མི་དཔྱད་ཀྱི་བསྟན་བཅོས་བསྡུས་པ།
མི་དཔྱད་ཀྱི་བསྟན་བཅོས་བསྡུས་པ་བཞུགས། །གང་ལ་གཉེར་མ་ལྔ་ཡོད་ཅིང༌། །དེ་ཡི་སྣ་རྒྱུད་མཐོ་བ་དང༌། །དཔྲལ་བའི་མཐའ་གཉིས་རྒྱས་ཤིང་མཐོ། །ལུས་པོ་ཤིན་ཏུ་སྤོམ་ལ་སྙོམས། །མགོ་བོ་ཟླུམ་ཞིང་རབ་ཏུ་རྒྱས། །སྨ་ར་སྲབ་ཅིང་སྙོམས་པ་དང༌། །ན་ཆུང་ལྟ་བུར་ནུ་མ་རྒྱས། །དཀར་དངས་སོ་ནི་དམ་ཞིང་སྙོམས། །མིག་གི་དབང་པོ་རྒྱས་ལ་གསལ། །རྣ་བ་མདངས་སྙུག་ཆུང་ཞིང་སྙོམས། །ཕྲག་གོང་རབ་ཏུ་རྒྱས་པ་དང༌། །རྐང་པའི་སོར་མོ་བཅུ་པོ་ནི། །ཤ་རྒྱས་བཀྲག་བཟང་པོ་ལ་གོང་མཐོ། །གང་གི་མཆན་ཁུང་སྤུ་མེད་པ། །ལག་པ་ཆུང་ཤིང་ཤ་རྒྱས་པ། །དེ་རྣམས་མཆན་ལྡན་ལྷ་ཡི་རིགས། །སྐོམ་གདུངས་ཆེ་ཞིང་ཆུང་ངུ་ཟ། །ཤ་ཡི་ཟས་ལ་རྣམ་པར་རྩི། །ནད་མེད་དེ་ཡི་ལུས་ལ་ནི། །ཉི་ཤུ་རྩ་ལྔའི་ལོ་ལོན་ཚེ། །ཆུ་ཡི་གནོད་པ་འབྱུང་བར་འགྱུར། །ཡུལ་རྣམས་བསྐོར་ཞིང་རྣམ་པར་འཁྱམས། །ཀུན་དུ་བདེ་སྐྱིད་ལྡན་པར་བྱེད། །བརྫུན་ཚིག་སྤང་ཤིང་ཐམས་ཅད་སྟེར། །འདོད་པ་ཆུང་ཞིང་མི་རྐུབ། །དོན་རྣམས་སྨྲ་བ་བཞིན་དུ་སྒྲུབ། །གང་ཞིག་མི་ཡི་རིགས་གྱུར་པ། །གདོང་རིང་གྱེན་དུ་གཉེར་མ་ཅན། །སྨ་ར་ཉུང་ཞིང་རྣ་ཤལ་རིང༌། །བསྡུས་པ་ལག་པ་རྣམ་པར་འགུལ། །འབྲུ་ཚུགས་སུ་ནི་རྣམ་པར་ལྟ། །ལུས་པོ་རྗུད་ཅིང་སྐེམས་པ་དང༌། །བ་སྤུ་མང་ཞིང་རིང་བ་དང༌། །དེ་ཡི་མིག་ནི་གཏིང་དུ་སོང༌། །སྣ་ནི་ཆུང་ཟད་ལེབ་པ་དང༌། །ལུས་ཐོང་རིང་ཞིང་བ་རྣབ་སེམས་ཆེ། །མང་དུ་ཟ་ཞིང་ཀུན་ལ་འཁོན། །འདོད་པ་ཆེ་ལ་གཅིག་ཏུ་བརྗོད། །ཆོས་མིན་སྤྱོད་ཅིང་ཐོབ་ཆོད་ཟ། །སེམས་ངན་དེ་ནི་མི་ཡི་
རིགས། །རྐང་བ་རིང་ཞིང་གདོང་པ་སྐམས། །རྐང་ལག་སེར་ཀ་མང་བ་དང༌། །གནག་ཅིང་བ་སྤུ་མེད་པ་དང༌། །ཟས་ངན་བཟའ་ཞིང་བཟང་པོ་འདོར། །མཚན་ངན་དེ་ནི་ཉི་མ་འདོད། །ལག་བའི་ནོར་རྣམས་ཉམས་པར་བྱེད། །དེ་རྣམས་མཚན་ངན་ཡི་དྭགས་མི། །འགྲོ་ཞིང་འགྲོ་ཞིང་སྡོད་པ་དང༌། །འགྲོ་ཞིང་ཕྱོགས་རྣམས་ཀུན་དུ་བལྟ། །རྐང་པ་ཤ་མེད་རྩ་ཡིས་གང༌། །སྨ་ར་ཆེའམ་ཡང་ན་མེད། །དེ་རྣམས་མཚན་ལྡན་དུད་འགྲོའི་རིགས། །དེ་རྣམས་རྣམ་པར་བཤད་བྱ་བ། །གང་གི་དཔྲལ་བའི་སྐྲ་མཚམས་ལ། །ཐིག་ལེའམ་རི་མོ་མངོན་ཅན་ཆགས། །བློ་ལས་ལྡན་ཞིང་སྡུག་བསྔལ་ཐོབ། །སྣ་ཡི་གཡས་གཡོན་མཁུར་བ་ལ། །ཤ་མཚན་ནག་པོ་ཆགས་གྱུར་ན། །ཟླ་དྲུག་ལོན་ནས་ནང་ཀྱིས་འདེབས། །མིག་ལ་ནག་པོ་ཆགས་པ་ན། །ནོར་ཡོད་ཟས་ཀྱིས་ཕོངས་པར་འགྱུར། །གདོང་པ་གཙང་ཞིང་མདངས་བཟང་ན། །ནད་མེད་གཙང་ཞིང་བདེ་བར་འཚོ། །མཁུར་བ་གཡས་མ་གཡོན་པ་ལ། །མཛེར་བ་ཆུང་དུ་ཆགས་པ་ན། །ལོངས་སྤྱོད་ལྡན་ཞིང་རྙེད་པ་ཐོབ། །སྣ་འདེབས་ནང་ན་སྨེ་བ་ཆགས། །གང་ཞིག་སུམ་ཅུ་ལོན་པའི་ཚེ། །གསེར་དང་རྟ་ཡི་རྙེད་པ་ནི། །རྒྱལ་པོ་ལས་ནི་ཐོབ་པར་འགྱུར། །མི་དཔྱད་འདི་རྡོ་རྗེ་གདན་དུ་ཨུ་རྒྱན་པས་བསྒྱུར་པའོ། །