་པར་སྦྱར་བ་འབྲས་བུའི་གཏན་ཚིགས་ཀྱི་དབང་དུ་བྱས་བ་ལེའུ་གཉིས་པའོ།། །།དེ་ལྟར་འབྲས་བུའི་གཏན་ཚིགས་དེ་ནི་གང་དང་གང་ལས་ལྷན་ཅིག་སྐྱེ་བར་མངོན་སུམ་དང་མི་དམིགས་པས་མཐོང་བ་དེ་དང་དྲ་བར་ཐམས་ཅད་དུ་ཡིན་གྱི། རྣམ་པ་དེ་ལྟ་བུའི་སྐྱེ་བ་རིགས་མི་མཐུན་པ་ལས་ཀྱང་འབྲས་བུ་གསལ་བར་མི་བྱེད་དོ། །དངོས་པོ་འགའ་ཞིག་ལ་ཁྱབ་པ་མཐོང་བས་རྗེས་སུ་འགྲོ་བ་དང་ལྡོག་པ་གྲུབ་པ་ཡིན་ནོ་ཞེས་བསྟན་ཏོ། །མི་དམིགས་པ་ཡང་ཇི་སྐད་བཤད་པའི་རྒྱུ་མཚན་གཞན་མེད་པར་བསྟན་པ་དང་འབྲེལ་པས་རྗེས་སུ་འགྲོ་བ་དང་ལྡོག་པ་ལ་ལོག་པར་རྟོག་པ་མེད་དོ། །འདིར་རང་གི་ངོ་བོ་ཉིད་ལས་གཞན་དག་ལོག་པར་རྟོག་པ་དེ་ལྟ་ན་ཡང་དམིགས་པའི་རིག་བྱར་གྱུར་པའི་དངོས་པོ་ཅམ་མི་དམིགས་པས་ནི་མེད་པར་འགག་པའི་བདག་ཉིད་ཚད་མ་གཞན་གྱིས་རྟོགས་པར་བྱ་བར་དབང་འཕྱུག་སྡེ་ལ་སོགས་པ་ཁ་ཅིག་འདོད་དོ། །གཞན་ཡང་དགག་བར་བྱ་བའི་ཡུལ་གྱི་ཤེས་པའི་ངོ་བོ་ཡོངས་སུ་གྱུར་པའི་བདག་ཉིད་དམ། དེ་ལས་གཞན་པའི་དངོས་པོ་ཡུལ་ཅན་གྱི་རྣམ་པར་ཤེས་པ་ཉིད་ལས་མེད་པར་རྟོགས་པ་ནི་མངོན་སུམ་དང་རྗེས་སུ་དཔག་པ་དག་གི་ཚད་མ་ལས་གཞན་དུ་དཔྱད་བ་བརྗོད་དོ། །དངོས་པོ་གཞན་པའི་ཡུལ་ཅན་གྱི་རྣམ་པར་ཤེས་པ་ནི་མངོན་སུམ་དང་རྗེས་སུ་དཔག་པས་མེད་པར་རྟོགས་པ་མ་ཡིན་ཏེ། དེ་ནི་དངོས་པོའི་ཡུལ་ཅན་ཡིན་པའི་ཕྱིར་རོ། །དངོས་པོ་མེད་པ་དང་ལྡན་པ་དང་མེད་དོ་ཞེས་ཤེས་པ་སྐྱེད་པ་གང་ཡིན་པ་དེ་ནི་དངོས་པོ་མེད་པའི་ཚད་མར་བརྗོད་པ་འཐོབ་སྟེ། དཔེར་ན་དབང་པོ་རང་གི་ཡུལ་རྟོགས་པ་སྐྱེད་པར་བྱེད་པ་ཉིད་ཀྱིས་མངོན་སུམ་དུ་བརྗོད་པ་དེ་བཞིན་དུ་གཞན་གྱི་དངོས་པོའི་མཚན་ཉིད་དམ་ཤེས་པའི་
མཚན་ཉིད་མི་དམིགས་པས་མེད་པ་ཁོ་ན་སྒྲུབ་པར་བྱེད་པར་སྨྲའི། མེད་པའི་ཐ་སྙད་ནི་མ་ཡིན་ནོ། །མི་དམིགས་པའི་རྟགས་ཀྱིས་དངོས་པོ་མེད་པ་གྲུབ་པས་རང་ཉིད་ཁོ་ན་ཐ་སྙད་ལ་འཇུག་པ་ཡིན་ནོ། །རིག་པ་ཅན་ཡང་མེད་པ་འབའ་ཞིག་ཤེས་བ་ཁོ་ན་ཡིན་གྱི་ཡུལ་ལ་སོགས་པ་འཛིན་པའི་ཤེས་པ་དེ་མ་ཐག་ཏུ་བྱུང་བའི་མངོན་སུམ་ནི་གཞན་མེད་པ་ལ་ཚད་མ་ཡིན་ཏེ། ཅི་ཡང་མ་ཡིན་པར་ཡོངས་སུ་བཅད་པའི་བདག་ཉིད་དུ་བརྗོད་དེ་དེ་ཉིད་བུམ་པ་ལ་སོགས་པ་དགག་པའི་མི་དམིགས་པའི་སྒྲས་བརྗོད་པ་ལ་འགལ་བ་མེད་དོ་ཞེ་ན། དེ་ཉིད་མི་དམིགས་པ་ལས་ཐ་དད་པར་གྱུར་པའི་བློ་ཡིས་རྒོལ་བ་ན། དེ་ཚར་གཅད་པའི་ཕྱིར་མི་དམིགས་པའི་རང་བཞིན་གྱི་ངོ་བོ་བསྟན་པ་ནི་དམིགས་པའི་རིག་བྱར་གྱུར་པའི་མི་དམིགས་པའི་ཞེས་བྱ་བ་ལ་སོགས་པ་སྨོས་ཏེ། དམིགས་པའི་རིག་བྱར་གྱུར་བ་ནི་དམིགས་པའི་རྐྱེན་གཞན་ཏེ། རྒྱུ་དང་དེ་མ་ཐག་པ་དང་བདག་པོའི་རྐྱེན་གྱི་མིང་ཅན་མ་ལུས་པ་དང་དམིགས་པའི་རྐྱེན་རང་བཞིན་ཁྱད་པར་ཅན་ཡིན་ནོ། །རང་བཞིན་གང་ཡིན་པ་དེ་ཡོད་ལ་དམིགས་པའི་རྐྱེན་གཞན་ཡང་ཡོད་ན་མངོན་སུམ་ཁོ་ནར་འགྱུར་རོ། །དེ་ལྟ་བུའི་ངོ་བོ་ལ་བསྟན་བཅོས་བྱེད་པ་གཞན་རིག་པ་ཅན་ལ་སོགས་པས་བཤད་པའི་ལོག་པར་རྟོག་པ་བསལ་བའི་ཕྱིར་དེ་དམིགས་པའི་རིག་བྱར་གྱུར་པ་སྨོས་སོ། །ཆེན་པོ་ཉིད་དང་དུ་མའི་རྫས་དང་ལྡན་པ་དང་གཟུགས་ཅན་གྱི་རྫས་རྣམས་སུ་སྨྲ་བ་དང༌། ཆེན་པོ་དུ་མའི་རྫས་དང་ལྡན་པ་ཉིད་ཀྱི་ངོ་བོ་མེད་པ་ནི་དམིགས་སུ་རུང་བར་བརྗོད་པ་དེ་ལྟར་ན་དམིགས་པའི་རིག་བྱར་གྱུར་པ་ལས་མི་དམིགས་པ་ཡོད་ཀྱང་དངོས་པོ་སྲིད་པས་ན་མེད་པའི་ཐ་སྙད་སྒྲུབ་པ་ལས་མ་ངེས་པར་བརྗོད་དོ། །དམིགས་ཀྱང་གཞན་གྱི་ཆེན་པོ་ཉིད་དང་དུ་མའི་རྫས་ཉིད་དང་གཟུགས་ནི་དམིགས་པར་རུང་བ་མ་ཡིན་པ་དང་ཡོད་པ་མ་ཡིན་པས་དེ་ཙམ་གྱི་མི་དམིགས་པས་ཀྱང་མེད་པའི་ཐ་སྙད་དུ་དེ་ལ་བྱེད་པར་མི་ནུས་སོ། །བཤད་པ་བྱེད་པས་གང་སྨྲས་པ་རྗེས་སུ་དཔག་པས་དམིགས་པར་བྱ་བ་དང་མངོན་སུམ་དང་མི་དམིགས་པའི་གཏན་ཚིགས་ཀྱི་དངོས་པོ་མེད་པ་མ་ཡིན་ཏེ། དབང་བོ་ཉིད་དང་
པགས་པ་ལ་སོགས་པ་བཞིན་དུ་མིག་དང་རྗེས་སུ་དཔག་པས་ཐོབ་པར་བྱེད་པ་ནི། མིག་གི་འོད་ཟེར་དུ་ཉེ་བར་དམིགས་པ་དེ་ནི་མངོན་སུམ་དང་མི་དམིགས་པ་ཡིན་ན་ཇི་ལྟར་མེད་པའི་ཐ་སྙད་སྒྲུབ་པར་བྱེད་པ་ཡིན། དེ་དམིགས་པའི་རིག་བྱར་གྱུར་པའི་མི་དམིགས་པ་མེད་པའི་ཐ་སྙད་དུ་བྱེད་པ་ལ་མ་ངེས་པར་རིགས་པ་ཅན་བརྗོད་དེ་དགག་པའི་ཕྱིར་དམིགས་པའི་རིག་བྱར་གྱུར་པའི་ཕྱིན་ཅི་མ་ལོག་པ་བསྟན་བཅོས་མཛད་པས་བསྟན་པས་གནོད་པའི་ཕྱིར་རོ། །དེ་ལྟ་ན་དམིགས་པའི་རྐྱེན་གཞན་མཐའ་དག་དང༌། རང་བཞིན་ཁྱད་པར་ཅན་ཇི་སྐད་བཤད་པ་ནི་དམིགས་པའི་རིག་བྱར་གྱུར་པར་བརྗོད་དོ། །དུ་མའི་རྫས་དང་ལྡན་པ་ཉིད་ལ་སོགས་པ་མེད་པ་དེ་སྲིད་དུ་འཁྲུལ་པའི་གོ་སྐབས་ག་ལ་འགྱུར། དངོས་པོ་ཡོད་པ་ལ་དེ་མི་སྲིད་པའི་ཕྱིར་རོ། །ཆེན་པོ་ཉིད་ལ་སོགས་པ་ནི་མི་སྲིད་པར་དམིགས་པའི་རིག་བྱར་གྱུར་པའི་སྒྲར་བརྗོད་པར་མི་བྱའོ། །གཟུགས་ལ་སོགས་པ་ལས་ཐ་དད་པའི་རྫས་དེའི་སྣང་བས་དབེན་པའི་རྣམ་པ་གཞན་རང་གི་ཤེས་པ་ལ་སྣང་བ་མེད་དོ། །སྣང་བ་མེད་པ་མ་ཡིན་པ་ནི་བདག་ཉིད་ཀྱི་ངོ་བོ་མ་ཡིན་པས་ཐ་དད་པའི་ངོ་བོར་མངོན་སུམ་གྱིས་ཉམས་སུ་མྱོང་བར་ཐལ་བར་འགྱུར་བའི་ཕྱིར་དེའི་ཡོད་པ་དང་ཆེན་པོ་ཉིད་ལ་སོགས་པ་འདི་སྲིད་པ་ག་ལ་ཡིན། རང་གི་ངོ་བོས་ཆེན་པོ་དང་དེ་དང་འབྲེལ་པས་ཀྱང་འདིའི་ཆེན་པོའམ་གཞན་གྱི་ངོ་བོར་འཛིན་པ་མེད་ན་ཇི་ལྟར་འཁྲུལ་པའི་ཤེས་པ་དེ་མ་འཁྲུལ་པ་ཡིན་དེའི་ཕྱིར་ཆེན་པོ་དང་རྫས་དང་དམིགས་པར་བྱེད་པ་པོ་ངོ་བོ་དེ་ཡང་རང་གི་ངོ་བོ་འཛིན་པ་མེད་དེ། རྫས་བདག་ཉིད་ཤིན་ཏུ་ལྐོག་ཏུ་གྱུར་པའི་ཕྱིར་རོ། །རྫས་ཀྱི་ངོ་བོ་ཐ་དད་པ་ཡང་ཉེ་བར་མི་རྟོགས་པས་དེ་བཞིན་དུ་འཛིན་པར་བྱེད་པ་པོའམ་ཆེན་པོའི་ངོ་བོ་མེད་དེ། གང་གི་ཕྱིར་རྫས་ཀྱི་ཡོན་ཏན་འདུ་བའི་རྒྱུ་ཡིན་པར་འདོད་པས་རྫས་སྐྱེ་བའི་དུས་ཁས་བླངས་པའི་ཕྱིར་རོ། །དེ་ཡང་དམིགས་པའི་བདག་ཉིད་ཁོ་ནར་དེ་བཞིན་དུ་ཉམས་སུ་མྱོང་བས་ན་སྐད་ཅིག་མ་དང་བོའི་རྫས་དང་ཡོན་ཏན་ཁོ་ན་སྐད་ཅིག་མ་གཉིས་པ་ན་སྔ་མའི་ངོ་བོར་འདོར་བ་ལས་ངོ་བོ་གཞན་དུ་གྱུར་པ་ནི་མེད་དོ། །གང་ལས་སྔར་ཆེན་པོ་ཉིད་ལ་སོགས་པའི་རྟེན་གྱི་དངོས་པོར་
རྟོགས་ནས་ཕྱིས་ཡོན་ཏན་གྱི་རྟེན་དུ་འགྲོ་བར་འགྱུར་བའི་ཕྱིར་རོ། །སྐྱེད་པར་བྱེད་མི་བྱེད་ན་རྟེན་མ་ཡིན་ཏེ་སྐྱེད་པར་བྱེད་པ་ནི་སྐད་ཅིག་མ་ཉིད་ཀྱིས་དོན་བྱེད་པ་མི་འགལ་བས་སྐད་ཅིག་མ་མ་ཡིན་པ་དེ་ལས་འདུ་བའི་རྒྱུ་སྲིད་པར་ག་ལ་འགྱུར། གང་གི་ཕྱིར་རང་གིས་སྐྱེད་པའི་འབྲས་བུ་སྐྱེ་བར་དེ་བཞིན་དུ་བསྟན་པ་དེ་ཡང་སྐད་ཅིག་མ་མ་ཡིན་པ་ལ་སྔར་རྟེན་མ་ཡིན་པ་ལ་ཕྱི་ནས་བརྟེན་པའི་དངོས་པོ་མ་ཡིན་ནོ། །འདུ་བའི་རྒྱུ་མི་སྲིད་པ་ཉིད་དང་དུ་མའི་རྫས་དང་ལྡན་པ་ཉིད་ཀྱང་མི་སྲིད་དོ། །གང་གི་ཕྱིར་དུ་མའི་རྫས་ཀྱིས་བསྐྱེད་པ་འདུ་བའི་རྒྱུའི་བདག་ཉིད་དུ་ཡོད་པ་གང་ཡིན་པ་དེ་ནི་དེ་ལྟར་བསྟན་པའི་རྫས་མེད་པ་དང་དུ་མའི་རྫས་དང་ལྡན་པ་ནི་མ་ཡིན་ལ། ཆེན་པོ་ཉིད་ལ་སོགས་པ་ཡོད་པ་ཡང་འདིར་དམིགས་པའི་རིག་བྱར་གྱུར་པ་ནི་མ་ཡིན་པར་ཁོ་བོ་ཅག་མངོན་པར་འདོད་ལ་ཁྱེད་ཀྱང་འདོད་དོ། །དེ་དག་དམིགས་པའི་རིག་བྱར་གྱུར་པ་ལས་མི་དམིགས་པས་མེད་པའི་ཐ་སྙད་དུ་གྲུབ་པ་མ་ངེས་པ་མ་ཡིན་ནོ་ཞེས་བསྟན་བཅོས་བྱེད་པས་བསྟན་པར་འགྱུར་བ་དང་དམིགས་པའི་རིག་བྱར་གྱུར་བ་ལས་མི་དམིགས་པའི་རྒྱུ་དང་ཁྱབ་པར་བྱེད་པ་བཀག་པས་གཞན་གང་ཡིན་པ་དེ་འབྲས་བུ་དང་ཁྱབ་པར་བྱ་བ་མེད་པའི་གཏན་ཚིགས་ཏེ་མེད་པའི་ཐ་སྙད་ཀྱི་གཏན་ཚིགས་སོ།། གང་ཡང་དགག་པ་ནི་དམིགས་པའི་རིག་བྱར་གྱུར་པ་ལས་མི་དམིགས་པས་མེད་པའི་ཐ་སྙད་ཀྱི་གཏན་ཚིགས་ཡིན་ནོ་ཞེས་འམ་གྱི་སྒྲས་བསྟན་ཏོ། །མི་དམིགས་པའི་མཚན་ཉིད་ཀྱིར་ར་བ་མི་དམིགས་པ་ནི་མངོན་སུམ་དང་རྗེས་སུ་དཔག་པ་ལྡོག་པའི་མཚན་ཉིད་དེ་ནི་ཐེ་ཚོམ་གྱི་རྒྱུ་ཡིན་ཏེ། ཚད་མ་ལོག་ཀྱང་དོན་མེད་པར་མི་འགྲུབ་སྟེ་རྒྱུ་མཚན་མེད་པའི་ཕྱིར་ཡོད་པའི་ཐ་སྙད་འགོག་པའི་རྒྱུ་ཡིན་ནོ་ཞེས་ཁོང་དུ་ཆུད་པར་བྱའོ། །དེ་ལ་རེ་ཞིག་གང་དམིགས་པ་མེད་པ་ཙམ་མི་དམིགས་པར་འདོད་ན་ནི་རྣམ་པར་ཤེས་པའམ་གཞན་པའི་དངོས་པོ་ཡིན་ནོ་ཞེས་བརྗོད་པས་དེའི་གཞན་པའི་དངོས་པོའམ་རྣམ་པར་ཤེས་པ་ཁོ་ན་དགག་པའི་དོན་དུ་ཤེས་པ་དང་ཤེས་བྱའི་མཚན་ཉིད་ཀྱི་ཆོས་མི་དམིགས་པར་སྟོན་པར་བྱེད་པས་དམིགས་པ་ཉིད་རྣམ་པ་གཉིས་སུ་བསྟན་པ་ནི་དེ་ལ་དམིགས་པ་ཞེས་བྱ་བ་སྨོས་ཏེ། དམིགས་པའི་ངག་གིས་དམིགས་པར་ཐོས་ཏེ་
བྱ་བའི་ངོ་བོ་ཉིད་དེ་ནི་གང་གི་ཚེ་བྱེད་པ་པོ་ལ་ལྟོས་པ་དེའི་ཚེ་དེའི་དམིགས་པ་ནི་བྱེད་པ་པོའི་ཆོས་ཉིད་ལ་ལྟོས་ལ། དེའི་ཤེས་པ་ནི་རྟེན་བའམ་དམིགས་པ་སྟེ་ཤེས་བ་གང་ཡིན་པ་དེ་དམིགས་པར་བརྗོད་པ་དང༌། དམིགས་བ་ནི་བློ་དང་དབང་པོ་དང་ལུས་ཀྱི་ཚོགས་པ་ཁོ་ན་སྐད་ཅིག་མ་སྔ་མ་བཟུང་ནས་ཉེ་བར་དམིགས་བ་སྐྱེད་བར་བྱེད་པར་བརྗོད་དོ། །དེ་བཞིན་དུ་དམིགས་པ་སྐྱེད་པར་བྱེད་པའམ་རྟེན་པའམ། བྱེད་པ་པོར་གཞན་དག་བརྗོད་པ་དང༌། དབང་པོ་ལ་སོགས་བ་ལས་གཞན་གྱིས་སྐྱེད་བར་བྱེད་པ་ཉིད་དུ་མི་སྲིད་དེ་གང་གི་ཕྱིར་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་རྒྱུ་དང་འབྲས་བུའི་ཐ་སྙད་བྱེད་པ་དེ་ཡང་རྗེས་སུ་འགྲོ་བ་དང་ལྡོག་པ་དག་དབང་པོ་ལ་སོགས་པ་ལས་གཞན་ལ་མི་སྲིད་པའི་ཕྱིར་དང་དབང་པོ་ལ་སོགས་པ་ཡོད་པ་རྣམས་ལས་ངེས་པར་དམིགས་པའི་ཕྱིར་རོ། །གང་གི་ཚེ་དབང་པོ་ལ་སོགས་པ་རྣམས་ཡོད་ཀྱང་རེས་འགའ་ཞིག་དམིགས་པ་མི་སྐྱེ་བ་དེའི་ཚེ་རྒྱུ་གཞན་ཡོད་པ་རྣམས་ཀྱི་ནུས་བ་ལས་འབྲས་བུ་མི་སྐྱེད་དེ་རྒྱུ་གཞན་མ་ཚང་བ་བསྟན་པའི་ཕྱིར་རོ། །དེ་ལས་ཐ་དད་པའི་རྒྱུ་གཞན་ཡོངས་སུ་བསྟན་ན་ནི་བདག་ཀྱང་ཡོད་པ་མ་ཡིན་ལ། དེ་ཇི་ལྟར་བདག་ཉིད་ལས་སྐྱེ་བ་ཡིན། རྒྱུ་མཚན་མེད་པར་ཁས་བླངས་ན་ནི་ཧ་ཅང་ཐལ་བར་འགྱུར་བའི་ཕྱིར་རོ། །དེ་སྐད་དུ། གང་ཞིག་ཡོད་ན་གང་འབྱུང་བ། །དེ་ལས་གཞན་ནི་བརྟགས་ན་ནི། །དེ་རྒྱུ་ཉིད་ཀྱིས་ཐམས་ཅད་དུ། །རྒྱུ་རྣམས་ཐུག་པ་མེད་པར་འགྱུར། །ཞེས་བཤད་དོ། །རྟེན་པ་ཉིད་ཀྱང་སྐྱེད་པར་བྱེད་པ་ཁོ་ན་ཡིན་ཏེ་དེ་ཡང་དེའི་བདག་ཉིད་དུ་སྲིད་པ་མ་ཡིན་ནོ། །གལ་ཏེ་འཇིག་པར་བྱེད་པའི་ཕྱིར་རྟེན་ཡིན་ནོ་ཞེ་ན། སྐད་ཅིག་མ་མ་ཡིན་པ་ཡང་འཇིག་པ་མེད་པས་གནས་པ་མེད་དོ། །འདི་ལྟར་མི་འཇིག་པར་དམིགས་པ་ཁོ་ན་གནས་པ་ཞེས་བརྗོད་ཀྱི་ལྕི་བ་མེད་པའི་ཕྱིར་ལྟུང་བ་མེད་དོ། །གལ་ཏེ་ལྡན་པ་མེད་པ་ནི་ལྕི་བའི་ཕྱིར་ལྟུང་བ་ཡིན་ནོ་ཞེས་གཞན་དག་བརྗོད་དེ་ལྡན་པ་ལ་བརྟེན་པ་ཡིན་ནོ་ཞེ་ན། འོ་ན་དེ་ཡང་རྟེན་དང་བརྟེན་པའི་འབྱུང་བ་རྣམས་ཡོད་པར་འདོད་པས་མི་ལྟུང་བའི་ཆོས་ཀྱི་རྟེན་དུ་དམིགས་པ་ནི་ཅི་ཡང་མེད་དོ། །འདུ་བ་རྟེན་བ་ཡིན་ན་ནི་གཞན་ལ་ཡང་ཐལ་བར་འགྱུར་ཏེ།
དེའི་བདག་ཉིད་ཐམས་ཅད་ལ་མཚུངས་པའི་ཕྱིར་དང་འདི་གཅིག་པ་ཉིད་དུ་ཁས་བླངས་པའི་ཕྱིར་དང༌། རིམ་དང་ཅིག་ཅར་གྱི་དོན་གྱི་བྱེད་པ་འགལ་བ་འདི་ནི་ཡོད་པ་མ་ཡིན་ནོ། །དེའི་ཕྱིར་སྐྱེད་པར་བྱེད་པ་ཉིད་དང་རྟེན་པར་བྱེད་པ་ག་ལ་ཡིན། འདི་དག་བཏགས་བ་ལ་འཐག་པར་བྱེད་པ་ཡིན་ནོ། །དེ་ལྟར་དམིགས་པ་བསྟན་ནས་མི་དམིགས་པ་བསྟན་པ་ནི་མ་ཡིན་པར་ཞེས་བྱ་བ་སྨོས་ཏེ། བཟར་མི་རུང་བ་ནི་བཟར་མི་རུང་བར་རྗོད་པར་འདོད་པ་དེ་ནི་བཟའ་བ་ལས་གཞན་ཡིན་བའི་ཕྱིར་གྲོང་གི་ཁྱིམ་བྱ་བཟར་མི་རུང་བ་ལས་གཞན་པ་ནི་བཟར་རུང་བར་ཡང་བརྗོད་དོ། །རེག་ཏུ་མི་རུང་བ་བཞིན་ཞེས་བྱ་བ་ནི་རེག་ཏུ་རུང་བ་དང་འགལ་བར་བརྗོད་པར་འདོད་པའི་རེག་ཏུ་རུང་བ་ལས་གཞན་ཡིན་པའི་ཕྱིར་རེག་ཏུ་མི་རུང་བ་དོན་ལ་སོགས་པ་དེ་ལས་གཞན་པ་ནི་རེག་པར་བྱ་བ་ཡིན་ནོ། །དེ་ནི་དམིགས་པའི་རིག་བྱར་གྱུར་པའི་མི་དམིགས་པ་འདོད་པར་བྱའོ། །གལ་ཏེ་མ་ཡིན་པ་ནི་དགག་པའི་ཡུལ་ལ་ཡིན་པའི་ཕྱིར་ཇི་ལྟར་དངོས་པོའི་མ་ཡིན་ཞེ་ན། མ་ཡིན་པར་འཇུག་པས་ཞེས་བྱ་བ་སྨོས་ཏེ། མ་ཡིན་པ་དགག་པའི་དོན་སྤངས་ནས་ཁྱད་པར་གྱི་དོན་ལ་འཇུག་པ་དེ་ལ་དགག་པ་གཟུང་བར་མི་བྱ་སྟེ། དགག་བ་ནི་དངོས་པོའི་ཡུལ་ཅན་ཡིན་ཏེ། གང་ལ་སྒྲུབ་པ་གཙོ་བོས་དགག་པའི་དོན་བཟུང་ནས། རང་གི་ཚིག་གི་སྒྲུབ་པར་སྟོན་པའི་ངག་གཅིག་པ་དེ་ལ་མ་ཡིན་པར་དགག་པ་འཇུག་པ་དང་སྒྲུབ་པ་གཙོ་བོར་བརྗོད་པས་དམིགས་པ་ནི་གཞན་དམིགས་པ་ཡིན་པ་དེ་ལྟར་ངག་གིས་གཞན་དམིགས་པར་བརྗོད་དོ། །གཞན་དམིགས་པར་བརྗོད་པ་ན་ཤུགས་ཀྱིས་མི་དམིགས་པ་ཁོ་ན་བརྗོད་པར་འདོད་དོ། །དགག་པར་རྟོག་པ་བརྗོད་པར་འདོད་པ་ནི་དམིགས་པ་ལྡོག་པ་མེད་ན་དེ་ལ་ལྟོས་ནས་གཞན་དུ་བརྗོད་པར་མི་རིགས་པའི་ཕྱིར་རོ། །རང་གི་ཚིག་གིས་དགག་པ་དང་སྒྲུབ་པ་ལ་བརྟེན་པར་མ་བརྗོད་པ་དེ་ལྟ་ན་འོན་ཏེ་སྒྲ་ཡིས་མ་ཡིན་པ་ལ་བརྟེན་པ་སྒྲ་གཞན་ཉིད་ཀྱི་ངག་གིས་རབ་ཏུ་སྦྱོར་བའི་ཕྱིར་རོ། །གཞན་དམིགས་པའི་མི་དམིགས་པ་ཡིན་པའི་ཕྱིར་རོ། །དགག་པ་ནི་སུབ་ཀྱི་མཐའ་ཡིན་ལ། ཏིའི་མཐའ་ནི་མ་ཡིན་ཏེ། ངག་གཅིག་པ་ཉིད་དམིགས་པ་མེད་པ་མི་
དམིགས་པ་ཡིན་ནོ། །མེད་པར་དགག་པ་ནི་འདི་དག་ལས་ཀྱང་བཟློག་པར་རིག་བར་བྱའོ། །དེ་ལ་དགག་པ་ནི་གཙོ་བོ་ཡིན་ལ་སྒྲུབ་པ་ནི་ཤུགས་ཀྱིས་གོ་བར་བྱ་བ་དག་ཐ་དད་པ་ཡིན་ལ། རང་གི་ཚིག་གིས་དགག་བ་ལ་བརྟེན་པ་མི་སླུ་བའོ། །དེ་ལྟར་དེའི་ཤེས་པའི་ཆོས་ཀྱི་མཚན་ཉིད་ཀྱི་མི་དམིགས་པ་བཤད་ནས་ཤེས་པར་བྱ་བའི་ཆོས་ཀྱི་མཚན་ཉིད་བསྟན་པར་བྱ་བའི་ཕྱིར་དམིགས་པར་བྱ་བའི་ཆོས་ཉིད་ཡིན་ན་ནི་ཞེས་བྱ་བ་ལ་སོགས་པ་སྨོས་ཏེ། གང་གི་ཚེ་ལས་ལ་གནས་པའི་བྱ་བ་ལ་ལྟོས་པ་ན་དམིགས་པར་བྱ་བའི་དངོས་པོའི་ཆོས་དམིགས་པར་བརྗོད་པར་འདོད་པ་དེའི་ཚེ་ཡུལ་གྱི་རང་བཞིན་གྱི་དམིགས་པར་རིག་པར་བྱའོ། །གལ་ཏེ་ཡུལ་གྱི་ངོ་བོ་ཅི་འདྲ་བ་ཞིག་ཡིན་ཞེ་ན། རང་གི་ཡུལ་ཞེས་བྱ་བ་ལ་སོགས་པ་སྨོས་ཏེ། བུམ་པ་ལ་སོགས་པ་དགག་པར་བྱ་བའི་བདག་ཉིད་ཀྱི་ཡུལ་ཅན་གྱི་རྣམ་པར་ཤེས་པ་གང་ཡིན་པ་དེ་ནི་སྐྱེད་པར་རུང་བའི་མཚན་ཉིད་དོ། །ཡུལ་གྱི་ངོ་བོ་ལ་དམིགས་པའི་སྒྲ་བརྗོད་དོ། །གལ་ཏེ་ཡུལ་གྱི་ངོ་བོ་ཇི་ལྟར་དམིགས་སུ་རུང་བའི་མཚན་ཉིད་ཡིན། ཆོས་དང་ཆོས་ཅན་ནི་ཐ་དད་པ་ཡིན་ཞེ་ན། རུང་བའི་ཉིད་ནི་ཞེས་བྱ་བ་ལ་སོགས་བ་སྨོས་ཏེ། རུང་བ་ནི་དོན་དམ་པར་ན་དངོས་པོའི་ངོ་བོ་ཉིད་དེ། དངོས་པོའི་ངོ་བོ་ལས་ཐ་དད་པ་ནི་མེད་དོ། །དེ་ལྟ་མ་ཡིན་ན་དངོས་པོའི་རུང་བ་ཉིད་དུ་མི་འགྱུར་བ་དང༌། རུང་བ་འདི་ཡིན་ནོ་ཞེས་དངོས་པོ་དང་འབྲེལ་པར་ཡང་མི་འགྱུར་བ་དང༌། འབྲེལ་པ་ཅན་བརྟགས་ན་ཡང་ཐུག་པ་མེད་པར་འགྱུར་རོ་ཞེས་ལན་མང་དུ་བཤད་ཟིན་ཏོ། །དེ་ཉིད་དམིགས་པར་བྱ་བ་ཡུལ་གྱི་ཆོས་སུ་བསྟན་པ་ན་མི་དམིགས་པ་རྟོག་པ་ཡིན་པར་དེ་ལས་གཞན་པ་ཞེས་བྱ་བ་ལ་སོགས་པ་སྨོས་ཏེ། དེའི་ཕྱིར་བུམ་པ་ལ་སོགས་པ་དགག་པར་བྱ་བ་ཡུལ་ཅན་གྱི་རྣམ་པར་ཤེས་པ་སྐྱེད་པར་རུང་བ་ལས་གཞན་པ་དམིགས་པར་སྐྱེད་བར་རུང་བ་ཉིད་དེ་ལས་ཕྱིན་ཅི་ལོག་པ་ནི་མ་ཡིན་ནོ། །བུམ་པའི་རང་བཞིན་གྱིས་དབེན་པའི་ཕྱོགས་ཀྱི་ངོ་བོ་དེ་ཉིད་ལ་འདིར་མི་དམིགས་པའི་སྒྲས་བརྗོད་དོ། །སྔ་མ་ཉིད་ཀྱི་རིགས་པ་ཙམ་འདིར་བསྟན་པ་ནི་སྔ་མ་བཞིན་ཞེས་བྱ་བ་ལ་སོགས་
པ་སྨོས་ཏེ། བརྗོད་པར་འདོད་པའི་དམིགས་པ་ལས་གཞན་ཡིན་པའི་ཕྱིར་བཟར་མི་རུང་བ་དང་རེག་ཏུ་མི་རུང་བ་བཞིན་དུ་མ་ཡིན་པར་དགག་པ་ལ་འཇུག་གོ །ཇི་ལྟར་དགག་པ་ཡང་གཞན་གྱི་དོན་ལ་འཇུག་པ་ཡིན། ཐུན་མོང་བའི་བུམ་པ་ཡོད་པས་དབེན་པའི་ཕྱོགས་ཀྱི་ཤེས་པའམ་ས་ཕྱོགས་ཏེ་བུམ་པས་དབེན་པའི་མི་དམིགས་པ་འདི་མ་ཡིན་པར་དགག་པ་འཇུག་པར་རབ་ཏུ་བཏགས་པ་ཡིན་གྱི། ཁྱད་པར་མེད་པར་འདི་དག་ཐམས་ཅད་ཀྱང་གཞན་གྱི་སྒྲས་བརྗོད་པར་མི་བྱའོ་སྙམ་ནས་གང་དུ་གང་ཞིག་ཅེས་བྱ་བ་ལ་སོགས་པ་སྨོས་ཏེ། གང་དུ་ནི་ཡུལ་དང་དུས་དང་གནས་སྐབས་བར་དུ་མཆོད་པ་ལ་སོགས་པའི་མཚན་ཉིད་ཅན་ནོ། །གང་ཞིག་ནི་ས་ཕྱོགས་ཀྱི་ངོ་བོ་ལ་སོགས་པ་དམིགས་པར་བྱའོ། །ངེས་པར་ནི་གདོན་མི་ཟ་བའོ། །དོན་གཞན་བུམ་པ་ལ་སོགས་པའི་ངོ་བོ་དམིགས་པར་འགྱུར་རོ། །དེ་ནི་བུམ་པ་ལ་སོགས་པའི་ངོ་བོ་དེ་དང་འདྲེ་བ་དེས་ནས་ཕྱོགས་ལ་སོགས་པའི་ངོ་བོ་དང་འདྲེ་བའོ། །གལ་ཏེ་གཅིག་ལ་དམིགས་པར་བྱ་བ་ཡང་ཇི་ལྟར་གཞན་ལ་ངེས་པར་དམིགས་པར་འགྱུར་ཞེ་ན། རུང་བ་ཉིད་དུ་ཁྱད་པར་མེད་པའི་ཕྱིར་རོ། །ས་ཕྱོགས་ཀྱི་བུམ་པའི་ངོ་བོ་དག་ནི་རང་གི་ཡུལ་ཅན་གྱི་རྣམ་པར་ཤེས་པ་སྐྱེད་པར་རུང་བར་མཚུངས་སོ། །གང་གི་ཚེས་ཕྱོགས་ཀྱི་ངོ་བོ་བར་དུ་ཆོད་པའི་སྐལ་བ་ལ་སོགས་པ་སྤངས་པ་ནི་རྣམ་པར་ཤེས་པ་ལ་རང་གི་རྣམ་པར་འཇོག་པ་ཡིན་པ་དེའི་ཚེ་བུམ་པའི་ངོ་བོ་ཡང་དེ་ལ་དེ་བཞིན་དུ་རང་གི་རྣམ་པ་གཏོད་པར་འགྱུར་བ་ཉིད་དོ། །གལ་ཏེ་རུང་བ་དེ་དང་དེ་ནི་རང་རང་གི་ངོ་བོ་ལ་གནས་པ་ཡིན་ཇི་ལྟར་དེ་དང་འདྲེ་བ་ཡིན་ཞེ་ན། ཤེས་པ་གཅིག་དང་འདྲེ་བའི་ཕྱིར་རོ། །ཤེས་པ་གཅིག་ལ་དེ་གཉིས་ཀྱང་དེ་དག་གི་རྣམ་པའི་སྒོ་ནས་འདྲེ་བ་ནི་དངོས་སུ་མ་ཡིན་པས་དེའི་རྣམ་པར་ཤེས་པ་དོན་གྱི་རྣམ་པ་གཉིས་སྐྱེས་བ་དག་གི་བདག་ཉིད་འདྲེ་བར་བསྟན་ཏོ། །ཅི་དེའི་ཤེས་པ་ལ་དོན་གྱི་རྣམ་པ་གཉིས་གདོན་མི་ཟ་བར་ཡང་འགྱུར་རམ། གང་གིས་དེ་གཉིས་ཤེས་པའི་སྒོ་ནས་འདྲེ་བ་ཡིན་ཞེ་ན། དེ་གཉིས་ཞེས་བྱ་བ་ལ་སོགས་པ་སྨོས་ཏེ། དེ་དག་མཚུངས་པར་རུང་བའི་ངོ་བོ་གང་ཡིན་བ་དེ་དག་གང་གི་ཚེ་ཡོད་པར་
གྱུར་པ་དེའི་ཚེ་རྣམ་པ་གཅིག་ངེས་པར་རྟོགས་པར་མི་འགྱུར་ཏེ། ཅིའི་ཕྱིར་ཞེ་ན། མི་སྲིད་པའི་ཕྱིར་རོ། །འདི་དག་ཡོད་པར་སྲིད་ན་མཚུངས་པར་རུང་བའི་ངོ་བོ་གཉིས་ལས་གཅིག་ཁོ་ན་སྣང་བ་མ་ཡིན་ཏེ་གཞན་དུ་མ་ཡིན་ནོ། །དེ་ལྟ་ན་རུང་བར་ཁྱད་པར་མེད་པའི་ཕྱིར་ཅིས་ན་དེ་ལ་རང་གི་རྣམ་པ་གཏོད་པར་མི་བྱེད་དེ་ཅིག་ཅར་སྣང་བར་ཡང་ཉམས་སུ་མྱོང་བས་གྲུབ་བོ། །ཉམས་སུ་མྱོང་བ་དང་འགལ་བར་མི་མཁས་པ་ཡིས་བརྗོད་པ་ལ་གནོད་པ་མེད་པས་བརྗོད་པར་མི་བྱའོ། །གལ་ཏེ་མགྱོགས་པར་འབྱུང་བའི་ཕྱིར་ཅིག་ཅར་སྙམ་དུ་སེམས་སོ་ཞེན། མ་ཡིན་ཏེ་གནོད་པར་བྱེད་པའི་རྐྱེན་སྤངས་པས་འཁྲུལ་པར་བརྟག་པར་མི་རིགས་པས་ཐམས་ཅད་དུ་དེ་བཞིན་དུ་དངོས་པོ་མེད་པར་ཐལ་བར་འགྱུར་བའི་ཕྱིར་རོ། །གལ་ཏེ་རྒྱུའི་ཆོས་འདི་ཁོ་ན་གང་གི་ཚེ་ལས་སུ་བྱ་བ་གཅིག་སྒྲུབ་པ་དུ་མ་མི་བྱེད་ལ་དབང་པོ་དེ་ལས་དུ་མར་རྟོགས་པའི་རྒྱུ་བྱེད་པ་ནི་མ་ཡིན་ནོ་ཞེ་ན། ཇི་ལྟར་མར་མེ་ལ་སོགས་པས་རྟོགས་པར་བྱེད་པ་མང་པོ་རྣམས་ལ་དུ་མ་སྐྱེད་པར་བྱེད་པ་ཡིན། བྱེད་པ་པོ་ཐ་དད་པ་ས་སྐྱོན་མེད་དོ་ཞེ་ན། བྱེད་པ་པོ་གཅིག་ཡིན་པའི་ཕྱིར་བྱ་བ་དང་ལས་གཅིག་ཡིན་པས་ཇི་ལྟར་རྒྱུའི་ཆོས་ཡིན་ཞེས་བྱ་བ་ལ་སོགས་པ་བརྗོད་པ་ནི་བསླང་བ་ཡིན་ནོ། །དངོས་པོ་རྣམས་སྐད་ཅིག་མ་རེ་རེ་སོ་སོར་གྱེས་བ་ལ་དོན་དམ་པར་མེད་པས་སོ། །བྱེད་པ་པོ་དང་བྱེད་པ་པོ་ལ་སོགས་པའི་དངོས་པོའམ་བྱ་བ་འགའ་ཞིག་ཀྱང་མི་རིགས་སོ། །ཐམས་ཅད་ཀྱི་བྱེད་པ་པོ་དང་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པའི་འབྲས་བུ་འགའ་ཞིག་ཕུལ་དུ་བྱུང་བ་ཡོད་པ་མ་ཡིན་ཏེ། གང་གིས་འདི་བྱེད་པ་པོ་དག་དང་བྱེད་པར་རིག་པ་ཡིན་ནོ་ཞེས་བྱ་བ་ལ་སོགས་པ་གཞན་གྱིས་ཡོངས་སུ་བརྟགས་པ་དེའི་ཕྱིར་རུང་བ་དེ་ཉིད་དུ་ཁྱད་པར་མེད་དོ། །ག་ལས་ཤེ་ན། གཅིག་གི་ངོ་བོ་ངེས་པར་རྟོགས་པ་སྲིད་པའི་ཕྱིར་ཤེས་པ་གཅིག་ལ་ཚོགས་པར་གྲུབ་པ་དང༌། རུང་བའི་ངོ་བོ་ཉིད་དུ་མཚུངས་པ་འདི་དག་ཉིད་རྟགས་ཡིན་ནོ། །རུང་བའི་ངོ་བོ་ཉིད་དུ་མེད་པ་དང་མཚུངས་པས་ཅིག་ཅར་དབང་པོ་ལས་སྐྱེས་པའི་ཤེས་པ་ལས་སོ་སོར་སྣང་བ་ནི་གཟུགས་དང་རོ་བཞིན་དུ་མི་སྲིད་པའི་ཕྱིར་རོ། །དེ་ལ་གང་དག་བདེ་བར་
གཤེགས་པ་རྣམས་ཀྱིས་སྐྱེ་མཆེད་གཅིག་གི་གཟུང་བ་མ་ཡིན་པར་འདི་བསྟན་ཏོ། །དུ་མ་ལ་ཡང་དབང་པོའི་ཤེས་པ་གཅིག་སྐྱེ་བའི་ཕྱིར་དེ་དག་ཤེས་པ་གཅིག་ལ་ཚོགས་པ་ནི་གཙོ་བོ་ཁོ་ན་ཡིན་ནོ། །དེ་ལ་ཡང་དོན་རེ་རེ་ཐ་དད་པ་ཉིད་དབང་པོ་གཅིག་གི་རྒྱུ་མཚན་ལས་གཞན་པ་དུས་གཅིག་པ་གང་ཡིན་པ་དེའི་ཡུལ་རྣམས་ཅིག་ཅར་ཉེ་བ་ན་རང་གི་ཤེས་པ་ལ་ནུས་པ་ཁྱད་པར་མེད་པའི་ཕྱིར་རོ། །དེ་ཉིད་ཀྱི་ཕྱིར་འཇིག་རྟེན་པས་གཅིག་ཏུ་མངོན་པར་ཞེན་པའི་ཤེས་པ་སྐྱེད་པ་ཡིན་ནོ་ཞེས་བརྗོད་དེ། དེ་དག་དབང་པོ་གཅིག་ལས་སྐྱེས་པ་ཡིན་པ་དང་སྐྱེ་མཆེད་གཅིག་གི་ཡུལ་ཡིན་པས་དུས་གཅིག་པ་རྣམས་ལ་འཇིག་རྟེན་པས་དེ་བཞིན་དུ་ངེས་པས་གཅིག་གི་ཐ་སྙད་དུ་བྱེད་པ་ནི་བཏགས་པ་ཡིན་ནོ། །གལ་ཏེ་དེ་ལྟར་ཤེས་པ་གཅིག་ལ་ཚོགས་པ་དེ་ནི་འདྲེ་བ་ཡིན་པ་དེ་ལྟ་ན་ཡང་ཐུན་མོང་དུ་ཐམས་ཅད་ལ་གཞན་པའི་བདག་ཉིད་དུ་ཅི་སྟེ་དགག་པར་མི་རྟོགས་ཤེ་ན། དེ་ལྟ་བས་ན་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་རུང་བ་ཉིད་དུ་ཁྱད་པར་མེད་པའི་ཕྱིར་རུང་བ་ཉིད་ནི་ཇི་སྐད་བཤད་པའི་རྣམ་པས་ཤེས་པ་གཅིག་ལ་གཉིས་གང་ཡང་ཚོགས་པ་དེའི་ཕྱིར་རུང་བ་ཉིད་ཀྱི་ངོ་བོ་ཁྱད་པར་མེད་པ་ཅན་གང་དང་གང་ཡིན་པ་དེ་ཉིད་ལས་ཤེས་པ་གཅིག་ལ་ཚོགས་བ་དེ་དག་ཡིན་པ་དེའི་ཕྱིར་དེ་དག་དེ་ལྟ་བུའི་ངོ་བོ་ཕན་ཚུན་ལྟོས་པ་ཁོ་ན་ཡིན་གྱི་གཞན་པ་ཚིག་གི་དོན་ཐམས་ཅད་ལ་ལྟོས་པ་མ་ཡིན་ནོ། །གཞན་པ་ཉིད་ནི་འདིར་མི་དམིགས་པ་ལ་འགྱུར་བ་མེད་དོ། །གལ་ཏེ་འཇིག་རྟེན་པ་ཡང་དོན་གཞན་པ་མ་ལུས་པ་ལ་ལྟོས་ནས་གཞན་པ་ཉིད་ཁྱབ་པའི་རིགས་པ་ལ་བརྟེན་ནས་ལ་ལར་དགག་པ་བརྗོད་དོ། །དེ་ལྟ་ན་ཡང་དེ་ནི་འདིར་གཟུང་བར་མི་བྱའི་ཉེ་བའི་རིགས་པ་ལ་བརྟེན་ནས་ཤེས་པ་གཅིག་ལ་ཚོགས་པའི་མཚན་ཉིད་ནི་ཉེ་བའི་རིགས་པ་ལ་བརྟེན་ནས་ཚད་མར་བསམ་པ་ལ་འགྱུར་བ་མེད་དོ། །དེ་ལྟ་མ་ཡིན་ན་མི་དམིགས་པ་མ་ངེས་པ་ཉིད་དུ་འགྱུར་རོ། །དེའི་ཕྱིར་དེ་ཁོ་ན་ཉིད་སེམས་པས་རྣམ་པ་དེ་ལྟ་བུའི་གཞན་པ་ཉིད་ལ་བརྟེན་ནས་མི་དམིགས་པའི་རྒྱུ་མཚན་ལ་འཁྲུལ་པ་མེད་པ་གང་ཡིན་པ་དེ་ཡང་ཇི་སྐད་བཤད་པ་བཞིན་དུ་དགོངས་པ་ཡིན་ནོ། །དེ་ལྟར་ན་དེ་ནི་ཤེས་པ་གཅིག་ལ་ཚོགས་པ་ལ་ལྟོས་
ནས་གཞན་པ་ཉིད་དུ་རྟོགས་པ་ནི་མི་དམིགས་པར་བསྟན་པས་ནི་དེ་འབའ་ཞིག་ལ་ཞེས་བྱ་བ་ལ་སོགས་པ་སྨོས་ཏེ། དེ་ཉིད་གང་གི་ཚེས་ཕྱོགས་འབའ་ཞིག་ཇི་ལྟར་བཤད་པའི་བུམ་པ་ལ་ལྟོས་པ་དེའི་ཕྱིར་གཞན་ཞེས་བརྗོད་པ་དེའི་ཚེ་བུམ་པས་དབེན་པའི་ས་ཕྱོགས་སམ་ཤེས་པ་ལ་མི་དམིགས་པ་ཡིན། དཔེར་ན་དབང་ཕྱུག་སྡེས་བསམས་པའི་དམིགས་པ་མེད་པ་ཙམ་གྱིས་མི་དམིགས་པ་བཞིན་དུ་མ་ཡིན་ཏེ། འཆད་པར་འགྱུར་བའི་སྐྱོན་དང་ལྡན་པའི་ཕྱིར་རོ། །བུམ་པས་དབེན་པའི་ཕྱོགས་ཀྱི་ངོ་བོ་ནི་དེས་དབེན་པའི་ཤེས་པ་ཉིད་ནི་མ་ཡིན་ཏེ། ཇི་ལྟར་གཞོན་ནུ་མ་ལེན་གྱི་རྣམ་པར་ཤེས་པའམ་གཞན་པའི་དངོས་པོ་གཞན་དུ་མ་ཡིན་ཏེ། ཇི་ལྟར་གཞན་གྱི་དངོས་པོའི་ཡུལ་གྱི་རྣམ་པར་ཤེས་པ་ཉམས་སུ་མྱོང་བ་རྣམས་དང་མི་མཐུན་པའི་དྲན་པ་ལྟོས་པ་མེད་པའི་ཐ་སྙད་དུ་བྱེད་པའི་རྒྱུ་མཚན་ཡིན་པ་དེ་ལྟ་ན་དེས་དབེན་པའི་ས་ཕྱོགས་ཀྱང་ཡིན་ནོ། །དེ་ལྟ་ན་རྟོགས་པར་བྱེད་པ་འགའ་ཞིག་གིས་གང་གི་ཕྱིར་ཕྱོགས་འབའ་ཞིག་གི་རྣམ་པ་ཉིད་ཀྱི་ཤེས་པའི་བདག་ཉིད་དུ་རིགས་པ་ཡིན་གྱི་བུམ་པའི་རྣམ་པ་མ་ཡིན་པ་དེའི་ཕྱིར་འདིར་བུམ་པ་མེད་དོ་ཞེས་བྱ་བ་དེ་བཞིན་དུ་མེད་པའི་ཤེས་པ་སྐྱེད་པ་ཡིན་ནོ། །གང་གི་ཕྱིར་འགའ་ཞིག་གིས་ཕྱོགས་འབའ་ཞིག་མཐོང་བ་གང་ཡིན་པ་ནི་བུམ་པ་དང་ལྷན་ཅིག་པ་མ་ཡིན་པ་དེའི་ཕྱིར་འདིར་བུམ་པ་ཞེས་བྱ་བ་དེ་ལྟར་ཡིན་ནོ། །དེའི་ཕྱིར་མེད་པའི་ཤེས་པ་སྐྱེད་པའི་ནུས་པ་མཚུངས་པའི་གཉི་ག་ཡང་མི་དམིགས་པར་རྣམ་པར་གཞག་པར་རིགས་སོ།། དེལ་གང་གི་ཚེ་དེ་ཤེས་པ་ཡིན་པ་དེའི་ཚེ་ཤེས་པ་ཉིད་ཀྱི་ཆོས་ཀྱི་མཚན་ཉིད་ནི་མི་དམིགས་པ་སྟེ། བྱེད་པ་པོ་ལ་གནས་པའི་བྱ་བ་ལ་ལྟོས་པའོ། །གང་གི་ཚེ་དེའི་ངོ་བོ་ཡིན་པ་དེའི་ཚེ་ཤེས་པར་བྱ་བའི་ཆོས་ཀྱི་མཚན་ཉིད་ནི་ལས་ལ་གནས་པའི་བྱ་བ་ལ་ལྟོས་པ་ཡིན་ནོ། །དེ་ལྟར་མི་དམིགས་པ་ནི་མ་ཡིན་པར་དགག་པ་ལ་འཇུག་པའི་རྣམ་པར་གཞག་པའི་བསྒྲུབ་པར་བྱ་བ་འདི་ཡང་བསྟན་པ་ནི་དེ་མེད་པ་ཞེས་བྱ་བ་ལ་སོགས་པ་སྨོས་ཏེ། ཐམས་ཅད་དུ་གཞན་དམིགས་པའི་རིག་བྱར་གྱུར་པས་དབེན་པའི་ཕྱོགས་ལ་སོགས་པ་ཡང་སྣང་བ་ཡིན་ལ། གང་ལ་བུམ་པ་ལ་སོགས་པ་
ཟླ་བོ་གཞན་མེད་པ་རྣམས་ཀྱིས་འདི་དྲན་པར་འགྱུར་ཏེ། དེ་ནི་མེད་པའམ་མེད་པའི་ཐ་སྙད་སྒྲུབ་པར་བྱེད་པ་ཡིན་ནོ། །རྒྱུ་དང་ཁྱབ་པར་བྱེད་པ་མི་དམིགས་པ་ནི་མེད་པ་དང་མེད་པའི་ཐ་སྙད་སྒྲུབ་པར་བྱེད་དོ། །རང་བཞིན་མི་དམིགས་པ་ནི་མེད་པའི་ཐ་སྙད་དུ་བྱེད་པ་ཉིད་དོ། །མེད་པ་དང་མེད་པའི་ཐ་སྙད་དུ་བྱེད་པ་ནི་ཤེས་པ་དང་རྗོད་པར་བྱེད་པ་དང་རབ་ཏུ་འཇུག་པའི་མཚན་ཉིད་དོ། །དེ་ལ་འདི་ན་བུམ་པ་མེད་དོ་ཞེས་བྱ་བ་དེ་ལྟ་བུའི་རྣམ་པའི་ཤེས་པ་དང༌། རྣམ་བ་དེ་ལྟ་བུའི་དངོས་པོ་བརྗོད་པ་ནི་རྗོད་པར་བྱེད་པའོ། །དོགས་པ་མེད་པར་ཕྱོགས་དེ་ལ་འགྲོ་བ་དང་འོང་བའི་མཚན་ཉིད་ནི་རབ་ཏུ་འཇུག་པའོ། །འདིས་དབང་ཕྱུག་སྡེ་དང་གཞོན་ནུ་མ་ལེན་གྱིས་ཚིག་གི་གོ་སྐབས་སུ་དོགས་པ་ལ་གྲུབ་པའི་མཐའ་ཡས་རྣམ་པར་གཞག་པ་བྱེད་པ་ནི་དེའི་འདོད་བ་བསལ་ནས་ཡང་གཞན་སུ་ན་དབྱུང་བའི་ཕྱིར་སྨྲས་པ། ཇི་ལྟར་ན་གཞན་ཡོད་ན་ཞེས་བྱ་བ་ལ་སོགས་པ་སྨོས་ཏེ། དབང་ཕྱུག་སྡེའི་འདོད་པ་ནི་འབྲས་བུ་དང་རང་བཞིན་གྱི་གཏན་ཚིགས་དག་ཡོད་པའི་ངོ་བོ་ལས་མི་དམིགས་པས་ཐ་དད་པར་བྱེད་པས་གདོན་མི་ཟ་བར་འདི་མེད་པའི་ངོ་བོ་ཉིད་ཡིན་ནོ། །དེ་ལྟ་མ་ཡིན་ན་ཐ་དད་པར་བྱས་པ་དོན་མེད་པ་ཉིད་དུ་འགྱུར་རོ། །ཁྱོད་ཀྱིས་ཀྱང་གཞན་བཀག་པས་དབེན་པའི་ས་ཕྱོགས་སམ་དེའི་ཤེས་པ་མེད་པའི་ངོ་བོ་ཉིད་དུ་ནི་དམིགས་པར་བསྟན་ཏེ། འདི་ཡོད་པ་ལ་དེ་མེད་པ་དེ་ནི་ཉུང་སྟེ་གང་གིས་དེ་ལྟར་བརྗོད་པར་བྱ་བ་འདི་དག་མི་རིགས་སོ། །ཡོད་པ་དང་མེད་ཏེ། ཡོང་བ་དང་མེད་པའི་ཆ་ཆོས་ཀྱི་ངོ་བོས་ཐ་དད་པ་ཡོད་།གཞོན་ནུ་མ་ལེན་ཡང་འདི་སྙམ་དུ་སེམས་ཏེ། གང་དག་གང་ཤེས་པར་བྱེད་པ་དང་ཤེས་པར་བྱ་བའི་ཆོས་ཀྱི་མཚན་ཉིད་རྣམ་པ་གཉིས་མི་དམིགས་པའི་ངོ་བོར་ཡོད་པར་ཁྱེད་ཀྱིས་བརྗོད་དེ། དེ་མེད་པ་ནི་མེད་པ་ཉིང་ཤེས་པའི་སྒྲུབ་པར་བྱེད་པ་ཡོད་དེ། འོན་ཀྱང་དེ་ཉིད་ནི་གཞན་དགག་པར་བྱ་བས་དབེན་པ་ནི་དངོས་པོ་དགག་པར་བྱ་བའི་ཤེས་པའམ་གཞན་པ་སྟེ། དེའི་ཤེས་པ་གང་ཡོད་པ་དང་མེད་པའི་ཆ་དེ་ཇི་ལྟར་མེད་པར་དགག་པར་བྱ་བའམ་ཤེས་པ་ཡིན། ཇི་ལྟར་མེད་པའི་ཆ་ལ་སྦྱོར་བ་མ་ཡིན་ཏེ། ཡོང་བ་དང་མེད་པའི་ཆ་ཆོས་ཀྱི་ངོ་བོས་ཐ་དད་པ་ཡོད་ཀྱང་ཆོས་ཅན་གྱི་ངོ་བོ་ལ་ཐ་དད་
པ་མེད་དོ། གལ་ཏེ་དེ་དག་ཡོད་པ་དང་མེད་པ་དག་གཟུང་བ་དང་གཟུང་བ་མ་ཡིན་པར་རྣམ་པར་གནས་ཏེ། ཇི་སྐད་དུ། ཆོས་ཅན་ཐ་དད་མེད་ན་ཡང༌། །ཆོས་དག་ཐ་དད་མེད་ན་ཡང༌། །ཆོས་དག་ཐ་དད་འདོད་པ་ན། །ཡོད་དང་མེད་པའི་ཐ་དད་ཕྱིར། །འཛིན་པ་རྣམ་པར་གནས་པ་ཡིན། །ཞེས་བཤད་དོ། །ལན་བཤད་ཟིན་པ་འདི་བསྟན་པ་ནི་འདིར་ཇི་ལྟར་ཞེས་བྱ་བ་ལ་སོགས་པ་སྨོས་ཏེ། ཇི་ལྟར་མ་ཡིན་པར་འཇུག་པ་ལ་ལྟོས་པའི་སྒོ་ནས་ནི་དགག་པ་དག་ནི་དེ་ཤེས་པ་ལ་ལྟོས་ནས་དེས་དབེན་པའི་དོན་དང་ཤེས་པ་མེད་པ་དག་མི་དམིགས་པར་བརྗོད་པར་བྱ་བའི་ཕྱིར་དབང་ཕྱུག་སྡེའི་ལན་བཏབ་པ་ཡིན་ནོ། །མེད་པར་དགག་པ་ཁོ་ན་འབའ་ཞིག་དགག་པའི་དོན་མ་ཡིན་གྱི། འོན་ཀྱང་མ་ཡིན་པར་དགག་པ་ཡང་ཡིན་ནོ། །དེའི་ཕྱིར་གཞན་ཡོད་ལ་གཞན་མེད་པའི་གཏན་ཚིགས་དང་མི་དམིགས་པ་ཐ་དད་པར་བྱེད་པ་ནི་རྟོགས་པར་བྱེད་པ་པོའི་བསམ་པའི་དབང་གིས་ཡིན་ནོ། །རང་བཞིན་གྱི་གཏན་ཚིགས་རྟོགས་པས་དངོས་པོ་ཁོང་དུ་ཆུད་པར་ངེས་པ་དང༌། མི་དམིགས་པ་ཡིས་དངོས་པོ་མེད་པ་རྟོགས་པར་ངེས་པ་ཡིན་ནོ། །དོན་དམ་པར་དགག་པ་ནི་མེད་པའི་ཐ་སྙད་དུ་རུང་བའི་དངོས་པོར་གྱུར་པ་ཉིད་ཀྱི་ཕྱོགས་བསྒྲུབ་པར་བྱ་བ་ཡིན་པས་རང་བཞིན་གྱི་གཏན་ཚིགས་མ་ཡིན་གྱི་རང་བཞིན་མི་དམིགས་པར་རིགས་པར་བྱའོ། །གང་ཡང་ལྟོས་པ་མེད་པའི་དོན་གཞན་པའི་ཚོགས་པ་དགག་པ་ཙམ་ནི་མི་པར་བྱེད་པ་ནི་པར་བྱེད་པ་ནི་དགག་པ་ཙམ་ནི་ཞེས་བྱ་བ་ལ་སོགས་པ་སྨོས་ཏེ། ཅིའི་ཕྱིར་ཞེ་ན། དེའི་སྒྲུབ་པར་བྱེད་པ་མ་གྲུབ་པའི་ཕྱིར་ཞེས་བྱ་བ་ལ་སོགས་པ་སྨོས་ཏེ། དངོས་པོ་མེད་པ་ནུས་པ་ཐམས་ཅད་ཀྱིས་སྟོང་པའི་མཚན་ཉིད་ཅན་དུ་སྒྲུབ་པར་བྱེད་པ་འགྲུབ་པའི་གཏན་ཚིགས་མི་འགྲུབ་བོ། །ནུས་པ་ཐམས་ཅད་ཀྱིས་སྟོང་པ་དེ་ཡང་མི་རིགས་པའི་ཕྱིར་རམ། གཏན་ཚིགས་ཉིད་ནི་ནུས་པ་དང་འབྲེལ་པའམ། དངོས་པོའི་ངོ་བོའི་མཚན་ཉིད་ཡིན་པའི་ཕྱིར་དངོས་པོའོ། །དངོས་པོ་མེད་པའི་ནི་ལྷན་ཅིག་བྱེད་པ་ལ་ལྟོས་པ་མེད་པར་རག་ལས་པའི་ཕུལ་དུ་བྱུང་བ་མེད་པས་མེད་དོ་ཞེས་པའི་
ཤེས་པ་སྐྱེད་པ་ན་དེ་རྟག་ཏུ་སྐྱེད་པར་ཐལ་བར་འགྱུར་རོ། །དེའི་ཕྱིར་སྒྲུབ་པར་བྱེད་པ་དང་མ་འབྲེལ་པས་མེད་པའི་ཐ་སྙད་མི་འགྲུབ་བོ། །ཡང་ན་མེད་པར་དགག་པའི་བདག་ཉིད་དམིགས་པ་མེད་པའི་སྒྲུབ་པར་བྱེད་པ་ཅུང་ཟད་ཅིག་ཀྱང་མི་འགྲུབ་སྟེ་དེ་ནི་མེད་པ་ཉིད་ལས་གཞན་པའི་དམིགས་པ་མེད་པས་བསྒྲུབ་པར་བྱ་བར་འགྱུར་ལ་དེ་ལ་ཡང་གཞན་ཡིན་པས་ཐུག་པར་འགྱུར་རོ། །དབང་པོ་བཞིན་དུ་དགག་པའི་ཤེས་པའི་རྒྱུ་རྟག་ཏུ་ཉེ་བས་ལྷན་ཅིག་བྱེད་པ་ལ་དེ་ཉིད་མི་ལྟོས་པས་དེ་རྟག་ཏུ་སྐྱེད་པར་ཐལ་བར་འགྱུར་བའི་ཕྱིར་རོ། །དོན་རྣམ་པ་གཉིས་བོ་འདི་ཇི་ལྟར་མེད་པ་ཡིན། འགའ་ཞིག་རྟོགས་དང་རྟོགས་པའི་རྒྱུ་དེ་ཡང་ཇི་ལྟར་རྟོགས་པ་ཡིན་ཞེས་བྱ་བ་གཞུང་འདིའི་ནང་དུ་སློབ་དཔོན་རྣག་ཉིད་ཀྱིས་རྣམ་པར་འབྱེད་པར་འགྱུར་རོ། །ཡང་གཞོན་ནུ་མ་ལེན་གྱི་ལན་ནི་དེའི་ཞེས་བྱ་བ་སྨོས་སོ། །འདི་ཟླ་བོ་དངོས་པོ་གཞན་དང་འདྲེ་བའི་ངོ་བོ་འདི་དངོས་པོ་གཞན་དང་འདྲེ་བ་མེད་པ་ཁྱེད་ཀྱི་མངོན་པར་འདོད་པ་གྲུབ་པ་ཡིན་ཏེ། ཡོད་པའི་ཆ་ཉིད་ཀྱི་མེད་པའི་ཆའི་ངོ་བོ་རིགས་སོ་ཞེས་འདོད་པ། དེ་ལྟ་ན་ཡང་མེད་པའི་ཆ་ཡང་གཞན་པའི་ངོ་བོ་དང་མི་འདྲེ་བ་ཉིད་ཀྱིས་མེད་པ་བསྟན་གྱི་དེ་ལྟ་མ་ཡིན་ན་དེ་མི་འཐད་དོ། །དེ་ཡང་དངོས་པོའི་ཆ་ལ་ཡང་མཚུངས་པའི་ཕྱིར་དེ་ཉིད་མེད་པའི་རྒྱུ་མཚན་དང་མཚུངས་པའི་ཕྱིར་ཅི་གཞན་པ་མེད་པའི་ཆ་ཁས་བླང་བར་བྱ། དེ་ཉིད་ཀྱི་ཕྱིར་མ་འདྲེས་པའི་ངོ་བོ་ཁྱད་པར་ཅན་ཡིན་ན། གང་གི་ཕྱིར་དེ་ལྟ་བས་ན་ཞེས་བྱ་བ་ནི་དེའི་ཕྱིར་གཞན་ཡོད་པ་ནི་གཞན་གྱི་དངོས་པོའོ། །ཡོད་པ་ཡང་ཁྱེད་མངོན་པར་འདོད་དོ། །ཡོད་པའི་ཆ་འབའ་ཞིག་ཀྱང་མ་ཡིན་གྱི། མེད་པའི་ཆ་ཁྱེད་འདོད་པས་མེད་པ་ཡིན་ནོ་ཞེས་ཐ་སྙད་འདོགས་སོ། །ཁོ་བོ་ཅག་ནི་དེས་ན་ཡོད་པའི་ཆའི་མེད་པ་ངོ་བོ་བརྗོད་པར་གྱུར་པ་ལ་འགལ་བ་ཅི་ཡང་མེད་དོ། །ཇི་སྐད་དུ་ཤེས་པར་བྱེད་པ་དང༌། ཤེས་པར་བྱ་བའི་ཆོས་ཀྱི་མཚན་ཉིད་ཀྱི་རང་བཞིན་མི་དམིགས་པས་མེད་པའི་ཐ་སྙད་སྒྲུབ་པར་བྱེད་པ་ཡིན་གྱི་མེད་པ་ནི་མ་ཡིན་ནོ་ཞེས་བཤད་དོ། །གཞན་བསལ་བའི་ཕྱིར་གང་ཡང་དག་པ་ཅན་ནི་མི་དམིགས་པ་དེ་སྒྲུབ་པར་བྱེད་པར་མི་འགྲུབ་བོ་ཞེས་བཤད་ཟིན་ཏོ། །བཤད་པ་གཉིས་པ་ནི་དགག་པ་ཙམ་གྱིས་
མི་དམིགས་པ་སྒྲུབ་པར་བྱེད་པ་མ་ཡིན་པར་བསྟན་པ་ནི་གཞན་ཡོད་པའི་མཚན་ཉིད་ཅེས་བྱ་བ་ལ་སོགས་པ་སྨོས་ཏེ། འཇིག་རྟེན་པ་ནི་འདི་སྙམ་དུ་སེམས་ཏེ། ས་ཕྱོགས་དག་པ་མཐོང་ནས་བུམ་པ་མེད་པར་ཐོག་མར་རྟོགས་པའམ་ས་ཕྱོགས་ཉི་ཚེ་ཤེས་པས་ཉམས་སུ་མྱོང་བའི་སྒོ་ནས་བུམ་པ་མེད་པའི་རྟོགས་པའོ། །དེའི་ཕྱིར་བུམ་པ་མེད་པའི་ཐ་སྙད་དུ་བྱེད་པ་ངེས་ན་འཇིག་རྟེན་པའི་ཤེས་པའི་རྗེས་སུ་འབྲངས་ནས་དགག་པར་བྱེད་པའམ། གཞན་ས་ཕྱོགས་ལ་དགག་པར་བྱ་བའི་ཤེས་པ་གཉིས་ཏེ། དེ་ཤེས་པ་དག་ཡོད་པའི་མཚན་ཉིད་ཀྱི་དངོས་པོ་མེད་པར་རོ། །རང་གི་ཚད་མས་ནི་དབང་པོའི་མངོན་སུམ་དང་རང་རིག་པའི་མངོན་སུམ་གྱིས་དངོས་སུ་འམ་བརྒྱུད་པས་ཇི་ལྟ་བའི་རིམ་པས་སྒྲུབ་པ་གང་ཡིན་པ་དེ་ཡང་བུམ་པ་མེད་པའི་ཐ་སྙད་བྱེད་པ་ཡིན་ནོ་ཞེས་དེ་ལྟར་རྣམ་པར་གཞག་པར་རིགས་སོ།། དེ་ལྟར་རྣམ་པར་བཞག་ཀྱང་ཁྱེད་ཀྱི་ཕྱོགས་ཉམས་པ་ཅི་ཡང་མེད་དོ། །དེ་ལྟ་ན་བརྒྱུད་པས་ཀྱང་མི་དམིགས་པར་ཁས་བླངས་པ་གང་ཡིན་པ་དེ་གྲུབ་པ་དེས་ན་དེ་ཉིད་ཀྱིས་གྲུབ་པར་འགྱུར་བའི་ཕྱིར་རོ། །དགག་པ་ཙམ་གྱི་མི་དམིགས་པ་དེ་ཉིད་དེ་སྒྲུབ་པར་བྱེད་པར་བསྟན་པ་འདིའི་དགོངས་པ་ནི་ཇི་ལྟར་ཁྱེད་ཤེས་པར་བྱེད་པ་དང༌། ཤེས་པར་བྱ་བའི་ཆོས་ཀྱི་མཚན་ཉིད་ཀྱི་དངོས་པོ་ངོ་བོ་རྣམ་པ་གཉིས་མི་དམིགས་པ་དེ་ལྟ་ན་ཁོ་བོ་ཡང་ཤེས་པར་བྱེད་པ་དང༌། ཤེས་པར་བྱ་བའི་ཆོས་ཀྱི་མཚན་ཉིད་དམིགས་པ་མེད་པ་དང་མི་དམིགས་པའི་མིང་ཅན་རྣམ་པ་གཉིས་སུ་འགྱུར་རོ། །དེ་ལ་ཤེས་པར་བྱ་བའི་ཆོས་ཀྱི་མཚན་ཉིད་ནི་གཞན་ཡོད་པ་མངོན་སུམ་གྱིས་གྲུབ་པ་དགག་པར་བྱ་བ་མེད་པ་ནི་ཤེས་པར་བྱ་བའི་མཚན་ཉིད་དམིགས་པ་མེད་པའི་ངོ་བོ་མི་དམིགས་པ་མེད་པའི་མིང་ཅན་དུ་གྲུབ་པར་འགྱུར་རོ། །ཤེས་པར་བྱེད་པའི་ཆོས་ཀྱི་མཚན་ཉིད་དང་གཞན་ཡོད་པ་ནི་ས་ཕྱོགས་དག་པ་ཤེས་པའི་བདག་ཉིད་རང་རིག་པས་གྲུབ་པ་དང༌། ཤེས་པར་བྱེད་པའི་ཆོས་དགག་པར་བྱ་བའི་ཤེས་པ་མེད་པའི་ངོ་བོ་མི་དམིགས་པར་མཚུངས་པར་བཤད་པ་གྲུབ་པར་འགྱུར་རོ། །དེས་ན་གང་ལས་ཐུག་པ་མེད་པར་འགྱུར། གང་གིས་ན་སྒྲུབ་པར་
བྱེད་པ་མི་འགྲུབ་པར་འགྱུར་བ་དེ་ལ་གཞན་ཡོད་པའི་མཚན་ཉིད་དགག་པར་བྱ་བ་དང༌། དེའི་ཤེས་པ་ནི་གཞན་དགག་པར་བྱ་བས་དབེན་པའི་ས་ཕྱོགས་དང་དེའི་ཤེས་པ་དེའི་བདག་ཉིད་མེད་པ་བརྗོད་པར་འདོད་པའི་ཕྱིར་རོ། །ཡོད་པ་དགག་པར་བྱ་བ་དང་དེའི་ཤེས་པ་གཞན་མི་དམིགས་པར་ཁྱེད་འདོད་པའོ། །རང་ཉིད་ནི་རང་གི་ངོ་བོ་ཚད་མ་སྟེ་དབང་པོའི་མངོན་སུམ་དང་རང་རིག་མངོན་སུམ་གྱིས་གྲུབ་བོ། །དེ་ནི་དེ་དགག་པ་ནི་མེད་པའི་ཐ་སྙད་ཀྱི་ཤེས་པའི་རྗོད་པར་བྱེད་པ་འཇུག་པའི་མཚན་ཉིད་ཀྱི་སྒྲུབ་པར་བྱེད་པ་འགྲུབ་པའམ། དེ་འགྲུབ་པས་དེ་གཞན་པའི་དངོས་པོའི་མཚན་ཉིད་ཀྱི་མེད་པར་ཇི་སྐད་བཤད་པས་གྲུབ་པའམ། དེ་མེད་པར་གྲུབ་པའམ། དེ་དགག་པར་བྱ་བ་དེ་ཤེས་པ་ནི་མེད་པ་ཞེས་བྱ་བ་དེ་ལྟར་འདོད་ན། ཁྱེད་མངོན་པར་འདོད་པའི་མི་དམིགས་པ་དང་ཁོ་བོ་ཅག་མངོན་པར་འདོད་པའི་མི་དམིགས་པ་ལ་ཁྱད་པར་འགའ་ཡང་མེད་ན་ཁོ་བོ་ཅག་གི་ལྟ་བ་ཅིས་ན་སྤོང་བར་བྱེད། འོ་ན་ནི་ཁྱད་པར་ཡོད་པར་འདོད་དེ་གཞན་ཡོད་པའི་མཚན་ཉིད་མི་དམིགས་པ་དང་ཅིག་ཤོས་བར་དུ་མ་ཆོད་པའོ། །དེ་མེད་པའི་ཐ་སྙད་སྒྲུབ་པར་བྱེད་པ་ཡིན་ནོ་སྙམ་ནས་དེ་ལ་ཁྱད་པར་མེད་དེ་ཞེས་བྱ་བ་སྨོས་ཏེ། ཁྱད་པར་མེད་ན་གང་གིས་ན་མི་དམིགས་པ་མེད་པའི་ངོ་བོ་དངོས་པོ་དང་འབྲེལ་པ་སྤོང་བར་ཁོ་བོ་ཅག་མངོན་པར་འདོད་པའི་མེད་པའི་ཐ་སྙད་དུ་སྒྲུབ་པ་དང་འགལ་བར་འགྱུར། གཞན་གྱི་ཁྱད་པར་ཡོད་པ་ལ་ཡང་གནོད་པ་མེད་པའི་ཕྱིར་མེད་པར་མཚུངས་པ་ཁོ་ནའོ་།དེ་སྐད་དུ་དེའི་སྒྲུབ་པར་བྱེད་པ་མེད་པས་མེད་པའི་ཐ་སྙད་མི་འགྲུབ་པར་ཐལ་བར་འགྱུར་རོ་ཞེས་བཤད་ཟིན་ཏོ་ཞེ་ན། དེ་ཡང་མི་བདེན་ཏེ། གང་གི་ཕྱིར་དེ་ཉིད་ཁྱོད་མངོན་པར་འདོད་པའི་གཞན་ཡོད་པ་དགག་པར་བྱ་བས་དབེན་པའི་ས་ཕྱོགས་བདག་ཉིད་དེའི་ཡུལ་དམིགས་པས་མི་དམིགས་པར་འདོད་པ་དང་དེ་མེད་པའི་མི་དམིགས་པར་ཁོ་བོ་ཅག་འདོད་པའི་དགག་པར་བྱ་བ་མེད་པ་དང༌། དེ་དམིགས་པས་མེད་པ་ཅིའི་ཕྱིར་ན་སྒྲུབ་པར་བྱེད་པའི་རྟགས་སུ་ཅིས་ན་མི་འདོད། དེ་ལྟ་ན་ཡོད་པར་འཇིག་རྟེན་པ་ལ་གྲགས་པའི་རྗེས་སུ་འབྲང་བར་འགྱུར་ན། ཅིའི་ཕྱིར་གཞན་ཡོད་པར་རྣམ་པ་
གཉིས་སུ་གྲུབ་པ་ཉིད་དེ་མེད་པར་གྲུབ་ན་དེའི་བསྒྲུབ་པར་བྱ་བ་གཞན་འགའ་ཞིག་ཡོད་པར་འགྱུར་ཞེས་ཁོ་བོ་ཅག་འདོད་པའི་འཇིག་རྟེན་པ་ལས་ཤིན་ཏུ་འདས་པ་མི་འདོད་དོ་ཞེས་བྱ་བ་ཕྱོགས་སྔ་མ་བཞིན་ནོ། །འདིར་སོ་སོར་མ་གྲུབ་པའི་ཕྱིར་ཞེས་བྱ་བ་སྨོས་ཏེ། གཞན་ཡོད་པ་འདིས་མེད་པའི་རྟགས་དང་རྟགས་ཅན་ག་ལ་ཡིན། དེ་བཞིན་དུ་འབྲེལ་པ་མེད་པའི་ཕྱིར་ནི་གཞན་ཡོད་པས་དེ་མེད་པའི་རྟགས་དང་རྟགས་ཅན་མ་ཡིན་ནོ། །ཐོག་མར་རེ་ཞིག་རྒྱུའི་འབྲེལ་པ་ནི་གཞན་ཡོད་པའི་ཞེས་བྱ་བ་སྨོས་ཏེ། དེ་དབེན་པའི་ས་ཕྱོགས་ཀྱིས་བདག་ཉིད་དེ་ནི་སྒྲུབ་པར་བྱེད་པ་མ་ཡིན་ལ་དགག་པར་བྱ་བ་མེད་པའི་རྟགས་མ་ཡིན་ཏེ་དམིགས་པ་ཡང་དེ་མེད་པའི་སྒྲུབ་པར་བྱེད་པ་མ་ཡིན་པར་ཕྱི་མས་བཤད་པར་བྱའོ། །དེའི་དོན་ནི་རེ་ཞིག་གི་སྒྲའོ། །ཅིའི་ཕྱིར་གཞན་ཡོད་པ་སྒྲུབ་བྱེད་མ་ཡིན་ཞེ་ན། གང་ཞིག་གྲུབ་ན་ཞེས་བྱ་བ་སྨོས་ཏེ། དངོས་པོ་ལ་གྲུབ་པར་གྲགས་པའོ། །གང་གཞན་གྱི་དངོས་པོ་མི་འགྲུབ་པ་ནི་མ་གྲགས་པའོ། །དེའི་དངོས་པོ་དེ་ནི་དངོས་པོ་དོན་དངོས་པོའི་རྟགས་ཅན་དུ་འགྱུར་རོ་ཞེས་འདིར་རྟགས་དང་རྟགས་ཀྱི་རིགས་པའོ། །འདིར་དབེན་ནི་མེ་དང་དུ་བ་ལྟ་བུའོ། །ཇི་ལྟར་གང་གི་ཚེ་དུ་བ་རྟོགས་པ་མེ་མི་རྟོགས་པ་དེའི་ཚེ་དེ་དག་རྟགས་དང་རྟགས་ཅན་གྱི་དངོས་པོར་འགྱུར་ཏེ། དུ་བ་རྟོགས་པའི་དུས་སུ་མི་རྟོགས་པ་ནི་མ་ཡིན་ནོ། །གལ་ཏེ་དེ་ལྟ་ན་དེས་ཅི་སྟེ་ཞེ་ན། གཞན་ཞེས་བྱ་བ་སྨོས་ཏེ། ཡོད་པ་ནི་དངོས་པོའི་ངོ་བོ་གང་ཡིན་པ་དེར་གྲུབ་པ་ཉིད་དེ་རྟོགས་པའོ། །དེ་མེད་པ་ནི་དགག་པར་བྱ་བ་དེ་མེད་པའོ། །གྲུབ་པ་ནི་རྟོགས་པའོ། །གཞན་ཡོད་པ་ཉིད་དེ་མེད་པའི་བདག་ཉིད་ཡིན་པའི་ཕྱིར་དེ་གྲུབ་པ་ཉིད་ཀྱིས་དེ་གྲུབ་པའི་མཚན་ཉིད་ཡིན་པའི་ཕྱིར་རོ། །རིགས་པ་ཅན་ཡང་དགག་པར་བྱ་བ་ནི་མེད་པར་དགག་པའི་བདག་ཉིད་ཅན་མེད་པའི་ངོ་བོ་ཡིན་པ་དེ་ནི་ཇི་ལྟར་གཞན་ཡོད་པའི་ངོ་བོ་ཡོད་པ་དང་མེད་པ་དག་འགལ་བ་མེད་པར་འགྱུར། ཇི་ལྟར་གཞན་ཡོད་པར་གྲུབ་པ་ཉིད་ཀྱིས་དེ་མེད་པར་གྲུབ་པར་འགྱུར་སྙམ་དུ་སེམས་ན་དེ་ལས་ཞེས་བྱ་བ་སྨོས་ཏེ། དེ་མེད་པའི་ཕྱོགས་ཀྱི་མཚན་ཉིད་ཡིན་
པ་དེའི་ཕྱིར་གཞན་དགག་པར་བྱ་བ་བུམ་པ་ལ་སོགས་པའོ། །མ་འདྲེས་པའི་ངོ་བོ་ནི་སྤངས་པའི་བདག་ཉིད་ཉི་ཚེ་དགག་པར་བྱ་བས་སྟོང་པའི་བདག་ཉིད་དོ། །འདིས་ནི་ས་ཕྱོགས་ཉི་ཚེ་ཡང་མེད་པར་དགག་པའི་བདག་ཉིད་དུ་སྨྲ་ན་ནི་ཇི་ལྟར་ཡོད་པ་ཅི་ཡང་མ་ཡིན་པའི་ངོ་བོ་ནི་རང་བཞིན་དང་འགལ་བར་འགྱུར་རོ་ཞེ་ན། གཞན་གྱི་ངོ་བོས་དེ་ཡང་ཅི་ཡང་མ་ཡིན་པའི་ངོ་བོ་མ་ཡིན་པའི་ཕྱིར་རོ། །ཇི་ལྟ་བའི་ལྟོས་པ་མེད་པའི་དངོས་པོ་གཞན་མེད་པར་དགག་པ་དང་སྟོང་པ་དང་རྣམ་པར་རྟོག་པའི་སྣང་བ་དགག་པར་བྱ་བ་ཅི་ཡང་མེད་པའི་ངོ་བོ་དང་དེའི་ངོ་བོ་སྤངས་པ་ནི་དེ་ལྟ་བུ་དེ་ནི་གཞན་ཡོད་ཀྱང་དགག་པར་བྱ་བ་དང་མ་འདྲེས་པའི་ངོ་བོ་ཡིན་པ་དེའི་ཕྱིར་ཇི་ལྟར་འདི་དགག་པར་བྱ་བ་མེད་པའི་ངོ་བོ་ཕན་ཚུན་གྱི་བདག་ཉིད་ཅན་དུ་ཐལ་བར་འགྱུར་རོ། །དེའི་ཕྱིར་ངོ་བོ་ཡིན་གྱི་གཞན་གྱི་ངོ་བོས་ནི་མ་ཡིན་ནོ། །དེ་ལྟ་མ་ཡིན་ན་ཇི་ལྟར་གཞན་ཡོད་པ་འདི་གཞན་པའམ་དེ་ལ་མེད་པར་འགྱུར། གང་དང་གང་མེད་པར་མི་འགྱུར་བ་དེ་ཉིད་འདི་ཡིན་ཏེ། དེའི་ངོ་བོ་བཞིན་ནོ། །དེའི་ཕྱིར་འགྲོ་བ་ཐམས་ཅད་ཕན་ཚུན་གྱི་བདག་ཉིད་ཅན་དུ་ཐལ་བར་འགྱུར་རོ། །དེའི་ཕྱིར་དངོས་པོ་ཐམས་ཅད་གཞན་གྱི་ངོ་བོ་མེད་པར་ཡིན་ལ་རང་གི་ངོ་བོས་ངོ་བོ་ཉིད་ལ་གནོད་པ་མེད་དོ། །དེ་ལྟ་ན་ཅི་སྟེ་མེད་པར་དགག་པ་དང་མ་ཡིན་པར་དགག་པ་ཐ་དད་པ་ཡིན། ཅི་ཡང་མ་ཡིན་ནོ། །ལྟོས་པ་མེད་པ་འབའ་ཞིག་ངོ་བོ་གཞན་མེད་པ་ཙམ་ནི་མེད་པར་དགག་པ་ཡིན་ནོ་ཞེས་འཇིག་རྟེན་པ་བརྗོད་ལ་ངོ་བོ་གཞན་ལ་གཞན་གྱི་ངོ་བོས་སྟོང་པ་ནི་མ་ཡིན་པར་དགག་པའོ། །ངོ་བོ་གཞན་མ་ཡིན་ལ་གཞན་གྱི་ངོ་བོ་མེད་པ་ཙམ་མ་ཡིན་ཏེ། ངོ་བོ་གཞན་ལ་དེའི་ངོ་བོས་སྟོང་པར་ཉམས་སུ་མྱོང་བ་ཁོ་ན་ཡིན་ནོ། །ཇི་ལྟར་དེ་མེད་པར་དགག་པའི་བདག་ཉིད་དུ་འགྱུར། གཞན་གྱི་ངོ་བོའི་ཤུགས་ཀྱིས་དེ་ལས་དེ་རྟོགས་པ་ཡིན་ནོ་ཞེ་ན། མ་ཡིན་ཏེ་རྒྱུ་རྟོགས་པ་མེད་ན་ཤུགས་མི་སྲིད་པའི་ཕྱིར་རོ། །དེའི་བདག་ཉིད་དུ་མེད་པའི་མེད་པར་དགག་དུ་བའི་འབྲེལ་པ་ཡིན་ནོ། །འདུ་བ་དན་ཡུར་པར་རྟོགས་ཀྱི་གཞན་དུ་ནི་མ་ཡིན་ནོ། །དེ་འདིར་མ་འདྲེས་པའི་ངོ་བོ་ཅན་གང་ཡིན་པ་དེ་ཉིད་དགག་པར་བྱ་བ་མེད་པ་ཅི་ཡང་མ་ཡིན་པའི་ངོ་བོ་རྣམ་པར་འཇོག་པར་བྱེད་པའི་ཚད་
མ་མངོན་སུམ་གྱི་ངོ་བོ་དེ་ཁོ་ནས་དེ་དུས་ཕྱིས་འབྱུང་བ་མ་ཡིན་པའི་བུམ་པ་འདི་ན་མེད་དོ་ཞེས་བརྟགས་པས་དེ་གཟུང་བ་ལ་འཛིན་པའི་དྲན་པ་ཚད་མ་མ་ཡིན་པའི་ཕྱིར་གཞན་བུམ་པ་ལ་སོགས་པ་རྣམ་པར་གཅོད་པས་མེད་པ་གྲུབ་སྟེ། དེ་མེད་པའི་བདག་ཉིད་ཀྱི་ས་ཕྱོགས་དེས་བཟུང་བའི་ཕྱིར་རོ། །ས་ཕྱོགས་དང༌། བུམ་པ་དང་མ་འདྲེས་པའི་རྣམ་པ་གཉིས་པོ་འདི་ངོ་བོ་འདི་ཡང་ལྡོག་པའི་ངོ་བོ་ཡིན་ནོ། །དེའི་ཕྱིར་གཞན་པའམ་བུམ་པ་འབའ་ཞིག་ཀྱང་མ་ཡིན་པ་བུམ་པར་རྟོགས་པའི་རྟེན་ཡོད་པ་དེས་ན་རྣམ་པ་གཉིས་མངོན་སུམ་གྱིས་འཛིན་ཏེ། བུམ་པ་ལས་གཞན་པ་ཉིད་དང་བུམ་པས་སྟོང་བ་འཛིན་པར་འགྱུར་བའི་ཕྱིར་རོ། །དངོས་པོ་མ་འདྲེས་པ་གྲུབ་པར་བྱ་བའི་ཕྱིར་རམ་འདི་མེད་དོ་ཞེས་བྱ་བ་དེ་ལྟ་བུའི་ཕྱིར་ཚད་མ་གཞན་པ་རྩམ་པ་མ་ཡིན་ཕྱི་ནས་འདི་རྒྱས་པར་འཆད་པར་འགྱུར་བས་རེ་ཞིག་གཞག་གོ །གང་གི་ཕྱིར་གཞན་ཡོད་པར་འགྲུབ་པ་ཉིད་དེ་མེད་པར་བཤད་པའི་རིགས་པས་གྲུབ་པ་དེའི་ཕྱིར་གཞན་ཡོད་པ་ནི་མ་ཡིན་ནོ། །དགག་པར་བྱ་བ་མེད་པའི་རྟགས་གཉིས་པའི་རྒྱུ་བརྗོད་པ་ནི་འབྲེལ་པ་མེད་པའི་ཡང་ཕྱིར་ཞེས་བྱ་བ་སྨོས་ཏེ། གཞན་ཡོད་པ་དང་དེ་མེད་པ་དག་ལ་འབྲེལ་བ་ཅུང་ཟད་ཅིག་ཀྱང་ཡོད་པ་མ་ཡིན་པ་དེའི་ཕྱིར་གང་ལས་རྟགས་ཅན་གྱི་དངོས་པོ་ཡིན། དེ་ཡང་ན་མ་ཞིག་ཚེ་བརྗོད་པར་བྱ་ན། གང་གི་ཚེ་དེ་མེད་པའི་ངོ་བོ་ཉིད་གཞན་ཡོད་པའི་ངོ་བོར་ཁས་བླངས་པ་ལ་ལྟོས་པ་དེའི་ཚེ་གཞན་ཡོད་པ་ལས་ཐ་དད་པ་དེ་མེད་པ་ཅི་ཡང་མ་ཡིན་པའི་ངོ་བོ་གཞན་འདོད་པ་ན་ཡིན་ནོ། །དེ་ལྟ་མ་ཡིན་ན་གཞན་ཡོད་པ་ཉིད་དེ་མེད་པའི་ངོ་བོ་ཉིད་བཤད་པའི་རིགས་པས་དེའི་བདག་ཉིད་ཡིན་ན་ཇི་ལྟར་འབྲེལ་པ་མེད་པ་ཡིན། མངོན་སུམ་གྱིས་གྲུབ་པ་དེ་ཉིད་ཕྱོགས་གཞན་གྱིས་བྱེད་པར་མི་འགྱུར་ཏེ། དེ་དང་དེ་ཞེས་བྱ་བ་ལ་སོགས་པ་ལ་ལྟོས་པའི་སྒོ་ནས་འབྲེལ་པ་ནི་གཅིག་ལ་འདུ་བ་ཞེས་བྱ་བ་གཞན་གྱི་གཞུང་གིས་བཤད་པའོ། །གཞན་ནི་རིགས་པ་ཅན་ལ་སོགས་པས་བྱས་པ་དང་མི་རྟག་པར་བརྗོད་པ་ཐ་དད་པའི་ཆོས་ཆོས་ཅན་གཅིག་ལ་འདུ་བས་བྱས་པ་དང་མི་རྟག་པ་དག་ཆོས་ཅན་གཅིག་ལ་འདུ་བའི་འབྲེལ་པ་ཡིན་ནོ། །འདུ་བ་དང་འབྲེལ་པའི་དཔེ་གཞན་ནི་
འདིར་དོན་གཅིག་ལ་འདུ་བའི་ཕྱིར་ཡང་དག་པར་ལྡན་པ་ཉིད་ལ་འདུ་བའི་སྒྲས་བརྗོད་དོ། །ལྡན་པ་དང་འདུ་བ་དག་ནི་རྟག་པའི་ཕྱིར་ཐ་དད་པར་བཤད་པ་ལ་གུས་པར་མི་བྱེད་དོ། །ཕ་རོལ་པོས་མེ་དང་དུ་བ་དག་རང་གི་ཡན་ལག་ཅན་ལ་འདུ་བ་ཡིན་གྱི་དེ་གཉིས་དོན་གཅིག་ལ་ནི་འདུ་བ་མ་ཡིན་ཏེ། མེ་དང་དུ་བ་གཞན་གྱི་ལུགས་ཀྱིས་རྟེན་དང་བརྟེན་པའི་དངོས་པོ་ཡིན་ནོ་ཞེས་འཇིག་རྟེན་པས་འབྲེལ་པར་བཤད་དོ། །བསྐྱེད་པར་བྱ་བ་དང་སྐྱེད་པར་བྱེད་པ་ཞེས་བྱ་བ་ནི་དོན་དམ་པའི་འབྲེལ་པས་བྱས་པའོ། །འོ་ན་ནི་དོན་དམ་པར་མེ་ནི་སྐྱེད་པར་བྱེད་པའི་ཕྱིར་ཅིག་ཤོས་ནི་བསྐྱེད་པར་བྱ་བ་ཡིན་ན། དབང་ཕྱུག་སྡེ་དང་ལྷན་ཅིག་དཔྱད་པ་བྱས་ཟིན་པ་དེ་རིགས་པ་ཡུ་མཚན་དུ་བརྗོད་པའམ། སྣང་གཞན་ཡོད་ན་དེ་མེད་པ་དགལ་མི་སྲིད་ན་ཅི་སྟེ་བརྗོད་པ་ཡིན། བདེན་ཏེ་ཞར་ལ་བྱུང་བས་དེའི་འདོད་པ་ཡང་དགག་པའི་ཕྱིར་བཤད་དོ། །སྔར་གཞན་ཡོད་པ་མངོན་སུམ་གྱིས་གྲུབ་པའི་ཕྱིར་དགག་པར་བྱ་བ་མེད་པ་དེའི་དོན་ལ་མངོན་སུམ་ལས་གཞན་བརྟགས་ན་ནི་ཤིན་ཏུ་ཐལ་བར་འགྱུར་རོ། །ཞར་ལ་བྱུང་བ་བཤད་ནས་ད་ནི་འདི་བརྗོད་པར་བྱ་སྟེ། གང་གི་ཚེ་གཞན་ཡོད་པར་འཛིན་པར་མངོན་སུམ་གྱིས་གྲུབ་པ་དེ་མེད་པར་མི་འགྱུར་བ་དེའི་ཚེ་མངོན་སུམ་ལས་གཞན་པས་བུམ་པ་མེད་དོ་ཞེས་བྱ་བ་དེ་ལྟ་བུའི་རྣམ་པ་ཁྱད་པར་དང་ཁྱད་པར་དུ་བྱ་བ་ཡོད་པའི་མཚན་ཉིད་དང་ཉེ་བ་ལ་སོགས་པ་འདོད་པར་འགྱུར་རོ་སྙམ་ན། འབྲེལ་པ་མེད་ན་གཞན་ཡོད་ན་དེ་མེད་པ་དག་ཁྱད་པར་དང་ཁྱད་པར་དུ་བྱ་བའི་དངོས་པོ་མི་རིགས་ཏེ། ཧ་ཅང་ཐལ་བར་འགྱུར་བ་དེའི་ཕྱིར་གང་ལས་དེའི་མཚན་ཉིད་དང་ཉེ་བ་དེ་མེད་ན་མངོན་སུམ་དུ་འགྱུར་བ་ཡིན། དེ་ལྟར་འབྲེལ་པའི་རང་གི་ངོ་བོ་བཤད་པ་དེ་འདིར་མི་སྲིད་པ་ནི་དངོས་པོ་ཡོད་པ་དང་ཞེས་བྱ་བ་སྨོས་ཏེ། ཇི་ལྟ་བའི་བྱས་པ་དང་མི་རྟག་པ་དང་མེ་དང་དུ་བ་དག་དོན་གཅིག་ཏུ་འདུ་བ་ལ་སོགས་པའི་མཚན་ཉིད་ཀྱི་འབྲེལ་པ་ནི་ཡོད་པ་དང་མེད་པ་དག་ལ་དེ་ལྟ་བུ་འགའ་ཡང་མེད་དོ། །འབྲེལ་པ་དག་ནི་དེ་མེད་པ་གཞན་ཡོད་པ་ལ་སྒྲུབ་པར་བྱེད་པར་མི་འགྱུར་རོ། །དེ་ལྟ་ན་དོན་གཅིག་པའི་ཆོས་ཅན་ལ་གནས་པ་གནས་པ་གང་ཡིན་པ་དེ་དག་དོན་གཅིག་ལ་འདུ་བ་ཡིན་ཏེ། གཞན་ལ་ཡོད་པ་ནི་ས་ཕྱོགས་སུ་བཤད་དོ། །
རང་གི་ཡན་ལག་ཅན་ལ་གནས་པ་དེས་ན་དེ་ལ་བུམ་པ་མེད་པའོ། །དེ་ལྟ་ནས་ཕྱོགས་ཀྱི་ཆ་ཆས་ལ་བུམ་པ་མེད་དོ་ཞེས་བྱ་བ་ནི་ས་ཕྱོགས་མ་ཡིན་ནོ། །ས་ཕྱོགས་ཀྱི་ཡན་ལག་ཅན་ནི་རྩོམ་པ་མ་ཡིན་ཏེ། དེ་རྫས་ཀྱི་བདག་ཉིད་ནི་རྫས་ལས་གཞན་པ་ཉིད་ཀྱིས་རྩོམ་པས་བུམ་པའི་མེད་པ་ནི་རྫས་ནི་རྣམ་པ་དགུར་འདོད་དོ། །བྱ་བ་དང་ལྡན་པ་ལ་སོགས་པ་རྫས་ཀྱི་མཚན་ཉིད་ཡིན་ན་དེ་ལྟ་ཡོད་པ་མ་ཡིན་ནོ། །ཡོན་ཏན་གྱི་ངོ་བོས་དེ་ལ་འཇུག་པ་མེད་དོ། །ཡོན་ཏན་ནི་ཉི་ཤུ་རྩ་བཞི་ཉིད་དུ་འདོད་པ་འདི་དེ་དག་ལས་གཞན་པ་མ་ཡིན་ནོ།། ལས་ཀྱི་ངོ་བོ་རྣམ་པ་ལྔ་ནི་མ་ཡིན་ཏེ་རང་གི་ལས་དང་རང་གི་དེ་མ་ཐག་ཏུ་འབྱུང་བས་དེའི་མཚན་ཉིད་སྤངས་པའོ། །རྫས་གཅིག་ཅེས་བྱ་བ་ལ་སོགས་པ་དེའི་མཚན་ཉིད་རྣམས་སོ། །དེ་དང་དེ་དག་མེད་པ་ནི་མི་སྲིད་པ་ཡིན་ནོ། །སྤྱི་ལ་སོགས་པའི་ངོ་བོས་ཀྱང་མ་ཡིན་ཏེ། དེའི་ངོ་བོ་སྤངས་པའི་ཕྱིར་རོ། །གཞན་ཡོད་པའི་དེ་མེད་པ་དག་ལས་མེ་དང་དུ་བ་དག་བཞིན་དུ་ལྡན་པ་ནི་མེད་དེ། རྫས་ཉིད་དུ་དེ་ཁས་མ་བླངས་པའི་ཕྱིར་རོ། །དེ་མེད་པ་ནི་རྫས་ཡིན་ནོ་ཞེས་མ་བཤད་དོ། །རྟེན་དང་བརྟེན་པའི་དངོས་པོ་ཡང་མེད་དེ་སྣོད་འདི་ལ་རྒྱ་ཤུག་ཡོད་པ་བཞིན་དུ་གང་གི་ཕྱིར་དེ་ཡང་ལྡན་པའི་རྒྱུ་མཚན་དུ་བརྗོད་པའམ། སྣལ་མ་འདི་རྣམས་ལ་སྣམ་བུའི་ཞེས་བྱ་བ་ནི་འདུ་བའི་རྒྱུ་མཚན་ཡིན་ནོ། །མེད་པ་ནི་རྫས་ཀྱི་བདག་ཉིད་མ་ཡིན་ནོ། །ལྡན་པ་མ་ལུས་པ་ཡང་འདུ་བ་རྣམ་པ་ལྔ་ཉིད་ཀྱིས་རྫས་ལ་སོགས་པ་རྣམས་ལ་འདུ་བར་འདོད་ཀྱི་དངོས་པོ་མེད་པ་ནི་མ་ཡིན་ནོ། །རྣམ་པ་ལྔ་ནི་རང་གི་ནང་དུ་འདུས་པ་ཡིན་ཏེ། དེའི་བདག་ཉིད་ལ་ཕན་འདོགས་པ་མེད་པའི་ཡོད་པ་ནི་རྟེན་དུ་ཐ་སྙད་གདགས་པ་མི་སྲིད་དོ། །ཕན་འདོགས་པར་བྱེད་པ་ནི་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོར་འགྱུར་ན་དེ་མེད་པ་བསྐྱེད་བར་བྱ་བ་མ་ཡིན་ཏེ། འབྲས་བུ་ཐལ་བར་འགྱུར་རོ། །འབྲས་བུ་ཡང་འདིར་མི་སྲིད་དེ་གང་ལས་རང་གི་རྒྱུ་དང་འདྲ་བའམ་ཡོད་པ་དང་འདྲ་བ་འབྲས་བུས་བརྗོད་ན། ཁྱེད་གཞན་ཡོད་པས་ས་ཕྱོགས་སུ་བཤད་པ་རྒྱུ་མ་ཡིན་གྱི་འདི་ལྟར་རྣམ་པ་གསུམ་སྟེ། རྫས་དང་ཡོན་ཏན་དང་ལས་
རྣམས་ཀྱིས་རྫས་དགུར་འདོད་དོ། །མེད་པ་ནི་རྫས་ཀྱི་མཚན་ཉིད་མ་ཡིན་པས་ཡོད་པའི་འདུ་བ་ཡང་ཤེས་པ་ཡོད་པའི་ཡུལ་དེ་མེད་པར་འགྱུར་ན་མེད་པ་ནི་ཤེས་པའི་ཡུལ་མ་ཡིན་ནོ། །ས་ཕྱོགས་ཡོད་པ་ལ་ཡང་བུམ་པ་མེད་པ་སྲིད་པས་དེ་འབྲས་བུར་ག་ལ་འགྱུར། དེའི་ཡུལ་ཐ་དད་པ་ནི་མེད་དེ་རྣམ་པ་གཅིག་པའི་ཤེས་པའི་ཡུལ་ཡིན་པའི་ཕྱིར་རོ། འབྲེལ་པ་ཐ་དད་པས་ནི་ཐ་དད་པ་ཉིད་ནི་སྤྱི་ལ་ཡང་ཐལ་བར་འགྱུར་རོ། །འདུ་བ་ཡང་དེ་མ་ཐག་ཏུ་སུན་ཕྱུང་བས་རང་གི་རྒྱུ་ཡོད་པ་ལས་འབྱུང་བའི་ངོ་བོའི་འབྲས་བུ་དེ་མེད་པར་ག་ལ་འགྱུར་འདིས་ནི་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་ཡང་བསལ་ཏོ། །དེས་ན་རྣམ་པ་ཐམས་ཅད་དུ་འབྲེལ་པ་མེད་པའི་ཕྱིར་ཇི་ལྟར་གཞན་ཡོད་པས་དེ་མེད་པའི་སྒྲུབ་པར་བྱེད་པར་འགྱུར། འབྲེལ་པ་གཞན་བསྟན་པའི་ཕྱིར་གལ་ཏེ་ཡུལ་དང་ཞེས་བྱ་བ་ལ་སོགས་པ་སྨོས་ཏེ། དཔེར་ན་དོན་ནི་ཡུལ་ལོ། །སྒྲ་ནི་ཡུལ་ཅན་ནོ། །ཡུལ་དང་ཡུལ་ཅན་གྱི་དངོས་པོ་དེ་དག་འབྲེལ་པ་བཞིན་དུ་གཞན་ཡོད་པས་དེ་མེད་པ་དག་ཀྱང་ཡུལ་དང་ཡུལ་ཅན་གྱི་དངོས་པོའི་འབྲེལ་པ་ལས་འབྱུང་"བར་འགྱུར་རོ། །ས་ཕྱོགས་སུ་སྣང་བ་གཞན་ཡོད་པས་བུམ་པ་མེད་པར་ཤེས་པར་འགྱུར་རོ་ཞེས་བྱ་བ་ནི་ཕྱོགས་སྔ་མའི་དོགས་པའོ། །སྒྲ་དང་དོན་དག་འབྲེལ་པར་འགྱུར་རོ་ཞེ་མངོན་པར་འབྲེལ་པའི་ངོ་བོ་ཅི་ཞིག་ཡིན། རྒྱུ་དང་འབྲས་བུའི་མཚན་ཉིད་དོ། །ཡང་ཇི་ལྟར་དོན་གྱི་འབྲས་བུར་སྒྲ་འགྱུར། དེ་སྟོན་པ་ནི་དོན་སྟོན་པའི་བསམ་པ་ཡོད་པ་ལ་རྗོད་པར་འདོད་པ་ཡོད་པར་སྒྲའི་སྦྱོར་བས་སྒྲ་བརྗོད་པ་དེས་ན་དོན་རྗོད་པར་འདོད་པ་ལ་འཇུག་གོ །སྒྲ་ནི་རྒྱུ་དང་འབྲས་བུའི་མཚན་ཉིད་ཀྱི་འབྲེལ་པ་ནི་མེད་དོ། །གལ་ཏེ་ན་ཡང་སྒྲ་དང་དོན་དག་གི་སྤྱིའི་ངོ་བོ་ལ་བློས་ཡོངས་སུ་བརྟགས་པ་དེ་ལྟ་ན་ཡང་སོ་སོར་སྣང་བའི་རྗོད་པར་འདོད་པའི་སྒྲའི་སྤྱི་ལས་རྟོག་པ་དང་འབྲེལ་པའི་སྒྲ་ནི་རང་གི་མཚན་ཉིད་ཀྱིས་ཀུན་ནས་བསླང་བའི་སྒོ་ནས་རྒྱུ་དང་འབྲས་བུར་བརྗོད་དོ། །མེད་ན་མི་འབྱུང་བའི་མཚན་ཉིད་ཡིན་པར་གཞན་ལ་རབ་ཏུ་གྲགས་པར་བརྗོད་དོ། གཞན་ནི་མེད་ན་མི་འབྱུང་བའི་མཚན་ཉིད་ཀྱི་སྒྲ་དང་དོན་དག་ལ་འབྲེལ་
ཏོ་ཞེས་ཐ་སྙད་བྱེད་དོ། །དེས་ན་འབྲེལ་པའི་རྒྱུ་མཚན་ཡིན་ནོ། །གལ་ཏེ་ཉན་པ་པོ་དང་འཆད་པ་པོ་དག་ཡོད་པའི་ངོ་བོའི་ཡུལ་དང་ཡུལ་ཅན་གྱི་ངོ་བོར་རིགས་ཀྱི། དེ་མེད་པའི་གཞན་ཡོད་པ་དག་ཀྱང་དེ་བཞིན་དུ་འགྱུར་རོ་ཞེ་ན། རྣམ་པ་འདི་ཡང་ཞེས་བྱ་བ་སྨོས་ཏེ། རྣམ་པ་འདི་ནི་དེ་མེད་པ་གཞན་ཡོད་པ་ལས་མི་སྲིད་དོ་ཞེས་བཤད་མ་ཐག་པ་ཡིན་ནོ། །བུམ་པ་མེད་པར་བསྟན་པའི་བསམ་པ་ལ་ཡོད་པའི་ས་ཕྱོགས་ཀྱི་མཚན་ཉིད་གཞན་ཡོད་པར་རབ་ཏུ་སྦྱོར་བས་གྲུབ་པ་མེད་དོ། །བུམ་པ་མེད་པར་སྟོན་པའི་བསམ་པའི་སྔ་རོལ་དུ་ས་ཕྱོགས་རང་གི་རྒྱུ་ཁོ་ན་ལས་གྲུབ་པོ། །དེའི་བསམ་པ་ཡོངས་སུ་ཟིན་ཀྱང་གཞན་ཡོད་པ་དང་དེ་མེད་པ་དེ་ཡང་ཇི་ལྟར་རྒྱུ་དང་འབྲས་བུའི་དངོས་པོ་དེའི་སྒོ་ནས་སམ་མེད་ན་མི་འབྱུང་བ་ལས་འགྱུར། གང་གིས་ན་ཡུལ་དང་ཡུལ་ཅན་གྱི་དངོས་པོར་བརྟག་པར་བྱ་བ་ཡིན། གལ་ཏེ་ཇི་ལྟར་སྒྲ་དང་དོན་དག་བསྒྲུབ་པར་བྱ་བ་དང་སྒྲུབ་པར་བྱེད་པའི་རྒྱུ་མཚན་ཡུལ་དང་ཡུལ་ཅན་གྱི་དངོས་པོ་ཡིན་པ་དེ་ལྟར་གཞན་ཡོད་པ་དང་དེ་མེད་པ་དག་ཀྱང་རེ་ཞིག་དེ་ཙམ་གྱི་སྒྲ་དང་དོན་དག་གི་དཔེ་ཡིན་ནོ་ཞེ་ན། གྲུབ་ན་ནི་ཞེས་བྱ་བ་སྨོས་ཏེ། སྒྲ་དང་དོན་དག་ནི་རྒྱུ་དང་འབྲས་བུའི་དངོས་པོའི་རྒྱུ་མཚན་གྱིས་བསྒྲུབ་པར་བྱ་བ་དང་སྒྲུབ་པར་བྱེད་པ་ཡིན་གྱི། དེ་ལྟ་མ་ཡིན་ན་དོན་གཞན་པ་ཉིད་ནི་དེར་མི་རིགས་པའི་ཕྱིར་རོ། །དེ་བཞིན་དུ་འདིར་ཡང་དེ་མེད་པ་དང་གཞན་ཡོད་པ་དག་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོར་འགྲུབ་པར་འགྱུར་ན། དེའི་ཚེ་དེའི་སྒོ་ནས་ནི་བསྒྲུབ་པར་བྱ་བ་དང་སྒྲུབ་པར་བྱེད་པའི་སྒོ་ནས་སོ། །ཡུལ་དང་ཡུལ་ཅན་གྱི་དངོས་པོར་འགྱུར་ན། ཇི་སྲིད་དུ་དེ་ཉིད་བསྒྲུབ་བྱ་དང་སྒྲུབ་བྱེད་ཀྱི་དངོས་པོའི་འབྲེལ་པ་མེད་ན་རྒྱུ་དང་འབྲས་བུས་དངོས་པོ་གང་གིས་འགྲུབ་པར་འགྱུར། ཐམས་ཅད་བསྒྲུབ་བྱ་དང་སྒྲུབ་བྱེད་དུ་ཐལ་བར་འགྱུར་བའི་ཕྱིར་རོ། །གལ་ཏེ་ཇི་ལྟར་དབང་པོ་རང་གི་ཡུལ་དུ་འགྲུབ་པའི་རྒྱུ་མཚན་ཡིན་ཞེ་ན། ཕན་ཚུན་ཉེ་བར་འགྲོ་བ་ལ་སོགས་པ་བརྟེན་པའི་རྐྱེན་གྱི་ཁྱད་པར་ལ་སོགས་པའི་དབང་པོ་དང་ཡུལ་དག་རྣམ་པར་ཤེས་པ་གཅིག་བསྐྱེད་པར་ནུས་པས་
སྐྱེད་པའི་ཐ་སྙད་འདོགས་པ་དེ་བཞིན་དུ་འདིར་མ་ཡིན་ཏེ། གཞན་ཡོད་པ་དང་དེ་མེད་བ་དག་དེ་མི་རིགས་པའི་ཕྱིར་རོ། །རྟགས་དང་རྟགས་ཅན་གྱི་དངོས་པོའི་མཚན་ཉིད་ཀྱི་བསྒྲུབ་པར་བྱ་བ་དང་སྒྲུབ་པར་བྱེད་པ་རྣལ་མ་ཡིན་པའི་ཕྱིར། དེ་ལ་ཡང་འབྲེལ་པ་གཞན་པ་མི་རིགས་སོ། །འབྲེལ་པ་གཞན་པའི་རྒྱུ་མཚན་ནི་གཞན་ཡོད་པ་དང་དེ་མེད་པ་ལ་མེད་དོ། །གལ་ཏེ་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་ཡང་ཡུལ་དང་ཡུལ་ཅན་གྱི་དངོས་པོའི་རྒྱུ་མཚན་ཁོ་ན་ཡིན་ནོ་ཞེ་ན། དེ་ལྟ་མ་ཡིན་ན་ཞེས་བྱ་བ་སྨོས་ཏེ། འབྲེལ་པ་གཞན་མི་འདོད་ཀྱི་འོན་ཀྱང་ཡུལ་དང་ཡུལ་ཅན་ཡིན་པས་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་ཡིན་པ་དེའི་ཕྱིར་ཡུལ་དང་ཡུལ་ཅན་གྱི་དངོས་པོ་ཡིན་པ་དེས་འདི་གཅིག་ལ་གཅིག་བརྟེན་པ་ཡིན་པར་འགྱུར་རོ། །དེ་ལྟ་ན་ཡང་གཅིག་མ་གྲུབ་པས་གཉི་ག་ཡང་མ་གྲུབ་པ་ཡིན་ནོ། །གཞན་ཡང༌། གཞན་ཡོད་པར་གྱུར་པ་རྟགས་ལས་སོ། །མེད་པ་ནི་རྟགས་ཅན་ནོ། །རྗེས་སུ་དཔོག་པར་འདོད་པའོ། །འདི་སྤྱི་བསྒྲུབ་པར་བྱ་བར་འགྱུར་ན་གཞན་ཡོད་པས་དེ་མེད་པ་འབའ་ཞིག་ཉིད་སྒྲུབ་པའི་ཕྱིར་དང༌། འབའ་ཞིག་པ་ལ་འབྲེལ་པ་མེད་པ་མ་ཡིན་པའི་ཕྱིར་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་མི་རིགས་སོ། །སྤྱི་ཡང་ཁྱད་པར་དུ་བྱ་བ་དང་ཁྱད་པར་བྱེད་པ་ལ་བརྟེན་པའི་ཆོས་དང་ཆོས་ཅན་མཚན་ཉིད་བསྒྲུབ་པར་བྱ་བར་འདོད་པས་དེ་མེད་པ་ལ་སྐྱོན་དུ་ཡང་འགྱུར་བས་ཀྱང་སྨོས་པ་ཡིན་ནོ། །གལ་ཏེ་ཐམས་ཅད་ཀྱི་སྤྱི་བསྒྲུབ་པར་བྱ་བར་མི་འདོད་དོ་ཞེ་ན། དེ་ལྟ་ན་ཞེས་བྱ་བ་ལ་སོགས་པ་སྨོས་ཏེ། ཆོས་ཙམ་ཡང་རང་རྒྱུད་པའི་བསྒྲུབ་པར་བྱ་བར་ཁས་བླངས་པ་དེ་ལས་གཞན་ཡོད་པའི་ཕྱིར་བུམ་པ་མེད་དོ་ཞེས་བྱ་བ་དེ་ལྟ་བུའི་ངོ་བོ་བུམ་པ་ཡུལ་ཐམས་ཅད་དང་ཐམས་ཅད་ཀྱི་ཚེ་མེད་པར་ཐལ་བར་འགྱུར་རོ། །ཆོས་ཅན་ལ་ལའི་ཆོས་ཀྱི་ཡོན་ཏན་དུ་གྱུར་པ་སྒྲུབ་པར་བྱེད་པར་དེ་ཉིད་ལ་དེའི་ཚེ་ཁོ་ན་ཡོད་པར་རིགས་ཏེ་གཞན་དུ་ནི་མ་ཡིན་ནོ། །ཐམས་ཅད་དུ་སྤྱི་བསྒྲུབ་པར་བྱ་བར་ཁས་བླངས་པས་ཆོས་འབའ་ཞིག་ནི་མ་ཡིན་ནོ་སྙམ་ན་གཞན་གྱི་འདིར་མ་ཡིན་ཏེ་ཞེས་བྱ་བ་ལ་སོགས་པ་སྨོས་ཏེ། སྤྱི་བསྒྲུབ་པར་བྱ་བ་ལ་གཞན་ཡོད་ན་དེ་མེད་པ་འབྲེལ་པ་མེད་པ་ག་ལ་
ཡིན། ཕྱོགས་ལ་སོགས་པ་ཞེས་བྱ་བ་ལ་སོགས་པས་ནི། ས་ཕྱོགས་འདི་ལ་བུམ་པ་མེད་དོ་ཞེས་བྱ་བ་དེ་བཞིན་དུ་བུམ་པ་མེད་པའི་ས་ཕྱོགས་ལ་སོགས་པ་ཆོས་ཅན་ཁྱད་པར་དུ་བྱེད་པ་ཡིན་ཏེ། བུམ་པ་དང་བཅས་པའི་ཕྱོགས་ལ་སོགས་པ་ཐ་དད་པར་རྣམ་པར་འཇོག་པའི་ཕྱིར་དེའི་ཁྱད་པར་གྱིས་ཐོབ་པ་ཡིན་ནོ། །བསྒྲུབ་པར་བྱ་བ་ནི་བུམ་པ་མེད་དོ་ཞེས་བྱ་བ་དེ་ལྟ་བུ་འབའ་ཞིག་མ་ཡིན་པར་ཆོས་ཅན་འགའ་ཞིག་ལ་ཡོན་ཏན་ཡོད་པར་སྟོན་པ་དེའི་ཕྱིར་སྤྱི་བསྒྲུབ་པར་བྱ་བ་ཡིན་པའི་ཕྱིར་གང་གིས་ནི་དེའི་སྐྱོན་འབྱུང་བར་མི་འགྱུར། ཁོ་བོ་ཅག་གི་ཕྱོགས་ལ་ནི་རྟགས་དང་རྟགས་ཅན་གཞན་པའི་བདག་ཉིད་མ་ཡིན་ལ་ཕྱོགས་ལ་སོགས་པའི་ཆོས་ཅན་ལ་འབྲེལ་པ་མེད་པར་ཐལ་བའི་སྐྱོན་དུ་མི་འགྱུར་རོ། །གཞན་ཡོད་པ་གང་ཞིག་ཡིན་སྙམ་ན་བུམ་པས་དབེན་པའི་ས་ཕྱོགས་ལ་སོགས་པའི་མཚན་ཉིད་ཕྱོགས་ཀྱི་ཆོས་ཅན་དང་དེའི་བདག་ཉིད་ཀྱི་འབྲེལ་པ་ཡོད་པའི་ཕྱིར་རོ། །དེ་ལྟ་ན་སྒྲ་ལ་སོགས་པའི་ཆོས་ཅན་ལ་བྱས་པ་ཉིད་དེའི་བདག་ཉིད་ཀྱི་མཚན་ཉིད་ཀྱི་འབྲེལ་པར་ཁྱེད་འདོད་པ་དེ་བཞིན་དུ་འདིར་ཡང་ཡོད་པ་ཡིན་ནོ་ཞེས་བསམས་ནས་དེ་ཡང་འབྲེལ་པའི་ཕྱིར་རོ་ཞེས་བྱ་བ་མི་རིགས་པ་བཤད་དོ་སྙམ་དུ་སེམས་ན་གྲུབ་པའི་མཐའ་སྨྲ་བས་ཀྱང་བསྒྲུབ་པར་བྱ་བའི་ཆོས་ཀྱི་མཚན་ཉིད་ཀྱི་རྟགས་ཅན་བུམ་པ་མེད་པ་དང༌། གཞན་ཡོད་པའི་རྟགས་དང་འབྲེལ་པ་མེད་པ་མ་ཡིན་ན་སྔར་བཤད་པའི་ཆོས་ཅན་ལ་མེད་པ་དེས་ན་ལན་འདི་དག་ལ་འབྲེལ་པ་ཅི་ཞིག་ཡོད་སྙམ་དུ་དགོངས་ནས། གཞན་ཡོད་པར་བཤད་པ་དང་ཆོས་ཅན་འབྲེལ་པ་མེད་པར་བསྟན་པ་ནི་མ་ཡིན་ཏེ་ཞེས་བྱ་བ་སྨོས་ཏེ་རྟགས་དང་རྟགས་ཅན་གྱི་འབྲེལ་པ་མེད་པ་མ་ཡིན་ཏེ་ཞེས་བྱ་བ་སྨྲས་པ་མ་ཡིན་ཏེ་ཞེས་བྱ་བར་སྦྱར་རོ། །དེ་ལྟར་སྤྱི་སྒྲུབ་པར་བྱེད་པ་མ་ཡིན་པས་འོན་ཀྱང་རྟགས་དང་རྟགས་ཅན་གྱི་འབྲེལ་པ་མེད་པ་ཉིད་དང་སྤྱི་སྒྲུབ་པ་མེད་པར་དེ་བཞིན་དུ་བརྗོད་པའི་ཕྱིར་རོ། །ཆོས་ཅན་དུ་རྣམ་པར་གཞག་པ་ནི་གཞན་ཡོད་པ་ཡིན་པའི་ཕྱིར་གཞན་ཡོད་པའི་མཚན་ཉིད་རྟགས་ཡིན་ན་ཕྱོགས་ལ་སོགས་པ་ག་ལ་ཡིན། འདི་དག་བསྟན་པ་ནི་ཕྱོགས་གང་ཁོ་ན་
ལ་ཆོས་ཅན་དུ་ཁྱེད་ཀྱི་བརྟགས་པ་ལ་བུམ་པ་ལ་སོགས་པ་མེད་དོ་ཞེས་བརྗོད་དོ། །འཇིག་རྟེན་པས་ཕྱོགས་ལ་སོགས་པ་དེ་ཉིད་ལ་བུམ་པ་ལ་སོགས་པ་དེ་དང་འདྲེ་བ་མེད་པ་སྟེ། ཚོགས་པས་བྱས་པ་སྤངས་པའི་གཞན་ཡོད་པ་རྟགས་སུ་འདོད་བ་ལས་གཞན་ནི་འགའ་ཡང་མེད་དོ། །གང་གི་ཕྱིར་དེ་མཐོང་བ་ཁོ་ནས་ནི་བུམ་པ་དང་མ་འདྲེས་པའི་ཕྱོགས་ལ་སོགས་པ་མཐོང་བ་ཁོ་ནས་རྟོགས་པར་བྱེད་པ་པོས་འདི་ན་བུམ་པ་མེད་དོ་སྙམ་པའི་རྣམ་པར་རྟོག་པ་རྟགས་ཅན་གྱི་ཤེས་པ་དེ་དག་ཁས་བླངས་པ་དེ་ཉིད་ཀྱི་ཕྱིར་གཞན་ཡོད་བའོ། །གང་ཁོ་ན་མཐོང་བ་རྣམས་རྟགས་ཀྱི་ཤེས་པ་སྐྱེད་པ་དེ་ཁོ་ན་རྟགས་སུ་བརྗོད་དོ། །བུམ་པ་དང་མ་འདྲེས་པའི་ཕྱོགས་ལ་སོགས་པ་ཁོ་ན་ཡིན་པ་དེའི་ཕྱིར་གཞན་ཡོད་པའི་མཚན་ཉིད་དེ་ཉིད་རྟགས་སུ་ཁས་བླངས་པ་དེས་ན་ཇི་ལྟར་དེ་ཁོ་ན་གཞན་ཡོད་པ་ལ་ལྡོག་པ་ཡིན་དུ་ཟིན་ཀྱང་རྟགས་དང་རྟགས་ཅན་གྱི་དངོས་པོ་སྟེ་རྟགས་ཉིད་དང་རྟགས་ཅན་ཉིད་ཐ་དད་པར་འགྱུར། ཆོས་ཅན་དུ་གྱུར་པ་རྟགས་ཉིད་དུ་འོས་པ་མ་ཡིན་ཏེ། ཆོས་རྟོགས་པ་ཉིད་ལས་བསྒྲུབ་བྱ་རྟོགས་པའི་རྗེས་སུ་འགྲོ་བ་ལ་སོགས་པའི་རྗེས་སུ་འབྲང་བར་མི་རིགས་པའི་ཕྱིར་རོ། །དེ་ལས་གཞན་པའི་ཆོས་ཅན་མེད་པའི་ཕྱིར་རོ། །ཇི་ལྟར་གཞན་ཡོད་པའི་བདག་ཉིད་དེ་རྟགས་སམ་སྤྱི་བསྒྲུབ་བྱར་སྦྱར་བར་བྱ། སྒྲ་དང་བྱས་པ་ཉིད་ཀྱང་དོན་དམ་པར་ན་དེའི་བདག་ཉིད་ཡིན་དུ་ཟིན་ཀྱང་ལྡོག་པ་ཐ་དད་པའི་རྒྱུ་མཚན་ཡོད་པ་ཉིད་ཀྱིས་ཐ་དད་དོ། །དེས་ན་སྒྲ་ལ་སོགས་པ་ཆོས་ཅན་དུ་རྟོགས་ལ་མི་རྟགས་པ་ལ་སོགས་པ་ཡང་རྟོགས་པར་བྱས་པ་ཉིད་ལ་སོགས་པ་དེ་བསྒྲུབ་བྱར་འགྱུར་བ་ནི་རིགས་སོ། །གལ་ཏེ་སྤྱི་དང་བྱེ་བྲག་ཏུ་བརྟགས་ནས་རྟགས་དང་རྟགས་ཅན་དུ་ཡང་འགྱུར་རོ་སྙམ་དུ་སེམས་སོ་ཞེ་ན། གང་གིས་ན་ཞེས་བྱ་བ་སྨོས་ཏེ། འདིར་གཞན་ཡོད་པའི་རང་བཞིན་ལ་སྤྱི་དང་བྱེ་བྲག་གི་དངོས་པོར་བརྟག་པ་ཡང་མི་སྲིད་དེ་གང་གིས་ན་སྤྱི་དང་ཁྱད་པར་དུ་བརྟགས་ནས་སྤྱི་ནི་གཏན་ཚིགས་སུ་འགྱུར་ལ་ཁྱད་པར་ནི་ཆོས་ཅན་དུ་འགྱུར་བ་ཡིན། སྤྱི་བསྒྲུབ་པར་བྱ་བའི་དེ་རྟགས་དང་རྟགས་ཅན་དུ་འབྲེལ་པར་
འགྱུར་རོ། །གང་གིས་ན་མི་སྲིད་པ་ཡིན་ཞེ་ན། དེ་ཁྱད་པར་རྟོགས་བ་ཁོ་ནས་ཞེས་བྱ་བ་སྨོས་ཏེ། བུམ་པས་དབེན་པའི་ཕྱོགས་ཀྱི་ཁྱད་པར་དེ་ཁོ་ན་དེ་མེད་པ་སྟེ་བུམ་པ་མེད་པར་རྟོགས་པའི་ཕྱིར་དང༌། གང་གི་ཕྱིར་ཁྱད་པར་ཁོ་ན་བུམ་པ་མེད་པར་རྟོགས་པའི་རྒྱུ་མཚན་ཡིན་པ་དེའི་ཕྱིར་ཅི་དེ་ལ་སྤྱིར་རྟོགས་པར་བྱེད་པ་ནི། གལ་ཏེ་དེ་ཉིད་ཀྱི་ཁྱད་པར་གཞན་ལ་འཇུག་པས་སྤྱིའི་ངོ་བོར་རྟོགས་པར་འགྱུར་རོ་ཞེ་ན། བུམ་པས་དབེན་པའི་ཕྱོགས་ཀྱི་ཁྱད་པར་དེ་ཡང་གཞན་རིགས་མཐུན་པ་ལ་རྗེས་སུ་འགྲོ་བ་དང་རྗེས་སུ་འཇུག་པ་མེད་པའི་ཕྱིར་གང་ལས་སྤྱིའི་བདག་ཉིད་དུ་འགྱུར། འདི་ཡུལ་དང་དུས་དང་གནས་སྐབས་ངེས་པའི་བྱེ་བྲག་རྣམས་ནི་གཞན་གྱི་རྗེས་སུ་འགྲོ་བ་མེད་པའི་ཕྱིར་རོ། །འདི་ཉིད་ཀྱི་གཏན་ཚིགས་ལྷག་པར་བསྟན་པ་ནི་དམ་བཅའ་བའི་དོན་ཞེས་བྱ་བ་ལ་སོགས་པ་སྨོས་ཏེ། གང་གི་ཚེ་བུམ་པས་དབེན་པའི་ཕྱོགས་ཀྱི་ཁྱད་པར་གྱི་ཆོས་དེ་ཁོ་ན་གཏན་ཚིགས་སུ་འདོད་པ་དེའི་ཚེ་དམ་བཅའ་དོན་ཆོས་དང་ཆོས་ཅན་གྱི་སྤྱི་ཡིན་ལ་དེའི་ཕྱོགས་གཅིག་ཆོས་ཅན་གྱི་མཚན་ཉིད་གཏན་ཚིགས་སུ་འགྱུར་རོ། །དམ་བཅའ་བའི་དོན་གྱི་ཕྱོགས་གཅིག་ལྡོག་པ་ཡིན་ཡང་ཐ་དད་པར་ཉམས་སུ་མ་མྱོང་བས་གཏན་ཚིགས་མ་གྲུབ་པ་ཡིན་ནོ། །འོན་ཏེ་དེ་དག་གི་སྐྱོན་དུ་མ་གྱུར་ཅིག་སྙམ་ནས་བུམ་པས་དབེན་པའི་ཕྱོགས་ཀྱི་བྱེ་བྲག་གཏན་ཚིགས་སུ་མི་འདོད་ན་བུམ་པས་དབེན་པའི་བྱེ་བྲག་སྤངས་པའི་ཕྱོགས་ཙམ་ཡིན་ནོ་ཞེ་ན། གང་ན་ཕྱོགས་ཙམ་ཡོད་པ་དེ་ལ་བུམ་པ་མེད་པ་ཡང་མ་ཡིན་ནོ་ཞེས་བྱ་བ་སྨོས་ཏེ། བུམ་པ་དང་བཅས་པའི་ཕྱོགས་ཀྱང་ཕྱོགས་ཙམ་ལ་ཡོད་པས་གཏན་ཚིགས་མ་ངེས་པར་འགྱུར་རོ། །ཕ་རོལ་གྱིས་སྤྱི་དང་བྱེ་བྲག་གི་དངོས་བོ་དེ་ལྟ་མ་ཡིན་པར་བསྟན་པ་ནི་དེ་དང་འདྲ་བ་ཅི་འདྲ་བ་ཅི་འདྲ་བའི་བུམ་པས་དབེན་པ་འབའ་ཞིག་པ་འདིའོ། །ཕྱོགས་ནི་མདུན་ན་གནས་པའོ། །དེ་དང་འདྲ་བའི་ཕྱོགས་ཐམས་ཅད་ལ་བུམ་པ་མེད་པ་ཁོ་ན་ཡིན་པས་གང་གིས་མ་ངེས་པར་འགྱུར། རྣམ་པ་དེ་ལྟ་བུའི་ཕྱོགས་ཀྱི་བྱེ་བྲག་རྟོགས་པ་ཉིད་བུམ་པ་མེད་པ་རྟོགས་པ་ཡིན་པ་དེའི་ཕྱིར་གཞན་ཡོད་པ་ན་དེ་མེད་པ་དག་རྟགས་དང་རྟགས་ཅན་དུ་མི་འཐད་པ་ཉེ་བར་
བསྟན་པ་ནི་དེ་ནི་འབའ་ཞིག་ཅེས་བྱ་བ་ལ་སོགས་པ་སྨོས་ཏེ། གང་འབའ་ཞིག་བ་ནི་འདི་ཕྱོགས་ཀྱི་བྱེ་བྲག་གི་ཆོས་ཅན་དུ་རྣམ་པར་གཞག་པ་དེ་འབའ་ཞིག་གང་ཡིན་པ་དེ་ནི་འབའ་ཞིག་པ་ཞེས་བྱ་བ་ཁྱོད་ཀྱིས་བྱེ་བྲག་ཏུ་བརྗོད་པ་འདིས་བུམ་པ་སྤངས་པ་འདི་ཉིད་བུམ་པ་མེད་པ་ཡིན་ནོ་ཞེས་སྨྲས་པ་ཡིན་ནོ། །དེ་ཡང་བུམ་པ་སྤངས་པ་རྟགས་སུ་གྱུར་པ་འབའ་ཞིག་པའི་ཕྱོགས་རྟོགས་པ་ཁོ་ནའི་ཚེ་གྲུབ་པ་ཡིན་གྱི་དུས་ཕྱིས་ནི་མ་ཡིན་ནོ། །དེའི་ཕྱིར་རྣམ་པ་གཞན་ཁོ་ནའི་སྒོ་ནས་དུ་བ་ལ་སོགས་པའི་མེ་བསྒྲུབ་པར་བྱ་བ་ཡིན་པ་དེས་ན་རྟོགས་པ་ལས་བསྒྲུབ་པར་བྱ་བ་རྟོགས་པ་ཡིན། རྟགས་དང་རྟགས་ཅན་ནི་འགའ་ཞིག་ཀྱང་ཡོད་པ་མ་ཡིན་ཏེ། ཤེས་པར་འདོད་པ་ལ་བུམ་པ་མེད་པ་གྲུབ་ན་གང་འགའ་ཞིག་ནི་ཤེས་པར་མི་འདོད་པའི་ཕྱིར་རོ། །ཕྱོགས་འགའ་ཞིག་པ་རྟོགས་པ་ཉིད་དང༌། བུམ་པ་སྤངས་པ་རྟོགས་པ་གང་ཡིན་པ་འདི་དག་དུས་ཕྱིས་གང་དང་གང་ཕྱོགས་འབའ་ཞིག་པ་དེ་དང་དེ་ནི་བུམ་པ་སྤངས་པ་ཡིན་ནོ་ཞེས་བྱ་བའི་རྗེས་སུ་འགྲོ་བ་སྨོས་པའི་རྗེས་སུ་འབྲང་བ་དོན་མེད་དེ་བསྒྲུབ་པར་བྱ་བ་དང་པོར་རྟོགས་པའི་ཕྱིར་རོ། །གང་གི་ཕྱིར་དེ་ལྟར་དེ་ལྟ་བས་ན་གཞན་ཡོད་པ་འབའ་ཞིག་ས་ཕྱོགས་ཀྱི་མཚན་ཉིད་ནི་བསྒྲུབ་པར་བྱ་བ་དང་སྒྲུབ་པར་བྱེད་པ་བྱེ་བྲག་མེད་པས་དངོས་པོ་མེད་པ་སྒྲུབ་པ་མ་ཡིན་པ་དེ་ལྟར་ན་སྤྱི་བསྒྲུབ་པར་བྱ་བ་དེ་ཡང་རྟགས་དང་རྟགས་ཅན་གྱི་འབྲེལ་པ་བསྟན་པས་གཞན་གྱི་ཕྱོགས་ལ་སོགས་པའི་ཆོས་ཅན་གྱི་ཁྱད་པར་ལ་མེད་པ་སྒྲུབ་པར་བྱེད་པའི་ཕྱིར་རོ་ཞེས་གང་བཤད་པ་ལ་དེ་ཐ་དད་པར་མ་གྲུབ་པའི་ཕྱིར་སུན་འབྱིན་པས་བསལ་བ་ཡིན་ནོ། །ཡུལ་དང་ཡུལ་ཅན་དུ་གྱུར་པའི་འབྲེལ་པ་ཡང་བསལ་བས་ཕ་རོལ་པོ་བསྒྲུབ་པར་བྱ་བ་དང་སྒྲུབ་པར་བྱེད་པ་ལ་འབྲེལ་པ་གཞན་སྟོན་པ་ནི་གལ་ཏེ་འགལ་བའི་ཞེས་བྱ་བ་སྨོས་སོ། །གཞན་ཡོད་པ་དང་དེ་མེད་པ་དག་ལ་འགལ་བའི་འབྲེལ་པ་ཡོད་པར་བཤད་པ་དེའི་འབྲེལ་པ་ཡོད་པས་གཞན་ཡོད་པ་ལས་དངོས་པོ་མེད་པར་གྱུར་པར་འདོད་ཅེ་ན། གྲུབ་པའི་མཐའ་སྨྲ་བས་བསྒྲུབ་པར་བྱ་བ་དང་སྒྲུབ་པར་བྱེད་པ་དག་ལ་འགལ་བ་མི་སྲིད་པས་གང་ཞིག་གང་དང་འགལ་ཞེས་གང་ཞིག་
དྲིས་པའོ། །སྒྲུབ་པར་བྱེད་པ་དང་བསྒྲུབ་པར་བྱ་བ་དག་ལ་འདིར་འགལ་བ་མི་སྲིད་དོ་ཞེས་བསམས་པ་ཡིན་ནོ། །གཞན་འགལ་བར་མངོན་པར་འདོད་པ་མི་ཤེས་པས་སྟོན་པ་ནི་གཞན་མེད་པའི་ཕྱོགས་འབའ་ཞིག་གི་བདག་ཉིད་དང་ཟླ་བོ་ནི་གང་མེད་པའོ། །འཇལ་བར་འདོད་པས་བུམ་པ་ལ་སོགས་པ་དེ་ཡིན་ནོ་ཞེས་ཕ་རོལ་པོས་དེ་ལྟར་སྨྲས་པ་ནི་མ་འབྲེལ་པར་བརྗོད་པར་བསྟན་པ་ནི་ཅི་ཞེས་བྱ་བ་སྨོས་ཏེ། ཟླ་བོར་འདོད་པའི་བུམ་པ་ལ་སོགས་པ་འཇལ་བར་འདོད་པར་གང་གིས་ཟླ་བོ་གཞལ་བར་བྱ་བ་ཉིད་ཀྱིས་རྟགས་དང་རྟགས་ཅན་ལ་འགལ་བའི་འབྲེལ་པ་བརྗོད་པ་ནི་མེད་དོ། །གལ་ཏེ་ཟླ་བོ་འཇལ་བར་བྱེད་པར་འདོད་པ་ནི་མ་ཡིན་ཏེ་འོན་ཀྱང་དེ་མེད་པ་ཡིན་ནོ་ཞེ་ན། དངོས་པོ་མེད་པའི་ཟླ་བོ་ཞེས་བྱ་བ་སྨོས་ཏེ་བསྒྲུབ་པར་བྱ་བའོ། །དེ་དང་གཞན་ཡོད་པ་དང་འགལ་བ་མེད་པ་ཉིད་དོ། །གང་ལས་ཤེ་ན་ལྷན་ཅིག་གནས་པའི་ཕྱིར་རོ། །ཟླ་བོ་དངོས་པོ་མེད་པ་དང་གཞན་ཡོད་པ་དག་ལྷན་ཅིག་གནས་པའི་ཕྱིར་རོ། །འདི་གང་གཞན་གྱི་འདོད་པ་ལ་ལྟོས་ནས་བརྗོད་པ་ཡིན་གྱི་དེ་ལྟ་མ་ཡིན་ན་གང་ཁོ་ནའི་ཕྱོགས་འབའ་ཞིག་དེ་ཁོ་ན་བུམ་པ་མེད་པ་ཡིན་ནོ་ཞེས་བསྟན་པས་གང་ཞིག་གང་དང་ལྷན་ཅིག་གནས་པ་ཡིན་ཏེ། དེ་ལ་གཞན་ཡོད་པ་དང་ལྷན་ཅིག་གནས་པའི་དེ་མེད་པའི་གཞལ་བར་བྱ་བ་ལ་རྟགས་དང་རྟགས་ཅན་དག་ཇི་ལྟར་འགལ་བ་ཡིན། རྣམ་པ་འགའ་ཞིག་ཀྱང་མ་ཡིན་ནོ་ཞེས་བྱའོ། །འབྲེལ་པ་མེད་པ་ཉིད་དེ་དག་ཡིན་པའི་ཕྱིར་རོ། །འདིར་ཡང་འགལ་བའི་འབྲེལ་པ་ལ་ལྟོས་ནས་གཞན་ཡོད་པ་ནི་རྟགས་ཡིན་པའི་ཕྱིར། གཞན་པའི་ཆོས་ཅན་མི་སྲིད་པས་སྤྱི་མེད་པ་སྒྲུབ་པར་བྱེད་པའི་གནས་སྐབས་ལ་གང་སྔར་གྱི་སྐྱོན་དེ་དང་དེར་བྱུང་བ་སོ་ན་འདུག་སྟེ་ཡོངས་སུ་སྤངས་པ་མེད་དོ། །འདི་ལྟར་ཕ་རོལ་གྱིས་འབྲེལ་པ་མེད་པར་རྣམ་པར་གཞག་པའི་གཞན་ཡོད་པར་རྟོགས་པས་དེ་མེད་པའི་རྟོག་པ་གྲུབ་པའི་མཐའ་ལ་མི་སྲིད་པར་གཞན་གྱིས་བསྟན་པ་ནི་མེད་པ་དང་ཞེས་བྱ་བ་ལ་སོགས་པ་སྨོས་ཏེ། གཞན་ཡོད་པར་རྟོགས་པ་ཉིད་ལས་དེ་མེད་པར་རྟོགས་པའི་ཕྱིར་རྟགས་དང་རྟགས་ཅན་གྱི་
དངོས་པོ་རྣམ་པར་འབྱེད་པ་ནི་གང་དང་གང་གཞན་ཡོད་པར་རྟོགས་པ་ལས་དེ་མེད་པར་རྟོགས་པར་སྔར་བཤད་པ་དེ་ཡང་གཞན་ཡོད་པས་དེ་མེད་པ་དག་ལ་འབྲེལ་པ་ཡོད་པར་གྱུར་ན་ཡིན་གྱི། རྟགས་དང་རྟགས་ཅན་འབའ་ཞིག་པས་ནི་མ་ཡིན་ནོ། །དེའི་ཕྱིར་ཁྱེད་ཀྱིས་གདོན་མི་ཟ་བ་དེ་དག་ལ་འབྲེལ་པ་འགའ་ཞིག་འདོད་པར་བྱ་དགོས་ན་དེ་ཉིད་ཁོ་བོ་ཡང་འདོད་པ་ཡིན་ནོ་ཞེ་ན། གྲུབ་པའི་མཐའ་སྨྲ་བས་འབྲེལ་པ་ཞེས་བྱ་བ་སྨོས་ཏེ། འབྲེལ་པ་གང་ལས་ཅུང་ཟད་ཅིག་འབྲེལ་པ་ལ་བརྟེན་པ་གཞན་ཡོད་པས་དེ་མེད་པ་ཤེས་པར་བྱེད་པར་མི་འདོད་ཀྱི། འོན་ཀྱང་ཁོ་བོ་ནི་གཞན་ཕྱོགས་འབའ་ཞིག་ཡོད་པ་ཁོ་ན་དེ་གཞན་བུམ་པ་ལ་སོགས་པ་མེད་པ་ཡིན་ནོ། །གཞན་ཡོད་པ་ལས་གཞན་དུ་གྱུར་པ་ཅི་ཡང་མ་ཡིན་པའི་ངོ་བོ་ཡིན་པའི་ཕྱིར་ཞེས་སྔར་འདི་དག་བཤད་ཟིན་ཏོ། །གཞན་ཡོད་པ་ལ་ཡང་དེ་མེད་པ་ཡིན་ནོ་ཞེས་ཐ་སྙད་བཏགས་པ་ནི་འདིར་རིགས་པ་ཅན་སུན་འབྱིན་པ་ཡིན་ནོ། །གང་གི་ཚེ་དེ་ལྟ་ཡིན་པ་དེའི་ཚེ་དེ་གཞན་ཡོད་བ་དང་གཞན་བུམ་པ་ལ་སོགས་པ་དང་མ་འདྲེས་པ་ནི་ལྷན་ཅིག་པའི་ངོ་བོ་གང་ཡིན་པ་དེ་ལྟར་ནི་མ་ཡིན་ནོ། །གཞན་མ་ཡིན་པ་དང་འདྲེ་བའི་ངོ་བོ་འདི་དག་ཉིད་སྟོན་པ་ནི་འབའ་ཞིག་པ་ཞེས་བྱ་བ་ནི་ཉི་ཚེ་བ་ཉིད་དུ་བརྗོད་དོ། །བདག་ཉིད་ཀྱི་རང་བཞིན་དུ་རྣམ་པར་གནས་པ་ཡིན་ཏེ་དེའི་བདག་ཉིད་གཞན་དང་ལྷན་ཅིག་པ་མ་ཡིན་པའི་བདག་ཉིད་དུའོ། །དེའི་ནུས་པ་ལས་བྱུང་བ་དེའི་ངོ་བོ་ཉིད་དུ་རྗེས་སུ་བྱེད་པའི་མངོན་སུམ་གྱིས་ཡོངས་སུ་གཅོད་པ་དེ་ཉིད་གཞན་བུམ་པ་ལ་སོགས་པ་དེ་ལ་ཡོད་པ་རྣམ་པར་གཅོད་དོ། །རྣམ་པར་མི་གཅོད་པར་མེད་པ་རྟོགས་པ་ཡིན་ན་ནི་གང་གིས་ན་གཞན་ཡོད་པས་དེ་མེད་པ་དག་གོ་བར་བྱ་བ་དང་གོ་བར་བྱེད་པའི་དངོས་པོ་ཡིན། གང་གི་ཕྱིར་དེ་དག་འབྲེལ་པ་ཡིན་པར་ཁོ་བོ་འདོད་དོ། གཞོན་ནུ་མ་ལེན་གྱིས་བསམ་པ་ཡོད་པའི་ཆ་ལས་ཐ་དད་པ་འདི་ཉིད་མེད་པའི་ཆ་ཡིན་པ་དེའི་ཕྱིར་གཞན་ཡོད་པ་དེ་མེད་པ་མ་ཡིན་པ་ཇི་ལྟར་དེ་རྟོགས་པ་ཡིན། འདི་ལྟར་འདི་མེད་པ་དང༌། སྔ་ན་མེད་པ་ལ་སོགས་པ་ཐ་དད་པས་ཐ་དད་པ་ནི་དངོས་པོ་མེད་པ་ལས་ཐ་དད་པ་མི་སྲིད་པས་འདི་དངོས་པོའི་ངོ་བོ་ཉིད་ཡིན་ནོ། །ཇི་སྐད་དུ་
དངོས་པོ་མེད་ལ་འདི་མི་འགྱུར། །ཐ་དད་དེས་ན་འདི་དངོས་ཡིན། །ཞེས་སྨྲས་སོ། །དངོས་པོའི་ཆ་ནི་དངོས་པོ་མེད་པའི་ཆར་མི་རུང་ངོ༌། །དེ་དབང་པོ་དང་ལྡན་པའི་འབྲེལ་པའི་སྟོབས་ཀྱིས་རྟོགས་ཀྱི། ཅིག་ཤོས་རྟོགས་པ་ཡང་དེ་དང་འབྲེལ་པའི་རྒྱུ་མེད་པའི་ཕྱིར་རོ། །དེ་སྐད་དུ། འབྲེལ་དེ་ཡོད་པས་དེ་བཞིན་དུ། །ཡོད་པའི་ངོ་བོར་རྟོགས་པ་ཡིན། །འདི་ལ་འདི་དང་འདིར་དེ་མེད། །འབྲེལ་མེད་པ་ཡི་རྒྱུ་ཅན་ཡིན། །ཞེས་བཤད་དོ། །དེ་ཇི་ལྟར་དེ་རྟོགས་པ་ཉིད་ལས་གཞན་རྣམ་པར་གཅོད་པ་ཡིན་ཞེ་ན། དེ་སུན་དབྱུང་བའི་ཕྱིར་དེ་ལས་གཞན་པ་རྟོགས་པ་ཞེས་བྱ་བ་སྨོས་ཏེ། ཕྱོགས་འབའ་ཞིག་པའི་བདག་ཉིད་གཅིག་པུ་ལྷན་ཅིག་པ་མེད་པ་དེ་ཉིད་གཞན་ཟླ་བོ་བུམ་པ་ལ་སོགས་པ་མ་ཚང་བ་མེད་པ་ཡིན་ནོ་ཞེས་བྱའོ། །དེའི་ཕྱིར་གཞན་གྱི་ཡོད་པ་ཁོ་ན་ལ་ཁྱོད་དངོས་པོའི་ཆའི་ངོ་བོར་མངོན་པར་འདོད་པའི་ཟླ་བོ་དངོས་པོ་མེད་པ་ནི་དེ་མ་ཡིན་ཏེ་ཐ་དད་པར་གྱུར་པའི་ཆོས་གཞན་ཡིན་ནོ་ཞེས་བརྗོད་དོ། །བདེ་བར་གཤེགས་པའི་སྲས་རྣམས་ནི་དེ་ལས་ཀྱང་དེ་རྟོགས་པ་ཉིད་དེ་དེ་ལས་གཞན་པ་ཡོད་པ་རྟོགས་པ་ཉིད་ད་མེད་པར་རྟོགས་པ་ཡིན་ནོ། །དེ་མི་རྟོགས་པ་ནི་དེའི་ཟླ་བོ་མི་རྟོགས་པ་སྟེ། མེད་པ་མི་རྟོགས་སོ་ཞེས་བྱ་བའི་དོན་ཏོ། །འདི་སྙམ་དུ་སེམས་ཏེ། གང་དང་གང་མེད་པའི་ཆ་དང་ཡོད་པའི་ཆ་དག་ཐ་དད་པར་གྱུར་པའི་དངོས་པོ་མེད་པའི་ཆོས་སུ་ཡོངས་སུ་བརྟགས་པ་ལ་བུམ་པ་དང་བཅས་པ་ལ་སོགས་པ་མེད་པའི་བདག་ཉིད་དེའི་ངོ་བོ་ནི་མ་ཚང་བ་ཉིད་ཉམས་སུ་མྱོང་བའི་གཞན་དུ་ནི་མ་ཡིན་ནོ། །དེ་ཡང་དེའི་ངོ་བོ་མ་ཚང་བ་གཞན་པའི་དངོས་པོའི་ཡོད་པའི་ཆ་ལ་ཡང་ཡོད་ན་དེ་མེད་པ་ཡིན་ཏེ་དེ་ལས་གཞན་པའི་དངོས་པོ་འདོར་བར་འགྱུར་བས་གང་དང་གང་གི་ངོ་བོ་མ་ཚང་བ་མ་ཡིན་པ་དེ་དང་དེ་ནི་གཞན་པ་ཉིད་དུ་རིགས་པར་མི་འགྱུར་ཏེ་དཔེར་ན་རང་གི་ངོ་བོ་བཞིན་ནོ། །མེད་པའི་ཆ་ཡང་དེར་མི་འགྲུབ་པས་སྣ་ཚོགས་པ་ཐམས་ཅད་ཀྱང་རྫས་གཅིག་ཏུ་ཐལ་བར་འགྱུར་བ་དང༌། དེས་ན་ལྷན་ཅིག་ཏུ་སྐྱེ་བ་ལ་སོགས་པ་ཐལ་བར་འགྱུར་བ་དང༌། ཐམས་ཅད་ཐམས་ཅད་ལ་སྦྱོར་བར་འགྱུར་བའི་ཕྱིར་གདོན་མི་ཟ་བར་གཞན་པའི་དངོས་པོ་ཡོད་པའི་ངོ་བོ་ཉིད་
དེ་གཞན་མེད་པའི་བདག་ཉིད་ཁོ་ན་ཡིན་པ་དེ་བཞིན་དུ་རྟོགས་པ་ཉིད་དེ། དེ་ལས་གཞན་པའི་ཡོད་པ་རྟོགས་པ་ནི་དབང་པོ་དང་འབྲེལ་པ་ཁོ་ནས་ཡིན་ལ་དེ་མེད་པ་ནི་མ་འབྲེལ་པ་ལས་སོ་ཞེས་བྱ་བས་ཅི་ཞིག་བརྗོད་ཅེ་ན། འདི་ལ་འདི་དང་འདིར་དེ་མེད་དེ། རྒྱུ་དང་འབྲེལ་པ་མེད་པ་ཡིན་ཞེས་བྱ་བ་རྣམ་པར་རྟོག་པ་ལ་ལྟོས་ནས་བརྗོད་པ་ཡིན་ནོ་ཞེ་ན་ནི་དེ་དང་དེ་ལ་གནོད་པ་མེད་དེ་མངོན་སུམ་གྱིས་དེའི་རྣམ་པར་སྐྱེས་ནས་གཞན་མེད་པ་དེའི་བདག་ཉིད་ཀྱི་དངོས་པོའི་ངོ་བོར་རྟོགས་པའི་ཕྱི་ནས་ཇི་ལྟར་འཛིན་པའི་མངོན་པར་བརྗོད་པའི་རྣམ་པར་རྟོག་པ་ཁས་བླངས་པའི་ཕྱིར་རོ། །རྒྱས་པར་ཚད་མ་གཉིས་སུ་བསྒྲུབ་པའི་གཞུང་གི་དངོས་པོ་མེད་པ་རྣམ་པར་དཔྱད་པ་དེ་དངོས་པོ་མེད་པའི་གཞལ་བྱ་དང་ཚད་མ་རྣམ་པར་དཔྱད་པ་བྱས་ཟིན་པས་དེ་ཉིད་དུ་བལྟ་བར་བྱའོ། །གདོན་མི་ཟ་བར་དེ་ལས་གཞན་ཡོད་པར་རྟོགས་པ་ཉིད་དེ་མེད་པར་རྟོགས་པ་ཡིན་པ་དེའི་ཕྱིར་དངོས་པོ་མ་འཁྲུལ་པ་སྒྲུབ་པའི་དོན་དང་འདི་ལ་འདི་མེད་དོ་ཞེས་བྱ་བ་མེད་པའི་ཐ་སྙད་ཀྱི་དོན་དུ་མེད་པའི་ཚད་མ་བརྟག་པ་ནི་མི་རིགས་པ་ཡིན་ནོ་ཞེས་བསྟན་པ་ནི་དེ་ལྟ་མ་ཡིན་ན་ཞེས་བྱ་བ་སྨོས་ཏེ། གང་གི་ཚེ་དེ་རྟོགས་པ་ཉིད་དེ་མེད་པར་རྟོགས་པར་མི་འདོད་པ་དེའི་ཚེ་དེ་ལས་གཞན་པའི་དངོས་པོའི་རང་གི་ངོ་བོ་ཡོངས་སུ་དེ་ལས་གཞན་པ་དེ་མ་ཡིན་པའི་ངོ་བོ་རྣམ་པར་གཅོད་པས་དེ་དངོས་པོ་མེད་པར་རྟོགས་པ་མི་སེལ་ན་དེ་ཡོངས་སུ་གཅོད་པ་ཉིད་དུ་མི་འགྱུར་ཏེ་དེ་ལས་གཞན་པའི་དངོས་པོའི་རང་གི་ངོ་བོ་རྟོགས་པ་ཉིད་དུ་མི་འགྱུར་རོ། །ཅིའི་ཕྱིར་ཞེ་ན། དེ་དང་དེ་མ་ཡིན་པའི་ངོ་བོ་ནི་དེ་དང་དེ་ལས་གཞན་པའི་ངོ་བོར་རྟོགས་པར་ངེས་སོ། །ཁམས་གསུམ་པོ་མ་ལུས་པའི་མཚན་ཉིད་མི་མཐུན་པ་གང་ཡིན་པ་དེ་མ་ཡིན་པའི་ངོ་བོ་དེའི་ངོ་བོར་མི་འགྱུར་ཏེ། གཞན་གྱི་ངོ་བོ་དེ་དག་རྣམ་པར་མ་ཕྱེ་བའི་ཕྱིར་རོ། །རྣམ་པར་མ་ཕྱེ་བས་རྣམ་པར་དབྱེ་བ་རྣམ་པར་མ་བཞག་པའི་ཕྱིར་རོ། །མ་འཆོལ་བ་རབ་ཏུ་མ་བསྒྲུབ་པའི་ཕྱིར་གཞན་མ་ལུས་པའི་ངོ་བོ་མི་འཆོལ་བ་དེའི་ངོ་བོའོ། །གལ་ཏེ་དེ་དང་དེ་ལས་བྱུང་བའི་མངོན་སུམ་གྱིས་དེ་བཞིན་དུ་རྗེས་སུ་མི་བྱེད་དེ་འབའ་ཞིག་བ་ལས་གྲོལ་བའི་རྣམ་པ་ཉིད་སྐྱེས་ན་ནི་དེའི་
ཚེ་ཇི་ལྟར་དེས་དེ་ཡོངས་སུ་གཅོད་པར་འགྱུར། གང་གི་ངོ་བོའམ་གང་གི་དངོས་པོ་དེའི་རྗེས་སུ་མི་བྱེད་པའི་ཤེས་པས་དེ་ཡོངས་སུ་གཅོད་པར་མི་རིགས་ཏེ། དཔེར་ན་དུང་དཀར་པོའི་རྗེས་སུ་མི་བྱེད་པས་མིག་སེར་གྱིས་དུང་སེར་པོར་སྣང་བའི་ཤེས་པ་བཞིན་ནོ། །སོ་སོར་ངེས་པའི་རྗེས་སུ་བྱེད་པ་ན་དེ་མ་ཡིན་པ་ཡོངས་སུ་གཅོད་པ་ཉིད་ཇི་ལྟར་གཞན་རྣམ་པར་མི་གཅོད་པ་ཡིན། དེས་ན་སོ་སོར་ངེས་པ་དེའི་ངོ་བོ་དེའི་རྗེས་སུ་མི་བྱེད་ན། དེ་ལས་གཞན་པ་རྣམ་པར་མི་གཅོད་དེ་དེ་ལྟ་ན་ཡང་དེ་ཡོངས་སུ་གཅོད་པ་མེད་དོ་ཞེས་བྱའོ། །དོ་ལྟར་ཡིན་ན་དེ་ལས་ཉེས་པ་ཅི་ཞིག་ཏུ་འགྱུར་ཞེ་ན། ལ་ལར་འགའ་ཞིག་ཅེས་བྱ་བ་སྨོས་ཏེ། སྐྱེ་བོ་ཐམས་ཅད་ཀྱིས་རྟོགས་པའི་མེ་ལ་སོགས་པ་འགའ་ཞིག་གི་དངོས་པོ་ཡུལ་ལ་ལར་མཐོང་ནས་དེ་དང་འབྲེལ་པ་ཐོབ་པའི་ཕྱིར་དང་མཐོང་བ་དེས་མ་མཐོང་བ་ཡོངས་སུ་སྤངས་པའི་ཕྱིར་འཇུག་པ་དང་ལྡོག་པའི་མཚན་ཉིད་དུ་མི་འགྱུར་ཏེ། ཅིའི་ཕྱིར་ཞེ་ན། ནི་ཞེས་བྱ་བ་གང་གི་ཕྱིར་ཏེ། མེ་ནི་མཐོང་ཡང་འདི་རྟོགས་པས་དེ་དང་དེ་མ་ཡིན་པའི་ངོ་བོ་འདྲེས་པར་སྣང་བ་ནི་མངོན་སུམ་གྱིས་སོ། །དེ་ལྟ་མ་ཡིན་ན་མཐོང་བའི་ངོ་བོ་ཉམས་པར་འགྱུར་རོ། །དེ་ལྟ་ན་མ་འདྲེས་པའི་ངོ་བོ་མ་མཐོང་ན་འདྲེས་པ་ཡང་གལ་ཏེ་མི་མཐོང་བས་དེའི་ཚེ་བོང་བ་ལ་སོགས་པའི་རྣམ་པ་ལྟ་བུ་འགའ་ཞིག་གིས་འདི་དག་ཇི་ལྟར་མཐོང་བར་འགྱུར། དེ་ལྟར་གྱུར་པ་དེ་ནི་འདྲེས་པར་མཐོང་བ་དང་ལྡན་པའི་མེ་ཉིད་མཐོང་བ་ན་ཆུ་ལ་སོགས་པ་ནི་མ་ཡིན་པར་རྟོགས་སོ། །འོན་ཀྱང་འདྲེས་པའི་ངོ་བོས་དངོས་པོར་སྣང་བའི་ཤེས་པ་དེས་ཇི་ལྟར་ཆུ་དོན་དུ་གཉེར་བ་མེའི་ཡུལ་དེ་ལ་འཇུག་པར་མི་འགྱུར། རང་གཞན་གྱི་ཚིག་གིས་དོགས་པའི་གོ་སྐབས་ནི་གལ་ཏེ་མི་དམིགས་པས་ཞེས་བྱ་བ་ལ་སོགས་པ་སྨོས་ཏེ། མི་སྣང་བའི་ཤེས་པ་ལ་མེའི་རང་གི་ངོ་བོ་ཉིད་རྟོགས་ཀྱི་ཆུ་མེད་པ་གང་ཡིན་པ་དེ་ནི་ཆུ་དེ་ལ་མི་དམིགས་པའི་ཤེས་པ་ཡིན་པ་དེས་ན་ཤེས་པ་གཉིས་དེ་དང་དེ་མ་ཡིན་པའི་ངོ་བོ་དག་རྣམ་པར་འབྱེད་པས་འཇིག་རྟེན་པ་འཇུག་པ་དང་ལྡོག་པའི་མཚན་ཉིད་སོ་སོར་ངེས་པའི་ཐ་སྙད་གྲུབ་པ་ཡིན་ནོ་ཞེ་ན། གྲུབ་པའི་མཐའ་སྨྲ་བས་མི་དམིགས་པ་
ཞེས་བྱ་བ་འདི་ཅི་ཞིག་ཅེས་བྱ་བ་སྨོས་སོ། །གཞན་གྱིས་སྨྲས་བ་རེས་འགའ་ཞིག་ཆུ་དམིགས་པ་སྤངས་པ་ཙམ་ཡིན་ནོ་སྙམ་ནས་གལ་ཏེ་ཆུའི་དམིགས་པ་ཞེས་བྱ་བ་ལ་སོགས་པ་སྨོས་ཏེ། གཞོན་ནུ་མ་ལེན་གྱིས་ཆུའི་དམིགས་པ་ལྡོག་པ་ཙམ་ཅི་ཡང་མ་ཡིན་པའི་ངོ་བོ་དངོས་པོ་མེད་པའི་ཚད་མ་ནི་མངོན་པར་འདོད་ཀྱི། མངོན་སུམ་ལ་སོགས་པ་མ་སྐྱེས་པས་ཚད་མ་དངོས་པོ་མེད་པར་བརྗོད་ཅེས་བྱ་བ་འམ། དེའི་བདག་ཉིད་ཡོངས་སུ་མ་གྱུར་པའམ་རྣམ་པར་ཤེས་པ་མེད་པ་སྟེ་དངོས་པོ་གཞན་དུ་བརྗོད་དོ། །འོན་ཀྱང་དེའི་བདག་ཉིད་བཀག་པའི་དངོས་པོ་གང་སྣང་བའི་ཤེས་པའི་བདག་ཉིད་ཡོངས་སུ་མ་གྱུར་པ་དེ་དང་དེ་ལས་གཞན་པའི་དངོས་པོ་སྣང་བའི་ཤེས་པ་དང་ལྷན་ཅིག་ཏུ་རྒྱུ་བར་ཁས་བླང་བར་བྱ་སྟེ་འབའ་ཞིག་ནི་མ་ཡིན་ནོ་ཞེས་གཞན་གྱིས་ཁས་བླང་བའི་ཆེད་དུ་འདི་ཉེ་བར་དགོད་དོ། །དེ་ལྟ་ན་ཡང་གཞན་པའི་དངོས་པོ་རྣམ་པར་ཤེས་པ་ཉིད་དངོས་པོ་མེད་པའི་ཚད་མ་ཡིན་པ་བླའི། ཅི་ཚད་མ་མེད་པའི་བདག་ཉིད་ཡོངས་སུ་མ་གྱུར་པར་བཤད་པའི་ཆོས་ཡོངས་སུ་བརྟགས་ན་ནི་དེ་ལས་གཞན་པའི་དངོས་པོ་རྣམ་པར་ཤེས་པ་ཡོངས་སུ་གྱུར་པ་ལས་གཞན་པ་ཉིད་ཡོངས་སུ་མ་གྱུར་པ་ནི་མ་ཡིན་ཏེ། ཁྱེད་དངོས་པོ་ལས་གཞན་པ་ཉིད་ཀྱི་དངོས་པོ་མེད་པར་ཁས་བླངས་པའི་ཕྱིར་རོ། །ནུས་པ་མཚུངས་པའི་ངོ་བོ་ཤེས་པ་གཅིག་ལ་ཚོགས་པ་ནི་གཞན་པའི་དངོས་པོ་རྣམ་པར་ཤེས་པ་རྣམས་སོ། །དེ་བཞིན་ཐབས་གཞན་མེད་པས་དེ་ཤེས་པ་ལས་གཞན་ཟླ་བོ་མེད་པར་གྲུབ་པ་ཡིན་གྱི་གཟུགས་ཤེས་པས། རོ་ལ་སོགས་པ་མེད་པར་རྟོགས་པའམ་ཤིན་ཏུ་ཡུལ་ལ་སོགས་པས་བསྐལ་པ་ནི་རིགས་པ་མ་ཡིན་ནོ། །གཞན་པའི་དངོས་པོ་རྣམ་པར་ཤེས་པ་སོ་སོར་ངེས་པའི་ངོ་བོ་སོ་སོར་སྣང་བ་ཉིད་ལས་དངོས་པོ་གཞན་དུ་སྣང་བ་དེ་ཆུ་ལ་སོགས་པ་དམིགས་པ་མེད་པ་ཁོ་ནར་མི་འགྲུབ་ཀྱི། དེ་ལྟར་ཟླ་བོ་མེད་པ་ནི་མངོན་སུམ་གྱིས་ངེས་པ་ཉིད་དོ། །དེ་མེད་པའི་ཐ་སྙད་དུ་ཁོ་བོ་ཅག་མངོན་པར་འདོད་པས་མི་དམིགས་པ་ལས་འོངས་པ་མ་ཡིན་ནོ་ཞེས་བསྟན་པ་འདིས་ཉེ་བར་དགོད་དོ། །དེ་ལ་གང་གི་ཚེ་ཆུ་དམིགས་སུ་མེད་པ་ཅི་ཡང་མ་ཡིན་པའི་ངོ་བོ་མི་
དམིགས་པ་ཡིན་པ་དེའི་ཚེ་མེད་པ་དེ་ཇི་ལྟར་འགའ་ཞིག་གིས་རྟོགས་པ་ཡོངས་སུ་གཅོད་པ་ཡིན། ཇི་སྲིད་དུ་ཡོངས་སུ་གཅོད་པ་ནི་ཤེས་པའི་ཆོས་ཡིན་པའི་ཕྱིར་རོ། །ཡང་ན་དེ་རྟོགས་པའི་ངོ་བོར་མི་འདོད་ཀྱི་འོན་ཀྱང་དེའི་ཕྱིར་རྒྱུར་ཡོད་པ་ཡིན་ནོ་ཞེ་ན། རྟོགས་པའི་རྒྱུ་འམ་ཞེས་བྱ་བ་སྨོས་ཏེ། ནུས་པ་ཐམས་ཅད་ཀྱིས་སྟོང་པའི་མཚན་ཉིད་ཀྱི་དངོས་པོ་མེད་པ་ནི་རྟོགས་པའམ་རྟོགས་པའི་རྒྱུར་ཡོད་པར་མི་རིགས་སོ། །ཆུའི་དངོས་པོ་ཉིད་ཡིན་ན་ལྷན་ཅིག་བྱེད་པ་ལ་དེ་ལྟོས་པ་མེད་པའི་ཕྱིར་དེ་རྟག་ཏུ་ཤེས་པ་སྐྱེད་པས་དངོས་པོ་མེད་པའི་ཤེས་པ་གཅིག་པུ་ཁོ་ན་རྟོགས་པར་འགྱུར་ཏེ། ཤེས་པ་གཞན་གྱི་གོ་སྐབས་མེད་པར་འགྱུར་རོ། །ཤེས་པ་མེད་པ་ནི་མེད་པ་ཉིད་ཤེས་པར་རིགས་སོ་ཞེ་ན། དེ་ཡང་ཞེས་བྱ་བ་སྨོས་ཏེ་ཆུ་དམིགས་པ་མེད་པར་ཇི་ལྟར་རྟོགས། ཡང་ན་ཆུ་འདི་དམིགས་པ་མེད་པ་ནི་དེ་འདིར་རྟོགས་པ་མེད་པ་ཁོ་ན་ཆུ་མེད་པར་རྟོགས་པ་དེའི་ཚེ་རེས་འགའ་སྐྱེ་བ་ཡིན་ནོ། །དེ་སྐད་དུ་ཡང་དེའི་ཆུ་དམིགས་སུ་མེད་པའམ་དེ་ལ་ཆུ་ལས་གཞན་པ་མེ་ལ་སོགས་པའི་རྣམ་པར་ཤེས་པ་གཞན་པའི་དངོས་པོ་ཡིན་ནོ་ཞེས་བཤད་དོ། །དེས་ན་བདག་ཉིད་ཡོངས་སུ་མ་གྱུར་པ་ནི་ཐ་དད་པ་རྣམ་པར་གཞག་པའམ་དེ་ལ་ཡང་དེ་ཁས་ལེན་པས་ན་བདག་ཉིད་ཡོངས་སུ་གྱུར་པ་དེའི་བདག་ཉིད་ཡིན་པའི་ཕྱིར་དེ་ལས་ཐ་དད་པར་རྣམ་པར་གཞག་པར་མི་བྱའོ། །དེ་ཡང་དེའམ་གཞན་པ་ཡང་རུང་རེས་འགའ་ཞིག་ཀྱང་རྟོགས་པ་མེད་ཀྱང་གང་གི་ཚེ་ཆུ་ལ་སོགས་པ་དངོས་པོ་མེད་པར་རྟོགས་ན་དེའི་ཚེ་གཉིད་ལོག་པ་ལ་སོགས་པའི་གནས་སྐབས་ན་ཡང་གཉིད་ལོག་ཀྱང་ཆུ་ལ་སོགས་པ་དངོས་པོ་མེད་པ་ཅིས་ན་མི་རྟོགས། དེས་ཀྱང་དེ་མེད་པར་རྟོགས་པར་འགྱུར་རོ་ཞེས་ཚད་མ་རྣམ་པར་ངེས་བས་དེ་རྣམ་པར་དཔྱད་པས་དེ་ཉིད་དུ་བལྟ་བར་བྱའོ། །བར་དུ་ཆོད་པ་ལ་སོགས་པ་སྨོས་པ་ནི་འདི་དག་བསྟན་པ་ཡིན་ཏེ། གཞན་པའི་དངོས་པོ་ཡང་གཞན་པ་ཉིད་དང་མཚུངས་པར་རུང་བའི་ངོ་བོ་ལ་ལྟོས་པར་ཁས་མ་བླངས་སོ། །དེ་ལྟར་ན་ཁོ་བོ་ཅག་གིས་ཉེ་བར་བརྗོད་པ་མི་དམིགས་པ་གྲུབ་པས་སོ། །གང་གི་ཚེ་ཇི་སྐད་དུ་བཤད་པའི་
མི་དམིགས་པའི་རྣམ་པས་ཆུ་མེད་པར་རྟོགས་པ་ལ་མི་སྦྱོར་བ་དང་མེར་སྣང་བའི་ཤེས་པ་སོ་སོར་ངེས་པའི་རྣམ་པ་ཁས་བླང་བར་མི་བྱའོ། །དེ་ལྟ་བས་ན་འདིས་མེ་མཐོང་བར་རྟོགས་པ་ན་མེ་མཐོང་ཡང་ཤེས་པ་ལ་འདྲེས་པའི་ངོ་བོར་སྣང་བས། འདི་ན་མེ་ཡིན་གྱི་ཆུ་མ་ཡིན་ནོ་ཞེས་མི་ངེས་པས་མི་ཤེས་པའོ། །ཆུ་རང་གི་ངོ་བོར་སྣང་ཡང་དེ་དོན་དུ་གཉེར་བ་ནི་འདུག་པ་ལ་འཇུག་པར་མི་བྱ། འགྲོ་བར་མི་བྱ་བ་ནི་ཆུ་དོན་དུ་གཉེར་བ་ལ་འཇུག་པར་མི་བྱ་བའོ། །དེ་ལྟར་ན་ཆུ་ཞེས་བརྗོད་པ་གང་ཡིན་པས་གདུང་བ་བགྲོད་པར་དཀའ་བ་སྟེ། དེའམ་གཞན་པའི་ངོ་བོ་མ་ལུས་པ་མ་འདྲེས་པ་སོ་སོར་ངེས་པའི་རྣམ་པར་ཤེས་པ་ལ་སྣང་བ་ཡིན་ན་འདིའམ་གཞན་པ་ཉིད་འདྲེན་མའི་ངོ་བོར་ཡང་ཅིས་ན་སྣང་བར་འགྱུར། དེས་ཀྱང་འཇུག་པ་དང་ལྡོག་པ་དག་འགལ་བས་ཅིག་ཅར་ཉམས་སུ་བླང་བར་མི་ནུས་པའི་ཕྱིར་རོ། །རྒོལ་བར་དཀའ་བ་ནི་ཉོན་མོངས་ཤིང་རྟོགས་པར་འགྱུར་བའོ། །འདིར་གཞན་གྱི་དོགས་པ་སྨྲ་བའི་གོ་སྐབས་ནི་གལ་ཏེ་གཅིག་མཐོང་བ་ཞེས་བྱ་བ་ལ་སོགས་པ་སྨོས་ཏེ། ཁོ་བོ་ནི་ཆུ་ལ་དམིགས་པ་ལྡོག་པ་ཙམ་ཅི་ཡང་མ་ཡིན་པའི་ངོ་བོ་དེ་མེད་པར་རྟོགས་པ་ནི་མི་བརྗོད་དོ། །ཇི་སྐད་བཤད་པའི་སྐྱོན་དུ་ཐལ་བར་འགྱུར་བས་སོ། །འོན་ཀྱང་འདི་གཅིག་པུ་འབའ་ཞིག་པའི་མེ་མཐོང་བ་གང་ཡིན་པ་དེ་ཉིད་ལས་གཞན་པ་ཡིན་ཏེ་དེ་ལ་ཆུ་སྣང་བ་མེད་པར་རྟོགས་པར་འགྱུར་བའམ་རྣམ་པར་ཤེས་པ་ལ་གཞན་པའི་དངོས་པོར་བརྗོད་དོ། །གྲུབ་པའི་མཐའ་སྨྲ་བས་ཇི་ལྟར་གཅིག་མཐོང་བས་ཞེས་བྱ་བ་ལ་སོགས་པ་སྨོས་ཏེ། ཅི་དེ་གཅིག་མཐོང་བའི་ཤུགས་ཀྱིས་ཀྱང་གཞན་མེད་པར་རྟོགས་པར་འགྱུར་རམ། དེ་ལྟ་ན་མཐོང་བ་དེའི་ཚེ་དེ་ཉིད་ཡོད་དོ་ཞེས་ཁོང་དུ་ཆུད་པར་འགྱུར་ལ། དེ་ལས་གཞན་མེད་དོ་ཞེས་ཅིས་ན་ངེས་པར་འགྱུར་བ་ཡིན། མེ་ལ་སོགས་པ་འབའ་ཞིག་པ་དེ་ཉིད་ཡོངས་སུ་མཐོང་བ་ན་ཆུ་དང་མ་འདྲེས་པར་མཐོང་བས་མེ་ཤེས་པ་ལ་སོ་སོར་སྣང་བ་ན་ཆུ་མེད་དོ་ཞེས་ཤེས་པ་སྐྱེ་བ་ཡིན་ནོ། །དེ་ལྟ་ན་མེ་བཞིན་དུ་ཆུ་ཡང་གང་གིས་དེ་ལས་འབྱུང་བར་འགྱུར་བ་དེའི་ཚེ་མེ་བཞིན་དུ་དེ་མཐོང་བའི་ཤེས་པ་ལ་སྣང་བར་འགྱུར་རོ། །དེ་དག་གི་རང་གི་ཤེས་པ་ཁྱད་
པར་ཅན་ཡིན་པའི་ཕྱིར། གཅིག་སྣང་བར་རུང་བ་ཡིན་པར་རིགས་སོ། །དེའི་ཕྱིར་གཅིག་སྣང་བ་གཞན་མེད་པ་ནི་མི་འབྱུང་བ་ཡིན་པའི་ཕྱིར། གཞན་པའི་ཡོད་པའི་ཤེས་པ་སྐྱེ་བ་ན་གཞན་པའི་དངོས་པོའི་རྣམ་པར་ཤེས་པ་མེད་དོ།། ཞེས་བྱ་བའི་ཤེས་པ་སྐྱེ་བའོ། །གཞན་གྱི་དངོས་པོ་དེ་ཡང་གཞན་དང་མ་འདྲེས་པའི་རང་བཞིན་དེ་ཉིད་ཀྱིས་དེ་མེད་པར་རྣམ་པར་རྟོག་པའི་རྒྱུ་ཡིན་ནོ་ཞེ་ན། གྲུབ་པའི་མཐའ་སྨྲ་བས་འདི་ཉིད་ཅེས་བྱ་བ་ལ་སོགས་པ་སྨོས་ཏེ། འོན་ཏེ་ཁོ་བོ་ཅག་གིས་འདི་དག་ཀྱང་དེ་དག་ཡོད་པ་ན་གཅིག་གི་ངོ་བོར་ངེས་པ་རྟོགས་པ་མི་སྲིད་པ་མ་ཡིན་ནོ་ཞེས་བྱ་བ་ལ་སོགས་པའི་ཚིག་གིས་སྔར་བཤད་ཟིན་ཏོ། །དེའི་ཕྱིར་གཞན་དང་མ་འདྲེས་པ་འབའ་ཞིག་པ་སྣང་བ་གང་ཡིན་པ་དེ་ལས་གཞན་མེད་པ་ཡང་ཡིན་ནོ། །དེ་ཉིད་འབའ་ཞིག་དེ་ལས་གཞན་མེད་པའི་བདག་ཉིད་ཡིན་པའི་ཕྱིར་རམ་གཞན་མེད་པའི་ཆ་ནི་སུན་ཕྱུང་བའི་ཕྱིར་དང༌། དེ་ནི་མངོན་སུམ་ལ་སྣང་བའི་ཕྱིར་དེ་མེད་པ་ནི་དེའི་སྟོབས་ཀྱིས་ཕྱིས་ཐ་སྙད་འཇུག་པར་བྱེད་དེ་གཟུགས་མེད་པ་ཉིད་ཀྱི་རྣམ་པར་རྟོག་པའི་ཤེས་པ་སྐྱེ་བ་ཡིན་ནོ། །དེས་མ་རྟོགས་ན་ཅུང་ཟད་ཅིག་ཀྱང་གོ་བར་བྱ་བར་མི་འགྱུར་ཏེ། གང་གི་ཕྱིར་དེ་གཞན་གྱི་དངོས་པོ་རྣམ་པར་ཤེས་པ་ནི་མངོན་སུམ་གྱི་བདག་ཉིད་ཀྱིས་ཀྱང་མི་རྟོགས་ཀྱི་དེ་ལས་གཞན་མེད་པའི་ཤེས་པ་སྐྱེ་བས་དངོས་པོ་མེད་པའི་ཚད་མ་ལོགས་ཤིག་ཏུ་རྣམ་པར་མི་གཞག་གོ །དེ་ལྟ་ན་དེ་གཞན་གྱི་རྣམ་པར་སྟོང་པ་མྱོང་བ་ཁོ་ན་ལས་དེ་མེད་པར་རིག་གོ །རྣམ་པར་རྟོག་པའི་ཤེས་པ་ཡང་དེའི་རྣམ་པས་སྟོང་བའི་ངོ་བོར་རིགས་པས་དེ་ལས་གཞན་མེད་པར་རིག་པ་ནི་མེད་དེ། འབའ་ཞིག་པ་འདི་རྣམ་པར་རྟོག་པས་འབྱེད་དོ། །དེའི་ཕྱིར་འདི་ལྟར་རྟོག་པ་མེད་པའི་ཤེས་པ་བཞིན་དུ་ལ་ལར་མེད་པར་ངེས་པ་ན་འདི་ན་མེ་ཡོད་ཅེས་ཕྱིས་ནས་རྣམ་པར་རྟོག་པའི་ཤེས་པས། ཐ་སྙད་རབ་ཏུ་འཇུག་པ་ཙམ་དེ་ལས་ཐ་དད་པའི་ཚད་མ་ནི་མེད་པར་སྔར་ཇི་སྐད་བཤད་པ་དེ་བཞིན་དུ་མེད་པའི་ཤེས་པ་ཡང་རྣམ་པར་རྟོག་པ་དེའི་འབྲས་བུའི་སྒོ་ནས་གཞན་པའི་དངོས་པོ་རྣམ་པར་ཤེས་པའི་མངོན་སུམ་ལས་
དངོས་པོ་མེད་པར་གྲགས་པའི་ཚད་མ་ཐ་དད་པ་མེད་པའི་ཕྱིར་རོ། །དེའི་ཕྱིར་ཁོ་བོ་ཅག་གིས་བཤད་པའི་དེ་ལས་གཞན་མེད་པར་རྟོགས་པ་གང་ཡིན་པ་དེ་ཉིད་ཁྱེད་ཀྱིས་ཀྱང་བསྟན་ན་ཅིའི་ཕྱིར་མ་རངས་པར་སྟོན། གང་གི་ཕྱིར་དངོས་པོ་མེད་པའི་ཚད་མར་བཤད་པ་ཐ་དད་པ་ནི་ཁས་མི་ལེན་པས་ཁས་ལེན་པ་ལ་བཞད་གད་སྟོན་པ་ཡིན་ནོ། །དེ་ལྟ་ན་ཁྱེད་ཀྱིས་ད་ལྟར་ཐབས་ཟད་པས་གཟུ་བོར་གནས་པར་བརྗོད་པ་ཡིན་གྱི་དེ་ལྟ་མ་ཡིན་ན་འདི་སྔར་ཡང་ཅིས་ན་མི་བརྗོད། ཅལ་ཅོལ་དུ་བརྗོད་པས་བདག་དང་གཞན་ཉོན་མོངས་པ་ཡིན་ནོ་ཞེས་མཇུག་བསྡུ་བ་ནི་དེ་ལྟ་བས་ན་འགྲམ་མ་མཐོང་བའི་བྱ་བཞིན་དུ་ཞེས་བྱ་བ་ལ་སོགས་པ་སྨོས་ཏེ། དཔེར་ན་གྲུར་ཞུགས་པའི་ཚོང་པ་རྣམས་ཀྱིས་བྱ་བ་བཀྲོལ་ནས་ཀྱང་འགྲམ་མཐོང་བ་ཡིན་ན་དེ་གང་གི་ཚེ་འགྲམ་དུ་གནས་ལ། མཐའ་མ་རྙེད་པ་དེའི་ཚེ་ནི་གྲུ་ཉིད་དུ་ཕྱིར་འོང་བ་དེ་བཞིན་དུ་འདི་ལ་ཡང་བལྟ་བར་བྱ་སྟེ། གང་གིས་ཀྱང་གདོན་མི་ཟ་བར་ཁས་བླང་བར་བྱ་བ་གང་དང་གང་གི་ཕྱོགས་ཡིན་པ་དེ་བས་ན་མ་རིག་པའི་གཏིང་མི་ཚུགས་པ་ཅན་གྱི་ཕྱོགས་བསྒྲུབས་པ་འདི་ལ་ཅུང་ཟད་ཅིག་ཀྱང་དགོས་པ་མེད་དོ། །དེ་ལྟར་ན་གཞན་གྱི་གཞན་ཡོད་པ་དེ་མེད་པ་དག་རྟགས་དང་རྟགས་ཅན་གྱི་དངོས་པོར་འདོད་པ་ལ་འབྲེལ་པ་མེད་པས་འདི་རིགས་པ་མ་ཡིན་ནོ། །གཞན་གྱིས་བསྟན་པ་འབྲེལ་པ་མེད་པས་གཞན་ཡོད་པར་རྟོགས་པས་ཀྱང་མེད་པར་རྟོགས་པར་མི་འགྱུར་རོ་ཞེས་རྩོད་པ་ནི་འདིར་འབྲེལ་པ་ལ་སོགས་པ་འགའ་ཞིག་གིས་བྱས་པ་མེད་ཀྱི། དེ་ལས་གཞན་པ་ཁོ་ན་དེ་མེད་པ་ཡིན་ཏེ། གཞན་མེད་པར་རྟོགས་པ་ཉིད་ཀྱིས་དེ་མེད་པར་རྟོགས་པའི་ཕྱིར་རོ་ཞེས་རབ་ཏུ་བསྒྲུབས་སོ། །གཞོན་ནུ་མ་ལེན་གྱིས་ཡོངས་སུ་བརྟགས་པའི་དངོས་པོ་མེད་པའི་དོན་འགའ་ཞིག་དང་དངོས་པོ་མེད་པའི་ཚད་མས་རྩོད་པ་ནི་ཞར་ལ་སུན་ཕྱུང་ནས་ད་ལྟར་ནི་དངོས་པོ་འཁྲུལ་པ་གྲུབ་པ་ནི་དེའི་ཚད་མ་ཡང་རྟེན་ཅེས་བྱ་བ་འདི་དག་དངོས་སུ་གསལ་བར་བྱེད་པས་ཕྱོགས་སྔ་མ་ཀུན་ནས་བསླང་བ་ནི་གལ་ཏེ་དེ་ལྟར་གཅིག་ཡོངས་སུ་བཅད་པ་ཞེས་བྱ་བ་ལ་སོགས་པ་སྨོས་ཏེ། གང་གི་ཚེ་གཅིག་པུ་འབའ་ཞིག་ཡོངས་སུ་བཅད་པས་གཞན་རྣམ་པར་བཅད་པ་འགྲུབ། དེའི་ཚེ་ཁྱད་
པར་གཞན་ཐམས་ཅད་ཀྱི་ཡུལ་གང་ཡིན་པ་དེ་ལ་འདི་གཅིག་ཏུ་མཐོང་བ་དེ་ལ་མེད་པར་འགྲུབ་པར་འགྱུར་བས། ཁྱད་པར་འཛིན་པར་མཚུངས་པར་རང་གི་ཤེས་པ་སྐྱེད་པར་རུང་བའི་གནས་སྐབས་གང་ཡིན་པ་དེ་ཉིད་དེ། དཔེར་ན་འདི་དང་མཚུངས་པར་རུང་བའི་ངོ་བོའི་དོན་གྱིས་དབེན་པའི་ངོ་བོ་དམིགས་པ་དེ་ལས་གཅིག་ཏུ་ངེས་པའི་རྣམ་པ་ཅན་གྱི་ཤེས་པ་ཡིན་པ་དེ་བཞིན་དུ་དེ་དང་མཚུངས་པ་མ་ཡིན་པའི་ངོ་བོའི་དོན་གྱིས་དབེན་པའི་བདག་ཉིད་ལ་ཡང་ཡིན་ནོ། །དེས་ཀྱང་དེས་དབེན་པའི་རྣམ་པས། དེ་ལས་གཞན་ཡོད་པ་སྒྲུབ་པར་བྱེད་པ་ཁྱད་པར་མེད་པས་ས་ཕྱོགས་ཀྱི་ངོ་བོ་ཤེས་པའི་བུམ་པ་མེད་པ་བཞིན་དུ་རོ་ལ་སོགས་པ་མེད་པ་ཡང་སྒྲུབ་པར་བྱེད་པས་བུམ་པ་མེད་པ་ཡང་མ་ཡིན་ནོ། །གཞན་ཡང་གང་དམིགས་པའི་རིག་བྱར་གྱུར་པ་ལས་མི་དམིགས་པས་མེད་པ་སྒྲུབ་པར་བྱེད་པའི་ཁྱད་པར་བཤད་པ་ཡང་བརྗོད་མི་དགོས་སོ། །ཅིའི་ཕྱིར་ཞེ་ན། གང་དང་གང་དམིགས་པའི་རིག་བྱར་མ་གྱུར་པ་དེ་དག་ཀྱང་ཡུལ་དེ་དང་དེ་དག་ལ་རྣམ་པ་གཅིག་པའི་ཤེས་པས་རྣམ་པར་གཅོད་པར་འགྱུར་བ་ཉིད་དོ། །དེ་བཞིན་དུ་ཇི་ལྟ་བའི་དམིགས་པའི་རིག་བྱར་གྱུར་པ་དེའི་རྣམ་པ་གཅིག་པའི་ཤེས་པ་ལ་སྣང་བ་དེས་ཀྱང་རྣམ་པར་གཅོད་པ་ཡིན་ནོ། །དེ་བཞིན་དུ་དམིགས་པའི་རིག་བྱར་མ་གྱུར་པའི་མཚན་ཉིད་ལ་ཡང་ཡིན་ན། ཅི་དམིགས་པའི་རིག་བྱར་གྱུར་པའི་ཁྱད་པར་འདིས་ཡིན་ནམ་ཞེས་བྱ་བ་དེ་ལྟ་ན་ཡང་ཕྱོགས་སྔ་མ་རྣམ་པར་བཞག་ནས། གལ་ཏེ་དེ་ལས་གཞན་པ་རྣམ་པར་གཅོད་པ་དེས་ཐ་དད་པར་བྱེད་པ་རྣམས་གཞན་གྱིས་རྣམ་པར་གཞག་པ་མངོན་པར་འདོད་པ་དེ་ཁས་བླང་བར་བྱ་བ་ཁོ་ནའོ། །འོན་ཏེ་དེའི་ཡུལ་དང་དུས་དག་ཏུ་མེད་པ་དེ་མི་རིགས་སོ། །གང་གིས་ནུས་པ་མཚུངས་པར་རུང་བའི་ངོ་བོ་དམིགས་པའི་རིག་བྱར་གྱུར་བ་ལས་ཀྱང་མེད་པ་སྒྲུབ་པར་བྱེད་པ་ཡིན་ལ་དེ་དང་ནུས་པ་མི་མཚུངས་པར་རུང་བའི་ངོ་བོ་དམིགས་པའི་རིག་བྱར་མ་གྱུར་པ་ལ་མི་སྲིད་པ་མ་ཡིན་ནོ། །དེ་དག་ཡོད་པ་ལ་གཅིག་ཏུ་ངེས་པར་རྟོགས་པ་མི་སྲིད་པ་མ་ཡིན་པས་དེ་ལྟར་དེ་མེད་པ་སྒྲུབ་
བར་བྱེད་དོ། །འདི་དག་གཞན་ལ་ཡོད་པ་མ་ཡིན་པས། རྟོགས་པར་བྱེད་པས་བདག་ཉིད་གཅིག་ཡོངས་སུ་བཅད་པས་ཞེས་བྱ་བ་ལ་སོགས་པ་ཉེ་བར་བསྟན་ཏོ། །གང་དེའི་མདུན་ན་གནས་པ་མངོན་སུམ་ལ་སྣང་བ་ཡིན་ཏེ། དེའི་གཅིག་གི་བདག་ཉིད་དུ་ངེས་པ་དེའི་ངོ་བོ་ཡོངས་སུ་བཅད་པས་དེའི་རྣམ་པས་བསྐྱེད་པའི་སྒྲུབ་པའི་རྣམ་པར་རྟོག་པ་སྐྱེའོ། །དེ་ལས་གཞན་ནི་དེ་དག་ལས་གཞན་ཏེ་དེ་ལས་ཐ་དད་པ་དེ་ཐམས་ཅད་དོ། །གང་བདག་གི་ངོ་བོ་དེ་ལས་རྣམ་པར་གཅོད་པ་ཐ་དད་པ་དང༌། ལོགས་ཤིག་ཏུ་བྱེད་པ་དང་གཞན་པ་ཉིད་ཀྱིས་སྒྲུབ་པར་བྱེད་པས་མ་འདྲེས་པའི་ངོ་བོའི་ཤེས་པ་རྣམས་སུ་འགྱུར་རོ། །ཡང་ཇི་ལྟར་གཅིག་གི་བདག་ཉིད་ཡོངས་སུ་གཅད་པས་གཞན་པའི་བདག་ཉིད་རྣམ་པར་གཅོད་པར་མངོན་སུམ་གྱིས་བྱེད་པ་ཡིན་ནོ། །ཇི་སྲིད་དུ་མངོན་སུམ་གྱིས་མདུན་ན་གནས་པའི་དོན་གྱི་ནུས་པ་ལས་བྱུང་བའི་ངོ་བོ་ཉིད་དུ་རྟོགས་པ་གང་ཡིན་པ་དེ་ལས་ལྡོག་པ་མ་ལུས་པའི་དོན་ལས་སྐྱེས་པ་དེའི་བདག་ཉིད་དུ་དེའི་མདུན་ན་གནས་པའོ། །ཇི་ལྟར་དེ་རྣམ་པར་གཅོད་པར་བྱེད་པ་དང་དེ་རྣམ་པར་བཅད་པའི་དོན་དངོས་པོ་མེད་པའི་ཚད་མ་ཁས་བླང་བར་བྱ། གང་གི་ཕྱིར་དངོས་པོ་མ་འདྲིས་པའི་གྲུབ་པ་དང༌། དེའི་ཚད་མ་ལ་ཡང་དག་པར་བརྟེན་པ་ཡིན་ནོ་སྙམ་ནས་དེའི་བདག་ཉིད་དུ་ངེས་པར་སྣང་བའི་ཤེས་པ་ཡིན་ནོ་ཞེས་བྱ་བ་སྨོས་ཏེ། གང་མདུན་ན་གནས་གཅིག་དངོས་པོ་ལ་གཞན་གྱི་ངོ་བོ་དང་མ་འདྲེས་པའི་བདག་ཉིད་དངོས་པོ་ཀུན་གྱི་རང་བཞིན་ནི་རང་རང་གི་ངོ་བོ་ལ་གནས་པའི་ཕྱིར་དང་གཞན་གྱི་ངོ་བོ་དང་མ་འདྲེས་པའི་བདག་ཉིད་ཡིན་པའི་ཕྱིར་རོ། །དེ་ལྟ་མ་ཡིན་ན་ཇི་ལྟར་དངོས་པོ་མེད་པའི་ཆད་མས་ཀྱང་མ་འཆོལ་བར་དེ་དག་གྲུབ་པར་འགྱུར། འདྲེས་པའི་དངོས་པོ་རྣམས་མ་འཆོལ་བར་སྒྲུབ་པར་བྱེད་པ་ན་འཁྲུལ་པར་ཐལ་བར་འགྱུར་བའི་ཕྱིར་རོ། །དེའི་ཕྱིར་གཞན་གྱི་ངོ་བོ་དང་མ་འདྲེས་པའི་རང་བཞིན་ཁོ་ན་དེའི་བདག་ཉིད་དུ་ངེས་པར་སྣང་བ་ན་གཞན་གྱི་ངོ་བོ་དང་མ་འདྲེས་པར་སྣང་བ་ཁོ་ན་དེའི་དོན་གཅིག་གི་ནུས་པ་ལས་བྱུང་བའི་མངོན་སུམ་ནི་གཞན་གྱི་ངོ་བོར་སྣང་བར་མི་རིགས་
པས་དེ་འཁྲུལ་པར་གྱུར་ན་ནི་མངོན་སུམ་ཉམས་པ་ཡིན་ནོ། །དེ་སྐད་དུ། དེའི་ནུས་པ་ལས་སྐྱེས་པ་རྣམས་དེའི་ངོ་བོའི་རྗེས་སུ་བྱེད་པ་ལ་སོགས་པ་དེ་དོན་མེད་དོ་ཞེས་བྱ་བ་བཤད་དོ། །དེ་དང་དེའི་བདག་ཉིད་དུ་ངེས་པར་སྣང་བའི་ཤེས་པ་ལས་རང་རིག་པའི་མངོན་སུམ་གྱིས་རིག་པའི་ཕྱིར་རོ། །དེ་རིག་པ་ནི་མངོན་སུམ་གྱིས་དེའི་ངོ་བོ་རྣམ་པར་བཅད་པ་དང་སོ་སོར་བྱེད་པ་དེའི་སྟོབས་ཀྱིས་དུས་ཕྱིས་གཞན་པའི་བདག་ཉིད་འདི་མ་ཡིན་ནོ་ཞེས་མ་འདྲེས་པར་རྣམ་པར་གནས་པ་ཤེས་པའི་རྣམ་པར་རྟོག་པ་སྐྱེ་སྟེ། གཟུང་བ་ལ་འཛིན་པ་དེས་ན་སྔོན་མེད་པ་ཅུང་ཟད་ཅིག་ཀྱང་ཤེས་པ་མེད་ཀྱི། གཞན་པའི་ངོ་བོ་དང་མ་འདྲེས་པའི་བདག་ཉིད་ཀྱི་མངོན་སུམ་དེ་ཉིད་ཀྱི་རྣམ་པའི་རྗེས་སུ་བྱེད་པས་ཡོངས་སུ་གཅོད་པ་ཡིན་པའི་ཕྱིར་རོ། གལ་ཏེ་དེའི་བདག་ཉིད་དུ་ངེས་པར་སྣང་བའི་ཤེས་པ་ཡིན་པ་དེ་ལྟ་ན་ཡང༌། ཇི་ལྟར་གཞན་གྱི་བདག་ཉིད་ལས་དེ་ལོགས་ཤིག་ཏུ་བྱེད་པ་ཡིན་ཞེ་ན། དེའི་བདག་ཉིད་ནི་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་དེའི་དངོས་པོའི་བདག་ཉིད་གང་གཞན་གྱི་ངོ་བོ་དང་མ་འདྲེས་པ་དེ་གཞན་མ་ལུས་པའི་དངོས་པོའི་བདག་ཉིད་མ་ཡིན་ནོ། །ཐམས་ཅད་དེ་ལས་གཞན་པའི་རང་བཞིན་ཡིན་པའི་ཕྱིར་རོ། །དེ་ལྟ་མ་ཡིན་ན་དེ་ཉིད་དམ་གཞན་ཉིད་ཉམས་པ་ཡིན་པས་སོ། །དེའི་ཕྱིར་དེའི་བདག་ཉིད་དུ་ངེས་པར་སྣང་བའི་ཤེས་པ་ཉིད་ནི་དེའམ་གཞན་པ་རྣམས་ལ་ལྡོག་པ་ཡིན་ནོ། ཤེས་པས་དོན་ལག་པས་འཛིན་པ་ནི་མ་ཡིན་གྱི་གཞན་ལས་ལྡོག་པ་ཡིན་ནོ། །གཞན་གྱི་ངོ་བོ་དང་མ་འདྲེས་པ་འབའ་ཞིག་གཅིག་པུའི་བདག་ཉིད་ཀྱི་རྗེས་སུ་བྱེད་པ་ཉིད་དེ་གཞན་ལས་ལྡོག་པར་བཤད་པའི་ཕྱིར་རོ། །ཡང་ན་གཞན་གྱི་བདག་ཉིད་རང་གི་ཡུལ་ལས་མི་འདོགས་པ་དེའི་ཚེ་རང་གི་ཡུལ་ལ་གཞན་གྱི་བདག་ཡོངས་སུ་རྣམ་པར་བཅད་དོ། །བདག་དང་གཞན་ཡང་ཐ་དད་པར་རྣམ་པར་གཞག་པ་ནི་དེ་ལ་ཡང་ཡོངས་སུ་བཅད་པ་ལས་འགྱུར་རོ། །དེ་ལྟ་མ་ཡིན་ན་གཞན་རྣམ་པར་མ་བཅད་པས་འདི་ཉིད་གཅིག་གི་བདག་ཉིད་དུ་ཡོངས་སུ་བཅད་པའི་ཡོངས་སུ་བཅད་པའི་བདག་ཉིད་དེ་ལྡོག་བའི་ངོ་བོར་འགྱུར་
རོ། དེས་ཀྱང་རྣམ་པར་མ་བཅད་པས་གཞན་གྱི་བདག་ཉིད་ཡོངས་སུ་གཅོད་པར་ཐལ་བར་འགྱུར་བ་དང་འཇུག་པ་དང་ལྡོག་པ་མེད་པས་སྔ་མ་བཞིན་དུ་ཐལ་བར་འགྱུར་བ་ནི་མེ་མཐོང་ཡང་མེ་ཁོ་ན་མ་མཐོང་ཞེས་བྱ་བ་ལ་སོགས་པའོ། །འབའ་ཞིག་པ་དེ་གཞན་གྱི་བདག་ཉིད་ལས་ལྡོག་པ་ཡིན་ན་དེའི་བདག་ཉིད་ལ་ཡང་གཞན་མ་ལུས་པ་མ་ཡིན་ནོ་ཞེས་བསྟན་པ་ནི་ཡུལ་དང་ཞེས་བྱ་བ་སྨོས་ཏེ། དེ་ཡང་མདུན་ན་གནས་པའི་ཡུལ་དང་དུས་དང་ངོ་བོ་ཉིད་དང་གནས་སྐབས་སུ་ངེས་པ་དེ་ལས་གཞན་པ་ཡུལ་ལ་སོགས་པ་རྣམས་ལས་ལྡོག་པའི་བདག་ཉིད་ནི་རང་གི་རྒྱུ་རྣམས་ཁོ་ན་ལས་འབྱུང་བའི་དེའི་བདག་ཉིད་དོ། །ཡུལ་ལ་སོགས་པ་ངེས་པའི་བདག་ཉིད་ཀྱི་རྣམ་པ་དེ་ལྟ་བུའི་ངོ་བོའི་རྗེས་སུ་བྱེད་པའི་བློས་དམིགས་པ་དེ་ཁོ་ན་ཉིད་འཕོ་བ་མེད་པའོ། །ཡུལ་དང་དུས་དང་ངོ་བོ་ཉིད་དང་གནས་སྐབས་ཀྱི་བདག་ཉིད་འདི་རང་གི་ཡུལ་ལ་རྣམ་པར་གཅོད་པ་སྟེ་ཐ་དད་དུ་བྱེད་པའོ། །ཡང་ཅིའི་ཕྱིར་གཞན་གྱི་ཡུལ་ལ་སོགས་པ་དེ་ལས་ཐ་དད་པར་རྣམ་པར་གཞག་ཅེ་ན། དེ་ལྟ་ན་ཞེས་བྱ་བ་སྨོས་ཏེ། ན་ཞེས་བྱ་བ་ནི་གང་གི་ཕྱིར་རོ། །གཞན་གྱི་ཡུལ་ལ་སོགས་པ་དེ་ལས་ཐ་དད་པར་བྱེད་པ་གདོད་མ་ནས་ཡུལ་ལ་སོགས་པ་ངེས་པའི་དོན་ཡོངས་སུ་གཅོད་པ་ཡིན་ཏེ། དེའི་ངོ་བོའི་རྗེས་སུ་བྱེད་པའི་ཕྱིར་རོ། །དེ་ལྟ་མ་ཡིན་ན་དེ་ལ་གཞན་གྱི་ཡུལ་ལ་སོགས་པ་དེའི་ངོ་བོའི་རྗེས་སུ་མི་བྱེད་ན་རྣམ་པར་གཅོད་པར་མི་འགྱུར་རོ། །དེ་ཁོ་ན་ཉིད་ཀྱང་དེའི་ཡུལ་ལ་སོགས་པ་ངེས་པ་ཉིད་དེའི་ཚེ་དེ་ཁོ་ན་མཐོང་བ་ཡིན་ནོ། །གཞན་གྱི་ཡུལ་ལ་སོགས་པ་ནི་གཞན་མ་ཡིན་པར་འདོད་དོ། །གང་གི་ཕྱིར་དེ་ལྟ་ན་ཞེས་བྱ་བ་ནི་དེའི་ཕྱིར་རོ། །གཞན་དུ་གྱུར་པས་ནི་གཞན་གྱི་ཡུལ་ལ་སོགས་པ་དང་ལྡན་པའོ། །དེ་ལྟ་བུར་གྱུར་པ་ནི་དེའི་ཡུལ་ལ་སོགས་པ་དང་ལྡན་པ་རྣམ་པར་གཅོད་པ་ཉིད་ནི་རྟོགས་པར་བྱེད་པའོ།། དེ་ཡོངས་སུ་གཅོད་པ་ཡིན་ནོ་ཞེས་བྱ་བ་ནི་སྔ་མའི་མཇུག་བསྡུ་བའོ། །དེ་བས་ན་དེ་ལྟ་བུར་གྱུར་པས་གཞན་དུ་གྱུར་པ་ཉིད་རྣམ་པར་གཅོད་པ་ཉིད་ཀྱིས་མཇུག་བསྡུ་བའི་འབྲས་བུ་ཡིན་ནོ། །དེ་སྐད་དུ་བཤད་པའི་རིགས་པ་འདིས་མངོན་སུམ་མ་མ་རྗེས་སུ་དཔག་པའི་ཚད་མ་གཅིག་འཇུག་
པའོ། །དེ་ཡང་དེ་བཞིན་དུ་རང་གི་ཡུལ་ཡོངས་སུ་གཅོད་པའོ། །འཇུག་པ་ནི་རབ་ཏུ་འཇུག་པའོ། །དངོས་པོ་ཐམས་ཅད་ཕུང་པོ་གཉིས་ཏེ་དེ་ཉིད་དང་གཞན་ཉིད་དུ་རྣམ་པར་འཇོག་པར་བྱེད་དེ། །དེ་བས་ན་དེ་ཡོངས་སུ་གཅོད་པའི་ཚད་མའི་སྟོབས་ཀྱིས་མ་འདྲེས་པར་གྲུབ་པ་ཡིན་ན། ཅི་དེ་དོན་དུ་གཉེར་བ་ཡང་མེད་པ་ལ་རྟོགས་པར་བྱེད་དམ། འོ་ན་ནི་འདི་དང་འདི་དག་གཞན་གྱི་བདག་ཉིད་མ་ཡིན་ལ་གཞན་ཡང་དེའི་བདག་ཉིད་མ་ཡིན་ནོ་ཞེས་བྱ་བ་རྣམ་པར་རྟོག་པའི་བྱེད་པ་ཡིན་གྱི་མངོན་སུམ་ནི་རྟོག་པ་མེད་པར་འདོད་ན་དེ་ཇི་ལྟར་མ་འདྲེས་པར་དེ་ལས་གྲུབ་པར་འགྱུར་ཞེ་ན། དེ་ནི་རྗེས་སུ་འགྲོ་བ་ཞེས་བྱ་བ་ལ་སོགས་པ་སྨོས་ཏེ། མངོན་སུམ་དེ་ནི་སྒྲུབ་པ་དང་དགག་པའི་རྣམ་པར་རྟོག་པ་གང་གི་ཚེ་རང་གི་ཡུལ་ལ་སྐྱེ་བ་དེ་ཉིད་འདིའི་འབྲས་བུ་དང་བཅས་པ་ཡིན་ཏེ། དེ་ཉིད་ཀྱང་ཆད་མར་འདོད་ཀྱི་གཞན་དུ་ནི་མ་ཡིན་ནོ། །དེ་ཉིད་ཀྱི་ཕྱིར་དོན་གཅིག་གི་རང་བཞིན་མངོན་སུམ་གྱི་ཆ་ཤས་མེད་པར་བདག་ཉིད་ཐམས་ཅད་ཡོངས་སུ་གཅོད་ཀྱང་འཁྲུལ་པའི་རྒྱུ་མཚན་ཡོད་པར་གྱུར་པས་སྐད་ཅིག་མ་ལ་སོགས་པའི་རྗེས་སུ་འགྲོ་བ་དང་ལྡོག་པའི་བློ་སྐྱེད་པར་མི་ནུས་པས་དེ་ལ་ཚད་མར་མི་འདོད་དོ་སྙམ་ན། གལ་ཏེ་ཕུང་པོ་གཉིས་སུ་གྲུབ་པ་ནི་འཆོལ་བར་མ་གྱུར་ཅིག་སྙམ་ནས་དངོས་པོ་མེད་པའི་ཚད་མ་བརྟག་པ་ཡིན་ཏེ། འོན་ཀྱང་རྣམ་གཞན་མེད་པར་འགྱུར་ན་དེ་མེད་པར་གྲུབ་པ་ལ་མངོན་སུམ་གྱིས་བྱེད་པས་ཅུང་ཟད་ཀྱང་རྟོག་པ་མེད་དོ་ཞེས་འདོད་ན་ཞེ་ན། དེ་ལ་མ་བརྟགས་པ་ཞེས་བྱ་བ་ལ་སོགས་པ་སྨོས་ཏེ། དེའི་ཕྱིར་ཡོངས་སུ་མཐོང་བ་ལས་ཐ་དད་པ་མ་ལུས་པའི་དངོས་པོ་རྣམ་པར་གཅོད་པ་ནི་དེ་ལས་ལོགས་ཤིག་ཏུ་བྱེད་པ་གཞན་པས་ཁྱབ་པ་གང་ཡིན་པ་དེ། སྒྲུབ་པ་ཁོ་ནས་རྣམ་པ་གཞན་ནི་དེ་ཉིད་དམ་གཞན་ཉིད་ལས་ཕྱི་རོལ་དུ་གྱུར་པ་མེད་པར་གྲུབ་པ་ཡིན་ནོ། །དེས་ན་དེའི་དོན་ལ་ཡང་དངོས་པོ་མེད་པའི་ཚད་མ་བརྟག་པར་མི་རིགས་སོ། །ཡང་ན་མ་ལུས་ཡོངས་སུ་མཐོང་བ་དང་བལྟ་བར་བྱ་བ་ལས་གཞན་པ་ཉིད་མ་ཁྱབ་པ་ན་མངོན་སུམ་གྱིས་གྲུབ་པར་མི་འགྱུར་ཏེ། དེ་གང་གིས་ཕུང་པོ་གསུམ་པ་མེད་པར་མངོན་སུམ་ཉིད་དུ་གྱུར།
དེ་ལས་མེད་པའི་ཚད་མ་བརྟག་པ་དོན་མེད་པར་འགྱུར་རོ་ཞེ་ན། དེ་ཞེས་བྱ་བ་སྨོས་ཏེ། ཕུང་པོ་གསུམ་པར་བརྟག་པར་བྱ་བ་ནི་མཐོང་བ་དང་དེ་ལས་གཞན་པས་མ་ཁྱབ་པ་ཡིན་པ་དེས་ན་རང་གི་ཡུལ་གྱི་དོན་དེ་མངོན་སུམ་གྱིས་རྣམ་པར་མ་བཅད་པས་ལོགས་ཤིག་མ་བྱས་ན་དེའི་དོན་གྱི་ཕུང་པོ་གཞན་བརྟག་པར་བྱ་བ་ཡིན་ན། རང་གི་ཡུལ་ལ་རྣམ་པར་མ་བཅད་པའི་ཕྱིར་ཡང་དངོས་པོ་ཡོངས་སུ་མ་བཅད་པར་ཐལ་བར་འགྱུར་བ་དེ་ནི་དེའི་ཡུལ་གཞན་གྱི་ངོ་བོ་མ་ལུས་པ་དང་འདྲེས་པའི་བདག་ཉིད་དེ་གལ་ཏེ་དེས་བདག་ཉིད་ཡོངས་སུ་མི་གཅོད་པ་དང་དེས་བདག་ཉིད་ཡོངས་སུ་བཅད་པ་ཉིད་ཇི་ལྟར་དེའམ་གཞན་པས་ཐམས་ཅད་ལ་ཁྱབ་པར་མ་བསྒྲུབ་པ་ཡིན། དེ་ལྟ་མ་ཡིན་ན་གཅིག་ཀྱང་དེའམ་གཞན་པ་ཉིད་དུ་མི་འགྱུར་ཏེ་རྒྱུ་མཚན་མཚུངས་པའི་ཕྱིར་རོ། །གང་གི་ཕྱིར་དེ་ལྟར་དེ་བས་ན་དངོས་པོ་འགའ་ཞིག་ལ་ཚད་མ་མངོན་སུམ་ལ་སོགས་པ་རབ་ཏུ་འཇུག་པ་དེའི་དངོས་པོ་སོ་སོར་ངེས་པའི་བདག་ཉིད་ཡོངས་སུ་གཅོད་པ་ན་དེ་ལས་གཞན་པ་དེའི་ངོ་བོ་མ་ཚང་བ་རྣམ་པར་གཅོད་པ་ཡིན་ནོ། །དེ་འམ་གཞན་པ་ཉིད་ཀྱི་རྣམ་པར་གཞག་པ་ལས་རྣམ་པག་སུམ་པ་དེ་ཉིད་དག་གཞན་པ་ཉིད་ལས་ཕྱི་རོལ་དུ་གྱུར་པ་རྣམ་པ་གཞན་མེད་པར་བསྟན་ཏེ་གཞན་པས་ཐམས་ཅད་ལ་ཁྱབ་པར་བསྒྲུབ་པའི་ཕྱིར་རམ། དེ་དང་འགལ་བས་དངོས་པོ་ཐམས་ཅད་རྣམ་པ་གཉིས་སུ་བསྒྲུབ་པའི་ཕྱིར་རོ། །དེ་ལྟར་ཚད་མ་གཅིག་གི་བྱ་བ་འདི་དག་བཤད་མ་ཐག་པ་དེ་ཉིད་ཀྱི་མཇུག་བསྡུ་བ་བདེ་བླག་ཏུ་རྟོགས་པར་འགྱུར་བ་བསྟན་པ་ན་འདི་ལྟར་ཞེས་བྱ་བ་སྨོས་ཏེ། དངོས་པོ་འགའ་ཞིག་ལ་མངོན་སུམ་ལ་སོགས་པ་འཇུག་པའོ། །དེ་ཉིད་ཀྱི་དངོས་པོ་དེ་ལས་གཞན་པའི་ངོ་བོ་རྣམ་པར་གཅོད་པ་སྟེ་དེ་ལས་ཐ་དད་པར་བྱེད་པས་སོ། །དེའི་ངོ་བོ་ནི་མ་འདྲེས་པའི་ངོ་བོར་ཁོང་དུ་ཆུད་པར་བྱའོ། །དོན་དམ་པར་ན་དེ་ནི་དེའི་ངོ་བོ་ཡིན་པའི་ཕྱིར་དང༌། ཇི་ལྟ་བའི་དངོས་པོའི་མངོན་སུམ་གྱི་ངོ་བོས་རྗེས་སུ་བྱེད་པའི་ཕྱིར་རོ། །ཅི་འདི་གཞན་གྱི་ངོ་བོ་རྣམ་པར་གཅོད་པར་བྱེད་པ་ཡིན་ཏེ། དེ་ཉིད་གཞན་པའི་ངོ་བོ་མ་ཚང་བའི་གཅིག་གི་ངོ་བོ་ཡོངས་སུ་གཅོད་པའི་ཕྱིར་དང༌། དེ་བཞིན་དུ་གཞན་པ་ཉིད་
དེ་ནི་དེ་ལས་དེ་སྣང་བ་ལས་གཞན་པའི་རྣམ་པར་གཅོད་པའོ། །ག་ལས་ཤེ་ན། དེ་ལས་དེ་རང་གི་ཡུལ་ལས་སོ། །རང་གི་ཡུལ་འབའ་ཞིག་གཞན་ལ་རྣམ་པར་གཅོད་པ་མ་ཡིན་ཏེ། གཞན་པ་ཡང་རང་གི་ཡུལ་ལས་ཡིན་ནོ་ཞེས་བྱའོ། །འདི་ག་ལས་ཤེ་ན། གཞན་ནི་དེ་ལས་གཞན་པ་སྟེ་དེ་ལ་རྣམ་པར་མི་གཅོད་དོ། །གདོན་མི་ཟ་བར་ཡོངས་སུ་བཅད་པ་ནི་ཡོངས་སུ་བཅད་པ་ལས་གཞན་ཉིད་ཡིན་ནོ། །གང་གི་ཕྱིར་དེ་ལྟར་དེའི་ཕྱིར་ཚད་མ་དེ་ཉིད་གཅིག་གི་དངོས་པོ་ཡོངས་སུ་གཅོད་པར་བྱེད་པ་ན་རྣམ་པ་གཞན་མེད་པར་སྒྲུབ་པར་བྱེད་དེ་དངོས་པོ་མེད་པར་བཤད་པ་ནི་མ་ཡིན་ནོ། །འདི་ག་ལས་ཤེ་ན། དེ་སྣང་བ་ན་དངོས་པོ་མིན་པ་དེ་ལས་གཞན་པ་ཉིད་ཀྱིས་དེ་ལས་གཞན་ཏེ་རྣམ་པར་གཅོད་པ་ནི་གཞན་ཉིད་དོ། །དེ་ལས་གཞན་པ་ཉིད་དུ་སྣང་བ་ནི་དེ་ལས་གཞན་པ་ཉིད་དུ་སྣང་བ་སྟེ། དེས་ན་ཐམས་ཅད་དེ་ལས་ཐ་དད་པར་རྣམ་པར་འཇོག་པའི་ཕྱིར་རོ། །དེ་མ་ཡིན་པ་ལས་གཞན་དུ་བརྗོད་པ་གང་ཡིན་པ་ནི་གཞན་མ་ཡིན་ཏེ། མདུན་ན་གནས་པ་གཞན་མ་ལུས་པའི་ངོ་བོ་ལས་ལྡོག་པ་ལས་ལྡོག་པ་དེ་ཉིད་དེ་ལས་སྣང་བའི་རྣམ་པར་གཞག་གོ །རིགས་པ་འདི་ཉིད་ཀྱིས་གཞན་ལ་ཡང་བསྟན་པ་ནི་འདིར་རིམ་པ་དང་རིམ་པ་མ་ཡིན་པ་ཞེས་བྱ་བ་ལ་སོགས་པ་སྨོས་ཏེ། རིགས་པ་གཞན་པ་འདིས་དོན་གཅིག་ཏུ་ངེས་པའི་ངོ་བོ་དང་རྗེས་སུ་མཐུན་པའི་བློ་སྐྱེ་བ་ན་དེ་ལས་བཟློག་པའི་ངོ་བོ་ཐམས་ཅད་རང་གི་ཡུལ་ལས་རྣམ་པར་གཅོད་པས་ན་ཕུང་པོ་གཉིས་ཡིན་ལ། གསུམ་པའི་རྣམ་པ་གཞན་མེད་པར་སྒྲུབ་པར་བྱེད་པ་ན་གཞན་གང་ཡང་རུང་བ་འགའ་ཞིག་རྣམ་པར་གཅོད་དོ། །རིམ་དང་རིམ་མ་ཡིན་པས་རྟག་པ་དང་མི་རྟག་པ་ལ་སོགས་པ་དེ་བཤད་པ་ཡིན་ནོ། །དེ་ལྟ་ན་འབྲས་བུ་རིམ་པ་ལ་རྐྱེན་དང་ལྷན་ཅིག་མ་ཡིན་པ་ཉིད་ཀྱི་བློ་དེ་དང༌། རིམ་མ་ཡིན་པའི་འབྲས་བུ་གཞན་དང་ལྷན་ཅིག་པ་ཡིན་པ་དེའི་ཕྱིར་ཐ་དད་པར་བྱེད་དོ། །རིམ་དང་རིམ་མ་ཡིན་པའི་ངོ་བོ་དེ་ལས་གཉིས་སུ་གྲུབ་པས་རྣམ་པ་གསུམ་པ་སྲིད་པ་བཀག་པ་ཡིན་ནོ། །རིམ་པའི་དངོས་པོས་ཐ་དད་པའི་འབྲས་བུ་སྐྱེད་པ་ཐམས་ཅད་ནི་དེ་དང་གཞན་རྣམ་པ་
གཉིས་སུ་རྣམ་པར་འཇོག་པའི་ཕྱིར་རོ། །དེ་ལྟར་སྐྱེ་བ་དང་འཇིག་པ་ནི་སྐད་ཅིག་མར་བརྗོད་དོ་ཞེས་བྱ་བ་རྣམ་བར་འཇོག་བ་ཁོ་ནའི་དུས་སུ་བློས་དེ་ལས་བཟློག་པའི་ངོ་བོ་ས་ནི་རང་གི་ཡུལ་ལ་ཕན་མི་འདོགས་པས་དེ་ལས་གཞན་པ་ཉིད་ཀྱི་རྣམ་པ་གཞན་དུ་འཇོག་པའི་ཕྱིར་རྫས་གཞན་མེད་པ་ཡིན་ནོ། །དེ་ལྟར་ན་ཚང་མ་གཅིག་གི་རྒྱུ་མཚན་གྱིས་མ་འདྲེས་པར་གྲུབ་པའི་མཇུག་བསྡུ་བ་བསྟན་པ་ནི་དེ་ལྟར་བས་ན་ཞེས་བྱ་བ་སྨོས་སོ། །དེ་སྐད་དུ་བཤད་པའི་རིམ་པས་གཅིག་ཏུ་སོ་སོར་ངེས་པའི་བདག་ཉིད་དུ་དམིགས་པས་དེའི་དམིགས་པར་བྱ་བ་དེ་ལས་གཞན་པ་གང་ཡིན་པ་དེ་དང་མཚུངས་པར་རུང་བའི་ངོ་བོ་དེ་ལས་བཟློག་པ་ནི་དེའི་ངོ་བོ་མ་ཚང་བ་དེའི་བདག་ཉིད་རྣམ་པར་གཅོད་པ་སྟེ་ཐ་དད་པར་བྱེད་པའོ། །དེའི་དམིགས་པར་བྱ་བ་མི་དམིགས་པའི་རང་བཞིན་གྱི་ངོ་བོ་གཞན་དུ་སྣང་བའི་ཕྱིར་རོ། །དེ་བཞིན་དུ་དེའི་རང་གི་ཡུལ་དེ་ལས་གཞན་པའི་བདག་ཉིད་མེད་པ་གཙོ་བོ་ཡིན་པར་བསྟན་པས་རྣམ་པར་གཅོད་པ་ཡིན་ལམ་འདྲེས་པར་སྒྲུབ་པར་བྱེད་དོ། །དེས་ན་གང་གི་ཚེ་འདི་དག་གཞན་ཐམས་ཅད་དང་བྱེ་བྲག་མེད་པར་དེ་ལ་མེད་པར་གྲུབ་པར་འགྱུར་རོ་ཞེས་གང་ལ་མངོན་པར་འདོད་པ་དེའི་ཚེ་གྲུབ་པ་ལ་སྒྲུབ་པ་ཡིན་ནོ། །གང་གི་ཕྱིར་ཐམས་ཅད་བྱེ་བྲག་མེད་པར་དེ་དང་རྣམ་པ་གཅིག་པའི་བློ་དེ་མ་ཡིན་པའི་ངོ་བོ་མ་ཚང་བ་ནི་རང་གི་ཡུལ་ལས་རྣམ་པར་བཅད་པར་བྱ་བ་ཡིན་ཏེ། གཞན་གྱི་ངོ་བོ་ཐམས་ཅད་དེ་ལ་མི་སྣང་བའི་ཕྱིར་རོ། །ཡང་ན་དེའི་ཡུལ་དང་དུས་དག་ཏུ་བཟློག་པའི་ངོ་བོ་ཐམས་ཅད་མེད་པར་རྣམ་པར་གཅད་པར་བྱ་བར་འདོད་པ་དེ་མི་རིགས་སོ་ཞེས་སྟོན་པ་ནི་དེའི་ཡུལ་དང་དུས་དག་ཏུ་གང་ལ་འདི་ངེས་བ་ན་ཁམས་གསུམ་པོ་མ་ལུས་པ་དང༌། མཚན་ཉིད་མི་མཐུན་པའི་དོན་དུ་དམིགས་པར་བྱ་བ་མ་ཡིན་ནོ། །དེ་ལ་དངོས་པོ་གཞན་ཐམས་ཅད་དང་མཚུངས་བར་རུང་བའི་ངོ་བོ་འམ་ཅིག་ཤོས་རྣམ་པར་གཅོད་པ་དང་དགག་པ་ཡིན་ནོ། །རྒྱུ་གང་གིས་དེ་མཚུངས་པར་རུང་བའི་ངོ་བོ་དེ་ལ་མི་སྣང་བའི་བཀག་པ་དེ་ལས་དེའི་ངོ་བོ་གཅིག་ཏུ་ངེས་པའི་ངོ་བོ་ས་རྟོགས་བ་མི་སྲིད་པའི་ཕྱིར་རོ། །དེ་མེད་ན་མི་འབྱུང་བ་ནི་དེ་ལ་རག་ལས་པ་དེའི་དགག་པ་གོ་བར་བྱེད་པ་ཡིན་པས་
དེ་རྒྱུ་མ་ཡིན་པ་དང༌། དམིགས་པ་འདི་རིགས་བྱར་མ་གྱུར་པ་དེ་དང་མཚུངས་པར་རུང་བའི་ངོ་བོ་ནི་སྲིད་པའི་ཕྱིར་ཇི་ལྟར་མེད་པ་འགྲུབ་པར་འགྱུར། དེ་དག་གི་མཇུག་བསྡུ་བ་ནི་དེ་ལྟ་བས་ན་དེའི་བདག་ཉིད་མ་ཡིན་པ་ཞེས་བྱ་བ་སྨོས་ཏེ། དེ་ལས་བཟློག་པའི་ངོ་བོ་གཞན་ཐམས་ཅད་དེའི་རྣམ་པ་གཅིག་པ་ཡུལ་དང་ངུས་སུ་ཡང་སྒྲུབ་པར་བྱེད་པར་མི་འགྱུར་ལ། དེའི་སྣང་བ་གང་དང་གང་ཡུལ་དང་དུས་དེ་དང་དེ་དག་ཏུ་ཡང་འགྱུར་རོ། །ཅི་དང་འདྲ་ཞེ་ན། རོ་དང་གཟུགས་ལ་སོགས་པ་བཞིན་ནོ། །གཟུགས་སོ་སོར་སྣང་བའི་ཤེས་པས་དེའི་ངོ་བོ་དང་འདྲ་བའི་རོ་རང་གི་ཡུལ་ལས་ཐ་དད་པར་བྱེད་པ་ཡང་དེ་དང་མ་འདྲེས་པར་སྒྲུབ་པར་བྱེད་པས་ཀྱང་དེའི་ཡུལ་དང་དུས་དག་མེད་པར་སྒྲུབ་པར་བྱེད་དོ། །དེས་ན་ཡང་ཐམས་ཅད་དང་མཚུངས་པར་མི་རུང་བའི་གནས་སྐབས་ཀྱང་དེ་ལ་མེད་པར་འགྱུར་རམ། དམིགས་པའི་རིག་བྱར་གྱུར་པའི་བྱེ་བྲག་རྣམས་ཀྱང་བརྗོད་པར་མི་བྱའོ། །གང་གི་ཕྱིར་དེ་ལྟར་དེ་བས་ན་ཇི་སྐད་བཤད་པའི་མི་དམིགས་པ་ཁོ་ན་ལས་རེས་འགའ་ལ་ལ་ཞིག་ཏུ་འགའ་ཞིག་དངོས་པོ་མེད་པར་འགྲུབ་བོ། །དམིགས་པའི་རིག་བྱར་གྱུར་པའི་དེ་དང་མཚུངས་པར་རུང་བའི་ངོ་བོ་དམིགས་པའི་བདག་ཉིད་དེ་ལྟ་བུའི་ངོ་བོས་ཡིན་གྱི། སྤྱི་ཡིས་ནི་མ་ཡིན་ནོ། །ཇི་སྐད་དུ་བཤད་པའི་ཕ་རོལ་པོའི་ཚད་མ་ལྔ་པོ་གང་ལ་དངོས་པོའི་ངོ་བོ་ལས་སྐྱེས་བ་ནི་དངོས་པོ་ཡོད་པ་རྟོགས་པའི་ཕྱིར་རོ། །དེ་ལ་མེད་པའི་ཚད་མ་ཡིན་པ་དེ་ནི་དམིགས་པའི་རིགས་བྱར་མ་གྱུར་པའི་ཚང་མ་ལྔ་པོ་རབ་ཏུ་མི་འཇུག་པས་ཀྱང་དེ་མེད་པར་འགྲུབ་བོ། །ཡོད་ཀྱང་དེ་ནི་རང་བཞིན་གྱིས་བསྐལ་བ་ལ་སོགས་པ་ལ་ཚད་མ་ལྔ་པོ་འཇུག་པ་མི་སྲིད་པའི་ཕྱིར་རོ། །དེས་ན་དེ་ལྟར་ཞར་ལ་བྱུང་བ་རྫོགས་ནས་གང་བཤད་པ་དེ་ཉིད་གཞན་གྱིས་སྨྲས་པ། གཞན་ཡོད་པ་དེའི་ཡུལ་ཅན་གྱི་དམིགས་པས་དེ་མེད་པར་ཅིས་ན་སྒྲུབ་པར་མི་བྱེད་ཅེ་ན། དེ་ལ་གཞན་ཡོད་པས་དེ་མེད་པའི་རྟགས་ནི་སུན་ཕྱུང་ནས་དེའི་ཡུལ་ལ་གང་ལ་ཉེ་བར་དམིགས་པ་བསལ་བ་ནི་གཞན་ཡོད་པའི་ཡུལ་ཅན་ཞེས་བྱ་བ་ལ་སོགས་པ་སྨོས་ཏེ། གང་གཞན་ཡོད་པའི་ཡུལ་ཅན་གྱི་དམིགས་
པས་དེ་མེད་པ་ཅིས་ན་སྒྲུབ་པར་མི་བྱེད་ཅེས་ཡང་བཟླས་ནས་བཤད་པ་ནི་དེས་དེ་མེད་པར་སྒྲུབ་པར་བྱེད་པར་ཁོ་བོ་ཅག་འདོད་པ་ཁོ་ན་ཡིན་གྱི་ཇི་སྐད་བཤད་པ་འདི་རྟགས་ཉིད་དུ་ནི་མ་ཡིན་ནོ། །ཅིའི་ཕྱིར་ཞེ་ན། གང་གིས་དེ་ལ་གཞན་ཡོད་བའི་ཡུལ་ཅན་གྱི་དམིགས་པ་གང་ཡིན་པ་དངོས་པོ་མེད་པ་ལོགས་ཤིག་པ་གཞན་ཡོད་པ་དང་མཚུངས་པའི་ཕྱིར་དེ་ནི་གཞན་ཡོད་པའི་ཡུལ་ཡིན་པ་དང་དེ། དེ་མེད་པ་འགའ་ཞིག་ཏུ་འདུ་བ་ལ་སོགས་པའི་ངོ་བོའི་འབྲེལ་པ་ཡོད་པ་མ་ཡིན་ནོ། །ཐ་མི་དད་པར་གྲུབ་པ་འདི་ཡང་མཚུངས་སོ་ཞེས་བསྟན་པ་ནི་རྟགས་འབྱུང་བའི་དུས་སུ་ཞེས་བྱ་བ་ལ་སོགས་པ་སྨོས་ཏེ། གང་དང་གང་གཞན་ཡོད་པའི་ཡུལ་ཅན་ཉེ་བར་དམིགས་པ་རྟགས་སུ་འདོད་པ་དེ་དང་དེས་དབེན་པའི་ཕྱོགས་ཀྱི་རྣམ་པ་འབྱུང་བའི་དུས་ཁོ་ན་ནི་རྟོག་པ་སྐྱེ་བའི་དུས་ཁོ་ནར་རོ། །དེ་མེད་པར་འགྲུབ་པའི་ཕྱིར་རོ། །དེ་ལྟ་ན་དེར་སྣང་བས་དབེན་པའི་གཞན་ཡོད་པར་སྣང་བའི་བློས་རིག་པ་ཉིད་དེ་མེད་པར་རིགས་པ་ཡིན་ནོ་ཞེས་བྱའོ། །འདི་དག་ཉིད་སྒྲུབ་པ་ནི་གཞན་ན་དེས་དབེན་པ་ཡོད་པར་རྟོགས་པར་བྱ་བ་གདོད་ནས་རྟོགས་པ་ནི་དུས་ཕྱིས་དེ་རྟོགས་པའོ། །གཞན་ཡོད་པར་རྟོགས་པ་དེ་མེད་པ་ནི་རྗེས་སུ་འགྲོ་བ་དང་ལྡོག་པ་དག་རབ་ཏུ་བསྒྲུབས་ནས་འབྲེལ་པ་སྒྲུབ་པར་བྱེད་པའི་ཚད་མས་དེ་མེད་པ་རྟོགས་པ་ནི་མ་ཡིན་ནོ། །འོ་ན་ཅི་ཞེ་ན། དེ་ལས་གཞན་པ་དེས་དབེན་པའི་ངོ་བོ་རྟོགས་པ་ཁོ་ན་དེའི་ཟླ་བོ་མེད་པ་རྟོགས་པ་ཡིན་ཏེ། དེ་ཉིད་དེ་མེད་པའི་བདག་ཉིད་ཡིན་པའི་ཕྱིར་རོ། །འདི་ལྟར་བུམ་པ་དང་བཅས་པའི་ཕྱོགས་དང་མ་འདྲེས་པའི་ངོ་བོ་འབའ་ཞིག་གི་ཕྱོགས་སྣང་བ་ཉིད་བུམ་པ་མེད་བར་སྣང་བ་ཡིན་ནོ། །འདི་ན་བུམ་པ་མེད་པའམ། བུམ་པ་འདི་དང་ལྡན་པ་མ་ཡིན་ཏེ་བུམ་པ་དད་བཅས་པ་ལ་གཞན་ཡིན་དང༌། དོན་ལ་ནི་ཐ་དད་པ་ཅི་ཡང་མེད་དོ། །དེས་ན་བུམ་པ་དང་བཅས་པ་ལས་གཞན་པ་འབའ་ཞིག་པའི་ཕྱོགས་སྣང་བ་ཉིད་བུམ་པ་མེད་པར་སྣང་བ་ཡིན་པའི་ཕྱིར་བུམ་པ་འདི་ན་མེད་དོ་ཞེས་ཤེས་པ་ནི་གཟུང་བ་ལ་འཛིན་པས་དྲན་པ་ཡིན་ནོ། །གལ་ཏེ་ཇི་ལྟར་ཤེས་ཤེ་ན་མཐོང་བ་ཅན་དུ་རྗེས་སུ་འགྲོ་བ་དང༌། ལྡོག་པ་སྒྲུབ་པའི་མཚན་ཉིད་ཀྱིས་བར་དུ་
ཆོད་པ་མེད་པར་འདི་ན་བུམ་པས་དབེན་པའི་ཕྱོགས་ཀྱི་ངོ་བོ་ཡོད་དོ། །འདི་ན་བུམ་བའི་དངོས་པོ་མེད་དེ་ཞེས་ཕྱེ་ནས་རྣམ་པར་རྟོག་པ་ཉིད་ཀྱིས་ཤེས་པར་བྱེད་པའི་ཕྱིར་རོ། །དེས་ན་འདི་ན་ཡོད་དོ་ཞེས་བྱ་བ་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མེད་དོ། །གང་ཡང༌། གཞན་ཡོད་པའི་ཡུལ་དམིགས་པ་དེ་མེད་པར་སྒྲུབ་པ་མ་ཡིན་ཏེ་དཔེ་མ་གྲུབ་པའི་ཕྱིར་རོ། །འདི་ཉིད་ལྡོག་པའི་སྒོ་ནས་བསྟན་པ་ནི་དེ་ནི་གང་ཞིག་ཅེས་བྱ་བ་ལ་སོགས་པ་སྨོས་ཏེ། གལ་ཏེ་འདི་ལ་ཡང་རྗེས་སུ་འགྲོ་བ་ཡོད་དོ་ཞེ་ན། འདི་སྐད་དུ་ཡང་ཞེས་བྱ་བ་ལ་སོགས་པ་སྨོས་སོ། །ཅིའི་ཕྱིར་བསྟན་པར་མི་ནུས་ཤེ་ན། དེ་དམིགས་པ་གཅིག་པུ་གཞན་མ་ཡིན་པ་དང་ཚོགས་པ་གཅིག་པར་ཡོད་པ་གང་དམིགས་པ་ཁྱད་པར་གྱི་ངོ་བོ་དེ་ནི་གཞན་གང་ན་ཡང་མེད་པའི་ཕྱིར་རོ། །འོན་ཏེ་དེས་དབེན་པར་ཉེ་བར་དམིགས་པ་ཐུན་མོང་བའི་གཏན་ཚིགས་སུ་བརྗོད་པ་ཡིན། གང་དང་གང་ན་བུམ་པས་དབེན་པའི་ས་གཞི་དམིགས་པ་དེ་དང་དེ་ན་བུམ་པ་མེད་དེ་དཔེར་ན་སྔར་ཉམས་སུ་མྱོང་བའི་བུམ་པས་དབེན་པའི་ཕྱོགས་བཞིན་ནོ་ཞེ་ན། སྤྱི་རབ་ཏུ་བསྟན་པ་ཞེས་བྱ་བ་སྨོས་ཏེ། སྤྱི་རབ་ཏུ་བསྟན་པར་བྱེད་པའི་དཔེ་ལ་ཡང་སྔར་ཉམས་སུ་མྱོང་ཟིན་པའི་བུམ་པས་དབེན་པའི་ས་ཕྱོགས་ན་བུམ་པ་མེད་པར་སྒྲུབ་པར་བྱེད་པའི་ཚད་མ་མངོན་སུམ་ལ་སོགས་པ་གཞན་ནི་གཞན་ཡོད་པའི་ཡུལ་ལ་དམིགས་པ་ནི་མེད་དོ། །འོན་ཀྱང་དེ་ཁོ་ན་གཞན་ཡོད་པ་དམིགས་པ་ཡིན་ནོ། །བསྒྲུབ་པར་བྱ་བའི་ཆོས་དེ་མེད་པ་སྒྲུབ་པར་བྱེད་པ་དེ་ཡང་ཇི་ལྟ་བ་བསྒྲུབ་པར་བྱ་བའི་ཆོས་ཅན་ལ་དེ་མེད་པར་སྒྲུབ་པ་ནི་དཔེ་ལ་ལྟོས་པ་ཡིན་ན། དཔེ་ཡང་དེ་བཞིན་དུ་གཞན་དེ་ལ་ཡང་ལྟོས་ན་ནི་ཐུག་པ་མེད་པ་དང༌། དཔེ་ཡང་ཐུག་པ་མེད་པའི་ཕྱིར་ཐམས་ཅད་ལ་དེ་མེད་པར་རྟོགས་པ་མ་ཡིན་ནོ། །གང་གི་ཕྱིར་དེ་བས་ན་རྟགས་གང་ལས་ཀྱང་ནི་དེ་ལས་གཞན་ཡོད་ཡོད་པ་དམིགས་པ་ཉིད་ལས་སོ། །དེ་མེད་པར་མི་འགྲུབ་བོ། །གང་གི་ཚེ་དེ་ལས་གཞན་ཡོད་པ་ལས་དེ་མེད་པར་སྒྲུབ་པར་མི་བྱེད་དོ། །ཡང་ཅིས་རྟགས་ཀྱིས་སྒྲུབ་པར་བྱེད་པ་མ་ཡིན་ཞེ་ན། མངོན་སུམ་གྱི་ཞེས་བྱ་བ་
སྨོས་ཏེ། མངོན་སུམ་གྱི་མཚན་ཉིད་བརྗོད་པར་འདོད་པའི་དམིགས་པ་གཞན་པ་མི་དམིགས་བ་ཡིན་པའི་ཕྱིར་དེའི་མཚན་ཉིད་མི་དམིགས་པས་གྲུབ་སྟེ། ཉམས་སུ་མྱོང་བའི་ཐ་སྙད་སྒྲུབ་པའི་ཕྱིར་རོ། །ལས་ལ་གནས་པའི་བྱ་བ་ལ་ལྟོས་ནས་དེ་གཞན་པ་ཡོད་པ་མི་དམིགས་པའི་ངོ་བོ་ཡིན་པའི་ཕྱིར་རོ། །ཡང་ཅིས་ན་འདི་མེད་པའི་ཐ་སྙད་སྒྲུབ་བ་ཡིན་ཞེ་ན། བསྒྲུབ་པར་བྱ་བ་རྟོགས་པ་ལས་ཏེ་གང་ཡུལ་རྟོགས་ཟིན་ནས་ཡུལ་ཅན་ལ་རྨོངས་པ་དྲན་པ་ཉིད་ཀྱིས་དེ་མེད་པའི་ཐ་སྙད་དུ་བྱེད་དོ། །མངོན་སུམ་གྱི་རྒྱུ་མཚན་ཁོ་ན་མི་དམིགས་པའི་རྟགས་མ་ཡིན་ནོ་ཞེས་གཞན་ལེགས་པར་དཔྱད་ཟིན་པས་འདིར་ཞར་ལ་འོངས་པས་ཆོག་གོ །དེས་ན་མི་དམིགས་པའི་གཏན་ཚིགས་ཀྱི་ལོག་བར་རྟོགས་པ་མ་ལུས་བ་བསལ་ནས་རང་གི་ངོ་བོ་རྣམ་པར་གཞག་པའི་དབྱེ་བ་བསྟན་པའི་ཕྱིར། དེ་འདིར་ཇི་སྐད་བཤད་པའི་མི་དམིགས་པ་གསུམ་སྟེ་ཞེས་བྱ་བ་སྨོས་ཏེ། ཇི་ལྟར་ཡིན་ཞེ་ན། སྒྲུབ་པར་བྱེད་པའི་ཚད་མ་དེ་ཡིས་རྒྱུ་དང་འབྲས་བུའི་དངོས་པོ་གྲུབ་བར་གྱུར་ན་རྒྱུ་མི་དམིགས་པ་ཡིན་ནོ། །ཅི་འདྲ་བ་ཞིག་ཅེ་ན་དངོས་པོ་མེད་པར་གྲུབ་པའོ། །དེ་བཞིན་དུ་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་གྲུབ་པ་ཡོད་ན་དེ་སྒྲུབ་པར་བྱེད་པའི་ཚད་མའི་སྟོབས་ཀྱིས་གཞན་དངོས་པོ་མེད་པར་སྒྲུབ་པའི་ཁྱད་པར་བྱེད་པ་མི་དམིགས་པའོ། །ཞར་ལ་ཇི་སྐད་བཤད་པའི་རང་བཞིན་མི་དམིགས་པར་ཡང་གྲུབ་པས་དེ་ལྟར་མི་དམིགས་པ་རྣམ་པ་གསུམ་ཡིན་ནོ། །ཡང་ཇི་ལྟར་ཁྱབ་པར་བྱེད་པ་དག་གིས་མེད་པའི་ཐ་སྙད་དུ་འགྲུབ། གང་ལས་དེ་དག་མེད་པར་འགྲུབ་པ་སྨོས་ཤིག་ཆེ་ན། དེ་ལ་རྒྱུ་དང་ཁྱབ་པར་དག་གིས་ཀྱང་ཞེས་བྱ་བ་སྨོས་ཏེ། འབའ་ཞིག་བ་དང་ཡིན་པ་དངོས་སུ་མིད་པའི་ཐ་སྙད་སྒྲུབ་པ་མ་ཡིན་གྱི་རང་བཞིན་མི་དམིགས་པའི་ངོ་བོས་མེད་པའི་ཐ་སྙད་འགྲུབ་པོ། །གཞན་དེས་དབེན་པ་ཡོད་པར་འགྲུབ་པ་གང་ཡིན་པ་དེ་ཉིད་མེད་པའི་ཐ་སྙད་འགྲུབ་པའི་རྒྱུ་ཡིན་པའི་ཕྱིར་དེ་སྐད་དུ་བརྗོད་དོ། །རྒྱུ་དང་ཁྱབ་པར་བྱེད་པ་མེད་པ་དེ་ནི་དེ་ལྟར་གྲུབ་པ་ནི་གཞན་ཡོད་པ་མངོན་སུམ་གྱི་ངོ་བོས་གྲུབ་ན་དངོས་པོ་མེད་པར་འགྲུབ་ལ་ལ་དངོས་པོ་མེད་པའི་ཐ་སྙད་ཀྱང་
འགྲུབ་པ་ཡིན་ནོ། །འབྲས་བུ་དང་ཁྱབ་པར་བྱ་བ་དག་དགག་བ་ནི་གང་གི་ཚེ་དེ་དག་དང་མི་མཐུན་པའི་ཡུལ་གྱི་ཁྱད་པར་དེའི་མི་དམིགས་པར་མི་འགྲུབ་པ་དེའི་ཚེ་དངོས་པོ་མེད་བའམ་དངོས་པོ་མེད་པའི་ཐ་སྙད་སྒྲུབ་པར་བྱེད་པ་ཡིན་ཏེ། འམ་གྱི་སྒྲ་ནི་བསྡུ་བའི་དོན་ཏོ། །ཅི་འོན་ཏེ་རང་བཞིན་མི་དམིགས་པས་ཀྱང་མེད་པར་བསྒྲུབ་པར་བྱ་བའི་རྟགས་སུ་འགྱུར་རམ་ཞེ་ན། རང་བཞིན་མི་དམིགས་པ་ཞེས་བྱ་བ་ལ་སོགས་པ་སྨོས་ཏེ། ཐ་སྙད་ཁོ་ན་མེད་པ་ཡང་མ་ཡིན་ཏེ་དེ་མངོན་སུམ་གྱིས་གྲུབ་པའི་ཕྱིར་རོ། །འདིར་གཞན་གྱིས་དོགས་པའི་སྐབས་སུ་བརྗོད་པ་ནི་གལ་ཏེ་རྒྱུ་དང་ཁྱབ་པར་བྱེད་པ་ཞེས་བྱ་བ་སྨོས་ཏེ། མེད་པའི་ཐ་སྙད་དུ་གྲུབ་པ་གང་དང་གང་ཡིན་པ་དེ་མེད་པ་ཡིན་ན་གང་གིས་དེ་གཞན་རྒྱུ་དང་ཁྱབ་པར་བྱེད་པས་དབེན་པའི་མངོན་སུམ་གྱི་བདག་ཉིད་ཀྱིས་གྲུབ་བ་དང༌། དེའི་ངོ་བོ་དམིགས་པས་གཞན་འབྲས་བུ་དང་ཁྱབ་པར་བྱ་བ་དང་དངོས་པོ་མེད་པ་དང་མེད་པའི་ཐ་སྙད་སྒྲུབ་པར་བྱེད་དོ། །དེ་ཡང་གཞན་ཡོད་པ་དམིགས་པས་དེ་དག་གི་རྒྱུ་དང་ཁྱབ་པར་བྱེད་པ་དམིགས་པའི་རིག་བྱར་གྱུར་པ་ཁོ་ན་ཡོད་པས་མེད་པའི་ཐ་སྙད་དུ་སྒྲུབ་པར་བྱེད་ཀྱི་གཞན་དུ་ནི་མ་ཡིན་ནོ་ཞེས་འདོད་པར་གྱུར་ན། ཇི་ལྟར་དེ་དག་རྒྱུ་དང་ཁྱབ་པར་བྱེད་པ་མི་དམིགས་པ་ལྐོག་ཏུ་གྱུར་པའི་དོན་གྱི་ཡུལ་ལ་སྦྱོར་བ་ཡིན། གང་གི་ཚེ་འབྲས་བུ་དང་རང་བཞིན་གྱི་གཏན་ཚིགས་ཀྱི་ལྡོག་པའི་སྦྱོར་བ་བྱེད་པ་ནི་གང་དང་གང་ན་མེ་མེད་པ་དེ་དང་དེ་ན་དུ་བ་ཡང་མེད་པ་དེ་བཞིན་དུ། གང་དང་གང་ན་ཤིང་མེད་པའམ། སྐད་ཅིག་མ་མེད་པ་དེ་དང་དེ་ན་ཤིང་ཤ་པའམ་ཡོད་པ་མེད་དོ་ཞེས་མ་ལུས་པའི་དོན་ཡོངས་སུ་བཟུང་ནས་ལྡོག་པའི་སྦྱོར་བར་འགྱུར་ན། མེད་དང་ཤིང་དང་སྐད་ཅིག་མ་ཉིད་དེས་དབེན་པའི་དོན་ཐམས་ཅད་མངོན་སུམ་མ་ཡིན་པ་དེའི་ཕྱིར་ན་ཇི་ལྟར་དེས་དབེན་པའི་དམིགས་པའི་མཚན་ཉིད་ཀྱི་མི་དམིགས་པའི་སྤྱོད་པ་ཉིད་ཀྱིས་དམིགས་པའི་རིག་བྱར་གྱུར་པ་ནི་མི་འགྱུར་པོ། །དེ་ལྟ་ན་ནི་ལྟར་མ་ལུས་པ་བསྡོམས་ནས་ཁྱབ་པར་རྒྱུ་དང་ཁྱབ་པ་དང་རང་བཞིན་གྱི་གཏན་ཚིགས་ཀྱི་ལྡོག་པ་གྲུབ་པ་ཡིན། ཡང་ན་དེ་གྲུབ་ན་ཇི་ལྟར་
འདིས་གོ་བར་བྱེད་པ་ཡིན། དེའི་ཕྱིར་ལ་ལར་མ་མཐོང་བ་ཙམ་ལས་ལྡོག་པ་དང་དེ་བཞིན་དུ་མཐོང་བ་ཙམ་ལས་རྗེས་སུ་འགྲོ་བར་འདོད་པར་བྱ་སྟེ། དེ་ལྟ་ན་ཡང་འབྲེལ་པ་བརྗོད་པ་དོན་མེད་དོ་ཞེས་གཞན་དག་སེམས་ན། གྲུབ་པའི་མཐའ་སྨྲ་བས་རྟགས་མ་ངེས་པ་ཞེས་བྱ་བ་སྨོས་ཏེ། ལྐོག་ཏུ་གྱུར་པའི་དོན་ལ་རྒྱུ་དང་ཁྱབ་པར་བྱེད་པ་མི་དམིགས་པའི་སྦྱོར་བའི་ལྡོག་པ་བསྟན་པའི་དུས་སུ་ཚད་མས་མ་ཡིན་ལ་རྒྱུ་དང་ཁྱབ་པར་བྱེད་པ་མི་དམིགས་པའི་ཚད་མར་གྱུར་པ་ཁོ་ནས་སྦྱོར་བ་མ་ཡིན་ཏེ། ཅིའི་ཕྱིར་ཞེ་ན། རྒྱུ་དང་ཁྱབ་པར་བྱེད་པ་མི་དམིགས་པའི་རྟགས་ཀྱི་མཚན་ཉིད་ནི་དེ་མེད་པའི་མཚན་ཉིད་ལ་མ་ངེས་པའི་ཕྱིར་རོ། །དེ་མི་དམིགས་པའི་ངོ་བི་ལ་ཐེ་ཚོམ་ཟ་བའི་ཕྱིར་ན་དེ་མེད་པ་ཉིད་ལ་ཡང་ཐེ་ཚོམ་ཟ་བའི་ཕྱིར་རོ། །དེ་ལྟ་ན་ཇི་ལྟར་དེའི་ཚེ་དེ་དག་ལ་སྦྱོར་བར་འདོད་པ་ཡིན་ཞེ་ན། རྒྱུ་དང་ཞེས་བྱ་བ་སྨོས་ཏེ། རྒྱུ་དང་ཁྱབ་པར་བྱེད་པ་ནི་རྒྱུ་དང་འབྲས་བུའི་དངོས་པོ་སྒྲུབ་པར་བྱེད་པ་དང་ཁྱབ་པར་བྱ་བ་དང་ཁྱབ་པར་བྱེད་པ་སྒྲུབ་པར་བྱེད་པ་སྔར་བཤད་པའི་དེ་ལས་བྱུང་བ་དང་དེའི་བདག་ཉིད་ཀྱི་མཚན་ཉིད་ཀྱི་འབྲེལ་པས་གྲུབ་པར་བྱེད་པས་འབྲེལ་པ་གྲུབ་པ་ཡིན་ན། གལ་ཏེ་མེད་པ་གང་དང་གང་ལ་མེད་པར་འགྱུར་བས་གཞན་དང་འབྲས་བུ་དང་ཁྱ་པར་བྱ་བ་གདོན་མི་ཟ་བར་མེད་པར་ངེས་སོ། །དེ་ལྟ་མ་ཡིན་ན་མ་ཡིན་པར་ཐལ་བར་འགྱུར་བའི་ཕྱིར་དང༌། རང་བཞིན་མེད་པར་ཐལ་བར་འགྱུར་བའི་ཕྱིར་རོ། །དེའི་སྒོ་ནས་འབྲེལ་པ་གྲུབ་པར་བྱེད་པའི་ཚད་མར་འགྱུར་རོ། །ཇི་ལྟར་འགྱུར་ཞེ་ན། འདིར་དེའི་དོན་བསྟན་པའི་ཕྱིར་རྒྱུ་དང་ཁྱབ་པར་བྱེད་པ་མི་དམིགས་པ་འདི་རབ་ཏུ་སྦྱོར་བ་འབའ་ཞིག་ཏུ་ཟད་དོ། །གང་ལ་མཐོང་བ་དང་མ་མཐོང་བའི་སྟོབས་ཀྱིས་སྒྲུབ་པ་ནི་གཅིག་མཐོང་བ་ན་གཞན་མཐོང་ལ། མ་མཐོང་བ་ཉིད་ན་མི་མཐོང་བ་དེ་ཉིད་ལ་དེ་ཡོད་པ་དང་མེད་པ་ཉིད་དུ་འགྱུར་ན་ཅིའི་ཕྱིར་ཐམས་ཅད་ལ་འགྱུར་བ་ཡིན། འབྲེལ་པ་མེད་པའི་བདག་ཉིད་བ་ལང་དང་རྟ་ལ་སོགས་པ་རྣམས་ལ་ལར་དེ་བཞིན་དུ་ཡོད་པར་མཐོང་ཡང་ཐམས་ཅད་ལ་དེ་བཞིན་དུ་ཡོད་པར་མི་འགྱུར་རོ། །སྐྱེས་བུས་ཀྱང་ཐམས་ཅད་ཀྱི་ཚེ་འགའ་
ཞིག་ཏུ་གཅིག་ཡོད་པ་དང་མེད་པ་དག་ལས་གཞན་ཡོད་པ་དང་མེད་པ་མཐོང་བ་ནི་འདོད་རྒྱལ་བ་བཞིན་དུ་མི་སླུ་བ་མ་ཡིན་འབྲེལ་པ་མེད་དོ། །དེ་སྐད་དུ། ཡུལ་ལ་སོགས་པའི་ཁྱད་པར་ལས། །རྫས་ལ་ནུས་པ་ཐ་དད་སྣང༌། །དེ་ལ་གཅིག་མཐའ་གཞན་ལ་ནི། །དེ་འབྱུང་ངེས་པར་རིགས་མ་ཡིན། །ཞེས་བྱ་བ་བཤད་དེ། །དེའི་ཕྱིར་གདོན་མི་ཟ་བར་འབྲེལ་པ་ལས་བསྒྲུབ་པར་བྱ་བ་སྒྲུབ་པར་བྱེད་པར་ཁས་བླང་པར་བྱའོ། །དེ་ཉིད་ཀྱིས་རྗེས་སུ་འགྲོ་བ་དང་ལྡོག་པ་དག་གི་སྦྱོར་བ་བསྟན་པ་དང༌། འདི་ཉིད་ཀྱིས་བསྟན་པ་མེད་པར་ཁྱབ་བ་བསྟན་པར་མི་ནུས་པའི་ཕྱིར་རོ། །གང་དང་གང་ན་ཞེས་བྱ་བ་མ་ལུས་པའི་དོན་ཡོངས་སུ་བཟུང་ནས་ཁྱབ་པ་ནི་འབྲེལ་པ་ཚད་མས་གྲུབ་པར་གྱུར་ན་གདོན་མི་ཟ་བ་ཡིན་ཏེ། གང་དང་གང་ན་འབྲས་བུ་ཡོད་པ་དེ་དང་དེ་ན་རྒྱུ་ཡོད་པ་དང༌། གང་དང་གང་ན་དེ་མེད་པ་དེན་འབྲས་བུ་ཡང་མེད་པ་ཡིན་གྱི་དེ་ལྟ་མ་ཡིན་ན་རྒྱུ་མེད་ཀྱང་འབྲས་བུ་འབྱུང་ན་ནི་རྒྱུ་མེད་པ་ཉིད་དུ་འགྱུར་རོ། །དེས་ན་རྟག་ཏུ་ཡོད་པ་དང་མེད་པ་ལ་སོགས་པར་ཐལ་བར་འགྱུར་རོ། །དེ་བཞིན་དུ་གང་དང་གང་ལ་གང་གི་རང་བཞིན་ཡིན་པ་དེ་དང་དེ་ལ་དེའི་རང་བཞིན་ཡིན་གྱི་དེ་ལྟ་མ་ཡིན་ན་བདག་ཉིད་མེད་པར་འགྱུར་བས་སོ། །ཁྱབ་པ་ཉིད་དང་རྗེས་སུ་འགྲོ་བ་དང་ལྡོག་བ་བསྟན་པ་ནི་འབྲེལ་པས་ཁྱབ་པ་ཡིན་ན་ནུས་ཀྱི་གཞན་དུ་ན་མ་ཡིན་ནོ་ཞེས་སྔ་མ་ཉིད་དུ་རྒྱུ་ཆེར་བསྟན་ཟིན་ཏེ། །དེ་ལྟར་འབྲས་བུ་དང་རང་བཞིན་དང་མི་དམིགས་པའི་མཚན་ཉིད་ཁོ་ནའི་ཕྱོགས་ཀྱི་ཆོས་འདི་དག་གི་རྒྱུ་སྒྲུབ་པར་བྱེད་པའི་ཚད་མ་ཡོད་པར་གྱུར་པས་རྗེས་སུ་འགྲོ་བ་དང་ལྡོག་པར་ཡོད་པར་གྱུར་པ་ཉིད་ཡིན་གྱི་གཞན་དུ་ནི་མ་ཡིན་ནོ་ཞེས་བསྟན་པའི་མཇུག་བསྡུ་བ་ནི་དེ་ལྟ་བས་ན་ཞེས་བྱ་བ་སྨོས་ཏེ། རང་བཞིན་དང་འབྲས་བུ་དང་མི་དམིགས་པའི་མཚན་ཉིད་ཀྱི་ཕྱོགས་ཀྱི་ཆོས་འདི་དང་རྗེས་སུ་འགྲོ་བ་དང་ལྡོག་པ་དང་ལྡན་པ་ཡིན་པས་འབྲེལ་པ་ཡོད་པར་གྱུར་པ་འདི་དག་ཉིད་ཀྱི་རང་བཞིན་དང་འབྲས་བུ་དང་མི་དམིགས་པའི་མཚན་གཞི་ཡིན་ནོ། །གང་གི་ཕྱིར་དེ་ཡང་རྗེས་སུ་འགྲོ་བ་དང་ལྡོག་དང་ལྡན་པའི་འབྲེལ་པ་སྒྲུབ་པར་བྱེད་པའི་ཚད་མ་ཡོད་པར་གྱུར་པར་རིགས་
པ་བཤད་ཟིན་པ་ཡིན་པ་དེའི་ཕྱིར་དེའི་ཆས་ཁྱབ་པ་སྟེ། རྗེས་སུ་འགྲོ་བ་དང་ལྡོག་པ་ངེས་པའི་དབང་གིས་དེའི་ཆས་ཁྱབ་པ་ངེས་པ་ཡིན་ནོ། །སྔར་ཇི་སྐད་དུ་བཤད་པའི་དེའི་ཆས་ཁྱབ་པ་ཞེས་བརྗོད་པས་མཚན་ཉིད་གསུམ་དང་ཚུལ་གསུམ་དང་རྣམ་པ་ཅན་གྱི་གཏན་ཚིགས་གོ་པར་བྱེད་པ་ཡིན་གྱི་མཚན་ཉིད་གཞན་ནི་མེད་དེ། ཇི་སྐད་བཤད་པའི་ཚུལ་གསུམ་ཡོད་པ་ལས་གཞན་པ་ནི་དོན་མེད་པས་སོ། །ཇི་སྐད་དུ་བཤད་པའི་ཚུལ་མེད་ན་ཚུལ་གཞན་བརྟགས་ཀྱང་མ་འཁྲུལ་པའི་གོ་བར་བྱེད་པ་མེད་པའི་ཕྱིར་རོ། །དེའི་ཕྱིར་ཚུལ་གསུམ་པོ་ཁོ་ན་ཅན་གྱི་རྟགས་རྣམ་པ་གསུམ་པོ་ཁོ་ན་གོ་བར་བྱེད་པ་ཡིན་གྱི་མཚན་ཉིད་གཞན་གྱིས་མ་ཡིན་ནོ་ཞེས་བསྟན་ཏོ། །རང་གིས་བསྒྲུབ་པར་བྱ་བ་ལ་མི་འཁྲུལ་པའི་ཕྱིར་རོ་ཞེས་མཚན་ཉིད་གསུམ་ཁོ་ན་རང་གིས་བསྒྲུབ་པར་བྱ་བའི་ཆོས་ལ་མི་འཁྲུལ་པའི་ཕྱིར་རོ། །རང་གིས་བསྒྲུབ་པར་བྱ་བའི་ཆོས་ལ་མི་འཁྲུལ་པ་ཉིད་གོ་བར་བྱེད་པ་ཡིན་པས་ཚུལ་གཞན་བརྟགས་པ་དོན་མེད་དེ། འབྲེལ་པའི་རྒྱུ་མཚན་གྱིས་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པའི་ཚུལ་གཞན་བརྟགས་ན་ཡང་རང་གིས་སྒྲུབ་པར་བྱ་བའི་ཆོས་ལ་འཁྲུལ་པ་དེས་ན་འདིར་རྣམ་གསུམ་ཉིད་ཅེས་བྱ་བ་མཚན་ཉིད་གསུམ་ཁོ་ནའོ། །གཏན་ཚིགས་དེ་ནི་མེད་ན་མི་འབྱུང་བ་ཡིན་པས་རང་གིས་བསྒྲུབ་པར་བྱ་བ་ལ་མི་འཁྲུལ་པའོ། །ངེས་བ་ནི་གདོན་མི་ཟ་བར་ཡོད་པར་གྱུར་པའི་འབྲེལ་པའི་རྒྱུ་མཚན་ནོ། །དེའི་ཆས་ཁྱབ་པར་ཁས་བླངས་པ་ཉིད་ཚུལ་གཞན་དུ་བརྟགས་པ་ཡང་གཏན་ཚིགས་ལྟར་སྣང་དེ་ལས་གཞན་ནོ། །གཏན་ཚིགས་ཐིགས་པའི་འབྲེལ་པ་བྲམ་ཟེ་ཨ་ཙ་ཏས་རྣམ་པར་སྦྱར་བ་ལས་མི་དམིགས་པའི་གཏན་ཚིགས་བཤད་པ་སྟེ་གསུམ་པའོ།། །།ཇི་སྐད་བཤད་པའི་མཚན་ཉིད་གསུམ་ལས་གཞན་པའི་ཚུལ་གཞན་གང་ཡང་རུང་པར་བརྟགས་པ་ནི་གཏན་ཚིགས་ལྟར་སྣང་བའོ། །མེད་ན་མི་འབྱུང་བའི་རྣག་གི་བསྒྲུབ་པར་བྱ་བའི་ཆོས་ལ་མི་འཁྲུལ་པ་དེ་རྣམས་ལ་མེད་པར་བསྟན་པ་ནི་ཇི་སྐད་བཤད་པའི་མཚན་ཉིད་གསུམ་ཁོ་ན་ལས་གཞན་ནི་མཚན་ཉིད་མ་ཡིན་པའི་ཕྱིར་དེ་ལ་གཞན་དག་
གིས་ལོག་པར་རྟོགས་པ་བསྟན་པ་ནི་གཞན་དག་ནི་གཏན་ཚིགས་མཚན་ཉིད་དུག་པའོ་ཞེས་ཟེར་ཏེ་ཞེས་བྱ་བ་སྨོས་ཏེ། རིགས་པ་ཅན་དང་སྤྱོད་པ་ལ་སོགས་པས་བསམ་པ་གཏན་ཚིགས་གཅིག་པུ་ཡོད་ཀྱང་ཚུལ་དྲུག་དུ་འདོད་པས་གསུམ་བོ་དེ་དག་དང་ཞེས་བྱ་བ་སྨོས་ཏེ། ཕྱོགས་ཀྱི་ཆོ་དང་རྗེས་སུ་འགྲོ་བ་དང་ལྡོག་པ་བསྟན་པའོ། །དེ་བཞིན་དུ་གནོད་པ་མེད་པའི་ཡུལ་ནི་ཚུལ་བཞི་པའོ། །བསྒྲུབ་པར་བྱ་བའི་ཆོས་ཀྱི་མཚན་ཉིད་གང་ཡིན་པ་དེ་ལ་ཚད་མས་མ་བསལ་བ་ནི་གནོད་པ་མེད་པ་སྟེ། དེ་ཡོད་པ་དེ་ཉིད་ལས་ཚུལ་གཞན་ནོ། །རྣམ་པར་དེ་ལྟ་བུ་བརྗོད་པར་འདོད་པའི་གྲངས་གཅིག་པའི་ཚུལ་གཞན་ནི་གྲངས་གཅིག་པ་གང་གི་གཏན་ཚིགས་ཀྱི་རྫས་དེའི་གྲངས་གཅིག་པ་ཡིན་ཏེ། བརྗོད་པར་འདོད་པའི་གྲངས་གཅིག་པའི་གཏན་ཚིགས་ཀྱི་རྫས་ལ་བརྟེན་པ་ཉིད་གང་གི་གཏན་ཚིགས་ཀྱི་སྤྱི་དེའི་བརྗོད་པར་འདོད་པའི་གྲངས་གཅིག་པ་སྟེ་དེ་ཡོད་པ་ལས་གཞན་པའི་ཚུལ་ལོ། །གལ་ཏེ་གྲངས་གཅིག་པ་ཡོངས་སུ་བཅད་པས་འགྲན་ཟླའི་གཏན་ཚིགས་སྤངས་པའི་བསལ་བའི་གཏན་ཚིགས་འདི་གཏན་ཚིགས་སུ་སྲིད་པ་དེའི་ཚེ་གོ་བར་བྱེད་པ་ཉིད་ཡིན་ཏེ། འགྲན་ཟླའི་གཏན་ཚིགས་དང་བཅས་པའི་གྲངས་གཉིས་པ་ཅན་ཡང་མི་རིགས་པའི་ཕྱིར་རོ། །གལ་ཏེ་འགལ་བ་མི་འཁྲུལ་པ་ཅན་གྱི་གཏན་ཚིགས་གཞན་ཕ་རོལ་པོས་བསྟན་ཏོ་ཞེས་བྱ་བའི་དོན་ཏོ། །དེ་བཞིན་དུ་ཤེས་པ་ཉིད་དང་ཤེས་པའི་ཡུལ་ཏེ། མི་ཤེས་པ་ཉིད་ནི་གཏན་ཚིགས་མ་ཡིན་ལ་རང་ཡོད་པ་ཙམ་གྱིས་གོ་བར་བྱེད་པར་མི་རིགས་སོ་ཞེས་བྱའོ། །དེ་ལ་ནི་དེ་རྣམས་ལའོ། །ཚུལ་གཞན་པ་གང་ཡིན་པ་དེ་དག་གནོད་པ་མེད་པའི་ཡུལ་ཅན་ཞེས་བྱའོ། །དེས་ན་རེ་ཞིག་འབྲེལ་པའི་རྒྱུ་མཚན་རྗེས་སུ་འགྲོ་བ་དང་ལྡོག་པ་དག་མེད་ན་མི་འབྱུང་བར་འགྱུར་བ་དེ་ལས་ཐ་དད་པའི་མཚན་ཉིད་གཞན་མ་ཡིན་ཏེ་དེའི་བདག་ཉིད་དུ་དེ་བརྗོད་པར་འདོད་པས་བཤད་ཟིན་པས་བཤད་པར་མི་བྱའོ། །ཅིའི་ཕྱིར་མཚན་ཉིད་ཐ་དད་པར་མི་འགྱུར་ཞེ་ན། གནོད་པར་བྱེད་པ་དང་མེད་ན་མི་འབྱུང་བ་དག་འགལ་བའི་ཕྱིར་རོ། །
ལྷན་ཅིག་མིག་ནས་པའི་མཚན་ཉིད་ཀྱི་འགལ་བ་སྒྲུབ་པར་བྱེད་པ་ནི་མེད་ན་མི་འབྱུང་བ་ཞེས་བྱ་བ་ལ་སོགས་པ་སྨོས་ཏེ། བསྒྲུབ་པར་བྱ་བའི་ཆོས་གཏན་ཚིགས་མེད་ན་མི་འབྱུང་བར་བརྗོད་པ་ལ་དེ་ལ་ཚད་མས་གནོད་པར་གྱུར་ན། གལ་ཏེ་དེ་ཡོད་པ་ཁོ་ན་དེ་ལ་མེད་པའི་ཡུལ་ཅན་གྱི་ཚད་མ་འཇུག་ན་དེའི་ཚེ་དེ་ནི་འཁྲུལ་པས་ཚད་མར་མི་འགྱུར་བའི་ཕྱིར་གནོད་པ་ག་ལ་ཡིན། དེས་ན་གཏན་ཚིག་དང་བཅས་པ་དེའི་མཚན་ཉིད་ཀྱི་བསྒྲུབ་པར་བྱ་བ་ཆོས་ཅན་ལ་མི་འབྱུང་བར་འགྱུར། །འདིར་ཡང་བསྒྲུབ་པར་བྱ་བའི་ཆོས་སུ་ཇི་ལྟར་ན་མི་འགྱུར། གང་གི་ཕྱིར་གནོད་པར་བྱེད་པའི་གོ་སྐབས་འགྱུར་བ་དེའི་ཕྱིར་མེད་ན་མི་འབྱུང་བ་དང་ཚད་མས་གནོད་པས་ལྷན་ཅིག་མི་གནས་པས་མེད་ན་མི་འབྱུང་བས་ཉེ་བར་གནས་པས་ཆོས་ཅན་ལ་བསྒྲུབ་པར་བྱ་བའི་ཆོས་ཡོད་པར་ཚད་མས་གནོད་པ་ཉེ་བར་འཇོག་པ་ཡིན་ནོ། །དེ་དང་དེ་མེད་པ་ཆོས་ཅན་གཅིག་ལ་ཕན་ཚུན་སྤངས་ཏེ་གནས་པའི་མཚན་ཉིད་ཀྱི་འགལ་བ་སྲིད་པ་ཡིན་ནོ། །དེ་ཉིད་འགལ་བར་གསལ་བར་བྱེད་པའི་ཞར་ལ་བཞད་གད་བྱེད་པ་ནི་མངོན་སུམ་དང་རྗེས་སུ་དཔག་པ་ཞེས་བྱ་བ་ལ་སོགས་པ་སྨོས་ཏེ། བསྒྲུབ་པར་བྱ་བ་ལ་གནོད་པར་བྱེད་པས་མངོན་སུམ་དང་རྗེས་སུ་དཔག་པ་དེས་ཆོས་ཅན་གྱི་མགུལ་པ་ནས་བཟུང་ནས་རང་གི་གནས་ལས་བཏོན་ནས་གང་གི་ཕྱིར་དེ་ལ་བསྒྲུབ་པར་བྱ་བའི་ཆོས་ཡོད་པ་ཁོ་ནས་དེ་དང་མེད་ན་མི་འབྱུང་བའི་ཕྱིར་གཏན་ཚིགས་ཡོད་པ་ནི་བསྒྲུབ་པར་བྱ་བའི་ཆོས་བསལ་ནས་བཙན་ཐབས་ཀྱིས་གཏན་ཚིགས་ཆོས་ཅན་དེ་ལ་འཇོག་པར་བྱེད་དོ་ཞེས་བྱ་བ་ནི་ཀྱེ་མ་མཆོག་ཏུ་བསྒྲུབ་པར་བྱེ་བའི་ཆོས་ཀྱི་ཚན་ཉིད་ཅན་གྱི་དངོས་པོ་རྣམས་རབ་ཏུ་ཉམ་ཐག་པར་འགྱུར་རོ། །དེ་ལྟ་ན་འཁྲུལ་འཁོར་གཉིས་ཀྱི་གཙོར་བས་དབུགས་མི་ཕྱིན་པ་འཆི་བ་ཉིད་དུ་འགྱུར་རོ། །གཞན་གྱི་གནོད་པ་དང་མེད་ན་མི་འབྱུང་བའི་ཡུལ་གྱི་དབྱེ་བ་བསྟན་པ་ནི་གལ་ཏེ་གཞན་ལ་ཞེས་བྱ་བ་སྨོས་པ་ནི་བསྒྲུབ་པར་བྱ་བའི་ཆོས་ཅན་ཡོངས་སུ་སྤངས་ནས་དཔེའི་ཆོས་ཅན་ལ་བསྒྲུབ་པར་བྱ་བའི་ཆོས་དང་མེད་ན་མི་འབྱུང་བའི་གཏན་ཚིག་ཡིན་གྱི་ཡང་བསྒྲུབ་པར་བྱ་བའི་ཆོས་ཁོ་ན་ལ་ནི་མ་ཡིན་ནོ། །
དེས་ན་གནོད་པ་དང་མེད་ན་མི་འབྱུང་བ་གཞན་ལ་འགལ་བ་ག་ལ་ཡིན། གནོད་པའི་ཆོས་ཅན་ལ་བསྒྲུབ་པར་བྱ་བ་མེད་པ་སྒྲུབ་པས་གཏན་ཚིགས་གཞན་གྱིས་དེ་ཡོད་པར་སྒྲུབ་པའི་ཕྱིར། །དེ་ལྟ་ན་རྣམ་པ་དེ་ལྟ་བུའི་མེད་ན་མི་འབྱུང་བ་ཡོད་ཀྱང་གནོད་པ་ཡོད་པས་གནོད་པ་མེད་པའི་ཡུལ་ཅན་གྱི་ཚུལ་གཞན་སྲིད་པའི་ཕྱིར་རྣམ་པ་དེ་ལྟ་བུའི་མེད་ན་མི་འབྱུང་བ་ཁས་ལེན་ཏོ། །གནོད་པ་མེད་ཡུལ་ཅན་ལ་སོགས་པའི་ཚུལ་གཞན་ཡོད་ཀྱང་གཏན་ཚིག་ལྟར་སྣང་དེ་ལས་གཞན་ཏེ་ཚུལ་གཞན་སྲིད་པ་ཡིན་ནོ་ཞེས་བསྟན་ཏོ། །གཏན་ཚིགས་ལྟར་སྣང་བ་དེའི་རྣམ་པར་འགྲེལ་ཕ་ནི་གཞན་ལ་བཞད་གད་བྱེད་པ་སྔོན་དུ་འགྲོ་བ་ནི་དེ་ཅི་ཞེས་བྱ་བ་སྨོས་ཏེ། འདི་བསྒྲུབ་པར་བྱ་བའི་ཆོས་ཅན་ནོ། །ཉོན་མོངས་ནི་དཀའ་ཐུབ་ཅན་ནོ། །མ་ནིང་དང་འཁྲིག་པ་ལས་ཏེ་དེ་ལ་བསྒྲུབ་པར་བྱ་བའི་ཆོས་སྒྲུབ་པར་བྱེད་པའི་ནུས་པ་མེད་པའི་གཏན་ཚིག་ཡོངས་སུ་བསྟན་པས་བསྒྲུབ་པར་བྱ་བའི་འབྲས་བུ་ཚོལ་བར་བྱེད་དམ། དེ་དག་ཉིད་གསལ་བར་བྱེད་པ་ནི་གང་ཞིག་ཆོས་ཅན་ལ་བསྒྲུབ་པར་བྱ་བའི་ཆོས་མེད་པར་འདོད་ཀྱང་བསྒྲུབ་པར་བྱ་བའི་ཆོས་མེད་ན་མི་འབྱུང་བར་གཞན་ལ་ཁས་བླངས་པས་རྣམ་པ་དེ་ལྟ་བུའི་བསྒྲུབ་པར་བྱ་བའི་ཆོས་ཅན་ཉེ་བར་བསྟན་ན་ཇི་ལྟར་ཆོས་ཅན་ལ་བསྒྲུབ་པར་བྱ་བའི་ཆོས་དང་ལྡན་པར་བརྗོད། རྒྱ་མཚོའི་ཆུ་ལན་ཚྭ་མེད་ན་མི་འབྱུང་བ་ཡིན་དུ་ཟིན་ཀྱང་དེ་ལས་ཐ་དད་པའི་ཆུ་ལན་ཚྭ་དང་ལྡན་པ་མ་ཡིན་ཏེ། བསྒྲུབ་པར་བྱ་བར་འདོད་པའི་ཆུ་ཡོད་པ་ལ་ཡང་ལན་ཚྭ་ཡོད་པར་མི་འགྲུབ་པའི་ཕྱིར་རོ། །གཞན་གྱི་ཚིག་གི་གོ་སྐབས་སུ་དོགས་པ་ནི་གལ་ཏེ་དེ་ཉིད་ཀྱི་ཕྱིར་ཞེས་བྱ་བ་ལ་སོགས་པ་སྨོས་ཏེ། འདི་དག་ཉིད་རྣམ་པར་འགྲེལ་པ་ནི་འདི་སྙམ་དུ་ཁྱེད་ཀྱི་འདོད་པ་གང་གི་ཕྱིར་གཏན་ཚིག་གཞན་དུ་ཡང་བསྒྲུབ་པར་བྱ་བའི་ཆོས་ལས་གཞན་པའི་ཆོས་ཅན་ལ་ཡོད་པ་ཡིན་ཏེ། ཆུ་ལ་སོགས་པ་དེ་བཞིན་དུ་མཐོང་བའི་ཕྱིར་བསྒྲུབ་པར་བྱ་བའི་ཆོས་སྤངས་ཀྱང་མེད་ན་མི་འབྱུང་བ་ཁས་བླངས་པའི་ཕྱིར་རོ། །དེ་ཉིད་ཀྱི་ཕྱིར་ཚད་མ་དག་གིས་གནོད་པ་མེད་པའི་ཆོས་དང་ལྡན་པའི་
ཆོས་ཅན་དུ་བརྗོད་པའོ། །གང་གི་ཚེ་མངོན་སུམ་དང་རྗེས་སུ་དཔག་པ་དག་གིས་བསྒྲུབ་པར་བྱ་བའི་ཆོས་ཅན་གྱི་གཏན་ཚིགས་ཀྱི་ཡུལ་བསྒྲུབ་པར་བྱ་བའི་ཆོས་ལ་མི་གནས་པ་ནི་དཔེར་ན་ཆུ་ལ་ན་ཚྭ་དང་ལྡན་པ་ཉིད་དེའི་ཚེ་དེ་གོ་བར་བྱེད་པ་ཡིན་གྱི་གཞན་དུ་མ་ཡིན་པ་དེའི་ཕྱིར་གཞན་ལ་མེད་ན་མི་འབྱུང་བ་ཙམ་གྱིས་བསྒྲུབ་པར་བྱ་བ་གྲུབ་པར་ཁས་མ་བླངས་པའི་ཕྱིར་སྔར་བཤད་པའི་ཉེས་པ་མེ་དོ་ཞེ་ན། གྲུབ་པའི་མཐའ་སྨྲ་བས་དེ་ད་ནི་ཞེས་བྱ་བ་སྨོས་ཏེ། གང་གི་ཚེ་ཚིགས་ཆོས་ཅན་ལ་མེད་ན་མི་འབྱུང་བས་ཁས་མ་བླངས་ལས་བསྒྲུབ་བྱ་འགྲུབ་པར་མི་འགྱུར་བས་དེ་དེ་གྲུབ་པའི་ཚུལ་གཞན་གནོད་པ་མེད་པའི་ཡུལ་ཅན་དུ་བརྗོད་དོ། །དེའི་ཚེ་གཏན་ཚིགས་ལ་ནུས་པ་ཅུང་ཟད་ཅིག་ཀྱང་མེད་ན་ཅིའི་ཕྱིར་གནོད་བ་མེད་པའི་གཏན་ཚིགས་གཞན་ཡང་ཡིན། བསྒྲུབ་པར་བྱ་བ་གྲུབ་ན་གཏན་ཚིགས་ཅུང་ཟད་ཅིག་ཀྱང་བྱེད་པ་མེད་པ་ཁོ་ནའོ། །དེ་ལྟར་ན་འདི་རྣམ་པར་རྟོགས་པ་གཉིས་ཏེ། གནོད་པར་བྱེད་པའི་ཚད་མ་འཇུག་པ་ན་བསྒྲུབ་པར་བྱ་བ་མེད་པར་ངེས་པར་འགྱུར་རམ། ངེས་པ་མེད་པ་ཡིན། དེ་ལ་གང་གི་ཚེ་སྔ་མའི་རྣམ་པར་རྟོག་པ་ཡིན་པ་དེའི་ཚེ་བསྒྲུབ་པར་བྱ་བའི་ཆོས་མེད་པ་ལ་གནོད་པར་བྱེད་པའི་ཚད་མ་འཇུག་པར་ངེས་པས་ངེས་པས་དེ་ཉིད་ཡོད་པས་དེ་མེད་པར་མི་འགྱུར་པའི་ཕྱིར་རོ། །དེའི་ཕྱིར་གནོད་པ་མེད་དེ་གནོད་པར་བྱེད་པའི་ཚད་མ་འཇུག་པ་ན་མེད་པར་བསྒྲུབ་པར་བྱ་བ་མེད་པ་ཡང་མེད་པས་བསྒྲུབ་པར་བྱ་བ་གྲུབ་པར་གྱུར་པས་གཏན་ཚིགས་དོན་མེད་པ་ཉིད་ཀྱིས་ཉེ་བར་བཀོད་པར་མི་བྱའོ། །དེ་བས་ན་སུ་ཞིག་ལ་གནོད་པའི་ཡུལ་ཉིད་ཀྱིས་ཚུལ་གཞན་དུ་འགྱུར། གནོད་པར་བྱེད་པའི་ཚད་མ་འཇུག་པ་མེད་པར་གྱུར་ཅིག་སྙམ་ནས་གཏན་ཚིགས་མེད་པར་ཡིན་ཏེ། གང་གི་ཚེ་བསྒྲུབ་པར་བྱ་བ་ལ་གནོད་པ་ཅན་གྱི་ཚད་མ་ཆོས་ཅན་ལ་འཇུག་པ་ན་དེའི་གཏན་ཚིགས་བསྒྲུབ་བྱ་སྒྲུབ་པར་མི་རུང་པར་འགྱུར་རོ་ཞེས་འདོད་ན་གནོད་པ་མེད་པ་ན་ཞེས་བྱ་བ་ལ་སོགས་པ་སྨོས་ཏེ། གང་གི་ཚེ་གནོད་པར་བྱེད་པའི་ཚད་མ་འཇུག་པ་དེའི་ཚེ་ཡང་དེས་བསྒྲུབ་པར་བྱ་བ་མེད་པར་ཆོས་ཅན་ལ་སྒྲུབ་ཅན་ཚངས་པས་ཀྱང་དེ་མེད་པར་བྱེད་པར་
མི་ནུས་པའི་ཕྱིར་ཡང་ཅི་རོ་ལྟ་བུའི་གཏན་ནམ། གང་ལས་སྒྲུབ་པར་བྱེད་པའི་གཏན་ཚིགས་སུ་རུང་བ་ཡིན། དེ་ཉིད་ཀྱི་ཕྱིར་བྱེད་ཀྱིས་གནོད་པ་མེད་པའོ་ཡུལ་ཅན་གྱི་ཚུལ་གཞན་སྨོས་པའོ། །ཡང་ན་གནས་པར་བྱེད་པའི་ཚད་མ་འཇུག་པས། བསྒྲུབ་པར་བྱ་བ་མེད་པ་ངེས་པ་མེད་ན་མེད་པར་ཡང་མི་འགྱུར་རོ་ཞེས་བྱ་བ་ཚོགས་གཉིས་པ་འདོད་ན། དེ་ཡང་གནོད་པ་མེད་པ་ནུས་པས་སྟོང་པར་བསྟན་པ་ནི་མ་ངེས་པ་ཞེས་བྱ་བ་སྨོས་ཏེ། གནོད་པར་བྱེད་པའི་ཚད་མ་འཇུག་པས་བསྒྲུབ་པར་བྱ་བ་མེད་པར་འདོད་པར་འགྱུར་ན་འདི་ཐོབ་སྟེ། གནོད་པར་བྱས་པའི་ཚད་མ་རྣམས་མེད་པར་བྱས་པའི་ཚད་མ་རྣམས་མེད་པར་གྱུར་ཀྱང་བསྒྲུབ་པར་བྱ་བ་སྒྲུབ་པར་བྱེད་པ་ལ་ནུས་པ་མེད་ན་གནོད་པ་མེད་པ་ཡོད་ཀྱང་བསྒྲུབ་བྱ་མེད་པ་སྲིད་པའི་ཕྱིར་རོ། །དེ་ལ་སྦྱོར་ན་ཡང་གཏན་ཚིགས་ལྟར་སྣང་ཁོ་ན་ཡིན་ནོ། །ཇི་སྐད་བཤད་པའི་གནོད་པ་མེད་པ་ནི་བསྒྲུབ་བྱ་འགྲུབ་པ་ལ་དོན་མེད་པའི་གཏན་ཚིགས་ཡིན་ནོ། །དེ་ལ་གཞན་དུ་དོན་ལ་གནོད་པ་མེད་པ་བསྟན་པའི་གཏན་ཚིགས་ཀྱི་ནུས་པ་བསྟན་པ་ནི་གནོད་པ་མེད་པ་ཞེས་བྱ་བ་སྨོས་ཏེ། གནོད་པ་ཅན་མེད་པ་མ་ཡིན་པར་ཕ་རོལ་པོ་འདོད་དེ། འོ་ན་ཅི་ཞེ་ན། གནོད་པ་མི་དམིགས་པ་ཡིན་ཏེ། དེ་དང་དེ་མི་དམིགས་པ་ནི་ཡུལ་ལར་གནོད་པར་བྱེད་པ་སྲིད་ཀྱང་སྐྱེད་པའི་ནུས་པ་མ་ཚང་བ་དེའི་ཕྱིར་གནོད་པར་བྱེད་པ་མི་དམིགས་པ་ཙམ་གྱིས་བསྒྲུབ་བྱ་འགྲུབ་པར་མི་སྲིད་པའི་ཕྱིར་རོ། །དེ་གྲུབ་པ་ནི་གཏན་ཚིགས་གདོན་མི་ཟ་བར་བརྗོད་དོགས་པས་དེ་ནི་གཏན་ཚིགས་སྦྱོར་བའི་ཡུལ་ཡིན་ནོ། །དེ་ལྟ་ན་གཏན་ཚིགས་རང་གི་བསྒྲུབ་བྱ་འགྲུབ་པ་ལ་ཇི་ལྟར་མི་ནུས་འགྱུར་ཞེ་ན། གྲུབ་པའི་མཐའ་སྨྲ་བས་གཏན་ཚིགས་གནོད་པ་ཞེས་བྱ་བ་སྨོས་ཏེ། གཏན་ཚིགས་གནོད་པ་གང་དམིགས་པ་དེས་འཇིགས་ཀྱི་སླར་གནོད་པས་མི་འཇིགས་མ་ཅེ་ན། གང་གིས་གནོད་པ་ཡོད་དུ་ཟིན་ཀྱང་ཁྱད་དུ་བསད་ནས་དེ་མི་དམིགས་པ་ཡིས་ཡོད་པ་ལ་སྦྱོར་བར་བྱ་བར་ཁྱེད་འདོད། །བརྒྱལ་ཕ་རོལ་ན་རེག་ནོད་པ་ཉོན་མོངས་ཡོད་དུ་ཟིན་ཀྱང་དེ་ལ་
དམིགས་པ་ཉིད་ཀྱི་སྲིད་པ་ལ་ཐབས་ཅི་བྱར་ཡོད། དེའི་ཕྱིར་དེ་ཉིད་ལས་གཏན་ཚིགས་འཇིག་པས་དེ་མེད་པར་རབ་ཏུ་སྦྱོར་བ་ཡིན་ནོ་ཞེ་ན། དེ་ལྟར་ན་གཏན་ཚིགས་ཞེས་བྱ་བ་ལ་སོགས་པ་སྨོས་ཏེ། དེ་ལྟ་ན་འོན་ཏེ་དོན་དམ་པར་ན་གཅིག་གནོད་པ་ཡོད་དམ་མེད་ཀྱང་རུང་དེ་ལ་མི་ལྟོས་ཀྱི་གནོད་པ་མི་དམིགས་པ་ལ་སྦྱར་བར་བྱ་བའམ། ཅི་ཞེས་བྱ་བ་ནི་དྲི་བའོ། །བརྒྱ་ལ་གཞན་དག་ན་རེ་འདི་དག་ནི་བཤད་ཟིན་པ་ཅིའི་ཕྱིར་འདྲི་སྙམ་ནས། ཅིའི་ཕྱིར་སྦྱར་པར་བྱ་ཞེས་བྱ་བ་སྨོས་ཏེ། གནོད་པ་མི་དམིགས་ཀྱང་དེ་ཡོད་ན་བསྒྲུབ་བྱ་སྒྲུབ་པ་ལ་སྦྱོར་བའི་ཕྱིར་རོ་ཞེས་བསམས་པའོ། །གཞན་གྱིས་བསམས་པ་མ་རྟོགས་བསྒྲུབ་བྱ་སྒྲུབ་པའི་ཕྱིར་ཞེས་བྱ་བ་སྨོས་ཏེ། གནོད་པར་བྱེད་པའི་རྐྱེན་མེད་ན་ཚད་མ་འདོད་པའི་ཕྱིར་དེ་ལས་བསྒྲུབ་བྱ་སྒྲུབ་པ་ལ་མི་འགལ་ལོ་སྙམ་དུ་སེམས་ན། གྲུབ་པའི་མཐའ་སྨྲ་བས་གནོད་པ་ཡོད་པ་དེ་མི་དམིགས་ཀྱང་བསྒྲུབ་བྱ་འགྲུབ་པ་ནི་མི་སྲིད་པས་འདོད་རྒྱལ་བ་ཡིན་པ་ནི་དེ་ལ་ལས་གནོད་པ་ཡིན་བཞིན་དུ་ཡང་ཞེས་བྱ་བ་ལ་སོགས་པ་སྨོས་ཏེ། ཡང་ཅི་གཏན་ཚིགས་འདི་གནོད་པ་ཡོད་དུ་ཟིན་ཀྱང་བསྒྲུབ་བྱ་སྒྲུབ་བྱེད་དོ་ཞེས་ཁྱེད་བརྗོད་ན་གང་གིས་ན་གནོད་པ་མེད་པར་ངེས་པར་བྱ་བ་ལ་འབད་པ་དང་གཏན་ཚིགས་ཀྱང་སྦྱོར་བར་མི་བྱེད་དམ། གལ་ཏེ་དེ་དག་དེ་ལྟ་ཡིན་ནོ་ཞེ་ན། དེ་ལྟ་ན་ཡང་གནོད་པ་བཞིན་དུ་ཡང་བསྒྲུབ་བྱ་སྒྲུབ་པར་ནུས་པར་ཁས་ལེན་པར་གྱུར་ན་གནོད་པ་མེད་པའི་ཡུལ་ཅན་གཏན་ཚིགས་ཀྱི་མཚན་ཉི་མ་ཡིན་ཏེ་ཅིའི་ཕྱིར་ཞེ་ན། གནོད་པ་ཡོད་བ་ཞིན་དུ་ཡང་འདིས་ནུས་པའི་ཕྱིར་དང་ནུས་པ་ཁས་བླངས་པའི་ཕྱིར་རོ། །དེ་ལ་གཏན་ཚིགས་ཀྱི་མཚན་ཉིད་དུ་བརྗོད་ན་གང་གིས་ན་བསྒྲུབ་བྱ་མེད་ན་སྒྲུབ་པར་བྱེད་པར་མི་འགྱུར། གནོད་པ་མི་དམིགས་པའི་གཏན་ཚིགས་ཀྱི་མཚན་ཉིད་དོན་དམ་པར་ན་གནོད་པ་མེད་པའི་ཡུལ་ཅན་མ་ཡིན་ནོ་ཞེས་འདོད་ན། དེ་ལྟ་ན་ཡང་ཞེས་བྱ་བ་ལ་སོགས་པ་སྨོས་ཏེ། དེ་ལྟ་ན་གནོད་པ་ཡོད་པར་འགྱུར་པའི་དངོས་པོ་སྲིད་པ་ཡང་དེ་ཁས་བླངས་ནས་མི་དམིགས་པ་ཙམ་གྱིས་གཏན་ཚིགས་ཀྱི་སྦྱོར་བར་འགྱུར་ཏེ། གང་གི་ཚེ་གཞོང་པ་ཁས་བླངས་ནས་གཏན་
ཚིགས་སྦྱོར་བར་མངོན་པར་འདོད་པར་གྱུར་པ་དེ་མི་དམིགས་པ་ཙམ་གྱིས་གནོད་པ་ཡོད་ན་ཡང་ཐེ་ཚོམ་ཡིན་ཏེ། རེས་འགའ་ཞིག་ལ་མི་དམིགས་པ་སྲིད་པས་ཐེ་ཚོམ་ཅན་དེའི་གཏན་ཚིགས་ཀྱི་སྦྱོར་བ་ལ་འཇུག་པ་མི་རུང་བའི་ཕྱིར་རོ། །དེའི་ཕྱིར་ཐེ་ཚོམ་གྱི་འཇུག་པ་གང་ཡིན་པ་དེ་ནི་ཡོད་པར་ཁས་བླངས་པ་ཡིན་ན་འཇུག་པ་ཡིན་ནོ། །དེ་ལྟ་ན་ཡང་ཇི་ལྟ་བའི་གནོད་པ་མི་དམིགས་པ་ལ་ཁས་བླངས་ནས་གཏན་ཚིགས་སྦྱོར་བ་དེ་བཞིན་དུ་དེ་དམིགས་པ་ལ་ཡང་སྦྱོར་བར་བྱའོ། །གནོད་པའི་དངོས་པོ་ཡོད་པར་ཁས་བླངས་པར་གྱུར་པ་ན་དེ་དམིགས་པ་དང་མི་དམིགས་པ་ལ་ཁྱད་པར་མེད་པས་མི་དམིགས་པའི་གནོད་པ་ཉིད་ཀྱང་གཏན་ཚིགས་ཀྱི་མཚན་ཉིད་དུ་སྦྱར་བར་མི་རིགས་སོ། །གནོད་པའི་རྐྱེན་སྤངས་པར་འགྱུར་ཀྱང་འབྲེལ་པའི་ཚད་མ་ཡོད་བ་ག་ལ་ཡིན། གཞན་གྱི་ཚིག་གི་དོགས་པའི་གོ་སྐབས་ནི་གལ་ཏེ་གནོད་པ་ཡོད་ན་ཞེས་བྱ་བ་ལ་སོགས་པ་སྨོས་ཏེ། གནོད་པ་ཡོད་པའི་གཏན་ཚིགས་ཀྱི་ནུས་པ་ནི་མི་འདོད་དོ། །དེས་ན་ཇི་ལྟར་དེ་དམིགས་ཀྱང་སྦྱོར་བར་འགྱུར། གྲུབ་པའི་མཐའ་སྨྲ་བས་ནི་གལ་ཏེ་དེ་ལྟར་ཞེས་བྱ་བ་སྨོས་ཏེ། གནོད་པ་ཡོད་ན་གཏན་ཚིགས་ཀྱིས་མི་ནུས་པར་འདོད་ན་གནོད་པ་མི་སྲིད་པར་དེ་གཏན་ལམ་ཕབ་པར་གཏན་ཚིགས་གང་ཡིན་པ་དེ་རྣམ་པ་དེ་ལྟ་བུའི་སྦྱོར་བ་མི་དམིགས་པ་ཙམ་གྱིས་འོད་པ་མ་ཡིན་ནོ། །ཅིའི་ཕྱིར་ཞེ་ན། གནོད་པ་སྲིད་པའི་ཕྱོགས་ལ་སྦྱར་ཀྱང་གཏན་ཚིགས་ཀྱིས་བསྒྲུབ་བྱ་སྒྲུབ་པར་མི་མུས་པར་འགྱུར་དུ་འོང་བས་སོ། །ཕྱོགས་སྔ་མར་སྨྲ་བས་གལ་ཏེ་གནོད་པ་མི་དམིགས་ན་ཞེས་བྱ་བ་སྨོས་ཏེ། གནོད་པ་མི་དམིགས་པའི་ཕྱིར་དམིགས་པའི་རྐྱེན་ཡོད་པར་གྱུར་ན་ཡོད་པར་གདོན་མི་ཟ་སྟེ། དོན་རྣམས་མེད་པས་གཏན་ཚིགས་ཀྱིས་ནུས་པ་ཡིན་ནོ་སྙམ་དུ་སེམས་པའོ། །གྲུབ་པའི་མཐའ་སྨྲ་བས་དམིགས་བས་གནོད་པ་ཞེས་བྱ་བ་ལ་སོགས་པ་སྨོས་ཏེ། དོན་རྣམས་དམིགས་པའི་འབྲས་བུར་འགྱུར་བའི་རྒྱུ་དང་འབྲས་བུའི་ཁྱབ་པ་ཡང་མེད་དོ། །རྒྱུ་རྣམས་ནི་གདོན་མི་ཟ་བར་འབྲས་བུ་དང་ལྡན་པ་མ་ཡིན་ཏེ་གགས་བྱེད་པ་སྲིད་
པའི་ཕྱིར་རོ། །ཇི་ལྟར་ཁྱབ་པར་བྱེད་པ་མ་ཡིན་པའི་དམིགས་པ་དེ་ལོག་པས་གནོད་པ་ལྡོག་པར་འགྱུར་རམ། གང་གི་གཏན་ཚིགས་ལ་གནོད་པ་སྲིད་པར་གྲུབ་པའི་ནུས་པ་མི་སྲིད་པ་ཡིན་ནོ་ཞེས་གཞན་གྱིས་ཀྱང་འདོད་བ་ཁོ་ནའི་ཚད་མས་གནོད་བ་ནི་སྐྱེ་བོའི་དུས་སུ་གནོད་པ་མི་དམིགས་པ་དུས་གཞན་ན་གནོད་པ་རྐྱེན་གྱིས་བསྐྱེད་པས་ཡོད་པར་ཚད་མས་ཁས་བླངས་པའི་ཕྱིར་རོ། །འོན་ཏེ་ཁྱབ་པར་བྱེད་པ་མ་ཡིན་པའི་ཡང་དམིགས་པ་ལྡོག་པས་གནོད་པ་ལྡོག་ཅིང་འགག་པ་ནི་ཕྱིན་ཅི་ལོག་གི་སྐྱོད་ཅན་གྱི་ཤེས་པ་ལ་འབད་པ་ཡིན་ནོ། །རིགས་པ་འདི་ཉིད་ཀྱིས་ཤེས་པ་ལྡོག་པས་གནོད་པ་ལྡོག་པ་མེད་པ་ནི་དེ་ལྟ་ན་ནི་ཞེས་བྱ་བ་སྨོས་སོ། །གཏན་ཚིགས་དོན་མེད་པ་ཡིན་ཏེ། ག་ལས་ཤེ་ན། གནོད་པ་མི་དམིགས་པ་ཁོ་ནས་གཏན་ཚིགས་ཀྱི་སྦྱོར་བ་སྤངས་ནས་བསྒྲུབ་བྱ་འགྲུབ་པའི་ཕྱིར་རོ། །ཅིའི་ཕྱིར་ཞེ་ན། མི་དམིགས་ན་གནོད་པ་མི་སྲིད་པའི་ཕྱིར་རོ། །དེ་ལྟ་ན་གང་ལ་གནོད་པ་མི་དམིགས་པ་དེ་ལ་དོན་དམ་པར་ན་དེ་ཡོད་པ་མ་ཡིན་ནོ་སྙམ་དུ་སེམས་ན། གང་ལ་དོན་དམ་པར་མེད་པ་དེ་ལ་བསྒྲུབ་བྱ་མེད་པ་ཡང་དོན་དམ་པ་ཁོ་ནར་མེད་པ་ཡིན་ཏེ། གཞན་དུ་དོན་དམ་པར་མེད་པ་མི་རིགས་པའི་ཕྱིར་རོ། །དེས་ཀྱང་བསྒྲུབ་པར་བྱ་བའི་ཆོས་མེད་ན་མེད་པར་འགྱུར་བ་ལ་ཡོད་ན་ཡོད་པར་འགྱུར་པའི་བསྒྲུབ་བྱ་མི་རྟོགས་ན་གཏན་ཚིགས་དོན་མེད་དོ། །འོན་ཏེ་རིགས་པ་དང་འགལ་བར་མ་གྱུར་ཅིག་སྙམ་ན་དམིགས་པ་ལོག་པས་གནོད་པ་ལྡོག་པར་འདོད་པར་མི་བྱའོ། །དེ་ལ་དམིགས་པ་ལོག་ཀྱང་ཞེས་བྱ་བ་སྨོས་ཏེ། གནོད་པ་ཡོད་པ་མི་ལྡོག་པར་འདོད་པ་ནི་གཏན་ཚིགས་ནུས་པ་མེད་པ་གང་ཡིན་པ་དེའི་གནས་སྐབས་སུ་གནོད་པ་དམིགས་པ་གང་ཡིན་པ་སོ་ན་འདུག་པས་གཏན་ཚིགས་སྦྱོར་བ་མ་ཡིན་ནོ། །གང་ཞིག་གནོད་པ་མེད་པའི་ཡུལ་ཅན་གྱི་ཚུལ་གཞན་དུ་འགྱུར། འདི་དག་ཉིད་ཀྱི་མཇུག་བསྡུ་བ་ནི་དེ་ལྟ་བས་ན་ཞེས་བྱ་བ་སྨོས་ཏེ། གང་གི་ཕྱིར་དེ་ལྟར་གཏན་ཚིགས་ཀྱི་ཁྱབ་པ་ནི་ཐམས་ཅད་དུ་བསྒྲུབ་པར་བྱ་བ་དང་མེད་ན་མི་འབྱུང་བ་ཁས་མ་བླངས་ན། ཁྱབ་པ་ཕྱི་རོལ་པ་ནི་དགའ་བས་གཏན་ཚིགས་ཀྱི་སྦྱོར་བས་དོན་མེད་པར་འཐོབ་པོ། །དེའི་ཕྱིར་རང་
གི་བསྒྲུབ་པར་བྱ་བ་ཡོད་པ་དང་མེད་པ་དག་ལས་ཡིན་གྱི་གཞན་དུ་ཡང་ཡིན་ན་ནི་རང་གི་བསྒྲུབ་བྱ་ཡོད་ཀྱང་མེད་ལ་མེད་ཀྱང་ཡོད་པས་སོ། །གཏན་ཚིགས་ཆོས་ཅན་ལ་ཅུང་ཟད་ཅིག་ཀྱང་བསྒྲུབ་པར་བྱ་བར་མི་འགྱུར་ལ་སྒྲུབ་པར་བྱེད་པར་ཡང་མི་འགྱུར་རོ། །འགོག་པར་ཡང་མི་བྱེད་པ་ནི་དེ་ལས་བཟློག་པ་འགོག་པར་མི་བྱེད་པའོ། །དེས་ན་སྒྲུབ་པ་དང་དགག་པར་བྱེད་པ་དག་སྤངས་པ་ཡིན་ན་སྦྱོར་བར་མི་ནུས་སོ། །རང་གི་བསྒྲུབ་པར་བྱ་བ་མེད་ན་མི་འབྱུང་བའི་གཏན་ཚིགས་ཀྱི་སྦྱོར་བ་གདོན་མི་ཟ་བར་གཏན་ཚིགས་ཐམས་ཅད་ཁས་བླངས་པར་འདོད་པར་བྱའོ། །དེ་ཡང་གགས་བྱེད་པའི་རྒྱུ་མཚན་གྱིས་མཐོང་བ་དང་མ་མཐོང་བ་ལ་རག་ལས་པ་ནི་མ་ཡིན་ནོ། །གང་གི་ཕྱིར་སྔར་ཇི་སྐད་བཤད་པ་བཞིན་དུ་གནོད་པ་དང་མེད་ན་མི་འབྱུང་བ་དག་འགལ་བར་གྲུབ་པོ་ཞེས་བྱ་བའི་མཇུག་བསྡུ་བ་ནི་དེ་ལྟ་བས་ན་ཞེས་བྱ་བ་ལ་སོགས་པ་སྨོས་ཏེ། དེ་ནི་དེ་ལས་ཁྱད་པར་གཞན་པའི་དངོས་པོར་གནས་ན་མཚན་ཉིད་མཛད་པས་ཀྱང་ངོ་བོ་གཞན་ཞིག་སྨོས་པར་འོས་པར་འགྱུར་ན་གང་ཞིག་ཁྱད་པར་ཡོད་བཞིན་དུ་ཡང་གང་ཞིག་དུ་འགྱུར་ཏེ། གང་ལས་ཁྱད་པར་གྱི་གཞི་དང་ཁྱད་པར་ཡོད་པ་དག་འཁྲུལ་པ་སྲིད་ཀྱི་འབའ་ཞིག་པ་ཁོ་ན་ལ་མི་སྲིད་དོ། །དཔེ་སྨོས་པ་ནི་དཔེར་ན་ཞེས་བྱ་བ་ལ་སོགས་པ་སྨོས་ཏེ། མཉན་བྱ་ལ་སོགས་པ་ཆོས་ཅན་དང་འབྲེལ་པ་ཡོད་ཀྱང་མཐུན་པའི་ཕྱོགས་ལ་མེད་པའོ། །མིག་གིས་གཟུང་བྱ་ལ་སོགས་པ་མཐུན་པའི་ཕྱོགས་ཡོད་དུ་ཟིན་ཀྱང་བསྒྲུབ་པར་བྱ་བའི་ཆོས་ཅན་ལ་མེད་པའོ། །དེས་ན་གང་ཞིག་ཁྱད་པར་གྱི་གཞི་ལ་ཁྱབ་པ་ཡོད་པ་གང་ཡིན་པ་ལ་འཁྲུལ་པ་སྲིད་ཀྱི་མཚན་ཉིད་ཀྱིས་མ་བསྟན་ཏོ། །གལ་ཏེ་འདིར་ཡང་དེ་འབྱུང་བར་འགྱུར་བ་ཡིན་ནོ་ཞེ་ན། འདི་དག་འདི་ནི་དེ་མ་ཐག་ཏུ་བཤད་ཟིན་ཏོ། །མེད་ན་མི་འབྱུང་བ་ཡོད་པ་ལ་གནོད་པ་སྲིད་པ་ཡིན་ནོ། །མེད་ན་མི་འབྱུང་བ་ལ་གནོད་པ་མེད་པ་ཡོད་དེ། ཡོད་པར་གྱུར་བས་འཁྲུལ་པ་མི་སྲིད་དོ། །གང་གིས་ན་ཁྱད་པར་གྱི་གཞི་དང་ཁྱད་པར་ཡོད་པ་མཚན་ཉིད་གཞན་དུ་བསྟན་པར་འོས་པ་མ་ཡིན། བསྒྲུབ་བྱ་དང་མེད་ན་མི་འབྱུང་བའི་གཏན་ཚིགས་དང་འགལ་
བ་ནི་བསྒྲུབ་བྱ་དང་བཟློག་པ་མ་ཡིན་ན། མེད་ན་མི་འབྱུང་བའི་ཡུལ་ལ་གནོད་པ་མི་སྲིད་དོ། །བཤད་ཟིན་པའི་རྣམ་པས་ཡང་དག་པའི་གཏན་ཚིགས་ཉིད་ལས་བཟློག་པ་ཡུལ་མེད་པ་ལ་སྦྱོར་བ་ནི་གཏན་ཚིགས་ལྟར་སྣང་བར་བརྗོད་དོ། །གང་གི་ཕྱིར་དེ་ལྟར་ཕྱིར་ཞེས་བྱ་བ་ནི་དེའི་ཕྱིར་རོ། །དེ་མེད་པ་ནི་གནོད་པ་སྤངས་པའོ། །ལོགས་ཤིག་ཏུ་ནི་མེད་ན་མི་འབྱུང་བ་ཅན་གྱི་རྗེས་སུ་འགྲོ་བ་དང་ལྡོག་པའི་བདག་ཉིད་ཀྱི་གཏན་ཚིགས་དང་འགལ་བ་འདི་གཉིས་ཀྱི་མཚན་ཉིད་གཞན་དུ་བརྗོད་པར་མི་བྱ་སྟེ། མ་འཁྲུལ་བའི་ངོ་བོ་གཞན་མི་རིགས་པའི་ཕྱིར་རོ། །གང་གི་ཕྱིར་མེད་ན་མི་འབྱུང་བ་ཡོད་པ་ལ་གནོད་པ་མི་སྲིད་པ་དེའི་ཕྱིར་ཇི་སྐད་བཤད་པའི་མཚན་ཉིད་ཅན་གྱི་གཏན་ཚིགས་ཀྱི་སྦྱོར་བ་ལ་གོ་བར་བྱ་བའི་དོན་དམ་བཅས་པའི་ཉེས་པ་མངོན་སུམ་དང་འགལ་བ་ལ་སོགས་པ་རྣམས་ཀྱང་མི་སྲིད་དོ། །དེ་ཇི་ལྟར་གནོད་པ་སྤངས་པའི་གཏན་ཚིགས་ཀྱི་ཚུལ་གཞན་བརྗོད་པ་ཡིན། གལ་ཏེ་མི་སྲིད་ཀྱང་དེ་དག་བརྗོད་ན་ནི་འབྲས་བུ་མེད་པ་ག་ལ་ཡིན། འབའ་ཞིག་པའི་སྦྱོར་བ་སྲིད་པ་ཡིན་ནོ་ཞེ་ན། དམ་བཅའ་བ་ལ་སོགས་པ་སྨོས་ཏེ། གཏན་ཚིགས་ཀྱི་སྦྱོར་བ་ལ་དམ་བཅའ་བ་འབའ་ཞིག་ལ་སྦྱོར་བ་མེད་དོ། །གཏན་ཚིགས་ཀྱི་ཡུལ་ཉིད་དུ་ཁས་བླངས་པས་ཡུལ་མེད་ན་གཏན་ཚིགས་དེ་ཡོད་པ་མི་རིགས་པའི་ཕྱིར་རོ། །དེས་ན་བསྟན་བཅོས་མཛད་པ་སློབ་དཔོན་ཕྱོགས་ཀྱི་གླང་པོས་ཀྱང་མངོན་སུམ་དང་འགལ་བ་ལ་སོགས་པ་དམ་བཅའ་བའི་སྐྱོན་གསུངས་པ་ཡིན་ནོ། །བསྒྲུབ་པར་བྱ་བ་དང་བསྒྲུབ་པར་བྱ་བ་ལས་བཟློག་པ་ལོག་པར་རྟོགས་པ་མཐོང་བས་སྦྱོར་བ་མི་འོས་སུ་ཟིན་ཀྱང་ཕྱོགས་ཀྱི་མཚན་ཉིད་བརྗོད་པའི་རིགས་པ་འཐོབ་པ་ཉིད་དོ། ཕྱོགས་ཉིད་ལ་བསལ་བའི་ཚིག་གིས་ཚད་མ་དང་འགལ་བ་བཤད་དོ། །ཧ་ཅང་ཐལ་བར་འགྱུར་བས་ཕྱོགས་ཀྱི་མཚན་ཉིད་རྣམ་པར་གཅད་པར་མི་བྱ་སྟེ་ཐེ་ཚོམ་གྱི་བསྒྲུབ་པར་བྱ་བ་ཡིན་པའི་ཕྱིར་རོ། །ཚད་མས་གནོད་པར་བྱ་བ་དང་གནོད་པར་བྱེད་པ་མི་འཇུག་པའི་ཕྱིར་དེ་ཁོ་ན་གནོད་པ་མེད་པའི་ཡུལ་ཅན་ཡིན་ཏེ་ཚུལ་གཞན་ནི་བསལ་བར་བྱ་བ་སེལ་བར་བྱེད་པ་ནི་འདིས་ཀྱང་ཞེས་བྱ་བ་སྨོས་ཏེ། མེད་ན་མི་
འབྱུང་བར་གྱུར་པ་གནོད་པ་མེད་པ་བསྟན་པས་བརྗོད་པར་འདོད་པའི་གྲངས་གཅིག་པ་ཅན་འགལ་བ་མི་འཁྲུལ་པའི་སྐྱོན་གྱི་མི་མཐུན་པའི་ཕྱོགས་བརྗོད་པ་བསལ་ཅིང་སྔ་ངས་པ་ཡིན་ནོ། །གཞན་གྱིས་དྲིས་བ་ཇི་ལྟ་བུ་ཞེ་ན། རྣམ་པ་གང་གིས་ཇི་ལྟ་བུའི་མེད་ན་མི་འབྱུང་བ་དང་ལྷན་ཅིག་མི་གནས་པའི་རྣམ་པ་དེ་ལྟ་བུ་གཏན་ཚིགས་ཀྱི་ཟླ་བོ་དང་མེད་ན་མི་འབྱུང་བ་དག་ཀྱང་ཡིན། གང་གིས་བརྗོད་པར་འདོད་པའི་གྲངས་གཅིག་པ་དང་ལྡན་པ་བསལ་བ་ཡིན་ཞེ་ན། གྲུབ་མཐའ་སྨྲ་བས་ཡང་དག་པར་བསྟན་པ་ནི་གཅིག་གི་ཞེས་བྱ་བ་ལ་སོགས་པ་སྨོས་ཏེ། གཏན་ཚིགས་གཅིག་གི་མཚན་ཉིད་རིགས་ཏེ། གལ་ཏེ་རང་གི་བསྒྲུབ་པར་བྱ་བ་ཡོད་པ་ཁོ་ནས་ཡོད་པའི་ཕྱིར་རང་གི་བསྒྲུབ་བྱ་ལ་འཁྲུལ་པར་ཇི་ལྟར་འགྱུར། དེ་ལྟ་མ་ཡིན་ན་མེད་ན་མི་འབྱུང་བའི་མཚན་ཉིད་ཉམས་པར་འགྱུར་རོ། །ཆོས་ཅན་གང་ལ་མཚན་ཉིད་གཅིག་ཡོད་པར་གྱུར་པ་ཆོས་ཅན་དེ་ཁོ་ན་ཡིན་པ་ལ་ཡིན་པ་དེའི་ཕྱིར་འགྲན་ཟླའི་གཏན་ཚིགས་གཞན་ཡང་འགལ་བ་ཡིན་པ་དེས་ན་གཏན་ཚིགས་ཀྱི་མཚན་ཉིད་དང་ལྡན་པར་ཇི་ལྟར་འགྱུར། གཏན་ཚིགས་གཅིག་གི་བདག་ཉིད་ཀྱི་བསྒྲུབ་པར་བྱ་བ་དེ་ལ་གནོད་པར་བྱེད་པ་ནི་དེ་དང་འགལ་བའི་ཆོས་གཞན་ཡོད་པ་ཁོ་ན་སྟེ་མེད་ཀྱང་ཡོད་པའི་ཕྱིར་མེད་ན་མི་འབྱུང་བ་མ་ཡིན་པས་གནོད་པ་དང་མཚུངས་སོ། །གནོད་པ་མི་སྲིད་པ་མཚུངས་པས་གཏན་ཚིགས་ཀྱི་ཟླ་བོས་བསལ་བ་ཁོ་ནས་བསལ་ཏོ། །འདིར་ཡང་སྐྱོན་གཞན་བརྗོད་པར་འདོད་ནས་རྣམ་པར་རྟོག་པ་ནི་གཞན་ཡང་ཞེས་བྱ་བ་ལ་སོགས་པ་སྨོས་ཏེ། དངོས་པོ་ནི་དོན་དམ་པ་སྟེ་གཏན་ཚིགས་ཀྱི་ཟླ་བོ་གང་ཡིན་པ་དེ་ནི་མི་སྲིད་པ་ཅི་འདི་ཡང་དག་པའི་ཤེས་པའམ། བཟློག་པ་ཉེ་བར་བཀོད་པའམ། བསྒྲུབ་པར་བྱའམ་དེ་ལས་ཟློག་པའི་ཤེས་པ་གཏན་ཚིགས་སུ་འདོད། གང་ལས་བརྗོད་པར་འདོད་པའི་གྲངས་གཅིག་པ་ཅན་གྱི་མཚན་ཉིད་དུ་བརྗོད། ཡང་ན་འདི་གཏན་ཚིགས་ཀྱི་ཟླ་བོ་དེ་བསྒྲུབ་པར་བྱ་བ་དང༌། བཟློག་པ་སྒྲུབ་པར་བྱེད་པ་མ་བསྟན་པ་ཞིག་ཡིན། དོན་དམ་པར་ཡོད་པ་ཡིན་ཡང་སྐྱོན་གཞན་མ་མཐོང་ངོ་སྙམ་ནས་ཅིར་འགྱུར་ཞེས་
བྱ་བ་སྨོས་སོ། །གལ་ཏེ་སྔ་མའི་རྣམ་པར་རྟོག་པའམ་ཕྱི་མ་དེ་ལ་ཉེས་པ་ཅི་ཞིག་ཡོད་སྙམ་པའོ། །གྲུབ་པའི་མཐའ་སྨྲ་བས་གལ་ཏེ་གཏན་ཚིགས་ཀྱི་ཟླ་བོ་མི་སྲིད་པས་ཡང་དག་པའི་ཤེས་པ་ལ་སོགས་པའི་གཏན་ཚིགས་སུ་འདོད་ན་དེའི་ཚེ་འདི་མཚན་ཉིད་མ་ཡིན་པ་ནི་བརྗོད་པར་འདོད་པའི་གྲངས་གཅིག་པའོ། །ཅིའི་ཕྱིར་ཞེ་ན། ངེས་པར་བྱ་བར་མི་ནུས་པའི་ཕྱིར་རོ། །གང་གི་དངོས་པོ་ལ་གཏན་ཚིགས་ཀྱི་ཟླ་བོ་མི་སྲིད་པ་ཉིད་དུ་དེ་བཞིན་དུ་བཤད་དོ། །གཞན་གྱི་འདོད་པ་ལ་ལྟོས་ནས་འདི་དག་བརྗོད་པ་ཡིན་གྱི། གཞན་དག་གིས་མཐོང་བ་དང་མ་མཐོང་བ་དག་ལས་འབྲེལ་པ་མེད་ཀྱང་མེད་ན་མི་འབྱུང་བ་འདོད་པ་དེའི་ཕྱིར། དེའི་གཏན་ཚིགས་ཀྱི་ཟླ་བོ་རྣམ་པ་དེ་ལྟ་བུ་ཡོད་པ་སྲིད་པ་ཡིན་ཏེ། དེ་ཡང་མི་དམིགས་ཀྱང་རེས་འགའ་ཞིག་འབྱུང་བས་དངོས་པོ་ཉིད་ལ་དེ་མེད་པར་མ་ངེས་པ་ཡིན་ཏེ། འབྲེལ་པའི་རྒྱུ་མཚན་གྱིས་མེད་ན་མི་འབྱུང་བར་སྨྲ་བ་ཁོ་བོ་ཅག་ལ་ནི་གཏན་ཚིགས་ཀྱི་ཟླ་བོ་མི་སྲིད་དོ། །ཤིན་ཏུ་ངེས་པ་ཁོ་ན་སྟེ། དེའི་བདག་ཉིད་དང་དེ་ལས་བྱུང་བའི་མཚན་ཉིད་ཀྱི་འབྲེལ་པ་ཚད་མས་གྲུབ་པའི་མེད་ན་མི་འབྱུང་བའི་རྒྱུ་མཚན་ཅན་གྱི་གཏན་ཚིགས་གཅིག་གིས་རང་གི་བསྒྲུབ་པར་བྱ་བ་སྒྲུབ་པར་བྱེད་པས་སླར་ཡང་དེ་ཉིད་ཀྱི་ཆོས་ཅན་ལ་དེའི་མཚན་ཉིད་དེ་དང་འགལ་བ་སྒྲུབ་པར་བྱེད་པའི་འགྲང་ཟླའི་གཏན་ཚིགས་མི་སྲིད་པར་ནུས་སོ། །དངོས་པོ་རྣམས་ལ་འགལ་བའི་རང་བཞིན་གཉིས་མི་རིགས་པས་འགལ་བའི་ཆོས་གནས་ན་མཚན་ཉིད་ཐ་དད་པའི་ཕྱིར་དང༌། འགལ་བའི་ཆོས་སྒྲུབ་པར་བྱེད་པ་སྲིད་ན་དེ་ཉིད་ཀྱི་རང་གི་བསྒྲུབ་པར་བྱ་བ་ལ་མེད་ན་མི་འབྱུང་བར་ཐོག་མར་དེ་ལ་ཚད་མས་ཡོད་པར་སྒྲུབ་པར་མི་རིགས་པའི་ཕྱིར་རོ། །གལ་ཏེ་དངོས་པོ་ལ་གཏན་ཚིགས་ཀྱི་ཟླ་བོ་མེད་པར་ངེས་པར་ཁོ་བོ་ཅག་གིས་ངེས་པར་མི་ནུས་ཀྱི་དེ་ལྟ་ན་ཡང་གཏན་ཚིགས་ཀྱི་ཟླ་བོ་མི་སྲིད་པས་བརྗོད་པར་འདོད་པའི་གྲངས་གཅིག་པ་བསྟུན་ན་གཏན་ཚིགས་ཀྱི་མཚན་ཉིད་དུ་འདོད་པར་གྱུར་པ་ཅིའི་ཕྱིར་མ་ཡིན་ཞེ་ན། སྒྲུབ་པར་བྱེད་པའི་ཆོས་མ་ངེས་པ་ཞེས་བྱ་བ་ལ་སོགས་པ་སྨོས་ཏེ། རྟོགས་པར་བྱེད་པའི་ཆོས་ཀྱི་གཏན་ཚིགས་དེ་མ་ངེས་པའི་ངོ་བོ་
ཡིན་ན་ནི་གང་གི་ཕྱིར་དེའི་མཚན་ཉིད་ནི་སྒྲུབ་པར་བྱེད་པའི་ཆོས་སུ་མི་འགྱུར་ཏེ། དཔེར་ན་ཕྱོགས་ཀྱི་ཆོས་ཐེ་ཚོམ་ཅན་བཞིན་ནོ། །ཐེ་ཚོམ་ཅན་གྱི་མཚན་ཉིད་གང་ཡིན་པ་དེ་ནི་གཏན་ཚིགས་མ་ཡིན་པ་འགལ་ཡང་གཏན་ཚིགས་སུ་མི་འགྱུར་རོ། །གང་ཡང་གཏན་ཚིགས་ཀྱི་ཟླ་བོ་མ་མཐོང་བ་དེ་དངོས་པོ་ཁོ་ན་ལ་གཏན་ཚིགས་ཀྱི་ཟླ་བོ་མི་སྲིད་པའི་ཕྱིར་རོ། །དངོས་པོ་དེ་ལ་གཏན་ཚིགས་ཀྱི་ཟླ་བོ་མི་སྲིད་པར་དོགས་ན་ནི་གནོད་པར་བྱེད་པའི་ཤེས་པ་མེད་ན་གནོད་པར་དོགས་པ་ནི་མི་རིགས་པའི་ཕྱིར་རོ། །དེ་སྐད་དུ། གནོད་པའི་ཤེས་པ་མ་སྐྱེས་པས། །དོགས་པ་ཚད་མ་མེད་ན་མིན། །ཞེས་བཤད་དོ་ཞེ་ན། མཚན་ཉིད་མཚུངས་པ་ཞེས་བྱ་བ་ལ་སོགས་པ་སྨོས་ཏེ། གཏན་ཚིགས་ཀྱི་ཟླ་བོ་ལ་དོགས་པ་ནི་མཐོང་བ་དང་མ་མཐོང་བའི་རྒྱུ་མཚན་གྱི་མཚན་ཉིད་མཚུངས་ཀྱི་མེད་ན་མི་འབྱུང་བ་དེ་ལ་མཐོང་བ་ན་འགྲན་ཟླའི་གཏན་ཚིགས་ལ་གནོད་པ་སྲིད་པའོ། །གང་གི་ཕྱིར་དེ་དག་ཀྱང་མཚན་ཉིད་མཚུངས་པ་རྣམས་ནི་འགྲན་ཟླ་མ་མཐོང་བ་དེ་རྣམས་ལ་ཡང་གཏན་ཚིགས་ཀྱི་ཟླ་བོ་སྲིད་པའི་ཡུལ་དོགས་པ་སྐྱེད་པར་བྱེད་དོ། །ཅིའི་ཕྱིར་ཞེ་ན། ཟླ་བོ་སྲིད་པ་མཐོང་བ་དང་ཟླ་བོ་མ་མཐོང་བ་ལ་ཁྱད་པར་མེད་པའི་ཕྱིར་རོ། །འདི་དང་ཅིག་ཤོས་ལ་ཁྱད་པར་འགའ་ཡང་མེད་པ་གང་ཡིན་པ་དེ་ལ་སྲིད་པར་དོགས་པར་མི་བྱའོ། །སྐྱེས་བུའི་ནུས་པ་མ་ཚང་བ་ལ་སོགས་པས་དེ་མཐོང་བ་སྲིད་པ་ཡིན་ཞེ་ན། དེས་ཅི་ཞིག །བརྗོད་དོགས་ཚད་མ་མེད་ན་མིན། །ཞེས་བྱའོ། །ཡང་ན་ཁྱད་པར་ནི་འབྲེལ་བའི་མཚན་ཉི་མེད་ན་མི་འབྱུང་བར་ངེས་པར་མཐོང་བས་གཏན་ཚིགས་ཀྱི་ཟླ་བོ་མ་མཐོང་ངོ་ཞེས་བྱ་བར་འདོད་ན་ནི་གང་གི་ཚེ་འགྲན་ཟླ་སྲིད་པར་དོགས་པ་ཁས་བླངས་པ་ཉམས་པ་ཡིན་པ་དེའི་ཚེ་ཁྱད་པར་ཡོད་ན་ནི་དེ་གཏན་ཚིགས་ཀྱི་མཚན་ཉིད་ཡིན་ཏེ། ཅིའི་ཕྱིར་ཞེ་ན། གང་གི་ཕྱིར་དེས་གཏན་ཚིགས་ཀྱི་ཁྱད་པར་གྱིས་མི་མཐུན་པའི་ཕྱོགས་ཆ་གཅིག་ཏུ་སེལ་བ་རྣམ་པ་དེ་ལྟ་བུའི་གཏན་ཚིགས་སྲིད་པས་རང་གི་བསྒྲུབ་པར་བྱ་བ་ངེས་པར་བྱེད་པའི་ཕྱིར་རོ། །རྣམ་པ་དེ་ལྟ་བུར་མི་འགྱུར་བ་དེ་ནི་ཁྱད་པར་སྤངས་པའི་གཏན་ཚིགས་ཀྱི་ཟླ་བོ་ལ་མ་མཐོང་བ་གང་ཡིན་པ་དེ་མཚན་ཉིད་ཅན་
ལ་མ་ཡིན་པ་གཏན་ཚིགས་སུ་མི་འགྱུར་རོ། །དེ་ལྟ་ན་ཡང་གལ་ཏེ་གཏན་ཚིགས་དང་ཟླ་བོའི་གཏན་ཚིགས་མཐོང་བའི་རྒྱུས་ཅི་ཞིག་ཏུ་གྱུར་ན་གང་གིས་དེ་ལྡོག་པ་དེ་ལ་བརྗོད་པར་འདོད་པ་གྲངས་གཅིག་པ་ཅན་དུ་བྱེད་དེ། ཇི་སྐད་བཤད་པ་མེད་ན་མི་འབྱུང་བར་བརྗོད་པ་ཁོ་ནས་དེ་ལྡོག་པར་འགྱུར་རོ་ཞེ་ན། དེ་ལྟ་ན་ཞེས་བྱ་བ་སྨོས་ཏེ། གཏན་ཚིགས་དེའི་ཁྱད་པར་དང་འབྲེལ་པ་ལ་ཟླ་བོའི་གཏན་ཚིགས་སྲིད་པར་གྱུར་ན་བརྗོད་པར་འདོད་པའི་གྲངས་གཅིག་པ་ཅན་དོགས་པ་མེད་དོ། །ཇི་སྲིད་བཤད་པའི་ཁྱད་པར་ཁས་བླང་བ་མཚན་ཉིད་ཀྱི་གཏན་ཚིགས་མི་སྲིད་པས་གང་ཞིག་བརྗོད་པར་འདོད་པའི་གྲངས་གཅིག་པ་རྣམ་པར་གཅོད་པར་བྱེད་པ་ཡིན། གང་གིས་འདི་དོན་དང་བཅས་པ་ཉིད་དུ་འགྱུར་བ་ནི་འགལ་བ་མི་འཁྲུལ་པ་ཅན་གྱི་གཏན་ཚིགས་ལྟར་སྣང་བར་རྣམ་པར་གཅོད་པའི་ཕྱིར། བརྗོད་པར་འདོད་པའི་གྲངས་གཅིག་པ་ཅན་གཏན་ཚིགས་ཀྱི་མཚན་ཉིད་དུ་བྱེད་པ་ཡིན་ན། དངོས་པོ་ལ་འགྲན་ཟླའི་གཏན་ཚིགས་མེད་པས་གཏན་ཚིགས་སུ་གྲུབ་པ་ནི་འབྲེལ་བ་མཚན་ཉིད་ཅན་གྱི་ཁྱད་པར་གྱི་གཏན་ཚིགས་འདོད་པ་ན་འགལ་བ་མི་འཁྲུལ་པ་ཅན་གྱི་གཏན་ཚིགས་ལྟར་སྣང་བ་སྲིད་པར་མི་འགྱུར་ཏེ། དེ་ལས་རྣམ་པར་བཅད་པ་མེད་པས་བརྗོད་པར་འདོད་པའི་གྲངས་གཅིག་པ་ཅན་དུ་ཅི་སྟེ་འགྱུར་སྙམ་བསྟན་པ་ནི་དེའི་ཕྱིར་ཞེས་བྱ་བ་སྨོས་ཏེ། འབྲེལ་པའི་མཚན་ཉིད་ཀྱི་ཁྱད་པར་ཁས་བླངས་པས་འགལ་བ་མི་འཁྲུལ་པའི་གཏན་ཚིགས་ལྟར་སྣང་བའི་མཚན་ཉིད་གང་ཡིན་པ་ཉམས་པར་འགྱུར་ཏེ་མི་སྲིད་པའི་ཕྱིར་རོ། །ཡང་འགལ་བ་མི་འཁྲུལ་པའི་མཚན་ཉིད་ཅི་ཞིག་ཡིན་ཞེ་ན། རང་གི་མཚན་ཉིད་ཅེས་བྱ་བ་ལ་སོགས་པ་སྨོས་ཏེ། གཏན་ཚིགས་ཀྱི་བདག་ཉིད་ནི་མཚན་ཉིད་གང་ཡིན་པ་དེ་དང་ལྡན་པའི་གཏན་ཚིགས་དག་ཆོས་ཅན་གཅིག་ལ་འགལ་བ་བསྒྲུབ་པར་བྱ་བ་དང། སྒྲུབ་པར་བྱེད་པ་ཕན་ཚུན་འགལ་བ་འདུ་བ་ན་འགལ་བ་འཁྲུལ་པ་མེད་པ་ཞེས་བྱའོ། །འགལ་བ་མི་འཁྲུལ་པའི་མཚན་ཉིད་རྣམས་ནི་དེ་དང་འབྲེལ་བ་ཁས་བླང་བར་འགྱུར་ན་མི་སྲིད་དོ། །དེའི་བདག་ཉིད་དང་དེ་ལས་བྱུང་བ་དག་རང་གི་བསྒྲུབ་པར་བྱ་བ་དང་འབྲེལ་པ་དང་
ལྡན་པ་གཏན་ཚིགས་གཅིག་ནི་ཆོས་ཅན་འགའ་ཞིག་ལ་སྲིད་པ་ཡིན་གྱི། གཉིས་པ་དེའི་མཚན་ཉིད་དང་ལྡན་པ་དེ་ཉིད་ལ་གཏན་ཚིགས་མི་སྲིད་པའི་ཕྱིར་རོ། །དངོས་པོ་རྣམས་ཀྱི་རང་བཞིན་ལ་འགལ་བ་རྣམ་པ་གཉིས་མི་སྲིད་པའི་ཕྱིར་རོ། །ཆོས་འགལ་བ་གནས་ན་མཚན་ཉིད་ཐ་དད་པའི་ཕྱིར་དེ་ལ་མི་འཁྲུལ་པའི་གཏན་ཚིགས་གཉིས་པ་དེ་ལ་སྲིད་པའི་གོ་སྐབས་སུ་ག་ལ་འགྱུར། །འོ་ན་ནི་གལ་ཏེ་རྣམ་པ་དེ་ལྟ་བུ་ཁྱད་པར་ཡོད་པར་གྱུར་ན་ནི་འགལ་བ་མི་འཁྲུལ་པ་ཉམས་པར་འགྱུར་ན། བརྗོད་པར་འདོད་པའི་གྲངས་གཅིག་པ་ཅན་མེད་དོ། །དེ་ལྟ་ན་ཡང་གཏན་ཚིགས་མེད་པར་ཐལ་བར་མི་འགྱུར་ན་གཏན་ཚིགས་མེད་པར་དེས་བཤད་པས་ཅི་ཞིག་བྱ་ཞེ་ན། ཁྱད་པར་དེའི་ངོ་བོ་ཡང་ཞེས་བྱ་བ་སྨོས་ཏེ། འབྲེལ་བའི་མཚན་ཉིད་ནི་གང་གི་ཕྱིར་དངོས་པོ་ལ་འགྲན་ཟླའི་གཏན་ཚིགས་མི་སྲིད་པས་དེའི་བདག་ཉིད་དང་དེ་ལས་བྱུང་བའི་མཚན་ཉིད་ངེས་པའི་ངོ་བོར་ཁྱོད་ཀྱིས་མ་བསྟན་གྱི། ཁོ་བོ་ཅག་གིས་ནི་ཇི་ལྟ་བ་བསྟན་ཏོ། །གང་ཞིག་གང་གི་ངོ་བོར་རྟོགས་ནས་ཟླ་བོ་ནི་མི་རྟོགས་པས་སྲིད་དམ་མི་སྲིད་པ་དག་བལྟ་བར་བྱའོ། །གང་ལ་ཁྱད་པར་དང་བཅས་པ་མེད་པ་དེ་ལ་འགྲན་ཟླ་སྲིད་པ་དེ་ཡིན་ཏེ། ལུང་ལ་བརྟེན་པའི་རྗེས་སུ་དཔག་པས་རྟོགས་པར་བྱེད་དོ། །གང་ལ་ཁྱད་པར་དང་བཅས་པ་ཡོད་པའི་དངོས་པོ་སྟོབས་ཀྱིས་ཞུགས་པའི་རྗེས་སུ་དཔག་པ་དེ་ལ་སྦྱོར་བའི་ཟླ་བོ་མི་སྲིད་པའི་ཕྱིར་རོ། །གང་གི་ཕྱིར་དེ་ལྟར་དེ་བས་ན་དངོས་པོ་ལ་ཁྱད་པར་མེད་པ་ཁོ་ནས་ཁྱེད་རྣམས་ཤེས་པར་བྱེད་པ་ལ་ཡང་ཁྱད་པར་མེད་པ་ཁོ་ན་ཡིན་པས་སོ། །དེའི་ཕྱིར་ཐམས་ཅད་དུ་གང་ལ་ཡང་སྦྱོར་བའི་ཟླ་བོ་མ་མཐོང༌། དེ་ལ་ཡང་སྦྱོར་བའི་ཟླ་བའོ། །ཡུལ་ལ་དོགས་པ་འབྱུང་བར་འགྱུར་རོ། །དེ་ཉིད་ཀྱི་དོགས་པ་བསྟན་པར་བྱེད་པ་ནི་ཟླ་བོའི་གཏན་ཚིགས་མཐོང་བ་ཞེས་བྱ་བ་ལ་སོགས་པ་སྨོས་ཏེ། གང་ཡང་ཟླ་བོའི་གཏན་ཚིགས་མཐོང་བ་དེ་ཡང་དང་པོར་འགྲན་ཟླ་མཐོང་བ་དང་ཅིག་ཤོས་དུས་ཐམས་ཅད་དུ་ཟླ་བོ་མ་མཐོང་བས་ཁྱད་པར་ཅུང་ཟད་ཀྱང་མི་རྟོགས་སོ། །གང་མཐོང་བ་ལས་ཤེས་པ་དེ་ལ་འགྲན་ཟླ་སྲིད་པ་ཡིན་གྱི་གཞན་ནི་མ་ཡིན་ནོ། །མཐོང་བ་དང་མ་མཐོང་བ་ཙམ་གྱི་རྒྱུ་
མཚན་གྱིས་རྗེས་སུ་འགྲོ་བ་དང་ལྡོག་པ་དག་ཐམས་ཅད་དུ་མཚུངས་པའི་ཕྱིར་རོ། །དེ་ལྟ་ན་ཡང་ཕྱི་ནས་དེ་ལ་འགྲན་ཟླའི་སྦྱོར་བ་མཐོང་བར་གྱུར་ན་ཐམས་ཅད་དུ་དེའི་མཚན་ཉིད་མཚུངས་པར་འགྲན་ཟླ་ཡོད་པར་དོགས་པར་ལྡོག་པར་མི་འགྱུར་རོ། །གལ་ཏེ་གང་དག་འགྲན་ཟླ་སྲིད་པ་དེ་རྣམས་ལ་གདོན་མི་ཟ་བར་རེས་འགའ་ཞིག་འདི་དམིགས་པར་འགྱུར་རོ། །ཡང་ན་སྐྱེས་བུའི་ཆོས་ཀྱང་དེ་དག་དམིགས་པར་མི་འགྱུར་རོ། །གལ་ཏེ་དེ་རྣམས་ལ་འདི་མེད་པ་ཉིད་དེས་ན་རྣམ་པ་དེ་ལྟ་བུ་གཏན་ཚིགས་དེ་འབྱུང་བ་ཡིན་ན་དེ་ཇི་ལྟར་གཏན་ཚིགས་དེ་ཁོ་བོ་ཅག་ལ་མེད་པ་ཡིན་ཞེ་ན། གང་ཟླ་བོའི་གཏན་ཚིགས་ཞེས་བྱ་བ་ལ་སོགས་པ་སྨོས་ཏེ། གང་དག་ལ་འགྲན་ཟླའི་གཏན་ཚིགས་སྲིད་པ་དེ་རྣམས་ལ་ཡང་ཐམས་ཅད་དུ་དེའི་ཟླ་བོའི་གཏན་ཚིགས་རྟོགས་པར་བྱེད་པ་རྣམས་ཀྱིས་དམིགས་པ་མ་ཡིན་ནོ། །ཐམས་ཅད་གཟིགས་པའི་དམིགས་པས་ནི་དངོས་པོ་ཡོད་པ་ཐམས་ཅད་ལ་ཁྱབ་པ་ཡིན་ཏེ། འབྲེལ་པ་མ་ཚང་བ་མི་དམིགས་པའི་ཕྱིར་རོ། །འོ་ན་ནི་གང་ལ་ཐམས་ཅད་དུ་རྟོགས་པར་བྱེད་པས་འགྲན་ཟླ་མ་མཐོང་བ་དེ་ལ་དེའི་ཚེ་དོགས་པ་ཇི་ལྟར་ཡིན། དེ་སྐད་དུ་ཡང༌། གནོད་པའི་ཤེས་པ་མ་སྐྱེས་ན། །དོགས་པ་ཚད་མ་མེད་ན་མིན། །ཞེས་བཤད་དོ། །དེ་བཞིན་དུ་འང་ཕ་རོལ་གྱིས། །ཉེ་བར་བརྟགས་ལ་རྨོངས་པས་ན། །གནོད་པར་བྱེད་པའང་མ་སྐྱེས་ན། །ཐ་སྙད་བྱ་བ་ཐམས་ཅད་ལ། །ཐེ་ཚོམ་ཟད་པ་དག་རྗེས་འབྲང་འགྱུར། །ཞེས་སྨྲའོ། །ཤེས་རབ་ཕུལ་དུ་བྱུང་བ་དང་ལྡན་པ་ཞེས་བྱ་བ་ལ་སོགས་པ་སྨོས་ཏེ། དེ་ལྟ་ན་འཇལ་བར་བྱེད་པ་ཁ་ཅིག་རྩྭ་ཀུ་ཤའི་རྩེ་མོ་ལྟ་བུ་ཤིན་ཏུ་ཕུལ་དུ་བྱུང་བའི་ཤེས་རབ་དང་ལྡན་པས་གཏན་ཚིགས་ཀྱི་ཟླ་བོ་བརྟགས་ན་ཁོ་བོ་ཅག་གིས་མཐོང་སྟེ། དཔེར་ན་རིག་བྱེད་ཀྱི་བྱེད་པ་པོ་སེལ་བའི་གཏན་ཚིགས་བདེ་བར་གཤེགས་པ་སློབ་མ་དང་ཡང་སློབ་བརྒྱུད་པས་གཞོན་ནུ་མ་ལེན་སྐྱེས་པའི་སྔ་རོལ་འགྲན་ཟླའི་སྦྱོར་བ་རྣམས་ཉེ་བར་དགོད་པ་མ་མཐོང་བ་དེ་ཉིད་ཤེས་རབ་ཕུལ་དུ་བྱུང་བར་སྦྱར་བས་གཏན་ཚིགས་ཀྱི་ཟླ་བོ་བརྟགས་ན། དེ་དང་དེ་མཐོང་བས་ཇི་སྲིད་འཚོའི་བར་དུ་ཟླ་བོའི་གཏན་ཚིགས་མཐོང་བས་འདེའི་དོགས་པ་ནམ་ཡང་ལྡོག་པར་མི་འགྱུར་རོ། །
དེས་ན་ཇི་ལྟར་དོགས་པ་ཚད་མ་མེད་པ་ཅན་ཡིན་ཞེས་བརྗོད། མཚན་ཉིད་མཚུངས་པ་ཞེས་བྱ་བ་ལ་སོགས་པ་ཡང་འགྲན་ཟླ་སྲིད་པའི་དོགས་པའི་རྒྱུ་བཤད་ཟིན་པ་ཉིད་དེ། ཟླ་བོ་སྲིད་པར་དོགས་པ་ལ་དེའི་རྒྱུ་མཚན་སྲིད་པས་རྟོགས་པ་ལ་སོགས་པས་བལྟས་པ་ཙམ་གྱིས་བཟློག་པར་མི་ནུས་སོ། །དེས་འགྲན་ཟླའི་སྦྱོར་བ་འདི་ཁྱད་དུ་བསད་པའི་རྒྱུ་ཅུང་ཟད་ཅིག་བརྗོད་པར་བྱ་དགོས་ཏེ། དཔེར་ན་ཁོ་བོ་ཅག་གིས་རང་བཞིན་གྱི་གཏན་ཚིགས་སུ་བརྗོད་པ་ལ་བཟློག་པ་ལ་གནོད་པ་ཅན་གྱི་ཚད་མའི་དབང་གིས་དེའི་བདག་ཉིད་དུ་ངེས་པའི་རྗེས་སུ་འགྲོ་བ་དང་ལྡོག་པ་ཡོད་པ་གཏན་ལ་ཕབ་པ་དང༌། འབྲ་བུའི་གཏན་ཚིགས་ཁ་དུ་བསད་པའི་རྒྱུ་ཅུང་ཟད་ཅིག་བརྗོད་པར་བྱ་དགོས་ཏེ། དཔེར་ན་ཁོ་བོ་ཅག་གིས་རང་བཞིན་གྱི་གཏན་ཚིགས་སུ་བརྗོད་པ་ལ་བཟློག་པ་ལ་གནོད་པ་ཅན་གྱི་ཚད་མའི་དབང་གིས་དེའི་བདག་ཉིད་དུ་ངེས་པའི་རྗེས་སུ་མཐོང་བ་དེའི་རྒྱུས་ནི་མ་ངེས་པ་ཡིན་ཏེ། ཟླ་བོ་སྲིད་པ་དང་མི་སྲིད་པ་དག་ནི་འདིར་ཟླ་བོ་སྲིད་པ་ཡིན་ནོ་ཞེས་དེ་ལྟ་བུའི་ངོ་བོ་ངེས་པ་ཡིན་པ་དེའི་ཕྱིར་དངོས་པོ་ལ་གཏན་ཚིགས་ཀྱི་འགྲན་ཟླ་མི་སྲིད་པ་གང་ཡིན་པ་དེ་གཏན་ཚིགས་ཀྱི་མཚན་ཉིད་དེ་ནི་མ་ངེས་པའི་ཕྱིར། བརྗོད་པར་འདོད་བའི་གྲངས་གཅིག་པར་སྨྲ་བ་རྣམས་ལ་ཅུང་ཟད་ཅིག་ཀྱང་གཏན་ཚིགས་སུ་མི་འགྱུར་རོ། །མ་ངེས་པ་ནི་གཏན་ཚིགས་ཀྱི་མཚན་ཉིད་དུ་མི་འགྱུར་བའི་མཇུག་བསྡུ་བ་ནི་དེས་ན་དེ་ལྟར་ན་ཅི་འདོད་པར་ལ་མི་སྲིད་པའི་གཏན་ཚིགས་ཟླ་བོ་གང་ཡིན་པ་དེ་ནི་ཡན་དག་པའི་ཤེས་པའི་གཏན་ཚིགས་ལས་བཟློག་པར་འདོད་པ་ཡིན་ནོ། །རང་གི་རྣམ་པར་རྟོག་པ་བསལ་ནས་རྣ་པར་རྟོག་པ་གཉིས་བ་བས་ལ་འཁར་དོད་ནས་འོན་ཏེ་ཟླ་བོའི་གཏན་ཚིགས་རབ་ཏུ་མ་བསྟན་པ་ཞིག་ཅེས་བྱ་བ་ལ་སོགས་པ་སྨོས་ཏེ། ཡང་དག་པའི་ཤེས་པ་ལས་བཟློག་པའི་གཏན་ཚིགས་སུ་འདོད་པའོ་ཞེས་བྱ་བར་སྦྱར་རོ། །འདིའི་ཕྱོགས་ཀྱང་སློབ་དཔོན་ཕྱོགས་ཀྱི་གླང་པོ་ཡང་བཞེད་པ་ཡིན་པར་གཞན་གྱིས་བསྟན་པ་ནི་འདི་སྐད་དུ་ཞེས་བྱ་བ་སྨོས་ཏེ། སློབ་དཔོན་ཕྱོགས་ཀྱི་གླང་པོས་ཅི་ཞིག་བཤད་ཅེ་ན་འོ་ན་ནི་གང་གི་ཚེ་ཞེས་བྱ་བ་ལ་སོགས་པ་སྨོས་ཏེ། མཉན་
པར་བྱ་བའི་མཚན་ཉིད་ཕྱོགས་ཀྱི་ཆོས་ཀྱི་གཏན་ཚིགས་ཉིད་དུ་འགྱུར་ཏེ། སྒྲ་ནི་རྟག་པ་ཡིན་ཏེ་མཉན་པར་བྱ་བ་ཡིན་པའི་ཕྱིར་སྒྲ་བཞིན་ནོ་ཞེས་དེ་སྐད་དུ་གཞན་གྱིས་བཤད་པར་གྱུར་པ་ལ་སློབ་དཔོན་གྱིས་སྒྲར་བཤད་པའི་ཆོས་ཅན་གང་དང་གང་ལ་མི་རྟག་པ་ཉིད་ཀྱི་གཏན་ཚིགས་བྱས་པ་ཉིད་དང་རྩོལ་བ་ལས་བྱུང་བ་ལ་སོགས་པའི་མཚན་ཉིད་འགའ་ཞིག་བྱེ་བྲག་པ་ལ་སོགས་པ་མི་སྟོན་པ་དེའི་ཚེ་ཁྱེད་ཀྱི་གཏན་ཚིགས་འདི་འགྲན་ཟླ་ཉིད་མ་བསྟན་པར་གྱུར་ན་ཞེས་བྱ་བ་བཤད་པ་ལྟ་བུའོ་ཞེ་ན། དེ་སྐད་དུ་དེ་སློབ་དཔོན་གྱི་ཞལ་སྔ་ནས་དབང་པོ་ཡིན་པས་ཕྱག་བརྐྱང་ནས་བསྟན་བཅོས་མཛད་པས་སྔོན་མཛད་པ་ཡིན་ཏེ། འདི་ནི་དེ་ནི་ཞེས་བྱ་བ་ལ་གང་གི་ཚེ་སློབ་དཔོན་ཡང་དེ་བཞེད་པ་ཡིན་ནོ་ཞེས་འགའ་ཞིག་འཆད་པ་དེ་དང་དེ་དག་ནི་ཆེས་ཤིན་ཏུ་ཉོན་མོངས་པར་གྱུར་པ་ཇི་ལྟ་བར་བྱས་པའི་ཕྱིར་བསྒྲགས་སུ་མི་རུང་བའོ། །བླ་མའི་སྐྱོན་བསྒྲགས་སུ་མི་རུང་བ་དང་རིགས་པའི་རྗེས་སུ་འབྲང་བ་རྣམས་ཀྱིས་བཅབ་ཏུ་མི་རུང་བ་སྟེ་སྦ་བར་མི་རུང་བའོ། །དེས་ན་ཅི་བླ་མའི་སྐྱོན་བརྗོད་དམ་ཡང་ན་རིགས་པ་ལ་ལྟོས་པར་བྱ་བ་ཡང་ཡིན། དེས་གཉི་ག་ཡང་མི་ནུས་པའི་ཕྱིར་ཆེས་ཤིན་ཏུ་ཉོན་མོངས་པར་གྱུར་བ་ཇི་ལྟར་རྒལ་བར་ནུས་པ་ཡིན་ཏེ་རེས་འགའ་ཡང་མ་ཡིན་ནོ། །འདི་ལ་ཉེས་པ་ཅི་ཞིག་ཡོད། གང་གིས་ན་འདི་ཤིན་ཏུ་ཉོན་མོངས་པ་ཡིན། རེ་ཞིག་གཏན་ཚིགས་འདི་ཞེས་བྱ་བ་སྨོས་ཏེ། མཉན་པར་བྱ་བ་ཉིད་ལ་སོགས་པ་གཏན་ཚིགས་ཀྱི་མཚན་ཉིད་དོ། །དངོས་པོ་ནི་སྒྲ་ལ་སོགས་པའོ། །རང་གི་བསྒྲུབ་པར་བྱ་བའི་དེ་ཉིད་ནི་རྟག་པའོ། །དེའི་རང་བཞིན་ནི་དེའི་བདག་ཉིད་དུ་བྱས་པའོ། །དེ་མཉན་བྱ་ཉིད་ལ་ཚད་མ་ཅན་གང་དག་གིས་སོ། །སྐྱེས་བུ་རྣམས་ནི་དཔྱོད་པ་དང་བྱ་ཀ་ར་ཎ་བ་ལ་སོགས་པ་རྣམས་སོ། །དེས་མངོན་པར་མཐོ་བ་ནི་མཐོ་རིས་སོ། །ངེས་པར་ལེགས་པ་ནི་བྱད་གྲོལ་ལ་སྦྱོར་བར་བྱེད་དེ། དེ་ལྟ་ན་དངོས་པོའི་དེ་ཁོ་ན་ཉིད་བསྒོམས་པས་ཉོན་མོངས་པ་མ་སྤངས་ན་ནི་རེ་ཞིག་མཐོ་རིས་སུ་སྐྱེ་བར་བྱེད་དོ། །ཉོན་མོངས་པ་སྤངས་པ་ཡིན་ན་ནི་མྱ་ངན་ལས་འདས་པའི་ཕ་རོལ་ཏུ་བྱོན་པར་འགྱུར་རོ། །ཡང་ན་སྒྲ་རྟག་པ་ཉིད་དུ་རྟོགས་པའི་རིག་བྱེད་
ཚད་མར་བྱེད་པས་མེ་ལ་མཆོད་སྦྱིན་ལ་སོགས་པས་མཐོ་རིས་སྒྲུབ་བར་བྱེད་ལ་རིག་བྱེད་ཀྱི་མཐའ་བསྟེན་པ་ལས་བྱད་གྲོལ་ཡིན་ནོ། །ཁྱེད་ཤེས་རབ་ཀྱི་རིགས་ཀྱིས་བྱེ་བྲག་པ་ལ་སོགས་པ་སྐྱེས་བུ་སམ་བྱས་པ་ལས་གཞན་པའི་གཏན་ཚིགས་འགྲན་ཟླའི་གཏན་ཚིགས་བསྟན་ནི་གང་འདིར་རྟག་པ་ཉིད་སྒྲུབ་པར་བྱེད་པའི་གཞུང་འཇུག་པ་ནི་གཏན་ཚིགས་འགྲན་ཟླ་མ་བསྟན་ན་ནི་འགྲུབ་བོ། །དེ་ཉེ་བར་བསྟན་དེ་བས་ལ་བ་ཡིན་ནོ། །དངོས་པོ་དེ་དག་དང་ནི་རྟག་པ་ཉིད་ཀྱི་ཕུན་སུམ་ཚོགས་པ་ལས་ཉམས་པས་དེ་ཚད་མར་བྱེད་པའི་སྐྱེས་བུ་རྣམས་མཐོ་རིས་དང་བྱང་གྲོལ་ཕུན་སུམ་ཚོགས་པ་ཉམས་པའི་མཉན་བྱའི་མཚན་ཉིད་ཀྱི་གཏན་ཚིགས་དུས་བ་མ་ཚང་བས་སྐྱོབ་པར་བྱེད་མི་ནུས་པ་ནི་རྒྱལ་སྲིད་ཤོར་བ་ལྟར་དཀའ་ཐུབ་ཀྱི་ནགས་ཚལ་དུ་འགྲོ་བ་སྟེ། རང་ཉིད་ཉེས་པར་བརྗོད་པས་འདིར་ཁྱེད་ཀྱིས་ཇི་སྐད་དུ་སྨྲ་པར་བྱ། དེ་ཉིད་བཞད་གང་དུ་བྱེད་པའི་དེའི་ཕྱོགས་ལ་སྐྱོན་བསྟན་པ་ནི་སྒྲུབ་པ་ཉིད་སྐྱེས་བུས་སྤོབས་བ་ཞེས་བྱ་བ་ལ་སོགས་པ་སྨོས་ཏེ། གང་གི་ཚེ་འགྲན་ཟླ་གཏན་ཚིགས་མ་བསྟན་པ་གཏན་ཚིགས་སུ་འདོད་པ་དེའི་ཚེ་སྐྱེས་བུའི་སྤོབས་པས་བྱས་པའི་སྒྲུབ་པར་བྱེད་པར་ཁས་བླངས་བར་འགྱུར་རོ། །དེས་ཀྱང་དངོས་བོ་ལས་ཅུང་ཟད་ཅིག་སྒྲུབ་པ་དང་སྒྲུབ་པ་མ་ཡིན་ནོ། །དེ་ལྟར་ན་གང་གི་ཚེ་གཏན་ཚིགས་ཀྱི་འགྲན་ཟླ་བ་བསྟན་བ་དེའི་ཚེ་སྒྲུབ་བར་བྱེད་བའོ། །གང་གི་ཚེ་བསྟན་པ་དེའི་ཚེ་སྒྲུབ་བ་མ་ཡིན་པས་སྐྱེས་བུའི་སྤོབས་བས་བྱས་པའི་སྒྲུབ་པར་བྱེད་པར་འགྱུར་རོ། །གཞན་ཡང་འགྲན་ཟླའི་གཏན་ཚིགས་མ་བསྟན་པའི་གཏན་ཚིགས་དེ་གཏན་ཚིགས་སུ་ཁས་ལེན་པར་བྱེད་ན་རྣམ་པར་རྟོག་པ་གཉིས་ཏེ་ཅི་དོན་དམ་པར་ན་གཏན་ཚིགས་དེའི་ཆོས་ཡོད་པའམ་ཡང་ན་དེ་མ་ཡིན་པའི་ཆོས་ཡོད་པ་ཡིན། དེ་ལ་རྣམ་པར་རྟོག་བ་དང་པོའི་དབང་དུ་བྱས་ནས་གཏན་ཚིགས་དེ་ཡང་ཞེས་བྱ་བ་སྨོས་ཏེ། ཐོག་མའི་ཁྱད་པར་དེ་ནི་གང་གི་ངོ་བོ་ཉིད་ཁོ་ན་དེ་ལ་བསྒྲུབ་པར་བྱ་བའི་ཆོས་ཡོད་པར་གྱུར་ན་དེ་ལྟ་བུའི་རང་བཞིན་ལས་མངོན་པར་འདོད་པའི་འབྲེལ་བ་གང་ཡིན་པ་འདོད་ན་དེའི་ཚེ་ཇི་ལྟར་གཞན་དུ་བྱེད་པར་འགྱུར། གཏན་ཚིགས་གཞན་
དེ་མ་ཡིན་པའི་ཆོས་ཡོད་པར་ཇི་ལྟར་བྱེད་པར་འགྱུར། རྣམ་པ་འགའ་ཞིག་ཀྱང་མ་ཡིན་ནོ། །ཅིའི་ཕྱིར་ཞེ་ན། དངོས་པོ་རྣམས་ནི་གཏན་ཚིགས་ཀྱི་མཚན་ཉིད་གང་གི་ངོ་བོ་ཡོད་པ་ཉིད་བསྒྲུབ་པར་བྱ་བའི་ཆོས་ཡོད་པའི་བདག་ཉིད་དེ་ལས་གཞན་དུ་བྱུང་པ་ནི་དེ་ལས་བཟློག་པ་སྟེ་མེད་པའི་ཕྱིར་རོ། །རང་གི་བསྒྲུབ་པར་བྱ་བའི་ཆོས་མེད་ན་ནི་འབྱུང་བའི་རང་བཞིན་ཁོ་ན་ཆོས་ཅན་གཅིག་ལ་དངོས་པོ་གཉིས་འགལ་བས་གཉི་གའི་རང་བཞིན་གཅིག་ཏུ་གྱུར་བའོ། །གཅིག་ལ་འགལ་བ་གཉིས་ཀྱི་ངོ་བོ་ཉིད་མི་སྲིད་དོ། །འགལ་བའི་ཆོས་གནས་པ་དེའི་གཅིག་པ་ཉམས་པར་ཐལ་བར་འགྱུར་བའི་ཕྱིར་རོ། །ཡང་རྣམ་པར་རྟོག་བ་གཉིས་པ་ཡིན་པ་དེའི་ཚེ་དེ་མ་ཡིན་པའི་ཆོས་ཡོད་པ་ཅན་མེད་ན་ཡང་བསྒྲུབ་པར་བྱ་བའི་ཆོས་ཀྱི་ངང་ཚུལ་ཅན་དང་འབྲེལ་པར་ཁས་བླངས་པའི་ཕྱིར་རོ། །ཇི་ལྟར་གཞན་ལས་ཀྱང་འགྲན་ཟླའི་གཏན་ཚིགས་མ་བསྟན་པར་གནས་སྐབས་སུ་ཡང་འགའ་ཞིག་གིས་སྒྲུབ་པར་བྱེད་པ་ཡིན། །དེ་ལ་སྒྲུབ་པར་བྱེད་པ་མ་ཡིན་ཏེ་གཏན་ཚིགས་བསྟན་པའི་གནས་སྐབས་འགའ་ཞིག་ནི་མ་ཡིན་ནོ། །མཇུག་བསྡུ་བ་ནི་དེ་ལྟ་བས་ན་ངོ་བོ་ཉིད་ཀྱིས་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་དེ་ལྟར་དངོས་པོ་རྣམས་ཀྱི་རང་བཞིན་ནི་གཞན་དུ་བྱ་བར་མི་ནུས་པས་འགལ་བ་གཉིས་ཀྱི་ངོ་བོ་ཡང་གཅིག་ལ་མི་སྲིད་པས་དེའི་ཕྱིར་དོན་དམ་པར་ན་རང་རང་གི་བསྒྲུབ་པར་བྱ་བ་ལ་མེད་ན་མི་འབྱུང་བར་ཇི་སྐད་བཤད་པའི་མཚན་ཉིད་ཀྱིས་རང་བཞིན་དང་འབྲས་བུའི་གཏན་ཚིགས་དེའི་མཚན་ཉིད་ཀྱི་རང་བཞིན་དང་འབྲས་བུའི་མཚན་ཉིད་ལ་འགྲན་ཟླའི་གཏན་ཚིགས་མི་སྲིད་པའི་ཕྱིར་རྗོད་པར་འདོད་པའི་གྲངས་གཅིག་པ་ནི་མཚན་ཉིད་མ་ཡིན་པས་རྗོད་པར་འདོད་པའི་གྲངས་གཅིག་པ་ཅན་གྱི་མཚན་ཉིད་མ་ཡིན་ནོ། །ཅིའི་ཕྱིར་ཞེ་ན། རྣམ་པར་གཅད་པར་བྱ་བ་ཞེས་བྱ་བ་ལ་སོགས་པ་སྨོས་ཏེ། རྗོད་པར་འདོད་པའི་གྲངས་གཅིག་པས་འགྲན་ཟླའི་གཏན་ཚིགས་རྣམ་པར་གཅད་པར་བྱ་བར་བརྗོད་དོ། །ཡང་ན་འགྲན་ཟླའི་གཏན་ཚིགས་སུ་རིགས་ཀྱི་འབྲས་བུ་དང་རང་བཞིན་མ་ཡིན་
པའི་ཕྱིར་ཇི་ལྟར་གཏན་ཚིགས་ཀྱི་མཚན་ཉིད་དུ་འགྱུར། དེ་ལྟར་ན་འདིས་ཚུལ་གཉིས་བ་སྲིད་བ་ནི་ཇི་སྐད་བཤད་པའི་མེད་ན་མི་འབྱུང་བ་སྲིད་པ་ལས་ཚུལ་གཞན་ཁས་བླངས་པ་ཡང་གཏན་ཚིགས་ལྟར་སྣང་བ་ཉིད་དེ། གཏན་ཚིགས་ལྟར་སྣང་དེ་ལས་གཞན། །ཞེས་བྱ་བ་དེའི་དོན་གྱི་འགྲེལ་པ་ཡིན་ནོ། །ཤེས་པ་ཉིད་བསལ་བར་བྱ་བ་ནི་ཡང་ཤེས་པ་ཉིད་ནི་ཞེས་བྱ་བ་ལ་སོགས་པ་སྨོས་ཏེ། གནོད་པ་མེད་པའི་ཡུལ་ཅན་དང་རྗོད་པར་འདོད་པའི་གྲངས་གཅིག་བ་ནི་འབྲས་བུ་དང་རང་བཞིན་གྱི་གཏན་ཚིགས་ཉིད་མེད་ན་མི་འབྱུང་བར་འགྱུར་བ་ལ་གནོད་པ་མེད་པའི་འགྲན་ཟླའི་གཏན་ཚིགས་མི་སྲིད་པའི་ཕྱིར་རོ། །རྣམ་པར་གཅད་པར་བྱ་བ་མེད་པར་གྱུར་པ་ལ་ཡང་རྟགས་ཀྱིས་ཆོས་ཀྱི་མཚན་ཉིད་དུ་མི་འགྱུར་རོ་ཞེས་བཤད་དོ། །ཤེས་པ་ནི་ཤེས་པ་ཉིད་དོ། །དེ་ཉིད་ནི་ཤེས་པ་ཡོད་པར་བརྗོད་པས་སོ། །དེ་ལྟ་ན་ཤེས་པའི་སྒྲ་འཇུག་པའི་རྒྱུ་མཚན་ནི་ཤེས་པ་ཉིད་དུ་བརྗོད་དོ། །དེ་ཡང་ཤེས་པ་ཁོ་ན་སྐྱེད་པར་གྱུར་པ་ལ་ཤེས་པ་ཉིད་ཅེས་ཐ་སྙད་དུ་བྱེད་དོ། །རྟགས་ཀྱི་ངོ་བོ་ནི་མ་ཡིན་ན་ཇི་ལྟར་རྟགས་ཀྱི་མཚན་ཉིད་དུ་འགྱུར། གལ་ཏེ་ཡང་རྣམ་པར་རྟོག་པའི་སྣང་བ་སྤྱིའི་རྣམ་པའི་རྟགས་སུ་རྣམ་པར་གཞག་པ་དེ་ལྟ་ན་ཡང་ཤེས་པ་ནི་རྟགས་ཀྱི་ཆོས་མ་ཡིན་ནོ། །འདིར་རང་དགའ་པ་ནི་རྟགས་མ་ཡིན་ཏེ། དེ་སྐད་དུ་རྣམ་རྟོག་ཐ་དད་པར་རང་དགའ་བ་ནི་དོན་གྱི་རྟེན་མ་ཡིན་ཏེ། རྣམ་པར་རྟོག་པའི་ཡུལ་ཁོང་དུ་ཆུད་པ་ནི་དོན་མེད་པ་ལ་དམིགས་པ་མེད་པ་ཁོ་ནར་འགྱུར་རོ་ཞེས་བཤད་དོ། །དེའི་ཕྱི་རོལ་གྱི་དངོས་པོ་ལ་བརྟེན་པ་ཁོ་ན་རྟགས་སུ་རྣམ་པར་གཞག་པར་བྱའོ། །བསྒྲུབ་པར་བྱ་བ་དང་སྒྲུབ་བར་བྱེད་པའི་རྟོག་པ་ནི་དངོས་པོ་མཐོང་བ་ལས་ཉམས་བས་ན། རང་གི་མཚན་ཉིད་ལ་ནི་རྗེས་སུ་འགྲོ་བ་འགའ་ཡང་མེད་དོ། །དེའི་ཆོས་དེ་ཉིད་ཀྱི་རྗེས་སུ་འབྲང་བའི་རྣམ་པར་རྟོག་པ་དུ་མ་ལས་ལྡོག་པ་ནི་དངོས་པོ་ཡོད་པ་མཐོང་བའི་བརྒྱུད་པ་དང་འབྲེལ་པས་མི་སླུ་བར་བྱེད་པ་མ་ཡིན་ཏེ། འབྲས་བུ་ལ་སོགས་པའི་རྟགས་སུ་བསྟན་པའི་རྒྱུ་མཚན་བཤད་ཟིན་ཏོ། །དེ་འབྲས་བུ་ལ་སོགས་པའི་བདག་ཉིད་
ཀྱི་ངོ་བོ་ཤེས་པའི་རྣམ་པར་རྟོག་པ་ལ་སྣང་བ་སྤྱིའི་རྣམ་པར་རྣམ་པར་རྟོག་པའི་བདག་ཉིད་དུ་གྱུར་བ་ནི་མ་ཡིན་ཏེ། དེ་ངོ་བོ་མེད་པ་དངོས་པོའི་ངོ་བོ་འགལ་བའི་ཕྱིར་དང༌། དེའི་ངོ་བོ་ནི་རྣམ་པར་རྟོག་པའི་གཟུགས་བརྙན་སྤྱིའི་བདག་ཉིད་ནི་སྤངས་པའི་ཕྱིར་རོ། །གང་གི་ཕྱིར་ཕྱི་རོལ་དུ་མ་གྱུར་ཀྱང་ཕྱི་རོལ་དུ་མངོན་པར་ཤེས་པ་ནི་རྗེས་སུ་མི་འགྲོ་བ་ཡང་རྗེས་སུ་འགྲོ་བས་སྤྱིའི་བདག་ཉིད་དོ། །དེ་ལྟ་ན་རྣམ་པར་རྟོག་པའི་ངོ་བོར་བཤད་པ་ནི་མ་ཡིན་ནོ། །ཇི་སྐད་དུ། ཤེས་ལས་ཐ་དད་མ་ཡིན་པ། །ཇི་ལྟར་དོན་གཞན་འབྲང་བར་འགྱུར། །ཞེས་བཤད་པའོ། །རྣལ་མའི་དོན་བས་མ་བར་བྱ་སྟེ། རྟོག་པར་བྱེད་པའི་སྐྱེས་བུ་གང་མི་སླུ་བར་བྱེད་པའི་རྟགས་དེའི་རང་གི་ངོ་བོ་བརྗོད་པར་བྱ་བ་བསྟན་བཅོས་བྱེད་པས་དེ་མཐོང་བའི་ངོ་བོ་འདི་རྟོགས་པར་བྱེད་པ་གང་ལ་དེའི་ངོ་བོ་སྲིད་པ་དེའི་ངོ་བོ་སྲིད་པ་དེའི་སྒྲུབ་པར་བྱེད་པ་ཡིན་ནོ། །དེ་མ་ཚང་བ་ནི་སྒྲུབ་པར་བྱེད་པ་མ་ཡིན་ནོ་ཞེས་རྣམ་པར་གཞག་པར་བྱའོ། །དེ་ལ་སྒྲུབ་པར་རྣམ་པར་གཞག་པ་གང་ཡིན་པ་དེ་ནི་འདོད་པའི་དོན་དང་ཉེ་བར་འཇོག་པར་བྱེད་པ་ལ་ཡིད་ཆེས་ནས་འཇུག་པའི་དམིགས་པ་ཡིན་ནོ། །དེ་ལ་དེ་ནི་རིགས་པས་རྣམ་པར་གཞག་པའོ། །འདི་རྟགས་ཀྱི་བདག་ཉིད་ཀྱི་ངོ་བོ་གང་ཡིན་པ་དེའི་མཚན་ཉིད་དུ་འགྱུར་བས་འོས་པ་ཡིན་ཏེ། ཕྱོགས་ཀྱི་མཚན་ཉིད་བཞིན་ནོ། །གཞན་གྱི་ངོ་བོ་མ་ཡིན་ནོ། །འདི་ཤེས་པ་རྟགས་སུ་སྒྲུབ་པར་བྱེད་བ་ནི་རིགས་པ་ཉིད་དེ་བསྒྲུབ་བྱ་སྒྲུབ་པ་ལ་ཉེར་བར་སྦྱོར་བ་རྟགས་ཀྱི་མཚན་ཉིད་ཡིན་ནོ་ཞེ་ན། རྟོག་པ་སྐྱེ་བ་ལ་ཞེས་བྱ་བ་ལ་སོགས་པ་སྨོས་ཏེ། གང་གི་ཚེ་རྗེས་སུ་དཔག་པར་བྱ་བ་རྟོག་པ་སྐྱེ་པ་ལ་ཉེ་བར་སྦྱོར་བས་དེ་ཙམ་གྱི་རྟགས་ཀྱི་མཚན་ཉིད་དུ་འདོད་ན་ནི་དེའི་ཚེ་ཧ་ཅང་ཐལ་བར་འགྱུར་བར་འགྱུར་བ་ཡིན་ནོ། །དེ་ཉིད་ནི་དེ་ལྟ་ན་ནི་རྟོག་པ་སྐྱེ་བ་ལ་ཉེ་བར་སྦྱོར་བ་ཙམ་རྟགས་ཀྱི་མཚན་ཉིད་ཡིན་ན་གཞལ་བྱ་དོན་དང་སྐྱེས་བུ་འཇལ་བར་བྱེད་པ་པོ་དང་སོགས་པའི་སྒྲ་ལྡན་པ་དང་འདུ་བ་ལ་སོགས་པ་དང་སྣང་བ་དང་ཡིད་ལ་བྱེད་པ་ལ་སོགས་པ་རྟགས་ཀྱི་མཚན་ཉིད་དུ་འགྱུར་རོ། །འདིར་རྒྱུ་ནི་དག་མེད་པར་ཞེས་བྱ་བ་སྨོས་ཏེ།
གཞལ་བྱ་ལ་སོགས་པ་མེད་པར་ནི་རྟགས་ཅན་ལ་ཤེས་པ་སྐྱེ་བར་མི་འགྱུར་བར་བྱས་སོ། །འདིར་གཞན་དག་མི་འདོད་བར་བརྗོད་པ་ནི་འོ་ན་ནི་ངེས་པ་སྨོས་པ་ཞེས་བྱ་བ་ལ་སོགས་པ་སྨོས་ཏེ། གལ་ཏེ་གཞན་གྱི་ངོ་བོ་ཉིད་ཤེས་པ་རྟགས་ཀྱི་མཚན་ཉིད་མ་ཡིན་ན་དེའི་ཚེ་སློབ་དཔོན་གྱིས། རྗེས་དཔག་བྱ་དང་དེ་མཚུངས་ལ། །ཡོད་དང་མེད་པ་ལ་མེད་པར། །ངེས་པ་ནི་ཞེས་བྱ་བ་གང་ཡིན་པ་འདི་དག་མཛད་པའི་ངེས་པ་སྨོས་པར་ཁྱེད་འདོད་པས་དེ་ནི་མི་མཛད་པ་ཁོ་ནར་འགྱུར་རོ་ཞེ་ན། དེའི་ངེས་པ་སྨོས་པ་ནི་རྟགས་ཀྱི་ངོ་བོ་བསྟན་པས་དོན་གཞན་ཡིན་པའི་ཕྱིར་རོ། །དེ་ཉིད་དོན་གཞན་ཡིན་པ་བསྟན་པ་ནི། མཐུན་ཕྱོགས་མི་མཐུན་ཕྱོགས་དག་ལ། །ཞེས་བྱ་བ་ལ་སོགས་པ་གསུངས་ཏེ། གཞན་གྱིས་མཐུན་པའི་ཕྱོགས་མཐོང་བ་ཙམ་དང་མི་མཐུན་པའི་ཕྱོགས་མཐོང་བ་ཙམ་གོ་བར་བྱེད་པའི་གཏན་ཚིགས་སུ་འདོད་པས་དེ་དག་མཐོང་བ་དང་མ་མཐོང་བ་བསྒྲུབ་ཡ་སྒྲུབ་པར་ནུས་པའི་གཏན་ཚིགས་སུ་མི་འགྱུར་བ་ཁོ་ནས་ཤེས་པར་འདོད་པའི་དོན་ངེས་པ་སྨོས་པ་མཛད་པ་ཡིན་ནོ། །གང་གི་ཕྱིར་དེ་དག་མཐོང་དང་མ་མཐོང་དང་མ་མཐོང་བ་ཡོད་བཞིན་ཤེས་པར་བྱེད་པའི་གཏན་ཚིགས་མ་ཡིན་པར་མཐོང་བའི་ཕྱིར་དེ་སྔོ་བསངས་ཀྱི་བུ་ཡིན་པའི་ཕྱིར་ཞེས་བྱ་བ་ལ་སོགས་པ་བཞིན་ནོ། །གནག་གི་ཕྱིར་དེ་ལྟར་རྒྱུ་དེས་ན་མཐུན་པའི་ཕྱོགས་ལ་ཡོད་པས་མི་མཐུན་པའི་ཕྱོགས་ཐམས་ཅད་ལ་མེད་པར་ཁྱད་པར་དུ་བྱེད་བས་ན། མཐུན་པའི་ཕྱོགས་མ་ཡིན་པ་ཐམས་ཅད་ལ་མེད་པ་མཐུན་པའི་ཕྱོགས་ལ་དེའི་བདག་ཉིད་དང་དེ་ལས་བྱུང་བའི་མཚན་ཉིད་ཡོད་པ་ཁྱོད་པར་ཅན་ནི་གོ་བར་བྱེད་པའི་གཏན་ཚིགས་ཡིན་ནོ་ཞེས་བྱ་བ་འདི་དོན་ཤེས་པའི་ཕྱིར་མཚན་ཉིད་གསུངས་པས་ངེས་པ་སྨོས་པ་མཛད་དོ་ཞེས་ཁོང་དུ་ཆུད་བར་བྱའོ། །འདི་སྐད་སྟོན་པ་ཡིན་ཏེ་གང་མཐུན་པའི་ཕྱོགས་དང་མི་མཐུན་པའི་ཕྱོགས་དག་ལ་ཡོད་པ་དང་མེད་པའི་འབྲེལ་པ་སྒྲུབ་པའི་ཚད་མ་འཇུག་པར་ངེས་པ་དེ་དག་ཉིད་ཀྱིས་གཏན་ཚིགས་གོ་བར་བྱེད་པར་འགྱུར་གྱི། རེས་འགའ་ཞིག་མཐོང་བ་དང་མ་མཐོང་བ་ཙམ་གྱིས་འདི་དོན་ཤེས་
བར་བྱ་བར་ངེས་པ་སྨོས་པར་མཛད་པ་ནི་མ་ཡིན་ནོ། །རྣལ་མའི་དོན་གྱི་མཇུག་བསྡུ་བ་ནི་དེས་ན་ཞེས་བྱ་བ་ལ་སོགས་པ་སྨོས་ཏེ། གང་གིས་ཡོད་པ་དང་མེད་པ་ཁྱད་པར་ཅན་དག་བསྟན་པའི་ཆེད་དུ་ངེས་པ་སྨོས་པ་མཛད་དོ། །ཚུལ་གཞན་བརྗོད་པ་མ་ཡིན་ཏེ་བདག་ཉིད་མ་ཡིན་པའི་ཚུལ་ནི་མཚན་ཉིད་དུ་མི་རུང་ངོ༌། །དེས་ན་གཞན་གྱི་ཚུལ་ནི་རྟགས་ཀྱི་མཚན་ཉིད་མ་ཡིན་ཏེ། གང་གི་ཕྱིར་དེས་ན་ཤེས་པ་ལ་སོགས་པ་ཚུལ་གཞན་གྱིས་རྟགས་ཀྱི་ཚུལ་འགའ་ཞིག་ལ་ཁྱད་པར་མི་སྟོན་པའི་ཕྱིར་རོ། །འོ་ན་ནི་མཐུན་པའི་ཕྱོགས་དང་མི་མཐུན་པའི་ཕྱོགས་ལ་ཡོད་པ་དང་མེད་པ་གཉིས་གོ་བར་བྱེད་པའི་གཏན་ཚིགས་སུ་གཞན་དག་འདོད་དེ་མཐོང་བ་དང་མ་མཐོང་བ་དེ་དག་ཉིད་སྒྲུབ་པར་བྱེད་པར་དེ་ཅིས་ན་དོན་ངེས་པ་ལ་སྨོས་པ་ཞེ་ན། དེས་ན་ཞེས་བྱ་བ་ལ་སོགས་པ་སྨོས་ཏེ། གལ་ཏེ་རང་བཞིན་དག་ཡོད་པ་དང་མེད་པ་དག་གོ་བར་བྱེད་པའི་གཏན་ཚིགས་སུ་འདོད་དོ། །དེ་ལྟ་ན་ཡང་མཐུན་པའི་ཕྱོགས་ཁོ་ན་ལ་ཡོད་པས་མི་མཐུན་པའི་ཕྱོགས་ལ་མེད་པ་ཉིད་དོ་ཞེས་ཡོད་པ་དང་མེད་པ་མཐོང་བ་དང་མ་མཐོང་བ་ཙམ་གྱིས་རྣམ་པར་གཞག་པ་ཡིན་ཏེ། དེ་དེ་ལས་རྣམ་པ་དེ་ལྟ་བུ་མི་འགྲུབ་སྟེ་འབྲེལ་པ་ཉིད་མེད་པར་བྱེད་པའི་ཚད་མས་དེའི་བདག་ཉིད་དང་དེ་ལས་བྱུང་བས་སྒྲུབ་པར་བྱེད་པའི་ཡུལ་འཇུག་པར་ཁོང་དུ་ཆུད་པར་བྱ་སྟེ། དེ་ལས་ཐབས་གཞན་མེད་པའི་ཕྱིར་རོ། །དེ་ཁས་མ་བླངས་པའི་གཏན་ཚིགས་མཐུན་པའི་ཕྱོགས་ཁོ་ན་ལ་ཡོད་པ་གཏན་ཚིགས་སུ་འདོད་པ་ཐམས་ཅད་ལ་གནོད་པ་གཞན་མེད་པའི་རྒྱུ་དེ་ས་ན་ཡོད་པ་དང་མེད་པའི་ཁྱད་པར་འདི་གཉིས་བསྟན་པས། ངེས་པ་ཞེས་བྱ་བའི་སྒྲ་སྦྱར་བ་ཡིན། མཚན་ཉིད་ནི་མཚན་ཉིད་མཛད་པས་སོ། །འོན་ནི་ཡོད་པ་དང་མེད་པ་བརྗོད་པ་ཙམ་ཁོ་ནས་ཚད་མ་ལས་ངེས་པ་འཐོབ་ན་གཞན་དུ་ན་དེ་དག་ཡོད་པ་མི་འགྲུབ་པོ་ཞེ་ན། དེས་ན་གལ་ཏེ་ཞེས་བྱ་བ་ལ་སོགས་པ་སྨོས་ཏེ། རྗེས་དཔག་བྱ་དང་དེ་མཚུངས་ལ། །ཡོད་དང་མེད་པ་ལ་མེད་པར། །ཞེས་བརྗོད་པ་ཙམ་གྱིས་ཀྱང་ངོས་པ་སྨོས་པ་ལ་མི་ལྟོས་པས་ཡོད་པ་དང་ཡོད་པ་དང་མེད་པ་དེ་གཉིས་ལ་སྒྲུབ་པའི་ཚད་མ་གང་ཡིན་པ་དེ་འཇུག་ན་བརྒྱལ་འཕྲལ་བར་འགྱུར་རོ། །ཇི་ལྟར་ངེས་པ་མ་སྨོས་པས་ཡོད་པ་དང་མེད་པ་བརྗོད་པ་ཙམ་གྱིས་དེ་ལ་འཇུག་པ་འཕངས་པ་མ་ཡིན་ཞེ་ན། དེ་ལྟ་མ་ཡིན་ན་ཞེས་བྱ་བ་སྨོས་ཏེ།
གལ་ཏེ་དེ་སྒྲུབ་པའི་ཚད་མ་འཇུག་པས་འཕགས་པ་ཡིན་བ་དེའི་ཚེ་དེ་དག་ཉིད་མཐུན་པའི་ཕྱོགས་དང་མི་མཐུན་པའི་ཕྱོགས་གཉིས་ལ་ཡོད་པ་དང་མེད་པ་དག་གིས་ཡོད་པར་རང་གི་ངོ་བོར་རྣམ་བར་གཞག་པ་གང་ཡིན་པ་དེ་མི་འགྲུབ་བོ། །ཅིའི་ཕྱིར་མི་འགྲུབ་ཅེ་ན། ཤེས་པར་བྱ་བ་ལ་སོགས་པ་སྨོས་ཏེ། ཤེས་པ་དམིགས་སུ་ཡོད་པ་ལས་སྐྱེ་བའི་རྒྱུ་མཚན་ཡིན་པའི་ཕྱིར་ཤེས་བྱ་ཡོད་པ་དང་མེད་པའི་མཚན་ཉིད་ཡོད་པར་རྣམ་པར་འཇོག་པ་ནི་རང་གི་ངོ་བོ་རྣམ་པར་གནས་པ་ཡིན་ནོ། །དམིགས་པའི་རྒྱུ་མཚན་མེད་ན་རང་ཉིད་ཀྱིས་དོན་འགྲུབ་པ་ནི་མེད་དེ་ཐམས་ཅད་ལས་འགྲུབ་པར་ཐལ་བར་འགྱུར་བའི་ཕྱིར་རོ། །དེའི་ཕྱིར་འདིའི་ངོ་བོ་ནི་འདི་ལྟ་བུ་ཡིན་ནོ། །དི་ལྟ་བུ་མ་ཡིན་ཞེས་བྱ་བ་འདི་རྣམ་པར་ཤེས་པ་སྐྱེད་པ་ཉིད་དུ་རྣམ་པར་གཞག་པར་བྱའོ། །གང་གི་ཕྱིར་དེ་ལྟར་དེའི་ཕྱིར་ཐམས་ཅད་ནི་བསྟན་བཅོས་དང་འཇིག་རྟེན་པ་ཉིད་ཀྱི་ཞེས་བྱའོ། །ཡོད་པར་རྣམ་པར་གཞག་པ་ཉིད་ནི་ངེས་པ་སྨོས་པ་མེད་ཀྱང་ཡོད་པ་སྒྲུབ་པར་བྱེད་པའི་ཚད་མ་འདྲེན་ཅིང་འཕེན་པ་ཡིན་ནོ། །གཞན་ཡང་བསྟན་བཅོས་བྱེད་བ་ནི་གཞན་གྱི་དོན་ཡིན་པའི་ཕྱིར་དེས་དེ་སྒྲུབ་པར་བྱེད་པའི་ཚད་མ་འདྲས་པ་ཡིན་ནོ་ཞེས་བྱ་བར་སྦྱར་རོ། །ཡང་ཅི་འདྲ་བ་ཞིག་བསྟན་བཅོས་བྱེད་པ་གཞན་གྱི་དོན་ངོ་བོ་གང་རང་ཉིད་རྣམ་པར་འཇོག་ཅིང་ཤེས་བྱ་ཡོད་པར་སྒྲུབ་པའི་ཚད་མ་འཕེན་པ་ཡང་ཡིན་ཞེ་ན། ཚུལ་གསུམ་པའི་རྟོགས་ཞེས་བྱ་བ་སྨོས་ཏེ། མི་སླུ་བར་བྱེད་པ་ནི་ཐོབ་པར་བྱེད་པར་འདོད་པ་དེའི་དོན་ལ་ཡིན་ནོ། །གལ་ཏེ་དེ་ལྟ་བུའི་ངོ་བོ་བསྟན་བཅོས་བྱེད་པ་གཞན་གྱི་དོན་ཡིན་པ་དེ་ལྟ་ན་ཡང་ཇི་ལྟར་དེ་སྒྲུབ་པར་བྱེད་པའི་ཚད་མ་འཇུག་པ་འཕེན་པ་ཡིན་ཞེ་ན། གང་དག་ཚུལ་དེ་ཞེས་བྱ་བ་སྨོས་ཏེ། ཚུལ་གསུམ་པོའི་རྟགས་ཀྱི་ཚུལ་གྱི་ངོ་བོ་རང་བཞིན་ཏེ། བསྟན་བཅོས་ལས་བཤད་པ་རྟོགས་པར་བྱེད་པ་བོས་མི་ཤེས་པ་དེ་དག་ནི་དེས་ཏེ་ཚུལ་གསུམ་པའི་རྟགས་པ་བསྟན་བཅོས་ནས་བཤད་པ་འདོད་པའི་དོན་ལ་འཇུག་པར་མི་འགྱུར་རོ། །ཤེས་པ་ཉིད་ཀྱི་དོན་ནི་ཤེས་པར་བྱེད་པ་རང་ཡོད་པ་ཙམ་གྱིས་འཇུག་པ་མེད་པའི་ཕྱིར་རོ། །གང་གི་ཕྱིར་དེ་ལྟར་ན་ཕྱིར་ཞེས་བྱ་བ་ནི་དེའི་ཕྱིར་ཏེ་གཞན་མཚོན་བར་བྱེད་པའི་ཕྱིར་ནི་གཞན་དག་གིས་ཤེས་པར་བྱེད་པར་ཚུལ་
གསུམ་པའི་རྟགས་ཤེས་པར་གྲུབ་མོད་ཀྱི། གལ་ཏེ་ཡང་ངེས་པ་ཞེས་བྱ་བ་སྨོས་པ་ལྷག་མ་ཡིན་ཏེ། འོན་ཀྱང་ཁྱེད་ཅག་རྟགས་ཀྱི་མཐུན་པའི་ཕྱོགས་དང་མི་མཐུན་པའི་ཕྱོགས་དག་ལ་ཡོད་པ་དང་མེད་པའི་ཁྱད་པར་བསྟན་བཅོས་བྱེད་པས་མཐུན་པའི་ཕྱོགས་ཁོ་ན་ལ་ཡོད་པ་དང་མི་མཐུན་པའི་ཕྱོགས་ལ་མེད་པ་ཁོ་ན་ཞེས་བྱ་བ་ལ་དེ་ལྟར་རིགས་པ་ཅན་ལ་སོགས་པ་གཞན་དག་མཐོང་བ་དང་མ་མཐོང་བ་ཙམ་གྱིས་གང་མཐོང་བ་དང་མ་མཐོང་བའི་འབྲེལ་པ་སྒྲུབ་བར་བྱེད་པར་ཁྱོད་ཀྱིས་དེ་ཙམ་གྱིས་རྣམ་པར་འཇོག་པ་ཡིན་ཏེ། གང་གི་ཕྱིར་ཞེས་བྱ་བ་ནི་དེའི་ཕྱིར་རོ། །རྒོལ་བ་དེ་དག་དགག་པའི་ཕྱིར་མཚན་ཉིད་མཛད་པས་ངེས་པའི་སྒྲ་སློབ་དཔོན་གྱིས་རབ་ཏུ་སྦྱར་བ་ནི་ཁོ་བོ་ཅག་ཁས་ལེན་པ་ཡིན་གྱི། གང་གཞན་ལ་ལོག་པར་རྟོགས་པ་མེད་ན་དེའི་ཚེ་འདི་རབ་ཏུ་སྦྱོར་བ་མ་ཡིན་ནོ། །འོན་ཀྱང་ཡང་མཐོང་བ་དང་མ་མཐོང་བ་དག་གིས་ཡོད་པ་དང་མེད་པའི་ཡུལ་དག་གིས་མཐུན་པའི་ཕྱོགས་དང་མི་མཐུན་པའི་ཕྱོགས་ཀྱི་ཁྱད་པར་དུ་བྱེད་དོ། །ཡོད་པ་དང་མེད་པ་ལས་རྗེས་སུ་འགྲོ་བ་དང་ལྡོག་པ་ཅིས་ན་མི་འདོད་ཅེ་ན། ཡོད་པ་དང་མེད་པ་ཞེས་བྱ་བ་ལ་སོགས་པ་སྨོས་ཏེ། ལ་ལར་མཐུན་པའི་ཕྱོགས་ལ་ཡོད་པ་མཐོང་བའི་གཏན་ཚིགས་ལ་ལར་མི་མཐུན་པའི་ཕྱོགས་ལ་མེད་པ་མཐོང་བ་ཡོད་དུ་ཟིན་ཀྱང་དེ་ནི་སྔོ་བསངས་ཡིན་ཏེ། སྔོ་བསངས་ཀྱི་བུ་ཡིན་པའི་ཕྱིར་ཞེས་བྱ་བ་ལ་སོགས་པ་བཞིན་རྗེས་སུ་འགྲོ་བ་དང་ལྡོག་པ་ལ་ཐེ་ཚོམ་ཟ་བའི་ཕྱིར་རོ། །དེ་ལྟ་ན་རྗེས་སུ་འགྲོ་བ་ནི་ཐམས་ཅད་དུ་བསྒྲུབ་བྱ་ཡོད་པ་ཉིད་ཀྱི་གཏན་ཚིགས་ཡོད་པ་ལ་ཁྱབ་པའམ་བསྒྲུབ་བྱ་མེད་ན་གཏན་ཚིགས་མེད་པའི་ལྡོག་པ་ནི་ལ་ལར་བསྒྲུབ་བྱེ་དང་གཏན་ཚིགས་ཡོད་པ་མཐོང་བ་ཙམ་གྱིས་མ་ཡིན་ཏེ་ཐམས་ཅད་ལ་ཡོད་པ་དང་མེད་པ་ནི་འབྲེལ་པ་མེད་པའི་ངལ་བོ་རྣམས་ལྷན་ཅིག་འབྱུང་བར་ངེས་པ་མེད་པའི་ཕྱིར་རོ། །དེ་ལྟར་ལ་ལར་བསྒྲུབ་པར་བྱ་བར་མངོན་པར་འདོད་པ་དེ་མེད་པར་གྱུར་པ་ལས་མེད་པར་མཐོང་བའི་གཏན་ཚིགས་ཀྱང་ཐམས་ཅད་དུ་དེ་མེད་ན་གདོན་མི་ཟ་བར་མེད་པ་དེ་ནི་འབད་པ་མེད་པར་དེ་ལྡོག་པར་ངེས་པས་ལྡོག་པར་འགྱུར་པ་མེད་པའི་ཕྱིར་རོ། །དེའི་ཕྱིར་འབྲེལ་པ་སྒྲུབ་པར་བྱེད་པའི་ཚད་མ་ཡོད་པ་ཉིད་ཇི་སྐད་བཤད་པའི་མཐུན་པའི་ཕྱོགས་དང་མི་
མཐུན་པའི་ཕྱོགས་ལ་ཡོད་པ་དང་མེད་པ་གྲུབ་པ་ཡིན་གྱི་གཞན་དུ་ནི་མ་ཡིན་ནོ་ཞེས་ལོག་པར་རྟོགས་པ་བསལ་བའི་ཆེད་དུ་ངེས་པ་སྨོས་པ་མཛད་པ་ཡིན་ནོ་ཞེས་བསྟན་པ་ནི་གང་ལས་ཞེས་བྱ་བ་ལ་སོགས་པ་སྨོས་ཏེ། །ཁོ་བོས་ཞེས་བྱ་བ་ནི་སློབ་དཔོན་གྱིས་ངེས་པ་སྨོས་པ་མཛད་པ་ནི་གཞན་དུ་ཁོ་བོ་ཅག་མངོན་པར་འདོད་པའི་ཕྱིར་ཁོ་བོས་ཞེས་བྱའོ། །དེས་ན་དེ་ལྟར་ལོག་པར་རྟོགས་པ་བསལ་བའི་ཕྱིར་ངེས་པའི་མོས་པ་མེད་ཀྱང་ལོག་པར་རྟོགས་པར་མི་བྱའོ་ཞེས་བསྟན་པ་དེ་ཉིད་ཀྱི་རིགས་པས་ཤེས་པ་ཉིད་ཚུལ་གཞན་མ་ཡིན་པར་བསྟན་པ་ནི་གནག་གི་ཕྱིར་ཞེས་བྱ་བ་ལ་སོགས་པ་སྨོས་ཏེ། ཐ་དད་པར་གྱུར་པས་ནི་ཕྱོགས་ཀྱི་ཆོས་ལ་སོགས་པ་ནི་ཚུལ་གསུམ་པ་ལས་སོ། །གང་ལས་ཤེ་ན། ཚུལ་གསུམ་པ་དེ་ཉིད་ཀྱི་ཚིག་གིས་དེ་སྒྲུབ་པར་བྱེད་པའི་ཚད་མ་འཕེན་པར་རྟོགས་པའི་ཕྱིར་རོ། །ཅི་འདྲ་བའི་ཞེ་ན། ཕྱོགས་ཀྱི་ཆོས་ཉིད་ལས་ཉེ་བར་གཏོང་བའི་དོན་བཞིན་ནོ། །དཔེར་ན་ཕྱོགས་ཀྱི་ཆོས་བརྗོད་པ་ཁོ་ན་གཏན་ཚིགས་ཉེ་བར་གཏོད་པའི་དོན་རྟོགས་པ་དེ་ཉིད་ཀྱིས་ཅན་ལ་གཏན་ཚིགས་ཡོད་པར་གྱུར་པར་བསྟན་པའི་བདག་ཉིད་ཡིན་པའི་ཕྱིར་དང༌། ཕྱོགས་ཀྱི་ཆོས་བརྗོད་པ་དེའི་ཚུལ་ཡིན་པའི་ཕྱིར་རོ། །དེས་ན་ཐ་དད་པ་ཉེ་བར་གཏད་པ་ཚུལ་གཞན་དུ་ནི་མི་འགྱུར་ཏེ། དེ་ལྟར་ཚུལ་གསུམ་པའི་ཚིག་དེ་ཉིད་བརྗོད་པའི་ཕྱིར་རོ། །འདིར་གཞན་དག་མི་འདོད་པས་སྤོང་བ་ནི། འོ་ན་ནི་རྗེས་སུ་འགྲོ་བ་དང་ལྡོག་པ་དག་ཀྱང་ཞེས་བྱ་བ་ལ་སོགས་པ་སྨོས་ཏེ། གལ་ཏེ་ཚུལ་གསུམ་པའི་ཚིག་གིས་ཡང་དག་པའི་ཤེས་པ་སྐྱེད་པ་བཞེས་བྱ་བ་དེས་ན་དེ་ལས་ཐ་དད་པར་བརྗོད་པར་མི་བྱ་བ་དེ་ལྟ་ན་ནི་རྗེས་སུ་འགྲོ་བ་ལས་ཐ་དད་པའི་ལྡོག་པ་བརྗོད་པར་མི་བྱ་བ་ལ་ལྡོག་པ་ལས་ཐ་དད་པའི་རྗེས་སུ་འགྲོ་བ་ཡང་ངོ༌། །ཅིའི་ཕྱིར་ཞེ་ན། རྗེས་སུ་འགྲོ་བའམ་ལྡོག་པ་གཅིག་གི་སྦྱོར་བས་གཉི་ག་རྟོགས་པའི་ཕྱིར་རོ། །དེ་གཉིས་ཚིག་ཐ་དད་པ་ནི་བྱས་པ་དེ་བཞིན་དུ་ཤེས་པ་ཉིད་ཀྱང་ཚུལ་གསུམ་པའི་གོ་བར་བྱ་བ་ལས་ཀྱང་ཐ་དད་པར་བརྗོད་པར་བྱའོ་ཞེ་ན། གྲུབ་པའི་མཐའ་སྨྲ་བས་མ་ཡིན་ཏེ་ཞེས་བྱ་བ་སྨོས་ཏེ། རྗེས་སུ་འགྲོ་བ་དང་ལྡོག་པ་དག་ཐ་དད་པ་ནི་མེད་ཀྱི་འོན་ཀྱང་ཚུལ་ཐ་དད་པ་ཉིད་དོ། །དེ་ལྟ་ན་རྗེས་སུ་འགྲོ་བས་མཐུན་པའི་ཕྱོགས་
ལ་ཡོད་པར་བརྗོད་དོ། །ཡང་ལྡོག་ལས་ནི་མི་མཐུན་པའི་ཕྱོགས་ལ་མེད་པ་དེ་དག་ནི་ཕན་ཚུན་ལྟོས་པས་སོ། །ཕན་ཚུན་ནང་དུ་འདུ་བ་ཡིན་ཏེ། སྒྲུབ་པ་དང་དགག་པའི་ཚུལ་ཐ་དད་པའི་ངོ་བོ་ཡིན་པའི་ཕྱིར་རོ། །གང་དང་གང་ཐ་དད་པའི་ངོ་བོ་དེ་དང་དེའི་ནར་དུ་འདུ་བར་འགྱུར་བ་མི་རིགས་སོ།། འོ་ན་ནི་གང་རྗེས་སུ་འགྲོ་བ་དང་ལྡོག་པ་ངོ་བོ་ཐ་དད་པ་དེ་ལྟ་ན་ཇི་ལྟར་ཚུལ་གསུམ་དུ་བརྗོད་པར་བྱེ། ཕན་ཚུན་ཐ་དད་པའི་བདག་ཉིད་ནི་གཅིག་པ་ཉིད་དུ་མི་རུང་ངོ་ཞེ་ན། ངོ་བོ་ཉིད་ཐ་དད་པས་མཚན་ཉིད་ཐ་དད་པའི་ཕྱིར་དངོས་པོ་ཐ་དད་པ་ལ་ཉེས་བ་འདི་མེད་དོ། །གང་གི་ཕྱིར་ཇི་ལྟ་བའི་རྗེས་སུ་འགྲོ་བ་དང་ལྡོག་པ་རྣམ་པ་རྣམ་པར་གཞག་པར་བྱ་བ་དེ་ལྟ་བུ་འདིས་ནང་དུ་འདུ་བར་བརྗོད་དེ། གཞན་དུ་ནི་མ་ཡིན་ནོ། །ཇི་ལྟར་འདི་དག་རྣམ་པར་གཞག་ཅེ་ན། ལྡོག་པས་བྱས་པ་ཐ་དད་པ་ལ་བརྟེན་པའི་དེ་ལྟ་ན་ཡང་ཚུལ་ཐ་དད་པ་འདི་ཉིད་ནི་ལྡོག་པ་ཐ་དད་པ་ཡིན་དུ་ཟིན་ཀྱང་དོན་དམ་པར་ཐ་དད་པ་མེ་དེ་རྟགས་གཅིག་ལ་ཚུལ་གསུམ་དུ་བརྗོད་དོ། །འོན་ནི་འདི་ནི་དོན་ལ་ཐ་དད་པ་འགའ་ཞིག་ཀྱང་མེད་ཀྱི་གཞན་དུ་སྦྱོར་བ་ཐ་དད་པ་ཡིན་ནོ་ཞེས་སྔར་བཤད་པ་ཇི་ལྟར་ཡིན་ཞེ་ན། ཚིག་གཅིག་གིས་ཀྱང་ཞེས་བྱ་བ་ལ་སོགས་པ་སྨོས་ཏེ། རྗེས་སུ་འགྲོ་བ་དང་ལྡོག་པའི་སྒོ་ནས་རབ་ཏུ་སྦྱོར་བ་ན་ཚིག་གཅིག་གིས་རྗེས་སུ་འགྲོ་བ་དང་ལྡོག་པ་ཐ་དད་པའི་མཚན་ཉིད་གོ་བར་བྱེད་པ་ཡིན་ནོ་ཞེས་ཁོ་བོ་ཅག་བརྗོད་ལ། དོན་གཅིག་ལ་རང་བཞིན་གཉིས་མེད་དོ་ཞེས་བརྗོད་དོ། །ཕན་ཚུན་ཐ་དད་པ་ཉིད་དག་གི་དོན་གྱི་ངོ་བོ་ཡིན་པའི་ཕྱིར་རོ། །འདིར་གཞན་དག་ན་རེ། འོན་ནི་དེ་ཁོ་ན་ལ་ཞེས་བྱ་བ་ལ་སོགས་པ་སྨོས་ཏེ། བསམ་པ་ནི་འདི་ཡིན་ཏེ། མཚན་ཉིད་གསུམ་པས་བསྟན་པའི་རྗེས་སུ་འགྲོ་བ་དག་ལྡོག་པ་ལ་བརྟེན་པ་ཕན་ཚུན་ནང་དུ་འདུ་བར་བཤད་པ་ནི་དེར་ཡང་རིག་པར་བྱ་བ་ཁོ་ན་སྟེ། དེ་ལྟ་ན་དེ་ཁོ་ན་ལ་ཡོད་དོ་ཞེས་བྱ་བ་མཚན་ཉིད་ཀྱི་དག་དེའི་ཤུགས་ཀྱིས་དེ་མེད་པ་ལ་མེད་པར་རྟོགས་སོ། །དེ་མེད་པ་ལ་གདོན་མི་ཟ་བ་མི་དོ་ཞེས་བྱ་བ་འདིས་ཀྱང་དེ་ཡོད་པ་ཡིན་ནོ། །འབྲེལ་པ་མེད་ན་ནི་མ་ཡིན་ཏེ། གཅིག་མེད་པས་གཞན་མེད་པ་ནི་འབྲེལ་པ་དེའི་བདག་ཉིད་དང་དེ་ལས་བྱུང་བ་དག་གིས་དེ་ཡོད་ན་ཡོད་པའི་ངོ་བོ་ཁོ་ནའོ། །དེས་ཀྱང་མཐུན་པའི་ཕྱོགས་སམ་མི་མཐུན་
པའི་ཕྱོགས་དག་ལ་ཡོད་པ་དང་མེད་པ་གཅིག་རྟོགས་པར་བྱེད་པས་འབྲེལ་པ་ཁྱད་པར་ཅན་གྱི་མཚན་ཉིད་ཀྱི་ཚིག་གིས་གཉི་ག་རྟོགས་པར་མ་བརྗོད་པར་མི་བྱའོ་སྙམ་ན། དེ་ལྟ་ན་ཚིག་གཅིག་གི་དོན་གྱི་ནང་དུ་འདུས་པས་ཐ་དད་པའི་ངོ་བོ་ཡང་འདིར་རྙེད་པར་དཀའོ། །དེས་ཀྱང་ཇི་སྐད་དུ་བཤད་པའི་རྗེས་སུ་འགྲོ་བ་དག་ཀྱང་འོན་ཏེ་ལོགས་ཤིག་ཏུ་མི་བྱ་སྟེ། དེ་དང་དེའི་གནས་སྐབས་ཁོ་ན་ཡིན་ནོ་ཞེ་ན། གྲུབ་པའི་མཐའ་སྨྲ་བས་ཚིག་འདིས་ནི་ཞེས་བྱ་བ་སྨོས་ཏེ། དེ་ཁོ་ན་ཡོད་པ་ཞེས་བྱ་བ་ལ་སོགས་པ་གཉི་ག་ཡང་འཕེན་པ་ནི་རབ་ཏུ་བསྟན་པའོ། །ག་ལས་ཤེ་ན། ཤུས་ཀྱིས་གཉི་ག་བསྟན་པར་ནུས་པའི་ཕྱིར་རོ། །གལ་ཏེ་ཇི་ལྟ་བུ་ཡིན་ཞེ་ན། གཅིག་གིས་ཀྱང་ཞེས་བྱ་བ་ལ་སོགས་པ་སྨོས་ཏེ་དག་ཅི་འདྲ་བ་ཞིག །ངེས་པར་བསྟན་པ་ནི་མཐུན་པའི་ཕྱོགས་ཁོ་ན་ལ་ཡོད་པ་དང་མི་མཐུན་པའི་ཕྱོགས་ལ་མེད་པ་ཁོ་ནས་ཐུན་མང་དུ་གཉིས་པ་འཕེན་པ་ནི་མེད་ན་མི་འབྱུང་བ་ཡིན་པའི་ཕྱིར་རོ། །རེ་ཞིག་ཚིག་གཅིག་ཏུ་བསྟན་པ་ཙམ་གྱིས་གཉི་ག་གཅིག་གི་ངོ་བོ་དང་ཐ་དད་པའི་ངོ་བོའི་དོན་རྣམས་ཀྱི་ངག་གཅིག་གིས་བསྟན་པར་མི་བྱ་བའི་ཕྱིར་རོ། །མཚན་ཉིད་ཀྱི་ཚིག་གཅིག་གིས་གཉི་ག་རྟོགས་ཀྱང་ཐ་དད་པར་བརྗོད་པ་གང་ཡིན་པ་དེ་ནི་སྦྱོར་བ་ངེས་པའི་ཕྱིར་ཆོས་མཐུན་པའི་སྦྱོར་བ་ལ་མི་མཐུན་པ་བརྗོད་པར་མི་བྱ་བ་དང༌། ཆོས་མི་མཐུན་པའི་སྦྱོར་བ་ལ་ཡང་ཆོས་མཐུན་པ་མི་བརྗོད་དོ། །ཡང་གཅིག་རྗོད་པར་བྱེད་པས་ཚུལ་གཞན་བསྟན་པའི་དོན་མི་རྟོགས་པ་ནི་མ་ཡིན་ནོ། །དེ་ལྟར་ཚུལ་གསུམ་པ་བརྗོད་པ་ནི་ཤེས་པ་དང་རྗེས་སུ་འབྲེལ་པས་ཤེས་བྱ་ལ་ཡོད་པར་རྣམ་པར་གཞག་པར་མི་བྱའོ། །བསྟན་བཅོས་བྱེད་པ་ལ་བརྟེན་ནས་གཞན་གྱིས་ཁོང་དུ་ཆུད་པར་བྱ་བའི་དོན་དུ་ཤེས་པ་ཉིད་ནི་ཚུལ་གསུམ་པ་བསྟན་པས་གོ་ན། ཤེས་པ་ཡང་བརྗོད་པ་ནི་དགོས་པ་ཅུང་ཟད་ཅིག་ཀྱང་ཡོད་པ་མ་ཡིན་ནོ། །འདི་ཐ་དད་པར་བརྗོད་པར་མི་རིགས་པའི་ཕྱིར་རོ། །འོན་ཏེ་འབའ་ཞིག་པ་ཡང་ཚིག་གཅིག་གི་དོན་གྱི་ནང་དུ་འདུ་བར་འགྱུར་བ་ཕན་ཚུན་ཐ་མི་དད་པའི་རང་བཞིན་དུ་འགྱུར་རོ། །དེ་ཉིད་ཀྱི་ཕྱིར་ཚིག་གཅིག་གི་དོན་གྱི་ནང་དུ་འདུས་པ་ཡིན་པར་འདོད་དོ་ཞེ་ན། ཡོད་པ་དང་མེད་པ་ཞེས་བྱ་བ་སྨོས་ཏེ། ངག་གཅིག་
པའི་དོན་ལ་མི་ལྟོས་པར་དེའི་ནང་དུ་འདུས་པ་ཙམ་གྱིས་མཐུན་པའི་ཕྱོགས་དང་མི་མཐུན་པའི་ཕྱོགས་མ་ཡིན་པ་དག་གི་ཡོད་པ་དང་མེད་པ་དག་ཕན་ཚུན་འཕེན་པའི་ནང་དུ་འདུ་བར་འགྱུར་བའི་ཐ་དད་པའི་ངོ་བོའི་དོན་རྣམས་ཀྱང་ཚིག་གཅིག་གི་དོན་གྱི་ནང་དུ་འདུ་བར་མ་མཐོང་བའི་ཕྱིར་རོ། །འོ་ན་ནི་ངེས་པ་དང་ལྡན་པའི་ཡོད་པ་དང༌། མེད་པ་འབའ་ཞིག་པ་ཉིད་དེ་དག་ཀྱང་ཕན་ཚུན་འཕངས་པས་འབའ་ཞིག་པ་ཡང་དེར་ཐལ་བར་འགྱུར་རོ་ཞེ་ན། ངེས་པ་དང་ལྡན་པ་ཞེས་བྱ་བ་སྨོས་ཏེ། དེ་ངེས་པར་གཟུང་བའི་དག་ཏུ་བསྟན་པས་འབའ་ཞིག་ནི་མ་ཡིན་ནོ། །འོན་ཀྱང་ལྷན་ཅིག་པ་ཉིད་ཀྱིས་སོ། །གང་ལས་ཤེ་ན་ངེས་པ་ན་ངེས་པར་གཟུང་བའི་ངག་ནི་གཉི་གའི་ངོ་བོ་ཡིན་པའི་ཕྱིར་རོ། །ངེས་ན་དེ་ལྟར་ཐུན་མོང་དུ་བརྗོད་པས་རྗེས་སུ་འགྲོ་བ་དང་ལྡོག་པ་འབའ་ཞིག་བརྗོད་པས་དེའི་ནང་དུ་འདུ་བས་གཉི་ག་རྟོགས་པ་ཡིན་ནོ། །འོན་ཀྱང་ཕན་ཚུན་ནང་དུ་འདུ་བར་གྱུར་པ་ཉིད་ལྷན་ཅིག་ཏུ་ཚིག་གཅིག་གིས་བརྗོད་པ་ཡིན་ནོ་ཞེས་མཇུག་བསྡུ་བ་ནི་དེའི་ཕྱིར་ཞེས་བྱ་བ་སྨོས་སོ་དེ་ཉིད་ལ་མཐུན་པའི་ཕྱོགས་ཁོ་ན་ལ་ཡོད་པ་ཞེས་བྱ་བ་འདིས་མཐུན་པའི་ཕྱོགས་ལ་ཡོད་པ་བརྗོད་པ་ནི་མ་ཡིན་ཏེ། འོན་ཀྱང་དེ་ལྟ་ན་མཐུན་པའི་ཕྱོགས་མེད་པ་ཡང་ཡིན་ནམ་དེ་བཞིན་ཅིག་ཤོས་ཀྱིས་ཀྱང་སྟེ། མཐུན་པའི་ཕྱོགས་ལ་མེད་པ་ཁོ་ན་ཞེས་བྱ་བའི་ཚིག་གིས་མེད་པ་ཉིད་འབའ་ཞིག་བརྗོད་པ་ནི་མ་ཡིན་ནོ། །འོན་ཀྱང་མཐུན་པའི་ཕྱོགས་ལ་ཡོད་པས་ཀྱང་ཡིན་ཏེ། གང་གིས་འབའ་ཞིག་པ་ཚིག་གིས་ཡོད་པའམ་མེད་པ་དེའི་བདག་ཉིད་ཀྱི་གཉིས་པ་འཕེན་པས་སོ། །གང་གི་ཕྱིར་འདིས་ཐ་དད་པར་བརྗོད་པར་མི་འགྱུར་བ་དེའི་ཕྱིར་གང་གི་ཚེ་རྗེས་སུ་འགྲོ་བ་དང་ལྡོག་པའམ་མེད་པ་ཐ་དད་པའི་ངོ་བོ་ཡིན་པའི་ཕྱིར་ཇི་ལྟར་དེ་ལས་ལོགས་ཤིག་པ་ཉིད་ཡིན། འོན་ཏེ་ངེས་པ་དང་ལྡན་པའི་ཚིག་གིས་བྱས་པའི་དེའི་ངག་གཅིག་པ་ཉིད་ཀྱིས་གཉི་ག་རྟོགས་པ་ཡིན་པའི་ཕྱིར་ལོགས་ཤིག་ཏུ་བརྗོད་པར་མི་བྱའོ། །དེ་བྱས་ཀྱང་མ་རྟོགས་པ་རྟོགས་པ་མེད་དེ། འོན་ཀྱང་སྦྱོར་བ་ངེས་པའི་དོན་ཡིན་ནོ་ཞེས་བཤད་དོ། །གལ་ཏེ་ཇི་ལྟ་བའི་རྗེས་སུ་འགྲོ་བའམ་ལྡོག་པའི་ཡོད་པའི་མཚན་ཉིད་ཕན་ཚུན་བདག་ཉིད་མ་ཡིན་པ་དང༌། དེས་དེ་གཉིས་ཕན་ཚུན་ཚུལ་གཞན་ཡིན་པ་དེ་བཞིན་དུ། བསྟན་བཅོས་བྱེད་པ་ནི་གཞན་གྱིས་ཤེས་པར་བྱེད་པ་ཡིན་པས་ཤེས་པ་ཉིད་ནི་མཚན་ཉིད་གསུམ་ལས་ཐ་དད་དོ། །དེའི་ནང་དུ་འདུ་བར་འགྱུར་བ་མ་ཡིན་པ་དེའི་ཕྱིར་ཚུལ་གཞན་དུ་འགྱུར་
རོ་ཞེ་ན། ཤེས་པ་ནི་དེ་ལྟར་ཞེས་བྱ་བ་སྨོས་ཏེ། རྗེས་སུ་འགྲོ་བ་དང་ལྡོག་པའི་ཡོད་པ་དང་མེད་པའི་མཚན་ཉིད་ཕན་ཚུན་ནང་དུ་འདུ་བར་འགྱུར་བ་དེ་བཞིན་དུ་ཤེས་པ་ནི་མ་ཡིན་ཏེ། གཞན་གྱིས་ཤེས་པར་བྱེད་པའི་བསྟན་བཅོས་བཤད་པའི་མཚན་ཉིད་གསུམ་གྱི་ནང་དུ་མ་འདུས་པ་ཡིན་ཏེ། གཞན་གྱི་མཚན་ཉིད་ཡིན་པའི་ཕྱིར་རོ། །གཞན་གྱིས་ཤེས་པར་བྱེད་པའི་ཚུལ་གསུམ་པའི་ཡུལ་རྟོགས་པའི་འབྲས་བུ་ཡིན། བསྟན་བཅོས་དེ་ལས་གང་གིས་ཚུལ་གསུམ་པ་རྟོགས་པ་གང་ཡིན་པས་ཤེས་པ་ནི་མ་བཟུང་ངོ༌། །དེའི་ཕྱིར་ཐ་མི་དད་པའི་ཤེས་པ་ནི་མ་བཟུང་བས་མཚན་ཉིད་གསུམ་གྱི་ནང་དུ་འདུས་སོ་ཞེས་བྱ་བའི་དོན་ཏོ། །བས་ཞེས་བྱ་བ་ནི་དེའི་ཕྱིར་ཏེ་མཚན་ཉིད་གསུམ་ལས་ཐ་དད་པ་མ་ཡིན་པའི་ཕྱིར་རོ། །གལ་ཏེ་ཤེས་པ་ཉིད་ཤེས་པའི་སྒྲ་འཇུག་པའི་རྒྱུ་མཚན་དུ་བཤད་པའི་རྣམ་པ་ཁོ་ནར་བརྗོད་དོ། །དེའི་ཚེ་དེའི་རྟགས་ཀྱི་བདག་ཉིད་མ་གྱུར་པས་དེའི་མཚན་ཉིད་མ་ཡིན་ནོ། །ཡང་ན་ཤེས་པ་ལ་ལྟོས་པའི་ལས་སུ་བྱ་བ་ཤེས་པ་ཉིད་དུ་བརྗོད་ན་དེའི་ཚེ་ཡང་ཤེས་བྱ་ཡོད་པར་རྣམ་པར་བརྗོད་པའི་རྒྱུ་མཚན་ནི་ཤེས་པ་ཡོད་པ་ཡིན་པའི་ཕྱིར་ཚུལ་གསུམ་རྣམ་པར་གཞག་པ་ཁོ་ནས་དེ་ཡོད་པར་འཇོག་པར་བྱེད་པའི་ཤེས་པ་རྣམས་ཀྱང་འཕེན་པ་ཡིན་ནོ། །དེའི་ཕྱིར་དེ་ལ་ལྟོས་ཀྱང་ལས་བྱ་བའི་ཡོད་པ་ནི་མ་བརྗོད་ཀྱང་གྲུབ་པས་དེའི་ཚིག་གིས་ལོགས་ཤིག་ཏུ་བརྗོད་པར་མི་བྱའོ། །དེ་ལྟར་བསྟན་བཅོས་ནི་གཞན་གྱིས་ཤེས་པར་བྱེད་པའི་ཕྱིར་བཤད་པས་མ་བཟུང་བའི་ཤེས་པ་ནི་མཚན་ཉིད་གསུམ་ལས་ཐ་མི་དད་པའི་ཕྱིར་རོ། །དེ་ཉིད་གནོད་པ་མེད་པའི་ཡུལ་ཅན་ལ་སོགས་པ་ཡིན་པའི་ཕྱིར་ཚུལ་གསུམ་བསལ་བའི་མཇུག་བསྡུ་བ་ནི་དེ་ལྟ་བས་ན་གཏན་ཚིགས་མཚན་ཉིད་དྲུག་མ་ཡིན་པར་ཞེས་སྨོས་སོ། །དེ་ལྟ་ན་མཚན་ཉིད་གསུམ་ཁོ་ན་ཡིན་ནོ་ཞེས་བྱའོ། །གཏན་ཚིགས་ཐིགས་པའི་འགྲེལ་པ་བྲམ་ཟེ་ཨ་ཙ་ཊས་རྣམ་པར་སྦྱར་བ་ལས་མཚན་ཉིད་དྲུག་བཤད་པ་སྟེ་བཞི་པའོ།། །།ཐུབ་པ་ཉིད་མའི་གསུང་གི་རིགས་པའི་སྒྲོན་མ་ཡིས། །རྟོག་གེ་ངན་པ་མ་ལུས་ལམ་ནི་ཟད་མཛད་པའི། །འགྲེལ་པ་འདི་ཡིས་བསོད་ནམས་བསགས་པ་གང་ཡིན་དེས། །འགྲོ་བ་གཞན་དག་རྣམ་པར་དག་པར་བྱེད་གྱུར་ཅིག །གཏན་ཚིགས་ཐིགས་པའི་རྒྱ་ཆེར་འགྲེལ་པ་བྲམ་ཟེ་ཨ་ཙ་ཊས་རྣམ་པར་སྦྱར་བ་རྫོགས་སོ།། །།འཛམ་གླིང་སྙིང་པོ་ཁ་ཆེའི་གྲོང་ཁྱེར་དུ། །མཁས་པའི་སྙིང་པོ་ཆོས་ཀྱི་གྲགས་པའི་འགྲེལ། །དམ་ཆོས་སྙིང་པོ་ཚད་མ་བསྒྱུར་བ་ལས། །སྙིང་པོ་མེད་པ་རྣམས་ཀྱི་སྙིང་པོར་ཤོག།། །།