སྨྲ་བ་ཀུན་ལ་འཇུག་པའི་སྒྲའི་བསྟན་བཅོས།
སུ་བྷཱ་ཥ་ཀཱི་རྟི།
རྒྱ་གར་སྐད་དུ། སརྦ་བྷཱ་ཥ་པྲ་ཝ་རྟ་ན་བྱཱ་ཀ་ར་ཎ་ཤཱསྟྲ། བོད་སྐད་དུ། སྨྲ་བ་ཀུན་ལ་འཇུག་པའི་སྒྲའི་བསྟན་བཅོས། ཐམས་ཅད་མཁྱེན་པ་ལ་ཕྱག་འཚལ་ལོ། །ཀུན་མཁྱེན་ལ་ནི་ཕྱག་འཚལ་ནས། །གསལ་བར་སྦྱོར་བ་བསྙད་པར་བྱ། །ཟིན་པ་དང་ནི་མ་ཟིན་དང༌། །གཉིས་ཀ་དག་ལས་བྱུང་བའི་སྒྲ། །སེམས་ཅན་སྟོན་དང་མི་སྟོན་དག །ལུང་དུ་སྟོན་དང་མི་སྟོན་པའོ། །གང་ཞིག་གང་གི་དུས་ལ་ནི། །གང་བསྒྲུབ་ཕྱིར་ནི་སྒྲ་གྲག་པ། །དེ་ཡིས་དེ་དག་སྟོན་པའི་ཕྱིར། །དེ་ཡི་བརྗོད་བྱ་རྗོད་བྱེད་དང༌། །འབྲེལ་དང༌། དགོས་པ་བསྙད་པར་བྱ། །མི་མཐུན་མི་ཤེས་རིགས་སེལ་བའི། །ཐོག་མར་བརྗོད་པའི་སྒྲ་གང་ཞིག །བསྡུས་དང་བྱེད་ལྡན་དུས་ལ་ནི། །བསྟན་བྱ་ཡོངས་སུ་སྟོན་པའི་ཕྱིར། །དེ་དག་ཉིད་མཐུན་སྒྲ་བརྗོད་པ། །བརྗོད་བྱ་རྗོད་བྱེད་དག་ཏུ་འདོད། །མཚོན་པར་བྱེད་དང༌། མཚོན་བྱ་ལ། །འབྲེལ་དང་དགོས་བ་ཤེས་པར་བྱ། །རིགས་སེལ་བ་དང་དུས་སེལ་དང༌། །ཆེད་དང་མིང་དུ་གདགས་དང་བཞི། །མི་ལྡན་སྒྲ་ནི་ཡོད་མ་ཡིན། འཛམ་བུའི་འབྲས་བུ་སྨིན་པ་ནི། །དྲི་མ་མེད་པའི་ཆུ་ལ་ལྷུང༌། །ཉ་ཡིས་བཟའ་བའི་ཆེད་དུ་ནི། །འགུ་ལུ་འགུ་ལུ་ཞེས་སུ་སྨྲ། །ཚོགས་པས་བསྐྱེད་པའི་ཆོས་རྣམས་ནི། །བྱས་པས་འཇིག་པའི་དུས་དག་ལ། །གང་ཞིག་དེ་ཤེས་འདོད་པའི་ཕྱིར། །མི་རྟག་ཅེས་ནི་བརྗོད་པ་ཡིན། །རིགས་སེལ་ཇི་ལྟར་ཡིན་ཞེ་ན། །འཁོར་དང་མྱ་ངན་འདས་པ་འམ། །ལུང་དུ་མི་སྟོན་དངོས་གང་ཞིག །བསྟན་པས་དོན་གཞན་གཅོད་པའོ། །སྤྱི་ལ་འཇུག་པ་བསྟན་པ་ན། མི་ཤེས་པ་ནི་སེལ་བར་བྱེད། །རིགས་ཀྱི་འདོམ་པ་བསལ་བྱས་ནས། །སྤྱི་ཡི་མཚན་ཉིད་བརྗོད་པར་བྱ། །དུས་སེལ་ཇི་ལྟར་ཡིན་ཞེ་ན། །དངོས་དེ་གནས་སྐབས་ཐམས་ཅད་པ། །བསྡུས་སོགས་གང་དུ་བསྒྱུར་བ་དེར། །ཁྱད་པར་གཞན་རྣམས་གཅོད་བྱེད་ཡིན། །དུས་ཀྱི་འདོམ་པ་སེལ་བ་ནི། །རང་གི་མཚན་ཉིད་སྟོན་པ་ཡིན། །གཉིས་དང་རྣམ་གྲངས་སོགས་རྣམས་ཀྱི། །གང་དུ་བྱེད་ཚིག་མི་གནས་པ། །དེ་ནི་མདོ་རུ་བསྡུས་པ་སྟེ། །མདོར་བསྡུས་དེ་ཡང་བཅུ་བཞིར་འདོད། །ཚིག་གཉིས་དང་ནི་རྣམ་གྲངས་
དང༌། །ཚིག་དོན་གཞན་དང་བྱེད་ཚིག་དྲུག །ཁྱད་པར་དང་ནི་འབྲུ་མང་པོ། །བྱེ་བྲག་གཞི་བསྡུ་གཅིག་ཏུ་བསྡུ། །ཟླས་དབྱེ་བ་གཉིས་དེའི་སྐྱེས་བུ། །ཟད་པར་མི་འགྱུར་ལས་འཛིན་ཡིན། །བྱེད་པའི་དུས་ནི་དེ་ཉིད་ལ། །ཐེ་ཚོམ་གཅོད་བྱེད་འདུས་བྱས་ཡིན། །དེ་ཡང་ལས་དང་བྱེད་པ་དང༌། །ཆེད་དང་འབྱུང་ཁུངས་འབྲེལ་པ་དང༌། །གཞི་དང་ཟླ་བསྡུ་ལྷག་བཅས་དང༌། །དགག་སྒྲུབ་བརྣན་དང་བདག་པོ་དང༌། །རྒྱན་དང་ཁ་སྐོང་དུས་ལ་འཇུག །འབྱེད་སྡུད་གཞན་གཅོད་གཉིས་པ་དང༌། །གཅིག་གི་ཚིག་དང་གཉིས་ཀྱི་ཚིག །མང་པོའི་ཚིག་དང་རྟགས་ཅན་དང༌། །མཐའ་ཡི་ཚིག་དང་དབུས་ཀྱི་ཚིག །ཉེ་དང་རིང་ལ་སྙེག་པ་དང༌། །མངོན་དུ་བ་དང་ལྐོག་ཏུ་གྱུར། །རབ་ཏུ་ལྐོག་ལ་སྙེག་པ་དང༌། །དྲི་དང་ལན་གྱི་ཚིག་དང་ནི། །བདག་དང་གཞན་དང་སྦྱོར་བའི་ཚིག །སུམ་ཅུ་ལྔ་ནི་བྱེད་ལྡན་དུས། །རིགས་དང་དུས་གསལ་བྱས་ནས་ནི། །བསྟན་བྱ་གང་ཞིག་སྟོན་པ་དེ། །དེ་ནི་ཆེད་དུ་འདོད་པ་ཡིན། །ཆེད་ཀྱི་དབྱེ་བ་ཇི་སྙེད་པ། །དུས་ཀྱི་ཚིག་གིས་ཤེས་པར་བྱ། །ཇི་སྙེད་དོན་གྱི་སྦྱོར་བ་ནི། །གང་ལ་འཇུག་པ་དེ་སྙེད་པ། །གང་གིས་སྟོན་པའི་ཡི་གེ་དེ། །དེ་ནི་མིང་དུ་གདགས་པ་ཡིན། །སྒྲའི་བསྟན་བཅོས་སྨྲ་བ་ཀུན་ལ་འཇུག་པ་ཞེས་བྱ་བ་སྦྱོར་བ་བཞི་དང་ལྡན་པ་སློབ་དཔོན་ཆེན་པོ་སུ་བྷཱ་ཥ་ཀཱི་རྟིས་མཛད་པ་རྫོགས་སོ།། །།