ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ།
ཟླ་བ་ལ་དགའ་བ།
རྒྱ་གར་སྐད་དུ། པ་དཱརྠ་ཙནྡྲ་ཀ་པྲ་བྷཱ་བ་ཏི་ནཱ་མ་ཨཥྚཱཾ་ག་ཧྲྀ་ད་ཡ་བྲྀཏྟི། བོད་སྐད་དུ། ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻ་ཌཱུཪྻའི་འོད་ལ་ཕྱག་འཚལ་ལོ། །འཕྲོག་བྱེད་མི་ཟད་ཚིག་གི་གཏེར། །ལྷ་ཡི་ལྷ་དབང་རབ་བཏུད་དེ། །རྒྱས་བཤད་ཚིག་དོན་ཟླ་བའི་ཟེར། །ཀུན་ལ་ཕན་གསལ་བདག་གིས་ནི། །དཔལ་ལྡན་སྒྲིབ་མེད་ལྷ་ཡིས་ནི། །སྙིང་ནི་རྣམ་པར་དྲངས་པས་ན། །བླ་མའི་ལུང་ནི་ཡང་དག་ཉིད། །གསལ་བར་རྟོགས་ནས་བརྩམ་པར་བྱ། །རིག་པས་རབ་ཟབ་གྲགས་ལྡན་པའི། །དགེ་བའི་འོ་མའི་མཚོ་ལས་སྐྱེས། །ཟླ་བ་དགའ་བ་ཟླ་བ་ལྟར། །མ་རྟོགས་ཚ་བ་ཞི་བྱེད་ཡིན། །འདོད་ཆགས་ལ་སོགས་མ་ལུས་པ་ཡི་ནད། །རྒྱུན་དུ་འབྲེལ་བས་ལུས་ཀུན་མ་ལུས་ཁྱབ། །
འདོད་དང་གཏི་མུག་ཁྲོ་བ་སེལ་བ་ཡི། །སྨན་པ་སྔོན་མེད་དེ་ལ་ཕྱག་འཚལ་ལོ། །ཞེས་བྱ་བ་ལ། བསྟན་བཅོས་རྩོམ་པས་ནི་མངོན་པར་འདོད་པའི་ལྷ་ལ་ཕྱག་བྱ་དགོས་པའི་ཕྱིར་ཚིགས་སུ་བཅད་པ་དང་པོ་འདི་སྨོས་པ་ཡིན་ཏེ། འདོད་ཆགས་ལ་སོགས་པའི་ནད་སེལ་སྨན་པ་དེ་ལ་ཕྱག་འཚལ་ལོ་ཞེས་བྱ་བར་སྦྱར་རོ། །འདིར་འདོད་ཆགས་ལ་སོགས་པ་ནི་འདོད་ཆགས་དང་ཞེ་སྡང་ལ་སོགས་པ་ཡིན་ལ། འདོད་ཆགས་ལ་སོགས་པ་དེ་ཉིད་ནི་གནོད་ཅིང་གཟིར་བར་བྱེད་པས་ན་ནད་དེ། ལུས་དང་སེམས་གདུང་བར་བྱེད་པ་ཞེས་བྱ་བའི་དོན་ཏོ། །དེ་ཡང་གང་གི་ཕྱིར་ལུས་ཅན་རྣམས་ཤིན་ཏུ་གཟིར་བར་བྱེད་པ་ཡིན་ལ། དེ་གང་གིས་སེལ་བར་མཛད་པའོ། །དེ་ཇི་ལྟ་བུ་ཞེ་ན། རྒྱུན་དུ་འབྲེལ་བ་ཞེས་བྱ་བ་སྨོས་ཏེ། རྟག་ཏུ་རྗེས་སུ་འབྲང་ཞིང་དུས་ཐམས་ཅད་དུ་ཀུན་ཏུ་འབྲེལ་ལ་ལྷན་ཅིག་སྐྱེས་པ་ཞེས་བྱ་བའི་དོན་དེ་དང་བྲལ་བའི་འཁོར་བ་ནི་ནམ་ཡང་འབྱུང་བར་མི་འགྱུར་རོ། །ལུས་ཀུན་ཁྱབ་ཅེས་བྱ་བ་ནི་ལུས་ཀྱང་ཡིན་ལ་ཀུན་ཡང་ཡིན་པས་ན་ལུས་ཀུན་ཞེས་བྱ་སྟེ། སྐྱེས་བུ་དང༌། ཕྱུགས་དང༌། གླང་པོ་དང༌། རྟ་དང༌། བ་ལང་དང༌། བ་ལང་རྒོད་དང༌། འབུ་སྲིན་དང༌། གྲོག་སྦུར་
ལ་སོགས་པ་དང་འབྲེལ་བའི་ལུས་མ་ལུས་པ་དེ་ཐམས་ཅད་ལ་མཆོག་ཏུ་ཁྱབ་པར་གནས་པས་ན་མ་ལུས་ཁྱབ་ཅེས་བྱ་སྟེ། རྩ་བ་དང་བཅས་ཤིང་ས་བོན་དང་བཅས་པ་མ་ལུས་པ་ལ་ཁྱབ་བ་ཞེས་བྱ་བའི་དོན་ཏོ། །འདོད་དང་གཏི་མུག་ཁྲོ་བ་སེལ། །ཞེས་བྱ་བ་ལ། འདོད་པ་ནི་ཡུལ་རྣམས་ལ་འདོད་ཅིང་ཆགས་པ་ལ་མངོན་པར་ཞེན་པའོ། །གཏི་མུག་ནི་བྱ་བ་དང་བྱ་བ་མ་ཡིན་པ་མངོན་པར་མ་རྟོགས་ཤིང་མི་ཤེས་པའོ། །ཁྲོ་བ་ནི་སེམས་ཀྱིས་ཞེ་སྡང་ཞིང་གང་དུ་ཡང་མངོན་པར་ཆགས་པ་མེད་པ་སྟེ། གང་དེ་ལྟ་བུ་སེལ་ཞིང་འཇོམས་པར་མཛད་པའི་སྨན་པ་སྔོན་མེད་དེ་ལ་ཕྱག་འཚལ་ལོ་ཞེས་བྱ་བ་ཡིན་ཏེ། ངོ་མཚར་དུ་གྱུར་ཅིང་རྨད་དུ་བྱུང་བའི་ཚུལ་ཅན་གྱི་སྨན་པ་སྔོན་མེད་དེ་ལ་ཕྱག་འཚལ་ཞིང་འདུད་པར་ནི་གང་གི་ཕྱིར་སྨན་པ་འདི་ནི་ལྷན་ཅིག་སྐྱེས་པའི་ཚུལ་ཅན་རྟག་ཏུ་འབྲེལ་ལ། ཁྱབ་པར་གནས་པ་རྩ་བ་དང་བཅས་པ་གསོར་མི་རུང་བའི་ནད་དང་མཚུངས་པའི་རྣམ་པ་ཅན། འཇིག་པར་མཛད་པ་ཡིན་ལ། སྨན་པ་གཞན་དག་ནི་རིམས་ལ་སོགས་པའི་ནད་རྣམས་མཚན་མ་འདི་དག་དང་ལྡན་ན་སེལ་བར་མི་ནུས་སོ། །ཡང་ན་གང་ཞིག་གི་སྔོན་དུ་གཞན་མེད་པ་གང་ཡིན་པ་དེ་ནི་སྔོན་མེད་ཅེས་བྱའོ། །འདི་སྐད་སྟོན་ཏེ། དེ་ཉིད་ནི་དེ་ཐམས་ཅད་ལས་ཐོག་མར་གྱུར་པ་ཡིན་ནོ། །གང་གི་ཕྱིར་མངོན་པར་འདོད་པའི་ལྷ་ལ་ཕྱག་བྱ་བ་སྔོན་དུ་འགྲོ་བར་ནི་རྩོམ་པ་ལ་འཇུག་པ་ཐམས་ཅད་རིང་པོ་མི་ཐོགས་པར་གེགས་མེད་པ་ཉིད་དུ་རྫོགས་ཤིང་འབྲས་བུ་དང་བཅས་པར་འགྱུར་རོ། །དེའི་ཕྱིར་འདོད་པའི་ལྷ་ལ་ཕྱག་བྱས་ནས། དེའི་འོག་ཏུ་སྨན་དཔྱད་ཀྱི་རྒྱུད་བྱེད་པས། རྒྱུད་འདི་ཐམས་ཅད་རྩོམ་པ་ལ་འཇུག་པ་ཡིན་ནོ། །དེ་བཞིན་དུ་འདིར་ཡང་འབྲེལ་པ་ལ་སོགས་པ་བཞི་བྱ་དགོས་ལ། ཚིག་ནི་རིམ་གྱིས་འཇུག་པ་ཡིན་པས། འདི་དག་ཅིག་ཅར་བརྗོད་པར་མི་ནུས་སོ། །དེ་བས་ན་དང་པོར་རེ་ཞིག་འབྲེལ་པ་བཤད་པར་བྱའོ། །དེ་ཡང༌། གང་ཕྱིར་འབྲེལ་པ་བརྗོད་པ་ཡིས། །ཉན་པ་པོ་ཡི་འཇུག་པ་འགྲུབ། །དེ་བས་བསྟན་བཅོས་ཐམས་ཅད་ལ། །འབྲེལ་བ་དང་པོར་བརྗོད་པར་བྱ། །
ཞེས་བཤད་པས་ན། འབྲེལ་བ་བརྗོད་དགོས་ལ། དགོས་པ་ཡང༌། བསྟན་བཅོས་དག་ནི་ཐམས་ཅད་དང༌། །ལས་རྣམས་ཅི་ཡང་རུང་བ་ཡི། །ཇི་སྲིད་དགོས་པ་མ་སྨྲས་པ། །དེ་སྲིད་དེ་ནི་སུ་ཞིག་འཛིན། །ཞེས་བཤད་པ་ཡིན་ནོ། །དེ་ལ་འདིར་འབྲེལ་པ་ནི་ཐབས་ནད་ཀྱི་མཚན་ཉིད་དང༌། ཐབས་ལས་བྱུང་བ་ནད་ཉེ་བར་ཞི་བའི་ཚེའི་རིག་བྱེད་དེ། དེ་དག་ཐབས་དང་ཐབས་ལས་བྱུང་བའི་མཚན་ཉིད་དུ་འབྲེལ་པ་ནི་འབྲེལ་པའོ། །དགོས་པ་ནི་ཁམས་དང་རང་བཞིན་གྱི་བྱ་བ་ཡང་སྟོན་པ་ནི་གཞུང་འདིའི་དགོས་པ་ཡིན་ལ། དགོས་པའི་དགོས་པ་ནི་ཆོས་དང༌། ནོར་དང་འདོད་པ་རྫོགས་པ་ཡིན་ནོ། །དེ་ནས་ཚེ་རིང་བར་འདོད་པའི་ལེའུ་བཤད་པར་བྱའོ། །ཞེས་བྱ་བ་ལ། འདིར་དེ་ནས་ཞེས་བྱ་བའི་སྒྲ་ནི་བཀྲ་ཤིས་པ་དང༌། དབང་དུ་བྱ་བ་དང༌། དེ་མ་ཐག་པའི་དོན་གྱི་དབང་དུ་བྱས་པ་ཡིན་ཏེ། དེ་ཡང༌། ཡི་གེ་ཨོཾ་དང་དེ་ནས་སྒྲ། །གཉིས་པོ་འདི་དག་སྔོན་ཚངས་པའི། །མཁུར་ཚོས་བརྟོལ་ཏེ་མངོན་པར་བྱུང༌། །དེས་ན་འདི་གཉིས་བཀྲ་ཤིས་ཡིན། །ཞེས་སྨོས་པ་ཡིན་ལ། བཀྲ་ཤིས་པ་ལ་སོགས་པ་ནི་དེ་འདོན་པར་བྱེད་པ་རྣམས་ལ་བར་ཆད་མེད་པར་རབ་ཏུ་འཇུག་ཅིང༌། མངོན་པར་འདོད་པའི་དོན་བསྒྲུབ་པ་འབྱུང་བར་འགྱུར་བ་ཡིན་ནོ། །དབང་དུ་བྱ་བ་ནི་ཚེ་རིང་བར་འདོད་པ་ལ་ཕན་པའི་བསྟན་བཅོས་ཀྱི་དབང་དུ་བྱས་པ་ཡིན་ཏེ། གང་འདི་ནས་ཉེ་བར་བརྩམས་ཏེ། གཞུང་ཡོངས་སུ་རྫོགས་པ་དེ་དག་ཐམས་ཅད་ནི་ཚེ་རིང་བར་འདོད་པ་རྣམས་ལ་ཕན་པ་ཡིན་ནོ། །དེ་མ་ཐག་པ་ཡང་ལྷ་ལ་ཕྱག་བྱས་པའི་རྗེས་ཐོགས་ཉིད་ལ་ཚེ་རིང་བར་འདོད་པ་རྣམས་ལ་ཕན་པར་བཤད་པ་ཡིན་ནོ། །དེ་ནས་ཞེས་བྱ་བ་ནི་རྒྱུའི་དོན་ཏེ། གང་གི་ཕྱིར་འགལ་བ་དང༌། ཐེ་ཚོམ་དང་བཅས་པ་དང༌། དོན་མེད་པ་དང༌། ཟློས་པ་ལ་སོགས་པའི་ཉེས་པ་དང་བཅས་པའི་གཞུང་མང་དུ་ཡོད་པའམ། འགྲོ་བའི་ཁོངས་སུ་གཏོགས་པའི་འཇིག་རྟེན་པ་རྣམས་ནད་ཀྱི་ཟིལ་གྱིས་ནོན་པར་མཐོང་སྟེ། དེ་བས་ན་ཚེ་ལ་ཕན་པ་དང༌། ནད་མེད་པའི་འགྲོ་བ་ལ་ཕན་པ་བཤད་པར་བྱའོ། །ཞེས་པའོ། །ཚེ་ཞེས་བྱ་བ་ནི་འགྲོ་བས་ན་ཚེ་
སྟེ། རྒྱུན་མི་འཆད་པར་འགྲོ་ཞིང་སྐད་ཅིག་ཀྱང་མི་སྡོད་པའོ། །ཚེ་དེ་འདོད་པ་རྣམས་ལ་ཕན་པས་ན་ཚེ་རིང་བར་འདོད་པའོ། །ལེའུ་ཞེས་བྱ་བ་ལ། ཤེས་པར་བྱེད་པས་ན་ལེའུ་སྟེ། དེ་ཡང་ཡི་གེ་བསྡུས་པ་ནི་ངག་ཡིན་ལ། ངག་བསྡུས་པ་ནི་རབ་ཏུ་བྱེད་པའོ། །རབ་ཏུ་བྱེད་པ་བསྡུས་པ་ནི་ལེའུའོ། །བཤད་པར་བྱའོ་ཞེས་བྱ་བ་ལ། སྣ་ཚོགས་ཤིང་དུ་མར་ཕྱེ་བ་སྟེ། ཚིག་དང༌། དོན་དང༌། དྲིས་པ་དང༌། ལན་ཏེ། གཞུང་ཡོངས་སུ་རྫོགས་ཀྱི་བར་དུ། གང་ཅུང་ཟད་བཤད་པ་དེ་ཐམས་ཅད་ནི་ཚེ་རིང་བར་འདོད་པ་རྣམས་ལ་ཕན་པའི་ཕྱིར་བཤད་ཅིང༌། བསྟན་ལ་རྣམ་པར་དབྱེ་བར་བྱའོ་ཞེས་བྱ་བའི་བར་དུའོ། །རྒྱུན་ཤེས་ཀྱི་བུ་ལ་སོགས་པ་དྲང་སྲོང་ཆེན་པོ་རྣམས་ཀྱིས་འདི་ལྟར་བཤད་དེ་ཞེས་བྱ་བ་ལ། རྒྱུན་ཤེས་ལས་སྐྱེས་བས་ན་རྒྱུན་ཤེས་ཀྱི་བུ་སྟེ། འདིས་ནི་རིགས་ཡོངས་སུ་དག་པར་སྟོན་པར་འགྱུར་རོ། །དེ་བཞིན་དུ་ཚེའི་རིག་བྱེད་ཀྱི་བསྟན་བཅོས་འདི་ལུང་གི་ཚད་མ་དང་ལྡན་པ་ཡང་ཡིན་ནོ། །རྒྱུན་ཤེས་ཀྱི་བུ་ལ་སོགས་པ་ཡང་ཡིན་ལ། དྲང་སྲོང་ཆེན་པོ་ཡང་ཡིན་པས་ན། རྒྱུན་ཤེས་ཀྱི་བུ་ལ་སོགས་པའི་དྲང་སྲོང་ཆེན་པོ་རྣམས་ཏེ། འདིས་ནི་རང་བཟོ་བྱས་པ་བཀག་པ་ཡིན་ཏེ། ཁོ་བོས་ནི་རང་དགར་ནི་ཅུང་ཟད་ཀྱང་སྨྲ་བར་ནུས་པ་མ་ཡིན་ནོ་ཞེས་པའོ། །འདི་ལྟར་ཞེས་བྱ་བའི་སྒྲ་ནི་འདི་སྐད་ཅེས་བྱ་བའི་དོན་ཏོ། །བཤད་དེ་ཞེས་བྱ་བའི་སྒྲ་ནི་སྔོན་གྱི་དུས་སུ་སྨྲ་ཞིང་སྟོན་པ་ཞེས་བྱ་བའི་དོན་ཏོ། །ཚེ་ནི་རིང་བར་འདོད་པ་ཡིས། །ཆོས་དང་ནོར་དང་བདེ་བ་བསྒྲུབ། །ཚེ་ཡི་རིག་བྱེད་ལུང་བཤད་པ། །རབ་ཏུ་གུས་པར་བྱ་བར་གྱིས། །ཞེས་བྱ་བ་ལ། ཆོས་དང་ནོར་གྱི་བདེ་བ་ཚེ་འདོད་པའི་སྐྱེས་བུས་ཚེའི་རིག་བྱེད་བསྟན་པ་མཆོག་ཏུ་གུས་པར་བྱ་བ་ནི། རང་ངམ་གཞན་ལས་ཤེས་ཏེ་བྱའོ། །དེ་ལ་ཚེ་ཞེས་བྱ་བ་ནི་འཚོ་བ་སྟེ། ལུས་དང་དབང་པོས་སེམས་ཅན་བདག །འདུས་པ་བཞི་ཡིས་འཚོ་བ་སྟེ། །རྟག་པར་འགྲོ་ཞིང་རྗེས་འབྲེལ་བ། །ཚེ་ཡི་རྣམ་གྲངས་ཡིན་པར་བཤད། །ཅེས་བྱ་བ་ཡིན་ལ། ཚེ་དེ་རིག་པར་བྱེད་པས་ན་ཚེའི་རིག་བྱེད་དོ། །ཇི་ལྟ་ཞེ་ན། ཕན་པ་དང༌། ཕན་པ་མ་ཡིན་པ་དང༌། བདེ་བ་
དང། སྡུག་བསྔལ་བ་དང༌། ཚད་མ་དང༌། ཚད་མ་མ་ཡིན་པ་ཉིད་ལས་ཤེས་སོ། །དེ་ཡང་ལུང་ལས། ཕན་དང་མི་ཕན་བདེ་སྡུག་བསྔལ། །དེ་ཡི་ཚེ་ཡིན་ཕན་མི་ཕན། །གང་དུ་ཚད་དུ་བཤད་པ་ནི། །ཚེ་ཡི་རིག་བྱེད་ཡིན་པར་བཤད། །ཅེས་སྨོས་པ་ཡིན་ནོ། །ཡང་ན་གང་གིས་གང་ལ་ཚེ་ཡོད་པར་འགྱུར་བ་དེ་ནི་ཚེའི་རིག་བྱེད་དེ། དེ་ཡོད་པར་ཤེས་པ་ཐོབ་ཅིང༌། རྣམ་པར་དཔྱོད་པར་འགྱུར་རོ། །དེའི་ལུང་བཤད་པ་ནི་ཚེའི་རིག་བྱེད་སྟོན་པར་བྱེད་པའི་བསྟན་བཅོས་ཏེ། དེ་ལྟར་ན་ཚེའི་རིག་བྱེད་སྟོན་པར་བྱེད་པའི་བསྟན་བཅོས་ལ་རབ་ཏུ་གུས་ཤིང་འབད་པས་གོ་བར་གྱིས་ཤིག་ཅེས་བྱ་བའི་དོན་ཏོ། །དེ་ཅིའི་ཕྱིར་ཞེ་ན། ཚེ་དེ་ནི་ཆོས་ལ་སོགས་པ་སྒྲུབ་པར་བྱེད་པ་ཡིན་ནོ། །དེ་ལ་ཆོས་ཞེས་བྱ་བ་ནི་འཇིག་རྟེན་པ་རྣམས་འཛིན་ཅིང་འཚོ་བར་བྱེད་པས་ན་ཆོས་སོ། །བླང་ཞིང་དོན་དུ་གཉེར་བར་བྱ་བ་ཡིན་པས་ནོར་རོ། །བདེ་བ་ནི་སྡུག་བསྔལ་དང་བྲལ་བའོ། །དེ་རྣམས་བསྒྲུབ་པ་ནི་སྒྲུབ་པའི་ཐབས་སུ་གྱུར་པའོ། །ད་ནི་བསྟན་བཅོས་གཅིག་ལས་གཅིག་ཏུ་བརྒྱུད་པ་ཡིན་པར་བསྟན་པའི་ཕྱིར། ཚངས་པས་ཚེ་ཡི་རིག་བྱེད་དྲན། །སྐྱེ་དགུའི་བདག་ལ་བཤད་པ་ཡིན། །དེ་ཡིས་ཐ་སྐར་དེས་བརྒྱ་བྱིན། །དེས་རྒྱུན་ཤེས་སོགས་དྲང་སྲོང་ལའོ། །དེ་ཡིས་མེ་བཞིན་འཇུག་ལ་སོགས། །དེ་རྣམས་ཀྱིས་རྒྱུད་སོ་སོར་བྱས། །ཞེས་སྨོས་པ་ཡིན་ནོ། །དེ་ལ་ཚངས་པ་ནི་མེས་པོ་ཆེན་པོ་སྟེ། །དེས་ནི་ཚེའི་རིག་བྱེད་དྲན་པ་ཡིན་ཏེ། ཚེའི་རིག་བྱེད་ནི་རྟག་པ་ཉིད་ཡིན་པའི་ཕྱིར་རོ། །སྐྱེ་དགུའི་བདག་ཅེས་བྱ་བ་ནི་མྱུར་བ་ཞེས་བྱ་བ་སྟེ། དེ་ལ་བཤད་ཅིང་འཛིན་དུ་བཅུག་གོ །དེ་ཡིས་ཐ་སྐར་ཞེས་བྱ་བ་ནི་སྐྱེ་དགུའི་བདག་པོ་དེས་ལྷའི་སྨན་པ་ཐ་སྐར་གྱི་བུ་གཉིས་ལ་བཤད་ཅིང་འཛིན་དུ་བཅུག་གོ །དེས་བརྒྱ་བྱིན་ཞེས་བྱ་བ་ནི་ཐ་སྐར་གྱི་བུ་གཉིས་ཀྱིས། བརྒྱ་བྱིན་མིག་སྟོང་ལྡན་འཛིན་དུ་བཅུག་གོ །དེས་རྒྱུན་ཤེས་ལ་སོགས་པ་དྲང་སྲོང་ལ་ཞེས་བྱ་བ་ནི། བརྒྱ་བྱིན་དེས་རྒྱུན་ཤེས་ཀྱི་བུ་ལ་སོགས་པའི་དྲང་སྲོང་རྣམས་འཛིན་དུ་བཅུག་སྟེ། རྒྱུན་ཤེས་ཀྱི་བུ་ནི་ནབ་སོ་སྐྱེས་སོ། །སོགས་པའི་
སྒྲས་ནི་ཐང་ལ་འབར་དང༌། རྐང་གཉིས་སྤྱོད་དང༌། མུ་ཁྱུད་དང༌། འདྲོབ་སྐྱོང་གི་བུ་ལ་སོགས་པས་གཟུང་ངོ༌། །དེ་ཡིས་མེ་བཞིན་འཇུག་ལ་སོགས། །ཞེས་བྱ་བ་ནི། རྒྱུན་ཤེས་ཀྱི་བུ་ལ་སོགས་པའི་དྲང་སྲོང་དེ་རྣམས་ཀྱིས། །དྲང་སྲོང་མེ་བཞིན་འཇུག་ལ་སོགས་པ་ལ་བཤད་དེ། སོགས་པའི་སྒྲས་ནི་དྲང་སྲོང་ལུག་དང༌། རྒྱ་སྐྱེགས་སྣ་དང༌། མདའི་མཆོག་དང༌། ལན་ཚྭའི་ལག་པ་ཞེས་བྱ་བའི་བར་ལ་བཤད་ཅིང་འཛིན་དུ་བཅུག་གོ །དེ་རྣམས་ཀྱིས་རྒྱུད་སོ་སོར་བྱས། །ཞེས་བྱ་བ་ནི། མེ་བཞིན་འཇུག་ལ་སོགས་པ་དེ་རྣམས་ཀྱིས་ཀྱང་སོ་སོར་ཞེས་པ་རེ་རེས། རྒྱུད་ཅེས་པ་སྨན་དཔྱད་ཀྱི་གཞུང་བྱས་ཤིང་རྒྱ་ཆེར་སྦྱར་བ་ཡིན་ནོ། །དེ་ཡང་གཞུང་འདིས་ཚེའི་རིག་བྱེད་ཀྱི་དོན་འཛིན་ཅིང་སྡུད་པས་ན་རྒྱུད་ཞེས་བྱའོ། །གལ་ཏེ་དྲང་སྲོང་ཆེན་པོ་རྣམས་ཀྱིས་བྱས་པའི་གཞུང་རྣམས་ཡོད་བཞིན་དུ། རྒྱུད་འདི་ཅིའི་ཕྱིར་རྩོམ་པར་བྱེད། དེ་ལ་འབད་པ་དོན་མེད་པ་བསྐྱེད་པ་འབའ་ཞིག་ཏུ་ཟད་དོ་ཞེ་ན། དེའི་ཕྱིར་ཤིན་ཏུ་འཐོར་བ་དེ་རྣམས་ལས་རིག་བྱེད་ཀྱི་དོན་འཛིན་ཅིང་སྡུད་པས་ན་རྒྱུད་ཅེས་བྱའོ། །རབ་ཅེས་ཕལ་ཆེར་བསྡུས་པ་ནི། །ཤིན་ཏུ་བསྡུས་མིན་རྒྱས་མིན་པར། །ཡན་ལག་བརྒྱད་པའི་སྙིང་པོ་བྱས། །ཞེས་བྱ་བ་སྨོས་པ་ཡིན་ཏེ། ཤིན་ཏུ་འཐོར་ཞིང་མ་འདུས་ལ། ཚིག་མཐོན་དམན་ཅན་གྱིས་དོན་ཕན་ཚུན་འཕྱན་པར་འགྱུར་བའི་གཞུང་དེ་རྣམས་ལས། ཤིན་ཏུ་ཞེས་པ་ཕལ་མོ་ཆེ་མང་དུ་བསྡུས་ནས། ཡན་ལག་བརྒྱད་པའི་སྙིང་པོ་ངས་བྱས་ལ། དེ་ཡང་ཤིན་ཏུ་བསྡུས་པའམ། ཤིན་ཏུ་རྒྱས་པ་ནི་མ་ཡིན་ནོ་ཞེས་བྱ་བའི་དོན་ཏོ། །ཚིག་གི་དོན་ནི་རྣམ་པར་འཐོར་བའི་ཚིག་རྣམས་ལས་བཏུས་ཤིང་ལེགས་པར་བསྡུས་པས་བཏུས་པའོ། །དེ་ཡང་གཅེས་པ་ཉིད་ལས་ཕལ་ཆེར་བཏུས་པ་ཡིན་ཏེ། གཞུང་གཞན་དག་ཏུ་གཅེས་པ་ཙམ་ཞིག་བསྡུས་པ་ཡིན་ལ། འདི་ནི་རབ་ཏུ་གཅེས་པ་བསྡུས་པ་ཡིན་ནོ། །ཤིན་ཏུ་
བསྡུས་མིན་རྒྱས་མིན་པར། །ཞེས་བྱ་བ་ལ། བསྡུས་པ་ནི་གཞུང་ཉུང་དུ་ཞིག་སྦྱར་བའོ། །རྒྱས་པ་ནི་གཞུང་མང་པོ་སྦྱར་བ་ཡིན་ནོ། །གང་གི་ཕྱིར་ཤིན་ཏུ་བསྡུས་པ་ནི་བློ་དམན་པ་རྣམས་ཀྱི་དོན་དུ་མི་འགྱུར་ལ། དེ་རྣམས་ཉིད་ལ་ཤིན་ཏུ་རྒྱ་ཆེར་བཤད་ན་ཡང་མཉན་པ་དང༌། གོ་བ་དང་ཉམས་སུ་ལེན་པར་མི་ནུས་སོ། །དེ་བས་ན་བློ་དམན་པ་དང༌། བར་མ་དང༌། མཆོག་དང་ལྡན་པའི་སློབ་མ་རྣམས་ཀྱི་དོན་དུ་རྒྱུད་འདི་བྱས་པ་ཡིན་ནོ། །ཡན་ལག་བརྒྱད་པའི་སྙིང་པོ་ཞེས་བྱ་བ་ནི། ཡན་ལག་བརྒྱད་པོ་རྣམས་ཀྱི་སྙིང་པོ་སྟེ། དེ་ནི་སྙིང་དང་འདྲ་བས་ན་སྙིང་པོ་སྟེ། སྙིང་པོའི་སྒྲ་ནི་གཅེས་པའི་ཚིག་ཡིན་ཏེ། གཅེས་པར་གྱུར་པ་གཙོ་བོར་བྱས་པས་གཅེས་པའི་དོན་ཏོ། །ཡན་ལག་བརྒྱད་པོ་དེ་རྣམས་ཀྱང་གང་ཞིག་ཡིན་ཞེ་ན། ལུས་དང་བྱིས་པ་གདོན་ལུས་སྟོད། །མཚོན་དང་མཆེ་བ་རྒས་རོ་ཙ། །གསོ་དཔྱད་གང་ལ་གནས་པ་ཡི། །ཡན་ལག་བརྒྱད་དུ་དེ་བཤད་དོ། །ཞེས་སྨོས་པ་ཡིན་ཏེ། ཚེའི་རིག་བྱེད་ཅེས་བྱ་བའི་རྒྱུད་དེའི་ཡན་ལག་རྣམ་པ་བརྒྱད་ནི་ལུས་ཀྱི་ཡན་ལག་གསོ་བའི་དཔྱད་གནས་ཤིང་བརྟེན་པའི་ཡན་ལག་བརྒྱད་དུ་དྲང་སྲོང་རྣམས་ཀྱིས་བཤད་ཅིང་བསྟན་ཏོ། །དེ་ལ་གསོ་དཔྱད་ཅེས་བྱ་བ་ནི། ནད་བསལ་ཞིང་ཞི་བར་བྱས་ནས། ཁམས་མཉམ་པར་བྱ་བའི་དོན་གྱི་བྱ་བའོ། །དེ་ཡང་ལུང་ལས། སྨན་པ་ལ་སོགས་རྣམ་པ་བཞི། །བསྔགས་པས་ཁམས་ནི་འགྱུར་བ་ལ། །ཁམས་སྙོམས་ཕྱིར་ནི་རབ་འཇུག་པ། །གསོ་དཔྱད་ཅེས་ནི་བྱ་བར་བཤད། །ཅེས་འབྱུང་བ་ཡིན་ནོ། །དེ་ལ་ལུས་ཀྱི་གསོ་བ་ནི་ཡན་ལག་ཐམས་ཅད་ལ་བརྟེན་པའི་ནད་རིམས་དང༌། འཁྲུ་བ་དང༌། སྐྲང་པ་དང༌། ཁྲག་དང༌། མཁྲིས་པ་དང༌། མཛེ་དང༌། གཅིན་རྟུག་འགགས་པ་ལ་སོགས་པ་ཉེ་བར་ཞི་བར་བྱ་བའི་དོན་ཏོ། །བྱིས་པ་གསོ་བ་ནི་གཞོན་ནུ་གསོ་བ་ན་མའི་ནུ་ཞོའི་ཉེས་པ་
སྦྱང་བའི་ཕྱིར་ཏེ། གནོད་པ་བྱེད་པའི་ནུ་ཞོ་ལས་བྱུང་བའི་ནད་ཉེ་བར་ཞི་བར་བྱ་བའི་དོན་ཏོ། །གདོན་གསོ་བ་ནི་ལྷ་དང༌། ལྷ་མ་ཡིན་དང༌། དྲི་ཟ་དང༌། གནོད་སྦྱིན་དང༌། སྲིན་པོ་དང༌། ཡི་དྭགས་དང༌། ཤ་ཟ་དང༌། ཀླུ་ལ་སོགས་པའི་གདོན་གྱིས་སེམས་ཟིན་པ་ལ་ཞི་བའི་ལས་དང༌། གཏོར་མ་སྦྱིན་པ་ལ་སོགས་པ་གདོན་ཉེ་བར་ཞི་བའི་དོན་དུ་བྱའོ། །ལུས་ཀྱི་སྟོད་ཀྱི་ཡན་ལག་གསོ་བ་ནི། ནམ་ཚོང་ཡན་ཆད་དུ་གཏོགས་པའི་ནད་ཀྱི་རྣམ་པར་གྱུར་པ་སྟེ། མིག་དང༌། རྣ་བ་དང༌། སྣ་དང༌། ཁ་ལ་སོགས་པའི་ནད་ཉེ་བར་ཞི་བར་བྱ་བའི་དོན་དུ་བྱའོ། །མཚོན་གྱིས་སྨས་པ་གསོ་བ་ནི། རྩྭ་དང༌། ཤིང་དང༌། རྡོ་དང༌། ས་རྡུལ་དང༌། ལྕགས་དང༌། བོང་པ་དང༌། རུས་པ་དང༌། སྐྲ་དང༌། སེན་མོ་སྣ་ཚོགས་ཀྱི་རྣག་འཛག་པ་དང༌། རྨ་མི་བཟད་པ་དང༌། ནང་དུ་ནུབ་པའི་ཟུག་རྔུ་དབྱུང་བའི་དོན་དུ་བྱའོ། །མཆེ་བའི་གསོ་བ་ནི། སྦྲུལ་དང་སྲིན་བུ་ལ་སོགས་པས་ཟིན་པ་བསལ་བ་དང༌། དུག་སྣ་ཚོགས་ཀྱིས་བཅོམ་པ་ཉེ་བར་ཞི་བའི་ཕྱིར་བྱ་བའོ། །རྒས་པ་ལ་གསོ་བ་ནི་ལང་ཚོ་ལ་གནས་པར་བྱ་བ་དང༌། ཚེ་དང་བློ་འཕེལ་བ་དང༌། ནད་ཉེ་བར་ཞི་བའི་དོན་དུ་བྱའོ། །རོ་ཙ་བར་བྱ་བའི་ཕྱིར་གསོ་བ་ནི། ཁུ་བ་ཆུང་བ་དང༌། གདུག་པ་དང༌། ཟད་པ་དང༌། བསྐམས་པར་གྱུར་པ་རྣམས་ས་བོན་འཕེལ་ཞིང་རབ་ཏུ་དང་བ་བསྐྱེད་པའི་ཕྱིར་དང༌། རབ་ཏུ་དགའ་བ་བསྐྱེད་པའི་ཕྱིར་བྱ་བའོ། །དེ་ལྟར་ན་ཡན་ལག་རྣམ་པ་བརྒྱད་དུ་བཤད་པ་ཡིན་ནོ། །གང་གི་དོན་དུ་གསོ་བར་བྱ་བའི་ཉེས་པ་དེ་བསྟན་པར་བྱ་བའི་ཕྱིར། འདི་ལྟར། རླུང་དང་མཁྲིས་པ་བད་ཀན་ཡང༌། །ཉེས་པ་རྣམ་གསུམ་མདོར་བསྡུས་ཡིན། །ཞེས་སྨྲས་པ་ཡིན་ཏེ། དེ་ལ་དང་པོར་རླུང་སྨོས་པའི་རྒྱུ་བཤད་བར་བྱ་སྟེ། ཁྱབ་དང་མྱུར་དུ་བྱེད་ཕྱིར་དང༌། །སྟོབས་ལྡན་གཞན་དག་འཁྲུག་བྱེད་ཅིང༌། །རང་རྒྱུད་གྲུབ་དང་ནད་མང་ཕྱིར། །ཀུན་ལས་རླུང་ནི་སྟོབས་ལྡན་ཡིན། །ཞེས་བཤད་པ་ཡིན་ནོ། །དེའི་འོག་ཏུ་ནི་ཕལ་ཆེར་རྒྱུ་འདི་དག་ཉིད་ཀྱིས་མཁྲིས་པ་སྨོས་པ་ཡིན་ལ།
དེ་བཞིན་དུ་བད་ཀན་ནི་ནུས་པ་ཆུང་བ་དང༌། ནད་ཉུང་བ་ཡིན་པའི་ཕྱིར་ཐ་མར་བསྟན་པ་ཡིན་ནོ། །ཡང་ཞེས་བྱ་བའི་སྒྲས་ནི། ཉེས་པ་གཞན་དག་ཀྱང་ཡོད་པ་ཉིད་དུ་སྟོན་པ་ཡིན་ཏེ། ཉེས་པ་གཞན་དག་ནི་འདོད་ཆགས་དང༌། ཞེ་སྡང་དང་གཏི་མུག་གོ །ལ་ལ་ནི་ཁྲག་ཀྱང་ཡིན་ནོ་ཞེས་ཟེར་རོ། །གནོད་ཅིང་སུན་འབྱིན་པར་བྱེད་པས་ན་ཉེས་པའོ། །རྣམ་གསུམ་ཞེས་སྨོས་པ་ནི་ངེས་པའི་དོན་ཏེ། གསུམ་ཉིད་ཡོད་ཀྱི་བཞི་པ་ནི་ཡོད་པ་མ་ཡིན་ནོ་ཞེས་པ་སྟེ། ཇི་ལྟར་གཞུང་གཞན་ལས་བཤད་པ་ལྟ་བུའོ་ཞེས་ངེས་པར་བྱ་བ་ཡིན་ཏེ། འདོད་ཆགས་དང༌། ཞེ་སྡང་དང༌། གཏི་མུག་དང༌། ཁྲག་གཅིག་པུས་ནད་སྐྱེད་པར་ནུས་པ་ནི་མ་མཐོང་ངོ༌། །དེ་ཡང༌། ཉེས་པ་གཞན་ལྟར་ཁྲག་དག་ནི། །གཞན་གྱི་དབང་གིས་ཉེས་ཡོད་མིན། །འདི་ནི་ཏིལ་མར་ཚིག་པ་ལྟར། །ནད་ཀྱི་མིང་དུ་བྱས་པ་ཡིན། །ཞེས་བཤད་པ་དང༌། དེ་བཞིན་དུ་བསྡུས་པ་ལས་ཀྱང༌། ཁམས་སོགས་གནས་པ་ཉེས་པ་ལས། །ནད་ནི་གང་ཞིག་འབྱུང་འགྱུར་བས། །ཉེ་བར་གདགས་པ་དེ་བསྐྱེད་པར། །བཤད་པ་ཚིག་པའི་མར་དང་མཚུངས། །ཞེས་བཤད་པ་ཡིན་ནོ། །མདོར་བསྡུས་ཡིན་ཞེས་བྱ་བ་ནི་བསྡུས་ནས་བསྟན་པའོ་ཞེས་བྱ་བ་སྟེ། རྒྱས་པར་ནི་རླུང་ལ་སོགས་པ་ལྡན་པ་དང༌། འདུས་པ་དང༌། ཟད་བྱེད་དང༌། མཉམ་པ་དང༌། རྣམ་པར་འཕེལ་བ་དང༌། དེ་བཞིན་དུ་ཤིན་ཏུ་ཤས་ཆེ་བར་ཡོངས་སུ་བརྟགས་པས་ཀྱང་མཐའ་ཡས་པར་འགྱུར་རོ། །དེ་ནི་རྣམ་གྱུར་མ་གྱུར་པས། །ལུས་ནི་འཇོམས་དང་གནས་པ་ཡིན། །ཞེས་བྱ་བ་ལ། རླུང་ལ་སོགས་པ་དེ་རྣམས་རྣམ་པར་གྱུར་པ་སྟེ། རང་གི་རང་བཞིན་ལས་གཞན་དུ་གྱུར་ཅིང་གཡོས་པས་ནི། ལུས་འཇོམས་ཤིང་གནོད་པར་བྱེད་ལ། མ་གྱུར་ཅིང་རང་གི་རང་བཞིན་དུ་ཐ་མལ་པར་མཉམ་པར་གནས་པས་ནི། ལུས་གནས་ཤིང་འཚོ་བར་བྱེད་པ་ཡིན་ནོ། །ཞེས་བྱ་བའི་དོན་ཏོ། །དེས་ཁྱབ་གྱུར་ཀྱང་སྙིང་ག་དང༌། །ལྟེ་བའི་འོག་བར་སྟེང་ན་གནས། །ཞེས་བྱ་བ་ལ། རླུང་ལ་སོགས་པ་དེ་རྣམས་ཁྱབ་ཅིང་ལུས་མ་ལུས་པ་ལ་རྒྱུ་བར་གྱུར་
ཀྱང། གནས་ངེས་པ་ཡོད་པར་ཤེས་པར་བྱ་སྟེ། དེའི་སྙིང་ག་དང་ལྟེ་བའི་འོག་བར་སྟེང་ན་གནས་ཞེས་བྱ་བ་ཡིན་ནོ། །དེའི་དོན་ནི་འདི་ཡིན་ཏེ། སྙིང་ག་དང་ལྟེ་བའི་འོག་མན་ཆོད་ནི་རླུང་གི་གནས་ཡིན་ནོ། །དེ་གཉིས་ཀྱི་བར་ནི་མཁྲིས་པའི་གནས་ཡིན་ནོ། །དེ་གཉིས་ཀྱི་སྟེང་ཡན་ཆོད་ནི་བད་ཀན་གྱི་གནས་ཡིན་ནོ། །ན་ཚོད་ཉིན་ཞག་ཟས་ཟོས་ལ། །དེ་ཡི་མཐའ་དབུས་སོགས་གཏོགས་རིམ། །ཞེས་བྱ་བ་ནི་ཉེས་པ་དེ་རྣམས་ན་ཚོད་ལ་སོགས་པའི་མཐའ་མ་དང༌། དབུས་ལ་སོགས་པར་གཏོགས་པ་ན་རྣམ་པར་འཕེལ་བར་འགྱུར་བ་ཡིན་ནོ། །རིམ་ཞེས་བྱ་བ་ནི་གོ་རིམས་ཇི་ལྟ་བར་ཡིན་གྱི། རིམ་པ་འཆོལ་བར་ནི་མ་ཡིན་ནོ། །དེ་ཡང་ན་ཚོད་ནི་དུས་སུ་རྣམ་པར་གཞག་པའི་ལུས་ཀྱི་གནས་སྐབས་གཞོན་ནུ་ལ་སོགས་པའོ། །ཉིན་ཞག་ནི་ཉིན་མོ་དང་མཚན་མོའོ། །ཟས་ཟོས་པ་ནི་ཟས་ལ་སྤྱོད་པའོ། །དེའི་མཐའ་མ་དང་དབུས་དང་ཐོག་མར་གཏོགས་པས་ན་མཐའ་དབུས་གཏོགས་ཞེས་བྱའོ། །དེས་ནི་འདི་སྐད་སྟོན་པར་འགྱུར་ཏེ། ན་ཚོད་ཀྱི་མཐའ་རྒས་པའི་དུས་སུ་ནི་རླུང་འཕེལ་བར་འགྱུར་ལ་དབུས་ཏེ་ལང་ཚོའི་དུས་ནི་མཁྲིས་པ་འཕེལ་བར་འགྱུར་རོ། །དང་པོ་སྟེ་བྱིས་པའི་དུས་སུ་བད་ཀན་འཕེལ་བར་འགྱུར་རོ། །དེ་བཞིན་དུ་ཉིན་མོའི་ཐ་མར་ནི་རླུང་འཕེལ་ལོ། །ཉི་མ་ཕྱེད་ན་མཁྲིས་པའོ། །སྔ་དྲོ་ནི་བད་ཀན་ནོ། །མཚན་མོའི་མཐར་ནི་རླུང་འཕེལ་བར་འགྱུར་རོ། །ནམ་གྱི་གུང་ལ་ནི་མཁྲིས་པའོ། །ནམ་སྟོད་ནི་བད་ཀན་ནོ། །དེ་ལ་ཟས་ཟོས་པའི་མཐའ་མ་ལ། ཁ་ཚ་བར་བྲོ་བར་གྱུར་པའི་དུས་སུ་ནི་རླུང་འཕེལ་བར་འགྱུར་རོ། །ཟས་ཟོས་པའི་བར་སྐྱུར་བར་གྱུར་པའི་དུས་སུ་ནི་མཁྲིས་པའོ། །ཟས་ཟོས་ནས་དང་པོ་མངར་བའི་དུས་སུ་ནི་བད་ཀན་འཕེལ་བར་འགྱུར་རོ། །དེས་ནི་འཇུ་བ་མི་སྙོམས་རྣོ། །ཆུང་དང་མཉམ་པས་མཉམ་པར་འགྱུར། །ཞེས་བྱ་བ་ནི་རླུང་ལ་སོགས་པ་དེ་རྣམས་ཀྱི་མེའི་དྲོད་ཀྱིས་འཇུ་བ་མི་སྙོམས་པ་ལ་སོགས་པ་རྣམ་པ་བཞིར་འགྱུར་རོ། །དེ་ཡང་རླུང་གིས་ནི་འཇུ་བ་མི་སྙོམས་པར་འགྱུར་རོ། །མཁྲིས་པས་ནི་འཇུ་བའི་མེ་དྲོད་ཤིན་ཏུ་རྣོ་བར་འགྱུར་རོ། །བད་ཀན་
གྱིས་ནི་མེ་དྲོད་ཆུང་བར་འགྱུར་རོ། །མཉམ་པས་ནི་མེ་དྲོད་མཉམ་པར་འགྱུར་ཏེ། ཉེས་པ་གསུམ་འཕེལ་འགྲིབ་མེད་པས་མཉམ་པར་འགྱུར་རོ། །དེ་ལ་གང་ལེགས་པར་ཟས་ཟོས་ཀྱང་ཡུན་རིང་པོ་ཞིག་ནས་འཇུ་བ་དང༌། ལན་འགའ་ལེགས་པར་མ་ཟོས་ཀྱང་ཤིན་ཏུ་མྱུར་བར་འཇུ་བ་ནི་མི་སྙོམས་པའོ། །གང་དུས་ཐམས་ཅད་དུ་ཟས་རན་པར་མ་ཟོས་ཀྱང་མྱུར་དུ་འཇུ་བ་དེ་ནི་རྣོ་བ་ཡིན་ནོ། །གང་དུས་ཐམས་ཅད་དུ་ཟས་རན་པར་ཟོས་ཀྱང་ཡུན་རིང་མོ་ཞིག་ནས་འཇུ་བ་དེ་ནི་ཆུང་བ་ཡིན་ཏེ། རྒྱུ་མ་འཁྲུག་ཅིང་ལྟམ་ལྟམ་པོར་གྱུར་པའོ། །གང་རན་ཞིང་ལེགས་པར་མ་ཟོས་ཀྱང་བདེ་བར་འཇུ་བ་ནི་མཉམ་པ་ཞེས་བྱའོ། །དེ་ནི་ལྟོ་བ་སྲ་སྙི་རན། །མཉམ་པས་ཀྱང་ནི་བར་མར་འགྱུར། །ཞེས་བྱ་བ་ནི། རླུང་ལ་སོགས་པའི་ཉེས་པ་དེ་རྣམས་ཀྱིས་ནི་ལྟོ་བ་རྣམ་པ་བཞིར་འགྱུར་ཏེ། རླུང་ཤས་ཆེ་བས་ལྟོ་བ་སྲ་བར་འགྱུར་ཏེ། དུར་བྱིད་ལ་སོགས་པས་ཀྱང་འཁྲུ་བ་དཀའ་བར་འགྱུར་རོ། །མཁྲིས་པ་ཤས་ཆེ་བས་ལྟོ་སྙི་བར་འགྱུར་ཏེ། ཞོ་ག་ཆུ་དང༌། འོ་མས་ཀྱང་འཁྲུ་ནུས་པར་འགྱུར་རོ། །བད་ཀན་གྱིས་རན་པར་འགྱུར་ཏེ། དོང་ག་ལ་སོགས་པས་ཀྱང་འཁྲུ་ནུས་པར་འགྱུར་རོ། །མཉམ་པས་ཞེས་བྱ་བས་ནི་ཉེས་པ་གསུམ་མཉམ་སྟེ། དེས་ནི་བར་མར་འགྱུར་ཞེས་བྱ་བ། སྲ་བ་ཡང་མ་ཡིན། སྙི་བ་ཡང་མ་ཡིན་པར་འགྱུར་རོ། །སྐྱེ་བའི་དང་པོར་ཁུ་ཁྲག་གནས། །དུག་ཅན་སྲིན་བུའི་དུག་དང་མཚུངས། །དེ་ནི་རང་བཞིན་རྣམ་གསུམ་སྟེ། །ཆུང་འབྲིང་ཆེན་པོ་སོ་སོར་བལྟ། །མ་ལུས་པ་ལ་ཁམས་མཉམ་པ། །མཆོག་ཡིན་ཉེས་པ་གཉིས་འབྱུང་སྨད། །ཅེས་བྱ་བ་ནི། རླུང་ལ་སོགས་པ་དེ་དག་ནི་རེ་རེ་ཞིང་རང་བཞིན་གསུམ་དུ་འགྱུར་ཏེ། ཆུང་ངུ་དང༌། འབྲིང་དང༌། ཆེན་པོའོ། །རང་བཞིན་ཞེས་བྱ་བ་ནི་ལུས་ཀྱི་རང་གི་ངོ་བོའོ། །དེ་ནི་སྐྱེ་བའི་དང་པོའི་མངལ་དུ་འཇུག་པའི་དུས་སྐྱེ་བ་རྩོམ་ཞིང་མངལ་ན་གནས་པ་ཞེས་བྱ་བའི་དོན་ཏོ། །ཁུ་བ་ནི་ས་བོན་ནོ། །ཁྲག་ནི་ཟླ་བའི་དུས་སུ་རྒྱུ་བས་ཟླ་མཚན་ཏེ། དེ་ལ་གནས་པས་ན་ཁྲག་
གནས་ཞེས་བྱའོ། །དྲིས་པ་གང་གི་ཚེ་ཁུ་བ་དང་ཁྲག་ལ་ཤས་ཆེར་གནས་པ་དེའི་ཚེ། ལུས་རྫོགས་པར་ག་ལ་འགྱུར། དེ་ལས་ཉེས་པ་གང་ལྷག་པར་འགྱུར་བ་དེ་ཉིད་ནི་རྣམ་པར་འགྱུར་ཞིང་འཇིག་པ་ཡིན་ན། ཉེས་པ་ལྷག་པར་གནས་པ་དེ་རང་བཞིན་གྱི་རྒྱུར་ཇི་ལྟར་འགྱུར་ཏེ། རང་བཞིན་ལས་ཉམས་པ་ཡིན་ལ། རང་བཞིན་ལས་ཉམས་པར་ནི། རང་བཞིན་གྱི་རྒྱུར་ནམ་ཡང་མི་འགྱུར་རོ། །དེ་ཡང་འབྲས་བུ་ནི་རྒྱུ་དང་འདྲ་བར་གནས་པ་ཡིན་ནོ་ཞེས་རྟོགས་པ་དག་ལ་དཔེ་བསྟན་པའི་ཕྱིར། དུག་ཅན་སྲིན་བུའི་དུག་དང་མཚུངས། །ཞེས་བྱ་བ་སྨོས་ཏེ། དཔེར་ན་དུག་ཅན་ནི་སྲོག་འཇིག་པའི་རྒྱུ་ཡིན་ཡང༌། དུག་ནི་སྲིན་བུ་འདི་སྐྱེ་བའི་རང་བཞིན་འབྱུང་བར་སྣང་ངོ༌། །དེ་བཞིན་དུ་འདི་དག་ནི་གནོད་པའི་རང་བཞིན་ཅན་ཡིན་ཡང༌། རང་གི་ཚད་ལས་ལྷག་པའི་ཉེས་པ་ཁུ་བ་དང་ཁྲག་ལ་གནས་པས། སྐྱེ་བའི་དང་པོ་ལུས་འབྱུང་བར་འགྱུར་རོ། །དེ་ཡང་རླུང་ཤས་ཆེ་བས་ནི་རང་བཞིན་ཆུང་བར་འགྱུར་རོ། །མཁྲིས་པ་ཤས་ཆེ་བས་ནི་འབྲིང་ངོ༌། །བད་ཀན་ཤས་ཆེ་བས་ནི་ཆེན་པོའོ། །མ་ལུས་པ་སྟེ་ཁམས་ཐམས་ཅད་ཀྱི་ནང་ནས་ཁམས་གང་མཉམ་པའི་རང་བཞིན་དེ་ནི་མཆོག་སྟེ། ཐུ་བོ་དང་དམ་པ་ཡིན་ལ་འདི་ནི་བཞི་པའོ། །དེ་ཡང་གང་གིས་ཁམས་མཉམ་པར་གྱུར་པ་དེ་ནི་ཁམས་མཉམ་པ་སྟེ། ཁམས་ཀྱི་སྒྲ་ནི་ནད་གཞིའི་ཉེས་པ་ལ་བྱའོ། །ཉེས་པ་གཉིས་འབྱུང་སྨད། ཅེས་བྱ་བ་ནི་གང་ཉེས་པ་གཉིས་འདྲེས་པ་ལས་བྱུང་བའི་རང་བཞིན་གསུམ་ནི་སྨད་པ་ཡིན་ཏེ། ནད་མེད་པ་མ་ཡིན་པའི་གཞིར་གྱུར་པའི་ཕྱིར་རོ། །དེ་ནི་རླུང་དང་མཁྲིས་པ་ལས་བྱུང་བ་དང༌། རླུང་དང་བད་ཀན་ལས་བྱུང་བ་དང༌། མཁྲིས་པ་དང་བད་ཀན་ལས་བྱུང་བའོ། །དེ་ལ་རླུང་ནི་རྩུབ་ཅིང་ཡང༌། །གྲང་ཞིང་སྲ་ལ་ཕྲ་ཞིང་གཡོ། །ཞེས་བྱ་བ་ལ། དེ་ལ་ཞེས་བྱ་བ་ནི་ངེས་པར་གཟུང་བ་སྟེ། ཉེས་པ་དེ་རྣམས་ཀྱི་ནང་ནས། རླུང་ནི་རྩུབ་པ་དང༌། ཡང་བ་དང༌། གྲང་བ་དང༌། སྲ་བ་དང༌། ཕྲ་བ་སྟེ། རྩ་སྦུབས་ཕྲ་མོ་ལ་འཇུག་པ་དང་གཡོ་བ་སྟེ། འགྲོ་བའི་ངང་ཚུལ་ཅན་གཅིག་ཏུ་མི་གནས་པ་ཡིན་ནོ། །དྲིས་པ་གཟེགས་གཟན་
ལ་སོགས་པས་ནི། རླུང་གྲང་བ་དང༌། དྲོ་བ་ཡིན་པར་བཤད་ལ། འདིར་ཡང་ཟུང་དུ་འཇུག་པའི་རྗེས་སུ་གནང་བས་གྲང་བ་དང༌། དྲོ་བ་གཉིས་ཀ་མ་ཡིན་པར་འདོད་དེ། དེ་ཡང༌། ཟུང་དུ་འཇུག་པ་རླུང་གི་མཆོག །ཡང་དག་སྦྱོར་བས་དོན་གཉིས་བྱེད། །ཉི་མ་ལྡན་པས་སྲེག་བྱེད་ལ། །ཟླ་བར་གནས་པས་བསིལ་བར་བྱེད། །ཅེས་བཤད་པ་དེ་བཞིན་དུ། རླུང་ནི་ཟུང་དུ་འཇུག་པས་ན། །བད་ཀན་ལྡན་པས་བསིལ་བར་འགྱུར། །མཁྲིས་པ་ལྡན་པས་ཚ་བ་ཡིན། །ཞེས་བཤད་པའི་ཕྱིར་རོ་ཞེ་ན། འདི་ར་ལན་བརྗོད་པར་བྱ་བ་སྟེ། རླུང་གྲང་བ་དང་དྲོ་བ་ཉིད་མ་ཡིན་པ་ནི་བདེན་མོད་ཀྱི། དེ་ཟུང་དུ་འཇུག་པ་ཡིན་ཡང་དེ་ཙམ་གྱི་དྲོ་བས་གྲང་བའི་ངོ་བོ་ཉིད་མེད་པར་མི་འགྱུར་རོ། །རླུང་གི་མཚན་ཉིད་གྲང་བ་ཡིན་པར་བཤད་པའི་དགོས་པ་ནི་འདི་ཡིན་ཏེ། འདི་ལ་དྲོ་བས་ཉེ་བར་ཞི་བར་འགྱུར་རོ། །ཞེས་བསྟན་པའི་ཕྱིར་དེ་སྐད་སྨོས་པ་ཡིན་ནོ། །མཁྲིས་པ་སྣུམ་བཅས་རྣོ་ཞིང་དྲོ། །ཡང་ཞིང་དྲི་མནམ་འཁྲུ་ཞིང་གཤེར། །ཞེས་བྱ་བ་ལ། སྣུམ་བཅས་ཞེས་པས་ནི། ཅུང་ཟད་སྣུམ་པ་སྟེ། བཅས་པའི་སྒྲ་ནི་ཅུང་ཟད་ཙམ་གྱི་དོན་ཏེ། དཔེར་ན་ཁ་བ་དང་བཅས་པའི་ཤ་ཁ་ར་ཞེས་ཟེར་བ་ལྟར་ཅུང་ཟད་སྣུམ་བག་ཅན་གང་ཡིན་པ་དེ་ནི་སྣུམ་བཅས་ཞེས་བྱའོ། །རྣོ་བ་ནི་ཁབ་ཀྱིས་འབིགས་པ་ལྟར་མྱུར་དུ་འབྱེད་པ་སྟེ། དམན་པ་ལས་གོ་བཟློག་པའོ། །དྲོ་བ་ནི་ཚ་བ་འུར་འུར་པོ་སྐྱེད་པའོ། །དྲི་མནམ་པ་ནི་ཉ་རུལ་ལྟ་བུའི་དྲི་མནམ་པ་ལྟ་བུའོ། །འཁྲུ་བ་ནི་བཤང་བ་སླ་བའམ། སྟེང་དང་འོག་ཏུ་ཁྱབ་ཅིང་རྒྱུ་བ་བརྟན་པ་ཡིན་པའོ། །གཤེར་བ་ནི་སླ་བའོ། །བད་ཀན་སྣུམ་བསིལ་ལྕི་བ་དང༌། །བརྟུལ་ཞིང་འཇམ་བརྟན་འབྱར་བག་ཅན། །ཞེས་བྱ་བ་ནི་སྣུམ་པའི་ཡོན་ཏན་དང་ལྡན་པས་ན་སྣུམ་པའོ། །བསིལ་བ་ནི་ཚ་བ་མེད་པའོ། །ལྕི་བ་ནི་ཡང་བར་མ་གྱུར་པའོ། །བརྟུལ་བ་ནི་ཡུན་རིང་པོ་ཞིག་ན་ལྡང་བའོ། །འཇམ་པ་ནི་མི་རྩུབ་པའོ། །བརྟན་པ་ནི་ཁྱབ་པའི་ངང་ཚུལ་ཅན་ནོ། །འབྱར་བག་ཅན་ནི་མཉེས་པ་ན་སོར་མོ་ལ་ཆགས་ཤིང༌། འཇམ་བག་ནལ་ནལ་པོ་ལ་འཚེར་བག་ཅན་ནོ། །དེ་ལྟར་ན་ཡོན་ཏན་དེ་དང་ལྡན་པས། ཡོན་ཏན་དང་ཡོན་ཏན་
ཅན་ཐ་མི་དད་པའི་ཉེ་བར་གདགས་པས། རླུང་ལ་སོགས་པའི་ཡོན་ཏན་ཉིད་དུ་བཤད་པ་ཡིན་ནོ། །འདི་དག་འདྲེས་པར་གྱུར་པའི་ཐ་སྙད་གཞུང་དུ་བསྟན་པར་བྱ་བའི་ཕྱིར་མི་གཉིས་སྨོས་པ་ནི། དེ་གཉིས་གསུམ་ཟད་འཁྲུགས་པ་ལས། །ལྡན་པ་དང་ནི་འདུས་པ་ཡིན། །ཞེས་བྱ་བ་ཡིན་ཏེ། ཀུན་ཏུ་འདུས་པའི་རྣམ་པ་གཅིག་ནི་ལྡན་པ་ཞེས་བྱ་ལ། གཉིས་པ་ནི་འདུས་པ་ཞེས་བྱ་སྟེ། གཉིས་པ་དང་གསུམ་པ་ནི་གཉིས་དང་གསུམ་ཞེས་བྱ་ལ། ཟད་པ་དང་འཁྲུགས་པ་ནི་ཟད་འཁྲུགས་ཞེས་བྱ་སྟེ། གཉིས་དང་གསུམ་གྱི་ཟད་པ་དང་འཁྲུགས་པ་ཞེས་བྱ་སྟེ། དེ་ལྟར་ན་གཉིས་དང་གསུམ་ཟད་པ་དང་འཁྲུགས་པ་དེ་ལས་མིང་གཉིས་འབྱུང་ངོ༌། །འདི་སྐད་སྟོན་པ་ཡིན་ཏེ། གཉིས་འཁྲུགས་ཤིང་རང་གི་ཚད་ལས་ལྷག་པར་གྱུར་པའམ། ཟད་པར་གྱུར་པ་ལས་འདྲེས་པར་གྱུར་པ་ནི་ལྡན་པ་ཞེས་བྱ་ལ། ཉེས་པ་གསུམ་པོ་ཟད་པའམ། འཕེལ་བར་གྱུར་པ་ལས་འདྲེས་པར་གྱུར་པ་ནི་འདུས་པ་ཞེས་བྱའོ། །དེ་ཡན་ཆད་ཉེས་པ་རྣམས་སྨྲས་ནས། ཁམས་རྣམས་བསྟན་པའི་ཕྱིར། ལུས་ཟུངས་དངས་མ་ཁྲག་དང་ཤ་།ཚིལ་དང་རུས་རྐང་ཁུ་ཆུ་སྟེ། །གནོད་བྱ་བདུན་ཡིན་ཞེས་སྨོས་ཏེ། བཅུད་ཀྱི་དངས་མ་ལ་སོགས་པ་བདུན་ནི་ལུས་ཟུངས་ཞེས་བྱ་སྟེ། ལུས་འཛིན་པར་བྱེད་པ་ཡིན་པའི་ཕྱིར་ལུས་ཟུངས་སོ། །དེ་རྣམས་ཀྱང་གནོད་བྱ་ཞེས་བྱ་སྟེ། རླུང་ལ་སོགས་པས་གནོད་ཅིང་ཉེས་པར་བྱ་བའི་གཞི་ཡིན་པས་གནོད་བྱ་ཞེས་བྱ་སྟེ། གང་གི་ཕྱིར་རླུང་ལ་སོགས་པ་ནི་གནོད་པའི་ངོ་བོ་ཡིན་པས། དོན་དང་ལྡན་པའི་མིང་ཉེས་པ་ཞེས་བཏགས་པ་ཡིན་ལ། དེས་ན་དེ་རྣམས་ནི་གནོད་པར་བྱ་བ་ལ་ལྟོས་དགོས་ཏེ། ལས་མེད་པར་བྱེད་པ་པོ་ལས་རྩོམ་པར་མི་འགྱུར་རོ། །དེ་བཞིན་དུ་གནོད་པ་མེད་པར་དངས་མ་དང་ལུས་ཟུངས་ལ་སོགས་པས་གནོད་བྱའི་མིང་མི་འཐོབ་ལ། དེ་མེད་པར་ཡང་རླུང་ལ་སོགས་པས་གནོད་པའི་མིང་མི་འཐོབ་བོ། །དེ་བས་ན་གཅིག་ལ་གཅིག་ལྟོས་པ་ཡིན་པའི་ཕྱིར་གནོད་པ་དང་གནོད་པར་བྱ་བ་དག་གནོད་པར་བྱ་བ་ཉིད་དང༌། གནོད་པ་ཉིད་ཀྱི་མིང་འཐོབ་པ་ཡིན་ནོ། །དྲི་མ། གཅིན། བཤང་བ།
རྡུལ་ལ་སོགས་པའང་ཡིན་ཞེས་བྱ་བའི་སྒྲས་གནོད་བྱ་ཡིན་པར་སྟོན་ཏེ། བཅུད་ཀྱི་དངས་མ་ལ་སོགས་པ་འབའ་ཞིག་གནོད་བྱ་ཡིན་པར་མ་ཟད་ཀྱི། དྲི་མ་ལ་སོགས་པ་དེ་རྣམས་ཀྱང་རླུང་ལ་སོགས་པས་གནོད་པར་བྱ་བ་ཡིན་ནོ། །དེ་ལྟར་ན་དངས་མ་ལ་སོགས་པ་ནི་གནོད་བྱ་དང༌། ལུས་ཟུངས་ཞེས་བྱ་བ་ཡིན་ལ། དེ་བཞིན་དུ་བཤང་བ་དང་གཅི་བ་ལ་སོགས་པ་ཡང་དྲི་མ་ཞེས་བྱ་བ་དང༌། གནོད་བྱ་ཞེས་བྱ་བ་ཡིན་ནོ། །དེ་ལྟར་གནོད་པ་དང༌། ལུས་ཟུངས་དང༌། དྲི་མར་བསྟན་པས་ལུས་བཤད་པ་ཡིན་ཏེ། དེ་ཡང་གཞུང་འདི་ཉིད་ཀྱི་འོག་ནས། ནད་དང་ལུས་ཟུངས་དྲི་མ་ནི། །རྟག་ཏུ་ལུས་ཀྱི་རྩ་བ་ཡིན། །ཞེས་བཤད་པ་ཡིན་ནོ། །དེ་ལྟར་བཤད་པའི་ལུས་ཏེ་ཐབས་འགའ་ཞིག་གིས་དུས་ཐམས་ཅད་དུ་ཡོངས་སུ་སྲུང་བ་རྫོགས་པར་འགྱུར་བའི་ཐབས་དེ་བསྟན་པའི་ཕྱིར། ཐམས་ཅད་མཉམ་པས་འཕེལ་འགྱུར་ཞིང༌། །དེ་ལས་བཟློག་པས་གནོད་པར་འགྱུར། །ཞེས་བྱ་བ་སྨོས་པ་ཡིན་ཏེ། ཐམས་ཅད་ཅེས་བྱ་བ་ནི་གནོད་པ་དང༌། ལུས་ཟུངས་དང༌། དྲི་མ་ལུས་ལ་བརྟེན་པ་རྣམས་ཏེ། དེ་དག་མཉམ་ཞིང་ཆ་མཚུངས་པའི་རང་བཞིན་དུ་གྱུར་པས་བརྟས་ཤིང་འཕེལ་བར་བྱེད་དེ། རང་གི་ཚད་ལས་ལྷག་པར་གྱུར་ལ། དེ་ལས་བཟློག་པ་ནི་མི་མཉམ་པ་ཉིད་དུ་གནས་པ་སྟེ། དེས་གནོད་པར་འགྱུར་བ་ནི་ཟད་པར་འགྱུར་ཞིང་འབྲི་བར་འགྱུར་བའོ། །སྤྱི་དང་ཁྱད་པར་ལ་ནི་རྫས་དང་ཡོན་ཏན་དང༌། ལས་ཀྱི་དབྱེ་བས་གསུམ་དུ་འདོད་དེ། དེ་ཡང། ཀུན་གྱི་རྣམ་ཀུན་འཕེལ་བ་ནི། །རྫས་དང་ཡོན་ཏན་བྱ་བར་མཚུངས། །བཟློག་པ་ཡིས་ནི་དངོས་པོ་རྣམས། །དེ་ལས་གཞན་དུ་འགྱུར་བ་ཡིན། །ཞེས་བཤད་པ་ཡིན་ནོ། །དེ་ཡང་རྫས་ལ་ནི་ཁྲག་ནི་ཁྲག་གིས་བརྟ་བར་བྱའོ། །ཤ་ནི་ཤས་སོ། །ཚིལ་ནི་ཚིལ་གྱིས་སོ། །རུས་པ་ནི་རུས་པས་སོ། །རྐང་ནི་རྐང་གིས་སོ། །ཁུ་བ་ནི་ཁུ་བས་སོ། །དེ་བཞིན་དུ་མངལ་ནི་ཕྱིས་འབྱུང་བར་འགྱུར་བའི་མངལ་གྱིས་སོ། །ཞེས་བཤད་པ་ཡིན་ནོ། །དེ་ལ་ཁྲག་གིས་ཁྲག་གོ་ཞེས་བྱ་བ་ནི་གཉི་ག་ཆུའོ། །ཤ་ནི་ཤས་སོ་ཞེས་བྱ་བ་ནི་སའོ། །དེ་
བཞིན་དུ་ཆུའི་བདག་ཉིད་ཅན་གྱི་ཆུས་ནི་དེའི་བདག་ཉིད་ཅན་གྱི་བད་ཀན་འཕེལ་བར་འགྱུར་ལ། དེ་བཞིན་དུ་མར་དང་འོ་མས་ནི་ཁུ་བ་འཕེལ་བར་འགྱུར་རོ། །དེ་བཞིན་དུ་སྨན་འཚོ་བྱེད་དང་ཉེའུ་ཤིང་ལ་སོགས་པ་ནི་ཟླ་བའི་བདག་ཉིད་ཅན་ཏེ། ཚིམ་པར་བྱེད་པས་རྫས་ཀྱི་ཁྱད་པར་རྣམས་ཀྱིས། ལུས་ཟུངས་མཉམ་པོར་བྱེད་པ་ཉིད་དུ་བྱ་བ་གཅིག་པ་ཡིན་པས། ལུས་སྣུམ་ཞིང་སྟོབས་དང་སྐྱེས་བུ་ཉིད་ཀྱི་གཟི་མདངས་བསྐྱེད་པ་ཡིན་ནོ། །ན་ལེ་ཤམ་དང༌། ཚ་བ་ལྔ་དང༌། བསེ་ཤིང་གི་འབྲས་བུ་ལ་སོགས་པས་ནི་བློ་དང་ཤེས་རབ་དང༌། མེ་དྲོད་ལ་སོགས་པ་འཕེལ་བར་བྱེད་པ་ཡིན་ནོ། །ཡོན་ཏན་ལས་ནི་བཙོ་ཙ་དང༌། མོ་ཚ་དང༌། ཁ་རུ་ཚ་ལ་སོགས་པ་སའི་ཁམས་ཅན་གྱི་རྫས་སུ་བསྟན་དུ་ཟིན་ཀྱང་ཆུའི་བདག་ཉིད་ཅན་བད་ཀན་འཕེལ་བར་བྱེད་དེ། སྣུམ་པ་དང༌། ལྕི་བ་དང༌། བསིལ་བ་ལ་སོགས་པའི་ཡོན་ཏན་གྱི་ཆ་དང་མཚུངས་པའི་ཕྱིར་རོ། །ལས་ཀྱང་རྣམ་པ་གསུམ་སྟེ། ལུས་དང་ངག་དང་ཡིད་ཀྱི་བྱ་བའི་བདག་ཉིད་ཅན་ནོ། །དེ་ལ་ལུས་ཀྱིས་ནི་རྒྱུག་པ་དང༌། མཆོང་བ་དང༌། རྐྱལ་བ་ལ་སོགས་པས་ནི་བསྐྱོད་པ་ཉིད་དུ་མཐུན་པས་རླུང་འཕེལ་བར་བྱེད་དོ། །ངག་གིས་ནི་ཀློག་པ་དང༌། སྨྲ་བ་དང། འདོན་དུ་འཇུག་པ་དང༌། གླུར་ལེན་པ་རྣམས་སོ། །ཡིད་ཀྱིས་ནི་ཡིད་ཀྱི་བྱ་བ་སྟེ། སེམས་ཤིང་དཔྱོད་པ་དང༌། འདོད་པ་དང༌། མྱ་ངན་དང༌། འཇིགས་པའོ། །དེ་དག་ཀྱང་ཡིད་འཁྲུགས་པར་བྱེད་པའི་རྒྱུར་གྱུར་པས་རླུང་འཕེལ་བར་བྱེད་པ་ཡིན་ནོ། །དེ་བཞིན་དུ་གདུང་བ་བསྐྱེད་པར་མཐུན་པས་ན། ཁྲོ་བ་དང་ཕྲག་དོག་ལ་སོགས་པས་ནི་མཁྲིས་པ་འཕེལ་བར་བྱེད་དོ། །གཉིད་ལོག་པ་དང༌། སྙོམ་ལས་དང༌། མལ་སྟན་བདེ་བ་ལ་ཆགས་པས་ནི་བསྟན་པར་མཐུན་པས་བད་ཀན་འཕེལ་བར་བྱེད་པ་ཡིན་ནོ། །ཁྱད་པར་དུ་གྱུར་ཞིང་མི་མཉམ་པས་ནི་ཟད་པར་འགྱུར་རོ། །དཔེར་ན་རྫས་ལས་འབྲས་ག་བྷེ་དྷ་ནི་སྐེམ་པར་བྱེད་པ་ཡིན་ལ། དེ་རླུང་གི་བདག་ཉིད་ཅན་ཡིན་པས་སའི་བདག་ཉིད་ཅན་གྱི་ཤ་ལ་སོགས་པ་ཟད་པར་བྱེད་པ་ཡིན་ནོ། །དེ་བཞིན་དུ་མེའི་བདག་ཉིད་ཅན་གྱི་ལན་ཚྭས་ནི་བད་ཀན་ཟད་པར་བྱེད་དོ། །
ཡོན་ཏན་ལས་ནི་དཔེར་ན་སྐྱུར་རྩ་བས་ནི་ཆུའི་བདག་ཉིད་ཅན་ཡིན་པས། བད་ཀན་ལ་དེ་དང་མི་མཐུན་པས་ཡང་བ་དང༌། རྩུབ་པ་དང༌། དྲོ་བ་དང༌། རྣོ་བ་དང༌། སྐམ་པའི་ཡོན་ཏན་གྱིས་ཟད་པར་བྱེད་དོ། །ལས་ལས་ནི་གཉིད་དང༌། སྙོམ་ལས་དང༌། ཡིད་མི་བདེ་བ་དག་ནི་རླུང་ཀུན་ཏུ་གཡོ་བ་དང་བཅས་པ་ཡིན་ལ། འདི་དག་ཡོངས་སུ་མི་གཡོ་བའི་མཚན་ཉིད་ཅན་ཡིན་པས་ན་འབྲི་བར་བྱེད་པ་དེ་བཞིན་དུ་ཡོངས་སུ་གཡོ་བའི་ཚུལ་ཅན་སེམས་ལས་དང༌། ཕན་ཚུན་བསྐྱོད་པ་དང༌། རྩོལ་བ་ལ་ནི་མི་འགུལ་བའི་མི་མཐུན་པའི་ཕྱོགས་ཡིན་པས་ན་བད་ཀན་ཟད་པར་བྱེད་དོ། །དེ་ལྟར་ན། ཐམས་ཅད་མཉམ་པས་འཕེལ་འགྱུར་ཞིང༌། །དེ་ལས་བཟློག་པས་གནོད་པར་བྱེད། །ཅེས་བཤད་པ་ཡིན་ནོ། །རླུང་ལ་སོགས་པ་དེ་རྣམས་གང་ལས་འཕེལ་བ་དང༌། ཟད་པར་འགྱུར་བ་དེ་བཤད་པར་བྱ་བའི་ཕྱིར། རོ་ནི་མངར་སྐྱུར་ལན་ཚྭ་དང༌། །ཚ་དང་ཁ་དང་བསྐ་བ་སྟེ། །རྫས་དྲུག་ལ་གནས་དེ་རྣམས་ཀྱང༌། །གོ་རིམས་བཞིན་དུ་སྟོབས་ཆེན་ཡིན། །ཞེས་བྱ་བ་སྨོས་པ་ཡིན་ཏེ། མངར་བ་ལ་སོགས་པའི་རོ་དྲུག་ནི་ལྕེའི་དབང་པོའི་ཡུལ་ཡིན་པས་ན་རོའོ། །དེ་དག་ཀྱང་འབྱུང་བ་ལྔའི་བདག་ཉིད་ཅན་གྱི་རྫས་ལ་བརྟེན་པ་ཡིན་ཏེ། གོ་རིམས་ཇི་ལྟ་བ་བཞིན་དུ་མཐུ་སྟོབས་ཆེ་བ་ཡིན་ཏེ། སྔོན་མ་སྔོན་མ་རྣམས་སྟོབས་ཐོབ་ཅིང་ནུས་པ་ཆེ་བ་ཡིན་ནོ། །དེ་བས་ན་རོ་ཐམས་ཅད་ལ་རོ་མངར་བ་ནི་ལུས་ཅན་རྣམས་ཀྱི་སྟོབས་ཤིན་ཏུ་འང་བསྐྱེད་པ་ཡིན་ལ། བསྐ་བ་ནི་ཐམས་ཅད་ལས་སྟོབས་བསྐྱེད་པ་ལ་དམན་པ་ཡིན་ནོ། །དེ་ལ་མངར་བ་ནི་བུ་རམ་དང༌། མར་ལ་སོགས་པ་རོ་མངར་བ་རྣམས་སོ། །སྐྱུར་བ་ནི་སྐྱུར་རྩི་ཆེན་པོ་ལ་སོགས་པ་ཤིན་ཏུ་སྐྱུར་བར་བྱེད་པ་ཡིན་ནོ། །ལན་ཚྭ་ནི་ལྕེ་མྱང་ཚ་ལ་སོགས་པའོ། །ཚ་བ་ནི་ན་ལེ་ཤམ་ལ་སོགས་པའོ། །ཁ་བ་ནི་ནིམ་པ་ལ་སོགས་པའོ། །བསྐ་བ་ནི་ཨ་རུ་ར་ལ་སོགས་པའོ། །དྲུག་ཅེས་བྱ་བ་ནི་དྲུག་པོ་ཉིད་དེ་ལྷག་པའམ། ཆད་པ་མ་ཡིན་པའོ། །རོ་དེ་རྣམས་ཀྱི་ཡོན་ཏན་དང༌། རོ་ལ་སོགས་པའི་བྱེ་བྲག་དང༌། དེ་བཞིན་དུ་སྦྱར་ཞིང་འདྲེས་པ་དང༌། རོའི་
རྗེས་ཉིད་དང༌། ཤིན་ཏུ་མྱུར་བར་བརྟག་པ་ལ་སོགས་པའི་དབང་གིས་ཐ་དད་པར་འགྱུར་དུ་ཟད་ཀྱིས། འོན་ཀྱང་དྲུག་པོ་ཉིད་ལས་འདའ་བར་མི་འགྱུར་རོ། །དེ་ལས་དང་པོ་གསུམ་པོ་ནི། །རླུང་འཇོམས་ཚ་སོགས་བད་ཀན་སེལ། །བསྐ་དང་ཁ་དང་མངར་བ་ནི། །མཁྲིས་སེལ་གཞན་དག་བྱེད་པ་ཡིན། །ཞེས་བྱ་བ་ནི། དེ་ལ་རོ་དེ་རྣམས་ཀྱི་ནང་ནས། དང་པོ་ནི་གསུམ་སྟེ། མངར་བ་དང༌། སྐྱུར་བ་དང༌། ལན་ཚྭ་རྣམས་ནི་རླུང་འཇོམས་ཤིང་ཞི་བར་བྱེད་པ་ཡིན་ནོ། །གཞན་དག་ཚ་བ་དང༌། ཁ་བ་དང༌། བསྐ་བ་གསུམ་པོ་དག་ནི་རླུང་དེ་ཉིད་སྐྱེད་པར་བྱེད་ཅིང༌། འཁྲུགས་པར་བྱེད་པ་ཡིན་ནོ། །ཚ་སོགས་བད་ཀན་སེལ་ཞེས་བྱ་བ་ནི། ཚ་བ་དང༌། ཁ་བ་དང༌། བསྐ་བ་གསུམ་ནི་བད་ཀན་སེལ་བ་ཡིན་ལ། མངར་བ་དང༌། སྐྱུར་བ་དང༌། ལན་ཚྭ་སྟེ་གསུམ་པོ་གཞན་དག་ནི་བད་ཀན་སྐྱེད་པ་ཡིན་ནོ། །བསྐ་བ་དང། ཁ་བ་དང༌། མངར་བས་ནི་མཁྲིས་པ་སེལ་བ་ཡིན་ནོ། །སྐྱུར་བ་དང༌། ལན་ཚྭ་དང༌། ཚ་བ་སྟེ་གཞན་དག་ནི་མཁྲིས་པ་དེ་ཉིད་སྐྱེད་པར་བྱེད་པ་ཡིན་ནོ། །དེས་ནི་འདི་སྐད་སྟོན་པར་འགྱུར་ཏེ། མངར་བ་ནི་རླུང་དང་མཁྲིས་པ་སེལ་ཞིང་བད་ཀན་སྐྱེད་པ་ཡིན་ནོ། །སྐྱུར་བ་ནི་རླུང་སེལ་ཞིང་བད་ཀན་དང་མཁྲིས་པ་སྐྱེད་པ་ཡིན་ནོ། །ལན་ཚྭ་ནི་རླུང་སེལ་ཞིང་བད་ཀན་དང་མཁྲིས་པ་སྐྱེད་པ་ཡིན་ནོ། །ཚ་བ་ནི་བད་ཀན་སེལ་ཞིང་རླུང་དང་མཁྲིས་པ་སྐྱེད་པ་ཡིན་ནོ། །ཁ་བ་ནི་བད་ཀན་དང་མཁྲིས་པ་སེལ་ཞིང་རླུང་སྐྱེད་པ་ཡིན་ནོ། །བསྐ་བ་ནི་བད་ཀན་དང་མཁྲིས་པ་སེལ་ཞིང་རླུང་སྐྱེད་པ་ཡིན་ནོ། །རོ་དེ་རྣམས་ཀྱི་རྟེན་གྱི་རྫས་རྣམ་པ་གསུམ་ཡོད་པར་བཤད་པ་ནི། དེ་ལྟར་རྫས་ནི་རྣམ་པ་གསུམ། །ཞི་འཁྲུགས་ཐ་མལ་གནས་ལ་ཕན། །ཞེས་སྨོས་པ་ཡིན་ནོ། །དེ་ལྟར་ཞེས་པ་ཚུལ་འདིས་རྫས་ཞི་བ་ལ་སོགས་པའི་དབྱེ་བས་རྣམ་པ་གསུམ་དུ་འགྱུར་བ་ཡིན་གྱི། རྣམ་པ་གཞན་གྱིས་ནི་གཉིས་སམ། ཡང་ན་རྣམ་པ་དུ་མ་ཉིད་ཡིན་ནོ་ཞེས་སོ། །དེ་ལྟར་གྱི་སྒྲས་ནི་དམ་པའི་དོན་དུ་བཤད་པ་ཡིན་ནོ། །དེ་ལ་གནོད་པ་གང་འཁྲུགས་པར་གྱུར་པ་ཞི་བར་གྱུར་པ་དེ་ནི་ཞི་བ་སྟེ། དཔེར་ན་ཏིལ་མར་དང༌། མར་དང༌། སྦྲང་རྩི་ལྟ་བུའོ། །དེ་ལ་
ཏིལ་མར་ནི་སྣུམ་པ་དང༌། དྲོ་བ་དང༌། ལྕི་བ་དང་ལྡན་པས་རླུང་གི་དེ་དང་མི་མཐུན་པའི་མཚན་ཉིད་ཞི་བར་བྱེད་པ་ཡིན་ལ། མར་སར་ནི་མངར་བ་དང་བསིལ་བ་དང་བརྟན་པའི་ཡོན་ཏན་དང་ལྡན་པས། དེ་དང་མི་མཐུན་པའི་མཚན་ཉིད་དང་ལྡན་པའི་མཁྲིས་པ་སེལ་བ་ཡིན་ནོ། །སྦྲང་རྩི་ནི་རྩུབ་པ་དང༌། རྣོ་བ་དང༌། བསྐ་བ་དང་ལྡན་པས་དེ་དང་མི་མཐུན་པའི་མཚན་ཉིད་ཅན་བད་ཀན་ཞི་བར་བྱེད་དོ། །དེ་ལ་འཁྲུགས་པ་ནི་གང་རླུང་ལ་སོགས་པའི་གནོད་པ་རྣམས་དང༌། བཅུད་ཀྱི་དངས་མ་ལ་སོགས་པའི་ལུས་ཟུངས་རྣམས་དང༌། གཅིན་ལ་སོགས་པའི་དྲི་མ་རྣམས་འཁྲུགས་པར་བྱེད་པ་ནི་འཁྲུགས་པའོ། །དེ་ནི་དཔེར་ན་ནས་ཐུག་དང༌། བ་ཏ་ལ་དང༌། མ་ཤ་དང༌། ཉ་ཤ་དང༌། རྡོ་གུ་རློན་པ་དང༌། ཡུངས་ཀར་དང༌། ཞོ་སར་པ་དང༌། ཕྲུམ་དང༌། མི་མཐུན་པའི་ཁ་ཟས་ཉ་དང་འོ་མ་ལྷན་ཅིག་བཟའ་བ་ལྟ་བུ་ལ་སོགས་པའོ། །ཐ་མལ་པར་གནས་པ་ལ་ཕན་པ་ནི་གནོད་པ་ནས་དྲི་མའི་མཐར་ཐུག་གི་བར་དུ་རང་གི་ཚད་དང་ལྡན་པར་གནས་པ་ནི། མཉམ་པར་འཇུག་ཅིང་ཐ་མལ་བར་གནས་པ་སྟེ། དེ་ལ་ཕན་པའི་རྫས་གང་ཡིན་པ་དེ་ནི་ཐ་མལ་གནས་ལ་ཕན་ཞེས་བྱ་སྟེ། དེ་ནི་དུས་སྤྱད་པ་ལ་བརྟེན་པའི་སྐབས་སུ་འོག་ནས་བཤད་པ་དང༌། དེ་བཞིན་དུ་ཟས་ཀྱི་ཚོད་རན་པར་བཟའ་བའི་ལེའུ་ལས་བཤད་པ་དང༌། སཱ་ལུ་རྩ་སྣར་དང༌། དྲུག་ཅུ་པ་དང༌། ནས་དང༌། གྲོ་དང༌། སྲོག་ཆགས་སྐམས་ལ་གནས་པའི་ཤ་དང༌། འཚོ་བྱེད་ཀྱི་ཚོད་མ་ལ་སོགས་པ་དང༌། ཞོ་ག་ཆུ་དང༌། འོ་མ་ལ་སོགས་པ་དང༌། དེ་བཞིན་དུ་གང་སྟོབས་སྐྱེད་ཅིང་བཅུད་ཀྱིས་ལེན་པ་དང༌། རོ་ཙ་བར་བྱེད་པ་དང༌། རྣམ་པ་ཐམས་ཅད་དུ་བཟའ་བར་བྱ་བ་ཉིད་དུ་བསྟན་པ་རྣམས་སོ། །དེའི་ནུས་པ་བཤད་པ་ནི། དེ་ལ་ཚ་བསིལ་ཕུལ་བྱུང་བས། །ནུས་བ་རྣམ་པ་གཉིས་སུ་བཤང༌། །ཅེས་བྱ་བ་ཡིན་ཏེ། དེ་ལ་ཞེས་པ་རྫས་དེ་ལ་ནུས་པ་རྣམ་པ་ཉི་ཤུ་ཡོད་པའི་ནང་ནས། ཚ་བ་དང་བསིལ་བདག་ནི་ཕུལ་དུ་བྱུང་བ་ཡིན་པས་ནུས་པ་ཞེས་བྱ་སྟེ། ཚེའི་རིག་བྱེད་ཐམས་ཅད་ལས་ཚ་བ་དང་བསིལ་བའི་ནུས་པ་གཉིས་པོ་ཉིད་དུ་བཤད་པ་ནི། རྒྱུ་དང་འབྲས་བུའི་དོན་ཡིན་ནོ། །དེ་ལ་
ནུས་པ་ནི་ཡོན་ཏན་ལ་བྱ་ལ། ཚ་བ་དང་བསིལ་བ་ཕུལ་དུ་བྱུང་བ་ནི། ཚ་བ་དང་བསིལ་བ་ཁྱད་པར་དུ་འཕགས་པ་ཉིད་དེ། ལ་ལ་ནི་ཚ་བའི་ནུས་པས་ཕུལ་དུ་བྱུང་བས་ཚ་བའི་ནུས་པའི་མིང་ཐོབ་ལ། དེ་བཞིན་དུ་བསིལ་བའི་ནུས་པས་ཕུལ་ཏུ་བྱུང་ཞིང༌། བསིལ་བའི་ནུས་པས་ཁྱད་པར་དུ་འཕགས་པ་ཉིད་ཀྱིས་བསིལ་བའི་ནུས་པའི་མིང་ཐོབ་བོ། །གལ་ཏེ་རྫས་རྣམ་པ་སྣ་ཚོགས་པ་ཡོད་མོད་ཀྱི། འོན་ཀྱང་འགྲོ་བ་ནི་མེ་དང་ཟླ་བའི་བདག་ཉིད་ཅན་ཡིན་པའི་ཕྱིར། ནུས་པའི་རྣམ་པ་གཉིས་ཁོ་ནར་བཤད་དོ། །སྨན་ཞུ་བའི་རྗེས་བཤད་པ་ནི། རྫས་ཀྱི་ཞུ་བ་རྣམ་གསུམ་སྟེ། །མདར་སྐྱུར་ཚ་བའི་བདག་ཉིད་ཅན། །ཞེས་སྨོས་པ་ཡིན་ཏེ། ཞུ་བ་ནི་རྣམ་པ་གསུམ་སྟེ། རྫས་ཐམས་ཅད་ཡོངས་སུ་ཞུ་བར་གྱུར་པའི་དུས་སུ། འབྲས་བུ་ལས་རྗེས་སུ་དཔག་པར་བྱ་སྟེ། ཕོ་བའི་མེ་དང་ཕྲད་པ་ལས། རོ་རྣམས་རང་གི་རང་བཞིན་ལས་གཞན་དུ་འགྱུར་ལ། དེ་ནི་རྣམ་པ་གསུམ་ཉིད་ཡིན་ཀྱི། རོ་དྲུག་ཡོད་ཀྱང་དྲུག་ནི་མ་ཡིན་ནོ། །དེ་ལ་རྫས་ནི་ལ་ལ་ནི་མངར་བར་ཞུའི། ལ་ལ་ནི་སྐྱུར་བར་ཞུ། ལ་ལ་ཚ་བར་ཞུ་བ་ཡིན་ནོ། །དེ་ལ་མངར་བ་དང༌། ལན་ཚྭ་ནི་མངར་བར་ཞུ་བའོ། །སྐྱུར་བ་ནི་སྐྱུར་བར་ཞུ་བའོ། །ཚ་བ་དང༌། ཁ་བ་དང༌། བསྐ་བ་ནི་ཚ་བར་རོ། །དེ་ནི་འབྲས་བུ་ལས་རྗེས་སུ་དཔག་པ་ཡིན་ནོ། །དེ་ཡང༌། ཕོ་བའི་མེ་དང་ཕྲད་པ་ལས། །གང་ཞིག་རོ་ནི་གཞན་གྱུར་པ། །རོ་རྣམས་ཞུ་བའི་ཐ་མ་དག །དེ་ནི་ཞུ་བ་ཞེས་བཤད་དོ། །ཞེས་འབྱུང་བ་ཡིན་ནོ། །དེ་བས་ན་ཁྱད་པར་དུ་སྨིན་པར་གྱུར་པ་ལས་ཞུ་བ་ཞེས་བྱའོ། །ཅུང་ཟད་སྨིན་པ་ནི་མ་ཡིན་ནོ། །དེ་བཞིན་དུ་མཐོ་བཙུན་དྲང་སྲོང་ཙ་ར་ཀས་ཀྱང༌། རྫས་ཀྱི་རོ་ནི་འབབ་པ་ན། །ལས་ཀྱི་མཐའ་ནི་ཞུ་བ་ཡིན། །ཇི་སྲིད་གནས་པ་ཡོན་ཏན་ཏེ། །འདུས་པ་ལས་ནི་ཤེས་པར་འགྱུར། །ཞེས་བཤད་པ་ཡིན་ནོ། །དེ་ལྟར་ན་ལས་བྱས་པ་རྗེས་སུ་དཔག་པའི་ཚུལ་གཅིག་པའི་གནས་སྐབས་ཕོ་བའི་མེ་དྲོད་དང་ཕྲད་པ་ལས་རོ་རྣམས་རོ་གཞན་དུ་གྱུར་པ་གང་ཡིན་པ་དེ་ཉིད་ནི་ཞུ་བ་ཞེས་བྱའོ། །གང་ཕོ་བ་མེ་དང་ཕྲད་པ་ཙམ་གྱིས་རོ་རྣམས་གནས་སྐབས་དུ་མར་འགྱུར་ཏེ། དང་པོ་
ནི་མངར་བའོ། །དེའི་རྗེས་ཐོགས་ལ་དེ་ཉིད་སྨིན་པ་ནི་སྐྱུར་བའོ། །དེ་ལས་ཀྱང་སྨིན་པའི་མཐར་ཐུག་པ་ན་ཚ་བར་གྱུར་པ་ལ་ནི་མི་བྱའོ། །རྫས་ཀྱི་ཡོན་ཏན་རྣམས་བཤད་པ་ནི། ཡོན་ཏན་ལྕི་རྡུལ་བསིལ་དང་སྣུམ། །འཇམ་དང་བསྐ་བ་མཉེན་དང་བརྟན། །ཕྲ་དང་བཅས་ཤིང་སྐམ་བག་ཅན། །དེ་བཟློག་པ་ནི་ཉི་ཤུ་ཡིན། །ཞེས་བྱ་བ་ཡིན་ཏེ། དེ་ལ་རྫས་ཀྱི་ཡོན་ཏན་ནི། ལྕི་བ་ལ་སོགས་པ་བཅུ་ཡིན་ལ། དེ་ལས་བཟློག་པ་དང༌། ཉི་ཤུ་ཡིན་པར་ཤེས་པར་བྱ་སྟེ། འདི་དག་རིམ་གྱིས་བཟློག་པ་ནི་ཡང་བ་དང༌། རྣོ་བ་དང༌། ཚ་བ་དང༌། རྩུབ་པ་དང༌། སླ་བ་དང༌། སྲ་བ་དང༌། གཡོ་བ་དང༌། སྦོམ་པ་དང༌། སླ་བག་ནལ་ནལ་པོ་ཡིན་ནོ། །དེ་ལྟར་ན་གོ་བཟློག་པ་ནི། དེ་དག་ཡིན་པས་སྤྱིར་ཉི་ཤུར་འགྱུར་རོ། །ནད་ཀྱི་རྒྱུ་བཤད་པ་ནི། དུས་དོན་ལས་ཀྱི་སྦྱོར་བ་རྣམས། །དམན་དང་ལོག་པ་ལྷག་པ་དང༌། །ཡང་དག་སྦྱོར་བས་ནད་དང་ནི། །ནད་མེད་རྒྱུ་གཅིག་ཡིན་ཞེས་བྱ་བ་ཡིན་ཏེ། དེ་ལ་དུས་ནི་བསིལ་བ་དང༌། ཚ་བ་དང༌། ཆར་འབབ་བའི་དུས་ཏེ་གསུམ་མོ། །དོན་ནི་འབྱུང་བ་ཆེན་པོའི་ཡོན་ཏན་སྒྲ་དང༌། རེག་བྱ་དང༌། གཟུགས་དང༌། དྲི་དང༌། རོའོ། །དེ་ཡང་ལུང་ལས། དོན་ནི་སྒྲ་སོགས་ཡིན་ཞེས་བྱ། །སྤྱོད་ཡུལ་ཡུལ་དང་ཡོན་ཏན་ཡིན། །ཞེས་བཤད་པ་ཡིན་ནོ། །ལས་ནི་བྱ་བ་སྟེ། ལུས་དང་ངག་དང་ཡིད་ཀྱི་ཀུན་ཏུ་སྤྱོད་པའོ། །དེ་ལྟར་དུས་དང་དོན་དང་ལས་ནི་དུས་དོན་ལས་ཏེ། དེ་རྣམས་ཀྱི་སྦྱོར་བ་ནི་འབྲེལ་པའོ། །ཇི་ལྟ་བུ་ཞེ་ན། དམན་དང་ལོག་པ་ལྷག་པ་དང༌། །ཞེས་བྱ་བ་དང༌། དེ་བཞིན་དུ་ཡང་དག་པའི་སྦྱོར་བ་ཡིན་ཏེ། གང་དུས་ལ་སོགས་པའི་སྦྱོར་བ་དམན་པ་དང༌། ལོག་པ་ལྷག་པ་སྟེ། དེ་ནི་ནད་ཀྱི་རྒྱུ་གཅིག་པུ་ཡིན་ལ། དེ་རྣམས་ཉིད་ཀྱི་ཡང་དག་པའི་སྦྱོར་བ་གང་ཡིན་པ་དེ་ནི་ནད་མེད་པའི་རྒྱུ་གཅིག་པུ་ཡིན་ནོ། །དེ་ལ་ཡང་དག་པའི་སྦྱོར་བ་སྨོས་པ་ནི་ནད་དང་ནད་མེད་པའི་རྒྱུ་གོ་རིམས་བཞིན་དུ་ཤེས་པར་བྱ་བའི་ཕྱིར་འདི་ལོགས་ཤིག་ཏུ་བསྟན་པ་ཡིན་ནོ། །རྒྱུ་གཅིག་ཡིན་ཞེས་བྱ་བ་ནི་རྒྱུ་གཅིག་པུ་ཡིན་པ་སྟེ། གཅིག་གི་སྒྲ་ནི་གཙོ་བོར་གྱུར་པའི་ཚིག་ཡིན་ནོ། །དེ་ཡང་དཔེར་ན་གཞུ་འཛིན་པ་ནི་སྲིད་སྒྲུབ་གཅིག་
པུ་ཡིན་ནོ་ཞེས་ཟེར་བ་ལྟ་བུའོ། །དུས་ཀྱི་སྦྱོར་བ་དམན་པ་ནི་རང་གི་རང་བཞིན་ལས་ཉམས་པའོ། །ལྷག་པའི་སྦྱོར་བ་ནི་རང་གི་རང་བཞིན་ལས་ལྷག་པར་གྱུར་པའོ། །ལོག་པའི་སྦྱོར་བ་ནི་རང་གི་རང་བཞིན་ལས་ཕྱིན་ཅི་ལོག་ཏུ་བྱེད་པའོ། །དེ་ཡང་དཔེར་ན་དམན་བའི་བསིལ་བ་དང། དམན་པའི་ཚ་བ་དང་དམན་པའི་ཆར་ནི་དམན་པའི་སྦྱོར་བའོ། །དཔེར་ན་གྲང་བའི་དུས་ཀྱི་གནས་སྐབས་སུ་ཤིན་ཏུ་གྲང་བ་ནི་ལྷག་བའི་སྦྱོར་བའོ། །དཔེར་ན་ལྷག་པར་བསིལ་བ་དང༌། ལྷག་པར་ཚ་བ་དང༌། ལྷག་བར་ཆར་འབབ་བ་ནི་ལྷག་པའི་སྦྱོར་བ་སྟེ། །སྦྱོར་བ་འདི་གསུམ་ནི་ནད་ཀྱི་རྒྱུ་ཡིན་ནོ། །མཉམ་པའི་སྦྱོར་བ་ནི་ཡང་དག་པའི་སྦྱོར་བ་སྟེ། རང་བཞིན་ཇི་ལྟ་བ་བཞིན་དུ་གནས་པ་ནི་ནད་མེད་པའི་རྒྱུ་ཡིན་ནོ། །ཡང་དོན་ནི་དབང་པོ་རྣམས་ཀྱི་རང་རང་གི་དོན་དམན་པ་ལ་སྦྱོར་བ་ནི་དམན་པའི་སྦྱོར་བའོ། །ཤིན་ཏུ་སྦྱོར་བ་ནི་ལྷག་པར་སྦྱོར་བའོ། །རྩུབ་ཅིང་མངོན་པར་མི་འདོད་པ་ལ་སོགས་པའི་སྦྱོར་བར་གྱུར་པ་ནི་ལོག་པའི་སྦྱོར་བའོ། །ལུས་ལ་སོགས་པའི་ལས་དམན་པ་ལ་འཇུག་པ་ནི་དམན་པའི་སྦྱོར་བའོ། །ལྷག་པར་འཇུག་པ་ནི་ལྷག་པའི་སྦྱོར་བའོ། །བཤང་གཅི་ལ་སོགས་པའི་ཤུགས་འགགས་པ་དང༌། ཕྱེད་ཙམ་ཟ་ཞིང་མང་དུ་སྨྲ་བ་ལ་སོགས་པ་དང༌། འདོད་ཆགས་དང༌། ཞེ་སྡང་ལ་སོགས་པ་རང་རང་གི་བདག་ཉིད་ཀྱིས་འོག་ནས་བཤད་པ་རྣམས་ནི་ལོག་པའི་སྦྱོར་བའོ། །ཐམས་ཅད་ཀྱང་མཉམ་པར་འཇུག་པ་ནི་ཡང་དག་པའི་སྦྱོར་བའོ། །དེ་བས་ན་དམན་པ་ལ་སོགས་པའི་སྦྱོར་བ་གསུམ་ནི་ནད་ཀྱི་རྒྱུ་ཡིན་ནོ། །ཡང་དག་པའི་སྦྱོར་བ་ནི་ནད་མེད་པའི་རྒྱུ་ཡིན་ནོ། །ནད་དང་ནད་མེད་པའི་ཞེས་གང་ལ་བྱ་ཞེ་ན། ནད་ཀྱི་ཉེས་པ་མ་སྙོམས་པ་ཡིན་ནོ། །ཉེས་པ་སྙོམས་པ་ནད་མེད་ཉིད། །ཅེས་བཤད་པ་ཡིན་ནོ། །རླུང་ལ་སོགས་པའི་ཉེས་པ་རྣམས་གཅིག་གམ་གཉིས་སམ་གསུམ་རང་གི་ཚད་ལས་འཕེལ་ལམ་ཟད་པར་གྱུར་ན། ནད་ཀྱི་རྒྱུ་ཡིན་པས་ནད་ཉིད་ནི་མ་སྙོམས་པ་ཡིན་པར་བརྟག་པར་བྱ་སྟེ། རང་གི་རང་བཞིན་ལས་གཡོས་པར་གྱུར་པ་ཡིན་ལ། དེ་བས་ན་རྒྱུ་དང་འབྲས་བུ་ཐ་མི་དད་བའི་ཉེ་བར་གདགས་པས་ནད་ཅེས་བྱའོ། །ཉེས་པ་རྣམས་
སྙོམས་ཤིང་རང་གི་རང་བཞིན་ལས་མི་འགྱུར་བ་མཉམ་པར་གྱུར་པ་དེ་ནི་ནད་མེད་པ་ཉིད་ཅེས་བྱ་སྟེ། ཐ་མལ་བར་རང་བཞིན་དུ་གནས་པ་ཞེས་བྱའོ། །དེའི་དབྱེ་བ་བསྟན་པ་ནི། །དེ་ལ་ནད་ནི་རང་བཞིན་གནས། །གློ་བུར་ཆ་ཡིས་གཉིས་སུ་བཤད། །ཅེས་བཤད་པ་ཡིན་ནོ། །དེ་ལ་ཞེས་པ་ནད་དང་ནད་མེད་པ་དེ་དག་ལ་ནད་ནི་རང་བཞིན་དུ་གནས་པ་དང༌། གློ་བུར་བའི་དབྱེ་བས་གཉིས་སུ་བཤད་དོ། །དེ་ལ་རང་བཞིན་གྱིས་གནས་པ་ནི། རླུང་ལ་སོགས་པའི་ཉེས་པ་ལས་བྱུང་བའོ། །གློ་བུར་བ་ནི་ཕྱི་རོལ་ནས་འོངས་པའོ། །དེ་ཡང་སློབ་དཔོན་གྱིས། ཉེས་པ་གསུམ་ལས་བྱུང་བ་ནི། རང་བཞིན་གྱིས་གནས་པ་ཡིན་ལ། ཕྱི་རོལ་གྱི་རྒྱུ་ལས་བྱུང་བའི་གློ་བུར་བ་ཡིན་ནོ། །ཞེས་བཤད་པ་ཡིན་ནོ། །འདི་གཉིས་ཀྱི་ཁྱད་པར་ནི་འདི་ཡིན་ཏེ། རང་བཞིན་གྱིས་གནས་པའི་ནད་རླུང་ལ་སོགས་པ་ནི། དང་པོ་མ་སྙོམས་པར་གྱུར་ནས། ཕྱིས་ཟུག་གཟེར་བསྐྱེད་པ་ཡིན་ལ། ཡང་གློ་བུར་བ་ནི་དང་པོ་ཉིད་དུ་ཟུག་གཟེར་བསྐྱེད་ནས། དེར་རླུང་ལ་སོགས་པ་འཁྲུགས་པར་འགྱུར་རོ། །རང་བཞིན་གྱིས་གནས་པ་དང༌། གློ་བུར་བའི་ཁྱད་པར་གྱིས་ཕྱེ་བའི་ནད་འདི་གཉིས་ཀྱིས་སེམས་ཀུན་ཏུ་གདུང་བ་ཡིན་པར་ཤེས་པར་བྱའོ། །གང་གི་ཕྱིར་འདི་ལྟར་ལུས་དང་སེམས་ནི་ནད་ཀྱི་གནས་ཉིད་དུ་གནས་པ་ཡིན་ཏེ། ལུས་གཅིག་བུའམ་སེམས་གཅིག་པུ་ནི་མ་ཡིན་ནོ། །དེ་བས་ན་དེའི་རྗེས་ཐོགས་ལ་འདི་སྐད་ཅེས་བཤད་པ་ཡིན་ཏེ། དེ་རྣམས་ལུས་སེམས་དབྱེ་བ་ཡིས། །གནས་ཀྱང་རྣམ་པ་གཉིས་ཡིན་ནོ། །ཞེས་བྱ་བ་ལས་ཡང་རང་བཞིན་གྱིས་གནས་པ་དང༌། གློ་བུར་བའི་ནད་དེ་རྣམས་ནི་ལུས་དང་སེམས་ཀྱི་དབྱེ་བས་གནས་རྣམ་པ་གཉིས་ཡིན་ཏེ། རིམས་དང༌། ཁྲག་དང༌། མཁྲིས་པ་དང༌། ལུད་བ་ལ་སོགས་པའི་གནས་ནི་ལུས་ཡིན་ལ། མྱོས་བ་དང༌། བརྒྱལ་བ་དང༌། སྒྱིད་ལུག་པ་དང༌། གདོན་དང༌། འབྱུང་པོ་དང༌། སྨྱོ་བ་དང༌། དྲན་པ་ཉམས་པ་དང༌། འདོད་ཆགས་དང༌། ཞེ་སྡང་ལ་སོགས་པའི་གནས་ནི་སེམས་ཡིན་ནོ། །དེ་ཡང་འདི་ལས་གནས་པས་ན་གནས་སོ། །དྲིས་པ་ལུས་ཀྱི་ནད་སྐྱེད་པའི་རྒྱུ་ནི་རླུང་ལ་སོགས་
པའི་ཉེས་པ་རབ་ཏུ་འཁྲུགས་པ་ཡིན་པར་བཤད་ཀྱི། སེམས་ཀྱི་ནད་ཀྱི་རྒྱུ་གང་ཞིག་ཡིན་ཞེ་ན། དེའི་ཕྱིར་བཤད་པ་ནི། འདོད་ཆགས་གཏི་མུག་ཀྱང་ཡིད་ཀྱི། །ཉེས་པ་གཉིས་སུ་བསྟན་པ་ཡིན། །ཞེས་བྱ་བ་ཡིན་ཏེ། ཡིད་ནི་སེམས་ལ་བྱ་ལ། དེ་ནི་འདོད་ཆགས་དང་གཏི་མུག་བདེ་ཞིང་མ་རིག་པ་ལས་བྱུང་བ་ཡིན་ལ། འདིར་ཡང་གཙོ་བོར་གྱུར་པས་དང་པོར་འདོད་ཆགས་སྨོས་པ་ཡིན་ནོ། །ཀྱང་ཞེས་བྱ་བའི་སྒྲས་ནི་རླུང་ལ་སོགས་པ་ཡང་ཉེ་བར་བསྡུ་བའི་དོན་ཡིན་ཏེ། གང་གི་ཕྱིར་དེ་རྣམས་ཀྱང་སེམས་ལ་བརྟེན་ནས། རྣམ་པར་འགྱུར་བར་བྱེད་པ་ཡིན་ཏེ། དུས་དག་ཏུ་རླུང་དང་མཁྲིས་པ་དང་བད་ཀན་དང་ལྡན་པ་དང་འདུས་པ་དང༌། དུག་གི་རྒྱུ་ལས་བྱུང་བའི་སྨྱོ་ནད་དྲུག་ཡོད་པ་ཡིན་ནོ། །བསྟན་པ་ཡིན་ཞེས་བྱ་བ་ནི་ཚེའི་རིག་བྱེད་ཀྱི་བསྟན་བཅོས་དག་ཏུ་ཚིག་གིས་མདོ་ཙམ་དུ་བསྟན་གྱི། རླུང་ལ་སོགས་པ་བཞིན་དུ་འདོད་ཆགས་དང་གཏི་མུག་གི་མཚན་ཉིད་མ་ལུས་པར་ནི་མ་ཡིན་ནོ། །འདིར་རང་བཞིན་གྱིས་གནས་ཀྱི་མཚན་ཉིད་ལ་སོགས་པས། རླུང་ལ་སོགས་པའམ་མ་ལུས་པ་བཤད་པ་ཡིན་གྱི། འདོད་ཆགས་དང་གཏི་མུག་ནི་མ་ཡིན་ནོ། །ནད་ཀྱིས་བཅོམ་པའི་ལུས་ཤེས་པར་བྱ་བའི་ཐབས་བསྟན་པ་ནི། ནད་པ་བལྟ་དང་རིག་པ་དང༌། །དྲིས་པ་ཡིས་ནི་ཡོངས་སུ་བརྟག །ཅེས་བྱ་བ་སྨོས་པ་ཡིན་ཏེ། ནད་ཡོད་པས་ན་ནད་པ་སྟེ་ནད་ཀྱིས་གདུངས་པའོ། །དེ་ནི་བལྟ་བ་ལ་སོགས་པས་ཡོངས་སུ་བརྟག་པར་བྱའོ། །དེ་ལ་བལྟ་བ་ནི་མིག་གིས་ཏེ། མིག་སེར་བ་ལ་སོགས་པས་ཉམ་ཐག་པ་རྣམས་ལ་མདོག་སེར་བ་དང༌། དཀར་པོར་སྣང་བ་དང༌། དབྱིབས་ཀྱི་ཚད་ཀྱིས་འཕེལ་འགྲིབ་དང༌། མདངས་དང་བཤང་གཅི་དང༌། སྐྱུགས་པ་ལ་སོགས་པས་བརྟག་པར་བྱའོ། །རེག་པ་ནི་ལག་པ་དང༌། ལུས་ཀྱི་རེག་པས་རིམས་དང༌། སྐྲན་དང༌། མ་ཞུ་བས་ཉེན་པ་དང༌། དེ་བཞིན་དུ་གྲང་བ་དང༌། ཚ་བ་དང༌། རེངས་པ་དང༌། འདར་བ་དང༌། འཇམ་པ་དང༌། རྩུབ་པ་ལ་སོགས་པ་རེག་པས་བརྟག་པ་དང༌། དྲིས་པ་སྟེ་གཟེར་དང༌། ཡི་ག་འཆུས་བ་དང༌། སློན་བ་དང༌། ལྟོ་སྲ་བ་དང༌། སྙི་བ་དང༌། རྨི་
ལམ་དུ་མཐོང་བ་དང༌། བསམ་པ་དང༌། ན་ཚོད་དང༌། ནད་ཀྱི་མགོ་གང་ནས་ཟུག་པ་དང༌། སྐར་མ་དང༌། མཛའ་བོ་དང༌། དགྲ་བོ་དང༌། བདེ་བ་དང༌། སྡུག་བསྔལ་ལ་སོགས་པ་དང༌། ནད་པའི་ཚིག་ལས་ཡོངས་སུ་བརྟག་པར་བྱའོ། །ནད་ཀྱི་བྱེ་བྲག་ཤེས་པར་བྱ་བའི་ཐབས་བཤད་པ་ནི། ནད་ཀྱི་གཞི་ཡི་དང་པོའི་ཚུལ། །མཚན་ཉིད་ཉེར་བསྟན་ཐོབ་པ་ཡིན། །ཞེས་བྱ་བ་ཡིན་ཏེ། ནད་ནི་ནད་གཞི་ལ་སོགས་པ་ལྔས་ཡོངས་སུ་བརྟག་པར་བྱ་སྟེ། ནད་གཞི་དང་རྒྱུ་དང་བྱེད་བ་ཞེས་བྱ་བ་ནི་མིང་གི་རྣམ་གྲངས་སོ། །དེ་ཡང་ཉེ་བ་དང་རིང་བའི་བྱེ་བྲག་གིས་རྣམ་པ་གཉིས་ཡིན་ལ། ཉེ་བ་ཡང་ཉེ་བ་དང་ཤིན་ཏུ་ཉེ་བའི་དབྱེ་བས་གཉིས་སོ། །དེ་ལ་ཉེ་བ་ནི་རྩུབ་པ་དང༌། ཡང་བ་དང༌། གྲང་བ་ལ་སོགས་པའི་རྫས་དང་འདྲེས་པར་གྱུར་པས་སོ། །ཤིན་ཏུ་ཉེ་བ་ནི་དཔེར་ན་རླུང་ལ་སོགས་པའི་ཉེས་པ་རྣམས་གང་དག་གི་རྗེས་ཐོགས་ཉིད་ལ་ནད་འབྱུང་བར་འགྱུར་བས་འཁྲུགས་པར་འགྱུར་རོ། །རིང་བ་ནི་གང་རིམས་ལ་སོགས་པའི་དང་པོའི་དུས་ཉིད་དུ་འབྱུང་བ་སྟེ། དཔེར་ན་ཕྱི་རོལ་དུ་ཤ་བཀྲ་ལ་སོགས་པ་འབྱུང་བ་དང༌། མཛེ་དང་གཅིན་ནད་ལ་སོགས་པ་སྟེ། དེས་ན་འདི་ལྟ་བུའི་དོན་བསྐྱེད་པ་དང༌། འདི་ལྟ་བུའི་ནད་ཀྱི་རྒྱུ་ཉིད་དུ་ཉེ་བར་གནས་པ་ཡིན་ལ། དེ་ལྟར་བྱུང་བ་ཡིན་པས་དེའི་ཕྱིར་ནད་གཞི་ལས་ནད་ཤེས་པར་བྱའོ། །དང་པོའི་ཚུལ་ནི་ཕྱིས་འབྱུང་བའི་ནད་མི་གསལ་བའི་ཁྱད་པར་གནས་པའི་མཚན་ཉིད་དེ། རིམས་ལ་སོགས་པའི་ནད་འབྱུང་བར་འདོད་པ་ན། རླུང་ལ་སོགས་པའི་གནོད་པའི་ཁྱད་པར་གྱིས་ཁྱད་པར་མི་སྣང་བ་ལ། གང་གིས་སྣང་བར་འགྱུར་ཞིང་ཅི་ནས་ཆུང་བ་ཉིད་ཀྱིས་གང་མི་གསལ་ཞིང་རྟགས་མངོན་དུ་མ་གྱུར་པ་དེ་ནི་དང་པོའི་ཚུལ་ལོ། །མཚན་ཉིད་ཀྱང་དང་པོའི་ཚུལ་ལས་མཚན་ཉིད་ཐ་དད་པ་སྟེ། གང་གིས་ཉེས་པ་མ་ལུས་པའི་བྱེ་བྲག་གིས་ཁྱབ་པའི་རྟགས་དང་ལྡན་པར་ནད་གསལ་བ་ཉིད་དུ་མཐོང་ཞིང་ཤེས་པའོ། །ཉེར་བསྟེན་ནི་བདེ་བ་དང༌། རྗེས་སུ་འབྲེལ་པའི་ཁ་ཟས་ལ་སོགས་པ་ལ་སྤྱོད་པ་སྟེ། འདི་ལྟ་བུའི་ཁ་ཟས་ལ་སོགས་པས་ནི། འདིའི་ནད་འདི་ན་མ་བྱུང་བ་འདི་ལྟ་བུས་ནི་དེང་འབྱུང་བར་
འགྱུར་རོ་ཞེས་བསྟན་པ་ལས་ནད་འདི་ཡིན་ནོ་ཞེས་ཤེས་པའོ། །ནད་དེ་ནི་གསོ་ར་རུང་ཞིང་བདེ་བའི་རྒྱུ་ཡིན་པས་ན་བདེ་བ་ཐོབ་པ་ཡིན་ནོ། །ཐོབ་པ་དང་རྫོགས་པ་དང་ཡང་དག་པར་ཐོབ་པ་དང་འོངས་པ་དང༌། སྐྱེས་པ་ཞེས་བྱ་བ་ནི་དོན་གྱི་རྣམ་གྲངས་ཡིན་ནོ། །དེ་ཡང་འདི་ལྟ་བུའི་མི་མཐུན་པ་དང༌། གནས་འདི་ལྟ་བུ་གནས་པ་དང༌། འདི་ལྟར་རྗེས་སུ་འགྲོ་བ་དང༌། བརྟག་པ་འདི་དང༌། ལམ་འདི་དང་ཉེས་པ་འདི་ཐོབ་པ་ཡིན་ནོ་ཞེས་ཡོངས་སུ་བརྟག་པ་སྟེ། དེ་བས་ན་ཐོབ་ཅིང་མཐར་ཕྱིན་པ་ལས། ནད་འདི་ཡིན་ནོ་ཞེས་ཤེས་པའོ། །ཉེ་བར་བསྟན་པ་ལ་སོགས་པའི་སྐབས་ཀྱི་ཡུལ་དང་དུས་ལ་སོགས་པ་དང་ཉེ་བར་སྦྱར་དགོས་ཏེ། དེ་བས་ན་དེ་གཉིས་ཀྱང་བཤད་པ་ནི། ས་དང་ལུས་ཀྱི་བྱེ་བྲག་གིས། །འདི་ལ་ཡུལ་ས་རྣམ་གཉིས་བཤད། །ཅེས་བྱ་བ་ཡིན་ཏེ། ཚེའི་རིག་བྱེད་ཀྱི་བསྟན་བཅོས་འདི་ལ་ཡུལ་ས་ནི་སློབ་དཔོན་དག་གིས་རྣམ་པ་གཉིས་སུ་བཤད་དོ། །དེ་གང་ཞེ་ན་སའི་བྱེ་བྲག་དང་ལུས་ཀྱི་བྱེ་བྲག་གིས་སོ། །དེ་ལ་ལུས་ཀྱི་ཡུལ་ནི་མགོ་བོ་དང་ལག་པ་ལ་སོགས་པའི་མཚན་ཉིད་དང་ལྡན་པར་གྲགས་པའི་ལུས་ཉིད་དོ། །སའི་ཡུལ་བཤད་པར་བྱ་སྟེ། སྐམས་ཕལ་ཆེར་རླུང་སྐྱེད་ཅིང༌། །རླན་ཅན་བད་ཀན་འཕེལ་བ་ཡིན། །ཆ་མཉམ་ཉེས་པ་མཉམ་པ་སྟེ། །ས་ཡི་ཕྱོགས་ནི་གསུམ་དུ་བཤད། །ཅེས་བྱ་བ་ལ། །ཡང་སའི་ཕྱོགས་ནི་རྣམ་པ་གསུམ་དུ་བཤད་དེ། དེ་ལ་སྐམ་སའི་ཆུ་དང་ཤིང་དང་རི་བོ་ཉུང་ཟད་ཅིག་ཡོད་པ་སྟེ། འོག་ནས་བཤད་དོ། །ཕལ་ཆེར་རླུང་སྐྱེད་ཅིང་ཞེས་བྱ་བ་སྟེ། དེ་ལས་སྐྱེས་པའི་སྨན་ནི་རྩུབ་པ་དང༌། སྲ་བ་ཡིན་པ་དང༌། རི་དགས་ལ་སོགས་པ་ཡང་རླུང་གི་ཤས་ཆེ་བ་ཡིན་ནོ། །རླན་ཅན་ནི་ཆུ་དང༌། ཤིང་མེད་པ་དང༌། རླུང་མེད་པ་དང༌། ཐན་པ་ཉུང་བའོ། །དེ་ནི་བད་ཀན་འཕེལ་བ་ཡིན་ཏེ། དེ་ལས་སྐྱེས་པའི་སྨན་ལ་སོགས་པ་ཡང༌། སྣུམ་ལ་སོགས་པ་དང་ལྡན་པ་ཡིན་ནོ། །ཆ་མཉམ་པ་ནི་མཚན་ཉིད་གཉི་ག་དང་ལྡན་པ་སྟེ། འདྲེས་པའི་ཚུལ་ཅན་ནོ། །ཉེས་པ་མཉམ་པ་སྟེ་ཞེས་བྱ་བ་ནི་རླུང་ལ་སོགས་པའི་ཉེས་པ་ཉམ་པའོ། །སྨན་རྣམས་ཀྱིས་ཡང་དག་པར་སྦྱར་བའི་རྒྱུའི་དུས་བཤད་པ་
ནི། སྐད་ཅིག་ལ་སོགས་ནད་ཀྱི་སྐབས། །དུས་སུ་སྨན་ནི་སྦྱོར་བར་བྱེད། །ཅེས་བྱ་བ་ཡིན་ཏེ། དུས་ནི་རྣམ་པ་གཉིས་ཏེ། སྐད་ཅིག་ལ་སོགས་པའི་མཚན་ཉིད་དང༌། ནད་གྱི་གནས་སྐབས་ཀྱི་མཚན་ཉིད་དོ། །སྨན་ནི་སྦྱར་བར་བྱ་ཞེས་བྱ་བ་ནི་སྨན་གྱི་སྦྱོར་བ་བྱེད་དོ། །དེའི་དོན་རྫོགས་པར་བྱེད་ནུས་སོ་ཞེས་པའི་དོན་ཏོ། །དེ་ལ་སྐད་ཅིག་ནི་གྲགས་པར་ཟད་དོ། །སོགས་པའི་སྒྲས་ནི་ཐང་ཅིག་དང༌། ཡུད་ཙམ་དང༌། ཐུན་གཅིག་དང༌། ཉིན་ཞག་དང༌། ཟླ་བ་ཕྱེད་དང༌། ཟླ་བ་དང༌། དུས་དང༌། ལྷོ་ཕྱོགས་དང༌། བྱང་ཕྱོགས་སུ་འགྲོ་བ་དང༌། ལོ་རྣམས་གཟུང་བར་བྱའོ། །སྐད་ཅིག་ལ་སོགས་པའི་དུས་ཀྱི་དཔེར་བརྗོད་པར་འདི་ལྟར། སྔ་དྲོའི་དུས་སུ་སྐྱུག་སྨན་གཏང༌། །ཉི་མའི་གུང་ལ་འཁྲུ་སྨན་ཏེ། །ཉི་མ་གུང་ལས་ཅུང་ཟད་ཡོལ། །སྨན་ནས་སྨན་ནི་མཁས་པས་གཏང༌། །ཞེས་བཤད་པ་ཡིན་ནོ། །ནད་ཀྱི་གནས་སྐབས་ནི་མ་ཞུ་བ་དང༌། ཞུ་བ་དང༌། དལ་བ་དང༌། བར་མ་དང༌། དྲག་པ་ཉིད་ཀྱི་དེ་དང་འཚམ་པའི་སྨན་གྱི་སྦྱོར་བ་གཏང་བར་བྱའོ། །དེ་ནི་འདི་ལྟར། སྨྱུང་བ་དུགས་དང་རྩ་བ་ལྔ། །ནས་ཐུག་ཏིག་ཏ་ཤ་ཁུ་དང༌། །དྲི་མ་རྣམས་ནི་སྨིན་བྱ་བ། །གནས་སྐབས་ཀྱིས་སམ་རིམ་པས་སོ། །ཞེས་བྱ་བ་དང༌། དེ་བཞིན་དུ། རིམས་ལ་ཐུག་པ་སྐ་བ་དང༌། །མར་སར་འོ་མ་བཀྲུ་སྨན་དག །ནད་སྟོབས་ཡོད་མེད་བལྟས་ནས་ནི། །ཉི་མ་དྲུག་དྲུག་སྦྱར་བར་བྱ། །ཞེས་བྱ་བ་དང༌། དེ་བཞིན་དུ། རིམས་ནི་རྩེ་ཞིལ་ལུས་ཡང་ལ། །དྲི་མ་ལ་སོགས་གཡོས་པ་ན། །རིམས་བཏབ་ཡུན་རིང་མ་ལོན་ཀྱང༌། །དེ་ཚེ་སྨན་གྱི་སྦྱོར་བ་བྱ། །ཞེས་བྱ་བ་ཡིན་ཏེ། གནས་སྐབས་འདིར་བྱིན་པའི་སྨན་ནི་ནད་མེད་པའི་དོན་དུ་འགྱུར་རོ། །སྨན་དེ་ཡང་རྣམ་པ་གཉིས་སུ་བཤད་དོ། །མདོར་ན་སྨན་ནི་རྣམ་གཉིས་ཏེ། །སྦྱང་བ་དང་ནི་ཞི་བའོ། །ཞེས་བྱ་བ་ཡིན་ཏེ། མདོར་བསྡུ་ན་འཇིག་རྟེན་དག་ན་སྨན་རྣམས་ཡོད་པ་དེ་རྣམས་དུ་མར་ཡོད་དུ་ཟིན་ཀྱང་ཚུལ་གཉིས་ལས་འདའ་བར་མི་བྱེད་དེ། སྦྱང་བ་དང་ཞི་བའི་མཚན་ཉིད་རྣམ་པ་གཉིས་སུ་བཤད་པ་ཡིན་ནོ། །དེ་ལ་སྦྱང་བ་ནི་ཉེས་པ་འཁྲུགས་པ་ཕྱི་རོལ་དུ་བཏོན་
ནས་ནད་ཉེ་བར་ཞི་བར་བྱེད་དོ། །ཞི་བ་ནི་གང་རང་གི་གནས་ན་གནས་པ་ཉིད་ལ་ཆ་མཉམ་པར་བྱེད་པས་ཞི་བ་ཡིན་ནོ། །སྨན་བཤད་ནས་དེའི་ཡུལ་བཤད་པ་ནི། ལུས་ལས་བྱུང་བའི་ནད་རྣམས་ཀྱི། །རིམ་གྱིས་སྨན་གྱི་དམ་པ་ནི། །མས་གཏོང་བཀྲུ་སྨན་སློན་སྨན་དང༌། །དེ་བཞིན་ཏིལ་མར་མར་སྦྲང་རྩི། །ཞེས་བྱ་བ་ཡིན་ཏེ། ལུས་ལས་བྱུང་བའི་ནད་རླུང་ལ་སོགས་པ་རྣམས་ཀྱི་རིམ་གྱིས་ཞེས་བྱ་བ་གྲངས་ཇི་ལྟ་བའི་གོ་རིམས་གྱིས་བསྟན་པ་དང༌། བཤད་པར་གྱུར་པས་སྨན་གྱི་དམ་པ་ཞེས་བྱ་ལ། སྨན་གཙོ་བོར་གྱུར་པ་ནི་མས་གཏོང་བ་ནས་སློན་པའི་བར་གྱིས་སྦྱང་བར་བྱ་བ་དང༌། དེ་བཞིན་དུ་ཏིལ་མར་ནས་སྦྲང་རྩིའི་བར་ནི་ཞི་བར་བྱེད་པའི་ཚུལ་ཅན་ཡིན་ནོ། །དེས་ན་རླུང་ལ་ནི་མཇུག་མ་ནས་སྦྲང་རྩི་དང་སྨན་བསྐོལ་བ་ལྒང་པ་ནས་གཏང་པར་བྱ་བ་སྨན་གྱི་མཆོག་ཡིན་ནོ། །མཁྲིས་པ་ལ་ནི་བཀྲུ་སྨན་ཁ་ནས་བཏུང་ཞིང་མཇུག་མའི་ལས་ཀྱི་མཐའ་ནས་དབྱུང་བ་སྨན་གྱི་མཆོག་ཡིན་ནོ། །བད་ཀན་ལ་ནི་སློན་སྨན་ཁ་ནས་འཐུངས་པས། དེ་ཉིད་ནས་ནད་དབྱུང་བ་སྨན་གྱི་མཆོག་ཡིན་ཏེ། དེ་དག་ནི་ནད་རྣམས་སྦྱངས་པའི་ཚུལ་གྱི་སྨན་ཡིན་ནོ། །ཏིལ་མར་ལ་སོགས་པ་ཞི་བའི་རང་བཞིན་ཅན་གྱི་སྨན་ཡིན་ནོ། །དེ་བཞིན་དུ་ཞེས་བྱ་བ་ནི་རིམ་གྱིས་ཏེ་རླུང་ལ་ཏིལ་མར་རོ། །མཁྲིས་པ་ལ་ནི་མར་སར་རོ། །བད་ཀན་ལ་ནི་སྦྲང་རྩི་སྨན་གྱི་དམ་པ་སྟེ། སྨན་གྱི་གཙོ་བོ་ཡིན་ཞེས་བྱ་བའི་དོན་ཏོ། །དུས་ལ་སོགས་པའི་ཡུལ་ལ་བརྟེན་པ་ཐམས་ཅད་དུ་ལུས་ལས་བྱུང་བའི་ནད་ཐམས་ཅད་ཀྱི་སྨན་གྱི་དམ་པ་བཤད་ཟིན་ཀྱང༌། དེའི་འོག་ཏུ་སེམས་ཀྱི་ནད་གསོ་བའི་མཆོག་གང་ཞིག་ཡིན་ཞེ་ན། དེའི་ཕྱིར་བཤད་པ་ནི། བློ་དང་བརྟན་བདག་སོགས་ཤེས་པ། །སེམས་ཀྱི་ཉིས་པའི་སྨན་མཆོག་ཡིན། །ཞེས་བྱ་བ་ཡིན་ཏེ། སེམས་ཀྱི་ཉེས་པ་འདོད་ཆགས་དང་ཞེ་སྡང་དང་གཏི་མུག་དག་ལ་ནི་ནད་སེལ་བར་བྱེད་པའི་སྨན་གྱི་མཆོག་ནི་བློ་དང་བརྟན་པ་ལ་སོགས་པ་ཡིན་ཏེ། དེ་ལ་བློ་ནི་ཤེས་རབ་སྟེ། ཕྱི་དང་ནང་གི་བདག་ཉིད་ཅན་གྱི་དངོས་པོ་རྣམས་ལ་ཕན་པ་དང༌། ཕན་པ་མ་ཡིན་པའི་བྱེ་བྲག་གིས་ཆ་རྣམ་པར་འབྱེད་ཤེས་པར་བྱའོ། །བརྟན་པ་ནི་སེམས་མི་འགྱུར་ཞིང་བརྟན་པ་
ཉིད་དེ་བློ་མི་རྒོད་བའོ། །དེ་ཡང་གོང་གིས་བཀག་པ་རྣམས་ལ་འཇུག་པར་མི་བྱེད་པ་དང༌། ཕན་པ་མ་ཡིན་པ་རྣམས་དང་སྡུག་བསྔལ་ལ་ཡིད་ཞུམ་པ་མེད་པའོ། །བདག་ཉིད་ཤེས་པ་ནི་རྣལ་འབྱོར་གྱི་ངོ་བོ་ཉིད་ཤེས་པས། ཏིང་ངེ་འཛིན་གྱི་དོན་དམ་པའི་བདག་ཉིད་ཤེས་པའོ། །སོགས་པའི་སྒྲས་ནི་ཡེ་ཤེས་དང༌། རྣམ་པར་ཤེས་པ་དང༌། དྲན་པ་དང༌། ཡུལ་དང༌། དུས་ལ་སོགས་པ་ཤེས་པ་ཡོངས་སུ་བསྡུའོ། །སེམས་ཀྱི་ཉེས་པ་འབྱུང་བ་འདོད་པ་ལ་སོགས་པ་ནད་བསལ་བའི་དོན་དུ་མཆོག་ཅེས་བྱ་བའི་སྒྲ་ནི་ཁྱད་པར་གྱི་ཚིག་ཏུ་བསྟན་པ་ཡིན་ནོ། །དེ་ལྟར་ན་རེ་ཞིག་འདིས་ནི་གསོ་བ་མ་ལུས་པར་བསྟན་པ་ཡིན་ལ། དེ་ཡང་ཡན་ལག་བཞི་དང་ལྡན་ན་དགོས་པ་བྱེད་པ་ཡིན་པས། དེའི་ཕྱིར་བཤད་པ་ནི། གསོ་བ་དག་ཏུ་བསྟན་པ་ནི། །སྨན་པ་སྨན་དང་ནད་གཡོག་དང༌། །ནད་པ་ཡན་ལག་རྣམ་བཞི་སྟེ། །རེ་རེའང་རྣམ་པ་བཞི་བཞི་ཡིན། །ཞེས་བྱ་བ་ཡིན་ཏེ། གསོ་བ་ཞེས་བྱ་བས་ནད་ཉེ་བར་ཞི་བར་བྱ་བའི་མཚན་ཉིད་ཀྱི་ཡན་ལག་ནི་རྣམ་པ་བཞི་ཡོད་པར་བཤད་ལ། དེ་རེ་རེ་ལ་ཡང་རྣམ་པ་བཞི་བཞི་ཡོད་དེ། དེ་ལྟར་ན་ཡོན་ཏན་རྣམ་པ་བཅུ་དྲུག་ཡིན་པར་གསོ་དཔྱད་མཁས་པའི་སྨན་པ་རྣམས་འདོད་དོ། །དེ་ལ་སྨན་པ་ནི་དེའི་གཙོ་བོ་ཡིན་པས་དང་པོར་བསྟན་ཏེ། དེ་ཡང་ལུང་ལས། སྦྱོར་ཞིང་རབ་སྦྱོར་སྟོན་པས་ན། །འདི་ནི་སྨན་པ་གཙོ་བོ་ཡིན། །ཞེས་བཤད་པ་ཡིན་ནོ། །དེ་བཞིན་དུ་བསྡུས་པ་ལས་ཀྱང༌། སྨན་པ་ཡོན་ཏན་མེད་ཡན་ལག །ཡོན་ཏན་ལྡན་ཡང་དོན་མེད་ཡིན། །དེ་ཡི་ཡོན་ཏན་ལྡན་ཡན་ལག །མཚང་ན་ཡང་ནད་པ་འཚོ། །དེ་བས་གསོ་དཔྱད་ལ་དེ་ཉིད། །རྒྱུ་ཡིས་གཙོ་བོ་ཡིན་ཞེས་བྱ། །ཞེས་བཤད་དོ། །སྨན་ནི་རྫས་རྣམས་སོ། །ནད་གཡོག་ནི་བསྙེན་བཀུར་བྱེད་པའོ། །ནད་པ་ནི་ནད་ཀྱིས་ཉམ་ཐག་པ་སྟེ། དེ་དག་ནི་སློབ་དཔོན་གྱིས་མདོར་བསྟན་པ་ཡིན་ནོ། །དེ་རྣམས་ཀྱི་ཡོན་ཏན་རྒྱས་པར་བཤད་པ་ནི། སྨན་པ་མཁས་སྟེགས་གཞུང་དན་ཤེས། །ལས་རྣམས་མཐོང་ཞིང་གཙང་བ་ཡིན། །ཞེས་བྱ་བ་ཡིན་ཏེ། དེ་ལ་སྨན་པའི་ཡན་ལག་བཞི་ནི་མཁས་པ་སྟེ། ལས་རྣམས་ལ་བྱང་བའོ། །སྟེགས་ནི་རང་གི་མཁན་པོའི་ལུང་གི་དོན་ཤེས་
པ་ལས། བསྟན་བཅོས་ཀྱི་གཞུང་གི་དོན་ལ་ཤེས་ཤིང་ཁོང་དུ་ཆུད་པ་གང་ཡིན་པ་དེ་ནི། སྨན་པ་མཁས་སྟེགས་གཞུང་དོན་ཤེས། །ཞེས་བྱ་བ་ཡིན་ཏེ། ལུད་བརྒྱུད་པ་ལས་བསྟན་བཅོས་ཀྱི་དོན་རྟོགས་པ་ཐོབ་བའོ། །ལས་རྣམས་མཐོང་ཞིང་ཞེས་བྱ་བ་ནི། གང་གིས་གསོ་བའི་མཚན་ཉིད་ཅེས་བྱ་བའི་ལས་མང་པོ་མཐོང་བ་དེ་ནི། ལས་རྣམས་མཐོང་ཞིང་ཞེས་བྱ་བ་སྟེ། ལན་མང་ཞིང་ནད་པ་གསོས་ཤིང་ལས་གོམས་པར་གྱུར་པའོ། །གཙང་བ་ཞེས་བྱ་བ་ནི་ལུས་དང་ངག་དང་ཡིད་ཀྱི་བྱ་བ་རྣམས་ལ་སྡིག་པའི་དྲི་མས་མ་གོས་པའོ། །སྨན་ཡང་རྣམ་པ་བཞི་སྟེ། དེ་ནི། སྨན་ནི་ཆོ་ག་མང་པོ་དང༌། །ཡོན་ཏན་མང་ལྡན་ཕུན་ཚོགས་འཕྲོད། །ཅེས་བྱ་བ་སྟེ། དེ་ལ་སྨན་གང་ལ་ཆོ་ག་མང་པོ་ཡོད་པ་དེ་ནི་ཆོ་ག་མང་པོ་སྟེ། བཅུད་དབྱུང་ཞིང་བསྐོལ་བ་དང༌། ཕྱེ་མ་ལ་སོགས་པར་བྱས་པས་ན་ནད་རྣམས་སེལ་ནུས་པ་སྟེ། ལན་ཚྭ་ལྟར་ཆོ་ག་གཅིག་ཡོད་པ་ནི་མ་ཡིན་ཏེ། དེ་ནི་ཁ་གཅིག་པུའི་ནང་དུ་དགོས་པ་བྱེད་པ་ཡིན་ནོ། །ཡོན་ཏན་མང་ལྡན་ཞེས་བྱ་བ་ནི་སེམས་ཅན་སྲེད་པ་ཐ་དད་པ་དག་ལ་ལྕི་བ་དང་རྟུལ་བ་ལ་སོགས་པའི་ཡོན་ཏན་མང་པོ་ཡོད་པ་དེ་ནི་ཡོན་ཏན་མང་ལྡན་ནོ། །ཡང་ན་གང་ནད་དུ་མ་དག་གི་ཚོགས་རྣམས་སེལ་བའི་ནུས་པ་དང་ལྡན་པའོ། །ཕུན་སུམ་ཚོགས་པ་ནི་ཕུན་སུམ་ཚོགས་པའི་ཡོན་ཏན་དང་ལྡན་པ་ཡིན་གྱི། ཡོན་ཏན་མ་ཚང་བར་གྱུར་པ་མ་ཡིན་པ་སྟེ། ས་གཞི་བཟང་པོ་ལས་སྐྱེས་པ་ལ་སོགས་པའོ། །དེ་ཡང་གཞུང་ལས། ས་ཕྱོགས་ཆ་མཉམ་བསྔགས་པ་ནི། །གཞི་མཉམ་ས་བཟང་གཙང་བ་དང༌། །དུར་ཁྲོད་མཆོད་རྟེན་ཉེ་འཁོར་དང༌། །གཡང་ས་གྲོག་མཁར་རྣམས་སྤངས་པའོ། །ཞེས་བཤད་པའི་ས་གཞི་བཟང་པོ་ལས་སྐྱེས་པ་ལ་སོགས་པའི་ཡོན་ཏན་དང་ལྡན་པའོ། །ཡང་ན་ལེགས་པར་སྨིན་ཅིང་སྦྱར་བ་ལ་སོགས་པའི་ཡོན་ཏན་དང་ལྡན་པའོ། །འཕྲོད་པ་ནི་སྦྱོར་བར་འོས་པ་སྟེ། གང་གང་ལ་འཕྲོད་ཅིང་འོས་པ་དེ་དེ་ལ་སྦྱར་བའོ། །དེ་ཡང་ནད་དང༌། ཡུལ་ཕྱོགས་དང༌། དུས་དང༌། གནོད་པ་དང༌། གནོད་པར་བྱ་བ་དང༌། ལུས་དང༌། ན་ཚོད་དང༌། སྟོབས་ལ་སོགས་པ་ཤེས་པར་
བྱས་ནས་སྦྱོར་ཞིང་སྟེར་བ་དག་ནད་པ་དང༌། ནད་ཀྱི་ཚོགས་ལས་དཔག་སྟེ་འཕྲོད་ཅིང་འོས་པ་དང༌། ཕན་པར་གྱུར་པའོ། །ནད་གཡོག་གི་ཡོན་ཏན་ཡང་རྣམ་པ་བཞི་སྟེ། ནད་གཡོག་རྗེས་བརྩེ་གཙང་སྦྲ་ཅན། །སྒྲིམ་ཞིང་བློ་དང་ལྡན་པ་ཡིན། །ཞེས་བྱ་བ་ཡིན་ཏེ། རྗེས་སུ་བརྩེ་བ་ཞེས་བྱ་བ་ནི་ནད་པ་ལ་བྱམས་ཤིང་དད་པའོ། །གཙང་སྦྲ་ཅན་ནི་ལུས་དང་ངག་དང་ཡིད་ཀྱི་ལས་ངན་པས་མ་གོས་པའོ། །སྒྲིམ་པ་ནི་བྱ་བ་ཐམས་ཅད་ལ་གཤོར་ཞིང་བརྩོན་པའོ། །བློ་དང་ལྡན་པ་ནི་བློ་གྲོས་ཁྱད་པར་ཅན་ཡོད་པ་སྟེ། མཁས་ཤིང་བྱང་བ་ཞེས་བྱ་བའི་དོན་ཏོ། །ནད་པའི་ཡོན་ཏན་ཡང་རྣམ་པ་བཞི་སྟེ། ནད་པ་ཕྱུག་ཅིང་བསྒོ་བ་ཉན། །ཤེས་པར་ནུས་ཤིང་སྙིང་སྟོབས་ལྡན། །ཞེས་བྱ་བ་ཡིན་ཏེ། ཕྱུག་པ་ནི་ནོར་དང་ལྡན་པའོ། །བསྒོ་བ་ཉན་པ་ནི་སྨན་པའི་དབང་དུ་གྱུར་ཅིང་བསྒོ་བ་ཉན་པའོ། །ཤེས་པར་ནུས་ཞེས་བྱ་བ་ནི། ཅི་ལས་གྱུར་པའི་ནད་ཀྱི་གཞི་ལ་སོགས་པ་ཤེས་པར་ནུས་པ་སྟེ། ན་བའི་ཟས་དང་སྤྱོད་པ་ལ་སོགས་པ་སྨན་པ་ལ་བརྡ་སྤྲད་པར་ནུས་ཤིང་ཟས་དང་སྤྱོད་པས་ཇི་ལྟར་གྱུར་པའི་ལོ་རྒྱུས་སྟོན་པར་ནུས་པའོ། །སྙིང་སྟོབས་ལྡན་པ་ནི་སྨན་དང་དཔྱད་ཀྱི་བྱ་བ་ལ་སེམས་ཞུམ་བ་མེད་ཅིང་ཕོག་སྙ་ཆེ་ལ་བློ་དང་ལྡན་པའོ། །ད་ནི་གསོ་སླ་བ་ལ་སོགས་པའི་ནད་རྣམ་པ་བཞིའི་མཚན་ཉིད་བཤད་པ་ནི། སྨན་ཀུན་བཟོད་པར་ནུས་པའི་ལུས། །སྐྱེས་བུ་གཞོན་ཞིང་བདག་ཉིད་ཐུལ། །གནད་དུ་མ་སོང་རྒྱུ་སྔར་ཚུལ། །མཚན་ཉིད་ཆུང་དང་གནོད་པ་མེད། །གནོད་བྱ་ཡུལ་དུས་རང་བཞིན་རྣམས། །མཚུངས་མིན་ཡན་ལག་ཕུན་སུམ་ཚོགས། །གཟའ་ནི་རྗེས་སུ་མཐུན་པ་ལ། །ཉེས་པ་ལམ་གཅིག་གསར་གསོ་སླ། །ཞེས་བྱ་བ་ཡིན་ཏེ། སྨན་ཀུན་བཟོད་པར་ནུས་པའི་ལུས་ལ་ནད་སྐྱེད་པར་གྱུར་ན་གསོ་སླ་བ་ཞེས་བྱ་བ་སྟེ། གསོ་བའི་ཐབས་བདེ་ཞིང་སླ་བ་ཡིན་ནོ། །དེ་ཡང་གཞུང་ལས། གསོ་སླ་བ་ནི་ཐབས་བདེ་བ། །ཅུང་ཟད་དུས་ཀྱིས་བསྒྲུབ་ཏུ་རུང༌། །ཞེས་བཤད་པ་ཡིན་ནོ། །དེ་ལ། སྨན་ཀུན་བཟོད་པར་ནུས་པའི་ལུས། །ཞེས་བྱ་བ་ནི། གང་གིས་སྨན་ཐམས་ཅད་བཟོད་ཅིང་བསྟེན་པར་ནུས་པ་སྟེ། རྣོ་བ་དང༌། བར་མ་དང༌། འཇམ་པའི་
ཚུལ་ཡུལ་སྣ་ཚོགས་ནས་སྐྱེས་པ་དང༌། ཞི་བར་བྱ་བ་དང༌། དེ་བཞིན་དུ་སྦྱང་བ་དང༌། དུག་དང་ལན་ཚྭ་ལ་སོགས་པ་བསྟེན་པར་བཟོད་པའོ། །སྐྱེས་བུ་ཞེས་སྨོས་པ་ནི་བུད་མེད་དག་མ་ཡིན་ཏེ། གང་གི་ཕྱིར་བུད་མེད་དག་ནི་རྟག་ཏུ་སྡང་ཞིང་བློ་དང་མི་ལྡན་པ་ཡིན་པས། ཇི་སྐད་བཤད་པའི་ནད་པ་ཡོན་ཏན་དང་མི་ལྡན་པ་ཡིན་ལ། དེ་ནི་ཤིན་ཏུ་གཞོན་ཤ་ཅན་ཡིན་པས། སྨན་རྣོན་པོ་བསྟེན་པར་མི་བཟོད་པ་ཡིན་ནོ། །གཞོན་ཞིང་ཞེས་བྱ་བ་ནི། ལང་ཚོ་ལ་གནས་ཤིང་གཞོན་པ་ཉིད་ཅེས་བྱ་བའི་དོན་ཏོ། །བདག་ཉིད་ཐུལ་ཞེས་བྱ་བ་ནི། བརྐམ་ཞིང་ཆགས་པ་མ་ཡིན་པ་སྟེ། གང་གི་ཡུལ་ལ་མངོན་པར་འདོད་པ་སྤངས་པས་བདག་ཉིད་ཐུལ་བའོ། །གནད་དུ་མ་སོང་ཞེས་བྱ་བ་ནི། གནད་ལ་མི་གནས་པ་སྟེ། གནད་ནི་མགོ་དང༌། སྙིང་ག་དང༌། མདོམས་ལ་སོགས་པ་སྟེ། དེ་རྣམས་སུ་མ་སོང་ཞིང༌། སྙིང་དང་ལྐོག་མ་ལ་སོགས་པར་ཤས་ཆེར་གནོད་མི་ནུས་པའོ། །རྒྱུ་སྔར་ཚུལ། །མཚན་ཉིད་ཆུང་དང་ཞེས་བྱ་བ་ནི། རྒྱུ་དང་སྔར་གྱི་ཚུལ་མཚན་ཉིད་དག་ནི། རྒྱུ་སྔར་ཚུལ་གྱི་མཚན་ཉིད་ཅེས་བྱ་སྟེ་རྒྱུ་དང་སྔར་གྱི་ཚུལ་དང༌། མཚན་ཉིད་དེ་དག་ཆུང་བ་གང་ཡིན་པ་དེ་ལ་དེ་སྐད་ཅེས་བྱའོ། །དེ་ལ་རྒྱུ་ནི་ནད་ཀྱི་གཞིའོ། །སྔར་གྱི་ཚུལ་ནི་སྔར་དང་པོ་བྱུང་བའི་ཚུལ་ལོ། །མཚན་ཉིད་ནི་རྟགས་ཀྱི་ཚུལ་ཏེ། དེ་དག་ཆུང་བ་གང་ཡིན་པ་དེ་ནི་གསོ་བ་སླ་བ་ཡིན་ནོ། །གནོད་པ་མེད་ཅེས་བྱ་བ་ནི་གང་ལ་འཚེ་ཞིང་གནོད་པ་མེད་པ་དེ་ནི་གནོད་པ་མེད་པ་ཞེས་བྱ་སྟེ། འདི་ལྟར་སྔར་ནད་གཅིག་བསྐྱེད་པ་ལ། དེའི་འོག་ཏུ་གང་ནད་གཞན་བླ་བརྣན་དུ་བྱུང་བ་ནི། དེའི་མཚན་ཉིད་མ་ཡིན་ཞིང༌། གཙོ་བོ་མ་ཡིན་ལ། རང་གི་མཚན་ཉིད་ཇི་ལྟ་བཞིན་མ་ཡིན་ཏེ། ནད་སྔ་མ་དེ་སེལ་བར་བྱེད་པ་ལ་གནོད་པ་བྱེད་པ་ཡིན་ནོ། །དེ་ཡང་ལུང་ལས། ནད་ཀྱི་སྟེང་དུ་ནད་གང་ཞིག །ཕྱིས་དུས་དག་ཏུ་འབྱུང་བ་དག །གསོ་བ་དག་ལ་གགས་བྱེད་པ། །དེ་ནི་གནོད་པ་ཞེས་བཤད་དོ། །ཞེས་འབྱུང་བ་ནི་ཡིན་ཏེ་དེ་མེད་པ་ལ་གནོད་པ་མེད་པ་ཞེས་བྱའོ། །གནོད་བྱ་ཡུལ་དུས་རང་བཞིན་རྣམས། །མཚུངས་མིན་ཞེས་བྱ་བ་ལ། གནོད་བྱ་དང༌། ཡུལ་དང༌། དུས་དང༌། རང་བཞིན་རྣམས་ནི། གནོད་བྱ་ཡུལ་དུས་རང་བཞིན་རྣམས། །ཞེས་བྱ་སྟེ། གང་གི་དེ་རྣམས་མཚུངས་བ་མ་ཡིན་པ་ནི་མཚུངས་
མིན་ནོ། །དེ་ལ་དེ་རྣམས་མཚུངས་པ་མ་ཡིན་པ་ནི། དཔེར་ན་གནོད་པར་བྱ་བ་རྐང་དང་ཚིལ་ལ་སོགས་པ་དང༌། ཤིན་ཏུ་རླན་ཆེ་བའི་ཡུལ་དང༌། གྲང་བའི་དུས་དང༌། ནད་པའི་རླུང་གི་རང་བཞིན་དེ་ལ་མཁྲིས་པ་འཁྲུགས་པར་གྱུར་ན་གསོ་སླ་བ་ཡིན་ནོ། །གནོད་པར་བྱ་བ་མཚུངས་པ་མ་ཡིན་ནོ། །དཔེར་ན་བད་ཀན་གྱི་མཚན་ཉིད་གྲང་བས་ཁྲག་དྲོ་བ་ལ་གནོད་པ་ཡིན་ནོ། །ཡུལ་མཚུངས་པ་མ་ཡིན་པ་ནི། དཔེར་ན་རླན་ཅན་ཤིང་རྩི་མོད་པའི་ཡུལ་དུ་མཁྲིས་པ་སྐྱེས་པའོ། །དུས་མཚུངས་པ་མ་ཡིན་པ་ནི་དཔེར་ན་སྟོན་ཀའི་དུས་སུ་བད་ཀན་སྐྱེས་པའོ། །རང་བཞིན་མཚུངས་པ་མ་ཡིན་པ་ནི་དཔེར་ན་མཁྲིས་པའི་རང་བཞིན་ཅན་ལ་བད་ཀན་གྱི་ནད་སྐྱེས་པ་ལྟ་བུའོ། །འདིར་དྲིས་པ། གནོད་བྱ་དང༌། ཡུལ་དང༌། དུས་དང༌། རང་བཞིན་རྣམས་མཚུངས་པ་མ་ཡིན་པ་ནི་གསོ་བར་དཀའ་བའམ། སྤང་བར་བྱ་བ་ཡིན་གྱི་གསོ་སླ་བ་མ་ཡིན་ཏེ། སྒོ་དུ་མ་ནས་གསོ་བ་ཙམ་དགོས་པ་ཡིན་པའི་ཕྱིར་ཏེ། འདི་ལྟར་གནོད་བྱ་ལ་སོགས་པ་འདྲ་བ་མ་ཡིན་པ་དག་ལ། ཕན་ཚུན་གསོ་བའི་རྩོམ་པ་གཞན་དང་གཞན་དག་ཀྱང་བྱ་དགོས་ཀྱི། སྒོ་གཅིག་ནས་གསོ་བ་ནི་གསོ་བ་སླ་བ་ཡིན་ནོ་ཞེ་ན། དེའི་ལན་བརྗོད་པར་བྱ་སྟེ། གནོད་བྱ་ལ་སོགས་པ་མཚུངས་པ་ནི་རང་བཞིན་སྟོབས་དང་ལྡན་པ་ཡིན་ཞིང༌། རྩོམ་པ་ཆེ་བས་གསོ་དཀའ་བའི་ནད་ཉིད་འབྱུང་བས་དེ་གསོ་སླ་བ་མ་ཡིན་ནོ། །ལ་ལར་ནི་གནོད་བྱ་ལ་སོགས་པ་མཚུངས་སུ་ཟིན་ཀྱང༌། གསོ་སླ་བ་དག་ནི་ཡོད་དོ། །དེ་ཡང་གཞུང་ལས། རིམས་ལ་ཡུལ་དུས་མཚུངས་པ་དང༌། །གཅིན་འགགས་གནོད་བྱ་མཉམ་པ་དང༌། །ཁྲག་གི་སྐྲ་ནི་རྙིང་པ་ཉིད། །གསོ་སླ་བ་ཡི་རྒྱུ་ཉིད་ཡིན། །ཞེས་བཤད་པ་ཡིན་ནོ། །ཡན་ལག་ཕུན་སུམ་ཚོགས་ཞེས་བྱ་བ་ནི། སྨན་ལ་སོགས་པ་ཡན་ལག་བཞིའི་ཕུན་སུམ་ཚོགས་པ་ནི་འབྱོར་བར་གྱུར་པ་སྟེ། ཡན་ལག་བཞི་པོ་སྟེ་ཡོངས་སུ་རྫོགས་པར་གྱུར་ན། ནད་གསོ་སླ་བར་འགྱུར་བའོ། །གཟའ་ནི་རྗེས་སུ་མཐུན་པ་ལ། །ཞེས་བྱ་བ་ལ། གཟའ་ནི་ཉི་མ་ལ་སོགས་པ་སྟེ། དེ་དག་རྗེས་སུ་མཐུན་པ་ཞེས་བྱ་བ། སྐར་མའི་ཁྱིམ་རྗེས་སུ་མཐུན་པ་ན་གནས་ཤིང༌། གནས་བཟང་པོ་
ན་གནས་པར་གྱུར་ན་ཡང་ནད་གསོ་སླ་བ་ཡིན་ནོ། །ཉེས་པ་ལམ་གཅིག་ཅེས་བྱ་བ་ནི་ཉེས་པ་དང་ལམ་གཉིས་གཅིག་དང་ལྡན་པ་ནི། ཉེས་པ་ལམ་གཅིག་སྟེ། ཉེས་པ་ནི་རླུང་ལ་སོགས་པའོ། །ལམ་ནི་གསུམ་སྟེ། འོག་ནས་བཤད་པའི་ཡན་ལག་གམ། ཡལ་ག་ལ་སོགས་པ་ནི་ཕྱི་དང་ནང་དང་བར་གྱི་དབྱེ་བས་སོ། །དེས་ན་གང་ཡང་རླུང་ལ་སོགས་པའི་ནང་ནས་གང་ཡང་རུང་བ་གཅིག་ལས་སྐྱེས་ཀྱི། གཉིས་སམ་གསུམ་ལས་མ་སྐྱེས་པ་དང༌། དེ་བཞིན་དུ་ཕྱི་རོལ་ལམ་ནང་ངམ་བར་མ་སྟེ་ལམ་གཅིག་ལས་སྐྱེས་པ་དེ་ནི་གསོ་སླ་བ་ཡིན་ནོ། །གསར་པ་ཞེས་བྱ་བ་ནི་ནད་མ་རྙིངས་པ་སྟེ། སྐྱེས་ནས་རིང་པོ་མ་ལོན་པ་ཞེས་བྱ་བའི་དོན་ཏོ། །གང་གི་ཕྱིར་ལོ་གཅིག་ཡན་ཆད་འདས་པའི་ནད་ནི་གསོ་དཀའ་བ་ཡིན་ནོ། །དེ་ལྟར་ན་དེ་ལྟ་བུའི་ནད་ནི་གསོ་སླ་ཞིང༌། གསོ་བའི་ཐབས་ནི་སླ་བ་ཉིད་ཡིན་ནོ། །གསོ་དཀའ་བའི་ནད་བཤད་པ་ནི། ནད་ནི་མཚོན་སོགས་ཀྱིས་གདབ་ཅིང༌། །གསོ་བ་དཀའ་ཞིང་དེ་ལས་འདྲེས། །ཞེས་བྱ་བ་ཡིན་ཏེ། ནད་གང་མཚོན་ལ་སོགས་པས་བསྒྲུབ་ཅིང་གདབ་དགོས་པ་དེ་ནི། གསོ་དཀའ་ཞིང་བཟློག་པར་དཀའ་བ་ཡིན་པས། ཐབས་མང་པོ་དང་ཡུན་རིང་པོས་གསོ་དགོས་པ་ཡིན་ནོ། །དེ་ཡང་གཞུང་ལས། གསོ་དཀའ་བ་ལ་དཀའ་བ་དང༌། །ཐབས་མང་ཡུན་ནི་རིང་པོས་སོ། །ཞེས་བཤད་པ་ཡིན་ནོ། །སོ་ལ་སོགས་པའི་སྒྲས་ནི་ནས་ཚིག་འཁུས་པའི་ཐལ་བས་བསྐུ་བ་དང༌། མེ་གདབ་པ་དང༌། དུག་གིས་བསྐུ་བ་ལ་སོགས་པས་བསྡུའོ། །དེ་ལས་འདྲེས་ཞེས་བྱ་བ་ལ། དེ་ལས་ཞེས་བྱ་བ་ནི་སྔར་བཤད་པའི་གསོར་རུང་བའི་མཚན་མ་ལས། ནད་དང་འདྲེས་པ་ཞིག་བྱུང་ན་དེ་ཡང་གསོ་བར་དཀའ་བ་ཡིན་ནོ། །དེ་ལ་དེ་ལས་འདྲེས་པའི་མཚན་ཉིད་ནི་སྔར་བཤད་པའི་གསོ་སླ་བའི་མཚན་ཉིད་ལས་འདྲེས་ཤིང་གཉིས་སམ་གསུམ་ཚོགས་པར་གནས་པ་སྟེ། དཔེར་ན་གཞོན་པ་ན་ཡང་བདག་ཉིད་ཐུལ་བ་དང༌། དབང་པོ་ཐུལ་བ་ཡིན་ཡང༌། ནད་གནད་ཀྱི་གནས་སུ་སོང་བ་དང༌། སྨན་ཐམས་ཅད་བཟོད་པར་ནུས་པའི་ལུས་དང་ལྡན་ཡང་རྒས་པ་དང༌། གལ་ཏེ་གཞོན་དུ་ཟིན་ཀྱང་སྨན་ཐམས་ཅད་ཀྱིས་བཟོད་པར་མི་ནུས་པའོ། །དེ་ལྟར་ན་ཕྱོགས་འདིས་ཐམས་ཅད་ལ་བསྒྲེ་བར་བྱའོ། །གསོ་
བ་ཙམ་དུ་བྱ་བ་བཤད་པ་ནི། ཚེ་ཡི་ལྷག་མ་ལུས་ཕྱིར་འཚོ། །གོ་བཟློག་པ་ལ་གོམས་ཕན་ཉིད། །ཅེས་བྱ་བ་ཡིན་ཏེ། ཕྱིན་ཅི་ལོག་རྣམ་པ་མང་པོས་བསྒྲུབ་པར་བྱ་བའི་གསོ་བའི་ཐབས་དང་མི་མཐུན་པར་གྱུར་ལ། ཚེའི་ལྷག་མ་ནི་མ་ཟད་པས། ནད་ཀྱིས་གསོ་བར་མི་ནུས་པ་དག་ལ་ནི་ཁ་ཟས་དང་སྤྱོད་ལམ་ཕན་པ་དག་གིས་རེ་ཞིག་གསོ་ཞིང་འཚོ་བ་ཙམ་དུ་བྱའོ། དེ་ཡོངས་སུ་སྤང་བར་ནི་མི་བྱའོ། །འདི་དང་ཡོངས་སུ་སྤང་བར་བྱ་བའི་ནད་ཀྱི་ཁྱད་པར་ནི་འདི་ཙམ་ཞིག་ཡོད་དོ། །འདི་ལ་ནི་ཚེའི་ལྷག་མ་ཙམ་ཞིག་ཡོད་པས། རེ་ཞིག་སྤང་བར་མི་བྱ་བ་ཡིན་གྱི། མཚན་ཉིད་གཞན་ཐམས་ཅད་ནི་ཕལ་ཆེར་མཐུན་པ་ཡིན་ནོ། །གོ་བཟློག་ཅེས་བྱ་བ་གང་ཞིག་བཟློག་པ་ཡིན་ཞེ་ན། འདས་མ་ཐག་པའི་རང་བཞིན་གསོ་སླ་བ་ལས་བཟློག་པའོ། །གོམས་པ་ནི་ཡང་དང་ཡང་དུ་བྱ་ཞིང་བསླབ་པ་སྟེ། དེ་བས་ན་ཕན་པའི་ཟས་དང༌། སྤྱོད་ལམ་གྱིས་གསོ་བར་བྱའོ། །དེ་ཡང་གསོ་བས་བདེ་བ་ཅུང་ཟད་ཅིག་བསྐྱེད་ཅིང༌། ཡང་རྒྱུ་ཅུང་ཟད་ཀྱིས་ནི་འཕེལ་བར་འགྱུར་རོ། །དེ་ཡང་བསྡུས་པ་ལས། བདེ་བ་ཅུང་ཟད་སྐྱེས་ནས་ནི། །ཅུང་ཟད་རྒྱུ་ནི་འཕེལ་འགྱུར་ཞིང༌། །ནད་ཀྱི་ལྷག་མ་མེད་མི་འགྱུར། །ལས་སྐྱེས་ཚེ་ནི་ངེས་པ་ཡིན། །ལྷུང་བ་ལས་ནི་འཇུས་པ་བཞིན། །ནད་ལ་ཕན་པས་གཟུང་བར་བྱ། །ཞེས་བཤད་པ་ཡིན་ནོ། །སྤང་བར་བྱ་བ་བཤད་པ་ནི། བཅོས་པའི་ཐབས་མེད་ཉིད་དུ་འགྱུར། །ཤིན་ཏུ་ཕྱིན་ཅི་ལོག་པར་གནས། །འདོད་དང་རྨོངས་དང་ཁྲོ་བར་བྱེད། །འཆི་ལྟས་སྣང་ཞིང་དབང་པོ་ཉམས། །ཞེས་བྱ་བ་ཡིན་ཏེ། གང་ལ་བཅོས་ཤིང་གསོ་བའི་ཐབས་མེད་པར་གྱུར་པ་དེ་ནི་བཅོས་པའི་ཐབས་མེད་པ་སྟེ། སྤང་བར་བྱ་བ་ཞེས་བྱ་བའི་དོན་ཏོ། །བཅོས་པའི་ཐབས་མེད་པ་དེ་གང་ཞིག་ཡིན་ཞེ་ན། གང་ཤིན་ཏུ་ཕྱིན་ཅི་ལོག་ལ་གནས་པ་ཞེས་བྱ་བ་ཡིན་ནོ། །ནད་གང་གསོ་བ་ཙམ་གྱི་ཚུལ་ལས་ཀྱང༌། ཤིན་ཏུ་ཕྱིན་ཅི་ལོག་པར་གནས་པ་སྟེ་བྱ་བའི་ལས་ཀྱི་ལམ་ཐམས་ཅད་ལས་འདས་ཤིང༌། ནད་རྐང་དང་ཁུ་ཆུ་ལ་སོགས་པ་ལུས་ཟུངས་ཤིན་ཏུ་གཏིང་རིང་བར་ཞེན་པ་གནད་དང་ཚིགས་ཀྱི་ནང་དུ་ཞེན་པ་དེ་ནི་བཅོས་པའི་ཐབས་མེད་ཅིང་གསོ་བར་མི་ནུས་པ་ཡིན་ནོ། །དེ་བཞིན་དུ་འདོད་པ་ལ་སོགས་པ་བྱེད་པ་ཡང་གསོར་མི་རུང་བ་ཉིད་དེ།
འདོད་པ་ནི་ཡུལ་རྣམས་ལ་ལྷག་པར་ཆགས་ཤིང་ཞེན་པའོ། །རྨོངས་པ་ནི་སེམས་དང་བྲལ་ཞིང་དྲན་པ་ཉམས་ལ་མི་ཤེས་པར་གྱུར་པའོ། །ཁྲོས་པ་ནི་གནས་དང་མལ་ལ་སོགས་པ་གང་དུ་ཡང་མི་དགའ་ཞིང་སེམས་ལྡོག་པའོ། །བྱེད་པ་ཞེས་བྱ་བ་ནི་གང་དེ་དག་ལྟར་བྱེད་པ་དེ་ཡང་བཅོས་པའི་ཐབས་མེད་པ་ཡིན་ནོ། །དེ་བཞིན་དུ་འཆི་ལྟས་སྣང་ཞིང་དབང་པོ་ཉམས་པ་ཡང་སྤང་བར་བྱ་བ་ཡིན་ནོ། །དེ་ལ་འཆི་ལྟས་སྣང་བ་ནི་འཆི་བའི་མཚན་མ་སྣང་བའོ། །དབང་པོ་ཉམས་པ་ནི་མིག་ལ་སོགས་པའི་དབང་པོ་ཉམས་ཤིང་དབང་པོ་འགགས་པར་བྱེད་པའི་ནད་ཀྱང་བཅོས་པའི་ཐབས་མེད་པ་ཡིན་ཏེ། མྱུར་དུ་དབང་པོ་འཇོམས་པ་ཡིན་ནོ། །དེ་ལྟར་ན་དང་པོ་ནད་ཡོངས་སུ་བརྟགས་ལ་གསོ་བ་བརྩམ་པར་བྱའོ། གཞན་དུ་སྨན་པའི་རང་གི་དོན་ལ་སོགས་པ་ངེས་པར་ཉམས་པར་འགྱུར་རོ། །དེ་ཡང་གཞུང་ལས། དང་པོར་འདི་ལྟར་ནད་བརྟགས་ལ། །དེ་ནས་ལས་ནི་བརྩམ་བྱ་ཡི། །གཞན་དུ་རང་དོན་རིག་པ་དང༌། །གྲགས་པ་ཉམས་པ་ཉིད་ཐོབ་འགྱུར། །ཞེས་བཤད་པ་ཡིན་ནོ། །ནད་པ་བཅོས་པའི་ཐབས་ཡོད་པ་དག་ཀྱང༌། སྤང་བར་བྱ་བ་དག་བཤད་པ་ནི། སྨན་པ་རྒྱལ་པོ་ལ་སྡང་དང༌། །དེ་དང་མི་མཛའ་སྡང་བ་དང༌། །ཡོ་བྱད་མི་འབྱོར་བྲེལ་བ་དང༌། །ཉན་དུ་མི་བཏུབ་ཚེ་ཟད་དང༌། །གཏུམ་ཞིང་མྱ་ངན་ལ་མནན་འཇིགས། །བྱས་པ་མི་གཟོ་སྨན་བརྙས་སྤང༌། །ཞེས་བྱ་བ་ཡིན་ཏེ། ནད་པ་དེ་ལྟ་བུ་ནི་གསོར་རུང་ཡང་སྤང་བར་བྱའོ། །སྨན་པ་རྒྱལ་པོ་ལ་སྡང་ཞིང༌། །ཞེས་བྱ་བ་ནི་སྨན་པ་དག་དང་རྒྱལ་པོ་སྟེ། ས་བདག་ལ་སྡང་བ་དང༌། དེ་བཞིན་དུ་དེ་དང་མི་མཛའ་ཞེས་བྱ་བ། སྨན་པ་དང་རྒྱལ་པོ་ལ་སྡང་ཞིང་མི་མཛའ་བ་དེ་ཡང་སྤང་བར་བྱའོ། །སྡང་བ་དང་ཞེས་བྱ་བ་ནི་བདག་ཉིད་ལ་སྡང་ཞིང་དགྲར་བྱེད་པའོ། །ཡོ་བྱད་མི་འབྱོར་ཞེས་བྱ་བ་ནི་ཡོ་བྱད་མཚང་བ་སྟེ། གསོ་བའི་ཡན་ལག་དང་མི་ལྡན་པའོ། །བྲེལ་བ་ནི་བྱ་བ་མང་བ་སྟེ། བྱ་བ་གཞན་ལ་ལྟོས་ཤིང༌། །ལས་གཞན་ལ་སེམས་ཞེན་པའོ། །ཉན་དུ་མི་བཏུབ་པ་ནི་སྨན་པའི་བསྒོ་བ་མི་བྱེད་པ་གང་ཡིན་པ་དེ་ཡང་སྤང་བར་བྱའོ། །ཚེ་ཟད་པ་ནི་འཚོ་བ་ཡོངས་སུ་ཟད་པའོ། །གཏུམ་པ་ནི་འཕྲལ་དུ་གནོད་པ་བྱེད་ཅིང་གདུག་པའི་ཆོས་ཅན་ནོ། །མྱ་ངན་ལ་མནན་པ་ནི་ཆུང་མ་
ལ་སོགས་པ་ཤི་བ་ལས་བྱུང་བའི་མྱ་ངན་གྱིས་གཟིར་བའོ། །འཇིགས་པ་ནི་འཇིགས་པ་དང་བཅས་པའོ། །བྱས་པ་མི་གཟོ་བ་ནི་གང་ལ་ཡང་ཕན་པར་བྱས་སུ་ཟིན་ཀྱང༌། གནོད་པ་བྱེད་པའོ། །སྨན་པ་བརྙས་པ་ནི་བདག་ཉིད་སྨན་པ་མ་ཡིན་དུ་ཟིན་ཀྱང༌། སྨན་པ་ལྟ་བུར་འཆོས་ཤིང་རྨོངས་པས་རང་དགར་སྨན་དཔྱད་བྱེད་པ་སྟེ། དེ་ཡང་སྤང་བར་བྱའོ། །དེ་ལྟར་ལེའུ་དང་པོར་གཞུང་མ་ལུས་པའི་དོན་མདོར་བསྡུས་པ་བཤད་ནས། དེའི་འོག་ཏུ་བདེ་བླག་ཏུ་དྲན་པར་བྱ་བའི་ཕྱིར། ལེའུའི་གྲངས་ཀྱི་མདོར་བསྡུས་པ་བཤད་པ་ནི། དེ་ནས་གཞན་ཡང་རྒྱུད་འདི་ཡི། །ལེའུ་བསྡུས་པ་བཤད་བྱ་སྟེ། །ཞེས་བྱ་བ་ཡིན་ཏེ། དེ་ནས་དེའི་འོག་ཏུ་བདེ་བར་དྲན་པར་བྱ་བའི་ཕྱིར། ལེའུ་བསྡུས་པ་བཤད་པར་བྱའོ་ཞེས་བྱ་བར་སྦྱར་རོ། །རྒྱུད་ཅེས་བྱ་བ་འདིས་ཚེའི་རིག་བྱེད་ཀྱི་དོན་འཛིན་ཅིང་སྡུད་པས་ན་རྒྱུད་དོ། །ལེའུ་བསྡུས་པ་ནི་ལེའུ་རྣམས་བསྡུས་ཤིང་ཕུང་པོ་གཅིག་ཏུ་བྱེད་པའོ། །དེ་དག་ཀྱང་གང་ཞིག་ཡིན་ཞེ་ན། ཚེ་རིང་ཉིན་རེ་དུས་སྤྱོད་དང༌། །ནད་མེད་བྱ་དང་བཏུང་བ་དང༌། །ཟས་ཤེས་བྱ་དང་ཟས་བསྡམ་བྱ། །ཟད་ཚོད་སྨན་དང་རོ་ལ་གནས། །ནད་ཤེས་བྱ་དང་དེའི་དབྱེ་བ། །དེ་གསོ་བ་དང་གསོ་ཐབས་གཉིས། །སྦྱང་སོགས་སྣུམ་ཆོས་ཁྲུས་བརྟ་བྱ། །སྨན་དུད་ཁར་དོར་མིག་བཀྲུ་དང༌། །གསོ་དང་དབྱུང་ཐབས་ཟུག་རྡུ་མཚོན། །གཏར་དཔྱད་ཟུག་རྡུ་དབྱུང་བའི་དཔྱད། །མཚོན་དང་ཐལ་སྨན་མེ་བཙའི་ལས། །མདོ་གནས་ལེའུ་སུམ་ཅུ་ནི། །འདི་ཡིན། ཞེས་བྱ་བ་ལ། དེ་ལྟར་སྔར་བཤད་པའི་ལེའུ་སུམ་ཅུས་ནི་མདོའི་གནས་བཤད་པ་ཡིན་ཏེ། ཚེ་རིང་བར་འདོད་པ་དང༌། ཉིན་རེ་དང་དུས་སུ་སྤྱོད་པ་དང༌། ཞེས་པ་གཉིས་པའི་མཚམས་སྦྱར་བར་བྱའོ། །དེས་ན་ཚེ་རིང་བར་འདོད་པ་དང༌། ཉིན་རེ་སྤྱོད་པ་དང༌། དུས་ཀྱི་སྤྱོད་པ་དང༌། ནད་མེད་པར་བྱ་བ་དང༌། བཏུང་བའི་རྫས་ཤེས་པར་བྱ་བ་དང༌། ཟས་ཀྱི་རང་བཞིན་ཤེས་པར་བྱ་བ་དང༌། ཟས་ལེགས་པར་བསྡམས་པར་བྱ་བ་དང༌། ཟས་ཀྱི་ཚོད་ཟིན་པར་བཟའ་བ་དང༌། སྨན་ལ་སོགས་པའི་རྫས་ཤེས་པར་བྱ་བ་དང༌། རོ་རྣམས་ཤེས་པར་བྱ་བ་དང༌། ནད་ལ་སོགས་པ་ཤེས་པར་བྱ་བ་དང༌། ནད་དེའི་བྱེ་བྲག་ཤེས་པར་བྱ་བ་དང༌། ནད་གསོ་བ་བསྟན་པ་དང༌། གསོ་
ཐབས་རྣམ་པ་གཉིས་དང༌། སྦྱང་བ་ལ་སོགས་པའི་ཚོགས་བསྡུ་བ་དང༌། སྣུམ་ཆོས་ཀྱི་དཔྱད་དང༌། དུགས་ཀྱི་དཔྱད་དང༌། སློན་དང་ཁྲུས་ཀྱི་དཔྱད་དང༌། མདོམས་ཀྱི་དཔྱད་དང༌། སྣ་ནས་གཏོང་བའི་སྨན་དང༌། སྨན་གྱི་དུད་པའི་དཔྱད་དང༌། སྨན་ཁུས་མཁུར་བ་བཀང་ཞིང་དོར་བ་ལ་སོགས་པའི་དཔྱད་དང༌། མིག་སྨན་བླུགས་ཏེ་མིག་ནད་བཀྲུ་བའི་དཔྱད་དང༌། མིག་གསོ་ཞིང་ཚིམ་པར་བྱ་བའི་དཔྱད་དང༌། སྨན་གྱི་ཕུར་མ་བཙོ་ཞིང་སྨན་ཁུས་མིག་བརྟ་བའི་ཆོ་ག་དང༌། མཚོན་གྱི་དུམ་བུ་ལུས་ལས་དབྱུང་བའི་ཆོ་ག་དང༌། གཏར་དཔྱད་ཀྱིས་དབུག་པའི་ཆོ་ག་དང༌། མཚོན་གྱི་ལས་ཀྱི་ཆོ་ག་དང༌། ཐལ་སྨན་རྣོན་པོ་དང་མེ་བཙའི་ལས་ཀྱི་ཆོ་གའོ། །འདི་དག་གིས་ནི་རྒྱུད་ཀྱི་དོན་མ་ལུས་པ་མདོར་སྟོན་པ་ཡིན་པས་ན་མདོའི་གནས་ཏེ་རྒྱུད་མ་ལུས་པའི་མགོ་བོ་ལྟ་བུ་ཡིན་ནོ། །ད་ནི། ལུས་ཀྱི་བརྗོད་བྱ་སྟེ། ཞེས་བྱ་བ་ལ། ལུས་ཀྱི་ཞེས་བྱ་བ་ནི་ལུས་ཀྱི་གནས་སོ། །ཅི་ཞིག་བརྗོད་ཅེ་ན་ལེའུ་བསྡུས་པ་ལས། དེ་དག་ཀྱང་གང་ཞེ་ན། མངལ་དུ་འཇུག་དང་དེའི་ནད་དང༌། །ཡན་ལག་གནད་ཀྱི་བྱེ་བྲག་དང༌། །རྣམ་འགྱུར་བང་ཆེན་ལས་བྱུང་དྲུག །ཅེས་བྱ་བ་ཡིན་ཏེ། དེ་ལ་ལུས་དེའི་མངལ་དུ་འཇུག་པ་དང༌། དེའི་ནད་ནི་མངལ་དེའི་ནད་དེ། ལུས་ཀྱི་མངལ་འཇིག་པ་དང༌། ལུས་ཀྱི་ཡན་ལག་གི་བྱེ་བྲག་དང༌། ལུས་ཀྱི་གནད་ཀྱི་བྱེ་བྲག་དང༌། ལུས་ཀྱི་རྣམ་པར་འགྱུར་བ་ཤེས་པར་བྱ་བ་དང༌། ལུས་ཀྱི་བང་ཆེན་ལ་སོགས་པ་ཤེས་པར་བྱ་བ་སྟེ། དེ་ལྟར་ན་ལེའུ་དྲུག་པོ་དེ་དག་ནི་ལུས་ཀྱི་གནས་ཡིན་ནོ། །དེ་ནས་ནད་གཞིའི་གནས་བཤད་པ་ནི། །ནད་ཀུན་འབྱུང་བའི་ནད་གཞི་དང༌། །རིམས་ཁྲག་དབུགས་མི་བདེ་གཅོང་སོགས། །ཆང་དང་གཞང་འབྲུམ་ཚད་པའི་ནད། །ཆུ་འགགས་གཅིན་ནི་སྙི་བ་དང༌། །ཁོང་འབྲས་དམུ་རྫིང་དག་དང་ནི། །སྐྱ་རྦབ་མཛེ་ནད་རླུང་གིས་གཟིར། །དྲེག་ནད་དག་དང་བཅུ་དྲུག་ཡིན། །ཞེས་བྱ་བ་ཡིན་ཏེ། ནད་ཐམས་ཅད་ཀྱི་ནད་གཞི་དང༌། རིམས་དང༌། མཁྲིས་པ་དང༌། ལུད་པའི་ནད་གཞི་དང༌། དབུགས་མི་བདེ་བའི་ནད་གཞི་དང༌། ཟད་བྱེད་ལ་སོགས་པའི་ནད་གཞི་དང༌། ཆང་དྲགས་པ་ལ་སོགས་པའི་ནད་གཞི་དང༌། གཞང་འབྲུམ་གྱི་ནད་གཞི་དང༌། ཚད་པས་འཁྲུ་བའི་ནད་གཞི་དང༌། གཅིན་འགགས་པའི་ནད་གཞི་དང༌། གཅིན་སྙི་བའི་
ནད་གཞི་དང༌། ཁོང་འབྲས་དང༌། སྐྲན་གྱི་ནད་གཞི་དང༌། དམུ་རྫིང་གི་ནད་གཞི་དང༌། སྐྱ་རྦབ་དང༌། འོར་ནད་དང༌། མེ་དབལ་ལ་སོགས་པའི་ནད་གཞི་དང༌། མཛེ་ནད་དང༌། ཤ་བཀྲ་དང༌། སྲིན་བུའི་ནད་གཞི་དང༌། རླུང་ནད་ཀྱི་ནད་གཞི་དང༌། དྲེག་ནད་ཀྱི་ནད་གཞི་སྟེ། དེ་ལྟར་ལེའུ་བཅུ་དྲུག་ནི་ནད་གཞིའི་གནས་ཡིན་ནོ། །གསོ་བ་བརྗོད་པར་བྱ་སྟེ། རིམས་ནད་གསོ་དང་ཁྲག་དང་ནི། །ལུད་པ་དབུགས་མི་བདེ་དང་གཅོང་། །སློན་དང་ཆང་ནད་གཞང་འབྲུམ་དང༌། །ཚད་ནད་ཕོ་བ་གཅིན་ནད་གཉིས། །ཁོང་འབྲས་སྐྲན་དང་དམུ་རྫིང་དང༌། །སྐྱ་རྦབ་འོར་ནད་མེ་དབལ་དང༌། །མཛེ་ནད་ཤ་བཀྲ་རླུང་ནད་དང༌། །དྲེག་ནད་གསོ་བའི་དཔྱད་རྣམས་ཏེ། །ལེའུ་ཉི་ཤུ་གཉིས་འདི་ཡིན། །ཞེས་བྱ་བ་ཡིན་ཏེ། གསོ་བའི་ནད་ལ་ལེའུ་ཉི་ཤུ་རྩ་གཉིས་ཡོད་པའོ། །དེ་ཡང་གང་ཡིན་ཞེ་ན། རིམས་ནད་གསོ་བ་དང༌། ཁྲག་དང་མཁྲིས་པ་གསོ་བ་དང༌། ལུད་པ་གསོ་བ་དང། དབུགས་མི་བདེ་བ་གསོ་བ་དང༌། གཅོང་ཆེན་པོའི་ནད་གསོ་བ་དང༌། རྟག་ཏུ་སློན་བ་དང༌། སྙིང་ནད་དང༌། ཆང་ནད་གསོ་བ་དང༌། གཞང་འབྲུམ་གསོ་བ་དང༌། ཚད་པས་འཁྲུ་བ་གསོ་བ་དང༌། ཕོ་བའི་ནད་གསོ་བ་དང༌། གཅིན་འགགས་པའི་ནད་གསོ་བ་དང༌། གཅིན་སྙི་བ་གསོ་བ་དང། ཁོང་འབྲས་འཕེལ་བ་གསོ་བ་དང༌། སྐྲན་ནད་གསོ་བ་དང༌། དམུ་རྫིང་གསོ་བ་དང༌། སྐྱ་རྦབ་ཀྱི་ནད་གསོ་བ་དང༌། འོར་ནད་གསོ་བ་དང༌། མེ་དཔལ་གསོ་བ་དང༌། མཛེ་ནད་གསོ་བ་དང༌། ཤ་བཀྲ་གསོ་བ་དང༌། སྲིན་ནད་གསོ་བ་དང༌། རླུང་ནད་གསོ་བ་དང༌། དྲེག་ནད་གསོ་བའི་དཔྱད་དེ། ཉི་ཤུ་རྩ་གཉིས་པོ་འདི་དག་ནི་གསོ་བའི་གནས་ཞེས་བྱའོ། །དེ་ལས་གཞན་ཡང་ཆོ་ག་གྲུབ། །སྐྱུག་སྨན་བཀྲུ་སྨན་ཆོ་ག་དང༌། །དེ་གྲུབ་མས་གཏོང་ཆོ་ག་དང༌། །མས་གཏོང་ཉེས་གྲུབ་དྲུག་པ་ནི། །སྨན་ཡིན། ཞེས་བྱ་བ་ནི་འདི་ཡན་ཆད་ཆོ་ག་གྲུབ་པའི་གནས་ཡིན་ནོ། །སྐྱུག་སྨན་གྱི་ཆོ་ག་དང། བཀྲུ་སྨན་གྱི་ཆོ་ག་དང༌། སྐྱུག་སྨན་དང་བཀྲུ་སྨན་དེ་གྲུབ་པར་བྱ་བའི་ཆོ་ག་དང༌། སྨན་མས་གཏོང་བའི་ཆོ་ག་དང༌། སྨན་མས་གཏོང་ཉེས་པ་གྲུབ་པའི་ཆོ་ག་དང༌། སྨན་གྱི་ཆོ་གའོ། །དེ་ལྟར་ན་ལེའུ་དྲུག་ནི་ཆོ་ག་གྲུབ་པའི་གནས་ཡིན་ནོ། །དེ་ནས་ཕྱི་མ་ནི། །བྱིས་པ་ཉེར་སྤྱོད་དེའི་ནད་དང༌།
དེའི་གདོན་འབྱུང་པོར་གཏོགས་པ་གཉིས། །སྨྱོ་དང་བརྗེད་བྱེད་སོགས་གཉིས་གཉིས། །མིག་ཆུ་རྫི་མ་གྲྭ་ཡི་མཚམས། །མིག་འབྲས་རབ་རིབ་མཐོང་ཉམས་གསུམ། །གཉིས་གཉིས་ཀུན་ལ་འགྲོ་བ་ཡིན། །རྣ་ནད་སྣ་དང་ཁ་དང་མགོའི། །རྨ་དང་ཆག་གྲུགས་མཚན་པར་རྡོལ། །འབྲས་སོགས་ཕྲ་མོའི་ནད་རྣམས་དང༌། །གསང་བའི་ནད་ནི་ཐ་དད་གཉིས། །དུག་དང་སྦྲུལ་དང་སྲིན་བུའི་དུག །བྱི་བ་དང་ནི་བཅུད་ཀྱིས་ལེན། །བུ་མེད་ས་བོན་གསོ་བ་སྟེ། །ལེའུ་བཞི་བཅུ་ཉིད་ཡིན་ནོ། །ཞེས་བྱ་བ་ལ། དེ་ནས་ཞེས་བྱ་བ་ལ་གྲུབ་པའི་གནས་མན་ཆད་ནི་ཕྱི་མ་ཞེས་བྱ་བ་སྟེ། རྒྱུད་ཕྱི་མ་ཡིན་པར་ཤེས་པར་བྱའོ། །བྱིས་པའི་ཉེ་བར་སྤྱོད་པ་ནི། །བྱིས་པའི་ཉེ་བར་སྤྱོད་པར་བྱ་བ་གང་ཡིན་པ་དང༌། དེའི་ནད་དང༌། དེའི་གདོན་དང༌། འབྱུང་པོར་གཏོགས་པ་གཉིས་ཏེ། གདོན་གྱི་དམིགས་ཤེས་པར་བྱ་བ་དང༌། གདོན་ནད་བསལ་བར་བྱ་བའོ། །སྨྱོ་བ་དང་བརྗེད་བྱེད་ལ་སོགས་པ་ལ་ཡང་གཉིས་གཉིས་ཏེ། སྨྱོ་བའི་ནད་ཤེས་པར་བྱ་བ་དང༌། སྨྱོ་ནད་བསལ་བ་དང༌། བརྗེད་བྱེད་ཀྱི་ནད་ཤེས་པར་བྱ་བ་དང༌། བརྗེད་བྱེད་ཀྱི་ནད་བསལ་བར་བྱ་བ་དང༌། རྫི་མ་དང་མིག་ཆུའི་ནད་ཤེས་པར་བྱ་བ་དང༌། གྲྭ་མཚམས་ཀྱི་དཀར་བ་དང༌། གནག་པའི་ནད་ཤེས་པར་བྱ་བ་དང༌། གྲྭ་མཚམས་ཀྱི་དཀར་བ་དང༌། གནག་པའི་ནད་བསལ་བའོ། །མིག་གི་འབྲས་བུའི་ནད་ཤེས་པར་བྱ་བ་དང༌། རབ་རིབ་བསལ་བ་དང༌། མཐོང་བ་ཉམས་པའི་ནད་བསལ་བ་དང༌། མིག་ནད་སྣ་ཚོགས་ཤེས་པར་བྱ་བ་དང༌། མིག་ནད་སྣ་ཚོགས་བསལ་བ་དང༌། རྣ་ནད་ཤེས་པར་བྱ་བ་དང༌། རྣ་ནད་བསལ་བ་དང༌། སྣ་ནད་ཤེས་པར་བྱ་བ་དང༌། སྣ་ནད་བསལ་བ་དང༌། ཁ་ནད་ཤེས་པར་བྱ་བ་དང༌། ཁ་ནད་བསལ་བ་དང༌། མགོ་ནད་ཤེས་པར་བྱ་བ་དང༌། མགོ་ནད་བསལ་བ་དང༌། རྨ་རྙིང་པའི་ནད་ཤེས་པར་བྱ་བ་དང༌། རྨ་རྙིང་པའི་ནད་བསལ་བ་དང༌། རྨ་སར་པ་གསོ་བ་དང༌། རྐང་ལག་ཆག་གྲུགས་སུ་གྱུར་པ་གསོ་བ་དང༌། མཚན་པར་རྡོལ་བའི་ནད་གསོ་བ་དང༌། འབྲས་དང༌། ཐོར་བུ་དང༌། རྐང་བམ་དང༌། ཟད་བྱེད་དང༌། རྩ་སྦུབས་ཤེས་པར་བྱ་བ་དང༌། འབྲས་དང་ཐོར་བུ་ལ་སོགས་བའི་ནད་གསོ་བ་དང༌། འབྲུམ་བུ་ཕྲ་མོའི་ནད་ཤེས་པར་བྱ་བ་དང༌། འབྲུམ་
བུ་ཕྲ་མོའི་དད་གསོ་བ་དང༌། གསང་བའི་གནས་ཀྱི་ནད་ཤེས་པར་བྱ་བ་དང༌། གསང་བའི་གནས་ཀྱི་ནད་གསོ་བ་དང༌། དུག་སྣ་ཚོགས་ཀྱི་དམིགས་བརྟག་པ་དང༌། དུག་གསོ་བའི་ཆོ་ག་དང༌། སྦྲུལ་གདུག་པས་ཟིན་པའི་ནད་གསོ་བ་དང༌། སྲིན་དུ་གདུག་པས་ཟིན་པའི་ནད་གསོ་བ་དང༌། བྱི་བ་དང༌། ཕུས་པ་ལ་སོགས་པས་ཟིན་པའི་ནད་གསོ་བ་དང༌། བཅུད་ཀྱིས་ལེན་པ་དང༌། ས་བོན་འཕེལ་ཞིང་རོ་ཙ་བར་བྱེད་པ་སྟེ། དེ་ལྟར་ལེའུ་བཞི་བཅུ་ནི་རྒྱུད་ཕྱི་མ་ཡིན་ནོ། །དེའི་ནད་དང༌། དེའི་གདོན་ཞེས་བྱ་བ་ལ། དེ་ཞེས་བྱ་བ་ནི་བྱིས་པ་ལ་བསྙེག་པ་ཡིན་ནོ། །གཉིས་གཉིས་ཞེས་བྱ་བ་ནི། མིག་གི་མཆུ་གཉིས་དང༌། གྲྭ་མཚམས་གཉིས་སོ། །གསུམ་ཞེས་བྱ་བ་ནི་མིག་འབྲས་དང༌། རབ་རིབ་དང༌། མཐོང་བ་ཉམས་པ་གསུམ་པོ་ནི་རེ་རེ་ཞིང་རེ་རེའོ། །དེ་ལ་རབ་རིབ་ནི་ཅུང་ཟད་མི་གསལ་བའོ། །མཐོང་བ་ཉམས་པ་ནི་སྤྲིན་ལྟ་བུས་ཁེབས་པའོ། །གཉིས་གཉིས་ཞེས་བྱ་བ་ནི། མིག་ནད་སྣ་ཚོགས་ནས། རྨའི་བར་དུ་ཡིན་པར་ཤེས་པར་བྱའོ། །རྐང་ལག་ཆག་གྲུགས་དང༌། མཚན་བར་རྡོལ་བ་ནི་རེ་རེའོ། །འབྲས་ལ་སོགས་པ་དང༌། གསང་བའི་ནད་དང༌། འབྲུམ་བུ་ཕྲ་མོའི་ནད་ནི་སོ་སོ་ཞིང་གཉིས་གཉིས་སོ། །བུ་མེད་པ་ནི་རབས་ཆད་པའི་སྐྱེས་བུ་སྟེ། དེའི་ས་བོན་གསོ་ཞིང་ཁུ་བ་འཕེལ་བར་བྱ་བ་ནི། ལེའུ་བཞི་བཅུ་པ་ཡིན་ནོ། །དེ་ལྟར་ལེའུ་ནི་བརྒྱ་ཉི་ཤུ། །གནས་ནི་དྲུག་ཏུ་བཤད་པ་ཡིན། །ཞེས་བྱ་བ་ལ། དེ་ལྟར་ཞེས་བྱ་བ་རྣམ་པ་འདིས་ན། ལེའུ་བརྒྱ་ཉི་ཤུ་ཡོད་པ་ཡིན་ནོ། །གནས་དྲུག་ཅེས་བྱ་བ་ནི། མདོ་དང༌། ལུས་དང༌། ནད་གཞི་དང༌། གསོ་བ་དང༌། ཆོག་གྲུབ་པ་དང༌། རྒྱུད་ཕྱི་མའོ། །བཤད་པ་ཡིན་ཞེས་བྱ་བ་ནི། བསྟན་པ་ཡིན་ཞེས་པའི་དོན་ཏོ། །ཡན་ལག་བརྒྱད་པའི་སྙིང་པོ་བསྡུས་པ་ཞེས་བྱ་བའི་མདོའི་གནས་ལས་རྣམ་པར་འགྲེལ་པ། ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་དང་པོའི་འགྲེལ་པའོ།། །།དེ་ནས་ཉིན་རེ་ཞིང་སྤྱད་པའི་ལེའུ་བཤད་བར་བྱའོ། །ཞེས་བྱ་བ་ལ། དེ་ནས་ཞེས་པ་ནི་ལེའུ་ཐམས་ཅད་ལ་བཀྲ་ཤིས་པའི་དོན་ཡིན་པའམ། དེ་བཞིན་དུ་དེ་མ་ཐག་པ་དང༌། རྩོམ་པ་དང༌། རྗེས་སུ་འབྲེལ་པ་ཡིན་ནོ། །དེ་ནས་
ཞེས་བྱ་བ་ལ་སོགས་པའི་སྒྲ་ལེའུ་སྔ་མར་དོན་བཤད་ཟིན་མོད་ཀྱི། བཀྲ་ཤིས་བའི་དོན་དུ་སློབ་དཔོན་གྱིས་ལེའུ་རེ་རེའི་རྩོམ་པ་ལ་བཀྲ་ཤིས་པར་བྱ་བའི་ཕྱིར། དེ་ནས་ཞེས་བྱ་བའི་སྒྲ་ནི་སྨོས་པ་ཡིན་ནོ། །ཉི་མ་རེ་རེ་ཞིང་བྱ་བའི་སྤྱོད་པ་ཡིན་པས་ན། ཉིན་རེ་ཞིང་སྤྱད་བར་བྱ་བའམ། ཉིན་མོ་སྤྱོད་པ་ཡིན་པས་ན། ཉིན་རེའི་སྤྱོད་པ་སྟེ། འཇིག་རྟེན་གཉི་ག་ལ་ཕན་པར་བྱ་བའི་ཟས་དང༌། སྤྱོད་ལམ་གྱི་སྤྱོད་པ་སྤྱོད་པར་བྱེད་པ་སྟེ། ཉི་མ་རེ་རེ་ཞིང་གང་ཞིག་བྱ་བའི་ལེའུ་དེ་བཤད་པར་བྱའོ་ཞེས་པའོ། །ཚེ་རིང་འདོད་པའི་ལེའུའི་རྗེས་ཐོགས་སུ་འདི་བཤད་པའི་འབྲེལ་པ་གང་ཞིག་ཡིན་ཞེ་ན། དེ་བརྗོད་པར་བྱ་སྟེ། གང་གི་ཕྱིར་ཚེ་རིང་བར་འདོད་པའི་སྐྱེས་བུས། གཙོ་ཆེར་ཚེ་ལ་ཕན་པ་གང་ཡིན་པ་དེ་དང་པོར་ཀུན་ཏུ་བསྟེན་པར་བྱ་བའམ། དེའི་རྗེས་ལ་ནི་ཕན་བ་གཞན་གང་དག་ཡོད་པ་བསྟེན་པར་བྱ་བ་ཡིན་ནོ། །དེ་བས་ན་དང་པོ་རེ་ཞིག་ཀུན་ཏུ་སྤྱོད་པ་གཙོར་གཟུང་བར་བྱའོ། །དེ་ཡང་གང་གི་ཕྱིར་ཀུན་ཏུ་སྤྱོད་པ་ལས། ཚེ་རིང་བ་འཐོབ་པར་འགྱུར་བས་ན་ཀུན་ཏུ་སྤྱོད་པ་ཡིན་ནོ། །གང་འདིར་མཚན་མོའི་སྤྱོད་པ་དག་ཀྱང་བཤད་མོད་ཀྱི། འོ་ན་ཀྱང་གཙོ་བོར་གྱུར་པས། ལེའུ་འདི་ལས་ཉིན་མོའི་སྤྱོད་པ་བསྟན་པ་ཡིན་ནོ། །དེ་བས་ན་འདི་ལ་ནི་ཉིན་རེའི་སྤྱོད་པ་ཞེས་བཤད་དོ། །གཞུང་འདི་ལས་ནི་ཆེ་བསྐྱང་བའི་རང་བཞིན་ཅན་སྟོན་ལ། དེ་ཡང་རྣམ་པ་གཉིས་ཏེ། ཐ་མལ་པར་བདེ་བར་གནས་པའི་འཇུག་པ་དང༌། ནད་པའི་འཇུག་པའོ། །དེ་ལ་བཀྲ་ཤིས་པའི་ཕྱིར་དང༌། སྨྲ་བར་བྱ་བ་ཉུང་ཟད་ཅིག་ཡོད་པའི་ཕྱིར་དང༌། ནད་པ་ལ་ཡང་དགོས་པའི་ཕྱིར། ཐ་མལ་པར་བདེ་བར་གནས་པར་འཇུག་པ་ཉིད་ཐོག་མར་བཤད་པ་ཡིན་ཏེ། བ་དེར་གནས་ཆེ་ནི་བསྲུང་བའི་ཕྱིར། །ཡུད་ཙམ་ཚངས་ཕྱིར་གནས་ཏེ་ལངས། །ཞེས་བྱ་བ་ལ། བདེ་བར་གནས་ཤིང་ནད་མེད་ལ་དགེ་བ་དེས་ནི། ཚད་ཇི་ཙམ་དུ་འོངས་བའི་སྲོག་བསྲུང་བའི་ཕྱིར་ཚངས་པའི་ཡུད་ཙམ་ན་ལྡང་ཞིང་ལངས་པར་བྱའོ། །དེ་ལ་ཡུད་ཙམ་ནི་ཆུ་ཚོད་གཉིས་སོ། །ཚངས་པའི་ནི་མྱ་ངན་ལས་འདས་པ་ལ་བྱའོ། །དེའི་དོན་དུ་འདོན་པ་ལ་ཚངས་པ་ཞེས་བྱའོ། །དེ་བྱ་བ་དང་འཚམ་པའི་ཡུད་ཙམ་ནི། ཐུན་ཐ་མའི་ཆུ་ཚོད་གཉིས་སོ། །འདི་ནི་བདེ་བར་གནས་པའི་དབང་དུ་བྱས་པ་ཡིན་པར་ཤེས་པར་
བྱའོ། །ལངས་ནས་ཅི་ཞིག་ལ་བརྟེན་པར་བྱ་ཞེ་ན། དེའི་ཕྱིར་བཤད་པ་ནི། ལུས་ཀྱི་བྱ་བ་རྫོགས་བྱས་ནས། །དེ་ནས་གཙང་སྦྲའི་ཆོ་ག་བྱ། །ཨརྐ་ནྱ་གྲོ་དྷ་སེང་ལྡེང༌། །ཀ་རཉྫ་ག་ཀུ་ལ་སོགས། །བསྐ་དང་ཚ་དང་ཁ་བ་དག །རྩེ་འཇམ་ནང་པར་ཟས་སྤྱད་ནས། །སོ་དང་རྙིལ་ལ་མ་གནོད་པར། །སོ་ཡི་དག་བྱེད་བཅའ་བར་བྱ། །ཞེས་བྱ་བ་ཡིན་ཏེ། ལུས་ཀྱི་བྱ་བ་རྫོགས་བྱས་ནས། །ཞེས་བྱ་བ་ནི། བཤད་བ་དང༌། གཅི་བ་དོར་བ་ལ་སོགས་པའི་མཚན་ཉིད་ཅན་ཏེ། རྣམ་གྲངས་གཞན་དུ་ན་ངེས་པར་བྱ་བའི་བྱ་བ་བྱས་ནས། དེ་ནས་དེའི་འོག་ཏུ་གཙང་སྦྲའི་ཆོ་ག་བྱས་ལ། སོ་དག་པར་བྱེད་བའི་སོ་ཤིང་བཅའ་བར་བྱའོ། །དེའི་ནང་པར་ཏེ་ཐོ་རངས་དང༌། ཟས་སྤྱོད་དེ་ཟས་ཟོས་ཟིན་ནས་བཅའ་ལ། དེ་ཡང་རྩེ་མོ་འཇམ་པ་སྟེ། པིར་ལྟ་བུར་གྱུར་པ་ཙམ་དུ་བཅའ་ལ་བྱའོ། །དེ་བཞིན་དུ་བསྐ་བ་དང༌། ཚ་བ་དང༌། ཁ་བའི་ཞེས་བྱ་བ་ཡིན་ཏེ། རོ་དེ་ལྟ་བུ་དག་གོ །དེ་ཡང་གང་ཞིག་ཅེ་ན། ཨརྐ་ཞེས་བྱ་བ་ལ་སོགས་པ་ཡིན་ནོ། །སོགས་པའི་སྒྲས་ནི། ཤིང་སད་ཛ་དང༌། ཨ་རི་མེ་ད་དང༌། ཨ་བ་མརྒ་དང༌། ཛཱ་ཏིའི་ཤིང་ལ་སོགས་པ་བསྡུའོ། །དེ་ཡང་སོ་དང་རྙིལ་ལ་མི་གནོད་ཅིང༌། མ་གཙེས་བར་བཅའ་བར་བྱའོ། །ཅི་ཐམས་ཅད་ཀྱིས་བཅའ་བར་བྱ་བའམ། འོན་ཏེ་འགའ་ཞིག་གིས་ཤེ་ན། དེའི་ཕྱིར་བཤད་པ་ནི། མ་ཞུ་སློན་བྲོ་དབུགས་མི་བདེ། །ལུད་པ་ལུ་རིམས་ཁ་ཡོན་ཅན། །སྐོམ་ཞིང་ཁ་སྐམས་སྙིང་མིག་རྣ། །མགོ་བོ་ན་བས་འདི་མི་བཅའ། །སོ་ཤིང་དེ་ནི་འདི་དག་གིས་བཅའ་བར་མི་བྱའོ། །གང་གིས་ཤེ་ན། མ་ཞུ་བ་སྟེ། ཁ་ཟས་མ་ཞུ་བ་དང༌། སློན་བྲོ་ཞིང་སྐྱུགས་པ་དང༌། དབུགས་མི་བདེ་བ་ལ་སོགས་པ། འོག་ནས་བཤད་པའི་མཚན་ཉིད་དང་ལྡན་པའོ། །ཅན་ཞེས་བྱ་བ་ནི་ཐམས་ཅད་ལ་སྦྱར་ཏེ། གང་ལ་མ་ཞུ་བ་ཡོད་པ་དེ་ནི་མ་ཞུ་བ་ཅན་ནོ། །དེ་བཞིན་དུ་གཞན་དག་ལ་ཡང་སྦྱར་རོ། །ཁ་ཡོ་བ་ནི་ཁའི་ཕྱེད་རླུང་གིས་ཡོན་པོར་གྱུར་པའོ། །ན་བ་ཞེས་བྱ་བ་ནི་སྐོམ་པ་ལ་སོགས་པ་ཀུན་དང་སྦྱར་ཏེ། དེས་ན་སྐོམ་དད་ཅན་དང༌། ཁ་སྐོམས་པའི་ནད་ཅན་དང༌། སྙིང་ནད་ཅན་དང༌། མིག་ནད་ཅན་དང༌། རྣ་ནད་ཅན་དང་མགོན་བ་དག་གིས་སོ་ཤིང་བཅའ་བདེ་སྤང་བར་བྱའོ། །
སོ་ཤིང་བཅའ་བའི་འོག་ཏུ་མིག་སྨན་བྱ་སྟེ། དེའི་ཕྱིར་བཤད་པ་ནི། རྟག་ཏུ་མིག་སྨན་སྐྱེར་ཁཎྜ། །མིག་ལ་ཕན་པས་དེ་ཕྱིར་བསྟེན། །ཞེས་བྱ་བ་ཡིན་ཏེ། རྟག་པར་དུས་ཐམས་ཅད་དུ་རྒྱུན་དུ་ནང་པར་དང་དགོངས་ཀ་མིག་གཉིས་སུ་སྐྱེར་ཁཎྜ་བཅུག་པ་ནི་ཕན་ཞིང་བདེ་བར་བྱེད་པ་ཡིན་ནོ། །དེ་བས་ན་དེའི་ཕྱིར་དེ་བསྟེན་ཅིང་གོམས་པར་བྱའོ། །ཅི་དུས་ཐམས་ཅད་དུ་དེ་ཉིད་བསྟེན་པར་བྱ་བ་ཡིན་ནམ་ཞེ་ན། དེའི་ཕྱིར་བཤད་པ་ནི། དེ་ནི་མེ་ཡི་རང་བཞིན་ཏེ། །ལྷག་པར་བད་ཀན་ལ་འཇིགས་པས། །མཆི་མ་འཛག་ཕྱིར་སྐྱེར་ཁཎྜ། །ཞག་བདུན་ཞིང་ནི་བླུགས་པར་བྱ། །ཞེས་བྱ་བ་ཡིན་ཏེ། གང་གི་ཕྱིར་མིག་དེ་ནི་མེའི་རང་བཞིན་ཅན་ནམ། ཚུལ་ཅན་ཡིན་པའི་ཕྱིར་བས། དེའི་ཕྱིར་དབང་པོ་རྣམས་ནི་འབྱུང་བ་ལྔའི་བདག་ཉིད་ཅན་ཡིན་པར་ཕལ་ཆེར་བཤད་ལ། མིག་དེ་ནི་རླུང་ལ་སོགས་པ་བས་ཁྱད་པར་དུ་བད་ཀན་ལ་ལྷག་པར་འཇིགས་པ་ཡིན་ཞིང་བརྟེན་པ་ཡིན་ལ། དེ་དག་ཕན་ཚུན་མི་མཐུན་པ་ཡིན་ལ། དེ་བས་ན་བད་ཀན་དབྱུང་ཞིང་འཛག་པར་བྱ་བའི་ཕྱིར། ཞག་བདུན་བདུན་འདས་པ་དང༌། སྐྱེར་ཁཎྜ་བླུགས་པར་བྱ་ཞིང་བསྟེན་པར་བྱའོ། །དེ་ནས་སྣར་བླུགས་པ་ལ་སོགས་པ་བྱ་དགོས་ཏེ། དེའི་ཕྱིར་འདིའི་འོག་ཏུ་སྣ་སྨན་བཤད་པ་ཡིན་ནོ། །དེ་ཡང་བསྡུས་པ་ལས། མིག་སྨན་སྣ་སྨན་ཁར་གཞག་དོར། །དུད་པ་བརྔུབ་པར་བྱ་བ་དང༌། །དུ་བ་སོ་རྩི་དོར་བ་ཡིས། །རིམ་གྱིས་བད་ཀན་རླུང་ལས་རྒྱལ། །ཞེས་བཤད་པ་ཡིན་པས་ན་འདིར། །དེ་ནས་སྣ་སྨན་མཁུར་བཀད་དོར། །དུད་པ་སོ་རྩི་བསྟེན་པར་བྱ། །ཞེས་པ་ཡིན་ཏེ། དེ་ནས་ཞེས་བྱ་བ་ལ་མིག་སྨན་གྱི་རྗེས་ཐོགས་ལ། སྣ་སྨན་ལ་སོགས་པ་བསྟེན་པར་བྱའོ། །སྣ་སྨན་ནི་སྣ་ནས་གཏང་བའི་སྨན་ནོ། །མཁུར་བཀང་དོར་བ་ནི། སྨན་གྱི་ཁུ་བ་བསྐོལ་བ་ལ་སོགས་པས་མཁུར་བ་བཀང་སྟེ་ཅུང་ཟད་གཞག་ལ་དོར་བའོ། །དུ་བ་ནི་འོག་ནས་བཤད་པའི་མཚན་ཉིད་ཅན་གྱི་སྦྱོར་བའོ། །སོ་རྩི་ཏམ་པོ་ལ་ནི་གྲགས་པར་ཟད་དོ། །དེ་དག་ཀྱང་ཅི་ཐམས་ཅད་ཀྱིས་བསྟེན་པར་བྱ་བའམ། འོན་ཏེ་ལ་ལ་ཞིག་གིས་བསྟེན་པར་བྱ་ཞེ་ན། དེའི་ཕྱིར་སྨྲས་པ་ནི། སོ་རྩི་གློ་འགྲམས་མཁྲིས་པ་ཁྲག །རྩུབ་པས་མིག་ནི་ན་བ་དང༌། །དུག་གིས་བརྒྱལ་ཞིང་ཆང་ནད་གཟིར། །ལུས་སྐེམ་གྱུར་ལ་
གནོད་པ་ཡིན། །ཞེས་བྱ་བ་སྨོས་པ་ཡིན་ཏེ། མཁྲིས་པ་ཁྲག་གིས་གནོད་པར་གྱུར་པའམ། ལུས་སྐེམ་པོར་གྱུར་པ་ལ། སོ་རྩི་ཏམ་པོ་ལ་དེ་གནོད་པ་ཡིན་ནོ། །དེ་ལ་གློ་འགྲམས་པ་ནི་གློ་རྡོལ་པའོ། །མཁྲིས་པ་ཁྲག་ནི་མཁྲིས་པ་ལས་གྱུར་པའི་ཁྲག་གོ །རྩུབ་པའི་རྒྱུས་གང་གི་མིག་གནོད་ཅིང་ན་བར་གྱུར་བ་དེ་ནི། རྩུབ་པས་མིག་ནི་ན་བ་དང༌། །ཞེས་བྱའོ། །ཡང་ན་རྩུབ་པར་གྱུར་པ་དང༌། མིག་ན་བར་གྱུར་པའོ། །དུག་ནི་ཁ་ལྐུགས་པ་ལ་སོགས་པའོ། །བརྒྱལ་བ་ནི་འབོག་པའོ། །ཆང་ནད་ཀྱིས་གཟིར་བ་ནི་ཆང་གིས་གནོད་པར་གྱུར་པ་སྟེ། འོག་ནས་བཤད་པའོ། །ལུས་སྐེམས་གྱུར་པ་ནི་གཅོང་ཆེན་པོས་ཐེབས་པ་སྟེ། འདི་དག་ལ་ནི་གནོད་པ་ཡིན་ནོ། །སྣར་བླུགས་པ་ལ་སོགས་པ་བྱས་ནས། བསྐུ་བྱུག་བྱ་བ་ཡིན་པས་ན། དེའི་ཕྱིར་སྨྲས་པ་ནི། རྟག་ཏུ་བསྐུ་བྱུག་སྤྱོད་བྱེད་ན། །དེ་ནི་རྒས་ངལ་རླུང་འཇོམས་ཡིན། །མིག་གསལ་ལུས་རྒྱས་ཚེ་འཕེལ་ཞིང༌། །གཉིད་འོང་ལྤགས་འཇམ་བརྟས་བྱེད་ཡིན། །ཞེས་བྱ་བ་ཡིན་ཏེ། རྟག་པར་དུས་ཐམས་ཅད་དུ་བསྐུ་བྱུག་ལ་སྤྱད་པར་བྱའོ། །ཅིའི་ཕྱིར་ཞེ་ན། བསྐུ་བྱུག་དེ་ནི་རྒས་པ་དང༌། ངལ་བ་དང༌། རླུང་འཇོམས་པ་ཡིན་པ་དང༌། དེ་བཞིན་དུ་མིག་གསལ་ཞིང་དངས་པར་བྱེད་པ་དང༌། ལུས་རྒྱས་ཤིང་འཕེལ་བ་དང༌། ཚེ་ཤིན་ཏུ་འཕེལ་བར་བྱེད་པ་དང༌། གཉིད་ལེགས་པར་ལོག་པར་གྱུར་པ་དང༌། བགས་པ་ཤིན་ཏུ་འཇམ་ཞིང་མདོག་གསལ་བ་ཉིད་དང་བརྟས་པ་སྟེ། བརྟན་པ་ཉིད་ཀྱིས་ལས་རྣམས་ནུས་པར་བྱེད་པ་ཡིན་ནོ། །དེ་ནི་མགོ་དང་རྣ་བ་དང༌། །རྐང་པར་ཁྱད་པར་དག་ཏུ་བསྟེན། །ཞེས་བྱ་བ་ནི་བསྐུ་བྱུག་བྱ་སྟེ། མགོ་བོ་ལ་སོགས་པས་ཁྱད་པར་དུ་བསྟེན་ཞིང་གོམས་པར་བྱའོ། །གང་གིས་སྤང་བར་བྱ་ཞེ་ན། །བད་ཀན་སྐྱེས་དང་མ་ཞུ་དང༌། །བཀྲུ་སྨན་སོགས་གཏང་བསྐུ་བྱུག་སྤང༌། །ཞེས་བྱ་བ་སྟེ། བད་ཀན་གྱིས་གཟིར་ཞིང་སྐྱེས་པ་ལ་སོགས་པས་སྤང་བར་བྱ་ཞིང་བསྟེན་པར་མི་བྱའོ། །དེ་ཡང་བད་ཀན་སྐྱེས་པ་ནི། བད་ཀན་གྱིས་གཟིར་ཞིང་གནོད་པར་གྱུར་པ་སྟེ། སྐྱེས་པ་སྨོས་པ་ནི་ཤིན་ཏུ་གཟིར་བར་གྱུར་པར་བསྟན་པའི་ཕྱིར་རོ། །མ་ཞུ་བ་ནི་ཟས་ཀྱི་ལྷག་མ་མ་ཞུ་བར་གྱུར་པའོ། །བཀྲུ་སྨན་སོགས་གཏང་ཞེས་བྱ་བ་ནི། བཀྲུ་སྨན་དང་སྐྱུག་སྨན་ལ་སོགས་པ་
བྱས་པ་སྟེ། ལུས་སྦྱངས་ནས་དུས་ཡུན་རིང་པོར་མ་ལོན་པར་དེས་བསྐུ་བྱུག་བསྟེན་པར་མི་བྱའོ། །བསྐུ་བྱུག་བྱས་ནས་ལུས་ཀྱི་རྩོལ་བ་ལ་བརྟེན་པར་བྱ་བ་ཡིན་པས། དེའི་ཕྱིར་བཤད་པ་ནི། ཡང་ཞིང་ལས་ནི་ནུས་པ་དང༌། །མེ་ཡི་དྲོད་སྐྱེད་ཚིལ་འབྲི་ལ། །ལུས་ཀྱི་སྐབས་ཕྱེད་མཁྲེགས་པ་ཉིད། །རྩོལ་བ་ལས་ནི་འབྱུང་བར་འགྱུར། །ཞེས་བྱ་བ་ཡིན་ཏེ། ལུས་དུབ་པར་བྱེད་པའི་ལས་ལ་ནི། རྩོལ་བ་ཞེས་བྱའོ། །དེ་བས་ན་རྩོལ་བ་བསྟེན་པ་ལས་ནི་ཡང་བ་ལ་སོགས་པ་ཉེ་བར་འབྱུང་བར་འགྱུར་རོ། །དེ་ལ་ཡང་བ་ནི་ལུས་ཀྱི་ཁོང་ཡང་བ་ཉིད་དོ། །ལས་ནུས་པ་ནི་ནུས་པ་བརྟན་པ་ཉིད་དོ། །མེའི་དྲོད་བསྐྱེད་པ་ནི་འཇུ་བའི་མེ་དྲོད་བསྐྱེད་པའོ། །ལུས་ཟུངས་ཀྱི་ཚིལ་བྲི་བ་ནི་ཚིལ་ཆུང་བར་འགྱུར་བའོ། །ལུས་ཀྱི་སྐབས་ཕྱེད་པ་ནི་ལུས་ཀྱི་སྟོད་སྨད་ཀྱི་ཆ་ཕྱེད་པར་གནས་པའོ། །མཁྲེགས་པ་ནི་ལྷོད་ཅིང་གྲིམས་ལ་བརྟེན་པ་སྟེ། དེ་ལྟ་བུའི་ལུས་ཀྱི་ཡན་ལག་གང་ཡིན་པ་དེ་ནི། ལུས་ཀྱི་སྐབས་ཕྱེད་མཁྲེགས་པ་ཞེས་བྱའོ། །དེ་ལྟ་བུའི་རང་བཞིན་ཅན་ཉིད་དུ་འགྱུར་བས་ན། ལུས་ཀྱི་སྐབས་ཕྱེད་མཁྲེགས་པ་ཉིད། །ཅེས་བྱའོ། །དེ་ཀུན་གྱིས་ཀྱང་བྱ་བ་འམ་འོན་ཏེ་མ་ཡིན་ཞེ་ན། དེའི་ཕྱིར། རླུང་མཁྲིས་ནད་ཅན་བྱིས་པ་དང༌། །རྒས་ཤིང་འཁོགས་པས་དེ་སྤང་བྱ། །ཞེས་བྱ་བ་སྨོས་ཏེ་རླུང་དང་མཁྲིས་པའི་ནད་ཀྱིས་གཟིར་བ་དང༌། བྱིས་པ་དང༌། རྒན་པོས་རྩོལ་བདེ་སྤངས་ཤིང་དོར་བར་བྱའོ། །དེ་ལ་རླུང་ནད་ཅན་ནི་རླུང་གི་ནད་ཀྱིས་ཉེན་པའོ། །མཁྲིས་ནད་ཅན་ནི་མཁྲིས་པས་ཉེན་པའོ། །ཐ་དད་པ་སྨོས་པ་ལ་ནི། རླུང་དང་མཁྲིས་པ་གཉིས་ཀ་སྨོས་ཀྱང་སྤང་བར་ཤེས་པར་བྱའོ། །རྒན་པོ་ནི་ལོ་བདུན་ཅུ་ཡན་ཆད་ཡིན་པར་ཤེས་པར་བྱའོ། །གཞན་ཡང་ཇི་ལྟར་བསྟན་པར་བྱ་ཞེ་ན། སྟོབས་ལྡན་སྣུམ་བག་ཟ་བ་དང༌། །གྲང་བའི་དུས་དང་དཔྱིད་དུས་དང༌། །ནུས་ལྡན་དག་གིས་དེ་བསྟེན་བྱ། །དེ་ལས་གཞན་ཚེ་དལ་བ་ཉིད། །ཅེས་བྱ་བ་ལ། རྩོལ་བ་དེ་ཡང་སྐྱེས་བུ་སྟོབས་དང་ལྡན་པ་དང༌། ཟས་སྣུམ་བག་ཅན་ཟ་བ་དང༌། གྲང་བའི་དུས་ཏེ། དགུན་སྟོད་དང༌། དགུན་སྨད་དང༌། དཔྱིད་ཀྱི་དུས་དང༌། ནུས་ལྡན་དག་གིས་ཞེས་པ། ཇི་སྲིད་ཤིན་ཏུ་ནུབ་པར་མ་གྱུར་བ་དེ་སྲིད་ཀྱི་བར་དུ་བསྟེན་པར་བྱའོ། །དེ་ལས་གཞན་ཚེ་ཞེས་བྱ་བ་ནི། དེ་ལས་དུས་
གཞན་པའི་ཚེ་སྟེ། སོ་ག་དང༌། དབྱར་དང༌། སྟོན་གྱི་ཚེ་ནི་ལ་བ་ཉིད་དེ་རན་ཅིང་ཅུང་ཟད་ཙམ་ཉིད་བསྟེན་པར་བྱའོ། །དེ་བྱས་ཅི་བདེར་ལུས་དག་ནི། །ཀུན་ནས་ཡོངས་སུ་མཉེ་བར་བྱ། །རྩོལ་བདེ་བྱས་ཟིན་ནས་ནི། །བདེ་བར་ལུས་ཀུན་གནས་པར་བྱ། །ཞེས་བྱ་བ་ལ། རྐང་པ་ནས་མགོ་བོའི་བར་ཐམས་ཅད་དུ། རྐང་པ་དལ་གྱིས་ཡོངས་སུ་མཉེ་བར་བྱའོ། །ཤིན་ཏུ་རྩོལ་དྲགས་ལུད་བ་དང༌། །སྐོམ་དང་གཅོད་ཅན་མི་དྲན་མུན། །ཁྲག་དང་མཁྲིས་རྒྱས་ངལ་དང་དུབ་། །རིམས་དང་སློན་པ་འབྱུང་བར་འགྱུར། །ཞེས་བྱ་བ་ནི། ཇི་སྐད་དུ་བཤད་པའི་ཚད་ལས་འདས་ཤིང་བརྩལ་བའི་ཤུགས་ཧ་ཅང་དྲགས་པར་བསྟེན་པས་ནི། སྐོམ་དད་ཆེ་བ་ལ་སོགས་པ་འབྱུང་བར་འགྱུར་རོ། །དེ་ལ་སྐོམ་པ་ནི་སྐོམ་དད་ཆེ་བའོ། །གཅོང་ཆེན་པོ་ནི་ཟད་བྱེད་དོ། །མི་དྲན་མུན་ཞེས་བྱ་བ་ནི། མི་དྲན་ཞིང་མུན་བར་ཞུགས་པ་སྙོམ་སེམས་པའོ། །ངལ་བ་ནི་སྐྱོ་བའོ། །དུབ་པ་ནི་ན་བའོ། །རིམས་དང་སློན་པ་ནི་རླུང་ལས་བྱུང་བའོ། །གཞན་དག་ནི་གྲགས་བར་ཟད་དོ། །འདིའི་ཞར་ལ་དགག་པར་བྱ་བ་གཞན་དག་ཀྱང་བཤད་པ་ནི། རྩོལ་བ་མི་ཉལ་ལམ་བུད་མེད། །བག་ད་དང་སྨྲ་སོགས་ཤུགས་འབྱིན་པ། །སེང་གེས་གླང་པོ་དྲངས་པ་བཞིན། །ཤིན་ཏུ་དྲགས་པས་མ་རུང་འགྱུར། །ཞེས་བྱ་བ་ཡིན་ཏེ། རྩོལ་བ་ལ་སོགས་ཧ་ཅང་དྲགས་པར་བསྟེན་ཅིང་སྤྱོད་པར་གྱུར་བའི་སྐྱེས་བུ་ནི་མ་རུང་བར་འགྱུར་རོ། །དེ་ནི་དཔེར་ན་སེང་གེ་རྣམ་པར་གནོན་པ་དང་ལྡན་ཡང་ཤིན་ཏུ་སྟོབས་ཆུང་བས། སྟོབས་ཤིན་ཏུ་ཆེ་བའི་གླང་པོ་ཆེ་དྲངས་ཤིང་འདྲེན་པ་ན། རང་ཉིད་རྐེད་པ་འཆད་པར་འགྱུར་ཏེ། གང་གི་ཕྱིར་སེང་གེ་ཤིན་ཏུ་བརྟན་པ་དང་ལྡན་པ་ཡིན་མོད་ཀྱི། འོ་ན་ཀྱང་གླང་པོ་ཆེ་གནས་ནས་གནས་སུ་དྲངས་ནས་ཁྱེར་བར་ག་ལ་ནུས་ཏེ། གླང་པོ་ཆེ་ཁྱེར་པ་ཉིད་ན་སྲོག་དང་བྲལ་བར་འགྱུར་རོ། །དེ་བཞིན་དུ་མི་ཡང་གཞུ་འདྲེན་པ་ལ་སོགས་པའི་རྩོལ་བ་ཧ་ཅང་དྲགས་པས་མ་རུང་ཞིང་འཇིགས་པར་འགྱུར་རོ། །རྩོལ་བའི་འོག་ཏུ་སྐ་བའི་རྫས་དག་གིས་བྱུགས་ཤིང་དྲིལ་བར་བྱ་བ་ཡིན་ཏེ། དེ་བས་ན་དེའི་ཡོན་ཏན་སྨྲས་པ་ནི། དྲིལ་ཕྱིས་བད་ཀན་སེལ་བ་དང༌། །ཚིལ་ནི་རབ་ཏུ་ཞུ་བྱེད་ཅིང༌། །ཡན་ལག་བརྟན་པར་བྱེད་པ་དང༌། །པགས་པ་གསལ་བར་བྱེད་པའི་མཆོག །
ཅེས་བྱ་བ་ཡིན་ཏེ། དྲིལ་ཕྱིས་ནི་བད་ཀན་སེལ་ཞིང་འཇོམས་པར་འགྱུར་རོ་ཞེས་བྱ་བ་ནི་ཚིག་གི་ལྷག་མའོ། །ཚིལ་ནི་ལུས་ཟུངས་ཏེ། དེ་ཞུ་བར་བྱེད་པ་ནི་མེ་ལྟར་ཞུ་བར་བྱེད་པའོ། །ཡན་ལག་རྣམས་བརྟན་པར་བྱེད་པ་ནི། མགོ་བོ་དང་རྐང་པ་ལ་སོགས་པ་བརྟན་པར་བྱེད་ཅིང་བརྟས་པར་བྱེད་པའོ། །དེ་བཞིན་དུ་པགས་པ་ཤིན་ཏུ་གསལ་བར་བྱེད་པའི་མཆོག་ཀྱང་ཡིན་ཏེ། པགས་པ་གསལ་ཞིང་དྲི་མ་མེད་པར་བྱེད་པའི་དོན་ཏོ། །དེ་ལྟར་ལུས་དྲིལ་ནས་ཁྲུས་བྱས་པ་ཡིན་པས། དེའི་ཕྱིར་སྨྲས་པ་ནི། ཁྲུས་ནི་དྲོད་སྐྱེད་རོ་རྩ་དང༌། །ཚེ་དང་མདངས་དང་སྟོབས་རབ་སྐྱེད། །གཡའ་དང་དྲི་མ་ངལ་དང་རྡུལ། །སྙོམ་སྐོམ་ལུས་ཚ་མི་ཤིས་སེལ། །ཞེས་བྱ་བ་ཡིན་ཏེ། ཁྲུས་ནི་དྲོད་བསྐྱེད་པ་ལ་སོགས་པའི་ཡོན་ཏན་དང་ལྡན་ཞིང༌། གཡའ་བ་ལ་སོགས་པ་སེལ་བ་ཡིན་ནོ། །དེ་ལས་ཁྲུས་བྱས་པས་དྲོད་བསྐྱེད་པ་ནི་དངོས་པོའི་ཆོས་ཉིད་ཡིན་ཏེ། ཕོ་བའི་མེ་དྲོད་གང་ཡིན་པ། །བ་སྤུའི་བུ་ག་རྣམས་ལས་ཕྱི་རོལ་དུ་འབྱུང་བར་བྱེད་པ་ཡིན་ལ། དེ་ཁྲུས་ཀྱིས་རེག་པ་ཁྱད་པར་གྲང་བའི་རང་བཞིན་གྱིས་བ་སྤུའི་བུ་ག་བཀག་པས་དྲོད་ནང་དུ་ཞུགས་ཏེ། ཕོ་བའི་མེ་དྲོད་སྐྱེད་པ་ཡིན་ཏེ། དཔེར་ན་དགུན་གྱི་དུས་སུ་རླུང་གྲང་མོའི་རེག་པས། བ་སྤུའི་བུ་ག་བཀག་པས་ལུས་ཀྱི་མེ་ཕྱི་རོལ་དུ་མི་འབྱུང་བས། མེའི་དྲོད་རྣམ་པར་འཕེལ་བ་ལྟ་བུ་ཡིན་ནོ། །རོ་ཙ་བ་ནི་ཁུ་བ་འཕེལ་བར་བྱེད་པའོ། །ཚེ་ནི་ཚེ་ལ་ཕན་པའོ། །མདངས་ནི་གཟི་མདངས་དང་ལྡན་བར་འགྱུར་བའོ། །སྟོབས་ནི་ནུས་པ་སྟེ་རབ་ཏུ་སྐྱེད་པར་བྱེད་པའོ། །གཡའ་བ་ལ་སོགས་པ་ཡང་སེལ་བ་དང༌། སྙོམ་པ་ནི་གཉིད་ཀྱིས་འཐིབས་པར་གྱུར་པ་སྟེ། དེ་ཡང་ལུང་ལས། གཉིད་ཀྱིས་ལོག་པ་རྣམས་ཁྱད་པར་དུ་ནོན་པར་འགྱུར་བ་ནི་སྙོམ་པའོ། །མི་ཤིས་པ་ནི་སྡིག་པ་སྟེ། དེ་སེལ་བར་བྱའོ་ཞེས་བཤད་པ་ཡིན་ནོ། །ཆུ་དྲོན་གྱིས་ནི་ལུས་ཀྱི་སྨད། །བླུགས་ཤིང་བཀྲུས་པ་སྟོབས་སྐྱེད་ཡིན། །དེ་ཉིད་མགོར་བླུགས་ཁྲུས་བྱས་ན། །སྐྲ་དང་མིག་གི་སྟོབས་འཕྲོག་ཡིན། །ཞེས་བྱ་བ་ནི། ཆུ་དྲོན་གང་ཡིན་པས་རོ་སྨད་བཀྲུས་ཤིང་བླུགས་པ་དེ་ནི་སྟོབས་སྐྱེད་ཅིང༌། སྟོབས་ཐོབ་པར་བྱེད་པ་ཡིན་ཏེ། ལུས་ཀྱི་སྨད་དེ་ཉིད་ཀྱི་རང་བཞིན་དེ་ཡིན་པའི་ཕྱིར་རོ། །ཆུ་དྲོན་པོ་དེ་ཉིད་ཀྱིས་མགོ་བོར་བླུགས་
ཤིང་ཁྲུས་བྱས་པ་ནི། སྐྲ་དང་མིག་གི་སྟོབས་འཕྲོག་ཅིང་གནོད་པ་ཡིན་ནོ། །ཁྲུས་ནི་འགྲམ་ཆགས་མིག་ནད་དང༌། །རྣ་བའི་ནད་དང་ཚད་པས་འཁྲུ། །ལྟོ་སྦོས་ཆམ་པ་མ་ཞུ་དང༌། །ཟོས་མ་ཐག་པ་རྣམས་ལ་སྨད། །ཅེས་བྱ་བ་དང༌། ཡང་ཁྲུས་ནི་འགྲམ་པའི་ནད་ཀྱིས་ཉེན་པ་རྣམས་ལ་སྨད་ཅིང་སྤང་བར་བྱ་བ་ཡིན་ནོ། །འགྲམ་ཆགས་ཞེས་བྱ་བ་ནི། རླུང་གི་ནད་དེ་འོག་ནས་བཤད་པའི་མཚན་ཉིད་དང་ལྡན་པའོ། །སྦོས་པ་ནི་རླུང་གིས་ལྟོ་བ་གང་ཞིང་སྦོས་པར་གྱུར་པའོ། །ཆམ་པ་ནི་སྣ་ནས་འཛག་པའོ། །མ་ཞུ་བ་ནི་ཟས་མི་འཇུ་བ་དང༌། ཐོགས་པ་དང། ཚ་བ་སྐྱེ་བའི་ཁྱད་པར་གྱིས་རྣམ་པ་གསུམ་ཡིན་ནོ། །ཁྲུས་བྱས་ནས་ཟས་ལ་སྤྱད་པར་བྱ་བ་ཡིན་པས། དེའི་ཕྱིར་སྨྲས་པ་ནི། ཞུ་ནས་ཕན་ཞིང་རན་པར་བཟའ། །བཤང་སོགས་ནན་གྱིས་བརྣག་མི་བྱ། །ཞེས་བྱ་བ་ལ་སོགས་པ་ཡིན་ཏེ། ཁ་ཟས་ཞུ་བ་ནི་ལེགས་པར་ཞུ་བར་གྱུར་པ་སྟེ། དེའི་ཁ་ཟས་ཞུ་བར་གྱུར་པའོ། །ཕན་པ་ནི་གནོད་པ་མེད་པའོ། །རན་པ་ནི་ཟས་ཀྱི་ཚོད་ཟིན་པར་བཟའ་ཞིང་སྤྱད་པར་བྱ་བའོ། །བཤང་སོགས་ནི་བཤད་བ་དང་གཅི་བ་ལ་སོགས་པ་སྟེ། དེ་ནན་གྱིས་ཞེས་པ་སྟོབས་ཀྱིས་བརྣག་པར་མི་བྱའི་ཡོངས་སུ་དོར་བར་བྱའོ། །ཤུགས་མ་ཕྱུང་བར་གཞན་མི་བྱ། །གནོད་ལས་མི་བདེ་བར་མ་ཡིན། །ཞེས་བྱ་བ་ནི་རླུང་དང་བཤང་བ་དང་གཅི་བའི་ཤུགས་འབྱུང་བར་གནས་ན། དེ་མི་དབྱུང་བར་གཞན་ལ་བརྩམ་པར་མི་བྱ་སྟེ། གང་གི་ཕྱིར་ཤུགས་བཀག་པས་ནི་ནད་རྣམས་འབྱུང་བར་འགྱུར་རོ། །གནོད་པ་ཞེས་བྱ་སྟེ། བསྒྲུབ་པར་བྱ་བའི་མཚན་ཉིད་དང་ལྡན་པའི་ནད་ལས་མི་རྒྱལ་ཞིང༌། དེ་གསོ་བས་བདེ་བར་མ་བྱས་པར་ཡང་བྱ་བ་གཞན་མི་བྱའོ། །གང་གི་ཕྱིར་གསོར་རུང་བའི་ནད་བཏང་སྙོམས་སུ་བྱས་ན་གསོར་མི་རུང་བ་ཉིད་དུ་འགྱུར་རོ། །དེ་ཡང་འདིར་གཞན་དག་ལས། གསོ་མིན་གསོ་བྱ་ཉིད་མི་འགྱུར། །གསོ་བྱ་གསོ་དཀའ་བ་ཉིད་འགྱུར། །གསོ་དཔྱད་ལས་གཞན་ལས་ཀྱིས་ནི། །ནད་གཞི་གནས་སྐབས་གཞན་དུ་འགྱུར། །ཞེས་བྱ་བ་ཡིན་ནོ། །སེམས་ཅན་ཐམས་ཅད་བདེ་འདོད་ཕྱིར། །རྩོམ་པ་ཀུན་ལ་འཇུག་པར་འདོང༌། །བདེ་བ་ཆོས་མེད་པར་མ་ཡིན། །དེ་བས་ཆོས་ལ་
བརྩོན་པར་བྱ། །ཞེས་བྱ་བ་ནི། སེམས་ཅན་ཐམས་ཅད་དེ། སྲོག་ཆགས་ཀུན་གྱི་རྩོམ་པའི་བྱ་བ་མ་ལུས་པ་ཀུན་ནི་བདེ་བ་འདོད་ཅིང་བསྒྲུབ་པར་བྱ་བའི་ཕྱིར་བྱེད་པར་འདོད་པ་ཡིན་ནོ། །བདེ་བ་ཞེས་བྱ་བ་ནི་སྡུག་བསྔལ་དང་བྲལ་བའོ། །དེ་ནི་ཆོས་མེད་པར་མ་ཡིན་ཞེས་བྱ་བ་ནི། ཆོས་མེད་ཅིང་སྤངས་ལ། ཆོས་ལས་གཞན་པར་སྤྱོད་པ་ལས་འབྱུང་བར་མི་འགྱུར་རོ། །རྒྱུ་དེ་བས་ན་ཆོས་གཙོ་བོར་བྱ་ཞིང་ཆོས་ལ་བརྩམ་པར་བྱའོ། །དེས་ནི་འདི་སྐད་སྟོན་པར་འགྱུར་ཏེ། བྱ་བ་ལ་སོགས་པས་རྩོམ་པ་གང་དང་གང་བྱེད་པ་དེ་དང་དེ་ནི། ཆོས་ལ་བརྩམས་པར་བྱས་ནས་བྱའོ་ཞེས་བྱ་བའི་དོན་ཏོ། །མོས་པས་དགེ་བའི་བཤེས་གཉེན་བསྟེན། །ཅིག་ཤོས་རིང་དུ་སྤང་བར་བྱ། །ཞེས་བྱ་བ་ལ། མོས་པས་ཞེས་བྱ་བ་ནི་ལུས་ངག་དང༌། ཡིད་ཀུན་ཏུ་འདུད་པས། དགེ་བའི་བཤེས་གཉེན་ཞེས་བྱ་བ། མཐོ་རིས་དང༌། ཐར་པའི་གྲོགས་བཤེས་སུ་གྱུར་ཅིང༌། ཡེ་ཤེས་ལ་སོགས་པ་སྟོན་པར་བྱེད་པ་སྟེ། དེ་འབད་པས་བསྟེན་ཅིང་བསྙེན་བཀུར་དུ་བྱའོ། །ཅིག་ཤོས་རིང་དུ་སྤང་བར་བྱ། །ཞེས་བྱ་བ་ནི། དགེ་བའི་བཤེས་གཉེན་ལ་ལྟོས་པའི་ཅིག་ཤོས་སྡིག་པའི་བྱ་བ་བྱེད་པ་སྟེ། དེ་ནི་སྤང་བར་བྱའོ། །འཚེ་དང་རྐུ་དང་འདོད་ལོག་སྤྱོད། །ཕྲ་མ་ངག་རྩུབ་བརྫུན་ཚིག་དང༌། །མི་འབྲེལ་སྨྲ་དང་གནོད་སེམས་དང༌། །བརྣབ་སེམས་ལྟ་བ་ཕྱིན་ཅི་ལོག །དེ་ལྟར་སྡིག་པའི་ལས་རྣམ་བཅུ། །ལུས་ངག་ཡིད་ཀྱིས་སྤང་བར་བྱ། །དེ་ལ་འཚེ་བ་ནི་སྲོག་ཆགས་རྣམས་འཇོམས་པ་སྟེ་གསོད་པའོ། །རྐུ་བ་ནི་གཞན་གྱི་རྫས་འཕྲོག་ཅིང་བརྐུ་བའོ། །འདོད་པ་ལ་ལོག་པར་སྤྱོད་པ་ནི། བགྲོད་པར་བྱ་བ་མ་ཡིན་པར་སོང་བ་སྟེ། དེ་ལྟར་ན་ལུས་ཀྱི་རྣམ་པ་གསུམ་མོ། །ཕྲ་མ་ནི་གཞན་གྱི་ཉེས་པ་སྒྲོགས་པར་བྱེད་པའོ། །ངག་རྩུབ་པོ་ནི་ཆིག་མི་བཟད་པར་རྣོ་བ་འམ། གཞན་གྱི་གནད་ལ་འབེབས་པའོ། །བརྫུན་ནི་ཚིག་མི་བདེན་པ་སྨྲ་བའོ། །མི་འབྲེལ་པར་སྨྲ་བ་ནི། ལོག་པར་སྨྲ་ཞིང་དགོས་པ་མེད་པར་སྨྲ་བ་སྟེ། དེ་ལྟར་ན་ངག་གི་རྣམ་པ་བཞིའོ། །གནོད་སེམས་ནི་སེམས་ཅན་རྣམས་ལ་རྣམ་པར་སྡང་བའོ། །བརྣབ་སེམས་ནི་མི་རིགས་པར་གཞན་གྱི་རྫས་ལ་རེག་པའོ། །ལྟ་བ་
ཕྱིན་ཅི་ལོག་ནི་ལོག་པར་ལྟ་བ་སྟེ། བསྟན་བཅོས་ལས་བཤད་པའི་ལྟ་བ་ལས་ཕྱིན་ཅི་ལོག་ཏུ་གྱུར་པ་མེད་པར་ལྟ་བ་ཉིད་དེ། སྦྱིན་པ་མེད་དོ། །སྦྱིན་སྲེག་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །ཞེས་བྱ་བ་དེ་ལྟ་བུ་ནི་ལྟ་བ་ཕྱིན་ཅི་ལོག་སྟེ། ཡིད་ཀྱི་རྣམ་བ་གསུམ་མོ། །ཕོངས་པ་ནད་པ་མྱ་ངན་གཟིར། །ཅི་ནུས་པར་ནི་ཕན་གདགས་བྱ། །ཞེས་བྱ་བ་ལ། ཕོངས་པ་ནི་འཚོ་བའི་ཐབས་དང་བྲལ་བའོ། །ནད་ཀྱིས་གཟིར་བ་ནི་ནད་ཀྱིས་གནོད་པར་གྱུར་པའོ། །མྱ་ངན་གྱིས་གཟིར་བ་ནི་མྱ་ངན་གྱིས་ཉམ་ཐག་པའོ། །ཕན་གདགས་པ་ནི་སྦྱིན་པ་དང༌། གསོ་བ་དང༌། མྱ་ངན་བསལ་བ་དག་གིས་དེ་ལས་བཟློག་ཅིང་ཕན་གདགས་པར་བྱའོ། །འབུ་སྲིན་གྲོག་སྦུར་དག་ལ་ཡང༌། །རང་དང་འདྲ་བར་རྟག་ཏུ་བལྟ། །ཞེས་བྱ་བ་ལ། འབུ་སྲིན་གྲོག་སྦུར་ལྟ་བུ་སྲོག་ཆགས་ཕྲ་མོ་རྣམས་ལ་ཡང་རང་དང་འདྲ་ཞིང་བདག་དང་མཚུངས་པར་དུས་རྟག་ཏུ་བལྟ་ཞིང་བསམ་པར་བྱའོ། །དེ་ཡང་ཇི་ལྟར་བདག་ཉིད་བདེ་བ་དང་སྡུག་བསྔལ་འདོད་ཅིང་འདོར་བ་ལ་སོགས་པ་དང༌། སྲོག་ལ་སྡུག་པར་འཛིན་པ་དེ་བཞིན་དུ་འདི་རྣམས་ཀྱང༌། བདེ་བ་དང་སྡུག་བསྔལ་འདོད་ཅིང་འདོར་བ་དང༌། སྲོག་ལ་སྡུག་པར་འཛིན་པ་ཡོད་པ་ཉིད་དེ། དེ་བས་ན་དེ་རྣམས་ལ་འཚེ་བ་ལ་སོགས་པ་མི་བྱའོ། །ཞེས་པའོ། །ལྷ་དང་དགེ་སློང་བྲམ་ཟེ་དང༌། །སྨན་པ་རྒན་རྒྱལ་མགྲོན་འོངས་མཆོད། །ཅེས་བྱ་བ་ནི། ལྷ་ལ་སོགས་པ་མཆོད་ཅིང་བསྙེན་བཀུར་དུ་བྱའོ། །རྒན་པོ་ནི་ཤེས་པ་དང་ཚུལ་ཁྲིམས་དང་དཀའ་ཐུབ་དང༌། ཚངས་པར་སྤྱོད་པ་དང༌། བརྟུལ་ཞུགས་ལ་སོགས་པ་རྣམས་ལ་རྒན་པའོ། །རྒྱལ་པོ་ནི་ས་བདག་གོ །མགྲོན་འོངས་པ་ནི་གློ་བུར་དུ་ལྷགས་ཤིང་གསར་དུ་འོངས་པའོ། །སློང་ལ་རྒྱབ་ཀྱིས་ཕྱོགས་མི་བྱ། །བརྙས་པར་མི་བྱ་ཚར་མི་གཅད། །ཅེས་བྱ་བ་ནི། སློང་བའི་མི་རྣམས་ལ་རྒྱབ་ཀྱིས་ཕྱོགས་ཤིང་རེ་ཐག་ཆད་པ་ཡོངས་སུ་སྤང་བ་དང༌། མ་གོ་བ་ལྟ་བུ་དང༌། ཚིག་རྩུབ་པར་མི་བྱའོ། །བརྙས་པ་ནི་བསྙེན་བཀུར་མེད་ཅིང་བཟློག་པའོ། །ཚར་གཅད་པ་ནི་ཁྱེད་རྣམས་ཀྱིས་ཅི་ཞིག་ཐོས་སམ། བསླབས་སམ་ཤེས་པ་ཡིན་ཞེས་དྲིས་པའི་ཚུལ་གྱིས་ཀུན་སྤྱོས་པའོ། །
གནོད་པར་བྱེད་བརྩོན་དགྲ་གཞན་ལའང༌། །ཕན་གདགས་པ་ནི་གཙོ་ཆེར་བྱ། །ཞེས་བྱ་བ་ནི། གནོད་པར་བྱེད་པ་ལ་བརྩོན་ཞིང་མི་རིགས་པར་བྱེད་པའི་དགྲ་བོ་ལ་ཡང་ཕན་གདགས་པ་ལ་གཙོ་ཆེར་བརྩོན་པ་ཉིད་བྱས་ན། དགྲ་བོ་རྣམས་ཀྱིས་གང་སྡང་བར་གྱུར་པ་ཉིད་ཡིད་ལ་རྣམ་པ་ཐམས་ཅད་དུ་གནས་མོད་ཀྱི། འོན་ཀྱང་གནོད་པར་བྱ་བ་ཉིད་ནི་ལན་འགའ་ཞིག་འགྲུབ་པ་ཡིན་ལ། གནོད་པར་བྱེད་པ་དེ་ལ་ནི། གནོད་པར་བྱེད་པ་ཉིད་མི་བྱའོ། །ཕན་པར་བྱེད་དུ་གནས་ན། གནོད་པའི་སེམས་ཀྱང་ལྡོག་པར་འགྱུར་བ་ཉིད་ཡིན་ནོ། །འབྱོར་དང་རྒུད་ལའང་ཡིད་གཅིག་བྱ། །རྒྱུ་ལ་ཕྲག་དོག་འབྲས་བུ་མིན། །ཞེས་བྱ་བ་ལ། འབྱོར་པ་ནི་ཕུན་སུམ་ཚོགས་པའོ། །རྒུད་པ་ནི་དེ་དག་ཉིད་དང་བྲལ་བ་སྟེ། དེ་དག་ལས་ཡིད་གཅིག་ཅིང་སེམས་མཉམ་པར་བྱའི། འབྱོར་པས་དྲེགས་པར་ཡང་མི་བྱ་ལ། རྒུད་པས་ཞུམ་པར་ཡང་མི་བྱའོ། །རྒྱུ་ལ་ཕྲག་དོག་ཅེས་བྱ་བ་ནི། ཕུན་སུམ་ཚོགས་པར་བྱེད་པའི་རྒྱུའི་དངོས་པོ་ལ་ཕྲག་དོག་བྱའི། འབྲས་བུ་གཞན་གྱི་ཕུན་སུམ་ཚོགས་པ་ལ་ནི་མ་ཡིན་ནོ། །དེ་ཡང་སྤྱོད་པ་དམ་པ་ལ་འཇུག་པ་དང༌། ཐོས་པ་དང༌། གཏོང་བ་ལ་སོགས་པ་གཞན་གྱི་ཡོན་ཏན་སྐྱེད་པར་བྱེད་པ་དེའི་རྒྱུ་ཉིད་ལ་ཕྲག་དོག་བྱའི། དེའི་འབྲས་བུ་ཐོབ་པ་ལ་ནི་མ་ཡིན་ཏེ། སྐྱེས་བུ་ཉིད་དུ་གྱུར་པར་མཚུངས་སུ་ཟིན་ཀྱང༌། འདི་ནི་འདི་ལྟར་ཡོན་ཏན་དང་ལྡན་པ་ཡིན་ན། བདག་འདི་ལྟ་བུའི་ཡོན་ཏན་གྱིས་བརྒྱན་པར་ཅིའི་ཕྱིར་མི་བྱ་ཞེས་གང་གིས་སྔོན་མ་ཐོབ་པའི་ཐོས་པ་ལ་སོགས་པ་འཕེལ་བར་འགྱུར་བ་དེ་ལྟ་བུའི་རྒྱུ་ལ་འབད་བ་ཉིད་དུ་བྱ་བ་ཡིན་ནོ། །དུས་སུ་ཕན་དང་རན་པར་སྨྲ། །སླུ་བ་མེད་ཅིང་དེས་པར་བྱ། །ཞེས་བྱ་བ་ལ། ཚིག་སྨྲ་བར་བྱ་བ་དག་ནི་དུས་སུ་ཤེས་པ་གནས་སྐབས་ལ་བབ་ཅིང་རུས་ཚོད་ལ་བབ་པར་བྱའོ། །ཕན་པ་ནི་ཆོས་དང་དོན་དང་སྙན་པ་དང་ལྡན་པའོ། །རན་པ་ནི་ཉུང་ཞིང་ཚོད་ཟིན་པའོ། །སླུ་བ་མེད་པ་ནི་བདེན་ཞིང་མི་སླུ་བའི་ཆོས་ཅན་ནོ། །དེས་པ་ནི་མཉན་ན་བདེ་བ་སྟེ། འཇམ་པར་སྨྲ་ཞིང་ཡིད་དུ་འོང་ལ་དགའ་བར་སྨྲ་བའོ། །བཞིན་འཛུམ་གསོང་པོར་སྨྲ་བ་དང༌། །སྤྱོད་པ་བཟང་ཞིང་སྙིང་རྗེ་འཇམ། །ཞེས་བྱ་བ་ལ། རང་བཞིན་འཛུམ་པ་ནི། རང་བཞིན་མཛེས་
པ་སྟེ། ཁྲོ་གཉེར་མེད་པའོ། །གསོང་པོར་སྨྲ་བ་ནི་དང་པོ་ཉིད་དུ་སྨྲ་བར་བྱེད་པའོ། །སྤྱོད་པ་བཟང་བ་ནི་རང་བཞིན་བཟང་བ་སྟེ། ཀུན་ཏུ་སྤྱོད་པ་མི་རྩུབ་པའོ། །སྙིང་རྗེ་འཇམ་པ་ནི་སྙིང་རྗེ་འཇམ་པ་སྟེ། སྙིང་བརྩེ་བ་དང་ལྡན་ཞིང་སེམས་མཉམ་པའོ། །གཅིག་པུ་བདེ་མིན་ཐམས་ཅད་ལ། །ཡིད་མི་བརྟན་ཞིང་དོགས་མི་བྱ། །ཞེས་བྱ་བ་ལ། སྐྱེས་བུས་ནི་བདག་གཅིག་བུ་བདེ་བ་དང་ལྡན་པར་མི་བྱའི། གཞན་དུ་ན་དགེ་སྦྱོང་དང༌། བྲམ་ཟེ་དང༌། གཉེན་འདུན་དང༌། མཛའ་བཤེས་དང་བྲན་གཡོག་ལ་སོགས་པ་རྣམས་དང་ལྷན་ཅིག་ཐུན་མོང་དུ་ལོངས་སྤྱད་པས་གནས་པར་བྱའོ། །ཐམས་ཅད་ལ་ཞེས་བྱ་བ་ལ། ཡུལ་ཐམས་ཅད་ལ་ཡིད་བརྟན་ཞིང་བློ་གདེང་བར་མི་བྱ་ལ། ཡིད་བརྟན་དུ་རུང་བའི་མི་དང༌། ཉེ་དུ་དང༌། མཛའ་བཤེས་དང༌། བྲན་གཡོག་ལ་སོགས་པ་ཐམས་ཅད་ལ་ཡང་དོགས་པ་དང་བཅས་པར་མི་བྱའོ། །སུ་ཡང་བདག་གི་དགྲ་ཡིན་དང༌། །བདག་ནི་སུ་ཡང་འགྲས་གྱུར་དང༌། །བརྙས་དང་བདག་ལ་གཙོ་བོ་ནི། །མི་བྱམས་ཞེས་ནི་སྨྲ་མི་བྱ། །ཞེས་བྱ་བ་ནི། བདག་ལ་དགྲ་བོ་ཡོད་ཅེས་བྱ་བ་ནི་སུ་ལ་ཡང་སྨྲ་ཞིང་བརྗོད་པར་མི་བྱ་སྟེ། དེ་བརྗོད་ན་གཡོན་ཅན་དག་གིས་ཤིན་ཏུ་ཡང་འབྱེད་པར་འགྱུར་རོ། །བདག་ནི་སུའི་དགྲ་ཡིན་ཞེས་སྐྱེ་བོ་འགའ་ལ་ཡང་སྨྲ་པར་མི་བྱ་སྟེ། གལ་ཏེ་དེ་ལྟར་བྱས་ན་ཤིན་ཏུ་འགྲས་པར་འགྱུར་རོ། །གཙོ་བོ་དང་འབྲེལ་པའི་བརྙས་པ་སྟེ། མ་བསྟུན་པ་ཡང་སྨྲ་བར་མི་བྱའོ། །དེ་བཞིན་དུ་གཙོ་བོ་དང་འབྲེལ་པའི་མི་བྱམས་ཤིང་བརྩེ་བ་མེད་པ་ལ་ཡང་སྨྲ་བར་མི་བྱའོ། །འགྲོ་བའི་བསམ་པ་ཤེས་ནས་ནི། །གང་ཞིག་ཇི་ལྟར་ཡོངས་མགུ་བ། །དེ་ལ་དེ་བཞིན་རྗེས་འཇུག་ཅིང༌། །གཞན་དག་དགའ་བྱེད་མཛངས་པ་ཡིན། །ཞེས་བྱ་བ་ནི། སྐྱེ་བོ་འཇིག་རྟེན་པའི་སེམས་ཀྱི་བསམ་པ་བརྟགས་ཤིང་ཤེས་པར་བྱས་ལ། ཤེས་རབ་ཀྱིས་ཡོངས་སུ་དཔྱད་ནས། རྣམ་པ་གང་གིས་སྐྱེ་བོ་གང་དག་ཡོངས་སུ་མགུ་ཞིང་ཀུན་ཏུ་དགའ་བར་འགྱུར་བའི་འགྲོ་བ་དེ་ལ། དེ་བཞིན་དུ་རྣམ་པ་དེ་ཉིད་ཀྱི་རང་བཞིན་དང་བསྟུན་ཏེ་གནས་ཤིང་འཇུག་པར་བྱེད་ལ། སྦྱིན་པ་དང་སྙན་པར་སྨྲ་བ་ལ་སོགས་པས་གཞན་དག་དགའ་བར་བྱེད་པ་དེ་ནི་མཛངས་ཤིང་མཁས་
པར་གྱུར་པའོ། །དབང་པོ་གཟིར་བར་མི་བྱ་ཞིང༌། །འདི་རབ་ཉམས་བདེར་བྱ་བའང་མིན། །ཞེས་བྱ་བ་ལ། དབང་པོ་སྟེ་ལྕེ་ལ་སོགས་པ་ཁ་ཟས་ཤིན་ཏུ་ངན་པ་ལ་སོགས་པས་གནོད་ཅིང་གཟིར་བར་མི་བྱ་ལ། ཡང་དབང་པོ་འདི་དག་ལོངས་སྤྱོད་ཀྱི་བདེ་བ་ལ་འབད་པས་བརྩལ་ནས་བརྟེན་ཅིང་རབ་ཏུ་བདེ་བའི་ཉམས་སུ་ཡང་མི་བྱའོ། །ཚོམས་གསུམ་མེད་པའི་རྩོམ་པ་ལ། །མི་བསྟེན་དེ་དང་འགལ་མི་བྱ། །ཞེས་བྱ་བ་ལ། ཚོམས་གསུམ་ནི་ཆོས་དང༌། ནོར་དང༌། ལོངས་སྤྱོད་ཅེས་བྱ་བ་ཡིན་ཏེ། བཞི་བ་ཐར་པའི་ནི་ཆོས་ཀྱི་ཁོངས་སུ་གཏོགས་པ་ཡིན་ནོ། །དེ་ལྟ་བུའི་སྡེ་ཚོམས་གསུམ་མེད་ཅིང༌། སྟོང་པའི་རྩོམ་པ་སྟེ། སྤྱོད་པའི་འབད་པ་ལ་བརྟེན་པར་མི་བྱ་ཞིང་གནས་པར་མི་བྱའི། ཅི་ནས་ཀྱང་ཆོས་དང་མི་འགལ་བའི་བྱ་བ་གང་ཡིན་པ་དེ་ནི་སྡེ་ཚོམས་གསུམ་དང་མི་འགལ་བ་ཉིད་དུ་སྐྱེས་བུས་བསྟེན་པར་བྱའོ། །དེ་ཡང་ཆོས་ལ་ཀུན་ཏུ་བརྟེན་པ་ན། ཅི་ནས་ཀྱང་ནོར་དང་ལོངས་སྤྱོད་དང་འགལ་བར་མི་འགྱུར་བ་དེ་ལྟར་བྱ་ལ། ནོར་ལ་བརྟེན་པ་ན་ཡང་ཆོས་དང་འགལ་བར་མི་བྱ་ལ། ལོངས་སྤྱོད་ལ་བརྟེན་པ་ན་ཡང༌། ནོར་དང་ཆོས་དང་འགལ་བར་མི་བྱའོ། །ཆོས་རྣམས་ཀུན་གྱི་ལམ་ལ་ནི། །དབུ་མའི་ལམ་གྱི་རྗེས་འཇུག་བྱ། །ཞེས་བྱ་བ་ལ། ཆོས་རྣམས་ཀུན་ཏེ། དངོས་པོ་ཐམས་ཅད་ལ་ལམ་ཞེས་བྱ་བ་བསྒྲུབ་ཅིང༌། བྱ་བའི་གནས་རྣམས་ལ་དབུ་མ་སྟེ། དམན་པ་ཡང་མ་ཡིན་ལ། ཤིན་ཏུ་མཐོ་བ་ཡང་མ་ཡིན་པ་དེ་ནི་རྗེས་སུ་འཇུག་ཅིང་སྤྱད་པར་བྱའོ་ཞེས་བསྟན་པ་ཡིན་ནོ། །སྐྲ་སེན་ཁ་སྤུ་རིང་མི་གཞག །སྒོ་དགུ་རྐང་པ་དྲི་མེད་བྱ། །ཞེས་བྱ་བ་ནི། སྐྲ་དང་སེན་མོ་དང༌། ཁ་སྤུ་རིང་པོར་མ་གྱུར་པར་བྲེགས་པ་སྟེ། ཁ་སྤུ་ཞེས་བྱ་བ་ནི་ཀོ་སྐོའི་ཕྱོགས་ཀྱི་སྤུའོ། །སྒོ་དགུ་དང་རྐང་པ་ནི། སྒོ་དགུ་དང་རྐང་པ་སྟེ། དེ་དག་དྲི་མ་མེད་པར་བྱའོ། །དེ་ལ་སྒོ་དགུ་ནི་དྲི་མའི་གནས་ཀྱི་སྒོ་རྣམས་ཏེ། མིག་དང༌། རྣ་བ་དང༌། སྣ་དང༌། ཁ་དང༌། བཤང་བའི་སྒོ་དང༌། གཅི་བའི་སྒོ་ལ་སོགས་པའོ། །རྐང་པ་ནི་རྐང་པ་གཉིས་ཏེ། དེ་རྣམས་ཀྱི་དྲི་མ་བསལ་ཞིང་སྦྱང་བར་བྱའོ། །ཁྲུས་ལ་དགའ་ཞིང་དྲི་ཞིམ་བསྒོ། །ཆ་ལུགས་བཟང་ཞིང་མི་འཕྱར་སྤ། །ཞེས་བྱ་བ་ལ། ཁྲུས་ལ་དགའ་བ་ནི་རྟག་ཏུ་ཁྲུས་བྱེད་པའོ། །དྲི་ཞིམ་བསྒོ་ཞེས་བྱ་བ་ནི། ག་བུར་ལ་སོགས་པའི་དྲི་ཞིམ་པའི་རྫས་རྣམས་ཀྱིས་
ལུས་རྗེས་སུ་བསྒོ་ཞིང་བྱུགས་པའོ། །ཆས་བཟང་བ་ནི་དྲི་དང་བྱུག་པ་དང༌། ཕྲེང་བ་དང༌། གོས་དང༌། རྒྱན་གྱི་རྣམ་པས་བརྒྱན་གྱིས་ཆས་པར་བྱའོ། །མི་འཕྱར་བ་ནི་ཁེངས་ཤིང་འཕྱར་ཆེས་པ་མ་ཡིན་པར་བྱས་ནས། སྤ་ཞིང་མདངས་དང་ལྡན་པར་བྱའོ། །རིན་ཆེན་གྲུབ་པའི་གསང་སྔགས་དང༌། །སྨན་ཆེན་རྟག་ཏུ་བཅང་བར་བྱ། །ཞེས་བྱ་བ་ནི། རིན་པོ་ཆེ་ནི་མརྐ་ཏ་དང༌། པདྨ་རཱ་ག་དང༌། བཻཌཱུཪྻ་དང༌། གསེར་ས་ལེ་སྦྲམ་དང༌། རྡོ་རྗེ་ལ་སོགས་པའོ། །གྲུབ་པའི་གསང་སྔགས་ནི། རབ་ཏུ་གྲུབ་པར་གྲགས་ཤིང༌། མཐུ་སྔོན་དུ་སྣང་བའི་གསང་སྔགས། འཇིག་རྟེན་པ་དང་བསྟན་བཅོས་ལས་གྲགས་པའོ། །སྨན་ཆེན་པོ་ནི་ལག་སྨི་དང༌། གུ་ཧ་དང༌། ཛཱ་ཏི་ལ་དང༌། ཤུ་དག་དང༌། ཡུངས་ཀར་ལ་སོགས་པའོ། །རིན་པོ་ཆེ་དང་སྔགས་དང་སྨན་དེ་དག་ནི་མགོ་དང་མགུལ་དང་དཔུང་པ་ལ་བཏགས་ཏེ་བཅང་བར་བྱའོ། །གདུགས་དཀར་ལྷམ་དང་ལྡན་པ་ནི། །གཉའ་ཤིང་གང་ཙམ་བལྟ་ཞིང་འགྲོ། །ཞེས་བྱ་བ་ལ། གདུགས་དཀར་པོ་ནི་ཚད་པ་འགེབས་བའི་གདུགས་སོ། །ལྷམ་ནི་རྐང་པ་སྐྱོབ་པར་བྱེད་པ་སྟེ། སྐྱེས་བུས་དེ་གཉིས་དང་ལྡན་པ་དང༌། གཉའ་ཤིང་གང་ཙམ་དུ་བལྟ་ཞིང་འགྲོ་བར་བྱ་སྟེ། དེ་ཙམ་ཞིག་ཏུ་མདུན་དུ་བལྟའོ། །དེས་ནི་སྦྲུལ་དང༌། ཕྱུགས་དང༌། བ་ལང་དང༌། རྟ་དང༌། རྡོ་རྩུབ་མོ་ལ་སོགས་པ་དག་གི་གནོད་པས་ཉེ་བར་མི་འགྱུར་རོ། །མཚན་མོ་དོན་ཆེན་དག་ལ་ནི། །དབྱུག་ཐོགས་མགོ་དཀྲི་གྲོགས་ལྡན་བྱ། །ཞེས་བྱ་བ་ནི། མཚན་མོའི་དུས་སུ་ནི་འགྲོ་བར་མི་བྱའོ། །གལ་ཏེ་ཤིན་ཏུ་དོན་ཆེ་ཞིང་བསྟན་པའི་བྱ་བའི་ལས་ལ་འགྲོ་ཞིང༌། མཚན་མོ་རྒྱུ་བས་ངེས་པར་འགྲོ་བ་ཡིན་ན། དབྱིག་པ་དང༌། མགོ་དཀྲི་བ་དང༌། གྲོགས་དང་ལྡན་པར་བྱས་ལ་འགྲོ་བར་བྱའོ་ཞེས་སྟོན་ཏེ། དོན་གྱི་ཤུགས་ཀྱིས་ན་མཚན་མོ་ངེས་པར་འགྲོ་སྟེ། མི་བྱར་མི་རུང་བའི་བྱ་བ་མ་ཡིན་པའི་དོན་དུ་ཆུང་དུ་དག་ལ་ནི་འགྲོ་བར་མི་བྱའོ་ཞེས་སྟོན་ཏོ། །དེ་ལ་བེར་ཀ་ཡོད་པས་ན་དབྱིག་པ་ཅན་ཏེ། སྦྲུལ་ལ་སོགས་པ་སྐྲག་པར་བྱ་བའི་ཕྱིར། དབྱིག་པ་སྒྲ་དང་ལྡན་པར་བྱ་བ་དང༌། འགྱེལ་བ་ལས་བརྟེན་པར་བྱ་བའི་ཕྱིར་དང༌། དགྲ་
བོ་བཟློག་པར་བྱ་བའི་ཕྱིར་བྱའོ། །མགོ་གཡོགས་པ་ནི་མགོ་པོ་དཀྲིས་པ་ལྟར་སྟེང་ནས་འབབ་པའི་བྱ་དང༌། ཕྱེ་མ་ལེབ་དང༌། འབུ་སྲིན་ལ་སོགས་པ་ལས་བསྲུང་བར་བྱ་བའི་ཕྱིར་རོ། །གྲོགས་དང་ལྡན་པ་ནི་རྐུན་པོ་དང༌། གནོད་སྦྱིན་དང༌། སྲིན་པོ་དང༌། ཤ་ཟ་ལ་སོགས་པའི་འཇིགས་པ་ལས་བསྲུང་བར་བྱ་བའི་ཕྱིར་བྱའོ། །མཆོད་རྟེན་མཆོད་བྱ་རྒྱལ་མཚན་དང༌། །མི་ཤིས་གྲིབ་མ་ཐལ་ཕུབ་དང༌། །མི་གཙང་གསེག་བོང་གཏོར་མ་དང༌། །ཁྲུས་བྱས་ས་ནི་འགོ་མ་མི་བྱ། །ཞེས་བྱ་བ་ལ། མཆོད་རྟེན་ནི་མཆོད་རྟེན་ཉིད་དག་དང༌། ཁྱད་པར་ཅན་གྱི་ལྷས་གནས་བཅས་པའི་ཞིང་གི་ཁྱད་པར་འཇིག་རྟེན་ན་གྲགས་པར་གང་གྱུར་པའོ། །མཆོད་བྱ་ནི་བླ་མ་ལ་སོགས་པའོ། །རྒྱལ་མཚན་ནི་གཙུག་ལག་ཁང་དང༌། ལྷ་ཁང་གི་ནང་དུ་བཏགས་པ་མདུང་ངམ་འཁོར་ལོ་དང་ལྡན་པའི་བ་དན་ནོ། །མི་ཤིས་པ་ནི་བཀྲ་མི་ཤིས་པའི་དངོས་པོ་སྟེ། དེ་རྣམས་ཀྱི་གྲིབ་མ་འགོམ་པར་མི་བྱ་ཞིང༌། བརྫི་བར་མི་བྱའོ། །ཐལ་བ་ནི་ལྕི་བ་ལ་སོགས་བ་ཚིག་པ་ལས་བྱུང་བའོ། །ཕུབ་མ་ནི་འབྲས་ཀྱི་ཤུན་བའོ། །མི་གཙང་བ་ནི་བཤང་བ་དང་གཅི་པ་ལ་སོགས་པའོ། །གསེག་མ་ནི་རྡོའི་དུམ་གྲུགས་སོ། །བོང་བ་ནི་སའི་རང་བཞིན་ལ་རྡོ་དང་འདྲ་བའོ། །གཏོར་མའི་གནས་ནི་འབྱུང་པོ་ལ་སོགས་པ་ལ་ཟས་སྦྱིན་པའི་གནས་སོ། །ཁྲུས་བྱས་པའི་ས་ནི་གང་དུ་འགའ་ཞིག་གིས་ཁྲུས་བྱས་པ་སྟེ། དེ་ཐམས་ཅད་འགོམ་པར་མི་བྱ་ཞིང་ཡོངས་སུ་སྤང་བར་བྱའོ། །ཆུ་བོར་རྐྱལ་ཏེ་འགྲོ་མི་བྱ། །མེ་ཚན་ཕུང་པོར་འགྲོ་མི་བྱ། །ཞེས་བྱ་བ་ལ་ཆུ་བོ་སྟེ། ཀླུང་གི་ཆུ་ཆེན་པོ་ལ་ལག་པ་གཉིས་བརྐྱང་ཞིང་འགྲོ་བར་མི་བྱ་སྟེ། ཆུ་སྲིན་དང་རུས་སྦལ་ལ་སོགས་པས་གནོད་པར་འགྱུར་བའི་འཇིགས་པ་ཡོད་པའི་ཕྱིར་རོ། །དེ་བཞིན་དུ་མེའི་ཕུང་པོ་ཆེན་པོའི་ཚོགས་ཀྱི་ཐད་དུ་འགྲོ་བར་མི་བྱའོ། །ཐེ་ཚོམ་བཅས་པའི་གྲུ་ཤིང་ལ། །བཞོན་པ་མི་སྲུན་བཞིན་མི་འཛེག །ཅེས་བྱ་བ་ལ། ཐེ་ཚོམ་དང་བཅས་པའི་གྲུ་ནི་ཆིངས་མ་ལྷོད་ཅིང་རྙིངས་པས་ཕ་རོལ་དུ་སྐྱེལ་མི་ནུས་སོ། །དེ་བཞིན་དུ་ཐེ་ཚོམ་དང་བཅས་པའི་ཤིང་ནི། དུག་ལ་སོགས་པའི་གདུག་པ་ཡོད་པའམ། ལྷ་ལ་སོགས་པ་གནས་
པའམ། ཆག་ཏུ་ཉེ་བ་དག་ཏུ་འཛེག་པར་མི་བྱ་ཞིང༌། དེ་དག་གི་སྟེང་དུ་གནས་པར་མི་བྱའོ། །ཇི་ལྟ་ཞེ་ན། བཞོན་པ་མི་སྲུན་བཞིན་ཞེས་བྱ་བ་ཡིན་ཏེ། དཔེར་ན་རྟ་ལ་སོགས་པའི་བཞོན་པ་མི་སྲུན་པ་ལ་བཞོན་དུ་མི་རུང་བ་དང་མཚུངས་སོ། །འདིས་ནི་ཟུར་གྱིས་བཞོན་པ་མི་སྲུན་པ་ལ་ཡང་ཞོན་པར་མི་བྱའོ་ཞེས་སྟོན་པ་ཡིན་ནོ། །སྦྲིད་པ་གད་མོ་གླལ་བལ། །ཁ་ནི་གདངས་པར་མི་བྱའོ། །ཞེས་བྱ་བ་ལ། སྦྲིད་པ་ནི་སྦྲིད་པ་འབྱུང་བའོ། །གད་མོ་ནི་དགོད་པའོ། །གླ་ལ་བ་ནི་བྱ་རྨྱང་སྟེ། དེ་ལ་ཁ་གདངས་པར་མི་བྱའོ་ཞེས་པ་སྟེ། ཁ་མི་དགབ་པར་མི་བྱའོ། །སྦྲིད་པ་ལ་སོགས་པ་འབྱུང་བ་ན་ལག་པའམ་གོས་ཀྱིས་དགབ་པར་བྱའོ་ཞེས་པའི་དོན་ཏོ། །སྣ་ནི་བྲུད་པར་མི་བྱ་ཞིང༌། །དོན་མེད་ས་རིས་མི་བྱའོ། །ཞེས་བྱ་བ་ལ། སྣ་བྲུད་ཅིང་ཤས་ཆེར་གནོད་པར་མི་བྱ་སྟེ། ཤུ་བ་དང་ཐོར་བུ་ལ་སོགས་པའི་གནོད་པ་སྤང་བར་བྱ་བའི་ཕྱིར་རོ། །དོན་མེད་ཅིང་དགོས་པ་འགའ་ཞིག་མེད་པར་ས་ལ་སོར་མོ་ལ་སོགས་པས་དེ་ལ་འདྲི་ཞིང་དྲུད་པར་མི་བྱའོ་ཞེས་བྱ་བའི་དོན་ཏོ། །ལུས་ཀྱི་ཡན་ལག་མི་གཅུ་ཞིང༌། །ཙོག་ཙོག་པོར་ཡང་འདུག་མི་བྱ། །ཞེས་བྱ་བ་ལ། ལུས་ཀྱི་ཡན་ལག་ལག་པ་དང་རྐང་པ་ལ་སོགས་པ་གཅུ་བ་སྟེ། མི་མཐུན་པར་བྱས་ནས་བྱ་བའི་ལས་མི་བྱའོ། །འདི་དག་གིས་ནི་ལག་པ་དང་རྐང་པའི་རྣམ་པར་འགྱུར་བ་སྤང་བར་བྱའོ་ཞེས་སྟོན་པ་ཡིན་ཏེ། གཟེར་དང་ཡན་ལག་ཆག་པར་འགྱུར་བའི་ཉེས་པ་ཡོད་པའི་ཕྱིར་རོ། །དེ་བཞིན་དུ་ཙོག་ཙོག་པོར་གནས་ཏེ་འདུག་པར་མི་བྱ་སྟེ། ཙོག་ཙོག་པོར་གནས་པས་ཡུན་རིང་པོར་འདུག་ན། གཞང་འབྲུམ་གྱི་ནད་འབྱུང་བར་བཤད་དོ། །ལུས་ངག་ཡིད་ཀྱི་སྤྱོད་པ་ནི། །སྔ་ནས་ངལ་ལས་བཟློག་པར་བྱ། །ཞེས་བྱ་བ་ནི། ལུས་དང་ངག་དང་ཡིད་ཀྱི་སྤྱོད་པ་ཞེས་བྱ་བ་ལས་སུ་བྱ་བ་ནི་སྔ་ནས་ཏེ། ངལ་བར་མ་གྱུར་པའི་དང་པོ་ཉིད་ནས་བཟློག་པར་བྱ་སྟེ། ཇི་ཙམ་གྱིས་ཤིན་ཏུ་དུབ་པར་མ་གྱུར་པ་དེ་ཙམ་ན་བཤོལ་བར་བྱའོ། །དེས་ནི་འདི་སྐད་སྟོན་པ་ཡིན་ཏེ། ལུས་དང་ངག་དང་ཡིད་ཀྱིས་འགྲོ་བ་དང༌། བཀླགས་པ་དང༌། སེམས་པ་ལ་སོགས་པའི་ལས་རྣམས་ནི་ཇི་སྲིད་ཤིན་ཏུ་དུབ་པར་མ་གྱུར་པ་དེ་སྲིད་ཀྱི་བར་དུ་བྱའོ་ཞེས་པའི་དོན་ཏོ། །པུས་བསྒྲེང་ཡུན་རིང་
གནས་མི་བྱ། །མཚན་མོ་ཤིང་དྲུང་བསྟེན་མི་བྱ། །ཞེས་བྱ་བ་ནི་པུས་མོ་གྱེན་དུ་བསྒྲེང་བ་གང་ཡིན་པ་དེ་ནི་པུས་བསྒྲེང་ཞེས་བྱ་སྟེ། གན་རྐྱལ་དུ་འདུག་ནས་པུས་མོ་བརྐྱང་སྟེ། ཡུན་རིང་དུ་གནས་པར་མི་བྱའོ། །དེ་བཞིན་དུ་མཆན་མོ་ཤིང་ཆེན་པོ་དག་ཏུ་གནས་ཤིང་བསྟེན་པར་མི་བྱའོ། །སུམ་མདོ་མཆོད་རྟེན་དྲུང་བཞི་མདོ། །ལྷ་ཡི་ཁང་པའང་དེ་བཞིན་ནོ། །ཞེས་བྱ་བ་ལ། སུམ་མདོ་ལ་སོགས་པར་ཡང་དེ་བཞིན་དུ་མཚན་མོ་བསྟེན་པར་མི་བྱའོ། །དེ་ལ་སུམ་མདོ་ནི་ལམ་གསུམ་འདུས་པ་ལ་བྱའོ། །དེ་ལ་ལ་ལ་དག་གིས་ཕྱོགས་གང་དུ། གང་ཞིག་གྲོང་ངམ་ལྗོངས་ནས་ཕྱིར་བྱུང་སྟེ། གནད་དུ་གྲོང་ན་གནས་པར་རམ། ལྗོངས་ན་གནས་པ་ལས་རང་དགར་འོངས་ཏེ། སྣ་ཚོགས་པའི་གཏམ་དེ་དང་སྨྲ་བའི་གནས་ལ་བྱའོ་ཞེས་འདོད་དོ། །མཆོད་རྟེན་གྱི་དྲུང་ནི་མཆོད་རྟེན་གྱི་ཉེ་འཁོར་རོ། །གཞི་མདོ་ནི་གང་དུ་ལམ་བཞི་གཅིག་ཏུ་འདུས་པའོ། །ལྷའི་ཁང་པ་ནི་ལྷ་རྣམས་ཀྱི་གནས་ཀྱི་ཁང་པའོ། །གསོད་ས་འབྲོག་སྟོང་ཁང་སྟོང་དང༌། །དུར་ཁྲོད་དུ་ནི་ཉིན་མོའང་མིན། །ཞེས་བྱ་བ་ནི་གསོད་ས་ལ་སོགས་པ་ཉིན་མོའང་བསྟེན་པར་མི་བྱའོ། །དེ་ལ་གསོད་ས་ནི་རྐུན་པོ་ལ་སོགས་པ་གསོད་པའི་གནས་སོ། །འབྲོག་སྟོང་ནི་དགོན་པའོ། །ཁང་སྟོང་ནི་སྐྱེ་བོ་མེད་པའི་ཁང་པའོ། །དུར་ཁྲོད་ནི་རོ་བསྲེགས་པའི་གནས་ཏེ། འདི་དག་ཏུ་ནི་ཉིན་པར་ཡང་བསྟེན་པར་བྱ་བ་མ་ཡིན་ན། མཚན་མོ་ལྟ་སྨོས་ཀྱང་ཅི་དགོས། རྣམ་ཀུན་ཉི་མ་ལ་མི་བལྟ། །མགོ་ཡིས་ཁུར་ནི་བསྐུར་མི་བྱ། །ཞེས་བྱ་བ་ལ། རྣམ་པ་ཀུན་ཏུ་ཞེས་པ་རྣམ་པ་ཐམས་ཅད་དུ་ཉི་མ་ལ་བལྟ་ཞིང་བརྟག་པར་མི་བྱའོ། །དེ་ཡང་གཞན་དག་ལས། འཆར་དང་ནུབ་པར་འགྱུར་ཚེ་དང༌། །ཕྱེད་དུས་གཟུགས་བརྙན་རྟོག་པ་དང༌། །གོས་ཀྱིས་བསྒྲིབས་པར་བྱས་པ་ལས། །ཉི་མ་བལྟ་བར་མི་བྱའོ། །ཞེས་བཤད་པ་ཡིན་ནོ། །དེ་བཞིན་དུ་མགོ་བོ་སྟེ། སྤྱི་བོས་ཁུར་བསྐུར་བར་མི་བྱ་ཞིང༌། གནས་ནས་གནས་སུ་བསྐུར་བར་མི་བྱའོ། །ཤིན་ཏུ་ཕྲ་དང་འཚེར་བ་དང༌། །མི་གཙང་མི་སྡུག་རྒྱུན་མི་བལྟ། །ཞེས་བྱ་བ་ལ། ཤིན་ཏུ་ཕྲ་ཞིང་བལྟ་དཀའ་བ་དག་ལ་རྟག་པར་རྒྱུན་ཏུ་བལྟ་ཞིང་བརྟག་པར་མི་བྱའོ། །དེ་བཞིན་དུ་འཚེར་བ་སྟེ། མེ་ལ་
སོགས་པ་དང༌། གཞན་ཡང་ཤིན་ཏུ་འཚེར་ཞང་གཟི་མདངས་དང་ལྡན་པ་ལ་བལྟ་བར་མི་བྱའོ། །མི་གཙང་བ་ནི་བཙོག་པར་གྱུར་པ་སྟེ། བཤང་གཅི་ལ་སོགས་པ་སྟེ། དེ་ལ་ཡང་མི་བལྟའོ། །མི་སྡུག་པ་ནི་མངོན་པར་མི་དགའ་ཞིང་སྡང་བར་གྱུར་པ་ལ་བལྟ་བར་མི་བྱའོ། །ཆང་འཚོང་བ་དང་སྦྱོར་བ་དག །སྦྱིན་དང་ལེན་དང་སྤྱད་མི་བྱ། །ཞེས་བྱ་བ་ལ། བཙོང་བ་ཞེས་བྱ་བ་ནི་ཟོང་དུ་བྱའོ། །འདིས་སྦྱོར་བར་བྱེད་པས་ན་སྦྱོར་བ་སྟེ། ཆང་བྱེད་པའོ། །སྦྱིན་པ་ནི་རང་གི་བྱ་བ་ལས་བཟློག་ཅིང༌། གཞན་དག་བསྟབས་པའོ། །ལེན་པ་ནི་བསྟན་བཅོས་ཇི་ལྟ་བ་བཞིན་དུ་གཞན་ལས་ལེན་པའོ། །དེ་ལྟར་ཆང་འཚོང་བ་ལ་སོགས་པ་བྲམ་ཟེ་དང༌། དགེ་སྦྱོང་དག་གིས་མི་བྱའོ། །མདུན་གྱི་སེར་བུ་ཉི་ཚན་རྡུལ། །བ་མོ་དང་ནི་རླུང་རྩུབ་དང༌། །སྦྲིད་པ་སྒྲེགས་པ་ལུད་པ་ཟད། །གཉིད་ལོག་ཉལ་པོ་གཅུ་མི་བྱ། །གང་ཀའི་གྲིབ་མ་རྒྱལ་པོ་སྡང༌། །སྦྲུལ་གདུག་གཅན་གཟན་རྭ་ཅན་དང༌། །དུས་མཚམས་རྟག་ཏུ་ཟས་བཟའ་དང༌། །བུད་མེད་ཉལ་ཀློག་སེམས་ལས་དང༌། །དགྲ་བོ་ནར་མར་ཟན་ཚོགས་འདུས། །སྨད་འཚོང་ཚོང་པའི་ཟས་དག་དང༌། །ལུས་དང་མཆུ་དང་སེན་སྒྲ་འབྱིན། །ལག་པ་སྐྲ་ནི་སྤྲུགས་པ་དང༌། །ཆུ་མེ་མཆོད་བྱའི་བར་དུ་འགྲོ། །རོ་བསྲེགས་ལ་བརྟེན་དུད་པ་དང༌། །ཆང་སོགས་ཆགས་དང་བུད་མེད་ལ། །ཡིད་རྟོན་རང་དབང་གྱུར་པ་སྤང༌། །ཞེས་བྱ་བ་ནི། མདུན་གྱི་བསེར་བུ་ལ་སོགས་པ་སྐྱེས་བུས་སྤང་བར་བྱའོ་ཞེས་བྱ་བར་སྦྱར་རོ། །དེ་ལ་མདུན་གྱི་བསེར་བུ་ནི་ཤར་ཕྱོགས་ནས་ལྡང་བའི་རླུང་ངོ༌། །ཉི་ཚན་ནི་ཉི་མའི་ཐན་པའོ། །རླུང་ནི་རྡུལ་གྱི་ཚོགས་སོ། །བ་མོ་ནི་བ་མོ་ལྷགས་པའོ། །རླུང་རྩུབ་པ་ནི་རླུང་དྲག་པའོ། །སྒྲེགས་པ་ནི་རླུང་གྱེན་དུ་རྒྱུ་བའོ། །ལུད་པ་ནི་ལུད་བ་ལུ་བར་གྱུར་པའོ། །ཟས་ནི་ཟས་ལ་སྤྱོད་པའོ། །ཉལ་པོ་ནི་འཁྲིག་པ་སྤྱོད་པ་སྟེ། དེ་དག་གཅུས་ཤིང་ཡོན་པོར་གྱུར་པ་མི་བྱ་བར་སྤང་བར་བྱའོ། །གད་ཀའི་གྲིབ་མ་ནི་ཆུ་བོའི་འགྲམ་གྱི་གད་ཀའི་གྲིབ་མའོ། །རྒྱལ་པོ་སྡང་བ་ནི་རྒྱལ་པོས་དགྲ་བའོ། །སྤྲུལ་གདུག་ནི་མཆེ་བ་གདུག་པ་ཅན་ནོ། །གཅན་གཟན་ནི་སེང་གེ་ལ་སོགས་པའོ། །རྭ་ཅན་
ནི་མ་ཧེ་ལ་སོགས་པའོ། །དུས་མཚམས་ཐམས་ཅད་དུ་ཟས་ལ་སྤྱོད་པ་ལ་སོགས་པ་ཡང་སྤང་བར་བྱའོ། །བུད་མེད་ནི་དེ་དང་ཉལ་པོ་བྱ་བའོ། །ཉལ་པོ་ནི་གཉིད་ལོག་པའོ། །ཀློག་པ་ནི་གཞུང་འདོན་པའོ། །སེམས་ལས་ནི་ཐོས་པ་ལ་སོགས་པ་ཡང་ཡང་དུ་དྲན་པར་བྱ་བའོ། །དགྲ་བོའི་ནར་མའི་ཟན་ལ་སོགས་པ་ཡང་སྤང་བར་བྱ་སྟེ། ནར་མའི་ཟས་ཞེས་བྱ་བ་ནི། མེ་ལྷ་བསྟོད་པའི་ཆོ་ག་ལ་སོགས་པའི་དུས་སུ་སྟེར་བའི་ཟན་ཏེ། མདུན་ན་འདོན་ལ་སོགས་པ་མ་གཏོགས་པར་གཞན་དག་གིས་དེ་ཟོས་ན། སྡིག་པས་གོས་པར་འགྱུར་བར་འདོད་དེ། གང་གི་ཕྱིར་མཆོད་སྦྱིན་རྫོགས་ཁར་དེ་ལས་བྱུང་བའི་སྡིག་པ་ཟད་པར་བྱ་བའི་ཕྱིར། ཉེས་པ་འཆགས་པ་ལས་འགོ་བར་འགྱུར་རོ་ཞེས་ཟེར་རོ། །ཚོགས་འདུས་ནི་སྐྱེ་བོ་མང་པོས་བསྟན་པའོ། །ཡུན་དུ་ཚོགས་ཏེ་གཏན་དུ་ཟློས་པར་བྱེད་པ་མང་པོ་འདུས་པར་བྱེད་པས་ཁྱབ་པའོ། །སྨད་འཚོང་ནི་འཕྱོན་མ་སྟེ། དེ་དང་འབྲེལ་པའི་ཟས་གང་ཡིན་པ་དེ་ཡང་བཟའ་བར་མི་བྱ་སྟེ། སྡིག་པས་གོས་པར་འགྱུར་བའི་ཕྱིར་རོ། །ཚོང་པ་ནི་ནོར་བསྒྱུར་མཁན་ཏེ། དེའི་ཟས་ཀྱང་སྡིག་པས་གོས་པར་བྱེད་པ་ཡིན་པར་འདོད་པས་བཟའ་བར་མི་བྱའོ། །དེ་བཞིན་དུ་ལུས་དང༌། མཆུ་དང་སེན་མོ་སྟེ། ཡན་ལག་དང་ཁ་དང༌། ལག་སྐྱེས་ཀྱི་སྒྲ་འབྱིན་པ་ཡང་སྤང་བར་བྱའོ། །དེ་བཞིན་དུ་ལག་པ་དང༌། སྐྲ་སྤྲུགས་ཤིང་བསྐྱོད་པ་ཡང་སྤང་བར་བྱའོ། །ཆུ་མེ་མཆོད་བྱའི་བར་དུ་འགྲོ། །ཞེས་པ་ནི་ཆུ་དང་མེ་དང་མཆོད་པར་བྱ་བ་དག་གི་བར་དུ་འགྲོ་ཞིང༌། སོང་བ་ཡང་སྤང་བར་བྱའོ། །མཆོད་བྱ་ནི་བླ་མ་ལ་སོགས་པའོ། །རོ་བསྲེགས་པ་ལ་བརྟེན་པའི་དུད་པ་ནི། མི་རོ་བསྲེགས་པ་ལས་བྱུང་བའི་དུད་པ་ཡང་སྤང་བར་བྱའོ། །དེ་བཞིན་དུ་ཆང་ལ་སོགས་པ་ལ་ཆགས་པ་སྟེ། ཆང་དང༌། རྒྱན་པོ་དང༌། བུད་མེད་དང༌། ཡུལ་གཞན་དག་ལ་ཆགས་ཤིང་ཡང་ནས་ཡང་དུ་བསྟེན་པ་ཡང་སྤང་བར་བྱའོ། །དེ་བཞིན་དུ་བུད་མེད་ལ་ཡིད་རྟོན་པ་དང༌། རང་དབང་དུ་བྱ་བའི་ཡུལ་དེ་སྤང་བར་བྱའོ། །བློ་ལྡན་སྤྱོད་པ་ཐམས་ཅད་ལ། །འཇིག་རྟེན་ཉིད་ནི་སློབ་དཔོན་ཡིན། །དེ་བས་འཇིག་རྟེན་པ་ཡི་དོན། །རྟོགས་པར་བྱེད་པས་དེ་ཉིད་བྱ། །ཞེས་བྱ་བ་ལ། བློ་དང་ལྡན་ཞིང་
ཤེས་རབ་དང་ལྡན་པས། སྤྱོད་པ་ཐམས་ཅད་དེ་བྱ་བ་ཐམས་ཅད་ལ། འཇིག་རྟེན་ཉིད་ཅེས་བྱ་བ། འཇིག་རྟེན་པ་དམ་པ་ཉིད་སློབ་དཔོན་ཡིན་ཏེ། རྗེས་སུ་སྟོན་པ་ཡིན་ནོ། །དེ་བས་ན་ཞེས་པ་གཏན་ཚིགས་དེའི་ཕྱིར་གང་ཕྱིར་གང་འཇིག་རྟེན་པའི་དོན་རྟོགས་པར་བྱེད་ཅིང༌། སོ་སོར་རྟོག་པ་སྔོན་དུ་གཏོང་ཞིང་བླང་བར་བྱ་བ་དང༌། སྤང་བར་བྱ་བའི་ཚུལ་གྱིས་ལེགས་པ་དང་ཉེས་པ་དག་གི་བྱེ་བྲག་ཤེས་པ་དག་གིས་འཇིག་རྟེན་པ་དམ་བདག་གི་སྤྱོད་པ་དེ་ཉིད་རྗེས་སུ་སྤྱད་པར་བྱ་ཞིང་བསླབ་པར་བྱའོ། །སྙིང་རྗེས་བརླན་ཞིང་གཏོང་དང་ལྡན། །ལུས་དང་ངག་ཡིད་དུལ་བ་དང༌། །གཞན་གྱི་དོན་ལ་རང་དོན་སེམས། །དེ་དག་དམ་པའི་སྤྱོད་མཐར་ཐུག །ཅེས་བྱ་བ་ལ། སྙིང་རྗེས་བརླན་པ་ནི་སེམས་ཅན་ཐམས་ཅད་ལ་སྙིང་བརྩེ་བ་དང་ལྡན་པ་ཉིད་དེ། སྙིང་རྗེས་སེམས་ནོན་པའོ། །དེ་བཞིན་དུ་གཏོང་བ་དང་ལྡན་པ་ནི། ཅི་ནུས་པ་དང་བསྟན་བཅོས་ཇི་ལྟ་བ་བཞིན་དུ་བདག་གིར་བྱ་བ་ལས་བཟློག་ཅིང་གཞན་དག་ལ་སྟེར་བའོ། །ལུས་དང་ངག་དང་སེམས་ནི་ལུས་ངག་ཡིད་ཀྱི་རྣམ་པའོ། །དུལ་བ་ནི་ཉེ་བར་ཞི་བའོ། །གཞན་གྱི་དོན་ལ་ཞེས་པ་ནི་གཞན་གྱི་དགོས་པའོ། །རང་དོན་སེམས་པ་ནི་གཞན་གྱི་དོན་བློ་ལ་སེམས་པ་འདི་ཉིད་ཁོ་བོའི་རང་གི་དོན་ཡིན་ནོ་ཞེས་དེ་སྙམ་དུ་སེམས་པའོ། །དེ་དག་ཅེས་པ་དེ་ལྟ་བུ་ནི་དམ་པ་སྟེ། ཡ་རབས་རྣམས་ཀྱི་སྤྱོད་པ་ཡིན་པས་ན་དམ་པའི་སྤྱོད་པའོ། །མཐར་ཐུག་པ་ནི་རྫོགས་པའོ། །ཡང་ན་དམ་པ་ཡང་ཡིན་ལ་སྤྱོད་པ་ཡང་ཡིན་པས་དམ་པའི་སྤྱོད་པ་སྟེ། སྤྱོད་པ་མཛེས་པ་ཞེས་བྱ་བའི་དོན་ཏོ། །ད་ལྟར་བདག་ནི་ཉིན་མཚན་དུ། །ཇི་ལྟ་བུར་ནི་གནས་འགྲོ་ཞེས། །རྟག་ཏུ་དྲན་པ་ཉེར་འཇོག་པ། །སྡུག་བསྔལ་སྣོད་དུ་མི་འགྱུར་རོ། །ཞེས་བྱ་བ་ནི་ད་ལྟར་ཞེས་པ་གནས་པའི་གནས་སྐབས་ཉིད་ན། བདག་ནི་ཉིན་མོ་དང་མཚན་མོ་རྟག་ཏུ་ཅི་ཆོས་ལ་སོགས་པའི་བྱ་བ་དང་ལྡན་ནམ། འོན་ཏེ་ཆོས་དང་མི་ལྡན་པར་འགྲོ་ཞིང་དུས་འདས་པ་ཡིན་ཞེས། དེ་ལྟར་རྟག་ཏུ་དྲན་པ་ཉེ་བར་འཇོག་ཅིང༌། དུས་ཐམས་ཅད་དུ་ཡིད་ལ་བྱེད་པ་དག་ནི་སྡུག་བསྔལ་གྱི་སྣོད་དུ་མི་འགྱུར་གྱི། འཇིག་རྟེན་
འདི་དང་གཞན་དུ་ཀུན་ཏུ་དགའ་བ་ཉིད་དུ་འགྱུར་རོ། །དེ་ལྟར་སྤྱོད་པ་མདོར་བསྡུས་པས། །གང་ཞིག་ཀུན་ཏུ་སྤྱོད་བྱེད་པ། །ཚེ་དང་ནད་མེད་དབང་ཕྱུག་དང༌། །གྲགས་པ་འཇིག་རྟེན་རྟག་ཐོབ་འགྱུར། །ཞེས་བྱ་བ་ལ། དེ་ལྟར་ཞེས་བྱ་བ་ནི་རྫོགས་པའི་ཚིག་གོ །སྤྱོད་པ་ནི་ཀུན་ཏུ་སྤྱོད་པའོ། །མདོར་བསྡུས་པ་ནི་མདོ་ཙམ་དུ་བསྡུས་ཏེ་བཤད་པ་ཡིན་པས་སོ། །དེ་ལྟ་བུའི་སྤྱོད་པ་དེ་སྐྱེས་བུ་གང་ཞིག་ཀུན་ཏུ་སྤྱོད་པར་བྱེད་པ་ནི། ཚེ་ལ་སོགས་པ་ཐོབ་པར་འགྱུར་རོ། །དེ་ལ་ཚེ་ནི་སྲོག་གོ །ནད་མེད་པ་ནི་བདེ་བར་གནས་པའོ། །དབང་ཕྱུག་ནི་འབྱོར་པ་དང་ལྡན་པའོ། །གྲགས་པ་ནི་སྙན་པས་ཀུན་ཏུ་ཁྱབ་པའོ། །འཇིག་རྟེན་རྟག་པ་ནི་མི་བཟད་པའི་གནས་ཐོབ་ཅིང་མི་འཇིགས་པའི་འདོད་པ་མ་ལུས་པ་ཐོབ་པར་འགྱུར་རོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བལ་དགའ་བས་རྣམ་པར་སྦྱར་བ་ལས་ལེའུ་གཉིས་པའི་རྣམ་པར་འགྲེལ་པའོ།། །།དེ་ནས་དུས་སུ་སྤྱད་པའི་ལེའུ་བཤད་པར་བྱའོ་ཞེས་བྱ་བ་ལ། འདིར་ཐ་མལ་པར་བདེ་བར་གནས་པའི་འཇུག་པ་བཤད་པའི་སྐབས་ཡིན་ལ། དེ་ཡང་ལེའུ་སྔ་མར་ནི། དུས་ཚིག་སྤྱི་ཙམ་དུ་བསྟན་པ་ཡིན་ལ། ད་ནི་དུས་ཀྱི་ཁྱད་པར་བསྟན་པར་བྱ་བའི་ཕྱིར། ལེའུ་འདི་རྩོམ་པ་བྱས་པ་དེ་ཉིད་རིགས་པ་ཡིན་པའི་ཕྱིར་རོ། །དེ་ཡང་གང་གི་ཕྱིར་ཞག་གཅིག་གི་ཆ་ཤས་ནི། ཐང་ཅིག་ཡིན་ལ། དེའི་སྤྱོད་པ་ཡང་ཐང་ཅིག་གིས་ཉེ་བར་མཚོན་ནས་སྟོན་ཏེ། དེ་ནི་ཚངས་ཕྱིར་ཐང་ཅིག་ཅེས་བྱ་བ་ལ་སོགས་པའི་གཞུང་གིས་བཤད་པ་ཡིན་ནོ། །ཉིན་ཞག་ཆ་ཤས་བསྡུས་པ་ནི་ཟླ་ཕྱེད་དོ། །ཟླ་བ་ཕྱེད་བསྡུས་པ་ནི་ཟླ་བའོ། །ཟླ་བ་བསྡུས་པ་ནི་དུས་སོ། །དུས་བསྡུས་པ་ནི་ལྷོ་དང་བྱང་དུ་འགྲོ་བའོ། །དེ་ལ་དུས་དང་དུས་སུ་སྤྱད་པར་བྱ་བ་ཡིན་པས་དུས་ཀྱི་སྤྱོད་པའོ། །དེ་ནས་ཞེས་བྱ་བ་ལ་སོགས་པ་གཞན་དག་གི་ཚིག་དོན་སྔར་བཤད་པར་བྱས་སོ། །དགུན་ཟླ་ར་བ་སོགས་གཉིས་གཉིས། །རིམ་བཞིན་དུས་ནི་དྲུག་ཏུ་བཤད། །དེ་ནས་དགུན་ཟླ་ཐ་ཆུངས་སོགས། །གསུམ་ནི་བྱང་དུ་འགྲོ་ཞེས་བྱ། །དེ་ཚེ་མི་རྣམས་ཉིན་རེ་ཞིང༌། །མཐུ་འཕྲོག་པ་
ཞེས་བྱ་བ་ཡིན། །ཞེས་བྱ་བ་ལ། དགུན་ཟླ་ར་བ་ལ་སོགས་པ་ཞེས་པ་ནི། དགུན་ཟླ་ར་བ་དང་འབྲིང་པོ་ལ་སོགས་པའོ། །གཉིས་གཉིས་ནི་གྲང་གཉིས་ཀྱིས་བཅད་པ་ནི་ཟླ་བ་བཅུ་གཉིས་སོ། །རིམ་ནི་གོ་རིམས་ཇི་ལྟ་བ་བཞིན་དུ་བྱ་བ་ཡིན་གྱི། གོ་རིམས་འཆོལ་བ་ནི་མ་ཡིན་ནོ། །དགུན་ཟླ་ཐ་ཆུངས་སོགས་ཞེས་བྱ་བ་ནི། དགུན་སྨད་དང༌། དཔྱིད་དང༌། སོ་ག་དང༌། དབྱར་དང༌། སྟོན་དང༌། དགུན་སྟོད་དེ། དུས་དྲུག་ཏུ་དུས་ཀྱི་རྣམ་པར་དབྱེ་བ་བཤད་ཅིང་བསྟན་པ་ཡིན་ནོ། །དེ་ལ་དུས་གསུམ་སྟེ། དགུན་སྨད་དང༌། དཔྱིད་དང༌། སོ་ག་ཞེས་བྱ་བའི་དུས་གསུམ་ལ་ནི། ཉི་མ་བྱང་ཕྱོགས་སུ་འགྲོ་བ་ཡིན་ཏེ། ཉི་མ་བྱང་ཕྱོགས་སུ་འགྲོ་བ་དེ་ནི། མཐུ་འཕྲོག་པ་ཞེས་ཀྱང་བྱ་བར་ཤེས་པར་བྱ་བའོ། །དེ་ཡང་གང་གི་ཕྱིར་དུས་དེའི་ཚེ་མི་རྣམས་ཀྱི་མཐུ་དང་སྟོབས་ཉི་མ་རེ་རེ་ཞིང་འཕྲོག་ཅིང་འབྲི་བར་བྱེད་པ་ཡིན་ནོ། །སུ་ཞིག་འཕྲོག་ཅེ་ན། རང་གི་རང་བཞིན་ཡིན་པའི་ཕྱིར། ཉི་མའི་འོད་ཟེར་དག་གིས་འཕྲོག་པར་བྱེད་དོ། །ཅིའི་ཕྱིར་ཞེ་ན། དེ་ཚེ་ཤིན་ཏུ་རྣོ་ཞིང་ཚ། །རྩུབ་པའི་ལས་ཀྱི་ངོ་བོ་ཉིད། །ཉི་མ་རླུང་གི་ཟླ་བ་ཡི། །ས་ཡི་ཡོན་ཏན་ཟད་པར་བྱེད། །ཅེས་བྱ་བ་ལ། དུས་དེའི་ཚེ་གང་གི་ཕྱིར། ཤིན་ཏུ་རྣོ་བ་དང༌། ཚ་བ་དང༌། རྩུབ་པའི་ལས་ཀྱི་ངོ་བོ་ཉིད་དེ། རང་བཞིན་ཅན་ཡིན་པས། ཉི་མ་དང་རླུང་གི་ཟླ་བའི་ཆ་ལས་བྱུང་བའི་བསིལ་བའི་རང་བཞིན་གནས་པའི་ཡོན་ཏན་དེ་ཟད་པར་བྱེད་ཅིང་འབྲི་བར་བྱེད་དོ། །ཚུལ་དེ་ལྟར་ན་མེ་ནི་རྩུབ་པའི་རང་བཞིན་ཅན་ཡིན་པས་མཐུ་སྟོབས་ཕྲོགས་ཏེ། དེ་བས་ན་དེའི་དངོས་པོ་རྣམས་ཀྱི་ཁུ་བཅུད་རྩུབ་པར་འགྱུར་བ་ཡིན་ནོ། །འདིར་ནི་ཚ་བསྐ་ཁ་བ་ཡི། །རོ་རྣམས་སྟོབས་ནི་ཆེ་བ་ཡིན། །ཞེས་བྱ་བ་ནི། དུས་འདིའི་ཚེ་ཚ་བ་ལ་སོགས་པའི་རོ་རྣམས་གྲངས་ཇི་ལྟ་བ་བཞིན་རིམ་གྱིས་སྟོབས་ཆེ་བ་ཡིན་ནོ། །དེ་ལ་དགུན་སྨད་ཀྱི་དུས་སུ་རོ་ཆེ་བ་སྟོབས་ཆེ་བ་ཡིན་ནོ། །དཔྱིད་ནི་བསྐ་བའོ། །སོ་གའི་ནི་ཁ་བ་སྟོབས་ཆེ་བའོ། །སྟོབས་ཆེ་བ་སྨོས་པ་ནི་འདི་སྐད་སྟོན་པ་ཡིན་ཏེ། དེའི་ཚེ་ཚ་བ་ལ་སོགས་པའི་རོ་འདི་དག་སྐྱེད་བར་བྱེད་པ་ནི་མ་ཡིན་གྱི་འོན་ཀྱང་རང་གི་ནུས་པ་གསལ་བར་སྣང་བར་བྱེད་པ་ཉིད་ཡིན་ནོ། །དེའི་ཚེ་སྟོབས་ཆེ་བར་འགྱུར་བ་ཡིན་ཞིང༌། རང་གི་མཐུ་ཁྱད་པར་ཅན་རྫོགས་
པར་བྱེད་དོ། །དེ་བས་མེ་ནི་མཐུ་སྟོབས་འཕྲོག །ཅེས་བྱ་བ་ནི། གང་གི་ཕྱིར་དེ་ལྟར་སའི་ཟླ་བ་བསིལ་བའི་ཡོན་ཏན་འབྲི་བར་བྱེད་ཅིང༌། རྩུབ་པའི་རོ་འཕེལ་བར་བྱེད་ལ། ཉི་མ་རྣོ་བར་བྱེད་པས་འགྲོ་བའི་སྣུམ་པའི་སྟོབས་འཕྲོག་པར་བྱེད་ཅིང༌། རླུང་གིས་ཀྱང་ཆུའི་ཁམས་སྐེམས་པ་ཡིན་ནོ། །ལྷོ་ཕྱོགས་སུ་ནི་འགྲོ་བའི་དུས། །དབྱར་ལ་སོགས་པར་སླར་སྟོབས་བསྐྱེད། །འདིར་སྟོབས་སླར་ནི་བསྐྱེད་པས་ན། །འདིར་ནི་བསིལ་བས་ཟླ་བ་ནི། །སྟོབས་དང་ལྡན་པས་ཉི་མ་འབྲི། །ཞེས་བྱ་བ་ནི། ལྷོ་ཕྱོགས་སུ་འགྲོ་བ་ཞེས་བྱ་བ་ནི་ཉི་མ་ལྷོ་ཕྱོགས་སུ་འགྲོ་བའོ། །དེའི་དུས་ནི་དབྱར་ལ་སོགས་པ་ཡིན་ཏེ། དབྱར་དང༌། སྟོན་དང༌། དགུན་སྟོད་ཅེས་བྱ་བ་ནི་གསུམ་མོ། །དུས་དེ་ནི་སླར་བསྐྱེད་པ་ཞེས་བྱ་བ་དང༌། བསིལ་ཞིང་ཞི་བ་ཞེས་བྱ་བ་ཡིན་ཏེ། གང་གི་ཕྱིར་ཉི་མའི་འོད་ཟེར་གྱི་སྟོབས་འཕྲོག་པའི་དུས་སུ་མི་རྣམས་ཀྱི་སྟོབས་ཀྱི་བཅུད་འཕྲོག་ཅིང་ཟད་པར་བྱེད་པ་སྟེ། སླར་གཏོང་ཞིང་སྐྱེད་པར་བྱེད་པ་ཡིན་ཏེ། དེ་བས་ན་འདི་ནི་སླར་གཏོང་བ་ཡིན་པས་ན། དོན་དང་མཐུན་པའི་མིང་དུ་དུས་འདི་ལ་སྐྱེད་པ་ཞེས་བྱའོ། །སླར་བསྐྱེད་པའི་དུས་འདིར་ནི་བསིལ་ཞིང་ཞི་བ་ཡིན་པས་ཟླ་བ་སྟོབས་དང་ལྡན་ཞིང་ནུས་པ་ཆེ་བ་ཡིན་ལ། དེས་ནི་ཉི་མ་འབྲི་བ་ཡིན་ཏེ། དེའི་ཚེ་ཉི་མའི་སྟོབས་ཆུང་བར་འགྱུར་བ་ཡིན་ཏེ། འདིའི་ནུས་པ་འབྲི་བ་ན། ཟླ་བའི་སྟོབས་འཕེལ་བས་བསིལ་བར་བྱས་པ་དང༌། ལྷོ་ཕྱོགས་སུ་འགྲོ་བའི་ལམ་གྱི་མཚན་ཉིད་ཡིན་པའི་ཕྱིར་རོ། །ཆར་འབབ་པ་དང་རླུང་བསིལ་བས། །ས་སྟེང་ཚ་བ་ཞི་བ་ན། །འདིར་ནི་སྣུམ་དང་སྐྱུར་ལན་ཚྭ། །མངར་བའི་རོ་རྣམས་མཐུ་བསྐྱེད་དོ། །ཞེས་བྱ་བ་ལ། འདིར་ནི་ཞེས་པ་སླར་སྟོབས་བསྐྱེད་པའི་དུས་འདིར་སྣུམ་པ་དང༌། རོ་གསུམ་པོ་སྐྱུར་བ་དང༌། ལན་ཚྭ་དང༌། མངར་བ་མཐུ་ཆེ་ཞིང་སྟོབས་བསྐྱེད་པས་རང་གི་ནུས་པ་གསལ་བར་བྱེད་ལ། འབྱུང་བ་ཆེན་པོ་རྣམས་ཆེ་ཆུང་གི་ཤས་སྙོམས་པས། རོ་དེ་རྣམས་མཐུ་ཆེ་བར་འགྱུར་བ་ཡིན་ནོ། །དེ་ཅིའི་ཕྱིར་ཞེ་ན། དུས་བསིལ་བའི་ཕྱིར་ཏེ། ཆར་གྱི་ཚོགས་འབབ་པ་དང༌། རླུང་བསིལ་ཞིང་གྲང་བས་སའི་སྟེང་གི་ཚ་བ་ཞི་ཞིང་ཐན་པ་དང་བྲལ་བས་མཐུ་སྐྱེ་བ་ཡིན་ནོ། །འདིར་ཡང་རིམ་པ་བཞིན་དུ་སྦྱར་བར་བྱ་སྟེ། དབྱར་ནི་རོ་སྐྱུར་
བ་མཐུ་བསྐྱེད་པ་ཡིན་ལ། སྟོན་ནི་ལན་ཚྭའོ། །དགུན་སྟོད་ནི་མངར་བའོ། །དགུན་ཚེ་ཆར་དང་ཚ་དུས་སུ། །སྟོབས་ཆུང་ལྷག་མ་དག་ལ་འབྲིང༌། །ཞེས་བྱ་བ་ལ། དགུན་ནི་གྲང་བའི་དུས་ཏེ། དགུན་སྟོད་དང་དགུན་སྨད་ཅེས་བྱ་བའོ། །ཆེ་བ་ནི་དེའི་ཚེ་མི་རྣམས་ཀྱི་མཐུ་སྟོབས་མཆོག་ཏུ་ཆེ་བར་འགྱུར་རོ། །འདིར་དགུན་ཞེས་སྨོས་པས་ནི། དགུན་སྟོད་དང་དགུན་སྨད་གཉི་ག་ཡིན་པར་ཤེས་པར་བྱ་སྟེ། དེའི་ཚེ་ནི་མིའི་སྟོབས་ཤིན་ཏུ་ཆེ་བ་ཡིན་ནོ། །ཆར་དུས་དང༌། ཚ་དུས་ནི་དབྱར་དང་སོ་གའི་དུས་ཏེ། དེའི་དུས་སུ་མིའི་སྟོབས་ཆུང་བ་ཡིན་ནོ། །ལྷག་མ་སྟེ། སྟོན་དང་དཔྱིད་དག་ལ་ནི། མིའི་སྟོབས་འབྲིང་ཞིང་རན་པ་ཡིན་ནོ། །དེ་ལ་རེ་ཞིག་དགུན་གྱི་དུས་ཀྱི་སྤྱོད་པ་སྨྲས་པ་ནི། སྟོབས་ལྡན་གྲང་བས་བཀག་པ་ནི། དགུན་གྱི་དུས་སུ་མེ་སྟོབས་ལྡན། །དེ་ནི་རླུང་གིས་སྦར་བ་ན། །ཟས་ཉུང་གྱུར་ན་ལུས་ཟུངས་སྐེམས། །དེ་བས་དགུན་ནི་མངར་སྐྱུར་དང༌། །ལན་ཚྭའི་རོ་ནི་བསྟེན་པར་བྱ། །ཞེས་བྱ་བ་ལ། སྟོབས་ཞེས་བྱ་བ་སྐྱེས་བུའི་མེ་དགུན་གྱི་དུས་སུ་སྟོབས་དང་ལྡན་པར་འགྱུར་རོ། །དེ་ཡང་དགུན་ནི་སླར་སྟོབས་བསྐྱེད་པའི་དུས་ཡུན་རིང་དུ་བསགས་པ་ཡིན་པས། མིའི་སྟོབས་བསྟན་པར་གྱུར་པ་ཡིན་གྱི། དང་པོ་རྩོམ་པ་ཙམ་གྱིས་ནི་མ་ཡིན་པས། སྟོབས་འཕྲོག་པའི་དུས་ཀྱི་སྟོབས་རྫོགས་པས། དེ་ལ་གནོད་པར་མི་ནུས་སོ། །དེ་བས་ན་དགུན་ནི་སྟོབས་མཆོག་ཏུ་ཆེ་བར་གྲུབ་པ་ཡིན་ནོ། །དེ་ཉིད་ཀྱིས་ན་དང་པོ་ཉིད་དུ། སྟོབས་ལྡན་གྲང་བས་བཀག་པ་ནི། །ཞེས་སྨོས་པ་ཡིན་ཏེ། སྟོབས་ནི་འདི་ལྟར་བྱེད་དེ། སླར་སྟོབས་བསྐྱེད་པའི་དུས་སུ་སྟོབས་བསགས་པས། དེའི་ཚེ་སྐྱེས་བུ་སྟོབས་དང་ལྡན་པ་ཡིན་ལ། སྟོབས་དེ་གྲང་བས་བཀག་པས་མི་སྨིན་པར་ནུས་པའི་སྟོབས་དང་ལྡན་པར་འགྱུར་རོ། །འདིར་དངོས་པོའི་ཆོས་ཉིད་ནི་འདི་ཡིན་ཏེ། ཕོ་བའི་མེ་དྲོད་ཀྱི་ཚོགས་གང་ཡིན་པ་བ་སྤུའི་བུ་ག་རྣམས་ལས་ཕྱིར་འབྱུང་བ་ནི་གྲང་བའི་རེག་པས་སྤུའི་བུ་ག་བཀག་པས་ནང་དུ་འདུས་ལ། ནང་དུ་ཞུགས་པ་དེས་རང་གི་མེའི་དྲོད་དེས་ཕོ་བའི་མེ་དྲོད་དེ་ཉིད་མངོན་པར་འཕེལ་བར་བྱེད་དོ། །ཕོ་བའི་མེ་དྲོད་འཕེལ་བ་དེས་ཅི་ཞིག་བྱེད་ཅེ་ན། དེ་ནི་རླུང་གིས་སྦར་བས་
ན། །ཟས་ཉུང་གྱུར་ན་ལུས་ཟུངས་སྐེམས། །ཞེས་སྨོས་པ་ཡིན་ཏེ། ཕོ་བའི་མེ་དྲོད་དེ་རླུང་གིས་སྦར་ཞིང་བུས་པས། ཟས་ཉུང་བར་འགྱུར་ཞིང༌། དེའི་ཚེ་ཁ་ཟས་ལེགས་པར་འགྲངས་པར་ཟོས་ན་དངས་མ་ལ་སོགས་པའི་ལུས་ཟུངས་རྣམས་བཙོས་ཤིང་སྐེམས་པར་འགྱུར་རོ། །དེ་བས་ན་དགུན་གྱི་དུས་སུ་ནི་མེའི་དྲོད་བསྲུང་བའི་ཕྱིར། ཁ་ཟས་ལེགས་པར་འགྲངས་པར་བཟའ་བ་ངེས་པ་ཁོ་ནར་བྱ་དགོས་ཏེ། ཕོ་བའི་མེ་དྲོད་ཀྱིས་ཟས་ཀྱི་ཚོད་ལྕི་བ་འཇུ་བར་ནུས་པ་ཡིན་གྱི། དུས་གཞན་དག་ཏུ་ན་དེ་ལྟར་མ་ཡིན་ནོ། །དེ་བས་ན་ཞེས་པ་ནི་རླུང་གིས་ཕོ་བའི་མེ་སྦར་བ་ན་སྟོབས་ཅན་ཡིན་པ་དེ་ལས་རྒྱལ་བར་བྱ་བའི་ཕྱིར་རོ། །དགུན་ནི་ཁ་བ་འབབ་པའི་དུས་དག་ཏུ་མངར་བ་དང༌། སྐྱུར་བ་དང༌། ལན་ཚྭའི་རོ་བསྟེན་པར་བྱ་ཞིང་ལོངས་སྤྱད་པར་བྱའོ། །དེ་ཚེ་མཚན་མོ་རིང་བས་ན། །ནང་པར་ཉིད་ནི་བཀྲེས་པར་འགྱུར། །ངེས་པར་བྱ་བ་བྱས་ནས་ནི། །ཇི་སྐད་བཤད་རྫོགས་དེ་རྗེས་ལ། །རླུང་འཇོམས་ཏིལ་མར་གྱིས་བྱུགས་ཤིང༌། །སྤྱི་བོའང་ཏིལ་མར་གྱིས་བྱུགས་མཉེ། །བག་ཡོད་པ་དང་སྟོབས་འབྱེད་ཅིང༌། །རྐང་པས་རན་པར་མཉེ་བར་བྱ། །ཞེས་བྱ་བ་ལ། དགུན་གྱི་དུས་དེའི་ཚེ། མཚན་མོ་ནམ་རིང་བས་ནང་པར་ཏེ། ཐོ་རངས་ཀྱི་དུས་ཉིད་དུ་བཀྲེས་ཤིང་ཟས་འདོད་པར་འགྱུར་རོ། །དེ་བས་ན་དེའི་ཚེ་ངེས་པར་བྱ་བ་ཞེས་བྱ་བ། བཤང་གཅི་དོར་ནས་གཙང་སྦྲའི་ཆོ་ག་བྱ་བ་དང༌། སོ་ཤིང་བཅའ་བ་དང༌། མཁུར་བ་བཀང་སྟེ་དོར་བ་ལ་སོགས་པ་ནི་ཉིན་རེ་སྤྱད་པའི་ཆོ་གའི་ལེའུ་ལས་ཇི་སྐད་བཤད་པ་རྫོགས་ཤིང་ཟིན་པར་བྱས་ལ། དེའི་རྗེས་ལ་རླུང་འཇོམས་ཤིང་སེལ་བའི་ཏིལ་མར་གྱིས་རླུང་གི་ནད་གསོ་བ་ལས་བསྟན་པ་བཞིན་དུ་བྱུགས་ཤིང་མཉེ་བ་བསྟེན་པར་བྱའོ། །དེ་བཞིན་དུ་སྤྱི་བོ་སྟེ། མགོར་ཏིལ་མར་གྱིས་བྱུགས་པ་དང༌། མཉེ་བ་སྟེ་ཁྱད་པར་དུ་ཡན་ལག་རྣམས་ལག་པ་དག་གིས་མཉེ་བ་དང༌། བག་ཡོད་པ་ནི་མཁས་ཤིང་གོམས་པ་སྟེ། དེ་དང་ལྷན་ཅིག་ལག་པའི་སྟོབས་འགྱེད་པའི་ཚུལ་གྱིས་མཉེ་བར་བྱའོ། །དེ་བཞིན་དུ་རྐང་པས་རན་པར་མཉེ་བ་སྟེ། རྐང་པ་གཉིས་ཀྱི་པགས་པ་དང༌། སྤུ་ལ་སོགས་པ་ལ་མི་གནོད་པར་རན་ཞིང་ཅི་རིགས་པར་མཉེ་བར་བྱའོ། །དེ་ནས་བསྐ་བས་སྣུམ་
བསལ་ལ། །ཆོ་ག་བཞིན་དུ་ཁྲུས་དག་བྱ། །གུར་ཀུམ་གླ་རྩི་དང་བཅས་པས། །ལུས་བསྐུས་ཨ་ཀ་རུ་ཡིས་བདུག །ཤ་ཚོན་ཁུ་བ་སྣུམ་བག་དང༌། །བུ་རམ་ཆང་དང་ཆང་དངས་ཆང༌། །གྲོ་དང་འབྲས་ཁུར་མ་ཤ་དང༌། །འོ་མ་བུ་རམ་ཤིང་བྱས་བཟའ། །ཁ་ཟས་གསར་དང་ཞག་ཏིལ་མར། །དྲོ་འཇམ་ཆུ་ཡིས་གཙང་སྦྲ་བྱ། །ཞེས་བྱ་བ་ནི། དེ་ལྟར་ལུས་བཀྲུས་པའི་འོག་ཏུ་སྲན་ཆུང་གི་ཕྱེ་མ་ལ་སོགས་པ་རྫས་བསྐ་བས་སྣུམ་བསལ་ཞིང་མེད་པར་བྱས་ལ། དེའི་འོག་ཏུ་ཆོ་ག་ཇི་ལྟ་བ་བཞིན་དུ་ཞེས་པ་ཆོ་ག་དང་མི་འགལ་བ་སྟེ། ཆུ་དྲོན་པོས་ལུས་ཀྱི་སྨད་བཀྲུ་བ་ལ་སོགས་པ་སྔར་ཇི་སྐད་བཤད་པ་བཞིན་དུ་ལུས་བཀྲུ་བར་བྱའོ། །དེ་ནས་ནི་གུར་གུམ་གླ་རྩི་དང་བཅས་པས་ལུས་བཀྲུ་བར་བྱའོ། །དེའི་འོག་ཏུ་སྐྱེས་བུའི་ལུས་ཨ་ཀ་རུའི་བདུག་པས་བདུག་པར་བྱའོ། །ཤ་ཚོན་ནི་ཤ་བཟང་པོའོ། །ཁུ་བ་ནི་ཤ་ཁུའོ། །སྣུམ་ཅན་ནི་མར་ལ་སོགས་པ་དང་ལྡན་པའོ། །དེ་ལ་བུ་རམ་ཆང་ནི་བུ་རམ་ལས་བྱས་པའི་ཆང་ངོ༌། །ཆང་དངས་མ་ནི་ཤིན་ཏུ་དངས་པའི་ཆང་ངོ༌། །ཡང་ཆང་ཞེས་སྨོས་ལ་ནི་ཡང་དེ་ལས་གཞན་པ་ཆང་བསྐ་བ་དག་བཏུང་བའོ། །དེ་བཞིན་དུ་གྲོ་ལས་བྱས་པའི་ཁུར་བ་དང་ལ་དུ་ལ་སོགས་པ་བཟའ་བ་དང་འབྲས་ཁུར་ཏེ། འབྲས་བཏགས་པ་ལས་བྱས་པའི་ཆང་ངོ༌། །ཆང་ངམ་ཤ་ལས་བྱས་པའི་བཟའ་བ་དང༌། ཀྲྀ་ས་ར་ལ་སོགས་པའི་བཟའ་བ་དང༌། འོ་མ་ལས་བྱས་པའི་ཕྲུམ་དང་ཞོ་དང་ཆུར་བ་ལ་སོགས་པ་དང༌། བུ་རམ་ཤིང་ལས་བྱས་པ་སྟེ། བཏུང་བ་དང༌། བུ་རམ་ལ་སོགས་པ་སྟེ། དེ་ཐམས་ཅད་བཟའ་བར་བྱའོ། །དེ་བཞིན་དུ་ཁ་ཟས་སར་པ་ནི་གསར་ཐོག་ལས་བྱས་པའོ། །ཞག་ནི་ཚིལ་མེད་པའི་ཤ་བཙོས་ཏེ་ཚོས་པ་དང༌། དེའི་སྟེང་ན་སྣུམ་གང་ཞིག་འབྱུང་བ་དེ་ལ་ནི་ཞག་གི་སྒྲར་བཤད་དོ། །དེ་ཡང་ལུང་ལས། ཚིལ་མེད་ཤ་ཡི་སྣུམ་གང་ཡིན། །དེ་ནི་ཞག་ཏུ་ཡོངས་སུ་བསྒྲགས། །ཞེས་བཤད་པ་ཡིན་ནོ། །ཏིལ་མར་ནི་ཏིལ་ལས་བྱུང་བ་ཡིན་ནོ། །དེ་བཞིན་དུ་དྲོ་འཇམ་ཆུ་ནི་རན་པར་བསྲོས་པའི་ཆུ་སྟེ། དེས་ཁྲུས་ལ་སོགས་པ་གཙང་སྦྲའི་བྱ་བ་བྱའོ། །བེའུ་རས་སླག་པ་དར་སོགས་བགོ་
དྲེའུ་རྡོག་རེའུ་བལ་ཅན་གདིང༌། །རང་བཞིན་དྲོ་ཞིང་ཡང་བ་ཡི། །གོས་བགོས་མལ་ལ་བརྟེན་པར་བྱ། །ཉི་མའི་འོད་ལ་རན་པར་འདི་། །དུགས་བྱ་ལྷམ་ནི་རྟག་ཏུ་བགོ །ཞེས་བྱ་བ་ནི། དེའི་ཚེ་སྐྱེས་བུས་མལ་ལ་བརྟེན་པར་བྱའོ། །ཇི་ལྟ་བུ་ཞེ་ན་བེའུ་རས་ཞེས་བྱ་བ་ལ་སོགས་པ་སྟེ། བེའུ་རས་ནི་བེའུ་ཕྲུག་གམ་ལྭ་བ་དམར་པོའོ། །སླག་པ་ནི་པགས་པའི་གོས་སོ། །དར་ནི་རྒྱ་ལས་བྱུང་བའོ། །སོགས་པ་ནི་གོས་བཟང་པོ་གཞན་དག་བསྡུའོ། །དྲེའུ་རྡོག་རེའུ་བལ་ཅན་ནི། སྐྱིན་ལ་སོགས་པའི་སྤུ་ལས་བྱས་པའོ། །རང་བཞིན་དྲོ་བ་ནི་ཕལ་ཆེར་སྤུ་དང་ལྡན་པའོ། །ཡང་བ་ནི་ཕྲ་བ་ལ་སོགས་པའི་ཡོན་ཏན་དང་ལྡན་པའོ། །དེ་བགོས་པ་ནི་དེ་དག་སྟེང་ནས་བགོ་བ་དང༌། འོག་ཏུ་བཏིང་བའི་མལ་སྟན་ལ་སྐྱེས་བུས་བརྟེན་པར་བྱའོ། །དེ་བཞིན་དུ་ཉི་མའི་འོད་ལ་རན་པར་ཞེས་བྱ་བ། འགྲོ་བ་ལ་སོགས་པ་སྤངས་ལ། ཉི་མ་འདི་ཞིང་བསྟེན་པར་བྱའོ། །དེ་བཞིན་དུ་དུགས་ཏེ་བསྲོ་བ་ལ་སོགས་པའི་དབྱེ་བ་རྣམ་པ་བཞི་དག་ཀྱང་ཅི་རིགས་པར་བསྟེན་པར་བྱའོ། །དེ་བཞིན་དུ་ལྷམ་ཞེས་བྱ་བ་དུས་འདིའི་ཚེ་རྣམ་པ་ཐམས་ཅད་དུ་རྟག་པར་ལྷམ་བགོ་བར་བྱའོ། །ཆུང་མ་གཞོན་ཞིང་ཡིད་འོང་རྒྱགས། །ནུ་མ་བརླ་དང་རོ་སྨད་རྒྱས། །གུར་གུམ་གྱིས་བྱུགས་སྤོས་ཀྱིས་བདུགས། །ལུས་ཀྱི་དྲོད་ཀྱིས་གྲང་སེལ་བའོ། །ཞེས་བྱ་བ་ནི། དེའི་ཚེ་ཆུང་མ་གཞོན་ཞིང་དར་ལ་བབ་པ་དང༌། ཡིད་དུ་འོང་ཞིང་སྙིང་དུ་སྡུག་པ་དང༌། ནུ་མ་དང་བརླ་དང་རོ་སྨད་ཀྱི་ཆ་ཤས་ཤིན་ཏུ་རྒྱས་པ་དང༌། སྤོས་ཀྱིས་བདུགས་པ་ལ་སོགས་པས་ལུས་ཀྱི་དྲོད་ཀྱིས་གྲང་བ་སེལ་ནུས་པ་བསྟེན་པར་བྱའོ། །ས་ཁང་ཁང་པ་ཉིས་རིམ་བྱ། །མདག་མེའི་དྲོད་ཀྱིས་བསྲོས་པས་ནི། །གྲང་དང་རྩུབ་པ་ལས་བྱུང་བའི། །ཉེས་པ་ནམ་ཡང་མི་འབྱུང་ངོ༌། །ཞེས་བྱ་བ་ལ། ས་ཁང་ནི་གང་ས་བརྐོས་ནས་ཁང་པར་བྱས་པའོ། །ཁང་པ་ཉིས་རིམ་ནི་ཁང་པའི་ནང་དུ་ཁང་པར་བྱས་པའོ། །མདག་མེ་དག་ནི་དྲོད་ཀྱིས་བསྲོས་པའི་སོལ་བ་མདག་མེར་ལྷགས་པར་བྱས་པའི་དྲོད་ཀྱིས་ཁང་པ་གང་བསྲོས་པར་གྱུར་པ་དེར་གནས་ཤིང་སྤྱོད་པར་བྱེད་པའི་སྐྱེས་བུ་དེ་ལ་ནི་གྲང་བ་དང་རྩུབ་པ་ལས་བྱུང་བའི་ཞེས་པ། གྲང་བ་དང་རྩུབ་པའི་དངོས་པོ་ལས་གྱུར་
པའི་ཉེས་པས་གནོད་པ་ནམ་ཡང་འབྱུང་ཞིང་སྐྱེ་བར་མི་འགྱུར་རོ། །ད་ནི་དགུན་སྨད་ཀྱི་སྤྱོད་པ་བསྟན་པར་བྱ་བའི་ཕྱིར་སྨྲས་པ་ནི། དགུན་སྨད་དུས་སུ་ལྷག་པར་ཡང༌། །ཆོ་ག་འདི་ཉིད་བྱ་བ་ཡིན། །དེ་ཚེ་ལྷག་པར་གྲང་བ་དང༌། །སྟོབས་འཕྲོག་ལས་བྱུང་རྩུབ་པའང་ཡིན། །ཞེས་བྱ་བ་ལ། དགུན་སྟོད་ཀྱི་བྱ་བ་འདི་ཉིད་ནི། །དགུན་སྨད་ཀྱི་དུས་སུ་ཡང་ལྷག་པར་ཏེ། ཁྱད་པར་དུ་བྱའོ། །དེས་ན་སྣུམ་པ་དང༌། རོ་གསུམ་པོ་དགུན་སྟོད་ཀྱི་དུས་སུ་བསྟེན་པར་བཤད་པ་སྟེ། དགུན་སྨད་ཀྱི་དུས་སུ་ཤིན་ཏུ་སྣུམ་པ་བསྟེན་པར་བྱ་ལ། དེ་བཞིན་དུ་བསྟེན་པར་བྱ་བ་བཤད་པ་གཞན་གང་དག་ཡིན་པ་དེ་རྣམས་དེའི་ཚེ་ལྷག་པར་ཤས་ཆེ་བར་བྱས་ནས་ཐམས་ཅད་བསྟེན་པར་བྱའོ། །དེ་ཅིའི་ཕྱིར་ཞེ་ན། དགུན་སྟོད་ཀྱི་དུས་ལས་ཀྱང་དེའི་ཚེ་ལྷག་པར་གྲང་བར་འགྱུར་བ་ནི་དུས་ཀྱི་རང་བཞིན་ཡིན་ལ། དེ་བཞིན་དུ་སྟོབས་འཕྲོག་པའི་དུས་ལས་བྱུང་བའི་རྩུབ་པ་ཡང་དེའི་ཚེ་འབྱུང་བ་ཡིན་ནོ། །དཔྱིད་ཀྱི་དུས་ཀྱི་སྤྱོད་པ་དག་བསྟན་པ་ནི། དགུན་ནི་བད་ཀན་ཁོང་ན་སོགས། །དཔྱིད་དུས་ཉི་མའི་འོད་དྲོས་པས། །མེ་ཡི་དྲོད་ཉམས་ནད་སྐྱེད་དེ། །དེ་བས་དེ་ནི་མྱུར་དུ་བསལ། །རྣོ་དང་སྐྱུག་སྨན་སྣ་སྨན་སོགས། །ཡང་དང་རྩུབ་པའི་ཁ་ཟས་དང༌། །བཅག་དང་ལུས་ཕྱི་མཉེ་བ་ཡིས། །བད་ཀན་བདོ་བའི་ནད་བསལ་བྱ། །ཁྲུས་བྱས་ག་བུར་ཙནྡན་དང༌། །གུར་གུམ་ལ་སོགས་བསྐུ་བར་བྱ། །ཞེས་བྱ་བ་ལ། དགུན་ཞེས་པ་ནི་གྲང་བར་ཆ་མཐུན་པས། དགུན་སྟོད་དང་དགུན་སྨད་གཉི་ག་ཡིན་པར་ཤེས་པར་བྱའོ། །དེའི་ཚེ་ནི་བད་ཀན་ཁོང་དུ་སོགས་ཤིང་འཕེལ་བ་ཡིན་ནོ། །དེ་ཡང་གང་གི་ཕྱིར་དགུན་སྟོད་དང༌། དགུན་སྨད་ཀྱི་དུས་སུ་སྣུམ་བག་ལ་སྤྱོད་པ་དང༌། དེ་བཞིན་དུ་དུས་ལས་བྱུང་བའི་གྲང་བས་འདི་ལྷག་པར་བསྒོངས་པར་གྱུར་བ་དང༌། དེ་དཔྱིད་ཀྱི་དུས་ལ་བབ་པ་དང༌། ཉི་མའི་འོད་ཟེར་གྱི་ཚ་བས་གདུངས་པ་དང༌། གཟུགས་ཞུ་བ་ཉིད་དུ་གྱུར་ནས། ཆུ་ལྟར་མེའི་མི་མཐུན་པའི་ཕྱོགས་སུ་འགྱུར་རོ། །དེས་ན་ཕོ་བའི་མེ་དྲོད་ཉམས་པར་བྱས་ཤིང་བཅིལ་ནས། ནད་སྐྱེད་པར་བྱེད་ཅིང་འབྱུང་བར་བྱེད་དོ། །དེ་བས་ནད་དཔྱིད་ཀྱི་དུས་ལ་བབ་མ་ཐག་བད་ཀན་ཆུའི་ཚོགས་
ལྟར་གནས་པ་དེ་མྱུར་དུ་ཟམ་པ་ལྟ་བུའི་སྐྱུག་སྨན་ལ་སོགས་པས་བད་ཀན་བདོ་བ་བསལ་ཞིང་བཟློག་པར་བྱའོ། །དེའི་མི་མཐུན་པའི་ཕྱོགས་ནི་སྨན་རྣོན་པོ་རྣམས་གཏང་བ་དང༌། དེ་བཞིན་དུ་ཡང་བ་དང་རྩུབ་བིལ་བཟས་ཏེ། ཟས་ཕལ་མོ་ཆེ་ཁ་བ་དང༌། བསྐ་བ་ལ་སོགས་པ་དང་ལྡན་པ་བཟའ་བ་དང༌། དེ་བཞིན་དུ་བཅག་པ་ལ་སོགས་པས་བད་ཀན་བདོ་བ་བསལ་ཞིང་བཟློག་ནས། དེའི་འོག་ཏུ་ཁྲུས་བྱས་ལ། ག་བུར་ལ་སོགས་པས་ལུས་བཀྲུ་ཞིང་བྱུག་པར་བྱའོ། །ནས་དང་གྲོ་ནི་རྙིང་པ་དང༌། །སྦྲང་རྩི་སྐམ་སའི་བསྲེགས་ཤ་བཟའ། །ཨ་མའི་ཁུ་དང་སྦྱར་བ་ཡི། །ཁུ་བ་སྐོམ་དུ་སྦྱར་བ་བཏུང༌། །ཆུང་མ་དྲི་ཞིམ་ཨུཏྤལ་གྱི། །མིག་དང་ལྡན་དང་ལྷན་ཅིག་ཅིང༌། །ཡིད་ནི་དགའ་ཞིང་བདེར་བྱས་པས། །གྲོགས་དང་ལྷན་ཅིག་བཏུང་བར་བྱ། །སྐྱོན་མེད་ཆང་རྒན་དྲོ་འཇམ་དང༌། །བུ་རམ་རྒུན་ཆང་སྦྲང་ཆང་དང༌། །སྒ་ཆུ་བསྐོལ་དང་སེའུའི་ཆུ། །སྦྲང་ཆུ་འམ་གླ་སྒང་ཆུ་བཏུང་བྱ། །ཞེས་བྱ་བ་ནི། གང་ནས་རྙིང་པ་དང༌། གྲོ་རྙིང་པ་དང༌། སྦྲང་རྩི་དང༌། སྲོག་ཆགས་སྐམས་ན་གནས་པའི་ཤ་ཐུར་མ་ལ་བསྐྱོན་ཏེ། བསྲེགས་པ་དེ་ཟ་བ་དང༌། ཆང་ལེགས་པར་བཏུང་བར་བྱའོ། །ཇི་ལྟ་བུ་ཞེ་ན། ཨ་མྲའི་ཁུ་བ་དང་སྦྱར་བ་ཞེས་པ་སྟེ། ཤིང་ཙུ་ཏའི་ཁུ་བ་དང་སྦྱར་བ་དེ་བཏུང་བར་བྱའོ། །དེ་བཞིན་དུ་ཆུང་མ་ཨུཏྤལ་ལྟ་བུའི་མིག་དང་ལྡན་པའི་མཚན་མ་དང་ལྷན་ཅིག་བཏུང་བར་བྱའོ། །དེ་བཞིན་དུ་ཡིད་དགའ་ཞིང་དང་བར་བྱ་བ་དང༌། སེམས་བདེ་ཞིང་ཚིམ་པར་བྱ་བ་དང༌། དེ་བཞིན་དུ་གྲོགས་པོ་མཛའ་བཤེས་རྣམས་དང་ལྷན་ཅིག་བཏུང་བར་བྱའོ། །དེ་བཞིན་དུ་སྐྱོན་མེད་པ་སྟེ། མདོག་དང༌། དྲི་དང༌། རོ་དང༌། གཟུགས་ཕུན་སུམ་ཚོགས་པའི་ཆང་རྒན་ལ་སོགས་པའི་ཆང་གི་བྱེ་བྲག་བཏུང་བར་བྱའོ། །དེ་ལ་ཆང་རྒན་ནི་གང་ཡུན་རིང་དུ་སྦྱར་ཞིང་བསླངས་པ་ལ་བྱའོ། །དྲོ་འཇམ་ནི་གང་བསྐོལ་ནས་བྱས་པ་དེ་ནི་དྲོ་འཇམ་མོ། །བུ་རམ་ཆང་ནི་བུ་རམ་ཤིང་གི་ཁུ་བ་ལས་ཆང་དུ་བྱས་པའོ། །རྒུན་ཆང་ནི་རྒུན་འབྲུམ་ལས་བྱས་པའོ། །སྦྲང་ཆང་ནི་སྦྲང་རྩི་ལས་བྱས་པའོ། །དེ་བཞིན་སྒ་ཆུ་བསྐོལ་བ་ནི། །བཅའ་སྒ་བསྐོལ་བའི་བཏུང་བའོ། །སེའུའི་ཆུ་ནི་སེའུ་འབྲུ་བསྐོལ་བའི་ཆུའོ། །
སྦྲང་རྩིའི་ཆུ་ནི་སྦྲང་རྩི་དང་ཆུ་སྦྱར་ཏེ་བཏུང་བར་བྱས་པའོ། །གླ་སྒང་ཆུ་ནི་གླ་སྒང་བསྐོལ་བའི་ཆུ་བཏུང་བའོ། །ལྷོ་ཕྱོགས་བསེར་བུས་བསིལ་བ་དང༌། །མཐའ་མ་ཀུན་ཏུ་ཆུ་འབབ་ལ། །ཉི་མའི་འོད་ནི་མི་སྣང་དང༌། །ནོར་བུ་བཅག་འདྲའི་མདངས་ལྡན་པ། །ཁུ་བྱུག་སྙན་པའི་སྒྲ་སྒྲོགས་ཤིང༌། །འདོད་པའི་ལོངས་སྤྱོད་ལྡན་པའི་ས། །སྣ་ཚོགས་མེ་ཏོག་ལྡན་པའི་ཤིང༌། །དྲི་ཞིམ་སྐྱེད་མོས་ཚལ་དུ་ནི། །དགའ་འདུན་གཏམ་ནི་སྣ་ཚོགས་པས། །ཕྱེད་དུས་བདེ་བས་བདེ་བར་བྱ། །ཞེས་བྱ་བ་ལ། སྐྱེད་མོས་ཚལ་གྱི་ནགས་ཚལ་དུ་འདུག་ལ། ཉི་མ་ཕྱེད་ཀྱི་དུས་སུ་བདེ་བ་ཉིད་ཀྱིས་དུས་འདའ་བར་བྱའོ། །ཇི་ལྟར་ཞེ་ན། དགའ་འདུན་གཏམ་ནི་སྣ་ཚོགས་པ། །ཞེས་བྱ་བ་ཡིན་ཏེ། དགའ་འདུན་ནི་གླུ་དང་རོལ་མོ་སྣ་ཚོགས་ལེན་པ་དང༌། གཏམ་སྟེ་སྙན་དངགས་ཀྱི་གཏམ་སྣ་ཚོགས་པ་བྱ་བས་སོ། །གང་དུ་ཞེ་ན། ལྷོ་ཕྱོགས་བསེར་བུས་བསིལ་བ་དང༌། །ཞེས་བྱ་བ་ལ་སོགས་པ་སྟེ། ལྷོ་ཕྱོགས་ཀྱི་རླུང་ནི་རྗེས་སུ་མཐུན་པར་ལྡང་བའི་རླུང་གང་ཡིན་པ་སྟེ། རྡུལ་དང་བྱེ་མ་དང་གསེག་མ་དང་བཅས་པར་ལྡན་པ་ནི་མ་ཡིན་ཏེ། དེ་ལྟ་བུའི་རླུང་གིས་བསིལ་བར་གྱུར་བའི་སྐྱེད་མོས་ཚལ་དུའོ། །ཡང་ན་ལྷོ་ཕྱོགས་ནས་ལྡང་བའི་རླུང་ནི་བསིལ་བ་ཡིན་པའི་ཕྱིར་རོ། །དེ་བཞིན་དུ་མཐའ་མ་ཀུན་ཏུ་ཆུ་འབབ་པའི་ངང་ཚུལ་དང་ལྡན་པའོ། །དེ་བཞིན་དུ། ཉི་མའི་འོད་ནི་མི་སྣང་དང༌། །ཞེས་པ་སྟེ། ཇི་སྲིད་ནུབ་པ་དེ་སྲིད་ཀྱི་བར་དུ་ཉི་མ་མི་སྣང་བ་སྟེ། དེ་ལྟར་ཤིན་ཏུ་སྟུག་པའི་ནགས་ཚལ་དེར་རོ། །ཡང་ན་ཕྱོགས་ལ་ལ་ནི་མི་སྣང་ཞིང་ཅུང་ཟད་སྣང་ལ། ལ་ལ་ནི་རྣམ་པ་ཐམས་ཅད་མི་སྣང་བར་གྱུར་པའོ། །དེ་བཞིན་དུ། ནོར་བུ་བཅག་འདྲའི་མདངས་ལྡན་པ། །ཞེས་བྱ་བ་སྟེ། བཻ་ཌཱུཪྻ་ལ་སོགས་པའི་ནོར་བུ་བཅག་པ་ལྟ་བུའི་འོད་དང་ལྡན་པ་གང་ཡིན་པ་དེ་ལ་དེ་སྐད་ཅེས་བྱའོ། །དེ་བཞིན་དུ། ཁུ་བྱུག་སྙན་པའི་སྒྲ་སྒྲོགས་ཤིང། ཞེས་བྱ་བ་སྟེ། སྐྱེད་མོས་ཚལ་དེ་ལ་ཁུ་བྱུག་རྣམས་སྒྲ་སྒྲོགས་ཤིང་ཅ་ཅོ་འདོན་བ་དང༌། དེ་བཞིན་དུ། འདོད་པའི་ལོངས་སྤྱོད་ལྡན་པའི་ས། །ཞེས་པ་སྟེ། སྣ་ཚོགས་པའི་གཟུགས་ཡིད་དུ་འོང་བ་དང༌། འདོད་པའི་ཡུལ་དུ་མ་དང་ལྡན་པའི་ནགས་ཚལ་ལོ། །དེ་བཞིན་དུ། སྣ་ཚོགས་མེ་
ཏོག་ལྡན་པའི་ཤིང༌། །ཞེས་བྱ་བ་སྟེ། སྣ་ཚོགས་ཤིང་ཐ་དད་པའི་སྟེ། མེ་ཏོག་དང་ལྡན་པའི་ཤིང་དུ་མ་དང༌། དེ་བཞིན་དུ་དྲི་ཞིམ་པ་སྟེ། ཡིད་དུ་འོང་བའི་དྲི་འབྱུང་བའི་ཚུལ་ཅན་གྱི་སྐྱེད་མོས་ཚལ་དུ་ཉི་མ་ཕྱེད་པའི་དུས་བདེ་བར་བྱའོ། །ལྕི་བསིལ་ཉིན་མོ་ཉལ་བ་དང༌། །སྣུམ་བག་མངར་སྐྱུར་སྤང་བར་བྱ། །ཞེས་བྱ་བ་ནི། དེའི་ཚེ་ལྕིབ་ནས་སྐྱུར་བའི་བར་ནི་བད་ཀན་འཕེལ་བར་བྱེད་པ་ཡིན་བས་དེའི་ཕྱིར་སྤང་བར་བྱའོ། །སོ་གའི་སྤྱོད་པ་སྨྲས་པ་ནི། །ཉི་མའི་འོད་ཟེར་རབ་ཚ་བས། །སོ་ག་འཕྲོག་པ་འདྲ་བ་ཡིན། །དེ་བས་དེ་ཚེ་ལན་ཚྭ་ཚ། །སྐྱུར་རྩོལ་ཉི་མའི་འོད་ཟེར་སྤང༌། །ཞེས་བྱ་བ་ལ། ཉི་མ་ནི་འོད་ཟེར་སྟོང་ལྡན་ནོ། །དེ་ནི་སོ་གའི་དུས་སུ་ཚ་བར་འགྱུར་ཏེ། སྟོབས་འཕྲོག་པའི་རང་བཞིན་མཐར་ཐུག་པའི་དུས་ཡིན་པའི་ཕྱིར་རོ། །དེ་ནི་འཕྲོག་པ་དང་འདྲ་བར་སྟོན་པ་ཡིན་ཏེ། སྔར་རྣམ་པར་དཔྱད་པའི་ལས་གཞན་དག་བྱ་བར་རིགས་པ་མ་ཡིན་ནོ། །དེ་བཞིན་དུ་བསིལ་བའི་ཡོན་ཏན་དང༌། འགྲོ་བའི་སྣུམ་བ་དག་ཀྱང་འཕྲོག་པ་འདྲ་བ་ཉིད་ཡིན་ནོ། །དེ་བས་ན་དེའི་ཚེ་ལན་ཚྭ་སྣ་ཚོགས་ལ་སོགས་པ་ཡང་སྤང་བར་བྱ་སྟེ། དེ་ནི་སྟོབས་སེལ་བར་བྱེད་པ་ཡིན་ནོ། །དེ་ཚེ་ཞེས་བྱ་བ་འདིས་ནི། འདི་སྐད་སྟོན་པ་ཡིན་ཏེ། དམན་ཞིང་ཤེས་ཆུང་བའམ། ལོག་པར་གྱུར་པའི་ཚེ། ལན་ཚྭ་ལ་སོགས་པ་སྤང་བར་མི་བྱའི་རང་གི་མཚན་ཉིད་ཇི་ལྟ་བུ་དང་ལྡན་པ་དེའི་ཚེ་བྱ་བ་ཡིན་ནོ། །དེ་ལ་ཚ་བ་ནི་ན་ལེ་ཤ་མ་ལ་སོགས་པའོ། །སྐྱུར་བ་ནི་དར་བ་སྐྱུར་བ་དང་སྐྱུར་པོ་ལ་སོགས་པའོ། །རྩོལ་བ་ནི་ལུས་དུབ་པར་བྱེད་པའི་ལས་རྣམས་སོ། །ཉི་མའི་འོད་ཟེར་ནི་ཉི་མ་ཚ་བའི་འོད་དེ་དེ་དག་སྤང་བར་བྱའོ། །དེ་ནས་དུས་དེའི་ཚེ་ཅི་ཞིག་བསྟེན་པར་བྱ་ཞེ་ན། དེའི་ཕྱིར་སྨྲས་པ་ནི། ཟས་ནི་མངར་དང་ཡང་བ་དང༌། །སྣུམ་བསིལ་སླ་བ་ཉིད་བསྟེན་བྱ། །ཞེས་བྱ་བ་ནི། དེའི་ཚེ་ཟས་མངར་བ་ཉིད་ཡང་དང་ཡང་དུ་བསྟེན་ཞིང་གོམས་པར་བྱའོ། །རོ་གཞན་ལ་བསྟེན་པར་མི་བྱའོ། །དེ་བས་ན་ཉིད་ཅེས་བྱ་བ་ངེས་པར་བཟུང་བར་བསྟན་པ་ཡིན་ནོ། །དེ་བཞིན་དུ་ཟས་ཡང་བ་སྟེ་རང་བཞིན་གྱིས་ཡང་བ་དང༌། ཚོད་ཟིན་པར་བཟའ་ཞིང༌། ཡང་བར་བྱ་བ་སྣུམ་པ་སྟེ། མར་དང༌། འོ་མ་ལ་སོགས་པ་དང་སྦྱར་བ་དང༌། བསིལ་བ་སྟེ་གྲང་བ་ཉིད་
དང། སླ་བ་སྟེ་ཀན་ཏེར་མ་གྱུར་པ་ཉིད་བསྟེན་ཅིང་བཟའ་བར་བྱའོ། །རབ་བསིལ་ཆུ་ཡིས་ལུས་བཀྲུ་ཞིང༌། །ཕྱེ་ཟན་ཁ་རར་བཅས་པ་བཟའ། །ཞེས་བྱ་བ་ནི། རབ་ཏུ་བསིལ་བའི་ཆུས་ལུས་བཀྲུ་ཞིང་གཏོར་བ་དང༌། ཕྱེ་ཟན་སླན་ཏེ་ཁ་ར་དང་སྦྱར་བ་ལྷག་ཅིང་བཟའ་བར་བྱའོ། །ཆང་མི་བཏུང་སྟེ་འཐུང་ན་ཡང༌། །ཉུང་བའམ་ཆུ་མང་བསྲེས་ལ་བཏུང༌། །ཞེས་བྱ་བ་ནི། སོ་ག་ཚ་བའི་དུས་སུ་ཆང་བཏུང་བར་མི་བྱའོ། །གལ་ཏེ་དེ་གཏོང་མི་ཕོད་ན། ཉུང་ཟད་ཅིག་གམ། ཆུ་མང་པོས་བསྲེས་ལ་བསླད་དེ་བཏུང་བར་བྱའོ། །གཞན་དུ་དེ་ནི་ཁ་སྐམ་ལྷོད། །ཚ་དང་རྨོངས་པར་བྱེད་པ་ཡིན། །ཞེས་བྱ་བ་ནི། གཞན་དུ་ན་ཆང་དེ་མང་དུ་འཐུངས་པའམ། ཆུ་མང་པོས་མ་བསླད་པར་འཐུངས་ན། ཁ་སྐམ་ཞིང་མཆིལ་མ་བསྐ་བ་དང༌། ལྷོད་པ་སྟེ་ལུས་ལྷོད་ཅིང་ཞིག་པ་སྙམ་བྱེད་པ་དང༌། ཚ་བ་སྟེ་ཡན་ལག་ཐམས་ཅད་ཚ་བས་འདེབས་པ་དང༌། རྨོངས་པ་སྟེ། སེམས་མེད་པ་སྙམ་དུ་བྱེད་པར་འགྱུར་རོ། །ཆང་བཏུང་བར་མི་བྱའོ་ཞེས་བྱ་བའི་སྐབས་འདིར་རང་བཞིན་གྱིས་དབྱེ་བ་ལ་བརྟེན་ཏེ་སྨྲས་པ་ཡིན་གྱི། །ཡུལ་གཅིག་ལ་ནི་མ་ཡིན་ནོ། །འོ་ན་ཅི་ཞིག་ཡིན་ཞེ་ན། །ཐ་དད་པའི་ཡུལ་གསུམ་སྟེ། དེས་བྱ་བ་དགག་པ་ནི་ཡུལ་གཅིག་ལ་ཡིན་པས་འགལ་བར་འགྱུར་རོ། །དེ་ལ་རེ་ཞིག་དུས་སུ་སྤྱད་པ་ལ་སོགས་པའི་ཆོ་ག་འདི་ནི་ཁམས་མཉམ་པ་བདེ་བར་གནས་པ་ལས་བརྩམས་ཏེ། ཐམས་ཅད་ངེས་པར་བཤད་པ་ཡིན་ནོ། །དེ་བས་ན་ཁམས་སྙོམས་པ་ཆང་ལ་སྲེད་པས་གང་ཅི་ཡང་རུང་བ་དེ་བཏུང་བར་མི་བྱའོ། །དེ་བས་ཀྱང་མཁྲིས་པའི་རང་བཞིན་ཅན་དག་གིས་ནི་ཤིན་ཏུ་བཏུང་བར་མི་བྱའོ་ཞེས་པ་འདི་ནི་དགག་པའི་ཡུལ་ཡིན་ནོ། །ཆོ་གའི་དབྱེ་བ་ནི་རླུང་དང༌། བད་ཀན་གྱི་རང་བཞིན་ཅན་དང༌། དེ་བཞིན་དུ་མཁྲིས་པ་དང་བད་ཀན་གྱི་རང་བཞིན་ཅན་གྱིས་བཏུང་བར་མི་བྱ་ཞིང༌། དེ་བཞིན་དུ་རླུང་དང་མཁྲིས་པའི་རང་བཞིན་ཅན་གྱིས་ཀྱང་བཏུང་བར་མི་བྱ་སྟེ། ཆང་ནི་ཕལ་ཆེར་རླུང་དང་མཁྲིས་པ་སྐྱེད་པར་བྱེད་པ་ཡིན་ནོ། །དེ་ཡང་ཕལ་ཆེར་ཆང་གི་ཉེས་པ་ནི་མཁྲིས་པ་དང་རླུང་གི་མཐར་ཐུག་པའི་ནད་སྐྱེད་པར་བྱེད་པ་ལེན་པས་གསུམ་པོ་དེ་དག་
གིས་སོ་གའི་དུས་སུ་ཆད་དེ་ཟད་པར་བྱ་བའི་ཕྱིར། དུས་གཞན་གྱི་ཚེ་ན་འཐུང་བ་ལྟར་མང་པོ་བཏུང་བར་མི་བྱའོ། །དེ་དང་ཆ་མཐུན་པ་ཉུང་ཟད་ཅིག་བཏུང་བར་བྱ་ལ། དེ་བཞིན་དུ་བད་ཀན་དང༌། མཁྲིས་པའི་རང་བཞིན་ཅན་ཆང་ལ་སྲེད་པ་དག་གིས་ནི་བད་ཀན་ཟད་པར་བྱ་བའི་ཕྱིར་དང། མཁྲིས་པ་དང་ཡང་མི་མཐུན་པ་མེད་པར་བྱ་བར་འདོད་ན་ཆང་དེ་ཆུ་མང་པོས་བསྲེས་ཏེ་བཏུང་བར་བྱའོ། །ཡང་ན་གནས་སྐབས་ཀྱི་དབྱེ་བ་ལས། ཡུལ་གྱི་དབྱེ་བ་སྟེ། གང་གིས་ཆང་དེ་འཐུངས་པས་དེས་སོ་གའི་དུས་སུ་གནས་སྐབས་ལ་ལར་ནི། ཉུང་ཟད་ཅིག་བཏུང་བར་བྱ་ལ། གནས་སྐབས་ལ་ལར་ནི་ཆུ་མང་པོས་བསླད་དེ་བཏུང་བར་བྱའོ། །འབྲས་ཆན་ཀུན་ད་ཟླ་ལྟར་དཀར། །སྐམ་སའི་སྲོག་ཆགས་ཤ་དག་བཟའ། །ཞེས་བྱ་བ་ནི་འབྲས་སཱ་ལུ་ལ་སོགས་པའི་འབྲས་ཆན་ཀུན་ད་དང༌། ཟླ་བ་ལྟར་དཀར་བ་དེ་སྲོག་ཆགས་སྐམ་ས་ན་གནས་པའི་ཤ་དང་བཅས་པར་བཟའ་ཞིང་ལོངས་སྤྱད་པར་བྱའོ། །ཁུ་བ་མི་སྐ་ཞོ་དང་ནི། །བུ་རམ་སྦྱར་སོགས་གཡོས་བྱས་བཏུང༌། །ཕལ་ཆེར་སྐྱུར་བ་བཏུང་བར་བྱ། །ཞེས་བྱ་བ་ལ། ཁུ་བ་ནི་ཤ་ཁུ་སྟེ་དེ་བཏུང་བར་བྱའོ། །མི་སྐ་བ་ནི་གར་པོ་མ་ཡིན་པ་སླན་ཏེའོ། །དེ་བཞིན་དུ་ཞོ་དང་བུ་རམ་སྦྱར་ཏེ། སྤོད་ཀྱིས་བཏབ་པ་བཏུང་བ་དང༌། དེ་བཞིན་དུ་རྒུན་འབྲུམ་དང༌། སེའུ་ལ་སོགས་པ་ལས་གཡོས་སུ་སྦྱར་བ་ཕལ་ཆེར་སྐྱུར་བ་བཏུང་བར་བྱའོ། །སྙིང་པོ་ལྔ་ཡི་བཏུང་བ་ནི། །ཁམ་ཕོར་སར་པ་ལ་གནས་པ། །ཆུ་ཤིང་རྒྱ་སྟར་དུམ་བུར་བསྲེས། །སྐྱུར་བཅས་ཁམ་ཕོར་སྣོད་ཀྱིས་བཏུང༌། །ཞེས་བྱ་བ་ནི་ཆུ་དང༌། སྦྲང་རྩི་དང༌། ནཱག་གེ་སར་ལ་སོགས་པ་དང་སྦྱར་བའི་བཏུང་བ་བཏུང་བར་བྱའོ། །སྙིང་པོ་ལྔ་ནི་རླུང་དང་མཁྲིས་པ་གསོ་བའི་གནས་སྐབས་ནས་བསྟན་པའི་སྐྱོ་མའི་བཏུང་བ་རྫ་བུམ་གསར་པའི་ནང་དུ་བཅུག་ཅིང་བཞག་པ་སྟེ། འབྲང་རྩི་འབྲ་གོ་རྒུན་འབྲུམ་དང༌། །པ་རུ་ཤ་ཀ་ཁ་རའི་ཆུ། །སྙིང་པོ་ལྔ་ཡི་སྐྱོ་མ་ནི། །འབྲས་ཡོས་ཕྱེ་དང་མར་བཅས་བཏུང༌། །ཞེས་ཁྲག་མཁྲིས་གསོ་བའི་གནས་སྐབས་ལས་ཀྱང་བཤད་པ་ཡིན་ཏེ་དེ་བཏུང་བར་བྱའོ། །ཆུ་ཤིང་རྒྱ་སྟར་དུམ་བུར་བསྲེས། །ཞེས་བྱ་བ་ནི། ཆུ་ཤིང་གི་འབྲས་བུ་དང༌།
རྒྱ་སྟར་གྱི་འབྲས་བུའི་དུམ་བུ་དང་བསྲེ་བ་དང༌། སྐྱུར་བཅས་ཞེས་བྱ་བ་ནི། སེའུ་དང་སྐྱུ་རུ་ར་ལ་སོགས་པས་རོ་སྐྱུར་བར་བྱས་པའོ། །ཁམ་ཕོར་སྣོད་ཀྱིས་ཞེས་བྱ་བ་ནི། ས་ལས་བྱས་པའི་ཁམ་ཕོར་སྲབ་མོ་ཆུང་དུས་བཏུང་བའོ། །ཆུ་ནི་པ་ཏ་ལས་བསྒོས་ཤིང༌། །ག་པུར་བཅས་ཤིང་ཤིན་ཏུ་བསིལ། །ཞེས་བྱ་བ་ལ། དེ་བཞིན་དུ་ཆུ་བཏུང་བར་བྱ་སྟེ། དེ་ཡང་པ་ཏ་ལས་བསྒོས་བ་ཞེས་པ། །པ་ཏ་ལའི་མེ་ཏོག་གིས་དྲི་ཞིམ་པར་བྱས་པ་དང༌། ག་པུར་ལ་སོགས་པ་དང་བསྲེས་ཤིང་ཤིན་ཏུ་བསིལ་བར་བཏུང་ངོ༌། །ཟླ་ཟེར་ལྟ་བུའི་བཟའ་བ་ནི། །མཚན་མོའི་དུས་སུ་བཟའ་བ་དང༌། །ཟླ་བ་སྐར་མ་ལྟར་དཀར་བའི། །མ་ཧེའི་འོ་མ་བསིལ་པོ་བཏུང༌། །ཞེས་བྱ་བ་ལ། ཟླ་ཟེར་ལྟ་བུའི་བཟའ་བ་ཞེས་བྱ་བ་ནི་འབྲས་ཀྱི་ཁུར་བ་ག་ཕུར་དང་བཅས་ཤིང་ཁོང་སྟོང་དུ་བྱས་པ། ཁ་ར་དཀར་པོ་ལ་སོགས་པ་བཅུག་པ་མཚན་མོའི་དུས་སུ་བཟའ་བར་བྱ་ཞིང་མ་ཧེའི་འོ་མ་ཁ་ར་དཀར་པོ་དང་བཅས་པ། ཟླ་བ་དང་སྐར་མའི་འོད་ཀྱིས་བསིལ་བར་གྱུར་པ་བཏུང་བར་བྱའོ། །སཱ་ལ་ཏ་ལ་ཆེན་པོ་ནི། །སྤྲིན་རེག་ཚ་བའི་འོད་ཟེར་སྒྲིབ། །རྒུན་འབྲུའི་སྙེ་མ་གཡུར་ཟ་ཞིང༌། །འཁྲི་ཤིང་ལྡན་དང་ནགས་ཚལ་བཟང༌། །དྲི་བཟང་ཁང་པ་ཆུ་ཡིས་ནི། །བསིལ་ཁང་ལུས་དང་འཚམ་བྱས་པར། །ཆག་ཆག་བཏབ་དང་ཨ་མྲ་ཡི། །ལྡུམ་བུ་འབྲས་བུ་འཕྱང་བ་དང༌། །ཆུ་ཤིང་འདབ་དང་ཀལ་ལྷ་ར། །པད་རྩ་པདྨ་ཨུཏྤ་ལ། །མེ་ཏོག་རྒྱས་པ་དང་ལྡན་པར། །འཇམ་པའི་གནས་མལ་བཅས་ནས་ནི། །ཕྱེད་དུས་ཉི་མས་གདུངས་པ་ན། །ཉལ་བའམ། ཞེས་བྱ་བ་ལ། སྐྱེད་མོས་ཚལ་དག་ཏུ་སྐྱེས་བུའི་རང་གི་ལུས་ཀྱི་ཚད་དང་མཉམ་པའི་མལ་དུ། ཉི་མ་ཕྱེད་ཀྱི་དུས་སུ་ཉལ་བར་བྱའོ་ཞེས་བྱ་བར་སྦྱར་རོ། །སྐྱེད་མོས་ཚལ་ནི་ཅི་ལྟ་བུར་ཞེ་ན། སཱ་ལ་ཏལ་ཆེན་པོ་ནི། །ཞེས་པ་ཤིང་སྔ་ལ་དང༌། ཏ་ལ་སྤྲིན་རེག་ཅེས་པ་བར་སྣང་དག་ལ་ཤིན་ཏུ་འཕགས་ཤིང༌། རྩེ་མོས་སྙོབ་པ་ལྟ་བུར་གནས་པ་གང་ཡིན་པ་དེས་ཚ་བའི་འོད་ཟེར་ཞེས་པ་སོ་གའི་ཉི་མ་ཚ་བའི་འོད་ཟེར་སྐྱེད་མོས་ཚལ་དུ་འབབ་པ་གང་ཡིན་པ་དེ་སྒྲིབ་ཅིང་འགེབས་པར་བྱེད་པ་དང༌། དེ་བཞིན་དུ་རྒུན་འབྲུའི་སྙེ་མ་སྟེ། འབྲས་བུའི་ཚོགས་གཅིག་ཏུ་འབྱར་བ་ནི་སྙེམ་ཞེས་བྱ་སྟེ། དེ་གཡུར་
ཟ་ཞིང་འཕྱང་བ་དང༌། མ་དུ་ཀ་ལ་སོགས་པའི་འཁྲི་ཤིང་གི་ཡལ་ག་རྣམས་ལ་འཇུས་ཤིང་འཁྲིས་པ་སྟེ། དེ་ལྟ་བུའི་སྐྱེད་མོས་ཚལ་དུ་ཉལ་བར་བྱའོ། །གཞན་ཡང་འོད་མ་ལ་སོགས་པ་ལས་བྱས་པའི་ཁང་པར་དྲི་བཟང་པོ་སྟེ། ག་བུར་ལ་སོགས་པའི་དྲིས་བསྒོས་ཤིང༌། ཁ་བས་གྲང་བར་བྱས་པའི་ཆུས་ཆག་ཆག་བཏབ་ཅིང༌། བརླན་པར་བྱས་པ་དང༌། དེ་བཞིན་དུ་ལུས་དང་འཚམ་པར་བྱས་པའི་གནས་དེའི་ཉེ་འཁོར་ན། གོས་ཀྱི་ཚོགས་དཔྱངས་པ་དང༌། དེ་བཞིན་དུ་ཨ་མྲའི་ལྡུམ་བུ་བྱུ་རུ་ལྟར་དམར་བའི་ཡལ་གསར་པ་དང༌། དེའི་འབྲས་བུའི་ཚོགས་འཕྱང་བ་དེས་ཀུན་ནས་བསྐོར་ཞིང་ཁྱབ་པ་དང༌། ཅི་སྐྱེད་མོས་ཚལ་དེར་ལུས་ཀྱི་ཚད་དང་འཚམ་པར་བྱས་པའི་སྤྱིལ་བུར། མལ་ཁྲི་མེད་པར་བབ་བབ་ཏུ་ཉལ་བར་བྱ་བའམ། འོན་ཏེ་མ་ཡིན་ཞེ་ན། དེའི་ཕྱིར་མལ་སྟན་བཅས་པ་ཞེས་བྱ་བ་སྨོས་པ་ཡིན་ནོ། །གང་གིས་བཅའ་ཞེ་ན། ཆུ་ཤིང་འདབ་མ་ལ་སོགས་པས་སོ། །ཇི་ལྟ་བུ་ཞེ་ན། འཇམ་པོའོ། །དེ་ལ་ཆུ་ཤིང་གི་འདབ་མ་ནི་ཆུ་ཤིང་གི་འདབ་མའོ། །གལ་ལྷར་ནི་གན་དྷ་སོ་མ་གའོ། །པདྨའི་རྩ་བ་ནི། པདྨའི་རྩ་བ་གཞོན་ནུའོ། །པདྨའི་མེ་ཏོག་ནི་པདྨའོ། །ཨུཏྤ་ལ་ནི་ཨུཏྤ་ལ་སྔོན་པོའོ། །གཞན་ཡང་ཅི་ལྟ་བུ་ཞེ་ན། མེ་ཏོག་རྒྱས་ཏེ་མེ་ཏོག་གི་ཡལ་ག་དགོད་པ་ལྟ་བུ་དང་ལྡན་པ་གང་ཡིན་པ་དེར་རོ། །ཡང་མེ་ཏོག་རྒྱས་པ་ནི། ལོ་འདབ་ཀྱི་མཐའ་མར་མ་ཏོག་ཅུང་ཟད་རྒྱས་པ་དང་ལྡན་པ་དེར། ཉི་མ་ཕྱེད་ཀྱི་དུས་སུ་ཉི་མས་གདུངས་པ་ན་ཉལ་བར་བྱའོ། །ཆུ་ཡི་ཁང་པ་ནི། །བུད་མེད་བཅོས་གཟུགས་ནུ་མ་ལག །ཁ་ལས་ཨུ་ཤིར་ཆུ་འབབ་བྱ། །ཞེས་བྱ་བ་ནི། ཡང་ན་ཉི་མ་ཕྱེད་ཀྱི་ཚ་བས་གདུངས་པའི་དུས་སུ་ཆུའི་ཁང་པར་ཉལ་བར་བྱའོ། །དེ་ཡང་བུད་མེད་བཅོས་མ་ཞེས་བྱ་བ་སྟེ། ཤིང་ལས་བུད་མེད་ཀྱི་གཟུགས་བྱས་ལ། ཁོང་དུ་ཆུ་དྲངས་ཏེ་དེའི་ནུ་མ་དང༌། ལག་སོར་དང༌། ཁ་ལས་བུ་ཤེལ་ཙི་དང་སྦྱར་བའི་ཆུ་འབབ་པའི་དྲུང་དུ་འདུག་ཅིང་དེས་རེག་པར་བྱའོ། །མཚན་མོ་ཡང་ཐོག་རྡོ་ཐལ་བྱུགས། །ཟླ་བའི་འོད་ཀྱིས་བསིལ་བར་ཉལ། །ཞེས་བྱ་བ་ནི། མཚན་མོའི་དུས་སུ་ཁང་བཟངས་ཀྱི་སྟེང་གི་ཡང་ཐོག་རྡོ་ཐལ་གྱིས་བྱུགས་ཤིང༌། ཟླ་བའི་འོད་ཀྱིས་བསིལ་ཞིང་ཁྱབ་
པར་ཉལ་བར་བྱའོ། །མལ་སྟན་བདེ་བར་སེམས་བདེ་ཞིང༌། །ཙནྡན་ལྡེ་གུ་ཕྲེང་བ་ཐོགས། །རབ་ཏུ་ཕྲ་བའི་གོས་བགོས་ཤིང༌། །འདོད་པའི་རྒྱུན་ལས་ལྡག་པར་བྱ། །ཞེས་བྱ་བ་ནི། མལ་སྟན་བདེ་བ་བཏིང་ནས་ཁང་བཟངས་ཀྱི་སྟེང་དུ་འདུག་པ་ནི། མཚན་མོ་བསྔགས་པ་ཡིན་ལ། དེ་བཞིན་དུ་སེམས་བདེ་བ་སྟེ། སྡུག་བསྔལ་གྱི་གདུང་བ་མེད་པ་དང༌། དེ་བཞིན་དུ་ཙནྡན་ལྡེ་གུ་སྟེ། ཙནྡན་གྱི་ལྡེ་གུས་ལུས་བྱུགས་པ་དང༌། ཕྲེང་བ་ཐོགས་པ་སྟེ། མེ་ཏོག་གི་ཕྲེང་བ་རྣམས་ཀྱིས་བརྒྱན་པ་དང༌། དེ་བཞིན་དུ། རབ་ཏུ་ཕྲ་བའི་གོས་བགོས་ཤིང༌། །ཞེས་བྱ་བ་སྟེ། ཤིན་ཏུ་ཕྲ་ཞིང་སྲབ་པའི་གོས་བགོས་པ་དང༌། དེ་བཞིན་དུ། འདོད་པའི་རྒྱུན་ལས་ལྡོག་པར་བྱ། །ཞེས་བྱ་བ་སྟེ། བུད་མེད་ཉལ་པོ་བྱེད་པ་སྤང་ཞིང་འཁྲིག་པ་མི་བྱ་སྟེ། དེ་ལྟ་བུ་དག་ནི་དེའི་ཚེ་ཕན་པ་ཡིན་ནོ། །ཏ་ལའི་བསིལ་ཡབ་སྤོས་ཆུས་གདང༌། །པདྨ་འདབ་བརྒྱད་རླུང་ཡབ་དང༌། །དལ་གྱིས་ལེགས་པར་གཡོབ་པ་དང༌། །རྫི་ཆར་སེར་བུ་དང་ལྡན་པ། །ག་པུར་མཱ་ལི་ཀའི་ཕྲེང་བ། །མུ་ཏིག་དོ་ཤལ་ཙནྡན་དཀར། །ནེ་ཙོ་ཤ་རི་ཀ་ལ་སོགས། །སྒྲ་སྙན་ཡིད་འོང་སྒྲོགས་པ་དང༌། །ཆུང་མ་གདུ་པུ་པད་རྩ་འདྲ། །པདྨ་རྒྱས་པ་ལྟ་བུར་མཛེས། །པདྨ་ཅན་ནི་འགྲོ་འདྲ་བ། །སྙོམ་བསེལ་བར་བྱེད་པ་ཡིན། །ཞེས་བྱ་བ་ལ། དུས་འདིའི་ཚེ་ན། ཏ་ལའི་རླུང་ཡབ་ལ་སོགས་པ་སྙོམ་ཞིང་ཚ་བས་ཞུམ་པ་སེལ་བར་བྱེད་པ་ཡིན་ནོ། །དེ་ལ་ཏ་ལའི་བསིལ་ཡབ་སྤོས་ཆུས་བཏབ་པ་ནི། ཤིང་ཏ་ལའི་ལོ་མ་སྤོས་ཆུས་སྦངས་ཤིང་བརླན་པར་བྱས་པའམ། ཡང་ན་ཏ་ལའི་བསིལ་ཡབ་ཅེས་བྱ་བ་ནི། རྨ་བྱའི་འཇུག་མ་ལ་སོགས་པ་ལས་བྱས་པའི་རྡུལ་ཡབ་ཚ་བ་སེལ་བའི་བྱ་བ་བྱེད་ནུས་པ་ལ་བྱའོ། །པདྨའི་འདབ་མ་རྒྱས་པ་ནི། པདྨའི་འདབ་མ་དག་ཉིད་རྒྱས་པ་བསིལ་ཡབ་ཏུ་བྱས་པ་དང༌། རླུང་ཡབ་ཅེས་བྱ་བའི་རྨ་བྱའི་སྒྲོ་ལས་བྱས་པ་རླུང་ཡབ་ནུས་པའི་རྣམ་པར་བྱས་པ་དག་གིས་ཏེ། དེ་དག་དང་དལ་གྱིས་ལེགས་པར་གཡོབ་ཅིང༌། སྒེག་པ་དང་བཅས་པས་གྱེན་དུ་བཏེག་པ་གང་ཡིན་པ་དེ་ནི་དལ་གྱིས་ལེགས་པར་གཡོབ་བའོ། །དེ་བཞིན་དུ་རྫི་ཆར་སེར་བུ་དང་ལྡན་པར་བྱེས་ཏེ། རྫི་ཆར་དང་སེར་བུ་བསིལ་བའི་བྱ་བ་བྱེད་པ་
དང་ལྡན་པར་གཡོབ་པར་བྱའོ། །དེ་བཞིན་དུ་ག་པུར་གྱིས་བསྒོས་པའི་མཱ་ལི་ཀ་ནི། ག་པུར་གྱི་མཱ་ལི་ཀ་སྟེ། དེའི་ཕྲེང་བ་ནི། ག་པུར་མཱ་ལི་ཀའི་ཕྲེང་བ་ཞེས་བྱ་བའམ། ཡང་ན་མཱ་ལི་ཀ་ཁྱད་པར་ཅན་གྱི་ཕྲེང་བ་ལ་དེ་སྐད་ཅེས་བྱ་སྟེ། དེ་གདགས་པ་དང༌། དེ་བཞིན་དུ་མུ་ཏི་ག་དོ་ཤལ་ནི་མུ་ཏིག་གི་རྒྱན་ཆུན་འཕྱང་ཞེས་བྱ་བ་སྟེ། ཙནྡན་དཀར་པོ་དང་བཅས་པར་གནས་པ་ལ་དེ་སྐད་ཅེས་བྱའོ། །དེ་བཞིན་དུ་བྱིས་པ་ཡིད་དུ་འོང་བར་སྨྲ་བ་དང༌། ནེ་ཙོ་དང༌། ཤ་རི་ཀ་ལ་སོགས་པ་སྒྲ་ཡིད་དུ་འོང་བར་སྒྲོགས་པ་དང༌། དེ་བཞིན་དུ་ཆུང་མ་གདུ་བུ་པདྨའི་རྩ་བ་ལྟར་དཀར་བ་ཐོགས་ཤིང༌། པདྨའི་འདབ་མ་རྒྱས་པ་ལྟར་བཞིན་རས་ཤིན་ཏུ་མཛེས་པ་དེ་ལ་འདི་ལྟར་བལྟ་བ་ནི། པདྨ་ཅན་ནི་འགྲོ་བ་འདྲ། །ཞེས་བྱ་སྟེ། པདྨ་ཅན་གྱི་མཚོ་འགྲོ་ཞེས་པ་ལྟ་བུར་བལྟ་ཞིང་དགའ་བ་བསྐྱེད་པར་བྱའོ། །དབྱར་གྱི་སྤྱོད་པ་སྨྲས་པ་ནི། །མཐུ་འཕྲོག་པ་ནི་ན་བའི་ལུས། །དམན་པ་ལས་ཀྱང་དམན་འགྱུར་ཏེ། །དབྱར་ནི་གནོད་པས། ཞེས་བྱ་བ་ནི། དགུན་སྨད་ན་སོ་གའི་བར་དུས་གསུམ་པ་ནི། མཐུ་འཕྲོག་པའི་དུས་ས་ཡིན་ཏེ། མཐུ་འཕྲོག་པའི་དུས་དེས་ན་ཞིང་ནུས་པ་འབྲི་བའི་ལུས་གང་ཡིན་པ་དེ་ནི། མཐུ་འཕྲོག་པ་ན་བའི་ལུས་སུ་ཤེས་པར་བྱའོ། །དེའི་མེ་དམན་པ་ལས་སྔར་དམན་ཞིང་ཞེན་པར་གྱུར་པ་ལས་ཀྱང་ཡང་དབྱར་གྱི་ཉེས་པ་རླུང་ལས་སོགས་པས་འཁྲུགས་ཤིང་ཞུམ་པས་དམན་པ་ཉིད་དུ་འགྱུར་རོ། །གནོད་འགྱུར་ཏེ། མཁའ་ལ་སྤྲིན་འདུས་ཆུ་ཡིས་བརླན། །ཆུ་ཐིགས་བཅས་པའི་རླུང་དང་ནི། །གྲང་བ་དྲག་པོར་ལྡང་བ་དང༌། །ས་ཡི་རླངས་པ་སྐྱུར་མིན་དང༌། །ཆུ་ནི་རྙོག་པ་ཅན་དག་གིས། །མེ་དྲོད་ཆུང་བས་གནོད་པར་བྱེད། །ཅེས་བྱ་བ་ནི། ཉེས་པ་དེ་དག་གིས་གནོད་པར་འགྱུར་ཞིང༌། སྡུག་བསྔལ་བསྐྱེད་པ་ཉིད་དུ་འགྱུར་རོ། །གང་གི་ཚེ་ཞེ་ན། མཁའ་ལ་སྤྲིན་འདུས་ཆུ་ཡིས་བརླན། །ཞེས་བྱ་བ་སྟེ། ཆུས་རྒྱས་པའི་ཆར་སྤྲིན་མཁའ་ལ་འདུས་པར་གྱུར་པས། གང་ཆུ་ཐིགས་ཕྲ་མོ་དང་བཅས་པའི་རླུང་གྲང་མོ་དྲག་ཅིང་ཤུགས་ཆེ་བར་ལྡང་བ་དང༌། དེ་བཞིན་དུ་སའི་རླངས་པ་བྱུང་ཞིང་ཁུག་རྣ་བྱུང་བ་དང༌། དེ་བཞིན་དུ་ཆུ་སྐྱུར་བའི་རྣམ་པར་སྨིན་ཞིང་མཐུ་སྐྱེད་པ་དང༌། དེ་བཞིན་དུ་ཆུ་རྙོག་པའི་བཅས་ཤིང་དྲི་མ་
ཡོད་པ་དག་གིས། མེའི་དྲོད་ཆུང་བར་བྱེད་པས་ཉེས་པ་དེ་འཕེལ་བར་འགྱུར་རོ། །ཕན་ཚུན་གནོད་པ་དེ་ལ་ནི། །དྲོ་ཞིང་མེ་ཡི་སྟོབས་སྐྱེད་པ། །ཐུན་མོར་གང་ཡིན་བསྟེན་པར་བྱ། །ཞེས་བྱ་བ་ནི། ཕན་ཚུན་གཅིག་ལ་གཅིག་གནོད་པར་བྱེད་པའི་ངང་ཚུལ་ཅན་གང་ཡིན་པ་དེ་ནི་ཕན་ཚུན་གནོད་པ་སྟེ། གཅིག་ལ་གཅིག་གནོད་པར་བྱེད་པ་ནི་རང་གི་ངོ་བོ་ལས་ཉམས་པར་བྱེད་པ་ཡིན་ནོ། །ཚུལ་འདིས་ན་ཕན་ཚུན་གནོད་པ་དག་ལ་ནི་རླུང་ལ་སོགས་པའི་ཐུན་མོང་གི་ཉེས་པ་གསུམ་ཆར་སེལ་པར་བྱེད་པའི་བཟའ་བ་དང་བཏུང་བ་དག་སྨན་ལ་སོགས་པ་བསྟན་ཅིང་གོམས་པར་བྱའོ། །དེ་ཡང་དྲོ་ཞིང་ཕོ་བའི་མེ་དྲོད་སྐྱེད་པར་བྱེད་པ། ཚ་བ་ལྔ་ལ་སོགས་པ་བསྟེན་པར་བྱའོ། །སྦྱང་བས་ལུས་ནི་དག་བྱས་ལ། །ཟས་ནི་ཡང་བག་ཁུ་བ་བཟའ། །སྐམ་སའི་སྲོག་ཆགས་ཤ་ཁུ་དང༌། །སྦྲང་རྩི་ཅན་ནི་རྙིང་བ་བཏུང༌། །ཞེས་བྱ་བ་ནི་སློན་སྨན་ལ་སོགས་པས་ལུས་དག་པར་བྱས་ཤིང༌། ནད་ལ་སོགས་པ་བསལ་བ་ལ་བརྟེན་པར་བྱའོ། །དེ་བཞིན་དུ་ཟས་ཡང་བ་སྟེ། གསར་ཐོག་དང་ཁུ་བ་སྟེ་ཤ་ཁུ་ལ་སོགས་པ་དང་སྦྱར་བ་བཟའ་བར་བྱའོ། །སྐམ་སའི་སྲོག་ཆགས་ཀྱི་ཤ་དང་ཁུ་བ་སྟེ། སྲན་མུངྒ་ལ་སོགས་པ་སྦྱར་བའི་ཁུ་བའོ། །སྦྲང་རྩི་ནི་སྦྲང་རྩི་ལས་བྱས་པའི་ཆང་གི་ཁྱད་པར་ཏེ། དེ་ཡང་རྙིང་པ་སྟེ་སྐྱོན་མེད་བཏུང་བར་བྱའོ། །དར་བ་ཁ་རུ་ཚར་སྦྱར་བའམ། །ཚ་བ་ལྔ་ཡི་ཕྱེ་མ་ཅན། །ཁྲོན་པའི་ཆུ་ནི་བསྐོལ་བའང་རུང༌། །ཞེས་བྱ་བ་ལ། དར་བའམ་ཁ་རུ་ཚ་སྦྱར་བ་ནི། །ལན་ཚྭ་ཁ་རུ་ཚ་ཞེས་པ་དང་ལྡན་བའོ། །དེ་བཞིན་དུ་ཚ་བ་ལྔའི་ཕྱེ་མ་ཅན་ནམ། ཡང་ན་ཁྲོན་པའི་ཆུ་འམ། ཆར་ཆུ་བསྐོལ་བ་བསྟེན་པར་བྱའོ། །ཆར་ཆེའི་དུས་སུ་ཁ་ཟས་ནི། །རབ་སྐྱུར་ལན་ཚྭ་སྣུམ་དང་བཅས། །སྐམ་ཞིང་སྦྲང་རྩིར་ལྡན་པ་ཡང༌། །ཞེས་བྱ་བ་ལ། ཤིན་ཏུ་ཆར་ཆེས་ཤིང་ཡུལ་རྨུས་པའི་དུས་སུ་བཟའ་བའི་ཁ་ཟས་ནི། རབ་སྐྱུར་ལན་ཚྭ་སྣུམ་དང་བཅས། །ཞེས་བྱ་བ་ཡིན་ཏེ། ཤིན་ཏུ་སྐྱུར་བ་དང༌། ལན་ཚྭ་དང་བཅས་པའི་ཁ་ཟས་གང་ཡིན་པ་དེ་ལ་དེ་སྐད་ཅེས་བྱའོ། །སྐམ་པ་ནི་ཕལ་ཆེར་སྐམ་པོ་དང་བཅས་པའོ། །སྦྲང་རྩིར་ལྡན་པ་ནི་སྦྲང་དང་བཅས་པའོ། །ཡང་བ་ནི་རང་བཞིན་གྱིས་
ཡང་བའམ། ཚོད་ཟིན་པར་བཟའ་བ་སྟེ། དེ་ལྟ་བུ་དག་བསྟེན་པར་བྱའོ། །དེ་ཡང་དུས་འདིའི་ཚེ་ནི་ལུས་ཟུངས་རྣམས་ཤིན་ཏུ་སླ་བར་གནས་པ་དེ་བས་ན་སླ་བས་ན་བསྲུང་བ་ཉིད་ཀྱི། །སྦྲང་རྩིའི་ནུས་པ་དེར་ཐིམ་པར་འགྱུར་བས། སྦྲང་རྩིས་རླུང་སྐྱེད་མི་ནུས་སོ་ཞེས་སྨན་དཔྱད་ཀྱི་ལུང་འཆད་པ་རྣམས་ཟེར་ཏེ། དེ་ཡང༌། རླུང་ཅན་རླུང་ནི་འཁྲུགས་བྱེད་ཀྱང༌། །དབྱར་ནི་སྦྲང་རྩི་བསྔགས་པ་ཡིན། །ཞེས་སྨོས་པ་ཡིན་ནོ། །རྐང་གིས་མི་འགྲོ་དྲི་ཞིམ་བྱུགས། །རྟག་ཏུ་གོས་ནི་སྤོས་ཀྱིས་བདུག །ཁང་བཟངས་སྟེང་དུ་བ་མོ་བསིལ། །ཆར་གྱི་ཟེར་སྦངས་གནས་པར་བྱ། །ཞེས་བྱ་བ་ནི་དབྱར་གྱི་དུས་དེའི་ཚེ་རྐང་གིས་འགྲོ་བར་མི་བྱ་ཞིང༌། བན་གླང་མོ་ལ་སོགས་པའི་བཞོན་པ་བརྟན་ཞིང་མཐོ་བས་འགྲོ་བར་བྱའོ། །དྲི་ཞིམ་བྱུགས་ཞེས་བྱ་བ་ནི། །ག་པུར་དང་གུར་ཀུམ་ལ་སོགས་པས་ལུས་ལ་བྱུགས་པ་དང༌། དུས་རྟག་ཏུ་གོས་ལ་སྦོས་ཀྱིས་བདུག་པ་དང༌། ཨ་ཀ་རུ་ལ་སོགས་པའི་བདུག་པས་གོས་ལ་བདུག་ཅིང་བགོ་བར་བྱའོ། །ཁང་སྟེང་ཞེས་བྱ་བ་ནི་ཁང་ཐོག་སྟེ། དེར་བ་མོ་ལ་སོགས་པས་མཉེན་པར་གནས་པར་བྱའོ། །ཀླུང་ཆུ་དང་སྦྱར་སྐྱོ་མ་དང༌། །ཉིན་གཉིད་རྩོལ་དང་ཉི་ཚན་སྤང༌། །ཞེས་བྱ་བ་ལ། དབྱར་གྱི་དུས་དེར་ཆུ་པོ་རྣམས་ཀྱི་ཆུ་དང་ཕྱེར་སྦྱར་བ་ལ། མར་དང་བཅས་པ་མི་བཏུང་ངོ༌། །དེ་བཞིན་དུ་ཉིན་པར་གཉིད་ལོག་པ་དང༌། རྩོལ་བ་སྟེ་དྲག་ཤུལ་གྱི་ངལ་བག་དང༌། ཉི་ཚན་ཏེ་ཉི་མའི་འོད་ཟེར་སྤང་ཞིང་དོར་བར་བྱའོ། །སྟོན་གྱི་དུས་ཀྱི་སྤྱོད་པ་སྤྲས་པ་ནི། །དབྱར་ལུས་བསིལ་བར་གྱུར་པ་ལ། །འཕྲལ་དུ་ཉི་ཟེར་གྱིས་གདུངས་པས། །ཆར་འབབ་ཚེ་ན་བསགས་པ་ཡི། །མཁྲིས་པ་སྟོན་ནི་ལྡང་བར་འགྱུར། །དེ་བསལ་ཕྱིར་ནི་སྨན་མར་ཁ། །བཀྲུ་སྨན་བཏང་དང་གཏར་ག་བྱ། །ཞེས་བྱ་བ་ནི། །དབྱར་ལུས་བསིལ་བར་གྱུར་ཅིང་ཆར་གྱིས་གྲང་བའི་བདག་ཉིད་ཅན་དུ་གྱུར་པ་ལ། འཕྲལ་དུ་ཞེས་པའི་མོད་ལ། སྟོན་གྱི་དུས་ལ་བབ་པན་ཉི་མའི་འོད་ཟེར་ཚ་བ་རྣམས་ཀྱིས་གདུངས་ཤིང༌། དྲོས་པར་གྱུར་པའི་སྐྱེས་བུ་ལ་ནི་ཆར་འབབ་ཚེ་ན། ཞེས་པ་དབྱར་གྱི་ཚེ་ན་བསགས་ཤིང་རང་གི་གནས་སུ་འཕེལ་བར་འགྱུར་བའི་མཁྲིས་པ་སྟོན་ལྡང་བར་འགྱུར་ཏེ། རང་
གི་ནུས་བ་ལྷག་པས་རང་གི་གནས་ནས་གནས་གཞན་དུ་སོང་སྟེ། སྐྱེ་བོ་མི་སྲུན་བ་ལྟར་གནོད་པར་བྱེད་པར་འགྱུར་རོ། །དེ་བས་ན་མཁྲིས་པ་དེ་བསལ་བར་བྱ་བའི་ཕྱིར། སྨན་མར་ཁ་བོ་རུ་རྟ་དང་སྦྱར་བ་བསྟེན་པ་དང༌། བཀྲུ་སྨན་གཏང་ཞིང་ཁྲུས་བྱ་བ་དང༌། གཏར་ག་བྱ་སྟེ་ཁྲག་གདོན་པ་ལ་སོགས་པ་བྱའོ། །ཁ་དང་མངར་དང་བསྐ་བ་དང༌། །བཀྲེས་ཚེ་ཟས་ནི་ཡང་བ་བཟའ། །འབྲས་ཆན་མུངྒ་སྐྱུ་རུ་ར། །སྦྲང་རྩི་སྐམ་སའི་པ་ཏོ་ལ། །ཞེས་བྱ་བ་ལ། ནམ་བཀྲེས་པར་གྱུར་པ་ན། བཟའ་བའི་རྣམ་པ་ཁ་བ་དང༌། མངར་བ་དང༌། བསྐ་བ་དང༌། ཡང་བ་བསྟེན་ཞིང་བཟའ་བར་བྱའོ། །དེ་བཞིན་དུ་འབྲས་སཱ་ལུའི་ཆན་དང༌། མུངྒ་སྟེ། མོན་སྲན་སྔེའུ་དང༌། ཤ་ཀ་ར་དང༌། སྐྱུ་རུ་ར་དང༌། སྦྲང་རྩི་དང༌། སྐམ་ས་ནས་སྐྱེས་པའི་སྲོག་ཆགས་ཀྱི་ཤ་དང༌། པ་ཏོ་ལའི་ཚོད་མ་བཟའ་བར་བྱའོ། །ཉི་མའི་ཟེར་གྱིས་གདུངས་པ་དང། །ཟླ་བའི་འོད་ཀྱིས་བསིལ་བྱས་ལ། །རྀ་ཥི་ཤར་བས་དུག་མེད་པ། །ཉིན་མཚན་གཉི་གར་སྦྱང་ཆུ་བཏུང༌། །དངས་པའི་དྲི་མེད་ཆུ་ཞེས་པ། །དྲི་མེད་དྲི་མ་སེལ་འགྱུར་བ། །མི་འབྲུག་རྩུབ་པ་མ་ཡིན་པ། །བཏུང་བ་ལ་སོགས་བདུད་རྩིར་མཚུངས། །ཞེས་བྱ་བ་ལ། ཡང་སྟོན་ཀའི་དུས་དེའི་ཚེ། ཉིན་མོ་ཉི་མའི་འོད་ཟེར་གྱིས་གདུངས་ཤིང་རྣམ་པ་ཐམས་ཅད་དུ་ཚ་བར་གྱུར་བ་དང༌། མཚན་མོ་ཟླ་བའི་འོད་ཟེར་གྱིས་བསིལ་ཞིང་གྲང་པར་བྱས་པ་སྟེ། དེ་ལྟར་དུས་ཀྱིས་བཅོས་ཤིང་སྨིན་པར་བྱས་པ་དང༌། རྀཥི་ཤར་བས་དུག་མེད་པར་ཤེས་པ། སྐར་མ་རྀཥི་ཞེས་པ་ཤར་བ་ན་དུག་མེད་པ་སྟེ། དེ་ཤར་བས་བར་སྣང་ལས་འབབ་བཅིང་བྱུང་ནས་ཆུ་བོ་དང༌། རྫིང་བུ་ལ་སོགས་པར་གནས་པའི་གནོད་པ་རྣམས་སྟོན་གྱི་ཚེ་དུག་མེད་པ་ཉིད་དུ་བྱེད་པས་ན་དེ་སྐད་ཅེས་བྱའོ། །ཁྲོན་པའི་ཆུ་ནི་མ་ཡིན་ཏེ། དེ་ནི་ཐམས་ཅད་དུ་དུག་མེད་པ་ཡིན་ནོ། །དངས་པའི་དྲི་མེད་ཆུ་ཞེས་པ་ནི། ཉི་མ་དང་ཟླ་བ་དག་ལ་བྱ་སྟེ། དེ་གཉིས་ཀྱིས་བསྟེན་ཅིང་དྲི་མ་མེད་ལ་རྡུལ་དང་བྲལ་བ་ནི། །དྲི་མ་ཞེས་པ་རླུང་ལ་སོགས་པ་སེལ་ཞིང་འཇོམས་པར་འགྱུར་བ་ཡིན་ནོ། །མི་འབྲུག་ཅེས་བྱ་བ་ནི་ཆུ་མིག་ལྟར་དེ་སྣུམ་ཞིང་ལྕི་བ་མ་ཡིན་པས། བད་ཀན་སྐྱེད་པར་མི་བྱེད་ལ། འབྲུག་པ་མ་
ཡིན་པ་ཉིད་ཀྱིས་ན་རྩུབ་པ་ཡིན་ནོ། །བཏུང་བ་ལ་སོགས་པ་ཞེས་བྱ་བ་ནི། ཙནྡན་ཨུ་ཤིར་ག་པུར་དང༌། །མུ་ཏིག་ཆུན་འཕྱང་ཕྲེང་གོས་མཛེས། །ཁང་བཟངས་རྡོ་ཐལ་གྱིས་དཀར་ཞིང༌། །ཟླ་ཟེར་ཅན་དུ་མཚན་གནས་བྱ། །ཟིལ་བ་ཐལ་སྨན་ཧ་ཅང་འགྲངས། །ཞོ་དང་ཏིལ་མར་ཞག་ཉིད་མཚན། །མི་བཟད་ཆང་དང་ཉིན་པར་ཉལ། མདུན་གྱི་སེར་བུ་ཡོངས་སུ་སྤང༌། །དགུན་དང་དབྱར་ནི་དང་པོའི་གསུམ། །དཔྱིད་ནི་ཐ་མའི་རོ་གསུམ་བསྟེན། །སོ་ག་མངར་རམ་སྟོན་ཀ་ནི། །མངར་དང་ཁ་དང་བསྐ་བ་བསྟེན། །མདོར་ན་ཟས་དང་སྐོམ་དག་ནི། །སྟོན་དང་དཔྱིད་ནི་རྩུབ་པ་སྟེ། །སོ་ག་དབྱར་མཐར་བསིལ་བར་བྱ། །གཞན་དག་ཏུ་ནི་དེ་ལས་བཟློག །རྟག་ཏུ་རོ་ཀུན་བ་སྟེན་པ་ལས། །རང་རང་དུས་སུ་ལྷག་པར་བསྟེན། །དུས་གཉིས་ཐོག་མཐའི་ཞག་བདུན་ནི། །དུས་མཚམས་ཡིན་པར་ཤེས་པར་བྱ། །དེས་ནི་སྔ་མའི་ཆོ་ག་སྤང༌། །འོག་མ་རིམ་བཞིན་བསྟེན་པར་བྱ། །མ་སྤངས་ན་ནི་ནད་འགྱུར་ཏེ། །འཕྲལ་དུ་ནད་ནི་འོང་བ་འགྱུར། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། །སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་གསུམ་པའི་རྣམ་པར་འགྲེལ་པའོ།། །།དེ་ནས་ནད་མི་འབྱུང་བར་བྱ་བའི་དཔྱད་ཀྱི་ལེའུ་བཤད་པར་བྱའོ། །ཞེས་བྱ་བ་ནི། དུས་སུ་སྤྱད་པར་བྱ་བའི་ལེའུ་བཤད་པའི་འོག་ཏུ། །ནད་མི་འབྱུང་བར་བྱ་བའི་ལེའུ་བརྩམས་པ་ཡིན་ཏེ། དེ་ཡང་གང་གི་ཕྱིར་ཇི་སྐད་དུ་བཤད་པའི་དུས་སུ་སྤྱད་པར་བྱ་བའི་ཆོ་ག་ཇི་ལྟ་བ་བཞིན་དུ། །རང་རང་གི་དུས་སུ་སྦྱང་ཅིང་ཉམས་སུ་བླང་བ་ལ་སྤྱོད་པར་བྱེད་དུ་ཟིན་ཀྱང༌། བཤང་པ་དང་གཅི་བ་ལ་སོགས་པའི་ཤུགས་བཀག་པས། དེ་དང་རྗེས་སུ་མཐུན་པའི་ནད་འབྱུང་བར་འགྱུར་བ་ཡིན་ལ། །དེ་ཡང་དུས་སུ་སྤྱད་པའི་ཆོ་ག་ལས་གཞན་དུ་ལོག་པར་སྤྱད་པ་དང་འདྲ་བ་ཡིན་ཏེ། དེ་བས་ན་འདིའི་རྩོམ་པ་བྱས་པ་ཡིན་ནོ། །དེ་ལ་ནད་ནི་ལུས་དང་སེམས་ལ་གནས་བའི་བྱེ་བྲག་གིས་གཉིས་སུ་བཤད་པར་བྱ་བ་ཡིན་ལ། དེ་རྣམས་མི་འབྱུང་བར་བྱ་བ་ལེའུ་གང་ན་ཡོད་པ་དེ་བཤད་པར་བྱའོ་ཞེས་པ་སྟེ། །འདི་ནི་ཐ་མལ་པར་ནད་མེད་པར་གནས་པའི་དབང་དུ་བྱས་པ་ཡིན་ཏེ། ཐ་
མལ་བར་གནས་པར་གྱུར་པ་དེས་ཉིན་རེ་སྤྱད་བའི་ལེའུ་ལས་བཤད་པའི་བྱ་བའི་ཆོ་ག་ཉམས་སུ་བླང་བར་བྱ་བ་དང༌། དེ་བཞིན་དུ་དུས་སུ་སྤྱད་པའི་ལེའུ་ལས་བཤད་པ་རྣམས་སྤྱད་དོ། །དེ་བཞིན་དུ་ནད་འབྱུང་བར་འགྱུར་བ་སྤང་བ་ལ་ནི། །རླུང་ལ་སོགས་པ་ཤུགས་བཀག་པ་དང༌། ནན་ཀྱིས་བཙིར་བ་ལ་སོགས་པ་ཡང་མི་བྱ་བ་ལས་སྤྱད་པར་བྱ་བ་ཡིན་པས་ན། དེའི་ཕྱིར་སྨྲས་པ་ནི། །ཕྱིའི་དབུགས་བཤང་གཅི་སྦྲིད་པ་དང༌། །བཀྲེས་སྐོམ་གཉིད་དང་ལུད་པ་དབུགས། །གླལ་དང་མཆིལ་མ་སྐྱུག་པ་དང༌། །ཁུ་བའི་ཤུགས་ནི་དགག་མི་བྱ། །ཞེས་བྱ་བ་ཡིན་ཏེ། རླུང་ལ་སོགས་པའི་ཤུགས་དགག་པར་མི་བྱའོ། །ངལ་དབུགས་ཞེས་བྱ་བ་ནི། །ངལ་ཞིང་དུབ་པ་ལས་བྱུང་བའི་དབུགས་ནི་རལ་བའི་དབུགས་ཏེ་མི་དགག་པའོ། །ཤུགས་ཞེས་བྱ་བ་ནི་ཁུ་བའི་བར་དེ་དག་འབྱུང་བ་ལ། རྗེས་སུ་ཕྱོགས་པར་གནས་པ་ཉིད་ནི་ཤུགས་ཞེས་བྱ་སྟེ། ཤུགས་དེ་དག་དང་འབྲེལ་བ་དེ་ནན་གྱིས་དགག་པར་མི་བྱའོ། །དེ་ལ་རླུང་ནི་གཙོ་བོར་གྱུར་པ་ཡིན་ལ། དེས་ན་དེ་བཀག་པ་ལས་བྱུང་བའི་ནད་ནི་ཤིན་ཏུ་བཟློག་པར་དཀའ་བའི་ཉེས་པ་ཡོད་པས་འཇིགས་པ་དང་པོར་བསྟན་པ་ཡིན་ནོ། །དེའི་ཕྱིར་སྨྲས་པ་ནི། འཕྱེན་ནི་བཀག་པར་གྱུར་པ་ཡིས། །སྐྲན་དང་རྟུག་སྐམ་གཟེར་སྙོམ་ལྕི། །འཕྱེན་དང་བཤང་ལྕི་ཁོང་དུ་འགགས། །མིག་རྟུལ་དྲོད་ཆུང་སྙིང་ནད་འགྱུར། །ཞེས་བྱ་བ་ནི། བཤང་སྒོ་ནས་བྱུང་བའི་འོག་གི་རླུང་བཀག་པས། སྐྲན་ལ་སོགས་པའི་ནད་འབྱུང་བར་འགྱུར་རོ། །རྟུག་སྐམ་ནི་བཤང་བ་ལ་སོགས་པ་རང་གི་གནས་ལས་གྱེན་དུ་འཕགས་ཤིང་གནོད་པ་བྱེད་པའོ། །གཟེར་བ་ནི་ལྟོ་ཀུན་ཏུ་གཟེར་བའོ། །སྙོམ་ཞིང་ལྕི་བ་ནི་ལུས་ཞུམ་ཞིང་ཁོང་སྦོ་བའོ། །འཕྱེན་དང་བཤང་གཅི་ཁོང་དུ་འགགས་པ་ནི་ཕྱིར་མི་འབྱུང་བའོ། །མིག་རྟུལ་ཞིང་དྲོད་ཆུང་བ་ནི་མིག་ལ་གནོད་ཅིང་ཁོང་པའི་མེ་དྲོད་འབྲི་བའོ། །སྙིང་ནད་ནི་སྙིང་ནད་ཀྱིས་འདེབས་པའོ། །བཤང་འགགས་བྱིན་པའི་ཉྭ་འགྱུར་ཞིང༌། །ཆམ་པས་འདེབས་ཤིང་ཀླད་པ་ན། །ཁར་ནི་མི་གཙང་འབྱུང་བ་དང༌། །སྔར་བཤད་ནད་དུའང་འགྱུར་བ་ཡིན། །ཞེས་བྱ་བ་ནི། །བཤང་
བ་ཞེས་པ་སླད་ས་ཆེན་པོ་འགགས་པས་བྱིན་པའི་ཉྭ་འགྱུར་བར་འགྱུར་ཏེ། ཉྭ་ཞེས་བྱ་བ་ནི་བྱིན་པའི་རྒྱབ་ཀྱི་ཆའི་ཤ་ཟླུམ་པོ་གནས་པ་ལ་བྱ་ལ། དེ་གཉིས་འགྱུར་པ་ནི་ལྡོག་པ་སྟེ། ལག་པ་ལ་སོགས་པས་མཉེས་པ་ལྟ་བུར་འགྱུར་བའོ། །ཆམ་པ་ནི་སྣ་ནས་སྣབས་འཛག་པའི་རླུང་ནད་དོ། །ཀླད་པ་ན་བ་ནི་མགོ་ན་བའོ། །དེ་བཞིན་དུ་ཁར་མི་གཙང་བ་འབྱུང་བ་ནི་ཁ་ནས་བཤང་བ་འབྱུང་བའོ། །སྔར་བཤད་ནད་ནི་འཕྱེན་འགགས་པ་ལས་སྐྲན་ལ་སོགས་པའི་ནད་དུ་འགྱུར་བར་བཤད་པ་སྟེ། དེ་ཡང་འབྱུང་བར་འགྱུར་བའོ། །གཅིན་འགགས་པ་ཡིས་ཡན་ལག་ན། །རྡེའུ་ཆུ་སོ་ཕོ་མཚན་ན། །དཀུ་ཡི་ནང་ན་སྔར་གྱི་ནད། །ཕལ་ཆེར་འབྱུང་ངོ༌། །ཞེས་བྱ་བ་ནི་གཅིན་འགགས་པ་ལས་ཡན་ལག་ན་བ་ལ་སོགས་པ་འབྱུང་བར་འགྱུར་རོ། །དེ་ལ་ཡན་ལག་ན་ཞེས་པ་ནི། །ཡན་ལག་རྣམས་བཅག་པ་སྙམ་པའམ། གཅུས་ཤིང་བཙིར་པ་སྙམ་དུ་སེམས་པའོ། །རྡེའུ་ནི་གཅིན་སྲི་བའི་ནད་གཞིའི་སྐབས་ནས་བཤད་པའོ། །ཆུ་སོ་ལ་སོགས་པའི་ནད་ལ་ཆུ་སོ་ནི་གཅིན་གྱི་གནས་སོ། །མཚན་ནི་ཕོ་མཚན་ནོ། །དཀུའི་ནང་ནི་བརླ་ཕུགས་ཀྱི་མཚམས་སོ། །འདིས་ནི་ནད་འདི་དག་འབའ་ཞིག་འབྱུང་བར་མ་ཟད་ཀྱི། །སྔར་འཕྱེན་ལ་སོགས་པ་བཀག་པ་ལས་བྱུང་བའི་ནད་སྐྲན་ལ་སོགས་པ་ཡང་གཅིན་འགགས་པ་ལས་འབྱུང་བར་འགྱུར་རོ། །ཕལ་ཆེར་ཞེས་སྨོས་པས་ནི་སྔར་གྱི་ནད་ཐམས་ཅད་འབྱུང་བར་འགྱུར་བ་ནི་མ་ཡིན་གྱི། །ལ་ལ་ནི་འབྱུང༌། ལ་ལ་ནི་མི་འབྱུང་ངོ་ཞེས་པའི་དོན་ཏེ། ཕལ་ཆེར་སྨོས་པའི་དོན་ནི་ཅུང་ཟད་མཚང་པ་ཉིད་དུ་སྟོན་པ་ཡིན་ནོ། །དེ་ཡང་ལུང་ལས། ཕར་ཆེར་སྒྲ་ནི་ཁྱད་པར་དོན། །ཅུང་ཟད་མ་ཚང་ཉིད་དུ་སྟོན། །ཞེས་འབྱུང་བ་ཡིན་ནོ། །འཕྱེན་ལ་སོགས་པའི་ཤུགས་གསུམ་པོ་དེ་རྣམས་བཀག་པའི་སྨན་སྤྱི་ཙམ་དུ་སྨྲས་པ་ནི། དེ་ཡི་སྨན། །རེད་བུ་བསྐུ་བྱུག་ལུས་བཅིང་དང༌། །དུགས་དང་སྨན་མར་མས་གཏོང་པའོ། །ཞེས་བྱ་བ་ཡིན་ཏེ། དེའི་ཞེས་པ་འཕྱེན་དང་བཤང་བ་དང་གཅི་བ་འགགས་པ་ལས་རྣམ་པར་གྱུར་པའི་སྨན་ཞེས་པ། གསོ་བའི་ཐབས་སུ་གྱུར་པའི་སྨན་ནི་རེང་བུ་ལ་སོགས་པ་ཡིན་ཏེ། དེ་ལ་རེང་བུ་ནི་པོ་སོན་ཆ་དང༌། ཁང་པའི་དུད་པ་དང༌། ལན་ཚྭ་ལ་སོགས་
པ་ལས་བྱས་པའི་རེང་བུ་སྟེ་འོག་ནས་བཤད་པ་ཡིན་ནོ། །བསྐུ་བྱུག་ནི་ཏིལ་མར་ལ་སོགས་པས་བྱུག་པའོ། །ལུས་བཅིང་བ་ནི་སྨན་རྣམས་བསྐོལ་བའི་ཆུ་དང༌། ཏིལ་མར་ལ་སོགས་པས་བཀང་བའི་ཟངས་སམ། གཞོང་པ་ཆེན་པོ་ཟབས་རིང་བའི་ནང་དུ་ལུས་བཅིང་པའོ། །དུགས་ནི་བསྲོ་བ་ལ་སོགས་པ་རྣམ་པ་བཞི་པོ་འོག་ནས་བཤད་པའོ། །སྨན་མར་མས་གཏོང་བ་ནི། །སྨན་དང་བསྐོལ་བའི་ཏིལ་མར་ལ་སོགས་པ་བཤང་སྒོ་ནས་བཅུག་པའོ། །འདི་དག་ནི་གསུམ་ཆར་ལ་ཡང་ཐུན་མོང་ཡིན་ནོ། །ཟས་སྐོམ་བཤང་བ་འགགས་པ་དང༌། །བཤང་འགགས་ལས་བྱུང་གློ་གཅོང་མཚུངས། །ཞེས་བྱ་བ་ནི། གང་བཤང་བ་འགགས་པ་ལས་བྱུང་བའི་གློ་གཅོང་བྱིན་པའི་ཉྭ་འགྱུར་བ་ལ་སོགས་པ་ནི། །བཤང་གཅི་འགགས་པ་ལ་ཕན་པའི་ཟས་དང་སྐོམ་སྦྱར་བར་བྱ་སྟེ། དེ་ནི་ནས་ཐུག་དང༌། ཟན་དྲོན་པོ་དང༌། མ་ཤ་དང༌། མུངྒ་དང༌། རྒྱ་སྣེའུའི་ཚོད་མ་མཐུག་པོའི་ཤ་དང་བཅས་པ་དང༌། ཆང་བསྐ་བ་དང༌། ཞོ་ག་ཆུ་དང༌། འབྲས་ཀྱི་ཁུ་ལེ་རང་སྐྱུར་ལ་སོགས་པ་ཡིན་ནོ། །ཆུ་འགགས་པ་ལས་མར་སར་ནི། །ཆེ་ཚད་ཙམ་ནི་རབ་ཏུ་སྦྱར། །ཞེས་བྱ་བ་ཡིན་ཏེ། གཅིན་འགགས་པ་ལས་བྱུང་བའི་ནད། ཡན་ལག་ན་བ་ལ་སོགས་པ་རྣམས་ལ་ནི་མར་སར་ཆེ་ཚད་ཙམ་སྦྱིན་པར་བྱ་སྟེ། ཆེ་ཚད་ཀྱི་སྒྲ་ནི་གང་ཉིན་མཚན་གཅིག་གིས་འཇུ་བར་འགྱུར་བའི་སྣུམ་གྱི་ཚད་ཆེ་བ་ལ་བྱ་སྟེ། དེ་ཡང་ཟས་མ་ཟོས་པའི་གོང་དུ་འམ། ཟས་ཞུ་བའི་རྗེས་ལ་སྦྱིན་པར་བྱའོ། །དེ་ཡང་བསྡུས་པ་ལས། མར་ནི་དང་པོར་བཟའ་བར་བསྔགས། །འཇུ་མཐར་ཚད་ནི་ཆེན་པོའང་རུང༌། །ཞེས་བཤད་པ་ཡིན་པས། སྦྱོར་བ་དེ་གཉིས་སླར་བྱ་བ་ཡིན་ནོ། །དེ་ལྟར་ཟས་ཀྱི་སྔར་རམ། །ཞུ་བའི་རྗེས་ལ་བྱ་བ་གཉི་གལ་ཆེ་ཚད་ཙམ་གྱི་སྒྲར་བཤད་དོ། །སྒྲིགས་པ་བཀག་ན་ཡི་ག་འཆུས། །ལུས་འདར་སྙིང་དང་བྲང་འགགས་ན། །སྦོ་ཞིང་ལུད་ལ་སྐྱིགས་བུས་འདེབས། །དེའི་སྨན་སྐྱིགས་བུ་དག་དང་འདྲ། །ཞེས་བྱ་བ་ཡིན་ཏེ། སྒྲེགས་པ་བཀག་པས་ཡི་ག་འཆུས་པ་ལ་སོགས་པ་འབྱུང་བར་འགྱུར་རོ། །དེ་ལ་ཡི་ག་
འཆུས་པ་ནི་ཟས་ལ་མངོན་པར་མི་དགའ་བའོ། །ལུས་འདར་བ་ནི་མགོ་དང་ལག་པ་ལ་སོགས་པ་འདར་བའོ། །སྙིང་བྲང་འགགས་ཤིང་ན་བ་ནི། །སྙིང་དང་བྲང་གི་དོང་ག་དག་སྦུབས་ཀྱིས་འགགས་ཤིང་རེངས་བ་སྙམ་སེམས་པའོ། །སྦོ་བ་ནི་ལྟོ་བ་རླུང་གིས་ཁེངས་པའོ། །ལུད་པ་དང་སྐྱིགས་བུ་ནི་རང་གི་མཚན་ཉིད་ཀྱི་སྐབས་སུ་འོག་ནས་སྟོན་ཏོ། །དེའི་ཞེས་པ་ཡི་ག་འཆུས་པ་ལ་སོགས་པ་དེ་རྣམས་ཀྱི་སྨན་ཏེ། གསོ་བའི་ཆོ་ག་ནི་སྐྱིགས་བུ་དག་དང་འདྲ་ཞེས་བྱ་བ་ཡིན་ཏེ། འོག་ནས་སྐྱིགས་བུ་གསོ་བའི་ལེའུ་ལས་བཤད་པ་དང་འདྲའོ། །སྦྲིད་བཀག་མགོ་ན་དབང་མི་རྣོ། །གཉེའུ་རེངས་ཁ་ཡོ་འགྲམ་ཆག་འགྱུར། །དུད་རྣོན་གྱིས་བདུག་མིག་སྨན་དང༌། །སྣ་སྨན་ཉི་མ་ལྟ་བ་ཡིས། །སྦྲིད་པ་འགགས་པ་བསལ་བྱ་ཞིང༌། །སྣུམ་དང་དུགས་ཀྱང་བསྟེན་པར་བྱ། །ཞེས་བྱ་བ་ནི། །སྦྲིད་པ་བཀག་ཅིང་བརྣགས་པས། མགོ་ནད་ལ་སོགས་པ་འབྱུང་བར་འགྱུར་རོ། །མགོ་ན་བ་ནི་ཀླད་པ་ན་བ་ཡིན་ནོ། །དབང་པོ་མི་རྣོ་བ་ནི་མིག་ལ་སོགས་པ་ཉམ་ཆུང་ཞིང་རང་གི་ཡུལ་འཛིན་པར་མི་ནུས་པའོ། །གཉེའུ་ནི་གནད་གཉིས་འདུས་པ་ལ་བྱ་ལ། དེ་དག་རེངས་པ་ནི་འགྱུར་མི་ཤེས་པར་བྱས་པའོ། །ཁ་ཡོ་བ་ནི་རླུང་གིས་ཁ་ཡོན་པོར་བྱས་པའོ། །འདིར་སྦྲིད་པ་འགགས་པ་ལ་དུད་པ་ལ་སོགས་པས་སྦྲིད་པ་དབྱུང་བར་བྱའོ། །དེ་ལ་དུད་རྣོན་ནི་འོག་ནས་བཤད་པའོ། །མིག་སྨན་རྣོན་པོ་ནི་པི་པི་ལིང་ལ་སོགས་པ་སྨན་རྣོན་པོའི་མིག་སྨན་དང༌། སྨན་རྣོན་པོའི་ཕྱེ་མ་སྣ་ནས་རྔུབ་པའི་སྣ་སྨན་དང༌། ཉི་མ་ལྟ་བ་ནི་སྦྲིད་པ་དབྱུང་བའི་ཕྱིར་ཉི་མ་ལ་བལྟ་བ་སྟེ། འདི་དག་བྱ་བ་དང༌། དེ་ལ་སྣུམ་དང༌། དུགས་དག་ཀྱང་བསྟེན་ཅིང་གོམས་པར་བྱའོ། །སྐོམ་འགགས་པས་ན་ཁ་སྐམས་ཤིང༌། །ཡན་ལག་མི་བདེ་རྣ་མི་གསང༌། །མགོ་འཁོར་མྱོས་ཤིང་སྙིང་ནད་འབྱུང༌། །དེར་བསིལ་ཆོ་ག་ཐམས་ཅད་ཕན། །ཞེས་བྱ་བ་ནི། །སྐོམ་ལས་འགགས་ཤིང་བརྣགས་པས་ཁ་སྐམ་པ་ལ་སོགས་པའི་ནད་འབྱུང་བར་འགྱུར་རོ། །དེ་ལ་ཁ་སྐམ་པ་ནི་ཤས་ཆེར་ཁ་སྐམ་པར་གྱུར་པའོ། །ཡན་ལག་མི་བདེ་བ་ནི་རྐང་ལག་ནུས་ཞན་ཅིང་སྙོམ་པའོ། །རྣ་བ་མི་གསང་བ་ནི་རྣ་བ་གཉིས་ཀྱིས་སྒྲ་མི་ཐོས་པའོ། །མགོ་འཁོར་བ་ནི་འཁོར་ལོ་ལ་བསྐྱོན་པ་
ཙམ་དུ་སེམས་པའོ། །མྱོས་པ་ནི་མི་དྲན་པའོ། །སྙིང་ནད་ནི་སྙིང་ག་ན་བའོ། །དེར་ཞེས་བྱ་བ་ནི་ནད་དེ་རྣམས་ལའོ། །བསིལ་བའི་ཆོ་ག་ཐམས་ཅད་ཕན། །ཞེས་བྱ་བ་ནི། །བཟའ་བ་དང༌། བཏུང་བ་ལ་སོགས་པའི་ཆོ་ག་བྱ་བ་ཐམས་ཅད་བསིལ་བར་བྱས་པ་ཕན་ཞིང་གནོད་པ་སེལ་བ་ཡིན་ནོ། །བཀྲེས་པས་ལུས་ཞིག་ཡི་ག་འཆུས། །ལུས་སྙོམ་ཉམ་ཆུང་གཟེར་མགོ་འཁོར། །དེ་ལ་ཟས་ཡང་སྣུམ་དྲོ་དང༌། །ཆུང་བ་དག་ནི་སྦྱར་བར་བྱ། །ཞེས་བྱ་བ་ནི། ཤས་ཆེར་བཀྲེས་བ་བརྣགས་པ་ལས། ལུས་ཞིག་པ་ལ་སོགས་པའི་ནད་འབྱུང་བར་འགྱུར་རོ། །ལུས་ཞིག་པ་ནི་ལུས་བཅོམ་པ་སྙམ་སེམས་པའོ། །ཡི་ག་འཆུས་པ་ནི་ཡི་གར་མི་འོང་བའོ། །ལུས་སྙོམ་པ་ནི་གཟེངས་དམའ་བའོ། །ཉམ་ཆུང་བ་ནི་སྦེག་པའོ། །གཟེར་བ་ནི་ཟུག་ཅིང་ན་བའོ། །དེ་ལ་ཞེས་བྱ་བ་ནི་ནད་དེ་རྣམས་ལའོ། །ཟས་ཡང་བ་ནི་འབྲས་སཱ་ལུ་རྩ་སྣར་ལ་སོགས་པ་ཡང་བ་ལས་བྱས་པ་སྦྱིན་ཞིང་སྦྱང་བ་དང༌། དེ་བཞིན་དུ་སྣུམ་པ་སྟེ། མར་དང་ཤ་ལ་སོགས་པ་དང་ལྡན་པ་དང༌། དྲོ་བ་སྟེ་ཚ་ཞིང་ལེགས་པར་ཚོས་པ་དང༌། ཆུང་བ་སྟེ་རན་ཅིང་ཆུང་བའི་ཚད་ཙམ་སྦྱིན་ནོ། །གཉིད་བཀག་ཁོང་མྱོས་སྤྱི་བོ་མིག །ལྕི་ཞིང་སྙོམ་ལ་གླལ་གཉིད་འོང། །ལུས་ཞིག་སྙམ་སེམས་དེ་ལ་ནི། །གཉིད་ལོག་ལུས་མཉེ་ཕན་པ་ཡིན། །ཞེས་བྱ་བ་ནི། གཉིད་བཀག་ཅིང་བརྣགས་པས་ཁོང་མྱོས་པ་ལ་སོགས་པ་འབྱུང་བར་འགྱུར་རོ། །ཁོང་མྱོས་པ་ནི་མི་དྲན་པ་སྙམ་བྱེད་པའོ། །སྤྱི་པོ་དང་མིག་ལྕི་བ་ནི་ལྕིད་ཆེ་བ་སྙམ་སེམས་པའོ། །སྙོམ་པ་ནི་ཉམ་ཆུང་ཞིང་རྨྱ་བའོ། །གླལ་འོང་བ་ནི་ཡན་ལག་རྐྱོང་བ་དང་བཅས་པའི་ཁ་གདངས་པའོ། །ལུས་ཞིག་སྙམ་སེམས་པ་ནི་ལུས་བརྡུངས་པ་སྙམ་སེམས་པའོ། །དེ་ལ་ཞེས་པ་ནི་ནད་དེ་རྣམས་ལའོ། །གཉིད་ལོག་ཅེས་པ་ནི་བདེ་བར་གཉིད་ཀྱིས་ངོམས་པར་བྱས་པ་དང༌། དེ་བཞིན་དུ་ལུས་མཉེ་བ་སྟེ། བདེ་བར་བྱས་ནས་ལུས་ལེགས་པར་མཉེས་པ་སྟེ། དེ་དག་ཕན་ཞིང་འདོད་པར་བྱ་བ་ཡིན་ནོ། །ལུད་བ་འགགས་པས་དེ་འཕེལ་ཞིང༌། །དབུགས་མི་བདེ་ཞིང་ཡི་ག་འཆུས། །སྙིང་ནད་སྐེམ་བྱེད་སྐྱིགས་བུས་འདེབས། །དེར་ནི་ལུད་བསལ་ཆོ་ག་བྱ། །ཞེས་བྱ་བ་
ནི། ལུད་པ་འགགས་ཤིང་འགགས་པས་ལུད་པ་དེ་ཉིད་འཕེལ་བར་འགྱུར་བ་དང༌། དབུགས་མི་བདེ་བ་དང༌། ཡི་ག་འཆུས་པ་དང༌། སྙིང་ནད་འབྱུང་བར་འགྱུར་བ་དང༌། དེ་བཞིན་དུ་སྐེམ་བྱེད་ཅེས་བྱ་བ་གཅོད་ཆེན་པོ་དང༌། སྐྱིགས་པུས་འདེབས་པར་འགྱུར་རོ། །དེར་ནད་འདི་དག་ལ་ལུད་པ་བསལ་ཏེ། ལུད་པ་གསོ་བའི་སྐབས་ནས་བཤད་པའི་ཆོ་ག་ཤིན་ཏུ་འབད་དེ་བྱའོ། །ངལ་དུབ་དབུགས་ནི་བཀག་པ་ལས། །སྐྲན་དང་སྙིང་ནད་མྱོས་པར་འགྱུར། །དེ་ལ་ངལ་གསོ་བྱ་བ་དང༌། །རླུང་སེལ་བྱ་བའི་ཆོ་ག་ཕན། །ཞེས་བྱ་བ་ལ། ངལ་ཞིང་དུབ་པའི་དབུགས་ནི་རྩོལ་བ་ལ་སོགས་པ་བསྟེན་པ་ལ། གང་འཕྲལ་དུ་བྱུང་བའི་དབུགས་དེ་འགགས་པ་ལས། སྐྲན་དང་གློ་སྙིང་གི་ནད་དང༌། མྱོས་ཤིང་མི་དྲན་པ་འབྱུང་བར་འགྱུར་ལ། ནད་དེ་རྣམས་ལ་བདེ་བར་ངལ་གསོ་ཞིང་རྩོལ་བ་ལ་སོགས་པ་སྤངས་ལ། ལུས་མ་བསྐྱོད་པ་དང༌། དེ་བཞིན་དུ་རླུང་སེལ་བར་བྱ་བའི་ཆོ་ག་རླུང་གི་ནད་འཇོམས་པར་འགྱུར་བའི་གསོ་བའི་རིམ་པ་ཕན་པ་ཡིན་ནོ། །གླལ་བཀག་ན་ནི་སྦྲིད་འགགས་མཚུངས། །ཆོ་ག་ཐམས་ཅད་རླུང་འཇོམས་བྱ། །ཞེས་བྱ་བ་ལ། གླལ་འོང་བཀག་ཅིང་བརྣགས་པས། སྦྲིད་པ་འགགས་པ་དང་འདྲ་བའི་ནད་ཐམས་ཅད་དེ། ཀླད་པ་ན་བ་དང༌། དབང་པོ་མི་གསལ་བ་ལ་སོགས་པ་འབྱུང་བར་འགྱུར་རོ། །ནད་དེ་རྣམས་ལ་ནི་ཆོ་ག་ཐམས་ཅད་རླུང་འཇོམས་ཤིང་སེལ་བའི་ཆོ་ག་རྣམས་བྱའོ། །མཆིལ་མ་འགགས་པས་མགོ་སྙིང་ན། །གཉའ་རེངས་ཡི་ག་འཆུས་མགོ་འཁོར། །སྐྲན་བཅས་སྣ་ཆུ་འཛག་འགྱུར་དེར། །གཉིད་ལོག་ཆང་བཏུང་གཏམ་སྙན་ཕན། །ཞེས་བྱ་བ་ནི། །མཆིལ་མ་འགགས་པ་ལས་མགོ་ན་བ་ལ་སོགས་པ་དང༌། སྐྲན་དང་བཅས་ཤིང་སྣ་ཆུ་འཛག་པར་འགྱུར་རོ། །མགོ་ན་བ་ལ་སོགས་པ་ནི་བཤད་ཟིན་ཏོ། །དེ་ཞེས་བྱ་བ་ནི་ནད་དེ་རྣམས་ལ་གཉིད་ལོག་པ་དང༌། རྒུན་ཆུང་ལ་སོགས་པ་བཏུང་བ་དང༌། གཏམ་སྙན་པ་སྟེ། ཆོས་ལ་སོགས་པ་དང་འབྲལ་ཅིང་ཡིད་དགའ་བར་འགྱུར་བའི་གཏམ་རྣམས་མཉན་པ་ཕན་པ་ཡིན་ནོ། །སྐྱུག་བྲོ་བརྣགས་པས་མེ་དབལ་མཛེ། །འབྲས་དང་མིག་ནད་གཡན་པ་རིམས། །
སྐྱ་རྦབ་ལུད་པ་དབུགས་མི་བདེ། །དང་ག་རོ་སྟོད་མི་བདེ་སྐྲངས། །དེར་ཁ་བཀང་དབོ་དུད་སྨྱུང་གནས། །རྩུབ་ཟོས་དེ་ཉིད་སྐྱུགས་པ་དང༌། །རྩོལ་དང་མྱུར་བར་གཏར་ག་གདབ། །བཀྲུ་སྨན་གཏོང་བ་འང་པ་སྔགས་པ་ཡིན། །ཞེས་བྱ་བ་ནི། །སྐྱུགས་ཤིང་སློན་བྲོ་བ་འགགས་ཤིང་བརྣགས་པས་མེ་དབལ་ལ་སོགས་པ་ལུད་པ་དང་བཅས་པ་འབྱུང་བར་འགྱུར་རོ། །དེ་ལ་མེ་དབལ་ནི་ནད་གཞིའི་སྐབས་ནས་བཤད་པར་བྱའོ། །མཛེ་ནི་པགས་པའི་འགྱུར་པའོ། །འབྲས་ནི་ཤའི་སྟེང་དུ་འཁོར་ལོ་དམར་པོར་གྱུར་པའོ། །མིག་ནད་ལ་སོགས་པ་ནི་རང་རང་གི་ལེའུ་ལས་བཤད་པར་བྱའོ། །རོ་སྟོད་མི་བདེ་བ་ནི་ཁ་མ་གཏོགས་པ་གཞན་དག་ཏུ་སྔོན་པོ་ཐལ་ཐིལ་འབྱུང་བའོ། །དང་ག་མི་བདེ་བ་ནི་སྙིང་གར་འཚང་བ་སྙམ་བྱེད་པའོ། །ནད་དེ་རྣམས་ལ་ནི་ཁ་བཀང་བ་སྟེ། སྨན་བསྐོལ་བའི་ཁུ་བས་ཁ་བཀང་ཞིང་དབོ་བ་དང༌། དུད་པ་རྣོན་པོ་དང༌། སྨྱུང་བར་གནས་ཤིང་ཟན་བཅད་པ་དང༌། དེ་བཞིན་དུ་ཟན་རྩུབ་མོ་ཟོས་ལ་དེ་ཉིད་སྐྱུགས་པ་བྱས་པས་ཕན་པ་ཡིན་ནོ། །དེ་བཞིན་དུ་རྩོལ་བ་སྟེ། ལུས་དུབ་པར་བྱེད་པའི་ལས་རྣམས་དང༌། ཉུང་བ་ཉིད་དུ་གཏར་ག་གདབ་ཅིང་ཁྲག་དབྱུང་བ་དང༌། དེ་བཞིན་དུ་བཀྲུ་སྨན་བྱ་བ་སྟེ། ཨ་རུ་ར་དང༌། སྦྲང་རྩི་ལ་སོགས་པ་དང༌། ཁྲུས་བྱ་བ་བསྔགས་ཤིང་ཕན་པ་ཡིན་ནོ། །ཁུ་བ་བཀག་པས་དེ་འཛག་དང༌། །ཕོ་མཚན་ན་དང་འོར་ནད་རིམས། །སྙིང་ནད་ཆུ་འགགས་ལུས་ཞིག་དང༌། །རྡེའུ་འཕེལ་དང་མ་ནིང་འགྱུར། །དེ་ལ་ཁྱིམ་བྱའི་ཤ་དང་ཆང༌། །འབྲས་ཆན་མས་གཏོང་ལུས་བཅིང་དང༌། །ཆུ་སོའི་ནད་བསལ་ཏིལ་མར་བཙོས། །འོ་མ་བུད་མེད་གཞོན་བསྟེན་ཕན། །ཞེས་བྱ་བ་ནི་ཁུ་བ་འབྱུང་བ་བཀག་པ་ལས་ཁུ་བ་དེ་ཉིད་འཛག་ཅིང་འབྱུང་བར་འགྱུར་བ་དང༌། ཕོ་མཚན་ན་བར་འགྱུར་བ་དང༌། འོར་ནད་དང༌། རིམས་ནད་དང༌། སྙིང་ནད་འབྱུང་བ་དང༌། ཆུ་འགགས་པ་སྟེ། གཅིན་འགགས་པར་འགྱུར་བ་དང༌། ལུས་ན་ཞིང་ཞིག་པ་སྙམ་སེམས་པ་དང༌། རྡེའུ་འཕེལ་བ་སྟེ་གཅིན་འགགས་པའི་རྡེའུ་འཕེལ་བ་དང༌། མ་ནིང་སྟེ་བུད་མེད་རྣམས་ལ་ཉལ་མི་ནུས་ཤིང་དགའ་བ་མེད་པར་འགྱུར་རོ། །དེ་ལྟ་བུའི་ནད་དེ་ལ་ནི་ཁྱིམ་བྱའི་ཤ་ལ་སོགས་པ་བསྟེན་པར་བྱའོ། །
ཁྱིམ་བྱ་ནི་གྲགས་པར་ཟད་དོ། །ཆང་ནི་དངས་མ་འམ་སྐ་བའོ། །འབྲས་ཆན་ནི་འབྲས་དམར་པོ་ལ་སོགས་པའི་ཆན་ནོ། །མས་གཏོང་བ་ནི་བཀྲུ་སྨན་དྲག་པོ་མས་གཏོང་བའམ། འཇམ་རྩི་དང༌། མས་གཏོང་བ་གོང་མའི་དབྱེ་བས་རྣམ་པ་གསུམ་མོ། །ལུས་བཅིང་བ་ནི་སྨན་ཁུས་སྣོད་གང་བར་ཞུགས་ཤིང་དུགས་བྱ་བའོ། །ཆུ་སོའི་ནད་བསལ་བ་ལ་ནི་ཀུ་སྨན་ད་དང༌། གཟེ་མ་དང༌། དོང་གྲ་ལ་སོགས་པ་ཏིལ་མར་དང་བསྐོལ་བ་དང༌། འོ་མ་དང༌། བུད་མེད་གཞོན་ཞིང་སྡུག་པ་བསྟེན་ཞིང་ལོངས་སྤྱད་པ་ཕན་པ་ཡིན་ནོ། །ཤུགས་ནི་བཀག་དང་བཙིར་བ་ཡིས། །ནད་ནི་ཀུན་ཀྱང་འབྱུང་བར་འགྱུར། །ཤིན་ཏུ་མང་པོ་དེ་ཡི་ཕྱིར། །གསོད་དཔྱད་མང་པོ་འདིར་བཤད་དོ། །ཞེས་བྱ་བ་ནི། ཤུགས་བཀག་པ་དང་བཙིར་བ་ཡིས་ནི་ནད་ཀུན་ཀྱང་ཞེས་པ་ནད་མ་ལུས་པ་དག་ཀྱང་འབྱུང་ཞིང་སྐྱེ་བར་འགྱུར་ཏེ། ཤུགས་བཀག་པ་དག་ཏུ་ནད་གང་ཞིག་སྨྲས་པ་དེ་འབའ་ཞིག་འབྱུང་བ་ཙམ་དུ་ཟད་པ་མ་ཡིན་གྱི། རིམས་ལ་སོགས་པ་གང་ཡིན་པ་ཅི་ཡོད་པ་ཐམས་ཅད་སྐྱེ་བར་འགྱུར་རོ་ཞེས་བྱ་བ་ནི་ཀྱང་ཞེས་བྱ་བའི་སྒྲའི་དོན་ཡིན་ནོ། །གང་ཡང་ནད་ཤིན་ཏུ་མང་པོ་ཡོད་པ་དེའི་ཕྱིར། གསོ་ཞིང་བཅོས་པའི་ཆོ་གའི་དཔྱད་འདིར་བསྟན་ཅིང་བཤད་པ་ཡིན་ནོ། །དེ་ལས་ཕལ་ཆེར་རླུང་དུ་མ། །གང་ཕྱིར་འཁྲུགས་པར་གྱུར་པས་ན། །དེ་ཕྱིར་དེའི་ཟས་སྐོམ་དང་སྨན། །མཉམ་པར་འགྱུར་བ་སྦྱར་བར་བྱ། །ཞེས་བྱ་བ་ལ། དེ་ལས་ཞེས་པ་ནི་ཤུགས་འགགས་པ་དང་བཙིར་བ་ལས། །ཕལ་ཆེར་ཞེས་པ་མང་དུ། རླུང་དག་དུ་མར་ཞེས་པ་རྣམ་པ་དུ་མའི་ཚུལ་གྱིས་རབ་ཏུ་འཁྲུགས་པར་འགྱུར་ཞིང༌། རྣམ་པར་ལྡང་བར་འགྱུར་བ་གང་ཡིན་པ་དེའི་ཕྱིར། རླུང་དེས་ཟས་དང་སྐོམ་དང་སྨན་མཉམ་པར་འགྱུར་བ་ཞེས་པ། རླུང་སྙོམས་པར་འགྱུར་ཞིང་ལམ་ལོག་བ་ན་གནས་པར་རང་གི་མལ་ལ་གནས་བར་བྱེད་ཅིང༌། གནོད་པ་སེལ་བར་འགྱུར་བ་དེ་སྦྱར་བར་བྱ་ཞིང་སྤྱད་པར་བྱའོ། །འདི་དང་གཞན་དུ་ཕན་འདོད་པས། །འདོད་ཆེན་ཕྲག་དོག་ཞེ་སྡང་དང༌། །སེར་སྣ་འདོད་ཆགས་ལ་སོགས་ཤུགས། །རྟག་བཀག་དབང་པོ་ཐུལ་བར་བྱ། །ཞེས་བྱ་བ་ལ། ཡང་སྐྱེས་བུ་དབང་པོ་ཐུལ་ཞིང་འདི་དང་གཞན་ལ་
ཕན་པར་འདོད་པས། ཡང་འདོད་ཆེན་ལ་སོགས་པ་ལ་ཞུགས་པའི་ཤུགས་འདི་དག་རྟག་པར་དུས་ཐམས་ཅད་དུ་དགག་པར་བྱའོ། །དེ་ལ་འདོད་ཆེན་ནི་གཞན་གྱི་རྫས་རྣམས་ལ་རེ་ཞིང་འདོད་པའོ། །ཕྲག་དོག་ནི་གཞན་གྱི་རྫས་ཕུན་སུམ་ཚོགས་པ་ལ་མི་བཟོད་པའོ། །ཞེ་སྡང་ནི་སྲོག་ཆགས་རྣམས་ལ་རབ་ཏུ་སྡང་བའོ། །སེར་སྣ་ཅན་སེར་སྣ་ཉིད་དོ། །འདོད་ཆགས་ནི་བུད་མེད་ལ་སོགས་པ་ལ་ཞེན་པའོ། །སོགས་པའི་སྒྲས་ནི་འཇིགས་པ་དང་ཁྲོ་བ་དང༌། གཡོ་སྒྱུ་དང༌། དྲེགས་པ་ལ་སོགས་པ་བསྡུ་སྟེ་དེ་དག་གི་ཤུགས་རྣམ་པར་བཀག་ཅིང་དབང་པོ་ཐུལ་བའི་རང་བཞིན་ཅན་ཉིད་དུ་བྱའོ། །དྲི་མ་རྣམས་ནི་སྦྱང་བའི་ཕྱིར། །ཅི་བཞིན་དུས་སུ་ནན་ཏན་བྱ། །དེ་ནི་ཤིན་ཏུ་སོགས་གྱུར་ན། །ཤས་ཆེར་འཁྲུགས་པས་སྲོག་རྒྱུན་གཅོད། །ཅེས་བྱ་བ་ནི་རླུང་དང་མཁྲིས་པ་དང་བད་ཀན་དང༌། བཤང་གཅི་ལ་སོགས་པའི་དྲི་མ་རྣམས་སྦྱང་བར་བྱ་ཞིང། རྣམ་པར་བསལ་བར་བྱ་བའི་འབད་པས་ནན་ཏན་དུ་བྱའོ། །གང་གི་ཚེ་ཞེ་ན། ཇི་བཞིན་དུས་སུ་ཞེས་བྱ་བ་སྟེ། དུས་ལས་མ་ཡོལ་བར་རོ། །དེ་ཅིའི་ཕྱིར་ཞེ་ན། དྲི་མ་དེ་རྣམས་ནི་ཤིན་ཏུ་སོགས་ཤིང་རང་གི་གནས་སུ་འཕེལ་བར་གྱུར་ན། ལན་འགའ་ཞིག་ན་ཟས་དང་སྤྱོད་ལམ་གྱི་ཚུལ་གྱིས་འཁྲུགས་པར་འགྱུར་བའི་རྒྱུ་ལ་བརྟེན་ནས་གང་གི་ཚེ་ཤས་ཆེར་འཁྲུགས་ཤིང་དཀྱེལ་དུ་གྱུར་པ་དེའི་ཚེ། དྲི་མ་འཁྲུགས་པར་གྱུར་པས་སྲོག་གི་རྒྱུན་གཅོད་པར་འགྱུར་ཞིང་ཚེ་འཕྲོག་པར་བྱེད་པར་འགྱུར་རོ། །དེ་བས་ན་དེ་རྣམས་སྦྱང་བ་ཉིད་དུ་བྱའོ། །འདི་ལྟར་ཤིན་ཏུ་བསགས་པའི་ཟིལ་གྱིས་མནན་པའི་ཐབས་ཀྱི་གཙོ་བོ་ནི་སྦྱང་བའི་ཕྱིར་ཏེ། གང་གི་ཕྱིར་དེས་ཤིན་ཏུ་མྱུར་བར་འགྱུར་ལ། ཕལ་ཆེར་སོགས་པ་དག་ལ་ནི་སྨྱུང་བ་དང༌། གཞུ་བར་བྱས་པ་ཡུན་རིང་པོར་བྱས་བས་བསལ་ཏེ། སྨྱུང་བ་དང་གཞུ་བར་བྱས་པ་དག །དེ་བསལ་བའི་ཆོ་གའི་བཙོ་བོ་དག་ཡིན་ནོ། །དེ་ལྟར་ན་ལ་ལར་ནི་སྦྱང་བ་གཙོ་བོ་ཡིན་ལ། ལ་ལར་ནི་སྨྱུང་བ་དང་གཞུ་བ་བྱ་བ་དག་གོ །ལ་ལར་ནི་སྨྱུང་བ་ཉིད་ནད་ཟིལ་གྱིས་གནོན་པའི་ཆོ་གའི་གཙོ་བོ་ཡིན་ལ། གང་གི་ཕྱིར་དེ་ལྟར་ཡིན་པ་དེས་ན། གཞུང་འདི་བརྩམས་པར་རིགས་པ་ཡིན་ནོ། །གནོད་པ་
སྨྱུང་དང་གཞུ་བྱས་པས། །བསལ་ཡང་སླར་ནི་ལྡང་སྲིད་ཀྱི། །གང་ཞིག་ལགས་པར་སྦྱངས་པ་དག །དེ་ནི་སླར་ཡང་འབྱུང་མི་འགྱུར། །ཞེས་བྱ་བ་ནི། རླུང་ལ་སོགས་པའི་གནོད་པ་རྣམས་སྨྱུང་བ་བྱ་བ་དང༌། གཞུ་བ་བྱས་པས་བསལ་ཞིང་རྒྱལ་བར་བྱས་སུ་ཟིན་ཀྱང༌། ནམ་ཞིག་ན་སླར་སྡང་བ་གྱུར་བ་སྲིད་ཀྱི། ཡང་གནོད་པ་གང་ཞིག་སློན་སྨན་ལ་སོགས་པས་དག་པ་འགྱུར་ཞིང༌། ལེགས་པར་སྦྱངས་པའི་གནོད་པ་དག་པའི་གཙང་བས་དག་པ་དེ་རྣམས་ནི་སླར་ཡང་འབྱུང་ཞིང་སྐྱེ་བར་མི་འགྱུར་ཏེ། རྩ་བ་ནས་བཅད་པ་ཡིན་པའི་ཕྱིར། དེ་རྣམས་སླར་སྐྱེ་བར་མི་འགྱུར་རོ། །དེ་པས་ན་སྨྱུང་བར་བྱས་པ་དང༌། གཞུ་བར་བྱ་བ་བྱས་སུ་ཟིན་ཀྱང༌། སྦྱང་བ་བྱ་དགོས་པ་ཡིན་ན། མ་བྱས་པ་ལ་དེའི་ཚེ་བརྩམ་པ་བྱ་དགོས་པར་ལྟ་སྨོས་ཀྱང་ཅི་དགོས། དེ་ལྟར་སྨྱུང་བ་དང་སྨིན་ཅིང་གཞུ་བར་བྱས་པ་དག་ལ་ཡང་སྤྱད་བའི་བརྩམ་བ་བྱ་དགོས་པ་ཡིན་ནོ། །སྦྱང་བའི་གནས་དག་ལ་ཡང་ཡུལ་དང་དུས་དང༌། ལུས་ཀྱི་སྟོབས་ལ་སོགས་པ་ལས་དཔགས་ཏེ། སྨྱུང་བ་དང་སྨིན་པར་བྱ་བ་རླུང་གིས་གནོད་པར་མ་གྱུར་པའི་ཚུལ་གྱིས་བརྩམ་པ་བྱ་དགོས་སོ། །དུས་ཤེས་པ་ཡིས་དེ་ཕན་ཆད། །རིམ་པ་བཞིན་དུ་ཅི་རིགས་པར། །བཅུད་ཀྱིས་ལེན་རྣམས་གྲུབ་པ་དང༌། རོ་ཙའི་སྦྱོར་བ་སྦྱར་བར་བྱ། །ཞེས་པ་ནི། དུས་ཤེས་པའི་མཁས་པས་སྦྱར་བར་བྱ་བ་སྟེ། དུས་ལ་སོགས་པ་གང་གིས་ཤེས་པ་དེ་ནི་དུས་ཤེས་པ་ཡིན་གྱི། དུས་ཙམ་ནི་མ་ཡིན་ནོ། །དེ་བས་ན་ཡུལ་དང༌། ལུས་ཀྱི་སྟོབས་དང༌། ཟས་དང༌། ཁུ་བཅུད་དང༌། རང་བཞིན་དང༌། སྙིང་སྟོབས་ཀྱི་ཚུལ་གང་གིས་ཤེས་པ་དེས། དེ་པན་ཆང་ཅེས་བྱ་བ་སྦྱང་བ་བྱས་པའི་རྗེས་ཐོགས་ལ། རིམ་པ་བཞིན་དུ་ཞེས་བྱ་བ། གོ་རིམས་མ་འཆོལ་བར་ཐུག་པ་ལ་སོགས་པའི་གོ་རིམས་ཀྱིས་ཞག་བདུན་གྱི་བར་དུ་བྱས་ནས། དེའི་འོག་ཏུ་ལུས་ཀྱི་སྟོབས་མཐར་ཕྱིན་པ་ཐོབ་པ་དང༌། ཐ་མལ་པའི་ཁ་ཟས་ཟོས་ནས། དེའི་འོག་ཏུ་ཅི་རིགས་པར་ཞེས་པ། རིགས་པ་མི་འགལ་བར་བྱ་བ་སྟེ། བཅུད་ཀྱིས་ལེན་འདི་ནི་རླུང་གི་རང་བཞིན་ཅན་ནོ། །འདི་ནི་བད་ཀན་གྱི་རང་བཞིན་ཅན་ནོ། །འདི་ནི་བད་ཀན་གྱི་རང་བཞིན་ཅན་ནོ་ཞེས་བྱ་བ་དང༌། བཅུད་ཀྱིས་ལེན་དེ་ཡང་གྲུབ་
པ་སྟེ། གྲུབ་པའི་དྲང་སྲོང་དག་གིས་བཤད་པ་ཡིན་གྱི། རང་བཟོའི་ཅི་དགའ་བས་ཁུ་བཅུད་དང་ཡོན་ཏན་དང༌། ནུས་པའི་མཐུ་ལས་དཔགས་ནས་བློ་དང་ལྡན་པའི་སྨན་བ་རང་ཉིད་ཀྱིས། ཡོངས་སུ་བརྟགས་པ་ནི་མ་ཡིན་ནོ། །ཡང་ན་གྲུབ་པ་ཞེས་བྱ་བ་མང་པོའི་མངོན་སུམ་དུ་གྱུར་པས་ཡིད་ཆེས་པ་སྟེ། ཚངས་པ་དང༌། གནས་འཇོག་དང༌། རི་བྱི་དང་འཕོ་བྱེད་ཀྱིས་སྦྱར་ཞིང་ལོངས་སྤྱོད་པ་དག་གོ །རོ་ཙའི་སྦྱོར་བ་ཞེས་བྱ་བ་ནི་བུད་མེད་ལ་ཕོད་པར་བྱ་བ་གྲུབ་པ་རྣམས་ཏེ་དེ་དག་སྦྱར་བར་བྱའོ། །སྨན་རྣམས་ཀྱིས་ནི་ལུས་སྦྱངས་ཕན། །སཱ་ལུ་དྲུག་ཅུ་པ་དང་གྲོ། །མུངྒ་ཤ་དང་མར་ལ་སོགས། །ཕན་པའི་ཟས་ཀྱིས་ལུས་བརྟ་ཞིང༌། །ཡིད་འོང་དྲོད་སྐྱེད་སྨན་སྦྱར་བ། །ཡི་ག་འབྱེ་ཞིང་འཇུ་བྱེད་དང༌། །བསྐུ་ཞིང་དྲིལ་ཕྱིས་ཁྲུས་བྱས་དང༌། །དྲག་པོ་འཇམ་རྩི་མས་གཏོང་བརྟ། །ཞེས་བྱ་བ་ནི། སྐྱེས་བུ་སྨན་གྱིས་ལུས་སྦྱངས་ཤིང་སྐྱུག་སྨན་ལ་སོགས་པས་ལུས་ཀྱི་ཉམས་དམད་པ་ལ། ལུས་བརྟ་བར་བྱ་བའི་ཕྱིར། སཱ་ལུ་རྩ་སྣར་ལ་སོགས་པའི་ཟས་རྣམས་དང༌། བསྐུ་བ་དང་བཅས་པ་ལ་སོགས་པས་རིམ་གྱིས་ལུས་བརྟ་བར་བྱའི་འཕྲལ་དུ་ནི་མ་ཡིན་ནོ། །ཕན་པ་ཞེས་བྱ་བ་ནི་ལུས་ལ་ཕན་པར་འགྱུར་བའོ། །ཡིད་དུ་འོང་བ་ཡང་མ་ཡིན་ལ། །དྲོད་སྐྱེད་པའི་སྨན་ཡང་ཡིན་པས་ན་ཡིད་འོང་དྲོད་སྐྱེད་སྨན་ཏེ། སྒེ་གཤེར་དང༌། པི་པི་ལིང་དང༌། ན་ལེ་ཤམ་དང༌། སེའུ་འབྲུ་དང༌། བི་ཛ་པུ་ར་དང༌། དར་བ་རྙིང་པ་དང༌། ལྕེ་མྱང་ཚལ་སོགས་པ་སྟེ། དེ་དང་སྦྱར་ཞིང་འདྲེས་པའི་ཁ་ཟས་གང་ཡིན་པ་དེ་ནི་སྦྱོར་བ་དེ་ལས་ཡིག་འབྱེ་ཞིང་འཇུ་བར་བྱེད་ལ། ཟས་འདོད་ཅིང་སྨིན་པར་བྱེད་ནུས་པ་སྟེ་བརྟ་བ་དང༌། ལུས་བསྐུ་བ་ལ་སོགས་པ་ནི་གྲགས་པར་ཟད་དོ། །དྲག་པོ་ནི་བཀྲུ་སྨན་དྲག་པོ་མས་གཏོང་བའོ། །འཇམ་རྩི་གཏོང་བ་ནི་སྣུམ་གྱི་སྦྱོར་བ་མས་གཏོང་བ་སྟེ། དེ་དག་གིས་བརྟ་བར་བྱའོ། །དེས་ནི་མེ་ཀུན་སྟོབས་ལྡན་ཞིང༌། །བློ་མདོག་དབང་པོ་དྲི་མ་མེད། །དེ་བཞིན་ཚེ་རིང་རོ་ཙེ་དང༌། །དཔལ་དང་གཟི་མདངས་ཐོབ་པར་འགྱུར། །ཞེས་བྱ་བ་ནི་དེ་ལྟར་རྣམ་པ་དེ་དག་བྱས་ཤིང་བཤད་མ་ཐག་བའི་བྱ་བ་རྫོགས་པ་དེས་ན། སྐྱེས་བུ་དེ་དཔལ་དང་གཟི་མདངས་ཐོབ་པར་འགྱུར་རོ། །དེ་བཞིན་དུ་མེ་
ཀུན་ཞེས་པ། ལུས་ཟུངས་རྣམས་ཀྱི་མེའི་དྲོད་ཀྱི་མེ་ཐམས་ཅད་དང༌། འབྱུང་བའི་མེ་རྣམས་དང༌། ཕོ་བའི་མེ་དྲོད་སྟོབས་དང་ལྡན་ཞིང་གསལ་ལ་སྨིན་བར་བྱེད་པའི་ནུས་པ་དང་ལྡན་པར་འགྱུར་ཏེ། དེ་ལྟར་ན་མེ་བཅུ་གསུམ་སྨིན་པའི་ནུས་པ་སྐྱེ་བར་འགྱུར་རོ། །དེ་བཞིན་དུ་བློ་མདོག་དབང་པོ་དྲི་མ་མེད། །ཅེས་བྱ་བ་སྟེ། བློ་གྲོས་དང༌། ཁ་དོག་དང༌། མིག་ལ་སོགས་པའི་དབང་པོ་རྣམས་དྲི་མ་མེད་ཅིང་དང་བར་འགྱུར་བ་དང༌། དེ་བཞིན་དུ་ཚེ་རིང་བ་སྟེ། ལྷག་པར་འཚོ་བར་འགྱུར་བ་དང༌། དེ་བཞིན་དུ་རོ་ཙ་བ་ཞེས་པ་ཁུ་བ་རྣམ་པར་འཕེལ་བས། བུད་མེད་ལ་ཕོད་པར་འགྱུར་བ་དང༌། དཔལ་དང་གཟི་མདངས་ཐོབ་པར་འགྱུར་རོ། །འབྱུང་པོ་དུག་དང་རླུང་དང་མེ། །མཚོན་རྨས་ཆག་གྲུགས་སོགས་བྱུང་དང༌། །འདོད་ཆགས་ཞེ་སྡང་འཇིགས་སོགས་གང༌། །དེ་ནི་གློ་བུར་ནད་ཅེས་བྱ། །ཞེས་བྱ་བ་ནི་ནད་འདི་དག་ནི་གློ་བུར་བ་ཞེས་བྱ་སྟེ། དེ་ཡང་གང་འབྱུང་པོས་མཐོང་ཞིང་ཟིན་པ་དང༌། དུག་གིས་རེག་ཅིང་ཟིན་པ་དང༌། གནོད་པའི་རླུང་དང༌། མེ་དང་མཚོན་གྱིས་རྨས་པ་དང༌། རྡོ་ལ་སོགས་པས་ཡན་ལག་ཆག་གྲུགས་སུ་གྱུར་ཅིང༌། ཉེ་བར་བཅོམ་པ་ལ་སོགས་པ་ལས་བྱུང་བར་གྱུར་པ་གང་ཡིན་པ་དང༌། དེ་བཞིན་དུ་འདོད་ཆགས་དང༌། ཞེ་སྡང་དང༌། འཇིགས་པ་དང༌། ཁོང་ཁྲོ་བ་དང༌། མི་བཟོད་པ་དང༌། བརྐམ་ཆགས་ལ་སོགས་པ་ཡིད་ཀྱི་ནད་དུ་གྱུར་པ་གང་དག་ཡིན་པ་སྟེ། དེ་དག་ཀྱང་གློ་བུར་བའི་ནད་ཅེས་བྱ་བ་ཡིན་པར་ཤེས་པར་བྱའོ། །ཤེས་རབ་ཉེས་པ་སྤོང་བ་དང༌། །དབང་པོ་ཉེར་ཞི་དྲན་པ་དང༌། །ཡུལ་དུས་བདག་ཉིད་ཤེས་པ་དང༌། །དམ་པའི་སྤྱོད་པའི་རྗེས་འཇུག་པ། །ལྷན་ཅིག་སྐྱེས་དང་གློ་བུར་ནད། །མདོར་ན་མ་སྐྱེས་མི་འབྱུང་དང༌། །སྐྱེས་པ་ཞི་བར་བྱ་བའི་ཕྱིར། །ཆོ་ག་འདི་ནི་བསྟེན་པ་ཡིན། །ཞེས་བྱ་བ་ལ། ཤེས་རབ་ཀྱི་ཉེས་པ་ཡིན་པས་ན། ཤེས་རབ་ཉེས་པ་སྟེ། དམ་པ་མ་ཡིན་པའི་སྤྱོད་པ་བྱེད་ཅིང༌། བཀག་པ་རྣམས་ལ་སྤྱོད་པ་སྟེ། ལྷའི་མིག་དང་ལྡན་པའི་སློབ་དཔོན་རྣམས་ཀྱིས་རྣམ་པར་བཀག་པའི་ཡུལ་དག་སྟེན་པར་བྱེད་ཅིང༌། བསྒོ་ཞིང་བསྟན་པའི་དོན་མི་བྱེད་པ་དེ་ལྟ་བུའི་ཤེས་རབ་ཀྱི་ཉེས་པ་ཡིན་ཏེ། མདོར་ན་ལུས་དང་ངག་དང་ཡིད་
ཀྱི་ཉེས་པ་སྤྱོད་པར་བྱེད་བའོ། །དེ་སྤང་པ་ནི་མི་བྱེད་པར་གཏོང་ཞིང་སྤང་པའོ། །དབང་པོ་ཉེ་བར་ཞི་བ་ནི་མིག་ལ་སོགས་པའི་དབང་པོ་རྣམས་མི་དགེ་བའི་རང་བཞིན་ཅན་གྱི་ཡུལ་ལ་འཇུག་པ་ལས་ལྡོག་ཅིང་ཉེ་བར་ཞི་བའམ། ཡང་ན་སྒྲ་ལ་སོགས་པའི་ཡུལ་ལ་ཤིན་ཏུ་ཞེན་པ་ལས་ཡང་དག་པར་སྡོམ་པའོ། །དྲན་པ་ནི་སྔར་རྗེས་སུ་མྱོང་བའི་དོན་ཡིད་ལ་སེམས་པ་སྟེ། དེ་ཡང་དགེ་བ་དང་མི་དགེ་བའི་ཚུལ་དྲན་པར་བྱས་ནས། ལེན་པ་དང་སྤོང་བར་བྱེད་པ་སྟེ། ཉིན་དང་མཚན་དུ་ཞེས་བྱ་བ་ལ་སོགས་པ་རྟག་ཏུ་སྤྱོད་པའི་ཆོ་ག་ལས་བཤད་པའོ། །དེ་བཞིན་དུ་ཡུལ་དུས་བདག་ཉིད་རྣམ་པར་ཤེས་པ་ཞེས་བྱ་བ་འདི། །ཅི་ཡུལ་འདི་སྐབས་དགོན་དུང་ཅན་ཡིན་ནམ། རླན་ཅན་ཡིན་ནམ། འོན་ཏེ་ཆ་མཉམ་པ་ཡིན། ཅི་རླུང་གི་རང་བཞིན་ཅན་ནམ། འོན་ཏེ་མཁྲིས་པའི་རང་བཞིན་ཅན་ནམ། ཡང་ན་བད་ཀན་གྱི་རང་བཞིན་ཅན་ཡིན་ཞེས་ཤེས་པར་བྱ་བ་དང༌། དེ་བཞིན་དུ་དུས་ཞེས་པ་སྟེ། ཅི་འདི་ནི་དགུན་སྟོད་ཡིན་ནམ། འོན་ཏེ་དགུན་སྨད་ལ་སོགས་པ་གཞན་དག་ཡིན་ཞེས་པ་དང༌། འདི་ནི་སྐད་ཅིག་ལ་སོགས་པའི་དུས་ཡིན་ནོ། །ཞེས་པ་དང༌། འདིར་ཕོངས་པར་འགྱུར་བ་དག་ཀྱང་གཟུང་བར་བྱའོ། །བདག་ཅེས་པ་ནི་རྣམ་པ་གཉིས་ཏེ། ངའི་རང་བཞིན་ནི་འདི་ཡིན་ཏེ། འདི་ལ་ནི་ངས་བརྟེན་པར་བྱའོ། །འདི་ལ་ནི་བརྟེན་པར་མི་བྱའོ་ཞེས་བྱ་བ་ལ་སོགས་པ་བདག་ཉིད་ཤེས་པ་ནི་གཅིག་ཡིན་ནོ། །གཉིས་པ་ནི་མྱ་ངན་ལས་འདས་པའི་རང་བཞིན་ཅན་ཡིན་ཞེས་པ་སྟེ། དེ་མེད་པར་འདོད་ཆགས་ལ་སོགས་པའི་ནད་གཞན་དག་གིས་བསལ་བར་བྱ་བར་མི་ནུས་པས་དེ་ཤེས་པར་བྱའོ། །དམ་པའི་སྤྱོད་པའི་རྗེས་སུ་འཇུག་པ་ཞེས་པ་ནི། དམ་པ་རྣམས་ཀྱི་སྤྱོད་པར་གྱུར་པ་གང་ཡིན་པ་དེའི་རྗེས་སུ་འཇུག་ཅིང་སློབ་ལ་ཉམས་སུ་ལེན་པའོ། །ལྷན་ཅིག་སྐྱེས་པ་ལ་ནི་ལུས་ལས་བྱུང་ཞིང༌། ལྷན་ཅིག་སྐྱེས་པའོ། །གློ་བུར་བ་ནི་འབྱུང་པོ་ལ་སོགས་པ་དང་འབྲེལ་པ་ལས་སྐྱེས་པའོ། །དེ་ལྟ་བུའི་ནད་ཀྱི་རྣམ་པར་འགྱུར་བ་དེས་མ་སྐྱེས་པ་རྣམས་མི་འབྱུང་བར་བྱ་བའི་ཕྱིར་དང༌། དེ་བཞིན་དུ་ལྷན་ཅིག་སྐྱེས་པ་དང༌། གློ་བུར་བའི་ནད་སྐྱེས་པ་རྣམས་ཞི་བར་བྱ་བའི་ཕྱིར། ཆོ་ག་འདི་ཉིད་མདོར་
བསྡུས་ནས་སློབ་དཔོན་གྱིས་བསྟན་ཅིང་བཤད་པ་ཡིན་ནོ། །དེ་བས་ན། དྲི་མ་རྣམས་ནི་སྦྱང་བའི་ཕྱིར། །ཅི་བཞིན་དུས་སུ་ནན་ཏན་བྱ། །ཞེས་བསྟན་པ་ཡིན་ནོ། །འོ་ན་དུས་གང་ཞིག་ཡིན་ཞེ་ན། དེའི་ཕྱིར་འདི་སྨས་པ་ཡིན་ཏེ། གྲང་བ་ལས་བྱུང་ཉེས་ཚོགས་དཔྱིད་ཀྱི་ཚེ། །རྣམ་བསལ་སོ་ག་ལས་བྱུང་དབྱར་དུས་ན། །དབྱར་བསགས་སྤྲིན་བྲལ་དུས་སུ་ལེགས་སྦྱངས་ན། །དུས་བྱུང་ནད་ནི་ནམ་ཡང་འབྱུང་མི་འགྱུར། །ཞེས་བྱ་བ་ལ། གྲང་བ་ཞེས་བྱ་བའི་སྒྲ་ནི་དགུན་སྟོད་དང༌། དགུན་སྨད་གཉི་ག་གཟུང་ངོ༌། །ཉེས་བ་རྣམས་ཀྱི་ཚོགས་ཡིན་པས་ན་ཉེས་ཚོགས་ཏེ། དེ་ལྟར་གྲང་བ་ལས་བྱུང་ཞིང་སྐྱེས་པའི་ཉེས་བའི་ཚོགས་གང་ཡིན་པ་དེ་ནི་དཔྱིད་ཀྱི་ཚེ་རྣམ་པར་བསལ་ཞིང་བསལ་བར་བྱའོ། །དེ་བཞིན་དུ་སོ་གའི་ཚོ་བསགས་པ་ལས་བྱུང་བའི་ཉེས་པའི་ཚོགས་ནི་དབྱར་གྱི་དུས་ན་རྣམ་པར་སྦྱང་བར་བྱའོ། །དེ་བཞིན་དུ་དབྱར་བསགས་པའི་ཉེས་པ་རྣམས་ནི་སྤྲིན་བྲལ་དུས་ཏེ། སྟོན་གྱི་དུས་སུ་མྱུར་ཞིང་རིངས་པ་གསོ་དཔྱད་ཀྱི་བསྟན་བཅོས་ལས་བྱུང་བའི་ཆོ་ག་བཞིན་དུ་ལེགས་པར་སྦྱངས་ཤིང་རྣམ་པར་བསལ་ན། དུས་ལས་བྱུང་བའི་ནད་སྐྱེས་བུ་དེ་ལ་ནམ་ཡང་འབྱུང་ཞིང་སྐྱེ་བར་མི་འགྱུར་རོ། །དཔྱིད་ཀྱི་ཚེ་རྣམ་བསལ་ཞེས་སྨོས་པ་འདིར་ནི་དཔྱིད་ཟླ་འབྲིང་པོ་མགོ་ཟུག་པ་ཁོ་ནའི་དུས་སུ་སྦྱང་བར་བྱ་བ་ཡིན་པར་ཁོང་དུ་ཆུད་པར་བྱ་སྟེ། དེ་ལྟར་མ་བྱས་ན་བཟློག་དཀའ་བའི་ཉེས་པ་ཡོད་དེ། དུས་གཉིས་པོ་འདི་ལ་བསགས་པའི་ཉེས་པའི་ཚོགས་སྦྱང་བར་བྱ་བའི་དུས་ལ་བབ་པ་དག་ནི་དུས་གཞན་དག་ལ་བསྡད་པ་ན་བསལ་བར་དཀའ་བ་ཡིན་པའི་ཕྱིར་རོ། །སོ་ག་ལས་བྱུང་དབྱར་དུས་ན། །ཞེས་བྱ་བའི་སྐབས་འདིར་ཡང་དབྱར་གྱི་དུས་རྩོམ་པ་ཉིད་ན་ཡིན་པར་བྱ་ཞིང༌། ཇི་སྲིད་གྲང་བ་དང༌། རླུང་དང༌། བ་མོ་དང༌། ཆར་གྱི་རྒྱུན་དང༌། འདྲེས་པའི་དུས་སུམ་ཕྱིན་པར་བྱ་བ་ཡིན་ནོ། །དབྱར་བསགས་སྤྲིན་བྲལ་དུས་ཞེས་བྱ་བ་འདིས། དུས་གང་གི་ཚེ་སྤྲིན་དང་ཤིན་ཏུ་བྲལ་ཞིང༌། ནམ་མཁའ་དང་བར་གྱུར་པ་སྟེ། སྟོན་ཟླ་གཉིས་ཀྱི་ཕྱི་མའི་ཆ། སྟོན་ཟླ་ཐ་ཆུངས་ཡིན་པར་ཤེས་བར་བྱའི་མགོ་རྩོམ་པ་ལ་ནི་མི་བཟུང་ངོ༌། །དེ་སྐད་དུ་གཞུང་རྩོམ་པར་བྱེད་པས་ཀྱང༌། དབྱར་དང་སྟོན་ཟླ་
ཆུངས་དཔྱིད་འབྲིང༌། །ཟླ་བ་རིམ་བཞིན་ཐུན་མོང་ཡིན། །སོ་ག་དབྱར་དགུན་ལ་བསགས་པའི། །རླུང་ལ་སོགས་པ་མྱུར་དུ་བསལ། །ཞེས་བཤད་པ་ཡིན་ནོ། །ཇི་ལྟར་ན་མི་རྣམས་རྟག་ཏུ་ནད་མེད་པར་འགྱུར་བ་དེ་བསྟན་པའི་ཕྱིར་སྨྲས་པ་ནི། རྟག་ཏུ་ཕན་པའི་ཟས་དང་སྤྱོད་ལམ་བསྟེན། །བརྟགས་ཏེ་བྱེད་ཅིང་ཡུལ་རྣམས་ལ་མི་ཆགས། །གཏོང་ལྡན་སེམས་སྙོམས་བདེན་བརྩོན་བཟོད་དང་ལྡན། །ཉམས་ལྡན་སྟེན་པར་བྱེད་ན་ནད་མེད་གྱུར། །ཞེས་བྱ་བ་ནི་ཡོན་ཏན་དི་ལྟ་བུ་དང་ལྡན་པའི་སྐྱེས་བུ་ནི་ནད་མེད་ཅིང་ཐ་མལ་པར་བདེ་བར་གནས་པར་འགྱུར་རོ། །དེ་ཡང་གང་ཞིག་ཅེ་ན། གང་རྟག་ཏུ་ཞེས་པ་དུས་ཐམས་ཅད་དུ་ཕན་ཞིང་འཕྲོད་པའི་ཟས་དང༌། སྤྱོད་ལམ་བསྟེན་ཞིང་གོམས་པར་བྱེད་བ་སྟེ། ཕན་པའི་ཟས་ནི་འོག་ནས་བཤད་པ་དང༌། དུས་སུ་སྤྱད་པའི་ལེའུ་ལས་བཤད་པར་བྱའོ། །སྤྱོད་ལམ་ནི་ལུས་དང་ངག་དང་ཡིད་ཀྱི་ཀུན་ཏུ་སྤྱོད་པ་སྟེ། དེ་ཡང་ཉིན་རེ་བརྟག་པར་སྤྱད་པའི་ལེའུ་ལས་བཤད་པ་ཡིན་ཏེ། དེ་དག་ལ་བརྟེན་པ་དང༌། དེ་བཞིན་དུ་བརྟགས་ཏེ་བྱེད་ཅིང་ཞེས་བྱ་བ་སྟེ། གང་དང་གང་བྱེད་པ་དེ་དང་དེ་སྤང་བ་དང་བླང་བར་བྱ་བ་ལེགས་པར་བརྟགས་ཤིང་བྱེད་དེ། འདི་བྱས་ན་ནི་རྫོགས་པར་འགྱུར་ལ། འདི་བྱས་ན་ནི་མི་རྫོགས་ཤིང་མཐར་ཕྱིན་པར་མི་འགྱུར་རོ་ཞེས་པ་དེ་ལྟར་ཤེས་པར་བྱས་ནས། དགེ་བ་བྱེད་ཅིང་མི་དགེ་བ་སྤོང་བར་བྱེད་པ་དང༌། དེ་བཞིན་དུ་ཡུལ་རྣམས་ལ་མི་ཆགས་ཞེས་པ་སྟེ། གཟུགས་དང༌། སྒྲ་དང༌། དྲི་ལ་སོགས་པ་ལ་སེམས་ཆགས་པ་མེད་པ་དང༌། གཏོང་ལྡན་ཞེས་པ་གཏོང་ཞིང་སྦྱིན་པར་བྱེད་པའི་ངང་ཚུལ་ཅན་དང༌། སེམས་སྙོམས་ཞེས་པ་སེམས་ཅན་ཐམས་ཅད་ཉེ་དུར་གྱུར་ཅིང་རྗེས་སུ་ཆགས་པ་དང༌། ཁོང་ཁྲོ་བ་མེད་པ་དང༌། བདེན་བརྩོན་ཞེས་པ་བདེན་པ་གཙོ་བོར་ལྷུར་བྱེད་ཅིང༌། བདེན་པར་དམ་འཆའ་ལ། སླུ་བ་མེད་པའི་ཚིག་ཕྱིན་ཅི་མ་ལོག་པར་སྨྲ་བ་དང༌། བཟོད་པ་དང་ལྡན་ཞེས་པ་སྟེ། བཟོད་ཅིང་དེས་པའི་ངང་ཚུལ་ཅན་དང༌། དེ་བཞིན་དུ་ཉམས་ལྡན་སྟེན་པར་བྱེད་པ་སྟེ། མཁས་པའི་ངང་ཚུལ་ཅན་ཡིན་པས་ན་མཁས་པ་སྟེ། འཇིག་རྟེན་གཉི་ག་ལ་སླུ་བ་མེད་ཅིང་
ཆགས་པ་དང༌། འཚེ་བ་མེད་པའི་དངོས་པོ་མཐོང་བ་ལ་མཁས་པ་ཞེས་བྱའོ། །དེ་ཡང་དྲང་སྲོང་ཙ་ར་ཀས། གང་ཞིག་དུས་གསུམ་དྲི་མེད་པར། །ཤེས་ཤིང་རྟག་ཏུ་མ་ཉམས་པ། །དེ་མཁས་ཕུལ་བྱུང་བློ་རྒྱས་ཡིན། །དེའི་ཚིག་ཐེ་ཚོམ་མེད་ཅིང་བསྟེན། །སྐྱོན་བྲལ་རྨོངས་པ་མེད་པ་སྟེ། །མི་བདེན་པར་ནི་ཇི་ལྟར་སྨྲ། །ཞེས་བྱ་བ་ཡིན་ཏེ། མཁས་ཤིང་ལུང་དང་ལྡན་པ་དེ་ལ་བརྟེན་ན་ནད་མེད་པར་འགྱུར་རོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་བར་སྦྱར་བ་ལས། ལེའུ་བཞི་པའི་རྣམ་པར་འགྲེལ་པའོ།། །།དེ་ནས་ཆུ་སྣ་ཚོགས་པ་ལ་སོགས་པའི་བྱེ་བྲག་ཤེས་བར་བྱ་བའི་ལེའུ་བཤད་པར་བྱའོ། །ཞེས་བྱ་བ་ལ། སྔར་གོང་དུ་རྟག་ཏུ་ཕན་པའི་ཟས་དང་སྤྱོད་ལམ་བསྟེན་ན། ནད་མེད་པར་འགྱུར་རོ། །ཞེས་བསྟན་ལ། ཕན་པའི་ཟས་དང་སྤྱོད་ལམ་དེ་གཉིས་ཀྱང་མིང་ཙམ་ཞིག་བསྟན་པ་ཡིན་ནོ། །དེ་ལ་སྤྱོད་ལམ་ནི་རྩོལ་བ་ལ་སོགས་པའི་རང་གི་ངོ་བོ་དང༌། ལས་ཀྱི་བྱེ་བྲག་བཤད་པས། ཕལ་ཆེར་བཤད་ཟིན་པ་དང༌། འོག་ནས་ཀྱང་སྟོན་ཏོ། །ཟས་ཀྱིས་ཀྱང་རང་གི་ངོ་བོ་དང༌། ལས་དང་ཡོན་ཏན་དག་འདིར་ཅུང་ཟད་ཀྱང་མ་སྨོས་སོ། །དེ་བས་ན་ད་ནི་དེའི་རང་གོ་ངོ་བོ་དང་ལས་དང་ཡོན་ཏན་བཤད་པར་བྱ་བའི་ཕྱིར་དང༌། ལེའུ་འདི་གཉིས་བརྩམས་པ་ཡིན་ལ། དེ་གཉིས་ལས་ཀྱང་ཆུ་སྣ་ཚོགས་པ་གཤེར་བའི་རྫས་ཀྱི་བྱེ་བྲག་ཤེས་པ་ནི་གཙོ་བོ་ཡིན་པས་དང་པོར་བསྟན་པ་ཡིན་ནོ། །ཆུ་སྣ་ཚོགས་པ་ནི་ཆུ་རྣམས་དང༌། འོ་མ་དང་བུ་རམ་ཤིང་གི་ཁུ་བ་དང༌། ཏིལ་མར་དང༌། ཆང་ལ་སོགས་པའོ། །དེ་རྣམས་ཀྱི་བྱེ་བྲག་ཤེས་པར་བྱ་བ་ནི་ཕན་པ་དང་གནོད་པ་ཉིད་ཀྱིས་རོ་དང་ནུས་པ་དང༌། འཇུ་བ་དང་ཡོན་ཏན་ལ་སོགས་པ་ཤེས་ཤིང་རྟོགས་པའོ། །དེ་ལ་ཕན་ཞིང་དགོས་པ་ནི་ལེའུ་སྟེ། དེ་བཤད་པར་བྱའོ་ཞེས་བྱ་བའི་དོན་ཏོ། །དེ་ལ་དང་པོར་ནི་ཆུའི་ཡོན་ཏན་གྱི་ངེས་པ་སྟོན་པ་ཡིན་ཏེ། དེ་ནི་ཐམས་ཅད་ལ་དགོས་པ་ཡིན་པའི་ཕྱིར་རོ། །དེ་ཡང་སློབ་དཔོན་གྱིས། ཆུ་ནི་སྲོག་ཆགས་རྣམས་ཀྱི་ཆོགས། །ལུས་ཀྱང་དེ་ཡི་རང་བཞིན་ཡིན། །དེ་བས་ཤིན་ཏུ་དགག་པ་ཡིས། །
ཆུ་ནི་གང་དུའང་བཟློག་པ་མེད། །ཅེས་བཤད་པ་ཡིན་ནོ། །མཁའ་ལས་འབབ་པའི་གང་གཱའི་ཆུ། །འཚོ་བྱེད་ངོམས་བྱེད་ཡི་གར་འོང༌། །ཚིམ་བྱེད་སེམས་ནི་གསལ་བྱེད་ལ། །སླ་ཞིང་རོ་མི་གསལ་ལ་ཞིམ། །བསིལ་ཞིང་ཡང་བ་བདུད་རྩིར་མཚུངས། །ཉི་ཟླ་རླུང་གིས་རེག་གྱུར་པ། །དེ་ཡི་ཡུལ་དུས་ལ་ལྟོས་ནས། །ཕལ་ཆེར་ཕན་དང་གནོད་པ་ཡིན། །ཞེས་བྱ་བ་ནི། ནམ་མཁའ་ལས་འབབ་པའི་གང་གཱའི་ཆུ་ནི། ཡོན་ཏན་འདི་དག་དང་ལྡན་པ་སྟེ། འཚོ་བྱེད་ཅེས་བྱ་བ་མདངས་འཕེལ་བར་བྱེད་པའོ། །ངོམས་བྱེད་ནི་ངལ་བ་སེལ་བར་བྱེད་པའོ། །དགའ་བར་བྱེད་པ་ནི་སྙིང་དགའ་བར་བྱེད་པའོ། །ཡང་ན་སྙིང་ལ་ཕན་པར་བྱེད་པའོ། །ཚིམ་བྱེད་ནི་བདེ་བ་སྐྱེད་པ་འམ་ནད་སེལ་བའོ། །བློ་སད་པར་བྱེད་པ་ནི་ཤེས་རབ་ཀྱི་ཁ་འབྱེད་པར་བྱེད་པ་སྟེ། གང་ལ་ཤེས་རབ་ཅི་ཙམ་ཞིག་དེ་ལ་གསལ་བར་སྣང་བ་ཉིད་དུ་དེ་འཐུངས་པ་ལས་གྱུར་པའོ། །སླ་བ་ནི་སྐ་བ་མ་ཡིན་པའོ། །རོ་མི་གསལ་བ་ཞེས་བྱ་བ་ནི། མངར་བ་ལ་སོགས་པའི་རོ་དེ་ལ་གསལ་བ་མེད་པས་ན་རོ་མི་གསལ་བའོ། །ཞིམ་པ་ནི་རོ་བདའ་བ་སྟེ། སྲོག་ཆགས་རྣམས་ཀྱིས་ཤིན་ཏུ་སྲེད་པར་བྱས་ནས། བཏུང་བའི་དོན་དུ་འཐུང་བ་ཞེས་བྱ་བའི་དོན་ཏོ། །དེ་ཡང་གང་གི་ཕྱིར་དྲང་སྲོང་དག་གིས། བསིལ་ཞིང་གཙང་ལ་དགེ་ཞིང་ཞིམ། །ཞེས་བཤད་པ་ཡིན་ནོ། །བསིལ་བ་ཞེས་བྱ་བ་ནི་རེག་པ་དང་ནུས་པ་གཉི་ག་སྦྱར་རོ། །ཡང་བ་ཞེས་བྱ་བ་ནི་ཡང་བའི་ཡོན་ཏན་དང་ལྡན་པའོ། །དེ་བཞིན་དུ་བདུད་རྩིར་མཚུངས་ཞེས་བྱ་བ་ནི་བདུད་རྩིའི་ཡོན་ཏན་དང་ལྡན་པ་སྟེ། ཡོན་ཏན་དམ་པའི་ཚོགས་དང་ལྡན་པའོ། །དེ་ལྟ་བུའི་ཡོན་ཏན་དང་ལྡན་པ་དག་ཀྱང་ནམ་མཁའ་སྟེ། བར་སྣང་ལས་བབ་ཅིང་ལྷུང་བ་ནི། ཉི་མ་དང༌། ཟླ་བ་དང༌། རླུང་གིས་རེག་ཅིང་ཕྲད་པར་གྱུར་པའི་ཆུ་དེ་ཡང་ཡུལ་དང་དུས་ལ་ལྟོས་ཤིང་ཡུལ་དང་དུས་ཀྱི་རྗེས་སུ་ཞུགས་པས། ཡུལ་དང་དུས་ཀྱི་ཡོན་ཏན་དང་འདྲེས་ཤིང་བདག་གིར་བྱེད་ལ། དེས་ན་ཕལ་ཆེར་སླར་ཞིང་ཕན་པ་དང་གནོད་པ་སྟེ། ལུས་ལ་ཕན་པར་འགྱུར་བ་དང༌། གནོད་པར་འགྱུར་བར་བྱེད་པ་ཡིན་ཏེ། དེ་ཡང་རླན་ཆེ་བ་ལ་སོགས་པའི་
ཡུལ་ཕྱོགས་གཞན་འགའ་ཞིག་ཏུ་འབབ་པ་ན། དེ་ཡང་ནག་པོའམ། དཀར་པོ་ལ་སོགས་པ་ལས་གཞན་དུ་འགྱུར་བ་དང༌། དུས་ཏེ་དུས་དྲུག་ལ་ལྟོས་ན་ཕན་པ་དང་གནོད་པ་ཡིན་ནོ། །གང་ཞིག་ཆར་འབབ་དྲི་མ་མེད། །འབྲས་ཆན་དངུལ་ཕོར་ནང་གནས་པ། །མ་རུལ་མདོག་ཀྱང་མ་གྱུར་པ། །གང་གཱའི་ཆུ་སྟེ་བཏུང་བར་བྱ། །ཞེས་བྱ་བ་ནི། ཆུ་གང་ལེགས་པར་ཆར་དུ་འབབ་པས་བརླན་ཞིང་སྤངས་པའི་སཱ་ལུའི་ཆན་ཏེ། དངུལ་ཕོར་གྱི་ནང་ན་གནས་པ་དེ་ཡང་རུལ་བར་མ་གྱུར་ཅིང༌། མདོག་ཀྱང་གཞན་དུ་མ་གྱུར་ན། ཆུ་དེ་ནི་གང་གཱའི་ཆུ་ཞེས་བྱ་སྟེ། དེ་ནི་འཐུངས་ན་གནོད་པ་མེད་པ་ཡིན་པས་ན་བཏུང་བར་བྱ་བ་ཡིན་ནོ། །གཞན་དུ་མཚོ་ཆུ་སྟོན་ཟླ་ནི། །འབྲིང་པོ་མིན་པར་བཏུང་མི་བྱ། །ཞེས་བྱ་བ་ནི། ཆུ་དེ་སྤངས་པའི་འབྲས་སཱ་ལུའི་ཆན་རུལ་བའམ། མདོག་གཞན་དུ་གྱུར་ན། དེ་ནི་རྒྱ་མཚོའི་ཆུ་དང་འདྲ་བ་ཡིན་པས་བཏུང་བར་མི་བྱ་སྟེ། བ་ཚ་ལ་སོགས་པའི་སྐྱོན་དང་འདྲེས་པ་ཡིན་པའི་ཕྱིར་རོ། །ཅི་དུས་ཐམས་ཅད་དུ་བཏུང་བར་མི་བྱའམ། འོན་ཏེ་ལན་འགའ་ཞིག་བཏུང་བར་མི་བྱ་ཞེ་ན། སྟོན་ཟླ་འབྲིང་པོ་མིན་བར་བཏུང་མི་བྱ། །ཞེས་བྱ་བ་སྨྲས་པ་ཡིན་ཏེ། སྟོན་ཟླ་འབྲིང་པོ་མ་གཏོགས་པར་དུས་གཞན་དག་ཏུ་དེ་བཏུང་བར་མི་བྱའོ་ཞེས་སྟོན་པ་ཡིན་ཏེ་ཅིའི་ཕྱིར་ཞེ་ན། དེའི་ཚེ་དྲང་སྲོང་རྀ་ཥི་འཆར་བའི་དུས་ཡིན་པས། དེས་མཚོ་དང་རྫིང་བུ་ལ་སོགས་པར་གཏོགས་པའི་ཆུ་ཐམས་ཅད་གནོད་པ་དག་ཀྱང་ཕན་པར་སྒྲུབ་པར་བྱེད་པ་ཡིན་པའི་ཕྱིར་རོ། །ཆར་པའི་ཆུ་ནི་སྣོད་བཟང་བཞག །འགྱུར་བ་མེད་པ་རྟག་ཏུ་བཏུང༌། །ཞེས་བྱ་བ་ནི། ཆར་པའི་ཆུ་ནི་དབང་པོས་བར་སྣང་ལ་ཆར་དུ་འབབ་པའི་ཆུའོ། །སྣོད་བཟང་བཞག་ཅེས་པ་ནི་སྣོད་བཟང་པོ་བཟེད་དེ་བསགས་པའོ། །འགྱུར་བ་མེད་ཅེས་བྱ་བ་ནི་ཁ་དོག་དང་རོ་མ་ཉམས་ཤིང་འགྱུར་བ་མེད་པ་སྟེ། དེ་ནི་རྟག་ཏུ་ཞེས་པ་དུས་ཐམས་ཅད་དུ་བཏུང་ཞིང་སྤྱད་པར་བྱའོ། །དེ་མེད་ན་ནི་ཐང་ལ་གནས། །བར་སྣང་བ་དང་རྗེས་མཐུན་ཡིན། །ས་ཕྱོགས་དཀར་ནག་གཙང་ཞིང་ཡངས། །ཉི་འོད་རླུང་གིས་ཕོག་པ་བསྔགས། །ཞེས་བྱ་བ་ནི། དེ་མེད་ན་ཞེས་པ་བར་སྣང་གི་ཆུ་བསགས་པ་དེ་མ་རྙེད་ན།
ཐང་ལ་གནས་ཞེས་པ། ས་ལ་ལྟེང་ཀར་གནས་པའི་ཆུ་ནི་བར་སྣང་བ་དང་རྗེས་མཐུན་ཡིན། ཞེས་བྱ་བ། བར་སྣང་གི་ཆུ་དང་འདྲ་བར་འཚོ་བར་བྱེད་པ་ལ་སོགས་པའི་ཡོན་ཏན་ཆ་མཐུན་པར་བྱེད་པ་ཡིན་ནོ། །དེ་བཞིན་དུ་ས་ཕྱོགས་ཁ་དོག་དཀར་བ་དང༌། གནག་པ་དག་གི་ཆ་འདྲེས་པ་སྟེ། ཕལ་ཆེར་དཀར་གནག་ཏུ་གནག་པ་ན་ཡོད་པ་དང་གཙང་བ་སྟེ། དག་པ་དང་ཡངས་པ་སྟེ་ས་ཕྱོགས་རྒྱ་ཆེ་བ་ན་ཡོད་པ་དེ་ཉི་མའི་འོད་དང་རླུང་གི་སེར་བུས་ཀུན་ནས་ཕོག་ཅིང་བསྟེན་པའི་ཆུ་གང་ཡིན་པ་དེ་བསྔགས་པ་ཡིན་པས་བཏུང་བར་བྱའོ། །ལྟེང་ཀ་འདམ་རྫབ་ཉ་ལྕིབས་དང༌། །རྩྭ་དང་ལོ་མ་རྙོག་མ་ཅན། །ཉི་ཟླ་རླུང་གིས་མ་ཕོག་པ། །མངོན་དུ་འབབ་དང་ཆུ་གར་ལྕི། །སྦུ་བ་སྲོག་ཆགས་ཅན་དང་དྲོ། །གྲང་ཆེས་སོ་ཡིས་མི་བཟོད་པ། །ཆར་གང་དུས་སུམ་བབ་དང༌། །དུས་ཀྱི་འང་དང་པོར་འབབ་པ་གང༌། །སྲོག་ཆགས་གདུག་དང་བ་སོགས་འདྲེས། །བཤང་གཅི་དུག་བསྲེས་གནོད་མི་བཏུང༌། །ཞེས་བྱ་བ་ནི། ལྟེང་ཀ་དང་འདམ་རྫབ་ལ་སོགས་པས་རྙོག་པ་ཅན་དུ་གྱུར་པའི་ཆུ་དེ་བཏུང་ཞིང་ལོངས་སྤྱད་པར་མི་བྱའོ། །དེ་ལ་འདམ་རྫབ་ནི་འདམ་གྱི་རྣམ་པ་སྟེ། དེས་རྙོག་པས་ནག་ནོག་ཅན་དུ་བྱས་པའོ། །ཉ་ལྕིབས་ནི་ཆུའི་ནང་ཉིད་ནས་སྐྱེས་པའོ། །རྩྭ་དང་ལོ་མ་ནི་གྲགས་པར་ཟད་དོ། །དེས་རྙོག་པ་ཅན་དུ་གྱུར་པ་ནི་གཡོགས་པའོ། །དེ་བཞིན་དུ་ཉི་ཟླ་རླུང་གིས་མ་ཕོག་པ་ཞེས་བྱ་བ་སྟེ། ཉི་མ་དང་ཟླ་བའི་འོད་དང་རླུང་གི་ཟེར་གྱིས་མ་ཕོག་པའོ། །དེ་བཞིན་དུ་མངོན་དུ་འབབ་པ་ཞེས་པ་སྟེ། མདུན་དུ་འབབ་པ་དང་འདྲེས་ཤིང་ཆུ་གཞན་གྱིས་གང་བར་འགྱུར་བའོ། །ཆུ་གར་ནི་ཡུན་རིང་པོར་གནས་པའི་ཕྱིར་རོ། །སླ་བ་མ་ཡིན་པ་ལས་སྐ་བ་ཉིད་དུ་གྱུར་པའོ། །དེ་བཞིན་དུ་ལྕི་བ་སྟེ། ཡང་བ་ལས་ཀྱང་ལྕི་བར་གྱུར་པའོ། །སྦུ་བ་ཅན་ནི་སྦུ་བ་ཡོད་པའོ། །སྲོག་ཆགས་ཅན་ནི་འབུ་སྲིན་དང་ལྡན་པའོ། །དྲོ་བ་ནི་ཉི་མ་ལ་སོགས་པའི་ཚ་བས་གདུངས་པའོ། །དེ་བཞིན་དུ་ཤིན་ཏུ་གྲང་ཆེས་པས། སོ་དང་རེག་པར་མི་བཟོད་པ་དེ་ཡང་བཏུང་བར་མི་བྱའོ། །དེ་བཞིན་དུ་ཆར་པ་གང་དུས་སུ་མ་བབ་པ་ཡང་བཏུང་བར་མི་བྱ་སྟེ། ཆར་ཆུ་ཡིན་པའི་
ཕྱིར་བཏུང་བར་བྱ་བ་ཉིད་ཡིན་ཡང༌། ཆར་འབབ་པའི་དུས་སུ་མ་བབ་པ་ཉིད་ཀྱིས་ན་གནོད་པ་ཡིན་པའི་ཕྱིར་བཀག་པ་ཡིན་ནོ། །དུས་མ་ཡིན་པར་འབབ་པ་བཀག་པ་ལས་ན་དུས་སུ་འབབ་པ་ལས་ན་བར་བྱའོ་ཞེས་གནང་བར་དོན་གྱིས་གོ་བར་བྱའོ། །དེ་བས་ན་བར་སྣང་ལས་འབབ་པའི་ཆུ་ཁྱད་པར་ཅན་དེ་ནི་བཏུང་བར་བྱ་བ་ཉིད་ཡིན་པ་ལས། དེ་དུས་སུ་བཏུང་བར་བྱ་བ་ཡིན་ལ། དེ་ཡང་དབྱར་གྱི་དུས་ཡིན་ཏེ། གང་གི་ཚེ་དབྱར་ནམ་མཁའ་ལས་འབབ་པ་བཏུང་བར་བྱ་བ་ཉིད་ཡིན་གྱི། དུས་གཞན་དག་ཏུ་འབབ་པ་ནི་དུས་མ་ཡིན་པར་བཏུང་བར་མི་བྱའོ། །ཅི་དུས་སུ་བབ་པ་ཐམས་ཅད་དུ་བཏུང་བར་བྱ་བ་འམ། དུས་སུ་བབ་པ་ཡིན་དུ་ཟིན་ཀྱང་བཏུང་བར་མི་བྱ་བ་ཅུང་ཞིག་ཡོད་དམ་ཞེ་ན། དེའི་ཕྱིར་དུས་ཀྱི་དང་པོར་འབབ་པ་གང་ཞེས་བྱ་བར་སྨོས་པ་ཡིན་ཏེ། དུས་དང་པོར་འབབ་པའི་ཆུ་གང་ཡིན་པ་དེ་ནི་བཏུང་བར་མི་བྱའོ། །དེས་ན་འདི་སྐད་སྟོན་པ་ཡིན་ཏེ། དབྱར་གྱི་དུས་སུ་འབབ་པ་ནི་བཏུང་བར་བྱ་ལ། དེ་ལས་ཀྱང་དང་པོར་འབབ་པ་ནི་དུས་སུ་འབབ་པ་ཡིན་ཡང་བཏུང་བར་མི་བྱའོ། །དེ་བཞིན་དུ་སྲོག་ཆགས་གདུག་པ་དང༌། ལུ་ཏ་ལ་སོགས་པ་རྣམས་ཀྱི། རྒྱ་དང༌། བཤང་བ་དང༌། གཅི་བ་དང༌། དུག་དང་འདྲེས་པས་རྨས་པར་བྱས་པའི་ཆུ་གང་ཡིན་པ་དེ་བཏུང་བར་མི་བྱའོ། །ནུབ་ཕྱོགས་ནས་ནི་རྒྱ་མཚོར་འབབ། །གང་ཡང་མྱུར་འབབ་རྡུལ་མེད་ཆུ། །དེ་དག་མདོར་ན་དགེ་བ་ཡིན། །དེ་ལས་བཟློག་པ་བཟང་མ་ཡིན། །ཞེས་བྱ་བ་ནི། ཆུ་བོ་གང་ནུབ་ཕྱོགས་ནས་མི་འབབ་པ་དང༌། དེ་བཞིན་དུ་མྱུར་བར་མི་འབབ་པ་དང༌། རྡུལ་མེད་པ་མ་ཡིན་པ་སྟེ་གོང་མ་ལས་བཟློག་པ་དེ་དག་ནི་བཟང་པོ་མ་ཡིན་པ་སྟེ། གནོད་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །རྡོ་ལ་ཤུགས་དྲག་རྡེབས་པ་ཡིས། །རྒྱུན་ཅན་གཡེངས་པའི་ཆུ་དག་དང༌། །གངས་ཅན་མ་ལ་ཡ་ལས་བྱུང། །དགེའོ། །ཞེས་བྱ་བ་ལ། རྡོའི་ཚོགས་ལ་ཤུགས་དྲག་པོས་རྡེབས་པར་བྱེད་ལ། དེས་རྒྱུན་ཆད་ཅིང་རྣམ་པར་འཐོར་བས་གཡེངས་ཤིང་སྤྲུགས་པའི་ཆུ་གང་དག་ཡིན་པ་དེ་དག་གངས་ཅན་ཏེ་རི་ཁ་བ་ཅན་དང༌། མ་ལ་ཡའི་རི་ལས་བྱུང་བ་སྟེ། དེ་གཉིས་
ལས་འཐོན་ཅིང་འབབ་པའི་ཆུ་བོ་ནི་དགེའོ་ཞེས་པ་སྟེ་ཕན་ཞིང་བསོད་པ་ཡིན་པའོ། །དེ་ནི་བརྟན་གཡུང་ན། སྲིན་བུ་རྐང་བ་མ་སྙིང་དང་ནི། །ལྐོག་མ་གླད་པའི་ནད་སྐྱེད་འགྱུར། །ཞེས་བྱ་བ་ནི། ཁ་བ་ཅན་དང་མ་ལ་ཡའི་རི་ལས་བྱུང་བ་དེ་ཉིད་བརྟན་ཞིང་གཡུང་བ་སྟེ། དལ་གྱིས་འབབ་པ་ཡིན་ན། སྲིན་བུ་ལ་སོགས་པ་སྐྱེད་པར་འགྱུར་རོ། །རྐང་བ་མ་ནི་ཚིལ་དང་ཤ་ལ་བརྟེན་ཏེ། རྐང་པ་དག་ཏུ་རྐང་པ་དག་འབྱུང་བ་སྟེ། མཚན་ཉིད་འོག་ནས་བཤད་དོ། །ཤར་དང་ནུབ་ཀྱི་མཐའ་ལས་བྱུང༌། །གཞང་འབྲུམ་སྐྱེད་དོ། །ཞེས་བྱ་བ་ནི། ཤར་གྱི་ལྷོ་བལ་གྱི་ཡུལ་ནས་འབབ་པ་དང༌། ནུབ་ཕྱོགས་ཏེ། སྟག་གཟིག་གི་ཡུལ་ནས་འབབ་པ་དང༌། མཐའ་ལས་བྱུང་བ་ལྷོ་ནུབ་ཀྱི་མཚམས་ཀྱི་ཡུལ་མ་ལ་ཡ་ལས་བྱུང་ཞིང་འབབ་པའི་ཆུ་བོ་ནི། གཞང་འབྲུམ་ཞེས་བྱ་བའི་ནད་སྐྱེད་པར་བྱེད་དོ། །དབང་ཆེན་འབབ། དམུ་རྫིང་རྐང་བ་མ་ནད་སྐྱེད་འགྱུར། །ཞེས་བྱ་བ་ནི། དབང་ཆེན་ཞེས་བྱ་བའི་རི་ལས་འབབ་ཅིང་རྒྱུ་བའི་ཆུ་བོ་ནི་དམུ་རྫིང་གི་ནད་དང༌། རྐང་བམ་གྱི་ནད་སྐྱེད་པར་འགྱུར་རོ། །སད་ཧྱ་བི་ན་དའི་རི་ལས་འབབ། །མཛེ་དང་སྐྱ་རྦབ་ཀླད་ནད་འགྱུར། །ཞེས་བྱ་བ་ནི། རི་བོ་སད་ཧྱ་དང༌། རི་བོ་བིན་ད་ཞེས་བྱ་བའི་རི་གཉིས་ལས་འབབ་ཅིང༌། དེ་ལས་འཐོན་པའི་ཆུ་བོ་ནི་མཛེ་དང༌། སྐྱ་རྦབ་ཀྱི་ནད་དང༌། ཀླད་པའི་ནད་སྐྱེད་པར་འགྱུར་རོ། །པ་རི་ཡད་ཏྲའི་ནད་ཀུན་སེལ། །ཞེས་བྱ་བ་ནི་རི་བོ་པ་རི་ཡད་ཏྲ་ཞེས་བྱ་བ་ཞིག་ཡོད་དེ། དེ་ལས་བྱུང་བའི་ཆུ་བོ་ནི་ཉེས་པ་གསུམ་ཆར་སེལ་བ་ཡིན་ནོ། །ཁྲོན་པ་རྫིང་ལ་སོགས་པའི་ཆུ། །སྐམ་ས་རླན་ཅན་བྲག་ལས་ཤེས། །ཞེས་བྱ་བ་ནི། ཁྲོན་པ་དང༌། རྫིང་བུ་ལ་སོགས་པའི་ཆུ་ཡང་བ་དང༌། ལྕི་བ་དང༌། ཡོན་ཏན་དང༌། སྐྱོན་གཉིས་ཀ་ཡང་སྐམ་ས་དང༌། གཤེར་ས་རླན་ཅན་དང་བྲག་ལས་ཤེས་པར་བྱ་སྟེ། སྐམ་ས་ལ་སོགས་པའི་ཡོན་ཏན་གྱིས། དེའི་ཁྲོན་པ་ལ་སོགས་པའི་ཆུའི་བྱེ་བྲག་ཤེས་པར་བྱའོ། །དེ་ཡང༌། ཁྲོན་པ་རྫིང་བུ་མཚེའུ་དང༌། །མཚོར་བཅས་ཆུ་མིག་ལ་སོགས་ཆུ། །སྐམ་ས་རླན་ཅན་བྲག་ལས་ནི། །ཡོན་ཏན་སྐྱོན་དག་
ཤེས་པར་བྱ། །ཞེས་དྲང་སྲོང་ཙ་ར་ཀས་བཤད་བ་དང༌། བསྡུས་པ་ལས་ཀྱང༌། སྐམ་ས་གཤེར་ས་རི་བོ་དང༌། །ཉེ་ལས་ཡང་དང་ལྕི་བ་འབྱུང༌། །ཞེས་བཤད་པ་ཡིན་ནོ། །དེས་ན་འདི་སྐད་སྟོན་པ་ཡིན་ཏེ། སྐམ་སའི་ས་ཕྱོགས་ན་གནས་པའི་ཁྲོན་བ་ལ་སོགས་པའི་ཆུ་ནི་ཡང་བ་ཉིད་ཡིན་ལ་རླན་ཅན་གྱི་ཕྱོགས་ལ་གནས་པའི་ཁྲོན་པ་ལ་སོགས་པའི་ཆུ་ནི་ལྕི་བ་ཉིད་ཡིན་ནོ། །རི་བོའི་ཕྱོགས་ན་གནས་པའི་ཁྲོན་པ་ལ་སོགས་པའི་ཆུ་ནི་ཉེས་པ་སྐྱེད་པ་ཡིན་ལ། བ་རི་ཡ་ཏྲའི་ཕྱོགས་ན་གནས་པའི་ནི་ཉེས་པ་འཇོམས་པ་ཡིན་ཏེ། ཐམས་ཅད་ལ་ཡང་འདི་བཞིན་དུ་སྦྱར་བར་བྱའོ། །དྲོད་ཆུང་སྐྲན་ཡོད་སྐྱ་རྦབ་དང༌། །དམུ་རྫིང་ཚད་འཁྲུ་གཞང་འབྲུམ་མམ། །ཕོ་བའི་དྲོད་ཆུང་འོར་ནད་ཅན། །མི་བཏུང་བརྣག་དཀའ་ཉུང་ཟད་བཏུང༌། །ཞེས་བྱ་བ་ནི། དྲོད་ཆུང་བ་ལ་སོགས་པས་ཆུ་བཏུང་བར་མི་བྱའོ། །གལ་ཏེ་བརྣག་བར་དཀའ་ཞིང་སྐོམ་པ་མི་བཟོད་པར་གྱུར་ན། རང་གི་རང་བཞིན་དང༌། ཡུལ་དང༌། དུས་དང༌། སྤྱོད་ལམ་དང༌། ལུས་ཀྱི་ཚོད་ལས་དཔགས་ཏེ། ཅུང་ཟད་ཅིག་བཏུང་བར་བྱའོ། །སྟོན་ཀ་སོ་ག་མ་གཏོགས་པར། །ནད་མེད་མིས་ཀྱང་ཅུང་ཟད་བཏུང༌། །ཞེས་བྱ་བ་ནི། སྟོན་ཀ་དང་སོ་གའི་དུས་མ་གཏོགས་པར་དུས་གཞན་དགུ་ན་སྟོད་དང༌། དགུན་སྨད་དང༌། དཔྱིད་དང༌། དབྱར་དག་གི་ཚེ་ནད་མེད་པའི་མིས་ཀྱང་ཅུང་ཟད་བཏུང༌། ཞེས་བྱ་བ་ནི། ཉུང་ཤས་ཉུང་ཤས་དག་བཏུང་བར་བྱའོ། །ཟས་ཟོས་པར་མཐའ་ཐོག་མར་ནི། །ཆུ་འཐུངས་རན་དང་སྦོམ་སྐེམ་འགྱུར། །ཞེས་བྱ་བ་ནི། ཟས་ཟོས་པའི་བར་དང་མཐའ་མ་དང༌། །ཐོག་མར་ཆུ་འཐུངས་ན། ལུས་སྦོམ་ཕྲ་རན་པ་དང༌། སྦོམ་པ་དང༌། སྐེམ་པར་འགྱུར་རོ། །དེས་ནི་འདི་སྐད་སྟོན་པར་འགྱུར་ཏེ། མིས་ཟས་ཟོས་པའི་བར་དུ་སྐོམ་འཐུངས་ན་ལུས་ཟུངས་རན་པ་སྟེ། ཕྲ་སྦོམ་འཚམ་པར་འགྱུར་ལ། ཟས་ཟོས་པའི་བར་མར་སྐོམ་འཐུངས་པས་ནི་སྦོམ་ཞིང་རགས་པར་འགྱུར་ལ། ཟས་ཟོས་པའི་ཐོག་མར་འཐུངས་པས་ནི་སྐེམས་པར་འགྱུར་རོ། །དེ་ཡང་སྐོམ་བར་དུ་འཐུངས་པས་ལུས་ཟུངས་མཉམ་པོར་སྐྱེད་ཅིང་རན་པ་ཉིད་དུ་བྱེད་དོ། །མཐའ་མར་འཐུངས་
པས་ནི་མ་ཞུ་བའི་གནས་སུ་བད་ཀན་འཕེལ་བར་བྱེད་པས་སྦོམ་པོ་བྱེད་དོ། །ཟས་ཀྱི་ཐོག་མར་འཐུངས་པས་ནི་ཟས་ཀྱི་ཤིང་མེད་པས། ཕོ་བའི་མེ་ཉམས་པར་བྱེད་དེ། མེའི་དྲོད་ཀྱིས་མི་མཐུན་པའི་ཕྱོགས་སུ་གྱུར་པས། མེའི་དྲོད་འབྲི་བར་བྱེད་ལ། དེས་ན་ཟས་ལེགས་པར་འཇུ་བར་མི་ནུས་ལ། ཟས་མི་འཇུ་བས་དེའི་ཚེ། དངས་མ་ལ་སོགས་པའི་ལུས་ཟུངས་ཇི་ལྟ་བ་བཞིན་དུ་རྒྱས་པར་མི་འགྱུར་ལ། དེ་རྒྱས་ཤིང་འཕེལ་བར་མ་གྱུར་པས་སྐྱེས་བུ་སྐེམ་པོར་འགྱུར་རོ། །དེ་སྐད་དུ་སློབ་དཔོན་གྱིས་བསྡུས་པ་ལས། ཟས་ཀྱི་ཐོག་མར་ཆུ་འཐུངས་ན། །མེ་ཉམས་བྱེད་པས་སྐེམས་པར་འགྱུར། །ཐ་མས་སྦོམ་པོ་ཉིད་བྱེད་དེ། །དེ་ནི་མ་ཞུ་བད་ཀན་རྒྱས། །བར་མ་ཡན་ལག་མཉམ་ཞིང་སྙོམས། །ལུས་ཟུངས་སྨིན་པས་བདེ་བ་ཡིན། །ཞེས་བཤད་པ་ཡིན་ནོ། །ཆུ་བསིལ་ཆང་ནད་བརྒྱལ་བ་དང༌། །སྐྱུགས་དང་ངལ་དང་མགོ་འཁོར་དང༌། །སྐོམ་དང་ལུས་ཚ་མཁྲིས་པ་དང༌། །ཁྲག་རྒྱས་དུག་ནི་སེལ་བྱེད་ཡིན། །ཞེས་བྱ་བ་ལ། ཆུ་བསིལ་བདག་ནི་ཆང་དྲགས་པའི་ནད་ལ་སོགས་པ་སེལ་ཞིང་འཇོམས་ལ་ཟློག་པར་བྱེད་པ་ཡིན་ནོ། །དེ་ལ་ཆང་ནད་ནི་ཆང་དྲགས་པ་ལས་གྱུར་པའི་ནད་དོ། །དེ་ལ་ནད་ཅེས་བྱ་བ་ནི། གནོད་པ་སོགས་ཤིང་སྙོན་རྨོངས་པར་བྱེད་པའོ། །བརྒྱལ་བ་ནི་དྲན་པ་སྟོར་བའོ། །སྐྱུགས་པ་ལ་སོགས་པ་ནི་གོ་བར་ཟད་དོ། །ལུས་ཚ་བ་ནི་ཟས་དང་སྤྱོད་ལམ་ཚ་བས་ཚ་བར་གྱུར་པའོ། །མཁྲིས་པ་དང་ཁྲག་རྒྱས་པ་དེ་ནི་དེ་དག་འཕེལ་བའོ། །དུག་ནི་རྒྱུ་བ་དང༌། རྒྱུ་བ་ལས་བྱུང་བའི་དབྱེ་བས་གཉིས་སོ། །སེལ་བྱེད་ཡིན་ཞེས་བྱ་བ་ནི། འཐུངས་པ་དང་གཏོར་བ་ལ་སོགས་པས་འདི་དག་སེལ་ཞིང་འཇོམས་པར་བྱེད་པའོ། །ཆུ་ཚན་དྲོད་སྐྱེད་ཟས་འཇུ་ཞིང༌། །མགུལ་བདེ་ལུས་ཡང་གཅིན་ནད་སེལ། །སྐྱིགས་བུ་ལྟོ་སྦོས་རླུང་བད་ཀན། །རིམས་སར་འཕྲལ་དུ་ཟློག་བྱེད་ཅིང༌། །ལུད་པ་ཆམ་སར་དབུགས་མི་བདེ། །རྩིབ་ལོགས་ཟུག་ལ་བསྔགས་པ་ཡིན། །ཞེས་བྱ་བ་ནི། ཆུ་བསྐོལ་ཞིང་ཚ་བར་བྱས་པ་དག་ནི་མེའི་དྲོད་
སྐྱེད་པར་བྱེད་པ་དང༌། དེ་བཞིན་དུ་མ་ཞུ་བའི་ཉེས་པ་སེལ་བར་བྱེད་པ་དང༌། མགུལ་པ་བདེ་ཞིང་ལྐོག་མ་སྦྱོང་ལ། གདངས་སྙན་པ་དང༌། ཡང་བའི་ཡོན་ཏན་དང་ལྡན་པས། ལུས་ཡང་བར་བྱེད་བ་དང༌། གཅིན་ནད་སེལ་ཞེས་པ་གཅིན་གྱི་གནས་ནི་ཆུ་སོ་སྟེ། དེ་ལ་གནོད་པས་ཁེབས་པར་གྱུར་པ་སེལ་བར་བྱེད་པའམ། ཡང་ན་དེ་ན་གནས་པའི་གཅིན་གྱི་སྐྱོན་སེལ་བར་བྱེད་པས་ན། གཅིན་ནད་སེལ་ཞེས་བྱའོ། །ཡང་ཆུ་བསྐོལ་བ་འདི་ནི་སྐྱིགས་བུ་ལ་སོགས་པའི་ནད་རྣམས་ལ་ཡང་བསྔགས་པ་ཡིན་ཏེ། སྐྱིགས་བུ་ལ་སོགས་པ་ནི་འོག་ནས་བཤད་པར་བྱའོ། །ཆམ་སར་ནི་ཆམ་པ་ཡང་ཡིན་ལ། སར་པ་ཡང་ཡིན་པས་ཆམ་སར་ཞེས་བྱ་སྟེ། དེ་ལ་ཡང་བསྔགས་པ་ཡིན་ཏེ། གང་གི་ཕྱིར་དྲོད་སྐྱེད་པ་དང༌། ཟས་འཇུ་བར་བྱེད་པ་ཡིན་པར་གོང་དུ་བཤད་པ་དེས་ན། འཇུ་ཞིང་སྨིན་པར་བྱེད་པས་ནི་མ་ཞུ་བ་ཡིན་པས་དེ་ལ་བསྔགས་པ་ཡིན་ནོ། །ཆུ་ནི་བསྐོལ་ནས་གྲངས་པ་དག །བད་ཀན་མི་སྐྱེད་ལུས་ཡང་ཞིང༌། །མཁྲིས་པ་ཅན་ལ་ཕན་པ་ཡིན། །དེ་ནི་ཞག་ལོ་ན་ཉེས་གསུམ་སྐྱེད། །ཅེས་བྱ་བ་ནི། ཆུ་བསྐོལ་ནས་བསྒྲངས་པ་ནི་བད་ཀན་སྐྱེད་པར་མི་བྱེད་དེ། མ་བསྐོལ་བའི་ཆུ་ལས་རང་བཞིན་གྱི་ཡོན་ཏན་དང་ལྡན་པ་ཡིན་པ་ལས་ཀྱང་བསྐོལ་ནས་བསྒྲངས་པ་ན། ཤིན་ཏུ་ཡང་བ་ཡིན་ལ། བསྐོལ་ནས་བསྒྲངས་པ་དེ་ཡང་རླུང་དང་བད་ཀན་གྱི་ཉེས་པ་གང་ཡང་རུང་བ་མཁྲིས་པ་དང་ལྡན་པ་ལ་ཕན་པ་ཡིན་ལ། གསུམ་ཆར་འདུས་པ་ལས་བྱུང་བའི་ནད་ལ་ནི་གནོད་པ་ཡིན་ནོ། དེ་ཡང༌། ཡུལ་དུས་ལྕི་དང་ཡང་བ་ལས། །བཞི་ཆ་གསུམ་ཆ་ཕྱེད་འདུས་པར། །ལྦུ་བ་མེད་པར་བསྐོལ་བ་ནི། །ཤུགས་མེད་དྲི་མ་མེད་ཅིང་ཕན། །ཞེས་བཤད་པ་ཡིན་ནོ། །དེ་ལྟར་ཡོན་ཏན་དང་ལྡན་ཞིང༌། །དེ་ལྟར་བསྐོལ་ནས་བསྒྲངས་བ་དེ་ནི་ཞག་ལོན་པ་སྟེ། ཉིན་ཞག་གཅིག་འདས་པའམ། ཡུན་རིང་པོར་བཞག་པ་དེ་ནི། ཉེས་གསུམ་སྐྱེད་ཅེས་བྱ་བ་ཡིན་ཏེ། རླུང་ལ་སོགས་པའི་ཉེས་པ་གསུམ་སྐྱེད་པར་བྱེད་དོ། །དུས་ཀྱི་རང་བཞིན་ཉིད་དང༌། མེའི་ཡོན་ཏན་ལས་ཉམས་པ་དང༌། སྐྱུར་པའི་རྣམ་པར་འགྱུར་བས་ཉེས་པ་རྣམས་སྐྱེད་པ་ཡིན་ནོ། །རྒྱ་སྟར་ཆུ་ནི་སྣུམ་པ་དང༌། །རོ་མངར་རོ་
ཙ་བསིལ་ཞིང་ཡང༌། །སྐོམ་དང་མཁྲིས་པ་རླུང་ནད་སེལ། །དྲོད་སྐྱེད་ལྒང་བའི་ནད་སྦྱོང་བྱེད། །དབྱར་ནི་ཆར་ཆུ་ཆུ་བོའི་ཆུ། །མཆོག་ཏུ་བཟང་དང་ངན་པར་བཤད། །ཅེས་བྱ་བ་ནི། རྒྱ་སྟར་གྱི་འབྲས་བུའི་ནང་ན་གནས་པའི་ཆུ་གཙོར་གཟུང་བར་བྱའོ། །དེའི་ཆ་ཤས་ལས་བྱུང་བ་གཞན་དག་ནི་མ་ཡིན་ནོ་ཞེས་ཤེས་པར་བྱ་བའི་ཕྱིར་ཆུའི་སྡེ་ཚན་འདིར་བསྟན་པ་བྱས་པ་ཡིན་ལ། རྒྱ་སྟར་གྱི་འབྲས་བུ་དེའི་ནང་གི་ཆུ་ནི་སྣུམ་པའི་ཡོན་ཏན་དང་ལྡན་པས་ན། སྣུམ་པ་དང་རོ་མངར་ཞིང་ཞིམ་པ་དང༌། རོ་མངར་ཞིང་ཁུ་བ་འཕེལ་བར་བྱེད་པ་དང༌། བསིལ་ཞིང་གྲང་བའི་སྟོབས་དང་ལྡན་པ་དང༌། ཡང་བ་ལ་སོགས་པ་དང་ལྡན་པ་དང༌། མེའི་དྲོད་སྐྱེད་པར་བྱེད་པ་དང་ལྒང་པ་སྟེ། གཅིན་གྱི་གནས་ཀྱི་ནད་སྦྱོང་ཞིང་དག་པར་བྱེད་པ་ཡིན་ནོ། །ཆར་འབབ་པ་སྟེ་བར་སྣང་ལས་འབབ་པའི་ཆུ་དང་ཆུ་བོའི་ཆུ་སྟེ། དེ་ལྟར་ཆར་གྱི་ཆུ་དང་ཆུ་བོའི་ཆུ་སྟེ། དེ་ལས་དབྱར་གྱི་ཆར་གྱི་ཆུ་ཤིན་ཏུ་བཟང་ཞིང་མཆོག་ཏུ་གྱུར་པ་ཡིན་ལ། ཆུ་བོའི་ཆུ་ནི་དབྱར་མཆོག་ཏུ་ངན་ཞིང་སྨད་པར་བྱ་བ་ཡིན་པར་བཤད་དོ། །ཆུའི་སྡེ་ཚན་ནོ། །ད་ནི་འོ་མ་ཐམས་ཅད་ཀྱི་སྤྱིའི་ཡོན་ཏན་དང༌། ལས་རྣམས་སྨྲས་པ་ནི་འདི་ཡིན་ཏེ། དེ་ཡང་ཅི་ལྟར་ཆུ་ནི་འཚོ་བར་བྱེད་པ་ལ་སོགས་པའི་ཡོན་ཏན་དང་ལྡན་པ་དེ་བཞིན་དུ། འོ་མ་ཡང་ཡོན་ཏན་མང་པོ་དང་ལྡན་པ་ཡིན་པས། སྡེ་ཚན་གཞན་དག་ལས་འོ་མའི་སྡེ་ཚན་ཉིད་མཆོག་ཏུ་གྱུར་པ་ཡིན་པ་དང༌། གཞན་ཡང་གང་གི་ཕྱིར། ཞུན་མར་ནི་སྣུམ་ཐམས་ཅད་ཀྱི་མཆོག་ཡིན་ལ། དེའི་སྐྱེ་བའི་གནས་ནི་འོ་མ་ཉིད་ཡིན་ཏེ། དེ་བས་ན་མཆོག་ཏུ་གྱུར་པ་ཡིན་ནོ། །འོ་མ་ཕལ་ཆེར་རོ་ཞུ་མངར། །སྣུམ་ཞིང་མདངས་སྐྱེད་ལུས་ཟུངས་འཕེལ། །རླུང་དང་མཁྲིས་སེལ་རོ་ཙ་བྱེད། །བད་ཀན་སྐྱེད་ཅིང་བསིལ་བ་ཡིན། །ཞེས་བྱ་བ་ལ། འོ་མ་ཕལ་ཆེར་ཞེས་པ་ནི་འོ་མ་ཕལ་མོ་ཆེའི་ཡོན་ཏན་འདི་དག་ཡིན་གྱི། ཐམས་ཅད་ཀྱི་ནི་མ་ཡིན་ནོ། །དེ་ལ་འོ་མར་གཏོགས་པ་ཐམས་ཅད་ཀྱི་ནི་རོ་མངར་བ་དང་ཞུ་བའི་རྗེས་ལ་མངར་ཞིང་འཇམ་པ་ཡིན་པས། དེ་དག་ནི་ཁྱད་པར་མེད་པར་རོ་མངར་བ་དང་ཞུ་བའི་རྗེས་མངར་བ་ཡིན་ནོ། །སྣུམ་པའི་ཡོན་ཏན་དང་ལྡན་པས་སྣུམ་པའོ། །གཟི་མདངས་
སྐྱེད་པ་ལ་ཕན་པས་ན་མདངས་སྐྱེད་དེ། མདངས་ཞེས་བྱ་བ་ལུས་ཟུངས་རྣམས་ཀྱི་སྙིང་པོར་གྱུར་པ། འོག་ནས་བཤད་པའི་མཚན་ཉིད་དང་ལྡན་པ་དེ་སྐྱེད་པར་བྱེད་པ་དང༌། ལུས་ཟུངས་ཞེས་པ་དངས་མའི་བཅུད་ལ་སོགས་པ་འཕེལ་བར་བྱེད་པ་དང༌། རླུང་དང་མཁྲིས་སེལ་ཞེས་བྱ་བ། རླུང་དང་མཁྲིས་པའི་ནད་འཇོམས་པར་བྱེད་པ་དང༌། རོ་ཙ་བྱེད་ཅེས་བ་ཁུ་བ་འཕེལ་བར་བྱེད་པ་དང༌། བད་ཀན་སྐྱེད་ཅེས་པ་བད་ཀན་འཕེལ་བར་བྱེད་པ་དང༌། ལྕི་བའི་ཡོན་ཏན་དང་ལྡན་པས་ལྕི་བ་དང༌། བསིལ་ཞིང་གྲང་བ་སྟེ། ཡོན་ཏན་དེ་དག་དང་ལྡན་པས་ལྕི་བའོ། །དེ་དག་ནི་ཕལ་མོ་ཆེའི་སྤྱིའི་ཡོན་ཏན་ཡིན་གྱི། ཐམས་ཅད་ཀྱི་ཡོན་ཏན་འདི་ལྟ་བུ་ནི་མ་ཡིན་ཏེ། ལ་ལ་ནི་གཞན་དག་ཏུ་ཡང་མཐོང་སྟེ། དཔེར་ན་རྔ་མོའི་ཅུང་ཟད་རྩུབ་ཅིང་ཚ་བ་དང༌། ལན་ཚྭ་བྲོ་བ་ཡང་བ་དང༌། དེ་བཞིན་དུ་རའི་འོ་མ་ཡང་ཡང་བ་དང༌། ལུག་གི་འོ་མའི་ནུས་པ་ཚ་བ་སྐྱེད་པ་དང༌། རྨིག་པ་གཅིག་པའི་འོ་མ་ཚ་བའི་ནུས་པ་ཅན་ཉིད་ཡིན་ནོ། །འདིར་སྤྱིའི་ཡོན་ཏན་བཤད་པ་ལས། གང་དེ་དང་མི་མཐུན་པའི་ཁྱད་པར་གྱི་ཡོན་ཏན་བཤད་པ་དེ་ནི་སྤྱིའི་ཡོན་ཏན་དང་མི་མཐུན་པ་ཉིད་ཡིན་པར་ཤེས་པར་བྱའོ། །འོན་ཏེ་ཆ་འདྲ་བ་དག་ཡིན་ན་ནི། དེ་ཉིད་སྟོབས་སྐྱེད་ཅིང་གྲོགས་སུ་གྱུར་པ་ཡིན་ནོ། །འདིར་ཁྱད་པར་དུ་བྱ་བ་ནི། བ་ཡི་འོ་མ་འཚོ་བྱེད་ཅིང༌། །བཅུད་ཀྱིས་ལེན་ཡིན་གློ་རྡོལ་དང༌། །གློ་གཅོང་ལ་ཕན་ཡིད་གཞུངས་བྱེད། །སྟོབས་སྐྱེད་ནུ་ཞོ་སྐྱེད་དང་འཁྲུ། །ངལ་དང་མགོ་འཁོར་མྱོས་དབལ་ཉམས། །ལུད་པ་དབུགས་མི་བདེ་བཀྲེས་སྐོམ། །རིམས་རྙིང་གཅིན་ནི་སྲི་བ་དང༌། །ཁྲག་དང་མཁྲིས་པ་སེལ་བ་ཡིན། །ཞེས་བྱ་བ་ནི་འདིར་འོ་མའི་ནང་ནས་གལ་ཏེ། དེ་བའི་འོ་མ་ཡིན་ན་འཚོ་བར་བྱེད་པ་ཡིན་པས་ན་འཚོ་བྱེད་ཅིང་ཞེས་བྱ་སྟེ། འོ་མ་ཐམས་ཅད་ཀྱང་འཚོ་བྱེད་ཡིན་མོད་ཀྱི། བའི་འོ་མ་འདི་ཡང་ཤིན་ཏུ་འཚོ་བར་བྱེད་པ་ཡིན་ཏེ། མདངས་སྐྱེད་ཅིང་ལུས་ཟུངས་མཉམ་པོར་འཕེལ་བར་བྱེད་པ་ཡིན་ནོ། །བཅུད་ཀྱིས་ལེན་ཡིན་ཞེས་བྱ་བ་ནི། སྲོག་ཡང་དག་པར་འཛིན་པར་བྱེད་པ་ཡིན་པས། བཅུད་ཀྱིས་ལེན་དང་འདྲ་བའི་ཕྱིར་བཅུད་ཀྱིས་ལེན་ཞེས་བྱ་སྟེ། དེ་ཡང་བསྡུས་པ་ལས། མར་དང་
འོ་མ་བསྟེན་པས་ནི། །བཅུད་ཀྱིས་ལེན་ནི་འཐོབ་པ་ཡིན། །གང་ཕྱིར་འོ་མ་བསྔགས་པ་ཡི། །བཅུད་རྣམས་ཀྱི་ནི་བཅུད་ལེན་ཡིན། །ཞེས་བཤད་པ་ཡིན་ནོ། །གློ་རྡོལ་དང་གཅོང་ལ་ཕན་པ་ནི་གློ་དང་བྲང་རྡོལ་བ། ལུས་ཟུངས་ཟད་པར་བྱེད་པའི་གཅོང་ལ་ཕན་ཞིང་རྗེས་སུ་མཐུན་པ་ཡིན་ནོ། །དེ་བཞིན་དུ་བློ་གྲོས་ཏེ། ཡིད་གཞུངས་བ་ལ་ཕན་པ་ཡིན་པས་ན། ཡིད་གཞུངས་བྱེད་ཅེས་བྱའོ། །སྟོབས་ལ་ཕན་པས་ན་སྟོབས་སྐྱེད་དོ། །ནུ་ཞོ་སྐྱེད་པ་ནི་བུད་མེད་རྣམས་ཀྱི་ནུ་ཞོ་འཕེལ་བར་བྱེད་པ་སྟེ། ནུ་ཞོ་སྣུམ་པ་བུད་མེད་ཀྱི་འོ་མ་སྐྱེད་པའོ། །འཁྲུ་བ་ནི་ཁོང་ནས་འཁྲུ་བའི་ངང་ཚུལ་ཅན་ནོ། །དེ་བཞིན་དུ་ངལ་བ་ལ་སོགས་པ་ཡང་སེལ་བ་ཡིན་ནོ། །མི་བདེ་བ་ནི་ཡིད་ཀྱི་གནོད་པའོ། །གཞན་དག་ནི་གོ་སླའོ། །མ་ཧེའི་འོ་མ་འཇུ་དྲགས་དང༌། །གཉིད་མེད་ལ་ཕན་རབ་ལྕི་བསིལ། །ཞེས་བྱ་བ་ལ། མ་ཧེའི་འོ་མ་ནི་འཇུ་དྲགས་པ་སྟེ་མེའི་དྲོད་ཆེ་བས་འགྲངས་མི་ཤེས་པ་དང༌། གཉིད་མེད་པ་ལ་ཕན་པ་དང༌། དེ་འོ་མ་གཞན་དག་ལས་རབ་ཏུ་ཞི་ཞིང་འཇུ་དཀའ་བ་དང༌། བསིལ་ཞིང་གྲང་བའི་ཡོན་ཏན་དང་ལྡན་པ་ཡིན་ནོ། །ར་ནི་ཆུ་ཉུང་འཐུང་ཟས་རྒོད། །ཁ་ཞིང་ཚ་བ་ཟབས་ཡང༌། །སྐེམ་དང་རིམས་དང་དབུགས་མི་བདེ། །ཁྲག་དང་མཁྲིས་པ་ཚད་ནད་སེལ། །ཞེས་བྱ་བ་ལ། རའི་འོ་མ་ནི། ཆུ་ཉུང་དུ་འཐུང་བ་ལ་སོགས་པའི་རང་བཞིན་ནི་ཡིན་ཏེ། འདིར་རྒྱུ་སྨོས་པ་ནི་གཞན་དག་ཀྱང་འདི་བཞིན་དུ་རྒྱུ་དང་ལྡན་པའི་དབང་གིས་འོ་མ་ཡང་བ་ཉིད་དུ་ཤེས་པར་བྱ་བའི་ཕྱིར་སྨོས་པ་ཡིན་ཏེ། འདི་ལས་གོ་བཟློག་པའི་རང་བཞིན་ཅན་ནི་ལྕི་བ་ཡིན་པར་ཤུགས་ཀྱིས་གོ་བར་བྱའོ། །ཆུ་ཉུང་དུ་འཐུང་བ་ལ་སོགས་པའི་རང་བཞིན་ནི་དུས་དང་ཡུལ་ལ་སོགས་པ་ལ་ལྟོས་ནས་བྱ་བ་ཡིན་ནོ། །རའི་འོ་མ་འདི་ནི་སྐེམ་པ་ལ་སོགས་པའི་ནད་སྐྱེད་པ་ཡིན་ཏེ། སྐེམ་པ་ནི་གཅོང་ཆེན་པོའོ། །རྔ་མོའི་འོ་མ་ཅུང་རྩུབ་དྲོ། །ལན་ཚ་བྲོ་ཞིང་དྲོད་ཆེ་ཡང༌། །རླུང་དང་བད་ཀན་ལྟོ་སྦོས་སྲིན། །འོར་ནད་དམུ་རྫིང་གཞང་ནད་སེལ། །ཞེས་བྱ་བ་ལ། རྔ་མོའི་འོ་མ་ནི་ཅུང་ཟད་རྩུབ་པ་དང༌། ཅུང་ཟད་དྲོ་བ་དང༌། ཅུང་ཟད་ལན་ཚྭ་བྲོ་བ་ཡིན་ཞིང༌། མེ་དྲོད་ཆེ་བར་སྐྱེད་བ་དང༌། ཡང་བ་ཡིན་ལ། རླུང་དང༌། བད་ཀན་དང༌། ལྟོ་སྦོས་
པ་དང། སྲིན་ནད་དང༌། འོར་ནད་དང༌། དམུ་རྫིང་དང༌། གཞང་འབྲུམ་གྱི་ནད་ལ་ཕན་ཞིང་བསྔགས་པ་ཡིན་ནོ། །བུད་མེད་ནུ་ཞོ་རླུང་མཁྲིས་ཁྲག །སྣད་བའི་མིག་ནད་སེལ་བྱེད་དེ། །ཚིམ་བྱེད་མིག་དང་སྣར་བླུགས་ཕན། །ཞེས་བྱ་བ་ལ། བུད་མེད་ཀྱི་འོ་མ་དེ་ནི་རླུང་དང༌། མཁྲིས་པ་དང༌། ཁྲག་དང། སྣད་པ་ལས་བྱུང་བའི་མིག་ནད་གང་ཡིན་པ་དག་སེལ་ཞིང་འཇོམས་པར་བྱེད་དོ། །ཇི་ལྟར་ན་དེ་སེལ་བར་བྱེད་ཅེ་ན། ཚིམ་བྱེད་མིག་དང་སྣར་བླུགས་ཕན། །ཞེས་བྱ་བ་ཡིན་ཏེ། ཚིམ་པར་བྱེད་པ་ལ་སོགས་པའི་མཚན་ཉིད་ནི། གནས་འདི་ཉིད་ཀྱི་འོག་ནས་བཤད་པ་ཡིན་ཏེ། ཚིམ་པར་བྱ་བ་ནི་མིག་བཀང་བ་སྟེ། ནས་སམ་སྲན་མ་ཤའི་ཟན་གྱི་རེང་བུ་སྦོམ་པར་བྱས་ལ་བསྐོར་ཏེ་བཀང་བའོ། །མིག་ཏུ་བླུགས་པ་ནི་མིག་འབྲས་ཀྱི་སྟེང་དུ་བླུགས་པའོ། །སྣར་བླུགས་པ་ནི་སྣ་ནས་གཏོང་བའོ། །ལུག་གི་འོ་མ་སྙིང་གནོད་ཚ། །རླུང་འཇོམས་སྐྱིགས་བུ་དབུགས་མི་བདེ། །མཁྲིས་པ་བད་ཀན་སྐྱེད་པ་ཡིན། །ཞེས་བྱ་བ་ལ་ལུག་གི་འོ་མ་ནི་སྙིང་ལ་གནོད་པ་སྟེ། ཤིན་ཏུ་མི་དགའ་བའམ། སྙིང་ནད་སྐྱེད་པའོ། །ཚ་བ་ནི་ནུས་པ་ཚ་བ་དང་ལྡན་པའོ། །རླུང་འཇོམས་པ་ནི་རླུང་གི་ནད་འཇིག་པའོ། །དེ་ལ་སྐྱིགས་བུ་དང་དབུགས་མི་བདེ་བ་དང༌། མཁྲིས་པ་དང༌། བད་ཀན་ནི་སྐྱེད་པར་བྱེད་པ་ཡིན་ནོ། །བ་གླང་མོ་ཡིས་རབ་བརྟན་བྱེད། །ཅེས་བྱ་བ་ནི། བ་གླང་མོའི་འོ་མ་ནི་རབ་ཏུ་བརྟན་པར་བྱེད་པ་ཡིན་ཏེ། ལུས་ཤིན་ཏུ་བརྟན་པར་བྱེད་པ་ཡིན་ནོ། །རྨིག་པ་གཅིག་པའི་འོ་མ་ཚ། །ཡན་ལག་རླུང་སེལ་སྐྱུར་བཅས་ཤིང༌། །ལན་ཚྭ་བྲོ་ཞིང་རྨོངས་པར་བྱེད། །ཅེས་བྱ་བ་ལ། རྨིག་བ་གཅིག་པ་ནི། རྨིག་སྦུབས་གཅིག་ཡོད་པ་སྟེ། རྨིག་བ་ལ་ཁ་བྲག་ཏུ་མ་གྱུར་པ། རྟ་དང་བོང་བུ་ལ་སོགས་པ་རྣམས་ལ་རྨིག་པ་གཅིག་པ་ཞེས་བྱ་བ་སྟེ། དེ་དག་གི་འོ་མ་ནི་ཚ་ཞིང་དྲོ་བའི་ནུས་པ་དང་ལྡན་པ་ཡིན་ནོ། །ཡན་ལག་ནི་ཁྲག་ལ་སོགས་པའི་ལུས་ཟུངས་རྣམས་ཏེ། དེ་ལ་གནས་པའི་རླུང་སེལ་ཞིང་འཇོམས་པར་བྱེད་པ་དང༌། སྐྱུར་དང་བཅས་པ་དང༌། ལན་ཚྭ་བྲོ་བ་ནི་ཅུང་ཟད་སྐྱུར་བ་དང༌། ཅུང་ཟད་ལན་ཚྭ་བྲོ་བའོ། །རྨོངས་པར་བྱེད་ཅེས་བྱ་བ་ནི་རྨོངས་རྨོངས་པོར་བྱེད་ཅིང༌། ལུས་མི་གསལ་བ་བེམས་པོ་ཉིད་དུ་བྱེད་བའམ། ཤེས་རབ་ལ་
གནོད་པར་བྱེད་པའོ། །ཡང་ན་རྨོངས་པ་ནི་བླུན་པ་ཉིད་དུ་གྱུར་པའོ། །ཞེས་ལ་ལས་བཤད་དོ། །འོ་རློན་བད་ཀན་སྐྱེད་ཅིང་ལྕི། །རིགས་པར་བསྐོལ་བས་དེ་ལས་གཞན། །ཤིན་ཏུ་བསྐོལ་ན་འཇུ་དཀའ་ལྕི། །བཞོས་མ་ཐག་དྲོ་བདུད་རྩིར་མཚུངས། །ཞེས་བྱ་བ་ལ། འོ་མ་ཐམས་ཅད་མ་བསྐོལ་བ་ནི་བད་ཀན་སྐྱེད་ཅིང་འཕེལ་བར་བྱེད་པ་ཡིན་ཏེ། དྲི་མ་དང་ལྡན་པས་ལུས་ཀྱི་མི་རྒྱུ་བ་ཡིན་པར་རོ། །ལྕི་བ་ནི་ཡུན་རིང་ཞིག་ན་འཇུ་བ་སྟེ། ས་ནི་ཟླ་བའི་ཡོན་ཏན་གྱི་ཤས་ཆེ་བ་ཡིན་པས་དེ་ལས་འབྱུང་བའི་ཕྱིར་རོ། །རིགས་པར་བསྐོལ་ན་ཞེས་བྱ་བ་ནི་འོ་མ་དེ་ཉིད་རློན་པ་ལས་གོ་བཟློག་པར་བསྟན་ན་དེ་ལས་གཞན་པ་སྟེ། བད་ཀན་སྐྱེད་པ་མ་ཡིན་ལྕི་བ་ཡང་མ་ཡིན་ཏེ། བད་ཀན་སེལ་ཞིང་ཡང་བར་གྱུར་པའོ། །དེ་ལ་ལེགས་པ་ནི་སྦྱོར་བའི་ཐབས་ཏེ། ཇི་ལྟར་འོ་མའི་ཕྱེད་ཀྱི་ཆུས་བསྣན་ལ་བསྐོལ་བ་ནི། འོ་མ་རློན་པ་བས་ཤིན་ཏུ་ཡང་བ་ཡིན་ནོ། །ཞེས་རྒྱུད་གཞན་ནས་བཤད་པ་ཡིན་ནོ། །ཡང་ན་ཤིན་ཏུ་བསྐོལ་བ་མ་ཡིན་ལ། ཅུང་ཟད་བསྐོལ་བ་ཡང་མ་ཡིན་པ་ནི་རིགས་པ་ཡིན་ཏེ། མི་རིགས་པར་བསྐོལ་བ་ནི་མེ་དང་ཕྲད་པ་ཡིན་དུ་ཟིན་ཀྱང་ལྕི་བ་ཉིད་དུ་འགྱུར་རོ། །དེ་ཡང་གང་གི་ཕྱིར་མི་རིགས་པར་བསྐོལ་ཞིང༌། ཆུ་མེད་པར་བསྐོལ་བ་ལས། ཆ་གཅིག་དང༌། ཆ་གཉིས་དང༌། གསུམ་དང༌། བཞི་ནས་ཆ་བརྒྱད་ལུས་པའི་བར་གྱིས་ནི། གོང་ནས་གོང་དུ་སྙིང་པོ་འདུས་པར་འགྱུར་རོ། །དེ་ཡང་རྒྱུད་གཞན་ལས། འོ་མ་ཆུ་མེད་པར་བསྐོལ་བ། གཉིས་གསུམ་བཞི་ནས་བརྒྱད་ཆ་ལུས། །ཇི་ལྟར་ཤིན་ཏུ་བསྐོལ་བ་བཞིན། །སྙིང་པོ་ལྕི་ཞིང་རབ་སྟོབས་ལྡན། །ཞེས་བཤད་པ་ཡིན་ནོ། །དེ་བས་ན་ཤིན་ཏུ་བསྐོལ་ན་འཇུ་དཀའ་ཞིང་རབ་ཏུ་ལྕི་བར་འགྱུར་རོ། བཞོས་མ་ཐག་པའི་འོ་མ་དྲོ་བ་ནི་འཕྲལ་དུ་བཞོས་པའོ། །དེ་ནི་ཕན་པ་ཉིད་ཀྱིས་ན་བདུད་རྩིར་མཚུངས། ཞེས་བྱ་བ་སྟེ། བདུད་རྩི་དང་འདྲ་བ་ཡིན་ནོ། །ད་ནི་འོ་མ་ལས་ཞོར་གྱུར་བ་ལས། གནས་སྐབས་དུ་མ་ཉིད་དུ་གྱུར་བ། མ་རྫོགས་པ་ལས་ཇི་སྐད་དུ་བཤད་པའི་སྐྱུར་བ་དང༌། ཤིན་ཏུ་སྐྱུར་བ་ལ་སོགས་པའི་ཚུལ་གྱིས་ཞོ་མ་ལངས་པ་དང༌། ལེགས་པར་ལངས་པ་དང༌། ལངས་ནས་ཐལ་ཆེས་པ་ཉིད་དུ་
ཡོངས་སུ་གྱུར་པ་ལས། ཇི་ལྟར་ཞོའི་གནས་སྐབས་དུ་མར་གྱུར་པའི་རང་བཞིན་གྱི་གནས་སྐབས་གཞུང་རྩོམ་པས་སྙིང་ལ་བཞག་སྟེ། སྨྲས་པ་ནི། ཞོ་ནི་རོ་དང་ཞུ་རྗེས་སྐྱུར། །རྟུག་སྐེམས་ལྕི་ལ་རླུང་ནད་སེལ། །ཚིལ་དང་ཁུ་ཆུ་སྟོབས་བད་ཀན། །ཁྲག་མཁྲིས་དྲོད་སྐྱེད་འོར་ནད་སྐྱེད་ཡིག་འབྱེད་ཅིང་ཁ་ཟས་ལེན། །གྲང་བའི་རིམས་དང་མི་སྙོམས་རིམས། །ཆམ་པ་གཅིན་འགགས་གྱུར་པ་དང༌། །འཁྲུ་བའི་ནད་ལ་རྩུབ་མོ་ཕན། །ཞེས་བྱ་བ་ལ། ཞོ་གང་རོ་དང་ཞུ་བའི་རྗེས་སྐྱུར་བ་ནི་རོ་དང་ཞུ་རྗེས་སྐྱུར་བའོ། །རྟུག་སྐེམས་ཞེས་བྱ་བ་ནི་བཤང་གཅི་ལ་སོགས་པ་རང་གི་གནས་ནས་བསྐུལ་ནས་གོང་པོར་བྱེད་པ་ལ་བྱའོ། །ལྕི་བའི་ཡོན་ཏན་དང་ལྡན་པ་ནི་ལྕི་བའོ། །རླུང་གི་ནད་སེལ་བས་ན་རླུང་སེལ་ལོ། །དྲོ་བ་ནི་དྲོ་བའི་ནུས་པ་བསྐྱེད་པའོ། །དེ་བཞིན་དུ་ཚིལ་དང་ཁུ་ཆུ་དང་སྟོབས་ལ་སོགས་པ་རང་གི་གནས་ནས། དེ་བཞིན་དུ་ཡིག་འབྱེད་ཅིང་འགྲངས་སུ་ཟིན་ཀྱང་འདོད་པར་བྱེད་པ་ཡིན་ནོ། །དེ་བཞིན་དུ་ཁ་ཟས་ལེན་ཞེས་བྱ་སྟེ། ཡིག་འཆུས་པ་ལ་ཕན་ཞིང་ཟས་གཞན་དག་ཀྱང་ཡི་གར་འོང་བར་བྱེད་པའོ། །དེ་བཞིན་གྲང་བའི་རིམས་དང་ཞེས་པ། གྲང་བ་ལས་གྱུར་པའི་རིམས་དང༌། རིམས་ལྡང་དུབ་མི་སྙོམས་པ་ལ་སོགས་པ་དང༌། ཆམ་པ་དང་གཅིན་འགགས་པར་གྱུར་པ་དང༌། འཁྲུ་བའི་ནད་རྣམས་ལ་ཕན་པ་ཡིན་ནོ། །དེ་ལ་རྩུབ་པ་ནི་ལེགས་པར་ལངས་པའི་ཞོ་ལས་དུས་འདས་ནས། རིམ་གྱིས་ཤིན་ཏུ་སྨིན་པར་གྱུར་པ་ནི་རྩུབ་པོ་ཡིན་བའམ། ཡང་ན་སྤྲིས་མ་བཤུས་པའི་ཞོ་ནི་རྩུབ་པོ་ཡིན་ནོ། །ཞོ་དྲོན་དཔྱིད་དང་སོག་དང༌། །སྟོན་དུས་མཚན་མོ་བཏུང་མི་བྱ། །དེ་ནི་མུངྒའི་སྲན་ཚོད་དང༌། །སྦྲང་རྩི་མར་དང་ཤ་ཁ་ར། །སྐྱུ་རུང་ནི་མེད་མི་བཏུང༌། །རྟག་ཏུ་མ་ཡིན་མ་ལངས་མིན། །གཞན་དུ་རིམས་ཁྲག་མེ་དབལ་དང༌། །མཛེ་དང་སྐྱ་རྦབ་མགོ་འཁོར་སྐྱེད། །ཅེས་བྱ་བ་ལ། ཞོ་དེ་ནི་དྲོན་པོར་མི་བཏུང་བ་དང༌། དེ་བཞིན་དུ་དཔྱིད་དང་སོག་དང༌། སྟོན་གྱི་དུས་སུ་བཏུང་བར་མི་བྱའོ། །དེ་ལྟར་ན་སྔར་དྲོན་པོར་ཞེས་སྨོས་པ་ནི་སོ་གའི་དུས་ཡིན་བར་ཤེས་པར་བྱ་སྟེ། དེའི་ཚེ་བཏུང་བར་མི་བྱ་སྟེ། དེ་བཞིན་དུ་མཚན་མོ་ཡང་བཏུང་བར་མི་བྱའོ། །གལ་ཏེ་དེ་འཐུང་བར་བྱེད་ན་སྲན་མུངྒ་སྟེ། མོན་སྲན་སྡེའུའི་ཚོད་མ་དང་
སྦྱར་བ་བཏུང་བར་མི་བྱ་བ་དང༌། དེ་བཞིན་དུ་སྦྲང་རྩི་དང་མར་དང་སྦྱར་བའམ། མར་དང་ཤ་ཁ་ར་དཀར་པོ་དང༌། ཤ་ཁར་དང་མི་ལྡན་པར་བཏུང་བ་དང༌། སྐྱུ་རུ་ར་མ་ཟོས་པར་མི་བཏུང་ངོ༌། །དེ་བཞིན་དུ་རྟག་བར་རྒྱུན་དུ་མི་བཏུང་བ་དང༌། མ་ལངས་མིན་ཞེས་བྱ་བ་སྟེ། ལེགས་པར་མ་ཆགས་ལ། གང་གི་ཚེ་འོ་མའི་རང་བཞིན་མ་སྤངས་ཤིང་ཞོར་ལེགས་པར་མ་ཆགས་པ་དེའི་ཚེ་མ་ལངས་པ་ཞེས་བྱ་སྟེ། དེ་མི་བཏུང་ངོ༌། །གཞན་དུ་ཞེས་བྱ་བ་ནི་སྔར་བཤད་པའི་ཆོ་ག་དང་མི་ལྡན་ཞིང་དེ་མ་སྤངས་པར། ལ་ལ་ཞིག་སྤྱོད་པར་བྱེད་ན། དེའི་ཚེ་ཞོ་དེས་རིམས་ལ་སོགས་པ་སྐྱེད་པར་འགྱུར་རོ། །དར་སར་ཡང་ལ་བསྐ་ཞིང་སྐྱུར། །དྲོད་སྐྱེད་བད་ཀན་རླུང་དག་སེལ། །སྐྲན་ནད་དམུ་རྫིང་གཞང་འབྲུམ་དང༌། །ཕོ་ནད་ཆུ་སྲི་ཡི་ག་འཆུས། །མ་ཆེར་པ་སྐྲན་དང་མར་མ་ཞུ་།སྦྱར་དུག་སྐྱ་རྦབ་ནད་རྣམས་སེལ། །ཞེས་བྱ་བ་ལ། དར་སར་ཞེས་བྱ་བ་ལ་ཞོ་སྲུབ་ཤིང་ལ་སོགས་པས་བསྲུབས་པ་ལས་བྱུང་བ་སྟེ། སྲུབ་ཤིང་སྣུམ་མེད་པ་དང༌། མར་གྱི་ཕྱེད་ཕྱུང་བ་དང༌། མར་མ་ཕྱུང་བ་སྟེ། གསུམ་ཆར་ཡང་ཡང་བ་ཡིན་ལ། དེ་ལས་རོ་ནི་བསྐ་བ་དང་སྐྱུར་བ་ཡིན་ནོ། །དྲོད་སྐྱེད་པ་ནི་ཕོ་བའི་མེ་དྲོད་འཕེལ་བར་བྱེད་པའོ། །བད་ཀན་རླུང་དག་སེལ་ཞེས་བྱ་བ་ནི། དེ་ལས་གཉིས་བསྲུབས་པ་ལས་བྱུང་བ། དེ་བཞིན་དུ་སྐྲན་ནད་དང་དམུ་རྫིང་ལ་སོགས་པ་སེལ་བར་འགྱུར་བ་དང༌། ཆུ་སྲི་བ་སྟེ། གཅིན་སྲི་བ་དང་མཆར་པ་ཞེས་པ་ལྟོ་བའི་གཡོན་ལོགས་ན་བརྟེན་པའི་རྣམ་པ་ན་བ་དང༌། མར་མ་ཞུ་ཞེས་པ་མར་ལྷག་པར་ཟོས་པའམ། མ་ལེགས་པར་ཟོས་པ་ལས་བྱུང་བའི་ནད་ལ་ནི་མར་མ་ཞུ་བ་ཞེས་བྱའོ། །སྦྱར་དུག་ནི་བཅོས་མའི་དུག་གོ །སྐྱ་རྦབ་ཀྱི་ནད་ནི་སྐྱ་རྦབ་ལས་ནད་དུ་གྱུར་པ་སྟེ། ནད་དེ་རྣམས་སེལ་ཞིང་འཇོམས་པ་ཡིན་ནོ། །དེ་འདྲ་ཞོ་ག་ཆུ་འཁྲུ་ཡང༌། །རྩ་སྦུབས་སྦྱོང་ལ་རྟུག་སྐམས་སེལ། །ཞེས་བྱ་བ་ལ། དེ་འདྲ་ཞེས་པ་ནི་དར་བ་སར་པ་སྟེ་དེ་དང་ཞོ་ག་ཆུ་ཡོན་ཏན་འདྲ་ཞིང་མཚུངས་པར་ཤེས་པར་བྱ་ལ། དེ་ཡང་འཁྲུ་བ་སྟེ་ཅུང་ཟད་ཁོང་འཁྲུ་བ་དང༌། ཡང་པ་ཞེས་པ་དར་བ་སར་པ་ཡང་ཡང་བ་ཡིན་མོད་ཀྱི། འདི་ནི་ཤིན་ཏུ་ཡང་བས་ན་ཁྱད་པར་སྨོས་པ་ཡིན་ནོ། །རྩ་སྦུབས་སྦྱོང་ཞིང་དག་པར་བྱེད་པ་དང༌།
རྟུག་སྐམས་འགགས་པ་སེལ་ཞིང་འཇིག་པར་བྱེད་པ་ཡིན་ནོ། །ཞེས་བྱ་བའི་དོན་ཏོ། །འཕྲལ་གྱི་མར་སར་རོ་ཙ་ཞིང༌། །བསིལ་ཞིང་མདོག་སྟོབས་དྲོད་སྐྱེད་བྱེད། །འཁྲུ་གཅོད་རླུང་མཁྲིས་ཁྲག་གཞང་འབྲུམ། །གློ་གཅོང་ཁ་ཡོན་ལུད་པ་སེལ། །ཞེས་བྱ་བ་ལ། འཕྲལ་གྱི་མར་སར་ཞེས་པ་ནི་བསྲུབས་ཟིན་མ་ཐག་ཕྱུང་བའི་མར་སར་རོ། །རོ་ཙ་བ་ནི་ཁུ་བ་འཕེལ་བའོ། །བསིལ་བ་ནི་ནུས་པ་བསིལ་བའོ། །དེ་བཞིན་དུ་མདོག་དང་སྟོབས་ལ་སོགས་པ་ཡང་སྐྱེད་པར་བྱེད་པ་ཡིན་ནོ། །འཁྲུ་བ་གཅོད་པ་ནི་བཤང་གཅི་སླ་བ་ལས་སྐ་བར་བྱེད་དོ། །དེ་བཞིན་དུ་རླུང་དང་མཁྲིས་པའི་ཁྲག་སེལ་བ་ཡིན་ཏེ། རླུང་གི་ཁྲག་ནི་རླུང་ལས་གྱུར་པའི་ཁྲག་གོ །མཁྲིས་པའི་ཁྲག་ནི་མཁྲིས་པ་ལས་གྱུར་པའི་ཁྲག་སྟེ། དེ་དག་དང་གཞང་འབྲུམ་ལ་སོགས་བསེལ་ཞིང་བསྔགས་པ་ཡིན་ནོ། །ཞུན་མར་བློ་རྣོ་དྲན་གསལ་ཞིང༌། །ཡིད་གཞུངས་དྲོད་སྐྱེད་སྟོབས་ཚེ་འཕེལ། །མིག་དང་བྱིས་རྒན་བུ་འདོད་དང༌། །མདངས་བཟངས་རབ་གཞོན་སྐད་སྙན་ཕན། །གློ་རྡོལ་སྐེམ་དང་གཅོང་དང་འབྲས། །མཚོན་རྨས་མེས་ཚིག་རྨ་ལའང་བསྔགས། །རླུང་དང་མཁྲིས་པ་དུག་དང་སྨྱོ། །ལུས་སྐེམས་མདངས་ཉམས་རིམས་རྣམས་སེལ། །སྣུམ་གྱི་ནང་ན་སྣུམ་མཆོག་སྟེ། །བསིལ་ཞིང་ན་ཚོད་འཇོག་པའི་མཆོག །ཞུན་མར་སྟོབས་ནི་སྟོང་དང་ལྡན། །སྦྱོར་བས་ལས་ནི་སྟོང་བྱེད་འགྱུར། །ཞེས་བྱ་བ་ལ། ཞུན་མར་ནི་བློ་རྣོ་བ་ལ་སོགས་པ་ལ་ཕན་པ་ཡིན་ནོ། །དེ་ལ་བློ་རྣོ་བ་ནི་བློ་གྲོས་དང་ལྡན་པ་སྟེ། དངོས་པོ་རྣམས་འཛིན་པར་ནུས་པའོ། །དྲན་བ་ནི་འདས་པའི་དངོས་པོ་ཡིད་ལ་དྲན་པར་ནུས་པའོ། །ཡིད་གཞུངས་པ་ནི་དངོས་པོ་རྣམས་བྱེ་བྲག་ཕྱེད་པའི་ཤེས་རབ་འཛིན་པར་བྱེད་པའོ། །དྲོད་སྐྱེད་པ་ནི་ཕོ་བའི་མེ་དྲོད་སྐྱེད་པའོ། །སྟོབས་ནི་ནུས་མཐུའོ། །ཚེ་ནི་སྲོག་དང་འཚོ་བར་ལྡན་པ་སྟེ། དེ་དག་འཕེལ་བར་བྱེད་པའོ། །མིག་ནི་མིག་ཉིད་ལ་ཕན་པར་བྱེད་པ་སྟེ། ཞུན་མར་ནི་དེ་དག་ལ་བསྔགས་པ་ཡིན་ནོ། །བྱིས་བ་ནི་བཅུ་དྲུག་ལོན་གྱི་བར་རོ། །རྒན་པོ་ནི་དྲུག་ཅུ་ཡན་ཆད་ལོན་པའོ། །བུ་འདོད་པ་ནི་བུ་སྐྱེ་བར་འདོད་པའོ། །མདངས་ནི་ལུས་ལ་གནས་པའི་མཛེས་སྡུག་པའོ། །རབ་
གཞོན་ནི་ལུས་གཞོན་ཤ་ཆགས་ཤིང་མི་རྩུབ་བའོ། །སྐད་སྙན་པ་ནི་ཚིག་གསལ་བའོ། །ཕན་ཞེས་པ་ནི་དེ་དག་འདོད་པ་ལ་ཕན་ཞིང་རྗེས་སུ་མཐུན་པ་ཡིན་ནོ། །དེ་བཞིན་དུ་གློ་རྡོལ་བ་ལ་སོགས་པ་རྨྱ་ཞིང་སྙོན་རྨོངས་པའི་བདག་ཉིད་ཅན་རྣམས་ལ་ཡང་བསྔགས་ཏེ་ཕན་པ་ཡིན་ནོ། །ལུས་སྐེམ་པ་ནི་ལུས་ཟུངས་ཟད་པའོ། །གཞན་དག་ནི་གོ་བར་ཟད་དོ། །སྣུམ་གྱི་ནང་ན་ཞེས་པ་ནི་ཏིལ་མར་དང་ཞག་དང༌། རྐང་རྣམས་ཀྱི་ནང་ནའོ། །སྣུམ་མཆོག་སྟེ་ཆེས་པ་ནི་གཙོ་བོ་ཡིན་པའོ། །བསིལ་བ་ནི་བསིལ་བའི་ནུས་པ་དང་ལྡན་པའོ། །ན་ཚོད་འཇོག་པ་ནི་རྒས་པ་འཇོམས་པ་སྟེ། གཞོན་ནུ་ཉིད་དུ་དུས་ཡུན་རིང་པོར་འཇོག་པའོ། །མཆོག་ཅེས་བྱ་བ་ནི་ཤིན་ཏུ་དམ་པ་ཡིན་པའོ། །སྟོབས་སྟོང་དང་ལྡན་པ་ནི་ནུས་པ་མཐའ་ཡས་ཤིང་མཐུ་དུ་མ་ཡོད་པའོ། །དེ་བཞིན་དུ་སྦྱོར་བས་ཞེས་བྱ་བ་ཆོ་ག་ཐ་དད་པ་སྟེ་བཏུང་བ་དང༌། སྣ་ནས་བཏང་བ་དང༌། བསྐུ་བ་དང༌། འཇམ་རྩི་མས་གཏོང་བ་ལ་སོགས་པའི་སྦྱོར་བས་སོ། །ལས་ནི་སྟོང་བྱེད་འགྱུར། ཞེས་བྱ་བ་ནི། བྱ་བ་མང་པོ་བྱེད་པའི་ཕྱིར། །ལས་མཐའ་ཡས་པ་བྱེད་བའོ། །མར་རྙིང་སྨྱོ་དང་བརྗེད་བྱེད་བརྒྱལ། །གླད་ནད་རྣ་མིག་མངལ་ནད་དང༌། །རྨ་རྣམས་སྦྱོང་ཞིང་འཚོ་བྱེད་པས། །ནད་ལས་རྒྱལ་བྱེད་དམ་པ་ཡིན། །ཞེས་བྱ་བ་ལ། མར་རྙིང་བ་སར་པ་མ་ཡིན་པ་ལོ་མང་པོ་ལོན་པ་ནི་སྨྱོ་བ་ལ་སོགས་པའི་ནད་སེལ་བ་ཡིན་པ་དང༌། དེ་བཞིན་དུ་གླད་པ་དང༌། རྣ་བ་དང༌། མིག་དང༌། མངལ་གྱི་ནད་རྣམས་སེལ་བ་ཡིན་ནོ། །སྨྱོ་བ་དང་བརྒྱལ་བ་དག་ནི་འོག་ནས་ཆང་ནད་ཀྱི་ནད་གཞིའི་སྐབས་ན་བཤད་པར་བྱའོ། །བརྗེད་བྱེད་ཀྱང་འོག་ནས་བཤད་པར་བྱའོ། །རྨ་རྣམས་སྦྱོང་ཞིང་ཞེས་བྱ་བ་ནི་རྨའི་རྣག་ལ་སོགས་པ་སེལ་བའོ། །དེ་བཞིན་དུ་འཚོབ་ཅིང་འབྱོར་པར་བྱེད་པ་ཡང་ཡིན་ཏེ། འཚོབ་བ་ནི་རྨ་དེ་པགས་པ་གཞན་དང་མདོག་མཉམ་པར་བྱེད་པའོ། །ཕྲུམ་སར་སྤྲི་དང་རྒྱ་ཕྲུམ་དང༌། །ཆུར་བ་ལ་སོགས་སྟོབས་སྐྱེད་ཅིང༌། །ཁུ་བ་གཉིད་དང་བད་ཀན་འཕེལ། །རྟུག་སྐམས་བྱེད་ལྕི་ཉེས་དང་ལྡན། །ཞེས་བྱ་བ་ལ། ཕྲུམ་སར་ཞེས་བྱ་བ་ནི་འོ་མ་དང་དར་བ་ལས་བྱས་པ་སྟེ། གྲགས་པར་
ཟད་དོ། །སྤྲི་ནི་བ་ལ་སོགས་པ་འབྲངས་མ་ཐག་པའི་འོ་མ་ལས་བྱས་པའོ། །རྒྱ་ཕྲུམ་ནི་འོ་མའི་བཙོ་ཕྲུམ་ཨ་མི་ཚ་ཞེས་གྲགས་པའོ། །ཆུར་བ་ནི་ཞོ་ག་ཆུ་ལས་གདུས་པའི་གོང་བོའོ། །འོ་མ་ལས་གྱུར་པ་འདི་དག་ནི་སྟོབས་སྐྱེད་ཅིང་འཕེལ་བར་བྱེད་བ་དང༌། དེ་བཞིན་དུ་ཁུ་བ་དང༌། གཉིད་དང། བད་ཀན་འཕེལ་བར་བྱེད་པ་ཡིན་ནོ། །གཞན་ཡང་རྟུག་སྐམས་བྱེད་པ་དང༌། ལྕི་བ་དང་ཉེས་པ་དང་ལྡན་པ་སྟེ་གནོད་པའི་འགྱུར་བ་དག་སྟོན་པའོ། །སོགས་པ་ཞེས་སྨོས་པ་ནི་འོ་མ་ལས་བྱས་པའི་རྣམ་པ་གཞན་གང་དག་ཡོད་པ་བསྡུའོ། །བ་མར་འོ་མ་མཆོག་ཡིན་ཏེ། །ལུག་ལས་བྱུང་བ་སྨད་པ་ཡིན། །ཞེས་བྱ་བ་ལ། བའི་མར་དང་འོ་མ་དག་ནི་མཆོག་ཡིན་ཏེ་ཞེས་བྱ་བ། ཀུན་གྱི་མཆོག་གཙོ་བོ་ཡིན་ཞིང་དམ་པ་ཡིན་ལ། ལུག་ལས་བྱུང་བའི་མར་དང་འོ་མ་ནི་སྨད་ཅིང་མི་བསྔགས་པ་ཡིན་ནོ། །འོ་མའི་སྡེ་ཚན་ནོ།། །།འོ་མའི་སྡེ་ཚན་གྱི་འོག་ཏུ་བུ་རམ་ཤིང་གི་སྡེ་ཚན་སྨོས་པའི་དགོས་པ་ནི་ཇི་ལྟར་འོ་མའི་རོ་དང༌། ཞུ་བའི་རྗེས་མངར་བ་ཡིན་པ་དེ་བཞིན་དུ། བུ་རམ་ཤིང་གི་ཁུ་བ་ཡང་རོ་དང་ཞུ་བའི་རྗེས་མངར་བ་ཡིན་ནོ། །བུ་རམ་ཤིང་ཁུ་འཁྲུ་ལྕི་སྣུམ། །ཤ་སྐྱེ་རོ་ཙ་བད་གཅིན་འཕེལ། །བསིལ་ཞིང་ཁྲག་མཁྲིས་སེལ་བ་དང༌། །རོ་དང་ཞུ་རྗེས་མངར་བ་ཡིན། །ཞེས་བྱ་བ་ལ། བུ་རམ་ཤིང་ལས་བྱུང་བའི་ཁུ་བ་ནི་འཁྲུ་བ་སྟེ། བཤང་བ་ལ་སོགས་པ་སླ་བར་བྱེད་པ་དང༌། ལྕི་བ་དང༌། སྣུམ་པར་བྱེད་པ་དང༌། ཤ་སྐྱེ་བ་དང༌། ལུས་སྦོམ་ཞིང་འཕེལ་བར་བྱེད་པ་དང༌། རོ་ཙ་ཞིང་ཁུ་བ་འཕེལ་བ་དང༌། བད་ཀན་དང་གཅིན་འཕེལ་བར་བྱེད་པ་དང༌། བསིལ་བ་སྟེ་ནུས་པ་བསིལ་བ་དང༌། དེ་བཞིན་དུ་ཁྲག་དང་མཁྲིས་པ་སེལ་ཞིང་འཇོམས་པ་དང༌། རོ་དང་ཞུ་བའི་རྗེས་མངར་ཞིང་བདའ་བའི་ཡོན་ཏན་དང་ལྡན་པ་ཡིན་ནོ། །དེ་ཚེ་ལ་ན་ཚྭ་བྲོ་ཞིང་སོས། །བཅས་ན་ཁར་དག་དང་འདྲ། །ཞེས་བྱ་བ་ལ། བུ་རམ་ཤིང་དེའི་རྩེ་མོ་ཅུང་ཟད་ལན་ཚྭ་བྲོ་ཞིང༌། སོས་བཅས་ཤིང་ཟོས་པ་དང༌། དེའི་ཡོན་ཏན་ཤ་ཁ་ར་དང་འདྲ་བ་ཡིན་ནོ། །རྩ་བ་རྩེ་མོ་འབུས་ཟོས་སོགས། །བཙིར་དང་དྲི་མས་སྦགས་པ་དང༌། །དུས་ནི་ཅུང་ཟད་ལོན་པ་ལས། །འཁྲུལ་འཁོར་ཅན་ནི་རྣམ་འགྱུར་ཏེ། །ཚ་ཞིང་ལྕི་ལ་
མཁྲེགས་པར་འགྱུར། །ཞེས་བྱ་བ་ལ། རྩེ་མོ་དང་རྩ་བ་འབུས་ཟོས་པ་ལ་སོགས་པ་རྩ་བརྩེ་མོ་འབུས་ཟོས་སོགས། །ཞེས་བྱ་བ་ལ། དེ་རྣམས་བཙིར་བ་དང༌། དེ་བཞིན་དུ་དྲི་མས་སྤགས་ཤིང་གོས་པར་གྱུར་པ་དང༌། དེ་བཞིན་དུ་དུས་ཅུང་ཟད་ལོན་པར་གྱུར་ཞིང༌། དུས་ཅུང་ཟད་འདས་པར་གྱུར་པའི་འཁྲུལ་འཁོར་གྱིས་བཙིར་པའི་བུ་རམ་གྱི་ཁུ་བ་དེ་ནི་རྣམ་པར་འགྱུར་བར་བྱེད་ཅིང༌། གཞན་དུ་གྱུར་པ་ཉིད་དུ་འགྱུར་ཏེ། འགྱུར་པ་ཞེས་བྱ་བ་ནི་རང་གི་ངོ་བོ་ལས་གཞན་དུ་འགྱུར་བའོ། །དེས་ན་དེའི་ཚེ་བསིལ་བ་ཡིན་པ་ལས། ཚ་བར་འགྱུར་བ་དང༌། ཡང་བ་ལས་ལྕི་བར་འགྱུར་བ་དང༌། འཁྲུ་བ་ཡིན་པ་ལས་མཁྲེགས་པར་འགྱུར་བ་སྟེ། འདི་དག་ནི་དེའི་འགྱུར་བ་ཡིན་ནོ། །དེ་ལ་གོད་དུ་ཚ་བ་ཞེས་སྨོས་པ་ནི་གང་ལ་ཚ་བ་ཡོད་པ་དེ་ནི་ཚ་བ་སྟེ། ཕོ་བའི་མེ་དྲོད་དང་ཕྲང་ནས་གང་འཇུ་བར་གྱུར་པ་དེ་ནི། འཇུ་བའི་གནས་སྐབས་ཕྱེད་ཞུ་ཙམ་དུ་གྱུར་པ་ན། རྣམ་པར་ཚ་ཞིང་མཁྲིས་པ་སྐྱེད་པར་བྱེད་པས་ཡུན་རིང་དུ་གནས་ཀྱི་མྱུར་དུ་འཇུ་བར་མི་བྱེད་དོ། །དེ་ནི་ལྕི་བ་ཡིན་པའམ། དངོས་པོའི་རང་གི་རང་བཞིན་ཡིན་པས་ན། དེ་ཚ་བ་དང་ལྡན་པ་ཡིན་ནོ། །ཞེས་སྨན་དཔྱད་ཀྱི་ལུང་ལ་བརྟེན་པ་རྣམས་འཆད་དོ། །དེ་ལ་ཁ་ར་དཀར་པོའི་ཤིང༌། །བསིལ་དང་མངར་བས་མཆོག་ཡིན་ལ། །ཞེས་བྱ་བ་ལ། དེ་ལ་ཞེས་བྱ་བ་ནི་བུ་རམ་ཤིང་དེ་རྣམས་ཀྱི་ནང་ནས་ཁ་ར་དཀར་པོའི་བུ་རམ་ཤིང་ནི་བསིལ་ཞིང་དྲི་མ་མེད་པ་དང༌། མངར་བས་མཆོག་སྟེ་དམ་པ་ཡིན་ནོ། །དེས་ན་འདི་ནི་ཕུལ་དུ་བྱུང་བ་ཉིད་ཡིན་ནོ། །དེ་ཡི་འོག་མ་སྦུབས་ཅན་ཡིན། །ཞེས་བྱ་བ་ནི། ཁ་ར་དཀར་པོའི་ཤིང་དེ་ལས་བང་ཤི་ཀ་ཞེས་བྱ་བའི་བུ་རམ་ཤིང་སྦུབས་ཆེ་བ་བསིལ་བ་ལ་སོགས་པའི་ཡོན་ཏན་ཆུང་བ་ཡིན་ཏེ། བསིལ་བ་ལ་སོགས་པའི་ཡོན་ཏན་ཉུང་ཟད་ཅིག་དང་ལྡན་ཞེས་བྱ་བའི་དོན་ཏོ། །ཚིགས་བརྒྱ་པ་དང་ཀན་ཏ་ར། །བལ་ཡུལ་སྐྱེས་སོགས་དེ་ལས་རིམ། །ཅུང་ཟད་ཚྭ་བྲོ་བསྐ་བ་དང༌། །དྲོ་བཅས་ཅུང་ཟད་ཚ་བ་སྐྱེད། །ཅེས་བྱ་བ་ལ། ཚིགས་བརྒྱ་པ་ལ་སོགས་པའི་བུ་རམ་ཤིང་རྣམས་ནི། རིམ་གྱིས་འོག་ནས་འོག་ཏུ་བསིལ་བ་ལ་སོགས་པའི་ཡོན་ཏན་དམན་པ་ཡིན་ཏེ། སྦུབས་ཅན་དེ་ལས་ཡོན་ཏན་ཚིགས་བརྒྱ་
པ་དམན་པ་ཡིན་ལ། དེ་བས་ཀྱང་ཀན་ཏ་རའི་ས་བྱ་བའི་བུ་རམ་ཤིང་ཕྲ་མོ་ཞིག་ཡོད་པ་དམན་པ་ཡིན་ལ། དེ་བས་ཀྱང་བལ་ཡུལ་གྱི་དམན་པ་ཡིན་ཏེ། དེ་བཞིན་དུ་གཞན་དག་ལ་ཡང་སྦྱར་བར་བྱའོ། །དེ་རྣམས་ཀྱང་ཅུང་ཟད་ལན་ཚྭ་བྲོ་བ་དང༌། ཅུང་ཟད་བསྐ་བ་དང༌། ཅུང་ཟད་དྲོ་བ་དང། ཅུང་ཟད་ཚ་བ་སྐྱེད་པའི་ངང་ཚུལ་ཅན་ཡིན་ནོ། །སྦུ་བ་ཅན་ལྕི་བད་ཀན་སྐྱེད། །སོགས་བྱེད་གཅིན་ནི་སྦྱོང་བྱེད་ཡིན། །ཞེས་བྱ་བ་ལ། སྤུ་བ་ཅན་ཞེས་བྱ་བ་ནི་བུ་རམ་ཕྲ་མོ་དག་གི་རྣམ་གྲངས་ཡིན་ཏེ། དེ་ནི་ལྕི་བ་དང༌། བད་ཀན་སྐྱེད་ཅིང་འཁྲུགས་པར་བྱེད་པ་དང༌། སོགས་བྱེད་ཅེས་བྱ་བ་ཉེས་པ་གསུམ་སོགས་ཤིང་སྡུད་པར་བྱེད། །ཅེས་བྱ་བའི་དོན་ཏོ། །དེ་བཞིན་གཅིན་ནི་སྦྱོང་བྱེད་ཡིན། །ཞེས་བྱ་བ་ནི། གཅིན་སྦྱོང་ཞིང་དྲི་མ་མེད་པར་བྱེད་པའམ། ཡང་ན་གཅིན་མང་པོ་འབྱིན་པར་བྱེད་བ་ཡིན་ནོ། །དཀར་པོ་བད་ཀན་ཆེར་མི་སྐྱེད། །བཤང་དང་གཅི་བ་བདེ་བར་འབྱིན། །ཞེས་བྱ་བ་ལ། བུ་རམ་སྐམ་པོ་དང་པོ་བསྐོལ་བ་ན། །རྙོག་པ་དང་བྲལ་བར་བྱས་པ་ནི། བད་ཀན་ཆེར་མི་སྐྱེད་ཅེས་པ་སྟེ། བད་ཀན་ཅུང་ཟད་ཙམ་ཞིག་སྐྱེད། །ཅེས་བྱ་བའི་དོན་ཏེ། །དེ་བཞིན་དུ། བཤང་དང་གཅི་བ་བདེ་བར་འབྱིན། །ཞེས་བྱ་བ་སྟེ། བཤང་བ་དང་གཅི་བ་བདེ་བླག་ཏུ་ཕྱི་རོལ་དུ་འབྱིན་ཞིང་འབྱུང་བར་བྱེད་པ་ཡིན་ནོ། །དམར་ནག་ཕལ་ཆེར་སྲིན་བུ་ཁྲག །རྐང་ཚིལ་ཤ་དང་བད་ཀན་སྐྱེད། །ཅེས་པ་ནི། བུ་རམ་དམར་ནག་རྙོག་པ་ཅན་ནི་ཁོང་པའི་འབུ་སྲིན་མང་དུ་སྐྱེད་པ་ལ་སོགས་པ་བྱེད་པ་ཡིན་ནོ། །རྙིང་པ་ཡིད་འོང་ཕན་པ་ཡིན། །ཞེས་བྱ་བ་ནི། བུ་རམ་རྙིང་པ་ལོ་མང་པོ་ལོན་པ་ནི་ཡིད་དུ་འོང༌། ཞེས་བྱ་བ་སྟེ། ཡི་གང་འོང་ཞིང་སེམས་དགའ་བར་བྱེད་པ་དང༌། དེ་བཞིན་དུ་ཕན་པ་སྟེ། ལུས་ཟུངས་རྣམས་དང༌། གནོད་པ་རྣམས་ལ་ཕན་པ་ཡིན་ནོ། །སར་བ་དྲོད་འབྲི་བད་ཀན་སྐྱེད། །ཅེས་བྱ་བ་ནི། བུ་རམ་སར་པ་དག་ནི་བད་ཀན་སྐྱེད་ཅིང་མེའི་དྲོད་འབྲི་བ་ཡིན་ནོ། །ཧྭགས་དང་ཁཎྜ་ཁ་ར་དཀར། །རིམ་གྱིས་ཡོན་ཏན་ཆེ་བ་སྟེ། །རོ་ཙ་གློ་གཅོང་གློ་རྡོལ་དང༌། །ཁྲག་དང་མཁྲིས་པ་རླུང་སེལ་ཡིན། །ཞེས་བྱ་བ་ལ། ཧྭགས་ཞེས་བྱ་བ་ནི་བུ་རམ་གྱི་དངས་མའི་ཤ་ཁར་
སྟེ། ག་ལ་ཞེས་མིང་དུ་གྲགས་པའོ། །ཁཎྜ་ནི་དེ་ལས་ཀྱང་དངས་ཤིང་དྲི་མ་མེད་པའོ། །ཁ་ར་དཀར་པོ་ནི་དེ་བས་ཀྱང་ཆེས་དངས་ཤིང་རྙོག་པ་མེད་པའི་ཁ་ར་དཀར་པོའོ། །དེ་ལྟར་ན་རིམ་གྱིས་ཡོན་ཏན་ཆེ་བའོ། །དེ་དག་ནི་རོ་ཙབ་སྟེ་ཁུ་བ་འཕེལ་བར་བྱེད་པ་དང། གཅོད་དང་གློ་རྡོལ་བ་ལ་སོགས་པ་ལ་ཕན་པ་ཡིན་ནོ། །ཡ་བ་ཀ་ར་ཚ་ཞིང་མངར། །བསྐ་སྟེ་ཡོན་ཏན་དེ་དང་འདྲ། །ཞེས་བྱ་བ་ནི། ཡ་བ་ཀ་ར་ཞེས་འཇིག་རྟེན་ན་གྲགས་པ་ཡིན་གྱི། གཞན་དུ་ན་ཡ་ཤཱ་བ་ར་ཞེས་བྱའོ། །ལ་ལ་དག་ནི་བྱི་ཚེར་བའི་ཁུ་བ་ལས་བྱེད་དོ། །ཞེས་ཟེར་རོ། །དེའི་ཡོན་ཏན་ཡང་རོ་ཚ་བ་དང༌། མངར་བ་དང༌། བསྐ་བའི་རྒྱུས་ཧྭགས་ལ་སོགས་པ་དེ་དང་འདྲ་ཞིང་མཚུངས་པ་ཡིན་ནོ། །ཁ་ར་དཀར་ཀུན་ཚ་དང་སྐོམ། །སྐྱུགས་བྲོ་བརྒྱལ་དང་ཁྲག་མཁྲིས་སེལ། །ཞེས་བྱ་བ་ལ། ཁ་ར་འདི་དག་དང་ཁ་ར་གཞན་གང་དག་ཡོད་པ་དེ་ཐམས་ཅད་ནི་ཚ་བ་ལ་སོགས་པ་སེལ་ཞིང་འཇོམས་པ་ཡིན་ནོ། །བུ་རམ་ཤིང་གདུས་ཁ་ར་དང༌། །སྦུ་བ་ཅན་མཆོག་ཐ་མ་ཡིན། །ཞེས་བྱ་བ་ལ། བུ་རམ་ཤིང་གདུས་པ་ནི་བུ་རམ་ཤིང་གི་ཁུ་བ་གདུས་པ་རྣམས་ཀྱི་ནང་ན་ཁ་ར་ནི་མཆོག་ཡིན་ལ། དབུ་བ་ཅན་ཞེས་པ་བུ་རམ་ཕྲ་མོ་རྙོག་པ་ཅན་ནི་ཐ་མ་ཡིན་ནོ། །སྦྲང་རྩི་མིག་ཕན་གཅོད་སྐོམ་དང༌། །བད་ཀན་སྐྱིགས་བུ་ཁྲག་མཁྲིས་འཇོམས། །ཚིལ་ཆེན་མཛེ་ནད་གཅིན་ནད་སྐྱུག །ལུད་པ་དབུགས་མི་བདེ་ཚད་སེལ། །རྨ་སྦྱོང་རྨ་འཚོ་ཆག་གྲུགས་འབྱོར། །རླུང་ནི་སྐྱེད་པར་བྱེད་པ་ཡིན། །རྩུབ་ཅིང་བསྐལ་མངར་བ་སྟེ། །སྦྲང་རྩིའི་ཁཎྜ་དེ་དང་འདྲའོ། །ཞེས་བྱ་བ་ལ། སྦྲང་རྩི་དག་ནི་མིག་ལ་ཕན་ཞིང་བསོད་པ་ཡིན་པ་དང༌། གཅོང་བ་ཞེས་བྱ་བའི་ངང་ཚུལ་ཅན་ཡིན་པ་སྟེ། བད་ཀན་དང་མདུད་པ་ལྟར་འདྲིལ་ཏེ་གནས་པ་དེ། རང་གི་མཚན་ཉིད་རྣོ་བ་ལས་གཅོད་ཅིང་འཇིག་པར་བྱེད་པ་ཡིན་པ་དང༌། དེ་བཞིན་དུ་སྐོམ་པ་ལ་སོགས་པ་སེལ་ཞིང་འཇིག་པར་བྱེད་པ་དང༌། དེ་བཞིན་དུ་མཛེ་ནད་དང་གཅིན་ནད་ལ་སོགས་པ་ལ་ཕན་པར་བྱེད་པ་ཡིན་ནོ། །དེ་བཞིན་དུ་རྨའི་རྣགས་པ་དང༌། འདྲུལ་བ་ལ་སོགས་པ་སྦྱོང་བར་བྱེད་པས་ན། རྨ་སྦྱོང་ཞེས་བྱ་བ་ལ། འདིར་འཚོ་བར་བྱེད་པས་ན་རྨ་
འཚོ་སྟེ། པགས་པ་འཚོབ་ཅིང་མདོག་མ་ཉམས་པར་བྱེད་པའོ། །ཆག་གྲུགས་འབྱོར་པ་ནི་འདིས་རྨ་གཉིས་གཅིག་ཏུ་འབྱོར་པ་དང༌། ཆག་པ་འབྱོར་པར་བྱེད་པས་ན་དེ་སྐད་ཅེས་བྱའོ། །རླུང་སྐྱེད་པར་བྱེད་པ་ནི་རླུང་གི་ནད་འཁྲུགས་བར་བྱེད་པའོ། །དེ་བཞིན་དུ་རྩུབ་པ་དང། རོ་བསྐ་བ་དང་མངར་བ་ཡིན་ནོ། །སྦྲང་རྩིའི་ཁཎྜ་འང་དེ་དང་འདྲ། །ཞེས་བྱ་བ་ནི། སྦྲང་རྩིའི་ཡོན་ཏན་ཇི་སྙེད་ཡོད་པ་དེ་ཐམས་ཅད་སྦྲང་རྩིའི་ཁཎྜའི་ཡོན་ཏན་ཡང་ཡིན་པས་ན། དེ་གཉིས་ཡོན་ཏན་མཚུངས་ཤིང་འདྲ་བ་ཡིན་པས་ཤེས་པར་བྱའོ། །ཚ་ཞིང་ཚས་གདུངས་ཚ་བར་ལྡན། །ཚ་བ་དེས་ནི་བསོད་པར་འགྱུར། །ཞེས་བྱ་བ་ནི། སྦྲང་རྩི་དེ་ཚ་ཞིང་ཞེས་པ། མེ་ལ་སོགས་པས་བསྲོས་ན། དེས་མི་བསོད་ཅིང་འཇོམས་པར་འགྱུར་རོ། །དེ་བཞིན་དུ་ཚ་གདུངས་ཞེས་པ། ཉི་ཚན་ལ་སོགས་པ་ཚ་བས་གདུངས་པའི་སྦྲང་རྩིས་བསོད་པར་བྱེད་དོ། །དེ་བཞིན་དུ་ཚ་བར་ལྡན་ཞེས་བྱ་བ་ཚ་བའི་དུས་སམ། ཚ་བའི་ཡུལ་དུ་སྦྲང་རྩི་ཟོས་ན་མི་བསོད་བར་བྱེད་དོ། །དེ་བཞིན་དུ་ཚ་བ་ཞེས་བྱ་བ། མེ་ལ་སོགས་པས་བསྐོལ་ཞིང་ཚ་བར་བྱས་པའི་སྨན་དང་ལྷན་ཅིག་སྦྲང་རྩི་ཟོས་ན་ཡང་མི་བསོད་བར་བྱེད་དོ། །སྐྱུགས་སྨན་སྨན་མར་མས་གཏོང་ལ། །སྦྲང་རྩི་དྲོ་བ་བཀག་པ་མེད། །ཅེས་བྱ་བ་ལ། སྦྲང་རྩི་དྲོ་བ་དག་ཀྱང་སྐྱུགས་སྨན་གཏོང་བ་དང༌། སྨན་མར་མས་གཏོང་བ་ལ་དགག་པ་མེད་དེ། གང་ཕྱིར་དེ་ནི་མི་འཇུ་བར། །མྱུར་དུ་ལྡོག་བར་འགྱུར་ཕྱིར་རོ། །ཞེས་བསྡུས་པ་ལས་གཏན་ཚིགས་བཤད་པ་ཡིན་ནོ། །བུ་རམ་ཤིང་གི་སྡེ་ཚན་ནོ།། །།འབྲུ་མར་རང་གནས་ལྟ་བུ་ཡིན། །དེ་ལ་ཏིལ་མར་ཏིལ་དང་མཚུངས། །གཙོ་བོ་རྣོ་ཞིང་ཁྱབ་པ་ཡིན། །པགས་པའི་ཉེས་སེལ་མིག་ལ་གནོད། །ཚ་ཞིང་རྣོ་ལ་བད་ཀན་སེལ། །སྐེམ་པོ་དག་ནི་ཤ་སྐྱེད་ཅིང༌། །སྦོམ་བོའི་ཤ་འབྲི་མཁྲེགས་པར་འོང༌། །རྟུག་འགགས་སྲིན་བུ་འཇོམས་པ་དང༌། །སྦྱར་བས་ནད་རྣམས་ཐམས་ཅད་སེལ། །ཨེ་རཎྜའི་མར་ཚ་ཞིང་ཁ། །ཞུ་རྗེས་མངར་ལྕི་འཁྲུ་བ་ཡིན། །རླིག་རླུགས་སྐྲང་རླུང་བད་ཀན་དང༌། །ལྟོ་ནད་ལྡང་དུ་བ་རིམས་རྣམས་སེལ། །འོར་ནད་སྐེད་པ་
གས་པ་དང༌། །ལྟོ་བ་རོ་རྒྱབ་ནད་ལ་ཕན། །ཨེ་རཎྜ་ནི་དམར་པོའི་མར། །རྣོ་ཚ་དྲིང་རབ་འབྱིལ་འགྲེང༌། །ཡུངས་མར་ཚ་དྲོ་རྣོ་བ་དང༌། །བད་ཀན་རླུང་སེལ་ཁུ་བ་འབྲི། །ཡང་ཞིང་ཁྲག་མཁྲིས་སྐྱེད་བྱེད་ལ། །ཤ་བཀྲ་མཛེ་འབྲུམ་རྨེན་བུ་སེལ། །བ་རུ་རའི་མངར་བསིལ་ཞིང་ལྕི། །སྐྲན་སྐྱེད་རླུང་དང་མཁྲིས་པ་སེལ། །ནིམ་མར་རབ་ཏུ་ཚ་མིན་ཁ། །ལྟོ་སྲིན་མཁྲིས་པ་བད་ཀན་སེལ། །ཟར་མ་ལེ་བརྒན་རྩི་ཡི་མར། །དྲོ་ཞིང་པགས་ནད་བད་མཁྲིས་སྐྱེད། །ཞག་དང་རྐང་ནི་རླུང་འཇོམས་ཤིང༌། །སྟོབས་དང་ཁུ་ཆུ་བད་ཀན་སྐྱེད། །ཤ་ནི་རང་དངོས་རྗེས་མཐུན་ལ། །ཚིལ་ཡང་དེ་དག་འདྲར་ཤེས་བྱ། །ཏིལ་མར་ལ་སོགས་པའི་སྡེ་ཚེན་ནོ།། །།ཆང་གི་སྡེ་ཚན་བརྩམས་པའི་དགོས་པ་ནི། ཆང་ནི་ནད་མེད་པར་བྱེད་པ་དང༌། །མེའི་དྲོད་སྐྱེད་ཅིང་ཡི་ག་འབྱེ་བ་ལ་སོགས་པའི་ཡོན་ཏན་གྱི་ཚོགས་རྣམས་དང་ལྡན་པའི་ཕྱིར་བསྟན་པ་ཡིན་ནོ། །དེ་ཡང་ཏིལ་མར་དང་ཐུན་མོང་གི་ཡོན་ཏན་ཅུང་ཟད་ཡོད་པས། ཏིལ་མར་ལ་སོགས་པའི་འོག་ཏུ་ཆང་ཐམས་ཅད་ཀྱི་སྤྱིའི་ཡོན་ཏན་སྨོས་པ་ནི། ཆང་ནི་དྲོད་འབར་ཡིག་འབྱེད། །རྣོ་ཞིང་དྲོད་སྐྱེད་ཁོང་བརྟ་དགའ། །མངར་བཅས་ཁ་ཞིང་ཚ་བ་དང༌། །ཞུ་རྗེས་སྐྱུར་ཞིང་ཅུང་ཟད་འཁྲུ། །བསྐ་བཅས་གདོངས་སྙན་ནད་མེད་དང༌། །སྤོབས་སྐྱེད་མདོག་འགྱུར་ཁོང་ཡང་ལ། །གཉིད་མེད་པ་དང་གཉིད་ཆེ་ལ། །ཕན་ཞིང་ཁྲག་དང་མཁྲིས་པ་སྐྱེད། །རིགས་འཐུངས་སྐེམ་དང་སྦོམ་ཕན་ཞིང༌། །རྩུབ་རྣོ་ལུས་སྒོ་ཁྱབ་ཅིང་སྦྱོང༌། །རླུང་དང་བད་ཀན་སེལ་བ་ཡིན། །གཞན་དུ་བསྟེན་ན་དུག་དང་མཚུངས། །ཞེས་བྱ་བ་འདི་ནི་ཆང་ཐམས་ཅད་ཀྱི་ཐུན་མོང་གི་ཡོན་ཏན་བརྗོད་པ་ཡིན་ཏེ། དེ་ལ་ཆང་ངོ་ཅོག་ཐམས་ཅད་ནི་དྲོད་འབར་བར་བྱེད་ཅིང་མེའི་ཤས་བསྐྱེད་པས་ན་དྲོད་འབར་རོ། །ཡི་ག་འབྱེ་ཞིང་ཟས་ལ་སྲེད་པ་སྐྱེ་བས་ན། ཡི་ག་འབྱེད་ཅེས་བྱ་སྟེ། འབྲས་ཆན་ལ་སོགས་པ་འདོད་པ་སྐྱེད་པའོ། །རྣོ་བ་ནི་ལུས་ཟུང་རྣམས་སྤྱོད་པར་བྱེད་ཅིང༌། ཚིགས་ཀྱི་མཚམས་འབྱོར་དམ་པོ་ལྷོད་པར་བྱེད་པའོ། །དྲོད་སྐྱེད་པ་ནི་ནུས་པ་དང་ལྡན་པ་དང༌། ཁོང་བརྟ་བ་ནི་ལུས་རྒྱས་བར་བྱེད་བའོ། །དགའ་བ་ནི་སེམས་མགུ་བར་བྱེད་པའོ། །མངར་
བཅས་ཁ་ཞིང་ཚ་དང་བཅས། །ཞེས་བྱ་བ་ནི། རོ་ཅུང་ཟད་མངར་བ་དང༌། ཅུང་ཟད་ཁ་བ་དང༌། དེ་བཞིན་དུ་ཞུ་བའི་རྗེས་དང༌། རོ་ཅུང་ཟད་སྐྱུར་བ་ཉིད་ཡིན་པ་དང༌། འཁྲུ་བ་སྟེ་ཁོང་འཁྲུ་བར་བྱེད་པ་དང༌། བསྐ་བཅས་ཞེས་བྱ་བ། ཅུང་ཟད་བསྐ་བའི་རོ་དང་ལྡན་པའོ། །དེ་བཞིན་དུ་གདངས་སྙན་པར་བྱེད་པའང་ཡིན་ཏེ། གདངས་སྙན་པ་ནི་ཚིག་གསལ་ཞིང་གདངས་མཐོ་བའོ། །ནད་མེད་པ་ནི་ཐ་མལ་བར་གནས་པ་ཉིད་དེ། དེ་བྱེད་པ་དང༌། སྤོབས་པ་ནི་སྨྲ་བ་ལས་ཞུམ་པ་མེད་པར་འགྱུར་བ་དང༌། མདོག་སྟེ་མདངས་དང་ལྡན་ལ་ཡང་བ་ཉིད་དང༌། གཉིད་མེད་པ་དང༌། གཉིད་ཆེ་བ་ལ་ཕན་ཞིང་བསོད་པ་ནི་ཆང་ཐམས་ཅད་མ་ཡིན་གྱི། གང་བད་ཀན་ལ་སོགས་པ་འཕེལ་བར་བྱེད་པ་ནི་གཉིད་མེད་པ་ལ་ཕན་ཏེ། དཔེར་ན་འབྲུའི་ཆང་ལ་སོགས་པ་ལྟ་བུའོ། །ཆང་ལ་ལ་ནི་གཉིད་ཆེ་བ་ལ་ཕན་ཏེ། གང་བད་ཀན་ལ་སོགས་པ་སེལ་བར་བྱེད་པ་སྦྲང་ཆང་ལ་སོགས་པ་ལྟ་བུའོ། །ཡང་ན་མཐུ་ཉིད་ཀྱིས་ཆང་ཐམས་ཅད་གཉིད་མེད་པ་དང༌། གཉིད་ཆེ་བ་ལ་ཕན་ནོ། །ཁྲག་དང་མཁྲིས་པ་སྐྱེད་པ་ནི་ཁྲག་དང་མཁྲིས་པའི་ནད་སེལ་བར་བྱེད་པའོ། །རིགས་འཐུངས་སྐེམས་དང་སྦོམ་ཕན་ཞིང༌། །ཞེས་པ་ནི་མི་སྐེམ་པོ་དང་ཚོ་ཞིང་སྦོམ་པ་ལ་ཕན་ཞིང་བསོད་པ་ཡིན་ནོ། །ཞེས་སྤྱིར་སྨོས་སུ་ཟིན་ཀྱང་ཆང་ལ་ལ་ནི་སྐེམ་པ་ལ་ཕན་པ་ཡིན་ལ། ཆང་ལ་ལ་ནི་སྦོམ་པ་ལ་ཕན་པ་ཡིན་གྱི། སྦོམ་པ་ལ་ཕན་པ་དེ་ཉིད་སྐེམ་པ་ལ་ཕན་པ་ནི་མ་ཡིན་ནོ། །ཡང་ན་ཟས་ལ་སོགས་པ་དང་རན་པར་འཐུངས་པའི་དབང་གིས་སམ། སྦྱོར་བ་ལ་སོགས་པའི་དབང་གིས་སམ། རྫས་ཀྱི་ནུས་པའི་དབང་གིས་ཐམས་ཅད་ཀྱང་སྐེམ་པ་དང་སྦོམ་པ་ལ་ཕན་པ་ཡིན་ནོ། །དེ་བཞིན་དུ་རྩུབ་པའི་ཡོན་ཏན་དང་ལྡན་པ་དང༌། རྣོ་བ་ནི་རྩ་ཕྲ་མོ་རྣམས་ལ་འཇུག་པར་བྱེད་པའོ། །ལུས་ཀྱི་སྒོ་ཁྱབ་ཅིང་སྦྱོང་བ་ནི་བད་ཀན་དང༌། རླུང་དང༌། ཚིལ་དང༌། དྲི་མས་ཡོངས་སུ་གང་བ་རྣམས་དྲི་མ་མེད་པར་བྱེད་པའོ། །དེ་བཞིན་དུ་དེ་རན་པར་འཐུངས་ན་རླུང་དང་བད་ཀན་དག་ཀྱང་སེལ་ཞིང་འཇོམས་པ་ཡིན་ནོ། །དེ་ལ་རན་པ་ཞེས་བྱ་བ་ནི་ཆ་མཉམ་པའི་སྦྱོར་བ་སྟེ། ཐུན་ཚོད་དང༌། ཡུལ་དང་དུས་ལ་སོགས་པའི་རྣམ་པ་ཤེས་པར་བྱས་ནས། དེ་དང་
རྗེས་སུ་གང་མཐུན་པ་གང་འཐུང་བ་དེ་ནི། དེའི་རིགས་པའམ་རན་པ་ཡིན་ནོ། །དེ་ཉིད་ཀྱིས་ན་གཞུང་ལས། དེ་བས་འདི་ཡི་སྦྱོར་བཤད་པ། །གང་ཞིག་བདེར་གྱུར་འབའ་ཞིག་ཕྱིར། །ཞེས་བཤད་པ་དང༌། དེ་བཞིན་དུ་ནུས་སྟོབས་དང་དུས་དང༌། ཡུལ་དང༌། བདག་ཉིད་ཀྱི་རང་བཞིན་གང་ཡིན་པ་དང༌། མཐུན་པའི་གྲོགས་དང༌། ནད་ཀྱི་ཚུལ་དང༌། ན་ཚོད་ཀྱི་རིམ་པ་ཤེས་པར་བྱས་ནས། དེ་དང་རྗེས་སུ་མཐུན་པར་འཐུངས་ན་བདུད་རྩི་འཐུངས་པ་དང་མཚུངས་པ་ཡིན་གྱི། དེ་ལས་གཞན་པར་རིགས་པ་དང་མི་ལྡན་ཞིང། རྣམ་པར་མ་དཔྱད་པར་འཐུངས་ན་དུག་དང་མཚུངས་ཤིང་འདྲ་བ་ཡིན་ནོ། །མི་རིགས་པར་འཐུངས་པ་ནི་དམན་པའམ། ལོག་པའམ་ཧ་ཅང་མང་དུ་འཐུངས་པ་ཡིན་ནོ། །དེ་ཡང་བསྡུས་པ་ཆེན་པོ་ལས་ཆང་ལ་སོགས་པ་བསྟེན་པ་ནི་བློ་དང་བརྟན་པ་དང༌། དྲན་པ་འཕྲོག་པར་བྱེད་པ་ཡིན་ནོ་ཞེས་བཤད་དོ། །ཆང་སར་ལྕི་ཞིང་ཉེས་སྐྱེད་ཡིན། །ཆང་རྙིང་དེ་ལས་གཞན་དུ་བྱེད། །ཅེས་བྱ་བ་ལ། ཆང་དེ་ཐམས་ཅད་ལས་ཆང་སར་པ་ནི་ལྕི་ཞིང་ཉེས་པ་རྣམས་འཁྲུགས་ལ་སྐྱེད་པར་བྱེད་པ་ཡིན་ནོ། །ཆང་རྙིངས་ཤིང་གྲུངས་མར་གྱུར་པ། ཁ་དོག་དང་དྲི་དང་རོ་ཕུན་སུམ་ཚོགས་པ་དང་ལྡན་པའི་ཆང་ཐམས་ཅད་ནི་སྔར་བཤད་པའི་ཆང་སར་བ་དེ་ལས་གཞན་དུ་བྱེད་དེ། དེ་ཡང་ཞིང་ཉེས་པ་སེལ་བར་བྱེད་པ་ཡིན་མོད་ཀྱི། འོན་ཀྱང་མཁྲིས་པ་ནི་སྐྱེད་ལ། རླུང་དང་བད་ཀན་ནི་འཇོམས་པ་ཡིན་པར་སྔར་བཤད་པ་ཡིན་ནོ། །ཚ་བའི་སྤྱོད་པར་ལྡན་མི་བཏུང༌། །སུན་ཅིང་བཀྲེས་ཉེན་ནད་པས་མིན། །ཤིན་ཏུ་རྣོ་མིན་སར་པ་དང༌། །ལེགས་པར་མ་བསླངས་རྙོག་ཅན་ཡིན། །ཞེས་བྱ་བ་ནི། ཆང་དེ་ཐམས་ཅད་ཚ་ཞིང་དྲོ་བའི་ཀུན་ཏུ་སྤྱོད་པ་དང་ལྡན་པའི་སྐྱེས་བུས་བཏུང་བར་མི་བྱའོ། །དེ་ལ་སྤྱོད་པ་ཞེས་བྱ་བ་ནི་བྱ་བ་སྟེ། དེ་ཡང་ཟས་དང་སྤྱོད་ལམ་གྱི་ཚུལ་ཏེ། ཟས་ཚ་བ་ཟོས་པའི་རྗེས་དང༌། སོ་ག་ལ་སོགས་པ་ཚ་བའི་དུས་དང༌། ཉི་ཚན་ལ་སོགས་པས་གདུངས་ཤིང་ཚ་བའི་སྐྱེས་བུས་བཏུང་བར་མི་བྱའོ། །དེ་བཞིན་དུ་ཆང་གིས་སུན་པས་དེའི་ཚེ། བཏུང་བར་མི་བྱ་བ་དང༌། དེ་བཞིན་དུ་བཀྲེས་པས་ཉེན་ཞིང་ཟིལ་གྱིས་མནན་པའི་
མིས་མི་བཏུང་བ་དང༌། དེ་བཞིན་དུ་ནད་པས་བཏུང་བར་མི་བྱ་སྟེ། དེ་བས་ན་ལུས་ཀྱི་གནས་སྐབས་ལས་དཔགས་ཏེ། ཆང་མི་བཏུང་བ་ཡང་ཡོད་པས་ཤེས་པར་བྱའོ། །དེ་བཞིན་དུ་ཤིན་ཏུ་རྣོ་ཞིང་ཚ་བས་མི་བཏུང་བ་དང༌། ཤིན་ཏུ་གཞོན་ཞིང་འཇམ་པས་ནི་མི་བཏུང་བ་དང༌། དེ་བཞིན་དུ་ལེགས་པར་མ་བསླངས་པ་སྟེ། རྒུན་འབྲུམ་དང༌། བུ་རམ་ཤིང་དང༌། འབྲས་བུ་དང༌། སྦྲང་རྩི་ལ་སོགས་པ་དང༌། ཏ་ཀི་ལ་སོགས་པའི་རྩི་ཉུང་ཟད་དང་སྦྱར་ཞིང༌། ཆང་དུ་ལེགས་པར་མ་རེག་པ་ཡང་བཏུང་བར་མི་བྱའོ། །རྙོག་ཅན་ཡིན་ཞེས་བྱ་བ་ནི་རྡུལ་དང༌། འདམ་རྫབ་དང༌། བོང་བ་དང༌། རྡོའི་གསེག་མ་ལ་སོགས་པ་དང་ལྡན་པ་དང་བཏུང་བར་མི་བྱའོ། །འབྲུ་ཆང་སྐྲན་དང་དམུ་རྫིང་དང༌། །རྟུག་སྐེམ་གློ་གཅོང་སེལ་བ་དང༌། །རླུང་འཇོམས་ཚིལ་དང་ཁྲག་སྐྱེད་ཅིང༌། །གཅིན་བདེར་འབྱིན་དང་བད་ཀན་སྐྱེད། །ཅེས་བྱ་བ་ནི། ཆང་གང་འབྲས་སཱ་ལུ་བཏགས་པ་ལས་བྱས་པ། སྐ་ཞིང་དཀར་བ་དེའི་ཡོན་ཏན་འདི་དག་ཡིན་ཏེ། ཆང་དེས་སྐྲན་ལ་སོགས་པ་སེལ་ཞིང་འཇོམས་པ་དང༌། ཚིལ་སྐྱེད་པར་བྱེད་པ་དང༌། དེ་བཞིན་དུ་ལྕི་ཞིང་རླུང་འཇོམས་པར་བྱེད་པ་དང༌། ཚིལ་ལ་སོགས་པ་སྐྱེད་ཅིང་འཕེལ་བར་བྱེད་དོ། །ཆང་དངས་ཡོན་ཏན་དེ་འདྲ་བས། །ཡིད་འོང་ཡང་ཞིང་རྣོ་བ་དང༌། །གཟེར་དང་ལུད་པ་དབུགས་མི་བདེ། །སྐྱུག་བྲོ་བཤང་འགགས་སྦོས་ཆམ་འཇོམས། །ཞེས་བྱ་བ་ནི། ཆང་གི་དངས་མ་སྟེང་དུ་བྱུང་བ་རྙོག་པ་མེད་པ་ཆུ་ལྟ་བུ་དེ་ལ་ནི་དངས་མ་ཞེས་བྱ་སྟེ། དེ་ཡང་ལུང་ལས། དངས་མ་ཆུ་ཞེས་བྱ་བར་བཤད། །འཛག་བདེ་དེ་བཞིན་ཆང་ཡིན་ལ། །དེ་འོག་བསྐ་བ་ཞེས་བྱ་སྟེ། །དེ་ཡི་འོག་མ་སྙིགས་མར་བཤད། །ཅེས་འབྱུང་བ་ཡིན་ནོ། །ཆང་གི་དངས་མ་དེ་ནི་སྔ་མའི་ཆང་སྐ་བའི་ཡོན་ཏན་གང་ཡིན་པ་དེ་ཐམས་ཅད་དངས་མ་འདི་ཡང་ཡིན་པས། ཡོན་ཏན་སྔ་མ་དེ་དང་འདྲ་བར་ཤེས་པར་བྱ་བ་དང༌། དེ་ནི་ཡང་ཡིད་དུ་འོང་ཞིང་སྙིང་དགའ་བར་བྱེད་པ་དང༌། དེ་བཞིན་དུ་ཡང་བ་དང་རྣོ་བས་བད་ཀན་དང་ཚིལ་ལ་སོགས་པ་སེལ་བར་བྱེད་པ་དང༌། གཟེར་བ་ལ་སོགས་པ་ཡང་འཇོམས་ཤིང་སེལ་བ་ཡིན་ནོ། །བ་རུའི་ཆང་ནི་ཡང་ཞིང་ཕན། །ཤིན་ཏུར་རོར་མི་འགྱུར་ཞིང༌། །
རྨ་དང་སྐྱ་རྦབ་མཛེ་ནད་ལ། །ཧ་ཅང་གནོད་པར་མི་འགྱུར་ཞིང༌། །ཞེས་བྱ་བ་ལ། བ་རུ་ར་ལས་སྦྱར་བའི་ཆང་ནི་བ་རུ་རའི་ཆང་སྟེ། དེ་ནི་ཡང་བ་དང་ཕན་པ་དང༌། ཤིན་ཏུ་ར་རོར་མི་འགྱུར་ཞིང༌། །ཞེས་པ་ཤས་ཆེར་མྱོས་པར་མི་བྱེད་པ་དང༌། དེ་བཞིན་དུ་རྨ་དང་སྐྱ་རྦབ་ཀྱི་ནད་དང༌། མཛེ་ནད་དག་ལ་དེ་ཆང་གཞན་ལྟར་ཧ་ཅང་མི་གནོད་པ་ཡིན་ནོ། །རྫས་བཞིན་ཡོན་ཏན་རྗེས་མཐུན་ཆང༌། །ཆང་གི་ཡོན་ཏན་ཀུན་ལས་ལྷག །ཕོ་ནད་སྐྱ་རྦབ་མཛེ་གཞང་འབྲུམ། །ལུས་སྐེམ་སྐྲང་འོར་དམུ་རྫིང་རིམས། །སྐྲན་དང་སྲིན་ནད་མཆེར་ནད་སེལ། །རོ་ནི་བསྐ་ཞིང་ཚ་རླུང་སྐྱེད། །ཅེས་བྱ་བ་ལ། རྫས་བཞིན་ཡོན་ཏན་རྗེས་མཐུན་ཆང༌། །ཞེས་བྱ་བ་ནི། རྫས་གང་བསྐོལ་ནས་བྱས་པའམ། མནན་ནས་བྱས་པ་ན། དེ་རྣམས་ཀྱི་ཡོན་ཏན་དེ་དེའི་རྗེས་སུ་འགྲོ་ཞིང་རྗེས་སུ་འབྲང་བ་སྟེ། དེའི་ཡོན་ཏན་དང་ལྡན་པར་འགྱུར་རོ། །ཞེས་བྱ་བའི་དོན་ཏོ། །དེ་ཡང་ཆང་གི་ཡོན་ཏན་ཀུན་ལས་ལྷག་ཅེས་བྱ་བ་ཡིན་ཏེ། དྲོད་སྐྱེད་པ་ལ་སོགས་པའི་ཆང་གི་ཡོན་ཏན་ཐམས་ཅད་ལས་ཡོན་ཏན་ལྷག་ཅིང་མང་བ་ཡིན་པ་དང༌། དེ་བཞིན་དུ་ཕོ་བའི་ནད་ལ་སོགས་པའི་གནོད་པ་རྣམས་སེལ་ཞིང་འཇོམས་པ་ཡིན་ནོ། །དེའི་རོ་ནི་བསྐ་བ་དང་ཚ་བ་ཡིན་ཞིང་རླུང་སྐྱེད་པར་བྱེད་པ་ཡིན་ནོ། །རྒུན་ཆང་ནད་སྦྱོང་སྙིང་ལ་ཕན། །ཤིན་ཏུ་དྲོ་མིན་མངར་ཞིང་འཁྲུ། །མཁྲིས་རླུང་ཅུང་ཟད་སྐྱེད་སྐྱ་རྦབ། །གཅིན་ནད་གཞང་འབྲུམ་སྲིན་ནད་སེལ། །ཞེས་བྱ་བ་ལ། རྒུན་འབྲུམ་ལས་བྱས་པའི་ཆང་ནི་རྒུན་ཆང་སྟེ། དེ་ནི་ནད་སྦྱོང་ཞིང་སེལ་བ་ཡིན་ཏེ། ཤིན་ཏུ་རྣོ་བ་ཡིན་པས་བད་ཀན་ལ་སོགས་པ་སེལ་བ་ཡིན་ནོ། །སྙིང་ལ་ཕན་པ་ནི་སྙིང་དགའ་བར་བྱེད་པའོ། །ཤིན་ཏུ་དྲོ་བ་མ་ཡིན་པ་ནི་ཅུང་ཟད་དྲོ་བའོ། །མངར་བ་ནི་རོ་མངར་བའོ། །དེ་བཞིན་དུ་འཁྲུ་བར་བྱེད་པ་དང༌། མཁྲིས་པ་དང་རླུང་ཅུང་ཟད་སྐྱེད་པ་ནི། ཆང་གཞན་ལ་ལྟོས་ན་སྐྱེད་པ་ཡིན་ནོ། །དེ་བཞིན་དུ་སྐྱ་རྦབ་ལ་སོགས་པ་སེལ་བ་ཡིན་ནོ། །བུ་རམ་ཆང་ནི་གཅིན་རྟུག་འགགས། །འབྱིན་ཞིང་ངོམས་ལ་དྲོད་སྐྱེད་ཡིན། །ཞེས་བྱ་བ་ལ། བུ་རམ་ལས་བྱས་པའི་ཆང་གི་བྱེ་བྲག་གིས་ནི་བུ་རམ་ཆང་སྟེ། དེ་ནི་གཅིན་རྟུག་འགགས་པ་འབྱིན་པ་ཡིན་ཏེ། གཅིན་འགགས་པ་དང་
རྟུག་པ་དང་འཕྱེན་འགགས་པ་འབྱིན་ཞིང་ཕྱི་རོལ་དུ་བདེ་བར་བྱེད་པ་ཡིན་ནོ། །དེ་བཞིན་དུ། ཚིམ་ཞིང་ངོམས་པར་བྱེད་པ་དང༌། མེའི་དྲོད་གསལ་བར་བྱེད་ཅིང་སྐྱེད་པར་བྱེད་པ་ཡིན་ནོ། །བུ་རམ་ཤིང་ཆང་རླུང་མཁྲིས་སྐྱེད། །སྣུམ་དང་བད་ཀན་ལས་བྱུང་འཇོམས། །ཚིལ་འོར་དམུ་རྫིང་གཞང་འབྲུམ་སེལ། །དེ་ལས་ཁུ་བ་བསྐོལ་མཆོག་ཡིན། །ཞེས་བྱ་བ་ལ། བུ་རམ་ཆང་ནི་བུ་རམ་ཤིང་གི་ཁུ་བ་བསྐོལ་བ་དང༌། མ་བསྐོལ་བ་ལས་བྱུང་བ་སྟེ། དེ་ཡང་ལུང་ལས། བུ་རམ་ཤིང་ཁུའི་བུ་རམ་ཆང༌། །རློན་པ་ཡིས་ནི་ནུས་པ་བསིལ། །བསྐོལ་བ་བསྐོལ་མའི་ཆང་ཞེས་བྱ། །ཞེས་བཤད་པ་ཡིན་ནོ། །བུ་རམ་ཆང་དེ་ནི་རླུང་དང་མཁྲིས་པ་སྐྱེད་པར་བྱེད་པ་ཡིན་ལ། སྣུམ་ལས་བྱུང་བ་དང༌། བད་ཀན་ལས་བྱུང་བ་ནི་འཇོམས་ཤིང་སེལ་བར་བྱེད་པ་ཡིན་ནོ། །དེ་བཞིན་དུ་ཚིལ་དང༌། འོར་ནད་དང༌། གཞང་འབྲུམ་དང༌། སྦོས་པ་སེལ་བ་ཡིན་ནོ། །དེ་ལས་ཞེས་པ་བུ་རམ་ཤིང་ལས་བྱུང་བའི་ཆང་གཉིས་ཀྱི་ནང་ནས་ཁུ་བ་བསྐོལ་བའི་ཆང་ནི་མཆོག་སྟེ་དམ་པ་ཡིན་ནོ། །སྦྲང་ཆང་འགྲིབ་བྱེད་རྣོ་བ་སྟེ། །གཅིན་ནད་ཆམ་པ་ལུད་པ་སེལ། །ཞེས་བྱ་བ་ནི། སྦྲང་རྩི་དང་ད་ཏ་ཀི་ལ་སོགས་པ་སྦྱར་བ་ལས་བྱས་པའི་ཆང་ནི་སྦྲང་ཆང་སྟེ། དེ་ནི་འགྲིབ་བྱེད་ཅེས་བྱ་བ་ཚིལ་ལ་སོགས་པ་འགྲིབ་པར་བྱེད་ཅིང༌། རྣོ་བ་ལས་ལུས་ཟུངས་རྣམས་སེལ་བར་བྱེད་པ་ཡིན་ནོ། །དེ་བཞིན་དུ་གཅིན་ནད་དང༌། ཆམ་པ་དང་ལུད་པའི་ནད་སེལ་ཞིང་རྒྱལ་བར་བྱེད་པ་ཡིན་ནོ། །ཚ་ནི་ཁྲག་མཁྲིས་བད་ཀན་དག །འཇུ་ཞིང་རླུང་ནི་སྙོམས་བྱེད་ལ། །རབ་ཏུ་ཚ་ཞིང་རྣོ་རྩུབ་སྐྱུར། །ཡིད་འོང་ཡི་ག་འབྱེད་ཅིང་འཁྲུ། །དྲོད་སྐྱེད་རེག་ན་བསིལ་བ་དང༌། །སྐྱ་རྦབ་སྲིན་སེལ་མིག་ལ་གནོད། །ཅེས་བྱ་བ་ནི། ཆང་ཐམས་ཅད་ཕལ་ཆེར་རོ་ལྔ་དང་ལྡན་པ་ཡིན་དུ་ཟིན་ཀྱང༌། དུས་ལས་ཡོལ་ཞིང་གཞན་དུ་གྱུར་པ་ན། གང་གི་ཚེ་དེའི་མངར་བ་ལ་སོགས་པའི་རོ་བཞི་ཡལ་ནས་རོ་སྐྱུར་བ་འབའ་ཞིག་ཤས་ཆེར་འཕེལ་ཞིང་བདོ་བ་དེའི་ཚེ། དེ་ནི་ཚ་ཞེས་བྱ་སྟེ། དེ་ཉིད་ཀྱིས་ན་ཆང་ཐམས་ཅད་ནི་ཞུ་བའི་རྗེས་སྐྱུར་བ་ཡིན་ནོ། །ཞེས་བསྟན་པ་ཡིན་ནོ། །དེ་ཡང་ལུང་ལས། ཤིན་ཏུ་སྐྱུར་བ་ཚ་ཞེས་བཤད་པ་ཡིན་ནོ། །དེའི་ཕྱིར་ཆང་ཐམས་ཅད་ནི་དུས་ཡུན་རིང་པོ་
ལོན་པ་དང༌། ཤིན་ཏུ་སྐྱུར་བར་འགྱུར་བ་ནི་ཚ་ཞེས་བྱའོ། །ཞེས་སྨན་དཔྱད་ཀྱི་ལུང་ལ་བརྟེན་པ་རྣམས་ཟེར་རོ། །ཚ་དེ་ནི་ཁྲག་དང་མཁྲིས་པ་དང་བད་ཀན་དག་འཇུ་བར་བྱེད་ཅིང་རང་གི་གནས་ནས་སྐྱོད་པར་བྱེད་དེ། ཐ་དད་པ་ལས་འདྲེས་པ་ཡིན་པར་ཤེས་པར་བྱའོ། །དེ་བཞིན་དུ་རླུང་སྙོམས་པར་བྱེད་པ་ཡིན་པས་ན། རླུང་ནི་སྙོམས་བྱེད་ལ་ཞེས་བྱ་སྟེ། འདིས་སྙོམས་པའམ་ཞི་བར་བྱེད་པའོ། །དེ་ཡང་ལམ་གཞན་ན་གནས་ལས་བྱུང་བ་དྲངས་ནས། རང་གི་གནས་སུ་གནས་པར་རྫས་གང་གིས་བྱེད་པ་དེ་ནི། རླུང་འཇོམས་པར་བྱེད་པ་སྟེ། ལམ་ལོག་པ་ན་གནས་པ་རང་གི་གནས་སུ་འཇོག་པར་བྱེད་དོ་ཞེས་བྱ་བའི་དོན་ཏོ། །ཡང་དེ་ནི་རབ་ཏུ་རྣོ་བ་དང༌། རྩུབ་པ་དང༌། སྐྱུར་བ་དང༌། ཡིད་དུ་འོང་བ་དང༌། ཡི་ག་འབྱེད་པར་བྱེད་པ་དང༌། ཁོང་འཁྲུ་བ་དང༌། ཕོ་བའི་མེ་དྲོད་སྐྱེད་པ་དང༌། རེག་པ་བསིལ་བ་དང། བསྐུས་ཤིང་བྱུགས་ན་བསིལ་བར་བྱེད་པ་དང༌། མིག་ལ་གནོད་པ་ཡིན་ནོ། །བུ་རམ་བུ་རམ་ཤིང་རྒུན་ཆང༌། །ཚ་ནི་ཕྱི་མ་ཕྱི་མ་ཡང༌། །ཞེས་བྱ་བ་ནི། བུ་རམ་ལ་སོགས་པའི་ཚ་ནི་ཕྱི་མ་ཇི་ལྟ་བ་བཞིན་དུ་ཡང་བ་ཡིན་ཏེ། དེ་ཡང་བུ་རམ་ཆང་གི་ཚ་ལས་བུ་རམ་ཤིང་གི་ཁུ་བའི་ཚ་ཡང་བ་ཡིན་ལ། བུ་རམ་ཤིང་གི་ཁུ་བའི་ཚ་བས་ནི་ཆང་གཞན་གྱི་ཚ་བ་ཡང་བ་ཡིན་ལ། ཆང་ཐམས་ཅད་ཀྱི་ཚ་བས་ནི་རྒུན་ཆང་གི་ཚ་བ་ཡང་བ་ཡིན་པར་ཤེས་པར་བྱའོ། །སྡོང་བུ་རྩ་བ་འབྲས་སོགས་ལས། །མནན་བྱས་དེ་དང་འདྲར་ཤེས་བྱ། །ཞེས་བྱ་བ་ནི། དེ་ལ་ཚ་དེ་རྣམས་ཉིད་དང༌། སྡོང་བུ་དང། རྩ་བ་དང༌། འབྲས་བུ་ལ་སོགས་པ་མནན་པ་ལས་བྱུང་བ་ཡང་དེ་དང་འདྲ་བར་ཤེས་པར་བྱའོ། །ཚ་ཤིན་ཏུ་དྲོ་བའི་ནུས་པ་དང་སྟོབས་སུ་ལྡན་པ་དང་འདྲ་བར་སྡོང་བུ་ལ་སོགས་པ་ལས་མནན་ཏེ་བྱས་པ་ཡང་དེ་དང་འདྲ་བའོ། །སོགས་པའི་སྒྲས་ནི་ཤུན་པ་དང་ལོ་མ་ལ་སོགས་པ་བསྡུའོ། །རྡོ་གུ་སོགས་ལས་བཞུར་བ་གཞན། །དུས་ཀྱི་སྐྱུར་པོ་ཡང་ཟས་ལེན། །ཞེས་བྱ་བ་ནི། རྡོ་གུ་ལ་སོགས་པའི་ཚོད་མའི་རྣམ་པ་མནན་ནས་སྐྱུར་པོར་བྱས་པ་དེ་ནི་ཡང་བ་དང༌། ཟས་ལེན་ཞིང་ཡི་ག་འབྱེད་པ་ཡིན་ལ། དེ་བཞིན་དུ་རྡོ་གུ་དང༌། རྩ་བ་དང༌། འབྲས་བུ་ལ་སོགས་པའི་དུས་རིང་པོར་
སྐྱུར་པོར་གྱུར་པ་དང༌། ཡང་ཞིང་ཟས་ལེན་པར་བྱེད་པ་ཡིན་ནོ། །དེས་ན་དེ་གཉི་ག་ཡང་ཡི་ག་འབྱེད་པར་བྱེད་པ་ཡིན་ནོ། །འབྲས་ཁུའི་རང་སྐྱུར་འཁྲུ་རྣོ་ཚ། །མཁྲིས་པ་སྐྱེད་བྱེད་བསྐུས་ན་བསིལ། །ངལ་དང་རྨྱ་སེལ་ཡི་ག་འབྱེད། །དྲོད་སྐྱེད་ཆུ་སོའི་ནད་སེལ་ཡིན། །ཞེས་བྱ་བ་ལ། འབྲས་ཁུའི་རང་སྐྱུར་ནི་འབྲས་ཀྱི་ཁུ་ལེ་མནན་ནས། རང་སྐྱུར་དུ་གྱུར་པའི་བཏུང་བ་ཀཉྫི་ཞེས་བྱ་བ་སྟེ། དེ་ནི་ཆང་དང༌། ཚྭ་དང༌། སྐྱུར་པོ་དང༌། ཅུང་ཟད་སྐྱུར་བས་སྡེ་ཚོམས་འདིའི་ནང་དུ་བསྟན་པ་ཡིན་ཏེ། ཇི་ལྟར་ཆང་ཡོ་བྱད་བསགས་ནས་ནད་པ་དེ་བཞིན་དུ་རང་སྐྱུར་འདི་ཡང་བྱེད་པ་དང༌། གཞན་ཡང་ཆུ་མང་བ་ཉིད་ཀྱིས། ཆང་དང་འདྲ་ཞིང་རེག་པ་བསིལ་བ་ཡིན་ནོ། །དེ་འཁྲུ་བ་སྟེ། ཁོང་འཁྲུ་བ་ཡིན་ནོ། །དེ་སྐད་དུ་ལུང་ལས། བཤང་བ་ལ་སོགས་གང་པོ་ནི། །འཇིག་པས་འཁྲུ་བ་ཞེས་བཤད་དེ། །དེ་ལས་བཟློག་པ་འགགས་པ་ནི། །རྟུག་སྐམ་ཞེས་ནི་བྱ་བར་བཤད། །ཅེས་འབྱུང་བ་ཡིན་ནོ། །རྣོ་བ་ནི་བད་ཀན་ལ་སོགས་པ་འཇིག་པའོ། །མཁྲིས་པ་སྐྱེད་པ་ནི་མཁྲིས་པ་འཕེལ་བར་བྱེད་པའོ། །བསྐུས་ན་བསིལ་ཞེས་བྱ་བ་ནི། ལུས་ཀྱི་ཕྱི་རོལ་ནས་བསྐུས་ན་ཚ་བ་སེལ་བའོ། །ངལ་རྨྱ་སེལ་ཞེས་བྱ་བ་ནི། རྩོལ་ཞིང་ལས་སུ་བྱེད་པ་ལ་སོགས་པས་ཞུམ་ཞིང་ཞན་པར་གྱུར་པ་ནི། ངལ་བ་སེལ་ཞེས་བྱ་བ་ལ་སོགས་པ་མི་བྱེད་པར་ལུས་ཞུམ་ཞིང་ཉམ་ཆུང་བ་ནི་རྨྱ་བ་ཞེས་བྱ་སྟེ། དེ་དག་སེལ་བར་བྱེད་པས་ན། ངལ་བ་དང་རྨྱ་སེལ་ཞེས་བྱའོ། །ཡི་ག་འབྱེ་བ་ནི་ཟས་འདོད་པའི་ངང་ཚུལ་ཅན་ནོ། །ཡི་ག་འཆུས་པར་བྱེད་པ་ངེས་པར་འཇོམས་པ་ཡིན་པའི་ཕྱིར་དྲོད་སྐྱེད་པའོ། །ཆུ་སོའི་ནད་སེལ་ཞིང་ཞེས་བྱ་བ་ནི། ལྒང་པའི་ནད་སེལ་ཞིང་འབྱིན་པར་བྱེད་པ་ཡིན་པས་ན་དེ་སྐད་ཅེས་བྱའོ། །མས་གཏོང་ལ་ཕན་ཡིད་དུ་འོང༌། །ཡང་ཞིང་རླུང་དང་བད་ཀན་འཇོམས། །ཞེས་བྱ་བ་ལ། དེ་བཞིན་དུ་མས་གཏོང་བ་ལ་ཕན་པ་ཞེས་བྱ་སྟེ། མས་གཏོང་བ་ནི་རླུང་ལས་གྱུར་པའི་ནད་ལ། སྦུ་གུ་ནས་མར་ཁུ་ལ་སོགས་པ་བཤང་བའི་ལམ་ནས་འཛུད་པ་སྟེ། དེ་ནི་འོག་ནས་བཤད་པར་བྱའོ། །གཞན་དག་ནི་གོ་སླའོ། །བ་གཅིན་ར་ལུག་མ་ཧེ་དང༌། །གླང་པོ་རྟ་བོང་རྔ་མོའི་
གཅིན། །མཁྲིས་སྐྱེད་རྩུབ་ཅིང་རྣོ་ལ་ཚ། །འཐུངས་རྗེས་ཚ་བྲོ་རོ་ཚ་སྟེ། །སྲིན་ནད་འོར་ནད་དམུ་རྫིང་སྤོས། །གཟེར་དང་སྐྱ་རྦབ་བད་ཀན་རླུང༌། །དུག་སྐྲན་ཤ་བཀྲ་ཡིག་འཆུས། །མཛེ་དང་གཞང་འབྲུམ་མྱུར་དུ་འཇོམས། །ཞེས་བྱ་བ་ནི། བ་གཅིན་ལ་སོགས་པའི་གཅིན་རྣམ་པ་བརྒྱད་འདིར་བསྟན་པ་ནི་དྲོ་བ་དང་རྣོ་བའི་ཡོན་ཏན་མང་བས། ཆང་དང་ཆ་མཐུན་པ་ཡོད་པ་བཤད་པ་ཡིན་ལ། རྣམ་པ་དེ་བརྒྱད་ཆར་ཡང་མཁྲིས་པ་སྐྱེད་ཅེས་བྱ་བ་སྟེ། མཁྲིས་པ་འཕེལ་བར་བྱེད་པ་དང༌། རྩུབ་པ་དང༌། རྣོ་བ་དང༌། ཚ་བ་ཡིན་ཞིང་འཐུངས་པའི་རྗེས་ལན་ཚྭ་བྲོ་བ་གང་ཡིན་པ་དེ་ནི་འཐུངས་རྗེས་ཚ་བྲོ་ཞེས་བྱ་སྟེ། འཐུངས་པ་དང་རོ་གཞན་གྱི་རྗེས་ལ་ལན་ཚྭ་བྲོ་བ་ཡིན་ལ། དེ་ཡང་གསལ་བ་དང་མི་གསལ་བར་བཤད་དོ། །དེ་ལ་རོ་ནི་གསལ་ཞེས་བྱ། །མི་གསལ་བ་ནི་འཐུངས་རྗེས་རོ། །མཐར་གསལ་བར་ཡང་འདོད་པ་ཡིན། །ཞེས་བཤད་པ་ཡིན་ནོ། །དེ་བཞིན་དུ་རོ་ལས་ཚ་བ་ཡིན་པ་དང༌། སྲིན་བུ་ལ་སོགས་པ་འཇོམས་ཤིང་ཡང་བར་འགྱུར་བ་ཡིན་ནོ། །དེ་ལྟར་ཆུ་བོ་བུ་རམ་ཤིང༌། །ཏིལ་མར་ཆང་གི་སྡེ་ཚོམས་རིམ། །གཤེར་པའི་རྫས་ཕྱོགས་གཅིག་པ་འདི། །རགས་རིམ་ཇི་བཞིན་བསྟན་པ་ཡིན། །ཞེས་བཤད་པ་ནི། དེ་ལྟར་ཞེས་བྱ་བ་བཤད་མ་ཐག་པའི་རྣམ་པས་ཆུ་དང་འོ་མ་ལ་སོགས་པ་གཤེར་བའི་རྫས་ཀྱི་སྡེ་ཚོམས་ཀྱི་ཚོགས་ཀྱི་རིམ་པའི་གོ་རིམས་བསྟན་པ་དང༌། བཤད་པའི་ཚུལ་ཇི་ལྟ་བ་ཕྱོགས་གཅིག་ཅེས་པ། ཡན་ལག་གི་ཕྱོགས་གཅིག་གམ། ཅུང་ཟད་ཙམ་བསྟན་པ་ཡིན་གྱི། གཤེར་བའི་རྫས་མཐའ་དག་མ་ལུས་པ་བསྟན་ཅིང་བཤད་པ་ནི་མ་ཡིན་ཏེ། དེ་དག་ནི་རགས་རིམ་ཇི་བཞིན་བསྟན་པ་ཡིན། ཞེས་བྱ་བ་སྟེ། རགས་ཤིང་སྦོམ་པ་མ་བོར་བ་ཙམ་དུ་རགས་རིམ་མཐོང་བ་བསྟན་པ་ཡིན་གྱི། ཞིབ་ཏུ་ཕྲ་བ་ལས་རྣམ་པར་དཔྱད་པ་ནི་མཐའ་ཡས་པ་ཡིན་ནོ། །དེ་བས་ཅུང་ཟད་ཙམ་ཞིག་ཁོ་བོས་སྨྲས་པ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་ལྔ་པའི་རྣམ་པར་བཤད་པའོ།། །།དེ་ནས་ཁ་ཟས་ཀྱི་ཚུལ་བརྟག་ཅིང་ཤེས་པར་བྱ་བའི་ལེའུ་བཤད་པར་བྱའོ། །ཞེས་
བྱ་བ་ལ། འདིའི་འགྲེལ་པ་ནི་འདི་ཡིན་ཏེ། གནའ་དང་པོ་འཇིག་རྟེན་ཆགས་པའི་དུས་སུ་དང་པོ་ནི་ཆུ་ཉིད་བྱུང་བ་ཡིན་ལ། དེའི་འོག་ཏུ་ནི་ཟས་བྱུང་ངོ༌། །དེའི་འོག་ཏུ་ནི་སེམས་ཅན་བྱུང་བ་ཡིན་ནོ། །དེ་ལྟར་ན་འདིའི་རྗེས་ཐོགས་ལ་ཁ་ཟས་ཀྱི་ཚུལ་བརྟག་ཅིང་ཤེས་པར་བྱ་བའི་ལེའུ་བརྩམས་པ་ཡིན་ནོ། །དེ་ལ་ཟས་ཀྱི་རང་བཞིན་གྱི་ཚུལ་ནི་གཡོས་སུ་བྱས་པ་དང༌། གཡོས་སུ་མ་བྱས་པ་སྟེ། དེའི་རོ་དང༌། ནུས་པ་དང༌། ཞུ་བའི་རྗེས་དང༌། མཐུ་སྟོབས་དང༌། ཡོན་ཏན་ལ་སོགས་པ་དང༌། དེ་བརྟག་ཅིང་ཤེས་པར་བྱ་བ་ནི་ཁོང་དུ་བཅུད་པ་སྟེ། དེ་ལ་ཕན་པར་བྱེད་པའི་ལེའུ་གང་ཡིན་པ་དེ་བཤད་པར་བྱའོ། །དེ་ལ་ཟས་ནི་གང་བཟའ་བར་བྱ་བ་སྟེ། འབྲུ་ལ་སོགས་པའོ། །འབྲུ་ཡང་གྲམ་ཅན་དང༌། གང་བུ་ཅན་གྱི་དབྱེ་བས་རྣམ་པ་གཉིས་སོ། །དེ་ལས་ཀྱང་གྲམ་ཅན་གཙོ་བོ་ཡིན་པས་དང་པོར་བསྟན་ཏེ། དེ་གཙོ་བོར་གྱུར་པ་ནི་མང་དུ་དགོས་ཤིང་ཞེས་པ་ཡིན་གྱི། གང་བུ་ཅན་གྱི་འབྲུ་ནི་སྲན་ཚོད་ལ་སོགས་པ་ཉིད་ཀྱིས་ཅུང་ཟད་དགོས་པའི་ཕྱིར་གཙོ་བོ་མ་ཡིན། དེ་བས་ན་འདིར་སྨྲས་པ་ནི། རྩ་སྣར་འབྲས་ཆན་ཀ་མ་ལི། །དྲུག་ཅུ་པ་དང་བྱ་ཡིས་བླངས། །སྒྲོན་བུའི་མཆུ་དང་རྩེ་རྣོན་དང༌། །རོ་དྲའི་འབྲས་འདྲ་དྲི་བཟངས་དང༌། །པ་ཏང་ག་དང་གསེར་མདོག་ཅན། །གང་གཞན་འབྲས་ནི་བཟང་པོ་རྣམས། །རོ་མངར་ཞུ་རྗེས་མངར་ཞིང་སྣུམ། །རོ་ཙ་བཤང་གཅི་སྐ་ཞིང་ཆུང༌། །རོ་རྗེས་བསྐ་ཞིང་ཕན་པ་དང༌། །ཡང་ཞིང་གཅིན་མང་བསིལ་བ་ཡིན། །ཞེས་བྱ་བ་ནི། འབྲས་གཞན་དག་ལས་སཱ་ལུ་རྩ་སྣར་རཀྟ་ལི། ཞེས་བྱ་བ་ལ་སོགས་པ་ནི་གཙོ་བོ་ཡིན་པས་ན་དང་པོར་སྨོས་པ་ཡིན་ནོ། །དེ་ལ་རཀྟ་ཤ་ལི་ནས་གསེར་མདོག་ཅན་ཞེས། ཊ་པ་ལི་ཞེས་བྱ་བའི་འབྲས་དང༌། གཞན་ཡང་གང་དག་དེ་དང་འདྲ་བའི་འབྲས་དཀར་པོ་བཟང་པོ་དེ་ཐམས་ཅད་ནི་རོ་མངར་བ་དང༌། ཞུ་བའི་རྗེས་མངར་བ་ཡིན་པ་དང༌། སྣུམ་པ་དང༌། རོ་ཙ་ཞིང་ཁུ་བ་འཕེལ་བ་དང༌། བཤང་གཅི་སྐ་ཞིང་བསྒོངས་པ་ཆུང་ངུར་བྱེད་པ་དང༌། རོའི་རྗེས་བསྐ་ཞིང་བསྐ་བའི་རོ་དང་ཧ་ཅང་མི་གསལ་ཞིང༌། ཤས་ཆུང་བ་དང་ལྡན་པ་དང༌། ཕན་ཞིང་གནོད་པ་སེལ་བ་དང༌། དེ་བཞིན་དུ་ཡང་བའི་ཡོན་ཏན་དང་ལྡན་པ་དང༌། གཅིན་མང་ཞིང་འཕེལ་བར་
བྱེད་པ་དང༌། བསིལ་ཞིང་གྲང་བའི་ནུས་པ་ཡོད་པ་སྟེ། ཡོན་ཏན་དེ་དག་དང་ལྡན་པ་ཡིན་ནོ། །དེ་ལ་རྩེ་རྣོ་ནང་རྩ་སྣར། །མཆོག་ཡིན་སྐོམ་དང་ཉེས་གསུམ་སེལ། །ཞེས་བྱ་བ་ནི། དེ་ལ་རྩེ་མོ་རྣོ་ཞིང་གྲམ་ཅན་དེ་རྣམས་ཀྱི་ནང་ན་རྩ་སྣར་ཏེ། རཀྟ་ཤ་ལི་ནི་མཆོག་དང་དམ་པ་ཡིན་ལ། དེ་ནི་སྐོམ་དད་སེལ་བ་དང༌། ཉེས་པ་གསུམ་སེལ་བར་བྱེད་པ་ཡིན་ནོ། །དེ་ཡི་འོག་ཏུ་འབྲས་ཆན་དམན། །དེའི་འོག་ཀ་མ་ལ་དེའི་འོག །ཅེས་བྱ་བ་ནི། རཀྟ་ཤ་ལི་དེའི་འོག་ཏུ་ནི་འབྲས་ཆན་ཏེ། མ་ཧཱ་ཤ་ལི་ཞེས་བྱ་བ་ཡོན་ཏན་གྱིས་སྔ་མ་ལས་དམན་པ་ཡིན་ལ། མཧཱ་ཤ་ལི་དེའི་འོག་ཀ་མ་ལ་ནི་དེ་བས་ཀྱང་ཡོན་ཏན་ཆུང་བ་ཡིན་ནོ། །དེ་བས་ཀྱང་དེའི་འོག་མ་དྲུག་ཅུ་པ་ལ་སོགས་པ་དེ་རྣམས་རིམ་གྱིས། སྔ་མ་སྔ་མ་ལས་ཕྱི་མ་ཕྱི་མ་ཡོན་ཏན་ཆུང་བ་ཡིན་ནོ། །ནས་འདྲ་ཧ་ཡན་ཆར་མ། །ནེ་ཤ་ད་ཀ་ལ་སོགས་ནི། །རོ་མངར་དྲི་ཞིམ་ལྕི་ལ་སྣུམ། །ཞུ་བའི་རྗེས་གྱུར་བད་མཁྲིས་སྐྱེད། །བཤང་དང་གཅི་བ་ཐུར་དུ་འབྱིན། །སྔ་མ་སྔ་མ་སྨད་པ་ཡིན། །ཞེས་བྱ་བ་ནི། ནས་འདྲ་ཞེས་བྱ་བ་ཡ་བ་ཀ་ལ་སོགས་པའི་འབྲས་རྣམས་རོ་མངར་ཞིང་བསིལ་བ་དང༌། དེ་བཞིན་དུ། ནུས་པ་དྲོ་ཞིང་ལྕི་བ་དང༌། །སྣུམ་པའི་ཡོན་ཏན་དང་ལྡན་པས་སྣུམ་པ་དང༌། ཞུ་བའི་རྗེས་སྐྱུར་བ་ཉིད་དུ་སྨིན་པར་འགྱུར་བ་དང༌། བད་ཀན་དང་མཁྲིས་པ་སྐྱེད་ཅིང་འཕེལ་བར་བྱེད་པ་དང༌། བཤང་བ་དང་གཅི་བ་ཐུར་དུ་འབྱིན་ཞིང་ཕྱི་རོལ་དུ་འབྱུང་བར་བྱེད་པ་དང༌། དེ་བཞིན་དུ་སྔ་མ་སྔ་མ་སྟེ། གང་ཞིག་གང་ལས་སྔ་མར་གྱུར་ཞིང༌། གོང་མ་ཡིན་པ་དེ་སྨད་ཅིང་མཆོག་མ་ཡིན་པ་ཉིད་ཡིན་ནོ། །དེས་ན་ནེ་ཤད་ལས་ཆར་མ་རྡུལ་ཅན་དུ་སྐྱེས་པ་སྨད་པ་ཡིན་ལ། ཆར་མ་ལས་ནི་ཧ་ཡན་སྨད་པ་ཡིན་ལ། དེ་ལས་ནས་འདྲ་ཞེས་པ་སྨད་པ་ཡིན་ཏེ། དེ་ལྟར་ན་ཐམས་ཅད་ལས་ཡ་བ་ཀ་ཞེས་པ་ནས་འདྲ་སྨད་པ་ཡིན་ནོ། །འབྲས་ནང་དྲུག་ཅུ་པ་མཆོག་སྟེ། །རྩ་སེར་ཤུན་པ་གནག་པ་དག །སྣུམ་ཞིང་འཇུ་སླ་བརྟན་ཞིང་མངར། །ཉེས་པ་གསུམ་སེལ་བསིལ་རྟུག་འདྲིལ། །ཞེས་བྱ་བ་ནི། འབྲས་ཤ་སྲི་ཀ་ཞེས་བྱ་བ་དྲུག་ཅུ་པ་ནི་སྣུམ་པའི་ཡོན་ཏན་དང་ལྡན་པས་ན་སྣུམ་པའོ། །བརྟན་པ་ནི་ལུས་བརྟན་པར་བྱེད་ཅིང༌། དེ་བཞིན་དུ་
ངལ་བ་དང༌། དུབ་པ་དང༌། རྨྱ་བ་སེལ་བ་ཡིན་ཏེ། དེ་ཉིད་ཀྱིས་ན་བཅུད་ཀྱིས་ལེན་དང༌། རིམས་ལ་སོགས་པ་དེ་དང་དེར་ལུས་ཉམ་ཆུང་ཞིང་སྦེག་པ་ལ་སྦྱིན་པ་ཉིད་དུ་བསྟན་པ་ཡིན་ནོ། །དེ་ནི་འབྲུ་རྣམས་ཀྱི་ཡོན་ཏན་གྱི་ནང་ན་མཆོག་ཡིན་ལ། དེ་ལ་ཡང་རྩ་སེར་བ་དང༌། ཤུན་པ་གནག་པའི་དབྱེ་བས་རྣམ་པ་གཉིས་ཡོད་ལ། དེ་གཉིས་ལས་ཀྱང་ཤུན་པ་གནག་པ་བས་རྩ་སེར་བ་མཆོག་ཡིན་ནོ། །དེ་ལས་རིམ་བཞིན་ཐུག་ཆེན་དང༌། །ཤུན་གནག་རྒྱ་སྐྱེགས་ཚིགས་མ་འདྲ། །ཁྱིམ་བྱའི་སྒོང་འདྲ་འུར་པའི་མིག །ཕུག་རོན་འབྲས་དང་སུ་ཀར། །འབའ་ར་ཀ་དང་ཨུཏྤལ་དམར། །ཅིན་སྟོན་སྐྱེས་ད་དུ་ར། །གནྡྷ་ན་དང་ཀུན་བིན་ད། །ཡོན་ཏན་རིམ་བཞིན་ཆུང་ཤེས་བྱ། །ཞེས་བྱ་བ་ནི། དྲུག་ཅུ་པ་དང༌། འབྲས་ཆན་ལ་སོགས་པ་ནས། ཀུན་བིན་དའི་མཐར་ཐུག་པ་དག་ནི་གོ་རིམས་བཞིན་དུ་ཡོན་ཏན་དག་ཆུང་ཞིང་དམན་པ་ཉིད་དུ་ཤེས་པར་བྱའོ། །དེ་ལྟར་ན་ཐུག་པོ་ཆེའི་ཡོན་ཏན་ལས་ནི་ཤུན་པ་གནག་པ་དྲི་སྣ་བྲི་ཧ་ཞེས་བྱ་བ་ཡོན་ཏན་ཆུང་བ་ཡིན་ལ། དེ་ལས་ནི་རྒྱ་སྐྱེགས་ཚིགས་མ་འདྲ་བ་ཡིན་པས་ན། འབྲས་ཐམས་ཅད་ལས་ཀུན་བིན་ད་ཡོན་ཏན་ཆུང་བ་ཉིད་ཡིན་པར་ཤེས་པར་བྱའོ། །འབྲས་གཞན་མངར་ཞིང་ཞུ་རྗེས་སྐྱུར། །མཁྲིས་པ་སྐྱེད་ཅིང་ལྕི་བ་དང༌། །གཅིན་རྟུག་མང་ཞིང་ཚ་བ་ཡིན། །པ་ཏ་ལ་ཉིད་ཉེས་གསུམ་སྐྱེད། །ཅེས་བྱ་བ་ནི། འབྲས་གཞན་ཞེས་བྱ་བ་གོང་དུ་མ་བཤད་པའི་འབྲས་རྣམས་ནི་རོ་མངར་བ་དང༌། དེ་བཞིན་དུ་ཞུ་རྗེས་སྐྱུར་ཞེས་པ། ཞུ་བའི་རྗེས་སྐྱུར་བར་འགྱུར་བ་དང༌། མཁྲིས་བསྐྱེད་ཅིང་འཕེལ་བ་དང༌། ལྕི་བ་དང༌། རྟུག་པ་མང་བར་འགྱུར་བ་དང༌། ཚ་བ་ཡིན་ཞེས་བྱ་བ་དྲོད་སྐྱེད་པ་སྟེ། འདིར་ཚ་བའི་སྒྲ་ནི་དྲོད་སྐྱེད་པ་ལ་བྱའོ། །མཁྲིས་པ་ནི་མ་ཡིན་ཏེ། གོང་དུ་མཁྲིས་པ་སྐྱེད་ཅེས་སྨོས་པའི་ཕྱིར་རོ། །པ་ཏ་ལ་ཉིད་ཉེས་གསུམ་སྐྱེད། །ཅེས་བྱ་བ་ནི། པ་ཏ་ལ་ཞེས་བྱ་བའི་འབྲས་བུ་ནི་ཉེས་པ་གསུམ་ཆར་སྐྱེད་པ་ཡིན་ཏེ། གནོད་པ་གསུམ་ཤིན་ཏུ་འཁྲུགས་པ་ཡིན་པར་ཤེས་པར་བྱ་སྟེ། ཉེས་པ་གསུམ་སྐྱེད་པ་ཉིད་ཀྱིས་ནི་འདི་བཟའ་བ་བཀག་པ་ཡིན་ནོ། །ཅི་ཙེ་ཁྲེ་དང་ནི་བར། །ཁྲེ་རྒོད་སྣེའུ་འབྲས་སོགས་བསིལ་ཡང༌། །རྩ་འབྲུ་དེ་དག་རླུང་སྐྱེད་ཅིང༌། །ཁོང་རྩུབ་བད་ཀན་མཁྲིས་པ་སེལ། །
ཞེས་བྱ་བ་ནི། ཅི་ཙེ་ལ་སོགས་པའི་རྩ་ཅན་གྱི་འབྲས་བུ་ནི་བསིལ་བ་སྟེ་གྲང་བའི་ནུས་པ་ཡོད་པ་དང༌། ཡང་བ་དང་རླུང་སྐྱེད་ཅིང་འཕེལ་བར་བྱེད་པ་དང༌། དེ་བཞིན་དུ་ཁོང་རྩུབ་ཅིང་འཁྲུགས་པ་དང༌། བད་ཀན་དང་མཁྲིས་པ་སེལ་ཞིང་འཇོམས་པ་ཡིན་ནོ། །དེ་ལ་ཁྲེ་ནི་བརྟ་བྱེད་ལྕི། །ལུས་ཀྱི་ཆག་གྲུགས་འབྱོར་བར་བྱེད། །ཅེས་བྱ་བ་ནི། དེ་ལ་རྩ་ཅན་གྱི་འབྲུ་དེ་རྣམས་ཀྱི་ནང་ནས་ཁྲེ་ནི་ལུས་བརྟ་བར་བྱེད་པ་དང༌། ལྕི་བ་དང་ལུས་ཀྱི་ཡན་ལག་གི་ཆག་གྲུགས་འབྱོར་ཅིང་འཚོ་བར་བྱེད་པ་ཡིན་ནོ། །ཁྲེ་རྒོད་མཆོག་ཏུ་འཁྲུ་གཅོད་ཅིང༌། །རེག་ན་བསིལ་ལ་དུག་སེལ་ཡིན། །ཞེས་བྱ་བ་ནི། རྩ་ཅན་གྱི་འབྲུའི་ནང་ནས་ཁྲེ་རྒོད་དེ། །ཀོ་ཏྲ་བ་ནི་ཤིན་ཏུ་ཡང་འཁྲུ་བ་གཅོད་ཅིང༌། སྡུད་པའི་ངང་ཚུལ་དང༌། རེག་ན་བསིལ་བ་སྟེ། ཕྱི་རོལ་དུ་བསྐུ་བ་ལ་སོགས་པ་ལ་སྦྱར་ན། རེག་ན་བསིལ་བ་ཉིད་ཀྱིས་ཚ་བ་སེལ་བར་བྱེད་དོ། །དུག་སེལ་ཞིང་འཇོམས་པ་ཡིན་པས་ན། དུག་སེལ་ཡིན་ཞེས་བྱའོ། །ནས་ནི་རྩུབ་བསིལ་ལྕི་ལ་མངར། །ཅུང་ཟད་ཁོང་འཁྲུ་བཤང་རླུང་འཕེལ། །རོ་ཙ་བརྟན་བྱེད་གཅིན་དང་ནི། །ཚིལ་དང་བད་ཀན་མཁྲིས་པ་སེལ། །ཆམ་པ་ལུད་པ་དབུགས་མི་བདེ། །ད་རྒན་ལྐོག་ནད་པགས་ནད་སེལ། །ཞེས་བྱ་བ་ནི། ནས་ནི་རྩུབ་པའི་ཡོན་ཏན་དང་ལྡན་པས་ན་རྩུབ་པའོ། །དེ་བཞིན་དུ་ལྕི་བ་དང༌། རོ་མངར་བ་དང༌། ཅུང་ཟད་ཁོང་འཁྲུ་བ་དང༌། བཤང་བ་དང༌། རླུང་འཕེལ་ཞིང་སྐྱེད་པ་ཡིན་ཏེ། དེ་ནས་བཤང་བ་ཟད་པ་དག་ལ་དྲང་སྲོང་དག་གིས་འདིའི་སྦྱོར་བ་བཤད་པ་ཡིན་ནོ། །དེ་བཞིན་དུ་རོ་ཙ་བ་དང་ལུས་བརྟན་པར་བྱེད་པ་དང༌། གཅིན་དང་ཚིལ་ལ་སོགས་པ་སེལ་ཞིང་འཇོམས་པར་བྱེད་པ་ཡིན་ནོ། །ནས་རྒོད་ཅུང་ཟད་དམན་པ་ཡིན། །ཞེས་བྱ་བ་ནི། ནས་དང་དབྱིབས་འདྲ་བ་ལས། ཤིན་ཏུ་ཕྲ་བ་ལ་ནི་ནས་རྒོད་ཅེས་བྱ་སྟེ། དེ་ནི་ནས་ཀྱི་ཡོན་ཏན་ལས་དམན་ཞིང་ཞན་པ་ཡིན་ནོ། །དེ་ནི་འཇིག་རྟེན་ན་ནས་འདྲ་ཞེས་མིང་དུ་གྲགས་པའོ། །སྨྱིག་སྐྱེས་འབྲས་ནས་རྩུབ་ཅིང་ཚ། །ཞེས་བྱ་བ་ནི། སྨྱིག་མ་ལས་སྐྱེས་པས་ན་སྨྱིག་སྐྱེས་པ་སྟེ། འོད་མའི་འབྲས་བུའི་ནས་ཞེས་ལུང་ལས་བཤད་པའོ། །སྨྱིག་མ་ལས་བྱུང་བའི་ནས་དེ་ནི་སྨྱིག་མའི་འབྲས་བུ་ནས་འདྲ་བ་དེ་རྩུབ་པ་དང༌།
ད་བཞིན་དུ་ཚ་བའི་ནུས་པ་དང་ལྡན་པ་ཡིན་ནོ། །གྲོ་ནི་རོ་ཙ་སྣུམ་བསིལ་ལྕི། །འཚོ་བྱེད་རླུང་དང་མཁྲིས་པ་སེལ། །ཆག་གྲུགས་འབྱོར་བྱེད་མངར་བ་དང༌། །ཤ་མཁྲེགས་བྱེད་ཅིང་ཅུང་ཟད་འཁྲུ། །ཞེས་པ་ལ། གྲོ་ནི་རོ་ཙ་བ་སྟེ། བུད་མེད་ལ་ཕོད་པར་བྱེད་པ་དང༌། སྣུམ་པ་དང་བསིལ་བ་ལ་སོགས་པའི་ཡོན་ཏན་དང་ལྡན་པ་ཡིན་ནོ། །ནན་དི་མུ་ཁ་རོ་བསྐ་ཞིང༌། །བསིལ་ཞིང་མངར་ཡང་ཕན་པ་ཡིན། །ཞེས་བྱ་བ་ལ། ནན་དི་མུ་ཁ་ནི་ཕྲན་པ་སྟེ། གྲོའི་རིགས་སུ་གཏོགས་པ་ཕྲ་ཞིང་རིང་བ་ཡིན་ཏེ། དེ་ནི་བསིལ་ཞིང་རོ་མངར་བ་དང༌། བསྐ་བ་དང་ཡང་བའི་ཡོན་ཏན་དང་ལྡན་ཞེས་གནོད་པ་དང༌། དྲི་མ་རྣམས་ལ་ཕན་ཞིང་བསོད་པ་ཡིན་ནོ། །གྲ་མ་ཅན་གྱི་འབྲུ་སྣ་ཚོགས་ཀྱི་སྡེ་ཚན་ནོ།། །།ཚོད་མ་བྱ་བའི་དོན་དུ། གྲ་མ་ཅན་གྱི་སྡེ་ཚན་གྱི་འོག་ཏུ། གང་བུ་ཆགས་པའི་འབྲུའི་སྡེ་ཚན་སྟོན་པ་ཡིན་ཏེ། དེའི་ཕྱིར་སྨྲས་པ་ནི། མོན་སྲན་སྡེའུ་དཀར་སྲན་ཆུང་སོགས། །གང་བུ་ཅན་འབྲུ་རྩ་སྒོ་འགགས། །རོ་བསྐ་མངར་ཞིང་འཁྲུ་བ་གཅོད། །ཞུ་རྗེས་ཚ་ལ་བསིལ་ཞིང་ཡང༌། །ཚིལ་དང་ཁྲག་དང་མཁྲིས་པ་ལ། །བསྐུས་ཤིང་བླུགས་ན་ཕན་པ་ཡིན། །འདི་ལས་མུངྒ་མཆོག་རླུང་ཆུང༌། །སྲན་མ་ཤིན་ཏུ་རླུང་སྐྱེད་ཡིན། །ཞེས་བྱ་བ་ལ། མོན་སྲན་སྡེའུ་ནི་སྲན་མུངྒའོ། །མོན་སྲན་དཀར་རུ་ནི་ཨ་དྷ་ཀ་ཞེས་སམ། ཏོ་བ་རི་ཞེས་གྲགས་པའོ། །སོགས་པའི་སྒྲས་ནི་སྲན་མ་ལ་སོགས་པ་ཡོངས་སུ་བསྡུའོ། །མོན་སྲན་སྡེའུ་ལ་སོགས་པའི་གང་བུ་ཅན་གྱི་འབྲུ་དེ་རྣམས་ནི་རྩ་སྦུབས་རྣམས་ཀྱི་སྒོ་འགགས་པར་བྱེད་པས་ན། རྩ་སྒོ་འགགས་པའོ། །དེ་བཞིན་དུ་རོ་ནི་མངར་བ་དང་བསྐ་བ་ཡིན་ནོ། །འཁྲུ་བ་གཅོད་པ་ནི་གང་བཤང་བ་ལ་སོགས་པ་སླ་བའམ། འབྱེ་བ་བསྡུས་ཤིང་གོང་པོར་བྱེད་པས་ན་འཁྲུ་བ་གཅོད་པ་ཡིན་ནོ། །དེ་བཞིན་དུ་ཞུ་བའི་རྗེས་ཚ་བ་སྟེ། ཕོ་བའི་མེ་དྲོད་དང་ཕྲད་པ་ལས་རོ་གཞན་དུ་འགྱུར་བའོ། །དེ་བཞིན་དུ་བསིལ་ཞིང་ཡང་བ་དང༌། ཚིལ་དང་ཁྲག་དང་མཁྲིས་པའི་ནད་བརྟགས་ཏེ། བསྐུས་པའི་ལུས་ལ་ཁུ་བ་བླུགས་ན་ཕན་ཞིང་བདེ་བར་འགྱུར་རོ། །འདི་ལས་མུངྒ་མཆོག་རླུང་ཆུང༌། །ཞེས་བྱ་བ་ནི། གང་བུ་ཅན་གྱི་འབྲུ་འདི་དག་གི་ནང་ན་མུངྒ་ནི་ཞེས་པ། མོན་
སྲན་སྡེའུ་མཆོག་སྟེ་དམ་པ་ཡིན་པ་དང༌། དེ་བཞིན་དུ་རླུང་ཆུང་ཞེས་བྱ་བ་སྟེ། རླུང་ཅུང་ཞིག་སྐྱེད་པ་ཡིན་ནོ། སྲན་མ་ཤིན་ཏུ་རླུང་སྐྱེད་ཡིན། །ཞེས་བྱ་བ་ནི། སྲན་མ་ཤིན་ཏུ་ཤས་ཆེར་རླུང་སྐྱེད་བ་ཡིན་ནོ། །མོན་སྲན་དཀར་པོ་རླུང་སྐྱེད་ཅིང༌། །རྩུབ་ཅིང་ལྕི་ལ་བཤང་བ་འཕེལ། །ཞེས་བྱ་བ་ལ། མོན་སྲན་དཀར་པོ་རྩ་མ་ཤ་ཞེས་བྱ་བ་ནི། རླུང་ཤས་ཆེར་སྐྱེད་བར་བྱེད་པ་དང༌། རྩུབ་པ་དང༌། ལྕི་བ་དང༌། བཤང་བ་ཆེ་ཞིང་འཕེལ་བར་བྱེད་པ་ཡིན་ནོ། །རྒྱ་སྲན་ནག་ཚ་ཞུ་རྗེས་སྐྱུར། །ཁུ་ཆུའི་རྡེའུ་ཆམ་ལུད་པ། །དབུགས་མི་བདེ་རླུང་བད་གཞང་འབྲུམ། །འཇོམས་ཤིང་ཁྲག་མཁྲིས་མཆོག་ཏུ་སྐྱེད། །ཅེས་བྱ་བ་ལ། རྒྱ་སྲན་ནག་པོ་ཀུ་ལངྠ་ཞེས་བྱ་བ་ནི་ཚ་བ་སྟེ། ནུས་པ་ཚ་བ་དང་ལྡན་པ་དང༌། ཞུ་རྗེས་སྐྱུར་བ་སྟེ། སྨིན་པ་དང་སྐྱུར་བ་ཞེས་བྱ་བའི་དོན་ཏོ། །ཁུ་བ་ལས་སྐྱེད་བའི་རྡེའུ་ནི་ཁུ་ཆུའི་རྡེའུ་སྟེ། དེ་ལ་སོགས་པ་འཇོམས་པ་དང༌། དེ་བཞིན་དུ་ཁྲག་མཁྲིས་མཆོག་ཏུ་ཤས་ཆེར་སྤྱོད་པར་བྱེད་པ་ཡིན་ནོ། །ནིས་པ་བ་ནི་རླུང་མཁྲིས་ཁྲག །ནུ་ཞོ་གཅིན་འཕེལ་ལྕི་ཞིང་འཁྲུ། །ཚ་བྱེད་མིག་གནོད་ཁུ་བ་འབྲི། །བད་ཀན་འོར་ནད་དུག་རྣམས་སེལ། །ཞེས་བྱ་བ་ལ། ནིས་པ་བ་ཞེས་བྱ་བའི་སྲན་རྒོད་ནི་རླུང་དང༌། ཁྲག་དང༌། མཁྲིས་པ་དང༌། བུད་མེད་ཀྱི་ནུ་ཞོ་དང༌། གཅིན་འཕེལ་བར་བྱེད་པ་དང༌། ལྕི་བ་དང༌། ཁོང་འཁྲུ་བ་དང༌། ལུས་ཚ་བར་བྱེད་པ་དང༌། དེ་བཞིན་དུ་མིག་ལ་གནོད་པ་དང༌། ཁུ་བ་འབྲི་ཞིང་ཟད་པ་དང༌། བད་ཀན་ཟད་པ་དང༌། འོར་ནད་དང༌། དུག་རྣམས་སེལ་བར་བྱེད་བ་ཡིན་ནོ། །མ་ཤ་སྣུམ་སྟོབས་བད་ཀན་སྐྱེད། །བཤང་གཅི་མཁྲིས་པ་འཕེལ་བྱེད་འཁྲུ། །ལྕི་ཞིང་ཚ་ལ་རླུང་འཇོམས་དང༌། །ཁུ་བ་འཕེལ་ཞིང་འབྱིན་པར་བྱེད། །ཅེས་བྱ་བ་ལ། མ་ཤ་ཞེས་བྱ་བ་མོན་སྲན་གྲེའུ་ནི་སྣུམ་ཞིང་སྟོབས་སྐྱེད་པ་ལ་སོགས་པའི་ཡོན་ཏན་དང་ལྡན་པ་དང༌། དེ་བཞིན་དུ་ཁུ་བ་མང་དུ་འཕེལ་བར་བྱེད་ཅིང༌། ཁུ་བ་དེ་ཉིད་མཚན་གྱི་ལམ་ནས་ཕྱིར་འབྱིན་པར་བྱེད་དོ། །ཀ་ཀན་དུ་ལ་ཁ་སྲལ་ཕྲེའུ། །ཡོན་ཏན་མོན་སྲན་གྲེའུ་དང་འདྲ། །ཞེས་བྱ་བ་ལ། ཀ་ཀན་དུ་ལ་ཞེས་བྱ་བ་ནི། མིང་
འདི་ཉིད་འཇིག་རྟེན་པ་ལ་གྲགས་པ་ཡིན་ནོ། །ཁ་སྲལ་ཕྲེའུ་ནི་སྲན་མ་ཨདྷྣ་ཀུ་པ་ཏ་སྟེ། ས་ལ་འབྱིང་བར་སྐྱེ་བའོ། །འབྲུ་དེ་དག་གི་འབྲས་བུ་ནི་མོན་སྲན་གྲེའུ་དང་ཡོན་ཏན་བར་ཤེས་པར་བྱ་སྟེ། སྲན་མ་མ་ཤ་ལ་ཡོན་ཏན་གང་དག་ཡོད་པ་དེ་ཐམས་ཅད་དང་ལྡན་པའི་དོན་ཏོ། །ཏིལ་འབྲུ་དྲོ་ཞིང་པགས་པ་འཇོམ། །བསིལ་ཞིང་སྐྲ་དང་སྟོབས་སྐྱེད་པ། །ལྕི་ཞིང་གཅིན་ཉུང་ཞུ་རྗེས་ཚ། །ཡིད་གཞུང་དྲོད་སྐྱེད་བད་མཁྲིས་སྐྱེད། །ཅེས་བྱ་བ་ལ། ཏིལ་གྱི་འབྲུ་ནི་དྲོ་བ་སྟེ། ནུས་པ་དྲོ་པ་དང༌། པགས་པ་འཇམ་ཞིང་མཉེན་པར་བྱེད་པ་དང༌། བསྐུས་ན་རེག་པ་བསིལ་བ་དང༌། སྐྲ་སྐྱེ་བ་དང༌། སྟོབས་སྐྱེད་པ་དང༌། དེ་བཞིན་དུ་ལྕི་བ་དང༌། གཅིན་ཉུང་ངུར་བྱེད་པ་དང༌། དེ་བཞིན་དུ་ཞུ་བའི་རྗེས་ཚ་བ་དང༌། ཡིད་གཞུངས་པ་དང༌། མེའི་དྲོད་སྐྱེད་ཅིང་བད་ཀན་དང་མཁྲིས་པ་འཕེལ་ཞིང་སྐྱེད་པ་ཡིན་ནོ། །ཟར་མ་སྣུམ་མངར་ཁ་ཞིང་དྲོ། །ལྕི་ཞིང་བད་ཀན་མཁྲིས་པ་སྐྱེད། །མིག་གནོད་ཁུ་སྐེམས་ཞུ་རྗེས་ཚ། །ཞེས་བྱ་བ་ལ། ཟར་མའི་འབྲས་བུ་ནི་སྣུམ་པ་དང༌། རོ་མངར་ཞིང་ཁ་བ་དང༌། ནུས་པ་དྲོ་བ་དང༌། ལྕི་ཞིང་བད་ཀན་དང་མཁྲིས་པ་སྐྱེད་པར་བྱེད་པ་དང༌། དེ་བཞིན་དུ་མིག་ལ་གནོད་པ་དང༌། ཁུ་བ་སྐེམས་ཤིང་ཟད་པ་དང༌། ཞུ་བའི་རྗེས་ཚ་བ་ཡིན་ནོ། །ལེ་བརྒན་རྩི་འབྲས་དེ་དང་འདྲ། །ཞེས་བྱ་བ་ནི། མེ་ཏོག་ལེ་བརྒན་རྩིའི་ས་བོན་ཡང་བཤད་མ་ཐག་པའི་ཟར་མའི་ཡོན་ཏན་དང་ཉེས་པ་ཆ་མཚུངས་པ་ཡིན་པར་ཤེས་པར་བྱའོ། །གྲ་མ་ཅན་ལས་ནས་རྒོད་དང༌། །མ་ཤ་གང་བུ་ཅན་ཐ་ཚད། །ཅེས་བྱ་བ་ལ། སྔར་གྱི་གྲ་མ་ཅན་རྣམས་ཀྱི་ཐ་ཆད་ནི་ནས་རྒོད་ཡིན་ལ། གང་བུ་ཅན་འདི་དག་གི་ནང་ན་ནི་མོན་སྲན་གྲེའུ་སྟེ། མ་ཤ་ཐ་ཆད་ཡིན་པར་ཤེས་པར་བྱའོ། །འབྲུ་ཡི་གསར་ཐོག་བད་ཀན་སྐྱེད། །ལོར་ལོན་འབྲུ་ནི་ཡང་བ་ཡིན། །ཞེས་བྱ་བ་ནི། གྲ་མ་ཅན་གྱི་འབྲུ་དང༌། གང་བུ་ཅན་གྱི་འབྲུ་གསར་ཐོག་ལོར་མ་ལོན་པ་ནི་བད་ཀན་སྐྱེད་ཅིང་འཕེལ་བར་བྱེད་དེ། རྩ་སྦུབས་རྣམས་ནས་སླ་ཞིང་འཛག་པ་ལས་མངོན་པར་ཕྱོགས་པར་ཞུ་བའི་ཚུལ་གྱིས་བད་ཀན་སེལ་བ་ཡིན་ནོ། །ལོར་ལོན་ཞེས་པ་ལོ་གཅིག་འདས་པའི་འབྲུ་
ཐམས་ཅད་ནི་ཡང་བ་ཡིན་པས། འབྲུ་གསར་པ་ལྕི་བར་བཤད་དུ་ཟིན་ཀྱང༌། ལྕི་བ་ཉིད་ཡིན་པར་དོན་གྱིས་སྟོན་པ་ཡིན་ཏེ། ལོ་གཅིག་ལོན་པ་འདིས་ལྕི་བ་འབའ་ཞིག་དང་བྲལ་བ་ཡིན་གྱི། ནུས་དང་བྲལ་བ་ནི་མ་ཡིན་མོད་ཀྱི། འོན་ཀྱང་སྣུམ་པའི་ཡོན་ཏན་རིམ་གྱིས་ཉུང་ཟད་འབྲི་བ་ཡིན་གྱི། དེ་ལ་རྩུབ་པ་ཞེས་བྱ་བའི་གནས་སྐབས་གཞན་དུ་གྱུར་པ་ནི་མ་ཡིན་ནོ། །དེ་ཡང་རྒྱུད་གཞན་དག་ལས། ལོ་གཅིག་ལོན་པའི་འབྲུ་རྣམས་ཀུན། །ལྕི་བ་དག་དང་བྲལ་འགྱུར་གྱི། །དེ་ཡི་ནུས་པ་སྤོང་མ་ཡིན། །དེ་འོག་རིམ་གྱིས་ནུས་དང་བྲལ། །ཞེས་བཤད་པ་ཡིན་ནོ། །མྱུར་སྐྱེ་དེ་བཞིན་སྲན་མ་ནི། །སྤུན་མེད་ལེགས་བརྔོས་ཚོད་མ་ཡང༌། །ཞེས་བྱ་བ་ལ། མྱུར་སྐྱེ་ཞེས་བྱ་བ་ནི་མྱུར་དུ་སྐྱེ་ཞིང་སྨིན་པའི་འབྲས་བུ་ནི་ཡང་བ་ཡིན་པ་དང༌། དེ་བཞིན་དུ་སྲན་མ་ཞེས་པ། མོན་སྲན་སྡེའུ་ལ་སོགས་པའི་གང་བུ་ཅན་གྱི་འབྲུ་རྣམས་སྦུན་མེད་ཅེས་བྱ་བ་སྤུན་མ་མ་ལུས་པར་བསིལ་ཞིང་ཤུན་པ་མེད་པར་བྱས་པ་དང༌། ལེགས་པར་བརྔོས་པའི་ཚོད་མའང་ཡང་བ་ཡིན་ནོ། །གང་བུར་ཆགས་པའི་འབྲུ་སྣ་ཚོགས་ཀྱི་སྡེ་ཚན་ནོ།། །།གྲ་མ་ཅན་དང་གང་བུ་ཅན་གྱི་འབྲུ་སྣ་ཚོགས་ཀྱི་སྡེ་ཚན་བསྟན་པ་དེ་དག་ཀྱང༌། མེ་ལ་བཙོས་པ་ལ་སོགས་པའི་གཡོས་སུ་བྱས་པ་ཉིད་ཀྱིས་ལེགས་པར་དགོས་པ་བྱེད་པ་ཡིན་གྱི་གཞན་དུ་ནི་མ་ཡིན་ནོ། །དེ་བས་ན་གྲ་མ་ཅན་དང་གང་བུ་ཅན་གྱི་སྡེ་ཚན་གྱི་འོག་ཏུ་ཁ་ཟས་ཀྱི་སྡེ་ཚན་བརྩམས་པ་ཡིན་པས། དེའི་ཕྱིར་སྨྲས་པ་ནི། འབྲས་ཐུག་སླ་སྐ་གར་བ་དང༌། །འབྲས་ཆན་རྣམས་ནི་སྔ་མ་བཞིན། །ཡང་ངོ༌། །ཞེས་བྱ་བ་ནི་འབྲས་ཐུག་སླན་ཏེ་ལ་སོགས་པ་ནི། སྔ་མ་བཞིན་དུ་ཡང་བ་ཡིན་པར་ཤེས་པར་བྱ་སྟེ། དེས་ན་འབྲས་ནི་ཡང་བ་ཡིན་ལ། དེ་ལས་འབྲས་ཐུག་གར་པོ་ཡང་བ་ཡིན། གར་པོ་བས་ཀྱང་འབྲས་ཐུག་སྐན་ཏེ་ཆེས་ཡང་བ་ཡིན་ལ། དེ་བས་ཀྱང་འབྲས་ཐུག་སླན་ཏེ་ཤིན་ཏུ་ཡང་བ་ཡིན་ནོ། །འདིར་ཡང་ཐུག་པ་ལ་སོགས་པ་ལས་ཐུག་པ་སླན་ཏེ་མཆོག་ཡིན་པས་ན་དང་པོར་བསྟན་ཏེ། འདི་ཟས་ཀྱི་རྣམ་པ་ཐམས་ཅད་ལས་མཆོག་ཏུ་གྱུར་པ་ནི། རླུང་ལུགས་དང་མཐུན་པར་འཇུག་པ་ལ་སོགས་པའི་ཡོན་ཏན་རྣམས་འདི་ཉིད་
ལ་ཡོད་པའི་ཕྱིར་མཆོག་ཏུ་གྱུར་བ་ཡིན་ནོ། །དེ་ཡང༌། པི་པི་ལིང་དང༌། དོང་གྲ་དང༌། སེའུ་འབྲུ་དང༌། འབྲས་ཡོས་ལ་སོགས་པ་ལས་བྱས་པའི་ཟས་ཀྱི་རྣམ་པ་ཤིན་ཏུ་སླ་བ་ནི། འབྲས་ཐུག་སླན་ཏེ་ཞེས་བྱ་སྟེ། དེ་ཡང་ཙ་ར་ཀ་ས། པི་པི་ལིང་དང་དོང་གྲ་དང༌། །སེའུ་འབྲས་ཡོས་ཆུར་བཅས་བསྐོལ། །ཐུག་པ་སླར་སྦྱར་མེ་དྲོད་སྐྱེད། །རླུང་ཡང་ལུགས་མཐུན་རྒྱུ་བར་བྱེད། །ཅེས་བཤད་པ་ཡིན་ནོ། །འབྲས་ཐུག་སླན་ཏེ་རྐྱང་རྐྱང་པོ། །དེ་ལས་ཅུང་ཟད་སྐ་བ་ནི་ཐུག་པ་སྐ་བ་ཞེས་བྱ་ལ། དེ་བས་ཀྱང་ཤིན་ཏུ་སྐ་བ་ནི་གར་པོ་ཞེས་བྱའོ། །དེ་ཡང་སྨན་དཔྱད་ཀྱི་ལུང་ལས། ལྕི་དང་བྲལ་བར་ཐུག་སླ་ཡིན། །ལྕི་བ་དང་ལྡན་ཐུག་པ་སྟེ། །ལྕི་བ་སྐ་བ་གར་པོ་ཡིན། །ནས་ཐུག་འབྲུ་ནི་ཐ་དད་གནས། །ཞེས་བཤད་པ་ཡིན་ནོ། །འབྲས་ཆན་ནི་འབྲས་བསྐོལ་བའི་ཆན་ལ་བྱ་ལ། དེ་ལས་སླ་བ་ནི། དགེ་ཞིང་རླུང་ནི་ལུགས་མཐུན་བྱེད། །སྐོམ་རྨྱ་ཉེས་པ་ལྷག་མ་འཇོམས། །འཇུ་ཞིང་ལུས་ཟུངས་མཉམ་པར་བྱེད། །རྩ་སྦུབས་མཉེན་བྱེད་རྡུལ་བ་དང༌། །མེ་ཡི་དྲོད་ནི་སྐྱེད་པར་བྱེད། །ཅེས་བྱ་བ་ནི། དེ་ལ་ཐུག་པ་ལ་སོགས་པ་དེ་རྣམས་ཀྱི་ནང་ནས་འབྲས་ཐུག་སླན་ཏེ་ནི་དགེ་ཞིང་ཉེས་པ་མེད་ཅིང་བདེ་བར་གནས་པར་བྱེད་ལ། བསོད་ཅིང་ཕན་པ་ཡིན་ནོ། །ཞེས་བྱ་བའི་དོན་ཏོ། །རླུང་ནི་ལུགས་མཐུན་བྱེད། །ཅེས་བྱ་བ་ནི། ལམ་ལོག་པར་ཞུགས་པ་རང་གི་རྒྱུ་བའི་གནས་སུ་འཇོག་པར་བྱེད་པ་དང༌། མི་བདེ་བ་བདེ་བར་བྱེད་དོ་ཞེས་བྱ་བའི་དོན་ཏོ། །དེ་བཞིན་དུ། སྐོམ་རྨྱ་ཉེས་པ་ལྷག་མ་འཇོམས། །ཞེས་བྱ་བ་སྟེ། སྐོམ་གྱིས་གདུངས་པ་དང༌། རྨྱ་ཞིང་ཉམ་ཆུང་བ་དང༌། ཉེས་པའི་ལྷག་མ་རྣམས་འཇོམས་ཤིང་སེལ་བ་ཡིན་ཏེ། སྐྱུག་སྨན་བཏང་བའམ། འཁྲུ་སྨན་བཏང་བའམ། འཇམ་རྩི་བཏང་བ་ལས་ཉེས་པ་སྟེ། ནད་ཅུང་ཟད་ལུས་པ་གང་ཡིན་པ་དེ་ནི་ཉེས་པའི་ལྷག་མ་སྟེ། སྐྱུག་སྨན་དང༌། འཁྲུ་སྨན་དང༌། འཇམ་རྩི་བཏང་བ་ལས་ཉེས་པའི་ལྷག་མ་ཡོད་པ་ལ་བྱ་བ་ཉིད་དུ་ཤེས་པར་བྱེད་པ་ནི་འདི་ཉིད་ཡིན་པར་ཤེས་པར་བྱ་སྟེ། ཉེས་པའི་ལྷག་མ་ཅུང་ཟད་ཡོད་པའི་ཕྱིར་ནི་སྐྱུག་སྨན་དང༌། འཁྲུ་སྨན་དང༌། འཇམ་རྩི་མས་གཏོང་བར་མི་བྱ་སྟེ།
སྦྱོར་བ་ཐལ་ཆེས་པའི་ཉེས་པའི་འཇིགས་པ་ཡོད་པའི་ཕྱིར་རོ། །འཇུ་ཞིང་ལུས་ཟུངས་མཉམ་པར་བྱེད། །ཅེས་བྱ་བ་ནི། ལུས་ཟུངས་སམ་ཉེས་པ་རྣམས་འཇུ་ཞིང་སྨིན་པར་བྱེད་པས་ན་འཇུ་ཞིང་ཞེས་བྱའོ། །དེ་བཞིན་དུ། ལུས་ཟུངས་རྣམས་དང༌། རླུང་ལ་སོགས་པ་མཉམ་ཞིང་སྙོམས་པར་བྱེད་པས་ན་ལུས་ཟུངས་མཉམ་པར་བྱེད་ཅེས་བྱའོ། །དེ་བཞིན་དུ། རྩ་སྦུབས་མཉེན་པར་བྱེད་པ་སྟེ། རྩའི་སྦུབས་ཀྱི་ཚོགས་མཉེན་ཞིང་འཇམ་པར་བྱེད་པ་དང༌། དེ་བཞིན་དུ་ལུས་ལས་རྔུལ་འབྱུང་བ་དང༌། ཕོ་བའི་མེ་དྲོད་སྐྱེད་ཅིང་ཟས་རྣམས་བདེ་བར་འཇུ་བར་བྱེད་པ་ཡིན་ནོ། །ཐུག་སྐ་བཀྲེས་སྐོམ་ཉམ་ཆུང་རྨྱ། །ལྟོ་ནད་རིམས་ནད་སེལ་བ་ཡིན། །དྲི་མ་འགགས་ལ་ཕན་པ་སྟེ། །དྲོད་སྐྱེད་ནད་ནི་འཇུ་བར་བྱེད། །ཅེས་བྱ་བ་ནི། ཐུག་པ་ཅུང་ཟད་སྐ་བ་ནི་བཀྲེས་ནས་རིམས་ནད་ཀྱི་བར་སེལ་ཞིང་འཇོམས་པ་ཡིན་ཏེ། ཉམ་ཆུང་བ་ནི་འཚོ་བའི་སྟོབས་ཆུང་བའོ། །རྨྱ་བ་ནི་རིད་ཅིང་སྐེམ་པའོ། །ལྟོ་ནད་ནི་ཚད་པའི་ནད་དུ་འཁྲུ་བ་དང༌། གཟེར་དང་སྐྲན་ལ་སོགས་པའོ། །དྲི་མ་འགགས་པ་ལ་ཕན་པ་ནི་དྲི་མ་རྣམས་བདེ་བར་འབྱིན་པ་ལ་ཕན་ཞིང་སྙོམས་པའོ། །དྲོད་སྐྱེད་པ་ནི་འདིས་མེའི་དྲོད་འཕེལ་བའོ། །འཇུ་བར་བྱེད་པ་ནི་ཉེས་པ་རྣམས་འཇུ་ཞིང་སྨིན་པར་བྱེད་པའོ། །ཐུག་གར་འཁྲུ་གཅོད་ཡི་གར་འོང༌། །སྐེམ་སེལ་དྲོད་སྐྱེད་རྨ་དང་མིག །བཀྲུ་སྨན་རྗེས་དང་ཉམ་ཆུང་དང༌། །སྣུམ་འཐུངས་རྗེས་ལ་ཕན་པ་ཡིན། །ཞེས་བྱ་བ་ལ། ཐུག་པ་གར་བོ་ནི་འཁྲུ་བ་གཅོད་པ་སྟེ། བཤང་གཅི་སླ་བ་གོང་བུར་བྱེད་པ་དང༌། ཡི་གར་འོང་བ་སྟེ། ཡིད་དུ་འོང་ཞིང་དགའ་བར་བྱེད་པ་དང༌། སྐོམ་སེལ་ཞེས་བྱ་བ་སྐོམ་གྱིས་གདུངས་པ་ཞི་བར་བྱེད་པ་དང༌། དྲོད་སྐྱེད་ཅེས་པ་མེ་དྲོད་སྐྱེད་པ་དང༌། དེ་བཞིན་དུ་རྨ་བྱུང་བ་དང༌། མིག་ནད་ཅན་དང༌། བཀྲུ་སྨན་དང་སྐྱུག་སྨན་གྱིས་སྦྱངས་པའི་རྗེས་ལ། ཉམ་ཆུང་ཞིང་སྦེག་པ་དང༌། མར་ལ་སོགས་པའི་སྣུམ་བག་འཐུངས་པ་རྣམས་ལ་ཡང་ཕན་ཞིང་བསོད་པ་ཡིན་ནོ། །འབྲས་ཆན་ལེགས་བཀྲུས་ཁུ་བཙགས་ཚོས། །རླངས་པ་དང་ནི་བྲལ་བ་དང༌། །གང་ཡང་ཚ་བའི་སྨན་རྣམས་ཀྱིས། །
བསྐོལ་བའི་འབྲས་ཚོས་ཡང་བ་ཡིན། །ཞེས་བྱ་བ་ནི། འབྲས་ཆན་གང་ལེགས་པར་བཀྲུས་པ་སྟེ། དག་པར་བཀྲུས་པ་དང༌། དེ་བཞིན་དུ་ཁུ་བཙགས་ཞེས་པ་སྟེ། ཕྱེད་ཙམ་བཙགས་ནས་ཁུ་བ་བཙགས་པ་དང༌། ཚོས་པ་སྟེ་ལེགས་པར་ཚོས་པ་དང༌། རླངས་པ་དང་བྲལ་བར་གྱུར་པ་ཡིན་ནོ། །གང་ཡང་ཚ་བའི་སྨན་རྣམས་ཀྱིས་བསྐོལ་བའི་འབྲས་ཚོས་ཡང་བ་ཡིན་ཞེས་བྱ་བ་ནི། གང་ཚ་བའི་སྨན་རྣམས་ཚ་བ་ལྔ་ལ་སོགས་པའི་ཆུ་དང་བསྐོལ་བའི་འབྲས་ཆན་དང༌། བརྔོས་པས་ཚོས་པར་བྱས་པའི་འབྲས་ཡོས་ལ་སོགས་པ་ནི་ཡང་བ་ཡིན་ནོ། །དེ་ལས་བཟློག་དང་གང་ཞིག་ནི། །ཤ་ཁུ་འོ་མ་བསྐོལ་སོགས་ལྕི། །ཞེས་བྱ་བ་ལ། འབྲས་ཆན་གང་སྔར་བཤད་པའི་མཚན་ཉིད་ལས་བཟློག་པ་དེ་ནི་ལྕི་བ་ཡིན་ནོ། །གང་མ་བཀྲུས་པ་དང༌། ལེགས་པར་མ་བཙགས་པ་དང༌། མ་ཚོས་པ་དང༌། གྲང་མོ་དང༌། མ་བརྔོས་པ་དང༌། ཚ་བའི་སྨན་གྱི་ཁུ་བ་དང་མ་བསྐོལ་བ་དེ་ནི་ལྕི་བ་ཡིན་ནོ། །དེ་བཞིན་དུ་འོ་མ་དང༌། ཤ་ཁུ་ལ་སོགས་པ་དེ་ཡང་ལྕི་བ་ཡིན་ནོ། །སོགས་པའི་སྒྲས་ནི་ཚོད་མ་དང༌། ཏིལ་མར་དང༌། མར་དང༌། འབྲས་བུ་དང༌། མ་ཤ་དང༌། ཏིལ་དང༌། མོན་སྲན་སྡེའུ་ལ་སོགས་པ་དང་ལྷན་ཅིག་བསྐོལ་བ་ཡང་ལྕི་བ་ཡིན་པར་ཤེས་པར་བྱའོ། །དེ་ལྟར་རྫས་དང་བྱ་སྦྱོར་དང༌། །ཚད་ལ་སོགས་པས་ཀུན་ཤེས་བྱ། །ཞེས་བྱ་བ་ནི། དེ་ལྟར་ཕྱོགས་འདིས་འདིར་མ་སྨོས་པའི་གཡོས་སུ་བྱས་པའི་ཟས་ཀྱི་རིགས་རྫས་དང་བྱ་བ་དང༌། སྦྱོར་བ་དང་ཚད་ལ་སོགས་པས་ཐམས་ཅད་བསྟན་ཞིང་ཤེས་པར་བྱའོ། །དེ་ལྟར་རྫས་ལས་ནི་དཔེར་ན་འབྲས་སཱ་ལུ་དང༌། དྲུག་ཅུ་པ་དང༌། མོན་སྲན་སྡེའུ་དག་ནི་རང་བཞིན་གྱིས་ཡང་བ་ལྟ་བུ་དང༌། འོ་མ་དང༌། བུ་རམ་ཤིང་དང༌། མོན་སྲན་གྲེའུ་དང༌། རླན་ཅན་གྱི་ཤ་རྣམས་རང་བཞིན་གྱིས་ལྕི་བ་ལྟ་བུའོ། །དེས་ན་འབྲས་སཱ་ལུ་རྩ་སྣར་ལས་བྱས་པའི་འབྲས་ཆན་ནི་ཡང་བ་ཡིན་ལ། འོ་མ་དང་བུ་རམ་ཤིང་ལ་སོགས་པ་ལས་བྱས་པ་ནི་ལྕི་བ་ཡིན་ནོ། །བྱ་བ་ནི་ལས་སུ་བྱ་བ་སྟེ། ལས་མངོན་པར་འདུ་བྱེད་པའོ། །དེ་ཡང་ཆུ་དང་མེ་ཕྲད་པའི་མཐུ་དང༌། སྣོད་ལ་སོགས་པ་ལས་བྱུང་བའོ། །དེ་སྐད་དུ་དྲང་སྲོང་ཙ་ར་ཀས་
བྱས་པ་ཡིན། གང་རྫས་ཀྱི་རང་བཞིན་རྣམས་མངོན་པར་འདུས་བྱས་ཤིང་ཚོགས་པའི་ཡོན་ཏན་ལས་སྐྱེས་པ་ཡིན་ལ། ཡོན་ཏན་དེ་དག་ཀྱང་ཆུ་དང་མེ་འདུས་པ་དང༌། བཅིང་བ་དང༌། དཀྲུགས་པ་དང༌། དུས་དང༌། ཡུལ་དང༌། གནས་དང༌། མཐུ་ལ་སོགས་པ་ལས་བྱུང་བ་ཡིན་ནོ། །ཞེས་བཤད་པ་ཡིན་ནོ། །སྦྱོར་བ་ནི་རྫས་དང་ལྷན་ཅིག་སྦྱོར་ཞིང་སྦྱོར་བའོ། །དེ་ཡང་དྲང་སྲོང་ཙ་ར་ཀས། སྦྱོར་བ་ནི་རྫས་གཅིག་གམ། མང་པོ་ལྷན་ཅིག་སྦྱོར་བ་སྟེ། དེ་ནི་ཁྱད་པར་སྐྱེད་པར་བྱེད་པ་ནི་གང་གཅིག་མ་ཡིན་ནོ། །ཞེས་བཤད་པའོ། །ཚད་ནི་སྲང་ཚད་དོ། །ཞོ་གཉིས་དང༌། སྲང་གཅིག་དང༌། ཕུལ་དང༌། བྲེ་ལ་སོགས་པ་དང༌། དེ་བཞིན་དུ་ཚད་ལས་ལྷག་པའི་འབྲས་བུ་ངེས་པར་ཤེས་པར་བྱའོ། །སོགས་པ་སྨོས་པ་ནི་ཡུལ་དང༌། དུས་དང་རྒྱུའི་ཡུལ། ལུས་ཀྱི་ཡན་ལག་ལ་སོགས་པ་ཡོངས་སུ་བསྡུའོ། །དེ་ཡང་སློན་དཔོན་གྱིས། སྤྱོད་དང་ལུས་ཀྱི་ཡན་ལག་དང༌། །རང་བཞིན་ལུས་ཟུངས་བྱ་བ་དང༌། །མཚན་མ་ཚད་དང་ལས་སུ་བྱས། །ཚད་དག་འདིར་ནི་བརྟག་པར་བྱ། །ཞེས་བཤད་པ་ཡིན་ནོ། །འདིའི་དཔེའི་ཕྱོགས་གཅིག་བསྟན་པ་ཡང་དེ་ཉིད་ཀྱིས་མཛད་པ་ཡིན་ཏེ། སྤྱོད་པ་རླན་ཅན་ཆུ་དང་མཁའ། །སྐམ་སར་གནས་པ་སྤྱོད་པ་དང༌། །ཆུ་སྐྱེས་རླན་ཅན་སྐྱེས་ཉིད་དང༌། །ཆུ་དང་རླན་ཅན་ལ་སྤྱོད་གང༌། །གང་ཡང་ལྕི་བ་ཟ་བ་རྣམས། །དེ་དག་ཐམས་ཅད་ལྕི་བར་བཤད། །སྐམ་སར་སྤྱོད་ཅིང་སྐམ་སར་སྐྱེས། །ཡང་བ་ཟ་བ་ཡང་བ་ཡིན། །ཞེས་བྱ་བ་ནི་གནས་ཀྱི་ཡུལ་ལོ། །ལུས་ཡན་ལག་ལས་བརླ་ལྕི་དང༌། །དེ་བཞིན་མགོ་དང་རོ་སྟོད་དེ། །དཔྱི་ལས་སྟོད་ཤ་ལྕི་བ་ཡིན། །དེ་བས་ཀླད་པ་དེ་བས་མགོ །རླིག་པ་པགས་པ་ཕོ་མཚན་དང༌། །མཇུག་ཏོ་རྐེད་པ་མཇུག་རྩེ་གཞང༌། །མཆེར་པ་རྐང་དང་གཞུངས་པ་ནི། །ཤ་ལས་ཤིན་ཏུ་ལྕིར་ཤེས་བྱ། །ཞེས་བྱ་བ་ནི། ལུས་ཀྱི་ཡན་ལག་གོ །རང་བཞིན་གྱིས་ཡང་མུངྒ་དང༌། །དེ་བཞིན་ཟླ་བ་ཕིན་ཛ་ལ། །རང་བཞིན་གྱིས་ལྕི་མོན་སྲན་གྲེའུ། །དེ་བཞིན་ཕག་དང་མ་ཧེ་ཤ་།ཞེས་བྱ་བ་སྟེ། འདི་ནི་རང་བཞིན་ནོ། །ཁྲག་ལ་སོགས་པའི་ལུས་
ཟུངས་ནི། །འོག་མ་བཞིན་དུ་ལྕི་བ་ཡིན། །ཞེས་བྱ་བ་ནི། ལུས་ཟུངས་སོ། །གང་ཞིག་མྱུར་ཞིང་བྱ་བ་མང༌། །ལེ་ལོ་ཅན་ལས་ཁྱད་འཕགས་ཡིན། །ཞེས་བཤད་པ་སྟེ། འདི་བྱ་བའོ། །ཕོ་དང་མོ་ཡི་མཚན་འདྲ་ལས། །ལྕི་དང་ཡང་བར་འགྱུར་བ་ཡིན། །ཞེས་བྱ་བ་ནི་མཚན་མའོ། །རང་གི་རིགས་ལས་ཚད་ཆེ་བ། །ལྕི་བའོ་གཞན་དུ་ཡང་བ་ཡིན། །ཞེས་བྱ་བ་ནི་ཚད་དོ། །ལས་སུ་བྱས་ལས་གོ་བཟློག་པར། །ལྕི་བ་ཡང་བར་འགྱུར་ཤེས་བྱ། །དཔེར་ན་འབྲུ་ལས་འབྲས་ཡོས་བྱས། །ཕྱེ་ལས་ཟན་ནི་བྱས་དང་མཚུངས། །ཞེས་བྱ་བ་ནི། ལས་སུ་བྱས་པའོ། །ལྕི་ལས་ཉུང་དུ་བཟའ་བ་དང༌། །ཡང་བ་ལྷག་པར་བསྟེན་པ་ནི། །རྫས་ཀྱི་ལྕི་དང་ཡང་བ་དག །ཚད་ཀྱི་རྒྱུར་ནི་བཤད་པ་ཡིན། །ཚད་ནི་རྫས་དང་མཚོན་པ་དང༌། །མེ་ཡི་དྲོད་ལ་ལྟོས་བྱས་ལས། །ལྕི་ལས་ཉུང་ཞིང་སྦྱིན་པར་བྱ། །ཡང་བ་འགྲངས་པ་ཉིད་དུ་འདོད། །ཅེས་བྱ་བ་ནི་ཚད་དེ། དེ་ལྟར་ན་འདིར་དེ་དག་ཐམས་ཅད་བརྟག་པར་བྱ་བ་ཡིན་ནོ། །ཁུ་བ་ཉམས་བརྟས་ཚིམ་བྱེད་ཅིང༌། །རོ་ཙ་མིག་ཕན་རྨ་ལ་གནོད། །ཅེས་བྱ་བ་ལ། ཁུ་བ་ནི་ཤ་ཁུལ་བྱ་སྟེ། དེ་ཡང་སྨན་དཔྱད་ཀྱི་ལུང་ལས། ཁུ་བ་ཁྱད་པར་མེད་བཤད་པར། །ཤ་ཁུ་ཡིན་པར་ཤེས་པར་བྱ། །ཞེས་འབྱུང་བ་ཡིན་ནོ། །བསྡུས་པ་ལས་ཀྱང༌། དེ་ལ་ཁུ་བ་ཤ་ཡི་ཡིན། །སྲན་ཁུ་འབྲུ་ཡི་འབྲས་བུ་དང༌། །ཁ་བའོ་རྩ་བ་ཏིལ་ལྡེ་གུ། །ཅུང་ཟད་སྐྱུར་བ་སྐྱུར་པོ་ཡིན། །དེ་ནི་གཡོས་བྱས་མ་བྱས་ཏེ། །སྣུམ་ལ་སོགས་དང་བྲལ་ཤེས་བྱ། །ཞེས་བཤད་པ་ཡིན་ནོ། །ཁུ་བ་དེ་ཡང་ཉམས་བརྟས་བྱེད། །ཅེས་བྱ་བ་སྟེ། ལུས་ཉམས་བརྟས་ཤིང་རགས་པར་བྱེད་པ་དང༌། ཚིམ་བྱེད་ཅིང་ཞེས་པ། ལུས་ཟུངས་རྣམས་རྒྱས་ཤིང་འཕེལ་བར་བྱེད་པ་དང༌། རོ་ཙ་ཞིང་ཁུ་བ་སྐྱེད་པ་དང༌། མིག་ལ་ཕན་ཞིང་བདེ་བར་བྱེད་པ་དང༌། རྨ་ལ་གནོད་པ་སྟེ་རྨ་འཇོམས་པར་བྱེད་པ་ཡིན་ནོ། །མོན་སྲན་སྡེའུ་སྦྱངས་དང་རྨ། །ལྐོག་མ་མིག་ནད་དག་ལ་ཕན། །ཞེས་བྱ་བ་ལ། མོན་སྲན་སྡེའུ་མུངྒ་ཞེས་བྱ་བ་བཅོས་པའི་ཁུ་བ་ནི། སྐྱུག་སྨན་ལ་སོགས་པས་ལུས་སྦྱངས་པ་དང༌། རྨ་བྱུང་བ་དང༌། ལྐོག་མན་པ་དང༌།
མིག་ན་བདག་ལ་ཕན་ཞིང་བསོད་པ་ཡིན་ནོ། །ཀུ་ལངྠའི་ཁུ་རླུང་དང་སྐྲན། །རོ་སྨད་སླར་གཟེར་གནོད་པ་སེལ། །ཞེས་བྱ་བ་ལ། རྒྱ་སྲན་ཀུ་ལངྠའི་ཁུ་བ་ནི་རླུང་ལུགས་སུ་འབྱུང་བར་བྱེད་པ་དང༌། དེ་བཞིན་དུ་སྐྲན་དང༌། རོ་སྨད་ཆུ་སོའི་ནད་དག་སེལ་བར་བྱེད་པ་ཡིན་ཏེ། དེ་དག་གི་མཚན་ཉིད་ནི་སྐྲན་ནི་ནད་གཞི་ལས་འོག་ནས་བཤད་པར་བྱའོ། །དེ་བཞིན་དུ་གཞུང་གཞན་དག་ལས་ཀྱང༌། གང་ཞིག་བཤང་དང་གཅི་བའི་གནས། །རོ་སྨད་དག་ཏུ་ནད་བྱུང་ཞིང༌། །བཤང་གཅིའི་ལམ་ནི་འགག་སྙམ་བྱེད། །དེ་ནི་རོ་སྨད་དཔྱི་ནད་ཡིན། །བཤང་ལམ་མདོམས་ལས་བྱུང་བའི་ནད། །མི་མཐུན་རྒྱུ་བས་གནོད་བྱེད་ཅིང༌། །ཤུགས་ཀྱིས་ཕོ་བའི་གནས་སུ་ཕྱིན། །སླར་གཟེར་བ་ཞེས་བྱ་བ་ཡིན། །ཞེས་བཤད་པ་ཡིན་ནོ། །ཏིལ་ཚིགས་གཡོས་སུ་སྦྱར་བྱས་ནས། །ཚོད་མ་སྐམ་དང་མྱུ་གུ་དང༌། །སྐྱུར་པོར་ཆང་བུ་བཅུག་པ་ནི། །མི་གནོད་ཉེས་སྐྱེད་རྨྱ་བྱེད་ལྕི། །ཞེས་བྱ་བ་ལ། ཏིལ་གྱི་ཚིགས་མ་ནི་ཏིལ་བཏགས་པའི་ལྡེ་གུའོ། །དེས་གཡོས་སུ་སྦྱར་བ་ནི་ཚོད་མ་ཉིད་དུ་བྱས་པའི་རྣམ་པར་འགྱུར་བའོ། །ཚོད་མ་ཡང་ཡིན་ལ་སྐམ་པ་ཡང་ཡིན་པས་ན་ཚོད་མ་སྐམ་མོ། །མྱུ་གུ་ནི་འབྲས་ཀྱི་ཁྱི་སོ་འཐོན་པའོ། །སྐྱུར་པོར་བཅུག་པའི་ཆང་བུ་ནི་སྐྱུར་པོར་ཆང་བུ་བཅུག་པ་ལས་ཚོད་མའི་གཡོས་སུ་བྱས་པའོ། །འདི་དག་ཐམས་ཅད་ནི་མིག་ལ་གནོད་པ་སྟེ། མིག་ནད་སྐྱེད་པ་དང༌། ཉེས་པ་སྐྱེད་པ་དང༌། རྨྱ་བར་བྱེད་པ་དང༌། ལྕི་བ་ཡིན་ནོ། །དེ་ལ་སྐྱུར་པོར་ཆང་བུ་བཅུག་པ་ཞེས་སྨོས་པ་ནི། ཆང་བུར་བྱ་བ་སྐམ་པོ་རྐྱང་རྐྱང་པོ་སྟེ། ཤ་ལ་སོགས་པ་ལས་བྱས་པ་ཡིན་པར་གཟུང་སྟེ། སྔར་སྐྱུར་པོ་སྨོས་པའི་སྐབས་སུ་རྫས་གཤེར་བའི་རྣམ་པ་འདིས་ཟིན་པས། འདིར་ལ་ཕུག་དང༌། ཡུངས་ཀར་ལ་སོགས་པའི་ཚོད་མ་བསྐོལ་བའི་འོག་ཏུ་ཕྱིས་སྐེ་ཚེའི་ཕྱེ་མ་བཅུག་པ་སྐྱུར་ཞིང་ཚ་ལ་སོགས་པ་རྣོ་བ་ལ་སྐྱུར་པོའི་སྒྲར་བཤད་པ་ཡིན་ནོ། །དྲི་འཛིན་ལུས་བརྟ་རོ་ཙ་ཞིང༌། །སྣུམ་ཞིང་སྟོབས་སྐྱེད་ཡི་ག་འབྱེད། །ཅེས་བྱ་བ་ལ། དྲི་འཛིན་ཞེས་བྱ་བ་ནི་ཞོ་དང་སྤོད་སྦྱར་ནས་དཀྲུགས་པ་སྟེ། ཞོ་ལག་
པས་མཉེས་ལ་ཤིང་ཚ་དང༌། སུག་སྨེལ་དང༌། གནྡྷ་བྷ་དྲ་དང༌། ན་ལེ་ཤམ་དང༌། ཤ་ཀ་རའི་ཕྱེ་མ་བཏབ་ལ་རས་ལས་བཙགས་པ་ནི་དྲི་འཛིན་ཞེས་བྱ་སྟེ། དེ་ནི་ལུས་བརྟས་ཤིང་འཕེལ་བར་བྱེད་པ་དང༌། རོ་ཙ་བ་དང༌། སྣུམ་པའི་ཡོན་ཏན་དང་ལྡན་པ་དང༌། སྟོབས་སྐྱེད་པར་བྱེད་པ་དང༌། ཡི་ག་འཆུས་པ་ཡི་ག་འབྱེད་པར་བྱེད་པ་ཡིན་ནོ། །རྒུན་ཆུའི་བཏུང་བ་ངལ་དུབ་དང༌། །བཀྲེས་སེལ་ཚིམ་པར་བྱེད་ཅིང་ལྕི། །རྟུག་སྐམ་གཅིན་མང་ཡི་གར་འོང༌། །དེ་ཡི་ཡོན་ཏན་སྨན་བཞིན་བལྟ། །ཞེས་བྱ་བ་ལ། རྒུན་ཆུའི་བཏུང་བ་ནི་བཏུང་བ་ཐ་དད་ཡོད་པ་དེ། ཆུ་དང༌། སྦྲང་རྩི་དང༌། དྲི་སྣ་གསུམ་དང༌། ན་ལེ་ཤམ་དང༌། རྒུན་འབྲུམ་དང༌། འབྲ་གོ་ལ་སོགས་པ་ལས་བྱས་པ་དག་སྟེ། དེས་ནི་དུབ་པ་དང༌། བཀྲེས་པ་དང༌། སྐོམ་པ་སེལ་ཞིང་ཚིམ་པར་བྱེད་པ་དང་ལྕི་བ་ཡིན་ནོ། །རྟུག་སྐམ་ནི་བཤང་བ་སྐ་ཞིང་འདྲིལ་བའོ། །དེ་བཞིན་དུ་གཅིན་མང་ཞིང་ཡི་གར་འོང་བ་ཡིན་ནོ། །དེའི་ཡོན་ཏན་ཞེས་བྱ་བ་ནི། བཏུང་བ་དེ་དྲི་སྣ་གསུམ་དང༌། བུ་རམ་དང༌། རྒུན་འབྲུམ་ལ་སོགས་པ་སྨན་དང༌། རྫས་གང་དང་གང་ལས་བྱས་པ། རྫས་དེའི་ཡོན་ཏན་ཅི་ཡོད་པ་ཐམས་ཅད་བཏུང་བ་དེ་ལ་ཡོད་པར་ཤེས་པར་བྱའོ། །འབྲས་ཡོས་སྐོམ་དད་སྐྱུག་ཚད་འཁྲུ། །གཅིན་མང་ཚིལ་དང་བད་ཀན་སེལ། །ལུད་པ་མཁྲིས་པ་ཉེར་ཞི་བྱེད། །དྲོད་སྐྱེད་ཡང་ཞིང་བསིལ་བ་ཡིན། །ཞེས་བྱ་བ་ལ། འབྲས་ཡོས་ནི་སོ་བ་རྩེ་རྣོན་ལ་སོགས་པ་ལས་བྱས་པ་སྟེ། དེས་ནི་སྐོམ་དད་ལ་སོགས་པ་སེལ་ཞིང༌། ཞི་བར་བྱེད་པ་ཡིན་ལ། དེ་བཞིན་དུ་ལུད་པ་དང་མཁྲིས་པ་ཉེ་བར་ཞི་བར་བྱེད་པ་དང༌། ཕོ་བའི་མེ་དྲོད་སྐྱེད་པ་དང༌། ཡང་བའི་ཡོན་ཏན་དང་ལྡན་པ་དང༌། བསིལ་ཞིང་གྲང་བའི་ནུས་པ་སྐྱེད་པ་ཡིན་ནོ། །སྲུས་ལེབ་ལྕི་ཞིང་སྟོབས་སྐྱེད་ལ། །བད་ཀན་བཤང་བ་སྲ་བྱེད་ཡིན། །ཞེས་བྱ་བ་ལ། སྲུས་ལེབ་ཅེས་བྱ་བ་ནི་ནས་དང་འབྲས་ཀྱི་སྲུས་བརྔོས་ཏེ། སྤུན་པ་མེད་པར་བྱས་པ་གཏུན་གྱིས་བརྡུངས་པ་ལ་སོགས་པ་ནི་སྲུས་ལེབ་ཅེས་བྱའོ། །ཡང་ན་སྲུས་བརྔོས་པ་ཉིད་ལ་ཡང་བྱའོ། །ཡང་ན་བཏགས་པའོ། །དེ་ནི་ལྕི་བ་དང༌། སྟོབས་སྐྱེད་པ་དང༌། བད་ཀན་དང་བཤང་
གཅི་སྲ་ཞིང་སྒོང་བར་བྱེད་པ་ཡིན་ནོ། །ནས་ཡོས་རྟུག་མཁྲེགས་རྩུབ་པ་དང༌། །སྐོམ་ཞིང་ཁོང་འཁྲུགས་ལྕི་བ་ཡིན། །ཞེས་བྱ་བ་ལ། ནས་བརྔོས་པའི་ཡོས་དེ་ནི་རྟུག་པ་མཁྲེགས་ཤིང་རྩ་སྦུབས་འགགས་པར་བྱེད་པ་དང༌། རྩུབ་པ་དང་སྐོམ་དད་སྐྱེད་པ་དང། ཁོང་འཁྲུགས་པ་དང་བད་ཀན་ལ་སོགས་པ་དཀྲུག་ཅིང་སེལ་བ་དང་ལྕི་བ་ཡིན་ནོ། །ནས་ཕྱེ་ཁོང་ཡང་བཀྲེས་སྐོམ་དང༌། །ངལ་དུབ་མིག་ནད་རྨ་ལ་ཕན། །སྐྱེ་མར་བྱས་པ་འཐུངས་པ་ཡིས། །འཕྲལ་དུ་སྟོབས་ནི་སྐྱེད་བྱེད་ཡིན། །ཞེས་བྱ་བ་ལ། ནས་ཕྱེ་ནི་ནས་ལས་བྱུང་བ་སྟེ། དེ་ནི་ཁོང་ཡང་བ་དང་བཀྲེས་པ་ལ་སོགས་པ་ལ་ཕན་པ་དང༌། ཆུ་ལ་སོགས་པ་ལ་སྦྱོར་ཞིང་སྐྱོ་མར་བྱས་ཏེ་འཐུངས་བས། འཕྲལ་དུ་ཞེས་པ་དེ་མ་ཐག་ཏུ་སྟོབས་སྐྱེད་ཅིང༌། ལུས་བརྟས་པར་བྱེད་པ་ཡིན་ནོ། །ཆུ་དང་ཕྱེ་སྤེལ་མི་བཟའ་ཞིང༌། །དུས་གཉིས་མཚན་མོའང་ཕྲད་མེད་མིན། །འགྲངས་རྗེས་མི་བཟའ་སོས་གཅད་མིན། །ཧ་ཅང་འགྲངས་ཆེས་བཟའ་མི་བྱ། །ཞེས་བྱ་བ་ལ། ཆུ་དང་ཕྱེ་སྦེལ་ཞིང་བཟའ་བར་མི་བྱ་སྟེ། དང་པོར་ཕྱེ་འགམས་ནས་བར་དུ་ཆུ། དེ་ནས་ཡང་ཕྱེ་བཟའ་བ་དང༌། ཡང་ཆུ་བཏུང་བའི་ཚུལ་གྱིས་སྤེལ་ཞིང་བཟའ་བར་མི་བྱ་སྟེ། ཆུ་འཐུངས་ནས་བར་བར་དུ་ཕྱེ་མི་བཟའ་བར་བྱ་བའི་དོན་ཏོ། །དུས་གཉིས་ཞེས་བྱ་བའི་དུས་གཉི་གར་ཕྱེ་མི་བཟའ་བ་དང༌། མཚན་མོའི་དུས་སུ་ཕྱེ་མི་བཟའ་སྟེ། དེ་ནི་བཀྲ་མི་ཤིས་པར་བཤད་དོ། །དེ་བཞིན་དུ་ཕྲད་མེད་པ་སྟེ། ཆུ་ལ་སོགས་པ་གཤེར་དང་མི་ལྡན་པར་ཡང་བཟའ་བར་མི་བྱ་སྟེ། འགྲངས་རྗེས་ཞེས་པ་འབྲས་ཆན་ལ་སོགས་པས་འགྲངས་པའི་འོག་ཏུ་ཡང་ཕྱེ་ཟན་མི་བཟའ་བ་དང་མཚན་མོའི་དུས་སུ་ལག་པར་བཞག་པའི་ཟན་གང་སོས་གཅད་ཅིང་མི་བཟའ་བ་དང༌། ཕྱེ་ཟན་ཧ་ཅང་འགྲངས་ཆེས་པ་ཡང་བཟའ་བར་མི་བྱའོ། །འབའ་ཆ་ཉམས་འབྲི་རྩུབ་པ་དང༌། བཤང་མཁྲེགས་མིག་ལ་གནོད་པ་ཡིན། །ཞེས་བྱ་བ་ནི། ཏིལ་དང་སྟར་གའི་འབྲས་བུ་ལ་སོགས་པ་བཙིར་ནས་མར་དང་ཕྲལ་བ་སྟེ། དེ་ནི་ཉམས་འབྲི་ཞིང་རྨྱ་བར་བྱེད་པ་དང༌། རྩུབ་པ་དང་བཤང་གཅི་མཁྲེགས་ཤིང་འབྱུང་དཀའ་བ་དང༌། མིག་ལ་གནོད་པ་ཡིན་ནོ། །
ཤ་གཡོས་སྤོད་སྦྱར་སྣུམ་ཞིང་ལྕི། །སྟོབས་སྐྱེད་ཤ་འཕེལ་བརྟས་བྱེད་ཡིན། །ཞེས་བྱ་བ་ལ། ཤ་གཡོས་སྤོད་དང་སྦྱར་བ་ནི་བཅའ་སྒ་དང༌། འུ་སུ་དང་གོ་སྙོད་ལ་སོགས་པ་དང་ཤ་བཏགས་པ་ནི་གཡོས་སུ་སྦྱར་བ་སྟེ། དེ་ཡང་ལུང་ལས། ཤ་ནི་རློན་པ་བཏགས་ནས་ནི། །གཡོས་སུ་སྦྱར་བ་ཤ་གཡོས་ཏེ། །ཞེས་བཤད་པ་ཡིན་ལ། ཤ་བཏགས་པ་དེ་ཡང་ཤིང་ཀུན་དང༌། ཚ་དང༌། མར་དང༌། ཏིལ་མར་ལ་སོགས་པ་དང་ཅི་རིགས་པར་སྦྱར་ཞིང་བཙོས་པའོ། །དེ་ལྟ་བུའི་ཤ་གཡོས་སྤོད་དང་སྦྱར་བ་དེ་ནི། སྣུམ་པ་དང༌། ལྕི་བ་དང༌། སྟོབས་སྐྱེད་ཅིང་ཤ་འཕེལ་བ་དང་བརྟས་པར་བྱེད་པ་ཡིན་ཏེ། སྟོབས་ནི་ནུས་པའོ། །བརྟས་པ་ནི་ལུས་ཟུངས་རྒྱས་པར་བྱེད་པའོ། །མུངྒ་གཡོས་སྦྱར་ལྕི་བ་དང༌། །སྨན་གྱི་ཆ་དང་ཡོན་ཏན་འདྲ། །ཞེས་བྱ་བ་ལ། སྲན་མུངྒ་སྟེ། སྡེའུ་ལ་སོགས་པ་དང་སྦྱར་བའི་ཤའི་གཡོས་སུ་བྱས་པ་སྟེ། ཕྲ་མོར་བཏུས་ནས་བརྔོས་པ་ནི་ཐམས་ཅད་ཀྱང་ལྕི་བ་དང༌། དེ་བཞིན་དུ་སྨན་གྱི་ཡོན་ཏན་མཚུངས་ཤིང་འདྲ་བ་སྟེ། མུངྒ་ལ་སོགས་པའི་ཡོན་ཏན་གང་ཡིན་པ་དེ་ལ་གཡོས་སུ་བྱས་པའི་ཡང་ཡོན་ཏན་ཡོད་པ་ཡིན་པར་ཤེས་པར་བྱའོ། །ཁུར་བ་མདག་བཙོས་དོག་ལེ་དང༌། །ས་སླང་ད་ནུར་རྒྱ་སོལ་བསྲེགས། །ཁུར་བ་འདི་རྣམས་རིགས་གཅིག་ཀྱང༌། །ཕྱི་མ་ཕྱི་མ་ཡང་བ་ཡིན། །ཞེས་བྱ་བ་ལ། འབྲས་ཀྱི་ཁུར་བ་མདག་མ་ལ་སོགས་པར་བཙོས་པ་ནི་རིགས་གཅིག་པ་སྟེ། འབྲས་ལ་སོགས་པའི་རྒྱུ་གཅིག་ཡིན་ན་ཡང༌། ཕྱི་མ་ཕྱི་མ་ཡང་བ་ཡིན་པར་ཤེས་ཤིང་རྟོགས་པར་བྱའོ། །དེ་ལ་རིགས་ནི་རྒྱུ་སྟེ། འབྲས་དང༌། གྲོ་དང༌། མོན་སྲན་གྲེའུ་ལ་སོགས་པ་སྟེ། དེ་དག་ནི་རིགས་མཐུན་པ་ལ་ལྟོས་ནས་རིགས་གཅིག་པ་ཞེས་བཏགས་སོ། །དེ་ནས་འབྲས་ལ་སོགས་པའི་སྐྱ་ཁུར་མདག་མར་བཙོས་པར་བྱས་པ་ནི་ཡང་བ་ཡིན་ལ། དེ་བས་ཀྱང་དོག་ལེ་དང༌། སླ་དར་བཙོས་པ་ཆེས་ཡང་བ་དང༌། དེ་བས་ཀྱང་ས་སླང་དུ་བཙོས་པ་རབ་ཏུ་ཡང་ཞིང༌། དེ་བས་ཀྱང་ད་ནུར་བཙོས་པ་རབ་ཏུ་ཡང་ལ། རྒྱ་སོལ་ལ་བསྲེགས་པ་ནི་ཡང་བའི་མཆོག་ཡིན་ཏེ། འབྲས་སམ་གྲོ་འམ་ནས་ལ་སོགས་པ་གཅིག་ལས་བྱ་ན་ཡང་ཁྱད་པར་དུ་
ཡང་ངོ། །དེ་ལ་མདག་བཙོས་ནི་མདག་མའི་ཤས་ཆུང་བ་ལ་བཙོས་པའོ། །གཞན་དག་ནི་རླངས་པ་ལ་བཙོས་པའོ་ཞེས་ཟེར་རོ། །ཁ་ཅིག་ནི་ཐལ་བ་མེ་མ་མུར་དུ་འདུག་པ་ལ་བསྲེགས་པ་ཡིན་ནོ་ཞེས་ཟེར་རོ། །དོག་ལེ་མེ་འབར་བ་ལ་བཙུགས་པའི་ལྕགས་སམ། སའི་སྣོད་ལ་བསྲེགས་པའོ། །གཡོས་སུ་བྱས་པའི་ཁ་ཟས་ཀྱི་སྡེ་ཚན་ནོ།། །།དེ་ལ་རེ་ཞིག་གཡོས་སུ་བྱས་པའི་ཁ་ཟས་བཙོས་པ་སྟེ། དེ་ཡང་ཤ་དང་ཚོད་མ་ལ་སོགས་པ་དང་ལྷན་ཅིག་སྦྱར་ཞིང༌། དེ་དང་ལྡན་ན་ལེགས་པར་དགོས་པ་བྱེད་པ་ཡིན་ལ། ཟས་ནི་མང་དུ་དགོས་པ་ཡིན་པ་ལྟར་ཤ་ལ་སོགས་པ་དེ་ལྟ་མ་ཡིན་ནོ། །དེའི་སྤགས་ཙམ་དུ་ཟད་པ་ཡིན་ནོ། །དེ་བས་ན་གཡོས་སུ་བྱས་པའི་ཁ་ཟས་ཀྱི་སྡེ་ཚན་གྱི་རྗེས་ལ། ཤ་དང་ཚོད་མའི་སྡེ་ཚན་བསྟན་པ་ཡིན་ནོ། །དེ་གཉིས་ལས་ཀྱང་ཤ་ནི་ཟས་དང་ལྷན་ཅིག་ཟོས་ན་ཉེས་པ་མེད་ཅིང་བསྟེན་པར་བྱ་བ་ཡིན་པས། ཤའི་སྡེ་ཚན་དང་པོར་སྨོས་པ་ཡིན་ནོ། །ཤ་བ་དགོ་བ་ཀུ་རང་ག །རྐྱང་དང་རི་ཤ་རི་དྭགས་མ། །རི་བོང་དང་སྒོ་ཙ་རུ་སྐ། །ལྡང་སྒོ་ལ་སོགས་རི་དྭགས་ཡིན། །ཞེས་བྱ་བ་ནི། ཤ་བ་ནས་ལྡང་སྒོའི་མཐར་ཐུག་པ་རྣམས་ནི། རི་དྭགས་ཀྱི་རིགས་སུ་གཏོགས་པ་ཡིན་ལ། སོགས་པའི་སྒྲས་ནི་མཇུག་ནག་གམ། སྲིང་ཤ་ཏ་ལ་སོགས་པ་བསྡུའོ། །དེ་དག་ནི་འཇིག་རྟེན་དུ་གྲགས་པར་ཟད་དོ། །ལ་བ་བར་ཏི་བར་ཏི་ཀ །གོ་ཙ་དམར་དང་གོང་མོ་དང༌། །སྲེག་པ་ཨུ་པ་ཙ་ཀྲ་དང༌། །ཀ་བིན་ཛ་ར་ཀུ་རུ་བ། །བ་ཏ་ཀ་དང་བ་ཏི་ཀ །གོང་མ་སྲེག་དང་རྨ་བྱ་དང༌། །ཁྱིམ་བྱ་དང་ནི་བ་ར་ཀ །གོ་ནན་ཏ་དང་རི་ལ་གནས། །ཤར་བ་དང་ཨིནྡྲ་པ། །རི་བྱ་འདི་དག་གཟས་ཁྲོན་རྐོ། །ཞེས་བྱ་བ་ལ། ལ་བ་ནས་རི་བྱའི་བར་འདི་དག་ནི་གཟས་ཁྲོན་གྱིས་རྐོ་བ་ཞེས་བྱ་བ་ནི། གང་རྐོ་ཞིང་རྐོ་ཞིང་འབྲུ་ལ་སོགས་པ་ཟ་བས་ན། གཟས་ཁྲོན་རྐོ་ཞེས་བྱའོ། །འདི་དག་ཞེས་བྱ་བ་ནི་རྣམ་པའི་ཚིག་སྟེ། རྣམ་པ་དེ་ལྟ་བུའི་བྱ་གཞན་དག་ཀྱང་ཡོད་དོ་ཞེས་སྟོན་ཏོ། །ཤང་ཤང་ཏེའུ་དེ་ཏུ་ཧ། །བུང་འདྲ་ནེ་ཚོ་ཤ་རི་ཀ །ལ་ཏྭ་ཁུ་བྱུག་ཧ་རི་ཏ། །བྱིའུ་ལ་སོགས་མཆུས་
རྐོ་ཡིན། །ཞེས་བྱ་བ་ལ། ཤང་ཤང་ཏེའུ་ནས་བྱིའུའི་བར་ནི་མཆུས་རྐོ་ཞེས་བྱ་སྟེ། མཆུས་རྐོ་ཞིང་ཟ་བའི་དོན་གྱིས་ན་མཆུས་རྐོ་ཞེས་བྱའོ། །སོགས་པའི་སྒྲས་ནི་ཤ་ཏ་པ་ཏྲ་དང༌། ཁན་ཛ་རི་ལ་སོགས་པའི་བྱ་རྣམས་བསྡུའོ། །སྦལ་པ་སྦྲུལ་དང་སྐྱིན་གོར་དང༌། །བྱི་ཐུར་ལ་སོགས་ཁུང་ན་གནས། །ཞེས་བྱ་བ་ལ། སྦལ་པ་ནས་བྱི་ཐུར་བར་ནི་ཁུང་ན་གནས་པ་ཡིན་ཏེ། སའི་ཁུང་བུ་དག་ན་གནས་ཤིང་ཉལ་བས་ན་ཁུང་ན་གནས་ཞེས་བྱའོ། །སོགས་པའི་སྒྲས་ནི་ཤ་ལ་མ་ཀ་ལ་སོགས་པ་བསྡུའོ། །བ་ལང་རྟ་བོང་དྲེའུ་དང༌། །སྟག་གཟིག་སེང་གེ་དོམ་སྤྲེའུ། བྱི་བ་བྱི་ལ་སྤྱང་ཀི་དང༌། །སྲེ་མོང་དང་ནི་དྲེད་དག་དང༌། །ཝ་དང་འཕར་བ་ཁྲ་དང་ནི། །ཆུན་ལག་ཁྲ་ལྗང་བྱ་རོག་ཁྱི། །བྱ་རིགས་ཁྲ་སྔོན་བྱ་ཀུ་ར། །བྱ་རྒོད་འུག་པ་ཀ་ལིང་ག །དུང་ཅན་མ་དུ་ཧ་ལ་སོགས། །གཅན་གཟན་བྱ་དག་རྩལ་མཐུས་ཟ། །ཞེས་བྱ་བ་ལ། བ་ལང་ནས་མ་དུ་ཧའི་བར་གྱི་ཕྱུགས་དང༌། གཅན་གཟན་དང་བྱ་དག་ནི་རྩལ་དང་མཐུས་ཟ་བ་ཞེས་བྱ་བ་སྟེ། མངོན་མཐོན་དུ་སྟོབས་ཀྱིས་འཕྲོག་ཅིང༌། ཤ་ལ་སོགས་པ་རྩལ་མཐུས་ཟ་བས་ན། ཁྲོན་དུ་རྐོ་བ་དང༌། མཐུས་ཟ་བ་ནི་ཁྲོན་དུ་རྐོ་བ་ལ་སོགས་པའི་ཚུལ་གྱི་བྱ་བ་དང་ལྡན་བས་ཟ་བས་ན་མིང་དེ་སྐད་ཅེས་བྱ་སྟེ། དེ་ཡང་དྲང་སྲོང་ཙ་ར་ཀས། །འཐོར་ཞིང་རྣམ་པར་རྐོ་བ་དང༌། །མཆུ་ཡིས་རྐོ་བར་བྱེད་པ་དང༌། །རྩལ་མཐུས་འཕྲོག་ཅིང་ཟ་བས་ན། །མཐུས་ཟ་ཞེས་ནི་དེ་ཕྱིར་བྱ། །ཞེས་བཤད་པ་ཡིན་ནོ། །སོགས་པ་ཞེས་བྱ་བ་ནི་གཞན་དག་ཀྱང་བསྡུ་བའོ། །ཕག་རྒོད་རུ་རུ་མ་ཧེ་སྐྱིན། །རོ་ཧི་ཏ་དང་གླང་པོ་ཆེ། །མཛོ་རྒོད་གནག་རྒོད་བསེ་དང་ནི། །སྨྱིག་གླང་ཞེས་གྲགས་རི་དྭགས་ཆེ། །ཞེས་བྱ་བ་ལ། ཕག་རྒོད་ནས་སྨྱིག་གླང་གི་བར་ནི་རི་དྭགས་ཆེན་པོ་ཞེས་བྱའོ། །ཆུར་གནས་ངང་པ་ས་ར་ས། །ཆུ་སྐྱར་ཀ་རཎྜ་བྱ་བླ། །རྒྱ་དང་ཁྲུང་ཁྲུང་ངུར་པ་དང༌། །སོ་བྱ་ཀ་དམ་པ་སོགས་ཡིན། །ཞེས་བྱ་བ་ལ། ངང་པ་ནས་ཀ་དམ་པའི་བར་ནི་ཆུ་ལ་གནས་པ་ཡིན་ཏེ། དེ་དག་ནི་ཆུ་ལ་སྤྱོད་པ་ཡིན་པས་ན་ཆུ་ལ་གནས་པའོ། །སོགས་པའི་སྒྲས་ནི་མགོ་དམར་དང༌། པདྨའི་མིག་དང༌། ཤ་ལ་རི་ལ་སོགས་པས་
བསྡུའོ། །ཉ་རོ་ཧི་ཏ་པ་ཏི་ན། །ཉ་ཕྱིས་རུས་སྦལ་ཀུམ་བྷི་ར། །ཀར་ཏ་དུང་སྲམ་ཤམ་བུ་ཀ །ཉེ་ལྡང་བར་མ་ཙིན་ཏྲི་ཀ །བུ་ལུ་ཆུ་སྲིན་ནག་ཁྲ་དང༌། །ཉ་བོ་ཆེ་ནི་བྱིས་པ་གསོད། །ཛ་རི་ཙི་ལི་ཙི་མ་སོགས། །ཞེས་བྱ་བ་ལ། ཉ་རོ་ཧི་ཏ་ནས་ཙི་ལི་ཙི་མའི་བར་ནི། ཆུ་ལས་བྱུང་ཞིང་ཆུ་ལ་གནས་སོ། །སོགས་པའི་སྒྲས་ནི་རྣམ་པའི་དོན་ཏེ། དེ་ལྟ་བུ་དང་གཞན་དག་ཀྱང་རྣམ་པ་དུ་མ་ཡོད་དོ། །ཀར་ཀ་ཏ་ནི་ཀུ་ལ་ར་ཞེས་བྱའོ། །ཤམ་བུ་ཀ་ནི་ཕྱུང་བའི་དུང་ཞེས་བྱའོ། །འདི་དག་ནི་རྣམ་གྲངས་མི་ཤེས་པ་དག་གིས་ནི་ཡུལ་ཕྱོགས་ཀུན་ཏུ་ཕྱིན་པ་དག་ལས་ཤེས་པར་བྱ་སྟེ། གང་གི་ཕྱིར་འདིར་སྨོས་པའི་སྲོག་ཆགས་ཡུལ་ལ་ལན་མེད་པས་མི་ཤེས་པ། ཁ་ཅིག་ནི་ཡུལ་གཞན་དག་ཏུ་གྲགས་པ་ཡོད་དོ། །དེ་བས་ན་འདི་རྣམས་ཀྱི་མིང་གི་རྣམ་གྲངས་ཡུལ་ཐ་དད་པ་ན་གྲགས་པ་ནི་རི་བྲགས་པ་དང༌། ཉ་པ་ལ་སོགས་པ་ལས་མིང་དུ་ཇི་སྐད་གྲགས་པ་གང་ཡིན་པ་ལས་ཤེས་པར་བྱའོ། །དེ་ལྟར་ཤ་ནི་བརྒྱད་དུ་བཤད། །ཅེས་བྱ་བ་ནི། དེ་ལྟར་ཞེས་པ་བཤད་མ་ཐག་པའི་རྣམ་པས་ཤ་བརྒྱད་དུ་ཞེས་པ། ཤའི་རྣམ་གྲངས་མདོར་བསྡུ་ན་རྣམ་པ་བརྒྱད་ཡོད་པར་སློབ་དཔོན་གྱིས་བཤད་ཅིང་བསྟན་པ་ཡིན་ནོ། །ར་ལུག་གཟས་ཀྱི་སྤྱོད་ཡུལ་ནི། །འདྲེས་པས་རིགས་གཅིག་ངེས་མ་ཡིན། །ཞེས་བྱ་བ་ལ། རིགས་བརྒྱད་པོ་དེ་དག་གི་ནང་ནས། ར་དང་ལུག་གི་ངེས་པ་མེད་པ་ཡིན་པས་ངེས་བ་མ་བཤད་དེ། ཅིའི་ཕྱིར་ཞེ་ན། སྤྱོད་ཡུལ་འདྲེས་པ་ཡིན་པའི་ཕྱིར་ཏེ། སྤྱོད་ཡུལ་འདྲེས་པ་ནི་རླན་ཅན་དང༌། སྐམ་སའི་གཟས་ཀྱི་སྤྱོད་ཡུལ་འདྲེན་མར་གནས་པ་སྟེ། ལན་འགའ་ནི་གཅིག་ཏུ་རླན་ཅན་ན་གནས་པ། ལན་འགའ་ནི་སྐམ་སར་གཅིག་ཏུ་གནས་པ་ཡིན་ནོ། །དེ་ལྟར་ན་རྒྱ་བྱ་ཡང་དེ་དང་འདྲ་བ་ཡིན་ཏེ། དེ་ཡང་གཉི་ག་ན་སྤྱོད་པ་ཡིན་པའི་ཕྱིར་རོ། །དེ་ཡང་དྲང་སྲོང་ཙ་ར་ཀས། སྐམ་ས་གཤེར་སར་གནས་པའི་ཕྱིར། །ཤིན་ཏུ་ལྕི་མངར་ཚ་མིན་པའི། །རྒྱ་བྱའི་ཤ་ནི་རླུང་ལ་སོགས། །ཉེས་པ་གསུམ་པོ་སེལ་བ་ཡིན། །ཞེས་བཤད་པ་ཡིན་ནོ། །དེ་ལྟར་ན་རྒྱ་བྱ་ཏི་ཏི་ར་ཞེས་བྱ་བ་ནི་གཉི་གར་སྤྱོད་པ་ཡིན་
དུ་ཟིན་ཀྱང༌། འདི་ཡུལ་གཅིག་ལ་ནམ་ཡང་གནས་པར་དགའ་བ་མ་ཡིན་པས། གཟེབ་ཏུ་བཅུག་པ་མ་གཏོགས་པར། །གཤེར་ས་དང་སྐམ་ས་གཉི་གར་ཡང་བརྟེན་པ་མ་ཡིན་ནོ། །ར་ལུག་ཀྱང་ཆེད་འགའ་ནི་སྐམ་ས་ཆུ་ཉུང་བ་ན་འཚོ་ལ། ཆེད་འགའ་ནི་རླན་ཅན་ཆུ་མང་བ་ན་འཚོ་སྟེ། རང་བཞིན་དེས་ན་ར་དང་ལུག་ནི་ངེས་པ་མ་ཡིན་པ་ཡིན་ནོ། །ཐོག་མ་ཐ་མ་སྐམ་གཤེར་གནས། །བར་མ་གཉིས་པོ་ཐུན་མོང་བཤད། །ཅེས་བྱ་བ་ལ། བར་མ་ནི་གཉིས་པོ་ཞེས་གཉིས་པར་བཤད་པ་ལས་ཐོག་མ་དང་ཐ་མར་ནི་སྡེ་ཚན་གསུམ་གསུམ་ཡིན་ཏེ། དང་པོའི་སྡེ་ཚན་གསུམ་ནི་རི་དྭགས་དང་ཁྲོན་དུ་རྐོ་བ་དང༌། མཆུས་རྐོ་བ་གསུམ་ནི་སྐམ་ས་ལ་གནས་པ་ཡིན་པས། སྐམ་སར་སྒྲར་བརྗོད་ལ། ཐ་མའི་གསུམ་པོ་རི་དྭགས་ཆེན་པོ་དང༌། ཆུ་ལ་སྤྱོད་པ་དང༌། ཉ་རྣམས་ནི་གཤེར་ས་ཉིད་ལ་སྤྱོད་པ་ཡིན་པས་ན་གཤེར་སའི་སྒྲར་བཤད་དོ། །བར་གྱི་སྡེ་ཚན་གཉིས་པོ་ཁུང་ན་གནས་པ་དང༌། རྩལ་མཐུས་ཟ་བ་ཞེས་བྱ་བ་གཉིས་ནི་ཐུན་མོང་སྟེ། གཉི་ག་ལ་སྤྱོད་པ་ཡིན་པར་བཤད་དོ། །དེ་ལས་སྐམ་སའི་ཤ་རྟུག་འགགས། །བསིལ་བ་དང་ནི་ཡང་བ་ཡིན། །འདུས་པ་མཁྲིས་པ་ཤས་ཆེ་ཞིང༌། །རླུང་འབྲིང་བད་ཀན་ཆུང་ལ་ཕན། །ཞེས་བྱ་བ་ལ། དེ་ལས་བྱས་པ་ནི་ངེས་པར་བཟུང་བ་སྟེ། སྐམ་ས་དང༌། གཤེར་ས་དང༌། ཐུན་མོང་གི་གནས་ན་སྤྱོད་པ་ཡིན་པར་བཤད་དོ། །སྐམ་སའི་ཤ་ནི་རྟུག་པ་འགགས་པར་བྱེད་པ་དང༌། ནུས་པ་བསིལ་བ་དང་ཡང་བ་ཡིན་ནོ། །དེ་བཞིན་དུ་འདུས་པའི་ནད་མཁྲིས་པའི་ཤས་ཆེ་ཞིང་རླུང་ཆེ་ཆུང་འབྲིང་དུ་གནས་པ་དང༌། བད་ཀན་ཤས་ཆུང་བ་ལ་ཕན་ཞིང༌། གནོད་པ་འཇོམས་པ་ཡིན་ཏེ། འདུས་པའི་ནད་གང་མཁྲིས་པའི་ཤས་ཆེ་བ་དང༌། རླུང་འབྲིང་ཙམ་དུ་གནས་པ་དང༌། བད་ཀན་ཆེས་ཆུང་བ་དེ་ལ་ཕན་པ་ཡིན་ནོ། །རི་བོང་ཤ་ནི་དྲོད་སྐྱེད་རྩུབ། །ཞུ་རྗེས་ཚ་ཞིང་འཁྲུ་གཅོད་བསིལ། །ཞེས་བྱ་བ་ལ། སྐམ་སར་གནས་པ་དེ་རྣམས་ཀྱི་ནང་ནས། རི་བོང་གི་ཤ་ནི་དྲོད་སྐྱེད་པ་སྟེ། ཕོ་བའི་མེ་དྲོད་འཕེལ་བར་
བྱེད་པ་དང༌། དེ་བཞིན་དུ་རྩུབ་པ་དང༌། ཞུ་རྗེས་ཀྱི་རོ་ཚ་བ་དང༌། འཁྲུ་བ་གཅོད་ཅིང་སྡུད་པ་དང༌། བསིལ་བའི་མཚན་ཉིད་ཅན་ཡིན་ནོ། །བར་ཏ་ཀི་ལ་སོགས་པའི་ཤ་།ཅུང་ཟད་སྣུམ་དྲོ་ལྕི་བརྟས་བྱེད། །ཅེས་བྱ་བ་ལ། སྐམ་སར་གནས་པ་རྣམས་ཀྱི་ནང་ནས། བྱ་བར་ཏ་ཀི་ལ་སོགས་པ་སྟེ། གང་སྐམ་སར་གནས་པའི་བར་དེ་ཐམས་ཅད་ནི་ཅུང་ཟད་སྣུམ་ཞིང་དྲོ་བ་དང་ལྕི་བ་དང་ལྡན་པ་ཡིན་ཞིང་ལུས་བརྟས་པར་བྱེད་པ་ཡིན་ནོ། །དེ་རྣམས་ལས་ཀྱང་རྒྱ་བྱའི་ཤ་།ཡིད་གཞུངས་དྲོད་སྟོབས་ཁུ་བ་འཕེལ། །བཤང་སྐེམས་མདོག་བཟངས་རླུང་ཤས་ཆེ། །འདུས་པ་སེལ་བའི་དམ་པ་ཡིན། །དེ་རྣམས་ཞེས་བྱ་བ་བར་ཏ་ཀི་ལ་སོགས་པའི་ནང་ནས་ཀྱང༌། རྒྱ་བྱ་ཏི་ཏི་རའི་ཤ་ནི་ཡིད་གཞུངས་པ་དང༌། དྲོད་སྐྱེ་བ་དང༌། སྟོབས་དང༌། ཁུ་བ་འཕེལ་བ་དང༌། བཤང་བ་སྐེམས་ཤིང་སྡུད་པ་དང༌། ལུས་ཀྱི་མདོག་བཟང་པོར་བྱེད་པ་དང༌། རླུང་ཤས་ཆེ་བའི་འདུས་པའི་ནད་སེལ་ཞིང་འཇོམས་པའི་མཆོག་དམ་པ་ཡིན་ནོ། །རྨ་བྱའི་ཤ་ནི་བཟང་མིན་ཡང༌། །རྣ་མིག་སྐད་འགགས་རྒས་སྲར་ཕན། །ཞེས་བྱ་བ་ལ། རྨ་བྱའི་ཤ་ནི་བཟང་པོ་མ་ཡིན་ཏེ། ཕན་ཞིང་བསྔགས་པ་མ་ཡིན་མོད་ཀྱི། འོན་ཀྱང་རྣ་བ་གཉིས་ལ་ཕན་ཏེ། སྒྲ་ལེགས་པར་ཐོས་པར་འགྱུར་བ་དང༌། མིག་གིས་ལེགས་པར་མཐོང་བར་བྱེད་པས་མིག་ལ་ཕན་པ་དང༌། གདངས་སྙན་པས་སྐད་འགགས་པ་ལ་ཕན་པ་དང༌། མྱུར་དུ་རྒས་པ་ལས་བསྲུང་བས་ན། རྒས་པ་སྲ་བ་ལ་ཕན་པ་ཡིན་ནོ། །ཁྱིམ་བྱ་དེ་འདྲ་རོ་ཙ་ལ། །གྲོང་གནས་ལྕི་ཞིང་བད་ཀན་སྐྱེད། །ཅེས་བྱ་བ་ལ། ཁྱིམ་བྱ་ནི་རྨ་བྱའི་ཤ་འདྲ་བས་ཤིན་ཏུ་བཟང་པོ་མ་ཡིན་མོད་ཀྱི། རྣ་བ་ལ་སོགས་པ་ལ་ཕན་པར་འདྲ་ཞིང་རོ་ཙ་བ་ཡིན་ནོ། །ཡང་ན་གྲོང་ན་གནས་པའི་ཁྱིམ་བྱ་སྟེ། སྐྱེ་བོའི་ཁྱིམ་ན་རྒྱུ་བ་གང་ཡིན་པ་དེ་ནི་ལྕི་བ་དང༌། བད་ཀན་སྐྱེད་པར་བྱེད་པ་དང༌། རོ་ཙ་བ་ཡིན་ནོ། །གོང་མོ་ཨུ་པ་ཙ་ཀྲར་བཅས། །ཡིད་གཞུངས་དྲོད་སྐྱེད་ཡི་གར་འོང༌། །ཞེས་བྱ་བ་ལ། བྱ་གོང་མོ་དང་ཨུ་པ་ཙ་ཀྲར་བཅས་པའི་ཤ་ནི་ཡིད་གཞུངས་
ཤིང་ཤེས་རབ་སྐྱེད་པ་དང༌། ཕོ་བའི་མེ་དྲོད་སྐྱེད་པ་དང༌། ཡི་གར་འོང་ཞིང་དགའ་བར་བྱེད་པ་ཡིན་ནོ། །ཐི་བ་ཞར་བའི་ཤ་ལྕི་ཞིང༌། །ཚ་བྲོ་ཉེས་པ་ཐམས་ཅད་སྐྱེད། །ཅེས་བྱ་བ་ལ། བྱ་ཐི་བ་ཞར་བའི་ཤ་ནི་ལྕི་བ་དང་ཚ་བྲོ་བ་སྟེ། ཅུང་ཟད་ལན་ཚྭ་བྲོ་བ་དང༌། ཉེས་པ་གསུམ་པོ་ཐམས་ཅད་སྐྱེད་པར་བྱེད་པ་ཡིན་ནོ། །བྱིའུ་ཤ་བད་ཀན་སྐྱེད་ཅིང་སྣུམ། །རླུང་འཇོམས་ཁུ་བ་རབ་འཕེལ་བྱེད། །ཅེས་བྱ་བ་ལ། བྱ་བྲན་བྱེའུ་རྣམས་ཀྱི་ཤ་ནི་བད་ཀན་སྐྱེད་པར་བྱེད་པ་དང༌། དེ་བཞིན་དུ་སྣུམ་པ་དང༌། རླུང་འཇོམས་ཤིང་སེལ་བ་དང༌། མཆོག་ཏུ་ཁུ་བ་འཕེལ་བར་བྱེད་པ་ཡིན་ནོ། །སྡེ་ཚན་དེ་ལས་ཕྱི་མ་རྣམས། །རིམ་བཞིན་ལྕི་དྲོ་སྣུམ་ཞིང་མངར། །གཅིན་མང་རོ་ཙ་སྟོབས་སྐྱེད་ཅིང༌། །རླུང་འཇོམས་བད་ཀན་མཁྲིས་པ་སྐྱེད། །ཅེས་བྱ་བ་ལ། སྐམ་སར་གནས་པའི་སྡེ་ཚན་དེ་ལས། ཕྱི་མ་ཁུང་ན་གནས་པ་ལ་སོགས་པ་ལྔ་རྣམས་ནི་རིམ་པ་བཞིན་དུ་ཞེས་པ། གོ་རིམས་མ་འཆོལ་བར་ལྕི་བ་ཉིད་དང༌། དྲོ་བ་ཉིད་དང༌། སྣུམ་པ་ཉིད་དང༌། མངར་བ་ཉིད་དེ་སྡེ་ཚན་དེ་དག་ལས་ཕྱི་མ་གང་དང་གང་ཡིན་པ་ནི་སྔ་མ་དེ་དང་དེ་ལས་ལྕི་བ་ལ་སོགས་པ་ཉིད་དང་ལྡན་པ་ཡིན་ནོ། །དེས་ན་ཁུང་ན་གནས་པ་ནི་མཐུས་ཟ་བ་ལྕི་བ་ལ་སོགས་པའི་ཡོན་ཏན་དང་ལྡན་པ་ཡིན་ལ། མཐུ་རྩལ་གྱིས་ཟ་བ་བས་ནི་རི་དྭགས་ཆེན་པོའོ། །རི་དྭགས་ཆེན་པོ་བས་ནི་ཁྲོན་དུ་རྐོ་བའོ། །ཁྲོན་དུ་རྐོ་བ་བས་ནི་ཉ་རྣམས་སོ། །དེ་བཞིན་དུ་རིམ་གྱིས་གཅིན་མང་བ་དང༌། རོ་ཙ་བ་དང༌། སྟོབས་སྐྱེད་པ་དང༌། རླུང་དང་བད་ཀན་འཕེལ་ཞིང་སྐྱེད་པར་བྱེད་པ་ཡིན་ནོ། །དེ་ལས་རི་དྭགས་ཆེན་པོའི་བསིལ། །ཞེས་བྱ་བ་ནི། སྡེ་ཚན་ལྔ་པོ་དེ་རྣམས་ཀྱི་ནང་ནས་རི་དྭགས་ཆེན་པོ་ནི་བསིལ་བ་སྟེ། བསིལ་བའི་ནུས་པ་དང་ལྡན་པ་ཡིན་ནོ། །རྩལ་མཐུས་ཤ་རློན་ཟ་བའི་ཡང༌། །རོ་རྗེས་ལན་ཚྭ་བྲོ་ཞུ་རྗེས། །ཚ་ཞིང་ཤ་ནི་འཕེལ་བར་བྱེད། །གཞང་འབྲུམ་རྙིང་པ་ཕོ་བ་གྲང༌། །སྐེམ་ནད་ཉེན་ལ་མཆོག་ཏུ་ཕན། །ཞེས་བྱ་བ་ལ། ཤ་རློན་ཟ་ཞེས་བྱ་བ་ནི། །ཤ་རློན་བ་གཅོད་ཅིང་ཟ་བར་བྱེད་པས་ན་ཤ་ཟ་བའོ། །དེ་ལ་ཡང་རྣམ་པ་གཉིས་ཏེ། གཅན་གཟན་དང་བྱའོ། །དེ་
ལས་ཀྱང་ཤ་རློན་པ་ཟ་བ་ལ་ལའི་མཚན་ཉིད་འདི་ཡིན་ནོ། །དེ་ཡང་རོ་རྗེས་ལན་ཚྭ་བྲོ་བ་སྟེ། རོ་གང་དག་གི་རྗེས་ལ་ཅུང་ཟད་མི་གསལ་བར་ལན་ཚྭ་བྲོ་བ་སྟེ། གཙོ་བོའི་རོས་ཟིལ་གྱིས་མནན་པས་ན། ཅུང་ཟད་མི་གསལ་བར་བྲོ་བའི་ཕྱིར་རོ། །རྗེས་ཞེས་བྱ་བ་སྟེ། རོའི་གཙོ་བོ་ཐ་དད་པ་ཡོད་པར་མཚོན་པ་ཡིན་ནོ། །དེ་བཞིན་དུ་ཞུ་རྗེས་ཆ་བ་སྟེ། ཞུ་བའི་རྗེས་ཚ་བ་ཉིད་དུ་སྨིན་པའོ། །དེ་བཞིན་དུ་ཤ་འཕེལ་བར་བྱེད་པ་སྟེ། ཤ་སྐྱེད་པར་བྱེད་པའོ། །དེ་བཞིན་དུ་གཞང་འབྲུམ་རྙིང་པ་དང༌། ཕོ་བ་གྲང་ཞིང་དྲོད་ཆུང་བ་དང༌། སྐེམ་ནད་ཀྱིས་ཉེན་པའི་མི་ལ་མཆོག་ཏུ་ཕན་པ་ཡིན་ནོ། །དེ་ལ་གཞང་འབྲུམ་རྙིང་པ་ཞེས་བྱ་བ་ནི་ཡུན་རིང་པོ་ལོན་པའི། །ར་ཤ་ཤིན་ཏུ་བསིལ་མིན་ཞིང༌། །ལྕི་སྣུམ་མ་ཡིན་ཉེས་མེད་མིན། །ལུས་དང་ཁམས་ནི་མཉམ་པས་ན། །བད་ཀན་མི་སྐྱེད་ལུས་བརྟས་བྱེད། །ཅེས་བྱ་བ་ལ། ཤིན་ཏུ་བསིལ་མིན་ཞེས་བྱ་བའི་སྒྲ་ནི་ཅུང་ཟད་ཀྱི་དོན་ལ་སྙེགས་ཏེ། དེས་ན་རའི་ཤ་ནི་ཅུང་ཟད་ཙམ་བསིལ་བ་དང༌། ཅུང་ཟད་ཙམ་སྣུམ་པ་ཡིན་ནོ་ཞེས་པའོ། །ཉེས་མེད་མིན་ཞེས་པ་མེད་པའི་དོན་ནི་ཆུང་བའི་དོན་ཏེ། དཔེར་ན་ལུག་སྤུ་མེད་ཅེས་བྱ་བ་འམ། བུ་མོ་རྐང་མེད་ཅེས་ཟེར་བ་དང་འདྲའོ། །དེས་ན་ཅུང་ཟད་ཙམ་ཉེས་པ་ཡོད་ཅིང༌། ཅུང་ཟད་བད་ཀན་སྐྱེད་པ་ཡིན་ནོ་ཞེས་པའི་དོན་ཏོ། །དེ་བཞིན་དུ་ལུས་དང་ཁམས་མཉམ་པས་ཀྱང་རྣམ་པ་ཐམས་ཅད་དུ་ཉེས་པ་མེད་པ་ཡིན་ཏེ། མི་རྣམས་ཀྱི་ལུས་དང༌། ལུས་ཟུངས་ཀྱི་ཚུལ་ཇི་ལྟ་བུ་ཡིན་པ། རའི་ལུས་དང་ཁམས་ཀྱང་དེ་དང་འདྲ་བ་ཡིན་ཏེ། དེ་བས་ན་ལུས་དང་ལུས་ཟུངས་མཚུངས་ཤིང་མཉམ་པས་ན། ཤ་དེ་ནི་ཉེས་པ་ཅུང་ཟད་ཀྱང་མི་སྐྱེད་པ་ཡིན་ནོ། །དེ་བས་ན་སྐྱེས་བུའི་ལུས་དང་ལུས་ཟུངས་མཐའ་དག་དང་དེ་མཉམ་སྟེ། མིའི་ལུས་ཟུངས་ཅི་འདྲ་བར་ཡང་དེ་དང་འདྲ་བར་དོན་གྱིས་སྟོན་པ་ཡིན་ཏེ། འདི་སྐད་བཤད་པས་ནི་མིའི་ཤའི་རང་བཞིན་ཅི་འདྲ་བ་ཡིན་པ་ཡང་བཤད་པ་ཡིན་ནོ། །བད་ཀན་མི་སྐྱེད་ཅེས་བྱ་བ་ནི་རའི་ཤ་དེ་བད་ཀན་ཡིན་ཡང་ཤས་ཆེར་སྐྱེད་པར་མི་
བྱེད་པའོ། །ལུས་བརྟས་པར་བྱེད་པ་ནི་ཤ་འཕེལ་བར་བྱེད་པའོ། །ལུག་ཤ་དེ་ལས་བཟློག་པ་སྟ། ལུས་བརྟས་ཡིན་པར་ཤེས་པར་བྱ། །ཞེས་བྱ་བ་ལ། ལུག་གི་ཤ་ནི་ར་ཤ་དེ་ལས་བཟློག་པར་ཤེས་པར་བྱ་སྟེ། དེས་ན་རའི་ཤ་ནི་ཤིན་ཏུ་བསིལ་བ་མ་ཡིན་ལ། འདི་ནི་ཤིན་ཏུ་བསིལ་བ་དང༌། དེ་ནི་ཤིན་ཏུ་ལྕི་བ་མ་ཡིན་ལ། །འདི་ནི་ཤིན་ཏུ་ལྕི་བ་དང༌། །དེ་ནི་ཤིན་ཏུ་སྣུམ་པ་མ་ཡིན་ལ། །འདི་ནི་ཤིན་ཏུ་སྣུམ་པ་དང༌། །དེ་ནི་ལུས་པར་བྱེད་པ་ཡིན་ལ། འདི་ཡང་བརྟས་པར་བྱེད་པ་ཡིན་པས། འདི་ལ་ནི་གོ་བཟློག་པ་མེད་དོ། །བ་ལང་ཤ་ནི་ལུད་སྐམ་དང༌། །ངལ་དང་ཚོ་ཆེས་མ་སྙོམས་རིམས། །ཆམ་པ་དང་ནི་སྐེམ་པ་དང༌། །རླུང་ནད་གཅིག་པུ་ན་བ་སེལ། །ཞེས་བྱ་བ་ལ། བ་ལང་དག་གི་ཤ་ཡིན་པས་ན་བ་ལང་ཤ་སྟེ། དེས་ནི་ལུད་པ་སྐམ་པ་ལ་སོགས་པ་སེལ་ཞིང་བཟློག་པ་ཡིན་ནོ། །ཚིག་གི་དོན་ནི་གོ་སླའོ། །མ་ཧེའི་ཤ་ནི་ལྕི་ཞིང་ཚ། །གཉིད་ཆེ་བརྟན་བྱེད་ཤ་ཆེར་སྐྱེད། །ཅེས་བྱ་བ་ལ། དེ་ལ་མ་ཧེའི་ཤ་ནི་ཤིན་ཏུ་ལྕི་བ་དང༌། ཚ་བ་དང༌། གཉིད་ཆེ་ཞིང་མཐུག་ལ་བརྟན་པར་བྱེད་པ་དང༌། ཤ་སྐྱེ་བར་བྱེད་པ་ཡིན་ནོ། །ཕག་རྒོད་ཤ་ནི་དེ་འདྲ་ཞིང༌། །ངལ་སེལ་ཟས་ལེན་ཁུ་སྟོབས་སྐྱེད། །ཅེས་བྱ་བ་ལ། ཕག་རྒོད་ཀྱི་ཤ་ནི་དེ་འདྲ་ཞེས་པ་མ་ཧེའི་ཤ་དང་ཡོན་ཏན་འདྲ་བ་ལས་དེ་ནི་ངལ་བསིལ་བ་དང༌། དེ་བཞིན་དུ། ཁ་ཟས་ལེན་ཞིང་ཡི་ག་འབྱེ་བ་དང༌། ཁུ་བ་དང་སྟོབས་རབ་ཏུ་སྐྱེད་པར་བྱེད་པ་ཡིན་ནོ། །ཉ་ནི་མཆོག་ཏུ་བད་ཀན་སྐྱེད། །ཅེས་བྱ་བ་ནི། རོ་ཧི་ཏ་དང༌། པ་ཐིན་ལ་སོགས་པའི་ཉ་ཤ་ནི་ཤིན་ཏུ་ཡང་བད་ཀན་སྐྱེད་པར་བྱེད་པ་ཡིན་ནོ། །ཙི་ལི་ཙི་མ་ཉེས་གསུམ་སྐྱེད། །ཅེས་བྱ་བ་ནི། ཉ་རྣམས་ཀྱི་ནང་ནས་ཙི་ལི་ཙི་མ་ཞེས་བྱ་བའི་ཉའི་ཁྱད་པར་ཅིག་ཡོད་པ་ནི་རླུང་ལ་སོགས་པའི་ཉེས་པ་གསུམ་སྐྱེད་པ་ཡིན་ནོ། །ལ་ཝ་རོ་ཧི་ཏ་སྐྱིན་གོར། །ཤ་བ་རང་རང་སྡེ་ཚན་མཆོག །ཅེས་བྱ་བ་ནི། ལ་ཝ་ལ་སོགས་པའི་ཤ་ནི་རང་རང་གི་སྡེ་ཚན་
ལས་མཆོག་ཡིན་ཏེ། དེས་ན་ཁྲོན་དུ་རྐོ་བའི་ནང་ན་ནི། ལ་བ་མཆོག་ཡིན་ལ། ཉ་རྣམས་ཀྱི་མཆོག་ནི་རོ་ཧི་ཏ་ཡིན། ཁུང་ན་གནས་པ་རྣམས་ཀྱི་མཆོག་ནི་སྐྱིན་གོར་ཡིན། རི་དྭགས་ཀྱི་ནང་ན་ཤ་བ་མཆོག་ཡིན་ནོ། །ཤ་ནི་འཕྲལ་བསད་བདག་དང༌། །དར་ལ་བབ་པའི་བསྟེན་པར་བྱ། །ཞེས་བྱ་བ་ལ། ཤ་ཐམས་ཅད་ནི་འཕྲལ་བསད་པ་སྟེ། དུས་དེའི་ཚེ་ཉིད་བསད་པ་དང༌། དེ་བཞིན་དུ་དག་པ་སྟེ། དུག་ལ་སོགས་པ་དང༌། མ་འབགས་པ་དང༌། དར་ལ་བབ་པ་སྟེ། རྒན་པ་དང་གཞོན་པ་མ་ཡིན་གྱི་རང་རང་གི་ན་ཚོད་དར་ལ་བབ་པའོ། །དེ་ལྟ་བུའི་ཤ་དེ་ནི་ཕན་བར་འགྱུར་བ་ཡིན་པས་བསྟེན་པར་བྱ་བ་ཉིད་ཡིན་ནོ། །རང་ཤི་རིད་དང་ཤིན་ཏུ་ཚོ། །ནད་ཆུ་དུག་གིས་ཤི་བ་སྤང༌། །ཞེས་བྱ་བ་ལ། ཤ་ཐམས་ཅད་ལས་རང་ཉིད་ཤི་བ་སྤང་བ་དང༌། དེ་བཞིན་དུ་རིད་ཅིང་སྦེག་པ་དང༌། ཤིན་ཏུ་ཚིལ་ཆེ་ཞིང་ཚོ་དྲགས་པ་སྤང་བ་དང༌། དེ་བཞིན་དུ་ནད་དམ་ཆུའམ་དུག་གིས་ཤི་བའི་ཤ་སྤང་ཞིང་དོར་བར་བྱའོ། །ཕོ་དང་མོ་ཡི་སྟོད་སྨད་ཕྱེད། །ལྕི་སྟེ་སྦྲུམ་མའི་ཐམས་ཅད་ལྕི། །ཞེས་བྱ་བ་ལ། སྲོག་ཆགས་ཐམས་ཅད་ཀྱི་ཕོ་དང་མོ་ལས་གོ་རིམས་ཇི་ལྟ་བ་བཞིན་དུ་ཕོའི་མགོ་བོ་ནས་བརྩམས་ཏེ། ལྟེ་བའི་བར་གྱི་ལུས་ཀྱི་ཕྱེད་ཀྱི་ཤ་ལྕི་བ་ཡིན་ལ། མོའི་ལྟེ་བ་མན་ཆད་ཀྱི་རོ་སྨད་ཀྱི་ཕྱེད་ཀྱི་ཤ་ལྕི་བ་ཡིན་ནོ། །སྦྲུམ་མར་གྱུར་པའི་ཤ་ནི་མ་ལུས་པ་ཐམས་ཅད་ལྕེ་བ་ཡིན་ནོ། །རྐང་བཞི་མོ་ཡི་ཡང་བ་ཡིན། །བྱ་རྣམས་ཀྱི་ནི་ཕོ་ཡི་ཡང༌། །ཞེས་བྱ་བ་ལ་རྐང་བཞི་སྟེ། རི་དྭགས་དང་ར་ལུག་དང་མ་ཧེ་ལ་སོགས་པའི་ནང་ནས་ནི་མོའི་ཤ་ཡང་བ་ཡིན་ལ། བྱ་རྣམས་ཏིལ་བ་དང༌། ངང་པ་དང༌། རྨ་བྱ་དང༌། ཁྱིམ་བྱ་ལ་སོགས་པ་གཤོག་པ་ཅན་རྣམས་ཀྱི་ཤ་ཡང་བ་ཡིན་ནོ། །མགོ་བོ་རོ་སྟོད་བྲང་དང་རྒྱབ། །རྐེད་པ་དཔྱི་ཡི་ལྕི་བ་ཡིན། །དེ་བཞིན་ཕོ་བ་རྒྱུ་མ་སོགས། །གོ་རིམས་བཞིན་དུ་ལྕི་བ་ཡིན། །ཞེས་བྱ་བ་ལ། མགོ་བོ་ལ་སོགས་པའི་ཡན་ལག་གི་ཆ་ཤས་ལས་ནི་གོ་རིམས་བཞིན་དུ་ཞེས་པ་གོ་རིམས་འཆོལ་བར་ལྕི་བ་ཉིད་ཡིན་པར་བསྟན་ཏོ། །དེས་ན་
དཔྱིའི་ཤ་བས་ནི་རྐེད་པའི་ཤ་ལྕི་ལ། རྐེད་པའི་ཤ་བས་ནི་རྒྱབ་ཀྱི་ཤ་ལྕི། རྒྱབ་ཀྱི་ཤ་བས་ནི་བྲང་གི་ཤ་ལྕི་ལ། བྲང་བས་ནི་རོ་སྟོད་ལྕི། རོ་སྟོད་ཀྱི་ཤ་བས་ནི་མགོའི་ཤ་ཤིན་ཏུ་ལྕི་བ་ཡིན་ནོ། །དེ་བཞིན་དུ་ཞུ་བའི་གནས་རྒྱུ་མ་ལ་སོགས་པའི་ཤ་བས་ནི་མ་ཞུ་བའི་གནས་ཕོ་བའི་ཤ་ལྕི་བ་ཡིན་ཏེ། དེས་ཟས་ཞུ་བ་རྣམས་ཀྱི་གནས་ནི་ཞུ་བའི་གནས་ཏེ། ལྟེ་བ་མན་ཆད་དོ། །ཟས་མ་ཞུ་བའི་གནས་ནི་མ་ཞུ་བའི་གནས་ཏེ། ལྟེ་བ་ཡན་ཆད་དོ། །དེ་ཡང་དྲང་སྲོང་གིས་བཤད་པ། འགྲོ་བའི་ལྟེ་བ་ནུ་མ་བར། །མ་ཞུ་བ་ཡི་གནས་སུ་བཤད། །ལྟེ་བ་ནས་ནི་ཆུ་སོའི་བར། །ཞུ་བའི་གནས་སུ་ཤེས་པར་བྱ། །ཞེས་བཤད་པ་ཡིན་ནོ། །ཁྲག་ལ་སོགས་པའི་ལུས་ཟུངས་རྣམས། །ཕྱི་མ་ཕྱི་མ་ལྕི་བ་ཡིན། །ཞེས་བྱ་བ་ནི། ཁྲག་ལ་སོགས་པའི་ལུས་ཟུངས་དྲུག་པོ་རྣམས་ཕྱི་མ་ཕྱི་མ་ལྕི་བ་ཡིན་པར་བཤད་དོ། །དེས་ན་ཁྲག་བས་ནི་ཤ་ལྕིའོ། །ཤ་བས་ནི་ཚིལ་ལོ། །ཚིལ་བས་ནི་རུས་པའོ། །རུས་པ་བས་ནི་རྐང་ངོ༌། །རྐང་བས་ནི་ཁུ་ཆུ་ཆེས་ལྕི་བ་ཡིན་ནོ། །ཤ་ལས་རླིག་པ་ཕོ་མཚན་དང༌། །མཁལ་མ་མཆེར་པ་གཞང་དག་ལྕི། །ཞེས་བྱ་བ་ལ། ལུས་ཐམས་ཅད་ལས་བྱུང་བའི་ཤ་རྣམས་ལས་ནི་རླིག་པ་ལ་སོགས་པའི་ཤ་ཤིན་ཏུ་ལྕི་བ་ཡིན་ནོ། །འདི་ལ་རླིག་པ་ཞེས་བྱ་བ་ནི་འབྲས་བུ་ཤུབས་ཅན་ཞེས་མིང་གི་རྣམ་པར་གྲགས་པའོ། །ཕོ་མཚན་ནི་མཇེའོ། །མཁལ་མ་ནི་ལྟོ་བའི་ཆ་ལ་གནས་པའོ། །མཆེར་པ་ནི་གསུས་པའི་གཡོན་ལོགས་ན་གནས་པ་ནག་པོ་ཅན་ཞེས་མིང་གི་རྣམ་པར་གྲགས་པའོ། །གཞང་ནི་བཤང་བའི་ལམ་སྟེ། དེ་དག་ནི་ལྕི་བ་ཡིན་ནོ། །འདིར་ཤ་རྣམས་ཕོ་དང་མོའི་ཁྱད་པར་དུ་བྱས་པ་དང༌། རིགས་གཅིག་པ་དང༌། རིགས་ཐ་དད་པ་དེ་རྣམས་ཀྱི་སྤྱི་དང་ཁྱད་པར་དུ་གནས་པ་ལས་སྟོབས་ཆེ་ཆུང་ཡོད་པ་བརྟག་པར་བྱ་བ་ནི། ཅི་རིགས་པར་རང་གི་བློ་ཉིད་ཀྱིས་རྣམ་པར་དཔྱད་པར་བྱའོ། །ཤའི་སྡེ་ཚན་ནོ།། །།
སྔར་ཚོད་མར་བསྟན་པ་དེ་རྣམས་ཀྱི་ལྷག་མ་དེ་བརྩམས་པ་ནི་འདི་དག་ཡིན་ཏེ། ཚོད་མ་པ་ཐ་ཤ་ཏི་དང༌། །སུ་ཤ་སུ་ནི་ཤ་ན་དང༌། །ས་ཏི་ན་ཛ་རྒྱ་སྣེའུ་སོགས། །ཉེས་པ་གསུམ་འཇོམས་རྟུག་སྲི་ཡང༌། །ཞེས་བྱ་བ་ལ། པ་ཐ་ལ་སོགས་པའི་ཚོད་མ་རྣམས་ནི་ཉེས་པ་གསུམ་སེལ་བར་བྱེད་པ་ཡིན་པས། ཉེས་པ་གསུམ་འཇོམས་ཞེས་བྱ་བ་ལ། དེ་བཞིན་དུ་རྟུག་པ་སྲི་ཞིང་མཁྲེགས་པ་དང་ཡང་བ་ཡིན་ནོ། །དེ་ལ་བ་ཐ་ནི་མིང་གི་རྣམ་གྲངས་བ་པ་ཙ་ལི་ཀ་ཞེས་བྱ་བའོ། །སུ་ནི་ཤ་ན་ནི་སུ་ལ་ཞེས་བྱ་བ་འདབ་མ་བཞི་བ་བཙོང་གི་དྲི་འདྲ་བ་ཞིག་ཆུའི་ནང་ན་སྐྱེའོ། །ས་ཏི་ན་ཛ་ཞེས་བྱ་བ་ནི་ཛཀྵ་པ་ནི། མིང་གི་རྣམ་གྲངས་བཀྲེས་བྱེད་ཅེས་བྱ་བར་གྲགས་པའོ། །དེ་ལས་སུ་ནི་ཤ་ན་དྲོ། །རོ་ཙ་ཞེས་བྱ་བ་ཚོད་མ་དེ་རྣམས་ཀྱི་ནང་ནས་སུ་ནི་ཤ་ན་ནི་དྲོད་སྐྱེད་པ་དང་རོ་ཙ་བར་བྱེད་པའོ། །ར་ཛཀྵ་པ་ཏི། ཕོ་བ་གཞང་འབྲུམ་ནད་སེལ་མཆོག །ཅེས་བྱ་བ་ལ། པ་ཏ་ལ་སོགས་པ་དེ་རྣམས་ནང་ནར་ཛཀྵ་པ་ཞེས་བྱ་བ་ནི་ཕོ་བ་དང་གཞང་འབྲུམ་གྱི་ནད་སེལ་བའི་མཆོག་ཡིན་ནོ། །རྒྱ་སྣེའུ་རྟུག་སྐམ་འཇོམས་པ་ཡིན། །ཞེས་བྱ་བ་ལ། ཚོད་མ་འདི་རྣམས་ཀྱི་ནང་ནས་རྒྱ་སྣེའུའི་ཚོད་མ་ནི་རྟུག་སྐམ་འཇོམས་ཤིང་འཁྲུ་བ་ཡིན་ནོ། །མོན་སྣེའུ་དམེ་རུ་ཉེས་གསུམ་འཇོམས། །མཛེ་སེལ་རོ་ཙ་བཅུད་ལེན་དྲོ། །འཁྲུ་ཞིང་མགུལ་པ་སྙན་པར་བྱེད། །ཅེས་བྱ་བ་ལ། མོན་སྣེའུ་དམེ་རུ་ཀ་ཀ་མ་ཙ་ཞེས་བྱ་བ་ནི་ཉེས་པ་གསུམ་པོ་ནི་རླུང་དང་མཁྲིས་པ་བད་ཀན་ཞེས་བྱ་བ་འཇོམས་པ་དང༌། དེ་བཞིན་དུ་མཛེ་ནད་སེལ་བ་དང༌། རོ་ཙ་ཞིང་ཁུ་བ་འཕེལ་བ་དང༌། བཅུད་ཀྱིས་ལེན་དུ་འགྱུར་ཞིང་ཚེ་འཕེལ་བ་དང་ཅུང་ཟད་དྲོད་སྐྱེད་པ་དང༌། འཁྲུ་ཞིང་བཤང་བ་སླ་བར་བྱེད་པ་དང༌། མགུལ་བ་གསལ་ཞིང་སྙན་པར་བྱེད་པ་ཡིན་ནོ། །ཙང་གི་རི་སྒྱུར་མེ་དྲོད་སྐྱེད། །ཕོ་བ་གཞང་འབྲུམ་བད་ཀན་རླུང༌། །དྲོད་ཆེ་འཁྲུ་གཅོད་ཡང་བ་ཡིན། །ཞེས་བྱ་བ་ལ། ཙང་གི་རི་ནི་རོ་སྐྱུར་བ་དང༌། དེ་བཞིན་དུ་ཕོ་བའི་མེ་དྲོད་སྐྱེད་པ་དང་ཕོ་བ་ལ་སོགས་པ་ལ་ཕན་པ་ཡིན་ནོ། །པ་ཏོ་ལ་དང་ས་པ་ཏ་ལ། །ནིམ་པ་ཤང་གཤྠ་སླེ་ཏྲེས། །ཨ་བལ་གུ་ཟ་རྩྭའི་མྱུ་གུ།
བྲི་ཧ་ཏི་དང་བཱ་ཤ་དང༌། །ཏི་ལ་པརྞི་ཀུ་ཏ་ལ། །མན་དུ་ཀའི་འདབ་ཀར་ཀོ་ཏ། །ཀར་བེ་ལ་བར་བ་ཏ། །ཎ་ཏི་དང་ནི་ཀ་ཏ་ཡ། །གོ་ཛི་ཧ་དང་བར་ད་ཀ །བ་ན་ཏིག་ཏ་ཀ་རི་རམ། །ཀུ་ལི་ཀ་དང་ནན་ཏི་དང༌། །ཀུ་ཙེ་ལ་ཤག་ཀུན་ད་ནི། །ཀ་ཏི་ལ་དང་ཀེའུ་ཀམ། །ཤོ་ཏམ་ཀོ་ཤ་ཏ་ཀ་དང༌། །ཀར་ཤ་འཇམ་བསིལ་ཁ་ཞིང་ཚ། །བཤང་སྲི་རླུང་སྐྱེད་བད་མཁྲིས་སེལ། །ཞེས་བྱ་བ་ལ། པ་ཏོ་ལ་ནས་ཀར་ཤ་དང་བཅས་པའི་བར་གྱི་ཚོད་མ་རྣམས་ནི་བསིལ་བའི་ནུས་པ་དང་ལྡན་པ་དང༌། རོ་ཁ་བ་དང་འཇུ་བའི་རྗེས་ཚབ་དང༌། བཤང་བ་ལ་སོགས་པ་མཁྲེགས་ཤིང་སྲི་བ་དང༌། རླུང་སྐྱེད་པ་དང༌། བད་ཀན་དང་མཁྲིས་པ་དག་སེལ་བར་བྱེད་པ་ཡིན་ནོ། །དེ་ལ་པ་ཏོ་ལ་ནི་ཁ་བ་ཞིག་གོ །སབ་ཏ་ནི་ས་ཏ་ལ་ཞེས་བྱའོ། །ནིམ་པ་ནི་ཨ་རི་སྟའོ། །ཤང་གཤྠ་ནི་ཨང་ཀ་ར་བ་ལི་གའོ། །ཨ་བལ་གུ་ཟ་ནི་སོ་མར་ཛའོ། །རྩྭའི་མྱུ་གུ་ནི་རྩྭ་གཞོན་ནུའི་རྩེ་མོའོ། །བྲི་ཧ་ཏི་ནི་སིང་ཧི་འོ། །བ་ཤ་ནི་བྲི་ཤའོ། །ཏིལ་པརྞི་ནི་རྒྱ་ཤུག་གི་ལོ་མ་འམ། ཡང་ན་ཏིལ་གྱི་ལོ་མའོ། །མན་དུ་ཀའི་འདབ་མ་ནི་མན་དུ་ཀི་ཞེས་བྱའོ། །ཀར་ཀ་ཏ་ནི་ལུག་གི་ར་འདྲའོ། །ཀར་བེ་ལ་ནི་ཀ་དུ་ཀ་བི་ལའི་འབྲས་བུའོ། །པར་པ་ཏ་ནི་ལྡུམ་བུ་སྐྲ་བཟངས་སོ། །ཎ་ཏི་ཀ་ནི་སྲན་མའི་སྦུར་རོ། །གོ་ཛི་ཧཱ་ནི་གླ་སྒང་གི་ལྕེ་འདྲ་བ་སྟེ། ཀྲོ་ཤ་ཀ་མུ་ལ་ཞེས་བྱའོ། །བ་ན་ཏིག་ཏ་ནི་བད་ཚ་ཀའོ། །ཀུ་ལི་ཀ་ནི་ཀཱ་ཀཱ་ཏིན་ཏུ་ཀའོ། །ནན་ཏི་ནི་མེ་ཏོག་ཛཱ་ཏིའི་ཤིང་ངོ༌། །ཤག་ཀུ་ནད་ནི་ཀ་རུ་ཀའོ། །ཀ་ཏི་ལ་ནི་མེ་ཏོག་དམར་བའི་པུརྞ་རྣ་བའོ། །ཀོ་ཤ་ཏ་ཀ་ནི་སྦུབས་ཅན་ནོ། །ཀར་ཤ་ནི་གྲགས་པར་ཟད་དོ། །པ་ཏོ་ལ་ཞིམ་སྲིན་ནད་སེལ། །ཞུ་རྗེས་མངར་ཞིང་ཡི་ག་འབྱེད། །ཅེས་བྱ་བ་ནི། པ་ཏོ་ལ་སོགས་པའི་སྡེ་ཚན་གྱི་ངེས་པར་བཟུང་བ་སྟོན་ཏེ། པ་ཏོ་ལ་ནི་ཞིམ་ཞིང་ཚིམ་པར་བྱེད་པ་དང༌། སྲིན་ནད་སེལ་ཞིང་འཇོམས་པ་དང༌། ཞུ་རྗེས་མངར་བ་སྟེ། ཞུ་བའི་རྗེས་མངར་བ་དང༌། ཤིན་ཏུ་ཡི་ག་འབྱེ་བར་བྱེད་པ་ཡིན་ནོ། །བྲི་ཧ་ཏི་གཉིས་མཁྲིས་སྐྱེད་འཁྲུ། །དྲོད་སྐྱེད་རླུང་ནི་འཇོམས་པ་ཡིན། །ཞེས་བྱ་བ་ལ། བྲི་ཧ་ཏི་གཉིས་ལ་
གཅིག་ནི་སྦོམ་མོ། །བྲི་ཧ་ཏི་ཞེས་བྱ་བ་ཡིན་ལ། གཉིས་པ་ནི་ཀཎྜ་ཀཱ་རི་ཞེས་བྱ་བ་སྟེ། མིང་གཞན་ཀྴུ་ཏ་ཞེས་བྱའོ། །བྲི་ཧ་ཏི་གཉི་ག་ཡང་མཁྲིས་པ་འཁྲུགས་ཤིང་སྐྱེད་པར་བྱེད་པ་དང༌། དེ་བཞིན་དུ་མེའི་དྲོད་སྐྱེད་པ་དང༌། ཁོང་འཁྲུ་བ་དང་རླུང་འཇོམས་ཤིང་སེལ་བ་ཡིན་ནོ། །བྲི་ཤན་རླུང་དང་ལུད་པ་འཇོམས། །ཁྲག་མཁྲིས་སེལ་བའི་དམ་པ་ཡིན། །ཞེས་བྱ་བ་ལ། བྲི་ཤན་ནི་བ་ཤ་ཀ་སྟེ། དེ་ནི་སློན་ཞིང་སྐྱུག་བྲོ་བ་དང༌། ལུད་པ་འཇོམས་པ་དང༌། དེ་བཞིན་དུ་ཁྲག་དང་མཁྲིས་པ་ཤིན་ཏུ་སེལ་བའི་མཆོག་དམ་པ་ཡིན་ནོ། །ཀ་ར་བེལ་ལ་ཁ་བ་དང༌། །དྲོད་སྐྱེད་བད་ཀན་སེལ་མཆོག་ཡིན། །ཞེས་བྱ་བ་ལ། ཀ་ར་བེལ་ལ་ནི་ཁ་བ་སྟེ། ཅུང་ཟད་ཁ་བ་དང༌། ཕོ་བའི་མེ་དྲོད་སྐྱེད་པ་དང༌། དེ་བཞིན་དུ་བད་ཀན་སེལ་ཞིང་འཇོམས་པའི་མཆོག་ཡིན་ནོ། །བར་ཏ་ཀའི་རོ་ཚ་ཞིང་ཁ། །མངར་བྲོ་བད་ཀན་རླུང་དག་སེལ། །ལན་ཚྭར་བཅས་པ་མེ་དྲོད་སྐྱེད། །ཡིད་འོང་ཟས་ལེན་མཁྲིས་མི་སྐྱེད། །ཅེས་བྱ་བ་ལ། བར་ཏ་ཀ་ཞེས་བྱ་བ་མིང་གཞན་བེན་དང་ཞེས་བྱ་བའི་ཚོད་མ་ནི་རོ་ཚ་ཞིང་ཁ་བ་དང༌། མངར་བ་དང་དྲོ་བའི་ནུས་པ་དང་ལྡན་པ་དང༌། བད་ཀན་དང་རླུང་འཇོམས་ཤིང་སེལ་བ་དང༌། ལན་ཚྭར་བཅས་པ་སྟེ། ཅུང་ཟད་ལན་ཚྭ་བྲོ་བ་དང༌། མེའི་དྲོད་སྐྱེད་པར་བྱེད་པ་དང༌། ཡིད་དུ་འོང་ཞིང་དགའ་བར་བྱེད་པ་དང༌། ཟས་ལེན་ཅིང་ཡིག་འབྱེད་པར་བྱེད་པ་ཡིན་པ་དང༌། མཁྲིས་པ་མི་སྐྱེད་ཅེས་པ་མཁྲིས་བ་ལ་མི་གནོད་པ་ཡིན་ནོ། །ཀ་རི་ར་ནི་སྦོས་བྱེད་ཅིང༌། །རོ་བསྐ་མངར་ཞིང་ཁ་བ་ཡིན། །ཞེས་བྱ་བ་ལ། ཀ་རི་རའི་ཚོད་མ་ནི་ལྟོ་སྦོས་པར་བྱེད་པ་དང༌། དེ་བཞིན་དུ་རོ་བསྐ་བ་དང༌། མངར་བ་དང་ཁ་བ་ཡིན་ནོ། །ཀོ་ཤ་ཏ་ཀ་བལ་གུ་ཟ། །འཁྲུ་ཞིང་དྲོད་ནི་སྐྱེད་བྱེད་ཡིན། །ཞེས་བྱ་བ་ལ། ཀོ་ཤ་ཏ་ཀ་ནི་ཨ་པ་མརྒའོ། །བལ་གུ་ཟ་ནི་སོ་མ་ར་ཛའོ། །དེ་དག་ནི་བཤང་གཅི་སླ་ཞིང་འཁྲུ་བར་བྱེད་པ་དང༌། དྲོད་སྐྱེད་པར་བྱེད་པ་ཡིན་ནོ། །ཏན་དུ་ལི་བསིལ་རྩུབ་པ་དང༌། །རོ་མངར་ཞུ་རྗེས་མངར་ཞིང་ཡང༌། །ཆང་ནད་མཁྲིས་ནད་དུག་ཁྲག་སེལ། །ཞེས་བྱ་བ་ལ། ཏན་དུ་ལི་ནི་
བེའུ་ལི་སྟེ། དེ་ནི་བསིལ་བ་ལ་སོགས་པའི་ཡོན་ཏན་དང་ལྡན་པ་ཡིན་ནོ། །མུན་ཛ་ལས་བྱུང་རླུང་མཁྲིས་སེལ། །སྣུམ་བསིལ་ལྕི་ཞིང་མངར་བ་དང༌། །ལུས་བརྟས་ཁུ་བ་འཕེལ་བའི་མཆོག །ཅེས་བྱ་བ་ནི། རྩཱ་མུན་ཛ་ལས་བྱས་པའི་ཚོད་མ་ནི་རླུང་ལ་སོགས་པ་སེལ་བའི་མཆོག་ཡིན་ནོ། །པ་ལག་ཀྱ་ལྕི་འཁྲུ་བར་བྱེད། །ཅེས་བྱ་བ་ལ། པ་ལག་ཀྱའི་ཚོད་མ་ནི་ལྕི་བའི་ཡོན་ཏན་དང་ལྡན་བས་ན་ཁོང་འཁྲུ་བར་བྱེད་པའོ། །ཨུ་ཕོ་ད་ཀ་ཆང་ནད་འཇོམས། །ཞེས་བྱ་བ་ལ། ཨུ་པོ་ད་ཀ་ར་ནི་པོ་ཏ་ཀི་སྟེ་དེས་ནི་ཆང་གིས་མྱོས་པ་འཇོམས་ཤིང་ལྕི་བ་དང་འཁྲུ་བ་ཡིན་ནོ། །ཙུ་ཙུ་པ་ལག་ཀྱ་འདྲ་ལས། །དེ་ནི་འཁྲུ་གཅོད་བདག་ཉིད་ཅན། །ཞེས་བྱ་བ་ལ། ཙུ་ཙུའི་ཚོད་མའི་ཡོན་ཏན་ནི་བ་ལག་ཀྱ་དང་འདྲ་ལ། དེ་ནི་ཡང་ཡོན་ཏན་འདྲ་བ་གཅོད་པའི་བདག་ཉིད་ཅན་ཡིན་གྱི། ཁོང་འཁྲུ་བར་བྱེད་པ་ནི་མ་ཡིན་ཏེ། ལྕི་བའི་ཡོན་ཏན་ཙམ་མཐུན་པ་ཡིན་ནོ། །བི་ད་རི་ནི་རླུང་མཁྲིས་སེལ། །གཅིན་མང་མངར་ཞིང་བསིལ་བ་ཡིན། །འཚོ་བར་བྱེད་ཅིང་ལྐོག་ནད་སེལ། །ལུས་བརྟ་རོ་ཙ་ལྕི་བཅུད་ལེན། །ཞེས་བྱ་བ་ལ། བི་ད་རི་ནི་མིང་གི་རྣམ་གྲངས། སྲི་ག་ལི་ཁ་ཞེས་བྱ་བ་ཡིན་ལ། དེ་ནི་རླུང་མཁྲིས་སེལ་བ་ལ་སོགས་པའི་ཡོན་ཏན་བྱེད་པ་དང༌། འཚོ་བར་བྱེད་པ་ཞེས་བྱ་བ་དང་མདངས་འཕེལ་ཞིང་ལུས་ཟུངས་སྙོམས་པར་བྱེད་པ་དང༌། ལྐོག་ནད་སེལ་བ་ལ་སོགས་པའི་མཚན་ཉིད་ཅན་ཡིན་ནོ། །ཛི་བན་ཏི་མངར་བསིལ་བ་དང༌། །མིག་ལ་ཕན་ཞིང་ཉེས་གསུམ་སེལ། །ཞེས་བྱ་བ་ལ། ཛི་བན་ཏིའི་ཚོད་མ་ནི་མངར་ཞིང་བསིལ་བའི་ནུས་པ་ལ་སོགས་པ་དང་ལྡན་པ་ཡིན་ནོ། །ཀུ་སྨན་དབུམ་ཤ་ཀ་ལིང༌། །ཀར་ཀ་དང་ནི་ཨེར་བ་རུ། །ད་ན་དིས་ཞེས་བྱ་བ་དང༌། །ད་ན་དིས་དང་ག་གོན་དང༌། །ཙིན་ཏ་ཀ་དང་ཙིར་བི་ཏ། །བད་རླུང་སྐྱེད་ཅིང་འཁྲུ་གཅིན་མང༌། །བཤད་སྲི་ལྕི་ཞིང་ཞུ་རྗེས་མངར། །ཞེས་བྱ་བ་ལ། ཀུ་སྨན་ད་ལ་སོགས་པའི་ཚོད་མ་ནི། རླུང་དང་བད་ཀན་གཉིས་སྐྱེད་པར་བྱེད་པ་ལ་སོགས་པའི་མཚན་ཉིད་ཅན་ཡིན་ནོ། །དེ་ལ་ཀུ་སྨན་ད་ནི་པུ་ཤ་པ་ལ་ཞེས་བྱ་བ་ཀུ་བ་འདྲ་བ་ལ། ནང་ས་བོན་མང་པོས་གང་
བའོ། །བུམ་ཤ་ནི་ཀུ་བའི་ཤའོ། །ཀ་ལིང་ཀ་དང་ཀར་ཀ་དང༌། ཨེར་བ་རུ་དང༌། ལོ་མ་ཤིང་དག་ནི་ག་གོན་གྱི་རྣམ་གྲངས་ཡིན་ནོ། །འཁྲི་ཤིང་འབྲས་བུའི་ནང་ན་མཆོག །ཀུ་སྨན་ད་སྟེ་རླུང་མཁྲིས་སེལ། །གཅིན་ནད་སེལ་ཞིང་རོ་ཙར་བྱེད། །ཅེས་བྱ་བ་ལ། ཀུ་བ་ལ་སོགས་པ་འཁྲི་ཤིང་ལ་བརྟེན་ཏེ། སྐྱེས་པའི་འབྲས་བུ་རྣམས་ཀྱི་མཆོག་ནི་ཀུ་སྨན་ད་ཡིན་ཏེ། དེ་ནི་རླུང་དང་མཁྲིས་པ་སེལ་བའི་དམ་པ་ཡིན་པ་དང༌། གཅིན་ནད་ཀྱི་རྒྱུན་ལམ་སྦྱོང་ཞིང་སེལ་བར་བྱེད་པ་དང༌། རོ་ཙ་བ་ཡིན་ནོ། །ག་གོན་ཤིན་ཏུ་གཅིན་མང་ཞིང༌། །ཞེས་བྱ་བ་ནི། འཁྲི་ཤིང་ལ་བརྟེན་པའི་འབྲས་བུའི་ནང་ན། ག་གོན་ནི་མཆོག་ཏུ་གཅིན་མང་བ་ཡིན་ནོ། །ཀུ་བ་ཤིན་ཏུ་རྩུབ་པ་ཡིན། །ཞེས་བྱ་བ་ནི། འཁྲི་ཤིང་ལ་བརྟེན་པའི་འབྲས་བུའི་ནང་ན། ཀུ་བ་ནི་ཤིན་ཏུ་རྩུབ་པ་ཡིན་ནོ། །ཀ་ལིང་ཀ་དང་ཨེར་བ་རུ། །ཙིར་བི་མཁྲེགས་གཞོན་མཁྲིས་སེལ་བསིལ། །སྨིན་བ་དེ་ལས་གཞན་དུ་བྱེད། །འབྲས་བུ་རྙིང་ལུང་ལན་ཚྭར་བཅས། །མཁྲིས་སྐྱེད་བད་ཀན་རླུང་ནད་སེལ། །ཡི་ག་འབྱེ་ཞིང་དྲོ་ཡིད་འོང༌། །ཧེན་ལངས་ལྟོ་སྦོས་སེལ་ཞིང་ཡང༌། །ཞེས་བྱ་བ་ལ། ཀ་ལིང་ཀ་དང་ཨེར་བ་རུ་དང༌། ཙི་བི་ར་ནི་མཁྲེགས་པ་སྟེ། བཤང་བ་ལ་སོགས་པ་སྲི་ཞིང་འབྱུང་བ་དཀའ་བར་བྱེད་པ་ཡིན་ནོ། །དེ་བཞིན་དུ་གཞོན་པ་ཞེས་པ་མ་སྨིན་ཞིང༌། རོ་དང་ནུས་པ་དང་སྨིན་པ་མ་རྫོགས་ཤིང་དང་པོ་སྐྱེས་པའི་གཞོན་ནུ་ནི་མཁྲིས་པ་སེལ་བ་ཡིན་ལ། ནུས་པ་ནི་བསིལ་བ་ཡིན་ནོ། །སྨིན་པ་ནི་དེ་ལས་གཞན་དུ་བྱེད་བར་ཤེས་པར་བྱ་སྟེ། མཁྲིས་པ་སྐྱེད་པ་དང་ནུས་པ་ཚ་བ་ཡིན་ནོ། །དེས་ན་གཞོན་ནུ་ལས་གོ་བཟློག་པར་ཤེས་པར་བྱའོ། །འབྲས་བུ་རྙིང་པ་ནི་འཁྲི་ཤིང་ལ་བརྟེན་པའི་འབྲས་བུའི་ལུང་སྟེ། གང་ན་ཀ་ལིང་གའམ། ཨེར་བ་རུའམ། ཙིར་བི་ར་དེ་གསུམ་གྱི་ལུང་དེངས་ཤིང་རྙིངས་པར་གྱུར་པ་སྨིན་པ་ལས་ཀྱང་ཐལ་བར་གྱུར་པ་དེ་ནི་ལན་ཚྭར་བཅས་ཞེས་བྱ་བ་ཅུང་ཟད་ལན་ཚྭ་བྲོ་བ་དང༌། དེ་བཞིན་དུ་མཁྲིས་པ་སྐྱེད་པ་ལ་སོགས་པའི་ཡོན་ཏན་དང་ལྡན་པ་ཡིན་ནོ། །ཧེན་ལངས་ཤིང་ལྟོ་སྦོས་པ་ནི་ནང་ན་མདུད་པར་འཆས་པ་སྙམ་བྱེད་
ཅིང་གྱེན་དུ་ལྡང་བ་དང༌། ཟུག་གཟེར་དང་བཅས་པས་ཤིང་མཁན་གྱི་ཐོ་བ་ལྟ་བུ་སྐྱེས་པ་སྙམ་བྱད་པ་སྟེ། དེ་ནི་ཧེན་ལངས་ཤིང་ལྟོ་སྦོས་པའི་ནད་གཞིའི་སྐབས་ནས་བཤད་པ་ཡིན་ནོ། །དེ་ཡང་གཞུང་གཞན་དག་ལས། ཐོ་བ་ལྟ་བུར་སྲར་གྱུར་ཅིང༌། །གྱེན་དུ་རྒྱ་ཆེར་ལྡང་བ་དང༌། །རླུང་གིས་ལྟོ་སྦོས་ཞེས་བྱ་སྟེ། །ཕྱིར་འབྱུང་ལམ་ནི་འགགས་བྱེད་ཡིན། །ཞེས་བཤད་པ་ཡིན་ནོ། །པད་རྩ་རྩ་བ་ཨུཏྤལ་རྩ། །ཀུ་མུ་ཨུཏྤལ་ཆུ་བ་དང༌། །ཆུས་པ་ཤ་ལུ་ཀ་ཏ་དང༌། །སྲིང་ག་དང་ག་ཤྲུ་ཀ །ཀྲོན་ཛ་ད་ན་ཀ་ལོད། །རྩུབ་ཅིང་བཤད་སྲི་བསིལ་ཞིང་ལྕི། །ཞེས་བྱ་བ་ལ། པདྨའི་རྩ་ལག་གི་སྡོང་པོ་ནས། ཀ་ལོ་དའི་བར་གྱི་ཚོད་མ་ནི་རྩུབ་པའི་ཡོན་ཏན་དང་ལྡན་པས་ན་རྩུབ་པའོ། །བཤང་བ་སྲི་བ་ནི་འཁྲུ་བ་ལས་གོ་བཟློག་པའོ། །དེ་ཡང་སྨན་དཔྱད་ཀྱི་ལུང་ལས། བཤང་བ་ལ་སོགས་འཇིག་བྱེད་ཅིང༌། །གོང་པོ་མེད་བྱེད་གང་དེ་འཁྲུ། །དེ་ལས་བཟློག་པ་བཤང་འགགས་ཏེ། །དེ་ནི་སྲི་བ་ཞེས་བྱར་བཤད། །ཅེས་བཤད་པ་ཡིན་ནོ། །བསིལ་བ་ནི་ནུས་པའོ། །ལྕི་བ་ནི་ཡོན་ཏན་ཡིན་ནོ། །པདྨའི་རྩ་ལག་ནི་པདྨའི་རྩ་བ་ཕྲ་མོའོ། །གཞན་དག་ནི་པདྨའི་རྩ་བའི་མྱུ་གུ་ཡིན་ནོ་ཞེས་ཟེར་རོ། །པདྨའི་རྩ་བ་དེ་ཉིད་ཀྱི་སྦོམ་པོ་ནི་པདྨའི་རྩ་བའོ། །ཤ་ལུ་ཀ་ནི་པདྨའི་རྩ་བ་ཉིད་དོ། །ཨུཏྤལ་དང་ཀུ་མུ་དའི་རྩ་བ་དང༌། ཆུ་བ་གང་ཡིན་པ་ནི་ཀུན་ནས་ཁྱབ་པར་གནས་པའོ། །ཀ་ལོ་ང་ནི་ཨུཏྤལ་ཐུང་ངུའོ། །ཀྲོན་ཛ་ད་ན་ནི་ཀ་ནང་ལའོ། །དེ་དག་ནི་རྩུབ་བ་དང་བཤང་གཅི་འགགས་ཤིང་སྲི་བ་དང༌། བསིལ་ཞིང་ལྕི་བ་ཡིན་ནོ། །ཀ་ལམ་པ་དང་ན་ལི་ཀ །མར་ཤེ་ཞེས་ནི་བྱ་བ་དང༌། །ཀུ་ཏི་ན་ཛ་ར་ཀུ་ཁ། །སེང་ཕྲོམ་ཡུངས་མ་ལོ་ནི་ཀ །ཀ་རུ་ད་ཀ་ག་པེ་རུ། །འཚོ་བྱེད་དང་ནི་ཛུན་ཛུ་དང༌། །ཨེ་ད་ག་ཛ་དག་དང་ནི། །ཡབ་ཤ་ཀ་ལྕམ་པ་དང༌། །ཨ་ལུ་ཀ་སོགས་ཐམས་ཅད་དང༌། །སྲན་ལོ་ཤིང་མངར་ལོ་མ་དག །མངར་ཞེང་རྩུབ་ལ་ལན་ཚྭ་བྲོ། །བད་ཀན་རླུང་སྐྱེད་ལྕི་བ་དང༌། །བསིལ་ཞིང་བཤད་གཅི་འབྱུང་སླ་བྱེད། །ཕལ་ཆེར་ཞུ་ནས་བཤད་གཅི་མཁྲེགས། །ཚོས་ཤིང་ཁུ་བ་ལེགས་བཙིར་ལ། །མར་ཆེར་བཏབ་བ་ཉེས་མི་སྐྱེད། །ཅེས་བྱ་བ་ལ། ཀ་ལམ་པ་ནས་
ནགས་མའི་བར་གྱི་ཚོད་མ་ནི་རོ་མངར་བ་དང༌། རྩུབ་པའི་ཡོན་ཏན་དང་ལྡན་པ་དང༌། ཅུང་ཟད་ལན་ཚྭ་བྲོ་བ་དང༌། བད་ཀན་དང་རླུང་སྐྱེད་པར་བྱེད་པ་དང༌། དེ་བཞིན་དུ་ལྕི་བ་ལ་སོགས་པའི་ཡོན་ཏན་དང་ལྡན་པ་དང༌། ཕལ་ཞེས་པ་མང་དུ་སྟེ། འདི་དག་ནི་ནང་ནས་ཚོད་མའི་ཁྱད་པར་ལ་ལ་ནི་རང་བཞིན་འདི་ལྟ་བུ་མ་ཡིན་ནོ། །ཞེས་ཤེས་བར་བྱ་བའི་ཕྱིར་སྒྲ་སྨོས་པ་ཡིན་ནོ། །ཡང་ཀ་ལམ་པ་ལ་སོགས་པའི་ཚོད་མ་དེ་རྣམས་ཀྱང༌། ཚོས་ཤིང་ཞེས་པ་ལེགས་པར་ཚོས་པར་བྱས་བ་དང༌། དེ་བཞིན་དུ་ཁུ་བ་ལེགས་པར་བཙིར་བ་ཞེས་བྱ་བ། ཚོས་པར་བྱས་པའི་འོག་ཏུ་ལག་པས་ཁུ་བ་ལེགས་པར་བཙིར་བ་གང་ཡིན་པ་དེ་ལ་དེ་སྐད་ཅེས་བྱའོ། །མར་ཆེར་བཏབ་པ་ཞེས་བྱ་བ་ནི་སྣུམ་ཤས་ཆེར་བཏབ་བ་དང་ལྡན་པའོ། །ཉེས་མི་སྐྱེད་ཅེས་བྱ་བ་ནི་ནད་ཀྱི་ཉེས་པ་རྣམས་ཤིན་ཏུ་བསྐྱེད་པ་མ་ཡིན་ནོ་ཞེས་པའི་དོན་ནོ། །འདི་རྣམས་ཀྱང་མིང་གི་རྣམ་གྲངས་དང༌། ཡུལ་ཡུལ་གྱི་སྐད་དག་ལས་ཤེས་པར་བྱའོ། །འོན་ཀྱང་འདིར་ཅུང་ཟད་ཅིག་བཤད་པར་བྱ་སྟེ། ཀ་ལམ་བ་ནི་རི་ལས་སྐྱེས་པ། ཀ་ལི་ཀ་ཞེས་བྱའོ། །མར་ཤེ་ནི་གནད་རི་ཞེས་བྱའོ། །ཀུ་ཏི་ན་ཛ་ར་ནི་འབྲས་བུ་ལས་ཚོད་མར་བྱས་པའོ། །སེང་ཕྲོམ་ནི་ཤ་བར་པ་ད་སྟེ་རོ་དའོ། །ལོ་ནི་ཀ་ནི་ཁ་ཙེ་ནཱ་ལོ་ནཱ་ར་ཞེས་གྲགས་པའོ། །ཀ་རུད་ཀ་ནི་འབྲས་བུ་ཕྲ་མོ་སྟེ། ཤི་ཏི་བར་ཞེས་བྱའོ། །ག་དེ་དུ་ནི་འབྲུའི་བྱེ་བྲག་གཅིག་གོ །འཚོ་བྱེད་ནི་ཛི་བན་ཏིའོ། །ཛུན་ཛུ་ནི་ཛི་ནི་འོ། །ཨེད་ག་ཛ་ནི་པུ་ན་ལའོ། །ཡ་བ་ཀ་ནི་ནས་ཀྱི་ནང་ནས་སྐྱེ་བ་ཀུན་ལན་ཞེས་བྱ་བ་རྒྱ་སྣེའུའི་ཁྱད་པར་གྱི་སྣེའུ་ཚོད་དོ། །ལྕམ་པ་ནི་གྲགས་པར་ཟད་དོ། །ཨ་ལུ་ཀ་ནི་རྣམ་པ་མང་སྟེ། ཨ་ལུ་ཀ་དམར་པོ་དང༌། ཨ་ལུ་ཀ་ཟླུམ་པོ་དང༌། ཨ་ལུ་ཀ་ལྗང་གུ་དང༌། ཨ་ལུ་ཀ་མངར་པོའོ། །སྲན་ལོ་ནི་མོན་སྲན་སྡེའུ་ལ་སོགས་པའི་འབྲུར་གཏོགས་པའི་འདབ་མའོ། །ཤིང་མངར་གྱི་ལོ་མ་ནི་ལཤྨ་ན་ཞེས་བྱའོ། །སེང་ཕྲོམ་འདབ་མ་ཞེས་བྱ་གང༌། །དེ་ནི་རྒྱ་སྣེའུ་དང་འདྲར་འདོད། །ཅེས་བྱ་བ་ལ། །སེང་ཕྲོམ་ཞེས་བྱ་བ་ཙི་བ་ལི་ལོ་འདབ་ཕྲ་མོ་ཡོད་པའི་ཚོད་མ་དེ་ནི་ཡོན་ཏན་རྒྱ་སྣེའུ་དང་འདྲ་བར་འདོད་དེ། རྒྱ་སྣེའུ་
དང་ཡོན་ཏན་གྱི་ཆ་འདྲ་བའོ། །ཏར་ཀ་རི་བར་ན་མངར། །ཁ་བཅས་རླུང་དང་བད་ཀན་སེལ། །ཞེས་བྱ་བ་ལ། ཏར་ཀ་རི་ཞེས་བྱ་བ་ནི་ཨག་ནི་མན་ཐའོ། །བར་ན་ནི་ཏ་མ་ལ་སྟེ། དེ་གཉིས་ཀྱི་ཚོད་མ་ནི་མངར་ཞིང་ཞིམ་པ་དང༌། ཁ་བཅས་ཞེས་བྱ་བ་ཅུང་ཟད་ཁ་བྲོ་བ་དང༌། རླུང་དང་བད་ཀན་དག་སེལ་བར་བྱེད་པ་ཡིན་ནོ། །པུ་རྞ་རྣམ་གཉིས་ཀ་ལ་ཤ །ཅུང་ཟད་ཚྭ་བྲོ་ཁ་ཞིང་ཚ། །དྲོད་སྐྱེད་ཁོང་འཁྲུ་སྦྱར་དུག་དང༌། །འོར་ནད་བད་ཀན་རླུང་ནད་འཇོམས། །ཞེས་བྱ་བ་ལ། པུརྞ་རྣམ་གཉིས་ཞེས་བྱ་བ་ནི། སྔོན་པོ་དང་དམར་པོའོ། །ཀ་ལ་ཤ་ཀ་ནི་ཨུཏྤ་ལའི་ཚོད་མ་འདྲ་བ་སྟེ། དེ་གསུམ་ཅར་ཡང་ཅུང་ཟད་ལན་ཚྭ་བྲོ་བ་དང༌། རོ་ཁ་བ་དང་ཚ་བ་ཡིན་ཞིང་ཕོ་བའི་མེ་དྲོད་སྐྱེད་པ་དང༌། བཤང་གཅི་སླ་ཞིང་འཁྲུ་བར་བྱེད་པ་དང༌། དེ་བཞིན་དུ་སྦྱར་བའི་དུག་ལ་སོགས་པ་འཇོམས་པ་ཡིན་ནོ། །ཙི་བི་ར་ཡི་མྱུ་གུ་ནི། །དྲོད་སྐྱེད་རླུང་དང་བད་སེལ་འཁྲུ། །ཞེས་བྱ་བ་ལ། ཙི་བི་ར་ནི་ཀ་རཉྫ་སྟེ། མིང་གི་རྣམ་གྲངས་སྲ་ཀི་རྒྱ་ཞེས་བྱ་བའོ། །དེའི་མྱུ་གུ་ནི་མྱུ་གུར་འཐོན་པའོ། །དེ་ནི་མེའི་དྲོད་སྐྱེད་ཅིང་རླུང་དང་བད་ཀན་གཉིས་སེལ་ལ་འཁྲུ་བར་བྱེད་པ་ཡིན་ནོ། །ཉེའུ་ཤིང་མྱུ་གུ་ཁ་བ་སྟེ། །རོ་ཙ་ཉེས་གསུམ་སེལ་བ་ཡིན། །ཞེས་བྱ་བ་ལ། ཉེའུ་ཤིང་ཞེས་པ་ཤ་ཏ་པ་རིའི་མྱུ་གུ་ནི་ཁ་བ་དང༌། རོ་ཙ་ཞིང་ཁུ་བ་འཕེལ་བ་དང༌། ཉེས་པ་གསུམ་པོ་རླུང་དང་མཁྲིས་པ་དང༌། བད་ཀན་སེལ་ཞིང་འཇོམས་པ་ཡིན་ནོ། །སྨྱིག་མའི་མྱུ་གུ་རྩུབ་པ་དང༌། །ཁོང་ཚ་རླུང་དང་མཁྲིས་པ་སྐྱེད། །ཅེས་བྱ་བ་ལ། སྨྱིག་མའི་མྱུ་གུ་ནི་སྨྱིག་མའི་ཁྱི་སོར་འཐོན་པའི་མྱུ་གུ་སྟེ། དེ་ནི་རྩུབ་པ་དང༌། ཁོང་པ་ཚ་བར་བྱེད་པ་དང༌། རླུང་དང་མཁྲིས་པ་སྐྱེད་པར་བྱེད་པ་ཡིན་ནོ། །པ་རུ་ར་ནི་དྲོད་སྐྱེད་ཁ། །མཆེར་པ་གཞང་འབྲུམ་བད་རླུང་སེལ། །ཞེས་བྱ་བ་ལ། བ་རུ་ར་ནི་ཉ་མིག་ལྟ་བུའི་སྨན་མང་ཚཀྵི་ཞེས་བྱ་བའོ། །དེ་ནི་མེའི་དྲོད་སྐྱེད་པ་དང་རོ་ཁ་བ་དང༌། མཆེར་པ་ལ་སོགས་པའི་ནད་སེལ་བ་ཡིན་ནོ། །ཀ་ས་མར་ད་སྲིན་ལུད་པ། །བད་ཀན་སེལ་ཞིང་ཞུ་བྱེད་འཁྲུ། །ཞེས་བྱ་བ་ལ། ཀ་ས་མར་ད་ནི་ཀ་ཤུ་ན་དྷི་ཞེས་བྱ་བ་སྟེ། དེ་ནི་སྲིན་ནད་དང་ལུད་པ་དང༌། བད་ཀན་
སེལ་བར་བྱེད་ཅིང་ནད་རྣམས་ཞུ་བར་བྱེད་པ་དང༌། འཁྲུ་བར་བྱེད་པ་ཡིན་ནོ། །ལེ་བརྒན་རྩི་ཚོད་རྩུབ་སྐྱུར་ཚ། །ལྕི་ཞིང་མཁྲིས་པ་སྐྱེད་ལ་འཁྲུ། །ཡུངས་ཀར་ཚོད་མ་ལྕི་ཞིང་ཚ། །བཤང་དང་ལྕི་འགགས་ཉེས་ཀུན་སྐྱེད། །ཅེས་བྱ་བ་ལ། ལེ་བརྒན་རྩི་ཞེས་བྱ་བ་ཀུ་སུ་མའི་ཚོད་མ་ནི་ལྕི་ཞིང་ཚ་བ་དང༌། བཤང་བ་དང་གཅི་བ་གཉིས་འགགས་ཤིང་སྲི་བར་བྱེད་པ་དང༌། ཉེས་པ་གསུམ་པོ་ཐམས་ཅད་སྐྱེད་པར་བྱེད་པ་ཡིན་ནོ། །ལ་ཕུག་གཞོན་ནུ་རོ་མི་གསལ། །ཅུང་ཟད་ཚྭ་བྲོ་ཁ་དང་བཅས། །གང་ཡིན་དེ་ནི་ཉེས་ཀུན་སེལ། །ཡང་ཞིང་ཅུང་ཟད་ཚ་བ་དང༌། །སྐྲན་དང་ལུད་གཅོང་དབུགས་མི་བདེ། །རྨ་དང་མིག་ནད་ལྐོག་ནད་སེལ། །སྐད་འགགས་དྲོད་ཆུང་རྟུག་སྐམ་དང༌། །ཆམ་པའི་ནད་ནི་འཇོམས་པ་ཡིན། །ཞེས་བྱ་བ་ལ། ལ་ཕུག་གང་གཞོན་ཞིང་ནར་མ་སོན་ལ། སྐྱེས་ནས་རིང་པོ་མ་ལོན་ལ། རོ་མི་གསལ་བ་སྟེ། མངར་བ་ལ་སོགས་པའི་རོ་གསལ་བར་མ་གྱུར་ཞིང༌། ཅུང་ཟད་ལན་ཚྭ་བྲོ་བ་དང༌། ཁ་བ་དང་བཅས་ཞེས་པ་ཅུང་ཟད་རོ་ཁ་བག་ཡོད་པ་དེའི་ལ་ཕུག་དེ་ནི་ཉེས་ཀུན་སེལ་ཞེས་པ། ཉེས་པ་གསུམ་ཅར་སེལ་བ་དང༌། ཡང་བ་དང་ཅུང་ཟད་ཚ་ཞིང་དྲོད་སྐྱེད་པ་དང༌། དེ་བཞིན་དུ་སྐྲན་ལ་སོགས་པ་འཇོམས་ཤིང་སེལ་བ་ཡིན་ནོ། །ནར་སོན་རོ་དང་ཞུ་རྗེས་ཚ། །དྲོད་སྐྱེད་བྱེད་ཅིང་ཉེས་གསུམ་སྐྱེད། །བད་ཀན་སྐྱེད་ལྕི། །ཞེས་བྱ་བ་ལ། གང་ལ་ཕུག་སྦོམ་ཞིང་ནར་སོན་ལ་རྒས་པ་དེ་ནི་རོ་དང་ཞུ་བའི་རྗེས་ཚ་བ་ཡིན་པ་དང༌། །དེ་བཞིན་དུ་དྲོད་སྐྱེད་པའི་ནུས་པ་ཡོད་པ་དང༌། ཉེས་པ་གསུམ་ཅར་སྐྱེད་པ་དང༌། མཆོག་ཏུ་ཡང་བད་ཀན་སྐྱེད་ཅིང་ལྕི་བ་ཡིན་ནོ། །བཙོས་པ་ནི། །སྣུམ་ཞིང་དེ་ཡང་རླུང་སེལ་ཡིན། །ཞེས་བྱ་བ་ལ། ལ་ཕུག་ཆེན་པོ་ནར་སོན་པ་དེ་མར་དང་ཤ་ལ་སོགས་པར་བཙོས་ཤིང་བརྔོས་པ་དེ་ནི་སྣུམ་ཞིང་རླུང་སེལ་བར་བྱེད་པ་ཡིན་ནོ། །སྐམ་པོ་རླུང་དང་བད་ཀན་སེལ། །ཞེས་བྱ་བ་ནི། ལ་ཕུག་དེ་ནར་སོན་པ་དང༌། མ་སོན་པ་གཉི་གཡང་སྐམ་པར་གྱུར་པའི་ཚོད་མ་ནི་རླུང་དང་བད་ཀན་འཇོམས་ཤིང་སེལ་བ་ཡིན་ནོ། །རྗེན་པ་ཐམས་ཅད་ཉེས་སྐྱེད་ཡིན། །ཞེས་བྱ་བ་ལ། ལ་ཕུག་དེ་གཞོན་པ་དང་ནར་སོན་
པ་དང༌། སྐམ་པོ་དང་རློན་པ་ཡང་རུང་སྟེ། རྗེན་པ་ཞེས་བྱ་བ་མེས་བཙོས་པར་མ་བྱས་པ་ཐམས་ཅད་ནི་ཉེས་སྐྱེད་ཡིན་ཞེས་བྱ་བ་ཉེས་པ་གསུམ་ཆར་སྐྱེད་པ་ཡིན་ནོ། །ཡུངས་མ་ཚ་ཞིང་དྲོ་བ་དང༌། །བད་ཀན་རླུང་སེལ་མཁྲིས་པ་སྐྱེད། །ཅེས་བྱ་བ་ནི། ཡུངས་མ་དག་ནི་རོ་ཅུང་ཟད་ཚ་བ་དང༌། ནུས་པ་དྲོ་བ་དང༌། བད་ཀན་དང་རླུང་སེལ་བ་དང༌། མཁྲིས་བ་སྐྱེད་པ་ཡིན་ནོ། །ཤན་ཏ་མུ་ལ་མཁྲིས་སེལ་ཞིང༌། །བསིལ་ཞིང་ཞུ་རྗེས་མངར་བ་དང༌། །རོ་མངར་བསྐ་ཞིང་ཁ་བ་སྟེ། །བད་ཀན་དུག་ཀྱང་སེལ་བར་བཤད། །ཀུ་ཐེར་བྱིའུ་རུག་ཤི་ཀྲུ། །སུ་མུ་ཁ་དང་སྐེ་ཚེ་དང༌། །བུ་སྲིན་དང་ཕ་ནི་ཛ། །ཟིན་ཐིག་ལེ་དང་ཛམ་བི་ར། །དེ་ལ་སོགས་པའི་ལྡུམ་རྣམས་ནི། །བཤང་གཅི་སྲ་ཞིང་མེ་དྲོད་སྐྱེད། །ཁོང་པ་ཚ་བྱེད་ཁ་རྩུབ་ཚ། །ཡིད་འོང་ལུས་དྲོ་ཡིག་འབྱེ། །མིག་གནོད་ཁུ་བ་སྲིན་འཇོམས་རྣོ། །སྐྲང་བར་བྱེད་དང་ཡང་བ་ཡིན། །ཅེས་བྱ་བ་ལ། ཀུ་ཐེར་ལ་སོགས་པའི་ལྡུམ་རྔད་རློན་པ་རྣམས་ནི། བཤང་གཅི་སྲ་ཞིང་བསྒོང་བའི་མཚན་ཉིད་ཅན། དྲོད་སྐྱེད་པར་བྱེད་པའི་ནུས་པ་ཡོད་པ་དང༌། ཁོང་བ་ཚ་ལམ་ལམ་པོར་བྱེད་པ་ལ་སོགས་པའི་ཡོན་ཏན་དང་ལྡན་པ་དང༌། སྐྲང་བར་བྱེད་ཅིང་རང་གི་ཚད་ལས་ལྷག་པར་སྐྱེད་བ་དང་ཡང་བ་ཡིན་ནོ། །ཀུ་ཐེར་ནི་ཀ་ཤི་རུ་ཀ་ཞེས་བྱ་བ་འདབ་མ་ཆུང་ཞིང་ཡོད་པ་ཡིན་ནོ། །ཤི་ཀྲུ་ནི་སོ་བན་ཛ་ནའོ། །སུ་མུ་ཁ་ནི་བན་ཏི་ག་ཏའོ། །སྐེ་ཚེ་ནི་ཨ་སུ་རའོ། །ཕ་ནི་ཛ་ནི་མ་རི་ཛ་ཀའོ། །ཟིན་ཐིག་ལེ་ནི་ཀུ་ཐེ་རའི་དབྱེ་བ་ཨར་ཛ་ཀ་ཞེས་བྱ་བ་འདབ་མ་ཕྲ་བ་ཞིག་གོ །ཛམ་བི་ར་ནི་ལོ་རྩུབ་ཅེས་བྱ་བ་སྒྱུར་རྩི་ཆེན་པོའོ། །སོགས་པས་ནི་གཞན་དག་བསྡུའོ། །ལྡུམ་ནི་རྗེན་རྔད་ཀྱི་མིང་གི་རྣམ་གྲངས་སོ། །བྱེའུ་རུག་སྐྱིགས་ལུད་དབུགས་མི་བདེ། །རྩིབ་ལོགས་ཟུག་དུག་ཁ་མ་ནམ་སེལ། །ཞེས་བྱ་བ་ལ། ཀུ་ཐེར་ལ་སོགས་པའི་སྡེ་ཚན་ལས། །སུ་རུས་བྱེའུ་རུག་པ་ཞེས་བྱ་བ་ནི་སྐྱིགས་བུ་ལ་སོགས་པའི་ནད་འཇོམས་བ་དང༌། རྩིབ་ལོགས་ཟུག་པ་སྟེ། རྩིབ་ལོགས་ནས་གཟེར་བ་ལ་ཕན་པ་ཡིན་ནོ། །དུག་ནི་སྦྱར་བ་ལ་སོགས་པའོ། །ཁ་མནམ་པ་ནི་དྲི་མི་ཞིམ་པ་སྟེ། དེ་ཡང་ཁ་ཟས་ལ་སོགས་པ་དང་འབྲེལ་བ་ལས་ཁ་དྲི་མི་ཞིམ་
པར་གྱུར་བ་སྟེ་དེ་དག་སེལ་ཏོ། །སུ་མུ་ཁ་ནི་རབ་ཚ་མིན། །སྦྱར་དུག་འོར་ནད་སེལ་བ་ཡིན། །ཞེས་བྱ་བ་ལ། ཀུ་ཐེ་རའི་སྡེ་ཚན་གྱི་ནང་ནས། སུ་མུ་ཁ་ནི་རབ་ཏུ་ཚ་བ་མ་ཡིན་ཏེ། དེ་ཡང་སྦྱར་དུག་དང་འོར་ནད་སྐྲང་བག་ཏུ་གྱུར་བ་སེལ་བ་ཡིན་ནོ། །འུ་སུའི་ལོ་མ་ཁ་ཞིང་མངར། །གཅིན་མང་མཁྲིས་པ་སྐྱེད་མ་ཡིན། །ཞེས་བྱ་བ་ལ། འུ་སུའི་ལོ་མ་ནི་ཨར་དྲི་ཀ་ཞེས་བྱ་སྟེ། དེ་ནི་ཁ་ཞིང་མངར་བ་ཡིན་པ་དང༌། གཅིན་མང་བར་བྱེད་པ་ཡིན་ཞིང༌། མཁྲིས་པ་ནི་སྐྱེད་པར་བྱེད་པ་མ་ཡིན་ནོ། །སྒོག་སྐྱ་རབ་ཏུ་ཚ་ཞིང་རྣོ། །ཞུ་རྗེས་ཚ་ཞིང་འཁྲུ་བ་དང། །ཞིམ་ཞིང་སྐྲ་སྐྱེད་ལྕི་རོ་ཚ། །སྣུམ་ཞིང་དྲོད་སྐྱེད་ཡིག་འབྱེ། །ཤ་བཀྲ་མཛེ་སྐྲན་གཞང་འབྲུམ་དང༌། །གཅིན་ནད་སྲི་དང་བད་ཀན་རླུང༌། །སྐྱིགས་བུ་ཆམ་པ་དབུགས་མི་བདེ། །ལུད་པ་སེལ་ཏེ་ཁྲག་མཁྲིས་སྐྱེད། །ཅེས་བྱ་བ་ལ། སྒོག་སྐྱ་ནི་ར་ས་ན་ཞེས་བྱ་བ་སྟེ། དེ་ནི་རབ་ཏུ་ཤས་ཆེར་ཚ་བ་དང༌། རྣོ་བ་དང་དེ་བཞིན་དུ་ཞུ་བའི་རྗེས་ཀྱང་རབ་ཏུ་ཚ་བ་དང༌། འཁྲུ་བར་བྱེད་པ་དང༌། ཞིམ་ཞིང་ཡིད་དུ་འོང་བ་དང༌། སྐྲ་འབྱི་བ་སྐྱེད་པ་དང༌། ལྕི་ཞིང་ཡང་བ་མ་ཡིན་པ་དང༌། རོ་ཙ་ཞིང་ཁུ་བ་འཕེལ་བ་དང༌། སྣུམ་པའི་ཡོན་ཏན་དང་ལྡན་པ་དང༌། དྲོད་སྐྱེད་པ་ནས་ལུད་པ་སེལ་བའི་བར་གྱི་ཡོན་ཏན་དང་ལྡན་པ་དང༌། ཁྲག་དང་མཁྲིས་པ་སྐྱེད་ཅིང་འཕེལ་བར་བྱེད་པ་ཡིན་ནོ། །ཀུན་དོང་དེ་ལས་ཡོན་ཏན་དམན། །བད་ཀན་སྐྱེད་མཁྲིས་རབ་མི་སྐྱེད། །ཅེས་བྱ་བ་ལ། ཀུན་དོང་ཞེས་བྱ་བ་ནི་པ་ལན་ད་ཞེས་བྱ་བའི་སྒོག་པ་སྟེ། དེ་ནི་དེ་ལས་ཡོན་ཏན་དམན་ཞེས་བྱ་བ། སྒོག་སྐྱའི་ཡོན་ཏན་ལས་ཆུང་ཞིང་དམན་པ་ཡིན་ནོ། །བད་ཀན་སྐྱེད་བར་བྱེད་ཅིང་མཁྲིས་པ་ནི་ཧ་ཅང་རབ་ཏུ་སྐྱེད་པར་མི་བྱེད་དོ། །ཀེའུ་བཙོས་དུགས་སྦྱར་ཟོས་པ་ཡིས། །བད་ཀན་རླུང་དང་གཞང་འབྲུམ་སེལ། །རྣོ་ཞིང་རྟུག་པ་སྲི་བ་དང༌། །དེ་ནི་མཁྲིས་ཅན་ལ་ཕན་མིན། །ཞེས་བྱ་བ་ལ། ཀེའུ་གཏུབས་ཤིང་བཙོས་ཏེ་དུགས་སུ་སྦྱར་བ་དང༌། དེ་བཞིན་དུ་ཁ་ཟས་སུ་ཟོས་པས་ནི་བད་ཀན་ལ་སོགས་པ་སེལ་བར་བྱེད་པ་དང༌། རྣོ་བ་དང་རྟུག་པ་སྲི་ཞིང་མཁྲེགས་པར་བྱེད་པ་དང༌། ཀེའུ་དེ་ནི་མཁྲིས་པ་ཅན་གྱི་སྐྱེས་བུ་ལ་ཕན་ཞིང་བདེ་བར་མི་
བྱེད་དོ། །ནད་དེ་སོས་པའི་རྒྱུར་མི་འགྱུར་བ་ཡིན་ནོ། །སུར་དྲོད་སྐྱེད་ཁ་ཟས་ལེན། །བད་སེལ་དྲི་མ་སྦྱོང་ཞིང་ཡང༌། །མཆོག་ཏུ་གཞང་འབྲུམ་དག་ལ་ཕན། །ཞེས་བྱ་བ་ལ། སུ་ར་ན་ནི་སྡོང་བུའི་རྣམ་པ་སྦོམ་པ་ཞིག་སྟེ། དེ་ནི་མེ་དྲོད་སྐྱེད་པར་བྱེད་པ་དང༌། ཁ་ཟས་ལེན་ཅིང་ཡི་ག་འབྱེ་བ་ལ་སོགས་པའི་ཡོན་ཏན་དང་ལྡན་པ་ཡིན་ནོ། །སྦང་ཕྲུམ་ཤིན་ཏུ་ཉེས་སྐྱེད་ཡིན། །ཞེས་བྱ་བ་ལ། ཚོད་མའི་ནང་ན་སྦང་ཕྲུམ་ནི་ཤིན་ཏུ་ངན་ཅིང་ཉེས་པ་ཐམས་ཅད་སྐྱེད་པ་ཡིན་ནོ། །མེ་ཏོག་འདབ་མ་འབྲས་ཡལ་ག །སྡོང་བུ་རིམ་བཞིན་ལྕི་བ་ཡིན། །ཞེས་བྱ་བ་ལ། མེ་ཏོག་ལ་སོགས་པའི་ཚོད་མ་དང༌། ལྡུམ་བུ་རྣམས་ནི་མེ་ཏོག་ལ་སོགས་པའི་རིམ་གྱིས་འོག་མ་ལྕི་བ་ཡིན་ཏེ། མེ་ཏོག་གི་ཚོད་མ་ལ་ལྟོས་ན་ལོ་འདབ་ཀྱི་ཚོད་མ་ལྕི་བ་ཡིན་ལ། དེ་བས་ནི་འབྲས་བུའི་ཚོད་མ་དང༌། དེ་བས་ཀྱང་ཡལ་གའི་ཚོད་མ་ལྕི་བ་ཡིན་ནོ། །དེ་བས་ཀྱང་ལྡུམ་བུའི་ཚོད་མ་ཤིན་ཏུ་ལྕི་བ་ཡིན་ནོ། །ལྡུམ་གྱི་རྔད་རྗེན་པར་བཟའ་བ་རྣམས་ལ་ཡང༌། རིམ་པ་འདི་བཞིན་ཤེས་པར་བྱའོ། །ཚོད་མའི་རབ་མཆོག་འཚོ་བྱེད་ཡིན། །ཡུངས་ཀར་ཚོད་མ་ཐ་ཆད་ཡིན། །ཞེས་བྱ་བ་ལ། བ་ཏ་ལ་སོགས་པ་ཚོད་མའི་སྡེ་ཚན་རྣམས་ཀྱི་ནང་ནས། རབ་མཆོག་ནི་འཚོ་བྱེད་ཅེས་བྱ་བའི་ཚོད་མ་ཡིན་ལ། ཡུངས་ཀར་གྱི་ལོ་མའི་ཚོད་མ་ནི་ཐ་མ་སྟེ་ཀུན་གྱི་ཐ་ཆད་ཡིན་ནོ། །ཚོད་རྔད་རྣམས་ཀྱི་སྡེ་ཚན་ནོ།། །།ཟས་ཀྱི་ནང་ན་ཤིང་ཏོག་ནི་ཐ་མར་བཟའ་བར་བྱ་བ་ཡིན་པ་དང༌། དེ་བཞིན་དུ་བཟའ་བར་བྱ་བ་ལ་དགོས་པར་གྱུར་པ་ཡིན་པས། འདི་དག་སྨོས་པ་ཡིན་ཏེ། རྒུན་འབྲུམ་འབྲས་བུའི་མཆོག་ཡིན་ཏེ། །རོ་ཙ་མིག་ཕན་བཤང་ལྕི་སླ། །མངར་ཞིང་ཞུ་རྗེས་སྣུམ་པ་དང༌། །ཅུང་ཟད་བསྐ་ཞིང་བསིལ་ལ་ལྕི། །རླུང་དང་ཁྲག་མཁྲིས་སེལ་བྱེད་ཅིང༌། །ཁ་ནང་ཁ་བྲོ་ཆང་ནད་དང༌། །སྐོམ་ལུད་ཚད་རིམས་དབུགས་མི་བདེ། །སྐད་འཛེར་གློ་རྡོལ་གློ་གཅོང་སེལ། །ཞེས་བྱ་བ་ལ། རྒུན་འབྲུམ་ནི་ཤིང་ཐོག་རྣམས་ཀྱི་ནང་ན་མཆོག་དང་དམ་པར་གྱུར་པ་ཡིན་ལ། དེ་ནི་རོ་ཙ་བ་དང༌། མིག་ལ་ཕན་པ་ལ་སོགས་པའི་ཡོན་ཏན་དང་ལྡན་པ་ཡིན་ཏེ། ཚིག་གི་དོན་ནི་གོ་སླའོ། །བལ་པོ་སེའུ་མངར་མཁྲིས་རྒྱས་
དང། །ཉེས་པ་གསུམ་པོ་སེལ་བ་ཡིན། །ཞེས་བྱ་བ་ལ། བལ་པོ་སེའུ་རོ་མངར་བ་དེ་ནི་མཁྲིས་པ་རྒྱས་ཤིང༌། ཤས་ཆེར་འཕེལ་བ་དང༌། རླུང་ལ་སོགས་པའི་ཉེས་པ་གསུམ་ཅར་ལ་ཡང་ཕན་པ་ཡིན་ནོ། །སྐྱུར་བ་མཁྲིས་སྐྱེད་མིན་ཅུང་དྲོ། །རླུང་དང་བད་ཀན་འཇོམས་པར་བྱེད། །ཅེས་བྱ་བ་ལ། བལ་པོ་སེའུ་སྐྱུར་བ་གང་ཡིན་པ་དེ་ནི་སྐྱུར་བ་ཉིད་ཀྱིས་ན། མཁྲིས་པ་སྐྱེད་པར་བྱེད་པ་ཡིན་མོད་ཀྱི། མཁྲིས་སྐྱེད་མིན་ཞེས་བྱ་བ་འདིས་དེ་བཀག་པ་ཡིན་ནོ། །ཅུང་དྲོ་ཞེས་པ་ནི་ཤིན་ཏུ་ཚ་བ་མ་ཡིན་གྱི་ཅུང་ཟད་དྲོ་བའི་དོན་ཏོ། །དེ་ཡང་རླུང་དང་བད་ཀན་གཉིས་ནི་འཇོམས་པར་བྱེད་པ་ཡིན་ནོ། །སེའུ་ཀུན་ཀྱང་ཡིད་འོང་སྣུམ། །ཡང་ཞིང་བཤང་སྲ་དྲོད་ཟས་ལེན། །ཞེས་བྱ་བ་ལ། སེའུ་ཀུན་ཀྱང་ཞེས་པ་མངར་པོ་དང༌། སྐྱུར་པོ་དང༌། མངར་སྐྱུར་འདྲེན་མ་ཐམས་ཅད་ཀྱང་ཡིད་དུ་འོང་ཞིང༌། དགའ་བར་བྱེད་པ་དང། སྣུམ་པ་དང༌། ཡང་བའི་ཡོན་ཏན་དང་ལྡན་པ་དང༌། བཤང་བ་སྲ་ཞིང་མཁྲེགས་པ་དང༌། ཕོ་བའི་མེ་དྲོད་སྐྱེད་པ་དང༌། འབྲས་ཆན་ལ་སོགས་པའི་ཟས་ལེན་ཅིང་ཡི་ག་འབྱེད་པ་ཡིན་ནོ། །མོ་ཙ་འབྲ་གོ་པ་ནས། །རྒྱ་སྟར་པ་རུ་ཤ་ཀ་དང༌། །ཨ་མྲ་ཏ་ལ་ཀསྨ་འབྲས། །ར་ཛ་ད་ན་མ་དུའི་འབྲས། །རྒྱ་ཤུག་སོ་བི་ར་ཨང་ཀོལ། །ཕལ་གུ་སླེས་མ་ཏའི་འབྲས་བུ། །ཏ་མལ་བི་ཤུ་སྟར་གའི་འབྲས། །མྱུ་གུ་ལ་དང་རྒྱ་ཁམ་དང༌། །ཨ་རུ་མ་ན་པི་ཡལ་འབྲས། །བརྟས་བྱེད་ལྕི་ཞིང་བསིལ་བ་ཡིན། །ལུས་ཚ་གློ་རྡོལ་གློ་གཅོང་སེལ། །ཁྲག་དང་མཁྲིས་པ་སྙོམས་པར་བྱེད། །ཞུ་རྗེས་མངར་ཞིང་སྣུམ་པ་དང༌། །བཤང་སྲི་བད་ཀན་ཁུ་བ་འཕེལ། །ཞེས་བྱ་བ་ལ། ཤིང་ཏོག་མོ་ཙ་ནས། པི་ལ་ཡའི་བར་གྱི་འབྲས་བུ་རྣམས་ནི་བརྟས་པར་བྱེད་པ་སྟེ། ཤ་རྒྱས་པར་བྱེད་པ་དང༌། དེ་བཞིན་དུ་ལྕི་བ་དང༌། བསིལ་བའི་ཡོན་ཏན་དང་ལྡན་པ་ཡིན་ཞིང༌། ལུས་ཚ་བ་དང་གློ་རྡོལ་བ་དང༌། གཅོང་སེལ་བ་ཡིན་ནོ། །དེ་ལ་གློ་རྡོལ་བ་ནི་བྲང་གི་ཕྱོགས་ནས་ཁྲག་འབྱུང་ཞིང་རྡོལ་བའོ། །གློ་གཅོང་ནི་ལུས་ཟུངས་ཟད་པ་སྟེ། སྐེམ་ནད་དང༌། གཅོང་ཆེན་པོ་ཞེས་མིང་གི་རྣམ་པར་གྲགས་པའོ། །དེ་ཡང་
སྨན་དཔྱད་ཀྱི་ལུང་ལས། གློ་གཅོང་ཟད་བྱེད་སྐེམ་ནད་དང༌། །ནད་ཀྱི་རྒྱལ་པོ་ཞེས་ཀྱང་བྱ། །ཞེས་བྱ་བ་བཤད་པ་ཡིན་ནོ། །གཞན་དག་ནི་གོ་བར་ཟད་དོ། །ཤིང་ཐོག་ལ་སོགས་མོ་ཙ་ནི་ཆུ་ཤིང་གི་འབྲས་བུའོ། །ར་ཛ་ད་ན་ནི་བར་ན་བྲི་ཡ་ཞེས་བྱའོ། །ཏ་ལའི་འབྲས་བུ་མཁྲིས་སྐྱེད་འཁྲུ། །ཞེས་བྱ་བ་ནི། མོ་ཙ་ལ་སོགས་པའི་ཤིང་ཐོག་རྣམས་ཀྱི་ནང་ནས། ཏ་ལའི་འབྲས་བུ་ནི་མཁྲིས་པ་སྐྱེད་ཅིང་འཕེལ་བར་བྱེད་པ་དང་ཁོང་འཁྲུ་བ་ཡིན་ནོ། །ཀཤྨ་རྒྱ་འབྲས་བསིལ་བ་དང༌། །བཤང་གཅི་འགགས་པ་སེལ་བྱེད་ཅིང༌། །སྐྲ་སྐྱེད་ཡིད་གཞུངས་བཅུད་ལེན་འགྱུར། །ཞེས་བྱ་བ་ལ། ཤིང་ཀཤྨ་རྒྱའི་འབྲས་བུ་ནི་བསིལ་བའི་ནུས་པ་དང་ལྡན་པ་ནས། བཅུད་ལེན་གྱི་བྱ་བ་བྱེད་པར་འགྱུར་བའི་བར་གྱི་ཡོན་ཏན་དང་ལྡན་པར་འགྱུར་བ་ཡིན་ནོ། །པ་ཏ་མ་སོགས་དྲོ་བ་དང༌། །བད་ཀན་མཁྲིས་པ་སྐྱེད་བྱེད་འཁྲུ། །སྣུམ་ཞིང་མཆོག་ཏུ་རླུང་སྐྱེད་བྱེད། །ཅེས་བྱ་བ་ལ། པ་ཏ་མ་ལ་སོགས་པ་ནས། པི་ལ་ཡའི་བར་གྱི་ཤིང་ཐོག་ནི་དྲོ་བའི་ནུས་པ་དང་ལྡན་པ་དང༌། དེ་བཞིན་དུ་བད་ཀན་དང་མཁྲིས་པ་སྐྱེད་ཅིང༌། ཁོང་འཁྲུ་ལ་སྣུམ་པ་དང༌། མཆོག་ཏུ་ཤས་ཆེར་རླུང་འཕེལ་བར་བྱེད་པ་ཡིན་ནོ། །པི་ལ་ཡའི་འབྲས་ཚ་བ་མིན། །ཞེས་བྱ་བ་ལ། པི་ལ་ཡའི་འབྲས་བུའི་ཤིང་ཐོག་ནི་ཚ་བ་མིན་ཞེས་བྱ་བ་སྟེ། བསིལ་བའི་ནུས་པ་ཅན་ཡིན་ནོ་ཞེས་བྱ་བའི་དོན་ཏོ། །པི་ལ་ཡ་ཡི་ཚི་གུ་མངར། །རོ་ཙ་མཁྲིས་པ་རླུང་ནད་སེལ། །ཞེས་བྱ་བ་ལ། པི་ལ་ཡའི་འབྲས་བུའི་ནང་གི་ཚི་གུ་ནི་རོ་མངར་བ་ལ་སོགས་པའི་ཡོན་ཏན་དང་ལྡན་པའོ། །རྒྱ་ཤུག་ཚི་གུའི་ཡོན་ཏན་ནི། །དེ་འདྲ་སྐོམ་སློན་ལུད་པ་སེལ། །ཞེས་བྱ་བ་ནི། རྒྱ་ཤུག་ནང་གི་ཚི་གུའི་ཡོན་ཏན་ནི། པི་ལ་ཡའི་འབྲས་བུའི་ཡོན་ཏན་དང་ལྡན་པ་ལས། དེ་ལས་ལྷག་པའི་ཡོན་ཏན་སྐོམ་ནད་དང༌། སློན་བྲོ་བ་དང༌། ལུད་པ་སེལ་བར་བྱེད་པ་ཡིན་ནོ། །བིལ་འབྲས་སྨིན་པ་འཇུ་དཀའ་ཞིང༌། །ཉེས་སྐྱེད་འཕྱེན་ནི་དྲི་ང་བྱེད། །ཅེས་བྱ་བ་ལ། བིལ་བའི་འབྲས་བུ་སྨིན་པར་གྱུར་པ་ནི་འཇུ་དཀའ་བ་སྟེ། ཡོངས་སུ་འདུ་ཞིང་སྨིན་པར་དཀའ་བ་སྟེ། ཉེས་པ་གསུམ་སྐྱེད་པ་དང༌། འཕྱེན་གྱི་དྲི་ང་ཞིང་མནམ་པར་བྱེད་པ་ཡིན་ནོ། །མ་སྨིན་
དྲོད་སྐྱེད་བད་རླུང་སེལ། །ཞེས་བྱ་བ་ལ། བིལ་བའི་འབྲས་བུ་དེ་མ་སྨིན་པ། མིང་གི་རྣམ་པར་བིལ་བའི་ག་གོན་ཞེས་གྲགས་པ་སྨིན་པར་གྱུར་པ་གང་ཡིན་པ་དེ་ནི་མེའི་དྲོད་སྐྱེད་པ་དང༌། དེ་བཞིན་དུ་བད་ཀན་དང་རླུང་སེལ་བ་ཡིན་ནོ། །དེ་དག་གཉི་ག་འཁྲུ་བ་གཅོད། །ཅེས་བྱ་བ་ལ། བིལ་བའི་འབྲས་བུ་སྨིན་པ་དང༌། མ་སྨིན་པ་དེ་གཉི་ག་ཡང་འཁྲུ་བ་གཅོད་པ་སྟེ། བཤང་བ་སྡུད་པའི་མཚན་ཉིད་ཅན་ཡིན་ནོ། །མ་སྨིན་ཀ་པིད་མགུལ་ནད་དང༌། །ཉེས་པ་ཀུན་སྐྱེད། ཅེས་བྱ་བ་ལ། ཀ་པི་ཏ་མ་སྨིན་པ་ནི། མགུལ་ནད་སྐྱེད་ཅིང་སྐད་གསང་ཉམས་པར་བྱེད་པ་དང༌། ཉེས་པ་ཀུན་སྐྱེད་ཅེས་བྱ་བ། ནད་གཞི་གསུམ་ཅར་སྐྱེད་པར་བྱེད་པ་ཡིན་ནོ། །སྨིན་པ་ནི། །ཉེས་འཇོམས་སྐྱིགས་བུ་སློན་བྲོ་སེལ། །ཞེས་བྱ་བ་ལ། ཀ་པི་ཏ་སྨིན་པ་ནི་ཉེས་འཇོམས་ཞེས་པ་ཉེས་པ་གསུམ་ཅར་སེལ་བ་དང༌། དེ་བཞིན་དུ་སྐྱིགས་བུ་དང༌། སློན་བྲོ་བའི་ནད་སེལ་བ་ཡིན་ནོ། །ཀུན་ཀྱང་འཁྲུ་གཅོད་དུག་འཇོམས་ཡིན། །ཞེས་བྱ་བ་ལ། ཀ་པི་ཏ་སྨིན་པ་དང༌། མ་སྨིན་པ་ཐམས་ཅད་འཁྲུ་བ་གཅོད་པའི་མཆོག་ཏུ་གྱུར་པ་དང༌། དུག་འཇོམས་ཤིང་སེལ་བར་བྱེད་པ་ཡིན་ནོ། །འཛམ་བུའི་ཤིང་ཏོག་བཤང་གཅི་སྲི། །བསིལ་ཞིང་ཤིན་ཏུ་རླུང་སྐྱེད་ཡིན། །བཤང་དང་གཅི་བ་གཅོད་བྱེད་ཅིང༌། །ལྐོག་མ་ལ་གནོད་བད་མཁྲིས་སེལ། །ཞེས་བྱ་བ་ལ། ཤིང་འཛམ་བུའི་ཤིང་ཏོག་ནི་བཤང་གཅི་སྲི་ཞིང༌། རྒྱུན་འགོག་པར་བྱེད་པ་དང༌། ལྕི་བ་ལ་སོགས་པའི་ཡོན་ཏན་དང་ལྡན་པ་དང༌། བད་ཀན་དང་མཁྲིས་པ་སེལ་བའི་བར་གྱི་མཚན་ཉིད་དང་ལྡན་པ་ཡིན་ནོ། །ཨ་མྲའི་འབྲས་བུ་མ་སྨིན་རླུང༌། །ཁྲག་མཁྲིས་སྐྱེད་བྱེད་རུས་ཆགས་པ། །བད་ཀན་མཁྲིས་སྐྱེད་མིན་རླུང་སྐྱེད། །ལྕི་མངར་བད་ཀན་ཁུ་བ་འཕེལ། །ཞེས་བྱ་བ་ལ། ཨ་མྲའི་ཤིང་ཏོག་མ་སྨིན་པ་གཞོན་ནུ་ནི་རླུང་དང་མཁྲིས་པ་དང་བད་ཀན་དག་སྐྱེད་པར་བྱེད་པ་སྟེ། རླུང་ལས་གྱུར་པའི་ཁྲག་དང་མཁྲིས་པ་ལས་གྱུར་པའི་ཁྲག་སྐྱེད་པར་བྱེད་དོ་ཞེས་བྱ་བའི་དོན་ནོ། །རུས་པ་ཆགས་པ་ནི་ཚི་གུའི་རུས་བ་སྐྱེས་པ་སྟེ། རུས་པ་ཆགས་པའི་ཨ་མྲ་དེ་ནི་བད་ཀན་དང་མཁྲིས་པ་སྐྱེད་པ་ཡིན་
ནོ། །ཨ་མྲའི་འབྲས་བུ་དེ་སྨིན་ཞིང་ནར་སོན་པ་ནི་རླུང་སེལ་བ་དང་ལྕི་བ་དང༌། རོ་མངར་བ་དང༌། བད་ཀན་དང་ཁུ་བ་འཕེལ་བར་བྱེད་པ་ཡིན་ནོ། །བྲྀཀྵ་ཨམླ་རྩུབ་བཤང་སྲི། །ལྕི་ཚ་བད་ཀན་རླུང་དག་འཇོམས། །ཞེས་བྱ་བ་ལ། བྲྀཀྵ་ཨམླ་ནི། ཏིན་ཏི་ལི་ཀམ་སྟེ། དེ་ནི་རྩུབ་པ་དང༌། བཤད་བ་སྲི་ཞིང་བསྒོང་བ་དང༌། ལྕི་བ་དང༌། ནུས་པ་ཚ་བ་དང༌། བད་ཀན་དང་རླུང་དག་འཇོམས་ཤིང་སེལ་བར་བྱེད་པ་ཡིན་ནོ། །ཤ་མྱ་ཚ་ལྕི་སྐྲ་གནོད་རྩུབ། །ཅེས་བྱ་བ་ལ། ཤིང་ཤ་མྱའི་འབྲས་བུ་ནི་ནུས་པ་ཚ་བ་དང༌། རང་བཞིན་ལྕི་བ་དང༌། སྐྲ་ལ་གནོད་ཅིང་འབྱི་བར་བྱེད་པ་དང༌། རྩུབ་པར་གྱུར་པ་ཡིན་ནོ། །པི་ལུའི་འབྲས་བུ་མཁྲིས་པ་སྐྱེད། །བད་ཀན་རླུང་ནད་སེལ་ཞིང་འཁྲུ། །མཚེར་བ་གཞང་འབྲུམ་སྐྲན་སྲིན་སེལ། །ཞེས་བྱ་བ་ལ། ཤིང་པི་ལུའི་འབྲས་བུ་ནི་མཁྲིས་པ་སྐྱེད་པར་བྱེད་པ་དང༌། བད་ཀན་ལ་སོགས་པ་སེལ་བའི་མཚན་ཉིད་ལྔ་དང་ལྡན་པ་ཡིན་ནོ། །པི་ལུ་མངར་ཞིང་ཁ་བ་གང༌། །ཤིན་ཏུ་ཚ་མིན་ཉེས་གསུམ་འཇོམས། །ཞེས་བྱ་བ་ལ། པི་ལུའི་འབྲས་བུ་གང་མངར་བ་དང༌། ཅུང་ཟད་ཁ་བ་དེ་ནི་ཤིན་ཏུ་ཚ་མིན་ཞེས་པ་སྟེ། ཅུང་ཟད་ཙམ་དྲོ་ཞིང་ཚ་བའི་ནུས་པ་དང་ལྡན་པ་ཞེས་བྱ་བའི་དོན་ཏེ། དེ་ནི་རླུང་ལ་སོགས་པའི་ཉེས་པ་གསུམ་འཇོམས་ཤིང་སེལ་བ་ཡིན་ནོ། །བ་ལུ་ཤུན་ཁ་ཚ་ཞིང་སྣུམ། །རླུང་ནད་སེལ་བར་བྱེད་པ་ཡིན། །ཞེས་བྱ་བ་ལ། བ་ལུ་ནི་མ་དུ་ལུང་ག་ཞེས་བྱ་བ་སྟེ། མིང་གི་རྣམ་གྲངས་བི་ཛ་བུ་ར་ཞེས་བྱའོ། །དེའི་ཤུན་པ་ཞེས་བྱ་བ་ནི་སྟེང་གི་ཤུན་ལྤགས་ཀྱི་རོ་ནི་ཁ་ཞིང་ཚ་བ་ཡིན་པ་དང༌། དེ་བཞིན་དུ་སྣུམ་ཞིང་རླུང་ནད་སེལ་བར་བྱེད་པ་ཡིན་ནོ། །བ་ལུང་འབྲས་ཤས་བརྟས་བྱེད་མངར། །རླུང་དང་མཁྲིས་པ་སེལ་ཞིང་ལྕི། །ཞེས་བྱ་བ་ལ། བ་ལུང་དེའི་འབྲས་བུའི་ཤ་ཞེས་པ། འབྲས་བུའི་པགས་པའི་ནང་རིམ་པགས་པ་དང་འབྲེལ་ཏེ་ཉེ་བར་གནས་པ་དེ་ནི་བརྟས་པར་བྱེད་པ་སྟེ། ལུས་ཉམས་བརྟས་ཤིང་རྒྱས་པར་བྱེད་པ་དང༌། རོ་མངར་བ་ཡིན་ཏེ། དེ་ནི་རླུང་དང་མཁྲིས་པ་སེལ་བ་དང་ལྕི་བ་ཡིན་ནོ། །དེ་ཡི་རྐང་ཡང་སྐྱིགས་ལུད་པ། །དབུགས་མི་བདེ་དང་ཆང་ནད་སེལ། །ཁ་སྐམ་རླུང་
དང་བད་ཀན་དང༌། །རྟུག་སྲ་སྐྱུགས་བྲོ་ཡི་ག་འཆུས། །སྐྲན་དང་གཞང་འབྲུམ་གཟེར་ནད་དང༌། །མེ་དྲོད་ཆུང་བ་ཉིད་སེལ་ཏོ། །ཞེས་བྱ་བ་ལ། བ་ལུང་དེའི་རྐང་སྟེ། ནང་ན་གནས་པའི་སྙིང་པོ་སྐྱུར་བ་གང་ཡིན་པ་དེ་ནི་ཡང་བ་ཡིན་ལ། དེས་ཀྱང་སྐྱིགས་བུ་ལ་སོགས་པའི་ནང་ནས་དྲོད་ཆུང་བའི་བར་སེལ་ཞིང་འཇོམས་པ་ཡིན་ནོ། །ན་རང་ག་འབྲས་མངར་ཅུང་སྐྱུར། །ཡི་གར་འོང་ཞིང་ཁ་ཟས་ལེན། །ལྕི་ཞིང་རླུང་ནི་རབ་སྐྱེད་པའི། །ཡོན་ཏན་ལྡན་པར་ཤེས་པར་བྱ། །ཞེས་བྱ་བ་ནི། སྐྱུར་རྩི་ཆུང་ངུའི་འབྲས་བུ་ནི་རོ་མངར་ཞིང་ཅུང་ཟད་སྐྱུར་བ་ཡིན་ནོ། །དེ་ནི་ཡི་གར་འོང་བ་ལ་སོགས་པའི་ཡོན་ཏན་དང་ལྡན་པར་ཤེས་པར་བྱའོ། །བསེ་ཤིང་འབྲས་བུའི་ཤུན་པ་ཤ་།ཁོང་བརྟས་བྱེད་ཅིང་མངར་ལ་བསིལ། །ཞེས་བྱ་བ་ལ། བསེ་ཤིང་གི་འབྲས་བུ་བ་ལ་ཏ་ཀ་ཞེས་བྱ་བ་སྟེ། མིང་གི་རྣམ་གྲངས་ཨ་རུ་ཀར་ཞེས་བྱ་བ་དེ་ནི་ཤུན་པ་དང༌། ནང་གི་ཤ་ནི་ཁོང་བརྟས་ཤིང་ལུས་རྒྱས་པར་བྱེད་པ་དང༌། རོ་མངར་ཞིང་ཞིམ་པ་དང༌། བསིལ་བའི་ཡོན་ཏན་དང་ལྡན་པ་ཡིན་ནོ། །དེའི་རུས་མེ་མཉམ་ཡིད་གཞུངས་བྱེད། །བད་ཀན་རླུང་ནི་སེལ་བའི་མཆོག །ཅེས་བྱ་བ་ལ། བསེ་ཤིང་གི་འབྲས་བུ་དེའི་རུས་པ་སྟེ། ཚི་གུ་ནི་རྣོ་བས་མེ་དང་མཉམ་པ་དང༌། ཕྱི་རོལ་དུ་བསྐུས་ན་ཆུ་བུར་འབྱུང་བར་བྱེད་པས་ན། མེ་དང་མཉམ་པ་ཞེས་བྱ་བ་ཡིན་ལ། དེ་བཞིན་དུ་ནང་དུ་བཏང་བའི་སྨན་དང་སྦྱར་བ་ལས་ཀྱང༌། མྱུར་དུ་ཟས་འཇུ་བར་བྱེད་ཅིང་དྲོད་མཆོག་ཏུ་སྐྱེད་པར་བྱེད་པས་ཙི་ཏྲ་ཀ་དང་མཚུངས་པ་ཡིན་ཏེ་མེ་དང་མཉམ་ཞེས་བྱའོ། །ལ་ལ་ནི་རྣོ་བ་དང་ཚ་བ་དང་མེ་ལྟར་ཆུ་བུར་འབྱིན་པར་བྱེད་པས་མེ་དང་མཉམ་པ་ཡིན་པར་འདོད་དོ། །གཞན་དག་ནི་མེ་དང་མཉམ་པ་ཞེས་བྱ་བ། ཙི་ཏྲ་ཀ་དང་མཉམ་པར་ཡོན་ཏན་དང་ཉེས་པ་སྐྱེད་པར་བྱེད་པས་ཙི་ཏྲ་ཀ་དང་མཚུངས་པ་ཡིན་ནོ། །ཞེས་ཟེར་མོད་ཀྱི། དེ་ནི་རིགས་པ་མ་ཡིན་ཏེ། ཙི་ཏྲ་ཀའི་སྟོབས་མེ་དང་མཉམ། །ཞེས་བྱ་བའི་སྐབས་སུ་ཚུལ་ཇི་ལྟར་བཤད་པར་བྱ་སྟེ། འདིར་ནི་མེ་ཉིད་དང་མཉམ་པར་དཔེར་སྦྱར་བར་རིགས་ཀྱི། བསེ་ཤིང་གི་རུས་པ་དང་མི་སྦྱར་རོ། །ཡིད་གཞུངས་བྱེད་ཅེས་བྱ་བ་ནི། བློ་རྣོ་བ་ལ་ཕན་པ་སྟེ་ཤེས་
རབ་ཐོབ་པར་བྱེད་པའོ། །དེ་བཞིན་དུ་བད་ཀན་རླུང་ནི་སེལ་ཞེས་བྱ་བ་སྟེ། བད་ཀན་དང་རླུང་སེལ་ཞིང་འཇོམས་པར་བྱེད་ལ། དེ་ཡང་མཆོག་ཏུ་ཞེས་ཤིན་ཏུ་སེལ་བར་བྱེད་པའོ། །ཀུ་ཤུ་རྣམ་གཉིས་ལྕི་བ་སྟེ། །མངར་སྐྱུར་བསིལ་དང་ཚ་བ་ཡིན། །ཡིག་འབྱེ་ཞིང་མེ་རབ་འབྲི། །ཞེས་བྱ་བ་ལ། ཀུ་ཤུ་ནི་ཅོའུ་སྟེ། དེ་ཡང་རྣམ་པ་གཉིས་ཞེས་བྱ་བ་མངར་བ་དང་སྐྱུར་བ་རྣམ་པ་གཉིས་ཡོད་དོ། །དེ་གཉི་ག་ཡང་ལྕི་བ་ཡིན་ལ། དེ་གཉིས་ལས་གོ་རིམས་བཞིན་དུ་མངར་བ་ནི་བསིལ་བ་ཡིན་ལ། སྐྱུར་བ་ནི་ཚ་བའི་ནུས་པ་དང་ལྡན་པ་ཡིན་ནོ། །དེ་བཞིན་དུ་ཡི་ག་འབྱེ་བར་བྱེད་ཅིང་མེའི་དྲོད་རབ་ཏུ་འབྲི་བར་བྱེད་པ་ཡིན་ནོ། །ཁམ་ཤ་ཡིག་འབྱེད་ཅིང་མངར། །སྨིན་པ་མྱུར་དུ་འཇུ་བར་འགྱུར། །ཤིན་ཏུ་ཚ་མིན་ལྕི་ཉེས་སྐྱེད། །ཅེས་བྱ་བ་ལ། ཁམ་ཤའི་དབྱེ་བ་ནི་རྣམ་པ་བཞི་སྟེ། དེ་ཡང་སྨན་དཔྱད་ཀྱི་ལུང་ལས། ཁམ་ཤ་དང་ནི་ཁམ་རྒོད་དང༌། །ཙི་ལི་སོགས་དང་རྒྱ་ཁམ་སྟེ། །དེ་ནི་རིགས་ཀྱི་ཁྱད་པར་གྱིས། །ཁམ་བུ་རྣམ་པ་བཞིར་ཤེས་བྱ། །ཞེས་བཤད་པ་ཡིན་ནོ། །དེ་བཞི་ཆར་ཡང་ཡི་ག་འབྱེད་ཅིང་ཟས་ལེན་པར་བྱེད་པ་དང༌། རོ་མངར་བ་དང༌། ཤིན་ཏུ་སྨིན་ཅིང་ཚོས་ནས་ནི་མྱུར་དུ་འཇུ་བར་འགྱུར་བ་ཡིན་ནོ། །ཤིན་ཏུ་ཚ་མིན་ཞེས་བྱ་བ་ནི། ཅུང་ཟད་ཙམ་ནུས་པ་ཚ་བ་དང༌། དེ་བཞིན་དུ་ཤིན་ཏུ་ལྕི་བ་དང༌། ཤིན་ཏུ་ཉེས་པ་སྐྱེད་པ་ཡིན་ཏེ། ཅུང་ཟད་ལྕི་བ་དང༌། ཅུང་ཟད་ཉེས་པ་སྐྱེད་པའོ། །རྒུན་འབྲུམ་པ་རུ་ཤ་ཀ་དང༌། །ཀར་མར་དང་བཙོས་རློན་སྐྱུར། །མཁྲིས་པ་བད་ཀན་སྐྱེད་ཅིང་འཁྲུ། །ལྕི་ཞིང་ནུས་ཚ་རླུང་འཇོམས་སོ། །ཞེས་བྱ་བ་ལ། རྒུན་འབྲུམ་དང༌། པ་རུ་ཤ་ཀ་དང༌། ཀ་ར་མར་དང་བཙོས་པ་རློན་པ་སྟེ། སྐམ་པོ་མ་ཡིན་པ་དང༌། མ་སྨིན་ཅིང་སྐྱུར་བར་འགྱུར་བ་ནི་མཁྲིས་པ་དང་བད་ཀན་འཕེལ་ཞིང་སྐྱེད་པར་བྱེད་པ་དང༌། ཁོང་འཁྲུ་བ་དང་ལྕི་བ་དང༌། རླུང་འཇོམས་ཤིང་སེལ་བ་དང༌། ནུས་པའི་སྟོབས་ཚ་བ་ཡིན་ནོ། །རྒྱ་ཤུག་སྐྱུར་ཐུང་ལི་གུ་ཚེ། །ཨ་མྲ་ཀ་ཏ་དེ་བཞིན་ནོ། །ཞེས་བྱ་བ་ལ། སྔར་བཤད་པ་བཞིན་དུ་རྒྱ་ཤུག་ནི་ཁམ་བུའི་འབྲས་བུ་དག་དང་ཆ་འདྲ་བ་ཡིན་ཏེ། རྒྱ་ཤུག་སྐྱུར་པོ་ནི་
ཨམླ་གོ་ལའོ། །རྒྱ་ཤུག་ཐུང་ངུ་ནི་ཀར་ཀན་དུའོ། །དེ་བཞིན་ནོ་ཞེས་བྱ་བ་ནི་འབྲས་བུ་དེ་དག་རློན་ཞིང་སྐྱུར་བར་གྱུར་པས་ནི་སྔ་མ་དང་འདྲ་བར་མཁྲིས་པ་དང་བད་ཀན་སྐྱེད་ཅིང་འཁྲུ་བ་དང༌། ལྕི་ཞིང་ནུས་པ་ཚ་ལ་རླུང་འཇོམས་པ་ཡིན་ནོ། །ཨེ་ར་བ་ཏི་ཏུ་ད་དང༌། །མྲི་ག་ལིན་ད་ཛམ་བིར་བཅས། །སྨིན་དང་ཀ་ར་ཡར་ཏ་སྐམ། །མཁྲིས་པ་ཤིན་ཏུ་སྐྱེད་བྱེད་མིན། །ཞེས་བྱ་བ་ལ། ཨེ་ར་བ་ཏི་དང༌། ཏུད་དང༌། མྲི་ག་ལིན་ད་དང༌། ཛམ་བི་ར་སྨིན་པ་དག་ནི་མཁྲིས་པ་ཤིན་ཏུ་སྐྱེད་པ་མ་ཡིན་ལ། དེ་བཞིན་དུ་ཀར་ཡར་སྐམ་པོ་ཡང་མཁྲིས་པ་ཤིན་ཏུ་སྐྱེད་པར་བྱེད་པ་མ་ཡིན་ཏེ། མཁྲིས་པ་ཅུང་ཟད་སྐྱེད་པར་བྱེད་དོ་ཞེས་དོན་གྱིས་སྟོན་པ་ཡིན་ནོ། །ཨེ་ར་བ་ཏི་ནི་བ་རང་གའོ། །ཛམ་བི་ར་ནི་དན་ད་ཤ་ཐའོ། །ཨམླི་ཀ་དང་རྒྱ་ཤུག་སྐྱུར། །སྐམ་པོ་དྲོད་སྐྱེད་འཁྲུ་བ་དང༌། །སྐོམ་དད་ལ་དང་རྨྱ་བ་སེལ། །ཡང་ཞིང་རླུང་དང་བད་ཀན་འཇོམས། །ཞེས་བྱ་བ་ལ། ཨམླི་ཀ་ནི་ཙུ་ཀྲི་ཀའོ། །རྒྱ་ཤུག་སྐྱུར་པོ་ནི་ཀོ་ལི་ཀའོ། །འབྲས་བུ་དེ་གཉིས་བསྐམས་པར་གྱུར་པ་ནི་མེའི་དྲོད་སྐྱེད་པ་དང༌། བཤད་གཅི་སླ་ཞིང་འཁྲུ་བ་དང༌། སྐོམ་དད་དང་ངལ་བ་དང་རྨྱ་བ་སེལ་བ་དང༌། དེ་བཞིན་དུ་ཡང་བ་དང༌། རླུང་དང་བད་ཀན་དག་ཀྱང་འཇོམས་ཤིང་སེལ་བ་ཡིན་ནོ། །དེ་ལས་འབྲས་བུ་ཀུན་ཐ་ཆད། །ལི་གུ་ཙེ་སྟེ་ནད་ཀུན་སློང༌། །ཞེས་བྱ་བ་ལ། འབྲས་བུའི་སྡེ་ཚན་རྣམས་ལ་འབྲས་བུ་དེ་རྣམས་གྱི་ཐ་ཆད་ཅེས་པ། ཐ་མ་ནི་ལི་གུ་ཙེ་ཞེས་བྱ་བ་ཡིན་ཏེ། དེས་ནི་ནད་ཀུན་སློང་ཞེས་པ་ཉེས་པ་གསུམ་པོ་མཐའ་དག་སྐྱེད་པར་བྱེད་པ་ཡིན་ནོ། །ཁ་བ་མེ་དང་རླུང་གནོད་ཉེན། །སྦྲུལ་གྱི་ཁ་ཆུ་སོགས་པས་ཕོག །སྲིན་བུས་ཟོས་དང་ཆུ་ནང་ལྷུང༌། །ས་ངན་དུས་མིན་སྐྱེས་པ་དང༌། །འབྲུ་གཞན་འདྲེས་ཤིང་མཐུ་ཉམས་དང༌། །ཤིན་ཏུ་རྙིང་གྱུར་འབྲུ་སྤང་བྱ། །ཞེས་བྱ་བ་ལ། འབྲུ་ཁ་བ་ལ་སོགས་པས་ཉེན་ཅིང་ཉམས་པ་རྣམས་སྤང་བར་བྱ་སྟེ། གནོད་པས་ཉེན་པའི་སྒྲ་ནི་ཀུན་ལ་སྦྱར་བར་བྱ་སྟེ། དེས་ན་ཁ་བའི་གནོད་པས་ཉེན་པ་དང༌། དེ་བཞིན་དུ་མས་ཚིག་པའི་གནོད་པས་ཉེན་པའམ། ཐན་པས་ཁྱེར་བ་དང༌། རླུང་གིས་གནོད་པ་སྟེ། འབྲུ་ལ་
གནོད་པ་རླུང་རྩུབ་མོས་ཉེན་པ་དང༌། དེ་བཞིན་དུ་སྦྲུལ་ལ་སོགས་པའི་ཁ་ཆུས་ཕོག་པ་ལ་སོགས་པའི་སྒྲས་ནི་རོ་བསྲེགས་པའི་དྲིས་ཕོག་པ་དང༌། བཤང་བ་དང་གཅི་བས་ཕོག་པ་བསྡུའོ། །སྲིན་བུས་ཟོས་པ་ནི་འབུ་སྲིན་རྣམས་ཀྱིས་ཟོས་བའོ། །ཆུ་ནང་ལྷུང་བ་སྟེ། ཆུའི་ནང་དུ་ནུབ་པ་དང༌། ས་ངན་པ་སྟེ། མི་མཐུན་པའི་སར་སྐྱེས་པ་སྟེ། དེ་ཡང་འབྲུ་གང་དང་གང་དུ་སྐྱེ་བར་འོས་པའི་ས་དེ་མ་ཡིན་པ་གཞན་དག་ཏུ་སྐྱེས་པ་ནི་མི་མཐུན་པར་སྐྱེས་བའོ། །དུས་མ་ཡིན་བར་སྐྱེས་བ་ནི་སྨིན་པའི་དུས་སུ་མ་ཕྱིན་པ་སྟེ། འབྲུ་གང་དུས་གང་སྐྱེས་པར་གྲགས་པ་དེ་ལས་གཞན་པའི་དུས་དག་ཏུ་སྐྱེས་པ་ཞེས་བྱ་བའི་དོན་ཏེ། དེའི་མཚན་ཉིད་ནི་རོ་ལ་སོགས་པ་ཡོངས་སུ་མ་རྫོགས་པས་གནོད་པ་ཡིན་ནོ། །འབྲུ་གཞན་ལྡན་ཞིང་ཞེས་བྱ་བ་ནི་རིགས་མི་མཐུན་པ་གཞན་དག་དང་འདྲེས་བར་གྱུར་པ་སྟེ། དཔེར་ན་འབྲས་རཀྟ་ཤ་ལི་རྩ་སྣར་ནི་འབྲས་ཡ་བ་ཀ་ཞེས་བྱ་བ་ནས་འདྲ་དང་འདྲེས་ན་གནོད་པ་ཡིན་ནོ། །དེ་བཞིན་དུ་མོན་སྲན་སྡེའུ་མུངྒ་ནི་མོན་སྲན་གྲེའུ་མ་ཤ་དང་མི་མཐུན་པ་ཡིན་ནོ། །དེ་བཞིན་དུ་གྲ་མ་ཅན་ཡང་གྲམ་ཅན་གྱི་རིས་མི་མཐུན་པ་དང་འདྲེས་པ་དང༌། གོང་བུ་ཅན་ཡང་གོང་བུ་ཅན་གྱི་རིས་མི་མཐུན་པ་དང་འདྲེས་པ་སྤང་བར་བྱའོ། །ལ་ལ་དག་ནི་འབྲུ་གྲ་མ་ཅན་ནི་འབྲུ་གང་བུ་ཅན་དང་མི་མཐུན་པ་ཡིན་ནོ་ཞེས་ཟེར་རོ། །དེ་བཞིན་དུ་གཞན་དག་ནི་སར་བ་དང་རྙིང་པ་འདྲེས་པ་དག་ནི་འབྲུ་གཞན་འདྲེས་པ་ཡིན་ནོ་ཞེས་ཟེར་རོ། །དེ་བཞིན་དུ་མཐུ་ཉམས་ཤིང་ཤིན་ཏུ་རྙིང་པ་སྟེ། ལོ་མང་པོར་ལོན་པ་ཉིད་ཀྱིས་ཤིན་ཏུ་རྙིང་པར་གྱུར་པས་མཐུ་ཉམས་ཤིང་ནུས་པ་ཟད་པའི་འབྲུ་སྤང་བར་བྱའོ། །དེ་ཡང་རྒྱུད་གཞན་དག་ལས། ལོ་གཅིག་ལོན་ན་འབྲུ་ཐམས་ཅད། །ལྕི་བ་ཉིད་ནི་སྤོང་གྱུར་གྱི། །དེ་ཡི་ནུས་པ་འདོར་མ་ཡིན། །དེ་ནས་རིམ་གྱིས་འདོར་བར་འགྱུར། །ཞེས་བཤད་པ་ཡིན་ནོ། །དེས་ན་མཐུ་ཉམས་ཤིང་ཤིན་ཏུ་རྙིང་པར་གྱུར་པའི་འབྲུ་ཡིན་ནོ། །ཚོད་མའང་དེ་བཞིན་རྩུབ་པར་ནི། །གཡོས་བ་དག་དང་མི་སྙི་དང༌། །རོ་ནི་སྨིན་པར་མ་གྱུར་དང༌། །ལ་ཕུག་མ་གཏོགས་སྐམ་པོ་དང༌། །ཞེས་བྱ་བ་ལ། ཚོད་མའང་དེ་བཞིན་ཞེས་པ་ཁ་བ་ལ་སོགས་པས་ཉེན་པ་སྤང་བར་བྱའོ། །
དེ་བཞིན་དུ་རྩུབ་པོས་བཙོས་པ་སྟེ། རྩུབ་པ་ཉིད་དུ་བཙོས་པ་ནི་རྩུབ་པོར་གཡོས་པའམ། ཡང་ན་རྩུབ་པོ་སྟེ་དར་བ་དང་ཞོ་ག་ཆུ་དང་སྐྱུར་པོ་ལ་སོགས་པ་དང༌། གཡོས་པ་ནི་རྩུབ་པོར་གཡོས་པའོ། །མི་སྙི་བ་ནི་སྲ་བ་སྟེ། རང་བཞིན་གྱིས་སྲ་བའམ། གཡོས་སུ་བྱས་པས་སྲ་བའོ། །དེ་བཞིན་དུ་རོ་སྨིན་པར་གྱུར་པ་སྟེ། རོའི་རང་བཞིན་ཡོངས་སུ་རྫོགས་པར་མ་གྱུར་པའོ། །དེ་བཞིན་དུ་ལ་ཕུག་མ་གཏོགས་པ་སྐམ་པོ་སྤང་བར་བྱའོ། །གང་གི་ཕྱིར་ལ་ཕུག་སྐམ་པོ་བཟའ་བར་བྱ་བ་སྔར་བཤད་པའི་ཕྱིར་རོ། །འབྲས་བུའང་ཕལ་ཆེར་དེ་བཞིན་ཏེ། །བིལ་བ་མ་གཏོགས་རློན་པ་སྤང༌། །ཞེས་བྱ་བ་ལ། འབྲས་བུ་ཤིང་ཐོག་ཀྱང་ཕལ་ཆེར་མང་དུ་དེ་བཞིན་ཏེ། ཇི་ལྟར་འབྲུ་ཁ་བ་ལ་སོགས་པས་ཉེན་ཅིང་སྣད་པ་དང༌། འབུས་ཟོས་པ་དང༌། ཆུར་ལྷུང་བ་དང༌། ས་ངན་པ་ལས་སྐྱེས་པ་དང༌། དུས་མ་ཡིན་པར་སྐྱེས་པ་དང། རོ་མ་སྨིན་པ་དང༌། སྐམ་པོ་སྤང་བར་བྱ་བ་ཡིན་ནོ། །ཕལ་ཆེར་ཞེས་སྨོས་པས་ནི་འབྲུ་གཞན་དང་འདྲེས་པ་དང་རྩུབ་མོར་གཡོས་པ་ལ་སོགས་པ་དང༌། འདིར་མི་སྦྱར་བ་དང༌། རྒུན་འབྲུམ་ལ་སོགས་པས་ནི་སྐམ་པོ་ཡང་སྦྱོར་བ་དག་ལ་དགོས་ཤིང་སྐྱོན་མེད་པར་སྣང་བས། དེ་དག་མ་གཏོགས་པར་ཤེས་པར་བྱ་བའི་ཕྱིར་ཕལ་ཆེར་སྨོས་པ་ཡིན་ནོ། །དེ་བཞིན་དུ་ཤིང་ཏོག་ཐམས་ཅད་ཀྱང་རློན་པ་སྟེ། སྨིན་པར་མ་གྱུར་པ་སྤང་བར་བྱའོ། །དེ་ལ་བིལ་བ་ནི་མ་གཏོགས་ཏེ། དེའི་མ་སྨིན་པའི་སྦྱོར་བའི་ཡོན་ཏན་ཆེན་པོ་དག་དྲང་སྲོང་གིས་བཤད་པ་ཡིན་ནོ། །འདིར་གཞན་དག་ཐམས་ཅད་ནི་ཅི་རིགས་པར་སྔ་མ་བཞིན་དུ་སྦྱར་བར་བྱའོ། །ཟས་ཀྱི་ཚུལ་ཤེས་པར་བྱ་བ་འདིར་འབྲུ་དང་ཤ་དང་ཚོད་མ་དང་ཤིང་ཏོག་འབྲས་བུར་གྲགས་པ་དང༌། མ་གྲགས་པ་རྣམས་ཀྱི་མིང་མ་སྨྲས་པ་དེ་དག་ནི་ཡུལ་མང་པོ་མཐོང་ཞིང་ཐ་སྙད་ལ་མཁས་པ་རྣམས་ལས་ཤེས་པར་བྱའོ། །འབྲས་བུའི་སྡེ་ཚན་ནོ།། །།ད་ནི་ལན་ཚྭ་ལ་སོགས་པ་དག་ཟས་ཀྱི་གཡོས་ལ་དགོས་པ་དང༌། སྨན་དང་ཟས་ཀྱི་སྦྱོར་བ་ལ་སོགས་པ་གང་ཡིན་པ་དེ་བརྗོད་པར་བྱ་སྟེ། ལན་ཚྭ་ཀུན་ཀྱང་བད་ཀན་སྐྱེད། །ཕྲ་ཞིང་བཤང་གཅི་འབྱིན་ལ་
འཇམ། །རླུང་འཇོམས་འཇུ་བྱེད་ཚ་ཞིང་རྣོ། །ཡི་ག་འབྱེད་ཅིང་བད་མཁྲིས་སྐྱེད། །ཅེས་བྱ་བ་ལ། ལན་ཚྭ་ཐམས་ཅད་ནི་སྤྱིར་བད་ཀན་སྐྱེད་ཅིང་རྩ་སྦུབས་ཀྱི་རྒྱུན་ལས་ཆུ་རྣམས་འཛག་པར་བྱེད་པ་ཡིན་པས། ཀུན་ཀྱང་བད་ཀན་སྐྱེད་པ་ཡིན་ནོ། །དེ་སྨན་དཔྱད་ཀྱི་རྒྱུད་ལས། རང་གི་ནུས་པ་སྙིང་གར་ནི། །སོང་སྟེ་རྣམ་པར་སྡུད་བྱེད་ཅིང༌། །རྣོ་བས་རྣམ་པར་གཅོད་བྱེད་ལ། X །ཚ་བས་མྱུར་དུ་འཛག་པར་བྱེད་པ་ཡིན་པས། ཀུན་ཀྱང་བད་ཀན་སྐྱེད་པ་ཡིན་ནོ། །དེ་སྨན་གྱི་རྒྱུད་ལས་ཞེས་བཤད་པ་ཡིན་ནོ། །ཕྲ་བ་ནི་རྩ་སྦུབས་ཕྲ་མོ་ལ་ཞུགས་པར་བྱེད་པ་ཡིན་པའི་ཕྱིར་རོ། །བཤང་གཅི་འབྱིན་པ་ནི་དྲི་མ་སེལ་ཞིང་འཁྲུ་བར་བྱེད་པའོ། །འཇམ་པ་ནི་རང་བཞིན་མཉེན་པའོ། །རླུང་འཇོམས་པ་ནི་རླུང་ནད་སེལ་བའོ། །འཇུ་བར་བྱེད་པ་ནི་ཟས་ལ་སོགས་པ་སྨིན་པར་བྱེད་པའོ། །ཚ་བ་ནི་ཚ་བའི་ནུས་པ་དང་ལྡན་པའོ། །རྣོ་བ་ནི་ལུས་ཟུངས་འབིགས་པའོ། །ཡིག་འབྱེ་བ་ནི་ཟས་ལེན་པའོ། །བད་ཀན་དང་མཁྲིས་པ་སྐྱེད་པ་ནི་དེ་གཉིས་འཕེལ་བར་བྱེད་པའོ། །དེ་ལ་ལྕེ་མྱང་ཚ་མངར་བཅས། །རོ་ཙ་ཡིད་འོང་ཉེས་གསུམ་སེལ། །ཡང་ཞིང་ཚ་ལ་མིག་ལ་ཕན། །ཚ་བ་མི་སྐྱེད་མེ་དྲོད་སྐྱེད། །ཅེས་བྱ་བ་ལ། དེ་ལ་ཞེས་བྱ་བ་ནི་ངེས་པར་གཟུང་བ་སྟེ། ལན་ཚྭ་དེ་ཐམས་ཅད་ཀྱི་ནང་ནས། ལན་ཚྭ་ལྕེ་མྱང་ཚ་ནི་ཡང་བ་སྟེ། ཅུང་ཟད་མངར་བ་དང༌། རོ་ཙ་ཞིང་ས་བོན་འཕེལ་བར་བྱེད་པ་དང༌། ཡིད་དུ་འོང་ཞིང་སྙིང་དགའ་བར་བྱེད་པ་དང༌། རླུང་ལ་སོགས་པ་གསུམ་སེལ་བར་བྱེད་པ་ལ་སོགས་པའི་ཡོན་ཏན་དང་ལྡན་པ་ཡིན་ནོ། །རྩལ་རུ་ཚ་ཡང་ཡིད་འོང་ཞིང༌། །སྒྲེགས་པ་སྦྱོང་ཞིང་དྲི་ཞིམ་ལ། །ཞུ་རྗེས་ཚ་ཞིང་བཤང་སྲི་སེལ། །དྲོད་སྐྱེད་ཡི་ག་འབྱེད་བྱེད་ཡིན། །ཞེས་བྱ་བ་ལ། རྩལ་རུ་ཚ་ནི་སེའུ་བར་ཙ་ལ་སྟེ། མིང་གི་རྣམ་གྲངས་གཞན་ཡང་རུ་ཙ་ཀ་ཞེས་བྱའོ། །དེ་ནི་ཡང་ཞིང་ཡིད་དུ་འོང་བ་དང༌། སྒྲེགས་པའི་དྲི་མི་ཞིམ་པ་སྦྱོང་བ་ལ་སོགས་པའི་ཡོན་ཏན་དང་ལྡན་པ་ཡིན་ནོ། །ཁ་རུ་ཚ་ནི་སྟོད་བད་ཀན། །སྨད་ཀྱི་རླུང་འབྱིན་དྲོད་སྐྱེད་ལ། །བཤང་འགགས་ལྟོ་སྦོས་རྟུག་སྐམ་དང༌། །གཟེར་ཟུག་ལུས་ལྕི་སེལ་བ་ཡིན། །ཞེས་བྱ་བ་ལ། ཁ་རུ་ཚ་
འདི་ནི་བི་ད་ལོ་ནུ་སྟེ། ཁ་རུ་ཚ་བཅོས་མ་ཡིན་པར་ཤེས་པར་བྱའོ། །དེ་ནི་སྟོད་ཀྱི་བད་ཀན་འདྲེན་པར་བྱེད་པ་དང༌། སྨད་ཀྱི་རླུང་འབྱིན་པར་བྱེད་པ་ཡིན་ནོ། །ལུགས་སུ་འབྱུང་བར་བྱེད་པ་ཡིན་ཞིང་དྲོད་སྐྱེད་པ་ལ་སོགས་པའི་ཡོན་ཏན་དང་ལྡན་པ་ཡིན་ནོ། །རྒྱ་མཚོའི་ལན་ཚྭ་ཞུ་རྗེས་མངར། །ལྕི་ཞིང་བད་ཀན་རྣམས་འཕེལ་བྱེད། །ཅེས་བྱ་བ་ལ། རྒྱ་མཚོའི་ལན་ཚྭ་ནི་ཞུ་བའི་རྗེས་མངར་བ་དང༌། ལྕི་ཞིང་ཁྱད་པར་དུ་བད་ཀན་འཕེལ་བར་བྱེད་པ་ཡིན་ནོ། །བཀོད་མའི་ལན་ཚྭ་ཅུང་ཟད་ཁ། །ཚ་དང་བ་ཚ་རྣོ་བྱེད་གཤེར། །ཞེས་བྱ་བ་ལ། བཀོད་མའི་ལན་ཚྭ་ནི་ས་ལས་སྐྱེས་པའི་ལན་ཚྭ་སྟེ། དེ་ནི་ཅུང་ཟད་ཚ་བ་ནི། ཅུང་ཟད་བ་ཚའི་ཞད་བྲོ་བ་དང༌། རྣོ་བའི་ཡོན་ཏན་དང་ལྡན་པ་དང༌། སླ་ཞིང་གཤེར་བར་བྱེད་ལ་བད་ཀན་དང་མཁྲིས་པ་ལ་སོགས་པ་གནས་ནས་སྒུལ་བར་བྱེད་པས་ན་གཤེར་བར་བྱེད་པ་ཡིན་ནོ། །ཁ་རུ་ཚ་ནག་ཡོན་ཏན་དྲི། །མ་གཏོགས་ཡོན་ཏན་བི་དར་མཚུངས། །ཞེས་བྱ་བ་ལ། ཁ་རུ་ཚ་ནག་པོ་ནི་དྲི་མ་གཏོགས་པ་ཡོན་ཏན་གཞན་བི་ད་ཁ་རུ་ཚ་དང་མཚུངས་ཤིང་མཉམ་སྟེ། འདི་གཉིས་ཀྱི་ཁྱད་པར་ནི་དྲི་ཙམ་དུ་ཟད་དོ། །མཚོ་ཚ་ཡང་སྟེ། ཞེས་བྱ་བ་ནི་ལན་ཚྭ་མཚོ་ཚ་ཞེས་བྱ་བ་ནི་རོ་མ་ཀ་སྟེ། དེ་ནི་ཡང་བའི་ཡོན་ཏན་དང་ལྡན་པས་ན་ཡང་བ་ཡིན་ནོ། །ས་སྐམ་ཚ། །བད་ཀན་སྐྱེད་ཅིང་འཇུ་དཀའ་ལྕི། །ཞེས་བྱ་བ་ལ། ས་སྐམ་གྱི་ཚ་ནི་ས་རུལ་ཅན་གྱི་ཕྱོགས་ནས་བྱུང་བའི་ཚ་སྟེ། དེ་ནི་བ་ཚ་བྲོ་ཞིང་བད་ཀན་སྐྱེད་པར་བྱེད་ཅིང་འཇུ་དཀའ་བ་དང། ལྕི་བ་ཡིན་ནོ། །ལན་ཚྭ་རྣམས་ཀྱི་སྦྱོར་བ་ལ། །རྒྱམ་ཚ་ལ་སོགས་རབ་ཏུ་སྦྱར། །ཞེས་བྱ་བ་ལ། ལྕེ་མྱང་ཚ་ལ་སོགས་པའི་ལན་ཚྭ་རྣམས་ཀྱི་ནང་ནས་གཅིག་གམ་གཉིས་སམ་མང་པོ་བརྔོས་པའི་ཕྱེ་མ་དང༌། ལ་དུ་དང༌། སྨན་མར་དང༌། ཏིལ་མར་ལ་སོགས་པའི་སྦྱོར་བ་དེ་དང་དེ་ལ་རྒྱམ་ཚ་ལ་སོགས་པ་རབ་ཏུ་སྦྱར་བར་བྱའོ། །དེས་ན་འདི་སྐད་སྟོན་པ་ཡིན་ཏེ། གང་དུ་ཁྱད་པར་མེད་པར་ལན་ཚྭ་གཅིག་སྨོས་པ་དེ་ནི་རྒྱམ་ཚ་འམ་ལྕེ་མྱང་ཚ་སྦྱར་བར་བྱའོ། །གང་དུ་གཉིས་སྨོས་པ་དེ་ནི་རྒྱམ་ཚ་དང་རྩལ་རུ་ཚའོ། །གང་དུ་གསུམ་
སྨོས་པ་དེར་ནི། རྒྱམ་ཚ་དང་རྩལ་རུ་ཚ་དང༌། ཁ་རུ་ཚ་ནག་པོ་སྦྱར་བར་བྱའོ། །གང་དུ་བཞི་སྨོས་པ་དེར་ནི། ལྕེ་མྱང་ཚ་དང་རྩལ་རུ་ཚ་དང༌། ཁ་རུ་ཚ་དང་ཁ་རུ་ཚ་ནག་པོའོ། །གོང་དུ་ལྔ་སྨོས་པ་དེར་ནི། ལྕེ་མྱང་ཚ་དང་རྩལ་རུ་ཚ་དང༌། ཁ་རུ་ཚ་དང་ཁ་རུ་ཚ་ནག་པོ་དང༌། རྒྱ་མཚོའི་ཚ་སྦྱར་བར་བྱའོ། །དེ་བཞིན་དུ་བཀོད་མའི་ལན་ཚྭ་ལ་སོགས་པ་ཡང་སྦྱར་རོ། །ནས་ཚིག་འཁུས་པའི་ལན་ཚྭ་ནི། །སྐྲན་དང་སྙིང་ནད་སྐྱ་རྦབ་དང༌། །ཕོ་བ་མཆེར་པ་ལྐོག་ནད་དང༌། །ལུད་པ་གཞང་འབྲུམ་དབུགས་མི་བདེ། །ལྟོ་སྦོས་བད་ཀན་སེལ་བ་ཡིན། །ཞེས་བྱ་བ་ལ། ལན་ཚྭའི་ནང་ནས་ནས་ཚིག་འཁུས་པའི་ཐལ་བའི་ལན་ཚྭ་ནི། སྐྲན་ནས་བད་ཀན་གྱི་བར་སེལ་ཞིང་འཇོམས་པ་ཡིན་ནོ། །སརྫི་ཀ་སོགས་ཐལ་ཚ་ཀུན། །རབ་རྣོ་ཚ་ཞིང་སྲིན་སེལ་ཡང༌། །ཁྲག་མཁྲིས་སྐྱེད་བྱེད་སྨིན་བྱེད་ལ། །གཅོད་ཅིང་མི་ཞིམ་རྣམ་པར་འབྱེད། །ནས་ཚིག་འཁུས་ཚ་ཁ་བས་ན། །མདོག་མདངས་ཁུ་བ་སྐྲ་མིག་གནོད། །ཅེས་བྱ་བ་ལ། སརྫི་ཀ་ལ་སོགས་པའི་ཐལ་བའི་ཚ་ཁུ་ནི་རབ་ཏུ་རྣོ་བ་དང༌། ཚ་བའི་ནུས་བ་དང་ལྡན་པ་དང༌། སྲིན་བུའི་ནད་སེལ་བ་དང༌། ཡང་བ་དང༌། ཁྲག་དང་མཁྲིས་པ་སྐྱེད་པ་སྨིན་པར་བྱེད་པ་དང༌། བད་ཀན་ལ་སོགས་པ་གཅོད་པར་བྱེད་པ་དང༌། དེ་བཞིན་དུ་མི་ཞིམ་པ་སྟེ། སྙིང་མི་དགའ་བར་མི་བྱེད་པ་དང་རྣམ་པར་འབྱེད་པ་སྟེ། འབྲུམ་བུ་དང༌། ཕོལ་མིག་ལ་སོགས་པ་འབྱེད་ཅིང་འགགས་པར་བྱེད་པ་དང༌། ལན་ཚྭ་བྲོ་ཞིང་ཁ་བས་མདོག་མདངས་དང་ཁུ་བ་ལ་སོགས་པ་ལ་གནོད་པ་ཡིན་ནོ། །ཤིང་ཀུན་རླུང་དང་བད་ཀན་སེལ། །གཟེར་འཇོམས་མཁྲིས་པ་སྐྱེད་བྱེད་དེ། །ཞུ་རྗེས་རོ་ཚ་ཡི་ག་འབྱེད། །དྲོད་སྐྱེད་ཟས་འཇུ་ཡང་བ་ཡིན། །ཞེས་བྱ་བ་ལ། ཤིང་ཀུན་ནི་རྩི་བོ་ཆེ་སྟེ། དེ་ནི་རླུང་དང་བད་ཀན་སེལ་ཞིང་གཟེར་ནད་འཇོམས་པ་དང༌། དེ་བཞིན་དུ་མཁྲིས་པ་སྐྱེད་པར་བྱེད་པ་དང༌། ཞུ་བའི་རྗེས་མངར་ཞིང་རོ་ཚ་བ་དང༌། ཡི་ག་འབྱེད་པ་དང༌། དྲོད་སྐྱེད་པ་དང༌། ཟས་མ་ཞུ་བ་འཇུ་བ་དང༌། ཡང་བའི་ཡོན་ཏན་དང་ལྡན་པ་ཡིན་ནོ། །ཨ་རུ་ར་བསྐ་ཞུ་རྗེས་མངར། །
རྩུབ་ཅིང་ལན་ཚྭའི་རོ་མེད་ཡང༌། །དྲོད་ཆེ་ཟས་འཇུ་ཡིད་གཞུངས་བྱེད། །ན་ཚོད་ལ་འཇོག་དམ་པ་ཡིན། །དྲོ་ཞིང་འཁྲུ་ལ་ཚེ་ལ་ཕན། །བློ་དང་དབང་གསལ་སྟོབས་རབ་སྐྱེད། །མཛེ་དང་བཞིན་ལུས་མདོག་མི་སྡུག །སྐད་འགགས་རིམས་རྙིང་མི་བཟད་རིམས། །གླད་པ་མིག་ནད་སྐྱ་རྦབ་དང༌། །མིག་སེར་ཕོ་བའི་ནད་རྣམས་དང༌། །སྐེམ་བཅས་འོར་ནད་གཅིན་ནད་དང༌། །ཚད་འཁྲུ་རྨོངས་བག་མྱོས་སློན་སྲིན། །མཆིལ་མང་ལུད་པ་དབུགས་མི་བདེ། །གཞང་འབྲུམ་མཆེར་པ་ལྟོ་སྤོས་དུག །གསུམ་འཕེལ་རྒྱུན་འགགས་སྐྲན་དང་ནི། །ད་རྒན་ན་དང་ཡི་ག་འཆུས། །རླུང་དང་བད་ཀན་ལས་གྱུར་ནད། །དེ་དང་དེ་ནི་སེལ་བྱེད་ཡིན། །ཞེས་བྱ་བ་ལ། ཨ་རུ་ར་ནི་རོ་རབ་ཏུ་བསྐ་བ་ཡིན་ལ། ཞུ་བའི་རྗེས་མངར་བ་ཡིན་ཞིང༌། རྩུབ་པའི་ཡོན་ཏན་དང་ལྡན་པས་རྩུབ་པ་ཡིན་ལ། ལན་ཚྭའི་རོ་མེད་པ་ནི་ལན་ཚྭའི་རོ་དང་བྲལ་བ་སྟེ། རོ་ལྔ་དང་ལྡན་པ་ཞེས་བྱ་བའི་དོན་ཏོ། །སྔར་བསྐ་བ་ཞེས་སྨོས་པ་ནི། དེ་ཤས་ཆེ་བར་བསྟན་པའི་ཕྱིར་ཡིན་ནོ། །དེ་ལྟར་ན་ཨ་རུ་ར་ནི་མངར་བ་དང༌། སྐྱུར་བ་དང༌། ཁ་བ་དང༌། ཚ་བ་དང༌། བསྐ་བ་སྟེ། རོ་ལྔ་དང་ལྡན་པ་ཡིན་པར་ཤེས་པར་བྱའོ། །དེ་ཡང་བ་ལ་སོགས་པའི་ཡོན་ཏན་དང་ལྡན་པ་ཡིན་ཏེ། ན་ཚོད་ལ་འཇོག་པ་ནི་གཞོན་ནུ་མ་ཡིན་པ་དག་ཀྱང་རྒས་པ་ལས་བཟློག་ནས་མཆོག་ཏུ་གཞོན་པ་ལ་འཇོག་པ་ཡིན་པ་དང༌། བློ་ཞེས་བྱ་བ་འཕྲལ་གྱི་དོན་འཛིན་པར་ནུས་པ་དང༌། མིག་ལ་སོགས་པའི་དབང་པོ་གསལ་བར་བྱེད་ཅིང༌། དེ་རྣམས་ཀྱི་སྟོབས་རང་གི་ཡུལ་ལ་འཇུག་པར་ནུས་པ་རབ་ཏུ་བསྐྱེད་པ་ཡིན་ནོ། །དེ་བཞིན་དུ་དེ་ནི་མཛེ་ནས་ཡི་ག་འཆུས་པའི་བར་གྱི་ནད་དང༌། རླུང་དང་བད་ཀན་ལས་གྱུར་པའི་ནད་གཞན་གང་དག་ཡོད་པ་དེ་དང་དེ་ཐམས་ཅད་སེལ་བར་བྱེད་པ་ཡིན་ནོ། །རིམས་རྙིང་པ་ནི་ཡུན་རིང་དུ་ལོན་པའོ། །མི་བཟད་པའི་རིམས་ནི་རྟག་པའི་རིམས་ལ་སོགས་པ་རྣམ་པ་བཞིའོ། །གཞན་དག་ནི་གོ་བར་ཟད་དོ། །སྐྱུ་རུ་ར་ཡང་དེ་འདྲ་བསིལ། །རོ་སྐྱུར་བད་མཁྲིས་སེལ་དེ་ལས། །ཞེས་བྱ་བ་ལ། སྐྱུ་རུ་ར་ཡང༌། ཨ་རུ་ར་དང་འདྲ་བར་ཤེས་པར་
བྱའོ། །ཨ་རུ་རའི་ཡོན་ཏན་བཤད་མ་ཐག་པ་གང་ཡིན་པ་དེ་ཐམས་ཅད་སྐྱུ་རུ་ར་ལ་ཡང་ཡོད་དེ་འདྲ་བ་ཞེས་བྱ་བ་ལ། འདིར་ནུས་བ་ནི་དེ་དང་མི་མཐུན་ཏེ། དེ་ནི་དྲོ་བ་ཡིན་ལ། སྐྱུ་རུ་ར་ནི་བསིལ་བའི་ནུས་པ་དང་ལྡན་པ་ཡིན་ནོ། །ཡོན་ཏན་གཞན་ལན་ཚྭ་མི་བྲོ་ཞིང་ཞུ་རྗེས་མངར་བ་དང། རོ་ལྔ་དང་ལྡན་པ་ལ་སོགས་པ་དང༌། བད་ཀན་དང་མཁྲིས་པ་ལས་བྱུང་བའི་ནད་དེ་དང་དེ་འཇོམས་པར་བྱེད་པ་ནི་འདྲ་བ་ཡིན་པར་ཤེས་ལ། སྐྱུར་བའི་རོ་ནི་ཤས་ཆེ་བ་ཡིན་ནོ། །ཡོན་ཏན་ཅུང་དམན་བ་རུར། །ཞུ་རྗེས་ཚ་མངར་སྐྲ་མིག་ཕན། །ཞེས་བྱ་བ་ལ། བ་རུ་ར་ནི་ཨ་རུ་ར་རའི་ཡོན་ཏན་དེ་ལས་ཅུང་ཟད་ཅིག་དམན་ཞིང་ཆུང་བ་ཡིན་ལ། དེ་ནི་ཨ་རུ་ར་དང་ཡོན་ཏན་ལས་ཐུན་མོང་ཡིན་ཡང༌། བ་རུ་ར་ནུས་པ་བསིལ་བ་ཡིན་ཏེ། དེ་རྩོམ་པའི་འབྱུང་བ་ཆེན་པོ་དེ་ལྟ་བུའི་རྣམ་པར་ཞུགས་པ་ཡིན་པའི་ཕྱིར་རོ། །དེ་ནི་ཞུ་བའི་རྗེས་ཚ་བ་དང༌། རོ་མངར་བའི་ཤས་ཆེ་བ་དང༌། སྐྲ་ལ་ཕན་པ་དང༌། མིག་ལ་ཕན་པ་ཡིན་ནོ། །འབྲས་བུ་གསུམ་པོ་འདི་དག་ནི། །བཅུད་ཀྱིས་ལེན་མཆོག་མིག་ནད་སེལ། །རྨ་འཚོ་ལྤགས་ནད་རྨ་རེད་དང༌། །ཚིལ་ཆེས་གཅིན་སྙི་བད་ཁྲག་སེལ། །ཞེས་བྱ་བ་ལ། ཨ་རུ་ར་དང་སྐྱུ་རུ་ར་དང་བ་རུ་ར་ཞེས་བྱ་བ་དང་གསུམ་མོ། །འབྲས་བུ་གསུམ་ཞེས་ལེགས་བཤད་པ། །འབྲས་བུ་གསུམ་པོ་དེ་ཤེས་བྱ། །ཞེས་འབྱུང་བ་དང༌། གཞན་དག་ལས་ཀྱང༌། འབྲས་བུའི་མཆོག་ནི་རྣམ་གསུམ་མོ། །འབྲས་བུའི་དམ་པ་གསུམ་ཞེས་བཤད་པ་ཡིན་ནོ། །འབྲས་བུ་གསུམ་པོ་དེ་དག་ཉིད་ནི་བཅུད་ཀྱིས་ལེན་པའི་མཆོག་ཅེས་བྱ་བ་སྟེ། བཅུད་ཀྱིས་ལེན་རྣམས་ཀྱི་ནང་ན་དམ་པ་ཡིན་པའོ། །མིག་ནད་སེལ་བ་ནི་མིག་གི་ནད་རྣམས་འཇོམས་པའོ། །རྨ་འཚོ་བ་ནི་རྨ་འབྱོར་ཅིང་སླར་འཚོ་བར་བྱེད་པའོ། །ལྤགས་ནད་ནི་མཛེ་ནད་མེད་པ་ལ་དང༌། སྐྲན་ནད་ལ་སོགས་པའོ། །རྨ་རེད་པ་ནི་རྨ་ལས་ཁྲག་ལ་སོགས་པ་འཛག་པའོ། །ཚིལ་ཆེས་པ་ནི་ལུས་ཟུངས་ཀྱི་ཚིལ་ལྷག་པའོ། །གཅིན་སྙི་བ་ནི་ཆུ་སོའི་ནད་དོ། །བད་ཀན་དང་ཁྲག་ནི་དངོས་སུ་ཟད་དེ། དེ་དག་སེལ་ཞིང་འཇོམས་པར་བྱེད་པ་ཡིན་ནོ། །ཤིང་ཚ་སུག་སྨེལ་བྷ་དྲ་
གསུམ། །གསེར་བཅས་བ་དྲི་བཟངས་བཞི། །ཞེས་བྱ་བ་འདི་ནི། བསྡུས་པའི་ཚིག་ཡིན་པ་ལས་མིང་ཙམ་བསྟན་པའི་ཕྱིར། འགའ་ཞིག་གིས་འདིར་བཅུག་པ་ཡིན་ཏེ། ཤིང་ཚ་དང༌། སུག་སྨེལ་དང༌། གནྡྷ་བྷ་དྲ་གསུམ་ནི་དྲི་བཟངས་གསུམ་ཞེས་བྱ་བ་ལ། གསུམ་པོ་འདི་རྣམས་ཀྱི་སྟེང་དུ་ནཱ་ག་གེ་སར་གྱིས་བསྣན་པ་ནི་དྲི་བཟངས་བཞི་ཞེས་བྱ་བའོ། །འདི་དག་ནི་མིང་ཙམ་བསྟན་པ་ཡིན་གྱི། ཡོན་ཏན་ནི་འདིར་མ་བསྟན་ཏེ་གཞན་ལས་ནི་མིང་ཙམ་བཏུས་པར་ཟད་དོ། །ན་ལེ་ཤམ་ནི་མཁྲིས་སྐྱེད་རྣོ། །རྩུབ་ཅིང་དྲོད་སྐྱེད་ཡི་ག་འབྱེད། །རོ་དང་ཞུ་རྗེས་དག་ཀྱང་ཚ། །བད་ཀན་འཇོམས་ཤིང་ཡང་བ་ཡིན། །ཞེས་བྱ་བ་ལ། ན་ལེ་ཤམ་ནི་མཁྲིས་པ་འཕེལ་བར་བྱེད་པ་ཡིན་པས་ན་མཁྲིས་པ་སྐྱེད་ཅེས་བྱའོ། །དེ་བཞིན་དུ་རྣོ་ཞིང་རྩུབ་པ་ལ་སོགས་པའི་ཡོན་ཏན་དང་ལྡན་པ་ཡིན་ནོ། །པི་པི་ལིང་རློན་བད་སྐྱེད་མངར། །བསིལ་ཞིང་ལྕི་བ་སྣུམ་པ་ཡིན། །ཞེས་བྱ་བ་ལ། པི་པི་ལིང་རློན་པ་ནི་བད་ཀན་སྐྱེད་པར་བྱེད་ཅིང་རོ་མངར་བ་དང༌། ནུས་པ་བསིལ་བ་དང༌། ལྕི་ཞིང་སྣུམ་པའི་ཡོན་ཏན་དང་ལྡན་པ་ཡིན་ནོ། །སྐམ་པོ་དེ་ལས་བཟློག་པ་ཡིན། །སྣུམ་ཞིང་རོ་ཙ་རོ་ཚ་ལ། །ཞུ་རྗེས་མངར་ཞིང་བད་རླུང་དང༌། །ལུད་པ་དབུགས་མི་བདེ་སེལ་འཁྲུ། །དེ་གཉིས་བཅུད་ལེན་མ་གཏོགས་པ། །གཞན་ལ་ཤས་ཆེར་སྦྱར་མི་བྱ། །ཞེས་བྱ་བ་ལ། པི་པི་ལིང་དེ་སྐམ་པོ་ཡིན་ན་ནི། པི་པི་ལིང་རློན་པ་དེ་ལས་ཡོན་ཏན་གོ་བཟློག་པ་ཡིན་ཏེ། དེ་ལས་གོ་བཟློག་པ་ནི་རློན་པ་ནི་བད་ཀན་སྐྱེད་པ་དང༌། མངར་བ་དང་ལྕི་བ་ཡིན་ལ། འདི་ནི་བད་ཀན་སེལ་བ་དང༌། ཁ་བ་དང༌། ནུས་པ་བསིལ་བ་དང་ཡང་བ་ཡིན་ནོ། །དེའི་ཁྱད་པར་གཞན་ཡང༌། སྐམ་པོ་ནི་རོ་ཙ་ཞིང་ཁུ་བ་འཕེལ་བ་དང༌། ཞུ་བའི་རྗེས་མངར་བ་དང༌། དེ་བཞིན་དུ་བད་ཀན་དང༌། རླུང་དང་བད་ཀན་དང༌། དབུགས་མི་བདེ་བསེལ་བར་བྱེད་ཅིང་ཁོང་འཁྲུ་བ་ཡིན་ཏེ། དེ་ལྟ་བུའི་པི་པི་ལིང་དེ་ནི་བཅུད་ཀྱིས་ལེན་གྱི་ཆོ་ག་མ་གཏོགས་པར་གཞན་ལ་ཞེས་པ། ནད་མེད་པར་གནས་པ་དང༌། ནད་པ་དག་གསོ་བའི་སྐབས་ལ་ཤས་ཆེར་སྦྱར་བར་
མི་བྱའོ། །དོང་གྲ་དྲོད་སྐྱེད་རོ་ཙ་དང༌། །འཁྲུ་གཅོད་ཡིད་འོང་མཁྲེགས་པ་སེལ། །ཡི་ག་འབྱེ་ཡང་ཞུ་རྗེས་མངར། །ཁོང་སྣུམ་དྲོད་ཆེ་བད་རླུང་སེལ། །ཞེས་བྱ་བ་ལ། དོང་གྲ་ནི་ལི་དོང་གྲ་སྟེ། མིང་གི་རྣམ་གྲངས་བི་ཤྭ་བི་ཞེས་གྲགས་པའོ། །དེ་ནི་དྲོད་སྐྱེད་པ་ལ་སོགས་པའི་ཡོན་ཏན་དང་ལྡན་པ་ཡིན་ཏེ། ཚིག་གི་དོན་ནི་གོ་བར་ཟད་དོ། །སྒེའུ་གཤེར་དེ་འདྲ། ཞེས་བྱ་བ་ནི། སྒེའུ་གཤེར་ཞེས་བྱ་བ་དོང་གྲ་རློན་པ་ནི་དོང་གྲ་དེ་ཉིད་དང་ཡོན་ཏན་འདྲ་བ་ཡིན་པར་ཤེས་པར་བྱའོ། །དེ་དག་ནི། །ཚ་བ་གསུམ་སྟེ་ཤ་སྦོམ་དང༌། །མེ་དྲོད་ཉམས་དང་དབུགས་མི་བདེ། །ལུད་པ་རྐང་བམ་ཆམ་པ་འཇོམས། །ཞེས་བྱ་བ་ལ། སྔར་བཤད་མ་ཐག་པའི་པི་པི་ལིང་དང༌། ན་ལེ་ཤམ་དང༌། དོང་གྲ་སྟེ་གསུམ་པོ་འདི་དག་ནི་ཚ་བ་གསུམ་ཞེས་བྱ་བར་ཤེས་པར་བྱའོ། །དེ་ནི་ཤ་སྦོམ་པ་ནས་ཆམ་པའི་བར་འཇོམས་པར་བྱེད་དོ། །དབྱི་མོང་པི་པི་ལིང་རྩ་བ། །ནལ་ཤམ་ཡོན་ཏན་ཅུང་ཟད་ཆུང༌། །ཞེས་བྱ་བ་ལ། དབྱི་མོང་དང་པི་པི་ལིང་གི་རྩ་བ་ནི་ན་ལེ་ཤམ་གྱི་ཡོན་ཏན་ལས་ཅུང་ཟད་ཅིག་གིས་ཆུང་བ་ཡིན་པར་ཤེས་པར་བྱའོ། །ཙི་ཏྲ་ཀ་སྟོབས་མེ་དང་མཉམ། །འོར་ནད་གཞང་འབྲུམ་སྲིན་མཛེ་སེལ། །ཞེས་བྱ་བ་ལ། ཙི་ཏྲ་ཀ་ནི་ཀྲུ་ཏྲུག་ཏྲེས་ཞེས་བྱ་བ་སྟེ། དེ་ནི་སྟོབས་མེ་དང་མཉམ་པ་ཡིན་ཏེ། མེ་དང་བྱ་བའི་ལས་མཚུངས་ཏེ། དེ་ནི་ཤིན་ཏུ་ཚ་ཞིང་དྲོ་བས་ཟས་མྱུར་དུ་འཇུ་བར་བྱེད་དོ་ཞེས་བྱ་བའི་དོན་ཏོ། །དཔེར་ན་ཕྱི་རོལ་གྱི་མེས་ཟངས་ན་གནས་པའི་ཆུ་དང་འབྲས་མེ་ལྕེ་འབར་བ་དང་ལྡན་པའི་མདག་མས་སྨིན་པར་བྱེད་པ་ཡིན་ལ། དེ་བཞིན་དུ་ཙི་ཏྲ་ཀ་དང་ལྡན་པ་ནི་མེའི་དྲོད་སྐྱེད་པའི་སྒོ་ནས་འཇུ་བར་བྱེད་པའི་ལས་ཀྱིས། དེ་ཉིད་མེ་དང་འདྲ་བར་འགྱུར་བ་ཡིན་ནོ། །དེ་ཡང་འོར་ནད་དང༌། གཞང་འབྲུམ་དང༌། སྲིན་ནད་དང༌། མཛེ་ནད་སེལ་བར་བྱེད་དོ། །འདི་རྣམས་ལས་ནི་ན་ལེ་ཤམ། །མ་གཏོགས་ཚ་བ་ལྔ་ཞེས་བཤད། །སྐྲན་ཆེན་དམུ་རྫིང་ལྟོ་སྦོས་དང༌། །གཟེར་འཇོམས་དྲོད་ནི་སྐྱེད་པའི་མཆོག །ཅེས་བྱ་བ་ལ། བཤད་མ་ཐག་པའི་པི་པི་ལིང་དང༌། པི་པི་ལིང་མཱུ་ལ་དང༌། དབྱི་མོང་དང༌། ཙིཏྲ་ཀ་དང༌། ལི་དོང་གྲ་སྟེ།
འདི་རྣམས་ལ་ནི་ཚ་བ་ལྔ་ཞེས་བྱ་བའི་མིང་གིས་མིང་དུ་བཏགས་པ་ཡིན་ནོ། །ན་ལེ་ཤམ་མ་གཏོགས་ཞེས་བྱ་བ་ནི་འདིར་ན་ལེ་ཤམ་མི་བགྲང་བ་སྟེ། གང་གི་ཕྱིར་པི་པི་ལིང་ལ་སོགས་པའི་ནང་ན། ན་ལེ་ཤམ་ཡང་བགྲང་མོད་ཀྱི། འདིར་ཚ་བ་ལྔ་ལ་མ་གཏོགས་པས་དེ་བཀར་བ་ཡིན་ནོ། །ཚ་བ་ལྔ་པོ་དེ་ནི་སྐྲན་ལ་སོགས་པ་འཇོམས་པ་དང༌། དེ་བཞིན་དུ་ཤིན་ཏུ་དྲོད་སྐྱེད་པའི་མཆོག་ཡིན་ནོ། །བི་ལ་པ་ཀསྨ་ཏར་ཀ་རི། །པ་ཏ་ལ་དང་དུན་དུ་ཀ །རྩ་ཆེན་ལྔ་པོ་བསྐ་ཁ་དྲོ། །རླུང་དང་བད་ཀན་སེལ་བྱེད་ཡིན། །ཞེས་བྱ་བ་ལ། བིལ་བ་ནི་མིང་གི་རྣམ་གྲངས་སུ་ཤི་རི་ཕལ་ཞེས་བྱའོ། །ཀཤྨ་རྒྱ་ནི་ཤི་མི་པརྞི་འོ། །ཏར་ཀ་རི་ནི་ཨག་ནི་མན་ཐའོ། །པ་ཏ་ལ་ནི་བ་སན་ཏ་དུ་ཏིའོ། །དུན་དུ་ཀ་ནི་སོ་ན་ཀ་སྟེ། དེ་རྣམས་ཀྱི་རྩ་བ་ནི་རྩ་བ་ཆེན་པོ་ལྔ་ཞེས་བྱ་བར་ཤེས་པར་བྱ་སྟེ། དེ་ནི་རོ་བསྐ་ཞིང་ཁ་བ་ཡིན་ལ། ནུས་པ་ནི་དྲོ་བ་ཡིན། ཡོན་ཏན་ནི་རླུང་དང་བད་ཀན་སེལ་བར་བྱེད་པ་ཡིན་ནོ། །ཨང་ཤུ་མ་ཏི་བྲི་ཧ་ཏི། །གཉིས་གཉིས་གཟེ་རྩ་ཆུང་ལྔར་བཤད། །ཞུ་རྗེས་རོ་མངར་ཧ་ཅང་ནི། །བསིལ་དང་ཚ་མིན་ཉེས་ཀུན་སེལ། །ཞེས་བྱ་བ་ལ། ཨང་ཤུ་མ་ཏི་གཉིས་ནི་ས་ལ་པརྞི་དང༌། ཀྲྀཥྞ་པརྞིའོ། །བྲི་ཧ་ཏི་གཉིས་ལས་བྲི་ཧ་ཏི་གཅིག་ནི་ཀཎྜ་ཀཱ་རི་སྟེ། མིང་གི་རྣམ་གྲངས་གཞན་ཡང་ཀྵུ་ཏྲ་ཞེས་བྱའོ། །བྲི་ཧ་ཏི་གཉིས་པ་ནི་སྦོམ་པོ་སྟེ། མིང་གི་རྣམ་གྲངས་གཞན་ཡང་སིང་ཧི་ཞེས་བྱ་བའོ། །གཟེ་མ་ནི་མིང་གི་རྣམ་གྲངས་ཁྱིའི་མཆེ་བ་ཞེས་བྱ་བ་སྟེ། དེ་རྣམས་ཀྱི་རྩ་བ་ནི་རྩ་བ་ཆུང་དུ་ལྔ་ཞེས་བཤད་ལ། དེ་ཡང་ཞུ་བའི་རྗེས་དང་རོ་མངར་བ་ཡིན་ལ། དེ་བཞིན་དུ་ཧ་ཅང་བསིལ་བ་དང༌། ཚ་བ་མ་ཡིན་པ་སྟེ། ཅུང་ཟད་ཚ་བ་ལ་ཅུང་ཟད་བསིལ་བས་ཐུན་མོང་གི་ཆ་མཉམ་པ་སྟེ། དཔེར་ན་མིའི་སེང་གེ་ཞེས་བྱ་བ་ལྟ་བུའོ། །དེ་བཞིན་དུ་རླུང་ལ་སོགས་པའི་ནད་རྣམས་འཇོམས་པས་ན་ནད་ཀུན་སེལ་ཞེས་བྱའོ། །རྩ་བ་ཆེན་པོ་དང་ཆུང་དུ་གཉིས་བསྡུས་པ་ལ་ནི་རྩ་བ་བཅུ་པ་ཞེས་བྱ་སྟེ། དེ་ཡང་ལུང་ལས། རྩ་བ་ཆུང་དང་ཆེན་པོ་ལྔ། །རྩ་བ་བཅུ་པ་ཞེས་བྱར་བཤད། །ཅེས་འབྱུང་བ་ཡིན་ནོ། །བལ་པུརྞ་ཨེ་རཎྜ། །
སུ་པྱ་པརྞི་རྣམ་གཉིས་རྩ། །འབྲིང་ཡིན་བད་ཀན་རླུང་འཇོམས་ཡིན། །ཤིན་ཏུ་མཁྲིས་པ་མི་སྐྱེད་འཁྲུ། །ཞེས་བྱ་བ་ལ། བ་ལ་ནི་མིང་གི་རྣམ་གྲངས་བ་དྷོ་ད་རི་ཞེས་བྱ་བའོ། །པུརྞ་རྣ་བ་ནི་བར་ཤ་བྷུ་ཞེས་བྱ་བའོ། །ཨེ་རཎྜ་ནི་སོར་ལྔ་པ་ཞེས་བྱ་བའོ། །སུ་པྱ་པརྞི་གཉིས་ནི་མུངྒ་པརྞི་དང༌། མ་ཤ་པརྞི་སྟེ། དེ་རྣམས་ཀྱི་རྩ་བ་ལྔ་ནི་རྩ་བ་འབྲིང་པོ་ཡིན་ཏེ། དེ་ནི་བད་ཀན་དང་རླུང་འཇོམས་པར་བྱེད་པ་དང༌། ཤིན་ཏུ་མཁྲིས་པ་མི་སྐྱེད་ཅེས་བྱ་བ། མཁྲིས་པ་ཅུང་ཟད་སྐྱེད་པ་དང༌། ཁོང་འཁྲུ་བར་བྱེད་པ་ཡིན་པར་ཤེས་པར་བྱའོ། །ཉེའུ་ཤིང་ཀ་ཀོ་ལ་འཚོ་བྱེད། །ཛི་བ་ཀ་དང་རི་ཤར་བཤད། །འཚོ་བྱེད་ཅེས་བྱ་མིག་ལ་ཕན། །རོ་ཙ་རླུང་དང་མཁྲིས་པ་སེལ། །ཞེས་བྱ་བ་ལ། ཉེའུ་ཤིང་ནི་ཨ་བྷི་རུའོ། །ཀ་ཀོ་ལ་ནི་བི་རའོ། །འཚོ་བྱེད་ནི་ཛི་བན་ཏི་སུ་མ་ག་ལ་ཞེས་བྱ་བའོ། །ཛི་བ་ཀ་ནི་ཀུར་ཙ་ཤིང་ཤིའོ། །རི་ཤ་བ་ནི་བི་ཤ་ནི་སྟེ། རྩ་བ་ལྔ་པོ་དེ་དག་ནི་འཚོ་བྱེད་ཀྱི་རྩ་བ་ལྔ་ཞེས་བྱ་བར་ཤེས་པར་བྱའོ། །དེ་ནི་མིག་གཉིས་ལ་ཕན་པ་ཡིན་པས་ན། མིག་ལ་ཕན་པ་ཞེས་བྱ་ལ། དེ་བཞིན་དུ་རོ་ཙ་བ་དང༌། རླུང་དང་མཁྲིས་པ་སེལ་བ་ཡིན་ནོ། །འཇག་མ་ཀུ་ཤ་འབྲས་བུར་ཤིང༌། །འདམ་རྩ་རྩར་བཤད་ལྔ་མཁྲིས་སེལ། །ཞེས་བྱ་བ་ལ། འཇག་མ་དང་ཀུ་ཤ་གཉིས་ཀ་རིགས་གཅིག་པ་ལ་སོགས་པ་དང༌། ཕྲ་བའི་ཁྱད་པར་གྱིས་གཉིས་སུ་བཤད་པ་ཡིན་ནོ། །ཀུ་ཤ་ནི་ཡང་འཇག་མ་ཅན་གྱི་རྩའི་ཁྱད་པར་རོ། །འབྲས་ནི་གྲ་མ་ཅན་གྱི་སྡེ་ཚན་ལས་བཤད་པའི་རཀྟ་ཤ་ལི་ལ་སོགས་པའོ། །བུ་རམ་ཤིང་དང་འདམ་བུ་ནི་གྲགས་པར་ཟད་དོ། །དེ་རྣམས་ཀྱི་རྩ་བ་ནི་རྩ་བ་ལྔ་ཞེས་བྱ་བའི་རྩ་བ་ལྔ་པ་ཡིན་ལ། དེ་ནི་མཁྲིས་པ་འབའ་ཞིག་སེལ་བར་བྱེད་པ་ཡིན་ནོ། །གྲ་མ་གང་བུ་གཡོས་སྦྱར་ཟས། །ཤ་དང་ཚོད་མ་ཤིང་ཏོག་སྨན། །ཟས་ཆ་ཅུང་ཟད་ཚན་གདུས་འདི། །རྟག་ཏུ་དགོས་པ་ཡོད་པར་སྨྲས། །ཞེས་བྱ་བ་ལ། བཟའ་བར་བྱ་བ་ཡིན་པས་ན་ཟས་ཏེ། དེ་ནི་གྲམ་ཅན་དང༌། གང་བུ་ཅན་དང༌། གཡོས་སུ་སྦྱར་བ་དང༌། ཤ་དང༌། ཚོད་མ་དང༌། ཤིང་ཏོག་དང༌། སྨན་སྣ་ཚོགས་དང༌། ཚོད་མ་སྣ་ཚོགས་ཚོད་མ་ལ་དགོས་
པའི་རྫས་ཅུང་ཟད་ཡོད་པ་དེ་དག་ཀྱང་ཟས་དང་འདྲ་བར་ནད་སེལ་བར་གནས་པ་དང༌། ནད་པ་རྣམས་ཁམས་སྙོམས་པར་བྱ་བའི་ཕྱིར་སྦྱར་བར་བྱ་བ་ཡིན་ཞིང་སྐྱོན་མེད་པ་ཉིད་ལ་རྟག་ཏུ་དགོས་པས་འདིར་བཤད་ཅིང་སྨྲས་པ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་དྲུག་པའི་རྣམ་པར་འགྲེལ་པའོ།། །།དེ་ནས་ཁ་ཟས་བསྲུང་བའི་ལེའུ་བཤད་པར་བྱའོ་ཞེས་བྱ་བ་ལ། དེ་ནས་ཞེས་བྱ་བ་ནི་འདས་མ་ཐག་པ་སྟེ། ཟས་དང་སྐོམ་ཕན་པ་དང༌། གནོད་པའི་དབྱེ་བས་ཕྱེ་སྟེ། བཤད་པ་དེ་ལ་ཡང་དུག་ལ་སོགས་པ་དང་འབགས་པའམ། མི་མཐུན་པ་ཟོས་པ་དག་དགག་པར་བྱ་བ་ཡིན་པས། དེའི་རྗེས་ཐོགས་ལ་འདི་བརྩམས་པ་ཡིན་ནོ། །དེ་ལ་བཟའ་བར་བྱ་བ་ཡིན་པས་ན་ཟས་སོ། །དེ་བསྲུང་བ་ནི་དུག་ལ་སོགས་པ་དང་མ་འདྲེས་པར་ཡོངས་སུ་བསྲུང་ཞིང་བསྡམ་པའོ། །དེའི་ལེའུ་གོང་དུ་བསྟན་པའི་ལེའུ་དེ་ཡང་ཉེ་བར་གདགས་པས་དེ་སྐད་ཅེས་བྱའོ། །དེ་ལྟར་ན་ཟས་དང་སྐོམ་ལ་སོགས་པས་སྤགས་པ་དང་མི་མཐུན་པའི་ཁ་ཟས་ལེའུ་གང་དུ་དགག་པར་བྱེད་པའི་ལེའུ་དེ་བརྩམ་པར་བྱ་སྟེ། གང་གི་ཕྱིར་ཡོན་ཏན་དང་ལྡན་པའི་ཟས་དང་སྐོམ་ནི་སྲོག་འཛིན་པར་བྱེད་པ་ཡིན་པས། སྲོག་དང་འདྲ་བ་དེ་ཉིད་དུག་ལ་སོགས་པ་དང་ཉེ་བར་བཅོམ་པ་དང༌། དེ་བཞིན་དུ་མི་མཐུན་པར་གྱུར་པ་ནི་གསོད་པར་གྱུར་པ་ཉིད་ཡིན་ཏེ། དེ་བས་ན་ཟས་ཀྱི་ཚུལ་ཤེས་པའི་ལེའུ་རྗེས་ཐོགས་ལ་འདི་བརྩམས་པ་ཡིན་ལ། རྒྱལ་པོའི་ཕོ་བྲང་ཉེ་འཁོར་དུ། །སྲོག་འཚོའི་སློབ་དཔོན་གཞག་པར་བྱ། །དེ་ལྟར་བྱས་པས་ཐམས་ཅད་དུ། །ཐམས་ཅད་ལས་ནི་བསྲུང་བར་འགྱུར། །ཞེས་བྱ་བ་ལ། རྒྱལ་པོ་ནི་ས་བདག་གོ །ཕོ་བྲང་ཉེ་འཁོར་ནི་རྒྱལ་པོའི་བཞུགས་གནས་དང༌། འདབ་ཉེ་བར་རོ། །སྲོག་འཚོའི་སློབ་དཔོན་ནི་སྨན་པ་སྟེ། སྨན་པ་རྣམས་ཀྱི་མཆོག་ཏུ་གྱུར་པའོ། །དེ་གཞག་པར་བྱ་ཞེས་པ། ཕོ་བྲང་ཉེ་བ་ཁོ་ནར་གཞག་པར་བྱ་ཞིང་གནས་པར་བྱ་བ་སྟེ། དེར་དེའི་ཁང་པ་ཞེས་བྱ་བའི་དོན་ཏོ། །དེ་
ལྟར་བྱས་པས་ཞེས་པ་དེ་ལྟར་ཉེ་བར་བསྟེན་པར་གྱུར་པས། སྨན་པ་དེ་ཐམས་ཅད་དུ་ཞེས་པ་དུས་ཐམས་ཅད་དུ། ཐམས་ཅད་ལ་ཞེས་པ་ཟས་དང་སྐོམ་ལ་སོགས་པ་རྣམས་ལ་བསྲུང་ཞིང་སྡོམ་པར་འགྱུར་རོ་ཞེས་བྱ་བའི་དོན་ནོ། །ཁྱད་པར་དུ་ནི་ས་བདག་གི །ཟས་སྐོམ་དུག་ལས་བསྲུང་བར་བྱ། །ཆོས་ལ་སོགས་དང་གང་འབྲེལ་པའི། །འབྱོར་བདེ་དེ་ལ་རག་ལས་སོ། །ཞེས་བྱ་བ་ལ། ཁྱད་པར་དུ་ཞེས་བྱ་བ་རབ་ཏུ་འབད་པས་ས་བདག་སྟེ། རྒྱལ་པོའི་ཟས་ལ་སོགས་པ་བསྲུང་ཞིང་བསྡམ་པར་བྱའོ། །ཟས་དང་སྐོམ་ཞེས་བྱ་བ་ནི་ཉེ་བར་མཚོན་པ་ཙམ་དུ་ཟད་དོ། །དེས་ན་རྒྱལ་པོའི་ལོངས་སྤྱོད་དུ་དགོས་པའི་ན་བཟའ་དང༌། གཟིམས་མལ་དང༌། དྲི་དང༌། ཕྲེང་བ་དང༌། རིན་པོ་ཆེ་ལ་སོགས་པ་དག་ཀྱང་དུག་ལས་བསྲུང་བར་བྱ་སྟེ། དེ་ཅིའི་ཕྱིར་ཞེ་ན། ཆོས་སྤྱད་པ་དང༌། སོགས་པ་ཞེས་བྱ་བ་ནོར་དང༌། འདོད་པ་དང་ཐར་པ་རྣམས་དང་གང་འབྲེལ་ཞིང་རྒྱུར་གྱུར་པའི་སྐྱེ་དགུ་དང༌། བདག་ཉིད་ཀྱི་འབྱོར་པ་དང༌། བདེ་བ་ནི་རྒྱལ་པོ་དེ་ལ་རག་ལས་ཤིང་དེའི་ཁ་ན་ལུས་པ་ཡིན་ནོ། །དེ་ལ་འབྱོར་པ་ནི་ལོངས་སྤྱོད་མ་ཐོབ་པ་རྣམས་ཐོབ་པར་བྱེད་པའོ། །ཐོབ་པ་རྣམས་ཡོངས་སུ་བསྲུང་བ་ནི་བདེ་བ་སྟེ། དེ་གཉི་ག་ཡང་རྒྱལ་པོ་དེ་ལ་རག་ལུས་པ་ཡིན་ནོ། །དེ་བས་ན་དེའི་གནོད་པ་བསྲུང་བར་བྱ་དགོས་སོ། །དེ་དག་ཀྱང་ཇི་ལྟར་ཤེས་ཤིང་བསྲུང་བར་བྱ་ཞེ་ན། འབྲས་ཆན་དུག་བཅས་གཤེར་བག་ཀྱང༌། །སྐམ་བག་ཅན་ནི་འདྲ་བར་འགྱུར། །ཡུན་རིང་ཚོས་པར་གྱུར་པ་དང༌། །ཚོས་པའང་ཞག་ལོན་ལྟ་བུར་འགྱུར། །རླངས་པ་རྨ་བྱའི་མགྲིན་འདྲ་ཞིང༌། །ཁོང་མྱོས་བརྒྱལ་དང་ལུས་རྡུལ་སྐྱེད། །དྲི་དང་མདོག་སོགས་ཉམས་པར་འགྱུར། །རུལ་ཞིང་རྨ་བྱའི་སྒྲོ་ལྟར་འཚེར། །ཞེས་བྱ་བ་ལ། འབྲས་ཆན་ནི་འབྲས་བཙོས་པའི་ཆན་ཏེ། དེ་དུག་དང་བཅས་ཤིང་དུག་གིས་སྦགས་པར་གྱུར་ན། གཤེར་བག་དག་ཀྱང་སྐམ་བག་ཅན་འདྲ་བར་འགྱུར་ཏེ། རླན་བག་མེད་ཅིང་བཅང་དུ་མི་འདོད་པར་འགྱུར་རོ། །དེ་བཞིན་དུ་ཚོས་དཀའ་བར་འགྱུར་ཏེ། དུས་རིང་མོས་ཚོས་པར་འགྱུར་བ་དང༌། དེ་ཚོས་པར་གྱུར་ནས་ཀྱང་འཕྲལ་
དུ་ཞག་ལོན་པ་ལྟ་བུར་འགྱུར་ཏེ། ཉིན་ཞག་གཅིག་འདས་པ་ལྟར་རླངས་པ་མེད་ཅིང་བསྡུར་མི་འདོད་པར་འགྱུར་རོ། །དེ་བཞིན་དུ་དེའི་རླངས་པ་རྨ་བྱའི་མགྲིན་པ་འདྲ་བར་ཁ་དོག་སྣ་ཚོགས་པར་འགྱུར་བས་ན། རླངས་པ་རྨ་བྱའི་མགྲིན་པ་འདྲ་ཞེས་བྱའོ། །དེ་ཟོས་པར་གྱུར་ནས་ཀྱང༌། ཁོང་མྱོས་པ་དང༌། བརྒྱལ་བ་དང༌། ལུས་རྡུལ་བ་སྐྱེད་པར་འགྱུར་ཏེ། ཁོང་མྱོས་པ་ནི་སེམས་མེད་པའོ། །བརྒྱལ་བ་ནི་འདུ་ཤེས་ཉམས་པའོ། །ལུས་རྡུལ་བ་ནི་བད་ཀན་འཐོན་པའོ། །ཡང་འབྲས་ཆན་དེ་དྲི་དང་མདོག་སོགས་ཞེས་པའི་དྲི་དང། ཁ་དོག་དང༌། རོ་དང༌། རེག་པ་རང་གི་ཇི་ལྟ་བ་ཉིད་ཉམས་ཤིང་འཇིག་པར་འགྱུར་རོ། །དེ་བཞིན་དུ་རུལ་ཅིང་ཞེས་པ། རབ་ཏུ་འདྲུལ་བར་འགྱུར་རོ་ཞེས་བྱ་བའི་དོན་ཏོ། །དེ་བཞིན་དུ་རྨ་བྱའི་སྒྲོ་ལྟར་འཚེར་བ་ཞེས་བྱ་སྟེ། རྨ་བྱའི་མཇུག་སྒྲོའི་རྩེ་མོ་ལྟ་བུའམ། ཆུ་ནང་དུ་ཏིལ་མར་གྱི་ཐིགས་པ་བོར་བ་ལྟར་སྔོ་དམར་འཚེར་བར་འགྱུར་རོ། །ཚོད་མ་མྱུར་དུ་སྐམ་པ་དང༌། །བསྐོལ་བ་མདོག་ནི་གནག་འགྱུར་ཞིང༌། །དེར་གཟུགས་ཆུང་བའམ་ཆེ་བའམ། །མི་སྡུག་པའམ་མི་སྣང་འགྱུར། །སྦུབ་སྟེང་བྱུང་རི་མོ་མཚམས། །ཁ་ཆུ་འདྲ་དང་ཆུ་བུར་འབྱུང༌། །ཞེས་བྱ་བ་ལ། ཚོད་མ་ཞེས་བྱ་བ་ནི་སྲན་ཚོད་ལ་སོགས་པ་སྟེ། དེ་ལ་དུག་ཡོད་ན་མྱུར་དུ་སྐམ་པར་འགྱུར་བ་དང༌། དེ་བཞིན་དུ་བསྐོལ་བ་ནི་མདོག་གནག་ཅིང་དྲི་མ་ཅན་དུ་འགྲོ་བ་དང༌། དེར་ཞེས་པ་ཚོད་མ་བསྐོལ་བ་དེར་རང་གི་གཟུགས་ཀྱི་རང་བཞིན་ལས་ཆུང་ཞིང་ཞན་པའམ། ཆེ་ཞིང་ལྷག་པའམ། མི་སྡུག་པ་སྟེ། རང་བཞིན་གཞན་དུ་སྣང་བར་འགྱུར་རོ། །ཡང་ན་དེར་རང་གི་རྣམ་པ་ཉིད་སྣང་བར་མི་འགྱུར་རོ། །ཡང་ཚོད་མ་བསྐོལ་བ་དེར་སྦུ་བ་ལ་སོགས་པ་འབྱུང་བ་ལས་ཀྱང་ཤེས་པར་བྱ་སྟེ། དེ་ལ་སྦུ་བ་ནི་སྦུ་བའི་རྣམ་པར་འབུར་དུ་ཆས་ཤིང་འབྱུང་སྟེ། དེའི་ནང་ན་རི་མོ་སྣ་ཚོགས་པ་དག་སྣང་བའམ། མཚམས་འབྱེ་ཞིང་འཆད་པ་ལྟ་བུར་སྣང་བ་དང༌། ཁ་ཆུ་འདྲ་བར་ན་ལ་ནལ་པོར་འབྱུང་བ་དང༌། ཆུ་བུར་དག་ཇི་ལྟར་ཆུའི་ནང་ན་སྣང་བ་དང་འདྲ་སྟེ། དེ་དག་དེར་འབྱུང་བར་འགྱུར་ཏེ། བཏུང་བ་མངར་
སྐྱུར་ཚོད་མ་དང༌། །ཤ་དག་མཚམས་འབྱེད་རོ་དང་བྲལ། །ཞེས་བྱ་བ་ལ། བཏུང་བ་ནི་རྒུན་འབྲུམ་ལ་སོགས་པ་ལ་སྔར་སྦྱར་བ་ཕལ་ཆེར་མདོག་དམར་པོར་སྣང་ཞིང་མངར་བ་དང་སྐྱུར་བ་སྟེ། ཡང་བཏུང་བའི་བྱེ་བྲག་བ་ལ་བོའི་སེའུ་ལ་སོགས་པ་ལས་བྱས་པའི་རོ་སྐྱུར་བ་དང༌། ཚོད་མ་སྟེ། ཤུ་ཤ་དང༌། པ་ཐ་ལ་སོགས་པ་དང༌། ཤ་བཙོས་པ་དག་སྟེ། བཏུང་བ་མང་པོ་མདོག་ཅན་ལ་སོགས་པ་དེ་ཐམས་ཅད་དུག་དང་བཅས་པར་གྱུར་ན། མཚམས་འབྱེ་བ་དང༌། རོ་དང་བྲལ་བར་འགྱུར་ཏེ། རོ་དྲུག་པོ་དག་མི་སྣང་ཞིང་གསལ་བར་མི་རྙེད་པར་འགྱུར་ཏེ། དེ་ལྟར་ན་རོ་དང་བྲལ་བ་སྟེ་རོ་མི་ཞིམ་པ་དང༌། ཕྱིན་ཅི་ལོག་གི་རོ་དང་ལྡན་པར་འགྱུར་བའི་དོན་ནོ། །ཤ་ཁུ་རི་མོ་སྔོར་སྣང་ཞིང༌། །འོ་མ་ཟངས་མདོག་ཞོ་དྲི་མ། །དར་བ་ལ་ནི་སེར་དང་གནག །མར་ཁུ་ཆུ་དང་འདྲ་བར་སྣང༌། །ཆང་དང་ཆུ་གནག་སྦྲང་རྩི་ལ། །ལྗང་སྣང་ཏིལ་མར་དག་ལ་དམར། །ཞེས་བྱ་བ་ལ། ཤ་ཁུ་ནི་ཤ་ལས་བྱས་པའི་ཁུ་བ་སྟེ། དེ་དུག་གིས་སྦགས་པར་གྱུར་པ་ན། དབུས་ན་རི་མོ་སྔོན་པོར་སྣང་བར་འགྱུར་རོ། །འོ་མ་ལ་དུག་གིས་སྦགས་ན། ནང་ན་ཟངས་ཀྱི་མདོག་ལྟ་བུར་སྣང་བར་འགྱུར་རོ། །ཞོ་ལ་དུག་ཡོད་ན་རི་མོ་དྲི་མ་ཅན་སྣང་བར་འགྱུར་རོ། །དར་བ་ལ་དུག་ཡོད་ན་ནི་རི་མོ་སེར་པོ་དང་ནག་པོ་སྣང་བར་འགྱུར་རོ། །མར་དུག་དང་འདྲེས་ན་ནི་རི་མོ་ཆུ་དང་འདྲ་བར་སྣང་བར་འགྱུར་རོ། །ཆང་དང་ཆུ་ལ་དུག་ཡོད་ན་གནག་ཅིང་སྣག་ཚ་ལྟར་སྣང་བར་འགྱུར་རོ། །སྦྲང་རྩི་ལ་དུག་ཡོད་ན་ནི་ལྗང་གུར་སྣང་ཞིང་མདོག་སྡོ་བསངས་སུ་སྣང་བར་འགྱུར་རོ། །ཏིལ་མར་ལ་དུག་ཡོད་ན་ནི་རི་མོད་མར་ཞིང་ཟངས་ལྟར་སྣང་བར་འགྱུར་རོ། །ཤིང་ཏོག་མ་སྨིན་སྨིན་པར་སྣང༌། །སྨིན་པ་དག་ནི་ཡོངས་སུ་འདྲུལ། །ཞེས་བྱ་བ་ནི། ཤིང་ཏོག་མ་སྨིན་པ་ལ་དུག་གིས་སྦགས་པ་ནི། སྨིན་པ་ལྟ་བུར་སྣང་བར་འགྱུར་ལ། ཤིང་ཏོག་སྨིན་པ་རྣམས་ལ་དུག་གིས་སྦགས་པ་ནི་ཡོངས་སུ་འདྲུལ་ཞིང་རུལ་བར་འགྱུར་རོ། །ཁ་ཟས་རློན་དང་སྐམ་པ་དག །རྙིངས་ཤིང་མདོག་ནི་ཉམས་པར་འགྱུར། །ཞེས་བྱ་བ་ལ། ཁ་ཟས་རློན་པ་ནི་དུག་གིས་སྦགས་ན་ནི་
རྙིངས་པར་འགྱུར་ལ། ཁ་ཟས་སྐམ་པོ་དག་ལ་དུག་གིས་སྦགས་ན་ནི་མདོག་ཉམས་ཤིང་ཁ་དོག་དང་བྲལ་བར་འགྱུར་ཏེ། འདིར་ཚིག་གཉིས་གོ་རིམས་བཞིན་སྦྱར་བར་བྱའོ། །སྙི་བ་དང་ནི་སྲ་བ་དག །རེག་པ་གོ་ནི་བཟློག་པར་འགྱུར། །ཞེས་བྱ་བ་ལ། རྫས་སྙི་བ་རྣམས་དང༌། དེ་བཞིན་དུ་སྲ་བ་དག་ལ་དུག་གིས་སྦགས་ན། རེག་བ་གོ་བཟློག་པར་འགྱུར་ཏེ། སྙི་བ་ནི་སྲ་བར་འགྱུར། སྲ་བ་ནི་སྙི་བར་འགྱུར་ཏེ། འདི་ནི་རེག་པའི་གོ་བཟློག་པའོ། །མེ་ཏོག་ཕྲེང་རྩེ་ལོ་མ་གས། །རྙིད་ཅིང་དྲི་ནི་མི་ཞིམ་འགྱུར། །ཞེས་བྱ་བ་ལ། གལ་ཏེ་མེ་ཏོག་གི་ཕྲེང་བ་ལ་དུག་ཡོད་ན་ནི་དེའི་རྩེ་མོ་གས་ཤིང་ཟད་པ་དང༌། རྙིད་ཅིང་ཀུན་ཏུ་དེངས་པར་འགྱུར་བ་དང༌། དྲི་མི་ཞིམ་པ་སྟེ་དྲི་ཞིམ་པོ་དང་བྲལ་ནས། དྲི་མནམ་པ་གཞན་དག་འབྱུང་བར་འགྱུར་རོ། །གོས་ལ་ནག་པོ་ཏལ་ཏིལ་དང༌། །སྤུ་རྣམས་འཐུལ་ཞིང་ཁ་ཚར་འཆད། །ཅེས་བྱ་བ་ལ། སྟེང་ནས་བགོ་བ་དང་འོག་ཏུ་གདིང་བ་ལ་སོགས་པའི་གོས་རྣམས་ལ་དུག་གིས་བསྒོས་པ་ན་ནི་རི་མོ་དྲི་མ་ཅན་ཏལ་ཏིལ་དག་སྣང་བ་དང༌། གོས་ཀྱི་སྤུ་རྣམས་རྣམ་པར་འཐུལ་ཞིང་ཆད་པ་དང༌། ཁ་ཚར་གཅད་ཅིང་ལྷུང་བར་འགྱུར་རོ། །གསེར་དངུལ་མུ་ཏིག་ཤིང་དང་རྡོ། །རིན་ཆེན་སོགས་ལ་དྲི་མ་ཆགས། །གཟི་མདངས་རེག་པ་འོད་ཉམས་འགྱུར། །ཞེས་བྱ་བ་ལ། གསེར་དངུལ་གྱི་ཁམས་ཀྱི་རང་བཞིན་ཅན་གྱི་རིན་པོ་ཆེ་རྣམས་ཏེ། འདི་དང་གཞན་ཡང་བསྡུའོ། །མུ་ཏིག་ནི་མུ་ཏིག་གི་རྡོ་གུའོ། །ཤིང་དང་རྡོ་ནི་དངོས་སུ་ཟད་དོ། །རིན་ཆེན་ནི་བཻ་ཌཱུཪྻ་དང༌། རྡོ་རྗེ་ལ་སོགས་པ་སྟེ། གསེར་དངུལ་ལ་སོགས་པ་འདི་རྣམས་ལ་དུག་གིས་སྦགས་ན་དྲི་མ་ཆགས་པ་སྟེ། །འདམ་གྱིས་བསྐུས་པ་འདྲ་བར་འགྱུར་བ་དང༌། དེ་བཞིན་དུ་གསེར་དངུལ་ལ་སོགས་པ་འདི་རྣམས་ཉིད་ཀྱི་གཟི་མདངས་དང༌། རེག་པ་དང་འོད་ཉམས་ཤིང་མེད་པར་འགྱུར་རོ། །ས་ཡི་སྣོད་ནི་མདོག་བཅས་བྱེད། །ཅེས་བྱ་བ་ལ། སའི་སྣོད་ཅེས་བྱ་བ་ཁམ་ཕོར་ལ་སོགས་པ་ལས་བྱས་པའི་སྣོད་རྣམས་ནི་མདོག་མེད་པ་དག་ཀྱང༌། མདོག་དང་བཅས་ཤིང་གཟིམ་དངས་ཅན་དུ་འགྱུར་རོ། །
དུག་སྟེར་ཁ་ནི་སྔོ་བསྐམས་ལ། །གནོང་བག་གི་ས་ནི་ཕྱོགས་སུ་བལྟ། །རྡུལ་ཞིང་འདར་ལ་སྐྲག་པ་དང༌། །འཇིགས་ཤིང་འགྲོས་འཁྱོར་གླ་ལ་བ་དང༌། །ཞེས་བྱ་བ་ལ། དུག་སྟེར་ཞིང་སྦྱིན་པར་བྱེད་པས་ན་དུག་སྟེར་ཏེ། དུག་སྦྱོར་བའི་མིའོ། །དེའི་ཁ་ནི་སྔོ་བསྐམས་ལ་ཞེས་བྱ་བ། དེའི་ཁ་སྔོ་ཞིང་བསྐམས་པར་གྱུར་པ་དང༌། དེ་བཞིན་དུ་གནོད་བག་གིས་ཞེས་བྱ་བ་ངོ་ཚ་བ་དང་བཅས་པ་ལྟ་བུར་གཡེར་བག་མེད་པ་དང༌། ཕྱོགས་ཀུན་ཏུ་བལྟ་ཞིང་རྟོག་པར་བྱེད་པ་དང༌། དེ་བཞིན་དུ་ལུས་ཚ་ལ་རྡུལ་ཞིང་འདར་བག་དང་ལྡན་ལ། རང་གི་ཉེས་པའི་དོགས་པས་སྐྲག་པ་སྟེ། ཁོང་སྐྱོ་བ་དང༌། འཇིགས་པ་སྟེ་བྲེད་པ་དང་བཅས་པ་དང༌། འགྲོས་འཁྱོར་བ་སྟེ། རྡེག་འཆོས་ཤིང་འཚོ་བ་དང༌། དེ་བཞིན་དུ་གླལ་ཞིང་ཁ་གདངས་པར་བྱེད་པར་འགྱུར་རོ། །དུག་ལྡན་ཟས་ནི་མེས་བསྲེགས་ན། །མེ་ལྕེ་གཅིག་འཁྱིལ་མེ་སྟག་རྒལ། །དུ་བ་རྨ་བྱའི་མགྲིན་འདྲར་འགྱུར། །མེ་ལྕེ་མི་འབར་འབར་ཡང་མནན། །སྦྲང་མས་ཟོས་ན་འཆི་བར་འགྱུར། །བྱ་རོག་གིས་ཟོས་སྐ་ད་ཞན་འགྱུར། །འདི་ནི་ནི་ཚོ་ད་རུ་ཧ། །རི་སྐེགས་ཀྱིས་མཐོང་ཅ་ཅོ་འབྱིན། །དང་པས་ཟོས་ན་རྡེག་འཆོས་ལ། །ཤང་ཤང་ཏེའུ་ན་བར་འགྱུར། །སྲེག་པ་མིག་ནི་མི་ཆགས་བྱེད། །ཁྲུང་ཁྲུང་དག་ནི་འཛུར་བར་འགྱུར། །ཕུག་རོན་ཁུ་བྱུག་བྱ་ག་ག་དང༌། །དུར་པས་ཟོས་ན་འཆི་བར་འགྱུར། །བྱི་ལ་སྐྱོ་ཞིང་འདོར་བར་འགྱུར། །སྤྲེའུ་མི་གཙང་འདོར་བར་བྱེད། །རྨ་བྱས་དེ་མཐོང་དགའ་བར་བྱེད། །དུག་གི་དཔལ་ནི་ཉམས་པར་འགྱུར། །དེ་ལྟར་ཟས་ནི་དུག་ལྡན་བར། །ཤེས་ཤིང་ལྕི་ནས་དེ་ཡིས་ནི། །སྲོག་ཆགས་ཕྲ་མོ་ཡན་ཆད་ལའང༌། །གནོད་པར་འགྱུར་བར་འབད་དེ་དོར། །རེག་ན་གཡའ་ཞིང་ཚ་ལ་ན། །རིམས་འདེབས་འབྲུམ་འབྱུང་ཚོར་བ་ཆུང༌། །སེན་མོ་སྤུ་འབྱུང་ལུས་སྐྲང་སྟེ། །དེ་ལ་དུག་ནི་རྣམ་འཇིག་པའི། །ཙནྡན་ཤུག་པ་པུ་ཤེལ་ཙེ། །སོ་མའི་ཤུན་བཅས་བལ་བུའི་འདབ། །རུ་རྟ་སླེ་ཏྲེས་ཨ་ཀ་རུའི། །ཆུས་བཀྲུས་བླུགས་ཤིང་བསྐུ་བར་བྱ། །ཁར་ཆུད་ནས་ནི་མཆིལ་སྣབས་མང༌། །ལྕེ་མཆུ་སྦྲིད་ཅིང་བེམ་པོར་
བྱེད། །ལུས་ཚ་ན་ཞིང་སོ་བརྩེ་ལ། །རོ་མི་ཚོར་ཞིང་འགྲམས་སོ་འཐམས། །དེ་ལ་དུག་ཀུན་འཇོམས་སྨན་དང༌། །ཨུར་ཤི་སོགས་ཁུས་ཁུར་བཀང་དབོ། །མ་ཞུའི་གནས་བབས་རྡུལ་བ་དང༌། །བརྒྱལ་ཞིང་ལྟོ་སྦོས་མྱོས་མགོ་འཁོར། །བ་སྤུ་ལྡང་ཞིང་སྐྱུག་ལུས་ཚ། །མིག་ནི་གསལ་ཞིང་སྙིང་མི་དྲན། །ཡན་ལག་ཐིག་ལེས་ཁྱབ་པར་འགྱུར། །ཞུ་བའི་གནས་སུ་ཕྱིན་ན་ཡང༌། །ཁ་དོག་སྣ་ཚོགས་སྐྱུག་པ་དང༌། །གཅིན་མང་རབ་ཏུ་འཁྲུ་བར་འགྱུར། །རྨྱ་སྙོམ་སྐོམ་ཞིང་མདོག་སྐྱ་ལ། །གསུས་པ་ཆེ་ཞིང་ཉམས་སྟོབས་ཟད། །དེ་གཉིས་སློན་དང་ཁྲུས་བྱས་ནས། །སེར་གཉིས་བུ་རམ་གི་རི་ཀར། །སེན་དུ་བ་རི་ནིས་པ་བ། །བ་ཤིས་ཀ་དང་ཚིགས་བརྒྱ་པ། །ཏན་དུ་ལི་ཡའི་རྩ་བ་དང༌། །བྱ་གག་སྒོ་ང་བལ་གུ་ཟ། །སྣར་གཏོང་མིག་སྨན་བླུད་བྱ་བ། །དུག་ཞིའི་ཕྱིར་ནི་སྦྱར་བར་བྱ། །ཞེས་བྱ་བ་ལ། དེ་གཉིས་ཞེས་པ་མ་ཞུ་བ་དང༌། ཞུ་བའི་གནས་དག་སློན་དང་ཁྲུས་བྱ་བ་སྟེ། སློན་སྨན་གྱིས་མ་ཞུ་བའི་གནས་ནས་སློན་ཅན་དེ་དྲངས་པ་དང༌། འཁྲུ་སྨན་གྱིས་འདུ་བའི་གནས་ནས་ཁྲུས་བྱ་ཞིང་བཏོན་ནས། དེ་ལྟར་ལེགས་པར་སྦྱང་བའི་ལུས་ལ་སེར་པོ་གཉིས་ལ་སོགས་པ་ནས། སྣ་ནས་བཏང་ཞིང་མིག་སྨན་ཁུ་བ་དང༌། བླུད་པའི་བར་གྱི་སྦྱོར་བ་དུག་ཞི་བར་བྱ་བའི་ཕྱིར་སྦྱར་བར་བྱའོ། །དེ་ལ་སེར་པོ་གཉིས་ཞེས་བྱ་བ་ནི་ཡུང་བ་དང་སྐྱེར་པ་སྟེ། སེར་པོ་རྣམ་པ་གཉིས་སོ། །བུ་རམ་ནི་བུ་རམ་ཤིང་ལས་བྱུང་བའི་བུ་རམ་དཀར་པོའོ། །གི་རི་ཀར་ནི་ག་ཏ་བིའོ། །སེན་དུ་བི་ར་ནི་ཤྭེ་ཏ་པུཥྤེའོ། །ནིས་པ་བ་ནི་གང་བུ་ཅན་གྱི་འབྲུའི་ཁྱད་པར་ཞིག་གོ །བ་ཤིས་ཀ་ནི་ཧེ་གུ་བ་ཏྲའོ། །ཏན་དུ་ལི་ཡ་ནི་མེ་གནྡྷ་སྟེ། དེའི་རྩ་བའོ། །བྱ་གག་གི་སྒོ་ང་ནི་ཁྱིམ་བྱའི་སྒོ་ངའོ། །ཨ་བལ་གུ་ཟ་ནི་སོ་མ་ར་ཛ་སྟེ། རྫས་དེ་རྣམས་ཆ་སྙོམས་ལ་ལྡེ་གུར་བྱས་ཏེ་སྣ་ནས་གཏང་བ་དང༌། མིག་སྨན་དུ་བསྐུ་བ་དང༌། བླུད་ཅིང་སྦྱིན་པར་བྱ་བ་དག་དུག་ཞི་བར་བྱ་བའི་ཕྱིར་བྱའོ། །དུག་འཐུངས་པ་དག་སྟེང་དང་ནི། །དེ་བཞིན་འོག་ནི་སྦྱངས་གྱུར་ནས། །དུས་སུ་ཟངས་བཟང་བདར་ཕྱེ་མ། །
སྦྲང་རྩིར་བཅས་པ་སྙིང་སྤྱོད་སྦྱིན། །ཞེས་བྱ་བ་ལ། དུག་འཐུངས་པའི་སྐྱེས་བུ་དེ། སློན་སྨན་དང་ཁྲུས་སྨན་གྱིས་སྟེང་སྟེ་རོ་སྟོད་དང༌། འོག་སྟེ་རོ་སྨད་སྦྱངས་ཤིང་དག་པར་གྱུར་ནས། རིགས་ཤིང་འཚམ་པའི་གནས་སྐབས་ཀྱི་དུས་སུ་ཟངས་མ་བཟང་པོ་ལེགས་པར་བདར་བའི་ཕྱེ་མ་ཞིབ་མོ་སྦྲང་རྩི་དང་སྦྲང་རྩིར་བཅས་པའི་ལྡེ་གུ་དེ་སྙིང་ན་ཡོད་པའི་ནད་སྦྱོང་བར་བྱེད་པ་ལ་སྦྱིན་པར་བྱའོ། །སྙིང་ནད་སྦྱངས་ནས་གསེར་ཕྱེ་ནི། །ཞིབ་མོ་ཞོ་གཅིག་སྦྱིན་བྱས་ན། །ཞེས་བྱ་བ་ལ། དེ་ལྟར་ཟངས་མའི་ཕྱེ་མའི་ལྡེ་གུ་སྦྱིན་ཞིང༌། སྙིང་ནད་སྦྱངས་པར་གྱུར་ནས། དེའི་འོག་ཏུ་གསེར་གྱི་ཕྱེ་མ་ཞིབ་མོར་བྱས་བ་སྲང་གཅིག་གི་བཞི་ཆ་སྦྱིན་པར་བྱའོ། །པདྨོའི་འདབ་མར་ཆུ་བཞིན་དུ། །གསེར་གྱི་ས་ཡན་ལག་ལ་མི་ཆགས། །ཚེ་ཡང་རིང་དུ་འཕེལ་བར་འགྱུར། །ཞེས་བྱ་བ་ལ། གང་གི་ཕྱིར་གསེར་འཐུངས་པར་གྱུར་པས་དུག་ཟོས་པའི་ཡན་ལག་རྣམས་ལ་དུག་དེ་ཆགས་ཤིང་ཞེན་པར་མི་འགྱུར་ཏེ། དཔེར་ན་པདྨའི་འདབ་མར་ཆུ་ཆགས་པར་མི་འགྱུར་བ་དེ་བཞིན་དུ། དེ་ལ་ཆགས་པར་མི་འགྱུར་བ་དང༌། དེ་བཞིན་དུ་གསེར་འཐུངས་པར་གྱུར་པ་དག་ནི་ཚེ་རིང་ཞིང་འཕེལ་བར་འགྱུར་བ་ཉིད་ཀྱང་འཐོབ་པར་འགྱུར་རོ། །སྦྱར་དུག་ལ་ཡང་ཆོ་ག་འདིའོ། །ཞེས་བྱ་བ་ལ། བཤད་མ་ཐག་པའི་དུག་ཞི་བར་བྱ་བའི་ཆོ་ག་འདི་ནི་འོག་ནས་བཤད་པའི་སྦྱར་དུག་ལ་བྱ་བར་དྲང་སྲོང་གིས་བཤད་དོ། །སྦྱར་བའི་དུག་ནི་དུག་སྦྱར་མའོ། །སྦྱར་དུག་དང་ལྡན་པའི་ཟས་སྐོམ་དག་ནི་དུས་ཕྱིས་ཞིག་ནས་གསོད་པར་བྱེད་པ་ཡིན་པས་གཙོ་བོ་མ་ཡིན་ལ། དེ་ལྟར་གཙོ་བོ་མ་ཡིན་པ་ཉིད་ཀྱིས་ན་འདིའི་ཆོ་གའི་དཔྱད་དུ་བྱ་བ་ཕྱིས་བསྟན་པ་ཡིན་ནོ། །དེ་བཞིན་དུ་ཟས་ཀྱི་ཕུང་པོ་ཡོན་ཏན་མཆོག་དང་ལྡན་བ་དག་ཀྱང་གཡོས་སུ་བྱ་ཞིང་སྦྱར་བ་དང༌། ཚད་དང་དུས་ལ་སོགས་པའི་དབང་གིས་ཁ་ཟས་མི་འཕྲོད་པར་གྱུར་པ་ནི། སྡུག་བསྔལ་སྐྱེད་པར་བྱེད་པས་སྦྱར་བའི་དུག་དང་འདྲ་སྟེ། འཕྲལ་དང་དུག་ཕྱི་ནས་གསོད་པར་འགྱུར་རོ། །དེ་བས་ན་འདིར་སྨྲས་པ་ནི། ཁ་ཟས་དག་ཀྱང་མི་མཐུན་ཟོས། །སྦྱར་དུག་འདྲ་བར་ཤེས་པར་
བྱ། །ཞེས་བྱ་བ་ཡིན་ཏེ། ཁ་ཟས་ཀྱང་གཡོས་སུ་བྱས་ཀྱང་སྦྱར་བ་དང༌། ཚད་པ་དང༌། ཡུལ་དང༌། དུས་ལ་སོགས་པས་མི་མཐུན་པར་གྱུར་པ་ཟོས་པ་ནི། སྦྱར་བའི་དུག་དང་འདྲེས་པར་ཤེས་པར་བྱ་ཞིང་ཁོང་དུ་ཆུད་པར་བྱའོ། །རླན་ཅན་ཤ་དང་མོན་སྲན་གྲེའུ། །སྦྲང་རྩིའོ་མ་མྱུ་གུ་ཅན། །པདྨའི་རྩ་བ་ལ་ཕུག་སྐམ། །བུ་རམ་དང་བཅས་མི་འཕྲོད་ཡིན། །ཞེས་བྱ་བ་ལ། རླན་ཅན་གྱི་ཤ་ནི་རི་དགས་ཆེན་པོ་དང༌། ཆུ་ལ་སྤྱོད་པ་དང༌། ཆུ་ལ་གནས་པ་ཞེས་བྱ་བའི་སྡེ་ཚན་གསུམ་དུ་བསྟན་པ་སྟེ། དེ་དང་མོན་སྲན་གྲེའུ་ཞེས་བྱ་བ། སྲན་མ་དང༌། སྦྲང་རྩི་དང༌། འོ་མ་དང༌། མྱུ་གུ་ཅན་དང༌། པདྨའི་རྩ་བ་དང༌། དེ་ལ་སོགས་པ་མི་འཕྲོད་པའི་ཟས་གང་ཡིན་པ་དེས་ནི། དེའི་གནོད་པའི་ཁྱད་པར་འདིར་མ་བསྟན་ཀྱང༌། དྲང་སྲོང་ཙ་ར་ཀས་ཇི་སྐད་བསྟན་པའི་མ་ནིང་ལ་སོགས་པའི་འགྱུར་བ་སྐྱེད་ཅིང༌། དེས་འཕྲལ་ཏམ། དུས་ཕྱིས་སྲོག་འཇོམས་པར་བྱེད་པ་ཡིན་ནོ། །མི་འཕྲོད་པའི་འབྲས་བུ་ཙ་ར་ཀས་བཤད་པ་ནི། འོ་པ་དང༌། ལོང་བ་དང༌། འདར་བག་དང༌། རྨོངས་བག་དང༌། ལྐུགས་པ་དང༌། དྲན་པ་མེད་པ་དང༌། རྨུགས་པ་རྣམས་ཀྱི་རྩ་བ་ཡིན་པའམ། ཡང་ན་འཆི་བར་འགྱུར་བ་ཉིད་ཡིན་ནོ། །ཞེས་བཤད་པ་ཡིན་ཏེ། དེ་དག་ནི་འདྲེས་པའི་སྦྱོར་བའི་མི་འཕྲོད་པ་ཡིན་ནོ། །ཁྱད་པར་དུ་ནི་འོ་མ་ཉ། །ཉ་རྣམས་ལས་ཀྱང་ཙི་ལི་ཙིམ་། །ཞེས་བྱ་བ་ལ། ཁྱད་པར་དུ་ཞེས་བྱ་བ་ནི་ལྷག་པར་རོ། །ཉ་ནི་རོ་ཧི་ཏ་ལ་སོགས་པ་སྟེ། རླན་ཅན་གཞན་དག་ན་ཡོད་པའང་རུང་སྟེ། དེ་ནི་འོ་མ་དང་ལྷན་ཅིག་ཟོས་ན་མི་འཕྲོད་པ་ཡིན་ནོ། །དེ་བཞིན་དུ་ཉ་རྣམས་ཀྱི་ནང་ནས་ཀྱང༌། ཙི་ལི་ཙི་མ་ཞེས་བྱ་བའི་ཉ་འོ་མ་དང་ལྷན་ཅིག་མི་འཕྲོད་པ་ཡིན་ཏེ། འདི་གཉི་ག་ཡང་རོ་མངར་བ་དང༌། ཞུ་བའི་རྗེས་མངར་བ་དང༌། བད་ཀན་སྐྱེད་ལ་དྲོ་བ་དང༌། བསིལ་བར་བྱེད་པའི་ཚུལ་གྱིས་ནུས་པ་མི་མཐུན་པ་ཡིན་ལ། ནུས་པ་མི་མཐུན་པས་ན་ཁྲག་འཁྲུག་པར་བྱེད་པ་ཡིན་ལ། བད་ཀན་སྐྱེད་པར་བྱེད་ཅིང་རྒྱུ་བའི་ལམ་འགག་པར་བྱེད་པ་ཡིན་ནོ། །དེ་ལས་ཀྱང་ཉ་ཙི་ལི་ཙི་
མ་ནི་ཅུང་ཟད་ཟླུམ་ཞིང་མདོག་དམར་པོར་སྣང་ལ། ཕལ་ཆེར་ས་ལ་རྒྱུ་བས། གལ་ཏེ་འོ་མ་དང་ལྷན་ཅིག་ཟོས་ན་གདོན་མི་ཟ་བར་ཁྲག་ལས་བྱུང་བའམ། རྟུག་འགགས་ལས་བྱུང་བའི་ནད་གང་ཡང་རུང་བ་འབྱུང་བར་འགྱུར་རོ་ཞེས་དྲང་སྲོང་ཙ་ར་ཀ་ས་བཤད་དོ། །འོ་མ་ལྷན་ཅིག་སྐྱུར་ཀུན་ནི། །མི་འཕྲོད་ཤིང་ཏོག་དེ་བཞིན་ནོ། །ཞེས་བྱ་བ་ལ། འོ་མ་དང་ལྷན་ཅིག་སྐྱུར་ཐམས་ཅད་མི་འཕྲོད་དོ། །འདིར་ཀུན་གྱི་སྒྲ་སྨོས་པས་སྐྱུར་བ་ལ་སོགས་པ་རྫས་གཤེར་བ་ཐམས་ཅད་བསྡུ་བ་དང༌། དེ་བཞིན་དུ་སྨན་སྐྱུར་བ་དང༌། ཆུའི་རྩ་བ་ལ་སོགས་པ་དེ་ཐམས་ཅད་འོ་མ་དང་ལྷན་ཅིག་མི་འཕྲོད་པ་ཡིན་ནོ་ཞེས་ངེས་པར་ཤེས་པར་བྱའོ། །འདིར་ལྷན་ཅིག་ཅེས་སྨོས་པ་ནི། དོན་ལྷག་པར་བསྟན་པར་བྱ་བའི་ཕྱིར་ཏེ། འོ་མ་འཐུངས་ན་ཟས་གཞན་གྱིས་བར་བཅད་དུ་ཟིན་ཅིང༌། ཕོ་བར་ཇི་སྲིད་གནས་པར་འགྱུར་བ་དེ་སྲིད་ཀྱི་བར་དུ། སྐྱུར་པོ་ལ་སོགས་པ་རྫས་སྐྱུར་བ་གང་ཡིན་བཟའ་བར་མི་བྱ་སྟེ། ལྷག་པའི་དོན་འདི་ལྷན་ཅིག་ཅེས་བྱ་བའི་སྒྲ་ལས་ཤེས་པར་བྱའོ། །དེ་ཡང་བསྡུས་པ་ལས། གཤེར་བ་དང་བསྐ་བའི་རྫས་ཐམས་ཅད་ནི་འོ་མ་དང་ལྷན་ཅིག་གམ། དེའི་རྗེས་ལ་མི་འཕྲོད་པ་ཡིན་ནོ་ཞེས་བཤད་པ་ཡིན་ནོ། །ཤིང་ཐོག་ནི་དེ་བཞིན་ནོ་ཞེས་བྱ་བར་འདིར་འོ་མ་དང་ལྷན་ཅིག་མི་འཕྲོད་དོ་ཞེས་བྱ་བར་སྦྱར་ཏེ། སྐྱུར་བ་རྣམས་འོ་མ་དང་མི་འཕྲོད་པ་འབའ་ཞིག་ཏུ་མ་ཟད་དོ། །ཤིང་ཏོག་ཀྱང་མི་འཕྲོད་དེ། དོན་གྱིས་ན་ཤིང་ཏོག་སྟར་ཀའི་འབྲས་བུ་ལ་སོགས་པ་སྐྱུར་བ་མ་ཡིན་པ་དག་ཀྱང༌། སྟར་ཀའི་འབྲས་བུ་ལ་སོགས་པ་ཕལ་ཆེར་ལྷན་ཅིག་མི་འཕྲོད་དོ་ཞེས་བྱ་བ་ནི་དེ་བཞིན་ནོ་ཞེས་བྱ་བའི་དོན་ཡིན་ནོ། །དེ་ཡང་དྲང་སྲོང་ཙ་ར་ཀས་ཨ་མྲའི་འབྲས་བུ་དང༌། ཨ་མྲ་ཏ་ཀ་དང༌། བ་ལུང་དང༌། ལི་ཀུ་རྩེ་དང༌། ཀ་ར་མར་ཏ་དང༌། ཆུ་ཤིང་གི་འབྲས་བུ་དང༌། སྐྱུར་རྩི་ཆེན་པོ་དང༌། རྒྱ་ཤུག་གི་འབྲས་བུ་དང༌། ཀོ་ཤ་ཨ་མྲ་དང༌། འཛམ་བུའི་འབྲས་བུ་དང༌། བིལ་བའི་རྐང་དང༌། ཏིག་ཏི་ལི་ཀ་དང༌། ཀུ་ཤུ་དང༌། སྟར་ཀའི་འབྲས་བུ་དང༌། པ་ན་ས་དང༌། རྒྱ་སྟར་གྱི་འབྲས་བུ་དང༌། བལ་པོ་སེའུ་དང༌། སྐྱུ་རུ་རལ་སོགས་པ་དེ་ལྟར་བུ་དང༌། གཞན་དག་དང༌། སྐྱུར་བའི་
རྫས་སྐམ་པོ་དང༌། གཤེར་བ་ཐམས་ཅད་འོ་མ་དང་ལྷན་ཅིག་མི་འཕྲོད་པ་ཡིན་ནོ་ཞེས་བཤད་པ་ཡིན་ནོ། །དེ་བཞིན་རྒྱ་སྲན་ཁྲེ་དག་དང༌། །བ་ལ་ཀུ་མུ་ཏ་མི་འཕྲོད། །ཅེས་བྱ་བ་ལ། དེ་བཞིན་དུ་རྒྱ་སྲན་ཀུ་ལ་ད་ཐ་ལ་སོགས་བ་ཡང་འོ་མ་ད་བ་ལྷན་ཅིག་མི་འཕྲོད་པ་ཡིན་ནོ། །ལ་ཕུག་ལ་སོགས་སྡོ་རྔད་ནི། །ཟོས་ནས་འོ་མ་སྤང་བར་བྱ། །ཞེས་བྱ་བ་ལ། ལ་ཕུག་ལ་སོགས་པའི་སྔོ་རྔད་རྗེན་པ་ཟོས་ནས་འོ་མ་སྤང་བར་བྱའོ། །ལ་སོགས་པའི་སྒྲས་ནི། སྐུ་ཐི་ར་དང༌། ཤི་ཀྲུ་དང༌། བྱེའུ་རུག་པ་ལ་སོགས་པ་བསྡུའོ། །དེ་ཡང་དྲང་སྲོང་ཙ་ར་ཀས། མཛེའི་ནད་དུ་འགྱུར་བའི་འཇིགས་པས། ལ་ཕུག་དང༌། ཡུངས་ཀར་གྱི་ལོ་མ་དང༌། སྒོག་སྐྱ་དང༌། གྲི་ན་གནྡྷ་དང༌། ཟིན་ཐིག་ལེ་སུ་མུ་ཁ་དང༌། སུ་ར་ལ་སོགས་པའི་སྒྲས་ཟོས་ནས། འོ་མ་བཏུང་བར་མི་བྱའོ་ཞེས་བཤད་པ་ཡིན་ནོ། །སྔོ་རྔད་ཅེས་སྨོས་པ་ནི་ལ་ཕུག་གི་ཁྱད་པར་ལ་བྱ་བར་བསྟན་ཏེ། འདི་ལྟར་སྨོས་པ་ལས་ན་འདི་ནི་རྗེན་པར་ཡང་བཟར་རུང་བར་བསྟན་པ་ཡིན་ལ། སྔར་ཚོད་མའི་སྡེ་ཚན་གྱི་ནང་དུ་འདི་སྨོས་པས་ནི། ཚོད་མ་ཉིད་དུ་བྱར་རུང་བར་སྟོན་པ་ཡིན་ནོ། །དེ་ལྟར་ན་རྗེན་པ་ཟོས་ནས་འོ་མ་མི་བཏུང་བ་ཡིན་གྱི། ཚོད་མར་བྱས་པ་མ་ཡིན་ཏེ། ལེགས་པར་བཙོས་ནས་ཁུ་བ་བཙིར་བ་དང༌། སྣུམ་ལ་སོགས་པས་བརྔོས་ཏེ། ཚོད་མར་གཡོས་སུ་བྱས་པའི་རྗེས་ལ་འོ་མ་མི་བཏུང་བ་ནི་མ་ཡིན་ནོ། །ཕག་རྒོད་བྱི་དུར་ཤ་མི་བཟའ། ཁྱིམ་བྱ་བྲི་ཤ་ཏ་ཞོར་མིན། །ཞེས་བྱ་བ་ལ། ཕག་རྒོད་ཀྱི་ཤ་དང༌། བྱི་དུར་ཤ་ལྷན་ཅིག་མི་བཟའ་བ་དང༌། དེ་བཞིན་དུ་ཁྱིམ་བྱ་དང༌། པྲི་ཤ་ཏའི་ཤ་ཞོ་དང་ལྷན་ཅིག་མི་བཟའོ། །ཤ་རློན་མཁྲིས་པ་དག་དང་ནི། །ལ་ཕུག་མ་ཤའི་ཚོད་མར་མིན། །ཞེས་བྱ་བ་ལ། ཤ་རློན་པ་མཁྲིས་པ་དག་དང་ལྷན་ཅིག་མི་བཟའ་བ་དང༌། དེ་བཞིན་དུ་ལ་ཕུག་མ་ཤའི་ཚོད་མ་དང་ལྷན་ཅིག་མི་བཟའོ། །ལེ་བརྒན་རྩི་ཚོད་ལུག་ཤར་མིན། །མྱུ་གུའི་ཚོད་མ་བད་རྩར་མིན། །ཞེས་བྱ་བ་ལ། ལེ་བརྒན་རྩིའི་ཚོད་མ་དང༌། ལུག་ཤ་ལྷན་ཅིག་མི་བཟའ་བ་དང༌། དེ་བཞིན་དུ་འབྲུའི་མྱུ་གུ་སྐྱེས་པའི་ཚོད་མ་དང༌། པདྨའི་རྩ་བ་ལྷན་ཅིག་བཟའ་བར་མི་བྱའོ། །
མ་ཤའི་སྲན་ཚོད་བུར་མ་ཞོ། །མར་འོ་ལི་ཀུ་རྩེའི་འབྲས་མིན། །ཞེས་བྱ་བ་ལ། མ་ཤའི་སྲན་ཚོད་དང༌། བུར་མ་མམ། ཞོ་འམ་མར་རམ་འོ་མའམ། ལི་ཀུ་རྩེའི་འབྲས་བུ་ལྷན་ཅིག་བཟའ་བར་མི་བྱའོ། །ཆུ་ཤིང་འབྲས་བུ་དང་བར་མིན། །ཏ་ལའི་འབྲས་བུ་ཞོར་མི་འཕྲོད། །ཅེས་བྱ་བ་ལ། ཆུ་ཤིང་གི་འབྲས་བུ་དར་བར་མི་བཟའ་བའམ། ཏ་ལའི་འབྲས་བུ་ཞོ་དང་ལྷན་ཅིག་མི་འཕྲོད་པས་མི་བཟའོ། །ཚ་བ་གཉིས་པོ་བུར་མ་དང༌། །སྦྲང་རྩི་ཀ་ཀ་མ་ཙིར་མིན། །ཞེས་བྱ་བ་ལ། ཀ་ཀ་མ་ཙི་ཚ་བ་གཉིས་པོ་པི་པི་ལིང་དང༌། ན་ལེ་ཤམ་དང༌། ལྷན་ཅིག་སྦྲང་རྩིའམ་བུ་རམ་དང་ལྡན་པར་མི་བཟའོ། །དེ་ནི་ཉ་བཙོས་པའི་སྣོད་དང༌། །དོང་གྲ་བཙོས་པར་གཡོས་པ་མིན། །ཞེས་བྱ་བ་ལ། ཀ་ཀ་མ་ཙི་དེ་ཉི་ཉ་བཙོས་པའི་སྣོད་དུ་གཡོས་སུ་བྱས་པའང་མི་བཟའོ། །ཀ་མ་ཏ་ནི་སྣོད་གཞན་དུ། །བཙོས་ནས་ཉིན་མཚན་ལོན་མི་བཟའ། །ཞེས་བྱ་བ་ལ། ཀ་མ་ཏ་ནི། ཀ་ཀ་མ་ཙི་སྟེ། དེ་སྣོད་གཞན་དག་ཏུ་བཙོས་ནས་ཉིན་མཚན་ལོན་ཞིང་ཞག་འདས་པ་དག་བཟའ་བར་མི་བྱའོ། །དེ་ལ་མི་བཟའ་ཞེས་བྱ་བ་འདི་ནི། འདི་ཡན་ཆད་ཀུན་ལ་སྦྱར་བར་མི་བྱའོ། །ཉ་བརྔོས་པ་ཡི་སྣུམ་ལ་ནི། །པི་པི་ལིང་བརྔོས་སྤང་བར་བྱ། །ཞེས་བྱ་བ་ལ། ཉ་བརྔོས་པའི་སྣུམ་ལ་བརྔོས་པའི་པི་པི་ལིང་སྤང་བར་བྱ་སྟེ། ཉ་གང་དུ་བརྔོས་པ་དེར་བརྔོ་བ་ཡང་སྤང་བར་བྱའོ། །མར་སར་འཁར་སྣོད་ཞག་བཅུ་ལོན། །གོ་བྱེའི་འབྲས་བུ་དྲོར་མི་བཟའ། །ཞེས་བྱ་བ་ལ། མར་སར་འཁར་བའི་སྣོད་དུ་ཞག་བཅུ་ལོན་པ་སྤང་བར་བྱའོ། །དེ་བཞིན་དུ་གོ་བྱེའི་འབྲས་བུ་ལ་ཏ་ཀ་བཟའ་བ་དང༌། བཏུང་བར་དྲོ་བ་དག་སྨན་པས་སྤང་བར་བྱའོ། །བ་ས་སྲེག་ཤར་མི་འཕྲོད་ཅིང༌། །དར་བར་ཀམ་བི་ལ་བཙོས་མིན། །ཞེས་བྱ་བ་ལ། བ་ས་ཞེས་བྱ་བའི་ཤ་སྲེག་ཤར་བྱ་བར་མི་འཕྲོད་པས་བཟའ་བར་མི་བྱའོ། །དེ་བཞིན་དུ་ཀ་མ་བི་ལ་ཞེས་བྱ་བ་སྟེ། མིང་གི་རྣམ་གྲངས་ཡན་ལག་དམར་ཞེས་བྱ་བ་དེ་དར་བར་བཙོས་ཏེ་བཟའ་བ་མི་འཕྲོད་པ་ཡིན་ནོ། །འོ་ཐུག་དང་ནི་ཀྲི་སར། །ཆང་དང་ལྷན་ཅིག་མི་འཕྲོད་སྤང༌། །ཞེས་བྱ་བ་ལ། འོ་ཐུག་དང༌། ཀྲི་ས་ར་དང༌། ཆང་ལྷན་
ཅིག་མི་འཕྲོད་པས་སྤང་བར་བྱའོ། །དེ་ལ་འོ་ཐུག་ནི་འབྲས་ཆན་འོ་མའི་ནང་དུ་བཙོས་ཏེ་སྤོད་ཀྱིས་བཏབ་པ་ནི་འོ་ཐུག་གོ །ཀྲི་ས་ར་ནི་ཏིལ་དང༌། སྲན་མུངྒ་དང༌། མ་ཤལ་སོགས་པ་གཡོག་པའི་ཐུག་པའོ། །ཆང་ནི་འབྲས་བཏགས་པ་ལ་སོགས་པ་ལས་མནན་ནས་བྱས་པའོ། །དེ་རྣམས་ལྷན་ཅིག་ཏུ་བཟའ་ཞིང་ལོངས་སྤྱད་བར་མི་བྱའོ། །སྦྲང་རྩི་མར་སར་ཞག་ཏིལ་མར། །ཆུ་རྣམས་གཉིས་གཉིས་གསུམ་གསུམ་མམ། །ཆ་མཉམ་ལྷན་ཅིག་ཟོས་པ་དག །ཕན་ཚུན་དག་ནི་མི་མཐུན་ནོ། །ཞེས་བྱ་བ་ལ། སྦྲང་རྩི་ལ་སོགས་པའི་རྫས་ལྡན་ནི་གཉིས་གཉིས་སམ། གསུམ་དུ་ཞེས་བྱ་བ་གསུམ་གསུམ་མམ། ཆ་མཉམ་ཞེས་བྱ་བ་གཅིག་ཏུ་ཆ་མཉམ་པར་བྱ་སྟེ། བཟའ་བ་ནི་ཕན་ཚུན་མི་འཕྲོད་པ་ཡིན་ནོ། །དེ་ཡང་གཉིས་གཉིས་ནི་དཔེར་ན། མར་སར་དང་སྦྲང་ཙིའམ། མར་སར་དང་ཞག་གམ། མར་སར་དང་ཏིལ་མར་རམ། སྦྲང་རྩི་དང་ཆུའོ། །གསུམ་གསུམ་ནི་དཔེར་ན། སྦྲང་རྩི་དང་མར་སར་དང༌། ཏིལ་མར་དུ་བཟའ་བའོ། །ཆ་མཉམ་པ་ནི་སྦྲང་རྩི་དང༌། མར་སར་དང༌། ཞག་དང༌། ཏིལ་མར་དང༌། ཆུ་རྣམས་ལ་བསྲེས་ཏེ་ལྷན་ཅིག་ཟོས་པ་སྟེ། དེ་དག་ནི་མི་འཕྲོད་པ་ཡིན་ནོ། །མར་སྦྲང་ཆ་ནི་མི་མཉམ་ཡང༌། །ཆར་པའི་ཆུ་ནི་འཐུངས་ན་གནོད། །ཅེས་བྱ་བ་ལ། མར་དང་སྦྲང་རྩི་ཆ་མི་མཉམ་པར་གྱུར་ཀྱང༌། ཆར་པའི་ཆུ་དང་ལྷན་ཅིག་འཐུངས་ན་མི་འཕྲོད་པར་འགྱུར་རོ། །སྦྲང་རྩི་པདྨའི་ས་བོན་དང༌། སྦྲང་རྩི་འབྲུ་ཆང་ཁ་རར་མིན། །ཞེས་བྱ་བ་ལ། སྦྲང་རྩི་དང་པདྨའི་ས་བོན་ལྷན་ཅིག་སྦྱར་ཏེ་བཟའ་བ་ལང་མི་འཕྲོད་པ་ཡིན་ནོ། །དེ་བཞིན་དུ་སྦྲང་རྩི་དང༌། འབྲུ་ཆང་ཞེས་བྱ་བ། འབྲུ་ལས་མནན་པའི་ཆང་དང༌། ཤ་ཁར་ལས་བྱས་པའི་ཆང་མི་འཕྲོད་ཅིང་གནོད་པ་སྐྱེད་པ་ཡིན་པས། རླུང་ཤིན་ཏུ་སྐྱེད་པར་བྱེད་པ་ཡིན་ནོ། །འོ་ཐུག་རྗེས་ལ་སྐྱོ་མར་མིན། །ཤ་མོ་ཡུངས་མར་བརྔོས་མི་འཕྲོད། །ཅེས་བྱ་བ་ལ། འོ་ཐུག་ནི་འོ་མ་ལ་འབྲས་བཙོས་པའི་ཐུག་པའོ། །དེ་ནི་སྐྱོ་མ་དང་མི་འཕྲོད་པ་ཡིན་ཏེ། སྐྱོ་མ་དེ་ནི་བད་ཀན་སྐྱེད་པར་བྱེད་པ་ཡིན་ཏེ། སྐྱོ་མ་ཞེས་བྱ་བ་ལ་ཕྱེ་དང་མར་སྦྱར་
བ་ཆུ་དང་སྦྱར་ལ་ཧ་ཅང་སླ་བ་འམ། ཧ་ཅང་སྐ་བར་མ་གྱུར་བ་ལ་བྱའོ། །ཤ་མོ་ནི་གདུགས་ལྟ་བུར་སྐྱེས་བའི་ཚོད་མའི་ཁྱད་པར་རོ། །དེ་ནི་ཡུངས་མར་བརྔོས་ཏེ་བཟའ་བ་མི་འཕྲོད་པ་ཡིན་ཏེ། ཤིན་ཏུ་མཁྲིས་བ་སྐྱེད་པ་ཡིན་ནོ། །ཨུ་བོ་ཏ་ཀ་ཏིལ་ཚིགས་ལ། །བཙོས་པ་འཁྲུ་པར་བྱེད་པ་ཡིན། །ཞེས་བྱ་བ་ལ། ཨུ་པོ་ཏ་ཀ་ནི་ལི་ས་ཞེས་བྱ་བའི་ཚོད་མ་སྟེ། དེ་ཏིལ་གྱི་ཚིགས་མ་དང་བཙོས་ཤིང་གཡོས་པ་ནི་འཁྲུ་བར་བྱེད་པ་སྟེ། ཚད་པས་འཁྲུ་བར་བྱེད་པ་ཡིན་ནོ། །བྱ་གག་ཤ་ནི་ཆང་དངས་དང༌། །ཀུ་ལ་མ་ཤའི་ཐུག་མི་འཕྲོད། །ཅེས་བྱ་བ་ལ། བྱ་གག་ནི་བྱ་བ་ལ་ག་ཞེས་བྱ་སྟེ། དེའི་ཤ་ཆང་དངས་མ་བ་རུ་ར་ཞེས་བྱ་བ་དང༌། ཀུ་ལ་མ་ཤ་ཐའི་ཐུག་པ་དང་ལྷན་ཅིག་མི་འཕྲོད་དེ། ཀུ་ལ་མ་ནི་མོན་སྲན་སྡེའུ་དང་སྲན་ཆུང་ལ་སོགས་པ་བཙོས་ནས། ཤིང་ཀུན་ལ་སོགས་པའི་སྤོད་བཏབ་པའི་ཐུག་པའོ། །དེ་ཉིད་ཕག་རྒོད་ཚིལ་ལ་བརྔོས། །སྲོག་ནི་འཕྲལ་དུ་འཇོམས་པར་བྱེད། །ཅེས་བྱ་བ་ལ། བྱ་གག་གི་ཤ་དེ་ཉིད་ཕག་རྒོད་ཀྱི་ཚིལ་དང་བརྔོས་པ་ནི། སྲོག་འཕྲལ་དུ་འཇོམས་པར་བྱེད་པ་ཡིན་ཏེ། དེའི་མོད་ལ་གསོད་པར་འགྱུར་རོ་ཞེས་པའི་དོན་ཏོ། །དེ་བཞིན་སྲེག་པ་རྨ་བྱ་དང༌། །ལ་བ་ཀ་པིན་ཛ་ལ་སྲམ། །ཨེ་རཎྜ་ཡི་མེ་ལ་ནི། །ཨེ་རཎྜའི་མར་བརྔོས་མི་འཕྲོད། །ཅེས་བྱ་བ་ལ། དེ་བཞིན་དུ་སྲེག་པ་ལ་སོགས་པའི་ཤ་།ཨེ་རཎྜའི་མེ་ལ་བཙོས་ཤིང་དེ་བཞིན་དུ་ཨེ་རཎྜའི་མར་དང་བསྲེས་ཤིང་བརྔོས་པ་ནི་མི་འཕྲོད་དེ། སྔ་མ་དང་འདྲ་བར་སྲོག་འཕྲལ་དུ་འཇོམས་བར་བྱེད་བ་ཡིན་ནོ། །ཧ་རིད་དྲ་ཤ་སྐྱེར་པ་ཡི། །ཐུར་མ་དག་ལ་བསྐྱོན་ནས་ནི། །སྐྱེར་པའི་མེ་ལ་བསྲེགས་གྱུར་པ། །འཕྲལ་དུ་སྲོག་ནི་འཇོམས་པར་བྱེད། །ཅེས་བྱ་བ་ལ། དེ་བཞིན་དུ་བྱ་ཧ་རིད་དྲའི་ཤ་སྐྱེར་པའི་ཐུར་མ་ལ་བསྐྱོན་ཞིང་བཙུགས་ནས་དེ་བཞིན་དུ་ཤིང་སྐྱེར་པ་བུས་པའི་མེ་ལ་བསྲེགས་ཤིང་ཚོས་པར་བྱས་པ་ནི་འཕྲལ་དུ་སྲོག་འཇོམས་པར་བྱེད་དེ། དུག་དང་འདྲ་བར་མྱུར་དུ་སྲོག་འཕྲོག་ཅིང་སྲོག་དང་བྲལ་བར་བྱེད་དོ་ཞེས་བྱ་བའི་དོན་ཏོ། །དེ་ཉིད་ཐལ་བ་རྡུལ་གྱིས་གོས། །སྦྲང་རྩིར་བཅས་བ་འཕྲོད་མ་ཡིན། །ཞེས་བྱ་བ་ལ། བྱ་ཧ་རི་ཏའི་ཤ་དེ་
ཉིད་ཐལ་བ་དང་རྡུལ་གྱིས་གོས་ཤིང་ཉམས་པར་གྱུར་པ་དང༌། སྦྲང་རྩི་དང་བཅས་པ་ནི་འཕྲོད་པ་མ་ཡིན་ཏེ། འཕྲལ་དུ་གསོད་པར་བྱེད་པ་ཡིན་ནོ། །དེ་བཞིན་དུ་མི་མཐུན་པ་གཞན་དག་སྟེ། གྲང་བ་དང༌། དྲོ་བ་དང༌། སར་པ་དང༌། རྙིང་པ་དང༌། བཙོས་པ་དང། མ་བཙོས་པ་དག་ནི་རླུང་དང༌། བད་ཀན་དང་མི་མཐུན་པའི་སྨན་རྣམས་ནི། བད་ཀན་གྱི་ཁམས་དང་མི་འཕྲོད་པར་གྱུར་པ་ཡིན་ནོ། །ལ་ལ་ནི་ཕན་ཚུན་གཅིག་ལ་གཅིག་མི་འཕྲོད་པ་ཡིན་ལ། ཁ་ཅིག་ནི་སྦྱོར་བའི་དབང་གིས་ཕྲད་པ་ལས་མི་འཕྲོད་པ་ཡིན་ཞིང༌། གཞན་དག་ནི་གཡོས་སུ་བྱ་བ་ལ་སོགས་པའི་དབང་གིས་མི་འཕྲོད་པ་ཡིན་ལ། ཡང་གཞན་དག་ནི་དུས་དང་ཡུལ་དང་ཚད་ལ་སོགས་པས་མི་འཕྲོད་པ་ཡིན་པ་དང༌། དེ་བཞིན་དུ་རང་བཞིན་གྱིས་མི་འཕྲོད་པ་ཡང་ཡོད་དེ། གཞུང་ཙོམ་པར་བྱེད་པས། བསྡུས་པ་ལས་བཤད་པ། རྫས་མཐུ་དང་ལྡན་པ་དག་ནི་ཡོན་ཏན་ཕན་ཚུན་མི་མཉམ་པ་ཉིད་ཀྱིས་གཡོས་སུ་བྱ་བ་ལ་སོགས་པའི་དབང་གིས་མི་འཕྲོད་པར་འགྱུར་ཏེ། འོ་མ་ནི་རྒྱ་སྲན་ཀུ་ལངྠ་དང་མི་འཕྲོད་ལ། པ་ན་ས་ནི་ཉ་དང་མི་འཕྲོད་ཅིང༌། མར་དྲོན་པོ་དང༌། སྦྲང་རྩི་དང༌། ཞོ་དྲོན་པོར་མི་འཕྲོད་པ་དང༌། ཚ་སྒོ་ཅན་གྱི་ཆུ་དང་ཕྱེར་བསྲེས་ཏེ་མཚན་མོ་བཟའ་བ་མི་འཕྲོད་པ་དང༌། དེ་བཞིན་དུ་ཆུ་གཞན་དག་དང་ནས་འདྲ་མི་འཕྲོད་པ་ལྟ་བུའོ། །གང་ཡང་ཉེས་པ་མ་སྦྱངས་པ། །མདོར་ན་དེ་ནི་མི་འཕྲོད་ཡིན། །ཞེས་བྱ་བ་ལ། གང་ཡང་རུང་བའི་ཁ་ཟས་ལས་བྱུང་བའི་ཉེས་པ་ཁྲུས་དང༌། སློན་ལ་སོགས་པས་མ་སྦྱངས་པར་དེ་ནི་མདོར་ན་ཞེས་པ། མདོར་བསྡུས་ན་མི་འཕྲོད་པ་ཡིན་པས་བསྟེན་པར་མི་བྱའོ། །ཉེས་འདི་སྦྱང་བར་འདོད་པའམ། །ཡང་ན་དེ་དང་མི་མཐུན་པའི། །རྫས་དེ་ཉིད་ཀྱིས་དང་པོ་ནི། །ལུས་ནི་མངོན་པར་སྦྱང་བར་བྱ། །ཞེས་བྱ་བ་ལ། ཟས་མི་འཕྲོད་པ་ལས་བྱུང་བའི་ཉེས་པ་འདིར་ནི་སྦྱང་བ་ཞེས་བྱ་བ། སློན་དང་ཁྲུས་ལ་སོགས་པའི་ཚུལ་བྱ་བ་ནི་འདོད་ཅིང་བསྔགས་པར་བྱ་བ་ཡིན་ནོ། །ཡང་ན་དེ་དང་མི་མཐུན་པའི་རྫས་ཀྱི་སྨན་གྱིས་ཞི་བར་བྱ་བ་འདོད་པ་ཡིན་ཏེ། མི་འཕྲོད་པའི་ཁ་ཟས་དེའི་གཉེན་པོར་གྱུར་པའི་སྨན་ཡོན་ཏན་གོ་བཟློག་པ་དེས་ཞི་བར་བྱ་བ་
ནི། ཡུལ་དང་དུས་ལ་ལྟོས་ནས་བྱ་བ་ཉིད་ཡིན་ནོ། །ཡང་ན་གང་ཕན་པར་འགྱུར་བའི་སྨན་དང༌། ཟས་ཀྱི་རྫས་དེ་ཉིད་ཀྱིས་དང་པོ་ཁོ་ནར་ལུས་མངོན་པར་སྦྱང་ཞིང་ཕན་པའི་དཔྱད་དུ་བྱ་བ་སྟེ། མདོར་ན་དང་པོ་ཉིད་ནས་ཟས་ཕན་པ་ཉིད་བཟའ་བར་བྱ་ཞིང་བསྟེན་བར་བྱའོ་ཞེས་བྱ་བའི་དོན་ཏོ། །དེ་ཡང་དྲང་སྲོང་ཙ་ར་ཀས། མི་འཕྲོད་ཟས་ཟོས་ལས་གྱུར་ན། །སློན་དང་ཁྲུས་ཀྱིས་སྦྱང་བྱ་ཞིང༌། །རྣམ་པར་བསལ་ནས་ཞི་བའམ། །དང་པོར་འཕྲོད་པ་བསྟེན་པས་སོ། །ཞེས་བཤད་པ་ཡིན་ནོ། །རྩོལ་ཅན་སྣུམ་བསྟེན་དྲོད་ཆེ་དང༌། །དར་ལ་བ་བཅིང་ཉམས་སྟོབས་ལྡན། །གོམས་པར་ཟོས་དང་ཅུང་ཟད་ཟོས། །མི་འཕྲོད་གྱུར་ཀྱང་གནོད་མི་འགྱུར། །ཞེས་བྱ་བ་ལ། གང་ལ་རྩོལ་ཞིང་ལས་སུ་བྱ་བ་ཡོད་བ་དེ་ནི་རྩོལ་བཅས་ཏེ། རྩོལ་བ་ཅན་དེས་ནི་ཟས་དང་བཏུང་བ་དང༌། སྨན་མི་འཕྲོད་པ་བསྟེན་ཀྱང་ནད་དུ་མི་འགྱུར་རོ། །དེ་བཞིན་དུ་སྣུམ་ཤས་ཆེར་བསྟེན་པ་དང༌། ཕོ་བའི་མེ་དྲོད་ཆེ་བ་དག་དང༌། དར་ལ་བབ་ཅིང་ན་ཚོད་བདེ་བ་དང༌། དེ་བཞིན་དུ་ཉམས་སྟོབས་དང་ལྡན་ཞིང་ཤིན་ཏུ་བསྔགས་པར་བྱ་བའི་སྟོབས་ཡོད་པ་དེས་མི་འཕྲོད་པ་དག་ཟོས་ཀྱང་ནད་དུ་མི་འགྱུར་བ་དང༌། དེ་བཞིན་དུ་གོམས་པར་བྱས་ཤིང་རྟག་ཏུ་ཟོས་པ་དང༌། ཅུང་ཟད་ཅུང་ཟད་ཟོས་པ་དག་གིས་ཀྱང་ནད་དུ་མི་འགྱུར་ཏེ། ཟས་དང་སྐོམ་ལ་སོགས་པ་མི་འཕྲོད་ཅིང་མི་མཐུན་པར་འགྱུར་བ་ཡིན་ཡང་སྐྱེས་བུ་དེ་ལ་གནོད་པའི་ནད་དུ་མི་འགྱུར་གྱི། ནད་མེད་པ་ཉིད་དུ་གནས་པར་འགྱུར་རོ། །དྲིས་པ་གང་མི་འཕྲོད་བའི་ཟས་སྐོམ་ཟོས་པ་ན་གོམས་པའམ། ཉུང་ཟད་ཅིག་བསྟེན་པའི་རྒྱུས་དུས་དང་ཡུལ་ལ་ལྟོས་ནས། གོམས་པས་ལུས་ལ་གནོད་པ་མེད་ཅིང་བདེ་བར་འགྱུར་བ་དེ་མོད་ལ་སྤང་བར་བྱ་བའམ། འོན་ཏེ་རིམ་གྱིས་སྤང༌། དེ་བཞིན་དུ་གང་ལུས་ལ་ཕན་ཞིང་འཕྲོད་པ་དག་ཀྱང་མོད་ལ་ཅིག་ཅར་བསྟན་པར་བྱ་བའམ་དེ་ལྟ་མ་ཡིན། དེ་གཉིས་ཀྱིས་རིམ་པ་སྤང་བ་དང༌། བླང་བའི་ཚུལ་བསྟན་པ་སྨྲས་པ་ནི། མི་འཕྲོད་ཆ་ཡིས་གོམས་བྱའམ། །ཆ་ཡི་ཆ་ཡིས་ཡོངས་སུ་སྤངས། །ཕན་པའང་དེ་བཞིན་བསྟེན་བྱ་སྟེ། །འདི་དག་གཉིས་གསུམ་གྱིས་ཆོད་བྱ། །ཞེས་བྱ་བ་ལ། གང་མི་འཕྲོད་ཅིང་
ཕན་པ་མ་ཡིན་པ་བསྟེན་ཅིང་གོམས་པར་བྱ་བ་དེ་ཡང༌། ཆ་ཡིས་གོམས་པར་བྱ་ཞེས་བྱ་བ་རང་གི་ཚད་ལས་དེའི་བཞི་ཆས་སྤང་བར་བྱའོ། །ཡང་ན་ཤིན་ཏུ་ཤས་ཆེར་ཟོས་པ་ནི། ཆའི་ཡང་ཆ་ཤས་སུ་བགོས་པ་སྟེ། བཅུ་དྲུག་ཆར་ཡང་སྤང་བར་བྱའོ། །འམ་ཞེས་བྱ་བ་ནི་མི་འཕྲོད་པ་ཡིན་ཀྱང༌། གནོད་པ་མེད་པ་དག་མོད་ལ་སྤངས་པས་ལུས་ལ་གནོད་བར་འགྱུར་བ་མཐོང་བས་བསྟན་བཅོས་རྩོམ་པས་འམ་གྱི་སྒྲ་སྨོས་པ་ཡིན་ནོ། །དེ་ལྟར་སྤངས་ནས་ཕན་ཞིང་འཕྲོད་པ་དག་ཀྱང་དེ་བཞིན་དུ་རིམ་པ་དེ་ཉིད་ཀྱིས་བསྟེན་པར་བྱ་སྟེ། འཕྲོག་པ་དག་ཀྱང་བཞི་ཆ་འམ་བཞི་ཆའི་བཞི་ཆས་བསྟེན་བར་བྱའོ། །དེ་ལྟར་མི་འཕྲོད་པ་ཆ་ཡིས་སྤང་བ་སྟེ་རིམ་པ་ལ་ལྟོས་པ་མེད་པར་དོར་བར་བྱ་བའམ། འོན་ཏེ་ལྟོས་པ་དང་བཅས་པས་དོར་བར་བྱ་ཞེ་ན། འདི་དག་གཉིས་གསུམ་གྱིས་ཆོད་བྱ། །ཞེས་སྨྲས་པ་ཡིན་ཏེ། སྔར་བཤད་པ་འདི་དག་ནི་ཞག་གཉིས་སམ་གསུམ་གྱིས་མི་འཕྲོད་པའི་ཉེ་བར་མཚོན་པ་ཐམས་ཅད་མེད་པར་འགྱུར་བས། བར་དུ་ཆོད་པར་བྱས་ལ་མི་འཕྲོད་པ་དེ་བཞི་ཆའམ། བཅུ་དྲུག་ཆས་སྤང་བར་བྱའོ། །དེ་བཞིན་དུ་ཕན་པ་དག་ཀྱང་ཞག་གཉིས་དང་གསུམ་གྱིས་ཕན་པ་མ་ལུས་པ་ཉེ་བར་འཕེལ་བར་འགྱུར་བར། བར་གྱིས་ཆོད་པར་བྱས་ལ་བཞི་ཆའམ། བཅུ་དྲུག་ཆས་ངེས་པར་བསྟེན་ཅིང་གོམས་པར་བྱའོ། །འདིར་དོན་ནི་འདི་ཡིན་ཏེ། མི་འཕྲོད་པ་གོམས་པར་འགྱུར་བའི་ཆ་གཅིག་སྤངས་ལ། མི་འཕྲོད་པ་སུམ་ཆའི་ནང་དུ་འཕྲོད་པ་གཅིག་བཅུག་ལ་བཟའོ། །དེ་ནས་ཉི་མ་གཉིས་པ་ལ། མི་འཕྲོད་པའི་གོམས་པའི་ཆ་བཟའ་བར་བྱའོ། །དེ་ལྟར་ན་མི་འཕྲོད་བའི་ཆ་གཅིག་གིས་ཆོད་པ་ཡིན་ནོ། །ཉི་མ་གཉིས་པ་དང་གསུམ་པ་དང་བཞི་པ་ལ་ཡང་མི་འཕྲོད་པའི་ཆ་གསུམ་དང་འཕྲོད་པའི་ཆ་གཅིག་བསྲེས་ཏེ་བཟའ་བར་བྱའོ། །ཉི་མ་ལྔ་བ་ལ་ནི་ཡང་ཐམས་ཅད་མི་འཕྲོད་པ་བཟའོ། །དེ་ལྟར་ན་མི་འཕྲོད་པ་གཉིས་ཀྱིས་ཆོད་པ་ཡིན་ནོ། །ཞག་དྲུག་པ་དང༌། བདུན་པ་ལ་མི་འཕྲོད་པའི་ཆ་གསུམ་དང༌། འཕྲོད་པའི་ཆ་གཅིག་བཟའ་བར་བྱའོ། །ཞག་དགུ་པ་ལ་ནི་ཐམས་ཅད་མི་འཕྲོད་པའོ། །དེ་ལྟར་ན་མི་འཕྲོད་པ་ཆ་གསུམ་
གྱིས་ཆོད་པ་ཡིན་ནོ། །དེ་བཞིན་དུ་མི་འཕྲོད་པའི་ཆ་གཅིག་འབྲི་ཞིང་དེ་ཉིད་ཕན་པའི་ཆ་བཅུག་པ་ལྟར་ཡང་ཉི་མ་བཅུས་མི་འཕྲོད་པའི་ཆ་གཉིས་བཅུག་པར་བྱའོ། །ཡང་དེ་བཞིན་དུ་ཞག་བཅུས་སྔ་མ་བཞིན་དུ་མི་འཕྲོད་པའི་ཆ་གསུམ་གྱིས་ཆོད་པ་ཡིན་ནོ། །དེ་བཞིན་དུ་མི་འཕྲོད་པའི་ཆ་བཞི་པ་ཡང་ཞག་བཅུས་སྤངས་ལ། འཕྲོད་པའི་ཆ་གསུམ་གཞུག་པར་བྱའོ། །དེ་ལྟར་ན་ཞག་བཅུས་སྤང་བ་དང༌། བླང་བ་གོམས་པར་བྱས་པ་ཡིན་ནོ། །གཞན་དག་ནི་འདི་ལས་གཞན་དུ་འཆད་དེ། ཉི་མ་དང་པོ་ལ་མི་འཕྲོད་པ་ལས་ཆ་གཅིག་སྤངས་ལ། འཕྲོད་པ་ལས་ཆ་གཅིག་བཅུག་ལ་དེ་ནས་ཞག་གཅིག་བསྡད་པར་བྱའོ། །དེ་ནས་ཉི་མ་གཉིས་པ་ལ་མི་འཕྲོད་པ་ཐམས་ཅད་བཟའ་བར་བྱ་སྟེ། དེ་ལྟར་ན་གཅིག་གཉིས་ཆོད་པར་གྱུར་པའོ། །དེ་ནས་ཉི་མ་གསུམ་པ་ལ་མི་འཕྲོད་པའི་ཆ་གཉིས་བསྟེན་པར་བྱའོ། །དེ་ནས་ཉི་མ་བཞི་པ་ལ་ཐམས་ཅད་མི་འཕྲོད་པ་བཟའ་བ་དང༌། དེ་བཞིན་དུ་ཞག་ལྔ་པ་ལ་ཡང་ཐམས་ཅད་མི་འཕྲོད་པ་བཟའ་བར་བྱའོ། །དེ་ལྟར་ན་ཉི་མ་གཉིས་ཀྱིས་ཆོད་པ་ཡིན་ནོ། །ཞག་དྲུག་པ་ལ་མི་འཕྲོད་པ་ལས་ཆ་གཅིག་འཕྲོད་པ་ལས་ཆ་གསུམ་བཟའ་བར་བྱའོ། །དེ་ནས་བདུན་པ་དང་བརྒྱད་པ་དང། དགུ་པའི་ཉིན་ཞག་ལ་ཐམས་ཅད་མི་འཕྲོད་པ་བཟའ་བར་བྱ་སྟེ། དེ་ལྟར་གསུམ་གྱིས་ཆོད་པའོ། །དེ་ནས་ཞག་བདུན་པ་ལ་མི་འཕྲོད་པའོ། །དེ་ནས་ཞག་བཅུ་གཅིག་པ་ལ་འཕྲོད་པ་ལས་ཆ་གསུམ་མི་འཕྲོད་པ་ལས་ཆ་གཅིག་བཟའ་བར་བྱའོ། །དེའི་འོག་ཏུ་ཉི་མ་བཅུ་གཉིས་པ་ལ་ཐམས་ཅད་འཕྲོད་པར་བཟའ་བར་བྱའོ། །དེ་ལྟར་ཞག་གིས་ཆོད་པར་བྱས་ནས། ཞག་བཅུ་གསུམ་པ་ལ་འཕྲོད་པའི་ཆ་གཉིས་དང་མི་འཕྲོད་པའི་ཆ་གཉིས་བཟའ་བར་བྱའོ། །དེ་ནས་ཞག་བཅུ་བཞི་པ་དང༌། བཅོ་ལྔ་བ་ལ་འཕྲོད་པ་འབའ་ཞིག་བཟའ་བར་བྱའོ། །དེ་ལྟར་ན་ཉིན་ཞག་གཉིས་གཉིས་ཀྱིས་ཆོད་པར་གྱུར་བ་ཡིན་ནོ། །དེ་ནས་ཉི་མ་བཅུ་དྲུག་པ་ལས་འཕྲོད་པ་ལས་གསུམ་དང༌། མི་འཕྲོད་པ་ལས་ཆ་གཅིག་བཟའ་བར་བྱའོ། །དེ་ནས་ཞག་བཅུ་བདུན་པ་དང༌། བཅོ་བརྒྱད་པ་དང༌། བཅུ་དགུ་བའི་གྲངས་ཀྱིས་བཅད་པའི་ཉིན་ཞག་ལ་ཐམས་ཅད་ཀྱང་
འཕྲོད་ཅིང་ཕན་པར་འགྱུར་བ་བཟའ་བར་བྱའོ། །དེ་ལྟར་ཉིན་ཞག་གསུམ་གྱིས་ཆོད་པ་ཡིན་ནོ། །དེའི་འོག་ཏུ་ཞག་ཉི་ཤུ་པ་ནས་བཙམས་ཏེ། ཆ་བཞི་པོ་ཐམས་ཅད་ཀྱང་ཕན་ཞིང་འཕྲོད་པ་ལས་བཟའ་བར་བྱའོ་ཞེས་ཟེར་རོ། །ལ་ལ་འདི་སྐད་འཆད་དེ། ཁ་ཟས་གནོད་པ་གོམས་པའི་ཆ་གཅིག་བོར་ལ། གནོད་པའི་ཁ་ཟས་ཆ་གསུམ་གྱི་ནང་དུ་ཕན་པའི་ཆ་གཅིག་བཅུག་ལ། ཇི་སྲིད་གོམས་པར་གྱུར་པ་དེ་སྲིད་ཀྱི་བར་དུ་བསྟེན་པར་བྱའོ། །དེ་ལྟར་ན་གནོད་པ་ནི་གཅིག་གིས་ཆོད་པ་ཡིན་ལ། ཕན་པའི་ཟས་ནི་གསུམ་གྱིས་ཆོད་པ་ཡིན་ཞིང༌། གང་གི་ཕྱིར་གནོད་པའི་ཆ་ལས་ནི་ཆ་གཅིག་བོར་བ་ཡིན་ལ། ཕན་པ་ལས་ཀྱང་ཆ་གསུམ་བོར་ནས། ཆ་གཅིག་བཅུག་པ་ཡིན་པའི་ཕྱིར་རོ། །དེ་བཞིན་དུ་ཆ་གཉིས་ཀྱི་ས་ཆོད་པ་ནི་གནོད་པ་དང༌། ཕན་པ་གཉིས་ལས་ཆ་གཉིས་དོར་ཏེ་ཆ་གཉིས་གཉིས་བསྲེས་ལ། ཇི་སྲིད་གོམས་པར་གྱུར་པ་དེ་སྲིད་ཀྱི་བར་དུ་བསྟེན་པར་བྱའོ། །དེའི་འོག་ཏུ་ཆ་གསུམ་གྱིས་ཆོད་པ་སྟེ། གནོད་པའི་ཆ་གསུམ་དོར་ལ། ཆ་གཅིག་པ་སྟེ་ཕན་པའི་ཆ་གསུམ་གྱི་ནང་དུ་བསྲེས་ཏེ། ཇི་སྲིད་གོམས་པར་གྱུར་པ་དེ་སྲིད་ཀྱི་བར་དུ་གོམས་པར་བྱའོ། །དེའི་འོག་ཏུ་ཕན་པའི་ཟས་དང་སྨན་ཆ་བཞིར་རྫོགས་པ་བསྟེན་པར་བྱའོ་ཞེས་ཟེ་རོ། །དེ་བས་ན་དྲང་སྲོང་ཙ་ར་ཀས་ཀྱང༌། དེ་ཕྱིར་གནོད་པའང་གོམས་བྱས་པ། །རིམ་གྱིས་ཡོངས་སུ་སྤང་བར་བྱ། །བསྟེན་པས་ཕན་པར་གྱུར་པ་ཡང༌། །རིམ་གྱིས་རྣམ་པར་འཕེལ་བར་བྱ། །གནོད་པའི་ཆ་གཅིག་དོར་བྱ་བ། །ཕན་པའང་ཆ་གཅིག་དོར་བྱ་བ། །ཉིན་ཞག་བཅོ་ལྔ་ཉི་ཤུས་བྱས། །དེ་ཕན་ཆད་ནི་ཆ་རེས་བྱ། །ཞེས་བཤད་པ་ཡིན་ནོ། །གཞུང་རྩོམ་པར་བྱེད་པས་ཡན་ལག་བརྒྱད་པ་ལ་འཇུག་པ་ལས་ཀྱང༌། གནོད་པའི་ཟས་ནི་གོམས་གྱུར་པའམ། །སྤྱོད་པའི་ཆ་ཡིས་དོར་བར་བྱ། །ཕན་པའང་ཆ་ཡིས་བསྟེན་བྱ་སྟེ། །ཞག་གཅིག་གཉིས་གསུམ་གྱིས་ཆོད་བྱ། །ཞེས་བཤད་པ་ཡིན་ནོ། །སྐྱོན་ནི་རིམ་གྱིས་འགྲིབ་པ་དང༌། །ཡོན་ཏན་རིམ་གྱིས་འཕེལ་འགྱུར་ན། །སླར་སྐྱེ་བར་ནི་མི་འགྱུར་ཞིང༌། །གཡོ་བ་མེད་པ་དག་ཏུ་
འགྱུར། །ཞེས་བྱ་བའམ། དེས་ནི་མི་འཕྲོད་ཅིང་གནོད་པ་སྐྱེད་པར་བྱེད་པ་ཡང་གོང་དུ་བཤད་མ་ཐག་པའི་རིམ་གྱིས་འགྲིབ་ཅིང་ཟད་པར་འགྱུར་ལ། ཡོན་ཏན་ཏེ་བདེ་བསྐྱེད་བར་གྱུར་པ་ཡང་རིམ་གྱིས་འཕེལ་བར་གྱུར་པ་ཉིད་ནི་གྲངས་ཇི་ལྟ་བ་བཞིན་དུ་ཉེས་པ་རྣམས་སླར་ཞིང་ཕྱིས་འབྱུང་བར་མི་འགྱུར་ཞིང༌། ཡོན་ཏན་གཡོ་བ་མེད་པར་འགྱུར་རོ། །མི་འཕྲོད་པ་ཡང་སྤངས་གྱུར་དང༌། །འཕྲོད་པ་གོམས་པར་གྱུར་པ་ཉིད། །འཕྲལ་དུ་སྤངས་དང་མ་བསྟེན་པས། །ཉེས་པ་རྣམས་ནི་འབྱུང་བར་འགྱུར། །ཞེས་བྱ་བ་ལ། དེ་ལྟར་གོང་དུ་བཤད་པའི་རིམ་གྱིས་མི་འཕྲོད་པ་གོམས་པར་གྱུར་པ་སྤངས་པར་གྱུར་ཅིང༌། འཕྲོད་པ་ཟ་བ་གོམས་པ་བསྟེན་པར་འགྱུར་བ་ཉིད་ནི་ཉེས་པར་མི་འགྱུར་གྱི་གཞན་དུ་ན་འཕྲལ་དུ་སྟེ། དེ་མ་ཐག་པ་འོང་བར་གྱུར་པས་ནི་འདི་གཉིས་ལས་ཉེས་པ་འབྱུང་བར་འགྱུར་རོ། །མི་འཕྲོད་པ་ཡང་སྤངས་གྱུར་དང༌། །ཞེས་བྱ་བ་འདིར་འཕྲལ་དུ་ཞེས་བྱ་བ་སྦྱར་བར་བྱ་སྟེ། མི་འཕྲོད་པར་གྱུར་པ་ཡང༌། འཕྲལ་དུ་སྤངས་པར་གྱུར་པ་དང༌། དེ་བཞིན་དུ་འཕྲོད་པ་འཕྲལ་དུ་གོམས་པར་གྱུར་པ་ཉིད་ལས་ནི་སྔར་བཤད་པའི་ཚུལ་ལས་གོ་བཟློག་པ་ཡིན་པས། དེ་ལྟ་བུའི་སྤངས་པ་དང་བསྟེན་པ་ལས་ནི་ཉེས་པ་སྟེ་ནད་རྣམས་འབྱུང་བར་འགྱུར་རོ། །གནོད་པ་གནོད་བྱའི་བདག་ཉིད་ཅན། །ཤིན་ཏུ་ཉེས་པར་གྱུར་པ་ལ། །ཕན་མེད་གནོད་པར་བྱེད་པ་ནི། །མཁས་པས་ཕྱིར་ཞིང་བྱ་མི་རིགས། །ཞེས་བྱ་བ་སྟེ། གནོད་པ་པོ་སྟེ་རླུང་དང༌། མཁྲིས་པ་དང༌། བད་ཀན་དང༌། གནོད་བྱ་སྟེ། ལུས་ཟུངས་ལ་གནོད་པའི་བདག་ཉིད་ཅན་རང་བཞིན་ཅན་དེ་ཤིན་ཏུ་ཉེ་བར་གྱུར་ཅིང༌། ལུས་ལ་གནོད་པར་གྱུར་པ་ལ། ཕན་མེད་ཅེས་བྱ་བ་རྗེས་སུ་མི་མཐུན་པར་གྱུར་པའི་བྱེད་པར། བྱེད་པ་ཉིད་གནོད་ཅིང་གདུག་བར་བྱེད་པ་ནི་མཁས་ཤིང་བདག་ཉིད་ཤས་པས་ཕྱིར་ཞིང་ཡང་ནས་ཡང་དུ་བྱ་བ་མི་རིགས་སོ། །དེ་ལྟར་ན་མཁས་པས་ཉེས་པ་སྟེ། ནད་རྣམས་སྤངས་ཤིང་བསལ་ནས་ནི། ནད་སླར་སྐྱེ་བར་མི་འགྱུར་ལ་ཡོན་ཏན་རིམ་གྱིས་འཕེལ་ཞིང་བསགས་པའི་འཕྲོད་པ་བསྟེན་པས་ནི་གཡོ་བ་མེད་དེ། རྟག་ཏུ་ནད་
མེད་པར་བྱེད་པར་འགྱུར་རོ། །ཟས་དང་མ་ལ་སྟན་འདོད་པ་སྤྱོད། །རན་ཞིང་རིགས་པར་སྦྱར་བ་ཡིས། །ཁང་ཁྱིམ་འཆོས་པ་ལྟ་བུར་ནི། །རྟག་ཏུ་ལུས་ནི་གཟུང་བར་བྱ། །ཞེས་བྱ་བ་ལ། ཟས་དང་མལ་སྟན་དང༌། འདོད་པ་སྤྱོད་བ་རན་ཞིང་རིགས་པར་འགལ་བ་མེད་པར་སྦྱར་བར་བྱ་བ་སྟེ། རིགས་པ་ནི་བསྟན་བཅོས་ལས་བཤད་བའི་ཆོ་ག་སྟེ། ཆོ་ག་དེ་སྦྱར་བའི་དེས་པས་དུས་རྟག་ཏུ་ལུས་གཟུང་བར་བྱ་ཞིང་འདི་རྣམས་ཀྱིས་གནས་པར་བྱའོ། །དེ་ཡང་ཁང་ཁྱིམ་ལྟ་བུ་འཆོས་ཤིང་བརྟན་པར་བྱ་བའི་ཚུལ་ལྟ་བུར་བྱ་བ་སྟེ། དཔེར་ན་ཁང་པ་ཀ་བ་བརྟན་པོས་བརྟེན་པ་ལྟར་ལུས་ཀྱི་ཁང་པ་འདི་ཡང༌། སྔོན་གྱི་ལས་ཀྱི་རྩ་བ་ཅན་ཀ་བས་བརྟེན་པར་གྱུར་པ་ལ། ཉེ་བའི་ཀ་བ་ལྟ་བུའི་ཟས་དང༌། མལ་སྟན་དང༌། འདོད་པ་ལ་སྤྱོད་པ་རིགས་པ་དང་ལྡན་པས་བརྟེན་པར་བྱའོ། །དེ་ལས་ཟས་ནི་བཤད་ཟིན་ཅིང༌། །དེ་དང་དེར་ནི་བཤད་པར་བྱ། །ཞེས་བྱ་བ་ལ། དེ་ལ་ཉེ་བའི་ཀ་བ་ལྟ་བུའི་ནང་ནས་ཟས་ནི་བཤད་ཟིན་ཏེ། ཆུ་སྣ་ཚོགས་པ་ལ་སོགས་པའི་ཚུལ་ཤེས་པར་བྱ་ལ། ཟས་ཀྱི་ཚུལ་ཤེས་པར་བྱ་བ་དང༌། དུས་སུ་སྤྱོད་པའི་ལེའུ་སྔར་བཤད་ཟིན་ལ་དེ་བཞིན་དུ་འོག་ནས་ཀྱང་ཟས་ཀྱི་འོག་ཏུ་སྐོམ་བཏུང་བའི་ཚུལ་རིམས་ལ་སོགས་པ་ལ་ཇི་ལྟར་བྱ་བ་དང༌། ཟས་ཀྱི་ཚོད་ཟིན་པར་བྱ་བ་ལ་སོགས་པའི་སྐབས་ནས་དེ་དང་དེར་བཤད་པར་བྱའོ། །མལ་སྟན་དང་འདོད་པ་ལ་སྤྱོད་པ་ནི་ལེའུ་འདི་ལས་བཤད་པར་བྱའོ། །བདེ་སྡུག་སྦོམ་སྐེམ་སྟོབས་ཆེ་ཆུང༌། །བུད་མེད་ལ་ཕོད་མི་ཕོད་དང༌། །ཤེས་དང་མི་ཤེས་འཚོ་དང་འཆི། །གཉིད་ལ་རག་ནི་ལུས་པ་ཡིན། །ཞེས་བྱ་བ་ལ། བདེ་བ་དང་སྡུག་བསྔལ་བ་ལ་སོགས་པ་ནི་གཉིད་ལ་རག་ལུས་པ་ཡིན་ཏེ། གཉིད་ལེགས་པར་ལོག་པས་ནི་བདེ་བ་དང། སྦོམ་ཞིང་རྒྱས་པ་དང༌། སྟོབས་དང་བུད་མེད་ལ་ཕོད་པ་དང༌། ཤེས་པ་དང༌། འཚོ་བ་འཕེལ་ཞིང་འབྱུང་བ་ཡིན་ལ། གཉིད་ཉེས་པར་བསྟེན་པས་ནི་སྡུག་བསྔལ་དང༌། སྐེམ་པ་དང༌། སྟོབས་ཆུང་བ་དང༌། བུད་མེད་ལ་མི་ཕོད་པ་དང༌། མི་ཤེས་པ་དང༌།
འཆི་བ་ཉིད་དུ་འགྱུར་བས་དེ་ལ་རག་ལས་བ་ཞེས་བྱའོ། །དེ་ལ་བདེ་བ་ནི་ནད་མེད་པའོ། །སྡུག་བསྔལ་བ་ནི་ལུས་ཟུངས་མི་སྙོམས་པའོ། །སྦོམ་པ་ནི་ལུས་ཟུངས་རྒྱས་པས་ཤ་ཆེ་བའོ། །སྐེམ་པ་ནི་ལུས་ཟུངས་ཟད་བའོ། །བུད་མེད་ལ་ཕོད་པ་ནི་རོ་ཙ་བའི་སྒོ་ནས་དེ་དགའ་བར་ནུས་པའོ། །དེ་ལ་མི་ཕོད་པ་ནི་ཁུ་བ་ཟད་པའི་སྒོ་ནས་མ་ནིང་ལྟ་བུར་གྱུར་པའོ། །ཤེས་པ་ནི་རྟོགས་པ་དང་ལྡན་པའོ། །མི་ཤེས་པ་ནི་རྣམ་པར་རྨོངས་པ་ཉིད་དོ། །འཚོ་བ་ནི་སྲོག་དང་ལྡན་པའོ། །འཆི་བ་ནི་སྲོག་དང་བྲལ་བའོ། །དུས་མིན་ཧ་ཅང་ཐལ་ཆེས་དང། །གཉིད་ནི་ཀུན་ཏུ་འགེགས་པ་དག །བདེ་དང་ཚེ་ནི་ཉམས་བྱེད་དེ། །དུས་མཚན་གཉིས་པ་ལྟ་བུ་ཡིན། །ཞེས་བྱ་བ་ལ། གཉིད་ནི་དུས་མིན་ཞེས་བྱ་བ་ལ། བསྟན་བཅོས་ལས་བཀག་པའི་དུས་སུ་བསྟེན་པ་དང༌། དེ་བཞིན་དུ་ཧ་ཅང་ཐལ་ཆེས་པར་བསྟེན་པ་དང༌། ཀུན་ནས་ཀུན་ཏུ་བཀག་ཅིང་མ་འདྲེས་པས་ནི་བདེ་བ་དང་ཚེ་ཉམས་ཤིང་འཇིག་པར་བྱེད་པར་འགྱུར་རོ། །དེ་ལ་བདེ་བ་ནི་ནང་དང་བྲལ་བའི་མཚན་ཉིད་ཅན་ནོ། །ཚེ་ནི་འཚོ་བ་དང་ལྡན་པ་སྟེ། དེ་གཉིས་ཉམས་ཤིང་འཇིག་པར་བྱེད་པའོ། །དེ་ནི་དཔེར་ན་དུས་མཚན་ཞེས་བྱ་བས་འཆི་བའི་དུས་ཀྱི་མཚན་མོ་ལ་བབ་པ་ནི་བདེ་བ་དང་ཆེ་ཉམས་པར་བྱེད་པ་ཡིན་ནོ། །དེ་བཞིན་དུ་འདི་ནི་དུས་མཚན་སྔོན་ཆད་མེད་པ་གཉིས་པ་ལྟ་བུ་ཡིན་ཏེ། བདེ་བ་དང་ཚེ་ཉམས་པར་བྱེད་པ་འདི་གཉིས་ཆོས་མཐུན་པ་ཡིན་པའི་ཕྱིར་རོ། །མཚན་མོ་གཉིད་ནི་མ་ལོག་རྩུབ། །ཉིན་མོ་གཉིད་ལོག་སྣུམ་ལྕིར་འགྱུར། །ཙོག་ཕུར་འདུག་སྟེ་ཡུར་བ་དག །མིག་རྩུབ་བད་ཀན་མེད་པར་འགྱུར། །ཞེས་བྱ་བ་ལ། གང་མཚན་མོ་གཉིད་མ་ལོག་བ་དེ་ནི་རྩུབ་པ་ཡིན་ལ། གང་ཉིན་མོ་གཉིད་ལོག་པ་དེ་ནི་སྣུམ་ཞིང་ལྕི་བར་གྱུར་པ་ཡིན་ཏེ། གཉིད་ཀྱིས་མ་ལོག་པའི་དབང་པོ་ཐམས་ཅད་ནི་བྱ་བ་ལ་ཕྱོགས་ཤིང་རྩོལ་བའི་མཚན་ཉིད་ཅན་ཡིན་པས། བྱ་བ་མ་རྫོགས་པའི་ཚུལ་གྱིས་ན་བད་ཀན་དང༌། ཚིལ་ལ་སོགས་པ་ཞི་ཞིང་རང་བཞིན་དུ་གནས་པའི་ངོ་བོ་འགྲིབ་པས་རྩུབ་པའི་ཡོན་ཏན་འབྱུང་བར་མི་རིགས་སུ་ཟིན་ཀྱང་རྩུབ་པ་
ཡིན་པར་སྒྲོ་བཏགས་ནས་སྨྲས་པ་ཡིན་གྱི། ཡང་དག་པར་རྩུབ་པ་ནི་མ་ཡིན་ནོ། །དེ་ཡང་དཔེར་ན་ཡུར་བ་ལ་སོགས་པ་ནི་གཉིད་མ་ལོག་པའི་སྔོན་དུ། བད་ཀན་དང་ཚིལ་ལ་སོགས་པ་རང་གི་རྒྱུ་ལས་བྱུང་བ་ཡིན་དུ་ཟིན་ཀྱང༌། སྐྱེས་བུ་གཉིད་ཀྱིས་མ་ལོག་པ་ལ། དེའི་བད་ཀན་དང་ཚིལ་ལ་སོགས་པ་ཟད་པར་སྣང་གི་འཕེལ་བར་མི་འགྱུར་ཏེ། དེ་བས་ན་གཉིད་ཀྱིས་མ་ལོག་པ་ལ་རྩུབ་པ་ཞེས་བཤད་དོ། །གཉིད་ལོག་པ་ལ་ཡང་དབང་པོ་ཐམས་ཅད་ཀྱི་བྱ་བ་འགགས་པ་ནི་མཚན་ཉིད་ཅན། བྱ་བ་ཟིན་བ་ལྟ་བུ་འདི་ལ་སྣུམ་པའི་ཡོན་ཏན་དང་འབྲེལ་པ་མེད་པ་མ་ཡིན་མོད་ཀྱི། འོན་ཀྱང་སྣུམ་པ་ལྟ་བུར་སྒྲོ་བཏགས་ནས་བཤད་པ་ཡིན་ཏེ། གང་གི་ཕྱིར་དེའི་ཚེ་རང་བཞིན་ཞི་བར་གྱུར་པས། བད་ཀན་དང་ཚིལ་ལ་སོགས་པ་རང་གི་རྒྱུ་ཉིད་ཀྱིས་བཤང་གཅི་ལ་སོགས་པ་མངོན་པར་འཕེལ་བར་བྱེད་དེ། དབང་པོ་ཐམས་ཅད་ཀྱི་བྱ་བ་ལས་ལྡོག་པ་ཡིན་པའི་ཕྱིར་གཉིད་མ་ལོག་པ་ལྟར་ཟད་པར་བྱེད་པ་ནི་མ་ཡིན་གྱི། གཉིད་ལོག་པའི་སྔར་ནི་བད་ཀན་དང་ཚིལ་ལ་སོགས་པའི་ཐ་མལ་པར་ཞི་བར་གནས་པའི་ངོ་བོ་རང་གི་ལུས་ལ་གནས་ཕར་གཏོགས་པ་ཅུང་ཟད་གཉིད་ཀྱིས་ལོག་པ་ལྟ་བུར་མི་སྣང་སྟེ། དེ་བས་ན་གཉིད་ཀྱིས་ལོག་པ་ལ་སྣུམ་པར་བཤད་པ་ཡིན་གྱི། ཡང་དག་པར་ནི་མ་ཡིན་ཏེ། འདིའི་བྱ་བའི་མཚན་ཉིད་ནི་འདི་ཙམ་དུ་ཟད་པའི་ཕྱིར་རོ། །ཙོག་པུར་འདུག་སྟེ་གང་ཡུར་ཞིང་ཅུང་ཟད་གཉིད་ལོག་པ་དེ་ནི་རྩུབ་པ་དང༌། བད་ཀན་མེད་པར་འགྱུར་བ་ཡིན་ཏེ། ཤིན་ཏུ་གཉིད་མེད་པ་མ་ཡིན་པའི་ཕྱིར། རླུང་སྐྱེད་ཅིང་འཁྲུགས་པ་ཡང་མ་ཡིན་ནོ། །བད་ཀན་ཡང་སྐྱེད་པ་མ་ཡིན་ནོ། །སོ་ག་རླུང་འཕེལ་སྟོབས་འཕྲོག་དུས། །རྩུབ་ཅིང་མཚན་མོ་ཐུང་བས་ན། །ཉིན་པར་གཉིད་ཕན། ཞེས་བྱ་བ་ལ། སོ་གའི་དུས་སུ་ཉིན་པར་གཉིད་ལོག་པ་ཕན་ནོ་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། རྒྱུ་གསུམ་སྨྲས་པ་ཡིན་ཏེ། རླུང་འཕེལ་བའི་དུས་ཡིན་ཏེ། སོ་ག་བསགས་བའི་རླུང་དབྱར་གྱི་དུས་ན་ལྡང་བར་འདོད་པའི་ཕྱིར་དང༌། སྟོབས་འཕྲོག་བའི་དུས་བྱུང་བའི་རྩུབ་པ་ཡིན་པས་སོག་རྩུབ་པའི་ཕྱིར་
དང། དེ་བཞིན་དུ་དེའི་ཚེ་མཚན་མོ་ཐུང་བར་གྱུར་བས་ན། ཉིན་པར་གཉིད་ལོག་པ་ཕན་པ་ཡིན་ནོ། །གཞན་དག་ཏུ། དེ་ནི་བད་ཀན་མཁྲིས་པ་སྐྱེད། །ཅེས་བྱ་བ་ལ། སོ་ག་ལས་གཞན་བར་དབྱར་ལ་སོགས་བའི་དུས་སུ་ནི་ཉིན་མོའི་གཉིད་དེ་ནི་བད་ཀན་དང་མཁྲིས་པ་གཉིས་སྐྱེད་པ་ཡིན་ནོ། །སྨྲ་མང་བཞོན་དང་ལམ་གྱིས་དུ་བ། །ར་རོ་བུད་མེད་བསྟེན་ཁུར་ལས། །ཁྲོས་དང་མྱ་ངན་འཇིགས་པས་དུབ། །སྐྱིགས་བུ་དབུགས་མི་བདེ་ཚད་འཁྲུ། །རྒན་དང་བྱིས་བ་ཉམས་སྟོབས་ཟད། །གློ་རྡོལ་སྐེམ་དང་གཟེར་གྱིས་གནོད། །ཟས་མ་ཞུ་དང་བཅོམ་དང་སྨྱོ། །ཉིན་པར་གཉིད་ལོག་རིགས་མ་གཏོགས། །ཞེས་བྱ་བ་ལ། སྨྲ་མང་ནས་འཇིགས་པའི་བར་དུ་དུབ་བའི་སྒྲ་སོ་སོར་ཞིང་སྦྱར་བར་བྱ་སྟེ། དེ་དག་གིས་དུབ་པ་དང་སྐྱིགས་བུ་ལ་སོགས་པས་དུབ་པར་སྦྱར་རོ། །དེ་ལ་སྨྲ་བ་མང་བ་ནི་ཀློག་པ་ལ་སོགས་པའོ། །བཞོན་པ་ནི་རྟ་ལ་སོགས་པས་བསྐྱོད་པའོ། །ལམ་གྱིས་དུབ་པ་ནི་ལམ་དུ་ཞུགས་པའོ། །ར་རོ་བ་ནིར་རོ་བས་ཉེན་པས་དུབ་པའོ། །བུད་མེད་ཀྱིས་དུབ་པ་ནི་འཁྲིག་པས་དུབ་པའོ། །ཁུར་གྱིས་དུབ་པ་ནི་ཁུར་བས་ལུས་ཉོན་མོངས་པས་དུབ་པའོ། །ལས་ནི་ལུས་དུབ་པར་བྱེད་པའི་རྩོལ་བ་རྣམས་སོ། །དེ་ལྟར་ན་སྨྲ་བ་མང་བ་ལ་སོགས་པས་དུབ་པ་དང༌། གཞན་ཡང་སྐྱིགས་བུ་ལ་སོགས་པས་བཏབ་པ་མ་གཏོགས་པར་གཞན་དག་ཉིན་པར་གཉིད་ལོག་པ་ནི། བད་ཀན་དང་མཁྲིས་པ་སྐྱེད་པར་བྱེད་པ་ཡིན་ལ། ཚུལ་འདི་དག་དང་ལྡན་པ་དག་གིས་ནི། དུས་ཐམས་ཅད་དུ་ཉིན་པར་གཉིད་ལོག་པར་མི་བྱའོ། །ཟས་མ་ཞུ་པ་ནི་རྣམ་པ་ལྔ་སྟེ། རིང་དུ་ཐོགས་པ་དང༌། ཁོང་ཚ་བ་དང༌། བཤང་བ་འགགས་པ་དང༌། ཤིན་ཏུ་ཐོགས་པ་དང༌། བཅུད་ཀྱི་ལྷག་མ་ལུས་པའོ། །བཅོམ་པ་ནི་རལ་གྲིལ་སོགས་པའི་མཚོན་གྱིས་ལུས་བཅོམ་ཞིང་བཏགས་པའོ། །སྨྱོ་བ་ནི་གདོན་དང་བརྗེད་བྱེད་ལ་སོགས་བས་ཁམས་མི་མཉམ་པར་བྱས་ནས་དྲན་པ་མེད་པའོ། །ཉིན་པར་གཉིད་ལོག་པར་རིགས་པ་ནི། སྔར་གོམས་ཤིང་འོ་བས་པའི་རང་བཞིན་ཡོད་པ་སྟེ། དེ་དག་ཐམས་ཅད་མ་གཏོགས་པར་གཞན་གྱིས་དུས་ཐམས་
ཅད་དུ་སྤང་བར་བྱའོ། །འདི་དག་དེ་བཞིན་ལུས་ཟུངས་སྙོམས། །བད་ཀན་སྐྱེས་ཤིང་ལུས་བརྟས་འགྱུར། །ཞེས་བྱ་བ་ལ། སྨྲ་བ་མང་བ་ལ་སོགས་པས་དུབ་པ་དེ་དག་གིས་སྔར་བཤད་པའི་ཚུལ་དེ་བཞིན་དུ་བསྟེན་པར་གྱུར་ན། དེ་ལུས་ཟུངས་ཞེས་བྱ་བ་དངས་མ་ལ་སོགས་པ་དང༌། བད་ཀན་ལ་སོགས་པ་ལུས་འཛིན་པར་བྱེད་པ་སྙོམས་པ་སྟེ། ལྷག་པ་དང་འབྲི་བ་མེད་པར་ཆ་སྙོམས་པར་འགྱུར་བ་དང༌། དེ་བཞིན་དུ་བད་ཀན་དང༌། ལག་ངར་དང༌། བརླ་ལ་སོགས་པའི་ལུས་ཀྱི་ཡན་ལག་རྣམས་སྐྱེས་ཤིང་བརྟས་པར་འགྱུར་བའོ། །ཚིལ་ཆེ་བད་ཀན་མང་དང་སྣུམ། །རྟག་ཟ་ཉིན་པར་གཉིད་མ་ལོག །ཅེས་བྱ་བ་ལ། མི་གང་ཚིལ་ཆེ་ཞིང་བད་ཀན་མང་བ་དང༌། དེ་བཞིན་དུ་སྣུམ་བག་རྟག་ཏུ་ཟ་བ་དག་ནི། ཉིན་པར་གཉིད་མ་ལོག་ཅེས་བྱ་བ་སྟེ། དུས་ཐམས་ཅད་དུ་ཡང་ཉིན་པར་གཉིད་ལོག་པར་མི་བྱའོ། །དུག་གིས་ཕོག་དང་ལྐོག་ནད་ཅན། །མཚན་མོ་ནམ་ཡང་གཉིད་མ་ལོག །ཅེས་བྱ་བ་ལ། དུག་གིས་ཕོག་ཅིང་ཉེན་པའི་ནད་བ་དང༌། ལྐོག་མའི་ནད་ཡོད་པའི་ལྐོག་ནད་ཅན་དེ་གཉི་གས་ཀྱང་མཚན་མོའི་དུས་སུ་ནམ་ཡང་གཉིད་ལོག་པར་མི་བྱའོ། །དུས་མིན་གཉིད་ལོག་རྨོངས་བག་དང༌། །རིམས་སྐྱེད་རྨུགས་ཤིང་ཆམ་པས་འདེབས། །མགོ་ན་སྐྲང་ཞིང་སློན་སྒྱིད་སྐྱུར། །རྩ་ཡི་རྒྱུན་འགགས་མེ་དྲོད་ཉམས། །ཞེས་བྱ་བ་ལ། དུས་མ་ཡིན་པར་གཉིད་ཀྱིས་ལོག་པ་ནི་སྔར་བཀག་པའི་དུས་སྨོས་བ་དག་ཏུ་ཉིན་མོ་གཉིད་ལོག་པ་ལས་ནི་རྨོངས་བག་ལ་སོགས་པ་འབྱུང་བར་འགྱུར་རོ། །དེ་ལ་རྨོངས་བག་ནི་གང་བྱས་པ་རྣམས་མི་དྲན་པའོ། །རྨུགས་པ་ནི་སེམས་མི་གསལ་བའོ། །སྒྱིད་སྐྱུར་བ་ནི་མེར་མེར་པོར་བྱེད་པའོ། །རྩའི་རྒྱུན་འགགས་པ་ནི་རྩ་སྦུབས་འགགས་ཤིང་ལེགས་པར་མི་རྒྱུ་བའོ། །དེ་ལ་སྨྱུང་དང་སློན་སྨན་དང༌། །རྡུལ་དབྱུང་སྣ་སྨན་གཏང་བ་དང༌། །ཞེས་བྱ་བ་ལ། དུས་མ་ཡིན་པར་གཉིད་ལོག་པ་ནས་བྱུང་བའི་རྨོངས་བག་ལ་སོགས་པ་ལ་སྨྱུང་བ་ནས་སྨན་སྣ་ནས་གཏོང་ཞིང་སྦྱིན་པར་བྱའོ། །གཉིད་ཆེས་གྱུར་ལ་སྐྱུག་སྨན་རྣོ། །མིག་སྨན་རྣོ་དང་སྣ་སྨན་དང༌། །
སྨྱུང་བ་སེམས་ལས་བུད་མེད་བསྟེན། །མྱ་ངན་འཇིགས་དང་ཁྲོས་པ་སྦྱར། །ཞེས་བྱ་བ་ལ། ཤིན་ཏུ་གཉིད་ཆེས་པ་ལས་གྱུར་པའི་ནད་ལ་སྐྱུག་སྨན་རྣོན་པོ་བཏང་བལ་སོགས་པ་ནས་ཁྲོས་པའི་བར་སྦྱར་བར་བྱའོ། །དེ་ལ་སྐྱུག་སྨན་ནི་སློན་སྨན་གཏང་བའོ། །དེ་ཡང་སྨན་རྣོན་པོ་སྦྱར་ཏེ་བྱ་བ་ཡིན་པས་རྣོན་པོ་ཞེས་བྱའོ། །དེ་བཞིན་དུ་མིག་སྨན་ཡང་རོ་ཚ་བ་དང༌། ལན་ཚྭ་དང༌། སྐྱུར་བའི་སྨན་ལས་སྦྱར་བའི་རྣོ་བ་ཉིད་དོ། །སྣ་ནས་གཏང་བའི་སྨན་ནི་སྣ་སྨན་ནོ། །སྨྱུང་བ་ནི་ཟས་བཅད་པའོ། །སེམས་ལས་ནི་དངོས་པོ་རྣམས་ཡིད་ལ་དྲན་པའོ། །བུད་མེད་བསྟེན་པ་ནི་འཁྲིག་པའོ། །མྱ་ངན་ནི་སྡུག་བསྔལ་བར་གནས་པའོ། །འཇིགས་པ་ནི་སྐྲག་པའོ། །ཁྲོས་པ་ནི་འཁྲུགས་པའོ། །འདི་དག་ཉིད་ཀྱིས་གཉིད་དྲགས་པ། །འཇིག་ཅིང་བད་ཀན་རབ་ཟད་བྱེད། །ཅེས་བྱ་བ་ལ། འདི་དག་ཉིད་ཀྱིས་གཉིད་དྲགས་པ། །འཇིག་ཅིང་བད་ཀན་རབ་ཟད་བྱེད། །ཅེས་བྱ་བ་ལ། འདི་དག་ཉིད་ཀྱིས་ཞེས་བྱ་བ། བཤད་མ་ཐག་བའི་སྐྱུག་སྨན་རྣོན་པོ་བཏང་བ་ལ་སོགས་པས་གཉིད་ཀྱིས་དྲགས་པ་ཡང་ཞིང་འཇིག་ལ། དེ་བཞིན་དུ་བད་ཀན་རབ་ཏུ་ཟད་པར་བྱེད་པས་ཀྱང་གཉིད་མེད་པར་འགྱུར་རོ། །གཉིད་ཡར་བ་ཡིས་ཡན་ལག་སྙོམ། །གླད་པ་ལྕི་ཞིང་གླལ་འོང་ལ། །མི་གསལ་ན་ཞིང་མགོ་འཁོར་ལ། །ཟས་མི་འཇུ་རྨྱ་རླུང་སྐྱེས་ནད། །ཅེས་བྱ་བ་ལ། གཉིད་ཡར་བ་ཞེས་བྱ་བ་གཉིད་མེད་བར་གྱུར་པ་ལས། ཡན་ལག་སྙོམ་པ་ལ་སོགས་པ་འབྱུང་བར་འགྱུར་རོ། །དེ་ལ་ཡན་ལག་སྙོམ་པ་ནི་ཡན་ལག་བརྡུངས་པ་སྙམ་སེམས་པའོ། །གླད་པ་ལྕི་བ་ནི་མགོ་ལྕི་བའོ། །རླུང་སྐྱེས་ནད་ནི་འདི་དག་དང༌། རྗེས་སུ་མཐུན་པའི་ནད་མང་པོ་འབྱུང་བའོ། །གཞན་ནི་གོ་བར་ཟད་དོ། །དེ་བས་མཚན་མོ་དུས་བཞིན་དུ། །ཅི་བདེར་གཉིད་ནི་ལོག་པར་བྱ། །ཞེས་བྱ་བ་ལ། རྒྱུ་དེ་བས་ན་མཚན་མོའི་དུས་སུ་དུས་བཞིན་དུ་ཞེས་བྱའོ། །གཉིད་ལོག་པའི་དུས་ཅི་ཙམ་ཡིན་པ་དེ་ཙམ་དུ་ཅི་བདེར་ཞེས་བྱ་བ། བདེ་བར་གྱུར་པ་ཉིད་དུ་གཉིད་ལོག་པར་བྱ་ཞིང་གོམས་པས་བསྟེན་པར་བྱའོ། །མ་གོམས་གཉིད་ཀྱི་ས་མ་ལོག་ན། །ནང་བར་མ་ཟོས་ཕྱེད་གཉིད་ལོག །ཅེས་བྱ་བ་ལ།
མ་གོམས་ཤིང་གཉིད་ཀྱིས་མ་ལོག་པར་འོས་པ་མ་ཡིན་བདག་གཉིད་མ་ལོག་ན། ནང་པར་ཉིན་མོའི་དུས་སུ་ཟན་མ་ཟོས་བར་དེའི་ཕྱེད་གཉིད་ཀྱིས་ལོག་པར་བྱའོ། །དེས་ནི་འདི་སྐད་སྟོན་པ་ཡིན་ཏེ། ཅི་སྲིད་གཉིད་ལོག་པར་རིགས་པའི་དུས་དེ་སྲིད་དུ་གཉིད་མ་ལོག་ན། མཚན་མོ་ཅི་ཙམ་གཉིད་མ་ལོག་པ་དེ་ཙམ་གཉིད་ལོག་པ་ནི་མ་ཡིན་མོད་ཀྱི། དེའི་ཕྱེད་ཙམ་གཉིད་ལོག་པར་བྱ་སྟེ། གང་མཚན་མོ་ཐུན་གཉིས་གཉིད་མ་ལོག་ན། དེ་ཉིན་མོ་ནང་པར་གྱི་དུས་སུ་ཐུན་གཅིག་གཉིད་ལོག་པར་བྱའོ། །གཉིད་ཡང་གྱུར་ན་འོ་མ་དང༌། །ཆང་དང་ཤ་ཁུ་ཞོ་རྣམས་བཏུང༌། །ལུས་བསྐུ་དྲིལ་དང་ཁྲུས་བྱ་ཞིང༌། །མགོ་བསྐུ་རྣ་བ་མིག་དག་བྱ། །ཞེས་བྱ་བ་ལ། གཉིད་ཡར་བའམ། ཤིན་ཏུ་སྲ་བར་གྱུར་ན། འོ་མ་བཏུང་བ་ལ་སོགས་པ་ནས། རྣ་བ་དང་མིག་དག་པའི་བར་དུ་ཅི་རིགས་པར་བྱའོ། །མགོ་བསྐུ་བ་དང༌། རྣ་བ་དང༌། མིག་དག་པ་ནི་སྣུམ་གྱིས་བྱའོ། །ན་ཆུང་ལག་དར་གྱིས་འཁྱུད་དང༌། །སེམས་བདེ་བྱ་བ་ཟིན་པ་དང༌། །ཡིད་དང་རྗེས་མཐུན་ཡུལ་ལྡན་པ། །ཇི་འདོད་གཉིད་འོང་བདེ་བར་སྐྱེད། །ཅེས་བྱ་བ་ལ། བུད་མེད་ན་ཆུང་གཞོན་ནུས་འཁྱུད་བ་ལ་སོགས་པ་དང༌། དེ་བཞིན་དུ་སེམས་བདེ་བ་སྟེ། ཡིད་དགའ་བ་དང་ལྡན་པ་དང༌། བྱ་བ་ཟིན་ཏེ། གང་བྱ་བའི་དངོས་བོ་དེ་བྱས་ཟིན་པར་གྱུར་བ་དང༌། དེ་བཞིན་དུ་གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་ཡིད་དང་རྗེས་སུ་མཐུན་ཞིང་ཡིད་དུ་འོང་བ་དང་ལྡན་པར་གྱུར་པ་སྟེ། འདི་དག་གིས་ནི་ཇི་ལྟར་དགའ་བ་བཞིན་དུ་གཉིད་འོང་ཞིང་དེས་བདེ་བ་རབ་ཏུ་སྐྱེད་པར་འགྱུར་རོ། །ཉལ་པོའི་བདེ་ལ་སེམས་མ་ཆགས། །ཚངས་པར་སྤྱོད་པ་ལ་དགའ་བ། །ཆོག་ཤེས་པ་ཡིས་མགུ་བའི་གཉིད། །རང་གི་དུས་ལས་འདའ་མི་བྱེད། །ཅེས་བྱ་བ་ལ། སྐྱེས་བུ་གང་གྲོང་ཡུལ་གྱི་བདེ་བ་འཁྲིག་པ་ལ་སོགས་པ་ལ་མ་ཆགས་པ། ཚངས་པར་སྤྱོད་བ་ལ་དགའ་བ། ཆོག་ཤེས་བས་མགུ་བར་གྱུར་བའི་གཉིད་ནི་རང་གི་དུས་ལས་ལྡོག་ཅིང་འདའ་བར་མི་བྱེད་ཀྱི། རང་གི་དུས་ཉིད་དུ་འོང་བོ་ཞེས་བྱ་བའི་དོན་ཏོ། །དེ་བ་གྲོང་གི་བདེ་བ་ནི་བུད་མེད་
ལ་ཆགས་པ་དང༌། ཟས་སྐེམ་ཞིམ་པོ་ལ་ཞེན་པ་སྟེ། དེ་རྣམས་ལ་གང་སེམས་ཞེན་པར་མ་གྱུར་བའོ། །ཚངས་པར་སྤྱོད་པ་ནི་བུད་མེད་དང་འདུས་པ་མེད་པ་སྟེ། དེ་ལ་དགའ་བ་དང༌། ཆོག་ཤེས་པ་ནི། བྱ་བ་ཐམས་ཅད་ལ་ར་བ་དང་བཅས་བ་མེད་པ་སྟེ། ཡོན་ཏན་དེས་མགུ་ཞིང་ཚིམ་པར་གྱུར་པ་ཉིད་ནི་རང་གི་དུས་མཚན་མོ་ཇི་ཙམ་ལོག་པར་བྱ་བ་དེ་ལས་འདའ་བར་མི་བྱེད་དོ། །ཉལ་པོའི་ཆོས་ནི་སྤང་བྱ་བ། །བཀན་མིན་ཟླ་མཚན་ལྡན་པ་དང༌། །ཡིད་དུ་མི་འོང་མི་སྡུག་སྤྱོད། །མངལ་ནི་སྐྱོན་གྱིས་ཁྱབ་པ་དང༌། །རབ་སྦོམ་སྐེམ་དང་བཅས་པ་དང༌། །སྦྲུམ་མ་གཞན་གྱི་བུད་མེད་དང༌། །རིགས་གཞན་སྐྱེ་གནས་མི་མཐུན་དང༌། །བླ་མ་ལྷ་དང་རྒྱལ་པོའི་གནས། །མཆོད་རྟེན་དུར་ཁྲོད་གསོད་གནས་དང༌། །བསྟི་ས་ལམ་གྱི་བཞི་མདོ་ཆུ། །དུས་ཚིགས་ཉིན་མོ་ཡན་ལག་མིན། །སྙིང་ག་མགོ་བོར་བརྡེག་སྤང་བྱ། །ཞེས་བྱ་བ་ལ། གྲོང་གི་ཆོས་ནི་འཁྲིག་པའི་ཆོས་ཏེ། མིང་གི་རྣམ་གྲངས་གཞན་ཡང་སྐྱེས་པ་དང༌། བུད་མེད་ཀྱི་ཀུན་ཏུ་སྦྱོར་བ་ཞེས་བྱ་བ་ཡིན་ནོ། །དེ་དག་ལས་སྤང་བར་བྱ་བ་འདི་དག་ཡོད་དེ། བཀན་མིན་ཞེས་བྱ་བ་ནི། བཀན་པ་མ་ཡིན་པ་སྤང་བ་སྟེ། དོན་གྱིས་ན་བཀན་ཏེ་བསྟེན་པར་སྟོན་པ་ཡིན་ནོ། །ཟླ་མཚན་ལྡན་པ་ཞེས་བྱ་བ་ནི་ཟླ་མཚན་རྒྱུ་ནས་དང་པོའི་ཞག་གསུམ་སྤང་བར་བྱའོ། །དེ་བཞིན་དུ་ཡིད་དུ་མི་འོང་བ་སྟེ། སྙིང་དུ་མི་སྡུག་པ་ཡང་སྤང་བར་བྱའོ། །དེ་བཞིན་དུ་མི་སྡུག་སྤྱོད་པ་སྟེ། དང་ཚུལ་ངན་ཅིང་མི་རིགས་པ་དང་ལྡན་པ་སྤང་བར་བྱའོ། །དེ་བཞིན་དུ་གང་གི་མངལ་སྐྱོན་གྱིས་ཁྱབ་ཅིང་གནོད་པ་དེ་སྤང་བར་བྱའོ། །དེ་བཞིན་དུ་རབ་ཏུ་སྦོམ་ཞིང་ཤ་ཆེ་བ་ཡང་སྤང་བར་བྱའོ། །དེ་བཞིན་དུ་ཤིན་ཏུ་སྐེམ་ཞིང༌། ཤ་དང་ཚིལ་དང༌། ཁྲག་ཟད་པ་ཡང་སྤང་བར་བྱའོ། །བཙས་པ་དང་ཞེས་བཙས་མ་ཐག་པ་དང༌། བུད་མེད་སྦྲུམ་མ་ཡང་སྤང་བར་བྱའོ། །དེ་བཞིན་དུ་གཞན་གྱིས་བདག་གིར་བཟུང་བའི་བུད་མེད་ཀྱང་སྤང་བར་བྱའོ། །དེ་བཞིན་དུ་རིགས་གཞན་ཏེ། རབ་ཏུ་བྱུང་བའམ། རིགས་ཤིན་ཏུ་མཐོ་བ་དག་ཀྱང་སྤང་བར་བྱའོ། །དེ་བཞིན་དུ་སྐྱེ་གནས་མི་མཐུན་པ་སྟེ། རྟ་ལ་སོགས་པ་སྐྱེ་གནས་ཐ་དད་པ་
ལ་སྤྱད་པ་ཡང་སྤང་བར་བྱའོ། །དེ་བཞིན་དུ་གྲོང་གི་ཆོས་ལ་འཇུག་པ་ན། བླ་མ་དང༌། ལྷ་དང༌། རྒྱལ་པོའི་གནས་སྤང་བར་བྱ་སྟེ། གནས་དེ་དག་ཏུ་འཁྲིག་བ་མི་བྱའོ་ཞེས་བྱ་བའི་དོན་ཏོ། །དེ་བཞིན་དུ་མཆོད་རྟེན་ལ་སོགས་བའི་གནས་དག་ཏུ་ཡང་འཁྲིག་པའི་བྱ་བ་སྤང་བར་བྱ་བ་སྟེ། དེ་ལ་མཆོད་རྟེན་ནི་དེ་བཞིན་གཤེགས་པའི་མཆོད་རྟེན་ནོ། །འཇིག་རྟེན་པ་དག་ནི་གྲོང་གི་ཕྱི་རོལ་ན་ཡོད་པའི་ཤིང་ཆེན་པོ་ལྷ་ལ་སོགས་པས་གནས་བཅས་པ་ལ་བྱ་བར་འདོད་དོ། །དུར་ཁྲོད་ནི་ཤི་བའི་རོ་བསྲེགས་བའི་གནས་སོ། །གསོད་གནས་ནི་རྒྱལ་པོའི་ཆད་པས་གཅོད་ཅིང་གསོད་པའི་གནས་སོ། །བསྟི་ས་ནི་གྲོང་ཁྱེར་གྱི་ཕ་རོལ་གྱིས་ཕྱོགས་ཀྱི་ཁྱད་བར་རོ། །བཞི་མདོ་ནི་ལམ་གྱི་བཞི་མདོའོ། །ཆུ་ནི་ཆུའི་ནང་སྟེ། དེ་དག་ཏུ་འཁྲིག་པ་སྤྱད་པར་མི་བྱའོ། །དུས་ཚིགས་ནི་ཚེས་བཞི་དང༌། ཚེས་དྲུག་དང༌། ཚེས་བརྒྱད་དང༌། ཉ་དང༌། དགུ་སྟོང་ལ་སོགས་པ་འཇིག་རྟེན་པའི་ཆོས་ལུགས་ལས་བཀག་བའི་ཉིན་ཞག་རྣམས་ཏེ། དེ་དག་གི་ཚེ་ཡང་སྤང་བར་བྱའོ། །དེ་བཞིན་དུ་ཉིན་མོ་སྤྱད་པ་ཡང་སྤང་བར་བྱའོ། །ཡན་ལག་མིན་ཞེས་བྱ་བ་ལ། འཁྲིག་པ་སྤྱད་པའི་ཡན་ལག་དང༌། འཚམ་པ་ནི་མངལ་གྱི་སྒོ་ཡིན་པ་ལས། དེ་མ་ཡིན་པ་ཡན་ལག་གི་གནས་སུ་མི་རུང་བ། ཁ་དང་བཤང་བའི་ལམ་ལ་སོགས་པར་ཡང་སྤྱད་པར་མི་བྱའོ། །དེ་བཞིན་དུ་སྙིང་ག་དང༌། མགོ་བོར་བརྡེག་པར་བྱས་ནས་འཁྲིག་བ་བྱ་བ་ཡང་སྤང་བར་བྱའོ། །སྤང་བ་ཞེས་པ་ནི་ཀུན་ལ་སྦྱར་བར་བྱའོ། །འགྲངས་ཆེས་ལྟོགས་དང་བརྟན་བྲལ་དང༌། །ཡན་ལག་མི་བདེར་གནས་དང་སྐོམ། །བྱིས་བ་རྒན་དང་ཤུགས་གཞན་ཉེན། །ནད་པ་ཡིས་ཀྱང་འཁྲིག་པ་སྤང༌། །ཞེས་བྱ་བ་ལ། འགྲངས་ཆེས་ཤིང་གསུད་པར་ཟོས་པ་དང་ལྟོགས་ཤིང་བཀྲེས་པས་ཉེན་པ་དང། བརྟན་ཞིང་ཡིད་རྟོན་པ་དང་བྲལ་བ་དང༌། ཡན་ལག་མི་བདེ་བར་གནས་ཤིང་ལུས་ཉ་མང་བར་གནས་པ་དང༌། སྐོམ་པས་ཉེན་པ་དང༌། བྱིས་པ་སྟེ་ལོ་བཅུ་དྲུག་པ་མན་ཆད་དང༌། རྒན་པོ་བདུན་ཅུ་ཡན་ཆད་ལོན་པ་དང༌། ཤུགས་གཞན་གྱིས་ཉེན་པ་སྟེ། བཤང་བ་
དང་གཅི་བ་ལ་སོགས་པའི་ཤུགས་ཀྱི་ས་ཉེན་ཅིང་གཟིར་བ་དང༌། ནད་བ་སྟེ་རིམས་ལ་སོགས་པའི་ནད་ཀྱིས་གཙེས་བ་སྟེ། དེ་དག་ཐམས་ཅད་ཀྱིས་ཀྱང་འཁྲིག་པ་སྤྱད་པ་སྤང་བར་བྱའོ། །དེ་ཡང་བསྡུས་པ་ལས། ཚེ་འདོད་སྐྱེས་བ་བུད་མེད་ཀྱིས། །བཅུ་དྲུག་ལོན་པ་ཚུན་ཆད་དང། །བདུན་ཅུ་ལོན་པ་ཕན་ཆད་ནི། །ཀུན་སྦྱར་བྱ་བར་མི་རིགས་སོ། །རབ་གཞོན་མ་རྫོགས་ལུས་ཟུངས་ཀུན། །བུད་མེད་ལ་ནི་ཟད་འགྱུར་ཏེ། །ལྟེང་ཀ་ཆུང་དུའི་ཆུ་བཞིན་དུ། །མོད་ལ་ཉེ་བར་བསྐམ་པར་འགྱུར། །དཔེར་ན་ཤིང་ནི་སྐམས་གྱུར་ཞིང༌། །འབུས་ཟོས་རྣམ་པར་དེངས་པ་ནི། །རེག་ན་མྱུར་དུ་འཇིག་པར་འགྱུར། །རྒན་པོ་བུད་མེད་བསྟེན་དེ་བཞིན། །ཤུགས་བཀག་གྱུར་པ་དག་གིས་ཀྱང༌། །གཅིན་ནད་རྡེའུ་འཕེལ་བ་དང༌། །རབ་རིབ་ལ་སོགས་ནད་སྐྱེད་ཅིང༌། །དབང་པོ་བཅོམ་པ་ཐོབ་པར་འགྱུར། །ཞེས་བཤད་པ་ཡིན་ནོ། །དགུན་དུས་རོ་ཙ་བྱས་དྲགས་ཚེ། །འདོད་པས་འདོད་པ་བསྟེན་པར་བྱ། །དཔྱིད་སྟོན་ཞག་ནི་གཉིས་གཉིས་ནས། །སོ་ག་དབྱར་ཚེ་ཟླ་ཕྱེད་ཅིང༌། །ཞེས་བྱ་བ་ལ། དགུན་དུས་ཞེས་བྱ་བ་ནི་གྲང་བའི་དུས་ཏེ། དགུན་སྟོད་དང་དགུན་སྨད་དོ། །དེའི་ཚེ་སྐྱེས་བུ་ཙ་བའི་ཆོག་བྱས་ཤིང་དྲགས་པ་བདོ་བར་གྱུར་པའི་ཚེ། འདོད་པས་ཞེས་པ་ཅི་དགའ་བར་འདོད་པ་བསྟེན་པར་བྱའོ། །དེ་ལ་རོ་ཙ་བར་བྱ་བའི་སྦྱོར་བ་ནི་ཁུ་བ་འཕེལ་བར་བྱ་སྟེ། འོ་མ་དང༌། མར་དང༌། ཤ་ཁུ་ལ་སོགས་པ་འོག་ནས་བཤད་བ་བཞིན་དུ་བྱས་ཤིང་ངོམས་བར་གྱུར་བའོ། །དེ་བཞིན་དུ་དཔྱིད་དང་སོན་ནི་ཞག་གཉིས་གཉིས་ནས་རོ་ཙ་བར་བྱས་པས་ངོམས་པ་དང༌། འདོད་པ་བསྟེན་པར་བྱའོ། །སོ་ག་དང་དབྱར་གྱི་ཚེ་ནི། རོ་ཙ་བ་བྱས་ནས་ཟླ་བ་ཕྱེད་ཅིང་འདོད་པ་བསྟེན་པར་བྱའོ། །གཞན་བུད་མེད་ལ་ཞུགས་ན། །མགོ་འཁོར་ངལ་དང་བླ་མ་ཐུ་ཉམས། །སྟོབས་དང་ལུས་ཟུངས་དབང་པ་ཉམས། །དུས་མིན་འཆི་བར་བྱེད་པ་ཡིན། །ཞེས་བྱ་བ་ལ། གཞན་དུ་ཞེས་བྱ་བ་ཇི་སྐད་དུ་བཤད་བ་ལས་གོ་བཟློག་པས་བུད་མེད་ལ་ཞུགས་ཤིང་འདོད་པ་སྤྱོད་པའི་སྐྱེས་བུ་དེ་ནི་མགོ་འཁོར་བ་ལ་སོགས་པའི་ནད་འབྱུང་བར་འགྱུར་རོ། །དེ་ལ་མགོ་འཁོར་བ་ནི་མི་བདེ་བར་
གནས་ཤིང་འཁོར་བའོ། །ངལ་བ་ནི་དུབ་པའོ། །བླའི་མཐུ་ཉམས་བ་ནི་མལ་དུ་འཇུག་ཅིང་འགྲོ་མི་ནུས་བའམ། ཤ་དང་ཁྲག་ཟད་པའོ། །དེ་བཞིན་དུ་སྟོབས་ཉམས་པ་དང༌། ལུས་ཟུངས་ཉམས་པ་དང༌། དབང་པོ་ཉམས་པར་འགྱུར་བ་དང༌། དུས་མིན་འཆི་བར་བྱེད་པ་ནི་ཤིན་ཏུ་བུད་མེད་ལ་བསྟེན་པས་དུས་མ་ཡིན་པར་འཆི་བར་ཡང་འགྱུར་བ་ཡིན་ནོ། །བུད་མེད་དག་ལ་ལེགས་བསྡམས་ན། །དྲན་དང་ཡིད་གཞུངས་ནད་མེད་ཚེ། །དབང་པོ་བརྟས་ཤིང་གྲགས་སྟོབས་རྣམས། །ལྷག་པར་འཕེལ་ཞིང་རྒས་སྲར་འགྱུར། །ཞེས་བྱ་བ་ལ། བུད་མེད་དག་བསྟེན་པ་ལེགས་བར་བསྡམས་ཤིང་བསྲུང་བའི་སྐྱེས་བུ་ནི། དྲན་པ་ལ་སོགས་པ་འཕེལ་བར་འགྱུར་རོ། །དེ་ལ་དྲན་པ་ནི་འདས་པའི་དོན་མ་བརྗེད་པའོ། །ཡིད་གཞུངས་པ་ནི་རྣམ་པར་དཔྱོད་ནུས་བའི་ཤེས་རབ་བོ། །ནད་མེད་པ་ནི་བདེ་བར་གནས་པའོ། །ཚེ་ནི་སྲོག་གོ །དབང་པོ་ནི་མིག་ལ་སོགས་པའོ། །བརྟས་པ་ནི་ལུས་རྒྱས་བའོ། །གྲགས་པ་ནི་སྙན་པའོ། །སྟོབས་ནི་ལུས་ཀྱི་ནུས་པ་སྟེ། དེ་དག་ལྷག་པར་འཕེལ་ཞིང་རྒྱས་པར་གྱུར་པ་དང༌། དེ་བཞིན་དུ་རྒས་སྲ་བར་འགྱུར་བ་སྟེ། སྐྲ་དགར་མེད་པ་ལ་སོགས་པར་འགྱུར་རོ། །ཁྲུས་དང་བྱུག་པ་རླུང་བསིལ་ཁར་ལ་སོགས་བཟའ། །ཆུ་བསིལ་འོ་མ་ཤ་ཁུ་སྲན་ཚོད་ཆང་དངས་འཐུངས། །ཉལ་པོ་དགའ་བྱས་འདོད་དང་བྲལ་འགྱུར་རྗེས་ལ་བསྟེན། །དེ་འདྲས་དེ་ཡི་ལུས་མདངས་སྟོབས་སླར་སྐྱེ་བར་འགྱུར། །ཞེས་བྱ་བ་ལ། སྔར་བསྟན་པའི་བུད་མེད་བསྟེན་པའི་རྗེས་ལ་ཆགས་པ་དང་བྲལ་བའི་སྐྱེས་བུས་ཁྲུས་ལ་སོགས་པ་བསྟེན་པར་བྱའོ། །དེ་ལ་བྱུག་བ་ནི་ཙནྡན་ལ་སོགས་པ་རྫས་དྲི་བཟང་པོས་ལུས་བྱུགས་ཤིང་ཁ་དོག་བསྒྱུར་བའོ། །རླུང་བསིལ་བ་ནི་རླུང་གྲང་མོའོ། །ཁ་ར་ལ་སོགས་པ་ནི་བཟའ་བའི་ཁྱད་པར་ཏེ། དེ་དག་བཟའ་བའོ། །ཆུ་བསིལ་བ་ནི་ཆུ་གྲང་མོའོ། །སྲན་ཚོད་ནི་འབྲུ་ལས་བྱས་པའོ། །ཆང་དངས་མ་ནི་ཆང་གི་སྙིང་པོའོ། །དེ་དག་ཐམས་ཅད་ནི་འདོད་པ་སྤྱོད་པའི་དགའ་བ་བྱས་ནས། འདོད་ཆགས་དང་བྲལ་བར་གྱུར་པའི་རྗེས་ཏེ། འོག་ཏུ་བསྟེན་ཅིང་ལོངས་སྤྱད་པར་བྱའོ། །དེ་
ལྟར་བྱས་པར་གྱུར་བས་སྐྱེས་བུ་དེའི་ལུས་ཀྱི་མདངས་དང་སྟོབས་སླར་སྐྱེ་བར་འགྱུར་རོ། །དེ་ཡང་བུད་མེད་དང་འཕྲད་པས་འཕྲལ་དུ་ལུས་ཀྱི་སྟོབས་འབྲི་བར་གྱུར་ཀྱང༌། འདི་ལྟར་བརྟ་ཞིང་ཚིམ་པར་བྱས་པས་དེའི་ཁུ་བ་དང་སྟོབས་འཕེལ་བ་ཉིད་དུ་འགྱུར་བའི་དོན་ཏོ། །སྨན་པ་ཐོས་སྤྱོད་ཕུན་ཚོགས་ལྡན་ཞིང་ལས་མཁས་སྙིང་རྗེ་ཅན། །གགས་དང་གནོད་མེད་ལུས་སྲུང་བྱེད་བ་ཉེ་བར་གཞག་བྱས་ནས། །རྒྱལ་པོ་རང་གི་དགེ་བའི་འབྲས་བུའི་ལོངས་སྤྱོད་བ་དེར་སྤྱོད་ཅིང༌། །ནད་མེད་མཐུ་དང་གཟི་བརྗིད་གྲགས་པ་ཡུན་རིང་འཕེལ་བར་འགྱུར། །ཞེས་བྱ་བ་ལ། སྨན་པ་ཞེས་བྱ་བ་ནི་སྨན་དཔྱད་ཀྱི་ཡན་ལག་ལ་མཁས་པ་སྟེ། དེ་ཡང་ཐོས་པ་དང་སྤྱོད་པ་ཕུན་སུམ་ཚོགས་པ་དང་ལྡན་པ་སྟེ། རྟོག་པ་དང་ཚུལ་ཕུན་སུམ་ཚོགས་པའི་ཡོན་ཏན་དང་ལྡན་པའོ། །ལས་ལ་མཁས་བ་ནི་གསོ་བ་ལ་མཁས་ཤིང་བྱང་བའོ། །སྙིང་རྗེ་ཅན་ནི་རྗེས་སུ་བརྩེ་བ་དང་ལྡན་པའོ། །གགས་དང་གནོད་པ་མེད་པ་ནི་མི་མཐུན་པ་མེད་ཅིང་བར་ཆད་ཀྱིས་གནོད་པར་བྱེད་བ་མེད་པའོ། །ལུས་སྲུང་བྱེད་བ་ནི་རྒྱལ་པོའི་སྐུ་འཚོ་བར་བྱེད་པ་སྟེ། དེ་ལྟ་བུ་ཉེ་བར་གཞག་ཅིང༌། ལུས་བསྲུང་དུ་བཅུག་ན། རྒྱལ་པོ་སྟེ་ས་བདག་གྲགས་བ་འཕེལ་བའི་བར་དུ་འགྱུར་རོ། །དེ་ཡང་རང་གི་དགེ་བའི་བསོད་ནམས་སུ་བྱ་བའི་ལས་ཏེ། དེའི་འབྲས་བུ་ནི་ལོངས་སྤྱོད་ཆེན་པོ་ལ་སོགས་པ་དང་ལྡན་པས་བདེ་བར་ཉེ་བར་ལོངས་སྤྱོད་པ་ཡིན་ལ། དེ་གང་ཞིག་སྤྱོད་པར་བྱེད་པ་དེ་ནི། དེ་སྐད་བྱ་སྟེ། དེ་ལ་ཡུན་རིང་དུ་སྤྱོད་པར་འགྱུར་བ་དང༌། ནད་མེད་ཅིང་ལུས་བདེ་བར་གནས་པ་དང༌། མཐུ་སྟེ་ལོངས་སྤྱོད་ཀྱི་འབྱོར་བ་རྣམས་དང༌། གཟི་བརྗིད་ཅེས་པ་ལུས་ཀྱི་གཟི་མདངས་དང་གྲགས་པ་སྟེ། སྙན་པས་ཁྱབ་པ་ཡུན་རིང་དུ་རྒྱ་ཆེར་འཕེལ་ཞིང་རྒྱས་པར་འགྱུར་རོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་བདུན་པའི་རྣམ་པར་འགྲེལ་པའོ།། །།དེ་ནས་ཁ་ཟས་ཀྱི་ཚོད་རན་པར་བཟའ་བའི་ལེའུ་བཤད་པར་བྱའོ་ཞེས་བྱ་བ་ལ། དེ་ནས་ཞེས་བྱ་བ་ནི་འདས་མ་ཐག་པ་སྟེ། སྔར་བརྩམས་པའི་ཁ་ཟས་བསྲུངས་
པའི་རྗེས་ཐོགས་ལ། ཁ་ཟས་ཀྱི་ཚོད་རན་པར་བཟའ་བར་བརྩམས་པ་ཡིན་ཏེ། གང་གི་ཕྱིར་ཡོན་ཏན་དང་ལྡན་པའི་ཟས་ཀྱང་ཡིན་ལ། དུག་ལ་སོགས་པ་དང་འདྲེས་པར་མ་གྱུར་དུ་ཟིན་ཀྱང་ཚད་ལས་ལྷག་པའོ། །ཚད་ལས་ཤིན་ཏུ་ཆུང་བར་ཟོས་ན་སྲོག་ཉེ་བར་འཇོམས་པར་འགྱུར་ལ། དེ་ཉིད་རན་པར་ཟོས་པ་ནི་སྲོག་ཆགས་རྣམས་ཀྱི་སྲོག་ཉིད་ཡིན་ནོ། །ཁ་ཟས་ནི་བཟའ་བར་བྱ་བ་རྣམས་སོ། །ཚོད་རན་པ་ནི་ཚད་དང་ལྡན་པའོ། །ཚོད་རན་པར་བཟའ་བ་ནི་ཚད་དང་ལྡན་པར་བཟའ་ཞིང་སྤྱད་པའོ། །དེ་ལ་ཕན་ཞིང་དགོས་པ་བྱེད་པའི་གཞུང་ལ་ནི་ལེའུ་ཞེས་བྱ་སྟེ། དེ་བཤད་ཅིང་རྣམ་པར་ཕྱེ་བ་བསྟན་པར་བྱའོ། །དུས་ཀུན་ཏུ་ནི་ཚོད་ཟིན་བཟའ། །དེ་ནི་མེ་དྲོད་སྐྱེད་བྱེད་ཡིན། །ཞེས་བྱ་བ་ལ། སྐྱེས་བུ་ནད་མེད་པའམ། ནད་དང་ལྡན་པ་ཡང་རུང་སྟེ། དེས་དུས་ཀུན་ཏུ་ཞེས་པ་དུས་ཐམས་ཅད་དུ་ཟས་ཚོད་ཟིན་ཅིང༌། ཚད་དང་ལྡན་པ་བཟའ་བར་བྱའོ། །དེ་ཅིའི་ཕྱིར་ཞེ་ན། གང་ཚད་དང་ལྡན་པར་ཟ་བ་ལ་འཇུག་པ་དེ་ནི་མེའི་དྲོད་སྐྱེད་པ་ཡིན་ཏེ། རང་གི་བྱ་བ་སྨིན་པའི་ལས་བྱེད་པར་ནུས་པ་ཡིན་ནོ། །དེ་ནི་ཚོད་རན་པར་བཟའ་ཞིང་ཚོད་ཟིན་པར་ཟ་བ་དང༌། ཚོད་ཟིན་པར་བཏུང་བ་དང༌། ཚོད་ཟིན་པར་བལྡག་པར་བྱའོ། །ཞེས་བལྟ་བར་བྱའོ། །ཚོད་རན་པའི་མཚན་ཉིད་ནི་སློབ་དཔོན་གྱིས་འདི་ལྟར་བཤད་དེ། ཚད་ཀྱང་མེའི་དྲོད་ཀྱི་སྟོབས་དང༌། ཟས་ཀྱི་དངོས་པོ་ལ་ལྟོས་པར་བྱ་དགོས་ཏེ། ཟས་ཀྱིས་ལྟོ་བར་གནོད་པ་མི་སྐྱེད་པ་དང༌། སྙིང་གར་ཐོགས་པར་མི་བྱེད་པ་དང༌། རྩིབ་ལོགས་གཉིས་སུ་ཟུག་ཅིང་གནོད་པར་མི་བྱེད་པ་དང༌། ཕོ་བ་ཤིན་ཏུ་མི་ལྕི་བ་དང༌། དབང་པོ་ཚིམ་ཞིང་བརྟས་པར་བྱེད་པ་དང༌། བཀྲེས་པ་དང༌། སྐོམ་པ་དང་བྲལ་བ་དང༌། གནས་དང༌། སྟན་དང༌། མལ་དང༌། འགྲོ་བ་དང༌། དབུགས་འབྱིན་པ་དང༌། དབུགས་རྔུབ་པ་དང༌། གཏམ་ཟེར་བ་ན་བདེ་བར་གནས་པ་དང༌། དགོངས་ཀ་དང༌། ནང་པར་བདེ་བར་ཡོངས་སུ་ཞུ་བ་དང༌། སྟོབས་དང་ཁ་དོག་ཉེ་བར་འཕེལ་བར་བྱེད་པ་སྟེ། འདི་དག་ནི་ཚད་དང་ལྡན་པའི་མཚན་ཉིད་ཡིན་ནོ། །འདི་དག་གིས་ཀྱང་ཚད་དང་ལྡན་ཞིང་ཚོད་ཟིན་པ་གཙོ་བོ་ཡིན་ཏེ། སེ་འབྲུ་དང༌།
སྐྱུར་པོ་ལ་སོགས་པའི་རྫས་མེའི་དྲོད་སྐྱེད་པར་བྱེད་པའི་རང་བཞིན་ཅན་དེ་ཚད་དང་ལྡན་པར་ཟོས་ན་མེའི་དྲོད་སྐྱེད་པར་འགྱུར་གྱི། ཚད་དང་མི་ལྡན་པས་ནི་མ་ཡིན་ནོ། །ལྕི་ཞིང་རང་བཞིན་གཡུང་བའི་རྫས་འོ་མ་དང་བུ་རམ་ཤིང་ལ་སོགས་པ་ལྟ་སྨོས་ཀྱང་ཅི་དགོས་ཏེ། དེ་བས་ན། རྫས་ནི་ལྕི་བའམ་ཡང་བའང་རུང༌། །ཆད་ལ་ལྟོས་པར་བྱ་བ་ཡིན། །ཞེས་བྱ་བ་ལ། རྫས་ལྕི་བ་ནི་བུ་རམ་ཤིང་དང༌། འོ་མ་དང༌། འབྲུ་དང༌། མོན་སྲན་གྲེའུ་དང༌། རླན་ཅན་གྱི་ཤ་རྣམས་སོ། །ཡང་བ་ནི་ཆར་གྱི་ཆུ་དང༌། རཀྟ་ཤ་ལི་ཞེས་བྱ་བ་ལ་འབྲས་རྩ་སྣར་དང༌། དྲུག་ཅུ་པ་དང༌། མོན་སྲན་སྡེའུ་དང༌། བྱ་ལ་ཝའི་ཤ་རྣམས་ཏེ། དེ་གཉི་ག་ལ་ཡང་ཚད་ལ་ལྟོས་པར་བྱ་བ་ཡིན་ཏེ། དེ་རྣམས་ནི་དེ་ལ་རག་ལུས་པར་གྱུར་པ་ཡིན་ནོ་ཞེས་བྱ་བའི་དོན་ཏོ། །རྫས་ལྕི་བའམ། ཡང་བ་དེ་དག་ཟ་ཞིང་སྤྱད་པ་ན། ཟས་ཀྱི་ཚུལ་ལ་གོམས་པར་བྱ་བ་ཆ་འདྲ་བར་རྟག་ཏུ་བཟའ་བར་བྱ་བའམ། ཡང་ན་ལྕི་བ་ནི་ཚད་ལས་གཞན་དུ་བྱ་ལ། ཡང་བ་ལ་ནི་ཚད་གཞན་ལས་ཞེས་སོམ་ཉིར་གྱུར་པ་དེའི་ཕྱིར་སྨྲས་པ་ནི། ལྕི་བ་ལས་ནི་ཕྱེད་འགྲངས་བྱ། །ཡང་བ་ལས་ནི་རབ་འགྲངས་མིན། །ཞེས་བྱ་བ་ལ། ཁ་ཟས་ལྕི་ཞིང་འཇུ་དཀའ་བ་ལས་ནི་ཕྱེད་འགྲངས་ཙམ་དུ་བཟའ་བ་དང་ཁ་ཟས་ཡང་བ་ཆར་ཆུ་དང༌། སཱ་ལུ་རྩ་སྣར་ལ་སོགས་པ་ལས་ནི། རབ་ཏུ་འགྲངས་བར་མི་བཟའི། གཞན་དུ་ན་རན་ཅིང་བདེ་བར་གནས་པ་ཙམ་གྱིས་འགྲངས་པར་བྱ་དགོས་ཏེ། གང་གི་ཕྱིར་མེ་དང་རླུང་དག་གིས་ཡོན་ཏན་མང་པོ་ཡང་བ་ལ་ནི། ཆ་མཉམ་པར་གནས་པས་མེའི་དྲོད་སྐྱེད་པར་བྱེད་པ་ཡིན་ལ། ཚོད་མ་ཟིན་པར་ཉེས་པར་ཟོས་སུ་ཟིན་ཀྱང་ཉེས་པ་ཅུང་ཟད་སྐྱེད་པ་ཡིན་ནོ། །རྫས་ལྕི་བ་ལ་ནི་སླ་བ་དང་ཆུའི་ཡོན་ཏན་མང་དུ་གནས་པས་མེའི་མི་མཐུན་པར་གྱུར་ཅིང༌། ཐུན་མོང་གི་ཡོན་ཏན་གཞན་ཡོད་པས་མེའི་དྲོད་འབྲི་བར་བྱེད་པ་ཡིན་ནོ། །བདེ་བླག་འཇུ་བ་དེ་ཙམ་ལ། །ཚོད་ཟིན་ཞེས་ནི་བཤད་པ་ཡིན། །ཞེས་བྱ་བ་ལ། ཚད་ཡོངས་སུ་ཆད་པ་སྟེ། ཚད་ཇི་ཙམ་ཟས་ཟོས་ན་བདེ་བླག་ཏུ་གཅོད་པ་མེད་པར་ཞུ་ཞིང་དེངས་པར་འགྱུར་བ་དེ་ཙམ་གྱི་ཚོད་ལ་ནི་ཚོད་ཟིན་པ་ཡིན་ནོ་ཞེས་བཤད་
ཅིང་བསྟན་པ་ཡིན་ནོ། །ཟས་ཚོད་མ་ཟིན་ཆུང་གྱུར་ན། །སྟོབས་དང་གཟི་མདངས་འཕེལ་མི་འགྱུར། །རླུང་གི་ནད་ནི་ཐམས་ཅད་ཀྱི། །རྒྱུ་ཉིད་དུ་ནི་འགྱུར་བ་ཡིན། །ཞེས་བྱ་བ་ལ། ཁ་ཟས་ཀྱི་ཚོད་མ་ཟིན་ཅིང༌། ཚད་ལས་ཆུང་ཞིང་དམན་པར་གྱུར་པ་ཟོས་ན་སྟོབས་སུ་ཡང་མི་འགྱུར། གཟི་མདངས་སུ་ཡང་མི་འགྱུར། ལུས་འཕེལ་ཞིང་རྒྱས་པར་མི་འགྱུར་བ་དང༌། དེ་བཞིན་དུ་རླུང་ལས་གྱུར་པའི་ནད་མ་ལུས་པ་ཐམས་ཅད་ཀྱི་རྒྱུ་ཉིད་དེ། བསྐྱེད་པའི་རྒྱུར་འགྱུར་ཞིང་འབྱིན་པར་བྱེད་དོ་ཞེས་བྱ་བའི་དོན་ཏོ། །ཚད་ལས་ཤིན་ཏུ་ཆེས་པ་ཡང༌། །ཉེས་པ་ཐམས་ཅད་མྱུར་དུ་སྐྱེད། །ཅེས་བྱ་བ་ལ། ཚད་ལས་ཤིན་ཏུ་ཆེས་པ་ནི་ཟས་ལྷག་པར་མང་པོ་ཟོས་པ་སྟེ། དེས་ནི་ཉེས་པ་གསུམ་པོ་ཐམས་ཅད་མྱུར་ཞིང་རིངས་པར་སྐྱེད་པར་བྱེད་ཅིང་རབ་ཏུ་གཡོ་བར་བྱེད་དོ། །མ་ཞུའི་ཟས་ནི་མི་བཟད་པ། །དེ་ཡིས་རླུང་སོགས་གཟིར་གྱུར་པས། །ཅིག་ཅར་རྣམ་པར་འཁྲུག་འགྱུར་ཞིང༌། །དེ་ཉིད་དུ་ནི་ཞུགས་གྱུར་ནས། །རྩ་སྒོ་འགགས་ཤིང་བེའུ་སྣབས་སྐྱེད། །སྟེང་དང་འོག་གི་ལམ་དག་ཏུ། །བསྐྱོད་པས་གསུད་ཅིང་ཟུག་བྱེད་པ། །བརྐམ་ཆགས་ཅན་ལ་འཕྲལ་སྐྱེད་བྱེད། །ཅེས་བྱ་བ་ལ། ཟས་མ་ཞུ་ཞིང་ལྷག་པར་ཟོས་པ་མི་བཟད་ཅིང་གནོད་པར་གྱུར་པས་དེས་རླུང་སོགས་ཞེས་པ། རླུང་དང་མཁྲིས་པ་དང་བད་ཀན་འཁྲུག་ཅིང་གཡོ་བར་གྱུར་པས་ཅིག་ཅར་དེ་རྣམས་དུས་གཅིག་ཏུ་འཁྲུག་ཅིང་ལྡང་བར་བྱེད་པས་ན། རྩ་སྒོ་འགགས་ཤིང་ཞེས་པ། རྩ་སྦུབས་འགགས་པར་བྱས་པས། བེའུ་སྣབས་ཞུ་བ་ཞེས་བྱ་བའི་ནད་སྐྱེད་པར་འགྱུར་རོ། །ཅི་ཞིག་བྱས་ནས་དེ་སྐྱེད་ཅེ་ན། །དེ་ཉིད་དུ་ནི་ཞུགས་གྱུར་ནས། །ཞེས་པ་སྟེ། ཟས་མ་ཞུ་བ་དེ་ཉིད་ཀྱིས་ནང་དུ་རླུང་ལ་སོགས་པ་ཞུགས་ཤིང་དེ་དང་གཅིག་ཏུ་གྱུར་ཅིང་འདྲེས་པར་གྱུར་ནས་བེའུ་སྣབས་ཀྱི་ནད་སྐྱེད་པར་བྱེད་པ་ཡིན་ནོ། །དེ་བཞིན་དུ་ཟས་མ་ཞུ་ཞིང་འདུག་པ་དེ་ཉིད་དུ་ཞུགས་ནས། སྟེང་དང་འོག་གི་ལམ་དག་ཏུ་བསྐྱོད་ཅིང༌། བླ་འོག་ཏུ་དྲི་མ་དང༌། ཟས་ལ་སོགས་པ་ཕྱི་རོལ་དུ་འདྲེན་ཅིང་འཕོ་བར་བྱེད་པས་ན། དེ་ཉིད་ཀྱི་
རྒྱུས་གསུད་པའི་ཟུག་གཟེར་དྲག་པོ་སྐྱེད་པར་བྱེད་པ་ཡིན་ནོ། །སུ་ཞིག་ལ་ཞེ་ན། བརྐམ་ཆགས་ཅན་ལ་ཞེས་བྱ་བ་སྟེ། བཟའ་བཏུང་ལ་ཆགས་ཤིང་ལྟོ་འདུན་ཅན་ཏེ། སེམས་མ་བསྡམས་པ་དག་ལ་གནོད་པ་འདི་ལྟ་བུ་འཕྲལ་དུ་སྐྱེད་ཅིང་འབྱུང་བར་འགྱུར་རོ་ཞེས་བྱ་བའི་དོན་ཏོ། །དེ་ཡང༌། ཕལ་ཆེར་ཤེས་རབ་ཉེས་པ་ཡིས། །ནད་ཀྱི་ཚོགས་ནི་སྐྱེ་བར་འགྱུར། །ཟས་ལ་བརྐམ་བའི་མི་རྣམས་ལ། །ཁྱད་པར་དུ་ནི་གསུད་པ་འབྱུང༌། །ཞེས་བཤད་པ་ཡིན་ནོ། །དེ་ལས་རླུང་ལས་གཟེར་མགོ་འཁོར། །ཁོང་སྦོས་འདར་ཞིང་རེངས་སོགས་འགྱུར། །མཁྲིས་པ་ལས་ནི་འཁྲུ་རིམས་འདེབས། །ཁོང་ཚ་སྐོམ་ཞིང་ཁ་སོགས་འགྱུར། །བད་ཀན་སློན་ཞིང་ཡན་ལག་ལྕི། །ཚིག་ཐོགས་མཆིལ་མ་མང་བར་འགྱུར། །ཞེས་བྱ་བ་ལ། དེ་ལ་མ་ཞུ་བ་ལ་རླུང་ལ་སོགས་པའི་ནད་གཞི་ཞེས་བྱ་བ་ལས་ནད་འདི་དག་འགྱུར་ཏེ། དེ་ལས་ཀྱང་རླུང་ལས་གྱུར་པའི་མ་ཞུ་བའི་ཁོང་པ་གཟེར་བ་དང༌། མགོ་འཁོར་ཞིང་ལྕི་བ་དང༌། ཁོང་སྦོས་པ་ལ་སོགས་བར་འགྱུར་རོ། །མཁྲིས་པ་དང་འདྲེས་པའི་མ་ཞུ་བ་ལས་ནི་འཁྲུ་བ་ལ་སོགས་པའི་ནད་སྐྱེ་བར་འགྱུར་རོ། །བད་ཀན་གྱི་ཤས་ཆེ་བ་ལས་ནི་སློན་ཞིང་སྐྱུགས་པ་དང། ཡན་ལག་ལྕི་བ་དང༌། ཚིག་ཐོགས་པ་དང༌། ཚིག་འབྱིན་མི་ནུས་པ་ལ་སོགས་པར་འགྱུར་རོ། །མ་ཞུ་བ་བེའུ་སྣབས་ཅན་དང་གསུད་ཅིང་གཟེར་ཟུག་ཅན་གྱི་མཚན་ཉིད་བསྡུས་བ་ལས། མིང་དོན་དང་ལྡན་པ་བཤད་པ་ནི། ཟས་ནི་འཇུ་བར་མ་གྱུར་ལ། །རྟིང་དང་འོག་ཏུ་མི་འགྲོ་བར། །མ་ཞུའི་གནས་སུ་བེའུ་སྣབས་འགྱུར། །དེས་ནི་བེའུ་སྣབས་ཅན་ཞེས་བཤད། །རླུང་ལ་སོགས་བ་རབ་འཁྲུགས་པས། །གཟེར་ཟུག་སྣ་ཚོགས་ཀྱིས་ཟུག་ཅིང༌། །ཁབ་ཀྱིས་ལུས་ནི་འབིགས་པ་ལྟར། །རྣོ་བར་ཟུག་པས་གསུད་གཟེར་ཡིན། །ཞེས་པའོ། །ཁྱད་པར་དུ་ནི་ཉམ་ཆུང་ཞིང༌། །མེ་དྲོད་ཞན་དང་ཤུགས་བཀག་པའི། །ཟས་ནི་རླུང་གིས་བཀག་པ་དང༌། །བད་ཀན་གྱིས་ནི་བར་བཀག་པའི། །ཉེས་པ་བེ་སྣབས་དཀྲུགས་པས་ན། །ཟུག་རྔུ་ཟུག་པ་ལྟ་བུར་གནས། །འཁྲུ་དང་སློན་
པར་མི་བྱེད་པར། །གཟེར་ལ་སོགས་པ་མི་བཟད་པ། །བེ་སྣབས་དེ་ཡིན། ཞེས་བྱ་བ་ནི། ཁྱད་པར་དུ་ཞེས་པ་མཆོག་ཏུ་ཡང་སྐྱེས་བུ་ཤིན་ཏུ་ཉམ་ཆུང་ཞིང་སྦེག་པར་གྱུར་པ་དང༌། དེ་བཞིན་དུ་མེ་དྲོད་ཞན་པ་སྟེ། བད་ཀན་མང་པོས་ཕོ་བའི་མེ་དྲོད་ཉམས་པར་གྱུར་པ་དང༌། ཤུགས་བཀག་པས་ཞེས་བྱ་བ། འཕྱེན་དང་བཤང་བ་དང༌། གཅི་བའི་ཤུགས་བཀག་པར་གྱུར་པའི་སྐྱེས་བུའི་ཟས་ནི་རླུང་གི་ནད་ཀྱིས་ལམ་ཉེ་བར་བཀག་པར་བྱས་པ་དང༌། དེ་བཞིན་དུ་བད་ཀན་གྱིས་བར་དུ་ཞེས་པ་དབུས་སུ་ལམ་བཀག་པའི་རྒྱུས་ནི། ཟས་དེ་བེའུ་སྣབས་སུ་གྱུར་ཅིང༌། ཕྱི་རོལ་དུ་འབྱུང་བར་འགྱུར་ལ། འཇུ་བའི་སྒོ་མེད་པར་གྱུར་པའི་ཉེས་པ་བེའུ་སྣབས་སུ་བྱས་ནས་དཀྲུགས་ཤིང་རྣམ་པར་བསྐྱོད་པས་མ་ཞུ་བའི་བེའུ་སྣབས་ཏེ། ཟུག་རྔུ་ཟུག་པ་ལྟ་བུ་ཉིད་དུ་ཀུན་དུ་གནས་ཤིང༌། གཟེར་བ་དང་ཁོང་པ་དང༌། ཡན་ལག་སྙོམ་ཞིང་ཟུག་པ་ལ་སོགས་པའི་ནད་རྣམ་པ་མང་པོའི་སྤྱིའི་རྒྱུར་གྱུར་པས་ཟས་དེ་མར་འཁྲུ་བ་དང༌། ཡར་སློན་པར་མི་བྱེད་པས་དེ་མ་གཏོགས་པར། ཇི་སྐད་དུ་བཤད་པའི་རླུང་ལ་སོགས་པའི་ནད་མི་བཟད་ཅིང་བརྣག་པར་དཀའ་བ་གང་ཡིན་པ་ནི་བེའུ་སྣབས་སུ་གྱུར་ནས་སྐྱེད་པར་བྱེད་པས་ན། ནད་དེ་ལ་མ་ཞུ་བ་བེའུ་སྣབས་ཞེས་བྱའོ། །ཉེས་རབ་གདུག །བེ་སྣབས་མི་བཟད་ཀྱིས་སྦུབས་བཀག །རྩིབ་ལོགས་ཀུན་ཏུ་དྲང་པོར་འགྲོ། །ཤིང་བཞིན་རེངས་པར་གྱུར་ན་ནི། །མ་ཞུ་ཤིང་འདྲ་ཞེས་བྱ་སྟེ། །མྱུར་དུ་གསོད་བྱེད་དེ་སྤང་བྱ། །ཞེས་བྱ་བ་ལ། རླུང་ལ་སོགས་པའི་ཉེས་པ་ཤིན་ཏུ་གདུག་པ་སྟེ། ཤས་ཆེར་གནོད་པར་གྱུར་པ་དང༌། བེའུ་སྣབས་མི་བཟད་པ་རྣམས་ཀྱིས་སྦུབས་བཀག་པ་སྟེ། མ་ཞུ་བའི་བེའུ་སྣབས་མི་བཟད་ཅིང་གདུག་པས་རྩ་སྦུབས་ཀྱི་ཁོང་སྟོང་པར་བཀག་ཅིང་གོ་སྐབས་ཀྱི་བར་ཆད་པས་རླུང་ལ་སོགས་པ་རྣམས་རྩིབ་ལོགས་ཀུན་ཏུ་ཐད་ཀར་ཕན་ཚུན་འགྲོ་ཞིང༌། དྲང་པོར་འགྲོ་བས་ཁྱབ་པར་གྱུར་པས་ན། ལན་འགའ་སྐྱེས་བུ་དེའི་ལུས་ཤིང་བཞིན་དུ་རེངས་ཤིང་དབྱིག་པ་བསྒྲེང་བ་ལྟར་གྱུར་ན། ལུས་གཡོ་བར་མ་ནུས་པར་བྱེད་པར་གྱུར་ན་ནི། དེའི་ནད་དེའི་མིང་མ་ཞུ་བ་ཤིང་
འདྲ་ཞེས་བྱ་སྟེ། དེས་ནི་མྱུར་དུ་གསོད་ཅིང་འཆི་བར་བྱེད་པས་གསོར་མི་རུང་བ་སྟེ། དེ་སྤང་ཞིང་དོར་བར་བྱ་སྟེ། དེ་ནི་ཟུག་ཐབས་ཤིང་འདྲ་བའི་མ་ཞུ་བ་ཞེས་བྱའོ། །མི་འཕྲོད་ལྷག་ཟ་མ་ཞུ་བར། །ཟད་བྱེད་མ་ཞུ་དུག་གི་ནི། །མཚན་ཉིད་ཅན་དེ་མི་བཟད་པ། །དུག་གི་མིང་ཅན་གང་ཡིན་དེ། །དུག་གི་ཚུལ་ཅན་མྱུར་གསོད་བྱེད། །གསོ་དཔྱད་བྱ་བར་དཀའ་བས་སྤང༌། །ཞེས་བྱ་བ་ལ། མི་འཕྲོད་པ་ནི་ཟས་བསྲུང་བའི་ལེའུའི་སྐབས་སུ་བཤད་པ། རླན་ཅན་གྱི་ཤ་ལ་སོགས་པ་དང༌། འོ་མ་ལ་སོགས་པ་ལྷན་ཅིག་བཟའ་བ་མ་འཕྲོད་པ་ལ་སོགས་པ་ཡིན་ནོ། །ལྷག་པར་ཟ་བ་ནི་ཟས་ཀྱིས་འགྲངས་པའི་སྟེང་དུ་ཡང་ཟ་བའོ། །མ་ཞུ་བར་ཟ་བ་ནི། སྔར་དེ་ཞག་གི་ཟན་མ་ཞུ་བར་གང་ཟ་བར་བྱེད་པའོ། །དེ་ལྟར་ན་མི་འཕྲོད་པར་ཟ་བ་དང༌། ལྷག་པར་ཟ་བ་དང༌། མ་ཞུ་བར་ཟ་བའི་སྐྱེས་བུ་དེ་ནི་དུག་གི་མཚན་ཉིད་ཅན་ཏེ། མ་ཞུ་བའི་ཉེས་བ་དུག་གི་མཚན་མ་ཅན་གྱི་མ་ཞུ་བ་དང༌། མི་བཟད་པ་ཤིན་ཏུ་གསོར་མི་རུང་བ་དུག་གི་མིང་ཅན་ཏེ། དུག་དང་མཚན་མ་འདྲ་བ་ཡིན་པའི་ཕྱིར་དུག་གི་ཚུལ་ཅན་ཏེ། དུག་དང་ཚུལ་འདྲ་བ་དང༌། མྱུར་དུ་གསོད་བར་བྱེད་པ་དང༌། གསོ་ཞིང་བཅོས་པར་བྱ་བའི་དཔྱད་བྱ་བར་དཀའ་བས་སྤང་ཞིང་དོར་བར་བྱའོ། །དེ་ཡང་གང་གི་ཕྱིར་མ་ཞུ་བ་ནི་བྱ་བ་དྲོ་བས་གསོ་དགོས་ན། དེ་དུག་གི་དབང་གིས་མི་འཕྲོད། དུག་ནི་བསིལ་བས་གསོ་བར་བྱ་བ་ཡིན་པའི་ཕྱིར། དུག་ལ་ནི་གསོ་བ་བསལ་བ་ཕན་ལ། དེ་ནི་མ་ཞུ་བའི་བེའུ་སྣབས་ལ་མི་འཕྲོད་པ་སྟེ། མ་ཞུ་བ་ནི་དྲོ་བའི་བྱ་བའི་རིམ་པས་གསོ་དགོས་པ་ཡིན་ནོ། །དེ་བས་ན་མཚན་ཉིད་གཉི་ག་དང་ལྡན་པའི་མ་ཞུ་བའི་དུག་གི་མིང་ཅན་དེས་ནི་གསོད་པར་བྱེད་པ་ཡིན་པས་སྤང་ཞིང་དོར་བར་བྱ་བ་ཁོ་ན་ཡིན་ནོ། །དེ་ནས་མ་ཞུའི་བེའུ་སྣབས་འགྱུར། །གསོར་རུང་ཤུ་དག་རྒྱམ་ཚ་དང༌། །པོ་སོན་ཆ་བཅུག་ཆུ་དྲོན་ནི། །འཐུངས་པས་སྐྱུག་བཅུག །ཅེས་བྱ་བ་ལ། དེ་ནས་ཞེས་བྱ་བ་ནི། བཀྲ་ཤིས་པའི་དོན་ཏེ། མ་ཞུ་བའི་བེའུ་སྣབས་ལ་སོགས་པ་ནི་ཤིན་ཏུ་མི་བཟད་ཅིང༌། གསོད་པར་བྱ་བ་ཡིན་པ་ལས། མ་ཞུ་བེའུ་སྣབས་སུ་གྱུར་པ་གང་གསོར་རུང་ཞིང༌། བཅོས་
པའི་ཐབས་ཡོད་པའི་མ་ཞུ་བ་དེ་ནི་མྱུར་དུ་སྐྱུག་ཏུ་གཞུག་ཅིང་སློན་བར་བྱའོ། །ཅི་ཞིག་གིས་སློན་དུ་གཞུག་ཅེ་ན། ཤུ་དག་དང༌། རྒྱམ་ཚ་དང༌། པོ་སོན་ཆ་བསྐོལ་བའི་ཆུ་དྲོན་པོ་འཐུངས་བས་སྐྱུག་ཏུ་གཞུག་གོ །དེ་ནས་ནི། དུགས་དང་མས་གཏོང་རེང་བུ་དག །དྲི་མ་རླུང་དག་ལེགས་རྒྱུ་སྦྱར། །ཞེས་བྱ་བ་ལ། དེ་ནས་ཞེས་བྱ་བ་སྐྱུག་སྨན་བཏང་སྟེ། སློན་པའི་རྗེས་ཉིད་ལ་མ་ཞུ་བས་ཉེན་པ་ལ་དུགས་བྱ་བ་སྟེ། མ་ཞུ་བ་བེའུ་སྣབས་ཅན་གྱིས་ཉེན་པ་ལ་དུགས་ཀྱི་ལེའུ་ལས་བཤད་པའི་དུགས་རྣམས་ཅི་རིགས་སུ་བྱ་བ་དང། དེ་བཞིན་དུ་མས་གཏོང་བའི་རེང་བུ་སྟེ། པོ་སོན་ཆ་དང༌། ཁང་པའི་དུད་པ་དང༌། ལན་ཚྭ་ལ་སོགས་པ་ལས་བྱས་པ། དྲི་མ་དང་རླུང་དག་ལེགས་པར་རྒྱུ་བར་བྱེད་པ་སྟེ། བཤང་བ་དང་གཅི་བ་དག་ཕྱིར་འབྱུང་བའི་རླུང་རང་གི་གནས་སུ་འཇོག་པར་བྱེད་ཅིང་ཕྱིར་འབྱིན་པར་བྱེད་པ་སྦྱར་ཞིང་གཏོང་བར་བྱ་སྟེ། དེ་ཡང་གང་གི་ཕྱིར། འཕྲལ་དུ་ལེགས་པར་དག་པ་ནི། །གནོད་པ་དེ་ནི་ཞི་བར་འགྱུར། །ཞེས་བཤད་པ་ཡིན་ནོ། །ཡན་ལག་འཁུམས་པར་གྱུར་པ་ལ། །ཤིན་ཏུ་དུགས་བྱ་དཀྲི་བར་བྱ། །ཞེས་བྱ་བ་ལ། ལག་ངར་ལ་སོགས་པའི་ཡན་ལག་འཇས་པ་འདྲ་བར་གྱུར་ཅིང༌། ཡོན་པོར་འཁུམས་པ་དག་ལ། ཤིན་ཏུ་དུགས་བྱས་ནས་འཇམ་པ་ཉིད་དུ་གྱུར་པ་དང༌། བལ་གོས་ལ་སོགས་པས་དཀྲི་བར་བྱའོ། །གསུད་ནད་ཤིན་ཏུ་འཕེལ་བ་དང༌། །རྟིང་པར་མེ་བཙའ་གདབ་པར་བསྔགས། །ཞེས་བྱ་བ་ལ། མ་ཞུ་བ་གཟེར་ཐབས་ཅན་ཤིན་ཏུ་འཕེལ་ཞིང་སྟོབས་ཅན་དུ་གྱུར་པ་ལ། རྐང་པའི་རྒྱབ་ཀྱི་ཆ་ལོང་མོའི་འོག །རྟིང་པ་ཞེས་བྱ་བ་དེ་གཉིས་སུ་ལྕགས་ཀྱི་ཐུར་མ་ལ་སོགས་པས་མེ་བཙའ་བཏབ་པ་ནི་བསྔགས་པ་ཡིན་ནོ། །དེ་ནི་དེའི་ཉིན་སྨྱུང་བར་གཞག །ཁྲུས་བཏང་ལྟ་བུར་ཉེ་བར་སྤྱད། །ཅེས་བྱ་བ་ལ། མ་ཞུ་བ་བའུ་སྣབས་དང་གསུད་པས་ཉེན་པའི་སྐྱེས་བུ་དེ་དེ་ལྟར་བྱས་བས། སློན་དང་ཁྲུས་ཀྱིས་དག་པར་གྱུར་པ་དེའི་རྗེས་ལ་དེའི་ཉིན་པར་སྨྱུང་བར་བཞག་ཅིང་ཟས་བཅད་པ་དང༌། ཁྲུས་བཏང་ལྟ་བུར་འབྲས་ཐུག་སླན་ཏེ་དང༌། སྐ་
བ་ལ་སོགས་པའི་སྦྱོར་བས་རིམ་གྱིས་གསོ་བར་བྱའོ། །ཅིའི་ཕྱིར་མ་ཞུ་བའི་བེའུ་སྣབས་གསོར་རུང་བ་ལ་སྐྱུག་སྨན་ལ་སོགས་པ་བྱ་བ་བསྟན་གྱི། གཟེར་འཇོམས་བར་བྱེད་པའི་སྨན་ཤིང་ཀུན་ལ་སོགས་པ་མ་བསྟན་པ་དང༌། གསུད་པ་གསོར་རུང་བ་ལ་རྟིང་བར་མེ་བཙའ་བསྟན་གྱི། སློན་དང་ཁྲུས་ཀྱིས་གཟེར་འཇོམས་པར་བྱེད་པ་དང༌། འཇུ་བར་བྱེད་པའི་སྨན་ལ་སོགས་པ་མ་བསྟན་ཞེས་བྱ་བ་རྟོག་པར་བྱེད་པ་དག་དགག་པའི་ཕྱིར་སྨྲས་པ་ནི། མ་ཞུ་མི་བཟད་ཉེན་གྱུར་ཀྱང༌། །གཟེར་འཇོམས་སྨན་ནི་བཏུང་མི་བྱ། བེའུ་སྣབས་མ་ཞུ་མེ་དྲོད་ཉམས། །ནད་ཀྱི་སྨན་ནི་འཇུ་མི་ནུས། །དེ་ཡིས་ནད་པ་འཕྲལ་དུ་ནི། །ཐུ་ཞིང་འཆི་བ་དག་ཏུ་འགྱུར། །ཞེས་བྱ་བ་ལ། མ་ཞུ་བས་ནི་སྨན་བཏུང་བར་མི་བྱའོ། །ཞེས་ཚིག་སྦྱར་བར་བྱའོ། །ཟས་ཞུ་ཞིང་སྨིན་པར་མ་ནུས་པས་མ་ཞུ་བ་སྟེ། ཟས་ཞུམ་ནུས་པ་དེས་མི་བཟད་པས་ཉེན་པར་གྱུར་ཅིང༌། ཤིན་ཏུ་གཟེར་ཟུག་པ་དང་ལྡན་པར་གྱུར་ཀྱང༌། གཟེར་འཇོམས་པའི་སྨན་ཤིང་ཀུན་ཅན་གསུམ་པ་ལ་སོགས་པར་བཏུང་བར་མི་བྱའོ། །དེ་ཅིའི་ཕྱིར་ཞེ་ན། བེའུ་སྣབས་མ་ཞུ་བས་མེ་དྲོད་ཉམས་ཤིང་མ་ཞུ་བའི་ཉེས་པས་བཅོམ་པའི་མེའི་དྲོད་དེས་ནི་མ་ཞུ་བའི་ནད་ཀྱིས། སྨན་དང་ཟས་ཀྱི་རིགས་འཇུ་ཞིང་སྨིན་པར་བྱ་བར་མི་ནུས་སོ། །དེས་ན་སྨན་དང་ཟས་དང་ཉེས་པ་འདི་དག་གིས་མ་ཞུ་བས་ཉེན་པའི་ནད་བ་འཕྲལ་དུ་དེའི་མོད་ལ་ཐུ་ཞིང་གནོད་པའི་ཁྱད་པར་འཕེལ་ཞིང་སྨན་གྱི་སྦྱོར་བ་ཉིད་ཀྱིས་འཆི་བ་དག་ཉིད་དུ་འགྱུར་རོ། །ཁ་ཟས་ཞུ་ནས་ལྟོ་བ་ནི། །རྩུབ་སྲར་གྱུར་ལ་སྨན་དག་ཀྱང༌། །ཉེས་པའི་ལྷག་མ་སྦྱང་ཕྱིར་དང༌། །ཕོ་བའི་མེ་ནི་བསྐྱེད་ཕྱིར་གཏང༌། །ཞེས་བྱ་བ་ལ། སྐྱེས་བུའི་ཁ་ཟས་ཞུ་ཞིང་སྨིན་པར་གྱུར་དུ་ཟིན་ཀྱང༌། ལྟོ་བ་རྩུབ་ཅིང་སྲ་བར་གྱུར་པ་སྟེ། ཕོ་བ་རེམ་རེམ་པོར་གྱུར་པ་ལ། ཉེས་པའི་ལྷག་མ་ཞུ་ཞིང་སྦྱང་བའི་ཕྱིར་དང༌། ཕོ་བའི་མེ་དྲོད་བསྐྱེད་པར་བྱ་བའི་ཕྱིར། སྨན་གཏང་བར་བྱ་ཞིང་སྦྱང་བར་བྱའོ། །མ་ཞུའི་འགྱུར་བ་ཞི་བ་དག །ཉམས་སྨད་པར་ནི་བྱས་ལས་འགྱུར། །ཞེས་བྱ་བ་ལ། མ་ཞུ་བའི་འགྱུར་བ་ཞེས་པ་ཟས་མ་ཞུ་བའི་ཉེས་པ་
ལས་བྱུང་བའི་བེའུ་སྣབས་དང༌། སྙོམ་པ་དང༌། གཟེར་བ་ལ་སོགས་པ་རྣམས་ལ་ཞི་བ་དག་ནི་ཉམས་དམད་པ། སྨྱུང་བ་དང་ཞི་བར་བྱས་པ་དང༌། དུགས་དག་བྱས་བ་ལས་དེ་ཉེ་བར་ཞི་ཞིང་ཉམས་དམས་པ་འབྱུང་བར་འགྱུར་རོ། །དེ་གསུམ་ཉེས་པ་རྣམ་གསུམ་ནི། །བརྟགས་ནས་རབ་ཏུ་སྦྱང་བར་བྱ། །ཞེས་བྱ་བ་ལ། ཉམས་སྨད་པར་བྱ་བ་དེ་ནི་སྨྱུང་བ་དང༌། ཞུ་བར་བྱས་པ་དང༌། དུགས་བྱ་བ་རྣམ་པ་གསུམ་ཡོད་པ་དེ་ཉེས་པ་རྣམ་གསུམ་ནི་ཞེས་པ། ཆུང་ངུ་དང༌། བར་མ་དང༌། ཆེན་པོའི་ཚུལ་བརྟགས་ཤིང་རིམ་པ་འདིས། ཆུང་ངུ་ལ་སོགས་པའི་ཉེས་པའི་དབྱེ་བས་སོ་སོར་བརྟགས་ཤིང་དཔྱད་ནས་རབ་ཏུ་སྦྱང་བར་བྱའོ། །དེ་ལ་ཆུང་ལ་སྨྱུང་བ་ཕན། །འབྲིང་ལ་སྨྱུང་དང་གཞུ་བྱ་བ། །ཆེན་པོ་ལ་ནི་སྦྱང་བ་སྟེ། །དེ་ཡིས་དྲི་མ་རྩ་ནས་འབྱིན། །ཞེས་བྱ་བ་ལ། དེ་ལ་ཞེས་པ་ཉེས་པ་རྣམ་པ་གསུམ་པོ་ལ། ཆུང་ངུ་ལ་ནི་སྨྱུང་བར་གནས་པ་ཉམས་དམད་པ་ཕན་ཞིང་རྗེས་སུ་མཐུན་པ་ཡིན་ཏེ། དེས་ཀྱང་མེ་དང་རླུང་འཕེལ་བར་བྱས་པས་དཔེར་ན་རླུང་དང་ཐན་པས་ཆུའི་ཚོགས་ཉུང་ཞིག་གི་གནས་སྐེམས་པར་བྱེད་པ་བཞིན་དུ། འདི་ལ་ཕན་པར་འགྱུར་བ་ཡིན་ནོ། །འབྲིང་ལ་ཞེས་པ་ཉེས་པའི་སྟོབས་འབྲིང་ཙམ་དུ་གྱུར་པ་ལན་ནི་སྨྱུང་བ་ཞེས་བྱ་བ་ཟས་བཅད་པ་དང༌། དེ་བཞིན་དུ་གཞུ་བ་ཞེས་བྱ་བ་ཤུ་དག་དང༌། པུ་ཤེལ་ཙེ་ལ་སོགས་པས་ཕན་པ་ཡིན་ཏེ། དེ་གཉིས་ནི་ཉེས་པ་འབྲིང་པོ་འཇོམས་ཏེ། དཔེར་ན་ཆུའི་ཚོགས་ཧ་ཅང་མི་ཆེ་བ་ལ་ཐལ་བ་དང། ས་རྡུལ་དག་དང་འདྲེས་པའི་རླུང་དང་ཐན་པས་ཆུའི་ཚོགས་ཧ་ཅང་མི་ཆེ་བ་སྐེམས་པར་བྱེད་པ་དང་འདྲའོ། །ཆེ་ལ་ཞེས་པ་ཉེས་པ་མང་པོ་སྟོབས་དང་ལྡན་པ་དག་ལ་ནི་སྦྱང་བ་སྟེ། ཁྲུས་དང་སློན་ལ་སོགས་པའི་ཚུལ་གྱིས་ཉམས་སྨད་པར་བྱ་བ་ཕན་པ་ཡིན་ཏེ། གང་གི་ཕྱིར་སྐྱུག་སྨན་ལ་སོགས་པ་སྦྱངས་པས་དེ་ཡིས་དྲི་མ་ཞེས་པ་རླུང་དང༌། མཁྲིས་པ་དང༌། བད་ཀན་དང༌། བཤང་བ་དང༌། གཅི་བ་ལ་སོགས་པ་རྩ་བ་ནས་འབྱིན་ཅིང་གཅོད་པར་འགྱུར་ཏེ། དཔེར་ན་འདམ་བུའི་ཞིང་ཆུ་མེད་པ་དག་ཏུ་ནི་འབྲས་ལ་སོགས་པ་སྐྱེ་བར་མི་འགྱུར་བ་དང་
འདྲའོ། །དེ་བས་ན་ཉམས་མཐོས་པའི་མ་ཞུ་བ་ལས་བྱུང་བ་ལ་ནི་ཉམས་དམད་བ་མ་བྱས་པར་ཞི་བར་འགྱུར་བ་མ་ཡིན་ལ། ཉམས་དམད་བར་གྱུར་བ་ལས་བྱུང་བ་ལ་ཡང་ཉམས་བརྟ་བ་བྱས་པར་ཞི་བར་འགྱུར་བ་མ་ཡིན་ནོ། །དེ་བཞིན་ནད་གཞན་དག་ལ་ཡང༌། །རང་ནད་གཞི་ལས་གོ་བཟློག་པས། །གསོ་བ། ཞེས་བྱ་བ་ལ། དེ་བཞིན་དུ་ཆུང་ངུ་ལ་སོགས་པའི་རིམ་པ་འདིས། རིམས་ལ་སོགས་པའི་ནད་གཞན་དག་ལ་ཡང་རང་གི་ནད་གཞི་ལས་གོ་བཟློག་པ་ཞེས་པ། རང་གི་ནད་ཀྱི་རྒྱུ་དང་མི་མཐུན་པའི་སྨན་གྱིས་གསོ་བར་བྱ་ཞིང་བཟློག་པར་བྱའོ། །དེ་ཡང་རང་གི་ནད་གཞི་ཡིན་པས་ན། རང་གི་ནད་གཞི་སྟེ། རང་གི་རྒྱུ་གང་ཡིན་པའོ། །དེ་ལས་གོ་བཟློག་པ་ནི་དེ་དང་མི་མཐུན་པ་སྟེ། དཔེར་ན་ཚིམ་ཞིང་བརྟས་པར་བྱས་པ་ལས་བྱུང་བའི་ནད་ལ་ཉམས་དམད་བར་བྱ་བ་དང༌། ཉམས་དམད་བ་ལས་བྱུང་བའི་ནད་དེ་ལས་བཟློག་པ་ནི་བརྟན་པར་བྱ་བ་ཡིན་པ་དང༌། དེ་བཞིན་དུ་ལྕི་བ་དང༌། སྣུམ་པ་དང༌། གྲང་བ་ལ་སོགས་པ་ལས་བྱུང་བའི་ནད་ལ་དེ་དང་མི་མཐུན་པ་ཡང་བ་དང༌། རྩུབ་པ་དང༌། དྲོ་བར་བྱ་བ་དང༌། ཡང་བ་དང༌། རྩུབ་པ་དང༌། དྲོ་བ་ལས་བྱུང་བའི་ནད་ལ་དེ་དང་མི་མཐུན་པ་ལྕི་བ་དང༌། སྣུམ་པ་དང༌། བསིལ་བར་བྱ་བ་ལ་སོགས་པ་ལྟ་བུའོ། །དེ་ལས་རྗེས་འབྲེལ་ཡོད། །རྒྱུ་ལས་གོ་བཟློག་རྣམ་སྤང་བ། །སྨན་པས་ཅི་ལྟ་ཅི་ལྟ་བར། །ནད་ལས་གོ་བཟློག་སྦྱར་བའམ། །ཞེས་བྱ་བ་ལ། ནད་ཀྱི་རྒྱུ་ལས་གོ་བཟློག་པའི་སྨན་བྱས་སུ་ཟིན་ཅིང༌། ཉེས་པ་སྟོབས་དང་ལྡན། ནད་དང་རྗེས་སུ་འབྲེལ་བ་ཡོད་ཅིང༌། ཤིན་ཏུ་ཞེན་པར་གྱུར་པ་ལ་ནི་རྒྱུ་ལས་བཟློག་པ་སྟེ། ནད་གཞི་དང༌། རྗེས་སུ་མི་མཐུན་པའི་སྨན་སྤངས་ཤིང་དོར། སྨན་པས་ཇི་ལྟར་རིགས་ཤིང་འོས་པའི་སྨན་ནད་ལས་གོ་བཟློག་པའི་སྨན་དེ་སྦྱར་བར་བྱ་ཞིང་སྦྱིན་པར་བྱ་སྟེ། དཔེར་ན་རིམས་ལ་གླ་སྒང་དང༌། པར་བ་ཏ་དང༌། ནས་ཐུག་སླ་བ་སྦྱིན་པ་དང༌། གཅིན་ནད་ལ་སེར་པོ་རྣམ་གཉིས་དང༌། ནས་ཟན་ལ་སོགས་པ་སྦྱིན་པ་དང༌། མཁྲིས་པ་གྱེན་དུ་འབྱུང་བ་ལ་ཁྲུས་སྨན་གྱིས་འོག་ནས་གདོན་པར་བྱའོ། །
དེ་བཞིན་དུ་ནད་ལས་གོ་བཟློག་པའི་གསོ་དཔྱད་ཀྱི་བཅོས་པའི་ཐབས་ཀྱི་གཙོ་བོ་རྣམ་པ་གཉིས་དང༌། ལས་རྣམ་ལྔ་དུ་བ་སྣ་ནས་གཏང་བ་དང༌། མིག་སྨན་ལ་སོགས་པ་དང་བཅས་པ་ལ་སོགས་པ་བྱ་བ་སྟེ། དཔེར་ན་གླ་སྒང་དང་པར་པ་ཏ་མཁྲིས་པ་སེལ་བར་བྱེད་པ་ཡིན་དུ་ཟིན་ཀྱང༌། རིམས་འཇོམས་པར་བྱེད་པ་དེ་ལྟར་མཁྲིས་པ་ལས་བྱུང་བའི་ནད་གཞན་ལ་ནི་མ་ཡིན་ནོ། །དཔེར་ན་སྐྱེར་པ་ནི་ཚིལ་དང༌། བད་ཀན་སེལ་བར་བྱེད་པ་ཡིན་དུ་ཟིན་ཀྱང༌། གཙོ་ཆེར་གཅིན་ནད་འཇོམས་པར་བྱེད་པ་དེ་ལྟར་ཚིལ་དང་བད་ཀན་ལས་བྱུང་བའི་ནད་གཞན་དག་ལ་ནི་དེ་ལྟ་མ་ཡིན་ནོ། །འདི་དག་ཀྱང་འོག་ནས་སློབ་དཔོན་གྱིས་རྒྱ་ཆེར་བསྟན་པ་ཡིན་ནོ། །དེའི་དོན་བྱེད་པ་སྦྱོར་བར་བྱ། །ཞེས་བྱ་བ་ནི། རྒྱུ་དང་ནད་ཀྱི་གོ་བཟློག་པ་དེའི་དོན་བྱེད་པ་སྟེ། འདི་ནི་རྒྱུ་དང་ནད་ཀྱི་གོ་བཟློག་པའི་དོན་བྱེད་པའི་ཚུལ་ཅན་ཡོད་པས་ན་དོན་བྱེད་པ་སྟེ། དེའི་དོན་ནི་ནད་ཀྱི་གཞི་ལས་གོ་བཟློག་པ་དང༌། ནད་ལ་གོ་བཟློག་པ་དག་ལ། གོ་མ་བཟློག་པར་གྱུར་པའི་ལས་དེའི་དོན་བྱེད་པ་སྦྱོར་བར་བྱ་སྟེ། དཔེར་ན་སྐྱུག་བྲོ་བ་ལ་སློན་སྨན་བཏང་བའམ། ཚད་པས་འཁྲུ་བ་ལ་ཁྲུས་བྱ་བའམ། ཆང་ནད་ལ་ཆང་སྦྱིན་པའམ། མེས་ཚིག་པ་ལ་མེས་བསྲོད་པ་འམ། ཞི་བ་དང༌། རྒྱས་པའི་ལས་བྱ་བ་སྟེ། འདི་དག་ནི་བསྡུས་པ་ལས་རྒྱས་པར་བཤད་དོ། །དོན་གཉིས་ཀས་བྱེད་པ་ལྷ་རྣམས་ལ་ཡང་བརྟེན་ཅིང༌། སྨན་གྱི་སྦྱོར་བ་ཡང་བྱེད་པ་དང༌། སྐྱུག་བྲོ་བ་ལ་སློན་སྨན་དང༌། ཚད་པས་འཁྲུ་བ་ལ་དྲི་མ་སྦྱང་བ་དང༌། ཆང་གི་ནད་ལ་ཆང་བླུད་པ་དང༌། མེས་ཚིག་པ་ལ་མེ་ལ་བསྲོད་པ་དང༌། མཁྲིས་པ་ནང་དུ་ཞེན་པའམ། ལམ་ལོག་པར་སོང་བ་ལ་དུགས་བྱ་བ་དང༌། ཁ་བ་དང་སྐྱུར་བ་དང་བསྐ་བའི་རོ་ལ་བརྟེན་ཅིང་དྲོ་བ་དང༌། གྲང་བའི་སྤྱོད་ལམ་གྱིས་གནས་པས་ཕྱི་རོལ་དུ་གདོན་ཅིང༌། རང་གི་ལམ་ནས་རྒྱུ་བར་བྱ་བ་དང༌། བད་ཀན་ནང་དུ་ཞེན་ཅིང་རེངས་པར་གྱུར་པ་ལ། ཕྱི་རོལ་ནས་བསིལ་བའི་ཉེ་བར་སྤྱོད་པ་ལ་གནས་པས། དེའི་གནོད་པ་ནང་དུ་ཞུགས་ནས། བད་ཀན་གཞུ་བར་བྱ་སྟེ། དེ་ལྟ་བུའི་གོ་བཟློག་པའི་དོན་བྱེད་དོ། །ཉེས་
སྨིན་མེ་དྲོད་སྐྱེས་གྱུར་ནས། །ཉམས་བརྟ་སྣུམ་གྱིས་བྱུགས་པ་དང༌། །བཏུང་དང་འཇམ་རྩི་སོགས་རིགས་སྦྱར། །ཞེས་བྱ་བ་ལ། ཉེས་པ་རྣམས་སྨིན་ཅིང་ཞུ་བར་གྱུར་པ་ནི། མ་ཞུ་བའི་བེའུ་སྣབས་དང༌། གསུད་པ་ལ་སོགས་པས་ཉེན་པ་དེ་མ་ཞུ་བའི་ཉེས་པ་དང་བྲལ་བར་གྱུར་ཅིང༌། ཉེས་པ་སྨིན་ནས་སྨྱུང་བ་ལ་སོགས་པ་བྱས་པས། ཕོ་བའི་མེ་དྲོད་ཀྱང་སྐྱེས་ཤིང་འཕེལ་བར་གྱུར་ནས་ཉམས་བརྟ་བར་བྱ་བའི་ཕྱིར། ཏིལ་མར་ལ་སོགས་པའི་སྣུམ་གྱིས་བྱུག་པ་དང༌། སྨན་མར་བཏུང་བ་དང༌། འཇམ་རྩི་མས་གཏོང་བ་དག་རིགས་པར་ཞེས་བྱ་བ་ཡུལ་དང་དུས་ལ་སོགས་པའི་ཆ་ལས་བརྟགས་ཏེ། ཆོ་ག་བཞིན་དུ་སྦྱར་བར་བྱ་བ་ནི་ཕན་པ་ཡིན་ནོ། །སོགས་པའི་སྒྲས་ནི་བཅུད་ཀྱིས་ལེན་པ་དང༌། རོ་ཙ་བའི་ཆོ་ག་དག་བསྡུའོ། །འཇམ་རྩི་མས་གཏོང་བའི་དབྱེ་བ་ཡང་དང་པོར་སྦྱང་བ་ལ་སོགས་པའི་སྒོ་ནས་རྣམ་པ་གསུམ་ཡོད་དེ། དེ་དག་ཀྱང་ནད་དང༌། སྨན་ལ་སོགས་པའི་གནས་སྐབས་ཀྱི་ཚུལ་ལས་བརྟགས་ནས། སྨན་པས་འདི་དག་རིགས་པར་སྦྱར་བར་བྱའོ། །བད་ཀན་མ་ཞུའི་བེའུ་སྣབས་ཏེ། །དེ་ནི་མིག་དང་མཁུར་བ་སྐྲང༌། །སྒྲེགས་པ་ཟོས་མ་ཐག་འདྲ་འབྱུང༌། །མཆིལ་མ་མང་ཞིང་ཉེས་གཡོ་ལྕི། །ཞེས་བྱ་བ་ལ། བད་ཀན་འཕེལ་བ་ལས། མ་ཞུ་བར་གྱུར་པ་གང་ཡིན་པ་དེ་ནི་བེའུ་སྣབས་ཞེས་བྱ་སྟེ། དེ་ལ་བད་ཀན་གྱི་མ་ཞུ་བའི་མཚན་ཉིད་ནི་འདི་ཡིན་ཏེ། མིག་དང་མཁུར་བ་སྐྲངས་པ་སྟེ། མཁུར་བ་དང་མིག་གི་ཁུང་བུར་གཏོགས་པ་སྐྲང་བར་འགྱུར་རོ། །དེ་བཞིན་དུ་སྒྲེགས་པ་ཟོས་མ་ཐག་པའི་འདྲ་བ་འབྱུང་སྟེ། མ་སྨིན་པ་འབྱུང་བར་འགྱུར་བ་དང༌། མཆིལ་མ་ཤིན་ཏུ་མང་ཞིང་བད་ཀན་འབྱུང་བ་དང་ཉེས་པ་རྣམས་སྨིན། རང་གི་གནས་ནས་གཡོ་བ་དང༌། བད་ཀན་གྱེན་དུ་འབྱུང་བར་འགྱུར་བ་དང་ལྕི་བར་འགྱུར་རོ། །རླུང་ལས་རེངས་བག་གཟེར་བ་དང༌། །བཤང་གཅི་འགགས་ཤིང་སྦོས་དྲོད་ཉམས། །ཞེས་བྱ་བ་ལ། རླུང་ལས་གྱུར་པའི་མ་ཞུ་བ་གང་ཡིན་པ་དེ་ནི། མིང་རེངས་བག་ཅེས་བྱ་སྟེ། དེ་ནི་གཟེར་ཞིང་འཇུག་པ་དང༌། བཤང་བ་དང༌། གཅི་བ་འགགས་
ཤིང་ཐོགས་པ་དང༌། སྦོས་ཤིང་གསུས་པ་རྒྱས་པ་དང༌། མེའི་དྲོད་ཉམས་པ་དང་ཡན་ལག་སྙོམ་པར་བྱེད་པར་འགྱུར་རོ། །མཁྲིས་ལས་ཁོང་ཚ་སྒོམ་མགོ་འཁོར། །རྨོངས་བག་སྒྲེགས་པ་སྐྱུར་ཞིང་ཚ། །ཞེས་བྱ་བ་ལ། མཁྲིས་པ་ལས་གྱུར་པའི་མ་ཞུ་བ་གང་ཡིན་པ་དེ་ནི་ཁོང་ཚ་བ་ཞེས་བྱ་སྟེ། དེ་ནི་སྐོམ་དད་ཆེ་བ་དང་མགོ་འཁོར་བ་དང༌། རྨོངས་བག་ཅན་སྒྲེགས་པ་སྐྱུར་བ་དང༌། ལུས་ཚ་བ་དང་ལྡན་པར་འགྱུར་རོ། །མ་ཞུ་བེའུ་སྣབས་སྨྱུང་བ་བྱ། །རེངས་བག་ལ་ནི་དུགས་རབ་བྱ། །ཚ་བའི་མ་ཞུ་སྐྱུག་སྨན་དག །བཏང་བའམ་གནས་སྐབས་གང་ཕན་བྱ། །ཞེས་བྱ་བ་ལ། བད་ཀན་ལས་བྱུང་བའི་མ་ཞུ་བ་བེའུ་སྣབས་ལ་ནི་སྨྱུང་བ་སྟེ་ཟན་གཅོད་པར་བྱའོ། །རེངས་བག་སྟེ་རླུང་ལས་གྱུར་པའི་མ་ཞུ་བ་ནི་དུགས་རབ་བྱ་བ་སྟེ་ཤས་ཆེར་དུགས་བྱའོ། །ཚ་བ་སྟེ་མཁྲིས་པ་ལས་གྱུར་པའི་མ་ཞུ་བ་ལ་ནི་སྐྱུག་སྨན་གཏང་བར་བྱའོ། །ཡང་ན་གནས་སྐབས་ཇི་ལྟ་བ་བཞིན་དུ་གསུམ་པོ་དག་ཅི་རིགས་པར་བྱའོ། །མ་ཞུའི་བེ་སྣབས་ལྕི་བ་ན། །རྩ་སྦུབས་ཐིམ་ལས་ཡུན་རིངས་ཅན། །བད་ཀན་རླུང་ནི་འདྲེས་མཚན་མ། །དེ་དང་མཉམ་པར་བསྒྲུབ་པར་བྱ། །ཞེས་བྱ་བ་ལ། མ་ཞུ་བའི་བེའུ་སྣབས་ལྕི་བར་གྱུར་པ་རྩ་སྦུབས་སུ་ཐིམ་ཞིང་ཞེན་པར་གྱུར་བ་ལས་ཡུན་རིངས་ཅན་ཞེས་བྱ་བའི་མ་ཞུ་བའི་ཁྱད་པར་འབྱུང་བར་འགྱུར་རོ། །བད་ཀན་དང་རླུང་འདྲེས་ཤིང་རྗེས་སུ་འབྲེལ་བར་འགྱུར་བ་ལས་བྱུང་བའི་མ་ཞུ་བ་བེའུ་སྣབས་ཅན་གྱི་མཚན་མ་མིག་སྐྲང་བ་ལ་སོགས་པ་དང་ལྡན་པ་གང་ཡིན་པ་དེ་ལ་ནི། མ་ཞུ་བ་དེ་དང་མཉམ་ཞིང་མཚུངས་པར་སྒྲུབ་ཅིང་གསོ་བར་བྱ་བ་སྟེ། དེ་ལྟར་ན་དེ་ནི་སྨྱུང་བས་བསྒྲུབ་པར་བྱ་བ་ཡིན་ནོ། །དངས་མ་ལུས་ལས་ཟས་དད་ཆུང༌། །སྙིང་ན་སྒྲེགས་པ་མནམ་པར་འགྱུར། །ཞེས་བྱ་བ་ལ། ཟས་ཀྱི་དངས་མའི་ལྷག་མ་མ་ལུས་པ་ཡོངས་སུ་མ་ཞུ་བར་གྱུར་པ་ལས་ནི་ཟས་དད་ཆུང་བ་སྟེ། ཟས་ལ་མི་དགའ་བ་དང༌། སྙིང་ན་ཞིང་སྒྲེགས་པ་མནམ་པར་འགྱུར་རོ། །འདི་ལ་ཅུང་ཟད་གཉིད་ལོག་བྱ། །ཞེས་བྱ་བ་ལ། དངས་མའི་ལྷག་མ་མ་ཞུ་བ་འདི་ལ་ནི་ཅུང་ཟད་ཅེས་
པ། དུས་ཅུང་ཟད་ཅིག་གཉིད་ལོག་པར་བྱའོ། །མ་ཞུ་ཀུན་གྱིས་ཉིན་པར་ནི། །ཟས་མ་ཟོས་པར་གཉིད་ལོག་ལ། །བཀྲེས་གྱུར་ཡང་ལས་རན་པར་བཟའ། །ཞེས་བྱ་བ་ལ། མ་ཞུ་བར་གྱུར་པའི་སྐྱེས་བུ་ཀུན་གྱིས་ནི། པེ་སྣབས་ལ་སོགས་པའི་དབྱེ་བས་རྣམ་པ་བཞི་དང་ལྡན་པར་གྱུར་པ་ཀུན་གྱིས་ཀྱང༌། ཟས་མ་ཟོས་པར་ཉིན་པར་གཉིད་ལོག་པར་བྱ་ལ། དེ་ནས་དེ་བཀྲེས་པར་གྱུར་ཅིང་ཟས་ལ་འདོད་པ་སྐྱེས་པར་གྱུར་ནས། འབྲས་ལ་སོགས་པ་ལས་བྱས་པའི་ཟས་ཡང་བ་ལས་རན་པར་ཞེས་བྱ་བ་ཚོད་ཟིན་པར་ཉུང་ཟད་བཟའ་བར་བྱའོ། །མ་ཞུ་སྤྱི་ཡི་མཚན་མ་ནི། །རྣམ་པར་འགགས་སམ་ཤས་ཆེར་འབྱུང༌། །ན་ཞིང་རླུང་ནི་མི་གསལ་རྒྱུ། །མཁྲེགས་ཤིང་ལུས་ལྕི་མགོ་བོ་འཁོར། །ཞེས་བྱ་བ་ལ། མ་ཞུ་བ་སྤྱིའི་མཚན་མའམ། རྟགས་སུ་གྱུར་པ་ནི། བཤང་བ་དང་གཅི་བ་དང༌། འཕྱེན་ལ་སོགས་པ་སྲ་ཞིང་རྣམ་པར་འགགས་པར་གྱུར་པའམ། ཡང་ན་བཤང་གཅི་ལ་སོགས་པ་ཤས་ཆེར་འབྱུང་བར་འགྱུར་བ་དང༌། ན་ཞིང་རྨྱ་བར་འགྱུར་བ་དང༌། རླུང་མི་གསལ་བར་རྒྱུ་ཞིང་ཤེས་པར་དཀའ་བ་འབྱུང་བར་འགྱུར་བ་དང༌། བཤང་བ་མཁྲེགས་པ་དང༌། ལུས་ལྕི་བ་དང༌། མགོ་བོ་བསྐོར་བ་ལྟ་བུར་འཁོར་བར་འགྱུར་བ་སྟེ། འདི་དག་ནི་མ་ཞུ་བ་བཞི་ཆར་གྱི་ཐུན་མོང་གི་མཚན་ཉིད་ཡིན་ནོ། །ཟས་ཚོད་ལྷག་པར་གྱུར་པ་ཉིད། །གཅིག་པུ་མ་ཞུར་མ་ཟད་ཀྱི། །མི་འདོད་གགས་བྱེད་ཚིག་མ་ཚོས། །ལྕི་དང་རྩུབ་དང་མི་གཙང་གྲང༌། །ཁོང་ཚ་སྐོམ་དད་ཆུ་མང་དང༌། །བསྲེས་པའི་ཟས་ནི་འཇུ་མི་འགྱུར། །མྱ་ངན་ཁྲོ་དང་བཀྲེས་པ་ཡིས། །ཉེ་བར་གདུངས་ཤིང་ཟས་མི་འཇུ། །ཞེས་བྱ་བ་ལ། ཟས་ཀྱི་ཚོད་ལྷག་པར་གྱུར་པར་ཟོས་པ་གཅིག་པུ་མ་ཞུ་བར་གྱུར་པར་མ་ཟད་ཀྱི། མི་འདོད་བཞིན་དུ་ཟོས་པ་དང༌། འགག་པར་བྱེད་པ་སྟེ། རྩ་སྒོའི་སྦུབས་ཀྱི་གགས་བྱེད་པ་དང༌། ཚིག་པ་སྟེ་བཙོས་པ་ཐལ་དྲགས་པ་དང༌། མ་ཚོས་པ་སྟེ་ལེགས་པར་ཚོས་ཤིང་སྨིན་པར་མ་གྱུར་བ་དང༌། ལྕི་བ་དང་འཇུ་དཀའ་བ་དང༌། རྩུབ་སྟེ་སྣུམ་མེད་པ་དང༌། མི་གཙང་བ་སྟེ་མ་དག་པ་དང༌། གྲང་བ་སྟེ་ཁེངས་པ་དང༌། ཚ་བ་
སྟེ་ལུས་ཀྱི་ཁོང་ཚ་བར་བྱེད་པ་དང༌། སྐམ་པ་སྟེ་ཕལ་ཆེར་སྲ་བ་དང༌། ཆུ་མང་བ་སྟེ། ཆུ་མང་པོ་དང་བསྲེས་པའི་ཟས་འདི་དག་ནི་འཇུ་བར་མི་འགྱུར་ཞིང་ཡོངས་སུ་དེངས་པར་མི་འགྱུར་གྱི། བེའུ་སྣབས་ཀྱི་ཉེས་པ་འབའ་ཞིག་སྐྱེད་པར་འགྱུར་རོ། །གཞན་ཡང་གང་མྱ་ངན་ལ་སོགས་པས་གཟིར་བར་ཟོས་པ་དེ་ཡང་མི་མཐུན་པ་ཡིན་ཏེ། མྱ་ངན་ནི་མྱ་ངན་གྱིས་གདུངས་པའོ། །ཁྲོ་བ་ནི་སེམས་འཁྲུགས་པའོ། །བཀྲེས་པ་ནི་བྲུ་བ་ཚ་བས་གདུངས་པ་སྟེ། དེ་ལྟ་བུ་མ་ཟོས་པ་དེ་ཡང་འཇུ་བར་མི་འགྱུར་གྱི། མ་ཞུ་བའི་བེའུ་སྣབས་ཀྱི་ཉེས་པར་འགྱུར་རོ། །ཕན་དང་མི་ཕན་བསྲེས་པ་དང༌། །ཟོས་པ་མཉམ་ཟ་ཡིན་པར་འདོད། །ཅེས་བྱ་བ་ལ། ཕན་པ་དང་མི་ཕན་པ་དང༌། འཕྲོད་པ་དང་མི་འཕྲོད་པ་གཅིག་ཏུ་བསྲེས་ནས་ཟོས་པ་ནི། མཉམ་པའི་ཟས་ཟ་བ་ཡིན་པར་སློབ་དཔོན་རྣམས་འདོད་དོ། །འགྲངས་རྗེས་སླར་ཡང་ཟ་གྱུར་བ། །ལྷག་པར་ཟ་བ་ཡིན་ཞེས་བྱ། །ཞེས་བྱ་བ་ལ། ཁ་ཟས་འགྲངས་བར་ཟོས་ཤིང་ལོངས་སྤྱད་ནས་དེའི་སྟེང་དུ་སླར་ཡང་བཟའ་བ་ཟ་བར་གྱུར་པ་གང་ཡིན་པ་དེ་ནི་ལྷག་པར་ཟ་བ་ཞེས་བྱ་བར་ཤེས་པར་བྱའོ། །དུས་མིན་ཆེ་བའམ་ཆུང་ཟོས་པ། །མི་མཉམ་པར་ནི་ཟ་བ་ཡིན། །ཞེས་བྱ་བ་ལ། དུས་མ་ཡིན་པ་ནི་ཟས་ཀྱི་དུས་ལ་མ་བབ་པའམ། དུས་ལས་ཡོལ་བར་ཟ་བའོ། །ཆེ་བ་ནི་གང་ལྷག་པར་ཟོས་པའོ། །ཆུང་བ་ནི་ཚད་ལས་ཆུང་ཞིང་དམན་པར་ཟོས་པ་སྟེ། དེ་དག་ནི་མི་མཉམ་པར་ཟ་བ་ཡིན་པར་ཤེས་པར་བྱའོ། །གསུམ་པོ་འདིས་ཀྱང་གསོད་པའམ། །མི་བཟད་ནད་ཀྱིས་འདེབས་པར་བྱེད། །ཅེས་བྱ་བ་ལ། མཉམ་པར་ཟ་བ་དང་མི་མཉམ་པར་ཟ་བ་སྟེ། གསུམ་པོ་འདི་དག་གིས་ཀྱང་གསོད་ཅིང་འཆིང་བར་བྱེད་པའམ་མི་བཟད་ཅིང་གསོ་དཀའ་བའི་ནད་ཀྱིས་འདེབས་པར་བྱེད་ཅིང་སྐྱེད་པར་བྱེད་དོ། །དུས་སུ་གོམས་ཤིང་གཙང་ལ་ཕན། །སྣུམ་དྲོ་ཡང་དང་མ་ཡེངས་དང༌། །རོ་དྲུག་ལྡན་ཞིང་མངར་བག་ཆེ། །ཤིན་ཏུ་མྱུར་མིན་དལ་བར་མིན། །ཁྲུས་བྱས་བཀྲེས་ཤིང་དབེན་པར་གནས། །ཁ་གདོང་ལག་པ་རྐང་པ་བཀྲུས། །ལྷ་དང་ཡི་དྭགས་
རྗེད་ཅིང་སྦྱིན། །བླ་མ་བྱིས་པ་མགྲོན་མཆོད་བྱས། །དུད་འགྲོ་རྣམས་ཀྱང་རབ་བརྟགས་ཏེ། །བདག་ཉིད་ལེགས་པར་བརྟགས་ནས་ནི། །མ་སྨད་སྨྲ་འམ་ཡིད་འོང་སྨྲ། །སྐྱེ་བོ་གཙང་ཞིང་གུས་པས་སྟོབས། །ཡིད་འོང་གཉེན་དང་ལྷན་ཅིག་བཟའ། །ཞེས་བྱ་བ་ལ། ཟས་ནི་དུས་སུ་བཟའ་ཞིང་ལོངས་སྤྱད་པར་བྱའོ། །ཞེས་བྱ་བར་སྦྱར་རོ། །དེ་ཡང་དུས་ནི་བཤང་དང་གཅི་བསལ་ཞེས་བྱ་བ་ལ་སོགས་པའི་གཞུང་གིས་འོག་ནས་བཤད་པ་ཡིན་ནོ། །དུས་ཡོལ་ནས་ཟོས་པ་དེ་ནི་རླུང་གིས་བཀག་ནས་ཤིན་ཏུ་དཀའ་བས་འཇུ་བར་འགྱུར་བ་དང༌། ཟས་ལེན་ཅིང་ཡི་གར་འོང་བ་འགག་བར་འགྱུར་རོ། །གོམས་པ་ཞེས་བྱ་བ་འདི་ནི། བདག་ཉིད་ཀྱིས་གོམས་ཤིང་བསྟེན་པར་གྱུར་ན་འཕྲོད་པར་གྱུར་པ་ཡིན་གྱི། དེ་ལས་བཟློག་པ་མི་འདོད་ཅིང་གནོད་པ་ནི་མ་ཡིན་ནོ། །གཙང་བ་ནི་གང་ལས་འོངས་ཤིང་ཅི་ལྟར་གཡོས་པ་ཤེས་པའོ། །ཕན་པ་ནི་ཟས་ཀྱི་རིགས་གང་གིས་ཁམས་སྙོམས་པ་མཉམ་པ་ཡིན་དུ་འཇོག་པར་བྱེད་ཅིང༌། མ་སྙོམས་པ་རྣམས་སྙོམས་པར་བྱེད་པའོ། །དེ་ལས་བཟློག་པ་ནི་མི་ཕན་པའོ། །ཟས་སྣུམ་པ་དང༌། དྲོ་བ་དང༌། ཡང་བས་ནི་མེའི་དྲོད་སྐྱེད་པར་བྱེད་དེ། ཅུང་ཟད་དྲོ་བས་ནི་ལུས་སྦྱོང་ཞིང་ལུས་ཟུངས་འཁྲུག་པར་མི་བྱེད་པ་དང༌། མྱུར་དུ་འཇུ་བར་བྱེད་པ་དང༌། ལམ་མ་ཡིན་བར་ཞུགས་པ་རྣམས་བཟློག་ཅིང་ལུགས་སུ་འཇོག་པར་བྱེད་དོ། །སྣུམ་པ་ནི་དབང་པོ་རྣམས་བརྟན་པར་བྱེད་པ་དང༌། ལུས་བརྟས་ཤིང་འཕེལ་བ་དང། རྒས་སྲ་བ་དང༌། སྟོབས་སྐྱེད་པ་དང༌། ཁ་དོག་དང་བར་བྱེད་པ་ཡིན་ནོ། །ཡང་བ་ནི་ཟས་ཀྱི་རང་བཞིན་གྱིས་གནོད་པ་མེད་པར་འཇུ་བར་འགྱུར་ལ། མ་ཞུ་ན་ཡང་གནོད་པ་ཆེན་པོ་མེད་པ་ཡིན་ནོ། །ཡང་དྲོ་བས་ནི་ཡིག་འབྱེ་བར་བྱེད་པ་དང༌། བད་ཀན་འཇིག་པར་བྱེད་པ་ཡིན་ནོ། །མ་ཡེངས་པ་ཡིད་ལ་གཏོད་པ་སྟེ། ཡིད་གཞན་དུ་ཡེངས་པའམ། ཤིན་ཏུ་མྱུར་བར་ཟ་བའམ། སྨྲ་བཞིན་ནམ། དགོད་བཞིན་དུ་ཟ་ན། སྣུམ་མདངས་མི་སྐྱེད་པ་དང༌། རྨྱ་བ་དང༌། གནས་སུ་མ་ཆད་པ་དང༌། ཡོན་ཏན་དང་སྐྱོན་མི་རྟོག་པར་འགྱུར་
རོ། །རོ་དྲུག་ལྡན་ཞིང་ཞེས་བྱ་བ་ནི་མངར་བ་དང༌། སྐྱུར་བ་དང༌། ལན་ཚྭ་དང༌། ཁ་བ་དང༌། ཚ་བ་དང༌། བསྐ་བའི་རོ་དང་ལྡན་པའོ། །མངར་བག་ཆེ་ཞེས་བྱ་བ་ནི། ཕལ་ཆེར་མངར་བའི་ཤས་མང་བའོ། །ཤིན་ཏུ་དལ་ཆེས་བར་བཟའ་བ་ནི་ངོམས་ཤིང་ཆོག་ཤེས་བར་དཀའ་བ་དང༌། མང་དུ་ཟ་བར་འགྱུར་བ་དང༌། ཟས་ཀྱི་བག་འགྲངས་བར་འགྱུར་བ་དང༌། འཇུ་དཀའ་བར་འགྱུར་རོ། །ཁྲུས་བྱས་པ་ནི་གཙང་སྦྲའི་ཆོ་ག་བྱས་པའོ། །བཀྲེས་པ་ནི་བྲུ་བ་ཚ་བ་དང་ལྡན་པའོ། །དབེན་པར་གནས་པ་སྐྱེ་བོ་མང་པོས་མ་བསྐོར་བའོ། །ཁ་གདོང་ལག་པ་རྐང་པ་གང་དང་གང་གིས་བཀྲུས་ཤིང་དག་པར་བྱས་པའོ། །དེ་བཞིན་དུ་ལྷ་རྣམས་མཆོད་ཅིང་རྗེད་པ་དང༌། ཡི་དྭགས་ལ་སྦྱིན་པར་བྱ་བ་དང༌། བླ་མ་དང༌། བྱིས་པ་དང༌། མགྲོན་དུ་བོས་པའམ། གློ་བུར་དུ་འོངས་པ་ལ་མཆོད་ཅིང་སྦྱིན་པར་བྱ་བ་དང༌། ཁྱི་ལ་སོགས་པ་ལ་ཡང་སྦྱིན་ཞིང༌། ཕྱུགས་ལ་སོགས་པའི་དུད་འགྲོ་རྣམས་ཀྱང་རབ་ཏུ་བརྟགས་ཤིང༌། རྩྭ་ལ་སོགས་པ་སྦྱིན་ལ། །བདག་ཉིད་ལེགས་པར་བརྟགས་ནས་ནི། །ཞེས་བྱ་བ་ལ། ངའི་འདི་ནི་གོམས་ཤིང་བསྟེན་པ་ཡིན་ནོ་ཞེས་པ་དང༌། རྟག་ཏུ་བག་ཡོད་པས་གནས་པ་དང༌། མ་སྨད་པ་སྟེ་ཟས་ལ་དཔྱས་མི་བརྗོད་པ་དང༌། མི་སྨྲ་བ་དང༌། ཡིད་དུ་འོང་ཞིང་རྗེས་སུ་མཐུན་པ་ཅུང་ཟད་ཅིག་སྨྲ་བ་དང༌། སྐྱེ་བོ་གཙང་ཞིང་གུས་པས་སྟོབས་ཤིང་བྱིན་པའམ། གཡོས་སུ་བྱས་པ་དེ་ཡིད་དུ་འོང་ཞིང་སྙིང་དུ་སྡུག་པའི་གཉེན་དང་ལྷན་ཅིག་བཟའ་བར་བྱའོ། །ཟས་ནི་རྩ་དང་སྐྲ་སྤུ་སོགས། །འདྲེས་ཤིང་ཁོང་དུ་སླར་བསྲོས་དང༌། །ཚོད་མ་ཟས་ངན་མང་བ་དང༌། །ཚ་ཆེས་ལན་ཚྭ་མང་བ་སྤང༌། །ཕྲུམ་དང་ཞོ་དང་ཕྲུམ་སྐམ་དང༌། །བ་ཚ་ཚྭ་དང་ལ་ཕུག་རྗེན། །ཕག་རྒོད་ལུག་དང་བ་ལང་ཉ། །མ་ཧེའི་ཤ་དང་རིད་དང་སྐམ། །མ་ཤ་ཆུ་ལྡུམ་ནིས་ཤ་པ། །བད་རྩ་འབྲས་ཁུར་མྱུ་གུར་གྱུར། །ཚོད་མ་སྐམ་དང་ནས་འདྲ་དང༌། །བུ་རམ་ཕྲ་མོ་བཟའ་མི་བྱ། །ཞེས་བྱ་བ་ལ། ཕྲུམ་ནས་བུ་རམ་ཕྲ་མོའི་བར་དུ་བཟའ་བར་མི་བྱའོ། །བཟའ་མི་བྱ་ཞེས་བྱ་བ་འདིས་ནི་འདི་སྐད་སྟོན་པ་
ཡིན་ཏེ། ཕྲུམ་དང་ཆང་ལ་སོགས་པ་རྟག་ཏུ་གོམས་པར་རྒྱུན་དུ་བཟའ་བ་བཀག་པ་ཡིན་གྱི། འདི་དག་ལན་འགའ་ཡང་བཟར་མི་རུང་བར་བཀག་པ་ནི་མ་ཡིན་ནོ། །དེ་ལ་ཕྲུམ་ནི་བའི་འོ་མ་ལ་སོགས་པ་ལས་བྱས་པའོ། །བ་ཚ་ནི་ཡ་བཀྵར་ལ་སོགས་པའོ། །ཚ་ནི་ཆང་ཐམས་ཅད་ཤིན་ཏུ་སྐྱུར་བར་སོང་བའོ། །ལ་ཕུག་རྗེན་པ་ནི་ལ་ཕུག་རྒན་པོའོ། །ཤ་ཞེས་བྱ་བ་ནི་རིད་པ་ལ་སོགས་པ་ཀུན་དང་སྦྱར་རོ། །རིད་པ་ནི་པགས་པ་དང་རུས་པ་ཙམ་ལུས་པའོ། །སྐམ་པ་ནི་རླན་མེད་པའོ། །ནིས་པ་ནི་གང་བུ་ཅན་གྱི་འབྲུའི་བྱེ་བྲག་གཅིག་གོ །ཆུ་ལྡུམ་ནི་ཨུཏྤ་ལ་ལ་སོགས་པའི་སྡོང་བུའི་ཚོད་མའོ། །འབྲས་ཁུར་ནི་སཱ་ལུ་ལ་སོགས་པ་བཏགས་པ་ལས་བྱས་པའི་ཁུར་བའོ། །མྱུ་གུར་གྱུར་པ་ནི་འབྲས་ལ་སོགས་པའི་ཁྱི་སོ་འཐོན་པའོ། །ཡ་བ་ཀ་ནི་གྲ་མ་ཅན་གྱི་འབྲུའི་བྱེ་བྲག་གོ །བུ་རམ་ཕྲ་མོ་ནི་བུ་རམ་གྱི་ཁྱད་པར་ཆུང་ངུ་ཞིག་གོ །སཱ་ལུའི་འབྲས་དང་གྲོ་དང་ནས། །དྲུག་ཅུ་བ་དང་སྐམ་སའི་ཤ་།ཨ་རུ་སྐྱུ་རུ་རྒུན་འབྲུམ་དང༌། །མུངྒ་ཁ་ར་པ་ཏོ་ལ། །ཞུན་མར་ཆར་ཆུ་འོ་མ་དང༌། །སྦྲང་རྩི་སེའུ་འབྲུ་རྒྱམ་ཚ་བཟའ། །མིག་དང་སྟོབས་ཕྱིར་མཚན་མོ་ནི། །འབྲས་གསུམ་སྦྲང་རྩི་མར་སར་བཟའ། །མི་ནར་འཇོག་པར་བྱེད་གང་དང༌། །ནད་སེལ་བྱེད་པ་གང་ཡིན་བསྟེན། །ཞེས་བྱ་བ་ལ། རཀྟ་ཤ་ལི་ལ་སོགས་པ་དང༌། སཱ་ལུའི་འབྲས་ཆན་ལ་སོགས་པ་དང༌། སྐམ་སའི་ཤ་རྟག་ཏུ་བཟའ་བར་བྱའོ། །དེ་བཞིན་དུ་མིག་ལ་ཕན་པ་དང༌། ལུས་ཀྱི་སྟོབས་བསྐྱེད་པར་བྱ་བའི་ཕྱིར། མཚན་མོའི་དུས་སུ་འབྲས་བུ་གསུམ་དང༌། སྦྲང་རྩི་དང་མར་སར་དུ་སྦྱར་བ་བཟའ་བར་བྱའོ། །གཞན་ཡང་སྨན་གྱི་རིགས་གང་སྨོས་སུ་ཟིན་ཀྱང༌། སྨིན་པར་བྱེད་ཅིང་བདེ་བར་འཇུ་བར་བྱེད་པ་གང་ཡིན་པ་དང༌། སྨན་གང་ནད་སེལ་ཞིང་འཇོམས་པར་བྱེད་པ་དེ་ཡང་བསྟེན་ཅིང་བཟའ་བར་བྱའོ། །བད་རྩ་བུར་ཤིང་ཙོ་ཙ་དང༌། །མོ་ཙ་ཨ་མྲའི་འབྲས་བུ་དང༌། །ལ་དུ་ཁུར་བ་བུ་རམ་ཅན། །ཟས་ནི་ལྕི་ཞིང་སྣུམ་པ་དང༌། །མང་ཞིང་འཇུ་དཀའ་བརྟན་པ་རྣམས། །དང་པོ་ཉིད་དུ་བཟའ་བར་བྱ། །ཞེས་བྱ་བ་ལ། པདྨའི་རྩ་བ་ལ་
སོགས་པ་ནི་ཟས་ཀྱི་དང་པོར་ཐོག་མ་ཉིད་དུ་བཟའ་བར་བྱའོ། །ཙོ་ཙ་ནི་རྒྱ་སྟར་གྱི་འབྲས་བུའོ། །མོ་ཙ་ནི་ཆུ་ཤིང་གི་འབྲས་བུའོ། །ཁུར་བ་བུ་རམ་ཅན་ནི་བཟའ་བའི་ཁྱད་པར་རོ། །འཇུ་དཀའ་བ་ནི་རོ་རྟུལ་བའོ། །བརྟན་པ་ནི་བརྟན་པོར་གནས་པ་སྟེ། དེ་དག་ཐོག་མར་བཟའ་བར་བྱའོ། །དེ་ལས་བཟློག་པ་ཐ་མར་བཟའ། །བར་དུ་སྐྱུར་ཚ་ལན་ཚྭ་ཅན། །ཞེས་བྱ་བ་ལ། སྔར་བཤད་པ་དེ་ལས་གོ་བཟློག་པ་ནི། ཡང་བ་དང༌། རྩུབ་པ་དང༌། ཚ་བ་དང༌། རྣོ་བ་དང༌། གཡོ་བའི་རང་བཞིན་ཅན་གྱི་སྨན་རྣམས་ཁ་བ་དང༌། ཚ་བ་དང༌། བསྐ་བའི་མཚན་ཉིད་ཅན་ཟས་ཀྱི་ཐ་མ་རྫོགས་པའི་དུས་སུ་བཟའ་བར་བྱའོ། །ཟས་ཀྱི་བར་དུ་ནི་སྐྱུར་བ་དང༌། ཚ་བ་དང༌། སྔར་ལན་ཚྭ་ཅན་བཟའ་བར་བྱའོ། །ལྟོ་ཡི་ཆ་གཉིས་ཟས་ཀྱིས་ཏེ། །ཆ་གཅིག་སྐོམ་གྱིས་དགང་བར་བྱ། །རླུང་ལ་སོགས་པའི་གནས་སུ་ནི། །ཆ་བཞི་བར་ནི་ལྷག་མར་གཞག །ཅེས་བྱ་བ་ལ། ལྟོའི་ཆ་གཉིས་ནི་ཟས་ཀྱིས་དགང་བར་བྱའོ། །ལྟོའི་ཆ་གཅིག་ནི་སྐོམ་སྟེ་བཏུང་བས་དགང་བར་བྱའོ། །རླུང་ལ་སོགས་པའི་ཉེས་པ་རྣམས་ཀྱི་གནས་དང་རྟེན་དུ་ནི་ལྟོའི་བཞི་པ་ལྷག་མར་གཞག་ཅིང་ལུས་པར་བྱའོ། །འདི་ནི་རྣམ་པ་ཐམས་ཅད་དུ་བྱ་བ་མ་ཡིན་ཏེ། དེ་ཡང་གཞུང་ལས། རླུང་མེའི་ཤས་ཆུང་ནད་མེད་དང༌། །རྒྱལ་པོའི་བདེ་བའི་བདག་ཉིད་ལ། །རིམ་འདི་རྟག་ཏུ་སྦྱར་བྱ་ཡི། །གཞན་དག་ལ་ནི་ངེས་པ་མེད། །ཅེས་བཤད་པ་ཡིན་ནོ། །དེ་ལྟར་ཟས་ཟོས་ཟིན་ནས། དེའི་རྗེས་ལ་སྐོམ་བཏུང་བར་བྱ་བ་ཡིན་པས་ན། དེའི་ཕྱིར་སྨྲས་པ་ནི། ཟོས་རྗེས་སྐོམ་ནི་བསིལ་བའི་ཆུ། །ནས་དང་བག་ཕྱེའི་གཡོས་བྱས་ཟོས། །ཞོ་ཆང་དུག་འབགས་སྦྲང་རྩི་ལ། །ཆུ་བསིལ་རྗེས་སུ་འཐུངས་ན་ཕན། །ཞེས་བྱ་བ་ལ། ཟས་ཟོས་པའི་རྗེས་ལ་སྐོམ་དུ་བཏུང་བ་ནི་ཆུ་ཉིད་བཟང་བ་ཡིན་ཏེ། རོ་ཐམས་ཅད་ཀྱི་སྐྱེ་གནས་ཡིན་པའི་ཕྱིར་དང༌། སེམས་ཅན་ཐམས་ཅད་ཀྱི་ཐུན་མོང་གི་ལོངས་སྤྱོད་ཡིན་པའི་ཕྱིར་དང༌། འཚོ་བར་བྱེད་པ་ལ་སོགས་པའི་ཡོན་ཏན་དང་ལྡན་པའི་ཕྱིར་རོ། །དེ་ཡང་ཁྱད་པར་ནི་བསིལ་ཞིང་གྲང་བའི་ཡོན་ཏན་དང་
ལྡན་པའོ། །དེ་ཡང་གང་དང་རྗེས་སུ་མཐུན་ཞེ་ན། ནས་དང་བག་ཕྱེ་ལས་གཡོས་སུ་བྱས་པ་ཟོས་པ་དང༌། ཞོ་དང༌། ཆང་དང༌། དུག་དང༌། སྦྲང་རྩི་ཟོས་པའི་རྗེས་ལ་འཐུངས་ན་ཕན་ཞིང་བདེ་བར་འགྱུར་བ་ཡིན་ནོ། །མི་འཇུ་འགགས་ལ་ཆུ་དྲོན་གཏང༌། །ཚོད་མ་མུངྒའི་གནོད་པ་ལ། །ཞོ་ག་ཆུ་དང་དར་བ་དང༌། །རང་སྐྱུར་རྩབ་མོ་བཏུང་བར་བྱ། །ཞེས་བྱ་བ་ལ། གང་ཟས་མི་འཇུ་བ་དང༌། བཤང་གཅི་འགགས་པ་ལ་ནི་ཆུ་བསྐོལ་དྲོན་མོ་བཏུང་བར་བྱ་བ་ལ། ཚོད་མ་དག་དང༌། མུངྒ་ཟོས་པ་ལས་གནོད་པར་གྱུར་པའི་ནད་ལ་ནི་ཞོ་ག་ཆུ་དང༌། དར་བ་དང༌། འབྲས་ཁུ་མནན་པའི་རང་སྐྱུར་གྱི་རྩབ་མོ་བཏུང་བར་བྱའོ། །སྐེམ་པོ་རྒྱས་ཕྱིར་ཆང་བཏུང་སྟེ། །ཞེས་བྱ་བ་ལ། མི་སྐེམ་ཞིང་ཤ་ཆུང་བ་དག་ལ། ལུས་རྒྱས་ཤིང་ལུས་ཟུངས་འཕེལ་བར་བྱ་བའི་ཕྱིར། སྐོམ་དུ་ཆང་བཏུང་བ་ཕན་པ་ཡིན་ནོ། །སྦོམ་པོས་སྦྲང་རྩིའི་ཆུ་བཏུང་ངོ༌། །ཞེས་བྱ་བ་ལ། མི་སྦོམ་ཞིང་ཤ་ཆེ་བ་དག་སྐེམ་པོར་བྱ་བའི་ཕྱིར། སྐོམ་དུ་སྦྲང་རྩིའི་ཆུ་བཏུང་བ་སྟེ། སྦྲང་རྩི་དང་ཆུ་སྦྱར་བའི་སྐོམ་བཏུང་བར་བྱའོ། །གཅོང་ཆེན་ནད་ལ་ཤ་ཁུ་བཏུང༌། །ཞེས་བྱ་བ་ལ། གཅོང་ཞེས་བྱ་བ་ཟད་བྱེད་ཀྱི་གློ་གཅོང་ཆེན་པོ་ན་བ་ལ་ཤ་ཁུ་བཏུང་བར་བྱའོ། །དྲོད་ཆུང་ཤ་ཟོས་ཆང་བཏུང་བྱ། །ཞེས་བྱ་བ་ལ། མེ་དྲོད་ཆུང་ཞིང་ཤ་ཟོས་པས་ནི་སྐོམ་དུ་ཆང་བཏུང་བར་བྱའོ། །ནད་དང་སྨན་སོགས་སྦྲུམ་བུད་མེད། །ཟན་བཅད་དཀའ་ཐུབ་ལས་རྣམས་ཀྱིས། །སྐེམ་དང་བྱིས་པ་རྒན་པོ་ལ། །འོ་མ་བདུད་རྩི་ལྟ་བུར་ཕན། །ཞེས་བྱ་བ་ལ། ནད་པ་ལ་སོགས་པ་ཉམ་ཆུང་ཞིང་རྨྱ་བར་གྱུར་པའི་མི་དང༌། སྐེམ་པ་དང༌། བྱིས་པ་དང༌། རྒན་པོ་དག་ལ་སྐོམ་དུ་འོ་མ་བཏུང་བ་ནི་བདུད་རྩི་ལྟ་བུར་ཕན་པར་བྱེད་པ་ཡིན་ནོ། །མདོར་ན་ཟོས་རྗེས་བཏུང་བ་ནི། །གང་ཞིག་ཟས་དང་ཡོན་ཏན་གྱིས། །མི་མཐུན་མི་འཕྲོད་མེད་གྱུར་པ། །དེ་ནི་རྣམ་པ་ཀུན་ཏུ་བསྔགས། །ཞེས་བྱ་བ་ལ། མདོར་བསྡུ་ན་ཟས་ཀྱི་རྗེས་ལ་སྐོམ་དུ་བཏུང་བར་བྱ་བ་ནི་གང་ཞིག་ཟས་དང་མི་འདྲ་ཞིང༌། དེ་དང་རང་བཞིན་མི་མཐུན་པར་གྱུར་པ་དེ་ནི། དུས་རྣམ་པ་ཀུན་ཏུ་
བསྔགས་ཤིང་ཕན་བར་འགྱུར་བ་ཡིན་ལ། དེ་ཡང་མི་འཕྲོད་པ་མེད་པར་གྱུར་པའོ། །དེ་ཡང་དཔེར་ན་སྣུམ་པ་ལ་རྩུབ་པ་དང༌། རྩུབ་པ་ལ་སྣུམ་པ་དང༌། གྲང་བ་ལ་དྲོ་བ་དང༌། དྲོ་བ་ལ་གྲང་བ་དང༌། མངར་བ་ལ་སྐྱུར་བ་དང༌། སྐྱུར་བ་ལ་མངར་བ་དང༌། མངར་བ་ལ་ཁ་བ་དང༌། ཁ་བ་ལ་མངར་བའོ། །དེ་ལྟ་ན་ནི་འོ་མ་ལས་གཡོས་བྱས་པའི་ཟས་དང༌། འོ་མ་ལས་གྱུར་པ་རྣམས་ལ་སྐོམ་དུ་རང་སྒྱུར་གྱི་རྩ་བ་མོ་ལ་སོགས་པ་བཏུང་བར་བྱ་དགོས་ཏེ། ཟས་ཀྱི་ཡོན་ཏན་ལས་ཡོན་ཏན་མི་མཐུན་པ་མེད་པ་ཡིན་པའི་ཕྱིར་རོ་ཞེ་ན། དེའི་ཕྱིར་མི་འཕྲོད་པ་མེད་པ་མི་བྱ་བའི་ཚིག་སྨོས་པ་ཡིན་ཏེ། རྩབ་མོ་རང་སྐྱུར་ལ་སོགས་པ་སྐྱུར་བ་གང་ཡིན་པ་དེ་ནི་འོ་མ་ལ་སོགས་པ་དང་ཡོན་ཏན་མི་མཐུན་པར་གྱུར་པ་ཡིན་དུ་ཟིན་ཀྱང༌། དེ་ནི་མི་འཕྲོད་པ་ཡིན་ཏེ། འོ་མ་དང་སྐྱུར་ལྷན་ཅིག་བཟའ་བ་ནི་མི་འཕྲོད་པ་ཡིན་ནོ། །ཞེས་སྔར་བསྟན་པའི་ཕྱིར་རོ། །དེ་བས་ན་གང་ཟས་དང་སྐོམ་ཡོན་ཏན་མི་མཐུན་ཞིང༌། མཚན་ཉིད་ཐ་དད་ཀྱང་མི་འཕྲོད་པ་མེད་པར་གྱུར་བ་བཏུང་བ་དེ་མཆོག་ཏུ་བསྔགས་བ་ཡིན་ནོ། །ད་ནི་སྐོམ་འཐུངས་པའི་ཡོན་ཏན་སྨྲས་པ་ནི། ཟས་རྗེས་སྐོམ་འཐུངས་ངོམས་དང་ཁྱབ། །སྟོབས་འཕེལ་ལུས་ནི་བརྟན་བྱེད་ལ། །ཟས་སྡུད་སྙི་བར་འགྱུར་བ་དང༌། །འདྲུལ་ཞིང་རྣམ་པར་འཇུ་བར་འགྱུར། །ཞེས་བྱ་བ་ལ། ཟས་ཀྱི་རྗེས་སྐོམ་འཐུངས་པ་ནི་ངོམས་ཤིང་ཚིམ་པར་བྱེད་པ་དང༌། ལུས་ཁྱབ་ཅིང་རྫོགས་པར་བྱེད་པ་དང༌། གཟི་མ་དངས་འཕེལ་ཞིང་བརྟས་བར་བྱེད་པ་དང། དེ་བཞིན་དུ་ལུས་བརྟན་པར་བྱེད་པ་དང༌། ཡན་ལག་བརྟན་ཞིང་མཁྲེགས་པར་བྱེད་པ་དང༌། དེ་བཞིན་དུ་ཟས་ཀྱི་ཚོགས་སྡུད་ཅིང་གཅིག་ཏུ་གནས་བར་བྱེད་ལ་སྒོང་བར་བྱེད་དོ། །སྙི་བར་བྱེད་པ་ནི་ཟས་བསྡུས་པ་དེ་ལྷོད་ཅིང་སྙི་བར་བྱེད་པ་དང༌། ཟས་དེ་ཉིད་འདྲུལ་བར་བྱེད་ཅིང་སླ་བར་བྱེད་བ་དང༌། དེ་བཞིན་དུ་རྣམ་པར་འཇུ་ཞིང་བདེ་བར་འཇུ་བར་བྱེད་པར་འགྱུར་རོ། །དེ་ནི་ནམ་ཚོང་ཡན་ཆད་ནད། །དབུགས་ལུད་གློ་རྡོལ་ཆམ་པ་དང༌། །གླུ་ལེན་སྨྲ་མང་ལ་ཆགས་དང༌། །སྐད་འགགས་པ་ལ་གནོད་པ་ཡིན། །ཞེས་བྱ་བ་ལ། སྐོམ་འཐུངས་བ་དེ་ནི།
ནམ་ཚོང་ཡན་ཆད་ཀྱི་ནད་ལ་གནོད་པ་ཡིན་ནོ། །དེ་ལ་ནམ་ཚོང་ནི་མཆན་ཁུང་དང༌། དཔུང་པ་གཡས་གཡོན་གྱི་བར་མཚམས་ལ་ནམ་ཚོང་ཞེས་བྱ་སྟེ། དེ་ཡང་ལུང་ལས། ནམ་ཚོང་མགོ་དང་སྐེ་བའི་རྟེན། །མགོ་འཛིན་ཞེས་ཀྱང་བཤད་པ་ཡིན། །ཞེས་འབྱུང་བ་ཡིན་ནོ། །དེ་ལྟར་ན་དེ་ཡན་ཆད་ཀྱི་ཡན་ལག་གི་ནད་ལ་གནོད་པ་ཡིན་ནོ། །དེ་བཞིན་དུ་དབུགས་མི་བདེ་བ་དང༌། ལུད་པ་མང་བ་དང༌། གློ་རྡོལ་བ་དང༌། ཆམ་པས་བཏབ་པ་ལ་ཡང་གནོད་པ་ཡིན་ནོ། །དེ་བཞིན་དུ་གླུ་ལེན་པ་དང༌། སྨྲ་བ་མང་པོ་ལ་ཆགས་ཤིང་ཡང་དང་ཡང་དུ་སློན་པ་དང༌། སྐད་འགགས་པ་ལ་ཡང་གནོད་པ་ཡིན་ཏེ། དེ་རྣམས་ཀྱིས་མ་ཞུ་བའི་གནས་ལ་གནོད་བར་གྱུར་ནས། ལྐོག་མར་གྱུར་པའི་ཟས་ལས་བྱུང་བའི་སྣུམ་དང་འདྲེས་ཏེ། སློན་པ་ལ་སོགས་པའི་ནད་སྐྱེད་པར་འགྱུར་བ་ཡིན་ནོ། །ལུས་ལས་རྣག་འཛག་གཅིན་ནད་མིག །ལྐོག་ནད་རྨ་ཡི་ནད་ཀྱིས་ཉེན། །སྐོམ་སྤང༌། ཞེས་བྱ་བ་ལ། གང་གི་ལུས་ལ་མཛེ་ལ་སོགས་པས་ཉེན་ཅིང་རྣག་འཛག་བར་གྱུར་པ་དང༌། དེ་བཞིན་དུ་གཅིན་ནད་དེ། ལྒང་པའི་ནད་ཡོད་པ་དང༌། མིག་ན་བ་དང༌། ལྐོག་མའི་ནད་ན་བ་དང༌། རྨའི་ནད་ཀྱིས་ཉེན་ཅིང་གནོད་པར་གྱུར་པ་སྟེ། དེ་དག་ཐམས་ཅད་ཀྱིས་སྐོམ་སྤང་ཞིང་དོར་བར་བྱའོ། །ཀུན་གྱིས་སྐོམ་འཐུངས་ནས། །མང་སྨྲ་ལམ་ཞུགས་ཉལ་བ་སྤང༌། །ཞེས་བྱ་བ་ལ། ཀུན་གྱིས་ཞེས་བྱ་བ་ནད་མེད་པའམ། ནད་དང་ལྡན་པའི་མི་ཐམས་ཅད་ཀྱིས་ཀྱང་སྐོམ་འཐུངས་བར་གྱུར་པའི་རྗེས་ཐོགས་ལ་མང་དུ་སྨྲ་ཞིང་འདོན་པ་དང༌། ལམ་དུ་ཞུགས་ཤིང་འགྲོ་བ་དང༌། ཉལ་ཞིང་གཉིད་ལོག་པ་སྟེ། དུས་དེའི་ཚེ་ཉིད་འཕྲལ་དུ་བྱ་བ་དག་སྤང་ཞིང་དོར་བར་བྱའོ། །ཟས་ཟོས་ནས་ནི་ཉི་ཚན་མེ། །རྟ་ཞོན་རྐྱལ་དང་འདེགས་བ་སྤང༌། །ཞེས་བྱ་བ་ལ། ཟས་ཟོས་པའི་རྗེས་ཐོགས་ཉིད་ལ་ཉི་ཚན་ལ་སོགས་པ་སྤང་བར་བྱ་སྟེ། ཉི་ཚན་ནི་ཉི་མའི་ཐན་བས་གདུངས་པའོ། །མེ་ནི་མེ་ཚ་བ་ལ་འདེས་པར་གྱུར་པའོ། །བཞོན་པ་ནི་རྟ་ལ་སོགས་པས་འགྲོ་བའོ། །རྐྱལ་བ་ནི་མཚོ་ལ་སོགས་བར་རྐྱལ་བའོ། །འདེགས་པ་ནི་གུར་ལ་སོགས་པ་ཡུལ་གཞན་དུ་བསྐྱོད་
པ་སྟེ་དེ་སྤང་བར་བྱའོ། །ཟས་དང་སྐོམ་ཡོན་ཏན་དང་ལྡན་པ་དང༌། ཚོད་ཟིན་པར་བྱས་སུ་ཟིན་ཀྱང་དུས་མ་ཡིན་པར་ཟོས་པ་དང་འཐུངས་པས་ལུས་ལ་གནོད་པར་བྱེད་པ་ཡིན་ནོ། །དེ་བས་ན་བཤང་བ་དང༌། གཅི་བ་བསལ་ཞེས་བྱ་བ་ལ་སོགས་པའི་ཚིགས་སུ་བཅད་པས་དེའི་དུས་སྨྲས་པ་ཡིན་ཏེ། བཤང་དང་གཅི་བསལ་སྙིང་ལ་དྲི་མེད་ཉེས་པ་ལམ་མིན་བར་མི་འགྲོ། །སྒྲེགས་པ་དག་ཅིང་བྲུ་བ་ཚ་གྱུར་ཐུར་གྱི་རླུང་ནི་ཐ་མལ་རྒྱུ། །དེ་བཞིན་མེ་ཡི་དྲོད་བདོ་དབང་པོ་གསལ་ཞིང་ལུས་ཀྱང་རབ་ཏུ་ཡང༌། །ཟས་ཀྱི་ཚོད་རན་ཆོ་གར་སྦྱར་བཞིན་ཟ་བ་དེ་ནི་དུས་སུ་འདོད། །ཅེས་བྱ་བ་ལ། བཤང་བ་དང་གཅི་བ་ལེགས་པར་བསལ་ཞིང་བཏང་བ་དང༌། སྙིང་ལ་དྲི་མ་མེད་པ་སྟེ། སེམས་དངས་ཤིང་ཉམ་ང་བ་མེད་པ་དང༌། ཉེས་པ་སྟེ་རླུང་ལ་སོགས་བ་ལམ་མ་ཡིན་པ་དག་ཏུ་ལོག་པར་མི་འགྲོ་ཞིང༌། རང་གི་གནས་ན་གནས་པ་དང༌། སྒྲེགས་པ་དག་ཅིང་དྲི་མ་མནམ་པ་མེད་པ་དང༌། བྲུ་བ་ཚ་བར་གྱུར་ཅིང་བཀྲེས་པས་ཟ་འདོད་པར་གྱུར་པ་དང༌། ཐུར་གྱི་རླུང་ཐ་མལ་པར་རྒྱུ་བ་སྟེ། ཐུར་དུ་འབྱུང་བའི་རླུང་ལུགས་བཞིན་འབྱུང་བ་དང༌། དེ་བཞིན་དུ་ཕོ་བའི་མེ་དྲོད་བདོ་ཞིང་ཤས་ཆེ་བ་དང༌། དབང་པོ་གསལ་ཞིང་རང་གི་བྱ་བ་རྣམས་ལ་འཇུག་པ་གསལ་བ་དང༌། དེ་བཞིན་དུ་རང་གི་ལུས་ཀྱང་རབ་ཏུ་ཡང་བར་གྱུར་ཅིང་བྱ་བ་ལ་ཐོགས་པ་མེད་པར་གྱུར་པ་ནི། ཟས་ཀྱི་ཚོད་རན་པའི་ཆོ་གར་སྦྱར་བ་ཇི་སྐད་བཤད་པ་དེ་བཞིན་དུ་ཟ་བ་དེ་ནི་ཟས་ལ་སྤྱོད་པའི་དུས་ཡིན་བར་སློབ་དཔོན་དག་འདོད་ཅིང་བཞེད་པ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་བརྒྱད་པའི་རྣམ་པར་འགྲེལ་པའོ།། །།དེ་ནས་སྨན་ལ་སོགས་པ་རྣམས་ཀྱི་བྱེ་བྲག་ཤེས་པར་བྱ་བའི་ལེའུ་བཤད་བར་བྱའོ། །ཞེས་བྱ་བ་ལ། དེ་ནས་ཞེས་བྱ་བ་ནི་སྔར་བཤད་པའི་རྗེས་ཐོགས་ལ་སྟེ། ཟས་ཀྱི་ཚོད་ཟིན་པར་བཟའ་བའི་རྗེས་ལ། སྨན་ལ་སོགས་པ་རྣམས་ཀྱི་བྱེ་བྲག་ཤེས་པར་བྱ་བའི་ལེའུ་བཤད་པར་བྱའོ། །དེ་ལ་སྨན་ལ་སོགས་བ་ཞེས་སྨོས་པ་ལ་སོགས་པའི་སྒྲས་ནི་ནུས་
པ་དང་འཇུ་བ་ལ་སོགས་པ་བསྡུའོ། །དེ་རྣམས་བྱེ་བྲག་ཤེས་བར་བྱ་བ་ནི། མཚན་ཉིད་ཁོང་དུ་ཆུད་པར་བྱ་སྟེ། དེ་ཤེས་པར་འགྱུར་བ་ལ་ཕན་པའི་ལེའུ་བཤད་པར་བྱའོ་ཞེས་པའོ། །དེ་གང་གི་ཕྱིར་ཟས་དང་སྐོམ་འདི་དག་ནི་ཟས་དང༌། རོ་དང༌། ནུས་པ་དང༌། འཇུ་བ་ལ་སོགས་པ་ཡོངས་སུ་བརྟགས་ནས་སྦྱར་བར་བྱའི་གཞན་དུ་ནི་མ་ཡིན་ནོ། །དེ་ལ་སྨན་ན་མ་རྫས་ནི་རོ་ལ་སོགས་པ་ལས་མཆོག་ཏུ་གྱུར་པ་ཡིན་པས་དང་པོར་བསྟན་པ་ཡིན་ཏེ། སྨན་རྣམས་ཉིད་ཀྱི་རོ་ལ་སོགས། །དེ་ནི་དེ་ལ་བརྟེན་པས་མཆོག །ཅེས་བྱ་བ་ལ། སྨན་རྣམ་གཉིས་རོ་དང་ནུས་པ་ལ་སོགས་པ་རྣམས་ཀྱི་ནང་ན་མཆོག་ཡིན་ཏེ། ཅིའི་ཕྱིར་ཞེ་ན། རོ་ལ་སོགས་པ་དེ་རྣམས་ནི་སྨན་དེ་ལ་བརྟེན་ཅིང་གནས་པ་ཡིན་གྱི། རོ་ལ་སོགས་པ་འབའ་ཞིག་ཚིག་སྐྱར་གནས་པ་ནི་མ་ཡིན་ཏེ། དེ་བས་ན་དེ་ནི་མཆོག་ཡིན་ནོ། །དེ་ཡང་འབྱུང་ལྔའི་བདག་ཉིད་ཅན། །ཞེས་བྱ་བ་ལ། སྨན་དེ་ཡང་འབྲས་བུའི་རང་བཞིན་རྒྱུ་བ་དང་མི་རྒྱུ་བ་ལ་སོགས་པའི་ཚུལ་དུ་གནས་པ་གང་ཡིན་པ་དེ་ནི་འབྱུང་བ་ལྔའི་བདག་ཉིད་ཅན་ཏེ། འབྱུང་བ་ཆེན་པོ་རྣམ་པ་ལྔ་ལས་ཤེས་པར་བྱ་སྟེ། ནམ་མཁའ་ལ་སོགས་པ་རྒྱུའི་རྫས་རྣམས་ནི་མ་ཡིན་ཏེ། ནམ་མཁའ་ལ་སོགས་པ་རྒྱུའི་རྫས་ཀྱི་འབྱུང་བ་ཆེན་པོ་ལྔའི་བདག་ཉིད་ཅན་དུ་གྱུར་པ་ནི་སོ་སོར་རང་ཉིད་ཐོབ་བའི་དོན་དུ་གནས་བས་འདི་ནི་ནམ་མཁའ་ཞེས་བྱ་བའི་འབྱུང་བ་ཆེན་པོའོ། །འདི་ནི་སའི་འབྱུང་བ་ཆེན་པོ་ཞེས་སྨྲ་བར་ནུས་པ་མ་ཡིན་གྱི། ས་ལ་སོགས་པ་འབྱུང་བ་རྣམས་ནི་འབྱུང་བ་ཆེན་པོ་ལྔའི་བདག་ཉིད་ཅན་ཡིན་པས་ན། དེའི་སྒྲས་བསྟན་པ་ཡིན་ནོ། །དེ་བས་ན་འབྱུང་བ་ལྔའི་བདག་ཉིད་ཅན་དང་གཅིག་པ་མ་ཡིན་ནོ། །དེ་ཉེ་བར་དམིགས་པ་རྣམ་པ་ལྔས་ཞེས་བྱ་སྟེ། དེ་ལ་དེའི་དྲིའི་ཤས་ཆེ་བ་གང་ཡིན་པ་དེ་ནི་སའི་ཡིན་ལ། རོའི་ཤས་ཆེ་བ་གང་ཡིན་པ་དེ་ནི་ཆུའི་ཡིན་ནོ། །གཟུགས་ཀྱི་ཡོན་ཏན་ཤས་ཆེ་བ་དེ་ནི་མེའི་ཡོན་ཏན་ནོ། །རེག་པའི་ཡོན་ཏན་ཤས་ཆེ་བ་གང་ཡིན་པ་དེ་ནི་རླུང་གི་ཡིན་ནོ། །སྒྲའི་ཡོན་ཏན་ཤས་ཆེ་བ་གང་ཡིན་པ་དེ་ནི་ནམ་མཁའ་ཡིན་ཏེ། གང་དང་དེ་ནི་རྟག་ཏུ་འབྲེལ་བ་ཡིན་པའི་ཕྱིར། གང་
ཞེས་བྱ་བའི་ཚིག་འདི་མ་སྨོས་སུ་ཟིན་ཀྱང༌། བསྟན་པ་ཉིད་ཡིན་པར་ཤེས་པར་བྱའོ། །གལ་ཏེ་སྨན་དེ་འབྱུང་བ་ཆེན་པོ་ལྡས་སྐྱེད་པ་ཡིན་ན། དེ་འབྱུང་བ་ཆེན་པོ་གང་གིས་ཇི་ལྟར་བྱས་ནས་བསྐྱེད་པ་ཡིན། དེའི་ཕྱིར་སྨྲས་པ་ནི། ས་ལ་བརྟེན་ཏེ་སྐྱེ་བ་ཡིན། །ཞེས་བྱ་བ་ཡིན་ཏེ། ས་བརྟེན་པའི་གནས་སུ་བྱས་ནས་སྐྱེ་བ་ཡིན་ནོ། །དེ་ལྟར་ནས་ཞེས་བྱ་བའི་འབྱུང་བ་ཆེན་པོས་རྟེན་དུ་བྱས་པའི་དགོས་པ་བྱས་པས་ན། དེས་བསྐྱེད་ཅིང་བསྐྲུན་པ་ཡིན་ནོ་ཞེས་བཤད་དོ། །དེ་བཞིན་དུ་དེ་ནི་མེའི་སྐྱེ་གནས་ཞེས་བྱ་བ་ཆུའི་སྐྱེ་གནས་སུ་གྱུར་ཅིང༌། སྐྱེད་པར་བྱེད་པའི་རྒྱུ་བྱེད་པས་ན། སྨན་གྱི་སྐྱེ་གནས་ནི་ཆུའི་ཡིན་ཏེ། དེ་ལྟར་ཆུ་ཞེས་བྱ་བའི་འབྱུང་བ་ཆེན་པོས་རོ་དང་ལྡན་པར་སྐྱེ་གནས་ཀྱི་དགོས་བ་བྱས་པས་དེས་དེ་སྐྱེད་པ་ཞེས་བྱའོ། །ཆུ་ནི་སྐྱེ་གནས་མེ་དང་རླུང༌། །ནམ་མཁའ་རྣམས་ནི་ཚོགས་པ་ལས། །དེ་སྐྱེས་གྱུར་དང་ཁྱད་པར་བྱུང༌། །ཞེས་བྱ་བ་ལ། སྨན་དེ་སྐྱེས་ཤིང་བྱུང་བར་གྱུར་པ་དང༌། རྫོགས་པར་འཐོན་པ་དེ་ནི་མེ་དང་རླུང་དང་ནམ་མཁའ་རྣམས་ཀྱི་ཚོགས་པ་ལས་སྐྱེས་བར་གྱུར་པ་ཡིན་ཏེ། ཚོགས་བས་རྒྱུ་དང་འབྲས་བུའི་ཚུལ་གྱིས་སྐྱེད་དེ། དེས་ན་དཔེར་ན་མེ་ནི་སྨིན་པར་བྱེད་པ་ཉིད་ཀྱིས་དགོས་པ་བྱེད་ལ། རླུང་ནི་གཡོ་འགུལ་གྱིས་སོ། །ནམ་མཁའ་ནི་གོ་འབྱེད་པའི་ཚུལ་གྱིས་སོ། །དེ་སྐྱེས་པར་གྱུར་བ་མེ་དང་རླུང་དང་ནམ་མཁའ་རྣམས་ཀྱི་ཚོགས་པ་ལས་དེ་སྐྱེས་པར་གྱུར་པ་འབའ་ཞིག་ཏུ་མ་ཟད་ཀྱི་གང་ཁྱད་པར་དུ་གཞན་རྣམས་ཚུལ་ཐ་དད་ཅིང༌། རང་བཞིན་དུ་མ་གྱུར་པའི་བར་དེ་རྣམས་ཀྱང་མེ་དང་རླུང་དང་ནམ་མཁའ་དེ་རྣམས་ཀྱི་ཚོགས་བ་ལས་བྱུང་བ་ཡིན་ནོ། །གལ་ཏེ་དེ་ལྟར་སྨན་ཐམས་ཅད་དང་འབྱུང་བ་ཆེན་པོ་ལྔ་ཆར་གྱིས་བསྐྱེད་པ་ཡིན་ན། འདི་ནི་སའི་འོ། །འདི་ནི་ཆུའིའོ་ཞེས་མིང་ཅིའི་ཕྱིར་དོགས་ཤེན། དེའི་ཕྱིར་སྨྲས་པ་ནི། མིང་ནི་ཤས་ཆེ་ལས་གྱུར་ཡིན། །ཞེས་བྱ་བ་ཡིན་ཏེ། རྫས་གང་ལ་འདི་དག་ཐམས་ཅད་རྒྱུར་གྱུར་པ་ཡིན་ཡང༌། གང་གང་གི་ཤས་ཆེ་ཞིང་མང་བར་གྱུར་པ་དེས། དེ་ཉིད་ཀྱི་མིང་དུ་བཏགས་པ་ཡིན་ཏེ། སའི་ཤས་ཆེ་བ་ལས་སྐྱེས་པ་ནི་སའི་མིང་ཅན་ཡིན་ལ། ཆུའི་ཤས་ཆེ་བ་ལས་སྐྱེས་པ་ནི་ཆུའིའོ། །དེ་ལྟར་ན་སྨན་
ཐམས་ཅད་ནི་འབྱུང་བ་ཆེན་པོ་ལྔའི་བདག་ཉིད་ཅན་ཡིན་ནོ། །དེ་བས་འབྱུང་བ་འདུས་པ་ལས། །འབྱུང་བས་སྨན་ནི་རོ་གཅིག་མིན། །ཞེས་བྱ་བ་ལ། གང་ཕྱིར་འབྱུང་བ་ཆེན་པོའི་ཚོགས་པ་རྣམས་ལས་སྨན་རྣམས་འབྱུང་ཞིང་སྐྱེ་བ་ཡིན་པ་དེ་བས་ན། སྨན་རྣམས་ནི་རོ་གཅིག་ཁོ་ནར་མི་འགྱུར་ཏེ། རོ་མང་ཞིང་ཐ་དད་པ་ཡིན་ནོ། །ཞེས་བྱ་བའི་དོན་ཏོ། །འདིར་འདི་ལྟར་གང་རོའི་རྒྱུ་ནི་འབྱུང་བ་ཆེན་པོ་གཅིག་པོ་ཆུ་ཉིད་ཡིན་ནོ། །འབྱུང་བ་ཆེན་པོ་གཞན་དག་ནི་མ་ཡིན་ཏེ། དེ་དག་ནི་རོ་མེད་པ་ཡིན་ནོ། །འབྲས་བུ་ནི་རྒྱུ་དང་ཆ་འདྲ་བར་འབྱུང་བ་ཡིན་པས། གཞན་ལས་རོ་འབྱུང་བར་མི་རིགས་སོ་ཞེས་བརྒལ་ཞིང་བརྟག་པར་མི་བྱ་སྟེ། གང་གི་ཕྱིར་འབྱུང་བ་འདུས་པ་ལས་འབྱུང་ཞེས་བྱ་བ་འདི་སྐད་སྟོན་པ་ཡིན་ཏེ། ཅི་ལྟར་སྨན་འབྱུང་བ་ཆེན་པོ་འདུས་པ་ལས་སྨན་འབྱུང་བ་དེ་བཞིན་དུ། སྨན་ལ་བརྟེན་པའི་རོ་ཐ་དད་པར་གྱུར་པ་དག་ཀྱང༌། འབྱུང་བ་འདུས་པ་ཉིད་ལས་སྐྱེ་བ་ཡིན་གྱི། ཡོན་ཏན་གཞན་ལྟར་སྨན་ལ་ལྟོས་པ་ནི་མ་ཡིན་ནོ། །དེ་བས་ན་འབྱུང་བ་ཆེན་པོ་འདུས་པ་ཉིད་རོ་འབྱུང་བར་བྱེད་པ་ཡིན་གྱི། འབྱུང་བ་ཆེན་པོ་ཁ་དོག་ལ་སོགས་པ་ལྟ་བུར་རྫས་གཅིག་པུ་ལ་རག་ལུས་པ་ནི་མ་ཡིན་ནོ། །དེ་ལྟར་ན་རོ་ནི་འབྱུང་བ་ཆེན་པོ་འདུས་པ་ལས་འབྱུང་གི །གཅིག་ལས་མ་ཡིན་ཏེ། སྨན་ལ་བརྟེན་པའི་རོ་རྣམས་ཀྱི་རྒྱུ་རྣམས་འབྱུང་བ་ཆེན་པོ་འདུས་པ་ཡིན་ནོ། །ལ་ལ་ནི་ཡང་འབྱུང་བ་གཉིས་ཤས་ཆེ་བ་ལས་སྨན་མངར་བ་ལ་སོགས་པའི་རོ་གསལ་བར་འགྱུར་ཏེ། དེ་ཡང་རོ་ཐ་དད་པ་ཤེས་པར་བྱ་བའི་ལེའུ་ལས། མངར་བ་ལ་སོགས་རོ་སྐྱེ་བ། །ས་ཆུ་མེ་ས་ཆུ་དང་མེ། །ཞེས་བྱ་བ་ལ་སོགས་པ་འབྱུང་བ་ཡིན་ནོ། །དེ་ལྟར་ན་རོ་ཐམས་ཅད་ནི་འབྱུང་བ་འདུས་པ་ལས་འབྱུང་ལ། དེ་ལ་མང་ཞིང་ཤས་ཆེ་བ་ལས་ནི་འདི་ནི་སྨན་མངར་བའོ། །འདི་ནི་སྐྱུར་བ་ལ་སོགས་པའི་སྨན་རྣམས་སོ་ཞེས་བྱ་བར་གནས་ཀྱི། མངར་བའི་སྨན་དེ་ལ་སྐྱུར་བ་ལ་སོགས་པའི་ཞད་དུ་གྱུར་པ་མེད་པ་ནི་མ་ཡིན་ནོ། །མྱངས་པར་གྱུར་པ་དང་ནུས་པའི་དབང་གིས་རྫས་རྣམས་ལ་ཕན་ཚུན་དུ་རོ་དུ་མ་སྣང་ལ། ཆུ་ནི་རོ་མི་གསལ་བ་ཡིན་ཏེ། རོ་དྲུག་ཅར་དང་ལྡན་ཡང་མི་གསལ་ཞིང་མི་མངོན་པ་ཡིན་ནོ། །
དེ་ལྟར་ན་འབྱུང་བ་འདུས་པ་ལས་སྨན་འབྱུང་བའི་རྒྱུ་ཡིན་པ་དེ་བཞིན་དུ་མངར་བ་ལ་སོགས་བ་རོ་རྣམས་ཀྱི་ཡང་རྒྱུ་ཡིན་པས། རོ་ཐམས་ཅད་ནི་འབྱུང་བ་འདུས་པ་ལས་བྱུང་བ་ཡིན་ཞིང་རོ་གསལ་བ་མང་བོ་བཤད་བ་ཡིན་ནོ། །དེ་ཕྱིར་ནད་ཀྱང་ཉེས་གཅིག་མིན། །ཞེས་བྱ་བ་ནི། གང་གི་ཕྱིར་སྨན་རོ་སྣ་ཚོགས་པ་ཡིན་པའི་ཕྱིར་ཉིད་ཀྱིས་ན་ནད་ནི་གཅིག་པུ་མ་ཡིན་ནོ་ཞེས་བསྟན་ཏེ། དེ་ལ་ནད་ནི་ནད་ཀྱི་ཚོགས་རྣམས་སོ། །ཉེས་པ་ནི་རླུང་ལ་སོགས་པའོ། །དེ་ཡང་རོ་ལ་བརྟེན་ལ་རོ་ཡང་སྨན་ལ་བརྟེན་ཏེ། སྨན་ནི་འབྱུང་བ་ཆེན་བོའི་བདག་ཉིད་ཅན་ཡིན་པས་རོ་སྣ་ཚོགས་པ་ཉིད་ལ་དེ་དང་ཕྲད་པ་ལས་རླུང་ལ་སོགས་པ་སྐྱེད་པར་འགྱུར་བ་ཡིན་ལ། དེ་རྣམས་བསྐྱེད་པ་ལས་ནི་ནད་དུ་འགྱུར་བ་ཡིན་ཏེ། དེའི་ཕྱིར་ནད་ཀྱང་ཉེས་པ་གཅིག་དང་ལྡན་པ་མ་ཡིན་ཏེ། ཉེས་པ་གསུམ་ཅར་ལྡན་པ་མ་ཡིན་ནོ་ཞེས་བྱ་བའི་དོན་ཏོ། །འདིར་ཡང་མང་པོ་ཉིད་ཡིན་ནོ་ཞེས་ཤུགས་ཀྱིས་སྦྱར་བར་བྱ་སྟེ། འདི་ནི་རླུང་གི་རིམས་སོ། །འདི་ནི་མཁྲིས་པའི་རིམས་སོ། །ཞེས་བྱ་བ་ལ་སོགས་པ་ལྟ་བུའོ། །དེ་ལ་འདིར་རོ་ནི་གང༌། རོ་རྗེས་ནི་གང་ཞེ་ན། དེའི་ཕྱིར་སྨྲས་པ་ནི། དེ་ལ་གསལ་བར་རོ་ཞེས་བཤད། །མི་གསལ་རོ་རྗེས་མཐའ་མར་ནི། །ཅུང་ཟད་གསལ་བ་དག་ཏུ་འང་འདོད། །ཅེས་བྱ་བ་ལ། འབྱུང་བ་ཆེན་པོ་ལྔ་ལས་གྱུར་པའི་སྨན། རོ་ཐམས་ཅད་ཀྱི་གནས་སུ་གྱུར་པ་དེ་ལ། མངར་བ་ལ་སོགས་བའི་རོ་གང་གསལ་ཞིང་ངེས་པ་ཉིད་ཀྱི་ཚུལ་དུ་ཤེས་པར་འགྱུར་བ་དེ་ལ་ནི་རོ་ཞེས་བྱ་བར་བཤད་དེ། འདི་ནི་མངར་བ་ཉིད་དོ། །འདི་ནི་སྐྱུར་བ་ཉིད་དོ་ཞེས་བྱའོ། །རོའི་རྗེས་ནི་མི་གསལ་བ་ལ་བྱ་སྟེ། སྐྱུ་རུ་ར་ལ་སོགས་པ་གང་ཟ་བ་ན། ལྕེས་གསལ་བ་ཉིད་དུ་མ་རྟོགས་པ་དེ་ནི་རོ་རྗེས་ཞེས་བྱའོ། །དེ་ནི་ཐ་མར་ཞབས་སུ་ཅུང་ཟད་ཅེས་ཉུང་ཤས་ཅིག་རོ་དང་བཅས་པ་གསལ་བ་དག་ཏུའང་འདོད་བ་ཡིན་ནོ། །དྲིས་པ། མངར་བ་ལ་སོགས་པའི་རོ་ལ་ལྕི་བ་ལ་སོགས་པའི་ཡོན་ཏན་དང་ལྡན་པར་སྨྲ་བར་མི་རིགས་ཏེ། གང་གི་ཕྱིར་མངར་བ་ལ་སོགས་པའི་རོ་རྣམས་ནི་ཡོན་ཏན་ཉིད་ཡིན་ལ། ལྕི་བ་ལ་སོགས་པ་ཡང་དེ་བཞིན་དུ་ཡོན་ཏན་ཡིན་ཏེ། དེས་
ན་ལྕི་བ་ལ་སོགས་པའི་ཡོན་ཏན་རྣམས་ཀྱི་གནས་མངར་བ་ལ་སོགས་པའི་ཡོན་ཏན་བཤད་པར་ནི་མི་རིགས་ཏེ། གང་གི་ཕྱིར་བྱེ་བྲག་བདག་གིས་ཡོན་ཏན་ལ་ནི་ཡོན་ཏན་མེད་བ་ཞེས་བཤད་པའི་ཕྱིར་རོ་ཞེ་ན། དེའི་ཕྱིར་སྨྲས་པ་ནི། སྨན་གྱི་ཡོན་ཏན་ལྕི་སོགས་དང༌། །རོ་ནི་ས་ལ་སོགས་བརྟེན་པས། །མཚུངས་པར་སྤྱོད་བར་ཉེར་གདགས་པས། །རོ་ལས་མིང་དུ་བཏགས་བ་ཡིན། །ཞེས་བྱ་བ་ལ། རོའི་གནས་ལ་སོགས་པ་ལ་ཡང་དག་པར་ན་སྨན་གྱི་ཡོན་ཏན་ལྕི་བ་ལ་སོགས་པ་ཡང་གང་ཡིན་པར་ནི་འབྲས་བུ་ལས་དཔག་བར་བྱའོ། །དེས་ན་སྨན་གྱི་ཡོན་ཏན་ལྕི་བ་ཡིན་ལ། ལྕི་བ་དེ་བསྟན་པའི་རོ་ཡང་ཡོན་ཏན་ལྕི་བ་ཡིན་པར་མཚུངས་ཤིང་ཐུན་མོང་དུ་སྤྱོད་པ་ཡིན་ཏེ། ལྷན་ཅིག་སྤྱོད་བས་ན་མཚུངས་པར་སྤྱོད་པ་ཞེས་བྱའོ། །ཉེ་བར་གདགས་པ་ནི་ཆ་འདྲ་བར་སྤྱོད་པ་སྟེ། གཞན་གྱི་ཆོས་དང་མཚུངས་པར་བསྒྲེའོ། །དེ་ལྟར་ན་མཚུངས་པར་སྤྱོད་པའི་ཉེ་བར་གདགས་པས་ཆ་འདྲ་བས་ལྕི་བ་ལ་སོགས་པའི་ཡོན་ཏན་ནི། རོ་ལ་སོགས་པ་ལ་ཡོན་ཏན་ཡོད་བར་བཏགས་པ་ཡིན་གྱི། ཡང་དག་པར་རོལ་སོགས་པའི་ཡོན་ཏན་ཡོད་པ་ནི་མ་ཡིན་ནོ། །དེ་བས་ན་རོ་གཙོ་བོར་གྱུར་པ་ལས་མིང་དུ་སྒྲོས་བཏགས་པ་ཡིན་ནོ། །དེ་ལ་སའི་སྨན་ལྕི་དང་སྦོམ། །སྲ་ཞིང་དྲི་ཡི་ཤས་རབ་ཆེ། །ལྕི་ཞིང་བརྟན་དང་འདུས་པ་དང༌། །ཉེ་བར་འཕེལ་བར་བྱེད་པ་ཡིན། །ཞེས་བྱ་བ་ལ། དེ་ལ་ཞེས་བ་དེ་རྣམས་ཀྱི་ནང་ནས་སའི་རང་བཞིན་ཅན་གྱི་སྨན་ནི་ལྕི་བ་ལ་སོགས་པའི་ཡོན་ཏན་དང་ལྡན་པ་དང་དྲི་ཞེས་བྱ་བའི་ཡོན་ཏན་གྱི་ཤས་རབ་ཏུ་ཆེ་བ་ཡིན་ཏེ། སའི་རང་བཞིན་ཅན་གྱི་སྨན་དེའི་ལུས་ནི། ལུས་ལ་སོགས་པར་བྱེད་པ་ཡིན་ནོ། །དེ་ལ་ལྕི་བ་ནི་འཇུ་དཀའ་ཞིང་ལྕི་བར་གྱུར་པ་ཉིད་དོ། །བརྟན་བ་ནི་ལུས་བརྟས་བར་བྱེད་པའོ། །འདུས་པ་ནི་ཡན་ལག་མཁྲེགས་ཤིང་སྲ་བའོ། །ཉེ་བར་འཕེལ་བ་ནི་ལུས་ཟུངས་རྣམས་རྒྱས་བར་བྱེད་པའོ། །ཆུ་ཡི་གཤེར་དང་ལྕི་བསིལ་སྣུམ། །རྟུལ་ཞིང་བསྐ་ལ་རོ་ཤས་ཆེ། །འཇམ་ཞིང་བད་ཀན་འདྲ་བ་ལ། །འདྲུལ་ཞིང་ཚིམ་བྱེད་སྡུད་བར་བྱེད། །ཅེས་བྱ་བ་ལ། ཆུའི་རང་བཞིན་ཅན་གྱི་སྨན་ནི་གཤེར་པ་ལ་སོགས་བའི་ཡོན་ཏན་དང་ལྡན་པ་དང༌། རོའི་ཡོན་
ཏན་གྱི་ཤས་ཆེ་བ་ཡིན་ནོ། །དེ་ལུས་ལ་སྦྱར་ན་ལུས་འཇམ་ཞིང་སྣུམ་བར་བྱེད་པ་དང༌། རྩ་སྦུབས་གཤེར་ཞིང་བད་ཀན་འདྲ་བ་འཛག་པ་དང༌། ཟས་འདྲུལ་ཞིང་མྱགས་པ་དང༌། སེམས་ཚིམ་ཞིང་ངོམས་པར་བྱེད་པ་དང༌། ཚིགས་དང་རྐང་ལག་སྡུད་ཅིང་འབྱོར་པར་བྱེད་པ་ཡིན་ནོ། །མེ་ཡི་རྩུབ་རྣོ་ཚ་ཞིང་སྐམ། །ཕྲ་ཞིང་གཟུགས་ཀྱི་ཡོན་ཏན་ཆེ། །ཚ་ཞིང་འབར་ལ་མདོག་སྐྱེད་ཅིང༌། །གསལ་ཞིང་སྨིན་པའི་བདག་ཉིད་ཅན། །ཞེས་བྱ་བ་ལ། མེའི་རང་བཞིན་ཅན་གྱི་སྨན་ནི་རྩུབ་པ་ལ་སོགས་བའི་ཡོན་ཏན་དང་ལྡན་ཞིང༌། དེ་ནི་གཟུགས་ཀྱི་ཡོན་ཏན་གྱི་ཤས་ཆེ་བ་ཡིན་ནོ། །དེ་ཟོས་ཤིང་སྤྱད་ན་ལུས་ཚ་བར་བྱེད་པ་དང༌། མདངས་འབར་བར་འགྱུར་བ་དང༌། ལུས་ཀྱི་མདོག་སྐྱེད་པ་དང༌། གསལ་ཞིང་སྣང་བ་དང་ལྡན་པ་དང༌། ཟས་སྨིན་ཅིང་འཇུ་བར་བྱེད་པའི་ཡོན་ཏན་ཅན་ཡིན་ནོ། །རླུང་གི་རྩུབ་ཅིང་ཁྱབ་ལ་ཡང༌། །རེག་པའི་ཡོན་ཏན་ཤས་ཆེ་ཡིན། །རྩུབ་ཅིང་ཡང་ལ་དྲི་མ་སེལ། །རྣམ་དཔྱོད་ན་བར་བྱེད་པ་ཡིན། །ཞེས་བྱ་བ་ལ། རླུང་གི་རང་བཞིན་གྱི་སྨན་ནི། རྩུབ་པ་ལ་སོགས་པའི་ཡོན་ཏན་དང་ལྡན་པ་དང༌། རེག་པའི་ཡོན་ཏན་གྱི་ཤས་ཆེ་བ་ཡིན་ལ། དེ་ལུས་ལ་བརྟེན་ན་རྩུབ་པ་དང༌། ཡང་བ་དང༌། དྲི་མ་སེལ་བ་ལ་སོགས་པའི་ཡོན་ཏན་གྱི་ལས་བྱེད་པ་ཡིན་ནོ། །ནམ་མཁའི་ཕྲ་ཞིང་དངས་ལ་ཡང༌། །སྒྲ་ཡི་ཡོན་ཏན་ཤས་ཆེ་སྟེ། །ཁོང་སྟོང་ཡང་བར་བྱེད་པ་ཡིན། །ཞེས་བྱ་བ་ལ། ནམ་མཁའི་བདག་ཉིད་ཅན་གྱི་སྨན་ནི་ཕྲ་བ་ལ་སོགས་པའི་ཡོན་ཏན་དང་ལྡན་པ་དང༌། སྒྲའི་ཡོན་ཏན་ཤས་ཆེ་བ་ཡིན་ནོ། །དེ་ལུས་ཀྱིས་བསྟེན་ན་ཁོང་སྟོང་སྟེ། ནང་སྟོང་པར་བྱེད་པ་དང༌། ཡང་བར་བྱེད་པ་ཡིན་ནོ། །དྲིས་པ། རླུང་དང་ནམ་མཁའི་ནི་གཟུགས་མེད་པ་ཡིན་པས་དེའི་བདག་ཉིད་ཅན་གྱི་རྫས་ཡོད་པར་ག་ལ་འགྱུར་ཞེས་པ་ལ། ཉེས་པ་འདི་ཡོད་པ་མ་ཡིན་ཏེ། སྨན་གང་ལ་རྩུབ་པ་དང༌། ཁོང་སྟོང་གི་ལས་བྱེད་པ་མང་དུ་སྣང་ལ། དེར་ནི་རླུང་དང་ནམ་མཁའི་བདག་ཉིད་ཅན་དུ་ཉེ་བར་གདགས་པས་མིང་དུ་བཏགས་པ་ཡིན་ཏེ། དཔེར་ན་དད་པ་དང༌། ཚུལ་ཁྲིམས་དང༌། ཐོས་པ་དང༌། གཏོང་བ་ལ་སོགས་པའི་ལས་བྱེད་པ་མཐོང་ནས། སྐྱེས་
བུ་དམ་པ་དག་ལ་འདི་ནི་ལྷ་ཡིན་ནོ་ཞེས་ཉེ་བར་འདོགས་པར་བྱེད་པ་དང་འདྲའོ། །དེ་ལྟར་འགྲོ་ན་དོན་དང་ནི། །སྦྱོར་བ་སྣ་ཚོགས་དབང་གིས་ནི། །སྨན་མིན་ཅི་ཡང་ཡོད་མ་ཡིན། །ཞེས་བྱ་བ་ལ། དེ་ལྟར་འབྱུང་བ་ཆེན་པོ་ལས་བྱུང་བ་འདིས་ན། སྨན་ལྕི་བ་ལ་སོགས་པའི་ཡོན་ཏན་དང་ལྡན་པས། འགྲོ་བ་སྟེ་འཁོར་བའི་གནས་འདི། སྨན་མ་ཡིན་པར་གྱུར་པའི་རྫས་ཅི་ཡང་ཡོད་པ་མ་ཡིན་ཏེ། གཞན་དུ་ན་ཐམས་ཅད་ནད་སེལ་བར་བྱེད་པའི་དགོས་པ་བྱེད་པས་སྨན་ཉིད་ཡིན་ནོ། །དེ་ཡང་ཇི་ལྟར་གྱེན་དུ་ཉེས་པ་སེལ་བར་བྱེད་ནུས་པའི་དགོས་པ་དེའི་དོན་བྱེད་པར་ནུས་པ་དག་གིས་སྟོད་དུ་ཉེས་པ་སེལ་ཏེ། མེ་དང་རླུང་གི་ཤས་ཆེ་བའི་སྨན་གང་ཡིན་པ་དག་ཕལ་ཆེར་དེ་བྱེད་པར་ནུས་པ་ཡིན་ཏེ། རླུང་ནི་འཕར་བར་བྱེད་པ་དང༌། མེ་ནི་རིང་དུ་འབར་བར་བྱེད་པ་ཡིན་པའི་ཕྱིར། དེ་བས་ན་རོ་སྟོད་ཀྱི་ནད་བསལ་བའི་དོན་གྱི་དབང་གིས་མེ་དང་རླུང་ཤས་ཆེ་བའི་སྨན་གང་ཡིན་པ་དེ་རྣམས་དེའི་སྨན་ཡིན་ནོ། །འོག་གི་ཉེས་པ་སེལ་བར་ནུས་པའི་སྨན་ནི་དོན་དེ་སྒྲུབ་པར་བྱེད་ནུས་པ་དང༌། ཆུ་ཤས་ཆེ་བའི་སྨན་གང་ཡིན་པ་དག་ཕལ་ཆེར་ནི་དེའི་ནུས་པ་དང་ལྡན་པ་ཡིན་ཏེ། ས་ནི་ལྕི་བ་ཉིད་དང༌། དྲི་དང་རོ་ནི་ཆུའི་རང་བཞིན་ཡིན་ཏེ། དེ་ལྟར་ན་འོག་གི་ནད་སེལ་བའི་རྒྱུའི་དབང་གིས་ས་དང་ཆུའི་ཤས་ཆེ་བའི་རྫས་གང་ཡིན་པ་དེ། དེའི་སྨན་གྱི་མེ་དང་རླུང་གི་མ་ཡིན་ལ། སྟོད་ཀྱི་ཉེས་པ་སེལ་བ་ནི་ས་དང་ཆུའི་ཤས་ཆེ་བ་དག་མ་ཡིན་ནོ། །དེ་ལྟར་ན་རྒྱུའི་དོན་གྱི་དབང་གིས་རྫས་ལ་འགའ་ཞིག་སྨན་དུ་འགྱུར་བ་ཡིན་གྱི། ཐམས་ཅད་ཐམ་ཅད་དུ་ནི་མ་ཡིན་ནོ། །དེ་བཞིན་དུ་སྦྱར་བའི་དབང་གིས་ཀྱང་རྫས་ལ་ལ་དག་ལ་ལར་སྨན་དུ་འགྱུར་བ་ཡིན་གྱི། སྦྱོར་བ་གཅིག་གིས་ནད་ཐམས་ཅད་ལ་སྨན་དུ་འགྱུར་བ་མ་ཡིན་མོད་ཀྱི། འོན་ཀྱང་སྦྱོར་བའི་དབང་ཁ་ཅིག་གིས་ནད་ཁ་ཅིག་ལ་སྨན་དུ་འགྱུར་བ་ཡིན་ཏེ། འདི་ལྟར་པོ་སོན་ཆ་ལ་སོགས་པའི་སྨན་སྦྱོར་བའི་ཁྱད་པར་གཞན་དག་གིས་སྔ་མ་ལས་ལྷག་པར་འགྱུར་བ་ཡིན་ལ། གཞན་དག་གིས་ཀྱང་གཞན་དུ་འགྱུར་གྱི་གཅིག་གིས་ཐམས་ཅད་བྱེད་པ་ནི་མ་ཡིན་ནོ། །དེ་བས་ན་སྦྱོར་བའི་དབང་གིས་ཀྱང་རྫས་
ཐམས་ཅད་སྨན་ཡིན་ནོ། །དེ་ལ་སྨན་གྱི་གྱེན་དུ་འགྲོ། །ཕལ་ཆེར་མེ་དང་རླུང་ཤས་ཆེ། །ཞེས་བྱ་བ་དེ་ལ། སྨན་གྱི་རིགས་དེ་རྣམས་ཀྱི་ནང་ནས། གྱེན་དུ་འགྲོ་ཞིང་སྟེང་དུ་རྒྱུ་བའི་སྨན་སློན་པར་བྱེད་བ་ནི་ཕལ་ཆེར་ཞེས་པ་མང་དུ་མེ་དང་རླུང་གི་ཤས་ཆེ་བ་སྟེ། མེ་དང་རླུང་གི་བདག་ཉིད་ཅན་ཡིན་ཏེ། དེ་ཡང་གང་གི་ཕྱིར་གྱེན་དུ་འགྲོ་བས་མེ་ཡིན་པ་དང༌། ཡང་བས་རླུང་ཡིན་པར་ཤེས་པར་བྱའོ། །ཐུར་དུ་འགྲོ་བ་ཕལ་ཆེར་ནི། །ས་ཆུའི་ཡོན་ཏན་ཤས་ཆེར་ཡིན། །ཞེས་བྱ་བ་ལ། སྨན་ཐུར་དུ་འགྲོ་ཞིང་འོག་ཏུ་རྒྱུ་བས་འཁྲུ་བར་བྱེད་པའི་ངང་ཚུལ་ཅན་གང་ཡིན་པ་དེ་ནི། ས་དང་ཆུའི་ཤས་ཆེ་བ་ཡིན་ཏེ། དེ་གཉིས་ནིས་ལྕི་བ་དང༌། ཆུ་གཞོལ་ཕྱོགས་སུ་འགྲོ་བ་ཡིན་པའི་ཕྱིར་རོ། །དེ་ལྟར་སྨན་ནོ། །ཞེས་བྱ་བ་ལ། དེ་ལྟར་ཞེས་བྱ་བའི་སྒྲ་ནི་ཡོངས་སུ་རྫོགས་པ་ལ་བྱ་སྟེ། སྨན་གྱི་ཕྱིར་སྨྲ་བར་བྱ་བ་གང་དག་ཡོད་པ་དེ་ཐམས་ཅད་རྫོགས་སོ་ཞེས་བྱ་བའི་དོན་ཏོ། །ཆ་འདྲེས་པའི་བདག་ཉིད་ཅན་གྱི་སྨན་དང༌། སྟེང་དང་འོག་གི་ཉེས་པ་ཆ་མཉམ་པར་སེལ་བའི་སྨན་ནི། སྔར་སོ་སོར་བསྟན་པའི་དོན་གྱི་ཤུགས་ཀྱིས་ཤེས་པར་འགྱུར་བའི་ཕྱིར། གཞུང་མངས་པར་འགྱུར་བའི་དོགས་པས། རྒྱུད་གཞན་དག་ལྟར་འདིར་མ་བསྟན་པ་ཡིན་ནོ། །དེ་ལྟར་སྨན་བསྟན་ནས་དེ་ལ་བརྟེན་པའི་རོ་མངར་བ་ལ་སོགས་པ་གང་ཡིན་པ་དེ་དག་རེ་ཞིག་བསྟན་པར་བྱ་སྟེ། དེ་ནི། རོའི་བྱེ་བྲག །འདི་ཡི་འོག་ནས་སྟོན་པ་ཡིན། །ཞེས་བྱ་བ་ཡིན་ཏེ། རོའི་བྱེ་བྲག་དྲུག་ཅུ་རྩ་གསུམ་གྱི་གྲངས་སུ་ངེས་པར་ཆད་པར་འདིའི་འོག་ནས་ཞེས་པ། རོ་ཐ་དད་པ་ཞེས་བྱ་བའི་ལེའུ་ལས་གཞུང་རྩོམ་པར་བྱེད་པས་སྟོན་ཅིང་འཆད་པར་འགྱུར་ཏེ། འདིར་ནི་བཤད་པར་བྱ་བ་མང་དུ་ཡོད་པས་མ་སྨྲས་པ་ཡིན་ནོ། །ད་ནི་སྨན་གྱི་ནུས་པ་བཤད་པ་རྩོམ་པར་བྱེད་དེ། དེ་ནི། སྨན་མཐུ་ལ་ལས་བཤད་པ་ནི། །ལྕི་སྣུམ་བསིལ་དང་འཇམ་པ་དང༌། །ཡང་རྩུབ་ཚ་དང་རྣོ་བ་སྟེ། །དེ་ལྟར་རྣམ་པ་བརྒྱད་དུ་འདོད། །ཅེས་བྱ་བ་ལ། སྨན་གྱི་མཐུ་ནི་ཐམས་ཅད་དུ་ཐོགས་བ་དང༌། གཏུགས་པ་མེད་པར་འགྲོ་བ་ཡིན་པས་སྨན་གང་ལ་ཡོན་ཏན་གྱི་རིགས་གང་ཅུང་ཟད་ཡོད་པ་དེ་
ཐམས་ཅད་ལ་མཐུ་འམ་ནུས་པ་ཞེས་བྱའོ། །དེ་ལ་སློབ་དབོན་གཞན་དག་གིས་བཤད་པ་ནི། སྨན་གྱི་མཐུ་ནི་ལྕི་བ་ལ་སོགས་པའི་ཡོན་ཏན་གྱི་དབྱེ་བ་རྣམ་པ་བརྒྱད་དུ་འཆད་དེ། དེ་ལྟར་རྣམ་པ་འདིས་ནི་གྲངས་ཀྱི་རྣམ་པ་བརྒྱད་ཡིན་བར་སློབ་དཔོན་དག་འདོད་ཅིང་འཆད་གྱི། རྣམ་པ་གཞན་གྱིས་ནི་རྣམ་གྲངས་ཀྱི་ངེས་པ་གཞན་དུ་འདོད་དོ། །སྨན་མཐུ་ཙ་ར་ཀས་བཤད་པ། །གང་གིས་བྱ་བ་གང་བྱེད་པ། །མཐུ་མིན་ཅི་ཡང་མི་བྱེད་ཀྱི། །དེ་དག་ཐམས་ཅད་མཐུ་ཡིས་བྱེད། །ཅེས་བྱ་བ་ལ། དྲང་སྲོང་ཙ་ར་ཀས་སྨན་གྱི་མཐུ་འམ། ནུས་པ་བཤད་ཅིང་བསྟན་པ་ནི། དངོས་པོ་གང་གིས་བྱེད་པ། གང་ལ་ཞུགས་ཤིང་བྱ་བ། གང་ཞིག་བྱེད་ཅིང་རྫོགས་པར་གྱུར་པའི་དངོས་པོའི་རང་བཞིན་ཏེ། དེའི་མཐུ་ཡིན་ནོ་ཞེས་མཐོ་བཙུན་དྲང་སྲོང་ཙ་ར་ཀས་བཤད་དོ། །མཐུ་གང་གིས་བྱས་པ་གང་བྱེད་པ་ཞེས་བྱ་བའི་ཚིག་གིས་ན། ནུས་པ་ནི་མཐུ་ཡིན་ཞིང་རོ་ཡང་མཐུ་ཡིན་ལ། དེ་བཞིན་དུ་སྨན་ལ་བརྟེན་པའི་ཡོན་ཏན་ལྕི་བ་ལ་སོགས་པ་གང་ཅི་ཡང་རུང་བ་དེ་ཐམས་ཅད་ནི། སྨན་དེའི་མཐུ་ཞེས་བྱ་སྟེ། ནུས་པ་ཉིད་ལས་མ་འདས་པ་མཐུ་བྱུང་བ་ཡིན་ནོ། །སྤྱིར་ནི་སྨན་དེའི་མཐུ་ལ་སློབ་དཔོན་རྣམས་ཐ་དད་པར་འདོད་དེ། སློབ་དཔོན་ལ་ལས་ནི་ལྕི་བ་ལ་སོགས་པའི་ཡོན་ཏན་བརྒྱད་ལ་མཐུ་ཡིན་པར་འདོད་དེ། དེ་རྣམས་ནི་ཁྱད་པར་ཅན་ཉིད་ལ་མཐུར་འདོད་ཀྱི། ནུས་པ་ཕྲ་མོ་ཙམ་ལ་ནི་མི་འདོད་དོ། །གལ་ཏེ་ནུས་པ་ཕྲ་མོ་ཙམ་ལ་མཐུར་འདོད་ན་ནི། ལྕི་བ་ལ་སོགས་པའི་ཡོན་ཏན་བརྒྱད་པོའི་ཆ་ཕྲ་མོའི་དངོས་པོ་ཐམས་ཅད་ལ་ཡོད་པར་འགྱུར་བས་མི་རིགས་པ་ཡིན་ནོ། །དེའི་ཁྱད་པར་ཅན་གྱི་ནུས་པ་དང་ལྡན་པའི་ལྕི་བ་ལ་སོགས་པའི་ཡོན་ཏན་བརྒྱད་ལ་མཐུ་ཞེས་བྱ་བའི་མིང་མཐོང་བ་ཡིན་ནོ། །དེས་ན་ཡོན་ཏན་ནི་བརྒྱད་པོ་དེ་དག་ཡིན་ནོ། །དེ་ཡང་གང་གི་སྦྱོར་བ་བྱེད་པས་བྱེད། རྫས་དེའི་ནུས་པ་ཡིན་ཞེས་བྱ་བ་ཡིན་ནོ། །དེ་ལྟར་ན་དྲང་སྲོང་ཙ་ར་ཀས་འདོད་ཀྱི་སྨན་གང་ལ་ཡོན་ཏན་གྱི་རིགས་གང་དག་ཡོད་པ་དེ་ཐམས་ཅད་སྨན་དེའི་མཐུ་དང་བྲལ་ཞིང༌། མཐུ་མ་ཡིན་པས་ན་དངོས་པོའི་རིགས་དེས་བྱ་བ་ཅི་ཡང་མི་བྱེད་དེ། བྱ་བ་གང་ཞིག་ཀྱང་རྫོགས་པར་མི་ནུས་སོ། །དེས་
ན་བྱ་བ་དེ་དག་ཐམས་ཅད་མཐུས་བྱེད་ཅིང་ནུས་པ་རྫོགས་པར་བྱེད་པ་ཡིན་ནོ། །གལ་ཏེ་དེ་ལྟར་བྱ་བ་ཐམས་ཅད་མཐུ་ཡིན་ན། ཅིའི་ཕྱིར་ལྕི་བ་ལ་སོགས་པའི་ཡོན་ཏན་བརྒྱད་པོ་ཉིད་ལ་མཐུ་ཞེས་བྱ། རོ་ལ་སོགས་པའི་ཡོན་ཏན་དག་ལ་མཐུ་ཞེས་ཅིའི་ཕྱིར་མི་བྱ། དེ་དག་གིས་ཀྱང་བྱ་བ་དེ་ནི་བྱེད་པ་ཉིད་ཡིན་ནོ་ཞེ་ན། དེའི་ཕྱིར་སྨྲས་པ་ནི། དེས་ན་ལྕི་ལ་སོགས་པ་ཉིད། །ནུས་པའི་ཁྱད་པར་ལྡན་པ་དང༌། །ཡོན་ཏན་མ་ལུས་སྙིང་པོར་ནི། །གྱུར་པས་མཐུ་ཞེས་བཤད་པ་དག །དོན་དང་མཐུན་པར་བཏགས་པ་ཡིན། །ཞེས་བྱ་བ་ལ། དེས་ན་སློབ་དཔོན་དྲང་སྲོང་ཙ་ར་ཀས་ལྕི་བ་ལ་སོགས་པ་བརྒྱད་པོ་ཉིད་ནི་ནུས་པའི་ཁྱད་པར་དང་ལྡན་པ་ཡིན་ཞིང༌། ཡོན་ཏན་མ་ལུས་པའི་སྙིང་པོར་གྱུར་པ་ཡིན་པས། མཐུ་ཞེས་བཤད་ཅིང་ནུས་པ་ཞེས་མིང་དུ་བཏགས་པ་དེ་ནི་གཞུང་དང་དོན་མཐུན་ཞིང་ལྡན་པར་མིང་དུ་བཏགས་པ་ཡིན་ནོ། །དེ་ལ་ནུས་པའི་ཁྱད་པར་དང་ལྡན་པ་ནི་ཡོན་ཏན་ལྷག་པ་ཉིད་དེ་ཕུལ་དུ་བྱུང་བའི་ནུས་པའོ། །ཡོན་ཏན་མ་ལུས་པའི་སྙིང་པོ་ནི་ཡོན་ཏན་མཐའ་དག་གི་དམ་བར་གྱུར་པའོ། །ཐ་སྙད་ནི་འཇིག་རྟེན་པ་དང༌། བསྟན་བཅོས་ཀྱི་བརྟགས་པ་རྣམས་སོ། །དེ་ལས་ཀྱང་འདི་རྣམས་ནི་ཐ་སྙད་གཙོ་བོ་ཡིན་ནོ། །དེ་ཡང་འཇིག་རྟེན་པ་རྣམས་འདི་སྐད་སྨྲ་བ་དག་ཐོས་ཤིང་མཐོང་སྟེ། འདི་ནི་ལྕི་བའོ། །འདི་ནི་ཡང་བའོ། །འདིའི་ཡོན་ཏན་ནི་འདི་ལྟ་བུའོ་ཞེས་ཟེར་བ་དེ་བཞིན་དུ་བསྟན་བཅོས་ལས། གཅེས་པ་མང་དུ་ཡོད་ན་ཡང༌། །ཐ་སྙད་གཙོ་བོ་ཉིད་ཀྱིས་ཡིན། །ཞེས་བྱ་བ་ལ་སོགས་པ་སྨོས་པ་ཡིན་ནོ། །གཞན་ཡང་གཅེས་པ་མང་དུ་སྨོས་ཞེས་བྱ་བ་ཡིན་ཏེ། ལྕི་བ་ལ་སོགས་བ་དེ་ནི་གཅེས་པར་མང་དུ་སྨོས་པ་ཡིན་གྱི། རོ་ལ་སོགས་པ་རྣམས་ནི་དེ་ལྟ་མ་ཡིན་པ་དང༌། དེ་བཞིན་དུ་གཙོ་བོ་ཉིད་དུ་སྨོས་པ་ཡང་ཡིན་ཏེ། རོལ་སོགས་པའི་ཡོན་ཏན་ལས་དེ་རྣམས་མཆོག་ཏུ་བཟུང་བར་འོག་ནས་བཤད་དེ། བད་ཀན་ལ་སོགས་པའི་ནད་ཀྱི་རང་བཞིན་བརྟག་པ་ན། རང་རང་གི་ཡོན་ཏན་ལྕི་བ་ལ་སོགས་པ་ཡོད་པར་བསྟན་པ་དང༌། བད་ཀན་ལྕི་ཞིང་བསིལ་ལ་སྣུམ། །ཞེས་བཤད་ཀྱི་མངར་བར་མ་བཤད་པ་དང༌། མཁྲིས་པ་སྣུམ་བཅས་
བསིལ་ཞིང་ཚ། །ཞེས་བཤད་ཀྱི་ཡང་བར་མ་བཤད་པ་ཡིན་ནོ། །དེ་བས་གོ་ནི་བཟློག་པའི་ཕྱིར། །དེ་ནི་རོ་ལ་སོགས་པ་ལ། །སྲིད་དུ་ཟིན་ཀྱང་མ་བཤད་དེ། །དེ་བས་ལྕི་ལ་སོགས་པ་ཡིན། །ཞེས་བྱ་བ་ལ། དེ་བས་དེ་ལྟར་བསྟན་པའི་རྒྱུ་འདིས་ན་ཡོན་ཏན་མ་ལུས་པའི་སྙིང་པོར་གྱུར་པ་ལ་སོགས་པ་ལས། གང་གོ་བཟློག་པར་གྱུར་པའི་རོ་ལ་སོགས་པ་ཞེས་པ་སྟེ། རོ་དང་འཇུ་བ་ལ་སོགས་པའི་ཡོན་ཏན་གཞན་དག་ལ་དེ་སྲིད་ཀྱང་ཞེས་བྱ་བ། མཐུ་ཞེས་བྱ་བ་དེ་ཡོད་དུ་ཟིན་ཀྱང༌། གཙོ་བོར་མ་གྱུར་པས་མཐུ་ཞེས་དེ་ལ་མ་བཤད་པ་ཡིན་ནོ། །དེ་བས་ནི་ལྕི་པ་ལ་སོགས་པ་ཉིད་མཐུ་ཉིད་ཀྱི། རོ་ལ་སོགས་པ་ནི་མ་ཡིན་ནོ། །གཞན་དག་ཚ་དང་བསིལ་ཉིད་གཉིས། །སྟོབས་ཡིན་ཞེས་ཀྱང་སྟོན་པར་བྱེད། །ཅེས་བྱ་བ་ལ། སློབ་དཔོན་གཞན་དག་ནི་སྨན་གྱི་ཚ་བ་དང་བསིལ་བ་གཉིས་ལ་མཐུ་གཉིས་ཞེས་བྱའོ་ཞེས་སྟོན་ཏོ། །ཉིད་ཅེས་བྱ་བ་ནི་ངེས་པར་གཟུང་བའོ། །དེ་ཡང་རྫས་གང་གིས་བྱ་བ་གང་བྱེད་པ་སྟེ་དེའི་མཐུ་ཞེས་བྱའི། ལྕི་བ་ལ་སོགས་པའི་ཡོན་ཏན་བརྒྱད་ནི་མཐུ་མ་ཡིན་ནོ། །དེ་ཡང་ཚ་བ་དང་བསིལ་བའི་མཚན་ཉིད་ཅན་གྱི་མཐུ་གཉིས་པོ་འདིར་སྔར་བཤད་པའི་སྟོབས་ལྔར་མ་འདུས་པ་ཐམས་ཅད་འདུས་པ་ཡིན་པའི་ཕྱིར་རོ། །འདིར་དེའི་གཏན་ཚིགས་སྨྲས་པ་ནི། སྨན་ནི་སྣ་ཚོགས་བདག་ཉིད་ཅན། །ཉི་མ་ཟླ་བའི་སྟོབས་ཅན་ཡིན། །འགྲོ་འདི་གསལ་དང་མི་གསལ་ལས། །ནམ་ཡང་འདའ་བར་མི་འགྱུར་རོ། །ཞེས་བྱ་བ་ལ། གང་འདི་འགྲོ་བ་ན་སྨན་རྣམས་ནི་ངོ་བོ་ཉིད་གཅིག་ཀྱང་སྣ་ཚོགས་པའི་བདག་ཉིད་དུ་སྣང་ལ། དེ་ཡང་ཉི་མ་དང༌། ཟླ་བ་ཉིད་ནི་སྟོབས་ཆེ་བ་ཡིན་པས་ན། དེའི་རང་བཞིན་ལས་འདའ་བར་མི་བྱེད་དོ། །དེའི་བདག་ཉིད་ཅན་ཡིན་པའི་ཕྱིར་རོ། །དེ་ལ་རེ་ཞིག་རྫས་འདི་དག་སྣ་ཚོགས་དག་ཀྱང་ཉི་མ་དང་ཟླ་བའི་རང་བཞིན་ལས་འདའ་བར་མི་བྱེད་ཅེ་ན། དེའི་དཔེ་བསྟན་པའི་ཕྱིར་འོག་མ་འདི་སྨོས་བ་ཡིན་ཏེ། ཅི་ལྟར་འགྲོ་བ་འདི་དག་ནི་གསལ་བ་དང་མི་གསལ་བར་སྣང་བའི་ཆོས་ལས་ནམ་ཡང་འདའ་བར་མི་འགྱུར་རོ། །དེ་བཞིན་དུ་རྒྱུ་བ་དང་མི་རྒྱུ་བའི་ཚུལ་གྱིས་སྣ་ཚོགས་པའི་བདག་ཉིད་ཅན་དུ་གནས་བ་དག་
ཀྱང། ཟླ་བ་དང་ཉི་མའི་རང་བཞིན་ལས་འདའ་བར་མི་བྱེད་དེ། དེ་ལྟར་ན་སྨན་ལ་ལ་ནི་ཉི་མའི་རང་བཞིན་ཅན་ཡིན་ལ། སྨན་ལ་ལ་ནི་ཟླ་བའི་རང་བཞིན་ཅན་ཡིན་ནོ། །དེ་བས་ན་ལ་ལ་ནི་ཚ་བའི་མཐུ་ཡིན་ལ། ལ་ལ་ནི་གྲང་བའི་མཐུ་ཅན་ཡིན་ནོ། །དེ་ལ་ཚ་བ་མགོ་འཁོར་སྐོམ། །རྨྱ་རྔུལ་ཚ་ཞིང་མྱུར་འཇུ་བྱེད། །རླུང་དང་བད་ཀན་ཞི་བར་བྱེད། །ཅེས་བྱ་བ་ལ། དེ་ལ་ཞེས་བྱ་བ་ནི་ཚ་བ་དང་བསིལ་བའི་མཐུ་གཉིས་ཀྱི་ནང་ན། སྨན་ཚ་བའི་མཐུ་ཅན་ནི་མགོ་འཁོར་བ་ལ་སོགས་པ་བྱེད་དོ། །མྱུར་འཇུ་བྱེད་ཅེས་བྱ་བ་ནི་ཟས་མྱུར་བ་ཉིད་དུ་འཇུ་བར་བྱེད་དོ། །རླུང་དང་བད་ཀན་གཉིས་ཞི་བར་བྱེད་པ་ནི། རླུང་ནད་དང་བད་ཀན་གྱི་ནད་སེལ་བར་བྱེད་པའོ། །བསིལ་བ་དག་ནི་ཚིམ་བྱེད་ཅིང༌། །འཚོ་དང་རེངས་པར་བྱེད་པ་དང༌། །ཁྲག་དང་མཁྲིས་པ་རབ་དང་བྱེད། །ཅེས་བྱ་བ་ལ། སྨན་བསིལ་ཞིང་སྟོབས་གྲང་བ་དང་ལྡན་པ་ནི་ཚིམ་པར་བྱེད་པ་ལ་སོགས་པ་དང༌། ཁྲག་དང་མཁྲིས་པ་རབ་ཏུ་དང་བར་བྱེད་དོ། །དེ་ལ་ཚིམ་པ་ནི་བདེ་བ་སྐྱེད་པར་བྱེད་པའོ། །འཚོ་བ་ནི་གཟི་མདངས་འཕེལ་བར་བྱེད་པའོ། །རེངས་པར་བྱེད་པ་ནི་ལུས་ཤིང་བཞིན་རེངས་པར་བྱེད་པའོ། །ཁྲག་དང་མཁྲིས་པ་རབ་ཏུ་དང་བ་ནི་དེ་དག་གསལ་ཞིང་རྙོག་པ་མེད་པར་བྱེད་པའོ། །ད་ནི་ཕོ་བའི་ཞེས་བྱ་བ་ལ་སོགས་པ་ཚིགས་སུ་བཅད་པའི་རྫས་འཇུ་བ་སྨྲས་པ་ཡིན་ཏེ། ཕོ་བའི་མེ་དང་ཕྲད་པ་ལས། །གང་ཞིག་རོ་གཞན་བྱུང་གྱུར་བའི། །རོ་རྣམས་ཀྱི་ནི་མཐར་ཞུ་བ། །དེ་ནི་ཞུ་བ་ཞེས་བཤད་དོ། །ཞེས་བྱ་བ་ལ། ཕོ་བའི་མེ་དང་སྨན་ཕྲད་ཅིང་འདུས་པ་ལས་གང་རོ་གཞན་དུ་འགྱུར་བ་སྟེ། མངར་བ་ལ་སོགས་པའི་རོ་གཞན་དག་ཏུ་བྱུང་བར་གྱུར་པ་ཟས་ཀྱི་ལས་ཀྱི་མཐར་ཐུག་པ་ན། མངར་བ་དང༌། སྐྱུར་བ་དང༌། ཚ་བའི་རོ་རྣམས་ཀྱི་ཞུ་བའི་ཐ་མར་གང་ཞིག་ཞུ་ཞིང་སྨིན་པར་གྱུར་པ་དེ་ནི་ཞུ་བ་ཞེས་བྱའོ། །ཞེས་དྲང་སྲོང་དག་གིས་བཤད་དོ། །ཇི་ལྟར་མངར་བའི་རོ་ཟོས་པ་ན། དང་བའི་རོའི་ཁྱད་པར་འབྱུང་བར་གྱུར་པ་དེ་ནི་བསྟན་བཅོས་ཤེས་པ་དག་གིས་ཞུ་བ་ཡིན་ནོ་ཞེས་བཤད་དོ། །དེ་ཉིད་ཀྱི་ཕྱིར་སྨྲས་པ་ནི། མངར་དང་ལན་ཚྭ་ཞུ་རྗེས་མངར། །སྐྱུར་པའི་ཞུ་རྗེས་སྐྱུར་བ་ཡིན། །ཁ་དང་ཚ་དང་
བསྐ་བ་རྣམས། །ཞུ་རྗེས་ཕལ་ཆེར་ཁ་བ་ཡིན། །ཞེས་བྱ་བ་ལ། མངར་བ་ནི་རོ་ཞིམ་པའོ། །ལན་ཚྭ་ནི་ཚྭ་རྣམས་ཏ། དེ་གཉིས་ནི་ཞུ་བའི་རྗེས་མངར་བའོ། །རོ་སྐྱུར་བ་ཟོས་པའི་རྗེས་ཀྱང་སྐྱུར་བ་ཉིད་ཡིན་ནོ། །རོ་ཁ་བ་དང་ཚ་བ་དང་བསྐ་བ་རྣམས་ནི་ཕལ་ཆེར་ཁ་བར་འཇུ་བ་ཡིན་ནོ། །དེ་ལ་ཕལ་ཆེར་ཞེས་སྨོས་པ་ནི། ཁ་ཅིག་ཏུ་འདིར་སྨོས་པ་དང་མི་མཐུན་པ་ཡོད་དེ། འབྲུལ་གནས་པའི་རོ་མངར་བ་ནི་ཞུ་བའི་རྗེས་སྐྱུར་བར་འགྱུར་ལ། དེས་ནི་འབྲུ་ནི་རོ་མངར་ཡང་ཞུ་རྗེས་སྐྱུར་བ་ཡིན་བས། མཁྲིས་པ་སྐྱེད་ཅིང་ལྕི་བ་ཡིན་ནོ། །དེ་བཞིན་དུ་ཨ་རུ་ར་དང༌། བཅའ་སྒ་དང༌། སྒེའུ་གཤེར་དང༌། པི་པི་ལིང་ལ་སོགས་པ་ལ་ཡང་སྦྱར་བར་བྱའོ། །དེ་ཡང་བསྡུས་བ་ལས། འབྲུ་ནི་མངར་དང་སྐྱུར་བ་ཉིད། །དེ་བཞིན་སེའུ་སྐྱུར་ཡང་མངར། །ཏིལ་མར་ཁ་བར་གྱུར་པ་དང༌། །པི་པི་ལིང་ཡང་བསྐ་བར་འགྱུར། །ཞེས་བཤད་པ་ཡིན་ནོ། །དེ་ལྟར་ན་འབྲུ་ནི་མངར་དུ་ཟིན་ཀྱང་ཞུ་བའི་རྗེས་སྐྱུར་བར་འགྱུར་བ་དང༌། སེའུ་སྐྱུར་ཡང་མངར་བར་འཇུ་བ་དང༌། ཏིལ་མར་སྐྱུར་དུ་ཟིན་ཀྱང་ཁ་བར་འཇུ་བ་དང༌། པི་པི་ལིང་ཚ་ཡང་ཞུ་རྗེས་བསྐ་བར་འགྱུར་བ་ཡིན་ནོ། །དེས་ན་འདི་ལྟར་མི་མཐུན་པ་དག་ཀྱང་ཡོད་པས་ཕལ་ཆེར་ཞེས་སྨོས་པ་ཡིན་ནོ། །རོ་དང་ཞུ་རྗེས་འབྲས་བུ་མཉམ། །ཞེས་བྱ་བ་ལ། རོ་ཞེས་པ་ལྕེའི་ཡུལ་དུ་གྱུར་བ་མངར་བ་དང༌། སྐྱུར་བ་ལ་སོགས་པ་དང༌། ཞུ་བའི་རྗེས་འདི་ནི་འབྲས་བུ་ཡིན་པས་མཉམ་ཞིང་མཚུངས་པ་ཡིན་ཏེ། འདི་ནི་མངར་བའི་རོ་མྱངས་པ་ན་ལུས་ཚིམ་པར་བྱེད་པ་ལ་སོགས་པ་གང་བྱེད་པ་དེ་ནི་མེ་ཏོག་ལྟ་བུ་ཡིན་ཏེ། རོ་མངར་བ་དེ་ཞུ་བ་དང༌། དེ་མཚུངས་པ་ཡིན་ལ། གང་གཞན་རོ་ཞིམ་པ་ལ་སོགས་པའི་བྱ་བ་བྱེད་པ་དེ་ནི། རོ་མངར་བ་དེའི་འབྲས་བུ་ཡིན་པས་ཐམས་ཅད་དུ་མཐུན་པ་ཡིན་ནོ། །རོ་མངར་བའི་ལས་ནི་འཇུ་བརྟུལ་བ་དང༌། ལུས་ཟུངས་རྒྱས་པ་ལ་སོགས་པའི་ལས་བྱེད་པ་ཡིན་ནོ། །དེ་ལ་སྨན་ནི་བཟང་དང་ངན། །ལ་ལ་རོ་ཡིས་ལས་བྱེད་ལ། །གཞན་དག་འཇུ་བར་བྱེད་པ་ཡིན། །ཡོན་ཏན་གཞན་དང་ནུས་པ་དང༌། །མཐུ་ཡིས་ལ་ལ་བྱེད་པ་ཡིན། །ཞེས་བྱ་བ་ལ། དེ་ལ་ཞེས་བྱ་བ་ནི་ངེས་པར་གཟུང་བ་སྟེ། སྨན་དང༌། རོ་དང༌། ནུས་པ་དང༌། མཐུ་སྟོབས་
ཀྱི་ནང་ནས། སྨན་བཟང་དང་ངན་ཞེས་བྱ་བ་ནི་ཡོད་པ་དང་མེད་པའི་ལས་སྨན་ལ་ནི་རོ་ཡིས་བྱེད་པ་དང༌། བསྐ་བ་དང་བཅས་པས་བད་ཀན་ཞི་བར་བྱེད་ཅིང༌། ནུས་བ་བསིལ་བར་བྱེད་བས་རླུང་སྐྱེད་པར་བྱེད་དོ། །རླན་ཅན་གྱི་ཤའི་ཆུ་ནི་ནུས་པ་དྲོ་བ་ཡིན་པས་མཁྲིས་པ་སྐྱེད་པར་བྱེད་དོ། །དེ་བཞིན་དུ་ཏིལ་མར་ནི་ཞུ་རྗེས་ཁ་བ་ཉིད་ཀྱིས་བཤང་གཅི་སྐྱེད་ལ། རང་སྐྱུར་ཡང་རྩུབ་ཅིང་དྲོ་བ་ཡིན་པ་དང་བིལ་བའི་རྐང་ནི་རྩུབ་པས་མཁྲིས་པ་སྐྱེད་པ་དང༌། སྐྱུ་རུ་ར་ནི་ནུས་པ་བསིལ་བ་དང༌། ཞུ་རྗེས་མངར་བས་བད་ཀན་སྐྱེད་པ་དང༌། ཨང་ཞིང་རྩུབ་ཀྱང་རླུང་མི་སྐྱེད་པ་དང༌། ལན་ཚྭ་ལྕེ་མྱང་ཚ་ནི་ཞུ་རྗེས་མངར་པས་མཁྲིས་པ་སེལ་ཞིང་ཡང་བད་ཀན་ལ་ཕན་པ་དང༌། པུ་ཤེལ་ཙེ་དང༌། བཅའ་སྐ་ནི་སྣུམ་བ་དང༌། དྲོ་བ་དང༌། ཞུ་རྗེས་མངར་བས་རླུང་སེལ་བ་དང༌། པི་པི་ལིང་ཡང་དེ་དང་འདྲ་བས། རླུང་སེལ་བ་དང༌། སྒོག་སྐྱ་དང་ཀུན་དོང་དག་ནི་སྣུམ་པ་དང༌། ཚ་བ་དང༌། ལྕི་བས་རླུང་སེལ་བར་བྱེད་ལ། དེ་དག་ནི་སྣུམ་པ་དང༌། ལྕི་བས་བད་ཀན་སྐྱེད་པར་བྱེད་པ་ཡིན་ནོ། །ལ་ཕུག་སྒོང་པོ་ཡང་ཞུ་རྗེས་མངར་བས་བད་ཀན་སྐྱེད་དོ། །བྲི་ཧ་ཏི་དང༌། ཀཎྜ་ཀ་རི་དང༌། བྱི་ཤ་ལ་ནི་ནུས་པ་ཚ་བས་མཁྲིས་པ་སྐྱེད་པར་བྱེད་པ་དང༌། ཤ་ནི་ནུས་པ་དྲོ་བས་རླུང་སེལ་ཞིང་མཁྲིས་པ་སྐྱེད་པ་དང༌། ཀུ་ལངྠ་ནི་རོ་བསྐ་ཡང་ཞུ་རྗེས་བསིལ་བས་རླུང་སེལ་ཞིང་མཁྲིས་པ་སྐྱེད་པ་ཡིན་ནོ། །དེ་ལྟར་ན་དེ་དག་ནི་ཕྱོགས་གཅིག་ཙམ་གྱི་དཔེར་བསྟན་པ་ཡིན་ནོ། །སྨན་གྱི་རོ་སོགས་གང་དང་གང༌། །སྟོབས་ལྡན་ཉིད་ཀྱིས་གནས་བྱེད་དེ། །ཤིན་ཏུ་ཟིལ་གནོན་དེ་དང་དེ། །སྒྲུབ་བྱེད་རྒྱུ་ནི་ཉིད་དུ་གནས། །ཞེས་བྱ་བ་ལ། སྨན་གྱི་རིས་སུ་གཏོགས་བའི་རོ་དང༌། ནུས་པ་དང༌། འཇུ་བ་དང་མཐུ་གང་དང་གང་ཡིན་པ་དེ་དག་གི་ནང་ནས། སྟོབས་དང་ལྡན་པ་ཉིད་ཀྱིས་སྨན་ལ་གནས་པར་བྱེད་པ་དེ་ནི། སྨན་གྱི་རིགས་དེ་ཤིན་ཏུ་ཟིལ་གྱིས་མནན་ཅིང་སྟོབས་ཆུང་བ་གཞན་དག་ཕམ་པར་བྱས་ནས། གནས་བདེ་དང་དེ་ནི་བྱ་བ་གང་སྒྲུབ་པར་བྱེད་པ་དེ་དག་ནི། རྒྱུ་ཉིད་དུ་གནས་པར་འགྱུར་ཞིང༌། བསྒྲུབ་པར་བྱ་བ་ཉིད་སྒྲུབ་པར་བྱེད་པ་ཡིན་ནོ། །དེ་ཡང་རོས་ནི་འདི་བྱས་སོ། །ནུས་
པས་ནི་འདི་བྱས་སོ། །སྟོབས་ཀྱིས་ནི་འདི་བྱས་སོ། །ཞེས་བྱ་བ་ལྟ་བུའོ། །དོན་འདི་ཉིད་ཀྱིས་དཔེར་བརྗོད་པ། བསྡུས་པ་ལས་སྤྲོས་ཏེ་བཤད་པ་འདིར་བསྟན་པ་ཡིན་ལ། །གང་འདི་ལྟར་རོ་ལ་སོགས་པའི་རིགས་སུ་གཏོགས་པས་རོ་གཞན་དག་ལ་སྟོབས་དང་ལྡན་པར་གནས་ཤིག་དེ་དང་དེ་ཉིད་དུ་ཟིལ་གྱིས་མནན་ནས་སྒྲུབ་པའི་རྒྱུ་ཉིད་དུ་བྱེད་ཀྱི། རང་དང་གཞན་གྱི་སྟོབས་ལ་གནས་པ་དང༌། སྟོབས་དང་ལྡན་པ་དང༌། སྟོབས་ཆུང་བ་དང༌། གཉི་གའི་ཚུལ་གྱིས་རང་རང་གི་ལས་བྱེད་པ་ཡིན་པས་ན། དེའི་ཕྱིར་འདི་བསྟན་པར་བྱ་བ་སྨྲས་པ་ནི། ཡོན་ཏན་མི་འཕྲོད་སྦྱར་བ་ནི། །མང་པོས་ཉུང་དུ་ཟིལ་གྱིས་གནོན། །ཞེས་བྱ་བ་ཡིན་ཏེ། གང་གི་ཕྱིར་ཡོན་ཏན་མི་འཕྲོད་པ་དག་སྦྱར་ཞིང་བསྲེས་པ་ནི། མང་པོ་སྟོབས་དང་ལྡན་པས། སྟོབས་ཆུང་དུ་ཟིལ་གྱིས་གནོན་ཅིང་རྒྱལ་བར་བྱེད་དོ། །ཡོན་ཏན་མི་འཕྲོད་ཅེས་བྱ་བ་འདིར་ནི། རྫས་མི་འཕྲོད་པའི་སྦྱོར་བ་ལ་བྱའོ། །ཡོན་ཏན་མི་འཕྲོད་པ་ཉིད་དུ་ནི་སྨྲ་བར་རིགས་པ་མ་ཡིན་ནོ། །དེ་ཡང་དྲང་སྲོང་ཙ་ར་ཀས་བཤད་པ། སྦྱོར་བ་ནི་རྫས་གཉིས་སམ་རྫས་མང་པོ་སྦྱར་བ་ཡིན་ལ། དེ་ཡང་མི་འཕྲོད་པ་ནི་གཉིས་ཏེ། རང་བཞིན་མི་འཕྲོད་པ་དང༌། འབྲས་བུ་མི་འཕྲོད་པའོ། །རང་བཞིན་མི་འཕྲོད་པ་ནི། དཔེར་ན་སྨན་ཡང་པ་དང༌། ལྕི་བ་སྦྱར་བ་དང༌། ཆབ་དང་བསིལ་བ་སྦྱར་བ་ལ་སོགས་པའོ། །འབྲས་བུ་མི་འཕྲོད་པ་ནི། དཔེར་ན་རླུང་གི་ནད་བསལ་བའི་ཕྱིར། །སྨན་རྩུབ་པ་དང༌། རོ་ལྷན་ཅིག་སྦྱར་བ་དང༌། དེ་བཞིན་དུ་བསིལ་བ་དང༌། དྲོ་བ་དང་ལྷན་ཅིག་སྦྱར་བ་ལ་སོགས་པའོ། །དེ་ལྟར་ན་རང་བཞིན་གྱིས་ཡོན་ཏན་མི་འཕྲོད་པའི་སྨན་གྱི་སྦྱོར་བ་དང༌། དེ་བཞིན་དུ་འབྲས་བུ་མི་འཕྲོད་པའི་སྨན་གྱི་སྦྱོར་བ་ཕན་ཚུན་རིགས་མི་མཐུན་པའི་སྦྱོར་བ་དེ་ནི། གང་ཟས་ཀྱི་རིགས་ཉུང་དུ་རྫས་ཀྱི་རིགས་མང་པོས་ཟིལ་གྱིས་མནན་ནས། དེ་ཉིད་དུ་རྒྱུ་ཉིད་དུ་སྒྲུབ་པར་བྱེད་པར་གནས་པར་མཐོང་ངོ༌། །དེ་ཡང་དཔེར་ན་སྦྲང་རྩི་ནི་མངར་དུ་ཟིན་ཀྱང་བད་ཀན་ཞི་བར་བྱེད་དོ། །རོ་མངར་བ་ནི་བད་ཀན་སྐྱེད་པར་བྱེད་པ་ཡིན་ཡང༌། སྦྲང་རྩི་བད་ཀན་ཞི་བར་བྱེད་པ་ནི་མི་མཐུན་པ་མི་འཕྲོད་པའི་ཡོན་ཏན་དང་ལྡན་པའི་ཕྱིར་རོ། །དེ་
ལྟར་ན་རིགས་མཐུན་པའི་མཚན་ཉིད་སྦྱོར་བ་ལས་ཀྱང་གང་ཞིག་གང་གིས་ཟིལ་གྱིས་མནན་ནས། རང་རྒྱུད་དུ་གྲུབ་པ་ཡིན་པར་སོམ་ཉིར་གྱུར་པ་དེ་དགག་པར་བྱ་བའི་ཕྱིར་འདིར་སྨྲས་པ་ནི། རོ་དང་འཇུ་བའི་མཐུ་དག་ནི། །དེ་ཡི་སྟོབས་ཀྱིས་ཟིལ་གྱིས་གནོན། །ཞེས་བྱ་བ་ཡིན་ཏེ། རོ་དང་ནུས་པ་དང་འཇུ་བ་དང༌། སྟོབས་རྣམས་ནི་ཅི་ལྟར་ལྷན་ཅིག་སྦྱར་ཞིང་ནུས་པ་མཉམ་པ་ཡིན་དུ་ཟིན་ཀྱང་རང་བཞིན་གྱིས་འཇུ་བས་ནི་རོ་ཟིལ་གྱིས་མནན་ཏེ་དེའི་ནུས་པ་མེད་པར་བྱས་ནས། རང་གི་བྱ་བ་བསྟན་པའི་སྒོ་ནས། དེའི་ནུས་པ་ཟིལ་གྱིས་མནན་ནས། རང་གི་ནུས་པ་གསལ་བར་སྟོན་ཏོ། །དེ་བཞིན་དུ་རོ་དང་འཇུ་བ་དེ་གཉིས་ཀྱང་མཐུས་ཟིལ་གྱིས་གནོན་ལ། མཐུ་དེ་རྣམས་ཀྱི་སྟོབས་ཀྱིས་ཟིལ་གྱིས་གནོན་པ་ཡིན་ནོ། །རོ་སོགས་དེ་ལྟར་སྟོབས་ནི་མཉམ། །མ་བཅོས་པ་ནི་སྟོབས་དང་ལྡན། །ཞེས་བྱ་བ་ནི། རོ་དང་འཇུ་བ་དང་མཐུ་དང་སྟོབས་རྣམས་ནི། དེ་ལྟར་ཞེས་པ་རྣམ་པ་འདིས་སྟོབས་མཉམ་ཞིང་མཚུངས་པ་ཡིན་ལ། དེའི་སྟོབས་ནི་རོ་ལ་སོགས་པ་ལ་དམིགས་ནས་མ་བཅོས་པ་གང་ཡིན་པ་དེ་ནི་སྟོབས་དང་ལྡན་པར་བཤད་དེ། རྫས་གང་གི་རོ་མངར་བ་དེ་ཇི་སྐད་བཤད་པ་བཞིན་དུ་འཇུ་བ་མངར་བ་དང་ལྡན་པ་དང། དེ་བཞིན་དུ་ནུས་པ་བསིལ་བ་དང་ལྡན་པ་ནི་སྟོབས་ཆེ་བ་ཡིན་ལ། དེ་བཞིན་དུ་རོ་སྐྱུར་བ་ཇི་སྐད་བཤད་པའི་ཞུ་རྗེས་སྐྱུར་བ་དང་ལྡན་ཞིང༌། དེ་བཞིན་དུ་ཚ་བའི་ནུས་པ་དང་ལྡན་པ་དང༌། དེ་བཞིན་དུ་རོ་ཚ་བ་དང་ཇི་སྐད་བཤད་པའི་འཇུ་བའི་ཚ་བ་དང་ལྡན་ཞིང་དྲོ་བའི་ནུས་པ་དང་ལྡན་པ་དང༌། དེ་བཞིན་དུ་འོ་མ་དང་ཆང་དང༌། ན་ལེ་ཤམ་ལ་སོགས་པ་ལས་འོ་མ་ནི་རོ་མངར་ལ་འཇུ་བ་དང་ནུས་པ་བསིལ་བ་དང༌། ཆང་ནི་སྐྱུར་ལ་འཇུ་བ་དང་ནུས་པ་དྲོ་པ་དང༌། ན་ལེ་ཤམ་ནི་རོ་ཚ་ལ་འཇུ་བ་དང་ནུས་པ་དྲོ་བ་སྐྱེད་པ་དང༌། སྨན་དེ་དག་ནི་རོ་དང་འཇུ་བ་དང་ནུས་པ་དང་སྟོབས་མཉམ་པ་སམ་བཅོས་པའི་སྟོབས་དང་ལྡན་པ་ཞེས་བྱ་བ་ཡིན་པར་ཤེས་པར་བྱའོ། །ཁོ་བོ་ཅག་གིས་རོ་དང་འཇུ་བ་དང་ནུས་པའི་རང་བཞིན་ཅི་ལྟ་བུ་ཡིན་པ་དེས་ནི་ལས་ལ་རྗེས་སུ་དཔག་པས་ཤེས་པས་ནི། མཐུ་ཞེས་བྱ་བ་ནི་རང་བཞིན་ཤེས་པར་དཀའ་བས་དེ་མི་ཤེས་པས་ཐེ་ཚོམ་དུ་གྱུར་ན་མཐུ་ནི་གང་ཞིག་ཡིན། གང་ལས་ནི་རྗེས་སུ་
དཔག་པར་བྱ་ཞེ་ན། འདིར་སྨྲས་པ་ནི། རོ་སོགས་མཉམ་བའི་ལས་གང་ནི། །ཁྱད་འཕགས་དེ་ནི་མཐུ་ལས་སྐྱེས། །ཞེས་བྱ་བ་ཡིན་ཏེ། རོ་ལ་སོགས་པ་མཉམ་ཞིང་མཚུངས་པ་ཉིད་ཀྱིས་ལས་གང་ཁྱད་པར་དུ་འཕགས་པ་སྨན་གང་ལ་སྣང་བ་དེ་ནི་མཐུ་ལས་སྐྱེས་བ་ཡིན་བར་ཤེས་པར་བྱའོ། །རྗེས་སུ་དཔག་པ་དེས་ན་མཐུ་ཞེས་བྱ་བ་ཤེས་པར་བྱ་སྟེ། འདི་ནི་རྫས་ཀྱི་མཐུ་ཡིན་ནོ། །དེ་ཡང་སྨན་གཉིས་རོ་མཚུངས་པ་དང་ནུས་པ་མཉམ་དུ་ཟིན་ཀྱང་དེ་ལ་སྨན་གཅིག་ལས་གཞན་བྱེད་ལ་ཅིག་ཤོས་ཀྱང་ལས་གཞན་བྱེད་པ་ཉིད་ཡིན་ཏེ། དེས་ནི་སྟོབས་ཀྱིས་སྟོབས་ཡོད་པ་ཉིད་དུ་ཤེས་པར་བྱའོ། །དེ་ལྟར་ན་སྨན་རེ་རེའི་འཇུག་བ་དང་ལྡོག་པའི་མཚན་ཉིད་ཅན་གྱི་ཆོས་རང་གི་རང་བཞིན་དངོས་པོ་རྐྱེན་ཚོགས་པ་ལས་བྱུང་བ་ངེས་པར་བྱེད་པའི་མཚན་ཉིད་ཅན་དེ་ནི་མཐུ་ཞེས་བྱ་སྟེ། དངོས་པོ་གཞན་གྱི་མཐུ་ནི་མ་ཡིན་ནོ། །དན་ཏི་དང་ནི་ཙི་ཏྲ་ཀ །རོ་སོགས་མཚུངས་ཀྱང་དན་ཏི་འཁྲུ། །ཤིང་མངར་རྒུན་འབྲུམ་འདྲ་ཡང་འཁྲུ། །འོ་མ་མར་འདྲ་མར་དྲོད་སྐྱེད། །ཅེས་བྱ་བ་ལ། དེ་ལྟར་ན་སྨན་དན་ཏི་དང༌། ཙི་ཏྲ་ཀ་ནི་རོ་དང་ནུས་པའི་ཞུ་རྗེས་མཚུངས་ཏེ། ཙི་ཏྲ་ཀ་ལ་རོ་དང་ནུས་པ་དང་འཇུ་བའི་རྗེས་གང་དག་ཡོད་པ་དེ་དག་དན་ཏི་ལ་ཡོད་དུ་ཟིན་ཀྱང༌། དན་ཏི་ནི་དན་ཏི་རང་ཉིད་ཀྱི་མཚན་ཉིད་ཀྱིས་འཁྲུ་བར་བྱེད་པ་ཡིན་གྱི། ཙི་ཏྲ་ཀ་ནི་མ་ཡིན་ཏེ། དེ་ལྟ་བུའི་ཁྱད་པར་གྱི་ཆོས་ལ་མཐུ་ཞེས་བྱའོ། །དེ་བཞིན་དུ་མངར་བ་དང༌། རྒུན་འབྲུམ་རོ་མངར་བ་ལ་སོགས་པར་མཐུན་དུ་ཟིན་ཀྱང་རྒུན་འབྲུམ་འཁྲུ་བར་བྱེད་ཀྱི་ཤིང་མངར་ནི་མ་ཡིན་ནོ། །དེ་བཞིན་དུ་འོ་མ་དང༌། མར་ལ་སོགས་པ་མཚུངས་སུ་ཟིན་ཀྱང་འོ་མ་ནི་འོ་མར་གྱུར་པས་དྲོད་མི་སྐྱེད་ཀྱི། མར་གྱིས་དྲོད་སྐྱེད་དོ། །དེ་བཞིན་དུ་ཐམས་ཅད་ཀྱང་མཐུ་ལས་གྱུར་བ་ཡིན་ནོ་ཞེས་བྱ་བར་སྦྱར་རོ། །འདི་ལྟར་རེ་ཞིག་དངོས་པོ་ཐམས་ཅད་ལ་ཡང་སྤྱི་དང་ཁྱད་པར་གྱིས་ཁྱབ་པ་ཡིན་པས། དེའི་ཕྱིར་བསྟན་བཅོས་བྱེད་པས་སྨས་པ་ནི། དེ་ལྟར་སྨན་ལ་སོགས་པ་ཡི། །སྤྱི་ཡི་ལས་ཏེ་དེ་ཡང་ནི། །ཞེས་བྱ་བ་ཡིན་ཏེ། དེ་ལྟར་ཞེས་བྱ་བའི་སྒྲ་ནི་ཡོངས་སུ་རྫོགས་བའི་ཚིག་གམ་རྣམ་བའི་དོན་ནོ། །དེ་ཡང་སྨན་ལ་སོགས་པའི་
རོ་དང་འཇུ་བ་དང་ནུས་པ་དང་མཐུ་སྤྱིའི་ལས་རྫོགས་པ་ཡིན་གྱི་ཁྱད་པར་ནི་མ་ཡིན་ཏེ། དེ་རྩོམ་བར་བྱེད་པའི་འབྱུང་བ་ཆེན་པོ་སྤྱིའི་ལས་བྱུང་བ་ན་སྤྱིའི་རྐྱེན་སྤྱིའི་རྒྱུ་ལས་བྱུང་བ་ཞེས་བྱ་བའི་བར་དུའོ། །ཡང་ན་རྣམ་པའི་དོན་ཏེ། རྣམ་པ་འདིས་སྨན་ལ་སོགས་པ་སྤྱིའི་ལས་ཉིད་བཤད་ཀྱི་ཁྱད་པར་གྱི་ནི་མ་ཡིན་ཏེ། འབྱུང་བ་ཆེན་པོ་དག་གི་སྨན་ལ་བརྟེན་པའི་རོ་དང་མཐུ་ལ་སོགས་པ་ཇི་ལྟར་བསྐྱེད་པ་སྤྱིའི་རྒྱུ་བསྟན་པ་དེ་བཞིན་དུ་དེའི་ལས་ཀྱང་སྤྱི་ཙམ་དུ་བསྟན་ཏོ། །ཞེས་བྱ་བའི་དོན་ཏོ། །དེ་ལ་སྨན་ལ་སོགས་པའི་སྤྱིའི་ལས་བཤད་ནས་ཁྱད་པར་གྱི་དབྱེ་བས་སྨན་དེ་རྣམས་རེ་རེ་ཞིང་ལས་གཞན་དང་གཞན་བྱེད་པའི་ཚུལ་སྨྲས་པ་ནི། སྣ་ཚོགས་རྐྱེན་གྱི་དབྱེ་བ་ཡིས། །སྨན་དབྱེ་ཐ་དད་གྱུར་པ་ཡིན། །ཞེས་བྱ་བ་ལ། སྤྱིར་བཤད་བའི་སྨན་གྱི་རོ་དང་འཇུ་བ་དང་ནུས་པ་ལ་སོགས་པའི་ལས་དེ་ཡང་ཐ་དད་པར་འགྱུར་བ་ཡིན་ཞིང༌། བྱེ་བྲག་ཏུ་འགྱུར་བ་ཡིན་ནོ། །གང་གིས་ཐ་དད་པར་འགྱུར་ཞེ་ན། སྣ་ཚོགས་པའི་རྐྱེན་གྱི་དབྱེ་བ་ཐ་དད་པར་འགྱུར་བ་ཡིན་ཏེ། སྣ་ཚོགས་པའི་རྐྱེན་ནི་རྣམ་པ་ཐ་དད་པའི་ཚུལ་དུ་གནས་པའི་འབྱུང་བ་ཆེན་པོ་རྣམས་ལ་བྱ་ལ། དེ་ཡང་སེམས་ཅན་ཐ་དད་པ་རྣམས་ཀྱིས་སྔོན་དགེ་བ་དང་མི་དགེ་བ་བྱས་པའི་ལས་ལས་བྱུང་བའི་འབྱུང་བ་ཆེན་པོ་དེ་རྣམས་སྣ་ཚོགས་ཤིང་ཐ་དད་པ་དེ་ལྟ་བུར་ཡོངས་སུ་འགྱུར་བའི་རྐྱེན་སྣ་ཚོགས་པ་རྣམས་ཀྱིས་བསྐྱེད་པའི་སྨན་དེ་རྣམས་ཀྱི་དབྱེ་བ་ནི་ཁྱད་པར་ཏེ། ཁྱད་པར་གྱི་དབྱེ་བ་དེས་སྤྱིར་བཤད་པའི་སྨན་རྣམས་ལས་ཀྱི་དབྱེ་བ་ཐ་དད་པར་འགྱུར་ཞིང་དུ་མ་ཉིད་དུ་གནས་པ་ཡིན་ལ། །རོལ་སོགས་བ་ཡང་ལ་བརྟེན་པ་ཡིན་པས་དེ་རྣམས་ཀྱི་ལས་ཀྱང་སྨན་གྱི་དབྱེ་བས་ཐ་དད་པར་འགྱུར་བ་ཡིན་ནོ། །དེ་ལྟར་སྨན་རྣམ་པ་གཉིས་པོ་ལས། ལ་ལ་ནི་རྩོམ་པར་བྱེད་པའི་རྐྱེན་གྱིས་མཚུངས་པར་སྐྱེད་པ་ཡིན་ལ། ལ་ལ་ནི་ནུས་པ་སྐྱེད་པའི་རྐྱེན་གྱིས་མཚུངས་པར་སྐྱེད་པ་ཡིན་པས་རྐྱེན་སྣ་ཚོགས་ཉིད་དུ་གནས་པ་ཡིན་ཏེ། དེ་དག་གི་ཕྱོགས་གཅིག་གི་དཔེ་བསྟན་པར་བྱ་བའི་ཕྱིར་སྨྲས་པ་ནི། གྲོ་དང་ནས་ནི་མངར་བ་དང༌། །ལྕི་ལས་རླུང་འཇོམས་སྐྱེད་པ་ཡིན། །ཉ་དྲོའོ་མ་བསིལ་བ་དང༌། །སེང་གེ་ཁ་ཡི་ཕག་མ་
ཡིན། །ཞེས་བྱ་བ་ལ། གྲོ་དང་ནས་དག་ནི་རོ་མངར་བ་དང་ཡོན་ཏན་ལྕི་བ་དང་ལྡན་པ་ཡིན་དུ་ཟིན་ཀྱང༌། གྲོ་ནི་རླུང་འཇོམས་པར་བྱེད་ལ། ནས་ནི་རླུང་སྐྱེད་བར་བྱེད་པ་ནི་རྐྱེན་སྣ་ཚོགས་ལས་བྱུང་བ་ཉིད་ཡིན་པའི་ཕྱིར་རོ། །དེ་བཞིན་དུ་རྐྱེན་སྣ་ཚོགས་པ་ལས་བྱུང་བས། ཉ་ནི་རོ་མངར་དུ་ཟིན་ཀྱང་ནུས་པ་དྲོ་བ་ཡིན་གྱི་གྲང་བ་མ་ཡིན་ལ། འོ་མ་ནི་མངར་དུ་ཟིན་ཀྱང་ཞུ་རྗེས་ནུས་པ་བསིལ་བ་ཡིན་གྱི་དྲོ་བ་མ་ཡིན་ནོ། །དེ་བཞིན་དུ་རྐྱེན་སྣ་ཚོགས་པ་ལས་བྱུང་བའི་ཕྱིར། སེང་གེའི་ཤ་ནི་མངར་དུ་ཟིན་ཀྱང་ཞུ་རྗེས་ལ་སོགས་བ་ཁ་བ་ཡིན་ལ། ཕག་གི་ཤ་ནི་མངར་བ་ཡིན་བ་ལས། ཞུ་རྗེས་ལ་སོགས་པ་ཡང་མངར་བ་ཉིད་ཡིན་ནོ། །དེ་ལྟར་ན་ཐམས་ཅད་ཀྱང་རྐྱེན་སྣ་ཚོགས་ལས་བྱུང་བའི་ཕྱིར། རོ་དང༌། ཞུ་རྗེས་དང༌། ནུས་པ་ཐ་དད་ཡིན་པར་དཔེས་རིམ་པ་བཞིན་དུ་བསྟན་པ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་དགུ་པའི་རྣམ་པར་འགྲེལ་པའོ།། །།དེ་ནས་རོ་ཐ་དད་པ་ཤེས་པར་བྱ་བའི་ལེའུ་བཤད་པར་བྱའོ་ཞེས་བྱ་བ་ལ། སྨན་ལ་སོགས་པ་རྣམས་ཀྱི་བྱེ་བྲག་ཤེས་པར་བྱ་བའི་ལེའུ་བཤད་པའི་འོག་ཏུ། རོ་ཐ་དད་པ་ཤེས་པར་བྱ་བའི་ལེའུ་བཤད་པར་བྱ་སྟེ། རོ་རྣམས་ནི་སྨན་ལ་བརྟེན་པ་ཡིན་པའི་ཕྱིར་རོ། །དེ་ཡང༌། སྨན་རྣམས་ཉིད་ཀྱི་རོ་ལ་སོགས། །དེ་ནི་དེ་ལ་བརྟེན་པས་མཆོག །ཅེས་སྔར་བཤད་པའི་ཕྱིར་ཏེ། སྨན་མེད་པར་རོལ་སོགས་པ་ཉེ་བར་དམིགས་པར་མི་འགྱུར་རོ། །དེ་བས་ན་དང་པོར་སྨན་བཤད་ནས་དེའི་འོག་ཏུ་བརྟེན་པ་པོའི་རོའི་བྱེ་བྲག་ཤེས་པ་བསྟན་པ་བརྩམས་པ་ཡིན་ནོ། །དེ་ལ་རོ་རྣམས་ཀྱི་ཐ་དད་པ་ནི་རོའི་ཁྱད་པར་ཏེ་དེ་ཤེས་པར་བྱ་བ་ལ་ཕན་པའི་ལེའུ་གང་ཡིན་པ་དེ་བཤད་པར་བྱ་ཞིང་བསྟན་པར་བྱའོ་ཞེས་པའོ། །དེ་ལ་རོ་ནི་རེ་ཞིག་ཆུའི་རང་བཞིན་དང། དང་པོ་མི་གསལ་བ་ཡིན་པ་ལ། དེ་ནི་དུས་རྣམ་པ་དྲུག་དང་ལྡན་པ་ཡིན་པའི་ཕྱིར་དང༌། འབྱུང་བ་ཆེན་པོའི་ཡོན་ཏན་ཤས་ཆེ་ཆུང་གི་དབང་གིས་བྱུང་བ་དང་མི་མཉམ་ཞིང༌། ཚིག་པ་ལས་མངར་བ་ལ་སོགས་པའི་དབྱེ་བ་རྣམ་པ་དྲུག་ཏུ་འགྱུར་རོ། །དེ་ལྟར་ཆུ་སྨོས་པས་ནི།
རོ་དག་ཆུའི་རྣམ་པར་འགྱུར་བ་ཡིན་པར་ཤེས་བ་ས་ལ་སོགས་པ་ནི། ལྷན་ཅིག་བྱེད་པའི་ཚུལ་གྱིས་དགོས་པ་བྱེད་པ་ཡིན་ཏེ། དེ་བས་ན་ཚོགས་པ་ནི་ཡང་དག་བར་ན་རོའི་བྱེད་པ་པོ་ཡིན་ནོ། །དེས་ན་འབྱུང་བ་ཆེན་པོ་ཤས་ཆེ་བའི་ཁྱད་པར་ལས་རོ་འབྱུང་བའི་ཚུལ་སྨྲས་པ་ནི། མངར་བ་ལ་སོགས་རོ་སྐྱེ་བ། །ས་ཆུ་མེ་ས་ཆུ་དང་མེ། །མཁའ་རླུང་མེ་རླུང་ས་དང་རླུང༌། །གཉིས་གཉིས་ཤས་ཆེ་ལས་རིམ་འབྱུང༌། །ཞེས་བྱ་བ་ལ། རོ་མངར་བ་དང་སྐྱུར་བ་ལ་སོགས་བ་དྲུག་པོ་རྣམས་ནི་སྐྱེ་ཞིང་འབྱུང་བ་ནི་འབྱུང་བ་གཉིས་གཉིས་ཤས་ཆེ་ཞིང་ལྷག་པ་ལས་གོ་རིམས་ཇི་ལྟ་བ་བཞིན་དུ་བསྟན་པ་དང་བཤད་པའི་ཚུལ་གྱིས་འབྱུང་སྟེ། འབྱུང་བ་གཉིས་གཉིས་གང་ལ་ཤས་ཆེ་བར་གྱུར་པ་དེ་ལས་འབྱུང་བའོ། །དེ་ལས་འབྱུང་བ་ཆེན་པོ་གང་དག་རོ་གང་ཞིག་རྩོམ་པ་ལས་ལྷག་པར་གྱུར་པ་ཡིན་ཞེ་ན། དེ་དག་གྲངས་ཇི་ལྟ་བ་བཞིན་དུ་སྨྲས་པ་ནི། ས་ཆུ་ཞེས་བྱ་བ་ལ་སོགས་པ་སྟེ། ས་ཆུ་ཞེས་པ་ས་དང་ཆུའི་འབྱུང་བ་ཤས་ཆེ་བ་ལས་ནི། རོ་མངར་བ་འབྱུང་ལ་མེ་ས་ཞེས་བྱ་བ་མེ་དང་སའི་ཤས་ཆེ་བ་ལས་ནི་སྐྱུར་བ་འབྱུང་ངོ༌། །ཆུ་དང་མེ་ཞེས་བྱ་བ་འབྱུང་བ། ཆུ་དང་མེའི་ཤས་ཆེ་བ་ལས་ནི་ལན་ཚྭའི་རོ་འབྱུང་ངོ༌། །མཁའ་རླུང་ཞེས་བྱ་བ་ནམ་མཁའ་དང་རླུང་ཤས་ཆེ་བ་ལས་ནི་རོ་ཁ་བ་འབྱུང་ངོ༌། །མེ་རླུང་ཞེས་བྱ་བ་མེ་དང་རླུང་ཤས་ཆེ་བ་ལས་ནི་རོ་ཚ་བ་འབྱུང་ངོ༌། །ས་རླུང་ཞེས་བྱ་བ་འབྱུང་བས་དང་རླུང་གི་ཤས་ཆེ་བ་ལས་ནི་རོ་བསྐ་བ་འབྱུང་ངོ༌། །དེ་ལྟ་ན་གཉིས་གཉིས་ལས་འབྱུང་བ་ཡིན་ནོ། །ཤས་ཆེ་ཞེས་སྨོས་པས་ན་རོ་ཐམས་ཅད་ཀྱང་འབྱུང་བ་ལས་གྱུར་པ་ཡིན་པར་སྟོན་ཏོ། །དེས་ན་ཚོགས་པ་ལས་བྱུང་བ་ཡིན་ཡང་ཤས་ཆེ་བའི་ཤས་རྫོགས་པར་བྱས་པ་ཡིན་ཏེ། གང་དུ་གང་ཞིག་ཤས་ཆེ་བ་སྟེ་དེར་རོའི་ཁྱད་པར་གཞན་བསྐྱེད་པ་ཡིན་ནོ། །དེ་ལྟར་ན་ཤས་ཆེ་བའི་དབང་གིས་ན་རོ་མངར་བ་ནི་འབྱུང་པ་ཐམས་ཅད་ཀྱིས་བསྐྱེད་དུ་ཟིན་ཀྱང༌། ས་དང་ཆུ་ལས་བྱུང་བ་ཡིན་ཞེས་བཤད་པ་ཡིན་ནོ། །དེ་བཞིན་དུ་ལྷག་མ་རྣམས་ལ་ཡང་སྦྱར་བར་བྱའོ། །ད་ནི་མངར་བ་ལ་སོགས་པ་འབྱུང་བ་རྣམས་ཀྱི་མཚན་ཉིད་དང་ལས་བསྟན་པའི་ཕྱིར་སྨྲས་པ་ནི། དེ་ལས་རོ་ནི་མངར་བ་དག །གང་ཞིག་
མྱངས་པའི་ཚེ་ན་ནི། །ཁ་ལ་ཆགས་ཤིང་ལུས་ཀྱང་ནི། །ཚིམ་བྱེད་དབང་པོ་རབ་དང་བྱེད། །གྲོག་མ་ལ་སོགས་དགའ་བ་ཡིན། །ཞེས་བྱ་བ་ལ། རོ་དྲུག་བོ་དེ་དག་གི་ནང་ནས་རོ་མངར་བདག་ཏུ་ཤེས་པར་བྱ་བ་ནི་གང་ཞིག་མྱངས་ཤིང་ལྕེ་དང་ཕྲད་བར་གྱུར་བ་ན། ཁ་ལ་ཆགས་ཤིང་འབྱར་བག་ཅན་དུ་གྱུར་པ་དང༌། དེ་བཞིན་དུ་ལུས་ཀྱང་ཚིམ་ཞིང་བདེ་བར་བྱེད་པ་དང༌། དབང་པོ་རྣམས་རབ་ཏུ་དང་ཞིང་དགའ་བར་བྱད་པ་དང༌། དེ་བཞིན་དུ་གྲོག་མ་ལ་སོགས་སྲོག་ཆགས་ཕྲ་མོ་རྣམས་ཀྱང་དགའ་ཞིང་སྲེད་པར་བྱེད་པ་ཡིན་ནོ། །སྐྱུར་བ་ཁ་ནས་ཆུ་འཛག་ཅིང༌། །སོ་བརྩེ་སྤུ་ནི་ལྡང་བ་དང༌། །མིག་དང་སྨིན་མ་འཛུམ་པར་བྱེད། །ཅེས་བྱ་བ་ལ། རོ་སྐུར་བ་ནི་མྱངས་པའི་ཚེ་ཁ་ནས་ཆུ་འཛག་ཅིང༌། གཤེར་བ་འདུ་བ་དང༌། དེ་བཞིན་དུ་སོ་བརྩེ་བ་དང༌། སྤུ་ལྡང་བར་བྱེད་བ་དང༌། མིག་གཉིས་དང་སྨིན་མ་གཉིས་འཛུམ་ཞིང་སྡུད་པར་བྱེད་པ་ཡིན་ནོ། །ལན་ཚྭ་ཁར་ནི་མཆིལ་མ་འདུ། །མཁུར་བ་གྲེ་བ་ཚ་བར་བྱེད། །ཅེས་བྱ་བ་ལ། རོ་ལན་ཚྭ་ནི་ལྕེས་མྱངས་པ་ན་ཁར་མཆིལ་མ་འདུ་ཞིང་འཛག་པ་དང་མཁུར་བ་དང་གྲེ་བ་ཚ་བར་བྱེད་པ་ཡིན་ནོ། །ཁ་བ་ཁ་ཡི་དྲི་མ་སྤྱོད། །ལྕེ་ནི་འཇོམས་པར་བྱེད་པ་ཡིན། །ཞེས་བྱ་བ་ལ། རོ་ཁ་བ་ནི་མྱངས་པར་གྱུར་པ་ན། ཁའི་དྲི་མ་སྦྱོང་ཞིང་དག་པར་བྱེད་དེ། ལྗན་ལྗིན་སེལ་བ་ཡིན་ཞིང་ལྕེ་འཇོམས་ཏེ། རོ་གཞན་འཛིན་པར་བྱེད་པའི་ནུས་པ་འཇིག་པར་བྱེད་པ་སྟེ། རང་གི་ལས་ཀྱི་ནུས་པ་ཉེ་བར་འཇོམས་པར་བྱེད་དོ་ཞེས་བྱ་བའི་དོན་ཏོ། །ཚ་བ་ལྕེ་རྩེ་སྐྱོ་བྱེད་ཅིང༌། །ཙག་ཙག་བྱེད་པར་འགྱུར་བ་དང༌། །ཁ་མིག་སྣ་ལས་འཛག་བྱེད་ཅིང༌། །མཁུར་བ་སྲེག་བར་བྱེད་པ་ཡིན། །ཞེས་བྱ་བ་ལ། རོ་ཚ་བ་ནི་ལྕེ་ལ་མྱངས་པའི་ལྕེའི་རྩེ་མོ་སྐྱོ་བར་བྱེད་ཅིང་ན་བར་བྱེད་པ་སྟེ། ལྕེ་བེམ་བེམ་པོར་བྱེད་དོ་ཞེས་བྱ་བའི་དོན་ཏོ། །ཙག་ཙག་བྱེད་པར་འགྱུར་ཞེས་བྱ་བ་ནི། མེ་ལྕེ་ལ་རེག་པ་ལྟར་ལམ་ལམ་པོར་བྱེད་པའམ། སྐེ་ཚོའི་ལྡེ་གུས་བསྐུས་པ་ལྟར་ཚ་བ་ཙག་ཙག་པོར་བྱེད་པར་འགྱུར་རོ། །དེ་བཞིན་དུ་ཁ་དང་མི་ཤ་དང་སྣ་ལས་ཆུ་འཛག་པར་བྱེད་པ་དང༌། མཁུར་བ་མེ་ལྕེས་ཕོག་པ་ལྟར་སྲེག་པར་བྱེད་པ་ཡིན་ནོ། །བསྐ་བས་ལྕེ་ནི་བེམ་པོར་
བྱེད། །གྲེ་བ་རྩ་སྦུ་བས་འགགས་པར་བྱེད། །ཅེས་བྱ་བ་ལ། རོ་བསྐ་བ་ནི་ལྕེས་མྱངས་པ་ན་ལྕེ་བེམ་བེམ་པོར་བྱེད་དོ། །རོ་ཇི་ལྟ་བ་བཞིན་དུ་ཚོར་བར་གྱུར་པ་ལས་ཉམས་བར་བྱེད་པ་དང༌། དེ་བཞིན་དུ་གྲེ་བ་དང་རྩའི་སྦུབས་འགགས་པར་བྱེད་པར་འགྱུར་རོ། །རོ་ཡི་ཚུལ་ནི་དེ་དག་སྟེ། །ཞེས་བྱ་བ་ལ། རོ་རྣམས་ཀྱི་མཚན་ཉིད་བཤད་ནས་དེ་དག་གི་རང་བཞིན་ཉིད་ཀྱི་དོན་གྱི་མཇུག་བསྡུ་བའི་ཚིག་ཏུ་སློབ་དཔོན་གྱིས་སྨྲས་པ་ཡིན་ཏེ། མངར་བ་ལ་སོགས་པའི་རོའི་ཚུལ་ནི་སྔར་བཤད་པའི་རྣམ་བ་དེ་ལྟ་བུའི་མཚན་ཉིད་ཅན་ཡིན་པར་ཤེས་པར་བྱའོ་ཞེས་བྱ་བའི་དོན་ཏོ། །ལས་ནི་རོ་མངར་བ་དག་གིས། །སྐྱེས་ནས་འཕྲོད་པར་བྱེད་པ་དང༌། །ལུས་ཟུངས་མཐུ་སྟོབས་རབ་སྐྱེད་ཅིང༌། །བྱིས་པ་རྒན་པོ་གློ་རྡོལ་སྐེམ། །མདོག་མདངས་སྐྲ་དང་དབང་པོ་བཟང༌། །ལུས་བརྟས་སྐད་འགགས་ཕན་ཞིང་ལྕི། །ནུ་ཞོ་སྐྱེད་ཅིང་རྨ་འབྱོར་བྱེད། །ཚེ་རིང་འཚོ་བྱེད་སྣུམ་པ་དང༌། །རླུང་དང་མཁྲིས་པ་དུག་རྣམས་སེལ། །ཧ་ཅང་དྲགས་ན་ཚིལ་བཅས་དང༌། །བད་ཀན་ལས་བྱུང་ནད་སྐྱེད་ཅིང༌། །ལུས་སྦོམ་དྲོད་འབྲི་ཆང་ནད་དང༌། །གཅིན་ནད་ལྦ་བ་རྨེ་ན་སོགས་སྐྱེད། །ཅེས་བྱ་བ་ལ། རོ་མངར་བ་བསྟེན་ཅིང་སྤྱད་ན་ལས་འདི་དག་བྱེད་དོ། །དེ་ཡང་སྐྱེས་ནས་འཕྲོད་པར་བྱེད་པ་སྟེ། སྐྱེས་པ་ནས་བརྩམས་ཏེ་འཕྲོད་ཅིང་རྗེས་སུ་མཐུན་པ་ཡིན་པའི་ཕྱིར། བཅུད་ཀྱི་དངས་མ་ལ་སོགས་པའི་ལུས་ཟུངས་རྣམས་ཀྱི་མཐུ་སྟོབས་རབ་ཏུ་སྐྱེད་པར་བྱེད་པ་སྟེ། ནུས་པ་ཁྱད་བར་ཅན་དང་ལྡན་པའི་སྟོབས་བསྐྱེད་པར་འགྱུར་རོ་ཞེས་བྱ་བའི་དོན་ཏོ། །དེ་བཞིན་དུ་རྟག་ཏུ་བྱིས་པ་དང་རྒན་པོ་གློ་རྒོལ་བ་དང་སྐེམ་བ་དང་མདོག་མདངས་དང༌། སྐྲ་དང་དབང་པོ་རྣམས་ལ་བཟང་ཞིང་བསྔགས་པར་བྱེད་པ་ཡིན་ནོ། །དེ་བཞིན་དུ་ལུས་བརྟས་པར་བྱེད་པ་དང་སྐད་འགགས་པའི་ལྐོག་མ་ལ་ཕན་པ་དང་བུད་མེད་ཀྱི་ནུ་ཞོ་སྐྱེད་པ་དང༌། རྨ་དང་རུས་པ་ཆག་བ་འབྱོར་ཞིང་འཚོ་བར་བྱེད་བ་དང༌། ཚེ་རིང་བར་བྱེད་པ་དང༌། འཚོ་བར་བྱེད་ཅིང་མདངས་སྐྱེད་བ་དང༌། སྣུམ་པའི་ཡོན་ཏན་དང་ལྡན་པ་དང༌། དེ་བཞིན་དུ་རླུང་དང་མཁྲིས་པའི་ནད་དང་དུག་ལས་གྱུར་པའི་ནད་རྣམས་སེལ་བར་བྱེད་པ་
ཡིན་ནོ། །ཡང་རོ་མངར་བ་དེ་ཧ་ཅང་དྲགས་ཤིང་ཤས་ཆེར་བསྟེན་པར་གྱུར་ན། ཚིལ་དང་བད་ཀན་ལས་བྱུང་བའི་ནད་རྣམས་སྐྱེད་ཅིང་འཕེལ་བར་བྱེད་པ་དང༌། ལུས་སྦོམ་བ་ལ་སོགས་བར་བྱེད་པ་དང༌། ཆང་ནད་ནི་འོག་ནས་བཤད་དོ། །དེ་ལ་སོགས་བ་སྐྱེད་པར་འགྱུར་རོ། །སྐྱུར་བ་མེ་དྲོད་སྐྱེད་བྱེད་སྣུམ། །ཞིམ་ཞིང་འཇུ་བྱེད་ཡི་ག་འབྱེད། །དྲོ་བའི་ནུས་སྐྱེད་རེག་པ་བསིལ། །ཚིམ་བྱེད་འདྲུལ་བྱེད་ཡང་བ་སྟེ། །བད་ཀན་ཁྲག་མཁྲིས་རྒྱས་པར་བྱེད། །རླུང་འགགས་རྒྱུ་བར་བྱེད་པ་ཡིན། །དེ་ནི་ཤིན་ཏུ་བསྟེན་དྲགས་ན། །ལུས་ལྷོད་རབ་རིབ་མགོ་འཁོར་དང། །གཡན་པ་སྐྱ་རྦབ་མེ་དབལ་དང༌། །འོར་ནད་ཐོར་བུ་སྐོམ་རིམས་སྐྱེད། །ཅེས་བྱ་བ་ལ། རོ་སྐྱུར་བ་བསྟེན་ཅིང་སྤྱད་ན། ཁོང་པའི་མེ་དྲོད་སྐྱེད་ཅིང་འཕེལ་བར་བྱེད་པ་དང༌། དེ་བཞིན་དུ་སྣུམ་པ་དང༌། ཞིམ་ཞིང་སེམས་དགའ་བར་བྱེད་པ་དང༌། ཁ་ཟས་འཇུ་ཞིང་སྨིན་པར་བྱེད་པ་དང༌། ཡི་ག་འབྱེད་ཅིང་ཟས་ལེན་པ་དང༌། དེ་བཞིན་དུ་དྲོ་བའི་ནུས་པ་སྐྱེད་པ་དང༌། བསྐུས་ན་རེག་པ་ཁ་བ་ལྟར་བསིལ་བ་དང༌། ཚིམ་བར་བྱེད་པ་དང༌། ཁ་ཟས་འདྲུལ་ཞིང་སླ་བར་བྱེད་པ་དང༌། དེ་བཞིན་དུ་ཡང་བ་དང༌། བད་ཀན་དང་མཁྲིས་པ་དང༌། ཁྲག་རྒྱས་པར་བྱད་པ་དང༌། དེ་བཞིན་དུ་རླུང་ལམ་འགགས་ཤིང་འཁྱིལ་བ་དག་བདེ་བར་རྒྱུ་བར་བྱེད་ཅིང་འབྱུང་བར་བྱེད་པ་ཡིན་ནོ། །རོ་སྐྱུར་བ་དེ་ནི་ཤིན་ཏུ་བསྟེན་དྲགས་ཤིང་ཤས་ཆེར་ཟོས་ན་ལུས་ལྷོད་ཅིང་མི་མཁྲེགས་པར་བྱེད་པ་དང༌། དེ་བཞིན་དུ་རབ་རིབ་ལ་སོགས་པའི་ནད་སྐྱེད་པར་འགྱུར་རོ། །ལན་ཚྭ་སྲ་དང་འཁྱིལ་བ་དང༌། །འགགས་པ་འབྱིན་ཅིང་དྲོད་སྐྱེད་བྱེད། །སྣུམ་དང་དུགས་ཀྱིས་རྡུལ་ཞིང་རྣོ། །ཡི་ག་འབྱེད་ཅིང་གཅོད་འབྱེད་བྱེད། །དེ་ནི་དྲགས་པས་རླུང་ཁྲག་དང༌། །སྐྲ་འབྱི་སྐྲ་དཀར་གཉེར་མ་དང༌། །སྐོམ་མཛེ་དུག་དང་མེ་དབལ་རྣམས། །སྐྱེད་ཅིང་སྟོབས་ནི་འདྲི་བར་བྱེད། །ཅེས་བྱ་བ་ལ། རོ་ལན་ཚྭ་ཅན་བསྟེན་ཅིང་ལོངས་སྤྱད་ན། སྲ་བ་འབྱིན་པར་བྱེད་པ་དང༌། འཁྱིལ་བ་འབྱིན་པར་བྱེད་པ་དང༌། འགགས་པ་འབྱིན་པར་བྱེད་པ་ཡིན་ནོ། །དེ་ལ་སྲ་བ་ནི་རེངས་ཤིང་འགྱུར་མི་ཤས་བའོ། །འཁྱིལ་བ་ནི་བཤང་བ་ལ་སོགས་
པའི་ཚོགས་པ་འཁྱིལ་ཞིང་འབྱུང་དུ་མི་བཏུབ་པའོ། །འགགས་པ་ནི་རྩ་སྦུབས་རྣམས་འགགས་པ་སྟེ། དེ་དག་འབྱིན་ཅིང་སེལ་བར་བྱེད་པ་ཡིན་ནོ། །དེ་བཞིན་དུ་དྲོད་སྐྱེད་དེ་མེའི་ཤས་འཕེལ་བར་བྱེད་པ་དང༌། སྣུམ་པ་དང༌། དུགས་ཀྱིས་རྡུལ་འབྱིན་པར་བྱེད་པ་དང༌། རྣོ་ཞིང་འཇུག་པ་མྱུར་བ་དང༌། ཡི་ག་འབྱེད་ཅིང་ཟས་འདོད་པ་དང༌། གཅོད་ཅིང་ཁ་གཉིས་སུ་བྱེད་པ་དང༌། འབྱེད་པར་བྱེད་པ་ཡིན་ནོ། །ལན་ཚྭའི་རོ་དེ་དྲགས་ཤིང་ཤས་ཆེར་བསྟེན་པས་རླུང་དང་ཁྲག་གི་ནད་དང༌། དེ་བཞིན་དུ་སྐྲ་འབྱི་ཞིང་སྤྱི་ཐེར་དུ་འགྱུར་བ་དང༌། རྒས་སྲ་བའི་མཚན་མ་སྐྲ་དཀར་བ་དང༌། གཉེར་མ་ཞེས་པ་པགས་པ་འདུས་པ་དག་བྱེད་པ་དང༌། དེ་བཞིན་དུ་སྐོམ་དད་ལ་སོགས་པ་སྐྱེད་པར་བྱེད་ཅིང༌། སྟོབས་འབྲི་ཞིང་འཇིག་པར་བྱེད་པ་ཡིན་ནོ། །ཁ་བ་རང་ཉིད་ཞིམ་མིན་ཞིང༌། །ཡི་ག་འཆུས་དང་སྲིན་སྐོམ་དུག །མཛེ་དང་བརྒྱལ་དང་རིམས་སློན་བྲོ། །ཚ་དང་མཁྲིས་པ་བད་ཀན་འཇོམས། །འདྲུལ་དང་ཚིལ་དང་ཞག་དང་རྐང༌། །བཤང་དང་གཅི་བ་སྐེམས་པ་དང༌། །ཡང་ཞིང་ཡིད་གཞུངས་བསིལ་ཞིང་རྩུབ། །ནུ་མའི་ནད་དང་སྐད་འགགས་སེལ། །དེ་ནི་ཤིན་ཏུ་དྲགས་གྱུར་ནས། །ལུས་ཟུངས་ཟད་ཅིང་རླུང་ནད་སྐྱེད། །ཅེས་བྱ་བ་ལ། རོ་ཁ་བ་ནི་རང་ཉིད་ཞིམ་པ་མ་ཡིན་ཞིང་ཡི་ག་འབྱེད་པར་བྱེད་བ་ཡིན་ལ། རང་ཉིད་ཡི་གར་མི་འོང་བ་ཡིན་ནོ། །དེ་བཞིན་ཡི་ག་འཆུས་པ་ནས་བད་ཀན་གྱི་བར་དུ་འཇོམས་པར་བྱེད་བ་ཡིན་ནོ། །དེ་བཞིན་འདྲུལ་བ་ལ་སོགས་བཞུ་ཞིང་གཤེར་བའི་ཚུལ་ཅན་དག་སྐེམ་པར་བྱེད་པ་དང༌། དེ་བཞིན་དུ་བ་ཞིན་ཡང་བ་དང༌། ཡིད་གཞུངས་ཤིང་ཤེས་རབ་འཕེལ་བ་དང༌། བསིལ་ཞིང་གྲང་བའི་ནུས་པ་སྐྱེད་པ་དང༌། དེ་བཞིན་དུ་རྩུབ་པ་དང༌། བུད་མེད་ཀྱི་ནུ་མའི་ནད་དང༌། སྐད་འགགས་པའི་ལྐོག་མའི་ནད་སེལ་ཞིང་འཇོམས་པ་ཡིན་ནོ། །རོ་ཁ་བ་དེ་ཤིན་ཏུ་དྲགས་པར་བསྟེན་ཅིང་གོམས་པར་གྱུར་ན། ལུས་ཟུངས་དངས་མ་ལ་སོགས་པ་ཟད་ཅིང་འབྱེ་བ་དང༌། རླུང་ལས་གྱུར་བའི་ནད་རྣམས་སྐྱེད་ཅིང་འབྱིན་པ་ཡིན་ནོ། །ཚ་བས་ལྐོག་ནད་འགགས་པ་དང༌། །མཛེ་དང་མ་ཞུ་འོར་ནད་སེལ། །
རྨ་འཇིག་བྱེད་ཅིང་སྣུམ་པ་དང༌། །ཚིལ་དང་འདྲུལ་བག་སྐེམས་པར་བྱེད། །དྲོད་སྐྱེད་འཇུ་ཞིང་ཡི་ག་འབྱེད། །སྦྱོང་ཞིང་ཟས་ནི་འཇིག་པར་བྱེད། །འཆིང་བ་གཅོད་ཅིང་རྩ་སྦུབས་དག །རྣམ་པར་འབྱེད་ཅིང་བད་ཀན་སེལ། །དེ་ནི་ཤིན་ཏུ་དྲགས་གྱུར་བས། །སྐོམ་སྐྱེད་ཁུ་བ་སྟོབས་ཟད་ཅིང༌། །བརྒྱལ་ཞིང་ལུས་འཁུམས་འདར་བ་དང༌། །རྐེད་པ་རྒྱ་བ་སོགས་ན་བར་བྱེད། །ཅེས་བྱ་བ་ལ། རོ་ཚ་བས་ནི་ལྐོག་མའི་ནད་ལ་སོགས་པ་སེལ་བར་བྱེད་དོ། ལྐོག་ནད་ནི་ལྐོག་མའི་ཕྱོགས་སུ་བྱུང་བའི་ནད་དོ། །འགགས་པ་ནི་བྲང་འགགས་ཤིང་བད་ཀན་གྱིས་རྒྱས་པ་ལས་བྱུང་བའི་ནད་ལ་བྱའོ། །ལ་ལ་ནི་གྲང་བའི་འདར་ནད་ལ་ཨུ་དར་དུ་ཞེས་བྱའོ་ཞེས་ཟེར་རོ། །གཞན་དག་ནི་གྲང་པའི་དུས་སུ་ཁྱད་པར་དུ། གྲང་བ་ཆུ་ཡི་རེག་པ་ལས། །ལྐོག་མར་སྐྲངས་པར་གྱུར་པའི་ནད། །གག་བ་ཞེས་བྱ་བད་ཀན་འབྱུང༌། །ཞེས་བཤད་དོ། །མ་ཞུ་བ་ནི་མ་ཞུ་བ་བེའུ་སྣབས་ཅན་ནོ། །རྨ་འཇིག་པར་བྱེད་པ་ནི། རྨ་ཤིན་ཏུ་མཐོ་བའི་སྐྲངས་བག་ཅན་འཛུམ་ཞིང་འབྲི་བར་བྱེད་པའོ། །ཡང་རྨ་འབྱོར་བ་དག་གི་གགས་བྱེད་པའོ། །དེ་བཞིན་དུ་སྣུམ་པ་དང༌། ཚིལ་ལ་སོགས་པ་སྐེམས་ཤིང་འབྲི་བར་བྱེད་པ་དང༌། མེའི་དྲོད་སྐྱེད་ཅིང་འཕེལ་བ་དང༌། མ་ཞུ་བ་ཞུ་བར་བྱེད་པ་དང༌། ཁ་ཟས་ཡི་ག་འབྱེད་པར་བྱེད་པ་དང༌། རྩ་སྦུབས་སྦྱོང་བ་དང༌། ཟས་འཇིག་བར་བྱེད་པ་དང༌། འཆིང་བ་གཅོད་པ་སྟེ། རྣོ་བས་ལྷུ་ཚིགས་ཀྱི་འཆིང་བ་དམ་པོ་ལྷོད་བར་བྱེད་བ་དང༌། རྩ་སྦུབས་ཀྱི་ཁ་རྣམ་བར་འབྱེད་པ་དང༌། བད་ཀན་སེལ་ཞིང་འཇོམས་པ་ཡིན་ནོ། །ཚ་བ་དེ་ཤིན་ཏུ་དྲགས་པར་བསྟེན་ཅིང་ཟོས་པས་ནི་སྐོམ་དད་སྐྱེད་པ་ལ་སོགས་པ་བྱེད་པ་ཡིན་ནོ། །བརྒྱལ་བ་ནི་རྨོངས་བར་གྱུར་པའོ། །ལུས་འཁུམས་བ་ནི་ཡན་ལག་འཇས་བ་ལྟར་གྱུར་བའོ། །དེ་བཞིན་དུ་འདར་བ་དང༌། རྐེད་པ་དང་རྒྱབ་ན་བ་སྟེ། དེ་དག་ཏུ་གཟེར་བ་ལ་སོགས་པ་མི་བཟད་པས་འདེབས་པ་དང༌། སོགས་པའི་སྒྲས་ནི་རྐང་བ་དང༌། རྩིབ་ལོགས་ན་བར་བྱེད་པ་ཡིན་ནོ། །བསྐ་བས་མཁྲིས་བ་བད་ཀན་སེལ། །ལྕི་ཞིང་ཁྲག་ནད་རྣམ་བར་སྦྱོང༌། །སྐེམ་ཞིང་རྨ་འཚོ་བསིལ་བ་དང༌། །འདྲུལ་
དང་ཚིལ་ནི་རྣམ་བར་སྐེམས། །བེའུ་སྣབས་འཁྱིལ་ཅིང་སྲི་བར་བྱེད། །རྩུབ་ཅིང་པགས་མདོག་རབ་དང་བྱེད། །དེ་ནི་ཤིན་ཏུ་བསྟེན་དྲགས་ན། །བཤད་འགགས་ལྟོ་སྦོས་སྙིང་ནད་དང༌། །སྐོམ་དང་སྐེམ་ཞིང་སྐྱེས་མཐུ་ཉམས། །རྩ་སྒོ་འགགས་ཤིང་དྲི་མ་སྲི། །ཞེས་བྱ་བ། རོ་བ་སྐ་བ་བསྟེན་ཅིང་སྤྱད་པས་ནི། མཁྲིས་ཕ་བད་ཀན་སེལ་ཞིང་འཇོམས་པར་བྱེད་པ་དང༌། ལྕི་པའི་ཡོན་ཏན་དང་ལྡན་པ་དང༌། ཁྲག་གི་ནད་རྣམ་པར་སྦྱོང་པ་སོགས་པ་བྱེད་བ་དང༌། བེའུ་སྣབས་འཁྱིལ་ཞིང་ཐོགས་བ་དང༌། བཤད་བ་སྲི་བར་བྱེད་པ་དང༌། དེ་བཞིན་དུ་ཤིན་ཏུ་རྩུབ་པ་དང༌། པགས་པའི་མདོག་རབ་ཏུ་དངས་ཞིང་མདོག་གསལ་བར་བྱེད་པ་ཡིན་ནོ། །རོ་བསྐ་བ་དེ་བསྟེན་པ་དྲགས་ཤིང་ཤས་ཆེར་ཟོས་ན་བཤང་བ་འགག་པ་ལ་སོགས་པ་སྐྱེད་པར་བྱེད་པ་དང༌། སྐྱེས་བུའི་མཐུ་ཉམས་ཤིང་ཁུ་བ་ཟད་པར་འགྱུར་བ་དང། དྲི་མ་སྲི་བ་སྟེ། གཅིན་དང་ཕྱི་ས་འགགས་པར་འགྱུར་བ་ཡིན་ནོ། །མངར་བ་ལ་སོགས་པའི་རྫས་ཀྱི་སྡེ་ཚན་སྨྲས་པ་ནི། ཞུན་མར་བུ་རམ་སྟར་ག་གསེར། །མོ་ཙ་ཙོ་ཙ་པ་རུ་ཤ་།ཉེའུ་ཤིང་ར་མཉེ་བ་ནས། །ར་ཛ་དན་བ་ལ་གསུམ། །མེ་ད་གཉིས་དང་པརྞི་བཞི། །འཚོ་བྱེད་ཛི་བ་རི་ཤོ་བ། །ཤིང་མངར་མ་དུ་ཀ་པིམ་བི། །ཤྲ་བ་ནི་གཉིས་བི་ད་རི། །ཅུ་གང་ཀིཥར་ཤུ་ཀུ་ལ། །ས་ཧ་འོ་ཅན་གཤྨ་རི། །འོ་མ་བུ་རམ་ཤིང་གཟེ་མ། །རྒུན་འབྲུམ་སྦྲང་སོགས་མངར་བའི་སྡེ། །ཞེས་བྱ་བ་ལ། ཞུན་མར་ནས་རྒུན་འབྲུའི་བར་གྱི་སྡེ་ཚན་ནི་རྫས་མངར་བ་སྟེ། སྨན་མངར་པོ་ཡིན་ནོ་ཞེས་བྱ་བའི་དོན་ཏོ། །དེ་ལ་མོ་ཙ་ནི་ཆུ་ཤིང་གི་འབྲས་བུའོ། །ཙོ་ཙ་ནི་རྒྱ་སྐྱེགས་གྱི་འབྲས་བུའོ། །ཉེའུ་ཤིང་ནི་ཨ་བི་རུའོ། །ར་མཉེ་བ་ནས་ནི་བི་རའོ། །ར་ཛ་དན་ནི་བ་ན་ཡ་བྲི་ཡའོ། །བལ་གསུམ་ནི་བལ་དང༌། ཨ་ཏི་བལ་དང༌། ནཱ་གབ་ལའོ། །མེ་ད་གཉིས་ནི་མེད་དང༌། མ་ཧཱ་མེ་དའོ། །པརྞི་བཞི་ནི་སལ་པརྞི་དང༌། ཀྲྀཥྞ་པརྞི་དང༌། མུངྒ་པརྞི་དང༌། མ་ཤ་པརྞིའོ། །འཚོ་བྱེད་ནི་ཛི་བན་ཏིའོ། །ཛི་བ་ཀ་ནི་ཀུར་ཙ་ཤིར་ཤའོ། །རི་ཤོ་བ་ནི་བི་ལ་བར་དྷའོ། །མ་དུ་ཀ་ནི་མ་དུ་ཀའི་མེ་ཏོག་གོ །
བིམ་བི་ནི་ཏུན་ཏ་ཀེ་རིའོ། །ཤྲ་བ་གཉིས་ནི། ཤྲི་བ་ནི་དང༌། མ་ཧཱ་ཤྲི་བའོ། །བི་ད་རི་ནི་ཀཥི་ད་རིའོ། །ཅུ་གང་ནི་ཏུ་ཀ་ཀཥི་རའོ། །ཀཥིར་ཤུ་ཀུ་ལ་ནི། ཀཥི་ར་ཀ་ལོ་ལིའོ། །མཧཱ་གཉིས་ནི་མ་ཧཱ་ས་ཧ་དང༌། ཀྵུ་དས་ཧའོ། །འོ་མ་ཅན་ནི་འོ་མ་ཡོད་བའི་ཕྱིར་འོ་མ་ལ་སོགས་པའོ། །ཀཤྨ་རི་ནི་ཀད་པ་ལའོ། །གཞན་ནི་གོ་བར་ཟད་དོ། །སྐྱུར་བ་སྐྱུ་རུ་ཨམིལ་ཀ །བ་ལུང་དང་ནི་སྟར་བུ་དང༌། །སེའུ་འབྲུ་རྡུལ་དང་དར་བ་དང༌། །ཚ་དང་ཀུ་ཤུ་ཨ་མྲ་དང༌། །ཨམལ་ཏ་ཀ་བྷ་བྱ་དང༌། །ཀར་མ་རྡ་ཀ་བིད་ཐའོ། །ཞེས་བྱ་བ་ལ། སྐྱུར་ར་ནས་ཀ་བིད་ཐའི་བར་གྱི་སྡེ་ཚན་འདི་ནི་སྨན་སྐྱུར་བའི་སྡེ་ཚན་ཡིན་ནོ། །ཨམླི་ཀ་ནི་ཙུ་ཀྲི་ཀའོ། །བ་ལུང་ནི་པི་ཟ་པུ་རའོ། །གཞན་ནི་གོ་བར་ཟད་དོ། །ཚ་མཆོག་རྩལ་རུ་ཁ་རུ་ཚ། །བིད་རྒྱ་མཚོ་བཀོད་པའི་ཚ། །མཚོ་ཚ་སྐམ་ཚ་རོ་ཉེ་དང༌། །ཀཥ་ར་ལན་ཚྭའི་སྡེ་ཚན་ཡིན། །ཞེས་བྱ་བ་ལ། ཚ་མཆོག་ནས་ལན་ཚྭའི་བར་ནི། ཚའི་སྡེ་ཚན་གྱི་སྨན་གྱི་།ཚོགས་སོ། །ཚ་མཆོག་ནི་རྒྱམ་ཚ་དང༌། ལྕེ་མྱང་ཚའོ། །རྩལ་རུ་ཚ་ནི་སོ་བར་ཙ་ལ་སྟེ། མིང་གི་རྣམ་གྲངས་རུ་ཙིཀ་ཞེས་བྱའོ། །ཁ་རུ་ཚ་ནི་ཚ་ནག་པོའོ། །བིད་ནི་ཁ་རུ་ཚ་ནག་པོ་དྲི་མི་ཞིམ་པའོ། །རྒྱ་མཚོའི་ཚ་ནིས་མུ་ཏྲ་ལ་ཝ་ནའོ། །རོ་ཉེ་ཞེས་བྱ་བ་ནི་ཞ་ཉེ་ནག་པོའོ། །ཀཥ་རིན་སརྫི་ཀ་དང༌། ཡ་བཀྵ་ལ་སོགས་པའོ། །ཁ་བ་ཀྱི་ལྕེ་པ་ཏོ་ལ། །ཙནྡན་ཨུར་ཤི་བ་ལེ་ཀ །ཅི་སྐྲིགས་ནིམ་པ་པུ་ཙེ་ཤེལ། །རྒྱ་སྤོས་ཨ་ཀར་བ་ཙཀ །ནག་ཏ་མལ་སེར་པོ་གཉིས། །གླ་སྒང་མུར་བ་བ་ཤ་ཀ །ཨ་པ་མརྒ་པོ་སོན་ཆ། །འཁར་ལྕགས་སླེ་ཏྲེས་བྱི་ཚེར་བ། །རྩ་བ་ཆེ་ལྔ་བྱ་གྲི་གཉིས། །བོང་ང་ཤུ་དག་བི་ཤལ། །ཞེས་བྱ་བ་ལ། ཀྱི་ལྕེ་བ་ནས་བི་ཤ་ལའི་བར་གྱི་སྡེ་ཚན་འདི་ནི་སྨན་ཁ་བའི་སྡེ་ཚོམས་སོ། །ཅི་སྐྲིགས་ནི་ཀ་རི་ཏ་ཏིག་ཏའོ། །ནག་ཏ་མ་ལ་ནི་ཀ་རཉྫའོ། །སེར་པོ་གཉིས་ནི་ཡུང་བ་དང་སྐྱེར་བའོ། །བ་ཤ་ཀ་ནི་ཨང་ཏ་རུ་ཤ་ཀའོ། །བྱི་ཚེར་བ་ནི་དུར་ལ་བའོ། །རྩ་བ་ཆེན་པོ་ལྔ་ནི། བིལ་བ་དང་ཀ་ཀཥ་རི་ལ་སོགས་པའོ། །བྱ་གྲི་ནི་བྲི་ཧ་ཏི་དང༌། ཀཎྜ་ཀ་རིའོ། །ཚ་བ་ཤིང་ཀུན་ན་ལེ་ཤམ། །བྱི་དང་ག་དང་ཚ་བ་ལྔ། །ཀུ་ཐེར་སོགས་
ལྡུམ་རྔད་སྔོ། །མཁྲིས་བ་གཅིན་དང་གོ་བྱེ་ཡིན། །ཞེས་བྱ་བ་ལ། ཤིང་ཀུན་ནས་གོ་བྱེའི་བར་གྱི་སྡེ་ཚན་འདི་ནི། སྨན་ཚ་བའི་སྡེ་ཚན་ཡིན་ནོ་ཞེས་བྱ་བའི་དོན་ཏོ། །ཚ་བ་ལྔ་ནི་བི་བི་ལིང་དང༌། པི་པི་ལིང་མཱུ་ལ་དང༌། དབྱི་མོང་དང༌། ཙི་ཏྲ་ཀ་དང༌། བཅའ་སྒའོ། །ཀུ་ཐེ་ར་སོགས་ལྡུམ་རྔད་སྔོ་ཞེས་བྱ་བ་ནི་ཚོད་མའི་ནང་ནས་ལྡུམ་གྱི་སྔོ་རྔད་ཀུ་ཐེ་ར་དང༌། ཤི་ཀྲུ་དང༌། བྱིའུ་རུག་པ་ལ་སོགས་པའོ། །མཁྲིས་པ་ནི་རི་དགས་དང་བྱ་ལ་སོགས་པའི་མཁྲིས་པའོ། །གཅིན་ནི་བ་ལང་དང་ར་ལུག་ལ་སོགས་པའི་གཅིན་རྣམ་པ་བརྒྱད་དོ། །གོ་བྱེ་བ་ནི་པ་ལ་ཀ་ཞེས་བྱ་བ་བསེ་ཤིང་འབྲས་བུའོ། །བསྐ་ཚན་ཨ་རུ་བ་རུ་ར། །སྦྲང་རྩི་སེང་ལྡེང་ཤི་རི་ཤ་།ཀ་དམ་ཨུ་དུམྦཱ་ར་དང༌། །མུ་ཏིག་བྱི་རུ་ཨན་ཙན་བཙག །ཀ་བིད་ཏ་གཞོན་ཁར་ཛུ་ར། །པད་ཙ་པདྨ་ཨུཏྤ་ལའོ། །ཞེས་བྱ་བ་ལ། ཨ་རུ་ར་ནས་ཨུཏྤ་ལའི་བར་གྱི་སྡེ་ཚན་འདི་ནི་རོ་བསྐ་བའི་སྨན་གྱི་ཚོགས་སོ། །ཨན་ཙན་ནི་ལིག་བུ་མིག་དང་དངུལ་རྡོའོ། །བཙག་ནི་སུ་བར་ན་གི་རི་སྟེ། བཙག་ཡུག་སྣམ་མོ། །ཀ་བིད་ཐ་གཞོན་ཞེས་བྱ་བ་ནི་བ་ལི་ཀ་བིད་ཐ་གཞོན་ནུའོ། །ཁར་ཛུ་ར་ཞེས་བྱ་བ་ནི་ཀ་བིད་ཐ་རློན་པ་དང༌། ཁར་ཛུ་ར་མ་སྨིན་པའོ། །འབྲས་རྙིང་ནས་རྙིང་གྲོ་རྙིང་དང༌། །མུངྒ་སྦྲང་རྩི་ཤ་ཁ་ར། །སྐམ་སའི་ཤ་རྣམས་མ་གཏོགས་པའི། །མངར་བ་ཕལ་ཆེར་བད་ཀན་སྐྱེད། །ཅེས་བྱ་བ་ལ། མར་ལ་སོགས་པའི་སྨན་རོ་མངར་འཕལ་མོ་ཆེ་དེ་དག་ནི། བད་ཀན་སྐྱེད་ཅིང་འཕེལ་བར་བྱེད་པ་ཡིན་མོད་ཀྱི། འབྲས་རྙིང་པ་དང༌། ནས་རྙིང་པ་དང༌། གྲོ་རྙིང་པ་དང༌། སྲན་མུངྒ་སྟེ། མོན་སྲན་སྡེའུ་དང༌། སྦྲང་རྩི་དང༌། ཤ་ཁ་ར་དང༌། སྐམ་སའི་ཤ་རྣམས་ནི་མ་གཏོགས་ཏེ། འདི་དག་མངར་ཡང་བད་ཀན་མི་སྐྱེད་ཀྱི། དེ་ལས་གཞན་པའི་མངར་བ་ཕལ་ཆེར་བད་ཀན་སྐྱེད་བ་ཡིན་ནོ། །སྐྱུ་རུ་སི་འབྲུམ་གཏོགས་བའི། །སྐྱུར་བ་ཕལ་ཆེར་མཁྲིས་པ་སྐྱེད། །ཅེས་བྱ་བ་ལ། གང་སྐྱུར་བའི་སྨན་ཕལ་ཆེར་ཞེས་བ་མང་དུ་སྟེ། མ་དུ་ལུང་ག་ལ་སོགས་པ་གང་ཡིན་བདེ་ཐམས་ཅད་མཁྲིས་པ་སྐྱེད་ཅིང་འཕེལ་བར་བྱེད་པ་ཡིན་མོད་ཀྱི། རྒྱམ་ཚ་ལྕེ་མྱང་
ཚ་མ་གཏོགས། །ལན་ཚྭ་ཕལ་ཆེར་མིག་ལ་གནོད། །ཅེས་བྱ་བ་ལ། རྒྱམ་ཚ་དང༌། ལྕེ་མྱང་ཚ་ནི་མིག་ལ་ཕན་ནོ་ཞེས་དོན་གྱི་ཤུགས་ཀྱིས་སྟོན་པ་ཡིན་ནོ། །སླེ་ཏྲེས་བ་ཏོ་ལ་བཅའ་སྒ། །སྒོག་སྐྱ་པི་པི་ལིང་མ་གཏོགས། །ཁ་དང་ཚ་བ་ཕལ་ཆེར་ནི། །རོ་ཙ་འདྲི་ཞིང་རླུང་སྐྱེད་ཡིན། །ཞེས་བྱ་བ་ལ། སྨན་ཁ་བ་དང་ཚ་བ་ཐམས་ཅད་ལས་ཕལ་ཆེར་ཏེ་རོ་ཙ་ཞིང་ཁུ་བ་འཕེལ་བ་ལ་གནོད་ཅིང་འབྲི་བར་བྱེད་བ་དང༌། དེ་བཞིན་དུ་རླུང་སྐྱེད་པར་བྱེད་པ་ཡིན་མོད་ཀྱི། གཞན་དུ་ན་སྨན་ཁ་བའི་ནང་ན་སླེ་ཏྲེས་དང༌། པ་ཏོ་ལ་མ་གཏོགས་པ། སྨན་ཚ་བ་རྣམས་ཀྱི་ནང་ན་བཅའ་སྒ་དང། སྒོག་སྐྱ་དང༌། པི་པི་ལིང་སྟེ། གསུམ་མ་གཏོགས་པ་སྨན་ཁ་བ་དང༌། ཚ་བ་གཞན་དག་ནི་རོ་ཙ་བ་འབྲི་ཞིང་རླུང་སྐྱེད་པ་ཡིན་ཞིང༌། ལྔ་པོ་དེ་དག་ནི་རོ་ཙ་བར་བྱེད་བ་ཡིན་ལ། རླུང་འཇོམས་པ་ཡིན་ནོ། །བསྐ་ལས་ཨ་རུ་ར་མ་གཏོགས། །ཕལ་ཆེར་བསིལ་ཞིང་སྲི་བར་བྱེད། །ཅེས་བྱ་བ་ལ། སྨན་བསྐ་བ་ཤི་རི་ཤ་ལ་སོགས་པ་ཐམས་ཅད་ལས་ཕལ་ཆེར་ཏེ། མང་དུ་བསིལ་བའི་ནུས་པ་དང་ལྡན་ཞིང༌། བཤང་བ་ལ་སོགས་པ་སྲི་བར་བྱེད་བ་ཡིན་མོད་ཀྱི། ཨ་རུ་ར་མ་གཏོགས་ཏེ། དེ་ནི་ནུས་པ་དྲོ་ཞིང་འཁྲུ་བར་བྱེད་པ་ཡིན་ནོ། །རོ་ཚ་སྐྱུར་དང་ལན་ཚྭ་རྣམས། །གོ་རིམས་བཞིན་དུ་དྲོ་ནུས་ལྡན། །ཞེས་བྱ་བ་ལ། རོ་ཚ་བ་དང༌། སྐྱུར་བ་དང༌། ལན་ཚྭ་རྣམས་ནི་གོ་རིམས་བཞིན་ཏེ། རིམ་པ་མ་འཆོལ་བར་ཚ་བའི་ནུས་པ་དང་ལྡན་པ་ཡིན་ཏེ། དེ་ཡང་ཚ་བ་ནི་ཚ་ཞིང་དྲོ་བ་ཡིན་ལ། སྐྱུར་བ་ནི་རབ་ཏུ་ཚ་བ་ཡིན་ཏེ། ལན་ཚྭ་ནི་མཆོག་ཏུ་དྲོ་བའི་ནུས་པ་དང་ལྡན་པ་ཡིན་ནོ། །ཁ་དང་བསྐ་དང་མངར་བ་རྣམས། །དེ་བཞིན་དུ་ནི་བསིལ་བ་ཉིད། །ཅེས་བྱ་བ་ལ། རོ་ཁ་བ་དང་བསྐ་བ་དང་མངར་བ་རྣམས་ནི་དེ་བཞིན་དུ་ཞེས་པ། གོ་རིམས་སྔ་མ་བཞིན་དུ་བསིལ་བའི་ནུས་པ་དང་ལྡན་པ་ཡིན་གྱི་ཁ་བ་ནི་བསིལ་བ་ཡིན་ལ། བསྐ་བ་ནི་རབ་ཏུ་བསིལ་བ་ཡིན། མངར་བ་ནི་མཆོག་ཏུ་བསིལ་བ་ཡིན་ནོ། །ཁ་དང་ཚ་དང་བསྐ་བ་རྣམས། །དེ་བཞིན་རྩུབ་ཅིང་དྲི་མ་སྲི། །ཞེས་བྱ་བ་ལ། རོ་ཁ་བ་དང༌། ཚ་བ་དང༌། བསྐ་བ་རྣམས་ནི་དེ་བཞིན་དུ་ཞེས་པ་གོ་རིམས་ཇི་ལྟ་བ་བཞིན་དུ་རྩུབ་ཅིང་དྲི་མ་
སྲི་བར་བྱེད་པ་ཡིན་ཏེ། ཁ་བ་ནི་རྩུབ་པ་དང་དྲི་མ་སྲི་བར་བྱེད་པ་ཡིན་ལ། ཚ་བ་ནི་རབ་ཏུ་རྩུབ་ཅིང་རབ་ཏུ་དྲི་མ་སྲི་བ་ཡིན་ཏེ། བསྐ་བ་ནི་ཤིན་ཏུ་རྩུབ་ཅིང་དྲི་མ་སྲི་བ་ཡིན་ནོ། །ལན་ཚྭ་སྐྱུར་མངར་སྣུམ་བ་དང༌། །བཤང་གཅི་ཐུར་གྱི་དབུགས་འབྱིན་བྱེད། །ཅེས་བྱ་བ་ལ། རོ་ལན་ཚྭ་དང༌། སྐྱུར་བ་དང༌། མངར་བ་རྣམས་ནི་སྣུམ་པ་དང༌། བཤང་གཅི་དང་ཐུར་གྱི་དབུགས་འབྱིན་ཅིང་འདོན་པར་བྱེད་པ་ཡིན་ལ། གོ་རིམས་བཞིན་ཞེས་བྱ་བ་འདིར་ཡང་སྦྱར་བར་བྱ་སྟེ། ལན་ཚྭ་ནི་སྣུམ་པ་དང༌། བཤང་གཅི་དང་ཕྱི་རོལ་གྱི་དབུགས་འབྱིན་པར་བྱེད་པ་ཡིན་ལ། སྐྱུར་བ་ནི་རབ་ཏུ་སྣུམ་པ་དང༌། བཤང་བ་དང་གཅི་བ་དང་ཕྱི་རོལ་གྱི་དབུགས་རབ་ཏུ་འབྱིན་པར་བྱེད་པ་ཡིན་ནོ། །མངར་བ་ནི་ཤིན་ཏུ་སྣུམ་པ་དང༌། བཤང་བ་དང་གཅི་བ་དང་ཕྱི་རོལ་གྱི་དབུགས་ཤིན་ཏུ་འབྱིན་བར་བྱེད་པ་ཡིན་ནོ། །ལན་ཚྭ་ལས་བསྐ་དེ་བས་ཀྱང༌། །མངར་བ་མཆོག་ཏུ་ལྕི་བ་ཡིན། །ཞེས་བྱ་བ་ལ། རོ་ལན་ཚྭ་ལས་ནི་རོ་བསྐ་བ་ལྕི་བ་ཡིན་ལ། དེ་བས་ཀྱང་ཞེས་བྱ་བ། རོ་བསྐ་བ་བས་ཀྱང་རོ་མངར་བ་མཆོག་ཏུ་ལྕི་བ་ཡིན་ནོ་ཞེས་བྱ་བའི་དོན་ནོ། །སྐྱུར་ལས་ཚ་དང་དེ་བས་ཀྱང༌། །ཁ་བ་དག་ནི་ཡང་བ་ཡིན། །ཞེས་བྱ་བ་ལ། རོ་སྐྱུར་བ་ནི་ཡང་བ་ཡིན་ལ། དེ་བས་ཀྱང་ཚ་བ་ཡང་བ་ཡིན་ཞིང་རོ་ཚ་བ་དེ་ལས་ཀྱང་ཁ་བ་དག་ཡང་བ་ཡིན་ནོ། །རོ་རྣམས་ཀྱི་དབྱེ་བ་བཤད་པ་ནི། རོ་རྣམས་ཀྱིས་ནི་དབྱེ་བ་ལས། །སྦྱོར་བ་ལྔ་བཅུ་རྩ་བདུན་དང༌། །བརྟག་པ་དྲུག་ཅུ་རྩ་གསུམ་དུ། །རགས་རིམ་ཇི་བཞིན་ཕྱེ་བ་ཡིན། །ཞེས་བྱ་བ་ལ། རོ་རྣམས་ཀྱི་གཞི་བོ་སྨན་གྱི་སྦྱོར་བ་བྱས་པ་ལས་འོག་ནས་བཤད་པའི་ཚུལ་དུ་ཕན་ཚུན་འདྲེས་པའི་སྦྱོར་བ་བྱས་ཤིང་རྣམ་པར་ཕྱེ་བ་ལས་སྦྱོར་བ་ལྔ་བཅུ་རྩ་བདུན་ཐ་དད་པར་བྱ་བ་ཡིན་པ་དང༌། ཡང་འདི་རྣམས་ལ་བརྟག་པ་དྲུག་ཅུ་རྩ་གསུམ་དུ་ཕྱེ་བ་ཡིན་ནོ། །ཇི་ལྟར་བྱས་ནས་རོ་རྣམས་ཀྱི་སྦྱོར་བ་ལྔ་བཅུ་རྩ་བདུན་དང༌། བརྟག་པ་དྲུག་ཅུ་བྱས་པ་ཡིན་ཞེ་ན། རགས་རིམ་ཇི་བཞིན་ཞེས་བྱ་བ་ཡིན་ཏེ། རགས་པའི་གོ་རིམས་ལ་ལྟོས་ཤིང་མཚོན་ནས། རོ་གསལ་བར་མྱང་བའི་ཚུལ་དང༌། །
རྗེས་སུ་མཐུན་པར་བྱས་པ་ཡིན་གྱི། རོ་ཕྲ་མོ་ཡན་ཆད་རབ་དང་མཆོག་གི་དབྱེ་བ་ལས་ནི་རོ་མཐའ་ཡས་པ་ཡིན་པས། ཕྲ་མོ་རྣམས་ཀྱི་དབང་དུ་བྱས་བ་ནི་མ་ཡིན་ནོ། །དེ་ཡང་ཇི་ཙམ་ཞིག་ལུས་ལས་དགོས་པ་ཡོད་པ་དེ་ཙམ་གྱི་རགས་རིམ་ཇི་ལྟ་བ་བཞིན་དུ་ཕྱེ་ཞིང་གྲངས་སུ་ཆད་པར་བྱས་པ་ཡིན་ནོ། །སྦྱོར་བ་ཉིད་རོ་གཉིས་ལ་སོགས་པའི་དབྱེ་བས་བཤད་པ་ནི། དེ་ལྔ་རེ་རེ་ཕྲི་བ་ལས། །ལྔར་གྱུར་བ་ནི་རོ་གཉིས་པ། །ཞེས་བྱ་བ་ལ། རོ་གཉིས་སྦྱར་བ་ནི་གཉིས་པ་སྟེ། རོའི་གཞི་སྨན་དང་འབྲེལ་པའི་སྦྱོར་བ་གཉིས་པ་དེ་ལ་རོ་ལྔ་པོ་དེ་དག་གི་སྦྱོར་བ་བྱས་པ་ལས་འགྱུར་ཏེ། ཇི་ལྟར་འགྱུར་ཞེ་ན། རེ་རེ་ཕྲི་བ་ལས་གྱུར་ཏེ། མངར་བ་ཕྲི་བའི་སྐྱུར་བ་ལ་སོགས་པ་དང༌། སྐྱུར་བ་ཕྲི་བའི་ལན་ཚྭ་ལ་སོགས་པ་དང༌། ཁ་བ་ཕྲི་བའི་ཚ་བ་དང་བསྐ་བ་གཉིས་དང༌། ཚ་བ་ཕྲི་བའི་བསྐ་བའོ། །དེ་ལྟར་ན་མངར་བ་ལ་སོགས་པའི་རོ་རེ་རེ་ཕུལ་བའི་རོ་ལྔ་ནི་སྦྱོར་བའི་དོན་དུ་འགྲོ་བར་བྱེད་པ་ཡིན་ནོ། །སྐྱུར་བ་ལ་སོགས་པ་ནི་སྦྱོར་བར་བྱེད་པ་ཡིན་ཏེ། དེ་ཡང་འདི་ལྟ་སྟེ། མངར་བ་དང་སྐྱུར་བར་སྦྱར་བ་དང༌། མངར་བ་དང་ལན་ཚྭ་སྦྱར་བ་དང༌། མངར་བ་དང་ཁ་བ་སྦྱར་བ་དང༌། མངར་བ་དང་ཚ་བ་སྦྱར་བ་དང༌། མངར་བ་དང་བསྐ་བ་སྦྱར་བར་བྱ་སྟེ། དེ་ལྟར་ན་མངར་བ་དབྱེ་བ་རྣམ་པ་ལྔར་འགྱུར་རོ། །སྐྱུར་བའི་གཉིས་པ་ནི་མངར་བ་ལ་ལྟོས་ནས་རེ་རེ་ཕྲི་བར་གྱུར་ན། དབྱེ་བ་རྣམ་པ་གསུམ་དུ་འགྱུར་བ་ནི་འདི་ལྟ་སྟེ། ལན་ཚྭ་དང་ཁ་བར་སྦྱར་བ་དང༌། ལན་ཚྭ་དང་ཚ་བར་སྦྱར་བ་དང༌། ལན་ཚྭ་དང་བསྐ་བར་སྦྱར་བ་སྟེ། དེ་ལྟར་ན་ལན་ཚྭའི་གསུམ་པར་འགྱུར་རོ། །ཁ་བའི་གཉིས་པ་ནི་ལན་ཚྭ་ལ་ལྟོས་ནས། རེ་རེ་ཕྲི་བར་གྱུར་ན་དབྱེ་བ་རྣམ་པ་གཉིས་སུ་འགྱུར་བ་ནི་འདི་ལྟ་སྟེ། ཁ་བ་དང་ཚ་བར་སྦྱར་བ་དང༌། ཁ་བ་དང་བསྐ་བར་སྦྱར་བར་བྱའོ། །ཚ་བ་དང་ཁ་བ་ལ་ལྟོས་ནས་གཅིག་ཕྲི་བར་གྱུར་ན། དབྱེ་བ་རྣམ་པ་གཅིག་ཏུ་འགྱུར་ཏེ། ཚ་བ་དང་བསྐ་བར་སྦྱར་བར་བྱའོ། །དེ་ལྟར་ན་གཉིས་པ་དེ་དག་དབྱེ་བ་རྣམ་པ་བཅོ་ལྔར་འགྱུར་རོ། །གསུམ་པ་མངར་བཅུ་སྐྱུར་དྲུག་སྟེ། །ལན་ཚྭ་གསུམ་སྟེ་ཁ་བ་གཅིག །བཞི་པ་ལ་ནི་མངར་པོ་
བཅུ། །སྐྱུར་པ་བཞི་པོ་ལན་ཚྭ་གཅིག །ཅེས་བྱ་བ་ལ། གསུམ་པ་མངར་བཅུ་ཞེས་བྱ་བ་ལ། སྨན་གྱི་རོ་གསུམ་པ་ལ། རོ་མངར་བ་དབྱེ་བ་རྣམ་པ་བཅུར་འགྱུར་ཏེ། དེ་ཡང་འདི་ལྟར་མངར་བ་དང༌། སྐྱུར་བ་དང༌། ལན་ཚྭར་སྦྱར་བ་དང༌། མངར་བ་དང་སྐྱུར་བ་དང་ཁ་བར་སྦྱར་བ་དང༌། མངར་བ་དང་སྐྱུར་བ་དང་ཚ་བར་སྦྱར་བ་དང༌། མངར་བ་དང་སྐྱུར་བ་དང་བསྐ་བར་སྦྱར་བ་དང༌། མངར་བ་དང་ལན་ཚྭ་དང་ཁ་བར་སྦྱར་བ་དང༌། མངར་བ་དང་ལན་ཚྭ་དང་ཚ་བར་སྦྱར་བ་དང༌། མངར་བ་དང་ལན་ཚྭ་དང་བསྐ་བར་སྦྱར་བ་དང། །མངར་བ་དང་ཁ་བ་དང་ཚ་བར་སྦྱར་བ་དང༌། མངར་བ་དང་ཁ་བ་དང་བསྐ་བར་སྦྱར་བ་དང༌། མངར་བ་དང་ཚ་བ་དང་བསྐ་བར་སྦྱར་བ་སྟེ། དེ་ལྟར་ན་བཅུའོ། །སྐྱུར་དྲུག་སྟེ་ཞེས་བྱ་བ་ནི། རོ་སྐྱུར་བ་གསུམ་པའི་དབྱེ་བ་དྲུག་ཏུ་འགྱུར་བ་ནི་འདི་ལྟ་སྟེ། སྐྱུར་བ་དང་ལན་ཚྭ་དང་ཁ་བར་སྦྱར་བ་དང༌། སྐྱུར་བ་དང་ལན་ཚྭ་དང་ཚ་བར་སྦྱར་བ་དང༌། སྐྱུར་བ་དང་ལན་ཚྭ་དང་བསྐ་བར་སྦྱར་བ་དང༌། སྐྱུར་བ་དང་ཁ་བ་དང་ཚ་བར་སྦྱར་བ་དང༌། སྐྱུར་བ་དང་ཁ་བ་དང་བསྐ་བར་སྦྱར་བ་དང༌། སྐྱུར་བ་དང་ཚ་བ་དང་བསྐ་བར་སྦྱར་བ་སྟེ། དེ་ལྟར་ན་དྲུག་གོ །ལན་ཚྭ་གསུམ་ཞེས་བྱ་བ་ནི། ལན་ཚྭའི་གསུམ་པ་ནི་དབྱེ་བ་རྣམ་པ་གསུམ་དུ་གྱུར་པ་ནི་འདི་ལྟ་སྟེ། ལན་ཚྭ་དང་ཁ་བ་དང་ཚ་བར་སྦྱར་བ་དང༌། ལན་ཚྭ་དང་ཁ་བ་དང་བསྐ་བར་སྦྱར་བ་དང༌། ལན་ཚྭ་དང་ཚ་བ་དང་བསྐ་བར་སྦྱར་བ་སྟེ། དེ་ལྟར་ན་དབྱེ་བ་རྣམ་པ་གསུམ་དུ་འགྱུར་རོ། །ཁ་བ་གཅིག་པུ་ཉིད་ཅེས་བྱ་བ་ནི་རོ་ཁ་བ་ནི་ཁ་བ་དང་ཚ་བ་དང༌། བསྐ་བར་སྦྱར་བ་སྟེ། དབྱེ་བ་གཅིག་པུ་ཉིད་དུ་འགྱུར་རོ། །དེ་ལྟར་ན་གསུམ་པ་ཉི་ཤུར་འགྱུར་རོ། །བཞི་པ་ལ་ནི་མངར་པོ་བཅུ་ཞེས་བྱ་བ་ནི། བཞི་པ་ལ་ནི་ཞེས་བྱ་བ་དབྱེ་བ་བཞི་པ་ཅན་ལ་རོ་མངར་བ་དབྱེ་བ་བཅུར་འགྱུར་རོ། །དེ་ཡང་འདི་ལྟ་སྟེ། མངར་བ་དང་སྐྱུར་བ་དང༌། ལན་ཚྭ་དང་ཁ་བར་སྦྱར་བ་དང༌། མངར་བ་དང་སྐྱུར་བ་དང་ལན་ཚྭ་དང་ཚ་བར་སྦྱར་བ་དང༌། མངར་བ་དང་སྐྱུར་བ་དང་ལན་ཚྭ་དང་བསྐ་བར་སྦྱར་བ་དང༌། མངར་བ་དང་སྐྱུར་བ་དང་ཁ་བ་དང་ཚ་བར་སྦྱར་བ་
དང། མངར་བ་དང་སྐྱུར་བ་དང་ཁ་བ་དང་ལན་ཚྭར་སྦྱར་བ་དང༌། མངར་བ་དང་སྐྱུར་བ་དང་ཁ་བ་དང་བསྐ་བར་སྦྱར་བ་དང༌། མངར་བ་དང་སྐྱུར་བ་དང་ཚ་བ་དང་བསྐ་བར་སྦྱར་བ་དང༌། མངར་བ་དང་སྐྱུར་བ་དང་ཁ་བ་དང་བསྐ་བར་སྦྱར་བ་དང༌། མངར་བ་དང་ལན་ཚྭ་དང་ཚ་བ་དང་བསྐ་བར་སྦྱར་བ་དང༌། མངར་བ་དང་ལན་ཚྭ་དང་ཁ་བ་དང་བསྐ་བར་སྦྱར་བ་སྟེ། དེ་ལྟར་ན་དབྱེ་བ་རྣམ་པར་བཅུར་འགྱུར་རོ། །སྐྱུར་བ་བཞི་པོ་ཞེས་བྱ་བ་ནི། སྐྱུར་བ་བཞི་པོ་དབྱེ་བ་བཞིར་འགྱུར་བ་ནི་འདི་ལྟ་སྟེ། སྐྱུར་བ་དང༌། ལན་ཚྭ་དང་ཁ་བ་དང་ཚ་བར་སྦྱར་བ་དང༌། སྐྱུར་བ་དང་ལན་ཚྭ་དང་ཁ་བ་དང་བསྐ་བར་སྦྱར་བ་དང༌། སྐྱུར་བ་དང་ལན་ཚྭ་དང་ཚ་བ་དང་བསྐ་བར་སྦྱར་བ་དང༌། སྐྱུར་བ་དང་ཁ་བ་དང་ཚ་བ་དང་བསྐ་བར་སྦྱར་བ་སྟེ་དེ་ལྟར་ན་དབྱེ་བ་རྣམ་པ་བཞིར་འགྱུར་རོ། །ལན་ཚྭ་སྣ་གཅིག་ཅེས་བྱ་བ་ནི། རོ་ལན་ཚྭའི་བཞི་པ་ནི། དབྱེ་བ་གཅིག་ཏུ་འགྱུར་ཏེ། ལན་ཚྭ་དང་ཚ་བ་དང་ཁ་བ་དང་བསྐ་བར་སྦྱར་རོ། །དེ་ལྟར་ན་དབྱེ་བ་རྣམ་པ་བཅོ་ལྔར་འགྱུར་རོ། །ལྔ་པ་ལ་ནི་སྐྱུར་གཅིག་པུ། །མངར་བ་ལྔ་ལ་བསྟེན་པ་ཡིན། །ཞེས་བྱ་བ་ནི། དབྱེ་བ་རྣམ་པ་ལྔ་ནི། རོ་སྐྱུར་བའི་དབྱེ་བ་གཅིག་པུ་བསྟེན་པ་ནི་འདི་ལྟ་སྟེ། སྐྱུར་བ་དང། ལན་ཚྭ་དང༌། ཁ་བ་དང༌། ཚ་བ་དང་བསྐ་བར་སྦྱར་བར་བྱའོ། །ལྔ་པ་ལ་རོ་མངར་བ་ནི་དབྱེ་བ་ལྔ་བསྟེན་ཅིང་གནས་པ་ཡིན་ཏེ། འདི་ལྟར་མངར་བ་དང་སྐྱུར་བ་དང་ལན་ཚྭ་དང་ཁ་བ་དང་ཚ་བར་སྦྱར་བ་དང༌། མངར་བ་དང་སྐྱུར་བ་དང་ལན་ཚྭ་དང་ཁ་བ་དང་བསྐ་བར་སྦྱར་བ་དང། མངར་བ་དང་ལན་ཚྭ་དང་ཁ་བ་དང་ཚ་བ་དང་བསྐ་བར་སྦྱར་བ་དང༌། མངར་བ་དང་སྐྱུར་བ་དང་ཁ་བ་དང་ཚ་བ་དང་བསྐ་བར་སྦྱར་བ་དང༌། མངར་བ་དང་སྐྱུར་བ་དང་ལན་ཚྭ་དང་ཚ་བ་དང་བསྐ་བར་སྦྱར་བ་སྟེ། དེ་ལྟར་རྣམ་པ་ལྔ་དང༌། སྔ་མ་དང་བཅས་པ་ལྔ་པ་དབྱེ་བ་དྲུག་ཏུ་འགྱུར་རོ། །སྨན་ནི་རོ་དྲུག་གཅིག་པུ་ཡིན། །ཞེས་བྱ་བ་ནི། སྨན་ནི་རོ་དྲུག་ཅེས་བྱ་བ་གཅིག་བུར་འགྱུར་བ་ཡིན་ཏེ། མངར་བ་དང་སྐྱུར་བ་དང༌། ལན་ཚྭ་དང༌། ཁ་བ་དང༌། ཚ་བ་དང༌། བསྐ་བ་སྟེ། སྤྱིར་གཅིག་བུ་ཁོ་ནར་འདུས་ཤིང་གཅིག་ཏུ་འགྱུར་
བ་ཡིན་ནོ། །དེ་ལྟར་ན་སྦྱོར་བ་ནི་ལྔ་བཅུ་རྩ་བདུན་དུ་འགྱུར་བ་ཡིན་ནོ། །མ་འདྲེས་བ་ནི་རོ་དྲུག་འགྱུར། །ཞེས་བྱ་བ་ལ། མ་འདྲེས་པ་ནི་གཅིག་དང་གཉིས་ལ་སོགས་པའི་སྦྱོར་བ་དང་འབྲེལ་ཏེ། གཅིག་པུ་ཉིད་དུ་ནི་རོ་དྲུག་ཏུ་འགྱུར་ཏེ། མངར་བ་དང༌། སྐྱུར་བ་དང༌། ལན་ཚྭ་དང༌། ཁ་བ་དང༌། ཚ་བ་དང༌། བསྐ་བའོ། །དེ་རྣམས་བྱེ་བྲག་གི་ཆོགས་ཉེ་བར་སྦྱར་བ་ཡིན་ལ། བྱེ་བྲག་དེ་ནི་སྣུམ་གྱི་ཆོ་ག་ལ་དྲུག་ཅུ་རྩ་གསུམ་དུ་འགྱུར་ཏེ། དེ་ཡང་རོ་དབྱེ་བ་དེ་གཉིས་གཅིག་པུ་གཉིས། དྲུག་ཅུ་རྩ་གསུམ་དག་ཏུ་བརྟག །སྣུམ་གྱིས་གཞན་དག་ཟིལ་མནན་ཅིང༌། །ཉུང་བ་ཉིད་ཀྱི་རིམ་ལས་བཤད། །ཅེས་འབྱུང་བ་ཡིན་ནོ། །དབྱེ་བ་དེ་དག་བྱེ་བྲག་དྲན་པར་བྱ་བའི་ཕྱིར་ཚིགས་སུ་བཅད་པར་བསྡུས་ཏེ་སྨྲས་པ་ནི། ལྔ་པ་དྲུག་དང་རོ་ནི་ཐ་དད་དྲུག །བཞི་པ་གཉིས་པ་རྣམ་པ་བཅོ་ལྔ་ཡིན། །དབྱེ་བ་གསུམ་པ་ཉི་ཤུ་གཅིག་ཉིད་དེ། །སྨན་ནི་རོ་དྲུག་དེ་ལྟར་དྲུག་ཅུ་གསུམ། །ཞེས་བྱ་བ་ལ། རོ་ལྔའི་སྦྱོར་བ་དུ་ཡོད་ཅེ་ན། དྲུག་ཅེས་བྱ་བ་སྟེ། ལྔ་པ་ལ་ནི་སྐྱུར་གཅིག་པུ། །མངར་བ་ལྔ་ནི་བསྟན་པ་ཡིན། །ཞེས་བཤད་པས་ནི། དེ་ལྟར་ལྔ་པ་ལ་ནི་སྦྱོར་བའི་དབྱེ་བ་དྲུག་ཡིན་ནོ། །རོ་ཐ་དད་དྲུག་ཅེས་བྱ་བ་ནི་མ་འདྲེས་པའི་ངོ་བོ་ཉིད་ལས་ནི་མངར་བ་དང༌། སྐྱུར་བ་དང༌། ལན་ཚྭ་དང༌། ཚ་བ་དང༌། བསྐ་བ་སྟེ། རོ་དྲུག་གི་དབྱེ་བར་འགྱུར་རོ། །བཞི་པ་གཉིས་པ་རྣམ་པ་བཅོ་ལྔ་ཡིན། །ཞེས་བྱ་བ་ནི། བཞི་པ་དང་གཉིས་པའི་དབྱེ་བ་ནི་རྣམ་པ་བཅོ་ལྔ་སྟེ། དེ་ལྟར་ན་བཞི་བ་དང༌། གཉིས་པའི་རྣམ་བ་ཕྱེ་བའི་རོ་ནི་དབྱེ་བ་རྣམ་བ་སུམ་ཅུར་འགྱུར་རོ། །དེ་ཡང༌། །བཞི་པ་ལ་ནི་མངར་བོ་བཅུ། །སྐྱུར་བ་བཞི་བོ་ལན་ཚ་གཅིག །ཅེས་སྨོས་པའི་ཕྱིར་བཅོ་ལྔ་ཡིན་ནོ། །དབྱེ་བ་གསུམ་པ་ཉི་ཤུ་ཞེས་བྱ་བ་ནི། དབྱེ་བ་རྣམ་པ་གསུམ་གྱིས་ཕྱེ་བའི་རོ་རྣམས་ནི། དབྱེ་བ་ནི་རྣམ་པ་ཉི་ཤུར་འགྱུར་ཏེ། གསུམ་པ་མངར་བཅུ་སྐྱུར་དྲུག་སྟེ། །ལན་ཚྭ་གསུམ་སྟེ་ཁ་བ་གཅིག །ཅེས་བྱ་བ་ཡིན་པས་ན་ཉི་ཤུའོ། །གཅིག་ཉིད་དེ། སྨན་ནི་རོ་དྲུག་ཅེས་བྱ་བ་ནི། སྨན་ནི་
རོ་དྲུག་གཅིག་པུ་ཡིན། །ཞེས་བྱ་བའོ། །དེ་ལྟར་དྲུག་ཅུ་རྩ་གསུམ་ཞེས་བྱ་བ་ནི་རོ་རྣམས་ཀྱི་དབྱེ་བ་དྲུག་ཅུ་རྩ་གསུམ་ཡོད་བའོ། །དེ་དག་ཀྱང་གོང་དུ་གྲངས་ལྔ་བཅུ་རྩ་བདུན་དུ་ཆད་པའི་བཅོས་མར་ཡོངས་སུ་དབྱེ་བའི་སྦྱོར་བ་དང་བཅས་པར་བཤད་པ་དང༌། མ་བཅོས་པའི་རོ་དྲུག་སྟེ། རོ་དྲུག་ཅུར་རོ་རྣམས་དབྱེ་བར་བཤད་བ་གང་ཡིན་པ་དེ་ནི་དགོས་པའི་དབང་དུ་བྱས་པ་ལས། མཚོན་ཅིང་ལུས་ལ་དགོས་པའི་ཡུལ་དུ་རིགས་པ་ཉིད་ལས། རགས་རིམ་ཇི་ལྟ་བ་བཞིན་དུ་ཕྱེ་ཞིང་བཤད་པ་ཡིན་གྱི། ཕྲ་བ་རྣམས་ཀྱི་སྦྱོར་བ་བརྩིས་པའི་ཚུལ་འདི་ཙམ་དུ་ཟད་པ་ཡང་མ་ཡིན་ལ། དབྱེ་བ་ཡང་དྲུག་ཅུ་རྩ་གསུམ་དུ་ཟད་པ་མ་ཡིན་ཏེ། གང་གི་ཕྱིར་ཕྲ་ཞིང་རབ་ཏུ་ཕྲ་བར་བརྟག་པ་དང༌། དེ་བཞིན་དུ་རབ་དང་མཆོག་ཏུ་བརྟག་པའི་དབང་དང༌། དེ་བཞིན་རོ་དང་རོ་རྗེས་ཀྱི་དགོས་པའི་དབང་ལས་ནི། འདི་རྣམས་ཀྱི་དབྱེ་བ་གྲངས་མེད་པ་ཡིན་པས་ན། འདི་དག་བསྟན་པར་བྱ་བའི་ཕྱིར་སྨྲས་པ་ནི། དེ་རྣམས་རོ་དང་རོ་རྗེས་རོའི་དབྱེ་བ། །རབ་དང་རབ་མཆོག་དག་ཏུ་བྲགས་པ་ལས། །རྩིས་ལས་འདས་པར་བྱུང་བར་གྱུར་བ་ནི། །ནད་དང་སྨན་གྱི་དབང་ལས་ཉེ་བར་སྦྱར། །ཞེས་བྱ་བ་ལ། དྲུག་ཅུ་རྩ་གསུམ་གྱི་གྲངས་ཀྱི་དབྱེ་བས་ཕྱེ་བ་དེ་རྣམས་ནི་རྩིས་ལས་འདས་པ་ཡིན་ཏེ། ཤིན་ཏུ་མང་བའི་ཕྱིར་བརྩི་བར་མི་ནུས་བར་འགྱུར་ཞིང་སྐྱེས་པར་གྱུར་བ་ཡིན་ནོ། །དེ་ཅི་ལྟ་ཞེ་ན། རོ་དང་རྗེས་ཀྱི་དབྱེ་བ་ལས་ཏེ། དེ་བས་འབྱུང་བ་འདུས་པ་ལས། །བྱུང་བས་སྨན་རྣམས་རོ་གཅིག་མིན། །ཞེས་བྱ་བ་སྨོས་པ་ཡིན་ཏེ། རོ་དང་རྗེས་དེ་གཉིས་ཀྱང་འདི་ལྟར་མངར་བའི་རྗེས་ནི་སྐྱུར་བ་ལ་སོགས་པ་ཡིན་ལ། སྐྱུར་བའི་རྗེས་ནི་མངར་བ་ལ་སོགས་པ་ཡིན་པ་དང༌། དེ་བཞིན་དུ་སྐྱུར་བ་ནི་ལན་ཚྭའི་ལ་སོགས་པའོ། །ལན་ཚྭ་ནི་ཁ་བ་ལ་སོགས་པ་སྟེ། དེ་རྣམས་ཞེས་བྱ་བའི་ཚིག་གིས་ཐམས་ཅད་ལ་སྙེགས་སུ་ཟིན་ཀྱང༌། ལྔ་བཅུ་རྩ་བདུན་བོ་ཉིད་ལ་ཅི་རིགས་པར་རོ་དང་རོ་རྗེས་ཀྱི་དབྱེ་བ་བྱས་ན་གྲངས་མེད་པར་འགྱུར་ལ། རོ་དྲུག་པོ་འབའ་ཞིག་ལ་རབ་དང་རབ་མཆོག་ལ་སོགས་པའི་བརྟག་
པ་ལས་གྲངས་མེད་བར་འགྱུར་བ་ལྟ་སུ་ཞིག་འགོག །དེ་གཉིས་ཀྱིས་ན་རབ་དང༌། རབ་མཆོག་དག་ཏུ་བརྟག་པ་ལས་ཞེས་སྨོས་པ་ཡིན་ཏེ། རོ་སྦྱར་བ་དང༌། མ་སྦྱར་བའི་དབྱེ་བ་མཆོག་དང༌། རབ་མཆོག་དག་ཏུ་བརྟག་པ་ནི་འདི་ལྟར་མངར་བ་དང༌། རབ་ཏུ་མངར་བ་དང༌། རབ་མཆོག་ཏུ་མངར་བ་དང༌། ཅུང་ཟད་མངར་བ་དང༌། ཅུང་ཟད་རབ་ཏུ་མངར་བ་དང༌། ཅུང་ཟད་རབ་མཆོག་ཏུ་མངར་བ་སྟེ། དེ་བཞིན་དུ་གཞན་དག་ལ་ཡང་སྦྱར་བར་བྱའོ། །ཡང་རོའི་དབྱེ་བ་དེ་རྣམས་ནད་ཀྱི་སྨན་གྱི་དབང་གིས་ཉེ་བར་སྦྱར་བར་བྱ་སྟེ། དེ་ལ་ནད་ནི་རླུང་ལ་སོགས་པའོ། །སྨན་ནི་ཨ་རུ་ར་ལ་སོགས་པའོ། །ནད་དང་སྨན་གྱི་མངར་བ་ནི་དེའི་ཆེད་དམ། དབང་དུ་བྱས་པའམ། དེ་ལ་ལྟོས་པ་སྟེ། དེའི་དབང་དུ་བྱས་པ་ལས་ཡོངས་སུ་བརྟགས་ཏེ་སྦྱར་བར་བྱའོ། །བབ་བབ་ཏུ་འཆོལ་བར་བྱ་བ་ནི་མ་ཡིན་ནོ་ཞེས་བྱ་བའི་དོན་ཏོ། །ནད་དང་སྨན་ཞེས་སྨོས་པ་ནི་ཉེ་བར་མཚོན་བ་ཙམ་ཡིན་པར་ཤེས་པར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དབོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་བཅུ་པའི་རྣམ་པར་འགྲེལ་པའོ།། །།དེ་ནས་ནད་ལ་སོགས་པའི་ཚུལ་ཤེས་པར་བྱ་བའི་ལེའུ་བཤད་པར་བྱའོ་ཞེས་བྱ་བ་ནི། དེའི་རྗེས་ཐོགས་ལ་ནད་ལ་སོགས་པ་ཤེས་པར་བྱ་བ་བརྩམ་པར་བྱའོ། །གང་གི་ཕྱིར་རོ་རྣམས་ཀྱིས་དབྱེ་བ་དྲུག་ཅུ་རྩ་གསུམ་གྱིས་ཕྱེ་བ་དེ་དག་ཀྱང་ནད་ཀྱི་སྨན་གྱི་དབང་དུ་སྦྱར་བར་བྱ་བ་ཡིན་པར་བཤད་ལ། དེ་ལྟ་བས་ན་ནད་ལས་རྗེས་སུ་དཔགས་ཏེ་སྦྱར་བར་བྱའི། བབ་བབ་ཏུ་འཆོལ་བར་བྱ་བ་ནི་མ་ཡིན་ནོ། །དེ་བས་ན་ནད་དེ་རྣམས་ནི་རང་གི་ལས་ཀྱི་མཚན་ཉིད་ཇི་ལྟ་བ་ཉིད་ལས་རྗེས་སུ་དཔགས་ཏེ་ཤེས་པར་བྱ་དགོས་ཏེ། དེ་ཤེས་པར་བྱ་བའི་ཕྱིར་ན་ལེའུ་འདི་བརྩམས་པ་ཡིན་ནོ། །འདིར་ནད་རྣམས་གཞི་མེད་པར་ནི་ཇི་ལྟར་ཡང་ཤེས་པར་མི་ནུས་ལ། དེ་བས་ན་ནད་དེ་རྣམས་ཀྱི་གཞིར་གྱུར་པ། ལུས་ཟུངས་དང་དྲི་མ་རྣམས་གང་ཡིན་པ་དེ་ཤེས་པར་བྱ་དགོས་པས་ན། ནད་ཤེས་པར་བྱ་བ་འབའ་ཞིག་ཏུ་མ་
ཟད་ཀྱི་ཞེས་བྱ་བར་ངེས་པར་གནས་སོ། །དེ་ལྟར་ན་ནད་ལ་སོགས་པ་ཤེས་པར་བྱ་བ་དེ་ལ་ཕན་པའི་ལེའུ་བཤད་པར་བྱ་ཞིང་བསྟན་པར་བྱའོ་ཞེས་བྱ་བའི་དོན་ཏོ། །ནད་དང་ལུས་ཟུངས་དྲི་མ་རྣམས། །རྟག་ཏུ་ལུས་ཀྱི་རྩ་བ་ཡིན། །ཞེས་བྱ་བ་ལ། ནད་དང་ལུས་ཟུངས་དང་དྲི་མ་རྣམས་ནི། ནད་དང་ལུས་ཟུངས་དང་དྲི་མ་རྣམས་ཏེ། དེ་ནི་རྟག་པར་དུས་ཐམས་ཅད་དུ་ལུས་ཀྱི་རྩ་བར་གྱུར་པ་ཡིན་ཏེ། ལུས་ནི་དེ་ལས་བྱུང་བ་ཡིན་པའི་ཕྱིར། རྩ་བ་དང་འདྲ་བས་ན་རྩ་བ་སྟེ། རྒྱུའི་གཙོ་བོ་ཞེས་བྱ་བའི་དོན་ཏོ། །དེ་རླུང་དབུགས་འབྱུང་དབུགས་རྔུབ་དང༌། །བསྐྱོད་དང་ལས་སྤྱོད་ཤུགས་འབྱིན་དང༌། །ལུས་ཟུངས་ལེགས་པར་རྒྱུ་བ་དང༌། །དབང་པོ་རྣམས་ནི་གསལ་བ་དག །མི་གནོད་པ་ནི་རྗེས་འཛིན་ཡིན། །ཞེས་བྱ་བ་ལ། ལུས་དེ་ནི་རླུང་མི་གནོད་ཅིང༌། དབུགས་འབྱུང་བ་ལ་སོགས་པས་མཉམ་པར་གནས་ན་ལུས་རྗེས་སུ་འཛིན་ཅིང་རྟེན་པར་བྱེད་པ་ཡིན་ནོ། །དེ་ལ་དབུགས་འབྱུང་བ་ནི་གྱེན་དུ་དབུགས་འབྱིན་ཅིང་གཏོང་བའོ། །དབུགས་རྔུབ་བ་ནི་དབུགས་སྡུད་ཅིང་ཐུར་དུ་འཇུག་པའོ། །བསྐྱོད་པ་ནི་དབུགས་སུ་བྱ་བ་ཐམས་ཅད་ལ་བརྩོན་ཞིང་རྩོལ་བའོ། །ལས་ལ་སྤྱོད་པ་ནི་ལུས་དང་ངག་དང་ཡིད་ཀྱི་ལས་ལ་སྤྱོད་ཅིང་འཇུག་པའོ། །ཤུགས་འབྱིན་པ་ནི་བཤང་བ་དང༌། གཅི་བ་དང་རླུང་ཕྱི་རོལ་ཏུ་འབྱིན་པའོ། །ལུས་ཟུངས་ལེགས་པར་རྒྱུ་བ་ཞེས་པ་ནི། ལུས་ཟུངས་ཀྱི་སྒྲས་ནི་དངས་མ་ལ་སོགས་པ་དང༌། མཁྲིས་པ་དང་བད་ཀན་དག་གཟུང་ངོ༌། །དེ་རྣམས་ལེགས་པར་རྒྱུ་བ་ནི་མཉམ་པར་གནས་ཤིང་འཇུག་པའོ། །དེ་ལ་མཉམ་པར་རྒྱུ་བའི་གནས་སྐབས་ཉིད་ཀྱིས་དེ་རྣམས་རླུང་ཉིད་མི་གནོད་པར་འགྱུར་བའི་རྒྱུ་ཉིད་ཡིན་ཏེ། གང་གི་ཕྱིར་རྣམ་པར་འཐོར་ཞིང་འཁྲུགས་པ་སྡུད་ཅིང་བཞི་བར་བྱེད་པ་ཡིན་པའི་ཕྱིར་རོ། །དེ་བཞིན་དུ་དབང་པོ་རྣམས་གསལ་བ་སྟེ། མིག་ལ་སོགས་པའི་དབང་པོ་ཡུལ་འཛིན་པ་ལ་གསལ་བར་གནས་པ་སྟེ། ཡོན་ཏན་དེ་དག་དང་ལྡན་ན་མི་གནོད་ཅིང་རྗེས་སུ་འཛིན་པ་ཡིན་ནོ། །མཁྲིས་པ་འཇུ་དྲོད་མཐོང་བྱེད་དང༌། བཀྲེས་སྐོམ་ཟས་ལེན་མདངས་ཡིད་གཞུངས། །
བློ་ལྡན་དཔའ་སྙིང་ལུས་འཇམ་པས། །ཞེས་བྱ་བ་ལ། དེ་མཁྲིས་པར་འགྱུར་བ་མེད་ཅིང་འཇུ་བ་ལ་སོགས་པས་རྗེས་སུ་འཛིན་ཅིང་རྟེན་པར་བྱེད་པ་ཡིན་ནོ། །དེ་ལ་འཇུ་བ་ནི་ཟས་སྨིན་ཅིང་འཇུ་བའོ། །དྲོད་ནི་མེའི་ཤས་སོ། །མཐོང་བ་ནི་གཟུགས་འཛིན་པར་ནུས་པའོ། །བཀྲེས་པ་ནི་ཟས་འདོད་པའོ། །སྐོམ་པ་ནི་འཐུང་འདོད་པའོ། །ཟས་ལེན་པ་ནི་ཡི་ག་འབྱེད་ཅིང་ཉེ་བར་ལོངས་སྤྱོད་པར་འདོད་པའོ། །མདངས་ནི་བཞིན་མདོག་གསལ་ཞིང་གཟི་མདངས་ཆེ་བའོ། །ཡིད་གཞུངས་པ་ནི་ཤེས་རབ་དང་ལྡན་པའོ། །བློ་དང་ལྡན་པ་ནི་བློ་གྲོས་དང་ལྡན་པའོ། །དཔའ་སྙིང་ནི་སེམས་ཀྱིས་རྟུལ་ཕོད་པ་ཡིན་ཏེ། བརྟན་ཞིང་མི་གཡོ་བའོ། །ལུས་འཇམ་བ་ནི་ལུས་ཀྱི་ཤ་མདངས་འཇམ་ཞིང་མཉེན་པ་སྟེ། དེ་དག་གིས་ལུས་ཀྱི་རྟེན་བྱེད་དོ། །བད་ཀན་བརྟན་ཞིང་སྣུམ་ཉིད་དང༌། །ཚིགས་འབྲེལ་བཟོད་ལ་སོགས་པས་སོ། །ཞེས་བྱ་བ་ལ། དེ་ལ་བད་ཀན་ནི་མི་འགྱུར་ཞིང་བརྟན་པ་ལ་སོགས་པ་དང་ལྡན་པ། ལུས་རྗེས་སུ་འཛིན་པར་བྱེད་དོ། །བརྟན་པ་ནི་མི་གཡོ་བ་ཉིད་དོ། །སྣུམ་པ་ཉིད་ནི་ལུས་སྣུམ་པར་གྱུར་པ་ཉིད་དོ། །ཚིགས་འབྲེལ་པ་ནི་ལྷུ་ཚིགས་ཀྱི་བར་དེ་རྣམ་པར་འབྲེལ་ཞིང་དམ་དུ་གནས་པའོ། །བཟོད་པ་ནི་གནོད་པ་ལ་མི་འཁྲུགས་པ་སྟེ། དེ་དག་ལ་སོགས་པས་ཕན་པའི་ལས་བྱེད་པ་ཡིན་ནོ། །ལུས་ཟུངས་ལས་གཙོ་གོ་རིམས་བཞིན། །ཚིམ་བྱེད་འཚོ་བྱེད་གཡོགས་པ་དང༌། །སྣུམ་དང་བརྟན་དང་འགེངས་པ་དང༌། །མངལ་ནི་སྐྱེད་བྱེད་ཡིན་པར་བཤད། །ཅེས་བྱ་བ་ལ། བཅུད་ཀྱི་དངས་མ་ལ་སོགས་པ། ལུས་ཟུངས་བདུན་པོ་རྣམས་ཀྱི་མཆོག་དང༌། གཙོ་བོ་བདུན་ནི་གོ་རིམས་ཇི་ལྟ་བ་བཞིན་དུ་ཚིམ་པར་བྱེད་པ་ལ་སོགས་པ་ཡིན་པར་སློབ་དཔོན་དག་གིས་བཤད་ཅིང་བསྟན་ཏོ། །དེ་ལ་ཚིམ་པར་བྱེད་པ་ནི་ལུས་ཟུངས་ཚིམ་ཞིང་སེམས་དགའ་བར་བྱེད་པ་ནི་དངས་མའི་བཅུད་ཀྱི་ལས་ཀྱི་མཆོག་ཡིན་ནོ། །འཚོ་བར་བྱེད་ཅིང་སྲོག་འཛིན་པར་བྱེད་པ་ནི་ཁྲག་གི་ལས་སོ། །ལུས་ཀྱི་རུས་པ་གཡོགས་ཤིང་ཁེབས་པར་བྱེད་པ་ནི་ཤའི་ལས་སོ། །ལུས་སྣུམ་ཞིང་བཅུད་ཅན་དུ་བྱེད་པ་ནི་ཚིལ་གྱི་
ལས་སོ། །ལུས་བརྟན་ཞིང་མཁྲང་པོར་བསྒྲེང་བ་ནི་རུས་པའི་ལས་ཡིན་ཏེ། གཞན་དུ་ན་ལུས་ལ་རུས་པ་མེད་ན་ཤའི་གྲོང་བུ་ཉིད་དུ་འགྱུར་རོ། །རུས་པའི་རྐང་སྦུབས་འགེངས་པ་ནི་རྐང་གི་ལས་སོ། །མངལ་སྐྱེད་ཅིང་འབྱུང་བར་བྱེད་པ་ནི་ཁུ་བའི་ལས་ཀྱི་མཆོག་ཡིན་པར་བཤད་དོ། །བརྟན་པར་བྱེད་པ་བཤང་བ་ཡིན། །འདྲུལ་དང་འབྱིན་པ་གཅིན་གྱི་ཡིན། །བ་སྤུ་བརྟན་པ་རྡུལ་གྱི་ཡིན། །ཞེས་བྱ་བ་ལ། ལུས་བརྟན་ཅིང་འབྱིན་པར་བྱེད་པ་ནི། །བཤང་པའི་ལས་ཀྱི་གཙོ་བོ་ཡིན་ནོ། །ཟས་འདྲུལ་ཞིང་མྱགས་པ་དང༌། ཕྱི་རོལ་དུ་འབྱིན་ཞིང་འདོན་པ་ནི། གཅིན་གྱི་ལས་ཀྱི་གཙོ་བོ་ཡིན་ནོ། །སྐྲ་དང་བ་སྤུ་བརྟན་པར་འཛིན་པར་བྱེད་པ་ནི། རྡུལ་གྱི་ལས་ཀྱི་གཙོ་བོ་ཡིན་ནོ། །རླུང་ནི་འཕེལ་བར་གྱུར་པ་ཡིས། །སྐེམ་དང་མདོག་གནག་དྲོད་བག་དགའ། །འདར་དང་ལྟོ་སྦོས་བཤང་བ་སྲི། །སྟོབས་དང་གཉིད་དང་དབང་པོ་ཉམས། །སྨྲ་མང་མགོ་འཁོར་ཞུམ་པར་བྱེད། །ཅེས་བྱ་བ་ལ། རླུང་གི་ནད་འཕེལ་ཞིང་སྐྱེས་པར་གྱུར་པས་སྐེམ་པ་ལ་སོགས་བསྐྱེད་པར་བྱེད་དོ། །དེ་ལ་སྐེམ་པ་ནི་ཁྲག་ལ་སོགས་པ་ཟད་པས་སྐེམ་ཞིང་ཉམ་ཆུང་བའོ། །མདོག་ནག་པ་ནི་ཁ་དོག་ཉམས་པའོ། །དྲོད་བག་ལ་དགའ་བ་ནི་དྲོ་བ་མངོན་པར་འདོད་པའོ། །འདར་བ་ནི་གཡོ་ཞིང་འགུལ་བའོ། །ལྟོ་སྦོས་པ་ནི་གསུད་པ་རྒྱས་པའོ། །བཤང་བ་སྲི་བ་ནི་བཤང་གཅི་འགགས་པའོ། །སྟོབས་ལ་སོགས་པ་ཉམས་པ་ནི་དེ་དག་དང་བྲལ་བའོ། །སྨྲ་མང་བ་ནི་མ་འབྲེལ་བར་མང་དུ་སྨྲ་བའོ། །མགོ་འཁོར་བ་ནི་ལུས་མལ་ན་མི་གནས་ཤིང་འཁོར་བའོ། །ཞུམ་པ་ནི་སེམས་མི་དགའ་ཞིང་གདུང་བར་བྱེད་པའོ། །མཁྲིས་པ་བཤང་གཅི་པགས་མིག་སེར། །བཀྲེས་སྐོམ་ལུས་ཚ་གཉིད་ཆུང་བྱེད། །ཅེས་བྱ་བ་ལ། མཁྲིས་པ་འཕེལ་ཞིང་རྒྱས་པར་གྱུར་ན། བཤང་བ་ལ་སོགས་པ་སེར་པོར་བྱེད་པ་སྟེ། བཤང་བ་དང་གཅི་བ་སྲིབ་དང༌། པགས་པ་དང༌། མིག་གི་མདོག་ཁ་དོག་སེར་པོར་འགྱུར་བར་བྱེད་པ་དང༌། དེ་བཞིན་དུ་བཀྲེས་པ་དང༌། སྐོམ་པ་དང༌། ལུས་ཚ་བ་དང་གཉིད་ཆུང་བ་ཉིད་དུ་བྱེད་པར་
འགྱུར་རོ། །བད་ཀན་དྲོད་ཉམས་མཆིལ་མ་མང༌། །ཁོང་སྙོམ་ལྕི་དང་ཤ་མདོག་དཀར། །ལུས་གྲང་ཡན་ལག་ལྷོད་པ་དང༌། །ལུད་པ་དབུགས་མི་བདེ་གཉིད་ཆེ། །དངས་མའང་བད་ཀན་དང་འདྲ་ལ། །ཞེས་བྱ་བ་ལ། བད་ཀན་འཕེལ་བས་མེ་དྲོད་ཉམས་པ་ལ་སོགས་པ་བྱེད་དོ། །དེ་ལ་དྲོད་ཉམས་པ་ནི་ཕོ་བའི་མེ་དྲོད་ཉམས་པའོ། །མཆིལ་མ་མང་བ་ནི་མཆིལ་མ་ལྷག་པར་འབྱུང་བའོ། །ཁོང་སྙོམ་པ་ནི་སྤྲོ་བ་ཆུང་ཞིང་སྒྱིད་ལུག་པའོ། །ལྕི་བ་ནི་ལུས་ཀྱི་ཡན་ལག་ལྕི་བ་ཉིད་དོ། །ཤ་མདོག་དཀར་བ་ནི་ལུས་ཀྱི་མདོག་དཀར་ཞིང་སྐྱ་བ་ཉིད་དོ། །དེ་བཞིན་དུ་ལུས་གྲང་བ་ནས་གཉིད་ཆེ་བའི་བར་ཡང་སྐྱེད་པ་ཡིན་ནོ། །དངས་མའང་བད་ཀན་དང་འདྲ་ལ། །ཞེས་བྱ་བ་ལ། བཅུད་ཀྱི་དངས་མ་འཕེལ་བར་གྱུར་ན། དྲོད་ཉམས་པ་ནས་གཉིད་ཆེ་བའི་བར་བད་ཀན་དང་འདྲ་བར་སྐྱེད་པར་བྱེད་པའོ། །ཁྲག་འཕེལ་མེ་དབལ་ཁོང་འབྲས་མཆེར། །མཛེ་དང་རླུང་ཁྲག་མཁྲིས་པ་ཁྲག །སྐྲན་དང་རྙིལ་ནད་མིག་སེར་དང༌། །བསྐྱོད་དཀའ་དྲོད་ཉམས་རྨོངས་བག་དང༌། །མིག་དང་གཅིན་པགས་དམར་བར་འགྱུར། །ཞེས་བྱ་བ་ལ། ཁྲག་འཕེལ་བ་ལས་ནི་མེ་དབལ་ལ་སོགས་ནད་སྐྱེད་པར་འགྱུར་རོ། །རླུང་ཁྲག་ནི་རླུང་དང་ཁྲག་འདྲེས་པ་ལས་གྱུར་པའི་ནད་དོ། །མཁྲིས་པ་དང་ཁྲག་ནི་མཁྲིས་པ་དང་ཁྲག་འདྲེས་པའོ། །རྙིལ་ནད་ནི་སོའི་ཤ་ལས་ཁྲག་ལས་གྱུར་པའི་ཤ་ལྷག་སྐྱེ་བའམ་སྐྲང་བའོ། །བསྐྱོད་དཀའ་བ་ནི་རྐང་ལག་ལྕི་བ་ལ་བྱའོ། །ཡང་ན་བྱང་གྱ་ཞེས་པ་གདོང་ལ་དམར་པོ་ཏལ་ཏིལ་བྱུང་བའི་པགས་ནད་ལ་བྱའོ། །གཞན་དག་ནི་གོ་བར་ཟད་དོ། །ཤ་འཕེལ་ཝ་བ་རྨེན་བུམ་དུད། །མཁུར་ཚོས་བྲང་ལྟོ་བརླ་སྦོམ་ཞིང༌། །མགུལ་སོགས་ལྷག་པར་ཤ་ཡང་ཆེ། །ཞེས་བྱ་བ་ལ། ཤ་འཕེལ་བ་ལས་ནི་ཝ་བལ་སོགས་པ་སྐྱེད་པར་བྱེད་དོ། །དེ་བཞིན་དུ་མཁུར་ཚོས་དང༌། བྲང་དང༌། ལྟོ་བ་དང༌། བརླ་སྦོམ་པ་ཉིད་དུ་འགྱུར་བ་དང༌། མགུལ་པ་ལ་སོགས་པར་ལྷག་པར་ཤ་ཆེ་བར་འགྱུར་བ་སྟེ། ཤའི་སྟེང་དུ་ཤ་སྐྱེས་པ་ལྟ་བུར་འགྱུར་རོ། །ཚིལ་འཕེལ་དེ་འདྲ་དེ་
བཞིན་ངལ། །ཅུང་ཟད་བསྐྱོད་ཀྱང་དབུགས་རྒོད་ཅིང༌། །རྐུབ་ཚོས་ནུ་མ་གསུས་འཕྱང་འགྱུར། །ཞེས་བྱ་བ་ལ། ཚིལ་འཕེལ་བ་ནི་ཤ་འཕེལ་བ་དེ་དང་འདྲ་བར་ཝ་བ་ལ་སོགས་པ་སྐྱེད་བར་འགྱུར་བ་དང༌། དེ་བཞིན་དུ་ངལ་བ་དང༌། ཅུང་ཟད་བསྐྱོད་ཅིང་གཡོ་བ་དག་ལ་ཡང་དབུགས་རྒོད་པར་འགྱུར་བ་དང༌། རྐུབ་ཚོས་དང་ནུ་མ་དང་གསུས་པ་དག་ཀྱང་སྦོམ་ཞིང་རྒྱས་པ་ཉིད་ཀྱིས་འཕྱང་བར་འགྱུར་རོ། །རུས་འཕེལ་རུས་ལྷག་སོ་ལྷག་འགྱུར། །ཞེས་བྱ་བ་ལ། རུས་པ་འཕེལ་བས་ནི་རུས་པའི་སྟེང་དུ་རུས་པ་སྐྱེ་བ་དང༌། དེ་བཞིན་དུ་སོའི་སྟེང་དུ་སོ་འབྱུང་བར་འགྱུར་རོ། །རྐང་འཕེལ་ལུས་ལྕི་མིག་རྩ་གཡུང༌། །ཚིགས་ཀྱི་མགོ་བོ་སྦོམ་པ་དང༌། །ཚིགས་ལ་ཐོར་བུ་གསོ་དཀའ་འབྱུང༌། །ཞེས་བྱ་བ་ལ། རྐང་འཕེལ་ནས་ནི་ལུས་ལྕི་བ་དང༌། མིག་རྩ་གཡུང་ཞིང་ཞན་པར་བྱེད་པ་དང༌། ཚིགས་མདུད་ཀྱི་མགོ་བོ་རྣམས་སྦོམ་ཞིང་ཆེ་བར་འགྱུར་བ་དང༌། ཚིགས་ལ་ཐོར་བུ་གཡོ་ཞིང་མི་བཟད་པ་འབྱུང་བར་འགྱུར་རོ། །ཁུ་འཕེལ་བུད་མེད་ལ་རབ་གདུ། །ཁུ་བའི་རྡེའུ་དག་ཏུ་འགྱུར། །ཞེས་བྱ་བ་ལ། ཁུ་བ་འཕེལ་ཞིང་རྒྱས་པ་ནི་བུད་མེད་ལ་རབ་ཏུ་གདུ་ཞིང་ཆགས་པ་ཆེ་བར་འགྱུར་བ་དང༌། ཁུ་བ་ལས་བྱུང་བའི་རྡེའུ་དག་ཆགས་པར་འགྱུར་རོ། །བཤང་འཕེལ་ལྟོ་སྦོས་རྒྱུ་འཁྲུག་ཅིང༌། །ལུས་ལྕི་ལྟོ་བ་ན་བར་བྱེད། །ཅེས་བྱ་བ་ལ། བཤང་བ་འཕེལ་བར་འགྱུར་བ་ནི། ལྟོ་བ་སྟེ་ཁོང་སྦོས་ཤིང་གང་བ་དང༌། རྒྱུ་མ་འཁྲུག་ཅིང་ཀྲུག་ཀྲུག་ཟེར་བ་དང༌། ལུས་ལྕི་ཞིང་བསྐྱོད་དཀའ་བ་དང༌། ལྟོ་བ་ན་ཞིང་ཟུག་གཟེར་སྐྱེད་པར་བྱེད་པ་ཡིན་ནོ། །གཅིན་འཕེལ་ཆུ་སོར་ཟུག་ཅིང་ན། །གཅིས་ཀྱང་མ་གཅིས་སྙམ་སེམས་འགྱུར། །ཞེས་བྱ་བ་ལ། གཅིན་འཕེལ་བར་གྱུར་པ་ནི་ཆུ་སོར་ཟུག་ཅིང་ལྷག་པར་ན་བ་དང༌། དེ་བཞིན་དུ་གཅིས་ཤིང་བཏང་དུ་ཟིན་ཀྱང་མ་གཅིས་པ་སྙམ་སེམས་པར་འགྱུར་བ་སྟེ། ཡོངས་སུ་འདོར་བ་སྙམ་སེམས་པར་འགྱུར་ཏེ། ཡང་དང་ཡང་འོང་བས་ན་གཅིས་སོ་སྙམ་དུ་སེམས་པར་བྱེད་པར་འགྱུར་རོ། །རྡུལ་འཕེལ་རྡུལ་ཆེ་དྲི་མི་
ཞིམ། །གཡན་པ་ཉིད་ཀྱང་སྐྱེད་ཅེས་བྱ། །ཞེས་བྱ་བ་ལ། རྡུལ་ཆེན་ནང་དུ་འཕེལ་བས་རྡུལ་རབ་ཏུ་ཆེ་བར་འགྱུར་བ་དང༌། ལུས་དྲི་མི་ཞིམ་པ་ཉིད་དུ་བྱེད་དོ། །གཡན་པ་ཉིད་ཀྱང་སྐྱེད་ཅིང་འབྱུང་བར་བྱེད་པ་ཡིན་པར་ཤེས་པར་བྱའོ། །མིག་རྡུལ་ལ་སོགས་དྲི་མ་རྣམས། །མང་བས་ལྕི་ལ་སོགས་པར་བྱེད། །ཅེས་བྱ་བ་ལ། མིག་རྡུལ་ནི་མིག་གི་དྲི་མའོ། །སོགས་པའི་སྒྲས་ནི་རྣ་བ་ལ་སོགས་པའི་དྲི་མ་རྣམས་ཀྱང་བསྡུ་བར་བྱའོ། །དེ་ལྟར་ན་མིག་རྡུལ་ལ་སོགས་པའི་དྲི་མ་རྣམས་མང་ཞིང་འཕེལ་བས་ལྕི་ཞིང་མང་དུ་འབྱུང་བ་དང༌། དེ་བཞིན་དུ་སོགས་པ་ཞེས་སྨོས་པས་གཡའ་བ་དང༌། འདྲུལ་བ་ལ་སོགས་པར་བྱེད་པ་བསྡུའོ། །དེ་དག་ཀྱང་ཟད་ཅིང་འབྲི་བར་འགྱུར་བའི་མཚན་ཉིད་ནི། རླུང་ཟད་མཚན་མ་ལུས་མི་བདེ། །སྨྲ་ཉུང་རྩོལ་བ་ཆུང་བར་འགྱུར། །དྲན་པ་མི་གསལ་བད་ཀན་འཕེལ། །སྔར་བཤད་པ་ཡི་ནད་རྣམས་འབྱུང༌། །ཞེས་བྱ་བ་ལ། རླུང་ཟད་ཅིང་འབྲི་བར་འགྱུར་བའི་མཚན་མ་ནི་ལུས་མི་བདེ་ཞིང་སྒྱིད་སྙོམ་པ་དང༌། སྨྲ་བ་ཉུང་ཞིང་གཅོམ་ཆུང་བ་དང༌། རྩོལ་ཞིང་ལུས་ཀྱི་ལས་སུ་བྱེད་པ་དག་ཀྱང་ཆུང་ཞིང་ཞན་པ་དང༌། དྲན་པ་མི་གསལ་བ་སྟེ། རིག་ཅིང་ཚོར་བ་ཆུང་བ་དང་དེ་བཞིན་དུ་བད་ཀན་འཕེལ་བར་གྱུར་པའི་སྐབས་སུ་སྔར་བཤད་པའི་ནད་དྲོད་ཉམས་པ་དང༌། མཆིལ་མ་མང་བ་ལ་སོགས་པ་རྣམས་འབྱུང་བར་འགྱུར་རོ། །མཁྲིས་ཟད་དྲོད་ཉམས་གྲང་བ་དང༌། །མདོག་ཉམས་བྱེད་དེ། ཞེས་བྱ་བ་ལ། མཁྲིས་པ་ཟད་པའི་མཚན་མ་ནི་མེའི་དྲོད་ཉམས་ཤིང་རྟུལ་བ་དང༌། ལུས་གྲང་ཞིང་བསིལ་བག་ཏུ་འགྱུར་བ་དང༌། མདོག་མདངས་ཉམས་པར་བྱེད་པར་འགྱུར་རོ། །བད་ཀན་ཟད། །མགོ་འཁོར་བད་ཀན་གནས་སྟོངས་ཤིང༌། །སྙིང་འདར་ཚིགས་ནི་ལྷོད་པར་འགྱུར། །ཞེས་བྱ་བ་ལ། བད་ཀན་ཟད་པའི་མཚན་མ་ནི་མགོ་འཁོར་བ་སྟེ། ལུས་དང་སེམས་མལ་ལ་མི་གནས་པ་དང༌། བད་ཀན་གྱི་གནས་སྣ་ལ་སོགས་པ་སྟོངས་ཤིང་བསྐམས་པ་དང༌། སྙིང་འདར་ཞིང་གཡོ་ལ་འཛག་པ་དང༌། ཚིགས་ཀྱི་ཚོགས་རྣམས་
ལྷོད་ཅིང་ཤིག་ཤིག་པོར་འགྱུར་བ་ཡིན་ནོ། །ཅུང་ཟད་རྩུབ་ངལ་སྐམ་པ་དང༌། །ན་ཞིང་སྒྲ་ཆེར་མི་བཟོད་འགྱུར། །ཞེས་བྱ་བ་ལ། བཅུད་དམ་དངས་མ་ཟད་པའི་མཚན་མ་ནི། ལུས་རྩུབ་པ་ཉིད་དང༌། ང་ལ་ཞིང་དུབ་པ་དང༌། ཁ་སྐམ་པ་དང༌། ན་ཞིང་ཉམ་ཆུང་བ་དང༌། སྒྲ་ཆེར་གྲགས་པ་མི་བཟོད་ཅིང༌། ཚིག་སྨྲས་བརྣག་དཀའ་བར་འགྱུར་རོ། །ཁྲག་ཟད་སྐྱུར་དང་བསིལ་ལ་དགའ། །རྩ་ལྷོད་པགས་པ་རྩུབ་པར་འགྱུར། །ཞེས་བྱ་བ་ལ། ཁྲག་ཟད་པའི་མཚན་མ་ནི་རོ་སྐྱུར་བ་དང༌། རེག་པ་བསིལ་བ་ལ་མངོན་པར་དགའ་ཞིང་འདོད་པ་དང། རྩ་ལྷོད་ཅིང་རྙིང་བ་དང༌། ལུས་ཀྱི་པགས་པ་རྩུབ་པར་འགྱུར་རོ། །ཤ་ཟད་དབང་ཉམས་མིག་མཁུར་བའི། །རུས་སྐམས་ལྷུ་ཚིགས་ན་བར་འགྱུར། །ཞེས་བྱ་བ་ལ། ཤ་ཟད་པའི་མཚན་མ་ནི་དབང་པོ་ཉམས་ཤིང་རང་གི་ཡུལ་འཛིན་པར་མི་ནུས་པ་དང༌། མིག་དང་མཁུར་བའི་རུས་པ་སྐམས་ཤིང་ཤ་ཟད་པ་དང༌། ལྷུ་ཚིགས་རྣམས་ན་ཞིང་བཅག་པ་སྙམ་སེམས་པར་འགྱུར་རོ། །ཚིལ་ཟད་གཉིད་ཆེ་དཔྱི་རྐེད་མངོན། །མཆེར་བ་ཆེ་དང་ལུས་སྐེམས་འགྱུར། །ཞེས་བྱ་བ་ལ། ཚིལ་ཟད་པའི་མཚན་མ་ནི་དཔྱི་དང་རྐེད་པ་མངོན་ཞིང་ཚོར་བ་ཆུང་བ་དང༌། མཆེར་པ་ཆེ་ཞིང་འཕེལ་བ་དང༌། ལུས་སྐེམས་ཤིང་རིད་པར་འགྱུར་རོ། །རུས་ཟད་རུས་ཟུག་སོ་དང་ནི། །སེན་མོ་སྐྲ་ལ་སོགས་པ་འབྱུང༌། །ཞེས་བྱ་བ་ལ། རུས་པ་ཟད་པའི་མཚན་མ་ནི་རུས་པ་ཉིད་ཟུག་ཅིང་ན་བ་དང༌། དེ་བཞིན་དུ་སོ་དང་སེན་མོ་དང། སྐྲ་ལ་སོགས་པ་འབྱུང་ཞིང་འབྱི་བར་འགྱུར་རོ། །རྐང་ཟད་རྐང་སྦུབས་སྟོང་པ་དང༌། མགོ་འཁོར་རབ་རིབ་ཅན་དུ་འགྱུར། །ཞེས་བྱ་བ་ལ། རྐང་ཟད་པའི་མཚན་མ་ནི་རྐང་གི་རུས་པའི་སྦུབས་ཁོང་སྟོང་དུ་འདུག་པ་དང་དེ་བཞིན་དུ་མགོ་འཁོར་བ་དང༌། རབ་རིབ་ཅན་དུ་འགྱུར་ཞིང་མུན་པར་འཐོམས་པར་འགྱུར་རོ། །ཁུ་བཟད་པས་རིང་ནས་འབྱུང༌། །ཡང་ན་ཁུ་བ་ཁྲག་ཉིད་འབྱུང༌། །རླིག་པ་ཤིན་ཏུ་ན་བ་དང༌། །ཕོ་མཚན་ཚིག་པ་སྙམ་དུ་སེམས། །ཞེས་བྱ་བ་ལ། ཁུ་བཟད་པའི་མཚན་མ་ནི། ཁུ་བ་རིང་ཞིང་འགོར་
ནས་འབྱུང་བ་དང༌། ཡང་ན་ཁུ་བ་ཁྲག་ཉིད་དུ་འབྱུང་བར་འགྱུར་བ་དང༌། རླིག་པ་དེ་འབྲས་བུ་སྦུབས་ཅན་ཤིན་ཏུ་ན་ཞིང་འཇུག་པ་དང༌། ཕོ་མཚན་ཚིག་ཅིང་དུ་བ་འཐུལ་བ་སྙམ་དུ་སེམས་པར་འགྱུར་རོ། །བཤང་ཟད་རླུང་ནི་རྒྱུ་མའི་ནང༌། །སྒྲ་བཅས་འཁྱིལ་བ་ལྟ་བུར་བྱེད། །ལྟོ་བར་རྒྱུ་ཞིང་གྱེན་དུ་འགྲོ། །སྙིང་ག་རྩིབ་ལོགས་མི་བཟད་ན། །ཞེས་བྱ་བ་ལ། བཤང་བ་ཟད་པའི་མཚན་མ་ནི་རླུང་རྒྱུ་མའི་ནང་ན་རྒྱུ་བ་སྒྲ་དང་བཅས་ཤིང་འཁྱིལ་བ་ལྟ་བུར་ཡན་མན་དུ་རྒྱུ་བ་དང་དེ་བཞིན་དུ་ལྟོ་བར་གྱེན་དུ་རྒྱུ་ཞིང་འགྲོ་བས་ན་བར་བྱེད་པ། སྙིང་ག་དང་རྩིབ་ལོགས་གཉིས་སུ་མི་བཟད་པར་ན་ཞིང་གཟེར་བར་བྱེད་པ་ཡིན་ནོ། །གཅིན་ཟད་གཅིན་ནི་ཉུང་སྲི་དང༌། །མདོག་འགྱུར་བའམ་ཁྲག་བཅས་ཉིད། །ཅེས་བྱ་བ་ལ། གཅིན་ཟད་པའི་མཚན་མ་ནི་གཅིན་ཟད་ཅིང་ཅུང་ཟད་འབྱུང་བ་དང༌། སྲི་ཞིང་ན་བར་འབྱུང་བ་དང། མདོག་འགྱུར་བ་དང༌། ཁྲག་དང་བཅས་པ་ཉིད་དུ་འགྱུར་རོ། །རྡུལ་ཟད་སྤུ་འབྱི་སྤུ་འགྲེངས་ལ། །པགས་པ་རྣམས་ནི་འགས་པར་འགྱུར། །ཞེས་བྱ་བ་ལ། རྡུལ་ཟད་པའི་མཚན་མ་ནི་སྤུ་འབྱི་ཞིང་ལྷུང་བ་དང༌། བ་སྤུའི་བུ་ག་འཛུམས་ཤིང་འགྲེངས་པ་དང༌། པགས་པ་རྣམས་འགས་ཤིང་འགྱེས་པར་འགྱུར་བ་ཡིན་ནོ། །དྲི་མ་ཤིན་ཏུ་ཕྲ་བ་རྣམས། །ཟད་པས་བརྟག་དཀའ་དྲི་མ་ཡི། །རང་གནས་བསྐམས་དང་ན་བ་དང༌། །སྟོང་དང་ཡང་བ་ལས་ཤེས་བྱ། །ཞེས་བྱ་བ་ལ། མིག་རྡུལ་ལ་སོགས་པའི་དྲི་མ་ཤིན་ཏུ་ཕྲ་བ་རྣམས་ཟད་པའི་མཚན་མ་ནི་བརྟག་པར་དཀའ་སྟེ། དེ་བས་ན་དྲི་མ་རྣམས་ཀྱི་རང་གི་གནས་སྐབས་ལ་སོགས་པ་ལས་ཤེས་ཤིང་རྟོགས་པར་བྱའོ། །དྲི་མ་རྣམས་ཀྱི་རང་གི་གནས་ཡིན་པས་ན་དྲི་མའི་རང་གནས་ཏེ། མིག་ལ་སོགས་པ་དེ་རྣམས་བསྐམས་པ་དང༌། ན་བ་དང་སྟོང་པ་དང༌། ཡང་བ་ལས་ཟད་པ་བརྟག་པར་དཀའ་བའི་དྲི་མ་དེ་རྣམས་ཀྱི་ཟད་པ་ཤེས་པར་བྱའོ། །དེ་ལྟར་ནད་དང་ལུས་ཟུངས་དང༌། དྲི་མ་རྣམས་ཀྱི་ཟད་པ་དང་འཕེལ་བ་རྒྱ་ཆེར་བཤད་ནས། མདོར་བསྡུས་ནས་སྨྲས་པ་ནི། ནད་སོགས་རང་ཉིད་ཇི་ལྟ་བའི། །ཡོན་ཏན་འདི་ནི་བཟློག་པ་དག །ཟད་
པ་དང་ནི་འཕེལ་འགྱུར་ལས། །འཕེལ་འབྲི་སྨན་པས་ཤེས་པར་བྱ། །ཞེས་བྱ་བ་ལ། ཇི་ལྟར་ཤེས་པར་བྱ་ཞེ་ན། རང་ཉིད་ཀྱི་མཚན་ཉིད་ཇི་ལྟ་བའི་གོ་བཟློག་པ་ཟད་པ་ལས་ནི་འཕེལ་བར་ཤེས་པར་བྱ་ལ། རང་ཉིད་ཀྱི་ཡོན་ཏན་གོ་བཟློག་པ་འཕེལ་བར་འགྱུར་བ་ལས་ནི་འབྲི་བར་ཤེས་པར་བྱ་སྟེ། ནད་ལ་སོགས་པའི་ནམ་མཚན་ཉིད་ལས་གོ་བཟློག་པར་འགྱུར་བའི་མཚན་ཉིད་དོ། །དེ་ཇི་ལྟར་རླུང་གི་ནད་ཀྱི་ཡོན་ཏན་ལས་གོ་བཟློག་པ་ནི་སྣུམ་པ་ལ་སོགས་པའོ། །མཁྲིས་པའི་ནི་བསིལ་བ་ལ་སོགས་པའོ། །བད་ཀན་གྱི་ནི་རྩུབ་པ་ལ་སོགས་པའོ། །དེ་རྣམས་ལས་གོ་བཟློག་པ་ཟད་ཅིང། བྲི་བ་ལས་ནི་ནད་འཕེལ་བར་ཤེས་པར་བྱ་ལ། དེ་རྣམས་ཀྱི་ལས་ཀྱང་གོ་བཟློག་པའི་མཚན་ཉིད་འཕེལ་ཞིང་ལྷག་པར་གྱུར་བ་ལས་ནི། འབྲི་ཞིང་ཟད་པར་འགྱུར་བར་ཤེས་པར་བྱའོ། །དྲི་མ་ཐོགས་ལས་འཕེལ་བ་སྟེ། །ཤིན་ཏུ་འབྱུང་ལས་ཟད་ཤེས་བྱ། །ཞེས་བྱ་བ་ལ། བཤང་བ་དང་གཅི་བ་ལ་སོགས་པའི་དྲི་མ་རྣམས་ཐོགས་ཤིང་འབྱུང་བར་མི་བྱེད་པ་ལས་ནི་འཕེལ་བར་ཤེས་པར་བྱ་ལ། ཤིན་ཏུ་འབྱུང་ཞིང་ལྷག་པར་ཕྱིར་འབྱུང་བ་ལས་ནི་ཟད་པར་ཤེས་པར་བྱ་སྟེ། སྔར་བཤད་བ་འབའ་ཞིག་ཏུ་མ་ཟད་ཀྱི། ཚུལ་འདིས་ཀྱང་ཤེས་པར་བྱའོ། །དྲི་མ་རྣམས་འཕེལ་བ་དང༌། ཟད་པ་གཉི་ག་ཡང་ནད་སྐྱེད་པར་བྱེད་པ་ཡིན་ལ། དེ་ལ་ཡང་གང་ཞིག་ཟད་པར་འགྱུར་བ་དེ་འཕེལ་བ་བས་ཆེས་ལྷག་པར་འཕེལ་ཏེ་གནོད་པའི་རྒྱུར་འགྱུར་བ་ཡིན་ཏེ། དེ་བས་ན། ལུས་ནི་དྲི་མས་བརྟེན་པས་ན། །འཕེལ་བས་ཟད་པ་གནོད་པ་ཡིན། །ཞེས་བྱ་བ་ལ། ལུས་ཏེ་ཕུང་པོ་འདི་ནི་དྲི་མས་བརྟེན་ཅིང་གྲོགས་སུ་བྱས་པ་ཡིན་པས་དྲི་མ་རྣམས་འཕེལ་ཞིང་ལྷག་པར་གྱུར་པས་ཟད་ཅིང་འགྲིབ་པར་གྱུར་པས་ཆེས་ལྷག་པར་གནོད་པར་བྱེད་པ་ཡིན་ནོ། །ནད་ལ་སོགས་པའི་དངོས་པོ་དེ་རྣམས་ལས་གང་ཞིག་གཞི་གང་ལ་བརྟེན་ཞེ་ན། དེའི་ཕྱིར་སྨྲས་པ་ནི། དེ་ལ་རླུང་ནི་རུས་པར་གནས། །མཁྲིས་པ་རྡུལ་དང་ཁྲག་ལ་གནས། །བད་ཀན་ལྷག་མ་གནས། ཞེས་བྱ་བ་ལ། དེ་ལ་རླུང་ལ་སོགས་པ་དེ་རྣམས་ཀྱི་ནང་ནས་རླུང་ནི་རུས་པ་ལ་བརྟེན་ཞིང་གནས་ལ། མཁྲིས་པ་ནི་རྡུལ་དང་ཁྲག་ལ་གནས་
སོ། །བད་ཀན་ནི་ལྷག་མ་ལ་གནས་པ་སྟེ། རུས་པ་དང༌། རྡུལ་དང༌། ཁྲག་ནི་གནས་པ་པོ་དང་ལྡན་པས། དེ་མ་གཏོགས་པ་ལྷག་མ་དངས་མ་དང༌། ཤ་དང༌། ཚིལ་དང༌། རྐང་དང༌། ཁུ་ཆུ་དང༌། བཤང་བ་དང་གཅི་བ་ལ་སོགས་པ་གཞན་དག་ལ་གནས་ཏེ། དེ་དག་ལ་གནས་པ་པོ་མེད་པས་ལྷག་མ་ཞེས་བྱ་བ་ལ། དངས་མ་ལ་སོགས་པ་ལྷག་མ་དེ་རྣམས་ལ་བད་ཀན་བརྟེན་ཞིང་གནས་པ་ཡིན་ནོ། །དེས་འདི། །ཕན་ཚུན་རྟེན་དང་བརྟེན་པ་ཡིན། །འཕེལ་དང་ཟད་པར་བྱེད་པའི་སྨན། །གཅིག་གི་གང་ཡིན་གཞན་གྱིའང་དེ། །ཞེས་བྱ་བ་ལ། གང་ཚུལ་དེ་ལྟ་བུ་དེས་ན་ནད་དྲི་མ་རྣམས་གནས་དང་གནས་པ་པོ་འཕེལ་བར་བྱེད་པ་ཡིན་ལ། གང་བརྟེན་ཅིང་ཟད་པར་བྱེད་པ་ན་བརྟེན་པ་པོའི་ཡང་ཟད་པར་བྱེད་པ་ཡིན་པས་ན་གཅིག་གི་སྨན་གང་ཡིན་པ་གཞན་གྱི་ཡང་དེ་ཉིད་ཡིན་ནོ། །དེ་ལྟ་ན་ནི་གང་རླུང་གི་གནས་རུས་པ་འཕེལ་བའི་སྨན་དེས་ནི། དང་པོ་རླུང་ཡང་འཕེལ་བར་བྱེད་ལ། རུས་པ་ཟད་པར་བྱེད་པའི་སྨན་དེས་ནི་རླུང་ཡང་ཟད་པར་བྱེད་པར་འགྱུར་རོ་ཞེ་ན། རུས་པ་རླུང་གཉིས་ལ་འདི་མིན། །ཞེས་བྱ་བ་ཡིན་ཏེ། རུས་པ་དང་རླུང་གཉིས་མ་འཕེལ་བ་དང༌། ཟད་པར་བྱེད་པའི་སྨན་འདི་ལྟར་མི་སྦྱོར་རོ་ཞེས་ཤུགས་ཀྱིས་སྦྱར་བར་བྱའོ། །ཕལ་ཆེར་བརྟས་པས་འཕེལ་བར་འགྱུར། །བད་ཀན་རྗེས་མཐུན་དེ་ཡི་ཕྱིར། །དེ་ལས་བཟློག་པས་ཟད་པ་ཡིན། རླུང་དང་རྗེས་མཐུན། །ཞེས་བྱ་བ་ལ། གང་གི་ཕྱིར་ནད་དང་ལུས་ཟུངས་འདི་རྣམས་ནི་ཕལ་ཆེར་བརྟས་པར་བྱས་ཤིང་ཚིམ་པར་བྱས་པས་འཕེལ་ཞིང་སྐྱེ་བར་འགྱུར་ལ། འཕེལ་བ་དེ་ཡང་བད་ཀན་དང་རྗེས་སུ་མཐུན་པ་ཡིན་ནོ། །ཕལ་ཆེར་ཞེས་སྨོས་པ་ནི་གཞན་དག་ཏུ་ནི་ཁ་ཅིག་འདི་ལྟར་མ་ཡིན་པ་ཡང་ཡོད་དོ་ཞེས་སྟོན་པ་ཡིན་ནོ། །དེ་ལྟར་བརྟན་པ་ལས་འཕེལ་བར་འགྱུར་པའི་རྒྱུ་དེའི་ཕྱིར་བརྟེན་པ་པོའི་ཚུལ་ཅན་དང་ནད་དང་ལུས་ཟུངས་འདི་དག་ཟད་པར་བྱ་བ་ནི་དེ་ལས་བཟློག་པ་སྟེ། ཉམས་སྨད་པ་མིང་གི་རྣམ་གྲངས་སུ་སྨྱུང་བར་བྱ་བ་ཞེས་བྱ་བས་ཟད་པར་འགྱུར་བ་ཡིན་ནོ། །དེ་ལྟར་ན། གང་ཡང་རུས་པ་འཕེལ་བར་བྱེད་པའི་སྨན་སྣུམ་པ་དང་མངར་བ་ལ་སོགས་པ་དེ་ནི་རླུང་ཟད་པར་བྱེད་
པ་ཡིན་ནོ། །གང་རླུང་འཕེལ་བར་འགྱུར་བའི་སྨན་རྩུབ་པ་དང༌། ཁ་བ་ལ་སོགས་པ་དེ་ནི་ཉམས་སྨད་པར་བྱེད་པ། སྨྱུང་བའི་རྗེས་སུ་མཐུན་པས་ནི་རུས་བཟད་པར་བྱེད་པ་ཡིན་ནོ། །དེ་བས་ན་རུས་པ་རླུང་གཉིས་ལ་འདི་ཡིན་ཞེས་སྨོས་ཏེ། བསྟན་བཅོས་བྱེད་པས་ཕལ་མོ་ཆེའི་དབང་དུ་མཛད་ནས་སྨྲས་པ་ནི། འཕེལ་དང་ཟད་པ་འབྱུང་འགྱུར་བའི། །སྨྱུང་དང་བརྟ་བར་བྱ་བ་ཡིས། །ནད་ནི་རིམ་གྱིས་གསོ་བར་བྱ། །རླུང་མ་གཏོགས་ཏེ། །ཞེས་བྱ་བ་ཡིན་ཏེ། གང་གི་ཕྱིར་དེ་ལྟར་བལྟ་བའི་ཚུལ་ལས་ནི་འཕེལ་བར་འགྱུར་ལ། ཉམས་སྨད་པའི་ཚུལ་ལས་ནི་ཟད་པར་འགྱུར་བ་དེས་ན་ནད་ཀྱི་འཕེལ་བ་དང་ཟད་པ་འབྱུང་བར་འགྱུར་བའི་སྨྱུང་བ་དང་བརྟ་བར་བྱ་བ་དག་གིས་ནད་ཀྱི་རྣམ་པ་རིམ་གྱིས་གསོ་བར་བྱ་ཞིང་བསྒྲུབ་པར་བྱའོ། །དེ་ཡང་འཕེལ་བ་ལས་གྱུར་པའི་ནད་ལ་སྨྱུང་བ་དང་ཉམས་སྨད་པས་གསོ་བར་བྱ་ལ། ཟད་པ་ལས་གྱུར་པའི་ནད་ལ་ནི་བརྟ་ཞིང་ཚིམ་པར་བྱ་བས། བསྒྲུབ་པར་བྱའོ། །དེ་ལྟ་ན་ནི་རླུང་གསོ་བར་བྱ་བ་དག་ལ་རླུང་འཕེལ་བ་ལས་གྱུར་པའི་ནད་ལ་ནི་སྨྱུང་བར་བྱ་བས་གསོ་དགོས་ལ། རླུང་ཟད་པ་ལས་བྱུང་བའི་ནད་ལ་བརྟ་བར་བྱ་དགོས་པར་འགྱུར་རོ་ཞེས་རྟོགས་པར་གྱུར་པས། དེའི་ཕྱིར་སྨྲས་པ་ནི། རླུང་མ་གཏོགས་ཏེ་ཞེས་བྱ་བ་ཡིན་ཏེ། གསོ་བའི་རིམ་པ་དེ་ལ་རླུང་ནི་མ་གཏོགས་ཏེ། འདི་ལས་གཞན་དུ་བྱ་བ་ཡིན་ནོ། །དེ་སྐྱེས་ལ། །དེ་ཉིད་བཟློག་ཐབས་སྦྱར་བར་བྱ། ཞེས་བྱ་བ་ལ། རླུང་དེ་ལས་སྐྱེས་པའི་ནད་རྣམས་ལ་ནི་དེ་ཉིད་ཅེས་བྱ་བ་སྨྱུང་བ་དང༌། བརྟ་བར་བྱ་བ་དག་གི་བཟློག་པའི་ཐབས་ཀྱིས་གསོ་བར་བྱ་བ་སྟེ། འཕེལ་བ་ནི་བརྟ་བར་བྱ་བ་དང༌། ཟད་པ་ལ་ནི་སྨྱུང་བར་བྱ་བས་གསོ་བར་བྱའོ། །ཁྱད་པར་དུ་ནི་བྲག་སྐྱེས་ནད། །གཏར་ག་བཀྲུ་སྨན་དག་གིས་སོ། །ཞེས་བྱ་བ་ལ། ནད་ཀྱི་གསོ་བ་ལ་ཡང་ཁྱད་པར་དུ་བྱ་བ་ནི་ཁྲག་སྐྱེས་ཤིང་འཕེལ་བ་ལས་ནད་དུ་གྱུར་པ་ལས། གཏར་ག་བྱ་ཞིང་ཁྲག་དབྱུང་བ་དང༌། བཀྲུ་སྨན་བཏང་བདག་གིས་གསོ་ཞིང་བསྒྲུབ་པར་བྱའོ། །ཤ་ཆེར་སྐྱེས་ལས་བྱུང་བའི་ནད། །གཏར་ག་མེ་བཙའ་ཐལ་སྨན་སྦྱར། །ཞེས་བྱ་བ་ལ། ཤ་ཆེར་སྐྱེས་ཤིང་སྦོམ་པ་ལས་བྱུང་བའི་ནད་ལ་ནི་གཏར་ག་བྱ་བ་དང་མེ་བཙའ་གདབ་པ་དང༌། ཐལ་སྨན་རྣོན་པོ་སྦྱར་བ་ལ་སོགས་པས་
གསོ་བར་བྱའོ། །ཚིལ་ཆེས་སྦོམ་སྐེམས་གསོ་བར་བྱ། །ཞེས་བྱ་བ་ལ། ཚིལ་ཆེས་ཤིང་འཕེལ་བ་ལས་བྱུང་བའི་ནད་ལ་ནི། སྦོམ་པ་གསོ་བའི་ཆོ་ག་རྣམ་པ་གཉིས་བཤད་པའི་ཚུལ་གྱིས་གསོ་བར་བྱ་ལ། ཚིལ་ཟད་པ་ལས་བྱུང་བའི་ནད་ལ་ནི་སྐེམ་པོ་གསོ་བའི་ཆོ་ག་རྣམ་པ་གཉིས་ཀྱིས་གསོ་བར་བྱའོ། །རུས་པ་ཟད་པ་ལས་བྱུང་ལ། །མར་དང་འོ་མ་ཁ་རར་སྦྱར། །དེ་བཞིན་འཇམ་རྩི་གཏང་བས་གསོ། །ཞེས་བྱ་བ་ལ། རུས་པ་ཟད་པ་ལས་བྱུང་བའི་ནད་ལ་ནི། སྨན་རོ་ཁ་བ་དང་སྦྱར་བའི་འོ་མ་ལ་སོགས་པས་གསོ་བ་དང༌། དེ་བཞིན་དུ་འཇམ་རྩི་མས་གཏོང་བས་གསོ་བར་བྱའོ། །བཤང་བ་འཕེལ་ལ་འཁྲུ་བས་གསོ། །ཞེས་བྱ་བ་ལ། བཤང་བ་འཕེལ་བ་ལས་བྱུང་བའི་ནད་ལ་ནི་དྲག་ཏུ་འཁྲུ་བའི་ཆོ་གས་གསོའོ། །བཤང་བ་ཟད་ལས་བྱུང་བའི་ནད། །ར་ལུག་ནང་ཁྲོལ་ཟན་དྲོན་དང༌། །སྦྱར་ཐུག་མ་ཤ་གཉིས་སོགས་སྦྱིན། །ཞེས་བྱ་བ་ལ། བཤང་བ་ཟད་པ་ལས་བྱུང་བའི་ནད་ལ་ནི། ར་དང་ལུག་གི་ནང་ཁྲོལ་རྒྱུ་མ་ལ་སོགས་པ་གཡོས་སུ་བྱས་པ་དང༌། ཟན་དྲོན་དང༌། སྦྱོར་ཐུག་དང༌། མ་ཤ་གཉིས་པོ་སྟེ་མོན་སྲན་སྡེའུ་དང༌། མོན་སྲན་དཀར་པོ་གཉིས་སྦྱིན་པ་དང༌། སོགས་པའི་སྒྲས་རྒྱ་སྣེའུའི་ཚོད་མ་དང། ཞོ་ག་ཆུ་དང༌། རྩབ་མོ་རང་སྐྱུར་ལ་སོགས་པ་སྦྱིན་པ་བསྡུའོ། །གཅིན་འཕེལ་གྱུར་ལ་གཅིན་འབྲི་བ། །གཅིན་ཟད་ལས་བྱུང་གཅིན་སྙི་གསོ། །ཞེས་བྱ་བ་ལ། གཅིན་མང་བ་ལས་བྱུང་བའི་ནད་ལ་ནི། གཅིན་འབྲི་བའི་གསོ་བའི་ཆོ་གས་གསོ་བར་བྱའོ། །གཅིན་ཟད་པ་ལས་བྱུང་བའི་ནད་ལ་ནི། གཅིན་སྙི་བ་གསོ་བའི་ཆོ་གས་གསོ་བར་བྱའོ། །རྔུལ་མི་འབྱུང་ལ་རྩོལ་དང་བསྐུ། །རྔུལ་འབྱུང་ཆོ་གས་གསོ་བར་བྱ། །ཞེས་བྱ་བ་ལ། རྔུལ་ཟད་པ་ལས་བྱུང་བའི་ནད་ལ་ནི། རྩོལ་བ་ལ་སོགས་པས་རྔུལ་དབྱུང་བའི་ཆོ་གས་གསོ་བར་བྱའོ། །ལུས་ཀྱི་མེ་དྲོད་རང་གནས་འདུག །ཆ་ཤས་ལུས་ཟུངས་རྣམས་ལ་བརྟེན། །དེ་རྣམས་འབྲི་ཞིང་རབ་འབར་བས། །ལུས་ཟུངས་འཕེལ་དང་ཟད་པར་འགྱུར། །ཞེས་བྱ་བ་ལ། །ལུས་ཀྱི་མེ་དྲོད་ཅེས་བྱ་བ། ཕོ་བའི་མེ་དྲོད་ཡིན་ལ། རང་གནས་སུ་འདུག་ཅེས་བྱ་བ། རང་གི་གནས་ཞུ་བའི་
གནས་ཀྱི་བར་ན་འདུག་པ་དེའི་ཆ་ཤས་གང་ཡིན་པ་རྣམས་ལུས་ཟུངས་ལ་བརྟེན་ཅིང་གནས་པའི་ཆ་དེ་རྣམས་འབྲི་ཞིང་ཉམས་དམས་པས་དངས་མ་ལ་སོགས་པའི་ལུས་ཟུངས་རྣམས་འཕེལ་བར་འགྱུར་ལ། ཆ་ཤས་དེ་རྣམས་ཉིད་རབ་ཏུ་འབར་ཞིང་སྟོབས་ཆེ་བར་གྱུར་བས་ནི་ལུས་ཟུངས་རྣམས་ཟད་པར་འགྱུར་རོ། །ལུས་ཟུངས་དང་པོ་ཕྱི་མ་ནི། །རྒྱས་བྱེད་ཟད་པའང་དེ་བཞིན་ནོ། །ཞེས་བྱ་བ་ལ། ལུས་ཟུངས་ཀྱི་དང་པོ་དངས་མ་ཞེས་བྱ་བ་རྒྱས་པར་གྱུར་ན་དེའི་ཕྱི་མ་ཁྲག་ཅེས་བྱ་བའི་ལུས་ཟུངས་རྒྱས་པར་བྱེད་ལ། ལུས་ཟུངས་ཀྱི་དངས་མ་ཟད་ན་ཕྱི་མ་ཁྲག་ཀྱང་དེ་བཞིན་དུ་ཟད་པར་འགྱུར་རོ། །ནད་དང༌། ལུས་ཟུངས་དང༌། དྲི་མ་དང༌། དྲི་མ་རྣམས་ཀྱི་གནས་ལ་གནོད་པའི་རིམ་པ་དང༌། ནད་འབྱུང་བའི་རིམ་པ་སྨྲས་པ་ནི། ཉེས་འཁྲུགས་པས་ནི་ལུས་ཟུངས་ཉེན། །གཉི་གས་དྲི་མ་ལ་གནོད་བྱེད། །འོག་ན་གཉིས་ཏེ་མགོ་བོར་བདུན། །བུ་ག་དང་ནི་རྔུལ་འབྱུང་བའི། །དྲི་མའི་གནས་ནི་དྲི་མ་སྟེ། །རང་རང་གནས་སུ་ནད་སྐྱེད་འགྱུར། །ཞེས་བྱ་བ་ལ། ཉེས་པ་ནི་རླུང་ལ་སོགས་པ་སྟེ། དེ་རྣམས་འཁྲུགས་པ་ནི་རང་གི་རྒྱུ་རྣམས་ཀྱིས་ལྡང་ཞིང་གཡོས་སོ། །དེས་ན་ལུས་ཟུངས་བྱ་བ་དངས་མ་ལ་སོགས་པ་ལ་ཉེན་ཅིང་གནོད་པར་འགྱུར་རོ། །ཉེས་པ་དང་ལུས་ཟུངས་དེ་གཉིས་ཀ་འཁྲུགས་ཤིང་གཡོས་པས་ནི་དྲི་མ་ལ་གནོད་པར་བྱེད་ལ། གནོད་པ་དང་ལྡན་པ་ནི་དྲི་མ་དེས་ནི་དྲི་མའི་གནས་ལ་གནོད་པ་སྐྱེད་པར་འགྱུར་ན། དྲི་མའི་གནས་དེ་དག་གང་ཡིན་ཞེ་ན། དེའི་ཕྱིར་སྨྲས་པ་ནི། འོག་ན་གཉིས་ཏེ་བཤང་བའི་ལམ་དང་གཅི་བའི་ལམ་མོ། །མགོ་བོར་ནི་དྲི་མའི་གནས་བདུན་ཏེ། མིག་གཉིས་དང་རྣ་བའི་བུ་ག་གཉིས་དང༌། སྣའི་བུ་ག་གཉིས་དང༌། ལྐོག་མའི་བུ་ག་གཅིག་སྟེ། བུ་ག་ནི་བུ་གའི་ཁུང་བུ་རྣམས་དང༌། དེ་བཞིན་དུ་རྔུལ་འབྱུང་བར་བྱེད་པ་སྟེ། ལུས་ཐམས་ཅད་དུ་གཏོགས་པའི་བ་སྤུའི་བུ་ག་རྣམས་ཏེ། དེ་ཐམས་ཅད་ཀྱང་དྲི་མའི་གནས་ཡིན་ལ། དེ་རྣམས་ནི་གནོད་པ་ཅན་གྱི་དྲི་མས་གནོད་པ་སྐྱེད་དོ། །དེ་བས་ན་ལུས་ཟུངས་དང་དྲི་མའི་གནས་དེ་རྣམས་སུ་རང་རང་གི་གནས་པ་དེ་རྣམས་སུ་རང་གི་ནད་སྐྱེད་ཅིང་འབྱུང་བར་འགྱུར་རོ། །དེ་ཡང་ལུས་ཟུངས་རྣམས་ལ་ཉེས་བས་གནོད་པ་སྐྱེད་ལ། དྲི་མའི་
གནས་རྣམས་སུ་ནི་དྲི་མས་གནོད་པ་བསྐྱེད་ནས་རང་རང་ཇི་ལྟ་བའི་ནད་རྣམས་འབྱུང་བར་འགྱུར་རོ། །དེ་ལྟར་ཉེས་པ་དང་ལུས་ཟུངས་དང་དྲི་མ་རྣམས་རང་གི་ལས་ཉིད་ལ་སོགས་པའི་ཁྱད་པར་གྱིས་བཤད་ནས། ད་ནི་ཉེས་པ་དང་ལུས་ཟུངས་དང་དྲི་མ་རྣམས་ཀྱི་རྩ་བ། ལུས་འདིའི་ཉེས་པ་དང་ལུས་ཟུངས་དང་དྲི་མ་རྣམས་ཟད་དམ་མ་ཟད་པར་གྱུར་ཀྱང་སྲོག་དང་བཅས་པར་ཟད་པར་གྱུར་ལ། དེ་འཕེལ་བས་སྲོག་དང་བཅས་པ་འཕེལ་བར་འགྱུར་བའི་ལུས་གནས་པའི་རྒྱུའི་གཙོ་བོ་དེ་སྨྲས་པ་ནི། ལུས་ཟུངས་ཁུ་བའི་མཐར་ཐུག་པའི། །ནང་ནས་གཟི་ཅན་མདངས་མཆོག་ཡིན། །སྙིང་ལ་གནས་ཀྱང་ཁྱབ་པ་དང༌། །ལུས་ནི་བརྟན་པར་གནས་པ་ཡིན། །གང་ཞིག་འཇིག་ན་དེས་འཇིག་ལ། །གང་ཞིག་གནས་ན་གནས་གྱུར་པ། །གང་ལ་དངོས་རྣམས་སྣ་ཚོགས་པ། །ལུས་ལ་བརྟེན་པ་འབྱུང་བ་ཡིན། །ཞེས་བྱ་བ་ལ། ལུས་ཟུངས་དངས་མ་ནས་ཁུ་བའི་མཐར་ཐུག་པ་རྣམས་ཀྱི་ནང་ན་གཟི་ཅན་མདངས་ནི་མཆོག་ཡིན་ཏེ། ཤིན་ཏུ་སྙིང་པོར་གྱུར་པ་ཡིན་ལ། དེ་ནི་མདངས་ཞེས་བྱ་བར་སློབ་དཔོན་གྱིས་བཤད་དོ། །དེ་བཞིན་དུ་སྙིང་ག་ལ་གནས་སུ་ཟིན་ཀྱང་ལུས་མ་ལུས་པར་ཁྱབ་པ་ཡིན་ནོ། །དེ་ཡང་རྣམ་པ་གཉིས་སུ་བཤད་དེ། ཐིག་ལེ་དྲུག་པའི་ཚད་དང་ཁྱབ་པར་བྱེད་དེ། །དེ་ནི་ལུས་ཐམས་ཅད་ལ་ཁྱབ་པར་བྱེད་ཅིང་ཐིག་ལེ་དྲུག་པ་ཁ་དོག་དཀར་པོ་དང༌། དམར་པོ་ལྟ་བུ་དང༌། ཅུང་ཟད་སེར་པོར་སྣང་བ་ཁྱད་པར་དུ་སྙིང་ལ་གནས་པ་ཡིན་ནོ། །དེ་ཡང་ལུས་ནི་བརྟན་པར་གནས་པ་ཡིན་ཞེས་བྱ་བ་སྟེ། དེ་ནི་ལུས་བརྟན་པར་གནས་པ་དང༌། དེ་བསྲུང་ཞིང་གནས་པར་བྱེད་པ་ཡིན་ཏེ། དེ་ལུས་གནས་ཤིང་འཇོག་པར་བྱེད་པ་ཡིན་ནོ། །གཞན་ཡང་གང་ཞིག་འཇིག་ཅིང་མེད་པར་གྱུར་ན། ངེས་པར་གདོན་མི་ཟ་བར་འཇིག་པར་འགྱུར་ལ། དེ་བཞིན་དུ་མདངས་གང་ཞིག་གནས་ཤིང་ཡོད་པར་གྱུར་ན། སྐྱེས་བུ་དེ་གནས་ཤིང་འཚོ་བར་འགྱུར་བ་དང༌། དེ་བཞིན་དུ་མདངས་གང་ལས་དངོས་པོའི་ངོ་བོ་རྣམས་རྣམ་པ་དུ་མར་འབྱུང་ཞིང་སྣང་བར་འགྱུར་ལ། ལུས་ལ་སོགས་པ་སྣ་ཚོགས་པར་འབྱུང་བར་འགྱུར་ཞིང་བརྟེན་པ་དེ་ནི་མདངས་ཞེས་བྱའོ། །དེ་ཡང་བསྡུས་པ་ལས། འབྱུང་བ་ཀུན་གྱི་མདངས་གང་ཡིན། །གཟི་ཅན་དེ་ནི་མཆོག་ཏུ་བཤད། །དེ་
ནི་ཟླ་བའི་རང་བཞིན་དག །དམར་ཞིང་ཅུང་ཞིག་སེར་དང་བཅས། །དང་པོ་མངལ་གྱི་སྙིང་པོ་གང༌། །གང་དེ་མངལ་གྱི་དངས་མར་གནས། །སྙིང་ནི་ཆགས་པར་གྱུར་པ་ན། །གང་ཞིག་སྔོན་ཆད་བརྟེན་གྱུར་ཅིང༌། །ལུས་ཀྱི་དངས་མ་སྣུམ་དག་དང༌། །སྲོག་ནི་གང་ལ་བརྟེན་གྱུར་ལ། །གང་ཞིག་འཇིགས་པས་འཇིག་འགྱུར་ཞིང༌། །གང་གིས་ལུས་ཅན་འཚོ་བྱེད་ལ། །སྙིང་ལ་གནས་ཀྱང་ཁྱབ་གྱུར་གང༌། །དེ་ནི་སྲོག་གི་གནས་མཆོག་ཡིན། །ཞེས་བཤད་པ་ཡིན་ནོ། །མདངས་ནི་སེམས་འཁྲུགས་བཀྲེས་སེམས་ལས། །མྱ་ངན་ངལ་ལ་སོགས་པས་ཟད། །ཅེས་བྱ་བ་ལ། མདངས་དེ་ནི་སེམས་བྱུང་འཁྲུགས་པ་ལ་སོགས་པས་ཟད་པར་འགྱུར་ཏེ་སེམས་འཁྲུགས་པ་ནི་ཁྲོས་པའོ། །བཀྲེས་པ་ནི་ཤིན་ཏུ་མི་བཟད་པར་བྲུབ་ཚ་བའོ། །སེམས་ལས་ནི་ཡུལ་རྣམ་པ་དུ་མ་ལ་དཔྱོད་པའོ། །མྱ་ངན་ནི་སེམས་ཀྱི་སྡུག་བསྔལ་ལོ། །ངལ་བ་ནི་ལུས་ཉོན་མོངས་པའོ། །སོགས་པའི་སྒྲས་ནི་འཇིག་པ་ལ་སོགས་པ་བསྡུའོ། །དེ་ཟད་སྡངས་ཤིང་ལུས་རིད་ལ། །ཡང་ཡང་སེམས་ཤིང་དབང་པོ་ཉམས། །གཟི་ཉམས་རྩུབ་དང་ཡིད་མི་དགའ། །ཉམ་ཆུང་བར་ནི་འགྱུར་བ་ཡིན། །ཞེས་བྱ་བ་ལ། མདངས་དེ་ཟད་ཅིང་ཉམས་པར་གྱུར་ན་མི་སྡངས་པ་སྟེ། གློ་བུར་དུ་སྐྲག་པ་དང་བཅས་པར་འགྱུར། དེ་བཞིན་དུ་ལུས་རིད་ཅིང་མེ་སྟོབས་ཆུང་བ་དང༌། ཡང་དང་ཡང་དུ་སེམས་ཤིང་དཔྱོད་པ་ལ་བརྩོན་པར་གྱུར་པ་དང༌། དབང་པོ་ཐམས་ཅད་ཉམས་ཤིང་སྡུག་བསྔལ་ལ། མྱོ་མྱོ་པོར་ནུས་པ་ཆུང་བར་འགྱུར་བ་དང༌། གཟི་བྱིན་ཉམས་ཤིང་སྐྱ་བོ་འོད་འོད་པོར་འགྱུར་བ་དང༌། རྩུབ་པ་སྟེ་པགས་པ་ལ་སོགས་པ་སྣུམ་མེད་པ་དང༌། ཡིད་མི་དགའ་ཞིང་སེམས་ཀྱི་མདུད་པའི་ཤས་ཆེ་བར་འགྱུར་བ་དང༌། ཉམ་ཆུང་བ་སྟེ་ལུས་ཟུངས་རྣམས་ཟད་ཅིང་འབྲི་བར་འགྱུར་བ་ཡིན་ནོ། །འཚོ་བྱེད་སྨན་དང་འོ་མ་དང༌། །ཤ་ཁུ་ལ་སོགས་དེའི་སྨན་ཡིན། །ཞེས་བྱ་བ་ལ། མདངས་ཟད་པ་དེའི་སྨན་ནི་ཛི་བན་ཏི་དང༌། ཉེའུ་ཤིང་ལ་སོགས་པ་འཚོ་བྱེད་ཀྱི་སྨན་རྣམས་དང༌། དེ་བཞིན་དུ་འོ་མ་དང༌། ཤའི་ཁུ་བ་དང༌། སོགས་པའི་སྒྲས་བརྟས་པར་བྱེད་པའི་སྨན་རྒུན་འབྲུམ་ལ་སོགས་པའི་སྨན་མངར་བའི་སྡེ་ཚན་ལས་བསྟན་པ་རྣམས་བསྡུས་ཏེ། དེ་དག་ཀྱང་དེའི་སྨན་ཡིན་ནོ། །འོ་མ་ཡང་འཚོ་བྱེད་
ཡིན་པས། འཚོ་བྱེད་ཀྱི་སྨན་གྱི་སྡེ་ཚན་གྱི་ནང་དུ་གཏོགས་ན། ཅིའི་ཕྱིར་ལོགས་ཤིག་ཏུ་སྨོས་ཤེ་ན། འོ་མ་ནི་དེར་སྨན་གྱི་མཆོག་ཡིན་པས་ཁྱད་པར་དུ་སྨོས་པ་ཡིན་ནོ། །ཟད་པ་དང་འཕེལ་བ་དག་ནི་སྨན་མདོར་བསྡུས་ཏེ་སྨྲས་པ་ནི། ཟས་གང་མི་འདོད་གང་ཞིག་སློང༌། །དེ་ལ་མི་འཕྲོད་འཕྲོད་པ་ནི། །སྤང་དང་སྦྱིན་པར་བྱ་བ་དག །དེ་དང་དེས་འཕེལ་ཟད་པར་འགྱུར། །ཞེས་བྱ་བ་ལ། བཟའ་བར་བྱ་བའི་ཟས་གང་སྐྱེས་བུ་མི་འདོད་ཅིང་འགྲངས་པ་དང༌། ཡང་ཟས་གང་ཞིག་སློང་ཞིང་འདོད་པར་བྱེད་པ་དེ་དང་དེ་ལ་ཟས་མི་འཕྲོད་པ་དང་ཞེ་འགྲངས་པ་ནི། སྤང་ཞིང་མི་བཟའ་བ་དང། འཕྲོད་པ་དང་ཡིད་ལ་འདོད་པ་ནི་སྦྱིན་ཞིང་བཟའ་བར་བྱ་བ་གང་ཡིན་པ་དེ་དང་དེ་ནི་ནད་འཕེལ་བ་དང་ནད་ཟད་པར་འགྱུར་རོ། །དེ་ཡང་འདོད་ཅིང་སློང་བའི་ཟས་དེ་མི་འཕྲོད་པ་མེད་པར་གྱུར་ན་བཟའ་བར་བྱའི་གཞན་དུ་ནི་མ་ཡིན་ནོ། །ཉེས་པ་ཕྱིན་ཅི་ལོག་པ་དང༌། །མཐུན་པས་སྲེད་པ་སྐྱེད་བྱེད་དེ། །ཕལ་ཆེར་འཕེལ་དང་ཟད་པ་དག །མི་མཁས་པ་ཡིས་མི་ཤེས་སོ། །ཞེས་བྱ་བ་ལ། གང་གི་ཕྱིར་རླུང་ལ་སོགས་པའི་ཉེས་པ་དག་ནི་ཕྱིན་ཅི་ལོག་ཏུ་གྱུར་པའི་ཟས་ཀྱིས་ཡུལ་དེ་ལ་སྲེད་ཅིང་དགའ་བ་སྐྱེད་པར་བྱེད་ལ། དེ་ཡང་ཕལ་ཆེར་ཏེ་ཐམས་ཅད་དུ་མ་ཡིན་ནོ། །ཟད་པ་ནི་ཟས་ཀྱི་རིས་སུ་གཏོགས་པ་དང་ཆ་འདྲ་ཞིང་མཐུན་པའི་ཡོན་ཏན་གྱིས་ཡུལ་དེ་སྲེད་པ་སྐྱེད་པར་བྱེད་དེ། ཇི་སྲིད་རླུང་འཕེལ་བ་ནི། ཟས་སྣུམ་པ་དང༌། སྐྱུར་བ་དང༌། མངར་བ་ལ་དགའ་བ་སྐྱེད་པར་བྱེད་པའོ། །མཁྲིས་པ་འཕེལ་བས་གྲང་བ་དང་བསིལ་བའོ། །བད་ཀན་འཕེལ་བ་ནི་ཁ་བ་དང་རྩུབ་པ་ལ་སྲེད་པ་སྐྱེད་པར་བྱེད་དོ། །དེ་ལ་ཟད་པ་ལ་རླུང་ཟད་པས་སྣུམ་པ་དང་ལན་ཚྭའོ། །མཁྲིས་པ་ཟད་པས་ནི་སྐྱུར་བ་ལ་སོགས་པའོ། །བད་ཀན་ཟད་པས་ནི་ཟས་སྣུམ་པ་དང༌། མངར་བ་ལ་སོགས་པ་ལ་དགའ་བ་སྐྱེད་པར་བྱེད་པ་ནི་དངོས་པོའི་རང་བཞིན་ནམ་ཆོས་ཉིད་ཡིན་ནོ། །དེ་ལྟ་བུའི་ཉེས་པའི་རང་བཞིན་ནི་སྨན་པ་མི་མཁས་ཤིང། ཤེས་རབ་ཆུང་བས་མི་ཤེས་ཤིང་ཡུལ་དེའི་རང་བཞིན་ཤེས་པ་དེ་ལ་མི་སྐྱེའོ། །ཞེས་བྱ་བའི་དོན་ཏོ། །ཡང་མཚན་ཉིད་གཞན་དག་མདོར་བསྡུས་ཏེ་སྨྲས་པ་ནི། ཅི་བཞིན་སྟོབས་དང་རང་ཇི་བཞིན། །འཕེལ་ན་ཉེས་པ་རྒྱས་པར་འགྱུར། །ཟད་པས་རང་བཞིན་འདོར་བར་འགྱུར། །མཉམ་ན་
རང་གི་ལས་རྣམས་བྱེད། །ཅེས་བྱ་བ་ལ། ནད་དང་ཉེས་པ་རྣམས་ཀྱི་སྟོབས་ཅི་ལྟ་བ་དང༌། རང་གི་རང་བཞིན་ཅི་ལྟ་བ་ལས་ཚད་ལས་འཕེལ་བར་གྱུར་ན་ནི། ཉེས་པ་རྒྱས་ཤིང་སྐྱེ་བར་འགྱུར་ལ། དེ་བཞིན་དུ་ཟད་པ་སྟེ་རང་གི་སྟོབས་ཇི་ལྟ་བ་དང༌། རང་གི་མཚན་ཉིད་ཆེན་པོ་དང་འབྲིང་དང་ཆུང་ངུ་ཅི་ལྟ་བ་དང༌། རང་གི་རང་བཞིན་རྩུབ་པ་དང༌། དྲོ་བ་དང་སྣུམ་པ་ལ་སོགས་པའི་རང་བཞིན་ཅི་ལྟ་བ་ཟད་པ་ལས་ནི་ནད་དེ་རྣམས་རང་གི་མཚན་ཉིད་འདོར་ཞིང་སྤོང་བར་འགྱུར་རོ། །གང་གི་ཚེ་ཉེས་པ་དེ་རྣམས་མཉམ་པ་སྟེ་འཕེལ་བ་ཡང་མེད་ལ་ཟད་པ་ཡང་མེད་པ་དེའི་ཚེ་ནི་རང་གི་ཚད་དང་ལྡན་པར་གནས་པ་ཡིན་ཏེ། དེའི་ཚེ་ན་ནི་མཉམ་ཞིང་མི་འགྱུར་བར་གནས་པ་ཉིད་ཀྱིས་ན། རང་གི་ལས་ནད་ལ་སོགས་པའི་ཚུལ་ཤེས་པར་བྱ་བ་ལས་བཤད་པ། དབུགས་རྔུབ་པ་དང་དབུགས་དབྱུང་བ་ལ་སོགས་པའི་ལས་དེ་རྣམས་བྱེད་ཅིང་སྐྱེད་པ་ཡིན་ནོ། །མཚན་ཉིད་དེས་ན་དེ་རྣམས་མཉམ་ཞིང་འགྱུར་བ་མེད་པར་ཤེས་པར་བྱའོ། །ཉེས་པ་ཟད་པ་རྣམས་ནི་ལུས་ལ་ཉེས་པ་ཅི་ཡང་སྐྱེད་པར་མི་བྱེད་དེ། མི་ལྡང་བའི་ཕྱིར་དང༌། ནུས་པ་ཟད་པའི་ཕྱིར་དང༌། ཅི་ཡང་མི་བྱེད་པ་ཡིན་པའི་ཕྱིར་ཉེས་པ་ཅི་ཡང་སྐྱེད་པར་མི་བྱེད་དོ་སྙམ་དུ་སེམས་ནས། སྨན་པ་དག་ཉེས་པ་ཟད་པ་འཕེལ་བའི་ཕྱིར། བཟའ་བ་དག་སྟེར་བར་བྱེད་པ་ལ་སྦྱོར་བར་བྱེད་པ་ནི་ནམ་ཡང་མ་གྱུར་ཅིག་སྙམ་ནས་སྨྲས་པ་ནི། གང་ཞིག་མཉམ་པས་ལུས་འདི་འཕེལ་བར་བྱེད། །ཉེས་པ་དེ་ཉིད་མི་མཉམ་གསོད་པར་བྱེད། །དེ་བས་ཟད་པའང་འཕེལ་བ་ལྟ་བུ་ནི། །ཕན་པའི་སྤྱོད་པ་ཉིད་ཀྱིས་བསྲུང་བར་བྱ། །ཞེས་བྱ་བ་ནི། ཉེས་པ་གང་ཞིག་མཉམ་ཞིང་སྙོམས་པར་གྱུར་པས་ལུས་འཕེལ་བར་བྱེད་པའི་དོན་དུ་འགྱུར་ཏེ་རང་གི་ཚད་དང་ལྡན་པར་གནས་པ་ནི་ལུས་མཉམ་པའི་རྒྱུར་འགྱུར་རོ། །ཉེས་པ་དེ་ཉིད་མི་མཉམ་ཞིང་རང་གི་ཚད་ལས་ལྷག་པའམ་ཆད་པར་གྱུར་ན་ལུས་གསོད་པར་འགྱུར་རོ། །གང་གི་ཕྱིར་ཉེས་པ་མཉམ་པ་ནི་ལུས་འཕེལ་བའི་རྒྱུ་ཡིན་ལ། མི་མཉམ་པ་ནི་ལུས་གསོད་པའི་རྒྱུ་ཡིན་པ་དེ་བས་ན། ཉེས་པ་རྣམས་ཟད་ཀྱང་འཕེལ་བ་བཞིན་དུ་ཕན་པའི་སྤྱོད་པས་བསྲུང་བར་བྱ་སྟེ། ཇི་ལྟར་འདི་རྣམས་འཕེལ་ནས་ནད་ལྡང་ཞིང་གནོད་པར་འགྱུར་བས་ན། ཁྱད་པར་དུ་མི་འཕེལ་བའི་ཕྱིར་སྲུང་བར་བྱེད་པ་བཞིན་དུ་ཟད་པ་ལས་ཀྱང་
རྗེས་སུ་མཐུན་ཞིང་ཕན་པའི་སྤྱོད་པ་ཉིད་ཀྱིས་ཀྱང་བསྲུང་ཞིང་བསྐྱང་བར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་བཅུ་གཅིག་པའི་རྣམ་པར་འགྲེལ་པའོ།། །།དེ་ནས་ནད་ཀྱི་དབྱེ་བ་ཤེས་པར་བྱ་བའི་ལེའུ་བཤད་པར་བྱའོ་ཞེས་བྱ་བ་ལ། སྔར་ནད་ལ་སོགས་པའི་ཚུལ་ཤེས་པར་བྱ་བ་བཤད་མོད་ཀྱི། ནད་རྣམས་ནི་ཐ་དད་པར་འབྱུང་བ་ཡིན་པས། དེའི་ཕྱིར་ནད་ཀྱི་དབྱེ་བ་ཤེས་པར་བྱ་བ་མེད་པར་ནད་མ་ལུས་པའི་ཚུལ་ཤེས་པར་འགྱུར་བ་བཤད་པ་མ་ཡིན་པས་དེའི་ཕྱིར་ནད་ལ་སོགས་པའི་ཚུལ་ཤེས་པར་བྱ་བའི་འོག་ཏུ་ནད་ཀྱི་དབྱེ་བ་ཤེས་པར་བྱ་བའི་ལེའུ་བཤད་པ་ཡིན་ནོ། །དེ་ལ་ནད་རྣམས་ཀྱི་དབྱེ་བ་ནི་ནད་ཀྱི་དབྱེ་བ་སྟེ། གནས་དང་མིང་དང༌། དབྱེ་བ་ལ་སོགས་པའི་རབ་ཏུ་དབྱེ་བས་ཤེས་པར་བྱ་ཞིང་རྟོགས་པར་བྱ་བ་སྟེ། དེ་ལ་ཕན་པའི་གཞུང་ནི་ནད་ཀྱི་དབྱེ་བ་ཤེས་པར་བྱ་སྟེ། དེའི་ལེའུ་བཤད་ཅིང་བསྟན་པར་བྱའོ་ཞེས་པའོ། །དེ་ལ་རེ་ཞིག་རླུང་ལ་སོགས་པ་ལུས་ལ་གནས་པའི་དབྱེ་བའི་ངེས་པར་བརྟག་པ་སྨྲས་པ་ནི། ཞུ་བའི་གནས་དང་རྐེད་པ་དཔྱི། །རྣ་བ་རུས་པ་རེག་དབང་པོ། །རླུང་གནས་ཡིན་ཏེ་དེ་ལས་ཀྱང༌། །ཞུ་བའི་གནས་སུ་ཁྱད་པར་གནས། །ཞེས་བྱ་བ་ལ། རླུང་གི་གནས་ནི་ཞུ་བའི་གནས་ལ་སོགས་པ་ཡིན་ཏེ། ལྟེ་བའི་འོག་ནས་རྐེད་པ་དང༌། དཔྱི་དང༌། རྣ་བ་དང༌། རུས་པ་དང༌། རེག་པའི་དབང་པོ་སྟེ། པགས་པ་རྣམས་ཡིན་ལ། དེ་རྣམས་ཀྱི་ནང་ནས་ཀྱང་ཞུ་བའི་གནས་ནི་རླུང་གི་ཁྱད་པར་གྱི་གནས་ཡིན་ཏེ། ཟས་འཇུ་བ་རྣམས་གང་ན་གནས་ཤིང་བརྟེན་པ་དེ་ནི་ལྷག་པར་རླུང་གི་གནས་ཡིན་ནོ། །མཁྲིས་གནས་ལྟེ་བ་ཕོ་བ་རྡུལ། །ཆུ་སེར་དངས་མ་ཁྲག་དང་ནི། །མིག་དང་པགས་པ་དག་ཡིན་ཏེ། །དེ་ལས་ལྟེ་བ་ཁྱད་པར་གནས། །ཞེས་བྱ་བ་ལ། མཁྲིས་པའི་གནས་ནི་ལྟེ་བ་ལ་སོགས་པ་ཡིན་ཏེ། ཕོ་བ་ནི་ལྟེ་བ་ཡན་ཆད་ཀྱི་མ་ཞུ་བའི་གནས་སྤྱི་ལ་བྱའོ། །ཆུ་སེར་ནི་པགས་པའི་ཤ་མདངས་ན་ཆུར་གནས་ཏེ་འདུག་པ་ལ་བྱ་སྟེ། པགས་པ་ཕྲུགས་པ་ལས་ཆུའི་རྣམ་པར་བྱུང་བར་སྣང་བའོ། །དངས་མ་དང་ཁྲག་ནི་ལུས་ཟུངས་དང་པོ་
དང་གཉིས་པའོ། །མིག་ནི་མིག་གི་དབང་པོའོ། །པགས་པ་ནི་རེག་པའི་དབང་པོ་སྟེ། དེ་ནི་རླུང་གནས་ཡིན་པར་བསྟན་མོད་ཀྱི། མཁྲིས་པའི་ཡང་དེ་ཉིད་ཡིན་ཏེ། རླུང་གི་གྲོགས་ཡིན་པའི་ཕྱིར་རོ། །འདིར་གནས་དེ་དག་ལས་ཀྱང་ལྟེ་བ་ནི་ཁྱད་པར་གྱི་གནས་ཡིན་ནོ། །བད་ཀན་བྲང་དང་མགུལ་པ་མགོ །གློ་བ་རུས་ཚིགས་མ་ཞུའི་གནས། །དངས་མ་ཚིལ་དང་སྣ་ལྕེར་གནས། །བྲང་ནི་ཁྱད་པར་དག་གི་གནས། །ཞེས་བྱ་བ་ལ། བད་ཀན་གྱི་གནས་ནི་བྲང་ལ་སོགས་པ་ཡིན་ནོ། །དེ་ལ་བྲང་ནི་ཐོད་ཁའི་གནས་སོ། །མགུལ་བ་ནི་ལྐོག་མའོ། །མགོ་བོ་ནི་སྤྱི་བོའོ། །གློ་བ་ནི་ཁོང་པའི་ནང་ཆ་སྟེ། ལུས་ཀྱི་ཡན་ལག་གི་དབྱེ་བ་ལས་འོག་ནས་བཤད་དོ། །རུས་ཚིགས་ནི་ཚིགས་ཀྱི་མདུད་པའོ། །ཕོ་བའི་གནས་ནི་ལྟེ་བ་ཡན་ཆད་དོ། །དངས་མ་ལ་སོགས་པ་ནི་གོ་བར་ཟད་དོ། །འདིར་གནས་འདི་རྣམས་ཀྱི་ནང་ན་བྲང་ནི་བད་ཀན་གྱི་ཁྱད་པར་གྱི་གནས་སོ། །རླུང་ནི་སྲོག་སོགས་དབྱེ་བ་ཡིས། །ལྔ་ཡི་བདག་ཉིད། ཅེས་བྱ་བ་ལ། རླུང་གཅིག་པུ་གཡོ་བའི་བདག་ཉིད་ཅན། གཅིག་པུ་ནི་སྲོག་དང༌། སྟོད་དུ་རྒྱུ་བ་དང༌། ཁྱབ་བྱེད་དང༌། མེ་དང་མཉམ་དུ་གནས་པ་དང༌། ཐུར་དུ་སེལ་བ་ཞེས་བྱ་བ་རྣམ་པ་ལྔའི་བདག་ཉིད་ཅན་དུ་གནས་པ་ལ་སོགས་པའི་དབྱེ་བས་འགྱུར་རོ། །འདིར་སྲོག་ནི། སྤྱིར་གནས་བྲང་དང་གྲེ་བར་རྒྱུ། །བློ་དང་དབང་པོ་སེམས་འཛིན་བྱེད། །མཆིལ་འདོར་སྦྲིད་འབྱུང་སྒྲེགས་པ་འདོན། །དབུགས་རྔུབ་ཟས་ནི་མིད་པར་བྱེད། །ཅེས་བྱ་བ་ལ། འདིར་ལྔ་པོ་འདི་དག་གི་ནང་ནས་སྲོག་ཅེས་བྱ་བའི་རླུང་ནི་སྤྱི་བོར་གནས་ཤིང་མགོ་ལ་བརྟེན་པ་དང༌། བྲང་དང་གྲེ་བར་རྒྱུ་ཞིང་འགྲོ་བ་དང༌། བློ་དང་དབང་པོ་དང་སེམས་འཛིན་པར་བྱེད་པ་དང༌། མཆིལ་མ་ལ་སོགས་པ་འདོར་ཞིང་འབྱིན་པར་བྱེད་དོ། །མཆིལ་མ་ནི་ཁ་ནས་བད་ཀན་འབྱུང་བའོ། །དབུགས་རྔུབ་པ་ནི་དབུགས་ནང་དུ་སྡུད་པའོ། །གྱེན་རྒྱུའི་གནས་ནི་བྲང་ཡིན་ཏེ། །སྣ་དང་ལྕེ་དང་ལྐོག་མར་རྒྱུ། །ཚིག་འབྱིན་འབད་རྩོལ་མདངས་དང་ནི། །སྟོབས་དང་ཁ་དོག་དྲན་ལས་བྱེད། །ཅེས་བྱ་བ་ལ། རླུང་གྱེན་དུ་རྒྱུ་བའི་གནས་ནི་བྲང་ཡིན་ཏེ། དེར་བརྟེན་ནས་སྣ་ལ་སོགས་པ་གསུམ་དུ་རྒྱུ་བར་བྱེད་དོ། །དེའི་དབྱེ་བ་ནི་ཚིག་འབྱིན་པ་
ལ་སོགས་པ་ཡིན་ཏེ། འབད་རྩོལ་ནི་བྱ་བ་ལ་བརྩོན་པའོ། །མདངས་ནི་གཟི་མདངས་དང་ལྡན་པའོ། །སྟོབས་ནི་ནུས་པའོ། །ཁ་དོག་ནི་དཀར་པོ་ལ་སོགས་པའི་དབྱེ་བས་ཕྱེ་བའོ། །དྲན་པ་ནི་འདས་པའི་དོན་མ་བརྗེད་པའོ། །ཁྱབ་བྱེད་སྙིང་གནས་ལུས་ཀུན་ལ། །མ་ལུས་ཁྱབ་ཅིང་རབ་ཏུ་མགྱོགས། །འགྲོ་དང་འདེགས་དང་འཇོག་པ་དང༌། །མིག་འབྱེད་འཛུམས་པ་ལ་སོགས་པ། །ལུས་ཅན་བྱ་བ་ཕལ་ཆེར་ནི། །དེ་ལ་རག་ནི་ལུས་པ་ཡིན། །ཞེས་བྱ་བ་ལ། རླུང་ཁྱབ་བྱེད་ཅེས་བྱ་བ་ནི་སྙིང་ལ་གནས་ཏེ། ལུས་ཀུན་མ་ལུས་པར་ཁྱབ་ཅིང་རྒྱུ་བ་ཡིན་ལ། རབ་ཏུ་མགྱོགས་པ་སྟེ་མྱུར་དུ་འགྲོ་ཞིང་ཤས་ཆེར་མགྱོགས་པ་ཡིན་ནོ། །དེའི་ལས་ནི་འགྲོ་བ་ལ་སོགས་པའི་ལུས་ཅན་ཏེ། སེམས་ཅན་གྱི་བྱ་བ་ཐམས་ཅད་ལས་ཕལ་ཆེར་ཏེ། མང་དུ་རླུང་དེ་ལས་རག་ལས་ཤིང་ལྟོས་པ་ཡིན་ནོ། །དེ་ཡང་འགྲོ་བ་ནི་ཡུལ་ནས་ཡུལ་གཞན་དུ་འགྲོ་བ་ལ་སོགས་པའོ། །འདེགས་པ་ནི་གྱེན་དུ་འདྲེན་པའོ། །འཇོག་པ་ནི་ཡན་ལག་སྨད་དེ་འཇོག་པའོ། །མིག་འབྱེད་པ་ནི་མིག་གི་རྫི་མ་གཉིས་འབྱེད་པའོ། །འཛུམས་པ་ནི་དེ་ཉིད་འཛུམས་པའོ། །མཉམ་གནས་མེ་དྲོད་ཉེ་བར་གནས། །ནང་ཁྲོལ་ཀུན་ཏུ་རྒྱུ་བ་ཡིན། །བྱ་བ་ཟས་ལེན་འཇུ་བ་དང༌། །དངས་སྙིགས་འབྱེད་ཅིང་འདོར་བར་བྱེད། །ཅེས་བྱ་བ་ལ། རླུང་མེ་དང་མཉམ་དུ་གནས་པ་ཞེས་བྱ་བ་ནི། ཕོ་བའི་མེ་དྲོད་དང་ཉེ་བར་གནས་ཏེ། ནང་གྲོལ་གྱི་ནང་ན་མ་ཞུ་བའི་གནས་ཞེས་བྱ་བ་དེར་བརྟེན་ནས་ནང་གྲོལ་དུ་རྒྱུ་ཞིང་སྤྱོད་པ་ཡིན་ལ། དེའི་ལས་ཀྱི་བྱེ་བྲག་ནི་ཟས་ལེན་ཅིང་འཛིན་པ་དང་དེ་བཞིན་དུ་འཇུ་ཞིང་སྨིན་པར་བྱེད་པ་དང་དངས་སྙིགས་འབྱེད་ཅིང་བྱེ་བྲག་འབྱེད་པ་དང་ཕྱི་རོལ་དུ་འདོར་ཞིང་འབྱིན་པར་བྱེད་པ་ཡིན་ནོ། །ཐུར་སེལ་གཞང་གནས་འདོང་མོ་དང༌། །ལྒང་པ་ཕོ་མཚན་བརླ་ནང་རྒྱུ། །བྱ་བ་ཁུ་བ་བཟླ་མཚན་དང༌། །བཤང་གཅི་མངལ་ནས་འབྱིན་པར་བྱེད། །ཅེས་བྱ་བ་ལ། རླུང་ཐུར་དུ་སེལ་བ་ཞེས་བྱ་བ་ནི་གཞང་ན་གནས་པ་སྟེ། རྐེད་པའི་འོག་ན་འདུག་པ་དང༌། དེ་བཞིན་དུ་འདོང་མོ་ཞེས་བྱ་བ་མཇུག་ཏོའི་ནང་ལ་སོགས་པའི་གནས་ན་རྒྱུ་བ་དང༌། ལྒང་པ་དང་ཕོ་མཚན་དང་བརླའི་ནང་ན་རྒྱུ་བ་ཡིན་ནོ། །བྱ་བའི་ལས་
ནི་ཁུ་བ་དང་ཟླ་མཚན་འབྱིན་པ་ལ་སོགས་པ་ཡིན་ནོ། །མཁྲིས་པའི་རང་བཞིན་ལྔ། ཞེས་བྱ་བ་ལ། མཁྲིས་པའི་རང་བཞིན་ནི་རྣམ་པ་ལྔ་སྟེ། འཇུ་བྱེད་དང༌། དམར་སྒྱུར་དང༌། སྒྲུབ་བྱེད་དང༌། མཐོང་བྱེད་དང༌། མདོག་གསལ་ལོ། །དེ་ལ། །ཞུ་དང་མ་ཞུའི་བར་ན་གནས། །འབྱུང་ལྔའི་བདག་ཉིད་ཅན་གྱིས་ནི། །གང་མེའི་ཡོན་ཏན་ཤས་ཆེ་བས། །གཤེར་ཉིད་སྐེམས་བྱེད་འཇུ་ལ་སོགས། །ལས་ཀྱི་མེ་ཡི་སྒྲར་བཤད་དོ། །ཟས་ནི་འཇུ་དང་དེ་བཞིན་དུ། །དངས་མ་སྙིགས་མ་འབྱེད་པར་བྱེད། །དེར་གནས་བཞིན་དུ་མཁྲིས་པ་ནི། །ལྷག་མ་རྣམས་ཀྱི་གྲོགས་བྱེད་པས། །སྟོབས་སྐྱེད་པ་ཡིས་བྱེད་འགྱུར་བ། །དེ་ནི་འཇུ་བྱེད་ཅེས་བཤད་དོ། །ཞེས་བྱ་བ་ལ། དེ་ལ་ཞེས་བྱ་བ་ལྔ་པོ་དེ་རྣམས་ཀྱི་ནང་ནས། མཁྲིས་པ་འཇུ་བྱེད་ཅེས་བྱ་བ་ནི་ཞུ་བའི་གནས་དང་མ་ཞུ་བའི་གནས་ཀྱི་བར་ན་གནས་ཤིང་བརྟེན་ལ། དེ་ཡང་འབྱུང་བ་ཆེན་པོ་ལྔའི་བདག་ཉིད་ཅན་དུ་གྱུར་པ་ཡིན་གྱིས་ཀྱང་གང་གི་ཕྱིར་མེའི་ཡོན་ཏན་གྱི་ཤས་ཆེ་ཞིང་བདོ་བས་གཤེར་བ་ཉིད་སྐེམས་པར་བྱེད་པ་ཡིན་ཞིང༌། ཟླ་བའི་ཡོན་ཏན་ཟད་པར་བྱས་པས་གཤེར་བ་ཉིད་སྐེམས་པ་ཡིན་ཏེ། དེས་ན་འཇུ་བ་ལ་སོགས་པའི་ལས་ཀྱིས་ཏེ་འཇུ་བ་དང་སྲེག་པ་ལ་སོགས་པའི་བྱ་བའི་ལས་ཀྱིས་མེའི་སྒྲར་བཤད་ཅིང་མིང་འཐོབ་པ་ཡིན་ནོ། །དེ་བཞིན་དུ་ཟས་རྣམ་པ་བཞི་འཇུ་བར་བྱེད་པ་ཡིན་ནོ། །ཟས་ཞུ་བར་གྱུར་པ་རྣམས་ཀྱི་དངས་མ་དང་སྙིགས་མ་འབྱེད་བར་བྱེད་ཅིང་བྱེ་བྲག་ཏུ་ཐ་དད་པར་བྱེད་པ་དང་ཞུ་བ་དང་མ་ཞུ་བའི་བར་དེར་གནས་བཞིན་དུ་མཁྲིས་པ་དམར་སྒྱུར་ལ་སོགས་པ་བཞི་པོ་གྲོགས་བྱེད་ཅིང་སྟོབས་བྱེད་ལ། སྟོབས་སྐྱེད་པ་སྟེ་ནུས་པ་སྐྱེད་པར་བྱེད་པར་འགྱུར་ཏེ། མཁྲིས་པ་དེ་ནི་འཇུ་བར་བྱེད་ཅེས་བཤད་དོ། །མཁྲིས་པ་མ་ཞུའི་གནས་ལ་བརྟེན། །དངས་མདོག་སྒྱུར་བས་དམར་སྒྱུར་ཡིན། །ཞེས་བྱ་བ་ལ། དམར་སྒྱུར་ཞེས་བྱ་བའི་མཁྲིས་པ་ནི་མ་ཞུ་བའི་གནས་ལ་བརྟེན་ཅིང་གནས་ནས། ལུས་ཟུངས་དངས་མ་ཞེས་བྱ་བ་ཁྲག་གི་རང་བཞིན་དུ་མདོག་སྒྱུར་བར་བྱེད་པས། དམར་པོར་བྱེད་པའི་ཕྱིར་དམར་སྒྱུར་ཞེས་བྱ་བའི་སྒྲར་བཤད་པ་ཡིན་ནོ། །མཁྲིས་པ་སྒྲུབ་བྱེད་སྙིང་ལ་གནས། །བློ་དང་ཡིད་གཞུངས་ང་རྒྱལ་སོགས། །མངོན་འདོད་དོན་ནི་སྒྲུབ་བྱེད་པས། །ཞེས་བྱ་བ་ལ། མཁྲིས་པ་སྒྲུབ་བྱེད་
ཅེས་བྱ་བ་སྙིང་ལ་གནས་ཤིང་བརྟེན་པ་གང་ཡིན་པ་དེ་ནི་བློ་ལ་སོགས་པའི་རྒྱུར་གྱུར་པས་མངོན་པར་འདོད་པའི་དོན་རྫོགས་པར་བྱེད་ཅིང༌། ཕྱིའི་དོན་རྣམས་འཛིན་ཅིང་དྲན་པར་བྱེད་པ་ལ་སོགས་པའི་ཚུལ་གྱིས་སྒྲུབ་པར་བྱེད་པས་ན་དེ་ནི་སྒྲུབ་བྱེད་ཅེས་བྱའོ། །བློ་དང་ཡིད་གཞུངས་པ་ནི་ཕན་ཚུན་ཁྱད་པར་ཡོད་པར་ཤེས་པར་བྱ་སྟེ། ད་ལྟར་བྱུང་བའི་དུས་སུ་དོན་གང་ལ་ཡིད་ཐེ་ཚོམ་དུ་གྱུར་པའི་དོན་དེ་ལ་ཚིག་འདིའི་དོན་ནི་འདི་ཡིན་ནོ། །ཞེས་གང་ངེས་པ་སྐྱེད་པ་དེ་ནི་བློ་ཞེས་བྱ་ལ། ཡིད་གཞུངས་པ་ནི་བློའི་ཁྱད་པར་ཡིན་ནོ། །མིག་ལ་གནས་ཏེ་གཟུགས་མཐོང་བྱེད། །མཐོང་བྱེད་ཅེས་བཤད། ཅེས་བྱ་བ་ལ། མིག་གི་དབང་པོ་ལ་གནས་པའི་མཁྲིས་པ་ནི། མིག་འབྲས་ཀྱི་ནང་ན་གནས་ནས་གཟུགས་མཐོང་བར་བྱེད་པས་ན་མཐོང་བྱེད་ཅེས་བཤད་དོ། །གཟུགས་འཛིན་པ་དེ་ནི་དེ་ལ་རག་ལས་པ་ཡིན་པའི་ཕྱིར་རོ། །མདོག་གསལ་ནི། །པགས་མདོག་གསལ་བྱེད་པགས་པར་གནས། །ཞེས་བྱ་བ་ལ། མཁྲིས་པ་མདོག་གསལ་ནི་པགས་པ་མདོག་གསལ་ཞིང་དང་བར་བྱེད་པས་ན་མདོག་གསལ་ཞེས་བྱ་ལ། དེའི་གནས་ནི་པགས་པར་གནས་སོ། །དེས་ན་བསྐུ་བ་ལ་སོགས་པ་འཇུ་ཞིང་སྨིན་པར་བྱེད་དོ། །འཇུ་བར་མ་གྱུར་པའི་སྨན་གྱིས་ནི་རང་གི་བྱ་བ་མི་བྱེད་དོ། །བད་ཀན་རྣམ་ལྔ་ཞེས་བྱ་བ་ནི། རྟེན་བྱེད་དང༌། མྱགས་བྱེད་དང༌། མྱོང་བྱེད་དང༌། བརྟས་བྱེད་དང༌། འབྱོར་བྱེད་དང༌། དབྱེ་བ་རྣམ་པ་ལྔའོ། །བད་ཀན་རྣམ་ལྔ་བྲང་གནས་པ། །རང་གི་སྟོབས་ཀྱིས་སུམ་མདོ་དང༌། །སྙིང་དང་ཟས་ཀྱི་མཐུ་དང་ནི། །དེ་ཉིད་ལ་གནས་ཆུའི་ལས་བྱེད། །བད་ཀན་ལྷག་མའི་གནས་གྱུར་པའི། །རྟེན་ནི་གང་ཕྱིར་བྱེད་གྱུར་པས། །དེ་ཕྱིར་རྟེན་བྱེད་ཅེས་བཤད་དོ། །ཞེས་བྱ་བ་ལ། ཡང་བད་ཀན་དེ་ལས། བྲང་ལ་གནས་པ་དེ་རང་གི་སྟོབས་སམ། ནུས་པས་སུམ་མདོ་ཞེས་བྱ་བ་དཔུང་པ་གཉིས་དང༌། གཉའ་བ་འདུས་པའི་མདོ་རང་གི་ནུས་པས་རྟེན་པར་བྱེད་ཅིང༌། རང་གི་བྱ་བའི་ནུས་པ་སྐྱེད་པར་བྱེད་པས་ན་རྟེན་བྱེད་ཅེས་བྱའོ། །དེ་བཞིན་དུ་སྙིང་གར་ཟས་ཟོས་པའི་མཐུ་དངས་མའི་ཚུལ་གྱིས་རྟེན་པར་བྱེད་པ་རང་གི་སྟོབས་ཀྱིས་གནས་པ་དང༌། དེ་བཞིན་དུ་བྲང་དེ་ཉིད་ལ་གནས་ནས། ཆུའི་
ལས་བྱེད་ཅིང་ཆུའི་བྱ་བ་ངོམས་པ་དང༌། འགེངས་པ་ཞེས་བྱེད་པས། བད་ཀན་ལྷག་མ་རྣམ་པ་བཞིའི་གནས་སུ་གྱུར་ཅིང་རྟེན་བྱེད་དེ། གང་གི་ཕྱིར་རྒྱུ་དེ་ལྟར་བྱེད་པར་གྱུར་པས། དེའི་ཕྱིར་བད་ཀན་རྟེན་བྱེད་ཅེས་མིང་དུ་བཤད་དོ། །གང་ཞིག་མ་ཞུའི་གནས་ལ་གནས། །དེ་ནི་ཟས་ཚོགས་འདྲུལ་བྱེད་པས། །མྱགས་བྱེད་ཅེས་ནི་བྱ་བ་ཡིན། །ཞེས་བྱ་བ་ལ། བད་ཀན་དེ་ཉིད་གང་མ་ཞུ་བའི་གནས་ལ་གནས་ཤིང༌། དེས་ཟས་ཀྱི་ཚོགས་ཏེ། ཟས་ཀྱི་ཕུང་པོ་འདྲུལ་བར་བྱེད་ཅིང༌། མདག་མདག་པོར་བྱེད་པས་ན། མིང་མྱགས་བྱེད་ཅེས་བྱ་བ་ཡིན་ནོ། །མྱོང་བྱེད་ལྕེ་གནས་རོ་ཚོར་བྱེད། །ཅེས་བྱ་བ་ལ། བད་ཀན་མྱོང་བྱེད་ནི་ལྕེར་གནས་ནས་རོ་ལེགས་པར་ཚོར་བར་བྱེད་ཅིང༌། ཤེས་པར་བྱེད་པས་མྱོང་བྱེད་ཅེས་བྱའོ། །བརྟས་བྱེད་མགོར་གནས་དབང་པོ་ནི། །ཚིམ་པར་བྱེད་དེ། །ཞེས་བྱ་བ་ལ། བད་ཀན་བརྟས་བྱེད་ནི་མགོ་བོར་གནས་ནས། མིག་ལ་སོགས་པའི་དབང་པོ་རྣམས་ཚིམ་པར་བྱེད་ཅིང་བརྟས་པར་བྱེད་པས་ན། མིང་བརྟས་བྱེད་ཅེས་བྱའོ། །འབྱོར་བྱེད་ནི། ཚིགས་ལ་གནས་ནས་འབྱོར་བར་བྱེད། །ཅེས་བྱ་བ་ལ། བད་ཀན་འབྱོར་བྱེད་ཅེས་བྱ་བ་ཡན་ལག་གི་ཚིགས་ལ་གནས་ནས་ཚིགས་རྣམས་འབྱོར་བར་བྱེད་པས་ན། འབྱོར་བྱེད་ཅེས་བྱའོ། །དེ་ལྟར་ན་ནད་རྣམས་ཀྱི་གནས་དང་ལས་རྣམས་རྣམ་པར་ཕྱེ་སྟེ་བཤད་ནས་ཉེ་བར་བསྡུ་བའི་ཕྱིར་སྨྲས་པ་ནི། དེ་ལྟར་ནད་ནི་ཕལ་མོ་ཆེ། །མི་འགྱུར་བདག་ཉིད་ཅན་ཁྱབ་ཀྱང༌། །གནས་ཡིན་པར་ནི་ཤེས་བྱ་སྟེ། །ལས་རྣམས་ཀྱང་ནི་ཐ་དད་ཡིན། །ཞེས་བྱ་བ་ཡིན་ཏེ། བཤད་མ་ཐག་པའི་ཚུལ་དེ་ལྟར་རླུང་ལ་སོགས་པའི་ནད་ཕལ་མོ་ཆེ་མང་པོ་མི་འགྱུར་བའི་བདག་ཉིད་ཅན་ཏེ། བསྟན་བཅོས་ལས་ཇི་སྐད་བཤད་པའི་རང་གི་ཚད་དང་ལྡན་པར་གནས་ཤིང༌། མི་མཉམ་པ་མེད་པར་གྱུར་པ་དག་ནི་ལུས་ཀུན་མ་ལུས་པར་ཁྱབ་ཅིང་རྒྱུ་བ་ཡིན་ཡང༌། རང་རང་གི་གནས་དེ་དག་ཡིན་པར་ཤེས་པར་བྱ་ཞིང་ལོང་དུ་ཆུད་པར་བྱའོ། །གནས་འབའ་ཞིག་ཏུ་མ་ཟད་ཀྱི། དེ་རྣམས་ཀྱི་ལས་རྣམས་ཀྱང་སོ་སོ་ཐ་དད་པ་ཡིན་པར་ཤེས་པར་བྱའོ། །རླུང་ལ་སོགས་པ་དེ་དག་རེ་རེ་ཞིང་རྣམ་པ་ལྔར་ཕྱེ་བ་ཡིན་མོད་ཀྱི། འོན་ཀྱང་རྩུབ་པ་དང༌། སྣུམ་པ་ཉིད་ཀྱི་རང་
གི་མཚན་ཉིད་འདོར་བར་བྱེད་པ་ཡིན་པས་ན། དེའི་ཕྱིར་རྫས་ལ་བརྟེན་པའི་ཡོན་ཏན་མཉམ་པས་ནི། ནད་དེ་རྣམས་ཀྱི་སོགས་པ་དང་འཕེལ་བར་འགྱུར་བ་ཡིན། དེ་རྣམས་ཀྱི་རང་གི་མཚན་ཉིད་དང་མི་མཐུན་པའི་ཡོན་ཏན་རྫས་ལ་བརྟེན་པས་ནི་ཞི་བར་གྱུར་བ་ཡིན་ན། འདིར་གཞན་དག་ལ་ལྟོས་ཤིང་རག་ལས་པ་ནི་ཅུང་ཟད་ཀྱང་མེད་དེ། ཐམས་ཅད་ཀྱང་ཡོན་ཏན་མཉམ་པས་ནི་འཕེལ་བར་འགྱུར་ལ། མི་མཐུན་པས་ནི་ཞི་བར་བྱེད་པ་ཡིན་ནོ་སྙམ་དུ་སེམས་པ་ལ། དེའི་ཕྱིར་གཞུང་རྩོམ་པར་བྱེད་པས་འདི་སྐད་ཅེས་སྨྲས་པ་ནི། རྩུབ་སོགས་དྲོ་བར་ལྡན་པ་ནི། །རླུང་ནི་སོགས་པར་འགྱུར་བ་ཡིན། །གྲང་བས་ལྡང་བྱེད་སྣུམ་ལ་སོགས། །ཡོན་ཏན་དྲོ་ལྡན་ཞི་བྱེད་འགྱུར། །ཞེས་བྱ་བ་ཡིན་ཏེ། རྩུབ་པ་ལ་སོགས་པའི་ཡོན་ཏན་ནི་རྩུབ་པ་དང༌། བསིལ་བར་བྱེད་པ་དང༌། ཕྲ་བ་དང་གཡོ་བ་དག་ནི་ཡོན་ཏན་དྲོ་བ་དང་ལྡན་ཞིང༌། རླུང་གི་གཉེན་པོར་གྱུར་ཅིང་དེ་དང་མི་མཐུན་པའི་ཡོན་ཏན་དང་ལྡན་ན་རླུང་ནད་སོགས་ཤིང་འཕེལ་བར་འགྱུར་བ་ཡིན་ཏེ། རླུང་གི་ཡོན་ཏན་གྱི་སྤྱིའི་མཚན་ཉིད་ཙམ་དང་ལྡན་པའི་རྩུབ་པ་ལ་སོགས་པ་དག་ནི། རླུང་སོགས་ཤིང་འཕེལ་བའི་རྒྱུར་གྱུར་པ་ཡིན་མོད་ཀྱི། འོན་ཀྱང་དེ་གཅིག་པུར་མ་ཟད་དེ། ཡོན་ཏན་དྲོ་བ་རླུང་གི་གཉེན་པོར་འགྱུར་བ་དང་ལྡན་པའི་རྩུབ་པ་ལ་སོགས་པ་དེ་དག་ཀྱང་རླུང་སོགས་པར་བྱེད་དོ། །ཡང་རྩུབ་པ་ལ་སོགས་པའི་རླུང་གི་ཡོན་ཏན་དེ་དག་རླུང་དང་ལྡན་པར་གྲང་བའི་ཡོན་ཏན་དང་ལྡན་པ་ནི་རང་གི་རྗེས་སུ་མཐུན་པ་ཡིན་པས་ན། རླུང་ལྡང་བར་བྱེད་པ་ཡིན་ནོ། །སྣུམ་པ་ལ་སོགས་པའི་ཡོན་ཏན་དེ། སྣུམ་པ་དང༌། ལྕི་བ་དང༌། ཕྲ་བ་དང༌། སྦོམ་པ་དང༌། བརྟན་པ་དག་དྲོ་བའི་ཡོན་ཏན་དང་ལྡན་ན་རླུང་རབ་ཏུ་ཞི་བར་བྱེད་དོ། །རྣོ་སོགས་བསིལ་བ་དང་ལྡན་པས། །མཁྲིས་པ་སོགས་བར་བྱེད་འགྱུར་ལ། །དྲོ་བས་ལྡང་ཞིང་རོ་རྟུལ་སོགས། །བསིལ་བར་ལྡན་པས་ཞི་བར་འགྱུར། །ཞེས་བྱ་བ་ལ། རྣོ་བ་ལ་སོགས་པའི་ཡོན་ཏན་ནི་རྣོ་བ་དང༌། ཡང་བ་དང༌། དྲི་ང་བ་དང༌། འཁྲུ་བ་དང༌། སླ་བ་སྟེ། མཁྲིས་པའི་ཡོན་ཏན་ཆ་མཉམ་པ་དག་ནི་བསིལ་བའི་ཡོན་ཏན་མཁྲིས་པའི་མི་མཐུན་ཕྱོགས་དང་
ལྡན་པས། མཁྲིས་པའི་ནད་སོགས་ཤིང་འཕེལ་བར་འགྱུར་ལ། རྣོ་བ་ལ་སོགས་པའི་ཡོན་ཏན་མཁྲིས་པའི་ཡོན་ཏན་གྱི་ཆ་དང་མཉམ་པ་དེ་ཉིད་མཁྲིས་པའི་ཡོན་ཏན་དང་རྗེས་སུ་མཐུན་པ་དྲོ་བའི་ཡོན་ཏན་དང་ལྡན་པས་ལྡང་ཞིང་འཁྲུགས་པར་བྱེད་དོ། །དེ་རོ་རྟུལ་བ་ལ་སོགས་པའི་ཡོན་ཏན་ཏེ། རོ་རྟུལ་བ་དང༌། ལྕི་བ་དང༌། རྩུབ་པ་དང༌། བརྟན་པ་དང༌། བསྐ་བ་དང༌། དང་བའི་མཚན་ཉིད་མཁྲིས་པའི་ཡོན་ཏན་གྱི་མི་མཐུན་པའི་ཕྱོགས་སུ་གྱུར་པ་བསིལ་བ་ཞེས་པ་ཡང་མཁྲིས་པའི་གཉེན་པོར་གྱུར་བ་དང་ལྡན་པས་ཞི་བར་བྱེད་པར་འགྱུར་རོ། །སྣུམ་སོགས་གྲང་དང་ལྡན་པ་ཡིས། །བད་ཀན་སོགས་པར་བྱེད་འགྱུར་ལ། །དྲོ་བས་ལྡང་འགྱུར་དེ་ཉིད་ནི། །རྩུབ་སོགས་ཡོན་ཏན་གྱིས་ཞིར་འགྱུར། །ཞེས་བྱ་བ་ལ། སྣུམ་པའི་ཡོན་ཏན་ནི་ལྕི་བ་དང༌། རྟུལ་བ་དང༌། འཇམ་པ་དང༌། བརྟན་པ་སྟེ། བད་ཀན་གྱི་ཡོན་ཏན་དང་ཆ་མཉམ་པ་དག །གྲང་དང་ལྡན་པ་ཡིས། ཞེས་བྱ་བ་བད་ཀན་གྱི་ཡོན་ཏན་གྲང་བ་དང་ལྡན་པར་གྱུར་ན། བད་ཀན་སོགས་པར་བྱེད་པར་འགྱུར་ཏེ། བད་ཀན་ནི་སྣུམ་པ་ལ་སོགས་པའི་ཡོན་ཏན་དག་ནི་དེའི་ཡོན་ཏན་དང་ཆ་མཐུན་པ་ཡིན་པས། དེ་ཙམ་གྱིས་གང་ལ་ཡང་མི་ལྟོས་པར་སོགས་པར་བྱེད་པ་མ་ཡིན་གྱི། གཞན་དུ་ནི་གྲང་བའི་ཡོན་ཏན་ལྷག་པར་གྱུར་པ་ལ་ལྟོས་ན་གྲང་བ་ལྷག་པར་ཤས་ཆེ་བའི་ཡོན་ཏན་དེ་དང་ལྡན་ན། སྣུམ་པ་ལ་སོགས་པ་བད་ཀན་འཕེལ་ཞིང་སོགས་པར་བྱེད་དོ། །དེ་ཡང་འདིར་སྣུམ་པ་ལ་སོགས་པའི་བད་ཀན་གྱི་ཡོན་ཏན་རྣམས་གྲང་ཞིང་བསིལ་བས་བསྡུས་པར་བཤད་པ་ནི་གྲང་བས་བསྒོངས་ཤིང་འཁྱགས་པར་བྱས་པས་སོགས་པ་ཉིད་དུ་འགྱུར་བ་ཡིན་ལ། དྲོ་བ་ལ་སོགས་པ་བད་ཀན་གྱི་ཡོན་ཏན་དང་ཆ་མཐུན་པ་འདི་དག་ཉིད་དྲོ་བའི་ཡོན་ཏན་གྱི་གཉེན་པོར་གྱུར་པ་དང་ལྡན་པས། བད་ཀན་ཞུ་བར་བྱས་པའི་སྒོ་ནས་ལྡང་བར་འགྱུར་བ་ཡིན་ནོ། །དེ་ཉིད་ནི་ཞེས་པ་དྲོ་བའི་ཡོན་ཏན་བད་ཀན་གྱི་གཉེན་པོར་གྱུར་པ་དེ་ཉིད། རྩུབ་སོགས་ཡོན་ཏན་གྱིས་ཞེས་པ། རྩུབ་པ་དང༌། ཡང་བ་དང༌། རྣོ་བ་དང༌། མཁྲང་བ་དང༌། གཡོ་བ་སྟེ། བད་ཀན་གྱི་
ཡོན་ཏན་གྱི་གཉེན་པོར་གྱུར་པ་དང་ལྡན་པས་ཞི་བར་བྱེད་པར་འགྱུར་རོ། །དེ་ལ་དངོས་པོ་རྣམས་ཀྱི་ཆོས་ཉིད་དང༌། རང་བཞིན་ནི་འདི་ཡིན་ཏེ། གལ་ཏེ་རྩུབ་པ་ལ་སོགས་པ་འབའ་ཞིག་ཉིད་རླུང་གི་ཡོན་ཏན་དང་ཆ་མཐུན་པ་ཙམ་གྱིས་རླུང་ལྷག་པར་འཕེལ་བར་གྱུར་ན་ནི། དེའི་ཚེ་དེ་རྣམས་ལ་རླུང་གི་ཡོན་ཏན་གྱི་གཉེན་པོར་འགྱུར་བ། དྲོ་བ་ཞེས་བྱ་བ་མེད་པས་རྩུབ་པ་ལ་སོགས་པ་རྣམས་རླུང་ལྡང་ཞིང་འཁྲུགས་པའི་གནས་སྐབས་སྐྱེད་ཀྱི། སོགས་པར་ནི་མི་བྱེད་ལ། ཡང་གང་གི་ཚེ་ཡོན་ཏན་དྲོ་བའི་ནུས་པ་དང་འབྲེལ་བས་རྩུབ་པ་དེ་རྣམས་ནུས་པ་ཞན་པར་གྱུར་པའི་ཕྱིར་སོགས་པའི་གནས་སྐབས་སྐྱེད་ཀྱི། ལྡང་བའི་གནས་སྐབས་ནི་མི་བྱེད་དེ། ནུས་པ་ཞན་པ་ཡིན་པའི་ཕྱིར་རོ། །མཁྲིས་པ་ལ་རྣོ་བ་ལ་སོགས་པ་འབའ་ཞིག་གི་གཉེན་པོ་བསིལ་བའི་ཡོན་ཏན་མེད་པར་ནི་ལྡང་བའི་གནས་སྐབས་སྐྱེད་ཀྱི། སོགས་པའི་གནས་སྐབས་སུ་མི་བྱེད་དེ། རིགས་པ་སྔ་མའི་ཚུལ་གྱིས་སོ། །བད་ཀན་ལ་ཡང་སྣུམ་པ་ལ་སོགས་པའི་ཡོན་ཏན་དང་ཆ་མཐུན་པར་གྱུར་པ་ཡིན་དུ་ཟིན་ཀྱང༌། གྲང་བའི་ཡོན་ཏན་གྱི་ཤས་ལྷག་པར་ཆེ་བ་དང་ལྡན་པས་བད་ཀན་འཁྱགས་ཤིང་བསྒོངས་པའི་ཚུལ་སྐྱེད་པར་བྱེད་པས་སོ། །སོགས་པའི་གནས་སྐབས་ཉིད་བྱེད་ཀྱི། འདིའི་ལྡང་བའི་གནས་སྐབས་ནི་མི་བྱེད་དོ། །དེ་ཡང་དེའི་གཉེན་པོར་གྱུར་པ་གྲང་བའི་ཡོན་ཏན་དང་ལྡན་པའི་སྣུམ་པ་ལ་སོགས་པས་བད་ཀན་འདིའི་གཟུགས་ཞུ་བར་བྱས་ནས། ལྡང་བའི་གནས་སྐབས་སྐྱེད་པར་བྱེད་ནུས་ཀྱི། ཞུ་བར་བྱེད་པའི་རང་བཞིན་ཅན་ཡིན་པའི་ཕྱིར་སོགས་པར་བྱེད་པའི་གནས་སྐབས་ནི་བྱེད་མི་ནུས་སོ། །དེ་ལྟར་རླུང་ལ་སོགས་པ་དང་ལྡན་པ་ཅི་ལྟ་བ་ཉིད་ཡོན་ཏན་ཇི་ལྟ་བ་ལས་བྱུང་བ་དེ་ལྟར་བསྟན་ནས། ད་ནི་སོགས་པ་དང་འཕེལ་བ་ཇི་ལྟ་བ་ཉིད་དུ་འཁྲུལ་པ་དག་བསལ་བའི་ཕྱིར་གཞུང་རྩོམ་པར་བྱེད་པས། རང་གི་མཚན་
ཉིད་བཤད་པའི་འོག་ཏུ་སྨྲས་པ་ནི། རང་གནས་ཉིད་དུ་འཕེལ་སོགས་ཡིན། །དཀྱེལ་གྱུར་རྒྱུ་ལས་འཁྲུགས་པ་དང༌། །མི་མཐུན་པ་ཡི་ཡོན་ཏན་འདོད། །ཅེས་བྱ་བ་ཡིན་ནོ། །གང་ཉེས་པ་རྣམས་རང་རང་གི་གནས་སུ་འཕེལ་བར་འགྱུར་བ་ཡིན། ཞེས་བྱ་བ་འདིས་ནི་སོགས་པ་བཤད་ཅིང་བསྟན་པ་ཡིན་ནོ། །དཀྱེལ་གྱུར་རྒྱུ་ལས་འཁྲུགས་པ་དང༌། །ཞེས་བྱ་བ་ལ། དེ་བཞིན་དུ་ཕྱིན་ཅི་ལོག་པའི་ཡོན་ཏན་འདོད། ཅེས་བྱ་བས་ནི་རྒྱུ་བསྟན་པ་ཡིན་ནོ། །དེ་ལྟར་ན་གང་གི་ཚེ་རླུང་ལ་སོགས་པར་འགྱུར་བ་དེའི་ཚེ་རྩུབ་བ་ལ་སོགས་པའི་ཡོན་ཏན་དང་ཆ་མཐུན་པ་རྣམས། དཀྱེལ་དུ་གྱུར་པའི་རྒྱུ་ལས་འཁྲུགས་པར་འགྱུར་ལ། དེ་དང་མི་མཐུན་པའི་ཡོན་ཏན་སྣུམ་པ་ལ་སོགས་པ་འདོད་ཅིང༌། མངོན་པར་དགའ་བ་ལས་འདིའི་རྗེས་སུ་དཔག་པར་བྱའོ། །དེས་ན་འདི་སྐད་སྟོན་པར་འགྱུར་ཏེ། རང་གི་གནས་ཏེ་ནད་རང་ཉིད་ཀྱི་གནས་སུ་གང་འཕེལ་བར་གྱུར་པ་དེ་ནི་སོགས་པ་ཡིན་ལ། ནད་རྣམས་སོགས་པར་གྱུར་ནས་དཀྱེལ་དུ་གྱུར་པའི་རྒྱུ་ལས་ནི་འཁྲུགས་ཤིང་གཡོས་པར་གྱུར་པ་དང༌། དེ་དང་མི་མཐུན་པའི་ཡོན་ཏན་སྣུམ་པ་ལ་སོགས་པ་འདོད་པ་སྐྱེས་པར་འགྱུར་རོ། །ལྡང་བ་ལོག་པའི་ལམ་ཞུགས་ཉིད། །རང་གི་རྟགས་ནི་སྟོན་པ་དང༌། །བདེ་མེད་ནད་ནི་འབྱུང་འགྱུར་བའོ། །ཞེས་བྱ་བ་ལ། ཡང་ལྡང་བ་ནི་འཕེལ་ཞིང་ལྷག་པར་གྱུར་བ་ལས། ནད་རྣམས་རང་གི་གནས་ལས་གནས་གཞན་དུ་འགྲོ་བ་སྟེ། རང་གི་གནས་སྤངས་ནས། ལོག་པའི་ལམ་གཞན་དུ་ཞུགས་པར་འགྱུར་ཏེ། ལྡང་བ་ལོག་པའི་ལམ་ཞུགས་ཉིད། །ཅེས་བྱ་བ་འདིས་ནི་ནད་ལྡང་བ་སྟོན་པ་ཡིན་ནོ། །གཞན་དུ་ན་འཕེལ་བ་ཙམ་གྱི་རང་བཞིན་དུ་མཐུན་པས་ན་ཚུལ་གཅིག་པ་ཉིད་དུ་འགྱུར་རོ། །དེས་ན་སོགས་པ་ནི་རང་གི་གནས་ཉིད་དུ་ནད་གང་འཕེལ་བར་མ་གྱུར་པ་ལ་བྱ་ལ། ལྡང་བའི་ཁྱད་པར་ནི་སོགས་པའི་རྒྱུའི་ཚོགས་ལས་གཞན་དུ་གྱུར་བ་སྟེ། རང་གི་གནས་ཡོངས་སུ་སྤངས་ནས་ནད་རྣམས་ལམ་གཞན་དུ་ཞུགས་པ་གང་ཡིན་པ་དེ་ལ་ལྡང་བ་ཞེས་བྱའོ། །
དེ་བས་ན། རྩུབ་སོགས་དྲོ་བར་ལྡན་པས་ནི། །ཞེས་བྱ་བ་ལ་སོགས་པས་སྔར་བསྟན་པ་ཉིད་ཀྱིས་སོགས་པའི་རྒྱུ་ནི་གཞན་ཡིན་ལ། ལྡང་བའི་རྒྱུ་ཡང་གཞན་ཡིན་པར་བཤད་པ་འདི་ནི་ངེས་པ་ཡིན་ནོ། །དེ་བཞིན་དུ། རང་གི་རྟགས་ནི་སྟོན་པ་དང༌། །ཞེས་བྱ་བ་སྟེ། ནད་ཀྱི་མཚན་ཉིད་ཇི་ལྟ་ཇི་ལྟ་བར་བྱུང་བ་དེ་ལྟ་དེ་ལྟར་ནད་རྣམས་འབྱུང་ཞིང་ལྡང་བར་འདོད་ལ། སྤྱིར་ལུས་དང་སེམས་ཟིལ་གྱིས་གནོན་པར་བྱེད་པ་ཉིད་ལ། བདེ་བ་མེད་པ་ཞེས་བྱའོ། །དེ་བཞིན་དུ་ནད་ནི་འབྱུང་འགྱུར་བའོ་ཞེས་བྱ་བ་འདིས་ནི་རྗེས་སུ་དབོག་པར་བྱེད་པའི་རྒྱུ་སྟོན་པར་བྱེད་པའོ། །དེ་ལྟར་ན་རྒྱུ་ལ་སོགས་པ་རེ་རེ་འབའ་ཞིག་ལས་ནད་རྣམས་ལྡང་བར་རྗེས་སུ་དཔག་པར་ནུས་པ་མ་ཡིན་ཏེ། མི་མཐུན་ཞིང་ཆ་མི་འདྲ་བ་ཉིད་ཡིན་པའི་ཕྱིར་རོ། །ཡང་ཉེས་པ་ཐམས་ཅད་ནི་རང་གི་ཚད་ལས་ལྷག་ཀྱང་ལམ་དེ་ཉིད་ན་གནས་ནས་ནད་སྐྱེད་པར་བྱེད་པར་མ་ཟད་པས། ནད་གང་འབྱུང་བ་ལས་དེའི་རྗེས་སུ་དཔག་པར་བྱའོ། །དེ་ཡང་གང་གི་ཕྱིར་ནད་རང་གི་ཚད་ལས་ཆུང་བར་གྱུར་ཀྱང༌། ནད་སྟོབས་ཅན་གཞན་ཟིལ་གྱིས་གནོན་པ་དང༌། རང་གི་གནས་སྤངས་ཏེ་ལོག་པའི་ལམ་དུ་གྱུར་ནས། རང་གི་ནད་ཇི་ལྟ་བ་ཉིད་ཤས་ཆེར་སྐྱེད་པར་བྱེད་དོ། །དེ་བས་ན་མཚན་ཉིད་གསུམ་པོ་འདི་དག་ནི། ནད་རྣམས་ཡོངས་སུ་ཤེས་པར་བྱ་བའི་ཕྱིར་སྨྲས་པ་ཡིན་གྱི་ལྷག་པར་སྨྲས་པས་ཅི་ཞིག་བྱ། རང་གནས་གནས་པ་མཉམ་ཉིད་དང༌། །ནད་རྣམས་མ་བྱུང་ཞི་བ་ཡིན། །ཞེས་བྱ་བ་ལ། འདིར་ཚིག་འདི་ནི་བསྡུས་པ་ལས་བྱུང་བ་ཡིན་པར་ཤེས་པར་བྱའོ། །དེ་ལ་ནད་རྣམས་རང་གི་གནས་ན་གནས་པ་མཉམ་པ་ཉིད་གང་ཡིན་པ་དེ་ནི་ཞི་བ་ཡིན་ནོ། །དེ་བཞིན་དུ་ནད་རྣམས་ཀྱི་རྣམ་པར་གྱུར་བ་མ་བྱུང་ཞིང་མ་སྐྱེས་པའི་མཚན་ཉིད་དེས་ཀྱང་ཞི་བར་རྗེས་སུ་དཔག་པར་བྱའོ། །ནད་རྣམས་སོགས་པ་དང་ལྡང་བ་དང༌། ཞི་བའི་མཚན་ཉིད་བཤད་ནས། །ད་ནི་རླུང་ལ་སོགས་པ་དུས་གང་དང་གང་གི་ཚེ་ན་སོགས་པ་དང་ལྡང་བ་དང༌། ཞི་བར་འགྱུར་བ་བསྟན་པའི་ཕྱིར་སྨྲས་པ་ནི། སོགས་དང་ལྡང་དང་རབ་ཞིབ། །རླུང་ནི་སོག་སོགས་གསུམ་ཚེ། །མཁྲིས་པ་དབྱར་ལ་སོགས་པར་ཏོ། །བད་ཀན་དགུན་སྨད་སོགས་པར་རེ། །ཞེས་བྱ་བ་ཡིན་ཏེ།
གོང་དུ་བསྟན་པའི་ནད་སོགས་པ་དང་ལྡང་བ་དང༌། རབ་ཏུ་ཞི་བར་འགྱུར་བ་དག་རླུང་ལ་སོགས་པ་རེ་རེ་དང་སྦྱར་བ་ལས། རླུང་ནི་སོ་ག་སོགས་གསུམ་ཚེ། །ཞེས་བྱ་བ་ནི། སོ་གའི་དུས་སུ་སོགས་པར་འགྱུར་ལ། དབྱར་གྱི་ཚེ་ལྡང་བར་འགྱུར་ཞིང༌། སྟན་ནི་རབ་ཏུ་ཞི་བར་འགྱུར་རོ། །མཁྲིས་པ་ནི་དབྱར་ལ་སོགས་པའི་དུས་གསུམ་དུ་སོགས་པ་དང་ལྡང་བ་དང་ཞི་བར་འགྱུར་ཏེ། དབྱར་ནི་སོགས་པར་འགྱུར་རོ། །སྟོན་ནི་ལྡང་ངོ༌། །དགུན་ནི་ཞི་བར་འགྱུར་རོ། །བད་ཀན་ནི་དགུན་སྨད་ལ་སོགས་པའི་དུས་གསུམ་དུ་སོགས་པ་དང་ལྡང་བ་དང༌། རབ་ཏུ་ཞི་བར་འགྱུར་ཏེ། དེ་ལ་དགུན་སྨད་ནི་སོགས་པར་འགྱུར་རོ། །དཔྱིད་ནི་ལྡང་བར་འགྱུར་རོ། །སོ་ག་ནི་རབ་ཏུ་ཞི་བར་འགྱུར་རོ། །ཞེས་པ་རླུང་འདི་ནི་སོ་ག་སོགས་པར་མི་འཐད་ཀྱི། །ལྡང་བའི་དུས་ཡིན་ནོ། །དེ་ཡང་ཅིའི་ཕྱིར་ཞེ་ན། དེའི་ཚེ་ཡང་ཞིང་རྩུབ་པའི་དུས་ཡིན་པས། སྨན་ཕལ་ཆེར་ཡང་དེ་དང་རྗེས་སུ་མཐུན་པ་ཡིན་པའི་ཕྱིར་རོ། །དེ་བཞིན་དུ་དབྱར་ཡང་མཁྲིས་པ་སོགས་པར་མི་འཐད་དེ། ཆུ་རྣམས་སྐྱུར་བ་ཉིད་དུ་ཞུ་བར་བྱེད་པ་དང༌། དེ་བཞིན་དུ་སྨན་རྣམས་ཀྱང་སྐྱུར་བ་སྨིན་པས་མཁྲིས་པ་ལྡང་བའི་དུས་ཡིན་ནོ། །དེ་བཞིན་དུ་བད་ཀན་ཡང་དགུན་སོགས་པར་མི་འཐད་དེ། ཆུ་རྣམས་སྣུམ་པ་དང༌། སྨན་རྣམས་ཀྱང་སྣུམ་པ་ཉིད་ཡིན་ལ། དུས་ཀྱང་གྲང་བ་ཉིད་ཀྱིས་ན། དེའི་ཚེ་ལྡང་བར་འགྱུར་གྱི། སོགས་པར་མི་འགྱུར་རོ་ཞེ་ན་དེའི་ཕྱིར་སྨྲས་པ་ནི། ཡང་དང་རྩུབ་པ་ལ་སོགས་པའི། །སྨན་དང་ལུས་ཀྱང་དེ་མཚུངས་པས། །སོ་ག་རླུང་ནི་སོགས་འགྱུར་གྱི། །དྲོ་བའི་དུས་ཀྱིས་ལྡང་མི་འགྱུར། །ཞེས་བྱ་བ་ཡིན་ཏེ། སོགས་པ་སྟེ་སོ་གའི་དུས་སུ་ཡང་བ་དང༌། རྩུབ་པ་ལ་སོགས་པའི་སྨན་རྣམས་དང༌། ལུས་ཀྱང་དེ་བཞིན་དུ་ཡང་བ་དང༌། རྩུབ་པ་ལ་སོགས་པ་ཡིན་པ་དང༌། དུས་ཀྱང་ཡང་བ་དང་རྩུབ་པ་ཡིན་པས། རླུང་ཡང་དུས་ཀྱི་རང་བཞིན་གྱིས་ཡང་བ་དང་རྩུབ་པ་ཉིད་ཡིན་ཏེ། དེ་བས་ན་ཡོན་ཏན་ཆ་མཚུངས་པ་ཉིད་ཀྱིས་རླུང་ལྡང་བར་རིགས་མོད་ཀྱི། སོ་གའི་ཚེ་རླུང་སོགས་པར་འགྱུར་གྱི། ལྡང་བར་མི་འགྱུར། དེ་གང་གིས་ཤེ་ན། དྲོ་བའི་དུས་ཀྱིས་ལྡང་མི་འགྱུར། །ཞེས་བྱ་བ་
འདིས་བཀག་པར་གྱུར་པ་ཡིན་ཏེ། དྲོ་བ་ཉིད་ཀྱིས་ན་རྒྱུ་སྔ་མ་ཉམ་ཆུང་བར་བྱས་པ་ཡིན་པའི་ཕྱིར་ལྡང་བར་མི་འགྱུར་གྱི་སོགས་པ་ཉིད་དུ་འགྱུར་རོ། །ཆུ་རྣམས་འཇུ་བ་སྐྱུར་བ་དང༌། །སྨན་ཡང་དེ་དང་འདྲ་བ་ཡིན། །མཁྲིས་པ་སོགས་ཀྱི་དུས་ཀྱི་ནི། །གྲང་བ་ཉིད་ཀྱིས་ལྡང་མི་འགྱུར། །ཞེས་བྱ་བ་ལ། དབྱར་ཆུ་རྣམས་ཀྱིས་འཇུ་བ་སྐྱུར་བར་འགྱུར་བ་དང༌། དེ་བཞིན་དུ་སྨན་ཡང་དེ་དང་འདྲ་བར་འགྱུར་བའི་རྣམ་པ་ཡིན་པས། མཁྲིས་པ་དེ་ཡང་དེ་དང་འདྲ་བར་སོགས་པར་འགྱུར་གྱི། ལྡང་བར་ནི་མི་འགྱུར་ཏེ། ཅིའི་ཕྱིར་ཞེ་ན། དབྱར་སྨད་ཀྱི་ཚེ་གྲང་བ་ཡིན་བས་ན་ལྡང་བར་མི་འགྱུར་ཏེ། གྲང་བ་ནི་དྲོ་བའི་མི་མཐུན་པའི་ཕྱོགས་ཡིན་པས་གྲང་བ་འདིས་ལྡང་བའི་གནས་བྱེད་པ་ཡིན་ནོ། །ཆུ་དང་སྨན་ནི་བསིལ་བ་དང༌། །སྣུམ་པས་དུས་ནི་མཚུངས་གྱུར་ཀྱང༌། །དགུན་སྨད་བད་ཀན་སོགས་འགྱུར་གྱི། །བསྒོངས་པས་ལྡང་བར་མི་འགྱུར་རོ། །ཞེས་བྱ་བ་ལ། དགུན་སྨད་ནི་ཆུ་དང་སྨན་བསིལ་བ་དང༌། སྣུམ་པ་དང༌། དུས་ཀྱང་བསིལ་བ་དང་སྣུམ་པ་ཡིན་པའི་ཕྱིར། བད་ཀན་དང་དུས་ལ་སོགས་པ་མཚུངས་ཤིང་འདྲ་བ་ཡིན་དུ་ཟིན་ཀྱང༌། དུས་ཀྱི་རང་བཞིན་གྱིས་ལྡང་བར་མི་འགྱུར་གྱི། སོགས་པ་ཁོ་ནར་འགྱུར་རོ། །དེ་ཅིའི་ཕྱིར་ཞེ་ན། གྲང་བས་བསྒོངས་ཤིང་མར་འཁྱགས་པ་ལྟར་གྱུར་བས་ལྡང་བར་མི་འགྱུར་ཏེ། བསྒོངས་པ་ཞེས་བྱ་བ་འདི་ཉིད་ཀྱིས་བཀག་པ་ཡིན་ནོ། །དེ་ལྟར་དུས་ཀྱི་རང་བཞིན་འདི། །ཞེས་བྱ་བ་ལ། གང་བསགས་པ་ལ་སོགས་པ་སོ་ག་ལ་སོགས་པའི་ཚེ་འབྱུང་བ་བཤད་པ་དེ་ནི་དུས་ཀྱི་རང་བཞིན་ལ་བརྟེན་ནས་བཤད་པ་ཡིན་ཏེ། དེ་ཡང༌། སོ་ག་ལ་སོགས་སྦྱོར་མཚུངས་ཀྱང༌། །ཞེས་བྱ་སྟེ། རླུང་ལ་སོགས་པའི་རྒྱུ་བཤད་པ་ཡིན་ནོ། །ཅི་ནད་རྣམས་སོགས་པ་ལ། སོགས་པའི་རྒྱུ་དུས་འབའ་ཞིག་ཏུ་ཟད་དམ། གཞན་དག་ཀྱང་ཡོད་ཅེ་ན། དེའི་ཕྱིར་སྨྲས་པ་ནི། ཟས་ལ་སོགས་པའི་དབང་གིས་ནི། །དུས་ལ་བབ་པར་མ་གྱུར་ཀྱང༌། །འཕྲལ་དུ་སོགས་པ་ལ་སོགས་འགྱུར། །ཞེས་བྱ་བ་ལ། ཟས་ལ་སོགས་པའི་དབང་གིས་ཏེ། ཟས་དང་སྐོམ་ལ་སོགས་པའི་ནུས་པ་དང༌། སོགས་པ་ཞེས་བྱ་བ་སློན་སྨན་དང༌།
འཁྲུ་སྨན་དང༌། འཇམ་རྩི་མས་གཏོང་བ་དང༌། དུབ་པ་ལ་སོགས་པའི་དབང་གིས་ཀྱང་རླུང་ལ་སོགས་པའི་ནད་སོགས་པ་དང༌། ལྡང་བ་དང༌། རབ་ཏུ་ཞི་བར་འགྱུར་རོ། །དེ་ཡང་རྒྱུ་དེ་དག་གིས་དུས་དེ་དག་ལ་ཕྱིན་ཅིང་སྐབས་ལ་བབ་པར་མ་གྱུར་ཀྱང༌། དེ་དག་ལ་ལྟོས་པ་མེད་པར་འཕྲལ་དུ་སྟེ། དེའི་མོད་ལ་སོགས་པའི་དུས་ལ་སྡོད་པ་མེད་པར་ཟས་ལ་སོགས་པ་དེའི་དབང་གིས་སོགས་པ་ལ་སོགས་པར་འགྱུར་རོ། །ཡང་ན་སོགས་པའི་དུས་སུ་ནད་ལ་སོགས་པར་མི་འགྱུར་གྱི་ཟས་ལ་སོགས་པ་ཉིད་ལས་འགྱུར་རོ། །ནད་ནི་ལྡང་གྱུར་འཕྲལ་དུ་ལུས། །མགོ་ནས་རྐང་གི་བར་དུ་ཁྱབ། །ལྡོག་འགྱུར་ཆུ་ཡི་རྒྱུན་བཞིན་དུ། །ཅུང་ཞིག་ཅུང་ཞིག་དག་གིས་ཞི། །ཞེས་བྱ་བ་ལ། ནད་ནི་ལུས་ཉོན་མོངས་པར་བྱེད་པ་སྟེ། རླུང་དང་མཁྲིས་པ་དང་བད་ཀན་ལ་སོགས་པའོ། །དེ་ལྡང་བར་གྱུར་པ་ནི་འཁྲུགས་པར་གྱུར་བ་སྟེ། དེའི་ཚེ་ནི་འཕྲལ་དུ་ཞེས་པ་མོད་ལ་ལུས་ཀྱི་མགོ་ནས་རྐང་གི་བར་དུ་མ་ལུས་པར་ཁྱབ་ཅིང་གནོད་པར་འགྱུར་རོ། །ནད་དེ་ཉིད་ལུས་ལས་ལྡོག་པར་གྱུར་ཅིང༌། གསོ་བས་ཞི་བར་བྱས་པ་ན། ཅུང་ཞིག་ཅུང་ཞིག་གིས་ཞི་བར་འགྱུར་ཏེ། དེ་ཡང༌། དཔེར་ན་ཆུ་ཡི་རྒྱུན་བཞིན་དུ། །ཞེས་བྱ་བ་སྟེ། དཔེར་ན་ཆུའི་རྒྱུན་སྐྱེ་བ་དང༌། དེའི་ཚོགས་ཀྱིས་ཟམ་པ་ཡང་ཁྱེར་ནས། མོད་ལ་ཀུན་ཏུ་ཁྱབ་ཅིང་འགྲོ་བར་བྱེད་ལ། ཆུའི་རྒྱུན་དེ་འབྲི་བ་ན། གནས་དེ་ལས་རིམ་གྱིས་ཅུང་ཟད་ཅུང་ཟད་ཀྱིས་ལྡོག་ཅིང་འབྲི་བར་འགྱུར་རོ། །དེ་བཞིན་དུ་ནད་རྣམས་ཀྱང་ལྡང་བར་གྱུར་ན། ཉེས་པ་ཐམས་ཅད་སྐྱེད་པར་འགྱུར་གྱི། འབྲི་བའི་ཚེ་ན་ནི་དེ་ལྟ་མ་ཡིན་ནོ། །ནད་ཐམས་ཅད་ལ་རྣམ་པར་འགྱུར་བ་རེ་རེ་ཞིང་ནད་གཞི་དང་གསོ་བའི་མཚན་ཉིད་མཐའ་ཡས་བསྟན་པར་མི་ནུས་པས་དེའི་ཕྱིར་དེ་བསལ་བ་ལ་ཡང་འབད་པར་མི་བྱེད་དོ་སྙམ་དུ་དོགས་པའི་ཕྱིར་འདིར་སྨྲས་པ་ནི། ནད་འཁྲུགས་སྣ་ཚོགས་ཚུལ་ཅན་ནི། །གྲངས་མེད་པར་ནི་གྱུར་བའི་ལུས། །ཐམས་ཅད་ཉེ་བར་གཟིར་གྱུར་པ། །དེ་རྒྱུ་ཚུལ་དང་བསྒྲུབ་པ་དག །རེ་རེ་ནས་ནི་བསྟན་མི་ནུས། །དེ་བས་སྤྱི་ཡི་བརྗོད་པ་ཡིན། །ཞེས་བྱ་བ་ཡིན་ཏེ། རླུང་ལ་སོགས་པའི་ནད་འཁྲུགས་པར་གྱུར་ཅིང༌། རྣམ་པར་ལྡང་བར་གྱུར་ན་སྣ་
ཚོགས་པའི་ཚུལ་ཅན་དུ་འབྱུང་བའི་ནད་རྣམ་པ་ཐ་དད་པའི་མཚན་ཉིད་ཅན་གྲངས་མེད་ཅིང༌། བརྩི་བ་ལས་འདས་པས་ལུས་ཐམས་ཅད་ཉེ་བར་གཟིར་ཞིང་གདུངས་པར་གྱུར་ཏེ། ལུས་སྡུག་བསྔལ་བར་བྱེད་དོ་ཞེས་བྱ་བའི་དོན་ཏོ། །དེ་བས་ན་དེ་དག་གི་རྒྱུའི་ཚུལ་གྱིས་འབྱིན་པར་བྱེད་པ་དག་གི་མཚན་ཉིད་དང༌། བསྒྲུབ་ཅིང་གསོ་བར་བྱ་བ་དག་གི་རེ་རེ་ནས་ཞེས་པ། ནད་ཀྱི་ཚུལ་སོ་སོ་ནས་མིང་གིས་བསྟན་པར་མི་ནུས་ཏེ། ནད་འདིའི་རྒྱུ་ནི་འདི་ཡིན་ནོ། །འདིའི་མཚན་ཉིད་ནི་འདི་ཡིན་ནོ། །གསོ་བ་ནི་འདི་ལྟར་བྱའོ་ཞེས་བསྟན་པར་ཤིན་ཏུ་དཀའ་སྟེ། དེ་བས་ན་སྤྱིའི་བརྗོད་པ་ཡིན་ཏེ། སྤྱིར་ཁྱབ་པའི་ཚིག་གང་ཡིན་པ་དེ་ཉིད་བཤད་ཅིང་བརྗོད་པ་ཡིན་ནོ། །དེ་ཉིད་ཀྱང་གང་ཞེ་ན། ནད་རྣམས་དག་ནི་ཐམས་ཅད་ཀྱི། །ཉེས་པའི་རྒྱུ་ནི་གཅིག་པུ་ཉིད། །ཅེས་བྱ་བ་ཡིན་ཏེ། འདི་ལྟར་ནད་ཐམས་ཅད་ཀྱི་རྒྱུ་ནི་ཉེས་པ་ཉིད་གཅིག་པུ་རྒྱུར་གྱུར་པ་ཡིན་ཏེ། རྒྱུ་ཡང་ཡིན་ལ་གཅིག་པུ་ཉིད་ཀྱང་ཡིན་ཏེ། གཙོ་བོའི་རྒྱུར་གྱུར་པའམ། ཡང་ན་ཐམས་ཅད་ཀྱི་སྤྱིའི་མཚུངས་པའི་རྒྱུ་ཡིན་པས་ན་རྒྱུ་གཅིག་པུ་སྟེ། ཐུན་མོང་གི་རྒྱུ་ཞེས་བྱ་བའི་དོན་ཏོ། །ཉིད་ཅེས་བྱ་བ་ནི་ངེས་པར་གཟུང་བའི་ཕྱིར་སྨོས་པ་ཡིན་ཏེ། ནད་ཀྱི་རྒྱུ་ནི་གཅིག་པུ་ཉིད་ཡིན་གྱི། དངོས་པོའི་རིགས་གཞན་དག་ནི་མ་ཡིན་ཏེ། ཐུན་མོང་མ་ཡིན་པའི་ཕྱིར་རོ། །དོན་འདིའི་དཔེ་བསྟན་པར་བྱ་བའི་ཕྱིར་ཚིག་ཏུ་སྨྲས་པ་ནི། དཔེར་ན་བྱ་ནི་ལྡིང་གྱུར་པ། །ཉིན་རངས་ཀུན་ཏུ་སོང་གྱུར་ཀྱང༌། །རང་གི་གྲིབ་མ་དང་མི་འབྲལ། །འགྲོ་ཀུན་དེ་དང་འདྲ་བ་ཡིན། །ཞེས་བྱ་བ་ཡིན་ཏེ། དཔེར་ན་ཁྲ་ལ་སོགས་པའི་བྱ་རྣམས་ལྡིང་བར་གྱུར་པ་ན་ཉིན་རངས་ཏེ། ཉིན་ཐོག་ཐག་ཀུན་སོང་ཞིང་ལྡིང་བར་གྱུར་ཀྱང༌། རང་གི་གྲིབ་མ་དང་འབྲལ་བར་མི་འགྱུར་ཞིང༌། གྲིབ་མ་དེ་དང་བྲལ་བར་སྐད་ཅིག་ཀྱང་མི་སྣང་སྟེ། འགྲོ་བའི་ནད་ཀྱི་ཚུལ་ཡང་དེ་དང་འདྲའོ། །ཡང་དོན་འདིའི་དཔེ་གཞན་དག་བསྟན་པའི་ཕྱིར། སྨྲས་པ་ནི། ཡང་ན་ཇི་ལྟར་མ་ལུས་པའི། །འགྲོ་བ་མི་འདྲ་སྣ་ཚོགས་འདི། །ཡོན་ཏན་གསུམ་དང་མི་འབྲལ་ལོ། །ཞེས་བྱ་བ་ཡིན་ཏེ། དཔེའི་རྣམ་པ་གཞན་ཡང་མ་ལུས་པའི་འགྲོ་བ་རང་བཞིན་མི་
འདྲ་བ། མངལ་ནས་སྐྱེས་པ་ལ་སོགས་པའི་དབྱེ་བས་ཐ་དད་པའམ། རྒྱུ་བ་དང་མི་རྒྱུ་བ་ལ་སོགས་པའི་དབྱེ་བས་ཕྱེ་བ་སྣ་ཚོགས་ཤིང་རིགས་ཐ་དད་པ་འདི་དག་ཀྱང༌། ཡོན་ཏན་གསུམ་པོ་སྙིང་སྟོབས་དང༌། རྡུལ་དང་མུན་པའི་ཚུལ་དང་མི་འབྲལ་ཞིང་དེ་ལས་མི་འདའ་སྟེ། ཡོན་ཏན་གསུམ་པོ་འདི་དག་དང་ནམ་ཡང་འབྲལ་བར་མི་འགྱུར་རོ། །དེ་བཞིན་རང་ཁམས་མ་སྙོམས་པའི། །རྒྱུ་ཡང་གནས་སྐབས་ཐམས་ཅད་དུ། །ནད་རིགས་ཉེས་པ་གསུམ་མི་འབྲལ། །ཞེས་བྱ་བ་ལ། དཔེ་དེ་བཞིན་དུ་རང་ཁམས་མ་སྙོམས་པའི་རྒྱུ་ཡང་དུས་དང་གནས་སྐབས་ཐམས་ཅད་དུ་ནད་ཀྱི་རིགས་སུ་བཤད་པ། ཉེས་པ་གསུམ་པོ་དང་ནམ་ཡང་མི་འབྲལ་ལོ། །དེ་ཡང་རླུང་ལ་སོགས་པའི་ཁམས་འདི་རྣམས་ནི་ལུས་འཛིན་པར་བྱེད་པ་ཡིན་དུ་ཟིན་ཀྱང་གལ་ཏེ་ཁམས་མ་སྙོམས་པར་གྱུར་ན་དེ་ཡང་ནད་ཀྱི་རྒྱུ་ཡིན་པའི་ཕྱིར་རོ། །ནད་དང་དྲི་མའི་ཚུལ་གྱིས་མ་སྙོམས་པ་མེད་པར་ཡང༌། ནད་ཀྱི་རྒྱུར་འགྱུར་བར་བཤད་པའི་ཕྱིར། འདིར་ཡང་ཞེས་བྱ་བའི་སྒྲ་ཁྱད་པར་དུ་སྨྲས་པ་ཡིན་ནོ། །དེ་རྣམས་ཀྱིས་ནི་ལྡང་བའི་རྒྱུ། །དབང་དོན་མི་འཚམ་ཕྲད་པ་དང༌། །དུས་དང་ཉེས་པའི་ལས་རྣམས་སོ། །ཞེས་བྱ་བ་ལ། རླུང་ལ་སོགས་པ་དེ་རྣམས་ཀྱི་ལྡང་ཞིང་འཁྲུགས་པར་བྱད་པའི་རྒྱུ་ནི། མིག་ལ་སོགས་པའི་དབང་པོའི་དོན་མི་མཐུན་ཞིང་འཚམ་པ་མ་ཡིན་པ་དང༌། ཕྲད་ཅིང་འབྲེལ་པ་དང༌། དུས་མི་འདྲ་བ་སྟེ། གྲང་བ་དང༌། དྲོ་བ་དང༌། ཆར་ལ་སོགས་པ་དང༌། དེ་བཞིན་དུ་ལས་ཉེས་པར་སྤྱད་པ་ཚེ་སྔ་མ་འམ། འདིར་ལུས་དང་ངག་དང༌། ཡིད་རྣམ་པ་གསུམ་གྱི་ལས་མི་དགེ་བ་བྱས་པ་དེ་ཐམས་ཅད་ནི་རླུང་ལ་སོགས་པ་འཁྲུགས་ཤིང་ལྡང་བའི་རྒྱུ་ཡིན་ནོ། །དེ་ཡང་དམན་ལྷག་ལོག་སྦྱར་བས། །དབྱེ་བ་རྣམ་པ་གསུམ་དུ་འགྱུར། །ཞེས་བྱ་བ་ལ། གང་རླུང་ལ་སོགས་པ་འདི་དག་གི་རྒྱུའི་ཚུལ་སྔར་རྣམ་པར་དབྱེ་བ་བྱས་སུ་ཟིན་ཀྱང༌། ཡང་དེ་དམན་པ་དང༌། ལྷག་པ་དང༌། ལོག་པའི་སྦྱོར་བས་དབྱེ་བ་རྣམ་པ་གསུམ་དུ་འགྱུར་ཏེ། སྔ་མ་དེ་དག་རེ་རེ་ཞིང་ཡང་གསུམ་དུ་འགྱུར་བ་ཡིན་ནོ། །དབང་དོན་རང་ཡུལ་ཆུང་ངུའམ། །མི་སྦྱོར་བ་
ནི་དམན་པ་སྟེ། །ཤས་ཆེར་གཏད་པ་ལྷག་སྦྱོར་བ། །ཞེས་བྱ་བ་ལ། གང་མིག་ལ་སོགས་པའི་དབང་པོ་རྣམས་གཟུགས་ལ་སོགས་པའི་ཡུལ་རྣམས་ལ་རང་གི་ཡུལ་ཆུང་ངུ་ལ་སྦྱོར་བ་འམ། རང་གི་ཡུལ་ལ་མི་སྦྱོར་ཞིང་མ་ཚང་བ་དེ་ནི་དམན་པའི་སྦྱོར་བ་ཞེས་བྱའོ། །ཡང་རང་གི་ཡུལ་ཤས་ཆེར་གཏད་ཅིང་བསྟེན་དྲགས་པ་ནི་ལྷག་པའི་སྦྱོར་བ་ཞེས་བྱའོ། །རབ་ཕྲའི་འོད་དང་འཇིགས་པ་དང༌། །ཤིན་ཏུ་ཉེ་དང་ཤིན་ཏུ་རིང༌། །ཡིད་དུ་མི་འོང་མི་སྡུག་པའི། །གཟུགས་ལ་མིག་ནི་ལྟ་བྱེད་པ། །ལོག་སྦྱོར་དེ་ནི་མི་ཟད་ཡིན། །ཞེས་བྱ་བ་ལ། ལོག་པའི་སྦྱོར་བ་ནི་རང་རང་གི་དབང་པོའི་ཡུལ་རབ་ཏུ་ཕྲ་བའི་འོད་མིག་གི་དབང་པོས་ལྟ་ཞིང་བརྟག་པར་བྱེད་པ་དེ་ནི་རང་གི་ཡུལ་ལ་ལོག་པར་སྦྱོར་བ་ཡིན་ནོ། །དེ་བཞིན་དུ་ཤིན་ཏུ་འཇིགས་པའི་གཟུགས་ལ་ལྟ་བ་ལ་སོགས་པ་རྗེས་སུ་མི་མཐུན་ཞིང་གནོད་པ་སྐྱེད་པར་བྱེད་པ་དག་ཀྱང་ལོག་པའི་སྦྱོར་བ་ཡིན་ཏེ། དེ་དག་ནི་ཤིན་ཏུ་མི་བཟད་ཅིང་འཇིགས་པ་ཡིན་ནོ། །དེ་བཞིན་རབ་གྲག་རུལ་ལ་སོགས། །དབང་དོན་ཇི་བཞིན་ཤེས་པར་བྱ། །ཞེས་བྱ་བ་ལ། ཕྱོགས་འདིར་བསྡུ་བ་ནི་དབང་པོའི་དོན་རབ་ཏུ་མཐོང་བ་དང༌། རུལ་པ་ལ་སོགས་པ་ཡང་ལོག་པའི་སྦྱོར་བའི་རང་བཞིན་ཅན་ཡིན་པར་ཇི་ལྟ་བ་བཞིན་དུ་ཤེས་པར་བྱའོ། །དེ་ཡང་ཇི་ལྟར་མྱ་ངན་སྐྱེད་པ་ལ་སོགས་པའི་སྒྲ་མི་སྡུག་པ་དྲག་པོ་རྣ་བའི་དབང་པོས་ཐོས་པ་ནི་ལོག་པའི་སྦྱོར་བར་འགྱུར་རོ། །གང་གི་ཚེ་རུལ་ཞིང་ཞིགས་པར་གྱུར་ཅིང༌། མི་གཙང་བ་མྱགས་པ་ལ་སོགས་པའི་དྲི་མི་སྡུག་པ་སྣའི་དབང་པོས་ཚོར་བ་ན། རང་གི་ཡུལ་དྲི་ཞེས་བྱ་བ་འདི་སྣའི་དབང་པོའི་ལོག་པའི་སྦྱོར་བ་ཡིན་ནོ། །སོགས་པའི་སྒྲས་ནི། ལྕེའི་ཡུལ་ལན་ཚྭ་ཤས་ཆེར་བྲོ་བ་ལ་སོགས་པ་དང༌། དེ་བཞིན་དུ་རེག་བྱའི་ཡུལ་ཤིན་ཏུ་ཚ་བ་དང༌། ཤིན་ཏུ་གྲང་བ་ལ་སོགས་པ་ནི་རང་གི་ཡུལ་ལོག་བའི་སྦྱོར་བ་ཡིན་པར་བསྟན་ཏེ། དེ་དག་ནི་ནད་རྣམས་ལྡང་བའི་རྒྱུ་ཡིན་པར་བཤད་དོ། །དེ་དག་ཐམས་ཅད་ནི་དྲང་སྲོང་ཙ་ར་ཀས་གསལ་བ་ཁོ་ནར་བཤད་དེ། །དེ་ཡང་རང་གི་ནས་པས་ཤས་ཆེར་ལྟ་བ་ནི་ལྷག་པར་སྦྱོར་བའོ། །ཕྱིས་མི་མཐོང་བར་གྱུར་པ་ནི་དམན་པའི་སྦྱོར་བའོ། །
ཕྲ་བ་དང༌། ཤིན་ཏུ་ཐག་ཉེ་བ་དང༌། ཤིན་ཏུ་ཐག་རིང་བ་དང༌། དྲག་ཅིང་མི་བཟད་པ་དང༌། འཇིགས་པ་དང༌། ཞེ་འགྲས་པ་དང༌། མི་སྡུག་པ་དང༌། སྐྲག་པར་བྱེད་པ་ལ་སོགས་པའི་གཟུགས་མཐོང་བ་ནི་ལོག་པའི་སྦྱོར་བའོ། །དེ་བཞིན་དུ་རྔ་བོ་ཆེ་དྲག་ཏུ་བརྡུངས་པ་ལ་སོགས་པའི་སྒྲ་གསང་མཐོ་བ་ལ་ལྷག་པར་གཏད་དེ་མཉན་པ་ནི་ལྷག་པའི་སྦྱོར་བའོ། །ཐམས་ཅད་དུ་མི་ཐོས་པ་ནི་དམན་པའི་སྦྱོར་བའོ། །སྒྲ་རྩུབ་པ་དང༌། སྡུག་པ་དང་བྲལ་བ་དང༌། འདར་བའི་སྒྲ་དང་འཇིགས་པའི་སྒྲ་ཐོས་པ་ནི་ལོག་པའི་སྦྱོར་བའོ། །དེ་བཞིན་དུ་འཛག་ཅིང་རུལ་བའི་དྲི་ཤིན་ཏུ་རྣོ་ཞིང་དྲག་པ་ཤས་ཆེར་བསྣོམས་པ་ནི་ལོག་པའི་སྦྱོར་བའོ། །རྣམ་པ་ཐམས་ཅད་དུ་མ་བསྣོམས་པ་ནི་དམན་པའི་སྦྱོར་བའོ། །རུལ་བ་ལ་སྣོམ་པ་ལ་སོགས་པ་འདི་ནི་ལོག་པའི་སྦྱོར་བའོ། །ཡང་ཁྲུས་ལ་སོགས་པའི་ཚ་བ་དང༌། གྲང་ཆེས་པ་བསྟེན་པ་དང༌། གོ་རིམས་འཆོལ་བར་བསྟེན་པ་དང༌། གནོད་པ་དང་མི་གཙང་བ་ལ་སོགས་པ་ནི་ལོག་པའི་སྦྱོར་བའོ། །དུས་ཀྱང་གྲང་དང་ཚ་བ་དང༌། །ཆར་དུས་དབྱེ་བས་གསུམ་དུ་འདོད། །ཅེས་བྱ་བ་ལ། དེ་བཞིན་དུ་དུས་ཀྱང་གྲང་བ་དང༌། ཚ་བ་ལ་སོགས་པའི་དབྱེ་བས་རྣམ་པ་གསུམ་ཡིན་ཏེ། དེ་ལ་གྲང་བ་ནི་དགུ་ན་སྟོང་དང༌། དགུན་སྨད་ཅེས་བྱ་བའོ། །ཚ་བ་ནི་སོ་གའོ། །དབྱར་ནི་ཆར་གྱི་དུས་སོ། །དེའི་དམན་པའི་སྦྱོར་བ་དང༌། ལྷག་པའི་སྦྱོར་བ་དང༌། ལོག་པའི་སྦྱོར་བ་བསྟན་པའི་ཕྱིར། དེ་དམན་གྲང་སོགས་ཆུང་བ་དང༌། །ལྷག་སྦྱོར་ཤིན་ཏུ་ཆེ་མཚན་ཉིད། །རང་གི་མཚན་ཉིད་ཕྱིན་ཅི་ལོག །ལོག་པའི་སྦྱོར་བ་ཡིན་པར་བཤད། །ཅེས་བྱ་བ་ལ། དེ་བཞིན་དུ་གྲང་བ་དང༌། ཚ་བ་དང༌། ཆར་གྱི་དུས་དང༌། དགུན་དང༌། སོ་ག་དང༌། དབྱར་ཞེས་བྱ་བའི་མཚན་ཉིད་ཅན། སྔར་ཇི་ཙམ་གྱི་ཚད་དུ་བསྟན་པ་དེ་ལས་གང་ཅུང་ཞིག་ཤིན་ཏུ་དམན་པར་སྣང་བ་དེ་ཉིད་ནི་དུས་དང་མི་སྦྱོར་བ་ཡིན་པས་ན། ཆུང་བ་འམ། དམན་པའི་སྦྱོར་བ་ཞེས་བྱའོ། །ལྷག་པའི་སྦྱོར་བ་ནི་གང་གསུམ་པོ་དེ་དག་རང་གི་ཚད་ལས་ཀྱང་ཆེས་ལྷག་པར་སྟོན་པ། དེ་ནི་ལྷག་པའི་སྦྱོར་བ་ཞེས་བྱའོ། །ལོག་པའི་སྦྱོར་བ་ནི་རང་གི་མཚན་ཉིད་ལས་ཕྱིན་ཅི་ལོག་
པ་སྟེ། ཇི་ལྟར་དགུན་གྱི་དུས་སུ་དྲོ་བ་དང༌། སོ་གའི་དུས་སུ་གྲང་བ་དང༌། དབྱར་གྱི་དུས་སུ་ཆར་མི་འབབ་པའོ། །ལས་ཀྱང་དབྱེ་བ་རྣམ་པ་གསུམ་དུ་བཤད་དེ། སྨྲས་པ་ནི། ལུས་ངག་ཡིད་ཀྱི་དབྱེ་བ་ཡིས། །ལས་ཀྱང་རྣམ་པ་གསུམ་དུ་བཤད། །ཅེས་བྱ་བ་ལ། ལས་ཞེས་བྱ་བ་ནི་སྦྱོར་བའི་རྒྱུ་ཡང་ལུས་དང་ངག་དང་ཡིད་ཀྱི་དབྱེ་བས་རྣམ་པ་གསུམ་དུ་བཤད་དོ། །ལུས་ལ་སོགས་པའི་ལས་དམན་ལ། །འཇུག་པ་དམན་པའི་མིང་ཅན་ཡིན། །ཞེས་བྱ་བ་ལ། ལུས་ཀྱི་ལས་དང༌། ངག་གི་ལས་དང༌། དེ་བཞིན་དུ་ཡིད་ཀྱི་ལས་རྣམས་ཀྱང༌། རང་གི་ཡུལ་དག་ལ་གང་དམན་པར་འཇུག་པ་དེ་ནི་དམན་པའི་སྦྱོར་བ་ཡིན་ནོ། །བརྟུན་ངས་འཇུག་པ་ལྷག་སྦྱོར་བའོ། །ཞེས་བྱ་བ་ནི། ལུས་དང་ངག་དང་ཡིད་ཀྱི་ལས་རྣམས་ལ་གང་རུང་བརྟན་ངས་ཤིང་དྲག་ཏུ་སྦྱོར་བ་དེ་ནི་ལྷག་པའི་སྦྱོར་བ་ཡིན་ནོ། །ཤུགས་བཀག་པ་དང་བཙིར་བ་དང༌། །མི་བཟད་ལུས་ཀྱི་ལས་རྣམས་དང༌། །གཅུས་དང་རྡེག་འཆོས་གོམ་འཁྱོར་སོགས། །ལྡང་བཞིན་སྨྲ་བར་བྱེད་པ་དང༌། །འདོད་ཆགས་ཞེ་སྡང་འཇིགས་སོགས་དང༌། །སྲོག་གཅོད་ལ་སོགས་ལས་རྣམས་དང༌། །རྣམ་བཅུ་དེ་ཡང་སྨད་པ་ཡིན། །འདི་དང་གཞན་དུ་བྱས་པ་རྣམས། །དེ་དག་མ་ལུས་ལོག་སྦྱོར་ཡིན། །ཞེས་བྱ་བ་ལ། ལོག་པའི་སྦྱོར་བ་ནི་ཤུགས་བཀག་པ་ནས་བརྩམས་ཏེ། རྡེག་འཆོས་ཤིང་གོམ་པ་འཁྱོར་བ་ལ་སོགས་པའི་བར་གྱིས་ལས་གང་ཡིན་པ་དེ་ལྟ་བུ་ལ་འཇུག་པ་གང་ཡིན་པ་དེ་ནི་ལུས་ཀྱི་ལོག་པའི་སྦྱོར་བའོ། །དེ་ལ་ཤུགས་བཀག་པ་ནི་རྒྱུ་བ་བརྣགས་པའོ། །ཤུགས་བཙིར་བ་ནི་ཁ་ནང་དུ་བལྟས་པར་གྱུར་པ་ཕྱིར་ཕྱོགས་པར་བྱས་པའོ། །མི་བཟད་ལུས་ཀྱི་ལས་རྣམས་དང༌། །ཞེས་བྱ་བ་ནི། འདིར་མི་བཟད་པའི་སྒྲ་ནི་ཚིག་ཀུན་དང་སྦྱར་བར་བྱའོ། །སོགས་པའི་སྒྲ་ནི་འགྲོ་བ་ལ་སོགས་པ་བསྡུའོ། །ལྡད་བཞིན་སྨྲ་བར་བྱེད་པ་ནི་གང་ཕྱེད་མིད་ཙམ་ན་སྨྲ་བ་སྟེ། འདི་དག་ནི་ངག་གི་ལས་ཏེ། རབ་ཏུ་དྲག་པ་ལ་བྱའི་ངལ་བ་ལ་ནི་མ་ཡིན་ནོ། །འདོད་ཆགས་དང་ཞེ་སྡང་ལ་སོགས་པ་གང་ཡིན་པ་དེ་དག་ནི་ཡིད་ཀྱི་ལས་ཡིན་ཏེ། གང་ཡུལ་དེ་
ལྟ་བུ་ལ་འཇུག་པ་དེ་ནི་ཡིད་ཀྱི་ལོག་པར་སྦྱོར་བའོ། །དེ་དག་ཐམས་ཅད་ཀྱང་ཚེ་འདིར་བྱས་ཤིང་སྤྱད་པ་འམ། སྐྱེ་བ་གཞན་དག་ཏུ་བྱས་ཀྱང་རུང་སྟེ། །དེ་རྣམས་ཐམས་ཅད་ལོག་པའི་སྦྱོར་བ་ཡིན་པར་ཤེས་པར་བྱའོ། །འདི་དག་ནད་ཀྱི་རྒྱུ་ཡིན་ནོ། །ཞེས་བྱ་བ་ལ། གསུམ་གསུམ་དུ་བརྟགས་པ་ནི་ནད་ཀྱི་རྒྱུ་ལས་ལྡང་བར་བྱེད་བའི་གཞི་ཡིན་ནོ། །ལྡང་གྱུར་དེ་ནི་མཐའ་ཡས་ཏེ། །སྣ་ཚོགས་ནད་ནི་བྱེད་པར་འགྱུར། །ཡན་ལག་ནང་གྲོལ་ལྷུ་ཚིགས་བརྟེན། །ཡན་ལག་ཁྲག་སོགས་པགས་པ་ཡིན། །ཞེས་བྱ་བ་ལ། ནད་ཀྱི་གཞི་དེ་དག་ལས་ནད་དེ་རྣམས་ལྡང་ཞིང་འཁྲུགས་པར་གྱུར་པ་དེ་ནི་གང་ཞིག་མཐའ་ཡས་པ་ཡིན་ཏེ། རྣམ་པ་ཐ་དད་པའི་ཚུལ་གྱི་ནད་ཀྱིས་འདེབས་ཤིང་སྐྱེས་པ་ཡིན་ནོ། །གང་དུ་སྐྱེ་ཞེ་ན། ཡན་ལག་རྣམས་དང༌། དེ་བཞིན་དུ་ནང་གྲོལ་དང༌། ལྷུ་ཚིགས་དང༌། གནད་རྣམས་སུ་སྐྱེའོ། །ཡན་ལག་ཁྲག་སོགས་པགས་པ་ཡིན། །ཞེས་བྱ་བ་ནི། དེ་ལ་ཡན་ལག་ནི་ཁྲག་ལ་སོགས་པའི་ལུས་ཟུངས་པགས་པའི་མཐར་ཐུག་པ་ལ་བྱའོ། །དེ་ནི་ཕྱི་རོལ་ནད་གནས་ཏེ། །ཞེས་བྱ་བ་ལ། དེ་དག་ནི་ཕྱི་རོལ་གྱི་ནད་རྣམས་ཀྱི་གནས་དང་རྟེན་ཡིན་པར་བཤད་དོ། །དེ་བརྟེན་མ་ཞུ་ཡན་ལག་ན། །ལྦ་བ་བེའུ་སྣབས་འབྲུམ་པ་སོགས། །གཞང་འབྲུམ་སྐྲན་དང་འོར་ནད་སོགས། །དེ་དག་ཕྱི་རོལ་ནད་ཅེས་བྱ། །ཞེས་བྱ་བ་ལ། གང་གི་ཕྱི་རོལ་གྱི་ནད་ཡན་ལག་ཁྲག་ལ་སོགས་པའི་ལུས་ཟུངས་ཀྱི་གནས་སུ་གྱུར་པ་ཡིན་ལ། དེ་བས་ན་དེ་ལ་བརྟེན་ཏེ་མ་ཞུ་བ་དང༌། ཡན་ལག་ན་བ་ལ་སོགས་པ་འབྱུང་བར་འགྱུར་བ་དང༌། དེ་བཞིན་དུ་ཕྱི་རོལ་གྱི་ནད་གཞང་འབྲུམ་ལ་སོགས་པའི་ནད་རྣམས་ཀྱང་འབྱུང་བར་འགྱུར་རོ། །ནང་ནད་རྩ་སྦུབས་ཆེན་པོ་དང༌། །མ་ཞུ་ཞུ་བའི་གནས་ལ་བརྟེན། །ཞེས་བྱ་བ་ལ། ཡང་ན་ནང་གི་ནད་ཅེས་བྱ་བ་ནི་ལྟོ་བ་དང་དེ་བཞིན་དུ་རྩ་སྦུབས་ཆེན་པོ་རྣམས་དང༌། མ་ཞུ་བ་དང་ཞུ་བའི་གནས་ལ་བརྟེན་པ་རྣམས་སོ། །གནས་དེ་ལས་ནི་སྐྱུག་ཚད་འཁྲུ། །དམུ་རྫིང་ལུད་བ་དབུགས་མི་བདེ། །ནང་གི་ཆ་ཡི་གཞང་འབྲུམ་སྐྲང༌། །སྐྲན་དང་མེ་དབལ་ཁོང་འབྲུམ་པ། །ཞེས་བྱ་བ་ལ། ནང་
གྲོལ་གྱི་གནས་དེ་ལ་ནི་སྐྱུག་པ་དང༌། ཚད་པས་འཁྲུ་བ་ལ་སོགས་པའི་ནད་རྣམས་འབྱུང་བར་འགྱུར་རོ། །དེ་བཞིན་དུ་ནང་གི་ཆའི་གཞང་འབྲུམ་དང༌། སྐྲན་ལ་སོགས་པ་འབྱུང་བར་འགྱུར་ཏེ། དེ་ལྟར་ན་གཞང་འབྲུམ་ལ་སོགས་པ་ནི་ཕྱི་དང་ནང་གི་ཆའི་དབྱེ་བས་རྣམ་པ་གཉིས་ཡིན་ནོ། །མགོ་བོ་སྙིང་དང་ཆུ་སོ་སོགས། །རུས་པའི་ཚིགས་ནད་གནད་ཡིན་ནོ། །ཞེས་བྱ་བ་ལ། འདི་དག་ནི་གནད་ཅེས་བྱ་སྟེ། མགོ་བོ་དང༌། སྙིང་དང༌། ཆུ་སོ་ལ་སོགས་པའི་ནད་དང༌། རུས་པའི་ཚིགས་ཏེ། འདིར་ཚིགས་ནི་རུས་པའི་ཚིགས་ལ་བྱའོ། །ཤ་དང་རྒྱུས་པ་དང༌། རྩ་ལ་སོགས་པ་གཉིས་འདུས་པའི་ཚིགས་གཞན་དག་ལ་ནི་མི་བྱའོ། །དེ་བས་ན་འདིར་རུས་པའི་ཚིགས་ངེས་པར་གཟུང་བ་ཡིན་ནོ། །དེ་འབྲེལ་རྩ་དང་ཆུ་བ་དང༌། ཆུ་བ་ཆེ་སོགས་བར་མ་ཡིན། །དེ་ལ་ནད་ལམ་དེར་གནས་པ། །གཅོང་ཆེན་གཞོགས་ཕྱེད་མཇིང་ཁ་ཡོ། །གླད་ནད་སོགས་དང་ཚིགས་རུས་དང༌། །དཔྱི་ཡི་གཟེར་དང་གནོད་ནད་སོགས། །ཞེས་བྱ་བ་ལ། དེ་རྣམས་དང་འབྲེལ་པ་ཡིན་པས་ན། དེ་འབྲེལ་ཏེ། གནད་དེ་རྣམས་དང༌། དེ་བཞིན་དུ་རུས་པའི་ཚིགས་རྣམས་དང་འབྲེལ་པའི་ལམ་བར་མ་ཞེས་བྱ་བ་དེ་ལ། ནད་གཅོང་ཆེན་པོ་ལ་སོགས་པ་གནས་པ་ཡིན་ནོ། །དེ་བཞིན་དུ་གླད་ནད་ལ་སོགས་པའི་ནད་དང༌། ཚིགས་པ་དང༌། རུས་པ་དང་དཔྱིའི་གཟེར་དང༌། གནོད་ནད་ལ་སོགས་པ་ཡང་དེར་གནས་སོ། །འབྱིན་ཁྱབ་ཟུག་དང་སྙོམ་པ་དང༌། ལུས་ཚ་ནད་གཟེར་བྱེ་བ་དང༌། །འབྱར་ཞིང་ཆག་སྙམ་རྐང་ལག་འཁུམས། །བསྒོངས་དང་བརྩེ་དང་སྐོམ་བྱེད་དང༌། །འདར་དང་རྩུབ་དང་ཁོང་སྟོང་དང༌། །སྐེམ་དང་འགུལ་དང་དཀྲིས་སྙམ་དང༌། །རེངས་དང་རོ་བསྐ་བྲོ་བའོ། །མདོག་ནི་གནག་གམ་དམར་བ་དག །རླུང་གི་ལས་ཡིན། ཞེས་བྱ་བ་ལ། རླུང་འཁྲུགས་པར་གྱུར་བ་ལས་འབྱིན་པ་སྙམ་བྱེད་པའི་ལས་བྱེད་པར་འགྱུར་རོ། །དེ་ལ་འབྱིན་པ་ནི་མིག་ལ་སོགས་པའི་ཡན་ལག་ཐུར་དུ་ལྷུང་བ་སྙམ་སེམས་པར་བྱེད་པའོ། །ལུས་ཀུན་ཏུ་ཁྱབ་ཅིང་འདྲེན་པར་བྱེད་པའོ། །ཟུག་པ་ནི་ཡན་ལག་རྡེག་
པ་སྙམ་སེམས་པའོ། །སྙོམ་པ་ནི་ལུས་ཀུན་དཀྲིས་པ་སྙམ་སེམས་པའོ། །ལུས་ཚ་བ་ནི་ལུས་བསྲེགས་པ་སྙམ་སེམས་པའོ། །ནད་ནི་ཚོར་བ་དྲག་པོའོ། །གཟེར་བ་ནི་ཁབ་ཀྱིས་ཕུག་པ་བཞིན་དུ་བྱེད་པའོ། །བྱེ་བ་ནི་འགྱེས་པ་སྙམ་སེམས་པའོ། །འབྱར་བ་ནི་བཤང་བ་ལ་སོགས་པ་གནས་ལས་མི་འགུལ་བར་བྱེད་པའོ། །ཆག་པ་སྙམ་སེམས་པ་ནི་ཡན་ལག་ཆག་པ་ལྟར་ཟུག་ཅིང་ན་བའོ། །ཡན་ལག་འཁུམས་པ་ནི་ཡན་ལག་འཇའ་ཞིང་འཁུམས་པར་བྱེད་པའོ། །བསྒོངས་པ་ནི་ཐ་དད་བར་འདུག་ལ་གཅིག་ཏུ་བསྡུས་པའོ། །བརྩེ་བ་ནི་ལུས་དང་སྤུའི་ཚོགས་རྣམས་བརྩེ་བའོ། །སྐོམ་པར་བྱེད་པ་ནི་སྐོམ་གྱིས་གདུངས་པའོ། །འདར་བ་ནི་ཡན་ལག་གཡོ་ཞིང་འགུལ་བའོ། །རྩུབ་པ་ནི་རེག་ན་མི་བདེ་བར་རྩུབ་པའོ། །ཁོང་སྟོང་པ་ནི་ནད་སྟོང་པའོ། །སྐེམས་པ་ནི་ལུས་སྐེམས་བག་ཏུ་གྱུར་བའོ། །འགུལ་བ་ནི་ཅུང་ཟད་གཡོ་བའོ། །དཀྲིས་པ་སྙམ་བྱེད་པ་ནི་ཡན་ལག་བཅིངས་པ་སྙམ་སེམས་པའོ། །རེངས་པ་ནི་ལུས་དང་ཡན་ལག་རྣམས་ཤིང་ལྟར་རེངས་པའོ། །རོ་བསྐ་བ་ནི་རོ་གཞན་དག་ཀྱང་བསྐ་བའི་རོར་ཚོར་བའོ། །མདོག་གནག་པ་ནི་ཕལ་ཆེར་ལུས་དྲི་མ་ཅན་དུ་འདུག་པའམ། དེ་བཞིན་དུ་ཕལ་ཆེར་དམར་བག་ཏུ་སྣང་བ་སྟེ། འདི་དག་ནི་རླུང་གི་ལས་ཡིན་ནོ། །མཁྲིས་པའི་ལས། ལུས་ཚ་མདོག་དམར་དྲོ་སྨིན་བྱེད། །རྡུལ་དང་རྣག་དང་འཛག་རྨ་རེད། །འདྲུལ་དང་བརྒྱལ་ཞིང་མྱོས་པ་དག །ཁའི་རོ་ཁ་དང་སྐྱུར་བ་དང༌། །མདོག་སྐྱ་དམར་རྩ་མ་ཡིན་པའོ། །ཞེས་བྱ་བ་ནི། མཁྲིས་པ་ལྡང་བར་གྱུར་ན་དེའི་ལས་ནི་ལུས་ཚ་བ་ལ་སོགས་པ་བྱེད་པར་འགྱུར་རོ། །དེ་ལ་ལུས་ཚ་བ་ནི་གང་ལུས་ཐམས་ཅད་ལ་ཤིན་ཏུ་མི་བཟད་པའི་ཚ་བ་འབྱུང་བར་འགྱུར་བ་དེ་ལ་ཚབ་ནི་སྒྲར་བཤད་དོ། །མདོག་དམར་བ་ནི་ལུས་དང་ཡན་ལག་ཤས་ཆེར་དམར་བའོ། །དྲོ་བ་ནི་ལུས་དང་ཡན་ལག་ཚ་བའོ། །སྨིན་པར་བྱེད་པ་ནི་ལུས་ཀྱི་ཡན་ལག་གི་ཕྱོགས་གཅིག་འདྲུལ་ཞིང་སྨིན་པའོ། །རྡུལ་བ་ནི་རླན་དང་ལྡན་པ་ཉིད་དོ། །རྣགས་པ་ནི་ལུས་འདྲུལ་ཞིང་སྨིན་པའོ། །འཛག་པ་ནི་རྣག་ལ་སོགས་པ་འཛག་པའོ། །རྨ་རེད་པ་ནི་རྨ་ཞིག་ཅིང་མནམ་པའོ། །འདྲུལ་བ་ནི་ལུས་དང་ཡན་ལག་
འདྲུལ་ཞིང་མྱགས་པའོ། །བརྒྱལ་བ་ནི་སེམས་མེད་ཅིང་མི་དྲན་པའོ། །མྱོས་པ་ནི་ཆང་གིས་མྱོས་པའི་ནད་ལྟ་བུའོ། །ཁའི་རོ་ནི་ཁ་བ་དང་སྐྱུར་བ་དག་ཏུ་ཚོར་བར་འགྱུར་རོ། །ལུས་ཀྱི་མདོག་ནི་སྐྱ་ཞིང་རྩ་དམར་བ་མ་ཡིན་པ་སྟེ། གཞན་དུ་ན་སྔོ་བ་དང༌། སེར་བ་ལ་སོགས་པའི་དབྱེ་བས་ཕྱེ་བར་སྣང་ངོ༌། །བད་ཀན་ལས་ནི་མཁྲང་ཞིང་སྣུམ། །གཡའ་ཞིང་ཁོང་གྲང་ལྕི་བ་དང༌། །ཚིགས་དམ་ཤ་རྒྱས་རྨོངས་བག་དང༌། །སྐྲང་ཞིང་གཉིད་ཆེ་ཟས་མི་འཇུ། །མདོག་དཀར་ཁ་རོ་ལན་ཚྭ་མངར། །ལས་ཀྱི་མཐའ་ལ་འདམ་རིང་ངོ༌། །ཞེས་བྱ་བ་ལ། བད་ཀན་ལྡང་བར་འགྱུར་བའི་ལས་ནི་མཁྲང་བ་དང་སྣུམ་པ་ལ་སོགས་པ་བྱེད་བར་འགྱུར་རོ། །དེ་ལ་མཁྲང་བ་ནི་ལུས་ཀྱི་ཡན་ལག་དང་ཉིང་ལག་རྣམས་སྲ་བ་ཉིད་དོ། །སྣུམ་པ་ནི་པགས་པ་ལ་སོགས་པ་སྣུམ་བག་ཏུ་གནས་པའོ། །གཡའ་བ་ནི་ལུས་ཀྱི་པགས་པ་གཡའ་བའོ། །ཁོང་གྲང་བ་ནི་ལུས་ཀྱི་ཡན་ལག་རྣམས་བསིལ་བག་ཏུ་གནས་པའོ། །ལྕི་བ་ནི་ལུས་ཟུངས་རྣམས་ལྕི་བ་ཉིད་དོ། །ཚིགས་དམ་པ་ནི་རྩ་སྦུབས་རྣམས་འགགས་པའོ། །ཤ་རྒྱས་པ་ནི་ལུས་ཀྱི་ཤ་ཆེ་བ་སྟེ། བད་ཀན་ཅན་དག་གི་ཁ་དང་ལྐོག་མ་ལ་སོགས་པའི་ལུས་ཀྱི་ཤ་རྒྱས་པའམ་འགགས་པའོ། །རྨོངས་བག་ནི་ཡུལ་རྣམས་ལ་དབང་པོ་མི་གསལ་བ་ཉིད་དོ། །གཞན་དག་ནི་ཡུར་བ་ཉིད་དོ། །ཞེས་ཟེར་རོ། །སྐྲང་བ་ནི་འོར་བག་ཏུ་འདུག་པའོ། །གཉིད་ཆེ་བ་ནི་གཉིད་སྟུག་པའོ། །ཟས་མི་འཇུ་བ་ནི་ཕོ་བའི་མེ་དྲོད་མི་སྙོམས་ཤིང་འཇུ་བར་མི་ནུས་པའོ། །ལུས་ཀྱི་མདོག་ནི་དཀར་ཞིང་སྐྱ་རྦབ་རྦབ་པོར་སྣང་བའོ། །ཁའི་རོ་ནི་ལན་ཚྭ་དང༌། མངར་བག་ཏུ་བྲོ་བར་འགྱུར་རོ། །ལས་ཀྱི་མཐའ་ལ་འདམ་ཞིང་རིང་བ་ནི་ནད་ཡུན་རིང་པོ་ནས་འབྱང་བའམ། ཡུན་རིང་ཞིག་ནས་འཆི་བར་བྱེད་དོ། །དེ་ལྟར་ཇི་སྐད་བཤད་པ་ཡི། །མཚན་ཉིད་ཀྱིས་ནི་ནད་ཀུན་ཁྱབ། །ཅེས་བྱ་བ་ལ། དེ་ལྟར་ཞེས་བྱ་བ་ནི་ཡོངས་སུ་རྫོགས་པའི་ཚིག་གམ། དེ་ལྟ་བུའི་རྣམ་པའི་དོན་ཡིན་ཏེ། རྫོགས་པ་ནི་ནད་རྣམས་ཀྱི་མཚན་ཉིད་གང་གིས། ནད་གང་ཡིན་པར་ཤེས་པར་འགྱུར་བའོ། །ཇི་ལྟ་བུ་ཞེ་ན། ནད་ཀུན་ཁྱབ་བྱེད་ཅེས་བྱ་བ་སྟེ། ནད་མ་ལུས་པ་ཁྱབ་པའི་ངང་ཚུལ་གང་ཡིན་པ་ནད་ཀུན་
ཁྱབ་པའོ། །དེ་ནི་མ་ཡེངས་བལྟ་སོགས་པས། །ཡང་དག་པར་ནི་ཤེས་པར་བྱ། །ནད་ཀྱི་གནས་སྐབས་དབྱེ་ཤེས་པས། །ནད་བ་སྐད་ཅིག་རེ་རེར་བལྟ། །ཞེས་བྱ་བ་ལ། དེ་ལྟར་ནད་ཀྱི་མཚན་ཉིད་ཀུན་ལ་ཁྱབ་པ་ཇི་སྐད་བཤད་པའི་ནད་ཀྱི་མཚན་ཉིད་དེ་ནི་མ་ཡེངས་པ་སྟེ། འབད་པ་དང་ལྡན་ཞིང་སེམས་གཞན་དུ་མ་ཡེངས་པའི་སྨན་པ་ལ་སོགས་པ་བརྩོན་པ་དང་ལྡན་པས། བལྟ་བ་ལ་སོགས་པས་ཞེས་པ་བལྟ་བ་དང༌། མྱང་བ་དང་དྲིས་པས་ཡང་དག་པར་ཤེས་པར་བྱ་ཞིང་རྟོགས་པར་བྱའོ། །དེ་ལ་བལྟ་བའི་མདོག་དང༌། གནས་དང༌། ཚད་དང༌། མཆིལ་སྣབས་དང༌། བཤང་གཅི་དང༌། སྐྱུགས་པ་ལ་སོགས་པ་ལ་བལྟ་བ་སྟེ། སོགས་པའི་སྒྲས་ནི་རྣ་བའི་སྒྲ་དང༌། རྒྱུ་མ་ཀྲུག་ཀྲུག་ཟེར་བ་དང༌། སོར་ཚིགས་ལ་སོགས་པ་གཅོག་པ་ཐོས་པ་ལས་ཤེས་པར་བྱའོ། །སྣུམ་པ་ནི་ལུས་དང་བཤང་བ་དང་རྨ་ལ་སོགས་པའི་དྲི་བརྟག་པར་བྱའོ། །རེག་པ་ནི་གྲང་བ་དང༌། དྲོ་བ་དང་འཇམ་པ་དང་རྩུབ་པ་དང༌། འགུལ་པའི་རེག་བྱ་ཤེས་པར་བྱའོ། །ཁའི་རོ་ནི་དྲིས་པ་ལས་ཤེས་པར་བྱའོ། །དེ་བཞིན་དུ་སྐྱུག་སླ་བ་དང༌། སྐྱུག་དཀའ་བ་དང༌། ལྟོ་བ་སྲ་བ་དང༌། སྙི་བ་དང༌། རྨི་ལམ་དུ་ཅི་མཐོང་བ་དང༌། གང་ལ་མངོན་པར་དགའ་བ་དང། ནད་གང་གི་ཚེ་ནས་ཞུགས་པ་དང༌། སྐྱེས་པའི་སྐར་མ་དང༌། མཛའ་བ་དང༌། མི་མཛའ་བ་དང༌། བདེ་བ་དང་སྡུག་བསྔལ་ལ་སོགས་པ་དྲི་བར་བྱའོ། །འདི་དག་ནི་ཕྱོགས་གཅིག་ཙམ་བསྟན་པ་ཡིན་པར་ཤེས་པར་བྱའོ། །དེ་བཞིན་དུ་རྗེས་སུ་དཔག་པ་ལས་ཀྱང་ཤེས་པར་བྱའོ། །རེ་ཞིག་ཕྱིར་འབྱུང་ཞིང་རྒྱུ་བ་ལས་ལུས་ཀྱི་བཅུད་དང༌། རོ་ཉམས་པ་ཤེས་པར་བྱའོ། །སྦྲང་བུ་འདུ་བ་ལས་ནི་མངར་བར་རོ། །དེ་བཞིན་དུ་ཕོ་བའི་དྲོད་ནི་འཇུ་བ་ལས་སོ། །སྟོབས་ནི་རྩོལ་བའི་ནུས་པ་ལས་ཤེས་པར་བྱའོ། །ནད་ཀྱི་མཚན་མ་མངོན་པ་དག་ནི་བསལ་བའི་སྲེད་པ་དང་མི་སྲེད་བ་ལས་སོ། །ནད་ཀྱི་ཚད་ནི་སྤྱོད་པའི་ཁྱད་པར་ལས་སོ། །ཚེ་ཟད་པ་ནི་འཆི་ལྟས་ལས་སོ། །རང་བཞིན་དང༌། སྙིང་སྟོབས་དང༌། སྤྲོ་བ་དང༌། གོམས་པ་ནི་རྟག་ཏུ་འགྲོགས་པ་ལས་ཤེས་པར་བྱའོ། །དེ་ཡང་ཙ་ར་ཀས། ཤེས་པའི་སྒྲོན་མའི་སྣང་བ་ཡིས། །
ནད་པའི་ནད་ཀྱི་བདག་ཉིད་ནི། །མ་ཤེས་བར་དུ་སྦྱོར་ཤེས་གང༌། །དེ་ནི་ནད་རྣམས་གསོ་མི་བྱེད། །ཅེས་བཤད་པ་ཡིན་ནོ། །ཅི་སྨན་གང་ལ་ལ་ཞིག་ཅི་ལྟར་རུང་བ་ཙམ་ཞིག་དེའི་མཚན་ཉིད་དང་ལྡན་པ་ཡིན་ནམ་ཞེ་ན། དེ་ཐམས་ཅད་མ་ཡིན་ཏེ། གཞན་དུ་ན་ནད་ཀྱི་གནས་སྐབས་ཀྱི་དབྱེ་བ་ཤེས་པ་དང༌། དེ་བཞིན་དུ་ནད་ལ་སྐད་ཅིག་རེ་རེ་ཞིང་ལྟ་བ་དག་སྨན་པ་ཡིན་ཏེ། སྐད་ཅིག་སྐད་ཅིག་ཅིང་གནས་སྐབས་ཐམས་ཅད་དུ་ཡང་དང་ཡང་དུ་རྒྱུན་མི་འཆད་པར་ལྟ་ཞིང༌། རྟོགས་པར་བྱེད་པའི་སྨན་པ་དེ་ལྟ་བུ་ནི་ནད་ཀྱི་གནས་སྐབས་ཀྱི་དབྱེ་བ་ཤེས་པ་ཡིན་ཏེ། དེ་ལྟར་ན་ནད་པ་སྐད་ཅིག་རེ་རེ་ཡང་བལྟས་པས་དེ་རྣམས་སྐྱེ་བར་འགྱུར་བ་ཡིན་ནོ། །དེ་བས་ན་དེ་ནི། གོམས་པས་ངེས་པར་ཐོ་བ་འགྱུར་ཏེ། །ལས་རྣམས་འགྲུབ་པ་གསལ་བྱེད་ཡིན། །ཞེས་བཤད་པ་ཡིན་ཏེ། གོམས་པ་ནི་གསོ་བའི་ལས་ལ་ཡང་དང་ཡང་དུ་འཇུག་པར་ངེས་པར་ཤེས་པར་གསོ་བ་ཤེས་པའི་ངེས་པ་རྙེད་པར་འགྱུར་གྱི། གསོ་བའི་བསྟན་བཅོས་ཁོང་དུ་ཆུད་པ་འབའ་ཞིག་ཙམ་གྱིས་ནི་མ་ཡིན་ཏེ། ཇི་ལྟ་བུའི་ངེས་པ་ཞེ་ན། ལས་རྣམས་འགྲུབ་པ་གསལ་བྱེད་ཡིན། །ཞེས་བྱ་བ་སྟེ། ལས་ཐམས་ཅད་འགྲུབ་པར་བྱེད་པ་ཡིན་པས་ན་ལས་འགྲུབ་པ་སྟེ། དེ་གསལ་བར་བྱེད་པ་ནི་སྣང་བར་བྱེད་པའོ། །འདི་ཉིད་ཀྱི་དཔེ་བསྟན་པའི་ཕྱིར། རིན་ཆེན་ལ་སོགས་བཟང་ངན་ཤེས། །བསྟན་བཅོས་འབའ་ཞིག་ལས་མི་འབྱུང༌། །ཞེས་བཤད་པ་ནི། མརྒད་ལ་སོགས་པ་འདི་དག་གི་བཟང་ངན་ཤེས་པ་གང་ཡིན་པ་ནི་གོམས་པ་ཁོ་ན་རྒྱུའི་གཙོ་བོ་ཡིན་ཏེ། དེས་འདི་ནི་བཟང་པོའོ། །འདི་ནི་ངན་པའོ་ཞེས་རྟོགས་པར་འགྱུར་ཏེ། འདིར་ནི་རིན་པོ་ཆེ་བརྟག་པའི་བསྟན་བཅོས་ཡོད་དུ་ཟིན་ཀྱང༌། དེ་ཤེས་པར་འགྱུར་བའི་བསྟན་བཅོས་འབའ་ཞིག་ལས་མི་འབྱུང་སྟེ། དེ་ནི་རིན་པོ་ཆེ་མང་པོ་ལན་མང་དུ་མཐོང་བའི་གོམས་པ་ལས་འདི་ནི་རིན་པོ་ཆེ་བཟང་པོ་ཡིན་ནོ། །འདི་ནི་མ་ཡིན་ནོ་ཞེས་ཤེས་པ་སྐྱེ་བར་འགྱུར་རོ། །དེ་བཞིན་དུ་གང་ཞིག་སྨན་དཔྱད་ཀྱི་བསྟན་བཅོས་ཤེས་ཤིང་ཁོང་དུ་ཆུད་པ་དང༌། དེ་བཞིན་དུ་ལས་ལ་གོམས་ཤིང་བྱ་བའི་སྨན་པ་དེས་ནད་རབ་ཏུ་ཞི་བའི་ལས་བྱེད་ན། སྲོག་
ཆགས་རྣམས་ཀྱི་སྲོག་སྟེར་བར་བྱེད་པ་ཡིན་གྱི། ལས་ལ་གོམས་ཤིང་བྱང་བར་མ་བྱས་པར། གསོ་བའི་བསྟན་བཅོས་ཤེས་པ་འབའ་ཞིག་གིས་ནི་མ་ཡིན་ཏེ། ཐོས་པ་མེད་པར་གོམས་པ་འབའ་ཞིག་གིས་ཀྱང་མ་ཡིན་ནོ། །དེ་བས་ན་འབའ་ཞིག་ཅེས་བྱ་བའི་སྒྲ་སྨོས་པ་ཡིན་ཏེ། འདི་ལ་ནི་གཉི་ག་དགོས་པ་ཡིན་ནོ། །ནད་ནི་འདི་ལྟར་རྣམ་གསུམ་སྟེ། །ལ་ལ་ཚེ་འདིའི་ཉེས་ལས་བྱུང༌། །ལ་ལ་སྔོན་གྱི་ཉེས་ལས་བྱུང༌། །གཞན་དག་དེ་གཉིས་འདྲེས་ལས་བྱུང༌། །ཞེས་བྱ་བ་ལ། ནད་པ་ལ་ལ་ནི་ཚེ་འདིའི་ཉེས་པ་ཞེས་པ་མཐོང་བའི་ཆོས་ཀྱི་ཉེས་པ་སྟེ། ནད་ཀྱི་རྒྱུ་ལ་ཉེས་པ་ཞེས་བྱའོ། །དེ་བཞིན་དུ་ལ་ལ་ནི་སྔོན་གྱི་ཉེས་པ་ལས་བྱུང་སྟེ། བདག་ཉིད་ཀྱིས་སྔོན་ལས་མི་དགེ་བ་བྱས་པའི། ཉེས་པ་བྱས་པའི་རྣམ་པར་སྨིན་པ་ལས་བྱུང་བ་ཡིན་ནོ། །གཞན་དག་ལ་ལ་ནི་གཉིས་འདྲེས་ཤིང་འདུས་པ་ལས་བྱུང་སྟེ། དེ་ལྟར་མཐོང་བའི་ཆོས་ཀྱི་ཚེ་འདིའི་ཉེས་པ་དང༌། སྔོན་གྱི་ཉེས་པ་དང༌། དེ་བཞིན་དུ་འདུས་པ་སྟེ། གསུམ་ཡོད་པ་སྟེ། དེ་ལྟར་ན་ནད་རྣམ་པ་གསུམ་ཡིན་པར་ཤེས་པར་བྱའོ། །ཡང་འདི་རྣམས་ཀྱི་མཚན་ཉིད་གོ་རིམས་ཇི་ལྟ་བའི་དབང་དུ་བྱས་ནས་སྨྲས་པ་ནི། ཉེས་འབྱུང་ནད་གཞི་ཇི་བཞིན་པར། །ཞེས་བྱ་བ་ལ་སོགས་པ་ཡིན་ཏེ། བཤད་པའི་ནད་གཞི་དེ་དང་དེ་ཉིད་ཡིན་གྱི་ཚེ་འདིའི་ཉེས་པ་ལས་བྱུང་བ་དེ་ཉིད་ནི་རླུང་དང༌། མཁྲིས་པ་དང་བད་ཀན་ལས་བྱུང་བ་ཡིན་ལ། དེ་ལ་ནི་ནད་གཞི་ཇི་ལྟ་བ་བཞིན་དུ་ཤེས་པར་བྱ་ཞིང༌། ནད་གཞི་མ་འཆོལ་བས་ནད་གང་ཡིན་པ་ལྡང་བའི་ནད་གཞི་གང་དང་གང་ཡིན་པ། ནད་ནི་ནད་གཞི་གཞན་ལས་མི་འབྱུང་གི །རང་གི་ཉེས་པ་ཁོ་ན་ལས་བྱུང་བ་དེ་ནི་ཚེ་འདིའི་ཉེས་པ་ལས་བྱུང་བ་ཡིན་པར་ཤེས་པར་བྱའོ། །ལས་སྐྱེས་རྒྱུ་ནི་མེད་པ་ཡིན། །ཞེས་བྱ་བ་ནི། གང་རྒྱུ་ཞེས་པ་ནད་གཞི་མེད་པར་ཉེས་པ་གང་ཡང་རུང་བ་ཞིག་ལས་བྱུང་བ་འདི་ནི་ལས་ལས་བྱུང་བའི་ནད་ཡིན་ནོ། །ཞེས་ངེས་པར་ཤེས་པར་བྱ་སྟེ། ནད་གཞི་ཇི་ལྟ་བའི་ཉེས་པ་ལས་བྱུང་བ་མ་ཡིན་པའི་ཕྱིར་རོ། །རྒྱུ་ཆུང་བ་ལ་དཀྱེལ་ཆེའི་ནད། །ཉེས་དང་ལས་ལས་བྱུང་བ་ཡིན། །ཞེས་བྱ་བ་ལ། ནད་གང་རྒྱུ་ཆུང་ངུ་ཞིག་ལས་དཀྱེལ་ཤིན་ཏུ་ཆེ་བར་སྣང་བ་དེ་ནི་ནད་གཞི་ཇི་ལྟ་བའི་ཉེས་པ་ལས་བྱུང་བ་ཡིན་དུ་ཟིན་ཀྱང༌། ནད་དེ་ངེས་པང་ནད་
གཞིའི་ངེས་པ་དང༌། ལས་ཀྱི་ཉེས་པ་གཉིས་ལས་བྱུང་བ་ཡིན་པར་ངེས་པར་ཤེས་པར་བྱའོ། །དེ་ནི་ནད་རྣམ་པ་གསུམ་པོ་འདི་དག་གི་གསོ་བ་སྨྲས་པ་ནི། དང་པོ་མི་མཐུན་བཟའ་བ་ཡིན། །ལས་སྐྱེས་ལས་ནི་ཟད་པ་སྟེ། །ཞེས་བྱ་བ་ཡིན་ཏེ། དང་པོ་བཤད་པས་ན་དང་པོ་སྟེ། གང་ནད་གཞིའི་ཉེས་པ་འབའ་ཞིག་ལས་བྱུང་བ་ལ། ཇི་སྐད་དུ་བཤད་པའི་རླུང་ལ་སོགས་པའི་མི་མཐུན་པའི་གཉེན་པོར་གྱུར་པ། ཟོས་པ་ལས་ཟད་ཅིང་དེངས་པར་འགྱུར་རོ། །ཞེས་ཚིག་སྦྱར་བར་བྱའོ། །ལས་ལས་སྐྱེས་པ་ནི་མི་དགེ་བའི་ལས་དེ་ཉིད་བྱང་ཞིང་ཟད་པ་ལས་ནད་ཟད་པར་འགྱུར་རོ། །གཉི་ག་ལས་བྱུང་ཉེས་དང་ལས། །ཟད་པས་ཟད་པར་འགྱུར་བ་ཡིན། །ཞེས་བྱ་བ་ཡང༌། ཚེ་གཉི་གའི་ཉེས་པ་དང་ལས་ལས་བྱུང་བའི་ནད་ནི་རྒྱུའི་ཉེས་པ་དང༌། ནད་ཀྱི་རྒྱུའི་ལས་ཟད་ཅིང་འཇིག་པས་ནད་དེ་མེད་པར་འགྱུར་བ་ཡིན་ནོ། །དེ་ལྟར་རེ་ཞིག་ནད་རྣམ་པ་གསུམ་དུ་བསྟན་ནས། ཡང་དབྱེ་བ་གཉིས་ཀྱི་དབང་དུ་བྱས་ནས་སྨྲས་པ་ནི། ནད་ནི་རང་རྒྱུད་གཞན་རྒྱུད་ལས། །གཉིས་འགྱུར། ཞེས་བྱ་བ་ཡིན་ཏེ། ནད་ནི་རང་གི་རྒྱུད་དང་གཞན་གྱི་རྒྱུད་ཀྱི་རྣམ་པ་དག་ལས་གཉིས་སུ་འགྱུར་ཏེ། དེ་ལ་རང་གི་རྒྱུད་ནི་གཙོ་བོ་སྟེ། གཞན་གྱི་དབང་དུ་མ་གྱུར་པ་ཞེས་བྱ་བ་དང་དོན་གཅིག་གོ །གཞན་གྱི་རྒྱུད་ནི་འཁོར་གཞན་ཡོད་པ་དང༌། གཙོ་བོ་ཡིན་པ་དང༌། རྗེས་སུ་འབྲང་བ་མ་ཡིན་ཞེས་བྱ་བ་མིང་གི་རྣམ་གྲངས་ཡིན་ཏེ། མཐའ་མའང་གཉིས་ཡིན་ཏེ། །སྔར་སྐྱེས་སྔ་མའི་ཚུལ་དུ་བཤད། །ཕྱི་སྐྱེས་པ་ནི་བླ་བརྣན་ཡིན། ཞེས་བྱ་བ་ལ། མཐའ་མ་ནི་གཞན་རྒྱུད་ཅན་ཏེ། མཐའ་མར་བསྟན་པས་ན་མཐའ་མར་ཏེ། གཞན་གྱི་རྗེས་སུ་འབྲང་བའོ། །དེ་ཡང་རྣམ་པ་གཉིས་ཡིན་ཏེ། སྔར་སྐྱེས་པ་ནི་གཅིག་གོ །གཉིས་པ་ནི་ཕྱི་ནས་སྐྱེས་པའོ། །དེ་ལས་གང་སྔོན་དུ་སྐྱེས་ཤིང་སྔར་བྱུར་བ་དེ་ནི་ནད་རྣམས་ཀྱི་སྔར་སྐྱེས་པའི་ནད་ཀྱི་ཚུལ་དུ་བཤད་དོ། །གང་ཕྱིས་འབྱུང་ཞིང་ནད་ཀྱི་རྗེས་སུ་འབྲང་བ་ནི་ནད་ཀྱི་བླ་བརྣན་ཞེས་བྱ་བ་ཡིན་ནོ། །རང་གནས་ཅི་བཞིན་གནས་པ་ནི། །རང་རྒྱུད་ཅན་དེ་མཚན་ཉིད་གསལ། །ཞེས་བྱ་བ་ལ། གང་ཡང་རྒྱུད་དུ་སྒྲུབ་ཅིང་རང་ཉིད་གཙོ་བོར་གྱུར་པ་དེ་ནི་མཚན་ཉིད་གསལ་བ་ཡིན་ཏེ་
དེ་ནི་རང་གི་གནས་ན་གནས་ཤིང་མཚན་ཉིད་གསལ་ལ། ཇི་ལྟ་བ་བཞིན་དུ་མངོན་པ་ཉིད་ཡིན་ཏེ། དེ་ནི་ཤེས་པར་སླ་བ་ཡིན་ནོ། །གཞན་དག་དེ་ལས་གོ་བཟློག་པ། །ཞེས་བྱ་བ་ལ། གང་དེ་ལས་གཞན་པ་སྔ་མའི་ཚུལ་དང་དེ་བཞིན་དུ་བླ་བརྣན་ཞེས་བྱ་བའི་ནད་དེ་ནི་རང་རྒྱུད་ཅན་གྱི་ནད་དེ་ལས་གོ་བཟློག་པ་སྟེ། རང་བཞིན་གོ་བཟློག་པ་ཡིན་པས། རང་གི་གནས་ན་ཇི་བཞིན་དུ་གནས་པ་ལྟར་མཚན་ཉིད་གསལ་བ་མ་ཡིན་ལ། གཞན་གྱི་དབང་དུ་གྱུར་བས་ན། །གཞན་རྒྱུད་ཅན་ཞེས་བྱ་བའོ། །ཅིན་ད་འབའ་ཞིག་རང་རྒྱུད་དང་གཞན་རྒྱུད་ཀྱིས་ཕྱེ་བའི་རང་གི་མཚན་ཉིད་ཇི་སྐད་དུ་བསྟན་པ་བཞིན་དུ་ཤེས་པར་བྱ་འམ། འོན་ཏེ་གཞན་དག་ཀྱང་དེ་ལྟར་ཤེས་པར་བྱ་ཞེ་ན། དེའི་ཕྱིར་སྨྲས་པ། དྲི་མ་འང་དེ་བཞིན་ཤེས་བར་གྱིས། །ཞེས་བྱ་བ་སྟེ། ནད་འབའ་ཞིག་རང་རྒྱུད་དང་གཞན་རྒྱུད་ཅན་དུ་ཤེས་པར་བྱ་བ་འབའ་ཞིག་ཏུ་མ་ཟད་ཀྱི། དྲི་མའི་བར་ཡང་རླུང་དང་མཁྲིས་པ་དང་བད་ཀན་གྱི་རང་རྒྱུད་དང་གཞན་རྒྱུད་ཅན་དུ་ཤེས་པར་བྱའོ། །དེ་ནི་ནད་རེ་ལྡང་བ་ན། །མ་ཡེངས་པས་ནི་ཤེས་བྱ་སྟེ། །ཞེས་བྱ་བ་ལ། ནད་དེ་རང་གི་གནས་ཇི་ལྟ་བ་བཞིན་དུ་གནས་པས་ཉེ་བར་གནས་པའི་རང་བཞིན་ཤེས་པར་བྱ་སྟེ། ནད་རེ་རེ་ལྡང་ཞིང་རྣམ་པར་གཡོས་བ་ན་སྨན་པས་མ་ཡེངས་ཤིང་དེ་ལ་གཏད་པའི་སེམས་བསྡུས་པས་ལུང་དང༌། མངོན་སུམ་དུ་རྗེས་སུ་དཔག་པས་ཤེས་པར་བྱའི་གཞན་དུ་སེམས་པས་ནི་མ་ཡིན་ནོ། །དེ་ལ་ནད་རང་རྒྱུད་ཅན་གྱི་རང་གི་སྐྱེ་བའི་མཚན་ཉིད་དང༌། རྗེས་སུ་མཐུན་པའི་སྨན་ལ་སོགས་པས་བདེ་བར་གསོ་བ་ནི། དེའི་མཚན་ཉིད་ཀྱི་དོན་བཤད་པ་ཡིན་ཏེ། དེ་བས་ན་དེ་ཉིད་དེའི་ཉེ་བར་ཞི་བའི་ཐབས་ཡིན་ནོ། །གཞན་རྒྱུད་ཀྱི་ནད་རྣམས་ཞི་བར་བྱེད་པའི་ཐབས་གང་ཞིག་ཡིན་ཞེ་ན། དེའི་ཕྱིར་སྨྲས་པ། དེ་རྣམས་གཙོ་བོ་ཞི་བྱས་པས། །ཞི་འགྱུར། ཞེས་བྱ་བ་སྟེ། གཞན་རྒྱུད་ཅན་གྱི་ནད་དེ་རྣམས་ནི་གཙོ་བོ་མ་ཡིན་པས་གཙོ་བོ་རང་རྒྱུད་ཅན་ཞི་ཞིང་གསོ་བ་བྱས་པས། ཞི་བར་འགྱུར་གྱི། ལོགས་ཤིག་ཏུ་གསོ་བས་གསོ་དགོས་པ་ནི་མ་ཡིན་ནོ། །ཞི་བར་མ་གྱུར་ན། །དེ་བཞིན་ཕྱི་ནས་གསོ་བར་བྱ། །ཞེས་བྱ་བ་ལ། གལ་ཏེ་གཙོ་བོའི་ནད་གསོས་ཀྱང་གཙོ་འོ་མ་ཡིན་པའི་བླ་བརྣན་རང་རྒྱུད་ཅན་མ་ཡིན་པ་ཞི་
བར་མ་གྱུར་ན་དེའི་ཚེ་ནད་བླ་བརྣན་དེ་ཡང་སྔ་མ་གསོས་པའི་རྗེས་ལ་གསོ་བར་བྱའི། དེ་བཏང་སྙོམས་སུ་མི་བཞག་སྟེ་དེ་ནི་གསོར་མི་རུང་བ་མ་ཡིན་པའི་ཕྱིར་རོ། །འོན་ཏེ་བླ་བརྣན་སྟོབས་ཆེ་ན། མྱུར་གསོ། །ཞེས་བྱ་བ་ལ། གལ་ཏེ་ནད་གཞན་དབང་ཅན་བླ་བརྣན་ཞེས་བྱ་བ་ཚབས་ཆེ་ཞིང་སྟོབས་དང་ལྡན་ན། དེའི་ཚེ་བླ་བརྣན་ལས་བྱུང་བའི་ནད་ཚབས་པོ་ཆེ་དེ་མྱུར་བ་ཁོ་ནར་དང་པོར་གསོ་བར་བྱའི། ཕྱིས་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ནད་ཀྱིས་གཟིར་བ། ལུས་ལ་ཤས་ཆེར་གནོད་བྱེད་ཡིན། །ཞེས་བྱ་བ་ལ། གང་གི་ཕྱིར་ནད་བླ་བརྣན་དེ་ནི་སྔར་ནད་ཀྱིས་གཟིར་བའི་སྐྱེས་བུའི་ལུས་ལ་བླ་བརྣན་ཤས་ཆེར་གནོད་པར་བྱེད་པ་ཡིན་ཏེ། བླ་བརྣན་ཕྱིས་འབྱུང་བ་ཡིན་དུ་ཟིན་ཀྱང༌། ནད་ཀྱིས་ཉོན་མོངས་པའི་ལས་ལས་འབྱུང་བས་ཤིན་ཏུ་གནོད་པར་བྱེད་པ་ཡིན་ཏེ། དཔེར་ན་གཅིན་འགགས་པ་ལ་ཐོར་བུ་འབྱུང་བ་ལ་སོགས་པ་ལྟ་བུའོ། །དེ་ལྟར་ན་གཞན་དབང་གི་ནད་གཙོ་བོ་མ་ཡིན་པ་སྟོབས་ཞན་པ་ནི་རང་དབང་ཅན་གྱི་ནད་གསོས་པས་ཞི་བར་འགྱུར་ལ། གཞན་དབང་ཅན་སྟོབས་ཆེ་ཞིང་ནད་ཚབས་ཆེ་བ་ནི་ཕྱིས་འབྱུང་བ་ཡིན་ཡང་བླ་བརྣན་དེ་སྔ་མ་གསོས་པས་ཞི་བར་མི་འགྱུར་ཏེ། དེ་མ་གསོས་ན་ཚབས་ཆེ་བ་ཉིད་ཡིན་པའི་ཕྱིར་རོ། །དེ་ལྟར་ན་ནད་ཀྱི་མཚན་ཉིད་ཤེས་པར་བྱས་ནས། གང་ནད་མ་ལུས་པའི་རྣམ་པར་འགྱུར་བ་ཐམས་ཅད་ཀྱི་མིང་ནས་བཟུང་བའི་ཚུལ་དུ་བསྡུས་ཏེ་བསྟན་མོད་ཀྱི། མིང་མེད་པའི་ནད་དག་ཀྱང་སྣང་བས་དེ་དག་གསོ་བར་བྱ་སྟེ། གང་གི་ཕྱིར་ནད་གཞི་མེད་པར་ནད་ཀྱི་རྣམ་པར་འགྱུར་བ་ཡོད་མི་སྲིད་དོ། །དེ་བས་ན་འདིར་སྨྲས་པ། ནད་ལ་རྣམ་པར་མི་མཁས་ཞེས། །ངོ་ཚ་ནམ་ཡང་མ་བྱེད་ཅིག །ནད་ཀྱི་འགྱུར་བ་ཐམས་ཅད་ཀྱི། །མིང་གི་ངེས་བསྟན་ཡོད་མ་ཡིན། །ཞེས་བྱ་བ་ལ། ནད་ལ་རྣམ་པར་མི་མཁས་པ་ནི་སྨན་པས་ནད་ཀྱི་མིང་མི་ཤེས་པ་སྟེ། དེས་ངོ་ཚ་བར་མི་བྱ་སྟེ། བདག་ནི་ནད་རྣམས་ཀྱི་མིང་མི་ཤེས་པའོ། །ཞེས་ངོ་ཚ་བ་ཉིད་དུ་མ་བྱེད་ཅིག་པའོ། །ཅིའི་ཕྱིར་ཞེ་ན། ནད་ཀྱི་འགྱུར་བ་ཐམས་ཅད་དེ། ནད་མ་ལུས་པ་རྣམས་ཀྱི་མིང་གི་ངེས་པ་འདི་དང་འདི་ཡིན་ཞེས་པ་བསྟན་པར་གནས་པ་ཡིན་ནོ། །ཉེས་པ་དེ་ཉིད་འཁྲུགས་ནས་ནི། །ཁྱད་པར་དུ་ནི་ལྡང་གྱུར་ནས།
གནས་གཞན་དག་ཏུ་སོང་ནས་ནི། །ནད་ནི་མང་པོར་བྱེད་པར་འགྱུར། །དེ་བས་ནད་ཀྱི་རང་བཞིན་ནི། །རང་གནས་གཞན་དུ་འཕོས་པ་དང༌། །རྒྱུ་ཡི་ཁྱད་པར་ཤེས་བྱས་ལ། །སྨན་དཔྱད་ཀྱིས་གསོ་མྱུར་དུ་བྱ། །ཞེས་བྱ་བ་ལ། གང་གི་ཕྱིར་རླུང་ལ་སོགས་པའི་ཉེས་པ་གང་ཡང་རུང་བ་ཅིག་པོ་དེ་ཉིད་འཁྲུགས་ཤིང་རྣམ་པར་ལྡང་བའི་ཁྱད་པར་གྱིས་གནས་གཞན་དང་གཞན་དག་ཏུ་སོང་ཞིང་ཕྱིན་ནས་རང་གི་གནས་སྤངས་ཏེ། གཞན་གྱི་གནས་དེ་དང་དེར་སོང་བ་དང༌། ནད་ཀྱི་རྣམ་པར་འགྱུར་བའི་རྒྱུ་རླུང་ལ་སོགས་པ་ཡིན་པར་མི་ཤེས་པས་ནི་ནད་དེ་གསོ་བར་མི་བྱའོ། །དེ་བཞིན་དུ་གཞན་དག་ཀྱང་ཤེས་ནས་རླུང་ལ་སོགས་པ་དེ་རྣམས་འཁྲུགས་པའི་རྒྱུའི་ནད་གཞིའི་ཁྱད་པར་ཤེས་པར་བྱས་ལ། ནད་རྣམས་སྨན་དཔྱད་ཀྱིས་གསོ་ཞིང་ཞི་བ་མྱུར་ཞིང་རིངས་པ་ཉིད་དུ་བྱའི། ནད་རྣམས་མི་ཤེས་པར་ནི་ནད་དེ་གསོ་བར་མི་བྱའོ། །གལ་ཏེ་རྒྱུ་དང་རང་བཞིན་དག་ཐ་དད་པ་མ་ཡིན་མོད་ཀྱི། འོན་ཀྱང་འདི་དག་གི་རང་གི་མཚན་ཉིད་ཀྱི་འཇུག་པ་ནི་ངེས་པར་ཁྱད་པར་ཡོད་པར་ཤེས་པར་བྱ་སྟེ། གང་གིས་རླུང་ལ་སོགས་པ་ཁྱད་པར་དུ་བྱེད་པ་དེ་ནི་དེའི་རང་བཞིན་ཡིན་ལ། རྩུབ་པ་ལ་སོགས་པས་ལྡང་བར་བྱེད་པ་དེ་ནི་རྒྱུ་ཞེས་བྱའི། རྩུབ་པ་ལ་སོགས་པ་ལ་རང་བཞིན་ཞེས་མི་བྱ་སྟེ། རིང་བའི་རྒྱུ་ཡིན་པའི་ཕྱིར་རོ། །ཅི་དེ་ཙམ་ཞིག་ལས་སུ་བྱ་བ་ཉམས་སུ་བླངས་ནས། སྨན་པ་དག་གསོ་བར་བྱེད་ན་ཉེས་པ་མེད་པར་འགྱུར་བ་ཡིན་ནམ། འོན་ཏེ་གཞན་འགའ་ཞིག་ལ་ཡང་ལྟོས་པར་བྱ་དགོས་ཤེ་ན། དེའི་ཕྱིར་སྨྲས་པ་ནི། གནོད་བྱ་ཡུལ་དང་ཉམས་སྟོབས་དུས། །མེ་དྲོད་རང་བཞིན་ན་ཚོད་དང༌། །སྙིང་སྟོབས་གོམས་དང་ཟས་རྣམས་ཀྱིས། །གནས་སྐབས་རྣམ་པ་ཐ་དད་པ། །འདི་དག་ཕྲ་མོ་ཡན་ཆད་བརྟག །ནད་དང་སྨན་གྱི་ཚུལ་བརྟགས་པས། །གང་ཞིག་གསོ་བ་ལ་འཇུག་པ། །དེ་ནི་ནམ་ཡང་འཁྲུལ་མི་འགྱུར། །ཞེས་བྱ་བ་ཡིན་ཏེ། འདི་དག་གི་མཚམས་སྦྱོར་མ་བྱས་པས་གནོད་བྱ་ལ་སོགས་པ་རེ་རེ་ཞིང་རང་རྒྱུད་དུ་སོ་སོར་མ་ལུས་པར་བརྟགས་ལ། ཇི་ལྟ་བ་བཞིན་དུ་ཤེས་པར་བྱ་བ་དང༌། དེ་བཞིན་དུ་ནད་ཀྱང་ཤེས་པར་བྱ་བ་དང༌། གནོད་བྱ་ལ་སོགས་པ་དེ་དང་དེ་རྣམས་ཕྲ་བ་དང༌། ཕྲ་བའི་ཡང་ཕྲ་བ་དང་
ཤིན་ཏུ་ཕྲ་ཞིང་ཤེས་པར་དཀའ་བ་ཡན་ཆད་ཀྱི་གནས་སྐབས་ལེགས་པར་བརྟགས་པའི་ཚུལ་སྣ་ཚོགས་པ་དང༌། ནད་དང་སྨན་གྱི་ཚུལ་བརྟག་ཅིང་ཡོངས་སུ་ཤེས་པར་བྱ་བས་ངེས་པར་བྱས་ནས། སྨན་པ་གང་ཞིག་གསོ་ཞིང་ནད་བསལ་བ་ལ་འཇུག་པ་དེ་ནི་དུས་ནམ་ཡང་གསོ་བ་དང༌། སྨན་གྱི་སྦྱོར་བ་དེ་ལ་འཁྲུལ་ཞིང་ཉེས་པ་དང་ལྡན་པར་མི་འགྱུར་ཏེ། འདོད་པའི་དོན་རྫོགས་པར་བྱེད་པར་འགྱུར་རོ་ཞེས་བྱ་བའི་དོན་ཏེ། ཡུལ་དེ་ལ་སོགས་པར་སྒྲུབ་པར་མི་འགྱུར་རོ། །དེ་ལ་གནོད་བྱ་ནི་ལུས་ཟུངས་དང་དྲི་མ་རྣམས་སོ། །ཡུལ་ནི་ས་ཕྱོགས་ཀྱི་ཡུལ་དང་ལུས་ཀྱི་ཡུལ་ལོ། །དེ་ཡང་སྐམས་དང༌། རླན་ཅན་དང༌། གཉི་ག་འདྲེས་པའི་དབྱེ་བས་ཕྱེ་བའོ། །ཉམས་སྟོབས་ནི་རྣམ་པ་གསུམ་སྟེ། ལྷན་ཅིག་སྐྱེས་བ་དང༌། དུས་ཀྱིས་སྐྱེས་བ་དང༌། སྦྱོར་བས་སྐྱེས་པའོ། །དུས་ནི་རྣམ་པ་གསུམ་སྟེ། གྲང་བ་དང༌། ཚ་བ་དང༌། ཆར་གྱི་དུས་སོ། །མེ་དྲོད་ནི་རྣམ་པ་བཞི་སྟེ། སྙོམས་པ་དང༌། མ་སྙོམས་པ་དང༌། དྲག་པ་དང༌། ཞན་པའོ། །རང་བཞིན་ནི་བདུན་ཏེ། ནད་གཞི་རེ་རེ་དང༌། གཉིས་གཉིས་དང༌། ཆ་མཉམ་པའོ། །ན་ཚོད་ནི་གསུམ་སྟེ། བྱིས་པ་དང༌། དར་ལ་བབ་པ་དང༌། རྒན་པོའོ། །སྙིང་སྟོབས་ནི་རྣམ་པ་གསུམ་སྟེ། སྙིང་སྟོབས་དང༌། རྡུལ་དང༌། མུན་པའི་དབྱེ་བས་སོ། །གོམས་པ་ནི་གསུམ་སྟེ། མཆོག་དང༌། བར་མ་དང༌། ཐ་མའི་དབྱེ་བས་སོ། །ཟས་ནི་རྣམ་པ་གཉིས་ཏེ། ཕན་པ་དང༌། གནོད་པ་ཉིད་ཀྱིས་སོ། །དེ་ལྟ་བུའི་གནས་སྐབས་རྣམ་པ་བཅུ་སོ་སོར་བརྟགས་པས་བརྟག་པ་དང༌། དེ་བཞིན་དུ་བཅུ་པོ་འདི་དག་ཉིད་ཀྱིས་ཕྲ་མོ་སྟེ། ཤིན་ཏུ་ཤེས་པར་དཀའ་བའི་གནས་སྐབས་ཡན་ཆད་བརྟགས་པས་ཤེས་པར་བྱས་ན་དེ་གསོ་བ་ལ་ནམ་ཡང་འཁྲུལ་བར་མི་འགྱུར་གྱི། གལ་ཏེ་གནས་སྐབས་དེ་དག་སྨན་པས་མ་བརྟགས་པར་བྱེད་ན་ནི་ནད་པ་གསོད་པར་འགྱུར་བ་ཡིན་ནོ། །ནད་དཀྱེལ་ཆེ་འམ་ཆུང་བ་དག །ཕོག་སྙ་ལུས་ཉམས་ཆེ་ཆུང་ལས། །གནོད་པར་བྱེད་པ་སྣང་གྱུར་བས། །དེ་ལའང་མ་ཡེངས་ཉིད་དུ་བྱ། །ཞེས་བྱ་བ་ལ། ཕོག་སྙ་ཆེ་བ་དང་ལུས་ཀྱི་ཉམས་ཆེ་བ་ལ། དང་པོར་ནད་དཀྱེལ་ཆེ་ཞིང་སྟོབས་དང་ལྡན་པ་བྱུང་དུ་ཟིན་ཀྱང་སྟོབས་ཆུང་བ་ལྟ་བུར་ཤེས་པར་བྱ་སྟེ། ཅིའི་ཕྱིར་ཞེ་ན། སྙིང་སྟོབས་དང༌། ལུས་ཀྱི་ཉམས་གཉིས་ཤིན་ཏུ་ཆེ་བ་ཡིན་པའི་ཕྱིར་རོ། །དེ་བཞིན་ཕོག་སྙ་ཆུང་བ་དང༌། ལུས་ཀྱི་ཉམས་ཤིན་ཏུ་ཆུང་བ་ལ། ནད་ཡང་བ་ཉིད་བྱུང་དུ་
ཟིན་ཀྱང་ཆེ་བ་ལྟ་བུར་ཤེས་པར་བྱ་སྟེ། སྙིང་སྟོབས་དང་ལུས་ཀྱི་ཉམ་ཆུང་བ་ཉིད་ཡིན་པའི་ཕྱིར་རོ། །དེ་ལྟར་ཕོག་སྙ་དང༌། ལུས་ཀྱི་ཉམས་ཆེ་བ་དང༌། ཆུང་བ་ལས་ནད་ཀྱི་དཀྱེལ་ཆེ་བ་འམ་ཆུང་བ་གནོད་པར་བྱེད་པ་གཞན་དང་གཞན་དུ་སྣང་བར་འགྱུར་གྱི། ནད་ཀྱི་མཚན་ཉིད་ཇི་ལྟ་བ་བཞིན་དུ་མ་ཡིན་ནོ། །འང་ཞེས་པའི་སྒྲས་ནི་ནད་ཀྱི་དཀྱེལ་ཆེ་ཆུང་གཅིག་ཁོ་ནར་སྣང་བ་ནི་མ་ཡིན་ནོ། །དེ་བས་ན་ནད་ཀྱི་གནས་སྐབས་འདིར་དང་པོར་ནད་གཞི་ནས་བཟུང་སྟེ། གནས་སྐབས་ཀུན་ལ་སྨན་པས་མ་ཡེངས་པ་ཉིད་དུ་བྱ་དགོས་སོ་ཞེས་བྱ་བའི་དོན་ཏོ། །སྨན་པ་ངན་པས་ནད་རྣམས་ནི། །ལྕི་བ་ཡང་བར་ཡོངས་རྟོག་ཅིང༌། །ནད་ཉུང་དག་ཏུ་བརྟགས་པ་ཡིས། །གསོ་བ་ལོག་པ་དག་ཏུ་འགྱུར། །ཞེས་བྱ་བ་ལ། སྨན་པ་ངན་ཅིང་མི་ཤེས་པ་དེ་ནི་ནད་ཀྱི་དབྱིབས་ཙམ་མཐོང་བ་ལས་ནད་ལྕི་བ་ཡང་བ་ལྟ་བུར་རྟོག་ཅིང་ངེས་པར་བྱེད་དོ། །ནད་ཉུང་བར་བརྟགས་པས་ནད་ཀྱི་ཚད་ཆུང་བར་ངེས་པར་བྱས་པའི་ཕྱིར་གསོ་བ་ལོག་པར་བྱེད་བར་འགྱུར་ལ། ནད་ཆུང་ངུ་དག་ནད་ཆེ་བ། ནད་ཚ་བས་ལྕི་བ་ཉེས་པ་ལྟར་བྱེད་དེ། དེ་ལྟར་ན་ནད་ཡང་བ་ནི་ལྕི་བ་ལྟ་བུར་ཉེས་པ་མང་བར་རྟོག་ལ། ལྕི་བ་ནི་ཡང་བ་ལྟ་བུར་རྟོག་པས་ནད་ཆུང་ངུ་ལ་ནད་ལྕི་བ་ལ་འོས་པའི་སྨན་སྟེར་བར་བྱེད་ལ། ནད་ལྕི་བ་ལ་ནི་ནད་ཡང་བ་ལ་འོས་པའི་སྨན་སྟེར་བས་གསོ་བ་ལོག་པ་དག་ཏུ་འགྱུར་རོ། །དེ་བས་ཆུང་བའམ་སྟོབས་ཆུང་བ། །དཀྱེལ་ཆེན་ནད་ལ་རབ་ཏུ་སྦྱོར། །སྦྱར་བ་ཆུང་ངུར་སྦྱར་བ་ཡིས། །ནད་ནི་ཤིན་ཏུ་སློང་བ་ཡིན། །ཞེས་བྱ་བ་ལ། གང་གི་ཕྱིར་དེ་ལྟར་བྱེད་པ་དེ་བས་ན་ཚད་ཆུང་བས་ཆུང་བའམ། སྟོབས་ཆུང་བའམ། ནད་ཀྱི་དཀྱེལ་ཆུང་བར་བརྟགས་པས་ནད་དཀྱེལ་ཆེན་པོ་སྟོབས་དང་ལྡན་པ་ལ་སྨན་དེ་རབ་ཏུ་སྦྱོར་ཞིང་སྟེར་བར་བྱེད་བས་སྦྱར་བ་ཆུང་ངུར་སྦྱར་ཞིང་བཏང་བས་ནད་དེ་ཤིན་ཏུ་སློང་ཞིང་དཀྲུགས་པས་སླར་ཐུ་བར་བྱེད་པར་འགྱུར་རོ། །སྦྱོར་བའང་ལྷག་པར་སྦྱོར་བ་དང༌། །ལོག་པར་སྦྱོར་བས་ཕྱིན་ཅི་ལོག །དྲི་མ་འབྱུང་བར་མ་ཟད་ཀྱི། །ལུས་ཀྱང་ཤིན་ཏུ་མ་རུངས་འགྱུར། །ཞེས་བྱ་བ་ལ། སྦྱོང་བར་བྱེད་པ་ན་ནད་ཤས་ཆེ་བར་བརྟགས་བས་ལྷག་བར་ཤས་ཆེ་བའི་སྦྱོར་བ་བྱེད་པ་དང༌། ལོག་པར་སྦྱོར་བ་སྟེ། ནད་ཆུང་ངུ་ལ་ཕྱིན་ཅི་ལོག་ཏུ་སྦྱོང་བ་ལ་སྦྱོར་བར་བྱེད་པའོ། །ཅིའི་ཕྱིར་ཕྱིན་ཅི་ལོག་ཡིན་ཞེ་ན། རང་བཞིན་ཆུང་ཞིང་སྟོབས་ཆུང་བ་ལས་ཚད་ཆེ་བ་དང་སྟོབས་ཆེ་བའི་སྦྱོར་བ་ལ་སྦྱོར་བ་ནི། ལྷག་པར་སྦྱོར་བ་ཡིན་པས་དེས་དྲི་མ་འབའ་ཞིག་འབྱུང་ཞིང་ཟད་
པར་འགྱུར་བར་མ་ཟད་ཀྱི། ལུས་ཀྱང་ཤིན་ཏུ་འཇིག་ཅིང་མ་རུངས་པ་ཉིད་དུ་འགྱུར་རོ། །དེ་བས་རྟག་ཏུ་བརྩོན་པ་དང༌། །ཐམས་ཅད་ཀུན་ཏུ་ལེགས་བརྟགས་ནས། །ཅི་ནས་ནད་མེད་བརྟན་གྱུར་པ། །དེ་ལྟར་སྨན་དཔྱད་སྦྱར་བར་གྱིས། །ཞེས་བྱ་བ་ལ། གང་གི་ཕྱིར་ཚུལ་དེ་ལྟར་ནད་རྣམས་ཀྱི་མཚན་ཉིད་རྟོགས་པ་ཤེས་པར་དཀའ་བ་ཡིན་པའི་རྒྱུ་དེ་བས་ན་སྨན་པ་ཤེས་རབ་དང་ལྡན་པས། བརྩོན་ཞིང་འབད་པ་དང་ལྡན་པས་དངོས་པོ་ཐམས་ཅད་དུས་ཀུན་ཏུ་གནོད་བྱ་ལ་སོགས་པའི་དངོས་པོ་རྣམས་ལ་ལེགས་པར་དཔྱད་ཅིང་བརྟགས་ནས། རྣམ་པ་ཐམས་ཅད་དུ་ནི་ཅི་ནས་ཀྱང་ཚེའི་རིག་བྱེད་ཀྱི་རྗེས་སུ་འབྲང་བའམ་དེའི་བསྟན་བཅོས་ལས་བཤད་པ་བཞིན་དུ་བྱས་ལ། ནད་མེད་པ་བསྟན་པར་བྱ་བའི་ཕྱིར་སྨན་དཔྱད་དག་མཁས་ཤིང་གསལ་བས་སྦྱང་བར་བྱ་སྟེ། རྣམ་པ་དེ་ལྟ་བུས་ནད་དང་ལུས་ཟུངས་ལ་སོགས་པ་དང༌། རྗེས་སུ་མཐུན་པའི་རྣམ་པ་གང་གིས་སྨན་དེ་བྱིན་པ་ན་ནད་མེད་པ་ཉིད་དུ་འགྱུར་བ་དེ་ལྟར་བྱའོ། །སྔར་ཉེས་པ་དང་དེ་ཉིད་ནད་ཐམས་ཅད་ཀྱི་རྒྱུ་ཡིན་པར་བཤད་ནས་དེའི་འོག་ཏུ་ནད་དེ་རྣམས་གནོད་པར་བྱ་བ་ལ་སོགས་པའི་རྣམ་པར་བརྟགས་ནས་བཤད་པ་ཡིན་ནོ། །དེ་བས་ན་འདིར་སྨྲས་པ་ནི། དེ་ནས་གཞན་ཡང་ནད་རྣམས་ནི། །འཕེལ་ཟད་དབྱེ་བས་བཤད་བྱ་སྟེ། །ཞེས་བྱ་བ་ལ་སོགས་པ་ཡིན་ཏེ། དེ་ནས་དེའི་རྗེས་ཐོགས་ལ་ནད་དེ་རྣམས་ཀྱི་དབྱེ་བ་བཤད་ཅིང་བསྟན་པར་བྱའོ། །ཅི་ལྟར་དབྱེ་བས་ཅི་བྱ་ཞེ་ན། འཕེལ་ཟད་དབྱེ་བས་ཞེས་བྱ་བ་སྟེ། འཕེལ་བ་དང་ཟད་པ་ནི་འཕེལ་ཟད་དེ། དེ་གཉིས་ཀྱི་དབྱེ་བའི་ཁྱད་པར་དེ་ལས་བཤད་ཅིང་བསྟན་པར་བྱའོ། །ཐ་དད་པ་ལས་གསུམ་ཞེས་བྱ། །ལྡན་གསུམ་དེ་ཡང་དེ་དགུ་ཡིན། །མཉམ་པར་འཕེལ་བས་གསུམ་ཉིད་དེ། །གཅིག་རབ་ལྷག་ལས་དྲུག་ཏུ་འགྱུར། །མ་ལུས་པ་ལས་བཅུ་གསུམ་ཡིན། །གཉིས་གཅིག་ལྷག་པ་ལས་དྲུག་སྟེ། །མཚུངས་ལས་གཅིག་ཡིན་རབ་དང་ནི། །རབ་མཆོག་བརྟགས་པ་ལས་དྲུག་ཡིན། །དེ་ལྟར་ཉི་ཤུ་རྩ་ལྔ་ནི། །འཕེལ་བའོ་ཟད་པའང་དེ་སྙེད་ཡིན། །དེ་དག་རེ་རེ་འཕེལ་མཉམ་ཟད། །དྲུག་སྟེ་སླར་ཡང་དེ་དག་ནི། །གཅིག་ཟད་གཉིས་གཉིས་འཕེལ་བ་ནི། །གོ་བཟློག་བཅས་ལས་དྲུག་ཏུ་འགྱུར། །དབྱེ་བ་དྲུག་ཅུ་གཉིས་སུ་བསྟན། །དྲུག་ཅུ་གསུམ་པ་བདེར་གནས་རྒྱུ། །ཞེས་བྱ་བ་ལ། རླུང་ལ་སོགས་པ་གསུམ་པོ་དེ་དག་སོ་སོ་ཐ་དད་པ་ལས་གསུམ་ཡིན་ལ། རང་
གི་ཚད་ལས་ལྷག་པ་གསུམ་གསུམ་དུ་འགྱུར་བས་དགུར་ཤེས་པར་བྱའོ། །དེ་ཡང་རླུང་འཕེལ་བ་དང༌། མཁྲིས་པ་འཕེལ་བ་དང༌། བད་ཀན་འཕེལ་བ་དང༌། དེ་ལྟར་ན་ནད་ཀྱི་དབྱེ་བ་རྣམ་པ་གསུམ་དུ་ཤེས་པར་བྱ་བ་དང༌། ལྡན་པ་དང༌། འདུས་པ་དང༌། དེ་གཉིས་དང་གསུམ་ཟད་པ་ལས་འཁྲུགས་པ་ལས་འགྱུར་ལ། འདུས་པ་ནི་ཉེས་པ་འདུས་པ་ལས་འགྱུར་རོ། །དེ་ལ་རེ་ཞིག་ལྡན་པ་ནི་གསུམ་སྟེ། རླུང་དང༌། མཁྲིས་པ་དང༌། རླུང་དང་བད་ཀན་དང༌། མཁྲིས་པ་དང་བད་ཀན་ནོ། །ལྡན་པ་དེར་རྣམ་པ་གསུམ་དུ་གཞག་པའི་ནད་ཀྱི་དབྱེ་བ་རང་གི་ཚད་ལས་ལྷག་པར་གྱུར་བ་དེ་ལ་ཤེས་པར་བྱའོ་ཞེས་འདི་ཐམས་ཅད་ལ་སྦྱར་བར་བྱའོ། །ཇི་ལྟ་ཞེ་ན། དེ་ལ་རེ་ཞིག་ལྡན་པའི་ནད་ཀྱི་དབྱེ་བ་གསུམ་པོ་ཉིད་འཕེལ་བ་ལས། གཅིག་ནི་རླུང་དང་མཁྲིས་པར་ལྡན་པ་ལྷག་པར་གྱུར་བས་ཕྱེ་བའོ། །གཉིས་པ་ནི་བད་ཀན་གྱི་ལྡན་པ་ལྷག་པར་གྱུར་བས་ཕྱེ་བའོ། །གསུམ་པ་ནི་མཁྲིས་པ་དང་བད་ཀན་གྱི་ལྡན་པ་ལྷག་པར་གྱུར་པས་ཕྱེ་བ་སྟེ། དེ་ལྟར་ན་ལྡན་པའི་དབྱེ་བ་གསུམ་དུ་ཤེས་པར་བྱའོ། །ཤིན་ཏུ་ལྷག་པར་གཅིག་དྲུག་འགྱུར། །ཞེས་བྱ་བ་ལ་ནི་ལྡན་པ་ལ་གནས་པའི་ནད་འདི་དག་ལས་ནད་གཅིག་ཤིན་ཏུ་ལྷག་ཅིང་ཁྱད་པར་དུ་འཕེལ་བས་ལྡན་པའི་དབྱེ་བ་དྲུག་ཏུ་འགྱུར་བར་ཤེས་པར་བྱ་སྟེ། རླུང་འཕེལ་བ་དང༌། མཁྲིས་པ་མཆོག་ཏུ་འཕེལ་བ་དང༌། མཁྲིས་པ་འཕེལ་བ་དང༌། རླུང་མཆོག་ཏུ་འཕེལ་བ་དང༌། རླུང་འཕེལ་བ་དང༌། བད་ཀན་མཆོག་ཏུ་འཕེལ་བ་དང༌། བད་ཀན་འཕེལ་བ་དང༌། རླུང་མཆོག་ཏུ་འཕེལ་བ་དང༌། བད་ཀན་འཕེལ་བ་དང༌། མཁྲིས་པ་མཆོག་ཏུ་འཕེལ་བ་དང༌། མཁྲིས་པ་འཕེལ་བ་དང༌། བད་ཀན་མཆོག་ཏུ་འཕེལ་བ་སྟེ། དེ་ལྟར་ན་འཕེལ་བ་ཤས་ཆེ་ཆུང་འདྲེས་པ་ལས་ལྡན་པ་དྲུག་ཏུ་འགྱུར་རོ། །མ་ལུས་པ་ལས་བཅུ་གསུམ་ཡིན། །ཞེས་བྱ་བ་ནི་ནད་གསུམ་པོ་དེ་དག་མ་ལུས་པ་འདུས་པ་ལས་འདུས་པའི་ནད་བཅུ་གསུམ་དུ་འགྱུར་བར་ཤེས་པར་བྱ་སྟེ། ཇི་ལྟ་ཞེ་ན། ལྷག་པ་ཡིས་ཀྱང་དྲུག་གཉིས་གཅིག། ཅེས་བྱ་བ་སྟེ། གཉིས་དང་གཅིག་ནི་གཉིས་གཅིག་སྟེ། དེ་རྣམས་ཀྱི་ལྷག་པ་ཡིན་པས་ན། ལྷག་པ་ཡིས་ནི་གཉིས་གཅིག་སྟེ། གཉིས་དང་གཅིག་གིས་ལྷག་པ་སྟེ་འཕེལ་བར་གྱུར་པས་ནད་གཉིས་ལྷག་པ་དང་གཅིག་ལྷག་པ་ལས་འདི་དག་ཏུ་འགྱུར་ཏེ། དེ་ཡང་རླུང་འཕེལ་བ་དང༌། མཁྲིས་པ་དང༌། བད་ཀན་གཉིས་མཆོག་
ཏུ་འཕེལ་བ་དང༌། མཁྲིས་པ་འཕེལ་བ་དང༌། རླུང་དང་བད་ཀན་མཆོག་ཏུ་འཕེལ་བ་དང༌། བད་ཀན་འཕེལ་བ་དང༌། མཁྲིས་པ་དང་རླུང་མཆོག་ཏུ་འཕེལ་བ་དང༌། རླུང་དང་མཁྲིས་པ་འཕེལ་བ་དང༌། བད་ཀན་མཆོག་ཏུ་འཕེལ་བ་དང༌། མཁྲིས་པ་དང་བད་ཀན་འཕེལ་བ་དང༌། རླུང་མཆོག་ཏུ་འཕེལ་བ་དང༌། རླུང་དང་བད་ཀན་འཕེལ་བ་དང༌། མཁྲིས་པ་མཆོག་ཏུ་འཕེལ་བ་སྟེ། དེ་ལྟར་འདུས་པ་དྲུག་གི་རྣམ་པར་དབྱེ་བས་གཉིས་དང་གཅིག་ལྷག་པ་ཡིན་པར་ཤེས་པར་བྱའོ། །ལྷག་པ་མཚུངས་པས་གཅིག་ཡིན་ལ། །འདུས་པའི་ནད་གཅིག་པུའི་དབྱེ་བ་མཚུངས་པའི་ལྷག་པའི་ཉེས་པས་ཤེས་པར་བྱའོ། །དེ་ཡང་གང་ལྷག་པའི་ཉེས་པ་མཚུངས་ཤིང་མཉམ་པར་བྱས་ནས། དེ་འདུས་པའི་ནད་ཀྱི་དབྱེ་བ་གཅིག་ཡིན་པར་ཤེས་པར་བྱའོ། །རབ་དང་རབ་མཆོག་བརྟགས་པས་དྲུག །དེ་ཡང་རབ་མཆོག་གི་དབྱེ་བས་འདུས་པའི་ནད་དེ་རྣམ་པར་བརྟག་པའི་དབྱིབས་འཕེལ་བའི་ཚུལ་ལས་འདུས་པའི་དབྱེ་བ་དྲུག་ཏུ་ཤེས་པར་བྱ་སྟེ། རླུང་འཕེལ་བ་དང༌། མཁྲིས་པ་རབ་ཏུ་འཕེལ་བ་དང༌། བད་ཀན་མཆོག་ཏུ་འཕེལ་བ་འདུས་པ་དང༌། མཁྲིས་པ་འཕེལ་བ་དང༌། བད་ཀན་རབ་ཏུ་འཕེལ་བ་དང༌། རླུང་མཆོག་ཏུ་འཕེལ་བ་འདུས་པ་དང༌། བད་ཀན་འཕེལ་བ་དང༌། མཁྲིས་པ་རབ་ཏུ་འཕེལ་བ་དང༌། རླུང་རབ་མཆོག་ཏུ་འཕེལ་བ་འདུས་པ་དང༌། རླུང་འཕེལ་བ་དང༌། བད་ཀན་རབ་ཏུ་འཕེལ་བ་དང༌། མཁྲིས་པ་རབ་མཆོག་ཏུ་འཕེལ་བ་འདུས་པ་དང༌། མཁྲིས་པ་འཕེལ་བ་དང༌། བད་ཀན་རབ་ཏུ་འཕེལ་བ་དང༌། རླུང་རབ་མཆོག་ཏུ་འཕེལ་བ་འདུས་པ་དང༌། བད་ཀན་འཕེལ་བ་དང༌། རླུང་རབ་ཏུ་འཕེལ་བ་དང༌། མཁྲིས་པ་རབ་མཆོག་ཏུ་འཕེལ་བ་འདུས་པ་སྟེ། དེ་ལྟར་དྲུག་གོ །དེ་ལྟར་ཉི་ཤུ་རྩ་ལྔ་ནི་འཕེལ་བའོ་ཞེས་བྱ་བ་ནི་ནད་འདི་དག་ནི་ནད་ཀྱི་དབྱེ་བ་ཤེས་པར་བྱ་སྟེ། དེ་ལྟར་ཇི་སྐད་དུ་བཤད་པའི་རྣམ་པ་དེ་དག་གིས་ནད་ཀྱི་གྲངས་ཉི་ཤུ་རྩ་ལྔར་ངེས་པ་ཉིད་དུ་ཤེས་པར་བྱའོ། །ཟད་པའང་དེ་སྙེད་ཡིན། ཞེས་བྱ་བ་ལ། ནད་དེ་རྣམས་ཟད་ཅིང་བྲི་བར་གྱུར་བའི་གནས་སྐབས་སུ་ཡང་གྲངས་དེ་སྙེད་ཁོ་ན་ཡིན་ཏེ། ནད་ཀྱི་དབྱེ་བའང་ཉི་ཤུ་རྩ་ལྔར་འགྱུར་བར་ཤེས་པར་བྱའོ། །དེ་ཡང་ནད་གཞི་གསུམ་པོ་སོ་སོར་ཟད་པ་ལས་གསུམ་དུ་འགྱུར་ཏེ། རླུང་ཟད་པ་དང༌། མཁྲིས་པ་ཟད་པ་དང༌། བད་ཀན་ཟད་པ་སྟེ། དེ་ལྟར་ནད་ཀྱི་དབྱེ་བ་གསུམ་དུ་ཤེས་པར་བྱའོ། །ནད་ཟད་པ་གང་ཡིན་པ་འདི་དག་གི་ལྡན་པ་ནི་དགུར་ཤེས་པར་བྱ་སྟེ། ཇི་ལྟ་ཞེ་
ན། གསུམ་པོ་དེ་ཉིད་ཟད་པར་མཉམ་པ་ལ་ལྟོས་པའི་ཟད་པ་ལྷག་པར་ཤས་ཆེ་བ་སྟེ། རླུང་ཟད་པ་དང༌། མཁྲིས་པ་རབ་ཏུ་ཟད་པའི་ལྡན་པ་དང༌། མཁྲིས་པ་ཟད་པ་དང༌། རླུང་རབ་ཏུ་ཟད་པའི་ལྡན་པ་དང༌། རླུང་ཟད་པ་དང༌། བད་ཀན་རབ་ཏུ་ཟད་པའི་ལྡན་བ་དང༌། བད་ཀན་ཟད་པ་དང༌། མཁྲིས་པ་རབ་ཏུ་ཟད་པའི་ལྡན་པ་དང༌། མཁྲིས་པ་ཟད་པ་དང༌། བད་ཀན་རབ་ཏུ་ཟད་པའི་ལྡན་པ་དང༌། བད་ཀན་ཟད་པ་དང༌། རླུང་རབ་ཏུ་ཟད་པའི་ལྡན་པ་སྟེ། དེ་ལྟར་ནད་རབ་ཏུ་ཟད་པའི་ལྡན་པ་ལས་བྱུང་བའི་དབྱེ་བ་དྲུག་ཏུ་ཤེས་པར་བྱའོ། །ནད་གཞི་ཟད་པའི་འདུས་པ་ལས་ནད་ཀྱི་དབྱེ་བ་བཅུ་གསུམ་དུ་འགྱུར་བར་ཤེས་པར་བྱ་སྟེ། ཇི་ལྟ་ཞེ་ན། གཉིས་དང་གཅིག་ལྷག་པར་ཤས་ཆེ་བ་དྲུག་སྟེ། ནད་གཉིས་ལྷག་པར་ཤས་ཆེ་བར་ཤིན་ཏུ་ཟད་པ་དང༌། དེ་བཞིན་དུ་ནད་གཞི་གཅིག་ལྷག་པར་ཤས་ཆེ་བར་ཤིན་ཏུ་ཟད་པའི་རྣམ་གྲངས་ལས་འདུས་པའི་ནད་དྲུག་ཏུ་འགྱུར་བར་ཤེས་པར་བྱ་སྟེ། དེ་ཡང་འདི་ལྟར་རླུང་ཟད་པ་དང༌། མཁྲིས་པ་དང༌། བད་ཀན་རབ་ཏུ་ཟད་པའི་འདུས་པ་དང༌། མཁྲིས་པ་ཟད་པ་དང༌། རླུང་དང་བད་ཀན་རབ་ཏུ་ཟད་པའི་འདུས་པ་དང༌། བད་ཀན་ཟད་པ་དང༌། མཁྲིས་པ་དང་རླུང་རབ་ཏུ་ཟད་པའི་འདུས་པ་དང༌། རླུང་དང་མཁྲིས་པ་ཟད་པ་དང༌། བད་ཀན་རབ་ཏུ་ཟད་པའི་འདུས་པ་དང༌། མཁྲིས་པ་དང་བད་ཀན་ཟད་པ་དང༌། རླུང་རབ་ཏུ་ཟད་པའི་འདུས་པ་དང༌། རླུང་དང་བད་ཀན་ཟད་པ་དང༌། མཁྲིས་པ་རབ་ཏུ་ཟད་པའི་འདུས་པ་སྟེ། དྲུག་དང༌། རླུང་དང་མཁྲིས་པ་དང༌། བད་ཀན་ཟད་པའི་འདུས་པ་གཅིག་གོ །དེ་དག་མཆོག་རབ་ཏུ་བརྟགས་པའི་དབྱེ་བས་ནད་ཀྱི་དབྱེ་བ་དྲུག་ཏུ་འགྱུར་ཏེ། རླུང་ཟད་པ་དང༌། མཁྲིས་པ་རབ་ཏུ་ཟད་པ་དང༌། བད་ཀན་མཆོག་ཏུ་རབ་ཏུ་ཟད་པའི་འདུས་པ་དང༌། མཁྲིས་པ་ཟད་པ་དང༌། རླུང་རབ་ཏུ་ཟད་པ་དང༌། བད་ཀན་མཆོག་རབ་ཏུ་ཟད་པའི་འདུས་པ་དང༌། བད་ཀན་ཟད་པ་དང༌། མཁྲིས་པ་རབ་ཏུ་ཟད་པ་དང༌། རླུང་མཆོག་རབ་ཏུ་ཟད་པའི་འདུས་པ་དང༌། རླུང་ཟད་པ་དང༌། བད་ཀན་རབ་ཏུ་ཟད་པ་དང༌། མཁྲིས་པ་མཆོག་རབ་ཏུ་ཟད་པའི་འདུས་པ་དང༌། མཁྲིས་པ་ཟད་པ་དང༌། བད་ཀན་རབ་ཏུ་ཟད་པ་དང༌། རླུང་མཆོག་རབ་ཏུ་ཟད་པའི་འདུས་པ་དང༌། བད་ཀན་ཟད་པ་དང༌། རླུང་རབ་ཏུ་ཟད་པ་དང༌། མཁྲིས་པ་མཆོག་རབ་ཏུ་ཟད་པའི་འདུས་པ་སྟེ། དྲུག་གོ །དེ་ལྟར་ན་སྤྱིར་ནད་གཞི་ཟད་པ་ལས་གྱུར་པའི་ནད་ཀྱང་ཉི་ཤུ་རྩ་ལྔ་ཡོད་པར་ཤེས་པར་བྱའོ། །དེ་དག་རེ་རེ་འཕེལ་མཉམ་
ཟད། །དྲུག་སྟེ། ཞེས་བྱ་བ་ལ་ནད་ཀྱི་དབྱེ་བ་དེ་རྣམས་འོག་ནས་བཤད་པའི་ནད་ཀྱི་དབྱེ་བའི་མིང་འདིས་ནད་དྲུག་ཏུ་འགྱུར་ཏེ། དེ་ཡང་འཕེལ་བ་དང༌། མཉམ་པ་དང་ཟད་པ་དག་ནི་འཕེལ་ཟད་ཅེས་བྱ་སྟེ། རླུང་ལ་སོགས་པ་གང་ཡང་རུང་བ་རེ་རེ་ཞིང་འཕེལ་བ་དང་མཉམ་པ་དང་ཟད་པ་ལས་དྲུག་ཏུ་འགྱུར་ཏེ། འདི་ལྟར་རླུང་འཕེལ་བ་དང༌། མཁྲིས་པ་མཉམ་པ་དང༌། བད་ཀན་ཟད་པའི་ནད་དང༌། མཁྲིས་པ་འཕེལ་བ་དང༌། རླུང་མཉམ་པ་དང༌། བད་ཀན་ཟད་པའི་ནད་དང༌། བད་ཀན་འཕེལ་བ་དང༌། མཁྲིས་པ་མཉམ་པ་དང༌། རླུང་ཟད་པའི་ནད་དང༌། རླུང་འཕེལ་བ་དང༌། བད་ཀན་མཉམ་པ་དང༌། མཁྲིས་པ་ཟད་པའི་ནད་དང༌། མཁྲིས་པ་འཕེལ་བ་དང༌། བད་ཀན་མཉམ་པ་དང༌། རླུང་ཟད་པའི་ནད་དང༌། བད་ཀན་འཕེལ་བ་དང༌། རླུང་མཉམ་པ་དང༌། མཁྲིས་པ་ཟད་པའི་ནད་དེ། དེ་ལྟར་ན་རེ་རེ་ཞིང་འཕེལ་བ་དང༌། མཉམ་པ་དང་ཟད་པ་ལས་དྲུག་གོ །སླར་ཡང་དེ་དག་ནི། །གཅིག་ཟད་གཉིས་གཉིས་འཕེལ་བ་ནི། །གོ་བཟློག་བཅས་ལས་དྲུག་ཏུ་འགྱུར། །ཞེས་བྱ་བ་ལ། ཡང་ནད་ཀྱི་དབྱེ་བ་དྲུག་པོ་དེ་རྣམས་ལས། གཅིག་གི་ཟད་པ་ནི་གཅིག་ཟད་ཅེས་བྱ་ལ། གཉིས་གཉིས་ཀྱི་འཕེལ་བ་ཡོད་པ་ལས་ནི་གཉིས་འཕེལ་ཞེས་བྱ་བ་ལ། དེ་གོ་བཟློག་དང་བཅས་པ་ནི་གང་ལ་གོ་བཟློག་པ་ཡོད་པ་དེ་ལ་དེ་སྐད་ཅེས་བྱ་སྟེ། ཡང་ནད་ཀྱི་དབྱེ་བ་དྲུག་པོ་དེ་རྣམས་ལས། གཅིག་ཟད་པ་དང་གཉིས་འཕེལ་བ་དེས་བསྣན་ན་དྲུག་གོ །དེ་ཡང་འདི་ལྟར་རླུང་དང་མཁྲིས་པ་དང༌། བད་ཀན་འཕེལ་བའི་ནད་དང༌། མཁྲིས་པ་ཟད་པ་དང༌། རླུང་དང་བད་ཀན་འཕེལ་བའི་ནད་དང༌། བད་ཀན་ཟད་པ་དང༌། རླུང་དང་མཁྲིས་པ་འཕེལ་བའི་ནད་དང༌། དེ་བཞིན་དུ་གཉི་ག་འཕེལ་བའི་ནད་ཚུལ་གྱིས་ནད་ཀྱི་དབྱེ་བ་དྲུག་སྟེ། དེ་ཡང་གཉིས་གཉིས་ཟད་པ་རེ་རེ་ལ་འཕེལ་བ་དང་བཅས་པས་འགྱུར་བ་ནི། འདི་ལྟར་རླུང་དང་མཁྲིས་པ་ཟད་པ་དང༌། བད་ཀན་འཕེལ་བའི་ནད་དང༌། རླུང་དང་བད་ཀན་ཟད་པ་དང༌། མཁྲིས་པ་འཕེལ་བའི་ནད་དང༌། མཁྲིས་པ་དང་བད་ཀན་ཟད་པ་དང༌། རླུང་འཕེལ་བའི་ནད་དེ། དེ་ལྟར་ཚུལ་གཉིས་འཕེལ་བའི་རྣམ་པས་ནད་ཀྱི་དབྱེ་བ་རྣམ་པ་དྲུག་ཡིན་ལ། དེ་རྣམས་ཀྱི་རབ་དང་མཆོག་རབ་ཀྱི་དབྱེ་བས་བརྩི་བ་ཕྲ་མོ་ནི་མཐའ་ཡས་པ་ཡིན་པར་ཤེས་
པར་བྱའོ། །དབྱེ་བ་དྲུག་ཅུ་གཉིས་སུ་བསྟན། །དྲུག་ཅུ་གསུམ་པ་བདེར་གནས་རྒྱུ། །ཞེས་བྱ་བ་ལ། དེ་ལྟར་རླུང་ལ་སོགས་པ་ནད་གཞིའི་དབྱེ་བས། སྤྱིར་དྲུག་ཅུ་རྩ་གཉིས་སུ་བསྟན་ཅིང་བཤད་བའམ། དྲུག་ཅུ་རྩ་གསུམ་དུ་བསྟན་ཏོ། །དེ་ཅིའི་ཕྱིར་ཞེ་ན། །བདེར་གནས་རྒྱུ་ཞེས་བྱ་བ་སྟེ། །བདེ་བའི་རྒྱུར་གྱུར་བ་ཉིད་ཀྱི་ཕྱིར་རོ། །དེ་བཞིན་འདི་དག་དངས་མ་ཁྲག་སོགས་འདྲེས་པ་ལས། །ནད་ནི་ཟད་དང་མཉམ་དང་འཕེལ་བའི་དབྱེ་བ་ཡིས། །རབ་དང་རབ་མཆོག་དག་ལ་མཐའ་ལས་ཉིད་འགྱུར་བར། །རང་བཞིན་ཅི་འདྲ་མ་ཡེངས་ཡིད་ཀྱིས་ཤེས་པར་གྱིས། །ཞེས་བྱ་བ་ལ། ནད་ཀྱི་དབྱེ་བ་འདི་དག་དང༌། དངས་མ་ལ་སོགས་པ་འདྲེས་ཤིང་འདུས་པ་དང༌། དེ་བཞིན་དུ་ཟད་པ་དང༌། མཉམ་པ་དང༌། རྣམ་པར་འཕེལ་བའི་དབྱེ་བས་རབ་དང་རབ་མཆོག་ཏུ་སྦྱར་བ་ལས་མཐའ་ཡས་པ་ཉིད་དུ་འགྱུར་བ་ཉིད། རང་བཞིན་ཅི་འདྲ་བ་ཡིན་པ་སྨན་པས་མ་ཡེངས་ཤིང་གཞན་དུ་གཡེང་བ་མེད་པར་སེམས་དེར་གཏོད་པས་ཤེས་ཤིང་རྟོགས་པར་གྱིས་ཤིག་པའོ། །དེ་ལ་དངས་མ་ལ་རླུང་དང་མཁྲིས་པ་དང་བད་ཀན་རེ་རེ་ཞིང་འཁྲུགས་པ་ལས་དབྱེ་བ་གསུམ་དུ་འགྱུར་ཏེ། ཐ་དད་པ་ལས་གསུམ་ཤེས་བྱ། །ཞེས་བྱ་བའི་ཚུལ་གྱིས་སོ། །དངས་མ་ལྡན་པ་བྱུང་ན། རླུང་ལ་སོགས་པ་འཕེལ་བ་ལས་དེར་ཆ་མཉམ་པའམ། ལྷག་པ་ལས་སྔ་མ་བཞིན་དུ་དགུར་ཤེས་པར་བྱ་སྟེ། དེ་ལྟར་ཐམས་ཅད་སྔ་མ་ལས་རྗེས་སུ་དཔག་པར་བྱའོ། །འདིར་འདི་ལྟར་རླུང་དང་མཁྲིས་པ་དང་བད་ཀན་གྱི་ནུས་པ་མི་མཐུན་པ་ཡོད་དུ་ཟིན་ཀྱང༌། སེམས་ཅན་གྱི་ནང་གི་མི་དགེ་བ་ལ་སོགས་པའི་དབང་གིས་གནོད་པ་སྐྱེད་ཅིང་འདུས་པའི་ནད་བྱེད་ཅིང༌། གཅིག་ལ་གཅིག་ཉེ་བར་ཞི་བ་ཅིའི་ཕྱིར་མི་བྱེད་ཅེས་བརྟག་པར་མི་བྱ་སྟེ་འདི་དག་གི་རང་བཞིན་ཉིད་ཡིན་པའི་ཕྱིར་དང༌། འབྱུང་བ་ཆེན་པོ་ལྟར་གཅིག་གིས་གཅིག་ཟིལ་གྱིས་གནོན་པ་ཡིན་ཡང༌། རྫས་དང་རོ་སོགས་པའི་བྱ་བ་ལྷག་ཅིང་རྩོམ་པ་དང་འདྲའོ། །དེ་བས་ན་འདི་དག་གི་རང་བཞིན་ནི་མི་འགྱུར་བ་ཉིད་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་བཅུ་གཉིས་པའི་རྣམ་པར་འགྲེལ་པའོ།། །།
དེ་ནས་ནད་གསོ་བའི་ཐབས་ཀྱི་ལེའུ་བཤད་པར་བྱའོ་ཞེས་བྱ་བ་ལ། དེ་ལ་རེ་ཞིག་དབྱེ་བ་དེ་དག་ཤེས་པའི་འབྲས་བུ་ནི་གང་སྨན་རྣམས་དང་ནད་རྣམས་གསོ་བ་དེ་ཤེས་པས་ནད་གསལ་བར་དག་པར་ནུས་པ་ཉིད་ཡིན་པས། དེའི་འོག་ཏུ་ནད་གསོ་བའི་ཐབས་ཀྱི་ལེའུའི་དབང་དུ་བྱས་ནས། དེ་དྲན་པར་བྱ་བའི་ཕྱིར། འདིར་ནད་གསོ་བའི་ཐབས་ལ་དགོས་པའི་སྣུམ་ལ་སོགས་པའི་མིང་གང་ཡིན་པ་སྟོན་པ་དེ་བཤད་པར་བྱའོ། །དེ་ལ་རླུང་ནི་ཐམས་ཅད་ཀྱི་གཙོ་བོ་ཡིན་པས། རླུང་ནད་གསོ་བ་སྣུམ་དང་ནི། །ཞེས་བྱ་བ་ལ་སོགས་པའི་ཚིགས་སུ་བཅད་པ་གསུམ་གྱིས། རླུང་ནད་གསོ་བའི་ཐབས་སྨྲས་པ་ཡིན་ཏེ། རླུང་འཁྲུགས་ཤིང་ལྡང་བར་གྱུར་ན། སྣུམ་ནས་འཇམ་རྩི་བཏང་བའི་བར་གསོ་བའི་ཐབས་ཡིན་ཏེ། རླུང་དེ་ལ་གསོ་བ་ཐམས་ཅད་ཀྱི་ནང་ན་གསོ་བའི་མཆོག་ནི་སྣུམ་ཡིན་ལ། དེ་ཡང་རྣམ་པ་དུ་མ་ཡོད་དོ། །དེའི་འོག་ཏུ་དུགས་བྱའོ། །དེ་ཡང་གང་གི་ཕྱིར་རླུང་ནི་ཟས་དང་སྐོམ་དང་སྨན་རྩུབ་པ་དང༌། གྲང་བས་ཅི་ལྟར་མྱུར་དུ་འཁྲུགས་པར་འགྱུར་བ་དེ་ལྟར་ཡང་བ་ལ་སོགས་པའི་ཡོན་ཏན་དང་ལྡན་པའམ། ཡོན་ཏན་མཉམ་པས་འཁྲུགས་པར་མི་འགྱུར་རོ། །དེ་བས་ན་རླུང་འཁྲུགས་པར་གྱུར་པ་ལ་ནི་གསོ་བའི་ཐབས་གཞན་དག་ལས་དང་པོར་སྣུམ་པ་དང༌། དུགས་ཀྱི་རྣམ་པ་དུ་མས་དེ་ཞི་བར་བྱ་བའི་དོན་དུ་བྱའི། གསོ་བ་གཞན་དག་ནི་དེ་ལྟ་མ་ཡིན་ནོ། །རླུང་ནད་གསོ་བ་སྣུམ་དང་ནི། །དུགས་དང་སྦྱང་བ་འཇམ་རྩི་དང༌། །མངར་སྐྱུར་ལན་ཚྭ་བྲོ་བ་ཡི། །ཟས་དང་བསྐུ་ཞིང་མཉེ་བ་དང༌། །དཀྲི་སྣུམ་སྨན་ཆུ་བླུགས་པ་དང༌། །གྲོ་ཆང་འབྲས་ཆང་བུ་རམ་ཆང༌། །ཞེས་བྱ་བ་ལ། དེ་ལ་རླུང་ནད་གསོ་བ་ལ་ནི་སྣུམ་ཆོས་དང༌། དུགས་བྱས་ནས་སྦྱང་བ་བྱ་ལ། དེ་ཡང་འཇམ་པས་བྱའི། རྣོ་ཞིང་དྲག་པས་ནི་མི་བྱ་སྟེ། རྣོ་བ་ནི་རླུང་སྐྱེད་པར་བྱེད་པ་ཡིན་པས་བཀག་པ་ཡིན་ནོ། །དེ་བཞིན་དུ་བཟའ་བར་བྱ་བའི་ཟས་ཀྱང་མངར་བ་དང༌། སྐྱུར་བ་དང༌། ལན་ཚྭ་དང༌། རྣོ་བས་བྱའི། རོ་གཞན་བཟའ་བར་མི་བྱའོ། །བསྐུ་ཞིང་མཉེ་བ་ཞེས་བྱ་བ་ནི་བསྐུ་བ་སྔོན་དུ་བྱས་པ་མཉེ་བར་བྱ་དགོས་པས་ན་བསྐུ་ཞིང་མཉེ་བའོ། །དཀྲི་བ་ནི་ཡན་ལག་རས་ལ་སོགས་པས་དཀྲི་བའོ། །སྣུམ་འཇམ་པའི་རྩ་
ལ་སོགས་པ་བརྡེག་པ་སྟེ། གསོ་བའི་ཐབས་འདི་ནི་རླུང་ནད་ཅན་ཁ་ཡོ་བ་ལ་སོགས་པ་ལ་བྱའི། གཞོགས་ཕྱེད་ན་བ་ལ་སོགས་པའི་རླུང་ནད་ལ་ནི་མི་བྱའོ། །སྨན་ཆུ་བླུགས་པ་ནི་རླུང་སེལ་བའི་སྨན་བསྐོལ་བ་དང༌། སྣུམ་དང་འོ་མ་ལ་སོགས་པའི་ཆུས་བླུགས་པའོ། །གྲོ་དང་འབྲས་ལས་བྱས་པའི་ཆང་ནི་གྲོ་དང་འབྲས་ཆང་ངོ༌། །བུ་རམ་ཆང་ནི་བུ་རམ་ཆང་ལས་བྱས་པ་སྟེ་སྦྱར་བའི་ཆང་ངོ༌། །སྣུམ་དྲོ་འཇམ་རྩི་གཏང་བ་ནི། །འཇམ་རྩི་ངེས་པ་བདེ་དགའ་དང༌། །ཞེས་པ་ལ། རྩུབ་པ་དང་གྲང་བ་བཀག་པ་ཡིན་ནོ། །འཇམ་རྩི་སྨོས་བ་ནི་ངེས་པར་འཇམ་རྩི་བྱ་དགོས་པའོ། །འཇམ་རྩི་ངེས་པ་ཞེས་བྱ་བ་ནི། ལས་དང་དུས་དང་སྦྱོར་བ་ལས་འཇམ་རྩི་ལྔ་བཅུ་རྩ་གསུམ་བྱ་བ་ནི་འཇམ་རྩི་ངེས་པའོ། །བདེ་དགའ་ནི་མྱ་ངན་ལ་སོགས་པ་བློ་འཁྲུགས་པར་བྱེད་པའི་དངོས་པོ་སྤངས་ལ་ཡིད་དུ་འོང་བའི་ཡུལ་བསྟེན་པའི་བདེ་བས་གནས་པའོ། །སྐྱེ་གནས་དུ་མའི་སྣུམ་དག་ནི། །ཞེས་བྱ་བ་ནི། སེམས་མེད་པ་དང་སེམས་ཡོད་པའི་དབྱེ་བས་ཕྱེ་བའོ། །དེ་ཡང༌། །དྲོད་ཆེ་འཇུ་བར་བྱེད་གཡོས་སྦྱར། །ཁྱད་པར་དུ་ནི་ཤ་ཚོན་དང༌། །ཏིལ་མར་དང་སྦྱར་འཇམ་རྩི་བྱ། །ཞེས་བྱ་བ་ལ། སྨན་དྲོད་ཆེ་ཞིང་འཇུ་བར་བྱེད་པ་དང༌། ལྷན་ཅིག་བཙོས་ཤིང་གཡོས་སུ་སྦྱར་བའོ། །ཡང་རླུང་དེ་འཁྲུགས་པར་གྱུར་པ་ལ་གསོ་བ་ཐམས་ཅད་ཀྱི་ནང་ན། ཁྱད་པར་མཆོག་ཏུ་གྱུར་པ་ནི། ཤ་ཚོན་པོའི་ཁུ་བ་སྟོབས་སྐྱེད་པར་བྱེད་ནུས་པ་སྟེ་ཤ་ཁུ་དང༌། དེ་བཞིན་དུ་ཏིལ་མར་དང་སྦྱར་བའི་འཇམ་རྩི་གཏང་བ་གསོ་བའི་ཐབས་ནི་མཆོག་ཡིན་ནོ། །མཁྲིས་པ་མར་སར་བླུད་པ་དང༌། །མངར་ཞིང་བསིལ་བའི་འཁྲུ་སྨན་དང༌། །མངར་དང་ཁ་དང་བསྐ་བ་ཡི། །ཟས་དང་སྨན་ནི་སྦྱིན་པ་དང༌། །དྲི་བཟང་བསིལ་ཞིང་ཡིད་འོང་བའི། །དྲི་ནི་ཉེ་བར་བསྟེན་པ་དང༌། །མགུལ་དུ་དོ་ཤལ་སེ་མོ་དོ། །ནོར་བུ་བྲང་དུ་གདགས་པར་བྱ། །ག་པུར་ཙནྡན་ཨུ་ཤི་རའི། །ཕྱུག་པས་སྐད་ཅིག་རེ་རེ་བསྐུ། །སྲོད་ལ་རྡོ་ཐལ་ཅན་ཟླ་ཟེར། །ཡིད་འོང་གླུ་དང་སེར་བསིལ་བསྟེན། །བག་ཕེབས་མཛའ་བོ་བདེ་བ་དང༌། །ཞེས་བྱ་བ་ལ། སོགས་པའི་སྒྲས་ཚིགས་སུ་བཅད་པ་དྲུག་གིས་ནི་མཁྲིས་པ་འཁྲུགས་པར་གྱུར་ན་མར་སར་བླུད་པ་ལ་སོགས་པས་གསོ་བར་བྱ་བ་དང༌། དེ་བཞིན་དུ་མངར་བ་དང༌། བསིལ་
བའི་ནུས་པ་དང་ལྡན་པའི་སྨན་གྱི་བཀྲུ་སྨན་བཏང་བས་ནད་ཐུར་དུ་དབྱུང་བ་ནི་གསོ་བའི་ཐབས་ཡིན་ནོ། །དེ་བཞིན་དུ་ཁ་ཟས་ཀྱང་མངར་བ་དང་ཁ་བ་དང་བསྐ་བའི་བཟའ་བ་དང༌། སྨན་ཡང་མངར་བ་དང་ཁ་བ་དང་བསྐ་བ་ཉིད་ཀྱིས་སྦྱིན་བར་བྱའོ། །དེ་བཞིན་དུ་དྲི་བཟང་ཞིང་བསིལ་བ་དང༌། ཡིད་དུ་འོང་བའི་ཙནྡན་ལ་སོགས་པའི་དྲི་ཉེ་བར་བསྟེན་པས་གསོ་བ་དང༌། དེ་བཞིན་དུ་མགུལ་དུ་རྒྱན་གྱི་རྣམ་པ་གསེར་ལ་སོགས་པ་ལས་བྱས་པའི་དོ་ཤལ་སེ་མོ་དོ་གདགས་པ་དང༌། དེ་བཞིན་དུ་མུ་ཏིག་གི་དོ་ཤལ་བྲང་དུ་འཕྱང་བར་གདགས་པར་བྱ་བ་དང༌། དེ་བཞིན་དུ་ནོར་བུ་སྟེ་བཻ་ཌཱུ་ཪྻ་དང༌། པདྨ་རཱ་ག་དང༌། ཆུ་ཤེལ་དང༌། ཚོན་ཤེལ་ལ་སོགས་པའི་ཆུན་འཕྱང་བྲང་དུ་གདགས་པ་ནི་མཁྲིས་པ་གསོ་བའི་ཐབས་ཡིན་ནོ། །དེ་བཞིན་དུ་ག་བུར་དང་ཙནྡན་དང༌། ཨུ་ཤི་རའི་བྱུག་པས། སྐད་ཅིག་མ་རེ་རེ་ཞིང་བསྐུ་བ་ནི་མཁྲིས་པ་གསོ་བའི་ཐབས་ཡིན་ནོ། །དེ་བཞིན་དུ་སྲོད་ལ་སྟེ། མཚན་མོའི་དང་པོའི་ཆ་ལ་རྡོ་ཐལ་ཅན་ཏེ། རྡོ་ཐལ་དཀར་པོས་བྱུགས་པའི་ཁྱིམ་དུ་འདུག་སྟེ། ཟླ་བའི་འོད་ཟེར་བསྟེན་ཅིང་ཡིད་དུ་འོང་ཞིང་རྣར་སྙན་པའི་གླུ་དང༌། སེར་བུ་བསིལ་བ་བསྟེན་པ་ཡང་མཁྲིས་པ་གསོ་བའི་ཐབས་ཡིན་ནོ། །དེ་བཞིན་དུ་བག་ཕེབས་ཤིང་ཉམས་རངས་སུ་གནས་པའི་མཛའ་བོའི་བདེ་བ་ཆ་ལུགས་དང་སྤྱོད་པ་མཐུན་པ་ཡིད་ཚིམ་པར་བྱེད་པ་དང་དེ་བཞིན་དུ། བུ་ལ་གཞོན་སྐད་ཉམས་རངས་སྨྲ། །ཆུང་མ་ཡིད་མཐུན་ལས་བྱེད་ཅིང༌། །སྡུག་ཅིང་ཡོན་ཏན་རྣམས་ཀྱིས་བརྒྱན། །ཁང་པ་ཉིས་རིམ་ཆུ་བསིལ་བླུགས། །སྐྱེད་མོས་ཚལ་རྫིང་བཟང་པོ་ནི། །རྒྱ་ཆེ་དང་ནི་སྟེགས་བཅས་པ། །ཆུས་བརླན་བྱེ་མ་བསིལ་བ་དང༌། །སྤྱིལ་བུ་ལུས་ཚད་ཤིང་ཁེབས་དང༌། །ཆུ་འགྲམ་པདྨར་བཅས་པ་ནི། །བདེར་གནས་ཁྱད་པར་འོ་མ་དང༌། །མར་སར་བཟའ་དང་བཀྲུ་སྨན་བྱ། །ཞེས་པ་གང་བུ་ཆུང་བ་དང༌། །མི་གསལ་ཞིང་གསང་དམའ་བར་སྨྲ་ཞིང་དགའ་བས་གནས་པ་དང༌། དེ་བཞིན་དུ་ཆུང་མ་ཡིད་དང་མཐུན་པའི་ལས་བྱེད་པ་དང༌། སྡུག་ཅིང་ཡིད་དུ་འོང་བ་དང༌། ཡོན་ཏན་གྱི་ངང་ཚུལ་བཟང་པོའི་སྤྱོད་པས་བརྒྱན་པ་དང༌། འགྲོགས་པ་ནི་མཁྲིས་པ་གསོ་བའི་ཐབས་ཡིན་ནོ། །ཁང་པ་ཡང་ཉིས་རིམ་དུ་བྱས་ཤིང་
བསིལ་བ་དང༌། ཆུ་རྒྱུན་བསིལ་བའི་རྒྱུན་འབབ་པ་བླུགས་པ་དང༌། སྐྱེད་མོས་ཚལ་རྫིང་བུ་བཟང་པོ་དང་ལྡན་པར་གནས་པ་ཡང་མཁྲིས་པ་ལ་ཕན་ནོ། །དེ་བཞིན་དུ་རྒྱ་ཆེ་ཞིང་ཡངས་པའི་སྟེགས་དང་བཅས་པ་ཆུ་དངས་བས་བརླན་ཞིང་གཤེར་བའི་བྱེ་མ་བསིལ་བར་བྱེད་པར་གནས་པས་མཁྲིས་པ་ལ་ཕན་ནོ། །ཡང་ཆུ་འགྲམ་དེར་སྤྱིལ་བུ་ལུས་ཀྱི་ཚད་ཙམ་འོད་མ་ལ་སོགས་པ་ལས་བྱས་པ་དང༌། ཤིང་བཟང་པོ་སྐྱེ་བ་དང༌། ཆུའི་འགྲམ་ན་པདྨ་དང་བཅས་པ་གང་ཡིན་པ་དེ་ལྟ་བུར་གནས་པ་དང༌། དེ་བཞིན་དུ་བདེ་བར་གནས་པ་སྟེ། ལུས་དང་སེམས་དགའ་བར་བྱེད་པ་དེ་དག་ནི་མཁྲིས་པ་གསོ་བའི་ཐབས་ཡིན་ནོ། །ཁྱད་པར་དུ་ནི་འོ་མ་དང་མར་གསར་བཟའ་བ་དང༌། བཀྲུ་སྨན་བཏང་བ་ནི་མཆོག་ཐམས་ཅད་ཀྱི་ནང་ནས་གསོ་བའི་མཆོག་ཡིན་ནོ། །བད་ཀན་ཆོ་གར་ལྡན་པ་ཡི། །སྐྱུགས་སྨན་བཀྲུ་སྨན་རྣོན་པོ་བཏང༌། །ཟས་ནི་རྩུབ་ཆུང་རྣོ་ཞིང་དྲོ། །ཚ་ཞིང་ཁ་དང་བསྐ་བ་བཟའ། །ཆང་ནི་ཡུན་རིང་ལོན་པ་བཏུང༌། །རྩེ་དགའ་དང་ནི་གཉིད་མི་ལོག །རྩོལ་བའི་ཚུལ་ནི་སྣ་ཚོགས་དང༌། །སེམས་ལས་རྩུབ་པས་མཉེ་བ་དང༌། །ཁྱད་པར་སྨན་ཁུ་སྐྱུགས་སྨན་བཏང༌། །སྦྲང་རྩི་ཚིལ་འཇོམས་སྨན་བསྟེན་བྱ། །སྨྱུང་བ་དུད་བདུག་མཁུར་བཀང་དབོ། །བདེ་བ་མེད་གཉིད་བདེ་ཕྱིར་བྱ། །ཞེས་བྱ་བ་ལ་སོགས་པ་ཚིགས་སུ་བཅད་པ་གསུམ་གྱིས་བད་ཀན་གྱི་རྒྱུ་སོགས་པ་དང༌། དེ་བཞིན་དུ་འཕེལ་བས་ནད་སྐྱེད་པར་ནུས་པ་དག་ལ་སྐྱུགས་སྨན་ལ་སོགས་པས་གསོ་བར་བྱའོ། །དེ་ལ་སྐྱུགས་སྨན་ནི་ནད་གྱེན་དུ་དྲང་བའོ། །དེ་ཡང་ཆོ་ག་དང་ལྡན་པར་བྱ་བ་སྟེ། གསོ་དཔྱད་ཀྱི་བསྟན་བཅོས་ལས་ཇི་སྐད་བཤད་པའི་ཆོ་གས་གཏང་བར་བྱ་ཞིང་སྦྱར་བར་བྱ་ལ། དེ་ཡང་རྣོ་བས་བྱ་དགོས་ཏེ། སྨན་རྣོ་བ་ལས་སྦྱར་བ་བཏང་ངོ༌། །དེ་བཞིན་དུ་བཀྲུ་སྨན་ཡང་རྣོན་པོས་བཀྲུ་བ་ནི་བད་ཀན་གསོ་བའི་ཐབས་ཡིན་ནོ། །དེ་བཞིན་དུ་ཟས་ཏེ་འབྲས་ཆན་ལ་སོགས་པ་རྩུབ་པ་དང༌། ཆུང་བ་དང༌། རྣོ་བ་དང༌། དྲོ་བ་དང༌། རོ་ཚ་བ་དང༌། ཁ་བ་དང༌། བསྐ་བ་བཟའ་བར་བྱའོ། །དེ་བཞིན་དུ་ཆང་དུས་ཡུན་རིང་པོར་ལོན་པ་བཏུང་བ་ཡང་བད་ཀན་ལ་ཕན་ནོ། །དེ་བཞིན་དུ་རྩེ་བ་དང་དགའ་བ་སྟེ་ཡིད་ལ་འདོད་པའི་དགའ་བ་ལ་བརྟེན་ཅིང་བུད་མེད་ལ་
བརྟེན་པ་དང༌། གཉིད་མི་ལོག་པ་སྟེ། མེལ་ཙེའི་ཚུལ་དུ་གནས་པ་ཡང་བད་ཀན་གསོ་བའི་ཐབས་ཡིན་ནོ། །དེ་བཞིན་དུ་རྩོལ་བའི་ཚུལ་སྣ་ཚོགས་ཤིང་རྣམ་པ་ཐ་དད་དུ་ལུས་དུབ་པར་བྱེད་པ་ལག་སྟོབས་འགྱེད་པ་དང༌། རྟ་འདུལ་བ་ལ་སོགས་པ་ཡང་བད་ཀན་གསོ་བའི་ཐབས་ཡིན་ནོ། །དེ་བཞིན་དུ་སེམས་ལས་ཏེ་དངོས་པོ་རྗེས་སུ་དྲན་ཞིང་དཔྱོད་པ་དང༌། དེ་བཞིན་དུ་རྩུབ་པ་དང༌། ཕལ་ཆེར་རྫས་རྩུབ་བས་མཉེ་བ་ཡང་བད་ཀན་གསོ་བའི་ཐབས་ཡིན་ནོ། །དེ་ལ་བད་ཀན་གྱི་གསོ་བ་ཐམས་ཅད་ལས་ཁྱད་པར་དུ་ཕན་པའི་ཐབས་ནི་སྨན་ཁུ་དང་སྐྱུགས་སྨན་གཏང་བ་ཡིན་ནོ། །སྨན་ཁུ་ནི་འབྲུའི་ཁུ་བ་ལས་བྱས་པའོ། །ཚིལ་འཇོམས་པའི་སྨན་ནི་གུ་གུལ་ལ་སོགས་པའོ། །སྨྱུང་བ་ནི་ཟས་བཅད་པའོ། །དུད་པ་ནི་འོག་ནས་བཤད་པའི་མཚན་ཉིད་ཅན་ནོ། །མཁུར་བ་དགང་ཞིང་དབོ་བ་ནི་སྨན་ཁུས་བ་བཀང་ཞིང་དབོ་བའོ། །བདེ་བ་མེད་པ་ནི་བདེ་བ་ཉིད་འགེགས་པ་སྟེ། བདེ་བ་དང་མི་ལྡན་པའམ། སྡུག་བསྔལ་བའི་ཚུལ་ཅན་གྱིས་ལུས་དང་སེམས་ཀྱི་ལས་ཤིན་ཏུ་བསྟེན་པས་གང་སྡུག་བསྔལ་སྐྱེ་བར་འགྱུར་བ་དེ་ནི་བདེ་བ་མེད་པ་སྟེ། དེ་ནི་བད་ཀན་གྱི་བདེ་བ་སྐྱེད་པར་བྱེད་པའི་ཕྱིར་བདེ་བའི་དོན་རྫོགས་པར་འགྱུར་རོ། །ནད་རྣམས་སོ་སོར་གསོ་བ་དག །ནད་ལས་དཔགས་ཏེ་བཤད་པ་ཡིན། །ལྡན་པ་དང་ནི་འདུས་པ་དག །དེ་ནི་སོ་སོའི་ཚུལ་གྱིས་བརྟག །ཅེས་བྱ་བ་ལ། གང་གིས་གསོ་བ་གང་ཡིན་པ་ནད་རྣམས་སོ་སོའི་མཚན་ཉིད་ལས་དབགས་ཏེ་བཤད་པ་དེ་ཉིད་ནི། རིམ་པ་ཇི་ལྟ་བ་བཞིན་དུ་བྱ་ལ། ལྡན་པ་དང་འདུས་པའི་ནད་དག་ལ་ནི་སོ་སོའི་ཚུལ་ཇི་ལྟ་བ་ལས་བརྟག་པར་བྱ་སྟེ། དཔེར་ན་རླུང་དང་མཁྲིས་པའི་ནད་ལྡན་པ་ལ། རླུང་དང་མཁྲིས་པ་གསོ་བའི་ཐབས་འདྲེན་མ་བརྟག་པར་བྱ་ལ། དེ་བཞིན་དུ་རླུང་དང་བད་ཀན་གྱི་ལྡན་པ་ཡང་རླུང་དང་བད་ཀན་འདྲེན་མའི་གསོ་བའི་ཐབས་བརྟག་པར་བྱའོ། །མཁྲིས་པ་དང་བད་ཀན་གྱི་ལྡན་པ་ཡང་མཁྲིས་པ་དང་བད་ཀན་གྱི་གསོ་བའི་ཐབས་འདྲེན་མ་བརྟག་པར་བྱའོ། །དེ་བཞིན་དུ་འདུས་པ་ལ་ཡང་གསོ་བ་གསུམ་ཅི་རིགས་པར་དུས་གཅིག་ཏུ་བརྟག་པར་བྱའོ། །ཡང་ལྡན་པ་གསུམ་པོ་འདི་དག་ལ་སྒོ་གཞན་དག་ནས་
གསོ་བའི་ཐབས་བསྒྲེ་བ་གསལ་བར་བྱ་བའི་ཕྱིར་སྨྲས་པ་ནི། རླུང་ནི་ཟུང་དུ་འཇུག་པས་ན། །རླུང་མཁྲིས་ཕལ་ཆེར་སོ་གའི་བྱ། །བད་ཀན་རླུང་ལ་དཔྱིད་ཀྱི་བྱ། །བད་ཀན་མཁྲིས་ལ་སྟོན་གྱི་བྱ། །ཞེས་བྱ་བ་ལ། རླུང་དང་མཁྲིས་པའི་ཚུལ་ལ་ནི་ཕལ་ཆེར་སོ་གའི་ཆོ་ག་བྱ་སྟེ། སོ་གའི་དུས་ཀྱི་ཆོ་ག་དུས་སུ་སྤྱད་པའི་ལེའུ་ལས་བཤད་པའི་སྣུམ་པ་དང༌། བསིལ་བའི་ཆོ་ག་སྦྱར་བར་བྱའོ། །དེ་བཞིན་དུ་བད་ཀན་དང༌། རླུང་གི་ལྡན་པ་ལ་ནི་དཔྱིད་ཀྱི་ཞེས་བྱ་བ། དཔྱིད་ཀྱི་སྤྱོད་པའི་ཆོ་ག་དྲོ་བ་དང༌། རྩུབ་པ་ཞེས་བྱ་བའི་ཆོ་ག་སྦྱར་བར་བྱའོ། །དྲིས་པ་སོ་གའི་ཚེ་ནི་ཕལ་ཆེར་བསིལ་བའི་ཆོ་ག་བཤད་ལ། དཔྱིད་ཀྱི་དུས་སུ་སྤྱད་པའི་ལེའུ་ལས་བཤད་པའི་སྣུམ་པ་དང༌། རླུང་སྐྱེ་བ་ཆེས་མཐུན་པ་སྟེ། གསོ་བར་ཇི་ལྟར་རིགས་ཏེ། རླུང་གི་རང་གི་མཚན་ཉིད་ནི་གྲང་བ་དང་རྩུབ་པ་ཡིན་པའི་ཕྱིར་རོ་ཞེ་ན། རླུང་ནི་ཟུང་དུ་འཇུག་པས་ན་ཞེས་སྨོས་པ་ཡིན་ནོ། །གང་གི་ཕྱིར་རླུང་ནི་ཟུང་དུ་འཇུག་པ་ཡིན་པས། གང་གིས་འདྲེས་ཤིང་ལྡན་པར་གྱུར་པ་དེ་ཉིད་ཀྱི་སྦྱོར་བའི་འཇུག་པ་གཅིག་པ་ཉིད་ཀྱིས་ན། བད་ཀན་དང་མཁྲིས་པ་ཆ་འདྲེས་པས་གསོ་བ་དེ་ལ་ཕན་པ་ཡིན་ནོ། །ཞེས་བྱ་བའི་དོན་ཏོ། །དེ་ཡང་གཞུང་ལས། ཟུང་དུ་འཇུག་པ་རླུང་གི་མཆོག །ཡང་དག་འདྲེས་པས་གཉིས་བདག་ཅན། །མེ་དང་ལྡན་པས་སྲེག་པར་བྱེད། །ཟླ་བ་ལྡན་པས་བསིལ་བར་བྱེད། །ཅེས་བཤད་པ་ཡིན་ནོ། །དེ་ལྟར་ན་རང་གི་མཚན་ཉིད་ཀྱི་གནས་སྐབས་ན་ཟུང་དུ་འཇུག་པ་ཉིད་དུ་བྱ་བར་རིགས་སོ། །དེ་བས་ན་རླུང་མཁྲིས་པ་དང་ལྷན་ཅིག་གནས་སུ་ཟིན་ཀྱང༌། མཁྲིས་པའི་གསོ་བ་བྱར་རུང་སྟེ། དེ་གཉིས་ཟུང་དུ་འཇུག་པ་ཡིན་པའི་ཕྱིར་རོ། །དེ་བཞིན་དུ་བད་ཀན་དང་ལྷན་ཅིག་གནས་པ་ཡང་བད་ཀན་གྱི་གསོ་བས་གསོ་བར་བྱར་རུང་ངོ༌། །བད་ཀན་དང་མཁྲིས་པར་ལྡན་པའི་ལྡན་པ་ལ་ནི་སྟོན་གྱི་ཞེས་བྱ་བ་སྟོན་གྱི་དུས་སུ་བྱ་བའི་སྤྱོད་པ་བཤད་པ་དག་གིས་གསོ་བར་བྱའོ། །ད་ནི་གསོ་བའི་ཐབས་ཀྱི་དུས་སྨྲས་པ་ནི། ནད་ནི་དཀྱེལ་སོགས་དུས་སུ་བསལ། །ལྡང་ན་གཞན་གནོད་མེད་པར་གསོ། །ཐམས་ཅད་ལྡན་ན་ཚབས་ཆེ་བ། །ནད་གཞན་གནོད་པ་མེད་པར་གསོ། །ཞེས་བྱ་བ་ལ། རླུང་དང་མཁྲིས་པ་དང་བད་ཀན་ཞེས་བྱ་བའི་ནད་ནི་དཀྱེལ་སོགས་
པའི་དུས་ཉིད་ཀྱི་གནས་སྐབས་ན་བསལ་ཞིང་གསོ་བར་བྱའི། ལྡང་བར་གྱུར་པའི་དུས་ཀྱི་བར་དུ་བསྡད་བར་མི་བྱའོ། །གང་གི་ཚེ་སོགས་པའི་དུས་སུ་བཏང་སྙོམས་སུ་བྱས་པས་ལྡང་བར་གྱུར་པ་དེའི་ཚེ་ནད་དེ་ལྡང་བས་ན་ནད་གཞན་ལ་གནོད་ཅིང་ལྡང་བར་འགྱུར་བ་མེད་པའི་ཚུལ་གྱིས་གསོ་བར་བྱའོ། །དེ་ནི་འདི་སྐད་སྟོན་པ་སྟེ། ནད་དེ་ལྡང་བ་ན་དེ་དང་མི་མཐུན་པའི་ཁ་ཟས་ལ་སོགས་བ་དང༌། དེ་དང་ཆ་འདྲ་བས་ན་ནད་གཞན་དག་ཅི་ནས་སློང་བར་མི་འགྱུར་བ་དེ་ལྟ་བུར་གསོ་བར་བྱའོ། །ཡང་གང་གི་ཚེ་ནད་ཐམས་ཅད་དུས་གཅིག་ཏུ་ལངས་ན་དེའི་ཚེ་ཚབས་ཆེ་བའི་ནད་སྟོབས་དང་ལྡན་པ་ལྡང་བར་འགྱུར་བ་སྟེ། དང་པོར་གསོ་བར་བྱ་ལ། དེ་ཡང་ནད་གཞན་ལ་གནོད་པ་མེད་པར་གསོ་བ་སྟེ། ཅུང་ཟད་ལྡང་བའི་ནད་དག་ལ་མི་གནོད་ཅིང་མི་མཐུན་པ་མེད་པའི་ཚུལ་གྱིས་གསོ་བར་བྱ་ལ། གལ་ཏེ་མཉམ་པར་འཁྲུས་ན། རླུང་སྟོབས་དང་ལྡན་པ་མ་ཡིན་ལ་ཆ་མཉམ་པར་གྱུར་པ་ལས་གང་གང་ཞིག་ལས་རང་བཞིན་གྱིས་འཕེལ་བར་འགྱུར་བ་དེ་ཚབས་ཆེ་བ་ཡིན་པས། ནད་གཞན་དག་ལ་གནོད་པ་མེད་པའི་ཚུལ་ཉིད་ཀྱིས་གསོ་བར་བྱའོ། །ནད་ནི་སྦྱོང་བས་ཞི་བྱ་བ། །གང་གཞན་ལྡང་བར་བྱེད་པ་དག །དེ་ནི་དག་མིན་གཞན་དག་ནི། །ལྡང་བར་མི་འགྱུར་རྣམ་དག་ཡིན། །ཞེས་བྱ་བ་ལ། ནད་ཞི་བར་བྱ་བའི་སྦྱོར་བ་སྨན་དང་ཁ་ཟས་ལ་སོགས་པ་སྦྱོར་བའི་ཚུལ་གང་གིས་ནད་གཅིག་ཞི་བར་བྱས་ནས་གཞན་གཉིས་པ་ལྡང་བར་བྱེད་པའི་སྦྱོར་བ་དེ་ནི་རྣམ་པར་དག་པ་མ་ཡིན་ཏེ། བཟང་པོ་མ་ཡིན་ལ། གང་གཅིག་ཞི་བར་བྱས་ནས་གཞན་དག་ལྡང་བར་མི་བྱེད་པ་དེ་ནི་དག་པ་དམ་པ་ཡིན་ཏེ། ཅིའི་ཕྱིར་ཞེ་ན། གནོད་པ་མེད་པའི་བྱ་བ་བཟང་པོ་བྱེད་པའི་ཕྱིར་རོ། །རྩོལ་དྲགས་ཚ་བ་རྣོ་བ་དང༌། །གནོད་པར་འགྱུར་བ་སྤྱད་པས་ཀྱང༌། །ཁོང་པ་ཡན་ལག་རུས་པ་དང༌། །གནད་དུ་རླུང་ནི་འཇུག་པར་འགྱུར། །དེ་བཞིན་དེ་ལ་རྩ་སྒོ་ནི། །རྣམ་པར་སྦྱངས་པས་འབྱུང་བར་འགྱུར། །སྨིན་བྱས་རླུང་ནི་ཚར་བཅད་པས། །ཁོང་པའི་ནང་དུ་འདུ་བར་འགྱུར། །ཞེས་བྱ་བ་ལ། རྩོལ་པ་དྲགས་པ་ནི་ལུས་ལ་སོགས་པ་ལ་གནོད་པར་འགྱུར་བའི་ལས་དྲགས་པ་དང༌། ཚ་བ་རྣོ་བའི་མེ་ཆེན་པོ་ལ་བརྟེན་པ་དང༌།
གནོད་པར་འགྱུར་ཞིང་ལོག་པའི་ལས་སྤྱད་པ་ལས་ཀྱང༌། ཁོང་པ་སྟེ་ཟས་ཞུ་བ་དང་མ་ཞུ་བའི་གནས་ཞེས་བྱ་བ་ལ། ཡན་ལག་དང་རུས་པ་དང་གནད་དུ་རླུང་ལ་སོགས་པའི་ནད་མྱུར་དུ་འཇུག་པར་འགྱུར་རོ། །དེ་ལ་ཡན་ལག་ནི་ཁྲག་ལ་སོགས་པའི་ལུས་ཟུངས་རྣམས་དང་པགས་པའོ། །རུས་པ་ནི་རུས་པའི་ཚིགས་རྣམས་སོ། །གནད་ནི་སྙིང་དང་མགོ་བོ་ལ་སོགས་པ་སྟེ། དེ་དག་ཏུ་རླུང་མྱུར་བའི་བདག་ཅན་ཡིན་པས་ན་ནད་འཇུག་ཅིང་ལྡང་བར་བྱེད་དོ། །དེ་བཞིན་དུ་ཡན་ལག་དང་རུས་པ་དང༌། གནད་རྣམས་ལ་ཡང་ཁོང་པའི་ནང་དུ་ཞུགས་པར་འགྱུར་ཏེ། ཅིའི་ཕྱིར་ཞེ་ན། རྩ་རྣམས་ཀྱི་སྒོ་གང་ཡིན་པ་དེ་རྣམ་པར་སྦྱངས་པས་རྣམ་པར་དག་པའི་ཕྱིར། དེ་ཁོང་པར་འབྱུང་བར་འགྱུར་བ་དང༌། དཀྱེལ་སོགས་ཤིང་འཕེལ་བས་འབྱུང་བར་འགྱུར་བ་དང༌། དེ་བཞིན་དུ་འཛགས་ཤིང་ཞུ་བ་སྟེ། ལན་ཚྭ་དང་འོ་མ་ལ་སོགས་པ་འཛག་པར་འགྱུར་བའི་ཟས་ཟོས་པས་འབྱུང་བར་འགྱུར་བ་དང༌། དེ་བཞིན་དུ་སྨིན་པ་སྟེ། སྨིན་པར་བྱ་བ་ལ་སོགས་པ་སྟེ། མ་ཞུ་བ་མེད་པར་བྱས་པས་ཁོང་བའི་ནང་དུ་ཞུགས་པར་འགྱུར་རོ། །ཞེས་བྱ་བར་སྦྱར་བ་དང༌། དེ་བཞིན་དུ་རླུང་འཐོར་བ་དང༌། སྡུད་པར་བྱེད་པ་ཚར་བཅད་ཅིང་ཞུ་བར་བྱེད་པ་ཁོང་པའི་ནང་དུ་ནད་དེ་འདུ་ཞིང་འབྱུང་བར་འགྱུར་བ་ཡིན་ནོ། །དེར་གནས་ནས་ཀྱང་རྒྱུ་དག་ལ། །སྡོད་ཅིང་རིང་དུ་ཐོགས་པ་ཡིན། །དེ་ནི་དུས་སོགས་སྟོབས་ཐོབ་ནས། །གཞན་ལ་བརྟེན་ཀྱང་ལྡང་བར་བྱེད། །ཅེས་བྱ་བ་ལ། ཁོང་བའི་ནང་དེར་གནས་ནས་ནད་དེ་ལྷན་ཅིག་བྱེད་པའི་རྒྱུ་དག་དང་མ་ཕྲད་ན་སྡོད་ཅིང་རིང་དུ་ཐོགས་ཏེ། རང་གི་ཤུགས་འབྱིན་པར་བྱེད་དེ། དེ་ལྡང་བའི་རྒྱུ་གང་ཡིན་ཚེ་མ་ཚང་བས་ནད་སྐྱེད་པའི་ནུས་པ་དང་མི་ལྡན་བ་ཚེ་འགྱུར་བའི་རྒྱུ་གཞན་དག་ལ་སྡོད་ཅིང་རྒྱུ་མང་པོ་ལ་བཞེས་པས་ན་དེ་ལྡང་བས་ན་འགོར་པ་ཡིན་ནོ། །དེ་ནས་དེ་དུས་དང་གནོད་བྱ་དང༌། ཡུལ་དང་རང་བཞིན་གྱིས་སྟོབས་ཀྱི་ནུས་པ་ཐོབ་ཅིང་སྐྱེས་ནས་ལྡན་པར་བྱེད་དོ། །དེའི་ཚེ་གཞན་དག་ལ་བརྟེན་ཀྱང་ཞེས་བྱ་བ་ལ། ཕ་རོལ་པོ་དག་ལ་བརྟེན་ཀྱང་གནས་ཀྱང་རྒྱུའི་ཚོགས་བརྙེད་ན་ལྡང་བར་འགྱུར་རོ། །དེ་ལ་གནས་གཞན་གནས་པ་ནི། །དེ་ཉིད་སྟོབས་ནི་མེད་ཉིད་ལ། །གསོ་བར་བྱ་བ་རང་གི་ནི། །
སྟོབས་ཀྱིས་གཞན་ཟིལ་གནོན་བྱེད་ནའོ། །ཞེས་བྱ་བ་ལ་དེ་ལ་ནད་རྣམས་ལངས་ནས་གཞན་དག་ན་གནས་པའི་ཚེ་དེ་ཉིད་གསོ་བར་བྱའོ། །ཞེས་བྱ་བར་སྦྱར་རོ། །དེ་ལ་ཞེས་བྱ་བ་ནི། ངེས་པར་བཟུང་བ་སྟེ། ནད་དེ་རྣམས་ཀྱི་ནང་ན་གཞན་ན་གནས་པ་དེ་ཉིད་ཅེས་པ་དེ་དང་འབྲེལ་བའི་བླ་ཐབས་སུ་ཞུགས་པ་དང༌། འབྲེལ་པ་དེ་ནི་གཞན་གྱི་གནས་ན་གནས་པའོ། །དེ་ཡང་ཇི་ལྟ་བུ་ཞེ་ན། སྟོབས་ནི་མེད་ཅེས་བྱ་བ་སྟེ། སྔ་ན་ཡོད་པའི་ནད་སྟོབས་ཆུང་བ་གཞན་དག་ལ་གནས་པའི་བླ་བརྣན་ལ་གསོ་བ་བྱའི། ནད་སྔ་མ་སྟོབས་དང་ལྡན་པ་ལ། བླ་ཐབས་སུ་བྱུང་བ་ལ་བླ་བརྣན་དང་པོ་གསོ་བ་ན་ངེས་པར་བཟུང་བ་སྟེ། གནས་གཞན་དང་འབྲེལ་པ་དེ་ཉིད་བླ་བརྣན་དུ་གྱུར་པ་ཡིན་ནོ། །ཡང་ན་སྔ་མ་སྟོབས་ཆུང་བ་གཞན་དག་ལ་གནས་པ་དང་ལྡན་པ་ལ་གནས་ན་ཅི་ཞིག་བྱ་ཞེ་ན། རང་གི་ནི། སྟོབས་ཀྱིས་གཞན་ཟིལ་གནོན་བྱེད་ནའོ། །ཞེས་བྱ་བ་ཡིན་ཏེ། རང་ཉིད་གཞན་གྱི་གནས་ན་གནས་པ་ན་གསོ་བ་བྱའི། གཞན་གྱི་གནས་དང་འབྲེལ་བའི་ནི་མ་ཡིན་ཏེ། ཇི་ལྟ་བུ་ཞེ་ན། སྟོབས་ཀྱི་རང་གི་ནུས་པས་ནད་གཞན་ཟིལ་གྱིས་གནོན་ཅིང་རྒྱལ་བར་ནུས་པ་དེ་གསོ་བར་བྱ་སྟེ། གང་སྟོབས་དང་ལྡན་པ་གསོ་བའི་དོན་ནོ། །ཅི་གསོ་བའི་ངེས་པར་འདིར་ཟད་དམ། རྣམ་པ་གཞན་དག་ཀྱང་འདི་ལ་ཡོད་ཅེ་ན། དེའི་ཕྱིར་སྨྲས་པ་ནི། བླ་བརྣན་ནད་ནི་ཞི་བྱས་ན། །རང་གནས་གནས་པ་གསོ་མི་དགོས། །ཞེས་བྱ་བ་སྟེ། ནད་བསལ་བའི་ཆོ་ག་ཇི་སྐད་བཤད་པས་བླ་བརྣན་ནད་སྟོབས་ཆུང་བ་ཡིན་ནོ། །ཞི་བར་བྱ་ཞིང་རྣམ་པར་བསལ་ན་རང་གི་གནས་ན་གནས་པ་ཡང་གསོ་མི་དགོས་ཏེ། བླ་བརྣན་སྟོབས་ཅན་ལ་ནི་རང་གི་གསོ་བ་དང་འདྲ་བར་གསོ་དགོས་སོ། །དེས་ན་གཞན་གྱི་གནས་སུ་སོང་བའི་ནད་ནི་སྟོབས་ཆུང་བ་ཡིན་ཡང་དེ་ཉིད་གསོ་བར་བྱའོ། །ཡང་ན་རང་གི་གནས་ན་གནས་པའི་ནད་གསོས་ནས། དེའི་འོག་ཏུ་བླ་བརྣན་གསོར་ཡང་རུང་ངོ༌། །སྟོབས་དང་ལྡན་པའི་ནད་གཞན་གྱི་གནས་ན་གནས་པ་ལ་ནི་རང་གི་དང་འདྲ་བར་གསོ་བར་བྱའོ། །ད་ནི་གཞན་གྱི་རྩིབ་ལོགས་སུ་འགྲོ་བའི་ནད་རྣམས་ལ་མཆོག་ཏུ་གསོ་བར་བྱ་བ་བསྟན་པའི་ཕྱིར་སྨྲས་པ་ནི། ཕལ་ཆེར་རྩིབ་ལོགས་འགྲོ་བའི་ནད། །ནད་པ་ཡུན་རིང་ཉོན་མོངས་བྱེད། །
ལུས་མེའི་སྟོབས་ནི་ཤེས་པ་ཡིས། །དེ་ལ་རིངས་ཐབས་དག་མི་བྱ། །དེ་ནི་སྦྱོར་བས་ཞི་བའམ། །ཁོང་དུ་བདེ་བར་བསྡུ་བར་བྱ། །ཁོང་དུ་འདུས་པར་ཤེས་ནས་ནི། །ཇི་ལྟར་ཉེ་བ་བཞིན་དུ་བསལ། །ཞེས་བྱ་བ་ཡིན་ཏེ། ཕལ་ཆེར་ཞེས་པ་མང་དུ་རྩི་བ་ལོགས་སུ་འགྲོ་ཞིང་རྩིབ་ལོགས་གཡས་གཡོན་ན་རྒྱུ་བའི་ནད་རླུང་ལ་སོགས་པ་ནི་ནད་པ་སྡུག་བསྔལ་བ་དང་ལྡན་པ་ཡུན་རིང་ཞིང་དུས་རིང་དུ་ཉོན་མོངས་ཤིང་སྡུག་བསྔལ་བར་བྱེད་དོ། །ནད་རྩི་བ་ལོགས་སུ་འགྲོ་བ་དེ་རྣམས་ལ་དེ་ནི་ལུས་ཀྱི་མེ་སྟོབས་ཤེས་ཤིང་རྟོགས་པའི་སྨན་བས་ནད་དེ་ལས་མྱུར་བ་རིངས་ཐབས་སུ་དེའི་གསོ་བ་དག་མི་བྱའོ། །འོ་ན་ཅི་ཞིག་བྱ་ཞེ་ན། ནད་སྦྱོར་བར་ཤེས་པ་རིགས་པ་དང་ལྡན་བས་ཞི་བར་བྱ་བའམ། ཁོང་པའི་ནང་དུ་བདེ་བར་བསྡུ་ཞིང་ནང་དུ་ཆུད་པར་བྱས་ལ། དེའི་འོག་ཏུ་གཟོད་གསོའོ། །དེ་ཡང་ནད་དེ་ཁོང་དུ་འདུས་ཤིང་ཆུད་པར་ཤེས་ནས་རྩི་བ་ལོགས་སུ་འགྲོ་བའི་ནད་དེ་ནང་དུ་བསྡུས་ནས། སྣའམ་ཁའམ་བཤང་བའི་སྒོ་ལ་སོགས་པ་ནད་གང་དང་ཉེ་བའི་ལམ་དེ་ནས་སྐྱུག་སྨན་ལ་སོགས་པས་བསལ་བར་བྱ་ཞིང་ཕྱིར་གདོན་བར་བྱའོ། །རླུང་ལ་སོགས་པའི་དྲི་མ་རྩེ་མ་ཞིལ་ཞིང་མེ་ཞུ་བའི་བུག་འགགས་པ་ལ་སོགས་པའི་སྤྱིའི་མཚན་ཉིད་བསྟན་པའི་ཕྱིར་སྨྲས་པ་ནི། བུ་ག་འབྱུང་འགགས་སྟོབས་ཉམས་ཤིང༌། །ལྕི་ཞིང་རླུང་ནི་ཁུང་དུ་འཁྲུལ། །ཁོང་སྙོམ་མི་འཇུ་མཆིལ་མ་མང༌། །བཤང་གཅི་སྲི་དུབ་ཟས་མི་ལེན། །ནད་རྩེ་མ་ཞིལ་སྤྱི་ཡི་རྟགས། །རྩེ་ཞིལ་དེ་ལས་བཟློག་པ་ཡིན། །ཞེས་བྱ་བ་ལ། བུག་འབྱུང་བ་འགགས་པ་ནི། །ནད་གྱེན་དུ་མི་འབྱུང་བའོ། །སྟོབས་ཉམས་པ་ནི་སྟོབས་བཅོམ་པའོ། །ལྕི་བ་ནི་ལུས་དང་ཡན་ལག་ལྕི་བའོ། །རླུང་ཁུང་དུ་འཁྲུལ་བ་ནི་རླུང་གསལ་བར་མི་རྒྱུ་བའོ། །ཁོང་སྙོམ་པ་ནི་སྤྲོ་བ་ཆུང་པའོ། །མི་འཇུ་བ་ནི་ཟས་འཇུ་བར་མི་བྱེད་པའོ། །མཆིལ་མ་མང་བ་ནི་མཆིལ་སྣ་བས་འཛག་པའོ། །བཤང་གཅི་སྲི་བ་ནི་བཤང་བ་ལ་སོགས་པ་འགགས་པའོ། །དུབ་པ་ནི་ཉམས་བྲི་བའོ། །ཟས་བ་བྲི་བ་ནི་ཟས་ལ་སྲེད་པ་མེད་པའོ། །དེ་ལྟ་བུའི་རྟགས་རྣམས་ནི། ནད་རྩེ་མ་ཞི་ལ་ཞིང་གཏིང་མ་ཕྱིན་པའི་སྤྱི་བི་རྟགས་ཡིན་ནོ། །རྩེ་ཞིལ་དེ་ལས་བཟློག་པ་ཡིན། །ཞེས་བྱ་བ་ནི། རྩེ་བཅིལ་
ཞིང་ནད་ཞི་བའི་རྟགས་ནི་བཤད་མ་ཐག་པའི་ལས་གོ་བཟློག་པ་སྟེ། དེ་ཡང་རྩ་སྦུབས་དག་པ་དང་སྟོབས་སྐྱེ་བ་དང༌། ཡང་བ་ཉིད་དང༌། རླུང་ལུགས་སུ་འབྱུང་བ་དང༌། ཁོང་སྙོམ་པ་མེད་པ་དང༌། ཟས་འཇུ་བ་དང་མཆིལ་མ་ཉུང་བ་དང༌། དྲི་མ་རྣམས་བདེ་བར་འབྱུང་བ་དང༌། ཟས་ཡི་གར་འོང་བ་དང༌། སྤྲོ་བ་དང་ལྡན་པ་སྟེ། འདི་དག་ནི་ནད་མེད་པའི་མཚན་ཉིད་ཡིན་ནོ། །ཡང་མ་ཞུ་བའི་མཚན་ཉིད་ཅི་ཞིག་དང་ལྡན་ན། རླུང་ལ་སོགས་པ་ལམ་ཞུ་བའམ། ནད་ཀྱི་ལྷག་མ་དང་བཅས་བ་ཞེས་བྱ་ཞེ་ན། དེའི་ཕྱིར་སྨྲས་པ་ནི། ཁོང་པའི་དྲོད་སྟོབས་ཆུང་ཉིད་ཀྱིས། །ལུས་ཟུངས་དང་པོ་མི་འཇུ་བ། །ནད་ནི་ཕོ་བར་ཞུགས་པ་དག །དངས་མ་མ་ཞུ་ཡིན་པར་བཤད། །ཅེས་བྱ་བ་ལ་སོགས་པ་ཡིན་ཏེ། ལུས་ཟུངས་ཀྱི་དང་པོ་དང༌། དངས་མ་ཆེན་པོ་ཞེས་བྱ་བ་སྟེ་ཁོང་པའི་དྲོད་ཆུང་བ་ཉིད་ཀྱིས་འཇུ་ཞིང་སྨིན་པར་མ་གྱུར་བ་རླུང་ལ་སོགས་པའི་ནད་དང་འདྲེས་པ་རང་གི་གནས་ཕོ་བར་ཞུགས་པ་གནོད་པར་འགྱུར་པ་དེ་ནི་དངས་མ་མ་སྨིན་ཅིང་མ་ཞུ་བ་ཡིན་ནོ། །ཞེས་ལ་ལ་དག་འདོད་དོ། །གཞན་དག་ནད་ཉིད་རབ་འཁྲུགས་པ། །རབ་གདུག་ཕན་ཚུན་འདོ་མ་ལས་བྱུང༌། །ཀོ་དྲ་བ་ཡི་དུག་བཞིན་དུ། །ནད་ཚབས་ཆེན་པོ་འབྱུང་བར་བཤད། །ཅེས་བྱ་བ་ལ། སློབ་དཔོན་གཞན་དག་ནི་མ་ཞུ་བའི་འབྱུང་བའི་ཚུལ་དུ་འདོད་དེ། རླུང་ལ་སོགས་པའི་ནད་ཉིད་རབ་ཏུ་འཁྲུགས་ཤིང་ཤིན་ཏུ་སོགས་པ་ལས་དུས་ཕྱིས་ཞིག་ན་ཁ་ཟས་མང་བ་རབ་ཏུ་གདུག་པ་ཕན་ཚུན་གཅིག་ལ་གཅིག་འདོམ་ཞིང་འདྲེས་པར་གྱུར་པ་ཉིད་ལས་མ་ཞུ་བ་འབྱུང་བར་འདོད་དེ། དེ་ཡང་དཔེར་ན་ཀོ་དྲ་ཞེས་བྱ་བའི་འབྲུ་ལས་དུས་དང་ཡུལ་གྱི་རྒྱུ་ལ་ལྟོས་ན་དུག་ཏུ་འགྱུར་བར་བཤད་དོ། །དེས་ན་འདི་སྐད་སྟོན་པར་འགྱུར་ཏེ། དཔེར་ན་ཀོ་དྲ་བ་ཉིད་དུག་ཏུ་འགྱུར་བ་བཞིན་དུ་ནད་རྣམས་ཀྱང་ཚབས་ཆེན་པོར་འཁྲུགས་པ་ལས་རང་ཉིད་ཆ་ལས་མ་ཞུ་བ་འབྱུང་བར་འགྱུར་རོ། །དེ་བས་ན་ལུས་ལ་སོགས་པ་ལས་མ་ཞུ་བའི་དོན་གཞན་དག་ཡིན་པར་ཤེས་པར་བྱ་བའི་ཕྱིར་སྨྲས་པ་ནི། ནད་ཚབས་དེ་དང་འདྲེས་པ་དང༌། །གནོད་པ་གནོད་བྱ་གནོད་འགྱུར་དང༌། །ནད་གཞན་གང་དག་དེ་ལས་བྱུང༌། །མ་ཞུ་བ་དང་བཅས་པར་བཤད། །ཅེས་བྱ་བ་ལ། ཇི་སྐད་བཤད་པའི་མ་ཞུ་བ་དེ་དང༌།
རླུང་ལ་སོགས་པའི་ནད་འདྲེས་ཤིང༌། གཅིག་ཏུ་གྱུར་པ་ལ་མ་ཞུ་བ་དང་བཅས་པ་ཞེས་བཤད་དོ། །དེ་བཞིན་དུ་གནོད་བྱ་སྟེ་དངས་མ་ལ་སོགས་པའི་ལུས་ཟུངས་རྣམས་དང་བཤང་པ་ལ་སོགས་པའི་དྲི་མ་དེ་རྣམས་དང་མ་ཞུ་བ་དེ་ཉིད་ཀྱིས་གནོད་པར་གྱུར་པ་ལ་མ་ཞུ་བ་དང་བཅས་པ་ཞེས་བྱའོ། །དེ་བཞིན་དུ་ནད་གཞན་གང་དག་རླུང་ཁོང་དུ་འཁྱིལ་པ་ལ་སོགས་པ་དེ་ལས་བྱུང་བ་དེ་རྣམས་ནི་ནད་མ་ཞུ་བ་དང་བཅས་པར་བཤད་དོ། །ཅི་དེ་དག་བཀྲུ་སྨན་དང་སྐྱུག་སྨན་ལ་སོགས་བས་མོད་ལ་འབྱུང་བར་བྱའམ། འོན་ཏེ་བསལ་བར་མི་བྱ་ཞེ་ན། དེའི་ཕྱིར་སྨྲས་པ་ནི། དེ་ནི་ལུས་ཀུན་ཞུགས་གྱུར་པ། །ནད་ནང་ཞུགས་ཏེ་རྩེ་མ་བཅིལ། །མ་སྨིན་དབྱུང་བར་མི་བྱ་སྟེ། །མ་སྨིན་ཤིང་ཐོག་ཁུ་བར་མཚུངས། །ཞེས་བྱ་བ་ལ། མ་ཞུ་བ་དང་འདྲེས་ཤིང་ལྷན་ཅིག་གནས་པའི་ནད་དེ། ལུས་ཀུན་ཏུ་ཁྱབ་ཅིང་མགོ་ནས་རྐང་པའི་བར་དུ་ཞུགས་པས་ཁྱབ་པར་བྱས་པ། ནད་ནང་དུ་ཞུགས་པ་རྩ་དང་རྒྱུས་པ་ཕྲ་མོ་ཡན་ཆད་གྱི་ཚིགས་ལ་ཁྱབ་ཅིང་ཞུགས་པ་དངས་མ་ལ་སོགས་པའི་ལུས་ཟུངས་ལ་ཞེན་ཅིང་དབྱུང་དཀའ་བ། གནས་ལས་མ་འགུལ་བ་དེ། སྨིན་ཅིང་སྙི་བར་མ་བྱས་པར་སློན་སྨན་ལ་སོགས་པས་དབྱུང་བར་མི་བྱ་སྟེ། དེ་ནི་སྨིན་པའི་ཆོ་ག་མ་བྱས་པར་ཕྱུང་ན་གནོད་པ་ཆེན་པོ་ཉིད་དུ་འགྱུར་རོ། །འདི་ཉིད་དཔེས་བསྟན་པར་བྱ་བའི་ཕྱིར། མ་སྨིན་ཤིང་ཏོག་ཁུ་བར་མཚུངས། །ཞེས་བྱ་བ་སྨོས་པ་ཡིན་ཏེ། མཚུངས་ཞེས་བྱ་བའི་སྒྲ་ནི་འདྲ་བའི་དོན་ཏེ། དཔེར་ན་མ་དུ་ལུང་ཀ་དང༌། སྐྱུ་རུ་ར་དང་རྒུན་འབྲུམ་སོགས་པའི་ཤིང་ཏོག་མ་སྨིན་ཅིང་མ་ཚོས་པ་ལས། ཁུར་བ་བཙིར་བ་ན་ཁུ་བ་ཐམས་ཅད་འབྱུང་བར་མི་ནུས་ཀྱི། འབྲས་བུ་ཉིད་རླག་པར་འགྱུར་ཏེ། དུས་ལ་མ་བབ་པའི་ཕྱིར་རོ། །དེ་ཉིད་ཀྱིས་ན་དཔེ་བསྟན་པའི་དོན་གསལ་བར་བཤད་པའི་ཕྱིར་སྨྲས་པ་ནི། དེ་ནི་དབྱུང་བར་དཀའ་བས་ན། །རྟེན་ནི་འཇིག་པར་བྱེད་པར་འགྱུར། །ཞེས་བྱ་བ་ཡིན་ཏེ། གང་གི་ཕྱིར་ནད་མ་སྨིན་པ་དེ་གནོད་པར་བྱེད་ཅིང༌། ལུས་ཀུན་ལ་
ཁྱབ་པ་ལུས་ཟུངས་ལ་ཞེན་ཞིང་འདྲེས་པས་སྨིན་པའི་ཆོ་ག་མ་བྱས་པར་དབྱུང་དཀའ་བ་ཡིན་ཏེ། དེས་ན་རྟེན་ཞེས་བྱ་བ་ལུས་ཉིད་འཇིག་ཅིང་ཉམས་པར་བྱེད་པར་འགྱུར་ཏེ། ཤིན་ཏུ་དཀའ་བས་ཅུང་ཟད་ཙམ་ཡང་དབྱུང་བར་མི་ནུས་པ་ཡིན་ནོ། །དེ་དག་གི་སྨན་ཅི་ཞིག་ཡིན་པ་བསྟན་པའི་ཕྱིར་སྨྲས་པ་ནི། དེ་ནི་སྨིན་དང་དྲོད་སྐྱེས་སྣུམ། །དུགས་བྱ་རྩེ་བཅིལ་དེ་བསིལ་བ། །ཇི་ལྟར་ཉེ་དང་སྟོབས་ཇི་བཞིན། །སྦྱང་བའི་དུས་སུ་བསལ་བར་བྱ། །ཞེས་བྱ་བ་ལ། ཉེས་པ་དེ་སྨིན་པ་ལ་སོགས་པ་བྱ་སྟེ། ནད་རྣམས་སྨིན་ཅིང་ཞུ་བར་བྱེད་པས་ནི་སྨིན་བས་ཏེ། དེའི་ཕྱིར་སྨྲས་བ་མ་སྨིན་པ་ལུས་ཟུངས་ལ་ཞེན་བ་དབྱུང་བར་དཀའ་བ་སྟེ། སྨིན་བ་ལ་སོགས་པའི་རིམ་གྱིས་གནས་པར་བྱ་ལ། དེའི་འོག་ཇི་ལྟར་ཉེ་བ་དང་སྟོབས་ཇི་ལྟ་བ་བཞིན་དུ་སྦྱང་བའི་དུས་ལ་བབ་པ་དང༌། སྦྱང་བའི་སྨན་གྱིས་བསལ་བར་བྱའོ། །དེ་ལ་ཇི་ལྟར་ཉེ་བ་ནི་ནད་གང་ལམ་གང་དང་ཉེ་བ། ནད་དེ་ལམ་དེ་ཉིད་ནས་བསལ་བར་བྱའོ། །དེ་ཡང་མ་ཞུ་བའི་གནས་ལ་གནས་པ་ནི་སྐྱུག་སྨན་གྱིས་བསལ་བར་བྱའོ། །ཞུ་བའི་གནས་ལ་གནས་པ་ནི་མས་གཏོང་བས་བསལ་བར་བྱའོ། །མགོ་བོ་ལ་གནས་པ་ནི་སྣ་ནས་བཏང་བས་སོ། །སྟོབས་ཇི་ལྟ་བ་བཞིན་ཞེས་བྱ་བ་སྟོབས་དང་ནད་ཚབས་ཤིན་ཏུ་ཆེ་བ་ནི། སྨན་རྣོ་བ་དང་ཚད་ཆེ་བས་བསལ་བར་བྱའོ། །སྟོབས་འབྲིང་ཙམ་ནི་འབྲིང་ཙམ་གྱིས་སོ། །སྟོབས་ཆུང་བ་ནི་འཇམ་པོས་སོ། །དེ་དག་ཉིད་བསལ་བར་བྱ་བའི་ཕྱིར་སྨྲས་པ་ནི། ཁ་ནས་རིགས་པར་སྨན་བཏང་བས། །མ་ཞུའི་གནས་ལས་ནད་མྱུར་བསལ། །ནམ་ཚོང་ཡན་ཆད་སྣ་སྨན་གྱིས། །ཞུ་བའི་གནས་ཡོད་མས་གཏོང་བསལ། །ཞེས་བྱ་བ་ཡིན་ཏེ། ཁ་ནས་ཅི་རིགས་པར་སྨན་བཏང་བས་མ་ཞུ་བའི་གནས་ལས་ནད་མྱུར་དུ་བསལ་ཞིང་གདོན་པར་བྱའོ། །ནམ་ཚོང་ཡན་ཆད་ཀྱི་ནད་ནི་སྣ་ནས་སྨན་བཏང་བས་བསལ་བར་བྱའོ། །ཞུ་བའི་གནས་ལྟེ་བ་མན་ཆད་ན་གནས་པ་དག་ནི་མས་གཏོང་བ་སྟེ། བཤང་སྒོ་ནས་སྨན་བཏང་བས་ནད་མྱུར་དུ་བསལ་བར་བྱའོ། །ནད་འབྱུང་བར་རྩོམ་པའི་མ་སྨིན་པར་ནི་རང་ཉིད་འབྱུང་ཡང་དགག་པར་མི་བྱ་སྟེ། ཁྲག་མཁྲིས་དང་ཚད་པར་འཁྲུ་བ་
དང་པོར་འབྱུང་བ་ན། དགག་པར་མི་བྱ་སྟེ། དེ་ནི་ནད་དུ་མའི་རྒྱུར་འགྱུར་རོ། །ཞེས་བསྟན་པའི་ཕྱིར། སྟེང་ངམ་འོག་ཏུ་འབྱུང་བར་རྩོམ། །ནད་ནི་རང་ཉིད་འབྱུང་བས་ན། །སྨན་གྱིས་ནད་ནི་མི་དགག་སྟེ། །བཀག་ན་དེ་ཉིད་ནད་སྐྱེད་འགྱུར། །ཞེས་བྱ་བ་ལ། སྟེང་གི་ལམ་ཁ་དང་སྣ་ཞེས་བྱ་བ་ལ། འོག་གི་ལམ་བཤང་སྒོ་དང་གཅི་སྒོ་ལས་ནད་རྣམས་འབྱུང་བར་རྩོམ་ཞིང་ཕྱིར་ཕྱོགས་པར་སྨྲས་ནས་འཐགས་པ་མ་སྨིན་པར་གྱུར་བ་དེ། རང་ཉིད་འབད་མི་དགོས་བར་འབྱུང་ཞིང་འབད་པས་ན། སྨན་གྱིས་གཅད་པའི་ཚུལ་གྱིས་ནད་དེ་མི་གཞག་ཅིང་དགག་པར་མི་བྱའོ། །དེ་ཡང་གང་གི་ཕྱིར་སྨིན་པའི་ནད་རང་ཉིད་འབྱུང་བར་རྩོམ་པ་སྟེ། ནན་གྱིས་བཀག་ན་དེ་ཉིད་ནད་སྐྱེ་བའི་རྒྱུར་འགྱུར་རོ། །དེ་བས་དང་པོར་ནད་འབྱུང་ལ། །བསྡད་དེ་ཕན་པ་བཟའ་བར་བྱ། །ཞེས་བྱ་བ་ལ། དེ་བས་རྒྱུ་དེའི་ཕྱིར་དང་པོར་ནད་འབྱུང་བ་ལ་ནན་གྱིས་བཀག་བ་ནི་ཤུགས་བཀག་པའི་རྒྱུར་འགྱུར་བས་སྨན་གྱིས་མི་བཟློག་པར་བཏང་སྙོམས་སུ་བྱ་ཞིང་བསྡད་པར་བྱའོ། །གང་གིས་ཤེ་ན། ཕན་པ་བཟའ་ཞེས་བྱ་བ་སྟེ། ནད་བཟས་སུ་མཐུན་པའི་ཁ་ཟས་ཕན་ཞིང་བསོད་པ་བཟའ་ཞིང་ལོངས་སྤྱད་བར་བྱའི། དེར་ནི་དགག་པར་ཡང་མི་བྱ་ལ། སྦྱ་དབང་ཡང་མི་བྱ་སྟེ། རང་ཉིད་འབྱུང་བ་ཡིན་པའི་ཕྱིར། བཏང་སྙོམས་སུ་སྡོད་པ་ཉིད་འདིར་སྨན་ཡིན་ནོ། །འཁྱིལ་ལ་སྨིན་པ་དེ་དང་དེས། །སྨིན་བྱས་དེ་བཞིན་བསལ་བར་བྱ། །ཞེས་བྱ་བ་ལ། མ་སྨིན་པའི་ནད་དེ་འཁྱིལ་ཞིང་འགགས་ན། སྨིན་པར་བྱེད་པའི་སྨན་དེ་དང་དེས་སྨིན་པར་བྱས་ཤིང་དབྱུང་དུ་རུང་བར་བྱ་བ་ནས། དེ་བཞིན་དུ་སྔར་ཇི་སྐད་བསྟན་པའི་ལམ་ནས་འབྱུང་ཞིང་བསལ་བར་བྱའོ། །སྔར་ནད་ཀྱི་དཀྱེལ་སོགས་དུས་སུ་བསལ་ཞེས་སྨོས་ན། དེ་ཅི་ལྟར་བསལ་བར་བྱ་ཞེ་ན། དེའི་ཕྱིར་སྨྲས་པ་ནི། དབྱར་སྟོན་ཐ་ཆུངས་དཔྱིད་ཟླ་འབྲིང༌། །ཐུན་མོང་དུས་སུ་རིམ་བཞིན་དུ། །སོ་ག་དབྱར་དང་དགུན་བསགས་པའི། །རླུང་སོགས་ནད་ནི་མྱུར་དུ་བསལ། །ཞེས་བྱ་བ་ལ་སོགས་པ་ཡིན་ཏེ། སོག་ལ་སོགས་པ་དུས་གསུམ་ནི་གསོ་བར་བྱ་བ་བསགས་པར་འགྱུར་བའི་ནད་ནི་དབྱར་ཟླ་ཐ་ཆུངས་དང༌། སྟོན་ཟླ་
ཐ་ཆུངས་དང༌། དཔྱིད་ཟླ་འབྲིང་པོ་དག་ཐུན་མོང་གི་དུས་ཡིན་པས། རིམ་བཞིན་དུ་བསལ་བར་བྱ་སྟེ། སོ་གའི་དུས་སུ་བསགས་པའི་རླུང་དབྱར་ཟླ་ཐ་ཆུངས་ལ་བསལ་བར་བྱའོ། །དབྱར་བསགས་པའི་མཁྲིས་པ་སྟོན་ཟླ་ཐ་ཆུངས་ལ་བསལ་བར་བྱའོ། །དགུན་བསགས་པའི་བད་ཀན་དཔྱིད་ཟླ་འབྲིང་པོ་ལ་བསལ་བར་བྱའོ། །སོ་ག་དབྱར་དང་དགུན་གྱི་ཚེ། །རབ་ཚ་ཆར་དང་གྲང་བའི་དུས། །ཞེས་བྱ་བ་ལ། གང་གི་ཕྱིར་སོ་ག་དང་དབྱར་དང་དགུན་གྱི་ཚེ་ནི་རིམ་པ་བཞིན་དུ་རབ་ཏུ་ཚ་བ་དང༌། ཆར་འབབ་པ་དང་གྲང་བའི་དུས་ཡིན་ནོ། །དེ་ལ་རབ་ཏུ་ཚ་བ་ནི་སོ་གའི་དུས་སོ། །རབ་ཏུ་ཆར་པ་འབབ་པ་ནི་དབྱར་གྱི་དུས་སོ། །རབ་ཏུ་གྲང་བ་ནི་དགུན་གྱི་དུས་སོ། །དེ་རྣམས་དུས་མཚུངས་ཐུན་མོང་སྟེ། །དེ་ཚེ་ནད་ནི་མི་བཟད་བསལ། །ཞེས་བྱ་བ་ལ་རབ་ཏུ་ཚ་བ་དང༌། ཆར་འབབ་པ་དང༌། གྲང་བའི་དུས་སོ་ག་དང་དགུན་ཞེས་བྱ་བ། དྲོ་བ་དང་ཆར་འབབ་པ་ཆ་མཉམ་པའི་དུས་དེའི་ཚེ། རླུང་ལ་སོགས་པའི་ནད་མི་བཟད་ཅིང་གནོད་པ་བསལ་ཞིང་སྦྱང་བར་བྱའོ། །ཐ་མལ་བདེར་གནས་དབང་བྱས་ཀྱི། །ནད་པ་ནད་ཀྱི་དབང་དུ་ནི། །གྲང་ཚ་ཆར་གྱི་དུས་དག་གི །གཉེན་པོ་ཅི་བཞིན་བྱས་ནས་ནི། །སྦྱོར་བའི་དུས་སུ་བབ་པ་ན། །བྱ་བ་དུས་ལ་མི་སྡོད་དོ། །ཞེས་བྱ་བ་ལ། ངས་དེ་ལྟར་བཤད་པ་ནི། ཐ་མལ་པར་བདེ་བར་གནས་པའི་དབང་དུ་བྱས་ཤིང༌། དེ་ལ་དམིགས་ནས་ཐུན་མོང་གི་ཉིན་ཞག་རྣམས་ལ། སློན་སྨན་ལ་སོགས་པ་བཏང་བ་བཤང་བ་ཡིན་གྱི། ནད་པའི་དབང་དུ་བྱས་ནས་སྨྲས་པ་ནི་མ་ཡིན་ཏེ། དེའི་ནད་ནི་གནོད་པར་བྱེད་དྲགས་པ་ཡིན་པས་བཏང་སྙོམས་སུ་གཞག་སྟེ། གསོར་རུང་བ་ཡང་གསོར་མི་རུང་བར་འགྱུར་རོ། །དེ་ལ་ནད་པ་ལ་ནི་ནད་སྐྱེད་པར་གྱུར་པའི་ནད་ཀྱི་དབང་དུ་བྱས་ནས། ནད་དང་རྗེས་སུ་མཐུན་པར་གྲང་བ་དང་ཚ་བ་དང༌། ཆར་གྱི་དུས་དག་གི་གཉེན་པོ་ཇི་ལྟ་བ་བཞིན་དུ་བཅོས་མ་མ་ཡིན་པ་ལེགས་པར་བྱ་ཞིང་དུས་ཀྱི་ཡོན་ཏན་ཇི་ལྟ་བ་ལས་གོ་བཟློག་པ་དང༌། སྦྱོར་བ་དང་ལས་བྱ་བ་དང༌། ཚད་བརྟགས་པས་སྨན་གྱི་ལས་ཉེ་བར་སྦྱར་ཞིང༌། མ་ཡེངས་པ་ཁོ་ནར་ཉེ་བར་
སྦྱང་བར་བྱའོ། །དེ་ཡང་གཉེན་པོ་ཇི་ལྟ་བ་བཞིན་དུ་བྱ་བ་སྟེ། གྲང་བ་དང་དྲོ་བ་དང༌། དྲོལ་གྲང་བར་བྱ་བ་དང༌། སྦྱོར་བའི་དུས་ཏེ། ནད་ཀྱི་དབང་གིས་གསོ་བར་བྱ་བའི་དུས་སུ་བབ་པ་ན། བྱ་བའི་དུས་དེ་ལ་མི་བསྡད་ཀྱི། དུས་ལས་མི་འདའ་བར་བྱའོ། །སྨན་ནི་ཟས་མ་ཟོས་སྔོན་དང༌། །དབུས་དང་མཐའ་དང་ཁམ་གྱི་བར། །ཟས་བར་ཙེག་བུ་ཟས་བཅས་དང༌། །ཟས་མནན་མཚན་མོ་བཏུང་བའོ། །ཞེས་བྱ་བ་ལ། སྨན་དུས་སྐབས་བཅུར་སྦྱར་ཞིང་གཏང་བར་བྱའོ། །དེ་ལ་ཟས་མ་ཟོས་པ་ནི་གང་དུ་སྨན་གཅིག་བུ་དགོས་པ་དེ་ལ་ནི་ཟས་མ་ཟོས་པ་ཞེས་བྱའོ། །སྔོན་དང་ཞེས་པ་ནི་ཟས་ཟ་བའི་སྔོན་དུ་སྨན་ཟོས་ན། དེའི་རྗེས་ཐོགས་ཉིད་ལའོ། །དབུས་ནི་གང་ཟས་ཀྱི་བར་དུའོ། །ཐ་མ་ནི་ཟས་ཟོས་པའི་རྗེས་ཐོགས་ལའོ། །ཁམ་གྱི་བར་ཞེས་བྱ་བ་ནི་སྨན་གྱི་ཁམ་ཟས་དང་འདྲེས་མར་བཟའ་བའོ། །ཟས་བར་དུ་ཞེས་བྱ་བ་ནི་གང་ཟས་ཀྱི་བར་བར་དུ་བཟའ་བའོ། །ཙེག་བུ་ནི་ཡང་ཡང་སྐད་ཅིག་རེ་རེ་ཞིང་ཟས་ཟོས་པའམ། མ་ཟོས་པའི་སྐབས་སུ་ཟ་བའོ། །ཟས་བཅས་ནི་ཟས་དང་ལྷན་ཅིག་བཅོས་པའམ། ཕྱིས་བསྲེས་ཏེ་བཟའ་བའོ། །ཟས་མནན་ནི་ཁ་སྦྱར་གྱི་ཚུལ་དུ་སྔར་སྨན་ཟོས་ནས་བར་དུ་ཟན་ཟ་བ་སྟེ། ཕྱིས་ཀྱང་སྨན་གྱིས་མནན་པའོ། །བད་ཀན་བདོ་འདས་ནད་པ་ནི། །ཉམས་སྟོབས་ལྡན་ལམ་ཟོས་གཏང༌། །ཞེས་བྱ་བ་ལ། བད་ཀན་གྱི་ཤས་ཆེ་ཞིང་བདོ་བའི་དུས་འདས་ཤིང་བད་ཀན་ལྡང་བའི་དུས་ཚོད་ཡོལ་བའི་ནད་དང༌། ནད་པ་ཉམས་སྟོབས་དང་ལྡན་པ་ལ། ཟས་མ་ཟོས་པའི་སྔར་ཟས་མེད་པར་གཏང་བར་བྱའོ། །ཐུར་སེལ་རླུང་ལ་ཟས་སྔར་གཏང༌། །མཉམ་གནས་ལྡང་ལ་བར་དུ་ཡིན། །ཞེས་བྱ་བ་ལ། ཐུར་དུ་སེལ་བ་ཞེས་བྱ་བའི་རླུང་གི་ནད་ལྡང་བར་གྱུར་ན། ཟས་ཀྱི་དང་པོ་ཉིད་དུ་སྨན་བཏང་ལ། དེའི་རྗེས་ཐོགས་ཁོ་ན་ལ་ཟས་བཟའ་བར་བྱའོ། །རླུང་མེ་དང་ལྷན་ཅིག་གནས་བ་ཞེས་བྱ་བ་ལྡང་བར་འགྱུར་ལ། ཟས་ཀྱི་བར་དུ་སྨན་བཟའ་བར་བྱ་སྟེ། ཟས་ཀྱི་ཕྱེད་ཟོས་པ་དང༌། བར་དུ་སྨན་ཟོས་པ་དང༌། དེའི་འོག་ཏུ་ཟས་ལྷག་མ་རྣམས་བཟའ་བར་བྱའོ། །ཁྱབ་བྱེད་ནང་པར་ཟས་
ཟའི་མཐའ། །གྱེན་རྒྱུའི་རླུང་ལ་དགོངས་ཀའོ། །ཞེས་བྱ་བ་ལ། རླུང་ཁྱབ་བྱེད་ཅེས་བྱ་བ་ལྡང་བར་གྱུར་པ་ན། ནང་པར་ན་སྔ་དྲོ་ཟས་ཟ་བའི་མཐའ་མ་རྫོགས་ཀར་སྨན་གཏང་བར་བྱའོ། །གྱེན་དུ་རྒྱུ་བ་ཞེས་བྱ་བ་ལ། དགོངས་ཀའི་ཟས་བཟའ་པའི་མཐའ་མར་སྨན་བཟའ་བར་བྱའོ། །སྲོག་ཅེས་བྱ་བའི་རླུང་ལྡང་ལ། །ཁམ་གྱི་བར་དང་ཟས་བར་བཟའ། །ཞེས་བྱ་བ་ལ། སྲོག་ཅེས་བྱ་བའི་རླུང་ལྡང་ཞིང༌། འཁྲུགས་པ་ལ་ཁམ་གྱི་བར་དང༌། དེ་བཞིན་དུ་ཟས་ཀྱི་བར་ཏེ། དབུས་སུ་སྨན་བཟའ་བར་བྱ་སྟེ། ཡང་ཁམ་སྤག་ཅིང་བཟའ་བར་བྱའོ། །བཟའ་བའི་བར་བར་དུ་བཟའ་བའོ། །དུག་དང་སྐྱུག་ལུད་དབུགས་མི་བདེ། །སྐོམ་དད་སྐྱེ་ལ་ཙེག་བུའོ། །ཞེས་བྱ་བ་ལ། དུག་འཐུངས་པ་དང་སྐྱུགས་པ་དང༌། ལུད་པ་དང་དབུགས་མི་བདེ་བ་དང༌། སྐོམ་དད་སྐྱེ་བ་ལ་ཙེག་བུར་ཡང་ཡང་བཟའ་བཟས་ཟོས་སམ། མ་ཟོས་པའི་སྐབས་སུ་བྱའོ། །ཡི་ག་འཆུས་ལ་སྣ་ཚོགས་ཟས། །སྨན་དང་ཟས་བཅས་སྦྱར་བར་བྱ། །ཞེས་བྱ་བ་ལ། བད་ཀན་གྱི་ཤས་ཆེ་བ་ཟས་མི་འདོད་པ་ལ། སྨན་སྦྱིན་པར་བྱ་བ་ནི། སྣ་ཚོགས་པའི་ཟས་དུ་མ་དག་དང༌། ལྷན་ཅིག་སྨན་སྦྱིན་པར་བྱ་བ་ཡིན་པས་ན། ཟས་དང་བཅས་པར་སྦྱར་བར་བྱའོ། །སྐྱིགས་བུ་ལུས་འདར་ལག་འདར་དང༌། །ཟས་ཉུང་ཟ་ལ་མནན་པ་གཏང༌། །ཞེས་བྱ་བ་ལ། སྐྱིགས་བུ་ལ་སོགས་པའི་ནད་རྣམས་དང༌། ཟས་ཉུང་དུ་ཟ་བ་ལ་སྨན་གྱི་མནན་པ་གཏང་བར་བྱ་སྟེ། སྨན་གྱིས་མནན་པ་ཞེས་བྱ་བ་ནི་གང་ཟས་ཀྱི་སྔོན་དང་ཕྱི་ནས་སྨན་བཏང་ལ། གང་གིས་ཟས་དེ་ཟ་མ་ཏོག་གི་ནང་དུ་བཅུག་པ་ལྟར་སྨན་གྱིས་སྟེང་འོག་ནས་བཏབ་སྟེ། གནས་པ་དེ་ལ་མནན་པ་ཞེས་བྱའོ། །ནམ་ཚོང་ཡན་ཆད་ནད་ལ་ནི། །མཚན་མོའི་དུས་སུ་བཏང་བ་བསྔགས། །ཞེས་བྱ་བ་ལ། ནམ་ཚོང་ཡན་ཆད་ཀྱི་ནད་མིག་དང་གདོང་འགྱུར་བ་ལ་སོགས་པའི་ནད་ལ་མཚན་མོ་ཉལ་ཁར་སྨན་བཏང་བ་རབ་ཏུ་བསྔགས་ཤིང་མཆོག་ཏུ་འདོད་པར་བྱ་བ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་
རྣམ་པར་སྦྱར་བ་ལས་ལེའུ་བཅུ་གསུམ་པའི་རྣམ་པར་འགྲེལ་པའོ།། །།དེ་ནས་གསོ་བའི་ཐབས་རྣམ་པ་གཉིས་བསྟན་པའི་ལེའུ་བཤད་པར་བྱའོ། །ཞེས་བྱ་བ་ལ། རླུང་ལ་སོགས་པའི་ནད་རྣམས་ཀྱི་གསོ་བའི་ཐབས་སྣུམ་ཆོས་བྱ་བ་ལ་སོགས་པ་རྣམ་པ་དུ་མ་ཞིག་བཤད་པ་ཡིན་ཏེ། རྣམ་པ་དུ་མ་ཞིག་ཡོད་དུ་ཟིན་ཀྱང་ཉམས་བརྟ་བ་དང༌། ཉམས་སྨད་པའི་ཚུལ་རྣམ་པ་གཉིས་ལས་མི་འདའ་བ་ཡིན་ནོ། །དེ་བས་ན་དེའི་འོག་ཏུ་གསོ་བ་རྣམ་པ་གཉིས་ཀྱི་ལེའུ་བརྩམས་པ་ཡིན་ལ། གསོ་བ་རྣམ་པ་གཉིས་པོ་དེ་སྟོན་ཅིང་གང་དུ་གསོ་བ་གཉིས་པོ་དེའི་ངེས་པ་བསྟན་པའི་ལེའུ་ལ་ནི་གསོ་བའི་ཐབས་གཉིས་བསྟན་པའི་ལེའུ་ཞེས་བྱ་སྟེ། དེ་བཤད་པར་བྱའོ། །ཞེས་པའོ། །གསོ་བ་གཉིས་པའི་རིགས་པ་བསྟན་པར་བྱ་བའི་ཕྱིར། གསོ་བ་རྣམ་པ་གཉིས་ཡིན་ཕྱིར། །གསོ་ཐབས་རྣམ་པ་གཉིས་སུ་འདོད། །ཅེས་བྱ་བ་ཡིན་ཏེ། གསོ་བ་རྣམ་པ་གཉིས་ཁོ་ན་སྟེ། གཅིག་ནི་ཉམས་བརྟ་བའི་ཚུལ་གྱིས་གསོ་བའོ། །གཉིས་པ་ནི་ཉམས་སྨད་པའི་ཚུལ་གྱིས་གསོ་བར་བྱ་བ་ཡིན་ཏེ། གང་གི་ཕྱིར་གསོ་བར་བྱ་བའི་ནད་དམ། ཡང་ན་དེ་ལྡན་པའི་སྐྱེས་བུ་ནི་ཉམས་བརྟ་བས་གསོ་བར་བྱ་བའམ། ཉམས་སྨད་པས་གསོ་བར་བྱ་བ་ཡིན་གྱི། དེ་ལས་གཞན་པའི་ཕྱོགས་གསུམ་པོ་ཡོད་པ་མ་ཡིན་ནོ། །དེ་བས་ན་གསོ་བའི་ཐབས་ནི་རྣམ་པ་གཉིས་ཁོ་ན་ཡིན་ལ། གསོ་བ་དང་ནད་གསོ་བའི་ཐབས་དང་བྱ་བའི་རིམ་བ་ཞེས་བྱ་བ་ནི་དོན་གཅིག་ཡིན་ནོ། །དྲང་སྲོང་ཙ་ར་ཀའི་གཞུང་ལ་བརྟེན་པ་གཞན་དག་ནི་གསོ་བའི་ཐབས་སྨྱུང་བ་ལ་སོགས་པ་བཞིར་འདོད་མོད་ཀྱི། སྨྱུང་བ་ལ་སོགས་བ་ནི་འདི་ཉིད་ཀྱི་ནང་དུ་འདུས་པ་ཡིན་ནོ། །ཁོ་ན་ཞེས་བྱ་བ་ནི་ངེས་པར་བཟུང་བ་སྟེ། དེ་ཉིད་ཀྱི་ཕྱིར་སྨྲས་པ་ནི། དེ་གཅིག་བརྟ་བར་བྱ་བ་ཡིན། །གཉིས་པ་ཉམས་ནི་སྨད་པའོ། །ཞེས་བྱ་བ་ཡིན་ཏེ། གསོ་བ་དེ་གཉིས་ལས་གསོ་བ་གཅིག་ནི་ཉམས་བརྟ་བའི་ཚུལ་ཡིན་ལ། །གཉིས་པ་ནི་ཉམས་བཙག་པ་ཡིན་ནོ། །དེ་དག་རྒྱས་བྱ་སྨྱུང་བ་ཞེས། །རྣམ་གྲངས་དག་ཏུ་བཤད་པ་ཡིན། །ཞེས་བྱ་བ་ལ། ཉམས་བརྟ་བ་དང༌། ཉམས་སྨད་པ་དེ་དག་ནི་གོ་རིམས་བཞིན་དུ་རྒྱས་པར་བྱ་བ་
དང། སྨྱུང་བ་ཞེས་བྱ་བའི་སྒྲས་མིང་གི་རྣམ་གྲངས་དག་ཏུ་བཤད་ཅིང་བསྟན་པ་དག་ལུང་ཤེས་བ་དག་གིས་བྱས་པ་ཡིན་ཏེ། དེ་དག་གི་དཀྱིལ་མིང་གི་རྣམ་གྲངས་བསྟན་པ་ཙམ་དུ་ཟད་དེ། ཞེས་བྱ་བའི་དོན་ཏོ། །ལུས་ཤ་རྒྱས་ཕྱིར་རྒྱས་བྱ་སྟེ། །ཡང་བ་ཉིད་ཕྱིར་སྨྱུང་བར་བྱ། །ཞེས་བྱ་བ་ནི། དེ་ལ་རྒྱས་པར་བྱ་བ་ནི་ལུས་ཀྱི་ཤ་འཕེལ་ཞིང་རྒྱས་པར་བྱ་བའི་དོན་བྱེད་པ་སྟེ། དཔེར་ན་ཤ་དང་འོ་མ་ལ་སོགས་པ་ལྟ་བུའོ། །གང་ལུས་ཀྱི་ཡང་ཞིང་སྲབ་པ་ཉིད་དུ་གང་གིས་བྱེད་པ་དེ་ནི་སྨྱུང་བར་བྱ་བ་ཞེས་བྱ་བའོ། །དེ་དག་ཀྱང་ཅི་ལྟ་བུའི་བདག་ཉིད་ཅན་ཡིན་ཞེ་ན། དེའི་ཕྱིར་སྨྲས་པ་ནི། དེ་ནི་ཕལ་ཆེར་ས་ཆུ་དང༌། །ཅིག་ཤོས་ལས་ནི་གྱུར་པ་ཡིན། །ཞེས་བྱ་བ་ཡིན་ཏེ། རྒྱས་པར་བྱ་བ་དང་སྨྱུང་བ་དེ་གཉིས་ནི། ས་དང་ཆུ་དང་ཅིག་ཤོས་ལས་ནི་གྱུར་པ་ཡིན་ཏེ། དེ་ཡང་ས་དང་བཅས་པའི་ཆུ་ཡིན་ནས་ཆུའོ། །དེས་ནི་འདི་སྐད་སྟོན་ཏེ། ས་དང་ཆུའི་རང་བཞིན་ཅན་གྱི་རྫས་ནི་རྒྱས་པར་བྱེད་པ་ཡིན་ཏེ། དེ་གཉིས་ཀྱི་ངོ་བོ་ཉིད་དེ་ཡིན་པའི་ཕྱིར་རོ། །སྨྱུང་བ་ནི་དེ་ལས་གཞན་པ་ཅིག་ཤོས་ཏེ། གང་ཅིག་ཤོས་ཤེ་ན། འདིར་དེའི་སྐབས་ཡིན་པས། ས་དང་ཆུ་ལས་ཅིག་ཤོས་མེ་དང་རླུང་དང་ནམ་མཁའི་བདག་ཉིད་ཅན་ཡིན་ནོ། །ཕལ་ཆེར་ཞེས་སྨོས་པས་ནི་ཤིན་ཏུ་རྒྱས་པར་བྱེད་པ་ནི་ས་དང་ཆུ་ཡིན་ལ། ཤིན་ཏུ་སྨྱུང་བར་བྱེད་པ་ནི་ཅིག་ཤོས་མེ་དང་རླུང་དང་ནམ་མཁའ་ཡིན་པས་ན་དེ་སྐད་ཅེས་བྱའོ། །མེ་དང་རླུང་དང་ནམ་མཁའ་ལ་རྒྱས་ཤིང་འཕེལ་བར་འགྱུར་བ་ཡེ་མེད་པ་མ་ཡིན་ལ། ས་དང་ཆུ་ལ་ཡང་སྨྱུང་བ་ཡེ་མེད་པ་མ་ཡིན་ཏེ། སྨན་རྣམས་ནི་འབྱུང་བ་ལྔའི་བདག་ཉིད་ཅན་ཡིན་པའི་ཕྱིར་རོ། །སྦྲེལ་གཞིར་གནས་པ་ཡང་སྲིད་དོ། །ལས་གང་སྣུམ་དང་དགག་པ་དང༌། །དུགས་དང་ཁོང་རྩུབ་བྱ་བ་སྟེ། །འབྱུང་བ་དེ་ཡང་གཉིས་ཡིན་ཕྱིར། །གཉིས་ལས་འདའ་བར་མི་བྱེད་དོ། །ཞེས་བྱ་བ་ལ། གསོ་བའི་ཐབས་མེད་དུ་སྨྲས་པ་དག་ཡོད་པའི་ཕྱིར། འདིར་སྨྲས་པ་ཡིན་ཏེ། འདི་ཉིད་ཀྱིས་ལས་སྣུམ་པག་ལ་སོགས་པ་བཞི་པོ་བཤད་པ་གང་ཡིན་པ། འདིའི་
ལས་ཡིན་གྱི། བརྟ་བར་བྱ་བ་དང་ཉམས་སྨད་པར་བྱ་བ་ལྟར་སྣུམ་ལ་སོགས་པ་བཞི་པོ་འདི་དག་དོན་ཐ་དད་པ་མ་ཡིན་ནོ། །འབྱུང་བའི་ལས་བཞི་པོ་དེ་དག་ཀྱང་བརྟ་བ་དང་ཉམས་སྨད་པ་གཉིས་ཀྱི་ཚུལ་ཅན་ཡིན་པའི་ཕྱིར་གཉིས་པོ་དེ་ལས་འདའ་བར་མི་བྱེད་དོ། འབྱུང་བ་རྣམས་བརྟ་བ་དང་ཉམས་སྨད་པའི་རང་བཞིན་གཉིས་ཀྱི་རྣམ་པ་གཉིས་ཡིན་པའི་ཕྱིར་དང༌། དེ་བཞིན་དུ་མེ་དང་ཟླ་བའི་རང་བཞིན་རྣམ་པ་གཉིས་དང་ལྡན་པ་ཡིན་པས། དེ་ལས་རྒྱས་པའམ། འཕེལ་བ་དང༌། སྨྱུང་བ་གཉིས་ལས་འདའ་བར་མི་བྱེད་དོ། །དེ་ཡང་སྣུམ་དང་བསྡམ་པར་བྱ་བའི་ཟླ་བའི་རང་བཞིན་པས་བརྟ་པའི་སྡེ་ཚོམས་སུ་གཏོགས་ལ། རྩུབ་པ་དང་དུགས་བྱ་བ་ནི་མེའི་རང་བཞིན་ཅན་ཡིན་པས་སྨྱུང་བར་གཏོགས་ཏེ། དེས་ནས་ལ་སོགས་པའི་འབྱུང་བ་རྣམས་བརྟ་བ་དང་ཉམས་སྨད་པའི་ཚུལ་ཅན་ཡིན་ནོ། །ད་ནི་དེ་གཉིས་ཀྱི་སོ་སོའི་དབྱེ་བ་སྨྲས་པ་ནི། དེ་ལའང་སྦྱང་དང་ཞི་བྱ་བ། །རྣམ་པ་གཉིས་པོ་སྨྱུང་བ་ཡིན། །ཞེས་བྱ་བ་ལ། དེ་ལ་ཞེས་བྱ་བ་ནི་ངེས་པར་གཟུང་བ་སྟེ། ཉམས་བརྟ་བ་དང་ཉམས་སྨད་པ་ཞེས་བྱ་བ་མིང་གི་རྣམ་གྲངས་རྣམ་པ་གཞན་དུ་ན། རྒྱས་པར་བྱ་བ་དང༌། སྨྱུང་བ་ཞེས་བྱ་བ་ལ་གང་འདི་སྨྱུང་བའམ། ཉམས་སྨད་པ་ཞེས་བྱ་བ་དེ་ནི་རྣམ་པ་གཉིས་ཏེ། སྦྱང་པ་དང་ཞི་བ་ཞེས་བྱ་བ་ཡིན་ཏེ། དེ་ལས་ལྷག་པའི་སྨྱུང་བ་ཡོད་པ་མ་ཡིན་ནོ། །ཡང་ན་རྣམ་པ་འདི་ལྟ་བུའི་ཚུལ་གྱིས་རྣམ་པ་གཉིས་པ་ནི་སྨྱུང་བ་ཡིན་ཏེ། གཞན་དུ་ན་འོག་ནས་བཤད་པའི་ཚུལ་གྱིས་རྣམ་པ་བཅུ་གཉིས་སུ་འགྱུར་རོ། །དེ་ལས་རང་གི་མཚན་ཉིད་དང་དེ་བཞིན་དུ་དེའི་དབྱེ་བ་བསྟན་པའི་ཕྱིར་སྨྲས་པ་ནི། །གང་ཞིག་ནད་ནི་ཕྱིར་འབྱིན་པ། །སྦྱང་ཡིན་དེ་ནི་རྣམ་ལྔ་སྟེ། །མས་གཏོང་སྐྱུག་སྨན་ལུས་ནད་བཀྲུ། །མགོ་ཡི་ནད་བཀྲུ་གཏར་གས་དབྱུང༌། །ཞེས་བྱ་བ་ཡིན་ཏེ། སྨན་གང་ནང་ན་ཡོད་པའི་ནད་ཕྱིར་འབྱིན་པར་བྱེད་པ་ནི་སྦྱང་བ་ཞེས་བྱ་བ་ལ། སྦྱང་བ་དེ་ཡང་མས་གཏོང་བ་ལ་སོགས་པའི་དབྱེ་བ་རྣམ་པ་ལྔ་ཡིན་ནོ། །དེ་ལ་མས་གཏོང་བ་ནི་བཤད་པའི་སྒོ་ནས། སྨན་དང་མར་ལ་སོགས་པ་བསྐོལ་ཏེ་གཏོང་བའོ། །སྐྱུག་སྨན་
ནི་ནད་རྣམས་གྱེན་དུ་དྲང་བའོ། །ལུས་ཀྱི་ནད་བཀྲུ་བ་ནི་ནད་ཐུར་དུ་དབྱུང་བའོ། །མགོ་བོའི་ནད་བཀྲུ་བ་ནི་ལུས་ཀྱི་ཕྱོགས་གཅིག་མགོ་བོ་ཞེས་བྱ་བ་གཅིག་པུའི་ནད་སྨན་སྣ་ནས་བཏང་བས་གྱེན་དུ་དྲང་བ་ནི་མགོ་བོའི་ནད་བཀྲུ་བའོ། །གཏར་གསད་དབྱུང་བ་ནི་ཁྲག་རྩའི་སྒོ་ལ་སོགས་པ་ལས་ཕྱིར་གདོན་པའོ། །དེ་ནི་ཞི་བའི་མཚན་ཉིད་དང༌། དེ་བཞིན་དུ་དབྱེ་བ་བཤད་པའི་ཕྱིར་འདི་སྨྲས་པ་ཡིན་ཏེ། གང་ཞིག་ནད་ནི་མི་སྦྱོང་དང༌། །སྙོམས་གནས་གློངས་པ་མ་ཡིན་དང༌། །མ་སྙོམས་སྙོམས་པར་བྱེད་པ་དག །ཞི་བ་ཡིན་ཏེ་དེ་རྣམས་བདུན། །སྨིན་དང་དྲོད་སྐྱེད་བཀྲེས་སྐོམ་དང༌། །རྩོལ་བཅག་ཉི་ཚན་སེར་བུ་བསིལ། །ཞེས་བྱ་བ་ལ། སྨན་གང་ཞིག་གིས་རླུང་ལ་སོགས་པའི་ནད་མི་སྦྱོང་ཞིང༌། ནད་ན་གནས་པ་ཕྱི་རོལ་ཏུ་མ་བཏོན་པ་དང༌། དེ་བཞིན་དུ་སྙོམས་པར་གནས་ཤིང་ཆ་མཉམ་པར་རང་གི་ཚད་དུ་གནས་ལ་གློངས་པ་མ་ཡིན་ཞིང་རང་གི་གནས་ནས་མི་བསྒུལ་བ་དང༌། དེ་བཞིན་དུ་མ་སྙོམས་པ་སྟེ། རང་གི་ཚད་ལས་ལྷག་པའམ། མཚང་བའི་ཚུལ་དུ་གནས་པ་དག་སྙོམས་པར་བྱེད་ཅིང༌། རང་གི་ཚད་དང་ལྡན་པ་བྱེད་པའི་སྨན་དེ་ནི་ཞི་བ་ཞེས་བྱ་བ་ཡིན་ལ། ཞི་བ་དེ་ནི་སྨིན་པ་ཉིད་ལ་སོགས་པའི་དབྱེ་བས་རྣམ་པ་བདུན་ཡིན་ནོ། །དེ་ལ་སྨིན་པ་ནི་སྨིན་པར་བྱེད་པས་ན་སྨིན་པ་སྟེ། ཕོ་བའི་མེ་དྲོད་ཀྱིས་འཇུ་བའི་བྱ་བ་རྫོགས་པར་བྱེད་ཅིང༌། དེ་སྨིན་ཅིང་འཇུ་བའི་ནུས་པ་ལྷག་པར་སྐྱེད་པར་བྱེད་པའི་སྨན་གང་ཡིན་པའམ། བྱ་བ་གང་ཡིན་པ་ལ་སྨིན་པ་ཞེས་བྱ་བ་སྟེ། དཔེར་ན་ཏིག་ཏ་ལ་སོགས་པ་ལྟ་བུའམ། སྨྱུང་བ་བྱའོ། །དྲོད་སྐྱེད་ཅེས་བྱ་བ་འདིས་དྲོད་སྐྱེད་པར་བྱེད་པ་སྟེ། དཔེར་ན་ཚ་བ་གསུམ་དང༌། ཚ་བ་ལྔ་ལ་སོགས་པའི་སྨན་གང་གིས་མེའི་དྲོད་ཤིན་ཏུ་འཕེལ་བར་བྱེད་པས། ཟས་འཇུ་བར་བྱེད་པ་དེའི་ནུས་པ་ལྷག་པར་ཉེ་བར་འཕེལ་བར་བྱེད་པ་དེ་ལ་དྲོད་སྐྱེད་ཅེས་བྱའོ། །དེ་ཡང་ལེགས་ཐོས་ཀྱིས། མ་སྨིན་པ་ནི་སྨིན་བྱེད་ཅིང༌། །མཉམ་གནས་དེ་ནི་ཞི་བ་ཡིན། །དྲོད་སྐྱེད་མེ་དྲོད་ཤིན་ཏུ་སྐྱེད། །ཆེད་འགའ་སྨིན་བྱེད་ཡང་ན་མིན། །ཞེས་བཤད་པ་ཡིན་ནོ། །
གཞན་དག་ནི་གོ་བར་ཟད་དོ། །ད་ནི་རྒྱས་པའམ་བརྟ་བར་བྱ་བ་བཤད་དེ། བརྟ་བ་དག་ནི་རླུང་དང་ནི། །རླུང་བཅས་མཁྲིས་པ་ཞི་བྱེད་ཡིན། །ཞེས་བྱ་བ་ལ། ནི་ཞེས་བྱ་བ་ནི་ཁྱད་པར་བྱེད་པ་ཡིན་པའི་དོན་ཏེ། བརྟ་བ་ནི་སྨྱུང་བ་ལས་ཚུལ་འདིས་ཁྱད་པར་དུ་བྱ་བ་ཡིན་ཏེ། བརྟ་བར་བྱེད་པ་འོ་མ་ལ་སོགས་པ་ཡང་སྦྱོར་ཞིང་འཁྲུ་བར་བྱེད་མོད་ཀྱི། སྦྱོར་བ་ནི་ཉམས་དམོད་པའི་བདག་ཉིད་ཅན་ཡིན་པས་དེ་ལས་ཀྱང་རླུང་འབའ་ཞིག་གམ། མཁྲིས་པ་དང་བཅས་པ་ལྡང་བར་བྱེད་དེ། དཔེར་ན་སྨྱུང་བ་ལས་ཨ་རུ་ར་ལ་སོགས་པའི་སྦྱོར་བ་བྱེད་པའི་སྨན་གྱིས་ལྡང་བར་བྱེད་པ་ཡིན་པས། དེའི་ཕྱིར་བརྟ་བའི་ཁྱད་པར་སྟོན་ཏེ། བརྟ་བའི་རྫས་འོ་མ་ལ་སོགས་པའི་སྦྱོར་བའམ་ཞི་བ་ནི། རླུང་འབའ་ཞིག་གམ་མཁྲིས་པ་དང་བཅས་པ་ཞི་བར་བྱེད་ཀྱི། སྨྱུང་བའི་སྦྱོར་བ་ལྟར་ནད་སྐྱེད་བར་ནི་མི་བྱེད་དོ། །དེ་ལྟར་ན་སྨྱུང་བ་ལས་བརྟ་བའམ། རྒྱས་པར་བྱ་བ་ཁྱད་པར་དུ་འཕགས་པ་ཡིན། དེས་ན་བརྟ་བ་དག་ནི་རླུང་དག་སྟེ། མཁྲིས་པ་དང་བཅས་པ་ཞི་བར་བྱེད་པ་ཡིན་གྱི། ལྡང་བར་བྱེད་པ་ཉིད་མ་ཡིན་ནོ། །ཉིད་ཅེས་བྱ་བ་ནི་ངེས་པའི་དོན་ཏེ། རླུང་འབའ་ཞིག་དང༌། དེ་བཞིན་དུ་དེ་ཉིད་མཁྲིས་པ་དང་བཅས་པ་དག་གི་ཡིན་གྱི། མཁྲིས་པ་འབའ་ཞིག་གམ། བད་ཀན་མཁྲིས་པ་དང་བཅས་པའམ། འདུས་པའི་ནད་དག་ལ་བརྟེན་བ་དེ་ཞི་བར་བྱེད་པ་མ་ཡིན་ནོ། །དེ་ལྟར་ན་བརྟ་བའི་ཉེས་པའི་ཡུལ་དེས་ཞི་བ་ཡིན་པར་ངེས་པ་ཡིན་ནོ། །ད་ནི་བརྟ་བར་བྱ་བའི་དངོས་པོ་གང་དང་གང་ཡིན་པ་བརྟ་བར་བྱ་བའི་ཕྱིར་འདི་སྨྲ་བ་ཡིན་ཏེ། བརྟ་བྱ་ནད་དང་སྨན་དང་ཆང༌། །བུད་མེད་མྱ་ངན་གྱིས་ཉམ་ཆུང༌། །ཁུར་དང་ལམ་གྱིས་གློ་རྡོལ་དང༌། །ལུས་རྩུབ་ཉམས་དམའ་རླུང་ཤས་ཆེ། །སྦྲུམ་མ་བུ་བཙས་བྱིས་པ་རྒན། །སོ་གའི་དུས་དང་གཞན་ཡང་བརྟ། །ཞེས་བྱ་བ་ལ། འདི་དག་ལ་ཉམ་ཆུང་བ་ཞེས་བྱ་བའི་སྒྲ་ཀུན་ལ་སྦྱར་བར་བྱ་སྟེ། དེས་ན་ནད་ཀྱིས་ཉམ་ཆུང་བ་དང༌། སྨན་འཐུངས་པས་ཉམ་ཆུང་བ་དང༌། བུད་མེད་ལ་བརྟེན་པས་ཉམ་ཆུང་བ་དང༌། མྱ་ངན་གྱིས་ཉམ་ཆུང་བ་སྟེ། དེ་དག་བརྟ་བར་བྱའོ། །དེ་བཞིན་དུ་རྟག་ཏུ་ཁུར་གྱིས་དུབ་པ་
དང། རྟག་ཏུ་ལམ་གྱིས་དུབ་པ་དང༌། གློ་རྡོལ་བ་དང༌། གཅང་ཆེན་པོ་དང༌། ལུས་རྩུབ་པ་དང༌། ཉམས་དམའ་བ་དང༌། རླུང་གི་ཤས་ཆེ་བ་དང༌། སྦྲུམ་མ་དང༌། བུ་བཙས་པ་དང༌། བྱིས་པ་དང༌། རྒན་པོ་དག་ཀྱང་རྟག་ཏུ་བརྟ་པའི་ཆོ་ག་དག་ཀྱང་བྱའོ། །དེ་བཞིན་དུ་སོ་གའི་དུས་དང༌། གཞན་ཡང་ཞེས་པ་འདིར་མ་བསྟན་པའི་གསོ་བར་འོས་པ་ནད་པའམ། ཐ་མལ་པའི་གནས་སྐབས་ཐམས་ཅད་བརྟ་བར་བྱ་བ་དང༌། ཡང་དེ་བཞིན་དུ་སོ་གའི་དུས་དེའི་ཚེ། ནད་ཀྱིས་ཉམ་ཆུང་བ་ལ་སོགས་པ་ལྷག་པར་ཡང་གསོ་བར་བྱའོ། །དེ་ལ་གང་གིས་བརྟ་ཞེ་ན། དེའི་ཕྱིར་སྨྲས་པ་ནི། ཤ་དང་འོ་མ་ཁ་ར་དཀར། །མར་སར་མངར་བག་མས་གཏོང་དང༌། །གཉིད་ལོག་ཉལ་བདེ་བསྐུ་བྱུག་དང༌། །ཁྲུས་དང་བདེར་གནས་ཉམས་དགའ་བརྟ། །ཞེས་བྱ་བ་སྨྲས་པ་ཡིན་ཏེ། དེ་ལ་ཤ་ནི་སྔར་བཤད་པ་རྣམ་པ་བརྒྱད་དོ། །འོ་མ་ཡང་དེ་བཞིན་ནོ། །ཁ་ར་དཀར་པོ་ནི་ཤ་ཁ་ར་དག་གོ །མར་སར་ནི་མར་རོ། །མངར་བག་ཀྱང་ཡིན་ལ་མས་གཏོང་བ་ཡང་ཡིན་པས་ན་མངར་བག་མས་གཏོང་སྟེ་དེས་བརྟ་བའོ། །གཉིད་ལོག་པའི་བདེ་བ་ནི་ཉལ་བའི་བདེ་བ་སྟེ། གཉི་ག་ལ་ཡང་བདེ་བའི་སྒྲ་སྦྱར་རོ། །བསྐུ་བྱུག་ནི་ལུས་ཏིལ་མར་ལ་སོགས་པས་བསྐུ་བའོ། །ཁྲུས་ནི་ལུས་ཆུ་དྲོན་པོས་བཀྲུ་བའོ། །བདེ་བར་གནས་པ་ནི་སེམས་དགའ་བའོ། །ཉམས་དགའ་བ་ནི་མགུ་བ་ནས་དགའ་བ་སྟེ་ཡིད་དགའ་བའོ། །ད་ནི་སྨྱུང་བ་སྟོན་ཏེ། གཅིན་སྙི་མ་ཞུ་སྣུམ་རབ་ཟོས། །རིམས་བཏབ་བརླ་རེངས་མཛེ་ནད་ཅན། །ཤུ་བ་ཁོང་འབྲས་མཆེར་པ་ན། །ཀླད་ནད་ལྐོག་ནད་མིག་ནད་དང༌། །སྦོམ་པོ་དགུན་དང་གཞན་དག་ཀྱང༌། །རྟག་ཏུ་སྨྱུང་བ་བྱ་བ་ཡིན། །ཞེས་བྱ་བ་ལ། གཅིན་སྙི་བ་དང༌། མ་ཞུ་བ་ལ་སོགས་པའི་ནད་ཡོད་པ་ལ་རྟག་ཏུ་སྨྱུང་བ་བྱའོ། །དེ་བཞིན་དུ་དགུན་དང༌། གཞན་མ་བསྟན་པ་ནད་ཀྱི་འགྱུར་བ་གཞན་དག་ལ་ཡང་བྱ་སྟེ། སྟོབས་རྫོགས་པ་ཡིན་པ་དང༌། བད་ཀན་ལ་སོགས་པའི་འཇིགས་པས་སྨྱུང་བ་བྱ་སྟེ། གཞན་དག་ཀྱང་ཞེས་བྱ་བ་འདིས་ནད་པ་ལ་བྱ་བ་ཡིན་གྱི། གཞན་དུ་ན་བདེ་བར་གནས་པའི་ཚེ་ནི་དགུན་སྟོད་དང༌།
དགུན་སྨན་བརྟ་བའི་ཆོ་ག་ཁྱད་པར་དང་བཅས་པ་སྨྲས་པ་ཡིན་ནོ། །ད་ནི་སྦྱང་བའི་ཡུལ་ལས་བརྩམས་ཏེ་སྨྲས་པ་ནི། དེ་ལ་སྦྱང་བྱ་ཤས་ཆེ་སྦོམ། །སྟོབས་ལྡན་མཁྲིས་པ་བད་ཀན་རྒྱས། །ཞེས་བྱ་བ་ཡིན་ཏེ། དེ་ལ་སྦྱང་བར་བྱ་བ་ནི་ཤས་ཆེ་ཞིང་སྦོམ་པ་དང༌། སྟོབས་དང་ལྡན་པ་དང། མཁྲིས་པ་དང༌། བད་ཀན་རྒྱས་པ་སྟེ། ཉམས་སྨད་པར་བྱ་བ་དེ་རྣམས་ཀྱི་ནང་ནས། མཚན་ཉིད་གསུམ་ཕོ་འདི་དག་དང་ལྡན་པའི་མི། སྦྱང་བ་རྣམ་པ་ལྔ་པོ་སྐྱུག་སྨན་ལ་སོགས་པས་ཅི་རིགས་པར་སྦྱང་ཞིང་ཉམས་སྨད་པར་བྱའོ། །མ་ཞུའི་ནད་དང་རིམས་དང་སྐྱུག །ཚད་པས་འཁྲུ་དང་སྙིང་ནད་ཅན། །ལུས་ལྕི་སྒྲེགས་མང་བཤད་གཅི་འགགས། །ཡི་ག་འཆུས་སོགས་ཀྱིས་ན་བ། །འབྲིང་ཙམ་སྦོམ་སོགས་ཕལ་ཆེར་ནི། །དང་པོར་སྨིན་དང་དྲོད་བསྐྱེད་བྱ། །ཞེས་བྱ་བ་ལ། མ་ཞུ་བ་དང༌། རིམས་ལ་སོགས་པའི་ནད་ཀྱིས་ཉེན་པའི་ནད་པ་ཤ་འབྲིང་ཙམ་དུ་སྦོམ་པར་གྱུར་པ་དག་ལ་ཕལ་ཆེར་ཞེས་པ་མིང་དུ་སྨིན་པ་དང༌། དྲོད་སྐྱེད་པ་ནི་སྨྱུང་བའི་རྣམ་པས་སྨྱུང་བར་བྱའོ། །སོགས་པའི་སྒྲས་ནི་འདིར་སྟོབས་དང་མཁྲིས་པ་དང་བད་ཀན་དག་བསྡུའོ། །དང་པོར་ནི་ཐོག་མར་ཏེ། སྔར་སྨིན་པ་དང༌། དྲོད་བསྐྱེད་བསྐྱེད་པས་སྨྱུང་བ་བྱ་ལ། དེའི་འོག་ཏུ་ཅི་རིགས་པའི་སྨྱུང་བ་བྱའོ། །ཕལ་ཆེར་ཞེས་སྨོས་པ་ནི། ནད་དང་ལུས་ཀྱི་ཉམས་སྟོབས་ལ་སོགས་པ་རྣམས་ལས་བརྟའི་ཐམས་ཅད་དུ་འདི་ལྟར་བྱ་བ་མ་ཡིན་ནོ་ཞེས་སྟོན། ནད་ནི་འདི་དག་གིས་ཉམ་ཐག །སྦོམ་དང་སྟོབས་སོགས་ཆུང་བ་ལ། །བཀྲེས་དང་སྐོམ་པས་ཚར་བཅད་དོ། །ཞེས་བྱ་བ་ནི། སྔར་བཤད་མ་ཐག་པའི་ནད་རིམས་ལ་སོགས་པ་འདི་དག་ཉིད་ཀྱིས་ཉམ་ཐག་ཅིང་གནོད་པར་འགྱུར་བའི་མི་ཤའི་སྦོམ་ཚད་དང༌། སྟོབས་ལ་སོགས་པ་ཆུང་བ་སྟེ། ཤ་ཆེ་བའི་ཤས་ཆུང་ཞིང་སྟོབས་ཞན་པ་བད་ཀན་མཁྲིས་པ་དང་ལྡན་པ་དག་ལ་ནི། བཀྲེས་པ་དང་སྐོམ་པས་ཚར་བཅད་པ་སྟེ། ལྟོགས་པ་དང་སྐོམ་པས་ཉེན་པར་བྱ་བའི་ཤུགས་ཀྱི་སྨྱུང་བའི་རྣམ་པས་ཉམས་སྨད་པར་བྱའོ། །ཞེས་བྱ་བའི་དོན་ཏོ། །ནད་ཀྱིས་ཉམ་ཐག་སྟོབས་འབྲིང་བརྟན། །སེར་བུ་ཚ་རྩོལ་གྱིས་སྨད་ན། །ཉམ་ཆུང་མི་བརྟ་སྨོས་ཅི་
དགོས། །ཞེས་བྱ་བ་ལ། ནད་ཀྱིས་གཟིར་ཞིང་ཉམ་ཐག་པའི་མི་སྟོབས་ཆེ་ཆུང་གཉི་ག་མ་ཡིན་པ། རན་པ་འབྲིང་ཙམ་ཡོད་པ་ནུས་པ་བརྟན་ཞིང་ཆེ་བའི་མི་ལ་ནི་སེར་བུ་བསིལ་བ་དང༌། ཉི་ཚན་དང༌། རྩོལ་བ་དེ་དག་ཤས་ཆེར་བསྟེན་པས་དེ་ཉམས་སྨད་པར་བྱ་ཞིང་སྨྱུང་བ་བྱའོ། །ཞེས་བྱ་བར་ངེས་པར་གནས་ནས། ཉམས་སྟོབས་ཆུང་ཞིང་ནད་ཅུང་ཟད་ཀྱིས་ཁྱབ་པའི་མི་ལྟ་སྨོས་ཀྱང་ཅི་དགོས་ཞེས་པའི་དོན་ཏོ། །བརྟ་བར་བྱས་པ་གང་ཡིན་པ་འདི་དག་དང་ཉམས་སྨད་ཅིང་སྨྱུང་བར་བྱ་བ་གང་ཡིན་པ་འདི་དག་ལས་གང་ཡང་བརྟ་བར་བྱ་བ་ལ། དེ་ལ་ནི་སྨྱུང་བས་མི་གསོལ། ཉམས་སྨད་པར་བྱ་བ་ལ་ནི་བརྟ་བས་མི་གསོ་ཞེས་བསྟན་ལ་དེ་ལྟར་ན་རིམས་ལ་སོགས་པ་སྨྱུང་བས་གསོ་བའི་ནད་ནི། བརྟ་བར་བྱ་བར་གྱུར་བས་ཐེ་ཚོམ་དུ་འགྱུར་ཏེ། ཅི་བརྟ་བར་བྱ་བར་འོས་པའི་མི་སྨྱུང་བས་གསོ་བའི་ནད་ཀྱིས་ཉམ་ཐག་ན། སྨྱུང་བས་གསོ་བ་ལ་འཇུག་པར་བྱའམ། འོན་ཏེ་བརྟ་བར་བྱ་བ་ཡིན་པ་སྨྱུང་བའི་ནད་ཡོད་ཀྱང༌། སྐྱེས་བུ་དེ་བརྟ་བར་བྱ་ཞེས་ཐེ་ཚོམ་དུ་གྱུར་བ་འདི་ལ། དེ་བསལ་བའི་ཕྱིར་འདིར་སྨྲས་པ་ཡིན་ཏེ། ཉམས་སྨད་བྱ་བ་བརྟ་མི་བྱ། །ཞེས་བྱ་བ་ཡིན་ཏེ། སྐྱེས་བུ་ཉམས་སྨད་ཅིང་སྨྱུང་བ་བྱ་བ་ནི་ནམ་ཡང་བརྟ་བར་མི་བྱ་སྟེ། ཅིའི་ཕྱིར་ཞེ་ན། བརྟ་བར་བྱ་བས་གསོ་བའི་ནད་ཀྱིས་ཉམ་ཐག་པའི་མི་ལ་སླར་ནད་སྐྱེད་པའི་འཇིགས་པ་ཡོད་པའི་ཕྱིར་རོ། །བརྟ་བྱ་ཉམས་སྨད་འཇམ་པོས་བྱ། །ཞེས་བྱ་བ་ནི། གང་ཡང་བརྟ་བར་བྱ་བའི་སྐྱེས་བུ་དེ། སྨྱུང་བར་བྱ་བའི་ནད་ཀྱིས་ཉམ་ཐག་ན། ཉམས་སྨད་པ་འཇམ་པོས་བྱ་ཞིང༌། སྨྱུང་བའི་རྣམ་པ་འཇམ་པོས་བྱས་ན། ཉམས་སྨད་པ་དེ་ལ་ནད་ལྡང་བར་མི་འགྱུར་རོ། །དེ་དག་ནི་བརྟ་བར་བྱ་བ་དག་ཚད་ཆེ་བ་དང་བར་མ་དང་ཆུང་བའི་ཟས་སྐོམ་གྱི་ཚད་དེ་དག་གི་དོན་ཤེས་པར་བྱ་བའི་ཕྱིར། དེ་སྐད་བཤད་པ་ཡིན་ནོ། །ཡང་ན་ཡུལ་དང་སྟོབས་སོགས་ལས། །རིགས་པས་དེ་ནི་ཉེ་བར་སྤྱད། །ཅེས་བྱ་བ་ནི། སྨྱུང་བར་བྱ་བ་བརྟ་བར་མི་བྱ་བ་དང༌། བརྟ་བར་བྱ་བ་ཉམས་སྨད་པ་འཇམ་པོས་བྱ་བ་ནི་ཐམས་ཅད་དུ་ངེས་པ་ཡིན་མོད་ཀྱི། འོན་ཀྱང་གཞན་གྱི་ནི་ཡང་ན་ཡུལ་དང་སྟོབས་ལ་སོགས་པ་
ལས་རིགས་པའི་སྦྱོར་བས་བརྟ་བར་བྱ་བ་སྨྱུང་བའི་ནད་ཀྱིས་ཉམ་ཐག་པ་དེའི་གསོ་བ་ཉེ་བར་སྤྱད་པར་བྱའོ། །སོགས་པའི་སྒྲས་ནི་ལུས་ཟུངས་ལ་སོགས་པའི་སྟོབས་ལས་ཀྱང་ཉེ་བར་བྱེད་ལ། དེ་བཞིན་དུ་བརྟ་བར་བྱ་བ་ཡང་ཉམས་སྨད་པ་འཇམ་པོས་བྱ་བ་ཡིན་པས། ཆེད་འགའ་ཉམས་བརྟ་པ་དང་ཉམས་སྨད་པ་འདྲེན་མའི་མཚན་ཉིད་ཀྱིས་གསོ་བས་ནད་གསོ་བ་ལ་ཉེ་བར་སྤྱད་པར་བྱ་སྟེ། འདིར་བརྟ་བར་བྱ་བ་ལ་ཉམས་སྨད་པ་འཇམ་པོས་གསོ་དགོས་པར་ངེས་པ་ཁོ་ན་ནི་མ་ཡིན་ཏེ། གཞན་དུ་ན་ཡུལ་དང་དུས་ཀྱི་དབང་དང་རིགས་པའི་སྦྱོར་བའི་དབང་གིས་གསོ་བས་ཀྱང་དེ་ལ་ཉེ་བར་སྤྱད་པར་བྱར་རུང་བ་ཡིན་ནོ། །བརྟ་བར་བྱ་བ་ལས་ཅི་ཞིག་འབྱུང་བར་འགྱུར་ཞེ་ན། དེའི་ཕྱིར་སྨྲས་པ་ནི། བརྟ་བས་སྟོབས་ནི་འཕེལ་བ་དང༌། །དེ་ཡིས་བསྒྲུབ་བྱའི་ནད་ཟད་འགྱུར། །ཞེས་བྱ་བ་ཡིན་ཏེ། སྐྱེས་བུ་བརྟ་བར་བྱས་པར་གྱུར་ན། སྟོབས་དང་ནུས་པ་སྐྱེ་བར་འགྱུར་བ་དང༌། དེ་བཞིན་དུ་ལུས་ཟུངས་ལ་སོགས་པ་འཕེལ་ཞིང་རྒྱས་པར་འགྱུར་བ་དང༌། དེ་བཞིན་དུ་དེས་བསྒྲུབ་ཅིང་གསོ་བར་བྱ་བའི་ནད་ཟད་པར་འགྱུར་རོ། །དེ་ཡིས་ཞེས་བྱ་བ་ནི་བརྟ་བ་ལ་སྙེགས་ཏེ། བརྟ་བར་བྱ་བས་གསོ་ཞིང་བསྒྲུབ་པར་བྱ་བའི་ནད་ཀྱིས་ཉམ་ཐག་པ་ལ་སོགས་པ་གང་ཡིན་པ་དེ་རྣམས་འཇིག་ཅིང་མེད་པར་འགྱུར་རོ། །སྐྱེས་བུ་སྨྱུང་བར་བྱས་པ་དག་ལ་མཚན་ཉིད་ཅི་ཞིག་འབྱུང་བར་འགྱུར་ཞེ་ན། དེའི་ཕྱིར་སྨྲས་པ་ནི། སྨྱུང་བས་དབང་གསལ་དྲི་མ་རྣམས། །མི་སྲི་ཁོང་ཡང་ཡི་ག་འབྱེ། །བཀྲེས་དང་སྐོམ་པ་ལྷན་ཅིག་འབྱུང༌། །དང་ག་སྙིང་དང་སྒྲེགས་པ་དག །ནད་ཀྱི་རྩེ་ཞིལ་སྤྲོ་བ་ཆེ། །སྙོམ་བག་མེད་པ་དག་ཏུ་འགྱུར། །ཞེས་བྱ་བ་ཡིན་ཏེ། སྐྱེས་བུ་སྨྱུང་བ་བྱས་ཤིང་ཉམས་སྨད་པར་གྱུར་ན་དབང་པོ་གསལ་བ་སྟེ། དབང་པོའི་ཚོགས་དག་ཅིང་གསལ་བར་འགྱུར་བ་དང་དེ་བཞིན་དུ་བཤང་བ་དང་གཅི་བ་ལ་སོགས་པའི་དྲི་མ་རྣམས་མི་སྲི་ཞིང་བདེ་བར་འབྱུང་བར་འགྱུར་བ་དང༌། དེ་བཞིན་དུ་ཁོང་ཡང་ནི་ལུས་བསྐྱོད་པ་ཡང་བ་ཉིད་དང༌། ཡི་ག་འབྱེ་བ་སྟེ་ཟས་ལེན་ཅིང་འདོད་པ་དང༌། དེ་བཞིན་དུ་བཀྲེས་པ་དང་སྐོམ་པ་ལྷན་ཅིག་ཏུ་དུས་གཅིག་
གི་ཚེ་འབྱུང་ཞིང་སྐྱེ་བར་འགྱུར་བ་དང༌། དེ་བཞིན་དུ་དང་ག་འམ། ལྐོག་མ་དག་པར་འགྱུར་བ་དང༌། སྙིང་དག་པར་འགྱུར་བ་དང༌། སྒྲེགས་པ་དག་ཅིང་མནམ་པ་མེད་པར་འགྱུར་བ་དང༌། དེ་བཞིན་དུ་སྨྱོང་བར་བྱ་བས་གསོ་དགོས་པའི་ནད་རྩེ་ཞིལ་ཞིང་སྙི་བར་འགྱུར་བ་དང༌། དེ་བཞིན་དུ་སྤྲོ་བ་ཆེ་སྟེ་བྱ་བ་རྣམས་ལ་བརྩོན་ཞིང་འབད་ནུས་པར་འགྱུར་བ་དང༌། དེ་བཞིན་དུ་སྙོམ་བག་དང༌། སྒྱིད་ཞན་པ་མེད་པ་དག་སྐྱེ་བར་འགྱུར་རོ། །དེ་དག་ཉིད་ཧ་ཅང་ཐལ་ཆེས་པར་ཚད་ལས་ལྷག་པར་བྱས་པའི་ཉེས་པ་སྨྲས་པ་ནི། དེ་དག་ཚད་ལ་སོགས་པ་དང། །མི་ལྡན་སྟེན་པར་བྱེད་པ་དག །རབ་སྦོམ་རབ་ཏུ་སྐེམ་སོགས་འགྱུར། །དེ་ཡང་སྨན་བཅས་བཤད་པ་ཡིན། །ཚུལ་ནི་ཤིན་ཏུ་བརྟ་བ་དང༌། །ཉམས་སྨད་དེ་ཉིད་ལས་ཤེས་བྱ། །ཞེས་བྱ་བ་ཡིན་ཏེ། བརྟ་བ་དང་ཉམས་པ་དེ་དག་ཚད་ལ་སོགས་པ་དང་མི་ལྡན་པར་བསྟེན་པ་སྟེ། ཚད་ལས་ལྷག་པར་བསྟེན་ཅིང་སྤྱོད་པ་དག་ནི་གོ་རིམས་བཞིན་དུ་རབ་ཏུ་སྦོམ་པ་ལ་སོགས་པ་དང༌། རབ་ཏུ་སྐེམ་པ་ལ་སོགས་པ་བྱེད་བར་འགྱུར་ཏེ། དེ་ཡང་ཡུལ་དང་དུས་ལ་སོགས་བ་ལ་མ་ལྟོས་པར་བརྟ་བ་ཧ་ཅང་ཤས་ཆེ་བར་བསྟེན་པས་ནི་ཤིན་ཏུ་སྦོམ་ཞིང་ཚོ་དྲགས་པ་ལ་སོགས་པ་སྐྱེད་པར་བྱེད་པར་འགྱུར་རོ། །སྨྱུང་བ་ཡང་དེ་བཞིན་དུ་བྱས་ན་ཤིན་ཏུ་སྐེམ་པ་ལ་སོགས་པ་སྐྱེད་བར་བྱེད་པར་འགྱུར་རོ། །དེ་ཡང་ཞེས་པ་ཤིན་ཏུ་ཚོ་བ་དང༌། ཤིན་ཏུ་སྐེམ་པ་ལ་སོགས་པ་དེ་རྣམས་དང་དེ་གཉིས་ཀྱི་སྨན་གང་དང་གང་ཡིན་པ་དེ་དག་ཀྱང་ལེའུ་འདིར་བཤད་པ་ཡིན་ནོ། །དེ་བཞིན་དུ་ཚུལ་དེའི་མཚན་ཉིད་ཤིན་ཏུ་བརྟ་བ་དང་ཉམས་སྨད་པ་དེ་གཉིས་ལས་གོ་རིམས་བཞིན་དུ་ཤེས་ཤིང་རྟོགས་པར་བྱའོ། །དེ་ལས་ཤིན་ཏུ་བརྟ་དྲགས་པ་སྨན་དང་བཅས་པ་སྨྲས་པ་ནི། ཤིན་ཏུ་ཚོ་ཆེས་འབྲུམ་གཅིན་སྙི། །རིམས་དང་དམུ་རྫིང་མཚན་བར་རྡོལ། །ལུས་རྨོངས་གཅིན་སྲི་བེའུ་སྣབས་ཆགས། །མཛེ་ལ་སོགས་པ་མི་བཟད་འབྱུང༌། །ཞེས་བྱ་བ་ལ་སོགས་པ་ཡིན་ཏེ། བརྟ་བ་ཧ་ཅང་དྲགས་པར་བསྟེན་ན་ཤིན་ཏུ་ཚོ་ཆེས་པ་ནས། མཛེ་ལ་སོགས་པའི་བར་དུ་སྐྱེད་པར་བྱེད་དོ། །ཤིན་ཏུ་ཚོ་ཆེས་པའི་མཚན་ཉིད། །དྲང་སྲོང་ཙ་ར་ཀས་མཛད་པ། །
ཤ་དང་ཚིལ་རབ་འཕེལ་བ་ཡིས། །ནུ་མ་གསུས་པ་མཇུག་མ་འཕྱང༌། །དགོས་མེད་འཕེལ་བར་རྩོམ་པ་ཡི། །མི་ནི་ཤིན་ཏུ་ཚོ། ཞེས་བྱ་བ་ཡིན་ནོ། །འབྲུམ་བུ་ནི་འབྲས་ཀྱི་ཕྲེང་བའོ། །གཅིན་སྙི་བ་ལ་སོགས་པ་ནི་འོག་ནས་བཤད་པའོ། །དེ་རྣམས་ཀྱི་ནི་སྨན་སྨྲས་པ་ནི། །དེ་ལ་ཚིལ་དང་རླུང་བད་ཀན། །སེལ་བར་བྱེད་པ་ཐམས་ཅད་ཕན། །ཛུ་རྣ་ཁྲེ་རྒོད་ཀུ་ལངྠ། །ནས་དང་སྲན་ཆུང་མོན་སྲན་སྡེའུ། །དར་བ་དར་རྙིང་ཞོ་ག་ཆུ། །སེམས་ལས་བྱ་དང་མི་ཉལ་བྱ། །ཞེས་བྱ་བ་ལ་སོགས་པ་ཡིན་ཏེ། དེ་ལ་ཞེས་པ་ཚོ་ཆེས་པ་ལ་སོགས་པ་དེ་རྣམས་ལ། ཚིལ་དང་རླུང་དང་བད་ཀན་སེལ་བར་བྱེད་པའི་ཟས་དང་སྨན་དང་སྤྱོད་ལམ་ཐམས་ཅད་ཕན་པ་ཡིན་ཏེ། ཛུར་ན་དང༌། ཁྲེ་རྒོད་དང༌། རྒྱ་སྲན་ཀུ་ལངྠ་དང༌། ནས་ནི་བཟའ་བའི་ཕྱིར་བསྟེན་ཏོ། །མོན་སྲེན་སྡེའུ་ནི་ཚོད་མའི་དོན་དུ་བྱའོ། །སྲན་ཆུང་དང་དར་བ་དང་དར་རྙིང་དང༌། ཞོ་ག་ཆུ་ནི་བཏུང་བའི་དོན་དུ་བྱའོ། །སེམས་ལས་དང་མི་ཉལ་བ་ནི་སྤྱོད་ལམ་གྱི་དོན་དུའོ། །སྦྱང་བ་ནི་ཚིལ་དང་བད་ཀན་ལ་སོགས་པ་དག་པར་བྱ་བའི་ཕྱིར་རོ། །སྦྲང་རྩི་འབྲས་བུ་གསུམ་པའམ། །སླེ་ཏྲེས་གླ་སྒང་ཨ་རུ་ར། །ཞེས་བྱ་བ་ནི། ཤིན་ཏུ་ཚོ་བ་ལ་སོགས་པ་དེ་རྣམས་ལ་སྐྱེས་བུས་འབྲས་བུ་གསུམ་གྱི་ཕྱེ་མ། སྦྲང་རྩི་དང་སྦྱར་བ་བཟའ་བའམ། ཡང་ན་སླེ་ཏྲེས་དང་སྦྲང་རྩིར་སྦྱར་བ་བཟའ་བའམ། ཡང་ན་གླ་སྒང་དང་སྦྲང་རྩིར་སྦྱར་བ་བཟའ་བར་བྱའོ། །སྐྱེར་ཁཎྜ་དང་རྩ་བ་ནི། །ཆེན་པོ་ལྔ་དང་གུ་གུལ་དང༌། །བྲག་ཞུན་གྱི་ནི་སྦྱོར་བ་དང༌། །ཨག་ནི་མན་ཐའི་ཁུ་བཅས་ཕན། །ཞེས་བྱ་བ་ནི། ཤིན་ཏུ་ཚོ་ཆེས་པ་དེ་ལ་སྐྱེར་ཁཎྜའི་སྦྱོར་བ་ཕན་ནོ། །དེ་བཞིན་དུ་བིལ་བའི་རྩ་བ་ལ་སོགས་པ། རྩ་བ་ཆེན་པོ་ལྔའི་སྦྱོར་བ་ཕན་ནོ། །དེ་བཞིན་དུ་གུ་གུལ་གྱི་སྦྱོར་བ་དང༌། བྲག་ཞུན་གྱི་སྦྱོར་བ་ཨག་ནི་མན་ཐ་ཞེས་བྱ་བ། ཏ་ཁ་རའི་ཁུ་བ་དང་བཅས་པ་ཡང་ཕན་པ་ཡིན་ནོ། །ནས་ཚིག་འཁུས་ཐལ་བྱི་དང་ག །བཅའ་སྒ་ལྕགས་ཕྱེ་སྦྲང་རྩི་དང༌། །ནས་དང་སྐྱུ་རུའི་ཕྱེ་མ་ཡི། །སྦྱོར་བས་ཤིན་ཏུ་ཚོ་ནད་སེལ། །ཞེས་བྱ་བ་ནི། ནས་ཚིག་འཁུས་པའི་ཐལ་བ་ལ་སོགས་པའི་སྦྱོར་བ་འདི་སྦྲང་རྩི་དང་སྦྱར་ཏེ། བལྡགས་ན་ཤིན་ཏུ་སྦོམ་ཞིང་ཆོ་ཆེས་པའི་ནད་སེལ་བར་
བྱེད་དོ། །ནས་ཚིག་འཁུས་པའི་ཐལ་བ་ནི་ཡ་བཀྵ་རའོ། །ལྕགས་ཕྱེ་ནི་ལྕགས་ནག་པོའི་ཕྱེ་མའོ། །གཞན་དག་ནི་གྲགས་པར་ཟད་དོ། །ཚ་གསུམ་འབྲས་གསུམ་བུ་ཙེ་ཤེལ། །ཤི་ཀྲུ་བྱི་དང་པོ་སྠི་ར། །ཤིང་ཀུན་གོ་སྙོད་ཁ་རུ་ཚ། །ལ་ལ་ཕུད་དང་འུ་སུ་དང༌། །ཀྲུ་ཏྲུག་ཏྲེས་དང་སེར་པོ་གཉིས། །བྲི་ཧ་གཉིས་དང་ཆུ་རྩི་མོ། །ཧ་པུ་ཤ་དང་པ་ཐ་དང༌། །ཀེ་པུ་ཀ་ཡི་རྩ་བ་སྟེ། །འདི་རྣམས་ཕྱེ་མ་མར་སྦྲང་རྩི། །ཏིལ་མར་དག་ནི་ཆ་སྙོམས་པ། །ནས་ཕྱེའི་ཆ་ནི་བཅུ་དྲུག་བསྐྱེད། །སྦྱར་བ་འཐུངས་ན་དེ་འཇོམས་སོ། །ཤིན་ཏུ་ཤས་ཆེའི་བདག་ཉིད་ཀུན། །གཞན་ཡང་དེ་འདྲའི་ནད་རྣམས་དང༌། །སྙིང་ནད་མིག་སེར་ཤ་བཀྲ་དང༌། །ལུད་དབུགས་མི་བདེ་ལྐོག་ནད་སེལ། །བློ་དང་ཡིད་གཞུངས་སེམས་དྲན་བྱེད། །ཟས་འཇུ་ཕོ་བའི་དྲོད་ཀྱང་སྐྱེད། །ཅེས་བྱ་བ་ནི། འདིར་ཚ་བ་གསུམ་དང་འབྲས་བུ་གསུམ་ལ་སོགས་པའི་སྨན་ཉི་ཤུ་རྩ་བཞི་བཤད་པ་འདི་རྣམས་མ་ལུས་པའི་ཕྱེ་མ་དང༌། སྦྲང་རྩི་དང་མར་དང་ཏིལ་མར་ཆ་མཉམ་པར་བྱའོ། །དེ་ནས་ཕྱེ་མ་ཆ་གཅིག །ཆ་གཉིས་ལ་སྦྲང་རྩི། ཆ་གསུམ་པ་མར། ཆ་བཞི་པ་ཏིལ་མར། ནས་ཕྱེ་ཕྱེ་མ་ལ་ལྟོས་པའི་བཅུ་དྲུག་འགྱུར་བྱའོ། །དེ་ལ་འདི་སྐད་སྟོན་པ་ཡིན་ཏེ། ཚ་བ་གསུམ་ལ་སོགས་པའི་ཕྱེ་མ་སྲང་གཅིག །སྦྲང་རྩི་དང་མར་དང་ཏིལ་མར་སྲང་རེ་རེ། ནས་ཀྱི་ཕྱེ་མ་སྲང་བཅུ་དྲུག་འགྱུར་དུ་བྱ་བའི་དོན་ནོ། །དེ་ལ་ཚ་བ་གསུམ་ནི་པི་པི་ལིང་དང་ན་ལེ་ཤམ་དང་བཅའ་སྒ་ཞེས་བྱའོ། །འབྲས་བུ་གསུམ་ནི་ཨ་རུ་ར་དང༌། སྐྱུ་རུ་ར་དང༌། བ་རུ་ར་འོ། །པུ་ཤེལ་ཙེ་ནི་ཀ་ཏུ་ཀའོ། །ཤི་ཀྲུ་ནི་སོ་བན་ཛ་ནའོ། །སྠི་ར་ནི་ས་ལ་པརྞིའོ། །ཁ་རུ་ཚ་ནི་སཽ་བར་ཚ་ལའོ། །གོ་སྙོད་ནི་ཙ་ར་ཀའོ། །འུ་སུ་ནི་འུ་སུའི་འབྲས་བུའོ། །སེར་པོ་གཉིས་ནི་ཡུང་བ་དང་སྐྱེར་པའོ། །བྲི་ཧ་ཏི་གཉིས་ནི་ཀཎྜ་ཀ་རི་དང༌། བྲི་ཧ་ཏིའོ། །ཧ་པུ་ཤ་ནི་བྲ་མོ་ཤ་ཞེས་བྱ་བ་འདབ་མ་སྔོ་བ་ཞིག་གོ །ཀེ་པུ་ཀའི་རྩ་བ་ནི་ཆུའི་པི་པི་ལིང་གི་རྩ་བ་སྟེ། དེ་དག་ཐམས་ཅད་ཀྱི་ཕྱེ་མ་རྫས་གཤེར་བ་དང་བསྲེས་ཏེ་འཐུངས་ན་ཤིན་ཏུ་ཚོ་ཆེས་པ་ལ་སོགས་པའི་ནད་ཐམས་ཅད་སེལ་བར་བྱེད་ཅིང༌། དེ་བཞིན་དུ་བརྟས་པ་ལས་བྱུང་བའི་ནད་དེ་དང་ཚུལ་མཐུན་པ་སེལ་བར་བྱེད་པ་དང༌།
དེ་བཞིན་དུ་སྙིང་ནད་ལ་སོགས་པ་སེལ་བར་བྱེད་པ་དང༌། དེ་བཞིན་དུ་བློ་དང་ཡིད་གཞུངས་པ་དང་དྲན་པ་གསལ་བར་བྱེད་པ་དང༌། དེ་བཞིན་དུ་ཕོ་བའི་དྲོད་སྐྱེད་ཅིང༌། མེ་དྲོད་ཉམས་པ་འཕེལ་བར་བྱེད་པ་ཡིན་ནོ། །ཤིན་ཏུ་ཉམས་སྨད་ཅིང་སྨྱུང་བ་དྲགས་བ་ལས་ནད་དུ་འགྱུར་བར་བཤད་པ་ནི། སྨྱུང་དྲགས་རབ་སྐེམ་མགོ་འཁོར་ལུད། །སྐོམ་དད་ཆེ་ཞིང་ཡི་ག་འཆུས། །སྣུམ་དྲོད་གཉིད་མིག་རྣ་བ་ཉམས། །ཁུ་བ་གཟི་མདངས་སྐད་གསང་ཟད། །ཆུ་སོ་སྙིང་ཀླད་བྱིན་པ་བརླ། །དཀུ་དོ་རྩིབ་ལོགས་ན་རིམས་འདེབས། །ཚིག་མང་སྟོད་དུ་རླུང་ནད་འཇུག །རྨྱ་ཞིང་སྐྱུག་བྲོ་རུས་ཚིགས་ན། །བཤང་གཅི་སྲི་བ་ལ་སོགས་པ། །སྨྱུང་བ་དྲགས་ལས་འབྱུང་བར་འགྱུར། །ཞེས་བྱ་བ་ཡིན་ཏེ། ཤིན་ཏུ་སྨྱུང་བ་དྲག་ཅིང༌། ཉམས་སྨད་པ་དྲགས་ཆེས་བ་ལས། སྐེམ་བ་ལ་སོགས་བ་འབྱུང་བར་འགྱུར་རོ། །དེ་ལ་རབ་ཏུ་སྐེམ་པ་ནི་ཤིན་ཏུ་སྐེམས་ཤིང་ལུས་ཟུངས་ཟད་པ་ཉིད་དོ། །མགོ་འཁོར་བ་ནི་འཁོར་ལོ་ལ་བསྐྱོན་པ་ལྟར་འཁོར་བས་ན་མགོ་འཁོར་བའོ། །ལུད་བ་ནི་ལུང་པ་མང་བའོ། །སྐོམ་དད་ཆེ་བ་ནི་སྐོམ་ནད་ཀྱིས་གདུངས་པའོ། །ཡི་ག་འཆུས་པ་ནི་ཟས་ལ་མངོན་པར་མི་དགའ་བའོ། །སྣུམ་ལ་སོགས་པ་བརྒྱད་ནི་ཟད་པ་ཞེས་བྱ་བ་སྦྱར་ཏེ། དེས་ན་སྣུམ་ཟད་པ་དང༌། མེ་དྲོད་ཟད་པ་ནས་སྐད་གདངས་ཀྱི་གསང་ཟད་པའི་བར་དུའོ། །རིམས་ཀྱིས་འདེབས་པ་ནི་རིམས་ནད་འབྱུང་བའོ། །ཚིག་མང་བཞི་འབྲེལ་བ་མེད་པའི་ཚིག་མང་དུ་སྨྲ་བའོ། །སྟོད་དུ་རླུང་འཇུག་པ་ནི་རོ་སྟོད་དུ་རླུང་ཞུགས་པའོ། །རྨྱ་བ་ནི་ལུས་ཀྱི་ཉམས་སྟོབས་ཆུང་བའོ། །སྐྱུག་བྲོ་བ་ནི་ཟས་ལ་སོགས་པ་མི་འདོད་བའོ། །རུས་ཚིགས་ན་བ་ནི་རུས་པ་རྣམས་དང་དེ་བཞིན་དུ་ཚིགས་རྣམས་བཅག་ཅིང་གྲུམ་པ་སྙམ་དུ་སེམས་ཤིང་ན་བའོ། །བཤང་གཅི་སྲི་བ་ལ་སོགས་པ་ཞེས་བྱ་བ་ལ་སོགས་པའི་སྒྲས་ནི་རླུང་ལས་བྱུང་བའི་ནད་སྣ་ཚོགས་བ་བསྡུའོ། །རབ་ཏུ་ཚོ་བས་སྐེམ་ཉིད་མཆོག །ཤིན་ཏུ་ཚོ་དྲགས་པ་ཡི་སྨན། །ཤིན་ཏུ་ཚིལ་ཆེས་མེ་རླུང་སེལ། །བརྟ་དང་ཉམས་སྨད་ཡོད་མ་ཡིན། །ཞེས་བྱ་བ་ནི། སྐེམ་པ་ཞེས་བྱ་བ་འདི་ནད་ཆེན་པོ་ཡིན་མོད་ཀྱི་འོན་ཀྱང་རབ་ཏུ་ཚོ་ཞིང་སྦོམ་པ་བས་སྐེམ་
པ་མཆོག་ཡིན་ཏེ། འདིར་ཤིན་ཏུ་ཚོ་བ་ལས་སྐེམ་པ་མཆོག་ཡིན་ནོ། །ཞེས་བྱ་བ་འདི་ལ་ཤིན་ཏུ་ཚོབ་བས་ཤིན་ཏུ་སྐེམ་པ་མཆོག་ཡིན་པ་ལ་བྱའི། ཅུང་ཟད་སྦོམ་པ་ལས་ཅུང་ཟད་སྐེམ་པ་མཆོག་མ་ཡིན་ནོ། །དེ་ཡང་གང་གི་ཕྱིར་ཤིན་ཏུ་ཚོ་ཞིང་སྦོམ་ཆེས་པ་དང། ཤིན་ཏུ་སྐེམ་པ་ཉིད་སྨྱུང་བ་དང་བརྟ་བས་གསོ་བར་བྱ་བ་ཉིད་བསྟན་གྱི། སྦོམ་པོ་དང་སྐེམ་པོ་ཐ་མལ་ཙམ་ནི་མ་ཡིན་ནོ། །ཅིའི་ཕྱིར་སྦོམ་པོ་བས་སྐེམ་པོ་མཆོག་ཉིད་ཡིན་པའི་རིགས་པ་འདིར་སྨྲས་པ་ནི། ཤིན་ཏུ་ཆོ་དྲགས་པའི་སྨན་ཞེས་བྱ་བ་ལ་སོགས་པ་ནི་མ་ཡིན་ཏེ། ཚིལ་ཆེས་བ་དང༌། ཤིན་ཏུ་མེ་དྲོད་ཆེས་པ་དང༌། རླུང་འཕེལ་བ་གང་ཡིན་པ་དེ་ལྟ་བུ་ཡོད་པ་མ་ཡིན་ནོ། །ཤིན་ཏུ་ཚིལ་ཆེས་པ་དང་མེ་དྲོད་དང་རླུང་སེལ་བའི་སྨན་དེ་ལྟ་བུ་ཤིན་ཏུ་ཚོ་ཆེས་བའི་བརྟ་བ་དང་ཉམས་སྨད་པར་ནུས་པ་མ་ཡིན་ནོ། །དེ་ལ་སྦོམ་པོའི་བརྟ་བའི་སྨན་གྱིས་སྦོམ་པོ་བཟློག་པའམ། ཉམས་སྨད་པར་ནུས་པ་མ་ཡིན་ཏེ། གང་གི་ཕྱིར་བརྟ་ཞིང་འཕེལ་བར་བྱེད་པ་ནི་ཤ་ལ་སོགས་པས་བྱེད་ལ། དེས་ནི་ཚིལ་འཕེལ་བར་བྱེད་དེ། བརྟ་བའི་རང་བཞིན་ཡིན་པའི་ཕྱིར་ཚིལ་ཁོ་ན་སོགས་པར་བྱེད་དོ། །ཉམས་སྨད་པའི་སྨན་ཁྲེ་རྒོད་ལ་སོགས་པ་གང་ཡིན་པ་འདི་ནི་ཉམས་སྨད་པའི་རང་བཞིན་ཅན་ཡིན་པའི་ཕྱིར་རླུང་འཕེལ་བར་བྱེད་དོ། །དེ་ནི་འདི་སྐད་སྟོན་པ་ཡིན་ཏེ། གལ་ཏེ་ཤིན་ཏུ་སྦོམ་ཆེས་པ་ལ་བརྟ་བའི་སྨན་བྱིན་ན་ནི། དེས་ཚིལ་དང་མེ་དྲོད་འཕེལ་བར་བྱེད་ཅིང་རླུང་འགྲིབ་པར་བྱེད་དོ། །འོན་ཏེ་ཉམས་སྨད་པ་སྨྱུང་བ་བྱས་ན་དེས་ཚིལ་ཟད་པར་བྱེད་ཀྱི་རླུང་དང་མེ་དྲོད་ལ་གནོད་པར་མི་བྱེད་དོ། །དེ་བས་ན་ཤིན་ཏུ་ཚོ་ཆེས་པ་ལ་བརྟ་བ་ཡང་བྱ་དཀའ་ལ། ཉམས་སྨད་པར་ཡང་ནུས་པ་མ་ཡིན་ནོ། །ཞེས་བྱ་བ་ནི་རིགས་པ་ཡིན་ཏེ། ཤིན་ཏུ་ཆོ་ཆེས་པ་ལ་གང་ཚིལ་ཟད་པར་བྱ་བ་དང༌། མེ་དྲོད་སེལ་བ་དང། རླུང་སེལ་བ་དེ་ལ་ཕན་པ་ཡིན་ན། དེ་ལྟ་བུ་མ་ཡིན་ནོ། །གང་ཞིག་མངར་དང་སྣུམ་བག་བཟའ། །བསོད་བདེ་དག་གིས་སྐེམ་པ་སེལ། །དེ་ལས་ཤིན་ཏུ་བཟློག་པ་དག །ངེས་པར་བསྟེན་པས་སྦོམ་ཉིད་སེལ། །ཞེས་པ་འདི་ནི་སྐེམ་པ་མཆོག་ཡིན་པའི་གཏན་
ཚིགས་གཞན་དག་བསྟན་པ་ཡིན་ཏེ། སྐེམ་པ་ཉིད་ནི་གང་གི་ཕྱིར་ཟས་མངར་བག་ལ་སོགས་པས་བདེ་ཞིང་དགའ་བ་མེད་པས་ཞི་བར་འགྱུར་བས། དེའི་ཕྱིར་སྦོམ་པོ་བས་སྐེམ་པོ་ཉིད་མཆོག་ཡིན་གྱི་སྦོམ་པོ་ནི་དེ་ལྟ་མ་ཡིན་ཏེ། གང་གི་ཕྱིར་སྦོམ་པོ་ཉིད་སྐེམ་པར་བྱས་པའི་གསོ་བའི་ཐབས་ལས་ཤིན་ཏུ་གོ་བཟློག་པའི་ཚུལ་བསྟེན་པས་ཟློག་པར་བྱེད་དེ། ཤིན་ཏུ་གོ་བཟློག་པ་ནི་ཕལ་ཆེར་ཁ་བ་དང༌། ཚ་བ་དང༌། བསྐ་བ་དང༌། ཟས་སྐོམ་དང་སྨན་རྩུབ་མོ་བསྟེན་ན། གདོད་ཤིན་ཏུ་ཚོ་ཆེས་པའི་སྦོམ་པོ་སེལ་ཏེ། ཚིལ་ཟད་པའི་རྒྱུ་རྣམས་ཀྱིས་དེ་འབྱུང་གི་ཟས་དང་སྐོམ་ལ་སོགས་པ་མངར་ཞིང་སྣུམ་པག་ཟོས་ཏེ། བསོད་ཅིང་ཚིམ་པར་བྱེད་པས་ནི་མ་ཡིན་ནོ། །དེ་ལྟར་ན་སྦོམ་པ་དང་སྐེམ་པ་འདི་གཉིས་ནད་དུ་མཉམ་པ་ཡིན་དུ་ཟིན་ཀྱང༌། སྦོམ་པོར་གྱུར་པ་ནི་གསོ་དཀའ་བ་ཡིན་པས་ན་ཡུན་རིང་འགོར་བའི་ཕྱིར་སྐེམ་པོ་ཉིད་མཆོག་ཡིན་ནོ། །སྐེམ་པོ་དེའི་སྨན་ཅི་ལྟ་བུ་ཡིན་ཞེ་ན། དེའི་ཕྱིར་སྨྲས་པ་ནི། དེ་ལ་བཟའ་བཏུང་སྨན་རྣམས་ནི། །བརྟ་བར་བྱེད་པ་ཐམས་ཅད་སྦྱར། །ཞེས་བྱ་བ་ལ་སོགས་པ་ཡིན་ཏེ། སྐྱེས་བུ་སྐེམ་པོ་དེ་ལ་བཟའ་བ་དང་བཏུང་བ་དང་སྨན་དུ་འབྲས་དྲུག་ཅུའི་ཆན་དང་ཤ་དང་འོ་མ་དང༌། བུ་རམ་ཤིང་གི་ཁུ་བ་ལ་སོགས་པ་དང༌། ཚོ་བར་བྱེད་པ་དང༌། བརྟ་བར་བྱེད་པའི་སྨན་གྱི་རིགས་ཐམས་ཅད་བརྟ་བའི་དོན་དུ་སྦྱར་བར་བྱའོ། །སེམས་ལས་མེད་དང་དགའ་བ་དང༌། །ངེས་པར་བརྟ་བར་བྱ་བ་དང༌། །གཉིད་ཆེར་ལོག་པས་སྐེམ་པ་ཡང༌། །ཕག་དང་འདྲ་བར་ལུས་རྒྱས་འགྱུར། །ཞེས་བྱ་བ་ལ། སེམས་ལས་མེད་པ་ནི་མྱ་ངན་གྱིས་གདུང་བ་མེད་པའམ། བྱ་བའི་རིགས་གང་ཡིན་པ་གང་ཡང་ཡིད་ལ་དཔྱོད་པ་མེད་པའོ། །དགའ་བ་ནི་ཉམས་བག་ཏུ་གནས་པའོ། །ངེས་པར་བརྟ་བར་བྱ་བ་ནི་ཤིན་ཏུ་ཚིམ་པར་བྱ་བ་དང༌། དེ་བཞིན་དུ་ལེགས་པར་གཉིད་ལོག་ཅིང་ཉལ་བས། སྐེམ་པོ་དག་རྣམ་པ་ཐམས་ཅད་དུ་ཤ་རྒྱས་པར་འགྱུར་རོ། །དེ་ཡང་དཔེར་ན་ཕག་དང་འདྲ་བ་སྟེ། སྐེམ་པོའི་གནས་སྐབས་སུ་ཤ་རྒྱས་པའི་རྒྱུ་གཞན་པས་གཉིད་ཆེར་ལོག་པ་རྒྱུའི་གཙོ་བོ་ཡིན་པར་བསྟན་པར་
བྱ་བའི་ཕྱིར་དཔེ་ཕག་པ་དང་སྦྱར་བ་ཡིན་ནོ། །དེ་ལྟར་སེམས་ལས་མེད་པ་དང༌། དགའ་བ་དང་ཤིན་ཏུ་བརྟ་བ་དང༌། ལེགས་བར་གཉིད་ལོག་པས་ལུས་ཟུངས་ཐམས་ཅད་འཕེལ་ཞིང་རྒྱས་པར་འགྱུར་རོ། །ལུས་ནི་བརྟས་ཤིང་ཚོ་བྱེད་པ། །ཤ་དང་འདྲ་བ་གང་ཡང་མེད། །ཤ་མི་ཟ་ལ་ཤ་ཟའི་ཤས། །ལུས་ནི་མཆོག་ཏུ་བརྟས་བྱེད་ཡིན། །ཞེས་བྱ་བ་ལ། གང་གི་ལུས་བརྟས་ཤིང་ཚོ་བར་བྱེད་པ་འདི་ལ་ཟས་གང་ཞིག་ཟོས་ཤིང་ལོངས་སྤྱད་པ་ན། ཤ་དང་འདྲ་བར་ལུས་པ་རྟས་ཤིང་ཚོ་བར་བྱེད་པའི་ཁ་ཟས་ཀྱི་རིགས་གང་ཡང་ཡོད་པ་མ་ཡིན་ནོ། །དེ་ལས་ཁྱད་པར་དུ་ཤ་ཟ་རྣམས་ཀྱི་ཤ་ནི་ཤས་སྐྱེད་ཅིང་འཕེལ་བར་བྱེད་པ་ཡིན་བས། ཤིན་ཏུ་ཡང་ལུས་བརྟས་ཤིང་འཕེལ་བར་བྱེད་པ་ཡིན་ནོ། །སྦོམ་པོ་དང་སྐེམ་བོ་དེ་གཉིས་ཀྱི་གསོ་བའི་ཐབས་མདོར་བསྟན་པའི་ཕྱིར་སྨྲས་པ་ནི། སྦོམ་ལ་ཉམས་སྨད་ལྕི་བས་བྱ། །དེ་ལས་བཟློག་པ་སྒེ་མ་ལ་ཕན། །ཞེས་བྱ་བ་ཡིན་ཏེ། མི་སྦོམ་པོ་ལ་ནི་ཉམས་སྨད་པའི་ལྕིབས་བྱ་སྟེ། དཔེར་ན་སྦྲང་རྩི་དང་སྲིད་ག་ཏ་ཞེས་བྱ་བའི་འབྲས་བུ་དང༌། པདྨའི་རྩ་བ་དང་སྡོང་བུ་ལ་སོགས་པ་སྟེ། དེ་དག་ནི་རྩུབ་པ་ཡིན་པའི་ཕྱིར་ཚིལ་ཟ་བར་བྱེད་པ་དང། ལྕི་བས་མྱུར་དུ་མི་འཇུ་བའི་ཕྱིར་རོ། །སྦོམ་པོ་ལ་ནི་ཡང་བའི་ཉམས་སྨད་པས་ཡང་སྦོམ་པོ་ཕན་ཏེ། དཔེར་ན་རྒྱ་སྲན་ཀུ་ལད་ཐ་དང༌། ཁྲེ་རྒོད་ལ་སོགས་པ་ཕན་བ་ལྟ་བུའོ། །དེ་ལས་བཟློག་པ་སྐེམ་ལ་ཕན། །ཞེས་བྱ་བ་ནི། གང་སྔ་མ་དེ་ལས་བཟློག་པའི་ཡང་བ་དང། དེ་བཞིན་དུ་བརྟ་བ་དེ་ནི་སྐེམ་བོ་ལ་ཕན་ཏེ། དཔེར་ན་འབྲས་དྲུག་ཅུ་པའི་ཆན་དང༌། རི་དགས་ཤ་བཀྲ་དང༌། རི་བོང་ལ་སོགས་པའི་ཤ་ལྟ་བུ་སྟེ། དེ་ཡང་གང་གི་ཕྱིར་ཤིན་ཏུ་སྐེམ་པ་ལ་ནི་ཟས་དང་སྐོམ་དང་སྨན་གཅིག་པ་དག་གིས་མེ་དྲོད་འབྲི་བར་བྱེད་པས་དེ་བརྟས་པར་བྱེད་པའི་རྫས་ཡིན་དུ་ཟིན་ཀྱང་དེ་མི་འཇུ་བས་སླར་ཉམས་སྨོད་ཅིང་སྐེམ་པོ་ཉིད་དུ་བྱེད་པར་འགྱུར་རོ། །ནས་དང་གྲོ་ནི་གཉི་ག་ལ། །དེ་ལ་འོས་པར་བྱེད་པས་བརྟག །ཅེས་བྱ་བ་ལ། སྦོམ་པོ་དང་སྐེམ་པོ་དེ་གཉིས་ཀ་ལ་འོས་ཤིང་འཚམ་པར་བྱ་ཞིང་སྦྱར་བ་དང༌། གཡོས་སུ་བྱས་
པའི་ཉེ་བར་བརྟག་པར་བྱས་བ་གང་ཡིན་པ་དེ་ནི། དེ་ལ་འོས་པས་བརྟག་ཅེས་བྱའོ། །དེ་ནི་འདི་སྐད་སྟོན་པ་ཡིན་ཏེ། གང་གི་ཕྱིར་སྦོམ་པོ་ལ་ནས་དང་གྲོ་སྟེར་བ་ན། དེའི་ཚེ་སྦོམ་བོ་ལ་འོས་ཤིང་འཚམ་བའི་ཉམས་སྨད་པའི་བྱ་བས་བྱ་ལ། གང་གི་ཚེ་ནས་དང་གྲོ་དེ་ཉིད་སྐེམ་བོ་ལ་སྟེར་ན་དེའི་ཚེ་སྐེམ་པོ་ལ་འོས་ཤིང་འཚམ་པའི་བརྟ་བ་བྱ་བའི་ཚུལ་གྱིས་བརྟག་པར་བྱའོ། །འདི་ནི་འདི་ལྟར་དོགས་བ་སྐྱེད་པར་མི་བྱའོ། །ཇི་ལྟར་ཉེས་བ་རྣམས་ཀྱི་ནད་ཀྱི་རྒྱུ་མཐའ་ལས་བ་ལས་ནད་ཀྱང་མཐའ་ཡས་པ་ཇི་ལྟ་བ་བཞིན་དུ་གསོ་བ་ཡང་མཐའ་ཡས། ཉམས་བརྟ་བ་དང་ཉམས་སྨད་པའི་གསོ་བའི་ཐབས་ཀྱང་སྦྱོར་བ་རབ་དང་རབ་མཆོག་གི་དབྱེ་བས་མཐའ་ཡས་བར་རིགས་ན། ཅིའི་ཕྱིར་གསོ་བའི་ཐབས་གཉིས་ཁོ་ནར་ཟད་ཅེས་ཕྱིར་རྒོལ་བ་དག་ཡོད་པས། དེའི་ཕྱིར་གཞུང་རྩོམ་པར་བྱེད་པས་འདིར་སྨྲས་པ་ནི། ནད་ཀྱི་དབྱེ་བ་ཐ་དད་ཀྱི། །གཅོད་འཁྲུ་ལ་སོགས་དབྱེ་བ་ཡིས། །ནད་ལྟར་ཐ་དད་གྱུར་ཀྱང་ནི། །གསོ་བ་གཉིས་ལས་ཡོད་མ་ཡིན། །ཞེས་བྱ་བ་ཡིན་ཏེ། ནད་རྣམས་ཟད་པ་དང༌། གནས་པ་དང༌། སྟེང་དང་འོག་དང་རྩིབ་ལོགས་ལ་སོགས་པར་ཐད་ཀར་འགྲོ་བ་ལ་སོགས་བའི་མཆན་ཉིད་ཀྱིས་རྣམ་པར་དབྱེ་ན། མཐའ་ཡས་པ་ཡོད་དུ་ཟིན་ཀྱང༌། གསོ་བ་ནི་རྣམ་པ་གཉིས་ལས་ལྷག་པར་དབྱེ་བ་མེད་དོ། །དེ་བཞིན་དུ་གཅད་བར་བྱ་བ་ལ་སོགས་པའི་དབྱེ་བར་ཕྱེ་བ་ལས་ཀྱང་ཐ་དད་པར་འགྱུར་ཏེ། འདི་ནི་གཅད་བའི་གསོ་བའོ། །འདི་ནི་རབ་ཏུ་གཅད་པའོ། །འདི་ནི་རབ་མཆོག་ཏུ་གཅད་པའོ། །འདི་ནི་རབ་ཏུ་འཁྲུ་བའོ། །འདི་ནི་རབ་མཆོག་ཏུ་འཁྲུ་བའོ། །སོགས་པས་ནི་སྣུམ་དང་རྩུབ་པ་ལ་སོགས་པ་ཡིན་ན། ཇི་ལྟར་ན་དེ་མཐའ་ཡས་པ་ཡིན་དུ་ཟིན་ཀྱང༌། དེ་རྣམས་དབྱེ་བ་མེད་པ་ཡིན་ཞེ་ན། ནང་ལྟར་ཐ་དད་གྱུར་ཀྱང་ནི། ཞེས་བྱ་བ་སྟེ། དཔེར་ན་ནད་གཞི་ལ་སོགས་པའི་དབང་གིས་ཀྱང༌། རིམས་ལ་སོགས་པའི་ནད་རྣམས་ཐ་དད་པར་འགྱུར་བ་ཡིན་ཀྱང་གསོ་བ་ནི། བརྟ་བ་དང་ཉམས་སྨད་བའི་ཚུལ་གཉིས་ཀྱིས་བསྒྲུབ་པར་བྱ་བ་ཡིན་པས་ན། མཚན་ཉིད་དེ་གཉིས་ལས་དབྱེ་བ་ཡོད་པ་མ་ཡིན་
ཏེ། ལན་འགའ་དེ་རྣམས་བརྟ་བར་བྱ་བས་གསོ་དགོས་པར་འགྱུར་རོ། །ལ་ལ་ནི་ཉམས་འབྲི་བས་གསོ་བར་བྱ་དགོས་ཀྱི་དེ་མ་གཏོགས་པ་གསོ་བའི་ཕུང་པོ་གསུམ་པ་ནི་ཡོད་པ་མ་ཡིན་ནོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གྱི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས་ལེའུ་བཅུ་བཞི་པའི་རྣམ་པར་འགྲེལ་པའོ།། །།དེ་ནས་སྦྱང་བ་ལ་སོགས་པའི་སྨན་གྱི་སྡེ་ཚན་སྣ་ཚོགས་འདུས་པའི་ལེའུ་བཤད་པར་བྱའོ། །ཞེས་བྱ་བ་ལ། ཇི་ལྟར་འདིར་གསོ་བ་སྣ་ཚོགས་ཡོད་དུ་ཟིན་ཀྱང༌། ཚུལ་གཉིས་ལས་ལྷག་པར་མེད་པ་དེ་བཞིན་དུ། སྨན་རྣམས་ཚུལ་ཐ་དད་པ་ཡོད་དུ་ཟིན་ཀྱང༌། སྦྱང་བ་དང་ཞ་བའི་ཚུལ་གཉིས་ལས་འདའ་བར་མི་བྱེད་དོ། །དེ་བས་ན་གསོ་བའི་ཚུལ་རྣམ་བ་གཉིས་ཀྱི་འོག་ཏུ་སྦྱང་བ་ལ་སོགས་པ་ནི་སྨན་གྱི་སྡེ་ཚན་གྱི་ལེའུ་བརྩམས་པ་ཡིན་ནོ། །སྦྱང་བ་ལ་སོགས་པའི་ཚུལ་ཅན་གྱི་སྨན་དུ་བསྟན་པའི་སྡེ་ཚན་གང་ཡིན་པ་དེ་ནི་སྦྱང་བ་ལ་སོགས་པའི་སྨན་གྱི་སྡེ་ཚན་ནོ། །སྡེ་ཚན་སྣ་ཚོགས་པ་འདུས་པ་ནི་དངོས་པོ་ཕན་ཚུན་འཐོར་བ་གཅིག་ཏུ་བསྡུས་པ་དེའི་ལེའུ་བཤད་པར་བྱའོ། །ཞེས་པའོ། །སྦྱོང་བའི་སྐྱུག་སྨན་ལ་སོགས་པའི་དབྱེ་བ་ཕྱི་མ་མཆོག་ཏུ་གྱུར་པའི་ལས་རྣམ་བ་ལྔ་ཡོད་པ་ལས། དང་པོར་རེ་ཞིག་སྐྱུག་སྨན་གྱི་སྡེ་ཚན་གྱི་གཙོ་བོ་བཤད་པར་བྱ་བའི་ཕྱིར་འདི་སྨྲས་པ་ཡིན་ཏེ། པོ་སོན་ཆ་དང་ཤིང་མངར་དང༌། །ཀུ་བ་ཁ་བོ་ནི་མ་པ་དང༌། །བིམ་པ་ག་གོན་པི་ཤ་ལ། །དུག་མོ་ཉུང་དང་མུར་བ་དང༌། །དེ་བ་ད་ལི་བྱི་དང་བ། །ལྕམ་པ་ཙི་ཏྲ་ཀྲུ་ཏྲུག་ཏྲེས། །ཀོ་ཤ་པ་ཏི་ཀ་རཉྫ། །པི་པི་ལིང་དང་རྒྱམ་ཚ་དང༌། །ཤུ་དག་སུག་སྨལ་ཡུངས་ཀར་ཏེ། །འདི་དག་སྐྱུག་པའི་སྨན་གྱི་སྡེ། །ཞེས་བྱ་བ་ནི། བོ་སོན་ཆ་ལ་སོགས་པའི་སྨན་ནི་སློན་ཞིང་སྐྱུག་པ་ལ་དགོས་པ་ཡིན་ནོ། །དེ་ལ་པོ་སོན་ཆ་ནི་མ་ན་ཕ་ལའོ། །ཤིང་མངར་ནི་མ་དུ་ཡང་ཤིའོ། །ཀུ་བ་ཁ་བོ་ནི་ཀ་ཏུ་ཀ་ཨ་པ་བུའོ། །ནིམ་པ་ནི་ཨ་རི་སྟག་ཀའོ། །བིམ་པ་ནི་ཛ་མུ་ཏ་ཀའོ། །བྱི་ཏང་ག་ནི་མིང་གི་རྣམ་གྲངས་གཞན་ཡང་འབྲས་བུ་མང་པོ་ཞེས་བྱའོ། །ག་
གོན་ནི་ཏྲི་དུ་སུ་ཁ་བའོ། །བི་ལ་ཤ་ནི་གོ་བ་ཨ་ཀྵ་སྟེ། བ་ལང་གི་མིག་ལྟ་བུའོ། །དུག་མོ་ཉུང་ནི་བད་ཙ་ཀའོ། །མུར་བ་ནི་མ་དུར་ས་སྟེ། ཁུ་བ་མང་ར་བ་ཞིག་གོ །དེ་བ་ད་ལི་ནི་ཛི་མུར་ཀའོ། །བྱི་དང་ག་ནི་སྲིན་བུ་གསོད་བའོ། །ལྕམ་པ་ནི་བི་ཏང་སོའོ། །ཙི་ཏྲ་ནི་ཏྲ་བ་ན་ཏྲིའོ། །ཀྲུ་ཏྲུག་ཏྲེས་ནི་ཙི་ཏྲ་ཀའོ། །ཀོ་ཤ་པ་ནི་གཉིས་ཏེ། གཅིག་ནི་ར་ཙ་ཀོ་ཤ་བ་ཏིའོ། །གཉིས་པ་ནི་ཀ་དུ་ཀ་ཀོ་ཤ་ཏ་ཀིའོ། །ཀ་རཉྫ་ནི་པུ་ཏི་ཀར་ཉྫ་འོ། །པི་པི་ལིང་ནི་ཀར་ནའོ། །ཡུངས་ཀར་ནི་ཡུངས་ཀར་དཀར་བོའོ། །ད་ན་ཏི་དང་ནི་ཏི་པིད་ཏ། །འབྲས་བུ་གསུམ་དང་བི་ཤ་ལ། །ཤང་ཀི་ནི་དང་སྣུ་ཧ་དང༌། །སེང་ཕྲོམ་དོང་ག་ནི་ལི་ནི། །ཁྲོན་བུ་དང་ནི་ཀམ་པི་ལྱ། །འོ་མ་བ་གཅིན་འཁྲུ་བར་བྱེད། །ཅེས་བྱ་བ་ལ་སོགས་པའི་སྨན་རྣམས་ནི་འཁྲུ་བའི་སྡེ་ཚན་ཡིན་ནོ། །དེ་ལ་དན་ཏི་ནི་ཀུ་མ་བའོ། །ཏྲི་བི་ད་ཏ་ནི་ཀུ་མ་བའོ། །བི་ཤ་ལ་ནི་གོ་བཱ་ཀྵིའོ། །ཤིང་ཁི་ནི་ཤིང་ཁ་པུས་པའོ། །སྣུ་ཧ་ནི་བུ་ཏའོ། །ནི་ལི་ནི་ནཱི་ལ་པུས་པ་སྟེ། མེ་ཏོག་སྔོན་པོ་ཅན་ནོ། །སེང་ཕྲོམ་ནི་དྲོ་ཏྲའོ། །དོང་ག་ནི་ཤ་མ་མྱ་ཀའོ། །ཁྲོན་བུ་ནི་སུ་བར་ན་ཀྴི་རའོ། །ཀ་མ་བི་ལྱ་ནི་ར་ཛ་ན་ག་སྟེ། ཚོན་ཤིང་ངོ༌། །འོ་མ་ནི་འོ་མ་རྣམས་སོ། །བ་གཅིན་ནི་དངོས་སུ་ཟད་དོ། །པོ་སོན་ཆ་དང་དུག་མོ་ཉུང༌། །རུ་རྟ་དེ་བ་ད་ལི་དང༌། །ཤིང་མངར་ཤུ་དག་རྩབ་བཅུ། །ཐང་ཤིང་ར་སྣ་ལ་ལ་ཕུད། །ཤ་ཏ་པུཥྦ་པ་ཏ་ལ། །རྒྱ་སྲན་ནག་པོ་སྦྲང་རྩི་དང༌། །རྒྱམ་ཚ་ལྕེ་ཚ་ཤིང་ཉེ་རོ། །འདི་དག་མས་གཏོང་བཀྲུ་སྨན་ཏེ། །ཞེས་བྱ་བ་ལ། པོ་སོན་ཆ་ལ་སོགས་པ་ནི་མས་གཏོང་བའི་བཀྲུ་སྨན་གྱི་སྡེ་ཚན་ཡིན་ནོ། །དེ་བ་ད་ལི་ནི་ཛི་མུ་དཀའོ། །གཞན་ནི་གོ་བར་ཟད་དོ། །རྩ་བ་བཅུ་ནི་རྩ་བ་ལྔ་བ་ཆེ་ཆུང་གཉིས་སོ། །ཤ་ཏ་པུ་ཥྤ་ནི་མི་བིའོ། །ཨ་པ་མ་རྒ་བྱི་དང་ག །ཚ་བ་གསུམ་དང་སྐྱེར་བའི་རྩ། །སུ་རལ་དང་ཤི་རི་ཤ །བྲི་ཧང་ཤི་ཀྲུའི་ས་བོན་དང༌། །སེང་ལྡེང་མ་དུ་ཀའི་སྙིང་པོ། །རྒྱམ་ཚ་དངུལ་རྡོ་ཕ་བོང་དྲེག །སུག་སྨེལ་གཉིས་དང་གོ་སྙོད་སྦོམ། །མགོ་བོའི་ནད་སྦྱོང་བྱེད་པ་ཡིན། །ཞེས་བྱ་བ་ལ། ཨ་བ་མརྒ་ལ་སོགས་པའི་རྫས་ཀྱི་སྡེ་ཚན་ནི་མགོ་བོའི་ནད་སྦྱོང་བར་བྱེད་པ་ཡིན་ནོ། །ཨ་པ་མརྒ་སྲ་དག་བུས་པའོ། །ཚ་བ་གསུམ་
ནི་པི་པི་ལིང་དང༌། ན་ལེ་ཤམ་དང༌། བཅའ་སྒ་དང་གསུམ་བསྲེས་པའོ། །སྐྱེར་བའི་རྩ་བ་ནི་ད་དུ་ཧ་རིད་ཏའོ། །སུ་རལ་ནི་སུ་ལག་གྲ་ནའོ། །ཤི་རི་ཤའི་ས་བོན་དང་པྲི་ཧའི་ས་བོན་དང༌། ཤི་ཀྲུའི་ས་བོན་ནོ། །ས་བོན་གྱི་སྒྲ་སུམ་ཆར་སྦྱར་རོ། །མ་དུ་ཀའི་སྙིང་པོ་ནི་མ་དུ་ཀའི་མེ་ཏོག་མཆོག་ཏུ་གྱུར་པ་ལ་བྱའོ། །དངུལ་རྡོ་ནི་ཀུ་ཤར་པ་ཨཉྫ་ནའོ། །སུག་སྨེལ་གཉིས་ནི་སུག་སྨེལ་ཕྲ་མོ་དང་སྦོམ་པོའོ། །གོ་སྙོད་སྦོམ་པོ་ནི་འཕྲ་ཐི་ཀའོ། །ཐང་ཤིང་རྒྱ་སྤོས་རུ་རྟ་དང༌། །རྩ་བ་བཅུ་དང་བ་ལ་གཉིས། །བི་ར་ཏ་རའི་སྨན་སྡེར་གཏོགས། །བི་ད་རི་སོགས་རླུང་ནད་སེལ། །ཞེས་བྱ་བ་ལ། ཐང་ཤིང་ལ་སོགས་པའི་སྨན་རྣམས་ནི་རླུང་འཇོམས་པར་བྱེད་བ་ཡིན་ནོ། །རྒྱ་སྤོས་ནི་ནིཥྛའོ། །རུ་རྟ་ནི་ཀུཥྛའོ། །བ་ལ་གཉིས་ནི་བ་ལ་དང་ཨ་ཏིབ་ལའོ། །པི་ར་ཏ་ལ་སོགས་པའི་སྡེ་ཚན་དང་བིད་ར་ལ་སོགས་པའི་སྡེ་ཚན་ནི་བཤད་དོ། །སྡེ་ཚན་དེ་གཉིས་རླུང་སེལ་བར་བྱེད་བ་ཡིན་ནོ། །དཱུར་བ་དང་ནི་བྱི་ཚེར་བ། །ནིམ་པ་བ་ཤ་ཀའི་ལོ་མ། །ཁ་སྲལ་ཕྲེའུ་འོལ་མ་སེ། །ཉེའུ་ཤིང་པ་ཞེས་བྱ་དང༌། །ཤི་ཏ་པ་ཀི་པྲི་ཡང་ཀུ། །ནྱ་གྲོ་དྷ་སོགས་ཤུག་པ་སོགས། །སྠིར་རྣམ་གཉིས་པདྨའི་ཟེ། །བན་ནྱ་ཐལ་ཏྲེས་སོགས་མཁྲིས་སེལ། །ཞེས་བྱ་བ་ལ། དཱུར་བལ་སོགས་པའི་སྡེ་ཚན་ནི་མཁྲིས་པ་འཇོམས་ཤིང་སེལ་བར་བྱེད་དོ། །དེ་ལ་དཱུར་བ་ནི་ཤ་དྷ་ལའོ། །བྱི་ཚེར་བ་ནི་བ་ཤ་ཀའོ། །ནིམ་པ་ནི་ནི་མ་པའོ། །ལོ་མ་ནི་བ་ཤ་ཀའིའོ། །ཁ་སྲལ་ནི་ཨད་མ་ཀུ་བ་ཏའོ། །འོལ་མ་ས་ནི་དགུན་ཏེའོ། །ཉེའུ་ཤིང་ནི་ཤཏ་བརྞིའོ། །ཤི་ཏ་པ་ཀི་ནི་ཤིང་ཁ་ན་དེའོ། །པྲི་ཡང་ཀུ་ནི་གནྡྷ་པྲི་ཡང་ཀུའོ། །ནྱ་གྲོ་དྷ་ལ་སོགས་པ་དང༌། ཤུག་པ་ལ་སོགས་པ་དང༌། ཐལ་ཏྲེས་ལ་སོགས་པའི་སྡེ་ཚན་ནི་འོག་ནས་སྟོན་ཏེ། སྠིར་རྣམ་གཉིས་ནི་ས་ལ་པརྞི་དང༌། ཀྲྀཥྞ་པརྞིའོ། །པདྨ་ནི་ཀ་མ་ལའོ། །བན་ནྱ་ནི་ཀུན་ན་ཏའོ། །དོང་ག་སོགས་དང་ཨ་རྒ་སོགས། །མུངྒ་སོགས་དང་པོ་སོན་སོགས། །བྱེའུ་རུག་པ་གླ་སྒང་སོགས། །དུག་མོ་ཉུང་སོགས་བད་ཀན་སེལ། །ཞེས་བྱ་བ་ལ། དོང་ག་ལ་སོགས་པའི་སྡེ་ཚན་བདུན་པོ་ནི་བད་ཀན་སེལ་ཞིང་འཇོམས་
པར་བྱེད་པ་ཡིན་ནོ། །ཛི་བན་ཏི་དང་རམ་ཉེ་བ། །མེ་དམ་ཧཱ་མེ་ད་དང༌། །མུངྒ་མ་ཤ་པརྞི་དང༌། །ལྡུམ་བུ་ཟངས་རྩི་བ་དང་ནི། །ཛི་བ་ཀ་དང་ཤིང་མངར་ཏེ། །སྡེ་འདི་འཚོ་བྱེད་ཅེས་བྱ་ཡིན། །ཞེས་བྱ་བ་ལ། ཛི་བན་ནི་ཛི་བའོ། །ར་མཉེ་བ་ནི་གཉིས་ཏེ། ཀ་ཀོ་ལི་དང༌། ཀྵི་ར་ཀ་ཀོ་ལའོ། །མེ་ད་དང་མ་ཧཱ་མེ་ད་ནི་མེ་ད་གཉིས་སོ། །མུངྒ་དང་མ་ཤ་པརྞི་ནི་མུངྒ་པརྞི་དང༌། མ་ཤ་པརྞིའོ། །ཟངས་རྩིབ་ནི་རི་ཤ་པའོ། །ཛི་བ་ཀ་ནི་སྨན་འཚོ་བྱེད་ཀུར་རྩ་ཤི་ཤའོ་ཞེས་བྱ་བའོ། །བི་ད་རི་དང་ཨེ་རཎྜ། །པྲིཤྩི་ཁ་ལི་པུརྞ་རྣ། །དེ་བ་ཧ་ས་དེ་བ་དང༌། །པརྞི་གཉིས་དང་ཁ་སྲལ་དང༌། །འཚོ་བྱེད་ལྔ་དང་རྩ་ཆུང་ལྔ། །ཐལ་ཏྲེས་དང་ནི་ལྕང་མ་དང༌། །ཧང་ས་བ་ཏི་ཞེས་བྱ་རྣམས། །བི་ད་རི་སོགས་འདི་སྙིང་ཕན། །ཉམ་ཆུང་རླུང་དང་མཁྲིས་པ་སེལ། །ལུས་སྐེམ་སྐྲན་ཚིགས་ལ་ན་ལག་ན། །དབུགས་མི་བདེ་དང་ལུད་པ་ལུ། །སེལ་བར་བྱེད་པའི་སྡེ་ཚན་ཡིན། །ཞེས་བྱ་བ་ལ། བི་ད་རི་དང་སོགས་པའི་སྡེ་ཚན་འདི་ནི་སྙིང་གི་ནད་ལ་ཕན་ཞིང་ཡིད་དུ་འོང་བ་དང༌། ཉམས་བརྟས་ཤིང་ཤ་སྐྱེད་བ་དང༌། དེ་བཞིན་དུ་རླུང་དང་མཁྲིས་བ་ལ་སོགས་པ་སེལ་བར་བྱེད་བ་དང༌། ལུས་སྐེམ་ཞིང་ཟད་བྱེད་ལ་སོགས་པ་སེལ་བར་བྱེད་པ་ཡིན་ནོ། །དེ་ལ་བི་ད་རི་ནི་ཤིང་པི་ད་རིའོ། །ཨེ་རཎྜ་ནི་སོར་ལྔ་བ་ཞེས་བྱའོ། །པྲིཤྩི་ཁ་ལ་ནི་ཨཥྛ་དུ་ཀའོ། །པུརྞ་རྣ་པ་ནི་བྲ་ཤི་བའོ། །པརྞི་གཉིས་ནི་མ་ཤ་པརྞི་དང༌། མུངྒ་པརྞིའོ། །འཚོ་བྱེད་སྣ་ལྔ་དང༌། རྩབ་ཆུང་དུ་ལྔ་ལ། འཚོ་བྱེད་ཅེས་བྱ་བའི་རྩ་བ་ལྔ་ལ་ནི། ཉེའུ་ཤིང་དང༌། རམ་ཉེ་བ་དང༌། ཛི་བན་ཏི་དང༌། ཛི་བ་ཀ་དང༌། ཟངས་རྩི་བའོ། །རྩ་བ་ཆུང་ངུ་ལྔ་ནི་སཔྟ་པརྞི་དང༌། ཀྲྀཥྞ་པརྞི་དང༌། བྲི་ཧ་ཏི་དང༌། ཀཎྜ་ཀ་རི་དང༌། གཟེ་མའོ། །ཐལ་ཏྲེས་ནི་ཤ་རི་བའོ། །ཧང་ས་པ་ཏི་ཏྲི་བ་དང་སྟེ་རྐང་གསུམ་བའོ། །ཐལ་ཏྲེས་དང་ནི་པུ་ཙེ་ཤེལ། །ཏང་པ་ལ་དང་ནི་མ་དུ་ཀ །ཙནྡན་དཀར་དང་དམར་བ་དང༌། །ཤིང་མངར་བ་རུ་ཤ་ཀ་རྣམས། །ཚད་བ་མཁྲིས་བ་ཁྲག་རྒྱས་དང༌། །སྐོམ་དད་རིམས་ཀྱིས་བཏབ་བ་སེལ། །ཞེས་བྱ་བ་ལ། ཐལ་ཏྲེས་ལ་སོགས་བའི་སྡེ་ཚན་འདིས་ནི་ཚད་པ་ལ་སོགས་པ་སེལ་ཞིང་འཇོམས་པར་བྱེད་བ་ཡིན་ནོ། །
ཏང་བ་ལ་ནི་ཀ་སྨ་རིའོ། །མ་དུ་ཀ་ནི་མ་དུ་ཀ་པུཥྤའོ། །པ་རུ་ཤ་ཀ་ནི་མྲི་དུ་པ་བ་སྟེ། འབྲས་བུ་ཆུང་ངུ་འཇམ་པ་ཞིག་གོ །ཤུག་པ་བུཎྜ་རཱི་ཀ་དང༌། །བྲྀཏྟི་རྀཏྟི་ཅུ་གང་དང༌། །སྲིང་གི་སླེ་ཏྲེས་འཚོ་བྱེད་བཅུ། །ནུ་ཞོ་སྐྱེད་བྱེད་རླུང་མཁྲིས་སེལ། །ཉམ་ཆུང་ཚིམ་བྱེད་བརྟས་བྱེད་ལ། །འཚོ་བྱེད་རོ་ཙ་ཉིད་དུ་བྱེད། །ཅེས་བྱ་བ་ལ། ཤུག་པ་ལ་སོགས་པའི་སྨན་གྱི་སྡེ་ཚན་ནོ། །ནུ་ཞོ་སྐྱེད་པ་ལ་སོགས་པ་བྱེད་དོ། །ནུ་ཞོ་ནི་བུད་མེད་འཕེལ་བར་བྱེད་བའོ། །དེ་བཞིན་དུ་རླུང་དང་མཁྲིས་པའི་ནད་སེལ་བ་དང༌། ཉམ་ཆུང་བ་རྣམས་ཚིམ་པར་བྱེད་བས་ན་ཚིམ་བྱེད་དོ། །མདངས་སྐྱེད་པ་ནི། འཕེལ་ཞིང་རྒྱས་པར་བྱེད་པ་སྟེ། ཉམས་སྟོབས་སྐྱེད་པའོ། །འཚོ་བར་བྱེད་པས་ན་འཚོ་བྱེད་དོ། །རོ་ཙ་བར་བྱེད་པ་ནི་ཁུ་བ་འཕེལ་བར་བྱེད་པའོ། །ཤུག་བ་ནི་པདྨ་ཀ་སྟེ། མིང་གི་རྣམ་གྲངས་གཞན་དུ་ན་ཧེ་མ་པདྨ་ཞེས་བྱ་བའོ། །པུཎྜ་རཱི་ཀ་ནི་པྲ་པུཎྜ་རཱི་ཀའོ། །བྲྀ་ཏྟི་ནི་ཤྲ་བ་ན་ཤི་རའོ། །རྀཏྟི་ནི་ཏུ་ཤིའོ། །ཅུ་གང་ནི་བང་ཤ་རེ་ཙ་ནའོ། །སྲིང་གི་ནི་ཀར་ཀ་སྲིང་གིའོ། །སླེ་ཏྲེས་ནི་གུ་རུ་ཙིའོ། །འཚོ་བྱེད་བཅུ་ནི་ཛི་བ་ན་ཏིའོ། །རམ་ཉེ་བ་ལ་སོགས་བ་སྔར་བཤད་པ་རྣམས་སོ། །པ་རུ་ཤ་དང་འབྲས་བུ་གསུམ། །རྒུན་འབྲུམ་དང་ནི་ཀད་པ་ལ། །ཀ་ཏ་ཀའི་འབྲས་ར་ཛ་དན། །སེའུ་འབྲུ་བར་ད་དུ་རྣམས། །སྐོམ་དད་ཆེ་དང་གཅིན་སྲི་དང༌། །རླུང་གི་ནད་རྣམས་སེལ་བྱེད་ཡིན། །ཞེས་བྱ་བ་ལ། པ་རུ་ཤ་ལ་སོགས་པའི་སྡེ་ཚན་ནི་སྐོམ་དད་ཆེ་བ་དང༌། གཅིན་སྲི་བའི་ནད་དང༌། རླུང་ནད་རྣམས་སེལ་ཞིང་འཇོམས་པ་ཡིན་ནོ། །རྒུན་འབྲུ་ནི་གོ་ཏན་ནི་རྒུན་འབྲུའོ། །ཀད་པ་ལ་ནི་མལ་བད་ཀའོ། །ཀ་ཏ་ཀའི་འབྲུས་བུ་ནི་ཤིང་ཏ་ཀའི་འབྲས་བུའོ། །ར་ཛ་ད་ན་ནི་ར་ཛ་ད་ནའོ། །སེ་འབྲུ་ནི་གོའོ། །བ་ར་ད་དུ་ནི་ཁ་ར་བ་ཏྲ་སྟེ། ལོ་མ་རྩུབ་པའི་ཤིང་ལོ་ཞིག་གོ །ཨ་ཉྫ་ན་དང་ཕ་ལི་ནི། །སྤང་སྤོས་པདྨ་ཨུཏྤལ། །སྐྱེར་ཁཎྜ་དང་སུག་སྨེལ་དང༌། །ཤིང་མངར་ནཱ་ག་གསེར་བཅས། །དུག་དང་ནང་གི་ཚ་བ་དང༌། །མཁྲིས་པ་རྒྱས་པ་སེལ་བར་བྱེད། །ཅེས་བྱ་བ་ལ། ཨཉྫ་ན་ལ་སོགས་པའི་སྡེ་ཚན་ནི། དུག་དང་ནང་གི་ཚ་བ་དང་མཁྲིས་པ་རྒྱས་པ་སེལ་བར་བྱེད་དོ། །དེ་ལ་ཨཉྫ་ན་ནི་རྣམ་
པ་གཉིས་ཏེ། ལིག་བུ་མིག་དང་དངུལ་རྡོའོ། །ཕ་ལི་ནི་གནྡྷ་པྲི་ཡང་ཀུའོ། །སྤང་སྤོས་ནི་ནལ་ད་ནའོ། །ཨུཏྤ་ལ་ནི་རྣམ་པ་གཉིས་ཏེ་སྔོན་པོ་དང་དམར་པོའོ། །པ་ཏོལ་དང་བུ་ཙེ་ཤེལ། །ཙནྡན་དཀར་པོ་མུར་བ་དང༌། །སླེ་ཏྲེས་སྐྲ་ལོར་བཅས་བདག །བད་ཀན་མཁྲིས་པ་མཛེ་དང་རིམས། །དུག་དང་སྐྱུག་བྲོ་ཡི་ག་འཆུས། །མིག་སེར་གྱི་ནི་ནད་རྣམས་འཇོམས། །ཞེས་བྱ་བ་ལ། པ་ཏོ་ལ་ལ་སོགས་པའི་སྡེ་ཚན་འདིས་ནི། བད་ཀན་དང་མཁྲིས་པ་ལ་སོགས་བ་འཇོམས་པར་བྱེད་དོ། །པུ་ཙེ་ཤེལ་ནི་ཀ་རུ་ཀ་རོ་ཧི་ནའོ། །མུར་བ་ནི་མང་དུ་སྲ་བའོ། །སླེ་ཏྲེས་དང་ནི་ཤུག་པ་དང༌། །ན་མི་པ་འུ་སུའི་འབྲས་བུ་དང༌། །ཙནྡན་དམར་པོ་ཞེས་བྱ་རྣམས། །མཁྲིས་བ་དང་ནི་བད་ཀན་དང༌། །རིམས་ནད་སྐྱུག་བྲོ་ལུས་ཚ་དང༌། །སྐོམ་དང་ཆེ་སེལ་མེ་དྲོད་སྐྱེད། །ཅེས་བྱ་བ་ལ། སླེ་ཏྲེས་ལ་སོགས་བའི་སྡེ་ཚན་འདི་ནི་མཁྲིས་པ་དང་བད་ཀན་ལ་སོགས་པ་རྣམས་སེལ་བར་བྱེད་ལ། མེའི་དྲོད་སྐྱེད་པར་བྱེད་དོ། །དོང་ག་ལ་སོགས་པའི་སྡེ་ཚན་འདི་ནི། སློན་བྲོ་བ་ལ་སོགས་པ་ནས་གཅིན་ནད་རྨ་རེད་པའི་བར་དུ་སྦྱོང་ཞིང་སེལ་བར་བྱེད་དོ། །དང་ག་དང་ནི་དུག་མོ་ཉུང༌། །ཀ་ཀ་ཏི་ག་ཏ་བ་ཏ་ལི། །ནི་མ་བ་སླེ་ཏྲེས་དཱུར་བ་དང༌། །མུར་བ་བེ་དང་ཀ་ཏ་དང༌། །པ་ཐ་ཅི་སྐྲིགས་ཤེ་རྒྱ་ཀ །ཀ་རཉྫ་གཉིས་པ་ཏོ་ལ། །ལོ་མ་བདུན་བཀྲུ་ཏྲུག་ཏྲེས། །སུ་ཥ་བྱི་ཏ་བོ་སོན་ཆ། །ས་ཧ་ར་ཛ་ཞེས་བྱ་དང༌། །རྒྱ་ཤུག་གི་ནི་འབྲས་བུ་རྣམས། །དེ་ནི་སློན་བྲོ་མཛེ་ནད་དང༌། །དུག་དང་རིམས་དང་བད་ཀན་དང༌། །གཡན་པ་དང་ནི་གཅིན་སྙི་དང༌། །རྨ་རེད་པ་རྣམས་སྦྱོང་བར་བྱེད། །ཅེས་བྱ་བ་ལ། དོང་ག་ལ་སོགས་པའི་སྡེ་ཚན་འདི་ནི་སློན་བྲོ་བ་ལ་སོགས་པ་ནས། གཅིན་དང་རྨ་རེད་བའི་བར་དུ་སྦྱོང་ཞིང་སེལ་བར་བྱེད་དོ། །དོང་ག་ནི་ཤ་མྱ་གའོ། །ཀ་ཀ་ཏིག་ཏ་ནི་ཤ་རང་གཥྛའོ། །པ་ཏ་ལ་ནི་ཀྲི་སྣ་བྲི་ཏའོ། །མུར་བ་ནི་མ་དུས་རའོ། །བེ་ཏང་ཀ་ཏ་ནི་སྲུང་བ་བི་ཤི་སྟེ། །ཤིང་ལོ་མ་ཅན་ཞིག་གོ །ཅི་སྐྲིགས་ནི་ཀི་རི་ཏི་ག་ཏ་སྟེ། བུ་ནི་མ་བའོ། །ཤེ་རྒྱ་ཀ་ནི་ཧ་ས་ཀ་རའོ། །ཀ་རཉྫ་གཉིས་ལས་གཅིག་ནི་པུ་ཏི་ན་ཀ་རཉྫ་སྟེ། མིང་གི་རྣམ་གྲངས་གཞན་ཡང་ཅི་རི་བི་ལ་བ་ཞེས་བྱ་བའོ། །ཀ་རཉྫ་གཉིས་བ་ནི་མིང་གི་རྣམ་གྲངས་སུ་ནན་ཏ་མ་ལ་
ཞེས་བྱའོ། །ལོ་མ་བདུན་པ་ནི་ས་བྷ་པརྞིའོ། །ཀྲུ་ཏྲུག་ཏྲེས་ནི་ཙི་ཏྲ་ཀའོ། །སུ་ཤ་བྱི་སི་ཏི་ཡ་བ་ལི་ཞེས་བྱའོ། །པོ་སོན་ཆ་ནི་མ་དང་ན་ལ་ལའོ། །ས་ཧ་ར་ཛ་ནི་ནཱི་ལ་བུས་པ་སྟེ། མེ་ཏོག་སྔོན་པོ་ཅན་ཞིག་གོ །རྒྱ་ཤུག་པའི་འབྲས་བུ་ནི་ཀུན་ཏ་ཞེས་བྱའོ། །ཨ་ས་ན་དང་ཏི་ནི་ཤ་།སྟག་པ་ཤྭེ་ཏ་བ་ཧ་དང༌། །ཀ་ཏ་ར་དང་སེང་ལྡེང་དང༌། །བན་ད་དང་ནི་ཤིང་ཤ་པ། །ཨ་ཛ་སྲིང་ག་ཙནྡན་ན་གསུམ། །ཏ་ལ་ཨ་ཀར་པ་ལ་ཤ་།ས་ལ་ཁར་བ་ཏྲ་དང༌། །དྷ་བ་ཀ་ལིང་ཀ་སྤྲོ་ཏོག །ཚ་ག་ཀརྞ་བད་ཚ་ཀ །ཐར་མ་ཞེས་ནི་བྱ་བ་སྟེ། །ཨ་ས་ན་སོགས་དེ་རྣམས་ཀྱིས། །ཤ་བཀྲ་མཛེ་ནད་བད་ཀན་དང༌། །སྲིན་ནད་སྐྱ་རྦབ་གཅིན་སྙི་དང༌། །ཚོ་ཆེས་ནད་ནི་སེལ་བར་བྱེད། །ཅེས་བྱ་བ་ལ། ཨ་ས་ན་ལ་སོགས་པའི་སྡེ་ཚན་འདི་ནི་ཚད་བ་ལ་སོགས་པ་སེལ་ཞིང་འཇོམས་པ་ཡིན་ནོ། །དེ་ལ་ཨ་ས་ནི་བ་ཏ་ས་ལའོ། །ཏི་ནི་ཤ་ནི་ཤིང་ཡན་ད་ནའོ། །ཤྭེ་ཏ་བ་ཧ་ནི་ཨ་ཛུ་ནའོ། །ཀ་ཏ་ར་ནི་སེང་ལྡེང་དང་འདྲ་བ་ལ་སྔོན་པོ་ཅན་ཞིག་གོ །བན་ད་ནི་ཤི་རི་ཤའོ། །ཤིར་ཤ་པ་ནི་ཀྲིས་སྣར་རའོ། །ཨ་ཛ་སྲིང་ག་ནི་མི་ཤི་སྲིང་ག་སྟེ། ར་ཐུག་གི་རྭ་འདྲ་བའོ། །ཙནྡན་གསུམ་ནི་དཀར་པོ་དང༌། དམར་པོ་དང༌། སེར་པོའོ། །ཏ་ལ་ནི་ཤིང་གི་ཁྱད་པར་ཏེ་དྭ་ཏྲ་ཛ་ཞེས་བྱ་བའོ། །ཨ་གར་ཛ་ནི་ཛོང་ག་གའོ། །པ་ལ་ཤ་ནི་ཤིང་ཤ་ཀའོ། །ས་ལ་ནི་ཤིང་མཐོན་པོ་ཞིག་གོ །ཁ་ར་པ་ཏྲ་ནི་ཤ་ཀ་ཞེས་བྱ་བའི་ཤིང་གི་ཁྱད་པར་ཞིག་གོ །དྷ་བ་ནི་ནྲི་ཧད་ཏ་རུ་ཞེས་བྱ་བ། ཤིང་ཆེན་པོ་ཞིག་གོ །ཀ་ལིང་ཀ་ནི་ཨིན་ཏྲ་ཡ་བའོ། །སྤྲོ་ཏོག་ནི་བུ་གའོ། །ཚ་ག་ཀརྞ་ན་རི་སྐྱེས་ཀྱི་རྣ་བ་འདྲ་བ་ཞིག་གོ །ཐ་རམ་ནི་ཨ་ཤར་ནའོ། །བ་ར་ན་ཤེ་རྒྱ་ཀ་གཉིས། །ཉེ་ཤིང་ཙི་ཏྲ་མོ་ར་ཏ། །བིལ་བ་ཨཉྫ་སྲིང་གི་དང༌། །བྲི་ཧ་ཏི་ནི་རྣམ་གཉིས་དང༌། །ཀ་རཉྫ་གཉིས་ཛ་ཡ་གཉིས། །ཤི་ཀྲུ་ཀུ་ཤ་རུ་རྟའོ། །བར་ན་སོགས་བད་ཀན་ཚིལ། །མེ་དྲོད་ཆུང་དང་རླུང་ནད་འཁྱིམས། །ཀླད་པ་ལ་བརྟེན་ནད་སེལ་ཞིང༌། །སྐྲན་དང་ཁོང་འབྲས་འཇོམས་པ་ཡིན། །ཞེས་བྱ་བ་ལ། བར་ན་ལ་སོགས་པའི་སྡེ་ཚན་འདི་ནི་བད་ཀན་ལ་སོགས་པ་ནས་ཁོང་འབྲས་ཀྱི་བར་དུ་འཇོམས་ཤིང་སེལ་བར་བྱེད་པ་ཡིན་ནོ། །
རླུང་ནད་འཁྱིམས་པ་ནི། ཚིལ་གྱིས་གཡོགས་པའི་རླུང་ངོ༌། །བ་ར་ནི་ནི་ཤིང་ཏ་མ་ལའོ། །ཤེ་རྒྱ་ཀ་གཉིས་ནི་སེར་པོ་དང་དམར་པོའོ། །མདོག་གིས་ཕྱེ་བའི་སུ་ཧ་ར་ཙ་གཉིས་སོ། །མ་ར་ཏ་ནི་ཀྵི་ར་མོ་ར་ཏའོ། །བིལ་བ་ནི་ཤིང་ཕ་ལའོ། །བྲི་ཧ་ཏི་རྣམ་པ་གཉིས་ནི་བྲི་ཧ་ཏི་དང་ཀརྞྜ་ཀ་རིའོ་ཀ་རཉྫ་གཉིས་ནི་བུ་ཏི་ཀ་རཉྫ་དང༌། ནག་མ་བའོ། །ཛ་ཡ་གཉིས་ནི། །ཨ་ག་ནི་མནྠ་གཉིས་སོ། །ཤི་ཀྲུ་ནི་སོ་བན་ཛ་ནའོ། །ཀུ་ཤ་ནི་དཱུར་པའོ། །རུ་ཙ་ནི་རུ་ཙ་ཀ་རའོ། །རུ་ཤ་ཀ་ཤིང་ཀུན་སྤངས་མ། །རྒྱམ་ཚ་བྲག་ཞུན་ནག་ཚུར་གཉིས། །གཅིན་སྲི་རྡེའུས་འགགས་པ་དང༌། སྐྲན་དང་ཚིལ་ཆེས་བད་ཀན་སེལ། །ཞེས་བྱ་བ་ལ། རུ་ཤ་ཀར་ལ་སོགས་པའི་སྡེ་ཚན་འདི་ནི། གཅིན་སྲི་བ་དང༌། རྡེའུས་འགགས་བ་ལ་སོགས་པ་སེལ་བ་ཡིན་ནོ། །རུ་ཤ་ཀ་ཤི་ནི་བྲི་ཀ་ཀའོ། །སྤངས་མ་ནི་རྣམ་པ་གཉིས་ཏེ། ཀར་ཀ་རམ་དུ་རྨ་བྱའི་མགྲིན་པ་འདྲ་བ་མ་ཡཱུ་ར་གྲྀ་བའོ། །རྒྱམ་ཚ་ནི་ཚ་མཆོག་གོ །བྲག་ཞུན་ནི་ཤེལ་ཛ་དུའོ། །ནག་ཚུར་གཉིས་ལས་གཅིག་ནི་བན་སུ་ཀ་སི་ཞེས་བྱ་བ་ས་རུལ་དང་འདར་བའོ། །གཉིས་པ་ནི་བུས་བས་ཀ་སི་ས་ཞེས་བྱ་བའོ། །བེ་ལན་ཏར་ཨ་ར་ནི། །སྤྲ་ཏོག་བྲི་ཤ་སྲུ་སྲུའི་རྩ། །ཨི་ཀ་ཏ་དང་གཟེ་མ་དང༌། །ས་ཧ་ར་ཛ་བ་ན་དང༌། །ཀ་ཤ་བྲྀ་ཀྵ་ད་ནི་དང༌། །འདམ་བུ་ཀུ་ཤ་རྣམ་གཉིས་དང༌། །ཀུན་ཐ་དང་ནི་ཁ་སྲལ་དང༌། །བལ་བུ་ཀ་དང་མོར་ཏ། །ཀུ་རུ་ཏ་དང་ཀ་རམ་པ། །ལྕམ་པ་ཞེས་བྱ་སྨན་སྡེ་འདི། །བེ་ལན་ཏ་ར་ལ་སོགས་པ། །རླུང་ལས་གྱུར་པའི་ནད་འཇོམས་ཤིང༌། །རྡེའུའི་ཕྲེའུ་ཡོད་པ་དང༌། །གཅིན་སྲི་བ་ཡིན་ད་རྣམས་སེལ། །ཞེས་བྱ་བ་ལ། བེ་ལན་ཏར་ལ་སོགས་པའི་སྡེ་ཚན་འདི་ནི་རླུང་ལས་གྱུར་ཅིང༌། རླུང་ལས་སྐྱེས་པའི་ནད་རྣམས་འཇོམས་པ་དང༌། ཆུ་སོའི་རྡེའུ་ལ་སོགས་བ་སེལ་ཞིང་འཇོམས་སོ། །དེ་ལ་རྡེའུ་ཕྲེའུ་ནི་རླུང་གིས་ཁྲག་བསྐམས་པ་ལས་དུམ་བུ་བྱས་པ་ལས་རྡེའུ་ཕྲེའུ་ཞེས་བྱའོ། །གཅིན་སྲིབ་ནི་གཅིན་ནད་ཕྱི་ནང་གཞི་ལས་བཤད་དོ། །བེ་ལན་ཏ་ར་ནི་བི་ར་ཏ་རའོ། །ཨ་ར་ནི་ཨ་ན་མ་ཐའོ། །སྤྲ་ཏོག་ནི་ཨི་ཤ་རམ་ལི་ཀི་འམ། བུ་གན་ཞེས་བྱ་བ་མེ་ཏོག་སྦོམ་བོ་ཅན་ནོ། །བྲི་ཤ་ནི་བ་ཤ་ཀའོ། །
སྲུ་སུའི་རྩ་བ་ནི་ཨེ་མ་དེ་བའོ། །ཨ་ག་ཏ་ནི་སྨྱུག་པ་ཏྲའོ། །ས་ཧ་ར་ཛ་ནི་སེར་པོའོ། །ཀ་ཤ་ནི་ཤེ་ཏ་ཙ་མ་ར་སྟེ། མེ་ཏོག་རྡ་ཡབ་ལྟ་བུ་ཡོད་པའི་འཇག་མ་སེར་པོའི་རིགས་སོ། །བྲི་ཀྵ་ད་ནི་ནི་བད་ཀན་ཞེས་བྱ་བ་ཤིང་ལས་ཤིང་གི་ནད་ཀྱི་ཤིང་ལོ་ཕྲེའུ་གཞན་སྐྱེས་པའོ། །འདམ་བུ་ནི་ན་ལ་སྟེ་ནང་ཁོང་སྟོང་ངོ༌། །ཀུན་ཤ་རྣམ་པ་གཉིས་ནི་འཇག་མའི་སྦོམ་པོ་དང༌། ཕྲ་མོ་རྣམ་པའི་དབྱེ་བས་ཕྱེ་བའོ། །ཀུན་ཐ་ནི་རྩ་བ་བཅའ་སྒ་འདྲ་བ་ཡོད་པའོ། །ཁ་སྲལ་ནི་ཀུན་ཏུ་སྲི་སྟེ་ཀ་པི་ཀ་ཆུའོ། །བལ་བུ་ཀ་ནི་སོ་ན་ཀའོ། །མོར་ཏ་ནི་ཤིང་ཏི་པར་གོའོ། །ཀ་རམ་པ་ནི་ཨག་ནི་མ་པའི་མཆོག་གོ །ལྕམ་པ་ནི་པར་ཐའོ། །སེང་ཕྲོམ་ཤ་བ་ར་རོ་ཏྲ། །པ་ལ་ཤ་དང་ཛྷིན་ཛི་ནི། །ཐང་ཤིང་ཀད་པ་ལ་རསྣ། །ཀ་དམ་པ་དང་ཆུ་ཤིང་དང༌། །ཨེ་ལ་བ་ལུ་ཨ་ཤོ་ཀ །པ་རི་པེ་ལ་མོ་ཙ་ཀ །འདི་ནི་སེང་ཕྲོམ་སོགས་ཞེས་བྱ། །ཚིལ་ཆེས་བད་ཀན་སེལ་བའི་སྡེ། །མངལ་ནད་འཇོམས་ཤིང་འཁྲུ་བ་གཅོད། །མདོག་བཟང་དུག་ནད་སེལ་བྱེད་ཡིན། །ཞེས་བྱ་བ་ལ། སེང་ཕྲོམ་ལ་སོགས་པའི་སྡེ་ཚན་འདི་ནི། ཚིལ་ཆེས་པ་དང༌། བད་ཀན་གྱི་ནད་སེལ་བ་དང༌། མངལ་ནད་འཇོམས་ཤིང་འཁྲུ་བ་གཅོད་པའི་ཚུལ་ཅན་དང༌། མདོག་བཟང་ཞིང་གསལ་བར་བྱེད་པ་དང༌། དེ་བཞིན་དུ་དུག་སེལ་བར་བྱེད་པ་ཡིན་ནོ། །དེ་ལ་སེང་ཕྲོམ་ཞེས་བྱ་བ་རི་དྲ་བ་རྣམ་པ་གཉིས་ཡོད་དེ། གཅིག་ནི་པ་ཏི་ཀ་རི་ཏྲའོ། །གཉིས་པ་ཤ་བ་ར་རི་ཏྲའོ། །པ་ལ་ཤ་ནི་ཀེང་སུ་ཀའོ། །ཛྷིན་ཛིན་གྲི་ཏ་མཉྫ་རི་སྟེ། ཡར་ཁ་མར་ཞིག་གོ །ཐང་ཤིང་ནི་སར་ལ་ཏེ་ཤིང་དྲང་པོ་ཙི་ཏྲ་ཞེས་བྱའོ། །ར་སྣ་ནི་པ་ནི་ཨ་མ་པ་ངན་པའོ། །ཆུ་ཤིང་ནི་རམ་པ་སྟེ་ནང་སྟོང་པའོ། །ཨེ་ལ་བ་ལུ་ཀ་ནི་ཧ་རི་བ་ལུ་ཀ་སྟེ། མིང་གཞན་ཡང་ཨེ་ལེ་ཡའོ། །ཨ་ཤོ་ཀ་ནི་མིང་མྱ་ངན་མེད་པའོ། །པ་རི་པེ་ལ་ནི་ཀུ་ཏ་ནན་དའོ། །མོ་ཙ་ནི་ས་ལ་ཀའོ། །ཨར་ཀ་དང་ནི་ཨ་རལ་ག །ནཱ་ག་དན་ཏི་བི་ཤ་ལྱེ། །ག་བྲར་སྣ་བྲི་ཤ་ལ། །ཨ་བ་མ་རྒ་ཀ་རཉྫ། །ཀ་ཀ་ད་རི་ཀ་རཉྫ། །གི་རི་ཀར་གཉིས་ཨིཾ་གུ་དང༌། །ཨ་རྐལ་སོགས་སྡེ་ཚན་འདི། །བད་ཀན་ཚིལ་ཆེས་དུག་རྣམས་སེལ། །སྲིན་ནད་དང་ནི་མཛེ་ནད་འཇོམས། །ཁྱད་པར་དུ་ནི་རྨལ་ཕན། །
ཞེས་བྱ་བ་ལ། ཨརྐ་ལ་སོགས་པའི་སྡེ་ཚན་འདི་ནི་བད་ཀན་དང༌། ཚིལ་ཆེས་པ་དང༌། དུག་རྣམས་སེལ་བར་བྱེད་པ་དང༌། སྲིན་བུ་དང་མཛེ་ནད་འཇོམས་པར་བྱེད་པ་དང༌། ཁྱད་པར་མཆོག་ཏུ་རྨ་རྣམས་ལ་ཕན་ཞིང་སྦྱོང་བར་བྱེད་པ་ཡིན་ནོ། །ཨར་ཀ་ནི་རྟག་ཏུ་མེ་ཏོག་འབྱུང་བ་སྟེ་མིང་གི་རྣམ་གྲངས་སུ་རུ་པི་ཀ་ཞེས་བྱའོ། །ཨ་རལ་ཀ་ནི་ཤྭེ་ཏ་ཀུ་སུ་མ་སྟེ་མེ་ཏོག་དཀར་པོ་ཡོད་པའོ། །ནཱ་ག་དན་ཏི་ནི་ཤ་ཏ་གན་དྷ་སྟེ་མེ་ཏོག་དཀར་པོ་དྲིལ་བུ་ལྟ་བུ་ཡོད་བའོ། །བི་ཤ་ལྱེ་ནི་ལག་ལ་བཤོལ་ལྟ་བུའོ། །ག་བྲ་ནི་ག་བར་གྱིའོ། །བི་ཤ་ལ་ནི་ཨ་སྟ་དུ་མའོ། །མིང་གཞན་ནི་སར་བ་ཏ་ཤི་ཀ་ཞེས་བྱའོ། །ཨ་པ་མརྒ་ནི་པྲ་དུག་པུས་པའོ། །ཀ་རཉྫ་ནི་པྲ་གྲི་རྒྱའོ། །ཀ་ཀ་ད་རི་ནི་པོ་ཏ་ཏེ་ལའོ། །ཀ་རཉྫ་ནི་གཉིས། ཀ་རཉྫ་ཀར་པོ་སྟེ། མིང་གི་རྣམ་གྲངས་གཞན་ཡང་ནག་ཏམ་ལ་ཞེས་བྱའོ། །གི་རི་ཀར་ནི་གཉིས་ལས་གཅིག་ནི་ཀི་ནི་ཧི་གི་རི་ཀར་ནི་ཞེས་བྱའོ། །གཉིས་བ་ནི་ཏ་ཀ་བྱི་ཞེས་བྱ་བའི་གིར་གི་གར་གི་དཀར་པོ་ཆེ་བའོ། །སློབ་དཔོན་གཞན་དག་ནི་ཀར་ནི་གཉིས་པ་ཀུ་མ་རི་ཞེས་བྱ་བ་ཡིན་ནོ་ཟེར་རོ། །ཨིང་གུ་ཏ་ནི་དཀའ་ཐུབ་པའི་ཤིང་ངོ༌། །བྱི་རུག་རྣམ་གཉིས་ཀུ་ཐེར། །ཀ་ལ་མ་ལ་བྱི་དང་ག །ཁ་ར་པ་ཏྲ་ཀད་པ་ལ། །བྲི་ཤ་ཀརྞི་ཤ་ཀུན་ཏི། །སྐེ་ཚེ་ཀ་པིད་ཐའི་ལོ་མ། །ག་བྲ་མོན་སྣེའུ་ཀ་མུ་ཀ །རྐང་མར་བི་ཤ་མུཥྛི་དང༌། །བུ་སྲིན་དང་འབམ་པོའོ། །བྱེ་རུག་པ་ལ་སོགས་པའི་སྡེ། །བད་ཀན་ཚིལ་ཆེས་སྲིན་ནད་སེལ། །ཆམ་པ་ཡིག་འཆུས་ལུད་པ། །དབུགས་མི་བདེ་འཇོམས་རྨ་རེད་སྦྱོང༌། །ཞེས་བྱ་བ་ལ། བྱིའུ་རུག་པ་ལ་སོགས་པའི་སྡེ་ཚན་འདི་ནི་བད་ཀན་ཚིལ་ཆེས་པ་དང༌། སྲིན་ནད་འཇོམས་པར་བྱེད་པ་དང༌། དེ་བཞིན་དུ་ཆམ་པ་ལ་སོགས་བ་འཇོམས་པ་དང༌། རྨ་རེད་པ་སྦྱོང་ཞིང་དག་པར་བྱེད་པ་ཡིན་ནོ། །བྱེའུ་རུག་པ་རྣམ་པ་གཉིས་ནི་སེར་པོ་དང་ནག་པོའི་དབྱེ་བས་ཕྱེ་བའོ། །ཀུ་ཐེ་ར་ནི་ཀ་ཀ་མ་ཙི་ཏའོ། །ཀ་མུ་ག་ནི་ནི་དི་ཀན་ད་སྟེ། མིང་གི་རྣམ་གྲངས་གཞན་ཨ་ཏི་མུག་ཏ་ཀ་ཞེས་བྱའོ། །རྐང་མར་ནི་ཨ་ལམ་བུ་སའོ། །བག་ཤ་མུག་ཏི་ནི་ཀེ་ཤ་མུཥྛི་སྟིའོ། །བུ་སྲིན་ནི་གུ་ཧ་བི་ན་ཛ་ག་སྟེ་ས་བོན་མི་མངོན་བའོ། །འབམ་པོ་ནི་འབུ་ཏ་གེ་ཤིའོ། །མུ་སྐ་ཀ་དང་
སྣུ་ཧ་དང༌། །འབྲས་བུ་གསུམ་དང་ཙི་ཏྲ་ཀ །པ་ལ་ཤ་དང་དྷ་བ་དང༌། །ཤིང་ཤ་པ་ཞེས་བྱ་བ་རྣམས། །སྐྲན་དང་གཅིན་ནད་རྡེའུ་ཆགས། །སྐྱ་རྦབ་དང་ནི་ཚིལ་ཆེས་ནད། །བད་ཀན་རྒྱས་དང་ཁུ་བ་ཡི། །ནད་རྣམས་སེལ་བར་བྱེད་པ་ཡིན། །ཞེས་བྱ་བ་ལ། མུ་སྐ་ཀ་ལ་སོགས་པའི་སྡེ་ཚན་འདི་ནི། སྐྲན་ལ་སོགས་པ་ནུས་ཁུ་བའི་ནད་ཀྱི་བར་དུ་སེལ་ཞིང་འཇོམས་བར་བྱེད་པ་ཡིན་ནོ། །དེ་ལ་མུ་སྐ་ཀ་ནི་ཤིང་མོང་ཤ་ཀ་ཞེས་བྱ་བའོ། །སྣུ་ཧ་ནི་སུདྷ་སྟེ་ཤྲཱི་ཁཎྜའི་ཤིང་ངོ༌། །བ་ལ་ཤ་ནི་བྲ་མ་ཏ་རུའོ། །དྷ་བ་ནི་ཤིང་ཤ་པའི་མིང་གི་རྣམ་གྲངས་མལ་ད་ལ་པ་ཧ་ཞེས་བྱ་བ་ཟླུམ་པ་ཞིག་གོ །དུག་མོ་ཉུང་དང་མུར་བ་དང༌། །བར་གི་དང་ནི་བུ་ཙེ་ཤེལ། །ན་ལེ་ཤ་མ་དང་བོང་ང་དཀར། །ཆུ་སྒོག་སུག་སྨེལ་པ་ཐ་དང༌། །ཡུངས་ཀར་ཟིར་ཨུ་ར་ལུ། །ཨ་ཟ་མོ་དང་པོ་སོན་ཆ། །ཤུ་དག་ཟིར་ནག་པོ་དང༌། །ཤིང་ཀུན་དང་ནི་བྱི་དང་ག །པ་ཤུ་གནྡྷ་ཚ་བ་ལྔ། །རླུང་དང་བད་ཀན་ཚིལ་ཆེས་དང༌། །ཆམ་བ་སྐྲན་དང་རིམས་དང་གཟེར། །གཞང་འབྲུམ་གྱི་ནི་ནང་རྣམས་སེལ། །ཞེས་བྱ་བ་ལ། དུག་མོ་ཉུང་ལ་སོགས་པའི་སྡེ་ཚན་དུ་གཏོགས་པའི་སྡེ་འདི་ནི་རླུང་ནད་དང༌། བད་ཀན་ལ་སོགས་པ་ནས་གཞང་འབྲུམ་གྱི་བར་འཇོམས་ཤིང་སེལ་བར་བྱེད་པ་ཡིན་ནོ། །དུག་མོ་ཉུང་ནི་རྣམ་གྲངས་པ་བད་ཀ་ཞེས་པའོ། །ཆུ་སྒོག་ནི་གན་དི་རིའོ། །ཨུ་ར་ལུ་ནི་ག་ཀ་ཏང་ཀ་སྟེ་མ་ཧཱ་ནི་མ་བའོ། །ཤུ་དག་ནི་ཚིགས་དྲུག་བའོ། །པ་ཤུག་ནདྷ་ནི་སྲ་ཏི་མི་རུ་རའོ། །ཚ་བ་ལྔ་ནི་པི་པི་ལིང་དང༌། པི་པི་ལིང་གི་རྩ་བ་དང༌། དབྱི་མོང་དང༌། ཙི་ཏྲ་ཀ་དང༌། བཅའ་སྒའོ། །ཤུ་དག་གླ་སྒང་ཐང་ཤིང་དང༌། །དོང་གྲ་བོང་ང་ཨ་རུ་ར། །སེར་པོ་གཉིས་དང་ཤིང་མངར་དང༌། །ཀྲྀཥྞ་པརྞི་དུག་མོ་ཡུངས། །ཤུ་དག་ཡུང་བ་ལ་སོགས་སྡེ། །བེའུ་སྣབས་ཚད་པས་འཁྲུ་སྨིན་གཅོད། །ཚིལ་ཆེས་བད་ཀན་རྒྱས་རླུང་འཁྱིལ། །ནུ་མའི་ནད་རྣམས་སེལ་བར་བྱེད། །ཅེས་བྱ་བ་ལ། ཤུ་དག་ལ་སོགས་པའི་སྡེ་ཚན་འདི་ནི། བེ་སྣབས་ཚད་བས་འཁྲུ་བ་སྨིན་པར་བྱེད་དོ། །ཚིལ་ཆེས་པ་དང་བད་ཀན་རྒྱས་པ་ལ་སོགས་པ་སེལ་བར་བྱེད་དོ། །སྨན་རྣམས་ནི་གོ་བར་ཟད་དོ། །དྲི་ཡང་ཀུ་དང་ར་གན་དུད། །ལིག་པུ་མིག་དང་སྟང་ཟིལ་དང༌། །
ལྕིམ་རྩ་པདྨ་སར་དང༌། །བཙོད་དང་ཡ་བ་ཤ་ཀ་དང༌། །ཤལ་མ་ལི་དང་དེའི་ཁུ་བ། །ས་མང་ག་དང་བུ་ན་མ། །ཙནྡན་ད་ཏ་ཀའི་མེ་ཏོག །ཨ་མ་བཤ་དང་ཤིང་མངར་དང༌། །ན་མ་ཀ་ར་ཏུ་ནི་ཤིང༌། །རྒྱ་སྐྱེགས་ཤིང་དང་ཀད་ཚུར། །སེང་ཕྲོམ་བིལ་རྐང་ད་ཏ་ཀི །པདྨའི་གསེར་ཀ་ཏང་ཀ ། པྲི་ཡང་ཨམ་པཤྠ་སྡེ་གཉིས། །ཞུ་བའི་ཚད་པའི་འཁྲུ་བ་སེལ། །འབྱོར་བྱེད་མཁྲིས་པ་དག་ལ་ཕན། །རྨ་ཡང་འཚོ་བར་བྱེད་པ་ཡིན། །ཞེས་བྱ་བ་ལ། པྲི་ཡང་ཀུ་དང༌། ཨ་མ་ཤའི་སྡེ་ཚན་འདི་གཉིས་ནི། ཞུ་བའི་ཚད་བས་འཁྲུ་བ་སེལ་བ་སྟེ། མ་ཞུ་བའི་བེ་སྣབས་མེད་པའི་འཁྲུ་བ་འཇོམས་པར་བྱེད་པ་དང༌། དེ་བཞིན་དུ་འབྱོར་བར་བྱེད་དེ། རྨ་འཚོ་བའི་ཚད་པས་འཁྲུ་བ་གཅོད་པ་དང་མཁྲིས་པ་ལ་ཕན་ཞིང་སྤ་ལ་ཕན་ཞིང་བདེ་བར་བྱེད་པ་དང༌། དེ་བཞིན་དུ་རྨ་ཡང་འཚོ་ཞིང་འབྱོར་པ་ལ་ཕན་པར་བྱེད་པ་ཡིན་ནོ། །དེ་ཡང་པྲི་ཡང་ཀུ་ནི་གན་དྷ་པྲི་ཡང་ཀུ་སྟེ། དེའི་མེ་ཏོག་གོ །ལྕིམ་རྩ་ནི་པདྨ་རྩ་རའོ། །པདྨ་གེ་སར་ནི་པདྨའི་ཀི་ན་ཛ་གའོ། །བཙོད་ནི་མན་ཛི་ཤྠའོ། །ཡབ་ཤ་ཀ་ནི་ཨ་ནན་ཏའོ། །ཤལ་མ་ལི་ནི་མན་དུ་མའོ། །དེའི་ཁུ་བ་ནི་ཤལ་མའི་ཁུ་བ་སྟེ། དེ་ལ་མོ་ཐ་རས་ཞེས་ཀྱང་བྱའོ། །སམ་ག་ནི་ན་མ་ཀར་དང་རཀྟ་མཱུ་ལ་ཞེས་བྱ་བ་ལ། རྩབ་དམར་བའོ། །བུ་ན་མ་ནི་རཀྟ་གེ་སར་རོ། །ད་ཏ་ཀི་ནི་མ་ད་ཧེ་ཏུ་སྟེ་ཚང་རྩིའོ། །ཨམ་བ་ཤ་ནི་བ་ཧུ་མཱུ་ལ་ཀ་སྟེ། རྩ་བ་མང་པོའོ། །ན་མ་ཀ་ར་ནི་ས་མང་གའོ། །ཏུ་ནི་ཤིང་ནི་ནན་ཏི་བྲྀ་ཀྵའོ། །ཀད་ཚུར་ནི་ཧ་རི་ཞེས་བྱ་བ་འདབ་མ་ཕྲ་བ་ཞིག་གོ །ཀ་ཧང་ཀ་ནི་ཨ་རུ་ལ་ཀའོ། །གླ་སྒང་ཤུ་དག་ཀྲུ་ཏྲུག་ཏྲེས། །སེར་པོ་གཉིས་དང་ཁ་བ་གཉིས། །གོ་བྱེ་བ་ཐ་འབྲས་བུ་གསུམ། །བོང་ང་དཀར་ནག་རུ་རྟ་དང༌། །སུག་སྨེལ་དང་ནི་ཤུ་དག་རྣམས། །ནུ་ཞོ་མངལ་ནད་དྲི་མ་སེལ། །ཞེས་བྱ་བ་ལ། གླ་སྒང་ལ་སོགས་པའི་སྡེ་ཚན་དུ་བྱས་པ་ནི། ནུ་ཞོའི་ནད་བུད་མེད་ཀྱི་ནུ་ཞོའི་སྐྱོན་དང་དེ་བཞིན་དུ་མངལ་གྱི་ནད་རྣམས་དང་དྲི་མ་སྟེ། འཕྱེན་དང་བཤང་གཅི་ལ་སོགས་པའི་ནད་སྨིན་ཅིང་སེལ་བར་བྱེད་པ་ཡིན་ནོ། །ཁ་བ་གཉིས་ལས་གཅིག་ནི་བུ་ཙེ་ཤེལ་ལོ། །གཉིས་པ་ཀ་ཀ་ཏིག་ཏའོ། །གཞན་ནི་གོ་བར་ཟད་དོ། །ནྱ་གྲོ་དྷ་དང་ཨ་ཤྭདྠ། །ཨུ་དུམྦཱ་ར་སེང་ཕྲོམ་གཉིས། །འཛམ་
བུ་གཉིས་དང་ཨརྫུ་ན། །ཀ་པི་ཏ་དང་ཀད་བ་ལ། །པླཀྴ་ཨ་མྲ་ལྕང་མ་དང༌། །པི་ལ་ཡ་དང་པ་ལ་ཤ་།ནན་ཏི་རྒྱ་ཤུག་ཀ་དམ་པ། །བི་ད་ཤིང་མངར་མ་དུ་ཀ །ནྱ་གྲོ་དྷ་སོགས་སྡེ་ཚན་འདི། །རྨ་འཚོ་འཁྲུ་གཅོད་ཆག་གྲུགས་འབྱོར། །ཚིལ་ཆེས་ཁྲག་མཁྲིས་སྐོམ་དད་ཆེ། །མངལ་གྱི་ནད་རྣམས་སེལ་བར་བྱེད། །ཅེས་བྱ་བ་ལ། ནྱ་གྲོ་དྷ་ལ་སོགས་པའི་སྡེ་ཚན་འདི་ནི། རྨ་འཚོ་ཞིང་འབྱོར་བར་བྱེད་པ་དང༌། འཁྲུ་བ་གཅོད་པ་དང༌། རྐང་ལག་གི་ཆག་གྲུགས་འབྱོར་བར་བྱེད་པ་དང༌། ཚིལ་ཆེས་པ་དང་ཁྲག་མཁྲིས་ལ་སོགས་པའི་ནད་སེལ་བར་བྱེད་པ་ཡིན་ནོ། །ནྱ་གྲོ་དྷ་ནི་བ་ཤི་བ་དའོ། །ཨ་ཤྭངྠ་ནི་བི་བ་ལའོ། །ཨུ་དུམྦཱར་ནི་ས་དང་ཕ་རོལ་ལའོ། །འཛམ་བུ་གཉིས་ལས་གཅིག་ནི་ར་ཛ་འཛམ་བུ་སྟེ། འབྲས་བུ་ཆེ་བ་ཞིག་གོ །གཉིས་པ་ནི་ཀ་འཛམ་བུའོ། །ཨརྫུ་ན་ནི་ཀུ་ཀུ་བའོ། །ཀ་པི་ཏ་ནི་བ་ར་དའོ། །ཀད་པ་ལ་ནི་སོམ་བ་ལ་ཀའོ། །པླག་ཤ་ནི་གར་ཤ་གན་དའོ། །ཨ་མྲ་ནི་ཙུ་ཏའོ། །ལྕང་མ་ནི་བན་ཛུ་ལའོ། །བི་ཡ་ལ་ནི་ཁ་ར་ཀན་དའོ། །དེ་བཞིན་དུ་པ་ལ་ཤ་ནི་ཀིང་ཤུ་ཀའོ། །ཤིང་ནན་ཏི་ནི་དུ་ནི་ཤིང་ངོ༌། །རྒྱ་ཤུག་ནི་བ་དི་རའོ། །བི་ད་ར་ལ་ནི་ཏིན་དུ་ཁིའོ། །གཞན་དག་ན་རེ་དིརྒ་ན་ཁ་ཡིན་ནོ་ཞེས་ཟེར་རོ། །མ་དུ་ཀ་ནི་མ་དུ་པུཥྤའོ། །ཨེ་ལ་གཉིས་དང་ཏུ་རུ་ཀ །རུ་རྟ་གནྡྷ་པྲི་ཡང་ཀུ། །སྤང་སྤོས་བ་ལ་བྱ་མ་ཀ །སྤྲི་ཀ་ཙོ་ར་ཙོ་ཙ་དང༌། །ཤིང་ཚ་གནྡྷ་བྷ་དྲ་དང༌། །རྒྱ་སྤོས་པོ་ལ་སྠེ་ནེ་ཡ། །རྒྱ་མཚོ་སྤུ་བ་ཆུ་སྲིན་སེན། །ཐང་ཤིང་དང་ནི་ཨ་ཀ་རུ། །གུར་གུམ་ཤི་རི་བ་ས་ཀ །ཙནྡན་གུ་གུལ་ལྕེ་པོག་དཀར། །བུ་ན་མ་དང་ཀུན་དུ་རུ། །ནཱ་ག་གེ་སར་ཞེས་བྱའོ། །ཨེ་ལ་སོགས་སྡེ་རླུང་བད་ཀན། །དུག་རྣམས་སེལ་ཞིང་མདོག་གསལ་བྱེད། །གཡན་པ་ཐོར་བུའི་ནད་རྣམས་དང༌། །ཤ་བཀྲ་བས་ལྡག་སེལ་བར་བྱེད། །ཅེས་བྱ་བ་ལ། ཨེ་ལ་ལ་སོགས་པའི་སྡེ་ཚན་འདི་ནི། རླུང་དང་བད་ཀན་དང་དུག་རྣམས་སེལ་བར་བྱེད་བ་དང༌། དེ་བཞིན་དུ་མདོག་གསལ་ཞིང་དང་བར་བྱེད་བ་དང༌། གཡན་པ་ལ་སོགས་པ་སེལ་བར་བྱེད་པ་ཡིན་ནོ། །ཨེ་ལ་གཉིས་ནི་སུག་སྨེལ་ཞེས་བྱ་བ། ཨེ་ལ་ཕྲ་མོ་དང༌། ཨེ་ལ་སྦོམ་པའོ། །
ཏུ་རུ་ཀ་ནི་སི་ལ་ར་སའོ། །གནྡྷ་བྲི་ཡང་ཀུ་ནི་ཕ་ནིའོ། །བྱ་མ་ཀ་ནི་དེ་བ་ད་དྷའོ། །སྤྲི་ཀ་ནི་ད་བ་ལི་སྟེ། འབུ་སུག་ཧང་ངོ༌། །ཙོ་ར་ཀ་ནི་བན་དྷ་ཐིག་ཁ་ན་སྟེ་ཙ་རོའོ། །ཙོ་ཙ་ནི་ས་ནི་ཏ་ཀ་རུ་སྟེ། མིང་གི་རྣམ་གྲངས་ན་ཏ་ཞེས་བྱའོ། །བོ་ལ་ནི་ཛ་ཀི་བ་ཀའོ། །རྒྱ་མཚོ་སྦུ་བ་ནི་བྱ་གྲ་ན་ག་སྟེ། ས་མུན་ཏྲ་ན་ཛ་ལ་ཞེས་བྱའོ། །ཐང་ཤིང་ནི་ཐང་ཤིང་རིང་པོའི་ཐང་ཆུའོ། །ཙནྡན་ནི་པུ་ཤུ་ནའོ། །གུ་གུལ་ནི་མ་ཧི་ཤ་གྷའོ། །པོག་དཀར་པོ་ནི་སརྫ་ར་ས་སྟེ། ལྷའི་སྤོས་ཞེས་ཀྱང་བྱའོ། །བུ་ན་མ་ནི་རཀྟ་ཀེ་ས་རའོ། །ཀུན་དུ་རུ་ནི་ཁ་བུར་རའོ། །ཤ་མ་དན་ཏི་དྲ་བན་ཏི། །ཀུ་ཏ་ར་ནན་ཀྲ་མུ་ཀ །ཤང་གི་ནི་དང་ས་ཏ་ལ། །ཁྲོན་བུ་དང་ནི་ག་བ་ཀྵི། །སུ་དྷ་ཀྵི་ར་ཀམ་བི་ལྱ། །སླེ་ཏྲེས་དོང་ག་ཀ་རཉྫ། །བཥྚ་ཨན་ཏྲ་ཤི་ཀྲུ་དང༌། །ཨ་མྲ་ཤིང་རོ་ཚའི་འབྲས་བུ། །དུར་བྱིད་ལ་སོགས་སྡེ་ཚན་འདི། །སྐྲན་དང་དུག་དང་ཡི་ག་འཆུས། །བད་ཀན་དང་ནི་སྙིང་ནད་དང༌། །གཅིན་སྲི་བ་ཡི་ནད་རྣམས་སེལ། །ཞེས་བྱ་བ་ལ། ཤམ་ལ་སོགས་པའི་སྡེ་ཚན་འདི་ནི་སྐྲན་ལ་སོགས་པའི་ནད་རྣམས་འཇོམས་ཤིང་སེལ་བར་བྱེད་པ་ཡིན་ནོ། །དེ་ལ་ཤ་མ་ནི་དུར་བྱིད་ཀྱི་བྱེ་བྲག་སྟེ། བ་ལི་ན་ཏི་ཞེས་བྱའོ། །དན་ཏི་ནི་མུ་ཀ་ལའོ། །དྲ་བན་ཏི་ནི་མུ་ཤ་ཀ་ར་ནིའོ། །ཀུ་ཏ་ར་ནི་བོད་སྟང་སྟེ། དུར་བྱེད་ཅེས་སོ། །ཀྲ་མུ་ཀ་ནི་གླ་གོར་ཞོ་ཤའོ། །ཤང་གི་ནི་ནི་ཡ་བ་ཏིག་ཏའོ། །ས་ཏ་ལ་ནི་ཙར་མས་དང་ཞེས་བྱའོ། །ཁྲོན་བུ་ནི་ཏིག་ཏ་དུག་དྷ་ག་སྟེ། འོ་མ་ཁ་བྲོ་བ་ཡོད་པའོ། །ག་བཀྴ་ནི་བི་ཤ་ལའོ། །སུ་དྷ་ཀྵི་ར་ནི་སུ་དའོ། །ཀམ་བི་ལྱ་ནི་ར་ཛ་ན་ཁོའོ། །ཀ་རཉྫ་ནི་པུ་ཏི་ཀ་རཉྫའོ། །བཥྚ་ཨ་ན་ཏྲ་ནི་བི་ཤ་གནྡྷིའོ། །ཤི་ཀྲུ་ནི་བ་ཧ་ལའོ། །ཤིང་རོ་ཚ་ནི་པི་ལུ་སྟེ་དེའི་འབྲས་བུའོ། །དེ་ལྟར་སུམ་ཅུ་རྩ་གསུམ་བཤད། །སྡེ་ཚན་དེ་དག་མ་རྙེད་ན། །དེ་དང་ཆ་མཚུངས་གཞན་ཡང་སྦྱར། །མི་འདྲའི་སྦྱོར་བ་སྤང་བར་བྱ། །དེ་ལྟར་ཞེས་བྱ་བའི་སྒྲ་ནི་རྫོགས་པའི་དོན་ནམ་རྣམ་པའི་དོན་ནོ། །དེ་ལ་རྫོགས་པ་ནི་སྡེ་ཚན་སུམ་ཅུ་རྩ་གསུམ་རྫོགས་པའོ། །རྣམ་པའི་དོན་ནི་རྣམ་པ་འདིས་སྡེ་ཚན་སུམ་ཅུ་རྩ་གསུམ་ཡིན་གྱི། ཡང་རྣམ་པ་གཞན་དུ་ན་སྨན་གྱི་དབྱེ་བ་ལ་ལྟོས་ན། སྡེ་ཚན་མཐའ་ཡས་པ་ཡིན་ནོ། །དེ་དག་ལས་སྦྱོར་བ་
དང་རྗེས་སུ་མཐུན་པ་གང་ཡིན་པ་གཞན་དེ་དང་དེ་དག་གི་མ་སྨོས་སུ་ཟིན་ཀྱང་གཞུག་བར་བྱ་ལ། གང་གཞན་སྦྱོར་བ་དང་མི་མཐུན་པ་དེ་དག་ནི་སྨོས་སུ་ཟིན་ཀྱང་གདོན་པར་བྱའོ། །དེ་བཞིན་དུ་སྡེ་ཚན་ཡང་གཞན་དག་དེ་དང་མཚུངས་པ་སྟེ། རོ་དང་ནུས་པ་དང༌། འཇུ་བའི་ཚུལ་དེ་དག་མཉམ་པའི་སྨན་གཞན་དག་སྦྱར་ཞིང་བསྲེ་བར་བྱའོ། །ཅི་མདོར་བྱ་བ་བསྟན་པ་ནི་འདི་ཙམ་ཁོ་ནར་ཟད་དམ། འོན་ཏེ་དེར་བྱ་བ་གཞན་འགའ་ཞིག་ཀྱང་ཡོད་ཅེ་ན། དེའི་ཕྱིར་སྨྲས་པ་ནི། མི་འདྲ་བའི་སྦྱོར་བ་སྤང་བར་བྱ་བ་ཡིན་ཏེ། རྫས་གང་སྦྱོར་བ་དང་མི་མཐུན་ཞིང་ཆ་མི་འདྲ་བ་སྟེ། སྤངས་ཤིང་དོར་བར་བྱའོ། །སྡེ་ཚན་དེ་དག་གནོད་དང་གནད་བྱ་སོགས་ལྟོས་ཏེ། །ཆོ་ག་བསྐོལ་དང་སྣུམ་དང་བསྡམས་པ་ལ་སོགས་ལྡན། །བཏུད་དང་སྣར་གཏོང་མས་གཏོང་དང་ནི་ཕྱི་རོལ་དུ། །བསྐུ་ཞིང་བྱུགས་པས་ཤིན་ཏུ་གསོ་དཀའི་ནད་ཀུན་འཇོམས། །ཞེས་བྱ་བ་ལ། དོན་གྱི་ཤུགས་ཀྱིས་ན་ནད་ལ་སོགས་པ་ལ་ལྟོས་པ་སྟེ། སྦྱོར་བ་དང་རྗེས་སུ་མཐུན་ཞིང་ཆ་འདྲ་བ་ནི་གཞུག་པར་བྱའོ། །ཞེས་སྟོན་པ་ཡིན་ནོ། །དེ་བས་ན་ནད་ལ་སོགས་པ་ལ་ལྟོས་བས་སྡེ་ཚན་མ་ལུས་པ་གསོ་བར་གཏོགས་པའི་ནད་རབ་ཏུ་ཞི་བར་བྱ་བའི་ཕྱིར་སྨན་སྦྱིན་པར་བྱ་ལ། གལ་ཏེ་སྡེ་ཚན་གྱི་སྨན་མ་ལུས་པ་རྙེད་ན་ཀུན་སྦྱིན་པར་བྱའོ། །གལ་ཏེ་མ་རྙེད་ན་དེ་ལས་སྨན་གཅིག་གམ་གཉིས་སམ་གསུམ་མ་མ་བཞིའམ་ལྔ་འམ་མང་པོའམ། ཇི་ཙམ་འབྱོར་པ་སྦྱིན་པར་བྱའི་འདིར་སྡེ་ཚན་ལས་སྨོས་པའི་སྨན་མ་ལུས་པ་མེད་དུ་མི་རུང་བ་ནི་མ་ཡིན་ནོ། །དེ་ཡང་སྨན་དཔྱད་ཀྱི་གཞུང་གཞན་ལས། དོན་གྱི་དབྱེ་བ་ལ་ལྟོས་ན། །ཕན་པའི་སྡེ་ཚན་སྦྱར་བྱ་ལ། །རེ་རེ་འམ་བསྲེས་བ་མ་ལུས་པ། །སྡེ་ཚན་སོ་སོར་བསྡུ་བར་བྱ། །ཞེས་སྨོས་པ་ཡིན་ནོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས་ལེའུ་བཅྭ་ལྔ་བའི་རྣམ་པར་འགྲེལ་པའོ།། །།དེ་ནས་སྣུམ་གྱི་ཆོ་ག་དཔྱད་པར་བྱ་བའི་ལེའུ་བཤད་པར་བྱའོ། །ཞེས་བྱ་བ་ལ། སྦྱར་བ་ལ་སོགས་པའི་སྨན་གྱི་སྡེ་ཚན་གྱི་རྗེས་ལ། སྣུམ་གྱི་
ཆོ་ག་བྱ་བའི་ལེའུ་བརྩམས་པ་ནི་གང་གི་ཕྱིར་སྐྱུག་སྨན་ལ་སོགས་པས་སྦྱོར་བ་ན། སྣུམ་དང་དུགས་བྱས་ན་སླར་གནོད་པར་འགྱུར་བས། དེའི་འོག་ཏུ་འདི་བཤད་པ་ཡིན་ནོ། །དེ་ལ་སྣུམ་ནི་ཞུན་མར་དང༌། ཏིལ་མར་དང༌། ཚིལ་དང་རྐང་ལ་སོགས་པའོ། །དེའི་ཆོ་ག་ནི་བྱ་བའི་ལས་ཀྱི་ཆོ་ག་སྟེ། དེའི་ལེའུ་གང་དུ་བཤད། དེའི་སྨན་གྱི་ཆོ་གར་བྱ་བའི་ལེའུ་སྟེ། དེ་བཤད་པར་བྱའོ་ཞེས་བྱ་བའོ། །སྣུམ་བྱེད་སྨན་རྣམས་ཕལ་ཆེར་ནི། །ལྕི་ཞིང་བསིལ་ལ་ཁོང་འཁྲུ་སྣུམ། །རྡུལ་དང་བྲལ་ལ་མཉེན་ཞིང་བརླན། །དེ་ལས་བཟློག་པ་རྩུབ་བྱེད་ཡིན། །ཞེས་བྱ་བའི་ཕྱིར་བསྟན་པ་འདི་ནི་གཞུང་རྩོམ་པར་བྱེད་པ་དང༌། རྩུབ་པར་བྱེད་པའི་སྨན་རྣམས་ཀྱི་མཚན་ཉིད་མདོར་བསྡུས་ནས་བཤད་པ་ཡིན་ནོ། །སྨན་གང་ཅི་ཡང་རུང་བ་ལྕི་བ་ལ་སོགས་པའི་ཡོན་ཏན་དང་ལྡན་པ་དེ་དག་ནི་སྣུམ་པར་བྱེད་པ་དང་ལྡན་པ་དེ་ནི་ཡིན་ལ། ཡོན་ཏན་དེ་ལས་གོ་བཟློག་པ་ཡང་བ་དང༌། དྲོ་བ་དང༌། བཤང་བ་སྲི་བ་དང༌། རྩུབ་པ་དང༌། རྣོ་བ་དང༌། སྦོམ་པ་དང༌། སྲ་བ་དང༌། བསྐ་བ་དང༌། མང་བའི་ཡོན་ཏན་དང་ལྡན་པ་དེ་ནི་རྩུབ་པར་བྱེད་པ་ཡིན་ནོ། །ཕལ་ཆེར་ཞེས་སྨོས་པ་ནི་སྣུམ་པར་བྱེད་པ་དང༌། རྩུབ་པར་བྱེད་པ་གཉིས་ཀ་ལ་ཡང་སྦྱར་བར་བྱ་སྟེ། དེ་ལ་གོ་རིམས་འཆོལ་བ་དག་ཀྱང་ཡོད་པར་བསྟན་པའི་ཕྱིར་རོ། །དེ་ཡང་དཔེར་ན་རའི་འོ་མ་ནི་ཡང་ནས་ཡང་དུ་སྣུམ་པར་བྱེད་པ་ཡིན་ནོ། །དེ་བཞིན་དུ་ཏིལ་མར་ནི་སྣུམ་པར་བྱེད་པ་ཡིན་ནོ། །དེ་བཞིན་དུ་མོན་སྲན་དཀར་པོ་ནི། ལྕི་བའི་ཡོན་ཏན་དང་ལྡན་ཡང་ཡང་བར་བྱེད་པ་ཡིན་ནོ། །ཞུན་མར་རྐང་དང་ཚིལ་ཏིལ་མར། །སྣུམ་རྣམས་ཀྱི་ནི་མཆོག་རབ་འདོད། །ཅེས་བྱ་བ་ལ། ཞུན་མར་ལ་སོགས་བ་བཞི་བོ་ནི། སྣུམ་ཐམས་ཅད་ཀྱི་ནང་ནས་མཆོག་རབ་བམ། གཙོ་བོ་ཡིན་བར་སྨན་བ་མཁས་པ་རྣམས་འདོད་དོ། །རང་གི་ལས་མྱུར་དུ་སྒྲུབ་བར་བྱེད་པ་ཡིན་པའི་ཕྱིར་རོ། །དེ་དག་ལས་ཀྱང་ཞུན་མར་ནི། །སྦྱོར་རྗེས་འཇུག་པས་མཆོག་ཡིན་ནོ། །ཞེས་བྱ་བ་ལ། བཞི་པོ་དེ་དག་གི་ནང་ནས་ཀྱང་ཞུན་མར་ནི་མཆོག་ཡིན་ཏེ། ཅིའི་ཕྱིར་ཞེ་ན། སྦྱོར་རྗེས་འཇུག་པ་ཞེས་བྱ་བ་སྟེ། སྨན་དང་སྦྱར་བ་དེའི་རྗེས་སུ་འཇུག་ཅིང་མཐུན་
པས་དེའི་ཕྱིར་ཞུན་མར་ནི་སྣུམ་ཐམས་ཅད་ཀྱི་མཆོག་ཡིན་གྱི་ཏིལ་མར་ནི་མ་ཡིན་ནོ། །དེ་ཡང་རྒྱུ་མཉམ་དུ་ཟིན་ཀྱང་ཞུན་མར་ནི་བུ་རམ་ལ་སོགས་པ་རྫས་ཀྱི་ཡོན་ཏན་དྲོ་བ་ཡོད་པ་དང་སྦྱར་དུ་ཟིན་ཀྱང༌། རང་གི་མཚན་ཉིད་ཀྱིས་བསིལ་བ་མདོར་བསྟན་པས་སྦྱོར་བའི་སྨན་གྱི་རྗེས་སུ་མཐུན་པར་འཇུག་གི །ཏིལ་མར་ནི་དེ་ལྟ་མ་ཡིན་ནོ། །དེ་ནི་ཙནྡན་ལ་སོགས་པ་སྨན་གྱི་ནུས་མཐུ་བསིལ་བ་དང་ལྡན་པར་སྦྱར་ན་ཡང༌། རང་གི་ཡོན་ཏན་དྲོ་བ་དེ་རྣམས་ཐམས་ཅད་དུ་འདོར་བར་མི་འགྱུར་ལ། དེ་མི་འདོར་བས་ན་ཁྲག་དང་མཁྲིས་པ་དང༌། མེ་དབལ་ལ་སོགས་པ་ལ་ཡང་གནོད་པར་བྱེད་པ་ཡིན་ནོ། །དེ་དག་སྔོན་བཞིན་མཁྲིས་པ་སེལ། །ཕྱི་མ་བཞིན་དུ་ཅིག་ཤོས་སེལ། །ཞེས་བྱ་བ་ལ། སྣུམ་སྔ་མ་གང་ཡིན་པ་ནི། སྔོན་བཞིན་ཞེས་བྱ་བ་ལ། གང་ཞིག་ལ་གང་ལས་འོག་མར་གྱུར་པ་ནི་ཕྱི་མ་བཞིན་ཞེས་བྱ་བ་ལ། ཕྱི་མ་ལ་ལྟོས་པ་ནི་སྔ་མ་ཡིན་ནོ། །སྔ་མ་ལ་ལྟོས་པ་ནི་ཕྱི་མ་ཡིན་ནོ། །དེ་བས་ན་འདི་སྐད་དུ། བསྟན་པའི་ཞུན་མར་ལ་སོགས་པའི་སྣུམ་བཞི་པོ་དེ་དག་ལས། ཚིལ་དང་རྐང་མར་ཞུན་མར་ཞེས་བྱ་བ་ནི་སྔོན་བཞིན་ཏིལ་མར་ཞེས་བྱ་བའི་སྣུམ་ནི་མ་ཡིན་ཏེ། དེ་ལས་གོང་མར་གྱུར་པ་མེད་པའི་ཕྱིར་དང༌། འདི་གང་ཞིག་ལ་ལྟོས་ནས་སྔ་མས་བདག་ཉིད་སྒྲུབ་པའི་ཕྱིར་ཕྱི་མ་ཡང་ཡོད་པ་མ་ཡིན་པའི་ཕྱིར་རོ། །དེ་བཞིན་དུ་སྣུམ་བཞི་པོ་དེ་དག་ལས་རྐང་དང་ཚིལ་དང་ཏིལ་མར་ཞེས་བྱ་བ་ལ་སྣུམ་གསུམ་པོ་ཁོ་ན་ཕྱི་མ་བཞི་དང་སྦྱོར་ཏེ། ཞུན་མར་ཞེས་བྱ་བའི་སྣུམ་ལ་ཕྱི་མ་ཡོད་པ་མ་ཡིན་ནོ། །དེ་བས་ན་སྔ་མ་བཞིན་དུ་མཁྲིས་བ་སེལ་བ་ཡིན་པས་ཚིལ་དང་རྐང་དང་ཞུན་མར་ནི་མཁྲིས་པ་སེལ་བར་བྱེད་པ་ཡིན་ནོ། །དེ་ལས་ཀྱང་ཚིལ་ནི་མཁྲིས་པ་སེལ་བར་བྱེད་པ་ཡིན་ནོ། །རྐང་ནི་རབ་ཏུ་མཁྲིས་པ་སེལ་བར་བྱེད་པའོ། །ཞུན་མར་ནི་རབ་མཆོག་མཁྲིས་བ་སེལ་བར་བྱེད་པའོ། །ཕྱི་མ་བཞིན་དུ་ཅིག་ཤོས་སེལ། །ཞེས་བྱ་བ་ནས། ཅིག་ཤོས་ནི་རླུང་དང་བད་ཀན་གཉིས་ཏེ། དེ་དག་སྣུམ་གསུམ་པོ་རྐང་དང་ཚིལ་དང་ཏིལ་མར་གྱིས་རིམ་བཞིན་སེལ་བར་བྱེད་པ་ཡིན་ཏེ། རྐང་ནི་རླུང་དང་བད་ཀན་སེལ་བར་བྱེད་པ་ཡིན་ནོ། །ཚིལ་གྱིས་རླུང་དང་བད་ཀན་རབ་ཏུ་སེལ་བའོ། །ཏིལ་མར་གྱིས་རླུང་
དང་བད་ཀན་རབ་མཆོག་ཏུ་སེལ་བར་བྱེད་པ་ཡིན་ནོ། །མར་བས་ཏིལ་མར་ལྕི་དེ་བས། །ཚིལ་དེ་ཚིལ་བས་རྐང་ལྕིའོ། །ཞེས་བྱ་བ་ནི། འདི་དག་འཇུ་དཀའ་བའི་རིམ་པ་ཡིན་ཏེ། དེ་ཡང་མཐོ་བཙུན་དཔལ་འཕེལ་གྱིས་བྱས་བའི་གཅེས་པ་བཏུས་པ་ལས། ཞུན་མར་བས་ནི་ཏིལ་མར་ལྕི་བ་ཡིན་ལ། ཏིལ་བས་ནི་ཚིལ་ལྕི་ཞིང་འཇུ་དཀའ་བ་ཡིན་ནོ། །ཚིལ་བས་ནི་རྐང་འཇུ་དཀའ་བ་ཡིན་ནོ་ཞེས་བཤད་པ་ཡིན་ནོ། །སྣུམ་རྣམས་ཀྱི་མིང་དང་མིང་ཅན་གྱི་འབྲེལ་པ་བསྟན་པར་བྱ་བའི་ཕྱིར་སྨྲས་པ་ནི། དེ་ལས་གཉིས་དང་གསུམ་དང་བཞི། །ཟུང་དང་གསུམ་པ་ཆེ་ཞེས་བྱ། །ཞེས་བྱ་བ་ཡིན་ཏེ། སྣུམ་གཉིས་པོ་མར་དང་ཏིལ་མར་ནི་ཟུང་ཞེས་བྱ་བའི་སྣུམ་ཡིན་ནོ། །ཞུན་མར་དང་ཏིལ་མར་དང༌། ཚིལ་གསུམ་གསུམ་པ་ཞེས་བྱའོ། །དེ་གསུམ་རྐང་དང་བཅས་པ་བཞི་བོ་ཞེས་བྱའོ། །དུགས་བྱ་སྦྱང་བྱ་ཆང་བུད་མེད། །རྩོལ་ཆགས་སེམས་ལས་ཆེ་བ་དང། །རྒན་པོ་བྱིས་པ་སྟོབས་ཆུང་སྦེག །རྩུབ་དང་ཁྲག་དང་ཁུ་བ་ཟད། །རླུང་ནད་ཀྱིས་ཉེན་རབ་རབ་དང༌། །ཤིན་ཏུ་དབྱེ་དཀའ་ལ་སྣུམ་བྱ། །ཞེས་བྱ་བ་ལ། དུགས་བྱ་བར་འོས་པ་ནི་དུགས་བྱ་བའོ། །ལེགས་བར་སྦྱང་བར་འོས་པ་ནི་སྦྱང་བར་བྱའོ། །ཆང་དང་བུད་མེད་དང་རྩོལ་བ་རྣམས་ལ་ཆགས་པ་དང༌། དེ་བཞིན་དུ་སེམས་ལས་ཆེ་བ་དང༌། རྒན་བོ་དང་བྱིས་པ་དང༌། སྟོབས་ཆུང་བ་དང་སྦེག་པ་དང༌། རྩུབ་བ་དང༌། གང་ཁྲག་དང་ཁུ་བ་ཟད་བ་དང༌། དེ་བཞིན་དུ་རླུང་ནད་ཀྱིས་རབ་ཏུ་ཉེན་ཞིང་གདུངས་པ་དང༌། དེ་བཞིན་དུ་ཡང་རླུང་ལས་རབ་རིབ་དང༌། མིག་ནད་ཤིན་ཏུ་དབྱེ་དཀའ་ཞིང༌། མིག་དཀའ་བས་དབྱེ་དགོས་པ་གང་ཡིན་པ་སྟེ། དེ་དག་ལ་སྣུམ་གྱི་ལས་བྱའོ། །ཤིན་ཏུ་དྲོད་ཆུང་རབ་དྲོད་ཆེ། །ཤིན་ཏུ་སྦོམ་དང་རིད་པ་དང༌། །བརླ་རེངས་ཚད་འཁྲུ་མ་ཞུ་དང༌། །ལྐོག་ནད་དབྱིག་དུག་དམུ་རྫིང་དང༌། །བརྒྱལ་སྐྱུགས་བད་ཀན་ཡི་ག་འཆུས། །སྐོམ་དང་ཆང་ནད་ཀྱིས་ཉེན་དང༌། །དུས་མིན་བུ་སྐྱེས་སྣ་སྨན་དང༌། །མས་གཏོང་བཀྲུ་སྨན་བྱས་ལ་མིན། །ཞེས་བྱ་བ་ནི། ཤིན་ཏུ་དྲོད་ཆུང་བ་ལ་སོགས་པ་ལ་སྣུམ་གྱི་ཆོ་ག་མི་བྱའོ། །ཞེས་བྱ་བར་སྦྱར་རོ། །དེ་དྲོད་ཤིན་ཏུ་ཆེ་བ་ལ་སྣུམ་གྱི་ཆོ་ག་བྱས་ན་མེ་དྲོད་ཤིན་
ཏུ་འཕེལ་དྲགས་པར་འགྱུར་རོ། །ཤིན་ཏུ་སྦོམ་པ་ལ་ཡང་མེ་དྲོད་དང་ཚིལ་ཆེར་འཕེལ་བར་འགྱུར་རོ། །རིད་པས་ནི་འཇུ་མི་ནུས་པར་འགྱུར་རོ། །བརླ་རེངས་ལ་སོགས་པས་ཉེན་པ་ཞེས་བྱ་བར་སྦྱར་ཏེ། དུས་མ་ཡིན་བར་བུ་སྐྱེས་པ་ཡང་སྣུམ་གྱི་ཆོ་ག་མི་བྱ་སྟེ། ཟླ་བ་མ་ཚང་བར་བུ་སྐྱེས་ན་འདིར་སྦྱོར་བའི་སྟོབས་ཡིན་དུ་ཟིན་ཀྱང༌། སྣུམ་གྱི་ཆོ་ག་མ་བྱས་པར་སྦྱར་བའི་ཆོ་ག་བྱའོ། །ཞེས་སྟོན་པ་ཡིན་ནོ། །དུས་མ་ཡིན་པར་བུ་སྐྱེས་པ་ཡང་སྣུམ་གྱི་ཆོ་ག་མི་བྱ་སྟེ། ཟླ་བ་མ་ཚང་བར་དུ་སྐྱེས་པ་ཡང་སྣུམ་གྱི་ཆོ་ག་མི་བྱའོ། །དེ་བཞིན་དུ་སྣ་སྨན་ལ་སོགས་པ་ལས་གསུམ་པོ་བྱས་པའི་སྐབས་སུ་ཡང་སྣུམ་བཅོས་ཀྱི་ཆོ་ག་མི་བྱའོ། །དེ་ལ་བློ་དྲན་ཡིད་གཞུངས་སོགས། །འདོད་པ་རྣམས་ལ་ཞུན་མར་བསྔགས། །ཞེས་བྱ་བ་ནི། དེ་ལ་སྣུམ་རྣམས་ཀྱི་ནང་ནས་བློ་གྲོས་ལ་སོགས་པ་འདོད་ཅིང་དོན་དུ་གཉེར་བའི་སྐྱེས་བུས་སྣུམ་བསྟེན་པའི་སྐབས་ལ་བབ་པས་ན། ཞུན་མར་བཏུང་བ་བསྔགས་ཤིང་འདོད་པར་བྱ་བ་ཡིན་ཏེ། དེའི་ནུས་པ་དེ་ཡིན་པའི་ཕྱིར་རོ། །དེ་ལ་བློ་ནི་བློ་གྲོས་སོ། །དྲན་པ་ནི་སྔོན་ཉམས་སུ་མྱོང་བ་དྲན་པའོ། །ཡིད་གཞུངས་པ་ནི་ཤེས་པ་སྟེ། གཞུང་འཛིན་པར་ནུས་པ་དང་ལྡན་པའོ། །སོགས་པའི་སྒྲས་ནི་སྐད་གདངས་མདོག་ལ་སོགས་པ་བལྟའོ། །རྨེན་བུ་བད་ཀན་སྲིན་བུ་དང༌། །ཚིལ་ཆེས་རླུང་ནད་ཡོད་པ་དང༌། །ལུས་ཡང་མཁྲང་འདོད་ལྟོ་སྲབ་པའི། །ལུས་ཅན་རྣམས་ལ་ཏིལ་མར་ཕན། །ཞེས་བྱ་བ་ལ། རྩ་ནད་ལ་སོགས་པའི་ནད་རྣམས་དང༌། དེ་བཞིན་དུ་བད་ཀན་དང༌། ཚིལ་ཆེས་པ་དང༌། རླུང་ནད་ཅན་གྱི་སྐྱེས་བུ་དང༌། དེ་བཞིན་དུ་ལུས་ཡང་བར་འདོད་བ་དང༌། མཁྲང་བར་འདོད་བ་དང༌། དེ་བཞིན་དུ་སྲབ་པའི་ལུས་ཅན་རྣམས་ལ་ཏིལ་མར་ཕན་ནོ། །ཞེས་བྱ་བར་སྦྱར་རོ། །རླུང་དང་ཉི་ཚན་ལམ་བུད་མེད། །ཁུར་དང་རྩོལ་བས་ལུས་ཟུངས་ཟད། །རྩུབ་ཉོན་མོངས་བཟོད་མེ་དྲོད་རྣོ། །རྩ་སྒོ་རླུང་འགགས་ལྷག་མ་ཕན། །ཞེས་བྱ་བ་ལ། རླུང་དང་ཉི་ཚན་ལ་སོགས་བས་ལུས་ཟུངས་ཟད་བར་འགྱུར་བའི་སྐྱེས་བུ་གང་ཡིན་པ་དང༌། དེ་བཞིན་དུ་ལུས་རྩུབ་པ་ལ་སོགས་པ་ལ། སྣུམ་ལྷག་མ་རྐང་དང་ཚིལ་བུ་གཉིས་ཕན་ཞིང་བསྔགས་པ་
ཡིན་ནོ། །ཉོན་མོངས་བཟོད་ཅེས་བྱ་བའི་སྒྲས། ཉོན་མོངས་ཤིང་དཀའ་བ་བསྟེན་མི་བཟོད་པས་ནི་ཞུན་མར་དང་ཏིལ་མར་བསྟེན་པར་མི་བྱའོ། །ཞེས་བཀར་བ་ཡིན་ནོ། །མེ་དྲོད་ནི་རྣོ་བའི་སྣུམ་སྔ་མ་དག་གིས། རྐང་དང་ཚིལ་སྦྱིན་པ་དང༌། དགར་བའི་ཚིག་ཡིན་ནོ། །རླུང་གིས་རྩ་སྒོ་ཀུན་འགགས་ཤིང་ཆོད་པ་འདི་ལྟ་བུ་ལ་ཚིལ་ཟོས་ན་ཕན་ནོ། །དེ་ལ་ཚིལ་ནི་ལྷག་པར་རུས་པའི་ཚིགས་ཁ་བྱེ་བ་དང༌། རུས་པ་ཆག་པ་དང༌། གནོད་སྣང་པ་དང༌། ལྟོ་བའི་ནང་གྲོལ་ན་བ་དང༌། མེས་ཚིག་པ་དང༌། ལུས་སྨས་ཏེ་རྨ་བྱུང་བ་དང༌། རྐང་ལག་གི་ཚིགས་བུར་བ་དང༌། མོ་མཚན་ན་བ་དང༌། རྣ་བ་ན་བ་དང༌། ཀླད་པ་ན་བ་དང༌། འདི་ལྟ་བུ་ལ་ཡང་ཚིལ་ཕན་ནོ། །ཞེས་བྱ་བར་སྦྱར་ན་ཡང་ཚིལ་མཆོག་ཏུ་ཡང་ཕན་པ་ཡིན་ནོ། །ད་ནི་དུས་གང་ཞིག་བཏང་བ་བསྔགས་པ་བསྟན་པའི་ཕྱིར་སྨྲས་པ་ནི། ཏིལ་མར་དབྱར་ཕན་ཞུན་མར་ནི། །དབྱར་མཐའ་དེ་བཞིན་དཔྱིད་ཀྱང་བསྔགས། །ཞེས་བྱ་བ་ལ། འདིར་དབྱར་ཞེས་སྨོས་ཀྱང་དབྱར་སྨོས་པའི་དུས་ཚིགས་ཐོག་མ་ལ་བྱ་སྟེ། དེ་ནས་དབྱར་ཟླ་འབྲིང་པོའོ་ཞེས་བྱ་བའི་སྐབས་སུ་སྦྱོང་བ་བྱེད་ན། ཏིལ་མར་བསྔགས་པ་ཡིན་ནོ། །དབྱར་མཐའ་ཞེས་སྨོས་ཀྱང༌། ཆར་འབབ་པའི་མཐའ་རྫོགས་པ་སྟོན་ཟླ་ཐ་ཆུངས་ལ། དེའི་ཚེ་སྣུམ་བྱ་བའི་དོན་དུ་ཞུན་མར་བསྔགས་པ་ཡིན་ནོ། །གཞན་ཞེས་བྱ་བ་རྐང་དང་ཚིལ་ཞེས་བྱ་བའི་སྣུམ་ནི་དཔྱིད་ཟླ་འབྲིང་པོའི་སྐབས་སུ་སྦྱོང་བར་བྱེད་པ་ན་སྣུམ་གྱི་སྦྱོར་བ་བསྔགས་པ་ཡིན་ནོ། །འདི་དག་ནི་ནད་མེད་པའམ། ནད་པ་གང་ཡང་རུང་བ་སྦྱོང་བ་བྱེད་པའི་གནས་སྐབས་བྱ་བའི་ཕྱིར་གཞུང་འདི་བརྩམས་པ་ཡིན་ནོ། །ནད་མེད་ཅིང་ཐ་མལ་པར་གནས་པ་དག་གིས་ཇི་སྐད་བཤད་པའི་དུས་ཚིགས་ཀྱི་ཆོ་ག་རྗེས་སུ་དཔྱད་ཟིན་ཀྱང་དུས་ལས་བྱུང་བའི་ནད་བསགས་པ་དག་ཡོད་སྲིད་པར་དེའི་འོག་ཏུ་དེ་ལས་ནད་བསགས་པ་གཞི་འཁྲུགས་པར་འགྱུར་ལ། ནད་འཁྲུགས་པས་ནད་འབྱུང་བར་འགྱུར་བ་ཡིན་ཏེ། དེ་བས་ན་ཚེའི་རིག་བྱེད་ཀྱི་དེ་ཁོ་ན་ཤེས་པའི་དྲང་སྲོང་རྣམས་ཀྱིས་རང་བཞིན་གྱིས་བྱས་པའི་རྒྱུད་སོ་སོར་བདེ་བར་གནས་པ་དག་གིས་སྦྱང་བ་དག་བྱ་བ་ཉིད་དུ་བསྟན་པ་ཡིན་ནོ། །དེ་བཞིན་དུ་གྲང་བ་ལས་བྱུང་བའི་ནད་བསགས་པ་ནི་དཔྱིད་ཀྱི་ཚེ་སྦྱང་བ་བཤད་པ་འདིས་ཆོ་ག་ལྷག་མ་ཡོད་པའི་གཞུང་གིས་སྦྱར་བ་ཡིན་ནོ། །བཀྲུ་སྨན་ལ་སོགས་
པའི་སྦྱོང་བ་རྣམས་ཀྱང་སྣུམ་དང་དུགས་ཀྱི་ཆོ་ག་བྱ་བ་སྔོན་དུ་འགྲོ་བས་བྱ་བ་ཡིན་གྱི་གཞན་དུ་མ་ཡིན་ནོ། །དེའི་ཕྱིར་གྲང་བ་ལས་བྱུང་བའི་ནད་བསགས་པ་ནི་དཔྱིད་ཀྱི་དུས་སུ་གདོན་ཅིང༌། གྲང་བ་ན་སྣུམ་དང་དུགས་བྱ་བ་དང༌། དེའི་ཚེ་ཏིལ་མར་བཀག་པ་ཡིན་ནོ། །དེ་བཞིན་དུ་དབྱར་འདས་པ་ན། དབྱར་བསགས་པའི་ནད་འབྱིན་པ་ནད་དང་པོར་སྣུམ་དང་དུགས་ངེས་པར་བྱ་དགོས་ལ། དེར་ཡང་སྣུམ་ཐམས་ཅད་ཀྱིས་སྣུམ་གྱི་ཆོ་ག་བྱེད་དེ། དེ་ཡིན་པའི་ཕྱིར་ཀུན་གྱི་བྱེད་པ་དག་སྲིད་མོད་ཀྱི། དེར་གནས་མོད་ཀྱིས་མི་བྱའོ། །ཞུན་མར་གྱི་སྣུམ་གྱི་ཆོ་ག་བྱ་སྟེ། འདི་ནི་ནད་མེད་པའི་ཡུལ་ལ་བྱས་བའི་ངེས་བ་ཡིན་ནོ། །ནད་བའི་གནས་སྐབས་སྦྱང་བར་བྱས་པ་གསོ་བའི་ནད་ཀྱིས་ཉེན་པ་ལ་ཏིལ་མར་གྱིས་གསོ་དགོས་པའི་ནད་ཡིན་ཏེ། དེ་དང་མི་འཚམ་དུ་ཟིན་ཀྱང༌། དབྱར་སྦྱང་བའི་ལས་བྱེད་པ་ན། ཏིལ་མར་ཉིད་ཀྱིས་སྣུམ་གྱི་ཆོ་ག་བྱའོ། །སྣུམ་གཞན་གྱིས་ནི་མ་ཡིན་ནོ། །དེ་བཞིན་དུ་གཞན་དག་ཀྱང་ནད་ཀྱི་ཚུལ་དང་སྦྱར་ཏེ། རང་ཉིད་ཀྱི་རྗེས་སུ་དཔག་པར་བྱའོ། །འདིར་འདི་ལྟར་དབྱར་ཏིལ་མར་གཏང་ངོ༌། །དབྱར་གྱི་མཐའ་ནི་ཞག་དང་ཚིལ་བུ་གཏང་ངོ༌། །ཞེས་བྱ་བའི་ཚུལ་གྱིས་ངེས་བ་བཞག་པ་ནི་གཞན་ལ་ཡང་ཅུང་ཟད་ལྟོས་པ་ཡིན་པས། ནད་དེའི་ཕྱིར་སྨྲས་པ་ནི། ཐུན་མོང་དུས་ལ་སྣུམ་རྣམས་ནི། །ཉིན་མོ་ཉི་མ་གསལ་ཚེ་བསྔགས། །ཞེས་བྱ་བ་ཡིན་ཏེ། ཐུན་མོང་དུ་ཤིན་ཏུ་ཚབ་མ་ཡིན་ཏེ། གྲང་བ་མ་ཡིན་པའི་གནས་སྐབས་བར་མར་སྣུམ་གྱི་ཆོ་ག་བྱེད་པ་ན། དེའི་ཚེ་སྦྱང་བའི་སྔོན་དུ་ཏིལ་མར་ལ་སོགས་པ་སྣུམ་གྱི་ཆོ་ག་འདིའི་དོན་དུ་སྦྱོང་བ་དེ་ཡང་ཉིན་པར་བྱའོ། །མཚན་མོ་ནེ་མ་ཡིན་ནོ། །དེ་བཞིན་དུ་ཉི་མ་གསལ་བ་སྟེ། ནམ་མཁའ་ལྟར་དྲི་མ་མེད་ཅིང་སྤྲིན་གྱིས་ཉི་མའི་ཟེར་མ་བསྒྲིབས་པའི་ཚེན་བྱ་བ་ཡིན་ནོ། །དེ་ལྟར་ན་དུས་དེ་རྣམས་སུ་ནད་བསགས་པ་ངེས་པར་འཇོམས་བའི་ཆོ་ག་བཤད་པ་ཡིན་ནོ། །དབྱར་ལ་སོགས་པ་མ་གཏོགས་པ་དུས་གཞན་དག་ཏུ་ནད་ཀྱི་དབང་གིས་བསྐྱུར་ཏེ། བྱ་དགོས་པའི་སྦྱང་བས་བྱ་བ་ཡིན་དུ་ཟིན་ཀྱང་བྱ་བའི་མཚན་ཉིད་དུ་འགྱུར་ཏེ་དེ་བཞིན་དུ་ཉི་མ་གསལ་བ་སྟེ། ནམ་མཁའ་ལྟར་གང་གི་ཕྱིར་དེ་སྦྱོང་བའི་འོག་ཏུ་སྣུམ་གྱི་ཆོ་ག་ཁྱ་དགོས་ལ། དེ་ལ་ཡང་སྣུམ་གྱི་ངེས་བ་བཤད་པས་ན་སྣུམ་གཞན་གྱི་དགོས་པ་བཞིན་བྱེད་བར་མི་ནུས་པ་དེ་ལ་ཇི་ལྟར་བྱ། བདེ་བ་བསྟེན་བར་བྱ་བ་སྨྲས་པ་ནི། རིངས་ལ་དགུན་ཡང་ཏིལ་མར་གཏང༌། །ཚ་བའི་དུས་སུའང་མར་ཚན་གཏང༌། །ཞེས་བྱ་བ་ལ། ནད་ཀྱི་གསོ་བའི་རིམ་ཐབས་སུ་བྱ་དགོས་ཤིང་
སྦྱང་བས་གསོ་དགོས་པའི་ནད་ལ་དགུན་སྟོད་དགུན་སྨད་ཀྱི་ཚེ་ཡང་སྦྱང་བའི་དོན་དུ་ཏིལ་མར་གཏང་བར་བྱའོ། །ཡང་ཞེས་བྱ་བའི་སྒྲས་ནི་ཏིལ་མར་དབྱར་འབའ་ཞིག་གི་ཚེ་གཏང་བར་མ་ཟད་དོ། །ཞེས་ངེས་པར་གཞག་པ་ཡིན་ནོ། །དེ་བཞིན་དུ་རིངས་པར་གསོ་དགོས་པ་ཡིན་ན། གང་གི་ཚེ་སོ་གའི་ཚེ་སྦྱོང་བ་བྱེད་པ་དེའི་ཚེ་སྦྱང་བའི་སྔོན་དུ་སྣུམ་གྱི་ཆོ་གར་གཏང་བའོ། །ཡང་ཞེས་བྱ་བའི་སྒྲས་རི་ཏིལ་མར་མཐའ་འབའ་ཞིག་ཏུ་ཞུན་མར་གཏང་བར་མ་ཟད་ཀྱི་དུས་འདིའི་ཚེ་ན་ཡང་གཏང་བ་ཡིན་ནོ། །སྣུམ་ཐམས་ཅད་ཉིན་མོ་གཏང་བ་ཡིན་མོད་ཀྱི། མཚན་མོ་ཡང་རིང་ཐབས་ལ་གཏང་དུ་རུང་ངོ༌། །མཁྲིས་པ་རླུང་དང་མཁྲིས་པར་བཅས། །ལྡན་པ་ལ་ཡང་མཚན་མོ་ཉིད། །ཅེས་བྱ་བ་ལ། ཚ་བའི་དུས་སུ་མར་སྣུམ་གྱི་ཆོ་ག་སྦྱོང་བའི་སྔར་མཚན་མོ་གཏང་དུ་རུང་བས་ངེས་པ་འབའ་ཞིག་ཏུ་མ་ཟད་ཀྱི་འདི་ཡང་ངེས་པ་ཡིན་ཏེ། མཁྲིས་པའི་ནད་ཡིན་ཏེ། དེ་དང་འབྱུང་བའི་ནད་དང༌། དེ་བཞིན་དུ་རླུང་འཁྲུགས་པའི་ནད་དང༌། དེ་ལས་བྱུང་བའི་ནད་སྣུམ་གྱིས་གསོ་བར་བྱ་ལ། དེ་ཞི་བར་བྱ་བའི་ཕྱིར་ཚ་བའི་དུས་སུ་སྨན་དང་སྦྱར་བའམ་མ་སྦྱར་བ་ཞུན་མར་སྦྱིན་པར་བྱའོ། །ཉིན་མོ་མ་ཡིན་པ་ལ་ཏིལ་མར་དང༌། རྐང་དང་ཚིལ་སྦྱིན་པར་བྱའོ། །དེ་བཞིན་དུ་མཁྲིས་པ་དང་བཅས་པའི་ལྡན་པ་ལ་མཚན་མོར་སྦྱིན་བར་བྱ་སྟེ། དེ་ཡང་ལྡན་པའི་གཉིས་པོ་མཁྲིས་པ་ཤས་ཆེ་བའི་རླུང་མཁྲིས་ཀྱི་ལྡན་པ་དང༌། མཁྲིས་པ་དང་བད་ཀན་དུ་ལྡན་པའམ། དེ་ལས་བྱུང་བའི་ནད་སྣུམ་གྱིས་གསོ་བར་བྱ་ལ། དེ་ཞི་བར་བྱ་བའི་ཕྱིར་ཞུན་མར་ཁོ་ན་མཚན་མོ་གཏང་བར་བྱའི་ཏིལ་མར་ལ་སོགས་པའི་སྣུམ་གཞན་ཡང་མི་གཏང་ལ། ཉིན་མོ་ཡང་གཏང་བར་མི་བྱའོ། །མཁྲིས་པ་དང་རླུང་ཞེས་སྨོས་པ་འདིས་ནི་ནད་ཀྱི་མཚན་ཉིད་ཉེ་བར་མཚོན་པའི་དོན་ཤེས་པར་བྱའོ། །མཚན་མོ་ལས་གཞན་རླུང་བད་ཀན། །ཉིན་མོར་སྦྱར་བས་མཁྲིས་ནད་འགྱུར། །ཞེས་བྱ་བ་ལ། འདིའི་དོན་ནི་འདི་ཡིན་ཏེ། ཞུན་མར་དང་ཏིལ་མར་གཉིས་བཏང་བ་དེ་བཞིན་དུ་གྲང་བའི་དུས་སུ་ཞུན་མར་བཏང་ན་རླུང་དང་བད་ཀན་གྱི་སྐྱོན་དུ་འགྱུར་རོ། །དེ་བཞིན་དུ་ཚ་བའི་དུས་སུ་ཏིལ་མར་ཉིན་མོ་བཏང་ན་མཁྲིས་པའི་ནང་དུ་འགྱུར་རོ། །རྐང་དང་ཚིལ་ནི་གྲང་བའི་དུས་དང་དྲོ་བའི་དུས་གཉི་གར་རིངས་པའི་དུས་བྱུང་བ་དག་ལ་སྦྱང་བའི་སྔོན་དུ་སྣུམ་གྱི་ཆོ་ག་བྱ་བར་གཞུང་རྩོམ་བས་མ་བཤད་དེ། དེ་གཉིས་ནི་ཚ་བ་དང་བསིལ་བའི་ནུས་པ་དང་གཉི་ག་ཡོད་པས། དེ་ལ་བསིལ་བའི་ཡོན་ཏན་འབའ་ཞིག་
མེད་དེ་གཞན་ལ་རག་ལས་པ་ཡིན་པའི་ཕྱིར་དང་དེ་བཞིན་དུ་ཤ་དང་རྗེས་སུ་མཐུན་པ་ཡིན་ནོ་ཞེས་བཤད་དོ། །དེ་ཡང་སྨན་དཔྱད་ཀྱི་ལུང་ལས། སེམས་ཅན་ཚ་གྲང་ཅི་འདྲ་བ། །རྐང་དང་ཚིལ་བུ་འདྲ་བར་བཤད། །ཅེས་འབྱུང་བ་ཡིན་ནོ། །དེ་ལྟར་སྣུམ་གྱིས་གཏང་བའི་དུས་གང་དང་གང་ཡིན་པ་ངེས་པར་བཤད་ནས། ད་ནི་སྣུམ་དེ་ཇི་ལྟར་བཏང་བ་དེ་བསྟན་པར་བྱ་བའི་ཕྱིར་སྨྲས་པ། བཟའ་སོགས་ཟས་དང་མས་གཏོང་དང༌། །སྣ་ནས་གཏང་བསྐུ་མཁུར་བཀང་དབོ། །མགོ་བསྐུ་རྣ་མིག་དགང་བ་ཡི། །སྣུམ་ནི་རིགས་པར་དཔྱད་པར་བྱ། །ཞེས་བྱ་བ་ལ། སྣུམ་རིགས་པར་དཔྱད་པར་བྱ་ཞེ་ན། བཟའ་སོགས་ཟས་དང་ཞེས་བྱ་བ་ལ་སོགས་པ་སྟེ། འབྲས་ཁུར་ལ་སོགས་པ་ཚོད་མ་ལ་སོགས་པ་ལྷན་ཅིག་མིད་པ་དང༌། ལྷན་ཅིག་བཟའ་བ་དང༌། དེ་བཞིན་དུ་མས་གཏོང་བ་གསུམ་པོ་བཀྲུ་སྨན་དྲག་པོ་མས་གཏོང་བ་ནི་རུ་ཧ་དང༌། བཀྲུ་སྨན་འཇམ་པོ་མས་གཏོང་བ་དང༌། འཇམ་རྩི་མས་གཏོང་བ་སྟེ་གསུམ་དང༌། སྣ་ནས་གཏང་བ་དང༌། ལུས་བསྐུ་བ་དང༌། མཁུར་བ་དགང་ཞིང་དཔོ་བ་དང༌། རྣ་བ་དགང་བ་དང༌། མིག་དགང་བ་སྟེ། འདི་དག་འོག་ནས་བཤད་པའི་མཚན་ཉིད་ཅན་རིགས་པ་ཞེས་བྱ་བ་སྦྱོར་བའི་ཐབས་ལ་སོགས་པའི་མཚན་ཉིད་དང་ལྡན་བར་དུས་ཀྱིས་བྱ་བ་བསམ་པ་དང༌། ལུས་ཀྱི་ཚད་དང༌། ནད་ཀྱི་ཚུལ་ལ་དཔགས་ནས། རན་ཅིང་འཚམ་པར་ཉེ་བར་དཔྱད་པར་བྱའོ། །དེ་བཞིན་དུ། རོ་ཡི་དབྱེ་བ་རེ་རེ་ཡིས། །དྲུག་ཅུ་རྩ་བཞི་རྣམ་པར་བརྟག །ཅེས་བྱ་བ་སྟེ། རོའི་དབྱེ་བར་རེ་རེ་དབྲི་བ་ལ་སོགས་པའི་གཞུང་བསྟན་ནས། དྲུག་ཅུ་རྩ་གསུམ་གྱི་གྲངས་སུ་ཆད་པ་དང༌། ལྷན་ཅིག་སྣུམ་སྦྱར་བ་དང༌། དེ་བཞིན་དུ་རེ་རེ་བཏང་ཞིང་ཕྲད་མེད་པར་སྣུམ་འབའ་ཞིག་བཏང་བ་ལས། དྲུག་ཅུ་རྩ་བཞི་རྣམ་པར་བརྟག་ཅིང་དཔྱད་པར་བྱའོ། །དེ་ལྟར་རོའི་དབྱེ་བ་རེ་རེ་ལས་སྣུམ་པ་རྣམ་པར་དཔྱད་ན་དྲུག་ཅུ་རྩ་བཞིར་འགྱུར་བར་བཤད་པ་ན། དགོས་པ་ཅི་ཞིག་གི་ཕྱིར་དཔྱད་པ་འདི་བཤད་ཅེ་ན། དེའི་ཕྱིར་རིགས་པས་གཉིས་སྨྲས་པ་ནི། སྣུམ་ནི་གཞན་གྱིས་ཟིལ་གནོན་ཅིང༌། །ཆུང་དུ་དགོས་པས་རིམ་པ་བཤད། །ཅེས་བྱ་བ་ལ། སྣུམ་ཞིང་
ཆུང་ངུ་དགོས་པའི་ཕྱིར་དང༌། དེ་བཞིན་དུ་གཞན་གྱི་ཟིལ་གྱིས་གནོན་ཅིང་ཟས་ལ་སོགས་པ་མང་པོས་ཟིལ་གྱིས་མནན་པ་དང༌། དེ་བཞིན་དུ་རོའི་དབྱེ་བས་ཀྱང་ཟིལ་གྱིས་མནན་ཏེ། དེ་ལྟར་ཟིལ་གྱིས་གནོན་བས་ན། དེའི་ཕྱིར་དེ་རྣམས་ནི་དེ་རྣམ་པར་བརྟག་པ་ཞེས་བྱའོ། །དེ་བས་ན་ཞུན་མར་འབའ་ཞིག་བཏུང་བ་ལ་ནི་རྣམ་པར་དཔྱད་མི་དགོས་པར་བཤད་དེ། དེའི་ཕྱིར་སྨྲས་པ་ནི། ཇི་སྐད་བཤད་པའི་རྒྱུ་མེད་པས། །དངས་མ་བཏུང་ལ་དཔྱད་མི་དགོས། །སྣུམ་གྱི་ལས་ནི་མྱུར་འགྲུབ་པས། །སྣུམ་དེའི་ཆོ་ག་མཆོག་ཡིན་ནོ། །ཞེས་བྱ་བ་ལ། ཇི་སྐད་བཤད་པའི་རྒྱུ་མེད་པ་ནི་སྔར་ཇི་སྐད་བསྟན་པའི་རྒྱུ་མེད་པའི་ཕྱིར་དང༌། མང་དུ་དགོས་པའི་ཕྱིར་འདི་ལ་དཔྱད་མི་དགོས་ལ། དེ་བས་ན་སྣུམ་གྱི་ཆོ་ག་དངས་མ་བཏུང་བ་དེ་ལྟ་བུ་དེ་ནི་མཆོག་ཡིན་ཏེ། རྣམ་པར་དཔྱད་དགོས་པ་ལས་ཁྱད་པར་ཡོད་པའི་ཕྱིར་རོ། །ཅིའི་ཕྱིར་ཞེ་ན། སྣུམ་གྱི་ལས་ནི་མྱུར་འགྲུབ་པ། །ཞེས་བྱ་བ་ཡིན་ཏེ། སྣུམ་གྱི་བྱ་བ་མྱུར་ཞིང་རིངས་པར་རྫོགས་པར་བྱེད་ཅིང་སྣུམ་གྱིས་གསོ་བའི་ནད་ཞི་བར་བྱེད་པ་ཡིན་པས་མཆོག་ཡིན་ནོ། །དངས་མ་བཏུང་བ་དེ་སྣུམ་གྱི་ཆོ་གར་གཏོང་བའི་ཚད་ཆུང་དུ་དང༌། བར་མ་དང༌། ཆེན་པོར་བཤད་པ་ནི་ཕོ་བའི་མེ་དྲོད་ཀྱིས་འཇུ་བ་ལས་རྗེས་སུ་དཔག་པ་ལས་ཤེས་པར་བྱ་དགོས་པའི་ཕྱིར། འདིར་སྨྲས་པ་ཡིན་ཏེ། གང་ཞིག་ཐུན་ནི་གཉིས་དང་བཞི། །བརྒྱད་ཀྱིས་རིམ་བཞིན་འཇུ་འགྱུར་བ། །ཚད་ཆུང་འབྲིང་དང་ཆེ་བ་སྟེ། །དེ་ལས་ཆུང་དུ་བཟའ་བ་མཆོག །ཅེས་བྱ་བ་ལ། སྣུམ་དེ་བཟའ་བའི་ཟས་ནི་ཆུང་དང་འབྲིང་དང་ཆེན་པོ་གསུམ་དུ་འགྱུར་ཏེ། ཚད་གང་ཞིག་གིས་ཐུན་གཉིས་ཀྱིས་འཇུ་བར་འགྱུར་བ་དེ་ནི་ཆུང་དུ་ཡིན་ལ་གང་ཐུན་བཞིས་རྗེས་སུ་འཇུ་བར་གྱུར་པ་དེ་ནི་བར་མ་ཞེས་བྱའོ། །གང་ཞིག་ཐུན་བརྒྱད་ཀྱིས་འཇུ་བ་དེ་ནི་ཆེན་པོ་ཞེས་བྱའོ། །དེ་ལྟར་ཚད་ཆུང་དུ་དང་འབྲིང་དང་ཆེན་པོ་དེ་རྣམས་ལས་གང་ཞིག་ཚད་ཆུང་དུ་དེ་ནི་མཆོག་ཡིན་ཏེ། སྦྱོར་བ་ཐམས་ཅད་དང་འཚམ་བ་ཡིན་པའི་ཕྱིར་རོ། །དེ་ཡང་ཚད་ཆུང་དུ་དེ་ནི་ཚད་ཆུང་བ་གཏང་དགོས་པ་ལ་ཉེ་བར་སྦྱར་བ་ན་སྐྱོན་མེད་པ་ཡིན་ལ། དེ་བཞིན་དུ་ཚད་འབྲིང་དང་ཆེན་པོ་གཏང་དགོས་པ་
ལ་བཏང་དུ་ཟིན་ཀྱང་སྐྱོན་མེད་པ་ཉིད་ཡིན་ནོ། །དེ་ཉིད་ཀྱིས་ན་གཞུང་རྩོམ་པར་བྱེད་པས། ནད་ལ་སོགས་པ་བརྟགས་ནས་ནི། །ཐོག་མར་ཤིན་ཏུ་ཆུང་དུ་བཟའ། །ཞེས་སྨྲས་པ་ཡིན་ཏེ། ནད་པའི་ཚུལ་དང་ཡུལ་དང༌། དུས་ལ་སོགས་པ་བརྟགས་ཤིང་དཔྱད་ནས་ཐོག་མར་ཏེ། དང་པོར་ཁོ་ནར་ཐམས་ཅད་དུ་ཚད་ནི་ཤིན་ཏུ་ཆུང་དུ་བཟའ་བར་བྱ་ཞིང་ལོངས་སྤྱད་པར་བྱའོ། །དེས་ན་འདི་སྐད་སྟོན་ཏེ། ནད་དང་ཡུལ་ལ་སོགས་པ་ལས་བརྟགས་ནས་ཚད་ཤིན་ཏུ་ཆུང་བ་ནི་ཚད་བཞི་པར་བརྟག་པར་བྱ་སྟེ། གང་གི་ཕྱིར་སྐྱེས་བུའི་ཕོ་བའི་མེའི་ཚད་མ་ཤེས་པར་སྣུམ་མང་དུ་བྱིན་ན་དེ་མི་འཇུ་ཞིང་སྲོག་ཀྱང་འདོར་བར་འགྱུར་བ་སྲིད་པ་ཡིན་ནོ། །ད་ནི་སྣུམ་གྱི་ཚད་གསུམ་པོ་དེ་དག་གཏང་བའི་དུས་དང༌། གཏང་བའི་གནས་བསྟན་པར་བྱ་བའི་ཕྱིར་སྨྲས་པ་ནི། སྔ་དེའི་ཟས་ནི་ཞུ་ཉིད་དང༌། །སྦྱང་ཕྱིར་དངས་མ་མང་དུ་བཏུང༌། །ཞེས་བྱ་བ་ཡིན་ཏེ། སྔ་དེ་ཞག་གི་ཟས་ཞུ་བ་ཙམ་ཉིད་ཀྱི་དུས་དེ་ཉིད་དེ། ཟས་ནི་ཞུ་བཀྲེས་པས་ནི་ཉེན་པའི་སྐབས་སུ་སྦྱང་བའི་ཕྱིར། སྣུམ་མང་དུ་གཏང་བ་ཉིད་ལ་ཞུན་མར་དངས་མ་འབའ་ཞིག་བཏུང་བར་བསྔགས་པས་ན། དེའི་ཕྱིར་འདི་ཉིད་ཅེས་བྱ་བའི་སྒྲ་ངེས་པར་བཟུང་བའི་དོན་དུ་སྨྲས་པ་ཡིན་ནོ། །སྔ་དེ་ཞག་གི་ཟན་ཞུ་བ་ཉིད་ན་ཞེས་པས་ཆད་ཀྱི་ལྟོགས་པ་དང་བཏུང་བར་བྱ་བ་ཡིན་ཏེ། དེ་ནི་གང་གི་ཕྱིར་མྱུར་བ་ཉིད་དུ་འཇུ་བར་བྱེད་དེ། སྦྱང་བ་མ་བྱས་པར་མེའི་དྲོད་ཤིན་ཏུ་ཤས་ཆེ་བ་ཡིན་བའི་ཕྱིར་རོ། །དེ་ཡང་དྲང་སྲོང་ཙ་ར་ཀས། ལྟོ་བ་རླུང་གི་ཤས་ཆེ་ཞིང༌། །རྩོལ་བ་ཆེ་བའི་དང་ཚུལ་ཅན། །མེ་དྲོད་ཆེ་བའི་སྨན་རྣམས་ནི། །མི་འཁྲུ་ཉིད་ལ་མྱུར་དུ་འཇུ། །ཞེས་བཤད་པ་ཡིན་ནོ། །ད་ནི་ཞི་བར་བྱ་བའི་སྣུམ་གྱི་ཆོ་ག་སྨྲས་པ་ནི། ཞི་བྱ་ལྟོགས་བཅས་ཟས་མེད་པར། །འབྲིང་ཚད་ཙམ་ནི་བསྔགས་པ་ཡིན། །ཞེས་བྱ་བ་ཡིན་ཏེ། ཞི་བར་བྱ་བ་ལ་སྣུམ་ཟས་མ་ཟོས་པར་ལྟོགས་པ་དང་བཅས་པའི་སྐབས་སུ་གཏང་བ་བསྔགས་པ་ཡིན་ལ། དེ་ཡང་འབྲིང་ཚད་ཙམ་སྟེ། ཐུན་བཞིས་འཇུ་བ་བསྔགས་ཤིང་ཕན་པ་ཡིན་ཏེ། དེ་ཡང་ཟས་མེད་པ་དང་སྟེ། ཟས་གང་དང་ཡང་མ་བསྲེས་པར་གཅིག་པུ་གཏང་བ་
བསྔགས་པ་ཡིན་ནོ། །བརྟ་བའི་སྣུམ་གྱི་ཆོ་ག་སྨྲས་པ་ནི། བརྟ་བ་ཤ་དང་ཤ་ཁུ་སོགས། །དེ་ཡང་འབྲས་ཆན་ཉུང་བཅས་པ། །བྱིས་པ་རྒན་པོ་སྐོམ་གྱིས་གདུངས། །སྣུམ་འགྲས་ཆང་དད་ཆེ་བ་དང༌། །བུད་མེད་སྣུམ་ནི་རྟག་བསྟེན་དང༌། །དྲོད་ཆུང་བདེ་དང་དཀའ་མི་བཟོད། །ལྟོ་སྙི་ནད་དཀྱིལ་ཆུང་ཚ་དུས། །ཉམ་ཆུང་བ་ལ་བསྔགས་པ་ཡིན། །ཞེས་བྱ་བ་ལ། བརྟ་བའི་སྣུམ་གྱི་ཆོ་ག་ནི་ཤ་དང་ཤ་ཁུ་ལ་སོགས་པ་དང་ལྷན་ཅིག་གཏང་བ་བསྔགས་སོ། །ཤ་ཁུ་ལ་སོགས་པའི་སྒྲས་ནི་བཟའ་བ་དང་ཤ་ཁུར་ལ་སོགས་པ་བསྡུའོ། །ད་ཡང་འབྲས་ཆན་དང་བཅས་པ་སྟེ། བཟའ་བ་དང་བཅས་བར་བྱའི། གང་སྦྱང་བ་ཞི་བ་ཞེས་བྱ་བའི་སྣུམ་གྱི་ཆོ་ག་གཉིས་སོ། །སྔར་བཤད་པ་དག་ནི་ཟས་དང་བཅས་བར་མི་བྱ་སྟེ། གཉི་ག་ཡང་ཟས་ཀྱི་དུས་སུ་བཟའ་བ་བཀག་བ་ཡིན་ནོ། །དེ་ཡང་ཉུང་དུ་སྟེ་ཆུང་དུ་ཡིན་པ་ལ་ཡང་དེ་ནི་བྱིས་པ་དང་རྒན་པོ་ལ་སོགས་པ་ལ་ཡང་ཕན་པ་ཡིན་ནོ། །དེ་བཞིན་དུ་སྐོམ་གྱིས་གདུངས་ཤིང་སྐོམ་དང་ཆེ་བ་དང༌། གང་སྣུམ་དང་འགྲས་ཤིང་སྣུམ་ལ་མི་དགའ་བ་དང༌། ཆང་དང་ཆེ་ཞིང་རྟག་ཏུ་ཆང་འཐུངས་པ་དང༌། དེ་བཞིན་དུ་རྟག་ཏུ་བུད་མེད་བསྟེན་པ་དང༌། རྟག་པར་སྣུམ་བསྟེན་པ་དང༌། ཕོ་བའི་མེ་དྲོད་ཆུང་བ་དང༌། བདེ་ཞིང་སྐྱིད་དེ་འདུག་པ་དང༌། དཀའ་བ་མི་བཟོད་ཅིང་སྡུག་བསྔལ་བསྟེན་པར་མི་ནུས་པ་དང༌། ལྟོ་བ་སྙི་བ་དང༌། ནད་དཀྱེལ་ཆུང་བ་དང༌། ཚ་བའི་དུས་ཏེ་སོ་གའི་དུས་དང༌། ཉམ་ཆུང་བ་སྟེ། ལུང་ཟུངས་ཟད་པ་རྣམས་ཏེ། དེ་ཐམས་ཅད་ལ་བརྟ་བའི་སྣུམ་བསགས་ཤིང་ཕན་པ་ཡིན་ནོ། །དང་བོ་བར་དང་ཟས་རྗེས་ཟོས། །ལུས་ཀྱི་སྨད་བར་སྟོང་ལས་བྱུང༌། །ནད་རྣམས་སེལ་ཞིང་ལུས་ཀྱི་སྟོབས། །སྐྱེད་བའི་རིམ་བཞིན་བྱེད་པ་ཡིན། །ཞེས་བྱ་བ་ལ། བརྟ་བ་ཞེས་བྱ་བའི་སྣུམ་ཆུང་དུ་ཟས་ཀྱི་དང་པོར་བཏང་ན་ལུས་ཀྱི་རོ་སྨད་ལས་བྱུང་བའི་ནད་རྣམས་སེལ་བར་འགྱུར་རོ། །ཟས་ཀྱི་བར་དུ་བཏང་ན་ལུས་ཀྱི་བར་གྱི་ནད་སེལ་ཏོ། །ཟས་ཀྱི་རྗེས་ལ་བཏང་ན་རོ་སྟོད་ལས་བྱུང་བའི་ནད་རྣམས་སེལ་བར་བྱེད་དོ། །དེས་ན་རིམ་བ་བཞིན་ཏེ། གོ་རིམས་མ་འཆོལ་ལུས་ཞེས་བྱ་བར་རོ་སྟོད་དང་རོ་སྨད་ཀྱི་སྟོབས་སྐྱེད་པ་
ཡིན་ནོ། །དེས་ན་ཟས་ཀྱི་དང་པོར་བཏང་ན་རོ་སྨད་དུ་གཏོགས་ལ། རྐེད་པ་ལ་སོགས་པའི་ལུས་ཀྱི་སྟོབས་སྐྱེད་པར་བྱེད་བ་ཡིན་ནོ། །ཟས་ཀྱི་བར་དུ་བཏང་ན་ལུས་ཀྱི་བར་མ་ལྟོ་བ་དང་སྙིང་ག་ལ་སོགས་པའི་སྟོབས་སྐྱེད་པར་བྱེད་པ་ཡིན་ནོ། །ཟས་ཀྱི་རྗེས་ལ་བཏང་ན་ནམ་ཚོང་ཡན་ཆད་ཀྱི་ལུས་པོ་ལ་སོགས་པའི་སྟོབས་སྐྱེད་པ་ཡིན་ནོ། །ད་ནི་སྣུམ་འཐུང་བའི་རྗེས་ལ་བཏུང་བའི་ཆོ་ག་བསྟན་པར་བྱ་བའི་ཕྱིར་སྨྲས་པ་ནི། དེ་ནི་ལེགས་པར་སྨིན་ཕྱིར་དང༌། །ཁར་ཆགས་པ་ནི་ཕྱི་པའི་ཕྱིར། །སྣུམ་དག་འཐུངས་རྗེས་ཆུ་ཚན་བཏུང༌། །ཨེ་རན་བ་ལ་ཏ་ཀར་མིན། །ཞེས་བྱ་བ་ལ། སྣུམ་དངས་མ་འཐུངས་པའི་རྗེས་ལ་བདེ་བར་འཇུ་བར་བྱ་བའི་ཕྱིར་སྨྲས་པ་ནི། དེ་བཞིན་ཏེ། དེའི་ཁར་ཆགས་པ་དག་མ་གོས་ཤིང་དག་པར་བྱ་བའི་ཕྱིར་ཆུ་ཚན་བཏུང་བར་བྱའོ། །སྣུམ་དངས་མ་བཏུང་བ་ཐམས་ཅད་ལ་ཆུ་ཚན་བཏུང་བར་བྱ་བའམ། འོན་ཏེ་འགའ་ཞིག་ལ་བཏུང་བར་བྱ་ཞེ་ན། ཨེ་རན་བ་ལ་ཏ་ཀར་མིན་ཞེས་སྨྲས་པ་ཡིན་ཏེ། ཨེ་རཎྜ་དང་བ་ལ་ཏ་ཀའི་སྣུམ་འཐུངས་པའི་སྐབས་སུ་ནི། ཆུ་ཚན་བཏུང་བར་མི་བྱ་སྟེ། འདི་གཉིས་ནི་ནུས་པ་ཆུང་བ་དང་ལྡན་པའི་ཕྱིར། དེ་དག་གི་གནོད་པ་སྐྱེད་པ་ཡིན་ནོ། །ཞུ་འམ་མ་ཞུའི་དོགས་སྐྱེ་ན། །སླར་ཡང་ཆུ་ཚན་བཏུང་བར་བྱ། །དེས་ནི་སྒྲེགས་པ་དག་འགྱུར་ཞིང༌། །དེ་ལས་ཁོང་ཡང་ཡི་གར་འོང༌། །ཞེས་བྱ་བ་ལ། སྣུམ་དངས་མ་འཐུངས་བའི་ཚེ། ཞུའམ་མ་ཞུ་བའི་དོགས་པ་སྐྱེས་ཤིང་ཡིད་གཉིས་སུ་གྱུར་ན། སླར་ཞིང་ཡང་ཆུ་ཚན་བཏུང་བར་བྱ་སྟེ། ཆུ་ཚན་དེ་དང་དེས་ནི་སྒྲེགས་པ་དག་ཅིང་མནམ་པ་མེད་པར་འགྱུར་བ་དང༌། དེ་ཡང་དེ་ལས་ལུས་ཁོང་ཡང་བར་འགྱུར་བ་དང༌། དེ་བཞིན་དུ་ཡི་གར་འོང་བ་སྟེ། ཟས་ལ་འདོད་པ་སྐྱེ་བར་འགྱུར་རོ། །ནང་བར་འཐུང་ངམ་འཐུངས་བ་དང༌། །འཐུངས་བར་གྱུར་ཚེ་ཁ་ཟས་རན། །གཤེར་དྲོད་བད་ཀན་མི་སྐྱེད་དང༌། །ཤིན་ཏུ་སྣུམ་མིན་འདྲེས་མིན་བཟའ། །ཞེས་བྱ་བ་ལ། སྣུམ་འཐུངས་པའི་སྐྱེས་བུ་དེས་ཁ་ཟས་བཟའ་བར་བྱ་བ་ལ། དེ་ཡང་ཇི་ལྟ་བུ་ཞེ་ན། ཕལ་ཆེར་གཤེར་ཞིང་རླན་བག་ཡོད་པ་དང༌། དྲོ་བའི་བད་ཀན་མི་སྐྱེ་བ་དང༌། ཤིན་ཏུ་སྣུམ་པ་མ་ཡིན་པ་སྟེ། ཅུང་
ཟད་སྣུམ་པ་དང་འདྲེས་པ་མ་ཡིན་པ་སྟེ། ཟས་གནོད་པ་དང་འདྲེན་མར་མ་ཡིན་པ་བཟའ་བར་བྱའོ། །དེ་ཡང་ཅི་ཞིག་བྱེད་པའི་ཚེ་ཞེ་ན་ནང་པར་ཏེ། ཕྱེད་དེ་ཉིན་ན་འཐུང་བར་རྟོག་པའམ། ཡང་དེ་བཞིན་དུ་ཉིན་ཞག་དེ་ཉིད་ཀྱིས་འཐུང་བ་དང༌། དེ་བཞིན་དུ་དང་པོར་གང་གིས་སྣུམ་འཐུངས་པ་དེའི་ཚེ། ཁ་ཟས་འདི་ལྟར་བཟའ་བའོ། །ཁ་ལག་ཆུ་ཚན་གྱིས་བཀྲུ་ཞིང༌། །བུད་མེད་མི་བསྟེན་མཚན་མོ་ཉལ། །ཤུགས་དགག་དྲག་ཤུལ་ལས་རྣམས་དང༌། །ཁྲོ་དང་མྱ་ངན་ཉི་ཚན་གྲང༌། །སེར་བུའི་ཁར་འདུག་རྟ་ཞོན་འགྲོ། །མང་སྨྲ་རབ་མཐོའི་སྟན་ལ་འདུག །སྔས་ནི་རབ་མཐོ་རབ་དམའ་དང༌། །ཉིན་ཉལ་དུད་རྡུལ་གནས་པ་སྤངས། །གང་གིས་ཉིན་མོ་འཐུངས་གྱུར་པ། །དེ་ལྟར་གཞན་ལ་སྤང་བར་བྱ། །ཞེས་བྱ་བ་ལ། སྣུམ་འཐུངས་པའི་སྐྱེས་བུས་ཁ་ལག་བཀྲུ་བ་ལ་སོགས་པ། ཆུའི་བྱ་བ་ཆུ་དྲོན་པེས་བྱ་བ་དང༌། བུད་མེད་བསྟེན་ཅིང་ཉལ་བོ་སྤང་བར་བྱ་བ་དང༌། དེ་བཞིན་དུ་མཚན་མོ་ཉལ་ཞིང་བདེ་བར་གཉིད་ལོག་པར་བྱ་བ་དང༌། དེ་བཞིན་དུ་བཤང་གཅི་ལ་སོགས་པ་ཤུགས་མི་དགག་པ་དང༌། དེ་བཞིན་དུ་དྲག་ཤུལ་གྱི་ལས་རྣམས་དང་ཁྲོ་བ་ནས་དུད་པ་དང་རྡུལ་གྱི་ནང་དུ་འདུག་པའི་བར་དུ་སྤང་བར་བྱའོ། །དེ་ལ་དྲག་ཤུལ་གྱི་ལས་ནི་དུས་ནུབ་པར་བྱེད་པའི་དུ་མའོ། །རབ་མཐོ་སྟན་གཅིག་མཐོན་པོ་ལ་གཅིག་པུ་ཡུན་རིང་དུ་མི་འདུག་པའོ། །མལ་དང་མགོ་བོའི་རྟེན་དུ་གྱུར་པ་ནི་སྔས་ཞེས་བྱ་བ་སྟེ། དེ་ཡང་རབ་ཏུ་མཐོ་བ་དང་རབ་ཏུ་དམའ་བ་སྤང་བར་བྱའོ། །ཉིན་པར་ཉལ་བ་ནི་ཉིན་མོ་གཉིད་ལོག་པ་སྟེ། དེ་ཡང་སྤང་བར་བྱའོ། །དུད་པ་ནི་གྲགས་པར་ཟད་དོ། །རྡུལ་ནི་རྡུལ་ཁྲོད་དེ། དེར་གནས་བར་མི་བྱའོ། །དེ་བས་ན་སྣུམ་གྱི་ཆོ་ག་བྱེད་པ་ན། དེ་ཐམས་ཅད་སྤང་བར་བྱའོ། །དེ་ཡང་སང་གི་ཉིན་མོ་སྟེ། ཉིན་ཞག་གང་ལ་སྐྱེས་བུ་སྣུམ་འཐུངས་པར་གྱུར་པ་དེས། དེ་སྲིད་ཀྱི་ཉིན་ཞག་གཞན་ལ་འང་གོང་དུ་སྨོས་པའི་ཐམས་ཅད་སྤང་བར་བྱའོ། །རིམ་འདི་ལས་རྣམས་ཐམས་ཅད་དང༌། །ནད་ཟད་བ་ལ་སྤྱད་པར་བྱ། །ཞེས་བྱ་བ་ལ། བཤད་མ་ཐག་པའི་ཆུ་ཚན་བཏུང་བ་ལ་སོགས་པའི་ལས་ཀྱི་རིམ་པ་བཞིན་འདི་ནི་སྣུམ་གྱི་ཆོ་ག་དང༌། དུགས་དང་སྣོད་
ལ་སོགས་པ་ནས་མེ་བཙའ་དང༌། ཐལ་སྨན་རྣོན་པོ་གཏང་བའི་བར་དུ། དེ་བཞིན་དུ་ནད་ཀྱིས་ཉམ་ཆུང་བར་གྱུར་པ་ལ་ཡང་བྱ་སྟེ། སྣུམ་གྱི་ཆོ་ག་འབའ་ཞིག་ལ་འདི་བྱ་བར་མ་ཟད་དོ། །ཞི་བའི་སྣུམ་གྱི་ཉེར་སྤྱད་ནི། །བཀྲུ་སྨན་བཏང་བ་ལྟ་བུར་བྱ། །ཞེས་བྱ་བ་ལ། ཞི་བར་བྱ་བའི་སྣུམ་བཏང་བའི་ཉེ་བར་སྤྱད་པ་ཟས་ལ་སོགས་པའི་རིམ་པ་ནི་བཀྲུ་སྨན་བཏང་བ་ལྟ་བུ་སྟེ། བཀྲུ་སྨན་བཏང་བ་ན་ཐུག་པ་ལ་སོགས་པ་བྱ་བ་གང་དག་ཡོད་པ་དེ་དག་ཐམས་ཅད་ཞི་བར་བྱ་བའི་སྣུམ་བྱས་པའི་སྣུམ་དེ་ཞུ་བའི་སྐྱེས་བུ་ལ་ཡང་བྱའོ། །ལྟོ་སྙི་ཞུན་མར་ཞག་གསུམ་བཏུང༌། །ལྟོ་སྲ་བ་ཡིས་ཞག་བདུན་བཏུང༌། །ཡང་ན་ཇི་སྲིད་སྣུམ་པར་བཏུང༌། །དེ་ཕན་ཆད་ནི་གོམས་བར་འགྱུར། །ཞེས་བྱ་བ་ལ། སྐྱེས་བུ་ལྟོ་སྙི་བས་ཞུན་མར་དངས་མ་ཞག་གསུམ་བཏུང་བར་བྱ་ལ། མི་ལྟོ་སྲ་བས་ནི་ཞག་བདུན་གྱིས་བཏུང་ངོ༌། །ཡང་ན་གཉིས་པོ་འདི་དག་ཁོ་ན་ངེས་པ་མེད་དེ། སྐྱེས་བུ་ཁོང་སྣུམ་པར་གྱུར་པ་ཉིད་འདིའི་ཚད་ངེས་པ་ཡིན་ནོ། །དེས་ན་དུས་ཇི་སྲིད་ཀྱིས་ལེགས་པར་ཁོང་སྣུམ་པའི་སྐྱེས་བུར་གྱུར་པ་དེ་སྲིད་པར་བཏུང་བར་བྱའོ། །ཞེས་བྱ་བའི་དོན་ནོ། །དེ་ལྟར་ལེགས་པར་སྣུམ་པའི་མཚན་ཉིད་དུ་གྱུར་ཕན་ཆད་སྣུམ་དངས་མ་བཏུང་པ་ནི་གོམས་པར་འགྱུར་གྱི། སྦྱོར་བའི་བྱ་བ་མི་བྱེད་དོ་ཞེས་བྱ་བའི་དོན་ནོ། །རླུང་ནི་བདེར་རྒྱུ་མེ་དྲོད་འབར། །བཤང་བ་སྣུམ་ཞིང་མི་སྲི་ལ། །སྣུམ་མི་འདོད་ཅིང་སྙོམ་འགྱུར་ལ། །སྣུམ་ལེགས་ཡིན་ཏེ་རྩུབ་གོ་བཟློག །ཅེས་བྱ་བ་ལ། སྐྱེས་བུ་ལེགས་པར་སྣུམ་གྱིས་ཞེན་པར་གྱུར་པ་ནི་རླུང་རྒྱུ་ཞིང་ལུགས་བཞིན་འབྱུང་བ་དང༌། ཕོ་བའི་མེ་དྲོད་འབར་ཞིང་བདེ་བ་དང༌། བཤང་བ་སྣུམ་པར་འགྱུར་གྱི་རྩུབ་པ་མ་ཡིན་པ་ལ། དེ་བཞིན་དུ་མི་སྲི་བ་སྟེ། ཕལ་ཆེར་སྙི་ཞིང་བརླན་པར་གྱུར་པ་དང༌། དེ་བཞིན་དུ་སྡུམ་སྟེན་པར་བྱེད་པའི་སྐྱེས་བུ། སྣུམ་མི་འདོད་ཅིང་སྣུམ་ལ་ཞེན་པར་མི་དགའ་བར་འགྱུར་བ་དང༌། དེ་བཞིན་དུ་སྙི་ཞིང་སྙི་བག་ཏུ་གྱུར་པ་སྟེ། དེ་དག་ཐམས་ཅད་ནི་སྣུམ་གྱིས་ལེགས་པར་ཞེན་པའི་མཚན་ཉིད་ཡིན་ནོ། །སྐྱེས་བུ་སྣུམ་མེད་ཅིང་རྩུབ་བར་གྱུར་པ་ནི་དེ་ལས་གོ་བཟློག་པ་སྟེ། ཇི་སྐད་བཤད་པའི་མཚན་ཉིད་
ལས་བཟློག་པར་འགྱུར་རོ། །དེ་ཡང་རླུང་མི་བདེ་བར་རྒྱུ་བ་དང༌། མེ་དྲོད་ཆུང་བ་དང༌། བཤང་བ་རྩུབ་པ་དང༌། བསྒོངས་པ་དང༌། སྣུམ་ལ་འདོད་པ་སྐྱེ་བར་འགྱུར་ཞིང༌། སྙོམ་པར་མི་འགྱུར་རོ། །སྣུམ་དྲགས་པ་ཡིས་སྐྱ་བ་དང༌། །སྣ་དང་ཁ་རྐུབ་ལས་འཛག་འགྱུར། །ཞེས་བྱ་བ་ལ། སྐྱེས་བུ་སྣུམ་ཧ་ཅང་དྲགས་པར་གྱུར་པ་ནི། སྐྱ་བོ་བསེང་བསེང་པོར་འགྱུར་བ་དང༌། སྣ་ནས་འཛག་པ་དང༌། རྐུབ་ནས་འཛག་པར་འགྱུར་རོ། །ཚད་དང་མི་ལྡན་དུས་མིན་གནོད། །ཟས་དང་སྤྱོད་ལམ་ལོག་པ་ཡིས། །སྣུམ་ཆོས་བྱེད་སྐྲང་གཞང་འབྲུམ་དང༌། །ཁོང་རྨྱ་རེངས་ཤིང་སེམས་མྱོས་དང༌། །གཡན་པ་མཛེ་དང་རིམས་སྐྱུག་གཟེར། །ལྟོ་སྦོས་མགོ་འཁོར་ལ་སོགས་འགྱུར། །ཞེས་བྱ་བ་ལ། སྣུམ་ཐམས་ཅད་ཚད་དང་མི་ལྡན་པར་ཟོས་པ་དང༌། དེ་བཞིན་དུ་དུས་མ་ཡིན་པར་ཟོས་པ་དང༌། གནོད་པ་སྟེ་གང་ཞིག་ལ་གནོད་པར་འགྱུར་བ་དེ་ཟོས་པ་དང༌། དེ་བཞིན་དུ་ཟས་དང་སྤྱོད་ལམ་ལོག་པ་དང་ལྡན་པས་སྤྱད་ན་སྐྲང་བ་ལ་སོགས་པའི་ནད་སྐྱེ་བར་འགྱུར་རོ། །དེ་ཡང་ཚད་ནི་ཆུང་དུ་དང་འབྲིང་དང་ཆེན་པོ་སྟེ། གསུམ་པོ་དེ་དག་ནད་ལུས་ཟུངས་ལ་ལྟོས་ཏེ་གཏོང་བར་མི་བྱེད་པ་དེ་ནི་ཚད་དང་མི་ལྡན་པའོ། །དུས་མ་ཡིན་པར་གཏོང་བ་དེ་ནི་དཔེར་ན་དགུན་གྱི་ཚེ་མར་གཏོང་བ་དང༌། མཚན་མོ་གཏོང་བ་དང༌། སོ་ག་ཏིལ་མར་གཏོང་བ་དང༌། ཉིན་བར་གཏོང་བ་ལྟ་བུའོ། །གནོད་པ་ནི་དཔེར་ན་བད་ཀན་གྱི་ནད་ལ་མར་གཏོང་བ་དང༌། མཁྲིས་པའི་ནད་ལ་ཏིལ་མར་གཏོང་བ་དང༌། ཟས་ནི་ཁ་ཟས་ཚད་དང་མི་ལྡན་པར་གང་བཤད་བ་དེ་ལོག་པར་འགྱུར་ཞིང༌། ཕྱིན་ཅི་ལོག་གིས་ཚེ་སྤྱོད་པར་བྱེད་པ་དེའི་ཚེ་སྐྱོན་དུ་འགྱུར་རོ། །སྤྱོད་ལམ་ནི་ཆུའི་བྱ་བ་ཆུ་ཚན་གྱི་བྱ་བ་ལ་སོགས་པ་བཤད་པ་སྟེ། དེ་ལོག་པར་སྤྱོད་པ་དེ་དང་མི་མཐུན་བར་སྤྱོད་པ་སྟེ། དེ་དག་གིས་སྐྲང་པ་ལ་སོགས་པའི་ནད་སྐྱེད་པར་འགྱུར་རོ། །དེ་ལ་བཀྲེས་སྐོམ་སྐྱུག་སྨན་དུགས། །ཟས་སྐོམ་སྨན་ནི་རྩུབ་པ་དང༌། །དར་བ་ཆང་རྙིང་ཚོད་མ་དང༌། །འབྲུ་རྒོད་ཅི་ཙེ་ཁྲེ་རྒོད་དང༌། །སྦྲང་རྩི་འབྲས་གསུམ་པི་པི་ལིང༌། །བ་གཅིན་གུ་གུལ་ཨ་རུ་ར། །ནད་དམིགས་སོ་སོ་ཇི་བཞིན་དུ། །
སྣུམ་ལས་ནད་གྱུར་བཅོས་ཐབས་ཡིན། །ཞེས་བྱ་བ་ལ། སྣུམ་གྱི་ཆོ་ག་ལས་གྱུར་ཅིང༌། སྣུམ་གྱི་ཆོ་ག་ལས་ཉམས་པས་ནད་དུ་གྱུར་པ་དེ་ལ་དཔྱད་དུ་བྱ་བ་ནི་བཀྲེས་སྐོམ་ལ་སོགས་པས་གསོ་ཞིང་བཅོས་པར་བྱའོ། །དེ་ལ་བཀྲེས་པ་ནི་ལྟོགས་པར་བྱ་སྟེ། ཟས་ཟ་བ་ལ་སོགས་པའོ། །སྐོམ་པ་ནི་སྐོམ་གྱིས་གདུངས་པ་སྟེ། ཚར་བཅད་པའོ། །སྐྱུག་སྨན་ནི་སློན་བཏང་བའོ། །དུགས་ནི་འོག་ནས་བཤད་པའོ། །དེ་བཞིན་དུ་ཁ་ཟས་རྩུབ་མོ་ཟ་བ་དང༌། སྐོམ་རྩུབ་པ་བཏུང་བ་དང༌། སྨན་རྩུབ་པ་བསྟེན་པ་དང༌། དར་བ་རབ་ཏུ་སྐ་བ་དང༌། དར་བ་རྙིང་པ་དང༌། ཆང་རྙིང་པ་དང༌། ཚོད་མ་སྟེ། རྩ་བ་དང་འབྲས་བུ་ལས་བྱས་པའི་ཚོད་མའི་རྣམ་པ་དང༌། འབྲུ་རྒོད་དང༌། འབྲས་བུའི་བྱེ་བྲག་ཨུཏྤལ་ཞེས་བྱ་བ་དང༌། ཅི་ཙེ་སྟེ། རྩ་འབྲུའི་བྱེ་བྲག་དང༌། ཁྲེ་རྒོད་སྟེ་ག་ཏྲ་པ་ཞེས་བྱ་བ་དང༌། དེ་བཞིན་དུ་སྦྲང་ལ་སོགས་པའི་སྨན་རྣམས་ནད་དམིགས་སོ་སོ་ཇི་ལྟ་བ་བཞིན་ནད་གང་གི་སྨན་གང་ཡིན་པ་དེ་དེ་ལ་སྦྱིན་པར་བྱའོ། །རྩུབ་པ་དག་ནི་སྨྱུང་བྱས་དང༌། །ཤིན་ཏུ་བྱས་དང་འདྲ་བ་ཡིན། །ཞེས་བྱ་བ་ལ། ལེགས་པར་རྩུབ་པར་གྱུར་པ་དང༌། ལྷག་པར་རྩུབ་པར་གྱུར་པ་དག་ནི་སྨྱུང་བ་དྲགས་པའི་མཚན་ཉིད་དང་འདྲ་བར་ཤེས་པར་བྱ་སྟེ། ཇི་ལྟར་ལེགས་པར་སྨྱུང་བར་བྱས་པའི་མཚན་ཉིད་གང་ཡིན་པ་དེ་ནི་ལེགས་པར་རྩུབ་ཆོས་བྱས་པའི་མཚན་ཉིད་དང་འདྲ་བར་ཤེས་པར་བྱ། དེ་བཞིན་དུ་ཤིན་ཏུ་སྨྱུང་བར་བྱས་པའི་མཚན་ཉིད་དང་འདྲ་བར་ཤེས་པར་བྱ་བ་སྟེ། སློན་དྲོ་སྐོམ་ས་ལས་བྱུང་སྣུམ། །ཤ་ཁུ་བཏུང་ཞིང་དུགས་སྤྱད་བྱ། །ཁྲུས་བྱེད་པ་འམ་སྐྱུག་སྨན་གཏང༌། །སྣུམ་བྱས་ཞག་གསུམ་གནས་པར་བྱ། །ཉིན་ཞག་གཞན་པ་གཅིག་ཅིག་ནི། །དེ་བསྐྱེད་པ་ཡིས་བད་ཀན་སྐྱེད། །ཅེས་བྱ་བ་ལ། སློན་ཞིང་དྲོ་བ་དང་སྐམས་ལས་བྱུང་བ་ཡང་ཡིན། སྣུམ་པ་ཡང་ཡིན་པས། སློན་དྲོ་སྐམ་ས་ལས་བྱུང་སྣུམ། །ཞེས་བྱ་བ་སྟེ། སློན་ཞིང་དྲོ་བ་དང༌། སྐམ་སའི་སྲོག་ཆགས་ཀྱི་ཤ་ལས་གཡོས་པའི་ཤ་ཁུ་བཏུང་བ་དང༌། དུགས་ཀྱི་བྱ་བ་ཀུན་ཏུ་སྤྱད་ཅིང་གནས་པར་བྱེད་པ་དང༌། སྣུམ་གྱི་ཆོ་ག་བྱས་པས་ཞག་གསུམ་གནས་
པར་བྱས་ནས། དེའི་འོག་ཏུ་ཉི་མ་བཞི་པ་ལ་ཁྲུས་བྱའོ། །སྐྱུག་སྨན་ཡང་ཉིན་རེ་བཞིན་དུ་བྱ་སྟེ། དང་པོར་སྣུམ་གྱི་ཆོ་ག་བྱས་ལ། དེའི་འོག་ཏུ་སྐམ་སའི་ཤ་རློན་ཞིང་དྲོ་བ་ལས་བྱུང་བའི་སྣུམ་གྱི་ཤ་ཁུ་འཐུངས་ནས། དུགས་བྱེད་ཅིང་ཞག་གཅིག་གནས་པར་བྱས་ལ། ཉིན་དེ་ལས་གཞན་པ་ཉིན་ཞག་གཉིས་པ་ལས་བད་ཀན་སྐྱེད་ཅིང་འཕེལ་བར་བྱ་བའོ། །གང་གིས་ཤེ་ན། དེ་སྐྱེད་པ་ཡིས་ཞེས་བྱ་བ་སྟེ། བད་ཀན་དེ་སྐྱེད་པར་བྱེད་པའོ། །འོ་མ་དང་ཉ་ལ་སོགས་པས་བད་ཀན་བསྐྱེད་ལ། དེའི་འོག་ཏུ་སྐྱུག་སྨན་གཏང་ངོ༌། །ཤ་ཆེ་ཚིལ་ཆེ་བད་ཀན་མང༌། །མེ་ཡི་འཇུ་དྲོད་མི་སྙོམས་དང༌། །སྣུམ་ལ་གོམས་པའི་སྣུམ་བྱ་རྣམས། །དེ་ནི་སྔོན་དུ་རྩུབ་ཆོས་བྱ། །དེ་ནས་སྣུམ་བྱས་སྦྱངས་གྱུར་ན། །དེ་ལ་སྣུམ་ནད་མི་འབྱུང་ངོ༌། །སྣུམ་ལ་གོམས་པར་གྱུར་པས་ན། །དྲི་མ་འཐོན་པར་ནུས་པ་ཡིན། །ཞེས་བྱ་བ་ལ། ཤ་ཆེ་བ་ནི་མི་ཤ་རྒྱས་ཤིང་སྦོམ་པའོ། །ཚིལ་ཆེ་བ་ནི་ཚིལ་གྱིས་རྒྱས་ཤིང་ཚོ་བའོ། །བད་ཀན་ཆེ་བ་ནི་བད་ཀན་མང་བའོ། །མེའི་འཇུ་དྲོད་མི་སྙོམས་པ་ནི་ཕོ་བའི་མེ་དྲོད་ཀྱིས་འཇུ་བ་མི་སྙོམས་པའོ། །སྣུམ་ལ་སོགས་བ་ནི་རྟག་ཏུ་སྣུམ་ཟ་བ་སྟེ། དེ་ལྟ་བུའི་སྣུམ་ཆོས་གཏང་བར་བྱ་བ་གང་ཡིན་པ་དེ་ནི་སྔོན་དུ་སྟེ། ཐོག་མར་རྩུབ་པ་ནི་ཟས་དང་སྨན་གྱིས་རྩུབ་ཆོས་བྱ་ལ། དེ་ནས་དེ་ལྟར་རྩུབ་ཆོས་བྱས་པའི་འོག་ཏུ། སྣུམ་ཆོས་བྱས་ལ་སྦྱངས་པར་གྱུར་ན། ཤ་ཆེ་བ་ལ་སོགས་བ་དེ་ལ་སྣུམ་མི་འབྱུང་ངོ༌། །དེ་བཞིན་དུ་ཤ་ཆེ་བ་ལ་སོགས་པ་རྩུབ་ཆོས་བྱས་ལ། དེའི་འོག་ཏུ་སྣུམ་བཏང་ན། །སྣུམ་ལ་གོམས་པར་གྱུར་པས་ན། །དྲི་མ་འཐོན་ཞིང་སྦྱོར་བར་ནུས་པ་ཡིན་ནོ། །བྱིས་པ་རྒན་པོ་ལ་སོགས་པ། །སྣུམ་སྤང་བར་ནི་མི་ནུས་ལ། །སྐྱོ་བར་མི་བྱེད་སྦྱོར་བ་འདིས། །འཕྲལ་དུ་སྣུམ་ནི་སྦྱར་བར་བྱ། །ཞེས་བྱ་བ་ལ། སྣུམ་ཆོས་བྱད་པའི་བྱིས་པ་དང༌། རྒན་བོ་ལ་སོགས་པ་སྔར་སྣུམ་ཆོས་ཀྱི་ཆོགས་བརྟ་བར་བྱ་བར་བཤད་པ་རྣམས་སྣུམ་ཆོས་སྤང་བར་མི་ནུས་བ་དེ་ལྟ་བུ་ལ་སྣུམ་གྱི་ཆོ་ག་བྱ་བའི་ཕྱིར། དེ་སྐྱེ་ཞིང་བསྟན་བར་མི་འགྱུར་བའི་སྦྱོར་བ་འདིས་འཕྲལ་དུ་དེ་ལ་སྣུམ་གྱི་ཆོ་ག་སྦྱར་བར་བྱའོ། །དེ་ཡང་གང་ཡིན་ཞེ་ན། དེ་ལ་མར་བརྔོས་ཤ་ཁུ་དང༌། །མར་བརྔོས་པ་ཡི་ཐུག་པ་དང༌། །ཏིལ་ཕྱེ་སྣུམ་
བཅས་བུ་རམ་ཆུར། །བཅས་དང་ཀྲི་ས་ར་དང་ནི། །འོ་ཐུག་མར་མང་དྲོ་བའམ། །བུར་མ་ཞོ་དང་བཅས་བ་འམ། །ཐུག་པ་སྣུམ་ནི་བཞི་པ་ལ། །ལྔ་བ་འབྲས་དང་ལྡན་པར་བྱ། །བདུན་པ་དེ་དག་འཕྲལ་སྣུམ་བྱ། །ཞེས་བྱ་བ་ལ། བྱིས་པ་དང་རྒན་པོ་ལ་སོགས་པ་རྣམས་ལ་མར་བརྔོས་པའི་ཤ་ཁུ་ལ་སོགས་པའི་སྦྱོར་བ་བདུན་པོ་འདི་དག་ནི་འཕྲལ་གྱི་སྣུམ་གྱི་ཆོ་གར་འགྱུར་རོ། །དེ་ལ་ཤ་མང་པོ་མར་དང་བརྔོས་པ་དེའི་ཁུ་བ་ནི་སྦྱོར་བག་ཡིན་ནོ། །ཡང་མར་མང་པོ་དང་བརྔོས་ཤིང་བཙོས་པའི་ཐུག་པ་བྱས་པ་ནི་སྦྱོར་བ་གཉིས་པ་ཡིན་ནོ། །དེ་བཞིན་དུ་ཏིལ་གྱི་ཕྱེ་མ་སྣུམ་དང་བཅས་བ་དང༌། བུ་རམ་ཆུ་དང་བཅས་པར་སྦྱར་བ་ནི་གསུམ་པ་ཡིན་ནོ། །འདིར་སྣུམ་ནི་མར་ལ་སོགས་པའོ། །བུ་རམ་ཆུང་དུ་ནི་བུ་རམ་ཕྲ་མོའོ། །དེ་བཞིན་དུ་ཀྲི་ས་ར་ཞེས་བྱ་བ་ནི་ཏིལ་དང་འབྲས་ལ་སོགས་པ་ལས་བྱས་པའི་ཐུག་པ་གར་ཐུག་འདྲ་བ་ལ་སྣུམ་གྱི་བུ་རམ་ཆུང་ངུ་བཏབ་པ་ནི་བཞི་པའོ། །ཡང་ན་འོ་མ་ནི་ཐུག་པ་སྟེ། འོ་མ་དང་བཙོས་པའི་ཐུག་པ་ཞུན་མར་མང་པོ་བཅུག་པ་དྲོ་བ་སྟེ་ལྔ་པའོ། །ཡང་བུ་རམ་ཞོ་དང་བཅས་པའི་རིན་ནི་དྲུག་པའོ། །ཡང་ན་ཐུག་སྣ་ལྔ་པ་ཞེས་བྱ་བ་སྣུམ་བཞི་པོ་ཞུན་མར་དང་ཏིལ་མར་དང་རྐང་དང་ཚིལ་དང༌། སྲང་གཉིས་དང་ལྡན་པ་ཡིན་པས་ན་དེའི་ཐུག་པ་ནི་བདུན་པའོ། །སྦྱོར་བ་འདི་དག་ནི་འཕྲལ་དུ་སྣུམ་གྱི་བྱ་བ་བྱེད་ཅིང་སྐྱོ་བ་དང་སུན་པར་མི་བྱེད་པ་ཡིན་ནོ། །སྣུམ་རྣམས་ལན་ཚྭ་ཆེར་བཏབ་པ། །དེ་ནི་བད་ཀན་སྐྱེད་རྩུབ་མིན། །ཕྲ་ཞིང་དྲོལ་ལུས་ཁྱབ་བྱེད། །ཅེས་བྱ་བ་ལ། དེ་བཞིན་དུ་སྣུམ་བཞི་པོ་ཞུན་མར་དང་ཏིལ་མར་དང་རྐང་དང་ཚིལ་ཞེས་བྱ་བ་ལན་ཚྭ་ཆེར་བཏབ་པ་ནི། འཕྲལ་དུ་སྣུམ་པར་བྱེད་པ་ཡིན་ཏེ། ཅིའི་ཕྱིར་ཞེ་ན། ལན་ཚྭ་བཏབ་པ་དེ་ནི་བད་ཀན་སྐྱེ་ཞིང་འཛག་པའི་རང་བཞིན་ཅན་ཡིན་པ་དང༌། དེ་རྩུབ་པ་མ་ཡིན་ཞིང་སྣུམ་པ་དང་ཕྲ་བ་སྟེ། ཕྲ་མོ་རྣམས་ལ་འཇུག་ཅིང་ཁྱབ་པར་བྱེད་པ་དང༌། དྲོ་ཞིང་ཚ་བའི་ནུས་པ་དང་ལྡན་པ་དང༌། ལུས་ཁྱབ་པར་བྱེད་པ་སྟེ། ལུས་མ་ལུས་པར་ཁྱབ་ནས་སྨིན་ཅིང་འཇུ་བའི་དོན་བྱེད་པ་ཡིན་པས། ལན་ཚྭ་ཆེར་བཏབ་པའི་སྣུམ་ནི་འཕྲལ་དུ་སྣུམ་ཆོས་སུ་འགྱུར་རོ། །མཛེ་དང་སྐྲན་
ནད་གཅིན་སྙི་ལ། །བུ་རམ་བཅས་བཟའ་འོ་མ་ཤ་།ཏིལ་དང་མ་ཤ་ཆང་དང་ཞོ། །སྣུམ་བྱའི་དོན་དུ་མི་བྱའོ། །ཞེས་བྱ་བ་ལ། མཛེ་ནད་ལ་སོགས་པ་ཡོད་པ་ལ་སྣུམ་གྱི་ཆོ་གར་བཟའ་བ་བུར་མ་དང་བཅས་པ་འདི་དག་བཏང་ཞིང་སྦྱིན་པར་མི་བྱའོ། །དེ་ལྟར་སྣུམ་གྱི་ཆོགས་ཅི་ཞིག་བྱ་ཞེ་ན། འབྲས་གསུམ་པི་པི་ལིང་གུ་གུལ། །ཨ་རུར་ལ་སོགས་བསྐོལ་ལ། །དེ་དག་སྣུམ་ལ་ཇི་བཞིན་དུ། །གནོད་པ་མེད་པར་སྦྱར་བར་བྱ། །ཞེས་བྱ་བ་ལ། གོང་དུ་སྨོས་པའི་མཛེ་ནད་ལ་སོགས་པ་དེ་དག་ལ་སྣུམ་འབྲས་བུ་གསུམ་དང༌། པི་པི་ལིང་དང༌། གུ་གུལ་དང༌། ཨ་རུ་ར་ལ་སོགས་པ་ནད་དང་ཇི་ལྟར་འཚམ་པ་བཞིན་དུ་གནོད་པ་མེད་ཅིང་མི་འཕྲོད་པ་མེད་པར་ལེགས་པར་སྦྱར་ཞིང་གཏང་བར་བྱའོ། །ནད་ཀྱིས་ཉམ་ཆུང་གྱུར་པ་ལ། །ལུས་དྲོད་སྟོབས་སྐྱེད་ནུས་པ་གཏང༌། །ཞེས་བྱ་བ་ལ། ནད་ཀྱིས་ཉམ་ཆུང་ཞིང་སྦེག་པའི་མི་ལ། སྣུམ་གྱི་ཆོ་ག་ལུས་ཀྱི་མེ་དྲོད་སྐྱེད་པར་ནུས་པའི་སྨན་གཏང་བར་བྱའོ། །དེ་ཡང་ལུས་མེ་དྲོད་ནི་ལུས་དྲོ་བ་སྟེ། དེ་གཉིས་སྐྱེད་པར་ནུས་པའི་སྣུམ་དེ་གཏང་བ་སྟེ། ལུས་ཀྱི་སྟོབས་སྐྱེད་པར་ནུས་པ་ནི་རྒྱས་ཤིང་འཕེལ་བར་འགྱུར་རོ། །དྲོད་ཀྱི་སྟོབས་སྐྱེད་པར་ནུས་པ་ནི་ཕོ་བའི་མེ་དྲོད་སྐྱེད་པར་བྱེད་པའོ། །སྐྱེས་བུ་སྣུམ་ལ་བརྟེན་པར་བྱེད་པ་རྣམས། །ནང་གི་དྲོད་འབར་ཁོང་པ་དག་པ་དང༌། །ལུས་ཟུངས་འཕྲལ་བརྟ་སྟོབས་དང་མདོག་བཟང་ལྡན། །དབང་བརྟན་རྒས་སྲ་ལོ་བརྒྱ་ཐུབ་པར་འགྱུར། །ཞེས་བྱ་བ་ལ། ལུས་ཀྱི་སྟོབས་དང་ཕོ་བའི་མེ་དྲོད་སྐྱེད་པར་བྱེད་པའི་སྣུམ་ལ་བརྟན་པའི་སྐྱེས་བུ་དག་གི་ལུས་ལ་འབྱུང་བའི་ཡོན་ཏན་ནི། ནང་གི་མེ་དྲོད་ཀྱིས་ལུས་ཐམས་ཅད་ལ་ཁྱབ་པར་འབར་བ་དང༌། ཁོང་པའི་ནང་གི་ནད་སྐྱེད་པར་བྱེད་པའི་སྙིགས་མ་སོགས་དག་པར་འགྱུར་བ་དང༌། ལུས་ཀྱི་ཟུངས་དང་སྟོབས་གསར་དུ་རྒྱས་ཤིང་འཕེལ་བར་འགྱུར་བ་དང༌། ཁ་དོག་བཟང་ཞིང་ཡིད་དུ་འོང་བར་འགྱུར་བ་དང༌། དབང་པོ་བརྟན་པ་སྟེ། མིག་ལ་སོགས་པའི་དབང་པོ་རང་གི་བྱ་བ་བྱེད་བར་ནུས་ཤིང༌། གསལ་བར་འགྱུར་བ་དང༌། རྒས་སྲ་ཞིང་སྐྲ་དཀར་མེད་པར་འགྱུར་བ་དང༌། ལོ་བརྒྱ་འཚོ་ཞིང་གནས་པས་ན། ལོ་བརྒྱ་ཐུབ་བ་སྟེ། སྣུམ་ལ་བརྟེན་པའི་སྐྱེས་བུ་ལ་
ཡོན་ཏན་འབྱུང་བར་དྲང་སྲོང་རྣམས་ཀྱིས་བཤད་ཅིང་བསྟན་པའོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས་ལེའུ་བཅུ་དྲུག་པའི་རྣམ་པར་འགྲེལ་པའོ།། །།དེ་ནས་དུགས་ཀྱི་ཆོ་གའི་ལེའུ་བཤད་པར་བྱའོ། །ཞེས་བྱ་བ་ལ། དུགས་ནི་ཕལ་ཆེར་དང་པོར་སྣུམ་ཆོས་བྱས་ནས་འདིར་བྱ་དགོས་པས་ན། དེའི་ཕྱིར་སྣུམ་གྱི་ཆོ་གའི་འོག་ཏུ་དུགས་ཀྱི་ཆོ་གའི་ལེའུ་བཤད་ཅིང་བསྟན་པ་ཡིན་ནོ། །དེ་ཡང་དྲང་སྲོང་ཙར་ཀས། །དུགས་ཀྱིས་གསོ་བར་བྱ་བའི་ནད། །རླུང་དང་བད་ཀན་བདག་ཉིད་ཅན། །སྣུམ་གྱི་དངོས་སུ་འགྲོ་བ་ཡི། །དུགས་ཀྱིས་རབ་ཏུ་ཞི་བར་འགྱུར། །ཞེས་བཤད་པ་ཡིན་ནོ། །དུགས་ཀྱི་ཆོ་ག་ནི་ལས་སུ་བྱ་བ་ཉིད་དེ། དེའི་ཚུལ་གྱི་ལེའུ་ཡིན་པས་ན་དུགས་ཀྱི་ལེའུའོ། །དེ་ལ་དུགས་ཀྱི་ཆོ་ག་ནི་དབྱེ་བའི་དབང་དུ་བྱས་ནས་སྨྲས་པ་ནི། དུགས་བསྲོ་བཅིང་དང་ཐ་མལ་པ། །ཆུ་དུགས་དབྱེ་བས་རྣམ་པ་བཞི། །ཞེས་བྱ་བ་ཡིན་ཏེ། བསྲོ་བ་དང༌། བཅིང་བ་དང༌། ཐ་མལ་པ་སྟེ། ཆུ་དུགས་ཞེས་བྱ་བར་མཚམས་སྦྱར་བར་བྱའོ། །དེས་ན་དུགས་ནི་བསྲོ་བ་ལ་སོགས་པའི་དབྱེ་བས་མེའི་ལུམས་རྣམ་པ་བཞིར་འགྱུར་རོ། །བསྲོ་བ་གོས་དང་ལྕགས་དང་ནི། །ལག་མཐིལ་ལ་སོགས་མེར་བསྲོས་བསྲོ། །ཞེས་བྱ་བ་ལ། བསྲོ་བའི་དུགས་ནི་གོས་ལ་སོགས་པ་མེ་ལ་བསྲོས་པས་བསྲོ་བར་བྱ་སྟེ། གོས་ནི་བགོ་བའི་གོས་བལ་ལ་སོགས་པ་ལ་བྱའོ། །ལྕགས་ནི་ལྕགས་ཀྱི་སྤྱད་ཐོང་ལྕགས་ལྟ་བུ་ལ་སོགས་པའོ། །ལག་མཐིལ་ནི་ལག་པའི་མཐིལ་ལོ། །སོགས་པའི་སྒྲས་ནི་བུམ་པ་དང༌། ཁར་བའི་སྣོད་ལ་སོགས་པ་བསྡུའོ། །བཅིང་བ་ཤུ་དག་སྦང་མ་དང༌། །ཐང་ཤིང་ཤ་ཏ་པུཥྤ་དང༌། །འབྲུ་ཀུན་དྲི་རྣམས་ར་སྣ་དང༌། །ཨེ་རཎྜའི་རྩ་ཤ་དག་དང༌། །སྣུམ་བག་ཚ་དང་དར་བ་དང༌། །འོ་མས་སྦྲུས་ཤིང་ཚ་ཆེར་བཏབ། །རླུང་ལས་བྱུང་བ་འབའ་ཞིག་སེལ། །བད་ཀན་འདྲེས་ལ་བྱེའུ་རུག་སོགས། །མཁྲིས་པ་འདྲེས་ལ་ཤུག་སོགས་ཀྱིས། །གླན་པ་ཞེས་བྱ་ཡང་དང་ཡང༌། །དཀྲི་བ་སྣུམ་ཞིང་ནུས་པ་དྲོ། །སྤུ་
འཇམ་ལྤགས་རུལ་མིན་པས་དཀྲི། །མ་རྙེད་རླུང་འཇོམས་ལོ་མ་དང༌། །དར་དང་སྣམ་བུ་རས་ཀྱིས་དཀྲི་།མཚན་མོ་དཀྲིས་པ་ཉིན་མོ་འགྲོལ། །ཉིན་པར་དཀྲིས་པ་མཚན་མོ་འགྲོལ། །ཞེས་བྱ་བ་ལ། བཅིང་བའི་དུགས་ནི་ཤུ་དག་དང༌། སྦང་མ་ལ་སོགས་པ་སྣུམ་ལ་སོགས་པ་དང་སྦྲུས་ཤིང་བསྲེས་པ་དང༌། དེ་བཞིན་དུ་ལན་ཚྭ་ཆེར་བཏབ་ཅིང་ལན་ཚྭ་ལྷག་པར་མང་དུ་བཏབ་པ་དག་རླུང་ལས་བྱུང་བའི་ནད་འབའ་ཞིག་སྟེ། ནད་གཞན་དང་མ་འདྲེས་པའི་རླུང་ནད་སེལ་ལོ། །བད་ཀན་དང་འདྲེས་པའི་རླུང་ལ་ནི་བྱེའུ་རུག་པ་ལ་སོགས་པ་ཕུ་རས་རྣམ་གཉིས་དང༌། ཀུ་ཐེ་ར་ལ་སོགས་པའི་སྡེ་ཚན་དུ་བཤད་པ་དག་གིས་བྱའོ། །དེ་བཞིན་དུ་མཁྲིས་པ་དང་འདྲེས་པའི་རླུང་ནི་ཤུག་ལ་སོགས་ཀྱིས་ཞེས་བྱ་བ་ལ། པདྨ་དང་ཕྲ་ཕྲན་ཀ་ལ་སོགས་པའི་སྡེ་ཚན་དུ་བཤད་པས་སོ། །སྣུམ་བག་ཚ་དང་དར་བ་དང༌། །འོ་མས་སྦྲུས་ཤིང་ཚ་ཆེས་བཏབ། །ཅེས་བྱ་བ་ནི། གསུམ་ཆར་དང་སྦྱར་བར་བྱ་སྟེ། དཀྲི་བ་གསུམ་པོ་དེ་དག་རིམ་པ་བཞིན་དུ་སྦྱར་བར་བྱའོ། །དེ་ནི་གླན་པ་ཞེས་ཀྱང་བྱ་སྟེ། དེས་ཡང་དང་ཡང་དུ་དུགས་བྱའོ། །གཞན་དག་ལས་ཀྱང༌། ཉམས་རེ་བ་སོགས་རླུང་འཇོམས་བཅས། །སྒྱུར་དང་གཤེར་བའི་རྫས་ཀུན་ལྡན། །རླན་ཅན་ཤ་དང་ལེགས་པར་བཙོས། །སྣུམ་ཀུན་དང་ནི་ཡང་དག་ལྡན། །དྲོ་འཇམ་ལན་ཚྭ་ཤས་ཆེར་དྲོ། །གླན་པ་ཞེས་ནི་བཤད་པ་ཡིན། །ཞེས་བྱ་བ་འབྱུང་བ་ཡིན་ནོ། །དཀྲི་བ་དང་ནི་དཀྲིས་ཤིང་བཅིངས་པ་ན་དཀྲིས་པ་ཞེས་བྱ་སྟེ། བཅིངས་པ་ལ་ཞེས་བྱ་བའི་དོན་ཏོ། །དེ་བས་ན་མང་དུ་བྱུགས་ལ་སྣུམ་པ་དང་ནུས་པ་དྲོ་བ་དང༌། སྤུ་འཇམ་པའི་པགས་པ་རུལ་པ་མ་ཡིན་པས་དཀྲི་བར་བྱའོ། །དེ་མ་རྙེད་ཅིང་མེད་པར་གྱུར་ན། རླུང་འཇོམས་ཤིང་ནུས་པ་དང་ལྡན་པའི་རྩྭ་ཤིང་གསོ་མ་ལ་སོགས་པའི་ལོ་མས་བཅིངས་ཤིང་ཡན་ལག་དཀྲི་བ་སྟེ། མཚན་མོ་དཀྲིས་ན་ཉིན་པར་འགྲོལ་བར་བྱ་སྟེ། དེ་ནི་ཚ་བ་མེད་པའི་ཕྱིར་བྱའོ། །ཉིན་མོ་དཀྲི་ཞིང་བཅིང་བྱས་པ་ནི་མཚན་མོ་འགྲོལ་བར་བྱའོ། །ལ་ལར་ནི་ཡུལ་དང་ནད་ཀྱི་དབང་གིས་ཡན་ལག་ཆག་པ་ལ་སོགས་པ་ཉིན་ཞག་གཉིས་
སམ། གསུམ་གཞག་པར་བྱ་བ་ཡང་ཡོད་དེ། སྦང་མ་ནི་ཆང་གི་སྙིགས་མའོ། །འབྲུ་ཀུན་ནི་གྲ་མ་དང༌། གང་བུ་ཅན་གྱི་སྡེ་ཚན་ལས་བཤད་པའོ། །དྲི་རྣམས་ནི་སྤང་སྤོས་དང༌། རུརྟ་དང་ཨ་རུ་ར་ལ་སོགས་པའོ། །ཨེ་རཎྜ་ནི་རྩ་བའོ། །ཤ་ནི་རླན་གྱི་ཤ་ལས་ཚོ་ཁུ་ཞིབ་མོར་བརྡུངས་པའོ། །སྣུམ་བག་ནི་ཏིལ་མར་ལ་སོགས་པའོ། །གཞན་དག་ནི་གོ་བར་ཟད་དོ། །ཐ་མལ་པ་ནི་ཁུར་བ་དང༌། །བོང་བ་གྱོ་མོ་རྡོ་ས་ཕྱེ། །གསོ་མའི་ལོ་མ་འབྲུ་རྣམས་དང༌། །ལྕི་རིལ་ཕྱེ་མ་ཕུབ་མ་རྣམས། །ཐབས་རྣམས་དུ་མས་ལེགས་བསྲོས་པ། །ཡུལ་དང་དུས་ལས་དཔགས་ཏེ་སྦྱར། །ཞེས་བྱ་བ་ལ། ཐ་མལ་བ་ཞེས་བྱ་བའི་དུགས་ནི། བལ་དང་ཁུར་བ་ལ་སོགས་པས་བྱ་སྟེ། དེ་ཡང་ནས་དང་མོན་སྲན་གྲེ་འུ་དང༌། ཏིལ་ལ་སོགས་པ་བཏབ་ནས་སྦྲུས་ཏེ་བཙོས་ནས་ཁུར་བ་ལྟ་བུར་བྱས་ནས། དུགས་སུ་བྱ་བའི་ཐབས་ལ་སྦྱར་བ་གང་ཡིན་པ་དེ་ནི་ཁུར་བའི་དུགས་ཞེས་བྱའོ། །བོང་བ་དང་གྱོ་མོ་དང༌། རྡོབ་མེར་བསྲེགས་པ་ལ་མེའི་མདོག་ཅན་དུ་བྱས་ལ། ཆུ་འམ་ཤམ་པོའི་ནང་དུ་ནུབ་པར་བྱས་ལ་རློན་པ་དེ་གོས་རིམ་གཅིག་གིས་དཀྲིས་པས་དུགས་བྱའོ། །གསོ་མའི་ལོ་མ་དང་འབྲུ་རྣམས་པ་ལང་ལ་སོགས་པའི་ལྕི་བ་དང༌། རིལ་མ་དང་ཕྱེ་མ་དང༌། ཕུབ་མ་རྣམས་ཆུ་སྐྱོར་མོ་དང་བསྐོལ་ལ། གོས་ཀྱི་ནང་དུ་བཅུག་པས་དུགས་བྱའོ། །ཐབས་རྣམས་དུ་མས་ལེགས་བསྲོས་པ། །ཞེས་བྱ་བ་ནི། རྫ་མ་དང་སྦུ་གུ་དང་རྫ་སྐྱོགས་དང༌། སླ་ང་ལ་སོགས་པའི་ཐབས་ཀྱིས་ལེགས་པར་བསྲོས་པའི་ཁུ་བ་ལ་སོགས་པའི་དུགས་རྣམས་ཡུལ་དང་དུས་ལས་དཔགས་ནས་སྦྱར་བར་བྱ་སྟེ། ཡུལ་ནི་སའི་ཡུལ་ཕྱོགས་དང༌། ལུས་ཀྱི་ཡན་ལག་གི་ཚོགས་སོ། །དུས་ནི་སྐད་ཅིག་ལ་སོགས་པའི་མཚན་ཉིད་དང༌། ནད་པའི་གནས་སྐབས་ཀྱི་མཚན་ཉིད་དོ། །དེ་ལས་དཔགས་པ་ནི་དེའི་དབང་དུ་བྱས་ཏེ། དུགས་ཀྱི་སྦྱོར་བ་འདི་བྱའོ། །དེ་ཡང་ལུས་ཀྱི་ཡུལ་ནི་དཔེར་ན། རླུང་ནི་མ་ཞུའི་གནས་ཞུགས་དང༌། །ཞེས་བྱ་བ་ལ་སོགས་པའོ། །སའི་ཡུལ་ལས་དཔགས་པ་ནི། ཡུལ་རླན་ཅན་དུ་དུགས་བྱ་དགོས་པ་དེ་ལྟར་སྐམ་སར་ཡིན་ནོ། །
དུས་ལས་ནི་དཔེར་ན་དགུན་གྱི་དུགས་གཞན་དག་བྱ་དགོས་ལ། སོ་གར་གཞན་དག་བྱའོ། །ནད་པ་ལས་ནི་དཔེར་ན་དུགས་ལ་ལ་ནི་མཁྲིས་པ་དང་འདྲེས་པའི་རླུང་ལ་སོགས་པའོ། །ལ་ལ་ནི་བད་ཀན་དང་འདྲེས་པའི་རླུང་ལ་དགོས་ལ། ལ་ལ་ནི་རླུང་འབའ་ཞིག་ལ་དགོས་པའོ། །འབྲུ་རྣམས་ནི་འབྲུའི་རིགས་ལོ་མ་དཀྲུགས་ཤིང་བཅོམ་པའོ། །ཆུ་དུགས་ཤི་ཀྲུ་བར་ན། །ཨེ་རཎྜ་དང་ཀ་རཉྫ། །བྱེའུ་རུག་པ་དང་ཨརྫ་ཀ །ཤི་རི་ཤ་དང་བ་ཤ་ཀ །འོད་མ་ཨརྒ་མ་ལ་ཏི། །ལ་བ་ཤ་ཀའི་ལོ་མ་བཀྲུ་།ཤུ་དག་ལ་སོགས་སྨན་རྣམས་དང༌། །གཤེར་ས་ཆུར་གནས་ཤ་རྣམས་དང༌། །རྩ་བཅུ་ནད་དམིགས་ཇི་བཞིན་དུ། །སོ་སོ་འམ་ལྷན་ཅིག་སྦྱར་ན་ནི། །སྣུམ་ལྡན་ཆང་དང་ཚྭ་དང་ནི། །འོ་མ་ཆུ་སོགས་ཀྱིས་བཙོས་ལ། །བུམ་པའམ་སྦུ་གུ་རིང་པོ་ནི། །བཀང་ལ་ནད་ཀྱིས་ཉམ་ཐག་པའི། །ལུས་ནི་གོས་ཀྱིས་དཀྲིས་ནས་སུ། །ཅི་བདེ་བར་ནི་སྣུམ་ཆུ་བླུགས། །ལུས་ལ་རླུང་ནད་ཞུགས་གྱུར་པ། །དེ་ཉིད་ཀྱིས་འདིར་བཀང་སྣོད་དུ། །ནད་པ་ཞུགས་ཏེ་གནས་ན་ནི། །གཅིན་སྲི་གཞང་འབྲུམ་སོགས་ནད་སེལ། །ཞེས་བྱ་བ་ལ། ཤི་ཀྲུ་ནས་བརྩམས་ཏེ། ཡབ་ཤ་ཀའི་བར་གྱི་སྡེ་ཚན་དེ་རྣམས་ལས། ལོ་མ་རྣམས་བཀྲུ་ཞིང་མཉེས་ལ། དེ་རྣམས་དང་དེ་བཞིན་དུ་ཤུ་དག་ལ་སོགས་པའི་སྨན་སྔར་བཤད་པ་རྣམས་དང༌། དེ་བཞིན་དུ་གཤེར་ས་དང་ཆུན་གནས་པའི་རོ་ཧི་ཏ་པ་ཐི་ན་ལ་སོགས་པའི་ཉ་དང༌། དེ་བཞིན་དུ་རྩ་བ་བཅུ་པ་ཞེས་ནད་ཀྱི་དམིགས་ཇི་ལྟ་བ་བཞིན་དུ་སོ་སོ་འམ་ལྷན་ཅིག་བཏང་བ་སྟེ། སོ་སོ་རེ་རེ་ནས་གཏང་བའམ། མ་ལུས་པ་ལྷན་ཅིག་སྦྱར་ཞིང་བསྲེས་ནས་ནད་དམིགས་ཇི་ལྟ་བ་བཞིན་དུ། དེ་དང་རྗེས་སུ་མཐུན་པར་སྦྱར་བར་བྱའོ་ཞེས་བྱ་བའི་བར་དུའོ། །དེ་བཞིན་དུ་སྣུམ་དང་ལྡན་བ་སྟེ་སྣུམ་ཡོད་པའོ། །འདི་ཡང་ནད་ལས་དཔགས་པ་དང་སྦྱར་བར་བྱ་སྟེ། མར་ལ་སོགས་པ་ནད་གང་དང་གང་ལ་ཕན་པའི་སྣུམ་དེ་དང་དེ་དག་དང་ལྡན་བར་བྱ་བ་དང༌། དེ་བཞིན་དུ་དེ་དང་མཉམ་པའི་ཆང་ལ་སོགས་པ་དང་བཙོས་པ་ནད་དམིགས་ཇི་ལྟ་བུ་ལས་དཔགས་ཏེ། བླུགས་པའི་ཆུ་དེ་བུམ་བ་མཆུ་ཕྲ་མོ་བཏོད་བའི་མཆུས་བླུགས་
པར་བྱ་སྟེ། སྤུ་གུ་ནི་རིང་པོ་ཁ་གྱེན་དུ་བལྟས་པའི་ནང་དུ་བཅུག་སྟེ། བཀང་ལ་ནད་ཀྱིས་ཉམ་ཐག་པ་སྟེ། གཟེར་ལ་སོགས་པས་ཉོན་མོངས་པར་གྱུར་པའི་ལུས་གོས་ཀྱིས་དཀྲིས་ལ། སྣུམ་ཞིང་རླུང་འཇོམས་པའི་སྨན་བསྐོལ་བ་བླུགས་པར་བྱ་སྟེ། དེ་ཡང་བདེ་བ་སྟེ། ཅི་བདེ་བ་ལ་རེག་པར་གྱུར་པའི་ཚུལ་དུ་བྱ་སྟེ། འདིར་ལན་འགའ་ཅུང་ཟད་དྲོ་བས་བྱའོ། །ལན་འགའ་ནི་ཤིན་ཏུ་དྲོ་བས་བྱའོ། །དེ་བླུགས་པ་ནི་ཆུའི་རྒྱུན་གྱི་ཁྱད་པར་གང་ཞིག་གིས་རྒྱུན་མི་འཆད་པར་བླུགས་ཤིང་ཆུ་ལ་སོགས་པའི་གཤེར་རྫས་འཛག་པར་འགྱུར་བས་ན་བླུགས་པ་ཞེས་བྱའོ། །ཆུའི་དུགས་ནི་རྣམ་པ་གཉིས་ཏེ། རྒྱུན་བླུགས་པ་དང་ཆུ་ལ་བཅིང་བའོ། །དེ་ལྟར་བླུགས་པ་བཤད་ཟིན་ནས། ད་ནི་ཆུ་ལ་བཅིང་བ་བཤད་པའི་ཕྱིར། ལུས་ལ་ཞེས་བྱ་བ་ལ་སོགས་པ་བཤད་པ་ཡིན་ཏེ། ནད་པ་ལུས་ཀྱི་ཡན་ལག་ཐམས་ཅད་ལ་རླུང་ནད་ཞུགས་ཤིང་རླུང་གི་བདག །དེ་ཉིད་ཀྱིས་ཞེས་བྱ་བ་སྔར་བཤད་པའི་སྨན་ཚོ་སྣོད་ཆེན་པོ་བཀང་ལ། བཀང་བའི་སྣོད་དེར་ནད་པ་བཅུག་སྟེ། སྙིང་ག་ལ་སོགས་པ་བསྲུང་བཞིན་གནས་པར་བྱའོ། །སྣོད་ཅེས་སྨོས་པ་ནི་སྤྱི་མིང་ཙམ་དུ་ཉེ་བར་མཚོན་པ་ཙམ་སྟེ། ཟངས་ཆེན་པོའམ། གཞོང་པ་རིང་པོ་ཆེན་པོ་སྨན་ཆུས་བཀང་བའི་ནང་དུ་འཇུག་ཅིང་བཅིངས་ཏེ་གནས་པར་བྱའོ། །དེ་བཞིན་དུ་གཞང་འབྲུམ་དང༌། གཅིན་སྲི་བ་ལ་སོགས་པ་ལུས་ཀྱི་ཕྱོགས་གཅིག་ན་བར་གྱུར་པ་ལ་ནི་ནད་ལ་སོགས་ཚུལ་ལས་དཔགས་ཏེ་སྦྱར་བར་བྱའོ། །རླུང་མེད་ཕྱི་ནང་སྣུམ་བཅས་ཤིང༌། །ཟས་འཇུའི་དུས་སུ་དུགས་དཔྱད་བྱ། །ནད་དང་ནད་པ་ཡུལ་དུས་ཀྱི། །དབང་ལས་ཆུང་འབྲིང་ཆེན་པོར་བྱ། །ཞེས་བྱ་བ་ལ། རླུང་མེད་པའི་ས་ཕྱོགས་སུ་སྐྱེས་བུའི་ལུས་ཕྱི་ནང་སྣུམ་དང་བཅས་པར་བྱས་ལ། ཁ་ཟས་སྨན་དང་ཞུ་ཟིན་པར་གྱུར་བའི་དུས་སུ་དུགས་དཔྱད་པར་བྱ་ལ། དུགས་དེ་ཡང་ནད་ལ་སོགས་པའི་དབང་གིས་ཆུང་ངུ་ལ་སོགས་བའི་ཚད་གསུམ་དུ་འགྱུར་རོ། །དེ་ཡང་ཆུང་ངུ་དང་འབྲིང་དང་ཆེན་པོ་གསུམ་དུ་འགྱུར་ལ། དེ་བཞིན་དུ་ནད་པ་ཡང་སྟོབས་ལ་སོགས་པ་ལ་ཆུང་ངུ་དང་འབྲིང་དང་ཆེན་པོ་ཡོད་དེ། ཡུལ་རླན་ཅན་དང༌། སྐམ་ས་འདྲེན་མ་གསུམ་ཡོད་དོ། །
ལུས་ཀྱི་གནས་མགོ་དང་ཕྲག་པ་དང༌། ལྟོ་བ་དང༌། བྱིན་བ་ལ་སོགས་པའི་དབྱེ་བས་ཕྱེ་བ་ཡིན་ནོ། །དུས་ནི་དྲོ་བ་དང༌། གྲང་བ་དང༌། འདྲེས་མའི་དབྱེ་བས་ཕྱེ་བ་ཡིན་ནོ། །དབང་ལས་ཞེས་བྱ་བ་ནི་དེ་དག་གཙོ་བོར་བྱས་པ་ཡིན་ནོ། །བད་ཀན་གྱིས་ཉེན་རྩུབ་དུགས་བྱ། །བད་ཀན་རླུང་ལ་རྩུབ་སྣུམ་བྱ། །ཞེས་བྱ་བ་ལ། བད་ཀན་གྱིས་ཉེན་ཅིང་བད་ཀན་ཤས་ཆེ་བའི་སྐྱེས་བུས་དུགས་རྩུབ་མོ་བྱའོ། །དེ་བཞིན་དུ་སྐྱེས་བུ་རླུང་ལས་གྱུར་ཅིང་བད་ཀན་ཡང་ཡོད་པ་དག་གིས་དུགས་གཞན་ལྟར་དང་པོར་སྣུམ་ཆོས་བྱ་ཞིང༌། བད་ཀན་དང་རླུང་ཡོད་པས་རྩུབ་པ་དང༌། སྣུམ་པ་འདྲེན་མའི་དུགས་སྦྱར་བར་བྱའོ། །རླུང་ནི་མ་ཞུའི་གནས་ཞུགས་དང༌། །བད་ཀན་ཞུ་བའི་གནས་བརྟེན་ལ། །གནས་ཀྱི་དབང་གིས་རྩུབ་དུགས་དང༌། །དེ་བཞིན་སྣུམ་སྔར་འགྲོ་དུགས་བྱ། །ཞེས་བྱ་བ་ལ། རླུང་མ་ཞུའི་གནས་སུ་ཞུགས་ལ་གནས་པའི་ནད་ལ་ནི་རྩུབ་པ་སྔོན་དུ་འགྲོ་བའི་དུགས་སྤྱད་པར་བྱའོ། །དེ་བཞིན་དུ་བད་ཀན་ཞུ་བའི་གནས་ལ་གནས་ཤིང་བརྟེན་པ་ལ་ནི་སྣུམ་སྔོན་དུ་འགྲོ་བའི་དུགས་བྱ་སྟེ། དེ་དག་ནི་གནས་ཀྱི་དབང་གིས་ཚུལ་དེ་ལྟར་བྱ་དགོས་པ་ཡིན་ནོ། །སྟ་ཟུར་དག་དང་མིག་དང་སྙིང༌། །རླིག་པར་ཉུང་ངུ་འམ་བྱ་བ་མིན། །ཞེས་བྱ་བ་ལ། སྟ་ཟུར་ཞེས་བྱ་བ་ལུས་ཀྱི་ཕྱོགས་གཅིག་བརླ་དང༌། དཔྱི་ལ་བརྟེན་པའི་ནད་ལ་དུགས་ཉུང་དུ་བྱའོ། །དེ་བཞིན་དུ་མིག་དང་སྙིང་ག་དང་རླིག་པར་ནི་ཤིན་ཏུ་ཆུང་བའི་དུགས་བྱའོ། །ཡང་ན་བྱ་བ་མིན་ཞེས་བྱ་བ་སྟེ། གནས་དེ་དག་ཏུ་ཡེ་མི་བྱའོ། །དུགས་ཀྱིས་གྲང་དང་ཟུག་གཟེར་བྲལ། །ཡན་ལག་མཉེན་པར་གྱུར་བ་དང༌། །དལ་གྱིས་མཉེས་ལ་ཁྲུས་བྱས་ལ། །དེ་ནས་སྣུམ་གྱི་ཆོ་ག་བསྟེན། །ཞེས་བྱ་བ་ལ། དུགས་ཀྱིས་སྐྱེས་བུའི་གྲང་བ་དང༌། ཟུག་གཟེར་བྲལ་བས་སྐྱེས་བུའི་ལུས་ལེགས་པར་བརླན་ཞིང་མཉེན་པར་འགྱུར་བ་དང༌། དེ་བཞིན་དུ་ཡན་ལག་མཉེན་ཞིང་འཇམ་པར་འགྱུར་བ་དང༌། དལ་གྱིས་དང་པོར་མཉེས་ལ་དེའི་འོག་ཏུ་ཁྲུས་བྱ་བ་དེ་དང་པོ་ལག་པས་ཡན་ལག་མཉེས་ལ་ཆུ་དྲོན་པོས་ཁྲུས་བྱས་ནས། དེའི་འོག་ཏུ་སྣུམ་ཆོས་ཀྱི་སྐབས་ནས་བཤད་པའི་ཆོ་ག་བསྟེན་ཅིང་སྤྱད་པར་བྱ་བ་དང༌།
སྤང་བར་བྱ་བ་རྣམས་དོར་བར་བྱའོ། །དེ་དག་ཀྱང་སྣུམ་གྱི་ཆོ་གའི་སྐབས་སུ་ཟས་དང་སྤྱོད་ལམ་བསྟན་པ་བཞིན་དུ་བྱ་བ་དང༌། ཐལ་སྨན་རྣོན་པོ་དང༌། མེ་བཙའ་བཏང་བ་དང༌། མེས་ཚིག་པ་ལ་ཚ་བ་ཞི་བར་བྱ་བ་དང༌། ཚད་བས་འཁྲུ་བ་དང༌། སློན་པ་ལ་དེ་བཅད་པ་དང༌། མི་དྲན་ཅིང་མྱོས་པ་ལ་སླར་དྲན་པར་བྱ་བའི་ཆོ་ག་བྱའོ། །དེ་བཞིན་དུ་ཆུ་ཚན་གྱི་ཉེ་བར་སྤྱོད་པ་ལ་སོགས་པ་སྤང་བར་བྱའོ། །དུགས་དྲགས་པ་ཡིས་ཁྲག་མཁྲིས་འཁྲུགས། །བརྒྱལ་སྐོམ་སྐད་འགགས་ཡན་ལག་འཇུམས། །མགོ་འཁོར་ཚིགས་ན་རིམས་འདེབས་ཤིང༌། །ཚི་གུ་དམར་པོ་ཏལ་ཏིལ་སྣང༌། །ལུམས་ཀྱིས་སྐྱུག་བྲོ་བར་འགྱུར་ཏེ། །ཞེས་བྱ་བ་ལ། དུགས་དྲགས་ཤིང་ཤས་ཆེར་བསྟེན་པས་ཁྲག་མཁྲིས་འཁྲུགས་པ་ལ་སོགས་པ་འབྱུང་བར་འགྱུར་རོ། །བརྒྱལ་བ་ནི་དྲན་པའོ། །སྐད་དང་ཡན་ལག་འཇུམས་པ་ནི། སྐད་གདངས་དམའ་ཞིང་རྨྱ་བའོ། །མགོ་འཁོར་བ་ནི་ལམ་མི་གནས་པའོ། །ལྷུ་ཚིགས་ན་བ་ནི་ལྷུ་ཚིགས་ན་བའོ། །ཚི་གུ་དམར་པོ་ཏལ་ཏིལ་སྣང་བར་གྱུར་པ་ནི། དེ་ལྟ་བུ་འབྱུང་བར་འགྱུར་བ་སྟེ། དེར་ནི་ཞི་བའི་སྨན་གྱིས་གསོ། །དུགས་དང་ཐལ་སྨན་མེ་བཙའ་དང༌། །ཚད་འཁྲུ་སྐྱུག་བྲོ་བརྒྱལ་ནད་གསོ། །ཞེས་བྱ་བ་ལ། དུགས་དྲགས་པ་ལས་བྱུང་བའི་ནད་ཁྲག་དང་མཁྲིས་པ་འཁྲུགས་པ་ལ་སོགས་བ་ཞི་བར་བྱ་ཞིང་རྩེ་གཞིལ་བའི་སྨན་བྱ་བ་དང་བཅོས་སྦྱར་བར་བྱའོ། །དུགས་ཞེས་བྱ་བ་ལ་སོགས་པ་འདིའི་སྐབས་སུ་ཞར་ལ་བཤད་པ་ཡིན་ཏེ། དེ་དག་ཀྱང་ཚུལ་འདི་ཉིད་ལ་བརྟེན་ནས་དུགས་གཞི་ལ་བ་ལ་སོགས་པའི་སྨན་བྱ་སྟེ། དུགས་གཞིལ་བའི་སྨན་བྱ་བ་དང༌། ཐལ་སྨན་རྣོན་པོ་བཏབ་པ་ལ་དེའི་ཚ་བཞི་བར་བྱ་བའི་ཕྱིར་སྨན་གཏང་བ་དང༌། མེ་བཙའ་ལ་དེའི་ཚ་བཞི་བར་བྱ་བའི་ཕྱིར་སྨན་གཏང་བ་དང༌། ཚད་པས་འཁྲུ་བ་ལ་ཚད་པས་འཁྲུ་བ་གཅོད་ཅིང་སྨིན་པའི་སྨན་གཏང་བ་དང༌། སྐྱུག་བྲོ་བ་ལ་དེ་ཞི་བའི་སྨན་དང༌། བརྒྱལ་བ་ལ་འདུ་ཤེས་རྙེད་བར་བྱ་བའི་ཐབས་ཀྱིས་གསོའོ། །དུགས་ནི་ཕལ་ཆེར་ལྕི་དྲོ་རྣོ། །དེ་ལས་གཞན་པའི་ཞི་བྱེད་ཡིན། །གཤེར་
ཞིང་བརྟན་འཁྲུ་སྣུམ་པ་དང༌། །རྩུ་བཅིང་སྲ་བ་དུགས་སྨན་ཡིན། །འཇམ་དང་རྩུབ་དང་ཞི་འབྱར་བག །གཤེར་བག་དེ་ནི་སེལ་བྱེད་ཡིན། །མདོར་ན་ཕལ་ཆེར་ཁ་བ་དང༌། །བསྐ་དང་མངར་བ་དེ་སྨན་ཡིན། །ཞེས་བྱ་བ་ལ། འདིས་དུགས་དེ་བཞི་བར་བྱ་བའི་ཆོ་ག་སྤྱིར་བཤད་པ་ཡིན་ཏེ། སྨན་གང་ལྕི་བ་དྲོ་བ་དང་རྣོ་བ་དེ་ཐམས་ཅད་ནི་དུགས་ཀྱི་སྨན་ཡིན་ལ། ཕལ་ཆེར་ཞེས་སྨོས་བ་ནི། ལ་ལ་རྣམ་པར་འགྱུར་བ་དག་ཀྱང་ཡོད་པར་བསྟན་པ་ཡིན་ནོ། །དེ་ལས་གཞན་པ་གོ་བཟློག་པ་དང༌། ཡང་བ་དང༌། བསིལ་བ་དང༌། རྟུལ་བ་ནི་ཞི་ཞིང་རྩེ་འཇིལ་བར་བྱེད་པའི་སྨན་ཡིན་ནོ། །དེ་བཞིན་དུ་གཤེར་བ་ལ་སོགས་པ་དང་ལྡན་པའི་སྨན་རྣམས་ནི་དུགས་ཀྱི་སྨན་ཡིན་ལ་འཇམ་བ་ལ་སོགས་པ་དང་ལྡན་པའི་སྨན་ནི་ཞི་བར་བྱེད་པ་ཡིན་ནོ། །དེ་བཞིན་དུ་མདོར་བསྡུ་ན་སྨན་གང་ཅུང་ཟད་ཁ་བ་དང་བསྐ་བ་དང༌། མངར་བ་རྣམས་ནི་དེ་རྩེ་གཞིལ་བར་བྱེད་ཅིང་ཞི་བར་བྱེད་པའི་སྨན་ཡིན་ནོ། །འདི་གཉིས་ཀྱི་མཚན་ཉིད་དྲང་སྲོང་ཙར་ཀས་བཤད་པ་དེ་ནི། ཞི་བྱེད་ལྕི་ཞིང་དྲོ་བ་འཇོམས། །ལུམས་ཕྱེད་རྡུལ་ནི་འབྱིན་བྱེད་ཅིང༌། །གསོ་བའི་རྫས་དག་གང་ཡིན་པ། །རྩེ་འཇིལ་ཞི་བར་བྱེད་བ་ཡིན། །ཞེས་འབྱུང་བ་ཡིན་ནོ། །ཞི་ཞིང་རྩེ་བཅིལ་སྟོབས་ཐོབ་གྱུར། །ཇི་སྐད་བཤད་པའི་ནད་རྣམས་ཟད། །ཅེས་བྱ་བ་སྟེ། སྐྱེས་བུ་ནད་ཞི་ཞིང་རྩེ་བཅིལ་བས། སྟོབས་ཐོབ་པར་གྱུར་ན། ནད་དེ་རྩེ་ཞིལ་ཞིང་དུགས་དྲགས་པའི་སྐྱོན་མེད་པར་འགྱུར་བ་ཡིན་ལ། དེ་བཞིན་དུ་དུགས་དྲགས་པ་ལས་བྱུང་བའི་ནད་ཁྲག་དང་མཁྲིས་པ་འཁྲུགས་པ་ལ་སོགས་པ་ཇི་སྐད་བཤད་པའི་ནད་རྣམས་ཟད་ན། ནད་ཞི་བ་བཅོས་པ་ལེགས་པ་ཡིན་པར་ཤེས་པར་བྱའོ། །བཅིལ་དྲགས་པགས་པ་རྩ་འཁུམས་ཤིང༌། །འདར་སྙིང་ཁ་འགྲམ་ནད་དུ་འགྱུར། །རྐང་མཆུ་ལག་པ་པགས་ནག་འགྱུར། །བཅིལ་དྲགས་པ་ཡིན་ནད་དུ་བཤད། །ཅེས་བྱ་བ་ཡིན་ཏེ། དུགས་པའི་ནད་ཧ་ཅང་བཅོས་དྲགས་ཏེ་ཐལ་ཆེས་པ་ལས་ནད་དུ་འགྱུར་བ་ནི་པགས་པ་དང་རྩ་འཁུམས་པ་ལ་སོགས་པ་ཡིན་པར་བཤད་དོ། །དེ་ཡང་བཅིང་ཞིང་བཅོས་དྲགས་པ་པགས་པ་དང་
རྩ་འཁུམས་ཤིང་ལུས་པོ་ཉིད་འདར་ཞིང་གཡོ་བ་དང༌། སྙིང་ག་དང༌། ཁ་དང་འགྲམ་བ་རྣམས་འགགས་ཤིང་རེངས་བའི་ནད་དུ་འགྱུར་ཏེ། ཚིག་མི་ཐོན་པ་དང༌། རྐང་པ་དང༌། མཆུ་དང༌། ལག་པ་དང༌། པགས་པའི་མདོག་ནག་པོར་འགྱུར་བ་སྟེ། དེ་ལྟ་བུ་ནི་ཤིན་ཏུ་རྩེ་བཅིལ་ཞིང་དྲགས་པའི་ནད་ཡིན་པར་ཤེས་པར་བྱའོ། །ཤིན་ཏུ་སྦོམ་དང་རྩུབ་པ་དང༌། །ཉམ་ཆུང་བརྒྱལ་བར་གྱུར་པ་དང༌། །དུགས་དྲགས་བཅོས་དགོས་གློ་རྡོལ་དང༌། །སྐེམ་དང་ཆང་ནད་ཀྱིས་བཏབ་དང༌། །རབ་རིབ་དམུ་རྫིང་ཤུ་བ་མཆེད། །མཛེ་ནད་འོར་ནད་རླུང་མཁྲིས་དང༌། །འོ་མ་ཞོ་དང་མར་སྦྲང་རྩི། །འཐུངས་དང་བཀྲུ་སྨན་བཏང་བ་དང༌། །ལུས་ནད་ཚིགས་དང་གཞང་ནད་ཡོད། །ཁྲོ་དང་མྱ་ངན་འཇིགས་པས་ཉེན། །བཀྲེས་སྐོམ་མིག་སེར་སྐྱ་རྦབ་དང༌། །གཅིན་ནད་མཁྲིས་ནད་ཟླ་མཚན་འཛག། སྦྲུམ་དང་བུ་སྐྱེས་དུགས་མི་བྱ། །ནད་ཚབས་ཆེན་འཇམ་པོར་བྱ། །ཞེས་བྱ་བ་ལ། ཤིན་ཏུ་སྦོམ་པ་དང༌། རྩུབ་པ་དང༌། བུ་བཙས་པའི་བར་དུ་དུགས་བྱ་བར་མི་རུང་ངོ༌། །དེ་ལ་ཉམ་ཆུང་བ་ནི་སྟོབས་ཆུང་བའོ། །དུགས་དྲགས་ཏེ་བཅོས་དགོས་པ་ནི་རྩེ་བཅིལ་བར་འོས་པའོ། །ཆང་ནད་ཀྱིས་བཏབ་པ་ནི་ཆང་དྲགས་པའི་ནད་ན་བའོ། །རླུང་མཁྲིས་ནི་རླུང་དང་མཁྲིས་པའི་ལྡན་པ་སྟེ། དེ་དག་ལ་དུགས་མི་བྱའོ། །དེ་བཞིན་དུ་འོ་མ་ལ་སོགས་པ་འཐུངས་པ་ལ་ཡང་དུགས་མི་བྱའོ། །དེ་བཞིན་དུ་བཀྲུ་སྨན་འཐུངས་པ་ལ་ཡང་དུགས་མི་བྱའོ། །གཞང་ནད་ཡོད་བ་ནི་གཞང་ནད་ལ་སོགས་པ་ལ་ཡང་མི་བྱའོ། །དེ་བཞིན་དུ་ཁྲོ་བས་ཉེན་པ་དང༌། མྱ་ངན་གྱིས་ཉེན་པ་དང༌། འཇིགས་པས་ཉེན་པ་དེ་དག་ལ་ཡང་དུགས་བྱར་མི་རུང་ངོ༌། །དེ་བཞིན་དུ་གཅིན་ནད་དང་མཁྲིས་པའི་ནད་དང༌། ཟླ་མཚན་འཛག་བ་དང༌། སྦྲུམ་མ་དང༌། བུ་སྐྱེས་པ་ལ་སོགས་པ་ལ་ཡང་དུགས་བྱར་མི་རུང་ངོ༌། །གལ་ཏེ་དེ་དག་ལ་གསུང་པ་ལ་སོགས་པའི་ནད་ཚབས་ཆེ་བ་བྱུང་སྟེ། མི་བྱར་མི་རུང་ན། འཇམ་པོར་སྦྱར་བའི་དུགས་དང་ལུམས་མི་དྲག་པ་འཇམ་བོ་བྱའོ། །ལུད་པ་ཆམ་བ་དབུགས་
མི་བདེ། །སྐྱིགས་བུ་ལྟོ་སྦོས་བཤང་འགགས་དང༌། །སྐད་འགགས་རླུང་གི་ནད་རྣམས་དང༌། །བད་ཀན་པེ་སྣབས་འཁྱིལ་ཞིང་ལྕི། །ལུས་རེངས་རྐེད་པ་རྩིབ་ལོགས་དང༌། །སྒུར་དང་ལྟོ་ནད་འགྲམས་ནད་དང༌། །རླིག་ནད་སྐྲངས་དང་ད་རྒན་དང༌། །རྩོལ་དང་རླུང་ནད་ཀྱིས་ཟུག་དང༌། །གཅིན་འགགས་ཐོར་བུ་རྨེན་བུ་དང༌། །ཁུ་བ་བཀག་དང་རླུང་འཁྱིམས་ལ། །དེ་ཡི་སྨན་གྱི་དབྱེ་བ་ཡིས། །དུགས་ནི་སོ་སོ་ཇི་བཞིན་བྱ། །ཞེས་བྱ་བ་ལ། ལུད་པ་དང་ཆམ་པ་དང་རླུང་འཁྱིམས་བའི་བར་ལ། དེའི་སྨན་ཇི་ལྟ་བས་ལེགས་པར་དུགས་བྱ་སྟེ། ལ་ལར་ནི་སྤྲོ་བས་སོ། །ལ་ལར་ནི་བཅིངས་པས་སོ། །ལ་ལར་ནི་ཐ་མལ་པ་ཞེས་བྱ་བས་སོ། །ལ་ལར་ནི་ཆུའི་དུགས་བྱ་བ་དང༌། དེ་བཞིན་དུ་དེ་ལ་ཕན་བའི་རང་གི་སྨན་གྱི་དབྱེ་བའི་ཆ་སོ་སོ་གང་ལ་ཕན་པའི་དབྱེ་བའོ་གནས་རང་རང་གི་ནད་ཀྱི་གནས་སྐབས་སུ་བཤད་པའི་སྨན་གྱི་དུགས་སོ་སོར་བྱའོ། །དེའི་ནི་འདི་སྐད་སྟོན་པ་ཡིན་ཏེ། གང་གི་ཚེ་ལུད་པ་ལ་དུགས་བྱ་དགོས་པ་དེའི་ཚེ། ལུད་པའི་སྨན་དུ་བཤད་པས་དུགས་བྱའོ། །དེ་བཞིན་དུ་ཆམ་པ་དང༌། དབུགས་མི་བདེ་བ་ལ་སོགས་པ་ལ་ཡང་རང་རང་གི་སྨན་གྱིས་དུགས་བྱའོ། །ཞེས་བྱ་བར་སྦྱར་རོ། །ད་རྒན་དང༌། རྩོལ་བ་དང༌། རླུང་ནད་ཀྱིས་ཟུག་པ་ནི་འོག་ནས་བཤད་པའི་རླུང་ནད་ཀྱི་ནད་གཞི་ལས་མཚན་ཉིད་སྟོན་ཏོ། །ཁུ་བ་འགགས་པ་ནི་ཁུ་ཆུ་བཀག་པའོ། །རླུང་འཁྱིམས་པ་ནི་ཚིལ་གྱིས་བར་བཀག་པའོ། །དུགས་ཕན་མེ་ཡིས་བསྲོ་མིན་པ། །རླུང་ནད་ཚིལ་དང་བད་ཀན་ཅན། །རླུང་མེད་ཁང་པར་རྩོལ་བ་དང༌། །གོས་ལྕི་བ་དང་འཇིགས་པ་དང༌། །དཀྲི་དང་སྟོབས་འགྱེད་ཁྲོ་བ་དང༌། །ཆང་མང་བཀྲེས་དང་ཉི་ཚན་གཞག །ཅེས་བྱ་བ་ལ། ཚིལ་དང་བད་ཀན་གྱིས་གཡོགས་པའི་རླུང་ལ་ནི་མེས་མི་བསྲོ་བར་བྱ་བ་ཕན་པ་ཡིན་ཏེ། དེའི་ཐབས་ནི་རླུང་མེད་པའི་ཁང་པར་འདུག་ལ། རྩོལ་བ་དེ་ལུས་དུབ་པར་བྱ་བ་དང༌། གོས་ལྕི་བ་ཁུར་དུ་ལོངས་པ་བགོ་བ་དང༌། དེ་བཞིན་དུ་འཇིགས་པ་དང༌། དེ་བཞིན་དུ་སྔར་བཤད་པའི་དཀྲི་བ་དང༌། སྟོབས་འགྱེད་
པ་སྟེ་ལག་པར་སྟོབས་འགྱེད་པ་ལ་སོགས་པ་དང༌། ཁྲོས་འཁྲུགས་པ་དང༌། ཆང་མང་པོ་བཏུང་བ་དང༌། བཀྲེས་ཤིང་ལྟོགས་པས་ཉེན་པ་དང༌། དེ་བཞིན་དུ་ཉི་མ་ཚ་བ་ལ་གཞག་པ་སྟེ། འདི་དག་བྱའོ། །ནད་གང་ནང་ཁྲོལ་གནས་དང་ལུས་ཟུངས་དང༌། །རྩར་སོང་རྐང་ལག་རུས་པའི་ནང་སོང་བའི། །ནད་དེ་དུགས་ཀྱིས་བསྲུང་བར་བྱས་ནས་ནི། །ཁོང་དུ་བསྡུས་ལ་སྦྱང་བས་དཔྱིས་དབྱུང་བྱ། །ཞེས་བྱ་བ་ལ། རླུང་ལ་སོགས་པ་ཁོང་བར་གནས་ཤིང་ནང་ཁྲོལ་ན་འདུག་པའམ། ཁྲག་ལ་སོགས་པ་ལུས་ཟུངས་ལ་གནས་པ་རྣམས་དང་དེ་བཞིན་གང་རྩ་རྣམས་སུ་ཁྱབ་ཅིང་ཞེན་པ་དང༌། དེ་བཞིན་དུ་རྐང་ལག་གི་ནང་དུ་སོང་བ་སྟེ། ལག་པ་ལ་སོགས་པའི་རུས་པ་ལ་ཞེན་པའི་ནད་དེ་དག་ཐམས་ཅད་གནས་དེ་དག་ལས་བཤད་མ་ཐག་པའི་སྣུམ་དང་དུགས་ཀྱིས་བསྲུང་བར་བྱས་ཤིང༌། འཛག་ཏུ་རུང་བ་ལྟ་བུ་བྱས་ལ། དེ་ནས་ཇི་སྐད་བཤད་པའི་དུགས་བཞི་པོས་ཇི་ལྟ་ཇི་ལྟ་བཞིན་དུ་བསྲུང་ཞིང་བཞུ་ནས། རྐང་ལག་ལ་སོགས་པ་ནས་ཁོང་པའི་ནང་དུ་བསྡུས་ལ། དེའི་འོག་ཏུ་འོག་ནས་བཤད་པའི་བཀྲུ་སྨན་གྱིས་དཔྱིས་དབྱུང་ཞིང་བཏོན་ནས། གདོན་པས་ཕྱིར་དབྱུང་བར་བྱའོ། །རྐང་ལག་གི་ནང་དུ་སོང་ཞེས་བྱ་བ་ནི་དེ་གནས་པའི་ནད་ནི་ཤིན་ཏུ་དུགས་བྱ་བར་འོས་པ་ཡིན་ནོ། །ཞེས་བསྟན་པ་ཡིན་ནོ། །ཡང་ན་ལུས་ཟུངས་སུ་གཏོགས་པའི་ནད་གང་འཕེལ་ནས། ཁོང་པ་ནས་ལུས་ཟུངས་སུ་སོང་བ་དང་རྐང་ལག་ལ་གནས་ན་ལྡང་བར་གྱུར་པ་ཡིན་པས་ན། འདིར་རྐང་ལག་དང་རུས་པར་གནས་པ་ནི་གཙོ་བོར་བཟུང་བའི་དོན་སྨོས་པ་ཡིན་ནོ། །དེ་བས་ན་དུགས་ཀྱིས་ནད་རྣམས་བསྲུང་བ་བྱས་ལ། ཁོང་པའི་ནང་དུ་བསྡུ་དགོས་པ་ཡིན་ནོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས་ལེའུ་བཅུ་བདུན་པའི་རྣམ་པར་འགྲེལ་པའོ།། །།དེ་ནས་སྐྱུག་སྨན་དང་བཀྲུ་སྨན་གཏང་བའི་ཆོ་གའི་ལེའུ་བཤད་པར་བྱའོ། །ཞེས་བྱ་བ་ལ། དུགས་ཀྱི་ཆོ་གའི་
འོག་ཏུ་སྐྱུག་སྨན་དང་བཀྲུ་སྨན་གྱི་ཆོ་གའི་ལེའུ་བརྩམས་པ་ནི་གང་གི་ཕྱིར། ནད་དེ་དུགས་ཀྱིས་བསྲུང་བ་བྱས་ནས་ནི། །ཁོང་དུ་བསྡུས་ལ་སྦྱར་བས་དཔྱིས་དབྱུང་བྱ། །ཞེས་འདས་མ་ཐག་པར་བཤད་པ་གང་ཡིན་པ་དེ། སྤྱད་པའི་རང་བཞིན་ཇི་ལྟ་བུ་ཡིན་པས་བསྟན་པར་བྱ་བའི་ཕྱིར་བཤད་པ་ཡིན་ཏེ། སྐྱུག་སྨན་ནི་སྟོད་ཀྱི་ནད་བསལ་བའི་ཐབས་ཡིན་ལ། བཀྲུ་སྨན་ནི་སྨད་ཀྱི་ནད་བསལ་བ་ཡིན་ཏེ། དེ་གཉིས་ཀྱི་ཆོ་ག་ནི་དེ་དག་གི་ནད་ལས་སུ་རུང་བར་བྱ་བ་ཡིན་ཏེ། དེ་ཚངས་པ་ལ་སོགས་པས་གང་དུ་དྲན་པའི་ཆོ་ག་ནི། སྐྱུག་སྨན་དང་བཀྲུ་སྨན་ལ་སོགས་པའི་ཆོ་ག་ཞེས་བྱ་སྟེ། དེ་དག་བཤད་ཅིང་བསྟན་པར་བྱ་བའོ་ཞེས་པའོ། །བད་ཀན་ནད་དམ་འདྲེས་པ་ཡི། །བད་ཀན་རྒྱས་ལ་སྐྱུག་སྨན་གཏང༌། །དེ་བཞིན་མཁྲིས་པ་བཀྲུ་སྨན་བྱ། །ཞེས་བྱ་བ་ལ། བད་ཀན་འབའ་ཞིག་གི་ནད་ལ་སྐྱུག་སྨན་གཏང་བར་བྱའོ། །ཡང་ན་ལྡན་པ་སྟེ། འདྲེས་པར་གྱུར་པའི་བད་ཀན་ལ་རྒྱས་པར་ཞེས་བྱ་བ་བད་ཀན་གྱི་ཤས་ཆེ་བའི་ནད་དང་མཁྲིས་པ་འདྲེས་པའི་ནད་ལྡན་བའམ། བད་ཀན་དང་རླུང་འདྲེས་པའི་ལྡན་བ་བད་ཀན་ཤས་ཆེ་བ་ལ་སྐྱུག་སྨན་གཏང་བར་བྱའོ། །དེ་བཞིན་མཁྲིས་པ་སྐྱུག་སྨན་གཏང༌། །ཞེས་བྱ་བ་ལ། དེ་དང་འདྲ་བས་ན་དེ་བཞིན་ཏེ། བད་ཀན་དེ་དག་ཚུལ་མཐུན་པར་བྱའོ། །དེ་ཡང་ཇི་ལྟར་བད་ཀན་འབའ་ཞིག་ལ་སྐྱུག་སྨན་བྱ་བ་ཡིན་པའམ། བད་ཀན་ཤས་ཆེ་བའི་ལྡན་བའི་ནད་ལ་སྐྱུག་སྨན་བྱ་བ་དེ་བཞིན་དུ་མཁྲིས་པ་འབའ་ཞིག་ལ་བཀྲུ་སྨན་གཏང་བའམ། འདྲེས་པའི་ནད་མཁྲིས་པ་ཤས་ཆེ་བ། མཁྲིས་པ་དང་བད་ཀན་འདྲེས་པའི་ནད་དམ། མཁྲིས་པ་དང་རླུང་འདྲེས་པའི་ནད་ལ་བཀྲུ་སྨན་བྱའོ། །རྒྱས་པ་ཞེས་སྨོས་པས་ནི་དེ་འབའ་ཞིག་བོད་པའམ། རང་གི་གནས་སམ་གནས་གཞན་དུ་ཞུགས་པའི་བད་ཀན་ནི་སྐྱུག་སྨན་བྱ་ལ། མཁྲིས་པ་ལ་ནི་བཀྲུ་སྨན་བྱའོ། །རིམས་སར་ཚད་འཁྲུ་ཐུར་དུ་ནི། །མཁྲིས་པ་ཁྲག་འཁྲུ་གློ་གཅོང་དང༌། །མཛེ་དང་གཅིན་ནད་འབྲུམ་ཐོར་བུ། །རྐང་བམ་མི་དྲན་ལུད་པ་ཅན། །དབུགས་མི་བདེ་སྙིང་འཕར་འབྲས་
མཆེད། །ནུ་མའི་ནད་དང་རོ་སྟོད་ནད། །ཁྱད་པར་དུ་ནི་སྐྱུག་སྨན་བྱ། །ཞེས་བྱ་བ་ལ། རིམས་སར་པ་དང་ཚད་པས་འཁྲུ་བ་ལ་སོགས་པ་ནས་རོ་སྟོད་ཀྱི་ནད་ཀྱི་བར་དག་ལ་ཁྱད་པར་རམ་མཆོག་ཏུ་སྐྱུག་སྨན་གཏང་བར་བྱ་སྟེ། དེས་ནད་འདི་རྣམས་ཆུ་དང་བྲལ་བའི་འབྲས་ལྟར་མཆོག་ཏུ་ཟད་ཅིང་དེངས་པར་འགྱུར་རོ། །དེ་ལ་རིམས་སར་པ་ནི་དང་པོར་བྱུང་བའི་རིམས་སོ། །ཐུར་དུ་ཁྲག་དང་མཁྲིས་པ་འཁྲུ་བ་ནི་ཁྲག་མཁྲིས་ཀྱི་འབྱུང་བའོ། །ཐོར་བུ་ནི་འབྲས་ཀྱི་ཕྲེང་བའོ། །རྐང་བམ་ནི་རྐང་པའི་ནད་དོ། །སྐྱུག་སྨན་མི་གཏང་སྦྲུམ་ཁོང་རྩུབ། །བཀྲེས་དང་རྟག་ཏུ་སྡུག་བསྔལ་བ། །བྱིས་པ་རྒན་སྐེམ་སྦོམ་སྙིང་ན། །གློ་སྐམ་སྨྲས་དང་ཉམ་ཆུང་དང༌། །རྟག་ཏུ་སློན་དང་མཆེར་པ་ན། །རབ་རིབ་ལྟོ་ན་སྲིན་བུ་ཡོད། །རླུང་ཁྲག་འདྲེས་མར་གྱེན་དུ་འབྱུང༌། །སོ་ནམས་གཏོང་སྐད་འཛེར་དང༌། །གཅིན་སྲི་དམུ་རྫིང་སྐྲན་ཅན་དང༌། །སློན་དཀའ་དྲོད་ཆེ་གཞང་འབྲུམ་ཅན། །རྟུག་སྐམ་མགོ་འཁོར་རྩིབ་ལོགས་སྲ། །རྩིབ་ལོགས་ཟུག་དང་རླུང་ཅན་ནོ། །ཞེས་བྱ་བ་ལ། སྦྲུམ་མ་ལ་སོགས་པ་ནས་རླུང་ནད་ཅན་གྱི་བར་དག་ལ་སྐྱུག་སྨན་མི་གཏང་ངོ༌། །དེ་ལ་ཁོང་རྩུབ་པ་ལ་སྐྱུག་སྨན་བཏང་ན། རླུང་གིས་ཡན་ལག་ལ་གནོད་པར་འགྱུར་ཏེ། ཕལ་ཆེར་ཁ་ཟས་ལ་སོགས་པ་རྩུབ་མོ་བསྟེན་པས་རླུང་ནད་སྐྱེད་པའི་ཕྱིར་སྟོབས་ཟད་པར་འགྱུར་རོ། །དེ་བཞིན་དུ་བཀྲེས་པ་དག་ལ་སྐྱུག་སྨན་བཏང་ན་མེའི་སྟོབས་ཀྱིས་སྟོབས་ཟད་པར་འགྱུར་རོ། །རྟག་ཏུ་སྡུག་བསྔལ་བ་ནི། ཁུར་དང་རྟག་ཏུ་སྡུག་བྱེད་པའི་དུབ་པས་སྟོབས་ཟད་པར་འགྱུར་རོ། །དེ་བཞིན་དུ་བཞོན་པས་དུབ་ཅིང་ཉམ་ཆུང་བ་དག་ལ་ཡང་སྟོབས་ཕྲིན་ཤིན་ཏུ་ཁྲག་སྐྱེ་བར་འགྱུར་རོ། །བྱིས་པ་ལ་སོགས་པས་ནི་སྨན་གྱི་སྟོབས་མི་བཟོད་པའི་ཕྱིར། ལུས་ཀྱི་སྟོབས་ཟད་པས་ནང་གི་ཁོང་པ་སྐེམ་ཞིང་གཅོང་དུ་འགྱུར་བའི་སྐྱོན་ཡོད་པ་ཡིན་ནོ། །ན་བ་ནི་སྙིང་ནད་ཀྱིས་ཉེན་པ་ལ་བྱས་ན་སྙིང་ནད་ལ་གནོད་པར་འགྱུར་རོ། །རྟག་ཏུ་སློན་པ་ནི་སྟོད་དུ་རྒྱུ་བའི་རླུང་གིས་གྱེན་དུ་བཏེག་པས་དེ་དྲགས་ན་སྲོག་ཟད་པར་འགྱུར་རོ། །ལྟོ་ན་སྲིན་བུ་ཡོད་པ་ནི་
སྔར་བཀྲུ་བ་མ་བྱས་ན། སྲིན་བུ་ཤིན་ཏུ་མང་བའི་ཕྱིར་མ་ལུས་པ་འབྱུང་བས། སྙིང་ཤིན་ཏུ་གཙེས་པས་སློན་པ་དྲགས་པར་འབྱུང་བར་འགྱུར་རོ། །རླུང་ལ་སོགས་བ་གྱེན་དུ་འབྱུང་བ་ནི་འོག་ཏུ་གསལ་བར་གྱུར་པས་གྱེན་དུ་དྲངས་པས་སྐྱོན་དུ་འགྱུར་རོ། །སློན་དཀའ་བ་ནི་ཁོང་པ་འགགས་ཤིང་སློན་དཀའ་བ་ལས་ཤས་ཆེར་དྲངས་ན་ཁོང་པའི་ནད་ཐམས་ཅད་སློངས་ཤིང་དཀྲུགས་པས། མེ་དབལ་དང་རྨོངས་བག་དང༌། མི་དྲན་པ་ལ་སོགས་པའི་ནང་འབྱུང་བར་འགྱུར་རོ། །རྟུག་སྐམ་ལ་སོགས་པས་ཉེན་པ་རྣམས་དང༌། རྩིབ་ལོགས་ཟུག་པ་ལ་སོགས་པ་ནི་རང་རང་གི་ནད་འཕེལ་བ་དང༌། འཆི་བ་དག་ཏུ་འང་འགྱུར་རོ། །ཅི་རྣམ་པ་ཐམས་ཅད་དུ་སྦྲུམ་མ་ལ་སོགས་པ་ལ་སྐྱུག་སྨན་གཏང་བར་མི་བྱ་འམ། འོན་ཏེ་གནས་སྐབས་ལ་ལར་སྐྱུག་སྨན་བྱ་ཞེ་ན། དེའི་ཕྱིར་སྨྲས་པ་ནི། དེ་དག་དུག་འཐུངས་མ་ཞུ་དང༌། །མི་འཕྲོད་ཟས་ཟོས་མ་གཏོགས་སོ། །ཞེས་བྱ་བ་ཡིན་ཏེ། སྦྲུམ་མ་ལ་སོགས་པ་དེ་དག་གིས་གལ་ཏེ་དུག་དང་སྦྱར་བའི་དུག་འཐུངས་སམ། ཟས་མ་ཞུ་བ་སྟེ་གསུད་དམ། མི་འཕྲོད་པའི་ཟས་ཟོས་བར་གྱུར་ན་ནི་མ་གཏོགས་ཏེ། འདི་དག་ནི་མྱུར་དུ་གསོད་པར་བྱེད་པ་ཡིན་པས་ན། དུག་འཐུངས་པ་ལ་སོགས་པའི་གནས་སྐབས་འདི་ལྟ་བུ་མ་གཏོགས་བ་གནས་སྐབས་གཞན་དུ་སྐྱུག་སྨན་མི་གཏང་གི །རྐྱེན་འདི་དག་བྱུང་ན་དེར་སྐྱུག་སྨན་འཇམ་པོ་གཏང་བར་བྱའོ། །རྟག་ཏུ་སློན་པ་ཡན་ཆད་དང༌། ཕལ་ཆེར་མ་ཞུའི་རིམས་དག་ཀྱང༌། །མ་ཞུ་བ་ནི་ཐམས་ཅད་ལ། །དུད་པས་བདུག་པའི་ལས་ཀུན་སྤངས། །ཞེས་བྱ་བ་ལ། འདིར་རྟག་ཏུ་སློན་ཞིང་རྒྱུན་དུ་སྐྱུགས་པའི་སྐྱེས་བུ་དང༌། གང་སྔར་སྐྱུག་སྨན་གཏང་དུ་མི་རུང་བར་བསྟན་པ་སྦྲུམ་མ་ནས། ཉམ་ཆུང་བའི་བར་དེ་ཐམས་ཅད་སྤང་ཞིང་དོར་བར་བྱའོ། །འདི་དག་དུད་པས་བདུག་པའི་བར་གྱི་ལས་ཀུན་སྤང་བར་བྱ་བར་མ་ཟད་ཀྱི། མ་ཞུ་བའི་རིམས་ཀྱི་བར་དག་ལའང་སྤང་བར་བྱ་སྟེ། རིམས་སར་པ་ལ་ནི་ནད་འཁྱིམས་པར་འགྱུར་བའི་ཉེས་པ་ཡོད་བའི་ཕྱིར་རོ། །དེ་བཞིན་དུ་མ་ཞུ་བའི་
ནད་ཐམས་ཅད་ལ་ཡང་སྒྱུག་སྨན་གྱི་རྗེས་ལ་ལས་ཀུན་ཏེ། བཀྲུ་སྨན་དང༌། མས་གཏོང་བ་དང༌། སྣ་ནས་གཏང་བ་དང༌། དུད་པས་བདུགས་པ་དང༌། མཁུར་བ་བཀང་ཞིང་དབོ་བ་དང༌། མིག་སྨན་དང༌། སྨིན་པར་བྱ་བའི་བར་གྱི་ལས་སྤང་བར་བྱ་སྟེ། མ་ཞུ་བའི་བེའུ་སྣབས་ཀྱི་འཇིགས་པ་ཉིད་ཀྱིས་སོ། །བཀྲུ་སྨན་གྱིས་གསོ་སྐྲན་གཞང་འབྲུམ། །འབྲུམ་བུ་མིག་སེར་གཞོགས་ཕྱེད་ལྕི། །རིམས་རྙིང་དམུ་རྫིང་དབྱིག་དུག་དང༌། །སྐྱུག་དང་མཆེར་ནད་སྐྱ་རྦབ་དང༌། །ལོང་ནད་རབ་རིབ་སྔོན་པོར་གྱུར། །མཆི་འཛག་ཞུ་བའི་གནས་ན་ཟུག །མངལ་དང་ཁུ་བའི་གནས་ཀྱི་ནད། །ཁོང་ནད་གཏོགས་དང་སྲིན་ནད་རྨ། །དྲེག་ནད་ནམ་ཚོང་ཡན་ཆད་ནད། །གཅིན་སྲི་བཤང་བ་འགགས་པ་དང༌། །སློན་བྱ་མཛེ་གཅིན་ནད་སོགས་ཡིན། །ཞེས་བྱ་བ་ལ། སྐྲན་ལ་སོགས་པ་ནས་རྟུག་པ་འགགས་པའི་བར་གྱི་ནད་རྣམས་དང༌། དེ་བཞིན་དུ་སློན་པར་བྱ་བའི་ནད་ལས། མཛེ་ནད་དང་གཅིན་ནད་ནས་རོ་སྟོད་ཀྱི་ནད་རྣམས་ཀྱི་བར་བཀྲུ་སྨན་གྱིས་གསོ་ཞིང་སྦྱང་བར་བྱ་བ་ཡིན་ཏེ། འདི་དག་ལ་བཀྲུ་སྨན་བྱས་པས་མཆོག་ཏུ་འབྱང་ཞིང་འཇིག་པར་འགྱུར་རོ། །ཁྲུས་མི་བྱ་བ་རིམས་སར་དང༌། །དྲོད་ཆུང་ཁྲག་མཁྲིས་ཐུར་དུ་འབྱུང༌། །རྨས་དང་གཞང་ནད་ཚད་པས་འཁྲུ། །ཁོང་དུ་མཚོན་ལུས་ལྟོ་སྲ་དང༌། །སྣུམ་ཆེས་པ་དང་སྐེམ་ཆེས་པའོ། །ཞེས་བྱ་བ་ལ། རིམས་སར་བ་ནས་སྐེམ་ཆེས་པའི་བར་ལ་ནི་ཁྲུས་བྱར་མི་རུང་ངོ༌། །དེ་ལ་རིམས་སར་པ་ཡིན་དུ་ཟིན་ཀྱང༌། ནད་མ་སྨིན་པ་ལ་ཁྲུས་མི་བྱ་སྟེ། དེས་ནད་སླར་སྐྱེད་པའི་ཕྱིར་རོ། །གཞང་ནད་པ་ནི་བཤང་སྒོ་སོགས་ལ་གནོད་པའི་ནད་སྐྱེད་པར་འགྱུར་བའི་ཕྱིར་རོ། །ཚད་བས་འཁྲུ་བ་དང་ཁྲག་མཁྲིས་ཐུར་དུ་དབྱུང་བ་གཉིས་ལ་ཁྲུས་བྱས་ཤིན་ཏུ་འཁྲུ་དྲགས་པས་མ་རུངས་པར་འགྱུར་རོ། །དྲོད་ཆུང་བ་ལ་སོགས་པ་ནི་སྨན་གྱི་ཤུགས་མི་བཟོད་ཅིང་བསྟེན་མི་ནུས་པ་ཡིན་ནོ། །ཆང་ནད་ཀྱིས་ཉེན་པ་ལ་ཁྲུས་མི་བྱ་སྟེ། དེས་རླུང་གིས་སྲོག་ལ་གཅོད་པར་བྱེད་པའི་ཕྱིར་རོ། །ལོང་ཁའི་གནས་སུ་རླུང་བསགས་པས་
ཕན་ཚུན་རྒྱུ་བ་ན་ནང་དུ་ལྟོ་སྦོས་པ་སྐྱེད་པར་བྱེད་དོ། །ཁོང་དུ་མཚོན་ལུས་པ་ཡང་དེར་རླུང་བརྟེན་པས་སྲོག་ལ་གནོད་པར་འགྱུར་རོ། །ལྟོ་སྲ་བ་ནི་སྨན་བདོ་བས་ནད་ཕྱིར་ཕྱིན་པར་མ་ནུས་པ་དང༌། སྙིང་གར་གཟེར་བ་དང༌། རྩིབ་ལོགས་སུ་ཟུག་པ་དང༌། སྤོ་བ་དང༌། སློན་པ་དང༌། བརྒྱལ་བ་དང༌། རྨྱ་བ་སྐྱེད་དེ། སྲོག་མ་རུངས་པར་བྱེད་དོ། །སྣུམ་ཆེས་པ་ལ་ཁྲུས་བྱས་ན་ཡང་ཧ་ཅང་དྲགས་པར་འགྱུར་རོ། །སྐེམ་ཆེས་བ་འདིར་ནད་གཅོང་ཆེན་པོ་ལ་བྱ་སྟེ། གཅོང་ཆེན་པོས་ཉེན་པ་ནི་ལུས་ཟུངས་ཟད་བས་དྲི་མའི་སྟོབས་ཀྱིས་གནས་པ་ཡིན་པ་ལས། དེ་ཕྱུང་ནས་ལུས་ཀྱང་འཇིག་པར་འགྱུར་རོ། །སྦྲུམ་མ་ལ་སོགས་པ་ལ་ཁྲུས་བྱས་ན་ཡང་ཉེས་པ་སྔར་བཤད་པ་ལྟར་འགྱུར་རོ། །དེ་ནས་ཐུན་མོང་དུས་སུ་ནི། །ཆོ་ག་བཞིན་དུ་སྣུམ་གྱིས་ཉེན། །ཉ་དང་མ་ཤ་ཏིལ་སོགས་ཀྱིས། །ནང་བར་སློན་བྱའི་བད་ཀན་སྐྱེད། །མཚན་མོ་གཉིད་ལོག་ཟས་ལེགས་ཞུ། །སྔ་དྲོའི་དང་པོར་བཀྲ་ཤིས་བྱས། །ཟས་མ་ཟོས་པའམ་ཅུང་ཟད་སྣུམ། །ཐུག་པ་ཞུན་མར་ལྡན་པ་བཏུང༌། །བྱིས་པ་རྒན་པོ་ཉམས་སྟོབས་ཆུང༌། །སྨན་སྟོབས་ཆུང་བ་ནད་དབང་ལས། །ཆང་འོ་བུ་རམ་ཤིང་ཤ་ཁུ། །ནད་དམིགས་ཇི་སྐད་བཤད་པ་བཞིན། །སྦྲང་རྩི་རྒྱམ་ཚ་དང་ལྡན་པ། །སྨན་ཚད་ལྟོ་བ་ལས་དཔགས་ཏེ། །སྨན་ལ་སྔགས་ནི་མངོན་བཟླས་ལ། །ལྐོག་མར་ཕྱིན་པའི་བར་དུ་བླུད། །ཚངས་པ་སྐྱེ་དགུའི་བདག་དང་ཐ་སྐར་བུ། །དྲག་པོ་དབང་པོ་ཉི་ཟླ་ས་མེ་རླུང༌། །དྲང་སྲོང་རྣམས་ཀྱི་ཚོགས་དང་བཅས་པ་དང༌། །འབྱུང་པོའི་ཚོགས་ཀྱིས་ཁྱོད་ནི་བསྲུང་བར་ཤོག །དྲང་སྲོང་རྣམས་ཀྱི་བཅུད་ཀྱིས་ལེན་པ་དང༌། །ལྷ་རྣམས་ཀྱི་ནི་བདུད་རྩི་ལྟ་བུ་དང༌། །ཀླུ་མཆོག་རྣམས་ཀྱི་བདུད་རྩི་ལྟ་བུར་ནི། །ཁྱོད་ལ་སྨན་འདི་ཉེ་བར་གནས་གྱུར་ཅིག །ཨོཾ་ན་མོ་བྷ་ག་བ་ཏེ། བྷཻ་ཥ་ཛྱ་གུ་རུ་བཻ་ཌཱུ་ཪྻ་པྲ་བྷ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ། སཾ་མྱཀ་སམ་བུད་དྷཱ་ཡ། ཏདྱ་ཐཱ། ཨོཾ་བྷཻ་ཥ་ཛྱེ་བྷཻ་ཥ་ཛྱོ་མ་ཧཱ་བྷཻ་ཥ་ཛྱེ། རཱ་ཛ་ས་མུངྒ་ཏེ་སྭཱ་ཧཱ། ཤར་དུ་ཁ་བལྟས་འཐུང་དུ་གཞུག །ཅེས་བྱ་བ་ལ། དེ་ནས་ཞེས་བྱ་བ་ནི་བཀྲ་ཤིས་
པའི་དོན་དུ་སྨོས་པ་ཡིན་ནོ། །ཐུན་མོང་གི་དུས་སུ་ནི་དབྱར་ཟླ་ཐ་ཆུངས་དང༌། དཔྱིད་ཟླ་འབྲིང་པོའོ། །ཆོ་ག་བཞིན་དུ་བྱ་བ་ནི་བྱ་བའི་རིམ་པ་དང་མཐུན་པར་སྣུམ་གྱིས་ཞེ་ན་ཅིང་བརླན་པར་བྱས་ལ། ནང་པར་ཏེ་དེ་ལས་གཞན་པའི་ཉི་མ་ལ། སྐྱུག་སྨན་གཏང་བར་བྱ་བའི་སྐྱེས་བུ་ནུབ་གཅིག་སྣུམ་གྱི་ཆོ་ག་སྤྱད་ལ། ཚད་དང་ལྡན་པའི་སྨན་དེ་བཏུང་བ་ནི་སྨན་པ་ནུབ་ཏུ་ཁ་བལྟས་ལ་ནད་པ་ཤར་དུ་ཁ་བསྟན་ཏེ། སྔགས་ནི་མངོན་པར་བཟླས་ལ་འཐུང་དུ་གཞུག་གོ་ཅེས་བྱ་བར་སྦྱར་རོ། །སྐྱུག་པར་བྱ་བ་ཇི་ལྟ་བུ་ལ་བླུད་ཅེ་ན། བད་ཀན་གློང་པ་སྟེ། བད་ཀན་སྐྱེད་པ་དེ་རང་གི་གནས་ནས་གསོ་བར་བྱའོ། །གང་གིས་ཤེ་ན། མོན་སྲན་གྲེའུ་དང་ཏིལ་ལ་སོགས་པས་སོ། །སོགས་པ་སྨོས་པ་ནི་འོ་མ་དང༌། ཞོ་དང༌། ཏིལ་གྱི་འབའ་ཆ་ལ་སོགས་པའི་ཁ་ཟས་ཀྱི་བྱེ་བྲག་རྣམས་ཀྱིས་སོ། །མཚན་མོ་གཉིད་ལོག་པ་ནི་མཚན་མོ་བདེ་བར་གཉིད་ལོག་པས་གནས་པའོ། །རང་གི་ཟས་ལེགས་པར་ཞུ་བ་ནི་ཁ་ཟས་བདེ་མོར་ཞུ་བར་གྱུར་པའོ། སྔོ་དྲོ་ནི་ཉི་མའི་ཆ་དང་པོའོ། །བཀྲ་ཤིས་བྱ་བ་ནི་བྱིན་རློབ་ཅིང་དགེ་བ་སྟོན་པར་བྱེད་པའོ། །དེ་བཞིན་དུ་ཟས་མ་ཟོས་པ་ནི་ཁ་ཟས་ལོངས་སྤྱད་པ་མ་བྱས་པའོ། །ཡང་ཅུང་ཟད་སྣུམ་པ་ནི་སྣུམ་གྱི་བྱ་བ་ཅུང་ཟད་བྱས་པའོ། །ཐུག་པ་ནི་ནས་ཐུག་གོ །དེ་ཞུན་མར་ཅུང་ཟད་བཏབ་ལ་བཏུང་བར་བྱའོ། །དེ་བཞིན་དུ་བྱིས་བ་དང་རྒན་པ་ལ་སོགས་པ་རྣམས་ནི་ནད་ཀྱི་དབང་ལས་ཆང་ལ་སོགས་པ་ལྐོག་མར་ཕྱིན་གྱི་བར་དུ་འཐུང་དུ་བཅུག་ལ། ནད་དམིགས་ཇི་སྐད་བཤད་ཅིང་གང་ལ་ཇི་ལྟར་འོས་པ་བཞིན་དུ་སྦྲང་རྩི་དང་རྒྱམ་ཚ་དག་དང་ལྡན་ཞིང་བསྲེས་ལ། སྨན་གྱི་ཚན་ལྟོ་སྲ་སྙི་རབ་འབྲིང་ཐ་མའི་ཚད་ལས་དཔགས་ཏེ། ལྟོ་སྙི་བ་ལ་སྨན་འཇམ་པོའམ་ཚད་ཆུང་བའི་སྨན་སྦྱིན་ནོ། །འབྲིང་ལ་འབྲིང་ངོ༌། །སྲ་བ་ནི་ཆེ་བ་དང་ཆེ་བའོ། །སྨན་ལ་སྔགས་ཀྱིས་མངོན་པར་བཟླ་བ་ནི། དགེ་སློང་བྲམ་ཟེ་རྣམས་ཀྱི་ཤིས་པར་བརྗོད་པར་བྱ་བའི་ཚིག་རྣམས་དང༌། དེ་བཞིན་དུ་ཚངས་པ་སྟེ་སྐྱེ་དགུའི་བདག་དང་ཞེས་བྱ་བ་ལ་སོགས་
པའི་ཚིགས་སུ་བཅད་པ་དང༌། སྔགས་བཟླ་བར་བྱའོ། །དེ་ལ་ཚངས་པ་དང་སྐྱེ་དགུའི་བདག་པོ་མྱུར་དུ་ཞེས་བྱ་བ་དང༌། ཐ་སྐར་གྱི་བུ་གཉིས་དང༌། དྲག་པོ་ལྷ་ཆེན་པོ་དང༌། དབང་པོ་སྟེ་བརྒྱ་བྱིན་དང༌། སའི་ལྷ་དང༌། ཉི་མ་དང༌། ཟླ་བ་དང༌། མེ་ལྷ་དང༌། རླུང་ལྷ་སྟེ་ཚངས་པ་ལ་སོགས་པ་དེ་དག་གིས་ཁྱེད་ལ་བསྲུང་ཞིང་སྐྱོབ་པར་ཤོག་ཤིག་པའོ། །འདི་དག་འབའ་ཞིག་ཏུ་མ་ཟད་ཀྱི་དྲང་སྲོང་ཞེས་བྱ་བ་རྒྱུན་ཤེས་ལ་སོགས་པ་སྨན་གྱི་ཚོགས་དང་བཅས་པ་སྟེ། སྨན་གྱི་གནས་ཡུལ་ལམ་སྨན་གྱི་ཚོགས་དུ་མ་དང་བཅས་པ་རྣམས་དང༌། དེ་བཞིན་དུ་འབྱུང་པོའི་ཚོགས་ཏེ་ལྷ་མ་ཡིན་དང༌། ནམ་མཁའ་ལྡིང་དང་མིའམ་ཅི་ལ་སོགས་པ་འབྱུང་པོ་མཐུ་བོ་ཆེ་རྣམས་ཀྱིས་བསྲུང་བར་ཤོག་ཤིག་པའོ། །ཡང་ཁྱེད་ལ་སྨན་འདི་ལྟ་བུར་ཉེ་བར་གནས་པར་གྱུར་ཅིག་པ་སྟེ། དྲང་སྲོང་རྣམས་ཀྱི་བཅུད་ལེན་དང༌། ཞེས་བྱ་བ་དྲང་སྲོང་འཕོ་བ་ཞེས་བྱ་བ་ལ་སོགས་པས་བཅུད་ཀྱིས་ལེན་དུ་བྱས་པའི་སྨན་གྱི་ཚོགས་ལྟ་བུ་དང༌། བརྒྱ་བྱིན་ལ་སོགས་པ་ལྷ་རྣམས་ཀྱི་བདུད་རྩི་ལྟ་བུ་དང༌། ཀླུ་ཡང་ཡིན་ལ་མཆོག་ཀྱང་ཡིན་པས་ན། ཀླུ་མཆོག་སྟེ་མཐའ་ཡས་དང་ནོར་རྒྱས་དང་རིགས་ལྡན་ལ་སོགས་པ་རྣམས་ཀྱི་སྟེ། ཀླུ་རྣམས་ཀྱི་བདུད་རྩི་རྙེད་པར་སླ་བ་མ་ཡིན་པས་ཀླུ་མཆོག་ཅེས་སྨོས་པ་ཡིན་ཏེ། ཀླུ་རྣམས་ཀྱི་བདུད་རྩི་ནི་ལྷའི་བས་ཅུང་ཟད་དམན་པ་ཡིན་ཏེ། དེ་དང་ཁྱེད་ཀྱི་སྨན་འདི་འདྲ་བ་ཉིད་དུ་གནས་པར་གྱུར་ཅིག་པའོ། །འཐུངས་ནས་དེ་ལ་སེམས་དམིགས་ཏེ། །ཡུད་ཙམ་བསྡད་ལ་དང་གར་འཁྱིལ། །མཆིལ་མ་དེ་ལས་སློན་དུ་གཞུག །མ་གནོད་པར་ནི་སོར་མོས་སམ། །ཡང་ན་ཆུ་བ་འཇམ་བོ་ཡིས། །ལྐོག་མ་ལྕེའུ་ཆུང་མ་སྣད་བྱ། །སྐྱུག་མི་བྲོ་བར་མི་དྲང་ངོ༌། །འབྱུང་བར་ལྡོག་པ་སློན་པར་བྱ། །པུས་མོ་དང་མཉམ་སྟན་ལ་གནས། །ཞེས་བྱབ་ལ། སྨན་འཐུངས་ཟིན་ནས། དེ་ལ་སེམས་ཤིང་ཞེས་པ་སློན་བྲོ་བའི་སེམས་བསྐྱེད་ལ། ཡུད་ཙམ་ཞེས་པ་ཆུ་ཚོད་གཉིས་ཀྱི་བར་དུ་བསྡད་ཅིང་འདུག་ལ་དང་གར་འཁྱིལ་བ་དང༌། རྡུལ་འབྱུང་
བས་ནད་ཞི་བར་འགྱུར་བ་དང༌། བ་སྤུ་ལྡང་བས་གནས་ལས་བསྐྱོད་པར་འགྱུར་བ་དང༌། ཁོང་པ་ཅུང་ཟད་སྤོ་ཞིང་འཁྲུགས་པས་ལྟོར་རྒྱུ་བ་དང༌། རིམ་གྱིས་སྙིང་གང་ཟུག་ཅིང་དང་ག་འཁྱིལ་བ་དང༌། སྙིང་འཕར་བ་དང༌། མཆིལ་མ་མང་པོ་ཁར་འབྱུང་བ་དག་གིས་ནད་དེ་གྱེན་དུ་མངོན་པར་ཤེས་པའི་བར་དུ་ཡུད་ཙམ་བསྡད་ནས་སློན་དུ་གཞུག་གོ །གང་ལ་དང་ག་འཁྱིལ་བ་དང་མཆིལ་མ་མང་བ་འབྱུང་བར་འགྱུར་བ་དེ་ནི་དང་གར་འཁྱིལ་བ་དང༌། མཆིལ་མ་མང་བ་ཞེས་བྱ་ལ། དེ་ལྟར་གྱུར་ནས་དེ་སློན་དུ་གཞུག་གོ །ཇི་ལྟར་སློན་པར་བྱ་ཞེ་ན། མ་གནོད་པར་སོར་མོ་གཉིས་ཀྱིས་སློན་ཞིང་དྲང་བ་སྟེ། ཤིན་ཏུ་རྩོལ་བ་དྲག་པོས་མི་བྱའོ། །ཡང་ན་ཆུ་བ་འཇམ་པོས་བྱ་སྟེ། ཨུཏྤལ་སྔོན་པོ་ལ་སོགས་པའི་ཆུ་སྡོང་ཟླུམ་པ་འཇམ་ཞིང་མཉེན་པས་བྱའོ། །ལྐོག་མ་ལྕེ་ཆུང་མ་སྣད་པར། །ཞེས་བྱ་བ་ནི། དེ་དག་ལ་གནོད་པ་མེད་པར་རོ། །དེ་བཞིན་དུ་སྐྱུག་མི་བྲོ་ཞིང་འབྱུང་བར་མི་ལྡོག་པའི་ཚེ་དྲང་ཞིང་སློན་པར་མི་བྱའོ། །སྐྱུག་བྲོ་ཞིང་འབྱུང་བར་ལྡོག་པ་ན་སློན་ཞིང་སྐྱུག་པར་བྱའོ། །སྐྱེས་བུ་སློན་ཞིང་སྐྱུག་བྲོ་བའི་ཚེ། པུས་མོ་དང་མཉམ་པའི་སྟན་མཐོན་པོ་ལ་གནས་པར་གྱུར་པས་སྐྱུག་ཏུ་གཞུག་གོ །དེ་ནི་སློན་ཚེ་གློ་གཉིས་དང༌། །དཔྲལ་བ་དག་ལ་བརྟེན་པར་བྱ། །དེ་བཞིན་ལྟེ་བ་བཙིར་བ་དང༌། །རྒྱབ་ནས་གྱེན་དུ་མཉེ་བར་བྱ། །ཞེས་བྱ་བ་ལ། མི་དེ་སློན་ཞིང་སྐྱུགས་པར་གྱུར་པ་ན། གློ་གཉིས་ཏེ་རྩིབ་ལོགས་གཉིས་དང༌། དེ་བཞིན་དུ་དཔུང་པ་ནས་གཟུང་ཞིང་བརྟེན་པར་བྱའོ། །དེ་བཞིན་ལྟེ་བ་བཙིར་བར་བྱ་བ་དང་རྒྱབ་ནས་གྱེན་དུ་བཙིར་ཐབས་ཀྱིས་ཕུལ་ཞིང་ལག་པ་གྱེན་དུ་བལྟས་པས་མཉེ་བར་བྱའོ། །དེ་ལྟར་བད་ཀན་རྣོ་དྲོད་ཁ། །མཁྲིས་པ་མངར་དང་བསིལ་བས་སློན། །རླུང་འདྲེས་བད་ཀན་སྣུམ་པ་དང༌། །སྐྱུར་དང་ལན་ཚྭ་དག་གིས་སློན། །ཇི་སྲིད་བད་ཀན་རྒྱུན་ཆད་པའམ། །མཁྲིས་པ་སྣང་གི་བར་དུ་སྐྱུག །ཅེས་བྱ་བ་ལ། ཚུལ་དེ་ལྟར་བད་ཀན་ནི་སྨན་རྣོ་བ་དང་དྲོ་བ་དང་ཁ་བས་སློན་ཞིང་སྐྱུག་ཏུ་གཞུག་གོ །དེ་བཞིན་དུ་མཁྲིས་པ་དང་བད་ཀན་
རྒྱས་པ་འདྲེས་པའི་ནད་ལ། སྨན་མངར་བ་དང་བསིལ་བའི་ནུས་པ་དང་ལྡན་པས་སློན་དུ་གཞུག་གོ །དེ་བཞིན་དུ་རླུང་ནད་འདྲེས་ཤིང་འདུས་པའི་བད་ཀན་རྒྱས་པ་ལ་ནི་སྨན་སྣུམ་པ་དང༌། སྐྱུར་བ་དང༌། ལན་ཚྭའི་ཤས་ཆེ་བ་དག་གིས་སློན་དུ་གཞུག་གོ །དེ་སློན་པ་ནི་ཇི་སྲིད་བད་ཀན་ཟད་ཅིང་རྒྱུན་ཆད་པའམ། མཁྲིས་པ་སྣང་གི་བར་དུ་སྐྱུག་ཅིང་དྲང་བར་བྱའོ། །ཤུགས་དལ་པི་པི་ལིང་སྐྱུ་རུ། །ཡུངས་ཀར་རྒྱམ་ཚའི་ཆུ་དག་གིས། །ཡང་དང་ཡང་ནི་སློན་དུ་གཞུག །ཅེས་བྱ་བ་ལ། སྐྱེས་བུ་སློན་པའི་ཤུགས་དལ་ཞིང༌། བབས་ཆུང་བར་གྱུར་ན། པི་པི་ལིང་དང་ཡུངས་ཀར་བཏགས་པའི་ལྡེ་གུ་དང༌། རྒྱམ་ཚའི་ཆུ་དག་བླུད་ལ། དེ་ཡང་དང་ཡང་དུ་སློན་ཞིང་སྐྱུག་ཏུ་གཞུག་གོ །དེར་ནི་སློན་པར་མ་གྱུར་པའམ། །སྡོད་པ་དང་བཅས་སློན་པའམ། །སྨན་ནི་འབའ་ཞིག་བྱུང་གྱུར་ན། །སྦྱོར་ཉེས་དེ་ནི་མཆིལ་མ་མང༌། །གཡན་པ་ཐོར་བུ་རིམ་སོགས་འབྱུང༌། །ཞེས་བྱ་བ་ལ། སྐྱུག་པའི་གནས་སྐབས་དེར་སློན་པའི་ཤུགས་ཅིའང་འབྱུང་བར་མ་གྱུར་པའམ། ཡང་ན་སྡོད་པའི་གགས་དང་བཅས་པར་སློན་པའམ། སྨན་འབའ་ཞིག་བྱུང་བར་གྱུར་ཞིང་ནད་མ་ཕྱིན་པ་སྨན་ཉི་ཚེ་སྐྱུགས་པར་གྱུར་ན། འདི་ནི་སྐྱུག་སྨན་གྱི་སྦྱོར་བ་ཉེས་ཤིང་མ་རུངས་པ་ཡིན་ཏེ། སྦྱོར་བ་ཉེས་པ་དེས་མཆིལ་མ་མང་བ་ལ་སོགས་པ་འབྱུང་བར་འགྱུར་རོ། །མཆིལ་མ་ནི་བད་ཀན་མཆིལ་སྣ་བས་མང་དུ་འཛག་པའོ། །སོགས་པ་ཞེས་སྨོས་པ་ནི་ཡི་གར་མི་འོང་བ་དང༌། ལུས་ལྕི་བ་དང་ཚིགས་ན་བ་དང༌། རྨྱ་ཞིང་སྙོམ་པ་དང་ཟུག་ཅིང་གཟེར་བ་དང༌། སྤུ་ལངས་པ་ལ་སོགས་པ་འབྱུང་བ་བསྡུའོ། །བདེར་སྐྱུག་བད་ཀན་མཁྲིས་པ་དང༌། །རླུང་ནི་རིམ་གྱིས་འབྱུང་བར་འགྱུར། །སྦྱོར་བ་ལེགས་པ་ཡིན། །ཞེས་བྱ་བ་ལ། སྐྱུག་སྨན་གྱི་སྦྱོར་བ་ལེགས་པའི་མཚན་མ་ཡང་བདེ་བར་སྐྱུག་ཅིང་གཟེར་བ་དང༌། བད་ཀན་ལ་སོགས་པ་རིམ་གྱིས་འབྱུང་བར་འགྱུར་བ་སྟེ། བད་ཀན་སློན་པ་མེད་པར་འབྱུང་བ་དང༌། དེའི་འོག་ཏུ་མཁྲིས་པ། དེའི་འོག་ཏུ་རླུང་རིམ་བཞིན་དུ་འབྱུང་བ་དང༌།
དེ་བཞིན་དུ་ཟུག་གཟེར་ཆེན་པོ་མེད་པ་དང༌། ཡིད་དགའ་ཞིང་གསང་བག་ལ་སོགས་པ་འབྱུང་བར་འགྱུར་རོ། །སྐྱུག་སྨན་གྱི་སྦྱོར་བ་ལེགས་པ་ཡིན་ནོ། །སྦྱོར་བ་དྲགས་པས། །ལྦུ་བ་ཚོན་ཅན་ཁྲག་འདྲར་སྣང༌། །སློན་ནས་ཁོང་རྨྱ་ལུས་ཚ་དང༌། །ལྐོག་སྐམ་མགོ་འཁོར་མིག་མི་མཐོང༌། །རླུང་ནད་མི་བཟད་ལྡང་འགྱུར་ཞིང༌། །སྲོག་གི་ཁྲག་འབྱུང་འཆི་བར་འགྱུར། །ཞེས་བྱ་བ་ལ། སྐྱུག་སྨན་གྱི་སྦྱོར་བ་དྲགས་པར་གྱུར་པ་ཡང༌། སློན་པའི་སྐྱུགས་པ་ལྦུ་བ་དང༌། མདོག་ཚོན་ཅན་རྨ་བྱའི་མཇུག་སྒྲོ་ལྟར་ཁ་དོག་སྣ་ཚོགས་པ་སྣང་བ་དང༌། ཁྲག་ལྟ་བུར་སྐྱུག་པར་འགྱུར་བས་ན། ལྦུ་བ་ཚོན་ཅན་ཁྲག་འདྲར་སྣང༌། །ཞེས་བྱའོ། །དེ་བཞིན་དུ་སློན་ནས་ཁོང་རྨྱ་ཞིང་ཤིན་དུ་ཉམ་ཆུང་བ་དང༌། དེ་བཞིན་དུ་ཡན་ལག་ཐམས་ཅད་ཚ་བ་འུར་འུར་པོར་གྱུར་པ་དང༌། ལྐོག་མ་སྐམ་ཞིང་གྲེ་བ་ཞུམ་པ་དང༌། མགོ་འཁོར་བ་དང༌། མིག་གིས་མི་མཐོང་ཞིང་མུན་པ་ལྟ་བུར་སྣང་བ་དང༌། རླུང་ནད་མི་བཟད་པ་སྟེ། ཁ་ཡོ་བ་དང༌། རྣ་བ་གཟེར་བ་དང༌། ཚིག་ཐོགས་པ་དང༌། ལྕེ་འཁུམས་པ་དང༌། མིག་འགྱུར་བ་དང༌། འགྲམ་པ་འཐམས་པ་དང༌། དྲན་པ་མེད་པ་དང༌། གཉིད་ཡར་བ་ལ་སོགས་པའི་ནད་མི་བཟད་པ་དང་ལྡན་པར་འགྱུར་རོ། །ཡང་ན་སྲོག་ཅེས་བྱ་བའི་ཁྲག་འོག་ནས་བཤད་པའི་མཚན་ཉིད་ཅན། སློན་ཉེས་པའི་ནད་དེ་འབྱུང་བས་འཆི་བར་འགྱུར་རོ། །སྦྱོར་བ་ལེགས་པས་སློན་པ་ནི། །ཡུད་ཙམ་ངལ་བསོ་དུད་པ་གསུམ། །གང་ཡང་རུང་བས་བདུག་པ་དང༌། །དེའི་འོག་སྣུམ་གྱི་སྤྱོད་པ་བསྟེན། །ཞེས་བྱ་བ་ལ། སྐྱེས་བུ་སྦྱོར་བ་ལེགས་པས་སློན་པར་གྱུར་ན་རྐང་པ་དང་ལག་པ་དང་གདོང་དང་མིག་ལེགས་པར་དག་པར་བྱས་ཤིང་ཕྱིས་ལ། ཡུད་ཙམ་ཞིག་ལ་ངལ་གསོ་ཞིང་དུབ་པ་བསལ་ལ། རྫ་ཡང་ལ་སོགས་པས་དབུགས་བྱུང་ཞིང་སེམས་གསོ་བ་བྱས་ནས། དེའི་འོག་ཏུ་གསོ་བ་བདུག་པ་གསུམ་པོ་བདུག་པའི་ཆོ་ག་ལས་འོག་ནས་བཤད་པ་རྣོན་པོ་དང་བར་མ་དང༌། འཇམ་པའི་དབྱེ་བས་ཕྱེ་
བའི་གང་ཡང་རུང་བ་དེའི་ནུས་པ་དང་སྦྱར་ཏེ། ཅི་རིགས་པར་རྣོ་བ་དང་བར་མ་དང་འཇམ་པ་དང་གསུམ་ལས་གཅིག་གིས་བདུག་པར་བྱའོ། །དེ་ནས་དེའི་འོག་ཏུ་སྣུམ་གྱི་ཆོ་གའི་སྤྱོད་པའི། ཁ་ལག་ཆུ་དྲོན་གྱིས་བཀྲུ་ཞིང༌། ཞེས་བྱ་བ་ལ་སོགས་པ་བསྟན་ཅིང་བསླབ་པར་བྱའོ། །དེ་ནས་དགོངས་ཀའམ་ནད་པར་ནི། །བཀྲེས་ཚེ་ཆུ་ཚན་གྱིས་བཀྲུས་ལ། །སཱ་ལུ་རྩ་སྣར་འབྲས་ཀྱི་ནི། །ཐུག་པ་ལ་སོགས་རིམ་བཞིན་བསྟེན། །ཞེས་བྱ་བ་ལ། དེ་ནས་སློན་ཟིན་པ་དང༌། དགོངས་ཀ་སྟེ་ཉི་མ་ནུབ་ནས་སམ། ཡང་ན་དེ་ཕྱི་དེ་ཞག་གི་ནང་པར་ཐོ་རངས་ཀྱི་སློན་གྱིས་གློངས་པའི་ལུས་ཟུངས་རྣམས་རང་གི་གནས་སུ་ལེགས་པར་གནས་པར་བྱ་བའི་ཕྱིར། སྔར་སློན་པས་བཀྲེས་ཤིང་བྲུ་བ་ཚ་བར་གྱུར་ན་ཆུ་དྲོན་པོས་ཁྲུས་བྱས་ཤིང་གཙང་སྦྲ་བྱས་ལ། སཱ་ལུ་རྩ་སྣར་གྱི་འབྲས་ཀྱི་ཐུག་པ་ལ་སོགས་པ་འོག་ནས་བཤད་པའི་རིམ་པ་འདི་བསྟེན་ཅིང་སྤྱད་པར་བྱའོ། །དེ་ལ་ཐུག་པ་ལ་སོགས་པའི་རིམ་པ་ལ་བསྟེན་པ་འབའ་ཞིག་ཏུ་མ་ཟད་ཀྱི། འབྲས་རཀྟ་ཤ་ལི་ཞེས་བྱ་བ་ལ་སོགས་པ་བཙོས་པའི་འབྲས་ཆན་སྣུམ་དང་ལན་ཚྭ་དང་ཁ་བ་ཤས་ཆུང་བ་དང༌། དེའི་འཚལ་ནན་ཕལ་ཆེར་དེ་དང་རྗེས་སུ་མཐུན་པ་བཏུང་བར་བྱ་སྟེ། མེའི་དྲོད་ཀྱི་སྟོབས་ལས་དཔགས་ཏེ། དགོངས་ཀའམ་ནང་པར་ལྟོགས་པར་གྱུར་པའི་དུས་སུ་ཆོ་ག་འདི་སྤྱད་པར་བྱའོ། །ཐུག་པ་གར་པོ་གཡོས་སུ་མ་བྱས་པའི། །ཡུ་ཤ་ཤ་ཁུ་གསུམ་དང་གཉིས་དང་གཅིག །མཆོག་དང་བར་མ་ཐ་མའི་སྦྱང་བས་སྦྱངས། །མི་ཡིས་ཟས་ཀྱི་དུས་སུ་རིམ་བཞིན་སྤྱད། །ཅེས་བྱ་བ་ལ། ཐུག་པ་ནི་འབྲས་ཐུག་རྐྱང་བ་ལ་ཅུང་ཟད་སྐ་བའོ། །དེ་བས་ཀྱང་སྐ་ཞིང་ཐུར་མ་ལ་ཆགས་པ་ནི་ཐུག་པ་གར་པོའོ། །གཡོས་སུ་བྱས་པའི་ཡུ་ཤ་ནི་བཅའ་སྒ་དང་པི་པི་ལིང་དང༌། སེ་འབྲུ་དང་གོ་སྙོད་དང་ཤིང་ཀུན་ལ་སོགས་པ་མ་བཏབ་པར་མོན་སྲན་སྡེའུ་མུངྒ་ཞེས་བྱ་བ་ལ་སོགས་པ་ལ་བསྐོལ་བའི་ཁུ་བའོ། །སྲན་མུངྒ་ལ་སོགས་པ་དེ་ཉིད་བསྐོལ་བའི་ཁུ་བ་ལ་བཅའ་སྒ་ལ་སོགས་པ་བཏབ་པ་ནི་གཡོས་སུ་བྱས་པའི་ཁུ་བའོ། །
ཤ་ཁུ་ནི་ཤ་དག་གི་ཁུ་བ་གཡོས་སུ་བྱས་པའོ། །འདིར་བྱས་པ་ནི། དེར་ནི་ཤ་ལས་ཁུ་བ་སྟེ། འབྲུ་ལས་ཁུ་བ་འབྲས་བུ་ལས། །ཁ་ལོ་རྩ་བ་ཏིལ་ཚིགས་སྐྱུར། །ཕལ་ཆེར་སྐམ་པ་ལ་ཞེས་བྱ། །དེ་དག་སྣུམ་སོགས་ལྡན་དང་མེད། །གཡོས་བྱས་མ་བྱས་ཡིན་ཞེས་བྱ། །ཞེས་འབྱུང་བ་ཡིན་ནོ། །ཐུག་པ་རྐྱང་རྐྱང་པོ་ལ་སོགས་པ་རྣམ་པ་ལྔ་པོ་དེ་དག་རིམ་བཞིན་དུ་གྲངས་ཇི་ལྟ་བ་བཞིན་དུ་གོ་རིམས་མ་འཆོལ་བར་གསུམ་དང་གཉིས་དང་གཅིག་ཏུ་བྱས་ནས། ཟས་ཀྱི་དུས་སུ་མཆོག་དང་བར་མ་དང་ཐ་མའི་སྦྱང་བས་སྦྱང་བར་མི་བྱ་སྟེ། སྐྱེས་བུས་སྤྱད་ཅིང་བསྟེན་པར་བྱའོ། །མཆོག་དང་བར་མ་དང་ཐ་མའི་སྦྱང་བ་དེ་དག་གིས་སྦྱངས་ཤིང་ནད་བསལ་བའི་མིས་ཟས་ཀྱི་དུས་གསུམ་པོར་ཐུག་པ་རྐྱང་རྐྱང་པོ་ནས་ཤ་ཁུ་བའི་རིམ་པ་བཞིན་དུ་སོ་སོར་སྤྱད་པར་བྱའོ། །དེ་ཡང་ཐུག་པ་གསུམ་པོ་ནམ་ཤ་ཁུའི་བར་དུ་ཚེ་ཚད་དེ། མཆོག་ཏུ་སྦྱང་བ་བྱས་པ་ལ་གསུམ་སྟེ། ཟས་ཀྱི་དུས་སུ་གསུམ་བསྟེན་པ་དང༌། སྦྱང་བ་འབྲིང་གིས་སྦྱོང་བ་ལ་གཉིས་ཏེ། ཟས་ཀྱི་དུས་གཉིས་གཉིས་ཏེ་བསྟེན་པ་དང༌། དེ་བཞིན་དུ་སྦྱང་བ་ཐམས་སྦྱང་བ་ལ་གཅིག་སྟེ། ཟས་ཀྱི་དུས་ཐུག་པ་ནས་ཤ་ཁུའི་བར་དུ་རེ་རེ་སྤྱད་པས་བསྟེན་པར་བྱའོ། །དེ་ལ་ཉི་མ་དང་པོའི་དགོངས་ཀ་ཐུག་པ་བཏུང་བར་བྱའོ། །ཉི་མ་གཉིས་པ་ལ་ཟས་ཀྱི་དུས་གཉིས་སུ་ཐུག་པ་ཉིད་བཏུང་བར་བྱས་ཏེ། དེ་ལྟར་ཟས་ཀྱི་དུས་གསུམ་དུ་ཐུག་པ་སྤྱད་པ་ཡིན་ནོ། །ཉི་མ་གསུམ་པ་ལ་ཟས་ཀྱི་དུས་གཉིས་སུ་ཐུག་པ་གར་པོ་སྤྱད་པར་བྱའོ། །དེ་ཡང་སླ་བ་མ་ཡིན་པ་ཐུར་མ་ལ་བདེ་བླག་ཏུ་ཆགས་པ་བཟའ་བར་བྱ་སྟེ། དེ་ལྟར་ན་ཟས་ཀྱི་དུས་གསུམ་དུ་ཐུག་པ་གར་པོ་ལོངས་སྤྱོད་པ་ཡིན་ནོ། །ཉི་མ་བཞི་པའི་དགོངས་ཀའི་ཟས་ཀྱི་དུས་གཅིག་ཏུ་གཡོས་སུ་མ་བྱས་པའི་ཁུ་བ་ལོངས་སྤྱད་པར་བྱའོ། །དེ་ཡང་ཉི་མ་ལྔ་པའི་ཟས་ཀྱི་དུས་གཉིས་སུ་གཡོས་སུ་མ་བྱས་པའི་ཁུ་བ་ཉིད་བཏུང་བར་བྱ་སྟེ། དེ་ལྟར་ན་གཡོས་སུ་མ་བྱས་པའི་ཁུ་བ་ཟས་ཀྱི་དུས་གསུམ་དུ་སྤྱད་པ་ཡིན་ནོ། །ཞག་དྲུག་པ་ལ་ཟས་ཀྱི་དུས་གཉིས་སུ་གཡོས་སུ་
བྱས་པའི་ཁུ་བ་བསྟེན་པར་བྱའོ། །ཉི་མ་བདུན་པའི་ནང་པར་གྱི་ཟས་གཅིག་ལ་གཡོས་སུ་བྱས་པའི་ཁུ་བ་ཟས་ཀྱི་དུས་གསུམ་དུ་སྤྱད་པར་བྱའོ། །ཞག་བདུན་པའི་དགོངས་ཀ་ཟས་ཀྱི་དུས་གཅིག་ཏུ་ཤ་ཁུ་དང་ཉེ་བར་ལོངས་སྤྱད་པར་བྱའོ། །ཞག་བརྒྱད་པའི་ཟས་ཀྱི་བར་དུས་གཉིས་སུ་ཤ་ཁུ་དང་བསྟེན་པར་བྱ་སྟེ། དེ་ལྟར་ཤ་ཁུ་ཟས་ཀྱི་དུས་གསུམ་དུ་བསྟན་པ་ཡིན་ནོ། །འདི་ནི་སྦྱང་བར་གྱི་ཐུག་པ་རྐྱང་རྐྱང་པོ་ནས་ཤ་ཁུའི་བར་སྤྱད་པའི་རིམ་པ་ཡིན་ནོ། །དེ་བཞིན་དུ་སྦྱང་བ་ཆེ་བས་སྦྱངས་པས་ཟས་ཀྱི་དུས་གཉིས་སུ་ཐུག་པ་ལ་སོགས་པ་སྤྱད་པར་བྱའོ། །ཉི་མ་བཞི་པའི་ནང་པར་ཡང་གཡོས་སུ་མ་བྱས་པ་ཉིད་དོ། །དེའི་དགོངས་ཀ་ནི་གཡོས་སུ་བྱས་པའི་ཁུ་བ་སྟེ། ལྔ་པའི་ནང་པར་ཡང་གཡོས་སུ་བྱས་པ་དང་སྤྱད་པར་བྱའོ། །དེའི་དགོངས་ཀ་ནི་ཤ་ཁུ་སྟེ། ཉི་མ་དྲུག་པའི་ནང་པར་ཡང་ཤ་ཁུ་དང་སྤྱད་པར་བྱའོ། །དེའི་དགོངས་ཀ་ཕན་ཆད་ནི་ཟས་ནར་མར་བཟའ་བར་བྱའོ། །དེ་བཞིན་དུ་སྦྱང་བ་ཐ་མས་སྦྱངས་པས་ཟས་ཀྱི་དུས་གཅིག་ཏུ་ཐུག་པ་རྐྱང་རྐྱང་པོ་ལ་སོགས་པ་སྤྱད་པར་བྱ་སྟེ། ཉིན་ཞག་དང་པོའི་དགོངས་ཀ་ཐུག་པ་རྐྱང་རྐྱང་པོ་སྤྱད་པར་བྱའོ། །ཉི་མ་གཉིས་པའི་ནང་པར་ཐུག་པ་གར་པོ་དགོངས་ཀ་གཡོས་སུ་མ་བྱས་པའི་ཤ་ཉི་མ་གསུམ་པའི་ནང་བར་གཡོས་སུ་བྱ་བའི་ཁུ་བ། དགོངས་ཀ་ཤ་ཁུ་དེ་ཕན་ཆད་ནི་ཟས་ནར་མ་ཐམས་ཅད་སྤྱད་ལ་རག་གོ །ཐུག་པ་རྐྱང་རྐྱང་པོ་ལ་སོགས་པའི་རིམ་པས་ཅི་ཞིག་བྱེད་ཅེ་ན། དེའི་ཕྱིར་སྨྲས་པ་ནི། །དཔེར་ན་མེ་ཆུང་རྩྭ་དང་ལྕི་སོགས་ཀྱིས། །རྣམ་པར་སྦར་ནས་རིམ་གྱིས་མཆེད་པ་ན། །ཆེ་ཞིང་བརྟན་ལ་ཐམས་ཅད་མཆེད་པར་ནུས། །སྦྱངས་པའི་ནད་མེད་ཐུག་སོགས་ཀྱིས་དེ་བཞིན། །ཞེས་བྱ་བ་ཡིན་ཏེ། དཔེར་ན་མེ་ཤིང་མེད་ཅིང་ཕྲ་བ་ཅུང་ཟད་ཅིག་གནས་པར་གྱུར་པ་ནི། རྩྭ་དང་ལྕི་བ་ལ་སོགས་པ་ཕྲ་ཞིང་ཞིབ་མོར་རྣམ་པར་སྦར་ཞིང་འབུད་པ་ན། རིམ་གྱིས་མཆེད་པར་གྱུར་པ་ན་ཆེན་པོར་འགྱུར་བ་དང༌། དེ་བཞིན་དུ་བརྟན་ཞིང་མི་སོད་པར་འགྱུར་བ་དང༌། ཐམས་ཅད་མཆེད་པར་ནུས་པ་
སྟེ། དངོས་པོ་སྲ་ཞིང་ལྕི་བའི་ཟས་ཀྱི་རིགས་རྣམས་ཀྱང་སྨིན་པ་དང་ཚོས་པར་ནུས་པར་འགྱུར་རོ། །དེ་བཞིན་དུ་སྦྱངས་པར་གྱུར་པའི་ཕོ་བའི་ནང་གི་མེ་སྦྱངས་པས་ཉམ་ཆུང་ཞིང་སྟོབས་ཞན་པ་ཐུག་པ་རྐྱང་རྐྱང་པོ་ལ་སོགས་པས་གསོས་པར་གྱུར་པ་ནི་རིམ་གྱིས་ཆེ་བ་དང་བརྟན་པ་དང༌། འཇུ་ཞིང་སྨིན་པར་བྱེད་ནུས་པར་འགྱུར་རོ། །དེ་ལ་སྦྱང་བ་གསུམ་པོ་དེ་གང་ཞིག་ཡིན་པ་མི་ཤེས་སོ་ཞེ་ན། དེའི་ཕྱིར་སྨྲས་པ་ནི། སློན་ཚད་ཆུང་དང་འབྲིང་དང་ཆེན་པོ་ནི། །བཞི་དང་དྲུག་དང་ལན་བརྒྱད་སློན་པར་འདོད། །དེ་གཉིས་བཅུ་དང་ཉིས་ལྡབ་སུམ་ལྡབ་འཁྲུ། །བྲེ་གང་དེ་བཞིན་ཉིས་ལྡབ་བཞི་ལྡབ་འགྱུར། །སྐྱུག་སྨན་མཐར་མཁྲིས་བཀྲུ་སྨན་ལས་བྱེད་དང༌། །བད་ཀན་མཐར་བྱུང་འཁྲུ་བ་མཆོག་ཏུ་བཤད། །ཅེས་བྱ་བ་ལ་སོགས་པའི་ཚད་ཆུང་ངུ་དང་འབྲིང་དང་ཆེན་པོ་གོ་རིམས་ཇི་ལྟ་བ་བཞིན་དུ་སློན་ཤུགས་བཞི་དང༌། དྲུག་དང་བརྒྱད་སློན་པ་དག་ཚེའི་རིག་བྱེད་དྲན་པར་བྱེད་པ་དག་མངོན་བར་འདོད་ཅིང་སྟོན་པ་ཡིན་ནོ། །དེ་ལ་སློན་པ་ཆུང་ཚད་ནི་ལན་བཞི་སློན་པ་ཡིན་པར་འདོད་དོ། །སློན་ཚད་འབྲིང་ནི་ལན་དྲུག་སློན་པའོ། །སློན་པ་ཆེ་ཚད་ནི་ལན་བརྒྱད་སློན་པའོ། །འབྱུང་བའི་ཤུགས་དེ་ཉིད་བཅུ་དང་ཉིས་ལྡབ་དང༌། སུམ་ལྡབ་ནི་འཁྲུ་བའི་ཚད་ཆུང་ངུ་དང༌། འབྲིང་དང་ཆེན་པོ་ཡིན་པར་དྲང་སྲོང་ཉིད་འདོད་དོ། །དེ་ལ་འཁྲུ་བ་ཆུང་བའི་ཚད་ནི་ལན་བཅུ་འཁྲུ་བའོ། །འཁྲུ་བའི་འབྲིང་ཚད་ནི། བཅུ་གཉིས་ལྡབ་སྟེ་ལན་ཉི་ཤུ་འཁྲུ་བར་འདོད་དོ། །འཁྲུ་བ་ཆེ་ཚད་ནི་བཅུའི་སུམ་ལྡབ་སུམ་ཅུ་ཡིན་པར་འདོད་དོ། །དེ་ལྟར་ན་སྐྱུག་སྨན་དང་བཀྲུ་སྨན་གཉིས་ཀྱི་འབྱུང་བའི་གྲངས་ཀྱི་ཚད་ཆུང་ངུ་དང་ཆེན་པོ་བཤད་པ་ཡིན་ནོ། །བྲེ་ལ་སོགས་པའི་ཚད་ཀྱིས་གཞལ་བའི་ཚད་ཆུང་ངུ་དང༌། འབྲིང་དང༌། ཆེན་པོ་སྨྲས་པ་ནི་བྲེ་གང་ལ་སོགས་པ་ཡིན་ཏེ། འཁྲུ་བའི་ཚད་ཆུང་ངུ་དང་འབྲིང་དང་ཆེན་པོ་ནི་རིམ་བཞིན་དུ་བྲེ་གང་དང༌། དེ་ཉིད་ཀྱིས་ཉིས་ལྡབ་དང༌། དེ་ཉིད་ཀྱིས་བཞི་ལྡབ་ཡིན་ནོ། །ཞེས་བྱ་བར་སྦྱར་རོ། །དེས་ན་འཁྲུ་བ་ཆུང་ཚད་ནི་བྲེ་གང་ངོ༌། །འབྲིང་ནི་བྲེ་དོའོ། །
ཆེན་པོ་ནི་བྲེ་བཞི་ཡིན་ནོ། །སློབ་དཔོན་གཞན་དག་ནི། སྐྱུག་སྨན་གྱི་མཆོག་ནི་མཁྲིས་པ་འབྱུང་བའི་མཐར་ཐུག་པ་ཡིན་པར་འདོད་དོ། །སྐྱུག་སྨན་གང་གི་མཐར་མཁྲིས་པ་འབྱུང་བ་དེ་ནི། སྐྱུག་སྨན་མཐར་ནི་མཁྲིས་པའོ། །ཞེས་བྱའོ། །བཀྲུ་སྨན་གྱི་ཚད་བྲེ་གང་དུ་ཡོངས་སུ་ཆུང་བ་ལས་ཕྱེད་དོ། །དེས་ན་སློན་པའི་ཆུང་ཚད་ནི་བྲེ་ཕྱེད་དོ། །འབྲིང་ནི་བྲེ་གང་ངོ༌། །ཆེ་ཚད་ནི་བྲེ་དོའོ། །དེ་བཞིན་དུ་བད་ཀན་མཐའ་མར་བྱུང་བའི་འཁྲུ་བའི་ཚད་ནི་མཆོག་ཡིན་ནོ། །ཞེས་སྲོག་བསྲུང་བའི་སློབ་དཔོན་དག་གིས་བཤད་དོ། །འཁྲུ་བ་གཉིས་གསུམ་བཤད་དང་བཅས་མི་གཏོགས། །འཁྲུ་བ་གཞལ་ཏེ་སློན་པ་འཐུངས་མ་གཏོགས། །ཞེས་བྱ་བ་ལ། འབྲིང་ནི་བྲེ་གང་ངོ༌། །འཁྲུ་བའི་ཤུགས་གཉིས་སམ་གསུམ་ལ་ནི་འཁྲུ་བའི་གསུམ་ཞེས་བྱ་བ་ལ། དེ་བཤང་བ་དང་བཅས་པར་འབྱུང་བས་ན། བཤང་བཅས་ཏེ་འཁྲུ་བ་དེ་གཏོགས་ཤིང་ཚད་དུ་བགྲང་བར་མི་རྩི་ཞིང་འཁྲུ་བའི་ཚད་ལ་ལ་གཞལ་ཞིང་བརྩིས་ལ་འཁྲུ་བའི་གྲངས་སུ་བསྟན་པ་གང་ཡིན་པ་ལས་དེ་མི་རྩི་སྟེ། དེའི་འོག་ཏུ་དངོས་པོའི་རིགས་གཞན་དེ་མེད་པ་འཁྲུ་བའི་ཤུགས་ཀྱི་དབང་གིས་བཤད་བའི་སྒོ་ནས་འབྱུང་བ་དེ་ཉིད་དེའི་འོག་ཏུ་བྲེ་ལ་སོགས་པའི་ཆད་ཀྱིས་གཞལ་བར་བྱའོ། །དེ་བཞིན་དུ་སློན་ཞིང་སྐྱུགས་པའི་ལུས་ལ་སློན་པའི་ཕྱིར། སྐྱུག་སྨན་ཆུ་ལ་སོགས་པ་རྫས་གཤེར་བ་དང་བསྲེས་ཏེ་འཐུངས་པ་གང་ཡིན་པ་ཁ་ནས་སློན་ཏེ་བྱུང་བ་དེ་སྐད་དུ་བཤད་པའི་གྲངས་སུ་མི་རྩིའོ། །དེའི་འོག་ཏུ་དངོས་པོ་གཞན་དག་སློན་པའི་ཤུགས་ཀྱིས་ཁའི་སྒོ་ནས་བྱུང་བ་དེ་ཉིད་ཕན་ཆད་གཞལ་ཞིང་བརྩི་བར་བྱའོ། །དེ་ནས་སློན་པ་དེ་ལ་ནི། །སླར་ཡང་སྣུམ་དང་དུགས་བྱས་ཏེ། །བད་ཀན་དུས་འདས་ལྟོ་ཤེས་ནས། །ལེགས་པར་བཀྲུ་སྨན་གཏང་བར་བྱ། །ཞེས་བྱ་བ་ལ། དེ་ནས་ཞེས་བྱ་བ་ནི། བཀྲ་ཤིས་པའི་དོན་ནམ། དེ་མ་ཐག་པའི་དོན་ཏེ། དེ་ནས་དེའི་འོག་ཏུ་སློན་པའི་སྐྱེས་བུ་དེ་སླར་ཡང་ཞེས་བྱ་བ་ཕྱིས་ཡང་སྣུམ་དང་དུགས་བྱས་ཤིང་བདེ་བར་གནས་པ་སྔར་བཤད་པའི་ཆོགས་བྱས་ལ། བད་ཀན་གྱི་དུས་འདས་པ་དང་ལྟོ་ན་ཁ་ཟས་
མེད་པར་ཤེས་ཤིང་རྟོགས་ནས་སྨན་གྱི་ཚད་ཇི་ལྟར་འོས་པ་ལས་ལེགས་པར་བཀྲུ་སྨན་བཏང་ཞིང་འཐུང་དུ་བཅུག་ལ། འཁྲུ་བར་བྱའོ། །མཁྲིས་པ་མང་ཞིང་ལྟོ་སྙི་ལ། །འོ་མས་ཀྱང་ནི་འཁྲུ་བར་བྱེད། །རླུང་ཤས་ཆེ་ཞིང་ལྟོ་སྲན། །དུར་བྱིད་སོགས་ཀྱིས་ཀྱང་འཁྲུ་དཀའ། །ཞེས་བྱ་བ་ལ། དེ་ལ་མཁྲིས་པ་མང་ཞིང་ལྟོ་སྙི་བ་གང་ཡིན་བ་དེ་ནི་འོ་མས་ཀྱང་འཁྲུ་བར་བྱེད་དོ། །འདིར་འོ་མ་སྨོས་པ་ནི་ཉེ་བར་མཚོན་པ་ཙམ་དུ་ཟད་དོ། །དེས་ན་བུ་རམ་ཤིང་གི་ཁུ་བ་དང་དར་བ་སྐྱུར་པོ་དང༌། ཞོ་ག་ཆུ་དང༌། བུ་རམ་དང༌། ཀྲི་སར་དང༌། ཞུན་མར་དང༌། ཆང་དང༌། ཆུ་ཚན་དང༌། པི་ལུ་དང༌། རྒུན་འབྲུམ་དང༌། གླ་གོར་ཞོ་ཤ་ལ་སོགས་པས་ཀྱང་འཁྲུ་བར་བྱེད་དོ། །དེ་ལ་རླུང་ཤས་ཆེ་ཞིང་ལྟོ་སྲ་ལ་འཁྲུ་བར་དཀའ་བ་ནི་དུར་བྱིད་དང་འབྲས་བུ་གསུམ་དང༌། ནིམ་པ་དང༌། ནི་ལི་ནི་དང༌། ད་ན་དའི་འབྲས་བུ་ལ་སོགས་པས་ཀྱང་འཁྲུ་བར་དཀའ་ཞིང་རྩོལ་བ་ཆེན་པོས་གདོང་འཁྲུ་བ་ཡིན་ནོ། །བཀྲུ་སྨན་མཁྲིས་ལ་མངར་དང་བསྐ། །བད་ཀན་ལ་ནི་ཁ་བས་བྱ། །རླུང་ལ་སྣུམ་དྲོ་ལན་ཚྭ་ཅན། །ཞེས་བྱ་བ་ལ། མཁྲིས་པའི་ནད་ཀྱི་ཡུལ་ལ་ནི་བཀྲུ་སྨན་མངར་བ་དང༌། བསྐ་བ་བཏང་ན་བཀྲུ་བ་ལ་བསྔགས་སོ་ཞེས་བྱ་བ་ནི་ཚིག་གི་ལྷག་མའོ། །དེ་བཞིན་དུ་བད་ཀན་ཞེས་བྱ་བ་ལ་མཁྲིས་པ་རྒྱས་པ་དང་འདྲེས་པའི་བད་ཀན་ལ་ནི་སྨན་ཁ་བས་བཀྲུ་བ་བསྔགས་པ་ཡིན་ནོ། །རླུང་དང་མཁྲིས་པ་འདྲེས་པ་ལ་ནི་སྨན་སྣུམ་པ་དང༌། དྲོ་བ་དང༌། ལན་ཚྭ་ཅན་གྱི་བཀྲུ་སྨན་གྱིས་བཀྲུ་བ་བསྔགས་པ་ཡིན་ནོ། །མི་འཁྲུ་ན་ནི་ཆུ་ཚན་བླུད། །ལག་པ་བསྲོས་པས་དེ་ཡི་ནི། །ལྟོ་བ་ལེགས་པར་དུགས་བྱའོ། །ཞེས་བྱ་བ་ལ། སྦྱང་བའི་སྨན་གྱིས་འཁྲུ་བར་མ་གྱུར་ན། སྨན་གྱི་ནུས་པ་བསྐྱེད་པར་བྱ་བའི་ཕྱིར། ཆུ་ཚན་བླུད་པ་དང༌། དེ་བཞིན་དུ་སྐྱེས་བུ་ལག་པ་བསྲོས་པས་དེའི་ལྟོ་བ་ལེགས་པར་དུགས་བྱ་ཞིང་བསྲོ་བར་བྱའོ། །མ་འཁྲུས་དེ་ཞག་ལྡང་ཟས་ཟོས། །ཉི་མ་གཉིས་པར་སླར་ཡང་བཏུང༌། །ཞེས་བྱ་བ་ལ། སྨན་དེས་ཅུང་ཞིག་འཁྲུ་བའི་ནད་བདེ་མོར་མ་ཕྱིན་ན་མལ་ནས་
ལངས་ལ། ཕྱི་རོལ་གྱི་སར་དྲི་མ་གདོན་པའི་ཕྱིར་འགྲོ་བར་བྱས་ལ། དེ་ནས་དེ་ཞག་གཅིག་ཟན་ཟོས་ལ། ཉི་མ་གཉིས་པ་ཞེས་བྱ་བ་ཕྱི་དེ་ཉིན་ཡང་འཁྲུ་བར་བྱ་བའི་ཕྱིར་ཡང་སྨན་བཏུང་བར་བྱའོ། །ལྟོ་བ་རབ་སྲ་སྣུམ་དག་ནི། །ཞག་བཅུའི་བར་དུ་ཡང་བཏུང་བས། །སླར་ཡང་སྣུམ་དང་དུགས་ཀྱིས་ནི། །ལུས་སྦྱངས་ནས་ནི་བཀྲུ་སྨན་གྱི། །སྦྱོར་བ་ལེགས་པར་བརྟགས་པ་དང༌། །སྔར་གྱི་ཉེས་པ་དྲན་པར་བྱ། །ཞེས་བྱ་བ་ལ། གང་གི་སྣུམ་གྱིས་ཞེན་པར་མ་གྱུར་ཅིང་མ་བསླན་བས་རབ་ཏུ་སྲ་བ་ཞིག་ན། ཞག་བཅུའི་བར་དུ་སླར་ཡང་སྣུམ་གྱི་ཆོ་ག་བྱས་ལ། ལུས་ཉེ་བར་སྦྱང་ཞིང་སྣུམ་གྱི་དུགས་ཀྱིས་བཙོས་ནས་བཀྲུ་སྨན་གྱི་སྦྱོར་བ་ནད་ལ་སོགས་པའི་ཚུལ་ལ་ལེགས་པར་བརྟགས་ཏེ་བྱ་བ་དང༌། དེ་བཞིན་དུ་སྔར་གྱི་ཉེས་པ་ཅི་ཡང་དྲན་ཞིང་ངོས་ཟིན་པར་བྱས་ལ། མ་ཡེངས་པར་བཀྲུ་སྨན་བཏུང་བར་བྱའོ། །བཀྲུ་སྨན་གྱི་སྦྱོར་བ་ཉེས་པའི་མཚན་ཉིད་ནི། སྙིང་དང་ལྟོ་ན་ཡི་ག་འཆུས། །བད་ཀན་མཁྲིས་པ་གློངས་པ་དང༌། །གཡན་པ་ལུས་ཚ་ཐོར་བུ་དང༌། །ཆམ་པས་འདེབས་ཤིང་བ་ཤང་རླུང་འགགས། །སྦྱོར་བ་ཉེས་པའི་མཚན་ཉིད་ཡིན། །ཞེས་བྱ་བ་ཡིན་ཏེ། བཀྲུ་སྨན་བཏང་བ་མ་ལེགས་ན། སྙིང་དང་ལྟོ་བ་ན་ཞིང་མི་དགའ་བར་འགྱུར་བ་དང༌། ཡི་ག་འཆུས་པ་སྟེ་ཟས་ལ་འདོད་པ་མེད་པ་དང༌། དེ་བཞིན་དུ་བད་ཀན་དང་མཁྲིས་པ་གློངས་ཤིང་བསྐྱོད་པར་འགྱུར་བ་དང༌། ལུས་གཡའ་ཞིང་ལུས་ཚ་བ་སྣ་ཚོགས་ཀྱིས་འདེབས་པ་དང༌། ཡན་ལག་དང་ཉིད་ལག་ཏུ་ཐོར་བུ་འབྱུང་བ་དང༌། ཆམ་པས་འདེབས་པ་དང༌། དེ་བཞིན་དུ་བཤད་བ་ཐུར་དུ་འབྱུང་བའི་རླུང་འགགས་པར་འགྱུར་བ་ནི་སྦྱོར་བ་ཉེས་པའི་མཚན་ཉིད་ཡིན་པར་བཤད་དོ། །སྦྱོར་ལེགས་ཇི་སྐད་བཤད་གོ་བཟློག །ཅེས་བྱ་བ་ལ། བཀྲུ་སྨན་གྱི་སྦྱོར་བ་ལེགས་ན་ཇི་སྐད་བཤད་པའི་མཚན་ཉིད་སྙིང་དང་ལྟོ་བ་ན་བ་ལ་སོགས་པ་ལས་གོ་བཟློག་པ་སྟེ། སྙིང་དང་ལྟོ་བ་དག་ཅིང་སང་བག་ཏུ་འགྱུར་བ་དང༌། ཟས་ཡི་གར་འོང་བ་ལ་སོགས་
པར་འགྱུར་རོ། །བཤང་བ་མཁྲིས་པ་བད་ཀན་རླུང༌། །རིམ་གྱིས་འཁྲུ་ཞིང་འབྱུང་བ་ན། །བད་ཀན་མཁྲིས་པ་མེད་ཆུ་འཁྲུ། །སྐྱ་ཞིང་གནག་དང་ཁྲག་དང་བཅས། །ཡང་ན་ཤ་བཀྲུས་ལྟ་བུའམ། །ཚིལ་གྱི་དུམ་བུ་འདྲ་ཉིད་དམ། །གཞང་འབྱུང་སྐོམ་དད་ཆེ་བ་དང༌། །མགོ་འཁོར་མིག་ནི་ཕུགས་སུ་བྲོས། །བཀྲུ་སྨན་དྲགས་ལས་འབྱུང་བ་ཡིན། །དེ་བཞིན་སྐྱུག་སྨན་དྲགས་ནད་འགྱུར། །ཞེས་བྱ་བ་ལ། སྐྱེས་བུ་ཤིན་ཏུ་འཁྲུ་དྲགས་པ་ལ། གནོད་པ་འདི་དག་འབྱུང་བར་འགྱུར་ཏེ། བཤང་བ་ལ་སོགས་པ་འབྱུང་བ་ན། བད་ཀན་དང་མཁྲིས་པ་ནི་མེད་པའི་དྲི་མའི་ཆུ་འབའ་ཞིག་འབྱུང་བ་དང༌། དེ་བཞིན་དུ་སྐྱ་ཞིང་དཀར་བ་དང༌། གནག་ཅིང་སྣག་ཚ་འདྲ་བ་དང༌། ཁྲག་དང་བཅས་པ་སྟེ། ཡང་ན་ཤ་བཀྲུས་པ་ལྟ་བུ་སྟེ། བཀྲུས་པའི་ཤ་འདྲ་བ་དང༌། དེ་བཞིན་དུ་ཚིལ་གྱི་དུམ་བུ་དང་འདྲ་ཞིང་མཚུངས་པ་དང༌། དེ་བཞིན་དུ་གཞང་འབྱུང་ཞིང་འཐོན་པ་དང༌། དེ་བཞིན་དུ་སྐོམ་དད་ཆེ་ཞིང་སྐོམ་པས་གདུངས་པ་དང༌། མགོ་འཁོར་བ་དང༌། དེ་བཞིན་དུ་མིག་ཕུགས་སུ་བྲོས་ཤིང་རྐོངས་སུ་ཞུགས་པ་སྟེ། འདི་དག་ནི་ཤིན་ཏུ་འཁྲུ་དྲགས་པ་ལས་འབྱུང་བར་འགྱུར་རོ། །དེ་བཞིན་དུ་སྐྱུག་སྨན་དྲགས་པའི་ནད་ཀྱི་ཚུལ་སྔར་བཤད་པ་ལྟར་ཡང་འབྱུང་བར་འགྱུར་ཏེ། ལུས་སྐེམ་ཞིང་རྨྱ་བ་དང༌། ལུས་ཀྱི་ཁོང་ཚ་བ་དང༌། ལྐོག་མ་བསྐམས་པ་དང༌། མིག་གིས་མི་མཐོང་ནས་འཆི་བའི་བར་དུ་འབྱུང་བར་འགྱུར་རོ། །ལེགས་པར་འཁྲུས་པ་དེ་ལ་ནི། །དུད་པས་བདུག་པ་མ་གཏོགས་པའི། །ཆོ་ག་སྐྱུག་སྨན་དང་མཚུངས་པས། །དེ་ནས་སློན་དང་འདྲ་བར་བྱ། །ཟས་ལ་རིམ་གྱིས་སྤྱད་ནས་ནི། །དེ་འོག་ནར་མའི་ཁ་ཟས་བསྟེན། །ཞེས་བྱ་བ་ལ། ལེགས་པར་འཁྲུ་ཞིང་ཁྲུས་ཀྱི་སྦྱོར་བ་ཇི་སྐད་དུ་བཤད་པ་ལྟར་འཁྲུ་བའི་སྐྱེས་བུ་དེ་ལ་དུད་པས་བདུག་པའི་ཆོ་ག་མ་གཏོགས་པ། ཆོ་ག་གཞན་སྐྱུག་སྨན་གྱི་སྐབས་སུ་བཤད་བ་དང་མཚུངས་ཤིང་འདྲ་བར་ཉེ་བར་སྦྱར་བར་བྱ་སྟེ། འདིར་ཁྱད་པར་ནི་དུད་པས་བདུག་པ་
འབའ་ཞིག་མ་གཏོགས་པ་སྔར་བཤད་པ་ཐམས་ཅད་བྱའོ། །དེ་ནས་དེའི་འོག་ཏུ་སློན་དང་འདྲ་བར་བྱ་བ་སྟེ། ཇི་ལྟར་སློན་པའི་སྐབས་སུ་བཤད་པ་བཞིན་དུ་རིམ་པ་ཉིད་ཀྱིས་ཁྲུས་བཏང་བའི་འོག་ཏུ་ཐུག་པ་རྐྱང་རྐྱང་པོ་ལ་སོགས་པ་སྦྱིན་པའི་ཁ་ཟས་ཀྱི་ཆོ་ག་རིམ་གྱིས་སྤྱད་ཅིང་བསྟེན་ནས། དེའི་འོག་ཏུ་ནར་མའི་ཁ་ཟས་མིན་པའི་དབང་དུ་བྱས་ནས་བཤད་པའི་ཟས་ཀྱི་ཆོ་ག་བསྟེན་པར་སྤྱད་པར་བྱའོ། །སྨན་འཐུངས་མེ་དྲོད་ཆུང་བ་དང༌། །མ་དག་ནད་ཀྱིས་རྨྱ་བ་དང༌། །ཞུ་པའི་མཚན་མ་མ་མཐོང་ན། །དེ་ཡི་ཉིན་པར་སྨྱུང་བྱས་ལ། །སྣུམ་དང་དུགས་དང་སྨན་རྣམས་ཀྱིས། །གློངས་པའི་ནད་ཀྱིས་ཉེན་མི་འགྱུར། །ཞེས་བྱ་བ་ལ། སྐྱེས་བུ་སྨན་འཐུངས་ཤིང་སྤྱད་ནས། མེའི་དྲོད་ཆུང་ཞིང་མེའི་སྟོབས་ཆུང་བ་དང༌། མ་དག་པ་སྟེ། ནད་མ་ཕྱིན་ལ་ལེགས་པར་སྦྱངས་པའི་མཚན་ཉིད་མ་སྐྱེས་པ་དང༌། ནད་ཀྱིས་རྨྱ་བ་སྟེ། ནད་ཀྱི་དུགས་སྨན་རྣམས་ཀྱིས་ཉམ་ཆུང་བ་དང༌། ཞུ་བའི་མཚན་མ་མཐོང་སྟེ། སྨན་ལེགས་པར་ཞུ་བའི་རྟགས་མི་སྣང་ན། སྣུམ་དང་དུགས་ལ་སོགས་པས་གློངས་པའི་ནད་ཀྱིས་གནོད་པར་མི་འགྱུར་ཏེ། དེ་ཡང་ནད་གང་སྣུམ་གྱིས་གློངས་ཤིང་བསྐྱོད་པ་དང་དུགས་ཀྱིས་གློངས་ཤིང་བསྐྱོད་པ་དང༌། སྨན་གྱིས་གློངས་པའི་དབང་གིས་ནད་བསྐྱོད་པ་དེ་སྨྱུང་བ་བྱས་ནས་དེས་ཉེན་ཞིང་གནོད་པར་མི་འགྱུར་རོ། །སྦྱངས་དང་ཁྲག་ནི་དབྱུང་བ་དང༌། །སྣུམ་ཆོ་ག་ལ་སྦྱར་སྨྱུང་བ་ཡིས། །མེ་དྲོད་ཞེན་པ་ཉིད་འགྱུར་ཏེ། །དེ་བས་ཐུག་སོགས་རིམ་གྱིས་སྤྱད། །ཅེས་བྱ་བ་ལ། སློན་དང་ཁྲུས་ལ་སོགས་པས་སྦྱངས་པ་ལ་སོགས་པས་ཕོ་བའི་མི་དྲོད་ཞེན་ཞིང་སྟོབས་ཆུང་བར་འགྱུར་བ་ཡིན་ཏེ། དེ་བས་ན་ཐུག་པ་ལ་སོགས་པ་རིམ་གྱིས་སྤྱོད་ཅིང་བསྟན་པར་བྱའོ། །དེ་ལ་སྦྱངས་པ་ནི་སྐྱུག་སྨན་བཏང་བ་དང༌། བཀྲུ་སྨན་བཏང་བས་ནད་ཕྱིན་པར་བྱས་པའོ། །ཁྲག་དབྱུང་བ་ནི་གཏར་ག་ལ་སོགས་པས་ཁྲག་དབྱུང་ངོ༌། །སྣུམ་གྱི་ཆོ་ག་ལ་སྦྱར་བ་ནི་སྣུམ་གྱི་ཆོ་ག་བསྟན་པའོ། །སྨྱུང་བ་ནི་ཟས་བཅད་པའོ། །དེ་ཡང་སྨན་དཔྱད་
ཀྱི་ལུང་ལས་སྨྱུང་བ་ཁྱད་པར་མེད་པས་བཤད་པར་ཞེས་འབྱུང་བ་ཡིན་ནོ། །བད་ཀན་མཁྲིས་པ་འབྲི་ཞིང་ཆུང༌། །ཆང་འཐུང་ས་རླུང་དང་མཁྲིས་པ་ཆེ། །དེ་ལ་ཐུག་པ་མི་བླུད་ཀྱི། །བརྟ་བ་ལ་སོགས་རིམ་པ་ཕན། །ཞེས་བྱ་བ་ལ། གང་གི་བད་ཀན་དང་མཁྲིས་པ་ཆུང་ཞིང་ཕྲི་བས་ཆུང་བར་གྱུར་པ་དེ་ནི་བད་ཀན་མཁྲིས་པ་བྲི་ཞིང་ཆུང་བ་ཞེས་བྱའོ། །དེ་བཞིན་དུ་གང་ཆང་འཐུང་བ་ལ་གོམས་པ་དེ་ནི་ཆང་འཐུངས་པའོ། །དེ་བཞིན་དུ་རང་བཞིན་གྱིས་རླུང་དང་མཁྲིས་པའི་ཤས་ཆེ་བ་དེ་ལ་ཐུག་པ་མི་བླུད་ཀྱི། གསུམ་པོ་དེ་དག་ལ་བརྟ་བ་ལ་སོགས་པའི་རིམ་པ་ཕན་ཏེ། ཟས་ཀྱི་དང་པོར་བརྟ་བའི་ཆོ་ག་འབྲས་བུའི་ཡོས་ཀྱི་ཕྱེ་ལས་བྱས་པའི་སྐྱོ་མ་སྦྱིན་པར་བྱ་སྟེ། ཐུག་པའི་སྐབས་སུ་བརྟ་བར་བྱེད་པའི་འབྲས་ཀྱི་སྐྱོམ་སྦྱར་བར་བྱའོ་ཞེས་བྱ་བའི་དོན་ཏོ། །སྐྱུག་སྨན་མ་ཞུ་བར་ནད་འབྱིན། །བཀྲུ་སྨན་ཞུ་ནས་འབྱིན་པ་ཡིན། །དེ་ཡི་ཕྱིར་ན་སྐྱུག་སྨན་དག །ཞུ་བ་ལ་ནི་བསྡད་མི་དགོས། །ཞེས་བྱ་བ་ལ། སྐྱུག་སྨན་བཏང་ན་ནི་མ་ཞུ་བའི་ནད་འབྱིན་པར་བྱེད་དོ། །བཀྲུ་སྨན་ཞུ་ཞིང་སྨིན་ནས་ནད་འབྱིན་ཅིང་སེལ་བར་བྱེད་དེ། དེའི་ཕྱིར་སྐྱུག་སྨན་དག་བཏང་ནས་ཞུ་བ་ལ་བསྡད་མི་དགོས་ཏེ་གང་ཡུད་ཙམ་བསྡད་པ་མ་བྱུང་ན་ཡང་མྱུར་བ་ཉིད་དུ་སློན་ཞིང་དྲང་བར་བྱའོ། །སྟེང་དང་འོག་ཏུ་འབྱུང་རིགས་པས། །གང་ཚེ་ཕྱིན་ཅི་ལོག་གྱུར་ན། །དེ་ཚེ་སྐྱུགས་ལ་རྐང་པར་ནི། །ཆུ་དྲོན་དག་གིས་བླུགས་པར་བྱ། །ལུས་ཀྱི་སྟོང་ནི་ཆུ་གྲང་བླུགས། །འཁྲུ་བ་ལ་ནི་དེ་ལས་བཟློག །ཅེས་བྱ་བའི་ཚིགས་སུ་བཅད་པ་འདི་ནི། ཡན་ལག་བརྒྱད་པ་བསྡུས་པ་ལས། ལ་ལ་ཞིག་གིས་འདིར་བཅུག་པ་ཡིན་ནོ། །དེའི་དོན་ནི་འདི་ཡིན་ཏེ། སྐྱུག་སྨན་གྱིས་སྟེང་དུ་འབྱུང་བ་དང༌། བཀྲུ་སྨན་གྱིས་འོག་ཏུ་འབྱུང་བའི་རིགས་པ་ལས། གང་གི་ཚེ་རྒྱུ་འགའ་ཞིག་གིས་ཕྱིན་ཅི་ལོག་ཏུ་གྱུར་ཏེ། རྐྱེན་དེས་སྐྱུག་སྨན་བཏང་བ་ན། འཁྲུ་བར་གྱུར་པ་དང༌། བཀྲུ་སྨན་བཏང་བ་ན་སློན་པར་གྱུར་པ་དེའི་ཚེ། འཁྲུ་བ་ལས་ཕྱིན་ཅི་ལོག་ཏུ་གྱུར་ཏེ། སློན་པར་གྱུར་པ་ནི། ཆུ་དྲོན་པོ་རྐང་
པར་བླུགས་ལ། ཆུ་གྲང་མོ་རོ་སྟོད་དུ་བླུགས་པར་བྱའོ། །གང་གི་ཚེ་འཁྲུ་སྨན་ཕྱིན་ཅི་ལོག་ཏུ་གྱུར་པ་ལས་གོ་བཟློག་པའི་དཔྱད་བྱ་སྟེ། རྐང་པར་ཆུ་གྲང་མོ་བླུགས་པར་བྱ་ལ། རོ་སྟོད་དུ་ཆུ་དྲོན་མོ་བླུགས་པར་བྱའོ། །གང་ཞིག་ཉམ་ཆུང་ནད་མང་དང༌། །ནད་སྨིན་པ་ཡིས་རང་ཉིད་ནི། །འཁྲུ་བར་བྱེད་ལ་འཁྲུ་བ་ནི། །ཁ་ཟས་བྱིན་ལ་དེར་འཁྲུར་གཞུག །ཅེས་བྱ་བ་ལ། གང་ཞིག་ཉམ་ཆུང་བ་ལ་སོགས་པ་དང༌། ནད་སྨིན་ཏེ་རང་ཉིད་འཁྲུ་བ་དེ་ལ་ནི་ཁ་ཟས་ཀྱིས་འཁྲུར་གཞུག་གི །འཁྲུ་བའི་སྨན་སྦྱིན་པར་མི་བྱའོ། །སྔར་སྦྱངས་པས་ནི་ཉམ་ཆུང་དང༌། །ནད་ཀྱི་དཀྱེལ་ཆུང་ལུས་ཟད་ནི། །ལྟོ་ཡི་སྲ་སྙི་མི་ཤེས་ལ། །སྨན་ནི་འཇམ་ཞིང་ཆུང་ངུ་བླུད། །དེ་མང་འཐུངས་པ་མཆོག་ཡིན་གྱི། །གཞན་དུ་དགོས་པར་བཅས་མི་རུང༌། །ཞེས་བྱ་བ་ལ། སླར་སྦྱང་བ་བྱས་པ་ལུས་ཉམ་ཆུང་བར་གྱུར་པ་དང༌། དེ་བཞིན་དུ་ནད་ཀྱི་དཀྱེལ་ཆུང་བ་དང༌། ལུས་ཀྱི་ཤ་ཟད་ཅིང་སྦེག་པ་དང༌། དེ་བཞིན་དུ་ལྟོ་སྲ་སྙིའི་བྱེ་བྲག་མི་ཤེས་པ་དག་ལ། སྨན་འཇམ་ཞིང་ཆུང་བ་བླུད་པར་བྱ་སྟེ། གང་གི་ཕྱིར་སྨན་དེ་དགོས་པ་ལ་ལྟོས་ནས་ལན་མང་དུ་འཐུངས་པ་ནི་མཆོག་ཡིན་གྱི་གཞན་དུ་ན་ལན་ཅིག་མང་དུ་བླུད་པ་དགོས་པ་དང་བཅས་པས་ནི་མི་རུང་སྟེ། སྦྱོར་བ་ཉེས་པའི་སྐྱོན་ཡོད་པའི་ཕྱིར་རོ། །ཉམ་ཆུང་བ་ནི་ནད་མང་པོ། །གཡོས་གྱུར་ཅུང་ཟད་ཅུང་ཟད་ཅིག །སྨན་ནི་འཇམ་པོས་ལན་མང་ཞིག །དེ་ནི་ཉུང་འགྱུར་ཞི་བར་བྱ། །མ་བསལ་དེ་ནི་ཡུན་རིང་དུ། །ཉོན་མོངས་པའམ་གསོད་པར་འགྱུར། །ཞེས་བྱ་བ་ལ། སྐྱེས་བུ་ཉམ་ཆུང་བའི་ནད་མང་པོ་གཡོས་པར་གྱུར་བ་ནི། ཅུང་ཟད་ཅུང་ཟད་ཅིག་སྨན་འཇམ་པོས་ཡང་དང་ཡང་དུ་བསལ་བར་བྱས་ནས། ཉམ་ཆུང་བའི་ནད་གཡོས་པར་གྱུར་པ་དེ་ཉུང་དུར་གྱུར་པས་མ་བཏོན་པར་ཞི་བར་བྱས་པས་ཞི་བར་བྱ་སྟེ། གང་གི་ཕྱིར་ཞེ་ན། མང་པོ་དེ་དག་གཡོས་པ་ཉུང་དུ་ནས་བསལ་ཞིང་ཞི་བར་བྱས་ན། ནད་དེ་ཡུན་རིང་དུ་ཉོན་མོངས་ཤིང༌། སྡུག་བསྔལ་བར་འགྱུར་བའམ། གསོད་ཅིང་འཇོམས་པ་
ཉིད་དུ་བྱེད་པར་འགྱུར་རོ། །མེ་དྲོད་ཆུང་དང་ལྟོ་སྲ་ལ། །ཐལ་སྨན་རྒྱམ་ཚ་མར་བཅས་པས། །མེ་ཡི་དྲོད་ནི་བསྐྱེད་ནས་སུ། །རླུང་དང་བད་ཀན་བསལ་བར་བྱ། །ཞེས་བྱ་བ་ལ། དེ་བཞིན་དུ་སྐྱེས་བུ་མེ་དྲོད་ཆུང་བར་གྱུར་པ་སྦྱང་བའི་སྐབས་ལ་བབ་ན་ཐལ་སྨན་རྣོན་པོ་དང་བཅས་པའི་མར་ཇི་སྐད་བཤད་པས་ཕོ་བའི་མེ་དྲོད་བསྐྱེད་ནས་སྦྱང་བ་བྱའོ། །དེ་བཞིན་དུ་སྲ་བ་ལ་རྒྱམ་ཚ་དང་མར་དང་བཅས་པས་རླུང་དང་བད་ཀན་བསལ་ལ་སྦྱང་བར་བྱའོ། །རྩུབ་ཅིང་རླུང་མང་ལྟོ་སྲ་དང༌། །རྟག་ཏུ་རྩོལ་བའི་ཚུལ་ཅན་དང༌། །མེ་དྲོད་རབ་ཏུ་ཆེ་ལ་སྨན། །མི་འཁྲུ་བར་ནི་ཞུ་བར་འགྱུར། །དེ་ལ་སྔར་ནི་འཇམ་རྩི་གཏང༌། །དེ་ནས་སྣུམ་པའི་བཀྲུ་སྨན་བྱ། །སྨན་ནི་རྣོན་པོའི་རེང་བུ་ཡིས། །བཤང་བ་ཅུང་ཟད་དབྱུང་བར་བྱ། །དྲི་མ་ལེགས་པར་འཁྲུས་ནས་ནི། །སྣུམ་འཁྲུ་བདེ་བར་འབྱུང་བར་འགྱུར། །ཞེས་བྱ་བ་ལ། སྐྱེས་བུ་རྩུབ་པ་ལ་སོགས་པ་དང་ལྡན་པ་དང༌། དེ་བཞིན་དུ་མེ་དྲོད་རབ་ཏུ་ཆེ་ཞིང་སྨན་དེ་འཁྲུ་བའི་སྨན་མི་འཁྲུ་བའི་བྱ་བ་མི་བྱེད་པ་ཉིད་དུ་ཞུ་ཞིང་དེངས་བར་འགྱུར་རོ། །དེ་བས་དེའི་འོག་ཏུ་སྣུམ་པའི་བཀྲུ་སྨན་ནི། ནིའི་ནིའི་མར་ལ་སོགས་པ་ལས་བཏང་བ་སྦྱིན་པར་བྱའོ། །ཡང་ན་མི་དེ་ལྟ་བུ་དེ་ལ་སྨན་རྣོན་པོའི་རེང་བུ་བྱས་པས་བཤང་བ་ཅུང་ཟད་ཅེས་པ་ཉུང་ཤས་ཅིག་ཕྱུང་ལ། དེའི་འོག་ཏུ་བཀྲུ་སྨན་གཏང་ངོ༌། །དེ་ཡང་གང་གི་ཕྱིར་རེང་བུ་མས་གཏོང་བས། སྨན་གྱིས་བཤང་བ་ལ་སོགས་པ་ཕྱུང་བའི་འོག་ཏུ་བཀྲུ་སྨན་སྣུམ་པོ་བཏང་ན་འཁྲུ་བ་བདེ་བར་འགྱུར་རོ། །དུག་གིས་ཕོ་ག་དང་ཐོར་བུ་བྱུང༌། །མཛེ་ནད་འོར་ནད་མེ་དཔལ་དང༌། །མིག་སེར་སྐྱ་རྦབ་ཟ་གུས་ཉེན། །ཧ་ཅང་སྣུམ་ཆེས་སྦྱང་མི་བྱ། །ཀུན་ལ་བཀྲུ་སྨན་སྣུམ་བག་བཏང༌། །སྣུམ་གྱིས་ཞེན་ལ་རྩུབ་པ་བཏང༌། །ཞེས་བྱ་བ་ལ། དུག་གིས་ཕོག་པ་ནས་གཅིན་ནད་ཟ་གུས་ཉེན་པའི་བར་གྱི་ནད་པ་ལ་སྣུམ་ཧ་ཅང་ཆེན་པོ་སྦྱིན་པར་མི་བྱའི། ཉམས་ལས་དཔགས་ལ། སྣུམ་ཅུང་ཟད་བྱིན་ཏེ། གང་ལ་ཇི་ལྟར་འཚམ་པའི་བཀྲུ་སྨན་ཕལ་ཆེར་རྩུབ་པས་ཁྲུས་བྱའོ། །
དུག་གིས་ཕོག་པ་ལ་སོགས་པ་འདིར་སྨོས་པ་མ་གཏོགས་པ་གཞན་ཀུན་ཏེ། ཐམས་ཅད་ལ་བཀྲུ་སྨན་སྣུམ་བག་ཅན་ཨེ་རཎྜའི་མར་ལ་སོགས་པའམ། ཡང་ན་བཀྲུ་སྨན་དང་བསྐོལ་བས་སྦྱང་བར་བྱའོ། །ཇི་ལྟ་བུ་ལ་སྣུམ་གྱི་ཁྲུས་སྨན་དེས་སྦྱང་ཞེ་ན། འདས་མ་ཐག་པའི་སྣུམ་གྱིས་བསྒོ་བར་བསྟན་པས་རྩུབ་པས་བསྒོས་ཤིང་ཡུན་རིང་པོར་རྫས་རྩུབ་པོས་ལུས་བསྐྱེད་པ་ཞེས་བྱ་བའི་བར་དེ་ལ། སྣུམ་པའི་བཀྲུ་སྨན་བཏང་ངོ༌། །དེ་ལ་ཡང་རྩུབ་པའི་ཁྲུས་སྨན་དུ་དུར་བྱིད་ལ་སོགས་པའི་སྣུམ་གྱིས་བསྒོས་པའི་མེ་ཡུན་དུ་སྣུམ་གྱིས་བསྐྱེད་པ་ལ་གཏང་ངོ༌། །སྐྱུག་སྨན་ལ་སོགས་ལས་རྣམས་ལ། །སླར་ཡང་བར་སྐབས་བར་སྐབས་སུ། །སྣུམ་དང་དུགས་ཀྱི་ཆོ་ག་བྱ། །སྣུམ་རྗེས་ལ་ནི་སྟོབས་བསྐྱེད་བྱ། །ལུས་ལས་ནད་རྣམས་བསལ་བ་ནི། །གོས་ཀྱི་དྲི་མ་འཁྲུ་དང་མཚུངས། །ཞེས་བྱ་བ་ལ། སྐྱུག་སྨན་ལ་སོགས་པའི་ལས་རྣམས་བྱེད་པ་ན། བར་སྐབས་བར་སྐབས་ཏེ། མདོ་མདོར་སྣུམ་དང་དུགས་ཀྱི་ཆོ་ག་བྱ་སྟེ། སྐྱུག་སྨན་བཏང་ནས་དེའི་ཞག་ཁ་ཅིག་འདས་པའི་སྐབས་སུ་སྣུམ་དང་དུགས་བྱས་ལ། དེའི་འོག་ཏུ་ཁྲུས་བྱའོ། །དེ་ལྟར་ཁྲུས་བྱས་ནས་ཡང་འདུས་ཏེ་འདས་པ་དང༌། སྣུམ་དང་དུགས་བྱས་ལ། དེའི་འོག་ཏུ་མས་གཏོང་བར་བྱའོ། །དེ་ནས་བར་སྐབས་སུ་སྣུམ་དང་དུགས་བྱས་ལ། དེའི་འོག་ཏུ་མགོ་ནད་ཀྱི་སྦྱང་བ་བྱའོ། །དེ་ལྟར་མགོའི་ནད་སྦྱང་བ་སྣ་སྨན་ལ་སོགས་པ་བྱས་ནས། སྣུམ་འབའ་ཞིག་སྟོབས་བསྐྱེད་པའི་ཕྱིར་གཏང་བར་བྱ་སྟེ། སྐྱུག་སྨན་ལ་སོགས་པས་སྟོབས་བྲི་བ་གང་ཡིན་པ་དེ་བསྐྱེད་པར་བྱ་བའི་ཕྱིར་དེ་སྦྱིན་པར་བྱ་སྟེ། གང་གི་ཕྱིར་དྲི་མ་དང་བཅས་པའི་ལུས་ནད་དང་འདྲེས་པར་གྱུར་པ་ལས། ནད་དེ་བསལ་ཞིང་གདོན་པར་བྱ་སྟེ། དེ་ལྟར་ན་ལུས་བསྲུང་བར་འགྱུར་རོ། །ཇི་ལྟར་ནད་ཀྱི་དྲི་མ་དབྱུང་ཞེ་ན། གོས་དང་མཚུངས་པར་ཏེ། དཔེར་ན་དྲི་དང་བཅས་པའི་གོས་ལ་དྲི་མ་མེད་དེ་སྤང་བ་ལ་སོགས་
པའི་རྣམ་པས་འཁྲུད་པར་བྱེད་པ་དེ་བཞིན་དུ་སྣུམ་དང་དུགས་ལ་སོགས་པས་ནད་ཀྱི་དྲི་མ་སློང་བའི་ཐབས་ཀྱིས་ནད་སློངས་ལ། དེའི་རྗེས་ལ་ནད་དབྱུང་བར་བྱའོ། །སྣུམ་དང་དུགས་དག་མ་བྱས་པར། །གང་ཞིག་སྦྱང་བའི་ལས་བྱེད་པ། །ཤིང་སྐམ་འགུགས་པར་བྱེད་པ་ལྟར། །དེ་ཡི་ལུས་ནི་མ་རུངས་འགྱུར། །ཞེས་བྱ་བ་ལ། གང་སྣུམ་དང་དུགས་དག་མང་པོ་བྱས་ཤིང་མ་བསྟེན་པར་གང་ཞིག་སྦྱང་བའི་ལས་སྐྱུག་སྨན་དང༌། བཀྲུ་སྨན་ལ་སོགས་པ་བྱེད་པར་གྱུར་བ་དག་ནི། ནད་དེས་ལུས་འཇིག་ཅིང་མ་རུངས་པར་འགྱུར་བ་སྟེ། དཔེར་ན་ཤིང་སྐམ་པོ་འགུགས་ཤིང་སྒུར་པོར་བྱེད་པ་ཆག་པ་དང་འདྲའོ། །སྦྱང་བ་ལེགས་པར་ཉེ་བར་བསྟན་པས་ནི། །བློ་གྲོས་གསལ་ཞིང་དབང་པོ་སྟོབས་དང་ལྡན། །ལུས་ཟུངས་བརྟན་ཞིང་ཁོང་པའི་མེ་དྲོད་འབར། །ན་ཚོད་དག་ཀྱང་རིང་དུ་འཇོག་པར་བྱེད། །ཅེས་བྱ་བ་ལ། སྦྱང་བ་ཞེས་བྱ་བ་སྐྱུག་སྨན་ལ་སོགས་པ་ནས་སྣ་ལ་སོགས་པ་མགོ་བོ་སྦྱང་བའི་བར་ལེགས་པར་ཆོ་ག་ཇི་ལྟ་བ་བཞིན་དུ་ཡང་དག་པར་བྱས་པས་ཉེ་བར་བསྟེན་ཞིང་ཀུན་ཏུ་སྤྱད་པས་བློ་གྲོས་ཏེ། ཤེས་རབ་གསལ་ཞིང་རྣོ་བར་འགྱུར་བ་དང༌། དེ་བཞིན་དུ་མིག་ལ་སོགས་པ་དབང་པོ་རྣམས་ཀྱི་སྟོབས་རང་རང་གི་ཡུལ་ལ་ལེགས་པར་འཇུག་ནུས་པ་དང། དེ་བཞིན་དུ་ལུས་ཟུངས་ཏེ་དངས་མ་ལ་སོགས་པ་བརྟན་ཞིང་སྲ་བ་དང༌། དེ་བཞིན་དུ་ཁོང་པའི་མེ་དྲོད་འབར་བའི་ཤིང་ཉིད་དུ་བྱེད་པ་དང༌། དེ་བཞིན་དུ་ན་ཚོད་དེ་ལུས་ཀྱི་ན་ཚོད་གཞོན་པ་དག་ཏུའང་ཡུན་རིང་དུ་འཇོག་པར་བྱེད་ཅིང་གནས་པར་བྱེད་དེ། བྱེད་ཅེས་བྱ་བ་ཐམས་ཅད་དང་སྦྱར་བར་བྱའོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློན་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས་ལེའུ་བཅྭ་བརྒྱད་པའི་རྣམ་པར་འགྲེལ་པའོ།། །།དེ་ནས་མས་གཏོང་བའི་ཆོ་གའི་ལེའུ་བཤད་པར་བྱའོ། །ཞེས་བྱ་བ་ལ། འདི་བརྩམས་པའི་དགོས་པ་ནི་བད་ཀན་བསལ་བའི་ཕྱིར་སྐྱུག་སྨན་བཤད་པ་ཡིན་ལ། མཁྲིས་པ་བསལ་བའི་ཕྱིར་ནི་བཀྲུ་སྨན་བཤད་པ་ཡིན་ལ། གནས་སྐབས་འདིར་རླུང་བསལ་བའི་ཕྱིར། མས་གཏོང་བ་བཤད་པའི་སྐབས་ཡིན་ཏེ། དེ་བས་ན་དེ་ཡོངས་སུ་ཤེས་པར་བྱ་བའི་ཕྱིར།
ལེའུ་འདི་བརྩམས་པ་ཡིན་ནོ། །བཤང་སྒོ་ནས་གཏོང་བ་ལས་སུ་བྱ་བ་ཡིན་པས་ན། མས་གཏོང་བའི་ཆོ་ག་སྟེ། ཆོ་ག་ནི་ཆོ་གར་བྱ་བ་འདི་ལྟར་བྱའོ། །ཞེས་བྱ་བའི་ཚུལ་གྱི་ལེའུ་སྟེ། དེ་བཤད་པར་བྱའོ་ཞེས་བྱ་བ་ནི་བསྟན་པར་བྱའོ་ཞེས་པའོ། །རླུང་ཤས་ཆེ་བའི་ནད་རྣམས་སམ། །རླུང་ལ་མས་གཏོང་བསྔགས་པ་སྟེ། །དེ་ནི་གསོ་བ་ཐམས་ཅད་ཀྱི། །མཆོག་སྟེ་དེ་ཡང་རྣམ་པ་གསུམ། །བཀྲུ་དྲགས་འཇམ་རྩི་མས་གཏོང་ངོ༌། །ཞེས་བྱ་བ་ལ། ནད་ཐམས་ཅད་ཀྱི་ནང་ན་རླུང་གི་ཤས་ཆེ་ཞིང་རླུང་ནད་བདོ་བའམ། རླུང་ལ་ཞེས་པ་རླུང་འབའ་ཞིག་ལྡང་བ་ལ་ཡང་མས་གཏོང་བ་དེ་ཉིད་ཀྱིས་གསོ་བ་དང༌། དེ་བཞིན་དུ་འཇམ་རྩི་ཞེས་བྱ་བ་སྣུམ་གྱི་འཇམ་རྩི་མས་གཏོང་བ་འདོད་ཅིང་བསྔགས་པ་ཡིན་ནོ། །དེ་ནི་གསོ་བ་སྟེ། རླུང་གི་ནད་གསོ་བ་ཐམས་ཅད་ཀྱི་ནང་ན་མཆོག་སྟེ། དམ་པ་ཉིད་དོ། །ཅིའི་ཕྱིར་ཞེ་ན། མྱུར་དུ་བདེ་བ་འཕེལ་བ་ལ་སོགས་པའི་རྒྱུར་གྱུར་པའི་ཕྱིར་རོ། །མས་གཏོང་བ་དེ་ཡང་རྣམ་པ་གསུམ་སྟེ། མས་གཏོང་བ་དྲག་པོ་ནི་རུ་ཧ་ཞེས་བྱ་བ་དང༌། མས་གཏོང་བ་ཨ་ནུ་བ་ས་སྟེ། འཇམ་རྩི་དང་མས་གཏོང་བ་གོང་མ་སྟེ། ཨུད་ད་ར་ཏི་ཞེས་བྱ་བའོ། །དེ་ལ་ནི་རུ་ཧ་ནི་ངེས་པར་འདོན་པ་སྟེ། ནད་མ་ལུས་པ་འབྱིན་པར་བྱེད་པའོ། །ཨ་ནུ་བ་ས་ནི་རྗེས་སུ་གནས་པར་བྱེད་པ་སྟེ། བཀྲུ་སྨན་དྲག་པོས་ནད་རྣམས་རང་གི་གནས་ལས་བསྐྱོད་ཅིང་གློངས་པ་གང་ཡིན་པ་དེ་དག་གང་གི་རྗེས་སུ་སྟེ་དེའི་འོག་ཏུ་རང་གི་གནས་སུ་གནས་ཤིང་བདེ་བར་འཇོག་པར་བྱེད་པ་དེ་ནི་ཨ་ནུ་བ་ས་སྟེ་འཇམ་རྩིའོ། །མས་གཏོང་བ་གོང་མ་ནི་བཤང་བའི་སྒོ་ལ་སོགས་པའི་མར་གྱུར་པ་ཕོ་བའི་དབང་པོ་ཞེས་བྱ་བ་དེ་ནས་སམ། དེར་གཏོང་བར་བྱེད་བ་དེ་ནི་ཨུད་ཏ་ར་བ་ཏི་སྟེ། མས་གཏོང་བ་གོང་མ་ཞེས་བྱའོ། །དེ་ཡིས་གསོ་བྱ་སྐྲ་ན་དང་ནི། །ལྟོ་སྦོས་དྲེག་ནད་མཆེར་བ་དང༌། །འཁྲུ་བ་འབའ་ཞིག་གཟེར་ནད་དང༌། །རིམས་རྙིང་བྱིང་དང་ཆམ་པ་དང༌། །ཁུ་བ་རླུང་དང་དྲི་མ་འགགས། །རླིག་རླུགས་རྡེའུ་ནད་ཟླ་མཚན་འཇིག །རླུང་གི་ནད་ནི་མི་བཟད་གསོ། །ཞེས་བྱ་བ་ལ། བཀྲུ་སྨན་དྲག་པོ་དེས་གསོ་བར་བྱ་བ་ནི། སྐྲན་ལ་སོགས་པ་ནས་རླུང་གི་ནད་མི་བཟད་པའི་བར་དུ་གསོ་ཞིང་བཙོ་བར་བྱའོ། །དྲེག་ནད་ནི་རླུང་དང་ཁྲག་འདྲེས་པ་ལས་གྱུར་པའི་རྐང་ནད་དོ། །འཁྲུ་བ་འབའ་
ཞིག་ནི་བེའུ་སྣབས་ལ་སོགས་པ་དང༌། མ་འདྲེས་པར་འཁྲུ་བའོ། །རིམས་རྙིང་པ་ནི་ཡུན་རིང་དུ་ལོན་པའི་རིམས་བྱིང་བག་ཏུ་འདུག་པའོ། །ཁུ་བ་དང་རླུང་དང་དྲི་མ་འགགས་པ་ནི་དེ་དག་ཐོགས་པའོ། །རླིག་རླུགས་ནི་དེ་འཕེལ་ཆེས་པའོ། །ཟླ་མཚན་འཇིག་པ་ནི་ཟླ་མཚན་མེད་པའོ། །རླུང་གི་ནད་མི་བཟད་པ་ནི་གསོ་བར་དཀའ་བའི་རླུང་ནད་དོ། །བཀྲུ་དྲགས་མི་བྱ་སྣུམ་དྲགས་དང༌། །གློ་རྡོལ་ཤིན་ཏུ་སྐེམ་པ་དང༌། །བེའུ་སྣབས་འཁྲུ་དང་སློན་བྲོ་དང༌། །སྦྱང་བྱས་སྣ་སྨན་གཏོང་བ་དང༌། །དབུགས་མི་བདེ་ལུད་ཆམ་གཞང་འབྲུམ། །སྐྱིགས་བུ་ལྟོ་སྦོས་མེ་དྲོད་ཆུང༌། །གཞང་སྐྲངས་ཁ་ཟས་ཟོས་ཟིན་དང༌། །ལྟོ་འགགས་བུ་ག་ཆུ་ཡོད་དང༌། །མཛེ་དང་གཅིན་ནད་སྦྲང་མདོག་དང༌། །སྦྲུམ་མ་ཟླ་བདུན་ཡན་ཆད་དོ། །ཞེས་བྱ་བ་ལ། བཀྲུ་སྨན་དྲག་པོ་གཏང་དུ་མི་རུང་བ་ནི་སྣུམ་ཤིན་ཏུ་དྲགས་པ་ལ་སོགས་པ་ནས་སྦྲུམ་མ་དང༌། ཟླ་བ་བརྒྱད་པའི་མགོ་ཟུག་པའི་བར་དུའོ། །ཤིན་ཏུ་སྐེམ་པ་ནི་ཧ་ཅང་སྦེག་ཆེས་པའོ། །བེའུ་སྣ་བས་འཁྲུ་བ་ནི་མ་ཞུ་བ་བེའུ་སྣབས་དང་བཅས་པར་འཁྲུ་བའོ། །སློན་བྲོ་བ་ནི་སྐྱུག་པ་དག་དང་ལྡན་པའོ། །སྦྱང་བ་བྱས་པ་ནི་འཁྲུ་སྨན་དང་སྐྱུག་སྨན་བཏང་པའོ། །སྣ་སྨན་བཏང་བ་ནི་སྣ་ནས་སྨན་གྱི་སྦྱོར་བ་བྱས་པའོ། །གཞང་སྐྲངས་པ་ནི་བཤང་བའི་ལམ་སྐྲངས་པ་དང་ལྡན་པའོ། །ཁ་ཟས་ཟོས་ཟིན་པ་ནི་ཟས་ལ་ཁོངས་སྤྱོད་པའོ། །དེ་བཞིན་དུ་ལྟོ་འགགས་པ་དང༌། ལྟོ་ན་བུ་ག་ཡོད་པ་དང༌། ལྟོ་ན་ཆུ་མང་པོ་ཡོད་པ་དང༌། གཅིན་ནད་སྦྲང་མདོག་ནི་སྦྲང་རྩིའི་མདོག་ལྟ་བུའི་གཅིན་ནད་ཀྱིས་ཉེན་པའོ། །དེ་ལ་སྣུམ་དྲགས་པ་ལ་བཀྲུ་སྨན་དྲག་པོ་མས་གཏོང་ན། བསྡུས་ཤིང་བསྲུལ་བའི་ནད་སློངས་པས་དམུ་རྫིང་ཆགས་པ་དང༌། སྐྲངས་པའམ། བརྒྱལ་བར་བྱེད་པར་འགྱུར་རོ། །གློ་རྡོལ་བ་དང་ཤིན་ཏུ་སྐེམ་པ་ལ་ནི། དེས་ལུས་ཤིན་ཏུ་དཀྲུགས་ཤིང་སློངས་བས་ཟུག་གཟེར་དྲག་པོ་མྱུར་དུ་སྐྱེད་པར་འགྱུར་རོ། །སློན་དང་ཁྲུས་བྱས་པ་ལ་ནི་ལུས་སྟོང་པ་སྟེ་དེ་སྐེམས་པར་མེ་ལྟར་བསྲེག་པར་
འགྱུར་རོ། །སྣ་སྨན་བཏང་བ་ལ་ནི་སྟེང་གི་རྩ་སྒོ་ཤིན་ཏུ་ཕྱེ་བས་གནོད་པ་བྱེད་པར་འགྱུར་རོ། །རྟག་ཏུ་སློན་པ་ལ་སོགས་པ་ནི་རླུང་གིས་བཀྲུ་སྨན་དྲག་པོ་གྱེན་དུ་འདྲེན་པར་འགྱུར་རོ། །གཞང་འབྲུམ་ཡོད་པ་ལ་ནི་རྒྱུ་མའི་ལམ་འགགས་པས་ཐུར་དུ་རྒྱུར་མི་སྟེར་བའི་ཕྱིར་སྲོག་ལ་གནོད་པར་འགྱུར་རོ། །ཟས་ཟོས་ཟིན་པའི་ཕྱིར་ལ་ནི་རང་ནད་འཕེལ་ཞིང་མ་ཞུ་བ་ལ་སོགས་པ་ལས་འཆི་བར་འགྱུར་རོ། །ལྟོ་སྦོས་པ་དང་ལྟོ་འགགས་པ་ལ་སོགས་པ་ནི་རླུང་གིས་ཤས་ཆེར་འགགས་པས་འཆི་བར་འགྱུར་རོ། །སྦྲུམ་མའི་ཉེས་པ་ནི་སྔར་བཤད་པ་ཡིན་ནོ། །བཀྲུ་དྲག་བྱ་ཉིད་འཇམ་རྩི་བྱ། །ཁྱད་པར་དུ་ནི་མེ་དྲོད་ཆེ། །རྩུབ་དང་རླུང་ནད་གཅིག་པུས་ཉེན། །ཞེས་བྱ་བ་ལ། གང་ལ་བཀྲུ་སྨན་དྲག་པོ་གཏང་བར་བྱ་བ་དེ་ཉིད་ལ། འཇམ་རྩི་བྱ་སྟེ། དེ་དག་ཉིད་ལ་སྣུམ་གྱི་ཆོ་ག་མས་གཏོང་བར་བྱའོ། །དེ་ལས་ཀྱང་ཁྱད་པར་དུ་མེ་དྲོད་ཆེ་ཞིང་ཁོང་པའི་དྲོད་ཆེ་བ་དང༌། དེ་བཞིན་དུ་ཁོང་རྩུབ་པ་དང༌། རླུང་ནད་གཅིག་པུས་ཉེན་ཅིང་ནད་གཞན་དང་མ་འདྲེས་པའི་རླུང་ནད་ཀྱིས་གཟིར་ཞིང་གནོད་པ་ལ་འཇམ་རྩི་བྱའོ། །འཇམ་རྩི་མི་བྱ་བའང་དེ་ཉིད་དོ། །དེ་བཞིན་སྐྱ་རྦབ་མིག་སེར་དང༌། །ཚིལ་ཆེ་ཆམ་བཏབ་ཟས་མ་ཟོས། །བཤང་བ་འཁྲུ་བར་བྱེད་པ་དང༌། །ལྟོ་ལྕི་ལྟོ་ནད་བད་ཀན་ཅན། །མཆིལ་མ་མང་དང་ཤིན་ཏུ་སྦོམ། །ལྟོ་ན་སྲིན་ཡོད་རླུང་འཁྱིམས་དང༌། །དུག་དག་འཐུངས་དང་འབྲུམ་བུས་བཏབ། །རྐང་བམ་ལྐོག་མའི་ལྦ་བ་ཅན། །ཞེས་བྱ་བ་ལ། འཇམ་རྩི་མི་བྱ་བའི་ཡུལ་ཡང༌། གང་སྔར་བཀྲུ་སྨན་དྲག་པོ་བྱར་མི་རུང་བར་བཤད་པ་དེ་ཉིད་ཡིན་ནོ། །གཞན་དེ་བཞིན་དུ་འཇམ་རྩི་བྱར་མི་རུང་བ་ནི། སྐྱ་རྦབ་དང་མི་གསེར་ལ་སོགས་པས་བཏབ་པ་དག་ལ་ཡང་བྱར་མི་རུང་ངོ༌། །རླུང་འཁྱིམས་པ་ནི་ཚིལ་གྱི་ནང་དུ་ཞེན་པའི་རླུང་ངོ༌། །འབྲུམ་བུ་ནི་འབྲས་ཀྱི་ཕྲེང་བའོ། །དེ་གཉིས་སྦུ་གུ་གསེར་སོགས་དང༌། །ཤིང་རུས་འོད་མ་ལས་བྱས་པ། །བ་ལང་མཇུག་འདྲ་བུག་རྡོལ་མེད། །འཇམ་ཞིང་དྲང་ལ་ཁ་ཟླུམ་པ། །ཞེས་བྱ་བ་ལ། བཀྲུ་སྨན་
དྲག་པོ་མས་གཏོང་བ་དང༌། འཇམ་རྩི་བཏང་བ་དེ་གཉིས་ཀྱི་སྦུ་གུ་ནི་འདི་ལྟར་བྱ་སྟེ། གསེར་ལ་སོགས་པ་ཞེས་བྱ་བ་གསེར་དང་དངུལ་དང་ཟངས་དང་ཞ་ཉེ་དང༌། རོ་ཉེ་ལས་བྱས་པའོ། །དེ་བཞིན་དུ་དབྱིབས་ནི་བ་ལང་གི་མཇུག་མ་ལྟར་རིམ་གྱིས་ཕྲ་བའོ། །བུག་རྡོལ་མེད་པ་ནི་སྤེལ་མེད་པའོ། །འཇམ་པ་ནི་རྩུབ་པ་མེད་པའོ། །དྲང་བ་ནི་མ་ཡོ་བའོ། །ཁ་ཟླུམ་པ་ནི་རྩེ་མོ་མི་རྣོ་བའོ། །ལོ་གཅིག་མ་ལོན་པར་སོར་ལྔ། །ལོ་ཚད་ལོ་བདུན་པ་ཡི་བར། །ཚད་ནི་སོར་དྲུག་ཡིན་པར་བཤད། །ལོ་བདུན་པ་ཡི་བདུན་ཉིད་དེ། །བཅུ་གཉིས་པ་ལ་སོར་བརྒྱད་བྱ། །བཅུ་དྲུག་ཡན་ཆད་སོར་དགུ་སྟེ། །ཉི་ཤུ་ཡན་ཆོད་སོར་བཅུ་གཉིས། །ལོ་གཞན་དག་ལ་ན་ཚོད་དང༌། །སྟོབས་དང་ལུས་ཚད་བརྟགས་ནས་ནི། །ཚད་ནི་མངོན་པར་བསྐྱེད་པར་བྱ། །ཞེས་བྱ་བ་ལ། བྱིས་པ་ལོ་གཅིག་མ་ལོན་པ་ལ་གཏོང་བའི་སྦུ་གུ་ནི་སྲིད་སོར་ལྔ་བྱའོ། །ལོ་ཚང་སྟེ་ལོ་གཅིག་ལོན་པའི་བྱིས་པ་ནས་ལོ་བདུན་པའི་བར་གྱི་བྱིས་པའི་གཅེའུའི་ཚད་ནི་སོར་དྲུག་པ་བྱ་བ་ཡིན་པར་བཤད་དོ། །དེ་ནས་བྱིས་པ་ལོ་དྲུག་ལོན་པ་ལ་གཅེའུ་སོར་དྲུག་པ་བྱའོ། །ལོ་བདུན་རྫོགས་པའི་ཚེ་ནི་སོར་བདུན་པ་ཉིད་བྱའོ། །ལོ་བཅུ་གཉིས་ལོན་པ་ལ་ནི་གཅེའུ་སོར་བརྒྱད་པ་བྱའོ། །ལོ་བཅུ་དྲུག་ལོན་པ་ནས་ལོ་བཅུ་དགུ་ལོན་པའི་བར་ལ་གཅེའུ་སོར་དགུ་པ་བྱའོ། །ལོ་ཉི་ཤུ་ལོན་པ་ཕན་ཆད་ནི་གཅེའུ་སོར་བཅུ་གཉིས་པ་བྱ་ལ། ཡང་ལོ་གཞན་དེ་དག་གི་ཚེ་ན་སྟོབས་དང་ལུས་ཀྱི་ཚད་བརྟགས་ནས་གཅེའུའི་ཚད་མངོན་བར་སྐྱེད་ཅིང་འཕེལ་བར་བྱའོ། །དེ་ཡང་ལོ་གཅིག་མ་ལོན་པ་ལ་གཅེའུའི་ཚད་སོར་ལྔ་བྱ་བར་བཤད་ལ། དེ་རྫོགས་ནས་ལོ་བཅུ་དྲུག་ལོན་པའི་བར་ལ་སོར་དྲུག་བྱ་བར་བཤད་པས། དེའི་ལོ་གཞན་དག་ལ་ནི་ཚོད་གང་ཡིན་པ་དང༌། དེ་བཞིན་དུ་སྟོབས་དང་ལུས་ཀྱི་ཚད་དེ་བརྟགས་ཏེ་བར་སྐབས་དེར་ན་ཚོད་ལ་སོགས་བ་སྐྱེ་བ་བཞིན་དུ་གཅེའུ་ཡང་བསྐྱེད་པར་བྱའོ། །དེ་བཞིན་དུ་ལོ་གཞན་དག་ནི་ན་ཚོད་ཀྱི་བར་གྱི་ལོ་ལ་ཡང་བསྒྲེ་བར་བྱའོ། །རྩ་བ་
རང་གི་མཐེ་བོང་མཉམ། །རྩེ་མོ་མཐེའུ་ཆུང་ཚད་དུ་བྱ། །ཞེས་བྱ་བ་ལ། གཅེའུའི་རྩ་བའི་གནས་སུ་རང་གི་མཐེ་བོའི་ཚད་ཅེས་པ། ནད་པའི་མཐེ་བོང་དང་སྦོམ་གྱི་ཚད་མཉམ་པར་བྱའོ། །རྩེ་མོ་སྟེ་གཅེའུའི་ཁའི་ཕྱོགས་ནད་པའི་མཐེའུ་ཆུང་དང་སྦོམ་མཉམ་པར་བྱའོ། །ལོ་གཅིག་ལོན་སོར་ནས་གཟུང་སྟེ། །དེ་ཡི་ཕྱེད་ཕྱེད་ཀྱིས་བསྐྱེད་བྱ། །གང་ཞིག་རྩ་བའི་བུ་གའི་ཚད། །སོར་མོ་གསུམ་རྩེ་ཤོང་བ་མཆོག །མུངྒ་མ་ཤ་སྲན་མ་བཙོས། །རྒྱ་ཤུག་འབྲས་ཤོང་རིམ་བཞིན་བྱ། །ཞེས་བྱ་བ་ལ། ན་ཚོད་ཇི་སྐད་བསྟན་པའི་རིམ་པས་གཅེའུའི་ཚད་བསྟན་པའི་རིམ་པ་ལས་མ་འཆོལ་བར་བྱས། བྱིས་པ་ལོ་གཅིག་ལོན་ཞིང་ཚང་བའི་སོར་ཚད་ནས་བཟུང་སྟེ། དེའི་ཕྱེད་ཕྱེད་བསྐྱེད་པར་བྱ་ཞིང༌། ཇི་སྲིད་དུ་བུ་གསོར་གསུམ་པར་གྱུར་པ་དེ་སྲིད་ཀྱི་བར་དུ་བསྐྱེད་པར་བྱ་སྟེ། དེ་ནི་བུ་གའི་ཆེ་ཚད་སྟེ་མཆོག་ཡིན་པས་ན། དེ་ལས་ཀྱང་ལྷག་པར་མི་བྱ་སྟེ། ལོ་གཅིག་མ་ལོན་པ་ལ་ནི་རྩ་བའི་བུ་ག་སོར་གཅིག་པས་ཆུང་བར་བྱའོ། །རྩེ་མོ་ཡང་སྲན་མུངྒ་ཤོང་བ་བས་ཅུང་ཟད་ཆུང་བར་བྱ། དེའི་ཕྱེད་ཕྱེད་ཅེས་བྱ་བ་ལ། དེ་ཡི་ཞེས་བྱ་བ་ནི་སོར་ཚད་ལ་སྙེགས་ལ། དེས་ན་སོར་གྱི་ཕྱེད་ཕྱེད་ཀྱིས་བསྐྱེད་ཅིང༌། འཕེལ་བར་བྱ་བ་ནི། ཇི་སྲིད་རྩ་བའི་བུ་གར་སོར་གསུམ་ཤོང་བར་གྱུར་པ་དེ་སྲིད་ཀྱི་བར་དུ་བསྐྱེད་པར་བྱའོ། །རྩེ་མོའི་བུ་ག་ནི་ལོ་གཅིག་ལོན་པའི་གཅེའུའི་བུ་ག་སྲན་མུངྒ་སྟེ། མོན་སྲན་སྡེའུ་ཤོང་བ་ནས་རྒྱ་ཤུག་གི་བར་དུ་རིམ་བཞིན་དུ་བསྐྱེད་པར་བྱའོ། །མཆོག་ཅེས་བྱ་བ་ནི་འདིར་ཡང་སྦྱར་བར་བྱ་སྟེ། གང་རྒྱ་ཤུག་གི་འབྲས་བུ་ཤོང་བའི་ཚད་དུ་བྱས་པའི་གཅེའུའི་བུ་ག་ནི་ཆེ་ཚད་ཡིན་པས་དེ་ལས་ལྷག་པར་ནི་མི་བྱའོ། །དེ་བས་ན་ལོ་གཅིག་ལོན་པ་ནས་ལོ་དྲུག་པའི་བར་གྱི་གཅེའུའི་རྩེ་མོའི་བུ་གའི་ཚད་ནི་མུངྒ་ཤོང་བ་ཙམ་བྱའོ། །ལོ་བདུན་པ་ནས་ལོ་བཅུ་གཅིག་པའི་བར་གྱི་གཅེའུའི་བུ་ག་ནི་མ་ཤ་ཤོང་བའོ། །ལོ་བཅུ་གཉིས་པ་ནས་བཅྭ་ལྔའི་བར་གྱི་ནི་སྲན་མ་སྐམ་པོ་ཤོང་བའོ། །
ལོ་བཅུ་དྲུག་པ་ནས་བཅུ་དགུ་པའི་བར་དུ་ནི་སྲན་མ་བཙོས་བ་ཤོང་བའོ། །ཉི་ཤུ་ལོན་པ་ཡན་ཆད་ནི་གཅེའུའི་བུ་ག་ནི་རྒྱ་ཤུག་གི་འབྲས་བུ་ཆུང་དུ་ཤོང་བ་ཙམ་བྱའོ། །རྩ་བའི་བུ་གའི་ཚད་ཀྱི་ནི། །མཐར་ནི་བུ་ག་འགེགས་པར་བྱ། །ཞེས་བྱ་བ་ལ། མཐར་ཞེས་བྱ་བ་རྩེ་མོར་རྩ་བའི་བུ་གའི་ཚད་ཇི་ལྟ་བ་ལས་དེའི་གག་པ་འཁོར་ལོ་ལྟ་བུ་གང་ཤིང་བསྒྲུབ་པར་བྱའོ། །རྩེ་མོར་ཁ་བཀག་ཅེས་བྱ་བ་ནི་གཅེའུ་དེའི་རྩེ་མོའི་ཁ་རས་བལ་ལ་སོགས་པའི་སྡོང་བུ་ལྟ་བུས་ཁ་བཀབ་སྟེ། རླུང་ལ་སོགས་པ་ནང་དུ་ཞུགས་པ་དགག་པའི་ཕྱིར་དེ་ལྟར་བྱའོ། །གཅེ་རྩ་རང་གི་སོར་གཉིས་ཀྱིས། །ཆོད་པར་འགག་པ་གཉིས་པ་བྱ། །ཞེས་བྱ་བ་ལ། དེ་བཞིན་དུ་གཅེའུ་དེའི་རྩ་བའི་ཕྱོགས་སུ་རང་གི་ཞེས་པ་ནད་པ་བདག་ཉིད་ཀྱི་སོར་གཉིས་ཀྱིས་ཆོད་པར་འགག་པ་གཉིས་པ་བྱ་སྟེ། དེ་ལ་རྐྱལ་བུ་གདགས་ཤིང་བཅིང་དགོས་པའི་ཕྱིར་རོ། །དེར་ནི་རྐྱལ་བུ་གདགས་བྱ་བ། །ར་ལུག་མ་ཧེ་ལ་སོགས་པའི། །ལྒང་པ་ལེགས་མཉེས་སྲ་བ་དང༌། །དམར་བཙོས་བུ་ག་ཐག་ཐུག་མེད། །དྲི་ང་རྩ་རིས་མེད་སྲབ་པར། །སྨན་ནི་ལེགས་པར་བླུགས་བྱས་ལ། །སྲད་བུས་དམ་པར་བཅིང་བར་བྱ། །ཞེས་བྱ་བ་ལ། གག་པ་གཉིས་ཀྱི་བར་དུ་ལུག་ལ་སོགས་པའི་ལྒང་བའི་རྐྱལ་བུ་ལེགས་པར་མཉེས་པ་དང༌། དེ་བཞིན་དུ་སྲ་བ་སྟེ་མ་གས་པ་དང་དམར་པོར་བཙོས་ཏེ་ཚོན་གཞན་གྱི་ཁ་དོག་མེད་པ་ཐག་ཐུག་མེད་ཅིང་མདུད་པ་ཆགས་པ་མེད་ཅིང་རུལ་བ་ལ་སོགས་པའི་དྲི་ང་བ་མེད་པ་རྩའི་རི་མོ་མེད་པས་སྲབ་སྟེ་མཐུག་བ་མ་ཡིན་པ། དེ་ལྟ་བུར་སྨན་བདེ་བར་བླུགས་ཤིང་གཞག་ལ། སྲད་བུ་སྲ་བས་ལེགས་པར་དམ་དུ་བཅིང་བར་བྱའོ། །ལྒང་མེད་རྐྱལ་པའི་དཔུང་པའམ། །བྱིན་པའི་ལྤགས་སམ་རས་སྟུག་བཟང༌། །ཞེས་བྱ་བ་ལ། གོང་དུ་སྨོས་པ་ལྟ་བུའི་ལྒང་པ་མེད་ན་རྐྱལ་པའི་དཔུང་པ་བཅད་པའམ། བྱིན་པའི་པགས་པ་ལེགས་པར་མཉེས་
པ་དེ་ལ་བཅིང་ཞིང་གདགས་པར་བྱའོ། །ཡང་ན་རས་སྟུག་ཅིང་བཟང་ལ་བུ་ག་མེད་པ་སྤྲ་ཚིལ་ལ་སོགས་པས་བསྐུས་ལ། ཆུ་ཐུབ་བ་ལས་སྨན་བླུགས་པའི་སྣོད་བྱའོ། །ནི་རུ་ཧ་ཚད་དང་པོ་ནི། །ལོ་གཅིག་པ་ལ་སྲང་གཅིག་མཆོག །ཇི་སྲིད་སྲང་ནི་བཅུ་གཉིས་བར། །ལོ་རེ་སྲང་རེས་བསྐྱེད་པར་བྱ། །བཅུ་གཉིས་པ་ནས་བཅྭ་བརྒྱད་བར། །དེ་ཡང་བདུན་ཅུའི་བར་ཚད་འདི། །དེ་ཕན་སྲང་ཚད་ཉི་ཤུ་ཉིད། །ཅེས་བྱ་བ་ལ། ནི་རུ་ཧ་སྟེ་བཀྲུ་སྨན་དྲག་པོ་མས་གཏོད་བའི་ཚད་ནི་ལོ་གཅིག་ལོན་པ་ལ་སྲང་གཅིག་མཆོག་སྟེ། ཆེ་ཚད་ཡིན་ནོ། །ལོ་གཅིག་མ་ལོན་པ་སྲང་གཅིག་ཏུ་ཅུང་ཟད་མ་ལོངས་པ་ཚད་ཡིན་ནོ། །དེ་ཕན་ཆད་ལོ་རེ་རེ་ཞིང་སྲང་རེ་རེས་བསྐྱེད་དེ། ལོ་བཅུ་གཉིས་པའི་བར་ལ་སྲང་བཅུ་གཉིས་གཏང་བའི་བར་དུ་བསྐྱེད་པར་བྱའོ། །ནི་རུ་ཧ་སྲང་བཅུ་གཉིས་བྱས་པ་དེ་ཕན་ཚད་ཀྱི་ལོ་རེ་བཞིན་སྲང་གཉིས་བསྐྱེད་པར་བྱའོ། །ལོ་བཅུ་གཉིས་ལོན་པ་ནས། བཅུ་བདུན་ལོན་པའི་བར་ལ་བྱའོ། །བཅྭ་བརྒྱད་པ་ནི་སྲང་ཉི་ཤུ་རྩ་བཞི་ཆེ་ཚད་ཡིན་ཏེ། དེ་ཡང་ནི་རུ་ཧ་ཚད་འདི་ནི་ལོ་བཅུ་བདུན་ལོན་པའི་བར་གྱི་ཚད་ཡིན་ནོ། །ལོ་བདུན་ཅུ་ལོན་པ་ཕན་ཆད་ཀྱི་ནི་སྲང་ཉི་ཤུ་ཉིད་ཆེ་ཚད་ཡིན་ནོ། །ཞེས་བྱ་བ་ནི་འདིར་ངེས་པར་བཟུང་བའི་དོན་ནོ། །ཆེ་ཚད་སྲང་ཉི་ཤུ་ཁོ་ན་ཡིན་གྱི་དེ་ལས་ལྷག་པ་མི་བྱའོ། །ཞེས་བྱ་བའི་དོན་ནོ། །བཀྲུ་སྨན་དྲག་ཚད་ཇི་ལྟ་བ། །དེ་ཡི་བཞི་ཆ་འཇམ་རྩིའི་ཚད། །ཅེས་བྱ་བ་ལ། བཀྲུ་སྨན་དྲག་པོ་ནི་རུ་ཧའི་ཚད་ནི་ཚོད་གང་དང་གང་ལས་ཇི་ལྟར་ཡིན་པ་དེ་དང་དེའི་བཞི་ཆ་འཇམ་རྩི་ཞེས་བྱ་བ། སྣུམ་གྱི་ཆོ་ག་མས་གཏོང་བའི་ཚད་ཡིན་ནོ། །དེ་ཡང་ལོ་དང་པོ་ལ་ནི་རུ་ཧའི་ཚད་སྲང་གཅིག་ཡིན་ལ། ཚད་དེའི་བཞི་ཆ་ཞོ་གཉིས་ལ་ནི་འཇམ་རྩི་ལོ་གཅིག་པ་ལ་གཏང་བའི་ཚད་ཡིན་ནོ། །དེ་བཞིན་དུ་བཅུ་གཉིས་པ་ལ་སྲང་བཅུ་གཉིས་ནི་རུ་ཧའི་ཚད་ཡིན་པ་ལས། དེའི་བཞི་ཆ་སྲང་གསུམ་འཇམ་རྩིའི་ཚད་དོ། །དེ་བཞིན་དུ་ལོ་བཅྭ་བརྒྱད་ལོན་
པའི་ཚད་ཉི་ཤུ་རྩ་བཞི་ཡིན་ལ། དེའི་བཞི་ཆ་ནི་སྲང་དྲུག་སྟེ། དེ་བཞིན་དུ་ཐམས་ཅད་ལ་ཡང་སྦྱར་བར་བྱའོ། །བཀྲུ་སྨན་དྲག་བྱ་སྣུམ་དུགས་བྱ། །སྦྱང་བྱས་ནས་ཀྱང་སྟོབས་ཐོབ་པ། །འཇམ་རྩི་གཏང་བར་འོས་པ་ནས། །ཐོག་མ་ཉིད་དུ་འཇམ་རྩི་གཏང༌། །ཞེས་བྱ་བ་ལ། ནི་རུ་ཧ་ཞེས་བྱ་བ་བཀྲུ་སྨན་དྲག་པོ་གཏང་བར་བྱ་ཞིང་འོས་པ་སྟེ། སྣུམ་དང་དུགས་བྱ་བ་སྟེ། དང་པོ་སྣུམ་གྱི་ཆོ་ག་བྱས་ལ། དེའི་འོག་ཏུ་དུགས་བྱའོ། །དེ་བཞིན་དུ་སྦྱང་བར་བྱ་བ་སྟེ། བཀྲུ་སྨན་དང༌། སྐྱུག་སྨན་བྱས་ནས་ཀྱང་སླར་སྟོབས་ཐོབ་ཅིང༌། ཉམས་སྟོབས་བརྟགས་པ་དག་འཇམ་རྩི་གཏང་བར་འོས་ཤིང་རིགས་པར་ཤེས་ནས། དང་པོ་ཐོག་མ་ཁོ་ནར་བཀྲུ་སྨན་དྲག་པོ་མས་གཏོང་བའི་འཇམ་རྩི་གཏང་བར་བྱའོ། །དགུན་དཔྱིད་ཉིན་པར་བཏང་དེ་ལས། །གཞན་དུ་མཚན་བཏང་ལ་ལ་འདོད། །ཅེས་བྱ་བ་ལ། དགུན་ཞེས་བྱ་བ་གྲང་བའི་དུས་སྤྱིར་གྲང་བ་སྟེ། དགུན་སྟོད་དང་དགུན་སྨད་ཀྱི་དུས་སུ་འཇམ་རྩི་ཉིན་པར་གཏང་བར་བྱའོ། །དེ་ལས་གཞན་དུ་ཞེས་པ་གོང་མ་ལས་གཞན་པའི་དུས་སོ་ག་དང༌། དབྱར་དང་སྟོན་ཀ་མཚན་མོའི་དུས་སུ་འཇམ་རྩི་གཏང་བར་བྱའོ། །ཞེས་སྲོག་འཚོ་བའི་སློབ་དཔོན་ལ་ལ་འདོད་དོ། །སྐུ་བྱུག་ཁྲུས་བྱས་སྔོན་ཐང་ལས། །བཞི་གསུམ་ཕན་ཞིང་ཡང་བ་དང༌། །སྣུམ་དང་རྩུབ་ཆེས་མ་ཡིན་བཟའ། །ཁུ་བ་ལ་སོགས་ཟོས་རྗེས་བཏུང༌། །བཅགས་ལ་བཤང་གཅི་བསལ་ནས་ནི། །མལ་དུ་བདེ་བར་གནས་བྱས་ལ། །མཐོ་དམན་མེད་པར་མགོ་སྨད་དེ། །གློ་གཡོན་གྱིས་ནི་ཕབ་ནས་སུ། །རྐང་པ་གཡས་པ་བཀུག་ནས་ནི། །རྐང་པ་གཡོན་པ་བརྐྱང་བར་བྱ། །ཞེས་བྱ་བ་ལ། དང་པོ་བསྐུ་བྱུག་བྱས་ལ། དེའི་འོག་ཏུ་ཁྲུས་བྱ་བ་ཡིན་པས་ན། ནད་པ་དེ་བསྐུ་བྱུག་དང་ཁྲུས་བྱའོ། །དེ་ནས་སྔོན་བསྟེན་ཞིང་གོམས་པའི་ཐ་མ་ལ་བཞི་ཆ་གསུམ་སྟེ། ནར་མར་བཟའ་བའི་ཐང་ལས་བཞི་ཆ་ཕྲི་ལ། བཟའ་བ་ནི་ཡང་བ་དང༌། ཧ་ཅང་རྩུབ་ཆེས་པ་དང༌།
སྣུམ་ཆེས་པ་མ་ཡིན་པ། སྣུམ་རྩུབ་རན་པ་ཕན་ཞིང་གནོད་པ་མེད་པའི་ཟས་བཟའ་བར་བྱའོ། །དེའི་འོག་ཏུ་འཚལ་ནན་བཏུང་བ་ནི་མུངྒའི་ཁུ་བ་ལ་སོགས་པ་གནོད་པ་མེད་ཅིང་རྗེས་སུ་མཐུན་པ་བཏུང་བར་བྱའོ། །དེ་བཞིན་དུ་བཅགས་པ་སྟེ། ཅུང་ཟད་ཅིག་ཕན་ཚུན་བཅགས་པ་དང༌། བཤང་བ་དང༌། གཅི་བ་ལེགས་པར་བསིལ་ཞིང་དོར་བ་དང༌། དེ་བཞིན་དུ་རླུང་མེད་པའི་ཁང་པའི་ནང་དུ་མལ་བདེ་བ་ཤིན་ཏུ་མཐོ་བ་དང༌། ཤིན་ཏུ་དམའ་བ་མ་ཡིན་པ་མགོ་སྨད་པ་སྟེ། རྐང་པའི་ཕྱོགས་ཅུང་མཐོ་བར་གློ་གཡོན་པ་ལེགས་པར་ཕབ་ལ། རྐང་པ་གཡས་པ་བཀུག་ནས་རྐང་པ་གཡོན་པ་ལེགས་པར་བརྐྱང་བའི་ཚུལ་དེ་ལྟར་གནས་པར་བྱས་ལ། དེ་ནས་དེ་ལ་གཅེའུ་གཞག་པར་བྱའོ། །དེ་ཡང་ཇི་ལྟ་ཞེན། དེ་ནས་དེ་ལ་གཅེའུ་ཁ་དང༌། །གཞང་སྒོ་སྣུམ་གྱིས་བསྐུས་ནས་ནི། །གཅེའུ་ལྒང་པའི་དབུགས་བཏོན་ལ། །ཁ་བཅིངས་ལག་པ་མི་འདར་བར། །རྒྱབ་ཀྱི་ཕྱོགས་སུ་འདུག་ནས་ནི། །ཤིན་ཏུ་མྱུར་དང་དལ་མིན་དང༌། །ཧ་ཅང་ཤུགས་དྲག་དལ་མིན་པར། །རན་པར་ལན་ཅིག་ཁོ་ནར་བཙིར། །རླུང་ནི་ལྷག་པར་གནས་པ་ན། །ལྷག་མ་ཅུང་ཟད་ལུས་པར་བྱ། །ཞེས་བྱ་བ་ལ། དེ་ནས་དེའི་འོག་ཏུ་སྐྱེས་བུ་དེ་ལ་གཅེའུ་གཞུག་པའི་ཐབས་ནི། གཅེའུ་ཁ་སྟེ་རྩེ་མོ་སྣུམ་གྱིས་བསྐུ་བ་དང༌། གཞང་ཞེས་བྱ་བ་བཤང་བའི་ལམ་ཡང་སྣུམ་གྱིས་བསྐུས་ཏེ། དབུགས་བཏོན་ཞེས་པ་ལྒང་པའི་ནང་གི་དབུགས་བཏོན་ལ། གཅེའུའི་ཁ་བཅིངས་ཤིང་བསྡམས་ནས། ལག་པ་མི་འདར་ཞིང་བརྡབས་བག་ཏུ་མ་གྱུར་པས་རྒྱབ་ཀྱི་ཕྱོགས་ནས་དེ་ལ་མངོན་པར་ཕྱོགས་པར་འདུག་སྟེ་གཏང་བར་བྱའོ། །དེའི་འོག་ཏུ་ཤིན་ཏུ་མྱུར་བ་དང༌། ཤིན་ཏུ་བུལ་བ་དང༌། དམ་པ་མ་ཡིན་པ་དང༌། ཧ་ཅང་ཤུགས་དྲག་པ་དང༌། ཧ་ཅང་དལ་བར་མ་ཡིན་པར་ལན་ཅིག་ཁོ་ནར་བཙིར་བར་བྱའོ། །ཡང་ནས་ཡང་དུ་ནི་མ་ཡིན་ནོ། །དེ་ཡང་ལྒང་པ་དེའི་ཞབས་ན་
སྨན་གྱི་ལྷག་མ་ཅུང་ཟད་ལུས་པར་བྱའི། རྣམ་པ་ཐམས་ཅད་ནས་ཐམས་ཅད་དུ་བཙིར་བར་མི་བྱའོ། །དེ་ཅིའི་ཕྱིར་ཞེ་ན། སྨན་གྱི་ལྷག་མར་རླུང་ཡོད་པའི་ཕྱིར་རོ། །དེ་ཡང༌། ལྒང་པ་དེའི་ཞབས་སྨན་གྱི་ལྷག །མ་ལུས་པར་ནི་བླུགས་བ་ཡིས། །རླུང་ཞུགས་ནས་ནི་རྣམ་འཁྲུགས་པས། །གཟེར་དང་ནད་རྣམས་སྐྱེད་པར་འགྱུར། །ཞེས་བཤད་པ་ཡིན་ནོ། །བཏང་ནས་ལུས་ནི་གན་རྒྱལ་གཞག །རྐུབ་ཙོས་ལག་པས་བརྡབ་པར་བྱ། །རྟིང་པས་མཇུག་ཙོས་བརྡུང་བྱ་ཞིང༌། །རྟིང་པ་བཏེག་ལ་ལན་གསུམ་གསིག །ཅེས་བྱ་བ་ལ། འཇམ་རྩི་བཏང་ནས་དེའི་ལུས་གན་རྐྱལ་དུ་བཞག་ལ། འཇམ་རྩི་བཏང་བ་དེའི་རྐུབ་ཙོས་ལག་པས་བརྡབ་པར་བྱ་ཞིང་བསྣུན་པར་བྱའོ། །དེ་བཞིན་དུ་ནད་པའི་རྟིང་པ་གཉིས་ཀྱིས་མཇུག་ཙོས་བརྡུང་ཞིང་བརྡེག་པར་བྱའོ། །དེ་བཞིན་དུ་མལ་ནས་རྟིང་པ་ཡར་བཏེག་སྟེ། ལན་གསུམ་གྱི་བར་དུ་གསིག་ཅིང་གྱེན་དུ་དྲང་བར་བྱའོ། །དེ་ནས་ལུས་ནི་བརྐྱང་ནས་ནི། །སྔས་དང་བཅས་པའི་རྟིང་པར་ནི། །ཁུ་ཚུར་གྱིས་བརྡུངས་ལུས་ཀྱང་ནི། །སྣུམ་གྱིས་བསྐུས་ལ་མཉེ་བར་བྱ། །ཚོར་བས་ཉེན་པས་སྣུམ་དག་ནི། །མྱུར་དུ་ཕྱིར་འབྱུང་མི་བྱེད་དོ། །གལ་ཏེ་མྱུར་དུ་ཕྱིར་བྱུང་ན། །ཕན་མི་བྱེད་པས་གཞན་དག་གཏང༌། །ཞེས་བྱ་བ་ལ། དེ་ནས་དེའི་འོག་ཏུ་ནད་པའི་ལུས་བརྐྱང་བར་འགྱུར་བ་དང༌། དེ་བཞིན་དུ་སྔས་བཅུག་པ་ལ་རྟིང་པར་ཁུ་ཚུར་གྱིས་བརྡུངས་ལ། ཡན་ལག་སྣུམ་གྱིས་བྱུགས་ནས་མཉེ་བར་བྱ་སྟེ། གང་གི་ཕྱིར་ཚོར་བ་མི་བདེ་བས་ཉེན་པས་མས་གཏོང་བའི་སྣུམ་སྟེ། མྱུར་བ་ཁོ་ནར་ཕྱིར་འབྱུང་ཞིང་འཛག་པར་མི་བྱེད་དོ། །གལ་ཏེ་མྱུར་དུ་ཕྱིར་འབྱུང་ཞིང་ལྡོག་པར་གྱུར་ན། འཇམ་རྩི་གཉིས་པ་སྦྱར་ཞིང་གཏང་བར་བྱ་སྟེ། གང་གི་ཕྱིར་སྣུམ་ནང་དུ་ཆགས་ན། ནད་པའི་རླུང་ལ་སོགས་པའི་ནད་སེལ་བའི་བྱ་བ་བྱེད་པར་འགྱུར་བས། དེ་མྱུར་དུ་བྱུང་ན་བྱ་བ་དེ་མི་བྱེད་པའི་ཕྱིར། གཞན་དག་གིས་བསྣན་
དགོས་སོ། །མེ་དྲོད་ཆེ་ཞིང་སྣུམ་བྱུང་ན། །དགོངས་ཀ་ཁ་ཟས་ཡང་བ་སྦྱིན། །ཞེས་བྱ་བ་ལ། མེ་དྲོད་ཤིན་ཏུ་ཆེ་ཞིང་སྣུམ་ཕྱིར་བྱུང་བར་གྱུར་ན། དགོངས་ཀ་སྟེ་ཉིན་པར་གྱི་མཐར་ཁ་ཟས་ཡང་མོ་དག་སྦྱིན་པར་བྱའོ། །དབྱུང་བའི་དུས་ཀྱི་དམ་པ་ནི། །ཐུན་གསུམ་ཡིན་ཏེ་དེ་ཕན་ཆད། །ཉིན་མཚན་གཅིག་ནི་བསྡད་ནས་སུ། །དེ་ཡི་འོག་ཏུ་རེང་བུ་ཡིས། །སྣུམ་དབྱུང་ཕྱིར་ནི་འབད་བྱ་བ། །མས་གཏོང་བ་ནི་རྣོན་པོ་བྱ། །ཞེས་བྱ་བ་ལ། འཇམ་རྩི་དབྱུང་བའི་དུས་ཀྱི་དམ་པའམ། མཆོག་ནི་ཐུན་གསུམ་ཡིན་ཏེ། དེ་ཕན་ཆད་ཅེས་བྱ་བའི་འོག་ཏུ་ཉིན་མཚན་གཅིག་འདས་ཀྱི་བར་དུ་བྱུང་བར་མ་གྱུར་ན། ཉིན་མཚན་གཅིག་གི་བར་དུ་བསྡད་ནས། དེའི་འོག་ཏུ་རེང་བུ་སྦྱར་བས་འཇམ་རྩི་སྣུམ་དབྱུང་བར་བྱ་བའི་ཕྱིར། སྨན་པས་འབད་པར་བྱ་བའམ། མས་གཏོང་བའི་སྨན་རྣོན་པོ་བྱ་བ་ལ་འབད་པར་བྱའོ། །ཤིན་ཏུ་རྩུབ་པས་མ་བྱུང་ཞིང༌། །སྙོམ་བག་ལ་སོགས་ནད་མེད་ན། །བཏང་སྙོམས་སུ་ནི་གཞག་པར་བྱ། །ཞེས་བྱ་བ་ལ། ཤིན་ཏུ་ལུས་ཀྱི་ཁོང་རྩུབ་པའི་ཕྱིར། སྣུམ་མ་བྱུང་ཞིང་སླར་འཛག་པར་མ་གྱུར་ལ། གལ་ཏེ་སྙོམ་བག་གམ། རྨོངས་བག་ལ་སོགས་པའི་ནད་ཀྱི་ཉེས་པ་ཡང་མེད་ན་བཏང་སྙོམས་སུ་གཞག་པར་བྱའོ། །དེ་བྱུང་བ་ལ་འབད་པར་མི་བྱའོ། །དེ་ནས་མཚན་འདས་ནང་པར་ནི། །བཅའ་སྒ་འུ་སུ་བསྐོལ་ཆུ་འམ། །ཡང་ན་ཆུ་ཚན་འབའ་ཞིག་བཏུང༌། །ཞེས་བྱ་བ་ལ། དེ་ནས་དེའི་འོག་ཏུ་མཚན་མོ་བདེ་བར་གནས་པས་འདས་པར་བྱས་ལ། ནང་པར་གྱི་དུས་སུ་བཅའ་སྒ་དང་འུ་སུ་བསྐོལ་བའི་ཆུ་ཚན་དྲོ་འཇམ་ཙམ་བཏང་བའམ། ཡང་ན་ཆུ་བསྐོལ་བ་ཚན་ཏེ་འབའ་ཞིག་བཏུང་བར་བྱ་སྟེ། དེའི་སྣུམ་གྱི་ལྷག་མ་ཞུ་བ་དང༌། རླུང་དང༌། བད་ཀན་ཞུ་བའི་ཕྱེད་བྱ་བ་ཡིན་ནོ། །འཇམ་རྩི་བཏང་ནས་ཉིན་གསུམ་མམ། །ཉིན་ལྔ་ལོན་ནས་སླར་བཏང་བ་འམ། །ཇི་སྲིད་སྣུམ་ནི་འཇུ་འགྱུར་བའམ། །ཡང་ན་རླུང་ནི་ཤས་ཆེ་དང༌། །རྟག་ཏུ་རྩོལ་བྱེད་མེ་དྲོད་ཆེ། །ཁོང་རྩུབ་པ་ལ་ཉིན་རེ་བཏང༌། །ཞེས་བྱ་བ་ལ། དེ་ལྟར་འཇམ་རྩི་བཏང་ནས་མི་དེ་ཉི་མ་གསུམ་མམ།
ཉི་མ་ལྔ་ནས་སླར་ཡང་འཇམ་རྩི་གཏང་བར་བྱའོ། །ཡང་ན་དུས་ཇི་སྲིད་ཅིག་གིས་སྣུམ་དེ་བདེ་བར་འཇུ་བར་འགྱུར་བ་དེའི་ཚད་ཀྱིས་བཏང་ངོ༌། །ཡང་ཉིན་རེ་ཡང་བཏང་དུ་རུང་སྟེ། དེ་ཉིད་ཀྱིས་ན་རླུང་ཤས་ཆེ་བ་ལ་སོགས་པ་ཡིན་ཏེ། རླུང་གི་ཤས་ཆེ་ཞིང་རླུང་ནད་བདོ་བ་དང༌། དེ་བཞིན་དུ་རྟག་ཏུ་རྩོལ་བ་བྱེད་པ་སྟེ། རྒྱུན་མི་འཆད་པར་ལས་སུ་བྱ་བའི་རྩོལ་བ་དྲག་པ་བྱེད་པ་དང༌། དེ་བཞིན་དུ་མེ་དྲོད་ཆེ་བ་དང༌། སྐྱེས་བུ་ཁོང་ཤིན་ཏུ་རྩུབ་པ་ལ་ཉིན་རེ་སྟེ་ཞག་རེ་རྒྱུན་མི་འཆད་པར་གཏང་བར་བྱའོ། །དེ་ལྟར་སྣུམ་ནི་གསུམ་མམ་བཞིས། །སྣུམ་གྱུར་རྩ་སྒོ་སྦྱང་བའི་ཕྱིར། །མས་གཏོང་ཁྲུས་ཀྱིས་སྦྱང་བ་དང༌། །སྣུམ་མེད་ལུས་ནི་སྣུམ་གྱུར་གཏང༌། །ཞེས་བྱ་བ་ལ། དེ་ལྟར་རིམ་པ་འདིས་ནད་ལ་སོགས་ཚུལ་ལ་དཔགས་ཏེ། འཇམ་རྩིའི་སྣུམ་གསུམ་མམ་བཞིས་སྐྱེས་བུའི་ལུས་ཀྱི་སྣུམ་གྱུར་ནས་རྩ་སྒོ་སྦྱང་བའི་ཕྱིར་ཞེས་པ་རྩ་སྣུམ་གྱི་རྒྱུ་བ་རྣམ་པར་དག་པར་བྱ་བའི་ཕྱིར། ནི་རུ་ཧ་སྟེ་བཀྲུ་སྨན་དྲག་པོ་དང༌། སྦྱང་ཞིང་ཞི་བར་བྱ་བ་དང༌། རླུང་ཤས་ཆེ་བས་ལུས་སྣུམ་མེད་པར་གྱུར་པའི་ལུས་ལ་སྣུམ་པར་བྱ་ཞིང་ཁོང་བརྟ་བར་བྱ་བའི་ཕྱིར་སྣུམ་གྱི་ཆོ་ག་གཏང་བར་བྱའོ། །ཉི་མ་གསུམ་མམ་ཉིན་ལྔ་ན། །ཚེས་གྲངས་བཟང་ཞིང་དགེ་བ་ལ། །ཉིན་ཕྱེད་ཅུང་ཟད་ཡོལ་བའི་ཚེ། །གཏོར་མ་བཀྲ་ཤིས་ཆོ་ག་བྱ། །སྣུམ་བསྐུ་དུགས་བྱ་བཤང་གཅི་ནི། །བསལ་ཞིང་ཤིན་ཏུ་བཀྲེས་མིན་ལ། །སྐྱེས་བུའི་ནད་དམིགས་སྨན་ལ་སོགས། །འབད་དེ་ཤེས་པར་བྱས་ནས་ནི། །སྨན་པས་དེ་ལ་མཁས་པ་ནི། །མང་དང་ལྷན་ཅིག་མས་གཏོང་སྦྱར། །ཞེས་བྱ་བ་ལ། དེ་ནས་འཇམ་རྩི་མས་གཏོང་བའི་ཉི་མ་གསུམ་མམ་ཉི་མ་ལྔ་ན་བྱ་བ་བསྒྲུབ་ཅིང་བསྔགས་པའི་ཚེས་གྲངས་དང༌། བྱེད་པ་དང༌། ཐང་ཅིག་དང༌། རྒྱུ་སྐར་བཟང་པོ་དང༌། ཉིན་དགེ་བ་ལ་ཉི་མའི་ཕྱེད་ཅུང་ཟད་ཡོལ་ཞིང་འདས་པའི་ཚེ་གཏོར་མ་དང་བཀྲ་ཤིས་ཀྱི་ཆོ་ག་དག་ཇི་ལྟ་བ་བཞིན་དུ་བྱས་ཤིང་ཤིས་པ་བརྗོད་པ་དང༌། བདེ་ལེགས་ལ་སོགས་པ་དགེ་སྦྱོང་དང་བྲམ་ཟེས་བྱས་ནས། སྨན་བཀྲུ་སྨན་དྲག་པོ་མས་གཏོང་ཞིང་བརྩམ་པར་བྱ་སྟེ། དེ་ཡང་དེ་ལ་མཁས་ཤིང་མས་གཏོང་བའི་ཆོ་གའི་སྦྱོར་བ་ལ་མཁས་
བའི་སྨན་པ་མང་པོ་དང་ལྷན་ཅིག་གྲོས་བྱ་བ་དང༌། སྐྱེས་བུ་ནད་པའི་ནད་ཀྱི་དམིགས་ལ་སོགས་པ་ཡང་ཤེས་པར་བྱས་ལ། ལུས་སྣུམ་གྱིས་བསྐུ་བར་བྱ་བ་དང༌། དེ་བཞིན་དུ་དུགས་བྱ་བ་དང༌། བཤང་བ་དང་གཅི་བ་བསལ་ཞིང་དོར་བ་དང༌། ཤིན་ཏུ་བཀྲེས་པས་མ་ཡིན་ཞིང་ལྟོགས་པས་ཉེན་པ་མ་ཡིན་པ་དང༌། དེ་བཞིན་དུ་ནད་དམིགས་དང་སྨན་ལ་སོགས་པ་འབད་ཅིང་བཙལ་བས་ཤེས་ཤིང་རྟོགས་པར་བྱས་ནས་སྨན་པས་མས་གཏོང་བའི་ཆོ་ག་ལ་སྦྱར་ཞིང་བརྟག་པར་བྱའོ། །སྨན་གྱི་སྲང་ནི་ཉི་ཤུ་དང༌། །པོ་སོན་ཆ་བརྒྱད་ལྷན་ཅིག་བསྐོལ། །ཞེས་བྱ་བ་ལ། རྩ་བ་བཅུ་པ་ལ་སོགས་པའི་སྨན་སྲང་ཉི་ཤུ་འོག་ནས་མས་གཏོང་བའི་ཆོ་གའི་སྐབས་ནས་སྨོས་པ་བསྐོལ་བ་དང༌། དེ་བཞིན་དུ་པོ་སོན་ཆའི་འབྲས་བུ་བརྒྱད་ལྷན་ཅིག་བསྐོལ་བར་བྱ་སྟེ། པོ་སོན་ཆ་བརྒྱད་ལ་ནི་སྲང་གཅིག་ཙམ་ཡོད་དོ། །དེ་ལྟར་ན་སྨན་སྲང་ཉི་ཤུ་རྩ་གཅིག་དང༌། སྨན་གྱི་བཅུ་དྲུག་འགྱུར་གྱི་ཆུ་དང་སྦྱངས་ལ་དེ་ལེགས་པར་བསྐོལ་བར་བྱའོ། །དེ་ནས་ཆ་ལུགས་དང་བསྐོལ་བའི་སྨན་ཆུ་དེ། བརྒྱད་ཅུ་རྩ་བཞི་འབྱུང་བར་འགྱུར་རོ། །བསྐོལ་བ་དེ་ཡི་བཞི་ཆ་ཡི། །སྨན་མར་རླུང་ལ་རྗེས་སུ་སྦྱར། །མཁྲིས་པ་བདེ་བར་གནས་དྲུག་ཆ། །བད་ཀན་ཤས་ཆེར་བརྒྱད་ཆ་གཅིག །ཅེས་བྱ་བ་ལ། དེ་ལྟར་བསྐོལ་བ་དེ་ལས་སྣུམ་གྱི་མར་བཞི་ཆ་གཅིག་རླུང་གི་ནད་ལ་རྗེས་སུ་སྦྱར་ཞིང་གཏང་བར་བྱའོ། །མཁྲིས་པའི་ནད་ལ་ནི་བསྐོལ་བ་དེ་ལས་སྔ་མའི་ཚད་ལས་དྲུག་ཆ་སྟེ། སྲང་བཅུ་བཞི་གཏང་བར་བྱའོ། །དེ་བཞིན་དུ་བདེ་བར་གནས་ཤིང་ཐ་མལ་པར་འདུག་པ་ལ་ཡང་དྲུག་ཆ་ཉིད་གཏང་བར་བྱའོ། །བད་ཀན་ཤས་ཆེ་ཞིང་རྒྱས་པའི་ནད་ལ་ནི་དེའི་བརྒྱད་ཆ་སྟེ། སྲང་བཅུ་གཏང་བར་བྱའོ། །ཡང་ན་ཀུན་ལ་སྨན་གྱི་ནི། །བརྒྱད་ཆ་གཅིག་གམ། ཞེས་བྱ་བ་ལ། སྦྱར་བར་བྱའོ་ཞེས་བྱ་བ་འདིར་ཡང་སྦྱར་བར་བྱ་སྟེ། ཀུན་ལ་ཞེས་བྱ་བ་རླུང་དང་མཁྲིས་པ་དང༌། དེ་བཞིན་དུ་བད་ཀན་ཏེ་བདེ་བར་གནས་པ་ལ་སྨན་གྱི་བརྒྱད་ཆ་གཅིག་སྟེ། བསྐོལ་བའི་གང་བརྒྱད་ཆ་གཅིག་ཏུ་གྱུར་པ་སྲང་བཅུ་ཐམས་ཅད་ལ་སྦྱིན་པར་བྱའོ། །ཅི་ནས་ཀྱང༌། །མས་གཏོང་སྐ་སླར་མི་འགྱུར་བྱ། །ཞེས་བྱ་བ་ལ། ཡང་ན་ཐམས་ཅད་དུ་སྨན་བསྐོལ་བའི་
བརྒྱད་ཆ་གཅིག་སྦྱིན་པ་ཡིན་ནོ། །གཞན་དུ་སྨན་གྱི་ཕྱེ་མ་འམ། ལྡེ་གུའི་ཆ་ལས་མས་གཏོང་བའི་སྨན་ཤིན་ཏུ་སྐ་ཞིང་འབྱར་བ་ཡང་མ་ཡིན་ལ། ཤིན་ཏུ་སླ་ཞིང་འཛག་ཆེས་པར་ཡང་མི་འགྱུར་བ་དེ་ལྟར་སྦྱར་བར་བྱའོ། །བུ་རམ་དག་ནི་སྲང་གཅིག་དང༌། །ཞེས་བྱ་བ་ལ། རླུང་དང་མཁྲིས་པ་དང༌། བད་ཀན་དང༌། བདེ་བར་གནས་པའི་མས་གཏོང་བ་ཐམས་ཅད་ལ། བུ་རམ་སྲང་གཅིག་གཞུག་པར་བྱ་སྟེ་སྨོས་པ་ནི། དེ་ལས་ཡིད་ཆེས་པའམ། ཆུང་བ་ཡང་རུང་བའི་དོན་ནོ། །རིགས་པས་སྦྲང་རྩི་རྒྱམ་ཚ་སོགས། །ལྷག་མ། ཞེས་བྱ་བ་ལ། རྗེས་སྦྱར་བ་དང་ཀུན་ལ་ཞེས་བྱ་བ་ལ་འདིར་ཡང་སྦྱར་བར་བྱ་སྟེ། དེ་ལ་རིགས་པ་ནི་སྦྱོར་བ་སྟེ། བྱ་བའི་ཐབས་ཡིན་ནོ། །དེ་ལྟ་བུའི་རིགས་པ་དང་ལྡན་པས་སྦྲང་རྩི་དང་རྒྱམ་ཚ་འམ། ལྕེ་མྱང་ཚ་ལ་སོགས་པ་ལྷག་མ་གང་ཡིན་པ་བཀྲུ་སྨན་དྲག་པའི་ཡན་ལག་ཏུ་གྱུར་པ་ཚད་མ་བསྟན་པ་དེ་ཐམས་ཅད་ལ་སྦྱར་ཞིང་གཏང་བར་བྱའོ། །སོགས་པའི་སྒྲས་ནི་སྦྲང་རྩི་དང་རྒྱམ་ཚ་ལས་གཞན་པ་ཞོ་ག་ཆུ་དང༌། རང་སྐྱུར་གྱི་རྩབ་མོ་དང༌། འོ་མ་དང༌། བ་གཅིན་ལ་སོགས་པ་བཀྲུ་སྨན་དྲག་པོ་མས་གཏོང་བའི་སྡེ་ཚན་དུ་གཏོགས་པ་གཞན་དག་ཀྱང་བསྡུའོ། །དེ་ཀུན་སྣོད་གཅིག་བླུགས། བུམ་པར་ཆུ་བསྐོལ་རླངས་པ་ཡིས། །བསྲོ་ཞིང་གཟར་བུས་དཀྲུགས་ནས་ནི། །རྐྱལ་བུའི་ནང་བླུགས་མཇུག་མར་ནི། །གཏོང་ཚེ་ཤིན་ཏུ་ཚ་གྲང་མིན། །ཤིན་ཏུ་སྣུམ་མིན་རྩུབ་པ་མིན། །ཤིན་ཏུ་རྣོ་མིན་འཇམ་པ་མིན། །ཤིན་ཏུ་སྐ་མིན་སླ་བའང་མིན། །ཤིན་ཏུ་མང་ཉུང་ཚད་མེད་པའམ། །ཚ་ཆེ་སྐྱུར་བའང་དེ་དང་འདྲ། །ཞེས་བྱ་བ་ལ། གོང་དུ་སྨོས་པ་དེ་ཐམས་ཅད་མ་ལུས་པ་སྣོད་གཅིག་ཏུ་བླུགས་ལ། བུམ་པར་བསྐོལ་པའི་རླངས་པས་བསྲོ་ཞིང་ཚ་བར་བྱ་བ་དང༌། དེ་བཞིན་དུ་གཟར་བུའམ་སྐྱབས་ཀུན་དཀྲུགས་ཤིང་བསྐྱོས་པར་ལུག་དང༌། མ་ཧེ་ལ་སོགས་པའི་ལྒང་པ་ལས་བྱས་པའི་རྐྱལ་བུའི་ནང་དུ་བླུགས་ལ་སྨན་དེ་མས་གཏོང་བའི་དོན་དུ་མཇུག་མ་ནས་གཏོང་ཞིང་འཇུད་པར་བྱེད་པའི་ཚེ། ཤིན་ཏུ་ཚ་བ་མ་ཡིན་པ་དང༌། ཤིན་ཏུ་གྲང་པ་མ་ཡིན་པ་དང༌། དེ་བཞིན་དུ་ཤིན་ཏུ་རྩུབ་པ་མ་ཡིན་པ་དང༌། དེ་བཞིན་དུ་བ་གཅིན་དང༌། ཡུངས་ཀར་ལ་སོགས་པ་ཤས་ཆེ་བ་ཤིན་
ཏུ་རྣོ་བ་མ་ཡིན་པ་དང༌། འོ་མ་མང་པོ་གཏོང་བས་ཤིན་ཏུ་འཇམ་པ་མ་ཡིན་པ་དང༌། དེ་བཞིན་དུ་ཤིན་ཏུ་སྐ་བ་མ་ཡིན་པ་དང༌། ཤིན་ཏུ་སླ་བ་མ་ཡིན་པ་དང༌། ཤིན་ཏུ་མང་བ་མ་ཡིན་པ་དང༌། ཚད་ལས་ཤིན་ཏུ་ཉུང་བ་མ་ཡིན་པ་དང༌། དེ་བཞིན་དུ་ཤིན་ཏུ་ཚ་མེད་པའམ། ཆེ་བར་ཡང་མི་བྱ་བ་དང། དེ་བཞིན་དུ་ཀན་ཛི་རང་སྐྱུར་ལ་སོགས་པ་སྐྱུར་བ་མེད་པའམ། དེ་ཤས་ཆེ་བའམ། དེ་དང་འདྲ་སྟེ། མི་བྱའོ་ཞེས་བྱ་བའི་དོན་ནོ། །དེ་ལ་མཁས་པ་གཞན་སྨྲས་པ། །སྣུམ་དང་སྦྲང་རྩི་གཉིས་སོ་སོར། །སྲང་ནི་གསུམ་གསུམ་བྱས་ནས་ནི། །རྒྱམ་ཚ་དག་ནི་ཞོ་གཉིས་དང༌། །ནད་མེད་ལ་བཏང་སྨན་སྲང་གཉིས། །ཁུ་བའི་སྨན་ནི་ལྷག་མ་ཀུན། །སྲང་བཅུ་ཡོངས་སུ་སྦྱར་བར་བྱ། །ཞེས་བྱ་བ་ལ། མས་གཏོང་བའི་ཆོ་ག་ལ་མཁས་པའི་སྨན་པ་གཞན་དག་གིས་ནི། མས་གཏོང་བའི་ཆོ་ག་གཞན་དག་འཆད་ཅིང་སྟོན་ཏེ། ཏིལ་མར་ལ་སོགས་པའི་སྣུམ་དང༌། དེ་བཞིན་དུ་སྦྲང་རྩི་དག་ནི་ཚད་སྲང་གསུམ་གསུམ་དུ་སོ་སོར་བྱ་བ་སྟེ། སྣུམ་སྲང་གསུམ་དང་དེ་བཞིན་དུ་སྦྲང་རྩི་སྲང་གསུམ་དང༌། དེ་བཞིན་དུ་རྒྱམ་ཚ་ཞོ་གཉིས་སྦྱར་བ་འདི་ནི་ནད་མེད་པ་སྟེ། བདེ་བར་གནས་པ་ལ་གཏང་བ་ཡིན་ནོ། །ཞེས་སྨྲས་སོ། །དེ་བཞིན་དུ་སྨན་སྲང་གཉིས་དང༌། ཀུ་བ་བསྐོལ་བའི་སྨན་ལྷག་མ་སྲང་བཅུར་ཡོངས་སུ་སྦྱར་བར་བྱའོ། །དེ་ལྟར་ན་སྤྱིར་སྲང་བཅྭ་བརྒྱད་མས་གཏོང་བའི་ཚད་ཡིན་པར་འདོད་དོ། །སྦྲང་རྩི་རྒྱམ་ཚ་སྣུམ་རྣམས་དང༌། །སྨན་ཕྱེ་ཁུ་བའི་རིམ་པ་ནི། །མས་གཏོང་རྒྱལ་པར་བཅུག་བྱས་ཏེ། །འདི་ནི་སྦྱོར་བའི་ཆོ་གར་བཤད། །ཅེས་བྱ་བ་ལ་སོགས་པའི་སྨན་གྱི་ཁུ་བ་རིམ་གྱིས་བཅོས་ཤིང་སྦྱང་སྟེ། དང་པོ་སྦྲང་རྩི་སྦྱར་ཞིང་གཞུག་པར་བྱའོ། །དེ་ནས་ནི་རྒྱམ་ཚའོ། །དེ་ནས་ནི་སྣུམ་མོ། །དེ་ནས་ནི་སྨན་གྱི་ཕྱེ་མའོ། །དེ་ནས་ནི་སྨན་གྱི་ཁུ་བ་གཞུག་པར་བྱ་སྟེ། གང་གི་ཕྱིར་སྨན་དྲག་པོ་མས་གཏོང་བའི་སྦྱོར་བ་འདི་ནི་སྦྱོར་བའི་ཆོ་ག་གཅིག་ཏུ་བསྲེས་པ་ཡིན་ནོ་ཞེས་དྲང་སྲོང་དག་གིས་བཤད་དོ། །གན་རྐྱལ་བཞག་ནས་བཏང་མ་ཐག །སྔས་ཀྱིས་བརྟེན་ཏེ་མས་གཏོང་ལ། །ཡིད་ནི་གཞན་དུ་མ་ཡེངས་པས། །ཞེས་བྱ་བ་ལ། གན་རྐྱལ་དུ་བཞག་ནས་སྔས་ཀྱིས་བརྟེན་ཏེ། བཀྲུ་སྨན་དྲག་པོ་མས་གཏོང་མ་ཐག་
འདས་པའི་དུས་གཞན་གང་དུ་ཡང་མ་ཡེངས་པས་མས་གཏོང་བ་དྲག་པོའི་ནུས་པ་ལུས་ལ་ཁྱབ་པའི་ཕྱིར། ནི་རུ་ཧ་དེ་ལ་མ་ཡེངས་པར་བྱ་སྟེ། གང་འདི་ང་ལ་བཀྲུ་སྨན་དྲག་པོ་མས་གཏོང་བ་ཇི་ཙམ་ན་སླར་འབྱུང་བར་འགྱུར་ཞིག་གུ་ཞེས་བསམ་པར་བྱའོ། །འཁྲུ་བ་ཙོག་བུས་གཏང་བར་བྱ། །ཞེས་བྱ་བ་ལ། དེའི་རྗེས་ཐོགས་ལ་འཁྲུ་བ་འབྱུང་བར་འགྱུར་ཞིང་བཀྲུ་སྨན་དྲག་པོས་ཕྱིར་འབྱུང་བར་ཉེ་བར་ཕྱོགས་པར་གྱུར་ན། ཙོག་བུས་འདུག་ལ། ཁུ་དྲག་པོའི་ཤུགས་བཏང་ཞིང་དོར་བར་བྱའོ། །འོང་དུས་དམ་པ་ཡུད་ཙམ་སྟེ། །དེ་ལས་གཞན་དུ་འཆི་བྱེད་ཡིན། །ཞེས་བྱ་བ་ལ། བཀྲུ་སྨན་དྲག་པོ་མས་གཏོང་བ་དེ་ཕྱིར་འོང་ཞིང་འབྱུང་བའི་དུས་ཀྱི་དམ་བ་འམ་མཆོག་ནི་ཡུད་ཙམ་སྟེ། ཆུ་ཚོད་གཉིས་ཀྱི་ནང་ཡིན་པ་ལས། དེ་ལས་གཞན་ཞིང་འདས་པའི་དུས་སུ་སྡོད་པར་བྱེད་ན། ནི་རུ་ཧ་ས་འཆི་བར་འགྱུར་བར་བྱེད་པ་ཡིན་ནོ། །དེ་ལ་བཅོས་པའི་ཐབས་གྱུར་སྣུམ། །ཐལ་སྨན་པ་གཅིན་ཁུ་སྐྱུར་སྦྱར། །མྱུར་བས་སྣུམ་རྣོ་དྲོ་བ་ཡི། །མས་གཏོང་གཞན་དག་གཏང་བར་བྱ། །ཡང་ན་སྨན་གྱི་རེང་བུ་དང༌། །བཏང་ཞིང་དུགས་ལ་སོགས་པ་བྱ། །ཞེས་བྱ་བ་ལ། བཀྲུ་སྨན་དྲག་པོ་མས་གཏོང་བ་དེ་ཕྱིར་འོང་བར་གྱུར་བ་ལ་བཅོས་ཤིང་གསོ་བའི་ཐབས་ནི་མྱུར་ཞིང་རིངས་པར་མས་གཏོང་བ་སྔ་མ་ལས་གཞན་པ་སྣུམ་པ་དང་རྣོ་བ་དང༌། དྲོ་བའི་མཚན་ཉིད་ཅན་དང༌། དེ་བཞིན་དུ་ཐུར་དུ་འབྱིན་པར་བྱེད་བའི་སྣུམ་དང༌། ཐལ་སྨན་རྣོན་པོ་དང༌། བ་གཅིན་ལ་སོགས་པ་དང་སྦྱར་བ་དག་ཀྱང་གཏང་བར་བྱའོ། །ཡང་ན་དེ་མྱུར་དུ་འཁྲུ་བའི་ཕྱིར་སྨན་གྱི་རེད་བུ་མྱུར་དུ་གཞུག་བར་བྱའོ། །དེ་ལ་སྨན་གྱི་རེང་བུ་ནི་པོ་སོན་ཆའི་འབྲས་བུ་ལས་བྱས་པའོ། །དེ་བཞིན་དུ་སྡངས་ཤིང་སྐྲག་པར་བྱ་བ་དང༌། དུགས་ལ་སོགས་པའི་རྣམ་པ་ཡང་མྱུར་དུ་དབྱུང་བར་བྱ་བའི་ཕྱིར་རོ། །རང་ཉིད་འོང་བར་གྱུར་ན་ནི། །མས་གཏོང་གཉིས་པ་བཏང་བའམ། །ལན་གསུམ་ལན་བཞིའི་བར་དུ་སྟེ། །ཇི་སྲིད་ལེགས་པར་གྱུར་པར་གཏང༌། །ཞེས་བྱ་བ་ལ། དེ་རང་ཉིད་འོང་ཞིང་མས་གཏོང་བ་གཅིག་འོང་བར་གྱུར་ན། མས་གཏོང་བ་གཉིས་པ་དང༌། དེ་བཞིན་དུ་ལན་གསུམ་པའམ། ལན་བཞི་བའི་བར་དུ་ཡང་གཏང་བར་བྱའོ། །ཡང་ཇི་སྲིད་ལེགས་པར་འཁྲུ་བར་འགྱུར་བའི་
བར་དུ་གཏང་སྟེ། གྲངས་ངེས་པར་ཆད་པ་མེད་དེ། མས་གཏོང་བ་དེ་དག་ཙམ་དུ་མ་ཟད་ཀྱི། བཀྲུ་སྨན་དྲག་པོ་ལེགས་པར་འབྱུང་བའི་མཚན་ཉིད་བསྐྱེད་པར་བྱ་བའི་ཕྱིར་མང་པོ་ཡང་གཏང་བར་བྱ་བ་ཡིན་ནོ། །དེ་ཡི་སྦྱོར་ལེགས་བཀྲུ་སྨན་དང༌། །འདྲ་བར་ཤེས་བྱ། ཞེས་བྱ་བ་ལ། བཀྲུ་སྨན་དྲག་པོ་མས་གཏོང་བ་དེའི་རྗེས་ལ་བཀྲུ་སྨན་གྱི་སྦྱོར་བ་ལེགས་པ་དང༌། སྦྱོར་བ་ཉེས་པ་ལ་སོགས་པའི་མཚན་ཉིད་ཇི་ལྟ་བ་བཞིན་དུ་བཀྲུ་སྨན་དྲག་པོ་མས་གཏོང་བའི་སྦྱོར་བ་འདི་ལ་ཡང་དེ་དང་འདྲ་བར་ཤེས་པར་བྱའོ། །སྦྱོར་བ་ཉེས་པ་ལས་སྙིང་དང་ལྟོ་བ་མ་དག་པ་དང༌། ཡི་ག་འཆུས་པ་ལ་སོགས་པ་ཡིན་ལ། སྦྱོར་བ་ལེགས་པ་ལས་ཇི་སྐད་བཤད་པའི་སྐྱོན་མེད་པའོ། །སྦྱོར་བ་དྲགས་པ་ནི་བད་ཀན་དང༌། མཁྲིས་པ་དང་བཤང་གཅི་སྐྱེད་པ་ལ་སོགས་པའི་མཚན་ཉིད་ཅན་ནོ། །སྦྱོར་ལེགས་ན། །ཆུ་དྲོན་འཇམ་པོས་བཀྲུས་ནས་ནི། །ཤ་ཁུ་འབྲས་ཆན་ཅུང་ཟད་སྦྱིན། །ཞེས་བྱ་བ་ལ། ཡང་དག་པའི་སྦྱོར་བའམ། སྦྱོར་བ་ལེགས་པར་གྱུར་ན། སྐྱེས་བུ་དེ་ཅུང་ཟད་དྲོ་བས་བཀྲུས་ལ་སྐམ་སའི་ཤའི་ཁུ་བ་དང་འབྲས་ཆན་ཉུང་ཟད་ཅིག་སྦྱིན་པར་བྱའོ། །མས་གཏོང་དྲག་པོའི་ནད་རྣམས་ཀྱི། །དྲི་མ་བསྐྱོད་བར་བྱུང་གྱུར་བ། །དེ་ནི་ཆུ་དྲོན་གྱིས་བཀྲུ་དང༌། །ཁ་ཟས་ཚུལ་བཞིན་ཟོས་པས་འབྱང༌། །ཞེས་བྱ་བ་ལ། སྐྱེས་བུ་བཀྲུ་སྨན་དྲག་པོ་མས་གཏོང་བའི་ནད་རྣམས་ཀྱི་དྲི་མས་བསྐྱོད་ཅིང་འབྱུང་བར་བྱའོ། །ནད་དེ་ཆུ་དྲོན་པོ་འཇམ་པོས་བཀྲུ་བ་དང༌། དེ་བཞིན་དུ་ཁ་ཟས་ཚུལ་བཞིན་དུ་ཟོས་པས་བྱང་ཞིང་དག་པར་འགྱུར་རོ། །གལ་ཏེ་རླུང་གིས་ཉམ་ཐག་ན། །སླར་ཡང་འཕྲལ་དུ་འཇམ་རྩི་གཏང༌། །ཞེས་བྱ་བ་ལ། གལ་ཏེ་རླུང་གི་ནད་ཀྱིས་ཉམ་ཐག་ཅིང་གནོད་པར་གྱུར་ན། སླར་ཡང་འཕྲལ་དུ་དུས་དེའི་ཚེ་ཉིད་འཇམ་རྩི་གཏང་བར་བྱ་སྟེ། སྣུམ་གྱི་ཇི་ལྟ་བུ་བཞིན་དུ་གསོ་ཞིང་བཅོས་པ་ཉིད་དུ་བྱའོ། །དེ་ནི་ལེགས་དང་མ་ལེགས་དང༌། །དྲགས་པ་སྣུམ་འཐུངས་འདྲར་ཤེས་བྱ། །ཞེས་བྱ་བ་ལ། འཇམ་རྩིའི་སྦྱོར་བ་ལེགས་པ་དང༌། མ་ལེགས་པ་དང༌། དྲགས་པ་རྣམ་པ་གསུམ། སྣུམ་འཐུངས་པ་དང་ཚུལ་འདྲ་བར་འགྱུར་ཏེ། དེ་ཡང་འདི་ལྟར། རླུང་ནི་བདེ་རྒྱུ་མེ་དྲོད་འབར། །བཤང་བ་སྣུམ་ཞིང་མི་སྲིལ། །སྣུམ་མི་འདོད་ཅིང་སྙོམས་གྱུར་བ། །སྣུམ་ལེགས་ཡིན་ཏེ་རྩུབ་མོ་བཟློག །སྣུམ་དྲགས་པ་ཡིས་སྐྱ་རྦབ་དང༌། །སྣ་དང་ཁ་རྐུབ་ལས་འཛག་
འགྱུར། །ཞེས་བྱ་བ་ལ། འདི་དག་གི་སྦྱོར་བ་ལེགས་པ་དང༌། མ་ལེགས་པ་དང༌། དྲགས་པར་གྱུར་པ་ཡིན་ནོ། །གང་ཞིག་དུས་ནི་ཅུང་ཟད་གནས། །བཤང་དང་བཅས་པར་འབྱུང་འགྱུར་ཞིང༌། །ཐུར་དུ་དབུགས་དང་སྣུམ་ལྷན་ཅིག །འབྱུང་འགྱུར་འཇམ་རྩི་ལེགས་པ་ཡིན། །ཞེས་བྱ་བ་ལ། སྣུམ་གང་ཞིག་དུས་ཅུང་ཟད་ཅིག་གནས་ནས་བཤང་བ་དང་བཅས་པར་ལྷན་ཅིག་འབྱུང་བར་འགྱུར་ཞིང་དེ་བཞིན་དུ་དབུགས་ཀྱི་རྒྱུ་བ་ལེགས་པར་འབྱུང་བར་འགྱུར་ན། འཇམ་རྩིའི་སྦྱོར་བ་ལེགས་པ་ཡིན་ནོ། །བད་ཀན་ལ་ནི་མས་གཏོང་བའི། །འཇམ་རྩི་གཅིག་གམ་གསུམ་གཏང་བྱ། །མཁྲིས་པ་ལ་ནི་ལྔ་འམ་བདུན། །རླུང་ལ་དགུ་འམ་བཅུ་གཅིག་གཏང༌། །ཞེས་བྱ་བ་ལ། བད་ཀན་གྱི་ནད་ལ་ནི་མས་གཏོང་བའི་སྣུམ་གྱི་འཇམ་རྩི་གཅིག་གམ་གསུམ་ཞིག་གཏང་བར་བྱའོ། །མཁྲིས་བའི་ནད་ལ་ནི་འཇམ་རྩི་ལྔ་འམ་བདུན་གཏང་བར་བྱའོ། །རླུང་ལས་གྱུར་བའི་ནད་ལ་ནི་དགུ་འམ་བཅུ་གཅིག་གཏང་བར་བྱའོ། །སླར་ཡང་དེ་ལས་ཟུང་མིན་པ། །མས་གཏོང་རྗེས་ལ་བྱ་བ་ཡིན། །ཞེས་བྱ་བ་ལ། བད་ཀན་ཤས་ཆེ་བའི་ནད་ལ་གཅིག་གམ་གསུམ་བཏང་བས་སྦྱོར་བ་ལེགས་པའི་མཚན་ཉིད་མ་བྱུང་ན་ཡང་མས་གཏོང་བ་དེའི་རྗེས་ལ་བྱ་ལ། དེ་ཡང་ཟུང་མ་ཐེམ་པར་བྱ་སྟེ། གཅིག་དང་གསུམ་དང་ལྔ་དང་བདུན་དང་དགུ་དང༌། བཅུ་གཅིག་ལ་སོགས་པ་ནི་ཟུང་མ་ཡིན་ནོ། །གཉིས་དང་བཞི་དང་དྲུག་དང་བརྒྱད་ལ་སོགས་པ་ནི་ཟུང་སྟེ། ཟུང་མ་ཡིན་པ་ཞེས་བྱ་བ་ལ་སོགས་ལ་སྦྱར་བར་བྱའོ། །དེ་ལྟར་འཇམ་རྩི་བཏང་བའི་རྗེས་ལ་སྦྱོར་བ་ལེགས་པར་གྱུར་ན་ཡང་མས་གཏོང་བའི་ཆོ་ག་བྱའོ། །བད་མཁྲིས་རླུང་ལ་རིམ་བཞིན་ཟས། །ཡུ་ཤ་འོ་མ་ཤ་ཁུ་གཏང༌། །ཞེས་བྱ་བ་ལ། བད་ཀན་གྱི་ནད་དང་ལྡན་པ་ལ་ནི། དེའི་ཟས་ཡུ་ཤ་སྟེ་སྲན་མུངྒའི་ཁུ་བ་ལ་སོགས་པ་གཡོས་བྱས་བ་དང་ལྷན་ཅིག་གཏང་བར་བྱའོ། །མཁྲིས་པའི་ནད་ཡོད་པ་ལ་ནི་ཟས་འོ་མ་དང་ལྷན་ཅིག་གཏང་བར་བྱའོ། །རླུང་གི་ནད་ཡོད་པ་ལ་ནི་ཟས་ཤ་ཁུ་དང་ལྷན་ཅིག་གཏང་བར་བྱའོ། །རླུང་འཇོམས་སྨན་ནི་ལེགས་བསྐོལ་བ། །དུར་བྱིད་རྒྱམ་ཚར་བཅས་པར་བྱ། །སྣུམ་མངར་སྐྱུར་ཤ་ཁུ་དྲོན་སྦྱར། །མས་གཏོང་གཅིག་ནི་རླུང་ལ་ཕན། །ཞེས་བྱ་བ་ལ། རླུང་ནད་ལ་ནི་མས་གཏོང་གཅིག་ཏུ་བཤད། དེ་ཡང་
རླུང་འཇོམས་པའི་སྨན་ནི་པི་ད་རི་ལ་སོགས་པ་ལེགས་པར་བསྐོལ་བ་ལས་བྱས་པ་དུར་བྱིད་དང༌། རྒྱམ་ཚ་གཉིས་ཀྱི་ལྡེ་གུ་དང་བཅས་ཤིང་སྦྱར་བ་དང༌། དེ་བཞིན་དུ་ཏིལ་མར་ལ་སོགས་པའི་སྣུམ་དང་ལྡན་པ་དང༌། དེ་བཞིན་དུ་སྨན་མངར་བ་དང་སྐྱུར་བ་དང་ལྡན་པ་དང༌། དེ་བཞིན་དུ་ཤ་ཁུ་དྲོན་པོ་དང་སྦྱར་བའི་མས་གཏོང་བས་རླུང་སེལ་བར་བྱེད་པ་ཡིན་ནོ། །ནྱ་གྲོ་དྷ་སོགས་སྡེ་ཚན་བསྐོལ། །ཤུག་སོགས་ཁ་ར་དཀར་དང་བཅས། །མངར་བསིལ་བུ་རམ་ཤིང་ཁུ་མར། །འོ་མ་སྦྲང་རྩིར་བཅས་མཁྲིས་སེལ། །ཞེས་བྱ་བ་ལ། མཁྲིས་པའི་ནད་ལ་ནི་མས་གཏོང་བ་གཉིས་ཏེ། ནྱ་གྲོ་དྷ་ལ་སོགས་པའི་སྡེ་ཚན་བསྐོལ་བ་དང༌། ཤུག་པ་ལ་སོགས་པའི་སྡེ་ཚན་ཁར་དཀར་པོའི་ལྡེ་གུ་དང་བཅས་པ་ལ་དེ་བཞིན་དུ་མངར་བ་དང་བསིལ་བ་དང༌། བུ་རམ་ཤིང་གི་ཁུ་བ་དང་མར་དང༌། འོ་མ་དང་སྦྲང་རྩི་དང་བཅས་པ་གཉིས་ཀྱིས་མཁྲིས་པ་སེལ་བར་བྱེད་པ་ཡིན་ནོ། །དོང་ག་ལ་སོགས་བསྐོལ་བ་དང༌། །དུག་མོ་ཉུང་སོགས་བཅས་པ་གསུམ། །རྩུབ་དང་སྦྲང་རྩི་བ་གཅིན་བཅས། །རྣོ་ཞིང་དྲོ་ཁ་བད་ཀན་སེལ། །ཞེས་བྱ་བ་ལ། བད་ཀན་གྱི་སྐབས་སུ་མས་གཏོང་བ་གསུམ་ཡོད་དེ། དོང་ག་བསྐོལ་བའི་དུག་མོ་ཡུངས་ལ་སོགས་པའི་ལྡེ་གུ་དང་བཅས་པ་གསུམ་ལ། དེ་བཞིན་དུ་རྩུབ་པ་དང་སྦྲང་རྩི་དང་བ་གཅིན་དང་བཅས་པ་རྣོ་བ་དང༌། ཁ་བའི་སྨན་རྣམས་སོ། །གསུམ་པོ་འདུས་པའི་ནད་ལ་ཡང༌། །གང་ཕྱིར་རིམ་བཞིན་སེལ་བ་ཡིན། །ཞེས་བྱ་བ་ལ། འདུས་པའི་ནད་ལ་ནི་མས་གཏོང་བ་གསུམ་ཉིད་དུ་བཤད་དེ། སྔར་བཤད་པའི་རླུང་དང་མཁྲིས་པ་དང་བད་ཀན་སེལ་བའི་གསུམ་པོ་ཉིད་ཡིན་པར་བསྟན་ནོ། །དེ་ཡང་གང་གི་ཕྱིར་མས་གཏོང་བ་རྣམས་ཀྱིས་རླུང་དང་མཁྲིས་པ་དང་བད་ཀན་རིམ་བཞིན་དུ་སེལ་ཞིང་འཇོམས་ཏེ། དེ་ལ་མས་གཏོང་བ་གཅིག་བཏང་བས་ནི་རླུང་སེལ་ཏེ། གཉིས་པས་ནི་མཁྲིས་པའོ། །གསུམ་པས་ནི་བད་ཀན་ནོ། །གསུམ་པོ་དེ་ལས་གཞན་པ་ཡི། །མས་གཏོང་གསོ་ཞེས་གཞན་མི་འདོད། །གང་ཕྱིར་སླར་ཡང་སྦྱིན་བྱ་ཡི། །ཉེས་པ་བཞི་པོ་ཡོད་མ་ཡིན། །ཞེས་བྱ་བ་ལ། མས་གཏོང་བ་གསུམ་པོ་དེ་དག་ལས་གཞན་པའི་མས་གཏོང་བ་བཞི་བར་ནི་གསོ་བ་ཤེས་ཤིང་སྨན་དཔྱད་ཀྱི་ལུང་ལ་
མཁས་པའི་སྲོག་འཚོ་བའི་སློབ་དཔོན་གཞན་དག་མི་འདོད་ཅིང་ཁས་ལེན་པར་མི་བྱེད་དེ། གང་གི་ཕྱིར་སྔར་བཤད་པའི་ནད་དམིགས་གསུམ་ལ་མས་གཏོང་བ་གྲངས་ཇི་ལྟ་བ་བཞིན་ཡིན་པའམ། སླར་ཡང་གང་ཞིག་གསོ་བར་བྱ་བའི་སྦྱིན་པའི་ཉེས་པའམ། ནད་བཞི་པ་ཡོད་པ་མ་ཡིན་པའི་ཕྱིར་རོ། །ནད་བསྐྱོད་དག་པར་བྱེད་པ་དང༌། །ཞི་བར་བྱ་བའི་རིམ་པ་ཡིས། །མས་གཏོང་གསུམ་པོ་ཉིད་བརྟག་ཅེས། །དེ་སྐད་གཞན་དག་སྨྲ་བ་ཡིན། །ཞེས་བྱ་བ་ལ། སྨན་པ་གཞན་དག་ནི་མས་གཏོང་བ་གསུམ་པོ་ཉིད་དུ་བརྟག་པར་བྱའོ། །ཞེས་དེ་སྐད་སྨྲ་བ་ཡིན་ཏེ། མས་གཏོང་བ་གཅིག་ནི་ནད་རྣམས་བསྐྱོད་པ་ལ་བརྟག་ཅིང་སྦྱར་བར་བྱའོ། །གཉིས་པ་ནི་ནད་རྣམས་དག་པར་བྱེད་པ་ཡིན་ནོ། །གསུམ་པ་ནི་ནད་རྣམས་ཞི་བར་བྱེད་པ་ཡིན་ནོ། །དེ་ལྟར་ནད་བསྐྱོད་ཅིང་བསྡུ་བ་དང༌། ནད་སྦྱོང་ཞིང་དག་པར་བྱེད་པ་དང༌། ནད་རྣམས་ཞི་བར་བྱེད་པས་ན་ཞི་བ་སྟེ། དེ་ལྟར་གསུམ་ཡིན་ནོ་ཞེས་ཟེར་རོ། །ནད་དང་སྨན་སོགས་སྟོབས་ལས་ནི། །འདི་དག་ཐམས་ཅད་ཚད་མས་གཞལ། །ཞེས་བྱ་བ་ལ། སློབ་དཔོན་ལ་ལ་ནི་གཞུང་ཚད་མ་ཅན་ཡིན་ལ། ལ་ལའི་གཞུང་ཚད་མ་མེད་པ་ནི་མ་ཡིན་ཏེ། གཞན་དུ་ན་ཐམས་ཅད་ཚད་མས་གཞལ་བ་ཡིན་ནོ། །ཇི་ལྟ་ཞེ་ན། ནད་དང་ནད་སྨན་སོགས་ལས་ནི། །ཞེས་བྱ་བ་སྟེ། ནད་ཀྱི་སྟོབས་ལ་སྨན་གྱི་སྟོབས་ལས་དཔགས་པ་ཡིན་ཏེ། སོགས་པའི་སྒྲས་ནི་ཡུལ་དང་དུས་དང་ལུས་ཀྱི་སྟོབས་དང་ལུས་ཚད་དང་ཁ་ཟས་དང་གོམས་པ་དང་སྙིང་སྟོབས་དང༌། རང་བཞིན་གྱི་སྟོབས་ཀྱི་ནུས་པ་ལས་དཔགས་པ་ཡིན་ཏེ། གཞུང་འདི་ནི་ཀུན་ལ་ཁ་བསྐང་དགོས་པའི་ལྷག་མ་ཡིན་པར་ཤེས་པར་བྱའོ། །གང་གསོ་བ་ཤེས་པའི་སློབ་དཔོན་མས་གཏོང་བ་གཞན་དུ་འདོད་པ་དེ་ཐམས་ཅད་ཀྱི་གཞུང་ཡང་འདི་ཉིད་ཡིན་གྱི་གཞན་ནི་མ་ཡིན་ནོ། །བཀྲུ་སྨན་དྲག་བཏང་ལེགས་མཚན་མ། །མ་མཐོང་བར་དུ་འཕྲོ་མི་བཅད། །ཅེས་བྱ་བ་ལ། ཇི་སྲིད་བཀྲུ་སྨན་དྲག་པོ་བཏང་བའི་མཚན་མ་ལེགས་པར་མ་མཐོང་ཞིང༌། མ་བྱུང་བ་དེ་སྲིད་ཀྱི་བར་དུ་ནི་རུ་ཧ་བཏང་བའི་འཕྲོ་བཅད་པར་མི་བྱ་སྟེ། དེ་ན་ཇི་སྲིད་མཚན་མ་ལེགས་པར་མཐོང་བར་གྱུར་
པ་དེ་སྲིད་ཀྱི་བར་དུ་བཀྲུ་སྨན་དྲག་པོ་གཏང་བར་བྱའོ། །ཞེས་སྟོན་པ་ཡིན་ནོ། །འདི་དག་ནི་ཉེ་བར་མཚོན་པ་ཙམ་སྟེ། འཇམ་རྩི་གཏོང་བའི་ཚེ་ན་ཡང་ཇི་སྲིད་འཇམ་རྩི་ལེགས་པར་གྱུར་བའི་མཚན་མ་མ་བྱུང་བ་དེ་སྲིད་ཀྱི་བར་དུ་མས་གཏོང་བ་འཕྲོ་མི་བཅད་ཀྱི། དེ་བྱུང་གི་བར་དུ་འཇམ་རྩི་གཏང་བར་བྱའོ། །གང་ཉེ་བར་མཚོན་པ་ཙམ་དུ་གཞན་པ་འདི་འཇམ་རྩི་ལ་ཡང་བྱ་བའི་ཕྱིར། གཞུང་རྩོམ་པར་བྱེད་པས་འདིར་ཡན་ལག་བརྒྱད་པ་བསྡུས་པ་ལས་འདི་སྐད་སྨྲས་པ་ཡིན་ཏེ། དང་པོར་སྣུམ་གཅིག་ཐ་མར་ལྔ། །བཀྲུ་སྨན་དྲག་པོ་བཅུ་གཉིས་ཏེ། །འཇམ་རྩིར་བཅས་པ་མས་གཏོང་བའི། །ལས་ནི་སུམ་ཅུར་བཤད་པ་ཡིན། །ཞེས་བྱ་བ་ལ། བཀྲུ་སྨན་དྲག་པོ་མས་གཏོང་བ་གཉིས་པ་དང་བཞི་པ་དང་དྲུག་པ་དང༌། བརྒྱད་པ་དང༌། བཅུ་པ་དང་བཅུ་གཉིས་པ་དང༌། བཅུ་བཞི་པ་དང༌། བཅུ་དྲུག་པ་དང༌། བཅྭ་བརྒྱད་པ་དང༌། ཉི་ཤུ་པ་དང༌། ཉི་ཤུ་རྩ་གཉིས་པ་དང༌། ཉི་ཤུ་རྩ་བཞི་བཞེས་བྱ་བ་དང༌། དེ་བཞིན་དུ་བཀྲུ་སྨན་དྲག་པོ་མས་གཏོང་བ་བཅུ་གཉིས་ཏེ། གསུམ་པ་དང༌། ལྔ་པ་དང༌། བདུན་པ་དང༌། དགུ་པ་དང༌། བཅུ་གཅིག་པ་དང༌། བཅུ་གསུམ་པ་དང༌། བཅོ་ལྔ་པ་དང༌། བཅུ་བདུན་པ་དང༌། བཅུ་དགུ་པ་དང༌། ཉི་ཤུ་རྩ་གཅིག་པ་དང༌། ཉི་ཤུ་རྩ་གསུམ་པ་དང༌། ཉི་ཤུ་རྩ་ལྔ་པ་ཞེས་བྱ་བ་དང༌། འཇམ་རྩིར་བཅས་པ་ཞེས་བྱ་བ་སྟེ། ཆོ་ག་འདིས་ནི་མས་གཏོང་བའི་ལས་སུམ་ཅུར་བཤད་པ་ཡིན་ནོ། །དུས་ནི་བཅོ་ལྔ་འདིར་གཅིག་ནི། །ཐོག་མའི་སྣུམ་སྟེ་ཐ་མར་གསུམ། །དུགས་དང་མས་གཏོང་ལྔ་པར་བཤད། །ཅེས་བྱ་བ་ལ། མས་གཏོང་བའི་དུས་ནི་བཅྭ་ལྔ་སྟེ། ཇི་ལྟ་ཞེ་ན། ཐོག་མར་ཏེ་དང་པོ་སྣུམ་གྱི་གཅིག་དང༌། མཐའ་མ་སྣུམ་གྱི་ལན་གསུམ་སྟེ། བཅུ་གསུམ་པ་དང༌། བཅུ་བཞི་པ། བཅྭ་ལྔ་པ་དང༌། དེ་བཞིན་དུ་སྨན་དྲུག་སྟེ། གཉིས་པ་དང༌། བཞི་པ་དང༌། དྲུག་པ་དང༌། བརྒྱད་པ་དང༌། བཅུ་པ་དང༌། བཅུ་གཉིས་པ་ཞེས་བྱ་བ་དང༌། ཇི་ལྟ་བུ་ཞེ་ན། མས་གཏོང་བའི་འཇམ་རྩི་ལྔ་སྟེ། གསུམ་པ་དང༌། ལྔ་པ་དང༌། བདུན་པ་དང༌། དགུ་པ་དང༌། བཅུ་གཅིག་པ་ཞེས་བྱ་བས་བར་དུ་བཅད་ཅིང་ཆོད་པའི་བཀྲུ་སྨན་དྲག་པོ་མས་གཏོང་བ་སྟེ། དེ་ལྟར་ན་མས་གཏོང་བའི་དུས་བཅྭ་ལྔ་ཡིན་ནོ། །མས་གཏོང་སྦྱོར་འདིར་བརྒྱད་ཡིན་ཏེ། །ནི་རུ་ཧ་དང་སྣུམ་
གསུམ་དང༌། །ཐོག་མ་ཐ་མ་གཉི་གའོ། །ཞེས་བྱ་བ་ལ། མས་གཏོང་བའི་སྦྱོར་བ་འདིར་བརྒྱད་ཡིན་ཏེ། སྦྱོར་བ་འདི་ཐོག་མ་དང་ཐ་མ་གཉི་ག་སྟེ། དང་པོ་དང་བརྒྱད་བ་ཞེས་བྱ་བའི་སྣུམ་གྱི་ལས་དང༌། ནི་རུ་ཧ་གསུམ་སྟེ། གཉིས་པ་དང༌། བཞི་པ་དང༌། དྲུག་པ་དང༌། སྣུམ་གསུམ་སྟེ། གསུམ་པ་དང༌། ལྔ་པ་དང༌། བདུན་པ་ཞེས་བྱ་བ་སྟེ། དེ་ལྟར་ན་སྤྱིར་བརྒྱད་ནི་སྦྱོར་བ་ཡིན་ནོ། །འཇམ་རྩིའམ་བཀྲུ་སྨན་མས་གཏོང་དྲག །གཅིག་པུ་ལྷག་པར་བསྟེན་མི་བྱ། །འཇམ་རྩིས་ནད་གློངས་མེ་དྲོད་འཇོམས། །ནི་རུ་ཧས་རླུང་སྐྱེད་འཇིགས་ཡོད། །དེ་བས་སྣུམ་རྗེས་བཀྲུ་དྲག་གཏང༌། །ཁྲུས་དྲག་བཏང་ནས་འཇམ་རྩི་བྱ། །དེ་ལྟར་རིམ་པས་སྣུམ་སྦྱང་བྱ། །མས་གཏོང་ལས་ནི་ཉེས་གསུམ་སེལ། །ཞེས་བྱ་བ་ལ། དེ་ལྟར་ན་ནི་རུ་ཧ་སྟེ་བཀྲུ་སྨན་དྲག་པོ་མས་གཏོང་བའི་ཐོག་མར་འཇམ་རྩི་བྱ་ལ། དེའི་འོག་ཏུ་བཀྲུ་སྨན་དྲག་པོ་མས་གཏང་བར་བྱ་ལ། དེའི་འོག་ཏུ་འཇམ་རྩིའི་རྒྱུན་མི་འཆད་པར་ནི་རུ་ཧ་གཅིག་པུ་བསྟེན་པར་མི་བྱ་ཞིང༌། འཇམ་རྩི་འབའ་ཞིག་རྒྱུན་མི་འཆད་པར་ཧ་ཅང་དྲགས་པར་མི་བྱ་ཞིང༌། བསྟེན་པར་མི་བྱ་སྟེ། གང་གི་ཕྱིར་འཇམ་རྩི་རྒྱུན་དུ་བསྟེན་དྲགས་པས་ནི། ནད་གློངས་པས་ཁམས་འཁྲུགས་པར་འགྱུར་བ་དང༌། དེ་བཞིན་དུ་མེའི་དྲོད་འཇོམས་པས་ཕོ་བའི་མེ་དྲོད་ཀྱིས་ཟས་འཇུ་མི་ནུས་པར་འགྱུར་རོ། །དེ་བཞིན་དུ་ནི་རུ་ཧ་བསྟེན་དྲགས་པས་རླུང་ནད་སྐྱེད་པར་བྱེད་དོ། །རླུང་གི་ནད་ལྡང་བའི་འཇིགས་པ་ཡོད་དོ་ཞེས་བྱ་བའི་དོན་ནོ། །དེ་བས་ན་བཀྲུ་སྨན་དྲག་པོ་མས་གཏོང་བར་བྱ་བའི་སྐྱེས་བུ་ལ་ནི། འཇམ་རྩི་གསུམ་གྱི་སྦྱོར་བ་མས་གཏོང་བར་བྱ་ལ། གང་འཇམ་རྩི་བྱ་བ་དེ་ལ་ནི་བཀྲུ་སྨན་དྲག་པོ་གཏང་བར་བྱ་དགོས་ཏེ། ནད་གློངས་པ་དང་མེ་དྲོད་འཇོམས་པ་དེས་བསལ་བར་བྱ་བའི་ཕྱིར་རོ། །དེ་ལྟར་ན་རིགས་པ་འདིའི་རིམ་པས་སྣུམ་གྱི་མས་གཏང་བ་བྱས་པ་དང༌། དེའི་འོག་ཏུ་ནི་རུ་ཧ་བྱ་ལ། དེ་ལྟ་བུའི་སྦྱང་བ་བྱས་ནས། མས་གཏོང་བའི་ལས་དེས་ནད་གཞི་གསུམ་གྱི་ཉེས་པ་སེལ་བར་འགྱུར་རོ། །སྣུམ་གྱི་ཚད་ནི་ཆུང་དུ་ཡི། །ཚད་དང་དེ་ནི་མཉམ་བྱས་པའི། །སྣུམ་ཚད་འཇམ་རྩིའི་ཚད་དུ་བཤད། །དེ་ནི་བྱིས་རྒན་ལམ་དང་ཁུར། །བུད་མེད་རྩོལ་ཞེན་པས་དུ་བ་དང༌། །རླུང་
ནད་ཀྱིས་གཞོམ་མེ་དྲོད་ཆུང༌། །རྒྱལ་པོ་ཕྱུག་པོ་ལ་བདེ་བ། །ཡིན་པས་རྟག་ཏུ་བསྟེན་པར་བྱ། །ནད་འཇོམས་ཡང་བ་མེད་པ་དང༌། །སྟོབས་སྐྱེད་བཤང་པ་བདེ་བར་འབྱུང༌། །ཞེས་བྱ་བ་ལ། སྣུམ་ལས་ཞུན་མར་འབའ་ཞིག་བཏུང་བའི་ཆུང་དུ་ཐུན་གཉིས་ཀྱིས་འཇུ་བར་འགྱུར་བའི་མཚན་ཉིད་ཅན་གྱི་ཚད་དང་མཉམ་པར་བྱས་པའི་སྣུམ་གྱི་ཚད། འཇམ་རྩིའི་ཚད་དུ་བཤད་དེ། དེ་ནི་འཇམ་རྩིའི་ཆུང་ཚད་ཅེས་བྱ་བ་ལ་ཚད་དེ་ནི་བྱིས་པ་དང་རྒན་པོ་ལ་སོགས་པས་དུས་རྟག་ཏུ་རྒྱུན་མི་འཆད་པར་བསྟེན་ཅིང་གོམས་པར་བྱའོ། །དེ་བསྟེན་ཅིང་གོམས་པར་བྱེད་པ་ནི་ནད་མེད་པར་བྱེད་པ་དང༌། བདེ་བ་ཡིན་པས་བྱིས་པ་ལ་སོགས་པ་ལ་ཡང་གཏོང་དུ་རུང་བས་གོམས་པར་སྤྱད་པར་བྱའོ། །དེ་བཞིན་དུ་ནད་འཇོམས་པ་སྟེ། རླུང་དང་མཁྲིས་པ་དང་བད་ཀན་ཡང་འཇོམས་ཤིང་སེལ་བར་བྱེད་དོ། །དེ་བཞིན་དུ་ཡང་འདི་ནི་ཡང་བ་མེད་པར་བྱེད་པ་དང༌། ཁ་ལག་ཆུ་དྲོན་གྱིས་བཀྲུ་ཞིང༌། །ཞེས་བྱ་བ་ལ་སོགས་པའི་གཞུང་གིས་སྔར་བཤད་པའི་འདམ་ག་མི་དགོས་པ་ཡིན་ལ། དེ་ཉིད་ཀྱིས་ན་བྱིས་པ་ལ་སོགས་པ་ལ་བདེ་བའི་བདག་ཉིད་ཅན་ཡིན་ནོ། །དེ་བཞིན་དུ་སྟོབས་སྐྱེད་པར་བྱེད་པ་ཡིན་ཏེ། ནུས་པ་སྐྱེད་པ་ཡིན་ནོ། །དེ་བཞིན་དུ་བཤང་བ་བདེ་བར་འབྱུང་བར་བྱེད་པ་ཡིན་ནོ། །གང་ཞིག་བཏང་བས་བཤང་བ་བདེ་བླག་ཏུ་འབྱུང་བར་བྱེད་པ་དེ་ལ་དེ་སྐད་ཅེས་བྱའོ། །མས་གཏོང་བུད་མེད་རོ་སྨད་ཀྱི། །མངལ་དང་མོ་མཚན་ནད་རྣམས་ལ། །བཀྲུས་དྲགས་གཉིས་གསུམ་གྱིས་དག་པར། །མས་གཏོང་གོང་མས་གཏོང་བར་བྱ། །ཞེས་བྱ་བ་ལ། འདིར་མས་གཏོང་བའི་ལུས་ཀྱི་ཡན་ལག་གི་ཕྱོགས་གཅིག་འབབ་པའི་ཕྱོགས་ནས་གཏང་བ་སྟེ། དེ་ནི་གཅིན་སྲི་བ་ལ་སོགས་པའི་ནད་གང་དག་ཡོད་པའི་སྐྱེས་པ་དང༌། བུད་མེད་དང་མ་ནིང་གི་མཚན་ནས་གཏང་བ་གོང་མ་གཏང་བར་བྱའོ། །དེ་དག་ཐམས་ཅད་ཀྱང་ལན་གཉིས་སམ་ལན་གསུམ་དུ་བཀྲུ་སྨན་དྲག་པོ་མས་གཏོང་བས་དག་ཅིང་སྐྱོན་བསལ་བ་ལ། མས་གཏོང་བ་གོང་མ་གཏང་བར་བྱའོ། །དེ་ཡི་གཅེའུ་ནད་པ་ཡི། །སོར་ཚད་བཅུ་གཉིས་ཚད་དུ་བྱ། །སྣུམ་ཞིང་བ་ལད་མཇུག་མ་འདྲ། །རྩ་བ་དབུས་སུ་གག་པ་གདགས། །རྩེ་མོ་ཡུངས་ཀར་ཤོང་
བ་ཙམ། །འཇམ་པ་གསེར་ལ་སོགས་ལས་བྱས། །ཀུན་ད་སྲི་ཞིང་སོ་མན། །མེ་ཏོག་རྩེ་མོ་ལྟར་ཟླུམ་ཕྲ། །ཞེས་བྱ་བ་ལ། དེའི་ཞེས་བྱ་བ་ནི། འདས་མ་ཐག་པའི་མས་གཏོང་བ་གོང་མ་ལ་སྙེགས་ཏེ། དེའི་གཅེའུ་ནི་ནད་པ་གང་ཡིན་པའི་ཚད་ཀྱིས་གཞལ་ལ། དེ་ཡང་སོར་བཅུ་གཉིས་སུ་བྱའོ། །དེ་བཞིན་དུ་ཟླུམ་པ་དང༌། བ་ལང་གི་མཇུག་མ་ལྟར་རྩེ་མོ་རིམ་གྱིས་ཕྲ་བ་དང༌། དེ་བཞིན་དུ་རྩ་བ་དང༌། དབུས་ཏེ་བར་དུ་གག་པ་གདགས་པར་བྱ་སྟེ། འདིར་གག་པ་གཅིག་ནི་དབུས་སུ་བྱ། དེ་ཡང་ཚད་ནང་དུ་ནུབ་པའི་ཚད་ལས་ཐལ་བར་གགས་བྱེད་ནུས་པ་ཙམ་ལ། གཉིས་པ་རྩ་བར་གནས་པར་བྱ་བ་ནི་རྐྱལ་བུ་ལ་གདགས་པ་ལ་སོགས་པ་ཡིན་ནོ། །ཡང་དེ་བཞིན་དུ་དེའི་རྩེ་མོའི་བུ་གའི་ཚད་ཡུངས་ཀར་ཤོང་བ་ཙམ་ལ་བྱའོ། །འཇམ་བག་ནི་རྩུབ་བག་མེད་པའོ། །གསེར་ལ་སོགས་པ་ལས་བྱས་པ་ནི་མས་གཏོང་བ་དག་གི་ཚེ་རྒྱུ་དང་མཚུངས་པར་བྱའོ། །དེ་བཞིན་དུ་མེ་ཏོག་ཀུན་ད་ལ་སོགས་པའི་རྩེ་མོ་ཁ་མ་ཕྱེ་བ་ལྟར་བྱིན་གྱིས་ཕྲ་ཞིང་ཟླུམ་པའོ། །གང་ལ་མེ་ཏོག་དང་འབྲས་བུ་ཆགས་པའི་དེའི་རྩ་བ་ཕྲ་མོ་སྟེ་དེ་ལ་བྱའོ། །དེ་ཡི་རྐྱལ་བུ་འཇམ་ཞིང་ཡང༌། །ཞེས་བྱ་བ་ལ། མས་གཏོང་བ་གོང་མ་དེའི་རྐྱལ་བུ་ནི། ར་སྐྱེས་ལ་སོགས་པའི་ལྒང་པ་འཇམ་ཞིང་མཉེན་ལ་ཡང་ཞིང་ཆུང་ངུ་གདགས་པར་བྱའོ། །ཚད་སྲང་ཕྱེད་དམ་གང་རིགས་བྱ། །ཞེས་བྱ་བ་ལ། འཇམ་རྩི་གོང་མ་དེའི་ཚད་ནི་སྣུམ་གཏོང་བ་ན་སྲང་ཕྱེད་བྱ་བའམ་གང་རིགས་པར་བྱ་བ་སྟེ། ནད་ལ་སོགས་པའི་ཚད་ལས་དཔགས་ནས་ཇི་ལྟར་འོས་པ་བྱ་བ་སྟེ། དེས་ན་ནད་ཀྱི་ཚོད་ལས་དཔགས་ཏེ། སྲང་ཕྱེད་པས་ཆུང་བར་ཡང་བྱའོ་ཞེས་བྱ་བའི་དོན་ནོ། །དེ་ནས་ཁྲུས་བྱས་ཟན་ཟོས་ལ། །འཇམ་རྩི་གཏོང་བའི་ཆོ་ག་བྱ། །ཁྲི་སྟེགས་བུས་མཉམ་འཇམ་པ་ལ། །དྲང་ཞིང་བདེ་བར་འདུག་ནས་ནི། །ཕོ་མཚན་བཏེག་ཅིང་དྲང་བར་བྱ། །སྦུབས་སྦྱང་ཕྱིར་ནི་ཐུར་མ་ནི། །འཇམ་པ་རིམ་གྱིས་གཞུག་པར་བྱ། །དེ་དག་ཕོ་མཚན་དང་འཚམ་པ། །འབྲས་བུའི་མཐར་ཐུག་པར་བཏང་བ། །མི་འདར་འཇམ་རྩི་གཏོང་ལྟར་བྱ། །བཙིར་ཏེ་བཏང་ལ་སྣུམ་རྗེས་བྱ། །འཇམ་རྩིའི་རིམ་པ་བཞིན་དུ་བྱ། །ཞེས་བྱ་བ་ལ། དེ་ནས་དེའི་འོག་
ཏུ་ལེགས་པར་ཁྲུས་བྱས་ཤིང་ཟན་རན་པར་ཟོས་པའི་སྐྱེས་བུ་དེའི་ཕོ་མཚན་དུ་དང་པོར་ཐུར་མ་ཕྲ་མོ་བཅུག་ལ། དེའི་འོག་ཏུ་གཅེའུ་གཞུག་པར་བྱའོ། །འཇམ་རྩི་གཏོང་བའི་ཆོགས་བྱ་བ་སྟེ། སྔར་བཤད་པའི་མས་གཏོང་བའི་ཆོགས་བྱ་བའོ། །དེ་བཞིན་དུ་ཁྲིའི་སྟེགས་པུས་མོ་དང་དཔངས་མཉམ་ཞིང་འཇམ་པའི་སྟེང་དུ། དྲང་ཞིང་ལུས་མ་ཡོ་བར་བདེ་བར་འདུག་པ་དེ་བཞིན་དུ་ཕོ་མཚན་དགའ་བས་བཏེག་ཅིང་ལྡང་བར་བྱས་ལ། དྲང་ཞིང་མ་ཡོ་བར་བྱས་ནས་གཅི་བའི་ལམ་གྱི་སྦུབས་དག་པར་བྱ་བའི་ཕྱིར་ཐུར་མ་འཇམ་པོ་རིམ་གྱིས་དལ་བར་གཞུག་པར་བྱའི། ཅིག་ཅར་གཞུག་པར་མི་བྱའོ། །དེ་ནས་ཐུར་མ་དེས་ཕོ་མཚན་གྱི་སྦུབས་དག་པར་བྱས་པའི་རྗེས་ལ། ཕོ་མཚན་དང་འཚམ་པའི་གཅེའུ་འབྲས་བུའི་མཐར་ཐུག་པའི་བར་དུ་གཏང་བར་བྱ་ལ། དེ་ཡང་ལག་བ་མི་འདར་བར་མཇུག་མར་འཇམ་རྩི་གཏོང་བ་དང་ཚུལ་འདྲ་བར་བྱས་ལ་བཙིར་བ་དང༌། བཏང་བ་དང་སྣུམ་གྱི་རྗེས་ལ་བྱ་བ་དག་ནི། འཇམ་རྩིའི་རིམ་པ་ཇི་ལྟ་བ་བཞིན་དུ་བྱ་བ་འདི་ལ་ཕན་པ་ཡིན་ནོ། །དེ་ཡི་རིམ་པ་འདི་ཡིན་ཏེ། །བཏང་ནས་ལུས་ནི་གན་རྐྱལ་གཞག །རྐུབ་ཙོས་ལག་པས་བརྡབ་པར་བྱ། །ཞེས་བྱ་བ་ལ་སོགས་པ་ཡིན་ནོ། །མས་གཏོང་ཆོ་ག་འདི་ཡིས་ནི། །གསུམ་མམ་བཞི་ཡི་བར་དུ་གཏང༌། །ཞེས་བྱ་བ་ལ། ཇི་སྐད་བཤད་པའི་ཆོ་ག་འདིས་མས་གཏོང་བའི་ཆོ་ག་གོང་མ་ལན་གསུམ་བཞིའི་བར་དུ་གཏང་བར་བྱའོ། །ལྷག་མ་འཇམ་རྩི་ཇི་ལྟ་བར། །འདི་ལ་ཐམས་ཅད་སྦྱར་བར་བྱའོ། །ཞེས་བྱ་བ་ལ། ཆོ་ག་ཐམས་ཅད་འཇམ་རྩི་དང་འདྲ་བར་བྱ་བ་སྟེ། སྦྱོར་བ་ལེགས་པ་དང་སྦྱོར་བ་མ་ལེགས་པ་དང༌། སྦྱོར་བ་དྲགས་པ་དང༌། དེ་བཞིན་དུ་དེའི་གནོད་པ་བསལ་བའི་སྨན་ལ་སོགས་པ་གང་དག་ཡིན་པ་འདི་ལ་ཡང་སྦྱར་བར་བྱ་ཞིང་ཤེས་པར་བྱས་ལ་བརྟག་པར་བྱའོ། །བུད་མེད་ཟླ་མཚན་དུས་སུ་ནི། །མང་ལ་བྱེ་བ་ལས་ཆགས་བར་འགྱུར། །དེ་ཕྱིར་དེ་ཚེ་གཏང་བར་བྱ། །རབ་ན་དུས་མིན་པར་ཡང་གཏང༌། །མོ་མཚན་ཉམས་དང་གཟེར་བ་དང༌། །མངལ་ཁྲག་རྟག་ཏུ་འབྱུང་གཏང་པ། །ཞེས་བྱ་བ་ལ། བུད་མེད་ཟླ་མཚན་འཛག་པའི་
དུས་སུ་འཇམ་རྩི་གོང་མ་གཏང་བར་བྱའོ། །ཟླ་མཚན་དང་པོ་འཛག་པ་ནས་ཞག་བཅུ་གཉིས་ཀྱི་བར་དུ་བུད་མེད་ཀྱི་ཟླ་མཚན་གྱི་དུས་ཡིན་ཏེ། དུས་དེའི་བར་དུ་དེའི་མས་གཏོང་བའི་ལས་བྱའོ། །ཅིའི་ཕྱིར་ཞེ་ན། དུས་དེའི་ཚེ་མས་གཏོང་བ་གོང་མ་ནས་སྣུམ་གཏང་བ་གང་ཡིན་པ་དེ་མངལ་བྱེ་བས་དེར་ཆགས་པར་འགྱུར་ཞིང་ལེན་པར་འགྱུར་ཏེ། དེའི་ཚེ་བུད་མེད་གྱི་མངལ་གྱི་ཁ་བྱེ་ནས་གནས་པ་ཡིན་ནོ། །དེ་ཇི་ལྟར་དེའི་ཚེ་མངལ་ཆགས་པར་འགྱུར་བ་དེ་བཞིན་དུ་མས་གཏོང་པ་ཡང་དེའི་ཚེ་ཆགས་གྱི་གཞན་གྱི་ཚེ་ནི་མ་ཡིན་ནོ། །དེ་ཡང་གཞུང་ལས་དཔེར་ན་ཉི་མ་ནུབ་གྱུར་ན་དུས་མ་ཡིན་ཏེ། ཟླ་མཚན་རྒྱུ་བའི་དུས་མ་ཡིན་ཡང་མས་གཏོང་བ་གོང་མ་གཏང་བར་བྱའོ། །མོ་མཚན་ཉམས་པར་གྱུར་བ་ལ་སོགས་པ་ལ་ཡང་གཏང་བར་བྱ་སྟེ། མོ་མཚན་ཉམས་པ་ལས་ནི་གནས་དེ་ལས་འཆུགས་ཤིང་ཞིག་པའོ། །དེ་བཞིན་དུ་མངལ་ན་བ་སྟེ། མངལ་གྱི་ནད་རྣམས་མང་པོ་འབྱུང་བ་དང༌། དེ་བཞིན་དུ་མོ་མཚན་གཟེར་ཞིང་ཟུག་པ་དང༌། དེ་བཞིན་དུ་མངལ་ནས་རྟག་ཏུ་ཁྲག་འཛག་ཅིང༌། ཁ་དོག་སྣ་ཚོགས་པའི་ཁྲག་དུས་རིང་པོར་འཛག་པའི་ནད་ནི། མངལ་ཁྲག་རྟག་ཏུ་འབྱུང་བ་སྟེ། དེ་ལ་ཡང་གཏང་བར་བྱའོ། །གཅེའུ་སོར་བཅུ་རྩེ་མོ་ཡི། །བུག་མུངྒ་ཤོང་སོར་བཞི། །མངལ་གྱི་གནས་སུ་གཏང་བར་བྱ། །སོར་གཉིས་གཅིན་འབབ་ལམ་དུ་གཏང༌། །གཅིན་འགགས་པ་ཡི་ནད་རྣམས་ལ། །བུ་མོ་རྣམས་ལ་སོར་གཅིག་གཏང༌། །ཞེས་བྱ་བ་ལ། མངལ་ཆགས་སུ་རུང་བའི་བུད་མེད་ཐམས་ཅད་དང༌། ཆགས་སུ་མི་རུང་བའི་བུ་མོ་གཞོན་ནུའི་མས་གཏོང་བའི་གོང་མའི་གཅེའུ་ཚད་ནི་སྤྱིར་སོར་བཅུ་བྱའོ། །གཅིན་འགགས་པའི་ནད་ཡོད་པའི་བུ་མོ་ཤིན་ཏུ་ཆུང་དུ་རྣམས་ལ་གཅིན་འབབ་པའི་ལམ་དུ་སོར་གཅིག་གཏང་བར་བྱ་ཞིང་གཞུག་པར་བྱའོ། །འབྲིང་ཚད་སྲང་ནི་གཅིག་པ་སྟེ། །བུ་མོ་རྣམས་ལ་སྲང་ཕྱེད་ཉིད། །ཅེས་བྱ་བ་ལ། བུད་མེད་རྣམས་ཀྱི་མས་གཏོང་གོང་མའི་འབྲིང་ཚད་ནི་སྲང་ཕྱེད་བྱའོ། །བུ་མོ་རྣམས་ཏེ་བུ་མོ་ཆུང་དུ་རྣམས་ཀྱི་འབྲིང་ཚད་ནི་སྲང་ཕྱེད་ཉིད་ཡིན་ནོ། །མལ་དུ་གན་རྐྱལ་འདུག་ནས་ནི། །བརླ་ནི་ལེགས་
པར་བསྐུམ་ནས་སུ། །པུས་མོ་བརྟོད་དེ་ཉིན་ཞག་ནི། །གཅིག་ལ་ལན་གསུམ་ལན་བཞི་བཏང༌། །དེ་ལྟར་མས་གཏོང་ཞག་གསུམ་ལ། །སྣུམ་གྱི་ཚད་ནི་བསྐྱེད་པར་བྱ། །དེ་ནས་ཞག་གསུམ་ངལ་བསོ་ནས། །སླར་ཡང་ཞག་གསུམ་གཏོང་བར་བྱ། །ཞེས་བྱ་བ་ལ། བུད་མེད་དེ་མལ་དུ་གན་རྐྱལ་དུ་བྱས་ཏེ། འདུག་ཅིང་གནས་པ་དང༌། དེ་བཞིན་དུ་བརླ་ལེགས་པར་བསྐུམ་པ་དང༌། པུས་མོ་ལེགས་པར་བརྟོད་དེ། དེ་ལ་ཉིན་ཞག་གཅིག་ལ་ལན་གསུམ་མམ་ལན་བཞིའི་བར་དུ་མས་གཏོང་བ་གོང་མ་བྱའོ། །དེ་བཞིན་དུ་ཞག་གཉིས་སམ་གསུམ་གྱི་རིམ་གྱིས་ཅི་རིགས་པར་ཉིན་རེ་ཞིང་སྣུམ་ཆད་བསྐྱེད་པར་བྱའོ། །དེ་ནས་ཞག་གསུམ་ངལ་བསོ་ཞིང་འཕྲོ་བཅད་ལ། སླར་ཡང་ཆོ་ག་འདི་ཉིད་ཀྱིས་ཞག་གསུམ་གཏོང་བར་བྱའོ། །སྐྱུག་སྨན་བྱས་ཟླ་ཕྱེད་བཀྲུ་སྨན། །དེ་ནས་ཟླ་ཕྱེད་ནས་བཀྲུ་དྲག །བཀྲུས་དྲག་འཕྲལ་ལ་འཇམ་རྩི་གཏང༌། །ཁྲུས་བཏང་ཞག་བདུན་ནས་འཇམ་རྩི། །ཞེས་བྱ་བ་ལ། སྔོན་དུ་སྐྱུག་སྨན་བྱས་ནས་ཟླ་བ་ཕྱེད་འདས་པ་དང༌། བཀྲུ་སྨན་བྱའོ། །དེ་ནས་བཀྲུ་སྨན་བཏང་བའི་ཟླ་བ་ཕྱེད་ནས་བཀྲུ་སྨན་དྲག་པོ་གཏང་བར་བྱའོ། །བཀྲུ་སྨན་དྲག་པོ་མས་གཏོང་བ་བྱ་སྟེ། འཕྲལ་དེ་རིང་པོར་མི་ཐོགས་པར་འཇམ་རྩི་བཏང་ངོ༌། །བཀྲུ་སྨན་བཏང་ནས་ཞག་བདུན་ལོན་ནས་འཇམ་རྩི་གཏང་བར་བྱ་སྟེ། དེ་ལྟར་ན་བཀྲུ་སྨན་བཏང་བ་དང༌། ནི་རུ་ཧ་གཏོང་བའི་བར་དུ་འཇིམ་རྩི་གཏང་ངོ༌། །ཞེས་བྱ་བའི་དོན་ནོ། །དཔེར་ན་ལེ་བརྒན་སོགས་བཙོས་པའི། །གོས་ནི་ཆུ་ལས་ཚོས་ལེན་ལྟར། །དེ་བཞིན་བངས་པར་བྱས་ལུས་ལ། །མས་གཏོང་བས་ནི་ནད་རྣམས་འབྱིན། །ཞེས་བྱ་བ་ལ། དཔེར་ན་ལེ་བརྒན་རྩི་ལ་སོགས་པ་དང་བསྲེས་པའི་ཆུ་ལ་སོགས་དེར་རས་ཚོས་ལེན་པར་བྱེད་ཅིང་ཆུ་འདོར་བར་བྱེད་པ་དེ་བཞིན་དུ་ལུས་སྣུམ་ལ་སོགས་པས་བངས་པར་བྱས་པ་ལས་མས་གཏོང་བས་ན་ནད་ཀྱི་གནོད་པ་རྣམས་སེལ་ཞིང་འབྱིན་བར་བྱེད་ཅིང་ལུས་གནོད་པ་མེད་པ་ལ་སྦྱོར་བར་བྱེད་དོ། །ལུས་ཀྱི་ཡན་ལག་ནང་གྲོལ་དག་ཏུ་སོང་ནད་དང༌། །གནད་དང་ལུས་སྟོད་ཡན་ལག་ཀུན་ཁྱབ་ནས། །གང་ཞིག་
ཡོད་པ་དེ་ལས་སྐྱེ་བའི་རྒྱུ། །རླུང་མ་གཏོགས་པ་གཞན་དག་ཡོད་མ་ཡིན། །ཞེས་བྱ་བ་ལ། ལུས་ཀྱི་ཡན་ལག་ན་ཁྲག་ལ་སོགས་པའི་ལུས་ཟུངས་རྣམས་ནས། པགས་པའི་བར་དང༌། དེ་བཞིན་དུ་ལག་ངར་ལ་སོགས་པའི་ལུས་ཀྱི་ཡན་ལག་ནང་གྲོལ་མ་གཏོགས་པ་ཀུན་ལ་བྱའོ། །དེ་བཞིན་དུ་ནང་གྲོལ་གྱི་ཕྱོགས་ཐམས་ཅད་དུ་ཁྱབ་ཅིང་སོང་བའི་ནད་དག་དང༌། དེ་བཞིན་དུ་གནད་དང་ལུས་ཀྱི་སྟོད་ན་གནས་པའི་ནད་པའི་ཡན་ལག་དངོས་སུ་ན་ལུས་ཀྱི་སྟོད་ཡན་ལག་གི་གནད་ཐམས་ཅད་ལ་ཁྱབ་ཅིང་གནས་པའི་ནད་གང་དག་ཡོད་པའི་ནད་དེ་རྣམས་སྐྱེ་བའི་རྒྱུ་འམ། འབྱུང་བའི་རླུང་མ་གཏོགས་པ་གཞན་གང་ཡོད་པ་མ་ཡིན་ཏེ། ནད་ཀྱི་རྒྱུ་གཉིས་པ་མེད་དོ་ཞེས་བྱ་བའི་དོན་ནོ། །ཅིའི་ཕྱིར་ཞེ་ན། དེའི་ཕྱིར་སྨྲས་པ་ནི། བཤང་དང་བད་ཀན་མཁྲིས་སོགས་ནད་སོགས་པ། གང་ཕྱིར་འཐོར་ཞིང་སྡུད་པར་བྱེད་པ་ཡིན། །དེ་ནི་རབ་འཕེལ་གྱུར་ལ་ཞི་བྱའི་ཕྱིར། །འཇམ་རྩི་མ་གཏོགས་སྨན་གཞན་གང་ཡང་མེད། །དེ་བས་གསོ་བ་མ་ལུས་ལས་མ་བཏང༌། །གསོ་བའི་ཕྱེད་ཡིན་ཞེས་ནི་ལ་ལ་འདོད། །དེ་བཞིན་ནད་རྙིང་གློ་བུར་སྐྱེད་བྱེད་ལ། །གཏར་ག་ཁྲག་དབྱུང་སྨན་ཉིད་འགྱུར་བ་ཡིན། །རྣམ་པ་དེ་གཉིས་བྱེད་པ་ན། །འཐོར་ཞིང་སྡུད་པར་བྱེད་པ་ཡིན། །ཞེས་བྱ་བ་ལ། བཤང་བ་དང་བད་ཀན་མཁྲིས་པ་ལ་སོགས་པ་གང་ཡིན་པ་དེ་ནི། བཤང་བ་དང་བད་ཀན་མཁྲིས་པ་ལ་སོགས་ཏེ། སོགས་པ་སྨོས་པ་ནི། ལུས་ཀྱི་ཚད་གཏོགས་པ་དངས་མ་ལ་སོགས་པའོ། །དེ་དག་ཉིད་ཀྱིས་ནི་ལུས་དྲི་མ་ཅན་དུ་བྱེད་པས་ན་ནད་དོ། །དེ་རྣམས་ལ་སོགས་པ་ནི་བཤང་བ་ལ་སོགས་པ་འཕེལ་བར་བྱེད་པ་ཡིན་ཏེ། གང་གི་ཕྱིར་འཐོར་ཞིང་རྒྱས་བར་བྱེད་ལ། ནད་རྙིང་པའི་ཚིགས་སུ་གནས་པ་ཕན་ཚུན་འཐོར་ཞིང་འབྱེད་པར་བྱེད་པ་དང༌། སྡུད་བར་ཡང་བྱེད་དེ། ཕན་ཚུན་འཐོར་ཏེ་གནས་པ་རྣམས་ཕུང་པོ་གཅིག་ཏུ་བྱེད་པའོ། །དེ་ལྟ་བུའི་རླུང་དེ་རབ་ཏུ་འཕེལ་ཞིང་རྣམ་པར་འཁྲུགས་པ་ལྡང་བར་
གྱུར་པ་ཞི་ཞིང་བསལ་བར་བྱ་བའི་ཕྱིར་དཔྱད་བྱ་ན། འཇམ་རྩི་ལ་སོགས་པ་མས་གཏོང་བ་མ་གཏོགས་པའི་སྨན་གཞན་དག་ཡོད་པ་མ་ཡིན་ནོ། །སྣུམ་དང་དུགས་གཞན་དག་ཡོད་ན་ཡང་ནུས་པ་ཆུང་བ་ཡིན་ནོ། །གང་གི་ཕྱིར་འཇམ་རྩི་ཡོན་ཏན་དེ་ལྟ་བུ་ཡོད་བ་དེ་བས་ན། རྒྱུ་དེའི་ཕྱིར་གསོ་བ་མ་ལུས་ཤིང་མཐའ་དག་ལས་མས་གཏོང་བ་ནི་གསོ་བ་འམ་ནད་བཅོས་པའི་ཐབས་ཀྱི་ཕྱེད་ཡིན་ནོ་ཞེས་བཤད་དེ། ཅིའི་ཕྱིར་ཞེ་ན། བཤང་བ་དང༌། གཅི་བ་དང༌། བད་ཀན་དང༌། མཁྲིས་པ་དག་གཏར་ག་བྱ་བའི་ནད་རྣམས་ཀྱང་རྩ་བ་ནས་འབྱིན་ཏོ། །དེ་བས་ན་དེ་ལས་བརྩམས་ཏེ། ནད་མ་ལུས་པ་དང་རླུང་གི་ནད་རྣམས་ཐམས་ཅད་མས་གཏོང་བས་གསོ་ཞིང་བཅོས་པར་བྱའོ། །ཞེས་བྱ་བའི་དོན་ནོ། །དེའི་ཕྱིར་ཚེའི་རིག་བྱེད་ཤེས་པའི་སྲོག་འཚོ་བའི་སློབ་དཔོན་གཞན་དག་ནི་གསོ་བ་རི་ཐབས་མ་ལུས་པ་མས་གཏོང་བར་འདུག་པས་ཁས་འཆེའོ། །ལ་ལ་དག་ནི་མས་གཏོང་བའི་གསོ་བའི་ཕྱིར་ཡིན་ནོ། །ཞེས་ཟེར་རོ། །དེ་བཞིན་དུ་གཏར་གས་ཁྲག་དབྱུང་བ་ཡང༌། ནད་རྙིང་པ་དང་གློ་བུར་བས་བཏབ་པའི་ནད་རྣམས་ལ་གཏར་གས་དབྱུང་བའི་གསོ་བའི་ཕྱེད་དམ། གསོ་བ་མ་ལུས་པར་གྱུར་པ་ཡིན་ནོ། །ཞེས་ཟེར་རོ། །དེ་བཞིན་དུ་རྙིང་གཞི་གནས་པ་དང༌། གློ་བུར་བ་གསར་དུ་བྱུང་བ་དག་ལ་ནི་ནད་རྙིང་གློ་བུར་བ་ཞེས་བྱ་སྟེ། དེ་དག་སྐྱེད་པར་བྱེད་པ་ཡིན་པས་ན་སྐྱེད་བྱེད་དེ། ཁྲག་ལ་བྱ་ལ་དེ་རབ་ཏུ་ཞི་ཞིང་བསལ་བ་ལ་ནི་གཏར་གས་ཁྲག་དབྱུང་ཞིང་ཁྲག་འདོན་པ་ཉིད་སྨན་དུ་འགྱུར་བ་ཡིན་པས་ན་ཁྲག་ལས་གྱུར་པའི་ནད་ཀྱི་གསོ་བའི་ཕྱེད་དམ། གསོ་བ་རངས་པ་ནི་གཏར་གས་ཁྲག་དབྱུང་བ་ཡིན་ནོ། །ཞེས་བྱ་བ་ནི་སྡུད་པར་བྱེད་པ་སྟེ། མས་གཏོང་བ་འབའ་ཞིག་གསོ་བ་ཡིན་པར་མ་ཟད་དེ། གཏར་གས་ཁྲག་དབྱུང་བ་ཡང་གསོ་བ་ཕྱེད་དམ། མ་ལུས་པ་ཡིན་ནོ། །ཞེས་བྱ་བའི་དོན་ནོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས་ལེའུ་བཅུ་དགུ་པའི་རྣམ་པར་འགྲེལ་བའོ།། །།
དེ་ནས་སྨན་སྣ་ནས་གཏང་བའི་ཆོ་གའི་ལེའུ་བཤད་པར་བྱའོ། །འདི་བརྩམས་པའི་འགྲེལ་བ་འདི་ཡིན་ཏེ། གང་གི་ཕྱིར་སྐྱུག་སྨན་ལ་སོགས་པས་ལུས་ཀྱི་ནང་ན་ཡོད་པའི་ནད་ཇི་ལྟར་སེལ་བར་བྱེད་པ་དེ་བཞིན་དུ་སྣ་ནས་གཏང་པའི་སྨན་ཡང་སྣའི་སྒོ་ནས་བཏང་བས་ལུས་ཀྱི་ནང་ན་སོང་བའི་ནད་དེ་ཕྱིར་འབྱིན་པར་བྱེད་དེ། དེས་སྐྱུག་སྨན་ལ་སོགས་པ་བཞི་པོ་ནད་ཕྱིར་འབྱིན་པར་བྱེད་པ་ཡིན་པ་དེ་བཞིན་དུ་སྣ་ནས་གཏང་བ་ཞེས་བྱ་བའི་ལྔ་པ་ཡང་དག་པའི་བྱ་བ་བྱེད་པ་ཡིན་ནོ། །ཡང་ན་ལུས་ནི་ཡན་ལག་ཐམས་ཅད་ལ་ཁྱབ་པ་ཡིན་པས་དེ་གསོ་བ་སྔར་བཤད་པ་ཡིན་ལ། དེ་ནི་ཐུར་མས་བཅོས་པའི་རྒྱུད་ཀྱི་ལེའུ་སྟོན་པ་ཡིན་ལ། དེ་ལས་འདིར་ནི་སྣ་ནས་གཏོང་བར་བྱེད་པའི་སྨན་ཡིན་པས་ན་སྣ་སྨན་ཏེ། སྣ་ནས་སྨན་གཏང་བ་དང་སྣའི་ལས་དང་སྨན་སྣ་ནས་གཏང་བ་ཞེས་བྱ་བའི་མིང་འཐོབ་པ་ཡིན་ནོ། །དེའི་ཆོ་ག་ནི་འདི་ལྟར་བྱའོ་ཞེས་བྱ་བའི་ཚུལ་ཏེ། དེའི་ལེའུ་བཤད་པར་བྱའོ་ཞེས་བྱ་བའི་དོན་ནོ། །ནམ་ཚོང་ཡན་ཆད་ནད་རྣམས་ལ། །ལྷག་པར་སྣ་ནས་གཏང་བ་ཕན། །སྣ་ནི་གླད་པའི་སྒོ་ཡིན་ཏེ། །དེས་ན་དེ་ནས་ནད་དེ་འཇོམས། །ཞེས་བྱ་བ་ལ། ནམ་ཚོང་ཡན་ཆད་ཀྱི་ནད་རླུང་དང་མཁྲིས་པ་དང་བད་ཀན་ལས་གྱུར་པ་གང་དག་ཡོད་པའི་ཡུལ་དེ་ཐམས་ཅད་ལ་ལྷག་པ་འམ་ཁྱད་པར་དུ་སྣ་ནས་གཏང་བ་ཕན་པ་ཡིན་ནོ། །ཡང་དེར་སྐྱུག་སྨན་ལ་སོགས་པའི་ཐབས་མེད་པ་མ་ཡིན་མོད་ཀྱི་ཁྱད་པར་རམ་ལྷག་པར་སྣ་ནས་གཏང་བ་མཆོག་ཏུ་གྱུར་བ་ཡིན་ནོ། །དེ་ཅིའི་ཕྱིར་ཞེ་ན། སྣ་ནི་གླད་པའམ་མགོ་བོའི་སྒོ་ནས་འཇུག་པའི་གནས་དེའི་རྒྱུ་དེས་ན་སྣ་ནས་གཏང་བཞེས་པའི་ལམ་དེ་ནས་སྨན་བ་སྟེན་ཅིང་བཏང་ན། རྣ་བའི་གསང་གི་བར་དུ་ཕྱིན་ནས། གླད་པ་དང༌། རྣ་བ་དང༌། ལྐོག་མ་ལ་སོགས་པའི་རྩའི་སྒོ་རྣམས་ཁྱབ་པས། ནམ་ཚོད་ཡན་ཆད་ཀྱི་ནད་མ་ལུས་པ་དེ་འཇོམས་ཏེ། མགོར་ཁྱབ་པའི་ནད་སེལ་བ་ཡིན་ནོ། །དེ་ནི་རྣམ་པ་གསུམ་སྟེ། བཀྲུ་བ་དང་བརྟ་བ་དང་ཞི་བར་བྱེད་པའོ། །དེ་ལས་ཀྱང་བཀྲུ་བ་ནི། །བཀྲུ་སྨན་གླད་པའི་ནད་རྣམས་དང༌། བློང་བག་ལྐོག་ནད་མཆི་མ་འཛག །སྐྲང་དང་ཐོར་བུ་སྲིན་རྨེན་བུ། །མཛེ་སྨྱོ་ཆམ་པས་བཏབ་ལ་གཏང༌། །ཞེས་བྱ་
བ་ལ། བཀྲུ་སྨན་སྣ་ནས་བཏང་བ་ནི་གླད་པའི་ནད་ལ་སོགས་པ་ལ་གཏང་བར་བྱའོ། །བཀྲུ་སྨན་ནི་མགོ་བོའི་ནད་བཀྲུ་ཞིང་སྦྱང་བའི་སྨན་ནོ། །བློང་བག་ནི་སེམས་མི་གསལ་བའོ། །མཆི་མ་འཛག་པ་ནི་མིག་ནས་རྫི་བོར་འབྱུང་བ་ལ་སོགས་པའོ། །སྲིན་བུས་སྤྱི་བོ་དང་མཚུལ་བར་ཁྱབ་བའོ། །ཆམ་པ་ནི་སྣའི་ནད་དོ། །བརྟ་བ་རླུང་ལས་བྱུང་གཟེར་དང༌། །གླད་པ་ཕྱེད་ན་སྐད་འགགས་དང༌། །སྣ་དང་ཁ་སྐམ་ཚིག་མི་ཐོན། །མིག་དབྱེ་དཔུང་པ་བསྐྱོད་དཀའ་གཏང༌། །ཞེས་བྱ་བ་ལ། སྣ་ནས་བཏང་བའི་སྨན་བརྟ་བར་བྱ་བ་གང་ཡིན་པ་ནི། རླུང་ལས་བྱུང་བའི་མགོ་བོའི་གཟེར་ནད་རྣམས་དང༌། དེ་བཞིན་དུ་ཉི་མ་ཕྱེད་ཀྱི་བར་དུ་གླད་པ་ན་བ་དང༌། སྐད་འགགས་ཤིང་ཉམས་པ་དང༌། དེ་བཞིན་དུ་ཁ་དང་སྣ་སྐམ་པ་དང༌། ཚིག་མི་ཐོན་ཞིང་སྐད་བརྡ་སྤྲོད་མི་ནུས་པ་དང༌། མིག་དབྱེ་བར་དཀའ་བའི་མིག་ནད་དང༌། དེ་བཞིན་དུ་རླུང་གི་ནད་དཔུང་པ་བསྐྱོད་པར་དཀའ་བ་དག་ལ་བཏང་ཞིང་སྦྱར་བར་བྱའོ། །ཞི་བ་མིག་སྔོན་གདོང་ལྤགས་ནད། །སྐྲ་ཡི་སྐྱོན་མིག་དམར་ལ་གཏང༌། །ཞེས་བྱ་བ་ལ། སྣ་ནས་གཏང་བ་ཞི་བར་བྱེད་པ་གང་ཡིན་པ་དེ་ནི། འོག་ནས་རྒྱུད་ཕྱི་མ་ལས་བཤད་པའི་མིག་གི་ནད་སྔོན་པོར་གྱུར་པ་ལ་སོགས་པའི་ནད་ལ་ཡང་གཏང་བར་བྱའོ། །དང་པོར་རང་སྦྱོར་ཇི་ལྟའི་སྣུམ། །སྨན་གྱི་ལྡེ་གུ་སོགས་བསྐོལ་དང༌། །ཤིང་མངར་རྒྱམ་ཚ་ཆང་རྙིང་སོགས། །ཅི་རིགས་པར་ནི་བསྐོལ་ལ་གཏང༌། །ཞེས་བྱ་བ་ལ། སྣ་ནས་གཏང་བར་བཤད་པའི་སྨན་དང་པོ་ནི་རང་གི་སྦྱོར་བ་ཇི་ལྟ་བ་གང་དང་འཕྲོད་ཅིང་འཚམ་པའི་སྣུམ་རྣོན་པོ་ཡུངས་མར་ལ་སོགས་པ་དང་ཅི་རིགས་པར་བསྐོལ་ཞིང་མགོ་བོའི་བཀྲུ་སྨན་རྣམས་དང་ཅི་རིགས་པར་བསྐོལ་བ་དང༌། དེ་བཞིན་དུ་སྨན་ཕྱེ་དང་སྨན་ཁུ་ལ་སོགས་པ་མགོ་བོའི་བཀྲུ་སྨན་ལས་འབྲེལ་པ་ལས་ཅི་རིགས་པར་སླ་བ་དང་ཞིབ་པ་དང༌། ལྡེ་གུར་བསྲེས་ཤིང་སྦྱར་བ་དང༌། དེ་བཞིན་དུ་ཤིང་མངར་དང་རྒྱམ་ཚྭ་དང༌། ཆང་རྙིང་ལ་སོགས་པ་དང་སྦྱར་ཏེ། བསྐོལ་བ་གཏང་བར་བྱའོ། །བརྟ་བ་འུ་སུའི་ཁུ་བ་དང༌། །ཤ་ཁུ་ཁྲག་དང་ཐང་ཆུ་སྦྱར། །ཞེས་བྱ་བ་ལ། སྣ་ནས་གཏང་བའི་སྨན་བརྟ་བར་བྱེད་པ་ནི་འུ་སུའི་ཁུ་བ་དེ་བཞིན་དུ་ཤ་ཁུ་དང་ཁྲག་
དང་དེ་བཞིན་དུ་ཁ་པུ་ར་ཞེས་བྱ་བའི་ཐང་ཆུ་དང་སྦྱར་ལ་གཏང་བར་བྱའོ། །འང་ཞེས་བྱ་བ་སྦྱོར་བའི་སྒྲས་ནི་རང་སྦྱོར་བ་ཇི་ལྟ་བའི་སྣུམ་མངར་བ་དང༌། སྣུམ་པའི་སྨན་ལ་བཙོས་པ་བརྟ་བའི་སྨན་སྣ་ནས་གཏང་བ་ལས་སྦྱར་བར་བྱའོ། །ཞེས་བྱ་བའི་དོན་ཏོ། །ཞི་བ་སྔ་མ་འོ་མ་དང༌། །ཆུ་དང་བཅས་པ་སྦྱར་བར་བྱ། །ཞེས་བྱ་བ་ལ། སྣ་ནས་གཏང་བའི་སྨན་ཞི་བ་ནི་སྔ་མ་ཞེས་བྱ་བའི་སྔར་བཤད་པའི་རང་གི་སྦྱོར་བ་ཇི་ལྟ་བའི་སྣུམ་དང༌། རང་གི་སྨན་གང་དག་ཡིན་པའི་ཁུ་བ་ལ་སོགས་པ་དང༌། དེ་བཞིན་དུ་འོ་མ་དང་ཆུ་དང་བཅས་པ་སྦྱར་བར་བྱའོ། །ཚད་ཅན་དང་ནི་ཚད་ཕྲན་ཏེ། །འདི་ཡི་སྣུམ་ཚད་རྣམ་པ་གཉིས། །ཞེས་བྱ་བ་ལ། སྣ་ནས་གཏང་བའི་སྨན་གསུམ་བོ་འདི་ལ་སྣུམ་གྱི་སྨན་མར་གཏང་བའི་ཁྱད་པར་གྱི་ཚད་ནི། ཚད་ཀྱི་དབྱེ་བ་ལས་རྣམ་པ་གཉིས་ཏེ། ཚད་ཅན་དང༌། ཚད་མེད་དོ། །ལྡེ་གུ་ལ་སོགས་བཙིར་བ་ཡི། །རྣོ་དེ་སྤྱི་བོའི་བཀྲུ་སྨན་ཡིན། །ཞེས་བྱ་བ་ལ། ལྡེ་གུ་དང་སྨན་བསྐོལ་བའི་ཁུ་བ་ལ་སོགས་པ་སྦྱར་བའི་སྨན་རས་བལ་གྱི་ཡེའུ་ལ་སོགས་པས་གཏོང་བ་དེ་ནི་བཙིར་བ་ཞེས་བྱའོ། །གཞན་དག་ན་རེ་ལྡེ་གུར་བྱས་པའི་སྨན་བཙོས་པ་ལས་ཁུ་བ་བཙིར་ཏེ། འཛག་པར་བྱས་པ་ལས་བྱའོ། །ཞེས་ཟེར་རོ། །བཙིར་བ་དེ་སྨན་རྣོན་པོའི་ལྡེ་གུ་བསྐོལ་བ་ལ་སོགས་པས་བཏང་བ་ནི་སྤྱི་བོའི་བཀྲུ་སྨན་ཞེས་བྱའོ། །ཕྱེ་མ་བུད་པའི་བཀྲུ་སྨན་ཏེ། །སྦུ་གུ་སོར་དྲུག་ཁ་གཉིས་པ། །ནང་ན་སྨན་དང་བཅས་པ་དག །ཁ་ཡི་དབུགས་ཀྱིས་བུས་ཏེ་གཏང༌། །དེས་ནི་མགོ་ནད་མང་པོ་ཡང༌། །ཕྱེ་མ་ཡིན་བས་འབྱིན་པར་བྱེད། །ཅེས་བྱ་བ་ལ། འཁྲུ་བར་འགྱུར་བའི་སྨན་ལས་སྦྱར་བའི་ཕྱེ་མ་ནི་བུད་པར་བྱ་བ་ཡིན་པས་ན་བུད་པའི་བཀྲུ་སྨན་ཞེས་བྱ་སྟེ། ཕྱེ་མ་དེ་ཁའི་རླུང་གིས་བུས་ལ་སྣ་ནས་གཏང་བར་བྱའོ། །གང་གིས་བཏང་ཞེ་ན། སྦུ་གུ་སོར་དྲུག་ཡོད་པ་ཁ་གཉིས་ཡོད་པ་དང༌། དེ་བཞིན་དུ་ནད་ན་སྨན་དང་བཅས་ཤིང་སྨན་ཕྱེ་མ་བླུགས་བ་དེ་ཁའི་དབུགས་ཀྱིས་བུས་ཏེ་གཏང་ངོ༌། །བུད་པའི་བཀྲུ་སྨན་དེས་ནི་མགོ་བོའི་བད་ཀན་ལས་བྱུང་བ་མང་པོ་ཡང་ཕྱི་ནས་འབྱིན་ཅིང༌། ནང་ནས་ཕྱིར་འདོན་པར་བྱེད་དོ། །མཛུབ་མོའི་ཚིགས་ནི་གཉིས་པའི་བར། །སྨྱུགས་པ་ཕྱིར་ཕྱུང་གྱུར་པ་ལས། །
ཐིགས་པ་བཅུ་འམ་བརྒྱད་དམ་དྲུག །ཇི་སྲིད་འཛག་པར་གྱུར་པ་དག །སྣ་ནས་གཏོང་ཚད་ཆེ་འབྲིང་ཆུང༌། །རིམ་པ་དེ་ཉིད་ཀྱིས་ཤེས་བྱ། །ལྡེ་གུ་ལ་སོགས་ཐིགས་པ་ནི། །གཉིས་ཀྱིས་ཕྲི་སྟེ་གཏང་བར་བྱ། །ཞེས་བྱ་བ་ལ། མཛུབ་མོ་ནི་མཐེ་བོང་ལ་ཉེ་བའི་སོར་མོ་སྟེ། དེའི་ཚིགས་གཉིས་ཀྱི་བར་དུ། དང་པོ་སྨྱུགས་ཤིང་སྤྱིངས་ལ་ཕྱིར་ཕྱུང་སྟེ། བཏེག་པར་གྱུར་པ་ལས་ཐིགས་པའི་ཚད་ཇི་ཙམ་ཞིག་འབྱུང་བར་འགྱུར་བ་དེ་ལ་ཐིགས་པ་ཞེས་བྱ་ལ། ཐིགས་པ་དེ་ལས་སྣུམ་གྱི་ཚད་ཆེ་ཆུང་དུ་བྱ་བ་ནི་ཐིགས་པ་བཅུ་ནི་ཆེ་ཚད་ཡིན་ལ། ཐིགས་པ་བརྒྱད་ནི་འབྲིང་ཚད་ལ། ཐིགས་པ་དྲུག་ནི་ཆུང་ཚད་དོ། །ཚད་འདི་དག་ཉིད་ལས་ཆེ་དང་འབྲིང་དང་ཆུང་དུ་ནི་རིམ་གྱིས་ཐིགས་པ་གཉིས་ཀྱིས་ཆུང་ཞིང་ཕྲ་བའི་ལྡེ་གུ་ལ་སོགས་པའི་སྨན་གྱི་ཁུ་བ་སྣར་བླུགས་པ་ཡིན་པར་ཤེས་པར་བྱའོ། །ཆུ་དང་ཆང་དང་སྦྱར་དུག་མར། །འཐུང་བ་འམ་འཐུང་བར་འདོད་པ་དང༌། །ཁ་ཟས་འདོད་དང་མགོ་བཀྲུས་དང༌། །འཁྲུ་བར་འདོད་དང་གཏར་ག་བྱས། །ཆམ་སར་ཤུགས་འོངས་ཀྱིས་གཟིར་དང༌། །བུ་བཙས་ལུང་པ་དབུགས་མི་བདེ། །སྦྱང་བྱས་མས་གཏོང་ཆོ་ག་བྱས། །དེ་བཞིན་དུས་མིན་ཡུལ་རྨུགས་ལ། །སྣ་སྨན་གཏང་བར་མི་བྱ་སྟེ། །ཚབས་ཆེའི་ནད་སོགས་མ་གཏོགས་སོ། །ཞེས་བྱ་བ་ལ། སྨན་སྣ་ནས་བྱར་མི་རུང་བ་ནི་ཆུ་དང་ཆང་དང་དུག་དང་མར་འཐུངས་པ་ནས། མས་གཏོང་བའི་ཆོ་ག་བྱས་པའི་བར་དང༌། དེ་བཞིན་དུས་མ་ཡིན་པའི་ཡུལ་རྨུགས་པ་ལ་གཏང་བར་མི་བྱ་སྟེ། དུས་མ་ཡིན་པའི་ཡུལ་རྨུགས་པ་ནི་དབྱར་མ་གཏོགས་པའི་དུས་གཞན་གྱི་ཆོ། ཡུལ་རྨུགས་ཤིང་རླུང་དང་གྲང་ལྷགས་དང་ཆར་འབབ་པར་འཁྲིགས་པའི་ཉིན་མོ་ནི་དུས་མིན་ཡུལ་རྨུགས་ཞེས་བྱའོ། །ཅི་དེ་དག་གི་ཚེ་རྣམ་བ་ཐམས་ཅད་དུ་གཏང་བར་མི་བྱ་འམ་ཞེས་རྟོགས་ན། དེའི་ཕྱིར་སྨྲས་པ་ནི། ཚབས་ཆེན་ནད་སོགས་མ་གཏོགས་སོ། །ཞེས་བྱ་བ་ཡིན་ནོ། །དེ་གསོ་བར་བྱེད་པའི་ནད་ཚབས་པོ་ཆེམ་གཏོགས་ཏེ། ནད་ཚབས་ཆེ་བའི་ཚེ་ན་ནི་ཆུ་དང་ཆང་དང་དུག་དང་མར་ལ་སོགས་པ་འཐུངས་སུ་ཟིན་ཀྱང་གཏང་བར་བྱའོ། །ཞེས་བྱ་བར་སྦྱར་རོ། །དེས་ན་དུས་
གང་གི་ཚེ་སྣ་ནས་བཏང་བས་སྨིན་པར་བྱ་ཞེ་ན། །དེ་ནས་སྣ་ནས་སྨན་བཏང་བ། །བད་ཀན་ནང་པར་མཁྲིས་ཉིན་ཕྱེད། །རླུང་ཅན་ཕྱི་འཕྲེད་མཚན་མོ་གཏང༌། །ཞེས་བྱ་བ་ལ། འདིར་དེ་ནས་ཞེས་བྱ་བའི་སྒྲ་ནི། བཀྲ་ཤིས་པ་སྟོན་པར་བྱེད་པ་ཡིན་པར་སྦྱར་རོ། །དེ་ལ་སྣ་སྨན་གཏང་བའི་དུས་ནི་བད་ཀན་ནམ། བད་ཀན་ལས་གྱུར་པའི་ནད་ནི་བད་ཀན་གྱི་དུས་ནང་པར་གྱི་ཚེ་ཉིད་སྣ་ནས་གཏང་བའི་སྨན་གཏང་བར་བྱའོ། །མཁྲིས་པ་འཁྲུགས་སམ་དེ་ལས་བྱུང་བའི་ནད་རྣམས་ལ་མཁྲིས་པའི་དུས་ཉི་མ་ཕྱེད་ཀྱི་ཚེ་གཏང་བར་བྱའོ། །རླུང་གི་ནད་དམ། དེ་ལས་བྱུང་བའི་ནད་རྣམས་ལ་རླུང་ལྡང་བའི་དུས་ཕྱི་འཕྲེད་དེ། ཕྱི་དྲོ་དང་མཚན་མོའི་དུས་སུ་སྨན་སྣ་ནས་གཏང་བར་བྱའོ། །ནད་མེད་པ་ལ་སྟོན་ཀ་དང༌། །དཔྱིད་ཀྱི་ཚེ་ན་སྔ་དྲོ་གཏང༌། །དགུན་ནི་ཕྱེད་དུས་སོ་གའི་ཚེ། །ཕྱི་འཕྲེད་དབྱར་ནི་ཉི་དྲོན་བཅས། །ཞེས་བྱ་བ་ལ། ནད་མེད་ཅིང་ཐ་མལ་པར་གནས་པ་ལ་ནི་སྟོན་ཀ་དང་དཔྱིད་ཀའི་ཚེ་སྔ་དྲོ་སྟེ། ཉི་མའི་སྔ་དྲོའི་ཆ་ལ་གཏང་བར་བྱའོ། །ནད་མེད་པར་གནས་པ་ལ་དགུན་གྱི་ཚེ་སྟེ། དགུན་སྟོད་དང༌། དགུན་སྨད་གྲང་བའི་དུས་སུ་ནི། ཉི་མ་ཕྱེད་ལ་སྨན་སྣ་ནས་གཏང་བར་བྱའོ། །དེ་བཞིན་དུ་སོ་གའི་ཚེ་ནི་ཕྱི་འཕྲེད་དེ་ཕྱི་དྲོའི་དུས་སུ་ནི་སྨན་སྣ་ནས་གཏང་བར་བྱའོ། །དེ་བཞིན་དུ་དབྱར་གྱི་ཉི་མ་དྲོན་པོ་དང་བཅས་པའི་སྐབས་སུ་ནད་མེད་པ་ལ་སྣ་ནས་གཏང་བར་བྱའོ། །གླད་པ་རླུང་ནད་ཀྱིས་ཐེབས་དང༌། །སྐྱིགས་བུས་བཏབ་དང་མགོ་འདར་དང། །གཉེའུ་རེངས་སྐད་ནི་འགགས་པ་ལ། །ཉིན་རེ་ནང་པར་དགོངས་ཀ་གཏང༌། །ཞེས་བྱ་བ་ལ། གླད་པར་རླུང་ནད་ཞུགས་ཤིང་མགོ་བོ་རླུང་གི་ནད་ཀྱིས་ཐེབས་པ་དང༌། དེ་བཞིན་དུ་མགོ་འདར་ཞིང་འདར་བ་ཞེས་བྱ་བའི་རླུང་གི་མགོ་ནད་དང༌། གཉེའུ་རེངས་ཤིང་འགྱུར་མི་ཤེས་པ་དང༌། སྐད་འགགས་ཤིང་སྐད་གདངས་ཉམས་པ་ལ། ཉིན་རེ་ཞིང་ནང་པར་དགོངས་ཀ་སྟེ། སྔ་དྲོ་དང་ཕྱི་དྲོ་སྣ་ནས་སྨན་གཏང་བར་བྱའོ། །གཞན་ལ་ཉིན་རེས་བར་བཅད་ལ། །ཉི་མ་བདུན་དུ་དེ་སྤྱད་བྱ། །ཞེས་བྱ་བ་ལ། གླད་པ་གང་ནད་ཀྱིས་ཐེབས་པ་དང༌།
སྐད་འགགས་ཤིང་སྐད་ལ་སོགས་པའི་ནད་མ་གཏོགས་པ་གཞན་དག་ལ་ནི། ཉིན་རེ་ཞིང་སྣ་ནས་གཏང་བའི་སྨན་མི་བྱའོ། གཞན་དུ་ན་ཉིན་རེ་རེས་བར་བཅད་པ་སྟེ། ཉི་མ་རེ་རེས་བར་བཅད་ཅིང་ཐག་ཆོད་པར་བྱས་ལ། སྨན་གཏང་བར་བྱ་སྟེ། ཚུལ་འདི་ལྟ་བུས་སྣ་ནས་གཏང་བའི་སྨན་ཞག་བདུན་གྱི་བར་དུ་གཏང་བར་བྱ་ཞིང་སྤྱད་པར་བྱའོ། །རྟག་ཏུ་བྱ་བའི་ལས་བྱས་ནས། །དང་པོར་མགོ་སྣུམ་བསྐུ་དུགས་བྱས། །རླུང་མེད་མལ་དུ་གནས་ནས་ནི། །ནམ་ཚོང་ཡན་ཆད་དུགས་ཀྱང་བྱ། །དེ་ནས་གན་རྐྱལ་ལུས་དྲང་བརྐྱང༌། །རྐང་པ་ལག་པ་ལེགས་བརྐྱང་ལ། །རྐང་པ་ཅུང་ཟད་བསྟོད་ནས་སུ། །མགོ་བོ་ཡིད་ཙམ་སྨད་པར་བྱ། །སྣ་བུག་གཅིག་ནི་རབ་བཀག་ལ། །རིམ་གྱིས་ཡོངས་སུ་བླུགས་བྱ་བ། །སྨན་ནི་ཆུ་དྲོན་གྱིས་བསྲོས་ལ། །སྦུ་གུ་འམ་རས་བལ་གྱིས་བླུགས་བྱ། །ཞེས་བྱ་བ་ལ། དེ་ནས་སྣ་ནས་གཏང་བ་ལ་འོས་པའི་སྐྱེས་བུས། རྟག་ཏུ་བྱ་བ་ལ་སོགས་བཤང་བ་དང་གཅི་བ་དང་པོར་བྱས་ལ། ཡང་དང་པོར་མགོ་བོ་སྣུམ་གྱིས་བསྐུས་ལ། དེའི་འོག་ཏུ་མགོ་བོའི་དུགས་རན་པ་ཙམ་བྱས་པ་དང༌། དེ་བཞིན་དུ་རླུང་མེད་པའི་གནས་སུ་མལ་བཏིང་བ་ལ་གནས་ཤིང་འདུག་ནས། ནམ་ཚོང་ཡན་ཆད་དུགས་ཀྱང་བྱས་ལ། དེ་ནས་དེའི་འོག་ཏུ་གན་རྐྱལ་དུ་འདུག་སྟེ། ལུས་དྲང་ཞིང་མ་ཡོ་བར་བརྐྱང་ལ། རྐང་པ་དང་ལག་པ་ཡང་ལེགས་པར་བརྐྱང་བར་གྱུར་པ་དང༌། སྣ་ནས་སྨན་གཏང་བར་བྱའོ། །ཡང་དེ་བཞིན་དུ་དེའི་རྐང་པ་ཅུང་ཟད་བསྟོད་དེ། གང་གི་རྐང་པ་མཐོ་བར་གྱུར་པ་དེ་ལྟ་བུར་ཁྲི་ལ་སོགས་པ་བཅའ་བར་བྱའོ། །དེ་ཉིད་ཀྱིས་ན་མགོ་བོ་ཡང་ཡིད་ཙམ་སྨད་པར་གྱུར་པ་དང༌། སྣ་ཁུང་གཅིག་བཀག་ཅིང་བཅད་ལ། སྣ་ཁུང་གཉིས་པ་གདངས་ཤིང་ཕྱེ་སྟེ། གནས་པ་ལ་སྣ་ནས་གཏང་བའི་སྨན་བླུགས་པར་བྱའོ། །དེ་བཞིན་དུ་སྣ་ཁུང་གཉིས་པར་ཡང་རིམ་གྱིས་སྣ་སྨན་སྦུ་གུ་མཆུ་ཅན་ནམ། སྲིན་བལ་གྱི་ཡེའུས་བླུགས་པར་བྱའོ། །བླུགས་ནས་རྐང་མཐིལ་ཕྲག་པ་དང༌། །ལག་པ་རྣ་བ་ལ་སོགས་མཉེ། །རིམ་གྱིས་བརྔུབས་ལ་གློ་གཉིས་སུ། །མཆིལ་མདོར་བ་དེ་ནས་ནི། །སྨན་ནི་ཟད་པར་གྱུར་གྱི་བར། །
ལན་གཉིས་ལན་གསུམ་སྣར་བཏང་སྤྱད། །ཅེས་བྱ་བ་ལ། དེར་སྨན་བླུགས་པ་དང༌། རྐང་མཐིལ་དང་ཕྲག་པ་དང༌། ལག་པ་དང་རྣ་བ་ལ་མཉེ་བར་བྱ་ཞིང༌། དེ་ནས་དེའི་འོག་ཏུ་རིམ་གྱིས་བརྔུབས་ལ། བློ་གཡས་གཡོན་གཉིས་སུ་མཆིལ་མ་དོར་བར་བྱའོ། །དེ་ནས་སྣ་གཡས་ནས་བཅུག་པའི་སྨན་བརྔུབས་པའི་མཆིལ་མ་གཡོན་ལོགས་སུ་དོར་བར་བྱ་ལ། གཡོན་གྱི་ནི་གཡས་སུའོ། །དེ་ལྟར་འདིས་སྨན་སྣ་ནས་གཏང་བ་ལ་ལན་གཉིས་ལན་གསུམ་དུ་སྤྱད་པར་བྱའོ། །གལ་ཏེ་བརྒྱལ་གྱུར་བསིལ་བའི་ཆུས། །མགོ་བོ་མ་གཏོགས་གཏོར་བར་བྱ། །ཞེས་བྱ་བ་ལ། སྨན་སྣ་ནས་གཏོང་བ་ན། གལ་ཏེ་བརྒྱལ་ཞིང་མི་དྲན་པར་གྱུར་ཏེ། སྨན་གྱི་སྟོབས་མ་གོམས་པས་བརྒྱལ་བར་གྱུར་ཏེ། མགོ་བོ་མ་གཏོགས་པར་གཞན་དུ་ཆུ་བསིལ་བས་ཀྱང་གཏོར་བར་བྱའོ། །བཀྲུ་སྨན་འོག་ཏུ་སྣུམ་དག་ནི། །ནད་སོགས་ཚུལ་ལས་དཔགས་ཏེ་གཏང༌། །ཞེས་བྱ་བ་ལ། སྣ་སྨན་བཏང་བའི་བཀྲུ་སྨན་བྱས་པའི་འོག་ཏུ། སྣ་ནས་གཏང་བ་སྣུམ་བ་གཏང་བར་བྱའི། རྩུབ་པ་ནི་མ་ཡིན་ལ། དེ་ཡང་ནད་ལ་སོགས་པའི་ཚུལ་ལས་དཔགས་ཤིང་ཤེས་པར་བྱས་ལ། དེ་དང་རྗེས་སུ་མཐུན་པའི་སྨན་ཏིལ་མར་ལ་སོགས་པ་གང་ཡང་རུང་བ་གཏང་བར་བྱའོ། །སྣ་སྨན་བཏང་མཐར་གན་རྐྱལ་དུ། །གྲངས་བརྒྱར་དེ་ལ་བསྡད་པར་བྱ། །དུད་པས་བརྔུབས་ལ་ཆུ་དྲོན་འཇམ། །གྲེ་བ་མཚུལ་པ་དག་ཕྱིར་བྱ། །ཞེས་བྱ་བ་ལ། སྐྱེས་བུ་སྣ་ནས་སྨན་བྱས་ཤིང་བཏང་ཟིན་ནས། མཐར་གན་རྐྱལ་དུ་གྲངས་བརྒྱ་རྫོགས་ཀྱི་བར་དུ་བསྡད་པར་བྱའོ། །དེའི་འོག་ཏུ་ཕན་པར་བྱེད་ཅིང་རྗེས་སུ་མཐུན་པའི་ཡོན་ཏན་དང་ལྡན་པའི་དུད་པ་བརྔུབས་ལ། ཆུ་ཅུང་ཟད་དྲོ་བ་འཇམ་པོ་མཁུར་བར་བཅང་བགྲེ་བ་དང་མཚུལ་པ་དག་པའི་ཕྱིར་རོ། །སྣུམ་བཏང་ལེགས་གྱུར་དབུགས་བདེ་རྒྱུ། །གཉིད་ལོག་སད་དེ་དབང་པོ་གསལ། །ཞེས་བྱ་བ་ལ། དེ་ལ་སྤྱིར་སྣུམ་བཏང་བ་ལེགས་པར་གྱུར་ན་དབུགས་བདེ་བར་འབྱིན་པ་སྔོན་དུ་འགྲོ་བས་དབུགས་རྒྱུ་བ་དང༌། དེ་བཞིན་དུ་བདེ་བར་གཉིད་ལོག་ཅིང་བདེ་
བར་སད་པ་དང༌། དབང་པོ་རྣམས་བདེ་ཞིང་རྣམ་པར་གསལ་བར་འགྱུར་རོ། །ཉེས་པས་མགོ་རྩུབ་མི་འགྱུར་སྐམ། །སྣ་དང་ཁ་སྐམ་གླད་སྟོང་སྙམ། །ཞེས་བྱ་བ་ལ། སྣུམ་གྱི་སྣ་སྨན་ཉེས་པས་མགོ་རྩུབ་ཅིང་མི་འགྱུར་བར་ཧར་ཧར་པོར་འདུག་པར་འགྱུར་བ་དང༌། སྐམ་པ་དང༌། དེ་བཞིན་དུ་སྣ་དང་ཁ་སྐམ་པར་འགྱུར་བ་དང༌། གླད་པ་སྟོང་པ་སྙམ་སེམས་པར་འགྱུར་རོ། །སྣུམ་དྲགས་གཡན་དང་ལྕི་བ་ཉིད། །མཆིལ་མང་ཆམ་འདེབས་ཡི་ག་འཆུས། །ཞེས་བྱ་བ་ལ། སྤྱི་བོར་སྣ་ནས་སྣུམ་བཏང་དྲགས་པར་གྱུར་ན། ཤིན་ཏུ་གཡའ་བར་འགྱུར་བ་དང༌། མགོ་ལྕི་བ་ཉིད་དང༌། མཆིལ་མ་དང་སྣབས་མང་བ་དང༌། ཆམ་པས་འདེབས་ཤིང་ཡི་ག་འཆུས་པར་འགྱུར་རོ། །ལེགས་བཀྲུས་མིག་གསལ་ཡང་བ་དང༌། །ཁ་དང་སྐད་ནི་དག་པར་འགྱུར། །འཁྲུས་ཉེས་ནད་ནི་འཕེལ་བར་འགྱུར། །བཀྲུས་དྲགས་ཁོང་ནི་རྨྱ་བར་འགྱུར། །ཞེས་བྱ་བ་ལ། མགོ་བོའི་བཀྲུ་སྨན་ལེགས་ཤིང་སྦྱོར་བ་ཕྱིན་ཅི་མ་ལོག་པར་གྱུར་ན། མིག་གསལ་ཞིང་ཡང་བ་དང༌། ཁ་དང་སྐད་གདངས་དག་ཅིང་གསལ་བར་འགྱུར་རོ། །མགོ་དེའི་བཀྲུ་སྨན་ཉེས་ཤིང་མ་ལེགས་པར་གྱུར་ན། ནད་ཀྱི་དཀྱེལ་འཕེལ་ཞིང་སླར་སོགས་པར་འགྱུར་རོ། །མགོ་བོའི་ཁྲུས་ཤིན་ཏུ་དྲགས་པར་གྱུར་ན། ཁོང་རྨྱ་ཞིང་ཉམ་ཆུང་བར་འགྱུར་རོ། །ཚད་ཆུང་གློ་རྡོལ་རིད་པ་དང༌། །བྱིས་པ་རྒན་པོ་སྐྱིད་པར་གནས། །དུས་མིན་ཆར་འབབ་པར་ཡང་གཏང༌། །ཞེས་བྱ་བ་ལ། སྣ་ནས་གཏང་བའི་སྨན་ཚད་ཆུང་ངུ་ནི། གློ་རྡོལ་བ་ལ་སོགས་པ་ལ་ཡང་གཏང་བར་བྱ་ལ། དེ་བཞིན་དུ་དུས་མ་ཡིན་པར་ཡུལ་རྨུགས་པ་ལ་ཡང་གཏང་དུ་རུང་ངོ༌། །དེ་ལ་གློ་རྡོལ་བ་ནི་གློ་ནས་ཁྲག་བྱུང་བའམ། བྲང་གི་ཤ་ཟད་པའོ། །རིད་པ་ནི་མི་རོ་སྐམ་པོ་ལྟར་སྐེམ་པའོ། །བྱིས་པ་ནི་ལོ་བཅུ་དྲུག་མན་ཆད་དོ། །རྒན་པོ་ནི་བདུན་ཅུ་ཡན་ཆད་ལོན་པའོ། །སྐྱིད་པར་གནས་པ་ནི་རྟག་ཏུ་བདེ་ཞིང་གཞོན་ཤ་ཅན་དུ་གནས་པའོ། །དེ་ནི་ཆམ་པས་དྲག་བཏབ་དང༌། །ཆང་འཐུངས་རྣ་བ་འོན་པ་དང༌། །གླད་རྒྱས་སྲིན་བུ་ཞུགས་པ་དང༌། །ནད་བསྡུས་ཕྱིར་ནི་མ་ཕྱུང་ལ། ཚད་ཆུང་བ་
ནི་གཏང་མི་བྱ། །ཞེས་བྱ་བ་ལ། སྣ་ནས་གཏང་བའི་སྨན་ཚད་ཆུང་ངུ་དེ་ནི་ཆམ་པ་དྲག་པོས་བཏབ་པ་དང༌། དེ་བཞིན་དུ་ཆང་འཐུངས་པ་སྟེ། གང་གིས་དུས་དེ་ཉིད་ཀྱི་ཚེ་འཐུངས་པ་དང༌། དེ་བཞིན་དུ་རྣ་བ་འོན་ཞིང་སྒྲ་འཛིན་པ་ལ་ཞེན་པ་དང༌། དེ་བཞིན་དུ་གླད་རྒྱས་ལ་སྲིན་བུ་ཞུགས་པ་དང༌། དེ་བཞིན་དུ་ནད་མང་པོ་ཁོང་དུ་བསྡུས་པའམ། སྤྱིར་ནད་མང་བར་གྱུར་པ་དང༌། ནད་བསྡུས་ནས་ཕྱིར་མ་བྱུང་བར་གྱུར་པ་ལ་ཡང་གཏང་བར་མི་བྱ་སྟེ། གང་གི་ཕྱིར་ཚད་ཆེན་པོ་ནས་ཆུང་བ་ནི་དམན་པ་ཉིད་ཡིན་པའི་ཕྱིར་ནུས་པ་ཆུང་བ་ཡིན་ནོ། །ཉིན་མཆན་ཟས་ཟོས་སློན་གཉིད་ཉལ། །མཐའ་དང་བུད་མེད་ལམ་ངལ་དུབ། །མགོ་བསྐུས་མཁུར་བཀང་དབོ་བའི་རྗེས། །བཤང་གཅི་མིག་སྨན་བཏང་རྗེས་དང༌། །སོ་ཤིང་གི་རྗེས་དགོད་པ་ཡི། །རྗེས་ལ་ཐིགས་པ་གཉིས་པ་གཏང༌། །ལྔ་ཡིས་དབང་པོའི་བུ་ག་དག །གསུམ་གྱིས་རིམ་བཞིན་ངལ་བ་སེལ། །ལྔ་བོས་མིག་ནི་གསལ་བར་བྱེད། །སོ་བརྟན་རླུང་ནད་ཞི་བར་འགྱུར། །ཞེས་བྱ་བ་ལ། ཚད་ཆུང་ངུ་བཏང་བའི་དུས་ནི་བཅྭ་ལྔ་པ་འདི་དག་སྟེ། མཚན་མོ་ཟས་ཟོས་པའི་རྗེས་ལ་སོགས་པ་ལ་གཏང་བར་བྱ་ལ། ཚད་ཆུང་ངུ་འདི་ནི་ཐིགས་པ་གཉིས་ཏེ། ལན་གཉིས་ཐིགས་པའི་ཚད་ཡིན་ལ། དེ་ཡང་དང་པོའི་ལྔའི་མཐའ་མར་བཏང་ན་བུ་ག་རྣམས་སྦྱངས་ཤིང་དག་པར་བྱེད་དེ། དེ་ཡང་མཚན་མོའི་མཐའ་དང༌། ཟས་ཟོས་པའི་མཐའ་དང༌། སློན་པའི་མཐའ་དང༌། ཉིན་པར་ཉལ་བའི་མཐར་བཏང་ན་དབང་པོའི་བུ་ག་རྣམས་གསལ་ཞིང་དག་པར་འགྱུར་རོ། །གསུམ་གྱིས་རིམ་བཞིན་ངལ་བ་སེལ། །ཞེས་བྱ་བ་ལ་ནི། བུད་མེད་ཀྱིས་དུབ་པའི་མཐའ་དང་ལམ་གྱིས་དུབ་པའི་མཐའ་དང༌། ངལ་ཆད་པའི་མཐའ་སྟེ། མཐའ་གསུམ་པོར་བཏང་ན་ངལ་བ་དེ་གསུམ་སེལ་བར་འགྱུར་རོ། །ལྔ་བཏང་མིག་ནི་གསལ་བར་འགྱུར། །ཞེས་བྱ་བ་ལ། མགོ་བཀྲུས་པའི་རྗེས་དང༌། མཁུར་བ་བཀང་ནས་ཕོ་བའི་རྗེས་དང༌། བཤང་བ་བཏང་བའི་རྗེས་དང༌། གཅི་བ་བཏང་བའི་རྗེས་དང༌། མིག་སྨན་བཏང་བའི་རྗེས་ལ་བཏང་ན་མིག་གསལ་ཞིང་
སྟོབས་དང་ལྡན་པར་འགྱུར་རོ། །སོ་ཤིང་ཟོས་པའི་རྗེས་ལ་བཏང་ན་སོ་བརྟན་པར་འགྱུར་རོ། །དགོད་པའི་རྗེས་ལ་ཐིགས་པ་གཉིས་བཏང་ན་རླུང་ཞི་བར་འགྱུར་རོ། །སྣ་སྨན་ལོ་བདུན་མ་ལོན་དང༌། །བརྒྱད་ཅུ་འདས་ལ་གཏང་མི་བྱ། །བཅོ་བརྒྱད་མ་ལོན་དུད་མི་བདུག །མཁུར་བཀང་ལྔ་མ་ལོན་ལ་མིན། །ལོ་བཅུ་མ་ལོན་སྦྱང་མི་གཏང༌། །བདུན་ཅུ་འདས་ལ་འང་མི་བྱའོ། །སྐྱེས་ནས་རྒས་པའི་བར་དུ་ནི། །ཚད་ཆུང་མས་གཏོང་ལྟ་བུར་བསྔགས། །དེ་ནི་རྟག་ཏུ་བསྟེན་གྱུར་ན། །ཚད་ཆེ་བ་ལྟར་ཡོན་ཏན་སྐྱེད། །འདི་ལ་བདམ་པ་གང་ཡང་མེད། །གནོད་ལས་ཚད་ཆེན་ལྟར་འཇིགས་མེད། །ཅེས་བྱ་བ་ལ། སྨན་སྣ་ནས་གཏང་བ་ནི། བྱིས་པ་ལོ་བདུན་མ་ལོན་པ་དང༌། ལོ་བརྒྱད་ཅུ་ཡན་ཆད་འདས་པའི་ནད་པ་ལ་གཏང་བར་མི་བྱའོ། །བཅོ་བརྒྱད་མ་ལོན་དུད་མི་བདུག །ཅེས་བྱ་བ་ནི། མི་ལོ་བཅོ་བརྒྱད་མ་ལོན་པ་མན་ཆད་ནི་དུད་པས་བདུག་པའི་སྨན་གཏང་བར་མི་བྱའོ། །དེ་བཞིན་དུ་མཁུར་བ་བཀང་ནས་དབོ་བའི་སྨན་ཡང་ལོ་ལྔ་མ་ལོན་པ་མན་ཆད་ལ་གཏང་བར་མི་བྱའོ། །དེ་བཞིན་དུ་ལོ་བཅུ་མ་ལོན་པ་ལ་བཀྲུ་སྨན་གྱིས་སྦྱང་བ་མི་བྱའོ། །དེ་བཞིན་དུ་ལོ་བདུན་ཅུ་ཡན་ཆད་འདས་པའི་ན་ཚོད་དང་ལྡན་པ་ལ་སྦྱང་བ་མི་བྱའོ། །དགག་པ་འདི་བཀྲུ་སྨན་བཏང་བའི་སྐབས་ཡིན་པར་ཤེས་པར་བྱའོ། །སྐྱུག་སྨན་ནི་མ་ཡིན་ཏེ་བྱིས་པ་ནི་ཕལ་ཆེར་འོ་མ་དང་མར་ཟ་བས་བད་ཀན་ལས་བྱུང་བའི་ནད་ཡོད་པས་ན་ནད་ཐམས་ཅད་བཀྲུ་སྨན་བསྔགས་པ་མ་ཡིན་ནོ་ཞེས་བཤད་པའི་ཕྱིར་རོ། །ཡང་ཚད་རབ་ཏུ་ཆུང་བ་ཐིགས་པ་གཉིས་པ་ནི་འདི་ནི་སྐྱེས་ནས་ཞེས་བྱ་བ་བྱིས་པ་ལོ་གཅིག་མ་ལོན་པ་ནས། འཆི་བ་ནས་རྒས་པའི་མཐར་ཐུག་པའི་བར་ལ་ཚད་ཆུང་ངུ་བསྟེན་པ་བསྔགས་པ་ཡིན་ཏེ། དེ་ཡང་ཇི་ལྟར་མས་གཏོང་བ་སྐྱེས་ནས་རྒས་པའི་བར་དུ་གཏང་དུ་རུང་ཞིང་བསྔགས་པ་ཡིན་པ་དང་འདྲ་བར་ཚད་ཆུང་ངུ་འདི་བསྔགས་པ་ཡིན་ནོ། །ཚད་ཆུང་ངུ་དེ་རྟག་ཏུ་བསྟེན་ཅིང་རྒྱུན་དུ་གོམས་པར་བྱས་ན། ཐུན་ཚད་ཆེ་བ་དང་འདྲ་བར་ཡོན་ཏན་སྐྱེད་པར་བྱེད་པ་ཡིན་ཏེ། དེ་བས་ན་སྐྱེས་ནས་རྒས་ཀྱི་བར་དུ་བསྔགས་པ་ཡིན་ནོ། །སྣ་ནས་གཏང་
བའི་སྨན་ཆུང་ངུ་འདི་ལ་ནི་སྔར་གྱི་ཚད་དུ་བསྟན་པའི་ཆེ་འབྲིང་ཆུང་གསུམ་ལྟར་བདམ་པ་ཡོད་པ་མ་ཡིན་ཏེ། སྣུམ་གྱི་ཆོ་གའི་སྐབས་ནས་བཤད་པའི་ཆོ་ག་ལྟ་བུ་བསྟེན་ཅིང་བསྲུང་མི་དགོས་སོ། །ཡང་ཚད་ཆེན་པོ་བཏང་བ་ལས་གནོད་པ་འབྱུང་བའི་འཇིགས་བ་ཡོད་པ་ལྟར་འདི་ལྟར་འདི་ལ་དེ་ལྟ་བུའི་གནོད་པའི་འཇིགས་པ་འབྱུང་བར་མི་འགྱུར་རོ། །སྣ་སྨན་དོན་དུ་ཏིལ་མར་ཉིད། །རྟག་ཏུ་བསྟེན་པ་བསྔགས་པ་ཡིན། །མགོ་ནི་བད་ཀན་གནས་ཡིན་ཕྱིར། །སྣུམ་གཞན་བདེར་གནས་ལ་མི་བསྔགས། །ཞེས་བྱ་བ་ལ། བདེ་བར་ནད་མེད་པར་གནས་པའི་སྐབས་སུ་སྣ་ནས་གཏང་བའི་སྨན་གྱི་དོན་དུ་ཏིལ་མར་ཉིད་བསྔགས་པ་ཡིན་གྱི། མར་ལ་སོགས་པའི་སྣུམ་གཞན་རྟག་ཏུ་བསྟེན་པ་བསྔགས་པ་མ་ཡིན་ནོ། །དེ་ཅིའི་ཕྱིར་ཞེ་ན། མགོ་བོ་ནི་བད་ཀན་གྱི་གནས་ཡིན་པའི་ཕྱིར་སྣུམ་གཞན་མི་བསྔགས་ཀྱི་ཏིལ་མར་ནི་བད་ཀན་སེལ་བ་ཡིན་བས། དེའི་ཕྱིར་སྣུམ་གཞན་མར་ལ་སོགས་པ་ནད་མེད་པའི་སྐབས་སུ་གཏང་བ་བསྔགས་པ་མ་ཡིན་ནོ། །མྱུར་བྱེད་རིང་ཞིག་བྱེད་པ་དང༌། །ཡོན་ཏན་ཆེ་དང་ཆུང་བྱེད་པའི། །ཁྱད་པར་ཚད་ཆེན་ཚད་ཆུང་དང༌། །གལ་ཏེ་མེད་པར་གྱུར་ན་ནི། །གང་ཞིག་སྤང་བཅས་གནོད་བཅས་པའི། །ཚད་ཆེན་དག་ནི་སུ་ཞིག་སྟོན། །སྣུམ་དངས་བཏུང་བ་རྟག་བཤད་དུ། །སྤྱིལ་བུ་རླུང་དང་ཚད་པར་གནས། །འཇམ་རྩི་ཚད་ཅན་མས་གཏོང་ཚད། །དེ་དང་འདྲ་བར་རྣམ་པར་བསྟན། །ཞེས་བྱ་བ་ལ། འདི་ནི་ཡན་ལག་བརྒྱད་པ་བསྡུས་པ་ལས་གཞུང་རྩོམ་པར་བྱེད་པས་བཤད་པ། འདིར་ལ་ལ་ཞིག་གིས་བཅུག་པ་ཡིན་མོད་ཀྱི། འོན་ཀྱང་འདིར་བཤད་པར་བྱ་སྟེ། གལ་ཏེ་ཚད་ཆེ་བ་སྔར་རྣམ་པ་གསུམ་དུ་བསྟེན་པ་དང༌། ཚད་ཆུང་ངུ་ཐིགས་པ་གཉིས་པ་དེ་དག་ལ་ཁྱད་པར་མེད་པར་གྱུར་ན། སྤང་བར་བྱ་ཞིང་ཉེས་དམིགས་དང་བཅས་པའི་ཚད་ཆེན་པོས་ནད་པ་གསོ་བར་གླེན་པ་སུ་ཞིག་བྱེད་དེ། ཚད་ཆུང་འདིས་ཆོག་མོད། །དེས་ན་འདི་གཉིས་ལ་ཡོན་ཏན་གྱི་ཁྱད་པར་ཅི་ཡོད་ཅེ་ན། དེའི་ཕྱིར་མྱུར་བྱེད་ཅེས་བྱ་བ་ལ་སོགས་པ་སྨྲས་པ་ཡིན་ཏེ། ཚད་ཆེ་བ་དང་ཆུང་བ་གཉིས་ནི། གཉིས་པ་ཁྱད་པར་གྲངས་ཇི་ལྟ་བ་བཞིན་དུ་
མྱུར་དུ་བྱེད་པ་དང༌། རིང་ཞིག་ན་བྱེད་པ་དང༌། ཡོན་ཏན་ཆེ་བ་དང༌། ཆུང་བར་བྱེད་པའི་ཁྱད་པར་མཆོག་སྟེ་ཐ་མ་དག་ཡོད་པ་མ་ཡིན་ཏེ། དེ་ཡང་ཆེ་ཚད་གསུམ་པོ་ནི་སྣུམ་གྱི་ལས་ལ་སོགས་པ་མྱུར་དུ་བྱེད་པ་ཡིན་ནོ། །དེ་བཞིན་དུ་འདི་ཉིད་ཡོན་ཏན་ཤས་ཆེ་བར་བྱེད་པ་ཡིན། དེ་བཞིན་དུ་ཆུང་ཞིང་དམན་པར་ཡང་བྱེད་པ་སྟེ། དེ་ལྟ་བུའི་ཡོན་ཏན་གྱི་ཁྱད་པར་ཡོད་པ་ལ་བརྟེན་ནས། ཚད་ཆེན་པོར་བཤད་པ་གསུམ་པ་ནི་སྤང་བ་དང་བཅས་ཤིང་གནོད་པ་དང་བཅས་སུ་ཟིན་ཀྱང༌། ཚད་ཆེན་པོ་དག་བྱ་བ་ཁོ་ན་སྟོན་པ་ཡིན་ཏེ། དེ་བཞིན་དུ་སྐབས་ཀྱིས་གཞན་དག་ཀྱང་བཤད་པ་ཡིན་ཏེ། སྣུམ་དངས་མ་བཏུང་བ་ནི་སྤང་བར་བྱ་བ་དང་བཅས་ཤིང༌། མི་མཐུན་པའི་སྐབས་གནོད་པའི་སྐབས་སྤང་བ་མེད་པ་མ་ཡིན་ཡང༌། འོན་ཀྱང་ཞུན་མར་ལ་སོགས་པའི་སྣུམ་དངས་མ་བསྟེན་པར་བཤད་པ་ནི་མྱུར་དུ་བྱེད་པ་དང༌། ཡོན་ཏན་ཆེ་བའི་ཕྱིར་རོ། །དེ་བཞིན་དུ་སྤྱིལ་བུར་གནས་ནས་བཅུད་ཀྱིས་ལེན་ཉེ་བར་བསྟེན་པ་དང༌། དེ་བཞིན་དུ་རླུང་དང༌། ཚད་པར་གནས་ནས་རླུང་དང་ཉི་ཚན་གྱི་ཆོ་གས་བཅུད་ཀྱིས་ལེན་བསྟེན་པར་བྱེད་པ་དེ་གཉིས་ལ་ཁྱད་པར་མེད་པར་གྱུར་ན་སྤྱིལ་བུར་གནས་པའི་ཆོ་ག་སྤང་བ་དང༌། གནོད་པ་དང་བཅས་པ་སུ་ཞིག་སྟོན་པར་བྱེད་ན། གང་གི་ཕྱིར་སྤྱིལ་བུ་ལ་གནས་པ་ནི་མྱུར་བར་བྱེད་པ་དང༌། ཡོན་ཏན་ཆེ་བ་ཡིན་ལ། རླུང་དང་ཚད་པར་གནས་པ་ནི་རིང་ཞིག་ན་བྱེད་པ་དང༌། ཡོན་ཏན་ཆུང་བ་ཡིན་ཏེ། ཚད་འདི་གཉིས་ཀྱི་ཁྱད་པར་ཡང་དེ་དང་འདྲའོ། །དེ་བཞིན་དུ་འཇམ་རྩེ་མས་གཏོང་བའི་ཚད་ཀྱང་དེ་དང་འདྲ་བར་བཤད་པ་ཡིན་ཏེ། དེས་ན་འཇམ་རྩི་མས་གཏོང་བ་ནི་མྱུར་དུ་བྱེད་པ་དང༌། ཡོན་ཏན་ཆེ་བ་ཡིན་ལ། འཇམ་རྩི་ཚད་ཤིན་ཏུ་ཆུང་བའི་མས་གཏོང་བ་ནི་རིང་ཞིག་ན་བྱེད་པ་དང༌། ཡོན་ཏན་ཆུང་བ་ཡིན་ན། དེ་བས་ན་ཁྱད་པར་འདི་གཉིས་ལ་བརྟེན་ནས་འཇམ་རྩི་ཚད་དང་ལྡན་པ་དག་ནི་སྤང་བར་བྱ་བ་དང༌། གནོད་པ་དང་བཅས་སུ་ཟིན་ཀྱང་བཤད་པ་ཡིན་གྱི། མས་གཏོང་བ་ཆུང་ངུ་ཆུང་ངུས་བྱེད་པ་གཅིག་བུམ་བཤད་དེ། འདི་གཉིས་ནི་འབྲས་བུ་ཁྱད་པར་ཡོད་པ་ཡིན་ནོ། །ཛ་ལ་སྒྲོན་ཤིང་རྫི་བན་ཏི། །
གླ་སྒང་ཤིང་ཚ་པུ་ཤེལ་ཙི། །གོ་བི་ཙནྡན་སྐྱེར་པའི་རྩ། །ཤིང་མངར་གླ་བ་ཨ་ཀ་རུ། །ཉེའུ་ཤིང་བིལ་བ་པུཎྜ་རཱི། །ཨུཏྤལ་མུར་པརྞི་གཉིས། །བྲི་ཧ་ཏི་གཉིས་བྱི་དང་ག །གནྡྷ་བྷ་དྲ་སུག་སྨེལ་དང༌། །ཧ་རེ་ཎུ་ཀ་པདྨ་ཡི། །གེ་སར་དང་ནི་བ་ལ་སྟེ། །སྨན་ནི་འདི་རྣམས་ཆ་སྙོམས་ལ། །ཆར་པའི་ཆུས་ནི་བསྐོལ་བར་བྱ། །ཏིལ་མར་ལས་ནི་སྨན་གྱི་ཁུ། །བཅུ་འགྱུར་ལྷག་བྱས་དེ་ལས་ནི། །ཏིལ་མར་ཆུ་དང་བསྐོལ་བྱ་བ། །ལན་བཅུ་ཉིད་ནི་བསྐོལ་ནས་ནི། །ཚོས་པ་ཡི་ནི་བཅུ་ཆ་ལ། །དེ་མཉམ་ར་ཡི་འོ་མ་བླུགས། །སྣར་བཏང་ཏིལ་མར་ཡོན་ཏན་ཆེ། །ཐིགས་ཕྲན་ཞེས་བྱ་འདི་བསྟེན་བྱ། །ཞེས་བྱ་བ་ལ། ཛ་ལ་ཞེས་བྱ་བ་ནི་རྩྭ་སྨན་བ་ལ་ཀའོ། །ཛི་བན་ཏི་ནི་གྲགས་པར་ཟད་དོ། །གོ་བི་ནི་ཤི་རི་བའོ། །གླ་བ་ནི་བ་རི་པེ་ལའོ། །ཉེའུ་ཤིང་ནི་ཤ་ཏ་པ་རིའོ། །པུཎྜ་རཱི་ནི་པྲ་པུཎྜ་རཱི་ཀའོ། །ཨུཏྤ་ལ་ནི་ཨུཏྤ་ལ་སྔོན་པོའོ། །མུ་ར་ནི་གན་དམུ་རའོ། །པརྞི་གཉིས་ནི་ས་ལ་པརྞི་དང༌། ཀྲྀཥྞ་པརྞིའོ། །བྲི་ཧ་ཏི་གཉིས་ནི་བྲི་ཧ་ཏི་དང༌། ཀཎྜ་ཀ་རིའོ། །ཧ་རེ་ཎུ་ཀ་ནི་རེ་ཎུ་ཀའོ། །པདྨའི་གེ་སར་ནི་པདྨའི་སྙིང་པོའི་གེ་སར་རོ། །བ་ལ་ནི་གྲགས་པར་ཟད་དོ། །སྨན་འདི་རྣམས་ལེགས་པར་ཆ་སྙོམས་ལ། དེའི་བརྒྱད་འགྱུར་གྱི་ཆར་པའི་ཆུ་དང་བསྐོལ་བ་ཇི་སྲིད་ཏིལ་མར་གྱི་བཅུ་འགྱུར་ལུས་པར་འགྱུར་གྱི་བར་དུ་བསྐོལ་བར་བྱའོ། །དེ་ལྟར་སྨན་གྱི་ཁུ་བ་ཏིལ་མར་གྱི་བཅུ་འགྱུར་ལུས་པར་བྱས་ལ། དེའི་འོག་ཏུ་བསྐོལ་བའི་ཆུ་ཏིལ་མར་གྱི་བཅུ་འགྱུར་ཡོད་པ་ལ། དེ་ལ་ཏིལ་མར་ཆ་གཅིག་དང༌། ལན་བཅུའི་བར་དུ་བསྐོལ་བར་བྱའོ། ལྷག་པ་འམ་མ་ཚང་བ་མ་ཡིན་ནོ། །འདི་ཉིད་ཅེས་བྱ་བ་ངེས་པར་གཟུང་བ་སྨོས་པ་ཡིན་ནོ། །དེ་ལ་ཏིལ་མར་ཆོས་པའི་ཚད་ནི་ཅི་ནས་སྨན་བསྐོལ་བའི་ཆུ་དེ་བཅུ་ཆ་རེ་རེ་དང་སོ་སོར་བསྐོལ་བས་རྫོགས་ཀྱི་བར་དུ་བསྐོལ་ནས། ཏིལ་མར་དེ་ཚོས་པར་གྱུར་པ་དེ་ལྟར་བྱའོ། །ཚོས་པ་བཅུ་ཆ་དེ་དང་མཉམ་པའི་རའི་འོ་མ་བླུགས་པར་བྱ་སྟེ། གང་དང་མཉམ་ཞེ་ན། ཏིལ་མར་དང་བསྐོལ་བའི་ཆུ་དང་མཉམ་པར་བྱའོ། །དེ་ཡང་འདི་སྐད་སྟོན་པ་ཡིན་ཏེ། ཛ་ལ་དང་སྒྲོན་ཤིང་ལ་སོགས་པའི་སྨན་ཆ་མཉམ་སྲང་སུམ་
ཅུ་རྩ་གཉིས་པ་ཕྲག་བརྒྱ་སྟེ། སུམ་སྟོང་ཉིས་བརྒྱ་བསྐོལ་ལ་བསྐོལ་བའི་སྨན་ཁུ་ལྷག་མ་སྲང་སུམ་ཅུ་ཉི་ཤུ་ལུས་པར་བྱས་ཏེ། དེའི་བཅུ་ཆ་སྨན་ཁུ་སྲང་སུམ་ཅུ་རྩ་གཉིས་དང༌། ཏིལ་མར་སྲང་སུམ་ཅུ་རྩ་གཉིས་བསྐོལ་བར་བྱའོ། །དེ་བཞིན་དུ་བསྐོལ་བ་བཅུ་པོའི་སྐབས་སུ་ཏིལ་མར་དང་མར་དང་མཉམ་པའི་རའི་འོ་མ་སྲང་སུམ་ཅུ་རྩ་གཉིས་གཞུག་པར་བྱའོ། །སྣ་ནས་གཏང་བའི་ཏིལ་མར་འདི་ནི་ཡོན་ཏན་ཆེ་ཞིང་བསྟེན་པར་བྱ་བ་ཡིན་པར་དྲང་སྲོང་རྣམས་ཀྱིས་བཤད་ལ། འདིའི་མིང་ནི་ཐིགས་ཕྲན་ཞེས་བྱ་སྟེ། མགོ་བོའི་ཆའི་རྩ་ཕྲན་རྣམས་སུ་ཐིགས་པ་ཕྲ་མོས་ནང་དུ་འཇུག་པར་ནུས་པའི་ཕྱིར། ཏིལ་མར་འདི་ལ་ཐིགས་ཕྲན་གྱི་ཏིལ་མར་ཞེས་དོན་དང་ལྡན་པའི་མིང་བཏགས་པ་ཡིན་ནོ། །སྣ་ནས་གཏང་བའི་སྨན་བསྟེན་པས། །ཕྲག་པ་མགྲིན་པ་དཔུང་མགོ་ནི། །མཁྲེགས་ཤིང་མཐོ་ལ་པགས་མདོག་གསལ། །དབང་བརྟན་སྐྲ་དཀར་མེད་པར་འགྱུར། །ཞེས་བྱ་བ་ལ། དེ་ལྟར་བསྟན་པའི་སྣ་ནས་གཏང་བའི་སྨན་བསྟེན་ཅིང་གོམས་པར་བྱས་པས་ནི། སྐྱེས་བུ་དེ་ཕྲག་པ་དང༌། མགྲིན་པ་དང་དཔུང་མགོ་མཐོ་ཞིང་སྲ་ལ་མཁྲེགས་པར་འགྱུར་བ་དང༌། པགས་པའི་མདོག་གསལ་ཞིང་དངས་པར་འགྱུར་བ་དང༌། དེ་བཞིན་དུ་མིག་ལ་སོགས་པའི་དབང་པོ་བརྟན་ཞིང་ཡུལ་འཛིན་པར་ནུས་པ་དང༌། སྐྲ་དཀར་མེད་ཅིང་རྒས་སྲ་བ་ཉིད་དུ་འགྱུར་བ་ཁོ་ན་ཡིན་ནོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་ཉི་ཤུ་པའི་རྣམ་པར་འགྲེལ་བའོ།། །།དེ་ནས་སྨན་གྱི་དུད་པ་གཏང་བའི་ཆོ་གའི་ལེའུ་བཤད་པར་བྱའོ། །ཞེས་བྱ་བ་ལ། འདི་བརྩམས་པའི་འགྲེལ་བ་ནི་འདི་ཡིན་ཏེ། སྔར་བཤད་པའི་སྨན་སྣ་ནས་གཏང་བའི་རྗེས་ལ། དུད་པ་བརྔུབས་ཏེ། མཁུར་བ་བཀང་ནས་དབོ་བར་བྱའོ། །ཞེས་སྔར་བཤད་པས་ན། དུད་པ་དེའི་ཆོ་ག་འདི་དང་འདི་ལྟར་བྱའོ་ཞེས་བྱ་བའི་ཚུལ་གྱིས་ལེའུ་བཤད་པ་ཡིན་ནོ། །ནམ་ཚོང་ཡན་ཆད་བད་རླུང་ལས། །བྱུང་བའི་ནད་རྣམས་མི་སྐྱེ་དང༌། །སྐྱེས་པ་རྣམས་ནི་
བསལ་བའི་ཕྱིར། །མཁས་པས་རྟག་ཏུ་དུད་པ་བརྔུབ། །ཅེས་བྱ་བ་ལ། ནམ་ཚོང་ཡན་ཆད་ཀྱི་བད་ཀན་ལས་བྱུང་བའི་ནད་དང༌། རླུང་ལས་བྱུང་བའི་ནད་དང༌། དེ་བཞིན་དུ་བད་ཀན་དང་རླུང་ལས་བྱུང་བའི་ནད་རྣམས་མི་འབྱུང་བའི་ཕྱིར་དང༌། དེ་བཞིན་དུ་སྐྱེས་ཤིང་བྱུང་བ་རྣམས་བསལ་ཞིང་གཞོམ་བར་བྱ་བའི་ཕྱིར་སྐྱེས་བུ་མཁས་པ་བདག་ལ་ཕན་པར་འདོད་པས་རྟག་པར་དུས་ཐམས་ཅད་དུ་དུད་པའི་སྨན་བརྔུབ་ཅིང་བཏུང་བར་བྱའོ། །དེ་ནི་འཇམ་དང་བར་མ་རྣོ། །རླུང་དང་བད་རླུང་བད་ཀན་ལ། །ཞེས་བྱ་བ་ལ། དུད་པ་དེ་ནི་འཇམ་བ་དང་བར་མ་དང༌། རྣོ་བའི་དབྱེ་བས་རྣམ་པ་གསུམ་ཡོད་དོ། །དེ་ལས་འཇམ་ཞིང་སྣུམ་པ་ནི། བད་ཀན་ཅུང་ཟད་དང་ལྡན་པའི་རླུང་ནད་ལ་གཏང་བར་བྱའོ། །བར་པ་ནི་རླུང་དང་བད་ཀན་འདྲེས་པའི་ཆ་མཉམ་པ་ལ་གཏང་བར་བྱའོ། །རྣོན་པོ་ནི་བད་ཀན་ལ་བཏང་བར་བྱའོ། །དེ་ལ་འཇམ་པ་ནི་བརྟས་པར་བྱེད་པ་དང༌། སྣུམ་པ་དང༌། འཇམ་པ་ཞེས་བྱ་བ་རྣམ་གྲངས་ཡིན་ནོ། །བར་མ་ནི་ཞི་བར་བྱེད་པ་དང༌། སྦྱོར་བ་ཅན་ཞེས་བྱ་བ་རྣམ་གྲངས་ཡིན་ནོ། །རྣོ་བ་ནི་སྦྱོར་བ་དང་བཀྲུ་བ་ཞེས་བྱ་བ་རྣམ་གྲངས་ཡིན་ནོ། །གཏང་ངོ་མཁྲིས་ཁྲག་གིས་ཉེན་དང༌། །ཁྲུས་བཏང་དམུ་རྫིང་ཟ་ཁུ་དང༌། །རབ་རིབ་སྦོས་དང་སྟོད་རླུང་ནད། །ལྐོག་ནད་མས་གཏོང་བྱས་པ་དང༌། །ཉ་དང་ཆང་དང་འོ་མ་ཞོ། །སྦྲང་རྩི་མར་དང་དུག་འཐུངས་སོགས། །མགོ་ནད་སྐྱ་རྦབ་ནད་ཅན་ནི། །མཚན་གཉིད་མ་ལོག་ལ་མི་གཏང༌། །ཞེས་བྱ་བ་ལ། དུད་པ་དེ་ནི་མཁྲིས་པ་དང་ཁྲག་གི་ནད་ཀྱིས་ཉེན་པ་དང༌། བཀྲུ་སྨན་བཏང་བ་ལ་སོགས་པ་ལ་གཏང་བར་མི་བྱའོ། །སྟོད་ཀྱི་རླུང་ནད་ནི་རོ་སྟོད་ཀྱི་རླུང་ནད་དོ། །ལྐོག་ནད་ནི་ལྐོག་མ་འགགས་པ་ལ་སོགས་པའོ། །ཉ་དང་ཆང་འཐུངས་པ་ལ་སོགས་པ་མཚན་མོ་གཉིད་ཀྱིས་མ་ལོག་པ་ལ་དུ་བའི་སྨན་གཏང་བར་མི་བྱའོ། །གལ་ཏེ་དུད་པ་ཆེར་བརྔུབ་ས་ན། །ཁྲག་དང་མཁྲིས་འཕེལ་འོན་ལོང་དང༌། །སྐོམ་དང་བརྒྱལ་དང་རྨོངས་པར་བྱེད། །དེར་ནི་བསིལ་བའི་ཆོ་ག་ཕན། །ཞེས་བྱ་བ་ལ། དུད་པ་གསུམ་པོ་དུས་མ་ཡིན་པར་བརྔུབས་པ་དང༌། བཀག་པའི་གནས་
ལ་བརྔུབས་པ་དང༌། སྦྱོར་བ་ནོངས་པས་བརྔུབས་པ་དང༌། །ཆེར་བརྔུབས་ཤིང་ལྷག་པར་བརྔུབས་པ་ནི། ཁྲག་དང་མཁྲིས་པ་འཕེལ་བར་འགྱུར་བ་དང༌། དེ་བཞིན་དུ་འོན་བ་སྟེ་རྣ་བའི་དབང་པོ་ལ་གནོད་པར་འགྱུར་བ་དང༌། མིག་ལོང་ཞིང་མཐོང་བ་ཉམས་པ་དང༌། སྐོམ་པ་དང༌། དེ་བཞིན་དུ་བརྒྱལ་ཞིང་འབོག་པ་དང༌། རྨོངས་ཤིང་མྱོས་པར་བྱེད་དོ། །ཁྲག་དང་མཁྲིས་པ་འཕེལ་བ་ལ་སོགས་པ་དེར་ནི་བསིལ་བའི་ཆོ་ག་སྟེ། སྨན་ཁ་ནས་བཏང་བ་དང༌། མིག་བསྐུ་བ་དང༌། མིག་སྨན་དང༌། ཆུས་གཏོར་བ་དང༌། ཟས་དང་སྐོམ་པའི་ཆོ་ག་ཐམས་ཅད་བསིལ་བར་བྱས་པས་ཕན་ནོ། །བཀྲེས་སྦྲིད་གླལ་དང་བཤང་གཅི་བསལ། །བུད་མེད་བསྟེན་དང་གཏར་ག་བཏབ། །དགོད་དང་སོ་ཤིང་བཅས་པ་ཡི། །མཐར་ནི་དུད་པ་འཇམ་པོ་གཏང༌། །ཞེས་བྱ་བ་ལ་སོགས་པ་བརྒྱད་ཀྱི་མཐར། དུད་པ་འཇམ་པོ་རྔུབ་ཅིང་གཏང་བར་བྱའོ། །དུས་འདི་དག་ནས་མཚན་ཟས་ཟོས། །སྣ་སྨན་རྗེས་ལ་བར་མ་བརྔུབ། །ཅེས་བྱ་བ་ལ། དུས་བརྒྱད་པོ་འདི་དག་ཉིད་ཀྱི་ཚེ་དང་མཚན་མོའི་མཐའ་དང་ཟས་ཟོས་པའི་མཐའ་དང༌། སྣ་སྨན་བཏང་བའི་རྗེས་ལ་དུད་པ་བར་མ་བརྔུབ་ཏུ་རུང་སྟེ། དུད་པ་འཇམ་པོ་གཏང་བའི་དུས་བརྒྱད་དང་མཚན་མོའི་མཐའ་ལ་སོགས་པར་དུ་བ་བརྔུབ་པར་བྱའོ། །གཉིད་ལོག་སྣ་སྨན་མིག་སྨན་ཁྲུས། །སློན་པའི་རྗེས་ལ་རྣོན་པོས་བཀྲུ། །ཞེས་བྱ་བ་ལ། གཉིད་ལོག་པ་ལ་སོགས་པའི་རྗེས་ལ་སྨན་རྣོན་པོས་མགོ་བོ་བཀྲུས་པའི་དུད་པ་བརྔུབ་པར་བྱའོ། །མས་གཏོང་གཅེའུ་འདྲར་བྱས་པ་ཡི། །དུད་གཅེའུ་སྦུབས་གསུམ་དྲང་པོར་བྱ། །རྩ་བ་མཐེབ་ཤོང་རྩེ་མོ་ནི། །རྒྱ་ཤུག་ཤོང་བའི་ཚང་དུ་བྱ། །ཞེས་བྱ་བ་ལ། དུ་བ་བརྔུབ་བའི་གཅེའུ་ནི། མས་གཏོང་བའི་གཅེའུའི་རྒྱུ་དང་འདྲ་བར་བྱ་ལ། དེ་བཞིན་དུ་སྦུབས་གསུམ་པོ་སྟེ། ནང་གི་ཁོང་སྦུབས་དང་ཁ་གསུམ་པར་བྱ་བ་དང༌། དྲང་ཞིང་ཡ་ཡོ་མེད་པར་བྱ་བ་དང༌། དེ་བཞིན་དུ་རྩ་བའི་སྦོམ་མཐེ་བོ་ཤོང་བ་ཙམ་བྱ་བ་དང༌། རྩེ་མོའི་བུ་ག་རྒྱ་ཤུག་གི་འབྲས་བུ་ཤོང་བར་བྱའོ། །དེ་ཡི་ཚད་ནི་རྔུབ་བྱེད་པའི། །སོར་ནི་ཉི་ཤུ་སུམ་ཅུ་གཉིས། །
བཞི་བཅུ་རྣོ་དང་བར་མ་དང༌། །འཇམ་པོ་ལ་ནི་རིམ་བཞིན་བྱ། །ཞེས་བྱ་བ་ལ། རྣོན་པོ་ལ་སོགས་པའི་དུ་བ་གསུམ་ལ། དེའི་གཅེའུའི་ཚད་ནི་རིམ་པ་བཞིན། དུ་བ་རྣོན་པོ་གཏོང་བ་ལ་རྔུབ་པར་བྱེད་པའི་ནད་པའི་སོར་ཉི་ཤུ་རྩ་བཞི་བྱའོ། །བར་མ་ལ་སོགས་སུམ་ཅུ་རྩ་གཉིས་སོ། །འཇམ་པོ་ལ་ནི་རིམ་བཞིན་བྱ། དེ་ལྟར་གཅེའུ་རིང་པོས་ནི་ཐག་རིང་པོ་ནས་འཇུག་པའི་གཅེའུའི་སྦུབས་ནས། ཕྲ་མོ་རིམ་གྱི་ས་གཞུག་པས་ཁྱབ་ཅིང་བདེ་བར་བྱེད་པར་འགྱུར་རོ། །དྲང་པོར་འདུག་ཅིང་དེ་ལ་སེམས། །ཁ་གདངས་ནས་ནི་ལན་གསུམ་བརྔུབ། །སྣ་ཁུང་རེ་རེ་བཀག་ནས་ནི། །སྣར་ནི་དུད་པ་བརྔུབ་པར་བྱ། །ཞེས་བྱ་བ་ལ། དུད་པ་གཏོང་བའི་ཚེ་དྲང་པོར་འདུག་ཅིང༌། མ་ཡོ་བར་གནས་པར་བྱ་བ་དང༌། དེ་བཞིན་དུ་དེ་ལ་སེམས་པ་སྟེ། དུད་པ་བརྔུབ་པ་ལ་སོགས་པ་ལ་མ་ཡེངས་པ་དང༌། དེ་བཞིན་དུ་ཁ་གདངས་ཤིང་མཆུ་དང་སོ་ཕྱེ་ནས་དུ་བ་ལན་གསུམ་བརྔུབ་ཅིང་བཏང་ལ། སྣ་ཁུང་ཡ་གཅིག་བཀག་ནས་སྣ་ཁུང་གཅིག་ནས་དུད་པ་བརྔུབ་པའོ། །དེ་བཞིན་དུ་སྣ་ཁུང་གཉིས་རེ་རེ་ནས་བཀག་ཅིང་ལན་གསུམ་བརྔུབ་པར་བྱའོ། །མགོ་དང་སྣར་གཏོགས་ནད་བསྐྱོད་པ། །དང་པོར་སྣ་ནས་བརྔུབ་པར་བྱ། །བསྐྱོད་པའི་དོན་དུ་ཁ་ནས་བརྔུབ། །གྲེ་བར་གཏོགས་པ་དེ་ལས་བཟློག །ཅེས་བྱ་བ་ལ། མགོ་དང་སྣར་གཏོགས་པའི་ནད་བསྐྱོད་ཅིང་བསྡུས་ལ། རང་ཉིད་བསྐྱོད་པའི་ནད་ལ་ནི། དང་པོར་ཏེ་ཐོག་མར་སྣ་ནས་བརྔུབས་ལ། ཕྱིས་ཁ་ནས་བརྔུབ་པར་བྱའོ། །གྲེ་བའི་ནད་ལ་ནི་དེ་ལས་བཟློག་པའི་ཚུལ་གྱིས་བརྔུབ་པར་བྱ་སྟེ། གྲེ་བའི་ནད་བསྐྱོད་ཅིང་གློངས་པ་ལ་ནི་དང་པོར་ཁ་ནས་དུད་པ་བརྔུབས་ལ། ཕྱིས་སྣ་ནས་བརྔུབ་པར་བྱའོ། །གྲེ་བའི་ནད་མ་བསྐྱོད་ཅིང་མ་བསྡུས་པ་ནི། དེ་བསྐྱོད་པར་བྱ་བའི་ཕྱིར་དང་པོ་སྣ་ནས་དུད་པ་བརྔུབས་ལ། ཕྱིས་ཁ་ནས་བརྔུབ་པར་བྱའོ། །དུ་བ་ཁ་ཉིད་ནས་སློན་གྱི། །སྣར་སློན་མིག་ལ་གནོད་པར་བྱེད། །ཅེས་བྱ་བ་ལ། སྣ་ནས་བརྔུབ་པའི་དུད་པ་དང༌། ཁ་ནས་བརྔུབ་པའི་དུད་པ་ནི་གཉི་ག་ཡང་ཁ་ཉིད་ནས་སློན་ཕྱིར་གདོན་པར་བྱའི་མིག་ལ་འཇིགས་པ་ཡོད་པའི་ཕྱིར་སྣ་
ནས་སློན་པར་མི་བྱའོ། །དུད་པ་བརྔུབ་དང་འབྱིན་པ་ཡིས། །ལན་ནི་གསུམ་གསུམ་བརྔུབ་པར་བྱ། །ཞེས་བྱ་བ་ལ། དུ་བ་བརྔུབ་པ་ནི་ལན་གསུམ་གསུམ་བརྔུབ་པ་དང༌། འབྱིན་པའི་ཚུལ་གྱིས་བརྔུབ་པར་བྱའོ། །འཇམ་པོ་ཉིན་གཅིག་ལན་གཅིག་གཏང༌། །བར་མ་ལན་གཉིས་སྦྱོར་བ་ནི། །ལན་གསུམ་ལན་བཞི་གཏང་བར་བྱ། །ཞེས་བྱ་བ་ལ། དུ་བ་འཇམ་པོ་ནི་ཉི་མ་རངས་པ་ལ་རང་གི་གཏང་བར་བྱ་བའི་ནད་རྣམས་ལ་ལན་ཅིག་གཏང་བར་བྱའོ། །དེ་བཞིན་དུ་སྦྱོར་བའི་དུད་བ་རྣོན་པོ་ནི་ཉིན་གཅིག་ལ་རང་གི་གཏང་བར་བྱ་བའི་ནད་རྣམས་ལ་ལན་གསུམ་མམ་བཞི་གཏང་བར་བྱའོ། །དེར་སྨན་གུ་གུལ་ཨ་ཀ་རུ། །གླ་སྐྲང་རྡོ་དྲེག་སྠོ་ནེ་ཡ། །སྤང་སྤོས་ཨུ་ཤིར་བ་ལ་ཀ །ཤིང་ཚ་ཀོ་ན་ཏི་ཤིང་མངར་དང༌། །བིལ་རྐང་ཨེ་ལ་བ་ལུ་ཀ །པོག་དཀར་ཤི་རི་པེ་སྟ་ཀ །བྱ་མ་ཀ་གླ་བ་སྦྲ་ཚིལ། །པོག་ནག་གུར་གུམ་མ་ཤ་དང༌། །ཀུན་ཏུ་རུ་དང་ནས་དང་ཏིལ། །སྣུམ་བཅས་འབྲས་བུ་སྙིང་པོ་དང༌། །ཚིལ་དང་རྐང་དང་ཞག་དང་མར། །ཞེས་བྱ་བ་ལ། དེ་ལ་སྨན་གྱི་དུ་བ་གསུམ་པོ་དེ་དག་གི་ནང་ནས་དུ་བ་འཇམ་པོའི་སྨན་འཕྲོད་ནི། གུ་གུལ་ནས་མར་གྱི་བར་ཡིན་ནོ། །རྡོ་དྲེག་ནི་ཤེལ་ལ་ཡང་སྟེ། ཕ་བོང་གི་དྲག་པའོ། །ཡང་ན་བྲག་ཞུན་ལ་བྱའོ། །སྠོ་ནེ་ཡ་ནི་ཏེ་ལ་པ་ཏོ་ཀའོ། །སྤང་སྤོས་ནི་ན་ལ་ཀའོ། །ཀོན་ཏི་ནི་ཏ་རེ་ནུ་ཀའོ། །བིལ་བའི་རྐང་ནི་བི་ལ་བའི་ནང་ངོ༌། །ཨེ་ལ་བ་ལུ་ཀ་ནི་ཧི་རི་བ་ལུ་ཀའོ། །ཤི་རི་བེ་སྟ་ཀ་ནི་ཤི་རི་བེ་སྟ་ཀ་སྟེ། ཐང་ཤིང་གི་ཐང་ཆུའོ། །པོག་དཀར་པོ་ནི་སརྫ་ར་སའོ། །བྱ་མ་ཀ་ནི་ད་བ་དྷག་དྷའོ། །གླ་བ་ནི་མན་བྱ་མའོ། །པོག་ནག་པོ་ནི་ས་ལ་ཀིའོ། །མ་ཤ་ནི་མོན་སྲན་གྲེའུའོ། །སྣུམ་དང་བཅས་པའི་འབྲས་བུ་ནི་སྟར་གའི་འབྲས་བུ་ལ་སོགས་པའོ། །དེ་བཞིན་དུ་སྙིང་པོ་ནི་ཤིང་སཱ་ལ་དང༌། ཨ་ཀ་རུ་དང༌། ཐང་ཤིང་དང༌། ཤིང་ཤ་པ་ལ་སོགས་པའི་སྙིང་པོའི་ཁུ་བའི་སྣུམ་མོ། །ཡང་དེ་བཞིན་དུ་ཚིལ་དང་རྐང་དང་ཞག་དང་མར་དང་སྦྱར་བ་ལས་དུད་པའི་སྨན་བྱའོ། །ཞི་བ་པོག་ནག་རྒྱ་སྐྱེགས་དང༌། །རྒུན་འབྲུམ་པདྨ་ཨུཏྤ་ལ། །ནྱ་གྲོ་དྷ་དང་ཨ་ཤྭདྠ། །ཨུ་དུམྦཱར་བླག་ཤ་དང༌། །སེང་ཕྲོམ་ཤུན་པ་ཀ་ར་དང༌། །
ཤིང་མངར་ཀླུ་ཤིང་ཤུག་པ་གཅོད། །དྲི་ལས་རྒྱ་སྤོས་རུ་རྟ་བསྐོལ། །ཞེས་བྱ་བ་ལ། ཞི་བར་བྱེད་པའི་དུ་བའི་སྨན་ནི་པོག་ནག་པོ་དང༌། རྒྱ་སྐྱེགས་ལ་སོགས་པ་ལ་བྱ་སྟེ། ནྱ་གྲོ་དྷ་ལ་སོགས་པ་ཤིང་ལྔའི་ཤུན་ལྤགས་ལས་སྦྱར་རོ། །ཀླུ་ཤིང་གི་ཤུན་ལྤགས་ནི་ནཱ་ག་གེ་སར་གྱི་ཤིང་གི་ཤུན་པའོ། །ཤུག་པ་ནི་ཧེ་མ་པདྨ་ཁའོ། །བཙོད་ནི་མན་ཛི་ཏའོ། །དྲིའི་རྫས་རྣམས་ལས་རྒྱ་སྤོས་དང༌། རུ་རྟ་བསྐོལ་བ་མ་གཏོགས་པར་བྱས་པའི་དྲིའི་རྫས་ཐམས་ཅད་དོ། །རྣོན་པོ་ཛོ་ཏི་སྨ་ཏི་དང༌། །སྐྱེར་པ་དང་ནི་རྩ་བ་བཅུ། །ལྡོང་རོས་བ་བླ་རྒྱ་སྐྱེགས་དང༌། །གི་རི་གར་དཀར་འབྲས་བུ་གསུམ། །དྲི་ཡི་སྨན་ལ་རོ་རྣོ་བའི། །མགོ་བོའི་བཀྲུ་སྨན་སྡེ་ཚན་ནོ། །ཞེས་བྱ་བ་ལ། དུ་བའི་སྨན་རྣོན་པོ་ལ། ཛོ་ཏི་ལ་སོགས་པའི་སྨན་རྣམས་ཡིན་ཏེ། ཛོ་ཏི་སྨ་ཏི་ནི་གྲང་གུ་ནི་ཀའོ། །རྩ་བ་བཅུ་ནི་རྩ་བ་ལྔ་པ་ཆེ་ཆུང་གཉིས་སོ། །དྲིའི་སྨན་རོ་རྣོ་བ་ནི་རུ་རྟ་ལ་སོགས་པའི་དྲི་རྣོ་བའི་རྫས་སོ། །མགོ་བོའི་བཀྲུ་སྨན་གྱི་སྡེ་ནི་ཨུ་ཤི་ར་དང༌། ཨ་པ་མརྒ་དང༌། ཚ་ཟ་གསུམ་ལ་སོགས་པའི་སྨན་སྔར་སྨན་གྱི་སྡེ་ཚན་དུ་བཤད་པའོ། །དེ་དག་ཞག་གཅིག་ཆུར་སྦངས་ལ། །དུ་བའི་སྨན་རྣམས་བཏགས་ནས་ནི། །ཐུར་མ་སོར་ནི་བཅུ་གཉིས་ལ། །ལན་ལྔའི་བར་དུ་བྱུག་པར་བྱ། །གདར་བུ་མཐེ་བོ་ཙམ་སྦོམ་ལ། །ནས་ཀྱི་དབྱིབས་དང་འདྲ་བར་བྱ། །ཞེས་བྱ་བ་ལ། སྨན་དེ་དག་སྦྱར་བ་ནི། དེ་དག་ཉིད་ཞག་གཅིག་ཆུར་བཅུག་སྟེ་སྦངས་ལ། དུ་བའི་སྨན་རྣམས་ཆུ་ཐགས་སུ་ལེགས་པར་བཏགས་ལ་འདམ་བུ་ལ་སོགས་པའི་ཐུར་མ་སོར་བཅུ་གཉིས་པ་ལ་ཞོ་གཉིས་གཉིས་ཙམ་གྱི་ལྡེ་གུས་ལན་ལྔའི་བར་དུ་བྱུག་པར་བྱ་སྟེ། དེ་ཡང་གྲིབ་མ་ལ་སྐམ་ཞིང་ལན་ལྔའི་བར་དུ་བྱུགས་ལ། གདར་བུ་དེ་སྦོམ་མཐེ་བོ་ཙམ་དུ་གྱུར་གྱི་བར་དུ་བསྣན་ཅིང༌། དེ་བཞིན་དུ་ནས་ཀྱི་དབྱིབས་དང་འདྲ་བར་གྱུར་པར་བྱའོ། །གྲིབ་མར་སྐམ་ཞིང་ཁོང་སྟོང་མེད། །སྣུམ་གྱིས་ཇི་བཞིན་བསྐུས་བྱས་ལ། །བརྔུབ་ཕྱིར་མེ་ཡིས་བསྲེགས་ནས་ནི། །དུ་བའི་གཅེའུ་དང་སྦྱར་བྱ། །ཞེས་བྱ་བ་ལ། གདར་བུ་དེ་ལྟར་གྲིབ་མ་ལ་བསྐམས་པ་སྟེ་ཁོང་
སྟོང་མེད་པར་བྱས་ལ། སྣུམ་གང་ཇི་ལྟར་འཕྲོད་པ་མར་ལ་སོགས་པས་ཇི་ལྟ་བ་བཞིན་དུ་བསྐུས་ལ། དུད་པ་བརྔུབ་པའི་ཕྱིར་མེས་བསྲེགས་ལ། དུ་བའི་གཅེའུའི་སྦུ་གུ་དང་སྦྱར་བར་བྱའོ། །ཁམ་ཕོར་ཁ་སྦྱར་བུ་གར་ནི། །གཅེའུ་སོར་བཅུའམ་སོར་བརྒྱད་པ། །བཅུག་ནས་ཁ་ནས་དུད་པ་ནི། །ལུད་པ་ཅན་གྱིས་བརྔུབ་པར་བྱ། །ཞེས་བྱ་བ་ལ། ཁམ་ཕོར་སྦྱར་མ་ནི། ཁམ་ཕོར་གཉིས་ཁ་སྦྱར་བ་སྟེ། དེ་ལ་བུ་ག་དེར་འོད་མ་ལ་སོགས་པའི་གཅེའུ་སོར་བརྒྱད་པའམ། སོར་བཅུ་པ་བཅུག་ལ་ལུད་པ་ཅན་གྱི་སྐྱེས་བུས་བརྔུབ་པར་བྱའོ། །འདི་སྐད་སྟོན་ཏེ། ལུད་པ་འཇོམས་པར་བྱེད་པའི་སྨན་གྱི་ཕྱེ་མའམ། རི་ལུ་མེ་མདག་དུ་བ་མེད་པ་རྒྱུན་རིང་བ་འབར་བཞིན་པ་ལྟ་བུར་ཁམ་ཕོར་ལེགས་པར་བཞག་པ་བཀང་ལ། ཁམ་ཕོར་གཉིས་པ་ཞབས་སུ་བུ་ག་ཟླུམ་པོ་བཏོད་པས་བཀབ་ལ། དེར་གཅེའུ་བཙུགས་ཏེ། ཁ་ཉིད་དུ་དུ་བ་བརྔུབ་པར་བྱ་ལ། དེ་བྲང་དུ་ཕྱིན་པ་དང༌། ཁ་ནས་སླར་བཏོན་ཅིང་སློན་པར་བྱའོ། །དུ་བ་ཞིན་ཡང༌། སྨན་བཅུག་ཅིང་བརྡུངས་ལ། ནད་དེ་བྱང་བ་ལ་ལུས་ཡང་བར་འགྱུར་གྱི་བར་དུ་གཏང་ངོ༌། །དུད་པ་བརྔུབས་ལ་ལུད་པ་དབུགས་མི་བདེ། །སྐད་འགགས་རྣག་དང་དྲི་མི་ཞིམ་གདོང་སྐྱ། །སྐྲ་སྐྱོན་རྣ་མིག་འཛག་གཡའ་རྨོངས་བག་དང༌། །སྙོམ་དང་སྐྱིགས་བུ་ཆམ་པའི་ནད་མི་འབྱུང༌། །ཞེས་བྱ་བ་ལ། སྐྱེས་བུ་དུད་པ་བརྔུབ་པའི་ཆོ་ག་ལ་བརྟེན་པར་བྱེད་པ་ལ། ལུད་པ་དང་དབུགས་མི་བདེ་བ་ལ་སོགས་པའི་ནད་རྣམས་འབྱུང་བར་མི་འགྱུར་རོ། །རྣག་ནི་སྣ་ནས་འཛག་པའོ། །དྲི་མི་ཞིམ་པ་ནི་ཁ་ནས་སོ། །སྐྱ་བ་ནི་གདོང་སྐྱ་ཞིང་ཁྱེམ་ཆགས་པའོ། །སྐྲའི་སྐྱོན་ནི་སྤྱི་ཐེར་དང༌། མདོག་འགྱུར་བ་ལ་སོགས་པའོ། །འཛག་པ་ནི་གསུམ་ཆར་དང་སྦྱར་བར་བྱ་སྟེ། རྣ་བ་ནས་འཛག་པ་དང༌། མིག་ནས་འཛག་པ་དང༌། ཁ་ནས་འཛག་པའོ། །སྙོམ་པ་ནི་གཉིད་ཀྱིས་མྱོས་པ་ལྟར་ཡུལ་འཛིན་མི་ནུས་པའོ། །གཞན་དག་ནི་གྲགས་པར་ཟད་དོ། །ནད་དེ་དག་འབྱུང་བར་མི་འགྱུར་བའོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་
དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་ཉི་ཤུ་རྩ་གཅིག་པའི་རྣམ་པར་འགྲེལ་པའོ།། །།དེ་ནས་སྨན་གྱི་ཁུ་བས་མཁུར་བ་དགང་བ་ལ་སོགས་པའི་ཆོ་གའི་ལེའུ་བཤད་པར་བྱའོ། །ཞེས་བྱ་བ་ལ། འདི་བརྩམས་པའི་དགོས་པ་ནི་སྣ་ནས་བཏང་བའི་རྗེས་ལ། ཐོག་མར་དུད་པ་བརྔུབ་པར་བྱ་ལ། དེའི་འོག་ཏུ་ཆུ་དྲོན་གྱིས་མཁུར་བ་བཀང་བར་བྱའོ་ཞེས་བཤད་པ་ཡིན་པས་ན། དེ་གཉིས་ཀྱི་འོག་ཏུ་འདི་བརྩམས་པ་ཡིན་ནོ། །སྨན་གྱི་ཁུ་བས་མཁུར་བ་བཀང་བ་ནི་ཁ་བཀང་བ་སྟེ། དེ་ལ་སོགས་པ་གང་ཡིན་པ་ནི། མཁུར་བ་བཀང་བ་ལ་སོགས་པ་ཞེས་སྨན་མུར་བ་དང༌། གདོང་བཀྲུ་བ་དང༌། སྤྱི་བོར་སྣུམ་གྱིས་བྱུག་པ་དང༌། རྣ་བ་བཀང་བ་བསྡུའོ། །དེ་རྣམས་ཀྱི་ཆོ་ག་ནི་འདི་ལྟར་བྱའོ་ཞེས་བྱ་བའི་ཚུལ་ཏེ། དེ་ལ་ལེའུ་བཤད་པར་བྱའོ་ཞེས་པའོ། །མཁུར་བཀང་རྣམ་པ་བཞི་ཡིན་ཏེ། །སྣུམ་དང་ཞི་བྱེད་སྦྱོང་རྨ་འཚོ་བ། །ཅེས་བྱ་བ་ལ། སྨན་གྱི་ཁུ་བས་མཁུར་བ་བཀང་བ་ནི་རྣམ་པ་བཞི་ཡིན་ཏེ། སྣུམ་ཞིང་འཇམ་པ་དང༌། ཞི་བར་བྱེད་པ་དང༌། སྦྱོང་ཞིང་འཁྲུ་བར་བྱེད་པ་དང༌། རྨ་འཚོབ་པར་བྱེད་པའོ། །དེ་དག་གི་མིང་ནི་རྣམ་གྲངས་གཞན་དུ་ན་འཇོམས་པར་བྱེད་པ་དང༌། རྩེ་འཇིལ་བར་བྱེད་པ་དང༌། དག་ཅིང་གསལ་བར་བྱེད་པ་དང༌། འབྱོར་བར་བྱེད་པ་ཞེས་བྱའོ། །དེ་ལས་གསུམ་ནི་རླུང་ལ་སོགས། །གསུམ་གཏང་ཐ་མ་རྨ་ལ་ཕན། །ཞེས་བྱ་བ་ལ། མཁུར་བ་བཀང་བ་བཞིན་ནང་ནས་དང་པོའི་མཁུར་བ་བཀང་བ་གསུམ་ནི་རླུང་དང་མཁྲིས་པ་དང་བད་ཀན་གྱི་ནད་ལ་རིམ་བཞིན་དུ་གཏང་བར་བྱ་སྟེ། སྣུམ་གྱི་སྨན་གྱི་ཁུ་བས་མཁུར་བ་བཀང་བ་ནི། རླུང་ལ་གཏང་བར་བྱའོ། །ཞི་བར་བྱེད་པའི་སྨན་གྱི་ཁུ་བ་ནི་མཁྲིས་པ་ལ་གཏང་བར་བྱའོ། །སྦྱོང་བར་བྱེད་པའི་སྨན་གྱི་ཁུ་བ་ནི་བད་ཀན་ལ་གཏང་བར་བྱའོ། །ཐ་མའི་སྨན་ཁུས་ཁ་བཀང་ལ། རྨ་འཚོ་བ་ཞེས་བྱ་བའི་རྨ་ལ་ཕན་པ་ཡིན་ཏེ། ཁའི་ནང་ན་གནས་པའི་རྨའི་ནད་སེལ་བར་བྱེད་དོ། །འདིར་སྨན་མངར་སྐྱུར་ལན་ཚྭ་དང༌། །
ཚ་དང་སྣུམ་ནི་བསྐོལ་བ་ཡིན། །ཞི་བྱེད་ཁ་བསྐ་མངར་སྨན་བསྐོལ། །སྦྱང་བ་ཁ་དང་ཚ་དང་སྐྱུར། །རྨ་འཚོ་བྱེད་པ་ཁ་བ་དང༌། །བསྐ་བའི་སྨན་ནི་བསྐོལ་བར་བྱ། །ཞེས་བྱ་བ་ལ། འདིར་མཁུར་བ་བཀང་བ་ནི། སྨན་མངར་བ་དང༌། སྐྱུར་བ་དང༌། ལན་ཚ་དང༌། ཚ་བ་རྣམས་སྣུམ་དང་བསྐོལ་ཞིང་བཙོས་པའོ། །ཞི་བར་བྱེད་པའི་མཁུར་བ་བཀང་བ་ནི་སྨན་ཁ་བ་དང༌། བསྐ་བ་དང༌། མངར་བ་བསྐོལ་བའི་ཁུ་བ་འམ་ལྡེ་གུ་གཏང་བར་བྱའོ། །སྦྱོང་བའི་མཁུར་བ་བཀང་བ་ནི། སྨན་ཁ་བ་དང༌། ཚ་བ་དང་སྐྱུར་བ་བསྐོལ་བའམ། ལྡེ་གུ་གཏང་བར་བྱའོ། །རྨ་འཚོ་བའི་མཁུར་བ་བཀང་བ་ནི་སྨན་ཁ་བ་དང་བསྐ་བ་རྣམས་བསྐོལ་བ་འམ། ལྡེ་གུས་བྱའོ། །དེ་ལ་སྣུམ་དང་འོ་མ་དང༌། །སྦྲང་རྩི་ཆུ་དང་ཚྭ་དང་ཆང༌། །བ་གཅིན་འབྲུ་ཡི་ཁུ་བ་རྣམས། །སྨན་ནི་ཇི་ལྟ་ཇི་ལྟ་དང༌། །ལྡེ་གུར་བྱས་པ་འམ་བསྐོལ་བ་ནི། །ཇི་ཙམ་བཟོད་པ་རྣམ་པར་སྦྱར། །ཞེས་བྱ་བ་ལ། འདི་དག་ནི་སྨན་ཁུས་མཁུར་བ་བཀང་བ་སྤྱིའི་ཆོ་ག་ཡིན་ཏེ། དེ་ལས་ཀྱང་སྣུམ་ཞེས་བྱ་བ་ཤ་ཁུ་དང་ཏིལ་གྱི་ལྡེ་གུའི་ཆུ་དང་འོ་མ་ནི་སྣུམ་གྱིས་མཁུར་བ་བཀང་བ་ཡིན་ནོ། །སྦྲང་རྩི་དང་ཆུ་དང་འོ་མ་དང་མར་ནི་ཞི་བར་བྱེད་པའི་མཁུར་བ་བཀང་བ་ཡིན་ནོ། །ཚྭ་དང་ཆང་དང་འབྲུའི་ཁུ་བ་སྐྱུར་པོ་ནི། སྦྱོང་བའི་མཁུར་བ་བཀང་བ་ཡིན་ནོ། །སྦྲང་རྩིའི་ཆུ་དང་འོ་མ་ནི་རྨ་འཚོབ་བའི་མཁུར་བ་བཀང་བ་ཡིན་ནོ། །ཇི་ལྟ་ཇི་ལྟ་བ་ཞེས་བྱ་བ་ནི། སྔར་བཤད་པའི་སྨན་གྱི་ལྡེ་གུ་དང་སྦྱར་བའམ། ཡང་ན་བསྐོལ་བའམ། ཅི་ཙམ་བཟོད་པ་རྣམ་པར་སྦྱར་བར་བྱ་སྟེ། དེ་ལ་རླུང་ལ་ནི་དྲོན་པོའོ། །མཁྲིས་པ་ལ་ནི་གྲང་མོའོ། །བད་ཀན་ལ་ནི་རབ་ཏུ་ཚ་བའོ། །སོ་བརྩེ་སོ་ནི་འགུལ་བ་དང༌། །རླུང་ལས་གྱུར་བའི་ཁ་ནད་ལ། །དྲོ་འཇམ་ཙམ་མམ་བསིལ་བ་ཡི། །ཏིལ་ཆུས་མཁུར་བ་བཀང་བ་ཕན། །ཞེས་བྱ་བ་ལ། ཏིལ་གྱི་ལྡེ་གུ་དང་བསྲེས་པའི་ཆུ་ནི་ཏི་ལ་གྱི་ལྡེ་གུའི་ཆུ་སྟེ། དེ་དྲོ་འཇམ་ཙམ་མམ་བསིལ་བས་མཁུར་བ་བཀང་བ་ནི། སོ་བརྩེ་བ་དང་སོ་འགུལ་བའི་ནད་འོག་ནས་བཤད་པ་དག་དང༌། ཁའི་
ནད་རླུང་ལས་གྱུར་ཅིང་རླུང་ཤས་ཆེ་བ་ལ་ཕན་པ་ཡིན་ནོ། །རྟག་ཏུ་མཁུར་བ་བཀང་སྟེ་འཇོག །ཏིལ་མར་དག་གམ་ཤ་ཁུ་བསྔགས། །ཞེས་བྱ་བ་ལ། འདི་ནི་བསྡུས་པ་ལས་བྱུང་བ་ཡིན་ཏེ། རྟག་ཏུ་ཞེས་བྱ་བ་དུས་ཐམས་ཅད་དུ་ནད་མེད་པར་གནས་པའི་སྐབས་སུ་མཁུར་པ་བཀང་སྟེ་འཇོག་པའི་སྨན་དུ་ཏིལ་མར་ཤ་ཁུ་བསྔགས་ཤིང་ཕན་པ་ཡིན་ནོ། །ཁ་དྲོད་ཆེ་ཚ་ཚོས་པ་དང༌། །འཕྲལ་དུ་རྨ་ནི་བྱུང་བ་དང༌། །དུག་དང་ཐལ་སྨན་མེས་ཚིག་ལ། །ཞུན་མར་དག་གམ་འོ་མས་དགང༌། །ཞེས་བྱ་བ་ལ། ཁའི་ནད་སྨིན་ཅིང་ཚོས་པ་ལ་དྲོད་ཆེ་ཞིང་ཚ་བ་དང་ལྡན་པ་དང༌། དེ་བཞིན་དུ་ཁའི་རྨ་འཕྲལ་དུ་བྱུང་ཞིང་གློ་བུར་གྱིས་ཐེབས་པ་དང༌། དེ་བཞིན་དུ་ཁར་དུག་གིས་ཕོག་པ་དང༌། དེ་བཞིན་དུ་ཐལ་སྨན་རྣོན་པོ་དང༌། མེ་དེ་དག་གིས་ཚིག་པར་གྱུར་པ་ལ། ཞུན་མར་རམ་འོ་མས་མཁུར་བ་བཀང་ལ་གཞག་པར་བྱའོ། །སྦྲང་རྩི་མཁུར་བཀང་བྱས་པས་ནི། །ཁ་ཡི་དྲི་མ་སྦྱོང་བྱེད་ཅིང༌། །ཁ་ཡི་རྨ་ནི་འཚོ་བ་བྱེད་ཡིན། །ཁ་ཚ་སྐོམ་དད་རབ་ཞི་བྱེད། །ཅེས་བྱ་བ་ལ། སྦྲང་རྩིས་མཁུར་བ་བཀང་བས་ནི། ཁའི་དྲི་མ་སྦྱོང་ཞིང་དག་པར་བྱེད་པ་དང༌། དེ་བཞིན་དུ་ཁའི་ནང་གི་རྨ་འཚོབ་པར་བྱེད་ཅིང་འབྱོར་བར་བྱེད་པ་དང༌། དེ་བཞིན་དུ་ཁ་ཚ་བ་དང་སྐོམ་དད་རབ་ཏུ་ཞི་བར་བྱེད་པའོ། །རོ་མི་ཚོར་དང་དྲི་མ་ཆེ། །ཁ་མནམ་འབྲས་རྩབས་བཀང་བས་སེལ། །ཞེས་བྱ་བ་ལ། འབྲས་ཀྱི་རྩབ་མོ་ནི་འབྲས་བུ་རང་སྐྱུར་ཀན་ཛི་ཞེས་བྱ་བ་སྟེ། དེས་ཁ་བཀང་བ་འཇོག་པས་དྲི་མི་ཞིམ་པ་མནམ་པ་དང༌། དྲི་མ་དང་ལྗན་ལྗིན་གྱིས་གོས་པ་དང༌། རོ་མི་ཚོར་ཞིང་མི་གསལ་བ་སེལ་བར་བྱེད་པ་ཡིན་ནོ། །དེ་ཉིད་ཅུང་ཟད་ཚ་བཅས་བསིལ། །ཁ་སྐམས་སེལ་བའི་དམ་པ་ཡིན། །ཞེས་བྱ་བ་ལ། འབྲས་བུའི་རང་རྩབས་དེ་ཉིད་ཅུང་ཟད་ཚ་དང་བཅས་ཤིང་བསིལ་བ་ཁ་སྐམས་པ་སེལ་བའི་དམ་པ་འམ་མཆོག་ཡིན་ནོ། །ཐལ་སྨན་རྣོན་ཁུས་མཁུར་བཀང་བ། །བད་ཀན་སོགས་པ་མྱུར་དུ་སེལ། །ཞེས་བྱ་བ་ལ། ཐལ་སྨན་རྣོན་པོའི་ཆུ་ནི་ཐལ་སྨན་རྣོན་པོ་སྦངས་པའི་དངས་མ་སྟེ། །
དེས་ཁ་བཀང་ནས་འཇོག་པས་ནི། བད་ཀན་སོགས་ཤིང་སྡུད་པ་མྱུར་ཞིང་རིངས་པར་སེལ་བར་བྱེད་དོ། །ཆུ་ཚན་དྲོ་འཇམ་མཁུར་བཀང་བས། །ཁ་ནི་ཡང་ཞིང་བདེ་བར་བྱེད། །ཅེས་བྱ་བ་ལ། ཆུ་ཚན་དྲོ་འཇམ་རན་པ་ཙམ་གྱིས་མཁུར་བ་བཀང་བ་འཇོག་པས་ནི། ཁ་ཡང་ཞིང་བདེ་བར་བྱེད་དེ། རླུང་དང་བད་ཀན་སེལ་ཞིང་སྦྱོར་བར་བྱེད་དོ་ཞེས་བྱ་བའི་དོན་ཏོ། །རླུང་མེད་ཉི་ཚན་བཅས་པར་ནི། །ཕྲག་པ་མཇིང་བར་དུགས་བྱས་མཉེ། །མཁུར་བ་བཀང་ནས་གདོང་པ་ནི། །ཅུང་ཟད་བཏེག་སྟེ་ཇི་སྲིད་ན། །བད་ཀན་གྱིས་ནི་ཁ་གང་བའང༌། །སྣ་མིག་འཛག་པའི་བར་དུ་གཞག །ཅེས་བྱ་བ་ལ། མཁུར་བ་བཀང་བ་གཏང་བ་ན། རླུང་མེད་ཅིང་སེར་བུས་མ་ཕོག་པ་ཉི་ཚན་ནམ་མེ་དང་བཅས་པའི་གནས་སུ་འདུག་ལ། ཕྲག་པ་དང་མཇིང་པ་མཉེས་ཤིང་དུགས་བྱས་ལ། མཁུར་བ་བཀང་ནས་གདོང་པ་ཅུང་ཟད་བཏེག་སྟེ། ཇི་སྲིད་ཅིག་ན་བད་ཀན་གྱི་མཆིལ་སྣབས་ཀྱིས་གང་བར་གྱུར་པའམ། སྣ་ནས་སྣབས་འཛག་པར་གྱུར་གྱི་བར་དུ་གཞག་པར་བྱ་སྟེ། དོན་དེ་ནི་ཇི་སྲིད་མཁུར་བ་བཀང་བ་ལེགས་པའི་མཚན་མ་དུ་བ་བརྔུབས་པ་དང་འདྲ་བ་འབྱུང་བར་གྱུར་གྱི་བར་དུ་ལན་ལྔའམ་བདུན་གྱི་བར་བྱའོ། །དེའི་མཚན་ཉིད་ནི་བསྡུས་པ་ལས་རང་གི་དོན་གྱི་བྱ་བ་བྱེད་པ་དང༌། མི་བྱེད་པ་ལས་ཤེས་པར་བྱ་བ་སྟོན་ཏོ། །རོ་མི་ཚོར་བ་དང༌། ཡི་ག་འཆུས་པ་དང༌། མཆིལ་སྣབས་མང་བ་དང༌། ཁར་ཆགས་པ་ལས་ནི་སྦྱོར་བ་ཉེས་པར་བྱའོ། །ཁ་སྐམ་པ་དང་ཁའི་ནང་ཚོས་ཤིང་སྨིན་པ་དང༌། རྨྱ་བ་དང༌། ཡི་ག་འཆུས་པ་དང༌། སྙིང་འཛག་པ་དང༌། སྐད་གདངས་ཉམས་པ་ལས་ནི་མཁུར་བའི་སྦྱོར་བ་དྲགས་པར་བྱའོ། །ཞེས་བཤད་དོ། །དེ་རྣམས་ཀྱི་གསོ་བ་ཡང་རང་རང་གི་ཇི་ལྟ་བ་བཞིན་དུ་བྱའོ། །ཁ་བཀང་མི་སྦོ་བཞག་མཁུར་བཀང༌། །གཞན་དུ་ཁར་བརྔུབ་པར་འགྱུར་རོ། །ཞེས་བྱ་བ་ལ། ཁའི་ནང་སྣུམ་དང་འོ་མ་བསྐོལ་བ་ལ་སོགས་པས་ཡོངས་སུ་བཀང་ནས་གཡས་གཡོན་དུ་མི་སྦོ་བར་བཞག་པ་དེ་ནི་མཁུར་བ་བཀང་བ་ཞེས་བྱ་ལ། གཞན་དུ་ཁར་བརྔུབ་
པ་ཞེས་བྱ་སྟེ། སྨན་བསྐོལ་བས་ཁ་ཅུང་ཟད་མ་གང་བར་བཀང་ལ། མཁུར་བ་དང་ལྐོག་མ་སྤོ་ཞིང་དཀྲུགས་པ་ནི། ཁར་བརྔུབ་པའམ་འགྲམ་པ་སྤོ་བའི་ཁྱད་པར་ཡིན་ནོ། །ཁར་བརྔུབས་པ་ཡིས་ཁྱད་པར་གསོ་བ་ནི། །གཉེའུ་རེངས་མགོ་མིག་རྣ་ནད་ཁ་ནད་དང༌། །མཆིལ་མང་གྲེ་ནད་སྙིང་ག་སྲ་བ་དང༌། །སྙིང་འཕར་སྙོམ་དང་ཆམ་པ་ཡི་ག་འཆུས། །ཞེས་བྱ་བ་ལ། མཁུར་བ་བཀང་བའི་དབྱེ་བ་ཁར་བརྔུབ་པ་ཞེའམ། མཁུར་བ་སྤོ་བ་ཞེས་བྱ་བས་ཁྱད་པར་དུ་གསོ་ཞིང་དཔྱད་དུ་བྱ་བའི་ནད་ནི་གཉེའུ་རེངས་ལ། སོགས་པ་ཡིན་ཏེ། དེས་དེ་གསོ་བར་ནུས་པ་ཡིན་ནོ། །དེ་ལ་གཉེའུ་རེངས་ནི་ནད་ཀྱིས་ཚིགས་ཆུ་བ་གཉིས་རེངས་པ་ལ་བྱའོ། །གཞན་དག་ནི་གོ་བར་ཟད་དོ། །མྱུར་བ་འམ་གཞིབས་པའི་ཆོ་ག་ནི། །མཁུར་བཀང་བཤད་པའི་སྨན་རྣམས་ཀྱི། །ལྡེ་གུ་སྨན་ཁུ་ཕྱེ་མ་སྟེ། །ཁར་མུར་བྱ་བ་རྣམ་གསུམ་ཡིན། །དེ་ནི་བད་ཀན་ནད་ལ་གཏང༌། །ཞེས་བྱ་བ་ལ། མུར་བར་བྱ་བ་ནི་གསུམ་སྟེ། ལྡེ་གུ་དང་སྨན་ཁུ་དང་ཕྱེ་མའོ། །དེ་ལ་ལྡེ་གུ་ནི་སྨན་རློན་པ་བཏགས་པའི་ཞིབ་མོ་བྱས་པ་ལ་བྱའོ། །སྨན་ཁུ་ནི་ལྡེ་གུའི་སྨན་རློན་པ་དེ་དག་རྩོམ་པ་དང་ལྡེ་གུ་སྐ་མོ་བྱས་པ་བལྡག་པར་བྱ་བ་ལྟ་བུའི་ཁུ་བའི་སྦྱོར་བ་ལ་བྱའོ། །ཕྱེ་མ་ནི་སྐམ་པོ་ཉིད་བཏགས་པའོ། །དེ་གསུམ་ཆར་ཡང་བད་ཀན་གྱི་ནད་མཆིལ་མ་མང་བ་དང༌། སྐྱུག་ལྡད་བྱེད་པ་དང༌། ལྐོག་མའི་ནད་ལ་སོགས་པ་ལ་ཅི་རིགས་པར་གཏང་བར་བྱའོ། །གང་གིས་ཤེས་ཤེན་མཁུར་བ་བཀང་བ་བཤད་པའི་སྨན་ལས་དེ་དག་སྦྱར་བར་བྱའོ། །གདོང་བསྐུས་གསུམ་སྟེ་ནད་སེལ་དང༌། །དུག་སེལ་ཁ་དོག་བཟང་བྱེད་པའོ། །ཞེས་བྱ་བ་ལ། གདོང་བསྐུ་བ་ནི་རྣམ་པ་གསུམ་སྟེ། ནད་སེལ་ཞེས་བྱ་བ་རླུང་དང་མཁྲིས་པ་དང༌། བད་ཀན་གྱི་ནད་འཇོམས་པར་བྱེད་པ་དང༌། དུག་སེལ་བ་ཞེས་བྱ་བ་དུག་འཇོམས་པ་དང་ཁ་དོག་བཟང་བར་བྱེད་པ་སྟེ། མདོག་མཛེས་པར་བྱེད་པའོ། །དེ་དྲོད་བད་ཀན་རླུང་ལ་བསྔགས། །ལྷག་མ་ལ་ནི་རབ་བསིལ་བ། །ཞེས་བྱ་བ་ལ།
གདོང་བསྐུ་བ་དེ་ལ་དྲོ་བའི་རླུང་དང་བད་ཀན་གྱི་ནད་ལ་བསྔགས་པ་ཡིན་ནོ། །རླུང་དང་བད་ཀན་ཞེས་སྨོས་པ་ནི། སྤྱི་དང་ཁྱད་པར་དག་ཡིན་པར་ཤེས་པར་བྱ་སྟེ། དེས་ན་རླུང་དང་བད་ཀན་སོ་སོ་ལ་ཡང་དྲོ་བར་བྱ་ལ། རླུང་དང་བད་ཀན་འདྲེས་པ་ལ་ཡང་དྲོ་བ་ཉིད་བྱའོ། །དེ་ལས་ལྷག་མ་མཁྲིས་པ་སེལ་བ་དང༌། དུག་སེལ་བ་དང༌། ཁ་དོག་བཟང་བར་བྱེད་པ་གསུམ་ལ་ནི། གདོང་བསྐུ་བ་ཤིན་ཏུ་བསིལ་བ་བསྔགས་པ་ཡིན་ནོ། །དེ་ཡི་ཚད་དཔངས་སོར་བཞི་ཆ། །སུམ་ཆ་ཕྱེད་དེ་རྣམ་པ་གསུམ། །ཞེས་བྱ་བ་ལ། གདོང་བསྐུ་བ་དེའི་ཚད་ནི་རྣམ་པ་གསུམ་སྟེ། དཔངས་སུ་སོར་གྱི་བཞི་ཆ་དང༌། སུམ་ཆ་དང༌། ཕྱེད་དོ། །དེ་ལྟར་ན་དཔངས་སམ་མཐུག་སོར་བཞི་ཆའི་ཆུང་ཚད་དོ། །དཔངས་སུ་སོར་གྱི་སུམ་ཆ་ནི་གདོང་བསྐུ་བའི་འབྲིང་ཚད་དོ། །དཔངས་སུ་སོར་གྱི་ཕྱེད་ནི་གདོང་བསྐུ་བའི་ཆེ་ཚད་དོ། །མ་བསྐམས་བར་དུ་དེ་གཞག་གི །བསྐམས་ན་པགས་པ་ལ་གནོད་འགྱུར། །ཞེས་བྱ་བ་ལ། གདོང་བསྐུ་བ་དེ་ཇི་སྲིད་མ་བསྐམས་ཀྱི་བར་དུ་གཞག་པར་བྱའི། བསྐམས་ནས་ནི་བཏང་སྙོམས་སུ་མི་གཞག་སྟེ། གང་གི་ཕྱིར་དེ་བསྐམས་ན་པགས་པ་ལ་གནོད་ཅིང་མ་རུང་བར་བྱེད་དོ། །དེ་ནི་སྦངས་ནས་བཀྲུ་བར་བྱ། །དེ་ཡི་རྗེས་ལ་བསྐུ་བྱུག་བྱ། །ཞེས་བྱ་བ་ལ། གདོང་བསྐུས་པ་དེ་བསྐམས་མ་ཐག་སྦངས་ལ་བཀྲུ་ཞིང་ཕྱི་བར་བྱའོ། །དེའི་རྗེས་ལ་ནི་མར་ལ་སོགས་པས་བསྐུས་ལ་དྲིལ་བར་བྱའོ། །ཉིན་པར་གཉིད་ལོག་མང་སྨྲ་ཁྲོ། །མེ་ཚན་ཉི་ཚན་མྱ་ངན་སྤང༌། །ཞེས་བྱ་བ་ལ། གདོང་བསྐུ་བ་བྱས་ནས་ཉིན་པར་གཉིད་ལོག་པ་དང༌། ཁ་དོན་ལ་སོགས་པ་མང་དུ་སྨྲ་བ་དང༌། མེ་ཚན་དང་ཉི་ཚན་གྱིས་གདུངས་པ་དང༌། ཁྲོས་ཤིང་འཁྲུགས་པ་དང༌། མྱ་ངན་དང་ཡིད་མི་བདེ་བར་གྱུར་པ་སྤང་ཞིང་དོར་བར་བྱའོ། །དེ་ནི་ཆམ་པ་སྣ་སྨན་གཏང༌། །མ་ཞུ་འགྲམ་འཐམས་ཡི་ག་འཆུས། །མཚན་གཉིད་མ་ལོག་ལ་མི་གཏང༌། །ཞེས་བྱ་བ་ལ། གདོང་བསྐུ་བ་དེ་ཆམ་པས་བཏབ་པ་དང༌། སྣ་སྨན་བཏང་བ་དང༌། ཟས་མ་ཞུ་བ་དང༌། འགྲམ་པ་འཐམས་པའི་རླུང་ནད་དང༌། མཚན་
མོ་གཉིད་ཀྱིས་མ་ལོག་པ་དག་ལ་གཏང་དུ་མི་རུང་ངོ༌། །དེ་ནི་ལེགས་པར་སྤྱད་པ་ཡིས། །དུས་མིན་སྐྲ་དཀར་པོ་ཁབས་དང༌། །གཉེར་མ་རབ་རིབ་མིག་སྔོ་སེལ། །ཞེས་བྱ་བ་ལ། གདོང་བསྐུ་བ་དེ་ལེགས་པར་སྤྱད་ཅིང༌། ཕྱིན་ཅི་མ་ལོག་པར་བཏང་བས་དུས་མ་ཡིན་པའི་སྐྲ་དཀར་བྱུང་བ་ལ་སོགས་པ་འཇོམས་ཤིང་སེལ་བར་བྱེད་དོ། །དུས་མ་ཡིན་པའི་སྐྲ་དཀར་ནི་ན་ཚོང་ཡོད་བཞིན་དུ་སྐྲ་དཀར་བྱུང་བའོ། །རྒྱ་ཤུག་སྙིང་པོ་བ་ཤའི་རྩ། །སེང་ཕྲོམ་ཡུངས་ཀར་དཀར་པོ་རྣམས། །སིང་ཧིའི་རྩ་བ་ཏིལ་ནག་དང༌། །སྐྱེར་པའི་ཤུན་པ་རྨེའུ་རྣམས། །འཇག་རྩ་ཙནྡན་ཨུར་ཤིར། །ཤིང་ཤ་ཤ་ཏ་པུཥྤ་འབྲས། །ཀུ་མུ་ད་ཨུཏྤལ་ཀ་ལ་ཧ། །དཱུར་བ་ཤིང་མངར་ཙནྡན་རྣམས། །ཀ་ལི་ཡ་ཀ་ཨུ་ཤིར་ཏི། །སྤང་སྤོས་རྒྱ་སྤོས་ཤུག་པ་རྣམས། །ད་ལིས་ཀུན་དྲ་པུཎྜ་རཱི། །ཤིང་མངར་རྒྱ་སྤོས་ཨ་ཀ་རུ། །དེ་ལྟར་ཚིགས་བཅད་ཕྱེད་ཀྱིས་བཤད། །བསྐུ་བ་དགུན་སྟོད་སོགས་དྲུག་སྦྱར། །ཞེས་བྱ་བ་ལ། དེ་ལྟར་རྒྱ་ཤུག་གི་སྙིང་པོ་ལ་སོགས་པ་བཤད་མ་ཐག་པའི་རྣམ་པས་ཚིགས་བཅད་ཕྱེད་ཀྱིས་བཤད་པའི་སྨན་གྱིས་གདོང་བསྐུ་བ་དགུན་སྟོད་ལ་སོགས་པའི་དུས་དྲུག་པོ་སྟེ། དགུན་སྟོད་དང༌། དགུན་སྨད་དང༌། དཔྱིད་དང༌། སོ་ག་དང༌། དབྱར་དང༌། སྟོན་ཞེས་བྱ་བའི་དུས་རྣམས་དང༌། རིམ་བཞིན་དུ་སྦྱར་བར་བྱའོ། །རྒྱ་ཤུག་གི་སྙིང་པོ་ནི་རྒྱ་ཤུག་པར་དའི་ཚི་གུའོ། །བ་ཤའི་རྩ་བ་ནི་བ་ཤ་ཀའི་རྩ་བའོ། །སེང་ཕྲོམ་ནི་དྲང་སྲོང་དཀར་པོའོ། །ཡུངས་ཀར་དཀར་པོ་ནི་དངོས་སུ་ཟད་དེ། དེ་རྣམས་ནི་དགུན་སྟོད་ཀྱི་གདོང་བསྐུ་བའི་སྨན་ནོ། །སིང་ཧིའི་རྩ་བ་ནི་བྲི་ཧ་ཏིའི་རྩ་བའོ། །ཏིལ་ནི་ནག་པོ་ལས་བྱའི་དཀར་པོ་ལས་མི་བྱའོ། །སྐྱེར་པའི་ཤུན་པ་དང་རྨེའུ་ནི་སྦུན་པ་མེད་པའི་ནས་སོ། །གཞན་དག་ནི་དགུན་སྨད་ཀྱི་གདོང་བསྐུ་བའི་སྨན་ནོ། །གཞན་དག་ལ་ཡང་དེ་བཞིན་དུ་སྦྱར་རོ། །འབྲས་ནི་འབྲས་སཱ་ལུའོ། །ཨུཏྤལ་ནི་ཨུཏྤལ་སྔོན་པོའོ། །ཀ་ལ་ཧ་རི་ནི་གན་དྷ་སོ་
མའོ། །ད་ལིས་ནིད་ལིས་ཀྱི་ལོ་མའོ། །ཀུན་དྲ་ནི་ཀ་པི་ཁི་ཏ་པ་ཀ་ཚུལ་ལོ། །པུཎྜ་རཱི་ནི་པུཎྜ་རཱི་ཀའོ། །གདོང་བསྐུ་བ་ལ་གོམས་པ་རྣམས། །མཐོང་བ་བརྟན་པར་འགྱུར་བ་དང༌། །གདོང་ནི་ཡོངས་སུ་མི་རྙིང་ལ། །འཇམ་ཞིང་པདྨ་འདྲ་བར་འགྱུར། །ཞེས་བྱ་བ་ལ། གདོང་བསྐུ་ཞིང་བྱུག་པ་ལ་གོམས་ཤིང་རྟག་ཏུ་བསྟེན་པ་རྣམས་ནི་མིག་གིས་མཐོང་ཞིང་བལྟ་བ་བརྟན་ཞིང་མི་ཉམས་པར་འགྱུར་བ་དང༌། གདོང་ཡོངས་སུ་མི་རྙིང་ལ་མདངས་ཡལ་བར་མི་འགྱུར་བ་དང༌། དེ་བཞིན་དུ་འཇམ་ཞིང་རྩུབ་བག་མེད་པ་དང༌། པདྨ་འདྲ་བར་འགྱུར་རོ། །བསྐུ་དང་བླུགས་དང་རས་བལ་ཅན། །པགས་པས་གཡོགས་དང་རྣམ་པ་བཞི། །དེ་ནི་སྤྱི་བོའི་ཏིལ་མར་ཏེ། །ཕྱི་བཞིན་དུ་ནི་ཡོན་ཏན་ཆེ། །ཞེས་བྱ་བ་ལ། སྤྱི་བོར་ཏིལ་མར་བྱུགས་པ་ལ་སོགས་པ་དབྱེ་བས་རྣམ་པ་བཞི་ཡོད་དོ། །བསྐུ་བ་ནི་གདོང་བསྐུ་ཞིང་བྱུག་པའོ། །བླུགས་པ་ནི་སྟེང་ནས་བླུགས་པའོ། །རས་བལ་ཅན་ནི་རས་བལ་ཅན་སྲན་ཁུང་ལྟར་ཟླུམ་པོ་ཆུང་ངུ་བྱས་ཏེ། སྤྱི་བོར་གླན་པའོ། །པགས་པས་གཡོགས་པ་ནི་འདི་ཉིད་ཀྱི་འོག་ནས་བཤད་པའོ། །དེ་དག་ནི་སྤྱི་བོའི་ཏིལ་མར་ཞེས་བྱ་སྟེ། ཕྱི་མ་ཕྱི་མ་བཞིན་དུ་ཡོན་ཏན་ཆེ་བ་ཡིན་ནོ། །དེ་ལ་བསྐུ་བ་ནི་ཡོ་ཏན་ཅན་ཡིན་ནོ། །དེ་བས་ཀྱང་བླུགས་པ་ཡོན་ཏན་ཆེ་བ་ཡིན་ནོ། །དེ་བས་ཀྱང་རས་བལ་ཅན་ཡོན་ཏན་ཆེ་བ་ཡིན་ནོ། །ཐམས་ཅད་ལས་མགོ་བོ་པགས་པས་དཀྲི་བ་ཡོན་ཏན་རབ་མཆོག་ཏུ་ཆེ་བ་ཡིན་ནོ། །སྤྱི་བོའི་ཏིལ་མར་ཞེས་བྱ་བ་ནི་ཉེ་བར་མཚོན་པ་ཙམ་དུ་ཟད་དོ། །དེ་བས་ན་ཞུན་མར་གྱིས་བསྐུས་པ་ཡང་ཕྱི་མ་བཞིན་དུ་ཡོན་ཏན་ཆེ་བར་ཤེས་པར་བྱའོ། །དེ་ལ་བྱུག་པ་རྩུབ་པ་དང༌། །གཡའ་དང་དྲི་མ་ཅན་ལ་སྦྱར། །ཞེས་བྱ་བ་ལ། བྱུག་པ་ལ་སོགས་པ་རྣམས་ཀྱི་ནང་ནས་བྱུག་པ་ནི་ལུས་རྩུབ་པ་ལ་སོགས་པ་ལ་སྦྱར་བར་བྱའོ། །བླུགས་པ་གློག་པ་གླད་གཟེར་དང༌། །ཚ་དང་རྨ་སྨིན་རྣགས་ལ་གཏང༌། །ཞེས་བྱ་བ་ལ། སྣུམ་བླུགས་པ་ལ་སོགས་པ་ནི་གློག་པའི་ནད་རྣམས་ལ་སྦྱར་བར་བྱའོ། །རས་བལ་སྣུམ་ཅན་སྐྲ་འབྱི་དང༌།
གཟའ་ཞུགས་མིག་ནི་རེངས་ལ་གཏང༌། །ཞེས་བྱ་བ་ལ། རས་བལ་སྣུམ་ཅན་ནི་སྐྲ་འབྱི་བ་ལ་སོགས་པ་དང༌། དེ་བཞིན་དུ་མིག་རེངས་པ་སྟེ། མིག་ཧར་ཧར་པོར་འདུག་ཅིང་འཛུམས་མི་ཤེས་པ་ལ་སྦྱར་བར་བྱའོ། །པགས་བཅིངས་མགོ་བོ་ཚོར་བ་མེད། །ཁ་ཡོ་གཉིད་ནི་ཡར་བ་དང༌། །ཁ་དང་སྣ་སྐམ་རབ་རིབ་དང༌། །མི་བཟད་མགོ་ནད་དག་ལ་སྦྱར། །ཞེས་བྱ་བ་ལ། པགས་པས་གཡོགས་ནས་བཅིངས་པ་ནི་མགོ་བོ་ཚོར་བ་མེད་པ་ལ་སོགས་པ་ལ་སྦྱར་བར་བྱའོ། །དེ་ཡི་ཆོ་ག་འདུག་པ་ལ། །ཁྲིའུ་པུས་མཉམ་འཇམ་པ་ལ། །ལུས་བཀྲུས་བསྐུ་ཞིང་དུགས་བྱས་ལ། །དགོངས་ཀ་བ་འམ་མ་ཧེ་ཡི། །པགས་པ་མགོ་བོ་དང་མཉམ་ལ། །རྒྱར་ནི་སོར་ནི་བཅུ་གཉིས་པ། །རྣ་བའི་མཐར་ཐུག་བར་བཅིང་བ། །དབྲལ་བ་གོས་ཀྱིས་དཀྲིས་པ་ནི། །གོས་ས་མ་ལན་བུས་བཅིངས་བྱས་ལ། །མ་ཤའི་ལྡེ་གུས་བསྐུ་བར་བྱ། །ཞེས་བྱ་བ་ལ། མགོ་བོ་པགས་པས་གཡོགས་ཏེ། བཅིང་བའི་ཆོ་ག་ནི་འདི་ལྟར་བྱ་བ་སྟེ། སྐྱེས་བུ་འདུག་པར་བྱ་བ་ལ། མགོ་པགས་པས་དཀྲི་བར་བྱའོ། །དེ་ཡང་ཇི་ལྟ་བུ་ལ་འདུག་ཅེ་ན། །ཁྲིའུའི་དཔངས་སུ་པུས་མོ་དང་མཉམ་པ་རྒྱ་བརྟེན་འཇམ་ཞིང་འབོལ་བ་ལ། དང་པོ་ཁྲུས་བྱས་ནས་དེའི་འོག་ཏུ་བསྐུས་ལ་དུགས་བྱས་ནས་དགོངས་ཀ་སྟེ། ཉི་མ་ནུབ་པའི་ཚེ་བ་ལང་ངམ་མ་ཧེའི་པགས་པ་མཐའ་འཁོར་བ་མཉམ་པ། རྒྱར་སོར་བཅུ་གཉིས་པ་རྣ་བའི་མཐར་ཐུག་པར་བཅིངས་ལ། དེ་ཡང་དཔྲལ་བ་གོས་ཀྱིས་དཀྲིས་ཤིང་ལན་བུས་ཀྱང་བཅིངས་ལ། ཡང་སྲན་མ་ཤའི་ལྡེ་གུས་བསྐུ་ཞིང་བྱུག་པར་བྱའོ། །དེ་ནས་ནད་དམིགས་ཅི་འདྲ་ལ། །སྣུམ་བསྐོལ་བ་ནི་དྲོ་འཇམ་ཙམ། །དེ་ནི་སྤྱི་བོ་མན་ཆད་ནས། །སྐྲ་དྲུང་སོར་གཅིག་ནུབ་ཙམ་བླུགས། །ཁ་དང་སྣམ་ཚུལ་ཕྱིན་པར་གཞག །དེ་ནི་རླུང་སོགས་ནད་རྣམས་ལ། །སྟོང་ཕྲག་བཅུ་དང་བརྒྱད་དྲུག་གཞག །ནད་མེད་པ་ལ་སྟོང་ཕྲག་གཅིག །མར་བསལ་ཕྲག་པ་ལ་སོགས་མཉེ། །དེ་ལྟར་ཞག་བདུན་བླུགས་པར་བྱ། །ཞེས་བྱ་བ་ལ། དེ་ནས་མགོ་བོ་པགས་པས་
གཡོགས་པའི་འོག་ཏུ་ནད་དམིགས་ཀྱི་རྣམ་པ་ཅི་འདྲ་བ་དང་སྦྱར་ལ། སྣུམ་བཞི་པོ་ལས་ཅི་རིགས་པར་བསྐོལ་བ་དྲོ་འཇམ་སྟེ། ཅུང་ཟད་དྲོ་བ་དེ་ནི་སྤྱི་བོ་མན་ཆད་ནས་སྐྲ་དྲུང་གི་བར་དུ་སོར་གཅིག་ཙམ་ནུབ་པའི་ཚད་ཙམ་གྱི་བར་དུ་བླུགས་པར་བྱའོ། །ཡང་སྣུམ་དེ་བཞག་པའི་ཚད་ནི། ཁའི་ནད་དང་སྣའི་མཚུལ་པར་ཕྱིན་ཅིང་གཤེར་འཛག་པའི་བར་དུ་གཞག་པར་བྱའོ། །ཡང་སྣུམ་དེ་རླུང་ལས་གྱུར་པའི་ནད་རྣམས་ལ་སེ་གོ་ལ་བསྐོར་ཞིང་གཏོགས་པའི་ཚད་སྟོང་ཕྲག་བཅུ་སྟེ། ཁྲིའི་བར་དུ་གཞག་པར་བྱའོ། །མཁྲིས་པ་ལས་གྱུར་པ་ལ་ནི་བརྒྱད་སྟོང་གི་བར་དུ་གཞག་པར་བྱའོ། །བད་ཀན་གྱི་ནད་ལ་ནི་དྲུག་སྟོང་གི་བར་དུ་གཞག་པར་བྱའོ། །ནད་མེད་ཅིང་ཐ་མལ་པར་གནས་པ་ལ་ནི་སྟོང་ཕྲག་གཅིག་གི་བར་དུ་གཞག་པར་བྱའོ། །དེ་ནས་དེའི་འོག་ཏུ་མར་ཟགས་སུ་བཅུག་ལ། ཕྲག་པ་ལ་སོགས་པ་མཉེ་བར་བྱ་སྟེ། ཕྲག་པ་དང་མགོ་བོ་དང་གཉའ་བ་དང་ལྟག་པ་དང༌། དཔྲལ་བ་ལ་སོགས་པ་དལ་བུས་མཉེ་བར་བྱའོ། །དེ་ལྟར་སྣུམ་གྱི་དམ་པ་སྟེ་ཞག་བདུན་གྱི་བར་དུ་བླུགས་པར་བྱའོ། །རྣ་བར་བཀང་བར་བླུགས་ཏེ་གཞག །རྣ་བའི་རྩ་བ་མཉེ་བར་བྱ། །ནད་རྩེ་ཞིལ་ཀྱི་བར་བྱ་ཞིང༌། །རྣ་བ་སེ་གོལ་བརྒྱ་པར་གཞག །ཅེས་བྱ་བ་ལ། རྣ་བ་ན་བར་གྱུར་པ་ལ་ནི་སྣུམ་རྣ་བ་གང་བར་བླུགས་ལ་བཞག་ནས། རྣ་བའི་རྩ་བ་མཉེ་བར་བྱ་སྟེ། དེ་ཡང་སེ་གོལ་གྲངས་བརྒྱའི་བར་དུ་གཞག་པར་བྱ་ཞིང༌། ནད་དེ་རྩེ་ཞིལ་གྱི་བར་དུ་རྣ་བ་བཀང་བའི་སྣུམ་བྱའོ། །པུས་མོ་གཡས་པའི་ལྷ་ང་ནི། །ལག་རྩེས་བསྐོར་བའི་བར་དག་དང༌། །མིག་འབྱེད་འཛུམས་དང་མཉམ་པ་ཡི། །ཡུན་ནི་གྲངས་ཀྱི་ཚད་དུ་བཤད། །ཅེས་བྱ་བ་ལ། གྲངས་སུ་གཟུང་བའི་ཚད་ནི། པུས་མོ་གཡས་པའི་ལྷ་ང་ལག་པའི་སོར་མོའི་རྩེ་མོས་ཀུན་ནས་བསྐོར་བའི་བར་དང༌། དེ་བཞིན་དུ་མིག་གཉིས་འབྱེད་པ་དང་འཛུམས་པའི་དུས་དང་མཉམ་པའི་དུས་ཀྱི་ཡུན་ནི། གྲངས་ཀྱི་ཚད་ཡིན་པར་མཁས་པ་རྣམས་ཀྱིས་བཤད་དོ། །སྤྱི་བོར་ཏིལ་མར་སྦྱར་བ་བསྐུས་པས་ནི། །སྐྲ་དཀར་དམར་སེར་སྐྲ་འབྱི་གཟའ་ཞུགས་དང༌། །
མགོ་བོའི་རླུང་ནད་སེལ་ཞིང་དབང་པོ་གསལ། །སྐད་གདངས་འགྲམ་པ་མགོ་བོའི་སྟོབས་སྐྱེད་བྱེད། །ཅེས་བྱ་བ་ལ། ཏིལ་མར་སྤྱི་བོར་བླུགས་ཤིང་བསྐུས་པས་ནི། སྐྲ་དཀར་བ་དང༌། སྐྲ་དམར་སེར་དུ་འདུག་པ་དང༌། སྐྲ་འབྱི་བ་དང༌། གཟའ་ཞུགས་ཤིང་སྐྲ་ཁ་གྱེས་པ་དང༌། མགོ་བོའི་རླུང་གི་ནད་སེལ་ཞིང་འཇོམས་པར་འགྱུར་རོ། །དེ་བཞིན་དུ་མིག་ལ་སོགས་པའི་དབང་པོ་རྣམས་གསལ་ཞིང་རང་གི་ཡུལ་འཛིན་པར་ནུས་པ་དང༌། དེ་བཞིན་དུ་སྐད་གདངས་དང༌། འགྲམ་པ་དང༌། མགོ་བོའི་སྟོབས་སྐྱེད་ཅིང་འཕེལ་བར་བྱེད་པ་ཡིན་ནོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་ཉི་ཤུ་གཉིས་པའི་རྣམ་པར་འགྲེལ་པའོ།། །།དེ་ནས་སྨན་གྱི་ཐིགས་པ་མིག་ཏུ་བླུགས་པ་དང༌། སྨན་གྱིས་མིག་བསྐུ་བའི་ཆོ་གའི་ལེའུ་བཤད་པར་བྱའོ། །ཞེས་བྱ་བ་ལ། འདི་བརྩམས་པའི་འགྲེལ་པ་ནི་འདི་ཡིན་ཏེ། །གང་གི་ཕྱིར་བཤད་མ་ཐག་པའི་སྤྱི་བོའི་ཏིལ་མར་གྱིས་ནི་དབང་པོ་རྣམས་གསལ་བར་བྱེད་པར་བཤད་ལ། དབང་པོ་ཐམས་ཅད་ཀྱི་ནང་ནས་དབང་པོའི་གཙོ་བོ་ནི་མིག་ཡིན་པས། དེའི་ཕྱིར་དེ་བསྲུང་བའི་དོན་དུ་དེའི་འོག་ཏུ་ལེའུ་འདི་བརྩམས་པ་ཡིན་ནོ། །མིག་གི་སྨན་གྱི་ཐིགས་པ་གང་ཞིག་བླུགས་པས་མིག་གི་སྐྱོན་ཀུན་འཛག་པར་འགྱུར་བས། མིག་གི་སྨན་གྱི་ཐིགས་པ་མིག་ལ་བསྐུ་བ་ཞེས་བྱ་བ་སྟེ། དེའི་འོག་ཏུ་ཆོ་ག་ནི་འདི་ལྟར་བྱའོ། །ཞེས་པའི་ལས་ཀྱི་ཚུལ་ཏེ། ཆོ་ག་དེ་བཤད་པར་བྱའོ། །མིག་ནད་དག་ནི་ཐམས་ཅད་ལ། །དང་པོར་སྨན་ཐིགས་བླུགས་པས་ནི། །ཟུག་ན་གཡའ་དྲུད་མཆི་མ་འཛག །མིག་ཚ་མིག་དམར་རྣམས་ལ་ཕན། །ཞེས་བྱ་བ་ལ། །མིག་གི་ནད་མ་ལུས་པ་ཐམས་ཅད་ལ། དང་པོ་ཐོག་མ་ཁོ་ནར་མིག་སྨན་ཐིགས་པ་ལ་སོགས་
པ་བླུགས་ནས། མཆི་མ་འཛག་ཅིང་ཁྲུས་བྱ་བ་ཕན་ནོ། །དེ་ཡང་མིག་རྡོལ་ལ་ཐུག་པ་ལྟར་ན་བ་དང༌། ཟུག་ཅིང་ན་བ་ལ་སོགས་པ་སེལ་བར་བྱེད་པ་ཡིན་ནོ། །དེ་ཡང་ཟུག་པ་ནི་རྒྱུན་དུ་གཟེར་ཞིང་ན་བའོ། །ན་བ་ནི་སྣ་ཚོགས་པའི་ཚུལ་གྱིས་ན་བའོ། །གཡའ་བ་ནི་མིག་ཤས་ཆེར་གཡའ་བའོ། །དྲུད་པ་ནི་མིག་མཆུ་གཉིས་ཕན་ཚུན་རེག་པ་ན་མིག་ལ་དྲུད་པ་སྙམ་བྱེད་ཅིང་ན་བའོ། །མཆི་མ་འཛག་པ་ནི་རྒྱུན་དུ་མིག་ཆུ་འཛག་པའོ། །ཚ་བ་ནི་ཆ་འུར་འུར་བོར་བྱེད་པའོ། །མིག་དམར་བ་ནི་མིག་དམར་པོ་སླེ་སླེ་བོར་འདུག་པ་སྟེ། འདི་རྣམས་ལ་མིག་བཀྲུ་བའི་སྨན་བླུགས་པས་ཕན་པ་ཡིན་ནོ། །རླུང་ལ་དྲོན་པོ་བད་དྲོ་འཇམ། །ཁྲག་མཁྲིས་ལ་ནི་དེ་བསིལ་བསྔགས། །ཞེས་བྱ་བ་ལ། མིག་སྨན་གྱི་ཐིགས་པ་དེ་རླུང་གི་ནད་ལ་དྲོན་པོ་སྟེ། དྲོ་བའི་བག་ཏུ་བྱས་པ་ཕན་ནོ། །བད་ཀན་གྱི་ནད་ལ་ནི་དྲོ་འཇམ་སྟེ། ཅུང་ཟད་དྲོ་བ་ཕན་པ་ཡིན་ནོ། །ཁྲག་དང་མཁྲིས་པ་ལས་གྱུར་པའི་མིག་ནད་ལ་ནི། སྨན་གྱི་ཐིགས་པ་བསིལ་བ་ཕན་པ་ཡིན་ནོ། །རླུང་མེད་གནས་སུ་འདུག་ནས་ནི། །ལག་པ་གཡོན་པས་མིག་ཕྱེ་ལ། །ཉ་ཕྱིས་ནང་སྦྱར་རས་བལ་ནི། །བསྙད་པའི་ཐིགས་པ་བླུགས་བྱ་བ། །སོར་གཉིས་ཙམ་དཔངས་ལས་མིག་གྲྭ། །ཐིགས་པ་བཅུ་འམ་བཅུ་གཉིས་བླུགས། །ཞེས་བྱ་བ་ལ། སྐྱེས་བུས་རླུང་མེད་པའི་གནས་སུ་འདུག་ནས་སྨན་པའི་ལག་པ་གཡོན་པས་དེའི་མིག་ལེགས་པར་ཕྱེ་ལ་ལག་པ་གཡས་པ་ཉ་ཕྱིས་ཀྱི་ནང་དུ་སྨན་སྦྱར་བ་རས་བལ་ཡེའུ་བསྙད་པས། ཅུང་ཟད་འཕྱང་བར་བྱས་ལ་ཐིགས་པ་བླུགས་པར་བྱ་བ་ནི་སོར་གཉིས་ཙམ་གྱི་དཔངས་ལས་མིག་གྲྭ་སྣ་དང༌། ཉེ་བའི་མིག་གི་ཟུར་ནས་ཐིགས་པ་བཅུ་འམ་བཅུ་གཉིས་བླུགས་པར་བྱ་སྟེ། དེ་ལས་རྣམ་པ་གཞན་དུ་བྱས་ན་མིག་དམར་བ་ལ་སོགས་པའི་ནད་སྐྱེད་པར་འགྱུར་རོ། །དེ་ནས་གོས་འཇམ་དག་གིས་ཕྱི། །རླུང་དང་བད་ཀན་ཅན་དག་ལ། །གོས་འཇམ་གཞན་ནི་ཆུ་དྲོན་ལ། །སྦངས་པས་དུགས་ནི་འཇམ་པོ་བྱ། །ཞེས་བྱ་བ་ལ། དེ་ལྟར་
མིག་ཏུ་བླུགས་པའི་རྗེས་ལ། གོས་འཇམ་ཞིང་རེག་ན་བདེ་བས་མིག་ཕྱི་ཞིང་སྦྱང་བར་བྱའོ། དེའི་འོག་ཏུ་གོས་འཇམ་པོས་ཕྱི་བ་ལས་གཞན་པ་དག་ཆུ་དྲོན་ལ་སྦངས་བས་མིག་འཇམ་ཙམ་དུ་དུགས་བྱའོ། །དེ་ཡང་ཆུ་དང་བད་ཀན་དག་ལ་ཞེས་བྱ་བ་རླུང་ནད་དང་བད་ཀན་གྱི་ནད་ཡོད་པ་ལ་དུགས་བྱའོ། །མཁྲིས་པ་འམ་ཁྲག་ཅན་ལ་ནི། དེ་ལྟར་དུགས་བྱར་མི་རུང་སྟེ། ད་གཉིས་ལ་ནི་སྦྱང་ཞིང་ཕྱེ་བ་ཙམ་བྱའོ། དུགས་མི་བྱའོ། །མིག་སྨན་བླུགས་པ་རབ་ཚ་རྣོས། །ན་ཞིང་མིག་དམར་རྟུལ་བར་འགྱུར། །ཤིན་ཏུ་གྲང་བས་ཟུག་པ་དང༌། །འཛུམས་མི་ཤེས་དང་ན་བར་འགྱུར། །དྲགས་པས་མིག་མཆུ་དམར་དང་དྲུད། །རྩུབ་ཅིང་མིག་ནི་འབྱེད་དཀར་འགྱུར། །ཤིན་ཏུ་ཆུང་བས་ནད་དཀྱེལ་སྐྱེད། །མ་ཕོ་བས་ནི་ཐུ་བར་བྱེད། །ཅེས་བྱ་བ་ལ། མིག་ཏུ་སྨན་གྱི་ཐིགས་པ་བླུགས་པ་རབ་ཏུ་ཚ་བ་དང༌། རྣོན་པོས་བླུགས་པས་ནི་ན་ཞིང་ཟུག་པར་འགྱུར་བ་དང༌། མིག་དམར་བར་འགྱུར་བ་དང༌། མིག་རྟུལ་ཞིང་མི་གསལ་བར་འགྱུར་རོ། །གལ་ཏེ་མིག་ཏུ་བླུགས་པའི་སྨན་ཤིན་ཏུ་བསིལ་ཞིང་གྲང་བ་བླུགས་ན། མིག་གི་ནད་རབ་ཏུ་ཟུག་ཅིང་རྡོལ་ལ་ཐུག་པ་སྙམ་པ་འབྱུང་བར་འགྱུར་བ་དང༌། འཛུམས་མི་ཤེས་ཤིང་རེངས་བག་ཧར་ཧར་པོར་གནས་པ་དང༌། ན་བ་སྟེ་རྒྱུན་མི་འཆད་པར་ཟུག་ཅིང་ན་བར་འགྱུར་རོ། །མིག་སྨན་གྱི་ཐིགས་པ་མང་པོར་བླུགས་ཏེ་དྲགས་པས་ནི་མིག་མཆུ་དམར་ཞིང་འབྱར་བག་དང༌། རྙོག་མ་ཅན་གྱི་མདོག་ཅན་དུ་བྱེད་དོ། །དེ་བཞིན་དུ་མིག་མཆུ་ཕན་ཚུན་དུ་དྲུད་པ་དང༌། དེ་བཞིན་དུ་མིག་ཤིན་ཏུ་དབྱེ་དཀའ་བར་འགྱུར་རོ། །མིག་སྨན་བླུགས་པ་ཤིན་ཏུ་ཆུང་ཞིང་ཆུང་དུ་མ་ཕྱིན་པས་ནི། ནད་ཀྱི་དཀྱེལ་སྐྱེད་ཅིང་འཕེལ་བར་འགྱུར་གྱི། ནད་དེ་ཞི་བར་བྱེད་མི་ནུས་སོ། །མིག་གི་སྨན་མ་བཙགས་ཤིང་གོས་ཀྱི་ཚགས་ལས་མ་གཏོན་པའམ། མིག་ཏུ་བླུགས་པ་སླར་མ་ཕོ་བས་ནི། སླར་ཐུ་བར་བྱེད་ཅིང་མཆི་མ་འཛག་པ་དང༌། མིག་ཟུག་པ་དང༌། མིག་རྙོག་པ་ཅན་དུ་འགྱུར་རོ། །བསྐུས་
ལགས་ནད་རྩ་སྣ་སུལ་དང༌། །ཁ་ཡི་སྦུབས་སུ་སྨན་གྱིས་ཁྱབ། །སྤྱི་བོར་གཏོགས་པའི་ནད་ཀྱི་ནི། །དྲི་མ་དཔྱིས་ནི་འབྱིན་པར་བྱེད། །ཅེས་བྱ་བ་ལ། མིག་ཏུ་བླུགས་པའི་སྨན་ལེགས་པར་བླུགས་ན། ནད་ཀྱི་རྩ་རྣམས་དང༌། སྣའི་སུལ་རྣམས་དང༌། ཁའི་སྦུབས་ན་ཡོད་པའི་རྩ་རྣམས་སུ་ཁྱབ་ཅིང་ཕྱིན་པར་འགྱུར་བས། སྤྱི་བོར་གཏོགས་ཤིང་མགོ་ཁྱབ་པར་བྱེད་པ་དྲི་མ་སྟེ། ནད་རྣམས་སེལ་ཞིང་འབྱིན་པར་བྱེད་དོ། །བཟློག་པར་ནུས་སོ་ཞེས་བྱ་བའི་དོན་ཏོ། །དེ་ནས་ལུས་སྦྱང་མིག་སྨན་བསྐུ། །མིག་ཙམ་ལ་ནི་གནས་གྱུར་པ། །ཅུང་ཟད་སྐྲངས་དང་ཤིན་ཏུ་གཡའ། །རྔུ་མ་ཆགས་པས་སྨིན་ཤེས་ཤིང༌། །ཅུང་ཟད་དྲུད་དམར་མཆི་མ་འཛག །མིག་རྔུ་སྟུག་ལ་གཏང་བར་བྱ། །བད་ཀན་དང་ནི་ཁྲག་མཁྲིས་དང༌། །མཆོག་ཏུ་རླུང་གིས་གཟིར་ལ་བསྐུ། །ཞེས་བྱ་བ་ལ། དེ་ནས་མིག་སྨན་གྱི་ཐིགས་པ་བླུགས་པའི་འོག་ཏུ་ལུས་སྦྱངས་ཤིང་སྐྱུག་སྨན་ལ་སོགས་པས་ནད་བསལ་ནས། མིག་སྨན་གྱིས་བསྐུ་བ་ནི་མིག་ཙམ་བརྟེན་ཅིང་གནས་པར་གྱུར་པའི་ནད་གང་ཡིན་པ་དེ་སྨིན་ཅིང་ཅུང་ཟད་རྙིང་པར་གྱུར་པའི་མཚན་མ་འབྱུང་བའི་མིག་སྨན་བསྐུ་བར་བྱའོ། །སྨིན་པ་དེ་ཅུང་ཟད་སྐྲངས་པ་དང༌། དེ་བཞིན་དུ་ཤིན་ཏུ་གཡའ་བ་དང༌། མིག་གི་རྔུ་མ་ཆགས་པར་གྱུར་པ་ལས་སྨིན་པ་ཡིན་པར་ཤེས་ཤིང་རྟོགས་པ་དང༌། དེ་བཞིན་དུ་ཅུང་ཟད་དྲུད་པ་སྙམ་པ་དང༌། དམར་བ་དང་མཆི་མ་འཛག་པ་སྟེ། མིག་གང་ཤས་ཆུང་བར་དྲུད་པ་སྙམ་བྱེད་ཅིང་མཆི་མ་འཛག་པ་དང༌། མིག་རྔུ་སྟུག་ཅིང་ཆེ་བ་ཆགས་པ་ལ་མིག་བསྐུ་ཞིང་བྱུག་པར་བྱའོ། །ཡང་དེ་བཞིན་དུ་བད་ཀན་དང་ཁྲག་དང༌། མཁྲིས་པས་ཉེན་ཅིང་གནོད་པའི་མིག་ནད་ལ་གཏང་བར་བྱའོ། །དེ་བཞིན་དུ་མཆོག་གམ་ཁྱད་པར་དུ་ནི་རླུང་ནད་ཀྱིས་ཉེན་པ་དག་ལ་མིག་སྨན་བསྐུ་ཞིང་བྱུག་པ་གཏང་བར་བྱའོ། །མིག་སྨན་ཕྱི་དང་རྨ་གསོ་དང༌། །གསལ་བར་མཐོང་སྟེ་རྣམ་པ་གསུམ། །ཞེས་བྱ་བ་ལ། བསྐུ་ཞིང་བྱུག་པའི་མིག་སྨན་དེ་ཡང་རྣམ་པ་གསུམ་སྟེ། གཅིག་ནི་ཕྱི་ཞིང་
བསལ་བའོ། །གཉིས་པ་ནི་རྨ་འཚོབ་ཅིང་གསོ་བའོ། །གསུམ་པ་ནི་མིག་གསལ་བར་བྱེད་པའོ། །དེ་ཡང་ཕྱི་བ་ནི་ལིང་ཏོག་ལ་སོགས་པའི་མིག་ནད་ཀྱི་རིགས་མིག་གི་མཚོན་སྤྱད་ཀྱིས་བྱི་ཞིང་བདར་བ་ལྟར་བྱེད་པས་ན་ཕྱི་བའོ། །ཡང་ན་མིག་སྨན་ཤིན་ཏུ་རྣོ་བས་ནད་ཀྱི་ཁམས་འབྲུ་ཞིང་འབྱིན་པས་ན་བསལ་བ་ཞེས་བྱ་བའོ། །རྨ་གསོ་བ་ནི་གང་གིས་འཚོབ་ཅིང་འབྱོར་བར་བྱེད་པས་ན་རྨ་གསོ་བའོ། །གསལ་བར་མཐོང་བ་ནི་གསལ་ཞིང་དྲི་མ་མེད་པར་མཐོང་བར་བྱེད་དོ། །དེ་ལ་བྱི་བའི་མིག་སྨན་ནི། །བསྐ་དང་སྐྱུར་དང་ཚ་དང་ཁ། །རྨ་གསོ་སྨན་ནི་ཁ་བ་སྟེ། །གསལ་སྨན་མངར་དང་བསིལ་བ་ཡིན། །ཞེས་བྱ་བ་ལ། མིག་སྨན་དེ་རྣམས་ཀྱི་ནང་ནས། ཕྱི་བའི་མིག་སྨན་ནི་བསྐ་བ་ལ་སོགས་པའི་རོ་བཞི་ལས་སྦྱར་བའི་མིག་སྨན་ནི། ལིང་ཏོག་དང་སྤྲིན་གྱིས་གཡོགས་པ་ལ་སྦྱར་རོ། །རྨ་གསོ་བའི་མིག་སྨན་ནི་རོ་ཁ་བ་དག་ལས་སྦྱར་ཏེ། དེ་ནི་མཆི་མ་ལ་སོགས་པ་ལ་གཏང་ངོ༌། །མིག་གསལ་བའི་སྨན་ནི་རོ་མངར་བ་དང་བསིལ་བ་ཡིན་ཏེ། དེ་ནི་མིག་སྣད་པ་དང་ནད་མེད་པར་གནས་པའི་སྐབས་སུ་གཏང་བར་བྱའོ། །ཐུར་མ་སོར་བཅུའི་དབུས་ཕྲ་ལ། །རྩེ་མོ་སྲི་ཤིང་ཁ་འབུས་འདྲ། །ཕྱི་བའི་ཐུར་མ་ཟངས་ཀྱི་བསྔགས། །རྨ་གསོ་ལྕགས་ནག་བྱས་སོར་ཙམ། །བཟང་པོ་གསལ་བར་བྱེད་པ་ནི། །གསེར་དང་དངུལ་ལས་བྱས་པ་བསྔགས། །ཞེས་བྱ་བ་ལ། མིག་སྨན་བསྐུ་བའི་ཐུར་མ་ནི། སྲིད་སོར་མོ་བཅུའི་ཚད་ལ་དབུས་ཀྱི་ཕྱོགས་ཕྲ་བ། རྩེ་མོ་གཉིས་སྲི་ཤིང་སི་མེ་ཏོག་ཁ་འབུས་བ་འདྲ་བར་ཅུང་ཟད་སྦོམ་ཞིང༌། ཐུར་མ་དེ་ཕྱི་བའི་དཔྱད་དུ་ནི་ཟངས་མ་ལས་བྱས་པ་བསྔགས་སོ། །རྨ་གསོ་བའི་ཐུར་མ་ནི་ལྕགས་ནག་པོ་ལས་བྱས་པ། མཛུབ་སོར་ཙམ་གྱི་སྲིད་ཡོད་པ་བཟང་ཞིང་བསྔགས་སོ། །གསལ་བར་བྱེད་པའི་མིག་སྨན་བསྐུ་བའི་ཐུར་མ་ནི་གསེར་དང༌། དངུལ་ལས་བྱས་པ་བཟང་བ་ཡིན་ནོ། །གདར་བུ་ཁུ་བ་ཕྱེ་མས་ཏེ། །མིག་སྨན་རྣམ་གསུམ་ཉིད་དུ་བརྟག །དེ་ནི་མིག་ནད་ལྕི་འབྲིང་
དང། །ཡང་བ་ལ་ནི་རིམ་བཞིན་སྦྱར། །ཞེས་བྱ་བ་ལ། མིག་སྨན་སྦྱར་བའི་ཐབས་ནི་རྣམ་པ་གསུམ་ཁོ་ན་སྟེ། གདར་བུ་དང་ཁུ་བ་དང་ཕྱེ་མའོ། །དེ་ལ་གཤེར་གྱིས་སྦྲུས་ཤིང་བཏགས་ནས། རེང་བུར་བྱས་པ་ནི་གདར་བུ་ཞེས་བྱ་བའི་སྒྲར་བརྗོད་དེ། །ཁུ་བ་ནི་སྨན་ཁུ་བསྐོལ་བ་ལས་སྐན་ཏེར་གྱུར་པ་ལས་བྱས་པའོ། །སྨན་སྐམ་པོར་བཏགས་པའི་མིག་སྨན་ནི་ཕྱེ་མའོ་ཞེས་བྱའོ། །མིག་སྨན་དེ་དག་ཀྱང་སྔ་མ་བཞིན་དུ་སྟོབས་ཆེ་བ་ཡིན་ཏེ། དེ་བས་ན་ནད་ཤིན་ཏུ་སྟོབས་དང་ལྡན་པ་ལ་ནི་རེང་བུ་གཏང་བར་བྱའོ། །མིག་ནད་ཚབས་འབྲིང་ཙམ་ལ་ནི་ཁུ་བ་གཏང་བར་བྱའོ། །མིག་ནད་ཡང་ཞིང་སྟོབས་དང་ལྡན་པ་ལ་ནི་ཕྱེ་མ་གཏང་བར་བྱའོ། །དེ་ལྟར་རིམ་བཞིན་དུ་སྦྱར་བར་བྱའོ། །མཚན་མོ་ཉལ་དང་ཉི་མའི་གུང༌། །ཟོས་འཐུངས་ཉི་མ་ཚ་བ་ཡིས། །མིག་གི་ནད་ནི་འཕེལ་བ་དང༌། །དཀྱེལ་ནི་སྐྱེ་དང་འཁྲུགས་པར་འགྱུར། །དེ་བས་དེ་ཞི་ཕྱིར་ན་དགོངས། །ཉི་མ་སྤྲིན་བྲལ་དུས་སུ་བསྐུ། །ཞེས་བྱ་བ་ལ། མཚན་མོ་ཉལ་བས་ནད་འཕེལ་ཞིང་སྐྱེ་བར་འགྱུར་བ་དང༌། དེ་བཞིན་དུ་ཉི་མའི་གུང་ལ་ཟས་ཟོས་ཤིང་སྐོམ་འཐུངས་བས་དཀྱེལ་སྐྱེ་ཞིང་གྱེན་དུ་འཕེལ་བར་བྱེད་པ་དང༌། དེ་བཞིན་དུ་ཉི་མ་གུང་ལ་ཡང༌། ཉི་མ་ཚ་བའི་ཟེར་གྱིས་མིག་ནད་མྱུར་དུ་འཁྲུགས་ཤིང་གཡོ་བར་འགྱུར་ཏེ། དེ་བས་ན་དེ་ཞི་བར་བྱ་བའི་ཕྱིར་ཏེ། དེ་ནུབ་མོའི་ནད་ཀྱི་སྐྱོན་ཞི་བར་བྱ་བའི་ཕྱིར། ནང་པར་གཏང་བར་བྱ་ལ། དེ་བཞིན་དུ་ཉི་མ་གུང་གི་སྐྱོན་ཟོས་པ་དང༌། འཐུངས་པ་དང༌། ཉི་མ་ཚ་བས་དཀྱེལ་སྐྱེ་ཞིང་གནོད་པ་དང་འཁྲུགས་པར་འགྱུར་བའི་ཉེས་པ་སྤང་བའི་ཕྱིར་དགོངས་ཀ་བསྐུའོ། །ཡང་ན་ཕྱི་འཕྲེད་ཀྱི་དུས་སྤྲིན་དང་བྲལ་ཞིང་ཡུལ་རྨུས་པ་མེད་པའི་སྐབས་སུ་བསྐུའོ། །གཞན་དག་སྨྲ་བ་ཉིན་པར་ནི། །མིག་སྨན་རྣོན་པོ་གཏང་མི་བྱ། །བཀྲུས་པས་ཉམ་ཆུང་གྱུར་པའི་མིག །ཉི་མར་བལྟས་ན་གནོད་པར་འགྱུར། །ཞེས་བྱ་བ་ལ། ཡང་སློབ་དཔོན་གཞན་དག་འདི་སྐད་ཟེར་ཏེ།
ཉིན་པར་གྱི་དུས་སུ་མིག་སྨན་རྣོན་པོ་བཏང་ཞིང་བསྐུ་བར་མི་བྱ་སྟེ། ཅིའི་ཕྱིར་ཞེ་ན། མིག་སྨན་རྣོན་པོས་བསྐུས་པས་བཀྲུས་ཤིང་འཛག་པར་བྱས་པས། ཉམ་ཆུང་ཞིང་སྟོབས་ཞན་པའི་མིག་གིས་ཉི་མར་བལྟས་ན་གནོད་པར་འགྱུར་ཞིང་ཉམ་ཆུང་བར་འགྱུར་རོ། །མཚན་མོ་གཉིད་ནི་ལོག་པ་དང༌། །ཟླ་དུས་ཡིན་པས་བརྟས་འགྱུར་ཏེ། །མིག་ནི་མེ་ཡི་རང་བཞིན་པས། །བསིལ་བས་གནོད་མེད་བརྟན་པར་འགྱུར། །ཞེས་བྱ་བ་ལ། ཡང་སློབ་དཔོན་དེ་ནི་མཚན་མོའི་དུས་སུ་མིག་སྨན་རྣོན་པོ་གཏང་བར་བྱའོ། །ཞེས་ཟེར་ཏེ། ཅིའི་ཕྱིར་ཞེ་ན། མཚན་མོ་གཉིད་ཀྱིས་ལོག་ཅིང་ཉལ་བ་ནི། ཟླ་བའི་རང་བཞིན་ཡིན་པ་དང༌། དུས་ཀྱང་ཟླ་བའི་དུས་ཡིན་པས་བརྟས་ཤིང་ཚིམ་པར་འགྱུར་བ་ཉིད་ཀྱིས། མིག་ནི་མེའི་རང་བཞིན་བསིལ་བས་བརྟན་པར་འགྱུར་ཞིང་སྟོབས་རྙེད་པར་འགྱུར་རོ། །མིག་ནད་བད་ཀན་ཤས་ཆེ་བའམ། །ཕྱི་ཞིང་བསལ་བར་བྱ་བ་ལ། །རབ་ཚ་མིན་པའི་ཉིན་པར་ཡང༌། །མིག་སྨན་རྣོན་པོ་བླུགས་པར་འདོད། །ཅེས་བྱ་བ་ལ། གལ་ཏེ་བད་ཀན་གྱི་མིག་ནད་ཤིན་ཏུ་ཤས་ཆེ་ཞིང་བདོ་བ་དང༌། དེ་བཞིན་དུ་ཕྱི་ཞིང་བསལ་བར་བྱ་བའི་མིག་གཟེར་རམ་ལིང་ཏོག་ལ་སོགས་པ་ཉིན་མོ་ཡང་དེས་གསོ་བར་བྱ་བའི་ནད་ལ་མིག་སྨན་གཏང་དུ་རུང་ལ། དེ་ཡང་ཉི་མ་ཤིན་ཏུ་མི་ཚ་བ་ལ། མིག་སྨན་རྣོན་པོ་དག་ཀྱང་བླུགས་སུ་རུང་བར་འདོད་ཅིང་ཁས་ལེན་པ་ཡིན་ནོ། །དྲིས་པ་མིག་ནི་མེའི་རང་བཞིན་ཡིན་ལ། མིག་སྨན་རྣོན་པོ་ཡང་མེའི་རང་བཞིན་ཅན་ཡིན་པས། ཉི་མ་ཚ་བ་དང་ཆོས་མཐུན་པ་ཡིན་ན། འདི་ལ་འགལ་བ་ཅི་ཡོད་ཅེ་ན། དེའི་ཕྱིར་སྨྲས་པ་ནི། ལྕགས་ནི་རྡོ་ལས་འབྱུང་བ་ཡིན། །རྣོ་བ་དེ་ཉིད་ལས་བྱུང་ཡང༌། །དེ་ཉིད་ཀྱིས་ནི་གནོད་བྱེད་ནུས། །མིག་གི་རང་བཞིན་དེ་དང་འདྲ། །ཞེས་བྱ་བ་ཡིན་ཏེ། ཇི་ལྟར་ལྕགས་རྣམས་ནི་རྡོའི་ཁམས་རྣམས་ལས་བྱུང་ཞིང་སྐྱེས་པ་ཡིན་ལ། གང་ཡང་ལྕགས་དེ་ཉིད་རྣོ་བ་ཉིད་ཀྱང་རྡོ་དེ་ཉིད་ལས་བྱུང་བ་ཡིན་མོད་ཀྱི། གང་
ལྕགས་དེའི་རྣོ་བ་ཉིད་ལ་གནོད་ཅིང་འཇིག་པར་བྱེད་པ་འམ། ཡང་ན་རྣམ་པ་ཐམས་ཅད་ནས་ཐམས་ཅད་དུ་མེད་པར་བྱེད་པ་ནི་རྡོ་དེ་ཉིད་ལས་བྱུང་ཞིང་གཞན་ལས་མ་ཡིན་ནོ། །དེ་བཞིན་དུ་མིག་གི་མཐོང་བའི་རང་བཞིན་དུ་མེའི་ཁམས་ལས་བྱུང་ལ། དེ་ཉིད་ཀྱིས་ན་རྣོ་བའི་ཕྱིར་དེ་ཉིད་ཀྱིས་གནོད་པར་བྱེད་དེ། ཅུང་ཟད་ཙམ་མཐོང་བ་འམ། རྣམ་པ་ཐམས་ཅད་དུ་མི་མཐོང་བར་འགྱུར་རོ། །དགུན་ཚེ་མཚན་མོ་མིག་སྨན་ནི། །རྣོན་པོ་ཕན་པ་མ་ཡིན་ཏེ། །འཛག་མི་འགྱུར་བས་མིག་རེངས་དང༌། །གཡའ་དང་མི་གསལ་ལ་སོགས་སྐྱེད། །ཅེས་བྱ་བ་ལ། དགུན་གྱི་ཚེ། མཚན་མོ་ཡང་མིག་སྨན་ཤིན་ཏུ་རྣོ་བ་ཕན་ཞིང་བདེ་བར་བྱེད་པ་མ་ཡིན་ཏེ། ཅིའི་ཕྱིར་ཞེ་ན། དུས་དེའི་ཚེ་མིག་སྨན་རྣོན་པོ་བཏང་ཡང་གྲང་བའི་ཉེས་པས་མིག་ལས་མཆི་མ་ལ་སོགས་པའི་ནད་འབྱིན་ཅིང་འཛག་པར་བྱེད་མི་ནུས་ཏེ། སླར་ཞིང་མིག་སྨན་དེས་མིག་རེངས་ཤིང་ཧར་བག་ཏུ་འདུག་པ་དང༌། གཡའ་བ་དང༌། མིག་མི་གསལ་བ་ལ་སོགས་པ་སྐྱེད་པར་འགྱུར་རོ། །སོགས་པའི་སྒྲས་ནི་སྐྲང་བ་དང༌། མིག་རྡུལ་ཆགས་པ་དང༌། མིག་དམར་བ་ལ་སོགས་པ་སྐྱེད་པར་འགྱུར་རོ། །མིག་སྨན་མི་གཏང་འཇིགས་དང་སློན། །ཁྲུས་བཏང་ཟས་ཟོས་ཤུགས་ཀྱིས་ཉེན། ཁྲོས་དང་རིམས་བཏབ་མིག་ཕྱིར་བྱུང༌། །གླད་ནད་མྱ་ངན་གཉིད་མ་ལོག །ཉི་མ་མ་མཐོང་མགོ་བཀྲུས་དང༌། །ཆང་འཐུངས་དུ་བ་བརྔུབས་པ་དང༌། །ཁ་ཟས་མ་ཞུ་ཉི་ཚན་གདུངས། །ཉིན་ཉལ་སྐོམ་པ་ལ་མི་གཏང༌། ཞེས་བྱ་བ་ལ། སྐྱེས་བུ་འཇིགས་ཤིང་སྡངས་པར་གྱུར་པ་ལ། མིག་སྨན་གཏང་དུ་མི་རུང་ངོ༌། །དེ་བཞིན་དུ་སློན་ཞིང་སྐྱུག་པ་དང༌། བཀྲུ་སྨན་བཏང་ཟིན་པ་དང༌། ཟས་ཟོས་ཤིང་འགྲངས་མ་ཐག་དང༌། བཤང་བ་དང་གཅི་བ་ལ་སོགས་པའི་ཤུགས་ཀྱིས་ཉེན་པ་དང༌། ཁྲོ་ཞིང་རྔམ་པ་དང༌། རིམས་ཀྱིས་བཏབ་པ་དང༌། མིག་ཕྱིར་བྱུང་ཞིང་གློ་བ་དང༌། གླད་ནད་ཀྱིས་གཟེར་བ་དང༌། མྱ་ངན་དང་བཅས་པ་དང༌། མཚན་མོ་གཉིད་མ་ལོག་པ་དང༌། མགོ་བཀྲུས་ཤིང་
གཤེར་བ་དང༌། དེ་བཞིན་དུ་ཆུ་འཐུངས་ཤིང་དུ་བ་བརྔུབས་པ་དང༌། དེ་བཞིན་ཁ་ཟས་མ་ཞུ་བ་དང༌། ཉི་ཚན་གྱིས་གདུངས་པ་དང༌། ཉིན་པར་ཉལ་ཞིང་གཉིད་ལོག་པ་དང༌། སྐོམ་གྱིས་ཉེན་པ་ལ་མི་གཏང་ངོ་ཞེས་མི་གཏང་བ་ཀུན་ལ་སྦྱར་བར་བྱའོ། །མིག་སྨན་རབ་རྣོ་འཇམ་དང་ཉུང༌། །མང་སླ་སྐ་དང་རྩུབ་པ་དང༌། །ཤིན་ཏུ་བསིལ་དང་ཚ་བ་ཡི། །མིག་སྨན་བསྐུ་བར་མི་བྱའོ། །ཞེས་བྱ་བ་ལ། རབ་ཏུ་རྣོ་བ་ནི་རོ་ཚ་བ་དང༌། སྐྱུར་བ་དང༌། ལན་ཚྭ་ལས་སྦྱར་བར་མི་བྱའོ། །དེ་བཞིན་དུ་རབ་ཏུ་འཇམ་པ་ནི་རོ་མངར་བ་ཉི་ཚེ་ལས་བྱས་པའོ། །ཉུང་བ་ཆུང་ཆེས་པའོ། །མང་བ་ནི་ཆེས་དྲགས་པའོ། །དེ་བཞིན་དུ་ཤིན་ཏུ་སླ་བ་དང༌། ཤིན་ཏུ་སྐ་བ་དང༌། ཤིན་ཏུ་རྩུབ་ཅིང་རེག་ན་མི་བདེ་བ་དང༌། དེ་བཞིན་དུ་ཤིན་ཏུ་བསིལ་བ་དང༌། ཤིན་ཏུ་ཚ་བའི་མིག་སྨན་བཏང་ཞིང་སྦྱར་བར་མི་བྱའོ། །དེས་ན་མིག་ནི་མ་ཕྱེ་བར། །དལ་གྱིས་ནང་དུ་ཁྱབ་པར་བྱ། །ཞེས་བྱ་བ་ལ། དེས་ན་དེའི་འོག་ཏུ་མིག་སྨན་ནང་དུ་ཞུགས་ཤིང་ཁྱབ་པར་བྱ་བའི་ཕྱིར། མིག་གི་འབྲས་བུ་དལ་གྱིས་བསྐྱོད་ཅིང་བསྒུལ་ལ། སྨན་གྱིས་ཁྱབ་པར་བྱའོ། །ཅི་ཞིག་བྱས་ནས་ཤེ་ན། མ་ཕྱེ་བར་ཞེས་བྱ་སྟེ། མིག་མ་དབྱེ་བར་མིག་འབྲས་ནད་དུ་བསྒུལ་བར་བྱའོ། །མིག་སྨན་བྱུགས་ནས་མིག་མཆུ་ནི། །ཅུང་ཟད་བསྐྱོད་ལ་མིག་སྨན་ནི། །རྣོན་པོས་མྱུར་དུ་ཁྱབ་འགྱུར་བས། །དབྱེ་དང་འཛུམས་པར་མི་བྱའོ། །མིག་མཆུ་གཉིས་ནི་བསྡམ་པ་དང༌། །བཀྲུ་བ་དག་ནི་མི་བྱའོ། །ཞེས་བྱ་བ་ལ། མིག་སྨན་མིག་ཏུ་བཅུག་གམ། བྱུགས་ནས་མིག་གི་མཆུ་ཅུང་ཟད་ཙམ་དལ་བུས་བསྐྱོད་པར་གྱུར་ན། མིག་སྨན་རྣོན་པོས་མྱུར་དུ་ཁྱབ་པར་གྱུར་བས་འཕྲལ་དུ་དེའི་མོད་ལ་མིག་སྨན་བཅུག་མ་ཐག་མིག་དབྱེ་བ་དང་བཙུམས་པར་མི་བྱའོ། །དེ་བཞིན་དུ་དེའི་མོད་ལ་མིག་སྨན་གཉིས་བསྡམ་ཞིང་བཙིར་བར་ཡང་མི་བྱ་ལ། འཕྲལ་དུ་མིག་བཀྲུ་བར་ཡང་མི་བྱའོ། །གང་ཚེ་མིག་སྨན་གྱིས་བསྐུས་པའི། །སྨན་གྱི་རྩོལ་བ་
ཞི་གྱུར་ན། །ནད་ཀྱི་དམིགས་དང་མཐུན་པ་ཡི། །ཆུ་ཡིས་དེ་ཚེ་བཀྲུ་བར་བྱ། །ཞེས་བྱ་བ་ལ། གང་གི་ཚེ་མིག་གི་སྨན་བསྐུས་པའམ་བྱུགས་པའི་རྗེས་ལ། སྨན་གྱི་ནུས་པའི་མཐུ་རྩོམ་པ་ཞི་བར་གྱུར་ལ། ཚ་བ་ལ་སོགས་པ་མེད་པར་གྱུར་ཅིང༌། དེ་ཉིད་ཀྱིས་ན་བདེ་བར་གྱུར་བ་དེའི་ཚེ། ནད་ཀྱི་དམིགས་དང་མཐུན་པའི་ཆུ་བསིལ་བ་དང༌། དྲོ་བ་དང༌། བར་མའི་རང་བཞིན་ཅན་ལ་སོགས་པས་ཅི་བདེར་བཀྲུ་བར་བྱའོ། །དེ་ནས་གོས་འཇམ་བཅས་པ་ཡི། །མཐེ་བོ་དང་ནི་མཛུབ་མོ་གཉིས། །མིག་ནི་ཅི་རན་ཕྱེ་སྟེ་ཕྱི། །གཡོན་པས་གཡས་པ་ཕྱི་བར་བྱ། །གཞན་དུ་མིག་སྨན་བླུགས་པ་ཡིས། །མིག་མཆུ་ཁྱབ་པས་ནད་སྐྱེད་འགྱུར། །ཞེས་བྱ་བ་ལ། དེ་ནས་དེ་ལྟར་བཀྲུས་པའི་རྗེས་ལ་གཡས་པའི་མཐེབ་མོས་གོས་འཇམ་པོ་དང་བཅས། མིག་གཡོན་པའི་མིག་མཆུ་གོང་མ་བཟུང་ལ་ཅི་རན་ཙམ་དུ་ཕྱི་ཞིང་བསལ་བར་བྱའོ། །གཡོན་པའི་མཐེ་བོ་གོང་དང་བཅས་པས་ནི། གཡས་པའི་མིག་མཆུ་གོང་མ་བཟུང་ནས་ཕྱི་བར་བྱའོ། །དེ་ལས་གཞན་དུ་མིག་སྨན་བླུགས་པའི་རྗེས་ལ་སྦྱང་ཞིང་ཕྱི་བ་མ་བྱས་ན་མིག་སྨན་བླུགས་པས་ནད་ཀྱིས་མིག་མཆུར་ཁྱབ་ཅིང་ཕྱིན་པས། ནད་ཀྱི་གནོད་པ་སྐྱེད་པར་འགྱུར་རོ། །དེ་བས་ན་མིག་སྨན་བཏང་བའི་རྗེས་ལ། མིག་མཆུ་བཀྲུ་བ་དང་ཕྱི་བར་བྱའོ། །སྨན་གྱིས་གཡའ་བའམ་རྟུལ་གྱུར་ན། །རྣོན་པོའི་དུད་པ་བརྔུབ་པར་བྱ། །ཞེས་བྱ་བ་ལ། མིག་སྨན་བཅུག་ནས་མིག་གཡའ་བའམ་རྟུལ་བར་གྱུར་ན། མིག་སྨན་རྣོན་པོའི་དུ་བ་བརྔུབ་པར་བྱའོ། །མིག་སྨན་རྣོན་པོས་ཚ་གྱུར་ན། །སླར་འཆོས་མིག་སྨན་བསིལ་བྱེད་གཞུག །ཅེས་བྱ་བ་ལ། མིག་སྨན་རྣོན་པོ་བྱུགས་པས་མིག་རབ་ཏུ་ཚ་བར་གྱུར་ན། ཚ་བ་དེ་ཉེ་བར་ཞི་བར་བྱ་བའི་ཕྱིར་བསིལ་ཞིང་གྲང་བའི་ཕྱེ་མའི་མིག་སྨན་གཞུག་པར་བྱའོ། །མིག་སྨན་དེ་ནི་སླར་འཆོས་ཤིང་བསལ་བར་བྱེད་པས་ན། མིག་སྨན་སླར་འཆོས་པ་ཞེས་བྱ་བའོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ། ཚིག་
གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ལེའུ་ཉི་ཤུ་གསུམ་པའི་རྣམ་པར་འགྲེལ་པའོ།། །།དེ་ནས་མིག་བརྟ་བའི་ཆོ་ག་དང༌། མིག་སྨན་གྱི་ཐུར་མ་བསྲེག་ཅིང་བཙོས་པའི་ཁུ་བ་མིག་ཏུ་བླུགས་པའི་ཆོ་གའི་ལེའུ་བཤད་པར་བྱའོ། །ཞེས་བྱ་བ་ལ། འདི་བརྩམས་པའི་འགྲེལ་པ་ནི་འདི་ཡིན་ཏེ། མིག་སྨན་རྣོན་པོས་ཚ་བར་གྱུར་ན་སླར་འཆོས་པའི་མིག་སྨན་གྱི་ཕྱེ་མ་བསིལ་བ་གཞུག་པར་བྱའོ། །ཞེས་བཤད་པས་མིག་བརྟ་ཞིང་ཚིམ་པར་བྱ་བ་ཡང་ཕལ་ཆེར་དེ་དང་འདྲ་བར་འདིར་བཤད་པ་ཡིན་ནོ། །དེ་ལ་མིག་བརྟ་བ་དང༌། བསྲེག་ཅིང་བཙོ་བའི་ཆོ་ག་གཞུང་གང་དུ་སྟོན་པར་བྱེད་པའི་ལེའུ་བཤད་ཅིང་བསྟན་པར་བྱའོ་ཞེས་བྱའོ། །མིག་འཛུམས་མི་ཤེས་རེངས་བག་དང༌། །སྐམ་དང་རྩུབ་དང་སྣད་པ་དང༌། །རླུང་མཁྲིས་ནད་གྱུར་ཞུམ་བག་དང༌། །རྫི་མ་བྱི་ཞིང་གཡོགས་པར་མཐོང༌། །དབྱེ་དཀའ་རྩ་ནི་བརྩེ་བ་དང༌། །མིག་ནི་བརྩེ་འགྱུར་མི་མཐོང་དང༌། །དམར་ཞིང་མཆི་འཛག་གླད་ཕྱེད་ན། །རླུང་ནད་ཀུན་འགྲོ་ལིང་ཏོག་ཅན། །མིག་ནད་རྩེ་ཞིལ་མཆི་མ་འཛག །ན་ཞིང་དམར་ལ་མིག་རྡུ་ཆགས། །ཐུན་མོང་དུས་སུ་ནང་པར་རམ། །དགོངས་ཀ་གན་རྐྱལ་ཉལ་ནས་ནི། །ལུས་དང་མགོ་སྦྱང་རླུང་མེད་པའི། །གནས་སུ་བརྟ་བའི་སྨན་གཏང་ངོ༌། །ཞེས་བྱ་བ་ལ། མིག་ན་ཞིང་འཛུམས་མི་ཤེས་པ་དག་ལ་མིག་བརྟ་བའི་སྨན་བླུགས་པར་བྱའོ། །རེངས་བག་ནི་བསྐྱོད་ཅིང་འགུལ་མི་ཤེས་པའོ། །སྐམ་པ་ནི་ཡོངས་སུ་བསྐམས་པའོ། །རྩུབ་པ་ནི་སྣུམ་པའི་མདངས་ཀྱི་ཡོན་ཏན་དང་བྲལ་བའོ། །སྣང་བ་ནི་འབྲས་བུ་མངོན་པར་སྣང་བའོ། །རླུང་དང་མཁྲིས་པའི་ནད་ནི་དེ་གཉིས་ལས་གྱུར་པའི་ནད་ཀྱིས་ཉེན་པའོ། །ཞུམ་བག་ནི་རླུང་གི་དབང་གིས་མིག་ཡོན་པོར་གྱུར་བའོ། །རྫིམ་བྱི་བ་ནི་མིག་གོང་གི་རྫི་མ་རྣམས་ནད་ཀྱིས་བྱི་བར་གྱུར་བ་དང༌། དེ་བཞིན་དུ་གཡོགས་པར་མཐོང་བ་ནི། སྤྲིན་གྱིས་གཡོགས་པ་དང་འདྲ་བར་མི་གསལ་བར་མཐོང་བ་འམ། ཡང་ན་སྔོན་དམར་
དུ་མར་མཐོང་བ་སྟེ། དེ་ལ་བརྟ་བའི་སྨན་གཏང་བར་བྱའོ། །དེ་བཞིན་དབྱེ་དཀའ་བ་ལ་སོགས་པས་ཉེན་ཅིང་ན་བ་ལ་སོགས་པ་མིག་ནད་རྣམས་དང་ཡང་མིག་ནད་ལ་སོགས་པ་རྩེ་ཞིལ་ཞིང་ཅུང་ཟད་བྲི་བ་དང༌། ཡང་དུས་གང་ཐུན་མོང་དུ་གྱུར་ཅིང༌། གྲང་དྲོ་རན་པ་དང༌། དཔྱིད་དང་སྟོན་གྱི་དུས་དེའི་ཚེ་ན་ཡང་ནང་པར་ཏ་ནམ་ལངས་པ་དང༌། དགོངས་ཀ་སྟེ་ཉི་མ་ནུབ་པའི་དུས་སུ་སྐྱེས་བུ་གན་རྐྱལ་དུ་ཉལ་ནས་སྔར་ལུས་དང་མགོ་བོ་སྦྱངས་ཤིང་བཀྲུ་སྨན་བཏང་ཞིང་སྦྱར་བ་ལ། རླུང་མེད་པའི་གནས་སུ་བརྟ་བའི་མིག །སྨན་གཏང་བར་བྱའོ། ནས་སམ་མ་ཤའི་རྗེན་ཟན་གྱིས། །མིག་སྦུབས་མཐའ་སྐོར་མཉམ་པ་ནི། །དཔངས་སུ་སོར་གཉིས་བརྟན་བྱས་ལ། །ནད་དམིགས་ཇི་བཞིན་སྨན་བསྐོལ་བ། །ཞུན་མར་ཆུ་ཚན་ལ་བསྲོས་ཏེ། །མིག་ནི་བཙུམས་པར་བླུགས་པར་བྱ། །ཞེས་བྱ་བ་ལ། ནས་ཀྱི་རྗེན་ཕྱེ་སྦྲུས་པ་ལས། སྨན་མི་འཕོ་བའི་རྟེན་བྱས་ལ། ཞུན་མར་མིག་ཏུ་བླུགས་པར་བྱའོ། །བསྐོར་བ་དེ་ཡང་མིག་སྦུབས་ཀྱི་ཕྱི་རོལ་ནས་བསྐོར་བར་བྱས། དེ་ཡང་མཉམ་ཞིང་སྙོམས་པར་བྱའི། མི་མཉམ་པར་ནི་མི་བྱ་བ་དང༌། དཔངས་ཀྱི་ཚད་སོར་གཉིས་སུ་བྱ་བ་དང༌། དེ་བཞིན་དུ་བརྟན་པ་སྟེ་གས་མེད་པར་བྱས་ལ། དེའི་འོག་ཏུ་བསྐོར་བ་དེར་ནད་དམིགས་ཇི་བཞིན་ཞེས་བྱ་བ་རླུང་ལ་སོགས་པའི་ནད་གང་ལས་གྱུར་པ་སེལ་བའི་སྨན་དང་བསྐོལ་ཞིང་བཙོས་པའི་ཞུན་མར་ཆུ་ཚ་བ་ལ་བསྲོས་ཤིང་བཞུས་ཏེ་དྲོ་གྲང་རན་པར་བྱས་པའི་ཞུན་མར་དེ་མིག་བཙུམས་པར་བླུགས་པར་བྱའོ། །མཚན་མོ་མི་མཐོང་རླུང་རབ་རིབ། །དབྱེ་དཀའ་སོགས་ལ་ཚིལ་ཞུན་བླུགས། །རྫི་མའི་རྩེ་ནུབ་པར་བཀང་ལ། །དེ་ནས་བསྐྱོད་ཅིང་དབྱེ་བ་ནི། །དེ་ནི་དལ་གྱིས་བྱེད་དུ་གཞུག །ཚད་བགྲང་བྱ་བ། ཞེས་བྱ་བ་ལ། མཚན་མོ་མི་མཐོང་བ་ལ་སོགས་པའི་མིག་ནད་ཀྱིས་བཏབ་པ་ལ་རང་རང་གི་སྨན་གང་ཡིན་པ་དང༌། བཙོས་པའི་ཚུལ་གྱི་ཞུན་མར་སྔ་མ་ལྟར་བསྲོ་བ་བླུགས་པར་བྱའོ། །དེ་ལ་རྫི་མའི་རྩེ་མོ་ནུབ་པར་གྱུར་ཀྱི་བར་དང༌། སྨིན་མའི་སྤུར་ཕྱིན་གྱི་བར་དུ་དགང་
བར་བྱའོ། །དེ་ནས་བླུགས་ཟིན་པའི་རྗེས་ལ། མིག་བསྐྱོད་ཅིང་དབྱེ་བ་སྐྱེས་བུ་དེ་དལ་གྱིས་བགས་ཀྱིས་བྱེད་དུ་གཞུག་ལ། དེའི་གྲངས་ཀྱི་ཚད་བགྲང་ཞིང་གཟུང་བར་བྱའོ། །དེ་ལ་ནི། མིག་མཆུ་མིག་འགྲམ་དཀར་ནག་ནད། །གྲངས་བརྒྱ་སུམ་བརྒྱ་ལྔ་བརྒྱ་དང༌། །བརྒྱ་ཕྲག་བདུན་དང་བརྒྱད་རིམ་བཞིན། །དཀྲུགས་དང་རླུང་ལ་གྲངས་སྟོང་སྟེ། །མཁྲིས་པ་ནད་མེད་ལ་དྲུག་བརྒྱ། །བད་ཀན་ལ་ནི་ལྔ་བརྒྱ་གཞག །ཅེས་བྱ་བ་ལ། དེ་ལ་གྲངས་བགྲང་བའི་ཚུལ་ནི། མིག་མཆུའི་ནད་ལ་གྲངས་བརྒྱའི་ཚད་ཀྱི་བར་དུ་གཞག་པར་བྱའོ། །མིག་འགྲམ་གྱི་ནད་ལ་ནི་གྲངས་སུམ་བརྒྱའི་བར་དུ་གཞག་གོ །མིག་གི་འབྲས་བུ་དཀར་པོའི་ཆ་ལ་ནད་ཡོད་པ་ལ་ནི་གྲངས་བདུན་བརྒྱའི་བར་དུ་གཞག་པར་བྱའོ། །ནག་པོ་མཐོང་བའི་ཆ་ལ་ནད་ཡོད་པ་ལ་གྲངས་བརྒྱད་བརྒྱའི་བར་དུ་གཞག་པར་བྱ། དེ་བཞིན་དུ་མིག་དཀྲུགས་པ་སྙམ་སེམས་པ་དང་རླུང་གི་ནད་ལ་ནི་གྲངས་སྟོང་གི་བར་དུ་གཞག་གོ །མཁྲིས་པའི་ནད་དང་ནད་མེད་ཅིང་ཐ་མལ་བར་གནས་པའི་སྐབས་སུ་བཏང་བ་ལ་ནི་གྲངས་དྲུག་བརྒྱའི་བར་དུ་གཞག་པར་བྱའོ། །བད་ཀན་གྱི་ནད་ལ་ནི་གྲངས་ལྔ་བརྒྱའི་བར་དུ་གཞག་པར་བྱའོ། །དེ་ནས་མིག་འགྲམ་འཛག་སྒོ་བྱ། །སྨན་མར་སྣོད་དུ་གཟགས་པར་བྱ། །དུད་པ་བརྔུབས་ནས་ནམ་མཁའ་དང༌། །གཟུགས་འཚེར་བ་ནི་ལྟ་མི་བྱ། །ཞེས་བྱ་བ་ལ། གྲངས་བགྲང་བ་རྫོགས་པ་དེའི་རྗེས་ལ་བརྟ་བའི་སྣུམ་བླུགས་པ་གང་ཡིན་པ་དེ། དབོ་ཞིང་གཟགས་པར་བྱའོ། །དེ་ཡང་ཇི་ལྟར་ཞེན་མིག་འགྲམ་རྣ་བ་དང་ཉེ་བའི་ཕྱོགས་སུ་མིག་ཟུར་གྱི་འཛག་པའི་སྒོའི་བུ་ག་བྱས་ལ་སྨན་མར་སྣོད་བཟེད་པར་བྱའོ། །དེས་ན་དེའི་འོག་ཏུ་སྣུམ་གྱིས་གློངས་པའི་བད་ཀན་ཞི་བར་བྱ་བའི་ཕྱིར་དུ་བ་བརྔུབ་པར་བྱའོ། །དེ་ནས་དེའི་མོད་ལ་ནམ་མཁའ་ལ་མི་ལྟ་བ་དང༌། མེ་དང་ཉི་མ་ལ་སོགས་པ་གཟུགས་འཚེར་བ་ལ་བལྟ་བར་མི་བྱའོ། །དེ་ལྟར་རླུང་ལ་ཉིན་རེ་བྱ། །མཁྲིས་པར་ཉིན་རེའི་བར་དུ་གཅོད། །བད་ཀན་བདེར་གནས་གཉིས་པར་བཅད། །
ཚིམ་པར་འགྱུར་གྱི་བར་དུ་གཏང༌། །ཞེས་བྱ་བ་ལ། དེ་ལྟར་བཤད་པ་རྣམས་རླུང་གི་ནད་དང་ལྡན་པ་ལ་ནི་ཉིན་རེ་ལ་བཏང་ལ། ཚིམ་པར་འགྱུར་གྱི་བར་དུ་མི་གཅད་པར་བྱའོ། །མཁྲིས་པ་ལས་གྱུར་པའི་མིག་ནད་ལ་ནི། ཚུལ་འདི་ཉིད་ཀྱིས་ཉི་མ་གཅིག་གི་བར་དུ་བཅད་ཅིང་ཉིན་རེས་ཆོད་པར་བྱས་ལ་གཏང་ངོ༌། །བད་ཀན་དང་བདེ་བར་གནས་པའི་སྐབས་སུ་ནི་ཉི་མ་གཉིས་གཉིས་ཀྱི་བར་དུ་བཅད་ཅིང་གཏང་སྟེ། ཚིམ་པར་འགྱུར་གྱི་བར་དུ་གཏང༌། །ཞེས་པ་ནི་ཐམས་ཅད་ལ་གཏང་ངོ༌། །ཚིམ་པས་གསལ་བར་མཐོང་ནུས་ཤིང༌། །བདེ་ཞིང་མིག་ཡང་དྲི་མ་མེད། །མ་ཚིམ་པ་ལས་གོ་བཟློག་ཡིན། །ཚིམ་དྲགས་བད་ཀན་ནད་སྐྱེད་འགྱུར། །ཞེས་བྱ་བ་ལ། མིག་ལེགས་པར་ཚིམ་ཞིང་བརྟས་པར་གྱུར་ན་དངོས་པོ་གསལ་བར་མཐོང་བར་ནུས་པ་དང༌། དེ་བཞིན་དུ་བདེ་ཞིང་ནད་མེད་པ་དང༌། ཡང་བག་དང་ལེགས་པར་བརྟས་པར་བྱས་པས་མིག་རང་བཞིན་གྱིས་དྲི་མ་མེད་ཅིང་དག་ལ། རབ་རིབ་ལ་སོགས་པའི་ཉེས་པ་དང་བྲལ་བར་འགྱུར། གལ་ཏེ་ཡང་ཚིམ་པར་མ་གྱུར་ན། བཤད་མ་ཐག་པའི་ལེགས་པར་ཚིམ་པའི་མཚན་ཉིད་ལ་སོགས་པ་བསལ་བར་མི་ནུས་པས་ན་དྲི་མ་དང་བཅས་པའི་བར་དུ་འགྱུར་རོ། །ཚིམ་དྲགས་ཤིང་བརྟས་པར་བྱས་དྲགས་ན། བད་ཀན་ལས་བྱུང་བའི་ནད་རྣམས་བསྐྱེད་ཅིང་འབྱུང་བར་འགྱུར་རོ། །དེ་ནི་ལུས་ཀྱི་སྣུམ་འཐུངས་ལྟར། །མི་གསལ་མཐོང་བ་ཉམ་ཆུང་འགྱུར། །དེ་བས་བརྟ་བའི་རྗེས་ལ་ནི། །མཐོང་བའི་སྟོབས་ནི་སྐྱེད་བྱེད་པ། །སྔར་བཤད་པ་ཡི་མིག་ནད་ལ། །ཕུར་མ་བཙོས་པ་སྦྱར་བར་བྱ། །ཞེས་བྱ་བ་ལ། ཚིམ་པར་བྱས་པའི་མིག་ནི་མཐོང་བའི་སྟོབས་ཞན་པར་འགྱུར་ཏེ། དཔེར་ན་ལུས་ཀྱི་ཁོང་དུ་སྣུམ་འཐུངས་པ་ན། ཉམ་ཆུང་ཞིང་ཅུང་ཟད་བརྒྱལ། སྟོབས་ཆུང་བ་དང་འདྲ་བར་མིག་སྨན་འཐུངས་པས་ཀྱང་སྟོབས་ཆུང་ཞིང་མི་གསལ་བར་འགྱུར་རོ། །དེ་བས་ན་མིག་བརྟ་ཚིམ་པར་བྱས་པའི་རྗེས་ལ་མཐོང་བའི་སྟོབས་གསལ་བར་བྱེད་པ་དང༌། སྐྱེད་པར་ནུས་པའི་མིག་སྨན་ཕུར་མ་བཙོས་པའི་ཁུ་བ་མིག་གཉིས་སུ་བླུགས་པར་བྱ་ཞིང་
སྦྱར་བར་བྱའོ། །དེ་ཡང་སྔར་བཤད་པའི་མིག་ནད་མིག་དབྱེ་བར་དཀའ་བ་ལ་སོགས་པ་ལ་ཕུར་མ་བཙོས་པའི་ཁུ་བ་གཏང་བར་བྱའོ། །དེ་ནི་རླུང་ལ་སྣུམ་ཅན་ཏེ། །བད་ཀན་བཅས་ཏེ་ཕྱི་བ་ཕན། །མཐོང་ཉམས་རླུང་དང་མཁྲིས་བཅས་དང། །ཁྲག་མཁྲིས་བདེར་གནས་ལ་གསལ་བྱེད། །ཅེས་བྱ་བ་ལ། མིག་སྨན་བཙོས་པའི་ཁུ་བ་དེ་ནི་རླུང་ལས་གྱུར་པའི་མིག་ནད་ལ་སྣུམ་ཅན་གཏང་བར་བྱའོ། །དེ་བཞིན་དུ་བད་ཀན་དང་བཅས་པའི་རླུང་ལ་ནི་ཕྱི་བའི་མིག་སྨན་ཕན་པ་ཡིན་ནོ། །མཐོང་བ་ཉམས་ཤིང་མིག་མི་གསལ་བ་དང༌། རླུང་དང་མཁྲིས་པར་བཅས་པ་དང༌། ཁྲག་དང་མཁྲིས་པའི་ནད་དང༌། བདེ་བར་གནས་ཤིང་ནད་མེད་པའི་སྐབས་ལ་ནི་གསལ་བར་བྱེད་པའི་མིག་སྨན་གྱི་ཕུར་མ་བཙོས་པའི་ཐིགས་པ་མིག་ཏུ་བླུགས་པར་བྱའོ། །ཁུང་གནས་མཐུས་ཚོལ་རླན་ཅན་གྱི། །ཚིལ་དང་རྐང་དང་ཞག་ཤ་རློན། །འོ་མ་དག་དང་བཏགས་པ་དང༌། །འཚོ་བྱེད་དག་དང་སྦྱར་བའི་སྣུམ། །ཞེས་བྱ་བ་ལ། ཁུང་ན་གནས་པ་ནི་ས་ལ་བརྟེན་ཅིང་ཕུག་ན་གནས་པ་སྟེ། སྲ་མ་དང་ཕྱི་བ་ལ་སོགས་པའོ། །མཐུས་ཚོལ་བ་ནི་བྱ་རྒོད་དང༌། ཁྲ་ལ་སོགས་པའོ། །རླན་ཅན་ལ་གནས་པ་ནི་ངང་པ་དང་ཆུ་སྐྱར་ལ་སོགས་པ་སྟེ། དེ་རྣམས་ཀྱི་ཚིལ་དང༌། དེ་བཞིན་དུ་རྐང་དང་ཞག་དང༌། དེ་བཞིན་དུ་ཤ་རློན་པ་རྣམས་འོ་མ་དང་ལྷན་ཅིག་ཏུ་བཏགས་པ་དང༌། དེ་བཞིན་དུ་སྨན་འཚོ་བྱེད་ལ་སོགས་པ་དག་འོ་མ་དང་བཏགས་ཤིང་སྦྱར་བའི་སྣུམ་གྱི་ཁུ་བ་རྣམས་མིག་ཏུ་བླུགས་པའི་སྨན་ཁུའི་ཐིགས་པའི་དོན་དུ་བརྟག་པར་བྱའོ། །རི་དགས་བྱ་ཡི་མཆེར་པ་ཤ །མུ་ཏིག་ལྕགས་ཟངས་རྒྱམ་ཚ་དུང༌། །རྒྱ་མཚོའི་ལྦུ་བ་ལིག་བུ་མིག །བ་བླ་ཞོ་ག་ཆུར་སྦྱར་བྱ། །ཞེས་བྱ་བ་ལ། རི་དགས་ནི་ཤ་བཀྲ་ལ་སོགས་པའོ། །བྱ་ནི་ལ་བ་ལ་སོགས་པ་སྟེ། དེ་རྣམས་ཀྱི་མཆེར་པ་དང༌། ཤ་རློན་པ་དང༌། དེ་བཞིན་དུ་མུ་ཏིག་དང༌། ལྕགས་ཀྱི་ཕྱེ་མ་དང༌། ཟངས་ཀྱི་ཕྱེ་མ་དང༌། རྒྱམ་ཚ་དང༌། ལྕེ་མྱང་ཚ་དང༌། དུང་
དང། ལིག་བུ་མིག་སྟེ། སོ་ཏན་ཛ་ན་དང༌། རྒྱ་མཚོའི་ལྦུ་བ་དང༌། བ་བླ་སྟེ། འདི་རྣམས་ཞོ་ག་ཆུ་དང་བཏགས་ལ་བླུགས་པའི་མིག་སྨན་ཕྱི་ཞིང་བསལ་བའི་དོན་དུ་བརྟག་པར་བྱའོ། །རི་དགས་བྱ་ཡི་མཆེར་པ་རྐང༌། །ལྟོ་ཚིལ་རྒྱུ་མ་སྙིང་དང་ཤ །མངར་བག་མར་བཅས་ནུ་ཞོར་སྦྱར། །བཏགས་པ་གསལ་བར་བྱེད་པ་ཡིན། །ཞེས་བྱ་བ་ལ། རི་དགས་དང་བྱ་ནི་སྔར་བཤད་པར་ཟད་དེ། དེ་རྣམས་ཀྱི་མཆེར་པ་ལ་སོགས་པ་དང༌། དེ་བཞིན་དུ་སྨན་མངར་བག་འཚོ་བྱེད་ལ་སོགས་པ་དང་བཅས་པ་རྣམས་ནུ་ཞོ་ཞེས་བྱ་བ་བུད་མེད་ཀྱི་ནུ་ཞོ་དང་སྦྱར་ཞིང་བཏགས་པའི་སྨན་གྱི་ཕུར་མ་བཙོས་པའི་ཁུ་བ་ནི་མིག་གསལ་བར་བྱེད་པ་ཞེས་བྱ་བའི་དོན་ནོ། །ཤ་དང་སྨན་གྱི་ལྡེ་གུ་ནི། །གོང་བུ་སྲང་གཅིག་སོ་སོར་བྱས། །ཨེ་རཎ་ནྱ་གྲོ་དྷ་པདྨའི། །ལོ་མ་སྣུམ་པོས་རིམ་བཞིན་དུ། །དཀྲིས་ལ་འཇིམ་པས་བྱུགས་ནས་ནི། །ད་བ་དགོན་པའི་ལྕི་བའི་མེ། །འབར་བར་ཡོངས་སུ་བསྲེག་པར་བྱ། །ཚོས་ནས་དེ་ཡི་ཁུ་བ་བཙིར། །མིག་ཏུ་བརྟ་བའི་སྨན་ལྟར་བླུགས། །ཞེས་བྱ་བ་ལ། སྔར་བཤད་པའི་ཤ་དང༌། སྨན་གྱིས་སོ་སོར་སྲང་རེ་རེ་ཙམ་ཞིག་བྱས་ལ། སྨན་དང་ཤའི་ལྡེ་གུའི་གོང་བུ་གཅིག་ཏུ་བསྲེས་ཤིང་བསྡུས་པའི་གོང་བུ་ཨེ་རཎྜ་དང༌། ནྱ་གྲོ་དྷ་དང༌། པདྨའི་ལོ་མས་དཀྲིས་པར་བྱས་ཏེ། དེ་ཡང་སྣུམ་གྱིས་སྣུམ་བཙོས་པའི་ཨེ་རཎྜའི་ལོ་མས་དཀྲི་བར་བྱའོ། །དེ་བཞིན་དུ་ཕྱི་ཞིང་བསལ་བའི་སྨན་གྱི་ཕུར་མ་བཙོ་བ་ནི། ནྱ་གྲོ་དྷའི་འདབ་མས་དཀྲི་བར་བྱའོ། །དེ་བཞིན་དུ་གསལ་བར་བྱེད་པའི་སྨན་གྱི་ཕུར་མ་ནི་པདྨའི་ལོ་མས་དཀྲི་བར་བྱའོ། །དེ་ལྟར་དཀྲིས་པའི་འོག་ཏུ་འཇིམ་པས་བྱུགས་ཏེ། ཤིང་ད་བ་དང༌། དགོན་པའི་ལྕི་བའི་མེ་གང་རྙེད་པ་སྦར་བས་ཇི་སྲིད་དུ་མེ་མདོག་ལྟར་སྣང་གི་བར་དུ་བཙོས་ལ། དེ་ལྟར་ཚོས་པར་ཤེས་ནས་ཁུ་བ་དེ་བཙིར་ཏེ། མིག་ཏུ་བརྟ་བའི་སྨན་གྱི་ཁུ་བ་བླུགས་པར་བྱ་སྟེ། ཇི་ལྟར་མིག་བརྟ་བའི་སྨན་མིག་ཏུ་ལྡུགས་པ་ན། ནས་དང་མོན་སྲན་གྲེའུའི་རྗེན་ཟན་གྱིས་བསྐོར་ནས་ལྡུགས་པ་དེ་བཞིན་དུ་སྨན་གྱི་ཕུར་མ་བཙོས་ཤིང་བསྲེགས་པའི་ཁུ་བ་བླུགས་
ནས་མིག་དལ་བུས་བསྐྱོད་པར་བྱའོ། །ཕྱི་དང་སྣུམ་དང་བསལ་བ་ལ། །བརྒྱ་ཕྲག་གཅིག་གཉིས་གསུམ་ཅར་གཞག །དང་པོ་དྲོ་འཇམ་ཕྱི་བསིལ་བླུགས། །དེ་གཉིས་རྗེས་ལ་དུད་པ་བརྔུབ། །དེས་ནི་སྦྱར་བ་བརྟ་དང་མཚུངས། ཞེས་བྱ་བ་ལ། ཕྱི་བའི་སྨན་གྱི་ཐིགས་པ་མིག་ཏུ་བླུགས་པ་ན། ཚད་ཀྱི་གྲངས་བརྒྱའི་བར་དུ་གཞག་པར་བྱའོ། །སྣུམ་གྱི་ཕུར་མ་བཙོས་པ་ལ་ནི། ཉིས་བརྒྱའི་བར་དུ་གཞག་པར་བྱའོ། །བསལ་བར་བྱ་བའི་སྨན་བཙོས་པའི་ཐིགས་པ་བླུགས་པ་ནི་གསུམ་བརྒྱའི་བར་དུ་གཞག་པར་བྱའོ། །དང་པོ་ཞེས་བྱ་བ་སྔར་བསྟན་པའི་ཕྱི་བ་དང༌། སྣུམ་པར་བྱ་བ་གཉིས་ལ་ནི་དྲོ་འཇམ་ཞེས་བྱ་བ། ཅུང་ཟད་ཙམ་དྲོ་བ་མིག་ཏུ་བླུགས་པར་བྱ་སྟེ། ཕྱི་མ་སྟེ་ཐ་མ་བསལ་བར་བྱ་བའི་སྨན་གྱི་ཐིགས་པ་བསིལ་ཞིང་གྲང་བ་བླུགས་པར་བྱའོ། །དེ་གཉིས་ཞེས་བྱ་བ་ཕྱི་བ་དང་སྣུམ་པར་བྱ་བའི་མིག་སྨན་བཏང་བའི་རྫས་དེ་མཐར་དུད་པ་བརྔུབ་པར་བྱའི་གསུམ་པ་གསལ་བར་བྱེད་པའི་སྨན་བླུགས་པ་ལ་ནི་མ་ཡིན་ནོ། །ཡང་སྨན་གྱི་ཕུར་མ་བཙོས་པའི་ཐིགས་པ་མིག་ཏུ་བླུགས་པ་གསུམ་པོའི་སྐབས་དེར་སྦྱོར་བ་སྟེ། ལེགས་པ་དང་མ་ལེགས་པ་དང་དྲགས་པའི་སྦྱོར་བ་གསུམ་ནི་བརྟ་བའི་སྦྱོར་བ་བཤད་པ་དང་འདྲ་ཞིང་མཚུངས་སོ། །ཞེས་བྱ་བའི་དོན་དེ་གསལ་བར་མཐོང་བ་ནས་བད་ཀན་གྱི་ནད་དུ་གྱུར་བའི་བར་དུ་གོང་མ་བཞིན་དུ་ཤེས་པར་བྱའོ། །བརྟ་དང་ཕུར་བཙོས་ཐིགས་པ་བླུགས། །སྣ་སྨན་མི་བྱ་ལ་མི་གཏང༌། ཞེས་བྱ་བ་ལ། བརྟ་བ་དང་སྨན་གྱི་ཐིགས་པ་གཉིས་ཀ་ཡང་སྣ་སྨན་གཏང་དུ་མི་རུང་བའི་སྐྱེས་བུ་ལ་གཏང་བར་མི་བྱའོ། །ཇི་སྲིད་དུས་ནི་སྨན་གཏང་བ། །དེ་ཡི་གཉིས་འགྱུར་འཕྲོད་པ་བཟའ། །ཞེས་བྱ་བ་ལ། བརྟ་བ་དང་མིག་སྨན་གྱི་ཐིགས་པ་བླུགས་པ་འདི་གཉིས་ཀ་དུས་ཇི་ལྟར་ཏེ། ཉིན་ཞག་གི་གྲངས་སུ་སྨན་བཏང་བའི་ཉིན་ཞག་དེ་ཉིས་འགྱུར་གྱི་དུས་ཀྱི་བར་དུ་འཕྲོད་པ་བཟའ་ཞིང༌། ཕན་པའི་ཟས་དང་སྤྱོད་ལམ་བསྟེན་པར་བྱའོ། །མེ་ཏོག་ཛཱ་ཏི་མ་ལི་ཀས། །མིག་བཅིངས་མཚན་མོ་གནས་པར་བྱའོ། །ཞེས་བྱ་བ་ལ། མེ་
ཏོག་ཛཱ་ཏི་ནི་སོ་མ་ནའོ། །མ་ལི་ཀ་ནི་མེ་ཏོག་བརྩེགས་མ་ཅན་ཏེ། མེ་ཏོག་དེས་སྐྱེས་བུའི་མིག་བཅིངས་ཏེ་མཚན་མོ་གནས་པར་བྱའོ། །སྣ་སྨན་མིག་སྨན་བརྟ་བ་ལ་སོགས་པས། །མིག་མཐུ་སྐྱེད་ཕྱིར་ཀུན་ཏུ་འབད་པར་བྱ། །མཐོང་བ་ཉམས་ན་འགྲོ་བ་སྣ་ཚོགས་པའང༌། །མུན་པའི་རང་བཞིན་ཚུལ་གཅིག་ཉིད་དུ་འགྱུར། །ཞེས་བྱ་བ་ལ། ཀུན་ཏུའམ། རྣམ་པ་ཐམས་ཅད་དུ་མིག་གི་མཐུ་སྐྱེད་ཅིང་མིག་བསྲུང་བར་བྱ་བའི་ཕྱིར། འབད་ཅིང་བརྩོན་པར་བྱའོ། །གང་གིས་ཤེ་ན་སྣ་སྨན་ལ་སོགས་པ་སྟེ། སྨན་སྣ་ནས་གཏང་བ་དང༌། མིག་སྨན་བསྐུ་བ་དང༌། བརྟ་བ་དང༌། སྨན་གྱི་ཕུར་མ་བསྲེགས་པའི་ཁུ་བ་མིག་ཏུ་བླུགས་པ་ལ་སོགས་པས་མཐུ་བསྐྱེད་པར་བྱའོ། །ཅིའི་ཕྱིར་ཞེ་ན། འདི་ལྟར་མཐོང་བ་ཉམས་ཤིང་གསལ་བར་ལྟ་བ་དང་བྲལ་ན། འགྲོ་བ་སྣ་ཚོགས་པ་ཚུལ་ཐ་དད་པ་འདི་དག་ཀྱང་མུན་པའི་རང་བཞིན་དུ་གྱུར་པས་ཚུལ་གཅིག་པ་ཉིད་དུ་འགྱུར་བ་སྟེ། མུན་ནག་གི་རང་བཞིན་དུ་ཐ་དད་ཅིང་རབ་རིབ་ཀྱི་མུན་པས་ཁེབས་པས་སྣང་བའི་ཚུལ་དང་བྲལ་ཞིང་བྱེ་བྲག་ཏུ་ཤེས་པ་མེད་པར་འགྱུར་རོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ། ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལེའུ་ཉི་ཤུ་རྩ་བཞི་བའི་རྣམ་པར་འགྲེལ་པའོ།། །།དེ་ནས་ཆ་སྤྱད་ཀྱི་ཆོ་གའི་ལེའུ་བཤད་པར་བྱའོ། །ཞེས་བྱ་བ་ལ། འདི་བརྩམས་པའི་དགོས་པ་ནི་འདི་ཡིན་ཏེ། སྨན་མས་གཏོང་བ་ནས། མིག་སྨན་གྱི་བར་གྱི་རང་རང་གི་ཆ་སྤྱད་གང་དག་ཡིན་པ་བཤད་ནས། དེའི་འོག་ཏུ་ཟུག་རྔུ་དབྱུང་བ་ལ་སོགས་པའི་ཆ་སྤྱད་སྣ་ཚོགས་པ་གང་དག་དགོས་པ་དེ་བསྟན་པར་བྱ་བའི་ཕྱིར། དེའི་འོག་ཏུ་འདི་བརྩམས་པ་ཡིན་ལ། དེའི་ཆོ་ག་གང་དག་ཡིན་པ་བསྟན་པ་སྨན་པ་ནི། ཟུག་རྔུ་རྣམ་པ་སྣ་ཚོགས་དང༌། །ལུས་ནི་སྣ་ཚོགས་གནོད་བྱེད་པ། །འབྱིན་པའི་ཐབས་སུ་གང་གྱུར་པ། །སྤྱད་ཡིན་དེ་བཞིན་གཞང་འབྲུམ་དང༌། །མཚན་བར་རྡོལ་སོགས་ལྟ་བ་དང༌། །
གཙགས་བུ་ཐལ་སྨན་མེ་བཏབ་པའི། །ཡན་ལག་ལྷག་མ་བསྲུང་ཕྱིར་དང༌། །མས་གཏོང་ལ་སོགས་སྤྱད་མ་གཏོགས། །བུམ་བུ་ཀུ་བར་དང་ནི། །འཛམ་བུའི་མཆུ་ལ་སོགས་སྤྱད་ཡིན། །ཞེས་བྱ་བ་ལ། སྐྱེས་བུའི་ལུས་ལ་གནོད་པར་བྱེད་པའི་ཟུག་རྔུ་ནི། མཚོན་གྱི་དུམ་བུ་ནང་དུ་ལུས་པ་རྣམ་པ་སྣ་ཚོགས་ཤིང་དབྱིབས་དང་ལས་དུ་མར་གྱུར་པ་དང༌། དེ་བཞིན་དུ་ལུས་ཀྱི་ཕྱོགས་རྣམ་པ་སྣ་ཚོགས་པ་རྣམས་སུ་གནོད་པར་བྱེད་ཅིང་ཁོང་དུ་ཟུག་པས་ལུས་ཀྱི་ཕྱོགས་དུ་མ་དང༌། ནད་རྣམ་པ་སྣ་ཚོགས་སྐྱེས་པས་གནོད་པར་བྱེད་ཅིང༌། ཉེ་བར་འཇོམས་པར་བྱེད་པ་རྣམས་འཛིན་ཅིང་ལུས་ཀྱི་ཕྱོགས་ཀྱི་ནང་ན་གནས་པ་རྣམས་འདྲེན་པར་བྱེད་པའི་ཐབས་སུ་གྱུར་བ་གང་ཡིན་པ་དེ་ལ་ནི་ཆ་སྤྱད་ཅེས་བྱ་ལ། དེ་འབའ་ཞིག་ཏུ་མ་ཟད་ཀྱི་གཞང་འབྲུམ་དང༌། མཚན་པར་རྡོལ་བ་ལ་སོགས་པའི་ནད་ཚོལ་ཞིང་རྟོགས་པར་བྱེད་པ་དང༌། མཚོན་དུ་དེ་བཞིན་དུ་གཙགས་པུ་དང༌། ཐལ་སྨན་རྣོན་པོ་དང༌། མེ་བཙའ་གདབ་པར་བྱ་བའི་ནད་དེ་གཞང་འབྲུམ་དང་མཚན་པར་རྡོལ་བའི་ནད་ཀྱིས་ཉེན་པ་བལྟ་བའི་སྤྱད་དང༌། གཙགས་བུ་དང་ཐལ་སྨན་རྣོན་པོ་དང་མེ་གདབ་པར་བྱ་བའི་རིགས་པར་གཏོགས་པ་ཡན་ལག་ལྷག་མ་ནད་ཀྱི་གནོད་པས་ཉེན་པ་དེ་བསྲུང་ཞིང་བསྐྱང་བར་བྱ་བའི་ཕྱིར་དང༌། དེ་བཞིན་དུ་མས་གཏོང་བ་ལ་སོགས་པའི་ལས་རྣམས་ཀྱི་སྤྱད་མ་གཏོགས་པ་གནས་སྐབས་གཞན་དག་ཏུ་དགོས་པའི་ཆ་སྤྱད་བུམ་བུ་དང་ཀུ་བ་དང༌། རྔབས་རྭ་དང༌། འཛམ་བུའི་མཆུ་འདྲ་བ་ལ་སོགས་པའི་ཆ་སྤྱད་ཀྱི་དངོས་པོ་ཐམས་ཅད་ནི་ཆ་སྤྱད་ཅེས་བྱ་བ་ཡིན་ནོ། །འཛམ་བུའི་མཆུ་ནི་ཐལ་སྨན་འཇུ་བར་བྱེད་པའོ། །སྤྱད་དེ་དག་ནི་འཛིན་ཅིང་སྡུད་པས་ཟུག་རྔུ་ལ་སོགས་པ་གང་གིས་འབྱིན་པར་བྱེད་པ་དེ་ལ་ཆ་སྤྱད་ཅེས་བྱའོ། །གང་ཕྱིར་ཆ་སྤྱད་ཆོ་ག་བཞིན། །སྣ་ཚོགས་ཚུལ་དུ་བརྡུང་བྱ་བ། །བློ་ཡིས་རྣམ་དཔྱད་བྱ་བ་ནི། །རགས་རིམ་ཙམ་ཞིག་བསྟན་པ་ཡིན། །ཞེས་བྱ་བ་ལ། གང་གི་ཕྱིར་ཟུག་རྔུ་འབྱིན་པ་ལ་སོགས་པའི་ཆ་སྤྱད། ལུས་ཀྱི་ཆོ་ག་གང་ཇི་ལྟར་
དགོས་པ་བཞིན་དུ་སྣ་ཚོགས་པའི་ཚུལ་དབྱིབས་དུ་མར་ན་བ་དང༌། མིའི་ལུས་ལ་ཕན་པར་བྱེད་ནུས་པའི་ཚུལ་སྣ་ཚོགས་པར་བརྡུང་བར་བྱས་ལ། དེ་ཡང་ལུས་ཀྱི་ཚུལ་ལས་བློས་རྣམ་པར་དཔྱད་ལ་བརྟགས་ནས་ཅི་རིགས་པར་བརྡུང་བར་བྱ་བ་ཡིན་ལ། དེ་དག་ལས་ཁོ་བོས་ནི་རགས་རིམ་ཙམ་ཞིག་སྟེ། མདོ་ཙམ་ཞིག་བསྟན་པ་ཡིན་གྱི། དེ་དག་ནི་གྲངས་འདི་ཙམ་ཞིག་བྱའོ་ཞེས་ཚད་ངེས་པར་བསྟན་པ་མ་ཡིན་ནོ། །སེང་གེ་ཀང་ཀ་དོམ་བྱ་རོག །རི་དགས་བྱ་སོགས་པ་འདྲ་བའི། །མཆུ་ཅན་ཆ་སྤྱད་བྱས་ནས་ནི། དེ་ཡི་མིང་ཡང་གདགས་པར་བྱ། །ཕལ་ཆེར་ལྕགས་ཀྱི་རྒྱུ་ལས་ནི། །སྲིད་དུ་སོར་ནི་བཅོ་བརྒྱད་བྱ། །སྐམ་པ་སྦྲེལ་བའི་མཚམས་སུ་ནི། །སྲན་ཆུང་ལྟ་བུའི་གཟེར་བཏབ་པ། །རྩ་བ་ལྕགས་ཀྱུ་ལྟར་བཀུག་པའི། །ཆ་བྱད་བདེ་ལེགས་ཡིན་ཞེས་བྱ། །རྩེ་མོ་གཡུང་དྲུང་ལྟ་བུའོ། །ཞེས་བྱ་བ་ལ། སེང་གེ་དང་དོམ་ལ་སོགས་པ་རི་དགས་དང་བྱ་རྣམས་ཀྱི་མཆུ་དང་འདྲ་ཞིང་མཚུངས་པའི་ཆ་བྱད་བྱས་ལ་ཆ་སྤྱད་དེ་དག་ཀྱང་དེའི་མིང་གདགས་པར་བྱ་སྟེ། གང་གི་མཆུ་དང་གང་འདྲ་བ་དེ་ལ་དེའི་མིང་གདགས་པར་བྱ་སྟེ། དཔེར་ན་ཀང་གའི་མཆུ་དང༌། བྱ་རོག་གི་མཆུ་ལྟ་བུ་ཞེས་བྱ་བ་ལ་སོགས་པའོ། །དེ་དག་ཀྱང་ཕལ་ཆེར་རམ་མང་ལྕགས་ཀྱི་རྒྱུ་ལས་བྱ་ལ། ཚད་ནི་ཕལ་ཆེར་སོར་བཅོ་བརྒྱད་པར་བྱའོ། །སྐམ་པ་དེ་དག་གི་སྦྲེལ་བའི་མཚམས་ཁའི་འོག་ཏུ་སྲན་ཆུང་ལྟ་བུ་སྟེ། རྩེ་མོ་སྲན་ཆུང་ལྟར་ཟླུམ་པོའི་གཟེར་བུ་ལེགས་པར་བཏབ་ལ། དེ་བཞིན་དུ་རྩ་བ་དེ་ལག་པས་གཟུང་བའི་ཕྱོགས་སུ་ལྕགས་ཀྱུ་ལྟ་བུར་བཀུག་ཅིང་འཁྱོག་པར་བྱ་བའི་ཆ་སྤྱད་དེ་ནི་མིང་བདེ་ལེགས་ཞེས་བྱ་བ་ཡིན་ཏེ། རྩེ་མོ་གཡུང་དྲུང་ལྟ་བུ་བྱའོ། །དེ་ནི་བརྟན་པོར་རུས་ཟུག་པའི། །ཟུག་རྔུ་འབྱིན་ལ་སྦྱར་བར་བྱ། །ཞེས་བྱ་བ་ལ། བདེ་ལེགས་ཞེས་བྱ་བའི་ཆ་སྤྱད་བརྟན་ཞིང་མི་འཇིགས་པས་རུས་པར་ཟུག་རྔུ་གང་ཡིན་པ་དེ་འབྱིན་ཅིང་དབྱུང་བ་ལ་སྦྱར་བར་བྱའོ། །གཟེར་བཏབ་རྩེ་མོ་གྱེས་པ་དང༌། །སྐམ་པ་ཡིན་ཏེ་སོར་བཅུ་དྲུག །དེ་ནི་པགས་པ་རྩ་རྒྱུས་ཤར། །ཞེན་པའི་ཟུག་རྔུ་འབྱིན་ལ་སྦྱར། །ཞེས་བྱ་བ་ལ།
སྐམ་པ་ནི་གཉིས་བྱ་སྟེ། དེ་ལས་གཅིག་ནི་རྩེ་མོའི་ཕྱོགས་སུ་གཟེར་བུ་བཏབ་ཅིང་བསྡམ་པ་དང་བཅས་པའོ། །གཉིས་པ་ནི་རྩེ་མོ་གྱེས་ཤིང་རྩེ་མོ་གཟེར་བུས་མ་བཏབ་ལ། ཁམ་བསྡམས་པའོ། །སྐམ་པ་དེ་གཉི་ག་ཡང་སྲིད་སོར་བཅུ་དྲུག་བྱའོ། །དེ་གཉིས་ནི་པགས་པ་ལ་སོགས་པར་ནུབ་ཅིང་ཞེན་པའི་ཟུག་རྔུ་དེ་དབྱུང་ཞིང་འདྲེན་པ་ལ་སྦྱར་ཞིང་གཏང་བར་བསྟན་ནོ། །སྐམ་པ་སོར་དྲུག་ཟུག་རྔུ་ཕྲ། །རྫི་མ་མ་རུང་འབྱིན་ལ་སྦྱར། །ཞེས་བྱ་བ་ལ། སྐམ་བ་དེ་ལས་གཞན་པ་སྲིད་སོར་དྲུག་ཡོད་པ་ཁ་གྱེས་པ་ཉིད་དུ་བྱ་ལ། དེས་ན་ཟུག་རྔུ་ཕྲ་བ་སྟེ། མིག་གི་རྨ་ལ་སོགས་པར་གཏོགས་པ་དང༌། དེ་བཞིན་དུ་རྫི་མ་མ་རུང་བ་སྟེ། མིག་གི་རྨའི་ནང་དུ་ཞུགས་པ་འབྱིན་པ་ལ་སྦྱར་རོ། །སོ་ཕྲ་དྲང་ཞིང་རྩ་བ་ནི། །གདུ་བུས་བརྒྱན་པ་མུ་ཙ་ཏི། །དེས་རྨ་གཏིང་དུ་ཟུག་རྔུ་པ་དང༌། །མིག་མཛེར་གཏིང་དུ་ལུས་ལ་སྦྱར། །ཞེས་བྱ་བ་ལ། ཆ་སྤྱད་གང་སོ་ཕྲ་མོ་བཏོད་པ་བྱས་པ་དེ་ཡང་དྲང་ཞིང་རྩེ་མོ་གཉིས་དྲང་པོར་བྱའོ། །དེའི་ཚད་མ་སྨོས་པས་འདས་མ་ཐག་པའི་སོར་དྲུག་ཉིད་ཡིན་པར་ཤེས་པར་བྱའོ། །དེའི་རྩ་བ་ནི་ལག་པས་གཟུང་བའི་ཕྱོགས་དེར་གདུ་བུས་བརྒྱན་པ་ཞེས་བྱ་བ་དམ་དུ་བསྡམ་པའི་ཕྱིར་ལྕགས་ཀྱི་ཁྱུད་མོས་གདུ་བུ་ལྟ་བུར་བརྒྱན་པ་ཞེས་བྱའོ། །དེའི་མིང་ནི་མུ་ཙ་ཏི་ཞེས་བྱ་ལ། དེས་རྨ་གཏིང་དུ་ཟུག་པ་དང་དེ་བཞིན་དུ་མིག་མཛེར་གཏིང་དུ་ལུས་ཏེ་གདོན་པ་ལ་སྦྱར་བར་བྱའོ། །བཞི་པོ་དེ་དག་ནི་ཆ་སྤྱད་སྐམ་པ་ཞེས་བྱ་བ་ཡིན་ནོ། །ཉ་མགོ་འདྲ་བ་སོར་བཅུ་གཉིས། །ཆ་སྤྱད་གཉིས་པ་གཅིག་པ་བྱ། །ཉ་མགོ་ལྟ་བུ་ཞེས་བཤད་དེ། །རྣ་ཁུང་ཟུག་རྔུ་འབྱིན་ལ་སྦྱར། །ཞེས་བྱ་བ་ལ། དྲང་སྲོང་གི་ཆ་སྤྱད་ཉ་མགོ་ལྟ་བུ་ནི་གཉིས་ཡོད་པར་བཤད་དེ། དེ་གཉི་ག་ཡང་ཉ་མགོ་དང་འདྲ་ཞིང་སོར་བཅུ་གཉིས་པ་ཡིན་ལ། དེ་ཡང་ཉ་མགོའི་ལྐོག་མ་འདྲ་བས་ན། ཉ་མགོའི་མགུལ་བ་ལྟ་བུ་ཞེས་བྱ་བའི་དོན་ནོ། །དེ་ལ་ཉ་མགོ་གཉིས་འདྲ་བ་ཡོད་པ་དང༌། གཅིག་འདྲ་བ་ཡོད་པ་སྟེ། དེས་ན་གཅིག་ནི་རྟའི་མགུལ་པ་ལྟ་བུ་གཉིས་དང་ལྡན་པའོ། །གཉིས་པ་ནི་ཉའི་མགུལ་པ་ལྟ་བུ་གཅིག་དང་ལྡན་པའོ། །དེ་གཉི་གས་
ཀྱང་རྣ་ཁུང་ན་གནས་པའི་ཟུག་རྔུ་འབྱིན་པའི་ལས་ལ་སྦྱར་བར་བྱ་སྟེ། དེ་ན་གནས་པའི་ཟུག་རྔུ་དེ་གཉིས་ཀྱིས་དབྱུང་བར་བྱའོ། །ཆ་སྤྱད་སྦུ་གུ་ཅན་སྨྲས་པ་ནི། ཆ་སྤྱད་སྦུ་གུ་ཅན་ཁོང་སྟོང༌། །རྩེ་མོ་གཅིག་གམ་མང་པོ་བྱ། །དེས་ནི་བུ་གའི་ཟུག་རྔུ་དང༌། །ནད་ཡོད་བལྟ་དང་དབྱུང་བ་དང༌། །བྱ་བ་བླ་བ་བྱ་ཕྱིར་དང༌། །དགང་བར་བྱ་བའི་དོན་དུ་བྱ། །དེ་ཡི་ཞེང་དང་སྦོམ་སྲིད་ཚད། །བུ་གུའི་ཚད་ལས་དཔག་པར་བྱ། །ཞེས་བྱ་བ་ལ། ཆ་སྤྱད་སྦུ་གུ་ཅན་ནི་ནང་ཁོང་སྟོང་དུ་བྱས་ལ་རྩེ་མོ་ཁ་གཅིག་པ་འམ། ཁ་མང་པོ་པ་དགོས་པ་དུ་མའི་དབང་ལས་བྱས་ལ། དེས་ནི་གྲེ་བ་ལ་སོགས་པ་བུ་ག་ན་གནས་པའི་ཟུག་རྔུ་རྣམས་དང༌། དེ་ན་གནས་པའི་ནད་ཡོད་པ་དག་བལྟ་བར་བྱ་བའི་ཕྱིར་དང༌། དེ་བཞིན་དུ་བྱ་བ་སྟེ། ཟུག་རྔུ་དབྱུང་བ་དང་གཙགས་བུ་གདབ་པ་དང༌། ཐལ་སྨན་དང་མེ་བཙའ་གདབ་པ་ལ་སོགས་པའི་ལས་ཀྱི་བྱ་བ་བླ་བར་བྱ་བའི་ཕྱིར་དང༌། དེ་བཞིན་དུ་དགང་བར་བྱ་བའི་ཕྱིར་བྱ་སྟེ། དེའི་ཞེང་སྟེ་སྦོམ་དང༌། སྲིད་དེ་དཔངས་ཀྱི་ཚད་ནི་བུ་གའི་ཚད་ལས། ཞེས་བྱ་བ་ལ། གང་གི་བུ་ག་གང་དུ་བཏོད་པ་དེའི་ཚད་ལས་དཔགས་ནས་ཅི་རིགས་པར་བྱའོ། དེ་ཡང་ཞེས་བྱ་བ་ལ། ལོགས་གཅིག་ནས་གཅིག་ཏུ་ཕྱིན་པའི་ཚད་ལ་བྱ་ལ། སྦོམ་ནི་འཁྱུད་པའི་ཚད་ཡོངས་སུ་ཆད་པ་ལ་བྱའོ། །སྲིད་ནི་དཔངས་ཏེ། སྔར་བཤད་པའི་ཆ་སྤྱད་ལས་རིང་བར་བྱའོ། །སྲིད་དུ་སོར་བཅུ་སྦོམ་སོར་ལྔ། །གྲེ་བའི་ཟུག་རྔུ་རྟོག་བྱེད་ཡིན། །རྩེ་མོ་ལྔ་པ་བུ་ག་ཅན། །རྩེ་མོ་བཞི་ལ་སྤྱི་མདུད་བྱ། །ཆ་སྤྱད་ཐུར་མ་གཉིས་པ་ནི། །བུ་ག་གསུམ་པ་དེའི་ཚད་བྱ། །ཆ་སྤྱད་བྱ་བ་རང་གི་དབྱིབས། །སྦོམ་དང་མཆུ་ཡི་ཚད་མཉམ་པའི། །སྦུ་གུ་དེ་འདྲ་གཞན་དག་ཀྱང༌། །ཆ་སྤྱད་ཤེས་པར་བྱེད་དུ་གཞུག །ཅེས་བྱ་བ་ལ། ཆ་སྤྱད་སྦུ་གུ་ཅན་བྱའོ། །ཞེས་བྱ་བར་སྦྱར་རོ། །དེའི་ཚད་དང་སྲིད་དུ་སོར་བཅུ་བྱ་ལ། དེ་ཉིད་ཀྱིས་ན་དེའི་སྦོམ་གྱི་ཚད་སོར་ལྔ་པར་བྱའོ། །འདིས་རྟོག་ཅིང་བལྟ་བར་བྱེད་པ་ཡིན་པས་ན་རྟོག་པར་བྱེད་པ་སྟེ། གྲེ་བའི་ནང་དུ་ཟུག་རྔུ་བལྟ་བར་བྱ་བའི་དོན་དུ་བྱའོ། །ཡང་ན་སྦུ་གུ་གཞན་
རྩེ་མོ་ལྔ་པའི་སྦུ་གུ་ལ་ཡང་དེ་ལྟ་བུ་ནི་རྩེ་མོ་བཞི་པའི་སྤྱིར་བསྡུ་བར་བྱ་སྟེ། མདའ་ལ་སོགས་པ་ནང་དུ་ཞུགས་པ་བརྟག་པའི་ཕྱིར་ཐུར་མ་རྩེ་མོ་ཅན་བཏོད་པ་ནི་ཐུར་མ་ཞེས་བྱའོ། །དེ་བཞིན་དུ་ཆ་སྤྱད་ཐུར་མ་རྩེ་མོ་གཉིས་པ་ནི་སྦུ་གུ་ཅན་བུ་ག་གསུམ་པ་ཅན་བྱ་སྟེ། དེ་ཡང་སྔ་མའི་ཚད་དུ་བྱའོ། །ཆ་སྤྱད་པ་རང་གི་དེའི་དབྱིབས་དང་སྦོམ་པ་དང་མཆུའི་ཚད་དང་མཉམ་པའི་སྦུ་གུ་བྱ་ལ། ཡང་སྦུ་གུ་དེ་དང་འདྲ་བ་ན། སྟོང་པ་རྩེ་མོ་གཉིས་པ་དང༌། རྩེ་མོ་མང་པོ་ཡོད་པ་གཞན་དག་ཀྱང་ཟུག་རྔུ་བལྟ་ཞིང་བརྟག་པར་བྱ་བའི་ཕྱིར་ཆ་སྤྱད་ལ་མཁས་པ་གཞན་དག་བྱེད་དུ་གཞུག་གོ །རྩེ་མོ་པདྨའི་སྙིང་པོ་འདྲ། །སྲིད་དུ་སོར་ནི་བཅུ་གཉིས་པ། །བཞི་ཆ་ཁོང་སྟོང་བྱས་སྦུ་གུ། །ཟུག་རྔུ་འབྱིན་པ་ཡིན་པར་བཤད། །ཅེས་བྱ་བ་ལ། ཟུག་རྔུ་འབྱིན་པའི་ཆ་བྱད་མི་འགུལ་བའི་ཟུག་རྔུ་དབྱུང་བར་བྱ་བའི་ཕྱིར། །རྩེ་མོ་མགོ་བོའི་ཕྱོགས་པདྨའི་སྙིང་པོ་ཀར་ནི་ཀའི་དབྱིབས་འདྲ་ཞིང་མཚུངས་པ་ཚད་སྲིད་དུ་སོར་བཅུ་གཉིས་ཡོད་པ་བཞི་ཆ་ཁོང་སྟོང་ཡོད་པ་སྟེ། སོར་གསུམ་གྱི་བར་ཁོང་སྟོང་དུ་བྱས་པ་དེ་ནི་ཟུག་རྔུ་འབྱིན་པ་ཡིན་པར་འདོད་དོ། །གཞང་འབྲུམ་ཆ་སྤྱད་པ་ཡིན། །ནུ་སོར་འདྲ་བ་སོར་བཞི་པ། །སྐྱེས་པའི་སོར་ལྔས་འཁྱུད་པ་སྟེ། །བུད་མེད་སོར་དྲུག་གིས་འཁྱུད་བྱ། །ནད་པ་ལྟ་བ་ལ་བུ་ག་གཉིས། །ལས་ལ་བུག་གཅིག་པ་བྱ། །དབུས་ཀྱི་བུ་ག་སོར་གསུམ་པ། །མཐེ་བོ་ཤོང་བ་ཙམ་དུ་བྱ། །དེ་སྟེང་རྩེ་མོ་ཟླུམ་པོ་ནི། །དངངས་སུ་སོར་ནི་ཕྱེད་པ་བྱ། །ཞེས་བྱ་བ་ལ། གཞང་འབྲུམ་འཚོས་པའི་ཆ་སྤྱད་ནི། བའི་ནུ་སོར་དང་དབྱིབས་འདྲ་བ་བྱས་ལ། སྲིད་སོར་བཞི་ཡོད་པ། སྐྱེས་པ་ལ་སྟོང་པའི་སྦོམ་སོར་ལྔས་འཁྱུད་པ་བྱས་ལ། བུད་མེད་ཀྱི་གཞང་འབྲུམ་གསོ་བའི་ཆ་སྤྱད་ནི་སོར་དྲུག་གིས་འཁྱུད་པའི་སྦོམ་ཡོད་པར་བྱའོ། །ནད་བལྟ་བ་ནི་གཞང་འབྲུམ་གྱི་ནད་རྟོག་པའོ། །བུ་ག་གཉིས་ནི་ངོས་གཉི་ག་ལ་བུ་ག་ཡོད་པར་བྱས་པའོ། །དེ་བཞིན་དུ་གཞང་འབྲུམ་དང་བཅས་པ་དང༌། ཐལ་སྨན་རྣོན་པོ་གཏོང་བའི་ལས་རྣམས་ཀྱི་ཆ་སྤྱད་ནི། སྔ་མ་ལྟ་བུ་ལ་བུ་ག་གཅིག་པར་བྱའོ། །དེ་ལྟ་ན་མངོན་དུ་བལྟ་བའི་
ཕྱིར་ནི་བུ་ག་གཉིས་པས་བྱ། གཙགས་པ་དང༌། ཐལ་སྨན་དང༌། མེ་བཙའ་གདབ་པར་མི་འགྱུར་བར་བྱ་བའི་ཕྱིར་ནི་བུ་ག་གཅིག་པར་བྱའོ། །ཆ་སྤྱད་འདིའི་དབུས་ཀྱི་བུ་ག་ནི་སྲིད་དུ་སོར་གསུམ་པར་བྱའོ། །མཐེ་བོའི་ལྟོ་ཤོང་བ་སྟེ། རྒྱར་མཐེ་བོའི་ལྟོ་དང་ཞེང་མཉམ་པར་བྱའོ། །ཡང་བུ་ག་དེའི་རྩེ་འམ་སྟེང་མ་ནི་དབྱིབས་འདྲ་བ་ལ། དཔངས་སོར་ཕྱེད་ཡོད་པ། སོར་ཚད་དུ་བསྟན་པ་དེའི་སྟེང་དུ་ལྷག་མ་སོར་ཕྱེད་ཡོད་པར་ལྟེ་བར་ཟླུམ་པོ་སོར་ཕྱེད་བྱ་བའི་དོན་ནོ། །ཁར་དཀྲོལ་དེ་འདྲའི་བུ་ག་མེད། །ཆ་སྤྱད་གཞང་འབྲུམ་བཙིར་ལ་སྦྱར། །ཞེས་བྱ་བ་ལ། ཁར་དཀྲོལ་ལྟ་བུ་ཞེས་བྱ་བའི་ཆ་སྤྱད་ནི་བུ་གའི་རྣམ་པ་བཤད་མ་ཐག་པའི་གཞང་འབྲུམ་གྱི་རྣམ་པ་འདྲ་བ་ལ། བུ་ག་མེད་པ་སྟེ། ངོས་གཉིས་སུ་བུ་ག་བཏོད་པ་མེད་པའོ། །དེ་ལྟ་བུའི་ཆ་སྤྱད་ནི་གཞང་འབྲུམ་གྱི་ནད་བཙིར་བའི་དོན་དུ་བྱའོ། །མཆན་པར་རྡོལ་ལ་རྣམ་ཀུན་དུ། །བུ་ག་ཡན་ཆད་བསལ་བར་བྱ། །ཞེས་བྱ་བ་ལ། མཚན་པར་རྡོལ་བའི་ནད་གསོ་བའི་ཆ་སྤྱད་ནི་རྣམ་པ་ཐམས་ཅད་ནས་ཐམས་ཅད་དུ་བུ་ག་ཡན་ཆད་ཀྱི་ལྟེ་བ་དེ་བསལ་ཞིང་མེད་པར་བྱ་སྟེ། ཆ་སྤྱད་འདི་ལས་ནི་དབུས་མའི་ལྟེ་བ་མེད་པར་བྱ་བའི་དོན་ནོ། །སྣ་ཡི་ཤུ་བའི་འབྲུམ་པ་ལ། །བུ་ག་གཅིག་པ་སོར་གཉིས་བྱ། །ཞེང་དུ་མཛུབ་མོའི་ཚད་ཙམ་ལ། །མཚན་པར་རྡོལ་གྱི་སྤྱད་འདར་བྱ། །སོར་མོ་བསྲུང་ཕྱིར་བསོ་འམ། །ཤིང་གིས་ཤུ་བས་ནི་སོར་བཞི་བྱ། །བ་ཡི་ནུ་འདྲ་བུ་ག་གཉིས། །དེ་ཡི་ཁ་ནི་དབྱེ་བར་བྱ། །ཞེས་བྱ་བ་ལ། སྣའི་ནང་གི་འབྲུམ་པ་བསལ་ཞིང་གཅད་པའི་ཆ་སྤྱད་ནི། བུ་ག་གཅིག་པ་བྱ་ལ། དཔངས་སུ་སོར་གཉིས་པ། ཞེང་གི་ཚད་མཛུབ་མོ་ཙམ་ལ་མཚན་མར་རྡོལ་གྱི་ཆ་སྤྱད་དང་འདྲ་བར་དབུས་མའི་ལྟེ་བ་མེད་པར་བྱའོ། །དེ་སྟོང་པར་བྱེད་པ་ན་སྨན་པའི་སོར་མོ་བསྐུམ་ཞིང་གནོད་པ་མེད་པར་བྱ་བའི་ཕྱིར་བ་སོ་ལས་བྱས་པའམ། ཤིང་ལས་བྱས་པའི་ཤུབས་དཔངས་སུ་སོར་བཞི་ཡོད་པ། བུ་ག་གཉིས་པ་ཡོད་པར་བྱས་ལ། ཆ་སྤྱད་དེའི་རྣམ་པ་ནི་བའི་ནུ་མ་འདྲ་བར་བྱའོ། །ཡང་ཆ་སྤྱད་དེའི་ཁ་བྱེ་ཞིང་གྱེས་པར་བྱས་ལ། མཁྲིག་མར་སྲང་
བུས་དམ་དུ་བཅིང་བར་བྱའོ། །མོ་མཚན་རྨ་བརྟག་དབུས་སུ་ནི། །ཁོང་སྟོང་སོར་ནི་བཅུ་དྲུག་པ། །ཕྱོགས་བཞིར་གདུ་བུས་བཅིང་བར་བྱ། །རྩེ་མོ་པདྨ་ཁ་ཟླུམ་འདྲ། །ཐུར་མ་བཞི་ནི་མནན་པ་ཡི། །རྩ་བ་བསྡམས་ན་ཁ་དབྱེ་བྱ། །ཞེས་བྱ་བ་ལ། མོ་མཚན་ནམ་མངལ་དུ་རྨ་བྱུང་བ་བརྟག་ཅིང་བལྟ་བའི་ཆ་སྤྱད་ནི་དབུས་ཁོང་སྟོང་དུ་བྱས་པ་སྲིད་སོར་བཅུ་དྲུག་ཡོད་པར་གདུ་བུ་འདྲ་བའི་ཁྱུད་ཀྱིས་བཅིངས་པའི་ཕྱོགས་བཞིར་ཐུར་མ་བཞི་ཡོད་པར་བྱ་ཞིང༌། སྦྲུལ་པའི་འདྲ་བས་བཅིངས་པ་དང༌། དེ་བཞིན་དུ་པདྨ་ཁ་ཟླུམ་པའམ་མ་ཕྱེ་བ་འདྲ་བའི་རྩེ་མོ་ཡོད་པ་ཐུར་མ་བཞི་ཡོད་པའི་ལག་པས་གཟུང་བའི་ཕྱོགས་སུ་བསྡམས་ཤིང་བཙིར་ན་ཁ་འབྱེ་ཞིང་གྱེས་པར་འགྱུར་བར་བྱའོ། ཆ་སྤྱད་འཇམ་རྩིའི་སྦུ་བས་འདྲ་ལ། །རྩ་བ་མཐེབ་ཤོང་རྩེ་སྲན་ཤོང༌། །རྩེ་མོ་གག་པ་མེད་པ་ལ། །རྩ་བར་པགས་འཇམ་རྐྱལ་བུ་བཅིང༌། །རྨ་ཡི་ཕུ་ག་ནི་འཆས་པ་དང༌། །རྨ་བཀྲུ་བ་ལ་སྦྱར་བར་བྱ། །ཞེས་བྱ་བ་ལ། ཆ་སྤྱད་སྲིད་དུ་སོར་དྲུག་ཡོད་པ་གཉིས་བྱ་སྟེ། བུ་ག་ཅན་གྱི་རྩ་བསྐུ་བའི་ཕྱིར་དང༌། བཀྲུ་བའི་ཕྱིར་དགོས་སོ། །ཇི་ལྟ་བུ་ཞེ་ན། འཇམ་རྩིའི་སྦུ་གུ་འདྲ་བ་སྟེ། འཇམ་རྩིའི་སྦུ་གུ་དང་ཆ་འདྲ་ཞིང་མཚུངས་པ་གང་ཡིན་པ་དེ་ནི། འཇམ་རྩིའི་སྦུ་གུ་འདྲ་བའོ། །དེའི་བུ་ག་ནི་རྩ་བ་མཐེ་བོ་ཤོང་བ་ཙམ་ལ་རྩེ་མོ་སྲན་མ་ཤོང་བ་ཙམ་རྩེ་མོའི་ཆ་ལ་གག་པ་མེད་པ་བྱས་ལ། རྩ་བའི་གནས་སུ་པགས་པ་འཇམ་པོའི་རྐྱལ་བུ་སྣུམ་དང་འཁྲུད་པའི་སྨན་གྱི་སྣོད་ཀྱི་རྐྱལ་བུ་བཅིངས་པ་དེ་ལྟ་བུའི་ཆ་སྤྱད་དག་གིས་རྨའི་ཕུག་འཆས་པ་དང༌། རྨ་བཀྲུ་བ་ལ་སྦྱར་ཞིང་དཔྱད་དུ་བྱའོ། །འོད་མའི་སྦུ་གུའམ་སྒྲོ་རྩ་ནི། །འདྲ་བ་ཁ་གཉིས་དམུ་རྫིང་སྤྱད། །ཅེས་བྱ་བ་ལ། དམུ་རྫིང་གི་ནད་གསོ་བའི་སྦུ་གུ་བ་གཉིས་པ་འོད་མ་ལ་སོགས་པ་ལས་བྱ་བ་འམ། སྒྲོ་རྩ་སྟེ་རྨ་བྱ་ལ་སོགས་པའི་སྒྲོའི་རྩ་བ་ལས་སྦུ་གུ་ཆུ་གཟགས་པའི་དོན་དུ་ཁ་གཉིས་པ་བྱའོ། །དུད་པ་མས་གཏོང་ལ་སོགས་སྤྱད། །རང་རང་གི་ནི་སྐབས་སུ་སྨྲས། །ཞེས་བྱ་བ་ལ། དུད་པ་གཏང་བའི་ཆ་སྤྱད་ནི། །སྨན་གྱི་དུད་པ་སྣ་ནས་བརྔུབ་པའི་སྐབས་སུ་བཤད་པ་ཡིན་ལ། འཇམ་
རྩིའི་ཆ་སྤྱད་ནི་མས་གཏོང་བའི་སྐབས་སུ་བཤད་པ་ཡིན་ནོ། །སྩོགས་པ་ནི་མཚན་མ་ལ་སོགས་པར་བཤད་དེ། ཆ་སྤྱད་དེ་དག་རང་རང་གི་ལེའུ་བཤད་པའི་སྐབས་སུ་སྨྲས་ཟིན་པ་དེ་ལས་ཤེས་པར་བྱའོ། །རྔབས་རྭ་ཁ་ཞེང་སོར་གསུམ་པ། །དཔངས་སུ་སོར་བརྒྱད་པའམ་བཅུ། །རྩེ་མོའི་བུ་ག་ཡུངས་ཀར་ཤོང༌། །ལེགས་བཀབ་ནུ་སོར་དབྱིབས་འདྲ་བྱ། །ཞེས་བྱ་བ་ལ། རྔབས་རྭའི་ཚད་ནི་ཁ་ཞེང་དུ་སོར་གསུམ་པ་སྟེ། སོར་མོ་གསུམ་གཤིབས་པའོ། །དེ་ཡང་ནུ་ཞོའི་ནད་ལ་སོགས་པ་གཞིབ་པའི་ཕྱིར་བྱ་སྟེ། དེའི་དཔངས་ཀྱི་ཚད་ནི་སོར་བརྒྱད་པ་འམ། སོར་བཅུ་པ་བྱས་ལ། རྩེ་མོ་སྟེ་རྭའི་རྩེ་ཕྱོགས་ཀྱི་བུ་ག་ནི་ཡུངས་ཀར་ཤོང་བ་ཙམ་དུ་བྱ་ལ། དེ་བཞིན་དུ་གནས་དེ་ལེགས་པར་གཡོགས་པ་སྟེ། པགས་པ་སྲབ་མོ་ལ་སོགས་པས་ཁ་བཀག་ཅིང་གཡོགས་པའོ། །དེ་བཞིན་དུ་དབྱིབས་ནི་ནུ་སོར་གྱི་ཚུལ་དུ་བྱིན་གྱིས་ཕྲ་བར་བྱའོ། །ཀུ་བ་སྲིད་དུ་སོར་བཅུ་གཉིས། །ཁྱུང་ཁོར་སོར་ནི་བཅོ་བརྒྱད་པ། །ཁ་ཟླུམ་སོར་ནི་གསུམ་མམ་བཞི། །ནང་འབར་བད་ཀན་ཁྲག་འདྲེན་བྱེད། །ཅེས་བྱ་བ་ལ། ཀུ་བ་ནི་སྲིད་དམ་དཔངས་སུ་སོར་བཅུ་གཉིས་ཡོད་པ་ལ། ཁྱུད་འཁོར་གྱི་ཁ་ཞེང་ཟླུམ་པོར་བསྐོར་བ་ནི་སོར་བཅོ་བརྒྱད་ཀྱིས་འཁོར་བར་བྱ་ལ། དེ་བཞིན་དུ་བདེ་ཕྱོགས་ཀྱི་ཁ་ནི་ཟླུམ་པོ་ལ་སོར་གསུམ་མམ་བཞི་བ་བྱ་སྟེ། དེ་ལྟར་ན་ཁ་ཟླུམ་པོ་ལ་སོར་གསུམ་པ་འམ་སོར་བཞི་པ་ཟླུམ་པོ་ཁ་ཕྱོགས་སུ་བྱ་བ་དང༌། དེ་བཞིན་དུ་ནང་ན་འབར་བ་སྟེ། དེའི་ནང་དུ་གྲོ་ག་འམ་འཇག་མ་འམ། རྩ་བལ་བ་ཛ་འམ། རས་བལ་འབར་བ་བཅུག་པ་གླན་པ་བཅུག་པ་ནི་བད་ཀན་འཁྲུགས་པའམ། ཁྲག་ནད་ཅན་འདྲེན་ཅིང་འབྱིན་པར་བྱེད་པ་ཡིན་པས་ན། དེའི་ཕྱིར་བད་ཀན་འདྲེན་བྱེད་ཅེས་བྱའོ། །དེ་བཞིན་བུམ་པ་དེ་འདྲ་བ། །གླན་པས་སྐྲན་ཡང་འཇུ་བར་བྱེད། །ཅེས་བྱ་བ་ལ། བུམ་པས་སྔགས་འདེབས་པ་ཡང་ཀུ་བ་དང་འདྲ་བར་བྱ་བ་སྟེ། སྲིད་སོར་བཅུ་གཉིས་ལ། ཁྱུད་འཁོར་སོར་བརྒྱད་པ་ཁ་ཟླུམ་ཞིང༌། སོར་གསུམ་པ་འམ་སོར་བཞི་ཡོད་པ་ནང་ན་གྲོ་ག་འམ། རྩ་འཇག་གམ་སོག་མའི་མེ་འབར་བ་དང་བཅས་པ་དེ་གླན་པ་ནི། སྐྲན་འཇུ་བར་བྱེད་ཅིང་འབྲི་
བར་བྱེད་པ་ཡིན་ནོ། །ཡང་ཞེས་བྱ་བའི་སྒྲས་ནི་སྔར་བཤད་པའི་ཀུ་བ་དང་འདྲ་བས་བད་ཀན་དང་ཁྲག་འདྲེན་པར་བྱེད་དོ་ཞེས་བྱ་བའི་དོན་ནོ། །ཐུར་མ་ཞེས་བྱའི་ཆ་སྤྱད་ནི། །ལས་དང་དབྱིབས་ནི་སྣ་ཚོགས་པ། །ཅི་རིགས་པ་ཡི་ཚད་ལྡན་བྱ། །ཞེས་བྱ་བ་ལ། ཆ་སྤྱད་ཀྱི་རྣམ་པ་ཐུར་མ་ཞེས་བྱ་བ་ནི་ལས་སྣ་ཚོགས་བྱེད་པ་དང༌། དེ་བཞིན་དུ་དབྱིབས་ཀྱི་ཁྱད་པར་རིང་ཐུང་ལ་སོགས་པ་སྣ་ཚོགས་པར་གནས་པ་ནི་ཅི་རིགས་པའི་ཚད་དང་ལྡན་པར་བྱ་སྟེ། སྦོམ་དང་རིང་ཐུང་གང་དུ་གཏོང་བ་དེ་ཡང་འཚམ་པར་བྱའོ། །དེ་ལ་རྨ་ཚོལ་ལས་ལ་གཉིས། །སྲིན་བུ་གན་དུ་པ་ཏའི་དབྱིབས། །ཞེས་བྱ་བ་ལ། ཐུར་མའི་ཆ་སྤྱད་དེ་རྣམས་ཀྱི་ནང་ནས་ཐུར་མ་གཉིས་པོ་སྲིན་བུ་གན་དུ་པ་ཏའི་དབྱིབས་ལྟར་འདུག་པ་གཉིས་ནི། རྨ་ཚོལ་གྱི་ལས་ལ་སྦྱར་བར་བྱ་སྟེ། རྨ་དང་བུ་གའི་གཏིང་བཙལ་ཞིང་བརྟག་པ་ལ་སྦྱར་རོ། །སྲིན་བུ་གན་དུ་པ་ཏ་ཞེས་བྱ་བ་ནི། ཆར་འབབ་པའི་རྗེས་ཐོགས་ལ་སྲིན་བུ་དམར་པོ་རིང་པོ་ཐུར་མ་ཕྲ་མོ་ལྟ་བུ་ཞིག་འབྱུང་བ་ལ་བྱ་སྟེ། མིང་གི་རྣམ་གྲངས་གཞན་དུ་མི་ཏ་ལ་ཞེས་བྱའོ། །བུ་གའི་ནང་གི་ཟུག་རྔུ་འབྱིན། །ཁ་ནི་སྲན་ཆུང་ཕྱེ་འདྲ་གཉིས། །སོར་བརྒྱད་པ་དང་དགུ་པའི་ཚད། །ཅེས་བྱ་བ་ལ། ཡང་དེ་བཞིན་དུ་ཐུར་མའི་ཆ་སྤྱད་གཉིས་པོ་ཁ་སྲན་ཆུང་ཕྱེ་བ་འདྲ་བ་སྟེ། རྩེ་མོ་སྲན་ཆུང་བཀས་པ་འདྲ་བར་གྱུར་པར་བྱ་ལ། དེ་ཡང་གྲེ་བ་ལ་སོགས་པ་བུ་གའི་ནང་གི་ཟུག་རྔུ་དབྱུང་ཞིང་འབྱིན་པའི་དོན་དུ་སྦྱར་རོ། །ཚད་ནི་སོར་བརྒྱད་པ་དང་དགུ་པ་བྱ་སྟེ། དེ་ལ་གཅིག་གི་ཚད་ནི་སྲིད་སོར་བརྒྱད་ཡོད་པར་བྱ་ལ། གཉིས་པའི་ཚད་ནི་སོར་དགུ་པར་བྱའོ། །ཐུར་མ་དྲུག་སྟེ་དེ་ལས་གཉིས། །སོར་ནི་བཅུ་དྲུག་བཅུ་གཉིས་པ། །ཐལ་སྨན་གཏོང་བ་སྦྲུལ་ཁ་འདྲ། །གཉིས་པོ་བཅུ་གཉིས་སོར་བཅུ་པ། །ཞེས་བྱ་བ་ལ། ཡང་ཕུར་པ་འདྲ་བའི་ཐུར་མ་དྲུག་བྱའོ་ཞེས་བྱ་བ་ནི་ཚིག་གི་ལྷག་མའོ། །དེ་ལས་གཉིས་ནི་ཚད་སོར་བཅུ་དྲུག་པ་དང་བཅུ་གཉིས་པར་བྱའོ། །དེ་ཡང་ཐལ་སྨན་ལ་སོགས་པ་གཏོང་ཞིང་བསྐུ་བ་ལ་ནི་སྦྲུལ་གྱི་ཁ་འདྲ་བར་བྱ་བ་སྟེ། གཉི་ག་ཡང་སྦྲུལ་གྱི་ཁ་འདྲ་བའི་དབྱིབས་བྱས་པ་དེའི་ཚད་ནི། གཅིག་ནི་བཅུ་
གཉིས་པ་བྱ་ལ། གཅིག་ནི་བཅུ་པ་བྱ་བའོ། །བསྐུལ་སྤྱད་ཁ་ནི་མདའ་ལྟོང་འདྲ། །འབྱིན་པའི་ཆ་སྤྱད་ལྕགས་ཀྱུའི་དབྱིབས། །ཞེས་བྱ་བ་ལ། ཐུར་མ་དེ་ལ་ཟུག་རྔུ་བསྐུལ་བའི་ཆ་སྤྱད་ཀྱི་ཁ་ནི། ཡང་མདའི་ལྟོང་འདྲ་བར་བྱ་ལ། ཡང་ཕུར་བ་འདྲ་བའི་ཐུར་མའི་ཟུག་རྔུ་འབྱིན་པའི་དོན་དུ་ཆ་སྤྱད་ལྕགས་ཀྱུའི་དབྱིབས་ལྟར་རྩེ་མོ་ཅུང་ཟད་གུག་པར་བྱའོ། །ཐུར་མ་རྩེ་མོ་གུག་པ་ནི། མངལ་གྱི་ཕུར་པ་ཞེས་བྱ་སྟེ། །སྲིད་དུ་སོར་བརྒྱད་བྱས་པ་དེས། །བུད་མེད་མངལ་དུ་བུ་ཤི་དབྱུང༌། །ཞེས་བྱ་བ་ལ། ཐུར་མ་ཕུར་པ་ལྟ་བུ་རྩེ་མོ་སྒུ་བོར་གུག་པ་ནི། མིང་མངལ་གྱི་ཕུར་པ་ཞེས་བྱ་སྟེ། དེ་ཡང་ཚད་སྲིད་དུ་སོར་བརྒྱད་པ་བྱས་ལ། མངལ་གྱི་ཕུར་པ་དེས་བུད་མེད་མངལ་དུ་བུ་ཤི་བའི་རོ། །རྡོ་དང་བོང་བ་ལྟ་བུ་དེ་སྦྲུམ་མའི་ལུས་ལས་དབྱུང་ཞིང་གདོན་པར་བྱའོ། །རྡེའུ་འབྱིན་ཆ་སྤྱད་སྦྲུལ་མགོ་ཡི། །གདེངས་ཀ་འདྲ་ལ་རྩེ་གུག་པའོ། །ཞེས་བྱ་བ་ལ། ཆུ་སོའི་ནད་རྡེའུ་འབྱིན་པའི་ཆ་སྤྱད་ནི་སྦྲུལ་མགོ་ལྟ་བུ་སྟེ། རྩེ་མོ་སྦྲུལ་མགོའི་ཡ་ཐོད་འདྲ་བ་ལ་རྩེ་མོ་གུག་པ་བྱའོ། །མདའ་ལྟོང་འདྲ་བར་སོར་བཞི་པ། །སོ་དབྱུང་བ་ལ་སྦྱར་བར་བྱ། །ཞེས་བྱ་བ་ལ། ཆ་སྤྱད་དབྱིབས་མདའ་ལྟོང་འདྲ་བར་བྱས་པ་དེ་ཡང་སོར་བཞི་པ་མཐའ་མ་སྦོམ་ཞིང་ཟླུམ་པ་བྱ་སྟེ། དེ་ནི་སོ་དབྱུང་བ་ལ་སྦྱར་བར་བྱའོ། །རྩེ་མོ་རས་བལ་གྱིས་དཀྲིས་པའི། །ཕྱི་བསལ་ཐུར་མ་དྲུག་བྱའོ། །ཞེས་བྱ་བ་ལ། ཐུར་མ་དྲུག་བྱས་ལ། དེ་ཐམས་ཅད་ཀྱི་རྩེ་མོའི་ཆ་རས་བལ་གྱིས་དཀྲིས་ཤིང་གཡོགས་པ་བྱས་ལ། དེས་རྨ་རྣགས་པ་དང་ཐལ་སྨན་ལ་སོགས་པ་སྦྱང་བའི་བྱ་བ་བྱའོ། །གཞང་གི་ཉེ་རིང་ནང་ལ་གཉིས། །སོར་བཅུ་པ་དང་བཅུ་གཉིས་པ། །ཞེས་བྱ་བ་ལ། ཐུར་མ་སོར་བཅུ་པ་དང་བཅུ་གཉིས་བྱས་ལ། དེ་ནི་གཞང་གི་ནང་ཕྱི་བ་ལ་སྦྱར་བར་བྱའོ། །སྣ་ཡི་སོར་དྲུག་བདུན་པ་གཉིས། །རྣ་བའི་སོར་བརྒྱད་དགུ་པ་གཉིས། །ཞེས་བྱ་བ་ལ། །ཡང་ཐུར་མ་སོར་དྲུག་པ་དང༌། བདུན་པ་གཉིས་བྱས་ལ། དེ་ནི་སྣ་དང་ཁའི་ནད་ཀྱི་ལྗན་ལྗིན་ཉེ་བ་དང་རིང་བ་ན་ཡོད་པ་ཕྱི་བའི་དོན་དུ་བྱའོ། །ཡང་དེ་བཞིན་དུ་ཐུར་མ་སོར་བརྒྱད་པ་དང༌། །དགུ་པ་གཉིས་བྱས་ལ། རྣ་བའི་རྨ་དང་འཚམ་པ་དེས་ཐལ་སྨན་ལ་སོགས་པ་ཕྱི་བ་དང༌། བྱུག་པ་བྱ་ལ།
དེ་ཡང་ཉེ་བ་དང་རིང་བར་གནས་པའི་བྱེ་བྲག་གཉིས་བྱ་བ་ཡིན་ཏེ། དེ་ལྟར་ན་ཐུར་མ་དྲུག་པའི་དབྱེ་བ་སྨྲས་པ་ཡིན་ནོ། །རྣ་བ་བསལ་ལ་ཨ་ཤྭད་ཐའི། །རྩེ་འམ་བླུགས་གཟར་ཁ་འདྲ་བྱ། །ཞེས་བྱ་བ་ལ། རྣ་བ་བསལ་ཞིང་སྦྱང་བའི་ཆ་སྤྱད་ནི་རྩེ་མོ་ཤིང་ཨ་ཤྭད་ཐའི་ལོ་མ་འདྲ་བའམ། དེ་བཞིན་དུ་རྩེ་མོ་བླུགས་གཟར་གྱི་ཁ་དང་འདྲ་བར་བྱའོ། །ཐུར་མ་འཛམ་བུའི་ཐོར་ཏོ་འདྲ། །ཐལ་སྨན་མེ་བཙའ་སོ་སོར་གསུམ། །རིམ་གྱིས་ཕྲ་སྦོམ་སྦྱར་བར་བྱ། །ཞེས་བྱ་བ་ལ། ཐུར་མ་ཤིང་འཛམ་བུའི་ཐོར་ཏོ་འདྲ་བར། སོར་གསུམ་གསུམ་བྱ་སྟེ། དེ་ལྟར་ན་ཐལ་སྨན་རྣོན་པོའི་ཐུར་མ་འཛམ་བུའི་མཆུ་འདྲ་བའི་རྩེ་མོ་ཅན་གསུམ་བྱ་ལ། དེ་བཞིན་དུ་མེ་བཙའི་ལས་ལ་ཡང་གསུམ་པོ་སྟེ། དེ་དག་ཕྲ་བ་དང༌། སྦོམ་པའི་དབྱེ་བས་སྦྱར་བར་བྱའོ། །རྒྱུ་མའི་ལས་ལ་ཐུར་མ་ནི། །འཁར་བ་འདྲ་ཞིང་དབུས་ཟླུམ་པ། །རྩ་བ་ཟླ་བ་ཕྱེད་འདྲ་བྱ། །ཞེས་བྱ་བ་ལ། རྒྱུ་མའི་གནས་སུ་གཏོང་བའི་ཐུར་མ་ནི། རྒྱུ་མའི་ནད་ཀྱི་ཁྱད་པར་ལ་སྦྱར་བར་བྱ་སྟེ། རྩ་བའི་ཕྱོགས་ཟླ་བ་ཕྱེད་པ་དང་འདྲ་བར་སྣུམ་བག་ཏུ་འདུག་པ་ལ་དབུས་སུ་ཟླུམ་པ་རྩེ་མོ་ཐུར་མར་བྱས་ཤིང་ཟླུམ་པ་སྦྱར་བར་བྱའོ། །རྒྱ་ཤུག་ཚི་གུ་བཀས་འདྲ་བ། །སྣ་ཡི་ཐོར་ཏོ་འབྲུམ་སྲེག་བྱེད། །ཅེས་བྱ་བ་ལ། ཐུར་མ་རྩེ་མོ་རྒྱ་ཤུག་གི་རྩེ་མོ་བཀས་པ་འདྲ་བ་ནི། སྣའི་ནང་དུ་ཐོར་བུ་དང་འབྲུམ་བུ་སྲེག་པ་ཡིན་ནོ། །སོར་བརྒྱད་པ་ལ་རྩེ་མོ་ལྗོན། །གསུམ་པ་ཐལ་སྨན་སྨན་རིམ་ལ། །མཐེའུ་ཆུང་གུང་མོ་སྲིན་ལག་གི །སེན་མོ་ལྟ་བུའི་སོ་བྱས་པའོ། །ཞེས་བྱ་བ་ལ། ཐུར་མ་གསུམ་སྲིད་དུ་སོར་བརྒྱད་ཡོད་པ་རྩེ་མོ་ལྗོན་ཤིང་གཟར་བུ་འདྲ་བ་བྱས་པ་ནི་ཐལ་སྨན་གྱི་ལས་ཏེ་ཐལ་སྨན་ཀྴ་ར་སྦྱར་བ་དང༌། སྨན་གྱི་རིམ་པ་སྟེ། དུག་ལ་སོགས་པ་བསྐུ་བ་ལ་མཐེའུ་ཆུང་དང༌། གུང་མོ་དང་སྲིན་ལག་གི་སེན་མོ་ལྟ་བུའི་དབྱིབས་པའི་སོ་འམ་རྩེ་མོ་བྱའོ། །ཕོ་མཚན་སྦྱང་དང་མིག་སྨན་སོགས། །ཆ་སྤྱད་རང་རང་ལེའུར་བཤད། །ཅེས་བྱ་བ་ལ། ཕོ་མཚན་སྦྱང་བ་ལ་སོགས་ཆ་སྤྱད་ནི་རང་རང་གི་ལེའུར་སྔར་བཤད་ཟིན་པ་ཡིན་ནོ། །ཉེ་བའི་ཆ་སྤྱད་ཁབ་ལོང་དང༌། །ཐག་པ་རས་དང་
ཐོ་བ་དང༌། འབྲེང་བུ་རྒྱུ་མ་ལྕེ་རྟ་རྔ། །ཡལ་ག་སེན་མོ་ཁ་སོ་དང༌། །དུས་དང་སྨིན་དང་ལག་རྐང་དང༌། །འཇིགས་དང་དགའ་བ་དེའི་བྱ་བའི། །བྱེ་བྲག་ཐབས་ནི་ཤེས་པའོ། །མཁས་པས་བློ་ཡིས་དཔྱད་པར་བྱ། །ཞེས་བྱ་བ་ལ། ཆ་སྤྱད་དང་འདྲ་ཞིང་དེའི་བྱ་བ་རྫོགས་པར་བྱེད་ནུས་པ། རྡོ་ཁབ་ལེན་ལ་སོགས་པ་ཉེ་བའི་ཆ་སྤྱད་ཅེས་བྱའོ། །ཁབ་ལེན་ནི་ནོར་བུའི་བྱེ་བྲག་གོ །ཐག་པ་ནི་མུཉྫ་ལ་སོགས་པ་ལས་བྱས་པའོ། །གོས་ནི་རས་ཀྱི་རྣམ་པའོ། །ཐོ་བ་ནི་ཤིང་ལས་བྱས་པའི་སྦོམ་པོ་འམ་ཐུང་བའོ། །འབྲེང་བུ་ནི་པགས་པ་ལས་བྱས་པའོ། །རྒྱུ་མ་དང་ལྕེ་ནི་དངོས་སུ་ཟད་དོ། །རྟ་རྔ་ནི་རྟའི་རྔ་མ་འམ་རྔོག་མའོ། །ཡལ་ག་ནི་ཤིང་གིའོ། །དུས་ནི་སྐད་ཅིག་མ་ལ་སོགས་པ་ཉེ་བར་མཚོན་པའོ། །སྨིན་པ་ནི་ཚོས་པའོ། །དགའ་བ་ནི་སེམས་རངས་པ་སྟེ། །དབྱེ་བ་ནི་དེའི་ལས་ལ་ཉེ་བར་སྦྱོར་བ་ཡིན་ལ། བྱ་བའི་ཐབས་དེས་ཆ་སྤྱད་ཀྱི་ལས་རྫོགས་པར་བྱེད་པའི་ཐབས་ཤེས་ཤིང་སྦྱོར་བའི་བྱེ་བྲག་ལ་མཁས་པའི་སྨན་པས་ཆ་སྤྱད་གང་ལ་འོས་པ་དེ་ལ་སྦྱར་བར་བྱ་ཞིང༌། དེས་བློས་ལེགས་པར་བརྟགས་ཤིང་དཔྱད་ལ་སྦྱར་བའོ། །དེ་ཡང་སློབ་དཔོན་གྱིས་བསྡུས་པ་ལས། འདི་དག་ལུས་ནི་ཐམས་ཅད་དམ། །ལུས་ཀྱི་ཡན་ལག་བསྐྱོད་དང་འགྱུར་བ་དང༌། །ཚིགས་དང་ནང་གྲོལ་རྩ་བོ་ཆེ། །ཅི་རིགས་པར་ནི་སྦྱར་བར་བྱ། །ཞེས་བྱ་བ་ཡིན་ནོ། །ཆ་སྤྱད་བརྡུང་བསྲུབ་དགང་དང་རྒྱུན་སྲང་དག་བྱ་དང༌། །ཐལ་སྨན་གདབ་དང་མཚོན་དབྱུང་བཅིང་དང་བཙིར་བ་དང༌། །གཞིབ་དང་སྨད་དང་བསྟོད་དང་བསྐྱོད་དང་བཅག་པ་དང༌། །བཟློག་དང་དྲང་པོར་བྱ་བ་ཆ་སྤྱད་ལས་རྣམས་ཡིན། །ཞེས་བྱ་བ་ལ། བརྡུང་བ་ལ་སོགས་པ་ནི་ཆ་སྤྱད་ཀྱི་ལས་ཡིན་ཏེ། བརྡུང་བ་ནི་བསྣུན་ཅིང་བརྡེག་པའོ། །བསྲུབ་པ་ནི་མདས་བཙུགས་ཤིང་དཀྲུགས་པས་བསྲུབ་པ་ཞེས་བྱའོ། །དགང་བ་ནི་འདིས་དགང་བར་བྱས་པའོ། །རྒྱུན་སྲང་དག་པར་བྱ་བ་ནི་བུ་ག་རྣམས་དང་གྲེ་བ་ལ་སོགས་པའི་སྦུབས་རྣམས་མ་དག་པ་དག་པར་བྱེད་ཅིང་བརྡེག་པའོ། །གདབ་པ་ནི་ཐལ་སྨན་རྣོན་པོ་ལ་སོགས་པ་བསྐུ་བའི་ཁྱད་པར་རོ། །མཚོན་དབྱུང་བ་ནི་ཟུག་རྔུ་ལ་སོགས་པ་
འབྱིན་ཅིང་འདྲེན་པའོ། །བཅིང་བ་ནི་ཆག་གྲུགས་ལ་སོགས་པ་འདིས་སྡོམ་པར་བྱེད་པའོ། །བཙིར་བ་ནི་འདིས་རྣག་ལ་སོགས་པ་འབྱིན་པར་བྱེད་པའོ། །གཞིབ་པ་ནི་ཆ་སྤྱད་གང་གིས་ཁྲག་དང་ཆུ་སེར་ལ་སོགས་པ་བརྔུབ་པའོ། །སྨད་པ་ནི་ཆ་སྤྱད་གང་གིས་ཡན་ལག་ལ་སོགས་པའི་ཕྱོགས་སྨོད་པའོ། །བསྟོད་པ་ནི་ཆ་སྤྱད་གང་གིས་འདེབས་ཤིང་མཐོ་བར་བྱེད་པའོ། །བསྐྱོད་པ་ནི་གཡོ་བར་བྱེད་པ་སྟེ། མི་འགུལ་བ་གཡོ་ཞིང་འགུལ་བར་བྱེད་པའོ། །བཅག་བ་ནི་དངོས་པོ་གཅིག་དུ་མར་བྱེད་པའོ། །བཟློག་པ་ནི་ཆ་སྤྱད་གང་གིས་གཞན་དུ་བཟློག་ཅིང་བསྒྱུར་བའོ། །དྲང་པོར་བྱ་བ་ནི་ཡོན་པོར་གནས་པའི་དངོས་པོ་བསལ་ཞིང་རྣལ་དུ་གནས་པར་བྱེད་པའོ། །དེ་ལྟར་ན་བརྡུང་བ་ལ་སོགས་པར་བསྟན་པ་གང་ཡིན་པ་དེ་དག་ནི་མདོར་ན། ཆ་སྤྱད་ཀྱི་ལས་རྣམས་ཡིན་པར་ཤེས་པར་བྱ་སྟེ། ལེགས་པར་ཟུག་ཅིང་འབྱིན་པར་བྱེད་པ་དང༌། །གཟུང་བྱ་བླངས་ནས་འབྱིན་པར་བྱེད་ཕྱིར་དང༌། ཡན་ལག་ཀུན་ལ་གནོད་པ་མེད་པས་ན། །ཆ་སྤྱད་ཀུན་གྱི་མཆོག་ནི་ཀང་ཀའི་མཆུ། །ཞེས་བྱ་བ་ལ། གོང་དུ་སྨོས་པ་ནི་ཆ་སྤྱད་ཐམས་ཅད་ཀྱི་ནང་ན། ཀང་ཀའི་མཆུ་ལྟ་བུའི་ཆ་སྤྱད་ནི། གཙོ་བོ་ཡིན་ཏེ། ཅིའི་ཕྱིར་ཞེ་ན། དེ་ལེགས་པར་ཟུག་ཅིང་ཀུན་དུ་བསྐོར་དུ་འདོད་པ་དང༌། དེ་བཞིན་དུ་གཟུང་བར་བྱ་བའི་ཟུག་རྔུ་བདེ་བླག་ཏུ་ཟིན་ཅིང་བླངས་ནས་ཀྱང་ཟུག་རྔུ་འབྱིན་ཅིང་འདོན་པར་བྱེད་པའི་ཕྱིར་དང༌། ཟུག་ཏུ་དབྱུང་བར་བྱ་བའི་ལུས་ཀྱི་ཡན་ལག་ཀུན་ལ་གནོད་པ་མེད་ཅིང་ལས་དེ་བདེ་བླག་ཏུ་སྒྲུབ་པར་བྱེད་པ་ཡིན་པས་ན། དེའི་ཕྱིར་ཆ་སྤྱད་ཐམས་ཅད་ཀྱི་མཆོག་ནི་ཀང་ཀའི་མཆུ་ལྟ་བུ་ཡིན་ནོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ། ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། །ལེའུ་ཉི་ཤུ་རྩ་ལྔ་པའི་རྣམ་པར་འགྲེལ་པའོ།། །།དེ་ནས་གཏར་སྤྱད་ཀྱི་ལེའུ་བཤད་པར་བྱའོ། །ཞེས་བྱ་བ་ལ། འདི་བརྩམས་པའི་དགོས་པ་ནི་འདི་ཡིན་ཏེ། ཆ་སྤྱད་ཕལ་ཆེར་ནི་ལྕགས་ལས་བྱེད་པ་ཡིན་ལ།
འདི་ཕལ་ཆེར་ལྕགས་ལས་བྱེད་པའམ། ལས་ཀྱི་རྣམ་པ་རིས་མཐུན་པའི་ཕྱིར་ཏེ། དེའི་འོག་ཏུ་འདི་བརྩམས་པ་ཡིན་ནོ། །མགར་བ་མཁས་བས་ཆོ་ག་བཞིན། །བརྡུངས་པའི་གཏར་སྤྱད་ཉི་ཤུ་དྲུག །སྤུ་ནི་ཆོད་པར་ནུས་པ་དག །ཕལ་ཆེར་སོར་ནི་དྲུག་པ་བྱ། །གཟུགས་ལེགས་སོ་ནི་ལེགས་པ་དང༌། །གཟུང་བར་བདེ་བ་ཉིད་དུ་བྱ། །ཡ་ཡོ་མེད་ཅིང་འཐར་ལེགས་པ། །ཤིང་ཏུ་རྣོ་བའི་ལྕགས་ལས་བྱས། །རྩེ་མོ་ཤིན་ཏུ་ལེགས་བརྡུངས་པ། །ཨུཏྤལ་སྔོན་པོའི་མདོག་འདྲ་བ། །རང་མིང་རྗེས་སུ་མཐུན་གཟུགས་ནི། །རྟག་ཏུ་ཉེ་བར་གཞག་པར་བྱ། །རྩེ་མོ་རེ་རེ་དག་ལ་ཡང༌། །རང་ཚོད་སོར་ཕྱེད་གཉིས་དང་བཞི། །ཕལ་ཆེར་གཉིས་དང་གསུམ་དུ་བྱ། །དེ་གནས་ཁྱད་པར་དག་ལ་སྦྱར། །ཞེས་བྱ་བ་ལ། གཙགས་བུ་ཉི་ཤུ་རྩ་དྲུག་བྱ་བ་ཡིན་ལ། དེ་ཡང་གང་གིས་བྱ་ཞེ་ན། མགར་བ་མཁས་པས། ཞེས་བྱ་བ་སྟེ། བྱ་བ་ལ་མཁས་ཤིང་བྱང་བར་གྱུར་པའི་ལྕགས་མགར་གྱིས་བརྡུངས་ཤིང་རྫོགས་པར་བྱའོ། །ཅི་ལྟར་བྱ་ཞེ་ན། ཆོ་ག་བཞིན་ཏེ། ཚད་ལ་སོགས་པའི་རྣམ་པ་ཇི་སྐད་བཤད་པ་བཞིན་དུ་བརྡུང་བའོ། །རྣོ་ཚད་ཇི་ཙམ་ཞེ་ན། སྤུ་ནི་ཆོད་པར་ནུས་པ་དག །ཅེས་བྱ་བ་སྟེ། གང་གིས་སྤུ་ཆོད་པའི་ལས་བྱེད་ནུས་པ་ཙམ་དུ་བྱ་བའོ། །ཚད་ཅི་ཙམ་དུ་བྱ་ཞེ་ན། ཕལ་ཆེར་ཞེས་པ་མང་དུ་སྲིད་སོར་དྲུག་ཕར་བྱས་པ་དང༌། གཟུགས་ལེགས་ཤིང་ཇི་སྐད་བཤད་པའི་རྣམ་པར་དབྱིབས་དང་ལྡན་པ་དང༌། དེ་བཞིན་དུ་སོ་ལེགས་པ་སྟེ། རྣོ་ཞིང་སྙོམས་པ་དང༌། དེ་བཞིན་དུ་གཟུང་བར་བྱ་བ་བདེ་བ་ཉིད་དེ་བཟུང་བའི་ཕྱོགས་བདེ་བླག་ཏུ་གཟུང་བར་བྱ་བ་དང༌། དེ་བཞིན་དུ་ཡ་ཡོ་མེད་པ་སྟེ། སོ་སྙོམས་ཤིང་རྔ་རྔོ་མེད་པ་དང༌། དེ་བཞིན་འཐར་ལེགས་ཤིང་བརྡུང་བ་ཞག་པ་དང༌། ཤིན་ཏུ་རྣོ་བའི་ལྕགས་ལས་བྱས་པ་གང་ཡིན་པ་དེ་ལས་བརྡུངས་པ་དང༌། དེ་བཞིན་དུ་རྩེ་མོ་ཤིན་ཏུ་ལེགས་པར་བརྡུངས་པ་སྟེ། ལྕགས་ལེགས་པར་བསྐོལ་བ་ཐོ་བས་མ་གས་པར་བརྡུང་ཞིང་ཁྱད་པར་དུ་རྩེ་མོའི་གནས་བརྡུང་ཞག་པར་བྱས་པ་དང༌། དེ་བཞིན་དུ་ཨུཏྤལ་སྔོན་པོའི་མདོག་འདྲ་ཞིང་འཇམ་པ་དང༌། དེ་བཞིན་དུ་རང་གི་མིང་དང་རྗེས་སུ་མཐུན་པའི་གཟུགས་
སམ། དབྱིབས་ཡོད་པ་གཙགས་བུའི་ཁ་འབྲས་འདྲ་བར་བྱས་པ་ལ་ནི། གཙགས་བུ་འབྲས་ཀྱི་ཁ་འམ། འབྲས་ཀྱི་རྩེ་མོ་ཞེས་བཏགས་པ་ལྟ་བ་ལ་སོགས་པའོ། །དེ་བཞིན་དུ་རྟག་ཏུ་སྟེ། དུས་ཐམས་ཅད་དུ་ཆ་སྤྱད་དང་གཙགས་བུ་དེ་དག་ཉེ་བར་གཞག་པར་བྱ་ཞིང་སྟ་གོན་དུ་བྱ་བ་དང༌། དེ་བཞིན་དུ་རང་གི་ཚད་དེ། གཙགས་བུ་དེའི་སྲིད་ཀྱི་ཚད་ལས་རྩེ་མོ་འམ། ཁ་ཆ་ཕྱེད་ཀྱི་ཚད་དང༌། ལ་ལ་བཞི་ཚད་དུ་བྱ་བ་དང༌། དེ་དག་ཀྱང་ཕལ་ཆེར་གྲངས་གཉིས་དང་གསུམ་དུ་བྱ་བ་ལ་ཡང་གཙགས་བུ་དེ་དག་གནས་ཀྱི་ཁྱད་པར་དང༌། ནད་ཀྱི་ཁྱད་པར་ལ་སྦྱར་བར་བྱའོ། །དེ་ལས་དཀྱིལ་འཁོར་འདྲ་བའི་རྩེ། །མཛུབ་སེན་ནང་གི་དབྱིབས་འདྲར་བྱ། །དེ་ནི་རྙིལ་སྐྱེས་ལྐོག་མ་ཡི། །ཤ་ལྷག་ལ་སོགས་བཞར་བཅད་སྦྱར། །ཞེས་བྱ་བ་ལ། གཙགས་བུ་དེ་རྣམས་ཀྱི་ནང་ནས་གཙགས་བུ་དཀྱིལ་འཁོར་འདྲ་ཞེས་བྱ་བའི་རྩེ་མོ་ཁའི་དབྱིབས་མཛུབ་མོའི་ནང་གི་དབྱིབས་དང་འདྲ་བར་བྱ་བ་ལ། དེ་ནི་རྙིལ་གྱི་ལྷག་མ་སྐྱེས་པ་ལ་སོགས་པ་ཕྱི་ཞིང་བཞར་བ་དང༌། ཤ་ལྷག་བཅད་པ་ལ་སྦྱར་བར་བྱའོ། །འཕེལ་གཙགས་སྤུ་གྲིའི་དབྱིབས་ལྟ་བུ། །གཅོད་དང་དྲལ་དང་འབྱིན་ལ་སྦྱར། །རྩེ་དྲང་སྐྲངས་ནད་མཐོ་བ་དང༌། །ཟབ་པ་ལ་སྦྱར་དེ་ལས་གཞན། །ལྟག་པ་རིང་ཞིང་རྩེ་གུག་པ། །སོ་ཐུང་ནད་ཚུལ་ཇི་བཞིན་སྦྱར། །ཞེས་བྱ་བ་ལ། གཙགས་བུ་འཕེལ་གཙགས་ཞེས་བྱ་བའི་གཟུགས་ནི་སྤུ་གྲིའི་དབྱིབས་ལྟ་བུ་སྟེ། དེ་ནི་གཅོད་པ་སྟེ་གཤགས་པ་དང་འབྱིན་པ་སྟེ་རྨེན་བུ་དང༌། །ཐོར་བུ་ལ་སོགས་པ་གདོན་པ་ལ་སྦྱར་རོ། །དེ་ལས་ཀྱང་རྩེ་མོ་དྲང་པོ་སྟེ་སོའི་གནས་དྲང་པོར་འདུག་པ་ནི། སྐྲངས་ནད་མཐོན་པོར་འདུག་པ་དང༌། རྔམས་སྟུག་ཅིང་ཟབ་བ་ལ་སྦྱར་རོ། །རྩེ་མོ་དྲང་པོ་དེ་ལས་གཞན་པ་སྟེ། དེ་དང་མི་མཐུན་པ་ལྟག་པའམ། རྒྱབ་རིང་ཞིང་རྩེ་མོ་གུག་པ་སོ་འམ་ཁ་ཞེང་ཐུང་བ་དག་ནི་ནད་ཀྱི་ཚུལ་ཇི་ལྟ་བ་བཞིན་བྱ་ཞིང༌། ལུས་ཀྱི་གནས་ཀྱི་དབང་ལས་མཚོན་ལ་སྐྲངས་པ་ཧ་ཅང་མཐོ་བ་ཡང་མ་ཡིན་ལ། ཧ་ཅང་ཟབ་ཅིང་དམའ་བ་ཡང་མ་ཡིན་པ་མཉམ་པོར་གནས་པ་ལ་སྦྱར་བར་བྱའོ། །ཨུཏྤ་ལ་དང་
སོ་ཕྱེད་ཀྱིས། །དྲལ་དང་དེ་བཞིན་གཅད་པར་བྱ། །ཞེས་བྱ་བ་ལ། ཨུཏྤ་ལའི་འདབ་མ་འདྲ་བ་དང༌། སོ་ཕྱེད་ལྷག་ཙམ་ཡོད་པའི་གཙགས་བུ་གཉིས་ནི། དྲལ་བ་སྟེ་གཤགས་པ་དང༌། གཅད་པ་སྟེ་དུམ་བུར་དབྱེ་བ་ལ་སྦྱར་བར་བྱའོ། །སྦྲུལ་ཁ་རྩེ་སོར་ཕྱེད་རྣ་བ། །སྣ་ཡི་ཐོར་བུ་བཅད་ལ་སྦྱར། །ཞེས་བྱ་བ་ལ། གཙགས་བུ་སྦྲུལ་གྱི་ཁ་ཞེས་བྱ་བ་རྩེ་མོ་སྟེ་གཙགས་བུའི་འབྲས་བུའི་ཕྱོགས་ཚད་སོར་ཕྱེད་ཡོད་པ་དེ་ནི་སྣ་དང་རྣ་བ་ལ་ཐོར་བུ་འམ། འབྲུམ་ཆེན་བྱུང་བ་གཅད་པ་ལ་སྦྱར་བར་བྱའོ། །རྨ་ཚོལ་འཇམ་པོ་རྟ་བླ་བའི། །མགོ་བོ་འདྲ་གཞལ་བརྟག་པར་བྱ། །ཞེས་བྱ་བ་ལ། རྨའི་ལམ་ཀུན་ཚོལ་ཞིང་རྟོག་པར་བྱེད་པ་གང་ཡིན་པ་དེ་ལ་ནི་རྨ་ཚོལ་ཞེས་བྱ་ལ། དེས་ནི་ཐག་རིང་པོར་སོང་བའི་རྨའི་ཕུག་དང༌། སྦུབས་ཚོལ་བའི་སྐབས་སུ་སྦྱར་བར་བྱའོ། །དེ་ཡང་འཇམ་རྩི་རྩུབ་བག་མེད་པ་དང་སྲིན་བུ་རྟ་བླ་བ་ཞེས་བྱ་བ་གན་དུ་པ་ཏའི་མགོ་བོ་འདྲ་བ་དག་གིས་གཞལ་ཞིང་བརྟག་པར་བྱའོ། །དེ་ལས་གཞན་པ་ཁབ་རྩེ་འདྲ། །རྩེ་བུག་ཅན་ནི་དབུག་ལ་སྦྱར། །ཞེས་བྱ་བ་ལ། སྔ་མ་དེ་ལས་གཞན་པའི་རྨ་ཚོལ་གཉིས་པ་ཁབ་ཀྱི་རྩེ་མོ་འདྲ་ཞིང༌། རྩེ་མོ་རྣོ་བ་བུ་གའམ་མིག་ཡོད་པ་དག་ནི་དབུག་ཅིང་བརྟོལ་བ་ལ་སྦྱར་བར་བྱའོ། །ལྗང་པའི་ལོ་འདྲ་འབིགས་ལ་སྦྱར། །ཞེས་བྱ་བ་ལ། ལྗང་པའི་ལོ་མ་དང་དབྱིབས་འདྲ་བའི་གཙུགས་བུ་ནི་འབིགས་པ་ལ་སྟེ། རྩ་དབུག་པའི་ལས་བྱའོ། །ཤ་རིའི་མཆུ་འདྲ་མདའ་བུག་ནི། །ཁ་འདྲ་རྩེ་གསུམ་ཁྲག་གཟགས་ལ། །ཞེས་བྱ་བ་ལ། གཙགས་བུ་བྱ་ཤ་རི་ཀའི་མཆུ་འདྲ་བ་དང༌། མདའ་བུག་ནི་ཁ་འདྲ་བ་དང༌། རྩེ་གསུམ་པ་འམ། པིར་ཁ་བསྡུས་པ་འདྲ་བ་ནི་ཁྲག་གཟགས་འབྱིན་པས་གསོ་བར་བྱ་བའི་ནད་ལ་སྦྱར་རོ། །འཇག་རྩེ་ཨ་ཏའི་མཆུ་འདྲ་བ། །འབྲས་བུ་སོར་གཉིས་ཁྲག་འབྱིན་ལ། །ཞེས་བྱ་བ་ལ། གཙགས་བུ་འཇག་མའི་རྩེ་མོ་འདྲ་བ་དང༌། ཨ་ཏའི་མཆུ་འདྲ་བ་གཉིས་བྱ་བ་ལ། དེས་ཁྲག་གཟགས་པའི་ནད་ལ་སྦྱར་ལ། གཉིས་པ་དེ་དག་ལ་འབྲས་བུའམ། རྩེ་མོ་ནི་སོར་གཉིས་ཀྱི་ཚད་དུ་བྱའོ། །
དེ་འདྲའི་སོ་ནི་ནང་དུ་བལྟ། །གཙགས་འབྲས་ཟླ་བ་ཁམ་པ་འདྲ། །སོར་ནི་ཕྱེད་དང་གཉིས་ཡོད་བྱ། །ཞེས་བྱ་བ་ལ། དེ་གཉིས་དང་དབྱིབས་འདྲ་བས་ན་དེ་འདྲ་སྟེ། ཁྱད་པར་ནི་སོ་ནང་དུ་བལྟ་བ་དག་ཏུ་ཁྲག་གཟགས་པ་ལ་སྔ་མ་བཞིན་དུ་སྦྱར་བར་བྱ་ལ། གཙགས་བུ་ཁ་ནང་དུ་བལྟས་པ་དེའི་གཙགས་འབྲས་ཁ་ནི་ཟླ་བ་ཁམ་པ་སྟེ། ཟླ་བ་ཕྱེད་པ་འདྲ་ཞིང་ཁ་ཞེང་སོར་ཕྱེད་དང་གཉིས་པར་བྱའོ། །རྩེ་མོ་འབྲས་དང་འདྲ་བ་ལ། །སོར་ནི་ཕྱེད་དང་གཉིས་ཡོད་དག །དེ་ནི་རྩ་ལྟོའི་ནད་ལ་སྦྱར། །ཞེས་བྱ་བ་ལ། རྩེ་མོ་སྟེ་གཙགས་འབྲས་ཕྱོགས་འདྲ་བ་དེ་བཞིན་དུ་ཚད་སོར་ཕྱེད་དང་གཉིས་ཡོད་པ་དེ་ནི་རྩ་དབུག་པ་དང་ལྟོ་བའི་ནད་ལ་སྦྱར་བར་བྱའོ། །སྟ་རེའི་དཔངས་འདྲ་བ་ལང་སོ། །འདྲ་བའི་གཙགས་འབྲས་སོར་ཕྱེད་པ། །དེ་ཡི་ཡུ་བ་གྱེན་བསྟན་ལ། །རུས་པའི་སྟེང་གནས་རྩ་ལ་གདབ། །ཅེས་བྱ་བ་ལ། དཔངས་དང་སྲིད་སྟ་རེ་ཡུ་བ་ཅན་འདྲ་ཞིང་གཙགས་བུའི་རྩེ་མོ་འམ། ཁ་སོར་ཕྱེད་ཡོད་པའི་གཙགས་བུ་དེས་རུས་པའི་སྟེང་ན་གནས་པའི་རྩ་ལ་གདབ་ཅིང་དབུག་པར་བྱའོ། །ཅི་ལྟ་ཞེ་ན། འདེབས་པའི་ཚེ་ཡུ་བ་གྱེན་དུ་བསྟན་ལ་རྩ་དབུག་པར་བྱའོ། །ཟངས་མའི་ཐུར་མ་རྩེ་གཉིས་པ། །རྩེ་མོ་མེ་ཏོག་ཁ་འབུས་འདྲ། །དེ་ཡིས་མཐོང་ཉམས་མིག་སྤྲིས་དབུག །ཅེས་བྱ་བ་ལ། མཐོང་བ་ཉམས་པའི་མི་གནད་སྤྲིས་ཡོད་པ་དེ་དབུག་ཅིང་བསལ་བར་བྱ་བའི་ཕྱིར། ཟངས་ལས་བྱས་པའི་ཐུར་མ་རྩེ་མོ་གཉིས་བ་སྟེ། ཡ་ཏོག་མ་ཏོག་གཉིས་ཀ་རྩེ་མོ་ཡོད་པ་རྩེ་མོ་མེ་ཏོག་ཁ་འབུས་པ་འདྲ་བར་བྱ་སྟེ། དེས་མཐོང་བ་ཉམས་ཤིང་སྒྲིབ་པ་མེད་པའི་མིག་སྤྲིས་དབུག་བར་བྱའོ། །རྒྱ་འདྲའི་གཙགས་བུ་བྱ་བ་ནི། །སོར་གདུབ་འདྲ་ལ་ཁ་བྱུང་བ། །གཙགས་འབྲས་རྒྱར་ནི་སོར་ཕྱེད་པའི། །རིགས་པས་འཕེལ་གཙགས་ལྟ་བུ་འམ། །དཀྱིལ་འཁོར་ལྟ་བུའི་རྩེ་འདྲར་བྱ། །དེ་ནི་མཛུབ་མོའི་ཐོར་ཏོ་ལ། །གདགས་སུ་རུང་བའི་རྒྱ་འདྲ་བྱ། །སྲད་བུས་བརྟོད་ལ་གྲེ་བའི་ནང༌། །ནད་རྣམས་གཅད་དང་དྲལ་ལ་སྦྱར། །ཞེས་བྱ་བ་ལ། རྒྱ་འདྲ་བའི་གཙགས་བུ་བྱ་བ་ནི་མཚན་ཉིད་འདི་ལྟར་བྱ་སྟེ། སོར་གདུབ་འདྲ་
བར་བྱས་པ་ཉིད་ལས་ཁ་བཏོད་པ་འམ། བྱུང་བ་འམ། དེ་བཞིན་དུ་གཙགས་འབྲས་དེའི་ཁ་ཕྱོགས་སུ་རྒྱ་སོར་ཕྱེད་ཡོད་པ། རིགས་པས་ཞེས་པ་མཚོན་གྱི་ལས་བྱ་བ་དང་འཚམ་པར་བྱས་པ་དང༌། དབྱིབས་འཕེལ་གཙགས་ལྟ་བུ་འམ། དཀྱིལ་འཁོར་ལྟ་བུའི་གཙགས་བུ་དང༌། རྩེ་མོ་འདྲ་བ་བྱས་ལ། དེ་ཡང་མཛུབ་མོའི་ཐོར་ཏོ་སྟེ། ཚིགས་དང་པོ་ལ་གདགས་སུ་རུང་བའི་རན་པའི་སོར་གདུབ་ལྟ་བུའི་རྣམ་པ་དེ་ལྟ་བུར་བྱའོ། །དེ་ཡང་སྐུད་པ་དམར་པོས་བཏགས་ཏེ། མཁྲིག་མའི་གནས་སུ་གདགས་པར་བྱ་ལ། དེ་ནས་དེའི་འོག་ཏུ་གྲེ་བའི་ནང་དུ་གཞུག་ཅིང༌། དེའི་ནང་གི་ནད་རྣམས་གཅད་པ་དང་དྲལ་བར་བྱའོ། །གྲེ་བའི་ཤ་ལྷག་ཐོར་གཙུག་འཛིན། །ལྕགས་ཀྱུ་རྩེ་མོ་ལེགས་གུག་བྱ། །ཞེས་བྱ་བ་ལ། གྲེ་བའི་ནད་ཀྱི་ཤ་ལྷག་དང་ཐོར་བུ་དང་འབྲས་ལ་སོགས་པ་སླ་ཞིང་གཟུང་བའི་ཕྱིར། ལྕགས་ཀྱི་རྩེ་མོ་ལྕགས་ཀྱུ་ལྟ་བུ་ལ་བྱ་ཞིང་རྩེ་མོ་ཤིན་ཏུ་གུག་པར་བྱའོ། །རུས་པ་གཅོད་པའི་སོག་ལེ་ནི། །སྲིད་དུ་སོར་བཅུ་ཞེང་སོར་གཉིས། །སོ་རྣམས་ཕྲ་ཞིང་རབ་ཏུ་རྣོ། །ཡུ་བ་ཆང་ཟུངས་ལེགས་པར་བྱ། །ཞེས་བྱ་བ་ལ། རུས་པ་གཅོད་པའི་མཚོན་ནི། སོག་ལེ་ཞེས་བྱ་བས་བྱ་ལ། དེའི་ཚད་ནི་སྲིད་ཀྱི་དཔངས་སུ་སོར་བཅུ་ཞེང་དུ་སོར་གཉིས་ཡོད་པ་བྱས་ལ། དེ་ཡང་སོ་རྣམས་རབ་ཏུ་ཕྲ་ཞིང་རྣོ་ལ་རྩུབ་པར་བྱ་བ་དང༌། ཡུ་བའི་ཆང་ཟུངས་ལེགས་ཤིང་མཛེས་པར་བྱའོ། །རྨ་ཡི་ཆུ་རྒྱུས་སྐྲ་གཅད་པའི། །ཆན་པ་ཆན་པ་འདྲ་བར་བྱ། །ཞེས་བྱ་བ་ལ། གཙགས་སྤྱད་ཀྱི་རྣམ་པ་ཆན་པ་ཞེས་བྱ་བ་ནི། རྨའི་ཆུ་རྒྱུས་དང་སྐྲ་གཅད་པའི་དོན་དུ་བྱ་ལ། དེ་ཡང་ཆན་པ་འདྲ་བ་སྟེ། ཆ་གསུམ་འོག་ཏུ་དགུག་པར་བྱ་ལ། ལྷག་མ་ཆ་བཞི་པ་སོ་སོར་བྱའོ། །སོ་ཡོ་སོ་དྲང་ཁ་གཉིས་པའི། །སེན་མོའི་འདྲེག་སྤྱད་སོར་དགུ་པ། །ཟུག་རྡུ་ཕྲ་དབྱུང་གཅད་པ་དང༌། །དྲལ་དང་དབུག་དང་ཕྱི་བར་བྱ། །ཞེས་བྱ་བ་ལ། གཙགས་སྤྱད་ཁབ་སྲེགས་སུ་ཡོད་པ་དང་ཁ་འདྲ་བ་སྟེ། ཁ་གཉིས་ཡོད་པར་བྱ་ལ། དེ་ནི་སེན་མོ་འདྲེག་པའི་གཙགས་སྤྱད་ཅེས་བྱ་སྟེ། དེའི་སྲིད་ནི་སོར་དགུ་པར་བྱའོ། །དེས་
ཀྱང་ཟུག་རྡུ་ཕྲ་མོ་ཟུག་པ་དབྱུང་བ་དང༌། སེན་མོ་ལ་སོགས་པ་གཅད་པ་དང་དྲལ་བ་དང༌། དབུག་པ་དང༌། ཕྱི་བར་སྦྱར་བར་བྱའོ། །ཟུར་བཞི་པ་ལ་སོར་གཅིག་པ། །དབྱིབས་ནི་ཀུན་ཏུ་གཅིག་འདྲ་བ། །སོ་ཕྱི་བ་ཡི་གཙགས་སྤྱད་དེས། །སོ་ཡི་དྲེག་པ་ཕྱི་བར་བྱ། །ཞེས་བྱ་བ་ལ། ཕྱི་བཞེས་བྱ་བའི་གཙགས་སྤྱད་ཟུར་བཞི་པ། སོ་གཅིག་པར་བྱས་པ་ལ་དབྱིབས་ཀྱི་རྣམ་པ་ཀུན་ཏུ་འབྲེལ་ཞིང་གཅིག་འདྲ་བར་བྱ་ལ། དེ་ལྟ་བུའི་སོ་ཕྱི་བའི་གཙགས་སྤྱད་དེ་སོའི་དྲེག་པ་དང༌། སོ་ལ་སྐྱོན་བྱུང་བ་ཕྱི་ཞིང་བསལ་བར་བྱའོ། །ཁབ་ནི་མགོ་ཟླུམ་མིག་ཟབས་ཆེ། །མཁྲང་པ་གསུམ་བྱ། ཞེས་བྱ་བ་ལ། ཁབ་གསུམ་པོ་མགོ་ཟླུམ་ཞིང་འཇམ་པ་དང༌། སྐུད་པ་འཇུག་པའི་ཕྱོགས་ཀྱི་མིག་ཟབས་ཆེ་བ་དང༌། མཁྲང་ཞིང་སྲབ་པ་བྱའོ། །དེ་ལས་ནི། །ཤ་ཆེ་བ་ཡི་ཕྱོགས་སུ་ནི། །ཟུར་གསུམ་སྲིད་དུ་སོར་གསུམ་པས། །ཞེས་བྱ་བ་ལ། རྨ་བཙེམ་པ་ལ་གསུམ་པོ་དེ་དག་གི་ནང་ནས་ཤ་ཆེ་བའི་ཕྱོགས་ཀྱི་རྨ་བཙེམ་པ་ལ་ནི་ཟུར་གསུམ་པ་ཡོད། སྲིད་སོར་གསུམ་པས་བྱའོ། །ཤ་ཆུང་བ་དང་རུས་ཚིགས་ན། །རྨ་ཡོད་པ་ལ་སྲིད་སོར་གཉིས། །ཞེས་བྱ་བ་ལ། རྨ་ཤ་ཆུང་བའི་ཕྱོགས་དང་རུས་པ་དང། ཚིགས་ལ་རྨ་ཡོད་པ་བཙེམ་པ་ལ་ནི་ཁབ་སྲིད་དུ་སོར་གཉིས་པ་བྱའོ། །ཞུ་དང་མ་ཞུའི་གནས་ནད་རྨའི། །ཁབ་རྩེ་འབྲས་དབྱིབས་གཞུ་ལྟར་སྒུ། །སྲིད་དུ་སོར་ནི་ཕྱེད་དང་གསུམ། །ཞེས་བྱ་བ་ལ། ཁབ་གསུམ་པ་ནི་ཁབ་རྩེ་འབྲས་འདྲ་ཞིང་གཞུ་ལྟར་སྒུར་པོ་ལ་སོར་ཕྱེད་དང་གསུམ་ཡོད་པར་བྱ་སྟེ། དེས་ནི་ཞུ་བའི་གནས་དང༌། མ་ཞུ་བའི་གནས་ན་རྨ་ཡོད་པ་དང༌། གནས་རྣམས་ན་རྨ་ཡོད་པ་ལ་བཅོམ་བར་བྱའོ། །ཞེས་སྦྱར་བར་བྱའོ། །ཁབ་ནི་བདུན་ནམ་བརྒྱད་ཀུན་ཀྱང༌། །ཟླུམ་པོ་སོར་ནི་ལེགས་སྦམས་ལ། །ཁྲི་གཅིག་ལ་བཙུགས་པིར་འདྲ་བ། །བརྩན་སྔོན་གདོང་ནད་ཐིག་ལེ་ནག །སྐྲ་འབྱི་བ་ལ་གཙགས་པར་བྱ། །ཞེས་བྱ་བ་ལ། ཁབ་ནི་བདུན་ནམ་བརྒྱད་ཀུན་ཀྱང་ཟླམ་པོར་བྱས་ལ། ཚད་སོར་བཞི་པ་དེ་ལེགས་པར་སྦམས་ཤིང་བསྡུས་ལ་ཁྲིའུ་འམ། གཞི་གཅིག་ལ་བཙུགས་ཏེ། པིར་འདྲ་བར་
བྱ་ཞིང་ལེགས་པར་བཅིང་བར་བྱ་སྟེ། གཙགས་སྤྱད་འདི་ནི་ཁབ་ཀྱི་པིར་ཞེས་བྱ་སྟེ། དེ་ནི་བརྩན་སྔོན་པོ་བྱུང་བ་དང༌། གདོང་གི་ནད་ཐིག་ལེ་ནག་པོ་ཆགས་པ་དང༌། སྐྲ་འབྱི་བའི་ནད་ལ་གཙགས་པར་བྱའོ། །ཁབ་བརྒྱད་ཟླུམ་པོ་སོར་ཕྱེད་པ། །གཅིག་ཏུ་སྦམས་ལ་གཟར་བུ་འདྲ། །ལག་པ་གཉིས་ཀྱིས་བཙུགས་ནས་ནི། །དེ་ཡིས་སྣ་ཡི་ཁྲག་དབྱུང་ངོ༌། །ཞེས་བྱ་བ་ལ། ཚལ་པ་ཁྲེའུ་ཕྱོགས་བརྒྱད་དུ་གནས་པ་དང་ལྡན་པའི་དབྱིབས་ཟླུམ་པོ་ཚད་སོར་ཕྱེད་པ་གཅིག་ཏུ་སྦམས་པ་གཟར་བུ་འདྲ་བ་བྱས་ལ། གཟར་བུ་དེས་ལག་པ་གཉིས་དང་གཙགས་བུར་གྱུར་པ་ལས། སྣའི་ཁྲག་དབྱུང་ཞིང་གདོན་བར་བྱའོ། །རྣ་ཤལ་དབུག་པའི་སྨྱུང་བུ་ནི། །ཡུ་ཐི་ཀ་ནི་ཁ་འབུས་འདྲ། །ཞེས་བྱ་བ་ལ། རྣ་ཤལ་དབུག་ཅིང་འབིགས་པའི་ཆ་སྤྱད་སྨྱུང་བུ་ནི། མེ་ཏོག་ཡུ་ཏི་ཀ་ཁབ་འདྲ་བར་བྱས་པའོ། །སྨྱུང་བུ་སོར་ནི་ཕྱེད་པར་བྱ། །དེ་ཡི་ཚད་དབུག་དེ་ཡན་ཆད། །ཟུར་བཞི་བྱས་པ་དེ་ཡིས་ནི། །སྐྲངས་སྨིན་མ་སྨིན་དོགས་ལ་དབུག །རྣ་དྲུང་ཤ་ནི་སྟུག་པོ་དབུག །ཅེས་བྱ་བ་ལ། སྨྱུད་བུ་ཞེས་བྱ་བ་ནི། གཙགས་སྤྱད་ཁ་ཟླུམ་པོ་སོར་ཕྱེད་ཡོད་པ། དེའི་ཚད་དུ་དབུག་ཅིང་གཞུག་པར་བྱ་ལ། ཟླུམ་པོ་སོར་ཕྱེད་པ་དེ་ཡན་ཆད་ནི་དབྱིབས་ཟུར་བཞི་པར་བྱའི་ཟླུམ་པོར་མི་བྱའོ། །དེ་ལྟ་བུ་གཙགས་སྤྱད་དེས་ནི། སྐྲངས་པ་འདི་སྨིན་པ་ཡིན་ནམ། མ་སྨིན་པ་ཡིན་ཞེས་དོགས་ཤིང་སོམ་ཉིར་གྱུར་པ་ལ་དབུག་པར་བྱའོ། །གཞན་ཡང་དེས་རྣ་དྲུང་གི་སྣ་ཤལ་སྟུག་པོ་ཡོད་པ་དག་དབུག་པར་བྱའོ། །སྨྱུང་བུ་ཁ་ནི་སྦོམ་པོ་ལ། །སུམ་ཆ་སྦུ་གུ་ཡོད་བྱས་ལ། །སོར་གསུམ་པ་ཡིས་རྣ་བ་དབུག །ཅེས་བྱ་བ་ལ། ཡང་རྣ་ཤལ་མཐུག་པོ་ཡོད་པ་ལ། སྨྱུང་བུ་འམ་ཁབ་སྦོམ་པོས་དབུག་པ་བསྔགས་པ་ཡིན། དེ་ཡང་སུམ་ཆའི་ཚད་ཙམ་དུ་བུ་ག་ཡོད་པར་བྱས་ལ། སྲིད་སོར་གསུམ་པ་ཁོང་སྟོང་གིས་དབུག་པར་བྱའོ། །པདྨ་ཐལ་སྨན་མེ་བཙའ་དང༌། །མཆིང་བུ་རྡོ་དུམ་སེན་མོ་སོགས། །ལྕགས་མིང་གཏར་སྤྱད་ཕྲ་མོ་སྟེ། །དེ་ཡང་དེ་བཞིན་སྦྱར་བར་བྱ། །ཆ་སྤྱད་འཁྲུལ་འཁོར་སོགས་པས་ཀྱང༌། །མཁོ་བ་ནད་ཀྱི་དམིགས་
དང་སྦྱར། །ཞེས་བྱ་བ་ལ། པདྨ་དང་ཐལ་སྨན་ལ་སོགས་པ་ནི་མཁོ་བའི་ཆ་སྤྱད་ཡིན་ལ། སོགས་པ་ནི་ཀུར་བིན་དང༌། ཤིང་གི་ཡལ་ག་དང༌། ཕྱུགས་ཀྱི་རྨིག་པ་དང༌། ལོ་འདབ་རྩུབ་མོ་དང༌། རྒྱ་མཚོའི་ལྦུ་བ་དང༌། ལྕི་བ་སྐམ་པོ་ལ་སོགས་པ་བསྡུའོ། །དེ་དག་གི་ལྕགས་མ་ཡིན་པའི་གཏར་སྤྱད་ཕྲ་མོ་སྟེ། དེ་ཡང་བློས་སྔ་མ་བཞིན་དུ་འོག་ནས་བཤད་པའི་ཚུལ་གྱིས་སྦྱར་བར་བྱའོ། །ཡང་འདི་བཞིན་དུ་ཆ་སྤྱད་གཞན་དག་འཁྲུལ་འཁོར་ལ་སོགས་པས་ཀྱང་ཉེ་བར་སྦྱར་བར་བྱའོ། །དེ་བཞིན་དུ་མཁོ་བའི་ཆ་སྤྱད་གཞན་དག་ཀྱང་ནད་ཀྱི་དམིགས་ལས་དཔགས་ཏེ་སྦྱར་བར་བྱའོ། །འདྲེན་དང་འབྱིན་དང་དྲལ་དང་འདྲུབ། །དམིགས་ཚོལ་ཕྱི་བསལ་ཞལ་ཞལ་གདབ། །གཙགས་བཅད་གཤེགས་དབུག་བཙུགས་པ་དང༌། །གཟུང་བསྲེག་དེ་ཡིས་བྱ་བ་ཡིན། །ཞེས་བྱ་བ་ལ། འདྲེན་པ་དང་འབྱིན་པ་ཞེས་བྱ་བ་ནས། སྲེག་པའི་བར་བྱ། རེ་རེ་ཞིང་སྨོས་པ་ནི། གཙགས་སྤྱད་དེ་བྱ་བའི་ལས་ཡིན་ནོ། །གཅད་དང་དྲལ་དང་ཕྱི་བའི་ཕྱིར། །སྤྱད་ཀྱི་གཙགས་འབྲས་རྩ་བའི་བར། །མཛུབ་མོ་གུང་མོ་མཐེ་བོ་ཡིས། །མ་ཡེངས་པ་དང་ལེགས་པར་གཟུང༌། །ཞེས་བྱ་བ་ལ། གཙགས་སྤྱད་གཅད་པའི་དོན་དང༌། དྲལ་བའི་དོན་དང༌། ཕྱེ་བའི་དོན་གྱི་བྱ་བ་བྱེད་པའི་ཕྱིར། དེས་ལས་བྱེད་པ་ན་གཙགས་སྤྱད་དེ་རྣམས་ཀྱི་གཙགས་འབྲས་དང༌། རྩ་བའི་བར་ནས་ལས་དེ་དག་བྱ་བའི་ཕྱིར་གཟུང་བ་ནི། དེར་མཛུབ་མོ་དང༌། གུང་མོ་དང༌། མཐེ་བོ་སྟེ། སོར་མོ་གསུམ་གྱིས་གཟུང་བར་བྱའི། ལག་པ་ཐམས་ཅད་ཀྱིས་མི་གཟུང་ངོ༌། །འཛིན་པ་ན་ཡང་བློ་གཞན་དུ་མ་ཡེངས་པ་དང༌། ནོར་པ་མེད་པར་ལེགས་པར་གཟུང་བར་བྱའོ། །གཏར་ག་གདབ་ཕྱིར་རྩེ་མོའི་དྲུང༌། །མཛུབ་མོ་དང་ནི་མཐེ་བོས་གཟུང༌། །ཞེས་བྱ་བ་ལ། གཏར་ག་གདབ་ཅིང་ཁྲག་གཟགས་པའི་དོན་དུ་ནི། གཙགས་བུའི་རྩེ་མོ་དྲུད་མཚམས་ནས་མཛུབ་མོ་དང་མཐེ་བོས་གཟུང་བར་བྱའོ། །འབྲས་འདྲ་བ་ཡི་ཡུ་བ་ནི། །ཆང་བར་བཅུག་སྟེ་རྩེ་མོས་གདབ། །ཅེས་བྱ་བ་ལ། གཙགས་བུ་འབྲས་ཀྱི་དབྱིབས་
འདྲ་བའི་ཡུ་བ་ཟླུམ་པོ་ཆང་བར་བཅུག་སྟེ། རྩེ་མོ་སྟེ་ཁའི་ཕྱོགས་ནས་གཟུང་སྟེ་གདབ་པར་བྱའོ། །དབྱུང་དོན་ཡུབ་ནས་བཟུང་བྱ། །ཞེས་བྱ་བ་ལ། ཟུག་རྔུ་ལ་སོགས་པ་འབྱིན་པའི་དོན་གྱི་ཆ་སྤྱད་ནི་ཡུ་བ་སྟེ། རྩ་བའི་ཕྱོགས་ནས་བཟུང་ཞིང་གདོན་པར་བྱའོ། །ཆ་སྤྱད་སྔར་སྨོས་པ་རྣམས་ཀྱང་དེ་བཞིན་དུ་ཤེས་པར་བྱའོ། །གཞན་དག་བྱ་བ་གང་བདེར་བྱ། །ཞེས་བྱ་བ་ལ། གཙགས་སྤྱད་གཞན་དག་ནི། བྱ་བ་ལ་ཇི་ལྟར་བདེ་བ་བཞིན་དུ་ཅི་རིགས་པར་བྱའོ། །གཏར་སྤྱད་སྣ་ཚོགས་དག་གི་སྣོད། །གསོ་རས་བལ་སྣམ་མེན་ཏྲི་འམ། །པགས་འཇམ་དུ་གུ་ལ་ལས་བྱས། །རབ་ཏུ་སྟུག་པ་ཞེང་སོར་དགུ། །སྲིད་དུ་སོར་ནི་བཅུ་གཉིས་པ། །བལ་གྱིས་བར་གཅད་སྤྱད་བཅུག་ལ། །ལེགས་པར་གཞག་སྟེ་དྲུབ་པ་དང༌། །ཐུར་མས་ཁ་ནི་བརྒྱུ་བར་བྱ། །ཞེས་བྱ་བ་ལ། གོང་དུ་སྨོས་པའི་གཏར་སྤྱད་སྣ་ཚོགས་དག་གི་སྣོད་གསོ་རས་སམ་བལ་གོས་སམ། མེན་ཏྲི་ལ་སོགས་པས་བྱས་པའམ། པགས་པ་འཇམ་པོ་འམ། དུ་གུ་ལ་ལས་བྱས་པ། རབ་ཏུ་སྟུག་པ་མཁྲེགས་པ་དང༌། ཞེང་སོར་དགུ་སྟེ། ངོས་གཅིག་ནས་གཅིག་ཏུ་སོར་དགུ་པ་ཡོད་པ། སྲིད་སོར་བཅུ་གཉིས་པ། དེ་བཞིན་དུ་བལ་གྱིས་གཙགས་སྤྱད་ཀྱི་བར་དུ་བར་གཅད་ཅིང༌། བཅུག་ལ་མ་འདྲེས་པར་ལེགས་པར་གཞུག་སྟེ། དྲུབ་པ་དང༌། དེ་བཞིན་དུ་སྣོད་ཀྱི་ཁའི་བུ་ག་ཐུར་མས་ལེགས་པར་བརྒྱུ་བར་བྱ་ཞིང་ཁ་སྦྱར་བ་དང༌། བཅས་པ་དེ་བསག་ཅིང་བསྡུ་བར་བྱའོ། །སྲིན་བུ་པད་བ་བདེར་གནས་པ། །ཁྲག་དབྱུང་ཕྱིར་ནི་སྦྱར་བར་བྱ། །ཞེས་བྱ་བ་ལ། སྲིན་བུ་པད་བ་ཞེས་བྱ་བ། ཆུ་ན་གནས་པའི་འབུའི་རིགས་ཛ་ལུ་ཀ་ནི། སྐྱེས་བུ་བདེ་བར་གནས་པ་དག་ཁྲག་དབྱུང་བའི་ཕྱིར་སྦྱར་བར་བྱའོ། །ཆུ་ནང་ཉ་དང་སྦལ་སོགས་དང། །མི་རོའི་དྲི་མ་རྣམས་ལས་བྱུང༌། །དམར་དང་དཀར་དང་ཤིན་ཏུ་གནག །མི་སྲུན་སྦོམ་དང་འབྱིལ་བ་དང༌། །འཇའ་ཚོན་དང་འདྲ་རོ་སྟོད་བཀྲ། །སྤུ་ཡོད་དེ་རྣམས་དུག་ཅན་ཡིན། །སྤང་བྱ་དེས་ནི་ཁྲག་གཞི་བས་ན། །གཡའ་རྣག་འཇག་རིམས་མགོ་འཁོར་
སྐྱེད། །དེ་ལ་དུག་ཁྲག་མཁྲིས་གསོ་བྱ། །ཞེས་བྱ་བ་ལ། སྲིན་བུ་པད་པ་ཆུ་ནང་ལས་བྱུང་བ་དང༌། ཉ་དང་སྦལ་པ་ལ་སོགས་པ་དང༌། མི་རོ་དང་དྲི་མ་རྣམས་ལས་བྱུང་བ། ཁ་དོག་དམར་བ་དང༌། ཤིན་ཏུ་གནག་པ་དང༌། མི་སྲུན་ཞིང་རང་བཞིན་གཡོ་བ་དང༌། །སྦོམ་ཞིང་ལུས་ཆེ་བ་དང༌། བསིལ་བ་དང༌། འཇའ་ཚོན་དང་འདྲ་བར་ཁ་དོག་སྣ་ཚོགས་ཡོད་པ་དང༌། རོ་སྟོད་བཀྲ་ཞིང་ར་རིས་འདུག་པ་དང༌། སྤུ་ཡོད་པ་དེ་ཐམས་ཅད་དུག་ཅན་ཡིན་པས་སྤང་བར་བྱའི། །གཏར་ག་གདབ་པའི་དོན་དུ་མི་སྦྱར་རོ། །ཅིའི་ཕྱིར་ཞེ་ན། དེས་ཁྲག་གཞིབས་ནས་གཡའ་བ་ལ་སོགས་པ་སྐྱེ་བར་འགྱུར་ལ། གཡའ་བ་ལ་སོགས་པ་སྐྱེས་པ་དེ་ལ་ནི། དུག་དང་ཁྲག་དང་མཁྲིས་པའི་གསོ་བ་བྱའོ། །ཆུ་མདོག་རྣམ་པར་གསལ་བ་དང༌། །དུག་མེད་ཉ་ལྕིབས་མེད་ལས་བྱུང༌། །རྩ་སྣར་རོ་སྟོད་སྔོ་བཀྲ་ཟླུམ། །རྒྱབ་ནི་ངུར་སྨྲིག་འདྲ་ལུས་ཕྲ། །ལྟོ་ནི་ཅུང་ཟད་སེར་བ་བཟང༌། །ཞེས་བྱ་བ་ལ། ཆུའི་མདོག་རྣམ་པར་གསལ་ཞིང་དང་བ་ལས་བྱུང་བ་དང༌། དུག་མེད་ཅིང་ཉ་ལྕིབས་མེད་པ་ལས་བྱུང་བ་དང༌། མདོག་ཅུང་ཟད་རྩ་སྣར་སྔོ་བག་ཏུ་འདུག་པ་དང༌། རོ་སྟོད་སྔོ་བཀྲར་འདུག་པ་དང༌། དབྱིབས་ཟླུམ་པ་དང༌། རྒྱབ་ངུར་སྨྲིག་ལྟར་སེར་བ་དང༌། ལུས་ཕྲ་ཞིང་སྲབ་པ་དང༌། ལྟོ་ཅུང་ཟད་སེར་པོར་གནས་པ་གང་ཡིན་པ་དེ་ཐམས་ཅད་བཟང་སྟེ་དུག་མེད་པ་ཡིན་ནོ། །དེ་ཡང་ལེགས་པར་མ་སྐྱུགས་དང༌། །རྟག་ཏུ་འཐུང་དུ་བཅུག་པ་དག །ཆུ་ནང་ཞུགས་ཏེ་ནུབ་པ་ནི། །ཁྲག་གིས་མྱོས་པ་ཡིན་པས་སྤང༌། །ཞེས་བྱ་བ་ལ། དུག་མེད་པའི་སྲིན་བུ་དེ་ནད་ཁྲག་འཐུངས་ནས་ལེགས་པར་མ་སྐྱུགས་པ་དང༌། ཆུའི་ནང་དུ་ཕྱིན་ཏེ་ནུབ་པ་ནི་ཁྲག་གིས་མྱོས་པ་ཞེས་བྱ་བ་ཡིན་པས་དེ་ཡང་སྤང་བར་བྱའོ། །དེ་ནས་ཅིག་ཤོས་སྐྱེར་པ་བཏགས། །ཆུར་སྦྱར་བ་ཡི་ནང་དུ་གཞུག །ཀན་ཛིའམ་དར་བའི་ནང་དུ་གཞུག །སླར་ཡང་ཆུར་ནི་དབུགས་ཕྱུང་ནས། །མར་རམ་ས་ཞག་ནུ་ཞོའམ། །ཁྲག་གི་ཐིགས་པས་བསྐུས་འཐུང་གཞུག །ཅེས་བྱ་བ་ལ། དེ་ནས་སྲིན་བུ་དུག་
མེད་པ་སྐྱེར་པ་བཏགས་པའི་ཕྱེ་མ་དང་ཆུར་སྦྱར་བའི་ནང་དུ་བཅུག་པ་འམ། རྩབ་མོ་རང་སྐྱུར་རམ། དར་བའི་ནང་དུ་བཅུག་ལ། དེ་ནས་སླར་ཡང་ཆུར་བཅུག་པས་དབུགས་ཕྱུང་ལ་འཐུང་དུ་གཞུག་སྟེ། དེ་ཡང་མར་ལ་སོགས་པ་བསྐུས་པར་འཐུང་དུ་གཞུག་སེ། འཐུང་ཚེ་རོ་སྟོད་མཐོར་གྱུར་ན། །རས་མ་སྲབ་མོས་གཡོགས་པར་བྱ། །ཞེས་བྱ་བ་ལ། སྲིན་བུ་དེ་རོ་སྟོད་བཏེག་སྟེ་འཐུང་ན། གོས་སྲབ་མོས་གཡོགས་པར་བྱའོ། །ཁྲག་ནི་བཟང་ངན་འདྲེས་པ་ལས། །པད་པ་དང་པོར་ནད་ཁྲག་ནི། །འཐུང་སྟེ་ངང་པས་འོ་མ་དང། །འདྲེས་ཆུའི་འོ་མ་ལེན་དང་མཚུངས། །ཞེས་བྱ་བ་ལ། སྲིན་བུ་པད་པ་དེས་ནི་བཟང་པོ་དང༌། ངན་པ་འདྲེས་པ་ལས་ནད་ཁྲག་འཇིབས་ཏེ། དེ་དཔེར་ན་ཆུ་དང་འོ་མ་འདྲེས་པ་ལས་ངང་པས་ནི་འོ་མ་ལེན་བ་དང་འདྲའོ། །སོ་ཡིས་འདེབས་པའམ་གཡའ་གྱུར་ན། །དེ་ནི་སླར་དབྱུང་སྐྱུག་ཏུ་གཞུག །རྒྱམ་ཚ་ཏིལ་མར་གྱིས་ཁ་བསྐུ། །ཕྱེ་མ་འཇམ་པོས་རྒྱབ་ཏུ་གཏོར། །ཞེས་བྱ་བ་ལ། སྲིན་བུ་པད་པས་འཇིབས་པ་ན། སོས་འདེབས་པ་འམ་གཡའ་བར་གྱུར་ན། ནད་མེད་པའི་ཁྲག་བསྲུང་བའི་འབུ་དེ་གདོན་པར་བྱའོ། །བཏོན་ནས་ཀྱང་ཁྲག་སྐྱུག་ཏུ་གཞུག་གོ །དེ་བཞིན་དུ་རྒྱམ་ཚ་དང༌། ཏིལ་མར་སྦྱར་བས་ཁ་བསྐུ་བར་བྱའོ། །དེ་བཞིན་དུ་ཕྱེ་མ་འཇམ་པོས་ཀྱང་གཏོར་བར་བྱ་ཞིང༌། མཇུག་མ་ནས་ཡར་བཙིར་ཏེ་སློན་དུ་གཞུག་པར་བྱའོ། །སླར་ཡང་ཞག་བདུན་བར་དུ་ནི། ཁྲག་མྱོས་བསྲུངས་ལ་འཐུང་མི་གཞུག །ཅེས་བྱ་བ་ལ། དེ་ལྟར་སྔར་བྱས་ནས་ཞག་བདུན་གྱི་བར་དུ་འཇིབ་ཏུ་མི་གཞུག་གོ །སྲིན་བུ་པད་པ་ལེགས་སྐྱུགས་ན། །སྔོན་བཞིན་ཁོང་གྲིམས་བརྟན་པར་འགྱུར། །དྲགས་ན་དལ་ཞིང་སྙོམ་འཆི་འགྱུར། །སྐྱུགས་མ་ལེགས་ན་རེངས་མྱོས་འགྱུར། །ཞེས་བྱ་བ་ལ། །སྲིན་པུ་པད་པ་སྐྱུགས་ལེགས་ན་ཁྲག་མ་འཐུངས་པའི་སྔོན་བཞིན་དུ་ཁོང་གྲིམས་ཤིང་བརྟན་པར་འགྱུར་རོ། །དེ་སྐྱུགས་དྲགས་ན་ལུས་སྙོམ་པའམ་འཆི་བར་འགྱུར་རོ། །སྐྱུགས་མ་ལེགས་ན་ནི་རེངས་ཤིང་མྱོས་པར་
འགྱུར་རོ། །བུམ་པ་ཆུ་དང་ས་བླུགས་པ། །གཞན་དང་གཞན་དུ་གཞག་པར་བྱ། །ཁ་ཆུ་རུལ་བག་སྦྱང་ཕྱིར་བྱ། །གཞན་དུ་དུག་དང་བཅས་པར་འགྱུར། །ཞེས་བྱ་བ་ལ། པད་བ་དེ་ནི་བུམ་པ་དང༌། ཆུ་དང་ས་གཙང་མ་བླུགས་པ། དེ་ལྟ་བུ་མི་མཐུན་པ་གཞན་དང་གཞན་དག་ཏུ་གཞག་པར་བྱ་སྟེ། དེ་ཁ་ཆུ་དང་རུལ་བག་སྤང་བའི་ཕྱིར་ཡིན་ནོ། །དེ་ལྟར་མ་བྱས་ན་ནི་རྒྱུ་དེས་དུག་ཅན་དུ་འགྱུར་རོ། །མ་དག་པ་འམ་ཁྲག་མ་དབྱུང༌། །སྐྱེར་པ་བུ་རམ་སྦྲང་རྩིས་བསྐུ། །ཞེས་བྱ་བ་ལ། ཁྲག་མ་དག་པར་གྱུར་ན་སྲིན་བུ་དེ་བསྐྱེད་ལ། སྐྱེར་པ་ལ་སོགས་པས་བསྐུ་བར་བྱའོ། །ལན་བརྒྱར་དཀྲུགས་མར་རས་བལ་གྱི། །ཡེའུ་ས་བྱུགས་ལ་སྨན་བསིལ་བསྐུ། །ཞེས་བྱ་བ་ལ། ཁྲག་གཞིབས་ཟིན་ནས་མར་ལན་བརྒྱར་དཀྲུགས་ཤིང་བཞུས་པ། །རས་བལ་གྱི་ཡེའུས་བསྐུ་བ་དང༌། སྨན་བསིལ་བག་གིས་བསྐུ་བར་བྱའོ། །ནད་ཀྱི་ཁྲག་དང་བྲལ་གྱུར་ན། །འཕྲལ་དུ་རྩ་དམར་ནད་མེད་འགྱུར། །ཞེས་བྱ་བ་ལ། ནད་ཁྲག་མ་ལུས་པར་ཕྱིན་པར་གྱུར་པ་དང༌། དེའི་མོད་ལ་རྩ་དམར་བ་དང༌། ནད་དུ་གྱུར་པ་ཞི་བར་འགྱུར་རོ། །མ་དག་གནས་ནས་བསྐྱོད་གྱུར་པ། །རྨ་ཡི་གནས་སུ་འདུག་པའི་ཁྲག །ཞག་ལོན་ན་ནི་རྣག་པར་འགྱུར། །དེ་བས་དེ་ནི་སླར་དབྱུང་ངོ༌། །ཞེས་བྱ་བ་ལ། ཁྲག་མ་དག་ཅིང་ནད་དང་བཅས་པ་རང་རང་གི་གནས་ནས་བསྐྱོད་ཅིང་འཕོས་ཏེ་རྨའི་གནས་སུ་འདུག་པ་ནི་མཚན་མོ་འདས་ཤིང་ཞག་ལོན་ན་རྣག་པར་འགྱུར་རོ། །དེ་བས་ན་ཁྲག་དེ་སླར་དབྱུང་བར་བྱ་ཞིང་བསལ་བར་བྱའོ། །མཁྲིས་རྒྱས་ཁྲག་གི་ནད་ལ་ནི། །ཀུ་བ་བུམ་པ་སྦྱར་མི་བྱ། །དེ་གཉིས་མེ་དང་བས་པ་ཡིན། །རླུང་དང་བད་ཀན་ལ་སྦྱར་བྱ། །ཞེས་བྱ་བ་ལ། མཁྲིས་པ་རྒྱས་ཤིང་ཤས་ཆེ་བ་ལས་བྱུང་བའི་ཁྲག་གི་ནད་ལ་ནི། ཁྲག་དེ་དབྱུང་བའི་ཕྱིར་སྔར་བཤད་པའི་ཀུ་བ་དང༌། བུམ་པ་གླན་ཅིང་སྦྱར་བས་ཁྲག་དབྱུང་བར་མི་བྱ་སྟེ། གང་གི་ཕྱིར་གཉིས་པ་དེ་དག་ནི་ནང་ན་མེ་དང་བཅས་པ་ཡིན་པའི་ཕྱིར། ཁྲག་གི་སྐྱེ་གནས་མཁྲིས་པ་
དང། ནུས་པ་མཐུན་པས་གནོད་པ་ཡིན་ནོ། །རླུང་དང་བད་ཀན་ཤས་ཆེ་བའི་ནད་ལ་ནི། ཀུ་བ་དང་བུམ་པ་སྦྱར་བས་ཁྲག་དབྱུང་བར་བྱ་སྟེ། དེ་གཉིས་ཀྱི་གཉེན་པོར་གྱུར་བ་ཡིན་པའི་ཕྱིར་རོ། །བད་ཀན་ལས་གྱུར་ནད་ཁྲག་ནི། །སྐ་བས་རྔབས་རྭས་གཞིབ་མི་བྱ། །རླུང་དང་མཁྲིས་པ་ལས་གྱུར་ཁྲག །རྔབས་རས་གཞིབས་ཏེ་དབྱུང་བར་བྱ། །ཞེས་བྱ་བ་ལ། བད་ཀན་ལས་གྱུར་བའི་ནད་ཁྲག་ནི། །སྐ་ཞིང་ལྕི་བག་ཅན་ཡིན་པས། །རྔབས་རྭས་གཞིབ་ཅིང་དབྱུང་བར་མི་བྱ་ལ། རླུང་དང་མཁྲིས་བ་ལས་གྱུར་པའི་ཁྲག་ནི་སླ་བ་ཡིན་པས་རྔབས་རས་གཞིབ་ཅིང་དབྱུང་བར་བྱའོ། །ལུས་ཀྱི་གོང་དུ་སྲད་བུ་འམ། །རས་ཀྱིས་དམ་དུ་བཅིངས་ནས་ནི། །ཆུ་བ་ཚིགས་རུས་གནད་རྣམས་ནི། །དོར་ཏེ་ཞལ་ཞལ་གདབ་པར་བྱ། །གྱེན་དུ་དབྱུང་བའི་ཐབས་ཀྱིས་ནི། །ཐུར་དུ་འབབ་པར་གདབ་པར་བྱ། །ཟབ་དང་ཉེ་དང་འཕྲེད་མི་གདབ། །བཏབ་པའི་གནས་སུ་འང་གདབ་མི་བྱ། །ཞེས་བྱ་བ་ལ། ཞལ་ཞལ་གདབ་པར་བྱ་བའི་ལུས་ཀྱི་གོང་ཕྱོགས་སུ་སྲད་བུ་འམ། རས་གང་ཡང་རུང་བས་དམ་དུ་བཅིངས་ནས་ཆུ་བལ་སོགས་པ་དོར་ཞིང་སྤངས་ནས་གཙགས་བུས་ཞལ་ཞལ་གདབ་པར་བྱ་ལ། དེ་ཡང་གྱེན་དུད་བྱུང་ཞིང་གདབ་པའི་ཐབས་ཀྱིས་ཁྲག་ཐུར་དུ་འབབ་པར་གདབ་པར་བྱའོ། །དེ་བཞིན་དུ་ནང་དུ་ཟབ་པར་ཡང་མི་བྱ་སྟེ། ཉེ་ཞིང་བར་མཚམས་མེད་པར་ཡང་མི་གདབ། འཕྲེད་འགྲོས་ཀྱིས་ཀྱང་མི་གདབ་པོ། །དེ་བཞིན་དུ་གཙགས་བུ་བཏབ་ཟིན་པའི་གནས་སུ་གཉིས་པ་གདབ་པར་ཡང་མི་བྱའོ། །ཞལ་ཞལ་བྱ་བ་ཕྱོགས་གཅིག་འདུས། །རྩ་མདུད་སྲིན་བུས་ཁྲག་དབྱུང་ཞིང༌། །བེམ་བེམ་པོར་གྱུར་རྭ་སོགས་གདབ། །ནད་ཁྲག་ལུས་ཁྱབ་གཏར་ག་གདབ། །ཅེས་བྱ་བ་ལ། ཕྱོགས་གཅིག་ཏུ་འདུས་པའི་ཁྲག་ནི། ཞལ་ཞལ་གདབ་པས་དབྱུང་བར་བྱའོ། །དེ་བཞིན་དུ་རྩ་མདུད་དམ། རྨེན་བུར་འདུས་པའི་ཁྲག་ནི་སྲིན་བུ་པད་བས་དབྱུང་བར་བྱའོ། དེ་བཞིན་དུ་ཁྲག་གི་ཁྲག་བེམ་བེམ་པོར་གྱུར་ཅིང་ཚོར་བ་མེད་པ་ནི་རྩ་སོགས་ཏེ། རྔབས་རྭ་དང༌། ཀུ་བ་དང༌། བུམ་པ་དག་གིས་ནད་དམིགས་ཇི་བཞིན་དུ་
དབྱུང་བར་བྱའོ། །དེ་བཞིན་དུ་ནད་ཁྲག་གིས་ལུས་ཀུན་ཏུ་ཁྱབ་པར་གྱུར་པ་དེ་ནི་གཏར་ག་གདབ་པས་དབྱུང་བར་བྱའོ། །ཁྲག་ནད་འདུས་པ་ཞལ་ཞལ་བྱ། །གཏིང་ན་ཡོད་པ་བད་པས་དབྱུང༌། །ལྤགས་གནས་ཀུ་བུམ་རྔབས་རྭས་དབྱུང༌། །ལུས་ཁྱབ་ཁྲག་ལ་གཏར་ག་ཉིད། །ཅེས་བྱ་བ་ལ། ཁྲག་ནད་འདུས་ཤིང་གོང་པོར་འདྲིལ་བ་ལ་ནི། ཞལ་ཞལ་གདབ་པར་འོས་པ་ཡིན་ནོ། །དེ་བཞིན་དུ་ཁྲག་གཏིང་ན་ཡོད་ཅིང་ནང་དུ་ཞེན་པ་དག་ནི་སྲིན་བུ་བད་པས་དབྱུང་བར་བྱའོ། །ཁྲག་པགས་པར་གནས་ཤིང་རྒྱས་པར་གྱུར་པ་ནི། ཀུ་བ་དང༌། བུམ་པ་དང༌། རྔབས་རྭས་དབྱུང་བར་བྱའོ། །ལུས་ཐམས་ཅད་ཁྱབ་ཅིང་རྒྱས་པའི་ནད་ཁྲག་ནི་གཏར་གའི་ཐབས་ཉིད་ཀྱིས་དབྱུང་བར་བྱའོ། །རླུང་སོགས་གནས་ལ་རྔབས་རྭ་དང༌། །པད་བ་ཀུ་བས་རིམ་བཞིན་དབྱུང༌། །ཞེས་བྱ་བ་ལ། རླུང་ལ་སོགས་པའི་ནད་ཀྱི་གནས་ལ་གནས་པའི་ཁྲག་དེ་ནི་གནས་དེ་ལས་རྔབས་རྭ་ལ་སོགས་པ་ཐབས་གསུམ་གྱིས་ཁྲག་དབྱུང་བར་བྱ་སྟེ། དེས་ནི་རླུང་གི་གནས་ཀྱི་ཁྲག་ནི་རྔབས་རྭས་དབྱུང་བར་བྱའོ། །མཁྲིས་པའི་གནས་ཀྱི་ཁྲག་ནི་སྲིན་བུ་བད་པས་དབྱུང་བར་བྱའོ། །བད་ཀན་ཀྱི་གནས་ཀྱི་ཁྲག་ནི་ཀུ་བས་དབྱུང་བར་བྱའོ། །ཁྲག་ཕྱུང་བསིལ་བསྐུས་ལ་སོགས་པས། །རླུང་ནི་རྣམ་པར་འཁྲུགས་གྱུར་ཏེ། །རྨ་ན་གཡའ་ཞིང་སྐྲངས་གྱུར་ན། །དེ་ལ་ཞུན་མར་དྲོན་པོས་བསྐུ། །ཞེས་བྱ་བ་ལ། སྐྱེས་བུའི་ལུས་ལས་ཁྲག་དབྱུང་ཞིང་བཏོན་པར་གྱུར་པ་དག་ལ་ནི། བསིལ་བའི་སྨན་གྱི་ལྡེ་གུས་བསྐུ་བ་དང༌། བླུགས་པ་ལ་སོགས་པས་རླུང་རྣམ་པར་འཁྲུགས་པར་གྱུར་ཏེ། རྨ་ན་བ་དང༌། གཡའ་བདེ་ལ་ཞུན་མར་དྲོན་པོས་བསྐུ་ཞིབ་བྱུག་པར་བྱའོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ། ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་དེས་པར་སྦྱར་བ་ལས། ལེའུ་ཉི་ཤུ་རྩ་དྲུག་པའི་རྣམ་པར་འགྲེལ་པའོ།། །།དེ་ནས་གཏར་ག་གདབ་པའི་ཆོ་གའི་ལེའུ་བཤད་པར་བྱའོ། །ཞེས་བྱ་བ་ལ། འདི་བརྩམས་པའི་དགོས་
པ་ནི་འདི་ཡིན་ཏེ། ལུས་ཁྱབ་པའི་ཁྲག་ལ་གཏར་ག་གདབ་པར་བྱའོ། །ཞེས་སྔར་བཤད་པས་ནི། དེའི་འོག་ཏུ་འདི་བརྩམས་པ་ཡིན་ཏེ། རྩ་རྣམས་དབུག་ཅིང་གདབ་པའི་ལས་ནི་གཏར་ག་གདབ་པ་སྟེ། དེའི་ཆོ་ག་འདི་དང་འདི་ལྟར་བྱའོ། །ཞེས་བྱ་བ་ནི་ལས་ཀྱི་ཚུལ་ཡིན་ཏེ། དེའི་ལེའུ་བཤད་པར་བྱའོ། །ཅུང་ཟད་མངར་ཞིང་ཚྭ་བྲོ་ལ། །གྲང་དང་ཚ་མིན་སྐ་བ་མིན། །པདྨ་ལྷམ་བུ་ཆུ་གཤེར་དང༌། །བཙོད་དང་རི་བོད་ཁྲག་ལྟར་དམར། །དག་ཅིང་དམར་བར་འབྱུང་བ་ནི། །དེ་ཉིད་ཀྱིས་ནི་ལུས་གནས་བྱེད། །ཅེས་བྱ་བ་ལ། ཁྲག་དག་ཅིང་ནད་མེད་པ་ནི། ཅུང་ཟད་རོ་མངར་བ་དང༌། ཅུང་ཟད་རོ་ལན་ཚྭ་བྲོ་བ་དང༌། དེ་བཞིན་དུ་གྲང་བ་དང༌། ཚ་བ་གཉི་ག་མ་ཡིན་པ་ཚ་གྲང་སྙོམས་པར་གནས་ཏེ་ཟླ་བ་དང༌། མེའི་རང་བཞིན་གཉི་གའི་ཡོན་ཏན་དང་ལྡན་པ་དང༌། དེ་བཞིན་དུ་སྐ་བ་མ་ཡིན་ཞིང༌། བདེ་བླག་ཏུ་འཛག་པ་དང༌། དེ་བཞིན་དུ་པདྨ་དང༌། སྲིན་བུ་མེ་ཁྱེར་ལ་སོགས་པ་ལྟར་དམར་ཞིང་དང་བར་འབྱུང་བ་ནི་སྐྱོན་མེད་པ་ཡིན་ལ། ནད་མེད་པའི་ཁྲག་དེ་ཉིད་ཀྱིས་ནི་ལུས་གནས་ཤིང་འཇུག་པར་འགྱུར་བ་ཡིན་ནོ། །དེ་ནི་ཕལ་ཆེར་བད་མཁྲིས་ཀྱི། །ནད་ཀྱིས་འཁྲུགས་པས། ཞེས་བྱ་བ་ལ། ཁྲག་དམར་ཞིང་དངས་པ་དེ་ནི་ཕལ་ཆེར་ཏེ་མང་དུ་བད་ཀན་དང་མཁྲིས་པ་སྐྱེད་པར་བྱེད་པའི་ཁ་ཟས་དང༌། སྤྱོད་ལམ་དང་སྨན་གྱིས་ནད་འཁྲུགས་པར་འགྱུར་ཞིང་ལྡང་བར་བྱེད་པ་ཡིན་ནོ། །ཕལ་ཆེར་ཞེས་སྨོས་པས་ནི་ལན་འགའ་ནི་རླུང་གིས་ཀྱང་ལྡང་བར་བྱེད་པ་ཡིན་ནོ། །གནོད་སྐྱེད་པ། །མེ་དཔལ་འབྲས་དང་མཆེར་ནད་དང༌། །སྐྲན་དང་མེ་དྲོད་འབྲི་དང་རིམས། །ཁ་དང་མིག་དང་མགོ་ནད་དང༌། །མྱོས་དང་སྐོམ་དང་ཚ་བྲོ་དང༌། །མཛེ་ནད་དྲེག་ནད་མཁྲིས་ཁྲག་དང༌། སྒྲེགས་པ་སྐྱུར་ཞིང་མགོ་འཁོར་བྱེད། །ཅེས་བྱ་བ་ལ། དེའི་འོག་ཏུ་ནད་ཁྲག་དེས་གནོད་པ་སྐྱེད་པར་བྱེད་པ་ནི། མེ་དབལ་ལ་སོགས་སྐྱེད་པར་བྱེད་པ་ཡིན་ནོ། །ཁ་ལ་སོགས་པ་གསུམ་ནི། །ནད་ཅེས་བྱ་བ་དང་སྦྱར་རོ། །དྲེག་ནད་ནི་
རླུང་དང་ཁྲག་འདྲེས་བའོ། །བསིལ་དྲོ་སྣུམ་དང་རྩུབ་སོགས་དང༌། །ནད་གང་གསོས་པར་གྱུར་བ་ན། །ལེགས་པར་འཆོས་བར་མ་གྱུར་བ། །དེ་ནི་ཁྲག་འཁྲུགས་ལས་གྱུར་ཡིན། །ཞེས་བྱ་བ་ལ། བསིལ་བ་དང་དྲོ་བ་དང་སྣུམ་པ་དང༌། རྩུབ་པ་དང༌། ལྕི་བ་དང༌། ཡང་བ་ལ་སོགས་པའི་ཐབས་སྨན་དཔྱད་ལས་ཇི་ལྟར་འབྱུང་བ་བཞིན་དུ་རླུང་དང་མཁྲིས་པ་དང་བད་ཀན་གྱི་ནད་གང་སོས་ཤིང་བཅོས་པར་གྱུར་པ་ན། ལེགས་པར་འཆོས་པར་མ་གྱུར་ཅིང་ཉེ་བར་མ་ཞིན་ནད་དེ་ནི་ཁྲག་འཁྲུགས་ལས་གྱུར་བ་ཡིན་པར་ཤེས་པར་བྱ་སྟེ། མེ་དབལ་ལ་སོགས་པ་སྔར་བཤད་པ་འབའ་ཞིག་ཏུ་མ་ཟད་དོ། །ཁྲག་བདོར་གྱུར་པ་དེ་ལས་ནི། །གཏར་ག་གདབ་པས་དབྱུང་བར་བྱ། །ཞེས་བྱ་བ་ལ། སྔར་བཤད་པའི་ནད་ཁྲག་བདོ་བར་གྱུར་པ་དེ་ལས་ཁྲག་དབྱུང་བར་བྱ་བའི་ཕྱིར། གཏར་ག་གདབ་པར་བྱའོ། །དེ་ཡང་བཅུ་དྲུག་མ་ལོན་དང༌། །བདུན་ཅུ་འདས་ལ་ཁྲག་མི་དབྱུང༌། །ཉམ་ཆུང་དུགས་དྲགས་དུགས་མ་བྱས། །རླུང་གི་ནད་ཀྱིས་ཉེན་པ་དང༌། སྦྲུམ་མ་བུ་བཙས་ཟན་མ་ཞུ། །ཁྲག་མཁྲིས་ལུད་པ་དབུགས་མི་བདེ། །ཚད་འཁྲུ་རིམས་དང་སྐྱུགས་པ་དང༌། །སྐྱ་རྦབ་ཡན་ལག་ཀུན་སྐྲངས་དང༌། །སྣུམ་འཐུངས་པ་ལ་སྦྱོར་བ་དང༌། །དེ་བཞིན་ལས་ལྔ་བྱས་ལ་མིན། །ཞེས་བྱ་བ་ལ། གཏར་ག་གདབ་པ་དེ་ལ་བྱིས་པ་ལོ་བཅུ་དྲུག་མ་ལོན་པ་དང༌། རྒན་པོ་ལོ་བདུན་ཅུ་འདས་པ་དག་ལ་གཏར་གས་ཁྲག་དབྱུང་ཞིང་གདོན་པར་མི་བྱའོ། །དེ་བཞིན་དུ་ཉམ་ཆུང་ཞིང་ཁོང་རྩུབ་པ་དང༌། དུགས་དྲགས་པ་དང༌། དུགས་མ་བྱས་པ་ནས་སྣམ་འཐུངས་པ་སྦྱོར་བའི་སྐྱེས་བུའི་བར་དང༌། དེ་བཞིན་དུ་ལས་ལྔ་པོ་སྐྱུགས་སྨན་དང༌། བཀྲུ་སྨན་དྲག་པོ་དང་མས་གཏོང་བ་དང༌། འཇམ་རྩི་དང༌། མགོ་བོའི་བཀྲུ་སྨན་བཏང་བ་སྟེ། ལས་ལྔ་པོ་བྱས་པ་ལ་གཏར་ག་གདབ་པར་མི་བྱའོ། །མ་བསྡམས་གཏར་ག་མི་གདབ་ཅིང༌། །ཡོན་པོ་འམ་མི་སྣང་ལ་མི་གདབ། །ཚབས་ཆེན་ནད་ནི་མ་གཏོགས་པ། །གྲང་ལ་ཚ་ཆར་རླུང་དུས་མིན། །ཞེས་བྱ་བ་ལ། ཆིངས་མས་མ་བསྡམས་པ་གཏར་ག་གདབ་པར་མི་བྱའོ། །དེ་
བཞིན་དུ་ཡོན་པོར་བྱ་བའམ། རྩ་མི་སྣང་བར་ཡང་གཏར་ག་གདབ་པར་མི་བྱའོ། །ནད་ཚབས་ཆེ་བ་དེས་གསོ་བར་བྱ་བ་བཤོལ་དུ་མེད་པ་མ་གཏོགས་པ། གཞན་དག་གྲང་བ་དང༌། ཚ་བ་དང༌། ཆར་དང་རླུང་གི་དུས་སུ་གདབ་པར་མི་བྱ་སྟེ། ནད་ཚབས་ཆེ་བ་ལ་ནི་དེ་དག་གི་ཚེ་ཡང་བྱ་བར་འབྱུང་ངོ༌། །མགོ་དང་མིག་གི་ནད་རྣམས་ལ། །དཔྲལ་བའི་རྩ་ལ་གཏར་བའམ། །མིག་འགྲམ་སྣ་དྲུང་རྩ་ལ་གདབ། །ཅེས་བྱ་བ་ལ། མགོ་དང་མིག་གི་ནད་རྣམས་ལ་ནི། དཔྲལ་བའི་སྟེང་ན་ཡོད་པའི་རྩ་འམ། མིག་འགྲམ་མམ། སྣ་དྲུང་ན་ཡོད་པའི་རྩ་ལ་གདབ་པར་བྱའོ། །རྣ་བའི་ནད་ལ་རྣ་བའི་རྩ། །ཞེས་བྱ་བ་ལ། རྣ་བའི་ནད་རྣམས་ལ་ནི་རྣ་བ་དང་ཉེ་བར་གནས་པའི་རྩ་ལ་གདབ་པར་བྱའོ། །སྣ་ཡིན་ད་ལ་སྣ་རྩེར་རོ། །ཞེས་བྱ་བ་ལ། སྣའི་ནད་རྣམས་ལ་ནི་སྣའི་རྩེ་མོའི་ཆ་ལ་གནས་པའི་རྩ་ལ་གདབ་པར་བྱའོ། །ཆམ་པ་སྣ་དང་དཔྲལ་རྩར་གདབ། །ཅེས་བྱ་བ་ལ། ཆམ་པའི་ནད་ལ་ལན་འགའ་ནི་སྣ་རྩར་གདབ་ན་ཕན་ནོ། །ལན་འགའ་ནི་དཔྲལ་རྩའོ། །ལན་འགའ་ནི་གཉི་ག་གདབ་པར་བྱའོ། །ཁ་ནད་རྣམས་ལ་ལྕེ་དང་ནི། །མཆུ་དང་རྐན་གྱི་རྩར་གདབ་པོ། །ཅེས་བྱ་བ་ལ། ཁའི་ནད་རྣམས་ལ་ནི་ལྕེ་ལ་བརྟེན་པའི་རྩ་དང༌། དེ་བཞིན་དུ་མཆུ་དང་རྐན་གྱི་རྩ་ལ་གདབ་ན་ཕན་ནོ། །ནམ་ཚོང་ཡན་ཆད་རྩ་མདུད་འགུལ། །རྣ་བ་མུར་འགྲམ་སྤྱིར་གནས་གདབ། །ཅེས་བྱ་བ་ལ། ནམ་ཚོང་ཡན་ཆད་ཀྱི་ནད་རྩ་མདུད་དང༌། རྨེན་བུ་ལ་སོགས་པའི་ནད་ལ་རྣ་བ་ལ་བརྟེན་པའི་རྩ་དང༌། མུར་འགྲམ་དང་སྤྱི་བོར་གནས་པའི་རྩ་ལ་གདབ་པར་བྱའོ། །སྨྱོ་བྱེད་མིག་འགྲམ་བྲང་དཔྲལ་རྩ། །ཞེས་བྱ་བ་ལ། སྨྱོ་བྱེད་ཀྱི་ནད་ལ་ནི་མིག་འགྲམ་རྩ་དང༌། བྲང་གི་རྩ་དང༌། དཔྲལ་བའི་རྩ་ལ་གཏར་ག་བྱའོ། །བརྗེད་བྱེད་འགྲམ་པའི་མཚམས་སུ་གདབ། །ཅེས་བྱ་བ་ལ། བརྗེད་བྱེད་ཀྱི་ནད་ལ་འགྲམ་པ་གཉིས་ཀྱི་མཚམས་ན་ཡོད་པའི་རྩ་ལ་གདབ་པོ། །ཡང་ན་ཀུན་ལ་སྨིན་མཚམས་གདབ། །ཅེས་བྱ་བ་ལ། སྔར་བཤད་པའི་ནད་མགོ་དང་མིག་ལ་སོགས་པའི་ནད་མ་ལུས་བ་ཀུན་ལ། སྨིན་མཚམས་ཀྱི་བར་ན་ཡོད་པའི་རྩ་གང་ཡིན་པ་དེ་ལ་གདབ་པར་བྱའོ། །འབྲས་དང་
རྩིབ་ལོགས་ཟུག་པ་ལ། །རྩིབ་ལོགས་ནུ་མའི་བར་རྩ་གདབ། །ཅེས་བྱ་བ་ལ། འབྲས་མཆེད་པའི་ནད་དང༌། རྩིབ་ལོགས་གཉིས་སུ་ཟུག་ཅིང་གཟེར་བའི་ནད་ལ་རྩིབ་ལོགས་དང༌། ནུ་མའི་བར་ན་ཡོད་པའི་རྩར་གདབ་པར་བྱའོ། །ཉིན་གསུམ་པ་ལ་ཕྲག་མཚམས་གདབ། །ཉིན་བཞི་པ་ལ་ལྟག་པའི་འོག །ཅེས་བྱ་བ་ལ། རིམས་ཉིན་གསུམ་པ་ལ་ཕྲག་པ་གཉིས་ཀྱི་བར་མཚམས་ཀྱི་ནང་གི་རྩར་གདབ་པར་བྱའོ། །རིམས་ཉིན་བཞི་པ་ལ་ནི་ལྟག་པའི་འོག་ན་གནས་པའི་རྩ་གང་རུང་བར་གདབ་པར་བྱའོ། །འཁྲུ་བ་གཟེར་དང་ལྡན་པ་ལ། །མཇུག་ཏོའི་གོང་མ་སོར་གཉིས་བར། །ཞེས་བྱ་བ་ལ། ཚད་པས་འཁྲུ་བས་ཉེ་བར་གཙེས་ཤིང་གཟེར་དང་ལྡན་པ་དག་ལ་མཇུག་ཏོའི་རྩ་མཇུག་མ་སོར་གཉིས་གོང་དུ་གཞལ་བར་གདབ་པར་བྱའོ། །ཁུ་བའི་མཚན་ནད་ཕོ་མཚན་རྩ། །ཞེས་བྱ་བ་ལ། ཁུ་བ་འགགས་པ་ལ་སོགས་པའི་ནད་དང་ཕོ་མཚན་ཉིད་ཀྱི་ནད་ལ་ནི། ཕོ་མཚན་ལ་བརྟེན་བའི་རྩ་ལ་གཏར་ག་བྱའོ། །ལྐོག་མའི་ལྦ་བར་བརླ་རྩར་གདབ། །ཞེས་བྱ་བ་ལ། ལྐོག་མར་ལྦ་བ་སྐྱེ་བའི་ནད་ལ་བརླའི་རྩ་བར་གནས་པའི་རྩ་ལ་གཏར་ག་བྱའོ། །གཟུགས་འཁུམས་པུས་མཐིལ་འོག་གམ་ནི། །གོང་གི་སོར་བཞི་པ་ལ་གདབ། །ཅེས་བྱ་བ་རླུང་གི་ནད་གཟུགས་འཁུམས་ཤིང་འཇས་པ་ལ་ནི། པུས་མོའི་མཐིལ་གྱི་འོག་དང༌། གོང་དུ་སོར་བཞི་གཞལ་བར་གདབ་པར་བྱའོ། །འབྲས་ཀྱི་ཕྲེང་བར་བྱིན་པའི་ཉྭའི། །འོག་ཏུ་སོར་གཉིས་པར་གདབ་པོ། །ཞེས་བྱ་བ་ལ། འབྲས་ཀྱི་ཕྲེང་བའི་ནད་ལ་ནི། བྱིན་བའི་ཉ་གནད་ཅེས་བྱ་བའི་འོག་སོར་གཉིས་གཞལ་བར་གཏར་ག་གདབ་པོ། །རྐུབ་ཚོས་པུས་མོའི་ལྷ་ངའི་སྟེང༌། །ནད་ལ་ལོང་མོའི་ལྟག་སོར་བཞིར། །ཞེས་བྱ་བ་ལ། རྐུབ་ཚོས་ཀྱི་རླུང་ནད་དམ། པུས་མོའི་ལྷང་སྟེང་གི་ནད་ལ་ལོང་མོ་ལྟག་ཏུ་སོར་བཞི་བཅལ་བར་གཏར་ག་བྱའོ། །རྐང་ཚ་འཐེང་དང་སྦྲིད་པ་དང༌། །རྟིང་རྡོལ་རླུང་ནད་མཛེར་པ་དང༌། །རྐང་སོར་སྣགས་སུ་ཆད་པ་ལ། །རྒྱ་ཚིགས་ལས་གོང་སོར་གཉིས་གདབ། །ཅེས་བྱ་བ་ལ། རླུང་གི་ནད་རྐང་པ་ཚ་བ་ཞེས་བྱ་
བ་དང༌། རྐང་པ་སྦྲིད་པ་དང༌། རྟིང་པ་རྡོལ་བ་རླུང་ནད་ཀྱི་མཛེར་པ་དང༌། རྐང་པའི་སོར་མོ་སྣགས་སུ་ཆད་པ་ཞེས་བྱ་བའི་ཁྲག་ལས་གྱུར་པའི་སོར་མོའི་ནད་རྣམས་ལ། རྒྱ་ཚིགས་ལས་གོང་དུ་སོར་གཉིས་གཞལ་བར་གདབ་པར་བྱའོ། །འཁུམས་ལ་རྐང་འཁུམས་ལྟ་བུར་གདག། ཅེས་བྱ་བ་ལ། རླུང་ནད་ལ་བུམས་པ་བྱི་ཤ་ཙེ། །ཞེས་བྱ་བ་ལ། པུས་མོའི་གོང་སོར་བཞི་པར་གདབ་པར་བྱའོ། །ཇི་སྐད་བཤད་པ་མ་མངོན་ན། །གནད་མ་གཏོགས་པར་གར་ཉེ་བའི། །ཕྱོགས་གཞན་དག་ཏུ་གཏར་ག་གདབ། །ཅེས་བྱ་བ་ལ། གོང་དུ་ཇི་སྐད་བཤད་པའི་རྩ་རྣམས་མངོན་པར་མ་གྱུར་ན། ནད་འཕེལ་བར་འགྱུར་བའི་དབང་གིས་ནད་པ་ལ་གཏར་ག་རིངས་པར་བྱ་དགོས་ན། གནད་མ་གཏོགས་ཤིང་གནད་ལ་མ་ཕོག་བར། ནད་གང་དང་གདབ་པ་བ་ཉེ་ཞིང་འབྲེལ་བའི་ཕྱོགས་གཞན་དག་གི་རྩ་བཤད་པ་དག་ཀྱང་མངོན་ན་གདབ་པར་བྱའོ། །དེ་ནས་ལུས་སྣུམ་གཏར་ག་ཡི། །ཡོ་བྱད་ཀུན་བསགས་སྟོབས་དང་ལྡན། །བཀྲ་ཤིས་བྱས་ཤིང་ཁ་ཟས་ནི། །སྣུམ་ཟོས་ཁུ་བ་འཐུངས་པ་དང༌། །མེ་དང་ཉི་ཚན་གྱིས་དུགས་བྱས། །པུས་མཉམ་མཐོ་བའི་སྟན་ལ་འདུག །སྐྲ་རྩ་རས་ནི་འཇམ་པོས་བཅིངས། །པུས་མོའི་ལྷ་དར་གྲུ་མོ་གཟུགས། །ཁུ་ཚུར་ནང་དུ་གློད་བཅུག་པས། །མགུལ་བ་དམ་དུ་བཙིར་བར་བྱ། །སོ་བསྡམས་ལུད་པ་དང༌། །མཁུར་བ་གཉིས་ནི་བུད་པར་བྱ། །ཞེས་བྱ་བ་ལ། དེ་ནས་ཞེས་བྱ་བའི་དོན་ནི། བཀྲ་ཤིས་བའི་དོན་ཡིན་པར་ཤེས་པར་བྱའོ། །གཏར་ག་བྱ་བའི་སྐྱེས་བུ་སྣུམ་གྱིས་ཞེན་པར་བྱ་བ་དང༌། སྨན་པས་གཏར་བ་ལ་དགོས་པའི་ཡོ་བྱད་ཀུན་བསག་ཅིང་ཉེར་བསྡོགས་སུ་བྱ་བ་དང༌། དེ་བཞིན་དུ་སྟོབས་དང་ལྡན་ཞིང་ཉམ་ཆུང་བ་ལ་མ་ཡིན་པ་དང༌། དགེ་སློང་དང་བྲམ་ཟེ་བཀྲ་ཤིས་དང་བདེ་ལེགས་བརྗོད་པ་དང༌། དེ་བཞིན་དུ་ཁ་ཟས་སྣུམ་ཞིང་ཤ་ཁུ་ལ་སོགས་པ་དང་ལྡན་པ་བྱིན་པ་དང༌། དེ་བཞིན་དུ་མེ་ཚན་དང༌། ཉི་ཚན་གྱིས་དུགས་བྱ་བ་དང༌། པུས་མོ་དང་མཉམ་པ་ཙམ་གྱི་མཐོ་བའི་སྟན་ལ་འདུག་པ་དང་དེ་བཞིན་དུ་སྐྲའི་རྩ་བ་རས་ཀྱི་ཚལ་པ་འཇམ་པོས་བཅིངས་ཤིང་བསྡམས་པ་དང༌། དེ་
བཞིན་དུ་པུས་མོ་གཉིས་ཀྱི་ལྷ་ངར་གྲུ་མོ་བརྟན་པོ་བཙུགས་ནས། རང་གི་ཁུ་ཚུར་ནང་དུ་གོས་ཀྱི་གློད་བཅུག་པས། མགུལ་པའི་ངོས་གཉིས་ནས་དམ་དུ་བཙིར་བར་བྱ་བ་དང༌། དེ་བཞིན་དུ་སོ་བསྡམས་ཤིང་བཙིར་ལ་མཁུར་བ་གཉིས་སུ་དེ་གནས་པར་བྱའོ། །དེ་ལ་རྒྱབ་ནས་བཙིར་བ་དང༌། །གོས་ཀྱིས་དཀྲིས་ཤིང་མཛུབ་མོ་ནི། །གཡོན་པ་ལྐོག་མར་བཅུག་ནས་སུ། །ནང་དུ་ལེགས་པར་གཞུག་པར་བྱ། །ཞེས་བྱ་བ་ལ། ནད་པ་དེ་ལ་སྐྱེས་བུ་གཞན་གྱིས་རྒྱབ་ནས་བཙིར་ཞིང་བསྡམས་པ་དང༌། གོས་ཀྱིས་དཀྲིས་པ་ལྟག་པར་བཅུག་ནས། ལྐོག་མ་དང་གོས་ཀྱི་བར་དུ་ལག་པ་གཡོན་པའི་མཛུབ་མོ་བཅུག་ནས་དབུགས་དགག་པ་ལ་མི་གནོད་པས་དེ་བསྡམ་པར་བྱའོ། །འདི་ནི་ནང་དུ་ཁ་བལྟས་རྩ། །མ་གཏོགས་བསྡམ་པའི་ཆོ་ག་ཡིན། །ཞེས་བྱ་བ་ལ། བསྡམ་པའི་ཆོ་གར་བཤད་པ་གང་ཡིན་པ་དེ་ནི་རྩ་ཁ་ཕྱི་རོལ་དུ་བལྟས་པ་བསྡམ་པའི་ཆོ་ག་ཡིན་གྱི། ཁ་ནང་དུ་བལྟས་པའི་རྩ་བསྡམ་པའི་ཆོ་གར་བཤད་པ་ནི་མ་ཡིན་ནོ། །ཁ་ནང་དུ་བལྟས་པའི་རྩ་བསྡམ་པ་ནི། །ལྕེ་བཏེག་བཟློག་སྟེ་སོས་མནན་ལ། །ཞེས་འོག་ནས་བཤད་པ་ཡིན་ནོ། །དེ་འོག་སྨན་པའི་མཐེ་པོ་ལས། །གུང་མོ་བཏང་བར་གྱུར་པ་ཡིས། །རྩ་བྱུང་མངོན་ལ་གདབ་བྱས་ནས། །རེག་པའམ་མཐེ་བོས་མནན་བྱས་ལ། །ལག་པ་གཡོན་པས་བཟུང་པ་ཡི། །གཙགས་བུ་སྟ་རེས་དབུས་སུ་གདབ། །གཙགས་བུའི་ཁ་ཕྱོགས་མི་ཡོ་གཏང༌། །དེ་བཞིན་གདབ་པའམ་བཙིར་བ་ཡི། །བེམ་རྟོལ་བརྡབས་ལ་ཁྲག་དབྱུང་ངོ༌། །ཞེས་བྱ་བ་ལ། དེ་ལྟར་བྱས་པའི་འོག་ཏུ་སྨན་པས་མཐེ་པོའི་སོར་མོ་ལས་གུང་མོ་བཏང་བར་གྱུར་བས་རྩ་ལ་གདབ་པར་བྱའོ། །རྩ་དེ་བྱུང་ཞིང་གཡོ་བར་གྱུར་པ་རེག་པས་ཤེས་པར་བྱ་བའམ། མཐེ་བོས་མནན་པས་ཤེས་པར་བྱའོ། །དེའི་འོག་ཏུ་གཙགས་བུ་སྟ་རེ་ལྟ་བུས་རྩའི་དབུས་མཚན་མ་བཏབ་ལ། ལག་པ་གཡོན་པས་གཟུང་བའི་གཙགས་བུ་སྟ་རེ་ལྟར་ཡུ་བ་གྱེན་དུ་བསྟན་ཏེ། ལག་པ་འདར་བ་མེད་བར་བྱས་ལ། སྔ་མ་བཞིན་དུ་མཐེ་བོ་ལས་གུང་མོ་བཏོང་བའི་བེམ་རྟོལ་བརྡབས་པས་ཁྲག་དབྱུང་བར་བྱ་བའམ།
མཐེ་བོའི་ལྟོས་མནན་ཏེ་གཏར་ག་གདབ་པར་བྱའོ། །སྣ་དྲུང་གི་ནི་རྩར་གདབ་པ། །རྩེ་མོ་མཐེ་བོས་བཏེག་ནས་ནི། །གཙགས་རྩེ་འབྲས་འདྲ་གདབ་པར་བྱ། །ཞེས་བྱ་བ་ལ། སྣ་དང་ཉེ་བ་ན་གནས་པའི་རྩར་གདབ་པ་ན། སྣའི་རྩེ་མོ་མཐེ་བོས་བཏེག་ནས་གཙགས་བུ་རྩེ་མོ་འབྲས་འདྲ་བས་གདབ་པར་བྱའོ། །ལྕེ་བཏེག་བཟློག་སྟེ་སོས་མནན་ལ། །ལྕེ་འོག་རྩར་ནི་གདབ་པར་བྱ། །ཞེས་བྱ་བ་ལ། ལྕེ་བཏེག་ཅིང་བཟློག་པའི་སྟེ། རྐན་གྱི་ཐོག་ཏུ་བསྡུས་ལ། སོས་རྣམ་པར་མནན་ནས། ལྕེའི་འོག་གི་རྩ་ལ་གཏར་ག་གདབ་པར་བྱའོ། །ནུ་མ་ཡན་ཆད་བསྡམས་ནས་ནི། །མགུལ་པར་གནས་པའི་རྩར་གདབ་པོ། །ཞེས་བྱ་བ་ལ། ནུ་མ་ཡན་ཆད་རས་ཀྱིས་ལེགས་པར་བསྡམས་ནས་མགུལ་པར་གནས་པའི་རྩར་གདབ་ཅིང་གཏར་ག་བྱའོ། །ལག་པ་གཉིས་སུ་རྡོ་བཅངས་ཏེ། །ལག་པ་པུས་མོར་བརྟེན་ཏེ་བཅངས། །མཆན་ཁུང་མན་ཆད་མཉེས་ནས་ནི། །གོང་དུ་བཅིངས་ལ་ལྟོ་རྩར་གདབ། །ཅེས་བྱ་བ་ལ། ལག་པ་གཉིས་ཀྱི་ནང་དུ་རྡོ་བ་བཅངས་པ་དེ་ལྟ་བུའི་ལག་པ་བུས་མོར་བརྟེན་ཏེ་བརྐྱང་བ་དང༌། དེ་བཞིན་དུ་མཆན་ཁུང་མན་ཆད་ལེགས་པར་མཉེས་ཏེ། ལག་པ་དེའི་འོག་ཏུ་བཅིངས་ལ་ལྟོ་རྩར་གདབ་པར་བྱའོ། །ལག་ངར་རྩ་ནི་བདེར་འདུག་སྟེ། །གདབ་པའི་སོར་བཞི་གོང་གི་ནི། །ཕྱོགས་སུ་རས་ཀྱིས་དམ་བཅིངས་ལ། །མཐེ་བོ་ཆང་བར་བཅུག་ནས་ནི། །ལག་དར་བརྐྱང་ལག་དབ་པར་བྱ། །ཞེས་བྱ་བ་ལ། ལག་དར་གཉིས་ཀྱི་རྩར་གདབ་པ་ནི། དང་པོ་བདེ་བར་འདུག་སྟེ། གར་གདབ་བའི་ས་སོར་བཞིའི་གོང་དུ་རས་ཀྱིས་དམ་པོར་བཅིངས་ལ། མཐེ་བོ་ཆང་པར་བཅུག་ནས་སོར་མོ་རྣམས་ཀྱིས་བསྡམས་ཏེ། ལག་ངར་ལེགས་པར་བརྐྱང་ལ་གདབ་པར་བྱའོ། །རྩིབ་ལོགས་རྩ་ནི་དཔུང་པ་གཉིས། །ཐུར་དུ་དཔྱངས་ཏེ་གདབ་པར་བྱ། །ཞེས་བྱ་བ་ལ། རྩིབ་ལོགས་གཉིས་སུ་གཏར་ག་གདབ་པ། དང་པོར་ནད་བའི་དཔུང་པ་གཉིས་ཐུར་དུ་དབྱངས་ལ་གདབ་བར་བྱའོ། །ཕོ་མཚན་རྩ་ནི་བཏེག་སྟེ་གདབ། །ཅེས་བྱ་བ་ལ། ཕོ་མཚན་ཀྱི་རྩ་ནི་བཏེག་ཅིང་ལས་སུ་རུད་བར་བྱས་ནས་
གདབ་པར་བྱའོ། །བྱིན་རྩ་པུས་མོ་མ་བཀུག་པར། །ཞེས་བྱ་བ་ལ། བྱིན་པའི་རྩ་ནི་བུས་མོ་མ་བཀུག་པར་བརྐྱང་སྟེ་གདབ་པར་བྱའོ། །རྐང་པ་ལེགས་བཞག་པུས་མོ་ལ། །འོག་ཏུ་ལག་པ་གཉིས་ཀྱིས་ནི། །ལོང་མོའི་བར་དུ་དམ་བཙིར་ལ། །རྐང་པ་དེ་སྟེང་གཉིས་པ་ནི། །ཅུང་ཟད་བཀུག་སྟེ་བཞག་པ་ཡིས། །མནན་ལ་དེ་ནས་ལག་པ་ལྟར། །རྩར་གདབ། ཅེས་བྱ་བ་ལ། རྐང་པའི་རྩར་གདབ་པའི་ཐབས་ནི། དེ་ཡང་རྐང་པ་ལེགས་པར་བཞག་ལ། བུས་མོའི་ཚིགས་ཀྱི་འོག་ཏུ། ལག་པ་གཉིས་ཀྱིས་དམ་དུ་ལོང་མོའི་བར་དུ་བཙིར་ལ། རྐང་པ་དེའི་སྟེང་དུ་རྐང་པ་གཉིས་ཅུང་ཟད་བཀུག་སྟེ་བཞག་ལ། ཅུང་ཟད་ཙམ་མནན་ནས་སྔར་ལག་པའི་རྩར་འདེབས་པ་བཞིན་དུ་གཏར་ག་གདབ་པའི་འོག་ཏུ་སོར་བཞི་ཙམ་གྱི་རས་ལ་སོགས་པས་དམ་དུ་བསྡམས་ལ་རྩར་གདབ་པར་བྱའོ། །དེ་ལྟར་མ་སྨོས་པའི། གཞན་དགལ་ཡང་གདབ་བྱ་ལ། །ཐབས་ཤེས་གཙགས་སྤྱད་དེ་དང་དེས། །ཕྱོགས་ནི་དེ་དང་དེ་རུ་གདབ། །ཅེས་བྱ་བ་ལ། དེ་ལྟར་རྣམ་པ་དེ་དག་གིས་རྩར་གདབ་པའི་གནས་མ་སྨོས་པའི་ཕྱོགས་གཞན་དག་ལ་ཡང་གདབ་པར་བྱ་བ་ཡིན་པས་ན། ཐབས་ཤེས་ཤིང་རྟོགས་པའི་སྨན་པས། གཙགས་སྤྱད་དེ་དང་དེ་རང་གི་བློས་ལེགས་པར་དབགས་ལ་གནས་ཀྱི་ཕྱོགས་དེ་དང་དེར་གདབ་པར་བྱའོ། །ཤ་ཆེ་བ་ཡི་ཕྱོགས་སུ་འདེབས། །འབྲས་འདྲ་འབྲས་ཀྱི་སྲིད་ཙམ་གདབ། །རུས་པའི་སྟེང་རྩ་སྟ་རེ་འདྲས། །ནས་ཀྱི་ཕྱེད་ཙམ་གདབ་པར་བྱ། །ཞེས་བྱ་བ་ལ། ཤ་ཆེ་བའི་ཕྱོགས་སུ་འབྲས་འདྲ་བའི་གཙགས་བུས་འདེབས་པར་བྱེད་ན། གཙགས་བུ་དབྱིབས་འབྲས་འདྲ་ཞིང་འབྲས་ཀྱི་ཚད་ཙམ་གདབ་པར་བྱའོ། །རུས་པའི་སྟེང་རྩ་ལ་འདེབས་ན་སྟ་རེ་འདྲ་བའི་གཙགས་བུས་ནང་དུ་ནས་ཀྱི་ཕྱེད་ཙམ་ནུབ་པར་གདབ་པར་བྱའོ། །གཏར་ག་གདབ་པ་ཐམས་ཅད་ལ་ཡང་ཁ་སྦུབ་པས་ཤིན་ཏུ་གཏིང་རིང་བར་མི་བྱ་བ་དང༌། དྲང་ཞིང་མ་འཆོལ་བ་དང༌། སྙོམས་ཤིང་གནོད་པ་མེད་པར་རྩ་དབུས་སུ་གཙགས་བུས་མྱུར་དུ་གདབ་པར་བྱའོ། །ལེགས་པར་བཏབ་ནས་
ཁྲག་གཟགས་ཏེ། །ཆིངས་མ་བཀྲོལ་ནས་གཟགས་མི་བྱ། །ཞེས་བྱ་བ་ལ། དེ་ལྟར་གཏར་ལེགས་པར་བཏབ་ནས་ཁྲག་གི་རྒྱུན་གཟགས་པར་བྱའི། །ཆིངས་མ་བཀྲོལ་ནས་ནི་ཁྲག་གི་རྒྱུན་ཡང་གཟགས་པར་མི་བྱའོ། །དེ་ཡང་བསྡུས་པ་ལས། ལན་ཅིག་བཏབ་པས་ཁྲག་གི་རྒྱུན། །གང་ཞིག་འཛག་པར་གྱུར་པ་ན། །ཡུད་ཙམ་བསྡམས་པ་བྱས་པ་ནི། །དེ་ནི་ལེགས་པར་བཏབ་ཅེས་བྱ། །ཞེས་བཤད་པ་ཡིན་ནོ། །བཏབ་མ་ལེགས་པས་དུས་ཅུང་ཟད། །ཉུང་ཟད་འབྱུང་བ་ཏིལ་ཕྱེ་གདབ། །ཅེས་བྱ་བ་ལ། གཏར་ག་བཏབ་པ་མ་ལེགས་ཏེ། ཉེས་པར་གྱུར་པས་དུས་ཅུང་ཟད་ཅིག་ཁྲག་གི་རྒྱུན་ཉུང་ཟད་འབྱུང་བར་འགྱུར་ཏེ། དེ་ལ་ཏིལ་ཞིབ་ཏུ་བཏགས་པའི་ཕྱེ་མ་རྩའི་སྒོར་གདབ་པར་བྱའོ། །གདབ་དྲགས་སྒྲ་དང་བཅས་པར་ནི། །འབྱུང་ཞིང་བཅད་ཀྱང་དཀར་བར་འགྱུར། །ཞེས་བྱ་བ་ལ། གཏར་ག་བཏབ་པ་མེད་པའམ། དྲགས་པའི་ཁྲག་གི་རྒྱུན་སྒྲ་དང་བཅས་པར་འགྱུར་ལ། རྒྱུན་འབྱུང་བ་དེ་གཅད་ཅིང་དགག་པ་ཡང་ཤིན་ཏུ་དཀའ་བར་འགྱུར་རོ། །དང་ང་དང་འབོག་པར་འགྱུར་བ་དང༌། ཆིངས་ལྷོད་མཚོན་རྟུལ་འགྲངས་དྲགས་དང༌། ཉམ་ཆུང་ཤུགས་ཉེན་དུགས་མ་བྱས། །ཁྲག་མི་འབྱུང་བའི་རྒྱུ་ཡིན་ནོ། །ཞེས་བྱ་བ་ལ། ལེགས་པར་བཏབ་ཏུ་ཟིན་ཀྱང༌། དངང་བ་དང་འབོག་ཅིང་བརྒྱལ་བར་འགྱུར་བ་ནི། ཁྲག་གི་རྒྱུན་མི་འབྱུང་བའི་རྒྱུ་ཡིན་ནོ། །དེ་ལ་དངང་བ་ནི་སྐྲག་པའོ། །འབོག་པ་ནི་བརྒྱལ་ཞིང་མུན་པར་ཞུགས་པ་ལྟ་བུར་གྱུར་པའོ། །ཆིངས་མ་ལྷོད་པ་ནི་དམ་དུ་མ་བསྡམས་པའོ། །མཚོན་རྟུལ་བ་ནི་རྩེ་མོ་རྟུལ་ལ་ལམ་ཆག་པའོ། །འགྲངས་དྲགས་པ་ནི་ཟས་བསྟེན་དྲགས་པའོ། །ཉམ་ཆུང་པ་ནི་རིད་པའོ། །ཤུགས་ཀྱིས་ཉེན་པ་ནི་བཤང་གཅི་འབྱུང་ལ་ཁད་པའོ། །དུགས་མ་བྱས་པ་ནི་ལེགས་པར་མ་བསྲོས་བའོ། །ཁྲག་ནི་ལེགས་པར་མ་བྱུང་ན། །བྱི་དང་ཚ་གསུམ་སྐྱེར་པ་དང༌། །རྒྱ་སྤོས་རྒྱམ་ཚ་ཁྱིམ་དུང་བཅས། །ཏིལ་མར་བཏགས་ལ་རྨ་ལ་བསྐུ། །ཞེས་བྱ་བ་ལ། ཁྲག་ལེགས་པར་མ་བྱུང་ཞིང་གཏར་གཉེས་པར་གྱུར་ན། བྱི་དང་ག་དང་ཚ་བ་གསུམ་ལ་སོགས་པ་བཏགས་
པས་རྩའི་སྒོ་བསྐུ་བར་བྱ་སྟེ། དེས་ནི་ལེགས་པར་འབྱུང་བར་འགྱུར་རོ། །ཁྲག་ནི་ལེགས་བྱུང་ཏིལ་མར་དང༌། །རྒྱམ་ཚ་སྦྱར་ལ་དྲོ་འཇམ་བསྐུ། །ཞེས་བྱ་བ་ལ། ཁྲག་ལེགས་པར་འབྱུང་ཞིང་རྒྱུ་བར་གྱུར་ན། བད་ཀན་དང་རླུང་ཉེ་བར་ཞི་ཞིང་ཁྲག་གཅད་པར་བྱ་བའི་ཕྱིར་ཏིལ་མར་དང་རྒྱམ་ཚར་སྦྱར་ལ། དྲོ་འཇམ་ཙམ་གྱིས་རྨའི་སྒོ་བསྐུ་བར་བྱའོ། །ལེབ་རྒན་རྩི་ལས་ཚོན་སེར་ལྟར། །དང་པོར་ནད་ཁྲག་འབྱུང་བར་འགྱུར། །ཞེས་བྱ་བ་ལ། གཏར་ག་བཏབ་བ་ནི་ཁྲག་བཟང་ངན་འདྲེས་པ་ལ། དང་པོར་ནད་དང་བཅས་པའི་ཁྲག་དབྱུང་ཞིང་འབབ་པར་གྱུར་ཏེ། དཔེར་ན་ལེབ་རྒན་རྩིའི་ཚོན་སེར་པོ་དང་དམར་པོ་འདྲེས་བར་གྱུར་བ་ལ། གོས་འཚོད་པ་ན་དང་པོ་སེར་པོ་འབྱུང་བར་འགྱུར་བ་དང་འདྲའོ། །ལེགས་པར་འབྱུང་ན་རང་ཉིད་འཆད། །ཁྲག་བཟང་བྱུང་ན་འང་དབྱུང་མི་བྱ། །ཞེས་བྱ་བ་ལ། ལེགས་པར་བཏབ་སྟེ་འབྱུང་བ་རང་ཉིད་འཆད་པར་འགྱུར་ལ་དེ་ལྟར་རང་ཆད་ནས་དབྱུང་བར་མི་བྱའོ། །དེ་བཞིན་དུ་ཁྲག་བཟང་པོ་ནད་མེད་པར་གྱུར་ནས་ཀྱང་དབྱུང་བར་མི་བྱ་སྟེ། ཁྲག་ནི་སྲོག་གི་རྟེན་ཡིན་བའི་ཕྱིར་རོ། །བརྒྱལ་གྱུར་ན་ནི་ཆིངས་མ་དགྲོལ། །རླུང་ཡབ་ཀྱིས་གཡབ་སླར་ཁྲག་དབྱུང༌། །སླར་འབོག་གྱུར་ན་ཉི་མ་ནི། །གཉིས་པ་འམ་གསུམ་པ་དག་ལ་གདབ། །ཅེས་བྱ་བ་ལ། གང་ཞིག་ཁྲག་གཟགས་ནས་བརྒྱལ་བར་གྱུར་ན། གཏར་གའི་ཆིངས་མ་དེ་བཀྲོལ་ལ། རླུང་ཡབ་ཀྱིས་རླུང་གཡབས་ཏེ། བརྒྱལ་བ་དེ་བསངས་ཏེ། དེའི་འོག་ཏུ་སླར་ཁྲག་དབྱུང་བར་བྱའོ། །དེ་ལྟར་བྱས་ཀྱང་སླར་འབོག་པར་གྱུར་ན། དེ་ཚེ་བཅད་ལ་ཉི་མ་གཉིས་པའམ། གསུམ་པའི་ཚེ་གཏར་ག་གདབ་ཅིང་ནད་ཁྲག་དབྱུང་བར་བྱའོ། །རླུང་ཁྲག་གནག་ཅིང་དམར་ལ་རྩུབ། །ཤུགས་དྲག་གསལ་ཞིང་ལྦུ་པ་ཅན། །མཁྲིས་ཁྲག་སེར་ལ་རྩ་གནག་མན་མ། །སྤྱི་བག་དྲོ་ཞིང་ཚོན་ཅན་ཡིན། །བད་ཀན་ཁྲག་ནི་འཇམ་ཞིང་སྐྱ། །རྒྱུན་ཅན་འབྱར་ཞིང་སྐ་བ་ཡིན། །འདྲེས་པའི་མཚན་མ་འདྲེན་མ་ཡིན། །ཉེས་གསུམ་དྲི་མ་རྙོག་མ་ཅན། །ཞེས་བྱ་བ་ལ། དེ་ལ་རླུང་གི་ནད་ལས་ནི་ཁྲག་མདོག་གནག་པ་ལ་
སོགས་པ་འབྱུང་བར་འགྱུར་ཏེ། གནག་པ་ནི་ནག་ནོ་ག་ཅན་ལ་ཅུང་ཟད་ཙམ་སྔོ་བའོ། །དམར་བ་ནི་རྩ་དམར་ཞིང་འཚེར་བའོ། །རྩུབ་པ་ནི་སྣུམ་བག་མེད་པའོ། །ཤུགས་དྲག་པོ་ནི་ཤུགས་ཀྱིས་འབྱུང་བའོ། །མདོག་གསལ་བ་ནི་གསལ་བའོ། །ལྦུ་བ་ཅན་ནི་ལྦུ་བ་དང་བཅས་པའོ། །དེ་བཞིན་དུ་མཁྲིས་པ་ལས་གྱུར་པའི་ཁྲག་ནི་མདོག་སེར་བ་དང༌། གནག་པར་གྱུར་པ་དང༌། མནམ་ཞིང་དྲིང་བ་དང༌། སྤྱི་བག་སྟེ་ཚ་བས་འཐས་ཤིང་མཁྲང་པག་ཏུ་འགས་པ་དང༌། དྲོ་ཞིང་ཚ་བ་འུར་འུར་པོར་འདུག་པ་དང༌། ཚོན་ཅན་ཏེ་རྨ་བྱའི་མཇུག་སྒྲོ་ལྟར་སྣང་བ་ཡིན་ནོ། །བད་ཀན་ལས་གྱུར་པའི་ནད་ཁྲག་ལ་ནི་འཇམ་ཞིང་སྣུམ་པ་དང༌། མདོག་སྐྱ་བ་དང༌། རྒྱུན་ཅན་ནལ་ནལ་པོ་ཁ་འདྲ་བར་སྣང་བ་དང༌། འབྱར་ཞིང་སླ་བག་མེད་པ་དང༌། སྐ་ཞིང་འདྲིལ་བ་ཡིན་ནོ། །འདྲེས་པ་ནི་ནད་གཞི་གཉིས་ཀྱི་ལྡན་པ་ལས་གྱུར་པའི་ཁྲག་སྟེ། དེ་ནི་འདྲེན་མ་སྟེ། གང་དང་གང་འདྲེས་པ་དེ་གཉི་གའི་མཚན་མ་དང་འདྲེས་པ་ཞེས་བྱའོ། །ནད་གཞིའི་ཉེས་པ་གསུམ་ཆར་འདུས་པའི་ཁྲག་གང་ཡིན་པ་དེ་ནི་དྲི་མ་ཅན་ཏེ། དང་བག་མེད་པ་དང༌། རྙོག་པ་དང་ལྡན་ཞིང་ནག་ནོག་གི་ཤས་ཆེ་བ་ཡིན་ནོ། །ཁྲག་དན་པ་ནི་ཉམས་ཆེ་ལ། །ཚད་ལས་ལྷག་པར་དབྱུང་མི་བྱ། །ཁྲག་ཕྱུང་དྲགས་ན་འཆི་བ་འམ། །རླུང་ནད་མི་བཟད་འབྱུང་བར་འགྱུར། །ཞེས་བྱ་བ་ལ། སྐྱེས་བུ་ཉམས་ཆེ་བ་ཞིག་ཡིན་ན་ཡང༌། ཁྲག་ངན་པའམ། ནད་ཁྲག་ཚད་དེ་སྲང་བཅུ་དྲུག་པས་དབྱུང་བར་མི་བྱ་སྟེ། ཅིའི་ཕྱིར་ཞེ་ན། ཁྲག་དབྱུང་ཞིང་གཟགས་པ་དྲགས་ན་མྱུར་དུ་འཆི་བར་འགྱུར་བའམ། ཡང་ན་རླུང་ནད་ཤིན་ཏུ་གསོ་དཀའ་བ་འབྱུང་བར་འགྱུར་རོ། །དེ་ལ་བསྐུ་བྱུག་འོ་མ་ཁུ། །ཁྲག་བཅུད་བླུད་པ་སྨན་ཡིན་ནོ། །ཞེས་བྱ་བ་ལ། ཁྲག་བཏོན་དྲགས་པ་དེ་ལ་སྨན་ནི། བསྐུ་བྱུག་བྱ་བ་དང༌། འོ་མ་དང་ཤ་ཁུ་བླུད་པ་དང༌། རི་དགས་དང་ར་ལུག་ལ་སོགས་པའི་ཁྲག་བཏོན་ཏེ་བླུད་པར་བྱའོ། །ཁྲག་ཕྱུང་ནས་ནི་ཆིངས་མ་དག །དལ་གྱིས་བཀྲོལ་ལ་ཆུ་བ་སིལ་གྱིས། །བཀྲུས་ལ་ཏིལ་མར་གྱིས་བྱུགས་པའི། །གོས་འཇམ་གྱིས་ནི་རྨ་ཁ་དཀྲི། །ཞེས་བྱ་བ་ལ། ཁྲག་དབྱུང་
ཞིང་གཟགས་ནས་ཆིངས་མ་དལ་གྱིས་ཀློང་དེ་བཀྲོལ་ལ། ཆུ་བསིལ་བས་ཁྲག་རྗེས་བཀྲུས་ལ། །རྩའི་སྒོ་ཏིལ་མར་གྱིས་བྱུགས་པའི་གོས་འཇམ་པོས་རྨ་ཁ་གཡོགས་ལ། དེའི་འོག་ཏུ་བཅིང་བར་བྱའོ། །ཁྲག་ནད་ཡོད་ན་ཕྱི་འཕྲེད་དམ། །ཕྱི་དེ་ཉིན་པར་སླར་ཡང་དབྱུང༌། །ཤིན་ཏུ་གནོད་པའི་ཁྲག་ཟླ་ཕྱེད། །སྣུམ་གྱིས་བརྟས་པའི་ལུས་ལས་དབྱུང༌། །ཞེས་བྱ་བ་ལ། ཁྲག་མ་དག་ཅིང་ནད་ཡོད་པར་གྱུར་ན། ཕྱི་འཕྲེད་ཀྱིས་སླར་ཡང་དབྱུང་བར་བྱའོ། །ཡང་ན་ཕྱི་དེ་ཉིན་དེ། ཉི་མ་གཉིས་པར་བསྐྱར་བར་བྱའོ། །ཤིན་ཏུ་གནོད་པའི་ཁྲག་ཡོད་ན་ཟླ་བ་ཕྱེད་ནས་སྣུམ་གྱིས་བརྟ་ཞིང་ཞེན་པར་བྱ་བའི་ལུས་ལས་དབྱུང་བར་བྱའོ། །ཁྲག་ངན་ཅུང་ཟད་ལུས་ཀྱང་ནི། །ནད་ནི་ལྷག་པར་མི་བསྐྱེད་པས། །དེ་ཕྱིར་ལྷག་མ་ཡོད་གྱུར་ཡང༌། །གཞག་གི་ཤས་ཆེར་མི་དབྱུང་ངོ༌། །ཞེས་བྱ་བ་ལ། གང་གི་ཕྱིར་ཁྲག་ནད་ཅན་ངན་པ་ཅུང་ཟད་ལུས་པར་གྱུར་ཀྱང༌། དེ་ལས་བྱུང་བའི་ནད་ལྷག་པར་མི་བསྐྱེད་ཅིང་བྱ་བ་ལ་རྒལ་ཏེ། གནས་གཞན་དུ་མི་འགྲོ་བས་དེའི་ཕྱིར་ལྷག་མ་ཅུང་ཟད་ཡོད་དུ་ཟིན་ཀྱང་ཤས་ཆེར་མི་འབྱུང་གི །ལྷག་མ་དང་བཅས་པར་གཞག་སྟེ། །ཁྲག་ནི་སྲོག་གི་རྟེན་ཡིན་པའི་ཕྱིར་རོ། །དེ་ཡང་དྲང་སྲོང་ལེགས་མཐོང་གིས། །མཁས་པས་ནད་བཅས་ཁྲག་ཀྱང་ནི། །ལྷག་མ་ཅུང་ཟད་ཡོད་བྱ་ཡི། །ལྷག་པར་དབྱུང་བར་མི་བྱ་སྟེ། །ལྷག་མ་ཞི་བས་བསལ་བར་བྱ། །ནད་ཁྲག་ལྷག་མ་ཅུང་ཟད་ལུས། །ནད་ནི་ཤས་ཆེར་མི་སྐྱེད་དེ། དེ་བས་ལྷག་མར་བཅས་གཞག་གི །སྦྱོར་བ་དྲགས་པ་མི་བྱའོ། །ཞེས་བཤད་པ་ཡིན་ནོ། །ལྷག་མ་རྡབས་རུ་སྩོགས་གདབ་པའམ། །ཡང་ན་སྤྱོད་བསིལ་ཁྲག་མཁྲིས་བསལ། །སྦྱང་དང་སྐམ་པའི་བྱེ་བྲག་ནི། །གསོ་བས་དེ་ནི་དང་བར་བྱ། །ཞེས་བྱ་བ་ལ། ནད་ཁྲག་ལྷག་མ་ལུས་པ་དེ། རྔ་བས་རྭ་གདབ་པ་ལ་སོགས་པས་བསལ་བར་བྱ་བ་འམ། ཡང་ན་སྤྱོད་ལམ་བསིལ་བ་སྟེ། ཆུ་བསིལ་བ་བླུགས་པ་ལ་སོགས་པས་ཁྲག་དང་མཁྲིས་བ་བསལ་ཞིང་གསོ་པའི་ཐབས་དང་ཟས་དང་སྨན་སྣུམ་པ་དང༌། མངར་བ་བསྟེན་པ་དང་སྦྱང་
བ་སྟེ། སློན་དང་ཁྲུས་ཀྱི་ཚུལ་དང༌། སྐམ་པ་སྟེ། སྨྱུང་བར་གནས་པ་ལ་སོགས་པའི་བྱེ་བྲག་གི་གསོ་བས་དང་བར་བྱ་ཞིང་བསལ་བར་བྱའོ། །ནད་ཁྲག་རབ་རྒྱས་མ་གྱུར་པའམ། །དེ་འདྲའི་ཐབས་ཀྱིས་གསོ་བར་བྱ། །ཞེས་བྱ་བ་ལ། ནད་ཁྲག་ཤིན་ཏུ་རྒྱས་ཤིང་རབ་ཏུ་གྱུར་པ་ལའང༌། སྤྱོད་ལམ་བསིལ་བར་བྱ་བ་ལ་སོགས་པ་དེ་དག་གིས་གསོ་བར་བྱ་ཞིང་དང་བར་བྱའོ། །ནད་ཁྲག་རྒྱས་བར་གྱུར་པ་ལ་ནི་གཏར་ག་གདབ་པ་ལ་སོགས་པ་ཁྲག་དབྱུང་བའི་ཐབས་ཀྱིས་དབྱུང་བར་བྱའོ། །ཁྲག་གི་རྒྱུན་ནི་མཆོད་ན། །གཅད་པའི་སྦྱོར་བ་མྱུར་བར་བྱ། །ཞེས་བྱ་བ་ལ། ཁྲག་གི་རྒྱུན་བྱུང་བ་མཆོད་ཅིང་བདེ་བར་གནས་པར་མ་གྱུར་ན། གཅད་པའི་སྦྱོར་བ་མྱུར་ཞིང་རིངས་པར་བྱའོ། །སེང་ཕྲོམ་རྨ་ཤིང་པྲི་ཡང་ཀུ། །མ་ཤ་ཤིང་མངར་ཡུག་སྣམ་བཙག །གྱོ་དུ་མ་ཟར་མ་སྣག་ཚ་དང༌། །འོ་མ་ཅན་ཤིང་ཤུན་ལོ་མ། །བཏགས་པའི་ཕྱེམ་རྨ་ཁར་གདབ། །ཤུག་སོགས་ཆུ་གྲང་སྦྱར་ལ་བླུད། །ཅེས་བྱ་བ་ལ། དེ་ལྟར་ཁྲག་གཅད་པར་བྱ་བའི་ཕྱིར། སེང་ཕྲོམ་ལ་སོགས་པའི་ཕྱེ་མ་རྨའི་སྒོར་གདབ་པ་དང༌། ཤུག་པ་ལ་སོགས་པའི་སྡེ་ཚན་དང་སྦྱར་བའི་ཆུ་གྲང་བླུད་བར་བྱའོ། །འོ་མ་ཅན་གྱི་ཤིང་ནི་ནྱ་གྲོ་དྷ་དང༌། །ཨ་ཤྭདྠ་ལ་སོགས་པའི་ཤུན་པ་དང་ལོ་མའོ། །གཞན་ནི་གོ་བར་ཟད་དོ། །ཡང་ན་རྩ་བཏབ་དེ་གོང་གི །རྩ་དེ་ཉིད་ལ་གཏར་ག་གདབ། །ཡང་ན་ཐུར་མ་བསྲེགས་པ་ཡིས། །རྨ་ཁ་མྱུར་དུ་བསྲེག་པར་བྱ། །ཞེས་བྱ་བ་ལ། གཅད་པའི་སྦྱོར་བ་གཞན་ཡང་སྔར་བཅད་པའི་རྩ་དེ་ཉིད་ཀྱི་གོང་རོལ་དུ་གཏར་ག་གདབ་པར་བྱའོ། །ཡང་རྣམ་པ་ཐམས་ཅད་དུ་ཁྲག་ཆོད་བར་མ་གྱུར་ན། ཐུར་མ་མེར་བསྲེགས་པས་རྨ་ཁ་མྱུར་དུ་བསྲེག་པར་བྱའོ། །བཅིང་བ་ཉེས་པས་ལ་མ་ལོག་ལ་གནས་ཏེ། །ནད་ནི་རྒྱས་པས་ཁྲག་ནི་འཁྲུགས་གྱུར་པ། །རང་གི་གནས་སུ་སླར་ཕྱིན་མ་གྱུར་པ། །དེ་སྲིད་ཟས་དང་སྤྱོད་ལམ་ཕན་པ་བསྟེན། །ཞེས་བྱ་བ་ལ། གཏར་གའི་བཅིང་བ་ཉེས་ཤིང་མ་ལེགས་བ་རླུང་དང་མཁྲིས་བ་དང་བད་ཀན་གྱི་ནད་གང་རང་གི་གནས་ནས་རྒལ་ཏེ། ལམ་ལོག་པར་གནས་བས་ན་ཁྲག་ཏུ་གྱུར་པ་དེ་རང་གི་གནས་སུ་ཕྱིན་པར་མ་
གྱུར་ཅིང༌། རང་གི་ལམ་གནས་པར་མ་གྱུར་པ་དེ་སྲིད་ཀྱི་བར་དུ་ཟས་དང་སྤྱོད་ལམ་ལ་སོགས་པ་ཕན་ཞིང་གནོད་པ་མེད་པ་ལ་བརྟེན་པར་བྱའོ། །ལུས་དང་ངག་དང་ཡིད་ཀྱི་སྤྱོད་པ་ལ་འདིར་སྤྱོད་ལམ་ཞེས་བྱའོ། །ཤིན་ཏུ་ཚ་གྲང་མ་ཡིན་ཡང་དྲོད་བསྐྱེད། །ཁྲག་སེལ་བྱེད་པའི་བཟའ་དང་བཏུང་བ་ཕན། །དེ་ཚེ་ལུས་དང་ཁྲག་བདེར་མི་གནས་པས། །ཁྱད་པར་དུ་ནི་མེ་ལས་བསྲུང་བར་བྱ། །ཞེས་བྱ་བ་ལ། ཁྲག་དབྱུང་ཞིང་གཟགས་ནས་ཟས་དང་སྐོམ་ཤིན་ཏུ་ཚ་བ་དང༌། ཤིན་ཏུ་གྲང་བ་ན་གནོད་པ་ཡིན་ཏེ། ཤིན་ཏུ་ཚ་ན་ནི་སླར་ཁྲག་བསྐྱེད་པར་འགྱུར་ལ། ཤིན་ཏུ་གྲང་བ་ནི་མེ་དྲོད་ཉམས་པར་བྱེད་པ་ཡིན་ཏེ། དེ་བས་ན་གཉི་ག་མ་ཡིན་པ་བསྟེན་པ་དང༌། དེ་བཞིན་དུ་རང་བཞིན་གྱིས་གཡོས་སུ་བྱས་པའི་བཟའ་བཏུང་དང༌། ཕོ་བའི་མེའི་དྲོད་བསྐྱེད་པའི་ཟས་སྐོམ་ཡང་སྦྱིན་པར་བྱ་སྟེ། གང་གི་ཕྱིར་དེའི་ཚེ་ལུས་ལ་བདེ་བར་མི་གནས་པས་ཡང་དེ་ནི་མཁྲིས་པའི་གནས་ཡིན་ལ། མཁྲིས་པ་ནི་མེས་བསྐྱེད་དེ། དེའི་ཕྱིར་ཁྱད་པར་དུ་མེ་ལས་བསྲུང་བར་བྱ་ཞིང་རྣམ་པ་དུ་མས་བསྐྱང་བར་བྱའོ། །མདོག་དང་དབང་པོ་གསལ་ཞིང་དབང་པོ་ཡུལ། །འདོད་ཅིང་ཟས་འཇུ་ཤུགས་ཀྱང་བདེ་བར་འཇུ། །བདེ་དང་ལྡན་ཞིང་སྟོབས་རྒྱས་ཕུན་སུམ་ཚོགས། །མི་ཡི་ནད་ཁྲག་དག་པ་ཡིན་པར་བཤད། །ཅེས་བྱ་བ་ལ། སྐྱེས་བུ་འདི་ལྟ་བུ་ནད་ཁྲག་མེད་པ་ཡིན་པར་དྲང་སྲོང་རྣམས་ཀྱིས་བཤད་ཅིང་བསྟན་ཏོ། །དེ་ཡང་སྐྱེས་བུ་དེའི་ལུས་ཀྱི་མདོག་དང༌། དབང་པོ་རྣམས་གསལ་ཞིང་དང་བའི་བདག་ཉིད་ཅན་ཡིན་པ་དང༌། དེ་ཉིད་ནི་དབང་པོའི་ཡུལ་འདོད་ཅིང་ཡུལ་ལ་དགའ་བ་དང༌། ཟས་འཇུ་བ་ནི་ཕོ་བའི་མེ་དྲོད་ལ་བྱ་ལ། དེའི་ཤུགས་ནི་ནུས་པ་ལ་བྱ་སྟེ། ཟས་འཇུ་བ་དེ་ཐོགས་པ་མེད་པ་དང༌། ཟིལ་གྱིས་མི་ནོན་པར་བདེ་བར་འབྱུང་བ་དང༌། དེ་བཞིན་དུ་བདེ་བ་དང་ལྡན་པ་སྟེ། ནད་མེད་པ་དང་ལྡན་པ་དང༌། དེ་བཞིན་དུ་སྟོབས་དང་ལུས་རྒྱས་པ་ཕུན་སུམ་ཚོགས་པ་དང་ལྡན་པའི་མི་ནི་ནད་ཁྲག་ཡོངས་སུ་དག་པ་ཡིན་ནོ་ཞེས་བཤད་དོ། །ཡན་ལག་བརྒྱད་པའི་སྙོང་པོ་བསྡུས་པའི་རྣམ་པར་འགྲེལ་པ། ཚིག་གི་དོན་གྱི་ཟླ་ཟེར་ཞེས་བྱ་
བ། སློབ་དཔོན་ཟླ་བ་ལ་དགའ་བས་ཉེ་བར་སྦྱར་བ་ལས། ལེའུ་ཉི་ཤུ་རྩ་བདུན་པའི་རྣམ་པར་འགྲེལ་པའོ།། །།དེ་ནས་ཟུག་རྡུ་དབྱུང་བའི་ཆོ་གའི་ལེའུ་བཤད་པར་བྱའོ། །ཞེས་བྱ་བ་ལ། འདི་བརྩམས་པའི་འབྲེལ་པ་ནི་འདི་ཡིན་ཏེ། ནད་ཁྲག་ཏུ་གྱུར་པ་གང་ཡིན་པ། དེ་ནི་གཏར་ག་གདབ་པའི་ཐབས་ཀྱིས་དབྱུང་དགོས་པས་གོང་དུ་བཤད་པས་ན་དེའི་འོག་ཏུ་ཁོང་དུ་མཚོན་ལུས་པ་ཟུག་རྡུ་ཞེས་བྱ་བ་ཡང་དབྱུང་དགོས་པས་དེའི་འོག་ཏུ་འདི་བརྩམས་པ་ཡིན་ནོ། །ཟུག་རྔུའི་བགྲོད་པ་རྣམ་ལྔ་སྟེ། །ཡོ་དྲང་ཐད་ཀ་སྟེང་དང་འོག །ཅེས་བྱ་བ་ལ། ཟུག་རྡུ་སྟེ་མཚོན་ལུས་པའི་བགྲོད་པའི་ལམ་ནི། ཡོ་བ་ལ་སོགས་པའི་རྣམ་པས་རྣམ་པ་ལྔ་ཡོད་པར་ཤེས་པར་བྱའོ། །ཁ་གནག་སྐྲངས་དང་ནད་དང་བཅས། །ཡང་དང་ཡང་དུ་ཁྲག་འཛག་ལ། །རྨ་ཡི་ཉེ་འཁོར་མཐོ་ཞིང་གློ། །ཆུ་བུར་ལྟ་བུའི་ཐོར་བུ་འབྱུང༌། །ཤ་ནི་འཇམ་གྱུར་ལུས་མདོར་ན། །ཁོང་ན་ཟུག་རྔུ་ཡོད་ཤེས་བྱ། །ཞེས་བྱ་བ་ལ། ཁོང་པའི་ནང་ན་མཚོན་ཡོད་པའི་མཚན་ཉིད་ནི། མདོར་ན་འདི་ལྟར་ཤེས་པར་བྱ་ཞིང་ཁོང་དུ་ཆུད་པར་བྱའོ། །ཇི་ལྟ་བུ་ཞེ་ན། རྨའི་སྒོ་བ་གནག་ཅིང་དྲི་མ་ཅན་དང༌། དེ་བཞིན་དུ་རྨ་སྐྲང་ཞིང་ན་བ་དང་བཅས་པ་དང༌། དེ་བཞིན་དུ་ཡང་དང་ཡང་འཛག་ཅིང་འབྱུང་བ་དང༌། དེ་བཞིན་དུ་རྨའི་ཉེ་འཁོར་དཔངས་སུ་མཐོ་ཞིང་གློ་བ་དང༌། ཆུའི་ཆུ་བུར་ལྟ་བུར་ཐོར་བུ་འབྱུང་བ་དང༌། དེ་བཞིན་དུ་ཤ་མདངས་འཇམ་ཞིང་ཤ་སྙི་བར་གྱུར་པ་ཡིན་ནོ། །ཁྱད་པར་དུ་ནི་པགས་པར་ན། །མཚོན་ལུས་མདོག་ཉམས་སྲབ་དང༌། །སྐྲངས་པར་འགྱུར་རོ། །ཞེས་བྱ་བ་ལ། ཁྱད་པར་རམ་བྱེ་བྲག་ཏུ་པགས་པའི་ནང་དུ་མཚོན་ལུས་པ་ནི་པགས་པའི་མདོག་མི་སྡུག་པར་འགྱུར་པ་དང༌། སྲ་ཞིང་མཁྲང་བག་ཏུ་གནས་པ་དང༌། ཆུར་སྐྲངས་པར་འགྱུར་རོ། །ཤར་གནས་པ། །ནད་དང་སྐྲངས་པ་ལྷག་པར་འཕེལ། །བཙིར་བར་མི་བཟོད་སྨིན་པ་དང༌། །རྨ་ཡི་སྒོ་ནི་འདྲུབ་མི་ཤེས། །ཞེས་བྱ་བ་ལ། ཤའི་དུམ་བུ་ལུས་པ། ཤ་ལ་གནས་པ་ནི་ལྷག་པར་ན་ཞིང་སྐྲངས་པའི་ཚབས་ལྷག་པར་འཕེལ་བ་དང༌། བཙིར་ཞིང་མནན་པར་མི་བཟོད་པ་དང༌། མཚོན་གང་ནག་ནས་
པ་དེར་སྨིན་ཞིང་རྣགས་པ་དང༌། ཟུག་རྡུ་ཟུག་པའི་རྨའི་ཁ་འདྲུ་བཅིང་འཚོ་མི་ཤེས་པ་ཡིན་ནོ། །ཉ་ཡི་ནང་ཟུག་ཤར་ཟུག་དང༌། །འདྲ་ལས་སྐྲངས་བག་མེད་པ་ཡིན། །ཞེས་བྱ་བ་ལ། བྱིན་པ་ལ་སོགས་པའི་ཉའི་ནང་དུ་གནས་པའི་ཟུག་རྔུའི་མཚན་ཉིད་ནི་ཤ་ལ་ཟུག་པ་དང་འདྲ་བ་ལས་སྐྲངས་བག་མེད་དེ། དེ་མ་གཏོགས་པ་ཡིན་ནོ། །དེ་ལ་ལུས་པ་ཉ་ཞེས་བྱ་བའི་ཤ་ལྔ་བརྒྱ་ཡོད་པར་འོག་ནས་བཤད་དེ། ཤའི་ཆར་གཏོགས་པ་ཟླ་བ་ཟླ་བ་ཚེས་པ་ལ་སོགས་པའི་དབྱིབས་ཅན་ལ་ཉ་ཞེས་བྱའོ། །ཆུ་བ་འདྲི་བའི་ནང་ལུས་པའི། །ཆུ་བ་ལས་ནི་དབྱུང་དཀའ་ཞིང༌། །བསྒུལ་དཀའ་བསྐྱོད་ཚེ་རེངས་ཤིང་ན། །ཞེས་བྱ་བ་ལ། ཆུ་བའི་དྲ་བའི་ནང་དུ་མཚོན་ལུས་པ་ནི། ཆུ་བ་ལས་དབྱུང་བར་དཀའ་བ་དང༌། བསྒུལ་བར་དཀའ་ཞིང་ན་བ་དང༌། བསྐྱོད་པའི་ཚེ་ལྷག་པར་མི་བཟོད་པ་དང༌། ཤིང་ལྟར་རེངས་ཤིང་འཇས་པ་དང༌། ན་བ་ལྷང་ལྷང་པོར་བྱེད་པ་ཡིན་ཏེ། ཟུག་རྔུ་འདི་ནི་ལྷག་པར་འབྱུང་དཀའ་པར་འགྱུར་རོ། །རྩ་ལ་བརྟེན་པ་རྩ་སྐྲངས་འགྱུར། །ཞེས་བྱ་བ་ལ། ཟུག་རྡུ་རྩར་གནས་པ་ནི་རྩ་སྐྲངས་ཤིང་སྤོམ་བག་ཏུ་འགྱུར་པའོ། །བུ་གའི་སྦུབས་གནས་སྦུབས་ཀྱིས་ནི། །རང་གི་ལས་དང་ཡོན་ཏན་ཉམས། །ཞེས་བྱ་བ་ལ། བུ་གར་གནས་པའི་ཟུག་རྔུ་ནི་རང་གི་གནས་དང༌། ཡོན་ཏན་ལས་ཉམས་པར་འགྱུར་རོ། །དེ་ཡང་བུ་གའི་སྦུ་བས་ནི་དབུགས་དང༌། ལུས་ཟུངས་དང༌། དྲི་མ་དང་ཆུ་རྣམས་རྒྱུ་བའི་གནས་བཅུ་གསུམ་མོ། །དེ་དག་རང་གི་ལས་དང༌། དེ་བཞིན་དུ་ཡོན་ཏན་ཉམས་ཤིང་འཇིག་པར་འགྱུར་རོ། །རྩ་ཆེན་གནས་པ་དབུགས་དང་ཁྲག །ལྦུ་བ་ཅན་དུ་འབྱུང་འགྱུར་ཞིང༌། །སྒྲ་དང་བཅས་པར་འབྱུང་བ་དང༌། །སྙིང་དང་ཡན་ལག་ན་བཅས་འགྱུར། །ཞེས་བྱ་ལ། རྩ་ཆེན་པོ་སྦུབས་ཅན་དུ་གནས་པའི་ཟུག་རྔུ་ནི། སྦུབས་དང་ཁྲག་འདྲེས་པ་ལྦུ་བ་ཅན་དུ་འབྱུང་བར་འགྱུར་པ་དང༌། དབུགས་དང་རླུང་དེ་སྒྲ་དང་བཅས་པར་འགྱུར་བ་དང༌། སྙིང་ག་ན་ཞིང་མེར་མེར་པོར་སེམས་པ་དང༌། ཡན་ལག་ན་ཞིང་སྙོམ་པ་དང་བཅས་པར་འགྱུར་
རོ། །རུས་ཚིགས་བོག་རེར་མཚོན་ལུས་པ། །རུས་བརྩེ་ཚབས་ཆེར་ན་བར་འགྱུར། །ཞེས་བྱ་བ་ལ། རུས་པའི་ཚིགས་ཀྱི་བོག་རེར་མཚོན་གྱི་དུམ་བུ་ལུས་པ་ནི་རུས་པ་ཤིན་ཏུ་བརྩེ་ཞིང་ཟུག་པ་དང༌། བསྐྱོད་ཅིང་བསྒུལ་བ་ན་ཤས་ཆེན་པོར་ན་བར་འགྱུར་རོ། །རུས་གནས་ནད་མང་སྐྲང་བར་བྱེད། །ཅེས་བྱ་བ་ལ། མཚོན་གྱི་ཟུག་རྡུ་རུས་པའི་ནང་ན་གནས་པ་ནི། ནད་མང་པོ་སྣ་ཚོགས་པ་སྐྱེད་པར་བྱེད་དེ། ཕལ་ཆེར་ཆག་པ་དང༌། གྲུམ་པ་དང༌། འདར་བ་དང༌། གནོད་ཅིང་ཟུག་པར་འགྱུར་བ་དང༌། དེ་བཞིན་དུ་སྐྲང་པར་བྱེད་པར་ཡང་འགྱུར་རོ། །ཚིགས་ལ་གནས་པ་དེ་དང་འདྲ། །བསྐྱོད་པར་དཀའ་བ་དག་ཏུ་འགྱུར། །ཞེས་བྱ་བ་ལ། ཚིགས་ལ་གནས་པའི་ཟུག་རྡུ་ནི་རུས་པར་གནས་པ་དང་འདྲ་བར་འགྱུར་བ་དང༌། དེ་བཞིན་དུ་བསྐྱོད་པར་དཀའ་ཞིང་བསྒུལ་མི་བཟོད་པར་འགྱུར་རོ། །ནང་གྲོལ་ནང་ཡོད་འཁྲུགས་པ་དང༌། །སྤོ་ཞིང་ཁ་ཟས་ངན་སྐྱུགས་གཅིན། །རྨ་ཡི་ཁར་ནི་འབྱུང་བར་འགྱུར། །ཞེས་བྱ་བ་ལ། ནང་གྲོལ་གྱི་ནང་དུ་ལུས་པའི་མཚོན་ནི། འཁྲུག་ཅིང་རྒྱུ་མའི་སྒྲ་ཀྲུག་ཀྲུག་ཟེར་བ་དང༌། སྤོས་ཤིང་དབུགས་ཀྱིས་རྒྱས་པ་དང༌། དེ་བཞིན་དུ་ཁ་ཟས་དང༌། ངན་སྐྱུགས་དང༌། གཅིན་རྨའི་ཁར་འབྱུང་ཞིང་སྣང་བར་འགྱུར་རོ། །གནད་ཀྱི་ནང་དུ་མཚོན་ལུས་པ། །གནད་ཟུག་མཚན་ཉིད་ལས་ཤེས་བྱ། །ཞེས་བྱ་བ་ལ། གནད་རྣམས་ཀྱི་ནང་དུ་མཚོན་ལུས་པའི་ཟུག་རྔུ་ནི་གནད་དུ་ཟུག་ཅིང་བསྣུན་པའི་མཚན་ཉིད་གང་དག་བཤད་པ་དེའི་ཚུལ་ལས་ཤེས་པར་བྱའོ། །པགས་པ་ལ་སོགས་རང་རང་གི །ཇི་ལྟར་འཛག་ལས་ཤེས་པར་བྱ། །ཞེས་བྱ་བ་ལ། པགས་པ་ལ་སོགས་པ་ནས་གནས་ཀྱི་ནང་དུ་མཚོན་གྱི་དུམ་བུ་ལུས་པ་དག་སྔར་བསྟན་པའི་མཚན་ཉིད་དེ་དག་ལས་ཤེས་པར་བྱ་བ་འབའ་ཞིག་ཏུ་མ་ཟད་ཀྱི་རང་རང་གི་གནས་ལས་ཇི་ལྟར་འཛག་པ་ལས་ཀྱང་ཟུག་རྔུ་ཡོད་བར་ཤེས་པར་བྱའོ། །སྐྱོན་མེད་ལུས་ཀྱི་རྨ་འཚོ་སྟེ། །དེ་ནི་གནོད་པ་མེད་པར་གནས། །ནད་འཁྲུགས་སྣད་
པ་ལ་སོགས་ཀྱིས། །གོངས་ནས་སླར་ཡང་གནོད་པ་སྐྱེད། །ཅེས་བྱ་བ་ལ། སྐྱེས་བུ་ལུས་ལ་ནད་ཀྱི་སྐྱོན་མེད་པའི་ཟུག་རྔུ་དེ་རྗེས་མཐུན་པར་གནས་པ་དག་གི་རྨ་ཡང་འཚོ་བར་བྱེད་ཅིང་གནོད་པ་མེད་པར་འགྱུར་མོད་ཀྱི། རྨ་འཚོ་ཟིན་ནས་ཀྱང་ནད་གཞི་འཁྲུགས་པ་དང༌། སྣད་པ་དང༌། རྩོལ་བས་བསྐྱོད་པ་ལ་སོགས་པའི་དབང་གིས་གློངས་པ་དང༌། སླར་ཡང་ལུས་ལ་གནོད་པ་སྐྱེད་ཅིང་ནད་དུ་འགྱུར་བ་ཡིན་ནོ། །གང་ཡང་རུང་བར་བགས་པ་ཉམས། །བསྐུ་དང་མཉེ་དང་དུགས་བྱས་ནས། །མདོག་དམར་ན་ཞིང་ཚ་ལ་འཁྲུག །ཡང་ན་གང་དུ་མར་བཞག་འཇུ། །ལྡེ་གུས་བྱུགས་པ་མྱུར་དུ་བསྐ་མས། །གནས་དེར་ཟུག་རྡུ་བཅས་ཤེས་བྱ། །ཞེས་བྱ་བ་ལ། ཟུག་རྔུ་པགས་པའི་ནང་དུ་ཟུག་ཅིང་མི་མངོན་པར་འགྱུར་བ་ནི་ལུས་ཀྱི་ཕྱོགས་གང་དུ་ཟུག་པར་པགས་པ་ཉམས་པ་དང༌། བསྐུ་བ་ལ་སོགས་པ་བྱས་པས་ནི་མདོག་དམར་པ་དང༌། ན་ཞིང་ཟུག་པ་དང༌། ཚ་བ་དང་འཁྲུག་ཅིང་བསྐྱོད་པ་ན་ན་བར་འགྱུར་ཏེ། དེ་ལྟ་བུའི་གནས་དེ་ནི། ཟུག་རྔུ་དང་བཅས་པ་ཡིན་པར་ཤེས་པར་བྱའོ། །ཡང་ན་པགས་པའི་ཕྱོགས་གང་དུ་ན་སར་མར་བཞག་ན་མྱུར་དུ་འཇུ་བར་འགྱུར་པ་འམ། ལྡེ་གུས་བྱུགས་པ་མྱུར་དུ་བསྐམས་པར་གྱུར་ན། གནས་དེ་ཡང་ཟུག་རྡུ་དང་བཅས་པར་ཤེས་པར་བྱའོ། །ཤར་ལུས་སྦྱང་བ་བྱས་པ་ཡིས། །སྐེམ་བྱས་ལྷོངས་གྱུར་བསྒུལ་བ་དང༌། །བཙན་དམར་སོགས་ཀྱིས་ཤེས་པར་བྱ། །ཞེས་བྱ་བ་ལ། ཟུག་རྡུ་ཤའི་ནང་དུ་ལུས་པ་མི་སྣང་བར་གྱུར་པ་ནི་སྦྱང་བ་བྱ་བ་སྟེ། སློན་སྨན་དང་བཀྲུ་སྨན་ལ་སོགས་པ་བྱས་པས་ལུས་བསྐམ་ཞིང་སྦེག་པར་བྱས་ལ། སྐེམས་པར་བྱས་པ་དེས་ལྷོངས་ཤིང་ཡང་བག་ཏུ་གྱུར་པ་དང་བསྐུལ་བ་དང༌། བཙན་དམར་བོ་ཡོད་པ་དང༌། ན་བ་ལ་སོགས་པའི་ཟུག་རྔུ་ཡོད་པར་ཤེས་པར་བྱའོ། །ཉ་དང་རུས་ཚིགས་ནང་གྲོལ་གྱི། །ཟུག་རྔུའང་དེ་བཞིན་ཤེས་པར་བྱ། །ཞེས་བྱ་བ་ལ། ཉ་དང་རུས་པའི་ཚིགས་ལ་གནས་པ་དང༌། ནང་གྲོལ་ན་གནས་པའི་ཟུག་རྔུ་ནི་སློན་སྨན་ལ་སོགས་པའི་སྦྱང་བས་སྐེམས་པོར་བྱས་ཏེ། ལྷོངས་པར་གྱུར་པ་
པ་དང༌། བསྒུལ་པ་དང༌། བཙན་པ་ལ་སོགས་པས་ན་བར་གྱུར་པ་གང་ན་ཡོད་པ་དེ་ན་ཟུག་རྡུ་ཡོད་པར་ཤེས་པར་བྱའོ། །ཤ་ལ་ཟུག་རྔུ་དང་འདྲ་བར་ཤེས་པར་བྱ་སྟེ། རུས་པ་ཟུག་རྔུས་མ་རུངས་འགྱུར། །རུས་པ་བསྐུ་དང་དུགས་བྱ་ཞིང༌། །མཉེ་དང་བཙིར་ལས་ཤེས་པར་བྱ། །ཞེས་བྱ་བ་ལ། རུས་པའི་ནང་དུ་ལུས་པའི་མཚོན་མི་མངོན་པར་གྱུར་པ་ནི། རུས་པ་མ་རུངས་ཤིང་མདོག་ཉམས་པ་དང༌། རུས་པ་བསྐུ་བ་ལ་སོགས་པ་བྱ་བ་ན་གནོད་པ་ཡོད་པ་ལས་ཤེས་པར་བྱའོ། །རུས་ཚིགས་གནས་པ་རུས་འདྲ་དང༌། །བརྐྱང་དང་བསྐུམ་པས་ཤེས་པར་བྱ། །ཞེས་བྱ་བ་ལ། རུས་པའི་ཚིགས་ལ་གནས་པའི་ཟུག་རྡུ་མི་མངོན་པ་ནི། རུས་པ་དང་འདྲ་བར་བསྐུ་བ་དང༌། དུགས་བྱ་བ་ལ་སོགས་པས་ཤེས་པར་བྱ་བ་དང༌། བརྐྱང་བ་དང༌། བསྐུམ་བའི་བསྒུལ་བསྐྱོད་ལས་ཤེས་པར་བྱའོ། །ཆུ་བ་རྩ་དང་རྩ་ཆེན་སྦུབས། །ཟུག་རྔུ་མི་མཉམ་ལ་མ་འགྲོ་དང༌། །ཤིང་རྟ་ཆག་པའི་རྟ་དང་ནི། །ལྡན་པར་ནད་པ་བསྐྱོན་ནས་སུ། །མྱུར་དུ་དྲངས་ནས་དེ་ནས་ནི། །བསྐྱོད་པས་ཟུག་རྡུ་ཤེས་པར་བྱ། །ཞེས་བྱ་བ་ལ། ཆུ་བ་ལ་སོགས་པར་ནུ་བཅིང་མི་མངོན་པའི་ཟུག་རྔུ་ནི། མི་མཉམ་པའི་ལམ་ནི་ལམ་མཐོ་དམའ་ཅན་དུ་ཤིང་རྟ་འཁོར་ལོ་ཆག་པ། རྟས་དྲངས་པ་ལ་བསྐྱོད་ནས་དེའི་འོག་ཏུ་མྱུར་དུ་དྲངས་ཏེ། གནས་གཞན་དུ་བསྐྱོད་པས། དེ་ནས་བསྐྱོད་པ་དེས་རྩ་དམར་བ་དང༌། རྩ་བ་ལ་སོགས་པ་ནས། ཟུག་རྔུ་གང་ན་ཡོད་པ་ཤེས་པར་བྱ་ཞིང་བརྟག་པར་བྱའོ། །གནད་ཟུག་ལོགས་ཤིག་མ་བཤད་དེ། །དེ་རྣམས་ཤ་སོགས་ལ་གནས་ཡིན། །ཞེས་བྱ་བ་ལ། གནད་དུ་ཟུག་ཅིང་མི་སྣང་བར་གྱུར་པའི་ཟུག་རྡུའི་མཚན་ཉིད་ནི་ལོགས་ཤིག་ཏུ་མ་བཤད་དེ། དེ་རྣམས་ནི་ཤ་ལ་སོགས་པ་ཉིད་ལ་གནས་པར་སྔར་བཤད་པས་ལོགས་ཤིག་ཏུ་དགར་མེད་དོ། །སྦྱིར་ནི་ཟུག་རྔུར་བཅས་བསྐྱོད་པའི། །བྱ་བས་ནད་བཅས་ལས་ཤེས་བྱ། །ཞེས་བྱ་བ་ལ། སྦྱིར་ན་ལུས་ཀྱི་ཕྱོགས་གང་ན་ཟུག་རྡུ་ཡོད་ཅིང་ནང་ན་མཚོན་ལུས་པ་དང་བཅས་པ་ནི་བསྐྱོད་པའི་བྱ་བས་ཤེས་ལ་གླང་པོ་ཆེའི་རྒྱབ་དང༌། རྟ་ལ་བསྐྱོན་
པ་དང༌། ཤིང་ལ་འཛེག་པ་དང༌། རྟ་རྒྱུག་པ་དང༌། མྱུར་བ་དང༌། མདའ་འཕེན་པ་དང༌། གླལ་དང༌། སྦྲིད་པ་དང༌། སྒྲེགས་པ་དང༌། ལུད་པ་ལུ་བ་དང༌། མཆིལ་མ་དྲག་ཏུ་འདོར་བ་དང༌། དགོད་པ་དང༌། དབུགས་རྔུབ་པ་དང༌། འབྱུང་བ་དང་ན་བ་དང་བཅས་པ་ལས་ཤེས་པར་བྱའོ། །མདོར་ན་ཟླུམ་དང་གྱེས་པ་དང༌། །ཟུར་བཞི་པ་དང་ཟུར་གསུམ་པའི། །རྨ་ཡི་དབྱིབས་ལས་ཟུག་རྡུ་ནི། །མི་མངོན་རྣམ་པར་ཤེས་པར་བྱ། །ཞེས་བྱ་བ་ལ། མདོར་བསྡུ་ན། མི་མངོན་པའི་ཟུག་རྡུ་བརྟག་ཅེས་བྱ་བའི་ཐབས་ནི། རྨའི་ཁ་ཟླུམ་པ་དང༌། གྱེས་ཤིང་ངོས་གཉིས་ཐ་དད་པར་བྱེ་བ་དང༌། ཟུར་བཞིར་གནས་པ་དང༌། ཟུར་གསུམ་པར་གནས་པའི་རྨའི་དབྱིབས་ལས་ཟུག་རྔུའི་དབྱིབས་དང༌། རྣམ་པར་མི་མངོན་པ་དག་ཤེས་པར་བྱ་ཞིང་རྟོགས་པར་བྱའོ། །དེ་རྣམས་དབྱུང་བའི་ཐབས་གྱུར་གཉིས། ཕྱིར་དྲང་བ་དང་མདུན་ནས་དྲང༌། །ཞེས་བྱ་བ་ལ། ཟུག་རྔུ་སྟེ་ཐམས་ཅད་དབྱུང་བའི་ཐབས་ནི་གཉིས་ཁོ་ན་སྟེ། ཕྱིར་དྲང་བ་དང་མདུན་ནས་དྲང་བའོ། །རྩེ་ནས་དྲང་དང་རྩ་ནས་དྲང༌། །དེ་ལས་བཟློག་པས་དབྱུང་བར་བྱ། །ཞེས་བྱ་བ་ལ། དེ་གཉིས་ལས་བཟློག་པའི་ཐབས་ཡིན་པས་ན། གོ་བཟློག་པའི་ཚུལ་གྱིས་དབྱུང་བར་བྱའོ། །དེ་བས་ན་སྣ་ནས་དྲང་བ་དང་རྩེ་མོ་ནས་དྲང་བའི་ཐབས་གཉིས་ཀྱིས་དྲང་བར་བྱ་བ་ཡིན་ཏེ། མདུན་ནས་དྲང་བ་ནི་རྩ་བ་ནས་དྲང་བར་བྱའོ། །དེ་ཡང་དེ་བཞིན་དུ་ཐུར་དུ་ཟུག་པའི་ཟུག་རྔུའི་རྩེ་ནས་དྲང་བར་བྱ་ལ། གྱེན་དུ་ཟུག་པ་ནི་རྩ་བ་ནས་དྲང་བར་བྱའོ། །དེ་ལྟར་ན་གཅིག་ལ་གཅིག་བཅོས་པའི་ཐབས་ཀྱིས་ཟུག་རྔུ་དབྱུང་བར་བྱ་སྟེ། །དབྱུང་སླ་གང་ན་ཡོད་དྲལ་ཏེ། །དེ་ནས་ཐད་ཀར་དྲང་བར་བྱ། །ཞེས་བྱ་བ་ལ། མཚོན་འཕྲེད་དུ་ཟུག་པ་དག་ནི། ལུས་ཀྱི་ཕྱོགས་གང་ན་ཡོད་པར་དྲལ་ཏེ། དབྱུང་སླ་བར་བྱ་ལ་དེ་ནས་གནས་དེ་ལས་ཐད་ཀར་དྲང་ཞིང༌། དེ་དབྱུང་བར་བྱའོ། །མཚོན་ནི་བྲང་དང་མཆན་ཁུང་དང༌། བརླ་དྲུང་རྩིབ་ལོགས་ཟུག་པ་དང༌། །མདུན་དྲང་རྩེ་མོ་མངོན་གཅད་
བྱ། །ཁ་ཞེང་ཆེ་དྲང་མི་བྱ་དང༌། །ཞེས་བྱ་བ་ལ། ཟུག་རྔུ་བྲང་ན་གནས་ཤིང་ཟུག་པ་དང༌། དེ་བཞིན་དུ་མཆན་ཁུང་དང༌། བརླ་དྲུང་ན་གནས་པ་དང༌། རྩིབ་ལོགས་སུ་ཟུག་པ་རྣམས་སྟོབས་ཀྱིས་དབྱུང་བར་བྱའོ། །དེ་བཞིན་དུ་མདུན་ནས་དྲང་བར་མི་བྱའི་ཕྱིར་དྲང་བར་བྱ་བ་དང༌། རྩེ་མོ་འབུར་འབུར་པོར་ཕྱིར་མངོན་པ་དང༌། ཁ་གཅད་པར་བྱ་བ་དང༌། ཁ་ཞེང་ཆེ་བ་གང་ཡིན་པ་དེ་ནི་སྟོབས་ཀྱིས་དྲང་བར་མི་བྱའོ། །ཟུག་རྔུར་མ་གྱུར་མདེའུ་དང༌། །མི་མངོན་གནོད་མེད་པ་མི་དབྱུང༌། །ཞེས་བྱ་བ་ལ། ཟུག་རྔུར་མ་གྱུར་ཅིང་གནད་དུ་མ་ཞེན་ལ། གདེག་པ་དང༌། བདར་བ་དང༌། བཞག་པ་སྟེ་གནད་གསུམ་དུ་ཞུགས་པའམ། མཚོན་མི་མངོན་ཞིང་མི་སྣང་ཡང་གནོད་པ་མེད་དེ། སྐྲང་བ་དང་ན་བ་དང་རྣགས་པ་མེད་པར་གྱུར་ན། ཟུག་རྡུ་དེ་དབྱུང་བར་མི་བྱའོ། །དེ་ནས་ལག་པས་ཟིན་གྱུར་ན། ལག་པ་གཉིས་ཀྱིས་དྲང་བར་བྱ། །ཞེས་བྱ་བ་ལ། དེ་ནས་ཞེས་བྱ་བ་ནི་བཀྲ་ཤིས་པའི་དོན་ཏེ་ཟུག་རྔུའི་རྣམ་པ་ལག་པས་ཟིན་ཅིང་གཟུང་དུ་རུང་བ་ནི། ལག་པ་གཉིས་ཀྱིས་དྲང་ཞིང་གཟུང་བར་བྱའོ། །སྣང་གཞན་སེང་གེ་ཆུ་སྲིན་དང༌། །པར་མི་ཏ་ཀའི་མཆུ་ཡིས་དྲང༌། །ཞེས་བྱ་བ་ལ། ཟུག་རྔུ་གང་སྣང་བར་ཡང་གྱུར་ཅིང་སྔ་མ་ལས་གཞན་པ་སྟེ། ལག་པས་ཟིན་པར་མ་གྱུར་པ་དག་ནི། སེང་གེའི་མཆུ་འདྲ་བ་ལ་སོགས་པའི་ཆ་སྤྱད་ཀྱིས་དྲང་བར་བྱའོ། །མི་མངོན་རྨ་ཡི་དབྱིབས་ལས་ནི། །གལ་ཏེ་དབྱུང་བར་ནུས་གྱུར་པ། །ཀང་ཀ་བྲིང་ག་ཁྲུང་ཁྲུང་དང༌། །བྱ་རོག་ཤར་བྱའི་མཆུས་དྲང༌། །ཞེས་བྱ་བ་ལ། གང་ཟུག་རྔུ་ཉིད་ནི་མི་མངོན་ལ། རྨ་བྱའི་དབྱིབས་ལས་ལུས་གང་ན་གང་གནས་པའི་ཕྱོགས་དེ་ལས་གལ་ཏེ་དབྱུང་དུ་རུང་ཞིང་ནུས་པ་ཡིན་ན་ལུས་ཀྱི་ཕྱོགས་དེ་ལས་ཀང་ཀ་ལ་སོགས་པའི་མཆུ་འདྲ་བའི་ཆ་སྤྱད་ཀྱིས་དྲང་བར་བྱའོ། །པགས་སོགས་ལ་གནས་སྐམ་པས་དྲང༌། །ཁོང་སྟོང་ནང་ནས་ཉ་མགོས་དབྱུང༌། །ཞེས་བྱ་བ་ལ། པགས་པ་ལ་སོགས་པར་གནས་པའི་ཟུག་རྔུ་ནི། སྐམ་པ་འདྲ་བའི་ཆ་སྤྱད་གཉིས་པོས་དྲང་བར་བྱའོ། །སོགས་པའི་སྒྲས་ནི་ཤལ་སོགས་པ་བསྡུའོ། །གང་ཁོང་སྟོང་གི་
སྦུབས་ཅན་གྱི་ནང་གི་པགས་པ་ལ་གནས་པ་ནི། ཉ་མགོ་ལྟ་བུའི་ཆ་སྤྱད་ཀྱིས་དབྱུང་བར་བྱའོ། །སྦུ་གུར་གནས་པ་འདམ་བུ་འདྲས། །ཞེས་བྱ་བ་ལ། བུ་གའི་ཕྱོགས་སུ་གནས་པའི་ཟུག་རྔུ་ནི་འདམ་བུ་འདྲ་བའི་ཆ་སྤྱད་ཀྱིས་དབྱུང་བར་བྱའོ། །ལྷག་མ་གཞན་གྱིས་ཅི་རིགས་དྲང༌། །ཞེས་བྱ་བ་ལ། ཟུག་རྔུ་ལྷག་མ་སྔ་མ་དེ་དག་གིས་དབྱུང་བར་མི་ནུས་པ་དེ་དག་ནི་ཆ་སྤྱད་གཞན་འདིར་སྨོས་པ་དང༌། མ་སྨོས་པའི་ཐུར་མ་ལ་སོགས་པས་ཅི་རིགས་པར་དྲང་བར་བྱ་སྟེ། གང་ཞིག་གང་དང་འཚམ་པ་དེས་དེ་དབྱུང་བར་བྱའོ། །ཡང་ན་དང་པོར་མཚོན་གྱིས་དྲལ། །ཞེས་བྱ་བ་ལ། དེ་ལྟ་ན་ཡང་རང་དྲང་བར་མ་ནུས་ན་གཙགས་སྤྱད་ཀྱིས་དྲང་པོར་དྲལ་ཞིང་ཤ་ལ་སོགས་པ་བཅད་དེ། དེའི་འོག་ཏུ་དབྱུང་བར་བྱའོ། །དེ་ནས་རྨ་ཡི་ཁྲག་བསལ་བ། །བྱས་ལ་མར་གྱིས་དུགས་བྱ་ཞིང༌། །བཅིངས་ཏེ་སྤྱོད་པ་བསྟེན་པར་བྱ། །ཞེས་བྱ་བ་ལ། དེ་ནས་དེའི་འོག་ཏུ་ལུས་ཀྱི་ཕྱོགས་ལ་ཟུག་རྔུ་ཕྱུང་ཟིན་པ་དང༌། རྨའི་ཁའི་ཁྲག་བསལ་ཞིང་ཕྱིས་ལ་མར་གྱིས་རྨ་ལེགས་པར་དུགས་བྱ་ཞིང་བཅིངས་ཏེ། དེའི་འོག་ཏུ་སྤྱོད་པ་སྔར་སྣུམ་གྱི་ཆོ་གའི་སྐབས་སུ་བཤད་པའི་ཁ་ཟས་དང༌། སྤྱོད་ལམ་དག་བསྟེན་པར་བྱའོ། །རྩ་དང་ཆུ་བར་མཚོན་ལུས་པ། །ཐུར་མས་བསྐྱོད་དེ་དབྱུང་བར་བྱ། །ཞེས་བྱ་བ་ལ། རྩ་དང་ཆུ་བར་ཞེན་ཅིང་ཆགས་པའི་མཚོན་ལུས་པའི་ཟུག་རྔུ་ནི། དང་པོར་ཐུར་མས་བསྐྱོད་ཅིང་བསྐུལ་ལ། དེའི་འོག་ཏུ་དབྱུང་བར་བྱའོ། །སྙིང་གར་གནས་པའི་ཟུག་རྔུ་ནི། །ཆུ་གྲང་གཏོར་བས་སྡངས་བྱས་ལ། །གནས་གཞན་ཕྱིན་ཅིང་འཕགས་གྱུར་ན། །ཅི་རིགས་པར་ནི་དབྱུང་བར་བྱ། །ཞེས་བྱ་བ་ལ། སྙིང་གའི་ཕྱོགས་སུ་གནས་པའི་མཚོན་གྱི་ཟུག་རྡུ་ནི་དང་པོར་ཆུ་གྲང་མོ་གཏོར་ཞིང་བཏབ་པས་སྡངས་ཤིང་སྐྲག་པར་བྱས་ལ། སྡངས་པས་དེ་གནས་གཞན་དུ་འཆུགས་ཤིང༌། འཕགས་པར་གྱུར་ན་ཅི་རིགས་པར་དབྱུང་བར་བྱ་སྟེ། ཆ་སྤྱད་གང་འཚམ་པས་དབྱུང་ངོ་ཞེས་བྱ་བའི་དོན་ཏོ། །རྨ་ཡི་སྒོ་ནས་དབྱུང་དཀའ་བ། །གཞན་དག་ལ་ཡང་དེ་བཞིན་
བྱ། །ཞེས་བྱ་བ་ལ། མཚོན་དང་པོ་གང་དུ་ཟུག་པའི་རྨའི་སྒོ་ནས་དབྱུང་ཞིང་གདོན་བར་དཀའ་བ་གཞན་དག་ལ་ཡང་ཟུག་རྔུ་དེ་གནས་གཞན་དུ་བསྐྱོད་ལ་དྲལ་ཏེ། དབྱུང་བར་བྱའོ། །རུས་པར་ཟུག་ལ་རྐང་པ་ནི། །གཉིས་ཀྱིས་མནན་ལ་དྲང་བར་བྱ། །ཞེས་བྱ་བ་ལ། ཟུག་རྡུ་གང་ཞིག་རུས་པར་ཟུག་པར་གྱུར་པའི་མི་ཟུག་རྔུ་ཅན་དེ་རྐང་པ་གཉིས་ཀྱིས་མནན་ལ། ཟུག་རྔུ་དེ་ཆ་སྤྱད་ཀྱིས་དྲང་ཞིང་གདོན་བར་བྱའོ། །དེ་ལྟར་མ་ནུས་སྟོབས་ཆེ་བའི། །གཡོག་གིས་དམ་དུ་བཟུང་སྟེ་དབྱུང༌། །ཞེས་བྱ་བ་ལ། དེ་ལྟར་རྣམ་པ་དེས་ཟུག་རྔུ་དབྱུང་བ་མ་ནུས་ན་ཤིན་ཏུ་སྟོབས་ཆེ་ཞིང་ནུས་པ་དང་ལྡན་པའི་གཡོག་བསྒོ་བ་བཞིན་དུ་བྱེད་པས་ཆ་སྤྱད་ཀྱིས་ཤིན་ཏུ་དམ་དུ་བཟུང་སྟེ་དབྱུང་བར་བྱའོ། །འོན་ཀྱང་མ་ནུས་མདེའུའི་རྩ། །བཀུག་ལ་གཞུ་རྒྱུད་དམ་བཏགས་ལ། །རྟ་སྲབ་ཀྱི་ནི་ཁ་ལྕགས་མཐར། །མ་ཡེངས་པ་ཡིས་དམ་བཏགས་ཏེ། །ཡན་ལག་ལྔ་པོ་ལེགས་བསྡམས་ནས། །རྟ་ནི་ལྕག་གིས་གཞུས་ནས་སུ། །བརྡེག་ཅིང་མགོ་བོ་བཏེག་ནས་ནི། །ཤུགས་ཀྱིས་ཅི་བཞིན་བསྟོད་ནས་ནི། །དེ་ལྟར་ཟུག་རྔུ་དབྱུང་བའམ། །ཞེས་བྱ་བ་ལ། དེ་ལྟ་ན་ཡང་ཟུག་རྔུ་དབྱུང་བར་མ་ནུས་ན། མདེའུའི་རྩ་བ་དམ་དུ་བཀུག་ལ། གཞུ་རྒྱུད་ཀྱི་ཕྱོགས་གཅིག་ལ་དམ་དུ་བཏགས་ཤིང་བཅིངས་ཏེ། གཞུ་རྒྱུད་ཀྱི་ཕྱོགས་གཅིག་རྟ་སྲབ་ཀྱི་ཁ་ལྕགས་ཀྱི་ཡང་མིག་ལ་སྨན་པས་གཞན་དུ་མ་ཡེངས་པར་དམ་དུ་བཏགས་ཏེ། རྟའི་ཡན་ལག་ལྔ་པོ་ལེགས་པར་བསྡམས་ཤིང་དུལ་བར་བྱས་ཤིང་དེའི་འོག་ཏུ་རྟ་ལྕག་གིས་གཞུས་ན། ཅི་ནས་ཀྱང་མགོ་དྲག་ཏུ་བཏེག་པའི་ཤུགས་ཀྱིས་ཟུག་རྔུ་འབྱིན་པར་ནུས་པ་དེ་ལྟར་བྱའོ། །ཡང་ན་ཤིང་གི་ཡལ་གར་གདགས། །ཞེས་བྱ་བ་ལ། ཡང་ན་རྣམ་པ་གོང་མ་ལྟར་གཞུ་རྒྱུད་ཀྱི་རྩེ་མོ་གཅིག་མདེའུ་ལ་བརྟོད་དེ། རྩེ་མོ་གཅིག་ཤིང་གི་ཡལ་ག་བཏུད་པ་ལ་བརྟོད་དེ། བཏང་བས་ཟུག་རྔུ་དབྱུང་བར་བྱའོ། །མདེའུ་རྩ་ཕྲ་བར་སྲད་བུ་དག །བཏགས་ཏེ་ཟུག་རྔུ་དབྱུང་བར་བྱ། །ཞེས་བྱ་བ་ལ། ཟུག་རྔུ་གང་གིས་མདེའུ་རྩ་བ་ཕྲ་ཞིང་ཆད་པར་
གྱུར་དུ་དོགས་པ་ཡིན་ན་སྲང་བུ་ཕྲ་མོ་བཏགས་ཏེ་དབྱུང་བར་བྱའོ། །རྨ་སྐྲངས་མདེའུ་རྩ་མི་སྣང་ན། །སྐྲངས་པ་ལེགས་པར་བཙིར་ནས་དབྱུང༌། །ཞེས་བྱ་བ་ལ། རྨ་ཡི་ཁ་སྐྲངས་པས་ཟུག་རྔུའི་མདེའུ་རྩ་བ་མི་སྣང་བར་གྱུར་ན། སྐྲངས་པ་དེ་ལེགས་པར་བཙིར་ཞིང་མནན་ནས་དབྱུང་བར་བྱའོ། །དོང་བུ་ཐོ་བས་བརྡུངས་པ་ཡིས། །མཐོ་ཞིང་སྣང་བར་གྱུར་ན་དབྱུང༌། །ཞེས་བྱ་བ་ལ། ཟུག་རྔུ་མཐོ་ཞིང་འཕགས་པར་སྣང་བར་གྱུར་ན་ཆ་སྤྱད་དོང་བུ་ཞེས་བྱ་བ་ཐོ་བས་བརྡུང་པས་དབྱུང་བར་བྱའོ། །ལམ་མ་ཡིན་པར་བྱུང་བ་གང༌། །དེ་ཉིད་ཀྱིས་ནི་རྨར་དབྱུང་བྱ། །ཞེས་བྱ་བ་ལ། ཐོ་བ་དེ་ཉིད་ཀྱིས་ཟུག་རྔུ་བསྐྱོད་ལ། ལམ་མ་ཡིན་པ་ལས་རང་གི་རྒྱུ་བའི་ལམ་རྨའི་སྒོ་དང་ཉེ་བར་དྲངས་ལ། དེའི་འོག་ཏུ་ལམ་ཇི་ལྟ་བ་ལས་དབྱུང་བར་བྱའོ། །མདེའུ་ཟུར་བཅུམ་སྟེ་དབྱུང་བ་འམ། །དོང་བུའི་ཁ་ཡིས་དབྱུང་བར་བྱ། །ཞེས་བྱ་བ་ལ། མདེའུ་ཟུག་རྔུའི་ཟུར་ཅན་ནམ་རྣ་བ་ཅན་ཡོད་ན་རྣ་བ་དེ་བཅུམ་ཞིང་བསྡུས་ལ། ལྷོད་པར་བྱས་ཏེ། དབྱུང་བའམ་དོང་བུའི་ཁས་ལེགས་པར་དབྱུང་བར་བྱའོ། །རྣ་བ་མེད་ཅིང་རྨ་ཁ་དབྱེ། །དྲང་འདུག་ཁབ་ལོང་བསྟན་པས་དབྱུང༌། །ཞེས་བྱ་བ་ལ། ཟུག་རྔུའི་མདེའུ་རྣ་བ་མེད་པ་དང༌། རྨ་ཁ་བྱེ་ཞིང་ཕྱེ་བ་དང༌། དྲང་པོར་འདུག་ཅིང་ཐད་ཀར་གནས་པ་དག་ནི། ཁབ་ལོང་ཞེས་བྱ་བའི་ནོར་བུའི་ཁྱད་པར་བསྟེན་པས་དབྱུང་བར་བྱའོ། །ཞུ་བའི་གནས་སོང་ཟུག་རྔུ་ནི། བཀྲུ་སྨན་ཉིད་ཀྱིས་དབྱུང་བར་བྱ། །ཞེས་བྱ་བ་ལ། ཞུ་བའི་གནས་ལོང་ཁ་ཆང་ཀྱི་ནང་དུ་ཞུགས་པའི་ཟུག་རྔུ་ཕྲ་མོ་ནི་བཀྲུ་སྨན་བཏང་བ་ཉིད་ཀྱིས་དབྱུང་བར་བྱའོ། །རླུང་གནོད་དུག་དང་ནུ་ཞོ་དང༌། །ཁྲག་དང་ཆུས་གནོད་གཞིབས་པས་བསལ། །ཞེས་བྱ་བ་ལ། རླུང་གནོད་པ་བསྐྱེད་པ་ལ་སོགས་པ་དག་ནི་ཟུག་རྔུ་དང་འདྲ་བར་ལུས་ལ་གནོད་པར་བྱེད་པ་ཡིན་ལ། དེ་ནི་གཞིབས་པས་བསལ་ཞིང་གདོན་པར་བྱའོ། །གྲེ་བའི་ནང་ཞུགས་ཟུག་རྔུ་ལ། །སྐུད་པ་གྲེ་བར་གཞུག་བྱ་སྟེ། །པདྨའི་རྩ་བར་སྐུད་པ་གདགས། །པད་རྩ་ཟུག་རྔུ་ལྷན་ཅིག་དྲང༌། །ཞེས་བྱ་བ་ལ། གྲེ་བའི་སྦུབས་ཀྱི་ནང་དུ་ཟུག་ཅིང་དེར་ཞུགས་
པའི་ཟུག་རྔུ་ནི། སྲིན་བལ་ལ་སོགས་པའི་སྐུད་པ་གཞུག་པར་བྱ་ལ། དེ་ཡང་པདྨའི་རྩ་བ་ལ་སྐུད་བ་བཏགས་ཏེ་བཏང་ལ་དེའི་འོག་ཏུ་པདྨའི་རྩ་བ་དང་ཟུག་རྔུ་ལྷན་ཅིག་དྲང་བར་བྱའོ། །ལྕགས་བསྲེགས་མིག་ཆུར་བཅུག་པ་ཡི། །ལྕགས་ཐུར་བརྟན་པོར་བྱས་ནས་ནི། །རྒྱ་སྐྱེགས་ཅན་ནམ་རྒྱ་སྐྱེགས་མེད། །རྒྱ་སྐྱེགས་ཀྱིས་བསྒོས་ཟུག་རྔུ་དབྱུང༌། །ཞེས་བྱ་བ་ལ། ཟུག་རྔུ་རྒྱ་སྐྱེགས་ཅན་དག་གྲེ་བའི་སྦུབས་ལས་གདོན་པའི་ཐབས་ནི། ཆ་སྤྱད་སྦུབས་ཅན་གྲེ་བར་བཅུག་ལ། གྲེ་བའི་ཚིགས་པ་བསྲུང་བར་བྱ་བའི་ཕྱིར། ཆུ་བསིལ་མོ་ལྕགས་བསྲེགས་པའི་ཐུར་མ་ལ་བླུགས་པས་དེ་གདོན་པར་བྱའོ། །རྒྱ་སྐྱེགས་མེད་པའི་ཟུག་རྔུ་ཡང་ལྕགས་བསྲེགས་པའི་ཐུར་མའི་རྩེ་རྒྱ་སྐྱེགས་ཀྱིས་བསྒོས་པའི་སྨྱིག་མའམ། དོང་བུར་བཅུག་སྟེ་ཆུས་བཏབ་པས་དབྱུང་བར་བྱའོ། །སྐྲ་ཤད་འཛིངས་པ་འཐུངས་པ་དང༌། །གཤེར་བས་ཚེར་མ་ཟུག་པ་གདོན། །འཕྲལ་དུ་སྲད་བུ་ཐོགས་པ་ཡིས། །སློན་པར་བྱའོ་དེས་ཅིག་ཤོས། །ཞེས་བྱ་བ་ལ། སྐྲའི་ཚོགས་བསྡུས་པའི་གོང་བུ་ནི་སྐྲ་ཤད་འཛིངས་པ་ཞེས་བྱ་ལ་དེ་འཐུངས་པ་དང༌། གཤེར་བའི་རྩྭས་ཆུ་ལ་སོགས་པའི་ཚེར་མ་སྟེ། ཉ་རུས་སམ། གཞན་ཡང་དེ་ལྟ་བུའི་རུས་པའི་ཟུག་རྔུ་དབྱུང་ཞིང་གདོན་པར་བྱའོ། །དེ་ཡང་འཕྲལ་དུ་སྟེ། དེའི་མོད་སྲད་བུ་ལ་ཟུག་རྔུ་ཐོགས་པར་གྱུར་པས་དེ་སློན་པར་བྱ་ཞིང༌། སྲད་བུའི་ཕྱོགས་གཅིག་ཏུ་ཟུག་རྔུ་འབྱར་བ་དེ་དྲང་བར་བྱའོ། །ཡང་ཚེར་མ་དེས་ནི་ཅིག་ཤོས་ཏེ། སྐྲ་ཤད་དེ་དྲང་བར་བྱ་སྟེ། སྲད་བུ་བཏགས་ཤིང་གཤེར་བག་འཐུངས་པས་སློན་པར་བྱའོ། །ཁ་སྣར་དྲང་བར་མ་ནུས་ན། གཞན་དུ་ཐུར་དུ་མིད་པར་བྱ། །ཞེས་བྱ་བ་ལ། གལ་ཏེ་ཁ་སྣར་གྱེན་དུ་ཟུག་རྔུ་དྲང་བར་མ་ནུས་ན། གཞན་དུ་ན་ཐུར་དུ་མིད་ཅིང་ནང་དུ་དྲང་བར་བྱའོ། །ཞེས་བྱ་བའི་དོན་ཏོ། །ཟས་ཀྱིས་བརྣངས་པའི་ཟུག་རྔུ་ནི། །ཆུ་བཏུང་ཕྲག་པར་བརྡེགས་པས་གཞུག །ཅེས་བྱ་བ་ལ། ཟས་ཀྱིས་བརྣངས་ཤིང་ལྐོག་མར་ཆགས་པའི་ཁ་ཟས་ཉིད་ནི་ཟུག་རྔུ་འབྱེད་བསད་པས་ཟུག་རྔུ་ཞེས་བྱ་ལ། དེ་ནི་ཆུ་བཏུང་བར་ཕྲག་པར་ཁུ་ཚུར་བརྡེག་པས་ནང་དུ་ཞུགས་པར་བྱའོ། །
མིག་གི་རྨ་ཡི་ཟུག་རྔུ་ཕྲ། དར་རམ་བལ་ལམ་ཆུ་ཡིས་བསལ། །ཞེས་བྱ་བ་ལ། མིག་གི་རྨའི་ཟུག་རྔུ་ཕྲ་མོ་ནི། དར་ལ་སོགས་པ་གསུམ་གྱིས་བསལ་ཞིང་གདོན་པར་བྱའོ། །མི་ནི་ཆུས་གང་ཁ་སྦུབ་སྟེ། །སྤྲུགས་པ་འམ་བརྐྱང་ལ་བཙིར་སློན་བའམ། །ཐལ་ཁུང་བརྐོས་ཏེ་མི་ཡི་ནི། །སྐེ་ཡི་བར་དུ་ནུབ་པར་གཞུག །ཅེས་བྱ་བ་ལ། མི་ཆུས་ཁྱེར་བའམ། །ཆུར་ལྷུང་པའི་ཚེ་ནང་དུ་ཆུས་གང་བར་གྱུར་ན། ཁ་སྦུབ་སྟེ་ལེགས་པར་སྤྲུགས་པའམ། དེ་བཞིན་དུ་ཡང་ཁ་སྤུབ་སྟེ་བརྐྱང་ལ་བཙིར་བ་འམ། སློན་སྨན་གྱིས་སྐྱུག་ཏུ་གཞུག་གོ །རྣ་བ་ཆུས་གང་ལག་པ་ཡིས། །མཉེས་ལ་ཏིལ་མར་རྒྱུན་བླུགས་ལ། །རྣ་བ་ཐུར་དུ་བསྟན་ནས་ནི། །བརྡབས་པའམ་ཡང་ན་བརྔུབ་པར་བྱ། །ཞེས་བྱ་བ་ལ། རྣ་བ་ཆུས་གང་བར་གྱུར་ན། ལག་པས་ལེགས་པར་མཉེས་ལ། ཏིལ་མར་གྱི་རྒྱུན་བླུགས་པ་དང༌། དེ་བཞིན་དུ་རྣ་བ་ཐུར་དུ་བསྟན་ནས་ལག་པས་བརྡབས་པའམ། བརྔུབ་ཅིང་གཞིབ་པར་བྱའོ། །རྣ་བའི་ནང་དུ་འབུ་ཞུགས་ན། །རྣ་བ་ཚྭ་ཆུས་བཀང་བའམ། །ཚྭ་ཆུ་དྲོ་འཇམ་ཉིད་ཀྱིས་དགང༌། །ཤི་ནས་འབུ་རོ་དབྱུང་ཐབས་བྱ། །ཞེས་བྱ་བ་ལ། རྣ་བའི་བུ་གའི་ནང་དུ་རྐང་བརྒྱད་པ་ལ་སོགས་པའི་འབུ་ཞུགས་ན་རྣ་བ་ཆུ་ཚན་གྱི་ཆུས་དགང་པའམ། ཚྭ་ཆུ་དྲོ་འཇམ་དག་གིས་ཀྱང་དགང་བར་བྱ་སྟེ། དོན་དུ་ཚྭ་ཆུའམ། ཚྭ་ཆུ་དྲོ་འཇམ་དུ་བསྲོས་པས་རྣ་བ་དགང་བར་བྱའོ། །གལ་ཏེ་འབུ་རོ་དབྱུང་བའི་ཐབས་རྣ་སྤབས་བསལ་བ་ལ་སོགས་པའི་ཆོ་ག་འོག་ནས་སྨོས་པ་དག་བྱའོ། །རྒྱ་སྐྱེགས་ཅན་དང་གསེར་དངུལ་སོགས། །འབྱུང་ཁུངས་ལས་བྱུང་ཡུན་རིངས་གནས། །མཚོན་ནི་ཕལ་ཆེར་ལུས་ཀྱི་མེ། །དྲོད་ཀྱིས་འཇུ་བར་བྱེད་པ་ཡིན། །ཞེས་བྱ་བ་ལ། ཟུག་རྔུ་རྒྱ་སྐྱེགས་ཅན་དང༌། གསེར་དངུལ་གྱི་རང་བཞིན་ཅན་ལ་སོགས་པ་འབྱུང་ཁུངས་ལས་བྱུང་བའི་མཚོན་ནི། ལུས་ཀྱི་མེ་དྲོད་ཀྱིས་འཇུ་བར་ནུས་པས་ཡུན་རིང་དུ་གནས་ན། མཚོན་དེ་དག་འཇུ་བར་འགྱུར་བ་ཡིན་ནོ། །ས་དང་འོད་མ་ཤིང་རྭ་རུས། །སོ་དང་སྐྲ་དང་རྡོ་བ་འཇུ། །ཞེས་བྱ་བ་ལ། ས་ལ་སོགས་པའི་
ཟུག་རྔུ་དག་ཀྱང་ལུས་ཀྱི་མེ་དྲོད་ཀྱིས་འཇུ་བར་ནུས་པ་ཡིན་ནོ། །རྭ་དང་འོད་ཚལ་ལྕགས་ཏ་ལ། །ཤིང་ཚལ་ཟུག་རྔུ་རིང་པོས་ཀྱང༌། །ཕལ་ཆེར་དེ་དག་ཚོས་འགྱུར་ལ། །ཁྲག་དང་ཤ་ཡིས་ཚོས་པར་བྱེད། །ཅེས་བྱ་བ་ལ། རྭའི་ཟུག་རྔུ་དང་འོད་མའི་ཟུག་རྔུ་དང་ཤིང་གི་ཟུག་རྔུ་ཕལ་ཆེ་བ་དག་ཀྱང་ལུས་ཀྱི་མེས་ཚོས་ཤིང་འདྲུལ་བར་འགྱུར་རོ། །དེ་དག་ཀྱང་ཤ་དང་ཁྲག་གིས་ཚོས་ཤིང་འཇུ་བར་བྱེད་དོ། །ཟུག་རྔུ་ཤ་ཡི་གཏིང་དུ་ཟུག །ཕྱོགས་དེ་ཚ་བ་འམ་མེད་གྱུར་ན། །དེ་ནས་དེ་ནི་སྣང་བྱའི་ཕྱིར། །མཉེ་དུགས་སྦྱང་དང་ཤ་འབྲི་བརྟ། །སྨན་རྣོན་བཅིངས་དང་ཟས་སྐོམ་སྦྱིན། །མཚོན་གྱིས་གདབ་ཅིང་གཙགས་པ་ཡིས། །སྨིན་པར་བྱས་ནས་རྨ་དབྲལ་དང༌། །བཙལ་དང་ཕྱེ་བས་ཟུག་རྔུ་དབྱུང༌། །ཞེས་བྱ་བ་ལ། ཟུག་རྔུའི་རྣམ་པ་ཤའི་གཏིང་དུ་ཟུག་ཅིང་ནང་དུ་ཟུག་པ་ནི་ལུས་ཀྱི་ཡན་ལག་གི་ཕྱོགས་དེ་ཚ་ཞིང་ཚོས་པར་འགྱུར་ཏེ། དེར་གནས་པའི་ཟུག་རྔུ་སྟེ་མཉེ་བ་ལ་སོགས་པའི་ཐབས་ཀྱིས་སྨིན་པར་བྱས་ནས་དབྱུང་བར་མི་བྱའོ། །མཉེ་བ་ནི་ལག་པས་མཉེ་བའོ། །བཀྲུ་སྣན་དང་སློན་སྨན་ལ་སོགས་པས་སྦྱང་བ་དང༌། སྨྱུང་བ་ལ་སོགས་པས་ཤ་དབྲི་བ་དང༌། ཤ་དབྲི་ཐབས་ལ་སོགས་པས་བརྟ་བ་དང༌། སྨན་ཚ་ཞིང་རྣོ་བས་བཅིང་བ་དང༌། ཟས་སྐོམ་རྣོན་པོ་སྦྱིན་པ་དང༌། མཚོན་གྱིས་བཏབ་ཅིང་གཙགས་པས་སྣང་བར་བྱས་ནས་དང་པོ་ཐབས་དེ་བཞིན་དུ་དེ་དག་གིས་སྨིན་པར་བྱས་ལ། དེའི་འོག་ཏུ་རྨ་འདྲལ་བ་དང༌། ཆུ་ཚོལ་གྱིས་བཙལ་བ་དང༌། དབྱེ་ཞིང་གཤགས་པས་ཟུག་རྔུ་དེ་དབྱུང་བར་བྱའོ། །ཟུག་རྔུའི་གནས་དང་ཆ་སྤྱད་ཀྱི། །ཚུལ་ནི་མང་པོས་ལེགས་བརྟགས་ཏེ། །བློ་ལྡན་ཐབས་ནི་དེ་དང་དེས། །ཤེས་པར་བྱས་ལ་ཟུག་རྔུ་དབྱུང༌། །ཞེས་བྱ་བ་ལ། ཟུག་རྔུ་དེ་རྭ་དང་འོད་མ་ལ་སོགས་པ་གནས་ཏེ། ཟུག་པའི་གནས་པགས་པ་དང༌། ཤ་ལ་སོགས་པ་དང་ཆ་སྤྱད་ཅེས་ཆ་སྤྱད་བཀྲ་ཤིས་ལ་སོགས་པ་དེ་རྣམས་ཀྱི་ཚུལ་མང་པོ་འམ། རྣམ་པ་སྣ་ཚོགས་པས་ལེགས་པར་བརྟགས་ཏེ་ཤེས་པར་བྱས་ལ་བློ་དང་ལྡན་པའི་མཁས་པས་འདིར་བཤད་པ་དང༌། མ་བཤད་པའི་ཐབས་དང་དེའི་བྱེ་བྲག་ཤེས་པར་བྱས་ལ། ཟུག་རྔུའི་རྣམ་པ་ཡང་ཇི་ལྟར་གནས་པ་ཤེས་པར་བྱ་
བ་དང༌། དེ་བཞིན་དུ་དེ་དང་དེ་ཉིད་ཀྱིས་དབྱུང་ཞིང་གདོན་པར་བྱའོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ། ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། །ལེའུ་ཉི་ཤུ་རྩ་བརྒྱད་པའི་རྣམ་པར་འགྲེལ་པའོ།། །།དེ་ནས་གཏར་ག་གདབ་པའི་ལས་ཀྱི་ཆོ་གའི་ལེའུ་བཤད་པར་བྱའོ། །ཞེས་བྱ་བ་ལ། འདིར་བཤད་པ་ནི་འདི་ཡིན་ཏེ། ཟུག་རྔུ་ལ་ལ་ནི་དཔྲལ་ནས་དབྱུང་བར་བྱའོ། །ཞེས་གོང་དུ་བཤད་པས་དེའི་ཕྱིར་དེའི་འོག་ཏུ་འདི་བརྩམས་པ་ཡིན་ནོ། །གཙགས་སྤྱད་ཀྱིས་གཏར་ག་གདབ་ཅིང་རྨའི་ལས་སུ་བྱ་བ་བྱེད་པས་ན་གཏར་ག་གདབ་པའི་ལས་ཏེ། དེའི་ཆོ་ག་ནི་འདི་དང་འདི་ལྟར་བྱའོ། །ཞེས་བྱ་བའི་ཚུལ་ཏེ་དེ་བཤད་པར་བྱའོ། །རྨ་ནི་ཕལ་ཆེར་དང་པོ་ནི། །སྐྲངས་དང་སྨིན་ལས་འབྱུང་བར་འགྱུར། །དེ་བས་དེ་ཉིད་གསོ་བྱ་སྟེ། །དེ་བསིལ་བྱུག་བླུགས་ཁྲག་དབྱུང་དང༌། །ལེགས་པར་སྦྱང་བ་ལ་སོགས་པ། །སྨིན་པར་འགྱུར་ལས་འབད་དེ་བསྲུང༌། །ཞེས་བྱ་བ་ལ། རྨའི་མཚན་ཉིད་ཕལ་ཆེར་མང་དུ་དང་པོ་སྐྲངས་ཤིང་སྨིན་པ་ལས་རྨ་འབྱུང་བར་འགྱུར་རོ། །དེ་བས་ན་སྐྲངས་པ་དེ་ཉིད་གསོ་ཞིང་ཞི་བར་བྱ་བ་དང༌། སྨིན་པར་འགྱུར་བ་ལས་བསྲུང་བར་བྱ་སྟེ། ཅི་ནས་ཀྱང་སྐྲངས་པ་དེ་སྨིན་ཅིང་རྣགས་པར་མི་འགྱུར་བ་དེ་ལྟར་འབད་པ་དང་ལྡན་པས་བསྲུང་བར་བྱའོ། །དེ་ཇི་ལྟར་བསྲུང་བར་བྱ་ཞེ་ན། དེ་ནི་བསིལ་དང་ཞེས་བྱ་བ་ལ་སོགས་པ་སྟེ། སྐྲངས་པ་དེ་ཙནྡན་གྱི་ལྡེ་གུ་ལ་སོགས་པ་བསིལ་སྨན་གྱིས་བྱུག་པ་དང༌། བསིལ་སྨན་ལ་སོགས་པའི་ཆུའི་རྒྱུན་བླུགས་པ་དང༌། དེ་བཞིན་དུ་གཏར་ག་གདབ་ཅིང་ཁྲག་དབྱུང་བ་དང༌། སྐྱུགས་སྨན་དང་བཀྲུ་སྨན་ལ་སོགས་པ་བཏང་བས་ལེགས་པར་སྦྱང་བར་བྱས་ལ། རླུང་ལ་སོགས་པའི་ནད་དམིགས་ཇི་ལྟ་བ་དང་མཐུན་པའི་གསོ་དཔྱད་ཀྱིས་སྨིན་ཅིང་རྣགས་པར་གྱུར་པ་ལས་བསྲུང་བར་བྱའོ། །ཐོར་བུ་མ་སྨིན་སྐྲངས་དྲོད་ཆུང༌། །མདོག་འདྲ་སྲ་ཞིང་བརྟན་པར་གནས། །ཞེས་བྱ་བ་ལ། ཐོར་བུ་འམ་སྐྲངས་
པའི་ཚབས་ཆུང་བ་དང༌། དྲོད་དམ་ཚ་བར་ཤས་ཆུང་བ་དང༌། དེ་བཞིན་མདོག་ནི་འདྲ་བ་སྟེ། པགས་པའི་མདོག་མ་ཉམས་ཤིང་མཉམ་པ་དང༌། སྲ་ཞིང་མཉེན་བག་མེད་པ་དང༌། བརྟན་ཞིང་མི་ཡོ་བར་གནས་པ་ཡིན་ནོ། །སྨིན་ཚེ་མདོག་ནི་འགྱུར་བ་དང༌། །དམར་ཞིང་རྐྱལ་བུའི་དབྱིབས་ལྟར་འདུག །གས་པ་ལྟ་བུའི་ནད་བཅས་དང༌། །ཡན་ལག་སྙོམ་ཞིང་གླལ་བཅས་དང༌། །ལུས་གྲུགས་འཁྲུགས་ཚ་ཡི་ག་འཆུས། །རིམས་འདེབས་སྐོམ་དད་གཉིད་མེད་དང༌། །མར་འཁྱགས་བཞག་ན་འཇུ་བ་དང༌། །རྨ་ལྟར་རེག་ན་མི་བཟོད་དོ། །ཞེས་བྱ་བ་ལ། སྐྲངས་པར་གྱུར་པ་དེ་སྨིན་པར་བྱེད་པའི་ཚེ་ནི། མདོག་འགྱུར་ཞིང་པགས་པའི་མདོག་དང་མི་འདྲ་བ་དང༌། དེ་བཞིན་དུ་མདོག་རྩ་དམར་དང༌། རྐྱལ་བུའི་དབྱིབས་ལྟར་འདུག་སྟེ། རླུང་གིས་ཁེངས་ཤིང་མི་འགྱུར་བར་གནས་པས་ན་རྐྱལ་པ་བུས་པ་ལྟ་བུར་འདུག་པ་དང་དེ་བཞིན་དུ་གས་པ་ལྟ་བུ་སྟེ། བཅག་པ་འམ་བཀས་པ་ལྟ་བུའི་ཚུལ་དང་ལྡན་པ་དང༌། ནད་དང་བཅས་པ་དེ་ཁབ་ཀྱིས་གཙགས་པ་སྙམ་དུ་སེམས་པ་དང༌། དེ་བཞིན་དུ་ཡན་ལག་ཐམས་ཅད་གླལ་འབྱུང་བ་དང་བཅས་པར་གནས་པས་ལུས་གྲུགས་ཤིང་དཀྲུམ་པ་ལྟ་བུར་སེམས་པ་དང་དེ་བཞིན་དུ་ལུས་འཁྲུགས་པ་ལ་སོགས་པ་དང་ལྡན་བ་སྟེ། འཁྲུགས་པ་ནི་ཚིག་བརྗོད་པར་མི་ནུས་པའི་ནད་ཀྱི་ཚོར་བ་རང་གི་ཉམས་ཀྱིས་མྱོང་བའི་ཚུལ་དུ་མ་དང་ལྡན་པའི་ཁམས་འཁྲུགས་པའི་ནད་འབྱུང་བའོ། །ཚ་བ་ནི་ལུས་དང་ཡན་ལག་ཐམས་ཅད་མི་བཟད་པར་ཚ་བའོ། །ཡི་ག་འཆུས་པ་ནི་ཟས་ལ་འདོད་པ་མེད་ཅིང༌། མངོན་པར་མི་དགའ་བར་འགྱུར་བ་དང༌། རིམས་ཀྱིས་འདེབས་པ་དང༌། སྐོམ་དད་ཀྱིས་གདུངས་པ་དང༌། གཉིད་མེད་ཅིང་ཡེར་བ་སྟེ། དེ་དག་དང་ལྡན་པར་འགྱུར་བ་དང༌། དེ་བཞིན་དུ་མར་འཁྱགས་ཤིང་འཐས་པར་གྱུར་པ་དེའི་སྟེང་དུ་བཞག་ན་འཇུ་བར་འགྱུར་བ་དང༌། དེ་བཞིན་དུ་རྨ་བྱུང་བ་ལྟར་སྐྲངས་པ་སྨིན་པར་བྱེད་པ་དེའི་ཚེ། རེག་ན་མི་བཟོད་པ་ཡིན་ནོ། །སྨིན་གྱུར་ན་བའི་ཤུགས་ཆུང་ཞིང༌། །རྙིད་ཅིང་སྐྱ་ལ་
གཉེར་མ་འདུ། །མཐའ་མ་འཇུམ་ཞིང་དབུས་སུ་མཐོ། །གཡའ་དང་སྐྲངས་པ་ལ་སོགས་ཆུང༌། །རྐྱལ་པ་ཡི་ནི་ཆུ་ལྟ་བུར། །རེག་ན་རྣག་ནི་ཕན་ཚུན་རྒྱུ། །ཞེས་བྱ་བ་ལ། སྐྲངས་པ་དེ་སྨིན་ཅིང་རྣགས་པར་གྱུར་ན་ན་བའི་ཤུགས་ཆུང་བ་སྟེ། ནད་ཀྱི་རྩོམ་པ་ཤས་ཆུང་བ་དང༌། དེ་བཞིན་དུ་རྙིང་ཅིང་སྙི་བ་དང༌། མདོག་སྐྱ་ཞིང་དཀར་བ་དང༌། གཉེར་མའི་ཚོགས་འདུ་བ་དང༌། དེ་བཞིན་དུ་མཐའ་མ་ཐོག་ཐག་འཇུམ་ཞིང་དམའ་ལ་དབུས་མའི་ཕྱོགས་མཐོ་ཞིང་འཕགས་པར་འགྱུར་བ་དང༌། དེ་བཞིན་དུ་གཡའ་བ་དང༌། སྤངས་པ་ལ་སོགས་པ་ཆུང་ཞིང་ཞི་བ་དང༌། རྐྱལ་པའི་ནང་དུ་ཆུ་བླུགས་པ་ལྟར་གནས་ཤིང༌། རེག་ཅིང་མནན་ན་རྣག་གི་ཚོགས་ཕན་ཚུན་རྒྱུ་ཞིང་འཁྲུགས་བ་ཡིན་ནོ། །རླུང་མིན་མིན་མཁྲིས་མིན་ཚ། །མེད་དེ་བད་ཀན་མེད་མི་སྐྲང༌། །ཁྲག་མེད་དམར་བར་མི་འགྱུར་ཏེ། །དེ་བས་ནད་ཁྲག་དང་བཅས་སྨིན། །ཞེས་བྱ་བ་ལ། སྨིན་ཅིང་རྣགས་པ་དེ་ལ་རླུང་མ་ཡིན་ཞིང༌། རླུང་ནད་མེད་པ་ནི། ན་ཞིང་ཟུག་པར་མི་འགྱུར་ལ། མཁྲིས་པ་མ་ཡིན་པར་ནི་ཚ་ཞིང་དྲོད་བག་མི་འབྱུང་ཞིང༌། བད་ཀན་མེད་པས་ནི་སྐྲངས་པ་འབྱུང་བར་མི་འགྱུར་ལ། ཁྲག་མེད་དམར་པར་ནི་མི་འགྱུར་ཏེ། དེ་བས་ན་རྒྱུ་དེའི་ཕྱིར་ན་ཞེས་པ་རླུང་དང་མཁྲིས་པ་དང༌། བད་ཀན་དང་ཁྲག་དང་བཅས་ན། སྐྲངས་ཤིང་སྨིན་པར་འགྱུར་རོ། །སྨིན་པ་ཐལ་དྲགས་ཁོང་སྟོང་དང༌། །ནད་ཀྱིས་ཟོས་པས་བགས་པ་སྲབ། །གཉེར་མ་འཇུམ་ཞིང་མདོག་གནག་ལ། །བ་སྤུ་རྣམས་ནི་འབྱི་བར་འགྱུར། །ཞེས་བྱ་བ་ལ། སྐྲངས་སྨིན་ཟིན་ནས་ཐལ་དྲགས་ཤིང་དུས་ཤིན་ཏུ་འདས་པ་ནི། སྐྲངས་པའི་གནས་ན་ཁོང་སྟོང་དུ་འགྱུར་བ་ནད་ལས་བྱུང་བའི་རྣག་གིས་ཟོས་ཤིང་ཟད་པར་བྱས་པ་དང༌། པགས་པ་སྲབ་ཅིང་རྡོལ་བར་ཉེ་བ་དང༌། གཉེར་མ་འཇུམ་ཞིང་པགས་པ་འདུས་པ་དང༌། མདོག་གནག་ཅིང་དྲི་མ་ཅན་དུ་གནས་པ་དང༌། བ་སྤུ་རྣམས་ཀྱི་ཚོགས་འབྱི་ཞིང་འབྱུང་བར་མི་འགྱུར་བ་ཡིན་ནོ། །བད་ཀན་ཤས་ཆེའི་སྐྲངས་པ་ནི། །སྨིན་
བ་གཏིང་རིང་ཁྲག་གིས་གང༌། །དེ་བས་སྨིན་རྟགས་གསལ་མ་ཡིན། །སྐྲངས་པ་གང་དུ་བསིལ་གྱུར་ཅིང༌། །པགས་མདོག་མི་འགྱུར་ནད་ཚབས་ཆུང༌། །རྡོ་ལྟར་རེག་ན་སྲ་བ་ཡིན། །མཁས་པས་ཐེ་ཚོམ་མེད་པར་དེ། །ཁྲག་གི་སྨིན་པ་ཞེས་བཤད་བྱ། །ཞེས་བྱ་བ་ལ། ཡང་བད་ཀན་ལས་བྱུང་བའི་སྐྲངས་བ་ལ་ནི། སྨིན་པ་གཏིང་རིང་ཞིང་ཟབ་པས་བརྟག་པར་དཀའ་བ་དང༌། ཁྲག་གིས་གང་བར་གྱུར་པ་ཡིན་ཏེ། དེ་བས་ན་དེའི་སྨིན་པའི་རྟགས་སམ། མཚན་མ་ནི་གསལ་བ་མ་ཡིན་ཏེ། ཤེས་པར་དཀའ་བ་ཡིན་ནོ། །ཡང་སྐྲངས་པའི་རྣམ་པ་གང་དུ་སྐྲངས་བག་བསིལ་ཞིང་རེག་ན་གྲང་བར་གྱུར་ལ། པག་པའི་མདོག་ཀྱང་གཞན་དུ་མ་འགྱུར་ཏེ། ཆ་འདྲ་བ་དང༌། ནད་ཚབས་ཆུང་བ་དང༌། རྡོ་ལྟར་རེག་ན་སྲ་ཞིང་མཁྲང་བག་ཏུ་གནས་པ་གང་ཡིན་པ་དེ་ནི་མཁས་པས་ཐེ་ཚོམ་དང་དོགས་པ་མེད་བ་ཉིད་དུ་ཁྲག་ལས་གྱུར་པའི་རྨ་སྨིན་ནོ་ཞེས་བཤད་ཅིང་ཐེ་ཚོམ་མེད་པ་ཉིད་དུ་བྱའོ། །སྙིང་སྟོབས་ཉམ་ཆུང་བྱིས་པ་དང༌། །ཐོར་བུ་སྨིན་པའི་ཚབས་ཆེ་བའམ། །གནད་དང་རུས་ཚིགས་ལ་སོགས་པར། །འབྱུང་བ་མ་གཏོགས་གཞན་དག་དྲལ། །ཞེས་བྱ་བ་ལ། སྙིང་སྟོབས་ཆུང་ཞིང་ཕོག་སྙ་ཞན་པ་དང༌། དེ་བཞིན་དུ་ཉམ་ཆུང་བ་དང༌། བྱིས་པ་ལྟ་བུ་མཚོན་གདབ་མི་བཟོད་པ་དང༌། སྨིན་པའི་ཚབས་ཆེ་ཞིང་ཐལ་དྲགས་པ་དང༌། དེ་བཞིན་དུ་གནད་དང་རུས་ཚིགས་ལ་གནས་པའི་སྐྲངས་པ་ལ་ནི། རྣོ་བ་དང་ཚ་བའི་སྨན་གྱིས་བརྟོལ་ཞིང་དྲལ་བར་བྱའོ། །དེ་ཡང་འདི་ཉིད་ཀྱི་རྒྱུད་ཕྱི་མ་ལས། གུ་གུལ་ཟར་མ་བ་ལས་སོ། །ཁྲོན་བུ་དང་ནི་ཕུག་རོན་རྟུག །ཐལ་སྨན་འཕྲོད་དང་ཐལ་སྨན་རྣོ། །སྐྲངས་པ་སྨིན་གྱུར་བརྟོལ་བར་བྱ། །ཞེས་བྱ་བ་བཤད་པ་ཡིན་ནོ། །གཞན་ཞེས་བྱ་བ་སྐྲངས་པའི་རྣམ་པ་གོང་དུ་སྨོས་པ་མ་གཏོགས་པ་གཞན་དག་ནི་གཙགས་བུས་དྲལ་བ་ཉིད་དུ་བྱའོ། །མ་སྨིན་བརྟོལ་ན་རྩ་རྒྱུས་ལ། །གནོད་ཅིང་ཁྲག་ནི་མང་དུ་འབྱུང༌། །ནད་ཚབས་རབ་འཕེལ་རྨ་གྱེས་པའམ། །རྨ་འབྱུང་ཐོར་བུ་འབྱུང་བར་འགྱུར། །ཞེས་བྱ་བ་ལ། སྐྲངས་
པ་མ་སྨིན་པ་བརྟོལ་ཞིང་དྲལ་ན། །རྩ་དང་རྒྱུས་པ་ལ་གནོད་ཅིང་མ་རུངས་པར་འགྱུར་བ་དང༌། དེ་བཞིན་དུ་ཁྲག་གི་ཚོགས་མང་དུ་འབྱུང་ཞིང་འབབ་པ་དང༌། དེ་བཞིན་དུ་ནད་ཚབས་རབ་ཏུ་འཕེལ་ཞིང་ཚོར་བར་འགྱུར་བ་དང༌། རྨའི་ཁ་གྱེས་ཤིང་བྱེ་བར་འགྱུར་བ་བའམ། ཡང་ན་རྨ་རྡོལ་བ་ལས་བྱུང་བའི་ཐོར་བུའམ། མེ་དབལ་གྱི་ནད་དུ་འགྱུར་རོ། །རྣག་ནི་ནང་དུ་གནས་གྱུར་པ། །འཕེལ་བས་རྩ་རྒྱུས་ཤ་དང་ནི། །ཁྲག་རྣམས་མྱུར་དུ་སྲེག་བྱེད་དེ། །རྩྭ་སྐམ་ལ་ནི་མེ་དང་མཚུངས། །ཞེས་བྱ་བ་ལ། སྐྲངས་པ་དེ་སྨིན་པ་ཐལ་དྲགས་ཀྱང༌། དྲལ་ཞིང་བརྟོལ་བ་མ་བྱས་པར་ནང་དུ་གནས་པར་གྱུར་པ་རྣམ་པར་འཕེལ་བར་འགྱུར་བས་རྩ་ལ་སོགས་པ་བསྲེག་ཅིང་ཟ་བར་བྱེད་དེ། དཔེར་ན་མེ་མཆེད་པས་རྩྭའི་ཚོགས་བསྲེགས་པ་དང་འདྲའོ། །གང་ཞིག་མ་སྨིན་བརྟོལ་བ་དང༌། །གང་ཞིག་སྨིན་ཀྱང་བཏང་སྙོམས་འཇོག །ཁྱད་པར་མི་ཤེས་དེ་དག་ནི། །སྨེ་ཤ་ཅན་འདྲར་ཤེས་པར་བྱ། །ཞེས་བྱ་བ་ལ། སྨན་པ་གང་གིས་སྐྲངས་པ་མ་སྨིན་པ་དག་ཀྱང་མི་ཤེས་པའི་དབང་གིས་བརྟོལ་ཞིང་དྲལ་བར་བྱེད་ལ་ཡང་སྨན་པ་གང་ཞིག་སྐྲངས་པ་དེ་སྨིན་ཟིན་ཀྱང་མི་ཤེས་པ་ཉིད་ཀྱིས་བཏང་སྙོམས་སུ་འཇོག་ཅིང་བརྟོལ་བར་མི་བྱེད་པ་ཉིད་དེ། དེ་གཉི་ག་ཡང་ཁྱད་པར་མི་ཤེས་ཤིང་མ་བརྟགས་པར་བྱེད་པ་ཡིན་པས་སྨེ་ཤ་ཅན་ཏེ། ཁྱི་ཤ་ཟ་བའི་རིགས་ངན་དང་འདྲ་བར་དམད་པར་བྱ་བ་ཡིན་ནོ། །རྨ་བརྟོལ་བ་ཡི་དང་པོར་ནི། །ཁ་ཟས་ཕན་བ་སྦྱིན་པར་བྱ། །ཚོར་བ་མི་བཟད་བཟེད་འགྱུར་པས། །ཆང་འཐུང་པ་ལ་ཆང་བླུད་བྱ། །ཟས་ཟོས་པས་ནི་མི་བརྒྱལ་ཞིང༌། །ནང་དུ་མཚོན་བཏབ་ཚོར་མི་འགྱུར། །ཞེས་བྱ་བ་ལ། རྨ་བརྟོལ་ཞིང་གཙགས་བུ་འདེབས་པའི་ལས་བྱེད་པའི་དང་པོར་རེ་ཞིག་འདི་དག་མ་བྱས་པའི་མཚོན་གྱི་ལས་མི་བྱ་སྟེ། དེ་ཡང་ཐོག་མ་ཁོ་ནར་ནད་པ་དེའི་སྟོབས་བསྐྱེད་པའི་ཕྱིར། ཁ་ཟས་ཕན་ཞིང་མངོན་པར་དགའ་བ་སྦྱིན་པ་དང༌། ཡང་མཚོན་གྱིས་བཏབ་པའི་ཚོར་བ་མི་བཟད་པ་དྲག་པོ་དེ་བཟོད་པར་འགྱུར་བས། ཆང་འཐུང་བ་ཞིག་ཡིན་ན་ཆང་རྙིང་པ་བླུད་པར་བྱའོ། །དེ་ལྟར་ན་དས་ཟན་ཟོས་ཤིང་
ལོངས་སྤྱད་པས་ནི་བརྒྱལ་ཞིང་འབོག་པར་མི་འགྱུར་ལ། དེ་བཞིན་དུ་ཆང་རྙིང་པ་རྣོན་པོ་འཐུངས་པས་ནི་ནང་དུ་མཚོན་གྱིས་བཏབ་ཅིང་བརྟོལ་བ་ཚོར་བར་མི་འགྱུར་ཞིང༌། དེའི་སྡུག་བསྔལ་བ་རྣགས་ནུས་པར་འགྱུར་རོ། །རུམ་དུ་བུ་ཤི་རྡེའུ་ཆགས་དང༌། །ཁ་ནད་དམུ་རྫིང་ཅན་མ་གཏོགས། །ཞེས་བྱ་བ་ལ། ནད་པ་རུམ་དུ་བུ་ཤི་བ་ལ་སོགས་པ་ནི་མ་གཏོགས་ཏེ། བུད་མེད་རུམ་དུ་བུ་ཤི་བ་དང༌། གཅིན་ནད་རྗེ་འུས་འགགས་པ་དང༌། ཁའི་ནད་རྣམས་ཡོད་པ་དང༌། ལྟོ་ད་མུ་རྫིང་ཅན་ལ་མཚོན་གདབ་པར་མི་བྱའོ། །དེ་ནས་ཡོ་བྱད་ཀུན་བསགས་ཏེ། །ནད་པ་ཤར་དུ་ཁ་བསྟན་ལ། །སྨན་པ་མངོན་ཕྱོགས་བསྡམས་ནས་ནི། །གནད་སོགས་མ་གཏོགས་གཙགས་བུས་གདབ། །ཤ་ཤུགས་རྗེས་མཐུན་ཤིན་ཏུ་རྣོ། །གཙགས་བུ་རྣག་ཕྱིན་བར་དུ་གདབ། །དེ་ནི་ཅིག་ཅར་གདབ་བར་བྱ། །ཞེས་བྱ་བ་ལ། དེ་ནས་ཞེས་བྱ་བ་ནི། བཀྲ་ཤིས་པའི་དོན་དུ་སྨོས་པ་ཡིན་ཏེ། ཡོ་བྱད་ཀུན་བསགས་ཏེ་ཞེས་བྱ་བ་ནི། དེའི་ཚེ་དགོས་པའི་ཡོ་བྱད་ཐམས་ཅད་བསགས་པ་སྟེ། ཆ་སྤྱད་རྣམས་དང༌། གཙགས་སྤྱད་རྣམས་དང༌། ཐལ་སྨན་དང༌། འཛུམ་བུའི་མ་མཆུ་དང༌། རས་བལ་དང༌། ཆུ་འམ་རས་བལ་སྤངས་པའི་གོས་ཀྱི་དུམ་བུ་དང༌། ལོ་མ་དང༌། སྲད་བུ་དང༌། བགས་པ་དང༌། སྦྲང་རྩི་དང༌། སྣུམ་དང༌། སྐ་བའི་ལྡེ་གུ་དང༌། ཏིལ་གྱི་ལྡེ་གུ་དང༌། ལྡུགས་པའི་སྨན་དང༌། ཆུའི་བུམ་པ་དང༌། ཆུ་ཚན་དང༌། ཆུ་དྲོན་དང༌། ཟས་དང༌། བསིལ་ཡབ་ལ་སོགས་པ་རྨ་ལ་དགོས་པའི་ཡོ་བྱད་ཐམས་ཅད་བསག་ཅིང་ཉེར་བསྡོགས་སུ་བྱའོ། །དེ་ནས་ནད་པ་ཁ་ཤར་དུ་བསྟན་ཏེ། སྨན་པ་དེ་ལ་མངོན་པར་ཕྱོགས་ཤིང་བལྟས་ནས། ལེགས་པར་བསྡམས་ཏེ། གཙགས་དུ་མྱུར་དུ་གདབ་པར་བྱའོ། །དེ་ཡང་ནད་ལ་སོགས་པར་གདབ་པ་སྟེ། གནད་དང༌། རྩ་དང༌། ཆུ་བ་དང༌། རུས་པའི་ཚིགས་དང༌། རྩ་བོ་ཆེ་རྣམས་སྤང་བར་བྱའོ། །དེ་ཡང་ཤ་ཤུགས་དང་རྗེས་སུ་མཐུན་པར་བྱས་ལ། ཤིན་ཏུ་རྣོ་བའི་གཙགས་བུ་གདབ་པ་ནི། རྣག་ཕྱིན་ཞིང་སྣང་བར་གྱུར་གྱི་བར་དུ་བཏང་ལ། དེ་ཡང་ཅིག་ཅར་ཏེ། ལན་ཅིག་
ཁོ་ན་གདབ་པར་བྱའོ། །སྨིན་པ་ཆེན་པོ་ཡོད་ཀྱང་ནི། །རྨ་ཞེང་སོར་གཉིས་དྲལ་བའམ། །སོར་གཉིས་པའི་ཟབས་སོར་གསུམ་གདབ། །ཅེས་བྱ་བ་ལ། སྨིན་པ་ཤིན་ཏུ་ཆེ་བ་ལ་ནི། རྨ་ཞིང་སོར་གཉིས་གདབ་པར་བྱ་བའམ། སོར་གཉིས་པའི་བར་རམ་ཟབས་བརྟགས་ལ་སོར་གསུམ་པར་གདབ་པར་བྱའོ། །མཛུབ་མོ་ཆུ་བ་སྤུ་དག་གིས། །གནས་ཕྱོགས་ཇི་བཞིན་བརྟགས་པའམ། །རྨ་ཚོལ་གྱིས་ནི་ལེགས་བཙལ་ཞིང༌། །ཀུན་ཏུ་ལེགས་པར་བརྟག་པར་བྱ། །ཞེས་བྱ་བ་ལ། རྨ་ཚོལ་གྱིས་ཀུན་ཏུ་ལེགས་པར་བཙལ་ཞིང་བརྟགས་ལ་བྱ་བའམ། མཛུབ་མོ་ལ་སོགས་པས་གནས་དང་ཕྱོགས་གང་ན་ཇི་ལྟར་ཡོད་པ་ལེགས་པར་བརྟག་ཅིང་བཙལ་བར་བྱ་སྟེ། རྨའི་ཁ་བྱེ་ཞིང་གྱེས་པའི་ཕྱོགས་སུ་མཛུབ་མོ་གཡོན་པས་བརྟག་པར་བྱས་ལ། ཁ་ཤིན་ཏུ་བྱེ་བ་ནི་མ་ཡིན་ལ། ཤའི་གཏིང་ཟབ་པ་དག་ནི། རྨ་ཚོལ་གྱི་ཐུར་མས་ལེགས་པར་བཙལ་བར་བྱ་ལ། གཞན་དག་ལ་ནི་སྨྱུག་མའི་སྦུ་གུའམ། པདྨའི་ཆུ་བ་ལ་སོགས་པས་བརྟག་པར་བྱ་ལ། ཁ་ཤིན་ཏུ་ཟླུམ་པ་ལ་ནི་ཕག་གི་སྦུས་བརྟག་ཅིང་བཙལ་ནས་རྨ་བཏོད་པར་བྱའོ། །གང་ནས་གང་དུ་འགྲོ་འགྱུར་བ། །གང་དུ་མཐོ་བ་ཤེས་བྱས་ལ། །དེ་དང་དེར་ནི་རྨ་བཏོད་དེ། །ལེགས་ཕྱེ་ཕུག་ནི་མེད་པར་བྱ། །ཆུ་དང་ཞེང་དུ་ཅི་ནས་ཀྱང༌། །ནད་ནི་གནས་པར་མི་འགྱུར་བྱ། །ཞེས་བྱ་བ་ལ། ལུས་ཀྱི་ཕྱོགས་གང་དུ་རྨ་ཚོལ་འགྲོ་བར་འགྱུར་བའི་ལུས་ཀྱི་ཕྱོགས་དེར་རྨ་བཏོད་པར་བྱའོ། །ཡང་ན་གང་དུ་སྐྲང་བའི་ཕྱོགས་མཐོ་བར་སྣང་བས་ཤེས་པར་བྱས་ལ། ཕྱོགས་དེ་དང་དེར་རྨ་བཏོད་པར་བྱའོ། །དེ་ཡང་ལེགས་པར་ཕྱེ་བ་སྟེ། ལོགས་ཕན་ཚུན་གྱི་བྱེ་བྲག་ལེགས་པར་ཤེས་ཤིང༌། ཕྱེད་པར་འགྱུར་བར་བཏོད་པ་དང༌། དེ་བཞིན་དུ་ཕུགས་འཆས་པ་སྟེ། རྣག་ལ་སོགས་པ་བརྟེན་པའི་གནས་མེད་པར་འགྱུར་བ་དང༌། དེ་བཞིན་དུ་ཆུ་སྟེ་སྲིད་དང༌། ཞེང་སྟེ་རྒྱར་ཅི་ནས་ཀྱང་རྣག་ལ་སོགས་པའི་ནད་གནས་པར་མི་འགྱུར་ཞིང༌། ཆགས་པར་མི་འགྱུར་བའི་མཚན་ཉིད་དང་ལྡན་བ་སྟེ་དེ་ལྟར་བྱའོ། །སྨན་པ་དཔའ་བརྟན་ལས་ལ་མྱུར། །མཚོན་རྣོ་མི་རྟུལ་མི་འདར་ལ། །ཀུན་ཏུ་རྨོངས་པར་མ་གྱུར་པ། །གཙགས་བུས་
འདེབས་པའི་ལས་ལ་བསྔགས། །ཞེས་བྱ་བ་ལ། སྨན་པ་དཔའ་བ་ལ་སོགས་པ་དང་ལྡན་པ་ནི། སྨན་དཔྱད་ཀྱི་མཚོན་གྱི་ལས་བྱེད་པ་ལ་བསྡགས་ཤིང་འདོད་པར་བྱ་བ་ཡིན་ནོ། །དེ་ལ་དཔའ་བ་ནི་རྟུལ་ཕོད་པའོ། །བརྟན་པ་ནི་བག་ཚ་བ་མེད་ཅིང་མི་འགྱུར་བའོ། །ལས་ལ་མྱུར་བ་ནི་ལག་བཟོ་བས་གཙགས་བུའི་ལས་མྱུར་དུ་བྱེད་པའོ། །མཚོན་རྣོ་བ་ནི་ལེགས་པར་བདར་བ་དང༌། ཁ་སྙོམས་ཤིང་ལེགས་པའོ། །མི་རྟུལ་བ་ནི་ལས་ཆུད་མི་འཛའ་བའོ། །མི་འདར་བ་ནི་ལག་པ་མི་འདར་བའོ། །ཀུན་ཏུ་མ་རྨོངས་པ་ནི་བྱ་བའི་མཁས་པའོ། །གྱེན་དུ་གཅད་རྩ་འཕྲལ་སྨིན་རྩ། །རྙིལ་དང་སྐེ་རྩ་ལྟོ་སྤོས་དང༌། །མཆན་ཁུང་དང་ནི་མིག་སྦུབས་མཆུ། །མཁུར་ཚོས་བརླ་དྲུང་ཆུ་སོ་རྩའོ། །ཞེས་བྱ་བ་ལ། དཔྲལ་བ་ལ་སོགས་པའི་རྩ་ནི་གཙགས་བུ་ཁ་དྲང་པོར་བསྟན་ཏེ་གྱེན་དུ་གདབ་པར་བྱའོ། །གཞན་དག་གྱེན་དུ་བཅད་ན་ནི། །རྩ་དང་ཆུ་བ་མ་རུངས་འགྱུར། །ཞེས་བྱ་བ་ལ། ཕྱོགས་གཞན་དག་ཏུ་རྩ་གྱེན་དུ་བཅད་ན། རྩ་དང་ཆུ་བ་མ་རུངས་པར་འགྱུར་རོ། །གཙགས་བུས་བཏབ་ནས་ནད་པ་ནི། །ཚིག་སྙན་ཆུ་ནི་བསིལ་པ་ཡིས། །དབུགས་བྱུང་ནས་ནི་དེའི་འོག་རྨ། །སོར་མོས་ཀུན་ནས་བཙིར་བ་དང༌། །སྐ་བའི་ཆུ་ཡིས་ལེགས་བཀྲུ་ཞིང༌། །སྨན་ཆུར་བཅུག་པའི་གོས་ཀྱིས་ཕྱི། །གུ་གུལ་ཡུངས་ཀར་ཨ་ཀ་རུ། །ཤིང་ཀུན་ཀ་ར་རྒྱམ་ཚ་དང༌། །ཤུ་དག་ནིམ་པའི་ལོ་མ་ནི། །མར་དུ་སྦྱར་བས་བདུག་པར་བྱ། །ཞེས་བྱ་བ་ལ། གཙགས་བུ་བཏབ་ཟིན་ཀྱང་དེའི་འོག་ཏུ་ནད་པ་ལ་དེའི་ཚེ་སྨྲ་བར་འོས་པའི་ཚིག་སྙན་པ་བརྗོད་པ་དང༌། དེ་བཞིན་དུ་ཆུ་བསིལ་བ་གཏོར་བ་ལ་སོགས་པས་དབུགས་ཕྱུང་ནས། དེའི་འོག་ཏུ་རྣག་ལ་སོགས་པའི་སྐྱོན་བསལ་བར་བྱ་བའི་ཕྱིར་རྨ་དེ་སོར་མོས་ཀུན་ནས་བཅིང་བར་བྱའོ། །དེའི་འོག་ཏུ་ནད་དམིགས་ཇི་ལྟར་འཚམ་པའི་སྨན་ཆུ་སྐ་བ་ལ་སོགས་པས་ལེགས་པར་བཀྲུ་ཞིང་སྦྱངས་ནས། དེའི་རྗེས་ལ་རས་ལ་སོགས་པའི་གོས་ཀྱིས་ཆུ་ལེགས་པར་བསལ་ཞིང༌། དེ་ནས་རྨ་དེ་གུ་གུལ་ནས་ནིམ་པའི་ལོ་མའི་བར་གྱི་སྨན་མར་དང་སྦྲུས་ཤིང་སྦྱར་བའི་བདུག་པས་བདུག་པར་བྱའོ། །ཏིལ་གྱི་ལྡེ་གུ་མར་སྦྲང་རྩི། །རང་གི་སྨན་ནི་ཇི་ལྟ་བས། །བྱུགས་ཤིང་
དེ་ནས་རྨ་ཚངས་གཞུག །དེ་ཉིད་ཀྱིས་ནི་དེ་གཡོགས་ལ། །མར་དང་ཕྱེར་སྦྲུས་བསྐུ་བ་དང༌། །དེའི་འོག་ཀོག་ཙེ་སྟུག་པོ་ནི། །གཞག་སྟེ་ཤིན་ཏུ་མ་ཡེངས་པས། །གོས་ཀྱིས་ལེགས་པར་བཅིངས་བྱས་ཏེ། །གློ་དང་གཡས་དང་གཡོན་དག་གམ། །སྟེང་དང་འོག་ཏུ་མ་སོང་བྱ། །ཞེས་བྱ་བ་ལ། དེ་ནས་དེའི་འོག་ཏུ་རྨའི་ནང་དུ་གྲོ་མདེའུ་ཚུལ་དུ་རས་གཙང་མའི་རྨ་ཚངས་སུ་བྱས་པ་དང༌། རས་བལ་ལ་སོགས་པའི་སྡོང་བུ་རྨའི་ནང་དུ་གཞུག་ཏུ་རུང་བ་བཅུག་ལ། དེའི་འོག་ཏུ་ནད་དམིགས་ཇི་ལྟ་བའི་སྨན་གྱི་ལྡེ་གུ་བྱུག་ཅིང་བསྐུ་བར་བྱ་བ་དང༌། དེ་བཞིན་དུ་ཏིལ་གྱི་ལྡེ་གུ་དང༌། མར་དང༌། སྦྲང་རྩི་བསྐུ་ཞིང་ཏིལ་གྱི་ལྡེ་གུ་དང་མར་དང་སྦྲང་རྩི་དེ་ཉིད་ཀྱིས། རྨའི་ནང་ན་གནས་པའི་རྨ་ཚངས་རྨར་བཅུག་པའི་རས་དུམ་ལ་སོགས་པ་དེ་ཉིད་ཀྱིས་གཡོགས་པར་བྱའོ། །དེ་འབའ་ཞིག་གིས་དེ་གཡོགས་པར་མ་ཟད་ཀྱི། སྣོད་ཀྱི་ནང་དུ་ཕྱེ་དང་མར་དང་ཆུར་སྦྲུས་ཤིང་ལག་པའི་རྩེ་མོས་མཉེས་པའི་ཟན་གྱིས་ཀྱང་གཡོགས་པར་བྱའོ། །དེའི་འོག་རྨའི་ཐོ་སྐོར་གྱི་སྟེང་དུ་གོས་རིམ་པ་མང་པོ་ལས་བྱས་པ་མཐུག་པོ་གཞག་པ། ཤིན་ཏུ་མ་ཡེངས་པས་གོས་ཀྱི་དུམ་བུས་ལེགས་པར་བཅིང་ཞིང་དཀྲི་བར་བྱ་ལ། དེ་ཡང་གློ་གཡས་སམ་གཡོན་དུ་མ་འཕྱུགས་པར་བྱ་བ་དང༌། རྨའི་སྟེང་ངམ་དབུས་སུ་མ་སོང་བར་དྲང་ཞིང་ཡ་ཡོ་མེད་པར་རྨ་དཀྲི་ཞིང་བཅིང་བར་བྱའོ། །རྨ་ཚངས་ཀོག་ཙེ་དཀྲིས་མར་བཅས། །ཕྲ་ཞིང་སྲ་ལ་གཙང་བ་ལ། །སྤོས་ཀྱིས་བདུགས་ཤིང་འཇམ་ལ་མཉེན། །ཁམ་ཁུམ་མེད་ཅིང་རྨ་ལ་ཕན། །ཞེས་བྱ་བ་ལ། གོང་དུ་སྨོས་པའི་རྨ་ཚངས་ནང་དུ་གཞུག་པའི་རས་དང༌། ཀོག་ཙེ་དང༌། དཀྲི་བའི་རས་ནི་སྲ་ཞིང་མི་འཆད་པ་དང༌། གཙང་ཞིང་བཀྲུས་པ་ལས་བྱས་ལ། དེ་ཡང་གུ་གུལ་ལ་སོགས་པའི་སྲོས་ཀྱིས་བདུག་པ་དང༌། འཇམ་ཞིང་རེག་ན་བདེ་བ་དང༌། མཉེན་ཞིང་འཇར་བ་དང༌། ཁམ་ཁུམ་མེད་ཅིང་བལྟ་བ་ཚིགས་དང་བྲལ་བའི་རྨ་ལ་ཕན་བ་དེ་ལྟ་བུ་དག་བྱའོ། །བཅིངས་ནས་དེ་ཡི་འོག་ཏུ་སྟེ། །གནོད་པ་བཟློག་ཕྱིར་བསྲུང་བར་བྱ། །དེ་རྣམས་ལ་ནི་གཏོར་མ་སྦྱིན། །ལག་སྨི་གུ་ཧ་ཨ་ཏི་གུ་ཧ། །སྤང་སྤོས་པྲ་མ་ཙ་རི་ནི། །ཚ་ཏྲ་ཨ་ཏི་ཚ་ཏྲ་དང༌། །དཱུ་ར་བ་ཤུ་དག་
ཡུངས་ཀར་དག །རྟག་ཏུ་དེ་ཡི་སྤྱི་བོར་གདགས། །ཞེས་བྱ་བ་ལ། རྨ་བཅིང་བའི་བར་གྱི་ལས་དེ་དག་བྱས་ནས། དེའི་འོག་ཏུ་ནད་པ་དེ་དག་ལ་གདོན་ལ་སོགས་པའི་གནོད་པ་བཟློག་པའི་ཕྱིར་བསྲུང་བར་བྱའོ། །ཡང་གནོད་སྦྱིན་ལ་སོགས་པ་དེ་རྣམས་ལ་གཏོར་མའི་ཁ་ཟས་ཅི་རིགས་པར་སྦྱིན་པ་དང༌། རྟག་པར་དུས་ཐམས་ཅད་དུ་སྨན་འདི་དག་སྤྱི་བོར་གདགས་པར་བྱ་སྟེ། ལག་སྨི་ཞེས་བྱ་བ་ཤ་མི་དང༌། གུ་ཧ་ཞེས་བྱ་བ་ཀྲྀཥྞ་པ་རྞི་དང༌། ཨ་ཏི་གུ་ཧ་ཞེས་བྱ་བས་ལ་པ་རྞི་དང༌། སྤང་སྤོས་ཞེས་བྱ་བ་མན་ཇི་སྟེ། མིང་གི་རྣམ་གྲངས་ཛཱ་ཏིལ་ཞེས་བྱ་བ་དང༌། པྲ་མ་ཙ་རི་ཞེས་བྱ་བ་བྲ་མ་ཨཥྚི་ཀ་ཞེས་བྱ་བའི་ཤིང་དང༌། ཤུ་དག་སྟེ་སྨན་པ་ཙ་དང༌། ཚ་ཏྲ་ཞེས་པ་ཤ་ཏ་པུཥྤ་དང༌། ཨ་ཏི་ཚ་ཏྲ་ཞེས་བྱ་བ་བི་ཤ་ནི་ཀི་དང༌། དཱུར་བ་དང༌། ཡུངས་ཀར་རྣམས་གདགས་པར་བྱའོ། །དེ་ནས་སྣུམ་གྱི་ཆོ་གར་བཤད། ཉིན་རེའི་ཀུན་སྤྱོད་བཤད་པ་བསྟན། །ཞེས་བྱ་བ་དེའི་འོག་ཏུ་སྐྱེས་བུ་དམན་མ་དེ་ལ་སྣུམ་གྱི་བཤད་པ་ཞེས་པ་སྣུམ་བཏུང་བའི་ཆོ་གའི་སྐབས་སུ་བཤད་པ། ཁ་ལ་ཆུ་དྲོན་གྱིས་ཀུན་ཏུ་སྤྱོད་པ་བྱ་བ་ལ་སོགས་པ་དང༌། ཉིན་རེ་ཞིང་སྤྱད་པར་བྱ་བའི་ལེའུའི་སྐབས་སུ་བཤད་པའི་ཀུན་ཏུ་སྤྱོད་པ་སྟོན་ཅིང་བསྒོ་བར་བྱའོ། །ཉིན་པར་གཉིད་ལོག་རྨ་གཡའ་ཞིང༌། །ཁ་དམར་ན་སྐྲངས་རྣག་འཁྱིམས་འགྱུར། །ཞེས་བྱ་བ་ལ། སྨན་མ་སྨིན་པར་གཉིད་ལོག་པ་ནི་རྨ་གཡའ་བ་དང༌། ན་བ་དང༌། སྐྲངས་པ་དང༌། རྣག་འཁྱིམས་པར་བྱེད་པར་འགྱུར་རོ། །བུད་མེད་དྲན་ན་མ་རེག་པའམ། །མཐོང་བས་ཁུ་བ་བྱུང་གྱུར་ན། །མ་ཕྲད་ན་ཡང་འཁྲེག་པ་ལས། །བྱུང་བའི་སྐྱོན་ནི་འཐོབ་པར་འགྱུར། །ཞེས་བྱ་བ་ལ། བུད་མེད་དང་མ་ཕྲད་དུ་ཟིན་ཀྱང༌། དེ་དྲན་པ་ལ་སོགས་པ་ཉིད་ཀྱིས་ཁུ་བ་བྱུང་བར་གྱུར་ན། འཁྲིག་པ་ལས་བྱུང་བའི་སྐྱོན་རྨ་བྱེ་བ་ལ་སོགས་པ་འབྱུང་ཞིང་འཐོབ་པར་འགྱུར་རོ། །ཁ་ཟས་དག་ནི་གང་གོམས་ལས། །ནས་དང་གྲོ་དང་དྲུག་ཅུ་པ། །སྲན་ཆུང་མུད་ག་ཏུ་བ་རི། །ནི་ཤན་ན་ག་ཛི་ཝན་ཏི། །ལ་ཕུག་གཞོན་ནུ་བར་ཏ་ཀ །རྒྱ་སྣེའུ་ཏན་དུ་ལི་ཡ་ཀ །ཀ་ར་བེ་ལ་ཀར་ཀོ་ཏ། །ཀ་ཏུ་ཀ་ལ་བཏོལ། །རྒྱམ་ཚ་སེ་འབྲུ་སྐྱུ་རུ་ར། །ཆུ་བསྐོལ་བ་ནི་བསྒྲངས་པ་དང༌། །འབྲས་རྙིང་ཆང་དང་སྣུམ་
ཉུང་ཟད། །ཟོས་རྗེས་ཆུ་ཚན་བཏུང་བ་དང༌། སྐམ་སའི་ཤ་ནི་ཟོས་གྱུར་ན། །རྨ་ནི་མྱུར་དུ་འཚོ་བར་འགྱུར། །ཞེས་བྱ་བ་ལ། ནད་པ་སྨན་མ་དེ་རྗེས་སུ་མཐུན་ཞིང་གོམས་པའི་ཁ་ཟས་ཟོས་པས་མྱུར་ཞིང་རིངས་པར་རྨ་འཚོ་ཞིང་བདེ་བར་གནས་པར་འགྱུར་རོ། །དེ་ལ་ནས་ལ་སོགས་པ་ནི་བཟའ་བའི་དོན་དུའོ། །སྲན་ཆུང་ལ་སོགས་པ་ནི་སྲན་ཁུ་ཡུ་ཤ་དང་ཚོད་མའི་དོན་དུ་སྦྱར་རོ། །ཏུ་བ་རི་ནི་སྲན་མ་ཨ་རུ་ཀའོ། །ནི་ཤ་ན་ནི་ཀ་དང༌། ཛི་བ་ན་ཏི་ལ་སོགས་པ་ནི་ཚོད་མའི་དོན་དུའོ། །རྒྱམ་ཚ་དང་སེ་འབྲུ་ལ་སོགས་པ་སྤོས་ཀྱི་དོན་དུའོ། །ཆུ་བསྐོལ་བ་བསྒྲངས་པ་ནི་བཏུང་བའི་དོན་དུའོ། །འབྲས་རྙིང་བ་ནི་ལོ་གཅིག་མ་ལོན་པའི་འབྲས་དེའི་ཆན་ནོ། །སྣུམ་ཅན་ནི་སྣུམ་ཅུང་ཟད་ཡོད་པའོ། །དེའི་རྗེས་ལ་འཚལ་ནན་ནི་ཆུ་ཚན་བཏུང་བར་བྱའོ། །དེ་བཞིན་དུ་སྐམ་སའི་ཤ་འུར་བྱ་ལ་སོགས་པའི་ཤ་བཟའ་བ་སྟེ། དེ་དག་གིས་རྨ་མྱུར་དུ་འཚོ་ཞིང་འབྱང་བར་འགྱུར་རོ། །དུས་སུ་རན་པར་བཟའ་བ་དང༌། །ཕན་པ་ཟོས་ན་བདེ་འཇུ་འགྱུར། །ཞེས་བྱ་བ་ལ། དེ་ལྟར་རྗེས་སུ་མཐུན་པའི་ཁ་ཟས་ཇི་ལྟར་འོས་པའི་དུས་སུ་རན་ཞིང་འཚམ་པར་བཟའ་པ་དང༌། ཕན་པ་ཟོས་ན་བ་དེ་བླག་ཏུ་འཇུ་ཞིང་སྨིན་པར་འགྱུར་རོ། །མ་ཞུ་བ་ཡིས་རླུང་ལ་སོགས། །ལྡང་ཞིང་ནད་ནི་སྟོབས་ཆེན་འགྱུར། །དེ་ལས་སྐྲངས་དང་རྣགས་བ་དང༌། །ཚ་དང་སྤོས་པར་འགྱུར་བ་ཡིན། །ཞེས་བྱ་བ་ལ། ཁ་ཟས་མ་ཞུ་ཞིང་སྨིན་པར་མ་གྱུར་བ་ལས་ནི། རླུང་ལ་སོགས་པ་ལྡང་ཞིང་སྟོབས་དང་ལྡན་པ་ནད་ཚབས་ཆེན་པོར་འགྱུར་རོ། །དེ་ལྡང་བ་དེ་ལས་རྨ་སྐྲངས་པ་དང་ན་བ་ལ་སོགས་པས་ནད་པ་ཉེན་པར་འགྱུར་རོ། །འབྲུ་སར་ཏིལ་དང་མ་ཤ་དང༌། །ཆང་དང་རླན་ཅན་ལས་བྱུང་ཤ །འོ་མ་བུར་མ་ཤིང་ལས་གྱུར། །སྐྱུར་དང་ལན་ཚྭ་ཚ་བ་དང༌། །གཞན་གང་འཁྲུ་བ་གཅོད་བྱེད་དང༌། །ཚ་དང་བསིལ་དང་ལྕི་བ་ཡང༌། །ཞེས་བྱ་བ་ལ། འབྲུ་སར་པ་ལ་སོགས་པའི་སྡེ་ཚན་རྨ་ཡོད་པའི་སྐྱེས་བུས་སྤང་བར་བྱའོ། །དེ་བཞིན་དུ་ཆང་དང་སྲོག་ཆགས་གཤེར་སར་གནས་པའི་ཤ་དང༌། འོ་མ་ལས་གྱུར་བ་དང༌། ཞོ་དང༌། དར་བ་དང༌། ཕྲུམ་དང༌། ཐུད་ལ་སོགས་པ་དང་བུ་རམ་ཤིང་ལས་གྱུར་པ་སྟེ། བུ་རམ་ཕྲ་མོ་
ལ་སོགས་པ་དང༌། སྐྱུར་དང༌། ལན་ཚྭ་དང༌། ཚ་བའི་བཟའ་བཏུང་དང༌། གཞན་ཡང་གང་དག་འཁྲུ་བ་གཅོད་ཅིང་འགགས་པར་བྱེད་པ་དང༌། ཚ་བའི་ཤས་ཆེ་བ་དང༌། བསིལ་བ་དང༌། གྲང་བ་དང༌། ལྕི་བད་དག་ཀྱང་སྤང་ཞིང་དོར་བར་བྱའོ། །འབྲུས་ར་ལ་སོགས་སྡེ་ཚན་འདི། །རྨ་དང་ལྡན་པའི་ནད་ཀུན་སྐྱེད། །ཅེས་བྱ་བ་ལ། བཤད་མ་ཐག་པའི་འབྲུ་སར་པ་ལ་སོགས་པའི་སྡེ་ཚན་འདི་ནི་རྨ་དང་ལྡན་པའི་སྐྱེས་བུ་དམན་པའི་ནད་ཀུན་སྐྱེད་པ་སྟེ། ནད་གཞི་གསུམ་ཆར་སྐྱེད་པའམ། རྨ་རེད་ཅིང་འདྲུལ་བ་ལ་སོགས་པ་ནད་སྐྱེད་པར་བྱེད་པ་ཡིན་ནོ། །ཆང་ནི་རྣོ་བ་ཚེ་རྩུབ་འགྱུར། །རྨ་ལ་མྱུར་དུ་གནོད་པར་བྱེད། །ཅེས་བྱ་བ་ལ། འབྲུ་སར་པ་ལ་སོགས་པའི་སྡེ་ཚན་འདི་ནི་བཤད་མ་ཐག་པར་ཆང་སྤང་བར་བྱ་བ་ཉིད་ཡིན་པར་བསྟན་ཟིན་པ་ལས། འདིར་ཡང་ཆང་སྤང་བར་བསྟན་པ་ནི་ཤིན་ཏུ་ཉེས་པ་ཆེ་བའི་ཕྱིར་ཡང་སྨོས་པ་ཡིན་ཏེ། འབྲུ་སར་བ་ལ་སོགས་པ་ཟོས་པས་རྨ་ལ་གནོད་པར་འགྱུར་མོད་ཀྱི། དེ་བས་ཀྱང་ཆང་ནི་རྣོ་བ་དང༌། ཚ་བ་དང༌། རྩུབ་པ་དང༌། སྐྱུར་བ་ཡིན་པས་དེ་ལ་གནོད་པའི་རང་བཞིན་ཅན་ཡིན་པའི་ཕྱིར་རྨ་ལ་ཤིན་ཏུ་མྱུར་བར་གནོད་པར་བྱེད་ཀྱི། གཞན་དག་ནི་དེ་ལྟ་མ་ཡིན་ནོ། །ཡང་ཆང་ཁྱད་པར་ཅན་རྣོ་བ་དང༌། རྩུབ་པ་དང༌། སྐྱུར་བ་གང་ཡིན་པ་དེ་ཉིད་ནི་རྨ་ལ་ཤིན་ཏུ་མྱུར་བར་གནོད་པར་བྱེད་པ་ཡིན་གྱི། སྣུམ་པ་ལ་སོགས་པའི་ཡོན་ཏན་དང་ལྡན་པ་གཞན་དག་ནི་དེ་ལྟ་མ་ཡིན་ནོ། །དེ་ཡང་རྒྱུད་གཞན་ལས། ཕལ་ཆེར་སྣུམ་བཅས་མངར་བ་དང༌། ཤིན་ཏུ་རྣོ་དང་རྩུབ་མ་ཡིན། །དངས་ཤིང་བཏུང་བར་སླ་བ་དག །རྒུན་ཆང་དག་ལས་དེ་མཆོག་ཡིན། །ཞེས་བཤད་པ་ཡིན་ནོ། །དེ་བས་ན་ཆང་སྣུམ་པ་ལ་སོགས་པའི་ཡོན་ཏན་དང་ལྡན་པ་ནི། དམན་མ་ལན་འགའ་ཞིག་ཉུང་ཞིང་བྱིན་པ་ནི་རྨ་ལ་གནོད་པར་མི་འགྱུར་གྱི། ཆང་རྣོ་བ་དང་ཚ་བ་ལ་སོགས་པའི་ཡོན་ཏན་དང་ལྡན་པ་འདི་ནི་ཤིན་ཏུ་གནོད་པ་ཡིན་ནོ། །ཞེས་བཤད་པར་བྱ་བའི་ཕྱིར། འདིར་ཡང་སྨོས་པ་ཡིན་ནོ། །བལ་ཨུར་ཤི་རས་གཡབ་ཅིང༌། །འདི་ནི་བསྐྱོད་པར་མི་བྱ་ལ། །དྲག་ཤུལ་མི་གཟུགས་འཕྲུག་མི་བྱ། །བསྐྱོད་པའི་ཚེ་ན་བག་བྱའོ། །ཞེས་བྱ་བ་ལ། རྨ་དེ་སྨན་པ་ལ་ཀ་དང༌། ཨུ་ར་ཤི་རས་གཡབ་པ་དང༌། རྨ་འདི་བསྐྱོད་ཅིང་
བསྐུལ་བར་མི་བྱ་བ་དང༌། དྲག་ཤུལ་དུ་གཟུགས་ཤིང་བརྡེག་པར་མི་བྱ་བ་དང༌། སེན་མོ་ལ་སོགས་པས་འཕྲུག་པར་མི་བྱའོ། །ཡང་དེ་བཞིན་དུ་བསྐྱོད་ཅིང་བསྐུལ་བའི་ཚེ་ན་ཡང་བྱ་བ་ཐམས་ཅད་དུ་རྨ་ལེགས་པར་བསྲུང་ཞིང་བག་བྱའོ། །མཛའ་དང་བྲམ་ཟེ་རྒན་སོགས་ཀྱི། །གཏམ་ནི་ཡིད་ལ་དགའ་བ་མཉན། །ནད་ལས་ཐར་བའི་རེ་བཅས་པས། །རྨ་ནི་མྱུར་དུ་འཚོ་བར་འགྱུར། །ཞེས་བྱ་བ་ལ། གྲོགས་མཛའ་བ་དང༌། བྲམ་ཟེ་དང༌། རྒན་པོ་ལ་སོགས་པའི་གཏམ་ཡིད་ལ་དགའ་བ་དག་མཉན་པ་དང༌། ནད་ལས་མྱུར་དུ་ཐར་བར་འགྱུར་རོ། །ཞེས་རེ་བ་དང་བཅས་ཤིང་དགའ་བས་རྨ་མྱུར་དུ་འཚོ་བས་འབྱང་བར་འགྱུར་རོ། །ཉིན་གསུམ་ལོན་ཚེ་རྨ་ཡི་ཚས། །སླར་ཡང་བཀྲུ་སོགས་ལས་རྣམས་ནི། །སྔ་མ་བཞིན་བྱ། ཞེས་བྱ་བ་ལ། དེ་ལྟར་བྱས་ན་ཉི་མ་གསུམ་ལོན་པའི་ཚེ་སླར་ཡང་རྨའི་ལས་སྔ་མ་བཞིན་དུ་བྱ་སྟེ། གོང་གི་བཤད་པ་དང་མཐུན་པར་བྱའི། ཆོ་ག་ཇི་ལྟ་བ་བཞིན་དུ་བྱའོ། །དེ་བཞིན་དུ། ཉིན་ཞག་གཉིས་པར་མི་བྱའོ། །ཚབས་ཆེར་ན་ཞིང་མི་འབྱར་ལ། །རྨ་ནི་ཡུན་རིང་ཞིག་ན་འཚོ། །ཞེས་བྱ་བ་ལ། སྔ་མ་བཞིན་དུ་ཉི་མ་གཉིས་པ་ལ་རྨ་བཀྲོལ་ཞིང་བཀྲུ་བ་ལ་སོགས་པའི་ལས་མི་བྱ་སྟེ། དེ་ལྟར་བྱས་ན་རྨ་ཚབས་ཆེར་ན་ཞིང༌། མི་བཟད་པར་ན་བ་དང༌། རྨ་མི་འབྱར་ཞིང་རྨེན་བུ་སྐྱེ་བ་དང༌། རྨ་ཡུན་རིང་དུ་ཞིག་ན་འཚོ་ཞིང་འདྲུབ་པར་འགྱུར་རོ། །རྨ་ཚངས་སམ་ནི་ལྡེ་གུས་གླན། །སྣུམ་ཆེས་རྩུབ་ཆེས་དམ་པ་དང༌། །ལྷོད་དྲགས་བཞག་ཉེས་མི་བྱ་སྟེ། །ཞེས་བྱ་བ་ལ། རྨའི་ནང་དུ་ཞུགས་པའི་རྨ་ཚངས་རས་ལ་སོགས་པའི་གོས་ཀྱི་དུམ་བུ་རྨའི་ནང་དུ་གཞུག་ཏུ་རུང་བ་དེ་སྣུམ་ཆེས་པ་དང༌། རྩུབ་ཆེས་པ་དང༌། དེ་བཞིན་དུ་དམ་ཞིང་དྲག་ཏུ་བཅིང་བ་དང༌། ལྷོད་དྲགས་པ་དང༌། བཞག་ཉེས་པ་དག་མི་བྱའོ། །དེ་བཞིན་དུ་སྨན་གྱི་ལྡེ་གུས་རྨ་གླན་པ་ཡང༌། སྣུམ་ཆེས་པ་དང་དམ་ཆེས་པ་དང༌། ལྷོད་ཆེས་པ་དང༌། བཞག་ཉེས་པར་མི་བྱའོ། །སྣུམ་ཆེས་རྨ་ནི་རེད་པར་འགྱུར། །རྩུབ་ཆེས་ཤ་ཆད་ཤིན་ཏུ་ན། །གས་ཤིང་ཁྲག་ནི་འབྱུང་བར་འགྱུར། །དམ་དང་ལྷོད་དྲགས་བཞག་ཉེས་པས། །རྨ་ཡེ་ཁ་
ནི་འདྲུད་པར་འགྱུར། །ཞེས་བྱ་བ་ལ། སྣུམ་ཤིན་ཏུ་དྲགས་ཤིང་ཤས་ཆེ་ན་རྨ་རེད་པར་འགྱུར་ཞིང་རྣག་དང་ཆུ་སེར་འཕེལ་བར་འགྱུར་རོ། །དེ་བཞིན་དུ་རྩུབ་ཆེས་པ་ནི་ཤ་བཅད་པ་དང༌། ཤིན་ཏུ་ན་བར་འགྱུར་བ་དང༌། དེ་བཞིན་དུ་པགས་པ་གས་པ་དང༌། ཁྲག་འབབ་ཅིང་འབྱུང་བར་འགྱུར་རོ། །དེ་བཞིན་དུ་རྨ་ཚངས་དང་ལྡེ་གུ་ཤིན་ཏུ་དམ་པ་དང༌། ཤིན་ཏུ་ལྷོད་དྲགས་པ་དང༌། བཞག་ཉེས་པས་ནི། རྨའི་ཁ་ཕན་ཚུན་འདྲུད་ཅིང་འདར་བ་དང་ཐུག་པར་འགྱུར་རོ། །རྨ་ནི་རྣག་བཅས་སྐྲངས་ཤིང་མཐོ། །རྒྱུ་བཅས་རྣག་ཕུགས་འཆས་པ་དག །རྨ་ཚངས་འཇམ་པོ་ནང་གནས་པ། རྨ་ཡི་སྐྱོན་ནི་དག་པར་བྱེད། །ཅེས་བྱ་བ་ལ། རྨ་གང་རྣག་དང་བཅས་པར་གནས་པ་དང༌། དེ་བཞིན་དུ་སྐྲངས་ཤིང་མཐོ་བར་གནས་པ་དང༌། རྒྱུ་བ་དང་བཅས་པ་སྟེ། ཤ་ལ་སོགས་པ་རྣག་གིས་ཟོས་པས་བུ་གའི་རྣམ་པ་རིང་དུ་འགྲོ་བ་ལས། རྒྱུ་དང་བཅས་པ་ཞེས་བཤད་དོ། །རྣག་ནི་ཕུགས་ནང་ན་འཆས་ཤིང་འཐུམས་པ་ཡོད་པ་ནི་རྣག་ཕུགས་འཆས་པ་སྟེ། དེ་ལྟ་བུའི་རྨ་གང་ཡིན་པ་དག །རྨ་ཚངས་འཇམ་པོ་ནང་ན་གནས་ཤིང་བཅུག་པས་རྨའི་སྐྱོན་དེ་དག་དག་ཅིང་སྦྱོང་བར་བྱེད་པས་དེའི་ཕྱིར། དེའི་རྨའི་ནང་དུ་གཞུག་པར་བྱའོ། །སྐྲངས་པ་ཧ་ཅང་མ་སྨིན་བརྟོལ། །སྨིན་ཞིང་རྣགས་པར་འགྱུར་བ་སྤྱད། །ཕན་པའི་སྨན་དང་ཟས་སྦྱིན་དཀྲི། །ཤིན་ཏུ་རྨར་མི་གནོད་པས་གསོ། །ཞེས་བྱ་བ་ལ། སྐྲངས་པ་ཧ་ཅང་མ་སྨིན་པ་ལ་ལེགས་བར་མ་བརྟགས་པར་གལ་ཏེ་སྐྲངས་པ་དེ་མཚོན་གྱིས་བརྟོལ་བར་གྱུར་ན། སྨིན་ཅིང་རྣགས་པའི་ཐབས་ཀྱིས་ཡང་དག་པར་གསོ་བར་བྱ་སྟེ། དེ་ཡང་ཕལ་ཆེར་ལན་ཚྭ་དང༌། སྐྱུར་བ་དང༌། ཚ་བ་དང༌། དྲོ་བའི་ལྡེ་གུའི་སྨན་རྣམས་དང༌། དེ་བཞིན་དུ་ཟས་སྨིན་ཅིང་རྣགས་པར་འགྱུར་བའི་བཟའ་བ་དང༌། དེ་བཞིན་དུ་སྨིན་པར་འགྱུར་བའི་ལོ་མ་ལ་སོགས་པ་དག་གིས་གསོ་བར་བྱ་ལ། དེ་དག་ཀྱང་རྨ་ལ་ཤིན་ཏུ་མི་གནོད་པར་བྱ་བ་སྟེ། ལན་འགའ་རྨ་སྨིན་པར་བྱ་བའི་ཕྱིར། རྨ་ལ་ཅུང་ཟད་གནོད་པ་བཏང་དུ་ཟིན་ཀྱང་སྐྱོན་དུ་མི་འགྱུར་བ་ནི་ཡོད་དོ། །སྣད་པའི་རྨ་ནི་གསར་དུ་བྱུང༌། །རལ་ཞིང་ཁ་བྱེ་འཕྲལ་
དུ་བཙེམ། །རྨེན་བུ་ཆེན་པོ་བཀས་པ་དང༌། །རྣ་ཤལ་བུ་ག་ཆད་པ་བཙེམ། །ཞེས་བྱ་བ་ལ། རྨ་དེའི་མོད་ཁོ་ན་ལ་མཚོན་གྱིས་དྲལ་ཞིང་སྣད་པ་ལས་བྱུང་བ་རལ་ཞིང་ཁ་བྱེ་བ་དང༌། དེ་བཞིན་དུ་རྨེན་བུ་ཆེན་པོ་བགས་པ་ལས་བྱུང་བ་དང༌། དེ་བཞིན་རྣ་ཤལ་གྱི་བུ་ག་ཆད་པའང་བཙེམ་པར་བྱའོ། །མགོ་དང་མིག་ཕུགས་སྣ་དང་མཆུ། །མཁུར་ཚོས་རྣ་བ་དཔུང་པ་བརླ། །མགུལ་པ་དཔྲལ་བ་རླིག་པ་དཔྱི། །ཕོ་མཚན་གཞང་དང་ལྟོ་བ་སོགས། །ཕུགས་རིང་བ་ན་གནས་རྣམས་དང༌། །ཤ་ཆེ་མི་འགུལ་མ་ཡིན་དང༌། །ཆུ་སོ་མཆན་ཁུང་ལ་སོགས་དང༌། །ཤ་ཆུང་མགུལ་པའི་རྨ་དག་དང༌། །དབུགས་དབྱུང་ཟུག་རྔུ་ཡོད་པ་དང༌། །ཐལ་སྨན་དུག་མེད་ཚིག་མི་བཙེམ་། །ཞེས་བྱ་བ་ལ། མགོ་བོ་དང་མིག་ཕུགས་ལ་སོགས་པར་གནས་པའི་རྨ་བཅོམ་པར་མི་བྱའོ། །དེ་བཞིན་དུ་སོ་དང༌། མཆན་ཁུང་ལ་སོགས་པའི་ལུས་ཀྱི་གནས་ཀྱི་རྨ་བཙེམ་པར་མི་བྱའོ། །དེ་བཞིན་དུ་ཤ་ཆུང་བ་དང༌། མགུལ་པའི་རྨ་དག་ཀྱང་བཙེམ་པར་མི་བྱའོ། །དེ་བཞིན་དུ་དབུགས་རྒྱུ་ཞིང་རྒྱུ་བ་དང༌། ནང་ན་ཟུག་རྔུ་ཡོད་པའི་རྨ་ཡང་བཙེམ་པར་མི་བྱའོ། །དེ་བཞིན་དུ་ཐལ་སྨན་དང༌། དུག་དང་མེས་ཚིག་བའི་རྨ་ཡང་བཙེམ་པར་མི་བྱའོ། །བཙེམ་པ་རུས་དུམ་ཁྲག་སྐམ་དང། །རྩ་དང་སྤུ་རྣམས་བསལ་ནས་ནི། །ཤ་ཆད་དུམ་བུ་འཕྱང་བ་ཡང༌། །རང་གི་གནས་སུ་གླན་པ་དང༌། །རུས་ཚིགས་བཅུག་ཅིང་ཁྲག་གཟགས་ལ། །སྐུད་པ་ཤིང་ཤུན་རྒྱུས་པས་བཙེམ། །ཞེས་བྱ་བ་ལ། བཙེམ་པར་བྱ་བ་ནི་རུས་ཚིགས་གསུམ་དུ་གནས་ལས་གོམས་པ་གང་ཡིན་པ་དང༌། ཁྲག་སྐམ་པོ་ལ་སོགས་བ་ལག་པས་བསལ་ཞིང་བཏོན་ལ། དེ་བཞིན་དུ་ཤ་ཆད་མཚོན་གྱིས་དབྲལ་ཏེ་དུམ་བུར་འཕྱང་བདེ་ཡང་རང་གི་གནས་སུ་གླན་ཞིང་སྦྱར་བ་དང༌། དེ་བཞིན་དུ་རུས་པ་དང་ཚིགས་ལ་སོགས་པ་བྱུང་ཞིང་འབུར་བ་སླར་གཞུག་པ་དང༌། ཁྲག་གི་རྒྱུན་གཟགས་ཤིང་སྤྱད་ལ། ཅི་རིགས་པར་རས་ཀྱི་སྐུད་པའམ། ཤིང་ཤུན་ཨ་སྨན་ཏ་ཀ་དང་མུར་བ་དང༌། གསོ་མ་ལ་སོགས་པའི་སྐུད་པ་འཇམ་པོའམ། རྒྱས་པ་ལས་བྱས་པའི་སྐུད་པས་ལེགས་པར་བཙེམ་པར་བྱའོ། །སྲུབས་ནི་ཉེ་བའམ་རིང་མི་བྱ། །བླང་བ་ཆེ་བའམ་ཆུང་མི་བྱ། །
ཞེས་བྱ་བ་ལ། དེ་ལྟར་བཙེམ་པ་ན། རྨ་ལས་ཧ་ཅང་ཉེ་བའམ། ཐག་རིང་བ་ནས་བཙེམ་པར་མི་བྱའོ། །དེ་བཞིན་དུ་རྨའི་གནས་ལས་སྲུབས་ཀྱི་བླང་བ་ཁམ་ཆུང་བར་མི་བྱའོ། །དེ་ནས་སྤྲོ་བསྲིང་བྱས་ནས་མཐར། །རྨ་ནི་སྦྲང་རྩི་མར་སྦྱར་དང༌། །སྐྱེར་པ་ཟར་མའི་དུད་པ་དང༌། །འབྲས་བུ་གསུམ་དང་ས་ལ་ཀི །སེང་ཕྲོམ་མངར་དང་སྣུམ་བཅས་པས། །བསྐུས་ལ་བཅིང་སོགས་སྔོན་བཞིན་བྱ། །ཞེས་བྱ་བ་ལ། དེ་ལྟར་བཙེམ་པའི་རྗེས་ཐོགས་ལ། ནད་པ་སྤྲོ་བ་སྲིང་ཞིང་དབུགས་ཕྱུང་སྟེ། དེ་ནས་དེའི་འོག་ཏུ་རྨ་ཁ་སྦྲང་རྩི་དང་མར་སྦྱར་བའི་སྐྱེར་བ་དང༌། ཟར་མ་ལ་སོགས་པའི་ལྡེ་གུ་བྱུག་ཅིང་བསྐུ་བ་དང༌། དེའི་འོག་ཏུ་བཅིང་བ་དང༌། དུད་པས་བདུག་པ་ལ་སོགས་པ་སྔ་མ་བཞིན་དུ་སྦྱར་བར་བྱའོ། །རྨ་ཁ་ཁྲག་ནི་མེད་གྱུར་གང༌། །དེ་ནི་ཅུང་ཟད་བྲུད་བྱས་ཏེ། །རྨ་འབྱོར་བ་ཉིད་ཁྲག་ཡིན་པས། །ཕྱུང་སྟེ་ལེགས་པར་དྲུབ་པར་བྱ། །ཞེས་བྱ་བ་ལ། རྨ་གང་ཞིག་ཁའི་ཕྱོགས་ན་ཁྲག་མེད་པར་གྱུར་པ་དེ་ནི་ཅུང་ཟད་ཙམ་བྲུད་ཅིང༌། མཚོན་གྱིས་གཙེས་ལ་ཁྲག་དབྱུང་བ་དང་བཙེམ་བར་བྱ་སྟེ། ཅིའི་ཕྱིར་ཞེ་ན། རྨ་འདི་འབྱོར་ཞིང་འཚོ་བར་བྱེད་པ་ནི་ཁྲག་ཉིད་ཡིན་པས་ན། དེ་ཕྱུང་སྟེ་དྲུབ་བར་བྱ་སྟེ། དེ་ལ་བཅིང་བ་ཡུལ་ལ་སོགས། །བརྟགས་ནས་ངེས་པར་སྦྱར་བར་བྱ། །ཞེས་བྱ་བ་ལ། འདིས་རྨ་བཅིང་ཞིང་དཀྲི་བར་བྱ་བ་ཡིན་པས་ན་བཅིང་བ་སྟེ། དེ་ནི་ཡུལ་ལ་སོགས་པ་ཞེས་པ། ཡུལ་དང་ནད་གཞི་དང་ལུས་ཟུངས་ལ་སོགས་པ་ལ་བརྟགས་ནས། རང་གི་བློས་ལེགས་པར་སྦྱར་བར་བྱའོ། །བལ་གོས་པགས་བ་དར་གསུམ་དྲོ། །ཟར་མའི་རས་ནི་བསིལ་བ་ཡིན། །ཞེས་བྱ་བ་ལ། བལ་གྱི་གོས་ཡིན་པས་ན་བལ་གོས་ཏེ། སྣམ་བུ་དང་ལ་བའོ། །བགས་པའི་རྣམ་པ་འཇམ་ཞིང་དྲོ་པའོ། །དར་ནི་ཟབ་དར་ཏེ། བཅིང་བ་གསུམ་པོ་འདི་དག་ནི་ནུས་པ་དྲོ་བ་ཡིན་ནོ། །ཟར་མའི་རས་དང་གསོར་ས་ནི་བསིལ་བ་ཡིན་ནོ། །དྲོ་གྲང་རན་པ་ཤིང་བལ་འདབ། །རས་བལ་རྒྱུས་པ་ཤིང་ཤུན་ཡིན། །ཞེས་བྱ་བ་ལ། དྲོ་བ་དང་གྲང་བ་གཉིས་ཀའི་རང་བཞིན་རན་པ་ནི་ཤིང་བལ་འདབ་མ་དང༌། རས་བལ་
དང་རྒྱུས་པ་དང༌། ཤིང་ཤུན་ལས་བྱས་པའི་ཆིངས་མ་སྟེ། རྒྱུ་དེ་དག་ལས་སྐུད་པའི་ཚུལ་དུ་བྱས་པའི་རྣམ་པས་དཀྲིས་པའོ། །ཟངས་ལྕགས་ཞ་ཉེ་རོ་ཉེ་ཡིས། །བད་ཀན་ཚིལ་ཆེས་རྨ་ལ་གླན། །ཆག་ཐུར་ཤིང་བྱང་པགས་པ་དང༌། །ཤིང་ཤུན་སྨྱིག་ཚལ་སོགས་པས་བཅིང༌། །ཞེས་བྱ་བ་ལ། བད་ཀན་དང་ཚིལ་ཆེས་པའི་རྨ་ལ་ནི། ཟངས་མ་དང་ལྕགས་ལ་སོགས་པ་གླན་ཞིང་བཅིང་བར་བྱའོ། །རྐང་ལག་གི་རུས་པ་ཆག་གྲུགས་སུ་གྱུར་པ་ལ་ནི། ཤིང་བྱང་ལ་སོགས་པས་བཅིང་བར་བྱའོ། །དབྱིབས་ནི་རང་མིང་མཐུན་པ་ཡི། །ཆིངས་མ་བཅྭ་ལྔ་རྣམས་བྱ་སྟེ། །ཤུབས་དང་བཀྲ་ཤིས་ལྷོད་པར་བཅིང༌། །མཐར་ཆགས་བཅིང་དང་ཟླུམ་པོར་བཅིང༌། །མདའ་ལྕགས་ཁྲི་དང་དམ་བཅིང་དང༌། །སྒྱེའུ་བླ་རེ་ལྐོག་ཤལ་དང༌། །འུར་མཐིལ་ཟུང་གླན་ཟླུམ་པ་དང༌། །ཡན་ལག་ལྔ་པ་ཞེས་བྱ་སྦྱར། །ཞེས་བྱ་བ་ནི། དབྱིབས་ཀྱི་རྣམ་པ་རང་གི་མིང་ཇི་སྐད་བཏགས་པ་དང༌། རྗེས་སུ་མཐུན་པའི་ཆིངས་མ་སྒྱེའུ་དང༌། བཀྲ་ཤིས་ནས་ཡན་ལག་ལྔའི་བར་བཅྭ་ལྔ་པོ་དེ་དག་བཅིང་བའི་དོན་དུ་སྦྱར་བར་བྱའོ། །དེ་དག་ཀྱང་ཤུབས་ནི་མཛུབ་ཤུབས་འདྲ་བ་སྟེ། སོར་མོའི་ཚིགས་གསུམ་པ་ལ་སྦྱར་བར་བྱའོ། །བཀྲ་ཤིས་ནི་གཡུང་དྲུང་ལྟ་བུ་ཟུར་བཞི་པ་སྟེ། རུས་པའི་ཚིགས་དང༌། སྨིན་མ་དང༌། ནུ་མའི་བར་དང༌། མཆན་ཁུང་དང༌། རྣ་བར་གླན་བར་བྱའོ། །ལྷོད་པར་བྱ་བ་ནི། རྩྭ་ལ་སོགས་པ་ལས་ལྷས་བར་བྱ་སྟེ། དེ་དག་ནི་མགུལ་བ་དང༌། ཕོ་མཚན་ལ་སོགས་པ་ལ་རྨ་བྱུང་བ་ལ་གླན་བར་བྱའོ། །མཐར་ཆགས་སུ་བཅིང་བ་ནི་རས་བལ་ལ་སོགས་བ་ཞེང་ཆུང་ལ་རིང་བ་སྟེ། དེ་ནི་མིང་གི་གྲར་སྦྱར་པར་བྱའོ། །ཟླུམ་པོར་བཅིང་བ་ནི་སྲད་བུ་སྟེ། དེ་ནི་ཡན་ལག་ཐམས་ཅད་བཅིང་བ་ལ་སྦྱར་བར་བྱའོ། །མདའ་ལྕགས་ནི་གང་རིང་པོར་བྱས་པ་སྟེ། དེ་ཡང་ལག་ངར་ལ་སོགས་པ་ལ་སྦྱར་བར་
བྱའོ། །ཁྲི་ནི་ཁྲི་རྐང་བཞི་པར་བྱས་པ་སྟེ། དེ་ནི་འགྲམ་པ་དང་མུར་འགྲམ་དང་མཁུར་ཚོས་སྣད་པ་ལ་སྦྱར་རོ། །དམ་དུ་བཅིང་བ་ནི་ཁྱད་པར་དུ་འདུག་མི་ཤེས་པར་བཅིང་བ་སྟེ། དེ་ནི་ལྟོ་བ་དང་བརླའི་རྒྱབ་ཏུ་གླན་ཞིང་བཅིང་བར་བྱའོ། །སྒྱེའུ་ནི་སོ་རྩི་ལ་སོགས་པའི་འཇུད་པའི་སྒྱེའུ་ཕྲན་ཏེ། དེ་ནི་སོར་མོ་དང་ཕོ་མཚན་གྱི་རྩ་ལ་ནད་ཡོད་པ་དང༌། གཅིན་ནད་ཟ་ཁུ་ཅན་ལ་སྦྱར་བར་བྱའོ། །བླ་རེ་ནི་ཉི་ཚན་ལ་སོགས་པའི་གནོད་པ་བཟློག་པའི་ཕྱིར། རས་བལ་ལ་སོགས་པས་ཁེབས་པ་ལྟ་བུ་སྟེ། ཕོ་མཚན་སྐྲངས་པ་ལ་སོགས་པ་ལ་སྦྱར་བར་བྱའོ། །བ་ལང་གི་ལྐོག་མ་ལྟ་བུ་ནི། ལྐོག་མར་ལྐོག་ཤལ་ལྟར་འཕྱང་བ་སྟེ། དེ་ནི་ལུས་ཀྱི་ཡན་ལག་འཕྱང་བ་ལས་གྱུར་བར་སྦྱར་བར་བྱའོ། །འུར་མཐིལ་ལྟ་བུ་ནི་ཞིང་པ་རྣམས་བྱ་སྐྲོད་པའི་ཕྱིར། འུར་རྡོ་འཕེན་པའི་རྡོའི་གནས་སུ་བྱེད་པ་འུར་མཐིལ་ཞེས་བྱའོ། དེ་ནི་རྣ་དང་ཆུ་དང་ཀོ་སྐོ་ནད་པ་ལ་སྦྱར་ཞིང་བཅིང་བར་བྱའོ། །ཟུར་དུ་གླན་པ་ནི་གང་དུ་བྱང་གཅིག་དབུས་སུ་སྐབས་བཏོད་དེ། རྨ་གཉི་ག་འདབ་ཆགས་སུ་བཅིང་དུ་རུང་བའོ། །དེ་ནི་རྨ་གཉིས་འདབ་ཆགས་སུ་བྱུང་བ་ལ་གླན་པར་བྱའོ། །ཟླུམ་པོ་ཞེས་བྱ་བ་ནི་དཀྱིལ་འཁོར་ལྟར་ཟླུམ་པོར་བྱས་པ་སྟེ། དེ་ནི་ཡན་ལག་ཟླུམ་བོར་སྣང་ཅིང་ཆག་པ་ལ་གླན་པར་བྱའོ། །ཡན་ལག་ལྔ་པ་ནི། ཤིང་བྱང་ལ་སོགས་པ་གང་ཡན་ལག་བཞི་པོ་ཡོད་ཅིང་གྱེན་དུ་དབྱུང་པ་བྱ་སྟེ། དེ་ནི་ནམ་ཚོང་ཡན་ཆད་སྣད་པ་ལ་སྦྱར་བར་བྱའོ། །དེ་ལས་གང་ཞིག་གང་ལེགས་འབྱོར། །དེ་ནི་དེ་རུ་ལེགས་པར་སྦྱར། །ཞེས་བྱ་བ་ལ། བཅིང་བ་དེ་དག་གི་ནང་ནས། ཆིང་མ་གང་ཞིག་ལུས་ཀྱི་ཕྱོགས་གང་དང་ལེགས་པར་འབྱོར་ཞིང་འབྱར་ལ་འཚམ་པའི་ཆིངས་མ་ཤུགས་ལ་སོགས་པ་དེ་དག་ནི། ལུས་ཀྱི་ཕྱོགས་དེ་རུ་ལེགས་པར་སྦྱར་ཞིང་བཅིང་བར་བྱའོ། །བརླ་དང་མཇུག་ཙོས་མཆན་ཁུང་དང༌། །ཆུ་སོ་སྤྱི་བོར་དམ་དུ་བཅིང༌། །ཞེས་བྱ་བ་ལ། བརླ་དང་མཇུག་ཙོས་ལ་སོགས་པ་ནི་ལུས་ཀྱི་
ཕྱོགས་སུ་རྨ་བྱུང་བ་ལ་ནི་དམ་ཞིང་སྲ་བར་བཅིང་བར་བྱའོ། །ལྷོད་པར་བཅིང་བར་མི་བྱའོ། །ལག་ངར་གདོང་དང་རྣ་བ་དང༌། །རྒྱ་བ་དང་རྩི་བ་ལོགས་མགུལ་པ་ལྟོ། །ཕོ་མཚན་རླིག་པ་རན་པར་བཅིང༌། །ཞེས་བྱ་བ་ལ། ལག་ངར་ལ་སོགས་པའི་ལུས་ཀྱི་ཕྱོགས་སུ་ནི་བཅིང་བ་དམ་ལྷོད་རན་པར་བྱ་ལ། དེ་བཞིན་དུ་ཕོ་མཚན་དང་རླིག་པ་ཡང་རན་པ་ཙམ་དུ་བཅིང་བར་བྱའོ། །མིག་དང་ཚིགས་སུ་ལྷོད་བར་བཅིང༌། །ཞེས་བྱ་བ་ལ། མིག་གི་ཕྱོགས་དང་རུས་པའི་ཚིགས་རྣམས་སུ་ཆིངས་མ་ལྷོད་པར་བཅིང་ངོ༌། །ལྷོད་བཅིངས་རྨ་ནི་བད་ཀན་དང༌། །རླུང་ཤས་ཆེ་ལ་རན་པར་བཅིང༌། །ཞེས་བྱ་བ་ལ། ལྷོད་བར་བཅིང་བ་མིག་དང་ཚིགས་ལ་རྨ་བད་ཀན་དང་རླུང་གི་ཤས་ཆེ་བ་ཡོད་ན་ལྷོད་པར་ན་ཙམ་དུ་བཅིང་ངོ༌། །རན་ཞིང་གནས་སུ་དམ་དུ་བཅིང༌། །དམ་ཞིང་ཤིན་ཏུ་དམ་པར་བཅིང༌། །ཞེས་བྱ་བ་ལ། རན་པར་བཅིང་པའི་གནས་ལག་ངར་ལ་སོགས་པར། བད་ཀན་དང་རླུང་གི་ཤས་ཆེ་བའི་རྨ་ཡོད་ན། རན་པར་མི་བཅིང་གི་དམ་དུ་བཅིང་བར་བྱའོ། །དམ་དུ་བཅིང་བའི་གནས་བརླ་དང་མཇུག་ཙོས་ལ་སོགས་པའི་རྨ་བད་ཀན་དང་རླུང་ལས་བྱུང་བ་ཡིན་ན། ཤིན་ཏུ་ཤས་ཆེར་དམ་དུ་བཅིང་བར་བྱའོ། །དགུ་ན་དང་དེ་བཞིན་དཔྱིད་ཀྱི་ཚེ། །ཞག་ནི་གསུམ་གསུམ་དག་ནས་དགྲོལ། །ཞེས་བྱ་བ་ལ། བད་ཀན་དང་རླུང་གི་ཤས་ཆེ་བའི་རྨ་དེ་གཉིས་ལས་དགུན་ཞེས་བྱ་བ་དགུན་སྟོད་དང་དགུན་སྨད། དེ་བཞིན་དུ་དཔྱིད་ཀྱི་ཚེ་སྟེ། ཟླ་བ་དྲུག་ལ་ནི་ཞག་གསུམ་ནས་དགྲོལ་ཞིང་བཅིང་བར་བྱའོ། །ཁྲག་མཁྲིས་ཤས་ཆེའི་རྨ་དག་ནི། །དམ་བཅིང་གནས་སུ་རན་པར་བཅིང༌། །རན་བཅིང་གནས་སུ་ལྷོད་པར་བཅིང༌། །ལྷོད་བཅིང་གནས་སུ་བཅིང་མི་བྱ། །ཞེས་བྱ་བ་ལ། ཁྲག་དང་མཁྲིས་པ་ཤས་ཆེ་བའི་རྨ་ལ་ནི་དམ་དུ་བཅིང་བའི་གནས་བརླ་ལ་སོགས་པར་དམ་དུ་མི་བཅིང་རན་བར་བཅིང་བར་བྱའོ། །རན་པར་བཅིང་བའི་གནས་ལག་ངར་ལ་སོགས་པར་ནི་ལྷོད་པར་བཅིང་བར་བྱའོ། །ལྷོད་པར་
བཅིང་བའི་གནས་མིག་དང་ཚིགས་སུ་ཁྲག་དང་མཁྲིས་པ་ཤས་ཆེ་བའི་རྨ་བྱུང་ན་དེ་བཅིང་བར་མི་བྱའོ། །དེ་གཉིས་སོ་ག་སྟོན་གྱི་ཚེ། །སྔ་དྲོ་ཕྱི་དྲོ་དགྲོལ་བར་བྱ། །ཞེས་བྱ་བ་ལ། ཁྲག་དང་མཁྲིས་པ་ལས་བྱུང་བའི་རྨ་དེ་གཉིས་ལ་སོ་ག་དང་སྟོན་ཀའི་ཚེ་ནི་ཉིན་རེ་ཞིང་སྔ་དྲོ་དང་ཕྱི་དྲོའི་དུས་སུ་དགྲོལ་ཞིང་བཅིང་བར་བྱའོ། །མ་བཅིངས་ཤ་སྦྲང་སྦྲང་བུ་དང༌། །ལྷགས་པ་སེར་བུ་སོགས་པས་གནོད། །རྨ་རེད་གྱུར་ཅིང་དེར་སྣུམ་དང༌། །སྨན་ནི་ཡུན་རིངས་གནས་མི་འགྱུར། །སྦྱང་པའམ་འཚོ་བར་དཀའ་བ་དང༌། །འཚོ་བ་ཀྱང་མདོག་ནི་མི་སྡུག་འགྱུར། །ཞེས་བྱ་བ་ལ། རྨ་མ་བཅིངས་ན་ཤ་སྦྲང་ལ་སོགས་པས་གཙེས་པར་འགྱུར་ཞིང༌། དེ་དང་རེག་པའི་དབང་གིས་འཚེ་བ་ལ་སོགས་ཀྱིས་གནོད་པར་འགྱུར་བ་དང༌། དེ་བཞིན་དུ་རྨ་དེ་བཅིང་བ་མེད་པར་སྣུམ་གྱིས་བསྐུས་ན་ཡང་སྨན་དེ་ཡང་ཡུན་རིང་དུ་གནས་པར་མི་འགྱུར་ཞིང༌། སྨན་གྱི་ལྡེ་གུ་ལ་སོགས་པ་བསྐུས་པ་ཡང་ཡུན་རིང་པོར་མི་ཐོགས་པར་བསྐམས་པའམ་ལུད་པར་གྱུར་པའམ། དེ་བཞིན་དུ་ལེགས་བར་བཅོས་སུ་ཟིན་ཀྱང་རྨ་འཚོ་ཞིང་འདྲུབ་བར་དཀའ་བ་དང༌། གལ་ཏེ་འཚོ་ཞིང་འདྲུབ་ཀྱང་ཤ་མདོག་མི་སྡུག་པར་འགྱུར་རོ། །བཅིངས་ན་ཆག་ཅིང་ཕྱེ་མར་འགྱུར། །འཕྲེས་སམ་འབུར་གྱུར་དྲལ་གྱུར་ཏམ། །རྩ་དང་རྒྱུས་པ་ཆད་གྱུར་ཀྱང༌། །རྨ་ནི་མྱུར་དུ་བདེ་བར་འཚོ། །ལྡང་དང་ཉལ་བ་ལ་སོགས་པའི། །སྤྱོད་ལམ་ཀུན་ལ་གནོད་པ་མེད། །ཅེས་བྱ་བ་ལ། རྨ་ལེགས་པར་བཅིངས་ཤིང་བསྡམས་པས་ནི། ཆག་ཅིང་ཕྱེ་མར་གྲུགས་པའམ། འཕྲེས་ཤིང་གནས་པ་ལས་འཕྱུགས་པའམ། །འབུར་ཞིང་མཐོ་བའམ། དྲལ་ཞིང་གས་པར་གྱུར་པའམ། རྩ་དང་རྒྱུས་པ་ཆད་པར་གྱུར་ཀྱང༌། རྨ་བདེ་བླག་ཏུ་མྱུར་དུ་འཚོ་བར་འགྱུར་རོ། །དེ་བཞིན་དུ་ལྡང་བ་དང་མལ་ན་ཉལ་བ་ལ་སོགས་པའི་སྤྱོད་ལམ་ཀུན་ལ་ཡང་གནོད་པ་མེད་པར་འགྱུར་རོ། །རྨ་ཁ་སྐྱེས་མཐོ་མི་མཉམ་དང༌། །སྲ་ཞིང་རབ་ན་འཚོ་བར་དཀའ། །
འཇམ་ཞིང་མཉམ་ལ་ན་བ་མེད། །རྨ་ནི་མྱུར་དུ་དག་ཅིང་འཚོ། །ཞེས་བྱ་བ་ལ། རྨ་གང་ཁ་ཆེར་སྐྱེས་ཤིང་མཐོ་བའི་ཟླུམ་པོ་ཡོད་པ་དང༌། མཐོ་དམན་མི་མཉམ་པ་དང༌། སྲ་ཞིང་མཉེན་བག་མེད་བ་དང༌། རབ་ཏུ་ན་ཞིང་ཚོར་བ་དྲག་པ་དང་ལྡན་པའི་རྨ་དེ་ལྟ་བུ་ནི་འཚོ་ཞིང་འབྱང་བར་དཀའ་བ་ཡིན་ནོ། །རྨ་གང་འཇམ་ཞིང་མཉེན་པ་དང༌། ན་བ་མེད་པ་ནི་མྱུར་དུ་དག་ཅིང་འཚོ་བར་འགྱུར་རོ། །རྨ་ནི་ཡུན་རིང་ཤ་ཆུང་དང༌། །རྩུབ་པས་འབྱོར་བར་མ་གྱུར་ན། །ནད་གཞི་དུས་ཚིགས་ཇི་བཞིན་དུ། །སྨན་དང་ལོ་མས་དགབ་པར་བྱ། །མ་རྙིངས་གཞོན་ཞིང་བུ་ག་མེད། །ཀུན་ནས་ལེགས་པར་ཁེབས་བ་དང༌། །ཕྱིས་ཤིང་མི་རྩུབ་ལོ་མ་ནི། །འོ་མ་ཅན་ཤིང་སྟག་པ་དང༌། །ཨརྫུ་ན་དང་ཀ་དམ་བའི། །ལོ་མ་ཡིས་ནི་གཡོགས་པར་བྱ། །ཞེས་བྱ་བ་ལ། རྨ་ཡུན་རིང་ཞིང་དུས་རིང་པོ་ལོན་ཏེ། རྙིངས་པ་དང༌། ཤ་ཆུང་ཞིང་ཟད་པ་དང༌། རྩུབ་པར་གྱུར་བའི་རྒྱུས་འབྱོར་ཞིང་འཚོ་བར་མ་གྱུར་ན། ནད་གཞི་ཇི་ལྟ་བའི་ཚུལ་དང་མཐུན་པ་དང༌། དུས་ཚིགས་དང་ཇི་ལྟར་མཐུན་པ་བཞིན་དུ་རྨའི་སྨན་ལྡེ་གུ་དང༌། སྣུམ་ལ་སོགས་པ་རྨ་ལ་ཕན་པར་བྱེད་པ་དག་བསྐུ་བར་བྱ་བ་དང༌། ཤིང་འོ་མ་ཅན་ལ་སོགས་པའི་ལོ་མས་དག་བཅིང་གསོ་བར་བྱ་སྟེ། དེ་ཡང་འདི་ལྟར་རླུང་ལས་གྱུར་པའི་རྨ་གྲང་བའི་དུས་སུ་སྣུམ་པ་དང་དྲོ་བས་གསོ་བ་དང་མཁྲིས་པ་ཤས་ཆེ་བའི་རྨ་དང༌། དེ་བཞིན་དུ་དྲོ་པའི་དུས་སུ་ནི་བསིལ་བར་གསོ་བ་དང༌། བད་ཀན་ཤས་ཆེ་བའི་རྨ་དང༌། གྲང་བ་དང་དྲོ་བའི་དུས་སུ་ནི་ཕལ་ཆེར་རྩུབ་པ་དང༌། གྲང་བས་གསོ་བར་བྱ་སྟེ། འགྲེས་འདིས་ཐམས་ཅད་ལ་སྦྱར་བར་བྱའོ། །དེ་བཞིན་དུ་ལོ་མ་རྙིངས་ཤིང་དེངས་པ་མ་ཡིན་པ་དང༌། གཞོན་ཞིང་གསར་པ་དང༌། བུག་རྡོལ་མེད་པ་དང༌། དེ་བཞིན་དུ་ཀུན་ནས་ཐམས་ཅད་དུ་ལེགས་པར་ཁེབས་ཤིང་ལེགས་པར་གཞག་པ། ཕྱིས་ཤིང་དྲི་མ་མེད་པར་བཀྲུས་པ་དང༌། མི་རྩུབ་ཅིང་སྲ་བ་མ་ཡིན་པའི་ལོ་མའི་མ་ཅན་གྱི་ཤིང་ལ་སོགས་པ་ལས་བྱུང་བས་ལེགས་
པར་གཡོགས་པར་བྱའོ། །མཛེ་དང་མེ་ཡིས་ཚིག་པ་དང༌། །འབུས་ཟོས་གཅིན་ནད་སྦྲང་རྩི་འདྲ། །བྱི་བ་སྦྲུལ་གྱི་དུག་དང་ནི། །ཐ་ལ་སྨན་རྣོ་དང་དུག་གིས་ཕོག །རྨ་ནི་བཅིང་བར་མི་བྱ་ཞིང༌། །ཤ་འདྲུལ་གཞན་ཁར་མི་བཟད་རྣགས། །འདྲུལ་ཤིང་ཚ་དང་ན་བཅས་པར། །སྐྲངས་སྐམས་མེ་དབལ་མི་བཅིང་ངོ༌། །ཞེས་བྱ་བ་ལ། མི་མཛེས་བཏབ་པ་དང༌། དེ་བཞིན་དུ་མེས་ཚིག་པའི་རྨ་བཅིང་བར་མི་བྱའོ། །དེ་བཞིན་དུ་འབུས་ཟོས་པའི་རྨ་ནས་དུག་གིས་ཕོག་བའི་རྨ་ཡང་བཅིང་བར་མི་བྱའོ། །དེ་བཞིན་དུ་ཤ་རུལ་ཞིང་འདྲུལ་བ་ནས་མེ་དབལ་གྱི་བར་གྱི་རྨ་ཡང་བཅིང་བར་མི་བྱའོ། །རྨ་གང་ལེགས་པར་མ་བསྲུངས་པར། །སྦྲང་མ་སྲིན་བུ་འཇུག་བྱེད་དེ། །དེ་ཡིས་ཟོས་པས་ན་བ་དང༌། །སྐྲང་དང་རྣག་ཁྲག་འཛག་པར་བྱེད། །ཅེས་བྱ་བ་ལ། རྨ་གང་ཞིག་ལེགས་པར་མ་བསྲུངས་ཤིང༌། །མ་བཙས་པས་འཇུག་པ་ལ་སོགས་པའི་གནོད་པ་འབྱུང་ངོ༌། །དེང་ནི་བཀྲུ་དང་དག་པར་ནི། །བྱེའུ་རུག་ལ་སོགས་སྡེ་ཚན་སྦྱར། །ཞེས་བྱ་བ་ལ། །འབུ་ཞུགས་པའི་རྨ་དེར་ནི་བྱེའུ་རུག་པ་ལ་སོགས་པའི་སྡེ་ཚན་སྦྱར་བས་བསྐུ་ཞིང་སྦྱར་བ་དང་དག་སྟེ་བསྐྲད་པར་བྱའོ། །སབ་ཏ་པརྞི་ཀ་རཉྫ། །ཨར་ཀ་དང་ནི་ནིམ་པ་དང༌། །རྭ་ཚ་དང་ནི་ཤིང་ཚ་རྣམས། །བ་གཅིན་དང་ནི་བཏགས་བ་ཡི། །ལྡེ་གུ་དེ་ལ་བསྐུ་བ་དང༌། །ཐལ་སྨན་ཆུ་ནི་བླུགས་པས་ཕན། །ཞེས་བྱ་བ་ལ། ཡང་རྨ་དེར་སབ་ཏ་པརྞི་ལ་སོགས་པ་དང༌། བ་གཅིན་བཏགས་པའི་ལྡེ་གུ་བསྐུ་བར་བྱའོ། །དེ་བཞིན་དུ་ཐལ་སྨན་རྣོན་བོའི་ཆུ་བླུགས་པ་ཡང་ཕན་པ་ཡིན་ནོ། །ཡང་ན་ཤ་རློན་གྱིས་གཡོགས་ལ། །དེ་ནི་མྱུར་དུ་དབྱུང་བར་བྱ། །ཞེས་བྱ་བ་ལ། ཡང་ན་རྨ་དེ་ཤ་རློན་རྨའི་ཚང་དང་དབྱིབས་འདྲ་བའི་ཤའི་དུམ་བུས་བཀག་ཅིང་གཡོགས་ལ། འབུ་དེ་དེ་ལ་ཆགས་པ་ན་མྱུར་ཞིང་རིངས་བར་གདོན་པར་བྱའོ། །འདི་ནི་ནང་ན་སྐྱོན་བཅས་པས། །མྱུར་དུ་འཚོ་བ་བར་མི་བྱ་སྟེ། །དེ་ནི་གནོད་པ་ཆུང་དུས་ཀྱང༌། །སླར་ཞིང་འགྲམས་པར་བྱེད་པ་ཡིན། །ཞེས་བྱ་བ་ལ། རྨ་འདི་ནི་ནང་ན་སྐྱོན་དང་བཅས་ཤིང་རྣག་ས་
ལ་སོགས་པས་ཁྱབ་པས་སྨན་པས་རིངས་ཤིང་མྱུར་བར་འདྲུབས་ཤིང་འབྱར་བར་བྱ་བའི་ཕྱིར། འཚོབ་པའི་སྨན་བསྐུ་བར་མི་བྱ་སྟེ། གང་གི་ཕྱིར་སྨན་དེ་ན་ངན་གནོད་པ་དང་བཅས་པས་རྨ་དེ་འཚོ་ཞིང་འབྱར་ཡང་སླ་ཞིང་འགྲམས་པ་དང་འཇིག་པར་འགྱུར་བ་ཡིན་ནོ། །འཚོབ་པར་གྱུར་ཀྱང་མ་ཞུ་དང༌། །དྲག་ཤུལ་བུད་མེད་བསྟེན་སོགས་སྤང༌། །ཞེས་བྱ་བ་ལ། རྨ་འཚོབ་ཅིང་འབྱོར་བར་གྱུར་ཀྱང་ནད་པ་དེས་མ་ཞུ་བ་དང་དྲག་ཤུལ་ལ་སོགས་པ་སྤང་ངོ༌། །ཟླ་བ་དྲུག་གམ་བདུན་གྱི་བར། །ཆོ་ག་འབད་པས་བསྲུང་བར་བྱ། །ཞེས་བྱ་བ་ལ། མ་ཞུ་བ་དང༌། བུད་མེད་དང་ཕྲད་པ་ལ་སོགས་པའི་ཆོག་འདི་ནི་རྨ་འཚོབ་ནས་ཟླ་བ་དྲུག་གམ་བདུན་གྱི་བར་དུ་བསྲུང་ཞིང་བསྡམ་པར་བྱའོ། །གནས་སྐབས་དེ་དང་དེར་ནི་བྱུང་གྱུར་ཚེ། །ནད་གཞི་ལ་སོགས་སྟོབས་ཀྱིས་རྗེས་འབྲངས་ཏེ། །ཕྱི་མ་ནས་བཤད་རྒྱ་ཆེར་ལེགས་བརྟགས་ལ། །ཐབས་ནི་དེ་དང་དེ་ཡིས་འབད་དེ་གསོ། །ཞེས་བྱ་བ་ལ། རྨའི་གནས་སྐབས་གསལ་བར་མ་བསྟན་པའི་ཚུལ་དང་མིང་གང་དག་ཡིན་བ་དེ་དག་བྱུང་ཞིང་སྐྱེས་པར་གྱུར་པ་ན། སྨན་པས་རླུང་ལ་སོགས་པའི་ནད་གཞི་ལ་སོགས་པའི་སྟོབས་ཀྱིས་རྗེས་སུ་འབྲངས་ནས། འདི་ཉིད་ཀྱི་རྒྱུད་ཕྱི་མ་ནས་རྒྱ་ཆེར་བཤད་པ་དེ་ལེགས་པར་བརྟགས་ཤིང་དཔྱད་ལ། རྨ་དེ་གསོ་བའི་ཐབས་དེ་དང་དེས་འབད་པ་དང་ལྡན་པས་གསོ་བར་བྱའོ། །བློས་གཞུང་ལ་མ་བརྟགས་པའི་རང་དགའ་དང༌། འབད་པ་མེད་པའི་སྒྱིད་ཞན་པས་ནི་མི་བྱའོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ། ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ཉེ་བར་སྦྱར་བ་ལས། ལེའུ་ཉི་ཤུ་རྩ་དགུ་པའི་རྣམ་པར་འགྲེལ་པའོ།། །།