Nitartha Digital Library
Tibetan
སྡེ་དགེའི་བསྟན་འགྱུར་པོད་བརྒྱ་དགུ་བཅུ་པ།


   
   
   
   
རྩོད་པའི་རིགས་པའི་འགྲེལ་པ་དོན་རྣམ་པར་འབྱེད་པ་ཞེས་བྱ་བ།  ཤཱནྟ་རཀྵི་ཏ།
   
   
   
   
   
   
   
   
   
   
   
   
   
   
   
   
   
   
   
   
   
   
   
   
   
   


 
previousརྩོད་པའི་རིགས་པའི་འགྲེལ་པ་དོན་རྣམ་པར་འབྱེད་པ་ཞེས་བྱ་བ། ཤཱནྟ་རཀྵི་ཏ།next

རྩོད་པའི་རིགས་པའི་འགྲེལ་པ་དོན་རྣམ་པར་འབྱེད་པ་ཞེས་བྱ་བ།
ཤཱནྟ་རཀྵི་ཏ།


DTG190_Page_0101
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ་བཱ་ད་ནྱ་ཡ་བྲྀཏྟི་བི་པཉྫི་ཏཱརྠ་ནཱ་མ། བོད་སྐད་དུ། རྩོད་པའི་རིགས་པའི་འགྲེལ་པ་དོན་རྣམ་པར་འབྱེད་པ་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །སྣ་ཚོགས་ཡོན་ཏན་དམ་པ་རིན་ཆེན་ཕུང་པོའི་འོད་ཀྱིས་རྟག་ཏུ་མུན་པ་བཅོམ་གྱུར་ཅིང༌། །གང་ཞིག་རྣམ་པ་སྣ་ཚོགས་སེམས་ཅན་འདོད་པའི་འབྲས་བུ་ཐོབ་པའི་དོན་དུ་བརྩོན་གྱུར་པ། །མ་ལུས་འགྲོ་བ་ཕན་པ་སྐྱེད་པར་དགྱེས་པ་འཇམ་དཔལ་དེ་ལ་གུས་པར་ཕྱག་འཚལ་ནས། །རྩོད་པའི་རིགས་པ་རྣམ་པར་འབྱེད་པ་དྲི་མ་དང་བྲལ་མདོར་བསྡུས་པ་འདི་བརྩམ་པར་བྱ། །གང་དགོས་པ་དང་བྲལ་བ་དེ་རྟོག་པས་སྔོན་དུ་བྱེད་པ་རྣམས་ཀྱིས་བརྩམ་པར་བྱ་བ་མ་ཡིན་ཏེ། དཔེར་ན་བྱ་རོག་གི་སོ་རྣམ་པར་ངེས་བྱེད་ལ་སོགས་པ་བཞིན། རབ་ཏུ་བྱེད་པ་འདི་ཡང་དགོས་པ་མེད་པའོ་ཞེས་དོགས་པར་བྱེད་པའི་དོགས་པ་དེ་ཡོངས་སུ་སྤང་བར་བཞེད་པས་དགོས་པ་བསྟན་པའི་ཆེད་དུ་རིགས་པ་སྨྲ་བ་རྣམས་ཀྱང་ཞེས་པ་ལ་སོགས་པའི་ངག་ཉེ་བར་བཀོད་དོ། །ཡང་ཇི་ལྟར་ངག་འདིས་དགོས་པ་ཉེ་བར་བསྟན་ཞེ་ན། འདི་ནི་རེ་ཞིག་གཞག་གོ །དོན་རྣམ་པར་བཤད་པར་བྱ་སྟེ། རིགས་པ་ནི་ཚུལ་གསུམ་པའི་རྟགས་ཀྱི་མཚན་ཉིད་རིགས་པ་སྟེ། འདོད་པའི་དོན་གྲུབ་པ་འདིས་འདྲེན་ཅིང་ཐོབ་པར་བྱའོ་ཞེས་བྱས་སོ། །དེ་ཉིད་ཀྱི་ཕྱིར་རྟགས་རྣམ་པར་གསུམ་ཁོ་ན་ཞེས་བྱ་བ་ལ་སོགས་པ་ཚུལ་གསུམ་པ་ཁོ་ནའི་རྟགས་བར་མ་ཆད་པར་འཆད་པར་འགྱུར་རོ། །དེ་རྗོད་པར་བྱེད་པའི་ཚིག་གོ་ཞེས་གཞན་


DTG190_Page_0102
[མ་དཔེ་གཟིགས་ན་འདིར་གནོན།]

རྣམས་སོ། །དེ་སྨྲ་བའི་ངང་ཚུལ་འདི་ཡིན་པ་དེ་ལ་དེ་སྐད་དུ་བཤད་དོ། །དེ་ཡང་ཚར་གཅོད་པར་བྱེད་དེ་ཕམ་པར་བྱེད་དོ་ཞེས་པའི་དོན་ཏོ། །ཚར་གཅོད་པ་ནི་རིགས་པ་སྨྲ་བའི་ཕན་པའི་སྐབས་ཉིད་ཁོ་ན་ཡིན་པའི་ཕྱིར་རོ། །རིགས་པ་སྨྲ་བ་ནི་ཚར་གཅད་པའི་འོས་མ་ཡིན་པས། ཚར་གཅོད་པར་བྱེད་པ་འདི་སྲིད་པར་འོས་པ་མ་ཡིན་མོད། གཞན་མཁས་པ་ལ་ཕྲག་དོག་པའི་བློ་ཅན་གྱིས་དེ་ཡང་ཕམ་པར་འགྱུར་བ་མི་སྲིད་དོ་ཞེས་བྱ་བའོ། །ཀྱང་གི་སྒྲ་ནི་བསྡུ་བའི་དོན་ནམ་ཁྱད་པར་བསྡུ་བའི་དོན་ཏོ། །གང་རྣམས་ལ་ཚར་གཅོད་པ་ཡིན་ཞེ་ན། རྩོད་པ་དག་ལ་ཞེས་བྱ་བ་སྨོས་སོ། །སྒྲུབ་པ་དང་སུན་འབྱིན་པ་ཡང་དག་པར་བརྗོད་པ་རྣམས་ལ་རྣམ་པར་དཔྱོད་པ་ཞེས་བྱ་བའི་དོན་ཏོ། །ལ་ལ་ལས་རྒོལ་པ་དག་ལ་ཞེས་འདོན་ཏོ། །དེ་ལ་འགལ་བ་བརྗོད་པའི་རྒོལ་བ་དེ་རྣམས་ལ་ཡིན་ནོ་ཞེས་བཤད་པར་བྱའོ། །ཇི་ལྟར་འགལ་བ་ཡིན་ཞེ་ན། སྒྲུབ་པ་དང་སུན་འབྱིན་པ་ཡང་དག་པར་བརྗོད་པ་རྣམས་ལ་དཔྱད་ནས་དེ་དང་འགལ་བའི་དོན་བསྒྲུབ་པ་ལ་འཇུག་པའི་ཕྱིར་རོ། །རིགས་པ་སྨྲ་བ་རྣམས་ལ་ཡང་ཡང་དག་པ་མ་ཡིན་པ་མ་གྲུབ་པ་ལ་སོགས་པ་གཏན་ཚིགས་ཀྱི་སྐྱོན་གྱིས་ཇི་ལྟར་སུན་འབྱིན་པ་ཡིན་ཞེ་ན་ཡང་དག་པ་མ་ཡིན་པའི་རྣམ་པར་གཞག་པ་ཞེས་བྱ་བ་སྨོས་ཏེ། འདིར་ཡང་དག་པ་མ་ཡིན་པ་ནི་དམ་པ་མ་ཡིན་པའི་རྣམ་པར་གཞག་པ་འམ་མི་བདེན་པའི་རྣམ་པར་གཞག་པ་སྟེ། ཡང་དག་པ་ལ་སྨོད་པའི་ཕྱིར་རོ། །དེ་ཡང་འབྲས་བུའི་ལྟག་ཆོད་ཡང་དག་པ་མ་ཡིན་པ་ཚར་གཅོད་པའི་མཚན་ཉིད་དོ། །དེའི་རྣམ་པར་གཞག་པ་ནི་སྦྱོར་བ་ཡིན་ནོ་ཞེས་བྱ་བར་སྦྱར་རོ། །ངོ་ཚ་མེད་པ་དེ་སྐད་དུ་ཅི་སྟེ་བརྗོད་ཅེ་ན། གཡོ་རྒྱུ་ཅན་ཞེས་པ་བྱ་སྨོས་ཏེ་སྒྲིན་པོ་སྒྱུར་ཅན་ཏེ། གཞན་གྱི་ཕུན་སུམ་ཚོགས་པ་ལ་ཕྲག་དོག་པ་ཞེས་བྱ་བའི་དོན་ཏོ། །གང་གི་ཕྱིར་དེ་དེ་ལྟར་ཚར་གཅོད་པ་དེའི་ཕྱིར་དེ་སུན་དབྱུང་བའི་དོན་དུ་ཡིན་ནོ། །སྒྱུ་ཅན་རྣམས་སམ་ཡང་དག་པ་མ་ཡིན་པའི་རྣམ་པར་གཞག་པ་དེ་རྣམས་སམ། དེ་ཚར་གཅོད་པ་འམ། ཡང་ན་གསུམ་ཆར་སུན་འབྱིན་པ་ནི་དེ་དགག་པའི་ཕྱིར་རོ། །རྒྱུ་མཚན་དེས་རབ་ཏུ་བྱེད་པ་འདི་བརྩམས་སོ། །ཡང་ན་དེའི་དོན་དུ་ཞེས་བྱ་བར་སྦྱར་རོ། །དེ་སུན་


DTG190_Page_0103
[མ་དཔེ་གཟིགས་ན་འདིར་གནོན།]

དབྱུང་བ་བྱས་ནས་ཡང་དག་པའི་སྤྱོད་པ་ལ་འཇུག་པ་ཡིན་ཏེ། དེ་སྔོན་དུ་སོང་བ་ཐམས་ཅད་སྐྱེས་བུའི་དོན་ཡིན་ནོ་ཞེས་བྱ་བར་དགོངས་སོ། །ནང་གི་རྗེས་སུ་འབྲངས་ནས་རབ་ཏུ་བྱེད་པ་འདི་ཞེས་ཡུལ་ཉེ་བར་བརྗོད་དོ། །ནང་གི་དེ་ཁོ་ན་ཉིད་དུ་ཡོངས་སུ་རྫོགས་པའི་ཕྱིར་རོ། །དེ་ལྟ་མ་ཡིན་ན་ནང་ཡོངས་སུ་མ་རྫོགས་པས་ཡུལ་ཉེ་བར་མི་འགྱུར་ལ་སྒྲ་སྦྱར་བར་ཡང་མི་འགྱུར་རོ། །བརྩམས་སོ་ཞེས་བྱ་བ་ཇི་ལྟར་ད་ལྟར་གྱི་དུས་སུ་སྟོན་ཞེ་ན། ད་ལྟར་དང་ཉེ་བར་ཡང་ད་ལྟར་བཞིན་དུ་བཤད་པ་ཡིན་ནོ། །འབྲེལ་པ་ཡང་བརྗོད་པར་བྱ་བ་ཡིན་གྱི་དེ་ལྟ་མ་ཡིན་ན་བྱིས་པ་དང་སྨྱོན་པའི་ཚིག་བཞིན་དུ་རྟོག་པ་སྔོན་དུ་གཏོང་བས་གཟུང་བར་མི་བྱ་བར་འགྱུར་རོ་ཞེ་ན། བདེན་ཏེ། དགོས་པའི་ནང་དུ་འདུས་པའི་ཕྱིར་ལོངས་ཤིག་ཏུ་མ་བརྗོད་དོ། །དེ་ལྟར་ན་དེ་སུན་དབྱུང་བའི་དོན་དུ་འདི་བརྩམས་སོ། །དེས་ན་དེའི་དགོས་པ་ནི་རབ་ཏུ་བྱེད་པ་འདིའི་བསྒྲུབ་པར་བྱ་བ་ཡིན་ལ། དགོས་པ་དང་རབ་ཏུ་བྱེད་པ་དེ་ཡང་བསྒྲུབ་པར་བྱ་བ་དང་སྒྲུབ་པར་བྱེད་པའི་མཚན་ཉིད་ཡིན་པས་འབྲེལ་པ་ཤུགས་ལ་བསྟན་ཏོ། །གཞན་པའི་དེ་མ་ཐག་པ་ལ་སོགས་པའི་མཚན་ཉིད་ཀྱི་འབྲེལ་པ་གང་ཡིན་པ་དེ་ནི་བརྗོད་པར་མི་བྱ་སྟེ། བྱ་བ་ཡང་རབ་ཏུ་བྱེད་པའི་ཡན་ལག་མ་ཡིན་པའི་ཕྱིར་རོ། །འདི་ལྟར་དེ་རྣམས་ཡོད་ཀྱང་དགོས་པ་མེད་ན་རབ་ཏུ་བྱེད་པ་མི་རྩོམ་པ་འམ། དེ་མེད་ཀྱང་དགོས་པ་ཡོད་ན་བརྩོན་པར་འགྱུར་བ་ཁོ་ན་ཡིན་ནོ། །དེའི་ཕྱིར་རབ་ཏུ་བྱེད་པའི་རྩོམ་པའི་དགོངས་པའི་རྗེས་སུ་འགྲོ་བ་དང་ལྡོག་པར་བརྗོད་པས་རྟོག་པ་དང་ལྡན་པས་དགོས་པ་བརྗོད་པར་བྱའོ། །དེ་ལྟར་བསྟན་པས་འབྲེལ་པ་བསྟན་པ་ཁོ་ན་ཡིན་ནོ་སྙམ་དུ་བསམས་པ་ཡིན་ནོ། །རྟོག་པ་དང་ལྡན་པ་རྣམས་རབ་ཏུ་བྱེད་པའི་ལུས་མ་བརྗོད་པར་འཇུག་པར་མི་འགྱུར་བ་དེ་བས་ན་དགོས་པ་བཞིན་དུ་འཇུག་པའི་ཡན་ལག་ཡིན་པའི་ཕྱིར་རབ་ཏུ་བྱེད་པའི་ལུས་ཀྱང་བརྗོད་པར་བྱ་བ་ཡིན་ནོ་ཞེ་ན། དེ་ལྟ་ཡིན་ཡང་དགོས་པའི་ངག་གིས་བསྟན་ཟིན་པའི་ཕྱིར་འབྲེལ་པ་བཞིན་དུ་དེ་ཡང་ལོགས་ཤིག་ཏུ་བརྗོད་པར་མི་རིགས་སོ། །གང་གི་ཕྱིར་དེ་སུན་དབྱུང་བའི་དོན་དུ་འདི་བརྩམས་སོ་ཞེས་བྱ་བས་བཤད་ཟིན་པ་དེའི་ཕྱིར་དེ་སུན་དབྱུང་བ་


DTG190_Page_0104
[མ་དཔེ་གཟིགས་ན་འདིར་གནོན།]

ཉིད་དུ་ལུས་ཡིན་ནོ་ཞེས་བྱ་བར་འགྱུར་རོ། །གང་གི་ཚེ་དེ་སུན་དབྱུང་བའི་དོན་དུ་འདི་བརྩམས་སོ་ཞེས་བྱ་བས་སྔ་མའི་གཏན་ཚིགས་མ་གྲུབ་པ་ཡིན་ནོ། །འགོག་པའི་ཚད་མ་གཞན་གཉིས་ཀྱང་འདིས་བསྟན་པ་ཡིན་ནོ། །རབ་ཏུ་བྱེད་པ་འདི་ནི་རྟོག་པ་དང་ལྡན་པའི་ནུས་པས་བརྩམ་པར་བྱ་འམ་གཟུང་བར་བྱ་སྟེ། དེ་དགོས་པ་དང་ལྡན་པའི་ཕྱིར་དང༌། འབྲེལ་པ་དང་ལྡན་པའི་ཕྱིར་བསྟན་བཅོས་གཞན་བཞིན་ནོ་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །དེ་ལྟར་དགོས་པ་བརྗོད་པ་ཡིན་ནོ། །རབ་ཏུ་བྱེད་པ་མ་ལུས་པའི་དོན་བསྡུས་པའི་ཚིགས་སུ་བཅད་པ་བཤད་པ། སྒྲུབ་བྱེད་ཡན་ལག་མི་བརྗོད་ཅིང༌། །ཞེས་བྱ་བ་ལ་སོགས་པའོ། །སྒྲུབ་བྱེད་ཡན་ལག་མི་བརྗོད་པ་དང༌། སྐྱོན་མི་བརྗོད་པ་གཉིས་པོ་ནི་རྒོལ་བ་དང་ཕྱིར་རྒོལ་བ་དག་གི་ཇི་ལྟ་བའི་རིམ་གྱིས་ཚར་གཅོད་པའི་གནས་སུ་འགྱུར་ཏེ། ཕམ་པའི་གནས་ཡིན་ནོ། །གཞན་ཞེས་བྱ་བ་ནི་གཉིས་པོ་དེ་དག་ལས་གཞན་པ་རྐང་མིག་གིས་བརྟགས་པའི་དམ་བཅའ་བ་ཡོད་པ་སྒྲུབ་བྱེད་བརྗོད་པ་ཚར་གཅད་པའི་གནས་ཡིན་པས་མི་རིགས་ཕྱིར་ཞེས་བཤད་དོ། །མི་འདོད་པ་ནི་ཚར་གཅད་པའི་གནས་སུ་མི་འདོད་དོ་ཞེས་སྦྱར་རོ། །རེ་ཞིག་འདི་ནི་བསྡུས་པའི་ཚིགས་སུ་བཅད་པ་ཡིན་ནོ། །འདོད་པའི་ཞེས་བྱ་བ་ལ་སོགས་པ་ནི་རྣམ་པར་དབྱེ་བ་བརྩམ་པ་ཡིན་ཏེ། འདོད་པའི་དོན་ནི་སྒྲ་རྟག་པ་ལ་སོགས་པ་བསྒྲུབ་པར་བྱ་བར་འདོད་པ་དེ་སྒྲུབ་པ་སྟེ། རྟོགས་པར་བྱེད་པ་ནི་སྒྲུབ་པར་བྱེད་པའོ། །དེས་ན་སྒྲུབ་པར་བྱེད་པའི་སྒྲ་འདིས་འདི་ཡོད་པ་བསྒྲུབ་པར་བྱ་བ་བཤད་པ་འདིར་འདོད་པ་ཡིན་གྱི་སྒྲུབ་པར་བྱེད་པ་ཞེས་བྱ་བར་བཤད་པ་རྒྱུ་ནི་མ་ཡིན་ནོ། །དེའི་ཕྱིར་སྒྲུབ་པར་བྱེད་པ་ནི་འདོད་པའི་དོན་སྒྲུབ་པའི་མཚན་ཉིད་ཀྱི་ཡན་ལག་གོ །དེ་གང་ཡིན་ཞེ་ན། བཤད་པ་སྒྲུབ་པར་བྱེད་པ་སྟེ། སྐྱེད་པར་བྱེད་པའོ། །ཡན་ལག་གི་སྒྲ་བརྗོད་པ་འདིས་ཡན་ལག་གི་སྒྲ་འདི་ནི་འདིར་རྒྱུའི་རྣམ་གྲངས་ཡིན་གྱི་ཆ་ཤས་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ཡང་འདིར་སྒྲུབ་པར་བྱེད་པའི་ཡན་ལག་གིས་ནི་ཚུལ་གསུམ་པའི་རྟགས་བསྟན་ཏོ། །སྒྲུབ་པར་བྱེད་པའི་ཡན་ལག་བརྗོད་པ་ནི་ཚུལ་གསུམ་པའི་


DTG190_Page_0105
[མ་དཔེ་གཟིགས་ན་འདིར་གནོན།]

རྟགས་ངེས་པ་འཆད་པ་ཡིན་ནོ། །དེའི་སྒྲུབ་བར་བྱེད་པའི་ཡན་ལག་མི་བརྗོད་ཅིང་མ་སྨྲས་པ་གང་ཡིན་པ་དེ་ནི་སྒྲུབ་པའི་ཡན་ལག་མི་བརྗོད་པའོ། །དེ་ནི་འདི་སྐད་སྟོན་པ་ཡིན་ཏེ། སྒྲུབ་པའི་ཡན་ལག་མ་ཡིན་པ་ནི་ཕྱོགས་དང་ཉེ་བར་སྦྱར་བ་ལ་སོགས་པའི་ཚིག་སྟེ། སྒྲུབ་པའི་ཡན་ལག་མ་བརྗོད་པས་དེ་ལྟར་མི་རྟོགས་སོ་ཞེས་འདིར་བསྟན་ཏོ། །དེ་ལྟ་ན་སྒྲུབ་པར་བྱེད་པའི་ཡན་ལག་མ་བརྗོད་པ་ནི་སྒྲུབ་པར་བྱེད་པའི་ཡན་ལག་བརྗོད་པ་མེད་པ་སྟེ། རྒོལ་པ་ཚར་གཅད་པའི་གནས་ཡིན་ནོ། །དེས་ནི་ཚིགས་སུ་བཅད་པ་དེའི་སྔ་མའི་ཆ་བཤད་པ་ཡིན་ནོ། །སྒྲུབ་པར་བྱེད་པའི་ཡན་ལག་མ་བརྗོད་པ་ཇི་ལྟར་ཚར་གཅད་པའི་གནས་སུ་འགྱུར་ཞེ་ན། དེ་ཁས་ལེན་པ་ཞེས་བྱ་བ་སྨོས་ཏེ། འདོད་པ་དེ་བསྒྲུབ་པར་བྱ་བ་ཁས་བླངས་པ་སྟེ། འདི་བདག་གིས་བསྒྲུབ་པོ་ཞེས་དམ་བཅས་ནས་སོ། །སྤོབས་པ་མེད་པས་བྱེད་པར་འགྱུར་བས་མི་སྨྲ་བར་འདུག་པར་གྱུར་པའི་ཕྱིར་ཏེ། སྤོབས་པ་མེད་པ་ནི་འདིར་སྔར་རྟོགས་པའི་དོན་བརྗེད་པ་དང་འཇིགས་པ་ཉིད་གཟུང་ངོ༌། །འདིས་ནི་སྒྲུབ་པར་བྱེད་པའི་ཡན་ལག་ཡེ་མ་བརྗོད་པ་གསུངས་སོ། །བརྗོད་པ་ན་ཡང་གལ་ཏེ་ནུས་པ་མེད་ན་དེའི་ཚེ་བརྗོད་ཀྱང་མ་བརྗོད་པ་ཁོ་ན་སྟེ། རང་གི་བྱ་བ་མི་བྱེད་པའི་ཕྱིར་རོ་ཞེས་དགོངས་ནས་གསུངས་པ། སྒྲུབ་བྱེད་ཀྱི་ཡན་ལག་བསྒྲུབས་པ་མེད་པའི་ཕྱིར་རོ་ཞེས་པ་སྟེ། དེ་ཁས་བླངས་ནས་ཞེས་འཇུག་གོ །འམ་གྱི་སྒྲ་ནི་སྔ་མ་ལ་ལྟོས་པས་རྣམ་པར་བརྟག་པའི་དོན་ཏོ། །སྒྲུབ་བྱེད་ཀྱི་ཡན་ལག་བསྒྲུབས་པ་མེད་པ་ནི་ཚུལ་གསུམ་རྣམས་ལ་ངེས་པ་མེད་པར་བསྟན་པའོ། །དེའི་ཕྱིར་མི་སྨྲ་བར་གྱུར་པ་ལས་ངད་བསྒྲུབས་པ་མེད་པ་ལས་ཀྱང་སྒྲུབ་པར་བྱེད་པའི་ཡན་ལག་མི་བརྗོད་པའོ། །དེ་ལས་ཀྱང་དམ་བཅས་པའི་དོན་མི་བྱེད་པར་ཕྱིར་རྒོལ་བ་ཚར་གཅད་པའི་གནས་སོ་ཞེས་དཀྱུས་དང་དང་སྦྲེལ་ལོ། །འགའ་ཞིག་ཏུ་རྒོལ་བ་ཞེས་ཀློག་སྟེ། དེར་ནི་དེ་སྒྲས་མི་བརྗོད་ཅེས་པ་དཀྱུས་མ་དང་སྤྲེལ་ལོ། །ཡང་གང་གིས་དེ་ལས་བཟློག་པས་བསྒྲུབས་པ་མེད་པ་ལས་དམ་བཅས་པའི་དོན་མི་བྱེད་པའི་ཕྱིར་རྒོལ་བ་ཚར་གཅད་པའི་གནས་ཉིད་དོ་ཞེས་པ་སྒྲུབ་བྱེད་ཀྱི་ཡན་ལག་བསྒྲུབ་པར་ཇི་ལྟར་འགྱུར། གང་གི་ཚེ་ཡིན། ཅིའི་


DTG190_Page_0106
[མ་དཔེ་གཟིགས་ན་འདིར་གནོན།]

ངོ་བོ་ལས་ཡིན་ཞེས་པ་འདིའི་ལན་གདབ་པར་བཞེད་པས། རྣམ་པ་གསུམ་ཁོ་ན་ཞེས་པ་ལ་སོགས་པས་དང་པོའི་གནས་སྐབས་མཛད་དེ། རྟགས་རྣམ་པ་གསུམ་ཁོ་ན་ཡན་ལག་སྟེ་རྒྱུའོ། །ཅིའི་ཕྱིར་ཞེ་ན། སྒྲུབ་པའི་སྟེ། འཐད་པའི་ངོ་བོ་ཅན་གྱིའོ། །ཅི་སྒྲུབ་པའི་ཞེ་ན། གསུངས་པ། མངོན་སུམ་མ་ཡིན་པ་སྟེ་ལྐོག་ཏུ་གྱུར་པའི་སྟེ། རྗེས་སུ་དཔག་བྱར་གྱུར་པའི་དངོས་པོའིའོ་ཞེས་པ་ཇི་སྲིད་པའོ། །རྣམ་པ་གསུམ་ཁོ་ན་ཞེས་བཞི་ལ་སོགས་པ་རྣམ་པར་གཅོད་པའི་ངེས་པར་གཟུང་བར་གསུངས་སོ། །ངེས་པ་འདི་ནི་ཇི་ལྟར་ཞེ་ན། གང་གི་ཕྱིར། སྒྲུབ་པ་དང་དགག་པའི་ངོ་བོ་ཉིད་ཀྱིས་བསྒྲུབ་པར་བྱ་བ་རྣམ་པ་གཉིས་སུ་རྣམ་པར་གཞག་ལ། སྒྲུབ་པའི་ངོ་བོ་ཡང་རང་བཞིན་གྱི་ངོ་བོ་དང་རྒྱུའི་ངོ་བོར་འགྱུར་ཏེ། དེ་ལ་གཏན་ཚིགས་འབྲེལ་པ་ལྡན་པའི་ཕྱིར་རོ། །དོན་གཞན་འབྲས་བུ་མ་ཡིན་པ་ཡོད་པར་གྱུར་པ་ན་གཞན་ཡོད་པར་འགྱུར་བ་ནི་རིགས་པ་མ་ཡིན་ཏེ། སྣམ་བུ་ཡོད་པར་གྱུར་པ་ན་རྔ་མོ་བཞིན་ནོ། །དོན་གཞན་རྒྱུ་མ་ཡིན་པ་ལྡོག་པ་ན་འབྲས་བུ་མ་ཡིན་པ་གཞན་ལྡོག་པ་ཡང་རིགས་པ་དང་ལྡན་པ་མ་ཡིན་ཏེ། རྔ་མོ་ལྡོག་པ་ན་སྣམ་བུ་བཞིན་ནོ། །རྗེས་སུ་འགྲོ་བ་དང་ལྡོག་པ་མ་ཚང་བ་ནི་གོ་བར་བྱེད་པ་ཉིད་དུ་རིགས་པ་ཡང་མ་ཡིན་ཏེ། སྣམ་བུ་ཡང་རྣག་མོའི་གོ་བར་བྱེད་པ་ཉིད་དུ་ཐལ་བའི་ཕྱིར་རོ། །རང་བཞིན་དུ་གྱུར་པའི་སྒྲ་ནི་རང་བཞིན་གྱི་གཏན་ཚིགས་ཀྱིས་བསྒྲུབ་པར་བྱ་བ་དང༌། རྒྱུར་གྱུར་པ་ནི་འབྲས་བུའི་གཏན་ཚིགས་ལས་ཁས་བླང་བར་བྱའོ། །དགག་པ་ནི་དམིགས་པའི་རིག་བྱར་གྱུར་པའི་མི་དམིགས་པས་ཇི་ལྟ་བར་བསྒྲུབ་པར་བྱའི་གཞན་གྱིས་མ་ཡིན་ནོ་ཞེས་དེ་བཞིན་དུ་རྒྱས་པར་ཕྱིས་བཤད་པར་བྱ་སྟེ། དེ་ནི་འདིར་མདོར་བསྡུས་པའི་དོན་ཡིན་པའི་ཕྱིར་རོ། །ཡུལ་ལ་ལྟོས་ནས་ཡུལ་ཅན་རྟགས་རྣམ་པར་གཞག་པར་བྱ་སྟེ། ཡུལ་ཅན་ཡང་དགག་པ་འམ་སྒྲུབ་པ་ཞིག་ཏུ་འགྱུར་ན། སྒྲུབ་པ་ཡང་དོན་གཞན་པ་འམ་དོན་གཞན་མ་ཡིན་བ་སྒྲུབ་པ་ཞིག་ཡིན། དོན་གཞན་སྒྲུབ་པ་ཡང་རྒྱུ་འམ། འབྲས་བུ་འམ། གཉི་ག་མ་ཡིན་པ་ཞིག་བསྒྲུབ་པར་བྱ། འབྲས་བུ་བརྗོད་པ་ཡང་རྒྱུའི་སྤྱི་སྤྲིན་ལ་སོགས་པ་ལྡོག་པའི་དངོས་པོ་ཙམ་གྱིས་རྟགས་སུ་


DTG190_Page_0107
[མ་དཔེ་གཟིགས་ན་འདིར་གནོན།]

བརྗོད་པ་འམ། རྒྱུའི་བྱེ་བྲག་སྤྲིན་ལ་སོགས་པ་ནུས་པ་ཐོགས་པ་མེད་པ་གང་ཡིན་པ་ཞིག་ཡིན། དགག་པ་ཡང་དགག་པར་མངོན་པར་འདོད་པའི་དངོས་པོ་མེད་པའི་མི་དམིགས་པའམ་དམིགས་པར་བསྟན་པ་ཞིག་ཡིན། མི་དམིགས་པ་དེ་ཡང་དམིགས་པ་ལོག་པ་ཙམ་གྱིས་མཚན་ཉིད་དུ་འགྱུར་རམ། དེ་དང་རུང་བར་མཚུངས་པའི་གནས་སྐབས་ཀྱི་དོན་འབའ་ཞིག་དམིགས་པས་སྒྲུབ་པར་བྱེད་པར་བརྟག །དེ་ལ་གདོན་མི་ཟ་བར་འབྲུག་སྒྲ་ལ་སོགས་པའི་ཆོས་དང་ལྡན་པའི་སྤྲིན་གྱི་རྒྱུ་ཙམ་ལས་ཀྱང་འབྲས་བུ་ཆར་པ་ལ་སོགས་པ་དང་ལྡན་པ་མ་ཡིན་ཏེ། བར་དུ་གཅོད་པ་སྲིད་པས་འཁྲུལ་པའི་ཕྱིར་རོ། །དེའི་ཕྱིར་རྒྱུ་ཙམ་གོ་བར་བྱེད་པ་མ་ཡིན་ནོ། །རྒྱུའི་ཁྱད་པར་ཡང་ནུས་པ་ཐོགས་པ་མེད་པས་བརྗོད་པ་ལ་རྗེས་སུ་དཔག་པར་བྱ་བ་ཤེས་པའི་སྔ་རོལ་དུ་འབྲས་བུ་འབྱུང་བས་དབང་པོའི་ཤེས་པའི་གཟུང་བར་བྱ་བར་འགྱུར་བས་དེ་ཡང་རྟགས་མ་ཡིན་ནོ། །འབྲས་བུ་རྒྱུའི་རྟགས་སུ་ནི་རིགས་ཏེ། དེ་མེད་ན་མི་འབྱུང་བས་དེ་ལས་མི་འདའ་སྟེ། རྒྱུ་དང་ལྡན་པ་ལས་འདས་པར་འགྱུར་བའི་ཕྱིར་རོ། །གཉི་ག་མ་ཡིན་པ་ཡང་འབྲེལ་པ་མེད་པས་གོ་བར་བྱེད་པ་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །དོན་གཞན་མ་ཡིན་པ་ནི་འཁྲུལ་པ་མེད་པའི་གོ་བར་བྱེད་པ་ཡིན་ནོ་ཞེས་བྱ་བར་རིགས་སོ། །དགག་པ་ཡང་དམིགས་པས་ནི་མི་རིགས་ཏེ། འགལ་བའི་ཕྱིར་རོ། །ཇི་ལྟར་དམིགས་པས་མེད་པ་ལ་ཉེ་བར་འགྱུར། དེའི་ཤེས་པ་ལོག་པ་ཙམ་ནི་འཁྲུལ་པར་འགྱུར་རོ། །ཤེས་པ་གཅིག་པ་ཚོགས་པ་འབའ་ཞིག་མཐོང་བས་མེད་པའི་ཐ་སྙད་དུ་བྱ་བར་རིགས་ཏེ། གལ་ཏེ་ཡོད་ན་དམིགས་པར་འགྱུར་བ་ཁོ་ནར་འགྱུར་བའི་ཕྱིར་རོ། །ཚད་མ་ཡང་གང་འཐད་པ་མེད་པའི་ཡུལ་ལ་དེའི་ཡུལ་ཅན་འཐད་པ་མ་ཡིན་ཏེ། རྟའི་རྭ་བཞིན་ནོ། །གཞན་གྱིས་བརྟགས་པའི་རང་བཞིན་ལ་སོགས་པ་ལས་གཞན་ལྡན་པ་ལ་སོགས་པ་ཡང་འཐད་པ་མེད་པའི་ཡུལ་དུ་བཤད་པས་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའོ། །ཆོས་མི་མཐུན་པའི་དཔེ་ནི་སྔོན་པོ་ལ་སོགས་པའི་ཤེས་པ་དང་འབྲས་བུའི་


DTG190_Page_0108
[མ་དཔེ་གཟིགས་ན་འདིར་གནོན།]

རྟགས་ལ་སོགས་པ་ཉིད་དོ། །སྒྲ་དོན་གྱི་རྒྱུ་མཚན་ཅན་དུ་འཐད་པ་ཡིན་ནོ་ཞེས་བྱ་བ་ནི་གནོད་པར་བྱེད་པའོ། །དེ་ལྟར་ཅིས་གྲུབ་ཅེ་ན། འདི་དག་གོ་བར་བྱེད་པ་མ་ཡིན་པའི་ཕྱིར་རོ། །འདི་ལྟར་ཡུལ་ཅན་ཉིད་དང་གོ་བར་བྱེད་པ་དང༌། གསལ་བར་བྱེད་པ་ནི་རྣམ་གྲངས་ཡིན་ནོ། །དེའི་ཕྱིར་བསྒྲུབ་པར་བྱ་བ་རྣམ་པ་གསུམ་ཡིན་པས་དེའི་གོ་བར་བྱེད་པའི་གཏན་ཚིགས་ཀྱང་རྣམ་པ་གསུམ་ཁོ་ན་ཡིན་ནོ་ཞེས་བྱ་བར་གནས་སོ། །རྣམ་པ་གསུམ་གང་ཡིན་ཞེ་ན། རང་བཞིན་ཞེས་བྱ་བ་ལ་སོགས་པ་སྨོས་སོ། །ངང་གི་སྒྲས་ནི་རང་བཞིན་དང༌། འབྲས་བུ་ལ་ལྟོས་ནས་བསྡུ་བ་ཡིན་ཏེ། འདི་དག་གིས་མངོན་པར་འདོད་པའི་གཏན་ཚིགས་བསྟན་ཏོ་ཞེས་བྱ་བའི་དོན་ཏོ། །རང་བཞིན་དང་འབྲས་བུ་མི་དམིགས་པའི་དབྱེ་བ་རྣམ་པ་གསུམ་ནི་མངོན་སུམ་མ་ཡིན་པའི་སྒྲུབ་པའི་ཡན་ལག་ཡིན་གྱི། རྒྱུ་དང་འབྲས་བུ་དང་འདུ་བ་དང་འགལ་བ་ལ་སོགས་པའི་དབྱེ་བ་བསྟན་པའི་དོན་དུ་ནི་མ་ཡིན་ནོ། །འོ་ན་དམིགས་པའི་རིག་བྱར་གྱུར་པ་ལས་མི་དམིགས་པར་བཤད་པ་གང་ཡིན་ཞེ་ན། དེ་ཉིད་མངོན་སུམ་གྱི་གྲུབ་པ་ཡིན་ཏེ། འཆད་པར་འགྱུར་བའི་རིགས་པས་ཡན་ལག་ཡིན་པའི་ཕྱིར་རོ། །མི་དམིགས་པ་ཙམ་མ་ཡིན་ན་དེ་ཇི་ལྟར་ཐུན་མོང་དུ་བཤད་ཅེ་ན། དེ་ལྟར་སྤྱིའི་སྒྲ་ཡིན་ཡང་འདི་སྒྲུབ་པར་བྱེད་པའི་སྒྲུབ་པའི་ཡན་ལག་ཏུ་དམིགས་པའི་རིག་བྱར་གྱུར་པའི་མི་དམིགས་པ་ཁོ་ན་ལ་འཇུག་གོ །འདི་ལྟར་སྤྱིའི་སྒྲ་ཡང་སྒྲ་གཞན་དང་ཉེ་བའི་སྐབས་ཀྱིས་སྤྱིའི་ཡང་བྱེ་བྲག་ལ་རྣམ་པར་གནས་པ་ཡིན་ནོ། །གང་བྱེ་བྲག་གི་སྒྲ་དང་ཉེ་བ་ཁོ་ནས་བྱེ་བྲག་ཏུ་གནས་པ་ནི་མ་ཡིན་གྱི། འོན་ཀྱང་སྐབས་དང་ཤུགས་ལ་སོགས་པས་ཀྱང་ཡིན་ནོ་ཞེས་བཤད་དོ། །ཇི་ལྟར་མི་དམིགས་པ་ཙམ་གྱིས་བསྒྲུབས་པ་ཡང་སྒྲུབ་པའི་ཡན་ལག་ཏུ་སྲིད་པ་མ་ཡིན་ནོ་ཞེས་ཕྱིས་བཤད་པར་བྱའོ། །མངོན་སུམ་མ་ཡིན་པའི་གཏན་ཚིགས་ཀྱི་དབང་དུ་བྱས་པ་ཡིན་པས་འདི་ལ་རྩོད་པ་མེད་དོ། །འདིར་ཡང་རྣམ་པ་གསུམ་སྒྲུབ་པའི་ཡན་ལག་ཏུ་སྒྲུབ་པས་བཟློག་པ་གང་སྒྲུབ་པ་མ་ཡིན་པར་ཇི་ལྟར་འགྱུར་ཞེ་ན། དེ་ལ་ཞེས་བྱ་བ་སོགས་པ་སྨོས་ཏེ། འདིར་བསྒྲུབ་པར་བྱ་བ་


DTG190_Page_0109
[མ་དཔེ་གཟིགས་ན་འདིར་གནོན།]

སྨོས་པ་ནི་མི་རྟག་པ་ལ་སོགས་པ་ཆོས་ཙམ་ལ་བརྗོད་དེ། ཆ་ཤས་ལ་སྤྱི་ཉེ་བར་བཏགས་པའི་ཕྱིར་རོ། །བསྒྲུབ་པར་བྱ་བ་ནི་ཆོས་དང་ཆོས་ཅན་གྱི་སྤྱི་མ་ཡིན་ཏེ། ཁྱབ་པ་ཉིད་མེད་པར་ཐལ་བར་འགྱུར་བའི་ཕྱིར་རོ། །སྒྲ་ལ་སོགས་པའི་ཆོས་ཅན་གྱིས་ཁྱད་པར་དུ་བྱས་པའི་མི་རྟག་པ་ནི་དཔེའི་ཆོས་ཅན་ལ་མེད་པའི་ཕྱིར་རོ། །ཁྱབ་པ་སྒྲུབ་པ་ནི་རྗེས་སུ་འགྲོ་བ་དང་ལྡོག་པ་ཚད་མས་བསྒྲུབས་པ་འདིས་རྗེས་སུ་འགྲོ་བ་དང་ལྡོག་པ་ངེས་པར་རིགས་པ་ཡིན་ནོ། །ཆོས་ཅན་ནི་ཤེས་པར་འདོད་པའི་བྱེ་བྲག་དང་ལྡན་བ་སྒྲ་ལ་སོགས་པ་ལ་ཡོད་པའི་དངོས་པོ་བསྒྲུབ་པའི་ཕྱིར་རོ། །ཕྱོགས་ཀྱི་ཆོས་གྲུབ་པའི་ཚད་མས་ཡོད་པའི་དོན་ཡང་བརྗོད་པ་ཡིན་ཏེ། འདིས་ཀྱང་ཕྱོགས་ཀྱི་ཆོས་ངེས་པར་ཅན་བཤད་པ་ཡིན་ནོ། །ཁྱབ་བ་སྒྲུབ་པའི་ཆོས་ཅན་ལ་ཡོད་པར་བཤད་པ་ཇི་ལྟར་ཕྱིའི་ཁྱབ་པ་ཐམས་ཅད་བསྡུས་པ་ཡིན་སྙམ་པ་ལ། འདིར་དཔེ་ནི། དཔེར་ན་ཞེས་བྱ་བ་ལ་སོགས་པ་སྨོས་ཏེ། དེ་ཐམས་ཅད་མི་རྟག་པ་ཞེས་བྱ་བས་དོན་བསྡུས་པའི་ཁྱབ་པ་བསྟན་པ་བཤད་པ་ཡིན་ནོ། །དོན་ཅི་ཡིན་ཞེ་ན། ལོག་པར་རྟོག་པ་བསལ་བའི་ཕྱིར་རོ། །འདི་ལྟར་ཁ་ཅིག་ཕྱོགས་ཉིད་མཐུན་པའི་ཕྱོགས་ལ་ལྟོས་པའི་ནང་གི་ཁྱད་པ་བསྟན་པ་ཡིན་ནོ་སྙམ་དུ་ལོག་པར་རྟོག་པ་དེ་ཡང་རིགས་པ་མ་ཡིན་ཏེ། ཁྱབ་པ་ནི་དངོས་པོའི་སྟོབས་ལས་འོངས་པའི་ཕྱིར་རོ། །སྔར་བསྒྲུབ་པར་བྱ་བས་ཁྱབ་པར་བསྒྲུབ་པས་ཕྱིས་ཆོས་ན་ལ་ཡོད་པར་བསྟན་འདི་འདྲ་བ་ལ་ཅི་འདིར་གོ་རིམས་ངེས་པ་ཡོད་དམ་མེད་སྙམ་པའམ། འདི་ལ་ཡང་ཞེས་བྱ་བ་ལ་སོགས་པ་སྨོས་ཏེ། གང་སྒྲུབ་པའི་ཡན་ལག་ཏུ་སྒྲུབ་པར་འདོད་པ་ཁོ་ན་ཡིན་ནོ། །ཡང་གི་སྒྲ་ནི་ངེས་པར་བཟུང་བ་སྟེ། མ་ཡིན་ཏེ་ཞེས་བྱ་བ་དང་སྦྱར་རོ། །འདི་ལ་འདི་འདྲ་བའི་གོ་རིམས་ཀྱི་ངེས་པ་འགའ་ཡང་ཡོད་པ་མ་ཡིན་ནོ་ཞེས་བྱ་བའི་དོན་ཏོ། ཅིའི་ཕྱིར་ཞེ་ན། འདོད་པའི་དོན་སྒྲུབ་པར་གཉི་ག་ལ་བྱེ་བྲག་མེད་པའི་ཕྱིར་རོ། །ཁྱབ་བ་སྒྲུབ་པ་བརྗོད་པ་སྔོན་དུ་འགྲོ་བའི་ཆོས་ཅན་ལ་ཡོད་པ་སྒྲུབ་པ་བརྗོད་པ་དང༌། ཆོས་ཅན་ལ་ཡོད་པ་སྒྲུབ་པ་བརྗོད་པ་སྔོན་དུ་འགྲོ་བའི་ཁྱབ་པ་སྒྲུབ་པ་བརྗོད་པ་ནི་བསྒྲུབ་པར་བྱ་བའི་དོན་སྒྲུབ་པ་ལ་ཁྱད་པར་


DTG190_Page_0110
[མ་དཔེ་གཟིགས་ན་འདིར་གནོན།]

མེད་ཅེས་བྱ་བའི་དོན་ཏོ། །གོ་རིམས་ངེས་པའི་དོན་ཅི་ཞིག་ལ་བརྟེན། བསྒྲུབ་པར་བྱ་བ་སྒྲུབ་པའི་དོན་ཡིན་ན་ནི་ཆོས་མཐུན་པ་ཉིད་ཅན་གྱི་སྦྱོར་བ་ཇི་ལྟར་བསྒྲུབས་པས་གཏན་ཚིགས་མེད་ན་མི་འབྱུང་བར་བསྟན་པ་ཡིན་གྱི། བསྒྲུབ་པར་བྱ་བ་ནི་མ་ཡིན་ནོ། །དེ་བཞིན་དུ་ཆོས་མི་མཐུན་པའི་སྦྱོར་བས་བསྒྲུབ་པར་བྱ་བ་མེད་ན་གཏན་ཚིགས་མེད་པར་བསྟན་གྱི། གཏན་ཚིགས་མེད་པས་བསྒྲུབ་བྱ་མེད་པ་ནི་མ་ཡིན་ནོ། །ཅིའི་ཕྱིར་ཞེ་ན། བསྒྲུབ་པར་བྱ་བ་དང་མེད་ན་མི་འབྱུང་བ་བསྟན་པས་འདོད་པའི་དོན་སྒྲུབ་པ་ལ་མ་གྲུབ་པ་དང་ཕྱིན་ཅི་ལོག་ཏུ་སྒྲུབ་པར་མ་གྱུར་ཅིག་སྙམ་དུ་དེ་ལྟར་དགོངས་པ་ཡིན་ནོ། །དེ་སྐད་དུ་གཏན་ཚིགས་ནི་མཐུན་པའི་ཕྱོགས་ཉིད་ལ་ཡོད་པ་དང་བསྒྲུབ་པར་བྱ་བ་མེད་པ་ལ་མེད་པ་ཉིད་དུ་བསྟན་པར་ནུས་ཀྱང་བཟློག་པས་ནི་མ་ཡིན་ཞེས་བཤད་དོ། །དཔེར་ན་བྱས་པས་མི་རྟག་པ་འམ། འཇིག་པ་ནི་འདིར་འབྲས་བུ་ཡིན་ཏེ། བྱས་པའི་ཁྱབ་པ་མ་བཤད་དུ་ཟིན་ན་འབྲེལ་པ་ངེས་པ་མེད་པ་ཡིན་ནོ་ཞེས་བྱ་བར་འབྲེལ་ཏོ། །དེས་ན་འདི་ནི་གོ་རིམས་མཚུངས་པ་ལ་བརྟེན་པར་རིགས་པ་ཡིན་ནོ། །འདིར་མ་བྱས་སུ་ཟིན་ཀྱང་འདིས་ཀྱང་འདོད་པའི་དོན་གྲུབ་ཅིང་རྫོགས་པ་ཡིན་པས་གོ་རིམས་ངེས་པ་ཡོད་པ་མ་ཡིན་ཞེས་བྱ་བ་ལེགས་པར་བཤད་པ་ཡིན་ནོ། །འདོད་པའི་དོན་གྲུབ་པར་གཉི་ག་ལ་བྱེ་བྲག་མེད་པའི་ཕྱིར་ཞེས་བྱ་བ་དེ་ཉིད་འདིར་གང་ལས་ཤེ་ན། བཤད་པ་གང་གི་ཕྱིར་ཆོས་ཅན་ལ་ཞེས་བྱ་བ་ལ་སོགས་པས་བསྒྲུབ་པར་བྱ་བས་ཁྱབ་པ་རབ་ཏུ་བསྒྲུབས་ནས་ཞེས་དང་པོར་བཤད་པ་ཡིན་ནོ། །དེའི་ཁྱབ་པ་བསྒྲུབ་པ་ཡང་གང་ཡིན་ཞེ་ན། འདིར་ཡང་ཞེས་བྱ་བ་ལ་སོགས་པ་སྨོས་ཏེ། འདིར་ཡང་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །འབྲས་བུ་དང་མི་དམིགས་པ་ལ་སོགས་པའི་ཁྱབ་པ་སྒྲུབ་པ་དག་ཕྱིས་བཤད་པར་བྱའོ། །བསྒྲུབ་པར་བྱ་བ་ལས་བཟློག་པ་ལ་གཏན་ཚིགས་འཇུག་པ་ཡོད་པ་མ་ཡིན་ནོ་ཞེས་བྱ་བ་ལྷག་མའོ། །གནོད་པ་ཅན་གྱི་ཚད་མ་ནི་གང་གིས་བསྒྲུབ་པར་བྱ་བ་ལས་བཟློག་པ་ལ་འཇུག་པའི་གཏན་ཚིགས་ལ་གནོད་པ་ཡིན་ནོ། །དེ་ཉེ་བར་བསྟན་པ་གང་ཡིན་པ་དེ་ནི་ཁྱབ་པ་སྒྲུབ་པར་བྱེད་པ་ཡིན་


DTG190_Page_0111
[མ་དཔེ་གཟིགས་ན་འདིར་གནོན།]

ནོ་ཞེས་བྱ་བའི་དོན་ཏོ། །དེའི་གནོད་པ་ཅན་གྱི་ཚད་མ་བསྟན་པ་ཡང་གང་ཡིན་ཞེ་ན། གལ་ཏེ་དངོས་པོ་ཡོད་པའམ། བྱས་པ་ཐམས་ཅད་ཅེས་བྱ་བས་ནི་སྔར་བཤད་པའི་གཏན་ཚིགས་གཉིས་པོ་བསྟན་ཏོ། །སྐད་ཅིག་མ་རེ་རེ་ལ་འཇིག་པར་མ་གྱུར་ན་མེད་པ་ཁོ་ནར་འགྱུར་བ་ཡིན་ནོ་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། སྐད་ཅིག་མ་མ་ཡིན་པའི་དོན་ནི་རིམ་དང་ཅིག་ཅར་གྱིས་དོན་བྱེད་པ་མི་རིགས་པའི་ཕྱིར་རོ། །འདི་ལྟར་སྐད་ཅིག་མ་མ་ཡིན་པར་མངོན་པར་འདོད་པའི་དངོས་པོ་ནི་རེ་ཞིག་རིམ་གྱིས་དོན་བྱེད་པ་རིགས་པ་མ་ཡིན་ཏེ། འབྲས་བུ་སྒྲུབ་པར་རུང་བའི་རང་བཞིན་རྟག་ཏུ་ཡོད་པ་ཡིན་པའི་ཕྱིར་རོ། །དེ་ལྟ་མ་ཡིན་ན་ཕྱིས་ཀྱང་བྱེད་པར་མི་འགྱུར་ཏེ། སྔ་མའི་རང་བཞིན་ལས་མ་འདས་པའི་ཕྱིར་སྔ་མ་བཞིན་ནོ། །ལྷན་ཅིག་བྱེད་པས་སྒྲུབ་པར་བྱེད་པ་ཡིན་ནོ་ཞེ་ན། མ་ཡིན་ཏེ། ཐོག་མའི་བདག་ཉིད་ཀྱི་ཁྱད་པར་སྔ་མའི་རང་བཞིན་ཡོངས་སུ་མ་སྤངས་པས་ལྷན་ཅིག་བྱེད་པ་ལ་ལྟོས་པ་ནི་མི་རིགས་པའི་ཕྱིར་རོ། །ལྷན་ཅིག་བྱེད་པ་དེས་དང་པོའི་བདག་ཉིད་དེ་ཐ་མར་ཁྱད་པར་དུ་འགྱུར་རོ་ཞེ་ན། མ་ཡིན་ཏེ། ལྷན་ཅིག་བྱེད་པས་བྱས་པའི་ཁྱད་པར་ནི་དེ་ཉིད་དམ་གཞན་ཉིད་དུ་མི་རིགས་པའི་ཕྱིར་རོ། །འདི་ལྟར་རེ་ཞིག་བདག་ཉིད་ཀྱི་ཁྱད་པར་འདི་ནི་དེའི་བདག་ཉིད་དུ་མི་འགྱུར་ལ། དེ་ཉིད་དེ་ལས་ཐ་མི་དད་པའི་བདག་ཉིད་ཀྱི་ཁྱད་པར་བཞིན་དུ་ལྷན་ཅིག་བྱེད་པའི་སྟོབས་ཀྱིས་སྐྱེ་བར་ཐལ་བར་འགྱུར་བའི་ཕྱིར་རོ། །དེ་ལྟར་ཁས་བླངས་པས་ཀྱང་སྐད་ཅིག་མ་ཡིན་པ་ཉིད་ཉམས་པར་འགྱུར་རོ། །ཐ་དད་པ་ཉིད་དུ་དེ་ཡོད་པ་མ་ཡིན་ནོ་ཞེ་ན་འོན་ཀྱང་དེ་ཉིད་ལས་ཡིན་ཡང༌། །བདག་ཉིད་ཀྱི་ཁྱད་པར་ལས་འབྲས་བུ་སྐྱེ་བས་དེའི་གནས་སྐབས་འདི་བྱེད་པར་མི་ནུས་པར་ཐལ་བར་འགྱུར་བ་ཡང་དཀའ་བ་ཐོག་ཏུ་བབ་པ་ཡིན་ནོ། །འདིའི་འབྲེལ་པ་ཡང་ཇི་ལྟར་ཡིན་ཞེས་བསམ་པའི་ཡུལ་ལ་འཇུག་པར་བྱ་བ་ཉིད་དེ། འདིར་ཡང་ཁྱད་པར་ལྷན་ཅིག་བྱེད་པའི་སྟོབས་ཀྱིས་བྱེད་པ་ལ་ལྟོས་པའི་ཕྱོགས་ཡིན་ན་ནི་སྐྱོན་མེད་དོ། །ནུས་པའི་རང་བཞིན་ཡིན་པའི་ཕྱིར་རོ། །གཏག་


DTG190_Page_0112
[མ་དཔེ་གཟིགས་ན་འདིར་གནོན།]

བཟངས་ལ་སོགས་པ་འགའ་ཞིག་ལ་ལྟོས་ནས་འབྲས་བུ་སྐྱེད་པ་ཡིན་ནོ་ཞེ་ན། དེ་ནི་མ་ཡིན་ཏེ། རེ་ཞིག་ལྷན་ཅིག་བྱེད་པའི་རྐྱེན་དེས་ཁྱད་པར་བྱེད་ནུས་པ་མ་ཡིན་ལ། ཕན་མི་འདོགས་པའི་དངོས་པོ་ལ་ལྟོས་པར་རིགས་པ་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་དང༌། དེ་ལྟར་ཐམས་ཅད་དུ་འདིའི་འབྲས་བུ་སྐྱེད་པར་ཐལ་བར་འགྱུར་བའི་ཕྱིར་རོ། །གཏག་བཟངས་ལ་སོགས་པ་དེའི་རང་བཞིན་བྱེད་པའམ་བྱེད་པ་ནི་དེའི་རང་བཞིན་ཡིན་པའི་ཕྱིར་རོ་ཞེས་བྱ་བ་ལ་སོགས་པ་གཏན་ཚིགས་ཐིགས་པར་བཤད་ཟིན་པས་བཤད་པར་མི་བྱའོ། །དེ་ལྟར་རེ་ཞིག་རིམ་གྱིས་བྱེད་པར་མི་རིགས་སོ། །ཅིག་ཅར་ཕྱི་རོལ་གྱི་དོན་བྱེད་པ་ལ་འཇུག་པར་ནུས་པའི་རང་བཞིན་གྱིས་བྱིན་གྱིས་བརླབ་པའི་ཡུལ་མ་ཡིན་ཏེ། དེས་ན་ཡོད་པ་འདི་ཉིད་ཕྱིས་ཀྱང་དེའི་ངོ་བོའི་འབྲས་བུ་སྐྱེས་པ་དང་མི་འབྲས་པར་འགྱུར་བའི་ཕྱིར་རོ། །དེ་ལྟ་མ་ཡིན་ན་སྐྱེས་མ་ཐག་འཇིག་པར་འགྱུར་རོ། །སྐད་ཅིག་མ་མ་ཡིན་པ་ཉིད་ཁས་བླངས་པས་ཅིག་ཅར་སྐྱེ་བ་དམིགས་པར་མི་འགྱུར་ཏེ། རིམ་པ་ཡོད་པ་མཐོང་བའི་ཕྱིར་རོ། །དེས་ན་དེ་ལྟར་སྐད་ཅིག་མ་མ་ཡིན་པའི་དོན་འདི་ནི་རིམ་པ་འམ་ཅིག་ཅར་འགའ་ཞིག་དོན་བྱེད་པའི་ཆ་ཕྲ་མོ་ཙམ་ཡང་སྒྲུབ་པར་མི་ནུས་པའི་ཕྱིར་ཡོད་པ་མ་ཡིན་ནོ། །གལ་ཏེ་དོན་བྱེད་པར་མི་རིགས་ན་ཇི་ལྟར་མེད་པར་འགྱུར་ཞེ་ན། དོན་བྱེད་པར་ནུས་པ་ཞེས་བྱ་བ་ལ་སོགས་པ་སྨོས་ཏེ། དོན་བྱེད་པར་ནུས་པ་གང་ཡིན་པ་དེ་ནི་འདིར་ཡོད་པའི་མཚན་ཉིད་ཡིན་ནོ་ཞེས་སྦྱར་རོ། །དེའི་ཕྱིར་དོན་བྱེད་པར་ནུས་པའི་མཚན་ཉིད་ནི་ཡོད་པ་ཡིན་ལ། །དེ་ལས་ལྡོག་པ་ནི་རྣམ་པར་གཅོད་པའོ། །ཕྱིར་ཞེས་བྱ་བ་ནི་གཏན་ཚིགས་ཀྱི་སྒྲ་སྟེ་དེའི་ཕྱིར་ཞེས་བྱ་བའི་དོན་ཏོ། །དོན་བྱེད་པར་ནུས་པའི་མཚན་ཉིད་ནི་ངེས་པར་བྱ་ཞེ་ན། ཐམས་ཅད་ཅེས་བྱ་བ་ལ་སོགས་པ་སྨོས་ཏེ། ཐམས་ཅད་ལ་ཉེ་བར་བརྗོད་པ་ནི་བསྟན་ཏེ། འདི་ཉེ་བར་བརྗོད་པར་བྱས་པའོ། །དེ་དང་བྲལ་བ་ནི་མེད་པའོ། །མཚན་ཉིད་དེ་ཉིད་ནི་བརྗོད་དུ་མེད་པ་གང་ཡིན་པ་དེ་ནི་གཞན་དུ་བཤད་དོ། །འདིར་ཡང་ཕྱིར་ཞེས་བྱ་བ་ནི་གཏན་ཚིགས་བརྗོད་པ་ཐམས་ཅད་སྨོས་པ་ནི་བུམ་པ་ལ་སོགས་པ་སྐད་ཅིག་མ་ཉིད་དུ་མངོན་པར་འདོད་པའི་


DTG190_Page_0113
[མ་དཔེ་གཟིགས་ན་འདིར་གནོན།]

ཡུལ་ཐ་དད་པ་དོན་བྱེད་མི་ནུས་པ་ལས་ལྡོག་པ་ཡོད་པའི་ཕྱིར་དེ་དག་མེད་པར་རྣམ་པར་གཅོད་པ་ཡིན་ནོ། །དོན་བྱེད་ནུས་པའི་མཚན་ཉིད་མ་ཡིན་པ་ཡང་ཡོད་པར་རིགས་སོ་ཞེ་ན། མ་ཡིན་ཏེ། ཡོད་པ་མི་སྲིད་པའི་ཕྱིར་རོ། །དེ་མེད་པ་ཡང་གཞན་དུ་བསྟན་ཟིན་པས་མ་བཤད་དོ། །ཡོད་པ་ཡང་ཡོད་པ་ཉིད་མ་ཡིན་ཏེ། ཡོད་པ་དང་མི་ལྡན་པའི་ཕྱིར་རོ། །སྤྱི་ནི་སྤྱི་དང་ལྡན་པ་མ་ཡིན་ནོ་ཞེས་བྱ་བ་གཞུང་ལུགས་ཡིན་ནོ། །རང་ཉིད་དེ་མ་ཡིན་པའི་ཕྱིར་དོན་གྱི་བདག་ཉིད་ཀྱི་རང་བཞིན་ནི་རིམ་པ་བཞིན་གཞན་དང་ལྡན་པར་བསྒྲུབས་ཀྱང་དེའི་རང་བཞིན་དང་འགྱུར་བ་མ་ཡིན་ནོ། །ཤེས་པ་དང་སྤྲིན་གྱི་དངོས་པོ་བཞིན་དུ་པ་ལ་ཤའི་ས་མེ་སྲོག་ལ་སོགས་པའི་ངོ་བོ་ཡིན་ནོ་ཞེས་བྱ་བ་ཅི་ཡང་མ་ཡིན་ནོ། །ཉེ་བར་བརྗོད་པའི་ནུས་པ་ཐམས་ཅད་དང་བྲལ་བའི་མཚན་ཉིད་བརྗོད་ཟིན་པ་དེ་ཡང་འདིར་ཉེ་བར་བརྗོད་པ་སྨོས་པ་ཇི་ལྟར་ཡིན། །དེ་ཉིད་བརྗོད་པར་མི་བྱའོ་ཞེ་ན་ནི་འདིར་སྨྲས་པ་ནི་བདེན་ན་ནུས་པ་ཐམས་ཅད་དང་བྲལ་བ་ལ་ནུས་པ་འགའ་ཞིག་དང་འབྲེལ་པའི་སྒྲ་ཡང་འཇུག་པ་མེད་པའི་ཐ་སྙད་ཀྱི་ཡུལ་དུ་བསྟན་པ་ཡིན་ནོ། །མིང་དོན་གྱི་རྗེས་སུ་འབྲངས་པ་བསྒྲུབ་པར་བྱ་བ་འདི་བཤད་པ་ཡིན་ནོ་ཞེས་བྱ་བར་རྟོགས་པར་བྱའོ། །གལ་ཏེ་བསྒྲུབ་པར་བྱ་བ་ལས་བཟློག་པ་ལ་གཏན་ཚིགས་དེ་ལ་གནོད་པ་ཅན་གྱི་ཚད་མ་བསྟན་པར་མ་བྱས་ན་ཅིར་འགྱུར་ཞེ་ན། བཤད་པ་དེ་ལྟ་ན་བསྒྲུབ་པར་བྱ་བ་ལས་བཟློག་པ་ལ་གནོད་པ་ཅན་གྱི་ཚད་མ་ཉེ་བར་བསྟན་པ་ན་ལྡོག་པ་ལ་ཐེ་ཚོམ་ཟ་བར་འགྱུར་རོ་ཞེས་བྱ་བར་སྦྱར་རོ། །དེ་གང་ལ་ཐེ་ཚོམ་ཟ་བ་ཡིན་ཞེ་ན། དེ་ཡོད་པ་འམ་བྱས་པ་འགྱུར་རོ་ཞེས་བྱ་བར་སྦྱར་རོ། །པའི་ཕྱོགས་ལ་གཏན་ཚིགས་འཇུག་པ་མ་དམིགས་ན། དེ་ཇི་ལྟར་མི་ལྡོག་པ་ཡིན་ཞེ་ན། གཏན་ཚིགས་འཇུག་པ་མ་མཐོང་དུ་ཟིན་ཀྱང་ཞེས་བྱ་བ་སྨོས་སོ། །གང་ཡིན་ཞེ་ན། བསྒྲུབ་བྱ་ལས་བཟློག་པ་ལས་ཞེས་བྱ་བ་ལྷག་མའོ། །དེ་ལྟར་ན་ནི་བཟློག་པ་ཇི་ལྟར་འགལ་བ་མེད་པའི་ཕྱིར་རོ་ཞེས་བྱ་བ་སྨོས་ཏེ། སྒྲུབ་པར་བྱེད་པའི་བསྒྲུབ་པར་བྱ་བའི་མི་མཐུན་པའི་ཕྱོགས་དང་ཞེས་ལྷག་མའོ། །འདིར་དགོངས་པ་ནི་འདི་ཡིན་ཏེ། གལ་ཏེ་སྒྲུབ་པར་


DTG190_Page_0114
[མ་དཔེ་གཟིགས་ན་འདིར་གནོན།]

བྱེད་པ་དང་བསྒྲུབ་པར་བྱ་བ་ལས་བཟློག་པ་ལ་ཕན་ཚུན་གྲུབ་པ་ཡིན་ན་ནི་མ་མཐོང་བ་ཙམ་གྱིས་ལྡོག་པ་ལ་ཐེ་ཚོམ་མི་ཟ་བར་འགྱུར་ན། གནོད་པར་བྱེད་པའི་ཚད་མ་མ་བསྟན་པར་དེ་ཉིད་མི་འགྲུབ་པོ། །གལ་ཏེ་འདིའི་ཐེ་ཚོམ་ལས་ལོག་ན་དེ་ལས་ཅིར་འགྱུར་ཞེ་ན། བཤད་པ་དེ་ལས་བཟློག་པ་ལ་ཐེ་ཚོམ་ཟ་བའི་མ་ངེས་པར་འགྱུར་ཏེ། གཏན་ཚིགས་ལྟར་ན་སང་བའོ། །ཅིའི་ཕྱིར་ཞེ་ན། ལྡོག་པ་ནི་བསྒྲུབ་པར་བྱ་བ་མེད་པ་ལ་གཏན་ཚིགས་མེད་པའི་མཚན་ཉིད་ལ་ཐེ་ཚོམ་ཟ་བའི་ཕྱིར་རོ། །མི་མཐུན་པའི་ཕྱོགས་ལས་བཟློག་པ་ལ་ཐེ་ཚོམ་ཟ་བའི་གཏན་ཚིགས་ལྟར་སྣང་བ་ཡིན་ནོ་ཞེས་བྱ་བའི་དོན་ཏོ། །མ་མཐོང་བས་ཀྱང་ཐེ་ཚོམ་ཅིས་མི་ལྡོག་ཇི་སྲིད་དུ་མ་མཐོང་བ་དེས་དངོས་པོ་མེད་པ་བསྒྲུབ་པར་བྱེད་པ་ཡིན་ནོ་ཞེ་ན། མ་མཐོང་བ་ཙམ་གྱིས་ལྡོག་པ་མ་ཡིན་ཏེ་ཞེས་བྱ་བས་སྨོས་ཏེ། བསྒྲུབ་པར་བྱ་བ་མེད་པའི་གྲུབ་པའི་གཏན་ཚིགས་ལས་འགྱུར་རོ་ཞེས་བྱ་བའི་ཐ་ཚིག་གོ །ཀྱང་གི་སྒྲ་ནི་གང་གི་ཕྱིར་གྱི་དོན་ཏོ། །ཙམ་སྨོས་པ་ནི་དམིགས་པའི་རིག་བྱར་གྱུར་པ་ལས་མ་དམིགས་པ་རྣམས་པར་གཅོད་པའི་དོན་ཏོ། །ཅིའི་ཕྱིར་ཞེ་ན། ཡུལ་དང་དུས་དང་རང་བཞིན་གྱིས་བསྐལ་པས་མི་གསལ་བའི་དོན་རྣམས་སོ། །རྒྱའི་ཡུལ་དང་ཤིང་རྟ་བཅུ་པ་དང༌། ཤ་ཟ་བ་ལ་སོགས་པ་མ་མཐོང་བ་གང་ཡིན་པ་དེ་ནི་མེད་པ་སྒྲུབ་པ་མ་ཡིན་ནོ། །གང་གིས་མེད་པ་སྒྲུབ་པར་བྱེད་པ་མ་ཡིན་ཞེ་ན། བསྐལ་པ་དག་གི་སྐབས་ཡིན་པའི་ཕྱིར་ཞེས་ཁོང་དུ་ཆུད་པར་བྱའོ། །འོ་ན་དོན་མཐའ་དག་ལ་ཁྱབ་པའི་ཤེས་པ་ཕུལ་དུ་བྱུང་བ་ཡང་དག་པར་མཉེས་པའི་གཟིགས་པས་བསྐལ་བའི་དོན་མེད་པ་ཡང་སྒྲུབ་པར་མཛད་ན། དེ་ཅིའི་ཕྱིར་དེ་སྐད་བཤད་ཅེ་ན། ཐམས་ཅད་གཟིགས་པ་མ་ཡིན་པ་ཞེས་བྱ་བ་སྨོས་སོ། །འདི་ཐམས་ཅད་གཟིགས་པའི་དང་ཚུལ་ཅན་ཡིན་པ་དེའི་ཕྱིར་དགག་པའི་བསྡུ་བ་ཡིན་ནོ། །མ་མཐོང་བ་དེ་ཡང་མེད་པ་སྒྲུབ་པར་བྱེད་པ་ཅིའི་ཕྱིར་མ་ཡིན་ཞེ་ན། ཚུ་རོལ་མཐོང་བ་ནི་སྐྱེས་བུའོ། །ཡོད་དུ་ཟིན་ཀྱང་བསྐལ་པའི་དོན་འགའ་ཞིག་མ་མཐོང་བའི་ཕྱིར་རོ། །འདི་སྙམ་དུ་སེམས་པ་ཡིན་ཏེ། ཐམས་ཅད་གཟིགས་པ་མ་ཡིན་པའི་མཐོང་བས་དངོས་པོ་མ་ལུས་པ་


DTG190_Page_0115
[མ་དཔེ་གཟིགས་ན་འདིར་གནོན།]

ཡོད་པ་ཁྱབ་པ་ནི་མ་ཡིན་ཏེ། གང་གིས་དེ་ལྡོག་པར་གྱུར་པའི་དོན་ནི་ཤིང་ལྡོག་པའི་ཤ་པ་བཞིན་ནོ། །ཐ་དད་པའི་ཕྱིར་གང་མི་ལྡོག་ན་དུ་བ་ལྡོག་པ་བཞིན་དུ། དེ་ཡང་དེའི་རྒྱུ་མ་ཡིན་ཏེ། དེ་མེད་ཀྱང་ཡོད་པའི་ཕྱིར་རོ། །གནོད་པར་བྱེད་པའི་ཚད་མ་ཡང་ཞེས་བྱ་བ་ལ་སོགས་པ་ལ། འདིར་ཁ་ཅིག་ཕྱོགས་སྔ་མ་དགོད་པ་ནི་གནོད་པར་བྱེད་པའི་ཚད་མ་ནི་ཅི་ཞིག་ཡིན། གང་ཉེ་བར་བསྟན་པས་རྩ་བའི་གཏན་ཚིགས་ཀྱི་ཁྱབ་པ་ལྡོག་པ་ཡིན་ཞེ་ན། གནོད་པར་བྱེད་པ་ཡང་ཞེས་བྱ་བ་ལ་སོགས་པ་སྨོས་ཏེ། དེ་དག་ཇི་ལྟར་འདིར་ཁྱབ་པ་སྒྲུབ་པ་ཡིན་ལ། བཟློག་པ་ལ་གནོད་པ་ཅན་གྱི་ཚད་མ་བསྟན་པ་ནི། གལ་ཏེ་ཡོད་པའམ་བྱས་པ་ཐམས་ཅད་སྐད་ཅིག་མ་རེ་རེ་ལ་འཇིག་པར་མ་གྱུར་ན་ཞེས་བྱ་བ་ལ་སོགས་པ་འདི་ཉིད་དོན་བསྟན་ཟིན་པས་ཟློས་པའི་སྐྱོན་དུ་མི་འགྱུར་བ་དེ་ཉིད་འདིར་བསམ་པར་བྱ་སྟེ། གཞན་གྱི་སྐྱོན་བརྗོད་པ་ནི་ཆོག་གོ །ཕྱོགས་སྔ་མ་ནི་གཞན་ཡིན་ཏེ། དེ་ལྟ་ན་གནོད་པ་ཅན་གྱི་ཚད་མ་ཡོད་པ་ཡིན་ནོ་ཞེས་བྱ་བ་གང་ཡིན་པ་འདི་ལའང་ཇི་ལྟར་སྐྱོན་མེད་པ་ཡིན་ཞེ་ན། བཤད་པ་གནོད་པ་ཅན་གྱི་ཚད་མ་ལ་ཡང་འཇུག་པ་ལ་ནུས་པ་མེད་པ་ཡིན་ཞེས་སྦྱར་རོ། །མེད་པའི་མཚན་ཉིད་ཅི་འདྲ་བ་ཅིག་ཇི་ལྟར་རབ་ཏུ་འཇུག་པ་ཡིན་ཞེ་ན། གང་གི་དོན་ལ་རིམ་པ་དང་ཅིག་ཅར་འབྲེལ་བ་མེད་པ་མ་ཡིན་ནོ་ཞེས་བྱ་བ་ཁ་བསྐང་བའོ། །དེ་ནི་འགའ་ཞིག་གི་འབྲས་བུ་ལ་ནུས་པ་མེད་པ་སྟེ། དཔེར་ན་ནམ་མཁའ་དང་པདྨོ་བཞིན་ནོ་ཞེས་བྱ་བའི་དཔེ་ཁ་བསྐང་བའོ། །སྐད་ཅིག་མ་ཡིན་པ་ཡོད་པ་དེ་ནི་རིམ་དང་ཅིག་ཅར་དག་གི་དོན་བྱེད་པ་རིམ་པ་མ་ཡིན་པ་ཞེས་བྱ་བ་དེ་ལྟར་རབ་ཏུ་འཇུག་པའི་ཕྱིར་རོ། །དེ་ལས་ཅི་ཞིག་འབྱུང་བར་འགྱུར་ཞེ་ན། བཤད་པ་དེའི་ཕྱིར་ཞེས་བྱ་བ་ནི་རྒྱུའི་དོན་ཏོ། །གང་གིས་དེ་ལ་རབ་ཏུ་འཇུག་པའི་ནུས་པ་མེད་པ་ནི་མཚན་ཉིད་མེད་པ་ན་འདྲེན་པར་བྱེད་དོ། །གང་ཡོད་པའམ་བྱས་པ་དེ་ནི་མི་རྟག་པ་ཁོ་ན་ཡིན་ནོ་ཞེས་བྱ་བར་འགྲུབ་བོ། །དེ་ལྡན་ཡང་ཅི་ཞིག་འགྲུབ་པར་འགྱུར་ཞེ་ན། འདི་ཙམ་གྱིས་ཀྱང་ཞེས་བྱ་བ་སྨོས་ཏེ། གནོད་པར་བྱེད་པའི་ཚད་མ་བསྟན་པ་ཙམ་གྱིས་སྒྲུབ་པར་བྱེད་པའི་ཆོས་ཙམ་གྱིས་རྗེས་སུ་འགྲོ་བ་ཡིན་ཏེ་ཞེས་བྱ་བར་སྦྱར་རོ། །གང་ཡིན་


DTG190_Page_0116
[མ་དཔེ་གཟིགས་ན་འདིར་གནོན།]

ཞེ་ན། བསྒྲུབ་པར་བྱ་བའི་ཆོས་ཀྱི་ཞེས་བྱ་བ་སྨོས་ཏེ། འདི་ནི་བྱེད་པ་པོ་དྲུག་པ་ཡིན་ནོ་ཞེས་བྱ་བར་བསྟན་པར་བྱའོ། །དེས་ན་རྒྱུ་གཞན་གྱི་བྱེད་པ་ལ་མི་ལྟོས་པར་བསྒྲུབ་པར་བྱ་བའི་སྒྲུབ་པར་བྱེད་པ་རྗེས་སུ་འགྲོ་བར་སྒྲུབ་པར་བྱེད་པ་ཡིན་ནོ་ཞེས་བྱ་བ་དག་གི་དོན་དུ་གནས་པ་ཡིན་ནོ། །སྒྲུབ་པར་ཕྱེད་པའི་ཆོས་ཅན་རྗེས་སུ་འགྲོ་བ་ཡིན་གྱི་བསྒྲུབ་པར་བྱ་བའི་ཆོས་ནི་དེ་ལྟར་བྱ་བ་མ་ཡིན་ནོ། །འདི་ལྟར་གཏན་ཚིགས་ནི་བསྒྲུབ་པར་བྱ་བ་ཁོ་ན་ལ་མེད་ན་མི་འབྱུང་བ་དང་སྐྱེ་བ་ཡིན་གྱི་གཏན་ཚིགས་ལ་ལ་མ་ཡིན་ཏེ། གཏན་ཚིགས་གོ་བར་བྱེད་པར་མི་འགྱུར་བའི་ཕྱིར་རོ། །དེ་ལ་ཡོན་ཏན་ཅི་ཞིག་འཐོབ་པ་ཡིན་ཞེ་ན། རང་བཞིན་གྱི་གཏན་ཚིགས་ཀྱི་མཚན་ཉིད་འགྲུབ་པར་འགྱུར་རོ། །དེ་ཙམ་གྱིས་ཞེས་བྱ་བར་སྦྱར་རོ། །རང་བཞིན་གྱི་གཏན་ཚིགས་ཀྱི་མཚན་ཉིད་དེ་ནི་ཡོད་པ་ཙམ་གྱི་རྗེས་སུ་འགྲོ་བས་རང་བཞིན་གྱི་གཏན་ཚིགས་ཀྱི་བདག་ཉིད་ཡིན་ནོ་ཞེས་བྱའོ། །གལ་ཏེ་གནོད་པ་ཅན་གྱི་ཚད་མ་ཉེ་བར་བསྟན་པས་གཏན་ཚིགས་ཀྱི་ཁྱབ་པ་གྲུབ་པ་ཡིན་ནོ། །དེ་ལྟ་ན་དེ་ནི་ཐུག་པ་མེད་པར་འགྱུར་བ་ཡིན་ནོ་སྙམ་པའི་དོགས་པ་བསལ་བའི་ཕྱིར་ཕྱོགས་སྔ་མ་བཀོད་པ་ནི། འདིར་ཡང་ཞེས་བྱ་བ་ལ་སོགས་པ་སྨོས་ཏེ། འདིར་ཡང་གནོད་པར་བྱེད་པའི་ཚད་མ་ནི་ཁྱེད་མ་མཐོང་བ་ཚད་མ་ཡིན་ན། མ་མཐོང་བ་ཙམ་གྱིས་གཏན་ཚིགས་ཀྱི་ལྡོག་པ་ངེས་པ་མ་ཡིན་ནོ་ཞེས་བྱ་བ་ནི་རྒྱུ་འདིས་སོ། །ཡང་ཞེས་བྱ་བའི་སྒྲ་ནི་རྩ་བའི་གཏན་ཚིགས་འབའ་ཞིག་མ་ཡིན་ནོ་ཞེས་བྱ་བའོ། །གང་ཡིན་ཞེ་ན། སྔར་གྱི་རྩ་བའི་གཏན་ཚིགས་ཡང་ཁྱབ་པ་མེད་པར་འགྱུར་རོ་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། རིམ་དང་ཅིག་ཅར་མི་རིགས་པ་ཉིད་ལ་ནུས་པ་མེད་པས་ཁྱབ་པ་མི་འགྲུབ་པའི་ཕྱིར་རོ། །འདི་ལྟར་གལ་ཏེ་མཐོང་བ་ཙམ་གྱིས་ལྡོག་པ་ངེས་པ་མེད་པ་དེ་ལྟ་ན་རིམ་དང་ཅིག་ཅར་གྱིས་མི་རིགས་པར་གྱུར་ཀྱང་ཡོད་པའི་མཚན་ཉིད་དོན་བྱེད་ནུས་པར་གྱུར་བ་ལ་གལ་བ་ཅི་ཞིག་ཡོད་སྙམ་པས་འདི་ཉིད་ལ་གནོད་པར་བྱེད་པའི་ཚད་མས་ཁྱབ་པ་མི་འགྲུབ་བོ། །བརྒྱ་ལ་འདི་མ་གྲུབ་ཀྱང་འདིའི་སྟོབས་ཀྱིས་རྩ་བའི་གཏན་ཚིགས་ཀྱི་ཁྱབ་པ་གྲུབ་པར་འགྱུར་རོ་ཞེ་ན། སྔར་གྱི་གཏན་ཚིགས་ལ་ཁྱབ་པ་མེད་པར་འགྱུར་རོ་ཞེས་ཁ་བསྐང་བའོ། །འདི་ལྟར་རང་ཉིད་


DTG190_Page_0117
[མ་དཔེ་གཟིགས་ན་འདིར་གནོན།]

ཚད་མ་མ་ཡིན་ཡང་གནོད་པར་བྱེད་པའི་ཚད་མར་གྱུར་པའི་ཚད་མ་གཞན་དུ་བརྟག་པར་བྱ་བ་མི་ནུས་ཏེ། ཚད་མར་ཐལ་བར་འགྱུར་བའི་ཕྱིར་རོ། །གལ་ཏེ་དེ་ལྟར་ཡིན་པ་དེ་ལྟ་ན་གནོད་པར་བྱེད་པའི་ཚད་མ་འདི་ལ་གནོད་པར་བྱེད་པའི་ཚད་མ་གཞན་གྱིས་ཁྱབ་པར་ངེས་པ་ཡིན་ནོ་ཞེ་ན། འདི་ལྟར་རང་ཉིད་ཚད་མ་མ་ཡིན་ཡང་དེ་འདི་ལ་ཡང་ཞེས་བྱ་བ་སྨོས་ཏེ། ཡང་ཞེས་བྱ་བ་སྨོས་པ་ནི་རྩ་བའི་གཏན་ཚིགས་འགའ་ཞིག་ཡིན་ནོ་ཞེས་བྱའོ། །སྒྲུབ་པར་བྱེད་པ་གཞན་ཡང་ཉེ་བར་སྦྱོར་ན་ནི་ཐུག་པ་མེད་པར་འགྱུར་རོ། །དེ་ལྟ་ན་ཡང་གནོད་པར་བྱེད་པའི་ཚད་མ་གང་ཡིན་པ་དེས་ཁྱབ་པ་སྒྲུབ་པའི་དོན་དུ་གནོད་པ་ཅན་གྱི་ཚད་མ་བརྗོད་དོ། །དེ་ལ་ཡང་གནོད་པར་བྱེད་པའི་ཚད་མ་གཞན་གྱིས་ཁྱབ་པ་སྒྲུབ་པ་ཡིན་ན་གང་གི་ཕྱིར་དེ་ཡང་རང་ཉིད་ཚད་མ་མ་ཡིན་ན་ཅིག་ཤོས་ཀྱི་ཚད་མར་བྱེད་པར་ནུས་པ་མ་ཡིན་པས། དེ་ལ་ཡང་དེ་སྐད་བརྗོད་པར་མི་ནུས་སོ། །དེ་ཡང་གཞན་གྱིས་ཁྱབ་པ་གྲུབ་པོ་ཞེ་ན། གལ་ཏེ་དེ་ལྟ་ན་འདི་ཉིད་ལ་འཇུག་ན་འདིར་ཡང་ཐུག་པ་མེད་པ་དེ་བཞིན་དུ་ཐལ་བར་འགྱུར་རོ། །དེ་སྐད་དུ་ཕྱོགས་སྔ་མ་བརྗོད་ནས་ད་ནི་དེ་བསལ་བའི་ཕྱིར་མ་ཡིན་ཏེ། མེད་པ་སྒྲུབ་པར་བྱེད་པ་ཞེས་བྱ་བ་ལ་སོགས་པ་སྨོས་ཏེ། ལྡོག་པ་སྒྲུབ་པར་བྱེད་པ་ཉིད་ཀྱིས་ཞེས་བྱ་བས་ཁ་བ་སྐད་དོ། །འདི་སྐད་སྟོན་པ་ཡིན་ཏེ། ཐམས་ཅད་དུ་མ་མཐོང་པས་འགོག་པ་ནི་མ་ཡིན་ཏེ། ལྡོག་པ་ངེས་པ་ནི་ཁྱབ་པར་བྱེད་པ་མི་དམིགས་པས་བཀག་པའི་ཕྱིར་རོ། །འོན་ཀྱང་མ་མཐོང་བ་ཙམ་གྱིས་ཡིན་ནོ་ཞེ་ན། བཤད་པ་གང་དང་གང་མ་མཐོང་བས་ལྡོག་པ་ལ་མེད་པར་བསྒྲུབ་པ་ཡིན་ཏེ། གང་གིས་ཡིན་ཞེ་ན། གཏན་ཚིགས་ཀྱིས་སོ། །གང་ལ་ཞེ་ན། བསྒྲུབ་བྱ་ལ་བཟློག་པ་ལའོ། །དེས་ན་མ་མཐོང་བའི་གཏན་ཚིགས་འདི་ནི་གནོད་པར་བྱེད་པའི་ཚད་མ་བརྗོད་དོ། །ཅིའི་ཕྱིར་ཞེ་ན། འགལ་པ་ཉེ་བར་གཞག་པའི་ཕྱིར་འདི་ལ་ཞེས་བྱ་བར་སྦྱར་རོ། །འདི་ལྟར་རིམ་དང་ཅིག་ཅར་མི་རིགས་པ་གང་ཡིན་པ་དེ་ནི་དོན་བྱེད་པར་ནུས་པ་ཡོད་པའི་མཚན་ཉིད་མ་ཡིན་ཏེ། དཔེར་ན་མོ་གཤམ་གྱི་བུ་ལ་སོགས་པ་བཞིན་ནོ། །དེ་ལྟ་ན་སྐད་ཅིག་མ་མ་ཡིན་པ་རྣམས་ཀྱང་རིམ་པ་དང་ཅིག་ཅར་


DTG190_Page_0118
[མ་དཔེ་གཟིགས་ན་འདིར་གནོན།]

དོན་བྱེད་པར་མི་རིགས་པའི་ཕྱིར་རོ། །རིམ་དང་རིམ་མ་ཡིན་པས་དོན་བྱེད་པ་མི་འཐད་པའི་ཕྱིར་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའོ། །ཡོད་པའི་ཕྱིར་ཞེས་བྱ་བའི་གཏན་ཚིགས་དང་འགལ་བ་བསྒྲུབ་པར་བྱ་བ་ལས་བཟློག་པ་མེད་པ་ནི་གཉེན་པོར་གནོད་པ་ཅན་གྱི་ཚད་མར་བརྗོད་པ་ཡིན་ནོ། །དེ་བཞིན་དུ་བྱས་པའི་ཕྱིར་ཞེས་བྱ་བ་ལ་ཡང་ཅི་རིགས་པར་སྦྱར་རོ། །ཅིའི་འགལ་བའི་གཉེན་པོར་དེ་འདིའི་གནོད་པ་ཅན་གྱི་ཚད་མར་བརྗོད་ཅེ་ན། དེ་ལྟ་ན་གཏན་ཚིགས་ཞེས་བྱ་བ་སྨོས་ཏེ། ཡོད་པ་ལ་སོགས་པའི་མཚན་ཉིད་དོ། །བསྒྲུབ་པར་བྱ་བ་མེད་པ་དེ་ལ་ཡོད་པ་མ་གྲུབ་པའོ། །གལ་ཏེ་དེ་ལ་བསྒྲུབ་པར་བྱ་བ་ཉིད་མེད་པར་བརྗོད་པའི་གསལ་བར་བྱས་པའོ། །གང་གིས་ཤེ་ན། རང་དང་འགལ་བས་སོ། །རང་དང་འགལ་བ་ཡང་མེད་པ་ལ་སོགས་པ་ཡིན་ནོ་ཞེས་བྱ་བའི་དོན་ཏོ། །གང་དང་ལྡན་པས་ཤེ་ན། ཚད་མ་དང་ལྡན་པ་སྟེ་ཚད་མ་དང་འབྲེལ་བས་སོ། །ཅིའི་ཕྱིར། དེ་ལྟར་དེ་ལ་མེད་པ་འདི་སྒྲུབ་པ་ཡིན་ཞེ་ན། བཤད་པ་རྣམ་པ་གཞན་དུ་དེ་ལ་བསྒྲུབ་པར་བྱ་བ་ལས་བཟློག་པ་ལའོ། །གཏན་ཚིགས་འདིས་གནོད་པ་ཅན་མེད་པར་མ་གྲུབ་ན། ཡོད་པ་ཡང་ཡིན། རྟག་པ་ཡང་ཡིན་ནོ་ཞེས་བྱ་བའི་ཐེ་ཚོམ་ཟ་བ་ནི་བཟློག་པར་དཀའ་བ་ཡིན་ནོ། །ལྷག་མའོ། །སྡུག་བསྔལ་གྱིས་བཟློག་དགོས་པའི་ཕྱིར་བཟློག་པར་དཀའ་བ་ཡིན་ཏེ། དགག་པར་དཀའ་བ་ཞེས་བྱ་བའི་དོན་ཏོ། །གནོད་པ་ཅན་སྨོས་པ་ནི་འདིར་འགལ་བ་ཉེ་བར་གནས་པ་འགྲན་ཟླའི་ཚད་མ་གཟུང་བར་བྱའོ། །གནོད་པ་ཅན་གྱི་ཚད་མ་འམ། འགྲན་ཟླའི་གཏན་ཚིགས་དང་འགལ་བའོ། །འོ་ན་ནི་བསྒྲུབ་པར་བྱ་བ་ལས་བཟློག་པ་ལ་མི་དམིགས་པས་བཟློག་པ་ངེས་པས་ལྡོག་པ་ཐེ་ཚོམ་མེད་པར་འགྱུར་ན། རྣམ་པ་གཞན་དུ་ན་གནོད་པ་ཅན་མ་གྲུབ་ན་ཐེ་ཚོམ་ཟ་བ་ནི་བཟློག་པར་དཀའ་བའོ་ཞེས་དེ་སྐད་དུ་ཅིའི་ཕྱིར་བརྗོད་པ་ཡིན་ཞེས་དོགས་པ་ལ། མ་ཡིན་ཏེ་ཞེས་བྱ་བ་སྨོས་ཏེ། དམིགས་པ་ཐམས་ཅད་ཀྱི་གནོད་པ་ཅན་གྱིས་འགེགས་པར་མི་རིགས་སོ་ཞེས་བྱ་བ་ཁ་བསྐང་བའོ། །གང་གི་ཕྱིར་ཞེ་ན། དངོས་པོའི་སྟེ་ཡོད་པའོ། །བསྒྲུབ་པར་བྱ་བ་ལས་བཟློག་པ་ལ་གཏན་ཚིགས་ཞེས་བྱ་བ་ལྷག་མ་སྟེ། འདི་ཉིད་སྐབས་ཀྱིས་གོ་


DTG190_Page_0119
[མ་དཔེ་གཟིགས་ན་འདིར་གནོན།]

བར་བྱ་བ་ཁོ་ན་ཡིན་ནོ། །འདི་སྐད་སྟོན་པ་ཡིན་ཏེ། བསྒྲུབ་པར་བྱ་བ་མེད་པ་ལ་ཁྱབ་པར་བྱེད་པ་མི་དམིགས་པའི་གཏན་ཚིགས་ལྷན་ཅིག་པས་གནོད་པ་ཡིན་ཏེ། དཔེར་ནམ་མཐོང་བ་ཙམ་གྱིས་ལྡོག་པ་མ་ཡིན་ཏེ། བསྐལ་བ་དག་ལས་ཐམས་ཅད་གཟིགས་པ་མ་ཡིན་པའི་མ་མཐོང་བས་མེད་པ་སྒྲུབ་པར་བྱེད་པ་མ་ཡིན་ནོ་ཞེས་བྱ་བ་ལ་སོགས་པ་སྔར་བཤད་པ་བཞིན་ནོ། །དེའི་ཕྱིར་རྣམ་པ་གཞན་དུ་དེ་ལ་གནོད་པ་ཙམ་གྱིས་ཚད་མ་གྲུབ་ན་ཐེ་ཚོམ་ཟ་བ་ནི་བཟློག་པར་དཀའོ་ཞེས་བྱ་བ་ལེགས་པར་བཤད་པ་ཡིན་ཏེ། འདིས་ནི་སྔར་བཤད་པ་དྲན་པར་བྱེད་པ་ཡིན་ནོ་ཞེས་བྱ་བའི་དོན་དང་འདི་ལྡན་པ་ཡིན་ནོ། །དངོས་པོ་མེད་པ་སྒྲུབ་པ་ནི་མ་མཐོང་བ་ཙམ་གྱིས་དགག་པ་མ་ཡིན་པར་བཤད་ཟིན་ཏོ། །ཅི་ཁྱབ་པར་འདིས་དངོས་པོ་མེད་པ་སྒྲུབ་པར་བྱེད་པ་ཡིན་ན། ཇི་སྙེད་པ་དེ་སྙེད་ཀྱིས་མ་མཐོང་བ་ཐམས་ཅད་མེད་པར་སྒྲུབ་པར་བྱེད་པ་ལ་ཞེས་དེ་ལ་ཁ་ཅིག་དོགས་པ་ལ། དེའི་དོགས་པ་བཟློག་པའི་ཕྱིར་མ་ཡིན་ཏེ་ཞེས་བྱ་བ་ལ་སོགས་པ་སྨོས་སོ། །དེ་ལ་ཡང་གི་སྒྲ་ནི་ཞེས་བྱ་བར་བཤད་པ་ཡིན་ཏེ། དེ་ནི་ངེས་པར་གཟུང་བར་བཤད་པའི་ཕྱིར་སྔ་མ་བཞིན་ནོ། །རིམ་དང་རིམ་མ་ཡིན་པ་ནི་མི་རིགས་པས་ནུས་པ་མེད་པ་ལ་ཁྱབ་པ་གནོད་པ་ཅན་གྱི་ཚད་མས་མི་འགྲུབ་པ་མ་ཡིན་ནམ། དེ་རང་ཉིད་ཀྱི་ཁྱབ་པ་མི་འགྲུབ་ན་ཡོད་པ་གཞན་དང་ཡོད་པ་གཏན་ཚིགས་ཉིད་ཇི་ལྟར་ཁྱབ་པ་སྒྲུབ་པར་ནུས། གལ་ཏེ་ཚད་མ་གཞན་གྱིས་དེ་ལ་ཁྱབ་པ་སྒྲུབ་པ་ཡིན་ནོ་ཞེ་ན། དེ་ལྟར་ནི་མི་གྲུབ་པས་དེ་ཉིད་ཐུག་པ་མེད་པའི་སྐྱོན་འདི་དང་འབྲེལ་བར་འགྱུར་རོ་ཞེས་པའི་དགོས་པ་ཐམས་ཅད་ལ། དེ་ལ་ཞེས་བྱ་བ་ལ་སོགས་པ་སྨོས་ཏེ། དེ་ལ་ཞེས་བྱ་བའི་ངག་ཉེ་བར་བཀོད་པའི་དོན་ཏོ། །ནུས་པ་ནི་གང་དངོས་པོའི་དོན་ཏོ་མཚན་ཉིད་དོ། །དེ་རིམ་དང་ཅིག་ཅར་གྱི་ཁྱབ་པ་གྲུབ་པ་ཡིན་ཏེ། ནུས་པ་གང་ཡིན་པ་དེ་ལ་རིམ་དང་ཅིག་ཅར་གྱི་དོན་བྱེད་པར་འགྱུར་རོ་ཞེས་བྱ་བའི་རྣམ་པས་སོ། །དེ་ཉིད་ཅིའི་ཕྱིར་ཞེ་ན་བཤད་པ་རྣམ་པ་གཞན་ནི་མེད་པའི་ཕྱིར་རོ། །གང་གི་ཕྱིར་རིམ་དང་རིམ་མ་ཡིན་པ་ལས་ཐ་དད་པའི་རྣམ་པ་གཞན་ནི་མེད་པའི་ཕྱིར་རོ། །དེའི་ཕྱིར་གང་ལ་ཡོད་པའི་མཚན་ཉིད་ཀྱི་དོན་བྱེད་ནུས་པ་དེ་ལ་


DTG190_Page_0120
[མ་དཔེ་གཟིགས་ན་འདིར་གནོན།]

རིམ་དང་རིམ་མ་ཡིན་པས་ངེས་པར་དོན་བྱེད་པར་འགྱུར་རོ། །འོ་ན་རིམ་དང་རིམ་མ་ཡིན་པ་དག་ལས་ཕུང་པོ་གཞན་མེད་པས་དེ་ཉིད་ཇི་ལྟར་འགྲུབ་ཅེ་ན། རིམ་དང་རིམ་མ་ཡིན་པ་ཕན་ཚུན་སྤངས་ཏེ་གནས་པའི་མཚན་ཉིད་ཡིན་པའི་ཕྱིར་ཕུང་པོ་གསུམ་པ་སྤངས་པ་ཡིན་ཏེ། དངོས་པོ་དང་དངོས་པོ་མེད་པ་བཞིན་ནོ་ཞེས་བརྗོད་དོ། །དེ་ལྟར་ཁྱེད་ལ་ཡང་ཡོད་པ་རིམ་དང་ཅིག་ཅར་གྱི་དངོས་པོ་ཁོ་ན་ཡིན་ནོ་ཞེས་བྱ་བ་ཅིའི་ཕྱིར་ཞེ་ན། གཞན་དུ་གྱུར་པ་གང་ཞིག་ཡིན། གཞན་ཞིག་ཡོད་དོ་ཞེ་ན། དེ་ལྟ་ན་དོན་མེད་པའི་གཡང་ས་ཆེན་པོས་དོན་ཅི་ཞིག་ཡོད། གལ་ཏེ་འདིའི་ངོ་བོ་ནི་འདི་ཡིན་ནོ་ཞེས་བྱ་བར་ཁྱོད་ཀྱིས་བརྗོད་པར་མི་ནུས་སོ། །གལ་ཏེ་ནུས་པ་རིམ་དང་རིམ་མ་ཡིན་པར་རིག་པའི་ཁྱབ་པ་གྲུབ་པ་དེ་ལྟ་ན་ཅི་ཞིག་འགྲུབ་ཅེ་ན། བཤད་པ་དེའི་ཕྱིར་ནུས་པ་ནི་རིམ་དང་རིམ་མ་ཡིན་པར་རིགས་པས་ཁྱབ་པས། ཁྱབ་པར་བྱེད་པའི་ཆོས་རིམ་དང་རིམ་མ་ཡིན་པར་རིགས་པ་མ་ཡིན་པས་སྐད་ཅིག་མ་མ་ཡིན་པར་ཁས་བླངས་པའི་ནུས་པ་ལ་གནོད་པའི་ཕྱིར་ཞེས་བྱ་བ་ནི་བསལ་ཏོ་ཞེས་བྱ་བའི་དོན་ཏོ། །འདི་ལྟར་རིམ་དང་རིམ་མ་ཡིན་པའི་རིགས་པ་དེ་ནི་ནུས་པའི་ཁྱབ་པར་བྱེད་པ་ཡིན་པས་དེ་ཡང་བཟློག་ན་གདོན་མི་ཟ་བར་ནུས་པ་སྤངས་པ་ཡིན་ནོ་ཞེ་ན། འདི་ནི་འདིའི་ཁྱབ་པར་བྱེད་པར་མི་འགྱུར་རོ། །གང་གི་ཕྱིར་དེ་གནོད་པར་བྱེད་པ་ཡིན་པ་དེའི་ཕྱིར་རིམ་དང་ཅིག་ཅར་མི་རིགས་པ་ལ་ནི་ཁྱབ་པར་བྱེད་པ་ནུས་པ་མེད་པ་བྱེད་པ་པོ་མེད་པ་ཉིད་ཀྱིས་ཁྱབ་པར་བྱ་བ་ལས་སུ་བྱ་བ་མེད་པའི་ཁྱབ་པ་གྲུབ་པའི་རྒྱུའི་ཕྱིར་ཐུག་པ་མེད་པར་ཐལ་བར་མི་འགྱུར་རོ། །དེ་ལྟ་ན་རང་བཞིན་གྱི་གཏན་ཚིགས་ཀྱི་སྒྲུབ་པའི་བརྗོད་པའི་མཇུག་བསྡུ་བ་ནི། དེ་ལྟ་ན་ཞེས་བྱ་བ་ལ་སོགས་པ་སྨོས་ཏེ། དེ་ལྟ་ན་ཡང་གལ་ཏེ་བསྒྲུབ་པར་བྱ་བ་མེད་པ་དེ་དང་དེ་ཉིད་མི་སྨྲ་བའི་རྒོལ་བ་ཕམ་པའི་གནས་ཡིན་པའི་ཕྱིར། སྔ་མའི་དམ་བཅས་པ་ཉིད་དང་སྦྱར་བར་བྱའོ། །དེ་ལ་སྒྲུབ་པ་མེད་པ་ཞེས་བྱ་བ་ལ་སོགས་པའོ། །དེ་ཅིའི་ཕྱིར་ཞེ་ན། བརྩམས་པའི་དོན་རབ་ཏུ་མ་བསྒྲུབས་པའི་ཕྱིར་རོ། །ནུས་པ་མེད་པའི་སྒྲུབ་པ་རྩོམ་པ་ནི་དོན་སྒྲུབ་པར་བྱེད་པར་ནུས་པ་མ་ཡིན་ཏེ། རྩོད་པ་མེད་པར་ཐལ་བར་འགྱུར་བའི་ཕྱིར་རོ། །འདི་


DTG190_Page_0121
[མ་དཔེ་གཟིགས་ན་འདིར་གནོན།]

ལྟར་ཐམས་ཅད་མཁྱེན་པའི་མཁྱེན་པ་སྒྲུབ་པ་ནི་མངོན་པར་འདུ་བྱེད་པའི་ཁྱད་པར་ཐ་དད་པ་སྲིད་པས་རབ་ཀྱི་མཐར་ཐུག་པར་འགྱུར་ཏེ། ཤེས་རབ་ལ་སོགས་པའི་ཡོན་ཏན་བརྟེན་པ་བཞིན་དུ་ཁྱད་པར་ལན་ཅིག་བྱས་པ་ལ་ཡང་འགལ་བའི་རྐྱེན་རྣམ་པ་འགའ་ཞིག་ཀྱང་མེད་པའི་ཕྱིར་དང༌། འབད་པ་ལྟོས་པའི་ཕྱིར་དྲི་མ་འཁྲུད་པ་བཞིན་དུ་དེ་ལ་སོགས་པ་རྒྱུ་རྣམས་ཀྱིས་ནུས་པ་ཁྱད་པར་གྱུར་པ་ཐོབ་པ་ཡོད་པ་ཉིད་དོ། །དེ་ཉིད་གལ་ཏེ་ཤེས་པར་བྱ་བ་སྒྲུབ་པར་མི་ནུས་པ་ཁོ་ན་ཤེས་པར་བྱེད་ན་ཁྱེད་དང་རྒྱལ་དཔོག་པ་ལ་སོགས་པ་རྩོད་པ་མེད་པ་ཉིད་དུ་འགྱུར་རོ། །འོ་ན་ནི་དེ་ཉིད་སྲིད་པ་མ་ཡིན་ན་གང་དོན་དམ་པར་གཏན་ཚིགས་ཀྱི་སྒྲུབ་པ་བརྗོད་པ་འདི་ཡང་ཕམ་པའི་གནས་སུ་རིགས་པར་འགྱུར་རོ་ཞེས་བྱ་བའི་དགོས་པ་བསྡུ་བར་རང་ཉིད་དགོངས་ནས། དངོས་པོ་ལ་ནུས་པའི་གཏན་ཚིགས་ཁས་ལེན་དུ་ཟིན་ཀྱང་སྒྲུབ་པ་རབ་ཏུ་མ་བསྟན་པའི་ཕྱིར་ཞེས་བྱའོ། །དེ་ནི་འདི་སྙམ་དུ་སེམས་ཏེ། གལ་ཏེ་དོན་དམ་པར་ནུས་པའི་གཏན་ཚིགས་འདི་བསྟན་པ་དེ་ལྟ་ན་ཡང་སྒྲུབ་པར་ནུས་པའི་ཡན་ལག་ཏུ་སྒྲུབ་པ་ལ་བསྟན་པ་དེ་ལྟ་ན་ཡང་སྒྲུབ་པར་ནུས་པའི་ཡན་ལག་ཏུ་སྒྲུབ་པ་མ་བསྟན་པ་འདིས་མ་བསྒྲུབས་པར་བརྟག་པར་བྱ་བ་ཁོ་ནའོ། །གཞན་གྱི་དོན་གྱི་རྗེས་སུ་དཔག་པའི་སྐྱོན་དང་ཡོན་ཏན་བརྗོད་པ་མེད་པའི་དོན་ལ་མ་ཡིན་ཏེ། དེ་ལྟ་ན་ཚིག་སྨྲ་བ་དོན་ཇི་ལྟ་བ་བཞིན་དུ་མེ་བརྗོད་པ་དམིགས་སུ་མེད་པའི་ཕྱིར་རོ། །དེ་ཉིད་ཀྱི་ཕྱིར་གང་ལ་སྐྱོན་དང་ཡོན་ཏན་རྗོད་པར་བྱེད་པ་དེ་ཡང་ཚིག་གི་སྒོ་ནས་ཡིན་ནོ། །དེ་ནི་འདི་ལྟར་ཁས་བླང་བར་བྱ་སྟེ། དེ་ལྟ་མ་ཡིན་ན་སྒྲ་མི་རྟག་གོ་ཞེས་བྱ་བ་དམ་བཅའ་བ་བརྗོད་པ་དེ་ཙམ་ཞིག་འདིར་བརྗོད་པར་བྱའོ། །དེ་ལྟ་ན་དོན་བརྗོད་པ་ཁོ་ན་འདོད་པའི་དོན་གྲུབ་པར་འགྱུར་རོ། །དེ་ལྟར་རང་བཞིན་གྱི་གཏན་ཚིགས་ཀྱིས་སྒྲུབ་པར་བྱེད་པའི་ཡན་ལག་གི་སྒྲུབ་པ་བསྟན་ནས། ད་ནི་འབྲས་བུའི་གཏན་ཚིགས་བཤད་པ་ནི། འབྲས་བུའི་གཏན་ཚིགས་ཀྱང་ཞེས་བྱ་བ་ལ་སོགས་པའོ། །དེ་ཡང་ཇི་ལྟ་བུ་ཞེ་ན། བཤད་པ་འབྲས་བུའི་རྟགས་ནི་དུ་བ་ལ་སོགས་པའི་མིང་ཅན་གང་ཡིན་པས་རྒྱུ་སྲེག་པ་ལ་སོགས་


DTG190_Page_0122
[མ་དཔེ་གཟིགས་ན་འདིར་གནོན།]

པའི་སྒྲུབ་པར་བྱེད་པ་གཟུང་བར་བྱའོ། །དུ་བ་ལ་སོགས་པ་དེས་བསྲེགས་པ་ལ་སོགས་པ་ལྷན་ཅིག་བྱེད་པའི་འབྲས་བུ་རྒྱུ་སྒྲུབ་པ་ཡིན་ནོ། །རྟགས་དང་རྟགས་ཅན་དག་རྒྱུ་དང་འབྲས་བུའི་དངོས་པོ་ཉིད་གང་ཡིན་པ་དེ་ཉིད་འབྲས་བུའི་གཏན་ཚིགས་ཀྱི་སྒྲུབ་པར་བྱེད་པའི་ཡན་ལག་སྒྲུབ་པའི་དོན་ཡིན་ནོ། །གང་གིས་རྒྱུ་དང་འབྲས་བུའི་དངོས་པོ་དེ་སྒྲུབ་པར་བྱེད་པ་ཡིན་ནོ་ཞེ་ན། དངོས་པོ་དང་དངོས་པོ་མེད་པ་དག་སྒྲུབ་པར་བྱེད་པའི་ཆད་མ་དག་ཅེས་བྱ་བ་སྨོས་ཏེ། དངོས་པོ་དང་དངོས་པོ་མེད་པ་དང་རྒྱུ་དང་འབྲས་བུ་དག་གོ །ཡོད་པ་དང་མེད་པ་འདི་དག་ཚད་མས་རབ་ཏུ་བསྒྲུབས་པ་ཡིན་ནོ་ཞེས་བྱ་བ་བསྟན་པའི་གོ་རིམས་སོ། །སྒྲུབ་པར་བྱེད་པའི་སྒྲ་ནི་རྒྱུ་དང་སྒྲུབ་པར་བྱེད་པའོ། །དངོས་པོ་དང་དངོས་པོ་མེད་པ་སྒྲུབ་པར་བྱེད་པའི་ཚད་མ་ནི་མངོན་སུམ་དང་མི་དམིགས་པས་གོ་རིམས་བཞིན་དུའོ། །མངོན་སུམ་དང་མི་དམིགས་པ་དག་གིས་རྒྱུ་དང་འབྲས་བུའི་དངོས་པོ་ཇི་ལྟར་སྒྲུབ་པ་ཡིན་ཞེ་ན། དཔེར་ན་ཞེས་བྱ་བ་ལ་སོགས་པ་སྨོས་ཏེ། དུ་བ་ལ་སོགས་པའི་མིང་ཅན་གྱི་འབྲས་བུ་འདི་ནི་མེ་ཡོད་པ་འདི་ལས་བྱུང་ངོ༌། །སྔར་དམིགས་པའི་རིག་བྱར་གྱུར་པའི་ཡོད་པ་མ་དམིགས་པ་ལས་ཡིན་ནོ་ཞེས་བྱ་བ་ཚིག་ལྷག་མའོ། །དེ་ལྟ་མ་ཡིན་ན་མེས་དུ་བ་བྱེད་པར་མི་འགྱུར་རོ། །མེ་དང་ཉེ་བའི་སྔ་རོལ་ན་འདི་ཡོད་དོ་ཞེས་བྱ་བའི་དགོས་པ་སྲིད་པ་ལ། ཇི་སྐད་བཤད་པའི་མི་དམིགས་པས་བཟུང་ཟིན་པ་ལ་དོགས་པ་འདི་མི་འཇུག་གོ །དེ་ཉིད་ཀྱི་ཕྱིར་ཚད་མ་རྣམ་པར་ངེས་པ་ལ་སོགས་པ་ཉིད་དེ་སྐད་དུ་བཤད་ཟིན་པའི་ཕྱིར་རོ། །འདིས་ནི་མངོན་སུམ་གྱི་ཚད་མའི་བྱེད་པ་བཤད་པ་ཡིན་ཏེ། འདི་ལྟར་འདི་ཡོད་ན་ཡོད་པར་འགྱུར་རོ་ཞེས་བྱ་བར་རྟོགས་པའི་ཕྱིར་རོ། །ད་ནི་མི་དམིགས་པའི་བྱེད་པ་བསྟན་པར་འདོད་ནས་དེ་ལས་གཞན་པ་ཞེས་བྱ་བ་ལ་སོགས་པ་སྨོས་ཏེ། དེའི་ཕྱིར་མེ་ལས་གཞན་པ་ལ་ཡོད་དུ་ཟིན་ཀྱང་དེ་བཞིན་དུ་དུ་བ་དེའི་རྒྱུ་བུད་ཤིང་དང་མེ་རྣམས་ནུས་པ་ཡོད་དུ་ཟིན་ཀྱང་ཞེས་བྱ་བ་ནི་འཇུག་པ་ནའོ། །དང་ཞེས་བྱ་བའི་ཡི་གེས་ནི་དབྱེ་བ་བསྟན་ཏོ། །ནུས་པ་ཞེས་བྱ་བ་ནི་མེ་དེ་མེད་ན་མེད་པར་འགྱུར་བ་སྟེ། འདི་ཞེས་བྱ་བའི་དབང་དུ་བྱས་པའོ་ཞེས་བྱ་བ་འདི་ལྟ་བུའོ་ཞེས་བྱ་བའི་དོན་ཏོ། །རྣམ་པར་གཅད་


DTG190_Page_0123
[མ་དཔེ་གཟིགས་ན་འདིར་གནོན།]

པ་དེ་ནི་རྟ་དང་བ་ལང་ལ་སོགས་པ་ཡུལ་དང་དུས་དང་ཉེ་བ་དེ་དག་ཀྱང་དུ་བ་སྐྱེད་པའི་རྒྱུ་འདིར་འགེགས་པའི་ཕྱིར་རོ། །གང་གི་ཚེ་གལ་ཏེ་རྟ་དང་བ་ལང་ལ་སོགས་པ་དེའི་རྒྱུ་ཡིན་ན་དེའི་ཚེ་འདས་པའི་མེ་ལ་སོགས་པ་དེ་དག་ཀྱང་ཉེ་བའི་ཕྱིར་དུ་བ་བསྐྱེད་ནས་ཐལ་བར་འགྱུར་རོ། །རྒྱུ་གཞན་བུད་ཤིང་ལ་སོགས་པ་ལ་ལྟོས་ནས་དེ་སྐྱེད་པར་འགྱུར་བ་དེ་དག་ལ་ཡང་ཐལ་བ་འདིར་མི་འགྱུར་རོ་ཞེ་ན། གལ་ཏེ་དེ་ལྟ་ན་ཡང་དེ་ལ་ཉེ་བ་ཁོ་ན་ཡིན་པས་ཐལ་བ་ལྡོག་པ་མེད་དོ། མེ་ཡང་ལྷན་ཅིག་བྱེད་པ་ལ་ལྟོས་ནས་དེ་སྐྱེད་པར་བྱེད་པ་དེ་ལས་འདི་ནི་མི་རིགས་སོ་ཞེ་ན། དེ་ལྟ་ན་མེ་དུ་བ་བསྐྱེད་པའི་རྒྱུ་ཉིད་ཡིན་པ་དེ་དང་སྔ་ཕྱི་འགལ་ན་དེ་སྐད་དུ་ཇི་སྟེ་བརྗོད། རྟ་དང་བ་ལང་ལ་སོགས་པ་ཉིད་རྒྱུར་གྱུར་གྱི་མེ་ནི་མ་ཡིན་ནོ་ཞེས་བྱ་བར་འགྱུར་རོ། །དེ་ལྟ་ན་དེ་ནི་རྒྱུ་ཡིན་ཡང་བླའི་རྟ་དང་བ་ལང་ལ་སོགས་པ་ཡང་ཡིན་ནོ་ཞེ་ན། འདི་ནི་མི་འཐད་དེ་དེ་ལ་ལྡོག་པ་རྟོགས་པར་དཀའ་བའི་ཕྱིར་རོ། །འདི་ལྟར་རྟ་དང་བ་ལང་ལ་སོགས་པ་ཉིད་ལོག་པར་འགྱུར་བའི་མེ་དེ་ལ་བུད་ཤིང་ལ་སོགས་པ་ཚོགས་པ་ཁོ་ན་ལས་དུ་བ་སྐྱེད་པར་འགྱུར་རོ། །གང་གི་ཕྱིར་རྒྱུའི་རྒྱུན་ལ་བརྟེན་ནས་རྒྱུ་དང་འབྲས་བུའི་དངོས་པོར་འགྱུར་བའི་ཕྱིར་འབྲས་བུའི་རྒྱུན་ལས་རྒྱུའི་རྒྱུན་སྔ་མ་ཡིན་གྱི་སྐད་ཅིག་མས་ནི་མ་ཡིན་ནོ་ཞེས་པས་བསྡོམས་པ་ཡིན་ཏེ། འདི་སྐད་ཅིག་མ་སྔ་མ་འདི་ཕྱི་མ་ཞེས་བྱ་བ་བྱེ་བྲག་གི་ནུས་པ་ལས་རྣམ་པར་ཤེས་པ་མི་སྐྱེ་བའི་ཕྱིར་རོ། །ཚུ་རོལ་མཐོང་བའི་དབང་དུ་བྱས་ནས་ཚད་མའི་མཚན་ཉིད་ནི་ཐུགས་རྗེ་དང་ལྡན་པས་ཇི་སྐད་བཤད་པ་བཞིན་དུ་བཀོད་དོ། །འདིར་གཞན་དག་རྨོངས་པས་འཇིག་རྟེན་པ་སླུ་བར་གྱུར་པས་ཐ་སྙད་པའི་ཚད་མ་འདི་གསུངས་པ་ཡིན་ནོ། །གནས་མལ་རྙིང་པ་ལ་སོགས་པ་ནི་མེ་མེད་ཀྱང་དུ་བ་ཡོད་པས་འཁྲུལ་པར་འགྱུར་རོ། །མ་ཡིན་ཏེ། དེ་ཡང་དུ་བའི་རྒྱུན་སྔོན་དུ་སོང་བ་ཡོད་པ་ཁོ་ན་ཡིན་ཏེ། དངོས་པོ་དང་བརྒྱུད་པས་བྱས་པའི་ཁྱད་པར་ཡིན་ནོ། །མེའི་རྒྱུན་དང་དུ་བའི་རྒྱུན་དག་གནས་མལ་རྙིང་པ་ལ་སོགས་པ་རྒྱུན་ཆད་པ་དང་མ་ཆད་པར་ཤེས་པར་འགྱུར་ཏེ། ཚང་བང་ལ་སོགས་པའི་ཡུལ་དུས་ཐ་དད་པ་གསལ་བ་ཡིན་པས་དངོས་པོ་སྣ་ཚོགས་པའི་


DTG190_Page_0124
[མ་དཔེ་གཟིགས་ན་འདིར་གནོན།]

རང་བཞིན་ཐ་དད་པར་ཤེས་པ་གོམས་པའི་སྟོབས་ལ་མཁས་པ་ལ་སྐྱེ་བར་འགྱུར་བའི་ཕྱིར་རོ། །རྗེས་སུ་དཔག་པ་ཐ་དད་པ་ཡང་མི་འགལ་བ་དེ་ཉིད་ཀྱི་ཕྱིར་ཡུལ་དང་དུས་ལ་སོགས་པ་ལ་སྟོས་པའི་འབྲས་བུའི་གཏན་ཚིགས་ཀྱི་རྗེས་སུ་དཔོག་པ་ནི་འགལ་བའི་འབྲས་བུ་དམིགས་པའི་སྐབས་སུ། འགལ་འབྲས་ལ་ཡང་ཡུལ་དང་ནི། །དུས་ལ་སོགས་པ་ལྟོས་པར་འདོད། །གཞན་དུ་འཁྲུལ་འགྱུར་མི་དྲང་པ། །སྒྲུབ་པ་ལ་ནི་ཐལ་བ་བཞིན། །ཞེས་བཤད་དོ། །དེ་ལྟ་ན་དངོས་པོ་རྣམ་པར་དབྱེ་བ་ཐ་དད་པ་འཕྲལ་དུ་བྱུང་བ་ལ་མཁས་པ་འགའ་ཞིག་རྣམ་པར་འབྱེད་པའི་ཐུར་མས་ཤེས་རབ་ཀྱི་མིག་ཕྱེ་བ་ཉིད་ཀྱིས་འདི་ནི་མེ་ལས་སྐྱེས་པ་འདི་དུ་བ་ལས་སྐྱེས་པའི་དུ་བ་ཞེས་བྱ་བ་རྣམ་པར་འབྱེད་དོ། །དེ་ལྟར་འཁྲུལ་བ་ཤིན་ཏུ་ཡང་མེད་པ་ཡིན་ནོ། །འདི་ལྟར་མེ་ལས་སྐྱེས་པའི་དུ་བ་ནི་གཞན་ལས་དུ་བ་སྐྱེས་བ་མ་ཡིན་ཏེ་རྒྱུ་མེད་པར་ཐལ་བར་འགྱུར་བའི་ཕྱིར་རོ། །འདི་ལྟར། གང་དག་མེ་མེད་དུ་བ་ལས། །གལ་ཏེ་དུ་བ་འབྱུང་ན་ནི། །བརྒྱ་བྱིན་སྤྱི་བོའང་དེ་བཞིན་ནོ། །དེ་ནི་གང་གིས་བསལ་བར་བྱ། །ཞེས་བྱ་བ་ལ་སོགས་པ་སྨྲ་བ་ནི་སྙིང་པོ་མེད་པས་དོར་བར་བྱའོ། །དེའི་ཕྱིར་རྟ་དང་བ་ལང་ལ་སོགས་པ་དེའི་རྒྱུ་མ་ཡིན་ནོ་ཞེས་བྱ་བར་ངེས་སོ། །དེས་ན་མེ་ཁོ་ན་དེའི་རྒྱུ་ཡིན་གྱི་རྟ་ལ་སོགས་པ་འདི་ནི་མ་ཡིན་ཞེས་བྱ་བར་གནས་སོ། །དཔེར་ན་རྗེས་སུ་འགྲོ་བ་དང་ལྡོག་པ་དག་གིས་ཇི་སྐད་བཤད་པའི་གནས་སྐབས་ཀྱིས་མེ་རྒྱུ་ཡིན་པར་སྦྱོར་བ་བཞིན་དུ་བུད་ཤིང་ལ་སོགས་པ་འམ་ཚོགས་པའི་རྒྱུ་ཐམས་ཅད་ལའང་སྦྱོར་བ་བྱ་བའམ། ཡང་ན་ངག་གཅིག་གིས་བཤད་པར་བྱའོ། །དེའི་ཕྱིར་མེ་ལས་གཞན་པ་ནུས་པའི་རྒྱུ་དག་ཡོད་དུ་ཟིན་ཀྱང་དེ་མེད་པར་འགྱུར་བ་ལྟ་བུའོ། །རྟ་དང་བ་ལང་ལ་སོགས་པ་དངོས་པོ་ཇི་སྐད་དུ་བཤད་པས་རྒྱུ་ལས་ཐ་དད་པ་སྒྲུབ་པར་རྟོགས་པར་བྱའོ། །འོ་ན་མེད་ན་མེད་པར་འགྱུར་རོ་ཞེས་བྱ་བ་འདི་ཉིད་ལེགས་པར་བཤད་པ་ཡིན་གྱི། གཞན་པའི་ནུས་པ་རྒྱུ་དག་ཡོད་དུ་ཟིན་ཀྱང་ཞེས་བྱ་བ་ལ་དོན་ཅིག་ཡོད་ཅེ་ན། དེ་ལྟ་ན་ནི་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་དེ་ལྟར་ཡོད་དུ་ཟིན་ཀྱང་ཞེས་བྱ་བ་ལ་སོགས་པ་


DTG190_Page_0125
[མ་དཔེ་གཟིགས་ན་འདིར་གནོན།]

བརྗོད་པ་ཡིན་ནོ། །འདི་ནི་དུ་བའོ། །དེའི་འབྲས་བུ་ཉིད་ནི་མེའི་འབྲས་བུ་ཉིད་དོ། །བསྒྲུབས་པ་ནི་ངེས་པ་སྟེ་ཐེ་ཆོམ་མེད་པར་འགྱུར་བའོ། །རྣམ་པ་གཞན་དུ་ན་ནི་དེ་ལྟར་མ་བསྟན་ནའོ། །འགའ་ཞིག་ནི་དེ་མེད་ན་མེད་པར་འགྱུར་བ་ཞེས་བསྟན་པར་བྱས་པ་ཡིན་པ་དེ་ལྟ་ན་རྟ་དང་བ་ལང་ལ་སོགས་པ་དང་བུད་ཤིང་ལ་སོགས་པ་ལས་ཡིན་ནོ། །ས་ཕྱོགས་སྟོང་པ་དེ་ཉིད་ལ་མེ་མེད་པ་ལས་མེད་པ་ཡིན་པ་ཐེ་ཚོམ་ཟ་བ་ཡིན་ནོ། །མེ་འདིའི་ནུས་པ་ངེས་པ་ལས་ཡིན་ནོ་ཞེས་བྱ་བའི་ངེས་པ་གང་ལས་ཡིན་ཞེས་བྱ་བ་བསྡུ་བའི་དོན་ཡིན་ནོ། །དེ་ཉིད་ཀྱི་ཕྱིར་བཤད་པ། ནུས་པའི་རྒྱུ་དག་ཡོད་དུ་ཟིན་ཀྱང་འབྲས་བུ་མི་སྐྱེ་སྟེ། རྒྱུ་གཞན་ལ་ཡིན་ནམ་འབའ་ཞིག་ལ་ཡིན་ཞེས་འདི་ཐེ་ཚོམ་ཟ་བ་ཡིན་ནོ། །དེ་ལྟ་མ་ཡིན་ན་ནུས་པ་ཞེས་བྱ་བ་འདི་ཉིད་ནི་དེ་ལ་གཞན་གྱི་ནུས་པ་ཞེས་བྱ་བ་ལ་སོགས་པ་བསལ་བར་བྱེད་པ་ཡིན་ནོ། །དེ་ལ་དུ་བ་འབྲས་བུར་གྲགས་པ་ནི་མེ་སྟོང་བའི་ཕྱོགས་སུ་གཞན་རྟ་དང་བུད་ཤིང་ལ་སོགས་པ་དེ་མེད་པར་འགྱུར་བ་ཡིན་ནོ་སྙམ་ན་འདི་མེད་པ་ལས་དེ་མེད་པ་ཡིན་ནོ་ཞེས་བྱ་བ་གང་ལས་ངེས་པ་ཡིན་ཞེས་བྱ་བའི་དོན་ཏོ། །གལ་ཏེ་དེ་ནི་གཞན་གྱི་ནུས་པ་ལས་ཀྱང་དེ་མེད་པར་འགྱུར་ན། འདི་ལོག་པས་འདི་ལྡོག་གོ་ཞེས་བྱ་བ་དེ་ཇི་ལྟར་ཡིན་ཞེ་ན། དེ་ལོག་ན་ཡང་ཞེས་བྱ་བ་ལ་སོགས་པ་སྨོས་ཏེ། མེ་འདི་ལྡོག་པ་ནས་ཀྱང་དུ་བ་འདི་ལྡོག་པ་ཡིན་པ་ཞེས་བྱ་བ་འདོད་རྒྱལ་བའི་འབྲེལ་བ་ཡིན་ཏེ། བྱ་རོག་དང་ཏ་ལའི་ཚུལ་བཞིན་ནོ་ཞེས་བྱ་བའི་དོན་ཏོ། །གང་གི་ཚེ་ཡོད་དུ་ཟིན་ཀྱང་བརྗོད་པ་དེའི་ཚེ་ཐམས་ཅད་དེ་ལ་ཉེ་བར་འགྱུར་ཀྱང་འདི་བཟློག་པ་ལས་འདི་ལྡོག་པར་ངེས་པ་ནི་འདོད་རྒྱལ་བ་ལ་འབྲེལ་པ་མེད་དོ་ཞེས་བྱ་བར་དགོངས་སོ། །དེ་ལྟར་ལྡོག་པ་ལྟ་བུའི་འདོད་རྒྱལ་བའི་འབྲེལ་པ་ཡིན་ཞེ་ན། མ་བག་མར་ལེན་པ་ཞེས་བྱ་བ་ལ་སོགས་པ་སྨོས་ཏེ། ཡུལ་གང་ན་མ་བག་མར་ལེན་པའི་ཆོས་ལུགས་བསྔགས་པ་དེ་ལྟ་བུ་དེ་ནའོ། །དེས་ན་ཡུལ་སྨོས་པ་དང་བཅས་པ་ནི་ཁྱད་པར་གྱི་བསྡུ་བའོ། །དེ་ལ་དེ་ཡང་སྐྱེ་བ་ལ་བརྟེན་ནས་ཉེ་བར་བཏགས་པ་སྐྱེ་བ་གང་ཡིན་པ་དེ་ནི་པར་སིག་གི་ཡུལ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་མ་ལ་སོགས་པའི་


DTG190_Page_0126
[མ་དཔེ་གཟིགས་ན་འདིར་གནོན།]

ཡུལ་གཞན་མ་བག་མར་ལེན་པ་མེད་ན་མེད་པ་འདོད་རྒྱལ་བའི་འབྲེལ་པ་དེ་བཞིན་དུ་འདིར་མ་ཡིན་ནོ། །འདི་ལྟར་ཡུལ་གཞན་ན་སའི་ཁྱད་པར་མེད་ན་མེད་པ་ཡིན་གྱི་མ་བག་མར་ལེན་པ་མེད་པས་ཡིན་ནོ་ཞེས་བྱ་བ་ནི་བྱ་རོག་དང་ཏ་ལ་བཞིན་དུ་ཡིན་ནོ། །ཡང་ན་རྣམ་པ་གཞན་དུ་བཤད་པར་བྱ་སྟེ། ཇི་ལྟར་དུ་བ་ལ་སོགས་པ་འདི་མེ་དང་བུད་ཤིང་ལ་སོགས་པའི་རྒྱུ་ལས་བྱུང་བ་ཡིན་ཏེ། སྔ་མ་བཞིན་དུ་འབྲས་བུར་བརྗོད་པ་ཁ་བསྐད་བར་བྱ་སྟེ། དེའི་དགོས་པ་ནི་དེ་ཉིད་དུ་ཁོང་དུ་ཆུད་པར་བྱ་བ་སྟེ། འདི་ནི་མངོན་སུམ་གྱི་བྱེད་པར་གྲགས་པ་ཡིན་ནོ། །ཡོད་དུ་ཟིན་ཀྱང་ཞེས་བྱ་བ་ལ་སོགས་པ་ནི་མ་དམིགས་པས་སོ། །དེ་ལས་གཞན་པ་དག་ནི་མེ་ལ་སོགས་པའི་རྒྱུའི་ཚོགས་པ་དེ་ལས་གཞན་པ་རྟ་དང་བ་ལང་ལ་སོགས་པའི་ནུས་པའི་རྒྱུ་རྣམས་ཡོད་དུ་ཟིན་ཀྱང་མེ་ལ་སོགས་པའི་རྒྱུའི་ཚོགས་པ་འདི་མེད་ན་མེད་པར་འགྱུར་བ་ཡིན་ནོ། །འདི་དག་ནི་གཞན་གྱི་བསམ་པ་ལ་ལྟོས་ནས་བཤད་པ་ཡིན་གྱི་དེ་ཁོ་ན་ཉིད་ཀྱི་དོན་དུ་ཡོད་པ་ནི་མ་ཡིན་ནོ། །གལ་ཏེ་དེ་ནི་དེའི་རྒྱུ་ཡིན་ན་དེའི་ཚེ་ཡོད་པའི་དུས་ལས་སྔར་རམ་ཕྱིས་ཀྱང་དུ་བ་བསྐྱེད་པར་འགྱུར་རོ། །དེ་དག་དེ་ལ་ལྟོས་ནས་སྐྱེད་པར་བྱེད་པ་ཡིན་ནོ་ཞེ་ན། དེ་ལྟ་ན་དེའི་ཚོགས་པ་ནི་རྒྱུར་གྱུར་པའི་ཕྱིར་རོ། །དེ་ལྟ་ན་གཉི་ག་རྒྱུར་གྱུར་དུ་ཟིན་ཀྱང་ངོ་བོ་འཆད་པར་ཅི་ཞིག་ཡོད་ཅེ་ན། མ་ཡིན་ཏེ། དེ་ལྡོག་པ་རྟོགས་པ་ཤིན་ཏུ་དཀའ་བའི་ཕྱིར་རོ། །ཇི་ལྟ་བ་ཐམས་ཅད་ཀྱང་འདི་ཚོགས་པ་ལས་གྱུར་པ་ཉིད་ན་དེ་ཡོད་པར་གྱུར་པའི་ཕྱིར་དེ་མེད་ན་མེད་པར་འགྱུར་རོ་ཞེས་བརྗོད་པར་རིགས་ཀྱི། དེའི་ནུས་པའི་རྒྱུ་དག་ཡོད་དུ་ཟིན་ཀྱང་ཞེས་བྱ་བ་ཅིའི་ཕྱིར་བཤད་ཅེ་ན། དེ་ལྟ་ན་ནི་ཞེས་བྱ་བ་ལ་སོགས་པ་སྨོས་སོ། །རྣམ་པ་གཞན་དུ་ན་དེའི་ཚོགས་པ་མེད་ན་མེད་པར་འགྱུར་རོ་ཞེས་བྱ་བ་ཉེ་བར་བསྟན་པ་དེ་ལ་ཚོགས་པ་ལས་གཞན་པ་རྟ་དད་བ་ལང་ལ་སོགས་པ་མེད་པར་འགྱུར་བ་དང༌། །ཚོགས་པ་འདི་ནུས་བ་ལས་ཐེ་ཚོམ་ཟ་བར་འགྱུར་རོ། །གང་གི་ཕྱིར་བ་ལང་ལ་སོགས་པ་གཞན་དེ་ལ་ནུས་པ་ཡིན་ན་དེ་མེད་ན་མི་འབྱུང་བར་འགྱུར་བ་ལོག་ན་ཡང་ལྡོག་པ་འདོད་རྒྱལ་བར་འགྱུར་ཏེ། ལྷག་མ་ནི་སྔ་མ་བཞིན་ནོ། །དེ་ལྟར་རྒྱུ་དང་འབྲས་བུའི་དངོས་པོ་ངེས་པར་བསྒྲུབ་པའི་


DTG190_Page_0127
[མ་དཔེ་གཟིགས་ན་འདིར་གནོན།]

ཐབས་བསྟན་ནས། རྣམ་པའི་མཇུག་བསྡུ་བ་ནི་དེ་ལྟར་ཞེས་བྱ་བ་ལ་སོགས་པ་སྨོས་སོ། །དེ་ལྟར་ཇི་སྐད་དུ་བཤད་པའི་རྣམ་པ་བསྡུ་བ་ལ་སོགས་པ་དེའི་འབྲས་བུར་བསྒྲུབས་པས་ངེས་པར་འགྲུབ་པ་ཡིན་ནོ། །ཡང་ན་མངོན་སུམ་དང༌། མི་དམིགས་པས་བསྒྲུབ་པར་གྱུར་བ་དེ་དང་དེ་ནི་འབྲས་བུར་གྱུར་པ་ཡིན་ནོ། །གལ་ཏེ་དེ་གྲུབ་པར་གྱུར་བ་ཡིན་ནོ་ཞེས་བྱ་བ་དེ་ཇི་ལྟ་བུ་ཞེ་ན། བཤད་པ། གྲུབ་པ་དེ་ཡང་རང་ཡོད་ན་བདག་ཉིད་དུ་ཉེ་བ་སྟེ། དེའི་རྒྱུ་དང་ཉེ་བ་དེ་ཡོད་པར་སྒྲུབ་པར་བྱེད་པ་དེ་ཡིན་ཏེ། ཡུལ་དང་དུས་ལ་ལྟོས་པ་ཡིན་ནོ་ཞེས་ཁ་བསྐང་ངོ༌། །འདི་སྐད་སྟོན་པ་ཡིན་ཏེ། རྒྱུ་དང་འབྲས་བུའི་དངོས་པོ་མེད་པས་དེ་ལས་སྐྱེ་བའི་མཚན་ཉིད་ཀྱི་འབྲེལ་པ་གྲུབ་པ་ཡིན་ནོ། །གལ་ཏེ་དེ་ལྟ་བུ་དམིགས་པ་དེ་ཉིད་ལ་རང་ཡོད་པ་ཙམ་གྱིས་ཡུལ་ལ་སོགས་པ་ལ་ལྟོས་ནས་རང་གི་རྒྱུ་རྟོགས་སོ། །ཅིའི་ཕྱིར་ཞེ་ན། བཤད་པ། རྒྱུ་དང་འབྲས་བུ་འཁྲུལ་པ་མེད་པའི་ཕྱིར་རོ། །དེ་ལྟ་མ་ཡིན་ན་དེའི་འབྲས་བུར་མི་འགྱུར་ཏེ། དེ་འཁྲུལ་པའི་ཕྱིར་རོ། །གང་དང་གང་བཟློག་པ་ཡིན་པ་དེ་དང་དེ་ནི་འབྲས་བུར་མི་རིགས་ཏེ། རྣ་རྒྱན་དང༌། དཔུང་རྒྱན་གྱི་འབྲེལ་པ་བཞིན་ནོ། །གལ་ཏེ་དུ་བ་མེའི་འབྲས་བུ་ཡིན་པར་འཁྲུལ་པ་མེད་ཀྱང་མྱུ་གུ་ལ་སོགས་པ་གཞན་རང་གི་རྒྱུ་དང་ས་ལ་སོགས་པ་རྣམས་ལ་མི་འཁྲུལ་པ་ཡིན་ནོ་ཞེས་བྱ་བར་གང་ལས་ཤེས་ཤེ་ན། མ་འཁྲུལ་པ་ཡང་ཞེས་བྱ་བ་ལ་སོགས་པ་སྨོས་ཏེ། འདི་ལྟར་སྟོན་པ་ཡིན་ཏེ། དུ་བ་རང་གི་རྒྱུ་ལ་མི་འཁྲུལ་པར་སྐྱེ་བར་འཁྲུལ་པ་གང་ཡིན་པ་དེས་ས་བོན་ལ་སོགས་པ་རང་གི་བདག་ཉིད་ཀྱི་རྒྱུ་དང་ལྷན་ཅིག་པ་ལས་མྱུ་གུ་ལ་སོགས་པ་འབྲས་བུ་ཐམས་ཅད་འདྲ་བ་མི་འཁྲུལ་པར་རིགས་པ་ཡིན་ནོ། །དེ་ལྟར་དེ་ཡང་ཇི་སྐད་བཤད་པའི་མངོན་སུམ་དང་མི་དམིགས་པའི་རྣམ་པ་དག་གིས་དེ་འབྲས་བུར་གྲུབ་པ་དེ་དང་དེ་མི་འཁྲུལ་པར་གྲུབ་པ་ཡིན་ནོ། །འདིས་ནི་འབྲས་བུའི་གཏན་ཚིགས་ཀྱི་སྒྲུབ་པར་བྱེད་པའི་ཡན་ལག་ཏུ་བསྒྲུབས་པ་དེ་ལས་བཟློག་པ་ནི་རྒོལ་བས་མ་གྲུབ་པས་དེ་ནི་ཕམ་པའི་གནས་ཀྱི་དབང་དུ་བྱས་པར་བསྟན་པ་ནི། དེ་ལྟར་ཞེས་


DTG190_Page_0128
[མ་དཔེ་གཟིགས་ན་འདིར་གནོན།]

བྱ་བ་ལ་སོགས་པ་སྨོས་ཏེ། དེ་ལྟར་ཞེས་ནི་མངོན་སུམ་དང་མི་དམིགས་པ་དག་ཇི་སྐད་བཤད་པའི་རྣམ་པས་སོ། །འབྲས་བུའི་གཏན་ཚིགས་ཀྱང་ཞེས་བྱ་བ་སྔར་བཤད་པའི་རང་བཞིན་གྱི་གཏན་ཚིགས་འབའ་ཞིག་གི་རྣམ་པ་སྒྲུབ་པར་མི་ནུས་པ་ཡིན་ཏེ། འདིར་ཡང་རྒོལ་བ་ཕམ་པའི་གནས་ཡིན་ནོ་ཞེས་བྱ་བ་ཡང་གི་སྒྲ་ཡིན་ནོ། དེ་ལྟར་ཅིའི་ཕྱིར་ཡིན་ཞེ་ན། མ་བསྒྲུབས་ན་འདིར་རྒྱུ་དང་འབྲས་བུའི་དངོ་པོ་རྟགས་དང་རྟགས་ཅན་ནམ། །དེའི་འབྲས་བུའི་རྟགས་ཉིད་དུ་རྩོམ་པའི་དོན་མི་འགྲུབ་པོ་ཞེས་བྱ་བ་ཚིག་གི་དོན་ཡིན་ནོ། །བརྩམས་པའི་དོན་ནི་རྒྱུ་ཡོད་པར་སྒྲུབ་པར་བྱེད་པ་དེ་མ་གྲུབ་པས་དེ་ཕམ་པའི་གནས་ཡིན་ཞེས་རྣལ་མ་དང་སྦྱར་རོ། །འདི་ཉིད་ཡིན་ནོ་ཞེས་བྱ་བ་དེ་ལ་ཞེ་ན་བཤད་པ་དོན་གཞན་པ་དུ་བ་ལ་སོགས་པའི་དངོས་པོ་ཡོད་པ་ནི། མེ་ལ་སོགས་པའི་དངོས་པོ་ཡོད་པ་ངེས་པ་མེད་པའི་ཕྱིར་རོ། །ངེས་པ་སྨོས་པ་ནི་འདོད་རྒྱལ་བའི་འབྲེལ་པ་བསལ་བའི་དོན་ཏོ། །དོན་གཞན་ཡང་དེའི་དངོས་པོ་དང་འབྲེལ་པའི་རང་བཞིན་ཡོད་པ་ཉིད་དུ་དེའི་དངོས་པོ་ངེས་པ་ཡིན་ནོ་སྙམ་དུ་དེའི་དངོས་པོ་དང་འབྲེལ་པ་མེད་པའི་རང་བཞིན་ལ་ནི་ཞེས་བྱ་བ་སྨོས་ཏེ། དེའི་དངོས་པོའི་མེ་ལ་སོགས་པའི་དངོས་པོའོ། །འབྲེལ་པ་མེད་པ་ནི་རག་ལས་པའི་རང་བཞིན་འདི་ཡིན་ཞེས་བྱ་བར་སྦྱར་རོ། །དོན་གཞན་པ་འདི་དག་ཡོད་ན་དེ་ཡོད་པའི་ངེས་པ་མེད་པའི་ཕྱིར་ཞེས་བྱ་བ་དེའི་རྒྱུ་ཁོང་དུ་ཆུད་པར་བྱའོ། །སྦྱོར་བ་ནི་གང་དང་གང་ལ་དོན་གཞན་དུ་གྱུར་པ་དང་འབྲེལ་པ་མེད་པ་དེ་དང་དེ་ནི་ཡོད་ན་དེ་ཡོད་པར་ངེས་པ་མེད་དེ། དཔེར་ན་རྐང་གདུབ་ཡོད་པའི་ཅོད་པན་བཞིན་ནོ། །དུ་བ་ལ་སོགས་པ་འདི་ཡང་དོན་གཞན་དུ་མེ་ལ་སོགས་པ་དང་འབྲེལ་པ་མེད་པའི་རང་བཞིན་ཡིན་པའི་ཕྱིར་རོ་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའམ་ཁྱབ་པར་བྱེད་པ་འགལ་བ་མི་དམིགས་པའི་གཏན་ཚིགས་ཀྱི་སྒྲུབ་པ་བཤད་དོ། །དེ་ཉིད་ཀྱི་འབྲེལ་པ་མེད་པའི་རང་བཞིན་ཡིན་པ་གང་ལས་ཤེ་ན། འབྲལ་བུ་ཉིད་དུ་མ་གྲུབ་པ་ཞེས་བྱ་བ་ལ་སོགས་པ་སྨོས་ཏེ། འདིར་མ་བསྒྲུབ་པས་དེར་མ་གྲུབ་བོ་ཞེས་བྱ་བར་རྟོགས་པར་བྱའོ། །འོ་ན་ནི་དོན་དམ་པར་རྟོགས་པ་འབྲས་བུའི་


DTG190_Page_0129
[མ་དཔེ་གཟིགས་ན་འདིར་གནོན།]

གཏན་ཚིགས་སུ་ཁས་བླངས་པ་དེ་ཡང་གལ་ཏེ་དེའི་འབྲས་བུར་དེས་མ་བསྒྲུབས་ན། ཇི་ལྟར་དེ་བཞིན་དུ་འདི་ཕམ་པའི་གནས་སུ་རིགས་པ་ཡིན་ཞེ་ན། བཤད་པ་དངོས་པོའི་འབྲས་བུའི་རྟགས་ཁས་བླངས་པ་ཡང་མ་བསྟན་པའི་ཕྱིར་ཏེ། འདི་དེའི་འབྲས་བུར་ཞེས་བྱ་བ་ལྷག་མའོ། །དེ་ལྟར་འབྲས་བུའི་གཏན་ཚིགས་ཀྱི་སྒྲུབ་པར་བྱེད་པའི་ཡན་ལག་ཀྱང་བརྗོད་ནས། མི་དམིགས་པ་ནི་བཤད་པ། མི་དམིགས་པ་ཡང་བསྒྲུབས་པ་ཡིན་ནོ་ཞེས་བྱ་བར་སྦྱར་ཏེ། སྒྲུབ་པར་བྱེད་པའི་ཡན་ལག་ཡིན་ནོ་ཞེས་བྱ་བ་ཁ་བསྐང་ངོ༌། །དེ་གང་ཡིན་ཞེ་ན། མི་དམིགས་པ་སྒྲུབ་པར་བྱེད་པའོ། །གང་ཡང་རུང་བས་ཅི་སྟེ་མ་ཡིན་ཞེ་ན། དམིགས་པའི་རིག་བྱར་གྱུར་པ་ཞེས་བྱ་བ་སྨོས་སོ། །སྣང་བའི་རང་བཞིན་གཞན་ཡིན་ནོ་ཞེས་བྱ་བའི་དོན་ཏོ། །དམིགས་པ་ནི་ཤེས་པ་སྟེ། དམིགས་པའི་སྒྲས་ཡོད་པའི་རྒྱུར་སྒྲུབ་པར་བྱེད་པ་ཞེས་བྱ་བའི་རྣམ་གྲངས་ཡིན་པའི་ཕྱིར་རོ། །དེའི་རིག་བྱར་གྱུར་པ་ནི་རྒྱུའོ། །རིག་བྱར་གྱུར་པའི་སྒྲས་རྒྱུ་སྒྲུབ་པར་བྱེད་པ་ཉིད་ཀྱིས་སྐྱེད་པར་བྱེད་པར་བརྗོད་པའི་ཕྱིར་རོ། །དེ་ཡང་རྐྱེན་གཞན་མ་ལུས་པ་དང༌། རང་བཞིན་ཁྱད་པར་ཅན་དུ་གྱུར་པ་དེ་མ་དམིགས་པ་དེའི་སྒྲུབ་པར་བྱེད་པ་བསྟན་པ་བཤད་པའི་གོ་རིམས་སོ། །རྣམ་པ་དེ་ལྟ་བུ་ཇི་ལྟར་མི་དམིགས་པ་ཡིན་ཞེ་ན། དེ་དེ་ཉིད་ལ་ཡིན་ནི་ཞེས་ནི་མི་བརྗོད་ཀྱི་འོན་ཀྱང་དེའི་རིགས་གཞན་ལ་མ་ཡིན་ཏེ། རྣམ་པ་དེ་ལྟ་བུའི་མི་དམིགས་པ་གང་གི་སྒྲུབ་པ་ཡིན་ཞེ་ན། བཤད་པ། རྟོགས་པ་པོ་སྟེ་ཕྱིར་རྒོལ་བས་སོ། །གལ་ཏེ་དམིགས་པའི་རིག་བྱར་གྱུར་པ་ནི་ཤ་ཟ་བ་ལ་སོགས་པ་ལ་ཡང་གཞན་མཐུ་དང་ལྡན་པར་འགྱུར་ན་དེ་དག་ཀྱང་ཇི་ལྟར་མི་དམིགས་པ་སྒྲུབ་པར་བྱེད་པའི་སྒྲུབ་པའི་ཡན་ལག་ཏུ་ནུས་པར་འགྱུར་ཞེ་ན། རྟོགས་པ་བོས་ཞེས་བྱ་བ་སྨོས་ཏེ། འདི་སྐད་སྟོན་པ་ཡིན་ཏེ། འདིར་རྟོགས་པར་བརྗོད་པ་གང་ཡིན་པ་དེའི་དམིགས་པའི་རིག་བྱར་བུམ་པ་ལ་སོགས་པ་གང་ཡིན་པ་དེ་ཉིད་བུམ་པ་སྒྲུབ་པར་བྱེད་པ་ཡིན་གྱི་གཞན་མ་ཡིན་ནོ། །རྣམ་པ་འདི་ལྟ་བུ་ཉིད་ཀྱི་མི་དམིགས་པ་སྒྲུབ་པར་


DTG190_Page_0130
[མ་དཔེ་གཟིགས་ན་འདིར་གནོན།]

བྱེད་པ་ཡིན་གྱི། ཅིའི་ཕྱིར་གཞན་གྱིས་མ་ཡིན་ཞེ་ན། དེ་འདྲ་བ་ཁོ་ནའི་མི་དམིགས་པ་ལ་ནི་མེད་པའི་ཐ་སྙད་སྒྲུབ་པ་ཡིན་གྱི་ཞེས་བྱ་བ་སྨོས་སོ། །དམིགས་པའི་རིག་བྱར་མ་གྱུར་པའི་མི་དམིགས་པ་ནི་ཐེ་ཚོམ་གྱི་རྒྱུ་ཡིན་ཏེ། རྟོགས་པར་བྱེད་པ་མ་ཡིན་པའི་ཕྱིར་རོ། །མེད་པའི་ཐ་སྙད་གྲུབ་པ་ཞེས་བརྗོད་པ་ནི་མེད་པའི་ཐ་སྙད་ཁོ་ནས་བསྒྲུབ་པར་བྱ་བ་ཡིན་གྱི། དངོས་པོ་མེད་པ་ནི་མ་ཡིན་ནོ། །རང་བཞིན་མི་དམིགས་པ་རང་ཉིད་མེད་པའི་ངོ་བོ་ཉིད་ཡིན་པའི་ཕྱིར་རོ་ཞེས་བྱ་བ་བསྟན་པའི་དོན་དུ་འམ། མེད་པའི་ཐ་སྙད་སྨོས་པ་ཉེ་བར་མཚོན་པའི་དོན་ཡིན་ནོ། །དེས་ན་སྒྲ་དང་ཤེས་པ་དེ་ཡང་གཟུང་ངོ༌། །འདི་ཡིན་ནོ་ཞེས་གང་ལ་ངེས་པར་བྱ་ཞེ་ན་བཤད་པ། དམིགས་པའི་རིག་བྱར་གྱུར་པའི་དོན་གྲུབ་པ་པོའི་མངོན་སུམ་ཉིད་དུ་ཉེ་བར་དམིགས་པ་དེ། ལྡོག་པར་འགྱུར་དུ་ཟིན་ཀྱང་དངོས་པོ་མེད་པ་མི་འཁྲུལ་པའི་ཕྱིར་རོ། །མེད་པ་སྨོས་པ་ནི་མེད་པའི་སྒྲ་དང་ཤེས་པ་ཐ་སྙད་ཉེ་བར་མཚོན་པ་ཡིན་ནོ། །དམིགས་པ་སྨོས་པས་ནི་ཤེས་པ་ཡོངས་སུ་གཟུང་སྟེ། རྟོགས་པ་པོའི་དངོས་པོ་སྤངས་པའོ། །དམིགས་པའི་མཚན་ཉིད་ཀྱི་གྱུར་པ་གང་ཡང་རུང་བའི་འདི་མི་དམིགས་པའི་མཚན་ཉིད་ཀྱི་གྱུར་པ་གང་ཡིན་པར་ཅི་སྟེ་བརྗོད་ཅེ་ན། དེ་ལ་ཞེས་བྱ་བ་ལ་སོགས་པ་སྨོས་ཏེ། དེ་ལ་ཞེས་བརྗོད་པའི་ངག་ཉེ་བར་བཀོད་པའི་དོན་དེ་རང་བཞིན་ཁྱད་པར་ཅན་ནོ། །ཅི་འདི་ཙམ་ཉིད་ཀྱིས་ཡིན་ན་མ་ཞེ་ན། བཤད་པ་རྒྱུ་མཚན་གཞན་ཚོགས་པས་དེའི་རང་བཞིན་ཁྱད་པར་ཅན་ལ་སོགས་པ་དང་གཞན་དབང་པོ་དང་ཡིད་ལ་བྱེད་པ་ལ་སོགས་པ་གང་ཡིན་པ་དེ་ནི་རྒྱུ་གཞན་ཏེ་དེ་དག་མ་ལུས་པའི་ཚོགས་པའོ། །རང་བཞིན་ཁྱད་པར་ཅན་ལ་ལྟོས་ནས་ཡང་ཞེས་བྱ་བའི་སྒྲ་བསྡུ་བ་ཡིན་ནོ། །རང་བཞིན་ཁྱད་པར་ཅན་འདི་ཡང་ཇི་ལྟ་བུ་ཡིན་ཞེ་ན། རང་བཞིན་ཞེས་བྱ་བ་ལ་སོགས་པ་སྨོས་ཏེ། གང་བསྐལ་པ་རྣམ་པ་གསུམ་གྱི་ངོ་བོ་བསྒྲིབས་པ་ནི་ཡུལ་དང་དུས་དང་རང་བཞིན་གྱི་མཚན་ཉིད་རི་རབ་དང་ར་མན་དང་ལྷ་མ་ལ་སོགས་པའི་ངོ་བོ་ལྟ་བུ་དེས་མ་བསྐལ་པ་ནི་རང་བཞིན་ཁྱད་པར་ཅན་དུ་


DTG190_Page_0131
[མ་དཔེ་གཟིགས་ན་འདིར་གནོན།]

བརྗོད་དོ། །གང་གི་བདག་ཉིད་ཅེས་བྱ་བ་ལ་སོགས་པའོ་ནི་གོ་བླའོ། །བདག་གི་ངོ་བོ་མ་ཡིན་པ་ནི། བདག་ནི་ངོ་བོ་མ་ཡིན་པ་སྟེ། གཞན་གྱི་ངོ་བོ་ཞེས་བྱ་བའི་དོན་ཏོ། །དེ་ཡང་འདིར་སྣང་བ་སྟེ་དེ་དང་བྲལ་བ་ནི་མེད་པའོ། །རྣམ་པ་དེས་ན་རྟོགས་པ་པོའི་མངོན་སུམ་དེས་སྣང་བའི་ངང་ཚུལ་ཅན་གྱི་ངོ་བོ་གང་ཡིན་པ་དེ་ལ་དེ་སྐད་དུ་བཤད་དོ། །ཡང་ན་ངོ་བོའི་སྒྲས་ནི་ལྷན་ཅིག་འདུས་པའི་ཁྱད་པར་ཅན་གྱི་འབྲས་བུ་དམིགས་པའི་རྐྱེན་མ་ལུས་པ་ཡོད་ཀྱང་ཉེ་བར་སྤངས་པ་ཡིན་ནོ། །གང་རང་གི་རིགས་སྤངས་པའི་བདག་ཉིད་སྣང་བ་དང་བྲལ་བའི་རང་གི་ཤེས་པ་གཞན་གྱི་རྒྱུ་དང་ཉེ་བར་གྱུར་བ་གང་ཡིན་པའི་རང་བཞིན་ནོ། །དེ་དང་འདྲ་བའི་ཞེས་བྱ་བ་ནི་བསྐལ་བ་རྣམ་པ་གསུམ་གྱིས་བསྐལ་བའི་དོན་གྱི་ངོ་བོ་སྟེ། དེ་ལྟ་བུའི་བདག་ཉིད་མ་ཡིན་པའི་ངོ་བོ་སྣང་བ་དང་བྲལ་བ་ནི་སྣང་བའི་ངོ་བོ་མི་དམིགས་པར་འགྱུར་བ་མེད་པའི་ཐ་སྙད་ཀྱི་ཡུལ་ཡིན་ཏེ། མེད་པའི་ཐ་སྙད་དུ་བྱ་བ་རྟོགས་པར་རུང་བར་འགྱུར་རོ་ཞེས་བྱ་བའི་དོན་ཏོ། །དབང་པོ་དང་སྣང་བ་དང་ཡིད་ལ་བྱེད་པ་ཡོད་དུ་ཟིན་ཀྱང་མེད་པ་ནི་ཉེ་བར་མི་དམིགས་ན་དེ་དང་བྲལ་བ་དེ་ཇི་ལྟར་མེད་པའི་ཐ་སྙད་ཀྱི་ཡུལ་དུ་གྱུར་བ་ཡིན་ཞེ་ན། དམིགས་པའི་རིག་བྱར་གྱུར་པ་གཞན་དག་ཡོད་པ་སྨོས་སོ། །འོ་ན་བུམ་པ་ལ་སོགས་པ་བསྐལ་བ་མ་ཡིན་པ་ཉེ་བར་དམིགས་པའི་རྒྱུ་གཞན་ཡིན་པར་ཡོད་པ་ཡིན་ཏེ། རྒྱུན་ཡོངས་སུ་གྱུར་པ་ལ་ལྟོས་པའི་ཕྱིར་མི་དམིགས་སོ་ཞེ་ན། གཞན་དང་ཉེ་བ་ཙམ་ནི་རང་གི་འབྲས་བུ་སྐྱེད་པའི་ནུས་པ་ཡོངས་སུ་གྱུར་པ་ལས་བྱུང་བ་ནི་རྒྱུ་མ་ཡིན་ཏེ། འདི་ལྟར་ས་དང་ཆུ་ལ་སོགས་པའི་ཚོགས་པ་ཡོད་དུ་ཟིན་ཀྱང་ཏ་ལའི་ས་བོན་གྱིས་རང་གི་འབྲས་བུ་བསྐྱེད་པ་ན་དུས་ཡུན་རིང་པོར་ན་འབྱུང་བ་ཡིན་ལ། ཤ་པ་ལ་སོགས་པའི་ས་བོན་ལས་ནི་དེ་མ་ཐག་ཏུ་འབྱུང་བ་ཁོ་ན་ཡིན་ནོ། །དེ་ལྟར་ན་འདིར་ཡང་འབྱུང་བར་འགྱུར་བའི་ཕྱིར་རོ། །གཞན་ཡང་རྣལ་འབྱོར་པ་མཐུ་དང་ལྡན་པ་དང་ཤ་ཟ་དང་སྒྱུ་མ་བྱེད་པ་ལ་སོགས་པ་བྱིན་གྱིས་བརླབས་པར་གྱུར་བའི་དངོས་པོ་གང་ཡིན་པ་དེ་ཡོད་དུ་ཟིན་ཀྱང་དམིགས་པ་མ་ཡིན་ནོ། །དེ་དང་འདྲ་བའི་དམིགས་པའི་རིག་བྱར་གྱུར་པ་གཞན་ཡོད་ཀྱང་མི་


DTG190_Page_0132
[མ་དཔེ་གཟིགས་ན་འདིར་གནོན།]

དམིགས་པ་ནི་མེད་པའི་ཐ་སྙད་ཀྱི་ཡུལ་དུ་གྱུར་པ་བཤད་པ་དེ་ཇི་ལྟར་ཡིན་ཞེ་ན། ཁྱོད་རིགས་པའི་ཐིགས་པ་ལ་ཡང་འབད་པ་བྱས་པ་ཉུངས་པ་ཡིན་ཏེ། འདི་ལྟར་རང་བཞིན་ཡོད་ལ་དམིགས་པའི་རྐྱེན་ཚང་ན་མངོན་སུམ་དུ་འགྱུར་རོ་ཞེས་དེ་སྐད་དུ་བཤད་དོ། །གང་ཡང་རྒྱུན་ཡོངས་སུ་གྱུར་པ་ལྟོས་པ་འདི་ཉིད་དང་མཐུ་དང་ལྡན་པས་བྱིན་གྱིས་བརླབས་པ་གང་ཡིན་པ་དེ་ནི་རང་བཞིན་ཁྱད་པར་ཅན་དུ་མི་འགྱུར་རོ། །དམིགས་པའི་རྐྱེན་གཞན་ཡང་མ་ལུས་པ་ཉེ་བ་ཡིན་པ་ཡང་རང་གི་ཡུལ་དུ་ངོ་བོ་ལ་ཉེ་བར་དམིགས་པ་མི་བསྐྱེད་པའི་ཕྱིར་རོ། །རྣམ་པ་དེ་ལྟ་བུ་འམ་ཤ་ཟ་བ་ལ་སོགས་པའི་རང་བཞིན་ཁྱད་པར་གྱི་ངོ་བོ་མ་ཡིན་པས་མེད་པའི་ཐ་སྙད་ཀྱི་ཡུལ་དུ་མི་འགྲུབ་བོ། །དེ་ལྟར་འོ་ན་དབང་པོ་ལ་སོགས་པ་དམིགས་པའི་རྐྱེན་གཞན་ཚང་བའི་ཡོད་པ་ནི་མངོན་སུམ་དུ་མ་གྱུར་ན། དེ་ལྟར་ཐམས་ཅད་དུ་མེད་པ། སྒྲུབ་པར་བྱེད་པར་མི་འགྱུར་རོ་ཞེ་ན། རྗེས་སུ་མཐུན་པ་ལེགས་པར་བརྗོད་ན་དབང་པོ་ཉམས་པ་ལ་སོགས་པ་གང་ཡིན་པ་འདི་ཉིད་ཀྱིས་མ་ལུས་པ་མཐོང་བའི་ལམ་དུ་འགྲོ་བ་ཡིན་པས་དེས་ན་མ་ལུས་པ་དེ་ནི་དམིགས་པས་མེད་པའི་ཐ་སྙད་ཀྱི་ཡུལ་དུ་སྒྲུབ་པར་བྱེད་པ་ཡིན་གྱི། ཤ་ཟ་ལ་སོགས་པ་རང་བཞིན་ཁྱད་པར་ཅན་མ་གྱུར་པ་ནི་མ་ཡིན་ནོ་ཞེས་བྱ་བ་གང་ཡིན་པ་དེ་མ་ཐག་ཏུ་བཤད་ཟིན་ཏོ། །རྣམ་པ་དེ་ལྟ་བུ་ཡོད་ཅིང་གཞན་དམིགས་པའི་རྐྱེན་མཐའ་དག་ཉེ་བར་གྱུར་པས་དམིགས་པ་མེད་པར་མི་རིགས་ཏེ། མི་དམིགས་པར་མི་རུང་བའི་ཕྱིར་དང༌། དམིགས་པར་སྐྱེས་པ་འགའ་ཞིག་ལ་ལྟོས་པ་མེད་པའི་ཕྱིར་རོ། །འབྲས་བུའི་དུས་སུ་དངོས་པོ་མེད་པ་མི་རྟོགས་སོ་ཞེས་བྱ་བ་ལ་སོགས་པ་ཚད་མ་རྣམ་པར་དེས་པར་གསལ་བར་བྱས་སོ། །གང་དག་ལ་ཏ་ལ་དང་ཤ་ནའི་ས་བོན་ལ་སོགས་པ་བཞིན་དུ་ངེས་པར་ཚོགས་པ་མ་ལུས་པའི་ཡོངས་སུ་གྱུར་བ་དགོངས་པ་ཕུལ་དུ་བྱུང་བ་གཞུང་གི་བཞེད་པ་ལས་རྟོགས་པ་ཆུང་དུ་རྩོད་པའི་མཆུ་ཅན་རྩོད་པ་དག་ཐམས་ཅད་གཞུང་ཉིད་ཀྱིས་གསལ་བར་རིག་པར་བྱ་བ་སྟེ། གནས་མ་ཡིན་པར་ནན་གྱིས་བརྗོད་པས་ཆོག་སྟེ་གཞག་གོ །དེའི་ཕྱིར་དམིགས་པའི་རིག་བྱར་གྱུར་པའི་མི་དམིགས་པས་མེད་པའི་ཐ་


DTG190_Page_0133
[མ་དཔེ་གཟིགས་ན་འདིར་གནོན།]

སྙད་སྒྲུབ་པར་བྱེད་པ་ཡིན་ནོ་ཞེས་བྱ་བ་འདི་གནས་སོ། །གང་གི་ཕྱིར་དེ་ཉིད་ཡིན་པ་དེའི་ཕྱིར་དེ་ལས་ནི་རྒྱུའོ། །དམིགས་པའི་རིག་བྱར་གྱུར་པ་ལས་མི་དམིགས་པར་བཤད་པ་ལས་རྣམ་པ་གཞན་དུ་བརྟགས་ན་ཐེ་ཚོམ་ཟ་བ་ཡིན་ནོ། །གལ་ཏེ་མེད་པའི་ཐ་སྙད་སྒྲུབ་པར་བྱེད་པ་ནི་མི་དམིགས་པ་ཙམ་གྱི་རྟགས་གཞན་གྱིས་ཁས་བླངས་པ་དེ་དེ་ལས་ཐེ་ཚོམ་ཟ་བར་འགྱུར་བས་མེད་པའི་ཐ་སྙད་སྒྲུབ་པའི་ངེས་པ་མེད་དོ། །དམིགས་པ་ལོག་ཀྱང་དོན་མེད་པར་མི་འགྲུབ་བོ་ཞེས་བྱ་བ་བསྡུ་བའི་དོན་ཡིན་ནོ། །ཡང་ན་སྣང་བ་མི་དམིགས་པས་དོན་དམ་གཞན་དུ་རྟགས་ནི་ཐེ་ཚོམ་ཟ་བ་ཉེ་བ་ཡིན་ཞེས་བཤད་པར་བྱའོ། །དེ་ལ་ཞེས་སྨོས་པས་ནི་སྔ་མ་ལ་ལྟོས་པའོ། །ཡང་ན་དམིགས་པའི་རིག་བྱར་གྱུར་པ་དེ་ལས་གཞན་པ་དེ་ནི་ཐེ་ཚོམ་ཟ་བའི་རྟགས་ཞེས་བཤད་དོ། །འདིར་ཡང་མི་དམིགས་པའི་ཁྱབ་པ་ཇི་ལྟར་ཞེ་ན། འདིར་ཡང་ཞེས་བྱ་བ་ལ་སོགས་པ་སྨོས་ཏེ། རྣམ་པ་དེ་ལྟ་བུ་ཞེས་བྱ་བ་ནི་སྣང་དུ་རུང་བའི་ཡོད་པ་མི་དམིགས་སོ། །ཐམས་ཅད་སྨོས་པ་ནི་ཐམས་ཅད་ཉེ་བར་བསྡུས་ནས་ཁྱབ་པ་བསྟན་པའི་དོན་ཡིན་ནོ། །གལ་ཏེ་རི་བོང་གི་མགོ་ལ་སོགས་པ་འགའ་ཞིག་ལ་རྭ་དམིགས་པའི་རིག་བྱར་གྱུར་པ་ལས་མི་དམིགས་པའི་ཐ་སྙད་ཀྱི་ཡུལ་དུ་གྱུར་ཀྱང་གཞན་སྤྱི་དང་བྱེ་བྲག་དང་ཡན་ལག་ཅན་དང་རྫས་དང་ལྡན་པ་རྣམ་པར་དབྱེ་བ་ལ་སོགས་པ་རྣམ་པ་དེ་ལྟ་བུའི་དེ་བཞིན་དུ་འགྱུར་རོ་ཞེས་བྱ་བའི་ངེས་པ་ཅི་ཞིག་ཡོད་ཅེ་ན། འགའ་ཞིག་ཅེས་བྱ་བ་ལ་སོགས་པ་སྨོས་ཏེ། འགའ་ཞིག་དམིགས་པའི་རིག་བྱར་གྱུར་པ་ལས་མི་དམིགས་པའི་རི་བོང་གི་རྭ་ལ་སོགས་པའི་མེད་པའི་ཐ་སྙད་ཀྱི་ཡུལ་དུ་ཁས་བླངས་པ་ནི་མེད་པའི་ཐ་སྙད་ལ་སོགས་པའི་ཡུལ་དག་ནི་མེད་པ་ཡིན་ནོ་ཞེས་བཤད་པ་དང་མཚན་ཉིད་ཁྱད་པར་མེད་པའི་ཕྱིར་རོ། །དེའི་མེད་པའི་མཚན་ཉིད་དེ་ཇི་སྐད་བཤད་པའི་མི་དམིགས་པའོ། །མཚན་ཉིད་སྨོས་པ་ནི་རྒྱུ་དང་སྒྲུབ་པར་བྱེད་པ་ཡིན་ཏེ། དེ་དང་ཁྱད་པར་མེད་པ་ཅན་ཡིན་པའི་ཕྱིར་རོ། །སྤྱི་དང་བྱེ་བྲག་ཅན་དང་ཡན་ལག་ཅན་རྫས་ལ་སོགས་པ་ཞེས་བྱ་བ་ཚིག་ལྷག་མའོ། །འདི་


DTG190_Page_0134
[མ་དཔེ་གཟིགས་ན་འདིར་གནོན།]

སྐད་སྟོན་པ་ཡིན་ཏེ། རི་བོང་གི་རྭ་ལ་སོགས་པ་མེད་པའི་ཐ་སྙད་ཀྱི་ཡུལ་དུ་ཅིའི་ཕྱིར་འདོད། ཇི་སྐད་བཤད་པའི་མི་དམིགས་པ་དེའི་རྒྱུ་མཚན་དུ་ཡོད་པའི་ཕྱིར་རོ་ཞེ་ན། གལ་ཏེ་དེ་ལྟར་སྤྱི་དང་བྱེ་བྲག་ལ་སོགས་པ་ཡང་ཡོད་པ་ཡིན་ན་ཅིའི་ཕྱིར་དེ་དག་མེད་པའི་ཐ་སྙད་ཀྱི་ཡུལ་ཉིད་དུ་ཁས་བླང་པར་མི་བྱ། དེ་ལྟ་མ་ཡིན་ན། དེ་ལ་ཡང་དེར་མི་འགྱུར་རོ། །སྐྱེས་བུའི་འདོད་པའི་དབང་གིས་ཡུལ་གྱི་རྣམ་པར་དབྱེ་བ་ནི་མི་རིགས་སོ། །རྣམ་པ་དེ་ལྟ་བུ་ཞེས་བྱ་བ་ལ་སོགས་པ་དེ་ཉིད་རྣམ་པར་འབྱེད་པ་རྣམ་པ་དེ་ལྟ་བུ་སྣང་དུ་ཡོད་པའི་མི་དམིགས་པའི་མེད་པར་ཁས་མི་ལེན་ན་ཞེས་བྱ་བ་ལ་སོགས་པའི་ཡུལ་ཁས་མི་ལེན་ཏོ་ཞེས་བྱ་བའི་དོན་ཏོ། །མེད་པ་སྨོས་པ་ནི་མེད་པའི་ཐ་སྙད་པ་ལ་སོགས་པའི་ཡུལ་ཉེ་བར་མཚོན་པ་ཡིན་ནོ། །དམིགས་སུ་རུང་བའི་མི་དམིགས་པ་དེ་ཡང་དགག་པའི་གཏན་ཚིགས་ཡིན་ནོ་ཞེས་བྱ་བའི་དོན་ཏོ། །རི་བོང་གི་རྭ་ལ་སོགས་པ་གཞན་ལ་རྣམ་པ་འདི་ལྟ་བུའི་མེད་པར་རུང་བ་སྲིད་པ་ཡིན་ནོ་ཞེས་བྱ་བའི་དོན་ཏོ། །རྣམ་པ་དེ་ལྟ་བུའི་སྣང་དུ་རུང་བ་ནི་དམིགས་པའི་རྐྱེན་གཞན་དག་ཡོད་ན་མི་དམིགས་པར་མི་འགྱུར་རོ། །དེ་ཅི་དང་འདྲ་བ་ཞིག་ཅེ་ན། བཤད་པ་གཞན་དམིགས་པའི་རྐྱེན་འགའ་ཞིག་ལ་ལྟོས་པ་ཡོད་པ་མ་ཡིན་ནོ་ཞེས་བྱ་བར་དགོངས་སོ། །དེས་ན་འདི་ནི་རྣལ་མ་ཉིད་གསལ་བར་བྱེད་པ་ཡིན་ནོ། །མི་དམིགས་པ་ཅི་འདྲ་བ་ཞིག་ཅེ་ན། དམིགས་པའི་རིག་བྱར་གྱུར་པ་མེད་པ་ཡིན་པའི་ཕྱིར་འདིར་དམིགས་པའི་རིག་བྱར་གྱུར་པ་དེ་ལས་མ་དམིགས་པ་དེ་ཙམ་ལས་རྒྱུ་མཚན་ཡིན་ཏེ། མེད་པའི་ཐ་སྙད་དུ་རུང་བའི་ཕྱིར་རོ། །དེས་ན་འདིར་ཐ་སྙད་ཀྱི་རྒྱུ་མཚན་གཞན་མ་ཡིན་པར་བསྟན་ཏོ། །དེ་ཉིད་གང་ལས་ཤེ་ན། གཞན་ཏེ་ཞེས་བྱ་བ་ལ་སོགས་པ་སྨོས་ཏེ། ཇི་སྐད་བཤད་པའི་མི་དམིགས་པ་སྤངས་ན་མེད་པའི་ཐ་སྙད་ཀྱི་རྒྱུ་མཚན་གཞན་མེད་པའི་ཕྱིར་རོ་ཞེས་བྱ་བ་བསྡུ་བའི་དོན་ཏོ། །གང་དང་གང་ལས་ཅུང་ཟད་ཅིག་ནུས་པ་མེད་པ་དེ་དང་དེ་ནི་མེད་པའི་ཐ་སྙད་ཀྱི་ཡུལ་ཡིན་ཏེ། དཔེར་ན་ནམ་མཁའི་པད་མོ་བཞིན་ནོ། །དེ་བཞིན་དུ་མངོན་པར་འདོད་པའི་ཡུལ་ལ་སོགས་པ་ལ་ཅུང་ཟད་ཅིག་ནུས་པ་མེད་པའི་ཕྱིར་མེད་པར་འདོད་


DTG190_Page_0135
[མ་དཔེ་གཟིགས་ན་འདིར་གནོན།]

པ་ཡིན་ནོ། །ནུས་པ་ཐམས་ཅད་ཀྱིས་དབེན་པ་ཉིད་མེད་པའི་ཐ་སྙད་ཀྱི་རྒྱུ་མཚན་དུ་གྱུར་ན། དེ་ལྟར་འབྲེལ་བ་མེད་པར་གཟེངས་བསྟོད་ནས་བརྗོད་པ་ཡིན་ནོ། །དེ་ནི་རྒྱུ་མཚན་མེད་པའི་ལས་ཡིན་ནོ་ཞེས་གཞན་འགའ་ཞིག་དེ་སྐད་དུ་སྨྲ་བའི་དགོས་པ་ནི། གལ་ཏེ་ནུས་པ་ཐམས་ཅད་ཀྱིས་དབེན་པའི་རྒྱུ་མཚན་ཡིན་ཞེ་ན། འདི་ལྟར་ལན་ནི། དེ་ནི་དེ་ལྟ་ཡིན་ན་ཞེས་བྱ་བ་ལ་སོགས་པ་སྨོས་ཏེ། འདི་སྙམ་དུ་སེམས་པ་ཡིན་ཏེ། ནུས་པ་ཐམས་ཅད་ཀྱིས་དབེན་པའི་རྒྱུ་མཚན་ཡིན་ནོ་ཞེས་བཤད་པ་ལེགས་ན་འོན་ཀྱང་དེ་ཉིད་ཐམས་ཅད་ཀྱིས་དབེན་པའི་དོན་ཡིན་པར་ཇི་སྐད་བཤད་པའི་མ་དམིགས་པ་སྤངས་ནས་ཇི་ལྟར་རྟོགས་པར་འགྱུར། །ནུས་པ་ཐམས་ཅད་ཀྱིས་དབེན་པ་གང་གིས་མེད་པའི་ཐ་སྙད་ཀྱི་རྒྱུ་མཚན་དུ་གྱུར་པ་ཡིན་པ་འདིར་མི་ཤེས་པ་ཉིད་ཀྱིས་དེའི་རྒྱུ་མཚན་འོས་པ་མ་ཡིན་ཏེ། ཤེས་བྱེད་ཀྱི་གཏན་ཚིགས་ཀྱི་དབང་དུ་བྱས་པའི་ཕྱིར་རོ། །ནུས་པ་ཐམས་ཅད་ཀྱིས་དབེན་པར་ཇི་སྐད་བཤད་པའི་མི་དམིགས་པ་ཅིའི་ཕྱིར་རྟོགས་པ་ཡིན་ཞེ་ན། དེ་རྟོགས་པའི་ཐབས་གཞན་མེད་པའི་ཕྱིར་རོ་ཞེས་བྱ་བ་སྨོས་སོ། །གང་གི་ཚེ་ཇི་སྐད་དུ་བཤད་པའི་མི་དམིགས་པ་དེས་ནུས་པ་ཐམས་ཅད་ཀྱིས་དབེན་པར་རྟོགས་པར་གྱུར་པ་དེའི་ཚེ། རྟོགས་པ་ཡོད་ན་མེད་པའི་ཐ་སྙད་དུ་འགྱུར་རོ། །ཕྱིར་ཞེས་བྱ་བ་ནི་དེའི་ཕྱིར་ཏེ། ཇི་སྐད་བཤད་པའི་མི་དམིགས་པ་འདི་ནི་མེད་པའི་ཐ་སྙད་དེའི་རྒྱུ་མཚན་དུ་བརྗོད་པ་ཡིན་ནོ། །སླར་ཡང་གཞན་དག་མེད་པ་ལ་སོགས་པའི་རྒྱུ་མཚན་གཞན་འགའ་ཞིག་ཏུ་དེ་སྐད་དུ་བརྗོད་པ་ཡིན་ནོ་ཞེས་དོགས་པར་ནི། གལ་ཏེ་སྒྲ་དང་བློ་དང་ཞེས་བྱ་བ་ལ་སོགས་པའོ། །འདིར་བསམ་པ་ནི་འདི་ཡིན་ཏེ། བློ་དང་སྒྲ་དང་དོན་བྱེད་པ་དག་ལས་ཡོད་པར་ཐ་སྙད་དུ་གྱུར་ཏེ། དེ་ལྟར་ན་དེ་ལ་འཇུག་པས་དངོས་པོ་ཡོད་པར་སྒྲུབ་པར་བྱེད་དོ། །དེ་ཐ་དད་པ་དང་ཐ་མི་དད་པས་དངོས་པོ་ཐ་མི་དད་པར་འགྱུར་རོ་སྙམ་དུ་སེམས་དང་དེ་བཟློག་པའི་རང་གི་རྒྱུ་མཚན་གྱིས་ཡོད་པའི་ཐ་སྙད་བཟློག་པ་ཡིན་ཏེ། མེ་དང་དུ་བ་བཞིན་དེ་བཟློག་པས་མེད་པ་ཐ་སྙད་ཡིན་ནོ།།


DTG190_Page_0136
[མ་དཔེ་གཟིགས་ན་འདིར་གནོན།]

ཡོད་པའི་ཐ་སྙད་དང༌། མེད་པའི་ཐ་སྙད་དག་ཕན་ཚུན་རྣམ་པར་བཅད་ནས་གནས་པའི་ངོ་བོ་ཉིད་ཀྱིས་གཅིག་སྤངས་ན་གཞན་ཡོངས་སུ་གཅོད་པ་ནི་མེད་ན་མི་འབྱུང་བ་ཡིན་པའི་ཕྱིར་རོ། །བློ་ལ་སོགས་པ་དེས་ཀྱང་མེད་པའི་ཐ་སྙད་ཀྱི་རྒྱུ་མཚན་ཡིན་པའི་ཐ་སྙད་ཀྱི་རྒྱུ་མ་ཡིན་པའི་ཕྱིར་དང་གཞན་མེད་པའི་ཕྱིར་རོ་ཞེས་བྱ་བ་ལ་སོགས་པའི་དེ་སྐད་བཤད་པའི་རིགས་པ་མ་ཡིན་པས་འདི་ཡང་བསལ་བའི་ཕྱིར། ཇི་སྐད་དུ་ཞེས་བྱ་བ་ལ་སོགས་པ་སྨོས་ཏེ། ཇི་སྐད་དུ་བཤད་པའི་བློ་ལ་སྣང་བ་ནི་སྒྲུབ་པ་པོའི་མངོན་སུམ་ལ་སྣང་བ་མེད་པའི་ངོ་བོ་སྣང་བ་སྟེ། ཇི་སྐད་དུ་བཤད་པའི་སྣང་བ་གང་ཡིན་པ་ཞེས་བྱ་བར་སྦྱར་རོ། །གང་གི་ངོ་བོ་མ་ཡིན་པ་ཞེས་བྱ་བ་ལ་སོགས་པ་བཤད་པ་དེས་ཡོད་པའི་ཐ་སྙད་དུ་འགྱུར་ཏེ། དངོས་པོ་མངོན་སུམ་དུ་འཛིན་པའི་ཕྱིར་རོ། །དེ་ལས་བཟློག་པའི་དངོས་པོ་མེད་པ་དེ་ནི་མེད་པའི་ཐ་སྙད་ཡིན་ཏེ། དམིགས་པའི་རྐྱེན་གཞན་ཡོད་ཀྱང་ཞེས་བྱ་བ་ནི་ངག་ཡོངས་སུ་རྫོགས་པའི་འབྲས་བུ་ཡིན་ནོ། །གཞན་དུ་ནི་ཐེ་ཚོམ་སྐྱེ་བར་འགྱུར་རོ། །དངོས་པོ་ཡོད་པའི་རྐྱེན་གཞན་ཚང་ན་ལྡོག་པར་མི་འགྱུར་རོ་ཞེས་བྱ་བ་འདི་ནི་ཁོ་བོ་ཅག་གིས་སྔར་བསྟན་པ་ཡིན་ནོ། །དེས་ན་རྣམ་པ་འདི་ལྟ་བུ་བློ་མངོན་པར་འདི་ནི་ཁྱེད་དང་འུ་ཅག་དེ་འདོད་པ་གཅིག་པར་དེ་ལྟར་ན་ཡང་ཁོ་བོ་ལ་མི་འདོད་པ་བཤད་པ་ཅུང་ཟད་ཀྱང་མེད་དོ། །དེ་ལྟ་མ་ཡིན་ན་དེ་ནི་འཁྲུལ་བར་འགྱུར་རོ་ཞེས་བསྟན་ཏོ། འཁྲུལ་པ་དེ་ཉིད་བསྟན་པ་ནི། མངོན་སུམ་གྱི་ཡུལ་མ་ཡིན་ནོ་ཞེས་བྱ་བ་ལ་སོགས་པ་སྨོས་སོ། །རྟགས་ལས་སྐྱེས་པ་ནི་རྟགས་ལས་སྐྱེས་པ་སྟེ། རྗེས་སུ་དཔག་པ་ཞེས་བྱ་བའི་དོན་ཏོ། །དེས་ཡོད་པའི་ཐ་སྙད་དུ་བྱེད་པ་ནི། ལྐོག་ཏུ་གྱུར་པའི་དོན་ཡིན་ནོ། །འབའ་ཞིག་མ་ཡིན་ཏེ་བཤད་མ་ཐག་པའི་རང་གི་ངོ་བོ་ནི་རང་གི་གཟུང་བར་བྱ་བ་ཡིན་པས་ཀྱང་ཞེས་བྱ་བ་སྨོས་སོ། །རྟགས་ཐམས་ཅད་ཀྱིས་ཡོད་པར་འགྱུར་རམ་ཞེ་ན། མ་ཡིན་ཏེ་འགའ་ཞིག་ཅེས་བྱ་བ་སྨོས་སོ། །རང་བཞིན་དང་འབྲས་བུའི་རྟགས་གཉིས་ཀྱི་སྟོབས་ལས་སྐྱེས་བ་ཡིན་ནོ་ཞེས་བྱ་བའི་དོན་ཏོ། །


DTG190_Page_0137
[མ་དཔེ་གཟིགས་ན་འདིར་གནོན།]

མི་དམིགས་པ་ནི་མེད་པའི་ཐ་སྙད་སྒྲུབ་པར་བྱེད་པའི་ཕྱིར་རོ་ཞེས་བྱ་བར་དགོངས་སོ། །གལ་ཏེ་དེ་ལྟ་ན་དེ་ལྟས་ཇི་ལྟར་འཁྲུལ་བར་འགྱུར་ཞེ་ན། མེད་པ་ཐ་སྙད་ནི་ཞེས་བྱ་བ་ལ་སོགས་པ་སྨོས་ཏེ། དེ་ལས་བཟློག་པ་ནི་ཇི་སྐད་བཤད་པའི་རྟགས་ལས་སྐྱེས་པ་མ་ཡིན་པའི་བློ་དེ་བཟློག་པ་ན་མ་ངེས་པ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། བསྐལ་བའི་དོན་ཕུང་པོ་ལ་སོགས་པ་བསྐལ་བ་རྟོགས་པའི་མངོན་སུམ་གྱི་ཚད་མ་ལྡོག་པ་ཡང་ཐེ་ཚོམ་རྒྱུ་ཡིན་པའི་ཕྱིར་རོ། །མེད་པའི་དོན་ལ་ཞེས་བྱ་བ་ནི་ལྷག་མའོ། །རྟོགས་པ་པའི་མངོན་སུམ་ཞེས་བྱ་བ་ནི་དྲུག་པའོ། །ཤེས་བྱ་མ་ལུས་པའི་སྒྲུབ་པ་སྤངས་པའི་མངོན་སུམ་འདི་ལོག་ན་ནི་ཚེ་ཚོམ་མི་ཟ་བར་བརྗོད་པ་ཡིན་ནོ། །གཞན་ནི་རྗེས་སུ་དཔག་པ་དང་ལུང་ངོ༌། །ལུང་གི་ཚད་མ་འདིས་རྟོགས་པར་བྱ་བ་རྗོད་པ་ལ་ཚད་མ་ཡོད་པ་མ་ཡིན་ཏེ། མེད་ན་མི་འབྱུང་བ་མེད་པའི་ཕྱིར་རོ། །སྒྲ་དང་དངོས་པོ་རྣམས་ལྷན་ཅིག་ཏུ་དོན་མི་འགྲུབ་སྟེ་དེ་དང་དེ་ནི་སྨྲ་བ་པོ་བསམ་པ་སྟོན་པ་ཡིན་ནོ་ཞེས་བརྗོད་དོ། །འདིར་བསམ་པ་ནི་འདི་ཡིན་ཏེ། གལ་ཏེ་ཚད་མ་ལོག་པ་མངོན་སུམ་མེད་པ་དེ་ལྟ་ན་ཡང་མེད་དོ་ཞེས་གང་ལས་ངེས་པར་འགྱུར། །ཇི་ལྟར་མ་ལ་ཡའི་རི་ཡུལ་ན་རྒྱུད་ང་དཱུར་བའི་ལོ་མ་ལ་སོགས་པ་ཚད་མའི་སྤྱོད་ཡུལ་ལས་པའི་དངོས་པོ་ཅན་བསྟན་དུ་ཡོད་པར་གནས་པ་མ་ཡིན་ནོ་ཞེས་ཞེས་བརྗོད་པར་ནུས་པ་མ་ཡིན་ཏེ། ཚད་མ་མེད་པ་ནི་ཡུལ་མཐའ་དག་གིས་ཁྱབ་པར་བྱེད་པ་དང་རྒྱུ་མ་ཡིན་པའི་ཕྱིར་རོ། །དེའི་ངོ་བོ་ཚང་བས་དོན་ལ་ནི་ངེས་པ་ནི་ངེས་པར་གཞན་ལྡོག་པ་མ་ཡིན་ཏེ་ཧ་ཅན་ཐལ་བར་འགྱུར་བའི་སྐྱོན་དུ་འགྱུར་བ་འདི་སྔ་མ་བཞིན་དུ་རིག་པར་བྱའོ། །གང་གི་ཕྱིར་བཤད་ན། བསྟན་བཅོས་ལ་བརྟེན་ཞེས་འབྲེལ་པ་མེད་པའི་དོན་མང་པོ་དབང་པོ་ལས་འདས་པ་དང་རྟགས་མེད་པ་དེ་དག་ཇི་ལྟར་མི་དམིགས་པས་མེད་པར་འགྱུར་བ་ཡིན། འོ་ན་འདི་རྟགས་ལས་སྐྱེས་པར་འདོད་པ་མེད་པ་ཐ་སྙད་ཀྱི་གཏན་ཚིགས་ཉིད་དགག་པ་རྩོམ་པ་ན་དེ་ལས་བཟློག་པ་ཡིན་ནོ་ཞེས་བྱ་བ་ལ་སོགས་པ་བརྗོད་པས་མངོན་སུམ་དང་ལུང་ལ་ལྟོས་པ་དེ་སྐབས་མ་ཡིན་དེ་ཅིའི་ཕྱིར་བརྗོད་ཅེ་ན། དེ་


DTG190_Page_0138
[མ་དཔེ་གཟིགས་ན་འདིར་གནོན།]

ནི་རིགས་པ་ན་ཚད་མ་ཐམས་ཅད་ལོག་པ་ཐམས་ཅད་ཚད་མ་ཡིན་པར་བསྟན་པས་འདི་ཡང་ངེས་པ་མེད་པར་བསྟན་ཅིང་བཤད་པ་ནི་བློ་གྲོས་བཟང་པོས་རྟོགས་པའི་དགོངས་པ་ཡིན་ནོ། །ཡོད་པའི་ཐ་སྙད་དང་མེད་པའི་ཐ་སྙད་དག་ཕན་ཚུན་རྣམ་པར་གཅོད་པའི་མཚན་ཉིད་དུ་གནས་པ་གཅིག་མེད་ན་མི་འབྱུང་བར་ཡོད་པའི་ཕྱིར་རོ། །བསྐལ་བའི་རྒྱུ་མཚན་དེས་ཡོད་པའི་ཐ་སྙད་པ་ན་མེད་པའི་ཐ་སྙད་དུ་འགྱུར་རོ་ཞེ་ན། སྨྲས་པ་ནི་བདེན་ན་དེ་ཡང་རིགས་པ་ནི་མ་ཡིན་ཏེ། འདི་ལྟར་སྐོར་དུ་ཡོད་པའི་དོན་ལ་ཡོད་པའི་ཐ་སྙད་ལོག་པ་ན། དེའི་རྒྱུ་མཚན་མེད་པས་ཀྱང་གཉི་ག་ཡང་འདི་ལྟར་འདིར་མི་དམིགས་པར་འགྱུར། རང་དང་བཟློག་པའི་གཏན་ཚིགས་ཡོད་པ་དང་མེད་པ་དག་གིས་ཡོད་པའི་ཐ་སྙད་དགག་པའི་འབྲས་བུ་ཅན་ཉིད་དུ་མཚུངས་ཀྱང་གཅིག་ནི་ཐེ་ཚོམ་ཅན་ཡིན་ལ། གཞན་ལས་ནི་ལྡོག་པ་ཡིན་ནོ་ཞེས་བྱ་བར་བརྗོད་ལ། ཐེ་ཚོམ་ཟ་བ་ཡིན་ནོ།། གལ་ཏེ་དེ་ལྟ་ན་མེད་པའི་ཐ་སྙད་ངེས་པ་དེ་ལ་རིགས་པར་མི་འཐད་པར་འགྱུར་རོ། །གང་ལ་ཡོད་པའི་ཐ་དད་དུ་ངེས་པར་ལྡོག་པ་དང་དེ་ལ་མེད་པའི་ཐ་སྙད་ཀྱང་རིགས་པ་ཁོ་ན་ཡིན་ནོ་ཞེ་ན། གཞན་འཇུག་པའི་འབྲས་བུ་ཅན་ཡང་ཡིན་ནོ་ཞེས་བྱ་བར་བཤད་ཟིན་ཏོ། །མེད་པའི་དངོས་པོ་རྣམ་པར་གཅོད་པས་ཡོད་པའི་ཞར་ལ་ངེས་པ་ནི་མ་ཡིན་ཏེ། མོ་གཤམ་གྱི་བུ་དང་ནམ་མཁའི་པདྨོ་ལ་སོགས་པ་མེད་པའི་བཀག་པས་ཡོད་པའི་གནས་སྐབས་སུ་གྱུར་པ་མ་ཡིན་གྱི། དགག་པ་ཙམ་དུ་འགྱུར་བ་ཡིན་གྱི། དེ་དག་ཕན་ཚུན་རྣམ་པར་བཅད་ནས་གནས་པའི་ཕྱིར་རོ། །དེ་བཞིན་དུ་འདིར་ཡང་མངོན་སུམ་མ་ཡིན་པས་ཡོད་པའི་ཐ་སྙད་རྣམ་པར་གཅད་པ་ན་སྒྲུབ་པར་གྱུར་པ་མེད་པ་ཐ་སྙད་ཤུགས་ལས་བྱུང་བ་མ་ཡིན་ཏེ། ཡོད་པའི་ཐ་སྙད་རྣམ་པར་གཅད་པ་ཙམ་ཡིན་པའི་ཕྱིར་རོ། །དེ་ཡོད་པ་དང་མེད་པ་ཕན་ཚུན་ཡོངས་སུ་སྤངས་ཏེ་གནས་པའི་ཕྱིར་རོ། །དྲི་མ་མེད་པའི་རིགས་པས་དེ་ཁོ་ན་ཉིད་གསལ་བར་རབ་ཏུ་རྟོགས་པའི་ཤེས་རབ་ཀྱིས་མ་ལུས་པའི་མུ་སྟེགས་ཅན་གྱི་གཞུང་གི་རྨོངས་པ་སྤངས་པའི་ཆོས་ཀྱི་གྲགས་པས་བདག་མེད་པ་ལ་སོགས་པ་རྣམ་པར་གཅོད་པ་ཡང་དེ་བཞིན་དུ་འགྱུར་རོ་ཞེས་བྱ་བ་ལ་སོགས་


DTG190_Page_0139
[མ་དཔེ་གཟིགས་ན་འདིར་གནོན།]

པ་འདི་སྐད་བཤད་པ་ཡིན་པས་ཆོག་གོ །ད་ནི་བློ་དང་སྒྲ་ཐུན་མོང་དུ་གྱུར་པའི་ཡོད་པ་ལ་འཇུག་པའི་གཏན་ཚིགས་ཀྱང་ཇི་ལྟར་མེད་པ་ཡིན་ཞེ་ན། བློ་དང་སྒྲ་ཞེས་བྱ་བ་ལ་སོགས་པ་སྨོས་ཏེ། དེ་ལ་རིམ་པ་ཇི་ལྟ་བ་བཞིན་དུ་སྦྱར་བར་བྱའོ། །ཅིའི་བློ་དང་སྒྲ་ལ་སོགས་པ་དངོས་པོ་ཡོད་པ་ཐམས་ཅད་སྒྲུབ་པར་བྱེད་པ་ཡིན་ནམ། དེ་དག་ཐ་སྙད་པ་དང་ཐ་སྙད་མེད་པ་འམ་དངོས་པོ་ཐ་དད་པ་དང་ཐ་དད་པ་མེད་པས་སམ་ཡོད་དམ་མེད་པ་ཞེས་བྱ་བ་ལ་སོགས་པ་ལ་ཡང་ཡིན། ཐམས་ཅད་སྨོས་པ་ནི་འགའ་ཞིག་སྒྲུབ་པར་བྱེད་པའོ་ཞེས་བྱ་བའོ། །གསལ་བར་བྱ་བ་ཉིད་གང་ཡིན་ཞེ་ན། བཤད་པ་འདས་པ་དང་མ་འོངས་པ་ལ་སོགས་པ་མེད་པ་དག་ལ་ཡང་འཇུག་པའི་ཕྱིར་རོ་ཞེས་བྱ་བར་སྦྱར་རོ། །སོགས་པ་སྨོས་པ་ནི་ནམ་མཁའི་ཨུཏྤལ་ལ་སོགས་པ་ཡོངས་སུ་གཟུང་ངོ༌། །ཡུལ་མེད་པ་ཡིན་ན་དེ་རྣམས་ལ་དེ་དག་ཇི་ལྟར་འཇུག་པར་རིགས་པ་ཡིན་ཞེ་ན། བཤད་པ་ཅི་ཞིག་ལྟར་དེའི་ངོ་བོ་མྱོང་བས་བྱས་བའི་བག་ཆགས་སྨིན་པ་ལས་བྱུང་བ་ཡིན་ནོ་ཞེས་བྱ་བའི་དོན་ཏོ། །དེ་དག་དངོས་པོ་འབྲེལ་བ་མེད་པ་དག་ཡིན་ནོ་ཞེས་བྱ་བར་དགོངས་སོ། །འཁོར་ལོས་བསྒྱུར་བ་དུང་གིས་ཞེས་བྱ་བ་སོགས་པའི་རྣམ་པ་དེས་འདིའི་དངོས་པོ་ཡོད་པ་སྒྲུབ་པ་མ་ཡིན་ནོ། །དེའི་རྣམ་པ་བཤད་པ། སྣ་ཚོགས་པ་དང་གཅིག་པའི་བྱ་བ་བྱེད་པའི་ངང་ཚུལ་ཅན་གང་ཡིན་པ་དེ་དག་དེ་སྐད་དུ་བརྗོད་པ་དེ་དག་ལ་འཇུག་པའི་རྒྱུས་སོ། །ཅིའི་ཕྱིར་དེ་དག་ལ་རྣམས་འཇུག་ཅེ་ན། དེ་ཡོད་པར་བསྟན་པའི་ཕྱིར་རོ། །དེ་དག་སྣ་ཚོགས་པ་དང་གཅིག་པའི་བྱ་བ་བྱེད་པ་དང་ཡོད་པར་བསྟན་ཏེ། སྣ་ཚོགས་པ་དོན་གྱི་བྱ་བ་བྱེད་པ་དང་གཅིག་གི་དོན་གྱི་བྱ་བ་བྱེད་པར་བརྗོད་པའི་དོན་ཡིན་ནོ་ཞེས་བྱ་བའི་དོན་ཏོ། །རྒྱུ་འདི་ཉིད་ཀྱིས་དེ་དངོས་པོའི་དེ་ཉིད་ཡིན་ཞེས་བཤད། སྣ་ཚོགས་པ་དང་གཅིག་པའི་བདག་ཉིད་མེད་པའི་བདག་ཉིད་ཀྱང་དེའི་དངོས་པོ་ཡིན་ནོ་ཞེས་སྒྲོ་བཏགས་སོ། །བློ་དང་སྒྲ་དག་གིས་གཅིག་དང་དུ་མ་ངོ་བོ་མ་ཡིན་ལ། དེས་ནི་འདི་ནི་དངོས་པོ་ཐ་དད་པ་འམ། ཐ་མི་དད་པ་སྒྲུབ་པར་བྱེད་པ་ནི་མ་ཡིན་ནོ། །འདིའི་དཔེ་སྟོན་པར་བྱེད་པ་ལ་རྒྱལ་པོ་མང་པོས་


DTG190_Page_0140
[མ་དཔེ་གཟིགས་ན་འདིར་གནོན།]

བཀུར་བས་ནི་འདས་པའི་དཔེའོ། །ཇི་ལྟར་ཞེས་བྱ་བ་ཉེ་བར་བཀོད་པའོ། །འཁོར་ལོས་སྒྱུར་བ་དུང་ཞེས་བྱ་བ་ལ་སོགས་པ་ནི་མ་འོངས་པ་ལ་འཇུག་པའོ། །རི་བོང་གི་རྭ་ཞེས་བྱ་བ་ལ་སོགས་པ་ཤད་པ་ཡིན་ནོ། །བསྟན་དུ་མེད་པ་ནི་མིག་གི་རྣམ་པར་ཤེས་པ་སྐྱེས་པའི་ཕྱིར་རོ། ཐོགས་པ་དང་བཅས་པ་ནི་རང་གི་ཡུལ་དུ་གཞན་སྐྱེས་བའི་དགག་བྱེད་པའི་ཕྱིར་རོ། །འདི་དག་སྣ་ཚོགས་པའི་དོན་བྱེད་པ་དག་ལ་འཇུག་པ་དེའི་དཔེ་ཡིན་ནོ། །གང་གི་ཕྱིར་མིག་གི་རྣམ་པར་ཤེས་པ་ལ་སོགས་པའི་འབྲས་བུ་སྐྱེད་པར་བྱེད་པའི་ཕྱིར་གཅིག་གི་ངོ་བོ་ཡིན་ཡང་དུ་མའི་ངོ་བོ་བསྟན་དུ་ཡོད་པ་ལ་སོགས་པའི་ཡུལ་དུ་བྱེད་པ་དེའི་ཕྱིར་དངོས་པོ་ཐ་དད་པ་སྒྲུབ་པར་མི་བྱེད་དོ། །བུམ་པ་ཞེས་བྱ་བ་ནི་དོན་གྱི་བྱ་བ་བྱེད་པ་དག་གི་དཔེ་ཡིན་ནོ། འདི་ལྟར་གཟུགས་དང༌། དྲི་དང༌། རོ་དང༌། རེག་བྱ་དག་མང་པོས་ཆུ་འཛིན་པའི་ཁྱད་པར་ལ་སོགས་པ་འབྲས་བུ་སྒྲུབ་པར་ནུས་པའི་ཕྱིར་ཐ་མི་དད་པའི་ངོ་བོ་དེ་ཡུལ་ཉིད་ཀྱིས་བདག་ཉིད་ཡོད་པར་བྱེད་དོ། །དེས་ན་དེ་ནི་ཐ་དད་པའི་སྒྲུབ་པར་མི་ནུས་སོ། །འོན་ན་ནི་འདས་པ་དང་མ་འོངས་པ་དང་རི་བོང་གི་རྭ་ལ་སོགས་པ་དག་ལ་དེ་འཇུག་པ་ན། དངོས་པོ་སྒྲུབ་པར་ཤིན་ཏུ་རྟོགས་པར་མེད་ཀྱི་བློ་དང་སྒྲ་བསྟན་དུ་ཡོད་པ་ལ་སོགས་པ་དངོས་པོ་ཐ་དད་པ་མི་སྒྲུབ་པ་ཞེས་བྱ་བའི་འདི་ལྟར་རྟོགས་པར་ཞེ་ན། མ་ཡིན་ཏེ་ཞེས་བྱ་བ་ལ་སོགས་པ་སྨོས་སོ། །དངོས་པོ་གཅིག་ཡིན་ན་ཅིའི་ཕྱིར་གཟུགས་ལ་སོགས་པ་དེ་ཉིད་ཉེ་བར་བསྡུ་བ་ཡིན་སྙམ་ན། བསྟན་དུ་ཡོད་པ་དང་ཐོགས་པ་དང་བཅས་པའི་ངོ་བོར་འགྱུར་པ་ནི། དེ་ལྟར་གཞི་མཐུན་པ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །དེ་ལྟ་མ་ཡིན་ན་རྒྱུ་ཐ་དད་པའི་ཕྱིར་མེ་ཏོག་བ་ཀུ་ལ་དང༌། ཨུཏྤལ་དང༌། པདྨ་དང༌། སྣ་མ་དང༌། མ་ལི་ཀ་ལ་སོགས་པ་སྒྲ་ཐ་དད་པ་བཞིན་དུ་གཞི་མཐུན་པར་མི་འགྱུར་རོ་ཞེས་བྱ་བར་དགོངས་སོ། །གཟེགས་ཟན་དང་རྐང་མིག་གི་རྗེས་སུ་འབྲངས་བ་ཕྱི་ཅི་ལོག་ཏུ་བསྟན་པ་རྗེས་སུ་ཆགས་པ་སྐྱེས་པའི་རྣམ་པར་རྟོག་པའི་དྲི་མས་གཡོགས་པའི་མིག་ཅན་གྱིས་བརྗོད་པ་སྣ་ཚོགས་ཡིན་དུ་ཟིན་ཀྱང་ཁས་བླངས་ནས་གཅིག་ལ་ཉེ་བར་བསྡུ་བ་ལ་འགལ་བ་ཉིད་ཀྱི་


DTG190_Page_0141
[མ་དཔེ་གཟིགས་ན་འདིར་གནོན།]

རྒྱུ་མཚན་ནི་བསྟན་དུ་མེད་པ་ལ་སོགས་པ་དང་འབྲེལ་པའི་ཕྱིར་ཞེ་ན། འདི་དག་ཐམས་ཅད་མ་བཏགས་ན་ཉམས་དགའ་བ་ཡིན་ན་དེས་ན་དཔྱད་པ་དང་གཞིག་མི་བཟོད་པའི་མཁས་པའི་སྐྱེ་པོས་བཞད་གད་དུ་བསྟན་པར་དགོངས་ནས། ཀྱེ་མ་འདི་ཞེས་བྱ་བ་ལ་སོགས་པ་སྨོས་ཏེ། ཀྱེ་མའི་སྒྲ་ནི་སྙིང་བརྩེ་བར་བྱའོ། །གང་ཡིན་ཞེ་ན། དུ་མ་དང་འབྲེལ་པ་རྣམས་བསྟན་དུ་ཡོད་པ་ལ་སོགས་པ་ཕན་འདོགས་པའོ། །ཕན་མི་འདོགས་པ་དེ་ནི་བདག་དང་དེ་འབྲེལ་པར་མི་རིགས་སོ་ཞེས་བྱ་བར་གསུངས་སོ། །བསྟན་དུ་ཡོད་པ་ལ་སོགས་པའི་སྒྲ་སྣ་ཚོགས་པ་དང་འབྲེལ་པ་དེ་དག་ལས་བདག་ཉིད་འདོད་པའི་དཀའ་ཐུབ་པ་སྡུག་བསྔལ་གྱི་རྒྱུའོ། །འོ་ན་གཟུགས་ལ་སོགས་པ་ཡོད་པ་དེ་ནུས་པ་ཐ་དད་པ་དུ་མ་དང་འབྲེལ་པ་གང་གིས་ཕན་འདོགས་པར་བྱེད་པ་ཡིན་ན། དེ་ཉིད་ཀྱི་ནུས་པ་ཐ་དད་པ་བུམ་པ་ལ་སོགས་པའི་སྒྲ་གཅིག་པོ་ཉིད་ཀྱིས་ཅིའི་ཕྱིར་བསྐྱེད་པར་མི་བྱ། གལ་ཏེ་དེ་ལྟར་གྱུར་ཀྱང་དེ་ལས་ཡོན་ཏན་ཅི་ཞིག་འཐོབ་ཅེ་ན། བཤད་པ། དེ་ལྟ་ན་འདིས་བརྒྱུད་པས་འཇུག་པའི་དུབ་པ་ཡོངས་སུ་སྤངས་པར་འགྱུར་རོ། །ནུས་པ་ཐ་དད་པས་འབྲེལ་པར་བྱེད། དེ་དག་ལས་ཞེས་བྱ་བའི་སྒྲ་དང་སྦྱར་ནས་འདི་བརྒྱུད་པའི་རྗེས་སུ་འཇུག་པའི་རྗེས་སུ་འབྲང་བས་དཀའ་ཐུབ་ཀྱིས་གདུངས་པ་གཟུགས་ལ་སོགས་པ་དོར་བར་འགྱུར་རོ་ཞེས་བྱ་བའི་དོན་ཏོ། །འོ་ན་སོ་སོར་ངེས་པས་ཕན་འདོགས་པའི་ནུས་པ་དང་ལྡན་པར་དངོས་པོ་ཐམས་ཅད་ལ་ཁྱོད་ཀྱིས་གདོན་མི་ཟ་བར་ཁས་བླང་བར་བྱ་སྟེ། དེ་ལྟ་མ་ཡིན་ན་སཱ་ལུའི་ས་བོན་ལས་སཱ་ལུའི་མྱུ་གུ་སྐྱེ་བར་འགྱུར་ལ་ནས་ཀྱི་མྱུ་གུ་ཅིའི་ཕྱིར་མི་སྐྱེ་ཞེས་བརྗོད་ན། ཁྱོད་ཅི་ཞིག་རྗོད་པར་བྱེད། དེའི་ཕྱིར་ཁྱེད་རྣལ་མའི་དོན་ལ་བརྟེན་པར་རིགས་ཏེ། གཞན་དུ་སྐྱོན་སྤང་བར་མི་ནུས་པའི་ཕྱིར་རོ། །ཁོ་བོའི་ལན་ནི་རྒྱལ་པོས་ཕྲོགས་སམ། འབྲེལ་དུ་མས་ཕན་འདོགས་པ་ཉིད་དེའི་ནུས་པ་སྒྲ་སྣ་ཚོགས་པ་སྐྱེད་པར་བྱེད་དོ་ཞེས་འདི་བརྗོད་པར་ནུས་པ་ཡིན་ནོ་ཞེ་ན། དེ་ནི་བདེན་ན། རེ་ཞིག་བསྟན་དུ་ཡོད་པ་ལ་སོགས་པ་ནི་ཡོད་པ་མ་ཡིན་ཏེ། རིམ་དང་ཅིག་ཅར་གྱིས་དོན་བྱེད་ནུས་པ་མི་རིགས་པའི་ཕྱིར་དང༌། དམིགས་པའི་རིག་


DTG190_Page_0142
[མ་དཔེ་གཟིགས་ན་འདིར་གནོན།]

བྱར་གྱུར་པ་ལས་མ་དམིགས་པའི་ཕྱིར་རོ། །དམིགས་པའི་རིག་བྱར་གྱུར་པའི་ཡོད་པ་མི་དམིགས་པ་ཡོད་པར་འགྱུར་རོ་ཞེས་བརྗོད་པར་མི་ནུས་ཏེ། ཧ་ཅང་ཐལ་བར་འགྱུར་བའི་ཕྱིར་རམ། དམིགས་པའི་རིག་བྱར་གྱུར་པ་འདི་ཇི་ལྟར་དེའི་རྒྱུ་མཚན་གྱིས་བློ་དང་སྒྲ་དག་པ་ལང་དག་དང་བ་མེན་ལ་སོགས་པ་དག་ལ་འཇུག་པར་འགྱུར་བ་ཡིན། དེས་ན་དམིགས་པ་ཡང་སྐད་ཅིག་མ་ལ་སོགས་པ་དུ་མ་གསལ་བ་ལས་ཐ་དད་པ་མི་དམིགས་པའི་མཚན་ཉིད་ཀྱང་གསལ་བ་ཡིན་ནོ། །གལ་ཏེ་སྤྱིའི་མཐོང་དུ་ཟིན་ཀྱང་མ་ཚང་བ་མེད་པ་ལོངས་ཤིག་རྟོགས་པ་ཡིན་ན། དེའི་དངོས་པོ་སྟོབས་ལས་བྱུང་བ་དེ་ལ་བློ་དང་སྒྲ་འབྱུང་བར་ནི་ཇི་ལྟར་འགྱུར། དབྱིག་པ་ཅན་ལ་སོགས་པ་རྒྱུ་མཚན་མ་རྟོགས་པ་ལ་སྒྲ་དང་བློ་ནི་ཡོད་པ་མིན། དེའི་ཕྱིར་དེ་ནི་རྣམ་པ་གསུམ་གྱིས་ཀྱང་དེ་དག་རིགས་པའི་རྗེས་སུ་འགྲོ་བ་མེད་པ་གཞན་ཡང་ཁྱེད་ཀྱིས་ཐམས་ཅད་མཐོང་བ་དེ་དག་དངོས་པོ་ཕྱོགས་གཅིག་པར་འགྱུར་བ་སྟེ། ཡང་ན་ཡུལ་དང་དངོས་པོ་ཐ་དད་པས་འདི་ཅིག་ཅར་ཡུལ་ཐ་དད་པར་འཇུག་པར་མི་འགྱུར། འཇུག་ན་ཡང་འདི་གཅིག་མ་ཡིན་ཏེ། ཅིག་ཅར་ཐམས་ཅད་ལ་འཇུག་པ་དང་ལྡན་པའི་རྣམ་པ་དུ་མ་རྣམས་ལ་བརྟེན་པའི་འབྲས་བུ་ལ་སོགས་པ་གཅིག་གྱུར་པ་ཡོད་པ་མིན། ཡོད་པ་འདི་དག་བློ་དང་སྒྲ་སྐྱེ་བའི་རྗེས་སུ་འགྲོ་བ་དང་ལྡོག་པ་དག་ཡོད་པའི་ངེས་པ་མེད་དོ། །མ་དམིགས་པ་དེ་དག་ཉིད་ཀྱི་ཕྱིར་འཚེད་པར་བྱེད་པ་ལ་སོགས་པ་དེ་རྣམས་ལ་ཡང་ཐ་དད་པ་དག་མེད་པའི་ཕྱིར་རོ། །རྣམ་འགྲེལ་ལས་ཀྱང་འཚེད་སོགས་རྣམས་ལས་དབྱེར་མེད་པར། །མེད་ཀྱང་དོན་ལ་ཐ་དད་བརྗོད། །འདི་ཡི་ལས་དག་རྒྱུ་མ་ཡིན། རིགས་འདི་ལས་ལ་མི་བརྟེན་ཕྱིར། །ཞེས་བྱ་བ་ལ་སོགས་པ་བཤད་ཟིན་ཡང་འདིར་མི་བརྗོད་དོ། །དེ་དག་ཕན་གདགས་པར་བྱ་བ་ཡོད་པ་མ་ལགས་ཏེ། རྟག་པར་གྱུར་པས་བོགས་དབྱུང་བ་མེད་པའི་ཕྱིར་རོ། །སྐྱེས་བུའི་འདོད་པ་ལ་མི་ལྟོས་པར་ཐོགས་པ་དང་བཅས་པ་ལ་སོགས་པའི་སྤྱི་གསལ་བར་བྱས་ནས་བརྗོད་པར་ནུས་པ་མ་ཡིན་ནོ། །བརྗོད་པར་འདོད་པ་ལ་སོགས་མི་ལྟོས་པར་འཇུག་པར་འགྱུར་བའི་ཕྱིར་རོ། །དེ་ནི་


DTG190_Page_0143
[མ་དཔེ་གཟིགས་ན་འདིར་གནོན།]

སྐྱེས་བུའི་བསམ་པ་ལ་རག་ལས་པས་ངེས་པར་འགྱུར་ན་བར་གྱི་སྤྱི་ལྷག་མས་ཅི་ཞིག་བྱ། འདི་ལྟར་དེའི་རྗེས་སུ་འགྲོ་བ་དང་ལྡོག་པའི་བྱེད་པ་ཉིད་དུ་རྟོགས་ཀྱི། སྤྱི་རྟག་པ་དང་ལྡོག་པ་མེད་པའི་ཕྱིར་རོ། །དེའི་ཕྱིར་འདི་ཐམས་ཅད་ལྟ་བ་ངན་པ་ལ་བརྟེན་པའི་བརྟགས་པ་ཙམ་ཡིན་ནོ། །འདི་རྟོགས་པར་བྱས་པ་ལ་ཡང་བརྒལ་ཞིང་བརྟགས་པ་མི་རིགས་པའི་ཕྱིར་རྟོགས་པ་ཡིན་ན་ནི་དེ་བདེན་པས་ད་ལྟར་བརྟགས་པ་ནི་མཛེས་ཏེ། སྐྱོན་མེད་པ་ཡོན་ཏན་དང་ལྡན་པའི་ཕྱིར་རོ་ཞེས་བརྗོད་དོ། །གཅིག་ལ་རྣམ་པ་སྣ་ཚོགས་པ་སྒྲས་བསྐྱེད་པའི་ནུས་པ་ཡོད་པ་མ་ཡིན་པས་བརྟགས་པའི་འདོད་པ་འདི་ནི་མི་རིགས་ཤེ་ན། གལ་ཏེ་དེ་ལྟ་ན་འདི་བརྗོད་པ་སྒྲ་སྣ་ཚོགས་སྐྱེས་པའི་ནུས་པ་མེད་པ་ནི་འབྲེལ་པ་ཅན་དེ་དག་ལ་ཕན་པར་མི་འགྱུར་རོ་ཞེས་བྱ་བ་སྨོས་སོ། །གཅིག་གིས་སྣ་ཚོགས་པ་ཕན་པར་བྱེད་པ་ཉིད་ནི་འགལ་བ་ཁས་ལེན་པ་ཉིད་ཡིན་ནོ་ཞེས་བྱ་བར་དགོངས་སོ། རྟག་པའི་ཕྱིར་ཕན་འདོགས་པ་མེད་པར་ཁས་ལེན་པ་ཡིན་ནོ་ཞེ་ན། བསྟན་དུ་ཡོད་པ་ཉིད་ལ་སོགས་པ་དེ་དག་ཕན་འདོགས་པ་མེད་པ་དེ་ཡན་ལག་ཏུ་བྱེད་ན་དེ་དང་འབྲེལ་པ་མེད་པར་གྲུབ་པོ། །གང་དང་གང་གིས་ཕན་འདོགས་པ་མེད་པའི་རྒྱུ་དེ་དང་དེ་ནི་འབྲེལ་པ་དང་ལྡན་པ་ཡིན་ཏེ། གངས་ཅན་དང་མ་ལ་ཡའི་རི་བཞིན་ནོ་ཞེས་བྱ་བར་དགོངས་སོ། །དེ་ལྟར་ན་རེ་ཞིག་གཞན་གྱི་ཕྱོགས་གསལ་བས་བསྟན་དུ་ཡོད་པ་ལ་སོགས་པའི་སྒྲ་ཐ་མི་དད་པའི་ཡུལ་ཅན་དུ་བསྟན་ཏོ། །དེ་ཉིད་རྨོངས་པ་དང་ལྡན་པའི་ཚིག་སྨྲས་པ་ན་ཡང་བརྒལ་ཞིག་བརྟག་པར་བྱེད་དོ། །འོ་ན་ནི་བསྟན་དུ་ཡོད་པ་ལ་སོགས་པའི་སྒྲ་ཡུལ་ཐ་དད་མེད་པ་ཉིད་དུ་གྱུར་ན། བུམ་པ་དང་སྣམ་བུ་ལ་སོགས་པའི་སྒྲ་སྣ་ཚོགས་པའི་ཡུལ་ཅན་ཉིད་ཡིན་ནོ་ཞེས་བྱ་བ་དེ་ཇི་ལྟར་ཡིན། གཟུགས་ལ་སོགས་པ་ཇི་སྙེད་པ་ལས་གཞན་ཡན་ལག་ཅན་གྱི་རྫས་ཡོད་པ་ཡིན་ཏེ། དེ་ལ་བུམ་པ་ལ་སོགས་པའི་ཡུལ་ཅན་དུ་བྱེད་པའི་ཕྱིར་རོ། །འདི་ལྟར་ཡུལ་དཔྱད་པ་ཡིན་ན་སྣམ་བུ་དང་སྣལ་མ་ཐ་དད་པ་ཡིན་ཏེ། བྱེད་པ་པོ་ཐ་དད་པའི་ཕྱིར་སྣམ་བུ་དང་བུམ་པ་


DTG190_Page_0144
[མ་དཔེ་གཟིགས་ན་འདིར་གནོན།]

བཞིན་ནོ། །དེ་ལྟར་སྣམ་བུ་ཡང་སྤྱི་དང་བྱེ་བྲག་གི་ཤེས་པའི་ཡུལ་ཡིན་པའི་ཕྱིར་བ་ལང་བཞིན་ནོ། །སྣལ་མ་དང་སྣལ་མའི་ཚོགས་པ་ལ་སྣམ་བུའི་ཤེས་པ་མི་སྐྱེ་བའི་ཕྱིར་རོ། །བུམ་པ་ལ་སོགས་པ་བཞིན་དུ་ཐབས་གཞན་གྱིས་མ་བསྒྲུབས་པའི་ཕྱིར་དང༌། ཡུལ་ཐ་དད་པ་ན་གནས་པས་བྱས་པའི་ཕྱིར་བུམ་པ་ལ་སོགས་པ་ཉིད་བཞིན་ནོ། །ཀུ་བ་ལ་དང་མ་ལ་ཀ་དང་བིལ་བ་ལ་སོགས་པ་བཞིན་དུ་ཚད་ཐ་དད་པའི་ཕྱིར་རོ། །དེས་ན་སྔ་མ་དང་ཕྱི་མའི་དུས་ལ་ལྟོས་པའི་ཕྱིར་ས་བོན་དང་མྱུ་གུ་བཞིན་ནོ། །ཡང་ན་སྣམ་བུ་ནི་དེའི་རྒྱུ་གཞན་ལས་བྱུང་བའི་ཕྱིར་གཏག་བཟངས་བཞིན་ནོ། །སྣལ་མ་དང་སྣམ་བུ་དག་གཞན་ཉིད་ཡིན་ཏེ། ནུས་པ་ཐ་དད་པ་དང་ལྡན་པའི་མེད་དང་ཆུ་བཞིན་ནོ། །འདི་ལྟར་གཞན་ཡང་འདི་དཔྱད་པའི་ཡུལ་དུ་བྱས་ནས་ཨུཏྤལ་དྲི་ལ་སོགས་པ་ལས་ཤིན་ཏུ་ཐ་དད་པ་ཡིན་ཏེ། དེ་དག་པར་གཅོད་པར་བྱེད་པ་ཡིན་པའི་ཕྱིར། ནག་པ་ལས་སྲིད་སྒྲུབ་ལ་སོགས་པ་བཞིན་ནོ། །གང་དང་གང་རྣམ་པར་གཅོད་པར་བྱེད་པད་དང་དེ་ནི་གཞན་ཡིན་ཏེ། དཔེར་ན་བ་ལང་ནག་པ་བཞིན་ནོ། འདི་ལ་ཡང་ཐ་དད་པར་སྒྲུབ་པའི་ཚད་མ་འདི་དག་ཡོད་པ་ཡིན་ནོ། །དེ་དང་དེ་དག་ཐ་དད་པའི་ཡུལ་དུ་མི་འགྱུར་ཞེ་ན། དེ་དང་དེ་དག་ནི་དམ་པ་མ་ཡིན་པ་ལ་མངོན་བར་ཞེན་པའི་ལིང་ཏོག་གིས་གཡོགས་པའི་ནང་གི་རྒྱུའི་མུན་པ་ཆེན་པོ་ཅན་གྱིས་བཀོད་པ་ཡིན་ནོ་སྙམ་དུ་དགོངས་ནས་བུམ་པ་ཞེས་བྱ་བ་ལ་སོགས་པ་འདི་ཡང་གཟུགས་ལ་སོགས་པ་ཉིད་ཀྱི་བྱ་བ་བྱེད་པ་བུམ་པའི་སྒྲ་གཅིག་བརྗོད་པར་འགྱུར་བ་ཡིན་ན། དོན་གཞན་རྟོགས་པ་ཅི་ཞིག་དགོས་ཞེས་བྱ་བ་སྨོས་ཏེ། འབྲས་བུ་ཞེས་བྱ་བ་ཁ་བསྐང་ངོ༌། །སྔོན་པོ་ལ་སོགས་པ་ལས་ཐ་དད་པ་དེའི་དེ་འདྲ་བ་ཅུང་ཟད་ཅིག་ཀྱང་མ་རྟོགས་སྙམ་དུ་དགོངས་པ་གང་ཡིན་པ་དེ་ཉིད་ཀྱིས་དེའི་ཚད་མ་སྟོན་པ་ནི་རིགས་པ་ཡིན་ནོ། །དེ་མ་གྲུབ་པ་ལ་སོགས་པའི་སྐྱོན་གྱིས་གནོད་ཕྱིར་ཐ་དད་པར་སྒྲུབ་པར་མི་ནུས་ཏེ། རྨོངས་པའི་འདོད་པ་ཉིད་སྔོན་དུ་སོང་བས་བྱས་པ་ཡིན་ནོ་སྙམ་དུ་དགོངས་པའི་ཕྱིར་རོ། །འདི་ལྟར་རེ་ཞིག་འདི་དང་པོར་ཚད་མས་བརྟག་པར་བྱ་བ་ཡིན་ན། བརྟག་པ་ཕྲ་མོ་བཟོད་པ་ཡང་མ་ཡིན་ནོ། །གང་གི་ཕྱིར་འདི་ལ་


DTG190_Page_0145
[མ་དཔེ་གཟིགས་ན་འདིར་གནོན།]

བརྟག་པ་གཉིས་འབྱུང་བར་འགྱུར་ཏེ། དང་པོར་སྣལ་མའི་གནས་སྐབས་ལས་སྙམ་བུ་གཞན་པ་ཉིད་དུ་སྒྲུབ་པ་འམ་དབྱིབས་ཁྱད་པར་ཅན་དུ་གནས་མ་འགྱུར་ན། དེ་ལ་དང་པོའི་གནས་སྐབས་འདི་རྣམ་པར་གནས་པ་དཔྱད་པའི་ཁུར་ལྕི་བའི་མི་བཟོད་པས་གྲུབ་པ་བསྒྲུབས་པའི་སྐྱོན་དང་བྲལ་བའི་ཕྱིར་རོ། །གང་གི་ཕྱིར་དངོས་པོ་མ་ལུས་པ་ཡང་དག་པར་རྟོགས་པར་བདེ་བར་གཤེགས་པའི་གཞུང་ལུགས་ཀྱི་ཚུལ་ལ་བརྟེན་ནས་སྒྲུབ་པ་དྲི་མ་མེད་པ་རྟོགས་ཀྱི་འཇུག་པའི་ལུགས་ནི་དངོས་པོ་ཐམས་ཅད་སྐྱེས་མ་ཐག་འཇིག་པ་ལ་བརྟེན་ནས་རབ་ཏུ་སྟོན་པ་ཡིན་ནོ། །དེས་ཀྱང་དེ་རྣམས་གཞན་པ་ཉིད་འདོད་པ་ཡིན་ན། གྲུབ་པ་ལ་སྒྲུབ་པའི་ཐལ་བར་འགྱུར་བའི་སྐྱོན་གྱི་གདོན་གྱིས་ཁྱོད་ཇི་ལྟར་ཟིན་པར་མི་འགྱུར་རྣམ་པར་རྟོག་པ་གཉིས་པ་ནི་མེ་ཤིན་ཏུ་ཚ་བས་གདུངས་པའི་རྡོ་ལེབ་ལ་རྐང་པ་གཞག་པའི་གནས་མེད་པ་བཞིན་དུ་འགྱུར་ཏེ། གཏན་ཚིགས་གཞན་ལ་མ་གྲུབ་པའི་ཕྱིར་རོ། །དབྱིབས་ཁྱད་པར་ཅན་དུ་གནས་པ་ལས་སྣམ་བུ་བྱེད་པ་པོ་གཞན་ལ་གྲགས་པར་འགྱུར་བར་བྱེད་པ་འཇུག་པ་མེད་པ་དེ་རྣམ་པ་དེ་འདྲ་བ་གང་ཡིན་པ་གཞན་པ་ཉིད་མེད་པས་ཁས་བླང་པར་མི་བྱའོ། །དེ་མ་ཐག་བཤད་པའི་ཚད་མ་རྣམས་ཀྱང་ཡོད་ལ་མངོན་བར་འདོད་པའི་དོན་ཡོངས་སུ་རྫོགས་པར་མི་བྱེད་དེ། གཏན་ཚིགས་མ་གྲུབ་པའི་ཕྱིར་རོ། །གང་གི་ཕྱིར་སྣལ་མ་རྣམས་ཀྱི་དབྱིབས་ཁྱད་པར་དུ་གནས་པ་ལ་ཤེས་པ་འཇུག་པ་མེད་པ་ཐ་དད་པའི་ངོ་བོ་གཞན་སྣམ་བུ་ཞེས་བྱ་བ་མིག་ཕྱེ་ཟིན་ཀྱང་མ་མཐོང་བའི་ཕྱིར་རོ་ཞེས་པ་ལ་སོགས་པ་ལ་མཐོང་ཞེ་ན། འདི་ནི་ཕྱིས་དགག་པར་བྱའོ། །ཐབས་གཞན་གྱིས་བསྒྲུབ་བར་བྱ་བ་མ་ཡིན་པའི་ཕྱིར་དང་ཡུལ་ཐ་དད་པ་ན་གནས་པས་བྱས་པའི་ཕྱིར་དང་ཚད་མ་ཐ་དད་པའི་ཕྱིར་དང་སྔ་མ་དང་ཕྱི་མའི་དུས་ལ་ལྟོས་པའི་ཕྱིར་དང་ནུས་པ་ཐ་དད་པ་དང་ལྡན་པའི་ཕྱིར་ཞེས་བྱ་བ་གང་ཡིན་པ་འདི་ལ་དང་པོའི་སྒྲུབ་པར་བྱེད་པ་ལས་བྱས་པའི་རྐྱེན་རྣོན་པོ་མཐོང་བས་དགྲ་བོ་མིག་དམར་བཞིན་དུ་དེས་གྲུབ་པ་མི་བཟོད་པ་ཡིན་ནོ། །དང་པོ་གྲུབ་པ་སྒྲུབ་ཉིད་དང༌། །


DTG190_Page_0146
[མ་དཔེ་གཟིགས་ན་འདིར་གནོན།]

གཉིས་པ་གཏན་ཚིགས་མ་གྲུབ་པ། །སྐད་ཅིག་ཡིན་ཕྱིར་ཁྱད་པར་ཅན། །སྐྱེ་བ་གང་གིས་མངོན་འདོད་པའོ། །ཞེས་བྱ་བ་བསྡུ་བའི་ཚིགས་སུ་བཅད་པའོ། །འདི་དཔྱད་པའི་ཡུལ་དུ་བྱས་ནས་ཨུཏྤལའི་དྲི་ཞེས་བྱ་བ་ལ་སོགས་པ་གང་སྨྲས་པ་དེ་ཡང་འབྲེལ་པ་མ་ཡིན་ཏེ། གང་གི་ཕྱིར་ཨུཏྤལའི་དྲི་ཞེས་བྱ་བ་ལ་སོགས་པ་དང་རོ་མངར་བའི་ཁྱད་པར་ལ་སོགས་པ་ཨུཏྤལའི་རང་བཞིན་གྲུབ་པར་སྒྲུབ་པའི་ཕྱིར་རོ་ཞེས་བྱ་བའི་དོན་ཏོ། །འབྲས་བུ་ཁྱད་པར་མེད་པར་སྒྲུབ་པར་བྱེད་པའི་སྤྱིའི་བདག་ཉིད་དུ་གྱུར་པ་ལ་ཞེས་བྱ་བ་ལ་སོགས་པའོ། །སྒྲར་གྲགས་པ་ནི་ཁྱད་པར་ཅན་གྱི་འབྲས་བུ་སྒྲུབ་པར་བཤད་པས་ཁྱད་པར་དང་ཁྱད་པར་ཅན་ཉིད་དུ་བརྗོད་ཀྱི། འདིར་ཇི་སྐད་བཤད་པའི་རྫས་ཀྱི་མཚན་ཉིད་གཞན་ཅུང་ཟད་ཅིག་ཀྱང་ཡོད་པ་མ་ཡིན་ཏེ། དེ་དང་འདྲ་བ་དེ་ནི་མི་དམིགས་པ་ཡིན་ཞེས་བྱ་བ་སྔར་བཤད་པ་བཞིན་ནོ། །དེ་ལྟ་ན་རྣམ་པ་འདིས་དེ་དག་དེ་རྣམ་པར་གཅོད་པར་བྱེད་པར་འགྱུར་ཏེ། །དེ་དག་དེ་རྣམ་པར་གཅོད་པ་ཡང་ཡིན་ལ། ཤིན་ཏུ་ཐ་དད་པ་མ་ཡིན་ནོ་ཞེས་བྱ་བ་འདི་ལ་འགལ་བ་ཅི་ཞིག་ཡོད། གཏན་ཚིགས་མི་མཐུན་པའི་ཕྱོགས་ལས་བཟློག་པ་ལ་ཐེ་ཚོམ་ཟ་བ་ཡིན་ཏེ། འབྲེལ་པ་མ་གྲུབ་པའི་ཕྱིར་རོ། །དཔེ་གྲུབ་པ་ཙམ་གྱིས་གྲུབ་པ་ཡོད་པ་མ་ཡིན་ཏེ། ཐམས་ཅད་གྲུབ་པར་ཐལ་བར་འགྱུར་བའི་ཕྱིར་རོ། །གཞན་ཡང་མཆི་གུའི་ལུས་ལ་གཟུགས་ཀྱི་རང་བཞིན་ཞེས་བྱ་བ་འདིར་ཡང་མཆི་གུ་དང་གཟུགས་དག་དང་ལུས་དང་རང་བཞིན་རྣམ་པར་གཅོད་པ་ཉིད་ཡོད་པ་ཡིན་པས་དེ་དག་ཐ་དད་པ་ཐལ་བར་འགྱུར་ན། འགྱུར་བ་ཡང་མ་ཡིན་ཏེ། རང་བཞིན་མེད་པར་ཐལ་བར་འགྱུར་བའི་ཕྱིར་རོ། །དེའི་ཕྱིར་ཁྱེད་ཀྱིས་བརྗོད་པ་འདི་ལ་འདིས་མ་ངེས་པར་གསལ་བ་ཡིན་ནོ། །གཞན་ཡང་འདི་ལོག་པར་ལྟ་བ་ཤིན་ཏུ་མང་པོ་ལ་ཆགས་པ་མེད་པའི་གདོན་གྱིས་བརླམས་པའི་བློ་ཅན་རྣམས་ཀྱིས་ཨུཏྤལའི་དྲི་ལ་སོགས་པ་ཞེས་བྱ་བར་སྨོས་སོ། །སྐྱེས་བུའི་བསམ་པའི་ཡུལ་བྱེད་པ་མི་ལྟོས་པར་དངོས་པོ་དེ་ཁོ་ན་ཉིད་དང་འབྲེལ་པས་ཇི་ལྟར་འཇུག་པར་འགྱུར། གཞན་ཡང་ཇི་ལྟར་སྦྱོར་


DTG190_Page_0147
[མ་དཔེ་གཟིགས་ན་འདིར་གནོན།]

བ་དེ་ལྟར་དངོས་པོ་དེ་ཁོ་ན་ཉིད་ལ་མི་ལྟོས་པར་དོན་བསྡུས་པར་སྟོན་པ་ཡིན། གལ་ཏེ་ཕྱོགས་དང་པོ་ལྟར་ཡིན་པ་དེའི་ཚེ་སྒྲ་རྣམས་རྟག་ཏུ་འབྱུང་བར་ཐལ་བར་འགྱུར། གཞན་ཡང་འདས་པ་ལ་སོགས་པར་ཡང་སྐྱེས་བུའི་འདོད་པའི་དབང་གིས་སྦྱོར་བར་མི་འགྱུར་བ་དང༌། གཞུང་ལུགས་གཞན་གྱི་ཐ་དད་པའི་དོན་ཡང་མི་འགྱུར་བས་ཚིག་འགའ་ཞིག་ཀྱང་མི་བདེན་པའི་དོན་ཅན་དུ་མི་འགྱུར་རོ། །ཕྱོགས་ཕྱི་མ་ལྟར་ན། གང་དག་གི་ཚིག་དངོས་པོའི་དབང་བརྗོད། ལྷུར་བརྗོད་འདོད་ལ་མི་བརྟེན་པ། །དེ་དག་ལ་ནི་དྲུག་པ་དང༌། །ཚིག་དབྱེ་ལ་སོགས་ཀླན་ཀ་རིགས། །ཕྱི་རོལ་དོན་ལ་མི་ལྟོས་པར། །ཚིག་གང་སྨྲ་འོས་ཇི་ལྟ་བུར། །རྗོད་བྱེད་ཉིད་དུ་ངེས་བྱེད་པ། །དེ་དེ་བཞིན་དུ་རྗོད་བྱེད་ཡིན། །དེ་ཚེ་སྐྱེས་བུ་འདོད་པ་ཡིན། །ནུས་པའི་དབང་གིས་འཇུག་པའི་སྒྲ་དོན་གྱི་དེ་ཁོ་ན་ཉིད་དུ་རྣམ་པར་གནས་པ་རིགས་པ་མ་ཡིན་པའི་ཕྱིར། དེའི་གནས་སྐབས་སུ་གཏན་ཚིགས་མི་མཐུན་པའི་ཕྱོགས་ལས་བཟློག་པ་ལ་ཐེ་ཚོམ་ཟ་བ་ཡིན་ཞེས་བྱ་བ་འདིས་ལོག་པར་རྟོག་པའི་ཡུལ་ཅན་དོན་ལ་སོགས་པ་ལས་གཟུགས་དང་དྲི་དང་རེག་བྱ་དང་ཤེས་བྱ་ཉིད་ལ་སོགས་པ་བཞིན་དུ་ཤེས་པ་ཡིན་ཏེ། སྒྲ་ཐ་དད་པ་དེས་བརྗོད་པའི་ཕྱིར་རོ། །རྡོ་དང་སྲང་དང་བྲེ་དང་གཞལ་བར་བྱ་བ་ལ་སོགས་པ་བཞིན་ནོ་ཞེས་བྱ་བ་འདི་ཡང་བསལ་བ་ཡིན་ནོ། །དེའི་ཕྱིར་དེ་ཡོད་པར་སྟོན་པ་ལ་ཚད་མ་ཅུང་ཟད་ཀྱང་ཡོད་པ་མ་ཡིན་ཞེས་བྱ་བ་འདི་གནས་པ་ཡིན་ནོ། །ཁོ་བོ་ཅག་གི་དེ་མེད་པར་བསྒྲུབ་པའི་ཚད་མ་ནི་འདི་ཡིན་ཏེ། གང་ཕན་ཚུན་ཐ་དད་པའི་རང་བཞིན་དུ་གནས་པ་དང་འབྲེལ་པའི་ལུས་ཅན་དེ་ནི་ཐ་དད་པ་དང་རྗེས་སུ་འབྲེལ་པའི་བདག་ཉིད་ཀྱི་ལུས་ཅན་དུ་ཡོད་པའི་ཡན་ལག་ཅན་གྱི་རྫས་སུ་ཡོད་པ་ཡིན་ཏེ། དཔེར་ན་ཐལ་བ་འཆང་བ་སྣོད་ཐ་དད་པ་དེ་བཞིན་དུ་དེ་ཁོ་ན་ཉིད་ལ་སོགས་པ་ཡང་ཇི་དད་བཤད་པའི་ཆོས་དང་ལྡན་པས་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །ཆོས་མི་མཐུན་པ་ནི་ནམ་མཁའི་པདྨ་པ་ལ་སོགས་པ་སྟེ། དེ་དག་རང་བཞིན་མེད་པའི་ཕྱིར་རོ། །ཇི་སྐད་བཤད་པའི་རང་བཞིན་ཡང་ཕན་ཚུན་ཐ་དད་པ་ཡིན་པས་ཁས་བླང་བར་མི་བྱའོ། །དེ་རྣམས་ལ་དེ་བདག་ཉིད་ཐམས་ཅད་ཀྱིས་སམ་ཕྱོགས་


DTG190_Page_0148
[མ་དཔེ་གཟིགས་ན་འདིར་གནོན།]

གཅིག་གིས་ཡོད་པར་མི་རིགས་པའི་ཕྱིར་ཞེས་བྱ་བ་གནོད་པ་ཅན་གྱི་ཚད་མའོ། །དེ་ཅིའི་ཕྱིར་ཞེ་ན། དེ་ནི་རྟེན་གཅིག་ལ་གནས་པའི་བརྟེན་པ་བཞིན་དུ་ཅིག་ཅར་དུ་མ་ལ་ཡོད་པ་ཡང་དུ་མའི་བདག་ཉིད་དུ་དཔག་པར་བྱ་བ་ཡིན་པའི་ཕྱིར་ཇི་ལྟར་འདི་ཐ་དད་པའི་རང་བཞིན་དུ་རིགས་པར་འགྱུར། ཡན་ལག་ཅན་གྱི་ཕྱོགས་གཅིག་ཏུ་དམིགས་པའི་ཚེ་མ་ལུས་པ་དེ་ལ་ཡོངས་སུ་རྫོགས་པའི་ཕྱིར་དམིགས་པར་ཐལ་བར་འགྱུར་རོ། །ཡན་ལག་ཅན་དུ་མ་ལ་དམིགས་པའི་སྒོ་ནས་དམིགས་པ་ཡང་ཡན་ལག་གཅིག་འགའ་ཞིག་མཐོང་བར་འགྱུར་རོ། །མ་ལུས་པའི་ཡན་ལག་ཅན་དམིགས་པའི་སྒོ་ནས། དམིགས་པ་ཡིན་ན་ཆ་ཐམས་ཅད་མཐོང་བར་ཐལ་བར་འགྱུར་ཏེ། ཚུ་རོལ་མཐོང་བས་དེའི་ཚུ་རོལ་དང་དབུས་ཀྱི་ཆ་རྣམས་ཅིག་ཅར་མི་དམིགས་པའི་ཕྱིར་རོ། །ཡན་ལག་གཅིག་གཡོན་ཐམས་ཅད་གཡོ་བ་ལ་སོགས་པར་ཐལ་བར་འགྱུར་བར་བརྗོད་པ་དང༌། ཕྱོགས་གཅིག་གིས་ཀྱང་མ་ཡིན་ཏེ། ཆ་ཤས་དང་བཅས་པར་ཐལ་བར་འགྱུར་བའི་ཕྱིར་དང༌། ཕྱོགས་གཅིག་ལ་ཡང་ཐུག་པར་འགྱུར་བའི་ཕྱིར་རོ། །དེ་ཡང་རྐང་པ་ལ་སོགས་པ་དེའི་ཡན་ལག་ཡོད་པ་ལ་ཡང་འདི་ཡོད་པར་འགྱུར་རོ་ཞེས་བྱ་བ་ལ་སོགས་པ་ཡོད་པར་འགྱུར་བའི་ཡན་ལག་ཅན་གྱི་གཅིག་པ་འགའ་ཞིག་ཡོད་པ་མ་ཡིན་ནོ། །འདི་ལྟར་རྐང་པ་ལ་སོགས་པའི་ཚོགས་ཁོ་ན་ཡིན་པ་ནི་བླའི། །ཡོད་པའི་བདག་ཉིད་དུ་གྱུར་པའི་ཡན་ལག་ཅན་རྣམས་འགའ་ཞིག་ལ་འབྲེལ་པ་ཡིན། འགའ་ཞིག་ལ་ཡང་འདི་ཡོད་པ་མ་ཡིན་ཏེ། ཕྱོགས་གཅིག་པའི་ཡན་ལག་ཅན་རེ་རེ་མེད་པའི་ཕྱིར། མཐའ་མེད་པའི་ཕྱིན་ཅི་ལོག་ཏུ་བརྗོད་པས་ཆོག་པས་མི་སྤྲོའོ། །དེས་ན་འདི་ལྟར་གཞན་གྱི་གཞུང་ལུགས་དེ་བརྗོད་པར་མི་བྱ་སྟེ། གངས་རིའི་དུམ་གྲུགས་ཀྱི་ཕྱེ་མ་ལ་ཉི་མའི་འོད་ཀྱི་ཚོགས་བཅས་པ་དང་འབྲེལ་པ་ཞུ་བ་བཞིན་དུ་འགྱུར་རོ་ཞེས་བྱ་བར་དགོངས་ནས་དོན་གཞན་ལ་རྟོགས་པ་ཅི་ཞིག་དགོངས་ཞེས་བྱ་བ་གསུངས་སོ། །བསམ་པ་འདི་ནི་ངན་པ་ཡིན་ཡང་གཞན་མང་པོས་དོན་གཅིག་བྱེད་པ་མ་ཡིན་ནོ་ཞེ་ན། མང་པོ་ཡིན་དུ་ཟིན་ཀྱང་ཞེས་བྱ་བ་


DTG190_Page_0149
[མ་དཔེ་གཟིགས་ན་འདིར་གནོན།]

ལ་སོགས་པ་སྨོས་ཏེ། ཅི་འདྲ་བ་ཞིག་ཅེ་ན། མིག་ལ་སོགས་པ་བཞིན་ནོ། །དཔེར་ན་གཟུགས་དང་སྣང་བ་དང་ཡིད་ལ་བྱེད་པ་དང་དམིགས་པ་ལ་སོགས་པས་མིག་གི་རྣམ་པར་ཤེས་པ་གཅིག་བྱེད་པ་དེ་བཞིན་དུ་གཟུགས་ལ་སོགས་པ་ཡང་ཆུ་འཛིན་པའི་ཁྱད་པར་ལ་སོགས་པ་དོན་གྱི་བྱ་བ་གཅིག་བྱེད་པ་ཡིན་ནོ་ཞེས་བྱ་བའི་དོན་ཏོ། །གང་གི་ཕྱིར་དེ་ལ་ཡང་དེ་ལྟར་དོན་གྱི་བྱ་བ་གཅིག་འབའ་ཞིག་གིས་ནི་མ་ཡིན་ཏེ། དེའི་ཕྱིར་ནུས་པ་བསྟན་པའི་ཕྱིར་གཟུགས་ལ་སོགས་པའི་གཅིག་པ་བ་དེ་ལ་བུམ་པ་ལ་སོགས་པའི་སྒྲ་གཅིག་ངེས་པར་སྦྱོར་བར་འགྱུར་རོ་ཞེས་བྱ་བའི་རིགས་པར་མཐོང་ངོ༌། །དེ་དག་ཀྱང་དོན་གྱི་བྱ་བ་གཅིག་བྱེད་པ་ཡིན་པའི་ཕྱིར། ཡང་གི་སྒྲ་སྨོས་པ་ཡིན་ནོ། །ཇི་ལྟར་རིགས་པ་ཡིན་ཞེ་ན་འདེ་སྙམ་དུ་དགོངས་པ་ཡིན་ཏེ། དགོངས་པ་འགའ་ཞིག་གིས་སྒྲ་འགའ་ལ་ཡིན་ནོ། །དེ་ལ་གང་གི་ཚེ་དུ་མས་གཅིག་ལ་སྦྱོར་བར་བྱེད་པ་ཡིན་པ་དེའི་ཚེ་གདོན་མི་ཟ་བར་བརྗོད་པར་འགྱུར་རོ། །དེས་རེ་རེ་རྗོད་པ་ནི་ཤིན་ཏུ་དཀའ་བར་འགྱུར་བས་གཞན་དང་ཐུན་མོང་གི་ངོ་བོ་འདི་བརྗོད་པར་ནུས་པ་ཡིན་ནོ། །འབད་པ་འདི་ལ་འབྲས་བུ་ཅི་ཡང་མེད་དེ་འབའ་ཞིག་གི་ནུས་པས་དོན་དེས་བསྐུལ་བ་ཡིན་ནོ། །སྨྲ་བ་པོའི་རང་དགའ་ཙམ་གྱིས་དེ་སྒྲ་གཅིག་གིས་ཀྱང་བསྐུལ་བར་འགྱུར་རོ། །དེས་ན་སྒྲ་གཅིག་གིས་མང་པོ་སྨྲ་བ་པོར་འདོད་པའི་དབང་གིས་སྒྲ་གཅིག་པ་འདི་འཇུག་པ་ལ་ཀླན་ཀ་འོས་པ་མ་ཡིན་ནོ། །འདི་ནི་མི་ནུས་པ་ལ་འཇུག་པ་མ་ཡིན་ཏེ། འདོད་པ་ལ་རག་ལས་པའི་ཕྱིར་རོ། །གལ་ཏེ་སྦྱོར་བར་བྱེད་པ་ལ་འདོད་པ་མེད་ན་དེ་ཇི་ལྟར་འཇུག་པར་འགྱུར། འདོད་པ་ཡོད་ན་ཡང་མང་པོ་རྣམས་བདེ་དང་འབྲེལ་པར་ཇི་ལྟར་འགྱུར། དགོས་པ་མེད་པའི་ཕྱིར་འཇུག་པར་མི་བྱའོ་ཞེས་དོགས་པར་མི་བྱ་སྟེ། ཐ་དད་པ་ལ་སྒྲ་གཅིག་པས་རྟོགས་པར་འགྱུར་ཏེ། འདི་དག་དགོས་པ་ཐ་དད་པས་གང་གི་ཕྱིར་དགོས་པ་ནི་བཤད་ཟིན་པ་དེའི་ཕྱིར་ཁོ་བོ་ཅག་གིས་ལེགས་པར་བཤད་པས་རིགས་པར་མཐོང་བ་ཡིན་ནོ་ཞེས་བྱའོ། །ཇི་ལྟར་བརྒྱལ་འཇིག་རྟེན་པ་ནི་དགོས་པ་མེད་པར་སྒྲ་སྦྱོར་བར་བྱེད་པ་དེས་ན་འདི་རིགས་པ་མ་ཡིན་ནོ་ཞེ་ན། བཤད་པ། འཇིགས་རྟེན་པ་ནི་


DTG190_Page_0150
[མ་དཔེ་གཟིགས་ན་འདིར་གནོན།]

དགོས་པ་མེད་པར་དོན་ལ་སྒྲ་སྦྱོར་བར་མི་བྱེད་དོ་ཞེས་བྱ་བ་གང་གིས་བརྡར་མ་བཏགས་པའི་སྒྲ་མ་སྦྱར་བས་འཇིག་རྟེན་པ་འདི་ཉོན་མོངས་པས་སྡུག་བསྔལ་བར་འགྱུར་བ་ཡིན་ཏེ། འོན་ཀྱང་དེ་ལྟར་སེམས་ཅན་རྩོམ་པ་ན་འདི་དགོས་པ་ཡོད་པ་ཉིད་ལས་རིགས་པ་ཡིན་ནོ་ཞེས་བྱ་བར་དགོངས་སོ། །དགོས་པ་ཉིད་དུ་གྱུར་པ་དེ་ལ་གཟུགས་དང་དྲི་དང་རོ་ལ་སོགས་པའི་དོན་གང་ལྷན་ཅིག་བྱེད་པའི་དགོས་པ་དང་འབྲེལ་པས་འབྲས་བུ་གཅིག་གིས་བྱ་བ་བྱེད་པ་ཞེས་བྱ་བའི་དོན་ཏོ། །ལྷན་ཅིག་བྱེད་པར་རེས་འགའ་འགའ་ཞིག་གིས་འབྲས་བུ་བྱེད་པ་ན་གཞན་ནི་བཏང་སྙོམས་སུ་འདུག་པར་འགྱུར་རོ་སྙམ་པ་དེའི་སོ་སོར་ཞེས་བྱ་བ་ལ་སོགས་པ་སྨོས་ཏེ། འམ་ཞེས་བྱ་བའི་སྒྲའི་དོན་ནི་རང་གི་དོན་ཏོ། །ཐམས་ཅད་བྱེད་པ་ཁོ་ན་དང་ལྡན་པ་ཡིན་ནོ་ཞེས་བྱ་བའི་དོན་ཏོ། །གཞན་ནི་གཞན་དུ་འཆད་དེ་བསྟན་པ་ལ་སྐྱོན་བརྗོད་པ་ཡིན་ཏེ། དེ་ལ་ནི་འདི་ཞེས་བྱ་བའི་སྒྲའི་དོན་ཏོ། །དོན་གང་རིམ་གྱིས་ཤེས་པ་ནི་གཟུགས་ལ་སོགས་པའོ། །ལྷན་ཅིག་གམ་སོ་སོར་དགོས་པ་སྟེ། ལྷན་ཅིག་པ་ནི་ཆུ་འཛིན་པར་བྱེད་པ་ལ་སོགས་པ་དབྱིབས་གཅིག་པའི་དགོས་པ་ཡིན་ནོ། །དཔེར་ན་སྦྲང་རྩི་དང་ཆུ་ལ་སོགས་པ་འཛིན་པ་ལྟ་བུའམ། དེ་དག་ཉིད་སོ་སོར་ཐ་དད་པའི་རང་གི་རྣམ་པར་ཤེས་པ་བསྐྱེད་པ་ཡིན་ནོ། །གཅིག་ལ་དེའི་གཅིག་པའི་དགོས་པ་མཐོང་བ་གང་ཡིན་པ་དེ་ནི་གཞན་ལ་མེད་པ་ཡིན་ཏེ། ལྷན་ཅིག་འབྱུང་བ་རྣམས་ཀྱང་རེས་འགའ་ཞིག་བཏང་སྙོམས་སུ་འདུག་པ་མཐོང་བའི་ཕྱིར། །ཐམས་ཅད་མེད་པ་དང་བཅས་པར་མ་མཐོང་བས་སོ་སོར་ཞེས་བྱ་བ་སྨོས་པ་ཡིན་ནོ། །འམ་གྱི་སྒྲ་ནི་བསྡུ་བའི་དོན་ཏོ། །གཞན་དག་ནི་གཅིག་པའི་དགོས་པ་འབའ་ཞིག་ཙམ་ཡིན་ནོ་ཞེས་བརྗོད་པས་དེ་བཞིན་དུ་ཐམས་ཅད་རྟོགས་པ་ཡིན་ནོ་ཞེས་བྱ་བས་སོ་སོར་ཞེས་བྱ་བ་དོན་མེད་པར་འགྱུར་རོ། །འདི་ནི་སྒྲའི་དོན་མ་ཡིན་པའི་ཕྱིར་འདི་ནི་ཅི་ཡང་མ་ཡིན་ཏེ། དེ་ཡིས་སྐབས་ཀྱི་དོན་མི་ཤེས་པའི་ཕྱིར་རོ། །འདི་ལྟར་འདིར་ཚོགས་པའི་སྒྲ་བརྗོད་པ་འཇུག་པ་ལ་འགལ་བ་མེད་པ་རྩོམ་པ་ཡིན་ནོ། །དེ་ལ་སྐབས་ཅི་ཞིག་ཡིན། དད་པ་སོ་སོ་བ་གཞན་བརྗོད་པའོ། །གཟུགས་ལ་སོགས་པའི་སྒྲ་འདི་ནི་རིགས་ཀྱི་སྒྲ་སྟེ། དེ་ལས་གཞན་པ་ཉིད་ཀྱི་སྐབས་


DTG190_Page_0151
[མ་དཔེ་གཟིགས་ན་འདིར་གནོན།]

སུ་འགྱུར་བ་ཡིན་ནོ། །དགོས་པ་གཅིག་པ་ཙམ་འབའ་ཞིག་ཡིན་ནོ་ཞེས་བྱ་བ་བརྗོད་པ་དེ་བཞིན་དུ་ཐམས་ཅད་ལ་མེད་པར་རྟོགས་པ་ཡོད་པ་ཡིན་ནོ་ཞེས་བྱ་བ་དེ་ཡང་རིགས་པ་དང་ལྡན་པ་མ་ཡིན་ཏེ། འདི་ལྟར་གཞན་གྱི་ཕྱོགས་ཕམ་པར་བྱེད་པས་བཅད་པའི་དགོས་པ་གཅིག་པ་ནི་གཞན་ཕམ་པར་བྱེད་པ་ཡིན་པས་དེ་ལ་ཐམས་ཅད་ཀྱང་བྱེད་པར་འགྱུར་བ་མ་ཡིན་ནོ། །དེ་བཞིན་དུ་འདིར་ཡང་འགྱུར་བ་དེ་ཉིད་ཀྱི་ཕྱིར་དགོས་པ་དང་བཅས་པར་མི་འགྱུར་རོ་སྙམ་ན་བཤད་པ་ཡིན་ཏེ། གང་གི་ཚེ་ཐམས་ཅད་ཉིད་ཀྱི་བྱེད་པ་དང་བཅས་པར་བསྟན་པ་ན་སོ་སོ་བ་དེ་བརྗོད་པ་ཡིན་ནོ། །དེ་བརྗོད་པ་དེའི་ཚེ་འདི་རིང་དུ་སྤངས་པ་ཡིན་ནོ། །དེས་ནི་ཉིད་ཀྱི་སྒྲ་མེད་པ་ཉིད་ཀྱི་དོན་ཀྱང་བསལ་བ་ཡིན་པའི་ཕྱིར་འདི་ནི་ཅི་ཡང་མ་ཡིན་ནོ། །བཤད་པ་འདི་དག་ཡོད་ཀྱང་བླ་སྟེ། གལ་ཏེ་རྣམ་པ་འགའ་ཞིག་གིས་འཇོག་པར་ནུས་པ་ཡང་ཡིན་ན་དེ་དག་རྣམ་པ་དེ་ལྟ་བུས་དོན་རྣམས་དེའི་དོན་གྱིས་བྱ་བ་གཅིག་བྱེད་པའི་དངོས་པོ་ལ་བུམ་པ་ལ་སོགས་པའི་སྒྲ་གཅིག་བརྗོད་པས། གལ་ཏེ་ངེས་པར་སྦྱོར་བ་ཡིན་ན་དེའི་ཚེ་ཅིར་འགྱུར་ཏེ་ཉེས་པ་ཅུང་ཟད་ཀྱང་མེད་དོ། །ཡོན་ཏན་འབའ་ཞིག་ཐོབ་པར་འགྱུར་རོ་ཞེས་བྱ་བ་དེ་དོན་བྱེད་པའི་ནུས་པ་ཐ་མི་དད་པ་བསྟན་པའི་ངེས་པར་སྦྱར་བ་ནི་ཚོགས་པ་སྒྲའི་ཚིགས་གཅིག་ལ་འགལ་བ་ཡོད་པ་མ་ཡིན་ནོ། །ཅིའི་ཕྱིར་ཞེ་ན། གང་གི་ཕྱིར་ལྷན་ཅིག་པ་དག་གིས་ནུས་པ་དེ་ཡང་གཅིག་པ་ཐ་མི་དད་པ་ཡིན་གྱི་སོ་སོ་ནི་མ་ཡིན་ཏེ། ཐ་དད་པར་འགྱུར་བ་མ་ཡིན་ནོ་ཞེས་བྱ་བའི་དོན་ཏོ་ཞེས་བྱ་བ་ནི་དེའི་ཕྱིར་རོ། །ཚིགས་པའི་སྒྲ་ཡིན་པ་དེ་ནི་དུ་མ་པ་ལ་སོགས་པ་ཚོགས་པ་གཅིག་ལའོ། །སྒྲ་གཅིག་གིས་བརྗོད་པ་བུམ་པ་ཡིན་ནོ་ཞེས་བྱ་བའི་ཚིག་ལྷག་མའོ། །འགྱུར་རོ་ཞེས་བྱ་བ་ནི་འཆད་པར་འགྱུར་བ་དང་སྦྱར་རོ། །འོ་ན་བུམ་པ་ལ་སོགས་པའི་སྒྲ་འདི་ཡང་བ་ལང་ལ་སོགས་པའི་སྒྲ་བཞིན་དུ་རིགས་ཀྱི་སྒྲ་ཡིན་ན། དེ་ཇི་ལྟར་འདི་བརྗོད་པ་ཡིན་ཞེ་ན། བདེན་ཏེ། ཚོགས་པ་གཞན་ལ་འཇུག་པ་ལ་ལྟོས་ནས་འདི་ཡང་རིགས་ཀྱི་སྒྲ་ཡིན་ནོ། །གཟུགས་ལ་སོགས་པའི་ཚོགས་པ་ལ་ལྟོས་ནས་ཚོགས་པའི་སྒྲ་དང་འབྲེལ་པ་ཡིན་ནོ་ཞེས་བྱ་བ་ལ་སྐྱོན་མེད་དོ། །འདི་


DTG190_Page_0152
[མ་དཔེ་གཟིགས་ན་འདིར་གནོན།]

ལྟར་སྒྲ་རྣམ་པ་གསུམ་དུ་འགྱུར་ཏེ། ཁ་ཅིག་རིགས་ཀྱི་སྒྲ་ཉིད་ནི་དཔེར་ན་བདེ་བ་ལ་སོགས་པ་ལྟ་བུ་སྟེ། བདེ་བ་ནི་ཡན་ལག་ཡིན་པའི་ཕྱིར་རོ། །ཁ་ཅིག་ནི་ཚོགས་པའི་སྒྲ་ཉིད་ནི་དཔེར་ན་འབིགས་བྱེད་དང་གངས་ཅན་དང༌། རི་རབ་ལྟ་བུ་སྟེ། དེའི་རིགས་ཚོགས་པ་མེད་པའི་ཕྱིར་རོ། །གཞན་ཡང་རིགས་དང་ཚོགས་པའི་སྒྲ་ནི་དཔེར་ན་བུམ་པ་ལ་སོགས་པའོ། །ཚོགས་པ་གཞན་ལ་སོགས་པ་གཞན་ལྟོས་པའི་ཕྱིར་རོ། །དེ་ལྟར་རེ་ཞིག་ཚོགས་པའི་སྒྲ་བརྗོད་པ་འཇུག་པ་ལ་འགལ་བ་མེད་པར་བཤད་དོ། །ཇི་ལྟར་རིགས་ཀྱི་སྒྲར་བརྗོད་ཅེ་ན། རིགས་ཀྱི་སྒྲ་རྣམས་ནི་ཞེས་བྱ་བ་སྨོས་ཏེ། བུམ་པ་ལ་སོགས་པའི་དོན་རྣམས་སོ་སོ་འམ་ལྷན་ཅིག་ཏུ་ནུས་པའི་རྒྱུའི། །དུ་མའི་ནུས་པ་འམ་གཅིག་པ་ཡིན་ནོ། །འདི་སྐད་སྟོན་པ་ཡིན་ཏེ། གང་གི་ཕྱིར་ཤིང་གཅིག་ཀྱང་ཁྱིམ་གྱི་རྒྱུའི་དོན་གྱི་བྱ་བ་སྒྲུབ་པར་ནུས་པ་དང་ཤིང་མང་པོ་དེས་ཀྱང་དེ་དག་ལ་ངེས་པར་ནུས་པའི་ཕྱིར་མང་པོའི་ནུས་པ་སྟེ་འདུས་ཀྱང་ནུས་པའི་ཕྱིར་རོ། །གཅིག་གི་ནུས་པ་ལ་ནི་གཅིག་ལ་ངེས་པའི་ཤེས་པ་དང་འབྲེལ་པས་གཅིག་པ་ཉིད་ཅེས་བཏགས་སོ། །གང་གི་ཕྱིར་དེ་ལྟར་ན་ཞེས་བྱ་བ་ནི་དེའི་ཕྱིར་ཏེ། རིམ་པ་བཞིན་དུ་མའི་ནུས་པ་བརྗོད་པར་འདོད་པ་ཡོད་པས་མང་པོའི་ཚིག་གིས་དུ་མ་བརྗོད་པ་ནི་ཤིང་རྣམས་ཞེས་བྱ་བར་འགྱུར་རོ། །གཅིག་གི་ནུས་པ་བརྗོད་པར་འདོད་པས་གཅིག་གི་ཚིག་གིས་གཅིག་པ་ཉིད་བརྗོད་པ་ནི་ཤིང་ཞེས་བྱ་བར་འགྱུར་རོ། །དེའི་ཚེ་གལ་ཏེ་ཁྱད་པར་མེད་པར་འཛིན་པའི་གདོན་གྱིས་སེམས་དཀྲུགས་ཤིང་ཉམས་པས་མང་པོ་རྣམས་ལ་མང་པོའི་ཚིག་གིས་བརྗོད་པར་འགྱུར་བ་དང༌། གཅིག་པ་ལ་གཅིག་པའི་ཚིག་གིས་བརྗོད་པ་འདི་དག་ནི་ངེས་པ་ཡིན་པ་དེས་འདི་དག་མཐོང་བ་ལ་བརྟེན་ནས་མང་པོ་དེ་དག་ལ་མང་པོའི་ཚིག་དང༌། གཅིག་ལ་གཅིག་གི་ཚིག་གིས་ཞེས་བྱ་བ་ལ་སྐྱོན་ཅུང་ཟད་ཀྱང་མ་མཐོང་ངོ༌། །ཁྱེད་ཀྱི་ཇི་ལྟར་ཡིན་ཞེ་ན། ཁོ་བོ་ཅག་ནི་ཞེས་བྱ་བ་ལ་སོགས་པ་སྨོས་ཏེ། སྒྲ་རྣམས་བརྡར་བཏགས་པའི་དབང་གིས་བཙུན་མོ་རྣམས་དང་བྱེད་མ་དང་འོད་ཟེར་དང་བླ་མ་རྣམས་ཞེས་བྱ་བ་ལ་སོགས་པ་མང་པོའི་ཚིག་གིས་མང་པོ་མེད་པའི་བརྗོད་པར་བྱ་བ་ལ་འཇུག་སྟེ། དེ་བཞིན་དུ་མེད་ཀྱང་གྲོང་ཁྱེར་དྲུག་དང༌། རྩ་བ་དྲུག་དང༌།


DTG190_Page_0153
[མ་དཔེ་གཟིགས་ན་འདིར་གནོན།]

ནགས་ཚལ་ཞེས་བྱ་བ་ལ་སོགས་པ་གཅིག་གིས་མཐའ་ཅན་འཇུག་པའི་ཕྱིར་མངོན་པར་ཞེན་པ་མེད་པ་ཁོ་ནའོ། །འདིའི་འདི་དག་ནི་སྐྱེས་བུའི་བསམ་པ་ཙམ་ལ་རག་ལས་པས་འཇུག་པའི་སྒྲ་རྣམས་ལ་མངོན་པར་ཞེན་པར་བྱེད་པའི་སྤྲོ་བས་ཅི་ཞིག་བྱ་ཞེས་བྱ་བར་དགོངས་སོ། །ཕྱོགས་ཕྱི་མས་ཕྱོགས་སྔ་མར་བྱེད་པ་ནི། གཟུགས་ལ་སོགས་པ་སྣ་ཚོགས་པ་ལ། སྒྲ་གཅིག་ཀུན་ནས་སློང་བར་ནུས་པ་མ་ཡིན་ནོ་ཞེས་བྱ་བ་ནི་སྣ་ཚོགས་པ་དང་གཅིག་པའི་འབྲེལ་པ་མི་རིགས་པའོ། །འོན་ཏེ་སྐྱེས་བུ་དག་གིས་ཞེས་བྱ་བ་ལ་སོགས་པ་ནི་ལན་ཡིན་ཏེ། སྐྱེས་བུ་འཇུག་པའི་འདོད་པའོ། །དེ་ལ་ལྟོས་པ་མེད་པ་སྔོན་ཡོད་པ་རང་ཉིད་ཀྱིས་ཅི་སྟེ་སྒྲ་ཀུན་ནས་སློང་བར་མི་བྱེད་དམ་ཡང་ན་སྐྱེས་བུའི་ཐ་དད་ཀྱི་དོན་རྣམས་ལ་རྣམ་པ་འགའ་ཞིག་ཀྱང་ངེས་པར་མི་སྦྱོར་རོ་ཞེས་བྱ་བ་ནི་རྣམ་པར་རྟོག་པ་གཉིས་པ་ཡིན་ནོ་། །དེ་ལ་སྐྱེས་བུ་ཉིད་ཀྱིས་དེ་ཇི་ལྟར་འདོད་པས་ངེས་པར་སྦྱོར་བ་ཡིན་གྱི། དེ་མ་ཡིན་ན་འདས་པ་ལ་སྐྱེ་བ་འམ་མ་མཐོང་བ་ལས་ཐ་དད་པ་འམ་གཞན་ལ་ཡང་ངེས་པར་སྦྱོར་བར་མི་འགྱུར་བའི་ཕྱིར་ཞེས་བྱ་བར་དགོངས་སོ། །དེས་ན་སྐྱེས་བུ་འདོད་པས་དོན་ལ་ལྟོས་པ་མེད་པར་སྒྲ་རང་ཉིད་སློང་བར་བྱེད་པར་འགྱུར་རོ། དངོས་པོ་ལ་ནུས་པ་ཡོད་པ་འམ་ནུས་པ་མེད་པ་བསལ་བར་བྱ་བ་ཡིན་ཞེས་བྱ་བ་ནི་ཐ་དད་པ་མེད་པའོ། །ཡོད་པ་ཉིད་ཡིན་པ་དེ་ལྟར་ན་རང་ཉིད་ཉེ་བར་འཇོག་གོ་ཞེ་ན། དེ་ཡང་རིགས་པ་མ་ཡིན་ནོ། །དེ་མ་ཐག་བཤད་པའི་རྒྱུ་རྣམ་པ་གསུམ་གྱིས་ཞེས་བྱ་བས་དགོངས་སོ། །དེའི་ཕྱིར་སྐྱེས་བུས་རྣམ་པ་གཅིག་པ་ཉིད་ལ་སོགས་པ་མེད་ཀྱང་སྒྲ་དེ་དག་ངེས་པར་སྦྱོར་བ་ཡིན་ཏེ། སྐྱེས་བུ་ཇི་ལྟར་འདོད་པ་གཅིག་པ་དེ་ལས་ཡང་མང་པོའི་ཚིག་གི་མཐའ་ཅན་དང་དུ་མ་ལ་ཡང་གཅིག་གི་ཚིག་གི་མཐའ་ཅན་གྱི་སྒྲ་ངེས་པར་སྦྱོར་བའི་ཕྱིར་རོ། །གཟུགས་ལ་སོགས་པ་སྣ་ཚོགས་པ་སྒྲ་གཅིག་ཀུན་ནས་སློང་བར་ནུས་པ་མ་ཡིན་ནོ་ཞེས་བྱ་བ་འདི་ནི་ཤིན་ཏུ་རྨོངས་པ་ཆེན་པོ་དང་ལྡན་པ་ཡིན་ནོ་སྙམ་དུ་དགོངས་ནས་དེ་ལ་དེ་རྣམས་ཀྱི་སྒྲ་ལ་ཀླན་ཀ་ཅི་ཞིག་ཡོད་དེ་ཅི་ཡང་མེད་དོ་ཞེས་བྱའོ། །ཇི་ལྟར་སྒྲ་གཅིག་དོན་དུ་མ་ལ་ངེས་པར་སྦྱོར་བར་འདོད་པ་ཡིན་ཞེ་ན།


DTG190_Page_0154
[མ་དཔེ་གཟིགས་ན་འདིར་གནོན།]

རྒྱུ་མཚན་གྱིས་ངེས་པར་སྦྱོར་བར་བསྟན་པ་ཉིད་དོ་ཞེས་བྱ་བ་སྨོས་སོ། །དེའི་ནུས་པ་བསྟན་པའི་ཕྱིར་དེ་ལ་སྒྲ་གཅིག་ངེས་པར་སྦྱོར་བར་འགྱུར་རོ། །འདིར་སྐབས་ཡིན་ནོ། །བསྣན་པ་གཞན་ཡང་ཞེས་བྱ་བ་ལ་སོགས་པ་སྨོས་ཏེ། རྟེན་དུ་མངོན་པར་འདོད་པའི་ཡན་ལག་ཅན་གྱི་རྫས་དེ་ལ་དེ་དག་ལྡན་པའི་འབྲས་བར་འབྲེལ་པའི་ཕྱིར་ཇི་ལྟར་གཅིག་དང་གཅིག་ཏུ་འབྲེལ་པ་མེད་དེ་འགལ་བ་ཁས་བླངས་པའི་ཕྱིར་རོ། །དེ་ལྟ་མ་ཡིན་ན་སྒྲ་གཅིག་ལ་ཡང་ལྷན་ཅིག་པར་མི་འགྱུར་རོ་ཞེས་བྱ་བར་དགོངས་སོ། །གཞན་གྱིས་སྨྲས་པ་ཁོ་བོ་ནི་གཅིག་དང་ལྷན་ཅིག་འབྲེལ་པར་འགལ་བའི་རྒྱུའི་སྒྲ་གཅིག་གཟུགས་ལ་སོགས་པ་ལ་མི་འདོད་པ་ཡིན་ཏེ། འོན་ཏེ་ཐ་མི་དད་པ་མ་ཡིན་པ་ནི་ཁྱད་པར་མེད་པའི་གཟུགས་ལ་སོགས་པའོ། །གང་ལ་ཞེ་ན། བུམ་པ་དང་ཟླ་བ་དང་སྣམ་བུ་ལ་སོགས་པ་འདི་དག་ནི་ཡུལ་ཐ་དད་པའི་དོན་བྱེད་པ་སྟེ། ཆུ་འཛིན་པ་དང་གོས་ལ་སོགས་པས་མཚོན་པའོ། །དེ་དང་འགལ་བ་ལྟར་དེའི་བུམ་པ་བསྟན་པས་སྒྲ་དང་འགལ་བའི་ཕྱིར་རོ། །ཡང་ན་དེ་དག་རྟེན་དང་ཐ་དད་པ་མེད་པ་དེ་རྫས་ལ་ཐ་དད་པ་མེད་པའི་ཕྱིར་རོ། །འདི་ཉིད་གསལ་བར་བྱ་བ་ནི། དེ་གཟུགས་ལ་སོགས་པ་དེ་རྣམས་རང་བཞིན་གཅིག་ཏུ་ཡོད་པ་ཚོགས་པ་གཞན་ལ་བུམ་པ་ལ་སོགས་པ་ཆུ་འཛིན་པ་ལ་སོགས་པ་ཁྱད་པར་གྱི་དོན་བྱེད་པ་མི་སྲིད་པ་མ་ཡིན་པའི་རྒྱུ་དེའི་ཕྱིར་དེའི་དོན་བྱེད་པ་མ་ཡིན་ནོ། །བསྟན་པའི་ཆེད་དུ་དེའི་དོན་གྱི་བྱ་བ་བྱེད་པར་འགྱུར་བའི་སྒྲ་དེས་ཀྱང་བརྗོད་པར་མི་བྱའོ། །སྦྱོར་བ་ཡང་གང་དང་གང་ལས་རང་བཞིན་ཁྱད་པར་མེད་པ་དང་དེ་ལས་དེའི་དོན་གྱིས་བྱ་བ་བྱེད་པ་སྲིད་པ་མ་ཡིན་ཏེ། དཔེར་ན་དེ་ཉིད་ཀྱི་རིགས་ལས་ཟླ་བར་རྟོགས་པའི་གཟུགས་ལ་སོགས་པ་བཞིན་ནོ། །དེ་བཞིན་དུ་བུམ་པར་རྟོགས་པའི་གཟུགས་ལ་སོགས་པར་ཡང་ཟླ་བར་རྟོགས་པའི་གཟུགས་ལ་སོགས་པས་ལས་རང་བཞིན་ཁྱད་པར་མེད་པས་ཞེས་བྱ་བ་ནི་ཁྱབ་བྱེད་མི་དམིགས་པའོ། །དེ་བཞིན་དུ་གཞན་ལ་ཡང་སྦྱར་བར་བྱའོ་ཞེས་བྱ་བ་ཕྱོགས་སྔ་མའི་ཚིགས་ལ་འདིར་ལན་ནི། འགྱུར་ན་ཞེས་བྱ་བ་ལ་སོགས་པ་སྨོས་ཏེ་འདིས་ནི་གཏན་


DTG190_Page_0155
[མ་དཔེ་གཟིགས་ན་འདིར་གནོན།]

ཚིགས་དེ་མ་གྲུབ་པར་བརྗོད་པ་ཡིན་ནོ། །འདིར་ནི་དོན་འདི་ཡིན་ཏེ། གཟུགས་ལ་སོགས་པ་དང་ཟླ་བ་ལ་སོགས་པ་རྣམས་ལ་ཐ་མི་དད་པ་ཡོད་པ་མ་ཡིན་ཏེ། ཕན་ཚུན་དཔེན་པའི་ངོ་བོ་ཉིད་དུ་ཚད་མས་ཡོངས་སུ་བཅད་པའི་ཕྱིར་རོ། །དེ་ལྟར་མངོན་སུམ་དུ་གྱུར་ན་ནི་ཅི་འདོད་པ་འདི་དག་དང་བཏང་སྙོམས་སུ་བྱེད། ཅི་སྟེ་ནི་མི་བཟོད་པ་ལ་དྲི་བའོ། །གདོད་པ་མེད་པ་ལ་བཟོད་པ་མ་ཡིན་ནོ་ཞེས་བྱ་བའི་དོན་ཏོ། །གཞན་ཡང་བུམ་པ་དང་ཟླ་བ་ལ་སོགས་པ་རྣམས་གཟུགས་ལ་སོགས་པ་ཐ་དད་པ་མེད་པ་ཡིན་ནོ་ཞེས་བྱ་བ་ནི་འདོད་པའི་བརྗོད་པ་ཡིན་ཏེ། ཅིའི་ཕྱིར་ཞེ་ན། གཟུགས་ལ་སོགས་པ་དག་ལ་ཚོགས་པའི་རྫས་ལ་མི་ལྟོས་པར་རང་གི་རྒྱུའི་སྟོབས་ཀྱིས་རང་བཞིན་ཐ་དད་པར་ཁས་བླངས་པའི་ཕྱིར་རོ། །དེས་ན་འདི་ཁས་བླངས་པའི་སྒོ་ནས་ཀྱང་མ་གྲུབ་པར་རིགས་པར་བྱའོ། །སྔ་མ་ནི་མངོན་སུམ་གྱི་སྒོ་ནས་ཞེས་བྱ་ལྷག་མའོ། །སྔར་ཡང་གཞན་ཕྲག་དོག་གིས་སྨྲས་པ། གལ་ཏེ་གཟུགས་ལ་སོགས་པ་ལས་གཞན་ཉིད་བུམ་པར་གྱུར་ན་ཅིར་འགྱུར། ཅུང་ཟད་ཀྱང་ཉེས་པར་མི་འགྱུར་རོ་སྙམ་དུ་བསམས་པའོ། །ཁྱོད་དེ་མི་འདོད་པ་ནི་མ་ཡིན་ཏེ། ཕྲག་དོག་གིས་ཡིན་ནོ། །འོན་ཀྱང་དེ་ཙམ་གྱིས་ཅི་ཞིག་འདིར་བརྗོད་པར་བྱ་བ་ཡོད་པར་འགྱུར་མོད། ཡན་ལག་ཅན་དེ་མངོན་སུམ་དུ་ཡོད་ན་ན་མིག་དང་ལུས་ཀྱི་དབང་པོས་གཟུང་བར་བྱ་བ་ཁས་བླངས་པའི་ཕྱིར་གཟུགས་ལ་སོགས་པ་མ་ཡིན་པའི་ངོ་བོ་ནི། གཟུགས་ལ་སོགས་པ་རྟོགས་པ་ཉིད་ལ་སོགས་པ་རང་བཞིན་སྤངས་པ་ཞེས་བྱ་བའི་དོན་ཡིན་ནོ། །ཡོན་ཏན་དང་རྫས་དག་ཐ་དད་པར་ཁས་བླངས་པའི་ཕྱིར་རོ། །དེ་ཐ་དད་པ་ནི་གཟུགས་ལ་སོགས་པའི་རང་བཞིན་ལས་ཐ་དད་པའོ། །བློ་ནི་མིག་དང་ལུས་ཀྱི་དབང་པོ་ལས་སྐྱེས་པ་ལས་སྣང་བ་ལ་རག་ན་ཅིས་བསྒྲིབས་པ་ཡིན། །གགས་བྱེད་པ་འགའ་ཞིག་ཀྱང་མེད་པའི་དོན་ཏོ། །འགའ་ཞིག་ཤིན་ཏུ་གུས་པས་དབང་པོ་མ་ཉམས་པས་ཀྱང་སྤྱོད་པ་ན་སྔོན་པོ་དང་མངར་དྲི་ད་བ་དང༌། རྩུབ་པ་ལ་སོགས་པ་ལས་ཐ་དད་པ་དེའི་ངོ་བོས་དབེན་པའི་ངོ་བོ་བུམ་པ་ལ་སོགས་པའི་རྫས་


DTG190_Page_0156
[མ་དཔེ་གཟིགས་ན་འདིར་གནོན།]

འདི་འདྲ་ན་དམིགས་སུ་མེད་དོ་ཞེས་དགོངས་སོ། །རྣམ་ཕུག་གིས་སྨྲས་པ། གཟུགས་ལ་སོགས་པ་གཟུང་ཡང་རྫས་མ་བཟུང་བ་ཡོད་པ་ཡིན་ཏེ། གང་སྣང་བའི་འགྲིབ་ཅི་བྱུང་བའི་ཚེ་གཟུགས་ལ་སོགས་པ་མི་དམིགས་པ་ཡིན་ལ་རྫས་ནི་དམིགས་པ་ཡིན་ཏེ། བ་ལང་དམ་རྟའི་གཟུགས་སུ་མ་ངེས་པའི་ཕྱིར་རོ། །འོན་ཀྱང་དེ་ཡང་མཐོ་ཡོར་ཙམ་དམིགས་སོ་ཞེ་ན། དམིགས་པ་ནི་བདེན་ན། དེའི་བདག་ཉིད་ནི་མ་ཡིན་ཏེ། གཟུགས་ལ་སོགས་པའི་བདག་ཉིད་ཡིན་ན། སྔོན་པོ་དང་སེར་པོ་ལ་སོགས་པའི་བྱེ་བྲག་འཛིན་པར་ཐལ་བར་འགྱུར་རོ། །དེ་བཞིན་དུ་ལྕགས་ཀྱི་ཁྲབ་ཀྱི་ནང་གི་སྐྱེས་བུའི་གཟུགས་ལ་སོགས་པ་མ་བཟུང་ཡང་སྐྱེས་བུར་ཤེས་པ་མཐོང་བ། ནུབ་མོའི་ཆུ་སྐྱར་གྱི་དཀར་པོའི་གཟུགས་ལ་སོགས་པ་མ་བཟུང་ཡང་བྱར་ཤེས་པས་མཐོང་ངོ༌། །དེ་བཞིན་དུ་སྔོན་པོ་ལ་སོགས་པ་ཉེ་བར་ལེན་པ་ཐ་དད་པའི་རྗེས་སུ་བྱེད་པའི་ནོར་བུ་ཤེལ་གྱི་གཟུགས་ལ་སོགས་པ་མི་འཛིན་ཀྱང་ཤེལ་དུ་ཤེས་སོ། །དེ་བཞིན་དུ་ཚོན་གྱི་ངོ་བོས་སྙམ་བུའི་གཟུགས་ལ་སོགས་པ་ཟིལ་གྱིས་མནན་པས་སྣམ་བུའི་གཟུགས་མ་བཟུང་ཡང་སྣམ་བུར་ཤེས་པས་མཐོང་བ་ཡིན་ནོ་ཞེ་ན། དེས་ན་འདི་ཐམས་ཅད་ནི་བསྐལ་པ་མང་པོར་བསགས་པའི་ལྟ་བ་ངན་པ་གོམས་པ་ལས་སྐྱེས་པ་བློས་རློམ་པ་ཡིན་ནོ་ཞེས་གསལ་བར་བྱེད་པའི་དོན་ཏོ། །འདི་ལྟར་རེ་ཞིག་འདི་སྐད་བརྗོད་པ་ཡིན་ཏེ། སྣང་བ་འགྲིབ་པས་མི་གསལ་བ་དང་མཚན་མོ་སྔོན་པོ་ལ་སོགས་པའི་ཉེ་བར་ལེན་པ་ཡོད་པར་འགྱུར་བ་ན་དེའི་གཟུགས་ལ་སོགས་པ་མི་འཛིན་རྫས་དམིགས་པ་ཡིན་ནོ་སྙམ་ན། དེ་ལ་བརྗོད་པར་བྱ་སྟེ། དེ་ལ་ཅི་འདྲ་བ་ཞིག་གིས་རྫས་དམིགས་པ་ཡིན་ནོ་ཞེ་ན། སྣང་བ་ཉིད་དེ་སྣང་བ་མི་དམིགས་པ་ཡིན་ནོ་ཞེ་ན། སྣང་བ་འགྲིབ་ཅིང་མི་གསལ་བའི་ཚེ་སྔོ་སྐྱའི་གཟུགས་དེ་ཉེ་བར་ལེན་པའི་གཟུགས་ཀྱང་དམིགས་སོ། །གཟུགས་དེ་དེའི་ངོ་བོ་མ་ཡིན་ན་དེ་མ་ཐག་ཏུ་བཤད་པའི་ཕྱོགས་ཉམས་པར་ཐལ་བར་འགྱུར་རོ། །དེ་དང་ཉེ་བའི་ལོགས་ན་ཡོད་པའི་དེ་ལྟར་དམིགས་པ་མེད་ཅིང་གཞན་གྱི་རྣམ་པའི་བློས་ཀྱང་དངོས་པོ་དེ་རྟོགས་པ་མ་ཡིན་ཏེ། གང་ཡང་རུང་བའི་རྣམ་པར་


DTG190_Page_0157
[མ་དཔེ་གཟིགས་ན་འདིར་གནོན།]

ཤེས་པ་དངོས་པོ་ཐམས་ཅད་གཅོད་པ་ཐལ་བར་འགྱུར་བའི་ཕྱིར་རོ། །དེའི་ཕྱིར་འདི་ནི་འཁྲུལ་པའི་ཤེས་པ་ཡིན་ནོ། །འཁྲུལ་པ་ནི་ས་བོན་གྱི་རྒྱུན་བབས་པ་འམ་རྒྱུ་མེད་པའི་དུས་སུ་ཡུལ་མེད་པ་ཉིད་དུ་ད་ལྟར་སྣང་བར་འགྲུབ་སྟེ། ཟླ་བ་གཉིས་པའི་ཤེས་པ་བཞིན་དུ་ཉེ་བར་སྐྱེའོ། །གང་གི་ཕྱིར་ཡུལ་མེད་དུ་ཟིན་ཀྱང་སོ་སོར་ངེས་པའི་ཡུལ་དང་དུས་སུ་འབྱུང་བར་འགྱུར་ཏེ། རང་གི་ཉེ་བར་ལེན་པའི་བག་ཆགས་སད་པར་བྱེད་པའི་ཕྱིར་ཕྱི་རོལ་གྱི་བདག་པོའི་རྐྱེན་ལ་ལྟོས་པའི་ཕྱིར་རོ། །ཟླ་བ་གཉིས་པའི་ཤེས་པ་བཞིན་དུ་འཁྲུལ་པ་ཡིན་དུ་ཟིན་ཀྱང་དོན་ལ་མ་བསླུས་ཏེ། ཁྱད་པར་ཅན་གྱི་བདག་པོའི་རྐྱེན་ཡོད་པའི་ཕྱིར་རོ། །ནོར་བུའི་འོད་ལ་ནོར་བུ་བཞིན་དུ་དོན་ལ་མི་སླུ་བ་ཉིད་ནི་ཡུལ་མེད་པ་མི་རིགས་པ་ཉིད་ནི་ཡིན་ན་རྗེས་སུ་དཔག་པའི་མ་ངེས་པའི་ཕྱིར་རོ། །ནོར་བུ་འཁྲུལ་པ་དེ་ཉིད་ནི་རྫས་ལ་ད་ལྟར་འཛིན་པ་དེའི་ཡུལ་མེད་པར་མི་འགྱུར་རོ་ཞེ་ན། འོ་ན་དེའི་རྫས་དེ་དང་དེའི་ངོ་བོ་མ་ཡིན་པ་གཞན་གྱི་རྣམ་པ་རྗེས་སུ་འབྲངས་པའི་ཤེས་པ་བཞིན་ཡོངས་སུ་གཅོད་པ་མ་ཡིན་ནོ་ཞེས་བཤད་ཟིན་ཏོ། །དེ་ལྟར་ན་ཡང་ཡུལ་དང་བཅས་ལ་ལྟོས་པ་ཡང་ཡུལ་དང་བཅས་པ་ཡོད་པར་འགྱུར་བ་ཉིད་ནི་འདི་ལྟར་ཨུཏྤལ་ལ་སོགས་པ་དེ་ལྟར་སྣང་ངོ་ཞེས་ཁོ་བོས་ཀྱང་བརྗོད་པར་ནུས་ཏེ། འཁྲུལ་པ་དེ་ཐེ་ཚོམ་གྱི་རྒྱུ་རྣམས་མེད་དུ་ཟིན་ཀྱང་སྣང་བའི་གནས་སྐབས་སུ་རུང་བའི་ཡུལ་ན་གནས་པ་དང༌། བསྒྲིབས་པ་མེད་པའི་གནས་སྐབས་སུ་དེའི་རྫས་ཀྱི་བདག་གཟུགས་སྣང་བ་ལས་ཐ་དད་པ་ནི་མི་དམིགས་ལ། སྐྲག་པ་འཁྲུལ་བའི་ཐེ་ཚོམ་གྱི་རྒྱུ་མཚན་མུན་པས་ཆོད་པའི་གནས་སྐབས་དང་ཡུལ་རིང་བའི་གནས་སྐབས་ན་སྒྲིབ་པ་དང་བཅས་པ་ལ་ཡང་དེ་བཞིན་གྱི་རྣམ་པ་ལས་ཐ་དད་པར་སྣང་བ་ཡིན་ནོ་ཞེས་བྱ་བ་སྨོས་པ་ལ་སུ་ཞིག་གིས་བརྗོད་པར་ནུས། ལྕགས་ཀྱི་ཁྲབ་ཀྱི་ནང་གི་སྐྱེས་བུའི་ཤེས་པ་ནི་མངོན་སུམ་མ་ཡིན་ཏེ། འོན་ཀྱང་རྟགས་ཅན་ཡིན་ནོ། །འདི་ལྟར་སྐྱེས་བུའི་ལུས་ཀྱི་ཆ་ཤས་ལ་བརྟེན་པའི་སྟོབས་ལས་བྱུང་བའི་ཁྱད་པར་གྱི་དབྱིབས་སུ་རྣམ་པར་གནས་པ་ཁྲབ་ཅན་


DTG190_Page_0158
[མ་དཔེ་གཟིགས་ན་འདིར་གནོན།]

མཐོང་བ་ལས་འབྲས་བུའི་རྟགས་ཀྱི་ཤེས་པ་འབྲེལ་པ་དྲན་པ་ལྟོས་ནས་རྒྱུར་གྱུར་པའི་རྣམ་པ་དེ་ལྟ་བུ་ཡིན་ནོ་ཞེ་ན། དེ་མ་ཐག་པའི་ཤེས་པ་སྐྱེ་བར་འགྱུར་བ་མ་ཡིན་པ་བསྒྲུབ་པ་ཡིན་ནོ། །དེ་ཉིད་ཀྱི་ཕྱིར་གསལ་བའི་རྣམ་པ་དང་བཅས་པར་རྟོགས་པ་གང་ཡིན་ཞེས་ཐེ་ཚོམ་ཟ་བར་འགྱུར་རོ། །རྣམ་པ་དེ་ལྟ་བུའི་ཁྲབ་ཅན་གྱི་དབྱིབས་ལས་སྐྱེས་པ་ནི་གཟུགས་ལ་སོགས་པ་ཉིད་དུ་རྒྱུར་འགྱུར་གྱི་ཡན་ལག་ཅན་གྱི་རྫས་ལས་ནི་མ་ཡིན་ནོ། །དེ་ལ་མ་གྲུབ་པས་མ་གྲུབ་པའི་རྣམ་པ་གཉིས་ལས་ཁས་བླངས་པར་མི་རིགས་ཀྱི་གཟུགས་ལ་སོགས་པ་ནི་མངོན་སུམ་དང་མི་དམིགས་པ་དག་གི་རྒྱུ་དང་འབྲས་བུར་གྲུབ་པ་དེ་དག་ཉིད་ལས་དེ་བཞིན་དུ་དབྱིབས་ཉེ་བར་གནས་པའི་ཕྱིར་རོ། །སྣམ་བུ་ཡང་ལེ་བརྟན་དང་བཙོད་ཀ་ལ་སོགས་པར་བསྒྱུར་བས་དོན་གཞན་ཉིད་དེ་ལས་དེ་བཞིན་དུ་སྐྱེ་བར་མཐོང་གི་སྣ་ཚོགས་པའི་རྫས་དག་དང་འདྲེས་པའི་དབྱེར་མེད་པ་ལས་དེ་བཞིན་དུ་མི་དམིགས་སོ། །དེའི་རྫས་རྒྱུན་གནས་པའི་རྒྱུ་རྒྱུན་ཆད་ན་དེ་ལྡོག་པ་ཡིན་ཏེ། ཉེ་བར་ལེན་པའི་རྒྱུ་ལ་ལྟོས་ནས་ཆུ་དང་མེད་ལ་སོགས་པ་གཞན་སྐྱེ་བའི་ཕྱིར་རོ། །འདིས་ནི་ལྕགས་གོང་དང་མི་དག་དེའི་ངོ་བོར་འཛིན་པའི་ཤེས་པས་མཐོང་ཞེས་བྱ་བ་དེ་ཡང་གསལ་བ་ཡིན་ནོ། །དེ་ལྟར་ན་རྫས་དེ་མངོན་སུམ་གྱིས་མ་གྲུབ་པར་བཤད་ནས་བ་ལང་དང་རྟ་དང༌། མ་ཧེ་དང་ཕག་དང་ཕྱེ་མ་ལེབ་ལ་ཡིད་གཉིས་འབྱུང་བའི་རྟེན་གཟུགས་ལས་ཐ་དད་པར་བརྗོད་དོ། །དབང་པོ་ཉིད་དུ་གྱུར་པས་གཟུགས་ལ་སོགས་པ་འཛིན་པ་ཕྱི་རོལ་དུ་དབང་པོས་མི་གཅོད་པའི་ཕྱིར། བདེ་བ་ལ་སོགས་པ་བཞིན་ནོ་ཞེས་བྱ་བ་དེ་ཡང་བསལ་བར་བྱའོ། །སྦྱོར་བ་ཡང་གང་དང་གང་སྣང་བ་ལས་ཐ་དད་པ་མ་དམིགས་པ་དེ་དང་དེ་ནི་ཐ་དད་པར་ཁས་བླང་བར་མི་བྱ་འམ་མེད་པ་ཡིན་ནོ་ཞེས་ཁས་བླང་བར་བྱ་སྟེ། དཔེར་ན་མིའི་མགོའི་རྭ་བཞིན་ནོ། །སྔོན་པོ་ལ་སོགས་པ་ཡང་ཐ་དད་པའི་སྤྱིའི་དང་བྱེ་བྲག་དང་ལྡན་པ་རྣལ་མ་དབྱེ་བ་གཞན་དང་གཞན་མ་ཡིན་པ་ལ་སོགས་པ་མི་དམིགས་པས་ཞེས་བྱ་བའི་ཁྱབ་པར་བྱེད་པ་མི་དམིགས་པའོ། །མ་གྲུབ་པ་ནི་མ་ཡིན་ཏེ། སྣང་བ་ཉིད་དུ་རང་


DTG190_Page_0159
[མ་དཔེ་གཟིགས་ན་འདིར་གནོན།]

ཉིད་ཀྱིས་ཁས་བླངས་པའི་ཕྱིར་རོ། །དེ་བཞིན་དུ་གཟུགས་ལ་སོགས་པའི་དོན་རྣམ་པ་ལྔ་ལས་ཐ་དད་པའི་རྫས་ཁས་ལེན་པ་ནི་དམིགས་པའི་རིག་བྱར་གྱུར་པ་ཉིད་དུ་ཁས་བླངས་པ་ནི་སྔོན་པོ་ལ་སོགས་པའི་ཁ་དོག་གི་གཟུགས་སྤངས་པའི་ཕྱིར་སྒྲ་དང་དྲི་དང་རོ་བཞིན་དུ་མིག་གི་ཤེས་པས་ངེས་པ་མ་ཡིན་ནོ། །རེག་བྱ་ལ་བརྟེན་པའི་ཤེས་པ་ཉིད་ཀྱི་རྟོགས་པ་ནི་མ་ཡིན་ཏེ། སྣང་བ་ཉིད་དུ་ཁས་བླངས་པ་ཉིད་རྩུབ་མོ་ལ་སོགས་པའི་རང་བཞིན་དང་བྲལ་བས་སྒྲ་ལ་སོགས་པ་བཞིན་ནོ། །ཁ་དོག་སྔོན་པོའི་གཟུགས་ལ་སོགས་པ་ལས་ཐ་དད་པ་སོ་སོར་སྣང་བར་ཐལ་བར་འགྱུར་བ་ནི་གནོད་པ་ཅན་གྱི་ཚད་མའོ། །སྤྱི་ལ་སོགས་པའི་ཚད་མ་རྣམ་པ་གཉིས་ཀྱི་གཏན་ཚིགས་ལ་མ་ངེས་པ་མ་ཡིན་ཏེ། དེ་དག་མེད་པའི་ཐ་སྙད་ཀྱི་ཡུལ་ཉིད་དུ་སྔར་བསྒྲུབས་ཟིན་པའི་ཕྱིར་རོ། །ཐམས་ཅད་བསྡུས་ནས་ཁྱབ་པ་ཉིད་དུ་སྒྲུབ་པའི་གཏན་ཚིགས་ཀྱི་ཁྱད་པར་བསྟན་པ་ཡིན་ནོ། །ཡང་ན་གལ་ཏེ་མིག་དང་རེག་བྱའི་ཤེས་པ་དག་གིས་ཐ་མི་དད་པའི་རྫས་ཉིད་ཡུལ་མ་ཡིན་ཏེ། ཐ་དད་པའི་རྣལ་མའི་རྗེས་སུ་བྱེད་པའི་ཕྱིར་སྒྲ་དང་དྲིའི་ཤེས་པ་བཞིན་ནོ། །དེ་བཞིན་དུ་རྫས་ཀྱང་དབང་པོ་གཉིས་ཀྱི་གཟུང་བྱ་ཡིན་པས་ཞེས་བྱ་བ་དེས་བསལ་བ་ཡིན་ནོ། །ཡུལ་གཅིག་པ་ཉིད་མེད་པར་ཐལ་བར་འགྱུར་བ་གནོད་པ་ཅན་གྱི་ཚད་མ་སྟེ། སྣང་བའི་པ་བརྗོད་པའི་ཕྱིར་རོ། །གཏན་ཚིགས་མ་གྲུབ་པ་ཡང་ཡིན་ཏེ། མིག་གི་རྣམ་པར་ཤེས་པའི་ཁ་དོག་གི་སོ་སོར་སྣང་བ་ཉིད་དང་རེག་བྱའི་རྣམ་པར་ཤེས་པ་རྩུབ་མོ་ལ་སོགས་པ་སོ་སོར་སྣང་བ་ཉིད་ཀྱི་རང་རིག་པའི་མངོན་སུམ་གྱིས་གྲུབ་པའི་ཕྱིར་རོ། །དེ་ལྟ་ན་གལ་ཏེ་རྩུབ་མོ་ལ་སོགས་པ་ལ་བརྟེན་པར་བརྗོད་པ་དེའི་ཚེ་གྲུབ་པ་ལ་སྒྲུབ་པ་ཉིད་དོ། །འོན་ཏེ་ཉིང་པོ་ལ་སོགས་པའི་རྫས་ཡིན་པ་དེའི་ཚེ་གཏན་ཚིགས་མ་གྲུབ་པ་ཡིན་ཏེ། གང་གི་ཕྱིར་མིག་གིས་མཐོང་བའི་རིང་པོ་དང་ཐུང་དུ་དང་ལྷམ་པ་དང་ཟླུམ་པོ་དག་ཡིན་ནོ། །ཞེས་ལུས་ཀྱི་ཤེས་པས་ཀྱང་མ་མཐོང་བ་ཡིན་ནོ་ཞེ་ན། དེ་ནི་དེ་ལྟ་མ་ཡིན་ཏེ། འདི་ལྟར་རིང་པོ་ལ་སོགས་པ་ཤེས་པ་ནི་ལུས་ཀྱི་དབང་པོ་ལས་ཤེས་པ་


DTG190_Page_0160
[མ་དཔེ་གཟིགས་ན་འདིར་གནོན།]

མ་ཡིན་ཏེ། དེ་ལྟར་རྟོགས་པ་ཡིན་ན་ཁ་དོག་ཀྱང་དེ་ལ་སྣང་བར་འགྱུར་བའི་ཕྱིར་རོ། །རེག་བྱ་ལ་བརྟེན་པའི་ཤེས་པ་ཉིད་ལ་ཁ་དོག་སྣང་བར་རིགས་པ་མ་ཡིན་ཏེ། དེ་ནི་མིག་གི་རྣམ་པར་ཤེས་པའི་ཡུལ་ཡིན་པའི་ཕྱིར་རོ། །རྩུབ་མོ་ལ་སོགས་པ་ཉིད་ལ་སྣང་བར་ཐལ་བར་འགྱུར་བ་དེའི་ཕྱིར་གཟུགས་དང་རེག་བྱའི་ཤེས་པའི་རྗེས་སུ་འགྲོ་བའི་ཡིན་ནི་དྲན་པའི་རྣམ་པར་རྟོག་པ་སྟེ། དེ་སྐད་དུ་མིག་དང་ལུས་དག་ཇི་ལྟར་རང་གི་ཡུལ་ཐ་དད་པ་ལ་དམིགས་པ་ལས་གཞན་པ་དེ་དང་ལྷན་ཅིག་རྒྱུ་བ་སྤྱིའི་ཡུལ་ལ་དྲན་པ་ཐ་མི་དད་པའི་ཤེས་པ་ཡིན་ནོ་ཞེས་བཤད་དོ། །ཁྱབ་པར་བྱེད་པ་དང་འགལ་བ་དམིགས་པ་ཡིན་ནོ། །བྱིས་པའི་བརྗོད་པ་འགའ་ལས་གུས་པ་ཅི་ཞིག་བྱ་སྟེ། འདིར་རེ་ཞིག་བཀག་པ་ནི་གཞག་པ་ཡིན་ནོ། །གཞན་དག་གི་གཟུགས་ལ་སོགས་པས་རྫས་ཐ་དད་པའི་ཕྱིར་དང༌། སྣང་བ་དེ་སྔོན་པོ་ལ་སོགས་པ་བཞིན་དུ་ཐ་དད་པར་སྣང་བ་ཡིན་ཏེ། དབང་པོའི་ཡུལ་གཅིག་གིས་གཟུང་བར་བྱ་བ་ཡིན་པའི་ཕྱིར་རོ། །དེ་བཞིན་དུ་འདིར་ཡང་ཡིན་ནོ་ཞེས་བྱ་བར་འདོད་པ་ནི་བརྫུན་ཏེ། དེ་བཞིན་དུ་འདི་སྔོན་པོ་དྲི་ཞིབ་མོས་མངར་བའོ། །འདི་རྩུབ་པའོ། །ཞེས་སོ་སོར་སྣང་བ་ཐ་དད་པ་ཞེས་བྱ་བར་སྨོས་སོ། །མངོན་སུམ་ལ་དོན་སྣང་བ་ཐ་དད་པ་མེད་ཀྱང་འགྱུར་རོ། །གང་ཡིན་ཞེ་ན། དེ་གཟུགས་ལ་སོགས་པ་སྟེ། འདི་དག་འཇིག་རྟེན་ལ་གྲགས་པ་བཤད་པ་ཡིན་ནོ། །དེ་དག་ཡུལ་ཐ་དད་པ་མེད་པ་ཡང་མ་ཡིན་ཏེ། ཐིགས་པ་དང་བཅས་པ་རྣམ་པ་བཅུར་ཡོད་པ་བརྗོད་པའི་ཕྱིར་རོ། །དེ་ལྟར་ན་དབང་པོ་གཅིག་གིས་གཟུང་བར་བྱ་བ་ཡིན་པ་ཉིད་དུ་ཟིན་ཀྱང་རླུང་དང་ཚ་བའི་རིགས་བྱ་བ་ལ་སོགས་པ་ནི་ཅི་རིགས་པར་འདི་ལན་ཡིན་ནོ། །འདིས་ཀྱང་གཏན་ཚིགས་ལ་ངེས་པ་ཉིད་དུ་བརྗོད་པ་ཡིན་ནོ། །ཆོས་ཅན་དང་འབྲེལ་པར་ཁས་བླངས་སུ་ཟིན་ཀྱང་དབང་པོ་གཅིག་གི་ཡུལ་ཡིན་པ་ཉིད་དུ་མ་ངེས་པར་བཤད་པ་དང༌། འདི་དག་ལ་ཡོད་པ་མ་ཡིན་པས་ཕྱོགས་གཅིག་ལ་མ་གྲུབ་པ་ཡིན་ཏེ། དྲི་མངར་བ་ལ་སོགས་པ་རྫས་འཛིན་པར་བྱེད་པར་དབང་པོ་གང་གིས་ཇི་ལྟར་གཟུང་བར་བྱ་བ་ཡིན། རྫས་དབང་པོ་ཐམས་ཅད་ཀྱིས་ཐལ་བར་འགྱུར་རོ། །


DTG190_Page_0161
[མ་དཔེ་གཟིགས་ན་འདིར་གནོན།]

སྣང་བ་དང་སྔོན་པོ་ལ་སོགས་པ་ཐ་མི་དད་པ་ཁོ་ན་ཡིན་ཏེ། གང་གི་ཕྱིར་སྒྲོན་མ་དང་ཉེ་བ་ལས་གསལ་བའི་ངོ་བོ་ཉིད་ཀྱི་རྣམ་པ་དེ་ལྟ་བུའི་རང་བཞིན་གྱི་ཡུལ་ཅན་དུ་སྐྱེ་བར་འགྱུར་རོ། །དེ་དག་ཐ་དད་པ་ཡོད་པ་མ་ཡིན་པས་དེས་སྒྲུབ་པས་སྟོང་པ་ཡིན་ནོ་ཞེས་བསམས་པ་ཡིན་ནོ། །ཁྱེད་ཀྱིས་འདི་མངོན་སུམ་ཉིད་དུ་ཁས་བླང་བར་བྱའོ། །དེ་ལྟ་མ་ཡིན་ན་མངོན་སུམ་ཉིད་དུ་མི་འགྲུབ་པོ། །ཅིའི་ཕྱིར་ཞེ་ན། གང་གི་ཕྱིར་དེ་བཞིན་དུ་ཞེས་བྱ་བ་ལ་སོགས་པ་ནི་གོ་སླའོ། །ཁྱེད་ཀྱིས་བུམ་པ་འདི་གཟུགས་ལ་སོགས་པ་ལས་ཐ་དད་པར་ཁས་བླངས་པས་ཅིའི་འདི་རིན་མེད་པར་འཚོང་བར་བྱེད་དམ། འདིས་ཀྱང་དེ་འཇིག་རྟེན་ཐ་དད་པ་འདི་འདྲ་བར་འགྱུར་རོ་ཞེས་བཤད་དེ། དེའི་རང་གི་ངོ་བོ་ཁྱད་པར་དུ་སྟོན་པར་སོ་སོར་མི་སྣང་བའི་ཕྱིར་རོ། །རང་ཉིད་མངོན་སུམ་དུ་བྱེད་པར་འདོད་པ་ཡིན་ཏེ། རྫས་ནི་མཐོང་བ་དང་རེག་པ་ཡིན་ནོ་ཞེས་གྲུབ་པའི་མཐའ་ལས་བཤད་པའི་ཕྱིར་རོ། །དེ་ལྟར་བདག་ཉིད་འདི་རྒྱུན་ཏུ་དགའ་བའི་གཉེན་བཤེས་ཀྱིས་ཤེས་པར་འགྱུར་རོ་ཞེས་ཁ་བསྐང་ངོ༌། །རིན་མེད་པར་འཚོང་བར་འདོད་པ་ཡོད་པ་ནི་རིན་ལ་འཚོང་བ་དེ་ལྟ་བུ་ཡིན་ནོ་ཞེས་བྱ་བ་མེད་པའོ། ཡང་ན་འཚོང་བའི་ངང་ཚུལ་ཅན་གང་ཡིན་པ་འདི་ནི་རིན་མེད་པ་དེ་ལྟར་འཚོང་བ་ཡིན་ནོ། །འདི་ཇི་ལྟར་ཡིན་ཞེ་ན། གང་མངོན་སུམ་ཉིད་དུ་ཞེས་བྱ་བ་ལ་སོགས་པ་སྨོས་སོ། །རིན་མེད་པར་ཡང་རང་ངོ་བོ་འཇོག་པ་ནི་བཞད་གད་དུ་བྱེད་པའོ། །བློ་དགྲ་དག་ཡོད་པས་གཟུགས་ལ་སོགས་པ་ལྡན་པའི་བུམ་པ་གཅིག་ཡོད་པ་ཉིད་མ་ཡིན་ནམ། འདི་བྱེད་པ་ཉིད་ཡིན་ནོ་ཞེས་བྱ་བ་ལ་དེ་ཇི་ལྟར་ཡིན་ཞེ་ན། དེ་དག་གིས་བློ་དང་སྒྲ་ཐ་དད་པ་ཡང་བཤད་པ་ཡིན་ནོ། །ཐམས་ཅད་ཀྱིས་མ་ཡིན་ནོ་ཞེས་བྱ་བ་ལ་སོགས་པའི་སྒྲས་ནི་ཐ་དད་པ་དང་ཐ་མི་དད་པ་དང་རྒྱུ་དག་གོ །གལ་ཏེ་བློ་དང་སྒྲ་ལ་སོགས་པ་དེ་དག་གིས་རྫས་དེ་སྒྲུབ་པར་འདོད་པ་ནི་གྲུབ་པར་རོ། །རྫས་འདི་སོ་སོར་སྣང་བར་གྱུར་དུ་ཟིན་ཀྱང་ལན་ཚྭའི་རོ་རྣམས་ཟིལ་གྱིས་མནན་པའི་ཁཎྜའི་རོ་བཞིན་དུ་ཉེ་བར་མི་རྟོགས་པ་དེས་ན་དེ་སྒྲུབ་པར་བྱེད་པའི་རྟགས་བརྗོད་


DTG190_Page_0162
[མ་དཔེ་གཟིགས་ན་འདིར་གནོན།]

པར་བྱའོ་ཞེ་ན། བཤད་པ། མངོན་སུམ་གྱི་ངོ་བོ་མི་མཐོང་བ་ནི་རིགས་པ་མ་ཡིན་ཏེ། རྫས་གཞན་གྱིས་ཟིལ་གྱིས་མ་མནན་པས་སོ། །ཟིལ་གྱིས་མནན་པ་ཡིན་ན་ནི་རིགས་ཏེ། དཔེར་ན་ཁཎྜའི་རོ་བཞིན་ནོ། །འདིར་ཡང་ཅུང་ཟད་ཅིག་ཟིལ་གྱིས་ནོན་པ་མེད་པའི་ཕྱིར་རོ། །སྔོན་པོ་ལ་སོགས་པ་རྣམས་ཡོད་དོ་ཞེ་ན། མ་ཡིན་ཏེ། རྫས་དུ་མ་དང་ལྡན་པའི་ཆེན་པོའི་ངོ་བོ་ཉིད་ཉེ་བར་དམིགས་པ་དེ་བཞིན་དུ་གཟུགས་ཀྱིས་འདུས་མ་བྱས་པའི་རླུང་ནི་མི་དམིགས་སོ་ཞེས་བརྗོད་པ་དེ་ཡང་མི་མཐོང་བའི་དེ་དག་ཀྱང་མི་མཐོང་བར་ཐལ་བར་འགྱུར་རོ། །དེས་ན་ཐམས་ཅད་མི་རྟོགས་པར་འཇིག་རྟེན་གྱི་ཐ་སྙད་འཆད་པར་འགྱུར་རོ་ཞེས་བྱ་བ་དགོངས་སོ། །གང་གིས་ཡན་ལག་ཅན་དེ་མི་རྟོགས་ན་སྒྲུབ་པར་བྱེད་པའི་རྟགས་བརྗོད་པར་བྱ་བའོ། །དེ་དངོས་པོ་སྒྲུབ་པར་བྱེད་པའི་རྟགས་ཁས་བླང་བར་བྱ་ཞིང་ཉེ་བར་གཟུང་བར་བྱ་བ་ཡིན་ན་དེ་གོ་བར་བྱེད་པའི་རྟགས་ནི་ཅུང་ཟད་ཅིག་ཀྱང་མེད་དོ་ཞེས་དེ་སྐད་དུ་སྔར་བཤད་དོ། །དེ་རྟོགས་པར་བྱེད་པའི་ཚད་མ་ཡོད་ན་དེ་ཡང་ཡོད་པ་ཡིན་ནོ་ཞེས་ན། མངོན་སུམ་ཉིད་མེད་པ་ལ་ཚད་མ་མ་ཡིན་པས་ཡོད་པར་ཁས་བླངས་པར་རིགས་པ་མ་ཡིན་ནོ་ཞེས་བྱ་བར་སྨོས་སོ། །ཚད་མ་མ་ཡིན་པ་འདིས་མངོན་སུམ་ལས་ཐ་དད་པར་སྒྲུབ་པར་བྱེད་པའི་ཚད་མ་མེད་པར་བཤད་པ་གང་དང་གང་སྒྲུབ་པར་བྱེད་པའི་ཚད་མ་མེད་པ་དེ་དང་དེ་ནི་ཡོད་པར་ཁས་བླང་བར་བྱ་བ་སྟེ། དཔེར་ན་ནམ་མཁའི་པདྨ་བཞིན་ནོ། །ཡན་ལག་ཅན་ཡང་ཡོད་པར་སྒྲུབ་པར་བྱེད་པའི་ཚད་མ་མེད་པས་ཡོད་པའི་ཐ་སྙད་དུ་བྱེད་པའི་དགག་པའི་འབྲས་བུ་ཅན་གྱིས་མི་དམིགས་པ་ཡིན་པར་དགོངས་སོ། །དེ་ལྟར་རྫས་གཅིག་མེད་པ་རྒྱ་ཆེར་བསྟན་ནས་རྣལ་མའི་མཇུག་བསྡུ་བ་ནི། དེས་ན་ཞེས་བྱ་བ་ལ་སོགས་པའོ། །དེ་ལྟ་ན་དེ་སྲིད་དུ་ཞེས་བྱ་བ་ནི་རྩ་བའི་སྐབས་ཀྱི་མཇུག་བསྡུ་བ་ཡིན་ནོ། །དེ་ཉིད་ཀྱི་ཕྱིར་དེ་དག་བློ་ལ་སོགས་པ་ལྡོག་པ་ནི་མདོ་ལ་སོགས་པ་དེ་དག་ལྡོག་པ་མེད་དོ། །གང་དང་གང་ཡོད་པ་དེ་དག་སྒྲུབ་པར་བྱེད་པ་མ་ཡིན་པ་དེ་ཇི་


DTG190_Page_0163
[མ་དཔེ་གཟིགས་ན་འདིར་གནོན།]

ལྟར་ལྡོག་པར་འགྱུར་ཞིང་དེ་མེད་པར་སྒྲུབ་པར་བྱེད་པར་འདོད་པར་འགྱུར་ཞེས་དགོངས་སོ། །གལ་ཏེ་བློ་ལ་སོགས་པ་ཡོད་པ་དེ་ཐ་དད་པ་དང་ཐ་དད་པ་མ་ཡིན་པའི་སྒྲུབ་པར་མི་བྱེད་ཀྱི་དོན་བྱེད་པ་སྒྲུབ་པར་བྱེད་པར་འགྱུར་རོ་ཞེ་ན་བཤད་པ། དོན་བྱེད་པ་ཡོད་པས་ན་ཐ་སྙད་དུ་འགྱུར་རོ་ཞེས་བྱའོ། །དེ་རྟོགས་པའི་ཕྱིར་ཡོད་པ་ཡིན་ནོ་ཞེས་བྱ་བར་དགོངས་སོ། །འདིས་འུ་བུ་ཅག་ལ་འདིར་མཚུངས་པར་མཐོང་བར་འགྱུར་གྱི་གཞན་དུ་རྩོད་པར་འགྱུར་རོ། །བཤད་པ་ཐ་དད་པ་དང་ཐ་དད་པ་མ་ཡིན་པ་ཡོད་པའི་ཐ་སྙད་དུ་མི་འགྱུར་རོ། །གཅིག་གིས་ཀྱང་དོན་དུ་མ་བྱེད་པར་མཐོང་བའི་ཕྱིར་རོ། །འོ་ན་རྐྱེན་གཅིག་གིས་སྐྱེ་བ་ནི་ཅུང་ཟད་ཀྱང་ཡོད་པ་མ་ཡིན་ན་དེ་ཇི་ལྟར་དེ་སྐད་བཤད་ཅེ་ན། བདེན་ཏེ། གཅིག་ཀྱང་ཚོགས་པ་མང་པོ་དང་འབྲེལ་བ་འདི་ལས་དོན་དུ་མ་བྱེད་པར་བཤད་པ་ཡིན་ནོ། །དེ་སྐད་དུ། ཚོགས་པ་ལས་ནི་ཐམས་ཅད་འབྱུང༌། གཅིག་ལས་གཅིག་ནི་ཅུང་ཟད་མེད། །ཚོགས་པ་གཅིག་པར་གྱུར་ན་ཡང༌། དེ་ནི་དུ་མ་བྱེད་པར་བཤད། །ཅེས་བཤད་དོ། །ཇི་ལྟ་བུ་ཞེ་ན། དཔེར་ན་མར་མེ་གཅིག་གི་རྣམ་པར་ཤེས་པ་དང་སྡོང་བུའི་རྣམ་པར་འགྱུར་བ་དང་འབར་བ་ཞེས་དངོས་པོ་གཞན་དུ་རྒྱུ་དང་འབྲེལ་བའི་སྐད་ཅིག་མ་གཞན་སྐྱེ་བ་ཡིན་ཏེ། དེ་ཉིད་ཡོད་པའི་ཐ་སྙད་དུ་བྱེད་པ་ཐ་དད་པའི་དངོས་པོའི་རྒྱུ་ཡིན་པའི་ཕྱིར་རོ། །ཇི་ལྟར་གཅིག་ལས་དུ་མའི་འབྲས་བུ་སྐྱེ་བའི་ཡིན་ནོ་ཞེ་ན། འདི་འདྲ་བའི་གཅིག་པ་ལས་འབྲས་བུ་དུ་བ་བསྐྱེད་པ་ལ་བརྟེན་པ་ཁྱད་པར་དུ་གྱུར་བའི་ངོ་བོ་དང་ལྡན་པར་རང་གི་རྒྱུ་ལས་སྐྱེས་པའི་ཕྱིར་རོ་ཞེས་བྱ་བ་དངོས་པོའི་ཚུལ་དེ་ཉིད་རིགས་པ་ཡིན་ནོ། །དེ་ལྟར་མིག་ལ་སོགས་པ་དུ་མ་ལས་ཀྱང་རྣམ་པར་ཤེས་པ་གཅིག་བསྐྱེད་པར་མཐོང་བའི་ཕྱིར་རོ། །ཐ་མི་དད་པའི་ཐ་སྙད་དུ་འགྱུར་བའི་རྒྱུ་ནི་འདི་ཡིན་ནོ། །གཟེགས་ཟན་གྱིས་ཕྱིན་ཅི་ལོག་ཏུ་གྱུར་པའི་བློས་སྨྲས་པ། མི་སྨྲ་བའི་ཞེས་བྱ་བ་ལ་སོགས་པའོ། །འོན་ཀྱང་མ་མཐོང་བའི་དོན་བྱེད་པ་ཐ་དད་པའི་སྒོ་ནས་ཡོད་པ་ཐ་དད་པ་ཡིན་ནོ་ཞེས་བྱ་བར་གནས་སོ། །དེ་ཉིད་བསལ་བར་བྱ་བ་ནི་གང་དོན་བྱེད་པར་སྦྲང་རྩིའི་བཟའ་བ་ལ་སོགས་པའི་མཚན་ཉིད་དོ། །དེ་ལ་སྣམ་


DTG190_Page_0164
[མ་དཔེ་གཟིགས་ན་འདིར་གནོན།]

བུ་ལ་སོགས་པ་ལ་མཐོང་བའི་ཡོད་པ་དང༌། བུམ་པ་ལ་སོགས་པ་གཞན་དུ་མཐོང་བ་དེས་ནི་རྣམ་པ་དེ་ལྟ་བུ་ཡོད་པ་ཐ་དད་པར་སྒྲུབ་པར་བྱེད་པའོ། །བུམ་པ་ལ་སོགས་པ་དེ་དག་ནི་ཁྱབ་པ་སྨྲ་བ་པ་ཡིན་ནོ། །ཅི་ལྟ་བུ་ཞེ་ན། དཔེར་ན་སྣམ་བུ་ལ་ཆུ་འཛིན་པ་ལ་སོགས་པའི་དོན་བྱེད་པ་མ་མཐོང་བ་ལ་བུམ་པ་མ་མཐོང་བར་འགྱུར་བ་ནི་ཡོད་པ་ཐ་དད་པ་སྒྲུབ་པར་བྱེད་དོ་ཞེས་སྣལ་མ་དང་སྦྱར་རོ། །འདི་དག་ནི་དཔེར་བརྗོད་པའོ། །སྣལ་མ་དག་ལ་གོས་ལ་སོགས་པའི་དོན་བྱེད་པ་མ་མཐོང་བ་ལ་གཞན་མཐོང་ངོ་ཞེས་བྱ་བ་འདི་ནི་ཕྱོགས་ཀྱི་ཆོས་ཉེ་བར་བསྟན་པ་ཡིན་ནོ་ཞེས་བྱ་བ་ནི་ཡོད་པ་ཐ་དད་པ་སྣལ་མ་དང་སྣམ་བུ་མ་གྲུབ་བོ་ཞེས་བྱ་བ་ནི་ལྷག་མའོ། །དེས་ནི་འདི་བསྒྲུབས་པའི་འབྲས་བུར་བཤད་དོ། །འདི་ནི་རང་བཞིན་གྱི་གཏན་ཚིགས་ཡིན་ནོ། །གང་གི་ཕྱིར་དེ་མ་མཐོང་བའི་དོན་བྱེད་པའི་རྒྱུས་ཡོད་པ་ཐ་དད་པ་དང་འདིར་རྗེས་སུ་འབྲེལ་ཏོ་ཞེ་ན། དེས་ནི་འདིའི་སྣལ་མ་སྣམ་བུ་གཞན་ཉིད་དུ་གྲུབ་མོད་ཀྱི། ཡན་ལག་ཅན་དོན་གཞན་དུ་གྲུབ་པ་མ་ཡིན་ནོ་སྙམ་དུ་སློབ་དཔོན་གྱིས་དགོངས་ནས། དེ་ལྟར་གྲུབ་པ་ཡིན་མོད་ཅེས་བྱ་བ་སྨོས་ཏེ། སྣལ་མ་དང་སྣམ་བུ་ཡོད་པ་ཐ་དད་པ་ཞེས་བྱ་བ་སྣལ་མའོ། །ཁྱེད་ལ་འདོད་པའི་དོན་གྲུབ་པ་ཡོད་པ་མ་ཡིན་ནོ་ཞེས་བྱ་བར་དགོངས་ནས་བཤད་པ། དེ་ལྟར་དོན་གཞན་པའི་ཡན་ལག་ཅན་བསྒྲུབ་པ་མ་ཡིན་ཏེ། འདི་ཅིའི་ཕྱིར་ཞེ་ན། དཔེར་ན་རྐྱེན་གྱིས་འདི་འདུས་བྱས་པའི་རང་བཞིན་ལ་ཐ་དད་པ་སྐྱེད་པའི་ཕྱིར་རོ། །རྒྱུས་དོན་བྱེད་པར་ཐ་དད་པ་གོས་ལ་སོགས་པའི་མཚན་ཉིད་ཡིན་ནོ། །འདི་སྐད་སྟོན་པ་ཡིན་ཏེ། །སྣལ་མ་བསྡོམས་པར་བྱ་བ་ཉེ་བར་ལེན་པའི་རྒྱུར་གྱུར་པ་ཐ་ག་ལ་སོགས་པའི་ལྷན་ཅིག་བྱེད་པའི་རྐྱེན་ལས་ཁྱད་པར་ཅན་གྱི་དབྱིབས་རྒྱུན་མི་འཆད་པ་སྣལ་མ་ལས་སྐྱེའོ། །གོས་ལ་སོགས་པའི་དོན་བྱེད་པ་ལ་ཉེ་བར་སྦྱོར་བ་གང་ཡིན་པ་དེ་ནི་སྔ་མ་ལས་སྣམ་བུ་གཞན་ཉིད་དུ་ཁོ་བོ་ཅག་འདོད་པ་ཡིན་ནོ། །ཁྱད་པར་ཅན་གྱི་དབྱིབས་རྒྱུན་མི་འཆད་པ་ནི་མ་ཡིན་པས་དོན་གཞན་ལ་ཡན་ལག་ཅན་དུ་འདོད་པ་འདི་སྤངས་པ་ཡིན་ལ། འདིས་ནི་རྣམ་ཕུག་པའི་སྔ་མ་དང་ཕྱི་མར་


DTG190_Page_0165
[མ་དཔེ་གཟིགས་ན་འདིར་གནོན།]

འཇུག་པ་ཉིད་ལ་སོགས་པ་བཤད་པ་དེ་ཡང་བསལ་བ་ཡིན་ནོ། །དེའི་སྒྲུབ་པར་བྱེད་པའང་སྤངས་པའི་རིག་པར་བྱའོ། །ཁོ་བོ་ཅག་ནི་རྒྱ་ཆེར་བཀག་ཟིན་པས་ཡང་བརྗོད་པར་མི་བྱེད་དོ། །ཇི་ལྟ་བུ་ཡིན་ཞེ་ན། རྐྱེན་གྱི་དབང་གིས་རང་བཞིན་ཁྱད་པ་ཅན་དུ་སྐྱེད་པའི་དོན་བྱེད་པ་ཐ་དད་པ་ཡིན་ནོ་སྙམ་ནས་བཤད་པ། གཙུབ་ཤིང་གིས་གཙུབས་པའི་གནས་སྐབས་ཐ་དད་པ་ལས་ཞེས་བྱ་བ་སོགས་པ་ནི་གོ་སླའོ། །དཔེ་བསྟན་ནས་དོན་བསྟན་པ་ནི། །དེ་བཞིན་དེ་ཞེས་བྱ་བ་ལ་སོགས་པ་སྨོས་ཏེ། འདིས་ནི་རྐྱེན་ཇི་ལྟ་བ་བཞིན་རང་བཞིན་ཐ་དད་པའི་དོན་གཅིག་སྐྱེད་པར་བྱེད་དོ། །འོ་ན་སྣལ་མ་དང་སྣམ་བུ་ཞེས་བྱ་བ་སྨོས་ཏེ། བློ་དང་སྒྲ་ཐ་དད་པ་ལས་ཇི་ལྟར་འདི་གཞན་པ་ཉིད་མེད་པ་ཡིན་ཞེ་ན། དེ་དགག་པར་བྱའོ་སྙམ་དུ་དགོངས་ནས་བཤད་པ་དེ་དག་གིས་ནི་བློ་དང་སྒྲ་ཐ་དད་པ་ཡང་བཤད་པ་ཡིན་ནོ་ཞེས་བྱ་བའོ། །དེ་ལ་སྔར་གང་བཤད་པ་དེ་ལྟར་གནས་པ་དེའི་ཕྱིར་ཡོད་པ་ཐ་སྙད་གྲུབ་པར་གྱུར་པ་ལྡོག་པ་ནི་དོན་བྱེད་པ་ལྡོག་པའི་ཐ་སྙད་དུ་བྱ་བ་ཡོད་པ་ཡིན་ནོ་ཞེ་ན། འདི་ནི་བདེན་ཏེ། དེ་ཙམ་ཞིག་སྨའི། དེ་ཉིད་དོན་བྱེད་པ་ལོག་པ་ཡིན་ཏེ། དམིགས་པའི་རིག་བྱར་མ་གྱུར་པ་དག་གིས་ནི་འགྲུབ་པར་མི་འགྱུར་རོ། །འདི་དམིགས་པའི་རིག་བྱར་གྱུར་པ་ལས་མི་དམིགས་པ་གང་ཡིན་པ་མི་འདོད་པ་དེ་ནི་དོན་ནུས་པའི་ཡོད་པར་མི་འགྱུར་བ་ཞིག་ན། ཁྱེད་ཀྱིས་ཇི་ལྟར་རྟོགས་པར་འགྱུར། །མི་དམིགས་པ་ཙམ་ནི་བརྗོད་པར་མི་རིགས་ཏེ་དེ་འཁྲུལ་བའི་ཕྱིར་དེ་ནི་མི་འདོད་པ་ཡང་འོང་བར་འགྱུར་རོ། །ཁྱེད་ཀྱིས་དོན་བྱེད་པ་འདི་དམིགས་པའི་རིག་བྱར་གྱུར་པ་དང་ཡོད་པ་ལས་མི་དམིགས་པ་གང་ཡིན་པ་དེ་ནི་མེད་པར་ཐ་སྙད་ཀྱི་ཡུལ་ཡིན་ཏེ། ཅི་ཞེ་ན། ཡོད་པ་ཞེས་བྱ་བ་ནུས་པའི་མཚན་ཉིད་ཀྱི་ཕྱིར་རོ། །དེ་ལྟ་ཡིན་ན་སྐྱོན་ཅི་ཡོད་ཅེ་ན། བཤད་པ་དེ་ལྟ་ན་ཡང་ཁོ་བོས་བརྗོད་པ་སྔ་མ་ལས་འདི་ཁྱད་པར་ཅི་ཡོད། དེ་དམིགས་པར་བྱ་བ་མ་དམིགས་པའི་ཕྱིར་ནུས་པ་འདི་མ་དམིགས་སོ་ཞེས་བྱ་བ་ཁྱེད་ཀྱིས་བཏགས་པ་ཡིན་ནོ། །དེའི་རང་བཞིན་མི་དམིགས་པར་འདོད་པར་གྱུར་ཀྱང་གང་


DTG190_Page_0166
[མ་དཔེ་གཟིགས་ན་འདིར་གནོན།]

གི་ནུས་པ་ཡིན་ཞེ་ན། དེའི་ཞེས་བྱ་བ་ལ་སོགས་པ་སྨོས་ཏེ། དེ་ལྟར་དེའི་ནུས་པ་མི་དམིགས་པ་གང་ཡིན་པ་དེ་ནི་རང་བཞིན་ཁོ་ན་ཡིན་ནོ། །དེའི་ཕྱིར་སྔ་མའི་རང་བཞིན་མི་དམིགས་པ་འདི་ནུས་པ་མི་དམིགས་པས་སོ། །དེ་བས་ན་སྣང་དུ་རུང་བ་མི་དམིགས་པ་ཉིད་མེད་པའི་ཐ་སྙད་སྒྲུབ་པ་ཡིན་ནོ་ཞེས་བྱ་བ་འདི་གནས་སོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་འདིས་དགོས་པ་འགའ་ཞིག་གིས་རི་བོང་གི་རྭ་ལ་སོགས་པ་མེད་པའི་ཐ་སྙད་དུ་བྱ་བར་ཁས་ལེན་པ་ནི། སྣང་བ་མི་དམིགས་པས་ཁས་བླང་བར་བྱའོ། །གཞན་དུ་ན་བལྟ་བར་བྱ་བའི་ཐབས་མེད་པར་འགྱུར་རོ་ཞེས་བྱ་བར་དགོངས་སོ། །དེས་ན་མི་དམིགས་པ་དེ་ནི་སྤྱི་དང་ཁྱད་པར་དང་ལྡན་པ་དང་ཡན་ལག་ཅན་གྱི་རྫས་ལ་སོགས་པ་གཞན་ཡང་རྣམ་པ་དེ་ལྟ་བུས་དམིགས་པའི་རིག་བྱར་གྱུར་པར་ཁྱད་པར་མེད་པའི་ཕྱིར་རོ། །སྤྱི་དང་ཁྱད་པར་ལ་སོགས་པ་དེ་བཞིན་དུ་མེད་པའི་ཐ་སྙད་ཀྱི་ཡུལ་ཉིད་དུ་འགྱུར་རོ་ཞེས་བྱ་བའི་དོན་ཏོ། །སྤྱི་དང་བྱེ་བྲག་ལ་སོགས་པ་འདི་ལྟ་བུའི་མི་དམིགས་པ་ཡིན་ཡང་མེད་པའི་ཐ་སྙད་ཀྱི་ཡུལ་དུ་མི་འགྱུར་རོ་ཞེ་ན། བཤད་པ་འགའ་ཞིག་ཏུ་མ་ཡིན་ཏེ། ཁྱད་པར་མེད་པའི་ཕྱིར་མེད་པའི་ཐ་སྙད་བྱ་བར་ཁས་བླང་བར་བྱའོ། །ཅིའི་ཕྱིར་ཞེ་ན། ཁྱད་པར་མེད་པའི་ཕྱིར་རོ། འདིར་མི་དམིགས་པ་གཉི་གའི་དོན་ལ་ཡང་མི་དམིགས་པ་དེའི་རྒྱུ་མཚན་མཚུངས་པའི་གཏན་ཚིགས་ཀྱིས་བསལ་ཏེ་སྤྱི་ལ་སོགས་པ་ལ་ཁས་བླངས་པ་ལ་ཡང་མེད་པའི་ཐ་སྙད་དུ་བྱའོ། །འོན་ཏེ་གཞན་དུ་ཡང་ཁས་ལེན་ན་མེད་པའི་གཏན་ཚིགས་སུ་ཁྱད་པར་མེད་པའི་ཕྱིར་ཞེས་སྔར་བཤད་པ་ཉིད་ཡིན་ནོ། །འགའ་ཞིག་མེད་པར་ཁས་ལེན་པ་དེའི་མཚན་ཉིད་ལ་ཁྱད་པར་མེད་པར་དྲན་པར་བྱེད་དོ། །དེའི་ཕྱིར་མི་དམིགས་པའི་རྣམ་པ་དེ་ལྟ་བུ་ཐམས་ཅད་ནི་མེད་པའི་ཐ་སྙད་ཀྱི་ཡུལ་ནོ་ཞེས་བྱ་བས་ཁྱབ་པའོ། །མི་དམིགས་པའི་ཡུལ་དུ་གྲུབ་པའོ། །སེར་སྐྱས་སྒྲ་ཐམས་ཅད་ཀྱི་བདག་ཉིད་ཡིན་ནོ། །དེ་ལྟ་མ་ཡིན་ན་གལ་ཏེ་འཇིམ་པའི་གོང་བུ་དང་འོ་མ་དང་ས་ལས་བུམ་པ་དང་ཞོ་དང་མྱུ་གུ་ལ་སོགས་པའི་ནུས་པའི་


DTG190_Page_0167
[མ་དཔེ་གཟིགས་ན་འདིར་གནོན།]

བདག་ཉིད་མེད་པ་ཁོ་ན་ཡིན་ནོ། །དེ་ཇི་ལྟར་དེ་ལས་དེ་དག་སྐྱེ་བར་འགྱུར། རི་བོང་གི་རྭ་དང་རྟའི་རྭ་མེད་པ་ནི་དེ་ལ་སྐྱེ་བ་མེད་དོ། །དེ་ལྟར་ན་འགའ་ཞིག་གི་བུམ་པ་ལ་སོགས་པ་ལའོ། །འགའ་ཞིག་ཏུ་ནི་ཡུལ་ལ་སོགས་པའོ། །རྣམ་པ་འགའ་ཞིག་ནི་དབྱིབས་ཀྱི་ཁྱད་པར་ལ་སོགས་པ་སྣང་དུ་རུང་བའི་ཡོད་པའི་མི་དམིགས་སུ་ཟིན་ཀྱང་མེད་པའི་ཐ་སྙད་ཀྱི་ཡུལ་མ་ཡིན་ནོ་ཞེས་དེ་དག་གི་དོགས་པས་གལ་ཏེ་ཞེས་བྱ་བ་ལ་སོགས་པ་སྟེ། རྩྭ་མཆོག་རྩེ་ལ་གླང་ཆེན་བརྒྱ། །སྔོན་ཆད་མ་མཐོང་ཡོད་དོ་ཞེས། །དེ་སྐད་གྲངས་ཅན་ཕྱུགས་ལས་གཞན། །ངོ་མཚར་བཅས་པས་སུ་བརྗོད་རྩོལ། །ཞེས་དགོངས་ནས་ཐམས་ཅད་ཅེས་བྱ་བ་ལ་སོགས་པ་སྨོས་ཏེ། གང་གི་ཚེ་མ་མཐོང་བ་དེ་ལ་ཡོད་པ་ཡིན་པ་དེའི་ཚེ་ཐམས་ཅད་ནི་འོ་མ་ལ་སོགས་པའོ། །ཐམས་ཅད་ནི་བུམ་པ་ལ་སོགས་པའི་ངོ་བོའི་རྗེས་སུ་བྱེད་པའི་ཕྱིར་དེ་བསྒྲུབ་པར་བྱ་བའི་དོན་གྱི་བྱ་བ་བྱེད་པར་འགྱུར་རོ་ཞེས་བྱ་བའི་དོན་ཏོ། །གཞན་ཡང་འདི་གཞན་ལས་མ་ཡིན་ཏེ། ཞོ་ལ་སོགས་པ་འབྲས་བུར་འདོད་པ་ནི་འོ་མ་ལ་སོགས་པ་ལས་འབྱུང་གི་ཆུ་ལ་སོགས་པ་ལས་མ་ཡིན་ནོ། །ཡང་ན་འདི་ནི་ཆོས་ལ་སོགས་པ་སྟེ་སྦྲང་རྩི་ལ་སོགས་པ་མ་ཡིན་ནོ། །དེ་བཞིན་དུ་གུར་གུམ་ལ་སོགས་པ་འདི་ནི་ཁ་ཆེ་བའི་ཡུལ་འདི་ནི་ཡིན་གྱི། །འདི་མ་ལ་ཡ་ལ་སོགས་པའི་ཡུལ་འདི་མ་ལགས་ཏེ། ཡང་ན་ཙན་དན་ལ་སོགས་པའི་འདི་ནི་མ་ཡིན་ནོ། །ཀུན་ད་ལ་སོགས་པ་དགུན་སྨད་ཀྱི་དུས་འདིའི་ཚེ་ཡིན་གྱི་སོས་ཀའི་དུས་འདིའི་ཚེ་ན་མ་ཡིན་ནོ། །ཡང་ན་པདྨ་ལ་སོགས་པ་འདིའི་ཚེ་མ་ཡིན་ནོ། །དེ་བཞིན་དུ་ཁཎྜ་ལ་སོགས་པ་མངར་བ་ལ་སོགས་པའི་ཡོན་ཏན་ཁྱད་པར་ཅན་འདི་ལྟ་བུ་ཡིན་གྱི་འདི་རྩ་བ་ལ་སོགས་པའི་ངོ་བོ་འདི་ལྟ་བུ་མ་ཡིན་ནོ། །ཡང་ན་འདི་ནི་མ་ལ་ཡ་ལ་སོགས་པ་འདི་ལྟ་བུ་མ་ཡིན་ནོ་ཞེས་བཤད་པར་བྱའོ། །ཅིའི་ཕྱིར་འདི་དག་དེ་ལྟ་བུ་ཡིན་ཞེ་ན། འགའ་ཞིག་གིས་ཞེས་བྱ་བ་ལ་སོགས་སྨོས་ཏེ། རྣམ་པ་དེ་ལྟ་བུ་མངར་བའི་ངོ་བོ་འདི་མེད་པ་ཡིན་ནོ། །ཐ་དད་པའི་དངོས་པོ་གང་ཡིན་པ་དེའི་རྒྱུ་མེད་པའི་ཕྱིར། །ཐམས་ཅད་དུ་ཐམས་ཅད་


DTG190_Page_0168
[མ་དཔེ་གཟིགས་ན་འདིར་གནོན།]

ངོ་བོ་རྣམས་ཀྱི་ཐམས་ཅད་ཀྱི་ཚེ་འདི་ལ་འཇུག་པར་འགྱུར་རོ་ཞེས་བྱ་བར་དགོངས་སོ། །འོ་ན་དེ་མ་ཐག་ཏུ་བཤད་པའི་དངོས་པོ་ཉིད་འདི་ནི་ཐམས་ཅད་ཀྱི་ཚེ་དོན་བྱེད་པ་ཡིན་ནོ་ཞེས་བྱ་བ་དེ་ཡང་དེ་མ་ཐག་ཏུ་བཤད་པའི་དངོས་པོ་ཉིད་འདི་འདིར་ཅི་ཞིག་བྱ། འདི་དག་བཏགས་པ་ལ་འཐག་པས་ཆོག་གོ་ཞེ་ན། བདེན་ཏེ། རྒྱུར་གྱུར་པའི་བྱེད་པ་སྔར་བཤད་ནས། ད་ནི་འབྲས་བུར་གྱུར་པ་ཁྱད་པར་ཡིན་པས་སྐྱོན་མེད་དོ། །འདི་ཡང་སྐྱོན་གཞན་གྱི་སྒོ་ནས་ཚིག་ལྷག་མ་བསྟན་པ་ཡིན་ནོ། །དེས་ན་དངོས་པོ་ཐ་དད་པ་མེད་པའི་ཕྱིར་གང་ལ་རྗེས་སུ་འགྲོ་བ་དང་འོང་བ་དག་མེད་པར་འགྱུར་རོ་ཞེས་སྦྱར་རོ། །འདི་འདིར་ཡོད་དོ་ཞེས་བྱ་བ་ལ་སོགས་པའི་རྗེས་སུ་འགྲོ་བའོ། །མེད་དོ་ཞེས་བྱ་བ་ནི་ལྡོག་པའོ། །གཞན་གྱི་སྨྲས་པ། གནས་སྐབས་ཞེས་བྱ་བ་ལ་སོགས་པ་སྟེ་འདི་སྐད་སྟོན་པ་ཡིན་ཏེ། གང་དང་གང་ལ་འཇུག་པ་དེ་དང་དེ་ནི་དེ་ལ་ཡོད་པ་ཡིན་ནོ་ཞེས་བྱ་བས་ཁ་བསྐང་སྟེ། གང་དང་གང་འཇུག་པ་དེ་ནི་དེ་ལ་ཡོད་པ་མ་ཡིན་ནོ་ཞེས་བྱ་བ་འདི་སྐྱོན་མ་ཡིན་ནོ། །སློབ་དཔོན་གྱིས་དེ་ཉིད་ཅེས་བྱ་བ་ལ་སོགས་པའོ། །དེ་ཉིད་ཀྱི་གནས་སྐབས་ལྡོག་པར་ཐ་དད་པར་མི་འགྱུར་རོ་ཞེས་བྱ་བ་ཁྱེད་ཅག་གི་ལྟ་ལྟར་མ་ཡིན་ཏེ། ཅིའི་ཕྱིར་ཞེ་ན། ཡུལ་ཐམས་ཅད་ལ་ཡོད་པའི་ཐ་སྙད་མེད་པའི་ཕྱིར་རོ། །དེ་ལྟ་ན་ཡང་ཡུལ་འགའ་ཞིག་ལ་མེད་པའི་ཐ་སྙད་དུ་འདོད་དེ་དེའི་ཚེ་དེའི་རྒྱུ་རྣམས་ཁྱེད་ཀྱིས་བརྗོད་དགོས་སོ་སྙམ་ནས། འགའ་ཞིག་ཅེས་བྱ་བ་སྨོས་སོ། །འགའ་ཞིག་ལ་གཞན་གྱིས་ཡོངས་སུ་བརྟགས་པའི་ལྡོག་པ་འདིས་ཡན་ལག་ཅན་ལ་སོགས་པ་ལ་མེད་པའི་ཐ་སྙད་དུ་ཁས་བླང་བར་བྱའོ། །ཡུལ་འགའ་ཞིག་ལ་སོགས་པ་སྨོས་ཏེ། ཅིའི་ཕྱིར་ཞེ་ན། གང་གི་ཚེ་དམིགས་པ་ལས་གཞན་མེད་པར་རྣམ་པར་གཅོད་པའི་གཏན་ཚིགས་ནི་ཡོད་པ་མ་ཡིན་ཏེ། །སྒྲུབ་པར་བྱེད་པ་ཞེས་བྱ་བ་ལྷག་མའོ། །དེ་ཡང་ཁྱོད་འདོད་པ་ཡིན་ནོ་ཞེས་བྱ་བར་དགོངས་སོ། །ཅིའི་ཕྱིར་ཞེ་ན། གང་གི་ཚེ་དེ་ལྟར་སྒྲུབ་པའི་དངོས་པོ་ནི་འགལ་བ་དམིགས་པ་ལ་སོགས་པའོ། །དགག་པ་ནི་ཁྱབ་པར་བྱེད་པ་མི་དམིགས་པ་ལ་སོགས་པའོ། །རྣམ་པར་གཅོད་པ་ནི་


DTG190_Page_0169
[མ་དཔེ་གཟིགས་ན་འདིར་གནོན།]

ཐམས་ཅད་དུ་ཡང་མི་དམིགས་པ་ཁོ་ནས་སྒྲུབ་པར་བྱེད་པའོ། །འོན་ཀྱང་ཁོ་བོ་ཡང་མི་དམིགས་པ་འདི་ཉིད་ལས་རྣམ་པར་གཅོད་པ་བསྒྲུབ་པར་བྱ་བ་ཡིན་ནོ་ཞེས་བརྗོད་པ་ད་འདིར་ཡང་བརྗོད་པར་བྱའོ་ཞེ་ན། བཤད་པ་མ་དམིགས་པ་དེ་གང་ལ་ཡོད་དེ་ཐམས་ཅད་མེད་པའི་ཐ་སྙད་ཀྱི་ཡུལ་ཞེས་བརྗོད་པར་བྱའོ། །ཅིའི་ཕྱིར་ཞེ་ན། ཁྱད་པར་མེད་པའི་ཕྱིར་རོ། །དེ་བཞིན་དུ་བུམ་པ་ལ་སོགས་པ་ཡང་ཡུལ་གྱི་ཁྱད་པར་འགའ་ཞིག་ཏུ་མེད་པའི་ཐ་སྙད་ཀྱི་ཡུལ་དུ་འགྲུབ་བོ། །རྣམ་པ་དེ་ལྟ་བུ་མི་དམིགས་པ་འདིར་ཡང་མི་དམིགས་པར་འགྱུར་ན། འགའ་ཞིག་ཏུ་འགའ་ཞིག་དམིགས་སུ་ཟིན་ཀྱང་མེད་པའི་ཐ་སྙད་ཀྱི་ཡུལ་དུ་དེ་མི་འགྱུར་རོ། །ཅི་སྟེ་བརྗོད་ཅེས་དགོངས་སོ། །དེ་ལྟ་མ་ཡིན་ན་ཡན་ལག་ཅན་འདི་ལ་མེད་པའི་ཐ་སྙད་དུ་མི་འགྱུར་རོ་ཞེས་བྱ་བའི་དོན་ཏོ། །ཕ་རོལ་པོ་གལ་ཚད་མ་ཐམས་ཅད་ལྡོག་པ་ཞེས་བྱ་ལ་སོགས་པའོ། །མ་དམིགས་པ་ལས་རྣམ་པར་གཅོད་པའི་གཏན་ཚིགས་ཡོད་པ་ཡིན་ནོ་ཞེས་བྱ་བ་དེ་ལྟར་ན་ཡང་འགའ་ཞིག་ཏུ་བུམ་པ་ཡང་མེད་པའི་ཐ་སྙད་ཀྱི་ཡུལ་དུ་མི་འགྱུར་ཏེ། ལུང་དང་རྗེས་སུ་དཔག་པའི་ཚད་མ་ཐམས་ཅད་ལོག་པས་མེད་པའི་ཕྱིར་རོ་ཞེས་སེམས་པ་ཡིན་ནོ། །ཅིའི་ཕྱིར་ཞེ་ན། འདི་ཡང་ཤེས་རབ་ཆེ་ཞིང་མཁས་པས་བསྒྲུབས་པ་ཡིན་ནོ་ཞེས་ཁྱེད་འདོད་དོ། །ཤེས་རབ་ཤིན་ཏུ་གཞོན་པ་ཞེས་བྱ་བ་ལ་སོགས་པ་ནི་བཞད་གད་དོ། །ཚད་མས་རྣམ་པར་གཅོད་པ་ན་ཉོན་མོངས་པ་མི་བཟོད་པ་ནི་ཤེས་རབ་གཞོན་པའི་རྒྱུ་ཡིན་ནོ། །མི་རིགས་པ་འདིར་ཅི་ཞིག་བཤད། ཁོ་བོ་ཅག་ལ་གང་གིས་ན་བཞད་གད་དུ་བྱེད་ཅེ་ན། གུས་པ་མི་བྱེད་པ་ཞེས་བྱ་བ་ལ་སོགས་པ་སྨོས་ཏེ། སྩོགས་པའི་སྒྲ་ནི་མཚུངས་པར་ཡོངས་སུ་གཟུང་ངོ༌། །འཁྲུལ་བ་ནི་སྔར་བཤད་ཟིན་ཏོ། །སྲོག་ཆགས་ཐམས་ཅད་ཀྱི་མངོན་སུམ་ལོག་པ་དེ་ལྟ་ན་རྟོགས་པར་འགྱུར་རོ་ཞེ་ན། བཤད་པ་ཐམས་ཅད་ཀྱི་མངོན་པར་ལོག་པ་ནི་མ་ཡིན་ཏེ། ཅིའི་ཕྱིར་ཞེ་ན། མ་གྲུབ་པའི་ཕྱིར་རོ། །བདག་དང་གཞན་དག་གིས་མ་རྟོགས་སོ་ཞེས་བྱ་བའི་དོན་ཏོ། །འདི་ཐམས་ཅད་ཀྱིས་


DTG190_Page_0170
[མ་དཔེ་གཟིགས་ན་འདིར་གནོན།]

མངོན་སུམ་གྱི་ལོག་པ་དེ་ལྟར་ན་རྟོགས་པར་བྱེད་དོ་ཞེ་ན། བདག་ཉིད་ཀྱིས་མངོན་སུམ་ལོག་པས་ཀྱང་མ་ཡིན་ཏེ་ཞེས་བྱ་བ་སྨོས་ཏེ། ཀྱང་གི་སྒྲ་ནི་སྔར་བཤད་པ་འབའ་ཞིག་གིས་མ་ཡིན་པའོ། །ལྡོག་པ་ཁྱད་པར་མེད་པ་ནི་ལྡོག་པ་ཁྱད་པར་མེད་པ་སྟེ། བདག་ཉིད་ཀྱིས་མངོན་སུམ་ལོག་པ་ཁྱད་པར་མེད་པ་ནི་བདག་ཉིད་མངོན་སུམ་ལོག་པ་ཁྱད་པར་མེད་པ་ཞེས་རིམ་གྱིས་བསྟན་ཏོ། །རྒྱུ་གཞན་མ་ལུས་པ་ཉེ་བ་ཡིན་ཡང་བསྐལ་བ་རྣམས་གསུམ་ལ་བདག་ཉིད་ཀྱིས་མངོན་སུམ་ལྡོག་པ་ཡིན་ལ། །བསྐལ་བ་མ་ཡིན་པ་ནི་མེད་པ་གོ་བར་བྱེད་པ་ཡིན་ནོ་ཞེས་བརྗོད་པ་ན་ཁྱད་པར་མེད་པའི་སྐལ་བ་བརྗོད་པ་ཡིན་ནོ། །གང་གི་ཕྱིར་ཚད་མ་ཐམས་ཅད་ལྡོག་པ་དག་གིས་མེད་པའི་ཐ་སྙད་ཀྱི་གཏན་ཚིགས་མ་ཡིན་པ་དེའི་ཕྱིར་རང་བཞིན་ཁྱད་པར་ཅན་ནི་བསྐལ་བ་རྣམ་པ་གསུམ་གྱིས་མ་བསྐལ་བའི་དངོས་པོའོ། །ཚད་མ་དང་ཉེ་བར་གྱུར་པ་མ་ལུས་པ་དང་དེ་ལས་གཞན་དབང་པོ་ལ་སོགས་པའི་རྒྱུ་ལས་བྱུང་བའི་མངོན་སུམ་གྱིས་མེད་པའི་ཐ་སྙད་ངེས་པར་བྱེད་པར་བསྟན་ཏེ་ཡང་དག་པར་སྒྲུབ་པའོ། །ཇི་སྐད་བཤད་པའི་ཚད་མ་དེ་ཉིད་ལོག་པས་དེའི་རང་བཞིན་ཁྱད་པར་ཅན་གྱི་མེད་པ་ཐ་སྙད་རབ་ཏུ་སྒྲུབ་པར་བྱེད་དོ། །ངེས་པར་གཟུང་བ་ནི་རྗེས་སུ་དཔག་པའི་གོ་བར་བྱེད་པ་ལ་སོགས་པ་དེ་རྣམ་པར་གཅོད་པ་ཡིན་ནོ། །དེ་ཅིའི་ཕྱིར་ཞེ་ན། དེའི་རང་བཞིན་ཁྱད་པར་ཅན་གྱི་ཡོད་པའི་རང་བཞིན་གྱིས་སོ། །ཇི་སྐད་བཤད་པའི་ཚད་མ་གང་ཡིན་པ་དེས་ཡོད་པ་འདི་ལ་ཁྱབ་པ་ཡིན་ནོ། །ཅིའི་ཕྱིར་ཞེ་ན། འདི་ལྟར་གང་ལ་དེ་འདྲའི་དོན་ཡིན་པ་དེ་ལ་ངེས་པ་དེ་ཡང་ཚད་མ་ལས་འགྱུར་བ་ཡིན་ཏེ། ནུས་པའི་རྒྱུ་ལས་འབྲས་བུ་འཁྲུལ་བ་མེད་པའི་ཕྱིར་རོ། །འདི་ལྟར་ཤིང་དང་ཤ་པ་བཞིན་དུ་དེའི་ཚད་མ་ཁྱད་པར་བྱེད་པ་ཡིན་པས་དེ་ལྡོག་ན་དེ་ཡང་ལྡོག་པར་འགྱུར་ཏེ། །འདིས་ནི་ཇི་སྐད་བཤད་པའི་མི་དམིགས་པ་ལ་སོགས་པའི་མཇུག་བསྡུ་བ་བཤད་པ་ཡིན་ནོ། །དམིགས་པའི་རིག་བྱར་གྱུར་པ་ཡིན་དུ་ཆུག་ཀྱང་འོ་མ་ལ་སོགས་པ་ལ་ཞོ་ལ་སོགས་པ་མངོན་སུམ་གྱིས་མི་དམིགས་སོ། །འོན་ཀྱང་རྗེས་སུ་དཔག་ལ་


DTG190_Page_0171
[མ་དཔེ་གཟིགས་ན་འདིར་གནོན།]

ལ་ནུས་པ་མེད་པ་ལས་མི་སྐྱེ་བ་ཡིན་པ་དེས་ན་དེ་ལྡོག་ཀྱང་མེད་པའི་ཐ་སྙད་ཀྱི་ཡུལ་དུ་དེ་མི་འགྱུར་རོ་ཞེ་ན། མ་ཡིན་གྱི་ཞེས་བྱ་བ་ལ་སོགས་པ་སྨོས་སོ། །གང་གིས་གཞན་དམིགས་པ་ཉིད་ཀྱི་རྗེས་སུ་དཔག་པས་འདི་མི་དམིགས་པར་འགྱུར་རོ། །གཞན་མི་དམིགས་པ་ལས་ཀྱང་ཅི་སྟེ་སྦྱོར་བར་མི་བྱེད་ཅེ་ན་དེའི་རང་བཞིན་ཞེས་བྱ་བ་ལ་སོགས་པ་སྨོས་ཏེ། ཡང་གི་སྒྲ་ནི་གང་གི་ཕྱིར་གྱི་དོན་ཏོ། །དེའི་རང་བཞིན་དམིགས་པའི་རིག་བྱར་གྱུར་པ་གཞན་དུ་གྱུར་པ་ནི་འཕོས་པའོ། །དེའི་དེ་མ་ཐག་ཏུ་མངོན་སུམ་དུ་དེ་མ་གྱུར་བ་མི་རིགས་སོ། །ཞེས་བྱ་བ་ལྷག་མའོ། །འདིས་ནི་མངོན་སུམ་དེ་ཉིད་དེ་མི་དམིགས་པ་ལ་ལྟོས་ནས་གཏན་ཚིགས་འགའ་ཞིག་གིས་མེད་པ་ལ་སོགས་བ་སྒྲུབ་པར་བྱེད་དོ། །སྦྱོར་བ་ཡང་གང་གི་ཚེ་མ་ལུས་པ་ཉེ་བའི་ནུས་པ་དང་འབྲེལ་བའི་རྒྱུ་ཡིན་པ་དེ་ནི་དེའི་ཚེ་འབྱུང་བར་འགྱུར་བ་ཉིད་དང་ལྟོས་པར་མི་འགྱུར་ཏེ། དཔེར་ན་ནུས་པ་ཐོགས་པ་མེད་པའི་ཚོགས་པའི་རྒྱུ་ལས་བྱུང་བའི་མྱུ་གུ་བཞིན་ནོ། །དེ་བཞིན་དུ་འོ་མ་ལ་སོགས་པའི་གནས་སྐབས་ལ་ཡང་ཇི་སྐད་བཤད་པའི་ཕྱོགས་ཀྱི་ཆོས་དང་ལྡན་པས་ཞོ་ལ་སོགས་པའི་ཡུལ་ལ་རྣམ་པར་ཤེས་པ་འབྱུང་བར་འགྱུར་རོ་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །གཉིས་པའི་བསྒྲུབ་བྱ་ལ་ལྟོས་ནས་ཁྱབ་པར་བྱེད་པ་དང་འགལ་བར་དམིགས་པའོ། །རྣམ་པ་གཞན་ཉིད་དུ་དེ་འགྱུར་བས་འདིའི་གཏན་ཚིགས་ཡིན་ནོ། །བཤད་པ་རྣམ་པ་གཞན་དུ་ཡོད་པར་འདོད་ན་ཞེས་བྱ་བ་ལ་སོགས་པ་དེ་ཉིད་དམིགས་པའི་རིག་བྱར་གྱུར་པ་མི་འགྱུར་ཏེ། སྔ་མའི་ངོ་བོ་ཉིད་འཕོས་པའི་ཕྱིར་རོ། །དེ་ལྟ་ན་ཡང་དེའི་ངོ་བོ་རྒྱུན་མི་འཆད་པར་འཇིག་པར་ཐལ་བར་འགྱུར་རོ། །གཞན་ཡང་ཞེས་བྱ་བ་ལ་སོགས་པས་སྐྱོན་བསགས་པར་བྱ་སྟེ། གང་གི་ཕྱིར་དངོས་པོ་འདི་མ་སྐྱེས་ཤིང་འཇིགས་པ་མེད་པའི་ངོ་བོ་ཁྱད་པར་འདི་ཡིན་ནོ་ཞེས་བྱ་བར་སྦྱར་རོ། །བཏགས་པའི་ངོ་བོ་གཅིག་པའི་ངོ་བོ་ཡིན་པའི་ཕྱིར་རོ། །རྫས་གཞན་གྱིས་བར་དུ་ཆོད་པ་དང་རིང་པོ་ན་གནས་པ་དག་ཀྱང༌། མངོན་སུམ་དང་མངོན་སུམ་མ་ཡིན་པ་ཉིད་ལ་སོགས་པར་འགྱུར་རོ་ཞེ་ན། བར་དུ་ཆོད་པ་མེད་པ་དང་རིང་པོ་


DTG190_Page_0172
[མ་དཔེ་གཟིགས་ན་འདིར་གནོན།]

མ་ཡིན་པ་དང་གནས་པ་ཞེས་བྱ་བ་ལ་སོགས་པ་སྨོས་ཏེ། བར་དུ་ཆོད་པ་དང་རིང་པོ་ན་གནས་པ་འདི་ཡོད་པ་མ་ཡིན་པ་ཞེས་བྱ་བར་སྦྱར་རོ། །དཔེ་ལ་ལས་བར་དུ་ཆོད་པ་མེད་པ་དང་རིང་པོ་མ་ཡིན་པ་ནི་གནས་པ་ཞེས་འདོན་ཏོ། །དེ་ལ་བར་དུ་ཆོད་པ་མེད་པ་དང་རིང་པོ་ན་གནས་པ་མ་ཡིན་པ་ཞེས་དགག་པའི་ཚིག་རེ་རེ་ཞིང་བསྡུ་བ་བྱ་བ་ནས། ཕྱིས་ནི་ཁྱད་པར་གྱི་བསྡུ་བ་བྱའོ། །གཅིག་ཀྱང་སྐྱེས་བུ་འགའ་ཞིག་ལ་ལྟོས་ནས་མངོན་སུམ་མ་ཡིན་པ་ལ་འགལ་བ་མེད་པ་ཉིད་དོ་ཞེས་ན། དེ་ཉིད་ཀྱི་ཞེས་བྱ་བ་སྨོས་སོ། །དེ་ཡང་དམིགས་ཕྱེ་བ་ལ་སོགས་པའི་གནས་སྐབས་ལ་སོགས་པའི་མངོན་སུམ་དུ་གྱུར་པ། གཞན་ལ་མངོན་སུམ་མ་ཡིན་པས་ཅི་ཞིག་ཉམས་ན། དབང་པོ་ལ་སོགས་པའི་གནས་དེ་ཉིད་ཅེས་བྱ་བ་སྨོས་ཏེ། འདི་དབང་པོ་མ་ཉམས་པ་དེའི་གནས་སྐབས་ཡིན་ཞེས་བྱ་བར་སྦྱར་རོ། །སོགས་པ་སྨོས་པ་ནི་ཡིད་མཁྱེན་པ་ལ་སྤངས་པ་ཡིན་ནོ། །རེས་འགའ་ཞིག་མངོན་སུམ་པར་གསལ་བའི་དུས་སུ་མངོན་སུམ་ཡིན་པ་དང༌། རེས་འགའ་མངོན་པར་མི་གསལ་བའི་ཚེ་མངོན་སུམ་མ་ཡིན་ནོ། །གང་གིས་མངོན་སུམ་དང་མངོན་སུམ་མ་ཡིན་པ་ཉིད་ནི་རེས་འགའ་ནུས་པ་མེད་པས་མི་སྐྱེ་བ་རྗེས་སུ་དཔག་པ་ཡིན་པ་དང༌། རེས་འགའ་གསལ་བའི་གནས་སྐབས་མངོན་སུམ་ཡིན་ནོ། །གང་གིས་དེ་སྐད་དུ་བརྗོད་པ་ལ་འདིར་ཡང་མི་རིགས་པ་ཅི་ཞིག་ཡོད་ཅེ་ན། བཤད་པ། འགའ་ཞིག་ལ་ཁྱད་པར་མེད་ན་ཞོ་ལ་སོགས་པའི་གནས་སྐབས་འདི་དག་མངོན་སུམ་ལ་སོགས་པ་དང་འགལ་བའི་ཕྱིར་རོ། །ཕན་ཚུན་འགལ་བ་གང་ཡིན་པ་དེ་དག་ཁྱད་པར་མེད་པའི་ཕྱིར་གཅིག་པ་མི་སྲིད་དེ། དཔེར་ན་གྲང་བ་དྲོ་བའི་རེག་བྱ་ལ་སོགས་པ་བཞིན་ནོ། །མངོན་སུམ་པ་ལ་སོགས་པ་ཕན་ཚུན་འགའ་བས་ཞེས་བྱ་བ་ནི་ཁྱབ་པར་བྱེད་པ་འགལ་བར་དམིགས་པ་ཡིན་ནོ། །གཞན་གྱིས་སྨྲས་པ། ཁྱད་པར་མེད་པ་མ་ཡིན་ཏེ་ཞེས་བྱ་བའོ། །གནས་སྐབས་ཀྱི་མཚན་ཉིད་ཁྱད་པར་གཅིག་ལྡོག་པ་ན་གསལ་བའི་གནས་སྐབས་ཀྱི་མཚན་ཉིད་གཞན་སྐྱེ་བ་ཡོད་པ་མ་ཡིན་པས་འོ་མ་དང་ཞོའི་ཐ་སྙད་ཁས་ལེན་པའོ། །འདི་ནི་སྐྱེ་བ་དང་འཇིག་


DTG190_Page_0173
[མ་དཔེ་གཟིགས་ན་འདིར་གནོན།]

པའི་ངོ་བོ་ཁྱད་པར་ལ་སོགས་པ་མ་གྲུབ་པར་སྨྲ་སྟེ། རེ་ཞིག་ཁྱད་པར་འདི་དང་ཁྱད་པར་ལྡན་པ་ཐ་དད་པར་ཁས་མི་ལེན་ཏེ། ཁས་ལེན་པ་ཉིད་ལ་དེའི་གནས་སྐབས་གཞན་དུ་བྱས་པའི་སྐྱོན་དུ་འགྱུར་རོ། །དེའི་ཕྱིར་འདི་ཐ་དད་པ་མེད་པ་ཉིད་དེ་ལ་སྐྱོན་འདི་ཡིན་ནོ་སྙམ་དུ་དོགས་ནས་བཤད་པ། ཁྱད་པར་དེའི་གནས་སྐབས་ཀྱི་མཚན་ཉིད་དེའི་ཁྱད་པར་དང་ལྡན་པའི་གནས་སྐབས་ཀྱི་བདག་ཉིད་དུ་གྱུར་པའི་རྗེས་སུ་འགྲོ་བ་མེད་པ་གཅིག་ཉིད་ལ་ལྡོག་པར་འགྱུར་ན། ཇི་ལྟར་རང་བཞིན་སྣ་ཚོགས་པའི་བདེ་བ་དང་སྡུག་བསྔལ་དག་འདྲེན་པར་མི་བྱེད་ཅེས་བྱ་བའི་དོན་ཏོ། །སྦྱོར་བ་ཡང་གང་དང་གང་བདག་ཉིད་དུ་གྱུར་པ་དེ་དང་དེ་ནི་གཅིག་ལྡོག་ན་ལྡོག་པ་ཡིན་པ་འམ་འཇུག་ན་འཇུག་ངེས་པར་འགྱུར་ཏེ། དཔེར་ན་དེའི་བདག་ཉིད་ཁྱད་པར་བཞིན་ནོ། །ཁྱད་པར་དང་ཁྱད་པར་ལྡན་པ་ཡང་བདག་ཉིད་དུ་གྱུར་པ་ཡིན་པས་ཞེས་བྱ་བ་རང་བཞིན་གྱི་གཏན་ཚིགས་སོ། །དེས་ན་གནས་སྐབས་གནས་སྐབས་ཅན་དེ་དག་སྣ་ཚོགས་པ་ཉིད་དུ་འགྱུར་ཏེ། ཕན་ཚུན་འགལ་བའི་ཆོས་ཉེ་བར་གནས་པའི་ཕྱིར་བདེ་བ་དང་སྡུག་བསྔལ་བ་བཞིན་ནོ་ཞེས་བྱ་བ་རང་བཞིན་གྱི་གཏན་ཚིགས་ཉིད་ཡིན་ནོ། །ཁྱད་པར་འདི་རྗེས་འགྲོ་མེད་པ་འམ། ལྡོག་པ་དང་འཇུག་པ་ནི་མ་ཡིན་ཏེ། དེས་ན་སྔ་མའི་སྦྱོར་བ་ནི་དཔེ་བསྒྲུབ་པར་བྱ་བས་སྟོང་པ་ཡིན་ལ། ཕྱི་མ་ནི་གཏན་ཚིགས་མ་གྲུབ་པ་ཡིན་ནོ་ཞེ་ན། བཤད་པ་རྗེས་སུ་འགྲོ་བ་དང་བཅས་པས་ཁྱད་པར་འཇུག་པ་དང་ལྡོག་པ་ཡན་ལག་ཏུ་བྱེད་པ་གཅིག་པ་ལ་འཇུག་པ་དང་ལྡོག་པ་ཅི་ཞིག་ཡོད་དེ། འཇུག་པ་དང་ལྡོག་པ་ནི་ཅི་ཡང་མེད་དེ། ཐམས་ཅད་ཐམས་ཅད་དུ་ཡོད་པའི་ཕྱིར་རོ་ཞེས་བྱ་བར་དགོངས་སོ། །སྐྱོན་གསལ་བར་བཤད་པ། གཞན་ཡང་འདི་ལྟར་རང་བཞིན་འགའ་ཞིག་གིས་ཁྱད་པར་དུ་བཤད་པ་དང་རང་ཉིད་འཇུག་པ་དང་ལྡོག་པ་ཤེས་པ་ཡིན་ན། །ཁྱེད་ནི་ཁྱད་པར་གཅིག་ལྡོག་པ་ཁྱད་པར་གཞན་སྐྱེ་བར་ཐ་སྙད་ཐ་དད་པ་ལས་ལེན་ཏོ་ཞེས་བྱ་བར་བརྗོད་དོ། །དེའི་ཚེ་དེ་དག་ཉིད་གཞན་དེ་བཞིན་གཤེགས་པའི་གསུང་ལ་གོམས་པར་བྱས་པའི་དྲི་མ་མེད་


DTG190_Page_0174
[མ་དཔེ་གཟིགས་ན་འདིར་གནོན།]

པའི་བློས་སྨྲ་བ་ན་བཞིན་འཛུམ་པའི་རྗེས་སུ་ཁས་མི་ལེན་ཏམ། གལ་ཏེ་འདི་སྐད་དུ་འགྱུར་ཡང་ཇི་ལྟར་བདག་ནི་འཇུག་པ་ན། ལྡོག་པ་ལྷག་པར་རྗེས་སུ་ཤེས་པ་དེ་བཞིན་དུ་དེས་ཀྱང་རྗེས་སུ་འགྲོ་བ་མེད་པའི་སྐྱེ་བ་འཇིག་པར་ཁས་བླང་བར་བྱེད་པ་ཡིན་ན་ཁོ་བོ་མངོན་པར་གསལ་བ་དང་མི་མངོན་པ་ཙམ་ལ་ཇི་ལྟ་བུ་ཅི་སྟེ་ཁས་མི་ལེན་པར་བྱེད་ཅེས་གཞན་དག་བརྒྱ་ལ་སྨྲ་བ་ལ་དོགས་ནས་འདི་ཞེས་བྱ་བ་ལ་སོགས་པ་སྨོས་སོ། །ཁྱེད་ཅག་ཡོད་པ་ལ་རྨོངས་པ་བདག་འདིར་རྗེས་སུ་འགྲོ་བར་སྨྲ་བ་དེ་ལ་བརྗོད་པར་བྱ་སྟེ། རྗེས་སུ་འགྲོ་བ་དང་ཞེས་བྱ་བ་གང་ཡིན། དངོས་པོ་སྐྱེ་བ་དང་འཇིག་པ་དག་ལ་ཞེས་བྱ་བ་འདི་འདུན་པ་ཡིན་ནོ། གཞན་གྱིས་སྨྲས་པ། འདིར་ཁྱེད་ཀྱིས་བརྗོད་པའི་ནུས་པའི་རྗེས་འགྲོའི་དངོས་པོ་སྐྱེ་བ་དང་འཇིག་པ་དག་ལ་ཡོད་པའོ། །དེའི་རྗེས་སུ་འགྲོ་བ་ཇི་ལྟ་བུ་ཡིན་ཞེ་ན། གང་གི་ཕྱིར་སྐྱེ་བའི་སྔར་དང་འཇིག་པའི་ཕྱིས་ཀྱང་ཡོད་པའི་ནུས་པ་ནི་གནས་སྐབས་ཅན་གྱི་མཚན་ཉིད་དོ། །གང་གིས་འདི་དག་འདི་ལྟར་ཡིན་པ་དེས་ན་དངོས་པོ་འདི་ཕྱིས་ཡོད་པ་ཐམས་ཅད་དུ་སྐྱེ་བ་ཡིན་ནོ། །འོན་ཀྱང་ནུས་པའི་ངོ་བོ་ལས་ཕྱིས་རྣམ་པར་གནས་པ་ལས་གསལ་བར་འགྱུར་བའི་ཕྱིར་རོ། །ཐམས་ཅད་ཡིན་ནོ་ཞེས་ཐམས་ཅད་དུ་འཛིན་པས་ཤེས་པར་འགྱུར་རོ། །དེ་བཞིན་དུ་གཅིག་པ་ཡིན་པས་ཕྱིས་ཀྱང་འཇིག་པ་མ་ཡིན་གྱི་འོན་ཀྱང་མི་མངོན་པ་ཡིན་ནོ། །མེད་པ་སྐྱེ་བ་ཡང་མ་ཡིན་ལ་ཡོད་པ་ཡང་མ་ཡིན་ནོ་ཞེས་བྱ་བའི་དོན་ཏོ། །སློབ་དཔོན་གྱིས་སྨྲས་པ། གལ་ཏེ་ནུས་པ་དང་བཅས་པ་ཐམས་ཅད་དུ་གསལ་བར་མི་མངོན་པའི་དུས་དང་གསལ་བ་ལས་ཁྱད་པར་མེད་པས་གཅིག་གི་ངོ་བོ་ཁྱད་པར་སྤངས་པ་ཡིན་ནོ་ཞེས་བྱ་བའི་དོན་ཏོ། །ད་ནི་འདིར་ཁྱད་པར་དང་ལྡན་པ་ཅི་ཞིག་ཡིན། འོ་མ་དང་ཞོ་དང་དར་བ་ལ་སོགས་པའི་རིམ་པའི་ཐ་སྙད་ཀྱི་རྣམ་པར་དབྱེ་བ་འདི་གང་གིས་བྱས། གྲངས་ཅན་གྱིས་སྨྲས་པ། གལ་ཏེ་གནས་སྐབས་ལྡན་པ་ཡིན་ནོ་ཞེ་ན། སློབ་དཔོན་གྱིས་གནས་སྐབས་ཞེས་བྱ་བ་ལ་སོགས་པ་གསུངས་སོ། །གནས་སྐབས་གཞན་མི་སྲིད་པས་བྱས་པ་རྣམ་པར་མི་རྟོག་པ་གཉིས་


DTG190_Page_0175
[མ་དཔེ་གཟིགས་ན་འདིར་གནོན།]

ཡིན་ཏེ། ངོ་ཚ་མེད་པའི་རྩོད་པ་ནི་མི་རིགས་སོ། །དེ་ཉིད་དམ་གཞན་ཉིད་ལས་ཕན་ཚུན་སྤངས་པ་ཡིན་ཏེ། གནས་པའི་མཚན་ཉིད་ཡིན་པས་ཕུང་པོ་གསུམ་པ་གསལ་བའི་ཕྱིར་རོ། །གཅིག་པ་ཡིན་པ་ལ་ཉེས་པ་ཅི་ཡོད་ཅེ་ན། གཅིག་པ་གཅིག་པ་ཡིན་པ་དེའི་ཚེ། ཇི་ལྟར་འདི་གཅིག་ལ་རྣམ་པར་དབྱེ་བ་ཡིན། ཡོད་པའི་རྣམ་པར་དབྱེ་བ་ནི་རང་གི་ངོ་བོ་རིགས་པ་མ་ཡིན་ནོ། །ལྟོས་ནས་ཡིན་ནོ་ཞེ་ན། རྣམ་གྲངས་མེད་པ་ལ་ཞེས་བྱ་བ་སྨོས་སོ། །དེ་ཕན་ཚུན་འགལ་བ་དག་ཇི་ལྟར་རིགས་པར་འགྱུར་བཤད་པ། སྐྱེ་བའི་གནས་སྐབས་དང༌། གང་མི་སྐྱེ་བའི་ནུས་པའོ། །དེ་ལྟ་བུ་ནི་དོན་བྱེད་པའི་ཉེ་བར་མཁོ་བ་ཡིན་གྱི་ནུས་པའི་གནས་སྐབས་ནི་མཁོ་བ་མ་ཡིན་ནོ། །སྦྱོར་བ་ནི་ནུས་པ་ལས་ཀྱང་སྐྱེ་བ་ཡོད་པ་ཡིན་ཏེ། གནས་སྐབས་ལས་ཐ་མི་དད་པའི་ཕྱིར། གནས་སྐབས་ཀྱི་རང་གི་ངོ་བོ་བཞིན་ནོ། །ཡང་ན་གནས་སྐབས་ཀྱི་སྐྱེ་བ་མ་ཡིན་ཏེ། ནུས་པའི་རང་གི་ངོ་བོ་བཞིན་ནོ། །རང་བཞིན་གྱི་གཏན་ཚིགས་དང་འགལ་བས་ཁྱབ་པ་དམིགས་པའོ། །གནས་སྐབས་ཀྱི་འདི་ཉིད་ཀྱིས་དོན་བྱེད་པ་དང་འབྲེལ་བ་དང༌། དོན་བྱེད་པ་མ་འབྲེལ་བ་དང༌། ལྡོག་པ་དང་མི་ལྡོག་པ་ལ་སོགས་པ་རྣམས་ལ་རང་བཞིན་གྱི་གཏན་ཚིགས་དང་འགལ་བས་ཁྱབ་པ་དམིགས་པ་དག་སྦྱར་བར་བྱའོ། །སོགས་པ་སྨོས་པ་ནི་ལྟུང་བ་དང་ཞེས་བྱ་བ་མི་ལྟུང་བ་ལ་སོགས་པ་སྦྱར་རོ། །གཞན་ཡང་གྲངས་ཅན་གྱི་འདོད་པའི་དགོས་པ་ནི། གལ་ཏེ་གནས་སྐབས་ཞེས་བྱ་བ་ལ་སོགས་པ་སྨོས་ཏེ། རྣམ་གྲངས་འགའ་ཞིག་གིས་གནས་སྐབས་ལ་ནུས་པ་གཞན་མ་ཡིན་པས་གཞན་ཉིད་དོ། །དེས་ན་སྐྱེ་བ་ལ་སོགས་པ་འགལ་བ་མེད་དོ། །ཁྱེད་རང་གི་ཕྱོགས་སྲུང་བས་གཡེངས་བའི་བློ་བདག་ཉིད་ཀྱང་བརྗོད་ངས་པ་བསྐྱུངས་པས་ཡིན་ནོ་ཞེས་དགོངས་ནས། བརྗེད་ངས་པའི་ངང་ཚུལ་ཅན་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་གཞན་ཡིན་པའི་ཕྱོགས་ལ་སྐྱོན་འདི་མེད་དེ། ཁོ་བོ་ཅག་གིས་བཤད་པ་གཞན་ཉིད་ཀྱི་ཕྱོགས་ཡིན་པས་གཞན་ཉིད་དོ། །འདི་ཡང་གང་ཡིན་ཞེ་ན། དེ་ཉིད་རིམ་གྱིས་བཤད་པར་བྱ་སྟེ། འོན་ཏེ་ནུས་པ་དང་གནས་སྐབས་འདིའི་རྣམ་པར་དབྱེ་བ་གཞན་


DTG190_Page_0176
[མ་དཔེ་གཟིགས་ན་འདིར་གནོན།]

ཉིད་ཡིན་པ་དེའི་ཚེ་འགལ་བ་འགལ་ཡང་མེད་དོ། །དངོས་པོ་རྗེས་སུ་འགྲོ་བ་དང་བཅས་པ་སྐྱེ་བ་དང་འཇིག་པ་དག་ཡིན་ནོ་ཞེས་བྱ་བ་འབའ་ཞིག་ཏུ་མི་འགྱུར་རོ། །དེ་ཅིའི་ཕྱིར་ཞེ་ན། གང་གི་ཕྱིར་གང་གི་རྗེས་སུ་འགྲོ་བའི་ནུས་པ་ཉིད་དུ་མངོན་པར་འདོད་པ་དེའི་སྐྱེ་བ་དང་འཇིག་པ་མ་ཡིན་ཏེ། རྟག་པ་གཅིག་པུ་ཉིད་ཀྱི་རང་བཞིན་དུ་རྣམ་པར་གནས་པའི་ཕྱིར་རོ། །ཡང་ན་གང་ཡིན་པ་དེ་དག་ནི་སྐྱེ་བ་དང་གནས་པའི་འཇིག་པའི་གནས་སྐབས་ཉིད་དུ་མངོན་པར་འདོད་པས་དེའི་རྗེས་སུ་འགྲོ་བ་མ་ཡིན་ནོ། །གཞན་དང་གཞན་མ་ཡིན་པ་སྐྱེ་བ་དང་འཇིག་པ་དག་ནི་གནས་སྐབས་ཀྱི་ངོ་བོ་མེད་པའི་ཕྱིར་རོ། །ནུས་པ་དང་གསལ་བ་དེ་དག་ལ་ཐ་དད་པ་མེད་པའི་ཕྱིར་སྐྱོན་མེད་དོ་ཞེས་བྱ་བའི་སེར་སྐྱའོ། །ལན་མེད་པར་ཞེས་བྱ་བ་ལ་སོགས་པ་ནི་སློབ་དཔོན་གྱིས་སོ། །འདིར་རིགས་པ་མེད་པ་ཅི་ཞིག་ཡོད། གང་གིས་ན་དེ་ལྟར་བརྗོད་ཅེ་ན། བཤད་པ། ཐ་དད་པ་མེད་ཅེས་བྱ་བ་ནི་གཅིག་པར་བརྗོད་པའོ། །ནུས་པ་དང་གསལ་བ་ཐ་དད་པ་དེ་དག་ཅེས་པ་འདི་ཡང་ཐ་དད་པ་བརྟེན་པ་གཞན་པའི་རྒྱུ་མཚན་གྱི་ཐ་སྙད་ཡིན་ནོ། །ཡོད་པ་མ་ཡིན་ཞེས་བྱ་བ་ནི་རྣམ་པར་རྟོག་པས་བཀོད་པ་མ་སྤངས་པའོ། །གཞན་ཡང་ལྡོག་པ་དང་རབ་ཏུ་སྐྱེ་བ་དག་དང་ལྡོག་པ་མེད་པ་དང་རབ་ཏུ་སྐྱེ་བ་མེད་པར་ཡོད་པ་དང༌། དེ་བཞིན་དུ་གནས་པ་དང་མི་གནས་པར་གྱུར་པ་དང༌། སོགས་པ་སྨོས་པས་འགྲོ་བ་དང་མི་འགྲོ་བ་ལ་སོགས་པ་ལ་སྦྱར་བར་བྱའོ། །ཁྱེད་ཀྱི་ཐ་དད་པའི་མཚན་ཉིད་འདི་དག་ཇི་ལྟར་རིགས་པ་ཡིན་ཞེ་ན། འདི་ལྟར་གནས་སྐབས་ཀྱི་ལྡོག་པ་དང་རབ་ཏུ་སྐྱེ་བ་བདག་དང་ལྡོག་པ་མེད་པ་དང༌། རབ་ཏུ་སྐྱེ་བ་མེད་པ་དང་ལྡན་པའི་ནུས་པ་ཐ་དད་པ་ནི་ཁྱེད་མི་འདོད་པ་དེ་བཞིན་དུ་ནུས་པ་དང་གནས་སྐབས་ཀྱང་ཡིན་ལ་གནས་སྐབས་ཅན་མ་ཡིན་པ་དང་ནུས་པ་ནི་དེ་དག་ལས་གཞན་པ་ཉིད་མི་འདོད་དོ། །ཅིའི་ཕྱིར་སྣ་ཚོགས་པའི་བདག་ཉིད་ཡིན་ཞེ་ན། བཤད་པ་འདི་དག་ནི་ལྡོག་པ་དང་རབ་ཏུ་སྐྱེ་བ་དང་ལྡོག་པ་མེད་པ་དང་རབ་ཏུ་སྐྱེ་བ་མེད་པ་ཞེས་བྱ་བ་ལ་སོགས་པ་ཐ་དད་པའོ། །འདི་ལྟར་གང་དག་ལྡོག་པ་དང་མི་ལྡོག་པ་ལ་སོགས་པ་དེ་ནི་དེ་ལས་ཐ་དད་པར་འགྱུར་ཏེ། དཔེར་ན་ཤིང་


DTG190_Page_0177
[མ་དཔེ་གཟིགས་ན་འདིར་གནོན།]

ཏ་ལ་དང་ཏམ་ལ་སོགས་པར་གྲགས་པ་བཞིན་ནོ། །དེ་དག་དང་བྲལ་བ་ནི་ཐ་དད་པ་མེད་པ་ཡིན་ཏེ་ཞེས་བྱ་བ་ནི་གང་ལྡོག་པ་དང་མི་ལྡོག་པ་ལ་སོགས་པ་ཡིན་ནོ། །འོ་ན་བྱུང་བ་དང་མ་བྱུང་བ་ལས་གྱུར་པ་དང་སེམས་དང་སེམས་ལས་བྱུང་བ་ལ་སོགས་པ་སོ་སོར་ངེས་པ་འདི་དག་ལྷན་ཅིག་སྐྱེ་བ་དང༌། འཇིག་པར་རིག་པར་བྱ་བ་སྟེ། དེ་དག་ཐ་མི་དད་པ་ནི་མ་ཡིན་ན་དེ་དག་དང་མི་འབྲལ་བ་ཐ་དད་པ་ཞེས་བྱ་བ་དེ་ཇི་ལྟར་བཤད་ཅེ་ན། །དེ་དག་སྐྱེ་བ་ལ་སོགས་པ་ཐ་དད་པར་འདོད་པའི་ཕྱོར། །རིམ་པ་ཇི་ལྟ་བ་བཞིན་དུ་དཔེ་གཉིས་བཤད་པ་ནི། དཔེ་ན་ཞེས་བྱ་བ་ལ་སོགས་པའོ། །རྣམ་པ་གཞན་དུ་ཞེས་བྱ་བ་ནི་གང་གི་ཚེ་ཐ་དད་པ་དང་ཐ་དད་པ་མེད་པའི་མཚན་ཉིད་ལ་བརྟེན་པ་སྔར་ཇི་སྐད་དུ་བཤད་པ་དེའི་ཐ་དད་པ་མེད་པའི་རྒྱུའི་ཕྱིར་ཐ་དད་པ་དང་ཐ་མི་དད་པ་རྣམ་པར་གཞག་པ་མ་ཡིན་ནོ། ཐམས་ཅད་དུ་ཞེས་བྱ་བ་ནི་བདེ་བ་ལ་སོགས་པ་དང་སེམས་པ་ཅན་གཞན་ཕན་ཚུན་དུའོ། །བདེ་བ་ལ་སོགས་པ་དང་སེམས་པ་ཅན་ཐ་དད་པ་འགྱུར་བ་ལ་བདེ་བ་ལ་སོགས་པ་སོ་སོར་ཐ་དད་པར་འགྱུར་རོ་ཞེས་བྱ་བའི་དོན་ཏོ། །དེའི་བདག་ཉིད་དུ་ཞེས་བྱ་བ་ལ་སོགས་པ་ནི་ཕ་རོལ་གྱིའོ། །གཞུང་ལུགས་ལས་གྲགས་པའི་ཐ་དད་པ་དང་ཐ་མི་དད་པའི་མཚན་ཉིད་བཤད་པ། དེ་བས་ན་འགལ་བ་ཞེས་བྱ་བ་ནི་སྐྱེ་བ་དང་མི་སྐྱེ་བ་ལ་སོགས་པ་དེ་མ་ཐག་ཏུ་བཤད་པའོ། །འཇིམ་པའི་བདག་ཉིད་ཅེས་བྱ་བ་ལ་སོགས་པ་ནི་འཇིམ་པའི་ནུར་བུ་དང་བུམ་པ་དག་ནི་རྟེན་དང་བརྟེན་པ་ཡང་མ་ཡིན་ནོ། །འོན་ཏེ་དེ་ལྟར་ན་འཇིམ་པའི་བདག་ཉིད་མགྲིན་པ་ལ་སོགས་པར་དབྱིབས་ཀྱི་ཁྱད་པར་འགའ་ཞིག་རྒྱུན་མི་འཆད་པ་ནི་བུམ་པ་ཞེས་བརྗོད་དོ། །འོ་ན་འཇིམ་པའི་རྫས་གཅིག་པ་ཐམས་ཅད་ལ་འདིས་བྱས་པ་དེ་ཇི་ལྟར་ཡིན་ཞེ་ན། ཁམས་གསུམ་པའི་འཇིམ་པའི་བདག་ཉིད་གཅིག་མ་ཡིན་ཏེ་ཞེས་བྱ་བ་སྨོས་ཏེ། དེ་ཅིའི་ཕྱིར་ཞེ་ན། རྣམ་པར་རིག་པ་སོ་སོར་སྣང་བ་ཐ་དད་པའི་རྫས་ཀྱི་རང་བཞིན་ཐ་དད་པའི་ཕྱིར་ཞེས་བྱ་བར་སྦྱར་རོ། །ཕན་ཚུན་ཐ་དད་པ་རྣམ་པ་ཉིད་ཀྱི་རྫས་རྣམ་པར་ཤེས་པ་སོ་སོར་སྣང་ངོ་ཞེས་བྱ་བ་ལ་སོགས་པའི་དོན་ཏོ། །དེ་བཞིན་དུ་གནས་སྐབས་ཐ་དད་པ་ནི་ཐ་དད་པར་


DTG190_Page_0178
[མ་དཔེ་གཟིགས་ན་འདིར་གནོན།]

གནས་པའི་ཕྱིར་དང་སོ་སོའི་དོན་གྱི་བྱ་བ་བཤད་པ་ནི་ཐ་དད་པའི་སྒོ་ནས་རྫས་ཀྱི་རང་བཞིན་ཐ་དད་པའི་ཕྱིར་རོ། །ཕན་ཚུན་མི་སྲིད་པས་རྒྱུ་དང་འབྲས་བུ་ཡིན་ནོ་ཞེས་བྱ་བའི་དོན་ཏོ། །གཞན་གྱིས་ཀྱང་རྡུལ་དང་མུན་པ་དང་སྙིང་སྟོབས་དང་སེམས་ཅན་ཐ་དད་པར་ཁས་བླངས་པའི་ཕྱིར་རོ། །འདི་དག་ཉིད་རྒྱུར་རིག་པ་ཡིན་ནོ་ཞེས་བརྗོད་དོ། །དེ་ལྟར་ཞེས་བྱ་བ་སྨོས་སོ། །གལ་ཏེ་རྣམ་པར་རིག་པའི་སོ་སོར་སྣང་བ་ཐ་དད་པ་ལ་ཐ་དད་པ་འདོད་དོ། །སེམས་རྣམས་ཞེས་བྱ་བ་ནི་མང་པོའི་ཚིག་སྟེ་སྐྱེ་བུ་ཡིན་ནོ་ཞེས་བྱ་བ་གྲུབ་པའི་མཐའོ། །ཇི་ལྟ་བ་དེ་ལྟར་ཞེས་བྱ་བ་ནི་རྣམ་པར་རིག་པ་སོ་སོར་སྣང་བ་ཐ་དད་པ་ལ་སོགས་པའོ། །སླར་ཡང་བཤད་པ། ཡོད་ཀྱང་འདི་རྣམ་པར་རིག་པ་སོ་སོར་སྣང་བ་ཐ་དད་པ་ཞེས་བྱ་བ་ལ་སོགས་པའོ། །བདག་ཉིད་འགའ་ཞིག་ཅེས་བྱ་བ་ནི་ནུས་པའི་རྗེས་སུ་འགྲོ་བའི་ཕྱིར་གཅིག་པ་ཉིད་ཀྱི་གནས་སྐབས་ཡིན་ནོ། །སློབ་དཔོན་གྱིས་སྨྲས་པ། གལ་ཏེ་དེ་ལྟ་ན་བདེ་བ་ལ་སོགས་པ་དང༌། སེམས་པ་ཅན་འདི་དག་ཀྱང་ཐ་མི་དད་པར་ཐལ་བར་འགྱུར་ཏེ། བདེ་བ་ལ་སོགས་པ་རྣམས་ཀྱི་ཡོན་ཏན་ཉིད་དང་ཟ་བ་པོ་དང་བྱེད་པ་པོ་གཉིས་ལ་སོགས་པའི་རྗེས་སུ་འགྲོ་བའི་ཕྱིར་རོ། སེམས་པ་ཅན་ཟ་བ་པོ་དང་བྱེད་པ་པོ་དང་ཡོན་ཏན་ལ་སོགས་པ་དང་ངོ༌། །དེ་བཞིན་བདེ་བ་ལ་སོགས་པ་དང་སེམས་ཅན་ཡང་ཡོད་པ་ཉིད་དང་ཞེས་བྱ་བ་ལ་སོགས་པའི་རྗེས་སུ་འགྲོ་བ་ཡིན་ནོ་ཞེས་དགོངས་སོ། །སྦྱོར་བ་དག་ཀྱང་སྐྱེས་བུ་དང་བདེ་བ་ལ་སོགས་པ་ཐ་མི་དད་པ་ཡིན་ཏེ། ཕན་ཚུན་རྗེས་སུ་འགྲོ་བ་དང་མི་འགྲོ་བའི་ཕྱིར་ནུས་ལ་དང་གསལ་བ་བཞིན་ནོ། །ནུས་པ་དང་གསལ་བ་ཡང་ཐ་མི་དད་པ་ཡིན་ནོ། །རྗེས་སུ་འགྲོ་བ་དང་མི་འགྲོ་བ་བརྗོད་པའི་ཕྱིར་བདེ་བ་ལ་སོགས་པ་དང་སེམས་པ་ཅན་བཞིན་ནོ། །རང་བཞིན་གྱི་གཏན་ཚིགས་དག་གོ །འོ་ན་གང་ལ་ཐམས་ཅད་བདག་ཉིད་ཀྱི་རྗེས་སུ་འགྲོ་བ་དེ་ལ་ཐ་མི་དད་པར་འགྱུར་ཏེ། གང་ལ་བུམ་པ་ལ་སོགས་པའི་ངོ་བོ་འགའ་ཞིག་གིས་མ་ཡིན་གྱི་ཐམས་ཅད་ཀྱི་བདག་ཉིད་དུ་རྗེས་སུ་འགྲོ་བ་དེས་ན་འདི་ལ་སྐྱོན་མེད་ཅེ་ན། བུམ་པ་ལ་སོགས་པ་དག་ཀྱང་ཐམས་ཅད་ཀྱི་བདག་ཉིད་དུ་གྱུར་པའི་རྗེས་སུ་འགྲོ་བ་མ་ཡིན་ནོ། །འོན་ཀྱང་ངོ་བོ་


DTG190_Page_0179
[མ་དཔེ་གཟིགས་ན་འདིར་གནོན།]

འགའ་ཞིག་གིས་ཏེ། བདེ་བ་ལ་སོགས་པ་འབའ་ཞིག་ནི་མ་ཡིན་ཞེས་བྱ་བར་སྨྲའོ། །དེ་ཅིའི་ཕྱིར་ཞེ་ན། རང་བཞིན་སྣ་ཚོགས་ལ་ཡང་ལྷན་ཅིག་སྐྱེ་བ་ལ་སོགས་པར་ཐལ་བར་འགྱུར་བའི་ཕྱིར་རོ། །འདི་ལྟར་གནས་སྐབས་ཐམས་ཅད་དང་རྣམ་པ་ཐམས་ཅད་ལ་རྗེས་སུ་འགྲོ་བ་གཅིག་པ་ཡོད་པར་འགྱུར་རོ། །དེས་ན་སྣ་ཚོགས་པ་ནི་གཟུགས་དང་དྲི་དང་རོ་དག་གི་ཁྱད་པར་མི་ནུས་པ་དང་ཤུགས་དང་སྨིན་པ་མེད་པས་སྣ་ཚོགས་པར་མི་འགྱུར་རོ། །དེ་ལྟར་ན་ཤིང་ལ་སོགས་པ་ལྔ་པ་དང་ལྡན་པ་མེད་པར་ཐལ་བར་འགྱུར་བའམ་ཤིང་ལ་སྣོད་དུ་ཐལ་བར་འགྱུར་བ་དགོངས་སོ། །ལྷན་ཅིག་སྐྱེ་བ་ནི་གནས་སྐབས་ཐམས་ཅད་ལ་སྦྱར་བར་བྱའོ། །སོགས་པ་སྨོས་པ་ནི་ལྷན་ཅིག་འགག་པ་དང་དོན་བྱེད་པ་སྟེ། བྱེད་པ་དང་འགྱུར་བ་བར་ཁས་བླང་བར་བྱའོ། །སྦྱོར་བ་ཡང་གང་ཁྱད་པར་ཅན་གཟུགས་དང་དྲི་དང་རོ་དང་ནུས་པ་རྣམས་ཀྱི་དུ་མའི་རྣམ་པར་མི་འགྱུར་བ་དེ་ནི་སྣ་ཚོགས་པའི་ངོ་བོ་མ་ཡིན་ཏེ། དཔེར་ན་བདེ་བ་ལ་སོགས་པའི་བདག་ཉིད་གཅིག་ཏུ་བཞིན་ནོ། །དེ་བཞིན་དུ་མངོན་པར་འདོད་པའི་གནས་སྐབས་ཀྱང་བཤད་མ་ཐག་པའི་ཆོས་དག་མེད་པས་ཞེས་བྱ་བ་གཏན་ཚིགས་མ་གྲུབ་པ་མ་ཡིན་ནོ། །གང་དང་གང་ཐ་དད་པ་མེད་བ་དེ་དག་དང་དེ་ནི་གཟུགས་ལ་སོགས་པ་རྣམས་ཀྱི་ཁྱད་པར་རྣམ་པ་དུ་མར་མི་འགྱུར་ཏེ། དཔེར་ན་དེའི་བདག་ཉིད་བཞིན་ནོ། །མངོན་པར་འདོད་པའི་གནས་སྐབས་ཀྱང་ཐ་དད་པ་མེད་པས་ཞེས་བྱ་བ་ནི་ཁྱབ་པར་བྱེད་པ་དང་འགལ་བ་དམིགས་པ་ཡིན་ནོ། །དེ་བཞིན་དུ་གང་དང་གང་ལས་ཐ་དད་པར་མ་གྱུར་བ་དེ་དང་དེ་ནི་སྐྱེ་བ་ལ་སོགས་པ་རྣམས་ཀྱི་སྐྱེ་བ་ལ་སོགས་པ་དང་ལྡན་པར་འགྱུར་ཏེ། དཔེ་ན་དེ་ཉིད་རང་གི་ངོ་བོ་བཞིན་ནོ། །གནས་སྐབས་གཞན་དུ་མངོན་པར་འདོད་པ་ཡང་ཐ་མི་དད་པར་འགྱུར་བས་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །དེ་ལྟ་མ་ཡིན་ན་བུམ་པ་འདི་ཞེས་བྱ་བ་གཞན་མ་ཡིན་པ་ཉིད་དུ་མི་རིགས་པའམ། མིང་གི་རྣམ་གྲངས་སུ་འགྱུར་རོ། །དོན་ཐ་དད་པ་ཁས་ལེན་པ་ལ་དེ་ལྟར་བརྗོད་པའི་ཕྱིར་རོ། །སྐྱོན་བསགས་པ་ནི་བུམ་པ་དང་འཇིམ་པའི་བདག་


DTG190_Page_0180
[མ་དཔེ་གཟིགས་ན་འདིར་གནོན།]

ཉིད་ཀྱི་དོན་ཐ་དད་པ་འགའ་ཞིག་མིག་ཕྱེ་ཡང་འདི་བུམ་པ་འཇིམ་པའི་བདག་ཏུ་ཐ་དད་པའི་ཉེ་བར་མཚོན་པའི་མེད་དོ། །གང་གི་ཕྱིར་འདི་ལྟར་འདི་རབ་ཏུ་སྐྱེ་བར་འགྱུར་ཞེས་བྱ་བར་འགྱུར། །འདི་ནི་དེ་ཐ་མི་དད་པའི་མཚན་ཉིད་ནི་ཤིན་ཏུ་མ་འབྲེལ་བར་འགྱུར་རོ་ཞེས་བྱ་བ་བཤད་དོ། །འོ་ན་བུམ་པ་དང་འཇིམ་པའི་བདག་ཉིད་ཀྱི་གོང་བུ་ངོ་བོ་ཐ་དད་པར་ཉེ་བར་མཚོན་པ་ཡོད་པ་ཉིད་ཡིན་ནོ། །དེ་སྐད་དུ་བཤད་པ་དེ་ཇི་ལྟར་ཡིན་ཞེ་ན། ཡོད་པ་ནི་བདེན་པ་ཏེ། གཞན་བུམ་པ་ལས་ཐ་དད་པར་མི་འདོད་པའི་ཕྱིར་སྐྱོན་མེད་དོ་ཞེས་དགོངས་སོ། །གལ་ཏེ་དེ་དག་ཐ་དད་པར་ཉེ་བར་མི་མཚོན་པ་དེ་ལྟ་བུ་ཡང་ཅིའི་ཕྱིར་འདི་ལྟར་མི་འགྱུར་རོ་ཞེ་ན། གནས་དང་གནས་པ་རྟེན་དང་བརྟེན་པ་འདི་འཁར་གཞོང་དང་རྒྱ་ཤུག་དག་བཞིན་དུ་ཐ་དད་པར་མི་དམིགས་པར་འགྱུར་བ་ནི་འདིར་རབ་ཏུ་སྐྱེ་བ་འགྱུར་རོ་ཞེས་བྱ་བ་དེ་ལྟར་མི་འགྱུར་རོ། །འདིས་ནི་འཇིམ་པའི་བདག་ཉིད་དང་བུམ་པ་དེ་རྟེན་དང་བརྟེན་པའི་དངོས་པོ་མ་ཡིན་ཏེ། ཐ་དད་པ་ཉེ་བར་མི་མཚོན་པའི་ཕྱིར་རོ། །ཡོད་པ་ལ་སོགས་པ་དེའི་བདག་ཉིད་བཞིན་ནོ་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའི་ཞེས་དགོངས་སོ། །དེ་ལྟར་ན་གང་དང་གང་ལས་རབ་ཏུ་སྐྱེ་བ་དེ་ནི་དེ་ལས་ཐ་མི་དད་པ་ཡིན་ནོ་ཞེས་བྱ་བ་ནི་ཐ་མེད་པའི་མཚན་ཉིད་ཀྱིས་མ་བརྗོད་པ་ནི་བཤད་པ། ནུས་པའི་བདག་ཉིད་རབ་ཏུ་སྐྱེ་བ་མ་ཡིན་ཏེ། དེ་ནི་རྟག་པའི་གནས་སྐབས་ཀྱི་གནས་སྐབས་སུ་ཁས་བླངས་པའི་ཕྱིར་རོ། །དེ་ལྟ་མ་ཡིན་ན་གནས་སྐབས་སུ་མི་འགྱུར་རོ། །དེ་ལྟར་དེའི་བདག་ཉིད་དུ་ཁས་བླངས་པས་ཐ་མི་དད་པར་མི་འགྱུར་ཏེ། ཐ་མི་དད་པའི་མཚན་ཉིད་མེད་པའི་ཕྱིར་རོ། །འདི་ནི་ཉེ་བར་མཚོན་པ་ཡིན་ཏེ། དེའི་གསལ་བ་བདེ་བ་དང་སྐྱེ་བུ་ལ་སོགས་པ་རྣམས་ལ་མཚུངས་པའི་ཕྱིར་རོ། །གཞན་ཡང་རང་གི་ལྟ་བའི་སྐྱོན་གྱིས་གོས་པའི་བློ་ཅན་གྱིས་གྲངས་ཅན་འགའ་ཞིག་འདི་སྐད་དུ་གང་དང་གང་ཡོངས་སུ་གྱུར་པ་དེ་དང་དེ་ལས་ཐ་དད་པ་ཡིན་པ་ཏེ། དཔེར་ན་གསེར་གྱི་རྣ་ཆ་ལ་སོགས་པའི་གནས་སྐབས་ཀྱི་ཁྱད་པར་བཞིན་ནོ་ཞེས་བརྗོད་པ་དེ་ཡང་སྔ་མའི་ཐ་དད་པའི་མཚན་ཉིད་ཀྱིས་ཁྱབ་པ་


DTG190_Page_0181
[མ་དཔེ་གཟིགས་ན་འདིར་གནོན།]

བསྟན་པ་འདིས་བསལ་བ་བཞིན་ཡིན་ནོ་ཞེས་བྱ་བ་དེ་དག་གིས་ཞེས་བྱ་བ་ལ་སོགས་པ་སྨོས་སོ། །ཁྱེད་ཀྱིས་བསྟན་པའི་ཡོངས་སུ་གྱུར་པ་ཡང་མི་རིགས་སོ་ཞེས་དགོངས་པ་དང་ལྡན་པས་སྤང་བར་མཛད་པ་ནི་ཅི་ཞིག་ཅེས་བྱ་བ་ལ་སོགས་པའོ། །ཕ་རོལ་པོ་ནི་འདིར་བརྗོད་པར་བྱ་བ་ཅི་ཞིག་ཡོད། །ཇི་སྲིད་དུ་བཅོམ་ལྡན་འདས་སེར་སྐྱས་བཤད་པ་འདི་བཟང་པོ་ཡིན་ནོ་སྙམ་དུ་བསམས་ནས་སྨྲས་པ། གནས་སྐབས་ཅན་གྱི་རྫས་ལ་ཡོངས་སུ་མ་གྱུར་པ་ནི། དཔེར་ན་གསེར་གྱི་ཆོས་གཞན་དཔུང་རྒྱན་ལོག་ནས་ཆོས་གཞན་རྣ་རྒྱན་ལ་སོགས་པ་རབ་ཏུ་སྐྱེ་བ་ཡིན་ནོ་ཞེས་སྨྲས་སོ། །སློབ་དཔོན་གྱིས་དེ་ཉིད་ལ་རེ་ཞིག་འདི་འདྲ་བའི་ཤེས་རབ་འཁྲུལ་བ་ཇི་ལྟར་རུང་བ་ཡིན་སྙམ་ནས་ངོ་བོ་ནི་ངོ་མཚར་བ་དང་སྙིང་བརྩེ་བ་ཡིན་ཏེ། དེ་གཞན་གྱི་རྗེས་སུ་ཟློག་པ་སྐྱབས་མེད་པའི་འཇིག་རྟེན་མུན་པས་ཁྱབ་པ་སྲོག་ཆགས་ལ་ཕན་པར་འདོད་པ་ལས་ཟློག་པ་སུའི་ཉེས་པ་ཡིན། གལ་ཏེ་དེ་ཉིད་བཤད་པ། ཁྱོད་མི་དཔྱོད་པར་འཇུག་གམ་ཞེ་ན། བཤད་པ། ཆོས་གཞན་རྣ་ཆ་ལ་སོགས་པས་གང་ཡིན་པ་དེ་ཟློག་པ་དང་རབ་ཏུ་སྐྱེ་བར་གྱུར་པ་དེ་ཅི་རྫས་དེ་ཉིད་ཀྱི་གནས་སྐབས་ཡིན་ནམ། དེ་ལས་དོན་གཞན་ཡིན། །ཅིའི་ཕྱིར་རྣམ་པར་བརྟགས་པ་གཉིས་ཁོ་ནར་བྱེད་པ་ཡིན་ཞེ་ན། བཤད་པ། རྣམ་པར་བརྟགས་པ་གཞན་མེད་པའི་ཕྱིར་རོ། །གཟུང་བ་མེད་པ་དེ་བཞིན་དུ་འདི་མི་རིགས་སོ་ཞེས་བྱ་བར་དགོངས་སོ། །གལ་ཏེ་བརྟག་པ་དང་པོ་ལྟར་ཡིན་པ་དེའི་ཚེ་སྐྱོན་ཅི་ཡོད་ཅེ་ན། གང་གི་ཚེ་ཆོས་གཞན་དེ་ཉིད་དང་དེ་ཉིད་མ་ཡིན་པའི་རྫས་ལ་གནས་པ་ཡིན་པ་དེའི་ཚེ་དེའི་གནས་སྐབས་ལྡོག་པ་དང་རབ་ཏུ་སྐྱེ་བ་མངོན་པར་གསལ་བ་དང་མི་གསལ་བའི་མཚན་ཉིད་དུ་མི་འགྱུར་རོ། །དེའི་ཕྱིར་དེ་དག་གང་ཡིན་པ་ཁྱེད་ཀྱིས་བརྗོད་པར་བྱའོ། །གང་གི་གནས་སྐབས་ཡིན་པ་དེ་ནི་ལྡོག་པ་དང་རབ་ཏུ་སྐྱེ་བ་མ་ཡིན་ཏེ། དཔེར་ན་གནས་སྐབས་ཅན་གྱི་རྫས་བཞིན་ནོ། །དེ་བཞིན་དུ་དེ་གནས་སྐབས་གཞན་དང་ཆོས་གཞན་ཡིན་པས་ཞེས་བྱ་བ་ནི་ཁྱབ་པར་བྱེད་པ་འགལ་བ་དམིགས་པ་ཡིན་ཏེ། གཏན་ཚིགས་མ་གྲུབ་པ་ཡང་མ་ཡིན་ཏེ་གང་གི་


DTG190_Page_0182
[མ་དཔེ་གཟིགས་ན་འདིར་གནོན།]

གནས་སྐབས་ཅན་གཞན་མ་ཡིན་པ་དེ་ནི་དེའི་གནས་སྐབས་ཏེ། དཔེར་ན་དེའི་ངོ་བོ་ཉིད་བཞིན་ནོ། །གཞན་མ་ཡིན་པའི་ཆོས་གཞན་ཡིན་པ་དེའི་ཕྱིར་ཞེས་བྱ་བ་རང་བཞིན་གྱི་གཏན་ཚིགས་སོ། །གཞན་ཡང་གང་གི་གནས་སྐབས་ཅན་ཉིད་ཀྱི་དེའི་རྫས་དེའི་ཆོས་གཞན་ནམ། དེའི་གནས་སྐབས་དང་རྫས་ཆོས་གཞན་ཡིན་ནོ་ཞེས་བྱ་བ་གྲུབ་པར་མི་འགྱུར་རོ། །ཅིའི་ཕྱིར་ཞེ་ན། དེ་ཉིད་དེའི་ཆོས་སུ་མི་འགྱུར་བའི་ཕྱིར་རོ། །དེ་ཉིད་དེའི་ཆོས་གཞན་དུ་གྱུར་བ་ཡིན་ཏེ། དཔེར་ན་བྱས་པ་ཉིད་སྒྲ་ལས་ཐ་མི་དད་པ་ཀྱང་དེ་ལས་ཡིན་ནོ་ཞེ་ན། བཤད་པ། དེ་ཉིད་ལྟོས་པ་མེད་པ་དེ་ནི་དེ་ལྟོས་པ་ཐ་དད་པས་ཞེས་བྱའོ། །འདི་སྐད་སྟོན་པ་ཡིན་ཏེ། འདིར་སྒྲ་དེ་ཉིད་བྱས་པ་ལ་སོགས་པ་ལས་ཐ་དད་པའི་ལྡོག་པ་ཡིན་ནོ། །དེ་ཙམ་ཤེས་པར་འདོད་པས་ཐ་དད་པ་གཞན་སྤངས་པའི་སྒྲས་ཆོས་ཉིད་སྟོན་པ་ཡིན་གྱི་འདི་ལ་ནི་ལྟོས་པའི་ཐ་དད་པ་ཡང་མེད་དོ། །དེས་ན་ཇི་ལྟར་དེ་ཉིད་ཆོས་གཞན་འབྱུང་བར་འགྱུར་རོ། །རྫས་ལས་ཆོས་དོན་གཞན་པའི་ཕྱོགས་ཡིན་ན། དེ་ལྟར་སྐྱོན་ཅི་ཞིག་ཡོད་ཅེ་ན། ཡང་ན་ཞེས་བྱ་བ་ལ་སོགས་པ་སྨོས་ཏེ། ཅིའི་ཕྱིར་ལྡོག་པ་དང་རབ་ཏུ་སྐྱེ་བ་དག་རྫས་ཀྱིས་ཡོངས་སུ་གྱུར་པ་མ་ཡིན། །གང་གི་ཕྱིར་དོན་གཞན་དུ་གྱུར་པའི་ལྡོག་པ་དང་རབ་ཏུ་སྐྱེ་བ་དག་ནི་དོན་གཞན་གྱིས་ཡོངས་སུ་གྱུར་པ་མ་ཡིན་ནོ། །དེ་ཅིའི་ཕྱིར་ཞེ་ན། སེམས་དང་ལྡན་པ་ཡང་ཡོངས་སུ་འགྱུར་བ་ནི་མི་འདོད་དོ། །གཙོ་བོ་སྐྱེས་བུ་དག་གཅིག་ཏུ་གྱུར་ནས་བྱེད་པ་པོར་མི་བརྗོད་པའི་ཕྱིར་རོ། །སྦྱོར་བ་ནི་གང་གང་ལ་དོན་གཞན་དུ་གྱུར་པ་ལྡོག་པ་རབ་ཏུ་སྐྱེ་བ་དེར་རྟོགས་པ་དག་ནི་དེའི་ཡོངས་སུ་གྱུར་པ་ཡིན་ཏེ། དཔེར་ན་སེམས་དང་ལྡན་པ་ལས་ཐབ་དད་པའི་རང་བཞིན་གྱི་མྱུ་གུའི་ལྡོག་པ་དང་རབ་ཏུ་སྐྱེ་བ་དང་སེམས་པ་ཅན་བཞིན་ནོ། །རྫས་ལས་ཆོས་གཞན་ཡིན་པས་ཞེས་བྱ་བའི་ཁྱབ་པ་བྱེད་པ་དང་འགལ་བ་དམིགས་པའོ། །གང་དོན་གཞན་དུ་གྱུར་པ་འགའ་འབྲེལ་པ་མེད་པས་ཀྱང་ལྡོག་པ་དང་རབ་ཏུ་སྐྱེ་བ་དག་གཞན་གྱིས་ཡོངས་སུ་གྱུར་པ་ནི་མ་ཡིན་གྱི་འོན་ཀྱང་དེ་དང་འབྲེལ་པ་ལས་ཡིན་ནོ། །དཔེར་ན་དེའི་མྱུ་གུ་དང་འབྲེལ་པའི་ལྡོག་པ་དང་རབ་ཏུ་སྐྱེ་བའི་ས་བོན་བཞིན་ནོ། །དེས་སྤྱི་སྒྲུབ་ན་གྲུབ་


DTG190_Page_0183
[མ་དཔེ་གཟིགས་ན་འདིར་གནོན།]

པ་ལ་སྒྲུབ་པ་ཡིན་ནོ། །ཆོས་དང་རྫས་འབྲེལ་པའི་ཕྱིར་རོ། །བྱེ་བྲག་ཡིན་ན་དཔེ་བསྒྲུབ་པར་བྱ་བས་སྟོང་པ་ཡིན་ནོ། །མྱུ་གུ་དང་སེམས་དང་ལྡན་པ་ལ་ལྷན་ཅིག་ཏུ་འབྲེལ་པ་མེད་པའི་ཕྱིར་ཞེ་ན། རྫས་ཀྱི་ཆོས་ཞེས་བྱ་བ་ཡང་སྒྲའི་ཐ་སྙད་མི་འགྲུབ་པོ། །ཅིའི་ཕྱིར་ཞེ་ན། འབྲེལ་པ་མེད་པའི་ཕྱིར་རོ། །དེ་ལྟར་རྫས་གཞན་དང་འབྲེལ་པའི་ཆོས་འདི་ཡིན་ནོ་ཞེས་བྱ་བ་དེ་ཉིད་ཡོད་པ་མ་ཡིན་ནོ། །དེ་གང་ལས་ཐལ་བར་འགྱུར་བ་ལྡོག་པ་ཡིན་ཞེས་བྱ། དེ་ལྟར་ན་རྫས་ཆོས་འདི་ཉིད་རྟེན་དང་བརྟེན་པའི་མཚན་ཉིད་ཀྱིས་འབྲེལ་པ་ཡིན་པ་དེའི་ཕྱིར་ཡང་བྱེ་བྲག་གི་གཏན་ཚིགས་གྲུབ་པ་ཡིན་ནོ་ཞེ་ན། རྒྱུ་དང་འབྲེལ་བ་ལས་དངོས་པོའི་འབྲེལ་པ་གཞན་ཡོད་པ་ནི་མ་ཡིན་ཏེ། རྟེན་དང་བརྟེན་པའི་དངོས་པོ་ཡང་རྒྱུ་དང་འབྲས་བུའི་དངོས་པོ་བྱེ་བྲག་ཉིད་དུ་རྣམ་པར་གཞག་པ་ཡིན་ནོ། །ཚད་མ་རྣམ་པར་ངེས་པ་ལས། གཞི་དེ་ལྡོག་པར་གྱུར་པ་ན། །བདག་ཉིད་དེ་འདྲའི་རྒྱུ་འབྲས་ཡིན། །ཞེས་བྱ་བ་རྫས་ཀྱི་སྐབས་སུ་གཏན་ལ་ཕབ་ཟིན་པར་དགོངས་སོ། །འོད་དེ་དེ་དག་རྒྱུ་དང་འབྲས་བུའི་དངོས་པོ་ཡིན་ལ་རག་གོ་ཞེ་ན། རྫས་དང་ཆོས་འདི་ཡང་རྒྱུ་དང་འབྲས་བུའི་དངོས་པོ་ཉིད་མེད་པ་ཡིན་ནོ། །ཅིའི་ཕྱིར་ཞེ་ན། རང་ཉིད་དེའི་བདག་ཉིད་མ་ཡིན་པ་དེའི་རྒྱུ་མ་ཡིན་པའི་ཕྱིར་རོ། །གང་གང་གི་རང་བཞིན་ཡིན་པ་དེ་དེའི་རྒྱུ་མ་ཡིན་ནོ་ཞེས་བྱ་བ་དེ་དག་ཁྱེད་ཉིད་ཀྱིས་ཁས་བླངས་པ་ཡིན་ཏེ། དཔེར་ན་རྡུལ་དང་མུན་པ་བཞིན་ནོ། །དེ་ལྟར་ཡང་རྫས་འདི་ཆོས་ཀྱི་རང་བཞིན་དུ་མི་འགྱུར་རོ། །དེ་ཇི་ལྟར་དེའི་རྒྱུ་ཉིད་ཡིན་པས་ཁས་བླང་བར་བྱའོ་ཞེ་ན་ཁྱབ་པར་བྱེད་པ་མི་དམིགས་པའི་ཐལ་བར་འགྱུར་བ་མ་ཡིན་པར་དགོངས་སོ། །གཏན་ཚིགས་མ་གྲུབ་པ་ཡིན་ནོ་ཞེས་བསམ་པར་བྱའོ། །དོན་གཞན་ལ་བརྟེན་པའི་ཕྱིར་ལ་སྐྱོན་བརྗོད་པ་ནས་རྣལ་མའི་དོན་བཤད་པའི་རྫས་ལས་ཆོས་ཀྱང་དོན་གཞན་ཉིད་ཡིན་པའི་ཕྱིར་རོ། །འོན་ཏེ་སྔ་མ་ལས་བཟློག་ནས་སེར་སྐྱའི་དགོངས་པ་གྲངས་ཅན་གྱི་འདོད་པས་བཅོས་ནས་བྱས་པ་ནི་རྫས་དོན་གཞན་མིན་དུ་ཟིན་ཀྱང་ཆོས་ཀྱི་རྒྱུ་ཡིན་པར་འདོད་ན། ཆོས་གཞན་ཞེས་བྱ་བ་སྨོས་ཏེ། རྫས་དོན་གཞན་མིན་དུ་ཟིན་ཀྱང་ཆོས་


DTG190_Page_0184
[མ་དཔེ་གཟིགས་ན་འདིར་གནོན།]

ཀྱི་རྒྱུ་ཡིན་པར་ཁས་ལེན་པ་ནི་ཡིན། དེ་བཞིན་དུ་གཞན་པའི་རྒྱུ་ལས་འབྲས་བུ་སྐྱེད་པར་འགྱུར་རོ། །ཁྱེད་ཀྱང་རྫས་ཉིད་ཡོངས་སུ་གྱུར་པ་ཞེས་བྱ་བར་འདོད་པ་ཡིན་ན། དེ་ལས་ཅིར་འགྱུར་ཞེ་ན། བཤད་པ། གཞན་ཡང་དེ་བཞིན་གཤེགས་པའི་དགོངས་པའི་རྗེས་སུ་འབྲངས་ན་དེ་འགལ་བ་མེད་དོ། །ཅིའི་ཕྱིར་ཞེ་ན། དེས་ཀྱང་རྫས་བྱ་བའི་རྒྱུ་དང་འབྲས་བུའི་རྒྱུན་ནི་འཇིམ་པའི་གོང་བུའི་རྫས་སྔ་མའི་རྒྱུར་གྱུར་པ་ལས་དོན་གཞན་པའི་འབྲས་བུ་བུམ་པའི་རྫས་ཕྱི་མ་སྐྱེ་བ་ན། འཇིམ་པའི་རྫས་ཡོངས་སུ་གྱུར་པ་ཡིན་ནོ་ཞེས་བྱ་བའི་ཐ་དད་པའི་ཐ་སྙད་ཁས་བླངས་པའི་རྒྱུའི་ཕྱིར་རོ། །གལ་ཏེ་བདག་ཉིད་དུ་གྱུར་པ་གནས་སྐབས་གཉིས་པོ་དག་ཀྱང་ཡོངས་སུ་གྱུར་པའི་ཡིན་པར་མི་རིགས་ཀྱི་གནས་སྐབས་འབྱུང་བར་འགྱུར་རོ་ཞེ་ན། བཤད་པ། ཆོས་དང་རྫས་ཞེས་བྱ་བ་ལ་སོགས་པ་སྨོས་ཏེ། དེའི་ཕྱིར་གཉི་གའི་ལྟར་ཡོངས་སུ་གྱུར་པ་ཡང་མ་ཡིན་ཞེས་བྱ་བ་མཇུག་བསྡུ་བའོ། །ཐ་དད་པ་མེད་པའི་རྫས་ཀྱི་ཆོས་མ་ཡིན་ཞིང་རྫས་ལས་དོན་གཞན་པ་གཅིག་ཏུ་ངེས་པ་མ་ཡིན་ཏེ། འོན་ཀྱང་རྫས་ཀྱི་བཀོད་པའི་གནས་སྐབས་གཞན་ཡིན་ཏེ། དཔེར་ན་སོར་མོ་དག་གི་དབྱིབས་ཀྱི་བཀོད་པ་ལས་ཁུ་ཚུར་ནི་དེ་ཉིད་དང་གཞན་ཉིད་དུ་བརྗོད་དུ་མེད་པ་ཡིན་ནོ། །ཅིའི་ཕྱིར་ཞེ་ན། དེ་ལས་སོར་མོ་ཉིད་དབྱེར་མི་བྱེད་པའི་ཁུ་ཚུར་མ་ཡིན་ཏེ། ཅིའི་ཕྱིར་ཞེ་ན། བརྐྱང་བ་དག་ལ་ཁུ་ཚུར་མེད་པའི་ཕྱིར། དེ་ལྟར་མ་ཡིན་ན་བརྐྱང་བ་དང་ཁྱད་པར་མེད་པའི་ཕྱིར་ཁུ་ཚུར་གྱི་གནས་སྐབས་བཞིན་དུ་ཁུ་ཚུར་ཉིད་དུ་ཐལ་བར་འགྱུར་རོ་ཞེས་བྱ་བ་རང་བཞིན་གྱི་གཏན་ཚིགས་ལྟར་བཅོས་པའོ། །ཁུ་ཚུར་དོན་གཞན་པ་ཡང་མ་ཡིན་ཏེ། སོར་མོ་ལས་ཐ་དད་པའི་རྒྱུ་ནུས་པ་ཐོགས་པ་རྩོལ་བ་ལས་བྱུང་བ་མི་དམིགས་པའི་ཕྱིར་ཞེས་སེར་སྐྱས་རེས་འགའ་དེ་སྐད་སྨྲའོ་ཞེས་འདོད་པའི་དགོས་པ་བསྡུ་བ་ནི་ཐ་དད་མེད་པ་ཞེས་བྱ་བ་འདི་དག་བསྟན་ཟིན་པའོ། །མ་ཡིན་ཏེ། ཁུ་ཚུར་ནི་སོར་མོ་དག་གི་ཁྱད་པར་གྱི་ཁུ་ཚུར་ཡིན་པའི་ཕྱིར་རོ་ཞེས་བྱ་བ་ནི་ལན་ཡིན་ནོ། །འདིས་ནི་སོར་མོ་ཉིད་ཁྱད་པར་མེད་པ་ཁུ་ཚུར་ཡིན་ནོ་ཞེས་པ་ཇི་ལྟར་དཔེར་རིག་པ་ཡིན། འདིར་ཡང་བརྐྱང་པ་དག་ལ་ཁུ་ཚུར་མེད་པའི་ཕྱིར་


DTG190_Page_0185
[མ་དཔེ་གཟིགས་ན་འདིར་གནོན།]

ཞེས་གང་བཤད་པ་དེ་དག་རིགས་པ་མ་ཡིན་ཏེ། ཅིའི་ཕྱིར་ཞེ་ན། སོར་མོ་ཉིད་ཁྱད་པར་ཅན་གྱི་རྒྱུ་དང་རྐྱེན་གྱི་སྟོབས་ཀྱིས་དེ་བཞིན་སྐྱེ་བ་འགའ་ཞིག་ཁུ་ཚུར་ཡིན་གྱི་ཐམས་ཅད་ནི་མ་ཡིན་ནོ། །དེ་ཅིའི་ཕྱིར་ཞེ་ན། བཤད་པ། སོར་མོ་བརྐྱང་བ་ལས་ཁྱད་པར་མེད་པའི་རང་བཞིན་མ་ཡིན་ཏེ། ཁུ་ཚུར་དང་སོར་མོ་དག་ཅེས་བྱ་བ་ལ་དང་གི་སྒྲ་ནི་དབྱེ་བར་ཤེས་པར་བྱའོ། །ཡང་ན་ཁུ་ཚུར་གྱི་བདག་ཉིད་ཀྱི་སོར་མོ་བརྐྱང་བ་ཡིན། ཁྱད་པར་མེད་པ་ཅན་གྱི་སོ་སོ་ནི་མ་ཡིན་ནོ་ཞེས་བཤད་པར་བྱའོ། །ཅིའི་ཕྱིར་ཞེ་ན། གནས་སྐབས་གཉི་ག་ལ་ཡང་ཡིན་ཏེ། བརྐྱང་བའི་དངོས་པོའོ། །བརྐྱང་བ་དང་མ་བརྐྱང་བ་གཉི་གའི་གནས་སྐབས་ཀྱི་རིམ་པ་ཇི་ལྟ་བ་བཞིན་དུ་རྟོགས་པར་ཐལ་བར་འགྱུར་བའི་ཕྱིར་རོ། །སྦྱོར་བ་ཡང་བརྐྱང་བའི་གནས་སྐབས་མ་བརྐྱང་བའི་གནས་སྐབས་རྟོགས་པར་འགྱུར་བའི་ཕྱིར་དང༌། སོར་མོ་རྣམས་ཐ་དད་པ་མེད་པའི་ཕྱིར། མ་བརྐྱང་བའི་གནས་སྐབས་ཉིད་བཞིན་ནོ་ཞེས་བྱ་བ་རང་བཞིན་གྱི་གཏན་ཚིགས་སོ། །འདི་ལྟར་མ་བརྐྱང་བའི་གནས་སྐབས་རྟོགས་པར་འགྱུར་བ་བཞིན་དུ་གཞན་ལ་ཡང་སྦྱར་བར་བྱའོ། །དེ་བཞིན་དུ་གཉི་ག་ལ་ཡང་གཉི་གར་མ་ཡིན་ནོ་ཞེས་བྱ་བ་ཁྱབ་པར་བྱེད་པ་མི་དམིགས་པའོ། །འོན་ཀྱང་རྣམ་པ་འགའ་ཞིག་ཐ་དད་པར་གནས་པའི་གནས་སྐབས་ཡིན་པ་དེའི་ཚེ་དེ་ཐ་དད་པའི་སོར་མོ་འམ། དེའི་རང་བཞིན་དུ་གྱུར་པ་ཡིན་ནམ་མ་ཡིན་ཞེས་རྣམ་པར་བརྟག་པ་གཉིས་ཏེ། དང་པོ་སྐྱོན་བརྗོད་པ་ནི་ཐ་དད་བ་དེ་ཉིད་ཀྱི་རང་བཞིན་དུ་གྱུར་པ་དེ་ཉིད་དངོས་པོ་ཐ་དད་པའི་མཚན་ཉིད་ནི་བདེ་བ་དང་སྡུག་བསྔལ་བ་ལྟ་བུའོ། །གཉིས་པའི་བཤད་པ་གཞན་དུ་གྱུར་པ་ནི་ཁྱད་པར་བསྐྱེད་ན་ཡང་བརྐྱང་བའི་སོར་མོ་ཉིད་དམིགས་པར་འགྱུར་ཏེ། ཁུ་ཚུར་གྱི་གནས་སྐབས་ཀྱི་ཁྱད་པར་ཡིན་ནོ། །གང་ཡིན་ཞེ་ན། གང་གི་ཕྱིར་གང་གི་རང་བཞིན་འཕོ་བ་མེད་པའི་དོན་བཞིན་སྐྱེ་ན་ནི། རྣམ་པ་གཞན་མི་དམིགས་པར་ཐལ་བར་འགྱུར་བའི་ཕྱིར་སོར་མོའི་དོན་ལས་གཞན་པའི་གླང་པོའི་ཕྲུ་གུ་སྐྱེ་བ་བཞིན་དུ་དམིགས་པར་ཐལ་བར་འགྱུར་རོ་ཞེས་བྱ་བའི་སྦྱོར་བ་ཡང་གང་གི་རང་བཞིན་འཕོ་བ་མེད་པ་དེའི་དོན་ལས་སྐྱེ་བ་ཡང་གཞན་དུ་དམིགས་པར་འགྱུར་ཏེ། དཔེར་ན་


DTG190_Page_0186
[མ་དཔེ་གཟིགས་ན་འདིར་གནོན།]

རྔ་མོ་དང་གླང་པོའི་སྐྱེ་བ་བཞིན་ནོ། །འཕོ་བ་མེད་པ་རང་གི་རང་བཞིན་ལས་སོར་མོ་ཐ་དད་པ་སྐྱེ་བར་འགྱུར་རོ་ཞེས་བྱ་བ་དགག་པ་དང་སྒྲུབ་པ་དག་ལ་ཡང་གཏན་ཚིགས་རྣམ་གྲངས་པ་ཡིན་ནོ། །རྒྱུ་འགལ་བ་དམིགས་པ་དང་རྒྱུ་མི་དམིགས་པའོ། །རྫས་ཁོ་ན་ཞེ་ན་བྱ་བ་ལ་སོགས་པ་ཕ་རོལ་པོའོ། །དེ་ཉིད་དང་གཞན་ཉིད་དུ་བརྗོད་དུ་མེད་པར་དེ་སྐད་བཤད་པ་ནི་ངག་གི་དོན་ཏོ། །སློབ་དཔོན་གྱིས་སྨྲས་སུ་ཟིན་ཀྱང་འདི་རིགས་པ་མ་ཡིན་ནོ། །ཇི་ལྟར་རིགས་པ་མ་ཡིན་ཞེ་ན། བཤད་པ། ཡོད་པ་ཉིད་ཀྱི་དངོས་པོ་དེ་ཉིད་དང་གཞན་ཉིད་དང་བྲལ་བའི་རྣམ་པ་གཞན་ཡོད་པ་མ་ཡིན་ནོ། །གང་དངོས་པོར་འཛིན་པའི་རྣམ་པར་རྟོག་པའི་བཟོས་སྦྱར་བ་གཞན་སེལ་བ་ལ་སོགས་པ་བསྟན་པ་ཡིན་ནོ། །ཅིའི་ཕྱིར་ཞེ་ན། དེ་དག་ནི་ཞེས་བྱ་ལ་སོགས་པ་སྨོས་ཏེ། སྦྱོར་བ་ཡང་དག་ཕན་ཚུན་སྤངས་ཏེ། གནས་པའི་མཚན་ཉིད་གཅིག་སྤོང་བ་དང་གཞན་ལེན་པ་མེད་པ་མི་འབྱུང་བ་དང་གཅིག་ལེན་པ་དང་གཞན་སྤོང་བ་མེད་ན་མི་འབྱུང་བ་ཡིན་ཏེ། དཔེར་ན་དངོས་པོ་དངོས་པོ་མེད་པ་བཞིན་ནོ། །དེ་ཉིད་དམ་གཞན་ཉིད་རྣམ་པ་ཡང་ཇི་སྐད་བཤད་པའི་ཆོས་དང་ལྡན་པས་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །སོར་མོ་ཁུ་ཚུར་དེ་ཉིད་ལས་གཞན་ཉིད་ཀྱི་རྣམ་པ་གཞན་ཡོད་པ་མ་ཡིན་པ་ཉིད་དོ། །སོར་མོ་ཉིད་ཁུ་ཚུར་མ་ཡིན་ཏེ་བརྐྱང་བ་ཉིད་ཁུ་ཚུར་མ་ཡིན་པའི་ཕྱིར་རོ། །དོན་གཞན་མ་ཡིན་ཏེ། རང་བཞིན་ལོགས་ཤིན་ཏུ་མི་དམིགས་པའི་ཕྱིར་རོ་ཞེ་ན། སོར་མོ་དག་ཅེས་བྱ་བ་ལ་སོགས་པ་སྨོས་ཏེ། སྐད་ཅིག་མ་རེ་རེ་འགག་པ་གང་ཡིན་པ་དེ་ཡོད་པ་མ་ཡིན་ནོ་ཞེས་བྱ་བར་སྦྱར་རོ། །དེ་ཉིད་སྐད་ཅིག་མ་ཡིན་པའི་ཕྱིར་རྣམ་པ་འདི་ལྟ་བུ་སྐྱེ་བ་དག་དང་ལྡན་པ་དག་གིས་ཁུ་ཚུར་ལ་སོགས་པ་བརྗོད་པར་འགྱུར་རོ་ཞེས་བྱ་བའི་དོན་ཏོ། །དེས་ན་དངོས་པོ་འདི་ལ་ཡང་མ་ཡིན་ཏེ། ཁུ་ཚུར་ནི་སོར་མོ་དག་གི་ཁྱད་པར་ཡིན་པའི་ཕྱིར་རོ་ཞེས་བཤད་ཟིན་ཀྱང་སྐབས་གསལ་བར་བཤད་པར་བྱ་བ་ཡིན་ནོ་ཞེས་བྱ་བར་དགོངས་སོ། །དེ་ལྟ་མ་ཡིན་ན་འདིས་ཅི་ཞིག་བྱ། གལ་ཏེ་དེ་ལྟ་ན་འོ་ན་ཁུ་ཚུར་དང་སོར་མོ་ཞེས་བྱ་བ་སྒྲ་ཐ་དད་པ་ཇི་ལྟར་ཡིན་ཞེ་ན། བཤད་པ། དེ་ལ་ཁུ་ཚུར་ལ་


DTG190_Page_0187
[མ་དཔེ་གཟིགས་ན་འདིར་གནོན།]

སོགས་པའི་སྒྲ་ཁྱད་པར་ཅན་གྱི་ཡུལ་ཅན་ཡིན་ཏེ་སོར་མོའི་གནས་སྐབས་ཁྱད་པར་ཉིད་ལ་བརྗོད་པར་བྱ་བ་ཡིན་པའི་ཕྱིར་རོ། །སོར་མོའི་སྒྲ་ནི་སྤྱིའི་ཡུལ་ཅན་ཡིན་ཏེ། སོར་མོའི་སྒྲ་ནི་ཡུལ་ཅན་ཡིན་ཏེ། གནས་ཐམས་ཅད་ལ་དེ་བརྗོད་པའི་ཕྱིར་རོ། །རིམ་པ་བཞིན་དུ་དཔེ་གཉིས་བཤད་པ་ནི། ས་བོན་དང་མྱུ་གུ་ལ་སོགས་པའི་སྒྲ་དང་འབྲུ་ལ་སོགས་པའི་སྒྲ་ལྟ་བུའོ། །དེ་ལྟར་གཞན་གྱི་ཕྱོགས་མ་ལུས་པ་འབྱེད་པར་བྱེད་པ་འམ། གཞན་གྱི་ལ་ལར་ཉེ་བར་བཀོད་པ་མ་ལུས་པ་ལས་རྒྱལ་བར་འདོད་པས་གཞན་གྱི་སྒོ་ནས་རྩོད་པ་ཉེ་བར་བཀོད་པ་ནི། དེ་ལ་གལ་ཏེ་ཞེས་བྱ་བ་ལ་སོགས་པའོ། །འདིར་བསམ་པ་ནི་འདི་ཡིན་ཏེ། དཔེར་ན་ཏིལ་ལ་མར་ཡོད་པ་མ་ཡིན་ན་ཏིལ་ལ་ཡང་དེ་བཞིན་དུ་འགྱུར་ཏེ། གལ་ཏེ་སྐབས་ཀྱི་རྒྱུ་ལས་འབྲས་བུ་སྐྱེ་བར་འགྱུར་བ་ཡིན་ན། དེའི་ཚེ་ཏིལ་ལས་ཀྱང་མར་སྐྱེ་བར་འགྱུར་རོ། །མེད་པའི་ཕྱིར་ཡང་ན་ཏིལ་ཡང་མ་ཡིན་ཏེ། དེ་ཉིད་ཀྱི་ཕྱིར་མར་བཞིན་ནོ། །འགའ་ཞིག་མེད་པ་བཞིན་དུ་བྱེ་བྲག་མེད་པའི་ཕྱིར་རོ་ཞེས་བྱ་བ་རང་བཞིན་གྱི་གཏན་ཚིགས་དང་ཁྱད་པར་བྱེད་པ་མི་དམིགས་པ་དང་འདོད་པས་མངོན་པར་འདོད་པའི་ཁྱབ་པར་བྱེད་པ་ཁྱབ་པར་བྱ་བ་དག་སྒྲུབ་པར་བྱེད་པའི་རྣམ་པ་དག་ཡིན་ནོ། །དེས་ན་འདི་དག་ཐམས་ཅད་བདག་ཉིད་གསང་བའི་ཕྱིར་བྱ་བ་བྱེད་ཁྱེད་ཅག་ཡིན་ནོ་སྙམ་དུ་བསམས་ནས་ཐམས་ཅད་ལ་ཐམས་ཅད་ཡོད་པ་ཉིད་ཡང་སྐྱོན་མཚུངས་པ་མ་ཡིན་ནམ་འགའ་ཞིག་ལ་བྱེ་བྲག་མེད་པ་ཡིན་ནོ། །སྦྱོར་བ་ནི་སྤྱོད་པའི་ཕྱིར་ཞེས་པ་བྱ་བ་ནི་ཁྱེད་ཉིད་ཀྱི་བཞིན་ནོ། །གཏན་ཚིགས་བཟློག་ནས་སྤྱོད་པ་བྱས་པ་ཡིན་ནོ། །འོན་ཀྱང་འགའ་ཞིག་ཀྱང་བྱེ་བྲག་མེད་པའི་ཕྱིར་ནི། །དེས་ན་ཡོད་ཀྱང་ཐམས་ཅད་ལས་ཐམས་ཅད་མི་སྐྱེ་བར་མི་འགྱུར་རོ། །དེའི་ཕྱིར་ཚད་མ་དག་ལས་མི་མཐུན་པའི་ཕྱོགས་བཟློག་པ་ལ་ཐེ་ཚོམ་ཟ་བ་ཉིད་ཡིན་ནོ་ཞེ་ན། བཤད་པ། བྱེ་བྲག་ཡོད་པར་བྱ་བ་ཡིན་ན་ཁྱད་པར་དུ་དེ་རྡུལ་དང་མུན་པ་སྙིང་སྟོབས་ཀྱི་ཡོན་ཏན་གསུམ་ལས་ཐ་དད་པར་འགྱུར་ཏེ། ཅིའི་ཕྱིར་ཞེ་ན། ཡོན་ཏན་གསུམ་དེ་ཡོད་དུ་ཟིན་ཀྱང་ཁྱད་པར་གྱི་རྗེས་སུ་འགྲོ་བ་མེད་པའི་རྒྱུའི་ཕྱིར་རོ། །སྦྱོར་བ་ནི་གང་ཡོད་ཀྱང་གང་ཡོད་པའི་རྗེས་སུ་མི་


DTG190_Page_0188
[མ་དཔེ་གཟིགས་ན་འདིར་གནོན།]

འགྲོ་བ་དེ་དང་དེ་ལས་ཤིན་ཏུ་ཐ་དད་པ་ཡིན་ཏེ། དཔེར་ན་སྒྲ་དང་གཟུགས་དང་དྲི་དང་རོ་ལས་སེམས་པ་ཅན་ཡིན་ནོ། །ཡོན་ཏན་གསུམ་གྱི་དངོས་པོ་ཡང་ཁྱད་པར་གྱི་རྗེས་སུ་འགྲོ་བ་མེད་པས་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །ཁས་བླང་པར་བྱ་ཅ་བ་དེ་དག་ཉེ་བར་བརྗོད་ནས་ད་ནི་འབྲས་བུ་ཡོད་པར་སྨྲ་བའི་སྐྱེ་བའི་དོན་ཉིད་ཀྱང་རིགས་པ་མ་ཡིན་ནོ་སྙམ་ནས། ཡོད་པ་ཉིད་ཡིན་ཞེས་བྱ་བ་ལ་སོགས་པ་སྨོས་ཏེ། དེའི་འབྲས་བུ་མངོན་པར་འདོད་པ་མི་སྐྱེ་བ་ཡོད་པ་མ་ཡིན་ཏེ། ཡོད་པའི་ཕྱིར་རོ། །གྲུབ་པའི་གནས་སྐབས་བཞིན་ནོ་ཞེས་བྱ་བ་འདི་འགལ་བས་ཁྱབ་པར་དམིགས་པ་ཡོད་པ་ལ་བསམས་པའོ། །དེ་ལྟ་དེ་ལྟ་མ་ཡིན་ན་སྐྱེས་ཟིན་པ་ཡང་སྐྱེ་བར་ཐལ་བས་ཐུག་པ་མེད་པར་འགྱུར་རོ། །དེ་སྐད་དུ། ཡོད་པ་གལ་ཏེ་སྐྱེས་གྱུར་ན། །སྐྱེས་ཟིན་དངོས་དེ་ཡང་འབྱུང་འགྱུར། །ཞེས་བཤད་དོ། །གཞན་ཡང་སྒྲུབ་པར་བྱེད་པ་དང༌། རྒྱུ་དང་ས་བོན་དང་མེ་དང་ཆུ་ལ་སོགས་པ་འབྲས་བུ་མེད་པར་ཐལ་བར་འགྱུར་རོ། །བསྒྲུབ་པར་བྱ་བ་དང་བྱ་བ་འགའ་ཞིག་ངོ་བོ་ཡང་མེད་པའི་ཕྱིར་རོ། །སྦྱོར་བ་ནི་གང་ལ་བསྒྲུབ་པར་བྱ་བ་ཅུང་ཟད་ཅིག་ཀྱང་མེད་པ་བསྒྲུབ་པར་བྱེད་པའི་འབྲས་བུ་མེད་པ་ཡིན་ཏེ། དཔེར་ན་ནམ་མཁའ་ལ་ཁྱབ་པར་བྱར་མེད་པ་བཞིན་ནོ། །རྒྱུར་རྣམ་པར་གཞག་པ་ལ་ཡོད་པའི་འབྲས་བུ་བསྒྲུབ་པར་བྱ་བ་ཅུང་ཟད་ཅིག་ཀྱང་མེད་པས་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའོ། །འདི་གཏན་ཚིགས་མ་གྲུབ་པ་ཡང་མ་ཡིན་ནོ་ཞེས་བསམ་པར་བྱའོ། །གང་ལ་ས་གང་ཡང་རུང་བ་འགའ་ཞིག་ཁྱད་པར་དུ་གྱུར་པ་དེ་ལ་རྒྱུ་གནས་པའི་འབྲས་བུ་ཅི་ཞིག་ལྟར་སྐྱེ་བ་འདོད་ན་འདི་ཁྱད་པར་བཅས་པ་ནི་དེ་ལ་མེད་ན་ཇི་ལྟར་སྐྱེ་བར་འགྱུར། སྐྱེ་བ་ནི་མ་ཡིན་ཏེ། མེད་པའི་ཕྱིར་རོ། །ནམ་མཁའི་ཨུཏྤལ་ལྟ་བུར་འོ་མ་ལ་ཡང་ཡིན་ནོ་ཞེས་བྱ་བ་ནི་ཁྱབ་པར་བྱེད་པ་མི་དམིགས་པར་སེམས་པ་ལ་གཞག་པ་ཡིན་ནོ། །འོན་ཏེ་དེ་མེད་ཀྱང་ཁྱད་པར་སྐྱེ་བ་ཡིན་ན་དེ་སྐྱེ་བ་མེད་པ་སྐྱེ་བ་བས་མེད་ཀྱང་ཁྱད་པར་ཐམས་ཅད་ཐམས་ཅད་ལས་སྐྱེ་བར་འགྱུར་རོ་ཞེས་བྱ་བ་བརྒལ་ཞིང་བརྟག་པ་མཚུངས་པ་ཡིན་ནོ། །ཁྱེད་ཀྱི་ཏིལ་ལས་མར་ཁྱད་པར་དུ་སྐྱེ་བ་ཡང་མེད་པའི་ཕྱིར་ཏིལ་གྱི་ཁྱད་བར་བཞིན་དུ་


DTG190_Page_0189
[མ་དཔེ་གཟིགས་ན་འདིར་གནོན།]

འགྱུར་རོ་ཞེས་བྱ་བའི་དོན་ཏོ། །རང་བཞིན་གྱི་གཏན་ཚིགས་ཀྱི་ཐལ་བར་འགྱུར་རོ། །གཞན་གྱི་དོགས་པ་བསུ་བ་ནི། གལ་ཏེ་ཁྱད་པར་དེ་ཞེས་བྱ་བ་ལ་སོགས་པའོ། །གལ་ལྟར་ཡང་མེད་པ་དེ་ཇི་ལྟར་དེ་ལས་མེད་པའི་རྣམ་པས་སྐྱེ་བར་འགྱུར་ཞེས་བྱ་བ་སྤོང་པའི་དོན་ཏོ། །སྐྱེ་ན་ཐམས་ཅད་ལས་སྐྱེ་བར་འགྱུར་རོ་ཞེས་བྱ་བ་བརྒལ་ཞིང་བརྟག་པ་མཚུངས་སོ་ཞེས་སྔར་བཤད་པ་རྣམས་ཀྱིར་རྗེས་སུ་ཞེས་སྔར་བཤད་པ་རྣམས་ཀྱི་རྗེས་སུ་འབྲང་བར་འགྱུར་རོ་ཞེས་བྱ་བར་དགོངས་སོ། །རྣམ་པ་ཐམས་ཅད་ཀྱིས་གྲུབ་པའི་ངོ་བོ་ཡིན་པ་དེ་ལྟར་ཡང་ཁྱད་པར་ཡིན་ནོ་ཞེ་ན་ཞེས་བྱ་བ་ལ་སོགས་པ་སྨོས་ཏེ། འདི་ལྟར་རེ་ཞིག་དེ་ཡོད་པ་དང་མེད་པའི་འབྲས་བུ་སྨྲ་བ་ཐམས་ཅད་ལས་སྐྱེ་བར་འགྱུར་རོ་ཞེས་བྱ་བ་སྐྱོན་མཚུངས་པར་བསྟན་ཟིན་ཏོ། །གཉི་ག་ཡང་རྩོད་པ་མཚུངས་པ་དེ་གཅིག་ལ་བརྗོད་པར་ནི་མི་རིགས་པ་ཡིན་ནོ། །འབྲས་བུ་ཡོད་པར་སྨྲ་བ་ཉིད་ལ་སྐྱེད་པའི་དོན་དུ་ཅུང་ཟད་ཅིག་ཀྱང་མེད་དོ་ཞེས་སྟོན་ཏོ། །དེས་ན་འདི་ལྷག་པའི་སྐྱོན་ཡིན་ནོ། །དེ་འདི་ལྟར་ངེས་འགའ་ཕ་རོལ་པོས་བརྗོད་པ་ནི། འོ་ན་གལ་ཏེ་ཁོ་བོས་དེ་ཡོངས་སུ་མ་སྤངས་ན་ཁྱེད་ཀྱིས་ངེས་པར་གནས་པར་འགྱུར་ན། འགའ་ཞིག་རང་གི་ཕྱོགས་བསྲུང་བ་ནི་ཕ་རོལ་གྱི་ཕྱོགས་ལ་སྐྱོན་བརྗོད་པས་རང་གི་ཕྱོགས་ནས་པ་ཁ་ན་མ་ཐོབ་པ་མེད་པ་རྙེད་པར་འགྱུར་རོ། །སྒྲ་ནི་རྟག་པ་ཡིན་ཏེ། ལུས་ཅན་མ་ཡིན་པའི་ཕྱིར་བདེ་བལ་སོགས་པ་མ་ངེས་པས་དང་པོའི་མི་རྟག་པ་ཉིད་མ་གྲུབ་པ་བཞིན་ནོ་ཞེ་ན། རྒྱུ་ལས་འབྲས་བུ་མེད་པ་ཡང་སྐྱེ་བ་ཡང་གང་ཡང་སྐྱེད་པར་བྱེད་པའི་རང་བཞིན་ཡིན་ན་དེ་ཉིད་ལས་དེ་སྐྱེད་པ་ཡིན་གྱི་གཞན་སྐྱེ་བ་མ་ཡིན་ནོ་ཞེས་བྱ་བར་ངེས་སོ། །ཡང་སྨོས་པ་ནི་སྲིད་པར་རུང་ངོ༌། །དོན་འདི་ལ་འདི་མེད་པ་ཉིད་དེ་མར་མེད་དུ་ཟིན་ཀྱང་ཏིལ་རྣམས་ལས་སྐྱེ་བ་ཡིན་ཏེ། དེ་སྐྱེད་པའི་ནུས་པ་དང་ལྡན་བའི་ཕྱིར་རོ། །ཏིལ་མར་ནི་གཞན་ལས་སྐྱེས་པ་མ་ཡིན་ཏེ། ནུས་པ་མ་ཚང་བའི་ཕྱིར་དང་དེའི་ནུས་པ་སོ་སོར་ངེས་པ་ཉིད་ལ་ཇི་ལྟར་ཡིན་ཞེ་ན། བརྒལ་ཞིང་བརྟག་པར་བྱེད་ཅེ་ན། ཇི་ལྟ་བ་ཡིན་པ་དངོས་པོའི་ཉིད་ཀྱིས་ལན་འདེབས་པར་འགྱུར་རོ། །དཔེར་ན་གཙོ་བོ་ལས་ཆེན་པོ་སྟེ། ཆེན་པོ་སྐྱེའི་ང་རྒྱལ་ནི་


DTG190_Page_0190
[མ་དཔེ་གཟིགས་ན་འདིར་གནོན།]

མ་ཡིན། ཆེན་པོ་ལས་ང་རྒྱལ་ཡིན་གྱི་དེ་ཙམ་ལྔ་ནི་མ་ཡིན་ནོ་ཞེས་བྱ་བའི་གཞུང་ལུགས་དེ་ལ་བྱེད་ནུས་པ་སོ་སོར་ངེས་པ་ལ་དམིགས་པ་ཉིད་སྐྱབས་ཡིན་ཏེ། གཞན་ལན་གདབ་པའི་ཐབས་མེད་པའི་ཕྱིར་རོ་ཞེས་བྱ་བ་དེ་བཞིན་དུ་ཁོ་བོས་ཀྱང་འདི་ཁྭས་ཟོས་པ་མ་ཡིན་པ་དེས་ན་རིགས་པ་མ་ཡིན་ནོ། །མེད་པར་འགའ་ཞིག་ལ་ཁྱད་པར་མེད་དོ་ཞེས་བྱ་བ་དེ་ནི་མི་རིགས་པའི་ཕྱིར་རོ། །རྒྱུ་ནུས་པ་དང་མི་ནུས་པས་བྱས་པའི་ཕྱིར་འབྲས་བུ་སྐྱེ་བ་དང་མི་སྐྱུ་བ་ཡིན་པ་དེ་བས་ན། སྔར་བཤད་པའི་ཚད་མ་དག་ལ་མི་མཐུན་པའི་ཕྱོགས་ལས་བཟློག་པ་ལས་ཐེ་ཚོམ་ཟ་བ་སྒྲུབ་པར་བྱེད་པ་དྲི་མ་ཅན་གྱི་གཏན་ཚིགས་སུ་འགྱུར་རོ། །སྐྱེ་བའི་རང་བཞིན་ངེས་པ་དེ་ཡང་དེའི་རྒྱུ་ལས་ཡིན་ནོ། །ཡོད་པ་གང་ལས་སྐྱེས་པ་ཡིན་ཞེ་ན། དེ་ཡང་དེའི་རང་བཞིན་ངེས་པ་ནི་རང་གི་རྒྱུ་ལས་ཡིན་ནོ་ཞེས་བྱ་བ་སྨོས་སོ། །དེ་ཡང་གང་ལས་ཡིན་ཞེ་ན་བཤད་པ། དེ་ལྟར་ཐོགས་པ་མེད་པ་ནས་དངོས་པོའི་རང་བཞིན་ངེས་པ་ཡིན་ནོ། །འདི་ཐོག་མ་ཡོད་པ་ཞེས་ཚིག་རྣམ་པར་སྦྱར་རོ། །རྒྱུ་དང་འབྲས་བུ་ཐོག་མ་མེད་ནས་ཁས་བླངས་པས་རང་བཞིན་རྒྱུད་པར་འགྱུར་བ་ལ་ཐུག་པ་མེད་པའི་སྐྱོན་ཅུང་ཟད་ཀྱང་མེད་དེ། །འགྱུར་བྱས་པའི་ལྷག་མའོ། །དེ་ལྟ་མ་ཡིན་ན་བརྟག་པར་མི་བྱ་སྟེ། རྒྱུ་མེད་པར་ཐལ་བར་འགྱུར་བ་དེས་ན། དེ་ཁྱེད་ཀྱི་གནས་མ་ཡིན་པ་ལ་དོགས་པ་ཡིན་ནོ་ཞེས་བྱ་བར་དགོངས་སོ། །ཡང་ན་གཞུང་འདི་གཞན་དུ་བཤད་པར་བྱ་སྟེ། རྣམ་གྲངས་མེད་པར་ཡོད་པར་ཁྱད་པར་དུ་སྐྱེ་བ་ཡོད་པ་དེ་ལྟ་ན་ཐམས་ཅད་ལས་ཐམས་ཅད་སྐྱེ་བར་འགྱུར་ན་ཞེས་བརྒལ་ཞིང་བརྟག་པར་མི་བྱ་སྟེ། གང་གང་ལས་སྐྱེས་པ་རང་བཞིན་དེ་ཉིད་ལས་ཁྱད་པར་དུ་སྐྱེ་བར་འགྱུར་ཏེ། ནུས་པ་སོ་སོར་ངེས་པ་ལ་བརྟེན་པའི་ཕྱིར་རོ་ཞེས་བྱ་རང་གི་གྲུབ་པའི་མཐའ་ལ་ཡིད་ཆེས་པ་བརྗོད་པར་དགོས་པ་ལ་ཁོ་བོའི་ནུས་པ་སོ་སོར་ངེས་པ་ལ་དམིགས་པ་འགའ་ཞིག་གིས་དབྱིག་པས་སྐྱོད་པར་བྱེད་པ་ལ་ནི་མདོ་ཞེས་དགོངས་སོ། །མེད་པ་སྐྱེ་ན་ཡང་ཞེས་བྱ་བ་ལ་སོགས་པ་སྨོས་ཏེ། ཚིག་གི་རྣམ་པར་དབྱེ་བ་ནི་སྔ་མ་བཞིན་ནོ། །སྦྱོར་བ་ནི་གང་དང་


DTG190_Page_0191
[མ་དཔེ་གཟིགས་ན་འདིར་གནོན།]

གང་སྐྱེ་བའི་རྒྱུའི་ནུས་པ་དེ་དང་དེ་ལས་སྐྱེ་བ་ཡོད་པ་ཡིན་ཏེ། དཔེར་ན་ཁྱད་པར་ཕུལ་དུ་བྱུང་བ་བཞིན་ནོ། །འབྲས་བུའི་ཁྱད་པར་ཡང་སྐྱེ་བའི་རྒྱུའི་ནུས་པ་ཡོད་པས་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །དེ་དེ་བཞིན་དུ་གང་གང་ལ་སྐྱེ་བའི་རྒྱུའི་ནུས་པ་མེད་པ་དེ་དང་དེ་ལ་སྐྱེས་པ་ཡོད་པ་མ་ཡིན་ཏེ། དཔེར་ན་ཏིལ་ལ་མར་གྱིས་ཁྱབ་པ་བཞིན་དུའོ། །དེ་བཞིན་དུ་འབྲས་བུའི་ཁྱད་པར་དང་རྒྱུའི་ཁྱད་པར་ཡང་སྐྱེ་བའི་རྒྱུའི་ནུས་པ་མེད་པས་ཞེས་བྱ་བ་ཁྱབ་པར་བྱེད་པ་མི་དམིགས་པའོ། །གཞན་ཡང་རྣམ་གྲངས་པའི་སྒྲུབ་པར་བྱེད་པའི་རྟགས་ནི་མེད་པའི་རྒྱུ་མ་ཡིན་པའི་ཕྱིར་དང་ཉེ་བར་ལེན་པའི་རྒྱུ་འཛིན་པའི་ཕྱིར་ཐམས་ཅད་ལས་སྲིད་པའི་ཕྱིར་དང༌། ནུས་པ་ནི་ནུས་པ་ཅན་གྱི་རྒྱུའི་ཕྱིར་དང་རྒྱུའི་དངོས་པོ་ཡིན་པའི་ཕྱིར་འབྲས་བུ་ཡོད་པ་ཞེས་བྱ་བ་དེ་ལྟ་བུ་ལ་སོགས་པ་དོན་མེད་དོ། །བསྒྲུབ་པར་བྱ་བ་དོན་འགའ་ཞིག་ལ་ཐེ་ཚོམ་དང་ཕྱིན་ཅི་ལོག་པ་དེ་རྣམ་པར་གཅོད་པ་ངེས་པའི་ཤེས་པ་སྐྱེ་བར་འགྱུར་བ་དང་བསྒྲུབ་པ་ཐམས་ཅད་ཀྱི་རྒོལ་བའི་ཚིག་གི་དངོས་པོ་ནི་ཐེ་ཚོམ་དང་ཕྱིན་ཅི་ལོག་དང་སྒྲུབ་པར་བྱེད་པ་གང་ཡིན་པ་དེའི་ངེས་པའི་ཤེས་པ་སྐྱེ་བའི་རྗེས་སུ་མཐུན་པར་འཇུག་གོ །གཉི་ག་ཡང་སེར་སྐྱའི་གཞུང་ལ་དེ་མི་སྲིད་པ་ཡིན་ཏེ། འབྲས་བུ་ཡོད་པ་རྣམ་པར་གནས་པ་ལ་སྐྱེ་བ་དང་འཇིག་པ་མི་རིགས་པའི་ཕྱིར་རོ། །འོན་ཏེ་ཡོད་ཀྱང་མི་གསལ་བ་འདི་ངེས་པའི་སྒྲུབ་པར་བྱེད་པ་འདི་ཚིག་ལས་གསལ་ཐབས་གཞན་ཡིན་པས་འབྲས་བུ་མེད་པ་མ་ཡིན་ནོ་ཞེ་ན། བཤད་པ། ཁྱད་པར་འགའ་ཞིག་གསལ་བར་བྱེད་པའི་མཚན་ཉིད་གང་ཡིན་པ་དེ་ལ་བསྒྲུབ་པར་བྱ་བ་ངེས་པའི་ངོ་བོ་ཡིན་ནོ། །ཅི་ཞིག་ལྟར་མེད་པ་སྐྱེ་བ་སྔར་བཤད་པའི་སྒྲུབ་པར་བྱེད་པའི་ཁྱད་པར་དེ་ལ་ཇི་ལྟར་སྐྱེ་བར་འགྱུར། སྐྱེ་ན་ཡང་ཐམས་ཅད་ཀྱི་ཁྱད་པར་གྱི་མ་ལུས་པའི་བསྒྲུབ་པར་བྱ་བ་ངེས་པར་མངོན་པར་གསལ་བའི་མཚན་ཉིད་སྒྲུབ་པར་བྱེད་པ་དང་སྒྲུབ་པ་ལྟར་སྣང་བ་གཞན་ཐམས་ཅད་ལས་སྐྱེ་བར་མཚུངས་པ་ཐལ་བར་འགྱུར་རོ། །ཕ་རོལ་པོ་མེ་ལ་སོགས་པའི་རྟོགས་པ་ནི། དུ་བ་ལ་སོགས་


DTG190_Page_0192
[མ་དཔེ་གཟིགས་ན་འདིར་གནོན།]

པའི་གཏན་ཚིགས་ཀྱི་དངོས་པོ་ཡང་འབྲས་བུ་ཡོད་པར་ངེས་པར་མངོན་པར་གསལ་བར་བྱེད་དོ་ཞེས་བྱ་བའི་དོན་ཏོ། །མངོན་པར་གསལ་བར་ཁས་བླངས་ནས་དེ་སྐད་བརྗོད་པ་ཡིན་ནོ། །འོན་འདི་རྣམ་པར་འགྱུར་བའི་ངོ་བོ་དག་ལ་བྱེད་པའི་གནས་དང་ལྷན་ཅིག་པའི་རང་གི་ངོ་བོའི་མཚན་ཉིད་དང༌། ངོ་བོའི་གཞན་སྐྱེ་བའི་མཚན་ཉིད་དེ་དེའི་ཡུལ་ལ་རྣམ་པར་ཤེས་པ་འབྱུང་བ་ཞིག་ཡིན་ན་རང་གི་ངོ་བོ་ནི་འགྱུར་བ་མ་ཡིན་ཏེ། གཞན་པ་ཉིད་དུ་སྒྲུབ་པར་བྱེད་པའི་ནུས་པའི་ཕྱིར་རོ། །རྣམ་པར་འགྱུར་བ་སྔ་མའི་རང་བཞིན་ཞིག་པ་དང་སྔ་མ་མ་ཡིན་པའི་ངོ་བོ་སྐྱེ་བས་འབྲས་བུ་མེད་པར་སྨྲ་བ་སྒྲུབ་པ་ཡིན་ཏེ། གྱུར་པ་ནི་སྔ་མ་དང་ཕྱི་མའི་ངོ་བོ་འདིར་དང་འཐོབ་པ་མཚན་ཉིད་ཡིན་པའི་ཕྱིར་རོ། །སེམས་ཅན་ནི་གཅིག་པའི་ཕྱིར་གཞན་ནི་དེའི་ཤེས་པའི་ཡུལ་དུ་མི་འགྱུར་རོ། །གཞན་ཞེས་བྱ་བ་ནི་དེའི་ངོ་བོ་གསལ་བར་མི་འཐད་དོ། །ངོ་བོ་གཞན་སྐྱེ་བར་བརྗོད་པ་ནི་གཞན་དུ་ཅུང་ཟད་ཅིག་ཀྱང་ཉེ་བར་སྐྱེ་བ་མ་ཡིན་ན། མཚན་ཉིད་མི་མཐུན་པའི་ཕྱིར་གསལ་བར་བྱ་བ་གསུམ་པ་ཡང་མི་སྲིད་པ་ལ་གཉིས་པ་འདི་ཡོངས་སུ་སྤངས་པའི་སྐྱོན་དུ་འགྱུར་རོ། །དེའི་ཡུལ་དང་ཤེས་པ་ལ་སོགས་པ་ཡང་དོན་གཞན་དུ་གྱུར་པའི་དངོས་པོ་ཕྱིན་ཅི་ལོག་མི་རིགས་པའི་ཕྱིར་རོ། །ཤེས་པ་ལ་ཕན་འདོགས་པར་མི་བྱེད་པ་ནི་ཡུལ་དུ་མི་འགྱུར་ཏེ། དེ་ནི་ཕན་འདོགས་པར་བྱེད་པ་ཉིད་དོ། །དེའི་ཕྱིར་དེ་ཉིད་སྐྱེ་བ་རྟགས་ལ་ལྟོས་ནས་རང་ཉིད་ཀྱི་བསྒྲུབ་བྱ་ངེས་པར་མངོན་པར་གསལ་བར་འགྱུར་ཏེ་སྒྲུབ་པར་བྱེད་པ་ལ་ལྟོས་པའི་བསྒྲུབ་བྱ་ངེས་པ་ལས་རང་གི་ཡུལ་ཤེས་པ་སྐྱེ་བ་དེ་ཉིད་བརྟན་པར་འགྱུར་བའི་གནས་སྐབས་ལ་ལྟོས་ནས་ཁྱད་པར་དུ་སྐྱེ་བའི་མཚན་ཉིད་མ་ཡིན་ནོ་ཞེས་བསྟན་ཟིན་ཏོ། །ཐམས་ཅད་ཀྱི་ཚེ་འབྱུང་བའི་ཕྱིར་དང་རྟགས་ཀྱང་རྟག་ཏུ་ཉེ་བའི་ངོ་བོ་ཡིན་པའི་ཕྱིར་རོ། །རྟགས་ཀྱི་ཤེས་པ་ལྟོས་པ་འདི་ཡང་རྟག་ཏུ་ཡོད་པར་སྨྲ་བ་དག་པ་ཡང་མཚུངས་ཏེ། དུས་ཐམས་ཅད་དུ་ཡོད་པའི་ཕྱིར་རོ། །གཞན་ཡང་ཇི་ལྟར་ཞེས་བྱ་བ་ལ་སོགས་པ་ནི་འབྲས་བུ་ཡོད་པར་སྨྲ་བ་སེལ་བར་བྱེད་པའི་རྒྱུ་གཞན་ཞེས་བྱ་བ་དེའི་གནས་སྐབས་ཞེས་བྱ་བ་སྨོས་ཏེ། འཇིམ་པའི་


DTG190_Page_0193
[མ་དཔེ་གཟིགས་ན་འདིར་གནོན།]

གོང་བུའི་གནས་སྐབས་ཕྱི་མ་བཞིན་དུ་སྟེ་མངོན་པར་གསལ་བའི་གནས་སྐབས་བཞིན་དུའོ། །བུམ་པ་ཆུ་འཛིན་པའི་དོན་བྱེད་པའི་ཁྱད་པར་ལ་སོགས་པ་བསྒྲུབ་པར་བྱའོ། །གསལ་བ། ཁྱད་པར་ཅན་གྱི་དབྱིབས་རབ་ཏུ་མི་སྐྱེ་བའི་ཕྱིར་ཞེས་བྱ་བ་གཞན་གྱི་དགོས་པའོ། །དེ་ཉིད་ཀྱི་ཞེས་བྱ་བ་ལ་སོགས་པ་བརྗོད་པ་ཡིན་ནོ། །འདི་སྐད་སྟོན་པ་ཡིན་ཏེ། མགྲིན་པ་ལ་སོགས་པའི་དབྱིབས་ཀྱི་ཁྱད་པར་རྒྱུན་མི་འཆང་པ་ཉིད་ཀྱི་དོན་བྱ་བ་བྱེད་པ་འགའ་ཞིག་ལ་འཇིམ་པའི་བྱ་བ་འགྱུར་བ་བུམ་པ་ཡིན་ནོ་ཞེས་བརྗོད་ཀྱི་གཞན་ནི་མ་ཡིན་ནོ། །གལ་ཏེ་ལྔར་ཡང་འཇིམ་བའི་གོང་བུའི་གནས་སྐབས་སུ་ཡོད་པ་དེའི་ཚེ་གསལ་བའི་གནས་སྐབས་བཞིན་དུ་དོན་བྱེད་པ་དམིགས་པར་འགྱུར་ན་ཡོད་པ་ཡང་མ་ཡིན་ནོ། །དེའི་ཕྱིར་འདི་མེད་པར་ངེས་པ་ཡིན་ནོ། །གནས་སྐབས་ཀྱི་དངོས་པོ་འདི་ཡང་དེས་པ་ཡིན་ནོ་ཞེ་ན། བཤད་པ་དེའི་རང་བཞིན་གཞན་གཞན་ལ་ཡོད་པ་མ་ཡིན་ཏེ། སེར་པོ་དང་སྔོན་པོ་བཞིན་ནོ་ཞེས་བྱ་བ་འགལ་བས་ཁྱབ་པར་དམིགས་པར་དགོངས་སོ། །གནས་སྐབས་དང་གནས་སྐབས་ཅན་ཐ་མི་དད་པས་གཏན་ཚིགས་མ་གྲུབ་པར་གསལ་བར་མི་བྱའོ། །གང་གི་ཕྱིར་རང་བཞིན་སྣང་བ་ཐ་དད་པ་ཡོན་ཏན་དངོས་པོ་ཐ་དད་པ་མ་ཡིན་ཏེ། ཧ་ཅང་ཐལ་བར་འགྱུར་བར་ཆེས་པའི་ཕྱིར་རོ། །རང་བཞིན་སྣང་བ་ཐ་དད་པ་སྨོས་པ་ནི་ཉེ་བར་མཚོན་པའི་དོན་ཏོ། །དེས་ན་དོན་བྱེད་པ་ཐ་དད་པ་ཁས་བླང་བར་བྱའོ། །འདི་སྙམ་དུ་སེམས་ཏེ། གང་གི་ཚེ་སྣང་བ་ཐ་དད་པ་ཤེས་པ་ཐ་དད་པས་སྒྲུབ་པར་བྱེད་པ་དེའི་ཚེ་བདེ་བ་དང་སྡུག་བསྔལ་དང་གཏི་མུག་རྣམས་མ་འདྲེས་པར་ཐ་དད་པར་རྣམ་པར་འཇོག་པར་འགྱུར་གྱི་རྣམ་པ་གཞན་དུ་མ་ཡིན་ནོ། །དེ་བཞིན་དུ་འཇིམ་གོང་དང་བུམ་པ་གཞན་དག་ཀྱང་ཕན་ཚུན་ཐ་དད་པ་གཞན་པ་ཡིན་ཞེས་རབ་ཏུ་ཤེས་ཏེ། རྣམ་པ་ཐ་དད་པ་ཤེས་པར་ཡོངས་སུ་གཅོད་པའི་ཕྱིར་རོ། །རྒྱུ་དང་འབྲས་བུ་ཕན་ཚུན་ཐ་དད་པར་བྱུང་བ་ཡང་བདེ་བ་ལ་སོགས་པ་བཞིན་ནོ་ཞེས་བྱ་བ་རང་བཞིན་གྱི་གཏན་ཚིགས་སོ། །དེ་ལྟ་མ་ཡིན་ན་བདེ་བ་ལ་སོགས་པ་རྣམས་ཀྱང་ཕན་ཚུན་ཐ་དད་པ་མེད་པར་ཐལ་བར་འགྱུར་


DTG190_Page_0194
[མ་དཔེ་གཟིགས་ན་འདིར་གནོན།]

ཏེ། གསལ་བ་དང༌། ནུས་པ་བཞིན་ནོ། །ཁྱད་པར་ཉིད་བརྗོད་དུ་མེད་དོ་ཞེས་བྱའོ། །དེའི་ཕྱིར་ཞེས་པ་མཇུག་བསྡུ་བའོ། །བུམ་པ་ལ་སོགས་པ་དེ་དེ་ལ་དམིགས་པ་ཉིད་རིག་བྱར་གྱུར་པའི་རང་བཞིན་དུ་གནས་པ་ནི་མི་དམིགས་པས་མེད་པར་རིགས་སོ། །འོན་ཀྱང་དེ་གནས་པ་དེ་མེད་ཀྱང་དེའི་རང་བཞིན་དང་དེ་མ་ཡིན་པའི་རང་བཞིན་དམིགས་པའི་རིག་བྱར་གྱུར་པའི་རང་བཞིན་གྱིས་ཐ་དད་པ་གཅིག་པའི་ངེས་པ་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟར་རང་བཞིན་མི་དམིགས་པའི་སྒྲུབ་པར་བྱེད་པའི་ཡན་ལག་གི་སྒྲུབ་པ་རྒྱ་ཆེར་བ་རྗོད་ནས་ལྷག་མ་རྣམས་ཀྱིས་མི་དམིགས་པར་བཤད་པར་བྱ་སྟེ། ཁྱད་པར་བྱེད་པ་མི་དམིགས་པ་ཞེས་བྱ་བ་ལ་སོགས་པ་སྨོས་སོ། །ཆོས་དག་ནི་དཔེར་ན་ཤིང་ཤ་པ་ཉིད་དང་ཤིང་དག་ཁྱབ་པར་བྱ་བ་དང༌། ཁྱབ་པར་བྱེད་པའི་དངོས་པོ་ཅུང་ཟད་ཅིག་ཚད་མས་རབ་ཏུ་བསྒྲུབས་ནས་ཁྱབ་པར་བྱེད་པ་ཤིང་ཉིད་ལ་སོགས་པ་ལྡོག་པ་རབ་ཏུ་གྲུབ་པས་སྒྲུབ་པར་བྱེད་སྒྲུབ་པའི་ཡན་ལག་བྱས་པ་ཡིན་ནོ་ཞེས་བྱ་བའི་ཐ་ཚིག་གོ །དཔེར་ན་ཤིང་ཤ་པ་མེད་དེ། ཤིང་མེད་པའི་ཕྱིར་རོ་ཞེས་བྱ་བ་ལ་སོགས་པའོ། །འོ་ན་དེ་ལ་རང་བཞིན་མི་དམིགས་པས་མེད་པར་འགྲུབ་པ་ཡིན་ནོ། །དེ་ལ་འདིས་ཅི་ཞིག་བྱ། བྱ་བ་དང་ལས་རྣམས་ཀྱི་ཁྱད་པར་གྲུབ་ཟིན་པ་ཡིན་ན་སྒྲུབ་པར་བྱེད་པར་མི་འགྱུར་ཏེ། སྒྲུབ་པར་བྱེད་པ་དམ་པའི་རྒྱུ་ཡིན་ནོ་ཞེས་བརྗོད་དོ། །མ་རྟོགས་པ་རྟོགས་པར་བྱེད་པ་ནི་ཚད་མར་བཤད་དེ། མ་རྟོགས་དོན་གྱི་གསལ་བྱེད་ཡིན་ཞེ་ན། འདི་ནི་བདེན་ན་འདི་ལྟར་འདི་ནི་ཐམས་ཅད་ལ་སྦྱར་བར་མི་བྱའོ། །འོན་ཏེ་དེ་ལྟར་འདོམ་སུམ་བརྒྱ་ཙམ་ལ་སོགས་པའི་བར་ཡོད་པ་གང་ལ་སཱ་ལ་དང༌། ཤར་ལ་དང༌། པ་ལ་ཤ་དང༌། ཤིང་ཤ་པ་ལ་སོགས་པའི་ཤིང་ཐ་དད་པ་ངེས་པར་གཟུང་བ་མེད་པ་དེས་ན་རྣམ་པ་ཐམས་ཅད་དུ་གང་ཁྱབ་པར་བྱ་བ་མེད་པའི་ངེས་པ་མེད་པ་འཁྲུལ་པའི་རྒྱུ་མཚན་འགའ་ཞིག་ཡོད་པ་དེ་ཉིད་ལ་འདི་རབ་ཏུ་སྦྱོར་རོ། །རྒྱུ་མི་དམིགས་པ་ནི་གང་ལ་འབྲས་བུ་མེད་པར་ངེས་པ་མེད་པ་དེ་ཉིད་ལ་རབ་ཏུ་སྐྱེ་བ་ཡིན་གྱི་གཞན་ལ་དོན་མེད་པའི་ཕྱིར་རོ། །དཔེར་


DTG190_Page_0195
[མ་དཔེ་གཟིགས་ན་འདིར་གནོན།]

ན་མུན་པའི་གནས་སྐབས་སུ་དུ་བ་མེད་པའི་ངེས་པའི་ངེས་པ་མེད་པས་འདིར་མེ་མེད་པས་དུ་བ་མེད་དོ་ཞེས་བྱ་བ་ལྟ་བུ་སྟེ། འབྲས་བུ་མེད་པར་ཐེ་ཚོམ་ཟ་བའི་ཕྱིར་དང༌། རྒྱུ་མེད་པར་ངེས་པའི་ཕྱིར་རོ། །རང་བཞིན་འགལ་བ་དམིགས་པ་ཡང་གྲང་བའི་རེག་པ་མེད་པར་གནས་པའི་ཡུལ་ལ་ཐེ་ཚོམ་ཟ་བ་ལ་མེ་འབར་བའི་ཚོགས་འཁྲིགས་པ་ཆེན་པོ་ནམ་མཁའ་ལ་སོགས་པའི་ཡུལ་ལ་ཁྱབ་པར་གནས་པ་ལས་ཡིན་ནོ། །རྒྱུ་འགལ་བ་དམིགས་པ་ནི་མེ་འབར་བ་དང་ཉེ་བར་གནས་པའི་སྐྱེས་བུ་དང་ལྡན་པའི་ས་ཕྱོགས་ཉེ་བར་སྣང་བ་ན་འདར་བ་དང་བ་སྤུ་ལངས་པ་དང༌། སོ་ཐམས་བྱེད་པ་ལ་སོགས་པའི་དངོས་པོ་ཐ་དད་པ་མེད་པ་ཉིད་རབ་ཏུ་སྦྱར་བར་བྱའོ། །གཞན་དུ་དོན་མེད་པ་ཡིན་གྱིའོ། །འདིས་ནི་ཡུལ་གཞན་མི་མཚུངས་ཀྱང་མི་དམིགས་པའི་སྦྱོར་བ་རྣམས་ཀྱི་ཡུལ་བསམ་པར་བྱའོ། །རང་བཞིན་དང་ཁྱབ་པར་བྱེད་པ་དང་རྒྱུ་དང་འགལ་བ་དེ་དག་ནི་ཉེ་བར་དམིགས་པ་དེ་དག་ཉིད་ཡིན་ནོ་ཞེས་སྦྱར་བར་བྱའོ། །འགལ་བ་གཉིས་པོ་དག་ལས་འགལ་བ་གཅིག་ཉེ་བར་བསྟན་པའི་འགལ་བ་ནི་གཉིས་ཏེ། རྒྱུ་མཚན་མ་ཚང་བ་མེད་པའི་ཡོད་པས་མེད་པ་དང༌། ཕན་ཚུན་སྤངས་ཏེ་གནས་པའི་མཚན་ཉིད་དོ། །འདིས་ནི་འགལ་བའི་འབྲས་བུ་དམིགས་པའི་ཡང་ཡུལ་དང་རང་བཞིན་གྱིས་སྒྲུབ་པར་བྱེད་པའི་ཡན་ལག་ཏུ་སྒྲུབ་པ་ནི་གོ་སླ་བ་ཉིད་དོ། །དེ་ལྟ་ན་ཡང་ཅུང་ཟད་ཙམ་གྱིས་ཐ་དད་པ་མི་དམིགས་པའི་སྦྱོར་བའི་བྱེ་བྲག་བཅུ་གཅིག་པོ་དག་ལ་ཡང་རྒྱུ་འགལ་བའི་ཁྱབ་བྱ་དམིགས་པ་དང༌། འབྲས་བུ་དང་འགལ་བའི་ཁྱབ་བྱ་དམིགས་པ་དང་ཁྱབ་བྱེད་དང་འགལ་བའི་འབྲས་བུ་དམིགས་པ་དང༌། འགལ་བའི་འབྲས་བུ་དམིགས་པ་ལ་སོགས་པ་དག་ལ་སྒྲུབ་པར་བྱེད་པའི་སྒྲུབ་པ་བཤད་པར་རིག་པར་བྱའོ། །དེ་དང་དེའི་གོ་རིམས་ཇི་ལྟ་བ་བཞིན་དུ་དཔེས་བསྟན་པ་འདི་ན་དུ་བ་མེད་དེ། བ་མོའི་རིག་པ་ཡོན་པའི་ཕྱིར་རོ། །འདི་ན་མེའི་རྒྱུ་ནུས་པ་ཐོགས་པ་མེད་པ་དག་མེད་དེ། བ་མོའི་རིག་པ་ཡོད་པའི་ཕྱིར། །འདི་ན་བ་མོའི་རེག་པ་མེད་དེ། །དུ་བ་ཡོད་པའི་


DTG190_Page_0196
[མ་དཔེ་གཟིགས་ན་འདིར་གནོན།]

ཕྱིར་རོ། །འདི་ན་གྲང་བའི་རྒྱུ་ནུས་པ་ཐོགས་པ་མེད་པ་དག་མེད་དེ། དུ་བ་ཡོད་པའི་ཕྱིར། །རྒྱུ་དང་འབྲས་བུ་འགལ་བ་དང༌། །ཁྱབ་བྱེད་འགལ་བའི་འབྲས་བུ་དང༌། །འབྲས་བུ་གཞན་པའི་དངོས་པོར་འགྱུར། །དགག་པ་ཉིད་ཀྱི་སྒྲུབ་བྱེད་ཡིན། །འདི་ལ་དུ་མེད་པ་རེག་ཕྱིར། །མེ་རྒྱུ་ནུས་པ་མེད་པའི་ཕྱིར། །འདི་ན་དུ་ཡོད་ལ་རེག་མེད། །གྲང་རྒྱུ་ནུས་པ་མེད་པའོ། །བསྡུ་བའི་ཚིགས་སུ་བཅད་པའོ། །དེ་ལྟར་རེ་ཞིག་རྣམ་པ་གཅིག་གིས་སྒྲུབ་པར་བྱེད་པའི་ཡན་ལག་མ་བརྗོད་པའི་རྒོལ་བ་དག་ཚར་གཅོད་པའི་གནས་ཡིན་ནོ་ཞེས་བསྟན་ཏོ། །དེ་ཉིད་རྣམ་པ་གཞན་གྱི་ཐམས་ཅད་བསྟན་པ་ནི། ཡང་ན་འདིས་ཞེས་བྱ་བ་ལ་སོགས་པ་སྨོས་ཏེ། ཚིག་གི་ཕྲད་ཀྱིས་བསྡུ་བ་འདི་ཡང་འདིར་འཇུག་པ་དང་སྔར་བསྟན་པའི་དོན་མ་སྤངས་པར་དོན་གཞན་བསྡུ་བ་ལ་འཇུག་པ་ཡིན་ནོ། །འདི་ལྟར་གཅོད་པ་ནི་མ་ཡིན་ནོ། །ཡང་ན་འདིས་སྒྲུབ་པར་བྱེད་པ་ལ་སོགས་པའི་དོན་ཡོངས་སུ་སྤངས་ནས་རྣམ་པར་བརྟག་པར་བྱ་བ་ཡིན་ན། །དོན་རྣམ་པ་གཉིས་ཀྱང་བརྗོད་པར་འདོད་པའི་ཕྱིར་རོ། །འདིར་ཡང་ཡང་ནའི་སྒྲས་ནི་རྣམ་གྲངས་པའི་སྒྲུབ་པར་བྱེད་པའི་སྟེ། བྱེད་པར་སྒྲུབ་པའོ། །སྔ་མ་ནི་ཡོད་པར་སྒྲུབ་པའོ། །འདི་ཞེས་པ་ནི་ཡན་ལག་གི་སྒྲའོ། །ཚིག་གི་ཡན་ལག་ལ་སྔ་མ་ནི་བྱེད་པ་པོར་བརྗོད་པ་ཡིན་ནོ་ཞེས་བྱ་བ་ནི་ལྷག་མའོ། །ཚུལ་གསུམ་པའི་རྟགས་བསྟན་པ་བསྡོམས་ནས་བརྗོད་པ་ཡིན་གྱི་མཚན་ཉིད་གཅིག་ལ་སོགས་པ་བརྗོད་པ་མ་ཡིན་ཏེ། སྒྲུབ་པར་བྱེད་པ་སྤངས་པས་སོ། །ཆོས་མཐུན་པ་ཉིད་ཅན་གྱི་སྦྱོར་བའི་བློ་ནི་གཏན་ཚིགས་མཐུན་པའི་ཕྱོགས་ལ་ཡོད་པར་བརྗོད་པར་ཡོད་མོད་ཀྱི། ཆོས་མི་མཐུན་པ་བརྗོད་པས་མི་མཐུན་པའི་ཕྱིར་ལ་མེད་པར་དེ་མ་ཐག་ཏུ་འགེགས་པའི་ཕྱིར་རོ། །དེ་ཇི་ལྟར་དེའི་གཅིག་བརྗོད་པ་ཡང་སྒྲུབ་པར་བྱེད་པའི་ཡན་ལག་མ་ཡིན་ནོ་ཞེས་བྱ་བ་འདིས་ཕྱིས་འཆད་པར་འགྱུར་པ་དང་འགལ་པར་མི་འགྱུར་རམ་ཞེ་ན། དེ་ཡང་དེ་ལྟ་མ་ཡིན་ནོ། །འདི་ལྟར་ཚུལ་གསུམ་པོ་དག་གི་རྟགས་ཀྱི་དོན་གྱི་བདག་ཉིད་བསྟན་པ་ཡིན་ནོ། །དོན་དམ་པར་ན་དེའི་རྣམ་པར་གནས་པས་བརྗོད་པ་


DTG190_Page_0197
[མ་དཔེ་གཟིགས་ན་འདིར་གནོན།]

ཡིན་ནོ། །གསལ་བར་བྱེད་པ་ཕྱོགས་ཀྱི་ཆོས་བརྗོད་པ་དང་མཐུན་པའི་ཕྱོགས་ལ་ཡོང་པར་བརྗོད་པ་འམ། ཕྱོགས་ཀྱི་ཆོས་བརྗོད་པ་དང༌། མི་མཐུན་པའི་ཕྱོགས་ལ་མེད་པར་བརྗོད་པ་ཉི་དོ། །དེས་ན་ཚོགས་པའོ། །དེའི་ཚིག་གཉིས་པོ་ཚོགས་པའི་ཡན་ལག་ཏུ་ཕྱོགས་ཀྱི་ཆོས་ལ་སོགས་པ་བརྗོད་པའོ། །ཕྱོགས་ཀྱི་ཆོས་ཀྱི་ཚིག་ནི་མི་གཡོ་བ་ཡིན་ལ་ཅིག་ཤོས་དག་ནི་རེས་འགའ་གཞན་དང་གཞན་དུ་མ་ཡིན་པ་དེས་ན། ཚིག་གཉིས་ཚོགས་པའི་ངོ་བོའི་ཡན་ལག་ཅན་ལ། ཚིག་གཉིས་རྟག་ཏུ་ཡན་ལག་ཡིན་ནོ། །ད་ནི་དེའི་ཡན་ལག་གཅིག་བརྗོད་ཀྱང་གཉིས་པོ་དག་འབའ་ཞིག་ཏུ་མ་ཟད་ཀྱི། སྒྲུབ་པའི་ཡལ་ལག་ཏུ་བརྗོད་པ་ཡིན་ནོ། །བཤད་པ་སྔ་མའི་རྗེས་སུ་འབྲངས་ནས་སྨོས་པ་ཡིན་ཏེ། གཉིས་པོ་མི་བརྗོད་པ་ནི་མི་སྨྲ་བར་འདུག་པས་སོ། །རྣམ་གྲངས་གཞན་ཡང་དེ་བཞིན་དུ་ཞེས་བྱ་བ་དང༌། དེ་ཉིད་ཀྱི་ཞེས་བྱ་བ་ཡིན་ནོ། །ཚུལ་གསུམ་པའི་ཚོགས་ཀྱི་ཚོགས་གང་ཡིན་པའི་ཡན་ལག་གི་ཆ་ཤས་སོ། །ཇི་ལྟར་དམ་བཅའ་བ་ལ་སོགས་པ་སྒྲུབ་པར་བྱེད་པའི་ཡན་ལག་ཉིད་མ་ཡིན་ཞེ་ན། བརྗོད་པར་བྱ་སྟེ། དམ་བཅའ་བ་བརྗོད་པ་ནི་དངོས་སམ་བརྒྱུད་པས་དེ་གྲུབ་པ་མི་སྐྱེའོ། །འདི་ལྟར་དོན་དང་འབྲེལ་པ་ཁོ་ནས་དོན་རྟོགས་ཀྱི་སྒྲས་ནི་མ་ཡིན་ནོ། །དོན་དང་འབྲེལ་པ་མེད་པའི་ཕྱིར་རོ། །དེའི་ཕྱིར་དམ་བཅའ་བ་བརྗོད་པ་འམ། གཏན་ཚིགས་བརྗོད་པ་ནི་དངོས་སུ་སྒྲུབ་པར་བྱེད་པའི་དོན་མི་འགྲུབ་སྟེ། ཕྱོགས་ཀྱི་ཚིག་ལས་ཐེ་ཚོམ་ཟ་བ་དང༌། དོན་མཐོང་བ་ལས་ངེས་པ་ཡིན་པ་དེའི་ཚེ་དངོས་སུ་སྒྲུབ་པར་བྱེད་པ་མ་ཡིན་ནོ། །འོན་ཏེ་ཐེ་ཚོམ་ཟ་བ་ཁོ་ནར་མ་གྲུབ་སྟེ། ཕྱོགས་ཀྱི་ཚིག་ལས་རྒོལ་བ་དང་ཕྱིར་རྒོལ་བ་དག་ངེས་པའི་ཕྱིར་རོ། །དེ་ལྟ་མ་ཡིན་ན་གཞན་དུ་གྱུར་ཏེ། འདི་ལྟར་བྱས་པ་ལ་སོགས་པའི་ཚིག་ལས་ཀྱང་མི་མཁས་པ་རྣམས་ཐེ་ཚོམ་སྐྱེ་བས་མ་ངེས་པར་འགྱུར་རོ་ཞེ་ན། འདི་ནི་མ་འབྲེལ་པ་ཡིན་ཏེ། ཆོས་ཅན་གཅིག་ལ་མི་རྟག་པ་ལ་སོགས་པ་ཤེས་པར་བྱེད་པར་འདོད་པས། ཡིད་ཆེས་པར་བྱེད་པའི་ཆོས་གཉིས་བརྩིས་ནས་རྒོལ་བ་དང་ཕྱིར་


DTG190_Page_0198
[མ་དཔེ་གཟིགས་ན་འདིར་གནོན།]

རྒོལ་པ་དག་ངེས་པ་ཡིན་ནོ། །རེ་ཞིག་དངོས་པོ་གཅིག་ལ་བརྩོན་པར་མི་འགྱུར་ཏེ། སྒྲུབ་པར་བྱེད་པའི་སྦྱོར་བ་དག་མི་བྱེད་པར་ཐལ་བར་འགྱུར་བའི་ཕྱིར་རོ། །ཡིད་ཆེས་པར་བྱེད་པར་མི་འགྱུར་ཏེ། ཆོས་གཉིས་ཀྱི་དངོས་པོ་གཉིས་སུ་འགྱུར་ལ། དངོས་པོ་གཉིས་ཀྱི་ཆོས་འགལ་བ་གཉིས་པར་ཐལ་བར་འགྱུར་པའི་ཕྱིར་རོ། །གང་གི་ཚེ་དངོས་པོ་གཅིག་ལ་ཚད་མའི་སྟོབས་ཀྱིས་རྒོལ་བ་ལས་ཆོས་འགལ་བའི་དངོས་པོ་ཡིན་པ་དེའི་ཚེ་དེ་དངོས་པོ་གཉིས་སུ་འགྱུར་རོ། །འོན་ཏེ་ཚད་མའི་སྟོབས་ཀྱིས་ངེས་པ་མ་ཡིན་ན་ནི་ལུང་ལས་རང་ཉིད་ཀྱིས་གོ་བར་འགྱུར་རོ། །འདི་ལྟར་གཞན་ཡང་ཆོས་གཉིས་ཚད་མས་ངེས་པ་ཡིན་ན། ཇི་ལྟར་ཕྱོགས་ཀྱི་ཚིག་ལ་ཐེ་ཚོམ་ཟ་བར་འགྱུར་རོ་ཞེས་བརྗོད་དོ། །དེ་བས་ཕྱོགས་ཀྱི་ཚིག་དངོས་སུ་སྒྲུབ་པར་བྱེད་པ་མ་ཡིན་ལ། བརྒྱུད་པས་ཀྱང་མ་ཡིན་ནོ། །གཏན་ཚིགས་མ་གྲུབ་པ་དང་དཔེ་ལྟར་སྣང་བ་བཞིན་དུ་བསྒྲུབ་པར་བྱ་བ་བརྗོད་པ་ཉིད་ཀྱིས་སྟོན་པར་མི་ནུས་པའི་ཕྱིར་དང༌། གཏན་ཚིགས་ཀྱི་ཚིག་གིས་སྟོན་པར་མི་ནུས་པའི་ཕྱིར་རོ། །གཏན་ཚིགས་ཀྱི་ནུས་པར་འདོད་དོ། །འོན་ཏེ་སྒྲུབ་པར་བྱེད་པའི་ཡན་ལག་ཏུ་དམ་བཅའ་བའི་ཚིག་བརྗོད་པར་འགྱུར་ཡང་གཏན་ཚིགས་ཀྱི་ཚིག་བཞིན་དུ་སྒྲུབ་པར་བྱེད་པ་ལ་ཕན་འདོགས་པར་བྱེད་པའི་ཡུལ་གསལ་བར་བྱེད་པའི་སྒོ་ནས་དམ་བཅའ་བ་བསྒྲུབ་པར་རྗེས་སུ་བཟུང་ངོ༌། །དེ་ལྟ་མ་ཡིན་ན། དེ་སྒྲུབ་པར་བྱེད་པའི་ཡུལ་དུ་མ་བྱས་ན་འཇུག་པར་མི་འགྱུར་རོ། །ཤེས་པ་དང་བདག་དང་ཡིད་དང་ཕྲད་པ་ལ་སོགས་པ་ཡང་སྒྲུབ་པར་བྱེད་པ་ཕན་འདོགས་པར་བྱེད་པ་དེས་ན་ཚིག་ཉིད་དུ་འགྱུར་རོ་ཞེས་བྱ་བ་ཡིན་ནོ། །འདིས་ཀྱང་སྒྲུབ་པའི་ཡན་ལག་གི་བསྒྲུབ་པར་བྱ་བ་བརྗོད་པ་ནི། དཔེའི་ཚིག་བཞིན་དུ་སྒྲུབ་པར་བྱེད་པའི་ཡུལ་གསལ་བར་བྱས་ནས་མཐོང་བའི་ཕྱིར་རོ་ཞེ་ན། འདི་ཡང་ཤིན་ཏུ་དོན་མེད་པ་ཡིན་ནོ། །གཞན་གང་གི་ཕྱིར་སྒྲ་ལ་མི་རྟག་པའི་སྒྲུབ་པ་ནི་སྒྲུབ་པར་བྱེད་ཀྱི་ཚིག་ཏུ་བརྗོད་པར་འགྱུར་བའི་སྒྲུབ་པར་བྱེད་པའི་ཡུལ་ལ་ཕན་བཏགས་བས་གསལ་བར་བྱེད་པ་མ་ཡིན་ནོ། །དེ་མ་ཐག་པའི་ཡན་


DTG190_Page_0199
[མ་དཔེ་གཟིགས་ན་འདིར་གནོན།]

ལག་ནི་བསྒྲུབ་བྱ་བསྒྲུབས་པས་ཡན་ལག་མ་ཡིན་ན། ཡུལ་བསྟན་པས་ཉེ་བར་སྦྱོར་བ་གང་ལ་ཡིན་ན། གལ་ཏེ་འདི་མེད་ན་བསྒྲུབ་བྱ་མི་འགྲུབ་ན་ནི་ཐམས་ཅད་མཛེས་པར་འགྱུར་རོ། །ཇི་སྲིད་དུ་དེ་མེད་ཀྱང་གང་ཇི་སྙེད་པའི་བྱས་པ་དང་ཡོད་པ་མི་རྟག་པ་ཡིན་ཏེ། དཔེར་ན་བུམ་པ་ལ་སོགས་པ་ལྟ་བུའོ། །སྒྲ་ཡང་བྱས་པས་ཞེས་བྱ་བ་འདིས་ཕྱོགས་མ་བརྗོད་ཀྱང་མི་རྟག་པ་ཡིན་ནོ་ཞེས་བྱ་བ་གོ་བར་འགྱུར་བ་ཉིད་དོ། །དེའི་ཕྱིར་འདི་བསྟན་པའི་དོན་མེད་པ་ཉིད་དོ། །གལ་ཏེ་འདི་ཕྱིན་ཅི་ལོག་ཏུ་གྱུར་པ་གཏན་ཚིགས་ཀྱི་བྱེད་པའི་ཡུལ་སྟོན་ཕྱོགས་ཀྱི་ཚིག་སྦྱར་བར་མི་བྱ་བ་ཉིད་ན། དེ་ཇི་ལྟར་ཕྱོགས་ལ་བརྟན་ནས་བརྗོད་པས་ཕྱོགས་ཀྱི་ཆོས་ཉིད་ལ་སོགས་པ་གྲུབ་པར་འགྱུར། དེ་དག་ངེས་པའི་བདག་ཉིད་ཡོད་པར་གྱུར་པ་དེའི་མཐུས་ཕྱོགས་རྟོགས་པ་མ་ཡིན་ན། ནུས་པ་ཐོབ་པའི་ཕྱོགས་ཀྱི་སྟོབས་ཀྱིས་ཕྱོགས་ཀྱི་ཆོས་ལ་སོགས་པ་གྲུབ་པ་ཡིན་ནོ་ཞེས་མི་རིགས་ཏེ། དེ་དག་ཡོད་པ་ལ་ནུས་པ་ཐོབ་པ་ཉིད་ཀྱི་ཕྱོགས་མེད་པའི་ཕྱིར་རོ། །གཞན་ཡང་ཕྱོགས་བསྟན་པ་འདིས་ཕྱོགས་ཀྱི་ཆོས་ཉིད་ལ་སོགས་པ་ཤུགས་ཀྱིས་འོང་བ་ས་ཕྱོགས་ཀྱི་དབང་གིས་ཕྱོགས་ཆོས་ལ་སོགས་པ་འགྲུབ་པོ། །ཕྱོགས་ཀྱི་ཆོས་ལ་སོགས་པའི་སྟོབས་ཀྱིས་ཀྱང་ཕྱོགས་ཡིན་ནོ་ཞེ་ན། དེ་ལ་འདིར་བརྗོད་པ། བསྒྲུབ་བྱར་བྱེད་པའི་དུས་སུ་ཕྱོགས་ཀྱི་ཆོས་ཉིད་ལ་སོགས་པའི་རྣམ་པར་རྟོག་པ་ཡོད་པར་ཟད་ཀྱི། གང་ལ་ཤེས་པར་འདོད་པའི་བྱེ་བྲག་དང་ལྡན་པའི་ཆོས་ཅན་སྒྲ་ལ་སོགས་པ་འམ་སྤྲ་པ་དང་རྟ་སྤངས་ལ་སོགས་པ་མིའི་གནས་ཀྱི་ཆོས་ཅན་ལ་བྱས་པ་ཉིད་དང་དུ་པ་ལ་སོགས་པའི་མཚན་ཉིད་རྗེས་སུ་དཔག་པས་བྱེད་པའི་མངོན་སུམ་གྱིས་ཤེས་པ་འམ། ཤེས་པར་བྱ་བ་ཡིན་ནོ། །དེ་བྱེ་བྲག་དང་ལྡན་པར་མ་ངེས་པ་ཡིན་ན་གཞན་བུམ་པའི་ཚད་བང་ལ་སོགས་ཡོད་པར་དྲན་པར་བྱེད་དོ། །དེའི་ཁྱད་པར་སྤངས་པ་ནི་ནམ་མཁའ་འམ་མཚོ་ལ་སོགས་པ་ལ་མེད་པ་དྲན་པར་བྱེད་དོ། །དེའི་དངོས་པོའི་ཆོས་དེ་དག་མེད་ཀྱང་ཕྱོགས་ཀྱི་ཆོ་ཉིད་ལ་སོགས་པ་བརྗོད་པས། དེ་ཤེས་པར་འདོད་པའི་ཆོས་ཅན་ལ་


DTG190_Page_0200
[མ་དཔེ་གཟིགས་ན་འདིར་གནོན།]

ཆོས་ཀྱི་བྱེ་བྲག་ཤུགས་ཀྱིས་བརྗོད་པ་ཡིན་ནོ། །དེ་ཡང་འདི་ཤུགས་ཀྱི་ཡུལ་ལ་ཕྱོགས་ཞེས་བརྗོད་དོ། །དེ་ནས་ཕྱིས་འབྱུང་བར་འགྱུར་བ་རྟེན་པའི་ཇི་ལྟར་འདོད་པ་ལ་ཕྱོགས་ཀྱི་ཆོས་ཞེས་བཏགས་སོ། །བསྟན་བཅོས་ཀྱི་ཐ་སྙད་ཀྱི་རྒྱ་ཆེར་བསྟན་ཏོ། །གལ་ཏེ་ཤེས་པ་མཐོང་བའི་གནས་སྐབས་ཀྱི་སྟོབས་ཀྱིས་སྒྲུབ་པར་བྱེད་པའི་དུས་སུ་ཕྱོགས་ལ་སོགས་པའི་རྣམ་པར་རྟོག་པ་ཇི་ལྟ་བུ་ཡིན་ཞེ་ན། དངོས་པོའི་ཆོས་གང་ལ་རྒོལ་བའི་གནས་སུ་གྱུར་པའི་ཆོས་ཀྱི་ཁྱབ་པར་སྒྲུབ་པར་འདོད་པའོ། །མཐུན་པའི་ཕྱོགས་དེའི་ཆོས་གང་ཡིན་པའི་ཆོས་ནི་མཐུན་པའི་ཕྱོགས་ཆོས་སོ། །རྣལ་མའི་རྣམ་པ་བསྒྲུབ་པར་བྱ་བའི་ཆོས་ཀྱི་སྤྱི་དང་དོན་མཐུན་པ་ནི་མཐུན་པའི་ཕྱོགས་སོ། །དེ་སྤངས་པ་ནི་མི་མཐུན་པའི་ཕྱོགས་ཡིན་ནོ་ཞེ་ན། གང་ཡང་སྒྲུབ་པར་བྱེད་པའི་དུས་སུ་ཕྱོགས་ཀྱི་སྦྱོར་བ་ཡོད་པ་དེ་ཡང་ཕྱི་རོལ་གྱི་ཡན་ལག་མ་ཡིན་པའི་ཕྱོགས་བརྗོད་པ་ནི་མི་རྟག་གོ་ཞེས་བྱ་བའོ། །འོན་ཏེ་གནས་སྐབས་ཅན་གཞན་ཡིན་ཡང་སྐབས་ཀྱི་སྟོབས་ཀྱིས་ཕྱོགས་ཀྱི་ཆོས་ལ་སོགས་པ་དག་བརྗོད་པ་ཡིན་ན་དེ་ཡང་ཕྱོགས་ཀྱི་སྦྱོར་བ་སུམ་འབྱིན་པ་ལ་ཡང་མཚུངས་སོ། །དེའི་ཕྱིར་དམ་བཅའ་བའི་ཚིག་གི་སྒྲུབ་པར་བྱེད་པའི་ཡན་ལག་ཡིན་པ་དང༌། ཉེ་བར་སྦྱར་བ་དང་མཇུག་བསྡུ་བའི་ཚིག་དག་སྒྲུབ་པར་བྱེད་པའི་ཡན་ལག་མ་ཡིན་པ་དེ་བཞིན་དུ་བརྗོད་དོ། །དེ་ལ་རེ་ཞིག་དཔེ་ལ་ལྟོས་ནས་ནི་དེ་བཞིན་ཉེ་བར་བསྡུ་བའོ། །དེ་ལྟ་བུ་མ་ཡིན་པའི་སྒྲུབ་པ་ནི་ཉེ་བར་སྦྱོར་བའོ། །དཔེར་ན་དེ་བཞིན་དུ་ཞེས་བྱ་བ་ནི་གཟུགས་བརྙན་གྱི་དོན་ཏོ། །འདིར་གཟུགས་བརྙན་ཡང་ཅི་ཞིག་ཡིན་ཞེ་ན། དཔེར་ན་གྱུར་པའི་ཆོས་འཁྲུལ་པ་མེད་པ་ཉིད་དུ་གྲུབ་པ་ནི་བསྒྲུབ་པར་བྱ་བ་འགྱུར་བ་དང་ཆོས་མཚུངས་པ་ཡིན་ནོ། །དེ་བཞིན་དུ་འདི་ཡང་བྱས་པས་ཞེས་བྱ་བས་བསྒྲུབ་པར་བྱ་བ་སྲིད་པ་ནི་ཉེ་བར་སྦྱོར་བའི་དོན་ཏོ། །འོ་ན་བྱས་པའི་ཕྱིར་ཞེས་བྱ་བ་ནི་འདིས་སྲིད་པ་ཇི་ལྟར་བརྗོད་ཅེ་ན། མ་བརྗོད་དེ། བསྒྲུབ་བྱ་སྒྲུབ་པའི་ཆོས་ཙམ་བསྟན་པའི་ཕྱིར་རོ། །བྱས་པ་ཉིད་ནི་བསྒྲུབ་བྱ་སྒྲུབ་པའི་ཆོས་ཅན་བསྟན་ཏོ། །བྱས་པའི་ཕྱིར་སྒྲ་མི་རྟག་པ་ཡིན་ནོ། །དེ་སླར་ཡང་སྒྲ་ནི་


DTG190_Page_0201
[མ་དཔེ་གཟིགས་ན་འདིར་གནོན།]

བྱས་པས་ཞེས་བྱ་བས་ཡོད་པའམ་མེད་པ་ཡིན་སྙམ་པ་ལ་ཉེ་བར་སྦྱོར་བས་སྲིད་པ་གོ་བར་བྱེད་པ་ཡིན། སྒྲ་ལས་བྱས་པ་ཡོད་པའི་ཕྱིར་རོ། །དེ་ལྟར་གཏན་ཚིགས་བྱས་པ་ལས་ཐ་དད་པ་དོན་སྟོན་པར་བྱེད་པ་ཉིད་དོ་ཞེས་ཉེ་བར་སྦྱར་བ་ཡིན་ནོ། ངོ་བོ་ཐ་དད་པའི་རྣམ་གྲངས་སུ་གྲགས་པ་ཐ་དད་པ་ཡིན་ལ་གཏན་ཚིགས་བརྗོད་པའི་དུས་ཕྱིས་སྟོན་པ་ནི་ཉེ་བར་སྦྱོར་བ་ཡིན་པའི་ཕྱིར་དཔེའི་གཏན་ཚིགས་བཞིན་དུ་རྗེས་སུ་དཔོག་པ་ཡིན་ནོ། །གཏན་ཚིགས་བརྗོད་པ་ནས་མཇུག་བསྡུ་བ་སྟེ། དམ་བཅས་ནས་ཡང་དམ་བཅས་བརྗོད་པའི་ཕྱིར་རོ། །ཚད་མའི་འཐད་པས་དམ་བཅའ་བའི་ཡུལ་ནི་དོན་མ་ལུས་པ་ལས་བཟློག་པར་ཐལ་བར་འགྱུར་བ་དགག་པའི་ཕྱིར་ཕྱིས་བརྗོད་པ་གང་ཡིན་པ་དེ་ནི་མཇུག་བསྡུ་བའོ། །དམ་བཅའ་བ་ཁོ་ན་ཡང་བརྗོད་པ་ནི་མ་ཡིན་ཏེ། ཅིའི་ཕྱིར་ཞེ་ན། གང་གི་ཕྱིར་སྒྲུབ་པ་སྟོན་པ་ནི། དམ་བཅའ་བ་ཡིན་ལ། གྲུབ་པ་སྟོན་པ་ནི་མཇུག་བསྡུ་བར་སྤྱོར་བ་མ་ཡིན་པའི་ཕྱིར་རོ། །ཡང་གི་སྒྲ་ཡང་སྣ་ཚོགས་པ་ལ་མཐོང་སྟེ་འོད་འདི་ཡང་ཐང་ཅིག་འབྱུང་ངོ་ཞེས་བརྗོད་པ་དང༌། དྲི་ཟའི་གྲོང་ཁྱེར་འདི་ཡང་མཐོང་ཞེས་བྱ་བ་བཞིན་དུ་འདིར་ཡང་གཏན་ཚིགས་བསྟན་པ་ནི་ཤུགས་ཀྱིས་ཉེ་བར་སྦྱར་བའི་ནང་དུ་འདུས་པར་བཟུང་སྟེ། དམ་བཅའ་བའི་ནང་དུ་འདུ་བ་ནི་མི་སྲིད་པའི་ཕྱིར་རོ། །དམ་བཅའ་བའི་ཕྱི་ནས་གཏན་ཚིགས་འགའ་ཞིག་སྟོན་པ་ནི་འཇུག་བསྡུ་བར་སྦྱོར་བ་མ་ཡིན་ནོ། །སྒྲ་མི་རྟག་པ་ཡིན་ཏེ་བྱས་པ་ཡིན་པའི་ཕྱིར་རོ། །དེའི་ཕྱིར་སྒྲ་མི་རྟག་པ་ཡིན་ནོ་ཞེས་བྱ་བ་དེ་ཡང་དམ་བཅའ་བརྗོད་པ་ལས་དོན་ཐ་དད་པ་བརྗོད་པ་ནི་མཇུག་བསྡུ་བ་སྟེ། དམ་བཅའ་བ་བརྗོད་པ་ལ་ངོ་བོ་ཐ་དད་པར་གྱུར་བའི་གཏན་ཚིགས་བརྗོད་པའི་དུས་ཕྱིས་བརྗོད་པའི་ཕྱིར་དཔེ་བརྗོད་བཞིན་ནོ། །མཐའི་ངོ་བོ་མཇུག་པ་སྡུ་བའི་སྒྲ་ཡང་བསྒྲུབ་བྱའི་དོན་སྟོན་པ་མ་ཡིན་ཏེ། དེ་ངེས་པར་གཟུང་བར་འཇིག་པའི་ཕྱིར་རོ། །གང་ཡང་འགྲོ་བས་ན་འདི་རྭ་ཅན་ཡིན་ནོ་ཞེས་འགའ་ཞིག་བརྗོད་པ་དེའི་ཚེ་རྟ་མ་ཡིན་ནོ་ཞེས་བརྗོད་པ་བཞིན་ནོ། །དེའི་ཕྱིར་སྤྱི་སྒྲ་དང་ལྷན་ཅིག་པའི་དག་གིས་སྤྱོད་པའི་ཡུལ་དུ་


DTG190_Page_0202
[མ་དཔེ་གཟིགས་ན་འདིར་གནོན།]

ཡོད་པ་ནི་བསྒྲུབ་བྱའི་དོན་བསྟན་པར་མི་འགྱུར་ཏེ། རྒྱུ་བསྟན་པའི་དུས་ཕྱིས་སྐྱེ་བ་མཐོང་བའི་ཕྱིར་སྔ་མ་བཞིན་ནོ་ཞེ་ན། དེ་འདིར་དགག་པར་བྱ་སྟེ། མི་རྟག་སྟེ། སྒྲ་འདི་བྱས་པའི་ཕྱིར་རོ་ཞེས་དེ་སྐད་དུ་སྦྱོར་བ་ནི་མ་ཡིན་ཏེ། དམ་བཅའ་བའི་སྦྱོར་བ་ནི་དེ་མ་ཐག་པར་གསལ་བའི་ཕྱིར་རོ། །འོན་ཀྱང་སྒྲ་ནི་བྱས་པའི་ཕྱིར་རོ། །གང་དེ་ལྟ་བུ་ཡིན་པ་དེ་ཐམས་ཅད་ནི་མི་རྟག་པ་ཡིན་ཏེ། དཔེར་ན་བུམ་པ་ལ་སོགས་པ་བཞིན་ནོ། །ཡང་ན་གང་བྱས་པ་དེ་ཐམས་ཅད་མི་རྟག་པ་སྟེ། དཔེར་ན་བུམ་པ་ལ་སོགས་པ་བཞིན་ནོ། །དེ་བཞིན་དུ་སྒྲ་ཡང་བྱས་པས་ཞེས་བྱ་བ་དེ་ལྟ་བུ་གཉི་ག་དེ་ལྟར་འདོད་པར་སྦྱོར་བར་བྱ་སྟེ། གཉི་གས་ཀྱང་བསྒྲུབ་བྱ་འགྲུབ་པའི་ཕྱིར་རོ། །དེ་ལ་གལ་ཏེ་སྒྲ་ནི་བྱས་པའི་ཕྱིར་གང་ཡང་དེ་ལྟ་བུ་དེ་ཐམས་ཅད་ནི་མི་རྟག་པ་ཡིན་ཏེ། དཔེར་ན་བུམ་པ་ལ་སོགས་པ་གཞན་ལ་བརྗོད་པ་དེ་བཞིན་དུ་སྒྲ་ཡང་བྱས་པས་ཞེས་བྱ་བས་གཟུགས་བརྙན་གྱི་དོན་ཉེ་བར་སྦྱོར་བའི་ཚིག་བརྗོད་པ་འདི་ནི་དོན་མེད་པ་ཡིན་ཏེ། གཟུགས་བརྙན་མེད་ཀྱང་དེ་མ་ཐག་པའི་སྦྱོར་བས་རྟོགས་པར་འགྱུར་བའི་ཕྱིར་རོ། །སྒྲུབ་པ་ནི་གང་དོན་མེད་པ་དེ་ནི་རྟོགས་པ་དང་ལྡན་པས་བསྒྲུབ་པའི་ངག་ཏུ་བརྗོད་པར་མི་བྱ་སྟེ། དཔེར་ན་སེའུ་བཅུ་ཞེས་བྱ་བ་ལ་སོགས་པའི་ཚིག་དེ་བཞིན་དུ་གཟུགས་བརྙན་གྱི་དོན་ཉེ་བར་སྦྱོར་བར་བརྗོད་པ་ཡང་དོན་མེད་པས་ཞེས་བྱ་བ་ནི་ཁྱབ་པར་བྱེད་པ་དང་འགལ་བའོ། །རང་གི་དོན་གྱི་དོན་དཔོག་པ་ཡང་རིགས་པ་འདི་ཉིད་ཀྱིས་མཐོང་བ་ཡིན་སྙམ་ན་འགའ་ཞིག་སེམས་པ་དང་བཅས་པ་ཡིན་པ་ནི། འདི་ལྟར་བྱེད་པ་མེད། བྱས་པའི་དངོས་པོ་ཉིད་དུ་སྒྲ་ལ་བཟུང་བར་དེའི་མེད་ན་མི་འབྱུང་བ་རྗེས་སུ་དྲན་པ་དེ་བཞིན་དུ་སྒྲ་བྱས་པ་ཡིན་ནོ་ཞེས་བྱ་བ་གཟུགས་བརྙན་གྱི་དོན་བྱེད་པ་མ་ཡིན་ནོ། །འོན་ཀྱང་གང་བྱས་པ་དེ་ཐམས་ཅད་མི་རྟག་པ་སྟེ། དཔེར་ན་བུམ་པ་བཞིན་ནོ། །དེ་བཞིན་དུ་སྒྲ་ཡང་བྱས་པས་སྲིད་པར་འདོད་པའི་དོན་ཉེ་བར་སྦྱོར་བའི་ཚིག་གིས་བརྗོད་པ་ཡིན་ནོ། །འདི་ནི་ཁོ་བོ་ཡང་ཡན་ལག་ཏུ་བྱེད་དེ། དམ་བཅའ་བའི་དེ་མ་ཐག་བསྒྲུབ་བྱ་སྒྲུབ་པ་ཙམ་བསྟན་པ་མི་རྟག་པ་སྟེ། སྒྲ་ནི་བྱས་


DTG190_Page_0203
[མ་དཔེ་གཟིགས་ན་འདིར་གནོན།]

པའི་ཕྱིར་རོ་ཞེས་བྱ་བ་ལ་སོགས་པ་བསྟན་པར་མི་བྱ་སྟེ། དམ་བཅའ་བའི་སྦྱོར་བ་མི་སྲིད་པའི་ཕྱིར་རོ། །དེའི་ཕྱིར་ཉེ་བར་སྦྱོར་བའི་ཡན་ལག་གཞན་པ་ནི་གཏན་ཚིགས་མ་གྲུབ་པའི་སྤྲུལ་གྱིས་ཟོས་པས་ཡན་ལག་ཏུ་མ་ནུས་པ་ཁོ་ནའོ། །གང་འདི་ཡང་གྲུབ་པའི་དོན་བསྟན་པའི་མཚན་ཉིད་ཀྱི་མཇུག་བསྡུ་བ་ཟློས་པར་བཤད་པ་ཡོངས་སུ་སྤངས་པར་བརྗོད་དོ། །མཇུག་བསྡུ་བ་མེད་པར་དོན་བསྒྲུབ་པ་ཁོ་ན་ཡན་ལག་ལྔ་པའི་སྒྲུབ་པར་བྱེད་པར་བརྗོད་པར་འཐད་པ་མ་ཡིན་ནོ། །དེ་ལྟ་མ་ཡིན་ན་མཇུག་བསྡུ་བ་བརྗོད་པ་དོན་མེད་དེ་དོན་གྲུབ་པའི་ཕྱིར་སྒྲུབ་པའི་ཡན་ལག་ཏུ་མཇུག་བསྡུ་བ་སྦྱོར་བར་བྱ་བ་དང༌། དེས་ཀྱང་བརྗོད་པར་ཡང་མི་བྱ་བ་དང༌། སྒྲུབ་པར་བྱེད་པ་མ་གྲུབ་པར་བརྗོད་པ་ཡང་དམ་བཅའ་བར་འགྱུར་རོ། །རྨོངས་པའི་ལོག་པར་རྟོགས་པ་ལ་ལྟོས་པ་མེད་པ་ལ་མི་རྟག་པ་ཉིད་དུ་གྲུབ་པར་སྨྲའོ། །མཇུག་བསྡུ་བ་ནི་དམ་བཅའ་པའི་ཡུལ་གྱི་དོན་ཚད་མ་མཐའ་དག་གི་ཐབས་གཞན་མ་ལུས་པའི་ཡན་ལག་དཔྱད་ནས་མི་རྟག་པ་ཁོ་ནར་ངེས་པར་བཟུང་ནས་འཇུག་གོ་ཞེ་ན། དེ་ནི་འཐད་པ་མ་ཡིན་ཏེ། གལ་ཏེ་ཚད་མ་གཞན་ལ་ལྟོས་པ་མེད་པ་དེ་ལྟ་ན་ཤུགས་ཀྱིས་བསྒྲུབ་བྱ་ཉིད་ངེས་པར་གཟུང་བ་ཡིན་ནོ། །འདི་ལྟར་གང་བྱས་པ་ཡིན་པ་སྟེ། མི་རྟག་པ་ཡིན་ཏེ། དཔེར་ན་བུམ་པ་ལ་སོགས་པ་བཞིན་ནོ། །སྒྲ་ཡང་བྱས་པས་ཞེས་བྱ་བས་མི་རྟག་པ་ཉིད་མེད་པར་མི་འབྱུང་བ་ཡིན་ནོ། །སྒྲ་ལས་བྱས་པ་ཉིད་ཡོད་པར་བཤད་པ་དེའི་ཤུགས་ཀྱིས་སྒྲ་མི་རྟག་པར་ངེས་པ་ཡིན་ནོ། །དེས་ནི་འདི་བརྗོད་པའི་ཤུགས་རྟོགས་པར་བྱ་བའི་དོན་ཤེས་པར་བྱེད་པའི་ཕྱིར་ཡང་བརྗོད་པ་ནི་རྒྱུ་མི་དམིགས་པ་དང༌། འདིར་ཡང་བཟློག་པར་ཐལ་བར་འགྱུར་བར་ཅུང་ཟད་ཙམ་ཡང་འདོགས་པར་མི་བྱའོ། །ངག་གིས་དེ་རྣམ་པར་གཅད་པའི་འབྲས་བུ་དང་བཅས་པའི་འདིར་རྒྱུར་འགྱུར་ཏེ། བྱས་པ་ལ་མི་རྟག་པ་ཉིད་ཁྱབ་པ་བསྒྲུབ་པའི་ཕྱིར་རོ། །སྦྱོར་བ་ཡང་གང་ཤུགས་ཀྱིས་རྟོགས་པ་དེ་ནི་རྟོགས་པ་དང་ལྡན་པས་སྒྲ་སྦྱར་བ་འམ་ཚིག་དེ་ཟློས་པར་འགྱུར་ཏེ། དཔེར་ན་གཞོན་


DTG190_Page_0204
[མ་དཔེ་གཟིགས་ན་འདིར་གནོན།]

ནུ་མ་ཁང་པའི་ནང་ན་མེད་པ་འམ། མི་གསོན་ནོ་ཞེས་བྱ་བ་དེའི་ཤུགས་ཀྱིས་དེ་ཕྱི་རོལ་ན་ཡོད་པར་བརྗོད་པར་རྟོགས་པ་བཞིན་དུ་ཕྱོགས་ཀྱི་ཆོས་དང་རྗེས་སུ་འགྲོ་བ་དང་ལྡོག་པ་བརྗོད་པའི་ཤུགས་ཀྱིས་ཀྱང་དེ་རྟོགས་པར་འགྱུར་རོ། །དེའི་ཕྱིར་མི་རྟག་པ་ཡིན་ནོ་ཞེས་བྱ་བ་དེ་ལྟ་བུ་ལ་སོགས་པའི་ཕྱི་ནས་བསྒྲུབ་པར་བྱ་བའི་དོན་ཏོ། །སྔ་མ་ནི་བསྒྲུབ་བྱ་ལ་ལྟོས་ནས་ཁྱབ་པར་བྱེད་པ་དང༌། འགལ་བ་དམིགས་པ་ཡིན་ནོ། །བསྒྲུབ་བྱ་གཉིས་ལ་ལྟོས་ནས་རང་བཞིན་གྱི་གཏན་ཚིགས་སོ། །དེ་ཉིད་ཀྱི་ཕྱིར་མཇུག་བསྡུ་བའི་ཡན་ལག་གཞན་བསྟན་པ་ནི་གཏན་ཚིགས་མ་གྲུབ་པར་བཤད་དོ། །ཇི་སྐད་དུ། སྔ་མ་ལ་ལྟོས་དམ་བཅའ་སོགས། །ངག་གི་དོན་བརྗོད་ཟིན་པ་ལ། ཐ་དད་པ་ཡི་ཚིག་གིས་ནི། །དོན་གཅིག་སྟོན་པ་མ་ཡིན་ཏེ། །དེས་ན་འབྲེལ་པ་གྲུབ་པའི་ཕྱིར། །མཇུག་བསྡུ་པ་ནི་ལོགས་ཤིག་བརྗོད། །ཅེས་བྱ་བ་ལ། དེ་ཡང་འདིས་བསལ་བ་ཡིན་པས་རྒྱ་ཆེར་བརྗོད་པར་བྱའོ། །རྗེས་སུ་གྲོ་བ་དང་ལྡོག་པ་དག་ཅས་བྱ་བ་ནི་རྣམ་གྲངས་པ་གཞན་གྱི་རྒྱུས་འཇུག་པས་གཉིས་པ་ཤུགས་ཀྱིས་གོ་པ་ཡིན་པས་གྲུབ་མ་ཟིན་པ་ཡང་བརྗོད་པར་མི་བྱའོ། །ཀུན་ལས་བཏུས་པའི་འགྲེལ་པ་མཁན་གྱིས་ཡུལ་བསྟན་པ་ཞེ་ན་ཞེས་བྱ་བ་ལ་སོགས་པ་སྨོས་ཏེ། མ་ཡིན་ཏེ་ཞེས་བྱ་བ་ལ་སོགས་པ་ནི་ལན་ནོ། །གལ་ཏེ་ཞེས་བྱ་བ་ལ་སོགས་པ་ནི་གཏན་ཚིགས་བསགས་པ་སྟེ། དམ་བཅའ་བ་སྒྲུབ་པར་བྱེད་པའི་ཡན་ལག་ཐོབ་པར་འགྱུར་ཏེ། ཕྱོགས་ཀྱི་ཚིག་བཞིན་དུ་བསྒྲུབ་བྱ་རྟོགས་པའི་རྒྱུ་མཚན་ངེས་པའི་ཕྱིར་རོ། །གཏན་ཚིགས་ལྡོག་པ་ཐེ་ཚོམ་ཟ་བའི་ཕྱིར་ཞེ་ན། སྨྲས་པ། ཕྱོགས་ཀྱིས་ཆོས་ཀྱི་ཚིག་ལ་ཡང་དེ་དང་མཚུངས་པའི་ཕྱིར་འགལ་བ་དང་མ་ངེས་པར་འགྱུར་ཏེ། ཕྱོགས་ཆོས་ཡོད་པར་འགྱུར་ཀྱང་གོ་བར་མི་བྱེད་པའི་ཕྱིར་རོ། །དེ་ཉིད་ཀྱིས་ཐེ་ཚོམ་བསྐྱེད་པས་ཕྱོགས་ཀྱི་ཚིག་ནི་སྒྲུབ་པར་བྱེད་པ་མ་ཡིན་ཏེ། ཐུན་མོང་ལ་སོགས་པའི་ཚིག་བཞིན་ནོ། །དེ་དག་གིས་དེ་དང་མཚུངས་པའི་ཕྱིར་ཞེས་བྱ་བ་ལ་སོགས་པ་སྨོས་སོ། །ཐེ་ཚོམ་སྐྱེད་པའི་ཡན་ལག་བསྟན་པ་ཡིན་ནོ། །དེ་དག་ཉིད་གསལ་བར་བྱེད་པ་ནི།


DTG190_Page_0205
[མ་དཔེ་གཟིགས་ན་འདིར་གནོན།]

ཕྱོགས་ཀྱིས་ཆོས་ཀྱི་ཚིག་ཅེས་བྱ་བ་ལ་སོགས་པའོ། །འདིས་ནི་དེ་མ་ཐག་པའི་གཏན་ཚིགས་དེ་འཁྲུལ་པར་བརྗོད་པ་ཡིན་ནོ། །འོ་ན་འབྲེལ་པ་མ་བསྟན་པའི་མཉན་བྱ་ལ་སོགས་པའི་ཕྱོགས་ཀྱི་ཆོས་སྒྲུབ་པའི་ཡན་ལག་ནི་མི་མཐུན་ཕྱོགས་མེད་པ་ཉིད་དུ་འཁྲུལ་པ་མེད་པ་ཉིད་མ་ཡིན། འབྲེལ་པ་བསྟན་པའི་སྒྲུབ་པའི་ཡན་ལག་ཡིན་པ་དེའི་ཚེ་དེ་ལས་ཐེ་ཚོམ་ཟ་བའི་མ་ངེས་པ་ཚིགས་མེད་པར་ལྡོག་གོ །འདི་སྙམ་དུ་སེམས་པ་ཡིན་ཏེ། འདིའི་ཕྱོགས་ཀྱི་ཚིག་དང་མཚུངས་པའི་ཕྱིར་དེ་ཡང་སྒྲུབ་པར་བྱེད་པར་འགྱུར་རོ། །འོན་ཏེ་བསྟན་པ་ནི་བདེན་ན་གལ་ཏེ་ཡོད་པ་མ་ཡིན་ན་ཡང་དེ་ལས་བསྒྲུབ་བྱ་མི་འགྲུབ་པའི་ཕྱིར་རོ། །བརྔས་ཟིན་པ་ཟོར་བས་རྔ་བར་བྱེད་པ་མ་ཡིན་ན་བྱེད་པ་ཡང་དོན་ཅི་ཞིག་རྒྱས་པར་བྱེད། འབྲེལ་པ་མ་བསྟན་ན་གཏན་ཚིགས་ཐེ་ཚོམ་སྐྱེད་པའི་ཕྱིར་རོ། །དེ་ཉིད་ཀྱིས་ཐེ་ཚོམ་སྐྱེའོ་ཞེས་འཆད་དོ། །གལ་ཏེ་དེ་ལྟ་ན་འོན་ཏེ་སྦྱོར་བ་གཞན་དེས་བསྒྲུབ་བྱ་འགྲུབ་པ་མེད་པའི་ཕྱིར་དོན་མེད་པ་ཉིད་དེ་སྦྱོར་བར་མི་འགྱུར་རོ། །དེ་ལྟ་མ་ཡིན་ན་ཕྱོགས་སྒྲུབ་པར་བྱེད་པར་ཇི་ལྟར་ནུས་པར་འགྱུར། དེས་ཀྱང་ཚུལ་གསུམ་པ་བསྟན་པའི་གཞན་གྱི་དོན་གྱི་རྗེས་སུ་དཔག་པ་སློབ་དཔོན་གྱིས་བཤད་པ་དང་འགལ་བར་འགྱུར་རོ། །དེ་ལྟ་ན་ཕྱོགས་ཀྱི་ཆོས་དང་འབྲེལ་པ་ལ་བརྗོད་པས་བསྒྲུབ་པར་བྱ་བ་བརྗོད་པ་ཇི་ལྟར་སྤོང་བ་ཡིན་ཞེ་ན། འགལ་བ་མེད་དེ་ཕྱོགས་ཀྱི་ཆོས་དང་འབྲེལ་པ་དག་གིས་བསྒྲུབ་བྱ་བརྗོད་པ་ཡིན་པས་གསལ་བར་བྱེད་པ་ལ་འཕངས་པ་དེའི་ཕྱིར་གཞན་དག་ཕྱོགས་དང་ཉེ་བར་སྦྱོར་བར་བྱེད། བརྗོད་པ་ལ་སོགས་པ་སྒྲུབ་པར་བྱེད་པར་ཁས་བླངས་པའི་ཚིག་སྤངས་པ་ཡིན་ནོ་ཞེས་བཤད་ཟིན་ཏོ། །བཤད་པའི་དོན་འདི་ཡིན་ཏེ། གང་གི་ཕྱིར་ཕྱོགས་ཀྱི་ཆོས་དང་འབྲེལ་པ་ཉིད་ཀྱི་རྗེས་སུ་འགྲོ་བ་དང་ལྡོག་པ་དག་གིས་བརྗོད་པར་འདོད་པའི་དོན་གྲུབ་པའི་རྒྱུར་རིགས་པ་ཡིན་ཏེ། གཞན་དུ་ནི་མ་ཡིན་ནོ། །དེའི་ཕྱིར་རྗེས་སུ་དཔག་པར་བྱ་བའི་བསྟན་པའི་དོན་སྒྲུབ་པའི་ཕྱིར་ཕྱོགས་ཀྱིས་ཆོས་བསྟན་པ་ཡིན་གྱི་གཞན་ནི་མ་ཡིན་ཞེས་འགལ་བར་བྱེད་དོ། །ཕྱོགས་བརྗོད་པ་འཕངས་པ་ནི་གསལ་བར་བྱེད་པ་ཡིན་


DTG190_Page_0206
[མ་དཔེ་གཟིགས་ན་འདིར་གནོན།]

ནོ། །དེ་དག་གིས་ཞེས་བྱ་བ་ནི་ཕྱོགས་བརྗོད་པ་ནི་ཚུལ་གསུམ་པའི་རྟགས་ཀྱིས་འཕངས་པར་བརྗོད་པ་དང་མཚུངས་སོ་སྙམ་ནས་རྟགས་ཀྱི་ཚིག་བརྗོད་པ་ཡིན་ཏེ། བརྗོད་པ་དང་དོན་གཅིག་པའི་ཕྱིར་རོ། །དེ་ལ་ཁོ་བོ་ཅག་ནི་རྗེས་སུ་དཔག་པར་བྱ་བ་བསྟན་པ་ནི་དཔེ་དང་གཏན་ཚིགས་ཀྱི་ཡུལ་དུ་འདོད་པའི་ཕྱིར་འགལ་བ་མེད་དོ། །ཕྱིར་ཞེས་བྱ་བ་ནི་གང་གི་ཕྱིར་ཏེ། དེ་རྟོག་གེའི་བསྟན་བཅོས་བདེན་པ་ཉིད་བརྗོད་པར་བྱ་བ་ཡིན་པས་འབྲེལ་པ་མང་པོའི་སྦྱོར་བ་ནི་འབྲེལ་པ་མེད་པ་ཡིན་ནོ། །གཞན་དེ་ཉིད་ཀྱིས་མཚན་ཉིད་ལོག་པར་རྟོགས་པའི་བྱེ་བྲག་དགག་པ་ནི་ཞར་ལ་བྱུང་བས་ཆོག་སྟེ། རྣལ་མ་དེ་ཉིད་བརྗོད་པར་བྱའོ། །དེའི་དངོས་པོའི་ངོ་བོ་སྒྲུབ་པའི་ཡན་ལག་ནི་གཉུག་མའི་དོན་གྱི་ཆོས་སྒྲུབ་པར་བྱེད་པའི་ཡན་ལག་གང་ཡིན་པ་དེ་ཉིད་གསལ་བར་བྱེད་པ་མ་ཡིན་པ་ནི་ཚིག་རྐང་པ་གཉིས་ཡིན་ནོ། །ཤེས་པར་འདོད་པ་མ་ཡིན་པ་ནི་ཕྱིར་རྒོལ་བས་སོ། །བསྟན་བཅོས་ལ་བརྟེན་པའི་གཡོ་ལ་སོགས་པའི་ཚིག་ནི་འབྲེལ་པ་མེད་པ་ཞར་ལ་འོངས་པ་ནི་དོར་བར་བྱ་བ་ཙམ་ཡིན་པས་རྒྱ་ཆེར་བརྗོད་པར་མི་བྱའོ། །དཔེར་ན་བློ་དང་དབང་པོ་དང་ཡུལ་དག་གི་ཚོགས་ལས་ཐ་དད་པའི་བདག་ཡོད་དམ་མེད་ཅེས་འདྲི་བར་བྱེད་པ་ན་རིགས་པ་ཅན་གྱིས་བརྗོད་པ། ཚད་མ་ནི་ཡོད་པ་ལ་སོགས་པ་ཡུལ་ཡིན་པ་དང་ཡུལ་མ་ཡི་པ་ལ་ཁྱད་པར་མེད་པ་ཞེས་བྱ་བའི་ཡུལ་ཅན་གྱི་ཁོ་བོའི་མངོན་སུམ་ལ་སོགས་པ་ནི་ཁོ་བོའི་ཡུལ་ལ་སོགས་པ་རོག་པར་བྱེད་པ་དང་ཤེས་པ་རིག་པར་བྱ་བ་ཐ་དད་པའི་ཤེས་པ་སྟེ། རང་གི་རྒྱུ་ལ་རག་ལས་པའི་སྐྱེ་བ་དང་ལྡན་པའི་ཕྱིར་སྐྱེས་བུ་གཞན་གྱི་ཤེས་པ་བཞིན་ནོ་ཞེས་བྱ་བ་དང༌། དེས་ན་རྫས་ནི་ཡོད་པའི་ཕྱིར་མི་རྟག་པ་དང་ལྡན་པའོ། །རྒྱུ་དང་འབྲས་བུ་དང་སྤྱི་དང་ཁྱད་པར་བཞིན་ནོ་ཞེས་བྱ་བ་ནི་རྫས་དང་ཡོན་ཏན་དང་ལས་དག་ཁྱད་པར་མེད་པའི་ཕྱིར་འབད་པ་ཆེན་པོས་ཡོད་པར་སོགས་པར་ཁྱད་པར་མེད་པར་སྨྲའོ། །ཡོད་པ་ལ་སོགས་པ་ནི་ཡུལ་དང་ཡུལ་མ་ཡིན་པ་ལ་ཁྱད་པར་མེད་པའི་ཤེས་བྱའི་ཡུལ་ཉིད་དུ་ཆོས་ཀྱི་ཁྱད་པར་རྣམ་པ་འགའ་ཞིག་མེད་ཀྱང་རྣམ་པའི་བསྒྲུབ་བྱ་སྒྲུབ་པ་ལ་ཕན་


DTG190_Page_0207
[མ་དཔེ་གཟིགས་ན་འདིར་གནོན།]

དོགས་པའི་གཏན་ཚིགས་སུ་རྗེས་སུ་བརྗོད་པར་གཞན་མི་ཤེས་པའི་རྗེས་སུ་བརྗོད་པ་ལ་སོགས་པ་མ་ཡིན་པའི་ཕྱིར་རོ། །འདིར་སྒྲུབ་པ་ལ་སོགས་པ་བརྗོད་བས་ལན་གཞན་གྱིས་ཁོང་དུ་ཆུད་པར་བྱེད་པའི་ནུས་པ་གནོད་པའི་གཏན་ཚིགས་ཡིན་ནོ་ཞེས་བྱ་བར་ཡོངས་སུ་གཟུང་བར་བྱའི་ཞར་ལ་བྱུང་བ་གང་ཡིན་པ་ཞེས་བྱ་བར་སྦྱར་རོ། །བདག་མེད་པར་སྨྲ་བ་ལ་དཔེ་ཇི་ལྟ་བུ་ཞིག་སྨྲ་བར་བྱེད་ཅེ་ན། གང་ལ་རྫས་ལ་སོགས་པའི་སྐྱོན་གྱི་ཚོགས་དགག་པ་དང༌། སྒྲུབ་པའི་བདེ་བར་གཤེགས་པའི་ཆོས་ཀྱི་འདུལ་བས་ཀྱང་བདག་ཏུ་སྨྲ་བའི་ང་རྒྱལ་གྱི་རྒྱལ་མཚན་མ་ལུས་པ་སེལ་བར་བྱེད་པ་ལ་སོགས་པའི་མཚན་ཉིད་སྟོན་པ་དེས་ན་གླུ་དང་གར་ལ་སོགས་བ་སྟོན་པར་བྱེད་པའི་ཞར་ལ་བྱུང་བ་ཡིན་ནོ། །དེ་ལ་གཞན་དག་དང་གཞན་དག་ལ་ནི་ལྟ་སྨོས་ཀྱང་ཅི་དགོས། འོ་ན་ནི་ཁོ་བོ་ཅག་སངས་རྒྱས་པས་བརྗོད་པ་ཡིན་ནོ་ཞེས་ཇི་སྲིད་དུ་དགག་པ་བྱེ་བྲག་དང་བཅས་པ་བརྗོད་པ་ཇི་ལྟར་ཡིན། ཁོ་བོ་ཅག་སངས་རྒྱས་པ་འདི་སྐད་བརྗོད་དོ་ཞེས་བྱ་བར་འགྱུར་ཏེ། དཔེར་ན་བདག་མེད་བརྗོད་དོ་ཞེས་བྱ་བ་བཞིན་ནོ། །མང་པོ་རྣམས་ལ་མང་པོའི་ཚིག་གིས་བརྗོད་པར་མི་ནུས་པ་ནི་མ་ཡིན་ནོ། །གང་ཞིག་ཅེས་བྱ་བ་ནི་བརྗོད་པའི་ཕྱིར་རོ་ཞེ་ན། དེ་ལྟ་ཡིན་ཏེ། གང་གི་ཕྱིར་འདི་རང་གི་ཕྱོགས་པ་དག་ཉིད་གཞན་འབའ་ཞིག་ཡིན་གྱི། གཞན་ལ་ལྟོས་ནས་མང་པོའི་སྒྲ་དེ་བཞིན་དུ་སྦྱར་བ་མ་ཡིན་པའི་ཕྱིར། འདི་འདྲ་བ་ཉིད་རྒོལ་བར་འདོད་པས་དཔེར་བརྗོད་པ་ཡིན་གྱི། གཞན་དག་ལ་མ་ཡིན་པ་ནི་བརྗོད་པའི་ཕྱིར་རོ། །ཡང་ན་རྨོངས་པས་སྨྲ་ལ་མངོན་པར་ཞན་པའི་ཕྱིར་འདི་ཉིད་བརྗོད་པ་ཡིན་ནོ། །དེ་ལྟ་ན་ཡང་སྒྲའི་བསྟན་བཅོས་ནི་དོན་མེད་པར་བསྟན་པར་འགྱུར་བ་དེ་ཉིད་ཀྱི་ཕྱིར་ཤིང་རྟ་ཆེན་པོ་བ་གཞན་གྱིས་རྒྱལ་པོ་ཁྱེད་པས་ཁོ་བོ་ཅག་ནི་འཁོར་གྱིས་བརྟེན་པའི་སློབ་དཔོན་གྱིས་ཤེས་རབ་ཀྱིས་མངོན་པར་རློམ་མོ་ཞེས་བྱ་བ་འདི་བརྗོད་པ་ལྟ་བུའོ། །མཁས་པ་དམ་པ་ནི་དམ་པའི་བློ་དང་ལྡན་པ་ཡིན་པའི་ཕྱིར་ཇི་ལྟར་བཞད་གད་བྱེད་པ་ཡིན། ཀྱེ་མ་ཞེས་བྱ་བ་འདིར་ཁ་བསྐང་བར་


DTG190_Page_0208
[མ་དཔེ་གཟིགས་ན་འདིར་གནོན།]

བྱའོ། །ཚད་མའི་མཚན་ཉིད་བཅུ་གཉིས་རྒྱས་པར་སྤྲོས་ནས་སྟོན་པ་ནི་རྒྱལ་དཔོག་པའི་བསྟན་བཅོས་ལས་དེ་ཡང་རྒྱལ་བ་པའི་འདོད་པ་བསྟན་པ་ཡིན་ནོ། །དེ་ན་རྟག་པར་དམ་བཅའ་བ་དེ་ཁོ་ན་ཉིད་ཀྱི་རྟེན་སྒྲ་དང་བུམ་པ་ལས་གང་ཡང་རུང་བའི་གཉིས་པ་དང་བཅས་པ་ཞེས་བྱ་བའི་དམ་བཅའ་བ་འདི་ཉེ་བར་བཀོད་ནས། མཚན་ཉིད་བཅུ་གཉིས་ལ་སོགས་པའི་ཚིག་གིས་ལན་འདེབས་པར་བྱེད་དོ། །རེ་ཞིག་ཚད་མའི་མཚན་ཉིད་གཅིག་ཡུན་རིང་པོ་ནས་བརྗོད་པས་མཚན་ཉིད་ཀྱི་ཆོས་རིག་པ་ནི་འཇུག་པར་བྱེད་པ་ཡིན་ནོ། །འཇུག་པའི་ཚིག་གིས་བྱུང་བ་དང་འབྱུང་བར་འགྱུར་བ་དང་ཕྲ་བ་དང་བར་དུ་ཆོད་པ་དང༌། བསྐལ་བའི་དོན་བསྟན་པ་ལ་ཅུང་ཟད་ཅིག་ཀྱང་དབང་པོ་རྟོགས་པར་ནུས་པ་མེད་དོ། །འདི་ལྟར་ཡོད་པ་དང་འབྲེལ་པའི་སྐྱེས་བུའི་དབང་པོ་ལས་ཀྱང་སྐྱེས་པ་ནི་མངོན་སུམ་ཡིན་ཏེ། རྒྱུ་མེད་པར་རིག་པར་བྱ་བ་དམིགས་པའི་ཕྱིར་རོ། །འདུ་བྱེད་ཀྱི་སྡུག་བསྔལ་བ་ཉིད་གྲུབ་པ་མེད་པར་ཡང་མི་རྟོགས་པ་ཉིད་གྲུབ་པ་མ་ཡིན་ཏེ། རྟེན་ཅིང་འབྲེལ་པར་མ་བྱུང་བ་ལ་སྐད་ཅིག་མ་རིགས་པ་མ་ཡིན་པའི་ཕྱིར་རོ། །དེ་ལྟར་ན་དེ་ནི་དེ་དང་འདྲ་བའི་ཆོས་ལོགས་ཤིག་ཏུ་བརྗོད་པར་བྱའོ་ཞེ་ན། དེ་ལྟར་ན་ཡང་དངོས་པོའི་ཆོས་མ་སྨྲས་སུ་ཟིན་ཀྱང་ཞེས་བྱ་བ་ལ་སོགས་པ་སྨོས་ཏེ། རྣམ་པ་དེ་ལྟ་བུ་ནི་བསྒྲུབ་པར་བྱ་བའི་ཆོས་ཀྱི་ནང་དུ་འདུས་པའི་ཕྱིར་རྒོལ་བས་ཤེས་པར་འདོད་པ་ཡིན་ཏེ། དེ་ནི་དེ་ལས་ལོགས་ཤིག་ཏུ་ནི་དམ་བཅའ་བ་ལས་གཞན་པ་གཏན་ཚིགས་དང་དཔེས་སོ། །གང་གི་ཚེ་འདི་དག་སྒྲུབ་པའི་ཡན་ལག་མ་བརྗོད་པའི་ཇི་སྐད་བཤད་པའི་ཚར་གཅད་པའི་གནས་སུ་འགྱུར་རམ་ཞེ་ན། བཤད་པ། རྒོལ་བས་དེ་ལྟར་དངོས་པོ་སྒྲུབ་པའི་ཡན་ལག་མ་བརྗོད་པ་དང༌། ལན་བརྗོད་པ་གང་ཡིན་པ་དེས་ནི་གཉིས་ལས་གཅིག་ཀྱང་རྒྱལ་བ་དང་ཕམ་པར་མི་འགྱུར་རོ། །ཅིའི་ཕྱིར་ཞེ་ན། སྒྲུབ་པར་བྱེད་པ་མ་བརྗོད་པའི་ཕྱིར་རྒོལ་བ་རྒྱལ་བ་མེད་པ་འམ། །ཕྱིར་རྒོལ་བས་དེའི་དངོས་པོ་མ་རྟོགས་པའི་ཕྱིར་ཕམ་པ་ཡང་མེད་དེ་དེ་ནི་སྒྲུབ་པ་ལ་ལྟོས་པའི་ཕྱིར་རོ། །དེ་ཉིད་ཀྱི་ཕྱིར་རྒོལ་བ་ལ་ཡང་དེ་དག་ལ་མེད་པའི་ཡིན་ནོ། །


DTG190_Page_0209
[མ་དཔེ་གཟིགས་ན་འདིར་གནོན།]

ད་ནི་ཕྱིར་རྒོལ་བར་ཚར་གཅད་པའི་གནས་པ་བསྟན་པ་ནི། རྒོལ་བ་སྐྱོན་མི་བརྗོད་པ་ཞེས་བྱ་བ་ལ་སོགས་པ་སྨོས་ཏེ། ཡུལ་གང་ལས་ཤེས་པར་འདོད་པ་དག་ལའོ། །ཤེས་པར་མི་འདོད་པ་ལ་ཡང་སྐྱོན་མི་བརྗོད་པ་ནི་ཉེས་པ་མ་ཡིན་ནོ་སྙམ་དུ་དགོངས་སོ། །སྒྲུབ་པར་བྱེད་པའི་སྐྱོན་དེ་གང་ཡིན་ཞེ་ན། བཤད་པ། མ་ཚང་བ་ཉིད་ནི་དྲུག་སྟེ། རེ་རེ་དང་གཉིས་གཉིས་ཀྱིས་སྒྲུབ་པར་མ་བརྗོད་པའོ། །མཐུན་པའི་ཕྱོགས་དང་མི་མཐུན་པའི་ཕྱོགས་ལ་ཡོད་པ་དང་མེད་པ་ཅིག་ཅར་སྦྱོར་བ་མ་ཡིན་ན་རྣམ་པ་དྲུག་ཏུ་མ་ཚང་བའི་སྐྱོན་ཇི་ལྟར་འདོད་པར་འགྱུར་ཞེ་ན། གང་གི་ཆ་ཐམས་ཅད་ལས་ཉེ་བར་སྦྱོར་བ་ལས་ཁྱབ་པ་དག་ཐ་དད་པ་དེ་ལ་ལྟོས་པ་དེས་ན་འདི་རྣམ་པར་གཞག་གོ །འོ་ན་རྗེས་སུ་འགྲོ་བ་དང་ལྡོག་པ་དག་ལ་མ་བསྟན་པ་ལ་སོགས་པ་དེའི་ཚེ་ཡང་དཔེའི་སྐྱོན་དུ་འགྱུར་བར་བརྗོད་པར་བྱའོ་ཞེ་ན། འདི་གཞན་ལ་སྐྱོན་དུ་འགྱུར་ཡང་གཏན་ཚིགས་ལ་སྐྱོན་གཅིག་ཁོ་ན་དང་ལྡན་པར་མི་འགྱུར་ལ། དཔེ་ལྟར་སྣང་བ་བཅོ་བརྒྱད་ཀྱི་དཔེར་བརྗོད་པ་ནི་རིགས་པའི་ཐིགས་པར་རྒྱས་པར་བལྟ་བར་བྱའོ། །དེ་དག་སྒྲ་གང་དང་གང་གིས་བལྟ་བར་བྱ་བ་མ་བརྗོད་པའོ། །མ་བརྗོད་པ་དེ་ཡང་རྣམ་པ་གསུམ་གྱི་རྒྱུས་ཡིན་ཏེ། དེ་ཡང་སྒྲུབ་པར་བྱེད་པའི་སྐྱོན་མེད་པ་ཉིད་ཅེས་བྱ་བ་ལ་སོགས་པ་སྨོས་སོ། །འོ་ན་སྒྲུབ་པར་བྱེད་པ་སྐྱོན་མེད་པ་བརྗོད་པ་ལ་རྒོལ་བས་སྐྱོན་བརྗོད་པ་ཚར་གཅད་པའི་གནས་རིགས་པ་ཡིན་ན་སྐྱོན་དང་བཅས་པ་ཉིད་ལ་ཤེས་པ་ནུས་པ་མེད་པ་དག་གིས་སྐྱོན་མ་བརྗོད་ཀྱང་རྒོལ་བས་སྒྲུབ་པར་བྱེད་པ་སྐྱོན་ཅན་སྦྱར་བའི་ཕྱིར་རྒོལ་བ་ཕམ་པར་རྣམ་པར་གཞག་ཕྱིར་རྒོལ་བ་ནི་མ་ཡིན་ནོ་ཞེ་ན། འདིར་སྨྲས་པ། སྒྲུབ་པར་བྱེད་པ་སྐྱོན་ཅན་བརྗོད་པ་ཡིན་ཡང་ཞེས་བྱའོ། །གལ་ཏེ་རྒོལ་བས་ཕྱིར་རྒོལ་བ་སྤངས་པའི་ཕྱིར་སྒྲུབ་པར་བྱེད་པ་སྐྱོན་ཅན་ཡིན་པ་དེ་ལྟ་ན་ཡང་དེས་ཅིའི་ཕྱིར་ཕམ་པར་མ་གྱུར་ཞེ་ན། འབའ་ཞིག་ཅེས་བྱ་བ་ལ་སོགས་པ་སྨོས་སོ། །གལ་ཏེ་དེ་ལྟ་ཡིན་ན། ཅིའི་ཕྱིར་ཕམ་པ་ཉིད་མ་ཡིན་ན་དེ་ཁོ་ན་ཉིད་གྲུབ་པ་ལས་ཉམས་པའི་ཕྱིར་རོ་ཞེ་ན། བརྩད་པ་མ་ཡིན་ཏེ། སུན་མ་ཕྱུང་བའི་


DTG190_Page_0210
[མ་དཔེ་གཟིགས་ན་འདིར་གནོན།]

ཕྱིར་རོ། །ལན་གཞན་ནི། སྐྱེ་བོ་ངན་པའི་ལོག་པར་རྟོགས་པས་ཐ་སྙད་མཛེས་པ་མ་ཡིན་ཏེ། དེའི་ཕྱིར་རིགས་པའི་ལུགས་བྱེད་པ་མ་ཡིན་པར་རྒྱལ་བར་འདོད་པའི་རྒོལ་བ་འགའ་ཞིག་ཚིག་དོར་ལ་སོགས་པའི་ཐ་སྙད་མ་ཡིན་ནོ། །གལ་ཏེ་དེ་ཁོ་ན་དོན་དུ་གཉེར་ན་ནི་རིགས་པ་བརྗོད་པ་ལས་ཕྱིར་རྒོལ་བས་རྟོགས་པས་དོན་དེ་རིགས་པས་ཁས་བླང་བར་བྱའོ། །འོ་ན་ཏེ་རང་གི་ཕྱོགས་སུ་ལྷུང་བའི་སྟོབས་དང་ལྡན་པའི་ཕྱིར་བརྗོད་པ་ཡང་རིགས་པས་རྟོགས་པ་ཡིན་པ་དེའི་ཚེ་དེས་ཕྱིར་རྒོལ་བ་ལ་དེའི་རིགས་པས་དོན་རྟོགས་པ་དང་ལྡན་པ་མ་ཡིན་པ་ལ་དབང་པོ་ཉེ་བར་གྱུར་པ་ལས་རྟོགས་པར་བྱེད་པའི་ཕྱིར་དམ་པ་རིགས་པའི་རྗེས་སུ་འབྲང་བའི་རྩོད་པ་བྱེད་པ་འཇིག་པར་འགྱུར་རོ་ཞེས་བྱའོ། །གལ་ཏེ་དེ་ཁོ་ན་ཉིད་བསྲུང་བ་ནི་ཇི་སྐད་དུ་དེ་ངེས་པར་བསྲུང་བ་སྒྲུབ་པའི་དོན་དུ་གཡོ་སྒྱུ་ནི་ས་བོན་སྐྱེད་པ་ལ་ཚེར་མའི་རིབ་མ་བྱེད་པ་བཞིན་ནོ་ཞེའོ། །མ་ཡིན་ཏེ་ཞེས་བྱ་བ་ནི་སློབ་དཔོན་གྱིས་སོ། །དེ་ཁོ་ན་ཉིད་བསྲུང་བ་ནི་འདི་ལྟར་ལེགས་པར་གྱུར་པ་ཡིན་ཏེ། ངེས་པར་རྟོགས་པ་དྲུང་ཕྱུང་བ་ལས་ཡིན་ནོ་ཞེས་བྱ་བར་དགོངས་སོ། །དེ་མེད་པ་ཞེས་བྱ་བ་ནི་སྒྲུབ་པར་བྱེད་པ་བཤད་པ་དང༌། སྒྲུབ་པ་ལྟར་སྣང་བ་སུན་འབྱིན་པ་བདག་མེད་པའོ། །རྣམ་པ་གཞན་དུ་ཞེས་བྱ་བ་ནི་ལོག་པར་སྟོན་པ་མེད་པའོ། །ཇི་ལྟར་སྒྲུབ་པར་བྱེད་པ་ལ་སྐྱོན་མེད་པ་ཡིན་ཞེ་ན། སྨྲས་པ། དེའི་སྐྱོན་ཡིན་པར་འདོད་པ་ཡིན་ཡང་གྲུབ་པ་ལ་གནོད་པ་མེད་པའི་ཕྱིར་རོ། །བྱས་པ་སྒྲ་མི་རྟག་པ་ཙམ་སྒྲུབ་པ་ལ་བྱེད་པ་ལ་བརྗོད་པར་མི་འོས་པར་འགྱུར་བ་ནམ་མཁའི་ཡོན་ཏན་མི་འདོད་ཀྱང་སྒྲུབ་པར་བྱེད་པ་ནི་རྐང་མིག་པ་འགའ་ཞིག་རིགས་པ་མི་ཤེས་པ་བསྟན་བཅོས་ཁས་བླངས་པས་དེ་ཐམས་ཅད་འདོད་ན། དེའི་ཚིག་ཙམ་གྱིས་བསྟན་བཅོས་དང་དམ་བཅའ་ལ་སྐྱོན་མ་ཡིན་པའི་ཕྱིར་དེ་ཡང་རིགས་པ་མ་ཡིན་ནོ། །བསྟན་བཅོས་ལ་བརྟེན་ནས་ཁས་བླངས་པ་ཙམ་གྱིས་བསྒྲུབ་པ་མ་ཡིན་པའི་ཕྱིར་རོ། །དེ་ལྟར་མ་ཡིན་ན། དྲིས་པའི་ཡོན་ཏན་དུ་གྱུར་པ་འདི་ཉིད་ཀྱིས་གཏན་ཚིགས་ཕྱིན་ཅི་ལོག་ཏུ་སྒྲུབ་པར་བྱེད་པས་དམ་བཅའ་


DTG190_Page_0211
[མ་དཔེ་གཟིགས་ན་འདིར་གནོན།]

བ་འདི་དང་འགལ་བར་འགྱུར་རོ། །དེ་བཞིན་དུ་དྭ་ར་དྭ་ཛས་སྐྱོན་གཞན་འདི་ཡང་རྗོད་པར་བྱེད་དེ། བདག་མེད་དོ་ཞེས་དམ་བཅའ་བ་ལ་སོགས་པ་ནི་པན་ཚུན་འགལ་བ་ཡིན་ཏེ། གང་གི་ཕྱིར་བདག་ནི་དངོས་པོ་རྗོད་པར་བྱེད་པ་ཡིན་ལ་མེད་དོ་ཞེས་བྱ་བ་ནི་དེ་དགག་པ་བརྗོད་པ་ཡིན་ནོ་ཞེ་ན། འདི་ནི་མི་རིགས་ཏེ། ཐོག་མ་མེད་པའི་བག་ཆགས་ལས་བྱུང་བ་བདག་ཉིད་རྣམ་པར་རྟག་པ་དངོས་པོར་སྣང་བའི་ངོ་བོའི་སྒྲའི་དོན་ལ་གཞན་དག་རྟག་པ་དང་ཁྱབ་པ་ལ་སོགས་པ་བདག་གི་ཁྱད་པར་གྱི་མཚན་ཉིད་ཀྱིས་དངོས་པོར་ཁས་བླང་བ་དགག་པར་འདོད་པའི་ཕྱིར། འདི་ཉིད་ཆོས་ཅན་དུ་རྣམ་པར་གཞག་ཅེས་ཡོད་པ་དང་མེད་པ་སེམས་པར་བྱེད་དོ། །ཅི་བདག་འདི་རྣམ་པར་རྟོག་པའི་སྣང་བའི་དོན་ཡིན་ནམ། ཇི་ལྟར་མངོན་པར་འདོད་པ་དངོས་པོ་ལས་སྐྱེས་པ་ཡིན་ནམ་མ་ཡིན་སྙམ་པ་འདིར་རྣམ་པར་རྟོག་པའི་སྣང་བ་འདི་ཉིད་ནི་དོན་ལས་མ་སྐྱེས་པའི་ཕྱིར་དང༌། དེ་གཉིས་བློས་གཞག་པའི་སྦྱོར་བ་ལས་བདག་ཏུ་རྟོགས་པའི་ཕྱིར་རོ། །རྣམ་པར་རྟོག་པའི་སྣང་བ་ལས་ཐ་དད་པ་ཕྱི་རོལ་གྱི་མཚན་ཉིད་མི་མཐུན་པ་ཉིད་སྒྲའི་དོན་མ་ཡིན་པའི་ཕྱིར་དེ་ནི་དགག་པ་དང་སྒྲུབ་པ་ཡང་མེད་དོ། །དེ་ལྟ་མ་ཡིན་ན་ནི། གཅིག་ཏུ་དོན་དམ་ལ་འཇུག་པ། ལྟ་བ་བྱེ་བྲག་གཞན་དག་ནི། །དོན་རྣམས་ལ་ནི་སྒྲ་རྣམས་དག །རྒྱུ་མེད་ཅན་འགྱུར་མི་འཇུག་ཅིང༌། །འདས་དང་མ་སྐྱེས་པ་ལ་ཡང༌། །ཚིག་འགའ་ཞིག་ཀྱང་བརྫུན་པ་ཡིས། །དོན་ཅན་དུ་ནི་མི་འགྱུར་ཕྱིར། །འདི་དག་བློ་ཡུལ་དོན་ཅན་འདོད། །དེ་ཡང་དངོས་པོར་ཁས་ལེན་པའི་རྣམ་པར་རྟོག་པ་འདི་དགག་པར་འདོད་པ་ཡིན་ཏེ། དེ་ནི་ཡུལ་དང་དུས་སོ་སོར་ངེས་པ་ལ་ལྟོས་པའི་རྣམ་པར་རྟོག་པའི་སྣང་བའི་ཡུལ་ཡིན་པའི་ཕྱིར་རོ། །སྒྲ་འདི་ཉིད་ཀྱང་ཡུལ་མེད་པ་མ་ཡིན་ནོ། །དེས་ཀྱང་ཇི་སྐད་དུ་བཤད་པ། གང་གང་ལ་འགོག་པ་དེ་ནི་དེ་ལས་གཞན་པ་ནི་ཡོང་པ་མ་ཡིན་ཏེ། དཔེར་ན་ཇི་ལྟར་མེད་པའི་དབང་དུ་བྱས་ནས་བུམ་པའི་སྒྲ་བྱམ་པར་རྟོགས་པར་བྱེད་པ་ཡིན་དུ་ཆུག་པ་དེ་ལྟར་ན་ཡང་ཡུལ་དང་དུས་ཀྱི་ཁྱད་པར་ལས་འགོག་


DTG190_Page_0212
[མ་དཔེ་གཟིགས་ན་འདིར་གནོན།]

པར་བྱེད་དེ་བུམ་པ་མེད་དོ་ཞེས་བྱ་བ་བཞིན་དུ། ཁྱིམ་འདི་ན་མེད་དོ་ཞེས་ཡུལ་གྱི་བྱེ་བྲག་འགོག་པ་དང༌། དེ་ལྟར་མེད་དོ། །སྔར་མེད་དོ། །ཕྱིས་མེད་དོ་ཞེས་དུས་ཀྱི་བྱེ་བྲག་འགོག་པ་ཡིན། ཐམས་ཅད་ན་འདི་མེད་ཅེས་འགོག་ན་ཐམས་ཅད་དུ་བུམ་པ་ཉམས་སུ་མ་མྱོང་བ་དགག་པར་རིགས་པ་མ་ཡིན་ནོ། །དེ་བཞིན་དུ་བདག་ཀྱང་མི་འགྱུར་རོ། །འདི་ཡུལ་གྱི་བྱེ་བྲག་དང་དུས་ཀྱི་བྱེ་བྲག་ལ་འགོག་པ་ཡིན་ནོ་ཞེ་ན། གལ་ཏེ་རེ་ཞིག་ཡུལ་གྱི་བྱེ་བྲག་ལ་འགོག་ན་དེ་ནི་བདག་ལ་མི་རིགས་ཏེ། བདག་ལ་ཡུལ་མེད་པའི་ཕྱིར་དང༌། ཡུལ་གྱི་བྱེ་བྲག་ལ་འགེགས་པས་བདག་དགག་པར་མི་རིགས་པའི་ཕྱིར་དང༌། དེ་ཁྱེད་མི་འདོད་པའི་ཕྱིར་རོ། །གལ་ཏེ་ལུས་ལ་བདག་མེད་པ་ཡིན་ནོ་ཞེ་ན། གང་གི་ལུས་ལ་བདག་མི་འགོག་པར་བྱེད། གལ་ཏེ་ལུས་ལ་བདག་མེད་དོ་ཞེས་དེ་ལྟར་འགོག་གོ་ཞེ་ན། སུའི་ཡུལ་ལ་བདག་འདི་འགོག་པ་ཡིན། དེ་ལྟར་ན་བདག་ནི་གང་གང་ལ་ཡང་བདག་མེད་དོ། །མེད་པ་འདི་ཉིད་ཅི་ཞིག་ཡིན། ཁྱད་པར་འགོག་པའི་ཕྱིར་མེད་པ་ཡིན་ནོ་ཞེས་བྱ་བ་ནི་ཚིག་གི་ཚུལ་ཅི་ཞིག་ཡིན། འདི་ནི་འདི་ལྟ་བུ་ཡིན་ནོ་ཞེས་ཚིག་གི་ཚུལ་གྱིས་ཇི་ལྟ་ཇི་ལྟར་གྱུར་པ་དེ་ལྟ་དེ་ལྟར་བསྟན་པར་བྱ་བ་ཡིན་པའི་ཕྱིར་དང༌། བདག་འདི་ནི་འགའ་ཞིག་ལ་མེད་པའི་ཕྱིར་རོ། །དེའི་ཕྱིར་བསྟན་པ་དེ་བཞིན་དུ་དུས་ཀྱི་བྱེ་བྲག་ལ་ཡང་དགག་པར་རིགས་པ་མ་ཡིན་ཏེ། བདག་ནི་དུས་གསུམ་དུ་མི་གསལ་བའི་ཕྱིར་རོ། །བདག་འགོག་པར་བྱེད་ན་ནི་སྒྲ་ཡུལ་དང་བཅས་པ་བརྗོད་དགོས་ན། ཚིག་གཅིག་ཀྱང་དོན་མེད་པར་མ་མཐོང་ངོ༌། །འོན་ཏེ་ལུས་ལ་སོགས་པ་རྣམས་ལ་བདག་གི་སྒྲ་རྗོད་པར་བྱེད་པ་དེ་ལྟ་ན་ཡང་ཇི་ལྟར་འགལ་བ་མེད་པ་ཡིན། བདག་མེད་དོ་ཞེས་བྱ་བ་ལ་འདིའི་དོན་ནི་འདི་ཡིན་ཏེ། ལུས་ལ་སོགས་པ་མེད་དོ་ཞེས་བྱ་བར་འགྱུར་རོ་ཞེས་བྱ་བ་དེ་ལྟ་བུ་ལ་སོགས་པ་འབྲེལ་བ་མེད་པ་མང་པོ་དེ་གསལ་བ་ཡིན་ནོ། །དམ་བཅའ་བ་དོན་གྱི་ཕྱོགས་ཡིན་ནོ་ཞེས་བྱ་བ་དེ་ཡང་སྤྱི་འམ་ཁྱད་པར་ཞིག་ཡིན་པར་གྱུར་ན། གང་བརྩལ་མ་ཐག་ཏུ་འབྱུང་བ་ཉིད་ནི་དམ་བཅས་པའི་དོན་གྱི་ཕྱོགས་གཅིག་ནི་མ་ཡིན་ཏེ།


DTG190_Page_0213
[མ་དཔེ་གཟིགས་ན་འདིར་གནོན།]

ཆོས་ཅན་དུ་མཚོན་པར་བྱ་བ་ལས་མ་ལོག་པའི་ཕྱིར་རོ། །གང་དང་གང་ལས་ཉེ་པར་མཚོན་པ་དེ་ནི་དེའི་ཕྱོགས་གཅིག་མ་ཡིན་ཏེ། དཔེར་ན་ཁང་བཟངས་ཀྱི་ཕྱོགས་བྱ་རོག་མ་ཡིན་པ་བཞིན་ནོ། །གཞན་ནི་མི་རིགས་ཕྱིར་མི་འདོད། །ཅེས་བྱ་བ་ནི་རྐང་མིག་ཚར་གཅད་པའི་གནས་ཉི་ཤུ་རྩ་གཉིས་ཇི་སྐད་བཤད་པ་ཡིན་ཏེ། དམ་བཅའ་བ་ལ་གནོད་པ་དང༌། དམ་བཅའ་བ་གཞན་དང༌། དམ་བཅའ་དང་འགལ་བ་དང༌། དམ་བཅའ་བ་བཀག་པ་དང༌། གཏན་ཚིགས་གཞན་དང་དོན་གཞན་དང༌། དོན་མེད་པ་དང༌། རྣམ་པར་མི་རིགས་པའི་དོན་དང༌། འབྲས་བུ་མེད་པ་དང༌། དུས་མ་ཡིན་པ་དང༌། མ་ཚང་བ་དང༌། ལྷག་པ་དང༌། ཟློས་པ་དང༌། རྗེས་སུ་མ་བརྗོད་པ་དང༌། མི་ཤེས་པ་དང༌། དགོས་པ་མེད་པ་དང༌། སྤངས་པ་དང༌། ཁོང་དུ་མ་ཆུད་པ་དང༌། བརྒལ་ཞིང་བརྟག་པ་ལ་ལྟོས་པ་དང༌། རྗེས་སུ་མ་སྦྱོར་བ་ལ་སྦྱོར་བ་དང༌། གྲུབ་པའི་མཐའ་དང༌། གཏན་ཚིགས་ལྟར་སྣང་བ་རྣམས་ཚར་གཅད་པའི་གནས་ཡིན་ཏེ། རྣམ་པ་ཉི་ཤུ་རྩ་གཉིས་པོ་འདིས་རྣམ་པར་དབྱེ་བ་རྟོགས་པར་བྱའོ། །མི་མཐུན་པའི་དཔེ་ལ་ཁས་ལེན་ན་དམ་བཅའ་ལ་གནོད་པ་ཡིན་ཏེ། རྣམ་བཤད་བྱེད་པའི་སུན་དབྱུང་ནས་རྣམ་འགྲེལ་བྱེད་པ་ལ་གནས་པའི་ཕྱོགས་ལ་སྨྲས་པ་དེ་ཉིད་བསྟན་པར་བྱ་བ་ནི། དྭ་ར་དྭ་ཛས་བཤད་པ་སུན་དབྱུང་ནས། ཁོ་བོ་ཅག་འདི་ཉིད་རེ་ཞིག་ངེས་པར་བྱས་ནས་བརྗོད་པར་བྱའོ་ཞེས་དགོངས་སོ། །དེ་ལ་རྣམ་བཤད་པའི་འདོད་པ་ནི་བསྒྲུབ་པར་བྱ་བའི་ཆོས་ལ་མི་མཐུན་པའི་ཆོས་དུ་མས་གནོད་པར་བྱེད་པ་སྟེ། དཔེ་དང་མི་མཐུན་པར་ཤེས་ནས་དམ་བཅའ་བ་སྤོང་བ་ནི་དམ་བཅའ་ལ་གནོད་པའོ། །དཔེ་བསྟན་པ་ནི་སྒྲ་མི་རྟག་སྟེ་དབང་པོས་གཟུང་བར་བྱ་བའི་ཕྱིར་བུམ་པ་བཞིན་ནོ་ཞེས་བྱས་པ་ལ་གཞན་གྱིས་སྨྲས་པ་སྤྱི་ནི་རྟག་སྟེ། དབང་པོས་གཟུང་བར་བྱ་བར་མཐོང་བ་ཅིའི་ཕྱིར་སྒྲ་ལ་ཡང་དེ་བཞིན་དུ་མི་འགྱུར་ཞེས་བྱ་བའོ། །ལན་དུ་བརྗོད་པ་ནི། གལ་ཏེ་འདི་དབང་པོས་གཟུང་བར་བྱ་བར་འདོད་པར་མ་ཟད་ཀྱི་བུམ་པ་ཡང་རྟག་པ་ཡོད་པར་འགྱུར་རོ། །དེའི་སྒྲུབ་པར་བྱེད་པ་འདི་དང་དཔེ་རྟག་པ་དང་ཉེ་བར་


DTG190_Page_0214
[མ་དཔེ་གཟིགས་ན་འདིར་གནོན།]

མཇུག་བསྡུ་བས་དེ་མ་ཐག་ཏུ་ཕྱོགས་པ་བཞིན་ནོ། །ཕྱོགས་སྤངས་པ་ནི་དམ་བཅའ་བ་ལ་གནོད་པ་ཞེས་བརྗོད་དོ། །དམ་བཅའ་བ་ལ་བརྟེན་ནས་ཕྱོགས་སུ་གྱུར་པའི་ཕྱིར་རོ་ཞེའོ། །རྣམ་འགྲེལ་བྱེད་པས་འདི་དག་སུན་དབྱུང་བ་ནི་འདི་ལྟར་ཤེས་པ་ནི་མེད་ན་ཇི་ལྟར་འདི་དམ་བཅའ་བ་ལ་གནོད་པ་ཡིན་ཞེས་བྱ། ཕ་རོལ་པོས་སྤྱི་དཔེར་བརྗོད་པ་ནི་གཏན་ཚིགས་མ་ངེས་པ་ཡིན་ཏེ། མ་ངེས་པའི་སྐྱོན་གྱི་སྒོ་ནས་རང་གི་དཔེ་རྟག་པར་སྟོན་པའི་ཕྱིར་རོ། །རྣམ་པར་བསྟན་པས་ཀྱང་དཔེ་མ་གྲུབ་པའི་སྐྱོན་དུ་འགྱུར་བའི་ཕྱིར་དཔེའི་སྐྱོན་འདི་འམ། གཏན་ཚིགས་ཀྱི་སྐྱོན་དེས་དམ་བཅའ་བ་ལ་གནོད་པའི་ཚར་གཅད་པ་མ་ཡིན་ནོ། །དཔེ་ལ་གནོད་པས་དམ་བཅའ་བ་ལ་གནོད་པ་ཡིན་ནོ་ཞེས་ཚར་གཅད་པར་གདགས་པ་ཡིན་ནོ་སྙམ་ན། དཔེ་དངོས་པོ་མེད་པ་ཉེ་བར་བཏགས་པ་མི་སྲིད་དོ། །དམ་བཅའ་བ་ལ་གནོད་པ་དངོས་ཀྱི་ཡུལ་དུ་བརྗོད་པར་བྱའོ། །ད་ནི་རྣམ་འགྲེལ་བྱེད་པའི་འདོད་པ་ནི་རང་ཉིད་ཉེ་བར་འགོད་དེ། མི་མཐུན་པའི་དཔེ་ཞེས་བྱ་བ་ལ་སོགས་པའོ། །འདིར་དཔེ་མངོན་པར་འདོད་པ་གང་ཞིག་ཡིན། གལ་ཏེ་རེ་ཞིག་འདིར་འཇིག་རྟེན་པས་བརྟགས་པའི་དཔེ་དེ་ནི་གྲགས་པ་ཡིན་པ་དེའི་ཚེ་བཤད་པར་བྱེད་པའི་འདོད་པ་ལས་ཁྱད་པར་དུ་དེ་བྱས་པ་མེད་དོ། །རྣམ་པ་གཞན་དུ་ན་དེ་ནི་རྟོགས་པའི་ཐབས་མེད་པའི་ཕྱིར་རོ་ཞེ་ན། སྨྲས་པ་དེ་ལ་མ་མཐོང་བ་དེ་དག་ཀྱང་སྒྲུབ་པར་བྱེད་པའི་ཆ་ཤས་ཅན་ཡིན་པར་མཇུག་བསྡུ་བ་ནི་མཐར་གནས་པའི་ཕྱིར་ཉིད་དཔེ་ཡིན་ནོ། །དེས་ན་རང་གི་སྒྲས་ནི་ཁྱད་པར་དང་ལྷན་ཅིག་བསྡུ་བའོ། །དེ་ལས་བཟློག་པ་ནི་མི་མཐུན་པའི་དཔེའོ། །དཔེར་ན་སྒྲ་མི་རྟག་སྟེ། དབང་པོས་གཟུང་བར་བྱ་བའི་ཕྱིར་ཞེས་རྒོལ་བས་བརྗོད་པ་ན་མི་མཐུན་པའི་ཕྱོགས་དང་ལྡན་པ་ཡིན་ནོ། །སྒྲ་ལ་སོགས་པའི་དབང་པོའི་གཟུང་བར་བྱ་བ་དེ་རྟོགས་པ་མི་མཐུན་པའི་ཕྱོགས་དེ་ལ་ཡང་འཇུག་པས་གཏན་ཚིགས་འཁྲུལ་པར་འགྱུར་རོ། །དེ་ལྟར་སྤྱིའི་སྒོ་ནས་གནོད་པར་འགྱུར་བར་བཤད་པ་དེ་ལྟར་ན་སྒྲ་ལ་ཡང་དེ་བཞིན་དུ་ཡོད་པར་འགྱུར་བའི་ཕྱིར། འདི་ནི་དམ་བཅའ་ལ་གནོད་པ་


DTG190_Page_0215
[མ་དཔེ་གཟིགས་ན་འདིར་གནོན།]

ཞེས་བྱ་བ་ཚར་གཅད་པའི་གནས་ཡིན་ནོ། །ཅིའི་ཕྱིར་ཞེ་ན། སྒྲ་མི་རྟག་པར་དམ་བཅས་པར་བཏང་བའི་ཕྱིར་དང༌། དམ་བཅའ་བའི་སྒྲས་ཆོས་ཀྱིས་ཁྱད་པར་དུ་བྱས་པའི་ཆོས་ཅན་བརྗོད་པ་ཡིན་ཏེ། ཆ་ཤས་ཀྱི་སྤྱི་ཡིན་པའི་ཕྱིར་རོ། །འདིས་ནི་འདིར་དྭ་ར་དྭ་ཛའི་འདོད་པ་སྤངས་ཤིང་དོར་བ་ཡིན་ཏེ། དམ་བཅའ་བ་སྤངས་པའི་རྒྱུའི་ཕྱིར་རོ་ཞེས་བྱ་བ་དམ་བཅའ་བ་ལ་གནོད་པར་གནས་པ་གང་ཡིན་པ་དེའི་ཕྱིར་ཁྱད་པར་ངེས་པ་སུ་ཞིག་གིས་བྱས། འདི་སུ་ཞིག་གི་ཡིན་སྙམ་དུ་རྣམ་པ་གཞན་གྱི་སྒོ་ནས་རང་གི་ཕྱོགས་དང༌། གཞན་གྱི་ཕྱོགས་ཀྱི་རྗེས་སུ་ཤེས་པའི་སྒོ་ནས་དམ་བཅའ་ལ་གནོད་པ་ཡིན་ནོ། །མི་སྦྱོར་བ་ཉིད་དམ་བཅའ་བ་ལ་གནོད་པ་འདོད་དོ་ཞེ་ན། གནས་སྐབས་དེ་ལས་གཞན་ཡོད་པ་མ་ཡིན་པའི་ཕྱིར་དོན་ལ་ངེས་པར་བརྗོད་པའི་ཕྱིར་རོ། །འོན་ཏེ་གཞན་ཡང་སྲིད་པར་འགྱུར་བ་ཡིན་ནོ་ཞེ་ན། གཙོ་བོ་རྒྱུ་མཚན་དེ་དེ་ལ་བསྟན་པས་གཞན་ཡང་བསྟན་པ་ཁོ་ནར་འགྱུར་བའི་ཕྱིར་རོ། །དེ་འདིར་ཡང་བཤད་པ་འདི་དག་ཉིད་ཀྱང་གཏན་ཚིགས་ཀྱི་སྐྱོན་བརྗོད་པ་ལ་སོགས་པའོ། །ཅིའི་ཕྱིར་ཞེ་ན། གང་གི་ཕྱིར་དེ་ལྟར་ཕྱིར་རྒོལ་བས་གཏན་ཚིགས་ཀྱི་སྐྱོན་བརྗོད་པས་རྒོལ་བའོ། །དམ་བཅའ་བ་ལ་གནོད་པར་འགྱུར་ཏེ། ཡང་དག་པའི་སྐྱོན་བརྗོད་པའི་ཕྱིར་རོ། །རྩོད་པ་གཞན་འདིར་ཡང་སྤྱི་ནི་རྟག་པ་སྟེ། དབང་པོས་གཟུང་བར་བྱ་བ་ཡིན་ནོ་ཞེས་བསྟན་པས་སྒྲ་ལ་ཡང་དེ་བཞིན་དུ་འགྱུར་རོ་ཞེས་བརྗོད་པ་འདི་ནི་འབྲེལ་པ་མེད་པ་ཉིད་ཡིན་ནོ། །གང་གི་ཕྱིར་རང་བཞིན་དུ་གནས་པའི་སྤྱིའི་བདག་ཉིད་བསྟན་པ་ཙམ་གྱིས་སྤྱིའི་བདག་ཉིད་ཅི་ཡོད་པར་འགྱུར་རམ། དེ་ཡང་དབང་པོའི་གཟུང་བྱ་ཡིན་པས་རྟག་པ་སྒྲ་ཡིན་ཡང་མ་དཔྱད་པར་རྟག་པ་ཁོང་དུ་ཆུད་པར་འགྱུར་རམ། འདི་ལྟར་འགྱུར་ཏེ། སྤྱི་ཡང་རྟག་པ་དང་དབང་པོའི་གཟུང་བར་བྱ་བ་ཉིད་དེ་ནི་བུམ་པ་མི་རྟག་པ་ཉིད་ལ་ཡང་དབང་པོས་གཟུང་བར་བྱ་བ་མཐོང་བའི་ཕྱིར་ཐེ་ཚོམ་དུ་འགྱུར་རོ། །གཞན་ཡང་མི་མཐུན་པའི་ཕྱིར་ཆོས་ཤེས་པས་འདིར་ཡང་རིགས་པ་མ་ཡིན་ནོ་སྙམ་ནས། དེའི་ཆོས་ཞེས་བྱ་བ་སྨོས་ཏེ། སྤྱི་ཡང་རྟག་


DTG190_Page_0216
[མ་དཔེ་གཟིགས་ན་འདིར་གནོན།]

པ་དེའི་ཆོས་ཡིན་པས་སོ། །གང་གི་ཕྱིར་སྒྲ་མི་རྟག་པར་བརྗོད་པ་ལ། འགའ་ཞིག་གིས་སྒྲ་རྟག་གོ་ཞེས་བྱ་བ་མི་མཐུན་པའི་ཕྱོགས་གཙོར་ཉེ་བར་འགྱུར་བ་ཡིན་གྱི་སྤྱི་ནི་མ་ཡིན་ཏེ། དེ་ནི་ཆོས་ཅན་གཞན་ཡིན་པའི་ཕྱིར་རོ། །འདི་ལྟར་རྟག་པ་དང་མ་ཡིན་པ་ཅིའི་ཕྱིར་ཞེ་ན། མི་མཐུན་པའི་ཕྱོགས་ཤེས་པས་སོ། །ཡང་ན་འདིས་ཞེས་བྱ་བ་ནི་ཇི་སྐད་བཤད་པ་འདི་ཉིད་གཙོ་བོའི་རྒྱུ་མཚན་ཡིན་ནོ་ཞེས་བྱ་བ་བསྒྲུབ་པའི་ཡན་ལག་མ་བརྗོད་པའོ། །དམ་བཅའ་བའི་དོན་བཀག་པ་ལ་ཆོས་རྣམ་པར་བརྟགས་ནས་དེའི་དོན་སྟོན་པ་ནི་དམ་བཅའ་བ་གཞན་པ་ཞེས་བྱ་བ་ནི་མཚན་ཉིད་གཉིས་པའི་མདོ་ཡིན་ཏེ། ཚར་གཅད་པའི་གནས་ཡིན་ནོ་ཞེས་ཀུན་ལ་ཡང་སྦྱར་རོ། །འདིའི་དོན་བགག་པའི་གཏན་ཚིགས་མི་མཐུན་པའི་ཕྱོགས་ལ་ཡོད་པར་བརྗོད་པ་སྟེ། དེ་ལྟར་ན་མཐུན་པའི་ཕྱོགས་དག་གི་ཆོས་ཀྱི་བྱེ་བྲག་གི་རྒྱུར་གྱུར་པས་སྔར་དམ་བཅས་པའི་དོན་ལས་བསྟན་པ་དོན་ནི་དམ་བཅས་པ་གཞན་དུ་བྱེད་པ། དཔེར་ན་བུམ་པ་ཐམས་ཅད་དུ་འགྲོ་བ་མ་ཡིན་པ་དེ་བཞིན་དུ། སྒྲ་ལ་ཡང་ཡིན་པས་བུམ་པ་བཞིན་དུ་མི་རྟག་པར་འགྱུར་རོ། །སྒྲ་ཡང་ཞེས་བྱ་བ་ལྷག་མའོ། །འདི་དག་དགག་པ་ནི་འདིར་ཞེས་བྱ་བ་ལ་སོགས་པ་སྨོས་ཏེ། རྣམ་ཕུག་གིས་བཤད་པའི་ཊཱི་ཀཱ་བྱེད་པས་འདིར་ཕམ་པར་འདོད་པས་ན་དོགས་པ་བསུ་བ་ནི། ཐམས་ཅད་དུ་སོང་བ་མ་ཡིན་པ་ཞེས་བྱ་བས་གཏན་ཚིགས་ཀྱི་ཁྱད་པར་དུ་བྱེད་པ་བཤད་པ་ཡིན་ནམ། གཏན་ཚིགས་ཁྱད་པར་དང་བཅས་པ་མི་མཐུན་པའི་ཕྱོགས་ལ་མེད་པས་དམ་བཅའ་བ་གཞན་པ་ཚར་གཅད་པའི་གནས་མ་ཡིན་གྱི། གཏན་ཚིགས་ཁྱད་པར་བསྟན་པས་གཏན་ཚིགས་གཞན་དུ་གྱུར་པ་ཚར་གཅད་པའི་གནས་ཡིན་པས་འདི་ནི་ཤིན་ཏུ་རིགས་པ་ཡིན་ནོ། །འདི་ལྟར་ཕྱོགས་ཀྱི་ཆོས་ཉིད་མཁས་པའི་བློས་རྣམ་པར་དཔྱོད་པ་ན། དམ་བཅའ་བ་གཞན་པར་བཤད་པར་མི་འགྲུབ་པའི་ཕྱིར་རོ། །གང་གི་ཚེ་གཏན་ཚིགས་ཀྱི་ཁྱད་པར་དུ་བསྟན་པས་གཏན་ཚིགས་གཞན་པ་ཚར་གཅད་པའི་གནས་སུ་འགྱུར་བར་གཞན་གྱིས་བརྗོད་པ་དེའི་ཚེ་ཤིན་ཏུ་མཛེས་པ་ཡིན་ནོ། །གང་གི་ཕྱིར་དེ་ཉིད་ཡིན་པ་ནི་


DTG190_Page_0217
[མ་དཔེ་གཟིགས་ན་འདིར་གནོན།]

བློའི་དམ་བཅས་པ་གཞན་པ་ནི་འབྲེལ་པ་མེད་པའི་ཕྱིར་རོ། །དཔེ་བརྗོད་པ་དང་ཆོས་མཐུན་པ་ཞེས་བྱ་བ་ལ་སོགས་པ་ནི། ཆོས་མཐུན་པའི་བསྒྲུབ་པར་བྱ་བ་སྒྲུབ་པར་བྱེད་པ་ནི་གཏན་ཚིགས་ཡིན་གྱི། དེའི་དམ་བཅའ་བའི་མཚན་ཉིད་བསྒྲུབ་པར་བྱ་བ་སྟོན་པའི་དམ་བཅའ་བ་གཞན་མེད་པའི་ཕྱིར་རོ། །ཁས་བླངས་པ་འདིས་དམ་བཅའ་བ་དམ་བཅའ་བས་སྒྲུབ་པར་བྱེད་ན་དམ་བཅའ་བ་ཙམ་གྱིས་སྤངས་པ་ནི་འདོད་པར་གྲུབ་པར་མི་འགྱུར་རོ། །དེས་ཀྱང་དང་པོའི་སྔ་མ་ལས་དམ་བཅའ་བའི་གཞན་པ་ཡིན་དུ་ཟིན་ཀྱང་གཏན་ཚིགས་དབང་པོས་གཟུང་བར་བྱ་བ་མི་བརྗོད་དོ། །དེའི་ཕྱིར་རྣམ་པ་འདི་ལྟ་བུའི་དམ་བཅའ་བ་སྒྲུབ་པའི་ཆེད་དུ་དམ་བཅའ་གཞན་པ་སྒྲུབ་པར་བྱེད་དོ་ཞེས་བྱ་བ་ནི་བྱིས་པས་བརྗོད་པ་ཡིན་ནོ། །ངོ་བོ་འདི་ལྟ་བུ་ལ་གཞན་དག་དགོས་པའོ། །མཚན་ཉིད་ངེས་པ་ནི་འབྲེལ་པ་མེད་པ་ཁོ་ན་ནས་ཡིན་ནོ། །དམ་བཅའ་བ་གཞན་པར་བརྗོད་པ་ནི། དམ་བཅའ་བ་གཞན་པ་ཞེས་བྱ་བ་ཚར་གཅད་པའི་གནས་འདི་གང་ཞིག་ཡིན། །འོན་ཏེ་མཚན་ཉིད་འདི་འདྲའོ། །ཞེས་པའི་ངེས་པ་མེད་པ་ཡིན་ཏེ། དམ་བཅའ་བའི་དོན་བཀག་པ་ལ་ཆོས་རྣམ་པར་བརྟགས་ནས་དེའི་དོན་ཏོ་ཞེས་དེ་ལྟར་བྱ་བའི་ཕྱིར་རོ། །འོན་ཏེ་དེ་ལས་བཟློག་པ་གཞན་པ་སྟོན་པའི་ཕྱིར་ཉེས་པ་མེད་དོ་ཞེས་བརྗོད་པ་ན། མཁས་པས་དམ་བཅའ་བས་བསྒྲུབ་པར་བརྗོད་པས་ཇི་ལྟ་བ་དེ་ལྟར་བསྒྲུབ་བྱ་མི་འགྲུབ་པ་ཡིན་ན། མ་གྲུབ་པ་དང་འགལ་བ་དང་མ་ངེས་པ་ལ་སོགས་པ་ཡང་སྦྱོར་བར་བྱེད་པ་ན་དེ་དག་སྒྲུབ་པར་བྱེད་པའི་ཡན་ལག་མ་བརྗོད་པ་ལ་སོགས་པ་ཁྱེད་ཀྱིས་བརྗོད་པར་མི་བྱའོ། །དེས་ན་མཁས་པ་དག་གིས་ཀྱང༌། །ཞེས་བྱ་བ་སྨོས་སོ། །ཚད་མ་བརྗོད་པ་མེད་པ་རང་གི་བསྟན་བཅོས་ཁས་བླངས་པ་ཡིན་ཏེ། དེ་ལྟར་འགྱུར་བའི་སྤྱི་དེ་ཉིད་མ་གྲུབ་པ་ཡིན་ནོ་ཞེས་དེ་ལྟར་བསྟན་ཏོ་ཞེས་བྱ་བའི་དོན་ཏོ། །འདི་ལྟར་སྣང་བའི་སེམས་ཀྱིས་གཞན་གྱི་གཞུང་ལུགས་རྣམ་པར་འཇོག་པ་ན་ཚད་མ་མེད་པའི་ཚིག་གཞན་དེ་ཁོ་ན་ཉིད་མཐོང་བས་མ་ངེས་པའི་སྐྱེ་བོ་མཁས་པ་དེ་ལྟར་ངེས་པར་མི་བྱའོ། །ཚད་མ་དང་ལྡན་པའི་ཁས་བླངས་པ་


DTG190_Page_0218
[མ་དཔེ་གཟིགས་ན་འདིར་གནོན།]

མཁས་པས་དོར་བར་མི་བྱ་བའི་ཕྱིར་རོ། །འདི་ལྟར་འགྱུར་ཏེ་ཚད་མས་མ་བསྒྲུབས་པའི་སྒྲུབ་པར་བྱེད་པ་ལས་ནི་རྒྱལ་བ་ཡིན་པར་ཡང་མི་འགྱུར་ཏེ། མི་མཐུན་པའི་ཕྱོགས་མ་སྤངས་པའི་ཕྱིར་རོ། །དམ་བཅའ་བ་དང་གཏན་ཚིགས་དག་འགལ་བས་དམ་བཅའ་བ་དང་འགལ་བ་ཞེས་བྱ་བ་ཚར་གཅད་པའི་གནས་ཡིན་ནོ། །ཡོན་ཏན་ལ་མ་གཏོགས་པའི་དོན་ནི། རྫས་ཞེས་བྱ་བ་ནི་དམ་བཅའ་བའོ། །གཟུགས་ལ་སོགས་པ་ལས་དོན་གཞན་མི་དམིགས་པའི་ཕྱིར་རོ་ཞེས་བྱ་བ་ནི་གཏན་ཚིགས་ཏེ། དེ་ནི་འདིར་དམ་བཅའ་བ་དག་གཏན་ཚིགས་སུ་འགལ་བའོ། །གལ་ཏེ་ཡོན་ཏན་ལས་རྫས་ཐ་དད་པ་ཡིན་ཏེ། གལ་ཏེ་གཟུགས་ལ་སོགས་པ་ལས་དོན་གཞན་མི་དམིགས་པ་ནི་འཐད་པ་མ་ཡིན་ཏེ། འོན་ཏེ་གཟུགས་ལ་སོགས་པ་ལས་དོན་གཞན་མ་དམིགས་པས་ཡོན་ཏན་ལས་ཐ་དད་པའི་རྫས་ཞེས་བྱ་བ་ནི་འཐད་པ་མ་ཡིན་ནོ། །འདི་ཉིད་ཀྱིས་དམ་བཅས་པ་དང་གཏན་ཚིགས་འགལ་བས་དམ་བཅས་པ་རང་གི་ཚིག་དང་འགལ་བར་བཤད་པ་ནི། མདོ་བྱེད་པས་ཉེ་བར་མཚོན་པའི་དོན་དུ་བཤད་པའི་ཕྱིར་རོ། །དགེ་སྦྱོང་མ་སྐྱེས་བུའི་ལོངས་སྤྱོད་པ་སྤངས་པའི་སྦྲུམ་མའི་སྐྱེས་བུའི་ལོངས་སྤྱོད་པ་མེད་ན་མེད་པ་ཡིན་པས་རང་གི་ཚིག་དང་འགལ་བ་ཡིན་ནོ། །གཏན་ཚིགས་ཀྱི་འགལ་བ་དེ་ཉིད་ཀྱིས་བཤད་ཟིན་པ་དང་སྦྱར་རོ། །དེ་ཐ་དད་པ་ནི་སྣ་ཚོགས་པ་སྟེ་གཅིག་པ་མེད་དོ་ཞེས་བྱ་བའི་དོན་ཏོ། །ཚོགས་པ་ལས་དངོས་པོའི་སྒྲ་སྦྱར་བའི་ཕྱིར་རོ། །སྤྱིར་བརྗོད་པ་ནི་བུམ་པ་ལ་སོགས་པ་ལ་དངོས་པོའི་སྒྲ་སྦྱར་བའི་ཕྱིར་རོ་ཞེས་བྱ་བའི་དོན་ཏོ། །གང་གི་ཕྱིར་ཚོགས་པ་ཞེས་བྱ་བར་བརྗོད་པ་ནི་གཅིག་ཁས་བླངས་པ་ཡིན་ནོ་ཞེས་བྱ་བར་འགྱུར་རོ། །གཅིག་པ་སོགས་པ་ལ་སོགས་པ་ཞེས་བྱ་བ་སྟེ། དེ་བཞིན་དུ་བ་ལང་ཉིད་ལ་སོགས་པ་ལ་བསགས་པ་ལས་རྫས་སུ་བསྟན་པ་འདི་ལ་འདུས་པ་ཞེས་བརྗོད་དོ། །འདི་ཐམས་ཅད་ཚོགས་པ་ལས་རྫས་གང་ཡིན་པ་དེ་ནི་བ་ལང་ཉིད་ལ་སོགས་པའི་དངོས་པོར་རྣམ་པར་གནས་པ་ཞེས་བྱ་བས་རྣམ་པར་གནས་པའོ། །ཐ་དད་པ་ཕྲ་མོ་དང་ཆེས་ཤིན་ཏུ་ཕྲ་བ་དང་དེ་


DTG190_Page_0219
[མ་དཔེ་གཟིགས་ན་འདིར་གནོན།]

ལས་ཀྱང་ཆོས་ཤིན་ཏུ་ཕྲ་མོ་སྟེ། གང་ཐ་མི་དད་པ་ནི་དེ་ལས་བཟློག་པའོ། །གང་གི་ཕྱིར་འདི་ཐ་དད་པ་ལས་བཟློག་པ་དེ་ནི་འོན་ཏེ་གཅིག་པར་སེམས་ན། རྡུལ་ཕྲ་རབ་ཐ་དད་པར་སེམས་པ་དེ་ནི་ལ་སོགས་པའི་ཚོགས་ཞེས་བྱའོ། །ཀྱེ་མ་འདིར་མཐོང་བ་ནི་གཟུགས་ལ་སོགས་པ་ཡིན་ན། རྡུལ་ཕྲ་རབ་ཚོགས་པའི་ངོ་བོ་དེ་སུ་ཞིག་གི་ཚོགས་པ་ཡིན་ཞེས་བརྗོད་པར་བྱ་བ་དེ་བཞིན་དུ་ལྷག་མའི་ཡོན་ཏན་རྣམས་ལ་ཡང་ངོ་ཞེ་ན། རྡུལ་ཕྲ་རབ་རྫས་བརྒྱད་འདུས་པ་ཡིན་ནོ་ཞེས་བྱ་བའི་བསྟན་བཅོས་དང་འགལ་བར་འགྱུར་རོ། །འདི་རྣམས་ལས་རྫས་ནི་གང༌། སྒྲ་མེད་ཕྲ་རབ་རྡུལ་རྣམས་ཡིན། །ཞེས་བྱ་བ་དེའི་ཕྱིར་གཅིག་ཏུ་མི་འཐད་པ་དུ་མར་འཐད་པ་ཡིན་ནོ་ཞེས་བྱ་བ་ནི་ཤིན་ཏུ་རྨོངས་པ་སྟེ། འདིའི་རྒྱུ་མ་གྲུབ་པ་ཡིན་ནོ། གང་གི་ཕྱིར་དུ་མའི་མཚན་ཉིད་མི་མཐུན་པ་འདི་ལ་སོགས་པའི་ཡོན་ཏན་ལ་ཚུལ་འཛིན་པ་ལ་སོགས་པའི་ཡན་ལག་ཅན་གཅིག་ཏུ་འདུས་པའི་དངོས་པོ་སྐྱེ་བ་ཡིན་ནོ། །དེས་ན་སྒྲ་གཅིག་རྟོགས་པས་ན་ལྷག་མ་ཤུགས་ཀྱིས་རྟོགས་པར་བྱའོ། །འོན་ཏེ་དམ་བཅའ་བ་དང་གཏན་ཚིགས་ལ་འགལ་བ་ཡིན་ནོ་ཞེ་ན། ཐོག་མ་དང་ཕྱི་མ་དང་ཁྱད་པར་མེད་པ་དེ་ལྟ་ན་གཉིས་ཀ་རྟེན་པར་མི་སྲིད་ཀྱང་འགལ་བར་བརྗོད་པ་དང་འདོད་པ་གང་ཡང་རུང་བར་བསྟན་པ་ཡིན་ནོ་ཞེས་དྭ་ར་དྭ་ཛས་བཤད་པའི་ཕྱིར་རོ། །དམ་བཅའ་བ་དཔེ་དང་འགལ་བ་ཡིན་ཏེ། དཔེར་ན་གསལ་བ་ནི་གཅིག་གི་རང་བཞིན་ཏེ། ཚད་མ་དང་ལྡན་པའི་ཕྱིར་ཁམ་ཕོར་ལ་སོགས་པ་བཞིན་ནོ། །ཁམ་ཕོར་ལ་སོགས་པའི་དཔེ་གཅིག་གི་རང་བཞིན་བརྗོད་པའོ། །དཔེར་གྱུར་པའི་རང་བཞིན་ནི་རང་བཞིན་གཞན་པའི་ཕྱིར་རོ། །རང་བཞིན་གཅིག་ཡིན་པའི་ཁམ་ཕོར་ལ་སོགས་པའི་དཔེར་རིགས་པ་མ་ཡིན་ནོ། །གཏན་ཚིགས་དང་དཔེ་ལ་སོགས་པ་དང་འགལ་བ་ནི་དཔེར་ན་ཡོན་ཏན་ལས་མ་གཏོགས་པའི་རྫས་གཞན་ཉིད་མ་དམིགས་པའི་ཕྱིར་དཔེར་ན་བུམ་པ་བཞིན་ནོ། །བུམ་པ་ལ་སོགས་པ་ཐ་དད་པ་སྨོས་པས་གཏན་ཚིགས་ལ་གནོད་པའི་དཔེའོ། །སོགས་པ་སྨོས་པ་ནི་གཏན་ཚིགས་དང་


DTG190_Page_0220
[མ་དཔེ་གཟིགས་ན་འདིར་གནོན།]

ཉེ་བར་སྦྱར་བ་དང༌། མཇུག་བསྡུ་བའི་འགལ་བ་ཡང་གཟུགས་པར་བྱའོ། །དཔེ་ནི་འདི་ཡིན་ཏེ། སྒྲ་ནི་མི་རྟག་པ་ཡིན་ཏེ་བྱས་པའི་ཕྱིར་རོ། །གང་བྱས་པ་དེ་ནི་མི་རྟག་པ་ཡིན་ཏེ། དཔེར་ན་ནམ་མཁའ་ལྟ་བུའོ། །དེ་བཞིན་སྒྲ་བྱས་པས་ཞེས་བྱ་བ་ཉེ་བར་སྦྱར་བ་དང་གཏན་ཚིགས་འགལ་བའོ། །དེ་བཞིན་དུ་དཔེ་ལ་ལྟོས་པ་དང་དེ་བཞིན་དུ་མཇུག་བསྡུ་བ་དང༌། དེ་བཞིན་དུ་བསྒྲུབ་པར་བྱ་བ་དང༌། ཉེ་བར་སྦྱར་བ་ཡང་བཤད་དོ། །འདིར་ཡང་དཔེ་ཕྱིན་ཅི་ལོག་པ་ཡིན་ནོ་ཞེས་བྱ་བ་ལ་དེ་ལ་ལྟོས་ནས་ཉེ་བར་སྦྱར་བ་དང༌། གཏན་ཚིགས་འགལ་བ་ཡིན་ནོ། །འདི་འདྲ་བའི་སྦྱོར་བ་ཡིན་པ་དེའི་ཕྱིར་མི་རྟག་གོ་ཞེས་བྱ་བས་ཚད་མ་དང་འགལ་བའི་དམ་བཅའ་བ་དང༌། གཏན་ཚིགས་ནི་དཔེར་ན་དྲོ་བ་མ་ཡིན་ཏེ། མེའི་རྫས་ཡིན་པའི་ཕྱིར་ཆུ་བཞིན་ནོ་ཞེས་བྱ་བ་དེ་མངོན་སུམ་དང་འགལ་བའོ། །གཞན་གྱི་ཕྱོགས་ཞེས་བྱ་བ་ལ་སོགས་པའོ། །དེ་དང་རང་གི་ཕྱོགས་ལ་ལྟོས་པ་མེད་པ་ཡང་ཞེས་བྱ་བ་ལ་སོགས་པ་སྨོས་པ། འདི་དག་གཏན་ཚིགས་དང་དམ་བཅའ་གཉིས་ཀ་དང་འགལ་བ་ཡིན་ནོ་ཞེས་བྱ་བ་འདིས་གཟུང་བའི་ཕྱིར་ཚར་གཅད་པའི་གནས་ལོགས་ཤིག་ཏུ་བརྗོད་དོ་ཞེས་བྱ་བ་བསྟན་པར་མི་བྱའོ། གཞན་གྱི་ཕྱོགས་ཞེས་བྱ་བ་ནི་འདིར་རྐང་མིག་ལ་སོགས་པ་གཞན་གྱི་ཚད་མ་བྱེད་པས་མ་ངེས་པ་བརྗོད་པའོ། །རང་གི་ཕྱོགས་ལ་མི་ལྟོས་པ་ཞེས་བྱ་བ་ནི་ཞེས་བྱེ་བྲག་པའི་ཚད་མ་བྱེད་པས་གཞན་ལ། གཞན་ལ་འཁྲུལ་བར་བརྗོད་པས་ན་ཐ་དད་པ་ཡིན་ནོ། །གལ་ཏེ་དེ་ལྟ་ན་བ་ལང་ཉིད་ལ་སོགས་པ་འཁྲུལ་བ་བརྗོད་པ་ནི་འགལ་བའི་ལན་བརྗོད་པ་ཡིན་པར་དེ་ལྟར་གྱུར་པ་མ་ངེས་པའི་ཡུལ་གང་ཡིན་ཞེ་ན། གཉི་ག་ཞེས་བྱ་བ་ལ་སོགས་པ་སྨོས་ཏེ། རྒལ་བ་དང་ཕྱིར་རྒོལ་བ་གཉིས་པའི་ཕྱོགས་ལ་རབ་ཏུ་གྲུབ་པར་ཁས་བླངས་པའོ། །དེ་ནི་མ་ངེས་པ་ཡིན་ཏེ། དེ་དེ་ཡིན་པའི་ཕྱིར། ཉེ་བར་བརྟགས་ནས་དེ་ལྟར་འཇུག་པ་དེས་ན་མ་ངེས་པར་རིག་པར་བྱའོ། །འདིར་ཡང་ཞེས་བྱ་བ་ལ་སོགས་པ་སྨོས་ཏེ། དེ་ཡང་བགག་པའི་ཕྱིར་རོ། །དེ་ལ་བརྟེན་ནས་དེ་དམ་བཅའ་བ་དང་འགལ་བ་སྟེ། ད་ནི་དེས་དེ་བཞིན་དུ་བྱས་པ་ཡིན་ནོ། །དེས་དམ་བཅའ་བར་བྱས་པ་ཡིན་ནོ། །ལྷག་མ་


DTG190_Page_0221
[མ་དཔེ་གཟིགས་ན་འདིར་གནོན།]

ནི་གོ་སླའོ། །ཐ་དད་པ་རྣམས་ཀྱང་རི་ལ་སོགས་པ་འགའ་ཞིག་ཀྱང་མངོན་སུམ་པའོ། །བསྐལ་པ་ནི་ཤ་ཟ་ལ་སོགས་པའོ། །དེ་ལ་འདི་ཉིད་ཚར་གཅད་པའི་གནས་ཏེ། དཔེར་ན་དམ་བཅའ་བ་ནི་འགལ་བ་མེད་པར་དམ་བཅས་པའོ། །ཚར་གཅད་པའི་གནས་ཡིན་ནོ་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། དེ་ལ་བརྟེན་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་དེ་ལ་བརྟེན་པ་ཡིན་ན་ཚར་གཅད་པའི་གནས་སུ་འགྱུར་རོ་ཞེ་ན། གལ་ཏེ་ཞེས་བྱ་བ་ལ་སོགས་པ་སྨོས་སོ། །སྐབས་སུ་བབ་པའི་རྒོལ་བའི་མཇུག་བསྡུ་བ་ཡོངས་སུ་རྫོགས་པའོ། །དེ་སྒྲུབ་པར་བྱེད་པའི་རྒྱུ་མཚན་དུ་དམ་བཅའ་བའི་སྦྱོར་བའོ། །དེ་ཙམ་གྱིས་སྒྲུབ་པར་བྱེད་པའི་ཡན་ལག་ཏུ་བརྗོད་པའི་རྒོལ་བ་རྣམ་པར་ཉམས་པར་འགྱུར་རོ། །དཔེ་འགའ་ཞིག་ལས་སྐབས་སུ་བབ་པའི་མཇུག་བསྡུ་བའི་མཐར་ཐུག་པ་ཡིན་པའི་ཕྱིར་འདོན་ཏོ། །དེ་ལ་རྒོལ་བ་ཡོངས་སུ་རྫོགས་པ་སྟེ། དམ་བཅའ་བའི་ཚིག་གི་སྦྱོར་བར་འགྱུར་བའི་མཐར་ཐུག་པའི་དབང་དུ་བྱས་པ་ཡིན་ནོ་ཞེས་བྱ་བའི་དོན་ཏོ། །འོན་ཏེ་ཁྱེད་ཀྱི་བློ་དེ་ལྟར་གྱུར་ན་ནི་སྐད་ཅིག་མ་ཉིད་ལ་སོགས་པའི་བསྒྲུབ་པར་བྱ་བ་གཅིག་པ་ཉིད་ལ་ཡོད་པ་ཉིད་དང་སྐྱེ་བ་དང་ལྡན་པའི་རྐྱེན་གྱི་བྱེ་བྲག་གི་ཐ་དད་པ་ལ་སོགས་པའི་གཏན་ཚིགས་མང་པོ་རྣམས་ཀྱི་ཁོང་དུ་ཆུད་པར་བྱའོ། །དེ་བཞིན་དུ་སུན་ད་བྱུང་བ་གཅིག་ལ་ཡང་སྒྲུབ་པར་བྱེད་པའི་ངག་གི་རིམ་གྱིས་སམ་དམ་བཅའ་བའི་ཚིག་ལ་སོགས་པའི་སྒོ་ནས་སམ་གཞན་གྱིས་ཀྱང་སུན་འབྱིན་ཏོ། །དེ་ལྟར་ན་ཕམ་ཟིན་པ་ལ་ཕམ་པར་མི་འགྱུར་བའི་ཕྱིར་རོ། །འདིར་བཤད་པ། གང་དུ་གཏན་ཚིགས་ཡོངས་སུ་བརྗོད་པ་དང༌། དེ་དག་གི་རྣམ་པར་རྟོག་པའི་སྒོ་ནས་འདི་དག་ཉིད་སྔ་མའི་གཏན་ཚིགས་ལ་ལྟོས་པའི་ཕྱིར་རོ། །ཡང་ན་རྣམ་པ་གཞན་དུ་སྒྲུབ་པར་བྱེད་པ་འདིས་བསྒྲུབ་པར་བྱ་བ་སྒྲུབ་པར་བྱེད་པའི་འཇུག་པའི་རྒྱུའི་ནུས་པ་ཡོད་པ་ཡིན་ནོ། །བསྡུས་པའི་སྦྱོར་བ་ཉིད་ཀྱིས་ཅིའི་ཕྱིར་མ་ཡིན་ཞེ་ན། བཤད་པ། རྣམ་པ་གཞན་དུ་གང་གི་ཚེ་བསྡུས་པའི་སྦྱོར་བའི་གཏན་ཚིགས་གཞན་འདོད་པ་དེའི་ཚེ་གཉིས་པོ་དོན་མེད་པའི་ཕྱིར་རོ། །རྣམ་པར་རྟོག་པས་


DTG190_Page_0222
[མ་དཔེ་གཟིགས་ན་འདིར་གནོན།]

ནུས་པ་ཡིན་ནོ་ཞེས་བརྗོད་པ་དོན་མེད་པ་བསྟན་ཏོ། །གལ་ཏེ་དེ་ལ་ཡང་སྦྱོར་བ་གཅིག་མེད་པར་སྦྱོར་བ་གཞན་དུ་ཡང་མི་འགྱུར་ཏེ། དགག་པ་གཉིས་ཀྱིས་རྣལ་མར་འགྱུར་བའི་ཕྱིར་རོ། །གང་གི་ཚེ་སྦྱོར་བ་གཅིག་གིས་སྦྱོར་བ་གཞན་འདུས་པར་འགྱུར་རོ་ཞེས་བྱ་བའི་དོན་ཏོ། །དེའི་ཚེ་གཉིས་པ་སྒྲུབ་པར་བྱེད་པའི་དོན་འགའ་ཞིག་ཀྱང་ཡོད་པ་མ་ཡིན་ཏེ། ཁོང་དུ་མ་ཆུད་པར་བསྟན་པ་མེད་པའི་ཕྱིར་རོ། །གཏན་ཚིགས་དང་པོ་བསྟན་པ་ཁོ་ནས་དོན་ཐ་དད་པའི་ཕྱིར་ཤིང་གཅད་པའི་བྱ་བ་གྲུབ་ཟིན་པ་ལ་སྟ་རེས་ཅུང་ཟད་ཅིག་ཀྱང་བསྒྲུབས་པའི་དོན་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །འོ་ན་སྒྲུབ་པ་བཞིན་དུ་རྣམ་པར་རྟོག་པའི་སུན་འབྱིན་པར་འགྱུར་རོ་ཞེས་འདི་སྙམ་དུ་སེམས་ན། གཞན་དག་གིས་ཁས་བླངས་པ་ནི་རིགས་པ་མ་ཡིན་ཏེ། འདི་ལྟར་དེས་རང་ཉིད་ཀྱི་དམ་བཅས་པ་སྒྲུབ་པར་བྱེད་པའི་ཡན་ལག་ཏུ་མ་རྟོགས་པར་འགྱུར་ཏེ། དམ་བཅའ་བ་དང་གཏན་ཚིགས་དང་དཔེ་དང་ཉེ་བར་སྦྱར་བ་དང༌། མཇུག་བསྡུ་བ་ཡན་ལག་གཞན་བཞིན་ནོ་ཞེས་བྱ་བ་འགལ་བའི་ཕྱིར་རོ། །གཏན་ཚིགས་གཞན་དག་ཉིད་ཅེས་བྱ་བ་སྔར་ཡན་ལག་ཅན་གྱི་རྫས་བཀག་པར་བཤད་ཟིན་ཏོ། །བུམ་པའི་སྒྲས་བུམ་པའི་ཡན་ལག་ཅན་གྱི་རྫས་ཀྱི་མཚན་ཉིད་གཅིག་པ་བསྟན་དུ་མེད་པར་དོན་སྣ་ཚོགས་པར་གཟུགས་ལ་སོགས་པ་དོན་གཅིག་བྱེད་པའི་སྤྱི་ཡིན་གྱི། སྤྱི་གཅིག་པ་གང་ཡིན་པ་དེ་ནི་བརྗོད་དུ་མེད་པར་ཁོང་དུ་ཆུད་པར་བྱའོ། །སྒྲའི་དོན་ཐམས་ཅད་གཟུགས་ལ་སོགས་པ་དོན་གཅིག་བྱེད་པར་ནུས་པ་སྣ་ཚོགས་པའི་ངོ་བོར་གྱུར་པའི་རྒྱུས་དངོས་པོ་གཅིག་པའི་ཁྱད་པར་གྱི་རང་བཞིན་མེད་པར་བསྟན་པས་དངོས་པོ་གཅིག་པ་མེད་པ་ཡིན་ནོ་ཞེས་བསྟན་ཏོ། །སངས་རྒྱས་པ་ནི་གཟུགས་ལ་སོགས་པ་མེད་པར་དབང་པོའི་དོན་ནི་མི་སྤོང་ངོ༌། །གཟུགས་ལ་སོགས་པ་ལས་ཐ་དད་པའི་ནུས་པ་དུ་མ་འདོད་ན། དེ་ཇི་ལྟར་གཅིག་ཡིན་ནོ་ཞེས་བརྗོད་པར་བྱ། །དེ་ཇི་ལྟར་སྒྲ་གཞན་གྱི་དོན་ཡིན། དོན་རང་གི་མཚན་ཉིད་ནི་སྒྲའི་དོན་དུ་བརྗོད་པར་མི་བྱའོ་ཞེ་ན། མ་ཡིན་ཏེ། ནུས་པ་ཐ་དད་པ་ནི་དོན་དམ་པ་ཡང་མ་ཡིན་ཏེ། དངོས་པོ་ཐ་དད་པའི་དོན་གཅིག་བྱེད་པར་ཤེས་པས་ངེས་


DTG190_Page_0223
[མ་དཔེ་གཟིགས་ན་འདིར་གནོན།]

པའི་རྒྱུ་ཡིན་པའི་ཕྱིར་ཕན་ཚུན་གཅིག་པ་ཡིན་ནོ་ཞེས་བཤད་དོ། །དེ་སྐད་དུ། གཅིག་པའི་ཤེས་པས་རྒྱུ་ཡི་ཕྱིར། །བློ་ནི་ཐ་དད་མེད་པ་ཡིན། །བློ་གཅིག་རྒྱུ་ཡི་དངོས་པོ་ཡིས། །གསལ་བ་རྣམས་ནི་ཐ་མི་དད། །ཅེས་བཤད་དོ། །སྐྱེས་བུས་ངེས་པར་བྱས་པ་ལ་བརྟེན་ནས་སྒྲའི་དོན་རྣམ་པར་འཇོག་པ་ཡིན་ནོ། །སྐྱེས་བུ་ནི་ཐོག་མ་མེད་པ་ནས་ཕྱིན་ཅི་ལོག་པའི་བག་ཆགས་ཡོངས་སུ་སྨིན་པ་ལས་བྱུང་བའི་ནང་གི་ལྡོག་པའི་རྣམ་པ་སྣ་ཚོགས་པ་རྣམས་ལ་མཐོང་བའི་རྣམ་པར་རྟོག་པས་སྒྲོ་བཏགས་གཅིག་ཏུ་གཏོགས་པ་ཡིན་ནོ། །དོན་དམ་པར་སྒྲ་ནི་ཡུལ་མེད་པ་ཡིན་ནོ། །གསལ་བ་རྣམས་ནི་རྣམ་པར་ཤེས་པའི་དོན་ལས་གཞན་པའི་རྗེས་སུ་འགྲོ་བ་ཡིན་ཏེ། བརྗོད་པའི་སྤྱོད་ཡུལ་གྱི་དངོས་པོ་ཡིན་པའི་ཕྱིར་རོ། །དེ་སྐད་དུ་ཡང༌། མདོ་ལས། གང་དང་གང་གི་མིང་གིས་ནི། །གང་དང་གང་གི་ཆོས་བརྗོད་པ། །ཆོས་རྣམས་ལྷན་ཅིག་ཆོས་ཅན་ལ། །དེ་དང་དེ་ནི་ཡོད་མ་ཡིན། །ཞེས་གསུངས་སོ། །དེས་ན། འདིར་བསྡུས་པའི་དོན་ནི་གཟུགས་ལ་སོགས་པ་དང་བུམ་པ་ནི་ཅི་རིགས་པར་དུ་མ་ཉིད་དང་གཅིག་པ་སྟེ། མང་པོ་ལ་གཅིག་གི་ཚིག་གིས་བརྗོད་པར་བྱ་བ་མ་ཡིན་ཏེ། དཔེར་ན་སྐར་མ་དང་ཟླ་བ་ལ་སོགས་པ་བཞིན་ནོ་ཞེས་བྱ་བ་དེ་ལྟ་བུ་དཔག་པ་ལྟར་སྣང་ངོ༌། །གཞན་གྱི་བུམ་པ་ལ་སོགས་པ་སྒྲའི་ཡུལ་གང་ཡིན་པ་འདི་དོན་གཅིག་པར་བརྗོད་པར་ཁས་བླངས་པ་དེ་ཉིད་སྤང་བར་བྱ་བ་ཡིན་ལ། གཟུགས་དང་རོ་ལ་སོགས་པའི་རྡུལ་ཕྲ་རབ་ཀྱི་རང་བཞིན་ནི་མ་ཡིན་ནོ། །འདི་ལྟར་དེ་དག་སོ་སོ་རེ་རེའི་བདག་ཉིད་ཡིན་པར་འདོད་པ་དེ་ཉིད་དེ། སེའུ་ཉི་ཚེའི་ས་བོན་བཞིན་དུ་ཚོགས་པ་ཉེ་བར་གྱུར་པ་ལས་ངེས་པར་འགྱུར་བ་དེའི་ཚེ། ཡོངས་སུ་གསལ་བར་རིགས་པ་མ་ཡིན་ནོ། །འདོད་ན་དབང་པོ་མེད་པ་ལ། །སྒྲ་མེད་ཕྲ་རབ་རྡུལ་རྫས་བརྒྱད། །ལུས་དབང་ལྡན་པ་རྫས་དགུ་སྟེ། །དབང་པོ་གཞན་ལ་རྫས་བཅུའོ། །ཞེས་བཤད་དོ། །དེ་ལྟར་རྡུལ་ཕྲ་རབ་རྣམས་ཀྱི་མཐར་དབང་པོས་གཟུང་བ་དང༌། མི་རྟག་པ་དང༌། གཞན་ཡང་ཁོ་བོ་ཅག་གིས་དེ་རྒྱས་པར་བཤད་དོ། །གང་ཡང་འདི་དག་མང་པོའི་ཚིག་དང་གཅིག་གི་ཚིག་གིས་བརྗོད་པའི་ཕྱིར་རོ་ཞེས་བྱ་བ་དེ་ནི་འཁྲུལ་


DTG190_Page_0224
[མ་དཔེ་གཟིགས་ན་འདིར་གནོན།]

པའི་ཕྱིར་རོ། །འདི་ལྟར་གང་གི་ཚེ་བུད་མེད་དང་ཆུ་བོ་དང་བྱེ་མ་དང་རྫས་ཉིད་གཅིག་པ་ཉིད་ཡིན་དུ་ཟིན་ཀྱང་བཙུན་མོ་དང་ཆུ་བོ་དང་བྱེ་མ་དང་ཞེས་བྱ་བའི་ཐ་དད་དུ་བྱེད་པ་དེའི་ཚེ་ཅི་དེ་ལ་མང་པོའི་ཚིག་ཏུ་གང་གིས་འགྱུར། གལ་ཏེ་ནུས་པ་ཐ་དད་པ་ཡིན་ནོ་ཞེ་ན། ད་ནི་ཐམས་ཅད་ཀྱི་བདག་ཉིད་ལ་གཅིག་གི་ཚིག་གིས་བརྗོད་པར་མི་འགྱུར་རོ། །དངོས་པོ་ཐ་མི་དད་པ་ལ་གཅིག་གི་ཚིག་ཏུ་འགྱུར་རོ་ཞེ་ན། འདི་ཡིན་དུ་ཆུག་ཀྱང་དེ་འདིར་དངོས་པོ་མེད་ན་བྱ་བ་ངེས་པ་ཅི་ཞིག་ཡོད། རང་འདོད་ཀྱི་དབང་གིས་སྒྲ་སྦྱར་བར་བྱེད་པ་ཡིན་ནོ། །འདིས་ནི་གསལ་བ་དང་རིགས་ཀྱི་བུད་མེད་ལ་སོགས་པ་ལ་རབ་ཏུ་སྦྱོར་བས་གསལ་བའི་ཆ་ཤས་ཀྱི་གྲངས་ལ་སོགས་པ་ལ་འཇུག་པ་ཡིན་ནོ་ཞེས་བྱ་བ་གཞོན་ནུ་མ་ལེན་གྱིས་ཇི་སྐད་སྨྲས་པ་དེ་ཡང་གསལ་བ་ཡིན་ཏེ། གྲོང་ཁྱེར་དྲུག་ཅེས་བྱ་བ་ཇི་ལྟར་མང་པོ་ལ་གཅིག་གི་ཚིག་ཏུ་འགྱུར་རོ། །གྲོང་ཁྱེར་ཉིད་ཀྱང་ཅུང་ཟད་ཀྱང་མེད་ན། གང་ལས་དེ་སྐད་བརྗོད། ཁང་བཟངས་དང་སྐྱེས་བུ་ལ་སོགས་པ་རྣམས་རིགས་མི་མཐུན་པ་རྣམས་མི་རྩོམ་པའི་ཕྱིར། གང་ལས་ཚོགས་པའི་རྫས་སུ་འགྱུར། ལྡན་པ་ནི་མེད་དེ། ལྡན་པའི་མིང་དུ་ཟད་དེ། ཁང་བཟངས་ལ་སོགས་པ་ཕན་ཚུན་ལྡན་པ་མེད་པའི་ཕྱིར་རོ། །ཁང་བཟངས་རང་ཉིད་ལྡན་པ་ཡིན་པས་གཞན་པའི་ཡོན་ཏན་དང་ལྡན་པ་མ་ཡིན་ནོ། །དེ་ཉིད་ཀྱི་ཕྱིར་གྲངས་ཀྱང་མེད་དོ། །གལ་ཏེ་དེ་དང་ལྡན་པས་སྐྱེས་བུའི་ཁྱད་པར་ཅན་གྱི་ཡོད་པ་ཡིན་ནོ་ཞེ་ན། ཅི་ཁྱད་པར་དུ་བྱར་མེད་པའི་ཁྱད་པར་རྣམས་ཡོད་པ་ཉིད་དུ་འགྱུར་རམ། ཁང་བཟངས་གཅིག་པ་ཡང་མ་ཡིན་ལ། ཁང་བཟངས་མང་པོ་ཡང་མ་ཡིན་པའི་ཕྱིར་མང་པོའི་སྒྲ་བརྗོད་པར་མི་འགྱུར་རོ། །གཉི་ག་ཕན་ཚུན་ཕན་འདོགས་པ་ཡིན་ནོ་ཞེ་ན། ཕན་འདོགས་པ་མེད་པ་ལ་ཅི་ལྷན་ཅིག་ཏུ་འབྱུང་བར་འགྱུར་རམ། སྐྱེས་བུ་དང་ལྡན་པ་ཡོད་པ་རྣམས་མང་པོའི་ཕྱིར་ཇི་ལྟར་གྲོང་ཁྱེར་ཞེས་བྱ་བ་གཅིག་གི་ཚིག་གཅིག་ཏུ་འགྱུར། གལ་ཏེ་དེ་ལྟར་གྱུར་པ་འགའ་ཞིག་ནུས་པ་ཐ་དད་པའི་རྒྱུ་མཚན་ཡིན་ནོ་ཞེ་ན། མ་ཡིན་ཏེ། དངོས་པོའི་ངོ་བོ་ལས་ནུས་པ་ཐ་དད་པའི་ཕྱིར་རོ། །ཐ་དད་པ་ཕན་འདོགས་པ་མེད་པ་ནི་གཞན་ལ་རག་ལས་མ་མ་ཡིན་པའི་ཕྱིར་རོ། །ཕན་


DTG190_Page_0225
[མ་དཔེ་གཟིགས་ན་འདིར་གནོན།]

འདོགས་པར་བྱེད་པ་ཉིད་ཀྱི་ནུས་པ་ལ་ཡང་ཕན་འདོགས་པར་བྱེད་པ་ཉིད་ཀྱི་ནུས་པ་ཐ་དད་པས་གཞན། དགོས་པ་རྟོགས་པ་ཐུག་པ་མེད་པར་འགྱུར་རོ། །དེ་ཐ་དད་པ་མ་ཡིན་ན་ནི། དང་པོ་འདི་ལ་ཡང་ཐལ་བར་འགྱུར་པས་ཅི་ཡང་མ་ཡིན་ནོ། །རྣམ་པ་འདི་ཡང་གཞན་ཡང་དཔེ་ཉེ་བར་བསྟན་པ་ཡང་ཞེས་བྱ་བ་སྨོས་ཏེ། ཅི་ལྔ་པའི་མཐའ་ཉེ་བར་བསྟན་པ་དཔེར་གྱུར་པ་ཡིན་ནམ་ཞེ་ན། བཤད་པ། བྱས་པ་ཉིད་ནི་མི་རྟག་པའི་ཕྱིར་རོ་ཞེས་བྱ་བ་གང་གིས་ཇི་སྐད་བཤད་པ་ལྟ་བུའོ། །གཏན་ཚིགས་བསྒྲུབ་པར་བྱ་བ་དང་རྗེས་སུ་འབྲལ་པ་གང་ལ་ཡོད་པ་དང་ཡོད་པར་བཤད་པའི་ལྔ་པའི་མཐའ་ཅན་གྱི་དཔེ་ཡིན་ཏེ། གཏན་ཚིགས་ཉེ་བར་སྦྱོར་བའི་བདག་ཉིད་ཡིན་ནོ། །འགའ་ཞིག་ནི་བུམ་པ་ལ་སོགས་པའི་རྫས་སོ། །བདེན་པར་རྟོགས་པའི་གཟུགས་ལ་སོགས་པ་ཐ་དད་པ་ཡིན་པ་དང་མེད་པ་ཞེས་བྱ་བའི་དོན་ཏོ། །སྣ་ཚོགས་པ་ཕན་ཚུན་ལྡོག་པ་གྲོང་ཁྱེར་ལ་སོགས་པ་སྤྱི་གྲོང་ཁྱེར་དྲུག་ཅེས་བྱ་བ་ལ་སོགས་པ་གང་བློས་སྒྲོ་བཏགས་པའོ། །དེ་ལ་གྲགས་པའི་སྒྲ་སྦྱོར་བར་ཉེ་བར་བསྟན་པའི་ཕན་ཚུན་ཐ་དད་པ་རྣམས་དོན་གྱི་རྗེས་སུ་ཞུགས་པ་བློས་བསྡུས་ནས་སྤྱིའི་དངོས་པོའི་སྒྲ་སྦྱོར་བ་ལ་སོགས་པ་ལྔ་པས་ཉེ་བར་སྦྱར་ནས་ཕྱོགས་ལ་ཆོས་བསྡུ་བར་བསམས་ནས་ལོག་པར་རྟོགས་པ་གནས་པ་ཡིན་ལ་ཡོད་པའི་སྤྱི་ཐམས་ཅད་ཐ་དད་པ་ཡིན་ནོ་ཞེས་བྱ་བར་མཇུག་བསྡུ་བར་བྱའོ། །ལོག་པར་རྟོགས་པའི་གནས་སུ་བསྟན་པ་ནི་ཚར་གཅད་པའི་གནས་ཡིན་ནོ། །འདི་སྐད་སྟོན་པ་ཡིན་ཏེ། གྱོ་མོ་ལས་ཐ་དད་པའི་ཡན་ལག་ཅན་ཡོད་པ་དང་མེད་པར་རྩོད་པར་འགྱུར་བ་འདིས་གཏན་ཚིགས་ཉིད་མཚན་ཉིད་གསུམ་པ་བསྟན་ཏོ། །གཞན་གྱི་དཔེ་ཉེ་བར་བཀོད་པ་ནི་གཏན་ཚིགས་ཀྱི་སྦྱོར་བ་འདི་ཉིད་དེ་བཞིན་དུ་བྱེད་དེ། །གང་ཡང་ཕན་ཚུན་ལོག་པར་ཐ་དད་པ་དེ་ནི་ཡན་ལག་ཅན་གྱི་རྫས་གཅིག་པའི་རྗེས་སུ་འགྲོ་བ་ལུས་ཅན་མ་ཡིན་ཏེ། དཔེར་ན་གྲོང་ཁྱེར་དྲུག་ཅེས་བྱ་བ་ལ་སོགས་པ་བཞིན་ནོ། །དེ་བཞིན་གྱོ་མོ་ལ་སོགས་པ་ཡང་ཕན་ཚུན་ཐ་དད་པའི་ཕྱིར་རོ་ཞེས་བྱའོ། །འོ་ན་ནི་གལ་ཏེ་འདིའི་དཔེའི་སྦྱོར་བ་དེའི་ཕྱིར་དང་པོ་ཁོ་ནར་དེའི་སྦྱོར་བ་


DTG190_Page_0226
[མ་དཔེ་གཟིགས་ན་འདིར་གནོན།]

གོ་རིམས་བཞིན་དུ་སྦྱོར་བ་དང༌། དཔེར་ན་གང་ཡིན་པ་དེ་ནི་སྐད་ཅིག་མ་སྟེ། དཔེར་ན་བུམ་པ་བཞིན་ནོ་ཞེས་བྱ་བའོ། །ལྔ་པའི་མཐར་བསྟན་པ་ཇི་ལྟར་ཡིན། ལོག་པར་རྟོགས་པའི་ཡུལ་ཡང་ཅིའི་ཕྱིར་མི་སྟོན། གྱོ་མོ་ལ་སོགས་པའི་ཆ་ཤས་ཀྱི་ཁྱད་པར་དགག་པ་ནི། དཔེར་ན་སྒྲ་མི་རྟག་པ་ཡིན་ཏེ། བྱས་པ་ཉིད་མི་རྟག་པའི་ཕྱིར་ཞེས་བྱ་བ་ལྟ་བུའོ། །དང་སྨོས་པ་ནི་གསལ་བའོ། །ཅིའི་ཕྱིར་ཞེ་ན། བསྒྲུབ་བྱ་རྗེས་སུ་འགྲོ་བ་མ་བཀག་པའི་ཕྱིར་རོ། །འདི་ལྟར་ཕན་ཚུན་ལྡོག་པ་རྣམས་དོན་གཅིག་གི་རྗེས་སུ་འགྲོ་བ་བློས་བསྡུས་པའི་ཚོགས་པའི་དངོས་པོ་སྒྲ་སྦྱོར་བའི་ཕྱིར་རོ་ཞེས་བྱ་བ་བསམ་པའི་ངག་གིས་བྱ་བ་རྫོགས་པ་ཡིན་ནོ། །མ་ཡིན་ཏེ་ཞེས་བྱ་བ་ཡིན་ཏེ་བསྡུ་བ་ནས་བསྟན་པའི་ཕྱིར་རོ། །མདོར་བསྡུས་ནས་བརྗོད་པ་ཡིན་ནོ་ཞེས་བྱ་བའི་དོན་ཏོ། །བྱས་པ་ཉིད་ནི་མི་རྟག་པ་ཡིན་པའི་ཕྱིར་རོ་ཞེས་བྱ་བ་ལ་སོགས་པ་དེ་ལྟ་བུའི་སྦྱོར་བ་ཡང་མཐོང་བའི་ཕྱིར་དང༌། སྒྲུབ་པར་བྱེད་པའི་ཚིག་མ་ཡིན་པའི་ཕྱིར་རོ། །སྒྲུབ་པའི་སྦྱོར་བས་སྦྱོར་བ་རྟགས་ནས་བསྟན་པའི་ཚིག་འདིས་འདི་སྒྲུབ་པར་བྱེད་པའི་ཡན་ལག་མ་ཡིན་ནོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་ན་ཞེས་བྱ་བ་ནི། དཔེ་སྟོན་པའི་ངག་ལ་སོགས་པའོ། །གང་ཡང་སྣལ་མ་དང་སྣམ་བུ་ཐ་དད་པ་ཡིན་ཏེ། གཟུགས་ཐ་དད་པའི་ཁྱད་པར་དང་ལྡན་པའི་ཕྱིར་གཟུགས་དང་རོ་བཞིན་ནོ་ཞེས་བྱ་བའི་གཏན་ཚིགས་འདི་ལ་ཡང་སྣལ་མ་འདི་ཡང་སྣམ་བུ་ཡིན་པའི་ཕྱིར་ཐ་དད་པར་མ་གྲུབ་པའོ། །དེ་ལ་བརྟེན་པའི་ཡོན་ཏན་གྱི་ཆ་ཤས་ཀྱང་མ་གྲུབ་པའོ། །བཞི་བ་གྲུབ་པ་ཡིན་ནོ་ཞེས་པའི་འདོད་པ་མི་འགྲུབ་པས་ན་ཆོག་གོ །འདི་ལྟར་ཕྲ་བ་དང་རགས་པའི་རྫས་འདུ་བ་དང་ཁྱད་པར་དང་ལྡན་པ་འམ། དུས་ཐ་དད་པ་ལས་སྐྱེས་པའི་རྫས་དང་འདུ་བ་ཡིན་ནོ་ཞེས་གཞན་གྱིས་བརྗོད་པ་ཡིན་ནོ། །འོ་ན་བསམ་པ་སྣ་ཚོགས་པའི་སྦྱོར་བས་འགའ་ཞིག་གཏན་ཚིགས་ཀྱི་སྦྱོར་བའི་རྩོད་པ་བརྗོད་པ། དེ་དང་བསམ་པ་གཅིག་པའི་སྦྱོར་བས་བརྗོད་པ་དེ་ནི་ཁོ་བོ་ཅག་གིས་རབ་ཏུ་སྦྱར་བ་སྟེ། དམ་བཅས་པ་གཏན་ཚིགས་ཀྱི་ཚིག་ཏུ་བརྗོད་ཀྱི། གང་དཔེ་མངོན་པར་འདོད་པ་ཡིན་ནོ་ཞེ་ན། མི་འདོད་པ་ཞེས་བྱ་བ་སྨོས་ཏེ། བཅོམ་ལྡན་འདས་དེ་བཞིན་


DTG190_Page_0227
[མ་དཔེ་གཟིགས་ན་འདིར་གནོན།]

གཤེགས་པའི་དགོངས་པ་ལ་གནས་པ་ལ་ལྟོས་ནས། ཁྱེད་རྐང་མིག་པ་ལ་འགལ་བ་ཡིན་གྱི། ཁོ་བོ་ཅག་གི་རང་གི་ཕྱོགས་ལ་ནི་དེ་འདྲ་བ་ཡིན་ནོ་ཞེས་བྱ་བ་བསྡུ་བའི་དོན་ཏོ། །རྣལ་འབྱོར་བ་ལ་ཡང་འདོད་པ་ཡོད་པ་ཉིད་དེ། དྲུག་གིས་ཅིག་ཅར་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ནི་གོ་གཅིག་ན། །གོང་བུའང་རྡུལ་ཕྲན་ཙམ་དུ་འགྱུར། །ཞེས་བྱ་བ་ལ་སོགས་པ་རྡུལ་ཕྲ་རབ་གཅིག་པ་ཉིད་ཁས་བླངས་པས་གོང་བུའི་འདུས་པར་རྣམ་པར་དཔྱད་ན་འདི་འདོད་པ་ཉིད་དོ་ཞེ་ན། དེའི་ཕྱིར་གང་ཡང་ཞེས་བྱ་བ་ལ་སོགས་པ་སྨོས་ཏེ། འོ་ན་དེ་ལྟར་ན་གཞན་དངོས་པོ་མེད་པར་རྣམ་པ་གཞན་གྱིས་སྒྲུབ་པར་བྱེད་པར་འདོད་པ་ཇི་ལྟར་ཡིན་ཞེ་ན། གཅིག་དང་དུ་མ་འགོག་པའི་ཕྱིར་རོ། །དྲུག་གིས་ཅིག་ཅར་སྦྱར་བས་ན། །ཞེས་བྱ་བ་ལ་སོགས་པ་རེ་ཞིག་གཅིག་བཀག་པས་དེའི་འདུས་པ་དུ་མ་ཡང་དེ་མེད་པས་མེད་པར་འགྱུར་རོ། །དེ་སྐད་དུ། དངོས་པོ་གང་གང་རྣམ་དཔྱད་ན། །དེ་དང་དེ་ནི་གཅིག་ཏུ་མེད། །གང་གིས་གཅིག་ཀྱང་ཡོད་མིན་པ། །དེས་ན་དུ་མ་ཉིད་ཀྱང་མེད། །ཅེས་བཤད་དོ། །འོ་ན། དྲུག་གིས་ཅིག་ཅར་སྦྱར་བས་ན། །ཞེས་བྱ་བ་ལ་སོགས་པ་ཇི་ལྟར་གཅིག་པ་ཉིད་སེལ་བ་ཡིན་ཞེ་ན། གང་གི་ཚེ་དེ་ལ་དེ་ཉིད་ཆ་ཤས་སུ་སྒྲུབ་པར་བྱེད་པ་དེ་ཉིད་ཀྱིས། རྡུལ་ཕྲ་རབ་དེའི་ཆ་ཤས་ཀྱིས་ཕྲ་བར་འགྱུར་ཏེ། རྡུལ་ཕྲ་རབ་ཀྱི་རྣམ་པར་དབྱེ་བའི་མཚན་ཉིད་མཐར་ཐུག་པའི་ཕྱིར་རོ། །ཇི་ལྟར་དེ་དག་ཀྱང་ཆ་ཤས་སུ་བརྗོད་པ་འདིས། དེའི་ཆ་ཤས་སུ་བརྗོད་པ་དེ་ལྟ་ན། དེ་ལ་དེ་ཉིད་ལན་ཡིན་ནོ་ཞེས་བྱ་བ་རྣམས་འདི་ཉིད་ཀྱིས་རྡུལ་ཕྲ་རབ་གཅིག་པ་ཉིད་དགག་པར་བྱེད་པར་མི་ནུས་ཏེ། དེ་ནི་རྣམ་པར་དབྱེ་བའི་ཕྱིར་རོ། །རྡུལ་ཕྲ་རབ་ཁས་མི་ལེན་པ་དེ་ཇི་ལྟ་གཅིག་པ་ཉིད་དུ་ཁས་ལེན་པར་འགྱུར་ཏེ། དེ་མེད་པར་སྟོན་པའི་གཏན་ཚིགས་ཐམས་ཅད་རང་ཉིད་ལ་མ་གྲུབ་པར་འགྱུར་རོ་ཞེ་ན། གང་གི་དོན་དུ་སྨྲ་བའི་ཆ་ཤས་ཀྱིས་རྣམ་པར་དབྱེ་བའི་བསྒྲུབ་པ་གང་ཡིན་པ་དེ་མཐར་འདྲེན་པར་བྱེད་པའི་ཕྱིར་རོ། །རྡུལ་ཕྲ་རབ་དངོས་པོར་བརྗོད་པ་དེ་ལ་དྲུག་གིས་ཅིག་ཅར་སྦྱར་བ་དེས་གཅིག་ཉིད་གསལ་བ་ཡིན་ནོ། །གང་གི་ཚེ་དེ་ཡང་དེ་ལྟར་ཡོད་པ་གསལ་བས། ཆ་ཤས་ཇི་ལྟར་གསལ་བ་བསྟན་


DTG190_Page_0228
[མ་དཔེ་གཟིགས་ན་འདིར་གནོན།]

པ་དེའི་ཚེ་རང་གི་དམ་བཅའ་བ་ཉམས་པ་ཡིན་ནོ། །ཆ་ཤས་དང་བཅས་པའི་ཡན་ལག་ཏུ་མི་བྱེད་པ་དེ་ལྟ་ན་བརྒལ་ཞིང་བརྟག་པ་མི་རིགས་སོ། །རྡུལ་ཕྲ་རབ་དེ་ཉིད་ཆ་ཆས་དང་བཅས་པར་ཡོད་པར་རྣམ་པར་གཞག་པའི་མཚན་ཉིད་དེ་ཉིད་རྣལ་འབྱོར་སྤྱོད་པ་ལས་འགེགས་པས་ཚར་གཅོད་པའི་ཕྱིར་དང་དེ་ཉིད་ཐུག་པ་མེད་པར་ཐལ་བར་བསྒྲུབ་པའི་ཕྱིར། མ་གྲུབ་པའི་སྐྱོན་ཡང་མེད་པའི་ཕྱིར་འདི་བརྗོད་པར་མི་བྱའོ། །འདིར་བརྗོད་པ་ཁོ་བོ་ཅག་གིས་ཁྱེད་ལ་ནི་བརྗོད་པ་མ་ཡིན་གྱི་རྨོངས་པའི་རྒོལ་བས་རྟོགས་པའི་ཕྱིར་རོ་ཞེ་ན། དེ་ཡང་ཐམས་ཅད་དུ་མེད་པའི་ཡིན་ཏེ། ཐ་དད་པའི་མཚན་ཉིད་ཀྱིས་ཐ་དད་པའི་ཕྱིར་རོ། །དུ་མའི་མཚན་ཉིད་ནི་གཅིག་གི་དངོས་པོར་མ་གྲུབ་པོ་ཞེས་བྱ་བའི་སྐབས་འདིར། དྭ་ར་དྭ་ཛ་ཁོ་བོ་ཅག་གི་འདོད་ན་དབང་པོ་མེད་པ་ལ་ཞེས་བྱ་བ་ལ་སོགས་པས་གྲུབ་པའི་མཐའ་འདི་ཅིའི་ཕྱིར་སྤོང་བར་བརྗོད། དེ་ལྟར་ཁས་བླངས་པ་ལ་སྐྱོན་གཞན་ཡང་བཤད་པ་འདིས་སྔར་གྱི་ཡོན་ཏན་ལས་ཐ་དད་པར་བཤད་པ་ལ་སོགས་པ་བསྟན་པ་འདིས་དམ་བཅའ་དང་གཏན་ཚིགས་དག་འགལ་བ་ལ་ཐ་དད་པ་མེད་ན་གནོད་པ་དང་འབྲེལ་པའི་དཔེར་བརྗོད་པ་དེས་སམ། དཔེར་བརྗོད་པ་ལོགས་ཤིག་པས་ཀྱང་དོན་མེད་འགའ་ཞིག་ཐ་དད་པ་ནི་མེད་ཀྱི་ཚིག་ཐ་དད་པར་ཟད་དོ། །རྣམ་པ་དེ་ལྟ་བུའི་དཔེར་བརྗོད་པས་ལོགས་ཤིག་བྱེད་ན་བྱས་པའི་ཕྱིར་ཞེས་བྱ་བ་ལ་སོགས་པ་ལ་ཧ་ཅང་ཐལ་བར་འགྱུར་རོ། །གཞུང་འགའ་ཞིག་ལས་ལྷན་ཅིག་གམ་ཐ་དད་པ་དག་ཅེས་འདོན་ཏེ། དེ་ལ་དོན་ནི་འདི་ཡིན་ཏེ། ལྷན་ཅིག་པ་ནི་དང་པོ་ལས་ཅིག་ཅར་ཇི་ལྟ་བའོ། །ཐ་དད་པ་ནི་འདིར་ལོགས་ཤིག་པ་ཇི་ལྟ་བུའོ། །འོན་ཏེ་འདིར་འགལ་བ་གསལ་བར་མི་རིགས་སོ་ཞེ་ན། གཞན་ཡང་ཞེས་བྱ་བ་ལ་སོགས་པ་སྨོས་ཏེ། ཐམས་ཅད་ཐ་དད་པ་ཡིན་ཏེ། ཚོགས་པ་ལ་དངོས་པོའི་སྒྲ་སྦྱོར་བའི་ཕྱིར་རོ་ཞེས་བྱ་བ་གཏན་ཚིགས་འདི་ནི་ཆོས་ཐམས་ཅད་ཀྱི་ཆོས་སུ་མི་འགྱུར་ལ། སྒྲའི་ཆོས་ཡིན་པའི་ཕྱིར་ཞེས་བྱ་བ་ནི་མ་གྲུབ་པའོ། །དེ་ལྟར་ཡང་རྟེན་ཐ་དད་པའི་ཕྱིར་མ་གྲུབ་པ་ཉིད་ཀྱི་སྐྱོན་ནི། བུ་རམ་གྱི་མངར་བ་དང་ཁྭའི་གནག་པ་ལ་སོགས་པ་བཞིན་དུ་དེ་ལ་འགལ་བ་མ་


DTG190_Page_0229
[མ་དཔེ་གཟིགས་ན་འདིར་གནོན།]

ཡིན་ཏེ། གཏན་ཚིགས་དང་དམ་བཅའ་བ་དག་ལ་རྟེན་ཐ་དད་པའི་ཕྱིར་རོ། །འོ་ན་ཚོགས་པ་བརྗོད་པའི་ཕྱིར་ཞེས་བྱ་བ་དངོས་པོར་བཤད་ཀྱི་ཊ་ཀི་ལས་རབ་ཏུ་སྦྱར་བས་གཞི་ཐ་དད་མེད་དོ་ཞེ་ན། འདི་སྙམ་དུ་དགོངས་ཏེ། རེ་ཞིག་འོད་བྱེད་ཀྱིས་རབ་ཏུ་སྦྱར་བ་གང་ཡིན་པ་དེ་ཁོ་བོ་ཅག་གིས་སྐྱོན་བརྩམ་པ་འདི་བརྗོད་པ་མ་ཡིན་དུ་ཟིན་ཀྱང་ད་ནི་རྣམ་པ་གཞན་དུ་སྦྱར་བ་ཡིན་ཏེ། གལ་ཏེ་དེ་དག་ལ་སྐྱོན་འདིར་མི་འགྱུར་ཡང་བཤད་མ་ཐག་པའི་སྐྱོན་དང་འཆད་པར་འགྱུར་བའི་སྐྱོན་ནི། ཚོངས་པས་ཀྱང་སྤང་བར་མི་ནུས་སོ། །དམ་བཅའ་བ་དང་གཏན་ཚིགས་འགལ་བར་ཚར་གཅོད་པའི་གནས་གཞན་ཡང་ཁས་ལེན་པ་འདི་ཁོ་བོས་གཞན་དུ་བྱས་ནས་དེ་སྐད་དུ་བཤད་དོ། །གཏན་ཚིགས་ལྟར་སྣང་བ་རྣམས་ཚར་གཅད་པའི་གནས་ཡིན་ནོ་ཞེས་བྱ་བ་འདིས་བསྡུས་པའི་ཕྱིར་རོ་ཞེས་བྱ་བར་བརྗོད་པ་དེ་དག་ལ་གཞན་ཡང་ཞེས་བྱ་བ་ལ་སོགས་པ་སྨོས་སོཿ་།སྐྱོན་གྱི་རིགས་རྣམ་པ་གཉིས་པོ་ཆ་ཤས་ཀྱི་སྐྱོན་གྱི་རྣམ་པ་གཉིས་པོ་དེ་གང་ཞེ་ན། བཤད་པ་འགལ་བ་ཉིད་དང་མ་གྲུབ་པའོ། །ཡང་ཇི་ལྟར་ན་འགལ་བ་དང༌། ཇི་ལྟར་མ་གྲུབ་པ་ཡིན། བཤད་པ། མདོར་བསྡུས་པའི་དོན་ནི་ཡིན་ཏེ། གང་ལ་དམ་བཅའ་བ་དང་གཏན་ཚིགས་ཀྱིས་འགལ་བའི་སྦྱོར་བ་ཡང་བརྗོད་པ་དེ་ལ་གདོན་མི་ཟ་བར་ཆོས་ཅན་གྲུབ་པ་ལ་བསྒྲུབ་པར་བྱ་བ་ཡིན་ན། ཆོས་ཅན་དེ་ལ་གཏན་ཚིགས་གྲུབ་པ་འམ་བསྒྲུབ་པར་བྱ་བའི་ཆོས་དང་གཉི་ག་མེད་པར་འགྱུར་རོ། །དེ་ལ་རེ་ཞིག་ཉི་ག་ཡང་ཡོད་པས་ཕན་ཚུན་འགལ་བ་ཡིན་གྱི། མེ་དང་གྲང་བ་བཞིན་དུ་གཞི་གཅིག་ལ་འགལ་བར་འགྱུར་བ་ཡིན་ནོ། །དེ་ལྟར་མ་ཡིན་ནོ། །འདིར་གཅིག་ལ་ལྷན་ཅིག་གནས་པ་ནི་ཐུན་མོང་བ་བཞིན་དུ་མི་འགལ་བ་ཉིད་དུ་འགྱུར་བའི་ཕྱིར་དམ་བཅའ་བ་དང་གཏན་ཚིགས་རིང་བ་ལ་ཡང་འགལ་བར་ཐལ་བར་འགྱུར་རོ། །དེ་འགལ་བར་བརྗོད་པ་ནི་རང་བཞིན་གྱིས་གཅིག་ལ་འགལ་བར་འགྱུར་གྱི། དེ་ལྟ་མ་ཡིན་ན་འགལ་བར་མི་འགྱུར་རོ། །དེ་ལྟ་ན་གཏན་ཚིགས་དེ་ལ་ཡོད་པར་འགྱུར་རོ། །གང་ལ་གཏན་ཚིགས་དེ་ལྟ་བུ་ཡིན་པས་དེ་ལ་བསྒྲུབ་པར་བྱ་བའི་ཆོས་དང་བསྒྲུབ་པར་བྱ་བའི་ཆོས་དེ་ལས་བཟློག་པ་


DTG190_Page_0230
[མ་དཔེ་གཟིགས་ན་འདིར་གནོན།]

ཡང་དེ་ལ་ཡོད་པ་མ་ཡིན་པར་གསལ་བ་ཡིན་ཏེ། འདི་དང་འགལ་བའི་ཕྱིར་རོ། །སྒྲ་རྟག་སྟེ། བྱས་པའི་ཕྱིར་རོ་ཞེ་ན། བཤད་པ། ཆོས་ཅན་ཡོད་པའི་གཏན་ཚོགས་འགལ་བར་གྲུར་པར་མ་གྱུར་པའོ། །ཡང་གང་གི་ཚེ་ཆོས་ཅན་དེ་ལ་ཚད་མ་གཞན་གྱིས་སྒྲུབ་པར་བྱེད་པ་ཡོད་པར་ངེས་པ་དེའི་ཚེ་དེ་ལ་གཏན་ཚིགས་མེད་པར་འགལ་བའི་སྟོབས་ཀྱིས་བྱས་པ་འམ་གཏན་ཚིགས་མ་གྲུབ་པ་ཡིན་ནོ། །སྒྲ་ནི་བྱས་པ་ཡིན་ཏེ། འབྲས་བུ་མ་ཡིན་པའི་ཕྱིར་ཞེས་བྱ་བ་ལ་སོགས་པ་བཞིན་ནོ། །དེ་ནི་ཆོས་ཅན་ལ་གཏན་ཚིགས་མ་གྲུབ་ཀྱང་ཞེས་བྱ་བ་ལ་སོགས་པ་སྨོས་ཏེ། གལ་ཏེ་ཡོན་ཏན་ལས་ཐ་དད་པའི་རྫས་ལ་སོགས་པའི་ཆོས་ཅན་ཚད་མས་མ་གྲུབ་པ་ལ་དམ་བཅའ་བ་དང༌། གཏན་ཚིགས་འགལ་བ་རྣམ་པར་གཞག་པ་བྱས་པ་དེས་ན་འདི་ནི་སྐྱོན་མ་ཡིན་ནོ། །དེས་འདི་མ་གྲུབ་པ་ལ་སོགས་པར་མི་ནུས་སོ་སྙམ་དུ་སེམས་ན། གལ་ཏེ་དེ་ལྟ་ན་ཡང་ཆོས་ཡོད་པར་འགྱུར་བ་དང༌། ཕྱོགས་ཀྱི་ཆོས་མེད་པ་དང་འགལ་བ་དང་མ་གྲུབ་པ་ཡང་ཡིན་པ་དེའི་གནས་སྐབས་སུ་ཡིད་ལ་བྱེད་པས་སྨྲས་པས་ཚད་མ་དང་འབྲེལ་པ་མེད་པར་རྒོལ་བ་དང་ཕྱིར་རྒོལ་བ་གཉིས་ལ་ཆོས་ཅན་ལ་གཏན་ཚིགས་ཡོད་པར་ཐེ་ཚོམ་ཟ་བ་ཡིན་ནོ། །ཚད་མ་ལོག་པས་ཀྱང་དོན་མེད་པར་མི་འགྲུབ་པ་དེས་ན་ཐེ་ཚོམ་ཟ་བའི་མ་གྲུབ་པ་ལ་བརྟེན་པའི་ཕྱིར། རི་སུལ་འདི་ན་རྨ་བྱ་ཡོད་དེ། སྒྲ་གྲགས་པའི་ཕྱིར་ཞེས་བྱ་བ་ལྟ་བུའོ། །ཡང་སྒྲས་ནི་སྟོན་པར་བྱེད་པའི་ཆོས་ཅན་ལ་ཚད་མས་རབ་ཏུ་སྦྱར་བ་ན་གཏན་ཚིགས་ཀྱི་གཞི་ལ་ཐེ་ཚོམ་ཟ་བའོ། །ཆོས་ཅན་གནོད་པར་བྱེད་པའི་ཚད་མ་ཡོད་པས་གཞི་མ་གྲུབ་པ་ཡིན་པར་གསལ་བ་ཉིད་ནི། བདག་ནི་ཐམས་ཅད་དུ་སོང་བར་བསྒྲུབ་པར་བྱ་བ་ལ་ཡོན་ཏན་ཐམས་ཅད་ན་དམིགས་པའི་ཕྱིར་ཞེས་བྱ་བ་ལ་སོགས་པའི་དོན་ཏོ། །འདི་ལྟར་ཆོས་ཅན་མ་གྲུབ་པའི་རང་བཞིན་ཞེས་བྱ་བ་ནི་འདིར་སྟོན་པར་བྱེད་པ་ལ་ཚད་མ་ཡོད་ན་ཆོས་ཅན་མ་གྲུབ་པར་བརྗོད་པར་འགྱུར་བའམ། གནོད་པར་བྱེད་པའི་ཚད་མ་ཡོད་ན་ཡིན་ནོ། །སྔ་མའི་ཕྱོགས་གཅིག་ལ་བཤད་ཟིན་པའི་སྐྱོན་ཡོད་པར་ཕྱི་མ་ལ་ནི་ཡང་གི་སྒྲས་བསྡུས་པ་ཡིན་ནོ། །འདིར་འོད་བྱེད་ཀྱིས་བརྗོད་པའི་དོགས་པ་བསུ་བ་ནི། གཉི་


DTG190_Page_0231
[མ་དཔེ་གཟིགས་ན་འདིར་གནོན།]

ག་ལ་བརྟེན་པའི་ཕྱིར་ཞེས་བྱ་བ་ལ་སོགས་པའོ། །འདི་དག་ཐམས་ཅད་ནི་བཤད་ཟིན་པའི་ཕྱིར་གོ་སླའོ། །ཐམས་ཅད་དུ་ཞེས་བྱ་བ་ལ་སོགས་པ་ནི་འགོག་པར་བྱེད་པའོ། །སྔར་ཇི་སྐད་བཤད་པ་ནི། སྐྱོན་གྱི་རིགས་རྣམ་པ་གཉིས་ཞེས་བྱ་བའོ། །འོན་ཏེ་འདིར་དམ་བཅའ་བ་ཙམ་རང་ཉིད་གཏན་ཚིགས་ལ་མི་ལྟོས་པ་དམ་བཅའ་བ་དང་འགལ་བར་རྣམ་པར་འཇོག་པའོ། །དཔེར་ན་དགེ་སྦྱོང་མ་སྦྲུམ་མ་ཞེས་བྱ་བ་འམ། འདིར་བདག་མེད་པ་ཞེས་བྱ་བ་བཞིན་ནོ་ཞེ་ན། གཏན་ཚིགས་ལ་ལྟོས་པ་མེད་དོ་ཞེས་སྨོས་པ་ནི་འབྲེལ་བ་མེད་པ་ཡིན་ཏེ། ཕན་འདོགས་པ་མེད་པའི་ཕྱིར་རོ། །གང་ཡང་གཏན་ཚིགས་འགལ་བ་དཔེར་བརྗོད་པ་ནི་སྒྲ་རྟག་གོ་ཞེས་བྱ་བ་ལ་སོགས་པའོ། །དམ་བཅའ་བ་གཏན་ཚིགས་འགལ་བ་ནི་མི་རིགས་སོ་ཞེས་བཤད་པ་ནི། འདི་ལ་ཡང་ཞེས་བྱ་བ་ལ་སོགས་པ་སྨོས་སོ། །གཉི་ག་ལ་བརྟེན་པའི་འགལ་བ་ཡིན་པ་དེ་ནི་དེ་ལྟ་ན་ཡང་རིགས་སོ་ཞེས་འདོད་ནས། འདིར་གཉིས་ཀ་བརྟེན་པ་ཞེས་བྱ་བ་ལ་སོགས་པ་སྨོས་ཏེ། འདི་ལྟར་དཔེ་བརྗོད་པ་བསྟན་པ་སྤངས་པས་འདོད་པ་བསུན་འབྱིན་པ་བཤད་པ། ཇི་སྐད་བསྟན་པ་དེ་དག་གིས་བཞད་གད་མཁན་གྱིས་རི་མོ་འདྲི་བའི་ཚུལ་དུ་དམ་བཅས་པ་དང་དཔེ་འགལ་བ་ལ་ཡང་བརྗོད་པར་བྱའོ། །ཚུལ་དུ་ཞེས་བྱ་བ་སྨོས་པ་ནི་བཤད་པར་བྱ་བ་འམ་བསྟན་པར་བྱ་བའོ། །དེ་ལྟ་མ་ཡིན་ན་གཞན་གྱི་ཚིག་ཕྱི་མ་དང་སྦྱར་བ་ནི་མི་འགྲིག་པར་འགྱུར་རོ། །བཞད་གང་མཁན་སྨོས་པ་ནི་སྐྱེས་བུ་བརྫུན་མའི་མཚན་ཉིད་ཡིན་པའི་ཕྱིར་རོ། །འདི་ལྟར་བཞད་གད་མཁན་གནས་སྐབས་སུ་ངོ་མཚར་བར་བྱེད་པ་ན་རི་མོ་སྤངས་ཀྱང་པ་ལ་བྷཉྫི་ཀ་ལ་སོགས་པའི་སྡེབ་སྦྱོར་སྣ་ཚོགས་པ་མི་འདྲ་བའི་བཟོ་ལ་མཁས་པའི་ང་རྒྱལ་སྟོན་པར་བྱེད་དོ། །རྣམ་པ་དེ་ལྟ་བུ་གཞན་ཡང་སྤྲུལ་པ་ལ་མཁས་པས་ཏ་ལའི་ལོ་མ་གཅིག་ལ་གླང་པོ་ལ་སོགས་པའི་གནས་པ་སྟོན་པར་བྱེད་དོ། །རྣམ་པ་དེ་ལྟ་བུ་འོད་བྱེད་ཀྱི་འདི་དག་ཀྱང་ཡིན་ཏེ། འདི་ལྟར་རེ་ཞིག་གཏན་ཚིགས་དང་འགལ་བ་གཏན་ཚིགས་ལྟར་སྣང་བ་ཐ་དད་པའི་མཚན་ཉིད་སྤངས་པ་འདི་དག་ཉེ་བར་བསྟན་པ་དང༌། ཡང་དེ་རྒྱས་པར་བསྟན་པར་སེམས་པ་ཉིད་ཀྱིས་


DTG190_Page_0232
[མ་དཔེ་གཟིགས་ན་འདིར་གནོན།]

ཅི་ཞིག་བྱ། དེ་ཉིད་རྒྱས་པར་བསྟན་པ་དང་དཔེ་དང་འགལ་བའི་གཏན་ཚིགས་ལྟར་སྣང་བ་ཐ་དད་པའི་མཚན་ཉིད་ལས་འདས་པ་བསལ་བར་བྱས་པ་ཡིན་ནོ། །དེ་ལ་ཞེས་བྱ་བ་ལ་སོགས་པ་ནི་གང་ལ་དམ་བཅའ་བ་དང་དཔེ་འགལ་བ་དེ་ལ་ཡང་ཕྱོགས་སུ་བྱས་པའི་ཆོས་བཟློག་པ་དང་ལྡན་པས་དཔེ་ལ་འགལ་བར་འགྱུར་གྱི་དམ་བཅས་པ་དང་དཔེ་འགལ་བ་ཞེས་བྱ་བ་ལྷག་མའོ། །ཕྱོགས་སུ་བྱས་པའི་ཆོས་མཐུན་པ་དེ་ལས་བཟློག་པ་ལ་ཡོད་པ་ཡིན་ནོ་ཞེས་ཚིག་རྣམ་པར་སྦྱར་རོ། །དཔེ་ཞེས་བྱ་བ་ནི་མཐུན་པའི་དཔེའི་ཆོས་སུ་འདོད་དོ། །གང་གི་ཕྱིར་མི་མཐུན་པའི་དཔེ་སྒྲུབ་པའི་ཆོས་ལས་བཟློག་པ་མ་ཡིན་ན་དེ་ལ་འགལ་བ་ཅི་ཞིག་ཡོད། དེ་ལ་དཔེ་ནི་སྒྲ་དང་བུམ་པ་བཞིན་ཡིན་ནོ། །འགལ་བའི་དཔེར་གྱུར་པ་ནི་གལ་ཏེ་ཕྱོགས་སུ་བྱས་པའི་ཆོས་ཡོད་ཅིང་གཞན་དང་ཐུན་མོང་པ་མ་གྱུར་པ་རབ་ཏུ་སྒྲུབ་པ་དེའི་ཚེ་འགལ་བའི་གཏན་ཚིགས་ལྟར་སྣང་བའོ། །གཞན་དང་ཐུན་མོང་དུ་གྱུར་པ་ནི། གཞན་དང་ཐུན་མོང་དུ་མ་གྱུར་པའོ། །གཞན་དང་སྨོས་པ་ནི་ཕྱོགས་སུ་བྱས་པའི་ཆོས་ལས་སྨོས་པ་དང་ལྡན་པའོ། །ཕྱོགས་སུ་བྱས་པའི་ཆོས་ལས་ཐ་དད་པར་སྒྲུབ་པ་ནི་མངོན་པར་མི་འདོད་པའོ། །ཕྱོགས་སུ་བྱས་པའི་ཆོས་ལས་བཟློག་པ་དང་ལྡན་པ་ལ་ཡོད་པར་གལ་ཏེ་དེ་ལྟར་བསྒྲུབས་ན་ཞེས་བྱ་བའི་དོན་ཏོ། །བསྒྲུབ་བྱ་དང་དཔེ་དག་གི་འབྲས་བུ་ཡིན་པའི་ཕྱིར་རོ་ཞེས་བྱ་བ་འདི་ཉིད་ཀྱིས་དེའི་མི་མཐུན་པའི་ཕྱོགས་ནམ་མཁའ་ལ་སོགས་པ་འཇུག་ཅིང་དེ་ལས་བཟློག་པ་བུམ་པ་ལ་འཇུག་པ་ལ་ཡང་མཐུན་པའི་ཕྱོགས་དང་མི་མཐུན་པའི་ཕྱོགས་དང་ཐུན་མོང་དུ་གྱུར་པ་ཞེས་བྱ་བ་ཚིག་གི་ལྷག་མའོ། །ཐུན་མོང་གི་མ་ངེས་པར་བཤད་པ་ནི་དཔེར་ན་བསྒྲུབ་པར་བྱ་བ་དང་དཔེ་དག་ལ་གཞལ་བྱ་ཡིན་པའི་ཕྱིར་ཞེས་བྱ་བ་འདིས་རབ་ཏུ་མ་བསྒྲུབས་པ་ཉིད་ལ་འཇུག་པར་ངེས་སོ། །དེ་ནི་མཐུན་པའི་ཕྱོགས་ལ་འཇུག་པར་ངེས་པ་འམ། །མཐུན་པའི་ཕྱོགས་དང་མི་མཐུན་པའི་ཕྱོགས་ལ་འཇུག་པར་ངེས་པར་ཐེ་ཚོམ་ཟ་བའི་མ་ངེས་པ་ཡིན་ནོ། །ལྡོག་པ་ལ་ཐེ་ཚོམ་ཟ་བ་ནི་དཔེར་ན་སྐྱེས་བུ་ཐམས་ཅད་མཁྱེན་པ་མ་ཡིན་པ་འམ་འདོད་ཆགས་དང་བྲལ་བ་མ་ཡིན་ནོ། །


DTG190_Page_0233
[མ་དཔེ་གཟིགས་ན་འདིར་གནོན།]

སྨྲ་བའི་ཕྱིར་ལམ་པོ་ཆེའི་མི་བཞིན་ནོ། །མཐུན་པའི་ཕྱོགས་དང་མི་མཐུན་པའི་ཕྱོགས་ལ་མེད་པའི་ཐུན་མོང་མ་ཡིན་པའི་མ་ངེས་པ་དེ་ནི་སྒྲ་རྟག་སྟེ། མཉན་པར་བྱ་བ་ཡིན་པའི་ཕྱིར་ཞེས་བྱ་བ་ལྟ་བུའོ། །གཞན་གྱིས་སྨྲས་པ། འགལ་བའི་དཔེ་ལ་མི་འཇུག་ཅིང་བཟློག་པ་འཇུག་པའི་གཏན་ཚིགས་ལ་གཏན་ཚིགས་ཀྱི་སྐྱོན་ཅུང་ཟད་ཅིག་ཀྱང་ཡོད་པ་མ་ཡིན་ཏེ། དཔེར་ན་སྒྲ་ནི་མི་རྟག་སྟེ། རྐྱེན་གྱི་བྱེ་བྲག་ཐ་དད་པས་ཐ་དད་པའི་ཕྱིར་ཆོས་མཐུན་པའི་དཔེ་ནི་ནམ་མཁའ་བཞིན་ནོ། །ཆོས་མི་མཐུན་པའི་དཔེ་ནི་བུམ་པ་བཞིན་ནོ་ཞེས་བྱ་བ་འདི་ལ། འདིར་མ་གྲུབ་པ་ལ་འཇུག་པའི་གཏན་ཚིགས་ལ། འདིར་མ་གྲུབ་པ་ནི་མ་ཡིན་ཏེ། གཏན་ཚིགས་ཆོས་ཅན་ལ་ཡོད་པའི་ཕྱིར་རོ། །མ་ངེས་པ་ཡང་མ་ཡིན་ཏེ། གཉི་ག་ལ་མི་འཇུག་པའི་ཕྱིར་དང༌། འབྲེལ་པ་གྲུབ་པའི་ཕྱིར་རོ། །འགལ་བ་ཡང་མ་ཡིན་ཏེ། མཐུན་པའི་ཕྱོགས་ལས་བཟློག་པ་མི་མཐུན་པའི་ཕྱོགས་ལ་མི་འཇུག་པའི་ཕྱིར་རོ། །དམ་བཅའ་བ་དང་དཔེ་འགལ་བ་འདི་ནི་གཏན་ཚིགས་ཀྱི་སྐྱོན་ཡུལ་འདས་པའི་དམ་བཅས་པ་འགལ་བ་ཡིན་ནོ་ཞེ་ན། འདི་ནི་འཐད་པ་མ་ཡིན་ཏེ། དེ་ལ་ཐེ་ཚོམ་ཟ་བའི་གཏན་ཚིགས་ལས་མ་ལོག་པའི་ཕྱིར་རོ། །གང་གི་ཕྱིར་དཔེ་དང་འགལ་བའི་ཕྱིར་དམ་བཅའ་བ་ནི། མཐུན་པའི་ཕྱོགས་ཀྱི་སྐྱོན་ཡིན་གྱི་མི་མཐུན་པའི་ཕྱོགས་ཀྱི་སྐྱོན་མ་ཡིན་ནོ། །ཅིའི་ཕྱིར་ཞེ་ན། མངོན་པར་འདོད་པ་ཉིད་ཡིན་པའི་ཕྱིར། ཕྱོགས་སུ་བྱས་པའི་ཆོས་ལས་བཟློག་པའི་འགལ་བ་ལྟ་བུའོ། །མི་མཐུན་པའི་ཕྱོགས་སུ་བརྗོད་དོ་ཞེས་བྱ་བར་དགོངས་པ་ཡིན་ནོ། །གལ་ཏེ་དེ་ལྟ་ན་དེ་ཡང་གཏན་ཚིགས་ལྟར་སྣང་བ་ལས་ཇི་ལྟར་འདས་པ་མ་ཡིན་ཞེ་ན། བཤད་པ། ཆོས་མཐུན་པ་ཉིད་ཅན་གྱི་དཔེ་ལ་ཕྱིན་ཅི་ལོག་པའི་ཆོས་དང་ལྡན་པ་ནི། འཁྲུལ་པ་མེད་པའི་ཆོས་ཉིད་དུ་བསྟན་པར་མི་ནུས་པའི་ཕྱིར། དེའི་དོན་དཔེས་བསྟན་པ་ནི། ཇི་སྐད་དུ། གཏན་ཚིགས་ཚུལ་གསུམ་ལྡན་པ་བཤད། །ཕྱོགས་ཀྱི་ཆོས་ལ་གནས་པ་དང༌། །ལྷག་མ་ཚུལ་གཉིས་ལྡན་པའི་དོན། །དཔེ་ཡིས་རབ་ཏུ་བསྟན་པ་ཡིན། །ཞེས་བཤད་དོ། །འོ་ན་རྐྱེན་གྱི་བྱེ་བག་ཐ་


DTG190_Page_0234
[མ་དཔེ་གཟིགས་ན་འདིར་གནོན།]

དད་པ་ཉིད་ཀྱིས་མི་རྟག་པ་དེ་ཉིད་ལ་ཇི་ལྟར་མི་འཁྲུལ་བར་མི་ནུས་ཤེ་ན། བཤད་པ། དངོས་པོ་བསྒྲུབ་པར་བྱ་བ་ལ་མི་འཁྲུལ་པར་མ་ཡིན་ཡང་ཚད་མ་མ་བསྟན་པའི་ཕྱིར་མེད་པ་དང་འདྲ་བ་ཡིན་ནོ་ཞེས་བྱ་བར་དགོངས་སོ། །དེ་ལྟར་ན་གཏན་ཚིགས་དང་མེད་ན་མི་འབྱུང་བའི་འབྲལ་བ་མ་བསྟན་པ་དེ་ཡང་བསྒྲུབ་པར་བྱ་བ་ངེས་པ་མ་ཡིན་ནོ། །དེ་ལ་དམ་བཅའ་བ་དང་དཔེའི་འགལ་བ་དེ་ཡང་གཏན་ཚིགས་ལྟར་སྣང་བ་ལས་མ་འདས་པ་ཡིན་ནོ། །ད་ལྟར་གྱི་འདི་ཡང་མི་མཐུན་པའི་ཕྱོགས་ལས་བཟློག་པ་ཐེ་ཚོམ་ཟ་བའི་ཕྱིར་རོ་ཞེས་དགོངས་པ་ཡིན་ནོ། །གཏན་ཚིགས་འགལ་བ་འབའ་ཞིག་མ་ཡིན་པས་ཡང་གི་སྒྲ་སྨོས་སོ། །གཞན་གྱི་དོགས་པ་བསུ་བ་ནི་གཏན་ཚིགས་ཀྱི་སྒོ་ནས་དང་དཔེའི་སྒོ་གཉི་ག་ལྟར་ཡང་གཏན་ཚིགས་ཀྱི་སྐྱོན་ལས་སྔར་དཔེའི་སྐྱོན་གྱིས་རྒོལ་བ་ཕམ་པ་ནི། དཔེ་དང་འགལ་བའི་སྐྱོན་གཞན་མ་ཡིན་ཏེ། གཞན་ལ་མི་ལྟོས་པའི་ཕྱིར་རོ། །ཕམ་པར་འགྱུར་བ་ལས་ཕམ་པ་གཞན་མེད་དོ་ཞེས་བསམས་པའོ། །རིགས་པ་ཅན་ཁྱད་པར་གཞན་དུ་བསྒྲུབ་པའི་ཡན་ལག་གོ་རིམས་ངེས་པར་རྒོལ་བ་ནི་དམ་བཅའ་བ་དང་གཏན་ཚིགས་དང་དཔེ་དང་ཉེ་བར་སྦྱོར་བ་དང༌། མཇུག་བསྡུ་བ་དག་གོ་རིམས་ངེས་པར་བརྗོད་པར་རིགས་པ་མ་ཡིན་ནོ། །ཡང་དེའི་ཁྱད་པར་ཇི་ལྟ་བུ་ཞེ་ན། དཔེ་དང་ཆོས་མཐུན་པར་ཞེས་བྱ་བ་ལ་སོགས་པ་སྨོས་སོ། །དཔེ་དང་འགལ་བའི་ཕྱིར་གཏན་ཚིགས་ལྟར་སྣང་བ་ཡོད་པ་མ་ཡིན་པས། ཇི་སྐད་དུ་བཤད་མ་ཐག་པའི་རྣམ་པར་རྟོག་པའི་སྐྱོན་གྱིས་རྣམ་པར་གསལ་པ་ཡིན་ནོ། །དེ་ལྟར་རེ་ཞིག་གང་ཡང་དམ་བཅའ་བ་དང་འགལ་བའི་གཏན་ཚིགས་ལྟར་སྣང་བའི་རྣམ་པར་གཞག་པ་འདི་ལས་ཤིན་ཏུ་འདས་པ་མ་ཡིན་ནོ་ཞེས་བྱའོ། །གང་ཡང་རྣ་མ་ཕུག་གི་རྣམ་བཤད་ཀྱི་ཊཱི་ཀཱ་ལས་དཔེར་བརྗོད་པའི་རང་བཞིན་གཅིག་གསལ་བ་མ་ཡིན་ཏེ། ཚད་དང་ལྡན་པའི་ཕྱིར་ཁམ་ཕོར་བཞིན་ནོ་ཞེས་བྱ་བའི་གཏན་ཚིགས་དེ་ཡང་འགལ་བ་ཡིན་ཏེ། ཚད་དང་ལྡན་པའི་གཏན་ཚིགས་ཀྱང་མཐུན་པའི་ཕྱོགས་ལ་མེད་པས་མི་འཇུག་ལ་མི་མཐུན་པའི་ཕྱོགས་ཁམ་པོར་ལ་སོགས་པ་རང་བཞིན་དུ་མ་ལ་འཇུག་པའི་ཕྱིར་དང༌། སའི་སྐད་ཅིག་མ་རེ་རེ་ལ་ཆ་ཤས་ཡོད་པའི་ཕྱིར་རོ། །ང་ནི་


DTG190_Page_0235
[མ་དཔེ་གཟིགས་ན་འདིར་གནོན།]

གཏན་ཚིགས་ཀྱང་དཔེ་དང་འགལ་བའི་གཏན་ཚིགས་ལྟར་སྣང་བའི་ནང་དུ་འདུས་པ་ཞེས་བྱ་བར་འགྱུར་ཏེ། གཏན་ཚིགས་ཀྱང་དཔེ་དང་འགལ་བ་གཉིས་ལ་ཐུན་མོང་དུ་ཡོད་པ་འམ་འལ་བ་ཉིད་དུ་འགྱུར་རོ། །གང་གི་ཚེ་འགལ་བར་འགྱུར་ཞེ་ན། བཤད་པ་ཆོས་ནི་མཐུན་པ་ལ་འཇུག་པ་ནའོ། །གང་ཡང་གང་ལ་དཔེར་བརྗོད་པ་དེ་ཉིད་ཀྱིས་ཡིན་ཏེ། རྫས་ནི་ཡོན་ཏན་ལས་ཐ་དད་པ་ཡིན་ཏེ། དོན་གཞན་དུ་མི་དམིགས་པའི་ཕྱིར་བུམ་པ་བཞིན་ནོ། །གང་ལ་སྣང་དུ་རུང་བར་གྱུར་པ་ན་གཏན་ཚིགས་ཀྱི་ཁྱད་པར་དང་འགལ་བ་ཡིན་ཏེ། མཐུན་པའི་ཕྱོགས་ལ་མི་འཇུག་པའི་ཕྱིར་དང༌། གཟུགས་ལ་སོགས་པ་མི་མཐུན་པའི་ཕྱོགས་ཀྱི་རང་གི་ངོ་བོ་ལ་འཇུག་པའི་ཕྱིར་རོ། །ཁྱད་པར་དུ་མ་བྱས་ན་ནི་ཤ་ལ་སོགས་པ་བཞིན་དུ་མི་དམིགས་པ་ཡང་དོན་གཞན་གྱིས་འཁྲུལ་བར་འགྱུར་ཏེ། ཕན་ཚུན་ཐ་དད་པའི་ཕྱིར་རོ། །འདིར་བུམ་པ་བཞིན་ནོ་ཞེས་བྱ་བ་འདི་དཔེ་ནི་རིགས་པ་མ་ཡིན་ཏེ། དེའི་རྫས་གཞན་འདི་དག་ཕྱོགས་སུ་བྱས་པའི་ཕྱིར་རོ། །གཟུགས་ལ་སོགས་པ་དེའི་ཐ་དད་པར་འཛིན་པ་སྔར་ཉིད་ནས་བགག་པའི་ཕྱིར་རོ། །འཛིན་ན་ནི་མ་གྲུབ་པའི་གཏན་ཚིགས་ལྟར་སྣང་བ་ཡིན་པའི་ཕྱིར་ཁོ་བོ་ཅག་གི་འདོད་པ་ཉིད་གནས་པ་ཡིན་ནོ། །འོན་ཏེ་གཏན་ཚིགས་ཚད་མ་དང་འགལ་བའི་ཚད་མས་དེ་ལྟར་སྣང་བ་ཡིན་ནོ་ཞེ་ན། བཤད་པ་མ་གྲུབ་པ་ཡིན་ཏེ། མེ་ལ་གྲང་བ་མ་གྲུབ་པའི་ཕྱིར་རོ། །གང་ཡང་འདིར་དཔེར་བརྗོད་པ་གཞན་ནི་མེ་ནི་དྲོ་བ་མ་ཡིན་ཏེ། རྫས་ཡིན་པའི་ཕྱིར་ཆུ་བཞིན་ནོ་ཞེ་ན། དེ་ནི་རིགས་པ་མ་ཡིན་ཏེ། མངོན་སུམ་གྱི་རྫས་ལ་གནོད་པས་དེ་ཆོས་ཅན་ལ་མ་གྲུབ་པའི་ཕྱིར་རོ། །འོན་ཏེ་དམ་བཅའ་བའི་དོན་ཙམ་ཤེས་པ་ཡིན་པ་དེ་ལྟ་ན་དམ་བཅའ་བའི་དོན་མངོན་སུམ་དང་འགལ་བའི་ཕྱིར་དེ་གཏན་ཚིགས་དེས་ཁྱབ་པ་མེད་པ་ནི་གཏན་ཚིགས་ཚད་མ་དང་འགལ་བའི་དོན་ཏོ། །དེ་ལྟ་ན་འོན་ཏེ་བསྒྲུབ་པར་བྱ་བ་དང་འགལ་བའི་ཆོས་ཀྱིས་ཁྱབ་པ་ན་ལྡོག་པ་ལ་ཐེ་ཚོམ་ཟ་བའི་གཏན་ཚིགས་ལྟར་སྣང་བ་ཡིན་པས་ཁོ་བོ་ཅག་གི་ཕྱོགས་བསྒྲུབས་པ་ཡིན་ནོ། །གཏན་ཚིགས་ཚད་མ་དང་འགལ་བ་ནི་གཏན་ཚིགས་ལྟར་སྣང་བ་ལས་མ་འདས་པའི་ཕྱིར་རོ། །དེ་སྐད་དུ། ཁྱབ་པ་འཛིན་པའི་དུས་


DTG190_Page_0236
[མ་དཔེ་གཟིགས་ན་འདིར་གནོན།]

སུ་ནི། །མངོན་སུམ་ལ་སོགས་འགལ་བ་ཡི། །འགལ་བས་ཁྱབ་པར་གྱུར་པ་ན། །ཆོས་ཅན་ལ་ནི་མི་རིགས་སོ། །ཞེས་གསུངས་སོ། །དམ་བཅའ་ཚད་མ་དང་འགལ་བར་འགྱུར་བ་དེ་ཙམ་དུ་གྱུར་པར་འདོད་ན་འགའ་ཞིག་ཀྱང་གཏན་ཚིགས་ལྟར་སྣང་བའི་ནང་དུ་འདུ་བར་ནུས་པ་མ་ཡིན་ནོ་ཞེ་ན། བཤད་པ། དམ་བཅའ་བ་ཚད་མ་དང་འགལ་བ་ནི་རང་གི་ཚིག་གི་སྒོ་ནས་བཤད་ཟིན་པ་ཡིན་ཏེ། བྱས་ཟིན་པ་མེད་པ་ཡིན་ནོ། །དེ་ལ་འདི་ཉིད་སྒྲུབ་པར་བྱེད་པའི་ཡན་ལག་ཏུ་མ་གྱུར་བའི་དམ་བཅའ་བའི་ཚིག་སྒྲུབ་པར་བྱེད་པའི་སྦྱོར་བ་ལ་སོགས་པའི་ཚར་གཅད་པའི་གནས་ཡིན་ནོ། །ཕྱི་རོལ་ཞེས་བྱ་བ་ནི་དེའི་ཕྱིར་ཏེ། ཐམས་ཅད་འདི་ཉིད་ཡིན་ནོ་ཞེས་བྱ་བ་མཇུག་བསྡུ་བའོ། །གང་ཡང་འགལ་བའི་ལན་གཞན་ནི་ཕྱོགས་སྔ་མ་བརྗོད་པ་གཞན་དང་གཞན་སྤང་བར་བྱ་བ་དེ་ནི་འབྲེལ་པ་ཉིད་མ་ཡིན་ཏེ། གང་གི་ཕྱིར་གང་གི་ཚེ་ཞེས་བྱ་བ་ལ་སོགས་པ་སྨོས་ཏེ་སྒྲ་ནི་མི་རྟག་པ་ཡིན་ཏེ། དབང་པོའི་གཟུང་བར་བྱ་བའི་ཕྱིར་ཏེ། བུམ་པ་བཞིན་ནོ་ཞེས་བྱ་བ་དེ་ལྟར་སངས་རྒྱས་པ་ལས་གཞན་པ་དཔྱོད་པ་དང་གཞན་གཟེགས་ཟན་པ་ཉིད་པ་ལང་ཉིད་ལ་སོགས་པའི་ཕྱིར་རང་གི་ཕྱོགས་ལ་གྲུབ་པ་གཞན་རྒོལ་བ་སངས་རྒྱས་པའི་སྒྲུབ་པར་བྱེད་པའི་གཏན་ཚིགས་འཁྲུལ་པར་དོགས་པ་ཡིན་ནོ། །ཁྱེད་ཀྱི་བ་ལང་ཉིད་དེ་ཡང་དབང་པོའི་གཟུང་བྱ་ཡིན་པར་མི་རྟག་པར་འགྱུར་རོ། །གང་གི་ཚེ་དེ་ལྟར་གཞན་ལ་སྒྲོ་བཏགས་ནས་བརྗོད་པས་འཁྲུལ་པར་འགྱུར་བ་དེའི་སངས་རྒྱས་པ་དེའི་རང་གི་ཕྱོགས་ལ་དེ་དང་དེའི་སྤྱི་རྟག་པ་དབང་པོས་གཟུང་བར་བྱ་བ་འགལ་བ་ཡིན་ནོ། །རྟག་པའི་དོན་གང་ཡིན་པ་ཁས་ལེན་པ་དང་འདོད་པའི་ཕྱིར་ཇི་ལྟར་འཁྲུལ་བར་འགྱུར། འགལ་བས་གནོད་པར་ཡང་རིགས་པ་མ་ཡིན་ནོ་ཞེས་བྱ་བའི་དོན་ཏོ། །རིགས་ན་ནི་ལན་དུ་བརྗོད་པར་འགྱུར་གྱི་དེ་ལྟ་ན་ཡང་གཞན་གཞན་གྱིས་འཁྲུལ་བའི་ཁུར་སྟེང་དུ་འཇོག་པར་བརྗོད་པ་འདི་ནི་ཇི་ལྟར་འགལ་བའི་ལན་མ་ཡིན། གང་གི་ཕྱིར་དེ་ནི་རྒོལ་བ་རང་ཉིད་ཀྱི་ཁས་ལེན་པའི་བ་ལང་ཉིད་བརྟགས་པ་ལ་དབང་པོས་གཟུང་བར་བྱ་བའི་གཏན་ཚིགས་འཇུག་པ་ཡོད་པའི་ལན་ནི། ཐེ་ཚོམ་དུ་གྱུར་པ་ནི་དེ་ཅི་


DTG190_Page_0237
[མ་དཔེ་གཟིགས་ན་འདིར་གནོན།]

བུམ་པ་བཞིན་དུ་དབང་པོའི་གཟུང་བྱ་ཡིན་པའི་ཕྱིར་སྒྲ་མི་རྟག་པར་འགྱུར་རམ། ཅི་བ་ལང་ཉིད་ལ་སོགས་པར་བརྟག་པར་འགྱུར། བདག་ཉིད་ཀྱི་རྟོག་པ་མེད་པར་དེ་ལྟར་སྟོན་པར་བྱེད་ཅེས་སྨྲས་སོ། །རང་གི་ཕྱོགས་བ་ལང་ཉིད་བརྟག་པ་ལ་དབང་པོས་གཟུང་བར་བྱ་བ་ཡིན་པ་དེའི་ཕྱིར་འདི་ཁོ་ན་ཉིད་ལ་མ་ངེས་པ་ཡིན་ནོ་ཞེས་བྱ་བ་འདི་བདག་ཉིད་ཁས་བླངས་ཀྱི་མ་ངེས་པར་བརྗོད་པས་སྤོང་བར་བྱེད་དོ། །ཁོ་བོའི་ལན་ཡིན་ནོ། །སངས་རྒྱས་པ་ལ་བ་ལང་ཉད་བརྟག་པ་མེད་པར་འདོད་པ་དེས་ན་ལན་འགལ་བར་འགྱུར་རོ་ཞེ་ན། དེའི་ཕྱིར་བཤད་པ། གཏན་ཚིགས་དེ་ཡང་དབང་པོས་གཟུང་བར་བྱ་བ་ཡིན་པའི་ཕྱིར་རོ། །བ་ལང་ཉིད་དོན་དམ་པར་ཡོད་དམ་མེད་ཀྱང་རུང་སྒྲུབ་པར་བྱེད་པའི་ནུས་པ་ལ་བསྒྲུབ་པ་ནི་བཟློག་པ་ལ་ཡོད་པར་གནོད་པར་བྱེད་པའི་ཚད་མ་མི་འཇུག་པར་ཐེ་ཚོམ་གྱི་རྒྱུ་ཡིན་པའི་ཕྱིར་མ་ངེས་པ་ཉིད་ཡིན། །སྒྲུབ་པར་བྱེད་པའི་ནུས་པ་རབ་ཏུ་མ་བསྒྲུབས་པ་ནི་བསྒྲུབ་པར་བྱ་བ་དང་མེད་ན་མི་འབྱུང་བ་འདི་དང་ཞེས་བྱ་བར་སྦྱར་རོ། །སྒྲུབ་པར་བྱེད་པ་སྨོས་པ་ནི་དངོས་པོ་སྒྲུབ་པར་བྱེད་པའོ། །གང་གི་ཚེ་གནོད་པར་བྱེད་པའི་ཚད་མའི་སྟོབས་ཀྱིས་གཏན་ཚིགས་མེད་ན་མི་འབྱུང་བར་ཐམས་ཅད་བསྡུས་ནས་སྒྲུབ་པར་བྱེད་པ་ཡིན་ཏེ། དབང་པོའི་ཤེས་པའི་གཟུང་བར་བྱ་བའི་རང་སྣང་བའི་ཤེས་པ་གང་ཅུང་ཟད་ཅིག་སྐྱེད་པའི་ཕྱིར་མི་རྟག་ན་དེ་ཐམས་ཅད་ཐམས་ཅད་ཀྱི་ཚེ་ཤེས་པའི་ཡུལ་དུ་ཐལ་བར་འགྱུར་བའི་རེས་འགའ་ཞིག་ཀྱང་མ་ཡིན་ནོ། །ད་ནི་བ་ལང་ཉིད་ལ་སོགས་པ་ལ་ཡང་གནོད་པར་བྱས་ན་འཆི་བའི་ཕྱིར། བ་ལང་ཉིད་ལ་གཏན་ཚིགས་མི་འཇུག་པར་ཐེ་ཚོམ་མེད་པ་ཡིན་ནོ། །དེ་དག་གིས་ནི་ཞེས་བྱ་བ་ནི་གོ་སླའོ། །དེ་ཡང་མ་ངེས་པའི་གཏན་ཚིགས་ལྟར་སྣང་བ་ལས་འདས་པ་ཡིན་ནོ་ཞེས་བྱ་བ་བསྡུས་པའི་དོན་ཏོ། །དེ་ནི་ཐེ་ཚོམ་ཟ་བའི་གཏན་ཚིགས་ཉིད་ཀྱི་སྒོ་ནས་སྒྲུབ་མི་ནུས་པའི་མ་ངེས་པའི་གཏན་ཚིགས་ཡིན་ནོ་།ཕྱོགས་གཅིག་གཞན་ལ་ཞུགས་པ་ཡང་དངོས་པོའི་ཕྱིར་གཉི་ག་ལ་གྲུབ་ན་ཅིག་ཤོས་ལ་ཡང་མ་ཡིན་པས་དངོས་པོ་ལ་ཡང་མ་ངེས་པར་ཁྱད་པར་མེད་དོ། །ཇི་ལྟར་སྔར་ཇི་སྐད་བཤད་


DTG190_Page_0238
[མ་དཔེ་གཟིགས་ན་འདིར་གནོན།]

མ་ཐག་པའི་གཏན་ཚིགས་དེ་ཡང་ཡོད་དམ་མེད་ཀྱང་རུང་ཞེས་བྱ་བ་ཅིག་ཤོས་ཀྱི་ཕྱོགས་ལ་ཞུགས་པ་མ་ངེས་པ་ཡིན་པའི་ཕྱིར་མ་ངེས་པ་བཤད་པ་ཡིན་ནོ། །མི་འདོད་པ་དང་ཉེས་པ་ཐམས་ཅད་མེད་པར་སེམས་པ་ན་སྒྲུབ་པ་དང་སུན་འབྱིན་པ་གཉི་ག་ལ་རབ་ཏུ་གྲུབ་པ་ཡིན་ནོ་ཞེས་བྱ། ཇི་ལྟར་དེ་དག་དང་འགལ་བར་མི་འགྱུར་ཞེ་ན། དེ་ཡང་དེ་ལྟ་མ་ཡིན་ཏེ། ངེས་པར་སུན་འབྱིན་པར་འདོད་ནས་སྨྲས་པའི་ཕྱིར་རོ། །དེ་ཉིད་ཀྱི་ཕྱིར་གཞན་ཡང་བསྒྲུབ་བྱ་ཡིན་ལ་ལྟོས་པ་ཡིན་ནོ་ཞེས་དེ་མ་ཐག་ཏུ་བཤད་ཟིན་ཏོ། །དེ་ལྟར་གྱུར་ན་གཉི་ག་ལས་གཅིག་ཀྱང་དེའི་ཚེ་ཕམ་པ་དང་རྒྱལ་བ་དག་ཏུ་མི་འགྱུར་རོ། །གང་གི་ཚེ་འོད་བྱེད་ཀྱི་དམ་བཅའ་བ་དང་འགལ་བའི་མདོའི་འགྲེལ་པ་འཆད་པའི་དཔེ་ལྟར་སྣང་བ་ཞེས་བྱ་བ་ལ་སོགས་པ་སྨོས་པའི་ཚེ་ཡང་རིགས་པ་ཅན་ཡན་ལག་གཞན་པར་སྨྲ་བ་ནི་མི་རིགས་སོ་ཞེས་སངས་རྒྱས་པས་བརྗོད་པ་ནི་མཛེས་པ་ཡིན་ནོ་ཞེས་དགོངས་སོ། །གཏན་ཚིགས་ལྟར་སྣང་པ་བསྟན་པའི་ཚིག་དེ་ལྟར་སྣང་བ་ཡང་དེའི་ཚིག་གི་སྒོ་ནས་གོ་བ་ཡིན་པ་དེའི་ཕྱིར་སྒྲུབ་པར་བྱེད་པ་གཞན་མེད་པར་ཐལ་བར་འགྱུར་བའི་ཕྱིར་རོ། །དེས་ཞེས་བྱ་བ་ནི་ལྷག་མའོ། །འོ་ན་དཔེ་ལྟར་སྣང་བ་དག་གཏན་ཚིགས་ལྟར་སྣང་བ་རྣམས་ཀྱི་ནང་དུ་འདུས་པར་འདོད་ན་གཏན་ཚིགས་དང་དཔེ་ཡན་ལག་གཞན་དུ་མི་འགྱུར་རོ་ཞེས་བྱ་བའི་ཚིག་འབྲེལ་པ་མེད་པ་ཡིན་ནོ་ཞེ་ན། དཔེ་ལྟར་སྣང་བ་ཞེས་བྱ་བ་ལ་སོགས་པ་སྨོས་ཏེ། འདི་དང་འདིར་སྦྱོར་བ་བརྗོད་པ་ནི། གང་དང་གང་དོན་གཞན་དུ་གྱུར་པ་དེ་ནི་དེར་སྣང་བར་བརྗོད་པ་ལ་ཡིན་ལ། གང་དེར་སྣང་བ་རྣམས་ནི་དེའི་ནང་དུ་འདུས་པ་ཡང་མ་ཡིན་ཏེ། དཔེར་ན་མངོན་སུམ་ལ་སྣང་བ་རྣམས་དང་རྗེས་སུ་དཔག་པ་ལ་སྣང་བ་བཞིན་ནོ། །ཁྱེད་ཀྱི་གཏན་ཚིགས་དང་དཔེ་དོན་གཞན་དུ་གྱུར་པ་ཡང་དེ་བཞིན་དུ་ཡིན་པས་ཞེས་བྱ་བ་ནི་ཁྱབ་པར་བྱེད་པ་དང་འགལ་བ་དམིགས་པ་ཡིན་ནོ། །དེ་བས་ན་དཔེ་ཡང་གཏན་ཚིགས་ཀྱི་ནང་དུ་འདུས་པར་འདོད་པར་བྱའོ། །དེ་ལྟ་ན་ཡང་དཔེ་ལོགས་ཤིག་ཏུ་སྒྲུབ་པར་བྱེད་པའི་ཡན་ལག་ཏུ་འགྱུར་ན་ལོགས་ཤིག་ཏུ་འཇུག་པ་མེད་པའི་ཕྱིར་རོ། །བྱེད་པ་གཅིག་པའི་ཕྱིར་རོ་ཞེས་བྱ་བའི་དོན་ཏོ། །དཔེ་གང་ཡིན་པ་དེ་ནི་ཞེས་བྱ་བ་ལ་སོགས་པ་དེ་ལྟར་དམ་བཅའ་བ་དང་གཏན་ཚིགས་ཡང་འགལ་


DTG190_Page_0239
[མ་དཔེ་གཟིགས་ན་འདིར་གནོན།]

པར་བཤད་པ་དེ་ཡང་གཏན་ཚིགས་ལྟར་སྣང་བའི་ནང་དུ་འདུས་པའི་ཕྱིར་ལོགས་ཤིག་ཏུ་བརྗོད་པར་མི་བྱའོ་ཞེས་བསྟན་ཏོ། །འདིས་ནི་དམ་བཅའ་བ་ལ་གནོད་པ་དག་ཀྱང་འདི་བཞིན་དུ་ཁོང་དུ་ཆུད་པར་བྱའོ། །གཞན་ཡང་ཞེས་བྱ་བ་ལ་སོགས་པ་སྨོས་ཏེ། རྒོལ་བའི་ཕྱོགས་སྔ་མ་སྨོས་པ་ནི་རྒོལ་བའི་ཕྱོགས་ཕྱི་མ་མ་ཤེས་པ་ལ་སོགས་པ་གཏན་ཚིགས་ལྟར་སྣང་བ་དང་འབྲེལ་བ་ཡོད་པར་བསྟན་པའི་དོན་ཏོ། །དེ་དང་འབྲེལ་པ་ཞེས་བྱ་བ་ནི་གཏན་ཚིགས་ལྟར་སྣང་བ་དང་འབྲེལ་པའོ། །འོན་ཏེ་དོན་གཞན་གོ་བར་བྱེད་པ་ལ་སོགས་པ་བརྗོད་པས་གཏན་ཚིགས་ལྟར་སྣང་བ་དང་འབྲེལ་པའི་ཕྱིར་རོ། །དེ་དག་ནི་ནང་དུ་འདུ་བ་མ་ཡིན་ནོ་ཞེ་ན། དེ་ཡང་མ་ཡིན་ཏེ། དོན་གཞན་གོ་བར་བྱེད་པ་ལ་སོགས་པ་ཡང་གཏན་ཚིགས་ལ་ནུས་པ་མེད་པ་ཉིད་ཡོད་པའི་ཕྱིར་རོ། །ཅིའི་ཕྱིར་ཞེ་ན། ནུས་པ་མེད་པ་ལ་རིགས་པའི་སྟོབས་ཀྱིས་རྒོལ་བས་བསྒྲུབ་པར་བྱ་བ་བསྟན་པ་ཡིན་ནོ་ཞེས་བྱ་བ་ལྷག་མའོ། །དོན་གཞན་གྱིས་གོ་བར་བྱེད་པ་ལ་སོགས་པ་ཕྱིན་ཅི་ལོག་པ་ཡིན་ནོ་ཞེས་བྱ་བར་དགོངས་སོ། །ལན་ཕྱིས་འབྱུང་བ་དེ་ལ་ཡང་དམ་བཅའ་བ་འདི་ཡོད་པ་མེད་པ་དེ་ལྟོས་པ་ཅི་ཞིག་བྱ་ཅི་ཡང་མ་ཡིན་ནོ་ཞེས་བྱ་བའི་དོན་ཏོ། །ཡོངས་སུ་བགྲང་བར་མི་ནུས་པ་དང༌། གང་དག་སྨན་པར་རབ་ཏུ་སྨྲ་བ་དག་གིས་འདོད་པ་དེ་དང་དེ་བཞིན་དུ་སྨན་ལ་སོགས་པ་ལ་བརྗོད་པའི་རྒོལ་བ་གང་དག་ཡིན་པ་དེ་དག་ནི་དམ་བཅའ་བ་ཡོད་པ་མེད་པ་ལ་སོགས་པ་དེ་དག་གོ །ཉེ་བར་བཀོད་པ་དེ་ནི་ཅི་ཞག་ཡིན། དེ་ལྟར་གྱུར་པའི་སྐྱོན་ཡང་འགའ་ཞིག་ཡིན་ཞེ་ན། དེ་ལྟ་བུ་ནི་ཧ་ཅང་ཐལ་བར་འགྱུར་བའི་ཕྱིར་རོ་ཞེས་བྱ་བ་སྨོས་ཏེ། དེ་བཞིན་དུ་གཞན་ཡང་བརྒྱལ་བ་དང་མྱོས་པ་དང་འཁྲུལ་པ་དང་སྡུག་བསྔལ་ལ་སོགས་པ་ནི་སོགས་པའི་སྒྲ་བསྡུས་པ་ཡིན་ནོ། །དེའི་ཕྱིར་དེ་དག་ཀྱང་འབྲེལ་པ་མེད་པས་མཁས་པའི་དབང་པོ་རྣམས་ཀྱིས་རྣམ་པ་འདི་ལྟ་བུ་རིགས་པ་ཡིན་པའི་ཕྱིར་རོ་ཞེས་བྱ་བར་དགོངས་སོ། །གལ་ཏེ་འདིར་རྣ་མ་ཕུག་གི་རང་ཉིད་ནུས་པ་མེད་པ་ཟློག་པར་བྱེད་པ་རགས་པ་ཡིན་པའི་ཕྱིར་འདི་ཚར་གཅད་པའི་གནས་མ་ཡིན་ཞེ་ན། དབང་པོ་དང་ཕྱིར་རྒོལ་བ་ཉེ་བ་ན་དམ་བཅའ་བ་དོན་ཁྱད་དུ་གསོད་པར་བྱེད་པ་ཞེས་བྱ་


DTG190_Page_0240
[མ་དཔེ་གཟིགས་ན་འདིར་གནོན།]

བ་འབྲེལ་པ་མེད་པར་བརྗོད་པ་ཡིན་ནོ། །བསམ་པ་ཡོངས་སུ་མི་ཤེས་པའི་ཕྱིར་རོ། །སྒྲ་ནི་འཇིགས་པའི་ཕྱིར་བརྗོད་པར་མི་བྱའོ། །འོན་ཀྱང་དམ་བཅའི་དོན་ལྡན་པ་དང་རྣམ་པར་དབྱེ་བས་གསལ་བར་མི་བྱེད་དོ་སྙམ་ནས་སྨྲས་པ། སྤྱིའི་དངོས་པོ་ལ་བརྟེན་ནས་གསལ་བའི་ཕྱིར་འཁྲུལ་བར་མི་འགྱུར་རོ་ཞེས་བྱ་བ་ཚར་གཅད་པའི་གནས་ཡིན་ཏེ། སྔར་དམ་མ་བཅས་པའི་ཕྱིར་རོ། །མ་ངེས་པའི་སྐྱོན་གྱིས་གཏན་ཚིགས་བགག་པས་དམ་བཅའ་བ་ཁྱད་པར་དུ་གསོད་པར་བྱེད་པ་ཚར་གཅད་པའི་གནས་ཡིན་ནོ་ཞེས་བྱ་བར་དེ་ལ་བརྗོད་པར་བྱའོ། །གལ་ཏེ་རྒོལ་བ་དོགས་པ་དང་བཅས་པ་ཉིད་ཀྱི་ནང་ནས་མཛངས་པའི་འགའ་ཞིག་མ་ངེས་པའི་སྐྱོན་རྗོད་པར་བྱེད་དེ། དམ་བཅའི་དོན་གྱི་འབྲས་བུར་བྱེད་པ་ནི། རང་གི་འདོད་པ་བསལ་བ་ཡིན་ནོ། །དེའི་ཚེ་སྐྱོན་གཞན་འགའ་ཡང་མེད་དོ། །དམ་བཅའ་བ་བཀོད་པ་ཡང་ཅིའི་ཡན་ལག་ཡིན། འོན་ཏེ་འདོད་པ་མེད་ན་ཡོད་པའི་ཕྱིར་དམ་བཅའ་བ་ཁྱད་པར་དུ་བྱེད་དོ། །དེའི་ཚེ་ཡང་མ་ངེས་པའི་སྐྱོན་ཁོ་ནས་ཚར་གཅད་པའི་ཕྱིར་དམ་བཅའ་བ་ཉེ་བར་བཀོད་པ་ལ་ལྟོས་པ་ཅི་ཞིག་ཡོད། ཅི་ཞིག་སྤོང་ཞིང་ཅི་ཞིག་གསལ་བར་བྱེད། །དམ་བཅའ་བ་གཞན་པར་གྱུར་པ་ཞེས་བྱ་བ་འདི་ནི་ལོགས་ཤིག་ཏུ་བརྗོད་པར་མི་བྱའོ། །གཏན་ཚིགས་ཁྱད་པར་མེད་པ་ཡིན་ནོ་ཞེས་བྱ་བ་ལ་སོགས་པ་མདོ་ལས་བསྟན་པས། འདིར་དཔེ་གསལ་བར་བྱེད་པ་ཡིན་ནོ་ཞེས་བྱ་བའི་དོན་ཏེ། །སེར་སྐྱའི་གཙོ་བོས་ཚད་མ་སྒྲུབ་པར་འདོད་པས་ཤིང་ལ་སོགས་པའི་གསལ་བ་ནི་རང་བཞིན་ཡིན་ཏེ། ཚད་ཡོད་པའི་ཕྱིར། བུམ་པ་དང་ཁམ་ཕོར་ལ་སོགས་པ་བཞིན་ནོ། །རང་བཞིན་གཅིག་པ་ཡིན་ནོ་ཞེས་བྱ་བ་སྦྱར་རོ། །རང་བཞིན་གཟུགས་ལ་སོགས་པའི་རྒྱུ་ཡིན་ནོ། །རང་བཞིན་གྱི་འགྱུར་བ་ནི་ཚོགས་གང་ཡིན་པ་དེ་གཙོ་བོ་ཡིན་ལ། གྲུ་བཞི་དང་ཟླུམ་པོ་ལ་སོགས་པ་ནི་གྱུར་བ་ཡིན་ནོ། །གྲངས་ཅན་འདོད་དོ། །ཇི་ལྟ་བ་སྔོན་དུ་སོང་བའི་རྒྱུ་དང༌། འབྲས་བུ་མེད་དོ་སྙམ་ནས་སྨྲས་པ། ཕྱིར་རྒོལ་བ་གཏན་ཚིགས་འདི་འཁྲུལ་པ་ཡིན་ནོ་ཞེས་བརྒལ་ཞིང་བརྟག་པར་བྱེད་པ་དང༌། རྟ་དང་བ་ལང་ལ་སོགས་པའི་རང་བཞིན་དུ་མ་དང་བུམ་པ་དང་ཁམ་ཕོར་ལ་


DTG190_Page_0241
[མ་དཔེ་གཟིགས་ན་འདིར་གནོན།]

སོགས་པ་གཅིག་གི་རང་བཞིན་ཡོངས་སུ་གྱུར་པ་ཚད་མ་ཐོང་བ་ཡིན་ནོ་ཞེས་རྒོལ་བས་དེ་ལྟར་བརྒལ་ཞིང་བརྟག་པར་བྱེད་པ་ལ་གལ་ཏེ་གཙོ་བོར་སྨྲ་བས། བརྒལ་ཞིང་བརྟག་པ་འགེགས་པ་ནི་འདུ་བའི་འབྲེལ་པས་འགྱུར་བ་རྣམས་རང་བཞིན་དུ་མཐོང་བ་ཡིན་ནོ། །གཏན་ཚིགས་ཁྱད་པར་དང་བཅས་པས་འཁྲུལ་པ་མ་ཡིན་ནོ་ཞེ་ན། ཇི་ལྟར་རང་བཞིན་གཅིག་དང་འདུ་བ་ཡིན། བདེ་བ་དང་སྡུག་བསྔལ་བ་དང་མ་རིག་པ་དང་འབྲེལ་པའི་ཡོངས་སུ་གྱུར་པའི་གསལ་བ་འདི་དག་ཚད་མ་དང་ལྡན་པར་འཛིན་པར་འགྱུར་རོ། །ཐམས་ཅད་དུ་དེའི་འབྲས་བུ་མཐོང་བ་ཡིན་ནོ་ཞེས་བསམས་པ་ཡིན་ནོ། །འདི་ལྟར་བདེ་བ་ཤས་ཆེ་བ་ནི་དང་བ་དང༌། སྤངས་པ་དང་སྐྱེ་བ་དང༌། ངལ་སོས་པ་དང་དགའ་བ་དང་མགུ་བ་དག་འབྲས་བུ་ཡིན་ནོ། །རྡུལ་ཆ་ཤས་ཆེ་བར་གྱུར་པ་ན། སྐམས་པ་དང༌། གདུང་བ་དང༌། རེངས་པ་དང༌། ཞེ་སྡང་བའོ། །མུན་པ་ཤས་ཆེ་བ་ནི་སྤྱོད་པ་དང༌། སྒྲུབ་པ་དང་ཉམས་པ་དང༌། ངོ་མཚར་བ་དང༌། གནག་པའོ། །འདི་དག་ཐམས་ཅད་ཐམས་ཅད་དུ་ཇི་སྐད་བཤད་པའི་ཁྱད་པར་ཐ་དད་པ་ཉེ་བར་དམིགས་པའི་ཕྱིར་རོ། །དེའི་ཕྱིར་སྣ་ཚོགས་པ་ན་ཡོན་ཏན་གསུམ་གྱི་རང་བཞིན་ཡིན་ནོ། །དེས་ན་འདི་དག་ཅེས་བྱ་བ་ལ་སོགས་པ་ཚར་གཅད་པའི་རྒྱུ་བཤད་པ་ནི་འདིར་ཞེས་བྱ་བ་ལ་སོགས་པའི་དགག་པ་ནི་གོ་སླའོ། །སྒྲུབ་པར་བྱེད་པ་བརྗོད་པ་ནི། མི་འདོད་པའི་ཕྱིར་དང་རྣམ་པར་མི་ཆོད་པའི་ཕྱིར་དང༌། ཡོངས་སུ་མ་རྫོགས་པའི་ཕྱིར་རོ་ཞེས་བྱ་བའི་དོན་ཏོ། །ཇི་སྐད་བཤད་པའི་མཚན་ཉིད་ཅེས་བྱ་བ་ནི་གཅིག་གི་དབང་དུ་བྱས་པ་འགལ་བ་མེད་པའི་ཆོས་ནི་ཕྱོགས་ཀྱི་མཚན་ཉིད་དུ་བསྟན་ཏོ། །ཡོངས་སུ་གཟུང་བ་ནི་རྒོལ་བ་དང་ཕྱིར་རྒོལ་བ་དག་གིས་བྱས་པའོ། །གཏན་ཚིགས་ཀྱིས་བསྒྲུབ་བྱ་སྒྲུབ་པ་ནི། རང་བཞིན་འདི་གཏན་ཚིགས་ཀྱི་དབང་དུ་བྱས་ནས་བསྒྲུབ་བྱ་སྒྲུབ་པར་བྱེད་པ་ཞེས་བྱ་བའི་གནས་སྐབས་ཀྱི་རང་བཞིན་གྱི་དོན་ཏོ། །སྒྲ་ནི་རྟག་པ་ཡིན་ཏེ། རེག་བྱ་མ་ཡིན་པའི་ཕྱིར་རོ། །དེ་དང་འབྲེལ་བའི་ཕྱིར་དང་དེས་ཕན་མི་འདོགས་པའི་ཕྱིར་རོ་ཞེས་བྱ་བའི་དོན་ཏོ། །འདི་ལྟར་དངོས་པོ་སྒྲུབ་པ་མེད་ན་ཡང་འཆད་པ་པོ་ལ་སོགས་པའི་བཤད་པའི་


DTG190_Page_0242
[མ་དཔེ་གཟིགས་ན་འདིར་གནོན།]

རྣམ་པ་འགའ་ཞིག་རྟོགས་པའི་དོན་ཉིད་ཀྱིས་དོན་སྒྲུབ་པར་བྱེད་པའི་རིགས་པ་དེ་དག་རང་གིས་འདོད་པ་དང་མི་འགལ་བའི་ཕྱིར་ཞེས་ཤེས་པར་འགྱུར་རོ། །རེས་འགའ་ཞིག་ཕྱོགས་སྔ་མ་ཕྱི་མར་རྒོལ་བ་ཚར་གཅད་པའི་གནས་ཡིན་ནོ་ཞེས་བྱ་བ་བཤད་པའི་སྐྱོན་སྟོན་པར་བྱེད་པ་ཡིན་ན། རྒོལ་བས་སྒྲུབ་པར་བྱེད་པའི་ཡན་ལག་བརྗོད་པ་མེད་པར་གཞན་ཉེ་བར་འགོད་པ་དང༌། སྐྱོན་བརྗོད་པ་མེད་པར་འགྱུར་རོ། །དེ་ལྟ་མ་ཡིན་ན་གཉིས་ལས་གཅིག་ཀྱང་རྒྱལ་བ་དང་ཕམ་པར་རིགས་པ་མེད་པར་འགྱུར་རོ། །རྣལ་མའི་སྒྲུབ་པ་ཞེས་བྱ་བ་གཏན་ཚིགས་སུ་བརྗོད་དོ། །དེ་ལ་བྱས་པ་ཞེས་བྱ་བ་ནི། སྒྲུབ་པར་བྱེད་པ་ནུས་པ་བཀོད་པ་དག་གོ །གཞན་ནི་བསྒྲུབ་པར་བྱ་བ་མེད་པ་ཅན་མ་ཡིན་པ་ཞེས་བྱ་བ་ནི་སྒྲུབ་བྱེད་དུ་ཉེ་བར་བཀོད་པ་བསྒྲུབ་པའི་ཡན་ལག་མ་ཡིན་ནོ་ཞེས་བྱ་བའི་དོན་ཏོ། །ངོ་བོ་སྤངས་ནས་གཞན་ཡང་མིང་ལ་སོགས་པ་བརྗོད་པ་ཡང་ཕམ་པའི་གནས་ཡིན་ནོ་ཞེས་བྱ་བར་འགྱུར་རོ། །ཡི་གེའི་གོ་རིམས་བསྟན་པ་བཞིན་དུ་དོན་མེད་པར་འགྱུར་ཏེ། གང་ལ་ཡི་གེ་ཉེ་ཚེའི་གོ་རིམས་ཀྱི་ཚིག་དང་ངག་ཀྱང་མ་ཡིན་པ་རྣལ་མའི་དོན་དུ་གྲགས་པའི་དོན་གཞན་སྟོན་པ་ན་སེང་གེའི་གོ་རིམས་འདོད་པ་ཞེས་བྱ་བ་ཁྱད་པར་མ་འབྲེལ་པ་ཉིད། ཡི་གེའི་གོ་རིམས་བསྟན་པ་ཉི་ཚེ་ནི་དོན་མེད་པ་སྟེ་འོན་ཀྱང་གང་སྒྲུབ་པར་བྱེད་པའི་ཡན་ལག་ཅུང་ཟད་ཀྱང་མ་གྲུབ་པ་ཉིད་ཡིན་གྱི་མ་གྲུབ་པ་ནི་མ་ཡིན་ནོ། །སྒྲའི་ངོ་བོར་གྲུབ་པར་བརྗོད་པ་ནི་དེ་ཉིད་དོན་མེད་པ་ཡིན་ཏེ། ཅིའི་ཕྱིར་ཞེ་ན། བསྒྲུབ་བྱ་སྒྲུབ་པ་ལ་ཉེ་བར་སྦྱོར་བའི་བརྗོད་པ་མེད་པའི་ཕྱིར་རོ། །བསྒྲུབ་བྱ་སྒྲུབ་པ་ལ་ཉེ་བར་སྦྱོར་བ་མེད་ཀྱང་དགོས་པ་གཞན་ཡོད་པ་ཡིན་ནོ་ཞེས་ཀྱང་བསམ་པར་མི་བྱ་སྟེ། བརྗོད་ཀྱང་དགོས་པ་མེད་པའི་ཕྱིར་རོ། །བསྒྲུབ་བྱ་སྒྲུབ་པ་ཉིད་ལ་ཆེད་དུ་གཏད་པའི་ཕྱིར་དགོས་པ་གཞན་ཉིད་ནི་དོན་མེད་པ་ཁོ་ན་སྟེ། དེ་ཉིད་སྐབས་ཡིན་ནོ་ཞེས་བྱ་བར་དགོངས་སོ། །དེའི་ཕྱིར་ཁྱད་པར་གྱི་རྣམ་པ་ཁས་ལེན་པ་ནི་ཡི་གེའི་རིམས་བསྟན་པ་བཞིན་དུ་འབྲེལ་པ་མེད་པ་ཡིན་ནོ། །གཞན་གྱིས་སྨྲས་པ་བསྒྲུབ་བྱ་སྒྲུབ་པར་བྱེད་པ་ལ་ཉེ་བར་སྦྱོར་བའི་ཡན་ལག་མ་ཡིན་པས་དོན་མེད་པར་མི་འདོད་པ་ཡིན་ནོ། །འོན་ཀྱང་བྱ་རོག་གི་སྐད་ལྟ་བུ་གང་གི་ཚེ་འགའ་ཞིག་ལ་


DTG190_Page_0243
[མ་དཔེ་གཟིགས་ན་འདིར་གནོན།]

ཡང་དོན་ཡོད་པ་མ་ཡིན་ནོ། །དེ་བཞིན་དུ་དོན་གཞན་ལ་དོན་མེད་པ་ལ་སོགས་པ་ནི་མ་ཡིན་ཏེ། འདིས་བསྡུས་པ་དེ་ལ་དོན་གྱི་ཆ་འགའ་ཞིག་ཡོད་པའི་ཕྱིར་རོ་ཞེ་ན། སློབ་དཔོན་གྱིས་སྨྲས་པ། རྒོལ་བ་མ་ཡིན་པ་གང་ཡང་རུང་བ་ཞིག་དོན་མེད་པར་བརྗོད་ན་རྒོལ་བ་བཞིན་དུ་ཚར་གཅོད་པའི་གནས་ཅིས་མ་ཡིན། ཇི་ལྟར་ཡིན་ཞེ་ན། ཚར་གཅོད་པའི་རྒྱུ་མཚན་དོན་མེད་པར་བརྗོད་པའི་རྒོལ་བ་མ་ཡིན་པ་ལ་ཁྱད་པར་མེད་པའི་ཕྱིར་རོ། །མ་ཡིན་ཏེ་ཞེས་བྱ་བ་ལ་སོགས་པ་ནི་རྒོལ་བའོ། །སློབ་དཔོན་གྱིས་དེ་འདིར་ནི་རྒོལ་བ་བཞིན་དུ་སྐབས་མ་ཡིན་པ་འོང་བར་འགྱུར་ཏེ། དེའི་དོན་མེད་པར་བརྗོད་པ་འདི་ཉིད་ཀྱིས་རྒོལ་བ་སྒྲུབ་པའི་ཡན་ལག་མ་ཡིན་པ་དང༌། ཐམས་ཅད་དུ་རྩོད་པ་མཚུངས་པར་དེ་ལ་དོན་མེད་པ་རྗོད་པར་བྱེད་པ་ཡིན་ནོ་ཞེས་བྱ་བ་ཐ་སྙད་དུ་བྱའོ། །དཔེ་ལ་གཅིག་ལས་དེ་བྱའོ་ཞེས་འདོད་ཏོ། །དེ་ལ་བླང་བར་བྱ་བ་ནི་ཅུང་ཟད་ཅིག་མེད་དོ། །དོན་མེད་པར་མངོན་པར་བརྗོད་པ་འདིས་གང་དང་གང་བརྗོད་པ་ལ་ནི་དོན་ཅུང་ཟད་ཅིག་ཀྱང་མེད་པའི་ཕྱིར། དེ་དག་ཀྱང་འགལ་བ་མེད་པ་ཡིན་ནོ། །གང་གི་ཕྱིར་ཡི་གེའི་གོ་རིམས་བསྟན་པ་ཐམས་ཅད་དུ་དོན་མེད་པ་ཡིན་ཏེ། རྣམ་པ་འགའ་ཞིག་ལ་ཡང་དོན་དང་ལྡན་པའི་ཕྱིར་རོ། །དེའི་ཕྱིར་འདིར་རྒོལ་བའི་ཡི་གེའི་གོ་རིམས་དོན་མེད་པ་ཉིད་དོ། །དེ་ལ་དོན་གཞན་ལ་སོགས་པ་མཚུངས་པ་ཡིན་པར་བསྟན་པར་བྱའོ། །མཆན་ཁུང་ཚོར་བ་ཞེས་བྱ་བ་ལ། འདིར་སོགས་པའི་སྒྲས་ནི་མཆོང་བ་དང་ཐལ་མོ་རྡེབ་པ་དང༌། གར་བྱེད་པ་ལ་སོགས་པ་གཟུང་ངོ༌། །ལན་གསུམ་པ་བརྗོད་པ་ཞེས་བྱ་བ་ལ་ལན་གསུམ་བརྗོད་པའི་འབྲས་བུ་ནི་རིགས་པ་ཉིད་བསྟན་པ་ཡིན་ཏེ། ལན་ཅིག་བརྗོད་པས་དོན་གསལ་བར་རེས་འགའ་ཞིག་ཀྱང་མི་འགྱུར་བའི་ཕྱིར་ལན་གསུམ་བརྗོད་པའི་འབྲས་བུ་ཡིན་ནོ། །ཡང་ཅིའི་ཕྱིར་ཚད་མ་མཁས་པའི་ཚིག་དང་ངག་ལས་ཤེས་པར་མི་འགྱུར་ཞེ་ན། མི་གསལ་བ་ཞེས་བྱ་བ་ལ་སོགས་པ་སྨོས་ཏེ། མི་གསལ་བ་ཅུང་ཟད་ཅིག་བརྗོད་པའི་ཕྱིར་རོ། །ཅིའི་ཕྱིར་དེ་ལྟར་རབ་ཏུ་སྦྱོར་བ་ཡིན་ཞེ་ན། ནུས་པ་མེད་པར་བསྡུས་པའི་ཕྱིར་རོ། །དོན་གསལ་བའི་རབ་ཏུ་བརྗོད་པའི་སྟོན་པ་ལས་སྐྱོན་འཆད་པར་འགྱུར་ཞེ་ན།


DTG190_Page_0244
[མ་དཔེ་གཟིགས་ན་འདིར་གནོན།]

འཇིགས་པས་རབ་ཏུ་སྦྱོར་རོ། །སྒྲུབ་པ་དང་སུན་འབྱིན་པ་འདི་ཡང་རྒོལ་བ་དང་མཚུངས་པས་སྐྱོན་བརྗོད་པ་ཡང་དེ་ལྟ་བུར་གྱུར་པའི་ཚར་གཅད་པའི་རྒྱུར་གྱུར་ཏེ། འདི་དོན་མེད་པ་ལས་ཐ་དད་པའི་ཕྱིར་རོ། །འདི་ལྟར་མི་གསལ་བའི་སྒྲ་རྣམས་ཀྱིས་རྣལ་མའི་དོན་དང་འབྲེལ་པར་བྱེད་པ་ཉིད་སྨྲ་བར་འགྱུར་རམ་འདི་ཕྱིན་ཅི་ལོག་ཏུ་འགྱུར། སྔར་གྱི་གནས་སྐབས་ལ་ནུས་པ་མེད་པ་ནི་མ་ཡིན་ནོ། །དེ་ལ་ཚོགས་པ་ལ་སོགས་པ་དེ་བརྗོད་པས་བླུན་པོས་ཁོང་དུ་ཆུད་པ་མེད་པའི་ཕྱིར་མཁས་པས་ཚར་གཅད་པར་འོས་པ་མ་ཡིན་ནོ། །སྨྲ་བ་བོས་ཉན་པ་པོ་ལ་གང་དག་ཁོང་དུ་ཆུད་པར་མི་བྱེད་པ་འདི་དག་ནི་ཚར་གཅད་པར་འོས་པ་མ་ཡིན་ནོ་ཞེས་དགོངས་སོ། །གཞན་གྱིས་སྨྲས་པ། གལ་ཏེ་ཚོགས་པའི་ཤེས་རབ་ཅེས་བྱ་བ་ནི་རིགས་པར་སྨྲ་བ་ལ་ལན་གདབ་པ་དང་རིགས་པར་སྨྲ་བར་བཤད་པར་བྱ་བ་ཞེས་བྱ་བར་སྦྱར་རོ། །བླུན་པོའི་ཚོགས་པ་ལ་སོགས་པ་མི་ཤེས་པའི་ཕྱིར་དང༌། རྒོལ་བ་བསྟན་པར་མི་ནུས་པའི་ཕྱིར་བྱས་ཀྱང་རྒྱལ་བར་འགྱུར་བ་མ་ཡིན་ཏེ། ཕྱིར་རྒོལ་བས་ཤེས་ནས་རྒྱལ་བར་རྣམ་པར་འཇོག་པ་ཡིན་ནོ། །ཚོགས་དང་ཕྱིར་རྒོལ་བ་མི་ཤེས་པ་དག་ལ་སྟོན་པར་ནུས་པ་གང་ཡིན་པ་དེ་ནི་འབྲས་བུའོ། །རྣམ་པར་རྟོག་པའི་དབང་དུ་བྱས་ནས་བཤད་པ་དང་འབྲེལ་པ་མེད་པར་བརྗོད་པ་དོན་མེད་པ་ཉིད་ཡིན་པའི་ཕྱིར་རོ། །ཚིག་དུ་མས་ཞེས་བྱ་བ་ནི་ཚིག་དུ་མའི་འབྲེལ་པ་མེད་པའི་དོན་སྟོན་པར་བྱེད་པ་ཉིད་གསལ་བར་བྱའོ། །ངག་གི་དོན་ལ་འབྲེལ་པ་མེད་པར་སྟོན་པར་བྱེད་པ་ཉིད་ནི་སྐབས་སུ་བབ་པ་སྟོན་པར་བྱེད་པ་ཡིན་ནོ། །བསྡུས་ནས་བསྟན་པ་མེད་པ་ཉིད་ཚར་གཅད་པའི་གནས་ཡིན་ཏེ། དཔེར་བརྗོད་པ་ན། །སེའུ་བཅུ་ཁུར་བ་དྲུག་སྣོད་དང༌། །རི་དགག་པགས་པ་རྩྭའི་གོང་བུ། །དེ་ནས་བརྫུན་མའི་བུ་མོ་འདི། །སྦ་ཡ་ཀྲི་ཏའི་བ་ཤིའོ། །ཞེས་བྱ་བ་ལྟ་བུའོ། །འདིར་ཡང་དྭ་ར་དྭ་ཛའི་འབྲེལ་བ་མེད་པ་དང་དོན་མེད་པ་དག་ཐ་མི་དད་པར་གཞག་པར་བྱ་བར་མི་ནུས་ཏེ། དེ་ལ་ལ་ཡི་གེ་ཙམ་འདི་ནི་ཚིག་དང་འབྲེལ་པ་མེད་པ་བཞིན་ནོ་ཞེས་སོ། །དེ་ཉིད་སློབ་དཔོན་གྱིས་སྤོང་བ་མཛད་པ་འདི་ནི་ཡི་གེ་ཞེས་བྱ་བ་ལ་སོགས་པའི་ཡི་གེའི་འབྲེལ་པ་མེད་པ་གང་ཡིན་པའི་དོན་མེད་པ་ཡིན་ནོ་ཞེས་བྱ་བར་སྦྱར་རོ། །


DTG190_Page_0245
[མ་དཔེ་གཟིགས་ན་འདིར་གནོན།]

འདི་ནི་ཞེས་བྱ་བ་སྨོས་པས་ནི་འདོད་པ་ཉིད་བསྟན་པའི་དོན་ཏོ། །མི་འདོད་པའི་དོན་ནི་ཡི་གེ་འབྲེལ་པ་མེད་པ་ནི་དོན་མེད་བཞིན་དུ་ཚིག་དག་ཀྱང་འབྲེལ་པ་མེད་པས་ལོགས་ཤིག་ཏུ་མི་འགྱུར་རོ། །དོན་མེད་པས་འབྲེལ་བ་མེད་པ་ཉིད་དུ་འདོད་ན་འབྲེལ་པ་མེད་པའི་ངག་གིས་བསྡུས་པའི་ཕྱིར་ལོགས་ཤིག་ཏུ་བརྗོད་པར་མི་བྱ་བར་དེས་སྨྲས་པ་མ་ཡིན་ནམ། གཉིས་ཀ་བསྡུས་པའི་ཕྱིར་དོན་དང་འབྲེལ་པ་ཉིད་མི་རིགས་སོ། །ཅིའི་ཕྱིར་ཞེ་ན། ཚིག་གི་དོན་དང་འབྲེལ་པ་མེད་པ་དང་དོན་མེད་པས་འབྲེལ་པ་མེད་པའི་ངག་དོན་མེད་དུ་ཟིན་ཀྱང་ཡི་གེའི་གོ་རིམས་ཙམ་གྱིས་མཚན་ཉིད་དང་འབྲེལ་བའི་ཕྱིར་རོ། །དོན་མེད་པར་བརྒྱ་ལ་བརྗོད་ན་ཅི་ཞིག་བརྗོད་པ་ཡིན། །གང་ལ་དོན་འབའ་ཞིག་ཁོ་ན་མེད་པ་འམ་ཡི་གེའི་གོ་རིམས་ཙམ་ཡིན་ཏེ། ཚིག་དང་ངག་ལ་འབྲེལ་བ་མེད་པ་གང་བསྒྲུབ་བྱ་སྒྲུབ་པའི་སྦྱོར་བ་ཡང་རྣམ་པ་ཐམས་ཅད་དུ་དོན་མེད་པ་ཡིན་པ་དེའི་དེའི་ཕྱིར་དོན་དང་ལྡན་པ་མ་ཡིན་པས་བསྡུས་ནས་གཅིག་ཏུ་བྱེད་པ་ཡིན་ནོ་སྙམ་ནས་དེ་ལྟ་བུའི་རྣམ་པའི་ཞེས་བྱ་བ་ལ་སོགས་པ་སྨོས་ཏེ། རྩོད་པ་ངན་པ་དེ་དག་ལོགས་ཤིག་ཏུ་བརྗོད་པ་ལ་ཐལ་བར་འགྱུར་རོ་ཞེས་བྱ་འདིར་ཧ་ཅང་ཐལ་བར་འགྱུར་བ་བརྗོད་དོ། །ཅུང་ཟད་ཙམ་གྱི་ཁྱད་པར་འགའ་ཞིག་བསྟན་པར་ནུས་པ་མ་ཡིན་ནོ་ཞེས་བྱ་བར་དགོངས་སོ། །འོན་ཏེ་དོན་མེད་པ་དང་འབྲེལ་པ་མེད་པ་དག་བསྡུས་པ་དག་བསྟན་པ་སྐྱོན་ནམ་རབ་ཏུ་དབྱེ་བའི་ཡོན་ཏན་མ་མཐོང་བས་རྐང་མིག་གིས་བསྡུས་ནས་སྟོན་པར་བྱེད་པ་ཅི་ཡང་མ་ཡིན་ནོ་ཞེ་ན། དེ་ལེགས་པར་མ་བསླབས་པ་ཡིན་ནོ་སྙམ་དུ་དགོངས་ནས་གང་དུ་བསྡུས་པ་བསྟན་པ་ཞེས་བྱ་བ་ལ་སོགས་པ་སྨོས་སོ། །མཚན་ཉིད་ཇི་ལྟ་བ་བཞིན་དོན་གྱི་དབང་གིས་ཞེས་བྱ་བ་ནི་ཡུལ་མ་བསྟན་པ་དང་ཡུལ་མེད་པ་ལ་སྒྲུབ་པ་འཇུག་པར་མ་གྱུར་ཅིག་སྙམ་ནས་སྒྲུབ་པར་བྱེད་པའི་མཚན་ཉིད་སྟོན་པ་དམ་བཅའ་བ་སྔོན་དུ་བརྗོད་དོ། །དེ་མ་ཐག་ཏུ་དཔེ་བརྗོད་པའི་ཆོས་མཐུན་པའི་བསྒྲུབ་པར་བྱ་པ་སྒྲུབ་པའི་གཏན་ཚིགས་ཀྱི་མཚན་ཉིད་དེ་ལྟ་བུ་ཡིན་ནོ་ཞེས་གཏན་ཚིགས་དེ་སྒྲུབ་པར་བྱེད་པར་བརྗོད་དོ། །དེས་ན་གཏན་ཚིགས་ཀྱི་ཕྱིའི་ཁྱབ་པ་མ་བསྟན་པའི་དོན་དུ་བསྒྲུབ་པར་བྱ་བ་དང་ཆོས་མཐུན་པ་དེའི་ཆོས་སུ་འགྱུར་བའི་དཔེ་ཉེ་བར་བསྟན་པར་བྱ་སྟེ། དེའི་མཚན་ཉིད་དེ་ལྟ་བུ་ཡིན་པའི་ཕྱིར་


DTG190_Page_0246
[མ་དཔེ་གཟིགས་ན་འདིར་གནོན།]

རོ། །དེས་ན་གཟུགས་ཀྱི་དོན་དམ་བསྒྲུབ་པར་བྱ་བའི་ཆོས་ཡོད་པ་བསྟན་པའི་ཕྱིར་དཔེ་ལ་ལྟོས་པ་ཡིན་ནོ། །དེ་བཞིན་དུ་མཇུག་བསྡུ་བ་ནི་དེ་ལྟ་བུ་མ་ཡིན་ནོ། །བསྒྲུབ་པར་བྱ་བ་ཉི་བར་སྦྱར་བ་ཡིན་ནོ། །དེས་ན་དུས་ཕྱིས་ཡན་ལག་ཐམས་ཅད་བསྡུས་ནས་ཕྱིན་ཅི་ལོག་ཏུ་ཐལ་བར་འགྱུར་བ་སྤངས་པའི་ཕྱིར་གཏན་ཚིགས་ཉེ་བར་བསྟན་ཏོ། །ཡང་དམ་བཅའ་བ་བརྗོད་པ་ནི་མཇུག་བསྡུ་བ་ཡིན་ནོ་ཞེས་བྱ་བ་མཚན་ཉིད་དེ་ལྟ་བུ་ནི་མཇུག་བསྡུ་བའོ། །འདིའི་མཚན་ཉིད་ཇི་ལྟ་བའི་དོན་གྱི་དབང་གིས་འདིའི་རིམ་པ་ཡིན་ལ། འདི་ལྟར་འཇིག་རྟེན་པ་ཡང་དང་པོ་ལས་དང་འཇིམ་གོང་ཉེ་བར་བླངས་ནས་ཕྱིས་ནི་དབྱུག་པ་དང་འཁོར་ལོ་ལ་སོགས་པ་རྒྱུ་ཡིན་ནོ་ཞེས་བྱ་བ་རིགས་པ་ཡིན་ནོ། །དེ་ལ་འདིར་རིམ་གྱིས་གནས་པ་ནི་རིགས་པ་ཡིན་ཏེ། དམ་བཅའ་བ་ལ་སོགས་པ་ཡན་ལག་བཟློག་པའི་སྒོ་ནས་བརྗོད་པ་ནི་ཚར་གཅད་པའི་གནས་ཡིན་ནོ། །དཔེར་ན་བུམ་པ་བཞིན་དུ་བྱས་པའི་ཕྱིར་མི་རྟག་གོ་ཞེས་བྱ་བ་ལྟ་བུའོ། །མ་ཡིན་ཏེ། དེ་ལྟ་བུས་ཀྱང་གྲུབ་པའི་ཕྱིར་རོ་ཞེས་བྱ་བ་དྭ་ར་དྭ་ཛའིའོ། །རང་ཉིད་ཀྱི་དོགས་པའི་ལན་འདེབས་པ་ནི་མ་ཡིན་ཏེ། སྒྲ་སྦྱོར་བ་དང་བྲལ་བ་བཞིན་དུ་འདིས་འགྱུར་རོ། །མགོ་ནི་བྱ་བ་ཚིག་འདིས་ནི་དཔེར་ན་ལྐུགས་པ་ལྟ་བུ་སྟེ། དཔེར་ན་བྱིས་པ་དང་སློབ་འདོད་པ་དང་གསལ་བ་དང་མི་གསལ་བ་དེས་དེ་དག་རྩོད་པ་ན་ངེས་པར་གསལ་བར་བྱ་བ་ཡིན་ནོ། །དེ་བཞིན་དུ་བ་ལང་ལ་སོགས་པའི་སྒྲ་ནི་རྗེས་སུ་དཔག་པའི་ཤེས་པ་ལེགས་པར་སྐྱེད་པར་བྱེད་པའི་རྒྱུ་ཡིན་ནོ་ཞེའོ། །དེ་འདིར་སྨྱོན་པ་བརྡ་སྤྲོད་པ་དང་སྨྱོན་པ་ལ་བརྗོད་པ་ནི། སྨྱོན་པ་འོད་བྱེད་ཀྱིས་བརྗོད་པ་ཡིན་ནོ། །དཔེར་ན་སྨྱོན་པ་གཅིག་གིས་སྨྱོན་པ་གཉིས་པ་ལ་བརྗོད་པ་དེ་བཞིན་དུ་གྱུར་བ་ཡིན་ནོ་ཞེས་བྱ་བའི་དོན་ཏོ། །གལ་ཏེ་སྨྱོན་པ་འོད་ཀྱིས་སྨྱོན་པ་བརྡ་སྤྱོད་པ་ལ་བརྗོད་པ་ཡིན་པ་དེ་ལྟ་ན། རེ་ཞིག་སྨྱོན་པ་ཁོ་ནའི་སྒྲ་ཡིན་ཏེ། ཚད་མ་དང་འགལ་བའི་དོན་སྟོན་པའི་ཕྱིར་རོ། །དེ་ཅིའི་ཕྱིར་ཞེ་ན། དེ་ལ་སྦྱོར་བར་བྱེད་པའི་ཤེས་པར་བྱེད་པའི་ཚད་མ་སེམས་པ་ཡིན་ནོ་ཞེས་བྱ་བའི་དོན་ཏོ། །ཡང་སྒྲ་བརྗོད་པ་ཉིད་རིགས་པ་མ་ཡིན་ཇི་ལྟར་ཡིན་སྙམ་ནས་གལ་ཏེ་ཞེས་བྱ་བ་ལ་སོགས་པ་སྨོས་ཏེ། བུད་མེད་དང་དམངས་རིགས་རྨོངས་པས་བརྗོད་པ་ནི་ནམ་མཁའི་


DTG190_Page_0247
[མ་དཔེ་གཟིགས་ན་འདིར་གནོན།]

སྒྲ་དང་མུ་ཀའི་སྒྲ་རིགས་ནི་སྣ་རྩེའི་སྒྲ་ཤེས་པ་མ་ཡིན་པ་གང་ཡིན་པ་དེ་ཇི་ལྟར་ཟུར་ཆག་པའི་སྒྲ་དང་ལེགས་པར་སྦྱར་བའི་སྒྲ་ལས་ཁོང་དུ་ཆུད་པར་འགྱུར། སྒྲ་དེ་ཉིད་ཁོང་དུ་ཆུད་པ་ཡིན་ན་འདིས་དེ་བཞིན་དུ་དོན་ཁོང་དུ་མ་ཆུད་པའི་ཕྱིར་བརྗོད་པ་ཅི་ཞིག་བྱ་སྙམ་ནས། གཉི་ག་རིགས་པ་མ་ཡིན་པས་ཀྱང་རྟོགས་པ་མཐོང་བའི་ཕྱིར་རོ་ཞེས་བྱ་བ་སྨོས་སོ། །དེའི་ཕྱིར་བརྒྱུད་པས་དོན་རྟོགས་པ་མ་ཡིན་ནོ། །འདིར་བསྡུས་པའི་དོན་ནི་འདི་ཡིན་ཏེ། དེ་ལྟར་ལེགས་པར་སྦྱར་བ་མ་ཡིན་པས་ལེགས་པར་སྦྱར་བ་དཔོག་པར་འགྱུར་རོ་སྙམ་ན། དུ་བ་ལ་སོགས་པ་གང་དང་གང་ཚུལ་གསུམ་པ་ལས་གྱུར་པར་ངེས་པ་ཡིན་ན་དེ་ལ་ཡང་སྲིད་པ་མ་ཡིན་ནོ། །གང་གི་ཕྱིར་རེ་ཞིག་གཉི་ག་མ་ཡིན་པར་རིག་པ་ཤ་ན་ཀ་ལ་སོགས་པ་གང་ཡིན་པ་དེའི་ཁྱབ་པར་བྱེད་པའི་དངོས་པོ་ཡོད་ཀྱང་རྟོགས་པ་མ་ཡིན་ཏེ། འདི་ཤེས་པའི་གོ་བྱེད་ཀྱི་ཡན་ལག་ཤེས་བྱེད་མེད་པའི་ཕྱིར་རོ། །ཟུར་ཆག་པ་དང་ཟུར་ཆག་པ་མ་ཡིན་པའི་བྱེ་བྲག་ལ་མཁས་པ་གང་ཡིན་པ་དེ་ཡང་ཡོད་པ་མ་ཡིན་པའི་ཕྱིར་བརྗོད་པར་མི་བྱའོ། །འདི་ལྟར་ལེགས་པར་སྦྱར་བ་མ་ཡིན་པ་དང་ལེགས་པར་སྦྱར་བ་རྣམས་ལ་དེའི་བདག་ཉིད་དང༌། རྒྱུ་དང་འབྲས་བུའི་དངོས་པོའི་འབྲེལ་པ་མ་ཡིན་ཏེ། དེ་གཉི་གར་བརྟགས་ཀྱང་མི་འཁྲུལ་པའི་ངེས་པ་མེད་པའི་ཕྱིར་རོ། །དེ་ལ་རེ་ཞིག་དེའི་བདག་ཉིད་དུ་ནི་ཁས་བླང་བར་མི་བྱ་སྟེ། དོན་དམ་པར་ཐ་དད་པ་ཁོ་ནར་མངོན་སུམ་གྱིས་གསལ་པར་རྟོགས་པའི་ཕྱིར་དང་སྒྲ་བཞིན་དུ། སྒྲ་ཉམས་པ་ཡང་ཐ་དད་པ་མེད་པར་བརྗོད་པར་བྱ་བ་ཉིད་དུ་ཐལ་བར་འགྱུར་བའི་ཕྱིར་རོ། །དེ་ལས་སྐྱེས་པ་ཡིན་ཡང་རིང་དུ་སྤངས་པ་ཉིད་དོ། །ལེགས་པར་མ་སྦྱར་བ་གང་ལས་ལེགས་པར་སྦྱར་བ་སྐྱེ་བ་ནི་མ་ཡིན་ཏེ། བརྗོད་པར་འདོད་པ་ཙམ་གྱིས་བྱེད་པ་འམ་ཡོན་ཏན་དེ་དག་རྒྱུ་ཡིན་པའི་ཕྱིར་རོ། །དེ་དག་རྟག་པ་ནི་མ་ཡིན་ཏེ། རེས་འགའ་ཞིག་དམིགས་པའི་ཕྱིར་རོ། །དེ་ནི་དོན་མེད་པར་སྐྱེ་བ་ཤིན་ཏུ་མེད་པ་འམ། ཡོན་ཀྱང་ཁྱབ་པར་བྱ་བ་དང༌། ཁྱབ་པར་བྱེད་པའི་དངོས་པོ་དེ་ཡོངས་སུ་ཤེས་ཀྱང་ཕྱོགས་ལ་ཆོས་མ་ཡིན་པ་ནི་མིག་གིས་གཟུང་བར་བྱ་བའི་ཕྱིར་རོ་ཞེས་བྱ་བ་ལྟ་ལེགས་པར་མ་སྦྱར་བས་


DTG190_Page_0248
[མ་དཔེ་གཟིགས་ན་འདིར་གནོན།]

རྗེས་སུ་དཔོག་པ་མ་ཡིན་ནོ། །འདིར་ཆོས་ཅན་ཡོད་པ་མ་ཡིན་ཏེ། གང་གི་ཕྱིར་ཕྱོགས་ཀྱི་ཆོས་བཀག་པའི་ཕྱིར་རོ། །ལེགས་པར་སྦྱར་བ་ཉིད་ནི་ཆོས་ཅན་མ་ཡིན་ཏེ། དེ་ཉིད་དཔག་པར་བྱ་བ་ཉིད་ཡིན་པའི་ཕྱིར་དང་ཆོས་ཅན་དང་སྒྲུབ་པར་བྱེད་པ་དག་རིགས་པ་དང་མི་ལྡན་པའི་ཕྱིར་རོ། ཡོད་པ་དང་མེད་པ་དང་གཉི་གའི་ཆོས་ནི་མ་གྲུབ་པ་དང་འགལ་བ་དང་མ་ངེས་པའི་སྐྱོན་གྱིས་གནོད་པའི་ཕྱིར་རོ། །ཇི་ལྟར་ལེགས་པར་མ་སྦྱར་བ་དེའི་ཆོས་ཡིན། དེའི་དུས་སུ་ནི་ཡོད་པ་མ་ཡིན་པ་དང༌། མེད་པའི་ཆོས་ཉིད་བརྗོད་པར་བྱེད་པ་ཉིད་ཡིན་ནོ་ཞེས་བྱ་བ་ནི་ལེགས་པར་བཤད་པ་ཡིན་ནོ། །སྐྱེས་བུ་ཆོས་ཅན་དུ་བརྗོད་པས་ཅི་ཞིག་བྱ། ལེགས་པར་སྦྱར་བའི་སྒྲ་བསྒྲུབ་པར་བྱ་བའི་ཆོས་སུ་བརྗོད་པར་འདོད་ན། ལེགས་པར་སྦྱར་བ་མ་ཡིན་པ་དེ་ཡང་འབྲེལ་བ་མེད་པའི་ཕྱིར་རོ། །ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་མེད་པ་ཉིད་ཀྱི་ཕྱིར་རོ། །གང་དང་གང་གི་ཕྱིར་ཁོ་བོ་ཅག་གིས་སྒྲ་སྦྱར་བ་ནི་བ་ལང་གི་སྒྲ་བརྗོད་པར་འདོད་པས་ནི་དམིགས་པ་ནི་མ་ཡིན་ནོ། །འོན་ཏེ་ཕྱོགས་ཀྱི་ཆོས་མཚང་བ་མི་གསལ་བས་ཡིན་ན་བྱིས་པའི་ཚིག་མི་གསལ་བ་ལས་རྗེས་སུ་དཔག་པར་བྱའོ་ཞེས་བརྒལ་ཞིང་བརྟག་པར་བྱེད་པར་འགྱུར་རོ། །དེ་བཞིན་དུ་ལེགས་པར་སྦྱར་བ་མ་ཡིན་པས་ལེགས་པར་སྦྱར་བའི་ཞེས་བྱ་བ་དེ་ཡང་རིགས་པ་མ་ཡིན་ནོ། །དེ་ཡང་བརྒལ་ཞིང་བརྟག་པ་མཚུངས་པའི་ཕྱིར་རོ། །ཁོ་བོ་ཅག་གིས་དངོས་པོ་རྟོགས་པ་མེད་པ་དེའི་ཕྱིར་དེ་ཡང་མི་གསལ་བ་ཙམ་གྱིས་དོན་རྟོགས་པ་ཡིན་ནོ་ཞེས་བྱའོ། །དེ་ཡང་མིང་དང་མིང་ཅན་གྱི་འབྲེལ་བ་ཤེས་པ་མེད་པའི་ཕྱིར། རྟོགས་པ་ཡང་མི་རིགས་པ་ནི་ཁས་བླང་བར་མི་བྱ་སྟེ། འཁོར་བ་ཐོག་མ་མེད་པ་ནས་ཐ་སྙད་བརྒྱུད་པ་དེ་ལྟ་བུར་གྱུར་བ་འདི་དང་འབྲེལ་པའི་རྟགས་མེད་པའི་ཕྱིར་རོ། །འདི་ལྟར་ཤིང་ལ་སོགས་པའི་སྒྲ་རྣམས་ཀྱང་ཕལ་ཆེ་བ་ལ་མ་ཡིན་ཏེ། དོན་གྱི་ཟུང་ཙམ་ངེས་པ་མེད་པས་སོ། །བརྡར་བྱས་པའི་ཐ་སྙད་བརྒྱུད་པ་ལ་མཁས་པས་ངེས་པ་དང་ལྡན་པ་ནི་འདིར་ཐུན་མོང་བ་ཉིད་དོ། །དེའི་ཕྱིར་འདི་ནི་ནགས་ཚལ་ན་དུ་བ་ཡིན་ཏེ། ཨམ་པ་ཨམ་བེ་ཞེས་བྱ་བ་ནི་དཔེར་ན་བྱིས་པ་དང་སློབ་སྦྱོར་བ་དང༌། མཁས་པ་བྱ་བ་


DTG190_Page_0249
[མ་དཔེ་གཟིགས་ན་འདིར་གནོན།]

གསལ་བ་དང་དེ་ཡང་རིགས་པས་གསལ་པོར་ངེས་པར་འགྱུར་རོ། །དེ་ལྟར་ལེགས་པར་མ་བྱས་པ་ལས་བློ་འཁྲུལ་པ་སྐྱེ་བ་དེ་བས་ན་ལེགས་པར་སྦྱར་བས་བསྐལ་བའི་དོན་འགའ་ཞིག་འདྲེན་པར་མི་འགྱུར་རོ། །གལ་ཏེ་དེ་ཡང་ཀུ་མཱ་ར་རི་ལས་བརྗོད་པ། །ཁོ་བོའི་སྒྲ་ཡི་གནས་པ་ལ། །དེ་སྐྱེད་བྱེད་པའི་ནུས་མེད་ན། གཽ་ཡི་སྒྲ་ལས་བ་ལང་བློ། །རྩ་བའི་སྒྲ་ཡི་རྗེས་འབྲང་འགྱུར། །དེ་ཡང་དེ་ཉིད་བརྗོད་པ་དང༌། །འདི་ཐམས་ཅད་བསྡོམས་ནས་མཇུག་བསྡུ་ན་བརྒྱུད་པས་རྟོགས་པ་ཡིན་ནོ་ཞེས་བྱའོ། །འདིར་ཡང་གཏན་ཚིགས་བསགས་པ་ནི་བཤད་པ་དོན་རྟོགས་པའི་ནུས་པ་མེད་པ་ནི་སྒྲ་འདིར་ཡང་རྟོགས་པ་སྐྱེད་པའི་ནུས་པ་མེད་པའི་ཕྱིར་རོ། །དེ་ལ་འདི་སྙམ་དུ་ཁོ་བོ་ཅག་ལགས་པར་མ་སྦྱར་བས་དོན་རྣམས་ལ་རྟོགས་པ་སྐྱེའི་འོན་ཀྱང་རྗོད་པར་བྱེད་པ་ནི་མ་ཡིན་པ་ལེགས་པར་མ་སྦྱར་བས་རྟོགས་པ་སྐྱེས་པར་བྱེད་ཀྱང་རྗོད་པར་བྱེད་པ་མ་ཡིན་ནོ་ཞེ་ན། དོན་ཡང་རྗོད་པར་བྱེད་པ་ཉིད་ཅེས་བྱ་བ་གཞན་ཉིད་མ་ཡིན་ཞེས་བྱ་བ་ལ་སོགས་པ་སྨོས་ཏེ། གལ་ཏེ་ལེགས་པར་སྦྱར་བ་མ་ཡིན་པའི་དོན་རྟོགས་པ་བསྐྱེད་པ་ཉིད་དུ་འདོད་ན་ཁོ་བོ་ཅག་དེ་ཙམ་གྱིས་ཡོངས་སུ་མགུ་བས་ཁོ་བོ་ཅག་ལ་རྗོད་པར་བྱེད་པ་མ་ཡིན་པ་རྗོད་པར་བྱེད་པ་གཞན་བརྟགས་པ་ཉིད་ཀྱིས་ཅི་ཞིག་བྱ་སྙམ་དུ་དགོངས་སོ། །ད་ལྟ་ན་འདི་ནི་དོན་ཁོང་དུ་ཆུད་པ་སྐྱེད་པར་བྱེད་པར་མི་ནུས་ན་ཡང་སྒྲ་ཁོ་ནས་ཡིན་ནོ་ཞེ་ན། ཟུར་ཆག་པའི་སྒྲ་ཡང་ཞེས་བྱ་བ་ལ་སོགས་པ་སྨོས་ཏེ། འདིར་བཤད་པ་སྒྲ་ནི་དོན་དེའི་རང་བཞིན་གྱི་འབྲེལ་པ་མ་ཡིན་པ་དེའི་ཕྱིར་དེ་ཉིད་ཀྱིས་དོན་རྟོགས་པར་བྱེད་པ་མ་ཡིན་ཏེ། དཔེར་ན་མིག་གཟུགས་ཀྱི་རང་བཞིན་གྱིས་གསལ་བར་བྱེད་པ་ཡིན་གྱི་སྒྲ་ལ་སོགས་པའི་མ་ཡིན་པ་བཞིན་དུ། བརྡར་མ་བྱས་པའི་སྒྲ་ཡང་ཞེས་བྱ་བ་ལ་སོགས་པ་མཐོང་བ་མེད་པའི་ཕྱིར་ཞེས་བྱ་བ་ནི། རྟོགས་པ་དང་འབྲེལ་པ་སྟེ། སིང་ག་ལའི་སྒྲས་འཕགས་པའི་ཡུལ་གྱི་ཐ་སྙད་ལ་འཇུག་པར་མི་འགྱུར་ལ། བརྡས་བྱས་པ་ཉིད་ཡོད་ན་ནི་རྟོགས་པ་སྐྱེས་པར་འགྱུར་རོ། །དེ་ལ་བརྡས་བྱས་པས་དོན་འདི་དང་འབྲེལ་པ་ཡང་མི་བཟློག་པ་ཡིན། དེ་བཤད་པ། ལེགས་པར་མ་སྦྱར་བ་ལེགས་པར་སྦྱར་བ་བརྡའི་དབང་གིས་འཇུག་ན། ཁམས་ལ་སོགས་པའི་སྒྲ་ཅིའི་ཕྱིར་དོན་ཉིད་ལ་འཇུག་


DTG190_Page_0250
[མ་དཔེ་གཟིགས་ན་འདིར་གནོན།]

པར་མེ་འགྱུར། དེ་ལྟ་བུའི་སྐྱོན་དང་ཡོན་ཏན་ནི་འགའ་ཞིག་ཀྱང་མེད་དོ་སྙམ་ནས། དེ་ལྟ་ན་རྟོགས་པ་པོ་ཞེས་བྱ་བ་ལ་སོགས་པ་སྨོས་སོ། །འདི་སྐད་སྟོན་པ་ཡིན་ཏེ། དཔེར་ན་སྒྲོན་མ་ལ་སོགས་པ་དང་གཟུགས་ལ་སོགས་པ་ལ་མིག་ལ་སོགས་པ་སྐྱེ་བ་བཞིན་དུ་སྒྲ་ཉམས་པས་འགལ་ཏེ་སྒྲ་ལ་རང་བཞིན་གྱིས་གསལ་བར་བྱེད་པ་དེ་ན་དེ་ཡང་སྒྲ་ལ་མི་ལྟོས་པར་ཐལ་བར་འགྱུར་རོ། །ལྟོས་ན་ཡང་དེས་སྒྲ་འདིའི་རང་བཞིན་ལ་ནུས་པ་མ་ཡིན་ནོ། །འདི་རྗེས་སུ་དཔག་པར་ནུས་པ་དེ་ལྟ་ན་ཡང་ཐམས་ཅད་བརྡ་ལ་ལྟོས་ནས་འཇུག་པ་ཡིན་ནོ། །ཇི་ལྟ་བའི་བརྡ་ནི་ལོག་པ་མེད་པ་ནི་དངོས་སུ་རྟོགས་པར་བྱེད་པར་མི་འགྱུར་ཏེ། དཔེར་ན་ལུས་ཀྱི་རྣམ་པར་རིག་བྱེད་བཞིན་ནོ། །ཟུར་ཆག་པའི་སྒྲ་དེ་ཡང་དེ་བཞིན་དུ་སྒྲ་ལ་ལྟོས་ནས་འཇུག་པའི་ཕྱིར་རོ་ཞེས་བྱ་བ་འདི་གྲུབ་པ་ཡིན་ནོ། །དེ་ཉིད་དོན་རྟོགས་པ་ཉིད་ལ་སྒྲིབ་པ་མེད་དོ། །ཡུལ་གཞན་ཡང་བསྟན་པ་བསགས་པ་ནི་ཤིང་དང་མེ་དང་རྡོ་ནི་འདི་ལྟ་བུའོ། །བཤད་པ་ནས་བྱས་པའི་བློ་ཅན་མི་མཁས་པ་ཤིང་ལ་སོགས་པ་འདི་ཅི་ལ་བྱ་ཞེས་རིམ་གྱིས་དྲི་མ་ཡོད་པ་ན། དེ་ལ་ཡང་མཁས་པས་ཐབས་མེད་པས་སྒྲ་ཉམས་པའི་སྒོ་ནས་ཤིང་དང་མེ་དང་རྡོ་ཡིན་ནོ་ཞེས་བསྟན་ནོ། །དེ་ལྟར་འདིར་སྒྲ་ཉམས་པ་ཁོ་ན་དེའི་རྗོད་པར་བྱེད་པ་ཡིན་ན་ལེགས་པར་སྦྱར་བ་ཁོ་ན་མ་ཡིན་ཏེ། ཡོད་ཀྱང་རྣམ་གྲངས་པའི་མཐོང་བའི་ཕྱིར་རོ། །འོན་ཏེ་ལེགས་པར་སྦྱར་བའི་སྒྲས་བསྟན་པ་ནི། ཆོས་ཡིན་ཏེ། དེ་སྐད་དུ། ལེགས་པར་ཆོས་ཀྱི་སྒྲུབ་བྱེད་དུ། །ཡ་རབས་རྣམས་ལ་ལུང་གིས་གྲུབ། །དོན་ཤེས་ཐ་དད་མེད་ན་ཡང༌། །སྒྲ་ཉམས་ཕྱིན་ཅི་ལོག་པ་ཡིན། །དེ་བཞིན་སྔགས་ཀྱི་དབྱངས་དང་ཡི་གེ་ཉམས་པ་ཡང་ལོག་པའི་རབ་ཏུ་སྦྱོར་བ་དེ་ནི་དོན་མེད་ཡིན་པར་བཤད། དཔེར་ན། དབང་པོའི་དགྲ་བོ་ཡི་གེ་ཉམས་པ་ལས། །གསུང་གི་རྡོ་རྗེ་མཆོད་སྤྱིན་བརླག་པ་ཡིན། །དེ་ནི་ལྷ་ལ་ཧི་ལ་ཡན་ཧི་ལ་ཡང་ཞེས་བརྗོད་པ་དང་ལྡན་པ་ནི་སྒྲ་གཅིག་གིས་བསྣན་ནས་སྦྱར་ན་ནི་མཁས་པའི་འཇིག་རྟེན་གྱིས་གོ་བར་འགྱུར་རོ། །སྒྲ་ཉམས་པ་བརྗོད་པའི་ལྟུང་བའི་ཉེས་པ་ནི་མེ་ལ་མཆོད་པ་བྱས་པས་དག་པར་འགྱུར་རོ་ཞེའོ། །འདི་དག་གསལ་བར་བྱ་སྟེ། ཆོས་སྒྲུབ་པ་ནི་མ་ཡིན་གྱི་སྒྲ་མངོན་པར་འདུ་བྱེད་པ་ཡིན་ཏེ། དེ་ཅིའི་


DTG190_Page_0251
[མ་དཔེ་གཟིགས་ན་འདིར་གནོན།]

ཕྱིར་ཞེ་ན། བརྗོད་པ་ལས་ལོག་པ་ལ་འཇུག་པར་འགྱུར་རོ་ཞེས་བྱ་བ་ལ་སོགས་པ་སྨོས་ཏེ། ལོག་པ་ལ་འཇུག་པ་བརྗོད་པར་འགྱུར་རོ་ཞེས་བྱ་བ་ནི་འབྲས་བུ་ཡིན་ཏེ། དཔེར་ན་བྱུ་རུ་ལྟ་བུའི་ལྕུག་མ་སར་པའི་སྙེ་མའི་ཕྲེང་བས་མཛེས་པར་བྱས་པའི་མྱ་ངན་མེད་པའི་ནགས་ཚལ་གྱི་དྲུང༌། མ་ལ་ཡའི་རི་ལ་ཉལ་བའི་བྲམ་ཟེ་ཨུཏྤལ་སྔོན་པོ་ལྟ་བུའི་རལ་གྱི་ཤིན་ཏུ་རྣོན་པོས་ཆོད་ཅིག་ཅེས་བརྗོད་པར་འགྱུར་བ་ཉིད་བྲམ་ཟེ་གསོད་པའི་འབྲེལ་པར་འགྱུར་རོ། །ལེགས་པར་མ་སྦྱངས་པ་གཞན་དག་གིས་ཕྱིན་ཅི་མ་ལོག་པ་ཡང་དག་པ་ལ་འཇུག་པ་རྗོད་པར་འགྱུར་ཏེ། དཔར་ན་བྲམ་ཟེ་འདི་ལ་བ་ལང་ཅིག་བྱིན་ཅིག་ཅེས་བྱ་བ་ལྟ་བུའོ། །བརྗོད་པ་ཐམས་ཅད་ལ་ཚད་མ་མེད་པའི་ཕྱིར། ཁྱེད་ཀྱི་ཚིག་ཙམ་ཡིན་ནོ་ཞེས་བསམས་ནས་རྩེགས་པ་ནི། སྒྲ་སྦྱོར་བ་ཁོ་ན་ལས་ཞེས་བྱ་བ་ལ་སོགས་པ་སྨོས་ཏེ། རྣམ་པ་དེ་ལྟར་བརྗོད་པ་ནི་ཚད་མ་མ་ཡིན་ནོ། །འོ་ན་མི་གནས་པའི་ས་ཕྱོགས་མཆོད་རྟེན་བཞེངས་ན་ཚངས་པའི་བསོད་ནམས་བསྐྲུན་པས་བསྐལ་པའི་ལྷའི་བདེ་སྐྱིད་ཐོབ་པར་འགྱུར་རོ་ཞེས་བྱ་བ་ལ་སོགས་པ་ལ་ཡང་ཚད་མ་མེད་པར་མཚུངས་པས་ཁྱེད་ཡང་ཐལ་བར་འགྱུར་རོ་ཞེ་ན། མཚུངས་པ་ནི་མ་ཡིན་ཏེ། གང་གི་ཕྱིར་ཡུལ་གཉིས་པོ་འདིར་རྣམ་པར་དག་པ་དང་གཙོ་བོའི་དོན་ལ་འདིར་མི་སླུ་བ་ཡོད་པ་ཡིན་ན་གནས་གསུམ་པར་བྱ་བ་ལ་ཡང་རྟོགས་པ་དང་ལྡན་པ་རྣམས་ལ་ཡོངས་སུ་མགུ་ནས་འཇུག་པར་འགྱུར་རོ། །དེ་ལྟར་ཁྱེད་ཀྱི་འདོད་པ་དེ་མ་ཐག་ཏུ་བསྟན་པ་གཉི་ག་ཡང་ཡོད་པ་མ་ཡིན་ཏེཿ་ཚད་མས་གནོད་པའི་ཕྱིར་རོ། །ཚད་མ་དང་འགལ་བ་ནི་དེ་མ་ཐག་ཏུ་བཤད་ཟིན་ཏོ། །དེའི་དབུལ་པོ་དང་ཕྱུག་པོ་མཉམ་ཀྱང་མཉམ་པར་མི་འགྱུར་རོ། །གང་རིག་བྱ་རིག་པའི་ཡོན་ཏན་དང་ལྡན་པའོ་ཞེས་བྱ་བ་ཡིན། རིག་བྱེད་ཀྱི་རྐྱེན་ནང་དུ་འདུས་པར་བསྟན་པ་ཡིན་ནོ། །རིག་བྱ་རིག་པ་ནི་བླང་བར་བྱ་བ་དང་དོར་བར་བྱ་བ་མ་ཡིན་པ་དེ་བཞིན་དུ་བསྟན་ཏོ། །སོགས་པ་སྨོས་པ་ནི་སྙིང་རྗེ་ལ་སོགས་པ་ཡོངས་སུ་གཟུང་ངོ༌། །འདི་ནི་ལེགས་པར་སྦྱར་བའོ། །གཞན་ནི་ལེགས་པར་སྦྱར་བ་མ་ཡིན་པའོ་ཞེས་བྱ་བ་ནི་མེད་པའོ། །འདི་སྐད་སྟོན་པ་ཡིན་ཏེ། སྒྲ་


DTG190_Page_0252
[མ་དཔེ་གཟིགས་ན་འདིར་གནོན།]

ནི་ཐ་དད་པའི་ཕྱིར་དོན་ཤེས་པའི་འབྲས་བུ་ཅན་ཡིན་ཏེ། དཔེར་ན་ལེགས་པར་སྦྱར་བ་དག་བརྡའི་དབང་གིས་གྲུབ་པ་དེ་བཞིན་དུ་ལེགས་པར་མ་སྦྱར་བ་ཡང་ཡིན་ན། གནས་པ་ཡིན་པ་ལ་མངོན་པར་ཞེན་པ་ཁྱད་པར་ཅན་གྱིས་སྦྱར་བའི་ཁྱད་པར་ཅན་གང་ཞིག་ཡིན། དེ་ཉིད་ཀྱི་ཕྱིར་རྟོགས་པ་དང་ལྡན་པས་བསམས་པ་ལས་གཞན་ཡིན་པའི་ཕྱིར་རྗེས་སུ་རྟོག་པའི་དོན་མིང་གི་འདི་ཉིད་ཡིན་ནོ་ཞེས་བྱའོ། །ཡང་ན་ཁོ་བོ་ཅག་བདག་ཉིད་ཆེན་པོ་རྣམས་ཀྱིས་འདི་སྤོང་བར་མཛད་པ་ནི་དགོས་པ་ཅི་ཞིག་ཡོད། གཞན་ལས་མ་ཡིན་ཞེས་བྱ་བ་འདི་ཉིད་མ་ངེས་པ་མེད་པའི་ཕྱིར་རོ། །གང་བཤད་པ་འདིར་ཐ་དད་པར་བྱ་བ་འགའ་ཞིག་གི་ངག་ལ་ཡང་དབང་པོ་མིད་ན་དབང་པོས་གང་ལས་འདི་དེ་ལྟ་བུ་ཡིད། འདི་རབ་ཏུ་སྦྱོར་བ་གཞན་ནི་མ་ཡིན་པར་ངེས་པར་བྱ། འོན་ཏེ་འདིར་བཤད་ཟིན་པ་ཟློས་པའི་དགོས་པ་ནི་བསྲུང་བའི་དོན་དང་མཚམས་བླ་བ་ཡིན་པའི་ཕྱིར། དེ་ཅི་ལྟར་ཡོན་ཏན་ཁྱད་པར་ཅན་དུ་འགྱུར་བ་མ་ཡིན་ཞེས་བརྗོད་པ་ན། རིག་བྱེད་བསྲུང་བ་ལ་སྒོས་པའི་དགོས་པ་ནི་དེའི་བརྡར་བྱས་པ་མ་ཡིན་པ་དེ་བཞིན་གཤེགས་པའི་ལུགས་ལ་ཡང་ཡོད་པའི་ཕྱིར་རོ། །དེའི་རང་བཞིན་ནི་ལེགས་པར་སྦྱར་བ་མ་ཡིན་པའི་སྒྲའི་ངོ་བོ་ལའོ། །གཞན་ལ་ཡང་ཞེས་བྱ་བ་ནི་རྒན་པོ་རྣམས་ཀྱི་བརྒྱུད་པ་ལ་ཡང་ངོ༌། །དཔེའི་གོ་རིམས་གསལ་བར་ཕྱེད་པ་ན་ཐ་མལ་པ་ཞེས་བྱ་བ་ལ་སོགས་པ་འདི་དག་ཁོ་ནའོ། །སྒྲ་ནི་སྨྱོན་པས་བསྟན་པ་ཡིན་ལ་དེ་ལྟར་ནི་དྭ་ར་དྭ་ཛ་ཡིན་ཏེ། ཡན་ལག་བཟློག་པ་ཡང་ཞེས་བྱ་བ་ལ་སོགས་པ་སྨོས་ཏེ། འབྲེལ་པ་ཤེས་པ་ཞེས་བྱ་བ་ནི་ཕན་འདོགས་པར་བྱེད་པ་དང་ཕན་གདགས་པར་བྱ་བའི་དངོས་པོ་འབྲེལ་པར་བརྒྱུད་པའོ། །བརྗོད་པར་འདོད་པའི་ནུས་པ་ལས་རྟོགས་པ་ཡིན་ནོ་ཞེས་བྱ་བ་ལྷག་མའོ། །འོན་ཏེ་རྐང་མིག་གིས་གྲུབ་མཐའ་བརྐྱང་པའི་དམ་བཅའ་བ་ལ་སོགས་པ་བཟློག་པ་ཡིན་ཞེ་ན། འདིར་ངེས་པར་བྱེད་པའི་བརྡ་དང་གྲུབ་མཐའ་ཅུང་ཟད་ཀྱང་ཚད་མ་མེད་པ་ཡིན་པའི་ཕྱིར་ཐ་སྙད་དུ་མི་བྱའོ། །གཞན་གྱིས་གལ་ཏེ་བཟློག་པ་ལ་ནི་རྟོགས་པ་མ་ཡིན་ཏེ་ཞེས་བྱ་བ་བསྒྲུབ་བྱའོ། །འོ་ན་ཏེ་དེ་ལས་བཟློག་པ་རྟོགས་པའི་ཕྱིར་རོ། །འདིར་དགག་པ་ནི་འབྲེལ་པ་ཤེས་པ་མེད་པ་ལས་གོ་རིམས་རྟོགས་པར་མི་འགྱུར་


DTG190_Page_0253
[མ་དཔེ་གཟིགས་ན་འདིར་གནོན།]

རོཿ་།དེ་དག་གི་ཞེས་བྱ་བ་ལ་སོགས་པ་ནི་དེ་ཉིད་བཤད་དེ། འོན་ཏེ་དམ་བཅའ་བ་དང་ཉེ་བ་དང་མཇུག་བསྡུ་བར་སྔར་ཁོ་བོ་ཅག་གིས་སྒྲུབ་པར་བྱེད་པ་རི་དག་ཏུ་བརྗོད་པ་སྤངས་པ་ཡིན་ནོ། །དེ་དེ་བྱས་པ་ལས་བཟློག་པ་ལས་ཡིན་ནོ་ཞེས་བྱ་བར་བརྗོད་པ་གང་ལས་ཡིན་དོན་རྟོགས་པ་ཞེས་བྱ་བ་ལ་སོགས་པ་ནི། དམ་བཅའ་པ་སྨོས་པ་ནི་ཉེ་བར་མཚོན་པའི་དོན་ཏེ། འོན་ཏེ་ནུས་པར་གྱུར་ན་ཡང་སྦྱོར་བ་དེ་ནི་ཧ་ཅང་ཐལ་བར་འགྱུར་རོ་སྙམ་ནས་དེ་བཤད་པའི་དོན་རྟོགས་པ་ལ་རབ་ཏུ་སྦྱོར་བ་ཧ་ཅང་ཐལ་བར་འགྱུར་ཏེ། ཆོས་མཐུན་པའི་སྦྱོར་བ་བྱས་ཀྱང་ཆོས་མི་མཐུན་པའི་སྦྱོར་བ་བྱེད་པར་ཐལ་བར་འགྱུར་ན། འདོད་པ་ཡང་མ་ཡིན་ནོ། །དོན་ཐོབ་ཟིན་ནས་ཡང་རང་གི་སྒྲ་སྦྱོར་བ་ནི་ཚར་གཅད་པའི་གནས་ཡིན་པའི་ཕྱིར་རོ། །དེ་ལྟ་ན་ཕྱོགས་ཀྱི་ཆོས་དང༌། རྗེས་སུ་འགྲོ་བ་དང་ལྡོག་པ་རྣམས་དམ་བཅའ་མེད་ཀྱང་རིམ་པ་འདོད་པ་མ་ཡིན་ནམ་ཞེ་ན། ལྷག་མ་དག་ནི་ཞེས་བྱ་བ་ལ་སོགས་པ་སྨོས་ཏེ། འབྲེལ་པ་མི་རྟག་པ་ཞེས་བྱ་བ་ལ་ལྟོས་པའི་སྐྱོན་གཞན་ཡང་བརྗོད་པ་ནི་དོན་མེད་པ་ལས་ཐ་དད་པའི་ཡོད་པ་མ་ཡིན་པས་ལོགས་ཤིག་ཏུ་བརྗོད་པར་མི་བྱའོ། །གང་ལ་དམ་བཅའ་བ་བརྗོད་པ་ནས་མཇུག་བསྡུ་བ་ལ་ཐུག་པའི་གང་ཡང་རུང་བ་ན་ཡན་ལག་གི་ངག་དེ་མ་ཚང་བའི་ཚར་གཅད་པའི་གནས་ཀྱི་རྒྱུ་ཡིན་ནོ། །བསྒྲུབ་པར་བྱ་བ་མེད་ན་ཡང་བསྒྲུབ་བྱ་མི་འགྱུར་པའི་ཕྱིར་རོ་ཞེས་བཤད་དོ་ཞེ་ན། འདི་དགག་པ་ནི་དམ་བཅའ་བ་མེད་ན་མ་ཚང་བ་ལ་སོགས་པ་སྨོས་སོ། །དམ་བཅའ་བ་སྨོས་པ་ནི། ཉེ་བར་མཚོན་པ་ཙམ་གྱི་དོན་ཡིན་ནོ། །དེས་ནི་ཉེ་བར་སྦྱོར་བ་དང༌། མཇུག་བསྡུ་བ་ལ་སོགས་པ་ནི་ཉེ་བར་གཟུང་ངོ༌། །འོད་བྱེད་ཀྱི་འདོད་པས་ཉེ་བར་མཚོན་པའི་དམ་བཅའ་བ་མཚང་བ་དེ་ནི་དམན་པ་ཁོ་ན་ཡིན་པས་དམ་བཅའ་བ་མཚང་བ་ཚར་གཅོད་པའི་གནས་ཡིན་ཞེ་ན། དེ་ནི་རིགས་པ་མ་ཡིན་ཏེ། བཤད་པ་སྒྲུབ་པར་བྱེད་པ་ཤུགས་ཀྱིས་ངོན་རྟོགས་པ་ལ་སྒྲ་དོན་མེད་པར་བསྒྲུབ་བྱ་བརྗོད་པ་སྒྲུབ་བྱེད་དུ་སྦྱོར་བར་བྱེད་པ་གང་ཡིན་པ་དེ་ནི་ཚར་གཅད་པར་འོས་པ་ཡིན་ནོ། །འདི་ལྟར་སྒྲ་མི་རྟག་པའི་སྤྱོད་པའི་རྟགས་གང་གི་ཚེ་བྱས་པ་རྣམས་ནི་མི་རྟག་པ་ཉིད་ནི་སྒྲ་ཡང་བྱས་པས་སོ་ཞེས་བརྗོད་པ་དེའི་ཚེ་ཚིག་གཉིས་ལས་བསྒྲུབ་


DTG190_Page_0254
[མ་དཔེ་གཟིགས་ན་འདིར་གནོན།]

བྱའི་དོན་རྟོགས་པའི་ཕྱིར་དམ་བཅའ་པའི་ཚིག་དོན་མེད་པའོ། །དོན་དང་འབྲེལ་པ་དང་ལྡན་པའི་ཕྱོགས་ཀྱི་ཆོས་དང་འབྲེལ་བ་ཅི་བརྗོད་པར་མི་རིགས་པ་མ་ཡིན་གྱི་ཡང་དག་པར་དཔྱད་པ་ལ་སོགས་པར་བྱེད་པ་ནི་རྣམ་འགྲེལ་བྱེད་པ་ཡིན་ནོ། །དེ་ཉིད་ཀྱི་ཕྱིར་ཞེས་བྱ་བ་ནི། གང་གི་ཕྱིར་ཤུགས་ཀྱིས་དོན་རྟོགས་པ་ལ་སྒྲ་སྦྱོར་བའི་ཚད་གཅད་པར་འོས་པ་མ་ཡིན་ནོ། །དེ་འདིར་རྣམ་ཕུག་པ་གགས་བྱེད་པའི་འཐད་པ་ལས་འགལ་བ་བརྗོད་པ་ནི། གལ་ཏེ་དེ་བཞིན་དུ་སྒྲ་ཡང་བྱས་པས་ཞེས་བྱ་བས་བརྗོད་པར་མི་བྱ་སྟེ། ཅིའི་ཕྱིར་ཞེ་ན། བྱས་པའི་ཕྱིར་མི་རྟག་གོ་ཞེས་བྱ་བ་དེ་ཉིད་ཀྱིས་སྒྲ་ཡང་བྱས་པའི་ཕྱིར་མི་རྟག་པ་ཡིན་ནོ་ཞེས་བྱ་བ་གཉི་ག་རྟོགས་པས་སོ། །གང་གི་ཕྱིར་སྔ་མས་སྒྲ་བྱས་པ་ཉིད་དུ་རྟོགས་པ་ཁོ་ནའོ། །སྐབས་ཀྱི་སྒྲ་ཡང་བློ་ལ་གནས་པ་ཡིན་པ་དེ་ལས་རྗེས་སུ་འགྲོ་བ་དག་དྲན་པ་ཙམ་ལས་སྐྱེས་པའི་ཕྱིར་རོ། །རྟོགས་པ་མེད་པ་ན་སླར་ཡང་བྱས་པ་ཉིད་བྱ་བ་མ་ཡིན་ནོ། །དེ་སྒྲ་ཡང་བྱས་པ་ཡིན་ནོ་ཞེས་བྱ་བ་དེ་ལས་ཀྱང་མི་འགྱུར་རོ། །གང་བྱས་པ་ནི་སྒྲ་ཡིན་ནོ་ཞེས་བྱ་བ་ཙམ་བརྗོད་པར་བྱ་བ་སྟེ། བྱས་པ་དང་མི་རྟག་པ་ཉིད་ནི་མེད་ན་མི་འབྱུང་བ་ཉིད་དོ། །གཞན་ལ་གྲུབ་པའི་ཕྱིར་སྒྲ་ལ་ཡང་མི་རྟག་པར་བསྟན་པར་བྱའོ་ཞེ་ན། དེ་རྗེས་སུ་མཐུན་པ་ཉིད་དུ་བྱས་པ་ཡིན་ཏེ། འདི་ལྟར་གལ་ཏེ་རེས་འགའ་ངེས་པར་རྟོགས་པ་ཡོད་པ་འདིར་ཕྱིར་རྒོལ་བ་ལ་ནི་བྱས་པ་ཡིན་ནོ་ཞེས་དཔེ་དེའི་ཚེ་ཕྱོགས་ལ་ཆོས་བསྡུ་བར་མི་བྱ་སྟེ། མི་འདོད་པའི་ཕྱིར་འབྲེལ་པ་ཙམ་ཞིག་བསྟན་པར་བྱའོ། །དེ་ལྟར་ན་འོན་ཏེ་ངེས་པ་མེད་པ་དེའི་ཚེ་ཡང་འདིར་གཞན་ལ་ཕྱོགས་ཆོས་བསྡུ་བ་བྱས་པ་གང་ཡིན་པ་དེ་ཡང་མ་གྲུབ་པ་བརྗོད་པར་འགྱུར་རོ། །དེ་ལ་བདག་གི་དེ་རྐྱེན་གྱི་བྱེ་བྲག་ཐ་དད་པའི་ཐབས་ཀྱི་གསལ་བ་འམ། རང་གི་ངང་གིས་རྩོད་པ་མེད་པ་དོགས་པ་མེད་པ་དེ་སེམས་ལ་བསྡོགས་ནས་ཕྱོགས་ལ་ཆོས་བསྡུ་བར་བྱ་སྟེ། སྒྲ་ཡང་བྱས་པ་ཡིན་ནོ་ཞེས་བྱ་བའོ། །གང་གི་ཚེ་རྒོལ་བ་ལ་ངེས་པ་དང་ལྡན་པ་དེ་ལྟ་ན་བྱས་པ་དང་མི་རྟག་པ་མེད་ན། མི་འགྱུར་བར་གཞན་ལ་གྲུབ་པ་དེའི་སྐབས་སུ་ཡང་སྒྲ་ནི་བྱས་པའོ་ཞེས་བྱ་བ་ཡང་བརྗོད་པ་ཡིན་ནོ་ཞེས་བྱ་བ་ནི་དེ་ཙམ་བརྗོད་པར་བྱའོ། །དེ་སྐད་དུ། དཔེ་ལ་དེ་ཡི་ངོ་བོ་དང༌།


DTG190_Page_0255
[མ་དཔེ་གཟིགས་ན་འདིར་གནོན།]

རྒྱུའི་དངོས་མི་ཤེས་དེ་དག་ལ། །སྟོན་ཏེ་མཁས་པ་རྣམས་ལ་ནི། །གཏན་ཚིགས་འབའ་ཞིག་བརྗོད་པར་ཟད། །ཅེས་བྱ་བ་སྨོས་སོ། །དེ་དང་དེ་དག་ནི་ངེས་པར་ཁས་བླངས་པས་ལྷག་མ་ཚར་གཅད་པའི་གནས་ཀྱི་ཁྱད་པར་གྱི་ཡུལ་དུ་གཞག་གོ །ཁྱད་པར་གྱི་ཡུལ་དེ་ཡང་སྒྲུབ་པར་བྱེད་པ་ཞེས་བྱ་བ་ལ་སོགས་པ་སྨོས་སོ། །འོ་ན་ངེས་པ་ཁས་བླངས་ནས་བརྗོད་པ་ཡིན་ཞེས་བྱ་བ་རྣམ་བཤད་མཁན་གྱིས་བརྗོད་པ་སློབ་དཔོན་གྱིས་འདིར་ཅི་ཞིག་ཏུ་བརྗོད། བདེན་ཏེ་ཅུང་ཟད་ཀྱང་བརྗོད་པ་མེད་དེ་སློབ་དཔོན་གྱིས་རྐང་མིག་གིས་སྨྲས་པ་ཉིད་རྗེས་སུ་ཤེས་པའི་དོན་དུ་ཡང་རྗེས་སུ་བརྗོད་དོ། །སྒྲ་དང་དོན་དག་སྨྲ་བ་ནི་ཡང་བརྗོད་པ་ཡིན་ནོ་ཞེས་བྱ་བར་སྨྲ་བ་ནི་སྐུར་བ་འདེབས་པ་ནི། རྗེས་སུ་སྨྲས་པ་ལས་གཞན་ཞེས་བྱ་བ་སྨོས་སོ། །རྗེས་སུ་སྨྲས་པ་ནི་མཇུག་བསྡུ་བའོ། །རྗེས་སུ་སྨྲ་བ་ནི་ཡང་བརྗོད་པས་བསྟན་པར་འགྱུར་བ་མ་ཡིན་ཏེ། སྒྲ་དག་གིས་དོན་གྱི་བྱེ་བྲག་བྱེད་ན་འཐད་པའི་ཕྱིར་རོ། །བསྒྲུབ་བྱ་བསྟན་པ་གང་ལས་དམ་བཅའ་བ་གྲུབ་ཟིན་པ་སྟོན་པ་ནི་མཇུག་བསྡུ་བ་ཡིན་ནོ་ཞེས་བཤད་དེ་ཡང་སྒྲ་དུ་མ་ཉིད་མཐོང་བས་དུས་མི་རིང་བར་ཡང་ངེས་པའི་ནུས་པ་ངེས་པར་ཡང་བྱ་བའོ་ཞེས་ཀྱང་རིག་པར་བྱ་བ་ཉིད་དོ། །འོ་ན་ཏེ་དེ་ལྟ་ན་གལ་ཏེ་ཡང་བརྗོད་པས་ཐོབ་པ་ཉིད་མེད་པ་ཡིན་ན་ནི་དོན་འདི་གསལ་པ་ཅིའི་ཕྱིར་རྩོལ་ཞེ་ན། བདེན་ཏེ་འདི་ལྟ་བུ་འདི་ཉིད་རྟོག་གེ་བ་ཕུལ་དུ་ཕྱུང་བ་ལ་ཇི་ལྟ་བ་ཡིན་ཞེས་བྱ་བ་ལ་སོགས་པ་འདྲི་བར་བྱའོ། །ཁོ་བོ་ཅག་ལ་ཕ་རོལ་གནས་སེམས་ཤིང་དཔྱོད་པ་རྣམས་ཀྱིས་ཅི་ཞིག་བྱ་སྟེ། ཞར་ལ་འབྱུང་བས་ཆོག་གོ །འདི་ལ་ཡང་མདོ་གཉིས་པ་ཡོད་པ་ཡིན་ཏེ། དོན་སྤངས་ནས་སྒྲ་རང་ཉིད་ལ་འཇུག་པ་ཡིན་ནོ་ཞེའོ། །དེ་སློབ་དཔོན་གྱི་ཉེ་བར་བཀོད་པ་ནི་མཚོན་པ་ཙམ་ཡིན་པའི་ཕྱིར་རོ། །གོ་བར་བྱ་བ་དང་གོ་བར་བྱེད་པའི་དོན་ལ་བཟླས་པ་ནས་བརྗོད་པ་ལ་སོགས་པ་འདི་དག་ཀྱང་སྤང་བར་བྱ་ཞིང་བསལ་བར་འདོད་པས་འདིར་ཞེས་བྱ་བ་ལ་སོགས་པ་སྐྱོན་རྩོལ་བ་ཡིན་ནོ། །འདི་སྐད་སྟོན་པ་ཡིན་ཏེ། གང་ལ་སྒྲ་དང་དོན་ལ་ཉེ་བར་ཐ་དད་པ་དེ་ལ་དོན་ཡང་བཤད་པ་ཉིད་ཀྱིས་རྟོགས་པ་ཡིན་ནོ། །གང་ལ་སྒྲ་དོན་དང་ཉེ་བར་ཐ་དད་པ་དེ་ལ་སྒྲ་ཡང་བརྗོད་པ་འདི་ཡང་སྐྱོན་ཅུང་ཟད་ཙམ་མེད་དེ། ཅི་འདི་འདྲ་


DTG190_Page_0256
[མ་དཔེ་གཟིགས་ན་འདིར་གནོན།]

པ་ཡོད་དམ་ཞེ་ན། སྒྲ་ཡང་བརྗོད་པ་གང་ཡིན་པ་འདི་ལ་དོན་ཐ་དད་པ་ཡོད་པ་ཉིད་སྲིད་པ་ཡིན་ཏེ། བཤད་པ། དཔེར་ན་རྒོད་ན་ཡང་རྒོད་པར་འགྱུར་ཞེས་བྱ་བ་ལ་སོགས་པའོ། །འདིར་ནི་སྔ་མའི་བརྗོད་པའི་སྒྲ་ནི་འདུན་པ་ཡིན་ལ་གཉིས་པ་ནི་ཏི་ངན་ཏ་ཡིན་པས་དོན་ཐ་དད་པ་ཡིན་ནོ། །འདི་འདྲ་བ་སྙན་དང་གས་མཁན་འདོན་པ་ཡིན་ཏེ། སྲིད་པ་ཡིན་ནམ་ཞེས་བྱ་བའི་དགོས་པ་ལ་དཔེ་ཡང་བརྗོད་པ་ནི། དཔེར་ན་ཞེས་བྱ་བ་ལ་སོགས་པ་སྨོས་ཏེ། འོན་ཏེ་འདིར་བྱ་བ་དེའི་མཐའ་དང་ཏྱ་དེའི་མཐའ་ཡང་ཡོད་པ་ཡིན་ནོ་ཞེ་ན། བདེན་ཏེ་སྒྲ་ཉི་ཚེ་ཙམ་ཡང་ཡོད་པ་ཡིན་ཏེ། འདིར་ཡང་སྒྲ་མི་རྟག་ཅེས་བྱ་བ་ལྟ་བུ་སྒྲ་ཐ་དད་པའོ། །རང་གི་ཐ་དད་པ་ནི་རང་གི་མཚན་ཉིད་ཐ་དད་པའི་ཕྱིར་རོ། །དེ་ལྟ་མ་ཡིན་ན་རིམ་པ་མེད་པས་ཐོབ་པར་འགྱུར་རོ། །མཚུངས་པ་ལ་བརྟེན་ནས་མཚུངས་པར་ཐོས་པའི་འདི་ཟློག་པར་བརྗོད་པ་ཡིན་ནོ། །དེ་ལ་ཅིག་ཤོས་འདི་ཡང་མཚུངས་པ་ཡིན་ནོ་ཞེས་དོན་ཐ་དད་པ་འདི་ཡང་བྱ་བ་ཐ་དད་པ་ལ་སོགས་པའི་ཚིག་ཐ་དད་པའི་ཕྱིར་རོ། །རྟོགས་པར་གྱུར་པའི་དོན་ལ་ཡང་བརྗོད་པར་ཡང་ཟློས་པར་བརྗོད་པ་ཡིན་ནོ། །ཡང་བརྗོད་པའི་མཚན་ཉིད་གཉིས་པའི་མདོ་ནི་ཉེ་བར་མཚོན་པ་ཙམ་ཡིན་ནོ། །དཔེ་འདི་ཡང་བད་ཚ་ཡ་ཡིས་རིགས་པ་བཤད་པ་དང་ཆོས་མཐུན་པར་ཆོས་མི་མཐུན་པའི་སྦྱོར་བ་ལ་བཤད་དོ། །སློབ་དཔོན་གྱིས་དམ་བཅའ་བ་ལ་ཡང་མཚུངས་པར་དགོངས་ནས་དམ་བཅའ་བ་བསྒྲུབ་པར་བྱ་བར་བརྗོད་ནས་རྗེས་སུ་དཔག་པ་སྟོན་པར་བྱེད་པར་འདོད་པ་ལ་ཚིག་ཟུར་གྱིས་དམ་བཅའ་བའི་ཚིག་བརྗོད་པའི་དཔེ་ཉིད་དུ་ཉེ་བར་བཀོད་པ་ཡིན་ནོ། །སྒྲུབ་པར་བྱེད་པའི་ཚིག་ངེས་པར་སྦྱོར་པའི་ངག་ལ་ནི་དཔེར་ན་དམ་བཅའ་བའི་ཚིག་བཞིན་དུ་སྒྲུབ་པར་བྱེད་ཚིག་ངེས་པར་སྦྱོར་བར་བྱེད་པའི་ངག་གང་ཡིན་པ་ལ་ཞེས་བྱ་བ་ནི་འབྲས་བུ་སྟེ། འདི་སྤངས་པ་ཡིན་ནོ། །དོན་ཟློས་པར་བརྗོད་པ་ཉིད་ཀྱིས་ཁོང་དུ་ཆུད་པའི་ཕྱིར་ལོགས་ཤིག་ཏུ་བརྗོད་པར་མི་བྱའོ། །དཔེ་ནི་སྒྲ་གཅིག་གིས་བསྟན་པའི་དོན་དེ་བསྟན་ཟིན་པ་སྒྲ་གཞན་གྱིས་བསྟན་པ་ཡིན་ན་དོན་མེད་པ་དེ་བཞིན་དུ་ཤུགས་ཀྱིས་གོ་བའི་དོན་ཡིན་ན་དོན་ཡང་བཟླས་ནས་བརྗོད་པ་ཉིད་བསྡུས་པ་ཡིན་ནོ་ཞེས་བྱ་བའི་དོན་ཏོ། །དམ་བཅའ་བ་བརྗོད་པ་དོན་གྱིས་གོ་བར་གྱུར་བ་འདི་བཟླས་པས་ཅི་ཞིག་བྱ། ཡང་བཟླས་པ་བརྗོད་པ་ནི་


DTG190_Page_0257
[མ་དཔེ་གཟིགས་ན་འདིར་གནོན།]

ཚར་གཅད་པའི་གནས་སུ་འགྱུར་རོ་ཞེས་པ་ནི་སྒྲུབ་པར་བྱེད་པ་ངེས་པའི་སྦྱོར་བ་བརྗོད་པ་ཡིན་ནོ་ཞེས་བྱ་བ་འདི་ཉིད་རྣམ་པར་འགྲེལ་པའོ། །ཡང་བསྒྲུབ་པར་བྱས་པ་འདི་ཉིད་གོ་བར་བྱ་བ་དང་གོ་བར་བྱེད་པའི་དོན་ལ་སྐྱོན་དུ་འགྱུ་ལ། སྒྲུབ་པར་བྱེད་པའི་ངག་ཁོ་ན་ལ་ངེས་པར་སྦྱོར་བའི་ཚིག་ལ་ཡང་འཇུག་པ་ཡིན་ནོ། །འདི་སྐད་སྟོན་པ་ཡིན་ཏེ། གང་གི་ཚེ་དབང་པོ་སྒྲའི་དོན་ལ་དཔྱོད་པ་ན། ཡང་རྟོག་པ་དང་ལྡན་པས་ཤིན་ཏུ་དཔྱོད་པར་བྱེད་པ་ཡོད་པ་ཡིན་ལ་སྟོན་པ་པོའི་དེ་བཞིན་དུ་འགྱུར་བ་ཉིད་དོ། །དེ་ཡང་ཚིག་གཞན་གྱིས་བསྒྲུབ་བྱར་སྒྲུབ་པར་བྱེད་དེ་དེ་ཉིད་རབ་ཏུ་སྦྱར་བར་བྱའོ། །ལྷག་མ་ནི་མ་ཡིན་ནོ་ཞེས་སྨྲས་པ་དེའི་སྐྱོན་ནི་གཞན་དུ་ན་མ་ཡིན་ནོ། །གང་གི་ཚེ་སྙིང་རྗེ་གཞན་དབང་དུ་གྱུར་པའི་སེམས་ཀྱི་རྒྱུ་མཚན་གྱི་ཚོགས་པས་ཡིད་དུ་འོང་བ་ལྟ་བུའི་ཕྱིར་རྒོལ་བ་རྣམས་དང་སློབ་མ་རྣམས་རིག་བྱེད་པའི་ལམ་དུ་འཇུག་པའི་འབད་པས་ཡང་བཟླས་ནས་བརྗོད་པ་ལ་ཡང་སྐྱོན་མེད་དོ། །དེ་ཉིད་བཤད་པ། རྒོལ་བ་པོས་འབད་པས་སྟོན་པར་བྱེད་ཅིང་བརྗོད་པས་འཇུག་པ་ཐོས་པ་དང་རྟོགས་པ་ཡང་དག་པ་མ་ཡིན་པར་དགོས་པ་བྱེད་པར་འགྱུར་བ་ཡང་དག་པ་མ་ཡིན་པའི་ཐོས་པ་དང་རྟོགས་པའི་དོན་དུ་ཡང་དང་ཡང་དུ་བརྗོད་པར་བྱ་བ་ཡིན་ནོ། །མ་ཡིན་ཏེཿ་ཡུལ་མ་ཡིན་པའི་ཕྱིར་ཞེས་བྱ་བ་ནི་ཕ་རོལ་པོའོ། །རྒོལ་བ་འདི་ནི་བླ་མ་ཡིན་ལ་ཕྱིར་རྒོལ་བ་འདི་ནི་སློབ་མ་ཡིན་པ་སྟེ། རྒོལ་བ་དང་ཕྱིར་རྒོལ་བ་གཉི་ག་ཡང་ཕན་ཚུན་རྒྱལ་བར་འདོད་པས་རྣམ་པར་འཇོམས་པའི་ཕྱིར་རོ། །དེའི་ཕྱིར་རྒོལ་བ་དང་ཕྱིར་རྒོལ་བ་འབད་པས་བསྟན་པར་བྱ་བ་མ་ཡིན་ནོ། །མ་ཡིན་ཏེ་ཞེས་བྱ་བ་ནི་སློབ་དཔོན་ནོ། །གལ་ཏེ་ཕྱིར་རྒོལ་བ་ལ་བསྟན་པར་བྱ་བས་དབང་པོས་གནོད་པ་མི་ཟ་བར་ཁོང་དུ་ཆུད་དེ་དེ་རྟོགས་པ་ཁོ་ནས་དབང་པོ་རྒྱལ་བ་ཡིན་ལ། དེ་ལྟ་མ་ཡིན་ན་ཕམ་པ་ཡིན་པའི་ཕྱིར་ཇི་ལྟར་དཔང་པོས་ཁོང་དུ་ཆུད་པར་མི་འགྱུར། གཞན་ཡང་ངེས་པར་དཔང་པོ་བཞིན་དུ་ཕྱིར་རྒོལ་བས་ཀྱང་ཁོང་དུ་ཆུད་པར་བྱ་སྟེ། ཅིའི་ཕྱིར་ཞེ་ན། མ་བསྟན་ན་སྐྱོན་དུ་བརྗོད་པའི་ཕྱིར་རོ། །དེ་ཡང་སྒྲ་ལ་ལྟོས་ནས་འཇུག་པ་དང་ངེས་པར་བྱེད་དོ། །གལ་ཏེ་དཔང་པོ་འཇུག་པ་ལ་བསྟན་པར་བྱེད་པ་མེད་པར་འགྱུར་བ་དེའི་ཕྱིར་ཁྱེད་ཀྱིས་རྒོལ་བ་དང་ཕྱིར་རྒོལ་བ་


DTG190_Page_0258
[མ་དཔེ་གཟིགས་ན་འདིར་གནོན།]

དག་ལན་གསུམ་དུ་བརྗོད་པའི་དོན་ལ་མ་རྟོགས་པ་ཚར་གཅད་པའི་གནས་སུ་བཤད་པ་གང་ཡིན་པ་དེ་དང་འགལ་བ་ཡིན་ནོ་ཞེས་བྱ་བའི་དོན་ཏོ། །གང་ཡང་འདི་ཞེས་བྱ་བ་བརྗོད་པ་དེ་མ་གྲུབ་སྟེ་ཕྱིར་རྒོལ་བ་འདི་སློབ་མ་ཡིན་པའི་ཕྱིར་རོ། །དེ་ཁོ་ན་ཉིད་ཤེས་པ་དོན་དུ་གཉེར་བའི་སློབ་མ་ལ་བསྟན་པར་བྱ་བ་ཡིན་པ་ལས་གཞན་མཚན་ཉིད་ནི་དེ་ལ་མེད་དོ། །དེ་ལྟར་གྱུར་པའི་ཕྱིར་རྒོལ་བ་ཅིའི་ཕྱིར་སློབ་མ་ཡིན། །དེ་ཁོ་ན་ཉིད་དོན་དུ་གཉེར་བ་འདི་ཕྱིར་རྒོལ་བ་མ་ཡིན་པ་ཉིད་དུ་འགྱུར་བ་བརྗོད་པ་ཅི་ཞིག་བྱ། དེ་གཉིས་ཀ་ཡང་ལྡང་བའི་ཕྱིར་རོ་ཞེས་བྱ་བ་ནི་མི་རིགས་སོ། །སྔར་རྒྱལ་བར་འདོད་པའི་སྨྲ་བ་དག་དགག་པར་བྱ་བའི་ཕྱིར་རོ། །དེ་ལྟ་ན་ཡང་འདི་འབད་པས་བསྟན་པར་བྱ་བ་མ་ཡིན་ན་ཡང་དྲང་སྲུང་གིས་ལན་གསུམ་གྱི་བར་དུ་བརྗོད་པའི་ངེས་པར་བྱས་པའི་ཕྱིར་རོ་ཞེ་ན། དེའི་ཕྱིར་ལན་གསུམ་གྱི་བར་དུ་བརྗོད་པའི་ཚིག་ཅེས་བྱ་བ་ལ་སོགས་པ་སྨོས་ཏེ། འདི་གཞན་དུ་འཆད་པར་འགྱུར་བ་ལས་བསྟན་པར་བྱ་སྟེ། གལ་ཏེ་རེ་ཞིག་གཞན་ལ་བསྟན་པའི་དོན་དུ་འཇུག་ན་ལན་གསུམ་གྱི་བར་དུ་ཅིའི་ཕྱིར་བརྗོད་པར་བྱ། ཇི་ལྟར་བརྗོད་པ་དེ་ལྟར་དེས་རྟོགས་པར་བྱ་བའི་དོན་ཡིན་པ་དེ་ལྟ་ན་ཡང་གཞན་དུ་གདུང་བར་འགྱུར་བས་ལན་གསུམ་གྱི་བར་དུ་བརྗོད་པ་ཅི་ཞིག་བྱ། དབང་པོ་རྣ་གཏོད་པ་ལ་བརྗོད་ལ་ཕྱིར་རྒོལ་བའི་འདོད་པ་ལ་ངེས་པར་རྟོགས་པ་མ་ཡིན་པ་མདོར་བསྟན་པ་ལ་སོགས་པས་དངོས་པོ་དེ་ངེས་པར་བྱེད་པའི་ཅི་རིགས་པའི་ལན་གྱིས་རྟོགས་པ་ཡིན་གྱི་རྨོངས་པ་ལ་ནི་སྨྲ་བར་མི་བྱའོ་ཞེ་ན། འདི་མ་ཡིན་ཏེ། སྒྲ་དང་དོན་དག་ཟློས་པའི་ཚིག་གིས་གོ་བར་བྱ་བ་འམ། དོན་ཟློས་པའི་ཚིག་གིས་ཐ་དད་མེད་པར་སྒྲུབ་པར་བྱེད་དོ། །ཚིག་ངེས་པར་སྦྱོར་བ་ཞེས་བྱ་བ་ལ་སོགས་པ་ལ་གཏན་ཚིགས་དང་དཔེ་ལྷག་པའི་སྐྱོན་ཡིན་ནོ། །བྱས་པའི་ཕྱིར་ཞེས་བྱ་བ་གཅིག་ལས་ནི་དོན་མེད་པར་བརྗོད་པའི་ཕྱིར་རོ། །ཟློས་པ་ཚིག་ལ་ཡང་སྔ་མའི་ཚིག་གིས་རྟོགས་པར་བྱ་བའི་དོན་ཤེས་པས་ཚིག་ཕྱི་མ་གང་ཡིན་པ་དེ་ནི་ལྷག་མའི་སྐྱོན་གྱི་དབང་དུ་བྱས་ནས་ཡིན་ནོ་ཞེས་བྱ་བ་དེ་སྐད་བརྗོད་དོ། །ཡང་ངེས་པའི་ཚིག་གི་སྦྱོར་བ་ལ་འདི་སྐྱོན་ཡིན་ནོ་ཞེས་ཅིའི་ཕྱིར་བཤད་ཅེ་ན། བཤད་པ་གཏམ་རྒྱུད་སྣ་ཚོགས་པའི་


DTG190_Page_0259
[མ་དཔེ་གཟིགས་ན་འདིར་གནོན།]

སྐྱོན་དུ་མི་འགྱུར་རོ་ཞེས་སྦྱར་རོ། །གང་གི་ཡིན་ཞེ་ན། གཏན་ཚིགས་ལ་སོགས་པ་ཡང་བརྗོད་པར་བྱའོ། །སོགས་པའི་སྒྲས་ནི་དཔེ་མང་པོ་གཟུང་བར་བྱའོ། །ཅི་འདྲ་བ་ཞིག་ཅེ་ན། མ་དཔྱད་པའི་དོན་གཅིག་པ་བསྒྲུབ་པའི་དབང་དུ་བྱས་ནས་དོན་འདི་བསྒྲུབ་པར་བྱ་བའི་དོན་དུ་གཉེར་བའི་ཕྱིར་བྱས་པའོ། །སྒྲུབ་པར་བྱེད་པའི་གཏན་ཚིགས་དང་ཆོས་ཅན་གྱི་དབང་དུ་བྱས་ནས་དོན་དང་ལྷན་ཅིག་ཏུ་སྒྲུབ་པར་བྱེད་པས་དོན་སྒྲུབ་པར་བྱེད་པ་སྟེ་བར་གྱི་ཚིག་མི་མངོན་པར་བྱས་པའོ། །འདིའི་དོན་དུ་སྒྲུབ་པར་བྱེད་པ་གཅིག་པའི་ཕྱིར་རོ་ཞེས་དེ་སྐད་དུ་བཤད་དོ། །དེའི་དབང་དུ་མ་བྱས་པ་ནི་དེ་མ་དཔྱད་པའི་དོན་སྒྲུབ་པར་བྱེད་པའི་དབང་དུ་བྱས་པའི་གཏམ་རྒྱུད་སྣ་ཚོགས་པའི་ཕྱིར་རྒོལ་བས་གསོན་པོའི་ལུས་ལ་སོགས་པའི་ཆོས་ཅན་ཡིན་གྱི་བདག་མེད་པ་ལ་སོགས་པའི་ཆོས་ཅན་གཅིག་ཏུ་ཡོངས་སུ་གཅོད་པ་ནི་མེད་དེ། འོན་ཀྱང་དུ་མ་ཉིད་དང་མི་རྟག་པ་ཉིད་དང་བདག་མེད་པ་དང་བྱེད་པ་པོ་དབང་ཕྱུག་ལ་སོགས་པའོ། །དེ་བཞིན་དུ་དུ་མའི་གཏན་ཚིགས་ནི་འོན་ཀྱང་དེ་གཅིག་མ་ཡིན་ནོ་ཞེས་བྱ་བའི་དོན་ཏོ། །འདི་ཉིད་རིམ་པ་ཇི་ལྟ་བ་བཞིན་དུ་བརྗོད་པ་ནི། དོན་སྣ་ཚོགས་ལ་སྒྲུབ་པར་འདོད་པ་འམ་སྒྲུབ་པར་བྱེད་པ་སྣ་ཚོགས་པར་འདོད་པའི་ཉན་པའི་སྔོན་དུ་སྒྲུབ་པར་བྱེད་པ་སྨོས་པ་ནི་དངོས་པོ་སྒྲུབ་པར་བྱེད་པའི་ཕྱིར་གྲུབ་པའི་ཚིག་གོ །ཕྱིས་རྒྱུ་སྒྲུབ་པར་བྱེད་པའི་ཕྱིར་གཏན་ཚིགས་སྨོས་སོ། །དེའི་ཕྱིར་གཏན་ཚིགས་ལ་སོགས་པ་མང་པོ་དང་ཚིག་མང་པོས་སྒྲུབ་པར་བྱེད་པར་ངེས་པའོ། །ཚིག་ལ་སྐྱོན་མེད་དོ། །ཅིའི་ཕྱིར་ཞེ་ན། བརྟགས་ཟིན་པ་ལ་བརྟག་པར་བྱར་མེད་པའི་ཕྱིར་རོ། །སྐྱོན་མཚུངས་པའི་ཕྱིར་འདུས་པའི་ཚིག་ཉིད་རིག་པ་ཡིན་ནམ། ལྷག་པར་བརྗོད་པར་བྱས་ནས་ཟློས་པ་བརྗོད་པ་ཉིད་དོ་ཞེས་བྱ་བའི་དོན་ཏོ། །ཡང་གི་སྒྲས་ནི་ཟློས་པར་བྱེད་པ་ལྷག་མའི་ནང་དུ་ཇི་ལྟར་འདུ་བར་འགྱུར་ཞེ་ན། བཤད་པ་རྣམ་གྲངས་ཀྱི་སྒྲར་བཏགས་པའི་གཏན་ཚིགས་གཞན་གཉིས་པ་ནི་གཏན་ཚིགས་གཅིག་བསྟན་པའི་ཡུལ་ལ་འཇུག་པ་ཡིན་ཏེ། ཅིའི་ཕྱིར་ཞེ་ན། བསྟན་པར་བྱ་བའི་ཡུལ་བྱེ་བྲག་མེད་པའི་ཕྱིར་རོ། །དོན་བཟླས་ནས་བསྟན་པ་ཡིན་པ་དེ་ལྟ་ན་ཇི་ལྟར་ལྷག་པའི་ནང་དུ་ཇི་ལྟར་འདུས་ཤེ་ན། དོན་ཡང་བསྟན་པ་ལ་ས་ཐ་དད་པ་ཡོད་པ་མ་ཡིན་ནོ། །དོན་སྒྲའི་སྒོ་


DTG190_Page_0260
[མ་དཔེ་གཟིགས་ན་འདིར་གནོན།]

ནས་ཟློས་པ་རྗོད་པར་ཤེས་པར་འགྱུར་ཏེ། ཡང་བརྗོད་པ་འདིས་ན་བཟླས་ནས་བརྗོད་པར་བསྟན་ཏེ། གཏན་ཚིགས་དང་དཔེ་ལྷག་མ་ཁོ་ནའོ། །འདི་སྐད་སྟོན་པ་ཡིན་ཏེ། དཔེ་འདི་གསལ་བ་ཉིད་དུ་ལྷག་པའི་ནང་དུ་འདུ་བ་ཡིན་ཏེ། འདི་ལྟར་ཆོས་མཐུན་པའི་སྤྱིར་བ་བྱས་ནས་ཆོས་མི་མཐུན་པའི་དཔེ་སྦྱོར་བའི་དོན་ཟློས་པའི་དཔེར་བརྗོད་པར་བཤད་དོ། །གང་ཡང་བརྗོད་པ་ཞེས་བྱ་བ་ལ་སོགས་པ་སྤོང་བར་བྱེད་པ་གོ་སླའོ། །རྣམ་པར་རིག་པར་འགྱུར་བའི་ངག་གི་དོན་ལན་གསུམ་གྱི་བར་དུ་བརྗོད་པར་བྱ་བ་གང་ཡིན་པ་དེ་ནི་དེ་བཞིན་དུ་ཁྱད་པར་གྱི་བསྡུ་བ་བྱ་སྟེ། རྣམ་པར་རིག་པ་ཡང་ཡིན་ལ་འདི་དག་གི་དོན་ཡང་ཡིན་པས་ལན་གསུམ་གྱི་བར་དུ་བརྗོད་པས་བསྟན་པར་བྱའོ། །ཕྱིར་རྒོལ་བ་གང་ཡིན་པ་ནི་ལན་བརྗོད་པར་བྱའོ་ཞེས་བྱ་བ་དང་འབྲེལ་པ། ཅིག་ཆར་ལན་གསུམ་བརྗོད་པས་ན་རྗེས་སུ་སྨྲ་བ་མེད་པ་ཞེས་བྱ་བ་ཚར་གཅད་པའི་གནས་ཡིན་ནོ་ཞེས་བ་ཤེས་པར་བྱ་བའི་དོན་ཏོ། །ལན་བརྗོད་པ་མེད་པ་ནི་སྒྲ་བརྗོད་པའི་སྒོ་ནས་ཚར་གཅད་པའི་གནས་ཀྱི་རྒྱུད་ནི་བཤད་པ་ལན་བརྗོད་པ་མེད་པར་ཅི་ལ་བརྟེན་ནས་གཞན་གྱི་ཕྱོགས་དགག་པ་སྨྲ་བར་བྱེད་ཅེས་བྱ་བ་ནི་ཡུལ་མེད་པའི་ཕྱིར་སུན་འབྱིན་པ་མེད་དོ་ཞེས་བྱ་བའི་དོན་ཏོ། །ཁྱེད་ཀྱིས་བཤད་པ་འདི་ཡིན་ནོ་ཞེས་བརྗོད་ན་སུན་འབྱིན་པ་བརྗོད་པར་བྱའོ། །དེ་ལྟ་ན་སུན་འབྱིན་པ་བརྗོད་པས་ཀྱང་བསྒྲུབ་པར་བརྗོད་པའི་རྗེས་སུ་བཟླས་ནས་ལན་བརྗོད་པར་བྱ་དགོས་པ་དེའི་ཕྱིར་འདི་གཉི་ག་ཡང་ཚར་གཅད་པའི་གནས་སོ། །འདི་བ་ར་དྭ་ཛས་རེ་ཞིག་མ་མཐོང་བ་སྤོད་པར་བྱེད་པ་ནི། གལ་ཏེ་ལན་གྱི་སྒོ་ནས་ངེས་པར་ཡོངས་སུ་ཤེས་པ་འདི་ནི་ཚར་གཅད་པའི་གནས་ཡིན་ཞེ་ན། དེ་ལྟར་ནི་གྱུར་ན་ཞེས་བྱ་བ་ལ་སོགས་པ་འདི་དག་ཏུ་བརྗོད་པ་ལན་གྱི་ཡུལ་ཡོངས་སུ་ཤེས་པ་ཞེས་བྱ་བ་དེ་ཉིད་ལན་ལྡོན་པ་ཡིན་ནོ། །འདི་ནི་འགལ་བ་ཞེས་བྱ་བ་ལ་སོགས་པ་འདི་ཉིད་རྣམ་པར་དབྱེ་བའོ། །དམ་བཅའ་བ་བརྗོད་པ་མེད་པ་ཞེས་བྱ་བ་དེ་ཉིད་ཡིན་གྱི་རྟེན་མེད་པར་གཞན་གྱི་ཕྱོགས་དགག་པ་མེད་པ་བརྗོད་པ་ནི་མི་རིགས་པའི་ལན་མ་བརྗོད་པ་ཞེས་བྱ་བ་ཚར་གཅད་པའི་གནས་སུ་རིགས་པ་ཡིན་ནོ་ཞེས་བྱ་བ་འདི་ཙམ་ནི་ཕ་རོལ་གྱི་གཞུང་ངོ༌། །འདིར་སློབ་དཔོན་གྱིས་སུན་འབྱིན་པ་རྩོམ་པ་ནི། གལ་ཏེ་རྒོལ་བ་རང་གི་སྒྲུབ་པར་བྱེད་


DTG190_Page_0261
[མ་དཔེ་གཟིགས་ན་འདིར་གནོན།]

པའི་དོན་གྱི་རྟེན་ཟོལ་གྱིས་ཞར་ལ་འོངས་པ་གཞན་དང་གཞན་སྨྲ་བར་འགྱུར་བ་ནི་སྔར་དཔེར་བརྗོད་པ་བཞིན་ནོ། །རི་དང་ཁང་བཟངས་ལ་སོགས་པ་བློ་སྔོན་དུ་སོང་བ་རྒྱུས་བྱས་པ་ཡིན་ནོ་ཞེས་བྱ་བ་ནི་དམ་བཅའ་བའོ། །ལུས་ལ་སོགས་པ་བསྟན་པའི་ཟོལ་གྱིས་མ་ལུས་པའི་རྒྱུད་བརྗོད་པ་ཡིན་ནོ། །དཔེར་ན་ཤེས་པར་འདོད་པའི་དོན་ཙམ་བཤད་པ་ཇི་ལྟར་རྒྱས་པར་བྱེད། གང་གི་ཚེ་རྒོལ་བ་རྒྱས་པར་བྱེད་པས་ཅི་ཞིག་བྱེད་ཅེས་སྦྱོར་རོ། །དམ་བཅའ་བ་ལ་སོགས་པ་དོན་གྱི་ཁྱད་པར་གཞན་གྱིས་ཉེ་བར་མི་མཁོ་བའི་བསྒྲུབ་པར་བྱ་བ་དོན་བྱེད་པར་ཁས་བླངས་ནས་སྔར་གྱི་དེས་ཇི་ལྟ་བ་བཞིན་དུ། སྒྲ་རྟག་མི་རྟག་ཅེས་བྱ་བ་ལ་རྒྱལ་དཔོག་པའི་རྒོལ་བ་ཚར་གཅད་པའི་མཚན་ཉིད་བཅུ་གཉིས་ལ་སོགས་པ་ནི་མཚན་ཉིད་བཅུ་གཉིས་སུ་བརྗོད་པ་ཉིད་དོ། །དཔེར་ན་ཅི་འདུས་བྱས་པས་འདི་ཐམས་ཅད་སྐད་ཅིག་མ་ཡིན་ནམ་མ་ཡིན་ཞེས་རྩོད་པའི་དངོས་པོ་ཉིད་ལ་སོགས་པའི་སྤྱི་ལ་བརྟེན་ནས་དེ་ལ་བརྟེན་པ་དང་དེའི་ཡུལ་མངོན་སུམ་ལ་སོགས་པ་ཤེས་པ་རང་གི་བདག་ཉིད་དུ་གྲུབ་པ་དེ་མ་ཐག་ཏུ་འཇིག་པ་ནི་མི་འགྱུར་ཏེ། སྤྱི་དང་སྤྱི་མ་ཡིན་པའི་རིགས་ཀྱི་རྫས་ལས་ལྡན་པ་དང་རྣམ་པར་དབྱེ་བའི་སྒྲའི་འབྲས་བུ་སྐྱེད་པ་ནི་བརྗོད་པར་བྱ་བ་ཡིན་པའི་ཕྱིར་སྔ་ན་མེད་པ་བཞིན་ནོ་ཞེས་བྱ་བ་རྐང་མིག་གིས་བརྗོད་པ་ཉིད་དོ། །འོ་ན་དམ་བཅའ་བ་ལ་སོགས་པ་ཞེས་བྱ་བའི་ཚོགས་པའི་སྒྲས་ཅི་ཞིག་གཟུང་བར་བྱ། རེ་ཞིག་གཏན་ཚིགས་དང་དཔེ་ནི་མ་ཡིན་ཏེ། དེ་ཙམ་བཤད་ཟིན་ཏོ་ཞེས་བརྗོད་པའི་ཕྱིར་རོ། །གཞན་ཡང་འགའ་ཞིག་ནི་འདིར་སྐབས་མ་ཡིན་ནོ་ཞེ་ན། སྐྱོན་འདི་ནི་མེད་དེ་གང་གི་ཕྱིར་འདིར་གཏན་ཚིགས་ལ་སོགས་པ་བརྗོད་པ་ཡིན་ནོ་ཞེས་བལྟ་བར་བྱའོ། །དེས་ན་གཏན་ཚིགས་ལ་སོགས་པ་སྨོས་པས་འཕགས་པ་ཡིན་ནོ་ཞེས་འགའ་ཞིག་འདོད་དོ། །གཞན་གྱིས་སྨྲས་པ་འདི་ནི་སྨྲས་པ་མ་ཡིན་པ་ལ་དོགས་པ་ཡིན་ནོ།། ཏྭའི་སྐྱོན་བསྟན་པའི་ཕྱིར་རོ། །གང་གི་ཕྱིར་དོན་འདི་ཙམ་ལ་ཕྱིར་རྒོལ་བར་ཤེས་པར་འདོད་པའི་དོན་ཙམ་གཞན་གྱི་ཁྱད་པར་སྤངས་པ་སྐད་ཅིག་མ་མ་ཡིན་པ་ལ་སོགས་པ་གང་ཡིན་པ་དེ་རྒོལ་བས་བརྗོད་པ་འདི་བདག་གིས་བསྒྲུབ་པར་བྱའོ་ཞེས་དུས་ཕྱིས་ཚད་མས་གསལ་བར་བྱེད་


DTG190_Page_0262
[མ་དཔེ་གཟིགས་ན་འདིར་གནོན།]

པས་དམ་བཅའ་བ་ལ་སོགས་པའི་དོན་གྱི་ཁྱད་པར་བརྗོད་ཅིང་གཞན་དོན་མེད་པ་ཁས་བླངས་ནས་བརྗོད་པ་ཇི་ལྟར་རྒྱས་པར་བྱེད་པ་ཞེས་བྱ་བའོ། །དེ་ཡང་ཞེས་བྱ་བ་ནི་དམ་བཅའ་བའི་ཁྱད་པར་བསྒྱུར་བ་སྐབས་སུ་མ་བབ་པ་གཉི་གར་བཤད་པ་གསལ་བར་བྱེད་པ་ལྟ་བུ་རྒོལ་བ་བརྗོད་པ་དེའི་ཚེ་དཀའ་བ་ཉིད་དོ། །སྐད་ཅིག་མ་མ་ཡིན་པ་ལ་སོགས་པ་རྩོད་པའི་གནས་ཀྱི་དོན་འདི་ཙམ་གྱི་ཚིག་གི་ནུས་པ་ལ་རྩོད་པ་མེད་དོ་ཞེས་བྱ་བའི་དོན་ཏོ། །དེ་བས་ན་རྒོལ་བ་ཐམས་ཅད་ཀྱི་ཚིག་ཇི་ལྟར་རྗེས་སུ་མ་བརྗོད་པར་གྱུར་ན། ཕྱིར་རྒོལ་བ་ལས་ལན་བརྗོད་པར་ནུས་པ་ཡིན་ཏེ། འོན་ཏེ་ཚིག་མེད་ན་མི་འབྱུང་བས་ཤེས་པར་འདོད་པའི་དོན་གྲུབ་པ་གང་ཡིན་པ་དེ་ཉིད་ཉེ་བར་དམིགས་པར་བྱ་བ་ཉིད་དོ་ཞེས་བྱ་བར་སྦྱར་རོ། །སྐྱོན་ནི་སྒྲུབ་པར་བྱེད་པའི་ཡོན་ཏན་ནི་སུན་འབྱིན་པའི་ཡུལ་ཡིན་པའི་ཕྱིར་རོ། །སུན་འབྱིན་པ་དང་སྒྲུབ་པ་ནི་གཞན་ལ་རག་ལས་ནས་གཞན་ལ་འཇུག་པ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་མེད་ན་མི་འབྱུང་བས་ཤེས་པར་འདོད་པའི་དོན་གྲུབ་པར་འགྱུར་ཞེ་ན། བཤད་པ་ཕྱོགས་ཀྱི་ཆོས་དང་ཁྱད་པར་རབ་ཏུ་སྒྲུབ་པ་ཡིན་ཏེ། ཁྱབ་པ་སྒྲུབ་པར་བྱེད་བའི་གནོད་པ་ཅན་གྱི་ཚད་མ་བསྟན་པའི་ཕྱིར་རོ། །ཅི་འདི་ཙམ་ཡང་སྒྲུབ་པར་བྱེད་པ་ལ་སྦྱོར་བའི་དོན་གཞན་སྤོང་བར་བྱེད་པ་མ་ཡིན་ནམ་ཞེ་ན་མ་ཡིན་ཏེ། བཤད་པ། དེ་ལ་ཡང་ཞར་ལ་བྱུང་བ་སྤོང་བ་ཡིན་ནོ་ཞེས་བྱ་བ་ནི་དོན་མེད་དོ་ཞེས་མངོན་པར་འདོད་དོ། །དེ་ཙམ་གྱིས་ཉེ་བར་བསྟན་པའི་སྔར་གྱི་གོ་རིམས་ལས་ཕྱིས་གཞན་དུ་ཇི་སྟེ་མ་ཡིན། དེ་ལ་ཡང་སུན་འབྱིན་པའི་ཡུལ་ཉེ་བར་བསྟན་པའི་དོན་རྗེས་སུ་བརྗོད་པ་ཇི་སྙེད་པ་ཐམས་ཅད་ཉེ་བར་བཀོད་པའི་རྒོལ་བས་དེ་མ་ཡིན་པའི་སྐྱོན་བརྗོད་པའི་ཕྱིར་རོ། །སྔ་མའི་རིམ་པ་བཞིན་དུ་བརྗོད་པར་མི་བྱའོ། །ཅིའི་ཕྱིར་ཞེ་ན། ལན་གཉིས་བརྗོད་པར་ཐལ་བར་འགྱུར་བའི་ཕྱིར་རོ། །ལན་གཉིས་བརྗོད་བར་ཐལ་བར་འགྱུར་བ་ཉིད་དུ་བསྟན་པ་ནི། དང་པོའི་གནས་སྐབས་ཀྱི་སྐྱོན་བརྗོད་པར་མི་བྱ་བ་ལ་སོགས་པའོ། །གལ་ཏེ་ཚིག་གི་གོ་རིམས་བཞིན་དུ་བརྗོད་པར་ཐལ་བར་མི་བྱེད་ན། ད་ནི་སུན་འབྱིན་པའི་ཡུལ་མེད་པར་ཐལ་བར་འགྱུར་བའོ་ཞེ་ན། ཅིའི་ཕྱིར་ཞེ་ན། མེད་ན་མི་


DTG190_Page_0263
[མ་དཔེ་གཟིགས་ན་འདིར་གནོན།]

འབྱུང་བ་ཉིད་ཡིན་པའི་ཕྱིར། སུན་འབྱིན་པའི་ཡུལ་ཉེ་བར་བསྟན་པར་བྱ་བ་ཁོ་ནའོ། །ཇི་ལྟར་སྐྱོན་གྱི་ཚིག་རེ་རེའི་ཡུལ་བསྟན་པར་བྱའོ། །སུན་འབྱིན་པའི་ཚིག་རེ་རེ་ལ་སྐྱོན་པ་རྗོད་པ་གང་ཡིན་པ་དེ་དང་དེ་ནི་ཡུལ་བརྗོད་པར་བྱའོ་ཞེས་བརྗོད་པའི་དོན་ཏོ། །དེ་ཉིད་བརྗོད་པ་ནི་རྒོལ་བས་སུན་འབྱིན་པར་བརྗོད་པའི་སྐྱོན་འདི་ཡིན་ཞེས་བྱའོ། །ཡང་ཅིའི་ཕྱིར་ཡིན་ཞེ་ན། སྐྱོན་ཐམས་ཅད་ཅིག་ཅར་ཚིག་གིས་བརྗོད་པར་བྱ་བ་ཡིན་ནོ་ཞེས་ཐམས་ཅད་གོ་རིམས་བཞིན་དུ། བརྗོད་པ་གང་ཡིན་པ་དེ་ལ་འཁྲུལ་པའི་གཞན་གྱི་ཕྱོགས་ནི་རིགས་པ་མ་ཡིན་ནོ། །དེ་བརྗོད་པ་ཡིན་ཏེ་སྐྱོན་བརྗོད་པ་མེད་པར་འདི་ལན་གཉིས་བརྗོད་པའི་ཕྱིར་རོ་ཞེས་བྱ་བ་དེ་ལྟ་ན་ཚིག་སོ་སོར་ཉེ་བར་དགོང་པ་ནི་འབྲས་བུ་ཡིན་ནོ། །དེའི་ཕྱིར་ཐམས་ཅད་ནི་གོ་རིམས་མེད་པར་རྗེས་སུ་སྨྲ་བ་ནི། ཕམ་པའི་རྟེན་ཅན་དུ་བརྗོད་པར་བྱའོ། །ད་ནི་འདིར་རྐང་མིག་གིས་སྐྱོན་འདི་ཐམས་ཅད་ཕྱོགས་སྔ་མ་ཁས་མི་ལེན་ན་ཁོ་བོ་ཅག་གིས་སོ་སོར་གསལ་བར་བྱའོ་སྙམ་དུ་སེམས་གཞན་དུ་རྗེས་སུ་ཤེས་པ་དེ་ལྟར་འགྱུར་རོ་སྙམ་ནས། དེ་ལྟར་གྱུར་ན་ཞེས་བྱ་བ་ནི་འདི་དག་ཉིད་བརྗོད་པར་བྱའོ། །གང་གི་ཕྱིར་འགའ་ཞིག་ལ་ཞེས་བྱ་བ་ནི། རང་གི་སྒྲུབ་པར་བྱེད་པའི་དོན་སྟོན་པའི་ཟོལ་གྱིས་དམ་བཅའ་ལ་སོགས་པའི་དོན་གྱི་ཁྱད་པར་རམ། བརྒྱུད་པས་ཁས་བླངས་པ་ཞར་ལ་འོངས་པ་མེད་ན་མི་འབྱུང་བ་མ་ཡིན་པར་འདོད་པའི་ངོ་བོར་སྒྲུབ་པ་ཞེས་བྱ་བར་སྔར་བཤད་པར་རྒོལ་པར་བརྟགས་པའི་ཕྱིར་དང༌། དོན་གཞན་གོ་བར་བྱ་བ་མ་ཡིན་པའི་ཕྱིར། ཚར་གཅད་པར་འོས་པ་ཡིན་ནོ། །ཞར་ལ་འོངས་པར་བརྗོད་པ་ནི་གང་ཡིན། ཚར་གཅད་པར་བྱ་བ་གང་ཡིན་ཞེ་ན། འགའ་ཞིག་འགའ་ཞིག་ལ་ཞར་ལ་འོངས་པར་བྱེད་པ་མེད་པ་ནི་མི་རིགས་ཏེ། སྔར་ཇི་སྐད་བཤད་པ་བཞིན་དུ་ཆོས་བདག་མེད་པར་སྨྲ་སྒྲུབ་བྱེད་དུ་གླུ་དང་གར་ལ་སོགས་པ་ཡང་ཐལ་པར་འགྱུར་རོ་ཞེས་བྱའོ། །རྒོལ་བ་དེས་ཞར་ལ་འབྱུང་བ་བརྗོད་པ་གང་ཡིན་པ་དེའི་རྗེས་སུ་ཕྱིར་རྒོལ་སྨྲ་བ་ཡང་མ་ཡིན་ཏེ། ཉེ་བར་མི་མཁོ་བ་ལ་རྗེས་སུ་བརྗོད་པར་བྱ་བ་མ་ཡིན་ནོ་ཞེས་བྱ་བའི་དོན་ཏོ། །དེས་སྔར་ཇི་སྐད་བཤད་པ་ནི། འདི་གལ་ཏེ་ཞིག་ན་རྒོལ་བ་


DTG190_Page_0264
[མ་དཔེ་གཟིགས་ན་འདིར་གནོན།]

རང་ཉིད་སྒྲུབ་པར་བྱེད་པའི་དོན་གྱིས་བསྟན་པ་འདི་གཞན་དུ་ཡོངས་སུ་ཤེས་སོ། །ད་ནི་ཇི་ལྟར་བཤད་པ་དེ་ཡང་ཐམས་ཅད་གོ་རིམས་བཞིན་དུ་བརྗོད་པར་མི་བྱ་བ་མ་ཡིན་ཏེ། ལན་ཅིག་བརྗོད་པར་ཐལ་བར་འགྱུར་བའི་ཕྱིར། ཞེས་ཕྱིས་སུན་འབྱིན་པ་བརྗོད་པ་ནི། འདི་ཡང་མ་ཡིན་ཏེ། ཁོ་བོ་ཅག་གིས་ཞེས་བྱ་བ་ལ་སོགས་པ་དེ་རྗེས་སུ་ཤེས་སོ། །སློབ་དཔོན་གྱིས་སྨྲས་པ་གལ་ཏེ་ཁྱེད་ཀྱང་དེ་ལྟ་བུ་ཡིན་པ་ཉིད་དུ་འདོད་པ་དེ་ལྟ་ན་རྗེས་སུ་བརྗོད་པ་ལས་ལོགས་ཤིག་ཏུ་བརྗོད་པར་མི་བྱ་སྟེ། ཅིའི་ཕྱིར་ཞེ་ན། སྤོབས་པ་མེད་པའི་ནང་དུ་འདུས་པའི་ཕྱིར་རོ། །འདུས་པ་ཉིད་དུ་བསྟན་པར་བྱ་བ་ཡིན་ལ། ལན་རྟོགས་པ་མེད་པ་ནི་སྤོབས་པ་མེད་པ་ཉིད་དོ། །ཇི་ལྟ་བ་འདུས་པ་ཡིན་ཞེ་ན། བཤད་པ། ལན་གྱི་ཡུལ་མ་བསྟན་ན་ལན་གསུམ་པའི་སྤོབས་པ་དང་རྟོགས་པ་དང་ཤེས་པ་དང་བརྗོད་པ་ལ་ནུས་པ་མེད་དོ། །ཅིའི་ཕྱིར་མི་ནུས་ཤེ་ན། རྗེས་སུ་ཆགས་པ་ལ་ཞེས་བྱ་བ་ལ་སོགས་པ་སྨོས་ཏེ། ལན་རྟོགས་པ་མེད་པ་ནི་ལན་ཁོང་དུ་ཆུད་པ་མེད་པ་ཡིན་ནོ་ཞེས་བྱ་བའི་དོན་ཏོ། །མི་འཕེན་པ་དེ་ནི་མ་ཡིན་པ་དེ་ནི་རྗེས་སུ་བརྗོད་པ་མེད་པ་གང་ཡིན་པ་དེ་དེ་བཞིན་དུ་དགག་པ་རྣམ་པ་གཉིས་ཀྱིས་ངེས་པར་རྣམ་གཉིས་འཕེན་པའི་ལམ་རྟོགས་པ་མེད་པ་ཉིད་དོ། །འདི་སྐད་སྟོན་པ་ཡིན་ཏེ། རྟོགས་པར་བྱ་བ་གང་ཡིན་པ་དེ་ནི་ཡུལ་གདོན་མི་ཟ་བར་འདི་ཡིན་ནོ་ཞེས་དེ་དང་དེ་དག་ནི་དམ་བཅའ་བ་སུན་འབྱིན་པའི་ཕྱིར་རོ། །ཡོངས་སུ་ཤེས་པའི་ཡུལ་ཡང་སེམས་དང་བཅས་པ་སུ་ཞིག་དེ་རྗེས་སུ་མི་བརྗོད་པ་ནི་མ་ཡིན་ནོ། །ཅིའི་ཕྱིར་ཞེ་ན། གང་ལ་རྗེས་སུ་བརྗོད་པ་ནི་མ་ཡིན་ནོ། །དེའི་ཕྱིར་གང་ལ་རྗེས་སུ་བརྗོད་པ་མེད་པ་དེ་ལ་སོགས་པ་མ་ཡིན་པ་དེ་ནི་དེའི་ཁྱབ་པར་བྱེད་པ་མ་ཡིན་ཏེ། ཤིང་དང་སེང་ལྡེང་བཞིན་ནོ། །དེ་ཡང་ཚར་གཅད་པའི་གནས་སུ་བྱས་པ་ཉིད་དོ། །རྗེས་སུ་བརྗོད་པ་མེད་པ་ལ་ཁྱབ་པ་ཡིན་པ་དེས་དེ་འཕངས་པ་ཞེས་བྱ་བ་དེ་གསལ་བར་བྱེད་པའི་མཇུག་བསྡུ་བ་ནི་ཞེས་བྱ་བ་ལ་སོགས་པ་སྨོས་ཏེ། འདིར་དཔེར་བརྗོད་པ་སྨྲས་པ་ནི་བ་ལང་གི་ཐ་སྙད་གང་ཡིན་པ་དེ་ཐ་དད་པར་ངེས་པ་མེད་པའི་སྤྱི་ལ་བྱེད་པ་བཞིན་དུ་ལྐོག་ཤལ་ལ་སོགས་པ་དང་ལྡན་པ་ངེས་ཁྱབ་པའི་ཁྲ་མོ་ཐོབ་པར་འགྱུར་རོ་སྙམ་ནས་འཇུག་གོ །སྦྱོར་བ་ནི་གང་ཡང་


DTG190_Page_0265
[མ་དཔེ་གཟིགས་ན་འདིར་གནོན།]

གཅིག་བརྗོད་པ་ནི་ཤུགས་ཀྱིས་མ་བརྗོད་པ་ཐོབ་པར་འགྱུར་བ་དེ་ནི་རྟོགས་པ་སྔོན་དུ་གཏོང་བས་སླར་ཕར་བརྗོད་པར་མི་བྱ་སྟེ། དཔེར་ན་བ་ལང་གི་རིགས་ཀྱི་ལྐོག་ཤལ་ལ་སོགས་པ་རྗེས་སུ་བརྗོད་པ་ནི་ཤུགས་ཀྱིས་དེ་ལ་ཐ་དད་པའི་ལྐོག་ཤལ་ལ་སོགས་པ་དང་ལྡན་པ་ཐོབ་པར་འགྱུར་བ་བཞིན་དུ་བརྗོད་པ་མེད་པའི་ཚར་གཅད་པའི་གནས་ཀྱང་སྤོབས་པ་མེད་པའི་ཚར་གཅད་པའི་གནས་སུ་བརྗོད་པའི་ཤུགས་ཀྱིས་ཐོབ་པ་ཡིན་ནོ་ཞེས་པའི་ཁྱད་པར་བྱེད་པ་དང་འགལ་བ་དམིགས་པའོ། །འོ་ན་ཡང་ཕྱིར་རྒོལ་བ་ཤེས་ནས་ཀྱང་ཡུལ་དག་གིས་ཡུལ་གྱི་ཡུལ་དག་ལ་ལན་འདེབས་པར་འཇིགས་པ་དག་འདར་བ་ལ་སོགས་པ་སེམས་དཀྲུགས་པར་བྱས་པའི་ཕྱིར་རྒོལ་བས་རྗེས་སུ་བརྗོད་པ་མེད་པ་ཡིན་ནོ། །སྤོབས་པ་མེད་པ་དེ་དེའི་ཁྱབ་པར་བྱེད་པ་ཇི་ལྟར་འགྱུར། གང་གིས་འདིའི་གཏན་ཚིགས་སུ་གྲུབ་པར་འགྱུར་ཞེ་ན། མ་ཡིན་ཏེ། དེ་ལྟ་བུ་མི་སྲིད་པའི་ཕྱིར་རོ། །ཡུལ་དག་གིས་ཡུལ་གྱི་ཡུལ་དག་ལ་ཡང་ལན་འདོན་པ་ནི་མ་ཡིན་རྣམ་པ་འགའ་ཞིག་གིས་འཇིགས་པ་འམ། བརྒྱལ་བ་འམ་མི་ཤེས་པ་མེད་པའི་ཕྱིར་རོ། །འཇིགས་པ་དང་འདར་བས་རྡུལ་བྱུང་བ་ལ་སོགས་པ་དེ་ལྟ་དེ་ལྟར་གྱུར་པ་ཡང་འཇིགས་པས་དཀྲུགས་པར་བྱས་ནས་ཡིན་ནོ། །དེ་ལྟ་ན་ཐོག་མ་ནས་དེ་ལྟ་བུའི་རྩོད་པ་བྱེད་དུ་འགྲོ་བར་ཡང་མི་འགྱུར་རོ། །གཞན་ཡང་གལ་ཏེ་ཕ་རོལ་པོ་བྱིས་པ་ཉིད་དུ་འགྱུར་ན་དེ་ལྟ་བུར་འགྱུར་གྱི་བྱིས་པའི་ཆེད་དུ་བྱས་ནས་རིགས་པའི་བསྟན་བཅོས་པ་ནི་མ་ཡིན་ནོ། གལ་ཏེ་དེ་ལྟ་ན་ཡང་སྤོབས་པ་མེད་པའི་ནང་དུ་འདུས་པ་ལ་འགལ་བ་མེད་དོ། །གང་གི་ཕྱིར་ལན་མི་ཤེས་པ་དང་ལན་མི་བརྗོད་པའི་ངོ་བོ་རྣམ་པ་གཉིས་ལ་ལན་རྟོགས་པ་མེད་པ་ཡིན་ལ་དེའི་ཕྱིར་འདི་ཡང་མ་ཡིན་ནོ། །འོན་ཏེ་གཞན་གདུང་བར་བྱེད་པའི་དོན་ཡིན་པ་དེ་ལྟར་ཡང་ལན་གསུམ་བརྗོད་པར་བྱ་བ་ཡིན་ན་དེ་ལ་འབྲས་བུ་ཅི་ཞིག་ཡོད། །དབང་པོ་རྣམས་གསལ་བར་སྨྲ་ལས་ཉམས་པ་རྣ་བར་བཤུབས་པ་འདི་དོན་འདི་ལ་ཁོ་བོས་བརྗོད་པར་འདོད་པ་ཡིན་ནོ་ཞེས་བྱ་བ་དུས་ཕྱིས་ཕྱིར་རྒོལ་པས་དཀའ་ཞིང་སྡུག་བསྔལ་བས་རྟོགས་པས་མདོར་བསྡུས་པ་ལ་སོགས་པ་ནི་ཉེ་བར་འཚོ་བ་ཡིན་ནོ། །དཀའ་བ་ནི་བརྗོད་དཀའ་


DTG190_Page_0266
[མ་དཔེ་གཟིགས་ན་འདིར་གནོན།]

བའོ། །རྟོགས་པ་མེད་པ་ནི་སིང་ག་གླིང་གི་སྐད་ལ་སོགས་པ་བརྡར་མ་བྱས་པའོ། །མྱུར་བ་ན་མགྱོགས་པར་བརྗོད་པའོ། །མདོར་བསྡུས་པ་ལ་སོགས་པ་མདོ་སྡེའི་ཚིག་བཞིན་ནོ། །བཟླུམས་ཏེ་བྱས་སོ་ཞེས་བྱ་བའི་དོན་ཏོ། །སོགས་པ་སྨོས་པ་ནི་སྦས་པའི་དོན་རྣམས་སྨོས་པ་སྟེ། དཔེར་ན། རང་གི་ཕྱོགས་ལ་དམིགས་ནས་རྣམ་པར་ཕྱེ། །གང་ཞིག་འདོད་དང་རེག་པ་འདི་ཡིན་ནོ། །ཞེས་བྱ་བ་ལྟ་བུའོ། །དཔེར་ན་ཕྱིར་རྒོལ་བ་ལན་བརྗོད་པ་ལ་སྨོས་ནས་སྨྲ་བར་མི་བྱའོ། །འཁོར་དང་ཕྱིར་རྒོལ་བ་དག་གིས་ལན་གསུམ་བརྗོད་པ་ནི་རྣམ་པར་མི་རིག་པར་རྣམ་པར་རིག་པའི་དོན་མ་ཡིན་པའི་ཕྱིར་འདིར་མཚམས་མེད་པ་དང༌། དཀའ་བ་ལ་སོགས་པའི་སྒྲ་སྦྱོར་བ་ནི་ཐུབ་པ་རྣམས་ཀྱིས་དགག་པའི་ཕྱིར་འདིར་རིགས་པ་མ་ཡིན་པ་བྱེད་པར་འཐད་པ་མ་ཡིན་ནོ་ཞེ་ན། གཞན་ཉེ་བར་གདུང་བར་བྱེད་པའི་རིམ་པ་ལ་ཞེས་བྱ་བ་ལ་སོགས་པ་སྨོས་སོ། །འོན་ཀྱང་གཞན་གདུང་བ་ལ་དམིགས་པ་འཇུག་པ་མ་ཡིན་ནོ། །བསྟན་བཅོས་ཀྱང་དེའི་ཆེད་དུ་བརྩམས་པ་ཡིན་ནོ་ཞེས་བསྟན་ཟིན་ཏོ། །སྐྱེ་བོ་ངན་པ་ལོག་པར་རྟོགས་པའི་དབང་དུ་བྱས་ནས་བསྟན་བཅོས་འཇུག་པར་འགྱུར་བའི་ཕྱིར་རོ། །གཞན་གདུང་བའི་ཆེད་དུ་མི་འཇུག་པ་ཡོད་པ་མ་ཡིན་ནོ། །དེའི་ཕྱིར་རེ་ཞིག་བརྗོད་པར་བྱ་སྟེ། ཇི་སྲིད་དུས་འདིས་རྟོགས་ན་ལན་གསུམ་གྱིས་བར་དུ་བརྗོད་པར་མི་བྱའོ། །འོན་ཏེ་རྒོལ་བས་ལན་བརྒྱར་ཡང་དང་ཡང་དུ་བརྗོད་ན་ཡང་ཕྱིར་རྒོལ་བ་རྨོངས་པས་གཟུང་བར་ནུས་པ་མ་ཡིན་ནོ་ཞེ་ན། གཟུང་བར་ངེས་པས་མི་ནུས་པར་ངེས་པ་ཡིན་པ་དེའི་ཚེ་རྣམ་པ་འགའ་ཞིག་ངེས་པའི་སྒྲུབ་པར་བྱེད་པའི་སྦྱོར་བས་འདི་དང་ལྷན་ཅིག་ཏུ་བརྗོད་པས་ཅི་ཞིག་བྱ་སྙམ་ནས་སྔར་ཉིད་དུ་འདོད་པར་འགྱུར་རོ། །ཡོངས་སུ་བཅད་ནས་སྦོར་བར་ནུས་པས་བརྒྱད་པ་ལ་རྨོངས་པའི་ཕྱིར་རྒོལ་བ་ཡིན་ནོ་ཞེས་བྱ་བར་སྦྱར་རོ། །གང་གིས་རྒོལ་བ་དེ་ལྟ་བ་ལ་ལན་དེ་ལྟ་བ་གདབ་པར་ཇི་ལྟར་མི་ནུས་པ་ཡིན་ནོ་སྙམ་དུ་དོགས་པ་གཞན་ལ། བཤད་པའི་ཚིག་འདིས་དོན་རྟོགས་པར་མི་ནུས་ན་ཡང་དབང་པོ་གཞན་གྱིས་རྟོགས་པར་བྱ་སྟེ། དེ་ལྟར་དངོས་པོ་རྣམ་པར་དབྱེ་བ་གནས་པའི་ཕྱིར་རོ། །དོན་རྣམ་པར་དབྱེ་བ་མི་ཤེས་པ་དངོས་པོ་རྐྱེན་ངེས་པར་བརྗོད་པའི་


DTG190_Page_0267
[མ་དཔེ་གཟིགས་ན་འདིར་གནོན།]

ཕྱིར་རོ། །སྒྲུབ་པར་བྱེད་པའི་ངག་གི་དོན་ཡོངས་སུ་ཤེས་པ་ཚར་གཅད་པའི་གནས་སོ། །དེ་ཉིད་ཀྱི་ཕྱིར་རྣམ་བཤད་ཀྱི་ཊཱི་ཀཱ་མཛད་པས། ངག་གི་དོན་གྱི་ཡུལ་ལ་རྣམ་པར་ཤེས་པ་མི་སྐྱེ་བ་ནི་མི་ཤེས་པ་ཡིན་ནོ་ཞེས་རྣམ་པར་འགྲེལ་ཏེ། ལས་འདི་ལ་ངེས་པར་བརྗོད་པའི་རྒོལ་པ་རབ་ཏུ་སྦྱོར་བའི་ངག་ཉིད་ཡིན་ལ་དེ་ལྟར་ན་ཡང་དག་གི་དོན་གྱི་ཡུལ་གྱི་ཤེས་པ་མི་སྐྱེ་བ་དང་ཁྱད་པར་མེད་པའི་ཕྱིར་རྒོལ་བ་ནི་ཚར་གཅད་པའི་གནས་ཡིན་ནོ་ཞེས་བྱ་བ་ཅུང་ཟད་ཀྱང་འགལ་པ་མེད་དོ། །གཞན་ངེས་པར་དོན་སྨོས་པ་མཐོང་སྟེ། མདོའི་དོན་སྨོས་པ་དོར་པར་འདོད་པ་དོན་མི་ཤེས་པ་ཡང་མི་ཤེས་པ་ཡིན་ནོ་ཞེས་བྱ་བ་དེ་ནི་ཡིད་ཆེས་པས་སྨྲ་བ་མ་ཡིན་ནོ། །དབང་པོས་སྒྲུབ་པར་བྱེད་པའི་ངག་གི་དོན་རྣམ་པར་ཤེས་ན་ཡང་ཕྱིར་རྒོལ་བས་རྣམ་པར་མི་ཤེས་ན་ཡང༌། ཕྱིར་རྒོལ་བས་རྣམ་པར་མི་ཤེས་པ་དང་ཁོང་དུ་མི་ཆུད་པ་གང་ཡིན་པ་དེ་ནི་མི་ཤེས་པ་ཡིན་ཟེར་བར་བྱེད་ཀྱི་ཕྱོགས་ཀྱི་ཡི་གེ་དགོད་པ་ཡིན་ནོ། །ལས་ཀྱི་ཕྱོགས་ཡིན་པ་དེ་ལ་ཡང་འགལ་བ་མེད་དེ་དག་གཅིག་པ་དེ་ཉིད་ཀྱིས་བཤད་དོ། །དབང་པོས་རྣམ་པར་ཤེས་པའི་དོན་ཅི་ཞིག་ཡིན། །དབང་པོས་ཤེས་པའི་རྒོལ་བས་དོན་མི་ཤེས་པ་ཚར་གཅད་པའི་གནས་ཡིན་ནོ་ཞེས་བྱ་བར་ཤེས་པར་བྱའོ། །ཚར་གཅད་པར་མི་བྱའོ། །བཤད་པ། དོན་རྣམ་པར་མི་ཤེས་པའི་ཕྱིར་རྒོལ་བ་དེ་དགག་པར་སྨྲ་བར་བྱ་བ་མ་ཡིན་ཏེ་ཞེས་བྱ་བ་གཞན་གྱི་སྐྱོན་བརྗོད་པའི་གཞུང་གི་ལན་དུ་འདི་སྦྱོར་བར་བྱེད་དོ། །དེ་ཡང་རིགས་པ་མ་ཡིན་ཏེ། རྣམ་བཤད་ཀྱི་འགྲེལ་པའི་གཞུང་ཡིན་པའི་ཕྱིར་རོ། །སྒྲུབ་པ་ཁུང་དུ་ཆུད་པ་མེད་པ་ཉིད་ནི་དཔེར་ན་རྗེས་སུ་མི་སྨྲ་བ་བཞིན་དུ་ལན་རྟོགས་པ་མེད་པའི་གནས་ནི་ཚར་གཅད་པའི་གནས་ཡིན་ནོ། །ལན་རྟོགས་པ་མེད་པ་ཇི་ལྟར་ཡིན་ཞེ་ན། བཤད་པ། ཡུལ་བསྟན་པ་མེད་པའི་ཕྱིར་རོ། །ཕྱིར་རྒོལ་བས་ལན་ཁོང་དུ་ཆུད་པར་མི་ནུས་པར་བྱས་པ་ནི། གང་གི་རྣམ་པར་རིག་པའི་ཡུལ་བསྟན་པ་མ་ཡིན་པའོ་ཞེས་ཁྱད་པར་གྱི་ཚིག་བསྡུ་བ་ཉིད་དོ། །འདི་ལྟར་སུན་འབྱིན་པའི་ཡུལ་བསྟན་པའི་དོན་དུ་བརྗོད་པ་ཡིན་ནོ། །དེ་ཡང་སྤངས་ནས་གང་གི་ཚེ་རྒོལ་བ་གཞན་གྱིས་བརྗོད་པ་ནི་མ་ཡིན་རྗེས་སུ་བརྗོད་པ་དེའི་ཚེ་ལན་གྱི་ཡུལ་མེད་པར་དེ་ལྟ་བུར་གྱུར་པ་དེ་རྗེས་སུ་བརྗོད་པ་ནི་


DTG190_Page_0268
[མ་དཔེ་གཟིགས་ན་འདིར་གནོན།]

དོན་ཡིན་པའི་ཕྱིར་མི་ནུས་སོ་ཞེས་བྱ་བར་གནས་པའམ་ལན་ཁོང་དུ་ཆུད་པ་མེད་པ་ཉིད་ཚར་གཅད་པའི་གནས་སུ་ཡིན་ནོ་ཞེས་བྱ་བའོ། །དེ་བཞིན་དུ་མི་ཤེས་པ་ཉིད་ཀྱང་ལན་ཁོང་དུ་ཆུད་པ་མེད་པས་ཚར་གཅད་པའི་གནས་ཡིན་ནོ་ཞེས་བྱ་བ་ནི་ཕྱོགས་ལ་ཆོས་བསྡུ་བའོ། །གང་གི་ཕྱིར་རྒོལ་བས་སུན་འབྱིན་པ་དེའི་ཡུལ་མི་ཤེས་ན་ཇི་ལྟར་ལན་གྱི་ཡུལ་དུ་སྨྲ་བར་འགྱུར། དཔེ་ཁ་ཅིག་ལས་ལན་གྱི་ཡུལ་སྐྱོན་སྨྲ་བར་འགྱུར་ཞེས་འདོན་ཏོ། །ཇི་ལྟར་ན་ལན་དང་ལན་གྱི་ཡུལ་གྱི་ལན་ཡིན་ཞེ་ན། དེ་ནི་དེ་ལྟ་བུའི་ཚིག་དང་འབྲེལ་པ་ཡིན་ནོ། །ལན་དང་ལན་གྱི་ཡུལ་མི་ཤེས་ན་ཇི་ལྟར་ལན་བརྗོད་པ་ཡིན་ཞེ་ན། དེའི་ཡུལ་མི་ཤེས་པ་དང་ལན་མི་ཤེས་པ་ཚར་གཅད་པའི་གནས་ཡིན་ཏེ། རྟོགས་པར་བྱ་བ་སྤོབས་པ་མེད་པའི་ཕྱིར་རོ། །བརྗོད་དུ་མེད་དོ་ཞེས་བྱ་བར་གནས་སོ། །ཅིའི་ཕྱིར་ཞེ་ན། བརྗོད་པར་འགྱུར་བས་དོན་རྣམ་པ་གཞན་དུ་ན་སྤོབས་པ་མེད་པ་ཅན་ཉིད་ཡིན་པའི་ཕྱིར་རོ། །ཇི་ལྟར་ཡུལ་མེད་པ་ཡིན་ཞེ་ན། དོན་ངེས་པར་གཟུང་བ་མེད་པ་ཞེས་བྱ་བ་ལ་སོགས་པ་སྨོས་ཏེ། ཕྱོགས་སྔ་མའི་ལན་ངེས་པར་གཟུང་བ་མེད་པའི་དོན་གྱི་ཕྱིར་རྒོལ་བས་རྗེས་སུ་བརྗོད་པ་མེད་པའོ། །རྗེས་སུ་སྨྲ་བ་མེད་པའི་ཡུལ་མ་བསྟན་པས་ལན་ཁོང་དུ་ཆུད་པར་མི་ནུས་པའི་ཕྱིར་ལན་ཁོང་དུ་ཆུད་པ་མེད་དེ། མི་ཤེས་པ་འམ་མ་བརྗོད་པས་སོ། །ཅིའི་ཕྱིར་ལན་གྱི་ཡུལ་མི་ཤེས་པ་ལ་ལན་རྟོགས་པ་མེད་པ་ཡིན་ཞེ་ན། ལན་དང་དེའི་ཡུལ་མི་ཤེས་པ་ཅན་ལ་ལན་ཁོང་དུ་ཆུད་པ་མི་ཤེས་པའི་ཕྱིར་རམ། ལན་ཁོང་དུ་ཆུད་པ་དེའི་ཡུལ་གང་ཡིན་པར་འགྱུར་རོ་ཞེས་བྱ་བ་ནི་བསྡུ་བའོ། །དེའི་ཕྱིར་དེའི་ལན་མི་ཤེས་པ་གཉིས་ཀྱང་རྟོགས་པ་མེད་པ་ནི་སྤོབས་པ་མེད་པ་ཞེས་བྱ་བའི་རྒྱུ་ཡིན་ནོ། །འོ་ན་ལན་མི་ཤེས་པ་ཉིད་སྤོབས་པ་མེད་པ་དེ་ཇི་ལྟར་དེའི་བདག་ཉིད་ཀྱི་རྒྱུ་ཡིན་པ་ཉེ་བ་ཉིད་དུ་བསྟན་ཞེ་ན། མ་ཡིན་ཏེ། ལན་བརྗོད་པ་མེད་པའི་མཚན་ཉིད་གང་ཡིན་པ་དེ་ནི་བརྗོད་པར་འདོད་པའི་སྤོབས་པ་མེད་པའི་ཕྱིར་རོ། །དེ་མེད་ན་ཞེས་བྱ་བ་ནི་དེ་དག་གི་ལན་མི་ཤེས་པ་དག་མེད་པར་འགྱུར་རོ། །ཁོང་དུ་ཆུད་པ་དང་རྗོད་པར་བྱེད་པ་དག་གི་ལན་ནི་ཡོད་པ་ཁོ་ནའོ། །ཕྱིར་རོ་ཞེས་བྱ་བ་ནི་དེའི་ཕྱིར་རོ། །དེ་དག་གི་ཡུལ་མི་ཤེས་པ་དང་ལན་མི་ཤེས་པ་


DTG190_Page_0269
[མ་དཔེ་གཟིགས་ན་འདིར་གནོན།]

དག་མི་ཤེས་པའི་མིང་ཅན་དག་ཚར་གཅད་པའི་གནས་ཡིན་ཏེ་སྤོབས་པ་མེད་པ་ལོགས་ཤིག་ཏུ་ཚར་གཅད་པའི་བརྗོད་པ་ཡིན་ན། སྤོབས་པ་མེད་པའི་ཡུལ་གང་ཡིན་ཞེས་བརྗོད་པར་བྱ། གལ་ཏེ་ཡུལ་མེད་པར་བརྗོད་པ་ནི་དེའི་ཚེ་ཡུལ་མེད་པ་ཅན་ཡིན་པའི་ཕྱིར། སྤོབས་པ་མེད་པར་བརྗོད་པར་བྱ་བ་མ་ཡིན་པ་ཉིད་དུ་འགྱུར་རོ། །མི་ཤེས་པ་དང་རྗེས་སུ་བརྗོད་པ་མེད་པ་དེ་དག་ཐ་དད་པར་བརྗོད་པ་ཡིན་ནོ་ཞེས་གཞན་དུ་བརྗོད་པར་བྱ་སྟེ། མི་ཤེས་པ་དང་སྤོབས་པ་མེད་པ་ཡུལ་ཐ་དད་པ་རྣམ་པར་འཇོག་པ་ཕ་རོལ་པོས་སྨྲས་པ། ལན་མི་ཤེས་པ་ནི་མི་ཤེས་པར་མི་བརྗོད་པ་ནི་གང་ལ་སྤོབས་པ་མེད་པ་ནི་ཡུལ་མེད་པའི་ཕྱིར་མི་བརྗོད་ཀྱི། འོན་ཀྱང་མི་ཤེས་པ་ཞེས་བྱ་བ་ལ་སོགས་པ་སྨོས་ཏེ། ཡུལ་མི་ཤེས་པའོ། །དེ་ལྟ་ན་ཇི་ལྟར་སྤོབས་པར་བྱེད་པ་ཡུལ་ཤེས་པ་དང་ལྡན་པར་འགྱུར་ཞེ་ན། བཤད་པ་ཡུལ་མི་ཤེས་པར་འགྱུར་བའི་དུས་ཀྱིས་ཕྱིས་ཕྱིར་རྒོལ་བས་ལན་ཤེས་པའི་ལན་ཁོང་དུ་མ་ཆུད་པས་མི་སྨྲ་བའི་ཕྱིར་རོ། །དེས་ན་ཡུལ་ཡོད་པ་ལ་སྤོབས་པ་མེད་པ་ནི་མི་ཤེས་པ་ལས་མ་འདས་པ་ཡིན་ནོ། །དེ་ལྟ་ན་ཡང་བརྗོད་དུ་མེད་པའི་ཕྱིར། །དེ་ལྟ་ཡིན་ན་ཞེས་བྱ་བ་སྨོས་ཏེ། རྗེས་སུ་དཔག་པ་མེད་པ་ནི། །མི་ཤེས་པའི་ནང་དུ་འདུས་པར་སྒྲུབ་པའི་ཕྱིར་རོ། །ཡུལ་ཡང་དག་པར་ཁོང་དུ་ཆུད་པ་ཡིན་ན་སུ་ཞིག་རྗེས་སུ་དཔག་པ་མེད་པར་འགྱུར། དེས་ན་རྗེས་སུ་དཔག་པ་མེད་པ་ལོགས་ཤིག་ཏུ་བརྗོད་པར་མི་བྱའོ། །གཞན་ཡང་རྗེས་སུ་བརྗོད་པ་དེ་བཞིན་དུ་སྤོབས་པ་མེད་པ་ཡང་མི་ཤེས་པ་ལས་ལོགས་ཤིག་ཏུ་བརྗོད་པར་མི་བྱའོ། །བཤད་པ། ལན་མི་ཤེས་པ་ནི་ནང་དུ་འདུས་པའི་ཕྱིར་རོ། །ཡུལ་ནི་འདི་ཡིན་ནོ་ཞེས་པ་ལ་སོགས་པ་དང༌། ཡུལ་ཤེས་པ་ཡོངས་པ་ལ་སོགས་པ་ནི་ཕ་རོལ་གྱིའོ། །འདི་སྐད་སྟོན་པ་ཡིན་ཏེ། ལན་མི་ཤེས་པ་ནི་རྣམ་པ་གཉིས་ཏེ། ཡུལ་མི་ཤེས་པ་དང་ལྷན་ཅིག་པ་འམ། ཡུལ་ཤེས་པ་དང་ལྷན་ཅིག་པ་འམ། དེ་ལ་དང་པོ་ནི་ཡུལ་མི་ཤེས་པ་ཉིད་ཀྱི་ནང་དུ་འདུས་པ་ཡིན་ལ་ཕྱི་མ་མ་འདུས་པ་ཉིད་དོ། །དེས་ན་གཉིས་པ་ལ་ལྟོས་ནས་སྤོབས་པ་མེད་པའི་ལོགས་ཤིག་ཏུ་བརྗོད་པ་ནི་མ་ཡིན་ནོ་ཞེ་ན། དེ་ལྟ་ན་ཐུག་པ་མེད་པ་ཚར་


DTG190_Page_0270
[མ་དཔེ་གཟིགས་ན་འདིར་གནོན།]

གཅད་པའི་གནས་སུ་ཐལ་བར་འགྱུར་རོ་སྙམ་ནས། དེ་ལྟ་ན་ཡང་ཞེས་བྱ་བ་ལ་སོགས་པ་སྨོས་ཏེ། དཔེར་ན་མི་ཤེས་པ་ལ་ཞེས་བྱ་བ་ལ་སོགས་པའི་རབ་ཏུ་བྱེད་པ་ད་ལྟར་མི་ཤེས་པ་དག་ལ་ཡང་ཞེས་བྱ་བ་ནི་ཡུལ་གྱི་ལན་མི་འདེབས་པ་དག་ཀྱང་ཡུལ་ཐམས་ཅད་ཀྱི་ལན་མི་ཤེས་པའོ། །སྩོགས་པ་སྨོས་པ་ནི་གཉིས་དང་གསུམ་དང་བཞི་ལ་སོགས་པའི་རྣམ་པར་དབྱེ་བ་ལ་བརྟེན་པ་ཡིན་ནོ། །ཡུལ་སྤྱི་དང་ལན་མི་ཤེས་པའི་བསྡུས་པར་བརྗོད་པའི་སྐྱོན་ཡིན་ནོ་ཞེ་ན། བཤད་པ། སྐྱོན་ཅུང་ཟད་ཀྱང་མེད་དོ། །ཇི་ལྟར་སྐྱོན་མེད་པ་དེ་ལྟར་ཡོན་ཏན་ཡང་མེད་དོ་ཞེ་ན། བཤད་པ། ཡོན་ཏན་ནི་བླ་མའི་མིང་ཅན་དུ་རྟོགས་པའི་ཕྱིར་འདུས་པར་བརྗོད་པར་མི་རིགས་པ་ཡིན་ནོ། །སྤོབས་པ་མེད་པའི་ཡུལ་བརྗོད་པ་ཡིན་པའི་ཕྱིར་ལོགས་ཤིག་ཏུ་མི་བརྗོད་དོ། །སྤོབས་པ་མེད་པའི་ཚིག་བསྡུས་ཞེས་བྱ་བའི་དོན་ཡིན་ནོ། །འདི་འབའ་ཞིག་ལོགས་སུ་མི་བརྗོད་པར་རིགས་པར་མ་ཟད་ཀྱི་འོན་ཀྱང་གཞན་དག་ལ་མ་ཡིན་ནོ་སྙམ་ནས། གཞན་ཡང་ཞེས་བྱ་བ་ལ་སོགས་པ་སྨོས་ཏེ། དེ་གཉི་ག་ཚིག་ཉིད་ཀྱིས་ཞེས་བྱ་བ་ནི་གཏན་ཚིགས་ལྟར་སྣང་བ་དང་སྤོབས་པ་མེད་པའི་ཚིག་གིས་སོ། །ཐམས་ཅད་ནི་དམ་བཅའ་བ་ཉམས་པ་དང་རྗེས་སུ་མི་བརྗོད་པ་ལ་སོགས་པའོ། །རྒོལ་བ་འགའ་ཞིག་ཡང་དག་པར་སྒྲུབ་པར་བྱེད་པ་ན་མི་མཐུན་པའི་ཕྱོགས་ཀྱི་ཆོས་རྗེས་སུ་འགྲོ་བར་མི་འགྱུར་རོ། །དམ་བཅའ་བ་དང་དམ་བཅའ་བ་སྒྲུབ་པར་བྱེད་པ་དག་གི་རྗེས་སུ་བགྲོ་བར་མི་འགྱུར་རོ་ཞེས་བྱ་བ་ལ་སོགས་པ་བརྗོད་དོ། །དེ་བཞིན་དུ་སུན་འབྱིན་པ་གསལ་བར་བརྗོད་པ་འགའ་ཞིག་རྗེས་སུ་བརྗོད་པ་ཡིན་ན་ཇི་ལྟར་རྣམ་པར་གཡེངས་པ་མ་ཡིན་ནོ། །གཞན་གྱི་འདོད་པ་རྗེས་སུ་ཤེས་པར་བྱའོ་ཞེས་བྱ་བ་ལ་སོགས་པ་བརྗོད་པར་བྱའོ། །འདི་གཉི་གར་འདུས་པ་ཡང་སྤྲོས་པའི་ཡོན་ཏན་དང་ལྡན་པ་དེས་ནི་དེ་ཐུབ་པ་ལ་སོགས་པས་བརྗོད་པར་བྱ་བ་ཡིན་ནོ་ཞེ་ན། བཤད་པ་དེ་གཉི་གར་འདུས་པའི་རབ་ཏུ་དབྱེ་བ་ཡོད་ན་ཡོན་ཏན་གྱི་ཁྱད་པར་མེད་ཅིང་མི་དམིགས་པའི་ཕྱིར་དང༌། ཡོན་ཏན་སྤྲོས་པ་མེད་པའི་ཚིག་ལ་སོགས་པ་ལ་ཧ་ཅང་ཐལ་བར་འགྱུར་བའི་ཕྱིར་རོ། །མཆན་ཁུང་བཙིར་བ་ལ་སོགས་པ་བརྗོད་པར་ཐལ་བར་


DTG190_Page_0271
[མ་དཔེ་གཟིགས་ན་འདིར་གནོན།]

འགྱུར་རོ་ཞེས་བྱ་བའི་དོན་ཏོ། །ཐུབ་པ་ཆེན་པོ་སྤྲོས་པ་དོན་མེད་མཛད་པ་དོན་མེད་པ་ཡིན་ནོ། །གཞན་གྱི་ཕྱོགས་འགེགས་པར་བྱེད་པ་གང་གི་ཚེ་སུན་འབྱིན་པའི་ལན་ཤེས་པར་མི་འགྱུར་བ་དང་རིག་པར་མི་འགྱུར་བ་དང༌། བརྗོད་དུ་མེད་པ་དེའི་ཚེ་ཚར་གཅད་པར་བྱ་བ་རིག་པར་བྱའོ་ཞེས་གཞན་གྱི་གཞུང་ཡིན་ནོ། །དེ་ཡང་འདིར་ཚར་གཅད་པའི་གནས་ཡིན་པ་དེ་ཉིད་ཀྱི་ཕྱིར་ཁོ་བོ་ཅག་གིས་འདིར་སྐྱོན་དུ་བརྗོད་པས་འདིར་བཤད་པ་འདི་ཡིན་ནོ་ཞེས་རྗེས་སུ་དཔག་པ་རྗེས་སུ་རིག་པར་བྱའོ། །སྒྲུབ་པར་བྱེད་པ་ལ་སོགས་པའོ། །སྒྲུབ་པར་བྱེད་པའི་ཚིག་གིས་དེ་མ་ཐག་པ་སུན་འབྱིན་པས་བརྗོད་པར་བྱ་བ་ནི་གང་གི་ཚེ་དེ་མ་བྱས་པ་ཐམས་ཅད་གོ་རིམས་བཞིན་དུ་རྗེས་སུ་བརྗོད་པར་སྨྲ་བ་དང༌། ཚིགས་སུ་བཅད་པ་འདོན་པ་ནི་དཔང་པོ་འམ་གཞན་པ་ཡང་དག་པར་བརྗོད་པ་དུས་འདས་པ་དེའི་ཚེ་དོན་མེད་པ་དང་དགོས་པ་མེད་པས་དུས་འདས་པར་བྱས་པས་སྐྱོན་ཕྱིར་རྒོལ་བ་བརྗོད་པ་ཁོང་དུ་ཆུད་པ་མེད་པ་ནི་ཚར་གཅད་པའི་གནས་ཡིན་ནོ། །དོན་མེད་པ་ནི་བྱེད་པའི་ཚིག་གམ་དུས་ཀྱི་ཚིག་གི་ཁྱད་པར་ཡིན་ནོ། །འབྲས་བུ་ལ་ཆགས་པ་ན་རྒྱུ་ཉེ་བར་འགོད་པས་རྩོད་པ་གཅོད་པ་ནི་རྩོད་པ་མི་སྨྲ་བའོ། །དཔེར་ན་གནའ་གཏམ་བརྗོད་ཅིང་དེ་ལྟར་རྩོད་པ་བྱེད་མི་ནུས་ཀྱི་ཕྱིས་གཏམ་བྱའོ་ཞེས་ཟེར་བ་དེ་བཞིན་དུ་ཐོག་མའི་སྐབས་སུ་བབ་པ་ལ་ཡང་བརྗོད་ན་གཟུང་བར་བྱ་བར་སེམས་པ་ཇི་ལྟར་འགྱུར། །ཚར་གཅད་པའི་གནས་བཤད་པ་ནི་རྒོལ་བ་འམ་ཕྱིར་རྒོལ་བ་གང་ཡང་སྒྲུབ་པར་བྱེད་པ་མི་བརྗོད་པ་དང་སུན་འབྱིན་པར་མི་བྱེད་པ་བཀོད་པས་ཚར་གཅད་པ་དང་དེ་ཚར་གཅད་པར་བྱེད་པའི་མཐར་ཐུག་པ་རྩོད་པ་དེ་ལྟ་བུར་གྱུར་པ་བརྩམས་པ་འདི་རང་ཉིད་ཀྱིས་རྩོད་པའི་མཐར་ཐུག་པ་རྟོགས་པར་འགྱུར་རོ་ཞེས་བྱ་བ་ནི་ཚར་གཅད་པའི་གནས་ཡིན་ནོ་ཞེ་ན་འདིར་སློབ་དཔོན་གྱིས་སྨྲས་པ། འབྲས་བུ་ལ་ཆགས་པར་གྱུར་པ་པ་ཡིན་ནོ། །གལ་ཏེ་རེ་ཞིག་རྒོལ་བ་ཕྱོགས་སྔ་མ་ཕྱེད་པ་ནི་སྒྲུབ་པ་བརྗོད་པའི་ཤུགས་ཀྱིས་གཡོ་སྒྱུ་ལྡན་པ་ཙམ་གྱི་སྒོ་ནས་ཚིག་དོར་རྣམ་པ་འགའ་ཞིག་གིས་ཞེས་བྱ་བའི་དོན་ཏོ། །ཡང་དག་པ་ཇི་ལྟ་བའི་རྩོད་པའི་ངོར་བྱས་པ་ནི་འབྲས་བུའི་དངོས་པོར་གྱུར་པ་བྱེད་པ་ལ་འཇུག་པ་མ་ཡིན་ནོ། །


DTG190_Page_0272
[མ་དཔེ་གཟིགས་ན་འདིར་གནོན།]

རྣམ་པ་འགལ་བ་དེ་ལྟ་བུར་བརྗོད་པའི་དངོས་པོ་ནི། རྩོད་པ་ནི་ཕ་རོལ་པོ་འཁྲུལ་པའི་དང་ཚུལ་ཅན་གང་ཡིན་པའི་གཏམ་གསར་པ་དང་ཁོང་པ་གཟེར་བ་དང༌། ཁྱིམ་ཚིག་པ་ལ་སོགས་པ་དེ་བཞིན་དུ་འམ། ཡང་ན་དེ་དང་དེའི་དུས་སུ་ཁོང་གཟེར་བ་དང༌། ཁྱིམ་ཚིག་པའི་བདེན་པའི་དེ་ལྟ་བུར་གྱུར་པ་ཡིན་ན་ནི་ཆར་གཅད་པའི་གནས་མ་ཡིན་ནོ་ཞེས་བྱ་བའི་དོན་ཏོ། །ཡང་གང་གི་ཚེ་གཡོ་སྒྱུ་ཙམ་གྱི་སྒོ་ནས་བྱེད་པ་ཡིན་པ་དེའི་ཚེ་རང་གི་སྒྲུབ་པ་ཡོངས་སུ་གཅོད་པར་བྱེད་པ་ཉིད་རྣམ་པར་གཡེངས་པར་འགྱུར་རོ། །དེ་ལྟར་གྱུར་ན་ཅི་ཉེས་ཤེ་ན། བཤད་པ། དེ་ལྟ་ན་འདི་ནི་རྣམ་པར་གཡེངས་པ་ཅན་བྱ་བ་ཚར་གཅད་པའི་གནས་ཡིན་ཏེ། དོན་གཞན་གྱི་རྗེས་སུ་འབྲང་བའི་ནང་དུ་འདུ་བར་འགྱུར་རོ། །དངོས་པོའི་རྐྱེན་སྒྲུབ་པ་ཞེས་བྱ་བ་དང་པོའི་བཤད་པ་དང་མཚུངས་པའི་ཕྱིར་ཉེ་བར་བཀོད་པར་བྱེད་པ་འམ། གཏན་ཚིགས་ལྟར་སྣང་བ་རྣམས་ཀྱི་ནང་དུ་འདུས་པའི་དབང་དུ་བྱས་པ་ཡིན་ནོ། །ཅིའི་ཕྱིར་ཞེ་ན། དེ་སྒྲུབ་པར་བྱེད་པའི་ནུས་པ་མེད་པར་བརྗོད་པའི་ཕྱིར་རོ། །འོན་ཀྱང་འདི་དག་དོན་མེད་པ་དང༌། དོན་དང་བྲལ་བ་དངོས་སུ་ཡོད་པ་མ་ཡིན་ཏེ། དེ་ཅིའི་ཕྱིར་ཞེ་ན། སྒྲུབ་པར་བྱེད་པའི་རང་བཞིན་གྱི་འབྲེལ་བ་རྟོགས་པ་མེད་པའི་ཕྱིར་རོ། །དེས་ན་བསྒྲུབ་པའི་ངག་དང་ལྷན་ཅིག་སེའུ་བཅུ་ཞེས་བྱ་བ་ལ་སོགས་ཛྷ་བ་ག་ད་དྷ་ལ་སོགས་པ་ཡི་གེའི་གོ་རིམས་བརྗོད་པའི་འབྲེལ་པ་མི་དམིགས་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་ཅུང་ཟད་ཙམ་ཐ་དད་པའི་རྒྱུ་མཚན་གྱི་ཆོས་ལ་སོགས་ཤིན་ཏུ་བྱེད་པ་ཡིན་ནོ་ཞེ་ན་ཧ་ཅང་ཐལ་བར་འགྱུར་རོ་ཞེས་བྱ་བ་ལ་སོགས་པ་སྨོས་ཏེ། སྒྲུབ་པར་བྱེད་པའི་འབྲེལ་པ་རྟོགས་པ་མེད་པ་གང་དག་རབ་ཏུ་ཐ་དད་པ་དེ་དག་ག་འབྲེལ་པ་སྒྲུབ་པར་བྱེད་པའི་ངག་རབ་ཏུ་བསྟན་པ་དང་དེ་ཡང་ཐ་དད་པ་དང་དེ་དག་ཡིན་ནོ་ཞེས་བྱ་བའི་འབྲས་བུའོ། །དེ་ལྟ་ན་རེ་ཞིག་རྒོལ་པ་ཕྱོགས་སྔ་མ་དང་འབྲེལ་པའི་རྣམ་པར་གཡེངས་པའི་ལོགས་ཤིག་ཏུ་བརྗོད་དུ་མེད་པར་བཤད་པ་དེ་ལྟར་ནི་ཕྱིར་རྒོལ་བ་དང་འབྲེལ་པ་ཡང་ཡིན་ནོ། །འོ་ན་དེ་བཞིན་དུ་རྒོལ་བ་ཕྱོགས་ཕྱི་མ་བྱིས་པ་མ་ལུས་པས་ལོགས་ཤིག་ཏུ་བྱས་པ་ལ་སོགས་པའི་རིམ་གྱིས་ཇི་ལྟར་རྣམ་པར་གཡེངས་པར་འགྱུར་ཞེ་ན། དེ་ནི་དེའི་རྒོལ་བ་ཕྱོགས་ཕྱི་མ་སྒྲུབ་པར་བྱེད་པ་དེ་མ་ཐག་


DTG190_Page_0273
[མ་དཔེ་གཟིགས་ན་འདིར་གནོན།]

པའི་ལན་བསྟན་པར་བྱར་མེད་པ་རྟོགས་པ་མེད་པར་འགྱུར་བ་དེའི་ལན་བརྗོད་པ་མེད་པའི་རྣམ་པར་གཡེང་བ་སྟོན་པ་གང་ཡིན་པ་དེ་ནི་སྤོབས་པ་མེད་པ་འམ། །དོན་གཞན་གྱི་ནང་དུ་འདུས་པར་འགྱུར་རོ། །གཞན་ཡང་ཇི་སྐད་བཤད་པའི་ནང་དུ་འདུས་པར་མི་བཟོད་པར་གྱུར་ནས་གལ་ཏེ་གདོན་མི་ཟ་བར་ཞེས་བྱ་བ་འདི་དག་བརྗོད་པ་ཡིན་ནོ། །འབྲེལ་པ་མེད་པ་ནི་སྒྲུབ་པར་བྱེད་པའི་དག་འབྲེལ་པ་མེད་པ་རྩོད་པ་སྣ་ཚོགས་པས་གཞན་གྱི་སྤོབས་པ་འཕྲོག་པ་དང་ཆར་འབྱེད་པ་དང༌། འཁྲུལ་པ་བརྗོད་པའི་སྒོ་ནས་ཀྱང་རྩོད་པར་འགྱུར་ཞེ་ན། སློབ་དཔོན་གྱིས་སྨྲས་པ། མ་ཡིན་ཏེ། མི་སྲིད་པའི་ཕྱིར་རོ། །རྣམ་པ་དེ་ལྟ་བུའི་རྩོད་པ་ནི་གང་གི་ཕྱིར་སྒྲ་ལ་སོགས་པ་གཅིག་ལ་བརྟེན་པའི་འགལ་བ་དང་རྟག་པ་དང་མི་རྟག་པ་ཉིད་ལ་སོགས་པའི་དམ་བཅའ་བའི་ཁས་བླངས་པའི་རྒོལ་བ་དག་ལ་རྩོད་པ་ནི་འདི་འགྱུར་རོ། །དེ་ཅིའི་ཕྱིར་ཞེ་ན། གང་དང་གང་ལ་འགལ་བ་ཁས་མི་ལེན་པ་དེ་དང་དེ་བཞིན་དུ་འགལ་བ་ཁས་མི་ལེན་པ་གང་ཡིན་པའི་སྐྱེས་བུ་དེས་ཁས་བླངས་པ་མེད་པ་དེ་དག་ལ་ཡང་རྩོད་པ་མེད་པའི་ཕྱིར་རོ། །དེ་ལྟར་རྣམ་པར་གཞག་པ་དེ་ལ་རིག་པ་འམ་གཞི་མེད་པ་ཡིན་པས་དེ་ལ་སྨོས་སོ། །རྒོལ་བ་མེད་པ་དང་ཕྱིར་རྒོལ་བས་གདོན་མི་ཟ་བར་གཅིག་བརྗོད་པ་ན་འགྱུར་རོ། །ཅིག་ཅར་ཅིའི་ཕྱིར་མ་བརྗོད་ཅེ་ན་བཤད་པ་ཅིག་ཅར་འཇུག་པ་ན་རང་བཞིན་དུ་གནས་པའི་བདག་ཉིད་དུ་མི་འཇུག་པའི་ཕྱིར་རོ་ཞེས་བྱ་བར་སྦྱར་རོ། །དེ་ཅིའི་ཕྱིར་ཞེ་ན་བཤད་པ་ཉན་པ་དང་ངེས་པར་འཛིན་པ་དང་ལན་གདབ་མི་སྲིད་པའི་རྒྱུར་གྱུར་པའི་ཕྱིར་འཇུག་པ་འབྲས་བུ་མེད་དོ། །གལ་ཏེ་ཕན་ཚུན་མ་འདྲེས་པར་བརྗོད་པ་ཉན་པར་འགྱུར་བ་དེའི་དོན་ངེས་པར་འཛིན་པའི་ལན་དུ་འགྱུར་རོ། །ནམ་མཁའི་གོས་ཅན་གྱིས་བརྗོད་པས་དུས་བཞིན་དུ་ཅིག་ཅར་འཇུག་པ་འདི་ཐམས་ཅད་ལ་སྲིད་པར་མི་འགྱུར་རོ། །དེའི་ཕྱིར་གདོན་མིས་བར་གཅིག་སྔར་བརྗོད་པ་ལས་བརྗོད་པར་འགྱུར་བ་དེས་ན་རང་བཞིན་དུ་གནས་པའི་རྒོལ་པ་ཕྱོགས་སྔ་མ་སྒྲ་མི་རྟག་པ་སྒྲུབ་པར་བྱེད་པ་ལ་སོགས་པ་རང་གི་ཁས་བླངས་པ་ཉེ་བར་དགོད་པར་བྱེད་པར་བརྗོད་པར་བྱའོ། །


DTG190_Page_0274
[མ་དཔེ་གཟིགས་ན་འདིར་གནོན།]

རྣམ་པ་གཞན་དུ་དཔང་པོ་ལ་སོགས་པ་གཞན་གྱིས་ཁོང་དུ་ཆུད་པར་མི་འགྱུར་བའི་གཏན་ཚིགས་བརྗོད་ཅིང་རྒོལ་བ་ཕྱོགས་སྔ་མ་གཞན་དག་གིས་ཀྱང་ལན་དེ་དག་འབྲེལ་པ་བརྗོད་པ་དང་སྒྲུབ་པར་བྱེད་པ་འབྲེལ་པའི་སུན་འབྱིན་པ་བཤད་པ་ཡིན་ནོ་ཞེས་བྱ་བར་གནས་སོ། །དེའི་ཕྱིར་རྒོལ་བ་དག་གཉི་གས་ཡང་དག་པ་མ་ཡིན་པ་མེད་པ་ལ་འཇུག་པའི་གཏན་ཚིགས་ལྟར་སྣང་བ་དང༌། སྤོབས་པ་མེད་པས་བསྡུ་བའི་རིགས་པ་ལ་འཇུག་པ་ཐམས་ཅད་ཀྱི་ཕྱོགས་སྔ་མ་དང་ཕྱི་མ་བཀོད་པའི་གཏན་ཚིགས་ལྟར་སྣང་བ་དང་སྤོབས་པ་མེད་པ་གཉིས་པོ་དག་ནི་ཤིན་ཏུ་བསྐལ་བ་མ་ཡིན་ནོ། །འོ་ན་གལ་ཏེ་རིགས་པ་ལ་འཇུག་པ་དེ་ལ་རྣམ་པ་གཉིས་སུ་ཇི་ལྟར་འཇུག་པར་འགྱུར། །ཆོས་ཅན་གཅིག་ལ་འགལ་བར་ཉེ་བར་དགོད་པ་ཇི་ལྟར་འགྱུར། གདོན་མི་ཟ་བར་རིགས་པ་ལ་འཇུག་པ་ན་དེ་ལ་གཅིག་ཉེ་བར་དགོད་པར་བྱེད་པ་ན་རིགས་པ་འཇུག་པར་འོས་སོ། །དེ་ལྟ་མ་ཡིན་ན་ཆོས་ཅན་གཉིས་སུ་འགྱུར་རོ། །བསམ་པ་ཡོངས་སུ་མི་ཤེས་པའི་ཕྱིར་རོ། །ཁྱེད་ཀྱིས་འདིའི་རིགས་པ་ལ་འཇུག་པ་སློབ་དཔོན་གྱིས་བརྗོད་པར་འདོད་པར་ཤེས་པ་ནི་མ་ཡིན་ནོ། །རིགས་པ་ལ་འཇུག་པ་ཉིད་ནི་ཕྱོགས་སྔ་མ་དང་ཕྱི་མ་དགོང་པ་ཅིག་ཅར་འཇུག་པ་མེད་པ་ཅིག་ཤེས་པ་དང༌། འཁྲུལ་པར་རྩོད་པ་ལ་སོགས་པ་མེད་པར་འདོད་དོ། །དེ་དག་གིས་ནི་གཅིག་གི་དབང་དུ་བྱས་ནས་འགལ་བར་ཁས་བླངས་པ་ནི་གགས་སུ་འགྱུར་རོ་ཞེས་བྱ་བ་ལ་སོགས་པ་ཞུམ་པའི་ལན་བསྟན་པ་ཡིན་ནོ། །ཇི་ལྟར་ལན་བསྟན་པ་ཡིན་ཞེ་ན། བཤད་པ་ཁས་བླངས་པ་མེད་པར་མེད་པའི་ཕྱིར་རོ། །འདི་སྐད་སྟོན་པ་ཡིན་ཏེ། རང་གི་ཕྱོགས་རྣམ་པར་འཇོག་པ་ནི། ཚིག་གི་ཚོགས་དམན་པ་ནི་ཞུམ་པར་བརྗོད་པའོ། །གལ་ཏེ་ཞུམ་པ་ལ་རང་གི་ཕྱོགས་མེད་པ་དེ་ལྟ་ན་ཇི་ལྟར་རྩོད་པ་མེད་པ་བརྗོད་པར་འགྱུར། །ཕྱོགས་དགག་པའི་དོན་ནི་ཞུམ་པ་འཇུག་གོ་ཞེ་ན། དེ་ལྟ་ན་ཕ་རོལ་གྱི་ཕྱོགས་དགག་པ་དང༌། རང་གི་ཕྱོགས་འཇོག་པ་ཡིན་ན་ནི་མཚན་ཉིད་ཞིག་པ་གང་དང་གང་ཁས་བླངས་པ་དེ་དང་དེ་ནི་རང་གི་ཕྱོགས་ཡིན་ནོ། །གཞན་གྱིས་དགག་པ་དེས་ན་མ་བླངས་པས་རང་གི་ཕྱོགས་ལ་ཤིན་ཏུ་འཇུག་པར་མི་


DTG190_Page_0275
[མ་དཔེ་གཟིགས་ན་འདིར་གནོན།]

འགྱུར་རོ། །འོན་ཀྱང་གང་གི་ཚེ་རྩོད་པ་ཁས་བླངས་ནས་དམ་བཅའ་བ་ཙམ་གྱིས་རྣམ་པར་གཡེངས་པས་འཁྲུལ་འཁོར་གྱི་འཇིགས་པས་འཁྲུལ་པར་བྱས་པའི་ཕྱིར་རོ་ཞེས་བྱ་བའི་དོན་ཏོ། །ཅུང་ཟད་ཅིག་ཀྱང་སྒྲུབ་པར་བྱེད་པ་དང༌། དེར་མི་སྨྲ་བ་འམ། གཞན་ཅུང་ཟད་ཅིག་དང་སྨྲ་བར་བྱེད་པ་ནམ་སྒྲུབ་པར་བྱེད་པ་དང་དེར་སྣང་བ་ལས་ཐ་དད་པར་བྱ་རོག་གི་སྒྲ་མི་སྙན་པ་བརྗོད་པ་ཁོ་བོའི་ཁྱིམ་དུ་ལྟས་དན་བ་བརྗོད་པ་ཅིག་འབྱུང་བས་རྩོད་པ་ནི། དེས་ཆོག་གི་འོན་ཀྱང་རེ་ཞིག་ཁྱིམ་དུ་འགྲོ་དགོས་ཏེ་ཕ་འམ་གཞན་ཞིག་འཆི་བར་འགྱུར་རོ་ཞེས་བྱ་བ་ལ་སོགས་པའོ། །དེའི་ཚེ་ཇི་ལྟར་གཏན་ཚིགས་མེད་ན་སྒྲུབ་པར་བྱེད་པ་མེད་པས་གཏན་ཚིགས་ལྟར་སྣང་བའི་ནང་དུ་འདུ་པར་འགྱུར་ཞེས་བསམས་པའོ། །ལན་ཁོང་དུ་ཆུད་པ་མེད་པར་ཡང་ཕྱོགས་སྔ་མའི་རྒོལ་བ་ལ་ཕྱོགས་མེད་པ་ཡིན་ནོ་ཞེས་བྱ་བར་དགོངས་སོ། །དེས་ན་འདི་གཉི་ག་ཡང་ཤིན་ཏུ་ཕམ་པ་མ་ཡིན་ནོ་སྙམ་ནས་སེལ་བར་བྱེད་དོ་ཞེས་ཕ་རོལ་པོ་འདོད་དོ། །སློབ་དཔོན་གྱིས་སྨྲས་པ། སྒྲུབ་པ་མེད་པའི་འབྲས་བུ་བརྗོད་པ་ནི། དེ་སྐད་དུ་མ་བསྟན་པའི་གཉི་ག་ཤིན་ཏུ་ཕམ་པ་ཡིན་ནོ་ཞེས་སྨྲ་ན་ནི། སྒྲུབ་པར་བྱེད་པ་མ་བརྗོད་པ་ཡིན་ནོ་ཞེས་བྱ་བའི་དོན་ཏོ། །མ་སྨྲས་ན་ནི་ཇི་ལྟར་རྟོགས་པར་འགྱུར་ཞེ་ན། །བཤད་པ། བརྗོད་པ་མེད་པ་དག་ཀྱང་ཕམ་པ་ཡིན་ནོ་ཞེས་བསྟན་པའི་རྣམ་པར་འཇུག་པ་ཉིད་དོ། །དེ་ཉིད་དྲན་པར་བྱེད་པའི་རྩོད་པ་ཁས་བླངས་པ་ལ་བསྒྲུབ་པའི་ཡན་ལག་མ་བརྗོད་པའི་ཕྱིར་རོ། །འདི་ལྟར་དེ་ལ་བསྒྲུབ་པའི་ཡན་ལག་མ་བཤད་པ་འམ་བསྒྲུབ་པའི་ཡན་ལག་མ་བརྗོད་པ་གཞན་བརྗོད་པ་གང་ཡིན་པ་དེ་ནི་བསྒྲུབ་པའི་ཡན་ལག་མ་བརྗོད་པ་ཡིན་ནོ། །དེ་དག་གིས་ནི་གཞན་བརྗོད་པས་ཕམ་པར་འགྱུར་བ་ཚིག་ལྷག་མའོ། །ཡང་དང་ཡང་བརྗོད་པ་དང༌། དམ་བཅའ་བ་ལ་སོགས་པའི་ཚིག་ཚར་གཅད་པའི་གནས་སུ་བཤད་པ་ཡིན་ནོ། །ཅིའི་ཕྱིར་ཞེ་ན། དེ་ཡང་ཞེས་བྱ་བ་ལ་སོགས་པ་སྨོས་ཏེ། འདི་ནི་འདི་སྐད་སྟོན་ཏེ། རིགས་པ་དང་ལྡན་པ་རྐང་མིག་གིས་ཅུང་ཟད་ཅིག་ཚར་གཅད་པའི་གནས་སུ་བཤད་པ་གང་ཡིན་པ་དེ། ཁོ་བོ་ཅག་གིས་བསྒྲུབ་པའི་ཡན་ལག་མ་བརྗོད་པའི་ཚིག་ཏུ་འདུས་པའི་ཕྱིར་རོ། །དེ་ལྟ་ན་གང་དམ་བཅའ་བ་ལ་སོགས་པའི་བརྗོད་པའི་ཞེས་བྱ་བ་ནི་དོན་ཅི་ཞིག་བསྟན་ཞེ་ན། དམ་བཅའ་བ་དང༌། །


DTG190_Page_0276
[མ་དཔེ་གཟིགས་ན་འདིར་གནོན།]

ཉེ་བར་སྦྱོར་བ་དང་མཇུག་བསྡུ་བ་བརྗོད་པ་ཚར་གཅོད་པའི་གནས་སུ་རྐང་མིག་གིས་བརྗོད་པ་ནི་མ་ཡིན་ནོ། །དེ་མ་བརྗོད་པ་ཚར་གཅད་པའི་གནས་ཡིན་པར་འགྱུར་གྱི། དེ་རྒོལ་བའི་འདོད་པ་དམན་པ་དང་ཆེས་གཞན་པ་དང༌། ཡན་ལག་མ་ཚང་བ་ཡིན་ནོ་ཞེ་ན། དེ་ལྟར་ན་དཔེའི་དོན་ནི་འདི་ལྟར་ཡིན་ཏེ། དཔེར་ན་དེ་མ་རྟོགས་པའི་རྟོགས་པར་བྱེད་པའི་ནུས་པས་ཚངས་པའི་ཕྱིར་སྒྲུབ་པའི་ཡན་ལག་མ་བརྗོད་པའི་ཚིག་གིས་བརྗོད་པའོ། །དེ་བཞིན་དུ་ལྷག་མ་དང་ཡང་ཡང་བརྗོད་པ་དག་གི་ཡང་ཞེས་བྱ་བ་དེ་ཉིད་ཀྱི་གཉིས་པའོ། །དང་པོ་སྨོས་པ་ནི་ཁོ་ནའི་སྒྲའི་དོན་ལ་འཇུག་པའོ། །དེ་ལྟ་མ་ཡིན་ན་ཡང་དང་ཡང་བརྗོད་པ་ནི་འདི་དང་འདི་ཞེས་བྱ་བར་འགྱུར་རོ། །ཁ་ཅིག་ནི་ཕྱིས་ཀྱི་དང་སྨོས་པའི་དོན་ཏོ། །ཡང་དང་ཡང་བརྗོད་པ་དམ་བཅའ་བ་ལ་སོགས་པ་འདི་ཉིད་འཆད་པ་ཡིན་ནོ། །དེ་ལྟ་ན་ཡང་རིགས་པ་མ་ཡིན་ཏེ། རྐང་མིག་རྣམ་པ་དེ་ལྟ་བུ་ཟློས་པར་མ་བསྟན་པའི་ཕྱིར་རོ། །འདི་ཡང་སྔ་མ་དང་ཆོས་མཚུངས་པས་ཡང་དང་ཡང་བཤད་པའི་ནང་དུ་འདུས་པའི་ཕྱིར་རོ། །རང་གི་ཕྱོགས་ཀྱི་སྐྱོན་ཁས་བླངས་ནས་གཞན་གྱི་ཕྱོགས་ཀྱི་སྐྱོན་ཞར་ལ་འཇུག་པར་བྱེད་པ་ནི་འདོད་པ་ཁས་ལེན་པ་སྟེ། སྐྱོན་ཡོངས་སུ་ཤེས་ནས་སྐྱོན་གྱི་ལན་བརྗོད་པར་བྱའི་གཞན་གྱིས་སྨྲས་པ་ཁས་ལེན་པ་ནི་ཚར་གཅད་པར་བྱ་བ་ཡིན་ནོ། །དེ་བཤད་པ་རྒོལ་བ་གཞན་གྱིས་བརྗོད་པ་ཉིད་ཀྱིས་བརྒལ་ཞིང་བརྟག་པ་སྟེ། སྐྱོན་སུན་འབྱིན་པ་མེད་པ་ཁྱོད་ཀྱིས་འདི་ལ་ཡང་སྐྱོན་ཡིན་ཞེས་སྨྲ་བར་བྱེད་དེ། དཔེར་ན་ཁྱོད་ནི་རྐུན་མ་ཡིན་ཏེ། སྐྱེས་བུ་ཉིད་ཡིན་པའི་ཕྱིར་རི་ཁྲོད་པ་ལ་སོགས་པ་བཞིན་ནོ་ཞེས་བྱ་བ་ནི། །རྒོལ་བས་བརྗོད་པར་འགྱུར་བ་ན་ཕྱིར་རྒོལ་བས་སྨྲས་པ། རྒོལ་བ་ཁྱོད་ཀྱང་རྐུན་མ་ཡིན་ནོ་ཞེས་བརྗོད་པ་ལྟ་བུའོ། །དེ་ཡང་སྒྲའི་སྦྱོར་བས་བདག་ཉིད་རྐུན་མར་ཁས་བླངས་ནས་གཞན་གྱི་ཕྱོགས་ཀྱི་སྐྱོན་རབ་ཏུ་སྦྱོར་བར་བྱེད་ཅིང་རྗོད་པར་བྱེད་པ་རྒོལ་བ་གཞན་གྱི་འདོད་པ་རྐུན་མ་ཉིད་ཕྱིར་རྒོལ་བར་ཁས་ལེན་པར་བྱེད་པའོ། །འདི་ལྟར་དཔེར་ན་བདག་ཉིད་རྐུན་མ་ཡིན་པར་ཐེ་ཚོམ་མེད་པ་ཡིན་ན་བརྗོད་པར་རིགས་ཀྱི་དེ་ལྟ་མ་ཡིན་ན་དེ་བརྗོད་པར་མི་བྱའོ། །རྒོལ་བས་དེ་ཡོད་པ་དང་མེད་པ་དཔྱོད་པ་དེའི་ཕྱིར་འདོད་པ་ལ་ཁས་ལེན་པ་ཚར་གཅད་བའི་


DTG190_Page_0277
[མ་དཔེ་གཟིགས་ན་འདིར་གནོན།]

གནས་ཡིན་ནོ། །འདིར་ཡང་གང་གི་ཚེ་དགོངས་པ་ནི་འདི་ཡིན་ཏེ། རྒོལ་བ་ལ་ལན་འདེབས་པ་ནི་སྐྱེས་བུ་ཡིན་པའི་ཕྱིར་ཁྱོད་ཀྱང་རྐུན་མར་འགྱུར་ལ། ཁྱོད་རང་བདག་ཉིད་རྐུན་མ་ཉིད་དུ་མི་འདོད་པ་དེའི་ཕྱིར་འདི་ནི་སྐྱེས་བུ་ཡིན་པའི་ཕྱིར་ཞེས་བྱ་བ་བསྒྲུབ་བྱ་རྐུན་མ་སྒྲུབ་པའི་གཏན་ཚིགས་ཡིན་ཏེ། རྐུན་མར་མ་གྱུར་པའི་མི་མཐུན་པའི་ཕྱོགས་ལ་འཇུག་པའི་མ་ངེས་པའི་སྐྱོན་གྱིས་གནོད་པའི་ཕྱིར་རོ། །དེས་ན་ཕྱིར་རྒོལ་བའི་བསམ་པ་འདི་ལ་འདོད་པ་ཁས་བླངས་པའི་མཚན་ཉིད་ཀྱི་སྐྱོན་དུ་ཅུང་ཟད་ཀྱང་མེད་དོ། །གཞན་ཡང་མངོན་པར་འདོད་པའི་སྒོ་ནས་དེ་རྐུན་མ་ཉིད་དུ་ཅིའི་ཕྱིར་འགྱུར། རྒོལ་བ་བདག་ཉིད་མི་མཐུན་པའི་ཕྱོགས་སུ་གྱུར་པ་ལ་གཏན་ཚིགས་ཡོད་པར་བསྟན་པའི་རྣམ་པས་སྐྱོན་དུ་འགྱུར་ཏེ། མཁས་པས་འཁྲུལ་པ་བརྗོད་པ་ཡིན་ནོ་ཞེས་བྱ་བའི་དོན་ཏོ། །འོད་བྱེད་ཀྱིས་རྒོལ་བ་དགོས་པ་ནི། འཁྱོག་པོར་མ་གྱུར་པའི་ཕྱིར་དྲང་པོ་ཉིད་ཀྱི་གོ་རིམས་ཀྱི་སྒོ་ནས་ཅིའི་ཕྱིར་གཏན་ཚིགས་འཁྲུལ་པར་མི་འགྱུར་ཏེ། ཁྱེད་ཀྱང་རྐུན་མ་ཡིན་ན་ནི་སྐྱེས་བུ་ཉིད་དཔེར་མ་ངེས་པར་འགྱུར་བས་སོ། །དེའི་ཕྱིར་དེ་ཉིས་ཀྱིས་འདི་ཀྱ་གྱུ་མེད་པར་བྱའི། །གྱ་གྱུའི་སྤྱོད་པ་དེ་ཉིད་ཚར་གཅད་པར་བྱས་པ་ཡིན་ནོ་ཞེ་ན། སློབ་དཔོན་གྱིས་སྨྲས་པ། འོད་བྱེད་ཀྱིས་སྨྲས་པ་འདི་ནི་ཅི་ཡང་མ་ཡིན་ཏེ། གང་གི་ཕྱིར་རྣམ་པ་དེ་ལྟ་བུ་ཡོད་པ་དེ་ལྟ་ན་མཁས་པའི་ཐ་སྙད་འཇུག་པའི་དུས་སུ། འདི་ལྟར་ཁྱོད་ཀྱིས་ནི་གཟུགས་འཚོ་བ་ཡིན་ཏེ། བུད་མེད་ཡིན་པའི་ཕྱིར་གཟུགས་འཚོང་མ་གཞན་བཞིན་ནོ་ཞེས་རྒོལ་བ་བརྗོད་པ་ན། བ་ལང་སྐྱོང་ལ་སོགས་པ་དང་སྐྱེ་བོ་ཕལ་པ་ལ་སོགས་པ་དང༌། ཐུན་མོང་དུ་མཛངས་སྤྱད་ན་ལན་འདེབས་པར་འགྱུར་ཏེ། དེ་བཞིན་དུ་ཁྱེད་ཀྱི་མ་ལ་ཡང་ཅིས་ནི་མི་འགྱུར། རྣམ་པ་འདིས་རང་རང་གི་མ་གཟུགས་འཚོང་བར་སྟོན་པར་འགྱུར་རོ།། འོན་ཀྱང་ཟུར་གྱིས་གཏན་ཚིགས་མ་ངེས་པས་གཞན་ལ་གགས་བྱེད་པར་འགྱུར་རོ། །དེའི་ཕྱིར་དེ་ལྟར་བྱིས་པ་ལ་སོགས་པའི་འཇིག་རྟེན་ལ་ཡང་ཐ་སྙད་དུ་གསལ་བས་འཇིག་རྟེན་པ་ཉིད་ཀྱིས་སྤོང་བར་བྱེད་དོ། །གལ་ཏེ་ཕ་རོལ་པོ་སྣང་བྱེད་ཀྱིས་བདག་ཉིད་ལ་སྣང་བ་དེས་སྟོང་


DTG190_Page_0278
[མ་དཔེ་གཟིགས་ན་འདིར་གནོན།]

སྟོན་པས་འདིར་བརྗོད་པར་ཟུར་གྱིས་འཁྲུལ་པར་མི་སྟོན་པ་ནི་མ་ཡིན་ཏེ། འོན་ཀྱང་དེའི་སྒྲུབ་པར་བྱེད་པ་ཡང་དག་པར་ཁས་བླངས་པ་དེས་ན་ཕ་རོལ་པོ་ལ་སྐྱོན་གྱི་དྲི་མས་གོས་པ་ཡིན་ནོ་སྙམ་ནས། དེའི་ཕྱིར་བཤད་པ་དེ་ལྟ་ན་དེས་ཉེ་བར་གཞག་པའི་སྐྱེས་བུ་ཡིན་པའི་ཕྱིར་ཁྱེད་རྐུན་མ་ཡིན་ནོ་ཞེས་ཁས་ལེན་པ་མ་ཡིན་ཡང་དེའི་ཚེ་འདི་སྒྲུབ་པར་བྱེད་པའི་ལན་མི་ཤེས་པ་དེ་ནི་ཚར་གཅད་པར་འོས་པ་ཡིན་ནོ། །རྒོལ་བ་གཞན་ལ་རང་གི་རྐུན་མའི་སྐྱོན་ཉེ་བར་བརྗོད་པའི་ཕྱིར་ཚར་གཅད་པར་འོས་པ་ཡོད་དོ། །དེ་ཉིད་ཀྱིས་གསལ་བར་བྱེད་པ་ནི་དེ་སྒྲུབ་པར་བྱེད་པ་སྤྱོན་མེད་པར་ཁས་བླང་པ་བྱས་པ་ཡིན་ནོ་ཞེས་བྱ་བ་ལྷག་མའོ། །དེ་ཉེ་བར་འཇོག་པ་ཁས་བླངས་པ་ཉིད་གང་ཡིན་པ་ཉིད་སྒྲུབ་པར་བྱེད་པའི་ལན་མི་ཤེས་པ་སྟེ། དེ་ཉིད་མི་ཤེས་པ་ཙམ་གྱིས་གཞན་ལ་སྐྱོན་བརྗོད་པས་སྔ་མའི་ཚར་གཅད་པ་ཐོབ་པར་འགྱུར་ཏེ། ཕྱིར་རྒོལ་བ་གང་གིས་ཚར་གཅད་པ་ཞེས་བྱ་བར་སྦྱར་རོ། །གཞན་གྱི་འདོད་པའི་སྐྱོན་ཉེ་བར་གཞག་པ་ལ་ལྟོས་པ་མེད་པའི་ཕྱིར་རོ། །ཕམ་པ་ལ་ཕམ་པར་མི་སྲིད་པའི་ཕྱིར་རོ་ཞེས་བྱ་བར་དགོངས་སོ། །ཚན་གཅོད་པ་ཐོབ་པ་ལ་ཚར་མི་གཅོད་པ་ནི་བརྒལ་ཞིང་བརྟག་པ་ཚར་གཅོད་པར་བྱའོ། །དེ་དོར་བས་ན་ཚར་གཅད་པ་འཐོབ་པ་འདི་ཡིན་ནོ་ཞེས་བྱ་བ་མ་བརྗོད་པའོ། །ཡང་འདིར་བརྒལ་ཞིང་བརྟག་པ་དོར་བ་ཚར་གཅད་པའི་གནས་སུ་ཞིག་གཏང་བ་ཡིན་ཞེ་ན། རེ་ཞིག་བརྒལ་ཞིང་བརྟག་པ་མི་བྱ་བའི་ཞེས་བྱ་བ་རིགས་པ་མེད་པའི་ཕྱིར་རོ། །སྲིད་པ་མ་ཡིན་ཏེ། ཕ་རོལ་པོ་ལ་སྐྱོན་བརྗོད་པར་བྱ་བའི་ཕྱིར་བདག་ཉིད་ལ་སྐྱོན་དང་ལྡན་པ་འདི་ཁས་ལེན་པ་ནི་ཚར་གཅད་པར་གྱུར་ན། འདི་ནི་བདག་ཉིད་དོར་བ་ཚར་གཅད་པའི་གནས་སུ་ཡོངས་སུ་མི་ཤེས་པའི་ཕྱིར་རོ། །དེའི་ཕྱིར་འདི་སྐྱོན་དང་ལྡན་པ་ཡིན་ནོ་ཞེས་བྱས་ཀྱང་དོར་བར་རིགས་པ་མ་ཡིན་གང་གིས་འདི་མི་ཤེས་པ་ཉིད་ཚར་གཅད་པ་ཡིན་ནོ། །འདི་ལྟར་ཡོངས་སུ་མི་ཤེས་པ་ཉིད་རྗེས་སུ་མི་སྦྱོར་བར་ཚར་གཅད་པ་ཐོབ་པའི་ཕྱིར་ཡོངས་སུ་ཤེས་པ་ཉིད་ཇི་ལྟར་འདོད་བར་འགྱུར། །དེ་ལྟར་འདི་གསལ་བར་བྱས་པས་ཇི་ལྟར་བདག་ཉིད་སྤོང་བར་འགྱུར། །དེའི་སྐྱོན་དེས་བདག་ཉིད་བརྒལ་ཞིང་བརྟག་པ་འདོར་བ་ནི་ཚར་གཅད་པའི་གནས་མ་ཡིན་པ་ལ་གཞན་གསུམ་པ་ཡོད་པ་མ་ཡིན་ནོ། །འགའ་ཞིག་ཅིའི་ཕྱིར་རྩོད་པ་


DTG190_Page_0279
[མ་དཔེ་གཟིགས་ན་འདིར་གནོན།]

ཞེས་འདིར་དགོས་པའི་དགོས་པ་ཐམས་ཅད་ཀྱི་ཕྱོགས་འདི་དམིགས་ནས་འདི་བརྗོད་པ་ཡིན་ནོ། །དེ་ཡང་བརྒལ་ཞིང་བརྟག་པ་དོར་ནས་རྩོད་པ་བརྗོད་པ་ན་སུ་ཞིག་ཕམ་པར་འགྱུར། དེ་ལྟར་ན་རྒོལ་བ་དང་ཕྱིར་རྒོལ་བ་དང་དཔང་པོ་དང༌། གཞན་དག་ལ་བརྒལ་ཞིང་བརྟག་པར་བྱེད་པ་མཐོང་བ་འཁོར་ལ་དྲི་བར་བྱའོ་ཞེས་བྱ་བའི་དོན་ཏོ། །ཡང་ཞེས་བྱ་བ་སྨོས་པ་ནི་ངེས་པར་གཟུང་བའོ། །གཞན་ཡང་རྒོལ་བ་དག་གིས་ཚར་གཅད་པའི་གནས་སུ་འགྱུར་ལ། འདི་དག་དབང་པོ་ཉིད་ཀྱང་ཡིན་ནོ། །ཅིའི་ཕྱིར་དེ་དག་གིས་བརྗོད་པར་མི་བྱ་བ་ཅི་ཡིན་ཞེ་ན། བཤད་པ། རང་གི་སྐྱོན་དང་རང་གི་ཉེས་པས་ཚར་གཅད་པ་ཐོབ་པར་འགྱུར་བ་རྣམ་པར་འགྲེལ་ཞིང་གསལ་བར་བྱེད་པར་མི་འགྱུར་རོ། །སློབ་དཔོན་གྱིས་གལ་ཏེ་འདིར་ཡང་ཞེས་བྱ་བ་ལ་སོགས་པའོ། །གང་གི་ཚེ་རིགས་པར་རྣམ་པར་དཔྱད་པ་དེའི་ཚེ་གཅིག་ཀྱང་རྒྱལ་བ་དང་ཕམ་པར་རིགས་པར་མི་འགྱུར་རོ། །ཇི་ལྟར་རྒོལ་བ་རྣམས་རྒྱལ་བར་མི་འགྱུར་རོ་ཞེ་ན། སྒྲུབ་པར་བྱེད་པ་ལྟར་སྣང་བ་ཤེས་པར་འདོད་པའི་དོན་བསྟན་པའི་ཕྱིར་རོ། །དེ་ཉིད་ཕྱིར་རྒོལ་བ་ཕམ་པར་འགྱུར་བ་མ་ཡིན་ཏེ། ཕྱིར་རྒོལ་བསྒྲུབ་པར་བྱེད་པར་འདོད་པ་གྲུབ་པ་ལ་ལྟོས་ནས་ཕམ་པར་འགྱུར་བ་འཇོག་པའི་ཕྱིར་རོ། །དེ་ལྟར་ན་ཕྱིར་རྒོལ་བ་ཅིའི་ཕྱིར་རྒྱལ་བར་མི་འགྱུར་ཞེ་ན། ཡང་དག་པའི་སྐྱོན་བརྗོད་པ་མེད་པའི་ཕྱིར་རོ། །དེ་ཉིད་ཀྱི་ཕྱིར་རྒོལ་བ་ཡང་ཕམ་པ་མ་ཡིན་ཏེ། དེས་སུན་འབྱིན་པ་ལ་ལྟོས་ནས་རྣམ་པར་འཇོག་པའི་ཕྱིར་རོ། །འོན་ཀྱང་ཕྱོགས་ཕྱི་མར་སྨྲ་བ་ལ་སྐྱོན་མང་པོ་ཡོད་དུ་ཟིན་ཀྱང་རྒོལ་བས་སྒྲུབ་པར་བྱེད་པ་བརྗོད་པའི་སྒོ་ནས་སྐྱོན་ཅུང་ཟད་ཅིག་རྗོད་པར་བྱེད་ཅིང༌། ཅུང་ཟད་མ་ཡིན་པ་དེའི་ཚེ་འདི་ཚར་གཅད་པར་འོས་པ་མ་ཡིན་ནོ། །ཅིའི་ཕྱིར་ཞེ་ན། ལན་ཁོང་དུ་ཆུད་པ་ཡོད་པའི་ཕྱིར་རོ། །གལ་ཏེ་འོས་པ་ཉིད་ན་སྐྱོན་ཡོད་པ་ཐམས་ཅད་མ་བརྗོད་པའི་ཕྱིར་རོ་ཞེ་ན། སློབ་དཔོན་གྱིས་སྨྲས་པ། ཡོད་ཅེས་བྱ་བ་ནས་གདོན་མི་ཟ་བར་སྐྱོན་ཐམས་ཅད་ཕྱིར་རྒོལ་བས་བརྗོད་པ་འམ། མ་བརྗོད་པ་ཉིས་སྐྱོན་གཞན་དུ་ཚར་གཅད་པར་མི་བྱ་སྟེ་ཤིན་ཏུ་མེད་པའི་ཕྱིར་རོ། །ཅིའི་ཕྱིར་སྐྱོན་ཐམས་ཅད་བརྗོད་པར་མི་བྱ་ཞེ་ན། བཤད་པ། མ་གྲུབ་པ་ལ་སོགས་པའི་སྐྱོན་གཅིག་བརྗོད་པས་ཀྱང་རྒོལ་


DTG190_Page_0280
[མ་དཔེ་གཟིགས་ན་འདིར་གནོན།]

བའི་རབ་ཏུ་སྦྱོར་བའི་བསྒྲུབ་པར་བྱ་བ་ལ་དེ་ལ་གནོད་པར་བྱེད་པའི་ཕྱིར་རོ། །བསྒྲུབ་བྱ་སྒྲུབ་པར་ནུས་པ་བསྟན་པའི་ཕྱིར་རོ་ཞེས་བྱ་བའི་དོན་ཏོ། །དངོས་པོ་གྲུབ་པར་བྱེད་པ་ལ་བསྟན་པའོ། །འདི་ཉིད་ཀྱི་དཔེ་ནི་བཤད་པ་སྒྲུབ་པར་བྱེད་པ་གཅིག་པ་ལྟ་བུའོ། །དཔེར་ན་ཞེས་བྱ་བ་ལ་སོགས་པའི་རྣམ་པར་དབྱེ་བའོ། །སྐད་ཅིག་མ་ཉིད་ལ་སོགས་པ་བསྟན་པ། །སྒྲུབ་པར་བྱེད་པ་དུ་མ་ཡོད་པ་ཉིད་འབྲས་བུ་ཉིད་དང་རྩོལ་བ་ལས་བྱུང་བ་ཉིད་ལ་སོགས་ཡོད་ཀྱང་ཡོད་པ་ལ་སོགས་པ་ཉིད་ཁོ་ན་ཡིན་གྱི། ཐམས་ཅད་ཁས་བླང་པར་མི་བྱ་བ་ནི། དེའི་སྐད་ཅིག་མ་ལ་སོགས་པའི་དོན་སྒྲུབ་པར་ངེས་པ་མེད་སྒྲུབ་ཕྱིར་ཐམས་ཅད་ཁས་བླང་པར་མི་བྱའོ། །དེ་བཞིན་དུ་སྐྱོན་གཅིག་གིས་ཀྱང་དེ་སྒྲུབ་པར་བྱེད་པ་ལ་གནོད་པ་ཡིན་པའི་ཕྱིར་ཐམས་ཅད་ཁས་བླང་བར་མི་བྱའོ་ཞེས་བྱ་བ་འདི་དང་དཔེ་མཚུངས་པ་ཡིན་ནོ། །དེའི་ཕྱིར་ཕྱོགས་ཕྱི་མར་སྨྲ་བས་གནོད་པའི་སྐྱོན་གཅིག་བརྗོད་པ་ཉིད་ཀྱིས་གཞན་གྱིས་ཕྱོགས་གཞན་དག་རྗོད་པར་མི་བྱེད་ན། ཚར་གཅད་པར་བྱ་བར་འོས་པ་མ་ཡིན་ནོ། །ཕྱོགས་སྔ་མས་སྒྲུབ་པ་ལྟར་སྣང་བ་བསྟན་ཕྱིར་དང༌། ཡང་དག་པའི་སྐྱོན་མ་བརྗོད་པའི་ཕྱིར་རོ། །འོ་ན་རྒོལ་བ་དེས་སྒྲུབ་པ་ལྟར་སྣང་བ་སྦྱར་བ་མེད་ན་ཅི་ཞིག་ལྟར་ན་རྒྱལ་བར་མི་འགྱུར། ཕྱིར་རྒོལ་བའི་མི་བདེན་པའི་སྐྱོན་བརྗོད་པར་འགྱུར་བའི་ཕྱིར་ཞེ་ན། ཕྱོགས་ཕྱི་མ་སྨྲ་བས་སྐྱོན་ལྟར་སྣང་བ་སྨྲ་བར་བྱེད་པ་ལ་རང་གི་ཕྱོགས་པས་སྤངས་པ་མེད་ཅིང་ལྡོག་པ་མེད་དོ། །དེས་ན་སྐྱོན་ལྟར་སྣང་བ་བརྗོད་པ་ཉིད་ཀྱིས་ནུས་པ་མེད་པའི་ཕྱིར་ཞེས་བྱ་བའི་དོན་ཏོ། །རྒོལ་བ་མ་ཡིན་ཏེ། ཅིའི་ཕྱིར་ཞེ་ན། སྒྲུབ་པར་བྱེད་པའི་ཡན་ལག་མ་བསྒྲུབས་པའི་ཕྱིར་རོ། །སྒྲུབ་པར་བྱེད་པའི་ཡན་ལག་མ་བསྒྲུབས་པ་གང་གིས་དེའི་དངོས་པོ་དེ་ཉིད་དོ། །འདི་ཡིན་པར་ག་ལས་ཡིན་ཞེ་ན། བཤད་པ། སྐྱོན་ཐམས་ཅད་མེད་པར་རབ་ཏུ་བསྟན་པར་བྱེད་པའི་ཡན་ལག་མ་བསྒྲུབས་པའི་ཕྱིར་རོ། །དེ་ལྟ་བུར་གྱུར་པའི་མཚན་ཉིད་དམ། བྱེད་པ་ཉིད་ཀྱི་གསུམ་པ་སྟེ། མ་བསྒྲུབས་པའི་ཕྱིར་སྒྲུབ་པར་ལྟར་སྣང་བ་ཉིད་དེས་རབ་ཏུ་སྦྱོར་བ་ཡིན་ནོ་ཞེས་བྱ་བ་བསྡུས་པའི་དོན་ཏོ། །ཕྱོགས་ཕྱི་མར་སྨྲ་བ་ལ་ཡང་རྒྱལ་བ་ཡོད་པ་མ་ཡིན་ནོ། །དེ་ཅིའི་ཕྱིར་དེ་ལྟ་བུ་ཡང་ཞེས་པ་ནི། གལ་


DTG190_Page_0281
[མ་དཔེ་གཟིགས་ན་འདིར་གནོན།]

ཏེ་ཕྱོགས་སྔ་མ་སྨྲ་བ་རྣམས་ཀྱིས་ཚར་གཅད་པ་ཐོབ་པ་ཚར་གཅད་པ་མི་བྱེད་པར་མ་ཟད་ཀྱི་ཕྱོགས་ཕྱི་མ་དང་འབྲེལ་པ་མེད་པ་མ་ཡིན་ནོ་ཞེས་བྱ་བ་ནི་ཡང་གི་སྒྲ་ཡིན་ནོ། །རྗེས་སུ་སྦྱོར་བ་མེད་པ་ལ་རྗེས་སུ་སྦྱོར་བ་ནི་ཚར་གཅད་པ་ཐོབ་པ་མ་ཡིན་པ་ལ་ཚར་གཅོད་པ་བརྗོད་པའི་ཕྱིར་རོ། །ཡང་ཅིའི་ཕྱིར་དེ་ལྟར་བརྗོད་ཅེ་ན། བཤད་པ་ཚར་གཅད་པའི་གནས་ཀྱི་མཚན་ཉིད་ལ་སོགས་པ་ངེས་པའི་ཕྱིར་རོ། །ཇི་སྐད་བཤད་པའི་ཚར་གཅད་པའི་གནས་ཀྱི་མཚན་ཉིད་ཡང་དག་པར་ཡོངས་སུ་མ་ཤེས་པའི་ཕྱིར་རོ་ཞེས་བྱ་བའི་དོན་ཏོ། །དེ་ལྟར་རྟོགས་པ་མེད་པར་ཚར་གཅད་པར་བྱའོ་ཞེ་ན། སློབ་དཔོན་གྱིས་དེ་ལྟ་ན་ཡང་ཞེས་བྱ་བ་སྨོས་ཏེ། གལ་ཏེ་རྒོལ་བ་དེའི་སྒྲུབ་པར་བྱེད་པ་ལ། ཡང་དག་པ་མ་ཡིན་པའི་བརྫུན་པའི་སྐྱོན་དུ་གྱུར་པའི་འཁྲུལ་པ་དང་བཅས་པ་ལ་སོགས་པའི་སྐྱོན་གྱིས་གནོད་པར་བྱེད་པ་ཁྱེད་ཀྱིས་སྒྲུབ་པར་བྱེད་པ་མ་ཡིན་པ་རབ་ཏུ་སྦྱར་བ་དེས་ན་ཚར་གཅད་པར་འགྱུར་ཞེས་བྱ་བ་དེ་ལྟ་བུ་ནི་གནས་པ་ལ་སྦྱོར་བ་སྟེ། དེ་བཤད་པ་ནི་སྐྱོན་མ་ཡིན་པ་ལ་ཚར་གཅད་པའི་གནས་སུ་འདི་སྐྱོན་རྣམ་པར་འབྱེད་པའོ། །མངོན་པར་སྦྱོར་བ་ནི་རྣམ་པར་འགྲེལ་ཞིང་རྗོད་པར་བྱེད་པ་མ་ཡིན་ཞེ་ན། དེ་ལྟན་ཡང་བརྫུན་པའི་སྐྱོན་བརྗོད་པར་འགྱུར་བ་ལ་སྐྱོན་བརྗོད་པའི་མཚན་ཉིད་ཀྱི་ལན་རྟོགས་པ་མེད་པ་དང༌། བརྗོད་པ་མེད་པ་དང་སྤོབས་པ་མེད་པའི་རྒྱུས་ཡང་དག་པ་མ་ཡིན་པའི་ལན་བརྗོད་པ་ཚར་གཅད་པའི་གནས་ཡིན་ནོ་ཞེས་བྱ་བ་འདི་ནི་རྗེས་སུ་དཔག་པར་བྱེད་པ་ལ་རྗེས་སུ་སྦྱོར་བ་བརྗོད་པ་ཚར་གཅད་པའི་གནས་ཡིན་ནོ། །སྤོབས་པ་མེད་པ་ཚར་གཅད་པའི་གནས་དེ་ལས་ཚར་གཅད་པའི་གནས་ནི་གཞན་མ་ཡིན་ནོ། །ནམ་ཞིག་གིས་འདི་སྤོབས་པ་མེད་པར་ཚར་གཅད་པ་ཡིན་ཞེ་ན། བཤད་པ། རྒོལ་བ་ཅིག་ཤོས་ཀྱིས་དེ་བརྗོད་པ་ན་སྤོབས་པ་མེད་པ་བསྟན་པ་ཡིན་ནོ། །དེ་ལྟར་མ་ཡིན་ན་སྔ་མ་བཞིན་དུ་གཉིས་ལ་གཅིག་ནི་རྒྱལ་བ་དང་ཕམ་པར་མི་འགྱུར་རོ་ཞེས་བྱ་བར་དགོངས་སོ། །དེ་ལྟར་ཕྱིར་རྒོལ་བ་དང་འབྲེལ་བ་ཐ་དད་མེད་པའི་ཚིག་གིས་བསྟན་པས་རྒོལ་བ་དང་འབྲེལ་པ་སྤོང་ངོ༌། །བཤད་པ། གཞན་ཡང་ཕྱིར་རྒོལ་བས་སྒྲུབ་པར་བྱེད་པ་ཡང་དག་པ་བདེན་པའི་སྐྱོན་འཁྲུལ་བ་ལ་སོགས་པ་


DTG190_Page_0282
[མ་དཔེ་གཟིགས་ན་འདིར་གནོན།]

བརྗོད་པར་འགྱུར་བ་ལ། གཞན་གྱིས་ཞེས་བྱ་བ་ནི་ཕྱོགས་སྔ་མའི་རྒོལ་བས་སྐྱོན་ལྟར་སྣང་བའི་ཚིག་གིས་མངོན་པར་སྦྱོར་ཞིང༌། མ་ངེས་པ་ལ་སོགས་པའི་ལྟར་སྣང་བའི་ལྟག་ཆོད་ཁྱོད་ཀྱིས་རབ་ཏུ་སྦྱར་རོ། །དེའི་ཕྱིར་ཚར་གཅད་པར་འགྱུར་བ་ནི་དེ་ལྟ་བུ་ལ་མངོན་པར་སྦྱར་རོ་ཞེས་བྱ་བའི་དོན་ཏོ། །དེའི་ཚེ་འཁྲུལ་པ་ལ་སོགས་པ་དེའི་སྐྱོན་བརྗོད་པའི་ཕྱིར་རྒོལ་བ་དེས་ཡང་དག་པའི་སྐྱོན་ཉིད་བསྟན་པས་ལྟག་ཆོད་ནི་གསལ་བ་ཡིན་ནོ་ཞེས་བྱ་བའི་དོན་ཏོ། །སྒྲུབ་པར་བྱེད་པ་ལྟར་སྣང་བ་ཚིག་ཉིད་ཀྱིས་རྒོལ་བ་ཚར་གཅད་པ་ཡིན་པའི་ཕྱིར་རོ་ཞེས་བྱ་བའི་ཕྱིར་རོ། །དེ་ལྟ་བུ་ཡང་རྒོལ་བ་དང་འབྲེལ་པས་ཐ་དད་པ་ཡིན་ཡང་གཏན་ཚིགས་ལྟར་སྣང་བ་ལས་ཐ་དད་པ་མེད་པ་ལས་ལོགས་ཤིག་ཏུ་བརྗོད་པར་བྱ་བ་ནི་གདོན་མི་ཟ་བར་རྒོལ་བའི་གཏན་ཚིགས་ལྟར་སྣང་བ་ཉི་ཤུ་རྩ་གཉིས་ཚར་གཅད་པའི་གནས་སུ་ལོགས་ཤིག་ཏུ་ཚར་གཅད་པའི་གནས་གཅིག་བརྗོད་པར་བྱའོ། །ཅིའི་ཕྱིར་ཞེ་ན། ཡུལ་ཐ་དད་པ་ཞེས་བྱ་བ་སྨོས་ཏེ། རྗེས་སུ་སྦྱོར་བ་མེད་པ་ལ་སྦྱོར་བ་ཞེས་བྱ་བ་ཚར་གཅད་པའི་གནས་ལས་མ་འདས་པའི་ཡུལ་བསྡུ་བའི་ཕྱིར་རོ། །དེ་ལྟ་མ་ཡིན་ན་ཚར་གཅད་པའི་གནས་ཉི་ཤུ་རྩ་གཉིས་ཁས་བླངས་པ་དང་འགལ་བར་འགྱུར་རོ་ཞེས་དགོངས་སོ། །དེ་ལྟ་ན་ཡང་དེ་སྐད་དུ་བཤད་པའི་གཏན་ཚིགས་ལྟར་སྣང་བ་རྣམས་ཚར་གཅད་པའི་གནས་སུ་བཤད་ཟིན་པ་ལ། གཞན་བརྗོད་པ་ནི་རྗེས་སུ་སྦྱོར་བ་མེད་པ་ནི་རྗེས་སུ་སྦྱོར་བ་གཞན་ནི་དོན་མེད་པ་ཡིན་ཏེ། གཏན་ཚིགས་ལྟར་སྣང་བ་བརྗོད་པ་ཉིད་ཀྱི་ནང་དུ་འདུས་པའི་ཕྱིར་རོ། །གྲུབ་པའི་མཐའ་ཁས་བླངས་ནས་ངེས་པ་མེད་པའི་ཞར་ལ་འོངས་པའི་ཚིགས་གྲུབ་པའི་མཐའ་མེད་པ་ཡིན་ནོ་ཞེས་བ་ནི་མདོའོ། །གྲུབ་པའི་མཐའ་ཁས་བླངས་ནས་ཕྱོགས་ཡོངས་སུ་གཟུང་བར་བྱས་པ་ལ་ངེས་པ་མེད་པའི་ཕྱིར་རོ། །སྔར་སྐབས་སུ་བབ་པའི་དོན་ལ་རག་ལས་པའི་བསྟན་བཅོས་རྣམ་པར་འཇོག་པ་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །ཞར་ལ་བྱུང་བའི་ཚིག་ནི་དོན་གཞན་བརྗོད་པ་ནི་དོན་འགའ་ཞིག་ཆོས་ཅན་དམ་བཅའ་བའི་དོན་ལས་བཟློག་པའི་འགལ་བའོ། །འདི་དཔེའི་སྒོ་ནས་གསལ་བར་བྱ་བ་ནི། དཔེར་ན་ཡོད་པའི་དངོས་པོ་ནི་གདོན་མི་ཟ་བར་འཇིག་པ་མེད་པར་མི་འགྱུར་བར་མ་ཟད་ཀྱི། མི་མངོན་པར་ཡང་འགྱུར་


DTG190_Page_0283
[མ་དཔེ་གཟིགས་ན་འདིར་གནོན།]

རོ། །མེད་པ་རྟའི་རྭ་དང་མཚུངས་པ་སྐྱེ་བར་འགྱུར་རོ། །འོ་ན་ཅི་ཞེ་ན། མངོན་པར་གསལ་བ་སྟེ། ཡོད་པ་སྐྱེ་བ་ཡིན་ནོ་ཞེས་བྱ་བ་དེ་ལྟ་བུ་སེར་སྐྱའི་གྲུབ་མཐའ་རྣམ་པར་འཇོག་པ་བསྟན་པ་ཕྱོགས་སུ་བྱས་ནས་རང་བཞིན་གཅིག་གསལ་བ་ནི་ཆེན་པོ་ལ་སོགས་པ་གསལ་བའོ། །འདིར་གཏན་ཚིགས་བཤད་པ་ནི་འགྱུར་བའི་རྗེས་སུ་འགྲོ་བ་མཐོང་བའི་ཕྱིར་རོ། །འཇི་བའི་རྗེས་སུ་འགྲོ་བ་ཞེས་བྱ་བ་ནི་དཔེའོ། །དེ་ལྟ་ན་ཡང་ཞེས་བྱ་བ་ནི་བསགས་པའོ། །བདེ་བ་དང་སྡུག་བསྔལ་བ་དང༌། རྨོངས་པ་དང་ལྡན་པའི་ཞེས་བྱ་བ་ནི་བདེ་བ་ལ་སོགས་པའོ། །བདེ་བ་ལ་སོགས་པའི་བདག་ཉིད་ཀྱི་གསལ་བ་ནི་སྔར་བསྟན་ཏེ། དཔེར་ན་གྲངས་ཅན་གྱི་འདོད་པ་བཞིན་ནོ། །དེའི་ཕྱིར་དེ་བདེ་བ་དག་གི་སྒོ་ནས་རང་བཞིན་གཅིག་པ་འདི་གསལ་བ་ཐ་དད་པ་ཡིན་ནོ་ཞེས་བྱ་བ་མཇུག་བསྡུ་བའོ། །བདེ་བ་ལ་སོགས་པ་དག་གིས་ཞེས་བྱ་བ་ནི་དེ་ལྟ་བུར་གྱུར་བའི་གསུམ་པའོ། །བདེ་བ་ལ་སོགས་པའི་རྣམ་པ་ནི་བདེ་བ་ལ་སོགས་པའི་གནས་སྐབས་ཀྱི་རང་བཞིན་གཅིག་པ་འདི་གསལ་བ་ཐ་དད་པ་ཡིན་ནོ་ཞེས་བྱ་བའི་དོན་ཏོ། །གཞན་གྱིས་སྨྲས་པ་རང་བཞིན་གཅིག་པའི་གསལ་བ་དང་མི་གསལ་བར་འགྱུར་བའི་རྗེས་སུ་བསྟན་པའི་ཕྱིར་རོ། །འདི་སྐད་སྟོན་པ་ཡིན་ཏེ་རང་བཞིན་གཅིག་པ་ཐམས་ཅད་དང་ཐ་དད་པ་མེད་པའི་བདག་ཉིད་ཀྱི་རང་བཞིན་གསལ་བ་དང་མི་གསལ་བའི་རྗེས་སུ་འགྲོ་བའི་ཕྱིར་རོ། །གང་གསལ་བར་འགྱུར་བ་ནི་ཆེན་པོ་ལ་སོགས་པའོ། །གང་མི་གསལ་བའི་གཙོ་བོའི་བདག་ཉིད་དུ་རྣམ་པར་གནས་པ་དེ་དག་ཀྱང་རྗེས་སུ་འགྲོ་བ་བསྟན་པའི་ཕྱིར་རོ། །གཞན་གྱིས་སྨྲས་པ་གསལ་བའི་རང་བཞིན་གཅིག་ཡིན་པ་གསལ་བ་རྣམ་པར་འགྱུར་བ་ཡིན་པས་གསལ་བའི་ངོ་བོ་ནི་འགྱུར་བ་ཡིན་ནོ་ཞེའོ། །རང་བཞིན་གྱི་དོན་ནི་བཟློག་པ་ཇི་ལྟར་འགྱུར་ཞེས་བསྟན་པའི་ཕྱིར་སེར་སྐྱས་དེ་སྐད་སྨྲས་པ་དེ་ལ་བརྒལ་ཞིང་བརྟག་པ་ནི་བཤད་པ། དེ་ཡང་རང་བཞིན་དང་འགྱུར་བ་ཇི་ལྟར་མཚོན་ཞིང་རྟོགས་པར་བྱས་ཞེས་བྱ་བ་དེ་ཉིད་ལ་རྗེས་སུ་སྦྱོར་བ་བརྗོད་དེ་གཞན་ལྡོག་པ་ན་ཆོས་གཞན་འཇུག་པར་འགྱུར་བའི་གནས་སྐབས་གང་ཡིན་པ་དེ་ནི་རང་བཞིན་ཡིན་ཏེ། གནས་སྐབས་ཀྱི་ངོ་བོ་འཇུག་པ་དང་ལྡོག་པའི་ཆོས་གཞན་གང་


DTG190_Page_0284
[མ་དཔེ་གཟིགས་ན་འདིར་གནོན།]

ཡིན་པ་དེ་ནི་འགྱུར་བ་ཡིན་ནོ་ཞེས་བྱ་བར་མཚོན་པར་བྱའོ། །གྲངས་ཅན་གྱིས་འདི་སྐད་སྟོན་པ་ཡིན་ཏེ། རང་བཞིན་སྤངས་པ་ཡིན་པ་སྐྱེ་བ་མི་འཐད་པ་དེ་ནས་རྒོལ་བའི་དམ་བཅའ་བའི་དོན་འདི་ལས་བཟློག་པ་ངེས་པ་མེད་པའི་ཚིག་རབ་ཏུ་སྦྱོར་བར་བྱེད་པའི་ཕྱིར་སྔ་མའི་རང་བཞིན་ཡོངས་སུ་སྤངས་སོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། དམ་བཅའ་བ་འདིས་ཞེས་བྱ་བ་ནི་སྔ་མ་དྲན་པར་བྱེད་པའོ། །གལ་ཏེ་དེ་ལྟ་ཡིན་ན་ཡང་སྐྱོན་ཅི་ཡོད་ཅེ་ན། ཡོད་པ་དང་མེད་པ་ལ་སོགས་པ་སྨོས་ཏེ། ཡོད་པ་ནི་མི་མངོན་པར་གདོན་མི་ཟ་བ་ལ་སོགས་པ་མེད་པ་འགའ་ཞིག་ཏུ་འཇུག་པ་ཆད་པ་མ་གྲུབ་པའོ། །ངོ་བོ་འགའ་ཞིག་གིས་གནས་སྐབས་ཀྱི་ངོ་བོར་གྱུར་པ་མི་དམིགས་པའི་ཆ་འགའ་ཞིག་གནས་པར་འགྱུར་བ་བདག་ཉིད་དམ་གཞན་དུ་གྱུར་པ་མ་ཡིན་ནོ། །བདག་ཉིད་དུ་གྱུར་པའི་མངོན་པ་ཡིན་པའི་ཕྱིར་ཐ་དད་པ་མེད་པ་མི་མངོན་པའི་ཕྱིར་བཞིན་དུ་གནས་པ་མེད་པར་འགྱུར་རོ། །གནས་པ་མེད་པ་དང་གནས་པ་ཅན་དེའི་ཐ་དད་པ་མེད་པས་མི་མངོན་པར་གནས་པ་མེད་པར་གྱུར་པ་འམ། གཞན་དུ་གྱུར་པ་ན་ཡང་ཇི་ལྟར་རྗེས་སུ་དཔག་པ་མེད་པ་དང་འཇིག་པ་མེད་པ་གཞན་གྱི་སྐབས་མེད་པས་གཞན་དུ་གནས་པ་མ་ཡིན་ནོ། །ཡང་ན་གཞན་ནི་གཞན་གྱི་རྗེས་སུ་འགྲོ་བ་ཅན་ཡིན་ན་སེམས་ཅན་དང་བུམ་པ་ལ་སོགས་པ་ལ་ཡང་རྗེས་སུ་འགྲོ་བར་ཐལ་བར་འགྱུར་རོ། །དེ་ལྟར་ན་ཡོད་པ་མངོན་པ་ནི་སྐྱེ་བ་ལས་མ་རྟོགས་པའི་ཆོས་འགའ་ཞིག་ཡོད་པ་མི་འགྲུབ་པོ་ཞེས། འོ་ན་ཡོད་པའི་ཆོས་གཞན་གྱི་ནང་དུ་འདུས་པའི་གཟུང་བའི་ཡུལ་ཡོད་པ་ཡང་ཐོབ་པ་ནི་མངོན་པ་སྟེ། བུམ་པ་མེད་པའི་ཉེ་བར་ལེན་པའམ་དམིགས་པ་བཞིན་དུ་ཡོད་པའི་ཕྱིར་བྱེད་པ་པོ་འམ་སྐྱེད་པ་མ་ཡིན་ནོ་ཞེས་དེ་ལྟར་རྣམ་པར་འཇོག་པ་ནི་གྲངས་ཅན་འགོག་པའོ། །དཔེ་ཁ་ཅིག་ལས། དེ་ལས་བརྒལ་ཞིང་བརྟག་པ་ན། །ཞེས་འདོད་ཏོ། །ཕྱིར་རྒོལ་བར་གྱུར་པ་ལས་ཞེས་བཤད་པར་བྱའོ། །གང་གི་ཚེ་སེར་སྐྱས་ཡོད་པའི་བདག་ཉིད་འཇིགས་པ་དང་མེད་པའི་བདག་ཉིད་ཐོབ་པར་ཁས་བླངས་པའི་གྲུབ་པའི་མཐའ་མེད་པར་འགྱུར་རོ། །ཁས་བླངས་པ་དང་འགལ་བའི་དམ་བཅའ་གྲུབ་པའི་མཐའ་ཉམས་པ་ཞེས་བྱ་བ་ཚར་གཅད་པའི་གནས་སུ་འདི་འགྱུར་རོ། །འོ་ན་ཡོད་པའི་བདག་ཉམས་པ་དང་མེད་པའི་བདག་ཐོབ་པར་


DTG190_Page_0285
[མ་དཔེ་གཟིགས་ན་འདིར་གནོན།]

ཁས་བླངས་པ་དེ་ལྟ་ན་ཡང་རང་བཞིན་གཅིག་པའི་རྣམ་པར་འགྱུར་བ་ཡིན་ནོ་ཞེས་བྱ་བ་གང་ཡིན་པ་འདིའི་ཕྱོགས་ལ་དམ་བཅའ་སྔ་མ་དེ་ནི་འདིར་གྲུབ་པར་མི་འགྱུར་ཏེ། འགྱུར་བའི་མཚན་ཉིད་གནས་པ་མེད་པའི་ཕྱིར་རོ། །འདི་ལྟར་མཚན་ཉིད་དེས་ཇི་ལྟར་གནས་པ་ཞེས་བྱ་བ་ལ་སོགས་པ་བཤད་པ་དེ་ནི་རིགས་པ་མ་ཡིན་ནོ། །ཡོད་པ་དང་མེད་པ་ཞེས་བྱ་བ་ལ་སོགས་པ་ནས་རྣམ་པར་གཞག་པ་ན་ཞེས་བྱ་བ་ནི་རེ་ཞིག་གཞུང་ཡིན་ནོ། །དེ་ནི་སློབ་དཔོན་གྱིས་འདིར་ལན་འདེབས་པ་ནི་འདི་ལ་ཡང་ཞེས་བྱ་བ་ནི་ལྷག་མའོ། །གྲུབ་པའི་མཐའ་ཅུང་ཟད་ཅིག་ངེས་པ་མེད་པའི་ཕྱིར་རོ་ཞེས་བྱ་བ་ནི་འགྱུར་བ་མེད་པའོ། །གྲངས་ཅན་གྱི་ཚིག་ཞར་ལ་འོངས་པ་ངེས་པར་ཁས་བླངས་པ་གང་ཡིན་པ་དེ་ནི། མེད་པ་སྐྱེ་བར་མི་འགྱུར་བ་ལ་སོགས་པ་ནི་འཇིག་པར་མི་འགྱུར་རོ་ཞེས་སྨྲས་པ་དེ་སྒྲུབ་པ་བཤད་པ་ཡིན་ནོ། །ཅི་ཞིག་བཤད་ཅེ་ན། རང་བཞིན་གཅིག་པ་གསལ་བ་འདིའི་རྗེས་སུ་འགྲོ་བ་ཐོབ་པའི་ཕྱིར་རོ་ཞེས་སྨྲས་པ་དེ་ལ་གཅིག་པ་འདི་ཉིད་རྣམ་པར་འབྱེད་པ་ཡིན་ཏེ། སྐྱེ་གནས་ཐ་མི་དད་པ་དེའི་གསལ་བ་ནི་བདེ་བ་ལ་སོགས་པའི་གསལ་བ་ཐ་དད་པ་ལོགས་ཤིག་ཏུ་མ་གྱུར་པ་སྟེ། སྐྱེ་གནས་འགྱུར་བ་མེད་པ་གང་ཡིན་པའི་གསལ་བ་དེ་དང་དེ་ནི་སྐྱེ་གནས་ཐ་དད་མེད་པ་ཡིན་ཏེ། ཅིའི་ཕྱིར་ཞེ་ན། དེའི་རྗེས་སུ་འགྲོ་བ་མཐོང་བའི་ཕྱིར་རོ། །བདེ་བ་ལ་སོགས་པ་འདི་གསལ་བ་རྗེས་སུ་འགྲོ་བ་མཐོང་བའི་ཕྱིར་དང༌། དེའི་བདག་ཉིད་དུ་གྲུབ་པའི་ཕྱིར་རོ། །དེས་ཅི་ཞིག་འགྲུབ་ཅེ་ན། གསལ་བ་དེའི་རང་བཞིན་ནི་བདེ་བ་ལ་སོགས་པའི་རང་བཞིན་ནོ། །དེའི་རང་བཞིན་དུ་ཇི་ལྟར་ངེས་པར་བྱ་ཞེ་ན། ཐ་མི་དད་པར་དམིགས་པའི་ཕྱིར་རོ་ཞེས་བྱ་བ་སྨོས་སོ། །བདེ་བ་ལ་སོགས་པ་དང་སྒྲ་ལ་སོགས་པ་ཐ་དད་པ་ཡིན་པར་བསྟན་པའི་ཕྱིར་རོ་ཞེས་བྱ་བའི་དོན་ཏོ། །དེ་ལྟ་ན་ཡང་ཅི་ཞིག་གྲུབ་པར་འགྱུར་ཞེ་ན། སྒྲ་ལ་སོགས་པ་འགྱུར་བའི་ཆོས་དེའི་བདག་ཉིད་དང་བདེ་བ་ལ་སོགས་པའི་བདག་ཉིད་དུ་སྐྱེ་བ་དང༌། འཇིག་པར་གྲུབ་པར་མི་འགྱུར་ཏེ། ཅིའི་ཕྱིར་ཞེ་ན། བདེ་བ་ལ་སོགས་པ་སྐྱེ་བ་དང་འཇིག་པ་མེད་པའི་ཕྱིར་རོ། །བདེ་བ་ལ་སོགས་པ་ཐ་དད་མེད་པའི་བདག་ཉིད་སྒྲ་ལ་སོགས་པ་ཡང་རྟག་པར་གྲུབ་པར་འགྱུར་རོ། །དེ་ལྟ་ན་ཡང་གང་སྔར་ཁས་བླངས་པ་


DTG190_Page_0286
[མ་དཔེ་གཟིགས་ན་འདིར་གནོན།]

ཡོད་པ་དེ་ནི་འཇིག་པ་མ་ཡིན་ལ་མེད་པ་ནི་སྐྱེ་བ་མ་ཡིན་ནོ་ཞེས་བྱ་བ་འགྲུབ་པར་འགྱུར་རོ། །དེ་ལྟ་ན་འདིར་སེར་སྐྱ་རང་གི་ཁས་བླངས་པ་གྲུབ་པར་གྱུར་པ་དེ་བཤད་པར་རིགས་པ་དང༌། གཞན་གྱི་གཏན་ཚིགས་ཀྱི་རྗེས་སུ་འགྲོ་བ་ན་མ་གྲུབ་པ་ལ་སོགས་པའི་སྐྱོན་བརྗོད་པ་དེ་མི་བརྗོད་པར་རང་བཞིན་གྱིས་འགྱུར་བ་ཡིན་ནོ་ཞེས་བྱ་བ་ཇི་ལྟར་རྟོགས་པར་བྱ་ཞེས་དེ་སྐད་དུ་བརྒལ་ཞིང་བརྟག་པ་བྱེད་པ་ཡིན་ཏེ། དེ་ལྟར་འདིར་རྐང་མིག་བདག་ཉིད་འདིར་རང་བཞིན་འགྱུར་བའི་མཚན་ཉིད་འདྲི་བར་བྱེད་ཅིང་རང་བཞིན་དང་འབྲེལ་པ་མེད་ཅིང་ངེས་པ་མེད་པས་རང་བཞིན་གྱི་དོན་ལ་རག་ལས་པའི་ཕྱིར་ཚིག་ལ་འཇུག་པར་བྱེད་དོ། །གང་གི་ཚེ་རང་བཞིན་དང་འགྱུར་བའི་མཚན་ཉིད་འདི་སྐབས་མ་ཡིན་པ་དེའི་རྣམ་པར་གཞག་པ་དེས་ཅི་ཞིག་བྱ། དེའི་ཕྱིར་སྐབས་མ་ཡིན་པ་དེའི་བརྒལ་ཞིང་བརྟག་པ་བྱེད་པས། རྐང་མིག་ཚར་གཅད་པའི་གནས་ཉིད་དུ་འགྱུར་རོ་ཞེས་བྱ་བར་དགོངས་སོ། །འོ་ན་འདིར་ལན་དང་འབྲེལ་པ་བརྗོད་པར་བྱ་བ་ཡིན་ཞེ་ན། བཤད་པ། དེ་ལ་གཏན་ཚིགས་ཀྱི་རྗེས་སུ་འགྲོ་བ་བསལ་བ་ཞེས་བྱ་བ་འཇུག་པའི་ཆོས་ཅན་འདི་འགྱུར་བ་བརྗོད་པ་ཡིན་ན་བདེ་བ་ལ་སོགས་པ་ནི་དེ་ལྟ་མ་ཡིན་ནོ། །འཇུག་པ་དང་ལྡོག་པའི་ཆོས་ཅན་གྱི་རྟགས་སུ་བརྗོད་པ་ནི་ཡོངས་སུ་གྱུར་པ་དང་འབྲེལ་པའོ། །དེ་བཞིན་དུ་གསལ་བའི་བདེ་བ་ལ་སོགས་པའི་རྗེས་སུ་འགྲོ་བར་བཤད་པ་ནི། བདེ་བ་ལ་སོགས་པའི་རང་བཞིན་གྱུར་པ་ཡིན་ན། འཇུག་པ་དང་ལྡོག་པའི་ཆོས་ཀྱི་མཚན་ཉིད་ཀྱིས་གསལ་བ་ཉིད་ཉམས་པར་འགྱུར་ཏེ། དེ་དང་ཐ་མི་དད་པ་དེ་དག་ཀྱང་གནས་སྐབས་ཐ་དད་པ་ཡིན་པའི་ཕྱིར་རོ་ཞེས་བྱ་བ་ནི་དེའི་ཕྱིར་དེ་དང་འབྲེལ་པ་ཡིན་ན། བདེ་བ་ལ་སོགས་པའི་རང་བཞིན་མ་ཡིན་ཏེ། རང་བཞིན་ཡིན་ན་འཇུག་པ་དང་ལྡོག་པ་སྤངས་པར་དེ་སྐད་དུ་བཤད་དོ། །དེ་ཡང་བདེ་བ་ལ་སོགས་པའི་རང་བཞིན་གང་ཡིན་པ་དེའི་དངོས་པོ་སྟེ། དེ་དང་འབྲེལ་པ་ཡིན་ན་ནི་བདེ་བ་ལ་སོགས་པའི་རང་བཞིན་ནི་མ་ཡིན་ཏེ། ཅིའི་ཕྱིར་ཞེ་ན། བཤད་པ། གསལ་བའི་མཚན་ཉིད་དང་འགལ་བའི་ཕྱིར་རོ། །གསལ་བའི་མཚན་ཉིད་ཀྱི་འཇུག་པ་དང་ལྡོག་པའི་ཆོས་ཉིད་ཡིན་ལ་དེ་ལ་སོགས་པའི་བདེ་བ་ལ་སོགས་པ་ནི་ཕན་ཚུན་སྤངས་ཏེ་གནས་པའི་མཚན་ཉིད་ཀྱི་འགལ་བ་ཡིན་ནོ། །རང་བཞིན་གྱིས་


DTG190_Page_0287
[མ་དཔེ་གཟིགས་ན་འདིར་གནོན།]

ཡོད་པའི་གནས་སྐབས་ཀྱི་ངོ་བོ་བདེ་བ་ལ་སོགས་པའི་རང་བཞིན་འདི་ནི་གསལ་བར་མི་འགྱུར་ཏེ། དེའི་བཟློག་པའི་ཆོས་ཡིན་པའི་ཕྱིར་སེམས་ཅན་ཤེས་པ་བཞིན་དུ་འམ། བདེ་བ་དང་གསལ་བ་དེ་དག་གཅིག་གི་རང་བཞིན་མ་ཡིན་ཏེ། ཕན་ཚུན་འགལ་བའི་ཆོས་གནས་པའི་ཕྱིར་རྡུལ་དང་སྙིང་སྟོབས་དང་མུན་པ་བཞིན་ནོ། །དེ་ལྟ་ན་ཡང་གསལ་བ་ནི་བདེ་བ་ལ་སོགས་པའི་རང་བཞིན་དུ་མི་རིགས་ཏེ། བདེ་བ་ལ་སོགས་པ་རྗེས་སུ་འགྲོ་བ་མཐོང་བའི་ཕྱིར་ཞེས་བྱ་བའི་གཏན་ཚིགས་མ་གྲུབ་པ་ཡིན་ནོ། །ཅིའི་ཕྱིར་འདི་འབྲེལ་པའི་སྐྱོན་ཡིན་ཞེ་ན། དེ་ལྟ་ན་གྲངས་ཅན་དེའི་གཏན་ཚིགས་མ་གྲུབ་པའི་སྒྲུབ་པར་བྱེད་པའི་སྐྱོན་བརྗོད་པས་བརྩད་པ་ན་གསལ་པ་འདི་དང་རང་བཞིན་གཅིག་པ་ཡིན་ནོ་ཞེས་བྱ་བ་སུན་དབྱུང་བར་འགྱུར་རོ། །ཡང་རིགས་པ་ཅན་དེས་གྲུབ་པའི་སྒྲུབ་པར་བྱེད་པའི་སྐྱོན་བསྟན་པ་མེད་པ་དང་བཤད་པ་མེད་པར་རང་བཞིན་མ་ཡིན་པ་དང་རང་བཞིན་དང་འགྱུར་བའི་མཚན་ཉིད་རྣམ་པར་གཞག་པའི་ཚིག་རྒྱས་པར་བཤད་ནས་རང་གི་སྐྱོན་ངེས་པ་མེད་པའི་གཏན་ཚིགས་ཞར་ལ་བྱུང་བའི་གཞན་གྲངས་ཅན་གྱི་དཀའ་ཐུབ་ལ་སྐྱོན་འགེལ་བར་བྱེད་དོ། །གཞན་གྱིས་སྨྲས་པ་གལ་ཏེ་གྲངས་ཅན་ལ་མ་གྲུབ་པའི་སྐྱོན་གྱི་རྣམ་པ་འདི་ཉིད་ཀྱི་རང་བཞིན་དང་འགྱུར་བའི་མཚན་ཉིད་རྣམ་པར་གཞག་པའི་སྒོ་ནས་ཁོ་བོ་ཅག་གིས་བརྗོད་པ་ཡིན་ནོ་ཞེ་ན། སློབ་དཔོན་གྱིས་སྨྲས་པ། འདི་ནི་རྒྱུ་སྐར་མཁས་ཀྱི་ཡུལ་ཅན་གང་ཡིན་པ་དེ་ནི་བཤད་ཟིན་པའི་ངག་གི་དོན་ཡིན་ནོ། །གང་གི་ཕྱིར་འཇིག་རྟེན་པའི་སྒྲས་མ་བསྟན་པ་རྟོགས་པར་མི་ནུས་སོ། །དོན་གྱི་བྱེད་པ་ལ་སོགས་པ་མེད་ཀྱང་ཐ་སྙད་དུ་འགྱུར་བ་དེའི་ཕྱིར་དེ་ཉིད་དམ་བཅའ་བ་དང་འགལ་བའི་གནས་སྐབས་ཀྱི་སྐྱོན་མེད་དོ། །གླུ་གར་མཁན་གྱིས་ཡི་གེ་འདྲི་བའི་ཚུལ་ལོ། །གྲུབ་པའི་མཐའ་གང་ཡིན་པ་འདི་ལ་ཡང་ཡིན། དེ་འབའ་ཞིག་ལ་ནི་མ་ཡིན་ནོ། །དཔེར་ན་རྫ་མཁན་གྱིས་པར་སྐབས་སུ་ངོ་མཚར་བྱེད་དེ་མྱུར་དུ་ཟླ་བ་ཚེས་གཅིག་པའི་ངོ་མཚར་བྲིས་ནས་སྨྲས་པ་ཁོ་བོ་ཅག་གིས་གླང་པོ་ས་ལ་བྲིས་པ་ལ་ལྟོས་དང་ཞེས་འདོན་ཏེ། དེ་ལ་བློ་དམན་པ་འགའ་ཞིག་ནི་དེ་བཞིན་དུ་རྟོགས་སོ། །བློ་རྣོ་བ་འགའ་ཞིག་རྣམ་པར་དཔྱོད་པར་བྱེད་དོ། །འོ་ན་འདི་ལ་རྣ་བ་དང་རྐང་མིག་དང་


DTG190_Page_0288
[མ་དཔེ་གཟིགས་ན་འདིར་གནོན།]

སོ་ལ་སོགས་པ་མེད་དོ་ཞེས་རྟོག་པས་དེ་མ་ཚང་བས་འདི་གླང་པོ་ཆེར་ཇི་ལྟར་འགྱུར། དེ་ལ་གླང་པོ་ཆེ་ཡོད་པར་རྟོགས་པ་ནི་མེད་དོ། །ཁོ་བོ་ཅག་གིས་ཆ་ཤས་མ་ལུས་པར་རྫོགས་པའི་གླང་པོའི་སྣ་འདི་བྲིས་པས་དེའི་ཚེ་མ་ལུས་པ་ཡིན་ན་ཆུའི་ནང་དུ་བུམ་པ་མ་དམིགས་ཏེ། བུམ་པ་ཆ་ཙམ་མཐོང་བ་ཡིན་ནོ་ཞེས་སོ། །རྣམ་པ་དེ་ལྟ་བུའི་ངག་གིས་གཞན་ཡང་ངོ་མཚར་བྱེད་དོ། །གལ་ཏེ་དོན་ནི་ཁོ་བོ་ཅག་གི་ངག་གིས་མི་རྟོགས་པ་དེ་ལྟ་ན་ཡང་རྣམ་པ་འདིས་འདི་བརྗོད་པ་ཡིན་ནོ་ཞེ་ན། ཇི་སྐད་དུ་བཤད་པའི་དོན་གྱི་རྣམ་པ་གཞན་འདི་ཡིན་པ་དེ་ལྟ་ན་ཡང་མ་གྲུབ་པའི་གཏན་ཚིགས་ལྟར་སྣང་བའི་ནང་དུ་འདུས་པའི་ཕྱིར་དང་དེ་ཉིད་ཚིག་གིས་བརྗོད་པའི་ཕྱིར་གྲུབ་མཐའ་ཉམས་པ་ཞེས་བྱ་བ་ལོགས་ཤིག་ཏུ་ཁས་བླང་བར་མི་བྱའོ། །དེ་ཉིད་ཟུར་གྱིས་མཇུག་བསྡུ་བ་བསྟན་པ་ནི། འདི་སྐད་བཤད་པའི་རིགས་པ་ཞེས་བྱ་བ་ལ་སོགས་པའོ། །ཇི་སྐད་དུ་མདོ་ལས། གཏན་ཚིགས་ལྟར་སྣང་བ་བཤད་པ་འདི་བད་ཚ་ཡ་ནས་བརྟགས་པ་སྔོན་དུ་བཏང་ནས་བཤད་པ་ཡིན་ནོ། །ཡང་ཇི་ལྟ་བུ་ཡིན་ཞེ་ན། གཏན་ཚིགས་ལྟར་སྣང་བའི་མཚན་ཉིད་ལས་གཞན་མཚན་ཉིད་དེ་དང་འབྲེལ་པ་ནི་ཚར་གཅད་པའི་གནས་ཉིད་དུ་གྱུར་པའོ། །ཇི་ལྟ་བུ་ཡིན་ཞེ་ན། བཤད་པ་དཔེར་ན་ཚད་མ་དག་མཚན་ཉིད་གཞན་གྱི་དབང་གིས་གཞལ་བྱ་ཉིད་དུ་གྱུར་པ་ཡིན་ཏེ། དེ་ནི་ཚད་མའི་བྱ་བ་བྱེད་པའི་ཕྱིར་རོ། །གང་ཚད་མ་ཡང་ཚད་མ་གཞན་གྱིས་འཇལ་བར་བྱེད་པ་དེའི་ཚེ་ཚད་མའི་བྱ་བར་འགྱུར་རོ། །དེ་ཉིད་ཀྱི་ཕྱིར་ཐེ་ཚོམ་ཟ་བས་འདྲི་བ་ནི་དོན་ཡིན་པའི་ཕྱིར་རོ། །འདིར་ཐུབ་པས་ཇི་སྐད་བཤད་པའི་རྩ་བ་དང་འགྲེལ་པ་ལས་ཇི་སྐད་བསྟན་པའི་གཏན་ཚིགས་ལྟར་སྣང་བའི་མཚན་ཉིད་ཁོ་ན་ཚར་གཅད་པའི་གནས་སུ་འགྱུར་རོ་ཞེས་སྨྲས་སོ། །འདི་སྐད་སྟོན་པ་ཡིན་ཏེ། འཁྲུལ་པ་དང་བཅས་པ་དང༌། འགལ་བའི་རྣམ་པ་དང༌། སྐབས་དང་མཚུངས་པ་དང༌། འདས་པ་དང་མཚུངས་པ་ཞེས་བྱ་བ་གཏན་ཚིགས་ལྟར་སྣང་བ་ཡིན་ནོ་ཞེས་ཐ་དད་པར་བསྟན་པའི་ཕྱིར་རེ་རེའི་མཚན་གཞི་དང་མཚན་ཉིད་འཆད་དེ། མ་ངེས་པ་དང་འཁྲུལ་པ་དང་བཅས་པ་དང༌། གྲུབ་པའི་མཐའ་ཁས་བླངས་པ་དང་འགལ་བའི་འགལ་བ་དང་ལོགས་ཤིག་ཏུ་གཏན་ལ་ཕབ་པའི་དོན་གང་ཡིན་པ་བཤད་པའི་སྐབས་དང་


DTG190_Page_0289
[མ་དཔེ་གཟིགས་ན་འདིར་གནོན།]

མཚུངས་པ་དང༌། བསྒྲུབ་པར་བྱ་བ་ཁྱད་པར་དུ་གྱུར་པ་དང་བསྒྲུབ་པར་བྱ་བ་ཡིན་པའི་ཕྱིར་བསྒྲུབ་པར་བྱ་བ་དང༌། མཚུངས་པ་དང་དུས་གསུམ་དུ་བཤད་པ་དང༌། དུས་འདས་པ་ཞེས་བྱ་བ་དེ་ཉིད་ཀྱི་མཚན་ཉིད་ཀྱིས་འདི་ཚར་གཅད་པའི་གནས་ཡིན་གྱི། ཡང་དེ་ལ་མཚན་ཉིད་གཞན་ལ་ལྟོས་པ་ནི་མ་ཡིན་ནོ། །སློབ་དཔོན་གྱིས་འདིར་ཡང་སྨོས་ཏེ། ཇི་ལྟར་བཤད་པར་བྱ་ཞེ་ན། ཅི་དེ་དག་ཇི་སྐད་དུ་ཁྱེད་ཀྱིས་མཚོན་པར་བྱ་བའི་རབ་ཏུ་དབྱེ་བ་དེ་ལྟ་བུ་ཉིད་ཡོད་དམ་འོན་ཏེ་རྣམ་པ་གཞན་ཡིན་ཞེས་མཚོན་པར་བྱ། གང་དག་གི་རྣམ་པར་དབྱེ་བ་ཞེས་བྱ་བར་སྦྱར་རོ། །དེ་ལྟ་ན་ཡང་ཅིའི་ཕྱིར་རྣམ་པར་མི་དཔྱོད་ཅེ་ན། དེ་དཔྱད་པར་བྱ་བ་ཡིན་ན་ནི་འདིར་ཧ་ཅང་ཐལ་བར་འགྱུར་བའི་ཕྱིར་མ་སྤྲོས་པའོ། །འདི་ནི་འདི་ཡིན་ནོ་སྙམ་དུ་དགོངས་ནས་གཏན་ཚིགས་ལྟར་སྣང་བའི་ནང་དུ་འདུས་པ་ཞེས་བྱ་བ་འདི་ནི་རྣམ་པར་མ་དཔྱད་པའི་གཏན་ཚིགས་ལྟར་སྣང་བར་རྣམ་འགྲེལ་བྱེད་པའི་གཞུང་གི་རྗེས་སུ་འབྲངས་པའི་ཕྱིར་བསྟན་བཅོས་གཞན་ཁོ་ནར་གྱུར་ལ་བློ་གསལ་བས་རྣམ་པར་དཔྱད་ན། ཁོ་བོ་ཅག་གིས་བྱས་པའི་གཏན་ཚིགས་ལྟར་སྣང་བའི་མཚན་ཉིད་ལས་རང་དུ་གྱུར་པའི་ཕྱིར་སྡུག་བསྔལ་ཉིད་དུ་རིག་པར་འགྱུར་རོ། །དེའི་ཕྱིར་བཏང་སྙོམས་སུ་བྱ་བར་རིགས་སོ། །དེ་ལྟ་ན་ཡང་བློ་དམན་པས་ཕྱོགས་ཙམ་ཉིད་རྟོགས་པར་བྱ་བའི་ཕྱིར་བརྗོད་པ་ཡིན་ནོ། །དུས་འདས་པའི་གནས་སྐབས་ཀྱི་དུས་ནི་རེ་ཞིག་གཏན་ཚིགས་ལྟར་སྣང་བ་ཇི་ལྟར་མི་རིགས་པ་དེ་ལྟར་གནས་སོ། །དེ་ལ་དུས་གཞན་དུ་སྦྱར་བ་ནི་དུས་འདས་པའོ། །རིགས་པ་ཅན་རྒན་པོ་རྣམས་ཀྱི་གཞུང་དེ་ནི་འདིར་སློབ་དཔོན་ཕྱོགས་ཀྱི་གླང་པོས་སུན་འབྱིན་ཟིན་པའི་ཕྱིར་རོ། །ད་ནི་བད་ཚ་ཡ་ན་ལ་སོགས་པ་འདིར་གནས་པའི་ཕྱོགས་ཀྱིས་གནས་པ་དེ་ལ་བརྗོད་པར་བྱའོ། །དུས་གཞན་དང་ལྡན་པ་གང་གི་དོན་གྱི་ཕྱོགས་གཅིག་བསྟན་པས་མ་ལུས་པ་ལ་རིགས་པ་བསྟན་པ་ནི་དུས་འདས་པ་ཞེས་བཤད་དོ། །དཔེར་ན་སྒྲ་ནི་རྟག་སྟེ། འབྲེལ་པ་གསལ་བའི་གཟུགས་བཞིན་ནོ། །དེ་སྔ་མ་དང་ཕྱི་མར་གསལ་བ་རྣམ་པར་གནས་པ་ལ་བརྗོད་པར་བྱའོ། །དུས་གཞན་དང་ལྡན་པ་གཟུང་འཛིན་བུམ་པ་འབྲེལ་བ་ལས་གསལ་བར་འགྱུར་རོ། །དེ་བཞིན་དུ་རྡ་བོ་ཆེ་ལ་སྒྲ་


DTG190_Page_0290
[མ་དཔེ་གཟིགས་ན་འདིར་གནོན།]

གནས་པ་དབྱུག་པ་ལ་འབྲེལ་པ་ཡིན་པ་དང༌། ཤིང་སྟ་རེ་དང་འབྲེལ་པ་ལས་གསལ་པར་འགྱུར་རོ། །དེའི་ཕྱིར་སྒྲ་རྟག་པ་ཡིན་ཏེ། འབྲེལ་པས་གསལ་བའི་ཕྱིར་རོ། །གཏན་ཚིགས་འདི་ནི་དུས་གཞན་བསྟན་པའི་ཕྱིར་འབྲེལ་པས་གསལ་བའི་དུ་ནི་གསལ་བར་བྱའི་ངོ་བོ་གཞན་གསལ་བ་ནི་མ་ཡིན་ཏེ། སྒྲོན་མ་དང་འབྲེལ་བའི་ངོ་བོ་འཛིན་པར་འགྱུར་གྱི། འབྲེལ་པས་ངོ་བོ་ལྡོག་པར་འགྱུར་བ་འམ། སྟ་རེ་དང་འབྲེལ་པས་ཤིང་གི་ངོ་བོ་ལྡོག་པར་འགྱུར་བ་ནི་མེད་དོ། །རྡང་བརྡུངས་པའི་དུས་དང་འབྲེལ་བའི་སྒྲ་རིང་པོ་ན་གནས་པ་ཡང་སྒྲ་གསལ་བར་ཐོས་པར་འགྱུར་རོ། །དུས་དང་འབྲེལ་པའི་གཞན་ཡིན་ནོ་ཞེས་བྱ་བའི་འབྲེལ་པའི་རྒྱུ་མཚན་མ་ཡིན་ཏེ། རྒྱུ་མེད་པའི་འབྲས་བུ་མེད་པ་བཞིན་ནོ་ཞེ་ན། འོ་ན་གཏན་ཚིགས་འདི་ནི་མ་ངེས་པ་ཉིད་ཡིན་ཏེ། མི་རྟག་པ་ཡང་འབྲེལ་པས་གསལ་བར་མཐོང་སྟེ་བུམ་པ་བཞིན་ནོ། །འབྲེལ་པས་གནས་སྐབས་ཀྱི་གསལ་བ་མ་ཡིན་ཏེ། བསྒྲུབ་པར་བྱ་བ་ཡིན་པའི་ཕྱིར་རོ། །མི་རྟག་སྟེ། སྒྲ་ཡིན་པའི་ཕྱིར་རོ་ཞེས་རྣམ་པར་གནས་པ་ནི་མི་སྨྲ་སྟེ། སྒྲ་ཞེས་བྱ་བ་འདི་དམ་བཅའ་བའི་དོན་ཡིན་པ་དེ་བཞིན་དུ་འབྲེལ་པས་གསལ་བའི་ཕྱིར་རོ་ཞེས་བྱ་བ་འདི་ཡང་གཏན་ཚིགས་མ་ངེས་པ་ཡིན་ཏེ། འབྲེལ་པས་གསལ་བར་བྱ་བ་མཐོང་བ་ནི་ཅུང་ཟད་ཅིག་གནས་པ་མེད་དོ། །དེས་ན་རྣམ་པར་གནས་པ་འདིས་འདིར་འབྲེལ་པ་གསལ་བར་བྱེད་པ་ཉིད་སྒྲ་ལ་བཀག་པས་འདི་མ་གྲུབ་པ་ལས་ལྡོག་པར་མི་འགྱུར་རོ། །དེ་ལྟ་མ་ཡིན་ན་སྒྲ་ནི་གསལ་བར་འགྱུར་རོ། །འབྲེལ་པའི་དུས་གཞན་ཡིན་ནོ་ཞེས་བྱ་བ་དང༌། འབྲེལ་པའི་རྒྱུ་མཚན་མ་ཡིན་ནོ་ཞེས་བྱ་བ་གཅིག་ཏུ་བརྗོད་པར་མི་བྱའོ། །ལས་སུ་བྱ་བ་ཐམས་ཅད་ནི་ཡོད་པ་མ་ཡིན་ཏེ། འདི་ཡང་མ་གྲུབ་པ་ནི་མ་ཡིན་ཏེ། ཐམས་ཅད་དུ་མ་གྲུབ་པ་མ་ཡིན་གྱི་སྐྱེ་བ་དང་འབྲེལ་པའི་དུས་སུ་གསལ་བར་འགྱུར་བ་ནི་ཡོད་པ་ཡིན་ཡང་ཉེ་བར་གྱུར་བ་ནི་མི་དམིགས་སོ་ཞེ་ན། དེ་ནི་རིགས་པ་མ་ཡིན་ཏེ། ཕྱོགས་གཅིག་ལ་མ་གྲུབ་པ་ཡང་མ་གྲུབ་པ་ཡིན་ཏེ། དམ་བཅའ་བ་ཡིན་པའི་ཕྱིར་རོ། །དཔེར་ན་རྡུལ་ཕྲ་མོ་ནི་རྟག་སྟེ། དྲི་དང་ལྡན་པའི་ཕྱིར་རམ། ཤེད་རྣམས་ནི་སེམས་པ་དང་བཅས་པ་ཡིན་ཏེ། ཉལ་བའི་ཕྱིར་རོ། །གང་ལ་སྒྲ་མི་རྟག་པ་ཡིན་ནོ་


DTG190_Page_0291
[མ་དཔེ་གཟིགས་ན་འདིར་གནོན།]

ཞེས་བྱ་བ་སྟ་རེ་དང་ཤིང་གི་འབྲེལ་པ་ལ་སོགས་པ་དེས་ཤེས་པ་ཡིན་ན་སྒྲ་སྐྱེ་བ་ཉིད་དུ་ཤེས་པ་ཡིན་ནོ། །ཡང་ན་གནས་སྐབས་ཀྱི་གསལ་བ་ལས་གསལ་བ་འདི་གཞན་ཡིན་པར་མ་གྲུབ་པ་ཡིན་ནོ། །འོ་ན་ཏེ་འབྲེལ་པ་ཉེ་བར་དམིགས་སོ་ཞེས་བྱ་བའི་གཏན་ཚིགས་ཀྱི་དོན་ནི་དམ་བཅའ་བ་ཡིན་གྱི་གཏན་ཚིགས་མ་གྲུབ་པ་ནི་མ་ཡིན་ནོ་ཞེས་བྱ་བ་ནི་ལན་ནོ་སྙམ་ན་དེ་ལྟ་ན་ཡང་མར་མེ་སྡོང་དུ་དང་འབྲེལ་པ་དང༌། རྫ་མཁན་དང་འཇིམ་པ་དང་དབྱིག་པ་དང་འབྲེལ་པར་གྱུར་པས་སྒྲོན་མ་དང་བུམ་པ་ཡང་དག་པར་དམིགས་པའི་ཕྱིར་རོ། །དེ་དག་དེ་དང་འབྲེལ་པས་སྔ་མའི་གནས་སྐབས་ནི་མ་ཡིན་པས་མ་ངེས་པ་ཉིད་ཐོབ་པར་འགྱུར་བའི་ཕྱིར་དུས་འདས་པ་ནི་མ་ཡིན་ནོ། །དེའི་ཕྱིར་དུས་ཀྱི་གནས་སྐབས་བསྒྲུབ་པར་བྱ་བ་ཡིན་ན་ནི་སྐྱེས་མ་ཐག་འཇུག་པ་སྨྲ་བ་ལ་ཡང་འགལ་བ་མེད་དོ། །མཐུན་པའི་ཕྱོགས་ནི་མེད་པ་ཉིད་ཀྱིས་དེ་ལ་འཇུག་པ་འགལ་བའི་ཕྱིར་དང༌། སྐད་ཅིག་མར་གནས་པའི་ཆོས་དང་ཆོས་ཅན་གཟུགས་ལ་སོགས་པ་ཡོད་པའི་ཕྱིར་དང༌། སྐད་ཅིག་མ་ནི་གནས་པར་སྨྲ་བ་ལ་འབྲེལ་པ་དོན་མེད་པ་མ་ཡིན་ནོ། །ཡན་ལག་མ་ཡིན་པ་གྲུབ་པའི་མཐའ་པ་ལ་རིགས་པར་སྨྲ་བས་བསྟན་པའི་སྐྱོན་ཡིན་པའི་ཕྱིར། དེ་བཞིན་དཔེ་གཞན་དག་ལ་ཡང་བརྟགས་པའི་སྐྱོན་བརྗོད་པར་བྱའོ། །གང་གི་གནས་སྐབས་དཔྱད་ནས་གཏན་ལ་ཕབ་པའི་དོན་བསྟན་པ་ནི་སྐབས་དང་མཚུངས་པའོ། །ཕྱོགས་དང་ཕྱོགས་མ་ཡིན་པ་དང་ལྡན་པར་ངེས་པར་དཔྱད་པ་ལ་གནས་པའི་སྐབས་དང་མཚུངས་པ་སྟེ། དཔྱོད་པ་ལ་འཇུག་པ་ལ་སྔར་གཏན་ལ་ཕབ་ཟིན་པ་བརྟག་པ་འམ། བྱས་ཟིན་པ་གང་ཡིན་པ་དེ་གཏན་ལ་འབེབས་པའི་དོན་ལ་སྦྱོར་བ་ན་གཉིས་ཀ་ཕྱོགས་ལ་ཡང་མཚུངས་པས་སྐབས་སུ་མི་འཇུག་པའི་གནས་སྐབས་དང་མཚུངས་པ་སྟེ། གཏན་ལ་དབབ་ཅིང་བརྟག་པར་མི་བྱའོ། །གནས་སྐབས་སྤྱོད་པ་ན་དེ་ཁོ་ན་ཉིད་མི་དམིགས་པ་ཅིའི་ཕྱིར་ཞེས་གང་གི་ཕྱིར་དེ་ཁོ་ན་དོན་དུ་གཉེར་བས་སྤྱད་ན་དམིགས་པ་ལྡོག་པ་དེའི་ཕྱིར་མཚུངས་པ་དང་ལྷག་མ་དང་ཁྱད་པར་དུ་གྱུར་པ་མི་དམིགས་སོ། །དེ་སྐབས་སུ་བབ་པ་དཔྱད་པ་ནི་དགོངས་པ་ཡིན་ཏེ། སྒྲ་མི་རྟག་སྟེ། རྟག་པའི་ཆོས་མི་དམིགས་པའི་ཕྱིར་རོ། །


DTG190_Page_0292
[མ་དཔེ་གཟིགས་ན་འདིར་གནོན།]

སྣོད་ལ་སོགས་པ་ལ་མི་རྟག་པ་དང་མཐོང་ལ་རྟག་པའི་ཆོས་ནི་མི་དམིགས་ཏེ། ཆོས་མཚུངས་པ་གང་ལ་ཐེ་ཚོམ་གྱི་རྒྱུའི་གཏན་ཚིགས་བསྟན་པ་ནི་ཐེ་ཚོམ་དང་མཚུངས་པ་འམ་འཁྲུལ་པ་དང་བཅས་པར་འགྱུར་བ་ཉིད་དོ། །གང་ཡང་ཡིད་གཉིས་དང་བཅས་པས་ཁྱད་པར་མི་ལྟོས་པ་ནི་གཉི་གའི་ཕྱོགས་ཀྱི་ཁྱད་པར་མི་དམིགས་པས་སྐབས་དང་བཅས་པ་ལ་འཇུག་པའི་དཔེར་ན་སྒྲ་ལ་རྟག་པའི་ཆོས་མི་དམིགས་པ་དང༌། དེ་བཞིན་མི་རྟག་པའི་ཆོས་ཀྱང་ཡིན་ལ་འདི་གཉི་གའི་ཕྱོགས་ཀྱང་མི་དམིགས་ལ་དེ་དཔྱོད་པའི་གནས་སྐབས་སུ་དགོངས་པ་ཡིན་ནོ། །ཇི་ལྟར་ཕྱིན་ཅི་ལོག་པའི་གནས་སྐབས་ལྡོག་པར་འགྱུར་ཞེ་ན། གལ་ཏེ་རྟག་པའི་ཆོས་སྒྲ་ལ་འཛིན་པ་ཡིན་ན་གནས་སྐབས་སུ་མི་འགྱུར་ལ། གལ་ཏེ་མི་རྟག་པའི་ཆོས་སུ་འཛིན་པ་དེ་ལྟན་ཡང་ལྡོག་པར་འགྱུར་བའི་གནས་སྐབས་དེར་གཏན་ཚིགས་དེ་ཕྱོགས་ལ་ཡོད་པས་གང་ཡང་རྒྱུ་གཏན་ལ་ཕབ་པར་བརྟག་པར་མི་བྱའི། འདིའི་བསྒྲུབ་པར་བྱ་བ་ཁྱད་པར་མེད་པ་ཁོ་ནའོ། །ཁྱད་པར་མེད་པ་ཉིད་ཀྱི་གནས་སྐབས་ལ་འཇུག་པར་མི་འགྱུར་ཏེ། གཏན་ཚིགས་ཀྱི་ཆོས་ནི་གཏན་ཚིགས་ཀྱིས་བརྗོད་པའི་ཕྱིར་རོ། །བསྒྲུབ་པར་བྱ་བ་དང་མཚུངས་པར་གཏན་ཚིགས་སུ་བརྗོད་ན་བསྒྲུབ་བྱ་དང་ཁྱད་པར་མེད་དོ། །ཡང་གང་ལ་གནས་སྐབས་སུ་འཇུག་པའི་གཏན་ཚིགས་ཉིད་དེ་ནི་སྐབས་དང་མཚུངས་པ་ཞེས་བྱའོ། །འདིར་ཡང་རྟག་པའི་ཆོས་དམིགས་པ་བསྟན་པ་ཉིད་གནས་སྐབས་སྤྱོད་པ་ཡིན་ཏེ། ཅིའི་ཕྱིར་ཞེ་ན། ཕྱིན་ཅི་ལོག་པའི་གནས་སྐབས་ལས་ལྡོག་པར་བརྗོད་པའི་ཕྱིར་རོ། །གལ་ཏེ་མི་རྟག་པའི་ཆོས་མི་དམིགས་པའི་གཏན་ཚིགས་སུ་གྱུར་པ་ཡིན་ན་ནི་སྐབས་དང་མཚུངས་པར་འགྱུར་རོ། །དེའི་ཆོས་གཅིག་མི་དམིགས་པ་ཆོས་སུ་མ་བརྗོད་ན་སྐབས་དང་མཚུངས་པས་བརྗོད་པར་བྱའོ། །གཉི་གའི་ཆོས་མི་དམིགས་པར་བརྗོད་པར་ཡང་མཐུན་པའི་ཕྱོགས་ལ་འཇུག་པ་མེད་པ་དང༌། ལྡོག་པ་མ་ངེས་པ་མེད་པས་ཐུན་མོང་མ་ཡིན་པའི་མ་ངེས་པར་འགྱུར་ཏེ། ཇི་ལྟར་འདི་གཏན་ཚིགས་ལྟར་སྣང་བ་གཞན་དུ་འགྱུར། ཆོས་གཅིག་ཀྱང་མ་དམིགས་པར་འགྱུར་ན་འདི་སྐབས་དང་མཚུངས་པར་འགྱུར་རོ། །དེ་ལྟར་ཡང་སྒྲ་རྟག་པར་སྨྲ་བར་གདོན་མི་ཟ་བར་རྨོངས་པས་མི་རྟག་པའི་ཆོས་རྟོགས་པར་


DTG190_Page_0293
[མ་དཔེ་གཟིགས་ན་འདིར་གནོན།]

བརྗོད་པ་འདི་མ་གྲུབ་པར་འགྱུར་རོ། །འོ་ན་ཏེ་ཚད་མས་བརྟགས་པའི་ཆོས་མི་མཐུན་པའི་ཕྱོགས་མི་རྟག་པའི་ཕྱིན་ཆོས་ཉེ་བར་དམིགས་པ་བསྟེན། དེའི་ཚེ་ངེས་པ་དང་ལྡན་པའི་ཕྱིར་ཡང་དག་པའི་གཏན་ཚིགས་ཡིན་པས་སྐབས་དང་མཚུངས་པའི་གཏན་ཚིགས་ལྟར་སྣང་བ་ཇི་ལྟར་འགྱུར་དེ་ནི་བྱེ་བྲག་ལ་དམིགས་པའི་གཏན་ཚིགས་ཀྱི་དོན་དུ་རྣམ་པར་གནས་སོ། །མི་རྟག་པ་ཡིན་ཏེ། བྱས་པའི་ཕྱིར་ཞེས་བྱ་བ་ལ་སོགས་པ་ཁྱད་པར་དུ་བྱས་པ་ཡིན་ན་དེས་བྱས་པ་ལ་སྐབས་སྤྱོད་པར་མི་རིགས་ཏེ། རྟག་པ་ཚད་མས་ཟློག་པར་བྱེད་པའི་ཕྱིར་རོ། །གཞན་ཡང་རྟག་པའི་ཆོས་མི་དམིགས་པ་ཡིན་ན། ཅི་འདི་མེད་པར་དགག་པར་འགྱུར་རོ། །ཡང་ཅི་སྟེ་འགལ་བར་བརྗོད། གལ་ཏེ་དགག་པར་བྱེད་པ་དེའི་ཚེ་གཞལ་བྱ་ལ་སོགས་པ་བཞིན་དུ་ཐུན་མོང་གི་མ་ངེས་པར་འགྱུར་ཏེ། རྟག་པའི་ཆོས་དགག་པ་ཙམ་མི་རྟག་པ་སྤངས་པ་ཙམ་ཡང་སྲིད་པའི་ཕྱིར་རོ། །འོན་ཏེ་འགལ་བར་བརྗོད་པའི་ཚེ་མ་ངེས་པར་རིགས་པ་མ་ཡིན་པ་ལ་གཏན་ཚིགས་ལྟར་བཅོས་པ་ནི་རིགས་པ་མ་ཡིན་ནོ། །གཞན་ཡང་རྣམ་པར་གཞན་མདོ་ལས་གཉིས་ག་བཤད་པ་ནི་གཏན་ཚིགས་གང་གཏན་ཚིགས་ཀྱི་དུས་སུ་དུས་སུ་འདས་པ་བརྗོད་པ་ཡིན་ནོ། །ཅིའི་ཕྱིར་དུས་འདས་པ་ཡིན་ཞེ་ན། མངོན་སུམ་མམ་ལུང་ངམ་གཉི་ག་ལས་འདས་པ་དང༌། མ་ལུས་པ་ལས་འདས་པ་ནི་དུས་འདས་པ་ཞེས་བརྗོད་དོ། །གལ་ཏེ་ཡང་མངོན་སུམ་དང་ལུང་དང་འགལ་བ་ཅིའི་ཕྱིར་ཞེ་ན། མཚན་ཉིད་རྣམ་པ་བཞིར་བཤད་པ་ཡིན་ཏེ། འདི་ལྟར་སྣང་མ་དང་ལྡན་པ་དང༌། ལྷག་མ་དང་ལྡན་པ་དང་ཕྱིར་རྒོལ་བ་མཐོང་བའོ་ཞེས་གཏན་ཚིགས་ཀྱི་མཚན་ཉིད་བཞི་འདོད་དོ། །སྔ་མ་དང་ལྡན་པ་དང༌། སྤྱིར་མཐོང་བ་ནི་ཁྱབ་པར་བྱེད་པའོ། །ལྷག་མ་དང་ལྡན་པ་ནི་སྤྱི་ལ་ཡོད་པའོ། །སྤྱིར་མཐོང་བ་ནི་མ་མཐོང་བའོ། །དང་གི་སྒྲས་ནི་འགལ་བའོ། །དེ་ལྟར་རྣམ་བཤད་བྱེད་པས་བརྗོད་པ་ཡིན་ཏེ། གང་ཡང་རྗེས་སུ་དཔག་པ་དང་མངོན་སུམ་དང་ལུང་དང་འགལ་བ་ནི་རིགས་པ་ལྟར་སྣང་བ་ཡིན་ནོ་ཞེའོ། །དེས་ན་དེ་ལྟར་ན་རྗེས་སུ་དཔག་པ་དང་ཚུལ་གསུམ་པའི་རྟགས་སུ་གྱུར་པ་དང༌། མངོན་སུམ་དང༌། ལུང་དང་འགལ་བ་གསུམ་གྱིས་བསྟན་པ་ཡིན་ནོ། །དེ་ཡང་རྣམ་པ་གསུམ་ཡོད་དེ་མངོན་སུམ་དང་འགལ་བ་དང་


DTG190_Page_0294
[མ་དཔེ་གཟིགས་ན་འདིར་གནོན།]

ལུང་དང་འགལ་བ་དང་གཉི་ག་དང་འགལ་བ་ཡིན་ནོ། །མངོན་སུམ་དང་འགལ་བ་ནི་དཔེར་ན་མེ་གྲང་བ་ཡིན་ཏེ། རྫས་ཡིན་པའི་ཕྱིར་ཆུ་བཞིན་ནོ། །ལུང་དང་འགལ་བ་ནི་བྲམ་ཟེས་ཆང་བཏུང་བར་བྱ་སྟེ། རྫས་ཡིན་པའི་ཕྱིར་འོ་མ་བཞིན་ནོ། །གཉི་ག་དང་འགལ་བ་ནི་མིག་ལ་སྣང་བ་མེད་དེ་དབང་པོ་ཡིན་པའི་ཕྱིར་སྣ་ལ་སོགས་པ་བཞིན་ནོ་ཞེས་བྱ་བའོ། །འདི་ཕྱོགས་དང་འགལ་བ་ནི་འགལ་བ་མ་ཡིན་ནོ། །ཕྱོགས་དང་འགལ་བ་ནི་སྤངས་པའི་ཕྱིར་རོ། །དེས་ན་འདི་ནི་ཚུལ་གྱི་མཚན་ཉིད་དང་འགལ་བས་སྡུག་བསྔལ་བ་ཡིན་ཏེ། ཚུལ་གསུམ་པ་ནི་རང༌། ཇི་ལྟར་བའི་རང་གི་ཚད་མས་ངེས་པའི་ཕྱིར་རོ། །ཕྱོགས་ཀྱི་ཆོས་ལ་སོགས་པ་གསུམ་ནི། གང་ལ་གནོད་པ་ཡོད་པ་དེ་འབྲེལ་པ་ཡོད་པ་ཡིན་ཏེ། གནོད་པ་ནི་མེད་ན་མི་འབྱུང་བ་དང་འགལ་བ་དང༌། མེད་ན་མི་འབྱུང་བར་འགྱུར་བ་ནི། བསྒྲུབ་པར་བྱ་བའི་ཆོས་དང་མེད་ན་མི་འབྱུང་བའོ། །ཇི་ལྟར་དེའི་མཚན་ཉིད་ཀྱི་ཆོས་འདི་གཏན་ཚིགས་སུ་འགྱུར་ཞེ་ན། བསྒྲུབ་པར་བྱ་བའི་ཆོས་ལས་ལྷག་མ་ཙམ་ནི། གནོད་པར་བྱ་བ་ཡུལ་ཡིན་པའི་ཕྱིར་སྐྱོན་གྱི་རྗེས་སུ་འབྲང་བར་བཤད་པར་བྱའོ། །གང་ལ་འདིར་ཡང་གནོད་པའི་དཔེར་བརྗོད་པ་དེ་དག་ནི་ཚུལ་གསུམ་པའི་མཚན་ཉིད་ལ་ཅུང་ཟད་ཅིག་ཀྱང་མེད་དོ། །ཕྱོགས་ཀྱི་སྦྱོར་བ་ཁས་བླངས་པ་ནི་ཕྱོགས་ཀྱི་སྐྱོན་འདི་ཉིད་ཀྱིས་བཤད་པ་ཡིན་ནོ། །གང་ཡང་ཕྱོགས་ཀྱི་སྐྱོན་ཡོངས་སུ་སྤངས་ནས་མ་འབྲེལ་པ་མང་པོ་བརྗོད་པ་ནི་ཤིན་ཏུ་ཡང་སྙིང་པོ་མེད་དོ། །གང་གི་ཕྱིར་སྐབས་སྤྱོད་པ་ན་རྣམ་བཤད་ཀྱིས་སྐབས་སྤྱོད་པ་དེའི་དཔེར་བརྗོད་པ་འདི་ཡིན་ཏེ། རྡུལ་ཕྲ་མོ་ནི་རྡུལ་ཕྲ་མོ་གཞན་གྱི་འབྲས་བུར་བསྟན་པ་ཡིན་ནམ་མ་ཡིན་ཞེས་སྤྱོད་པ་ན་འགའ་ཞིག་རྗོད་པར་བྱེད་ན་ནི་རྡུལ་ཕྲ་མོའི་རྡུལ་ཕྲ་མོ་གཞན་གྱི་འབྲས་བུ་ཡིན་ཏེ། གཟུགས་ལ་སོགས་པ་དང་ལྡན་པའི་ཕྱིར་གཉིས་པོ་ཅན་ལ་སོགས་པ་བཞིན་ནོ། །ཐུན་མོང་བའི་རྡུལ་ཕྲ་མོ་གང་ཡིན་པ་དེ་ན