རྒྱ་མཚོས་བསྟན་པའི་མཚན།
རྒྱ་གར་སྐད་དུ། ས་མུ་དྲ་བྷ་ཛཱ་བི་ན། བོད་སྐད་དུ། རྒྱ་མཚོས་བསྟན་པའི་མཚན། ཐམས་ཅད་མཁྱེན་པ་ལ་ཕྱག་འཚལ་ལོ། །རྐང་བའི་གོང་གི་སོར་མོའི་མཚན་རྣམས་ནི། །སྐྱིད་དང་སྡུག་པ་ཐམས་ཅད་ཤེས་པར་བྱེད། །མཐེ་བོང་ཆེ་ན་སྡུག་བསྔལ་འཐོབ་པར་བྱེད། །ཆུང་བ་སྐམ་པ་ཡུལ་རྣམས་བསྐོར་ཞིང་སྡུག །ལེབ་མོ་སྐམ་པ་སྐྱ་བོ་མི་བཟང་སྟེ། །མཐེབ་མཛུབ་པར་དུ་ཁ་འདྲ་སྐམ་པ་ནི། །ཉོན་མོངས་ཐམས་ཅད་སྐྱེ་བར་འགྱུར་བ་ཡིན། །མཐེ་བོང་གྱེན་དུ་མཐོ་བ་ལེགས་པར་སྙོམས། །སྣུམ་ཞིང་སྙོམས་པར་སྐྱེས་པ་བདེ་བའི་མཚན། །སོར་མོ་ཟླུམ་པ་སེན་མོ་ཟངས་ཀྱི་མདོག །ཤིན་ཏུ་དམར་བ་ཁྲག་གི་མདོག་ཅན་ནི། །རྒྱལ་པོར་འགྱུར་བའི་མཐེ་བོའི་མཚན་མ་ཡིན། །རྐང་བའི་མཛུབ་མོ་སྤོམ་ཞིང་རིང་བ་ནི། །བུད་མེད་ལོངས་སྤྱོད་ཀྱི་ནི་རྙེད་པ་ཐོབ། །ཐོབ་པའི་བུད་མེད་མྱུར་དུ་འཆི་བར་བྱེད། །ཡང་ན་བུ་སྐྱེས་འཆི་བར་འགྱུར་བ་ཡིན། །མཛུབ་མོ་ཆུང་ན་ཀུན་དང་འཁོན་པར་བྱེད། །གུང་མོ་མཐོ་ན་དོན་རྣམས་ཉམས་པར་བྱེད། །ཆུང་ན་སྡུག་བསྔལ་བཞིན་དུ་འབྱུང་བར་འགྱུར། །སྲིན་ལག་རིང་ན་རིག་པ་འཛིན་པར་བྱེད། །ཐུང་ན་ཆུང་མ་འཆི་བར་འགྱུར་བ་ཡིན། །མཐེ་ཆུང་རིང་ན་དོན་རྣམས་འགྲུབ་པར་འགྱུར། །ཆུང་ན་ཕ་རོལ་ནོར་རྣམས་འཕྲོག་པར་བྱེད། །མཛུབ་མོ་མཐེ་ཆུང་ཤིན་ཏུ་སྦོམ་པ་ནི། །ཨ་མ་འཆི་བར་འགྱུར་བ་རྒྱ་མཚོས་བཤད། །གུང་མོ་སྙོམས་ཤིང་ཟླུམ་པ་ལེགས་པ་ནི། །བུ་སྐྱེས་ཆུང་དུའི་ལོ་ལ་འཆི་བར་བྱེད། །རྒྱ་མཚོས་བསྟན་པའི་མཚན་གཅིག་པའོ།། །།སོར་མོ་མི་སྙོམས་སྦོམ་ཕྲར་གནས་པ་ནི། །འབངས་པོའི་འབངས་ཀྱི་ལས་རྣམས་བྱེད་པར་འགྱུར། །འབངས་བོ་མིན་ཡང་གཞན་གྱི་ལས་རྣམས་བྱེད། །སོར་མོ་འཁྱོག་ཅིང་གང་གིས་དང༌། །རྟག་ཏུ་སྡུག་བསྔལ་འབའ་ཞིག་སྤྱོད་པར་བྱེད། །སོར་མོ་སྙོམས་པ་གཅིག་ཏུ་སྐྱེས་པ་འདྲ། །ཟླུམ་ཞིང་འདྲིལ་བ་བྱིན་གྱིས་ཕྲ་བ་ནི། །རྒྱལ་པོའི་མཚན་གྱིས་བརྒྱན་པའི་སོར་མོ་ཡིན། །སེན་མོ་དཀར་བ་ཤ་དང་བཅས་པ་ནི། །སྐྱེས་པ་སྡུག་བསྔལ་བཞིན་དུ་གནས་པར་བཤད། །སེན་མོ་གས་པ་འདོད་པའི་ལོངས་སྤྱོད་མེད། །སེན་མོ་འཁྱོག་པ་ཆག་པ་སྤོམ་པ་ལས། །རྟག་ཏུ་སློང་མོ་བྱེད་པའི་དབུལ་པོར་
བཤད། །བ་བླ་ལྟ་བུ་སེན་པོ་སེར་པོ་ཡིས། །བྲམ་ཟེ་གསོད་དམ་བཀུར་འོས་གསོད་པར་བཤད། །སེན་མོ་དམར་བ་རྒྱལ་པོར་འགྱུར་བ་སྟེ། །དེས་ནི་གཉེན་པོ་བྱས་པ་མི་བཟང་སྟེ། །རང་གི་རིགས་རྣམས་སྨོད་པར་བྱེད་པ་ཡིན། །སེན་མོ་དུང་གི་མདོག་གིས་རྒྱལ་པོར་འགྱུར། །ཟངས་ཀྱི་མདོག་ཅན་རྒྱལ་པོའི་སེན་མོ་སྟེ། །པདྨའི་མདོག་ཅན་ཀྱང་ནི་དེ་བཞིན་ནོ། །སེན་མོ་ཁྲག་མདོག་མཆོག་གི་དབང་ཕྱུག་སྟེ། །སྣུམ་པ་ལེགས་པ་ཟངས་མདོག་རྒྱལ་པོར་འགྱུར། །རྒྱ་མཚོས་བསྟན་པ་ལས་མཚན་གཉིས་པའོ།། །།མཐེ་བོང་ནས་བཟུང་མཐིལ་གྱི་ཤ་རྒྱུད་ནི། །སྙོམས་པ་མདོག་བཟང་རིང་བ་བདེ་བར་འཚོ། །ཐུང་དུ་མདོག་ངན་མཐོ་དམན་ལྡན་པ་ནི། །བསམ་ངན་ཀུན་ལ་གནོད་ཅིང་བདེ་བ་མེད། །རྐང་པ་པག་གི་ལྟ་བུ་ཡོད་པ་ལ། །རྟག་ཏུ་གཞན་གྱིས་འཆིང་བར་འགྱུར་བ་ཡིན། །མཉམ་སྙོམས་པས་ནི་བདེ་བ་ཐོབ་པར་བྱེད། །བོ་ལ་ཚིགས་མ་ཧེ་ལྟ་བུ་ཕག་བཞིན་ནོ་།བོལ་ཚིགས་རྡོ་རྗེ་ལྟ་བུ་རྟག་ཏུ་སྡུག །བོལ་ཚིགས་རྟ་ཡི་ལྟ་བུ་དབང་ཕྱུག་ཐོབ། །རྒྱ་མཚོས་བསྟན་པ་ལས་མཚན་གསུམ་པའོ།། །།བྱིན་པ་རི་དགས་ལྟ་བུས་རྒྱལ་པོར་འགྱུར། །ཅེ་སྤྱང་ལྟ་བུའི་བྱིན་པས་སྡུག་བསྔལ་འཐོབ། །བྱིན་པ་སྦོམ་པོས་མཆོག་གི་དབང་ཕྱུག་ཐོབ། །བྱིན་པ་སྦོམ་པོ་རིང་པོ་གང་གིས་ཀྱང༌། །རྟག་ཏུ་འགྲོ་བ་འབའ་ཞིག་འཐོབ་པར་བྱེད། །བྱིན་པ་ཕག་པ་ལྟ་བུས་ལོངས་སྤྱོད་མེད། །བྱིན་པ་ཕོ་རོག་ལྟ་བུས་སྡུག་བསྔལ་ཐོབ། །བྱིན་པ་དོམ་མམ་སྤྲེའུ་ལྟ་བུས་འཆིང༌། །སེང་གེ་སྟག་གི་བྱིན་པ་འདྲ་བ་ལས། །ཕ་རོལ་གྲགས་པ་ནོར་རྣམས་མང་པོར་ལྡན། །བ་སྤུ་རེ་རེ་སྐྱེས་པ་རྒྱལ་པོར་འགྱུར། །གཅིག་གཉིས་སྐྱེས་པ་ནོར་གྱི་བདག་པོར་འགྱུར། །གསུམ་བཞི་ཡན་ཆད་གང་ཡང་རྙེད་པ་མེད། །རྒྱ་མཚོས་བསྟན་པ་ལས་མཚན་བཞི་པའོ།། །།ངང་པ་ནི་ཙོའི་གདངས་ཅན་རྒྱལ་པོར་འགྱུར། །དེ་གཉིས་འགྲོས་ཀྱིས་འགྲོ་བ་མཆོད་པར་འགྱུར། །ཁྱུ་མཆོག་སེང་གེ་གླང་གི་གདངས་དང་འགྲོས། །ལོངས་སྤྱོད་མང་པོའི་བདག་པོ་བྱེད་པར་འདོད། །སྣ་ཚོགས་བྱ་དང་དུད་འགྲོའི་གདངས་དང་འགྲོས། །ད་དང་དེ་ཡི་ལོངས་སྤྱོད་ཐོབ་
པར་བཤད། །ཆུ་ནང་སེམས་ཅན་བཞིན་དུ་དབུགས་ཀྱིབ་པ། །གནས་པ་མི་ཡི་འཇིགས་དང་སྡུག་བསྔལ་འཐོབ། །ཁྱི་དང་ཕག་དང་མ་ཧེ་ལྟ་བུའི་དབུགས། །འགྲོས་ཅན་དེ་འདྲ་སྡུག་བསྔལ་དོན་མི་ཐོབ། །རྒྱ་མཚོས་བསྟན་པ་ལས་མཚན་ལྔ་པའོ།། །།བརླ་ཕྲའི་སྐྱེས་པ་དེ་ནི་བུ་དང་བྲལ། །བརླ་སུལ་མཛེས་པ་སྦོམ་པོ་ལོ་བརྒྱ་འཚོ། །ནན་ཏུར་སྦོམ་ན་སྡུག་བསྔལ་མང་པོ་ཐོབ། །ཤ་རྒྱས་སྙོམས་པ་མི་ཡི་དབང་ཕྱུག་ཡིན། །སྤོམ་པོ་རིང་བ་གཞན་གྱི་འཆིང་བ་ཐོབ། །སྲབ་མོ་ཕུག་དང་འདྲ་བ་སྡུག་བསྔལ་འཛིན། །ཤ་སྐམས་བརླ་ནི་སྲབ་ཅིང་རྒྱུས་འདྲུལ་བྱེད། །སྦོམ་ཕྲ་མེད་པར་མཛེས་ཤིང་སྙོམས་པ་ནི། །ཡོན་ཏན་མང་པོ་འཛིན་པར་བྱེད་པ་ཡིན། །བརླ་སྒང་ལེབ་པ་བུད་མེད་རྙེད་པ་ཐོབ། །བརླ་སྟོད་ཕྲ་བ་བརླ་སྨད་སྦོམ་པ་ནི། །རྟག་ཏུ་རྒྱུ་འགྲུལ་བྱེད་པར་འགྱུར་བ་ཡིན། །རྒྱ་མཚོས་བསྟན་པ་ལས་མཚན་དྲུག་པའོ།། །།སོར་མོའི་རི་མོ་གཡས་སུ་འཁྱིལ་བ་ནི། །བུ་ཐོབ་གཡོན་པར་འཁྱིལ་བ་བུ་མོ་འབྱུང༌། །སོར་མོ་མི་སྙོམས་སྦོམ་ཕྲ་རྩ་དང་བཅས། །དེ་འདྲ་གང་ལ་ཡོད་པ་སྡུག་བསྔལ་འཐོབ། །སྙོམས་པ་རིང་བ་རྩ་མེད་ཤ་དང་བཅས། །གང་ལ་ཡོད་པ་དེ་ནི་བདེ་བར་འཚོ། །རྐང་པ་འཕོངས་ཚོས་མཉམ་པོར་འདུག་པ་ལ། །རྟགས་ཀྱིས་ས་ལ་རེག་པ་སྡུག་བསྔལ་འགྱུར། །དབང་པོས་ཚིགས་ལ་སླེབས་པས་དབང་ཕྱུག་འཐོབ། །སེང་གེ་སྟག་གི་དབང་པོ་འདྲ་བ་ཡིས། །ལོངས་སྤྱོད་དབང་པོའི་བདག་པོ་བྱེད་པར་འགྱུར། །རྟ་ཡི་དབང་པོ་ལྟ་བུའང་དེ་བཞིན་མོ། །དབང་པོའི་ནང་དུ་པདྨའི་རི་མོ་འདྲ། །གང་ལ་ཡོད་པ་དེ་ནི་རྒྱལ་པོར་འགྱུར། །གསེར་དངུལ་མུ་ཏིག་རྡོ་ཡི་སྙིང་པོ་དང༌། །དམར་བ་སྣུམ་པ་ནོར་བུ་རིན་ཆེན་འདྲ། །གང་ལ་ཡོད་པ་དེ་ནི་རྒྱལ་པོའི་མཚན། །ལྗང་དང་སྡོ་ནག་དངུལ་དང་བཅས་པ་དང༌། །རི་མོ་སྡེ་སྐྱ་གས་པ་གང་ཀོད་ཅན། །གང་ལ་ཡོད་པ་སྡུག་བསྔལ་མད་པོ་ཐོབ། །བརླ་ཡི་རི་མོ་ལྟ་བུ་རྒྱལ་པོར་འགྱུར། །མདོག་ངན་རྡུལ་དང་བཅས་པ་རི་མོ་ཅན། །དེ་འདྲ་གང་ལ་ཡོད་པ་རྙེད་པ་མེད། །ཡང་ན་དེ་འདྲའི་མཚན་མ་མ་ནིང་འགྱུར། །མཆོག་ཏུ་འདོད་པ་ཆེ་བ་བུ་མོ་སྐྱེ། །ཨུཏྤལ་སྔོན་པོ་པད་རྒྱས་འདྲ་བ་སྙོམས། །བཟང་པོའི་མཚན་མ་ཡིན་པར་རྒྱ་མཚོས་གསུངས། །དྲི་ཆུ་རིང་པོར་
འགྲོ་བ་བདེ་བར་འཚོ། །དྲི་ཆུ་གཉིས་གསུམ་བཞི་ལྔ་ངན་པར་བཤད། །ནན་ལྟར་མང་པོར་འགྲོ་བ་བདེ་བར་བཤད། །དྲི་ཆུ་སྒྲ་དང་བཅས་པ་བདེ་བར་འཚོ། །དྲི་ཆུ་སྒྲ་མེད་སྡུག་བསྔལ་འབྱུང་བར་བཤད། །འབབ་ཚེ་གཡས་སུ་འཁོར་བ་བཟང་པོར་བཤད། །ཕྱི་ནས་བུ་དང་ལྡན་པར་འགྱུར་བ་ཡིན། །གཡོན་དུ་འཁོར་ན་བུ་མོ་བཟང་མོ་སྐྱེ། །རལ་གྲི་སྔོན་པོ་ལྟ་བུ་སྡུག་ཅིང་གསོན། །སྐྱ་བ་སྐྱེད་མེད་སྡུག་བསྔལ་མང་པོ་འཐོབ། །རྟགས་ལ་རེག་ཚེ་ཤིང་ལྟར་གྱོང་པ་ཡིས། །རང་གི་རིགས་རྣམས་རླག་པར་བྱེད་པ་ཡིན། །སྙོམས་པ་ཟླུམ་པ་འཇམ་པ་ཆུ་བ་འཛིན། །གང་ལ་དེ་འདྲའི་རྟགས་ཅན་བདེ་བར་འཚོ། །སོར་གསུམ་སོར་ལྔ་ལྡན་པའི་དབང་པོ་ནི། །གང་ལ་ཡོད་པ་ས་ཡི་བདག་པོར་བཤད། །རྒྱ་མཚོས་བསྟན་པ་ལས་མཚན་བདུན་པའོ།། །།ལྟེ་བ་ཡངས་པ་ཟབ་པ་ནང་དུ་ཟླུམ། །དེ་འདྲ་གང་ལ་ཡོད་པ་བདེ་བར་འཚོ། །ནང་དུ་ཟླུམ་པ་མེད་ན་སྡུག་ཅིང་གསོན། །ཚང་ར་ཤ་དང་བཅས་པ་བདེ་བར་འཚོ། །ཤ་སྐམས་སྔོ་དང་བཅས་པ་སྡུག་བསྔལ་འཛིན། །ཤ་སྐམས་རྟིང་སོང་རྐུབ་ཚོས་སྤུ་དང་བྲལ། །རྟག་ཏུ་དེ་ལ་དུག་བསྔལ་མད་པོ་འབྱུང༌། །སྟག་དང་སེང་གེ་ལྟ་བུའི་འཕོངས་ཚོས་བཅས། །རྟག་ཏུ་བདེ་ཆེན་བདག་པོ་བྱེད་པར་འགྱུར། །དོམ་དང་སྤྲེའུ་ལྟ་བུ་བདེ་བ་མེད། །ཤ་སྐམས་ཁྱི་ཡི་ལྟ་བུའང་དེ་བཞིན་ནོ། །གསུས་པ་རི་དགས་ལྟ་བུ་བདེ་བའི་མཚན། །གསུས་པ་རྨ་བྱ་ལྟ་བུའང་དེ་བཞིན་ནོ། །སྟག་དང་སེང་གེ་ལྟ་བུ་རྒྱལ་པོར་འགྱུར། །གསུས་པ་ཆུང་བ་མི་ཡི་བདག་པོར་འགྱུར། །གསུས་པ་ཤིན་ཏུ་ཆེ་བ་བདེ་བའི་མཚན། །གསུས་པ་སྤེ་ག་ཟླུམ་པོ་ལྟ་བུ་ནི། །དེ་ནི་ས་ཡི་བདག་པོ་བྱེད་པར་འགྱུར། །ལྟེ་བ་ཟབ་པ་ཟླུམ་པོ་སྐྱེས་བུ་མཆོག །ཟླུམ་པོ་ཕྱི་རུ་འཐོན་ན་ངན་པར་བཤད། །ལྟེ་བ་གཡས་སུ་འཁྱིལ་བས་དོན་རྣམས་འགྲུབ། །གཡོན་དུ་འཁྱིལ་བས་དོན་རྣམས་སྟོང་བར་བྱེད། །སྤུ་གཉིས་སྙོམས་ཤིང་ཟབ་པ་བདེ་བའི་མཚན། །སྤུ་གཉིས་མི་མངོན་གསུས་པ་སྙོམས་པ་ལས། །བུད་མེད་ལོངས་སྤྱོད་ཐོབ་པ་བདེ་བའི་མཚན། །སྤུ་གཉིས་རི་བོང་ལྟ་བུའང་སྐྱེས་པའི་མཚན། །གསུས་པ་ནས་འདྲ་རྩ་ཡིས་གང་བ་ལས། །མཚན་ངན་སྡུག་བསྔལ་མང་པོ་འཐོབ་པར་བྱེད། །གསུས་
བ་ཟླ་གམ་སྦྲུལ་འདྲ་གྲོད་པ་ཆེ། །སྦྲུལ་དང་ཉ་འདྲ་རང་གི་དཀའ་ཐུབ་ཉམས། །ཁྱི་དང་ཅེ་སྤྱང་ལྟ་བུར་ལྟོགས་ཤིང་སྐོམ། །ཚེ་རིང་ལོ་བརྒྱ་འཚོ་ཡང་སྡུག་ཅིང་གསོན། །རྒྱ་མཚོས་བསྟན་པ་ལས་མཚན་བརྒྱད་པའོ།། །།ནུ་མ་མཐོ་བ་སྣུམ་ཞིང་སྙོམས་པ་ལས། །བདེ་ཞིང་བཟང་པོའི་མཚན་གྱིས་བརྒྱན་པ་ཡིན། །བྲང་ཞེང་སྙོམས་པ་ཟབ་པ་བདེ་བར་འཚོ། །ཚེ་རིང་ལོ་བརྒྱ་འཚོ་ཞིང་ལོངས་སྤོད་ཆེ། །ཤ་རྒྱས་ཆེ་ཞིང་ཟླུམ་པ་རྒྱལ་པོར་འགྱུར། །གདོང་བ་ཤ་མེད་མི་དེ་སྡུག་བསྔལ་འགྱུར། །དབང་ཕྱུག་སྟག་དང་སེང་གེ་འདྲ་བས་ཐོབ། །སྡེ་ཡི་བདག་དང་དཔོན་པོ་ཐོབ་པར་འགྱུར། །སེང་གེའི་རྒྱབ་ཅན་འདུད་ཅིང་ཀུན་གྱིས་མཆོད། །རྟ་ཡི་རྒྱབ་ཅན་སྐྱིད་སྡུག་ཕྱེད་མར་སྤྱོད། །ཤིན་ཏུ་རྒྱབ་གཞུང་རིང་བ་གཉེན་དང་བཅས། །རྟག་ཏུ་བདེ་བར་སྐྱོང་ཞིང་རང་དོན་མེད། །རྒྱ་མཚོས་བསྟན་པ་ལས་མཆན་དགུ་པའོ།། །།སྙིང་གར་སྤུ་དང་བཅས་པ་བདེ་བར་འཚོ། །སྤུ་དང་བྲལ་ཡང་བདེ་བར་འཚོ་བར་བྱེད། །སྤུ་སྙོམས་ཅུང་ཟད་སྐྱེས་པ་མཁས་པར་འགྱུར། །སྤུ་གཅིག་སྐྱེས་པ་ཕྱུག་པོར་འགྱུར་བར་བཤད། །གཉིས་དང་གསུམ་དུ་སྐྱེས་པ་ངན་པར་བཤད། །སེར་སྐྱ་སྔོ་ནག་སྤྲིན་གྱི་མདོག་ཅན་དང༌། །ལྡོང་རོས་ཟླ་བའི་ཁ་དོག་པདྨ་དང༌། །འདྲ་བ་དེ་ལ་རྒྱལ་པོའི་མཚན་མར་འདོད། །སེར་སྐྱ་ཉི་མ་འཆར་བའི་ཁ་དོག་ཅན། །ས་སྐྱོང་རྒྱལ་པོ་བྱེད་པར་འགྱུར་བ་ཡིན། །རྒྱ་མཚོས་བསྟན་པ་ལས་མཚན་བཅུ་པའོ།། །།གླང་ཆེན་ལྟ་བུར་ལུས་པེ་བྱིན་དུ་རྒྱས། །བདེ་བར་སོན་པ་བཟང་པོའི་མཚན་མ་ཅན། །ཐང་ཀར་ལངས་པ་ལག་པས་པུས་མོར་སླེབ། །ཡོན་ཏན་ཀུན་གྱིས་བརྒྱན་པའི་ལག་པ་ཡིན། །ཤིན་ཏུ་ལག་པ་ཆུང་བ་འབངས་པོར་འགྱུར། །ལག་པའི་རི་མོ་གཡོན་དུ་འཁྱིལ་བ་ནི། །ཐམས་ཅད་ཡོངས་སུ་རྫོགས་པར་རྒྱས་པ་ཡིན། །ཕ་རོལ་གྲགས་པའི་རྒྱལ་པོ་ཐོབ་པར་འགྱུར། །ལག་པའི་རི་མོ་གཡས་སུ་འཁྱིལ་བ་ནི། །རྟག་ཏུ་སྐྱེས་པ་སྡུག་བསྔལ་འགྱུར་བ་ཡིན། །ལག་པ་སྙོམས་ལ་མཐུག་པ་རོར་མོ་རིང༌། །དམར་ལ་ཟླུམ་པ་ཤ་དང་བཅས་པ་ནི། །འཇམ་པ་ནང་དུ་ཆུ་བླུགས་འཛིན་པར་བྱེད། །དེ་འདྲ་གང་ལ་ཡོད་པ་རྒྱལ་པོར་འགྱུར། །ལག་པ་ཤ་མེད་རྩ་དང་རྡུལ་གྱིས་གང༌། །སེར་སྐྱ་སེན་མོ་སེར་བ་སྡུག་བསྔལ་འཛིན། །མཛུབ་མོའི་དཀྱིལ་ལམ་
གྱེན་དུ་ལངས་པ་ཡི། །རི་མོ་གང་ལ་ཡོད་པ་བུ་གསུམ་འགྱུར། །གང་དུ་སྲང་གི་རི་མོ་ཡོད་གྱུར་པ། །ལག་པའི་རྟིང་པར་ཉའམ་རྔ་མ་འདྲ། །གང་ལ་ཡོད་པ་སྒྲུབ་པའི་འབྲས་བུ་ཐོབ། །དེ་ནི་བུ་མང་བདག་པོ་བྱེད་པར་བཤད། །མཐེ་ཆུང་སྲིན་ལག་རྩ་བའི་ཚིགས་གསུམ་གྱི། །འོག་མའི་དཀྱིལ་དུ་རི་མོ་སྙོམས་པ་གསུམ། །ནན་ཏར་གསལ་བ་ཡོད་ན་ལོ་བརྒྱ་འཚོ། །ལག་པ་གུར་འཆད་ལྟ་བུ་མདོག་ཅན་ནི། །གསེར་དང་ནོར་མང་བདག་པོ་བྱེད་པ་ཡིན། །གཞན་ཡང་རིག་པ་འཛིན་པར་བྱེད་པ་ཡིན། །ལག་པའི་དཀྱིལ་ལམ་ཡང་ན་གནས་གཞན་དུ། །ཧོམ་གཟར་ལྟ་བུ་གང་ལ་ཡོད་པ་དེ། །ཀུན་གྱིས་བཀུར་རམ་མཆོད་སྦྱིན་བདག་པོར་བཤད། །ལག་པའི་རི་མོ་མང་པོ་ཡོད་གྱུར་ན། །བྲམ་ཟེར་གྱུར་ན་རིག་བྱེད་བཞི་ལ་མཁས། །དབྱུག་པ་གདུགས་དང་ཆུ་བུམ་ལྟ་བུ་ཡི། །རི་མོ་གང་ལ་ཡོད་པ་བྲམ་ཟེའི་རིགས། །དེ་ཡི་རྐང་ལ་རྒྱལ་པོའི་མགོ་བོས་འདུད། །རྡོ་རྗེ་རྩེ་གསུམ་ཤཀྟི་འདྲ་བ་དང༌། །དགྲ་སྟའི་རི་མོ་རལ་གྲི་འདྲ་བའི་གཟུགས། །དེ་རྣམས་ཡོད་པ་དེ་ནི་རྒྱལ་པོར་འགྱུར། །དུང་དང་གདུགས་དང་ལྕགས་ཀྱུ་མཚན་ལྡན་དང༌། །གང་ལ་ཡོད་པ་མི་ཡི་རྒྱལ་པོར་འགྱུར། །རི་མོ་དོད་སྙོམས་སྣུམ་པ་འཁོར་ལོ་འདྲ། །གང་ལ་ཡོད་པ་དེ་ཡང་རྒྱལ་པོར་འགྱུར། །རི་མོ་ཆད་པ་རྡུལ་ཅན་ཉུང་དུ་གསོན། །རི་མོ་རི་དང་ཤིང་སྡོང་ལྟ་བུ་དང༌། །སོར་མོ་རིང་པོ་ཟླུམ་པོ་སྙོམས་པ་ནི། །དུད་འགྲོ་མང་པོའི་བདག་པོ་བྱེད་པར་འགྱུར། །རི་མོ་གདུགས་དང་རྒྱལ་མཚན་འཁོར་ལོ་དག །གང་ལ་ཡོད་བ་རྒྱལ་པོ་ངེས་པར་ཐོབ། །འགྲོ་འམ་འདུག་དང་ངེས་པར་བདེ་བར་སོན། །རྒྱ་མཚོས་བསྟན་པ་ལས་མཚན་བཅུ་གཅིག་པའོ།། །།ལག་པ་མཐོ་བ་ཟླུམ་པོ་ཤ་དང་བཅས། །དེ་ནི་སྡེ་ཆེན་བདག་པོ་བྱེད་པར་འགྱུར། །མགྲིན་པ་རིང་བ་རྔ་མོ་ལྟ་བུ་ནི། །ཕ་རོལ་ནོར་ལ་རློམ་སེམས་བྱེད་པར་འགྱུར། །མགྲིན་པ་སྣུམ་པ་ཀི་ར་ལྟ་བུ་དང༌། །གླང་ཆེན་ལྟ་བུ་ཡོད་ན་རྒྱལ་པོར་འགྱུར། །བཟའ་བཏུང་ལོངས་སྤྱོད་མང་པོ་འཐོབ་པར་བྱེད། །གདོང་བ་ཟླུམ་པོ་ཆོས་དང་ཚུལ་ཁྲིམས་ལྡན། །གདོང་པ་ཤ་དང་བྲལ་བ་ཞ་ཀྱོག་ཅན། །ཕ་རོལ་དོན་རྣམས་མང་པོ་སྨྲ་བར་བྱེད། །མང་པོ་སྨྲ་བ་དེ་ནི་རྐུན་མར་བཤད། །དོན་རྣམས་རྫོགས་པར་སྨྲ་བ་རྒྱལ་པོར་འགྱུར། །ར་དང་སྤྲེའུའི་སྐད་དང་གདོང་པ་ནི། །ཕ་རོལ་གྲགས་པ་ནོར་རྣམས་
མང་པོར་འགྱུར། །འགྲམ་མགོ་པདྨའི་འདབ་མ་ལྟ་བུ་ལ། །དེ་ཡི་མགྲིན་པ་ལོངས་སྤྱོད་མང་པོར་ལྡན། །ཡ་མཆུ་དམར་བ་སྲབ་པ་མི་ཡི་བདག །ཡ་མཆུ་མཐུག་པར་གྱུར་པ་རྨོངས་པར་འགྱུར། །ནན་ཏར་སྐམས་ན་སྡུག་བསྔལ་མང་པོ་ཅན། །བིམ་པའི་མཆུ་ཅན་བཟའ་བཏུང་མང་བར་བཤད། །སོ་རྣམས་ཀུ་མུ་ཏ་ལྟར་དཀར་བ་ནི། །མཆོག་ཏུ་བཟང་པོ་མི་ཡི་རྒྱལ་པོར་འགྱུར། །གླང་ཆེན་བོང་བུའི་སོ་ཅན་སྣུམ་པོ་རྣམས། །བདེ་བར་འཚོ་བ་བཟང་པོའི་མཚན་མ་ཡིན། །དོམ་དང་སྦྲེའུ་ལྟ་བུ་ལྟོགས་པར་འགྱུར། །རྡོ་བ་ལྟ་བུ་གདོལ་ཅན་འཁྱོག་པ་ནི། །སྡུག་བསྔལ་ཐོབ་པ་སོ་ཡི་མཚན་མ་ཡིན། །གཡས་པའི་སོ་གཉིས་སྦོམ་པ་དཔོན་པོར་འགྱུར། །སྟོབས་དང་ལོངས་སྤྱོད་མང་པོ་ལྡན་པ་ཡིན། །གཡོན་པའི་སོ་གཉིས་སྤོམ་པ་ཕ་མ་འཆི། །སོ་བཞི་འཁྱོག་པ་སྡུག་ཅིང་ཕ་མ་འཆི། །དཀར་པོ་རྣོ་བ་ལེགས་པས་ཡི་བདག །རིང་ཞིང་རྣོ་བ་མཁས་པའི་མཚན་མ་ཡིན། །སུམ་ཅུ་སོ་གཉིས་སོ་ཅན་རྒྱལ་པོར་འགྱུར། །ལོངས་སྤྱོད་དག་དང་ལྡན་པར་འགྱུར་པ་ཡིན། །སུམ་ཅུ་ཡོད་ན་བདེ་བར་འཆོ་བར་འགྱུར། །སུམ་ཅུ་སོ་དགུའི་སོ་ཅན་སྡུག་ཅིང་གསོན། །ཉི་ཤུ་རྩ་བཞི་པ་ནི་བདེ་བར་འཚོ། །དེས་ནི་འདོད་པའི་ལོངས་སྤྱོད་མང་པོ་རྙེད། །ཡ་སོ་མ་སོ་མཉམ་པ་ནོར་གྱི་བདག །དམར་སྨུག་དཀར་ཅན་རིགས་སྡིག་པ་བྱེད་པ་ཡིན། །མཐུག་བརྡུལ་ཅན་ལེ་ནི་མི་བཟང་སྟེ། །དཀར་པོ་ལྕེ་ཅན་སྤྱོད་པ་གཙང་བ་ཡིན། །པདྨའི་འདབ་མ་ལྟ་བུ་རིང་བ་ནི། །ཤིན་ཏུ་སྲབ་པ་མ་ཡིན་མཐུག་པ་མིན། །རྒྱལ་པོར་འགྱུར་བའི་ལྕེ་ཡི་མཚན་མ་ཡིན། །སྣུམ་དང་དམར་བ་རིག་པ་འཛིན་པར་བྱེད། །དམར་སྨུག་དཀར་ཅན་རིགས་རྣམས་ཉམས་པར་བྱེད། །དེས་ནི་ནོར་མེད་སྡུག་བསལ་མང་པོ་འཐོབ། །སེར་ནག་དམར་སྨུག་ཅན་གང་བཟང་པོ་མིན། །སེང་གེ་གླང་ཆེན་ལྟ་བུ་མི་ཡི་བདག །ངང་པ་འབྲུག་གི་གདངས་ཅན་ནོར་དང་ལྡན། །གླང་ངམ་བོང་བུའི་སྐད་ཅན་སྡུག་བསྔལ་ཆེ། །རྟ་དང་བང་བུ་བྱ་རོག་སྒྲ་ཅན་སྡུག །ཚིག་གཏམ་ཟེར་བ་སྡིག་ཅན་ཡིན་པར་བཤད། །ཉུང་དུ་སྨྲེ་ཞིང་བདེན་པ་རྒྱལ་པོར་འགྱུར། །རྒྱ་མཚོས་བསྟན་པ་ལས་མཚན་བཅུ་གཉིས་པའོ།། །།གླང་ཆེན་རྟ་ཡི་རྣ་ཅན་རྣོ་བ་ནི། །འཇིག་རྟེན་འདྲེན་པ་བྱེད་པར་འགྱུར་བ་ཡིན། །ནེ་ཚོའི་
མཆུ་ཅན་དེ་ཡང་དེ་བཞིན་ནོ། །ཤིན་ཏུ་རྣ་གོང་མཐོ་བ་ལོངས་སྤྱོད་ལྡན། །སྣ་ཆུས་པ་ཚུལ་ཁྲིམས་གཙང་མ་བསྲུང༌། །སྣ་གོང་འཁྱོག་པ་སྡིག་པ་བྱེད་པ་ཅན། །སྣ་རྩེ་སྤོམ་པ་མཐུག་པའང་སྡིག་པ་བྱེད། །སྣ་རྩེ་སྤོམ་པ་སྣ་གོང་ལེབ་པ་ནི། །དེ་ཡང་སྡུག་བསྔལ་མང་པོ་འཛིན་པར་བྱེད། །རྒྱ་མཚོས་བསྟན་པ་ལས་མཚན་བཅུ་གསུམ་པའོ།། །།མེ་ཏོག་དམར་པོ་ལྟ་བུའི་མིག་ཅན་ནི། །ལོངས་སྤྱོད་བདག་པོ་སྡེ་ཡི་འདྲེན་པ་བྱེད། །གྲུ་གསུམ་མིག་ཅན་འཇིགས་པ་ཟླུམ་པ་དང༌། །ཁྱིལ་ངང་པ་ལྟ་བུའང་དཔོན་པོར་འགྱུར། །ཁྲག་ལྟར་དམར་བ་ནད་དང་བཅས་ཤིང་སྡུག་མཆོག་ཏུ་མིག་འབོར་མཐོ་བ་སྡུག་པར་བཤད། །མ་ཧེ་ལུག་དང་ར་འདྲ་འཁྲུག་པ་རེམ། །གཡོ་བ་མིག་ཅན་ཀུན་དུ་ལྟ་བ་ནི། །ཕ་རོལ་བུད་མེད་ལ་ནི་བསམ་པ་ཅན། །མིག་གཉིས་ནང་དུ་སོང་བ་རིང་པོར་གསོན། །ཟླུམ་པའི་མིག་ཅན་ཉུང་དུ་གསོན་པར་བཤད། །རི་དགས་རྨ་བྱ་ཅེ་སྤྱང་བ་ལང་དང༌། །གླང་ཆེན་ལྟ་བུས་ལོངས་སྤྱོད་ཐོབ་པར་བྱེད། །མཆོག་ཏུ་ཆུད་པ་སྐེམ་པོ་ཡོ་བ་ནི། །ཆུ་ཡིས་གང་པ་ཟག་པ་མཆི་མ་ཅན། །ནོར་མེད་སྡུག་བསྔལ་ཅན་གྱི་མིག་ཏུ་བཤད། །རྒྱལ་མོ་ཤིན་ཏུ་གནག་པ་བདེ་བར་འཚོ། །རྒྱལ་མོ་དཀར་བ་འཆི་བ་འཐོབ་པར་བྱེད། །རྒྱལ་མོ་དམར་པ་ནོར་གྱི་བདག་པོར་བཤད། །མིག་ཀོང་ལེགས་པ་དབང་ཕྱུག་ཐོབ་པར་བྱེད། །མིག་རྩ་དམར་བ་ལོངས་སྤྱོད་ཐོབ་པར་བྱེད། །དམར་དང་དཀར་བའི་རི་མོ་དོད་པ་ལ། །དེ་ནི་མཁས་ཤིང་བློ་གྲོས་བཟང་པོ་ཅན། །མིག་ནས་མཆི་མ་འཛག་པས་འཁོན་ཞིང་སྡུག །འགྲོ་ཚོ་ལམ་ལ་ལྟ་བ་མཁས་པའི་མཚན། །ཀུན་དུ་ལྟ་བ་བ་ལང་ལྟ་བུ་ངན། །རྒྱ་མཚོས་བསྟན་པ་ལས་མཚན་བཅུ་བཞི་པའོ།། །།པདྨ་སྐྲ་ཅན་དམར་བ་ལེགས་པ་དང༌། །མེ་ལྟར་འོད་ཟེར་འབར་བ་མདངས་དང་བཅས། །དེ་འདྲའི་མདངས་ཅན་འཁོར་ལོས་སྒྱུར་བར་བཤད། །གསེར་གྱི་མདོག་ཅན་དབང་ཕྱུག་ཐོབ་པར་བྱེད། །ཕུག་རོན་ཨ་རོག་ར་དང་ཁུ་བྱུག་དང༌། །དབང་ཕྱུག་ལོངས་སྤྱོད་མང་པོ་འཐོབ་པར་བྱེད། །བྱི་ལ་འུག་པའི་མདོངས་ཅན་དཔལ་ཐོབ་ཅིང༌། །ཉི་མ་གླང་གི་གཟུགས་ཅན་རྒྱལ་པོར་བཤད། །ཀ་ལ་པིང་ཀའི་སེར་སྐྱའི་མིག་ཅན་ནི། །འཁོར་ལོས་སྒྱུར་བའི་རྒྱལ་པོ་བྱེད་པར་འགྱུར། །རིན་ཆེན་མུ་ཏིག་མིག་ཅན་མཁས་པར་འགྱུར། །མིག་གཉིས་འབྱེད་འཛུམས་མང་བ་ཉུང་དུ་གསོན། །འབྱེད་འཛུམས་ཉུང་བ་རིང་དུ་གསོན་པར་བྱེད། །བསྟུན་ནས་འབྱེད་འཛུམས་མང་བ་ནད་མང་ཞིང༌། །ལན་གཉིས་འཛུམས་པ་གཡོན་དུ་འགྱུར། །
བ་ཡིན། །གསུམ་དུ་འཛུམས་པ་བདེ་བར་བྱེད་པ་ཡིན། །ལན་བཞི་འཛུམས་པ་ལྟོགས་པར་གནས་པ་ཡིན། །དེ་ནི་ཚེ་ཐུང་སྡུག་ཅིང་བཀྲེན་པར་བཤད། །དཔྲལ་བ་སྐམས་པ་རྡུལ་དང་བཅས་པས་སྡུག །གཉེར་མ་ལྔ་པོ་ལོ་བརྒྱ་འཚོ་བར་བཤད། །གཉེར་མ་བཞི་པ་དགུ་བཅུར་གསོན་པར་བཤད། །གཉེར་མ་གཉིས་པ་དགུ་བཅུ་གསོན་པར་བཤད། །གཉེར་མ་མེད་པའི་མི་རྣམས་ཚེ་ཐུང་ཞིང༌། །གཉེར་མ་ཐུང་དུ་གཅིག་པ་ནད་མང་ཞིང༌། །གཉེར་མ་ཉི་ཤུ་རྩ་ལྔ་སྡུག་བསྔལ་མང༌། །དཔྲལ་བར་རྩ་གསུམ་པ་ཡོད་པ་དབང་ཕྱུག་ཐོབ། །གཉེན་འདུན་མང་པོའི་འཁོར་དང་ལྡན་པར་འགྱུར། །མེ་ཏོག་པདྨ་ལྟ་བུའི་དཔྲལ་བ་ཅན། །ཆོས་དང་ཚུལ་ཁྲིམས་འཛིན་པར་བྱེད་པ་ཡིན། །རྡོ་རྗེ་རྒྱལ་མཚན་འཁོར་ལོ་ཟླ་བ་དང༌། །དེ་འདྲ་གང་ཡོད་ས་ཡི་བདག་པོར་བཤད། །གྱེན་དུ་རི་མོ་གཅིག་པ་འབངས་ཀྱི་བདག །ཟླ་ཕྱེད་འདྲ་བས་དབང་ཕྱུག་ཐོབ་པར་བྱེད། །གྱེན་ཐུར་འཕྲེད་ལ་རི་མོ་མང་པོ་ཅན། །སྡུག་བསྔལ་འཛིན་པའི་སྐྱེས་བུའི་མཚན་མ་ཡིན། །རི་མོ་རིང་པོ་སློབ་དཔོན་བྱེད་པར་འགྱུར། །མགོ་བོ་གདུགས་འདྲ་མི་ཡི་བདག་པོར་འགྱུར། །དཔྲལ་བ་ཏོག་པོར་མཐོན་ནས་རྣོ་བ་ལ། །ལྟོགས་ཤིང་རྟག་ཏུ་ནོར་མེད་དབུལ་པོར་འགྱུར། །མགོ་བོ་གླང་ཆེན་ལྟ་བུ་རྒྱལ་པོ་འདྲ། །དབང་ཕྱུག་དུ་མའི་བདག་པོ་བྱེད་པར་འགྱུར། །མགོ་བོ་གྲུམ་པ་ལྟ་བུ་སྐྱེས་པ་དང༌། །རྡུལ་དང་སྐྲ་དང་ལྡན་པའང་དེ་བཞིན་དེ་བཞིན་ནོ། །རྡུལ་ཅན་ཆེན་པོ་མཐུག་པོར་སྐྱེས་པས་སྡུག །སྲབ་མཐུག་སྙོམས་པ་སྐྱེས་པ་བདེ་བར་འཚོ། །ལེགས་པ་རྩ་སྙོམས་པ་རིང་ཐུང་མེད། །དེ་འདྲ་མི་ཡི་དབང་ཕྱུག་ཐོབ་པར་བྱེད། །རྒྱ་མཚོས་བསྟན་པ་ལས་མཚན་བཅོ་ལྔ་སྐྱེས་པའི་མཚན་བསྟན་པ་རྫོགས་སོ།། །།བུད་མེད་མཚན་རྣམས་བསྟན་གྱིས་མཉན་པར་གྱིས། །པདྨ་ལྟ་བུར་དམར་བ་སྣུམ་པོ་དང༌། །རྐང་པ་ཆུང་བའི་བུད་མེད་པ་དེ་བར་འཚོ། །འཁོར་ལོ་གདུགས་དང་པདྨ་རྒྱལ་མཚན་དང༌། །རལ་གྲི་འདྲ་བའི་རི་མོ་གང་ཡོད་པ། །རྒྱལ་པོའི་བཙུན་མོར་འགྱུར་བར་རྒྱ་མཚོས་བཤད། །རྐང་པའི་སོར་མོའི་འོག་ཏུ་གྱེན་ཐུར་ལ། །རི་མོ་ཡོད་ན་དཔོན་པོའི་ཆུང་མར་འགྱུར། །རྐང་པ་སྲབ་མོ་ཆེན་གཡོག་ཏུ་འགྱུར། །རྐང་པ་སྐམས་པ་ལྟོགས་པར་འགྱུར་བ་ཡིན། །འགྲོ་ན་བྱ་ཕྲན་ལྟ་བུའང་དེ་བཞིན་དུ། །དེ་ལའང་གི་རིགས་དང་ཚུལ་
ཁྲིམས་མེད། །མཐེ་ཆུང་ས་ལ་མི་འབྱར་ཁྱོ་པོ་འཆི། །གུང་མོས་ལ་མི་འབྱར་བུད་མེད་ནི། །སྐྱེས་པ་ལྟ་བུའི་སྤྱོད་པ་བྱེད་པར་འགྱུར། །མཛུབ་མོ་ཟླུམ་པས་ལ་མི་རིག་པ། །ཁྱོ་བོ་སྤངས་ཤིང་སྐྱེས་པ་གཞན་དང་སྤྱོད། །སོར་མོ་སོ་སོར་གྱེས་པ་སྡུག་ཅིང་གསོན། །དེ་ནི་གཞན་གྱི་གཡོག་མོ་བྱེད་པར་འགྱུར། །སོར་མོ་སྦོམ་པོ་བདེ་བ་མེད་པར་བྱེད། །སོར་མོ་སྐམས་པ་རྩ་དང་བཅས་པ་ནི། །སྡུག་བསྔལ་འཛིན་པར་བྱེད་པའི་བུད་མེད་ཡིན། །རིང་བ་སྙོམས་པ་གཙང་བ་བདེ་བར་འགྱུར། །སོར་མོ་སྙོམས་པ་བར་མེད་ཤ་དངས་པ། །རྟག་ཏུ་བདེ་བར་འགྱུར་བའི་བུད་མེད་ཡིན། །རང་གི་ཁྱོ་བོ་ས་ཆོག་པར་འཛིན་པར་བྱེད། །སོར་མོ་མཐོ་བ་ཟླུམ་པ་པདྨའི་མདངས། །དེ་ལ་བུ་དང་ནོར་རྣམས་བརྟན་པར་འགྱུར། །སོར་མོ་ཆུང་བ་ས་རེག་པར་བྱེད། །སྐམས་ལ་རྡུལ་དང་བཅས་པའི་བུད་མེད་དེ། །རྟག་ཏུ་སྡུག་བསྔལ་འབའ་ཞིག་སྤྱོད་པར་བྱེད། །མཐེ་བ་ཆེན་གས་པ་མོ་ངན་པ་ཅན། །དེ་ཡི་སྤུན་ཟླ་ཉམས་པར་འགྱུར་བ་ཡིན། །རྒྱ་མཚོས་བསྟན་པ་ལས་བུད་མེད་ཀྱི་མཚན་བསྟན་པ་གཅིག་པའོ།། །།རྐང་པའི་མཐིལ་གྱི་ཤ་རྒྱུད་མཛེས་ཤིང་གོང༌། །དེ་ནི་སྨད་འཚོང་བྱེད་པར་འགྱུར་བ་ཡིན། །ཤིན་ཏུ་སྦོམས་ན་སྡུག་བསྔལ་འབའ་ཞིག་འཐོབ། །ས་ལ་རེག་ཅིང་སྙོམས་པ་བདེ་བར་འཚོ། །བོལ་ཚིགས་མ་ཧེ་ལྟ་བུ་འཆི་བར་འགྱུར། །བོལ་ཚིགས་སྙོམས་པའི་བུད་མེད་བདེ་བར་འཚོ། །བརླ་ཡི་ཤ་རྒྱས་སྙོམས་པ་སྣུམ་པ་དང༌། །རྩ་མེད་སྤུ་དང་བྲལ་བའི་བུད་མེད་དེ། །འགྲོ་བ་འདུག་པ་ཀུན་དུ་བདེ་བར་འཚོ། །བརླ་གྱེན་ཐུར་རི་མོ་གཉིས་ཡོད་ན། །སྨད་འཚོང་བྱེད་དེ་ཚུལ་ཁྲིམས་གཉིས་པ་ཡིན། །རི་མོ་ཆུང་ན་ཁྱོ་བོ་འཆི་བར་འགྱུར། །གྱེན་དུ་རི་མོ་གཅིག་པ་བདེ་བར་འཚོ། །རྒྱ་མཚོས་བསྟན་པ་ལས་མཚན་གཉིས་པའོ།། །།བརླ་འོག་རི་མོ་འཕྲེད་ལ་ཡོད་པ་ནི། །ཕྱི་རོལ་སྐྱེས་པ་གཞན་རྣམས་འཚོ་བར་བྱེད། །བརླ་སྟོང་ཤིན་ཏུ་ཤ་རྒྱས་བདེ་བའི་མཚན། །ནང་ནས་ཕྱི་རོལ་ཤིན་ཏུ་གནག་པའི་སྤུ། །ཉུང་དུ་སྙོམས་པར་སྐྱེས་པའི་བུད་མེད་ནི། །མི་ཡི་བདག་པོའི་བཙུན་མོ་བྱེད་
པར་འགྱུར། །མཚན་མ་རུས་སྦལ་རྒྱབ་ཅན་སྣུམ་ཞིང་རྒྱས། །བ་སྤུ་ལྟ་བུའི་སྤུ་དང་བཅས་པ་ནི། །ནོར་དང་དོན་འདོད་བུ་དང་ལྡན་ཞིང་བདེ། །དེ་ནི་ཁྱོ་བ་བསྙེན་བཀུར་བྱེད་པར་འགྱུར། །ཤ་སྐམས་ཆེན་མོ་རྩ་ཡིས་གང་བ་ནི། །ལྟོགས་ཤིང་སྡུག་བསྔལ་ཆེན་པོ་སྐྱེ་བར་འགྱུར། །གཡས་ཀྱི་ཤ་རྒྱས་བུ་དང་ལྡན་པ་ཡིན། །གཡོན་པ་མཐོ་ན་བུ་མོ་སྐྱེ་བར་འགྱུར། །དམར་སེར་སྤུ་ཅན་ལྟོགས་པར་འགྱུར་བ་ཡིན། །སྤུ་ནང་སྐྱེས་པ་བདེ་བ་འཚོ་བར་བྱེད། །བ་སྤུ་ལྟ་བུ་མང་བོ་རྒྱས་པའི་སྤུ། །གནག་པ་མ་ཡིན་ཉུང་བ་མ་ཡིན་པས། །ཤིན་ཏུ་བདེ་བ་མང་པོས་གང་བར་འགྱུར། །ཤིན་ཏུ་དཀྱིལ་འཁོར་གང་བ་མཐའ་མ་ལ། །སྙོམས་ཤིང་མཛེས་པར་གྱུར་བའི་སྤུ་དང་ལྡན། །རུས་སྦལ་རྒྱབ་བམ་གླང་ཆེན་སྤྱི་བོ་ལྟར། །འགྲམ་གྱི་ཤ་རྒྱས་ཁྱོ་དང་བཅས་པ་བདེ། །མཚན་མ་སྐམས་པ་ཀོང་པ་ངན་པའི་མཆན། །གང་ལ་ཡོད་པ་ལྟོགས་དང་སྡུག་བསྔལ་འབྱུང༌། །འགྲོ་ཚེ་ཚང་ར་འགུལ་ཞིང་ཕྱི་ནས་སྙོགས། །ཚུལ་ཁྲིམས་གཉིས་པ་བྱེད་པའི་འོས་སུ་འགྱུར། །མི་འགྱུར་བརྟན་པ་བདེ་བ་ཐོབ་པར་བྱེད། །ཚང་ར་སྤོམ་པ་གྲུ་བཞི་གཅང་བ་ནི། །བ་སྤུ་ཅུང་ཟད་ཡོད་པ་བདེ་བར་འགྱུར། །རྒྱ་མཚོས་བསྟན་པ་ལས་མཚན་གསུམ་པའོ།། །།ལྟེ་བ་ཟབ་པ་སྐྱེས་པས་ཕོངས་པ་མེད། །པདྨ་གེ་སར་ལྟ་བུའི་ལྟེ་བ་ཅན། །བདེ་བར་འཚོ་ཞིང་བཟང་པོའི་མཚན་དུ་བཤད། །ལྟེ་བ་མཐོ་བ་རྒྱས་བ་རྡུལ་དང་སྤུ། །མེད་པ་སྡུག་བསྔལ་མང་པོ་འཛིན་པར་འགྱུར། །ཤ་སྐམས་རིང་པོ་རྡུལ་དང་སྤུ་ཡིས་གང༌། །ལེགས་པ་མེད་པ་གང་ཞིག་འཇིགས་པར་སྐྱེས། །གླང་ཆེན་འགྲོས་དང་བ་ལང་ངང་པ་དང༌། །རྨ་བྱ་ནེ་ཅོའི་འགྲོས་ཅན་བཟང་པོའི་མཚན། །འགྲོ་ཞིང་སྨྲ་དང་ཅེ་སྤྱང་སྐད་ཅན་ནི། །བདེ་སྤོང་སྡུག་བསྔལ་ཆེན་པོ་འཛིན་པར་བྱེད། །རྐུབ་ཆོས་རྩ་ཡིས་གང་དང་མདུད་པ་ཅན། །བུད་མེད་ཁྱོ་དང་བྲལ་བར་ཆགས་པ་ཡིན། །ཚུལ་ཁྲིམས་གཉིས་པ་དེ་ནི་སྨད་འཚོང་འགྱུར། །གསུས་པ་ཆུང་ན་བུད་མེད་སྨད་འཚོང་འགྱུར། །གསུས་པ་ཤ་ཡིས་གང་བ་རྩ་དང་བྲལ། །རྟག་ཏུ་ལྟོགས་ཤིང་ནོར་མེད་སྡུག་བསྔལ་འགྱུར། །གསུས་པ་གཙང་
ཞིང་སྣུམ་པ་ལེགས་པ་སྟེ། །ནུ་མ་གཡས་པ་རྒྱས་པ་བུ་དང་བཅས། །གཡོན་པ་མཐོན་བུ་མོ་འབྱུང་བར་འགྱུར། །འཁྱོག་ཅིང་ཡོ་བ་བུ་དང་བྲལ་བར་འགྱུར། །སྐམས་དང་རྩ་བ་ཡོ་བར་འགྱུར་བ་ལ། །རྩེ་མོ་སྐམས་པ་སྡུག་པའི་མཚན་མ་སྟེ། །དེ་ཡི་ཁྱོ་འཆི་བུ་དང་བྲལ་བ་ཡིན། །ནུ་མ་རྒྱས་པ་ཤ་ཡིས་གང་བ་ཡི། །རབ་ཏུ་དལ་རྒྱས་པ་ནི་མདངས་དང་ལྡན། །དེ་ལ་བུ་དང་ནོར་དང་བུ་མོ་འབྱུང༌། །རྒྱ་མཚོས་བསྟན་པ་ལས་མཚན་བཞི་པའོ།། །།སྐེད་པ་སྒུར་བ་གཞུ་འདྲ་གཡོག་མོར་འགྱུར། །རྐེད་པ་གྱོད་པོ་ཁྱོ་པོ་འཆི་བར་འགྱུར། །ཤ་སྐམས་རྩ་ཡིས་གང་བ་སྡུག་པར་འགྱུར། །རྐེད་པ་སྤུ་ཅན་ཤུ་བ་འདྲ་བས་གང༌། །དེ་ལ་སྡུག་བསྔལ་ཆེན་པོ་ཐོབ་པར་འགྱུར། །བྱ་བྲང་བྱུང་བ་སྡུག་བའི་མཚན་མ་ཡིན། །བྲང་ཞེང་སྙོམས་པ་སྤུ་ཡིས་གང་བ་དང༌། །ཤ་ཡིས་རྒྱས་པ་ཁྱོ་བོ་བཟང་པོ་ཐོབ། །བྲང་ཞེང་སྲབ་པ་ཁྱོ་བོ་འཆི་བར་བཤད། །བསྐམས་པའི་བྲང་ཀྱང་དེ་བཞིན་ཁྱོ་བོ་འཆི། །རྒྱ་མཚོས་བསྟན་པ་ལས་མཚན་ལྔ་པའོ།། །།ལག་པ་སྤུ་མེད་ཆུ་འཛིན་ཟངས་ཀྱི་མདོག །སྣུམ་པ་བདེ་ཞིང་ཤ་རྒྱས་ནོར་དང་ལྡན། །ལག་པ་གཡས་པའི་སེན་མོ་གས་པ་དང༌། །ཤིན་ཏུ་སྲབ་པ་སྤུ་ཡིས་གང་བ་ནི། །རྡུལ་ཅན་རྩ་དང་བཅས་པ་ངན་པ་ཡིན། །པདྨ་འདབ་མ་ལྟ་བུ་སྙོམས་ཤིང་དག །གཤིབས་ནས་བསླང་ན་བར་དུ་མཐོང་བ་མེད། །དེ་འདྲའི་བུད་མེད་བདེ་བར་འགྱུར་བའི་མཚན། །ལྟེ་བའི་དཀྱིལ་དུ་འཁོར་གོས་ཀྱིས་གཡོགས་ཤིང་གནས། །ནོར་བུ་དང་ནི་ལྡན་པར་འགྱུར་བ་ཡིན། །ལག་པ་སྲབ་མོ་རྣ་བ་ཆེན་མོ་ཅན། །ཚེ་ཐུང་མྱུར་དུ་འཆི་བར་འགྱུར་བ་ཡིན། །མཛུབ་མོ་ཆེན་མོ་འམ་རྣ་བ་ཆེན་པོ་ཅན། །སྲིན་མོའི་རིགས་ཏེ་བདག་པོ་ཟ་བར་བྱེད། །ལག་པའི་རི་མོ་རྒྱང་ནས་གསལ་པོར་མཐོང༌། །སྣུམ་པ་མ་ཐོབ་དེ་ནི་བདེ་བར་འཚོ། །ལག་པ་ཆུང་བ་སྣུམ་པ་དེ་འདྲ་བ། །བདེ་ཞིང་གསོན་པར་འགྱུར་བའི་མཚན་མ་ཡིན། །ལག་པ་མཐུག་པ་རི་མོ་རྡུལ་དང་བཅས། །དམར་བ་སྣུམ་པ་རིང་བ་མཆོག་ཏུ་བཟང༌། །དེ་འདྲའི་ལག་པ་གང་ལ་ཡོད་གྱུར་ན། །རིགས་ངན་ཡིན་ཡང་རྒྱལ་པོའི་བཙུན་མོར་འགྱུར། །
ཤ་ཡིས་གང་ལ་བཀྲ་ཤིས་མཚན་མ་ཅན། །དཔོན་པོའི་ཆུང་མ་ནོར་གྱི་དབང་ཕྱུག་འགྱུར། །སྤུ་མེད་དཀར་པོར་གནས་པ་ཟངས་ཀྱི་མདོག །སྣུམ་པ་དེ་ཡང་བདེ་བར་འཚོ་བའི་མཚན། །སེན་མོ་གས་པ་རྡུལ་ཅན་བུ་གས་གང༌། །སྤུ་དང་བཅས་པ་དེ་ནི་སྡུག་པར་འགྱུར། །ལག་པ་བཀྲ་ཤིས་རྟགས་ཅན་སྣུམ་པ་ནི། །བུ་དང་ནོར་རྣམས་ཐོབ་པར་བྱེད་པ་ཡིན། །ལག་པ་དམར་པོ་སྣུམ་པ་གཙང་བ་ནི། །ཡོད་པ་དེ་ནི་རྒྱལ་པོའི་བཙུན་མོར་འགྱུར། །མེ་ཏོག་གདུགས་དང་བུམ་པ་བཀྲ་ཤིས་མཚན། །རྔ་མ་རལ་གྲི་ཡོད་པ་དོན་གསུམ་འགྲུབ། །གཙང་མ་པདྨོ་རྒྱལ་མཚན་ཡོད་གྱུར་ན། །དེ་ལ་སྐྱེས་པ་རྒྱལ་པོ་འདྲ་བར་འགྱུར། །རྒྱ་མཚོས་བསྟན་པ་ལས་མཚན་དྲུག་པའོ།། །།ཧ་ཅང་ལག་ཆུང་ཉོན་མོངས་སྐྱེ་བར་འགྱུར། །ནན་ཏུར་ཆེ་བ་བདག་པོ་འཆི་བར་འགྱུར། །སྤུ་ཡིས་གང་བའང༌། །དེ་བཞིན་འགྱུར་བ་ཡིན། །རིང་བ་སྙོམས་པ་བདེ་བ་འཐོབ་པར་བྱེད། །མཆོག་ཏུ་མགྲིན་པ་སྤོམ་པའང་དེ་བཞིན་ནོ། །གང་ཞིག་མདུན་དུ་སྒུ་བ་སྡུག་པ་ཡིན། །གཡོན་ན་ཤ་མཚན་ནག་པོ་ཡོད་པ་ན། །དེ་ཡི་ཁྱོ་པོ་འཆི་བར་འགྱུར་བ་ཡིན། །ཤ་མཚན་དཀར་པོ་གཙང་བ་ཡོད་པ་ནི། །དཔོན་པོའི་ཆུང་མ་ཁྱེད་པར་འགྱུར་བ་ཡིན། །མགྲིན་པ་ཤ་སྐམས་རྩ་ཡིས་གང་བ་ནི། །སྡུག་བསྔལ་མང་པོ་སྐྱེ་བར་འགྱུར་བ་ཡིན། །རྒྱ་མཚོས་བསྟན་པ་ལས་མཚན་བདུན་པའོ།། །།མཆུ་ལ་སེར་ཀ་མང་པོ་ཤུ་བ་ཅན། །མཆོག་ཏུ་མཐུག་པ་སྨད་འཚོང་བྱེད་པར་འགྱུར། །སྐམས་པའི་མཆུ་ཅན་ཁྱོ་བོ་འཆི་བར་འགྱུར། །རྩ་བའི་མཐའ་ཅན་སྣུམ་པ་སྙོམས་པ་ནི། །བུ་དང་བྲལ་བ་དམར་བ་ནོར་དང་བུ། །རྒྱས་ཤིང་རྟག་ཏུ་བདེ་བ་ཐོབ་པར་འགྱུར། །མཆུ་སྒྲོས་ཐད་ཀར་གྱེན་དུ་རི་མོ་ཅན། །ཤིན་ཏུ་བདེ་ཞིང་སྐྱིད་པའི་མཚན་མ་ཡིན། །ནག་པོའི་མཆུ་ཅན་ཀུན་དང་འཁོན་པར་བྱེད། །སྐམས་པ་རྡུལ་ཅན་མཐུག་པ་སྡུག་པའི་མཚན། །སྙོམས་པ་དཀར་པོ་སྣུམ་པ་བདེ་བར་བྱེད། །མ་སོ་འཁྱོག་པ་བུ་མོ་འཆི་བར་བྱེད། །ཡ་སོ་འཁྱོག་པ་བུ་རྣམས་འཆི་བར་འགྱུར། །བརྫུན་ཅན་སྨད་འཚོང་བྱེད་པའི་རིགས་སུ་འགྱུར། །སོ་ལ་རེག་ན་ལྡེག་པར་ལྟོགས་པ་དང༌། །བཅུ་དྲུག་ལོན་ནས་སྐྱེས་པ་འཚོ་བར་འགྱུར། །
རྒྱ་མཚོས་བསྟན་པ་ལས་མཚན་བརྒྱད་པའོ།། །།ལྕེ་མདོག་དམར་པོ་ནོར་དང་ལྡན་པར་འགྱུར། །སྲབ་མཐུག་སྙོམས་པའི་ལྕེ་ཡང་དེ་བཞིན་ནོ། །མཆོག་ཏུ་སྲབ་བ་དཀར་བ་ནད་དང་བཅས། །ཤིན་ཏུ་མཐུག་པའི་ལྕེ་ཡང་དེ་བཞིན་ནོ། །དེ་ནི་ཀུན་དང་འཁོན་པར་བྱེད་པ་ཡིན། །རིང་བར་སླེབ་ཙང་དམར་བ་སྣུམ་པ་ནི། །དེ་ཡིས་བདེ་བ་ཆེན་པོ་ཐོབ་པ་ཡིན། །རྐན་གྱི་ཁ་དོག་དཀར་བ་ལྟོགས་པ་ཡིན། །རྡུལ་ཅན་རྐན་ནི་ཆོས་ལ་རྟོན་པར་འགྱུར། །སེར་མོ་མཆོག་ཏུ་སྡུག་བསྔལ་ཆེན་པོ་འཐོབ། །པདྨའི་འདབ་ཅན་བདེ་བ་ཐོབ་ཅིང་མཆོད། །ཆུ་བྱའི་སྐད་ཅན་ངང་པ_ _ཁུ་བྱུག་གི །གདངས་ཅན་རྒྱལ་པོའི་བཙུན་མོ་བྱེད་པར་འགྱུར། །འགྲམ་འོག་སྣུམ་པ་ཤ་རྒྱས་བདེ་བར་འགྱུར། །སྐམས་པ་རྡུལ་ཅན་ཤུ་བ་མང་བ་དང༌། །རྩ་ཡིས་གང་བ་སྡུག་བསྔལ་མང་པོ་ཐོབ། །དེ་ལ་བུ་དང་འབྲལ་བ་རྒྱ་མཚོས་བཤད། །སྣ་གོང་རིང་བ་ཁྲོ་བར་འགྱུར་བ་ཡིན། །ནན་ཏུར་ཆུང་ན་གཡོག་པོར་འཁོལ་བར་འགྱུར། །སྣ་གོང་སྲབ་པ་ཁྱོ་བོ་འཆི་བར་འགྱུར། །རིང་པོའི་རྡུལ་དང་ཚུལ་ཁྲིམས་གཉིས་པ་ཡིན། །ཆེ་ཆུང་སྙོམས་པ་བུད་མེད་བདེ་བ་ཆེ། །སྣ་གོང་མཐོ་བ་བདེ་བ་ཆེན་པོར་བཤད། །རྒྱ་མཚོས་བསྟན་པ་ལས་མཚན་དགུ་པའོ།། །།དམར་སེར་མིག་ལ་རྩ་དང་ལྡན་པ་ནི། །བུ་དང་བདེ་བ་མང་པོ་འཐོབ་པར་བྱེད། །གཡོན་པ་མཐོ་བ་དེ་བ་མེད་པར་འགྱུར། །གཡས་པ་མཐོན་བུད་མེད་དོན་དང་བྲལ། །སྤྲུལ་དང་བྱི་ལའི་མིག་ཅན་དགེ་བ་མེད། །དམར་སེར་མིག་ཅན་གྱོས་པའམ་བུ་དང་ནི། །ཕ་ལ་སོགས་པ་རྣམས་ལ་སྦྱོར་བར་བྱེད། །པདྨའི་འདབ་མ་ལྟ་བུ་སྙོམས་ཤིང་སྡུག །སྣུམ་པ་རིང་ཞིང་ཞིབ་པའི་མདངས་ཅན་དང༌། །རྨ་བྱ་ངང་པ་རི་དགས་ལྟ་བུ་ཡང༌། །བུད་མེད་དམ་མཆོག་ཏུ་གྱུར་པའི་མཚན་མ་ཡིན། །མིག་གི་རྫི་མ་མང་བ་སྣུམ་ཞིང་གཙང༌། །ནོར་ཅན་ནོར་གྱི་བདག་པོ་བྱེད་པར་འགྱུར། །སྨིན་མ་མཐོ་ནག་རིང་ཞིང་སྙོམས་ལ་གཅང༌། རྣ་བ་ཆེན་མོ་ཤ་ཅན་ཞུམ་ཞིང་གཙང༌། །སྒྲ་མང་ཆུང་བ་གནས་ནི་བདེ་བའི་མཚན། །དཔྲལ་བར་རི་མོ་གསུམ་པ་རྩ་དང་སྤུ། །སྙོམས་པ་དྲུག་པ་ཚེ་རིང་བདེ་བའི་མཚན། །ཆེ་ཆུང་སྙོམས་པ་རིང་ཐུང་མེད་པ་ནི། །རི་མོ་ལེགས་པར་མཐོང་བ་རྒྱལ་པོ་དང༌། །ལྷན་ཅིག་གནས་པར་
གྱུར་པ་རྒྱ་མཚོས་བཤད། །བུད་མེད་དྲེད་ཀྱི་སྒྲ་ཅན་སྤོམ་ཞིང་རིང༌། །དེས་ནི་ཁྱོ་བོ་ཟ་བར་འགྱུར་བ་ཡིན། །བུད་མེད་ཕག་གི་གཟུགས་ལྟར་སྤོམ་ཞིང་རིང༌། །སེར་སྐྱའི་སྒྲ་ཅན་ཁྱོད་དང་འཁོན་པར་བྱེད། །རྡུལ་ཅན་སྐྲ་ཚོགས་སྲབ་པ་སྡུག་བསྔལ་ཐོབ། །རིང་ཐུང་ལག་པའི་ཚད་ཅན་སྣུམ་པ་དང༌། །རྨ་བྱའི་མདངས་ཅན་རྒྱལ་པོའི་སྤྱོར་བར་འགྱུར། །རྒྱ་མཚོས་བསྟན་པ་ལས་བུད་མེད་ཀྱི་མཚན་བཅུ་པ་རྫོགས་སོ།། །།པཎྚི་ཏ་པྲ་བྷཱ་ཀ་ར་དང༌། །བོད་ཀྱི་ལོ་ཙཱ་བ་དགེ་སློང་ཨུ་རྒྱན་པས་བསྒྱུར་བའོ། །