ཤིང་བཟོ་བས་གྲུབ་པ་ཐོབ་པའི་གཏམ་རྒྱུད།
ན་མོ་ལོ་ཀེ་ཤྭ་ར་ཡེ། ཤིང་བཟོ་བས་གྲུབ་པ་ཐོབ་པ་ནི། ཛ་ག་ཏ་ལར་གར་ལོག་བྱུང་བའི་ཚེ་མི་རྣམས་ཀྱིས་ཤར་ཕྱོགས་བྷཾ་ག་ལར་བྲོས་སོ། །ལམ་ཀ་ན་ཤིང་བཟོ་བའི་བུ་ཅིག་ཡོད་པས་མཐོང་ནས་བྲོས་པའི་དགེ་འདུན་རྣམས་ལ་བརྐྱང་ཕྱག་བཙལ་ཞབས་སྤྱི་བོར་བླངས། བསྙེན་བཀུར་བྱས་སྐད། དེར་དེ་ལྟར་བྱས་པའི་རྒྱུ་མཚན་དྲིས་པས། དེ་ན་རེ་བདག་གི་ཕ་དད་པ་ཆེ་བས། རབ་བྱུང་ཅིག་ལ་བསྙེན་བཀུར་བྱས། དེས་ཀྱང་ཐུགས་རྗེ་ཆེན་པོའི་སྒོམ་བཟླས་ཕོག་ནས་ཉམས་སུ་བླངས། དུས་རིང་ཞིག་ན་ནད་ཀྱིས་བཏབ་ནས་ཤི་སྟེ་དུར་ཁྲོད་དུ་ཤིང་བརྩིགས་ཏེ་དཀྱིལ་དུ་བཅུག་ནས་མཐའ་ནས་མེ་སྦར་བ་དང་ཐོན་བྱུང༌། དེར་དྲིས་པས་ང་ཁྱིམ་དུ་ཐེག་བཤད་དོ་ཞེས་ཟེར་རོ། །དེར་བཏེག་ནས་སྨྲས་པ། ང་གཤིན་རྗེའི་སྐྱེས་བུ་ཤིན་ཏུ་འཇིགས་པ་བཞིས་ཁྱེར་ནས་དམྱལ་བའི་གནས་སུ་བཀུམ་པ་ན་ར་ཀའི་ནང་མེས་གང་བར་བཅུག་པ་དང༌། དེར་བཀུམ་པ་ན་ར་ཀ་ཁ་ཟུམ་ནས་མ་ཚུད་ཕྱིར་བསྐྱེད་པ་དང༌། ཁ་བྱེ་ནས་བྱུང༌། ཡང་ཡང་དེ་བཞིན་དུ་བྱུང་བས་སྐྱེས་བུ་བཞི་པོ་འཇིགས་ནས་གཤིན་རྗེ་ཆོས་ཀྱི་རྒྱལ་པོ་ལ་དྲིས་པས། དེ་ན་རེ་འདིར་སྐྱེ་བའི་རྒྱུ་ཟད་ཐུགས་རྗེ་ཆེན་པོའི་བུ་ཡིན་ད་ཅིག་ཅར་སྐྱོལ་ཞེས་ཟེར་ནས་བསྐྱལ་བ་དང་ངའི་ནད་དྲག་འདུག་ཅེས་ཟེར་རོ། །དེ་ཕྱིར་རབ་ཏུ་བྱུང་བ་མཐོང་ཚད་ལ་བརྐྱང་ཕྱག་འཚལ་ཞིང་བསྙེན་བཀུར་བྱེད། བྱ་བ་ཐམས་ཅད་བཞག་ནས་སྒོམ་བཟླས་བྱེད་པ་ཅིག་བྱུང༌། བདག་ཀྱང་ཕའི་རྗེས་སུ་བགྱིད་པ་ལགས་ཟེར་རོ། །སྔགས་པ་ཁརས་པཱ་ཎིའི་སྙིང་པོ་བགྲང་བ་ཅིག་ལ་ཡང་དེ་ཁོ་ན་བཞིན་བྱུང་སྐད། ཤིང་བཟོ་བས་གྲུབ་པ་ཐོབ་པ་པཎྚི་ཏ་བི་ན་ཡ་ཤྲཱིས་བསྒྱུར་རོ། །