གསུང་རབ་རིན་པོ་ཆེའི་གཏམ་རྒྱུད་དང་ཤཱཀྱའི་རབས་རྒྱུད།
ཀ་བ་དཔལ་བརྩེགས།
གསུང་རབ་རིན་པོ་ཆེའི་གཏམ་རྒྱུད་དང་ཤཱཀྱའི་རབས་རྒྱུད་བཞུགས། དཀོན་མཆོག་གི་ཟ་མ་ཏོག་ལས། སེམས་ཅན་འཁོར་བ་ལས་འབྱུང་བར་རྩོལ་བ་ལ་བདུད་བར་ཆད་བྱེད་ཀྱི་མི་རྩོལ་བ་ལ་ནི་མི་བྱེད་དོ་ཞེས་འབྱུང༌། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་བསྟན་པའི་མདོ་ལས། འཕགས་པ་འཇམ་དཔལ་གྱིས་ཆོས་ཟབ་མོ་བཤད་པ་དང༌། རབ་འབྱོར་གྱིས་ཁྱོད་ལས་དང་པོ་རྗེས་སུ་མི་བསྲུང་བའི་ཆོས་སྟོན་ཏོ་ཞེས་བྱ་བ་དང༌། འཇམ་དཔལ་གྱིས་ནད་གསོ་བའི་ཕྱིར། སྨན་པས་སྨན་རྩ་བ་བྱིན་པ་འཕྲལ་དུ་བདེ་བར་བྱ་བའི་ཕྱིར་མ་ཡིན་ནོ་ཞེས་བྱ་བ་དང༌། བཅོམ་ལྡན་འདས་ཀྱིས་མ་འོངས་པ་ན་ཆོས་ཟབ་མོ་འདི་ལ་སུ་དད་པ་ཉན་ཐོས་ཀྱི་ཐེག་པ་ཅན་ཞིག་ན་ནི་བྱམས་པའི་འདུས་པ་གསུམ་གྱི་ཁོངས་སུ་གཏོགས་པར་འགྱུར་རོ། །བྱང་ཆུབ་སེམས་དཔའི་ཐེག་པ་ཅན་ཞིག་ན་ནི་བཟོད་པ་གང་ཡང་རུང་བ་ཐོབ་པར་འགྱུར་ཞེས་གསུངས། དད་པའི་སྟོབས་བསྐྱེད་པའི་མདོ་ལས། ཡེ་ཤེས་མཐའ་ཡས་པ་ནི་ཕྱོགས་བཅུའི་འཇིག་རྟེན་རབ་འབྱམས་ཐམས་ཅད་དུ་འཇིག་རྟེན་དང་འཇིག་རྟེན་ལས་འདས་པའི་ལས་དང་བཟོ་གནས་ལ་ཡེ་ཤེས་ལྷུན་གྱིས་གྲུབ་པའོ། །བློ་གྲོས་མི་ཟད་པས་བསྟན་པ་ལས། བྱང་ཆུབ་སེམས་དཔའི་ཚུལ་ཁྲིམས་མི་ཟད་པ་ནི་རྒྱུན་མི་ཟད་པའི་ཕྱིར་བལྟ་བར་བྱའོ། །དེ་ཅིའི་ཕྱིར་ཞེ་ན། སོ་སོའི་སྐྱེ་བོ་རྣམས་ཀྱི་ཚུལ་ཁྲིམས་ནི་སྐྱེ་བའི་གནས་རྣམས་ཀྱི་ཟད་པར་འགྱུར་རོ། །ཕྱི་རོལ་གྱི་བརྡ་མངོན་པར་ཤེས་པ་རྣམས་ཀྱིས་མངོན་པར་འགྱུར་རོ། །མི་རྣམས་ཀྱི་ནི་དགེ་བ་བཅུའི་ལས་ཀྱི་ལམ་ཟད་པས་སོ། །འདོད་པའི་ཁམས་ཀྱི་ལྷའི་བུ་རྣམས་ཀྱི་ནི་བསོད་ནམས་ཟད་པས་སོ། །གཟུགས་ཀྱི་ཁམས་ཀྱི་ནི་ཚད་མེད་པ་དང་བསམ་གཏན་ཟད་པས་སོ། །གཟུགས་མེད་པའི་ལྷ་རྣམས་ཀྱི་ཚུལ་ཁྲིམས་ནི་ཇི་ལྟ་བུར་སྙོམས་པར་ཞུགས་པ་སྐྱེས་པ་ཟད་ནས་ཟད་པར་འགྱུར་རོ། །སློབ་པ་དང་མི་སློབ་པ་དང་ཉན་ཐོས་ཐམས་ཅད་ཀྱི་ནི་མྱ་ངན་ལས་འདས་པའི་མཐར་རོ། །རང་སངས་རྒྱས་ཀྱི་ནི་སྙིང་རྗེ་ཆེན་པོ་དང་བྲལ་བས་སོ། །གཞན་ཡང་ཐེག་པ་གཉིས་ཏེ། ལྷའི་ཐེག་པ་དང་མིའི་ཐེག་པའོ། །དེ་ལ་སེམས་ཅན་ཐམས་ཅད་
ལ་དམིགས་པའི་བྱམས་པ་ནི། སེམས་དང་པོ་བསྐྱེད་པའི་བྱང་ཆུབ་སེམས་དཔའ་རྣམས་ཀྱིའོ། །ཆོས་ལ་དམིགས་པ་ནི། སྤྱོད་པ་ལ་ཞུགས་པའི་བྱང་ཆུབ་སེམས་དཔའ་རྣམས་ཀྱིའོ། །དམིགས་པ་མེད་པའི་བྱམས་པ་ནི་མི་སྐྱེ་བའི་ཆོས་ལ་བཟོད་པ་ཐོབ་པ་རྣམས་ཀྱིའོ། །འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་གྱི་སྔོན་དུ་འགྲོ་བ་ལྟར་དབུགས་དབྱུང་བ་དང༌། རྔུབ་པ་ནི་སྐྱེས་བུའི་སྲོག་གི་དབང་པོའི་སྔོན་དུ་འགྲོ་བའོ། །བྱང་ཆུབ་སེམས་དཔའི་ལྷའི་མིག་རྣམ་པར་དག་པ་ནི་ཕྱོགས་བཅུ་མཐའ་ཡས་པ་ན། སེམས་ཅན་གཟུགས་མེད་པ་མ་གཏོགས་པ་ཐམས་ཅད་ཀྱི་འཆི་འཕོ་དང༌། སྐྱེ་བ་དང་ལས་དང་འབྲས་བུ་དང་པོའི་རིམ་པ་ཤེས་པའོ། །སྦྱིན་པ་ནི་ཆོས་དང་ཟང་ཟིང་ངོ༌། །སྙན་པར་སྨྲ་བ་ནི་ཚིག་འཇམ་པའོ། །དོན་སྤྱོད་པ་ནི་གཞན་དག་གི་བསམ་པ་བཞིན་རྫོགས་པར་བྱེད་པའོ། །དོན་མཐུན་པ་ནི་བདག་ཡོན་ཏན་དུ་འདུ་ཤེས་པའི་ཐེག་པ་དེ་ཉིད་ལ་གཞན་དགོད་པའོ། །མདོར་ན་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བསྟན་པ་ནི་ཚིག་འབྲུ་ཞེས་བྱའོ། །སེམས་ཅན་ཐམས་ཅད་ཀྱི་སྐད་དང་ཡི་གེ་དང་ཚིག་འབྲུས་བརྗོད་དུ་མེད་པའི་དོན་ནི་སྟོན་ཏོ། །སྐྱེ་བ་དང་འགོག་པ་ལ་གནས་པ་ནི་རྣམ་པར་ཤེས་པའོ། །མི་སྐྱེ་བ་དང་མི་འགོག་པ་ལ་གནས་པ་ནི་ཡེ་ཤེས་སོ། །ངེས་པ་དང་དྲང་བ་ནི་དོན་དམ་པ་དང་ཀུན་རྫོབ་བསྟན་པའོ། །གང་ཟག་ནི་སྐྱེ་བོའི་གང་ཟག་གི་སངས་རྒྱས་ཀྱི་བར་བརྡས་བསྟན་ཏེ། དེ་དག་ལ་མངོན་པར་ཞེན་པ་ནི་སྟོན་པ་མ་ཡིན་ནོ། །ཆོས་ཉིད་ནི་མཉམ་མོ། །འདོད་ཆགས་ལ་སྤྱོད་པ་ཉི་ཁྲི་ཆིག་སྟོང་དེ་བཞིན་དུ་ཞེ་སྡང་དང་གཏི་མུག་དང་ཆ་མཉམ་ལ་སྤྱོད་པ་སྟེ། སྦྱིར་བརྒྱད་ཁྲི་བཞི་སྟོང་ངོ༌། །སྦྱིན་པ་བཞིན་ཡེ་ཤེས་ཀྱི་ཚོགས་སུ་འགྱུར་ཏེ། ཆོས་སྨྲ་བ་རྣམས་ལ་སྨྱུ་གུ་དང༌། གྲོ་ག་ལ་སོགས་པ་སྦྱིན་པ་དང༌། སྟན་སྦྱིན་པ་དང༌། རྙེད་པ་དང༌། བཀུར་སྟི་དང༌། སྙན་པ་སྦྱིན་པ་དང༌། ལེགས་པར་གསུངས་སོ་ཞེས་བྱ་བ་སྦྱིན་པའོ། །ཡང་བཟོད་པ་བཞི་ནི་ཡེ་ཤེས་ཀྱི་ཚོགས་སུ་འགྱུར་ཏེ། ཆོས་ཚོལ་བ་ལ་བརྩོན་པས་ངན་དུ་སྣྲ་བ་བཟོད་
པ་དང༌། མཁན་པོ་དང་སློབ་དཔོན་དང་མཐུན་པར་འཇུག་པའི་བཟོད་པ་དང༌། རྣམ་པར་ཐར་པའི་སྒོ་གསུམ་ལ་བཟོད་པའོ། །མི་རྟག་པའི་དོན་གང་ཞེ་ན། མེད་པའི་དོན་དང༌། མི་ཆགས་པའི་དོན་ཏོ། །དཀོན་མཆོག་འབྱུང་གནས་ལས། བྲམ་ཟེའི་རིག་བྱེད་ལས་མཚན་སུམ་ཅུ་རྩ་གཉིས་དང་ལྡན་པ་ནི་འགྲོ་བ་གཉིས་ཏེ། འཁོར་ལོས་སྒྱུར་བ་དང༌། སངས་རྒྱས་སོ། །སྨན་སེར་འདི་ཡིས་མིག་བསྐུས་ན། གཟུགས་ཅི་མཐོང་བ་ཐམས་ཅད་གསེར་གྱི་ཁ་དོག་ཏུ་མཐོང་བར་འགྱུར། སངས་རྒྱས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་པ་གང་དག་ཡོངས་སུ་མྱ་ངན་ལས་འདས་པ་ཡང༌། འཇམ་དཔལ་གཞོན་ནུར་གྱུར་པ་འདིས་བྱང་ཆུབ་ཏུ་བཙུད་དོ། །ཟ་མ་ཏོག་བཀོད་པ་ལས། སྤྱན་རས་གཟིགས་དབང་ཕྱུག་གིས་ལྷ་མ་ཡིན་གྱི་དབང་པོ་གཏོར་མ་ལུང་བསྟན། སྤྱན་རས་གཟིགས་དབང་ཕྱུག་གི་སྤོབས་པ་ལྟ་བུ་དེ་བཞིན་གཤེགས་པ་ལ་ཡང་མི་མངའ་ཞེས་འབྱུང༌། རིའི་རྒྱལ་པོ་དེ་དག་ལ་རང་སངས་རྒྱས་དེ་དག་གནས་ཏེ། མདོ་དང་དབྱངས་ཀྱིས་བསྙད་པ་ལ་སོགས་པ་རྣམ་པ་དུ་མ་དག་ཕན་ཚུན་སྨྲའོ། །དགེ་འདུན་གྱི་ལས་སྤྱོད་པའི་མི་འོས་པ་ལས་སྤྱོད་པ་ལས་སྡིག་ཆེ་བ་འབྱུང༌། འཇམ་དཔལ་རྣམ་པར་རོལ་པ་ལས། གང་དུ་སེམས་དང་ཡིད་དང་རྣམ་པར་རིག་པ་འཇུག་ན། ཐ་ན་མྱ་ངན་ལས་འདས་པར་སེམས་པ་ཡང་རུང་སྟེ། དེ་ཐམས་ཅད་ཉོན་མོངས་པའོ། །ཁ་དོག་དང་གཟུགས་ཀྱི་རྟགས་དང་སྤྱོད་ལམ་གྱི་དབྱིབས་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱིས་སེམས་ཅན་གཞན་དང་གང་ཟག་གཞན་དག་ལ་བྱམས་པ་དང༌། སྙིང་རྗེའི་སེམས་བསྐྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །རྣམ་པར་འཕྲུལ་པའི་རྒྱལ་པོས་ཞུས་པ་ལས། ཆོས་ཉིད་ལ་བརྟེན་ན་མདོ་སྡེ་ཐམས་ཅད་ངེས་པའི་དོན་ཡིན་ནོ། །འཇིག་རྟེན་ལ་བརྟེན་ན་ཐམས་ཅད་དྲང་བའི་དོན་ཡིན་ནོ། །བྱང་ཆུབ་སེམས་དཔའི་ལས་ནི་གཉིས་སོ། །སེམས་ཅན་ཡོངས་སུ་སྨིན་པར་བྱ་བ་དང༌། དམ་པའི་ཆོས་ཡོངས་སུ་བཟུང་བའོ། །བྱང་ཆུབ་སེམས་དཔའི་ས་བརྒྱད་པ་ལ་གནས་
ཤིང་ས་དགུ་བར་འཕར་བ་ལ་བྱང་ཆུབ་སེམས་དཔའི་སྟོབས་བཅུ་དང་མི་འཇིགས་པ་བཞི་དང་མ་འདྲེས་པ་བཅོ་བརྒྱད་ཡོད། ཆོས་དེ་དག་ཀྱང་མདོ་འདི་ཉིད་ལས་འབྱུང༌། མ་འདྲེས་པའི་ནས་ནས་བྱང་ཆུབ་སེམས་དཔའ་ལ་སེམས་ཅན་གདུག་པ་རྣམས་ཀྱིས་གནོད་པ་བྱས་ཀྱང་མ་བརྫི་ལ། གནོད་པ་བྱས་པའི་གཞི་དེས་སེམས་ཅན་དེ་ཡང་ངན་འགྲོར་མི་འགྲོ་སྟེ། བྱང་ཆུབ་སེམས་དཔའི་ཚུལ་ཁྲིམས་དག་པའི་སྨོན་ལམ་གྱི་དབང་གི་ཕྱིར་རོ། །འཕགས་པ་འཇམ་དཔལ་གྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ལས། རབ་ཏུ་བྱུང་བའི་ཡོན་ཏན་བཅུ་ཡོད་དེ། འདོད་པ་ལ་མི་ཆགས་པ་དང༌། དགོན་པ་ལ་དགའ་བ་དང༌། སངས་རྒྱས་ཀྱི་སྤྱོད་ཡུལ་འཐོབ་པ་དང༌། ཆུང་མ་ལ་སོགས་པ་ལ་སྲེད་པར་མི་འགྱུར་བ་དང༌། ངན་འགྲོར་འགྲོ་བའི་ཆོས་སྦོད་པ་དང༌། བདེ་འགྲོའི་ཆོས་ལ་བརྟེན་པ་དང༌། སྔོན་གྱི་དགེ་བའི་རྩ་བ་ལས་ཡོངས་སུ་མི་ཉམས་པ་དང༌། དགེ་བའི་རྩ་བ་ཕུན་སུམ་ཚོགས་པ་འཐོབ་པ་དང༌། ལྷ་རྣམས་དགའ་བ་དང༌། མི་མ་ཡིན་པ་རྣམས་བསྲུང་བར་འགྱུར་བའོ། །སངས་རྒྱས་བདུན་གྱི་སྨོན་ལམ་ལས། སེམས་ཅན་གྱི་རྣམ་པར་ཤེས་པ་གཤིན་རྗེའི་མིས་དྲངས་ཏེ། གཤིན་རྗེའི་མདུན་དུ་ཁྲིད་ཅིང་མི་དེ་དང་ལྷན་ཅིག་སྐྱེས་པའི་ལྷ་ཕྱི་བཞིན་འབྲང་བས་སེམས་ཅན་དེས་ལེགས་ཉེས་ཅི་བྱས་པ་ཐམས་ཅད་ལེགས་པར་ཡི་གེར་བྲིས་ཏེ། གཤིན་རྗེ་ལ་ཕུལ་བ་དང༌། གཤིན་རྗེས་དྲིས་ཤིང་བརྟགས་ནས། དེ་ལ་ཇི་ལྟར་བྱས་པ་དེ་བཞིན་དུ་བསྒོའོ། །མི་ཤི་མ་ཐག་ཏུ་སངས་རྒྱས་སྨན་གྱི་བླ་བཻ་ཌཱུ་རྻའི་འོད་མཆོང་ན། དེས་ཞག་བདུན་ནམ་ཉི་ཤུ་རྩ་གཅིག་གམ། སུམ་ཅུ་རྩ་ལྔའམ། བཞི་བཅུ་རྩ་དགུ་ན་དྲན་ཏེ། དེ་ཕྱིན་ཆད་སྡིག་པ་མི་བྱེད་དོ། །འཕགས་པ་འཇམ་དཔལ་གྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ལས། བྱང་ཆུབ་སེམས་དཔའ་ཁྱིམ་པ་གང་གཱའི་ཀླུང་གི་བྱེ་མ་སྙེད་ཀྱིས་དེ་བཞིན་གཤེགས་པ་དགེ་སློང་གི་དགེ་འདུན་གྱི་འཁོར་དང་བཅས་པ་ལ། བསྐལ་པ་གང་གཱའི་ཀླུང་གི་བྱེ་མ་སྙེད་དུ་བདེ་བར་སྦྱར་བ་ཐམས་ཅད་ཀྱིས་བསྟི་སྟང་བྱས་པ་བས། བྱང་ཆུབ་སེམས་དཔའ་རབ་ཏུ་བྱུང་བ་རབ་ཏུ་དབེན་པ་
འདོད་ཅིང་དགོན་པའི་ལོགས་སུ་ཕྱོགས་ཏེ། གོམ་པ་བདུན་པོར་ན་ཆེས་བསོད་ནམས་ཆེ་ཞིང༌། སངས་རྒྱས་སུ་ཡང་ཉེ་བར་འགྱུར་རོ། །བྱང་ཆུབ་ཀྱི་ཕྱོགས་ནི་བག་ཡོད་པ་ལ་གནས་སོ། །བྱང་ཆུབ་ནི་ནན་ཏན་ལ་གནས་སོ། །སངས་རྒྱས་ཀྱི་ཞིང་སྨོན་ལམ་གྱིས་གྲུབ་པོ། །གང་གིས་སངས་རྒྱས་བྱེ་བ་ཁྲག་ཁྲིག་ཕྲག་འབུམ་གྱི་མཚན་བརྗོད་པ་བས་ནི། འཕགས་པ་འཇམ་དཔལ་གྱི་མཚན་བརྗོད་པ་བསོད་ནམས་ཆེས་ཆེ་ན། དེ་བཞིན་གཤེགས་པ་ཀུན་དུ་གཟིགས་པའི་མཚན་བརྗོད་པ་ལྟ་སྨོས་ཀྱང་ཅི་དགོས། འཕགས་པ་འཇམ་དཔལ་ལ་བྱང་ཆུབ་སེམས་དཔའ་ཞིག་གིས་ཁྱོད་ནམ་འཚང་རྒྱ་ཞེས་དྲིས་པ་དང༌། ནམ་ཡང་འཚང་མི་རྒྱ་བའི་དཔེར། ཟླ་བ་ནི་ཉིན་མོར་འགྱུར་བ་དང༌། ཉིན་མོ་ནི་མཚན་མོར་འགྱུར་བ་དང༌། དགྲ་བཅོམ་པ་ཟག་པ་ཟད་པ་མངོན་པར་རྫོགས་པར་འཚང་རྒྱ་བ་ན་བ་དག་འཚང་རྒྱའོ་ཞེས་བཤད་དོ། །དེ་བཞིན་གཤེགས་པ་མི་འཁྲུགས་པའི་བཀོད་པ་ལས། བར་གྱི་བསྐལ་པ་ཉི་ཤུ་ལ་བསྐལ་པ་གཅིག་གོ །དེའི་བསྐལ་པ་བཅུ་ལ་བསྐལ་པ་ཆེན་པོ་གཅིག་གོ །བྱང་ཆུབ་སེམས་དཔའི་ཐེག་པ་པའི་གང་ཟག་ཁྱིམ་ནས་བྱུང་བ་ཞིག་གིས་མདོ་སྡེ་འདི་གཟུང་བ་དང༌། བཀླག་པ་ལ་སོགས་པར་མི་རྙེད་ལ་དེ་ལ་གལ་ཏེ་ལ་ལ་ཞིག་གིས་ཁྱོད་ཁྱིམ་གྱི་གནས་བཙུན་མོའི་འཁོར་གྱི་ནང་དུ་འདུག་ཕོད་ན་མདོ་སྡེ་འདི་སྦྱིན་ནོ་ཞེས་ཟེར་ལ། གལ་ཏེ་མདོ་སྡེ་རྙེད་པ་ལྟ་ན་ཁྱིམ་གྱི་གནས་བཙུན་མོའི་འཁོར་གྱི་ནང་ན་གནས་ཀྱང་ལྟུང་བ་མེད་དོ། །མི་འཁྲུགས་པའི་སངས་རྒྱས་ཀྱི་ཞིང་དེ་ན་ཚེ་གཅིག་གིས་དགྲ་བཅོམ་པར་འགྱུར་ཏེ། ལན་ཅིག་ཕྱིར་འོང་བ་དང༌། ཕྱིར་མི་འོང་བ་ཞེས་བྱ་བའི་འབྲས་བུ་མིང་ཙམ་སྟེ། སེམས་ཅན་གྱི་རིས་དེར་སྐྱེ་བ་མེད་དོ། །དེ་བཞིན་གཤེགས་པའི་བསམ་གྱིས་མི་ཁྱབ་པ་བསྟན་པ་ལས། འདི་ལྟ་སྟེ། ལས་བསམ་གྱིས་མི་ཁྱབ་པ་དང༌། ཀླུ་བསམ་གྱིས་མི་ཁྱབ་པ་དང༌། བསམ་གཏན་པ་བསམ་གྱིས་མི་ཁྱབ་པ་དང༌། སངས་རྒྱས་བསམ་གྱིས་མི་ཁྱབ་པའ་། །རང་གི་ལུས་ཀྱང་རས་བཅོས་བུས་དཀྲིས་ནས། འབྲུ་མར་གྱིས་བསྐུས་ནས་མར་མེ་འབུད་དོ། །བཅོམ་ལྡན་འདས་ཤཱཀྱ་ཐུབ་
པ་འདི་དེའི་ཚེ་ལྷའི་དབང་པོ་བརྒྱ་བྱིན་མིག་བཟངས་ཞེས་བྱ་བར་གྱུར་ཏོ། །ཆོས་བཞི་དང་ལྡན་ན་རྒྱལ་པོ་ལ་ཆོས་ཀྱི་རྒྱལ་པོ་ཞེས་བྱ་སྟེ། བྱང་ཆུབ་ཀྱི་སེམས་མི་གཏོང་བ་དང༌། གཞན་དག་ཀྱང་བྱང་ཆུབ་ལ་བཀོད་པ་དང༌། དགེ་བའི་རྩ་བ་ཐམས་ཅད་བྱང་ཆུབ་ཏུ་བསྔོ་བ་དང༌། སངས་རྒྱས་ཀྱི་ཆེ་བ་མཐོང་དམ་ཐོས་ན་དེ་ལ་མོས་པ་མ་གཏོགས་པ་ལྷ་ལ་སོགས་པ་དང༌། ཉན་ཐོས་ལ་སོགས་པའི་ཕུན་སུམ་ཚོགས་པ་གང་ལ་ཡང་མ་མོས་པའོ། །བྱམས་པ་སེང་གེ་ཏོག་མེ་ཏོག་པདྨ་མེ་ཏོག་སྐར་མ་རྒྱལ་སྤྱད་ལེགས་ལག་བཟངས་འོད་སྐར་མ་ལ་དགའ་བ། མངོན་འཕགས་ཤེས་པ་ཡོན་ཏན་གྱི་མཆོག་མངའ་བ་ནོར་དཔལ་ཡེ་ཤེས་འབྱུང་གནས། རིན་པོ་ཆེ་འབྱུང་གནས་ཀུན་དུ་སྣང་བ། ཡོན་ཏན་མཐའ་ཡས་གྲགས་པ་མོས་པ། དེ་བཞིན་གཤེགས་པ་མོས་པའི་སྐུ་ཚེ་དང་ཉན་ཐོས་ནི་བསྐལ་པ་བཟང་པོའི་སངས་རྒྱས་དགུ་བརྒྱ་དགུ་བཅུ་རྩ་དགུ་ཀུན་བསྡོམས་པ་དང་མཉམ་མོ། །དེ་སྙེད་ཀྱི་མཛད་པ་ཀུན་སངས་རྒྱས་མོས་པ་གཅིག་པུས་མཛད་དོ། །ཚངས་པ་གཙུག་ཕུད་བྱང་ཆུབ་ཀྱི་རིམ་གྲོ་བའི་ལྟ་གཟི་བརྗིད་ཀྱི་སྟོབས་ཞེས་བྱ་བ་རྟག་ཏུ་དེ་བཞིན་གཤེགས་པའི་ཞམ་རིང་ན་འབྲང་སྟེ། དེ་བཞིན་གཤེགས་པའི་ཞལ་ཟས་སྣོད་དུ་ཟེད་། གཟུགས་མེད་པའི་ལྷའི་ཚེ་བསྐལ་པ་བརྒྱད་ཁྲི་བཞི་སྟོང༌། སེམས་ཅན་གང་དག་དགོན་པའི་གནས་ལ་ཆགས་པ་དེ་དག་ལ་བྱང་ཆུབ་སེམས་དཔའི་སེམས་དབེན་པར་བྱ་བའི་གཏམ་བྱའོ། །ལག་ན་རྡོ་རྗེས་སྨྲས་པ། ཞི་བའི་བློ་གྲོས་དེ་བཞིན་གཤེགས་པས་ཡི་གེ་གཅིག་ཀྱང་མ་བརྗོད་དོ་ཞེས་ཁོ་བོས་སྔར་མ་བཤད་དམ། དེ་ལྟ་མོད་ཀྱི་སྔོན་གྱི་སྨོན་ལམ་གྱི་དབང་གིས་དེ་བཞིན་གཤེགས་པས་གསུངས། སེམས་ཅན་རྣམས་ཀྱིས་དམིགས་སོ། །ཆོས་ཀྱི་མདོ་བཞི་རྣམ་པར་གཞག་སྟེ། དགེ་སྦྱོང་དང༌། བྲམ་ཟེ་རྟག་པར་སྨྲ་བ་རྣམས་དང༌། ལྷ་ཚེ་རིང་པོ་རྟག་པར་འདུ་ཤེས་པ་རྣམས་ཀྱི་གཞོམ་པའི་ཕྱིར། འདུ་བྱེད་ཐམས་ཅད་མི་རྟག་གོ་ཞེས་བྱ་བ་དང༌། ལྷ་དང་མི་བདེ་བར་འདུ་ཤེས་པ་རྣམས་ཀྱི་གཞོམ་པའི་ཕྱིར་འདུ་བྱེད་ཐམས་ཅད་སྡུག་བསྔལ་ལོ་ཞེས་
བྱ་བ་དང༌། མུ་སྟེགས་ཅན་བདག་ཏུ་སྨྲ་བ་རྣམས་ཀྱི་གཞོམ་པའི་ཕྱིར་ཆོས་ཐམས་ཅད་བདག་མེད་པ་ཞེས་བྱ་བ་དང༌། རྣམ་པར་རྟོག་པ་ལ་སྤྱོད་པ་མངོན་པའི་ང་རྒྱལ་ཅན་རྣམས་ཀྱི་གཞོམ་པའི་ཕྱིར། མྱ་ངན་ལས་འདས་པ་ནི་ཞི་བ་ཞེས་བྱའོ། །རྨི་ལམ་བསྟན་པ་ལས། ས་དགུ་པ་དང་བཅུ་པ་ལས་རྨི་ལམ་ལོག་པར་མཐོང་བ་མེད་དོ། །ཕུང་པོ་གསུམ་པ་ལས་ཀྱི་སྒྲིབ་པ་སྦྱང་བའི་ཕྱིར་བཀླག་པ་དང༌། བྱང་ཆུབ་སེམས་དཔའ་གང་གི་རྨི་ལམ་ན་དེ་བཞིན་གཤེགས་པའི་ཆོས་གོས་གསུམ་ཆར་རྙེད་ན་དེ་ནི་ས་བརྒྱད་པར་བལྟའོ། །མེ་ཏོག་གི་ཚོགས་ལས། བྱང་ཕྱོགས་ན་ཡུལ་གན་དྷ་ར་ཞེས་བྱ་བ་ན་ལོ་འབུམ་དུ་མནར་མེད་པའི་སེམས་ཅན་དམྱལ་བ་འཛིན་པར་འགྱུར་བ་ཡོད་དོ། །ཁ་ཆེའི་ཡུལ་ནས་ཁྲི་ཕྲག་ལྔ། བྱང་ཕྱོགས་ནས་བྱེ་བ་ཕྲག་བརྒྱད་དང་ལྔ་འབུམ། ཤར་ཕྱོགས་ནས་བརྒྱ་སྟོང་ཕྲག་མང་པོ། །ལྷོ་ཕྱོགས་སུ་ཉིས་འབུམ། ནུབ་ཕྱོགས་ནས་འབུམ། རིགས་ཀྱི་བུ་གང་དེ་བཞིན་གཤེགས་པ་འོད་དཔག་མེད་ཀྱི་མཚན་ཐོས་པའི་དགེ་བའི་རྩ་བ་དེ་ལ་མ་དད་ཅིང༌། ཡིད་མ་ཆེས་ནས། དེ་ལྟ་བུར་ག་ལ་འགྱུར་ཞེས་ཚིག་ཏུ་སྨྲས་ན། ལོ་སྟོང་ཕྲག་དྲུག་ཅུར་སེམས་ཅན་དམྱལ་བ་ཆེན་པོ་འོ་དོད་འབོད་པ་ཞེས་བྱ་བར་འཚོ་བར་འགྱུར་རོ། །ཕྱོགས་གང་ན་བསྟན་པ་རབ་ཏུ་འབར་བར་གྱུར་པ་དེ་ན། དམ་པའི་ཆོས་སྤང་བའི་སྐྱེས་བུ་བླུན་པོ་ཤིན་ཏུ་མང་བར་གྱུར་ཏོ། །མི་ལུས་ཐོབ་པར་དཀའ་སྟེ། རུས་སྦལ་དང་གཉའ་ཤིང་གི་དཔེས་བསྟན་པ་འབྱུང༌། འཕགས་པ་བྱམས་པ་སེང་གེའི་སྒྲ་ཆེན་པོ་ལས། འབྲས་བུ་མ་ཐོབ་པར་ཐ་ན་དད་པས་བྱིན་པ་ཆུ་སྣོད་གང་ཙམ་ཡང་བླང་བར་མི་བྱའོ། །ཉན་ཐོས་ཀྱི་ཐེག་པ་པ་རབ་ཏུ་བྱུང་བ་སྡིག་པ་ཅན་གྱི་འདོད་པ་བཞི་སྟེ། མ་འོངས་པའི་སངས་རྒྱས་མཐོང་བར་འདོད་པ། འཁོར་ལོས་སྒྱུར་བའི་རྒྱལ་སྲིད་འདོད་པ། རྒྱལ་རིགས་འདོད་པ། བྲམ་ཟེའི་རིགས་འདོད་པའོ། །གླིང་བཞི་པའི་སེམས་ཅན་ཐམས་ཅད་ལ་བསྐལ་པ་བས་ལྷག་པར་ཡོ་བྱད་ཀུན་བྱིན་པ་བས། ཡང་དག་པར་ཞུགས་པ་ཚུལ་ཁྲིམས་ཡོངས་སུ་དག་པ་འཚོ་བ་དག་པ་ཞིག་གིས་སྦྱིན་པ་པོ་གང་གིས་དད་པས་བྱིན་པ་ཐ་ན་ཆུ་སྣོད་གང་ཙམ་བླངས་ན་དེ་བསོད་ནམས་ཆེའོ། །རབ་ཏུ་བྱུང་བ་ཉོན་མོངས་པ་ཆ་ཕྲ་བ་འདི་
དག་དང་ལྡན་ན། མདའ་འཕངས་པ་བཞིན་དམྱལ་བར་འགྲོ་སྟེ། གཞན་གྱི་རྙེད་པ་ལ་ཕྲག་དོག་དང༌། སྡོམ་པ་དང་ལྡན་པའི་མདོ་སྡེ་ཐོས་ན་ཚུལ་ཁྲིམས་ལ་སྨོད་པ་དང༌། དེ་བཞིན་གཤེགས་པའི་བཀས་བསླབས་པ་ལས་འགལ་ན་ང་རྒྱལ་གྱིས་མི་འཆགས་པ་དང༌། ཤེས་བཞིན་དུ་ཡོན་བདག་དད་པས་བྱིན་པ་ལ་སྤྱོད་པའོ། །རབ་ཏུ་བྱུང་བ་རྒྱགས་པ་འདི་བཞི་དང་ལྡན་ན་དམྱལ་བར་འགྲོ་སྟེ། བཞི་ནི་མང་དུ་ཐོས་པས་རྒྱགས་ནས་བག་མེད་པ་དང༌། རྙེད་པ་དང༌། བཀུར་སྟིས་རྒྱགས་པ་དང༌། མཛའ་བ་ཤེས་དང༌། སློང་མོ་སྟེར་བའི་ཁྱིམ་གྱིས་རྒྱགས་པ་དང༌། སྦྱངས་བའི་ཡོན་ཏན་གྱིས་རྒྱགས་ནས་བདག་བསྟོད། གཞན་ལ་སྨོད་པའོ། །ཆོས་བཞི་དང་ལྡན་ན་བྱང་ཆུབ་སེམས་དཔར་ཁས་འཆེས་ཏེ། རྙེད་པ་འདོད་པ་དང༌། བཀུར་སྟི་འདོད་པ་དང༌། གཡོ་བྱེད་པ་དང༌། ཡང་བའི་འཚོ་བས་འཚོ་བར་བྱེད་པའོ། །དུས་ལྔ་བརྒྱ་ཐ་མ་ལ་བྱང་ཆུབ་སེམས་དཔར་ཁས་འཆེས་པའི་ཁྱིའི་ཆོས་ཀུན་དུ་སྤྱོད་པ་དག་འབྱུང༌། དགེ་སློང་ཁྱིམ་པ་རྣམས་སུ་འགྲོ་བར་འདོད་པས་ནི་ཆོས་ཀྱི་སྐྱེས་མ་གཏོགས་པར་སྐྱེས་གཞན་བསྐུར་བར་མི་བྱ། ཁྱིམ་དུ་སོང་ནས་ཆོས་མ་གཏོགས་འདུ་འཛིའི་གཏམ་མི་བྱ། ངས་ནི་སྔོན་བྱས་པའི་ལས་ཟད་པར་བྱ་བའི་ཕྱིར། ཕུང་པོ་གསུམ་པའི་ཆོས་ཀྱི་རྣམ་གྲངས་གསུངས། བྱང་ཆུབ་སེམས་དཔའ་ལྟར་བཅོས་པ་ཁ་ཅིག་སྡིག་པ་བྱས་པ་བཤགས་པས་འབྱང་བའི་སེམས་ཀྱིས་ཕྱིན་ཆད་སྡོམ་པར་མི་བྱེད། ཉིན་གཅིག་ལ་ལན་བརྒྱ་བར་དུ་འབྱུང་བའི་ཕྱིར་སྤོང་བ་ནི་བླའི། ཚུལ་ཁྲིམས་མ་དག་པས་དད་པས་བྱིན་པ་ལ་ཡོངས་སུ་སྤྱོད་པ་ནི་དེ་ལྟ་མ་ཡིན་ནོ། །གལ་ཏེ་ཁྱེད་ཉན་ཐོས་གཅིག་གི་སེམས་དག་རྣམ་པར་གྲོལ་བར་མ་གྱུར་དུ་ཟིན་ན་ནི་འཁོར་ལོས་སྒྱུར་བའི་རྒྱལ་སྲིད་གང་གཱའི་ཀླུང་གི་བྱེ་མ་སྙེད་བྱེད་དུ་བཅུག་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ཡང་འགྱུར་རོ། །ཁྱིམ་པས་ཀྱང་ཕྱིར་མི་འོང་བའི་འབྲས་བུ་ཐོབ་པར་འགྱུར། ཚོང་དཔོན་བཟང་སྐྱོང་གིས་ཞུས་པ་ལས། ཚོང་དཔོན་ཟླ་བ་འབྱོར་པ་དེ་ལ་ནི་ལྷའི་དབང་པོ་བརྒྱ་བྱིན་གྱི་བདེ་བའི་ཡོ་བྱད་གྱིས་ཀྱང་ཅི་ཙམ་དུ་ཡང་མི་ཕོད་དོ། །དཔེར་ན་དགྲ་བཅོམ་པ་འགོག་པའི་སྙོམས་པར་ཞུགས་པའི་
རྣམ་པར་ཤེས་པའི་ཁམས་དེ་འགོག་པ་ལས་འདས་ནས་ཡོངས་སུ་ཕྱིན་པ་དེ་བཞིན་དུ། རྣམ་པར་ཤེས་པའི་ཁམས་འདི་ཡང་སྐྱེ་བ་པོ་ཤི་བའི་ལུས་ཡོངས་སུ་བཏང་ཞིང་ཁམས་རྣམས་བོར་ནས། ནང་གི་གཟུགས་དང་ཕྱི་རོལ་གྱི་གཟུགས་ཡོད་དེ། ནང་གི་གཟུགས་ནི་ཟིན་པའི་མིག་གང་ཡིན་པ་ནི་ཕྱི་རོལ་གྱི་གཟུགས་སོ། །མིག་གི་རྣམ་པར་ཤེས་པ་གང་ཡིན་པ་ནི་གཟུགས་སོ། །ནང་གི་མིག་ཤེས་པ་དང་ལྡན་པས་རྨི་ལམ་ན་གཟུགས་མཐོང་གི་ཤའི་མིག་གིས་ནི་མ་ཡིན་ནོ། །ཕྱིར་མི་ལྡོག་པའི་འཁོར་ལོ་ལས་འདི་གཉིས་ལོ་ཁྲིར་དགེ་བའི་རྩ་བ་ཡང་དག་པར་བསྒྲུབས་པ་བས། གང་ཞིག་དེར་སྔ་དྲོ་གཅིག་གི་དེ་ནི་དེ་བས་ཆེས་བསོད་ནམས་མང་དུ་ཡང་དག་པར་སྨྲ་བའོ། །དཀོན་མཆོག་སྤྲིན་ལས། བྱང་ཆུབ་སེམས་དཔའ་རྣམས་ཀྱི་སྤོབས་པ་ནི་དོན་དང་བྲལ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཉིད་ཐོབ་པའི་ཕྱིར་ཏེ། རིགས་ཀྱི་བུ་ཆོས་ཉིད་མ་ཐོབ་པ་རྣམས་ཀྱི་ནི་དོན་དང་འབྲལ་བར་འགྱུར་གྱི། ཆོས་ཉིད་ཐོབ་པ་རྣམས་ཀྱིས་ནི་མ་ཡིན་ནོ། །བྱང་ཆུབ་སེམས་དཔའ་རྣམས་ཀྱི་སྤོབས་པ་ནི་ཚིག་འབྲུ་དང་བྲལ་བ་མ་ཡིན་ནོ། །དེ་ཅིའི་ཕྱིར་ཞེ་ན། བསྟན་བཅོས་ཐམས་ཅད་ལ་འཇིགས་པ་མེད་པའི་ཕྱིར་ཏེ། རིགས་ཀྱི་བུ་བསྟན་བཅོས་ཀྱི་ཕྱོགས་འགའ་ཤེས་པ་རྣམས་ཀྱིས་ནི་ཚིག་འབྲུ་དང་བྲལ་བར་འགྱུར་གྱི་བསྟན་བཅོས་ཐམས་ཅད་མེད་པར་འགྱུར་བ་ནི་མ་ཡིན་ནོ། །བྱང་ཆུབ་སེམས་དཔའ་རྣམས་ནི་གང་ན་གནས་པས་སངས་རྒྱས་སྐྱེས་བུ་དུ་མ་འབྲས་བུ་མེད་པར་འགྱུར་བ་དང༌། སེམས་ཅན་གྱི་དོན་འགྲིབ་པར་འགྱུར་བ། ལྷ་ཚེ་རིང་པོའི་ནང་དུ་མི་སྐྱེའོ། །བྱང་ཆུབ་སེམས་དཔའ་རྣམས་ནི་འདོད་པའི་ཁམས་ཉིད་དུ་གང་སེམས་ཅན་གདུལ་བར་བྱ་བ་དང༌། སངས་རྒྱས་སྐྱེས་པ་མཉེས་པར་བྱར་ཡོད་པར་སྐྱེའོ། །དེ་ཅིའི་ཕྱིར་ཞེ་ན། དེ་ནི་ཐབས་མཁས་པའི་ཕྱིར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱིའོ། །འདུལ་བའོ། །ཚངས་པ་ཁྱད་པར་སེམས་ཀྱིས་ཞུས་པ་ལས། སངས་རྒྱས་ཀྱི་ཞིང་འདི་ན་འགའ་ཞིག་བསྐལ་པ་བརྒྱ་སྟོང་དུ་ཚངས་པར་སྤྱོད་པ་ལ་གནས་པ་བས། མི་མཇེད་ཀྱི་འཇིག་རྟེན་གྱི་ཁམས་ན་གང་སྔ་དྲོའི་དུས་གཅིག་ཞེ་སྡང་མེད་པར་གནས་པ་བསོད་ནམས་ཤིན་ཏུ་ཆེའོ། །ཆོས་བཞི་དང་ལྡན་ན་བྱང་
ཆུབ་སེམས་དཔའ་བསམ་གཏན་ལ་གནས་ནས། འདོད་པའི་ཁམས་སུ་སྐྱེ་སྟེ། བཞི་གང་ཞེ་ན། སེམས་ལས་སུ་རུང་བ་དང༌། དགེ་བའི་རྩ་བ་སྟོབས་སྐྱེད་པ་དང༌། སེམས་ཅན་ཡོངས་སུ་མི་གཏོང་བ་དང༌། ཐབས་དང་ཤེས་རབ་བསྒོམ་པའོ། །གང་རྣམས་དངོས་པོ་འཇིག་པ་ལས་འགགས་པ་དེ་འཕགས་པའི་བདེན་པའོ། །སྨྲ་བར་གྱུར་པ་དེ་དག་ནི་ལམ་ལོག་པར་ཞུགས་པ་སྟེ། ང་ཡང་དེ་དག་གི་སྟོན་པ་མ་ཡིན། དེ་དག་ཡང་ངའི་ཉན་ཐོས་མ་ཡིན་ནོ། །གལ་ཏེ་སེམས་ཅན་ཐམས་ཅད་ཀྱང༌། །ཐེག་པ་དམ་པ་འདོད་འགྱུར་ན། །ཐམས་ཅད་ཀྱི་ཡང་གོ་སྐབས་ཡོད། །ཐེག་པའི་ཁྱད་པར་དག་ལ་ལྟོས། །དངོས་པོ་ནི་མིག་གི་རང་བཞིན་གྱིས་དབེན་ཏེ། གང་ཆོས་ཐམས་ཅད་མི་སྒོམ་པ་འདི་ནི་ལམ་སྒོམ་པའོ། །བསྐལ་པས་བསྲེག་པ་ན་ཆུ་བྲན་དང༌། རྫིང་བུ་དང་མཚོ་ལ་སོགས་པ་སྔར་སྐམ་ལ་ཕྱིས་རྒྱ་མཚོ་ཆེན་པོ་སྐམ་པ་ལྟར་དམ་པའི་ཆོས་ནུབ་པའི་ཚེ། ཉི་ཚེ་བའི་སྤྱོད་པ་ལ་ཞུགས་པའི་སེམས་ཅན་རྣམས་ཀྱི་ཆོས་སྔར་ནུབ་པར་འགྱུར་ལ། ཕྱིས་སྐྱེས་བུ་དམ་པ་བློ་གྲོས་རྒྱ་མཚོ་ལྟ་བུ་སངས་རྒྱས་ཀྱི་ཐེག་པ་ཡང་དག་པར་འཛིན་པ་དེ་དག་གི་ལག་ནས་དམ་པའི་ཆོས་ནུབ་པར་འགྱུར་རོ། །ཇི་ལྟར་རྒྱ་མཚོ་ལས་བྱུང་བ། །རིན་པོ་ཆེས་ནི་རིན་ཆེན་སྡུད། །ཅེས་བྱ་བར་བསྔགས་པ། བསྲེག་པའི་བསྐལ་པ་བྱུང་ཡང་མི་འཚིག་སྟེ། །དེ་ཡང་འཇིག་རྟེན་འཇིག་ཚེ་གཞན་དུ་འགྲོ། །དེ་བཞིན་དྲི་མ་མེད་པའི་ཆོས་འཇིག་ཚེ། །བརྩོན་འགྲུས་མཆོག་ལྡན་དེ་དག་འབད་ཅིང་འཛིན། །སྣོད་མིན་འཇིག་རྟེན་ཆོས་མིན་འདོད་རིག་ནས། །ཁམས་པ་རྒྱལ་བ་གཞན་གྱི་དྲུང་དུ་འགྲོ། །ཆོས་རྣམས་འབྱུང་བ་མེད་པ་བསྟན་པ་ལས། །ལན་ཅིག་ཁོ་ནས་རྒྱལ་བར་འགྱུར་བ་མིན། །རིགས་པའི་རིམ་དང་བྱ་བའི་རིམ་གྱིས་འཐོབ། །བསྐལ་པ་ཁྲག་ཁྲིག་བྱེ་བ་གྲངས་མེད་དུ། །གོ་ཆ་བགོས་པས་འཐོབ་ཀྱི་གཞན་དུ་མིན། །རིགས་ཀྱི་བུ་བདག་བསྲུང་བར་འདོད་པ་དེས་གཞན་སུའི་སྤྱོད་པ་ལ་ཡང་བརྟག་པར་མི་བྱ་སྟེ། འདི་ནི་འདི་འདྲའོ། །འདི་ནི་འདི་འདྲའོ་ཞེས་དཔྱ་བར་མི་བྱའོ། །ཆོས་འདི་ཐོས་ཤིང་མིར་འགྱུར་བའི། །འདོད་པའི་
ཡོན་ཏན་ལྔ་ཆགས་ཁྱིམ་པའང་བླའི། །བསྟན་པ་འདི་ལ་རབ་ཏུ་བྱུང་གྱུར་ཞིང༌། །དམིགས་ལྟ་སྦྱངས་པའི་ཡོན་ཏན་རློམ་པ་མིན། །འཕགས་པ་ནམ་མཁའ་མཛོད་ཀྱི་ཞུས་པ་ལས། །དགེ་བའི་རྩ་བ་ནི་སེམས་དང་པོ་བསྐྱེད་པ་སྟེ། སངས་རྒྱས་ཀྱི་ཆོས་ཀུན་གྱི་རྩ་བའོ། །བསོད་ནམས་ནི་སེམས་བསྐྱེད་མ་ཐག་ཏུ་སེམས་ཅན་དང་ཐེག་པ་དམན་པའི་བསོད་ནམས་ཟིལ་གྱིས་གནོན་པའོ། །ཡེ་ཤེས་ནི་དགེ་བའི་རྩ་བ་དེ་དག་བླ་ན་མེད་པར་བསྔོ་བའོ། །ཤེས་རབ་ཀྱི་ཡེ་ཤེས་ཀྱིས་ནི་སེམས་ཅན་ཐམས་ཅད་ཀྱི་ཉོན་མོངས་པ་ཐམས་ཅད་ཡོངས་སུ་འདོར། ཐབས་ཀྱི་ཡེ་ཤེས་ཀྱིས་ནི་སེམས་ཅན་ཐམས་ཅད་མི་གཏོང་བ་སྟེ། ཚིག་ནམ་མཁའ་དང་མཚུངས་པའི་ཕྱིར་གཤེ་ཡང་སླར་མི་གཤེ། ལུས་ནམ་མཁའ་དང་མཚུངས་པའི་ཕྱིར་བརྡེག་ཀྱང་སླར་མི་བརྡེག །སེམས་ནམ་མཁའ་དང་མཚུངས་པས་སྤྱོ་ཡང་སླར་མི་སྤྱོ། །བསམ་པ་ནམ་མཁའ་དང་མཚུངས་པས་ཁྲོས་ཀྱང་སླར་མི་ཁྲོ། །དགེ་བའི་རྩ་བ་ནི་དགེ་བའི་བཤེས་གཉེན་རབ་ཏུ་རྙེད་པའོ། །བསོད་ནམས་ནི་དགེ་བའི་བཤེས་གཉེན་ཡོངས་སུ་མི་གཏོང་བའོ། །ཡེ་ཤེས་ནི་དགེ་བའི་བཤེས་གཉེན་ལ་ཀུན་དྲི་བྱའོ། །ཐོས་པ་ནི་ཤེས་རབ་ཆེན་པོའི་རྒྱུ་སྟེ། སེམས་ཀྱི་རང་བཞིན་འོད་གསལ་བས། འཁོར་ལོས་སྒྱུར་བའི་རྒྱལ་པོ་བསོད་ནམས་ཀྱིས་བརྒྱན་པ་དེ་ལ་བཙུན་མོ་ཡང་བརྒྱད་ཁྲི་བཞི་སྟོང་བུ་ཡང་བརྒྱད་ཁྲི་བཞི་སྟོང་ཡོད་དོ། །དགེ་བའི་རྩ་བ་ནི་སྡིག་པ་སོ་སོར་འཆགས་པའོ། །བསོད་ནམས་ནི་དགེ་བའི་རྩ་བ་ཐམས་ཅད་ལ་རྗེས་སུ་ཡི་རང་བར་བྱའོ། །ཡེ་ཤེས་ནི་སངས་རྒྱས་ཐམས་ཅད་ལ་གསོལ་བ་འདེབས་པའོ། །ཤེས་རབ་གང་ངོམས་དེ་དག་ཤིན་ཏུ་ངོམས། བྱང་ཆུབ་ཀྱི་སེམས་ནི་ཆོས་གཉིས་ཀྱིས་བསྡུས་ན་ཕྱིར་མི་ལྡོག་པར་གནས་སོ། །གཉིས་གང་ཞེ་ན། བསམ་པ་དང་ལྷག་པའི་བསམ་པའོ། །དེ་ལ་བསམ་པ་ནི་གཡོ་མེད་པ་དང་སྒྱུ་མེད་པས་བསྡུས་སོ། །ལྷག་པའི་བསམ་པ་ནི་དེ་ལ་ཆགས་པ་དང་ཁྱད་པར་དུ་འགྲོ་བས་བསྡུས་སོ། །སེམས་ཀྱི་དམིགས་པ་ནི་བདུད་ཀྱི་ཡུལ་ཏེ། ཀླུའི་རྒྱལ་པོ་རྒྱ་མཚོས་ཞུས་པ་ལས། ཆོས་བཞི་དང་ལྡན་ན་མི་ཁོམ་པ་སྤོང་བར་འགྱུར་ཏེ། དཀོན་མཆོག་གི་བསྔགས་པ་བརྗོད་པ་དང༌། ཆོས་འདོད་
པ་རྣམས་གཡེངས་པར་མི་བྱེད་པ་དང༌། བདག་གི་འགྱོད་པ་མི་སྐྱེ་བ་དང༌། གཞན་གྱི་འགྱོད་པ་སེལ་བའོ། །ཆོས་གཉིས་དང་ལྡན་པས་མི་དགེ་བའི་ཆོས་རྣམས་བསལ་ནས་མི་དགེ་བའི་ཆོས་འགོག་པར་འགྱུར་ཏེ། གཉིས་ནི་ཕུང་པོ་གསུམ་གྱི་བསྔོ་བ་དང་ལྡན་པ་དང༌། བག་ཡོད་པར་གནས་པའོ། །ཡང་གཉིས་ཏེ། དགེ་བའི་རང་བཞིན་དུ་གྱུར་པ་དང༌། རྣམ་པར་སྨིན་པ་ལ་མི་རེ་བའོ། །ཆོས་བརྒྱད་དང་ལྡན་ན་རབ་ཏུ་བྱུང་བའི་ཡོན་ཏན་ཡོངས་སུ་རྫོགས་པར་འགྱུར་ཏེ། གང་ཞེ་ན། འཕགས་པའི་རིགས་ཀྱིས་ཆོག་པར་འཛིན་པ་དང༌། སྦྱངས་པའི་ཡོན་ཏན་དང་ཡོ་བྱད་བསྡུས་པ་མང་དུ་ཐོས་པ། སེམས་ངེས་པར་སེམས་ལ་དགའ་བ། བྱང་ཆུབ་པའི་བསམ་པ་ལ་མ་རྨོངས་པ་དྲན་པ་མཉམ་པར་གཞག་པས་གནས་པ། ཏིང་ངེ་འཛིན་དང་ཤེས་རབ་བསྒོམ་པ་ལ་བརྩོན་པ། བརྩམས་པ་ཐམས་ཅད་བསྲུང་བ་སྙིང་པོར་བྱེད་པ། འཁོར་གྱི་ནང་དུ་འོང་བ་ལ་ཟབ་མོའི་ཆོས་ཀྱི་གཏམ་གྱི་བར་བགྱིད་དེ་གཏམ་སྣ་ཚོགས་གླེང་བ་གང་ཡིན་པ་དེ་ནི་དམ་པའི་ཆོས་མི་ནུབ་པར་བྱ་བའི་ཕྱིར་བརྩོན་པ་ཡིན་ནོ། །དེ་ཅིའི་ཕྱིར་ཞེ་ན། འཛམ་བུའི་གླིང་འདིར་ཇི་སྲིད་ཟང་མོའི་ཆོས་གྲགས་པ་དེ་སྲིད་དུ་ཆོས་ནུབ་པར་མི་འགྱུར་རོ། །སངས་རྒྱས་ཀྱི་ཞིང་འདིའི་གླིང་བཞི་པའི་འཇིག་རྟེན་གྱི་ཁམས་བྱེ་བ་ཕྲག་བརྒྱ་པ་དང་ཇི་ཙམ་གྱི་གླིང་བཞི་པར་གྱུར་པ་ལ་དེ་ལྟ་བུའི་བྱེ་བ་ཕྲག་བརྒྱ། དེ་ན་མི་རྣམས་པར་མདོར་འཆི་བ་མེད། ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་ཚུལ་ཁྲིམས་ཡོངས་སུ་རྫོགས་པར་མ་བྱས་ཏེ། ཆོ་ག་ཉམས་པ་དང༌། འཚོ་བ་ཉམས་པ་དང༌། ཚུལ་ཁྲིམས་ཉམས་པ་ནི་ཡོངས་སུ་རྫོགས་པར་བྱས་ལ། དེ་དག་གི་ལྟ་བ་དྲང་པོར་འགྱུར་ཏེ། དེས་ན་སེམས་ཅན་དམྱལ་བ་རྣམས་སུ་མི་སྐྱེའི། ཀླུའི་སྐྱེ་གནས་སུ་སྐྱེ་བར་འགྱུར། བྱད་བཞིན་བཟང་པོ་ལ་ཕྲག་དོག་མི་བྱེད་པ་དེ་ནི་ལུས་ཆེན་པོར་འགྱུར། བྱའི་རྒྱལ་པོ་ནམ་མཁའ་ལྡིང་བཞིས། ཁྱེའུ་བཞི་བའི་ཏིང་ངེ་འཛིན་ལས། དབུ་ནི་ཤར་ཕྱོགས། ཞལ་ནི་བྱང་ཕྱོགས། རྒྱབ་ནི་ལྷོ་ཕྱོགས་སུ་བསྟན་ལ་གློ་གཡས་པས་ཕབ། དྲང་སྲོང་རྒྱས་པས་ཞུས་པ་
ལས། ནོར་གང་གི་ཡིན་པ་དེ་ནི་སྦྱིན་བདག་ཡིན་ནོ། །བྱེད་དུ་བཅུག་པས་བྱིན་པ་ནི། སྦྱིན་པ་པོ་ཡིན་གྱི་སྦྱིན་བདག་མ་ཡིན་ནོ། །གང་རང་གི་དངོས་པོ་བདག་ཉིད་ཀྱིས་སྦྱིན་པ་དེ་ནི་སྦྱིན་པ་པོ་ཡང་ཡིན་ལ། སྦྱིན་བདག་ཀྱང་ཡིན་ནོ། །དུག་དང་མཚོན་ཆ་དང་སྲོག་ཆགས་བསད་དེ་ཤ་དང༌། བག་མེད་པ་རྣམས་ལ་ཆང་སྦྱིན་པ་དང༌། འདི་དག་ནི་བདག་གི་རིམ་གྲོ་དང་མཆོད་པར་འགྱུར་རོ་སྙམ་ནས་སེམས་ཅན་བསྡུ་བ་དང༌། འཐོབ་པའི་ཕྱིར་བསྡུ་བར་སྦྱིན་པ་ནི་སྦྱིན་པ་ཡོངས་སུ་མ་དག་པའོ། །རྩེད་མོ་ལ་སོགས་པ་བྱ་བའི་ཕྱིར་རོལ་མོ་མཁན་ལ་སྦྱིན་པ་བྱིན་པ་ནི་ཡོངས་སུ་མ་དག་པའོ། །སངས་རྒྱས་དང་དགེ་འདུན་དང་ཆོས་སྨྲ་བ་དང་ནད་པ་དང་ཕ་མ་ལ་སྦྱིན་པ་བྱིན་པ་ནི་སྦྱིན་པ་བླ་ན་མེད་པའོ། །དེ་བཞིན་གཤེགས་པ་བཞུགས་པ་དང༌། ཡོངས་སུ་མྱ་ངན་ལས་འདས་པ་ལ་མཆོད་པ་བྱེད་པ་ནི་རྣམ་པར་སྨིན་པ་མཚུངས་སོ། །དགེ་བ་བྱས་པ་མའི་མངལ་དུ་སྐྱེས་པ་ན་ཞག་བདུན་གྱི་བར་དུ། བདག་དེ་ནས་ཤི་འཕོས་ཏེ་འདིར་སྐྱེས་ཏེ་ལས་འདི་ལྟ་བུ་ཞིག་གིས་གྱུར་ཏོ་ཞེས་བྱ་བར་དྲན་ནོ། །མི་དགེ་བ་བྱེད་པ་ཡང་དེ་དང་འདྲའོ། །ལྷ་ཕྲེང་བ་ཐོགས་པ་དག་གཉིས་ཀྱིས་གཉིས་སྤྲོད་ཀྱི་ཁུ་བ་ནི་མི་འབྱུང༌། བུ་མངལ་ན་ཞག་བདུན་གནས་ནས་དཀུ་གཡས་ནས་འབྱུང་ངོ༌། །རྒྱལ་ཆེན་བཞིའི་རིས་ཀྱི་ལྷ་བར་དོར་འཆི་བའི་དུས་མི་བྱེད། སུམ་ཅུ་རྩ་གསུམ་པའི་ལྷ་ཨག་ཚོམ་དང་སྦུ་ཐུང་བ། ཆོ་འཕྲུལ་ཆེན་པོ་བསྟན་པ་ལས། མངོན་པར་རྟོགས་པ་གཅིག་ཏུ་འདུས་པ་ལ། བདེན་པ་བཞིར་ཡོངས་སུ་བརྗོད། བྱང་ཆུབ་ཀྱི་གནས་ཀྱི་རྗེས་སུ་འཇུག་པས། བྱང་ཆུབ་སེམས་དཔའ་ཞེས་བྱའོ། །རྩོམ་པ་ཆེན་པོ་ཉམས་འོག་ཏུ་ཆུད་པར་བྱེད་པ་དང༌། ཡེ་ཤེས་ཆེན་པོ་ཡོངས་སུ་རྫོགས་པར་བྱེད་པས། སེམས་དཔའ་ཆེན་པོ་ཞེས་བྱའོ། །སངས་རྒྱས་ཀྱིས་ཡོངས་སུ་གཟུང་བའི་ཚིག་གིས་སེམས་ཅན་ཐམས་ཅད་ཀྱི་ཉེས་པར་སྨྲ་བ་ཟིལ་གྱིས་ནོན་པར་བྱེད་པ་དེ་ལྟ་བུ་ནི་ཆོས་སྨྲ་བ་ཡིན་ནོ། །སེམས་ཅན་ཐམས་ཅད་ལ་འདུན་ཅིང་མི་དགེ་བ་མི་བྱེད་པ་ནི་ང་རྒྱལ་མེད་པའོ། །བདག་ཚུལ་ཁྲིམས་ལ་གནས་ལ། སེམས་ཅན་ཐམས་ཅད་ཀྱི་འགྱོད་པ་དང༌། ཀུན་ནས་སྡང་བ་བསལ་བའི་ཕྱིར་ཆོས་སྟོན་པ་ནི་འདུལ་བ་སྨྲ་བའོ། །བྱང་ཆུབ་
སེམས་དཔའི་སྡེ་སྣོད་ལས། བདག་དང་སེམས་ཅན་དང་གང་ཟག་ལ་སོགས་པ་ནི་ཡང་དག་པ་མ་ཡིན་པའོ། །བྱིས་པ་ཐོས་པ་དང་མི་ལྡན་པས། བདག་ལ་སོགས་པ་ཡོངས་སུ་རྟོགས་པ་ནི་ཡང་དག་པ་མ་ཡིན་པ་ཀུན་རྟོག་པའོ། །ང་ནི་ཚུལ་ཁྲིམས་ལྡན་ཞེས་བདག་མ་བསྙེམས། འདི་ནི་ཚུལ་ཁྲིམས་ངན་ཞེས་གཞན་མ་བརྙས། ཚུལ་ཁྲིམས་ཙམ་གྱིས་གཞན་ལ་གང་བརྙས་པ། །བསྙེམས་ཕྱིར་དེ་ནི་ཚུལ་ཁྲིམས་འཆལ་ཞེས་བྱ། དེ་བཞིན་གཤེགས་པའི་ཡེ་ཤེས་ཆགས་པ་མེད་པ་ནི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཀྱི་ཤིང་ལ་སོགས་པ་ཐམས་ཅད་གཅིག་ཏུ་སྤུངས་ཏེ། བསྲེགས་ལ་རྒྱ་མཚོ་ཆེན་པོར་སྦྱངས་ནས། དེ་ལས་རྡུལ་བླངས་ན་འདི་ནི་འདིའོ་ཞེས་བྱ་བར་ཡང་མཁྱེན་ལ་ཆགས་པ་ཡང་མི་མངའོ། །རྒྱུན་དུ་ཞུགས་པ་སྲིད་པ་བརྒྱད་པ་མངོན་པར་སྒྲུབ་པ་ནི་གནས་མ་ཡིན་ནོ། །ཚེ་དེ་ཉིད་ཀྱིས་ཡོངས་སུ་མྱ་ངན་ལས་འདས་པ་ནི་གནས་ཡིན་ནོ། །དེ་བཞིན་གཤེགས་པའི་སྐུ་ལ་ཆོས་གོས་སོར་བཞི་ཙམ་གྱིས་མི་རེག་མོད་ཀྱི། རྣམ་པར་འཐོར་རླུང་གིས་ཀྱང་བསྐྱོད་པར་མི་ནུས་སོ། །བྱང་ཆུབ་སེམས་དཔའ་སེམས་དང་པོ་བསྐྱེད་པ་རྣམས་ཀྱི་བྱམས་པ་ནི་སེམས་ཅན་ལ་དམིགས་པའོ། །སྤྱོད་པ་ལ་ཞུགས་པ་རྣམས་ཀྱི་ནི་ཆོས་ལ་དམིགས་པའོ། །བཟོད་པ་ཐོབ་པ་རྣམས་ཀྱི་ནི་དམིགས་པ་མེད་པའོ། །བྱང་ཆུབ་སེམས་དཔའ་མཁས་པ་ནི་སྦྱིན་པ་ཉུང་ངུ་ཡང་མང་པོར་བྱེད་དོ། །ཡེ་ཤེས་ཀྱི་སྟོབས་ཀྱིས་ལྷག་པར་བྱེད་དོ། །ཤེས་རབ་ཀྱིས་རྒྱས་པར་བྱེད་དོ། །བསྔོ་བས་དཔག་ཏུ་མེད་པར་བྱེད་དོ། །གང་ཟག་སྦྱོར་བ་དམན་པ་ལ་མོས་པ་རྒྱ་ཆེ་བ་ཡང་ཡོད། མོས་པ་དམན་པ་ལ་སྦྱོར་བ་རྒྱ་ཆེ་བ་ཡང་ཡོད། བུད་མེད་ནི་ཉེས་པ་མང་བ་སྒྱུ་མཁས་པ་སེམས་ཡང་བ། སེམས་འགྱུར་བ་སེམས་མི་བརྟན་པ། སེམས་རབ་ཏུ་གཡོ་ཞིང་མི་བརྟན་པ་སྤྲེའུའི་སེམས་སྤྲེའུ་དང་མཚུངས་པ་སྒྱུ་མ་སྟོན་པ་ལ་མཁས་པ་སྟེ། དེའི་ཕྱིར་བུད་མེད་ཅེས་བྱའོ། །བྱང་ཆུབ་སེམས་དཔའ་མཁས་པ་ནི་ལྡོག་པ་བཞི་བསྐྱེད་དེ། འདོད་པ་དང༌། སྲིད་པ་དང༌། བྱས་པ་མི་གཟོ་བ་དང༌། འདུ་བྱེད་དུ་གཏོགས་པའི་སྡུག་བསྔལ་ལས་བཟློག་
པའོ། །ཐེག་པ་ཆེན་པོ་ལ་ཞུགས་པའི་རིགས་ཀྱི་བུས། བུད་མེད་ཁ་དོག་རྒྱས་པ་མཐོང་ན་འདུ་ཤེས་བཞི་བསྐྱེད་པར་བྱ་སྟེ། ཉམས་པར་འདུ་ཤེས་པ་དང༌། གཡང་སར་འདུ་ཤེས་པ་དང༌། ཕྱི་ས་ཁུང་དུ་འདུ་ཤེས་པ་དང༌། རྣག་ཏུ་འདུ་ཤེས་བསྐྱེད་དོ། །གལ་ཏེ་དེ་ལྟར་བརྟགས་ཀྱང་འདོད་ཆགས་སྐྱེ་བ་ལྟ་ན། འདུ་ཤེས་གསུམ་བསྐྱེད་པར་བྱ་སྟེ། མ་འདྲ་བ་ལ་མའི་འདུ་ཤེས་དང༌། སྲིང་མོ་འདྲ་བ་ལ་སྲིང་མོའི་འདུ་ཤེས་དང༌། བུ་མོ་འདྲ་བ་ལ་བུ་མོའི་འདུ་ཤེས་བསྐྱེད་དོ། །ཤཱ་རིའི་བུ་དེ་བཞིན་གཤེགས་པའི་བསྟན་པའི་བར་དུ་གཅོད་པ་དང༌། འཇིག་པར་བྱེད་པ་ནི་དགེ་སློང་སྡིག་ཅན་ལས་གཞན་གང་ཡང་མེད་དོ། །བྱང་ཆུབ་སེམས་དཔའ་ཁྱིམ་པ་ཆོས་ལྔ་དང་ལྡན་ན་སངས་རྒྱས་འབྱུང་བ་མཉེས་པར་མི་བྱེད། དགེ་བའི་བཤེས་གཉེན་ལ་མི་བརྟེན། དལ་བ་འབྱོར་བ་མི་རྙེད། དགེ་བའི་ཆོས་བསྒྲུབས་པ་ཆུད་གཟོན། སྡོམ་པ་ལ་གནས་པའི་བྱང་ཆུབ་སེམས་དཔའི་རྗེས་སུ་མི་སློབ་འཚང་མི་རྒྱའོ། །ལྔ་ནི་རྒྱལ་པོས་བཀྲབ་པར་འགྱུར། སྐྱེ་བོ་མང་པོས་སྐྲག་པར་འགྱུར་ལ། སྐྱེ་བོ་མང་པོས་བདག་ཅག་གི་འདི་བགྱིར་གསོལ་ཞེས་དོན་བཅོལ་བ་ལས་བྱ་བར་ཁས་འཆེས་ནས་མི་བྱེད་པ་དང༌། དགེ་སློང་དང་དགེ་སློང་མ་དང་དགེ་བསྙེན་དང༌། དགེ་བསྙེན་མ་གྲོང་ངམ། ལྗོངས་སམ་ཡུལ་ལམ་ཕོ་བྲང་འཁོར་དུ་གནས་པར་གྱུར་པ་ལ། དེ་དག་གིས་ཚུལ་ཁྲིམས་ཉམས་པར་བྱེད་པ་དང༌། ཕ་མ་དང་བུ་ཕོ་དང་བུ་མོ་དང་སྲིང་མོ་དང་མཛའ་བོ་དང༌། ཉེ་དུ་དང་སེམས་ཅན་གཞན་ཡང་རུང་སྟེ། ཆོས་བྱེད་པའི་བར་ཆད་བྱེད་པ་དང༌། དེ་བཞིན་གཤེགས་པའི་བསྟན་པ་ཟབ་མོ་ཐོས་ན་མ་དད་ཅིང༌། ཁ་ཟེར་ལ་གཞན་ཡང་དེ་ལས་འདུན་པ་བཟློག་པ་དང༌། བློན་པོའམ་འཁོར་གཞན་སྟོབས་ཆེན་པོ་ལ་བརྟེན་ཅིང༌། དབང་ཕྱུག་བསྙེམས་པས་སྐྱེ་བོ་མང་པོ་ལ་གཤེ་བརྒྱད། འཕྱས་འདོགས་འཐིང་སླད་བྱེད་དོ། །རབ་ཏུ་བྱུང་བ་ཡང་ཆོས་ལྔ་དང་ལྡན་ན་ད་ལྟར་འགྱུར་ཏེ། ལྔ་ནི་འཆལ་པའི་ཚུལ་ཁྲིམས་སྤྱོད་པ་དང༌། དམ་པའི་ཆོས་ལ་སྨོད་པ་དང༌། རྙེད་པ་དང་བཀུར་སྟི་དང༌། ཚིགས་སུ་བཅད་པ་ལ་ཆགས་པ་དང༌། བདག་ཏུ་ལྟ་བའི་ཐིབས་པོ་དང༌། གཞན་གྱི་ཁྱིམ་ལ་ཕྲག་དོག་དང་སེར་སྣ་བྱེད་པའོ། །ཡེ་ཤེས་ཀྱི་ཚོགས་
ནི་སྦྱིན་པ་བཞི་སྟེ། ཆོས་སྨྲ་བ་ལ་རིམ་གྲོ་དང༌། སྨྱུ་གུ་དང༌། སྣག་ཚ་དང༌། གླེགས་བམ་སྦྱིན་པ་དང༌། སྟན་སྣ་ཚོགས་སྦྱིན་པ་དང༌། བཀུར་སྟི་དང་ཚིགས་སུ་བཅད་པ་ཐམས་ཅད་སྦྱིན་པ་དང༌། གཡོ་མེད་པར་ལེགས་སོ་ཞེས་བྱ་བ་སྦྱིན་པའོ། །དེ་ལྟར་གྱི་སངས་རྒྱས་མངོན་སུམ་དུ་བཞུགས་པ་ཏིང་ངེ་འཛིན་ལས། བུ་དང་བུ་མོ་ལ་དགྲར་འདུ་ཤེས་པ། ཆུང་མ་ལ་སྲིང་མོར་འདུ་ཤེས་པ་དང༌། འདི་ལྟར་མ་གུས་པས་ན་དམ་པའི་ཆོས་ནུབ་བར་འགྱུར་རོ། །གང་ཞིག་ཏིང་ངེ་འཛིན་འདི་ནི་གཟུང་འདོད་པས། ངོ་མི་རྟག་པ་ཐམས་ཅད་སྤང་བར་བྱ། ང་ཡོངས་སུ་མྱ་ངན་ལས་འདས་ནས་ལོ་བཞི་སྟོང་དུ་ཏིང་ངེ་འཛིན་འཛམ་བུའི་གླིང་ན་སྤྱོད་པར་འགྱུར་ཏེ། ལོ་བརྒྱ་པ་ཐ་མ་ཕྱི་མའི་ཚེ། ཕྱི་མའི་དུས་ལྔ་བརྒྱ་པ་ཐ་མར་གྱུར་པ། དངོས་པོའི་འདུ་ཤེས་ཅན་གྱིས་སངས་རྒྱས་མཐོང་བར་མི་འགྱུར། ཆོས་ཀྱི་འདུ་ཤེས་ཅན་གྱིས་མཐོང་བར་མི་འགྱུར། རྣམ་པར་སྨིན་པའི་རེ་བས་གཏོང་བ་ཕུན་སུམ་ཚོགས་པར་མི་འགྱུར། བསྒོམ་པ་ལ་མངོན་པར་དགའ་བས་ཚུལ་ཁྲིམས་རྣམ་པར་དག་པར་མི་འགྱུར། ཆོས་ལ་སེར་སྣ་བྱེད་པས་མང་དུ་ཐོས་པར་མི་འགྱུར། གང་ཟག་ལ་བརྟེན་པས་ཡོངས་སུ་མྱ་ངན་ལས་འདའ་བར་མི་འགྱུར། བྲེ་མོའི་གཏམ་ལ་དགའ་བས་བདེན་པ་མཐོང་བར་མི་འགྱུར། གནས་ལ་དགའ་བས་འབྲས་བུ་ཐོབ་པར་མི་འགྱུར། རྗེས་སུ་ཆགས་པས་སྐྱོན་མཐོང་བར་མི་འགྱུར། གནོད་སེམས་ལ་དགའ་བས་ངེས་པར་མི་འགྱུར། སྡང་ཞིང་ཞེ་འགྲས་པས་ཕན་ཡོན་མཐོང་བར་མི་འགྱུར་རོ། །བཀའ་མི་བཅག་པ་དང༌། མཛའ་རྟག་པ་དང༌། མི་རྟག་པ་སྤངས་པ་དང༌། ཉེས་པར་ལྟ་བ་མེད་པས་སློབ་དཔོན་གྱི་ཕྱི་བཞིན་འབྲང་བར་བྱའོ། །བསོད་ནམས་ཀྱི་སྟོབས་ཀྱི་རྟོག་པ་བརྗོད་པ་ལས། གང་དག་ཤིན་ཏུ་གཏང་དཀའ་བ། །ཉུང་དུའང་མང་པོ་གཏོང་བྱེད་ན། །ཤི་ཡང་དེ་ནི་ཤི་མ་ཡིན། །རྒྱགས་ཟད་པ་ཡི་མགྲོན་པོ་བཞིན། །བསོད་ནམས་མིན་པས་ཕན་པའི་སྨན། །ཤིན་ཏུ་གནོད་པ་དག་ཏུ་འགྱུར། །མཐུ་རྩལ་ཉམས་ལ་དྲེགས་པ་ཡི། །བག་མེད་ཆང་གིས་རྟག་མྱོས་ཤིང༌། །གང་དག་བསོད་ནམས་མི་བྱེད་པ། །དེ་དག་ཤི་བ་སྙིང་ནས་ཤི། །
སོར་མོའི་ཕྲེང་བས། འཇམ་དཔལ་སྐྱེས་བུ་ཆོས་འདོད་པ་ལ་ལ་ཞིག་བདག་ཉིད་དུས་གཉིས་སུ་ཟ་བ་ལས། ལ་ལ་ཞིག་གིས་བསྟན་ཏེ། ཟས་ལན་གཅིག་པར་གྱུར་ན། སྲིན་བུའི་རིགས་བརྒྱད་ཅུ་གསོད་པར་འགྱུར་རོ། །ཇི་སྟེ་དེ་ལྟར་གྱུར་ན་དེ་དག་ལ་སྲོག་གཅོད་པ་དག་པར་མི་འགྱུར་རོ། །དམ་པའི་ཆོས་ནུབ་པར་འགྱུར་བའི་དུས་ན་དགེ་སློང་གི་གཞི་ལས་གཞན་དུ་འགྱུར། སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་མ་བྱས་པ་རྟག་པར་གཡུང་དྲུང་མཚན་དང་དཔེ་བྱད་བཟང་པོས་བརྒྱན་པ་ཡོད་དེ། དཔེར་ན་ཆུ་དང་འོ་མར་འདྲེས་པ་མི་དམིགས་པ་དེ་བཞིན་དུ། སངས་རྒྱས་ཀྱི་དབྱིབས་ཀྱང་ཉོན་མོངས་པས་གཡོགས་མོད་ཀྱི། དེ་གཉིས་འདྲེས་པར་འགྱུར་བའི་གནས་མེད་དོ། །ཉོན་མོངས་པ་མེད་པ་ནས། ཉི་ཟླ་སྤྲིན་ལས་གྲོལ་བ་བཞིན་སྣང་ངོ༌། །སྔོན་ཕྱུགས་སུ་གྱུར་པའི་སེམས་ཅན་མ་རྒལ་བ་ལ་ད་དུང་སོ་སྒྲ་ཁྲིག་ཁྲིག་ཟེར་བ་གང༌། དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་སོ། །དེ་བཞིན་དུ་སྔོན་ལས་ངན་པ་བྱེད་བྱེད་པ་རིལ་ཡིད་མི་ཆེས་ཏེ། དེ་དག་ལ་སྐྱོན་རིལ་འབྱུང་ངོ་ཞེས་འབྱུང་ངོ༌། །བསོད་ནམས་ཅན་དེ་དག་ནི་དད་པར་འགྱུར་ཏེ། དེ་དག་ནི་སྐྱེ་བ་ཐམས་ཅད་དུ་ལེགས་དགུ་འགྲུབ་པར་འབྱུང༌། ཁ་ཆེའི་ཡུལ་གྱི་དགེ་སློང་རྣམས་སྒྲུབ་པའི་དོན་མི་ཤེས་ནས། ཐེག་པ་ཆེན་པོ་ཐམས་ཅད་ལ་སྨད་པ་འབྱུང་སྟེ། ང་ལ་སྐུར་པ་འདེབས་པ་དེ་ལ་ཅི་ལྟར་བྱ་ཞེས། ང་ཡང་ངོ་ཚ་བ་སྐྱེའོ། །མ་འོངས་པ་ན་སེམས་ཅན་གང་དག་བུདྡྷའི་སྐུ་ཕ་མ་ཕྲད་པ་ལས་སྐྱེས་པ། རུས་པ་དང༌། རྒྱུས་པ་དང༌། རྐང་དང་ཁྲག་ཅན་མིའི་ལུས་སོ་ཞེས་ཟེར་བ་དེ་དག་འཇིག་རྟེན་ན་མི་སྡུག་པའི་སྐྱོན་ཅན་ཞ་བོ་གཞོགས་ཉམས་པ་ཁམ་ནམ་པ་ཡན་ལག་མ་ཚང་བ་དང༌། ངན་སོང་གི་སྡུག་བསྔལ་གྱི་སྐལ་བ་ཅན་དུ་འགྱུར་རོ། །དཔེར་ན་སོག་བུར་གྱི་ཕུང་པོའི་ནང་དུ་མེ་བཅུག་ན། སོག་༌༌༌༌མའི་ཕུང་པོའི་དབུས་ཚིག་ལ་མཐའ་འཁོར་མི་ཚིག་པ་དེ་བཞིན་དུ། འཇམ་དཔལ་དང་པོ་ང་སྐྱེས་པའི་ཡུལ་ན་ནན་ཏན་ལྷུར་ལེན་པ་ཞིག་སྟེ་ཚིག་པ་ལས། ལྷོ་ཕྱོགས་ཀྱི་རྒྱུད་དུ་ལྷག་མ་ལུས་ཏེ། མཐའ་འཁོར་ན་གནས་པའི་བྱང་ཆུབ་སེམས་དཔའ་
སྐྱེས་པ་དེར། རྫོགས་པའི་སངས་རྒྱས་སྣང་བར་གྲགས་པ་ཡིན་ནོ། །གང་གཅིག་ཏུ་སྟོང་བར་སྨྲ་བ་དང༌། བདག་ཏུ་ལྟ་བ་དེ་གཉིས་ནི། དམ་པའི་ཆོས་འཇིག་པ་དང༌། ཁས་འབུབ་པའོ། །དབུ་མའི་ལམ་ཞེས་བྱ་བ་ནི་ཐེག་པ་ཆེན་པོའི་ཚིག་བླ་དགས་སོ། །དབུ་མའི་ལམ་མི་ཤེས་པས་སེམས་ཅན་རྣམས་དབུ་མའི་ལམ་གཞན་དུ་རྟོག་གོ །སོར་མོའི་ཕྲེང་བའི་མ་ཡང་སྤྲུལ་པ་ཡིན་པར་འབྱུང༌། སོར་མོའི་ཕྲེང་བ་དང་འཇམ་དཔལ་གཉིས་སངས་རྒྱས་ཡིན་པར་བཤད། འཕགས་པ་ཆོས་ཡང་དག་པར་སྡུད་པ་ལས། བྱང་ཆུབ་སེམས་དཔའ་ནི་ཡལ་བར་འདོར་བ་བཅུ་དང་ལྷན་ཅིག་མི་འགྲོགས་ཏེ། བཅུ་ནི་དམ་པའི་ཆོས་ཡོངས་སུ་འཛིན་པ་དང༌། དམ་པའི་ཆོས་ཉན་པ་དང༌། སེམས་ཅན་ཡོངས་སུ་སྨིན་པར་བྱ་བ་དང༌། དམ་པའི་ཆོས་སྦྱིན་པ་དང༌། བླ་མ་ཐམས་ཅད་ལ་རིམ་གྲོ་བྱ་བ་དང༌། བདུད་ཀྱི་ལས་དང༌། སེམས་ཅན་དཀྲུགས་པ་དང༌། དམ་པའི་ཆོས་རབ་ཏུ་རྣམ་པར་འཇིག་པ་དང༌། ཕ་རོལ་ཏུ་ཕྱིན་པ་དང༌། ཕུང་པོ་གསུམ་པོའི་ཡོངས་སུ་བསྔོ་བ་དང་ལྷན་ཅིག་མི་འགྲོགས་སོ། །འཛམ་བུ་ཆུ་བོའི་གསེར་ལས་གྲུབ་པ། མགར་བས་མ་བརྡུངས། སྦྱིན་པ་ནི་ཟས་ལ་སོགས་པ་སྦྱིན་པའོ། །སྦྱིན་པ་ཆེན་པོ་ནི་བུ་དང་ཆུང་མ་དང་རྒྱལ་སྲིད་ལ་སོགས་པ་གཏོང་བའོ། །ཤིན་ཏུ་སྦྱིན་པ་ནི་མགོ་དང་ལག་བ་ལ་སོགས་པ་གཏོང་བའོ། །བཅོམ་ལྡན་འདས་བྱང་ཆུབ་སེམས་དཔའ་ནི་མྱ་ངན་ལས་འདས་པ་ལས་རྣམ་པར་གྲོལ་ཞིང༌། འཁོར་བ་ལས་ནི་མ་ལགས་སོ། །དེ་ཅིའི་སླད་དུ་ཞེ་ན། བྱང་ཆུབ་སེམས་དཔའ་མྱ་ངན་ལས་འདས་བ་ལ་འཇིགས་པར་བགྱིའི། །འཁོར་བ་ལ་ནི་མ་ལགས་སོ། །བྱང་ཆུབ་སེམས་དཔས་ཆོས་ཤིན་ཏུ་མང་པོ་བསླབ་པར་མི་བགྱིའོ། །བཅོམ་ལྡན་འདས་བྱང་ཆུབ་སེམས་དཔས་ཆོས་གཅིག་ཏུ་བཟུང་ཞིང་རབ་ཏུ་རྟོགས་པར་བགྱིས་ན། སངས་རྒྱས་ཀྱི་ཆོས་ཐམས་ཅད་ལག་མཐིལ་དུ་མཆིས་པ་ལགས་སོ། །ཆོས་གཅིག་པོ་གང་ཞེ་ན། འདི་ལྟ་སྟེ། སྙིང་རྗེ་ཆེན་པོའོ། །བཞི་པ་བསྒྲུབ་པ་ལས། ཐམས་ཅད་མཁྱེན་པ་ཉིད་དང༌། སེམས་ཅན་འགྲོལ་བ་དང༌། དཀོན་མཆོག་གསུམ་གྱི་གདུང་མི་འཆད་པར་བྱ་བ་དང༌། སངས་རྒྱས་
ཀྱི་ཞིང་གི་ཡོན་ཏན་བཀོད་པ་ཡོངས་སུ་བཟུང་བ་ལ་དམིགས་ནས། དེ་བཞིན་གཤེགས་པའི་མཆོད་པ་བྱའོ། །བཞི་པོ་འདི་དག་ནི་ལྷག་པའི་སེམས་བསྐྱེད་པ་སྟེ། བཞི་ནི་སེམས་ཅན་བསྡུ་བ་དང༌། སྨིན་པར་བྱ་བ་དང༌། དགེ་བའི་རྩ་བ་བསགས་པ་དང༌། ཆོས་རྟོགས་པར་བྱ་བའི་ཕྱིར་སེམས་བསྐྱེད་པའོ། །སེམས་བསྐྱེད་པ་བྲག་ཅ་ལྟ་བུ་བཞི་ནི་སློང་བ་ལ་ཁོང་ཁྲོ་བ་མེད་པ་དང༌། ལོག་པར་ཞུགས་པ་ལ་སྙིང་རྗེ་བ་དང༌། ཤེས་རབ་ལས་མ་ཉམས་པ་དང༌། རྩོལ་བ་ཉམས་འོག་ཏུ་ཆུད་པའི་སེམས་སོ། །སེམས་བསྐྱེད་པ་མངོན་པར་འཕགས་པ་བཞི་ནི་ཚུལ་ཁྲིམས་དང༌། ཐོས་པ་དང༌། བྱམས་པ་དང༌། སྙིང་རྗེ་མངོན་པར་འཕགས་པའོ། །སེམས་བསྐྱེད་པ་རྡོ་རྗེ་ལྟ་བུ་བཞི་ནི། བསམ་པ་དང༌། མཛའ་བ་དང༌། ནན་ཏན་དང༌། ཐེག་པ་ཆེན་པོ་ལས་མི་ཕྱེད་པའོ། །སེམས་བསྐྱེད་པ་རྙེད་དཀའ་བ་བཞི་ནི། ཉོན་མོངས་པ་དང༌། རྙེད་པ་དང༌། བཀུར་སྟི་དང༌། ཚིགས་སུ་བཅད་པ་དང༌། ཐེག་པ་དམན་པ་དང༌། སྐྱེ་བོ་མི་བགྲུངས་པ་དང་མ་འདྲེས་པའོ། །སེམས་བསྐྱེད་པ་བླ་ན་མེད་པ་བཞི་ནི་ཕངས་པ་ཐམས་ཅད་གཏོང་བ་དང༌། བཏང་ནས་མི་འགྱོད་པ་དང༌། རྣམ་པར་སྨིན་པ་ལ་མི་རེ་བ་དང༌། བྱང་ཆུབ་ཏུ་བསྔོ་བའི་སེམས་བྱའོ། །སྤྱི་བོར་ཕྱིན་པའི་ཆོས་བཞི་ནི། ཤེས་རབ་ཀྱི་ཕ་རོལ་དུ་ཕྱིན་པ་དང༌། ཐབས་ལ་མཁས་པ་དང༌། དམ་པའི་ཆོས་འཛིན་པ་དང༌། སེམས་ཅན་སྨིན་པར་བྱེད་པའོ། །ཆོས་གྱ་ནོམ་པ་དང༌། དམ་པའི་མཆོག་བཞི་ནི་སེམས་ཅན་ལ་ཁོང་ཁྲོ་བ་མེད་པ་དང༌། གང་དག་འགལ་བར་བྱེད་པ་དག་ཉིད་ལ་རབ་ཏུ་ཐར་བར་བྱ་བར་སེམས་བསྐྱེད་པ་དང༌། ཡུལ་རྒྱ་ཆེན་པོ་འབྱོར་ཀྱང་དེ་ལ་བག་ཡོད་པ་དང༌། དབུལ་བས་ཕོངས་ཀྱང་ཆོས་སྤྱོད་པའོ། །དགེ་བའི་ཆོས་བཞི་ནི། དགེ་བ་ཐམས་ཅད་ལ་སྦྱོར་བ་དང༌། མ་བསླབས་པ་ལ་མི་བརྙེས་པ་དང༌། མ་གསོལ་བར་སེམས་ཅན་གྱི་བཤེས་གཉེན་བྱེད་པ་དང༌། ཡོན་ཏན་བསྒྲུབས་པ་ལ་ལན་རེ་བ་མེད་པའོ། །ཚངས་པས་བྱིན་གྱིས་ཞུས་པ་ལས། ཆོས་བཞི་དང་ལྡན་ན་བྱང་ཆུབ་སེམས་དཔའ་དམུ་རྒོད་ཡིན་ཏེ། གང་ཞེ་ན། ཁྭ་ལྟར་
སྐྲུ་ཞིང་མུ་ཅོར་སྨྲ་བ་ལ་གཞན་གྱི་ཡིད་དང་མི་སྦྱོར་བ་ཡིན། བདག་བསྟོད་ཅིང་གཞན་སྨོད་པ་ཡིན། ཚེ་འདི་ཆེད་ཆེར་འཛིན་པ་ཡིན། མཐུན་པ་འབྱེད་པ་ཡིན་ནོ། །གང་ཟག་ཕྲག་དོག་ཅན་དང༌། མི་བརྩོན་པ་དང༌། སྨྲ་བ་ལ་དགའ་བ་དང༌། བྲེ་མོའི་གཏམ་བྱེད་པ་དང༌། ཚུལ་བཞིན་མ་ཡིན་པ་དང༌། སྦྱོར་བ་དང་བྲལ་བ་རྣམས་གང་ན་བ་དེ་ན་སངས་རྒྱས་དང་བྱང་ཆུབ་སེམས་དཔའ་མི་གནས་སོ། །བཞི་པོ་འདི་དག་ནི་བསྟན་པ་འདི་ལ་རབ་ཏུ་བྱུང་བའི་གཡང་ས་ཡིན་ཏེ། གང་ཞེ་ན། འདི་སངས་རྒྱས་ལ་མ་གུས་པ་དང༌། ཆོས་སྤོང་བ་དང༌། ཆོས་སྨྲ་བ་ལ་སྡང་བ་དང༌། མངོན་པར་བརྩོན་པ་མེད་པ་དད་པས་བྱིན་པ་ལེན་ཏོ། །མྱ་ངན་མེད་ཀྱིས་བྱིན་པ་ལུང་བསྟན་པ་ལས། བྱང་ཆུབ་སེམས་དཔའ་ལ་ནི་ཁྱིམ་པའམ། རབ་ཏུ་བྱུང་བ་ཞེས་གཟུང་བར་མི་བྱའོ། །ཅིའི་ཕྱིར་ཞེ་ན། དེ་དག་ནི་བསམ་པ་དང༌། ཤེས་རབ་དང༌། ཡེ་ཤེས་ཀྱིས་ཕྱེ་བ་ཡིན་པའི་ཕྱིར་རོ། །སྤོབས་པའི་བློ་གྲོས་ཀྱིས་ཞུས་པ་ལས། ཆོས་ལྔ་དང་ལྡན་ན། སྐྱེ་བ་ཐམས་ཅད་དུ་དཀོན་མཆོག་གསུམ་དང་ཕྲད་པ་འཐོབ། ཆོས་ཀྱང་ཐོས་ཇི་ལྟར་འདོད་པ་བཞིན་ཕུན་སུམ་ཚོགས་པ་ཡང་འཐོབ་པར་འགྱུར་ཏེ་ལྔ་ནི། བདག་ཉིད་དཀོན་མཆོག་གསུམ་ལ་སྐྱབས་སུ་སོང་ནས། གཞན་ཡང་དེ་ལ་འཛུད་པ་དང༌། དེ་བཞིན་གཤེགས་པའི་སྐུ་གཟུགས་རྒྱས་པར་བྱེད་དུ་འཇུག་པ་དང༌། མཁན་པོ་དང་སློབ་དཔོན་ལ་གུས་པ་དང་བཅས་ཤིང་མཐུན་པར་འཛིན་པ་དང༌། སེམས་ཅན་ཐམས་ཅད་ལ་བུ་གཅིག་པ་བཞིན་སེམས་པ་དང༌། མདོ་སྡེ་ཟབ་མོ་ཁ་དོན་བྱེད་པ་ལ་སོགས་པས་བར་ཆད་མེད་པར་བསྒྲུབ་པའོ། །འཕགས་པ་ལས་ཀྱི་སྒྲིབ་པ་རྣམ་པར་དག་པ་ལས། བྱང་ཆུབ་སེམས་དཔའ་འདོད་པའི་ཡོན་ཏན་ལྔ་པོ་དག་ལ་མངོན་པར་དགའ་ཞིང་མི་གཏོང་མི་སྤོང་ལ། སངས་རྒྱས་ཀྱི་ཆོས་ཀྱང་འདོད་པའི་ངོ་བོ་ཉིད་དུ་མཐོང་བ་དེས་ནི་ལས་ཀྱི་སྒྲིབ་པ་དག་འཐོབ་པར་འགྱུར་རོ། །ཀུན་ནས་སྒོའི་ལེའུ་ལས། བསྐལ་པ་བྱེ་བ་བསམ་ཡས་སུ། །ང་ཡི་ཆོས་ནི་གནས་གྱུར་ལ། །ཉིན་གཅིག་བཞིན་དུ་ཉིན་རེ་ལ། །སྟོང་གསུམ་སེམས་ཅན་ཇི་སྙེད་པ། །ཐམས་ཅད་མྱ་ངན་འདས་བྱས་ཤིང༌། །
ཐམས་ཅད་དེ་ལྟར་བྱས་ཀྱང་ནི། །སེམས་ཅན་ཁམས་ལ་ཟད་པ་མེད། །ངེས་པ་དང་མ་ངེས་པར་འགྲོ་བའི་ཏིང་ངེ་འཛིན་འཇུག་པ་ལས། གང་ཞིག་གིས་སྡང་བའི་སེམས་ཀྱིས། ཉན་ཐོས་དང་རང་སངས་རྒྱས་དཔག་ཏུ་མེད་པའི་ཚུལ་ཁྲིམས་ལ་སོགས་པའི་ཕུང་པོ་ལྔ་མེད་པར་བྱས་ལ། གཞན་ཞིག་གིས་སྡང་བའི་སེམས་ཀྱིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའི་ཚུལ་ཁྲིམས་ཐ་ན་བསླབ་པ་གཅིག་ཙམ་ཡང་མེད་པར་བྱས་ན། དེ་བས་སྡིག་པ་ཆེས་གྲངས་མེད་པ་བསྐྱེད་དོ། །འགའ་ཞིག་གིས་ཕྱོགས་བཅུའི་འཇིག་རྟེན་གྱི་སེམས་ཅན་ཐམས་ཅད་བཙོན་རར་བཅུག་པ་བས། འགའ་ཞིག་གིས་སྡང་བའི་སེམས་ཀྱིས་བྱང་ཆུབ་སེམས་དཔའ་ལ་ཁྲོས་ཏེ། འདི་དང་མ་ཕྲད་པར་གྱུར་ཅིག་ཅེས་འདུག་ན་སྔ་མ་བས་ཆེས་སྡིག་ཆེའོ། །འགའ་ཞིག་གིས་ཕྱོགས་བཅུའི་སེམས་ཅན་ཐམས་ཅད་ཀྱི་མིག་ཕྱུང་བ་བས། འགའ་ཞིག་གིས་བྱང་ཆུབ་སེམས་དཔའ་ལ་ཁྲོས་ཏེ་བལྟས་ན་སྡིག་པ་ཆེས་ཆེའོ། །འགའ་ཞིག་གིས་ཕྱོགས་བཅུའི་འཇིག་རྟེན་ཐམས་ཅད་ཀྱི་རང་སངས་རྒྱས་པ་རྣམས་རང་སངས་རྒྱས་ལས་ཉམས་པར་བྱས་ལ། འགའ་ཞིག་གིས་བྱང་ཆུབ་སེམས་དཔའ་གཅིག་བྱང་ཆུབ་སེམས་དཔའ་ལས་ཉམས་པར་བྱས་ན་ཆེས་སྡིག་ཆེའོ། །ཤེས་རབ་ཀྱི་ཕ་རོལ་ཏུ་ཕྱིན་པ་འབུམ་པ་ལས། ཕ་རོལ་ཏུ་ཕྱིན་པ་དྲུག་ལ་འཇིག་རྟེན་པ་ཡང་ཡོད། འཇིག་རྟེན་ལས་འདས་པ་ཡང་ཡོད་དེ། དམིགས་པ་ཅན་ཐམས་ཅད་ནི་འཇིག་རྟེན་པ་ཡིན་ཏེ། འཇིག་རྟེན་ལས་མི་གཡོ་མི་འཕགས་པས་སོ་ཞེས་འབྱུང༌། དམིགས་པ་མེད་པ་ནི་འཇིག་རྟེན་ལས་འདས་པ་ཞེས་འབྱུང༌། དེ་གཉིས་ཀ་ཡང་ཕ་རོལ་ཏུ་ཕྱིན་པ་ཞེས་ནི་བྱ་བར་འབྱུང༌། བུ་མོ་བློ་གྲོས་བཟང་མོས་ཞུས་པ་ལས། ཆོས་བཞི་ནི་མཛེས་པར་འགྱུར་རོ། །དགྲ་ལ་ཡང་མི་ཁྲོ་པ་དང༌། བྱམས་པ་ལ་གནས་པ་དང༌། ཆོས་འདོད་པ་དང༌། དེ་བཞིན་གཤེགས་པའི་སྐུ་གཟུགས་བྱེད་དུ་འཇུག་པའོ། །བཞི་དང་ལྡན་ན་ནོར་མང་བར་འགྱུར་ཏེ་དུས་སུ་སྦྱིན་པ་དང༌། འགྱོད་པ་མེད་པར་སྦྱིན་པ་དང༌། ཡིད་དུ་འོང་བ་སྦྱིན་པ་དང༌། རྣམ་པར་སྨིན་པ་ལ་མི་རེ་བར་
སྦྱིན་པའོ། །བཞི་དང་ལྡན་ན་འགྲན་ཟླ་མེད་པར་འགྱུར་ཏེ། གཡོ་མེད་པར་དགེ་བའི་བཤེས་གཉེན་ལ་བརྟེན་པ་དང༌། དགེ་བའི་རྩ་བ་ལ་སེར་སྣ་མི་བྱེད་པ་དང༌། གཞན་གྱི་རྙེད་པ་ལ་དགའ་བ་དང༌། བྱང་ཆུབ་སེམས་དཔའི་བྱ་བ་དང་གནས་པ་ཐམས་ཅད་ལ་མི་ཁྲོ་བའོ། །བཞི་དང་ལྡན་ན་འཆི་བའི་དུས་ཀྱི་ཚེ་སངས་རྒྱས་མདུན་ན་བཞུགས་ཤིང༌། ཆོས་ཐོས་ལ་སྡུག་བསྔལ་མེད་པར་འགྱུར་ཏེ། གཞན་གྱི་བསམ་པ་རྫོགས་པར་བྱེད་པ་དང༌། མོས་པ་མང་བ་དང༌། བྱང་ཆུབ་སེམས་དཔའ་སྦྱིན་པ་བཀོད་པ་སྣ་ཚོགས་སྒྲུབ་པ་དང༌། དཀོན་མཆོག་གསུམ་མཆོད་པར་བརྩོན་པའོ། །དཔལ་སྤོང་གི་མདོ་ལས། འདི་ནི་ཆོས་འདུས་པ་ལ་འཕེལ་བ་སྟེ། ཉེས་པས་ཉེས་པ་ཅན་དུ་མཐོང་ན་འཆགས་ཤིང་མཐོལ་ཏེ་ཕྱིན་ཆད་ཀྱང་སྡོམ་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལྔ་བརྒྱ་པ་ལས། རབ་འབྱོར་གང་ཡང་བཅོམ་ལྡན་འདས་ཀྱིས། གཟུགས་རང་བཞིན་མེད་པ་དང༌། སྐྱེ་བ་མེད་པ་དང༌། གདོད་མ་ནས་ཞི་བ་དང༌། རང་བཞིན་གྱིས་ཡོངས་སུ་མྱ་ངན་ལས་འདས་པར་བསྟན་པ་གང་ཡིན་པ་དེ་ཐམས་ཅད་ནི་ལྡེམ་པོར་དགོངས་པ་མ་ཡིན་པ་སྟེ། སྒྲ་ཇི་བཞིན་པ་ཉིད་དུ་ཤེས་པར་བྱའོ་ཞེས་སྨྲས་ན། དེ་ནི་ཕྱི་རོལ་པས་ཀྱང་ཕྱིས་སོ་སོ་སྐྱེ་བོའི་ཕྱོགས་ལ་གནས་པ་སྟེ། ལོག་པར་སྨྲ་བའོ། །གང་ལ་ལ་ཞིག་གིས་གཟུགས་ལ་ཡང་ཡང་དག་པ་མ་ཡིན་པ་ཀུན་རྟོག་པ་ཙམ་དུ་ཡང་དག་པར་མི་མཐོང་བ་དེ་དག་གཟུགས་ལ་གཟུགས་སུ་དམིགས་པའོ། །ཆོས་ཐམས་ཅད་ཀྱི་ཡོན་ཏན་བཀོད་པའི་རྒྱལ་པོ་ལས། ཆོས་བཞི་དང་ལྡན་པས་དགོན་པར་གནས་པར་བྱ་སྟེ། ཁྱིམ་ན་གནས་པ་སྤོང་བ་དང༌། མི་དགེ་བའི་བཤེས་གཉེན་སྤོང་བ་དང༌། ཁྱིམ་པ་སྤོང་བ་དང༌། བདོག་པ་ཐམས་ཅད་གཏོང་བའོ། །ཆོས་གཉིས་ཀྱིས་དམྱལ་བར་ལྟུང་སྟེ། འདོད་ཆགས་དང་ཞེ་སྡང་ངོ༌། །ཆོས་བཞིས་མཐོ་རིས་སུ་འགྲོ་སྟེ། སེམས་ཅན་ལ་སེམས་སྙོམས་པ་དང༌། བསམ་པ་དག་པ་དང་བདོག་པ་ཐམས་ཅད་གཏོང་བ་དང༌། ཚངས་པར་སྤྱོད་པ་ལ་གནས་པའོ། །དེས་བས་ཞུས་པ་ལས། ཆོས་བཞི་དང་ལྡན་ན་དེ་བཞིན་གཤེགས་པ་མཐོང་བ་དོན་ཡོད་པ་ཡིན་ཏེ། བཞི་ནི་ཡིད་ཆེས་པ་དང༌། དད་པ་དང༌།
ཕངས་པར་འཛིན་པ་དང༌། གུས་པའོ། །བྱང་ཆུབ་སེམས་དཔས་ནི་གང་ལ་བདག་ཉིད་ཀྱང་འདོད་པ་སྤོང་བར་གྱུར་པ་ལས། གཞན་ཡང་འདོད་པའི་སེམས་བསྐྱེད་པར་མི་འགྱུར་བ་དེ་ལྟ་བུའི་གོས་བཅང་བར་བྱའོ། །སངས་རྒྱས་ཀྱི་སྟོབས་བསྐྱེད་པའི་ཚེ་འཕྲུལ་རྣམ་པར་བསྟན་པ་ལས། དེ་དག་ནི་དེ་བཞིན་གཤེགས་པས་མཆོད་པའི་ཕྱིར་ཐ་ན་བཞད་གད་དམ། ཀུ་རེའམ་བྱིས་པའི་ཀྱལ་ཀས་རྩིད་མོ་བྱས་ཀྱང་འཇིམ་པས་མཆོད་རྟེན་བྱེད་ན། དེ་དག་ཐམས་ཅད་ཀྱང་སྡུག་བསྔལ་མཐར་བྱས་ནས་འཚང་རྒྱ་བར་འགྱུར་རོ། །རྡོ་རྗེ་སྙིང་པོའི་གཟུངས་ལས། གང་དག་ཆོས་ཐམས་ཅད་ལ་དངོས་པོ་མེད་པར་ལྟ་བ་དེ་ནི་སྐྱེ་བར་ཡང་མི་འགྱུར། འགག་པར་ཡང་མི་འགྱུར་ཏེ། ཆོས་ཐམས་ཅད་ནམ་མཁའི་ངོས་ལྟ་བུར་མཐོང༌། སངས་རྒྱས་ཀྱི་ཆོས་རྣམས་ཀྱང་མི་དམིགས་མི་འདོར་རོ། །བྱང་ཆུབ་སེམས་དཔའི་སྤྱོད་པ་ངེས་པར་བཤད་པའི་རིན་ཆེན་བྱིན་གྱིས་ཞུས་པ་ལས། བྱང་ཆུབ་སེམས་དཔའི་ཡོན་ཡོངས་སུ་སྦྱོང་བ་ནི་ལྔ་སྟེ། ལྔ་གང་ཞེ་ན། ལུས་མི་དམིགས་པ་དང༌། སྦྱིན་པ་ལ་མ་ཞེན་པ་དང༌། རྣམ་པར་སྨིན་པ་ལ་མི་སྨོད་པ་དང༌། ལེན་པ་ལ་རྣམ་པར་སྨིན་པ་ལ་མི་རེ་བའོ། །བྱང་ཆུབ་སེམས་དཔས་ཆོས་བཞི་རྟག་ཏུ་མངོན་དུ་བྱ་སྟེ། བཞི་ནི་སྟོང་པ་ཉིད་ཀྱི་ཏིང་ངེ་འཛིན་དང༌། སངས་རྒྱས་རྗེས་སུ་དྲན་པ་དང༌། སྙིང་རྗེ་ཆེན་པོ་དང༌། བདག་ཉིད་ཀྱི་ལས་ཀྱི་རྣམ་པར་སྨིན་པའོ། །གླང་པོའི་རྩལ་ལས། ཐམས་ཅད་མཁྱེན་པ་བླ་མེད་པ། །མི་གང་ཞིག་གིས་སངས་རྒྱས་ཤིང༌། །གང་གཱའི་བྱེ་མའི་གྲངས་སྙེད་དག །མེ་ཏོག་རྣམས་ཀྱིས་བཀང་བྱས་ཏེ། །འཇིག་རྟེན་མགོན་ལ་ཕུལ་བ་བས། །གང་གིས་འདིར་ནི་ཐལ་སྦྱར་ནས། །བྱང་ཆུབ་ཏུ་ནི་སེམས་བཏུད་ན། །འདི་ནི་བསོད་ནམས་ཆེས་མང་སྟེ། །དེ་ལ་ཚད་ནི་ཡོད་མ་ཡིན། །དེ་འདྲའི་མཆོད་པ་གང་ཡང་མེད། །དེ་འདྲ་ཡི་དམ་ལ་ཡང་མེད། །སངས་རྒྱས་ཡེ་ཤེས་ཐོབ་འདོད་པས། །ཆོས་རྣམས་གང་ཡང་མི་གཟུང་ཞིང༌། །ཆོས་རྣམས་གང་ཡང་མི་འདོར་རོ། །ཀླུའི་རྒྱལ་པོས་ཞུས་པ་ལས། ཞི་གནས་ཀྱིས་བརྒྱན་ན་ཉོན་མོངས་པ་ཐམས་ཅད་འཇོམས་པར་འགྱུར་རོ། །ལྷག་མཐོང་གིས་
བརྒྱན་ན་ཡང་དག་པ་ཇི་ལྟ་བ་བཞིན་ཤེས་པར་འགྱུར་རོ། །སྒྱུ་མ་ལྟ་བུའི་ཏིང་ངེ་འཛིན་ལས། སེམས་ཅན་ཀུན་ལ་ཕན་པའི་ཕྱིར། །བྱང་ཆུབ་ཏུ་ནི་སེམས་བསྐྱེད་ན། །མཚན་མཆོག་སུམ་ཅུ་གཉིས་ལྡན་པའི། །སངས་རྒྱས་དག་ལ་མཆོད་པར་འགྱུར། །བད་སའི་རྒྱལ་པོ་འཆར་བྱེད་ཀྱིས་ཞུས་པ་ལས། སྦྲང་བུས་རྨ་ཞིག་མཐོང་ནས་རྒྱུག་པ་ཅི་འདྲ་དང༌། །ཕག་ནི་ངན་སྐྱུགས་མཐོང་ནས་རྒྱུག་པ་ཅི་འདྲ་དང༌། །ཁྱི་ནི་ཤ་ཡི་དོན་དུ་ཤན་པར་འགྲོ་བ་ལྟར། །དེ་བཞིན་མི་མཁས་བུད་མེད་དག་ལ་དགའ་བར་བྱེད། །རབ་ཏུ་མེ་འབར་ཐུ་ལུམ་བཟུང་བ་དེ་བླ་ལ། །དེ་བཞིན་ལྕགས་ཀྱི་ཐུ་ལུམ་འབར་བ་ཟ་བླ་ཞིང༌། །མེ་དོང་འཇིགས་སུ་རུང་བ་རྣམས་ལ་རེག་པ་བླའི། །ལག་པ་གཉིས་ཀྱིས་ནམ་ཡང་བུད་མེད་རེག་མི་བྱ། །བུད་མེད་ཀྱི་དབང་དུ་སོང་ནས་འདོད་པ་རྣམས་ལ་བརྟེན་ཅིང༌། ཕ་མ་ལ་བརྙས་པ་དང༌། ངན་འགྲོར་འགྲོ་བར་འཇུག་པ་དེ་ནི་སྐྱེས་པའི་སྐྱེས་བུའི་སྐྱོན་གཉིས་ཡིན་ནོ། །མི་ཡི་གཙོ་བོར་གྱུར་ཅིང་ལྷ་ཡི་ལྷར་གྱུར་པ། །ཐུབ་པ་ཆེན་པོ་འདི་འདྲའི་གསུང་ནི་ཐོས་གྱུར་ན། །རྒས་ཤིང་དབང་པོ་ཤིན་ཏུ་ཉམ་ཆུང་གྱུར་པ་ཡི། །ཕ་མ་སྦྱིན་གནས་དམ་པ་སུ་ཞིག་གསོ་མི་བྱེད། །མི་རྣམས་གང་དག་མི་མཁས་པས། །རྔ་མོ་བོང་བུའི་ཆོས་སྤྱོད་ཅིང༌། །བུད་མེད་མཐོང་ན་རབ་སྙེགས་པ། །ངན་སྐྱུགས་གནས་ལ་ཕག་རྣམས་བཞིན། །མི་གཙང་བུམ་པ་ཁྲ་བོ་ཞིག །ཁ་དོག་ལྡན་པར་མཐོང་མོད་ཀྱི། །ནང་ན་ཧ་ལ་ཧ་ལའི་དུག །དྲག་པོ་ཆེན་པོ་ཡོད་པ་ལྟར། །དེ་ནི་བུད་མེད་བརྒྱན་པ་དག །གང་དང་གང་ན་སྣང་བ་དང༌། །གཅིན་དང་ཕྱི་སས་གང་བ་ཡི། །རྐྱལ་པ་རླུང་གིས་བུས་པ་བཞིན། །སངས་རྒྱས་རྣམས་ཀྱིས་བུད་མེད་དག །ཕྱི་ས་བཞིན་དུ་དམན་བར་བསྒྲགས། །ཇི་ལྟར་ཕག་ནི་ཡུད་ཙམ་ཞིག །སྡངས་ཞིང་སྐྲག་པ་བྱུང་གྱུར་ཀྱང༌། །དེས་ནི་ཕྱི་ས་མཐོང་བ་ན། །ཆགས་པ་སྐྱེད་པར་བྱེད་པ་ལྟར། །རྨོངས་པ་རྣམས་ཀྱིས་ཆོས་ཐོས་ནས། །དགེ་བར་གསུངས་ཞེས་རྗོད་བྱེད་ཀྱང༌། །དེའི་སེམས་བུད་མེད་ཕྱི་བཞིན་སོང༌། །བྱི་བ་ལ་ནི་བྱི་ལ་བཞིན། །རྣམ་པར་དག་པ་བསྡུས་པ་ལས། །དགེ་སློང་ཆོས་དེ་འཆི་བའི་དུས་བྱས་ནས། འདི་ལྟར་དམ་བའི་ཆོས་སྤངས་པས་བསྐལ་པ་
བཅུར་སེམས་ཅན་དམྱལ་བར་སྐྱེས་སོ། །བསྐལ་པ་བཟང་པོ་འདི་ལ་དེ་བཞིན་གཤེགས་པ་གང་དག་འབྱུང་བའི་ཐ་མའི་ཚེ། ཁྱོད་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། །བསམ་གཏན་བཞི་ཐོས་དེར་ཕན་ཆད་བསྐལ་པ་གྲངས་མེད་པ་གསུམ་གྱིས་བླ་ན་མེད་པ་ཡང་དག་པར་འཚང་རྒྱའོ། །མི་བླུན་པོ་དག་འདི་སྐད་དུ་འདི་ལྟ་སྟེ། དམིགས་པའི་ཚུལ་གཅིག་པུས་བྱང་ཆུབ་ཐོབ་པོ་ཞེས་ཟེར་ཏེ། དེ་དག་ནི་སྤྱོད་པ་ཡོངས་སུ་མ་དག་པ་ཡིན་ནོ། །བརྩོན་པ་ལ་བདུད་གླགས་ཚོལ་གྱི་མི་བརྩོན་པ་ལ་བདུད་ཀྱིས་ཅི་ཞིག་བྱ་བར་འགྱུར། བྱང་ཆུབ་སེམས་དཔའི་སོ་སོར་ཐར་པ་ལས། བྱང་ཆུབ་སེམས་དཔའ་རྣམས་ལ་གཡོ་དང༌། སེར་སྣ་དང་ཕྲག་དོག་དང༌། །ཕྲ་མ་དག་གིས་མངོན་པར་རྫོགས་པར་འཚང་རྒྱ་མི་ནུས་སོ་སྙམ་པའི་ཞེན་པའི་སེམས་མེད་དོ། །བྱང་ཆུབ་སེམས་དཔའ་རྣམས་ལ་དུས་མ་ཡིན་པ་དང༌། མ་ལྡོང་བ་དང༌། ར་རོ་བ་དང༌། དུག་དང༌། བརྡེག་པ་དང༌། མཚོན་དང༌། འགྱེད་པ་དང༌། རང་གི་ལག་ནས་མ་ཡིན་པ་འདོད་པའི་རེག་པའི་སྦྱིན་པ་མེད་དོ། །བློ་གྲོས་མི་ཟད་པས་ཞུས་པ་ལས། ཆོས་ཐམས་ཅད་ཀྱི་རྗེས་སུ་སོང་བའི་སེམས་ནི་བྱང་ཆུབ་ཀྱི་སེམས་ཤེས་པའོ། །སུམ་ཅུ་རྩ་གསུམ་པའི་ལེའུ་ལས། ལྷའི་བུ་ཁམས་གསུམ་པ་ནི་སེམས་ཙམ་དུ་ཟད་ལ་སེམས་དེ་ཡང་སྒྱུ་མ་ལྟ་བུ་སྟེ། སེམས་ཀྱི་ཆོས་ཉིད་ཀྱིས་ཡོངས་སུ་བཙལ་ཀྱང་མི་རྙེད་དོ། །སེམས་གང་གིས་ཡོངས་སུ་བཙལ་བའི་སེམས་དེ་ཡང་མི་རྙེད་དོ། །སེམས་ཅན་མི་དམིགས་པས་ཆོས་ཐམས་ཅད་མི་དམིགས་སོ། །བྱང་ཆུབ་སེམས་དཔའ་ཐབས་ལ་མཁས་པ་ནི་ཇི་ཙམ་དུ་བདག་སྡུག་བསྔལ་བ་དང་ཡིད་མི་བདེ་བ་དེ་ཙམ་དུ་གཞན་གྱི་སྡུག་བསྔལ་ཞི་བར་བྱ་བའི་ཕྱིར་བརྩོན་ནོ། །ཆོས་བཞི་དང་ལྡན་ན་ཆོས་ཟབ་མོ་རྣམས་ལ་ཡང་སྤྱོད་ལ། ཡང་དག་པའི་མཐའ་ཡང་མངོན་སུམ་དུ་མི་བྱེད་དོ། །བཞི་ནི་དམ་བཅས་པ་ལ་བརྟན་པས་སྙིང་པོ་ལ་གནས་པ་དང༌། ཞུམ་པ་མེད་པའི་བརྩོན་འགྲུས་དང༌། སྙིང་རྗེ་ཆེན་པོ་དང༌། ཐབས་ལ་མཁས་པའོ། །གླིང་ཆེན་པོ་བཞི་པ་འདི་འབའ་ཞིག་ཏུ་ང་མངོན་པར་རྫོགས་པར་སངས་རྒྱས་ཀྱི། གླིང་གཞན་དུ་མ་ཡིན་ནོ་སྙམ་ན་མཽད་གལ་གྱི་བུ་ཁྱོད་དེ་ལྟར་མི་བལྟའོ། །ཅིའི་ཕྱིར་ཞེ་ན། གླིང་ཆེན་པོ་བཞི་པ་ཐམས་ཅད་དུ། ངས་སེམས་ཅན་རྣམས་ཀྱི་མོས་
པ་ཇི་ལྟ་བ་བཞིན་ཆོས་སྟོན་ཏོ། །ཁ་ཅིག་ཏུ་ནི་མངོན་པར་རྫོགས་པར་སངས་རྒྱས། ཁ་ཅིག་ཏུ་ནི་ཡུམ་གྱི་ལྷུམས་ན་གནས་པ། ཁ་ཅིག་ཏུ་ནི་དགའ་ལྡན་གྱི་གནས་ན་བཞུགས་པ། ཁ་ཅིག་ཏུ་ནི་ཡོངས་སུ་མྱ་ངན་ལས་འདས་པ་ངས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ལྟར་འདི་ན་རྒྱུན་དུ་ཞུགས་པ་ཞེས་བྱ་བ་ལ་སོགས་པ། དགེ་སྦྱོང་གི་ཚུལ་གྱི་འབྲས་བུ་བཞི་རྣམ་པར་གཞག་པ་ལྟ་བུ་དེ་ནི་མེད་ཀྱི་དེ་དག་ཐམས་ཅད་སྟན་གཅིག་ལ་འདུག་ནས། མངོན་པར་ཤེས་པ་འགའ་ཞིག་གིས་མངོན་སུམ་དུ་བྱེད་ཅིང༌། རྣམ་པར་ཐར་པ་བརྒྱད་རྗེས་སུ་འཐོབ་པ་དང༌། ཡེ་ཤེས་ཆེན་པོ་ཐོབ་ནས་ནམ་མཁའ་ལ་འཕགས་ནས། རང་གི་ལུས་མེས་སྲེག་པར་བྱེད་ཅིང་ཡོངས་སུ་མྱ་ངན་ལས་འདའོ། །མཽད་གལ་གྱི་བུ་ཆོས་བཞི་དང་ལྡན་པའི་བྱང་ཆུབ་སེམས་དཔའ་ནི་རེ་ཞིག་སྐྱེ་གནས་ལྔ་ལེན་པར་འགྱུར་ཏེ། བཞི་ནི་བྱང་ཆུབ་སེམས་དཔའི་མིང་གིས་རྙེད་པར་འཚོ་བར་བྱེད་ལ། བྱང་ཆུབ་སེམས་དཔའི་བསླབ་པ་ལ་མི་སློབ་པ་དང༌། ཆོས་སྤོང་བ་ལ་བཏང་སྙོམས་སུ་བྱེད་ཅིང་མི་བཟློག་པ་དང༌། གཞན་དག་གི་རྙེད་པའི་བར་ཆད་བྱེད་ཅིང་བསྔགས་པ་མ་ཡིན་པ་བརྗོད་པ་དང༌། ལུས་དང་ངག་དང་ཡིད་ཀྱི་ལས་མ་བསྲུངས་པའོ། །སྡོམ་པ་གསུམ་བསྟན་པ་ལས། གང་གི་སེམས་ལ་རྗེས་སུ་འགྱོད་པ་ཡོད་པ་དེ་དག་མཚམས་མེད་པ་དང་མི་དགེ་བ་བཅུ་མི་བྱེད། མིར་རོ་བའི་ལག་པ་ནས་འཛིན་པའམ་རྩོད་པར་མི་བྱེད། བྱམས་པའི་སེམས་ལ་ཞུགས་པས་གནས་ཉི་ཤུ་ཡོངས་སུ་སྤོང་ངོ༌། །བུད་མེད་ཉི་ཤུ་མ་ཚང་བ་ལ་ཆོས་མི་འཆད། དགེ་སློང་མས་དྲིས་པའི་ལན་མི་གདབ། བུད་མེད་ཀྱི་ཡི་གེ་མི་བྲི། གཉན་འདབ་ཀྱིས་མགྲོན་དུ་བོས་པར་མི་འགྲོ། །དགེ་སློང་མས་བསྐུགས་པ་ལ་སླར་བསྐུགས་པར་མི་བྱ། །དགེ་སློང་མས་བྱིན་པའི་ཆོས་གོས་མི་བགོ །ཡུགས་ས་མོས་བོས་ན། དགེ་འདུན་མེད་པར་ཁས་མི་བླང༌། དགེ་སློང་མས་བོས་ན་ལག་བསྣོལ་མགོ་སྨད་དེ་ཕྱོགས་དེ་ནས་བྱོལ་བར་བྱ། ཆོས་སྟོན་པའི་གནས་སུ་དགེ་སློང་མ་འོངས་ན་སྙིམ་པས་གདོང་བཀབ་སྟེ་འདུག་པར་བྱ། ཆོས་གཉིས་ཀུན་དུ་བསྟན་པར་བྱ་སྟེ། གང་ཞེ་ན། ཆོས་ཐམས་ཅད་ལ་དངོས་པོ་མེད་པའི་ཆོས་ཉིད་ཡོངས་སུ་བཙལ་བར་བྱ་བ་དང༌། ཡོངས་སུ་བཙལ་བའི་སེམས་ཀྱང་
བསྐྱེད་པར་མི་བྱའོ། །ཇི་ལྟར་བཙལ་ཞེ་ན། ཇི་ལྟར་ཡོངས་སུ་བཙལ་བ་དེ་གཉིས་མི་དམིགས་པ་ལྟར་རོ། །མི་དམིགས་པས་མི་དམིགས་པའི་སེམས་ཀྱང་བསྐྱེད་པར་མི་བྱ་སྟེ། དེ་ནི་ལོག་པར་ལྟ་བ་ཡིན་པས་ཁམས་གསུམ་པའི་སེམས་སོ། །མིས་ཞག་དྲུག་གི་བར་དུ་ཟན་མ་ཟོས་པ་ནི་བླའི། བསྟན་པ་འདི་ལ་རབ་ཏུ་བྱུང་ནས་བདག་དང་སེམས་ཅན་ནས། མྱ་ངན་ལས་འདས་པར་བལྟ་བའི་བར་དུ་ལྟ་བས་དད་པས་བྱིན་པ་སྤྱོད་པ་ནི་དེ་ལྟ་མ་ཡིན་ནོ། །མ་འོངས་པའི་དུས་ན་དགེ་སློང་བརྐམ་ཆག་ཅན་ཕྲ་མ་ཅན་བརླང་པ། རྩུབ་པ་ཁྲོ་གཉེར་ཅན་ཆོས་གསུམ་པོ་ལ་གནས་ཏེ། སྨན་དཔྱད་དང༌། ཉོ་ཚོང་དང༌། བུད་མེད་དང་འདྲ་བ་དག་འབྱུང་ངོ༌། །དཔེར་ན་ཁྱི་ཁྲོ་བའི་སྣར་མཁྲིས་པས་བཏབ་ན་ཕྱིར་ཁྲོའོ། །དེ་བཞིན་དུ་མ་འོངས་པའི་དུས་ན་སྐྱེས་བུ་དམ་པ་མ་ཡིན་པ་ཁྱི་དང་ཝ་དང་འདྲ་བ་དག་འབྱུང་སྟེ། དེ་དག་གིས་དེ་བཞིན་གཤེགས་པའི་གསུང་རབ་ཟབ་པ་དང་སྡོམ་པ་ཐོབ་ནས་ཕྱིར་ཞིང་ཁྲོའོ། །ཆོས་བཞི་དང་ལྡན་པའི་སེམས་ཅན་རྣམས་གསུང་རབ་ཇི་ལྟ་བུ་ཐོས་ཀྱང་སྐྱོ་བ་མི་སྐྱེ་སྟེ། བཞི་ནི་བག་མེད་པ་དང༌། རྣམ་པར་སྨིན་པ་ལ་ཡིད་མི་ཆེས་པ་དང༌། དམྱལ་བ་ཆེན་པོ་ལ་ཡིད་མི་ཆེས་པ་དང༌། བདག་འཆི་བ་ལ་ཡིད་མི་ཆེས་པའོ། །གཞན་ཡང་བཞིས་སྐྱོ་བར་མི་འགྱུར་ཏེ། བཞི་ནི། །འབྱུང་བ་གཞོན་ཏེ་བར་ཆད་མེད་པ་དང༌། མཐུ་སྟོབས་དང་ལྡན་པ་དང༌། འདོད་པའི་ཡོན་ཏན་ལ་ཆགས་པ་དང༌། རྣལ་འབྱོར་མ་མྱོང་ཞིང་གདུང་བའི་སྟོབས་ཅན་དུ་གྱུར་པའོ། །དགེ་སྦྱོང་དང་བྲམ་ཟེར་བྱེད་པའི་ཆོས་ནི་གཅིག་སྟེ། ཆོས་ཐམས་ཅད་ལ་སེམས་མི་གནས་པའོ། །སེམས་རྩེ་གཅིག་པ་ཞེས་བྱ་བ་ནི་ཡོངས་སུ་བཙལ་ན་ཆོས་གཅིག་ཀྱང་མི་དམིགས་པའོ། །དགེ་སློང་མའི་ཤེས་རབ་ནི་སོར་གཉིས་པ་ཡིན། མ་འོངས་པ་ན་ཕན་ཚུན་སྟོང་པ་སྟོང་པ་ཞེས་བརྗོད་པས་ཡོངས་སུ་རྟོགས་སོ་ཡོངས་སུ་རྟོགས་སོ་ཞེས་ཚིག་ཏུ་སྨྲ་བ་འབྱུང་ངོ༌། །དེའི་ཚེ་ཡང་དག་པ་ཇི་ལྟ་བ་བཞིན་རྟོགས་ཤིང་མི་འགལ་བར་སྦྱོང་བ་དང་ལྡན་པར་འགྱུར་བའི་དགེ་སློང་ནི་དགེ་སློང་ཉིས་སྟོང་གི་དགེ་འདུན་གྱི་ནང་ན་གཅིག་ཀྱང་དཀོན་པར་འགྱུར་རོ། །བསྐལ་པ་འདི་ནི་འདས་འོག་ཏུ། །བསྐལ་པ་དྲུག་ཅུ་ཐམ་པར་ནི། །སངས་རྒྱས་འབྱུང་བར་མི་
འགྱུར་ན། །དགའ་བ་འདི་ནི་ག་ལ་འབྱུང༌། །བྱང་ཆུབ་སེམས་དཔའ་ཁྱིམ་པས་ཆོས་གསུམ་མི་བྱ་སྟེ། གཞན་གྱི་སྦྱིན་པ་ལ་མ་བོས་སམ་ཐབས་མེད་པར་མར་གྱི་ཉིང་ཁུ་ཡང་སྦྱིན་པར་མི་བྱ་བ་དང༌། རབ་ཏུ་བྱུང་བའི་བར་ཆད་མི་བྱ་ཞིང་བསྐུལ་བ་དང༌། མཆོད་རྟེན་གྱི་ལས་ཀྱི་བླར་བསྐོས་ན་དེ་ལ་བརྟེན་ཏེ་ཡོ་བྱད་དུ་མི་སྤྱད་པའོ། །ཡང་གསུམ་མི་བྱ་སྟེ། སྐྱེས་པ་བཙོང་བ་དང༌། བུད་མེད་འཚོང་བ་དང༌། སྨན་མ་ཡིན་པ་སྦྱིན་པའོ། །ཡང་གསུམ་མི་བྱ་སྟེ། སྨད་འཚོང་མའི་ཐད་དུ་འགྲོ་བ་དང༌། སྨྲ་སེམས་ཐ་དད་བར་སྤྱོད་པའི་སྐྱེས་པ་དང་བུད་མེད་བསྟེན་པ་དང༌། བ་གླང་གསོད་པའི་གནས་སུ་འགྲོ་བའོ། །ཟུང་གི་མདོ་ལས། དེ་ནས་བྲམ་ཟེ་དང་གཞན་མུ་སྟེགས་ཅན་སྤྱོད་པ་དང༌། ཀུན་དུ་རྒྱུ་དང༌། གཅེར་བུ་པ་དང༌། རྒྱལ་པོ་དང༌། བདུད་སྡིག་ཅན་འཁོར་དང་བཅས་པ་ཐམས་ཅད་ལྷགས་ནས། གཡོ་བྱ་བའི་ཕྱིར་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་འདིར། དེ་བཞིན་གཤེགས་པའི་གན་དུ་མཆིས་ཏེ། ཆོས་ཀྱི་རྣམ་གྲངས་འདི་ཐོས་ནས། བདག་ཅག་སངས་རྒྱས་ཀྱི་བདེ་བ་འདི་ལྟ་བུ་ཐོབ་པར་གྱུར་ཅིག །འཇིག་རྟེན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདི་ལྟ་བུ་ཐོབ་པར་གྱུར་ཅིག །བཅོམ་ལྡན་འདས་ཀྱིས་བཀའ་སྩལ་པ། བཞིན་བཟངས་དག་དེ་དེ་བཞིན་ཏེ། ཇི་ལྟར་ཁྱེད་དེ་བཞིན་གཤེགས་པའི་གན་དུ་ལྷགས་ནས། ཁྱེད་ཀྱིས་ཟུང་གི་མདོའི་ཆོས་ཀྱི་རྣམ་གྲངས་འདི་ཐོས་ནས། བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །དེས་ན་ཁྱེད་ཐམས་ཅད་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །བཅོམ་ལྡན་འདས་ཀྱིས་ཚིག་འདི་གསུངས་མ་ཐག་ཏུ། དེ་ནས་གཞན་མུ་སྟེགས་ཅན་དེ་དག་ཐམས་ཅད་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏེ། ཐམས་ཅད་ཀྱང་ས་བཅུ་ལ་གནས་པའི་བྱང་ཆུབ་སེམས་དཔར་གྱུར་ནས། དེ་དག་སྟེང་གི་བར་སྣང་ལ་འཕགས་ཏེ། ཕ་རོལ་ཏུ་ཕྱིན་པ་ལྔ་པ་ལས། བྱང་ཆུབ་སེམས་དཔའ་ལ་སྦྱིན་པ་སྦྱིན་པ་ན། བདག་གི་སྦྱིན་པ་འདི་ཐམས་ཅད་མཁྱེན་པ་མ་གཏོགས་པར། གཞན་དུ་སྨིན་པར་མ་གྱུར་ཅིག་ཅེས་དེ་ལྟར་བསྔོ་ན། ཕ་རོལ་ཏུ་ཕྱིན་པའི་གྲངས་སུ་འགྲོའོ། །བྱང་
ཆུབ་སེམས་དཔའ་ལ་ཐོག་མ་མེད་པའི་འཁོར་བ་ན་ཐམས་ཅད་མཁྱེན་པར་ཡོངས་སུ་མ་བསྔོས་པའི་སྦྱིན་པ་བཏང་བ་ཡང༌། ཐབས་མཁས་པས་ཐམས་ཅད་མཁྱེན་པ་ཉིད་ལ་བྱེད་ཅིང་བསྔོ་ན་ཕ་རོལ་ཏུ་ཕྱིན་པའི་གྲངས་སུ་འགྲོའོ། །བྱང་ཆུབ་སེམས་དཔས་ཐོག་མ་ཁོ་ནར་སྦྱོར་བའི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །ཉམས་པ་ཕྱིར་བསླང་བར་ནུས་སམ། སྨྲས་པ། ཇི་སྟེ་ཡང་དག་པའི་མཐའ་མངོན་སུམ་དུ་མ་བྱས་ལ། ཇི་སྟེ་བདེན་པ་མ་མཐོང་ནའོ། །གལ་ཏེ་བྱང་ཆུབ་སེམས་དཔའ་གང་གཱའི་ཀླུང་གི་བྱེ་མ་སྙེད་ཀྱི་བསྐལ་པར་ཁྱིམ་པར་གནས་ཏེ་འདོད་པའི་ཡོན་ཏན་རྣམས་ལ་བརྟེན་ཅིང་ལོངས་སྤྱོད་ལ། ཉན་ཐོས་སམ་རང་སངས་རྒྱས་སུ་སེམས་མི་བསྐྱེད་ན། དེ་ཙམ་གྱིས་ནི་བྱང་ཆུབ་སེམས་དཔའ་ཚུལ་ཁྲིམས་འཆལ་པ་ཞེས་མི་བྱ་སྟེ། འདི་ལྟར་ལྷག་པའི་སེམས་མ་དཀྲུགས་པའི་ཕྱིར་རོ། །བྱང་ཆུབ་སེམས་དཔའ་འགོག་པའི་སྙོམས་པར་འཇུག་པ་ལ་དབང་ཐོབ་མོད་ཀྱི། མཉམ་པར་གཞོག་པར་ནི་མི་བྱེད་དོ། །འདུ་ཤེས་དང་ཚོར་བ་བར་གཞག་ན་ནི། དགྲ་བཅོམ་པའི་འབྲས་བུ་མངོན་སུམ་དུ་བྱེད་པར་བལྟ་སྟེ། ཡབ་དང་སྲས་མཇལ་བ་ལས། བཅོམ་ལྡན་འདས་ཀྱིས་གསུང་གཅིག་བརྗོད་པ་ལས། སྐྱེ་བོ་བསམ་པ་ཇི་བཞིན་སོ་སོར་འཆལ། བསྐལ་པ་གྲངས་མེད་པ་གཞལ་དུ་མེད་པའི་སྔོན་རོལ་ན། དེ་བཞིན་གཤེགས་པ་དབང་པོའི་ཏོག་ཅེས་བྱ་བ་འཇིག་རྟེན་དུ་བྱུང་སྟེ། ཆོས་ཀུན་ཡིད་ལ་བྱར་མེད་པ། །འདི་ཡང་གཟུངས་ཀྱི་སྒོ་ཡིན་ཏེ། །བདེ་བར་གཤེགས་པས་གཟུངས་སུ་བསྟན། །སྟོབས་བཅུ་རྒྱལ་བ་མ་དྲིས་པར། །སྲས་མཆོག་བྱང་ཆུབ་ལུང་མི་སྟོན། །དེ་བཞིན་གཤེགས་པས་ཀུན་རྫོབ་དང་དོན་དམ་པ་གཉིས་ཐུགས་སུ་ཆུད་དེ་ཞེས་བྱ་བ་ཡང་འདིར་ཟད་དོ། །དེ་ཡང་བཅོམ་ལྡན་འདས་ཀྱིས་སྟོང་པ་ཉིད་རབ་ཏུ་གཟིགས། རབ་ཏུ་མཁྱེན། ལེགས་པར་མངོན་དུ་མཛད་པས། དེའི་ཕྱིར་ཐམས་ཅད་མཁྱེན་པ་ཞེས་བྱའོ། །འདོད་ཆགས་གཉེན་པོར་ཞི་གནས་བཀའ་སྩལ་པ། ཞེ་སྡང་གཉེན་པོར་བྱམས་པ་གསུངས། །གཏི་མུག་གཉེན་པོར་ལྷག་མཐོང་ནི། །ཐུབ་པ་མཆོག་གིས་སེམས་ཅན་རྣམས་ལ་བསྟན། །དེ་བཞིན་གཤེགས་པ་ནི་མ་སྐྱེས་ཏེ། ཆོས་ཐམས་ཅད་
ཀྱང་མ་སྐྱེས་པའོ། །དེ་བས་ན་ཆོས་ཐམས་ཅད་ནི་དེ་བཞིན་གཤེགས་པའོ། །དམྱལ་བ་ནས་ཚེ་འཕོས་པའི་རྟགས་སྐད་ཆེ་བ་ཡིན། སྐད་ལྷང་ལྷང་པོ་ཡིན། སེམས་ཅན་ཀུན་ལ་ཡིད་མི་རྟོན་པ་ཡིན་ནོ། །དུད་འགྲོའི་སྐྱེ་གནས་ནས་ཤི་འཕོས་པའི་རྟགས་ནི་གཉིད་ཆེ་ལེ་ལོ་ཆེ་མང་དུ་ཟ་བ་ཡིན། མི་གསལ་བར་སྨྲ་བ་ཡིན། ཀུན་དུ་བསྐུམས་ཏེ་ཉལ་བ་ཡིན། གཞན་དུ་སྨྲ་ཞིང་གཞན་དུ་སྐྱེ་ཞིང་གཡོ་བྱེད་པ་ཡིན། བབ་ཆོལ་དུ་སྤྱོད་པ་ཡིན་ནོ། །གཤིན་རྗེའི་འཇིག་རྟེན་ནས་ཤི་འཕོས་པའི་རྟགས་ནི་སྐྲ་སེར་རྟག་ཏུ་བཀྲེས་སྐོམ་སེར་སྣ་དང་འདོད་ཞེན་ཆེ་བ། དངོས་པོ་ཀུན་ལ་རྐུ་བའི་སེམས་ཡོད་ལ། གཞན་གྱི་རྙེད་པ་ལ་ཕྲག་དོག་ཆེ་བ་ཡིན་ནོ། །ལྷ་མ་ཡིན་ལས་ཤི་འཕོས་པ་ནི། ཁེངས་པ། འཐབ་ཀྲོལ་ཅན། ཁོན་དུ་འཛིན་པ། ང་རྒྱལ་ཅན། ལུས་ཆེ་བ། མཆེ་བ་སྣང་བ། དབྱེན་ལ་དགའ་བ། ཀུན་ལ་བརྙས་པར་བྱེད་པ་ཡིན་ནོ། །མི་ལས་ཤི་འཕོས་པ་ནི། འཕགས་པ་ལ་བརྟེན་པ། འཕགས་པ་ལ་སྨོན་པ། ཁྲེལ་དང་ངོ་ཚ་ཤེས་པ། མཛའ་བོ་ལ་གདུང་བ། གཏོང་ཕོད་པ། སྐད་ཐམས་ཅད་འཛིན་པའི་མཐུ་ཡོད་པ་ཡིན་ནོ། །ལྷ་ལས་ཚེ་འཕོས་པ་ནི་མཛེས་པ་གཙང་སྦྲ་ཆེ་བ། རོལ་མོའི་སྒྲ་ལ་དགའ་བ། བྱམས་པ་ཆེ་བའི་ངང་ཚུལ་ཅན། འཇམ་པར་སྨྲ་པ། སྨྲ་མཁས་པ། ཕན་པར་བྱ་བ་ལ་མཁས་པ་ཡིན་ནོ། །གང་རྣམ་པར་ཤེས་པ་ཐ་མ་འགག་པ་དེ་ནི་འཆི་བ་ཞེས་བྱ། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱའོ། །རྒྱལ་པོ་ང་ལས་ནུ་བྱུང་བའི་ཚེ་འཛམ་གླིང་གི་གྲོང་ཁྱེར་ཐམས་ཅད་བྱ་གག་གི་འཕུར་སྟབས་ཀྱིས་ཆོད་པ་ཙམ་དུ་ཉེའོ། །བསོད་ནམས་ཐམས་ཅད་སྡུད་པའི་ཏིང་ངེ་འཛིན་ལས། བསོད་ནམས་སུ་བྱ་བ་ཐམས་ཅད་ནི། བྱང་ཆུབ་ཏུ་སེམས་བསྐྱེད་པ་དེའི་ཁོངས་སུ་འདུས་ཤིང་རྗེས་སུ་ཞུགས་པའོ། །དེ་བཞིན་གཤེགས་པ་རྣམས་ཀྱིས། བྱང་ཆུབ་སེམས་དཔའ་གང་ལ་འདུག་པའི་འཇིག་རྟེན་གྱི་ཁམས་དེ་རྡོ་རྗེའི་རང་བཞིན་དུ་བྱིན་གྱིས་མ་བརླབས་ན། སྐྱེས་མ་ཐག་ཏུ་གོམ་པ་བདུན་འདོར་བའི་ཚེ། ཐུར་དུ་དཔག་ཚད་དུག་ཁྲི་བརྒྱད་སྟོང་ཞོམ་པར་འགྱུར་ཏེ། །འོག་ནས་ཆུ་ཤིང་རྟའི་གཉའ་ཤིང་ཙམ་གྱི་རྒྱུན་དག་འབྱུང་བར་འགྱུར་རོ། །དེ་བཞིན་གཤེགས་པའི་ཡབ་ཡུམ་ལས་སྐྱེས་
པའི་སྟོབས་ཀྱང༌། མི་བཅུའི་སྟོབས་ནས། བ་གླང་དང༌། ལྷ་དང༌། བྱང་ཆུབ་སེམས་དཔའ་ལ་སོགས་པ་བཅུ་བཅུར་བསྒྲེས་པ། དྲུག་ཅུ་ལ་ཐུག་པ་བས་ཀྱང་ཆེ་སྟེ། ཐ་མ་ནི་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་ལ་ཅི་བར་འབྱུང༌། བྱང་ཆུབ་སེམས་དཔའ་ཚུལ་ཁྲིམས་ཀྱི་ཚོགས་ནི། བསླབ་པ་འདྲལ་བ་ལས་སྙིང་རྗེ་བ་དང༌། བསླབ་པ་དང་ལྡན་པ་རྣམས་ལ་གུས་པ་དྲག་པའོ། །ཆོས་བཞི་དང་ལྡན་ན་སྦྱིན་པ་ཟད་པར་འགྱུར་ཏེ། མ་བསྔོས་པ་དང༌། ཐབས་མི་མཁས་པ་དང༌། དམའ་བར་སྐྱེ་བ་སྒྲུབ་པ་དང༌། སྡིག་པའི་གྲོགས་པོ་ལ་བརྟེན་པའོ། །བཟློག་པ་ནི་མི་ཟད་པའོ། །བྱང་ཆུབ་སེམས་དཔའ་སློང་མོ་བ་འོངས་ན། གཏོང་མི་ཕོད་པ་དེ་ལྟ་བུའི་གཡོག་འཁོར་དང༌། ནོར་དང་རྒྱལ་སྲིད་གཟུང་བར་མི་བྱའོ། །ཆོས་ཐམས་ཅད་ནི་རྣམ་པར་ཐར་པའི་སྒོ་ཀུན་ནས་སྟོན་པའི་ཕྱིར་ཀུན་ནས་སྒོའོ། །བྱང་ཆུབ་སེམས་དཔའི་ཆོས་འདོད་པ་རྣམས་ནི། རི་དང༌། རི་སུལ་དང༌། ཤིང་དག་གི་ནང་དུ་ཆོས་ཀྱི་གཏེར་བཅུག་པ་ཡོད་དེ་གཟུངས་དང༌། ཆོས་ཀྱི་སྒོ་མཐའ་ཡས་པ་གླེགས་བམ་དུ་བྱས་པ་དག་ཀྱང་ལག་ཏུ་འོང་བར་འགྱུར་རོ། །ཆོས་བཞི་དང་ལྡན་ན་བྱང་ཆུབ་ཀྱི་སེམས་བརྗེད་པར་འགྱུར་ཏེ། ལྷག་པའི་ང་རྒྱལ་དང༌། ཆོས་ལ་མ་གུས་པ་དང༌། དགེ་བའི་བཤེས་གཉེན་ལ་ཁྱད་དུ་གསོད་པ་དང༌། ལོག་པའི་ཚིག་སྨྲ་བའོ། །ཆོས་བཞི་དང་ལྡན་ན་བྱང་ཆུབ་ཀྱི་སེམས་བརྗེད་པར་འགྱུར་ཏེ། ཐེག་པ་དམན་པའི་རྣལ་འབྱོར་པ་དང་འདྲིས་པར་བྱེད་པ་དང༌། ཐེག་པ་དམན་པ་ལ་མོས་པ་དང༌། བྱང་ཆུབ་སེམས་དཔའ་ལ་སྐུར་པ་དང༌། ཆོས་ལ་སློབ་དཔོན་གྱིས་དཔེ་མཁྱུད་བྱེད་པའོ། །ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་པ་བྱེད་མི་འགྱུར། །ཐོས་པས་གནོད་པ་སྤོང་བར་འགྱུར། །ཐོས་པས་མྱ་ངན་འདས་པ་འཐོབ། །བྱང་ཆུབ་སེམས་དཔའ་ནི་སྲོག་གི་ཕྱིར་ཡང་སྡིག་པ་མི་བྱེད་དོ། །ལུས་བརྟས་པའི་ཕྱིར་ཡང་བས་འཚོ་བར་མི་བྱེད་དོ། །སྲོག་གི་ཕྱིར་ཡང་གཞན་ལ་སློང་ཁྲོ་མི་བྱེད་དོ། །ལོངས་སྤྱོད་ཀྱི་ཕྱིར་མི་དགེ་བའི་མངོན་པར་འདུ་མི་བྱེད་དོ། །ཡང་བཞིས་བརྗེད་པར་འགྱུར་ཏེ། སྒྱུ་བྱེད་པ་དང༌། སེམས་ཅན་
ལ་གཡོས་སྟོན་པ་དང༌། དགེ་བའི་བཤེས་གཉེན་ལ་ལྕེ་གཉིས་བྱེད་པ་དང༌། རྙེད་པ་དང་བཀུར་སྟི་ལ་ཆགས་པའོ། །སྤྱོད་པ་བརྒྱད་ཁྲི་བཞི་སྟོང་ནི་འདོད་ཆགས་ཞེ་སྡང་གཏི་མུག་ཆ་མཉམ་པ་ལ་སྤྱོད་པ་ཉི་ཁྲི་ཆིག་སྟོང་ངོ༌། །གལ་ཏེ་བྱང་ཆུབ་སེམས་དཔའ་ལྟ་བ་འགའ་ཞིག་ལ་མངོན་པར་ཞེན་ཏེ། ཐ་ན་སངས་རྒྱས་ཀྱི་ཆོས་དང༌། མྱ་ངན་ལས་འདས་པའི་ལྟ་བ་ལ་མངོན་པར་ཞེན་ན། དེ་ཡང་དེ་བཞིན་གཤེགས་པའི་སྐུ་སླུ་བ་ཡིན་ནོ། །བྱང་ཆུབ་སེམས་དཔས་ནི་དུག་གསུམ་ལ་ཡང་སྤྱད་པར་བྱ་ཞིང༌། དེ་དག་དང་ཡང་འབྲལ་བར་བྱའོ། །སེམས་ཅན་ཐམས་ཅད་ལ་སེམས་སྙོམས་པ་དང༌། འགྲོ་བ་ལྔར་སྲིད་པ་ལེན་པ་ནི་བྱམས་པའོ། །སེམས་ཅན་ཐམས་ཅད་སྡུག་བསྔལ་ལས་དགྲོལ་བ་དང༌། འཁོར་བའི་ལམ་ལས་དགྲོལ་ལོ་སྙམ་པ་ནི་སྙིང་རྗེ་བའོ། །ལྷའི་བུ་རབ་རྩལ་སེམས་ཀྱིས་ཞུས་པ་ལས། བྱང་ཆུབ་སེམས་དཔའ་རྣམས་གཏན་གདུལ་བ་ཉིད་དུ་ཡང་ཤེས་པར་བྱེད་ཅིང༌། ལྟུང་བ་དང་ཉོན་མོངས་པ་དང་བྲལ་ལ། ལྟུང་བ་དང་ཉོན་མོངས་པ་གདུལ་བའི་ཕྱིར་ཆོས་སྟོན་པར་ཡང་བྱེད་ཅིང༌། དེ་ལྟར་ཉོན་མོངས་པ་རྣམས་རྟོགས་པར་བྱེད་ལ། བྱང་ཆུབ་ཀྱང་ཚོལ་བར་བྱེད་ན། དེ་ཙམ་གྱིས་ན་འདུལ་བ་འཛིན་པ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་རྣམ་གྲངས་མེད་པས་སེམས་ཅན་ཐམས་ཅད་སངས་རྒྱས་སུ་འགྱུར་གྱི། རྣམ་གྲངས་ཀྱིས་ནི་མ་ཡིན་ནོ། །ལྷའི་བུ་སྟོང་པ་ཉིད་གང་ཡིན་པ་དེ་ཉིད་བྱང་ཆུབ་ཡིན་པས་ན། བཅོམ་ལྡན་འདས་ཀྱིས་ཀྱང་སྟོང་པ་ཉིད་རྗེས་སུ་རྟོགས་པ་ཁོ་ན་བྱང་ཆུབ་ཡིན་ནོ་ཞེས་གསུངས་སོ། །ཤེས་པས་འཕགས་པ་དང་མཉམ་ལ་ཐབས་ཀྱིས་འཕགས་པ་མ་ཡིན་པར་གནས་ན། བྱང་ཆུབ་སེམས་དཔའ་དགྲ་བཅོམ་པ་ཡིན་ནོ། །སྒྲོགས་པ་ཡང་གཞན་གྱི་དྲིད་མི་འཇོག་ལ། ཐོས་པས་ཀྱང་མི་རློམ་པ་ནི། བྱང་ཆུབ་སེམས་དཔའ་ཉན་ཐོས་ཡིན་ནོ། །བྱང་ཆུབ་སེམས་དཔའི་སྤྱོད་པ་བསྟན་པ་ལས། འཇམ་དཔལ་གྱིས་སྨྲས་པ་འདི་ལ། ལས་དང་པོ་པའི་བྱང་ཆུབ་སེམས་དཔའ་ཇི་ལྟར་གདམས་ངག་བསྟན་པར་བྱ། ཇི་ལྟར་རྗེས་སུ་བསྟན་པར་བྱ། རིན་ཆེན་བྱིན་གྱིས་སྨྲས་པ། འདི་སྐད་ཅེས་སྨྲ་བར་བྱ་སྟེ། འདོད་ཆགས་མ་སྤོངས་ཤིག །ཞེ་སྡང་མ་གཞིལ་ཅིག །གཏི་
མུག་མ་བསལ་ཅིག །རང་གི་ལུས་ལས་གྱེན་དུ་མ་བསྐྱོད་ཅིག །མི་དགེ་བ་སྤྱོད་ཅིག །ལྟ་བ་ཚར་མ་བཅད་ཅིག །ཀུན་དུ་མི་སྦྱོར་བ་མ་སྟོན་ཅིག །ཕུང་པོ་རྣམས་ཟུང་ཤིག །ཁམས་རྣམས་རིལ་པོར་གྱིས་ཤིག །སྐྱེ་མཆེད་རྣམས་ལ་སྤྱོད་ཅིག །མི་དགེ་བ་ལ་རྟོགས་ཤིག །དགེ་བ་སྤོངས་ཤིག །ཆོས་མ་སེམས་ཤིག །དགེ་འདུན་ལ་མཆོད་པ་མ་བྱེད་ཅིག་ཅེས་བསྟན་པར་བྱའོ། །བུད་མེད་འགྱུར་བ་ལས། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །མདང་སུམ་བདག་གི་རྨི་ལམ་ན། ཉན་ཐོས་དང་རང་སངས་རྒྱས་དང༌། བྱང་ཆུབ་སེམས་དཔའ་དང༌། དྲང་སྲོང་རྣམས་ཀྱིས་གཞན་གྱི་སེམས་ཤེས་པ་ནི། དེ་བཞིན་གཤེགས་པའི་མཐུ་ཡིན་ཏེ། དཔེར་ན་ཉི་མ་ལ་སོགས་པའི་རྐྱེན་གྱིས་མིག་ཅན་རྣམས་ཀྱིས་གཟུགས་མཐོང་བ་བཞིན་ནོ། །མེ་འབར་བ་ནི་ཞི་བར་བགྱིས་འཚལ་གྱི། མེ་མི་འབར་བ་ནི་མི་འཚལ་ལོ། །དེ་བཞིན་དུ། སྐྱེ་བོ་ལ་བཟོད་པ་གསོལ་འཚལ་གྱི་འཕགས་པ་ལ་ནི་མ་ཡིན་ནོ། །ཅི་ཐམས་ཅད་མཁྱེན་པའི་མིང་དེ་ཡང་ཀུན་བརྟགས་པ་ཡིན་ནམ། དེ་དེ་བཞིན་ཏེ་སངས་རྒྱས་ཀྱི་ཞིང་གཞན་དག་ན་མིང་ཐ་དད་པ་ཡོད་པའི་ཕྱིར་རོ། །གལ་ཏེ་བདག་སེམས་པར་མ་གྱུར་ན་ནི། བདག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སེམས་བསྐྱེད་པ་ཞིག་མོད། མ་ཐོས་པ་ནི་གླིང་བྱང་ཆུབ་འདོད་པས་ཉན་ཐོས་ཀྱི་ཐེག་པ་ནི་དེ་ལྟ་མ་ཡིན་ནོ། །བུད་མེད་འདོད་པའི་ཡོན་ཏན་ལྡན་པ། ཐམས་ཅད་མཁྱེན་པ་ཉིད་ཀྱི་སེམས་དང་མ་བྲལ་བ་ནི་ཆོས་འཕགས་ཀྱིས་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་བདེན་པ་ལ་གནས་པ་ནི་དེ་ལྟ་མ་ཡིན་ནོ། །དར་མ་འདི་ལས་མི་དགེ་བ་བཅུ། བྱང་ཆུབ་སེམས་དཔའ་སྤྱོད་པ་དགེ་བ་སྦྱོར་བར་འབྱུང་སྟེ། དོན་དུ་ན་བྱང་ཆུབ་ཀྱི་ཕྱིར་རང་དང་གཞན་གྱི་སྲོག་བོར་བས་སྲོག་གཅོད་པའོ། །བྱང་ཆུབ་རང་རིག་པར་བླངས་པས་མ་བྱིན་པར་བླངས་པའོ། །འདོད་པ་འདི་དག་ལོག་པ་ཡིན་པར་ཤེས་པ་ནི་འདོད་པ་ལ་ལོག་པར་སྤྱོད་པའོ། །སྒྲ་ཇི་སྙེད་པ་བརྫུན་པས་ན་བརྫུན་དུ་སྨྲ་བའོ། །ཐེག་པ་དམན་པ་ལ་མོས་པ་ཐེག་པ་དེ་ལས་ཕྱེ་ནས་མཆོག་ལ་འགོད་པ་དང༌། མུ་སྟེགས་ཅན་རྣམས་
ཕྲ་མས་ཕྱེ་ནས་ཡང་དག་པའི་ལམ་ལ་བཀོད་པས་ཕྲ་མའོ། །རྒོལ་བ་ཆར་བཅད་པས་ཚིག་རྩུབ་པའོ། །བྱེ་བ་འདུམ་པར་བྱེད་པས་ན་ཀྱལ་པའོ། །སེམས་ཅན་ཀུན་བདེ་བ་ལ་བཀོད་པར་འདོད་པས་བརྣབ་སེམས་སོ། །ཆོས་འཇིག་པའི་ཚེ་སྟོབས་ཆེན་པོས་ཆོས་ལ་འཛུད་པ་ནི་གནོད་སེམས་སོ། །ལོག་པར་ལྟ་བ་རྣམས་ཡང་པ་ལ་འཛུད་པར་བྱེད་པས་ན་ལོག་པར་ལྟ་བ་ཞེས་བྱའོ། །ཁྱིམ་བདག་དྲག་ཤུལ་ཅན་གྱིས་ཞུས་པ་ལས། བྱང་ཆུབ་སེམས་དཔའ་ཁྱིམ་པ་ཆོས་བཞི་དང་ལྡན་ན། སངས་རྒྱས་ལ་སྐྱབས་སུ་སོང་བ་ཡིན་ཏེ། བྱང་ཆུབ་ཀྱི་སེམས་མི་འདོར་བ་དང༌། དམ་བཅས་པ་མི་འཇིག་པ་དང༌། སྙིང་རྗེ་ཆེན་པོ་མི་གཏོང་བ་དང༌། ཐེག་པ་གཞན་ལ་མི་དམིགས་པའོ། །བཞི་དང་ལྡན་ན་ཆོས་ལ་སྐྱབས་སུ་སོང་བ་ཡིན་ཏེ། ཆོས་སྨྲ་བ་ལ་གུས་པར་བྱས་ཏེ། ཆོས་ཉན་པ་དང༌། ཐོས་པ་ལ་ཚུལ་བཞིན་དུ་རྟོགས་པ་དང༌། གཞན་ལ་སྟོན་པ་དང༌། ཆོས་ཀྱི་སྦྱིན་པ་ལས་བྱུང་བའི་དགེ་བའི་རྩ་བ་བྱང་ཆུབ་ཆེན་པོར་བསྔོ་བའོ། །བཞི་དང་ལྡན་ན་དགེ་འདུན་ལ་སྐྱབས་སུ་སོང་བ་ཡིན་ཏེ། ཉན་ཐོས་ཀྱི་ཐེག་པ་པ་རྣམས་ཐམས་ཅད་མཁྱེན་པའི་སེམས་ལ་འཛུད་པ་དང༌། ཟང་ཟིང་གིས་སྡུད་པ་དེ་དག་ཆོས་ཀྱིས་བསྡུ་བ་ལ་སྦྱོར་བ་དང༌། བྱང་ཆུབ་སེམས་དཔའི་ཕྱིར་མི་ལྡོག་པའི་དགེ་འདུན་ལ་རྟོན་གྱི་ཉན་ཐོས་ཀྱི་དགེ་འདུན་ལ་མ་ཡིན་པ་དང༌། ཉན་ཐོས་ཀྱི་རྣམ་པར་གྲོལ་བ་ལ་མོས་པ་མ་ཡིན་པའོ། །འདི་དག་ལ་གང་འདོད་པ་སྦྱིན་ཏེ། ཆང་ཡང་བྱིན་ནས་དེའི་འོག་ཏུ་འཁྲུལ་པ་མེད་པའི་སྤྱོད་པ་དང༌། ཤེས་བཞིན་ཡང་དག་པར་འཛིན་དུ་གཞུག་གོ་སྙམ་ན། བྱང་ཆུབ་སེམས་དཔའ་ཁྱིམ་པས་གཞན་ལ་ཆང་བྱིན་ཡང༌། དེ་བཞིན་གཤེགས་པས་ཉེས་པར་བརྗོད་པ་མ་ཡིན་ཏེ། བསམ་པ་ཐམས་ཅད་རྫོགས་པར་བྱེད་པ་ནི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་སྦྱོང་བ་ཡིན་པའི་ཕྱིར་རོ། །བྱང་ཆུབ་སེམས་དཔའ་ཁྱིམ་པས་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། དགའ་ཞིང་བརྩེ་བའི་གྲོགས་ཡིན་གྱི། འཇིག་རྟེན་ཕ་རོལ་གྱི་གྲོགས་མ་ཡིན་པ་དང༌། བཟའ་བཏུང་གི་གྲོགས་ཡིན་གྱི་རྣམ་པར་སྨིན་པའི་གྲོགས་མ་ཡིན་པ་དང༌། བདེ་བའི་གྲོགས་ཡིན་གྱི། སྡུག་
བསྔལ་གྱི་གྲོགས་མ་ཡིན་པའོ། །ཕུང་པོ་གསུམ་པའི་ཆོས་ཀྱི་རྣམ་གྲངས་ཁ་དོན་བྱའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་དང༌། སྤྱོད་པ་རྣམ་པར་དག་པ་ལ་འདི་སྐད་ཅེས་བཀའ་སྩལ་ཏོ། །ཁྱེད་གཉིས་ཀྱིས་ཁྱིམ་བདག་འདི་རྣམས་རབ་མེ་ཏོག་པུཎྜ་རཱི་ཀ་ཞེས་འགྲོ་སྟེ། སྡུག་བསྔལ་མྱོང་ནས། ཚེ་འདི་ཉིད་ལ་མྱ་ངན་ལས་འདས་པ་འབྱུང༌། འཕགས་པ་དཀོན་མཆོག་ཏལ་ལ་ལས། བྱང་ཆུབ་སེམས་དཔའ་རྣམ་པར་གཞག་པ་ནི་བཅུ་པོ་འདི་དག་སྟེ། སེམས་དང་པོ་བསྐྱེད་པ་དང༌། ལས་དང་པོ་པ་དང༌། རྣལ་འབྱོར་སྤྱོད་པ་དང༌། སྐྱེ་བར་སྐྱེས་པ་དང༌། སྦྱོར་བ་ཕུན་སུམ་ཚོགས་པ་དང༌། བསམ་པ་ཕུན་སུམ་ཚོགས་པ་དང༌། ཕྱིར་མི་ལྡོག་པ་དང༌། གཞོན་ནུར་གྱུར་པ་དང༌། རྒྱལ་ཚབ་དང༌། དབང་བསྐུར་བ་ཐོབ་པའོ། །ཆོས་འདི་དག་སྤོང་བར་འགྱུར་བའི་སེམས་ཅན་དེ་དག་ནི་ཕལ་ཆེར་རབ་ཏུ་འབྱུང་བ་དག་འབྱུང་སྟེ། སློབ་དང་མི་སློབ་ལུས་ལ་མཉམ་གཞག་ཅིང༌། །རྐྱེན་གྱི་སངས་རྒྱས་ལུས་ནི་རྣམ་པར་སྣང༌། །རྐྱེན་གྱི་སངས་རྒྱས་ལུས་ལ་མཉམ་གཞག་ཅིང༌། །སངས་རྒྱས་སྐུ་མཆོག་རབ་ལས་རྣམ་པར་སྣང༌། །ཐེག་པ་ཆེན་པོ་མན་ངག་ལས། ཆོས་སྨྲ་བ་ནི་ཤ་ཟ་བ་མ་ཡིན་ནོ། །མ་འདྲེས་པ་བཅོ་བརྒྱད་ཞི་བ་རབ་ཏུ་བྱུང་ངོ༌། །ཐེག་པ་ཆེན་པོའི་བར་དུ་གཅོད་པའི་ཆོས་སུམ་ཅུ་རྩ་གཉིས་ལ་ཐོས་པ་དོན་དུ་མི་གཉེར་བ་དང༌། དཔྱད་པ་མེད་པ་དང༌། སློབ་དཔོན་གྱིས་དཔེ་མཁྱུད་བྱེད་པ་དང༌། ཆོས་སྨྲ་བ་ཡོངས་སུ་བཟུང་བས་དམ་པའི་ཆོས་ཡོངས་སུ་གཟུང་བ་ཡིན་ནོ། །དམ་པའི་ཆོས་ཡོངས་སུ་བཟུང་བས། སེམས་ཅན་ཐམས་ཅད་ཡོངས་སུ་གཟུང་བ་ཡིན་ནོ། །ཆོས་ཐམས་ཅད་འབྱུང་བ་མེད་པ་བསྟན་པ་ལས། སུ་ཞིག་ཚུལ་ཁྲིམས་མེད་པ་དེ་ལ་ནི། །ཚུལ་ཁྲིམས་མེད་དེ་དེ་མཐོང་ན། །ཚུལ་ཁྲིམས་འཆལ་དང་ཚུལ་ཁྲིམས་མཚན་ཉིད་གཅིག །དེ་ལྟར་ཤེས་ན་དེ་ནི་མགོན་པོར་འགྱུར། །ཕན་ཚུན་ཁྲོ་བར་བྱེད་དང་ལྡན་གྱུར་ཅིང༌། །ཚད་མེད་ཚེ་ཡི་ཞིང་དུ་སྨོན་པར་བྱེད། །གང་གཱའི་ཀླུང་གི་བྱེ་མ་ཇི་སྙེད་པར། །བརྡེག་ཅིང་སྤྱོད་སར་འཐོབ་པའི་གནས་ཡོད་ཀྱི། །བཟོད་པ་དམ་པ་ཡོངས་སུ་མ་བསྒོམས་པར། །རྒྱལ་བ་དེ་དག་ཞིང་དུ་དེ་མི་འགྲོ། །ཞིང་རྣམས་ཞིང་མིང་གང་གིས་ཤེས་གྱུར་ཅིག །ཞིང་རྣམས་ཐམས་ཅད་ནམ་མཁའི་རང་བཞིན་ཤེས། །
ཞིང་གི་ཡོན་ཏན་རློམ་སེམས་གང་མེད་པ། །སྐྱེས་བུ་ཁྱུ་མཆོག་ཞིང་དུ་དེ་འགྲོའོ། །འཕགས་པ་འོད་དཔག་མེད་ཀྱི་བཀོད་པ་ལས། དེ་བཞིན་གཤེགས་པ་དེ་སྤྱི་ནི་སྐུ་ཚེ་བསྐལ་པ་དཔག་ཏུ་མེད་པས་ཚེ་དཔག་མེད་ཅེས་ཀྱང་བྱ། མངོན་པར་སངས་རྒྱས་ནས་ནི་བསྐལ་པ་བཅུ་ལོན། ཨཱརྻ་པ་ལོ་དང་མཐུ་ཆེན་ཐོབ་ཀྱང་འཇིག་རྟེན་གྱི་ཁམས་འདི་ནས་ཤི་འཕོས་ནས་དེར་སྐྱེས། ད་དུང་ཡང་འདི་ནས་བྱང་ཆུབ་སེམས་དཔའ་བྱེ་བ་ཁྲག་ཁྲིག་ཕྲག་བདུན་ཅུ་རྩ་གཉིས་དེར་སྐྱེས་པར་འགྱུར། བུདྡྷ་འོད་དཔག་མེད་སྔོན་དགེ་སློང་ཆོས་ཀྱི་འབྱུང་གནས་སུ་གྱུར་པ་ན། ཞིང་ཡོངས་སུ་དག་པའི་སྨོན་ལམ་བཏབ་པ་འབྱུང༌། དཔེར་ན། རྒྱ་མཚོ་ཆེན་པོ་ཟབས་སུ་དཔག་ཚད་བརྒྱད་ཁྲི་བཞི་སྟོང་ཡོད་པ། འོད་དཔག་མེད་ཀྱི་མཚན་ཐོས་ནས་དད་པ་ནི་སྐྱེས་ལ། དེ་བཞིན་གཤེགས་པའི་ཡེ་ཤེས་དང་བཀོད་པ་རྒྱ་ཆེན་པོ་ལ་ཐེ་ཚོམ་ཡོད་བཞིན་བ་ནི་དེར་པདྨོའི་མངལ་ན་གནས་པར་སྐྱེ་སྟེ། ལོ་ལྔ་བརྒྱའི་བར་དུ་བུདྡྷ་མི་མཐོང༌། ཆོས་མི་ཐོས་སོ། །ཐེ་ཚོམ་མེད་པ་ནི་པདྨོ་ལས་སྐྱིལ་མོ་ཀྲུང་བཅས་ཏེ་སྐྱེའོ། །བྱང་ཆུབ་ཀྱི་སྙིང་པོ་རྒྱན་གྱི་མདོ་ལས། མཆོད་སྟོན་ལ་བོད་པ་ལ་ཚུལ་ཤིང་བྲིམ་པ་འབྱུང༌། འཕགས་པ་དགེ་བའི་རྩ་བ་ཡོངས་སུ་འཛིན་པ་ལས། བཅོམ་ལྡན་འདས་འཕགས་པ་འོད་སྲུངས་ལ་སྟན་ཕྱེད་བསྟབ་བོ། །བདག་ནི་ཆོག་ཤེས་འདོད་ཆུང་དང༌། །རབ་ཏུ་དབེན་པར་གནས་པ་དང༌། །ཆོས་གོས་ངན་པ་འཆང་སྙམ་རློམ། །འོད་སྲུངས་དེ་ནི་མུ་སྟེགས་ཅན་རྣམས་སོ། །བསླབ་པ་ཀུན་ལས་བཏུས་པའི་ཚིགས་བཅད་ལས། །བཟོད་བྱ་ཐོས་པ་བཙལ་བར་བྱ། །དེ་ནས་དགོན་པར་འགྲོ་བར་བྱ། །དཀོན་མཆོག་ཏ་ལ་ལས་འབྱུང་བ། །གང་དག་བསྲུངས་པས་སངས་རྒྱས་མཆོད་བྱེད་པ། །དེ་དག་སངས་རྒྱས་རྗེས་སུ་དྲན་མི་བྱེད། །གང་དག་སངས་རྒྱས་རྗེས་དྲན་མི་བྱེད་པ། །དེ་དག་རྟག་ཏུ་སངས་རྒྱས་བསམ་ཡས་མཐོང༌། །གང་དག་སངས་རྒྱས་བསམ་ཡས་རྟག་མཐོང་བ། །དེ་ལ་ནམ་ཡང་སངས་རྒྱས་མི་བཞུགས་མིན། །གང་དག་ནམ་ཡང་སངས་རྒྱས་མི་བཞུགས་མིན། །དེ་ལ་བར་སྐབས་ཆོས་ལས་ཉམས་མི་འགྱུར། །དམ་པའི་ཆོས་དྲན་པ་ཉེ་བར་གཞག་པ་ལས། ཅུང་ཟད་ཅིག་བསམ་པ་ལས་མ་བྱིན་ན་ཡི་དྭགས་སུ་སྐྱེ། དམ་བཅས་
པ་ལས་མ་བྱིན་ན་སེམས་ཅན་དམྱལ་བར་འགྲོ། །བྱང་ཆུབ་སེམས་དཔའི་སོ་སོར་ཐར་པ་ལས། གང་བྱིན་པ་དེ་ནི་སངས་རྒྱས་རྣམས་ཀྱིས་བསྔགས་པའོ། །གང་བཞག་པ་དེ་ནི་བྱིས་པ་རྣམས་ཀྱིས་བསྔགས་པའོ། །སྲེད་མེད་ཀྱི་བུས་ཞུས་པ་ལས། དངོས་པོ་གང་ལ་གཏོང་བའི་བློ་མི་སྐྱེ་བ་དང༌། སེམས་མི་འཇུག་པའི་དངོས་པོ་དེ་སྲེལ་བར་མི་བྱའོ། །ཡོངས་སུ་འཛིན་པ་གང་ལ་དེ་སྤང་བའི་སེམས་མི་སྐྱེ་བའི་ཡོངས་སུ་འཛིན་པ་དེ་གཟུང་བར་མི་བྱའོ། །དྲག་ཤུལ་ཅན་གྱིས་ཞུས་པ་ལས། བྱང་ཆུབ་སེམས་དཔའ་ལུང་འབོགས་པ་དང༌། ཁ་དོན་དུ་གཉེར་བས་སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང་ལྡན་པའམ། བྱང་ཆུབ་སེམས་དཔའི་ལམ་གྱི་ཚོགས་སོགས་པ་དང་ལྡན་པའི་ཚིག་བཞི་པའི་ཚིགས་སུ་བཅད་པ་སུ་ལས་མཉན་ནམ་ལུང་མནོས་སམ། བསླབས་པའི་སློབ་དཔོན་དེ་ལ། མིང་དང་ཚིག་དང་ཡི་གེ་ཇི་སྙེད་པ་ལས་ཚིགས་སུ་བཅད་པ་དེ་བསྟན་པ་དེ་སྙེད་ཀྱིས་བསྐལ་པར་གལ་ཏེ་སློབ་དཔོན་དེ་ལ་གཡོ་མེད་པའི་རྙེད་པ་དང༌། བཀུར་སྟི་ཐམས་ཅད་ཀྱིས་མཆོད་པ་བྱས་ཀྱང༌། དྲིན་མི་འཚོབས་ན། ཆོས་མ་ཡིན་པའི་གུས་པས་ལྟ་སྨོས་ཀྱང་ཅི་དགོས། དམ་པའི་ཆོས་པདྨ་དཀར་པོ་ལས། ཆོ་ག་སྤྱོད་ཡུལ་བསྲུང་བྱ་ཞིང༌། །འདུ་འཛི་མེད་ལ་གཙང་མར་བྱ། །རྒྱལ་པོ་དག་དང་རྒྱལ་བུ་དང༌། །འདྲིས་བྱེད་རྟག་ཏུ་སྤང་བར་བྱ། །རྒྱལ་པོའི་ཞམ་འབྲིང་གང་ཡིན་དང༌། །གདོལ་པ་དག་དང་རིགས་ངན་དང༌། །མུ་སྟེགས་ཅན་ནི་དེ་དག་དང༌། །རྣམ་པ་ཀུན་དུ་འདྲིས་པ་སྤང༌། །དགེ་སློང་འདུལ་དང་ལུང་གནས་པ། །དགྲ་བཅོམ་སྙམ་དུ་སྙེམས་བྱེད་ཅིང༌། །ང་རྒྱལ་ཅན་རྣམས་བསྟེན་མི་བྱ། །དགོད་ཅིང་སྨྲ་བའི་སྤྱོད་ཡུལ་ཅན། །དགེ་སློང་མ་རྣམས་རྟག་ཏུ་སྤང༌། །མི་བརྟན་པར་ནི་མངོན་པ་ཡིས། །དགེ་བསྙེན་རྣམས་ཀྱང་སྤང་བར་བྱ། །དགེ་འདུན་བསྲུངས་ཀྱི་རྟོག་པ་ལས་བྱུང༌། དགེ་ཚུལ་དགྲ་བཅོམ་པ་གཅིག་ཅིག་ལ་དམ་བཞག་པའི་རེས་བབ་ནས། ནམ་མཁའི་སྙིང་པོ་ལས། རྒྱལ་པོ་བཞི་ལ་མཆོད་རྟེན་དང༌། དགེ་འདུན་དང༌། ཕྱོགས་བཞིའི་དགེ་འདུན་གྱི་འཕྲོག་པ་དང༌། ཆོས་སྤོང་ཞིང་འགོག་པ་དང༌། རབ་ཏུ་བྱུང་བ་གང་ཡང་རུང་སྟེ། དེ་ལ་བརྡེག་འཚོག་གམ་བསད་བཅིངས་ལ་སོགས་པ་དང༌། ཆོས་གོས་འཕྲོག་ཅིང་ཁྱིམ་ན་གནས་
སུ་འཇུག་པ་དང༌། མཚམས་མེད་པ་གང་ཡང་རུང་བ་ཞིག་བྱེད་པ་དང༌། འཇིག་རྟེན་ཕ་རོལ་ལ་གཡེམ་སྟེ། མི་དགེ་བ་བཅུ་ལང་བླངས་ཤིང་གཞན་མང་ལེན་དུ་འཇུག་པའོ། །སའི་སྙིང་པོ་ལས། ངན་ཕྱིར་རབ་ཏུ་བྱུང་བ་ཚུལ་ཁྲིམས་དང་ལྡན་པའམ། འཆལ་བ་ཡང་རུང་སྟེ། འཁོར་ལོས་སྒྱུར་བའི་རྒྱལ་པོ་ཡང་ཆོས་དང་མཐུན་པས་ཀྱང་ཆད་པས་གཅོད་དུ་མི་གནང་ན། ཆོས་མ་ཡིན་པས་ལྟ་སྨོས་ཅི་དགོས། ལྷག་པའི་བསམ་པས་བསྐུལ་བ་ལས། བྱམས་པ་གང་དག་ལ་བརྩོན་པ་མེད་པ་དང༌། བསམ་གཏན་དང༌། སྤོང་བ་དང༌། ཁ་ཏོན་བྱ་བ་དང་མང་དུ་ཐོས་པ་ཚོལ་བ་མེད་པ་དེ་དག་ནི། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བ་མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་བསྟན་པ་ནི། བསམ་གཏན་ལ་སོགས་པས་རབ་ཏུ་ཕྱེ་བ་ཡིན་གྱི། འདི་ལྟར་ཞལ་ཏ་བྱེད་པ་དང༌། ལས་ཀྱི་མཐས་རབ་ཏུ་ཕྱེ་བ་ནི་མ་ཡིན་ནོ། །བྱམས་པ་ཞལ་ཏ་བྱེད་པ་ལ་བརྩོན་པའི་བྱང་ཆུབ་སེམས་དཔས་རིན་པོ་ཆེ་སྣ་བདུན་གྱི་མཆོད་རྟེན་རྣམས་ཀྱིས་སྟོང་གསུམ་གྱི་སྟོང་ཆེན་པོ་བཀང་ཡང༌། དེས་ང་མཉེས་པ་དང༌། རིམ་གྲོ་དང༌། བསྟི་སྟང་བྱས་པར་མི་འགྱུར་རོ། །དམ་པའི་ཆོས་དྲན་པ་ཉེ་བར་གཞག་པ་ལས། ལྐོག་ཏུ་ལྷག་མར་བྱ་བ་ཏེ་ལྷག་མ་མི་ཟ་བདག་ལ་བྱིན་ན་ཡི་དྭགས་སུ་སྐྱེའོ། །འཇམ་དཔལ་རྣམ་པར་རོལ་པའི་མདོ་ལས། ཁོང་ཁྲོབ་ཁོང་ཁྲོ་བ་ཞེས་བྱ་བ་ནི། བསྐལ་པ་བརྒྱར་བསགས་པའི་དགེ་བའི་རྩ་བ་འཇོམས་པས་དེའི་ཕྱིར་ཁོང་ཁྲོ་བ་ཞེས་བྱའོ། །བློ་གྲོས་མི་ཟད་པ་ལས། དགེ་བའི་རྩ་བ་བྱང་ཆུབ་ཏུ་ཡོངས་སུ་བསྔོས་བ་ནི་བྱང་ཆུབ་ཀྱི་སྙིང་པོ་ལ་འདུག་གི་བར་དུ་བར་མ་དོར་ཟད་པར་མི་འགྱུར་རོ། །བཙུན་པ་ཤ་ར་དྭ་ཏིའི་བུ་འདི་ལྟ་སྟེ་དཔེར་ན། ཆུའི་ཐིགས་པ་རྒྱ་མཚོ་ཆེན་པོར་ལྟུང་བ་ནི། བསྐལ་པའི་མཐར་ཐུག་གི་བར་དུ་བར་མ་ངོར་ཟད་པ་མེད་དོ། །ཉེ་བ་འཁོར་གྱིས་ཞུས་པ་ལས། ཉེ་བ་འཁོར་གལ་ཏེ་ཐེག་པ་ཆེན་པོ་ལ་ཞུགས་པའི་བྱང་ཆུབ་སེམས་དཔའ་ལ། འདོད་ཆགས་དང་ལྡན་པའི་ལྟུང་བ་གང་གཱའི་ཀླུང་གི་བྱེ་མ་སྙེད་བྱུང་བ་དང༌། གང་ཞེ་སྡང་དང་ལྡན་པའི་ལྟུང་བ་གཅིག་འབྱུང་བ། བྱང་ཆུབ་སེམས་
དཔའི་ཐེག་པ་བརྩན་པར་བྱ་ན། དེ་གཉིས་ལས་གང་ཞེ་སྡང་དང་ལྡན་པ་ནི་ཤིན་ཏུ་ལྕིའོ། །དེ་ཅིའི་ཕྱིར་ཞེ་ན། ཞེ་སྡང་ནི་སེམས་ཅན་ཡོངས་སུ་གཏོང་བར་འགྱུར། འདོད་ཆགས་ནི་སེམས་ཅན་སྡུད་པར་འགྱུར་བའི་ཕྱིར་རོ། །ཉེ་བ་འཁོར་དེ་ལ་ཉོན་མོངས་པ་གང་སེམས་ཅན་སྡུད་པར་འགྱུར་བ་དེ་ལ་ནི། བྱང་ཆུབ་སེམས་དཔའ་མཛེས་པ་ཡང་མེད། འཇིགས་པ་ཡང་མེད་དོ། །ཉེ་བ་འཁོར་དེ་ལྟ་བས་ན་ཁྱོད་ལ་འདོད་ཆགས་དང་ལྡན་པའི་ལྟུང་བ་ཐམས་ཅད་ནི་ལྟུང་བ་མ་ཡིན་པར་ངས་བཤད་དོ། །ཉེ་བ་འཁོར་དེ་ལ་གང་ཐབས་ལ་མི་མཁས་པའི་བྱང་ཆུབ་སེམས་དཔའ་དེ་དག་ནི། འདོད་ཆགས་དང་ལྡན་པས་འཇིགས་ཀྱི། ཞེ་སྡང་དང་ལྡན་པས་མ་ཡིན་ནོ། །ཐབས་མཁས་པ་དེ་དག་ནི་ཞེ་སྡང་དང་ལྡན་པས་འཇིགས་ཀྱི། འདོད་ཆགས་དང་ལྡན་པས་མ་ཡིན་ནོ། །དེ་བཞིན་གཤེགས་པའི་མཛོད་ཀྱི་མདོ་ལས། ཆོས་འདོད་པ་རྣམས་རྣམ་པར་གཡེང་བར་བྱེད་པ་འདི་ནི། ཚིག་ཀྱལ་པའི་ནང་ན་མ་རུངས་པའོ། །ཟླ་བ་སྒྲོན་མའི་མདོ་ལས། ཆོས་ཀྱི་རྣམ་གྲངས་ཇི་སྙེད་མང་པོར་ཆུབ་བྱས་ཀྱང༌། །ཐོས་པས་རྒྱགས་ཏེ་ཚུལ་ཁྲིམས་སྲུང་བར་མི་བྱེད་ན། །འདི་ནི་ཐོས་པས་ཡོངས་སུ་བསྐྱབ་པར་མི་ནུས་ཏེ། །ཚུལ་ཁྲིམས་འཆལ་བ་དེས་ན་ངན་སོང་འགྲོ་བར་འགྱུར། །འཕགས་པ་བློ་གྲོས་མི་ཟད་པའི་མདོ་ལས། དེ་ལ་སེམས་ཅན་ལ་དམིགས་པའི་བྱམས་པ་ནི་གང་ཐོག་མར་སྙིང་དུ་སྡུག་པའི་སེམས་ཅན་ལ་ཕན་པ་དང༌། བདེ་བ་ཉེ་བར་སྒྲུབ་པའི་བསམ་པ་གོམས་པར་བྱེད་ཅིང༌། དེ་དང་མཐུན་པའི་བྱམས་པ་ཉེ་བར་སྒྲུབ་པོ། །དེའི་འོག་ཏུ་འདྲེས་པ་རྣམས་ལའོ། །དེའི་འོག་ཏུ་ཉེ་འཁོར་བ་རྣམས་ལའོ། །དེའི་འོག་ཏུ་རང་གི་གྲོང་ན་གནས་པ་རྣམས་ལའོ། །དེའི་འོག་ཏུ་གཞན་གྱི་གྲོང་ནས་ཕྱོགས་གཅིག་གི་བར་ལ་མོས་པར་བྱས་ཤིང་ཁྱབ་པར་བྱས་ནས་རྫོགས་པར་བྱས་ཏེ་གནས་སོ། །ཕྱོགས་བཅུར་ཡང་དེ་བཞིན་ནོ། །དཔལ་བྱིན་གྱིས་ཞུས་པ་ལས། དཔེར་ན་བྱིས་པ་སོལ་བ་ཐོགས་ནས་སུ། །འདི་ནི་དཀར་པོར་བྱ་ཞེས་བདར་བྱེད་ཀྱང༌། །དཀར་པོའི་དངོས་པོར་མི་འགྱུར་ཟད་པར་འགྱུར། །བྱིས་བློ་ཕྱིན་ཅི་ལོག་གི་ང་རྒྱལ་ཅན། །དེ་ལྟར་མི་གང་གཙང་སྦྲའི་བློ་གྲོས་ལྡན། །ང་ཡིས་ལུས་འདི་གཙང་མར་བྱ་ཞེས་ཏེ། །བསྐུས་ཕྱིས་འདབ་
སྟེགས་བརྒྱར་ནི་ཁྲུས་ཀྱང་བྱས། །འཆི་བདག་དབང་གིས་ཟད་འགྱུར་གཙང་མི་འགྱུར། །དྲག་ཤུལ་ཅན་གྱིས་ཞུས་པ་ལས། ཆང་ཡང་སྦྱིན་པར་འབྱུང༌། མཚོན་ཆ་ལ་སོགས་པ་ཡང་ཤུགས་སུ་འགྱུར་བ་ལྟ་བརྟགས་ཏེ་བྱིན་ན་ལྟུང་བ་འདི་ཉིད་ཀྱིས་མངོན་ནོ། །གཙུག་ན་རིན་པོ་ཆེ་ལས། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་གང་ཞེ་ན། སྦྱིན་པ་མ་ཚང་བ་མེད་པ་ནས། ཞི་གནས་ལྷག་མཐོང་མ་ཆང་བ་མེད་པའི་བར་དང༌། སེམས་ཅན་ཡོངས་སུ་སྨིན་པར་བྱ་བ་ལ་རྟག་ཏུ་འབད་པ་སྟེ། འདི་ནི་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་དོ་ཞེས་བྱ་བ་ནས། རིགས་ཀྱི་བུ་འདི་ནི་བྱང་ཆུབ་སེམས་དཔའི་བསམ་གཏན་གྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པའོ་ཞེས་བྱ་བའི་བར་དུ་འབྱུང་ངོ༌། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལས། བྱང་ཆུབ་སེམས་དཔའ་རྣམས་ནི་སྙིང་རྗེ་མེད་པར་ཅི་ཡང་མི་སྤྱོད་དོ། །བསླབ་པ་ཀུན་ལས་བཏུས་པ་ལས་བྱུང་བ། དེ་ལ་ཕུང་པོ་གསུམ་ནི་སྡིག་པ་བཤགས་པ་དང༌། བསོད་ནམས་ཀྱི་རྗེས་སུ་ཡི་རང་བ་དང༌། རང་སངས་རྒྱས་ས་ལ་བསྐུལ་བ་ཞེས་བྱ་སྟེ། བསོད་ནམས་ཀྱི་ཕུང་པོ་ཡིན་པའི་ཕྱིར་རོ། །ལང་ཀར་གཤེགས་པ་ལས། བློ་གྲོས་ཆེན་པོ་དེ་ལ་འདོད་ཆེན་པོ་རྣམས་ཀྱི་ཐར་པར་མི་འདོད་པ་ཇི་ལྟར་འབྱུང་ཞེ་ན། འདི་ལྟ་སྟེ། དགེ་བའི་རྩ་བ་ཐམས་ཅད་སྤངས་པ་དང༌། ཐོག་མ་མེད་པའི་དུས་ཀྱི་སེམས་ཅན་ཐམས་ཅད་ཀྱི་ཕྱིར་སྨིན་པའོ། །དེ་ལ་དགེ་བའི་རྩ་བ་ཐམས་ཅད་སྤངས་པ་གང་ཞེ་ན། འདི་ལྟར་བྱང་ཆུབ་སེམས་དཔའི་སྡེ་སྣོད་ལ་འདི་དག་ནི་ཐར་པ་དང་མཐུན་པའི་མདོ་དང་འདུལ་བ་མ་ཡིན་ནོ་ཞེས་སྨྲ་བས་སྤོང་ཞིང་སྐུར་བ་ཡིན་ཏེ། དགེ་བའི་རྩ་བ་ཐམས་ཅད་སྤངས་པས་མྱ་ངན་ལས་མི་འདའོ། །བློ་གློས་ཆེན་པོ་གཉིས་སུ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལྟར་སེམས་ཅན་ཐམས་ཅད་ཡོངས་སུ་མྱ་ངན་ལས་མ་འདས་ཀྱི་བར་དུ། བདག་ཀྱང་མྱ་ངན་ལས་མི་འདའོ་ཞེས་སྲིད་པར་སྨོན་ལམ་དང་ཐབས་ཡོངས་སུ་བཏང་བས། དེའི་ཕྱིར་མྱ་ངན་ལས་མི་འདའོ། །བློ་གྲོས་ཆེན་པོ་དེ་ནི་ཡོངས་སུ་མྱ་ངན་ལས་མི་འདའ་བ་རྣམས་ཀྱི་རང་
གི་མཚན་ཉིད་དེ། དེས་འདོད་པ་ཅན་རྣམས་ཀྱི་ཚུལ་རབ་ཏུ་འཐོབ་བར་འགྱུར་རོ། །བློ་གྲོས་ཆེན་པོས་ཡང་གསོལ་པ། བཅོམ་ལྡན་འདས་འདི་ལ་གཏན་དུ་མྱ་ངན་ལས་མི་འདའ་བ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེ་ལ་བྱང་ཆུབ་སེམས་དཔའ་འདོད་ཆེན་པོ་ནི་ཆོས་ཐམས་ཅད་ཐོག་མ་ནས་མྱ་ངན་ལས་འདས་པར་ཤེས་ནས། གཏན་དུ་མྱ་ངན་ལས་མི་འདའི་དགེ་བའི་རྩ་བ་ཐམས་ཅད་སྤོང་བའི་འདོད་ཆེན་པོ་ནི་མ་ཡིན་ནོ། །བློ་གྲོས་ཆེན་པོ་དགེ་བའི་རྩ་བ་ཐམས་ཅད་སྤོང་བའི་འདོད་ཆེན་པོ་ཡང༌། དེ་བཞིན་གཤེགས་པའི་བྱིན་གྱི་རླབས་ཀྱིས་བརྒྱ་ལ་གལ་ཏེ་ན་དགེ་བའི་རྩ་བ་ཡོངས་སུ་སྦྱོར་བར་འགྱུར་རོ། །དེ་ཅིའི་ཕྱིར་ཞེ་ན། བློ་གྲོས་ཆེན་པོ་འདི་ལྟར་དེ་བཞིན་གཤེགས་པ་རྣམས་ཀྱིས་ནི་སེམས་ཅན་ཐམས་ཅད་ཡོངས་སུ་མ་བཏང་ངོ༌། །བློ་གྲོས་ཆེན་པོ་དེ་ལྟར་དེའི་ཕྱིར་བྱང་ཆུབ་སེམས་དཔའི་འདོད་ཆེན་པོ་རྣམས་ནི་ཡོངས་སུ་མྱ་ངན་ལས་མི་འདའོ། །བློ་གྲོས་ཆེན་པོའི་ཚིག་ནི་རྣམ་པར་རྟོག་པ་དང་ཐ་དད་པ་ཡང་མ་ཡིན་གཅིག་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། དེའི་རྒྱུ་ལས་འབྱུང་བའི་མཚན་ཉིད་ཀྱི་ཕྱིར་ཚིག་གི་རྣམ་པར་རྟོག་པ་འབྱུང་ངོ༌། །བློ་གྲོས་ཆེན་པོ་དེ་ལྟར་ཚིག་འདི་རྣམ་པར་རྟོག་པ་དང༌། ཐ་དད་པ་ཞིག་ཡིན་ན་ནི། རྣམ་པར་རྟོག་པའི་རྒྱུ་ལས་བྱུང་བ་མ་ཡིན་པས་འགྱུར་རོ། །དེ་སྟེ་གཅིག་པ་ཞིག་ཡིན་ན་ནི་ཚིག་དེ་དོན་གསལ་བར་ཡང་བྱེད་པར་ཡང་མི་འགྱུར་བ་ཞིག་ན་དེ་ནི་བྱེད་དོ། །དེ་ལྟ་བས་ན་ཐ་དད་པ་ཡང་མ་ཡིན། གཅིག་པ་ཡང་མ་ཡིན་ནོ། །རྣམ་རིག་འདི་ནི་མིང་ཙམ་སྟེ། །མཚན་ཉིད་ཀྱིས་ནི་ཡོད་མ་ཡིན། །བློ་གྲོས་ཆེན་པོ་སངས་རྒྱས་ཀྱི་ཞིང་ལ་ལ་ནི་མིག་མི་འཛུམས་པས། ལ་ལ་ནི་སྨིན་མ་བསྐྱོད་པ་ལ་སོགས་པས་ཆོས་སྟོན་ཏོ། །བློ་གྲོས་ཆེན་པོ་ནོར་པ་དེ་ཡང་ཕྱིན་ཅི་ལོག་དང༌། ཕྱིན་ཅི་ལོག་མ་ཡིན་པར་རྣམ་པར་བརྟགས་པས། འདི་ལྟ་སྟེ་འཕགས་པའི་རིགས་སམ། བྱིས་པ་སོ་སོའི་རིགས་དང་རིགས་གཉིས་འཐོབ་པར་བྱེད་པ་ཡིན་ནོ། །བློ་གྲོས་ཆེན་པོ་འཕགས་པའི་རིགས་ཀྱང་འདི་ལྟ་སྟེ། ཉན་ཐོས་དང༌། རང་སངས་རྒྱས་དང༌། སངས་རྒྱས་སུ་དབྱེ་བས་རྣམ་པ་གསུམ་དུ་དབྱེ་བར་འགྱུར་རོ། །དེ་ལ་བློ་
གྲོས་ཆེན་པོ་ཇི་ལྟར་ན་བྱིས་པ་རྣམས་ཀྱིས་ནོར་བ་ལ་རྣམ་པར་བརྟགས་པས། ཉན་ཐོས་ཀྱི་ཐེག་པའི་རིགས་བསྐྱེད་ཅེ་ན། འདི་ལྟ་སྟེ། བློ་གྲོས་ཆེན་པོ་རང་དང་སྤྱིའི་མཚན་ཉིད་ལ་མངོན་པར་ཞེན་པས། མངོན་བར་ཞེན་པ་ཉན་ཐོས་ཀྱི་ཐེག་པའི་རིགས་སུ་འགྱུར་ཏེ། དེ་ལྟར་ན་བློ་གྲོས་ཆེན་པོ་ནོར་པ་དེ་ཉན་ཐོས་ཀྱི་ཐེག་པའི་རིགས་འཐོབ་པར་བྱེད་པ་ཡིན་ནོ། །དེ་ལ་བློ་གྲོས་ཆེན་པོ་ཇི་ལྟར་ན་ནོར་པ་དེ་ཉིད་ལ་རྣམ་པར་བརྟགས་པས། རང་སངས་རྒྱས་ཀྱི་ཐེག་པའི་རིགས་འཐོབ་པར་བྱེད་པ་ཡིན་ཞེ་ན། བློ་གྲོས་ཆེན་པོ་འདི་ལྟ་སྟེ། །ནོར་པ་དེ་ཉིད་ཀྱིས་རང་དང་སྤྱིའི་མཚན་ཉིད་ལ་མངོན་པར་ཞེན་པ་དང༌། འདུ་འཛི་མེད་པའི་ཕྱིར་རང་སངས་རྒྱས་ཀྱི་ཐེག་པའི་རིགས་འཐོབ་པར་བྱེད་པ་ཡིན་ནོ། །བློ་གྲོས་ཆེན་པོ་དེ་ལ་ཇི་ལྟར་ན། མཁས་པ་རྣམས་ཀྱིས་ནོར་བ་དེ་ཉིད་ལ་རྣམ་པར་བརྟགས་པས། སངས་རྒྱས་ཀྱི་ཐེག་པའི་རིགས་འཐོབ་པར་བྱེད་པ་ཡིན་ཞེ་ན། འདི་ལྟ་སྟེ། བློ་གྲོས་ཆེན་པོ་རང་གི་སེམས་སྣང་བ་ཙམ་ཁོང་དུ་ཆུད་པའི་ཕྱིར་ཕྱི་རོལ་ལ་དངོས་པོ་དང་དངོས་པོ་མེད་པར་རྣམ་པར་མི་རྟོག་པས་རྣམ་པར་བརྟགས་ན་སངས་རྒྱས་ཀྱི་ཐེག་པའི་རིགས་འཐོབ་པར་བྱེད་པ་ཡིན་ནོ། །དེ་ལྟ་བས་ན་བློ་གྲོས་ཆེན་པོ་འདི་ནི་རིགས་ཏེ་རིགས་ཀྱི་དོན་ཏོ། །བློ་གྲོས་ཆེན་པོ་བྱིས་པ་རྣམས་ཀྱིས་ནོར་བ་ལ་དངོས་པོ་སྣ་ཚོགས་ཀྱི་རང་བཞིན་དུ་འདི་ནི་དེ་བཞིན་ཏེ། གཞན་དུ་མ་ཡིན་ནོ་ཞེས་རྣམ་པར་བརྟགས་ན། འཁོར་བའི་ཐེག་པའི་རིགས་འཐོབ་པར་བྱེད་དོ། །བློ་གྲོས་ཆེན་པོ་མྱ་ངན་ལས་འདས་པ་ནི་རྣམ་པ་བཞི་སྟེ། དངོས་པོའི་རང་བཞིན་མེད་པའི་མྱ་ངན་ལས་འདས་པ་དང༌། མཚན་ཉིད་སྣ་ཚོགས་ཀྱི་དངོས་པོ་མེད་པའི་མྱ་ངན་ལས་འདས་པ་དང༌། རང་གི་མཚན་ཉིད་ཀྱི་དངོས་པོ་མེད་པར་རྟོག་པའི་མྱ་ངན་ལས་འདས་པ་དང༌། ཕུང་པོ་རྣམས་ཀྱི་རང་དང་སྤྱིའི་མཚན་ཉིད་ཀྱི་རྒྱུན་ཆད་པའི་མྱ་ངན་ལས་འདས་པའོ། །དེ་དག་ནི་བློ་གྲོས་ཆེན་པོ་མུ་སྟེགས་ཅན་རྣམས་ཀྱི་མྱ་ངན་ལས་འདས་པ་ཡིན་ཏེ། དའི་གསུང་རབ་མ་ཡིན་ནོ། །བློ་གྲོས་ཆེན་པོ་ངའི་གསུང་རབ་ལ་ནི་རྣམ་པར་རྟོག་པ་དང་བཅས་པ་དང༌། བཅས་པའི་ཡིད་ཀྱི་རྣམ་
པར་ཤེས་པ་བཟློག་པ་ནི་མྱ་ངན་ལས་འདས་པའོ་ཞེས་བྱའོ། །ཀུན་བརྟགས་པ་ཡི་རང་བཞིན་ཡོད། །གཞན་གྱི་དབང་ནི་མེད་པ་སྟེ། །ནོར་པ་དག་གིས་བརྟགས་པ་སྣང༌། །གཞན་གྱི་དབང་ལ་མི་རྟོག་གོ །ཀུན་རྫོབ་དང་ནི་དོན་དམ་སྟེ། །རྒྱུ་ལས་སྐྱེས་པ་གསུམ་དུ་མེད། །བརྟགས་པ་དག་ནི་ཀུན་རྫོབ་བཤད། །དེ་བཤད་འཕགས་པའི་སྤྱོད་ཡུལ་ལོ། །བློ་གྲོས་ཆེན་པོ་ཡེ་ཤེས་ནི་རྣམ་པ་གསུམ་སྟེ། འཇིག་རྟེན་པ་དང༌། འཇིག་རྟེན་ལས་འདས་པ་དང༌། འཇིག་རྟེན་ལས་འདས་པའི་མཆོག་གོ །དེ་ལ་སྐྱེས་ནས་འཇིག་པ་ནི་རྣམ་པར་ཤེས་པའོ། །མ་སྐྱེས་མི་འཇིག་པ་ནི་ཡེ་ཤེས་སོ། །གཞན་ཡང་བློ་གྲོས་ཆེན་པོ་གསུམ་འདུས་པའི་བྱ་བ་སྐྱེ་བ་དང་ལྡན་པའི་མཚན་ཉིད་ནི་རྣམ་པར་ཤེས་པའོ། །མི་ལྡན་པའི་ངོ་བོ་ཉིད་ནི་ཡེ་ཤེས་སོ། །བློ་གྲོས་ཆེན་པོ་ཁྱད་པར་འདོད་པའི་བྱང་ཆུབ་སེམས་དཔས་དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་ཞེས་བསྒྲགས་པ་རྣམ་པར་སྦྱར་བར་བྱའོ། །དེ་ལ་མིང་དང་མཚན་མ་ནི་ཡོངས་སུ་ཀུན་བརྟགས་པའི་རང་བཞིན་དུ་ཤེས་པར་བྱའོ། །གང་ཡང་བློ་གྲོས་ཆེན་པོ་དེ་ལ་གནས་ཤིང་བཞུགས་པའི་རྣམ་པར་རྟོག་པ་སེམས་དང་སེམས་ལས་བྱུང་བ་ཞེས་པ་བསྒྲགས་པ་ཉི་མ་དང་འོད་ཟེར་ལྷན་ཅིག་པ་བཞིན་དུ་དུས་གཅིག་ཏུ་བྱུང་བ་སྣ་ཚོགས་ཀྱི་མཚན་ཉིད་རང་གི་རྣམ་པར་རྟོག་པ་ཁོང་དུ་ཆུད་པར་བྱེད་པའི་རང་བཞིན་ནི་གཞན་གྱི་དབང་ཞེས་བྱའོ། །བློ་གྲོས་ཆེན་པོ་ཡང་དག་པའི་ཡེ་ཤེས་དང༌། དེ་བཞིན་ཉིད་ནི་མི་འཇིགས་པའི་ཕྱིར་ཡོངས་སུ་གྲུབ་པར་ཤེས་པར་བྱའོ། །བློ་གྲོས་ཆེན་པོ་གཞན་ཡང་གསེར་དང་རྡོ་རྗེ་དང༌། རྒྱལ་པོའི་རིན་སྲེད་དང༌། ཐོབ་པ་དང་ཁྱད་པར་དག་ནི་མི་འཇིགས་པ་ཡིན་ཏེ། བློ་གྲོས་ཆེན་པོ་གལ་ཏེ་མངོན་པར་རྟོགས་པ་ཐོབ་པ་ཡིན་ན་ནི། འཕགས་པ་རྣམས་འཕགས་པ་མ་ཡིན་པར་འགྱུར་ཏེ། འཕགས་པ་རྣམས་ནི་འཕགས་པ་མ་ཡིན་པར་མི་འགྱུར་རོ། །བློ་གྲོས་ཆེན་པོ་གསེར་དང་རྡོ་རྗེ་ནི་རྣམ་པར་གཞག་ཀྱང་དེ་བཞིན་དུ་འདུག་སྟེ། མི་འབྲི་མི་སྐྱེ་ན་བྱས་པ་ལྡེམ་པོ་ངག་ཏུ་བཤད་པ་ལ། མི་མཁས་པ་དག་གིས་ཕྱི་ནང་གི་ཆོས་ཐམས་ཅད་སྐད་ཅིག་པའི་དོན་ཇི་ལྟར་བརྟགས།
སེམས་ནི་ཀུན་གཞི་རྣམ་ཤེས་ཏེ། །དར་སེམས་ཉིད་ནི་ཡིད་ཡིན་ནོ། །གང་གིས་ཡུལ་རྣམས་འཛིན་པ་ནི། །དེ་ནི་རྣམ་པར་ཤེས་ཞེས་བྱ། །སེམས་ནི་རྟག་ཏུ་ལུང་མ་བསྟན། །ཡིད་ནི་གཉི་གར་གྱུར་པ་སྟེ། །རྣམ་པར་ཤེས་པ་འབྱུང་བ་ཡང་དེ་ནི་དགེ་དང་མི་དགེ་བའོ། །ལྔ་པོ་སྣང་ལ་རྟོག་པར་བྱེད། །ཆོས་ལྔ་དག་དང་རང་བཞིན་རྣམས། །དེ་ནི་སངས་རྒྱས་སྤྱོད་ཡུལ་ཡིན། །ཡོད་པའི་ཟླ་གྲངས་མེད་པ་སྟེ། །མེད་བའང་ཡོད་པའི་ཟླ་གྲངས་སོ། །ཀུན་དུ་བརྟགས་དང་གཞན་གྱི་དབང༌། །ཕན་ཚུན་མཚན་ཉིད་ཐ་མི་དང༌། །གཟུགས་ཀྱི་མི་རྟག་ཉིད་བཞིན་ཏེ། །གཅིག་ལ་གཅིག་ཀྱང་སྐྱེད་བྱེད་པའོ། །བརྟགས་པ་ཤུལ་དུ་མཐོང་གྱུར་ན། །གཞན་གྱི་དབང་ནི་མི་སྐྱེའོ། །གཞན་གྱི་དབང་ནི་རབ་མཐོང་ན། །བརྟགས་པ་དེ་བཞིན་ཉིད་དུ་འགྱུར། །ཇི་ལྟར་འཕགས་པ་རྣམ་བསྒོམ་ལྟར། །དངོས་པོའི་དངོས་ཉིད་མེད་མོད་ཀྱི། །ཇི་ལྟར་བྱིས་པས་བརྟགས་པ་ལྟར། །དངོས་པོ་དག་ནི་ཡོད་པའོ། །སེམས་ནི་སྣང་དང་རྣམ་བྲལ་བ། །རང་བཞིན་གཉིས་ཀྱང་སྤངས་པ་སྟེ། །གནས་རྣམས་རབ་ཏུ་གྱུར་པ་ནི། །སྐྱེ་བ་མེད་པར་ངས་བཤད་དོ། །ནམ་ཡང་སྟོང་བས་སྟོང་པ་ཉིད། །སྐྱེ་བ་མེད་པའི་སྟོང་པའོ། །ཇི་སྲིད་སེམས་ནི་འཇུག་པའི་བར། །དེ་སྲིད་འཇིག་རྟེན་རྒྱང་བན་ཡིན། །འཇིག་རྟེན་རང་གི་སེམས་མཐོང་ན། །རྣམ་པར་རྟོག་པ་མི་འཇིག་གོ །ང་དང་དེ་བཞིན་གཤེགས་རྣམས་ཀྱིས། །སྟོང་ཕྲག་གསུམ་གྱི་མདོ་རྣམས་ཀྱིས། །མྱ་ངན་འདས་པ་ཤིན་ཏུ་བཤད། །འདོད་པའི་ཁམས་དང་གཟུགས་མེད་དུ། །སངས་རྒྱས་རྣམ་པར་འཚང་མི་རྒྱ། །གཟུགས་ཀྱི་ཁམས་ཀྱི་འོག་མིན་དུ། །འདོད་ཆགས་བྲལ་ཁྱོད་འཚང་རྒྱའོ། །རེག་པ་དང་ནི་གཟིར་བ་ཡིས། །ལྷ་དང་སེམས་ཅན་དམྱལ་བའི་ལུས། །བར་མ་དོ་ཡི་སྲིད་མེད་དེ། །རྣམ་པར་ཤེས་པས་བསྐྱེད་པ་ཡིན། །མངལ་སྒོང་དྲོང་གཤེར་ལ་སོགས་པའི། །སྲིད་པ་བར་མ་འབྱུང་བ་དག །སེམས་ཅན་མང་པོ་སྣ་ཚོགས་བཞིན། །དམ་ཚིག་གསུམ་གྱི་རྒྱལ་པོ་ལས། །ཐང་ལས་སྐྱེས་པའི་རིན་པོ་ཆེའི་རི་རྣམས་དང༌།
ཆུ་ལས་སྐྱེས་པའི་རིན་པོ་ཆེའི་རི་རྣམས་དང༌། །ཐང་ལས་སྐྱེས་པའི་རིན་པོ་ཆེ་ལ་སོགས་པ་ཕྱོགས་བཅུ་ན་རྣམ་པར་གནས་པ་ང་ཡིར་བྱ་བ་མེད་པར་ཡོངས་སུ་གཟུང་བ་མེད་པ་རྣམས་ལ་འབུལ་ལོ། །དོན་དམ་པའི་ཆོས་ཀྱི་རྣམ་པར་རྒྱལ་བ་ལས་འབྱུང་བ། ཁ་ཅིག་ནི་མངལ་ན་གནས་པ་ཉིད་ཀྱི་ཚེ་སྲིན་བུ་རྣམས་ཀྱིས་ཟོས་སོ། །དྲང་སྲོང་ཆེན་པོ་ཡང་འདི་ལྟ་སྟེ། བསྐལ་པས་བསྲེགས་པ་འདི་ནི་དེ་བཞིན་གཤེགས་པ་རྣམས་ཀྱི་ཐབས་མཁས་པ་སྟེ། དྲང་སྲོང་ཆེན་པོ་འདི་ལྟ་སྟེ་དཔེར་ན། གསེར་ལ་གནོད་པ་བྱ་བའི་ཕྱིར་མེར་བཅུག་པ་མ་ཡིན་གྱི། གསེར་མ་དུལ་བ་འདི་ཇི་ལྟར་དུལ་བར་འགྱུར་སྙམ་ནས་དེའི་ཕྱིར་མེར་འཇུག་གོ །དྲང་སྲོང་ཆེན་པོ་དེ་བཞིན་དུ་དེ་བཞིན་གཤེགས་པ་རྣམས་ཀྱང་རྒྱུ་མེད་པར་བསྲེག་པའི་བསྐལ་པ་མི་འབྱིན་ཏེ། འདིར་སེམས་ཅན་གང་ལ་ཡང་གནོད་པར་མི་འགྱུར་རོ། །བསྐལ་པས་བསྲེགས་པའི་འཇིགས་པ་ལས་བདག་ཉིད་བསྲེགས་པ་མཐོང་ནས་དགའ་བ་དང༌། མཆོག་ཏུ་དགའ་བ་སྐྱེས་ནས་འདི་སྐད་ཅེས་བདག་ཀྱང་འདི་ལྟར་གྱུར་ཅེས་སྨོན་ལམ་འདེབས་སོ། །སེམས་ཅན་གནས་གང་དུ་འདུ་བར་གྱུར་པ་བདག་ལ་བཀའ་སྩོལ་ཅིག །བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་ཐེག་པ་ཆེན་པོ་གཅིག་གིས་འབྱུང་བ་ལས་སེམས་ཅན་འདུ་བར་འགྱུར་རོ། །བྱང་ཆུབ་ཀྱི་སྙིང་པོ་ལ་སེམས་ཅན་འདུ་བར་འགྱུར་རོ། །ཕུང་པོ་མ་ལུས་པའི་དབྱིངས་སུ་སེམས་ཅན་རྣམས་འདུ་བར་འགྱུར་རོ། །དྲང་སྲོང་ཆེན་པོ་ཡང་འདི་ལྟ་སྟེ་དཔེར་ན། ཆུ་ཀླུང་ཐ་དད་པ་དང༌། ཀླུང་ཕྲན་དང་ཆེན་པོ་དག་རྒྱ་མཚོ་ཆེན་པོར་བབ་ནས་རོ་གཅིག་ཏུ་གྱུར་ཏོ། །དེ་བཞིན་དུ་སེམས་ཅན་གྱི་ཁམས་ཇི་སྙེད་པའི། དྲི་མ་མེད་པར་གྲགས་པས་བསྟན་པ་ལས། ཐབས་ཀྱིས་མ་ཟིན་པའི་ཤེས་རབ་ནི་བཅིངས་པའོ། །ཐབས་ཀྱིས་ཟིན་པའི་ཤེས་རབ་ནི་གྲོལ་བའོ། །ཤེས་རབ་ཀྱིས་མ་ཟིན་པའི་ཐབས་ནི་བཅིངས་པའོ། །ཤེས་རབ་ཀྱིས་ཟིན་པའི་ཐབས་ནི་གྲོལ་བའོ། །དེ་ལ་ཐབས་ཀྱིས་མ་ཟིན་པ་ཤེས་རབ་བཅིངས་པ་གང་ཞེ་ན། འདི་ལྟ་སྟེ། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་ལ་ངེས་པར་སེམས་ཤིང༌། མཚན་དང་དཔེ་བྱད་བཟང་པོ་
དང༌། སངས་རྒྱས་ཀྱི་ཞིང་གི་རྒྱན་དང༌། སེམས་ཅན་ཡོངས་སུ་སྨིན་པར་བྱ་བ་ལ་མི་སེམས་པ་ནི་ཐབས་ཀྱིས་མ་ཟིན་པའི་ཤེས་རབ་སྟེ་བཅིངས་པའོ། །དེ་ལ་ཐབས་ཀྱིས་ཟིན་པའི་ཤེས་རབ་དགྲོལ་བ་གང་ཞེ་ན། མཚན་ལ་སོགས་པ་ལ་ངེས་པར་སེམས་ཤིང༌། སྟོང་པ་མཚན་མ་མེད་པ་དང༌། སྨོན་པ་མེད་པ་ལ་འདྲིས་པར་བྱ་བ་འདི་ནི་ཐབས་ཀྱིས་ཟིན་པའི་ཤེས་རབ་སྟེ་གྲོལ་བའོ། །དེ་ལ་ཤེས་རབ་ཀྱིས་མ་ཟིན་པའི་ཐབས་བཅིངས་པ་གང་ཞེ་ན། འདི་ལྟ་སྟེ། ལྟ་བ་ཐམས་ཅད་དང༌། ཉོན་མོངས་པ་ཀུན་ནས་ལྡང་བ་དང༌། བག་ལ་ཉལ་བ་དང༌། རྗེས་སུ་ཆགས་པ་དང༌། ཁོང་ཁྲོ་བ་ལ་གནས་པའི་དགེ་བའི་རྩ་བ་རྩོམ་པ་ཐམས་ཅད་བྱང་ཆུབ་ཏུ་མི་བསྔོ་བ་ནི། ཤེས་རབ་ཀྱིས་མ་ཟིན་པའི་ཐབས་ཏེ་བཅིངས་པའོ། །དེ་ལ་ཤེས་རབ་ཀྱིས་ཟིན་པའི་ཐབས་གྲོལ་བ་གང་ཞེ་ན། འདི་ལྟ་སྟེ། ལྟ་བ་ཐམས་ཅད་ཉོན་མོངས་པ་ལ་སོགས་པ་སྤངས་པའི་དགེ་བའི་རྩ་བ་རྩོམ་པ་ཐམས་ཅད་བྱང་ཆུབ་ཏུ་ཡོངས་སུ་བསྔོས་ལ། དེས་ཀྱང་བསྙེམས་པ་མེད་པ་དེ་ནི་ཤེས་རབ་ཀྱིས་ཟིན་པའི་ཐབས་ཏེ་གྲོལ་བའོ། །ཀུན་དགའ་བོ་གང་ན་བྱང་ཆུབ་སེམས་དཔའ་སངས་རྒྱས་ཀྱི་མཛད་པ་བྱེད་པའི་སངས་རྒྱས་ཀྱི་ཞིང་རྣམས་ཀྱང་ཡོད་དོ། །གང་ན་འོད་དང་གང་ན་བྱང་ཆུབ་ཀྱི་ཤིང་དང༌། གང་ན་དེ་བཞིན་གཤེགས་པའི་མཚན་དང༌། གང་ན་ཆོས་དང༌། གང་ན་ཞལ་ཟས་ལ་སོགས་པའི་སངས་རྒྱས་ཀྱིས་མཛད་པའི་སངས་རྒྱས་ཀྱི་ཞིང་ཡོད་དོ། །འཕགས་པ་རིན་པོ་ཆེའི་མཐའ་ལས། དེས་ཇི་སྐད་བསྟན་པ་ལ་གལ་ཏེ་མཚུངས་པ་མེད་པ་བྱེད་པ་དེ་ལྟར་མོས་ཏེ། མཚམས་མེད་པ་ཡང་དེ་ལྟ་བུའི་དབྱིངས་ཡིན་པར་ཤེས་ན། དེ་ཀུན་ནས་ཉོན་མོངས་པ་ཅན་དུ་མི་འགྱུར་རོ། །དེ་ཅིའི་ཕྱིར་ཞེ་ན། འཇམ་དཔལ་མཚམས་མེད་པ་ནི་ཆོས་ཀྱི་དབྱིངས་སུ་མཚུངས་པར་མཉམ་པའི་ཕྱིར་ཏེ། འདི་ལྟར་མཚམས་མེད་པའི་དབྱིངས་དང་ཆོས་ཀྱི་དབྱིངས་ནི་གཉིས་སུ་མེད་ཅིང་གཉིས་སུ་བྱར་མེད་དོ། །ལྷག་པའི་བསམ་པ་བ་སྐུལ་བ་བྱས་ལ། བྱམས་པ་བྱང་ཆུབ་སེམས་དཔའི་ཐེག་པ་པའི་གང་ཟག་ཆོས་བཞི་དང་ལྡན་ན། ལྔ་བརྒྱ་
ཐ་མ་ལ་དམ་པའི་ཆོས་རྣམ་པར་འཇིག་པའི་ཚེ། མ་སྣད་ཅིང་མ་སྨས་ལ་བདེ་བར་ཡོངས་སུ་ཐར་བར་འགྱུར་རོ། །བཞི་གང་ཞེ་ན། བདག་གིས་འཁྲུལ་པ་ལ་སོ་སོར་རྟོགས་དང༌། བྱང་ཆུབ་སེམས་དཔའི་ཐེག་པ་པའི་གང་ཟག་གཞན་གྱི་ཉེས་པ་མི་གླེང་བ་དང༌། མཛའ་བཤེས་ཀྱི་ཁྱིམ་དང༌། སློང་མོ་སྟེར་བའི་ཁྱིམ་ལ་མི་ལྟ་བ་དང༌། ཡིད་དུ་མི་འོང་བའི་ཚིག་སྤོང་བའོ། །ཡང་བཞི་སྟེ། ཐོས་པ་ཉུང་དུའི་སེམས་ཅན་ཡོངས་སུ་སྤོང་བ་དང༌། འཁོར་མི་བསྡུ་བ་དང་བས་མཐའི་གནས་མལ་ལ་བརྟེན་པ་དང༌། བདག་དུལ་བ་དང༌། ཞི་བ་དང༌། ཞི་གནས་ཀྱི་སྦྱོར་བ་ལ་བརྩོན་པའོ། །བྱམས་པ་ད་ནི་ཚུལ་འཆོས་པ་ལ་དགོན་པ་ན་གནས་པ་ཞེས་མི་སྨྲའོ། །ང་ནི་བསོད་ནམས་ཆུང་དུ་ལ་འདོད་པ་ཆུང་བ་ཞེས་མི་སྨྲའོ། །ང་ནི་ཁ་ཟས་བཟང་པོ་འདོད་པ་ལ་བསོད་སྙོམས་པ་ཞེས་མི་སྨྲའོ། །ང་ནི་གོས་སྡུ་གུ་འདོད་པ་ལ་ཕྱག་དར་ཁྲོད་པ་ཞེས་མི་སྨྲའོ། །ང་ནི་ཁྱིམ་པ་དང་རབ་ཏུ་བྱུང་བ་འདྲེས་པ་ལ་མ་འཛིངས་པ་ཞེས་མི་སྨྲའོ། །ང་ནི་གཡོ་སྒྱུ་ཅན་ལ་སངས་རྒྱས་འབྱུང་བ་དང་ཕྲད་པ་ཞེས་མི་སྨྲའོ། །ང་ནི་གཞན་གྱི་འཁྲུལ་པ་ཚོལ་བ་ལ་རྣལ་འབྱོར་ལ་བརྩོན་པ་ཞེས་མི་སྨྲའོ། །ང་ནི་ཁོང་ཁྲོ་བ་མང་བ་ཚུལ་ཁྲིམས་ཀྱི་ཕུང་པོ་ཡོངས་སུ་དག་པ་ཞེས་མི་སྨྲའོ། །ང་ནི་ང་རྒྱལ་ཅན་ལ་མང་དུ་ཐོས་པ་ཞེས་མི་སྨྲའོ། །ང་ནི་ཕྱོགས་འཛིན་པ་ལ་འདུལ་བ་འཛིན་པ་ཞེས་མི་སྨྲའོ། །ང་ནི་རྒོད་པ་ལ་ཆོས་སྨྲ་བ་ཞེས་མི་སྨྲའོ། །ང་ནི་ཁྱིམ་པ་དང་འདྲེས་པ་ལ་ཞལ་ཏ་བྱེད་པ་ཡོངས་སུ་དག་པ་ཞེས་མི་སྨྲའོ། །ང་ནི་ཡོན་གནས་དམ་པ་ལ་ཟང་ཟིང་མེད་པ་ཡོངས་སུ་གཏོང་བ་ཞེས་མི་སྨྲའོ། །ང་ནི་ལན་དུ་ཕན་འདོགས་སུ་རེ་བ་ལ་བསྡུ་བའི་དངོས་པོ་ཞེས་མི་སྨྲའོ། །ང་ནི་རྙེད་པ་དང་བཀུར་སྟི་ལ་ཆགས་པ་ལ་ལྷག་པའི་བསམ་པ་ཡོངས་ས་དག་པ་ཞེས་མི་སྨྲའོ། །ང་ནི་མདང་པ་མང་བ་ལ་རབ་ཏུ་བྱུང་བ་ཞེས་མི་སྨྲའོ། །ང་ནི་ཕ་རོལ་ལ་ཤས་པར་བྱེད་པ་ལ་བསླབ་པ་འདོད་པ་ཞེས་མི་སྨྲའོ། །ང་ནི་མ་གུས་པ་ལ་ཆོས་སྦྱིན་པ་ཞེས་མི་སྨྲའོ། །ང་ནི་འཇིག་རྟེན་པའི་གསང་ཚིག་ལ་བརྩོན་པ་ལ་ཆས་ལ་དགའ་བ་ཞེས་མི་སྨྲའོ། །ང་ནི་སྟང་པ་ཉིད་ལ་མི་བརྩོན་
པ་ལ་ངེས་པར་བྱུང་བ་ཞེས་མི་སྨྲའོ། །ང་ནི་དམིགས་པ་ཅན་ལ་མངོན་པར་རྟོགས་པ་ཞེས་མི་སྨྲའོ། །ང་ནི་མཐུ་མེད་པ་ལ་བཟོད་པ་ཡོངས་སུ་རྫོགས་པ་ཞེས་མི་སྨྲའོ། །ང་ནི་མ་བཅོས་པ་ལ་བཟོད་པའི་སྟོབས་ཀྱི་གོ་ཆ་ཅན་ཞེས་མི་སྨྲའོ། །ང་ནི་རང་བཞིན་གྱིས་འདོད་ཆགས་ཆུང་བ་ལ་ཚངས་པར་སྤྱོད་པ་དགའ་བ་ལ་གནས་པ་ཞེས་མི་སྨྲའོ། །ང་ནི་སྦྱོར་བ་ལ་མི་གནས་པ་ལ་ཇི་སྐད་སྨྲས་པ་དེ་བཞིན་བྱེད་པ་ཞེས་མི་སྨྲའོ། །ང་ནི་ཐབས་དང་ལྡན་པར་གྱུར་པ་ལ་གཡོ་སྒྱུ་ཅན་ཞེས་མི་སྨྲའོ། །ང་ནི་སེམས་ཞུམ་པ་ལ་ང་རྒྱལ་མེད་པ་ཞེས་མི་སྨྲའོ། །ལག་བཟངས་ཀྱིས་ཞུས་པ་ལས། ལག་བཟངས་བྱང་ཆུབ་སེམས་དཔའ་ནི་སློང་བ་རྣམས་ཀྱིས་བསློངས་པ་ན་ཡན་ལག་དང་ཉིད་ལག་བཅད་ནས་སློང་བ་རྣམས་ལ་མི་སྦྱིན་ནོ། །དེ་ཅིའི་ཕྱིར་ཞེ་ན། དེ་དག་ཉིད་ཀྱིས་སེམས་ཅན་དམྱལ་བ་ཆེན་པོར་འགྱུར་བ་དང༌། མི་དགེ་བའི་ལས་ཆེན་པོ་རྒྱ་ཆེ་བ་ཡོངས་སུ་མྱོང་བའི་ཕྱིར་རོ། །ལག་བཟངས་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སློང་བས་བདོག་པ་ཐམས་ཅད་བླངས་ན། ཕ་མ་ལ་གནོད་པ་བྱས་ཤིང་སྤངས་ཏེ། །ནོད་པ་བྱས་ཤིང་བུ་དང་ཆུང་མ་དང༌། བྲན་ཕོ་དང་བྲན་མོ་དང་ཞོ་ཤས་འཚོ་བ་དང༌། ལས་བྱེད་པ་དག་ལ་གནོད་པ་བྱས་ཤིང་སྤངས་ཏེ། སྡུག་བསྔལ་བར་བྱས་ནས་སློང་བ་རྣམས་ལ་སྦྱིན་བར་མི་བྱེད་དོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ལ་མཚུངས་པར་སྙིང་བརྩེ་བའི་ཕྱིར་རོ། །བུ་མོ་ཟླ་མཆོག་གིས་ཞུས་པ་ལས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་སྐྱེ་བ་དང་འགག་པ་དང༌། ཆད་པ་དང༌། རྟག་པ་དང༌། དོན་གཅིག་པ་དང༌། དོན་ཐ་དད་པ་དང༌། འོང་བ་དང་འགྲོ་བ་མ་མཆིས་པའོ། །ལས་རྣམ་པར་འབྱེད་པ་ལས། མདོག་མི་སྡུག་པར་འགྱུར་བའི་ལས་བཅུ་སྟེ། ད་བཞིན་གཤེགས་པའི་མཆོད་རྟེན་གྱི་མར་མའི་འོད་ཀྱི་བར་དུ་གཅོད་པ་དང༌། གང་ཟག་མདོག་མི་སྡུག་པ་རྣམས་ལ་དབང་ཟ་བ། རིགས་དམའ་བར་འགྱུར་བའི་ཆོས་བཅུ་སྟེ། རིགས་དམའ་བར་སྐྱེ་བ་རྣམས་ལ་
དབང་ཟ་བ། ཤེས་རབ་འཆལ་བར་གྱུར་པའི་ཆོས་སྨྲ་བ་རྣམས་ལེགས་སོ་ཞེས་བྱ་བ་སྦྱིན་པ། ཡི་དྭགས་སུ་གྱུར་པའི་ཆོས་བཅུ་སྟེ། བཀྲེས་ཤིང་སྐོམ་བཞིན་དུ་འཆི་བའི་དུས་བྱེད་པ་དང༌། དངོས་པོ་ལ་ཆགས་བཞིན་དུ་འཆི་བའི་དུས་བྱེད་པ། དེ་ལ་ངེས་པར་སྐྱེ་བར་འགྱུར་བའི་ལས་གང་ཞེ་ན། དགེ་བའི་ལས་བྱས་ནས་འདིས་བདག་འདི་ལྟ་བུ་ཞིག་ཏུ་སྐྱེ་བར་གྱུར་ཅིག་ཅེས་ཡོངས་སུ་བསྔོ་བ་དང་མཚམས་མེད་པ་ལྔ་རྣམས་སོ། །དེ་ལ་ལས་གང་དང་ལྡན་ན། གང་ཟག་སེམས་ཅན་དམྱལ་བ་རྣམས་སུ་སྐྱེས་མ་ཐག་ཏུ་འཆི་འཕོ་བའི་ལས་གང་ཞེ་ན། དཔེར་ན་རྒྱལ་པོ་མ་སྐྱེས་དགྲས་ཕ་བསད་པ་ལྟ་བུ་སྟེ། དེ་སྐད་དུ། ཤིན་ཏུ་མི་བཟད་ལས་རྣམས་བྱས་པ་ན། །བདག་ལ་སྨོད་དང་རབ་ཏུ་བཤགས་པ་དང༌། །སྡོམ་པ་བྱེད་པས་དེ་དག་བསྲབས་འགྱུར་གྱི། །ཤིན་ཏུ་རྩ་ནས་ཕྱིན་ཅེས་མི་སྨྲའོ། །ཞེས་གསུངས་སོ། །གང་སྔར་བདེ་བར་འགྱུར་ལ་ཕྱིས་སྡུག་བསྔལ་བར་འགྱུར་བའི་ལས་གང་ཞེ་ན། འདི་ལ་གང་ཟག་འགའ་ཞིག་སྦྱིན་པ་བྱིན་པ་ན། ཡིད་རབ་ཏུ་དགའ་ཞིང་དགའ་བ་དང༌། ཡིད་བདེ་བ་སྐྱེས་ལ་བྱིན་ནས་ནི་འབྱད་པ་ཡིན་ཏེ། གང་ཟག་དེ་གང་གི་ཚེ་མི་རྣམས་ཀྱི་ནད་དུ་སྐྱེས་པ་ན། སྔར་ཕྱུག་པ་དང་བློན་པོ་དང་ཉེ་དུ་མང་བ་ལ་སོགས་པར་འགྱུར་ལ། ཕྱིས་ཉམས་པར་འགྱུར་རོ། །དེ་ལ་གང་ཟག་གང་ཚེ་ཟད་པར་གྱུར་པ་ལས་མ་ཟད་པ་གང་ཞེ་ན། གང་ཟག་གང་སེམས་ཅན་དམྱལ་བ་ནས་ཤི་འཕོས་ནས། སེམས་ཅན་དམྱལ་བར་སྐྱེ་བ་དང༌། ལས་ཟད་ལ་ཚེ་མ་ཟད་པ་གང་ཞེ་ན། སྔར་བདེ་བར་གྱུར་ལ་ཕྱིས་སྡུག་བསྔལ་བར་འགྱུར་བ་དང༌། ཆད་འཐུང་བ་ལ་ཉེས་དམིགས་སུམ་ཅུ་རྩ་དྲུག་སྟེ། ཚེ་འདི་ལ་ནོར་ཟད་པ་དང༌། ནད་ཀྱི་གཞིར་འགྱུར་པ་དང༌། འཐབ་པ་དང༌། མཚད་འདྲུ་བ་དང༌། རྩོད་པ་འཕེལ་བ་དང༌། སྦ་བའི་གནས་སྟོན་པ་དང༌། མི་སྙན་པ་བསྐྱེད་པ་དང༌། ཤེས་རབ་ཉམས་པར་བྱེད་པ་དང༌། མ་ཐོབ་པའི་ལོངས་སྤྱོད་མི་མ་ཐོང་བ་དང༌། ཐོབ་པ་ལས་ཉམས་པ་དང༌། གསང་བ་བརྗོད་པ་དང༌། ལས་སུ་བྱ་བ་ཉམས་པ་དང༌།
མྱ་ངན་གྱི་རྩ་བར་འགྱུར་བ་དང༌། ཉམ་ཆུང་བར་འགྱུར་བ་དང༌། དགེ་སྦྱོང་དང་བྲམ་ཟེར་མི་འཛིན་པ་དང༌། རིགས་ཀྱི་གཙོ་བོ་ལ་རིམ་གྲོར་མི་བྱེད་པ་དང༌། ཕ་མར་མི་འཛིན་པ་དང༌། དཀོན་མཆོག་གསུམ་ལ་མི་གུས་པ་དང༌། སྡིག་པའི་གྲོགས་པོས་ཟིན་པ་དང༌། དགེ་བའི་བཤེས་གཉེན་གྱིས་སྤངས་པ་དང༌། འཛིན་པ་མེད་པ་དང༌། དབང་པོ་མ་བསྡམས་པ་དང༌། བུད་མེད་ལ་བག་མེད་པ་དང༌། སྐྱེ་བོའི་ཡིད་དུ་མི་འོང་བ་དང༌། ཉེ་དུ་བཙུན་པས་སྨད་པ་དང༌། ཆོས་མ་ཡིན་པ་འཛིན་པ་དང༌། ཆོས་སྤོང་བ་དང༌། མཁས་པ་རྣམས་ལ་ཡིད་མི་བརྟན་པ་དང༌། བག་བྱ་བ་ལ་གཡེལ་བ་དང༌། མྱ་ངན་ལས་འདས་པ་ལས་རིང་བ་དང༌། མྱོས་པར་འགྱུར་བ་ལ་སོགས་པ་དང༌། ཤི་ནས་ངན་སོང་ངན་འགྲོ་སེམས་ཅན་དམྱལ་བར་སྐྱེའོ། །དེ་བཞིན་གཤེགས་པའི་ཡོན་ཏན་དང་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པ་བསྟན་པ་ལས། འཇམ་དཔལ་འཁོར་འདི་ཉིད་ཀྱི་ནང་ནས་ལྷ་དང་མི་ལ་ལས་ནི། བཅོམ་ལྡན་འདས་ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་ནས། བརྗོད་དུ་མེད་པའི་བར་གྱི་བསྐལ་བ་ཇི་སྙེད་ལོན་པར་ཤེས། ལ་ལས་ནི་མྱ་ངན་ལས་འདས་ནས་བརྗོད་དུ་མེད་པའི་བར་གྱི་བསྐལ་བ་ལོན་པར་ཤེས་སོ། །འཇམ་དཔལ་གང་གིས་དེ་བཞིན་གཤེགས་པ་མཐོང་བ་དང༌། མཐོང་ན་ས་རི་མོར་བྲིས་པའམ། འཇིམ་པ་ལས་བྱས་པའང་རུང་སྟེ། གནོད་པའི་སེམས་སམ་དང་བའི་སེམས་ཀྱིས་མཐོང་ན། དེ་དག་གི་དགེ་བའི་རྩ་བ་དེས་མིག་རྣམ་པར་དག་པར་འགྱུར་རོ། །འཇམ་དཔལ་ཟླ་བའི་དཀྱིལ་འཁོར་ནི་ཉི་མའི་དབང་གིས་འབྲི་བ་དང༌། སྐྱེ་བ་དང་ནུབ་པར་འགྱུར་བ་སྣང་མོད་ཀྱི། ཟླ་བའི་དཀྱིལ་འཁོར་ལ་སྐྱེ་བ་དང་འབྲི་བ་དང༌། ནུབ་པར་འགྱུར་བ་མེད་དེ་སེམས་ཅན་རྣམས་ནི་དགེ་བའི་རྩ་བ་ལས་རྣམ་པར་སྨིན་པས་ཡུད་ཙམ་ལ་སོགས་པ་དང༌། ལོ་བགྲང་བའི་གྲངས་གཞག་པའི་ཕྱིར། དེ་བཞིན་གཤེགས་པའི་བྱིན་གྱི་རླབས་ཀྱིས་དེ་ལྟ་བུའི་བྱ་བ་རྣམས་འབྱུང་སྟེ། འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་
དཔའ་ནི་གྲངས་མེད་དཔག་ཏུ་མེད་པའི་བསྐལ་བ་བྱེ་བ་ཁྲག་ཁྲིག་བརྒྱ་སྟོད་དུ་སེམས་ཅན་དམྱལ་བ་དང༌། བྱོལ་སོང་དང༌། ཡི་དྭགས་དང༌། གཤིན་རྗེའི་འཇིག་རྟེན་དུ་གནས་པར་འགྱུར་བའི་ལས་རྣམས་ཚེ་འདི་ལ་རྣམ་པར་སྨིན་ཏེ། ཀླད་པ་ཚ་བའམ། རིམས་སམ། རྩིབ་ལོགས་ན་བའམ། རྒྱལ་པོའི་སྲིད་འཁྲུགས་པའམ། ལྷོ་བལ་གྱིས་དཀྲུགས་བའམ། མུ་གེའི་འཁྲུག་པའམ། གཞན་དང་གཞན་གྱི་འཁྲུག་པས་ལུས་ཀྱི་གནོད་པའམ། ངག་གི་གནོད་པའམ། ཡིད་ཀྱི་གནོད་པས་ཚེ་གཅིག་ལ་བྱང་བར་འགྱུར་རོ། །སྤྱོས་པའམ། ཐ་ན་རྨི་ལམ་གྱིས་ཀྱང་འབྱང་བར་འགྱུར་རོ། །འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཡང་དག་པ་ཐེར་ཟུག་གཡུང་དྲུང་ངོ༌། །འཇམ་དཔལ་ཁྲོས་པའི་སེམས་སམ། དང་བའི་སེམས་ཀྱིས་དེ་བཞིན་གཤེགས་པའི་སྐུ་རི་མོར་བྲིས་པའམ། འཇིམ་པ་ལས་བྱས་པ་གང་གིས་མཐོང་བ་ཐ་ན་བྱོལ་སོང་གི་སྐྱེ་གནས་སུ་སོང་ཡང་རུང་སྟེ། དེ་དག་གི་ཉོན་མོངས་པ་ཐམས་ཅད་མེད་པར་འགྱུར། ལྷ་མོ་དཔལ་ཕྲེང་གིས་ཞུས་པ་ལས། བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་རྟག་པ་དང༌། བརྟན་པ་དང༌། ཐེར་ཟུག་ལགས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་ཐོག་མ་དང་ཐ་མ་མ་མཆིས་པའི་མཐར་མཆིས་བ་མི་སྐྱེ་བ་དང༌། མི་འགག་པའི་ཆོས་ཅན་ནོ། །འདུལ་བ་རྣམ་པར་གཏན་ལ་དབབ་པ་ཉེ་བ་འཁོར་གྱིས་ཞུས་པ་ལས། བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་པ་ཁྱིམ་ན་གནས་པས་ནི་སྦྱིན་པ་གཉིས་ལ་གནས་པར་བྱ་སྟེ། ཆོས་སྦྱིན་པ་དང༌། ཟང་ཟིང་སྦྱིན་པའོ། །རབ་ཏུ་བྱུང་བས་ནི་སྦྱིན་པ་བཞི་ལ་གནས་པར་བྱ་སྟེ། སྨྱུ་གུ་དང་སྣག་ཚ་དང་གླེགས་བམ་དང་ཆོས་སྦྱིན་པའོ། །བཅོམ་ལྡན་འདས་ཀྱིས་བཀའ་སྩལ་བ། ཤཱ་རིའི་བུ་བྱང་ཆུབ་སེམས་དཔའ་རྣམས་ཀྱི་ཁ་ན་མ་ཐོ་བ་ཆེན་པོ་དང་བཅས་པའི་ཉེས་པ་ནི་གཉིས་ཏེ། ཞེ་སྡང་དང་ལྡན་པ་དང༌། གཏི་མུག་དང་ལྡན་པའོ། །དེ་ལ་འདོད་ཆགས་ནི་ཁ་ན་
མ་ཐོ་བ་དང་བཅས་བ་ཆུང་མ་འབྲལ་བ་བུལ་བ་ཡིན་ནོ། །ཞེ་སྡང་ནི་ཁ་ན་མ་ཐོ་བ་དང་བཅས་པ་ཆེ་ལ་འབྲལ་བ་མྱུར་བ་ཡིན་ནོ། །གཏི་མུག་ནི་ཁ་ན་མ་ཐོ་བ་དང་བཅས་པ་ཆེ་ལ་འབྲལ་བ་བུལ་བ་ཡིན་ནོ། །འདོད་ཆགས་ནི་ཉིང་མཚམས་སྦྱོར་བའི་ས་བོན་ཡིན་ནོ། །ཞེ་སྡང་ནི་ངན་སོང་དུ་འགྲོ་བའི་རྒྱུར་གྱུར་པ་ཡིན་ནོ། །གཏི་མུག་ནི་སེམས་ཅན་དམྱལ་བ་ཆེན་པོ་བརྒྱད་དུ་ལྟུང་བའི་རྒྱུར་གྱུར་བ་ཡིན་ནོ། །ཉེ་བ་འཁོར་དེ་ལ་ཉན་ཐོས་ཀྱི་ཐེག་པ་པའི་ཚུལ་ཁྲིམས་ཡོངས་སུ་དག་པ་གང་ཡིན་པ་དེ་ནི་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་ཚུལ་ཁྲིམས་ཡོངས་སུ་མ་དག་པ་ཉིད་དང་ཤིན་ཏུ་འཆལ་པའི་ཚུལ་ཁྲིམས་ཉིད་ཡིན་ལ། ཐེག་པ་ཆེན་པོ་ལ་ཡང་དག་པར་ཞུགས་པ་ཡང་ཉན་ཐོས་ཀྱི་ཡོངས་སུ་མ་དག་པ་དང་ཤིན་ཏུ་འཆལ་བ་ཡིན་ནོ། །དེ་ཅིའི་ཕྱིར་ཞེ་ན། ཉན་ཐོས་ཀྱི་གནས་སྐད་ཅིག་ཙམ་ཡང་སྲེད་པ་ལེན་པར་མི་བྱེད་ལ། དེ་ནི་ཉན་ཐོས་ཀྱི་ཚུལ་ཁྲིམས་ཡོངས་སུ་མ་དག་པ་ཡིན་ནོ། །དེ་ཉིད་ཐེག་པ་ཆེན་པོའི་འཆལ་བའི་ཚུལ་ཁྲིམས་ཡིན་ནོ། །བྱང་ཆུབ་སེམས་དཔའ་ནི་བསྐལ་བ་གྲངས་མེད་པར་སྲིད་པར་སྐྱེ་བས་ཡོངས་སུ་མི་སྐྱོ་བ་ཡིན་ཏེ། དེ་ཉིད་ཉན་ཐོས་ཀྱི་འཆལ་པའི་ཚུལ་ཁྲིམས་ཡིན་ནོ། །འཕགས་པ་ཀུན་རྫོབ་དང་དོན་དམ་པའི་བདེན་པ་བསྟན་པ་ལས། རྡོ་ཆག་པའི་འཕྲོ་མི་འབྱོར་པ་ལྟ་བུ་ནི་ཉན་ཐོས་ཀྱི་འདུལ་བའོ། །གསེར་དང་དངུལ་ཆག་པའི་འཕྲོ་འབྱོར་པ་ལྟ་བུ་ནི་བྱང་ཆུབ་སེམས་དཔའི་འདུལ་བའོ། །གསང་ཆེན་ཐབས་ལ་མཁས་པ་ལས། བྱང་ཆུབ་སེམས་དཔའ་ཐབས་ལ་མཁས་པས་སེམས་ཅན་དེ་དག་གི་སྡུག་བསྔལ་གྱི་ཆོར་བ་དེ་དག་ཐམས་ཅད་བསྡུས་ནས་འཆགས་པར་བྱེད་ཅིང༌། སེམས་ཀྱི་སྡུག་བསྔལ་གྱི་ཚོར་བ་གང་དག་ཡིན་པ་དེ་དག་ཐམས་ཅད་བདག་གི་ལུས་ལ་བབ་པར་གྱུར་ཅིང༌། སེམས་ཅན་དེ་དག་བདེ་བར་གྱུར་ཅིག་ཅེས་གོ་གྱོན་པར་ཡང་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི་གལ་ཏེ་བརྒྱ་ལམ་ན་ཉེས་པ་འབྱུང་ན་ཡང་འདི་ལྟར་སོ་སོར་སློབ་ཏེ། གལ་ཏེ་ཁམས་དང་སྐྱེ་མཆེད་དང་ཕུང་པོ་
འདི་དག་ཉིད་ཀྱིས་མྱ་ངན་ལས་འདའ་བར་འགྱུར་ན་ནི། དེ་ལྟ་བས་ན་བདག་གིས་ཡོངས་སུ་གདུལ་བར་བྱ་དགོས་པར་འགྱུར་བ་ལས་བདག་གིས་འདི་ལྟར་གོ་བགོ་བར་བྱ་སྟེ། བདག་སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་ཕྱི་མའི་མཐའི་བར་དུ་འཁོར་བར་བྱ་བ་ལ་བདག་གིས་སེམས་ཞུམ་བར་མི་བྱ་ཞིང༌། ཇི་ལྟ་ཇི་ལྟར་འཁོར་བ་ན་འཁོར་བར་གྱུར་པ་དེ་ལྟ་དེ་ལྟར་སེམས་ཅན་ཡོངས་སུ་སྨིན་པར་བྱ་བ་དང༌། ཉེས་པ་འདི་ཡང་ཆོས་བཞིན་ཕྱིར་བྱ་ཞིང༌། ཕྱིན་ཆད་ཀྱང་ཉེས་པ་མི་འབྱུང་བར་བྱ་བ་དང༌། སེམས་ཅན་ཐམས་ཅད་ཀྱང་ཉེས་པ་ལས་འབྱུང་བའི་ཆོས་བསྟན་པར་བྱའོ་ཞེས་གོ་ཆ་གྱོན་པར་བྱེད་དོ། །རིགས་ཀྱི་བུ་ཡོངས་སུ་བརྟག་པ་ཉེ་བར་བཟུང་ན། བྱང་ཆུབ་སེམས་དཔའ་རབ་ཏུ་བྱུང་བ་ལ་གལ་ཏེ་རྩ་བའི་ཉེས་པ་བཞི་པོ་ཐམས་ཅད་བྱུང་བར་གྱུར་ན་ཡང་ཐབས་ལ་མཁས་པ་དེས་སེལ་བར་བྱེད་ན། རིགས་ཀྱི་བུ་སེམས་ཅན་གཞན་པ་ལ་ཉེས་པ་མེད་ཅེས་སྨྲའོ། །རིགས་ཀྱི་བུ་ངས་སྙིང་རྗེ་ཆེན་པོ་དང་ལྡན་པའི་སེམས་བསྐྱེད་པ་དེས་ཅུང་ཟད་ཅིག་འདོད་པ་དང་ལྡན་པར་བྱས་པས་ཀྱང་བསྐལ་པ་ཁྲིར་འཁོར་བ་བསྙིལ་ཅིང་སྤངས་པར་གྱུར་ཏོ། །རིགས་ཀྱི་བུ་སེམས་ཅན་གཞན་དག་གི་སེམས་ཅན་དམྱལ་བར་འགྱུར་བའི་ལས་གང་ཡིན་པ་དེ་ཡང་བྱང་ཆུབ་སེམས་དཔའ་ཐབས་ལ་མཁས་པ་ཚངས་པའི་འཇིག་རྟེན་དུ་སྐྱེ་བར་འགྱུར་བ་ལྟོས། ཀུན་དགའ་བོ་འདོད་ཆགས་བསྐྱེད་པ་གང་གིས་ནི། སེམས་ཅན་གཞན་དག་སེམས་དམྱལ་འགྲོ་འགྱུར་བ། །དེ་ཡིས་དཔའ་རྣམས་མཐོ་རིས་འགྲོ་འགྱུར་ཞིང༌། །སྐྱེས་པར་འགྱུར་བའི་ཡོན་ཏན་དེ་འདྲ་ལྟོས། །རིགས་ཀྱི་བུ་མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་དཔའ་ནི་འདོད་ན། ཞག་བདུན་གྱིས་ཀྱང་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །བྱང་ཆུབ་སེམས་དཔའ་ནི་དགའ་ལྡན་གྱི་གནས་ནས་མི་གཡོ་བཞིན་དུ་སྤྲུལ་པས་འཕོ་བ་དང༌། སྐྱེ་བ་ལ་སོགས་པ་ཀུན་དུ་སྟོན་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཡེ་ཤེས་དམ་པས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་དེ་སྐད་དུ་བྱང་ཆུབ་སེམས་དཔའ་ནི་ཚིག་གང་གིས་བདག་དང་གཞན་
ལག་དུང་བར་འགྱུར་བ་དེ་ལྟ་བུའི་ཚིག་མི་སྨྲའོ་ཞེས་བཀའ་སྩལ་ལགས་ན། བཅོམ་ལྡན་འདས་འོ་ན་ཅིའི་སླད་དུ་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་བྲམ་ཟེའི་ཁྱེའུ་འོད་ཟེར་ཕྲེང་ཞེས་བགྱི་བར་གྱུར་པ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱི་གསུང་རབ་ལ་འདི་སྐད་ཅེས་དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་སེམས་ནི་མཆོག་ཏུ་རྙེད་པར་དཀའ་བ་ཡིན་པས། དགེ་སྦྱོང་མགོ་རིག་ལ་བྱང་ཆུབ་ག་ལ་ཡོད་ཅེས་གསུངས་ན། བཅོམ་ལྡན་འདས་ཀྱིས་དེ་སྐད་གསུངས་པ། དེ་ཅི་ལས་དགོངས་ཏེ་གསུངས་ལགས། དེ་སྐད་ཅེས་གསོལ་བ་དང༌། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་བཞིན་གཤེགས་པ་དང་བྱང་ཆུབ་སེམས་དཔའ་རྣམས་ཀྱི་སྤྱོད་པའི་ཚད་རབ་ཏུ་རྣམ་པར་དབྱེ་བ་ཁྱོད་ལ་ཅི་བྱ་ཐོང་ཤིག །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཐབས་ལ་མཁས་པ་བསམ་གྱིས་མི་ཁྱབ་པ་དང་ལྡན་པས། སྐྱེས་བུ་དམ་པ་དེ་དག་ནི་ཇི་ལྟ་ཇི་ལྟར་སེམས་ཅན་ཡོངས་སུ་སྨིན་པར་འགྱུར་བ་དེ་ལྟ་དེ་ལྟར་གནས་པར་བྱེད་པའི་ཕྱིར་རོ། །རིགས་ཀྱི་བུ་གཞན་ཡང་གང་གི་ཕྱིར་བྱང་ཆུབ་སེམས་དཔའ་ལོ་དྲུག་ཏུ་དཀའ་བ་སྤྱད་པ་ཡང་ཉོན་ཅིག །འདི་ལྟར་བྱང་ཆུབ་སེམས་དཔའ་ཐབས་ལ་མཁས་པས་སེམས་ཅན་རྣམས་མི་དགེ་བའི་ལས་ཀྱི་བྱ་བ་དག་ལ་ངེས་པར་སྐྱོ་བར་བྱ་བའི་ཕྱིར་ཏེ། འདི་ལྟར་བྱང་ཆུབ་སེམས་དཔའ་ཡང་དག་པར་རྫོགས་པའི་སངས་རྒྱས་འོད་སྲུངས་ཀྱི་གསུང་རབ་ལ་ཚིག་འདི་སྐད་ཅེས་དགེ་སྦྱོང་མགོ་རིག་མཐོང་བས་ཁོ་བོ་ལ་ཅི་ཞིག་བྱ་བ་ལ་སོགས་པ་སྨྲས་པ་དེ་ཡང་བྱང་ཆུབ་སེམས་དཔའ་ཐབས་ལ་མཁས་པ་དེ་དང༌། ལྡེམ་པོ་ངག་ཡིན་པར་བལྟ་བར་བྱ་སྟེ། ལས་ཀྱི་སྒྲིབ་པ་དེའི་རྒྱུས་བྱང་ཆུབ་སེམས་དཔའ་ལོ་དྲུག་ཏུ་དཀའ་བ་སྤྱོད་དོ། །རིགས་ཀྱི་བུ་བྱང་ཆུབ་སེམས་དཔའ་དེ་དག་ཡོངས་སུ་སྨིན་པར་བྱས་ཤིང༌། ལས་ཀྱི་རྣམ་པར་སྨིན་པ་བསྟན་པ་
གང་ཡིན་པའི་ལས་ཀྱི་རྣམ་པར་སྨིན་པ་དེས་ཀྱང་ངས་ལོ་དྲུག་ཏུ་དཀའ་བའི་སྤྱོད་པ་སྤྱད་པར་གྱུར་པས་སེམས་ཅན་མི་ཤེས་པ་སྤྱོད་པ་གཞན་དག་གིས་ནི་དགེ་སྦྱོང་ངམ། བྲམ་ཟེའི་ཚུལ་ཁྲིམས་དང་ལྡན་པ་ལ་ལྐོག་ནས་ཚིག་རྩུབ་པོ་བརྗོད་ན། དེ་དག་ལ་ཡུན་རིང་པོར་གནོད་པར་བསྟན་པའི་ཕྱིར། དེ་བཞིན་གཤེགས་པས་ལས་དེ་ཀུན་དུ་སྟོན་པར་ཟད་ཀྱི། བྱང་ཆུབ་སེམས་དཔའ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མེད་དོ། །གཞན་ཡང་སེམས་ཅན་གང་དག་ཚུལ་ཁྲིམས་དང་ལྡན་པ་ལ་ཚིག་རྩུབ་མོ་སྨྲས་ནས། བདག་ཅག་ལ་ནི་ཐར་བའི་སྐལ་བ་མེད་དོ་སྙམ་དུ་སེམས་ཤིང་ཕྱིན་ཆད་རྩོལ་བར་མི་བྱེད་པ་དེ་དག་གི་འགྱོད་པ་བསལ་བའི་ཕྱིར་ཡང་ལས་དེ་ཀུན་དུ་བསྟན་ཏེ། གལ་ཏེ་རྨི་ལམ་ན་དེ་བཞིན་གཤེགས་པ་ལ་སྐུར་པ་བཏབ་པར་གྱུར་ན་ཡང་དེ་ཉིད་ཀྱིས་སད་པའི་ཚེ་ན་དྲི་མར་ཡང་འགྱུར་རོ། །དེ་བཞིན་གཤེགས་པ་ལ་ནི་སྐྱེས་བུ་ཆེན་པོའི་མཚན་རོ་བྲོ་བའི་མཆོག་དང་ལྡན་པས་ཞལ་ཟས་མི་བསོད་པ་གསོལ་ཀྱང་མོད་ལ་ལྷའི་ཁ་ཟས་ལས་ཡང་དག་པར་འདས་པའི་རོར་འགྱུར་རོ། །སྲིད་པ་འཕོ་བ་ལས། རྒྱལ་པོ་ཆེན་པོ་དེ་ལ་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དོ། །དེ་ལ་གང་རྣམ་པར་ཤེས་པ་ཐམས་ཅད་འགག་པ་དེ་ནི་འཆི་འཕོ་ཞེས་བྱ་ལ། གང་དང་པོ་འབྱུང་བ་ནི་སྐྱེ་བ་ཞེས་བྱའོ། །མིག་གིས་གཟུགས་རྣམས་མི་མཐོང་ཞིང༌། །ཡིད་ཀྱིས་ཆོས་རྣམས་མི་རིག་པ། །དེ་ནི་བདེན་པ་མཆོག་ཡིན་ཏེ། །དེ་ལ་འཇིག་རྟེན་མི་དཔོགས་སོ། །འདི་དག་ཐམས་ཅད་མིང་ཙམ་སྟེ། །འདུ་ཤེས་ཙམ་དུ་གནས་པ་ཡིན། །བརྗོད་པ་ལ་ནི་གཞན་གྱུར་པས། །བརྗོད་པར་བྱ་བ་ཡོད་མ་ཡིན། །མིང་ནི་གང་དང་གང་གིས་སུ། །ཆོས་རྣམས་གང་དང་གང་བརྗོད་པ། །དེ་ལ་འཇིག་རྟེན་མི་དཔོགས་སོ། །འདི་དག་ཐམས་ཅད་མིང་ཙམ་སྟེ། །དེ་ལ་དེ་ནི་ཡོད་མ་ཡིན། །འདི་ནི་ཆོས་རྣམས་ཆོས་ཉིད་དོ། །མིང་གིས་མིང་ནི་སྟོང་པ་སྟེ། །མིང་ནི་མིང་གིས་ཡོད་མ་ཡིན། །ཕག་མོའི་རྟོགས་པ་བརྗོད་པ་ལས། །ལྷའི་བུ་འཆི་འཕོ་བའི་སྔ་ལྟས་རྣམ་པ་ལྔ་འབྱུང་བར་འགྱུར་ཏེ། གང་ཞེ་ན། གོས་
སྡན་ཆད་མ་རྙིངས་པ་རྙིངས་པར་འགྱུར་བ་དང༌། མེ་ཏོག་གི་ཕྲེང་པ་སྔོན་ཆད་མ་རྙིངས་པ་རྙིངས་པར་འགྱུར་བ་དང༌། མཆན་ཁུང་གཉིས་ན་རྡུལ་འབྱུང་བ་དང༌། ལུས་ལས་དྲི་ང་བ་འབྱུང་བ་དང༌། རང་གི་གནས་ལ་མི་དགའ་བའོ། །སངས་རྒྱས་མི་སྤང་བ་ལས། འཇིག་རྟེན་གྱི་ཁམས་སྨིག་རྒྱུ་ཅན་དུ་བུདྡྷ་རྣམ་པར་གཟིགས་པའི་ང་རོ་འབྱུང་བའི་ཚེ། རིགས་ཀྱི་བུ་བཅུ་ཞིག་གིས་གཙུག་ལག་ཁང་ལྔ་བརྒྱ་ལྔ་བརྒྱ་བྱེད་དུ་བཅུག་ལ། གཙུག་ལག་ཁང་རེ་རེ་ན་ཡང་བན་དེ་སྟོང་སྟོང་གི་འཚོ་བ་སྦྱོར་བ་ལས། དེའི་ཚེ་ཆོས་སྨྲ་བ་སྦོབས་པ་བརྩེགས་པ་ཞེས་བྱ་བ་ལ་ཚུལ་ཁྲིམས་འཆལ་པ་གླེང་གླེང་བ་ལས། ལས་དེའི་རྣམ་པར་སྨིན་པ་ལས་ལོ་དགུ་ཁྲིར་སེམས་ཅན་དམྱལ་བར་སྐྱེས་སོ། །ཚེ་རབས་ལྔ་བརྒྱར་ནི་མི་རྣམས་ཀྱི་ནང་དུ་ཟ་མ་དང༌། ཀླ་ཀློ་དང་ལོག་པར་ལྟ་བའི་ཁྱིམ་དུ་སྐྱེས་སོ། །ལོ་དྲུག་བརྒྱར་ནི་དམུས་ལོང་དང༌། ལྕེ་མེད་པར་གྱུར་ཏོ། །ཚེ་རབས་བདུན་བརྒྱར་ནི་རབ་ཏུ་བྱུང་ནས། ཇི་སྲིད་འཚོ་བའི་མཐར་ཐུག་གི་བར་དུ་གཟུངས་མ་ཐོས་པར་འཆི་བའི་དུས་བྱས་ཏེ། ལས་ཀྱི་སྒྲིབ་པ་དེ་ཉིད་ཀྱིས་རིགས་ཀྱི་བུ་དེ་དག་བསྒྲིབས་སོ། །རིགས་ཀྱི་བུ་དེ་ལྟ་བས་ན་ཁྱོད་མོས་པར་བྱ། ཁོང་དུ་ཆུད་པར་བྱའོ། །ཆོས་ཀྱི་རྣམ་གྲངས་འདི་ཐོས་ནས་ཆོས་སྨྲ་བ་ལ་མངོན་སུམ་དུ་མཐོང་ཡང་འཆལ་བའི་ཚུལ་ཁྲིམས་ཀྱིས་བརྗོད་པར་མི་བྱན། ཐོས་པས་ལྟ་ཅི་སྨོས། །རིགས་ཀྱི་བུ་གང་ཞིག་སེམས་ཅན་ཐམས་ཅད་ཀྱི་མིག་འབྱིན་པར་བྱེད་པ་བས་ནི། གང་ཞིག་ཆོས་སྨྲ་པ་ལ་གཤེ་བའི་བསམ་པས་ལྟ་བར་བྱེད་ན། དེ་ནི་དེ་བས་ཆེས་ཁ་ན་མ་ཐོ་བའི་ལས་ཆེ་བ་ཡིན་ནོ། །གང་ཞིག་སེམས་ཅན་ཐམས་ཅད་འཆིང་བར་བྱད་པ་བས། གང་ཞིག་ཆོས་སྨྲ་བ་མཐོང་ན་རྒྱབ་ཀྱིས་ཕྱོགས་ཏེ་འདུག་པར་བྱེད་ན། འདི་ལ་སྔ་མས་བརྒྱ་དང༌། སྟོང་དང༌། འབུམ་དང༌། གྲངས་དང༌། དཔག་པའི་བར་དུ་ཡང་མི་བཟོད་དོ། །དེ་ཅིའི་ཕྱིར་ཞེ་ན། གང་ཆོས་སྨྲ་བ་ལ་སྐུར་པ་འདེབས་པ་དེས་ནི་སངས་རྒྱས་ལ་སྐུར་བ་བཏབ་པའི་ཕྱིར་རོ། །སངས་རྒྱས་ལ་བསྙེན་བཀུར་བྱེད་པར་འདོད་པས་ཆོས་སྨྲ་བ་ལ་བསྙེན་བཀུར་བྱའོ། །རིགས་ཀྱི་བུ་དེ་ལྟ་བས་ན་བྱང་
ཆུབ་སེམས་དཔའ་རྣམས་ཀྱི་གནས་པས་གནས་ཀྱང་རུང་སྟེ། བྱང་ཆུབ་སེམས་དཔས་སྲོག་གི་ཕྱིར་ཡང་འཁྲུལ་པ་བལྟ་བར་མི་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཆོས་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱིས་བྱང་ཆུབ་ཡོངས་སུ་སྦྱོང་བར་བྱེད་པའི་ཕྱིར་རོ། །བཞི་གང་ཞེ་ན། སྟོང་པ་ཉིད་སྒོམ་པ་དང༌། སེམས་ཅན་ཐམས་ཅད་ལ་ཞེ་འགྲས་པ་མེད་པའི་སེམས་དང༌། བྱང་ཆུབ་སེམས་དཔའ་ལ་རྟག་ཏུ་ཕན་པ་ཉེ་བར་སྒྲུབ་པ་དང༌། ཟང་ཟིང་མེད་པའི་སེམས་ཀྱིས་ཆོས་སྦྱིན་པའོ། །སྱད་ཡ་ཐེ་དན། ཨད་ཚེ་ཨད་ཚབ་ཌི། ཨན་བི་ལེ། ཨ་ཤེཥོ། ཨ་ཏྲི་ཏེ། ཨ་ན་ཡུ་དྷི། ཨ་ཕེ་ཨ་བི་ཛ་རི་ད། བྷ་བ་རུད་ཏྲ། ཨཾ་ག་མ། ཡུཏྟ་ན་ད་ཉ་བ། པྲ་ཀྵི་བེ། ཎི་བ་ཌེ། ཨ་གྲ་ཧེ། ཧུ་ཧུ་མེ། ཙ་པ་ལེ། ས་ཌེ་ས་མེ། ས་མ་དེ་ཡོ་ཌི། ན་ཡོ་བ་རི་ཤོ་དྷི། ཞག་བདུན་དུ་གཟུངས་སྔགས་འདི་དག་བཟླས་ན། ཞག་བདུན་དུ་སངས་རྒྱས་རྗེས་སུ་དྲན་པ་བསྒོམ་པར་བྱའོ། །ལྷག་པའི་བསམ་པ་བསྟན་པའི་ལེའུ་ལས་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་རྟོགས་པར་དཀའོ། །དེ་ཅིའི་ཕྱིར་ཞེ་ན། ཀུན་དགའ་བོ་ཉོན་མོངས་པ་ཐམས་ཅད་ལས་ཀྱང་སེམས་སྤྱད་དགོས་ལ། ཆོས་གང་ལས་ཀྱང་བསྐྱོད་པར་མི་བྱ་འཕགས་པར་ཡང་མི་བྱ་བའི་ཕྱིར་རོ། །ཆོས་ཀྱི་ཚུལ་ལས་རིགས་ཀྱི་བུ་དག་འཇིགས་པར་གྱིས་ཤིག །མངོན་པར་དགའ་བ་མེད་པར་གྱིས་ཤིག །སྙིང་བརྩེ་བ་མེད་པར་གྱིས་ཤིག །སྙིང་རྗེ་བ་མེད་པར་གྱིས་ཤིག །རིགས་ཀྱི་བུ་དག་འདུམ་བར་གྱིས་ཤིག །རྟག་ཏུ་བྱེད་པར་གྱིས་ཤིག །བརྟག་པར་གྱིས་ཤིག །བློ་རྒོད་པར་གྱིས་ཤིག །རིགས་ཀྱི་བུ་དག་རྗེས་སུ་ཆགས་པར་ཡང་གྱིས་ཤིག །རྟག་ཏུ་ཞེ་འགྲས་པར་གྱིས་ཤིག །ཡུན་རིང་པོར་བལྟ་བར་ཡང་གྱིས་ཤིག །བྱས་པ་མི་གཟོ་བར་ཡང་གྱིས་ཤིག །རིགས་ཀྱི་བུ་དག་བདུད་ཀྱི་ལས་རྣམས་ནི་འབར་བར་གྱིས་ཤིག །སངས་རྒྱས་ཀྱི་ཆོས་རྣམས་ནི་ཞི་བར་གྱིས་ཤིག །གང་དག་ཉན་ཐོས་ཀྱིས་སྨད་པར་བྱ་བ་དེ་དག་ཁྱེད་ཀྱིས་མ་སྨད་ཅིག །གང་ཉན་ཐོས་ཀྱིས་མངོན་པར་དགའ་བར་བྱ་བ་ལ་ཁྱེད་དགའ་བར་མ་བྱེད་ཅིག །གཙུག་ན་རིན་པོ་ཆེས་ཞུས་
པ་ལས། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡོངས་སུ་དག་པ་ནི་བཞི་སྟེ། གང་ཞེ་ན་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་དང༌། བྱང་ཆུབ་ཀྱི་ཕྱོགས་ཀྱི་ཆོས་ཡོངས་སུ་དག་པ་དང༌། མངོན་པར་ཤེས་པ་སྒྲུབ་པའི་སྤྱོད་པ་ཡོངས་སུ་དག་པ་དང༌། སེམས་ཅན་ཡོངས་སུ་སྨིན་པར་བྱ་བའི་སྤྱོད་པ་ཡོངས་སུ་དག་པའོ། །བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་ནི་ལྔ་སྟེ། གང་ཞེན། བདག་མི་སྟོན་པ་དང༌། གཞན་མི་སྟོན་པ་དང༌། མ་བསླབས་པ་ལ་མི་སྙན་པ་དང༌། ཉན་ཐོས་ཀྱི་སེམས་ལ་མི་རེག་པ་དང༌། རང་སངས་རྒྱས་ཀྱི་ས་ལ་མི་འདོད་པའོ། །དཔལ་དབྱིག་གིས་ཞུས་པ་ལས། གལ་ཏེ་བསླབ་པའི་གཞི་ལྔ་ལ་སློབ་པར་མི་ནུས་ན་ཡང༌། དེས་བཞི་འམ། གསུམ་མམ། གཉིས་སམ། དེའི་ནང་ན་གཅིག་ཙམ་ལ་ཡང་བླངས་ནས་བསླབ་པར་བྱའོ། །གལ་ཏེ་བསླབ་པའི་གཞི་གཅིག་ཙམ་ལ་ཡང་སློབ་པར་མི་ནུས་ན། དེས་སྡིག་པའི་ལས་གང་སྤྱོད་པ་དེ་ལ་མ་ཞེན་པ་དང༌། དྲག་པ་མ་ཡིན་པ་དང༌། མི་དགའ་བཞིན་པར་བྱའོ། །བཤུང་བ་དང་སྨད་པར་བྱའོ། །དགེ་བ་ལ་ནི་དེ་ལས་བཟློག་སྟེ་བྱའོ། །གསེར་གྱི་བྱེ་མ་ལྟ་བུ་ལས་བྱུང་བ། གནས་བརྟན་ཤཱ་རིའི་བུ་ཚིག་གཅིག་ཙམ་སྨྲ་བའི་ཡུན་ཇི་ཙམ་པ་དེའི་བར་སྐབས་སུ། རང་སངས་རྒྱས་ཀྱི་ཆོས་བསྟན་པ་རྣམ་གྲངས་མེད་པ་སྟོན་ཏོ། །རང་སངས་རྒྱས་ཀྱི་ཚིག་གཅིག་སྨྲ་བའི་ཡུན་ཇི་ཙམ་པ་དེའི་བར་སྐབས་སུ། བྱང་ཆུབ་སེམས་དཔའ་ཆོས་བསྟན་པ་རྣམ་གྲངས་མེད་དཔག་ཏུ་མེད་བརྗོད་དུ་མེད་པ་སྟོན་ཅིང༌། དོན་ཀྱང་བརྡ་སྤྲོད་པར་བྱེད་དོ། །ལྷའི་བུ་བློ་གྲོས་རབ་ཏུ་བརྟན་གྱིས་ཞུས་པ་ལས། བཙུན་པ་ཤཱ་རིའི་བུ་རིགས་ཀྱི་བུ་འམ་རིགས་ཀྱི་བུ་མོ་བདག་ཏུ་ལྟ་བ་ལ་བརྟེན་པ་འམ། སེམས་ཅན་དུ་ལྟ་བ་ལ་བརྟེན་པའམ། སྲོག་ཏུ་ལྟ་བ་ལ་བརྟེན་པ་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་སློང་གི་དགེ་འདུན་དང་བཅས་པ། གང་གཱའི་ཀླུང་གི་བྱེ་མ་སྙེད་ཅིག་ལ། ཇི་སྲིད་འཚོའི་བར་དུ་བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱས་ལ། གང་གིས་ཆོས་ཟབ་མོ་ཤེས་པར་དཀའ་བ་འཇིག་རྟེན་ཐམས་ཅད་
དང་མི་མཐུན་པ་འདི་ལྟ་བུ་ཐོས་ཤིང༌། ཆོས་སྟོང་པ་དང༌། མཚན་མ་མེད་པ་དང༌། སྨོན་པ་མེད་པ་དང༌། ཞི་བ་དང་དབེན་པ་དང༌། སྐྱེ་བ་མེད་པ་དང༌། སེམས་ཅན་དང༌། སྲོག་དང༌། གང་ཟག་མེད་པ་མི་རྟག་པ་དང༌། སྡུག་བསྔལ་བ་དང༌། བདག་མེད་པ་འདི་ལྟ་བུ་ཐོས་ནས་སྤངས་ཏེ། སེམས་ཅན་དམྱལ་བ་རྣམས་སུ་ལྟུང་བར་གྱུར་པ། བཙུན་པ་ཤཱ་རིའི་བུ་རིགས་ཀྱི་བུ་འམ་རིགས་ཀྱི་བུ་མོ་ཆོས་ཟབ་མོ་འདི་ཐོས་ནས་སྤངས་ཏེ། སེམས་ཅན་དམྱལ་བ་རྣམས་སུ་ལྟུང་བ་དེ། ཆེས་མྱུར་བར་དེ་དག་ནས་ལྡང་ཞིང་རྣམ་པར་ཐར་པར་འགྱུར་གྱི། རིགས་ཀྱི་བུའམ་རིགས་ཀྱི་བུ་མོ་བདག་ཏུ་ལྟ་བ་ལ་བརྟེན་པ་ཆོས་འདི་མ་ཐོས་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་ལ་བསྙེན་བཀུར་བྱས་པ་དེ་ནི་དེ་ལྟ་མ་ཡིན་ནོ། །ཤཱ་རིའི་བུ་གཞན་ཡང་རིགས་ཀྱི་བུ་འམ་རིགས་ཀྱི་བུ་མོ་གང་དག་རྣ་བླགས་ཏེ། ཆོས་ཟབ་མོ་འདི་མཉན་ནས་མ་རྟོགས་ཤིང་སྤངས་ཏེ། སེམས་ཅན་དམྱལ་བར་འགྲོ་བ་དེ་དག་ནི་ཆེས་མྱུར་བར་རྣམ་པར་ཐར་པར་འགྱུར་གྱི། དམིགས་པ་ཅན་ཐེ་ཆོམ་དུ་གྱུར་པ་གཞན་དག་ནི་དེ་ལྟ་བུ་མ་ཡིན་ནོ། །བདེན་པ་གཉིས་བསྟན་པ་ལས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལྟ་སྟེ་དཔེར་ན། སྐྱེས་བུ་བཀྲིས་ཤིང་ལྟོགས་པས་ཉམ་ཆུང་བ་བརྣག་པ་བླའི། མི་ཤེས་པར་ཁ་ཟས་དུག་ཅན་ཟོས་པ་དེ་ནི་དེ་ལྟ་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་དམིགས་པ་ཅན་མ་ཡིན་པར་སེར་སྣ་ཅན་དང༌། ཚུལ་ཁྲིམས་འཆལ་པ་དང༌། གནོད་སེམས་དང༌། ལེ་ལོ་ཅན་དང༌། བརྗེད་ངས་པ་དང༌། ཤེས་རབ་མེད་པ་བླའི། ཉན་ཐོས་དང་རང་སངས་རྒྱས་དམིགས་པ་ཅན་གྱི་སེམས་ཀྱི་སྦྱོར་བ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་ཀྱིས་སྦྱོར་བ་ནི་དེ་ལྟ་མ་ཡིན་ནོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་འདི་ལྟ་སྟེ་དཔེར་ན། གང་མི་དབུལ་པོའི་ཁ་ཟས་དེ་ནི་འཁོར་ལོས་སྒྱུར་བའི་རྒྱལ་པོའི་དུག་ཡིན་ནོ། །དེ་བཞིན་དུ་ཉན་ཐོས་དང༌། རང་སངས་རྒྱས་དམིགས་པ་ཅན་རྣམས་ཀྱི་ཚུལ་ཁྲིམས་དང་བརྩོན་འགྲུས་ཀྱི་བར་དེ་དག་ནི། བྱང་ཆུབ་སེམས་དཔའི་འཆལ་པའི་ཚུལ་ཁྲིམས་
ནས་ལེ་ལོའི་བར་དུ་འགྱུར་རོ། །ལྷའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །ཅི་འཇམ་དཔལ་ཁྱོད་བྱང་ཆུབ་སེམས་དཔའི་འདུལ་བ་ལ་བསླབས་སམ། འོན་ཏེ་ཉན་ཐོས་ཀྱི་འདུལ་བ་ལ་བསླབས། འཇམ་དཔལ་གྱིས་སྨྲས་པ། ལྷའི་བུ་འདི་ཇི་སྙམ་དུ་སེམས། རྒྱ་མཚོ་ཆེན་པོར་མི་ལོམ་པའི་ཆུ་གང་ཡང་ཡོད་དམ། ལྷའི་བུས་སྨྲས་པ། ཆོས་ཐམས་ཅད་ཤིན་ཏུ་མི་འབྱུང་བར་མཉམ་པ་ཉིད་ཅེས་བྱ་བ་གང་གི་ཚིག་བླ་དགས་ཡིན། འཇམ་དཔལ་གྱིས་སྨྲས་པ། ལྷའི་བུ་དེ་ནི་དོན་དམ་པ་སྣ་ཚོགས་མེད་པའི་ཚིག་བླ་དགས་སོ། །སྨྲས་པ། ཆོས་ཐམས་ཅད་ཤིན་ཏུ་མི་འབྱུང་བར་མཉམ་པ་ལ། ཅིའི་ཕྱིར་སྣ་ཚོགས་སུ་སྣང༌། ལྷའི་བུ་ཆོས་ཐམས་ཅད་ཤིན་ཏུ་མི་འབྱུང་བར་མཉམ་པ་ལ། དོན་དམ་པར་རྫས་དང༌། དངོས་པོ་དང༌། ངོ་བོར་ཡོངས་སུ་རྫོགས་པས་དེ་དག་དོན་དམ་པར་སྣ་ཚོགས་སུ་སྤྱོད་དོ། །དེ་དག་དོན་དམ་པར་སྣ་ཚོགས་སུ་སྤྱོད་པ་ལ། དམིགས་པའི་ལྟ་བ་མང་དུ་འགྱུར་རོ། །དེ་དམིགས་པའི་ལྟ་བ་མང་པོས་འགྲོ་བ་རྣམ་པ་ཐ་དད་པ་རྣམས་སུ་དབང་མེད་པར་འཁྱམ་མོ། །གང་ལྷའི་བུ་ཆོས་ཐམས་ཅད་ཤིན་ཏུ་མི་འབྱུང་བར་མཉམ་པ་ལ། དོན་དམ་པར་ངོ་བོ་དང༌། རྫས་དང་དངོས་པོར་ཡོངས་སུ་མི་རྟོགས་ན་དེ་དག་དོན་དམ་པར་སྣ་ཚོགས་སུ་མི་སྤྱོད་དོ། །དེ་དག་དོན་དམ་པར་སྣ་ཚོགས་སུ་མི་སྤྱོད་ན། དོན་དམ་པར་ཤིན་ཏུ་དངོས་པོ་མེད་པར་འགྲོ་བའི་ཚུལ་གྱིས་དོན་དམ་པར་ཆོས་ཐམས་ཅད་ཤིན་ཏུ་མ་སྐྱེས་པའི་མཉམ་པ་ཉིད་དང༌། མཉམ་པར་ཁོང་དུ་ཆུད་པར་འགྱུར་རོ། །ཀུན་རྫོབ་ཏུ་ནི་རྟོག་པ་ནི་ཉོན་མོངས་པ་རྣམས་ཀྱི་སྒོའོ། །མི་རྟག་པ་ནི་ཉོན་མོངས་པ་མེད་པའི་སྒོའོ། །བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་སྒོའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་མྱ་ངན་ལས་འདས་པའི་སྒོའོ། །ཀུན་རྫོབ་ཏུ་ཤའི་མིག་གིས་སེམས་ཅན་དང་སངས་རྒྱས་ཀྱི་ཞིང་མཐོང༌། ལྷའི་མིག་གིས་སེམས་ཅན་གྱི་འཆི་འཕོ་དང་སྐྱེ་བ་མཐོང༌། ཤེས་རབ་ཀྱི་མིག་གིས་སེམས་ཅན་གྱི་སེམས་ཀྱི་སྤྱོད་པ་དང༌། གཡོ་བ་ཤེས། ཆོས་ཀྱི་མིག་གིས་ཆོས་ཐམས་ཅད་ཡང་དག་པ་ཇི་ལྟ་བ་བཞིན་མཐོང༌། སངས་རྒྱས་ཀྱི་སྤྱན་
གྱིས་སངས་རྒྱས་ཀྱི་མཛད་པ་ཐམས་ཅད་མཛད་ཀྱང༌། དོན་དམ་བར་ཅི་ཡང་མི་ཤེས་མི་བྱེད་དོ། །རྣམ་པར་གཏན་ལ་དབབ་པའི་རྒྱལ་པོའི་མདོ་ལས་འབྱུང་བ། ཀུན་དགའ་བོ་འདི་ལྟ་སྟེ་དཔེར་ན། ཨུ་དུམ་བཱ་རའི་མེ་ཏོག་ནི་སངས་རྒྱས་སྐྱེ་བ་དང་དུས་གཅིག་ཏུ་འབྱུང་སྟེ། ཁ་དོག་དང་ལྡན་ཞིང་གསལ་ཏེ། བཟང་ལ་དྲིས་ནི་དཔག་ཚད་གཅིག །ཁོར་ཡུག་ཏུ་ཁྱབ་པར་བྱེད་དོ། །མེ་ཏོག་དེས་ནི་རབ་རིབ་མེད་པར་བྱེད། །དྲན་པ་ཡོངས་སུ་སྦྱོང་བར་བྱེད། །ནད་ཀྱང་རབ་ཏུ་ཞི་བར་བྱེད་དོ། །འཁོར་ལོས་སྒྱུར་བའི་རྒྱལ་པོ་ལ་ཡང་དེ་མི་འབྱུང་ན། ཚུལ་ཁྲིམས་འཆལ་པ་ལ་སྨོས་ཀྱང་ཅི་དགོས། མེ་ཏོག་དེ་ལྟ་བུ་དེ་གང་དུ་སྐྱེ་ཞེ་ན། རྟོགས་པ་བརྗོད་པ་ལས་འབྱུང་བ་མཚོ་ཆེན་པོ་མ་དྲོས་པའི་བྱང་ཕྱོགས་ན་རི་རབ་རྩེ་ལྔ་བ་ཞེས་བྱ་བ་དེའི་ཕ་རོལ་ན་ཨུ་དུམ་པའི་ཆལ་ཡོད་དེ། ནམ་བཅོམ་ལྡན་འདས་དགའ་ལྡན་ནས་བབས་ཏེ་ལྷུམས་སུ་ཞུགས་པ་དེའི་ཚེ། ཚལ་དེའི་ཁ་འབུ་བར་འགྱུར་རོ། །བལྟམས་པའི་ཚེ་ཁ་འབྱེ་བར་འགྱུར་རོ། །མངོན་པར་སངས་རྒྱས་པའི་ཚེ་མེ་ཏོག་རྒྱས་པར་འགྱུར་རོ། །ཚེའི་འདུ་བྱེད་བོར་བའི་ཚེ་རྙིངས་པར་འགྱུར་རོ། །མྱ་ངན་ལས་འདའ་བའི་ཚེ་མེ་ཏོག་དང༌། ལོ་མ་ལ་སོགས་པ་ལྷགས་པར་འགྱུར་རོ། མེ་ཏོག་དེའི་ཚད་ནི་ཤིང་རྟའི་འཕང་ལོ་ཙམ་མོ། །ནམ་སངས་རྒྱས་རྒྱལ་རིགས་སུ་སྐྱེས་པ་དེའི་ཚེ། མེ་ཏོག་དཀར་པོ་རབ་ཏུ་བྱུང༌། ནམ་བྲམ་ཟེའི་རིགས་སུ་སྐྱེས་པ་དེའི་ཚེ་སེར་པོར་འགྱུར་རོ། །བསྐལ་པ་བཟང་པོའི་མདོ་ལས། བསྐལ་པ་བཟང་པོ་འདིའི་འོག་ཏུ་སངས་རྒྱས་མེད་པའི་བསྐལ་པ་དྲུག་ཅུ་འབྱུང་ངོ༌། །དེའི་འོག་ཏུ་བསྐལ་བ་སྙན་པ་ཆེན་པོ་ལ་སངས་རྒྱས་ཁྲི་འབྱུང་ངོ༌། །དེའི་འོག་ཏུ་བསྐལ་པ་ཁྲིར་སངས་རྒྱས་མི་འབྱུང་ངོ༌། །དེའི་འོག་ཏུ་བསྐལ་བ་སྐར་མ་ལྟ་བུ་ལ། སངས་རྒྱས་བརྒྱད་ཁྲི་འབྱུང་ངོ༌། །དེའི་འོག་ཏུ་བསྐལ་པ་སུམ་བརྒྱར་སངས་རྒྱས་མི་འབྱུང་ངོ༌། །དེའི་འོག་ཏུ་བསྐལ་པ་ཡོན་ཏན་བཀོད་པ་ལ་སངས་རྒྱས་བརྒྱད་ཁྲི་བཞི་སྟོང་འབྱུང་ངོ༌། །ཡང་དག་པར་ལྡན་པའི་ལུང་ལས། མིའི་ལུས་ཐོབ་པར་དཀའ་བ་གཉའ་ཤིང་དང་རུས་སྦལ་གྱི་དཔེ་འབྱུང་ངོ༌། །འོད་སྲུངས་ཀྱི་ལེའུ་ལས། འོད་
སྲུངས་དཔེར་ན་ཟླ་བ་ཚེས་པ་ལ་ཕྱག་བྱ་བ་དེ་ལྟར་ཟླ་བ་ཉ་བ་ལ་མ་ཡིན་ནོ། །དེ་བཞིན་དུ་གང་དག་ང་ལ་རབ་ཏུ་དང་བ་དེ་དག་གིས་བྱང་ཆུབ་སེམས་དཔའ་ལ་ཕྱག་བྱའི་དེ་བཞིན་གཤེགས་པ་རྣམས་ལ་ནི་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ལས་ནི་དེ་བཞིན་གཤེགས་པ་སྐྱེའོ། །དེ་བཞིན་གཤེགས་པ་ལས་ནི་ཉན་ཐོས་དང་རང་སངས་རྒྱས་ཐམས་ཅད་སྐྱེའོ། །ཆོས་ཡང་དག་པར་སྡུད་པ་ལས། བྱང་ཆུབ་ཏུ་ཡོངས་སུ་བསྡོས་པའི་དགེ་བའི་རྩ་བ་རྒྱ་མཚོར་ཆུ་ཐིགས་ལྟུང་བ་བསྐལ་པ་མ་བྱུང་གི་བར་དུ་མི་འབྱུང་བའི་དཔེར་བསྟན་པ་འབྱུང༌། དད་པའི་སྟོབས་བསྐྱེད་པ་ལ་འཇུག་པའི་ཕྱག་རྒྱ་ལས། འཇམ་དཔལ་ལ་ལ་ཞིག་གིས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་རྣམས་ཀྱི་དགེ་བའི་རྩ་བའི་བར་ཆད་བྱས་པ་བས་ནི། གཞན་ཞིག་གིས་དགེ་བསྙེན། སྟོན་པ་གཞན་ལ་མི་རྟོག་པའི་དགེ་བ་བཅུའི་ལས་ཀྱི་ལམ་དང་ལྡན་པ་གཅིག་གི་དགེ་བའི་རྩ་བ་གཅིག་གི་བར་ཆད་བྱས་ན། དེས་སྡིག་པ་གྲངས་མེད་པར་བསྐྱེད་དོ། །དགེ་བསྙེན་དེ་སྙེད་ཀྱི་དགེ་བའི་བར་ཆད་བྱས་པས། དགེ་སློང་གཅིག་གི་བར་ཆད་བྱས་ན་དེ་བས་སྡིག་པ་གྲངས་མེད་པར་སྐྱེད་དོ། །དམ་པའི་ཆོས་དྲན་པ་ཉེ་བར་གཞག་པའི་མདོ་ལས། རིགས་ཀྱི་བུ་མོ་ཆོས་བཅུ་པོ་འདི་དག་ནི། བསམ་གཏན་དང༌། ཁ་དོན་གྱི་བར་དུ་གཅོད་པ་ཡིན་ཏེ། བཅུ་ནི། འདུ་འཛིའི་གཏམ་ཉན་པ་དང༌། རི་མོ་འདྲི་བ་དང༌། སྟན་དང༌། གོས་སྦྱོར་བ་དང༌། གཟའི་ཚོགས་དང༌། རྒྱུ་སྐར་སེམས་པ་དང༌། ཟས་རྙེད་པ་བདག་གིར་བྱེད་པ་དང༌། ཤ་ཟ་མོ་ལྷའི་རྣམ་པར་བསྒྱུར་བ་སེམས་པ་དང༌། རྒྱལ་པོ་ལ་བརྟེན་པ་དང༌། མཁས་པ་རྣམས་ལ་མི་འདྲི་བ་དང༌། དེ་བ་ལ་མགྲོན་དུ་འབོད་པ་དང༌། འདྲེ་ཞིང་གནས་པའོ། །མ་འདྲེས་པའི་མདོ་ལས་འབྱུང་བ། ཐམས་ཅད་མཁྱེན་པའི་སེམས་བསྐྱེད་པའི་བར་དུ་གཅོད་པ་ནི་གཉིས་ཏེ། གཡོ་དང་སྒྱུ་མེད་པའོ། །དེའི་གཞི་ཡང་དྲང་པོ་དང་གཡོ་མེད་པའོ། །དོན་དམ་པའི་མཆོད་པ་ལ་ཡང་རྟག་ཏུ་བརྩོན་བར་བྱ་སྟེ། བྱམས་པ་སེང་གེའི་སྒྲ་ལས། སངས་རྒྱས་སུ་འདུ་ཤེས་པ་དང༌། སངས་རྒྱས་མཐོང་བ་ཡང་མེད་
ན། སངས་རྒྱས་མཆོད་པར་འགྱུར་བ་ལྟ་ཅི་སྨོས། དེ་ཡང་སངས་རྒྱས་མཆོད་པ་གང་ཞེ་ན། གང་འདུ་ཤེས་ཀྱི་མཚན་མ་མི་བསྐྱེད་པའོ། །དེ་བཞིན་གཤེགས་པ་སྐྱེ་བ་འབྱུང་བའི་མདོ་ལས། ཀྱེ་རྒྱལ་བའི་སྲས་དེ་བཞིན་གཤེགས་པ་འབྱུང་བ་ཞེས་བྱ་བ་འདི་ནི། སེམས་ཅན་ཡོངས་སུ་ཚིམ་པར་བྱ་བའི་ཚིག་གོ །ཡོངས་སུ་མྱ་ངན་ལས་འདས་པ་ཞེས་བྱ་བ་ནི། སེམས་ཅན་སྐྱོ་བ་བསྐྱེད་པའི་ཚིག་གོ །དེ་བཞིན་གཤེགས་པ་རྣམས་ནི་སྐྱེ་བ་མེད་དོ། །ཡོངས་སུ་མྱ་ངན་ལས་མི་འདའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་ཆོས་ཀྱི་དབྱིངས་ལ་བཞུགས་པའི་ཕྱིར་ཏེ། སེམས་ཅན་གྱི་བསམ་པ་ཡོངས་སུ་བསྐང་བར་བྱ་བའི་ཕྱིར། མྱ་ངན་ལས་འདས་པ་ལྟར་སྣང་ངོ༌། །སངས་རྒྱས་མྱ་ངན་ལས་འདས་པ་ནི་རང་གི་དེ་ལྟར་མཐོང་སྟེ། སྣོད་ཆག་པའི་ཆུ་ལྟ་བུ་དང༌། འབྱུང་བ་ཡང་སྣོད་བཟང་པོ་ཆུ་དང་བ་བཞིན་ནོ་ཞེས་བྱ་བ་ཡང་འབྱུང་ངོ༌། །འཕགས་པ་ནཱ་གརྫུ་ནས་བཀའ་སྩལ་པ། ཐེག་པ་གཅིག་ལ་མོས་པའི་སེམས་ཅན་དེ་དག་ནི་ཤིན་ཏུ་རྙེད་པར་དཀའ་སྟེ། ཐེག་པ་གཅིག་ཏུ་ཟད་པར་ནི་མདོ་སྔ་དུ་མ་ལས་གསུངས་པའི་ཕྱིར་རོ། །འཕགས་པ་བདེན་པའི་ལེའུ་ལས། འཇམ་དཔལ་དེ་བཞིན་གཤེགས་པས་ལ་ལ་ལ་ནི་ཉན་ཐོས་ཀྱི་ཐེག་པ། ལ་ལ་ལ་ནི་རང་སངས་རྒྱས་ཀྱི་ཐེག་པ། ལ་ལ་ལ་ནི་ཐེག་པ་ཆེན་པོ་བཤད་པར་གྱུར་ན། དེ་ནི་དེ་བཞིན་གཤེགས་པའི་སེམས་ཡོངས་སུ་མ་དག་པར་འགྱུར་ཏེ། ངས་ཆོས་ལ་དཔེ་མཁྱུད་བྱས་པར་ཡང་འགྱུར་རོ། །འཇམ་དཔལ་ངས་སེམས་ཅན་རྣམས་ལ་ཆོས་གང་དང་གང་བསྟན་པ་དེ་དག་ཐམས་ཅད་ནི་འདི་ལྟ་སྟེ། ཐམས་ཅད་མཁྱེན་པའི་ཡེ་ཤེས་འཐོབ་པར་བྱ་བའི་ཕྱིར། བྱང་ཆུབ་ལ་གཞོལ་བ། ཐེག་པ་ཆེན་པོ་ལ་བབ་པ། ཐམས་ཅད་མཁྱེན་པ་ཉིད་སྒྲུབ་པ། ཡུལ་གཅིག་ཏུ་ཡང་དག་པར་ཕྱིན་པར་བྱེད་པ་སྟེ། དེ་བས་ན་ང་ལ་ཐེག་པ་རྣམ་པར་དགོད་པ་མེད་དོ། །ཐེག་པ་རྣམ་པར་དགོད་པ་ཞེས་བྱ་བ་ནི། དེ་བཞིན་གཤེགས་པས་ས་རྣམ་པར་དགོད་པ་མཛད་པ་དེ་ནི་གང་ཟག་རྣམ་པར་དགོད་ཚོགས་སུ་ཆུང་ངུ་དང་ཚད་མེད་པ་རྣམ་པར་དགོད་པ་མཛད་པ་སྟེ། ཆོས་ཀྱི་དབྱིངས་ཐ་
དད་པ་མེད་པའི་ཕྱིར། འདི་ལ་ཐེག་པ་ཐ་དད་པ་མེད་དེ། འདི་ནི་ཀུན་རྫོབ་ཏུ་འཇིག་པ་བསྟན་པའི་སྒོ་ཙམ་དུ་བརྗོད་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལས། ལྷའི་བུ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པ་དེ་དག་གིས། བླ་ན་མེད་པའི་བྱང་ཆུབ་ཏུ་སེམས་བསྐྱེད་པར་བྱའོ། །གང་དག་ཡང་དག་པ་ཉིད་དུ་ངེས་པར་ཞུགས་པ་དེ་དག་ནི། བྱང་ཆུབ་ཏུ་སེམས་བསྐྱེད་པའི་མཐུ་མེད་དོ། །དེ་ཅིའི་ཕྱིར་ཞེ་ན། དེ་དག་གིས་འཁོར་བའི་རྒྱུན་གྱི་མཚམས་བཅད་པའི་ཕྱིར་རོ། །དེ་དག་གལ་ཏེ་བླ་ན་མེད་པའི་བྱང་ཆུབ་ཏུ་སེམས་བསྐྱེད་ན་ནི། ང་ཡང་རྗེས་སུ་ཡི་རང་ཞིང༌། དེ་དག་གི་དགེ་བའི་རྩ་བ་ལ་བར་ཆད་མི་བྱེད་དོ། །ཁྱད་པར་དུ་འཕགས་པ་བས་ཀྱང་ཤིན་ཏུ་འཕགས་པའི་ཆོས་ལ་ལྷག་པར་དམིགས་པ་བྱའོ། །གཟུངས་ཀྱི་དབང་ཕྱུག་རྒྱལ་པོས་ཞུས་པ་དང༌། འདུས་པ་ཆེན་པོ་དང༌། ཕྱིར་མི་ལྡོག་པའི་འཁོར་ལོ་དང༌། དཔལ་གྱི་ཕྲེང་བ་སེང་གེའི་སྒྲ་དང༌། ལང་ཀར་གཤེགས་པ་ལས། ཐེག་པ་གསུམ་གཅིག་ཏུ་འདུ་བར་འབྱུང༌། དཔལ་གྱི་ཕྲེང་བའི་སེང་གེའི་སྒྲ་ལས། དམ་པའི་ཆོས་ཞེས་བྱ་བ་ནི་ཐེག་པ་ཆེན་པོའི་ཚིག་བླ་དགས་སོ། །དེ་ཅིའི་ཕྱིར་ཞེ་ན། ཉན་ཐོས་དང་རང་སངས་རྒྱས་དང༌། འཇིག་རྟེན་ལས་འདས་པའི་དགེ་བའི་རྩ་བ་ཐམས་ཅད་ཀྱང༌། ཐེག་པ་ཆེན་པོས་རབ་ཏུ་ཕྱེ་བའི་ཕྱིར་རོ། །ཟླ་བའི་སྙིང་པོའི་མདོ་ལས། དོན་དམ་པའི་བདེན་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྟེ། ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་མ་ཡིན་ནོ། །དེ་བས་ན་ཀུན་རྫོབ་ཀྱི་བདེན་པ་གང་གིས་ཀྱང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དགེ་བའི་རྩ་བའི་ཚོགས་ཀྱི་མཆོག་སྒྲུབ་མི་ནུས་སོ། །ཟླ་བའི་སྙིང་པོ་དཔེར་ན་མེ་སྟག་གང་གིས་ཀྱང་རྒྱ་མཚོ་ཆེན་པོ་སྐེམས་པར་མི་ནུས་སོ། །དེ་བཞིན་དུ་ཀུན་རྫོབ་ཀྱི་བདེན་པ་གང་གིས་ཀྱང༌། རང་གི་ཉོན་མོངས་པའི་རྒྱ་མཚོ་སྐེམས་པར་ཡང་མི་ནུས་ན། སེམས་ཅན་གཞན་གྱི་ལྟ་སྨོས་ཀྱང་ཅི་དགོས། །བྱང་ཆུབ་སེམས་དཔའི་སྡེ་སྣོད་ལས། འཕགས་པ་ཡང་དག་པའི་ལྟ་བ་འབྱུང་བ་ནི་རྒྱུ་གཉིས་ཏེ།
གཞན་གྱི་སྒོ་དང་བདག་ཉིད་ཀྱིས་ཚུལ་བཞིན་ཡིད་ལ་བྱེད་པའོ། །འཇམ་དཔལ་རྣམ་པར་སྤྲུལ་པའི་ལེའུ་ལས། ལྷའི་བུ་ཡི་གེ་རྣམས་ཀྱི་ཡེ་ཤེས་དེ་བསྟན་པ་དེ་ནི་དེ་བཞིན་གཤེགས་པ་རྣམས་ཀྱི་ཐབས་ཡིན་ཏེ། ཡེ་ཤེས་དེ་ནི་ཡི་གེ་མེད་པའོ། །དཔེར་ན་མེ་མ་གཙུབས་པ་ལས་མེ་མི་འབྱུང་གི །གཙུབས་པ་ལས་མེ་འབྱུང་བ་དེ་བཞིན་དུ། དེ་བཞིན་གཤེགས་པས་ཐོག་མ་ཁོ་ནར་སངས་རྒྱས་ཀྱི་ཡེ་ཤེས་རྒྱ་ཆེར་ཡང་དག་པར་བསྟན་ན། སེམས་ཅན་གང་གིས་ཀྱང་ཀུན་ཤེས་པར་མི་འགྱུར་བས། དེ་བཞིན་གཤེགས་པས་གཙུབ་ཤིང་གི་གཏམ་གྱིས། ཡེ་ཤེས་དེ་བསྟན་ཏེ་ཡེ་ཤེས་ནི་ཡི་གེ་མེད་པའོ། །སྨྲས་པ། འཇམ་དཔལ་གཙུབ་ཤིང་གི་གཏམ་གང་ཡིན། འཇམ་དཔལ་གྱིས་སྨྲས་པ། ལྷའི་བུ་སྡོམ་པ་དང༌། ཡོ་བྱད་བསྙུངས་པ་དང༌། ཕ་རོལ་ཏུ་ཕྱིན་པ་དང༌། བྱང་ཆུབ་ཀྱི་ཕྱོགས་ཀྱི་ཆོས་ལ་འཇུག་པའི་གཏམ་ཡིན་ནོ། །འཕགས་པ་ནཱ་གརྫུ་ནས་བཤད་པ་ཐབས་ལ་མཁས་པ་དང་བྲལ་བར་ཆོས་ཉིད་ཟབ་མོ་ལ་སྦྱོར་བར་མི་བྱ་སྟེ། དེ་བཞིན་གཤེགས་པའི་ཡོན་ཏན་དང་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པར་བསྟན་པ་ལས། འཇམ་དཔལ་ལ་ལ་དག་གིས་མངོན་པར་སངས་རྒྱས་ནས་ལོ་བཅུ་ལོན་པ་དང༌། ལ་ལ་དག་གིས་ཡོངས་སུ་མྱ་ངན་ལས་འདས་ནས་ལོ་བཅུ་ལོན་བ་དང༌། ལ་ལ་དག་གིས་ནི་བྱང་ཆུབ་ཀྱི་སྙིང་པོར་བྱོན་པ་དང༌། ལ་ལ་དག་གིས་བཅོམ་ལྡན་འདས་ཤཱཀྱ་ཐུབ་པའི་བསྟན་པ་ནུབ་པར་ཤེས་སོ། །དེ་བཞིན་དུ་རྣམ་པ་སྣ་ཚོགས་སུ་ཤེས་སོ། །མྱ་ངན་ལས་འདས་པ་ཆེན་པོ་ལས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འཁོད་པའི་སེམས་ཅན་ཐམས་ཅད་ཀྱང་གཅིག་ལ་གཅིག་པུ་གཅིག་པ་བཞིན་བྱམས་པར་བྱེད་དོ། །འདོད་ཆེན་པོ་རྣམས་ནི་མ་གཏོགས་སོ། །དེ་བཞིན་གཤེགས་པ་འདུས་བྱས་སོ་ཞེས་ཟེར་བ་དེ་དག་ནི་བརྫུན་དུ་སྨྲ་བ་སྟེ། རང་གི་ཁྱིམ་དང་འདྲ་བར་སེམས་ཅན་དམྱལ་བར་འགྲོ་བར་འགྱུར་རོ། །དམ་པའི་ཆོས་སུན་ཕྱུང་ཡང་རུང༌། འདོད་ཆེན་པོ་ཡང་རུང་སྟེ་གསད་དུ་མི་རུང་ངོ༌། །རྒྱུ་སོགས་པའི་སྲོག་གཅོད་པ་ནི་བྱེད་མི་ཕོད་དོ། །ཞིང་ངམ་ཁྱིམ་གྱི་ནང་དུ་དུག་ཤིང་ངམ། སྙེ་ལོང་སྐྱེས་ན་རྩ་ནས་གདོན་དགོས་པ་
ལྟར། ཚུལ་ཁྲིམས་འཆལ་པ་དང༌། དམ་པའི་ཆོས་སུན་འབྱིན་པ་རྣམས་ནི་བྲན་བཞིན་ཚར་གཅད་པར་ངས་གནང་ངོ༌། །དེ་བཞིན་གཤེགས་ཕ་ནི་རྟག་པ་དང་བརྟན་པ་ཡིན་པར་ཁོང་དུ་ཆུད་བར་གྱིས་ཤིག །འཇིག་རྟེན་འདི་ནི་སྤྲུལ་པའི་ལུས་མ་ཡིན་ཏེ། དེ་དེ་བཞིན་གཤེགས་པ་དུག་སྨན་ལ་བརྟེན་པའི་སྐུ་ཡོངས་སུ་འདོད་པར་མཛད་དོ་སྙམ་དུ་ཤེས་པར་གྱིས་ཤིག །ཚུལ་ཁྲིམས་འཆལ་པ་གང་དག་ཡིན་པ་དེ་དག་ནི་ཁྱིམ་བདག་མགོ་རེག་ཅེས་བྱའོ། །དགེ་བསྙེན་གྱི་བསླབ་པའི་གཞི་ལྔ་གཟུང་བར་མི་བྱ་སྟེ། མཚོན་ཆ་ཐོགས་ནས་དགེ་སློང་བསྲུང་བར་བྱའོ། །དེ་བཞིན་གཤེགས་པ་མྱ་ངན་ལས་འདས་ནས་དུས་ངན་པའི་ཚེ་མུ་གེའི་ཉེས་པས་ཕལ་ཆེར་རབ་ཏུ་བྱུང་ཞིང་མགོ་རེག་ཏུ་གྱུར་ཏེ། དེ་དག་གིས་དགེ་སློང་ཚུལ་ཁྲིམས་དང༌། ཡོན་ཏན་དང་ལྡན་པ་དག་སྐྲོད་པར་འགྱུར། གསོད་པར་འགྱུར། དགེ་འདུན་རྣམ་པ་གསུམ་སྟེ། ཚུལ་ཁྲིམས་འཆལ་པ་དང༌། བྱིས་པ་དང༌། རང་བཞིན་གྱི་དགེ་འདུན་ནོ། །བུདྡྷ་དཔྱིད་ཟླ་ཐ་ཆུངས་ཉའི་ནང་བར་དུ་མྱ་ངན་ལས་འདས་ཏེ། ད་ཕྱིན་ཆད་ངའི་ཉན་ཐོས་རྣམས་ཤ་ཟ་བར་མི་གནང་ངོ༌། །ཤ་ཟ་ན་ནི་བྱམས་པ་ཆེན་པོ་ཆད་པར་འགྱུར་རོ་ཞེས་ངས་བསྟན་ཏོ། །རིགས་ཀྱི་བུ་ཡང་རུང་བ་མ་ཡིན་པའི་འབྲས་འཚེད་པ་དང༌། ཤ་དང་ཉ་ཤ་ལེན་པ་དང༌། སྣབས་སུ་སྦྱོར་བ་དང༌། འབྲུ་མར་གྱི་སྣོད་དང༌། གདུགས་དང༌། ལྷ་བྱེད་པ་དང༌། རྒྱལ་པོ་ལ་བརྟེན་པ་དང༌། མོ་ཡིག་འཆད་བ་དང༌། སྨན་དབྱད་ལ་བརྩོན་པ་དང༌། བྲན་དང་གསེར་ལ་སོགས་པ་ལེན་པ་དང༌། རི་མོ་དང༌། གཟུགས་བྱེད་པ་དང༌། སྐྱེ་ཤིང་འཛུགས་པ་དང༌། གསང་སྔགས་དང༌། སྨན་དང༌། བྱིས་པའི་རྩེད་མོ་དང༌། གར་ཐབས་ཀྱི་ཡན་ལག་དང༌། འགྲོས་འཆོས་པ་དང༌། སྒེག་པའི་ཡན་ལག་ལ་བརྩོན་པ་དག་འབྱུང་བར་འགྱུར་ཏེ། དེ་དག་སྤངས་པ་ལ་དགེ་སློང་ཞེས་ཟེར་རོ། །འཛམ་བུའི་གླིང་ལ་ལར་ནི་བུད་མེད་ཀྱི་གཟུགས་ཀྱིས་འཚང་རྒྱ་བར་སྟོན། འཛམ་བུའི་གླིང་ལ་ལར་ནི་བདག་ཉིད་ཁམས་བཞི་པོ་རྣམས་སུ་སྒྱུར་བར་བྱེད་ཅིང༌། སེམས་ཅན་རྣམས་ཀྱི་ནད་བསལ་བར་བདག་ཉིད་སྨན་དང་ཤིང་ཐམས་ཅད་དུ་སྒྱུར་བར་བྱེད་དོ། །དེ་བཞིན་གཤེགས་
པ་ནི་གསོར་མི་རུང་བའི་ནད་འདོད་ཆེན་པོ་མ་གཏོགས་པར་ནད་ཐམས་ཅད་གསོ་བར་མཛད་དོ། །གང་མྱ་ངན་ལས་འདའ་བ་དེ་དག་གསོ་བ་ཡིན་ནོ། །དེ་བཞིན་གཤེགས་པ་ནི་ཤའི་སྐུ་ཡིན་ཏེ། བུད་ཤིང་ཟད་པའི་མེ་བཞིན་དུ་ཡོངས་སུ་མྱ་ངན་ལས་འདས་སོ་ཞེས་བྱ་བ་འདི་ནི། ཉན་ཐོས་ཀྱི་ཐེག་པ་ཡིན་ཏེ་ཚད་མ་མ་ཡིན་ནོ། །དགེ་སློང་རྣམས་ཀྱིས་ནི་ཐོག་མར་དགེ་སྦྱོང་གི་ཆོས་ཀྱིས་གྲོག་སྤུར་རྣམས་ལ་ཡང་སྙིང་རྗེ་བྱའོ། །དགེ་སྦྱོང་གི་ཆོས་ཀྱིས་ཆང་གི་རོ་བྲོ་བའི་བཏུང་བ་ཡང་དག་པར་སྤང་བར་བྱའོ། །རྨི་ལམ་དུ་ཡང་བརྫུན་དུ་སྨྲ་བ་དང༌། བུད་མེད་དང་ཕྲད་པའི་སེམས་བསྐྱེད་པར་མི་བྱའོ། །སངས་རྒྱས་ཀྱི་གསུང་ནི་དབུ་མའི་ལམ་ཡིན་པར་ཤེས་པར་གྱིས་ཤིག །སངས་རྒྱས་ཀྱིས་ན་རྟག་པ་དང་ཆད་པ་གཉིས་ཀའི་མཐའ་སྤངས་པ། དབུ་མའི་ལམ་དུ་གསུངས་སོ། །རིགས་ཀྱི་བུ་བསོད་ནམས་ཐམས་ཅད་བསྡུས་པའི་མདོ་དང༌། ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་ཆེན་པོ་ལས། གཉིས་སུ་མེད་པ་ལ་འཇུག་པའི་སྣང་བ་དང༌། དེ་ཉིད་བདག་ཡོད་པ་དང༌། བདག་མེད་པ་གཉིས་སུ་མེད་པར་ངས་བསྟན་པ་དེ་རྗེས་སུ་དྲན་པར་གྱིས་ཤིག །དེ་བཞིན་གཤེགས་པའི་སྙིང་པོ་ཐོག་མནས་བཅོས་མ་མ་ཡིན་ལ། ཉོན་མོངས་པ་ནི་གློ་བུར་བ་ཡིན་ཏེ། སངས་རྒྱས་སུ་འགྱུར་བར་འདོད་པས། ཉོན་མོངས་པ་རྣམས་གཞོམ་པར་བྱའོ། །ས་བཅུ་ཐོབ་པར་བྱང་ཆུབ་སེམས་དཔའ་རྣམས་ཀྱིས་ཀྱང་ལེགས་པར་བརྟགས་ནས། རང་གི་ལུས་ལ་དེ་བཞིན་གཤེགས་པའི་སྙིང་པོ་བྱས་པ་མ་ཡིན་པར་ཡོད་པར་འོལ་བྱིར་མཐོང་བར་ཟད་དོ། །ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང༌། མྱ་ངན་ལས་འདས་པ་ཆེན་པོའི་མདོའི་ཚུལ་གྱིས་བདག་གི་ལུས་ལ་དེ་བཞིན་གཤེགས་པའི་སྙིང་པོ་ཡོད་པར་ཡིད་ཆེས་པར་བྱ་སྟེ། ལེགས་པར་སྨྲས་པ་ཆོས་དང་འཚམ་པ་ནི་འཇིག་རྟེན་པ་ཡིན་ཡང༌། འཇིག་རྟེན་ལས་འདས་པ་ཡིན་པར་རིག་པར་བྱའོ། །བསྟན་བཅོས་སམ། རིགས་སྔགས་སམ། གསང་སྔགས་གང་ཅི་ཡང་རུང་བ་ཐམས་ཅད་ནི་རྫོགས་པའི་སངས་རྒྱས་ཀྱིས་བཤད་པ་ཡིན་པར་ཤེས་པར་གྱིས་ཤིག །བཅོམ་ལྡན་འདས་ཀྱིས་ཡི་གེ་ཕྱི་མོ་ཇི་ལྟར་བཀའ་སྩལ་ལགས། བཀའ་སྩལ་པ་ཡི་གེའི་ཕྱི་མོ་དང་ཆོས་ཐམས་ཅད་ནི་སྤྲུལ་པ་སྟེ། དེ་ཡང་དམ་པའི་
ཆོས་ཀྱི་ཚུལ་གྱིས་ཡི་གེ་ཕྱི་མོ་བསླབས་ན། ཆོས་དང་ཆོས་མ་ཡིན་པ་བྱེ་བྲག་ཕྱེད་པར་འགྱུར་བའི་ཕྱིར་བས་སྤྲུལ་པ་ཡིན་གྱི། ཆོས་མ་ཡིན་པའི་ཕྱིར་ནི་མ་ཡིན་ནོ། །འཕགས་པ་གང་དག་ཡིན་ཞེ་ན། འཕགས་པ་ནི་བྱུང་བ་གང༌། ཆགས་པ་མེད་པ་དང༌། རུང་བས་ཆོག་པར་འཛིན་པ་དང༌། སེམས་ཅན་སྲེད་པའི་མཚོ་ལས་སྒྲོལ་བ་ནི་འཕགས་པ་ཞེས་བྱའོ། །རིགས་ཀྱི་བུ་འམ་རིགས་ཀྱི་བུ་མོ་ལ་ཞུགས་པ་ནི་འཕགས་པ་སྟེ། དགེ་སློང་ཚུལ་ཁྲིམས་དང་ལྡན་པ་ཡང་འཕགས་པ་ཞེས་བྱའོ། །དེ་བཞིན་གཤེགས་པའི་སྐུ་ལ་ནི། བསགས་པའི་ཁམས་ཀྱི་བག་ཀྱང་མ་མཆིས། རིགས་ཀྱི་བུ་ང་འདས་ནས་ལོ་བཞི་སྟོང་གི་བར་དུ་འཛམ་བུའི་གླིང་དུ་སྤྱོད་པར་འགྱུར་ཏེ། དེའི་རྗེས་ལ་སའི་འོག་ཏུ་ནུབ་པར་འགྱུར་རོ། །ངའི་ཆོས་ཀྱི་མཇུག་ལོ་བརྒྱད་ཅུ་ལུས་པར་འགྱུར་ཏེ། ཆོས་ནུབ་ཏུ་ཆ་བ་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཆེན་པོ་འཛམ་བུའི་གླིང་དུ་འབྱུང་བར་འགྱུར་ཏེ། ལོ་བཞི་བཅུའི་བར་དུ་ཆོས་ཀྱི་ཆར་ཕབ་ནས་ནུབ་པར་འགྱུར་རོ། །རྒན་ནམ་ཡང་ན་གཞོན་ཡང་རུང༌། །གང་ལས་ཆོས་ནི་རྟོགས་འགྱུར་བ། །དབང་ཆེན་ལྷ་ཡི་བྱ་བ་བཞིན། །དེ་ལ་བཀུར་སྟི་ཕྱག་ཀྱང་བྱ། །ཞེས་བྱ་བ་ནི་མ་འོངས་པའི་དུས་ཀྱི་བྱང་ཆུབ་སེམས་དཔའ་རྣམས་ཀྱི་ཕྱིར་ངས་བསྟན་པ་ཡིན་གྱི། ཉན་ཐོས་རྣམས་ཀྱི་ཕྱིར་ནི་མ་ཡིན་ནོ། །ཁ་ཅིག་ནི་ཟླ་བ་ཕྱེད་ཡིན་པར་འཛིན་ཏེ། ཟླ་བ་ནི་ཕྱེད་དུ་འགྱུར་ཞིང་ལྷག་པ་ཡང་མེད་དེ། ཟླ་བ་ནི་རི་རབ་ཀྱི་རྐྱེན་གྱིས་དེ་ལྟར་སྣང་བར་ཟད་དོ། །རིགས་ཀྱི་བུ་གཞན་ཡང་དཔེར་ན་ཟླ་བ་དང་ལྷ་མ་ཡིན་གྱི་དབང་པོ་སྒྲ་གཅན་ཕྲད་པའི་ཚེ། འཇིག་རྟེན་རྣམས་ཀྱིས་ཟླ་བ་གཟས་ཟིན་ཏོ་སྙམ་དུ་འཛིན་ཏེ། སྒྲ་གཅན་ནི་ཟླ་བ་ལ་འཛིན་པར་ཡང་མི་བྱེད་ལ། དེས་ནི་དེ་ལ་གཟའ་བར་ཡང་མི་ནུས་ཏེ། སྒྲ་གཅན་གྱི་ལག་པས་ཟླ་བ་བསྒྲིབས་ནས་འོད་མི་སྣང་བར་བྱེད་པར་ཟད་དེ། ཟླ་བ་ལ་རྨ་ཡང་མེད། ཉོན་མོངས་པ་ཡང་མེད་དོ། །མི་རྣམས་ཀྱིས་ནི་ཟླ་བ་སྡུག་བསྔལ་ཞིང་འདུག་པར་འཛིན་ཏོ། །ཟླ་བ་ནི་རང་བཞིན་ཁོ་ནར་འདུག་བཞིན་དུ། བདག་ཉིད་སྒྲ་གཅན་དང་ལྷན་ཅིག་འདུག་སྟེ། འདི་ནི་འཇིག་རྟེན་གྱི་ཆོས་ཉིད་དོ། །དེ་བཞིན་གཤེགས་
པ་ནི་འཇིག་རྟེན་གསུམ་དུ་ཡང་དག་པར་སྣང་སྟེ། འདི་ནི་སངས་རྒྱས་རྣམས་ཀྱི་ཆོས་ཉིད་དོ། །རིགས་ཀྱི་བུ་དཔེར་ན་ཟླ་བ་ཡར་གྱི་ངོ་ཡང་མ་ཡིན། མར་གྱི་ངོ་ཡང་མ་ཡིན་པ་གནམ་སྟོང་གཉིས་པར་ཉི་མ་དང་ཟླ་བ་མེད་པའི་སྐབས་སུ། གཟའ་མཇུག་རིངས་ཤར་ནས་ཀུན་གྱིས་མ་ཚོར་བར་སྐད་ཅིག་ལོན་ལ་མི་སྣང་བར་འགྱུར་རོ། །དེ་བཞིན་དུ་རང་སངས་རྒྱས་རྣམས་ཀྱང་སངས་རྒྱས་མི་བཞུགས་པའི་ཚེ་བྱུང་ནས། སེམས་ཅན་མང་པོ་དམ་པའི་ཆོས་ལ་བཀོད་ནས་མི་སྣང་བར་འགྱུར་རོ། །འདོད་ཆེན་པོ་རྣམས་ལ་ཡང་དེ་བཞིན་གཤེགས་པའི་སྙིང་པོ་ཡོད་མོད་ཀྱི། འོན་ཀྱང་གཡར་ས་ཤིན་ཏུ་ལྐུགས་པར་འདུག་གོ །དཔེར་ན་དར་གྱི་སྲིན་བུ་རང་ཉིད་ཀྱིས་ཀུན་ནས་དཀྲིས་ནས། སྒོམ་བཏོད་པས་ཕྱིར་འབྱུང་མི་ནུས་པ་དེ་བཞིན་དུ་དེ་བཞིན་གཤེགས་པའི་སྙིང་པོ་ཡང་དེའི་ལས་ཀྱི་ཉེས་པས་འདོད་ཆེན་པོའི་ཁོང་ནས་འབྱུང་བར་མི་ནུས་སོ། །རིགས་ཀྱི་བུ་གཞན་ཡང་བུད་མེད་ཇི་ལྟར་མི་བཟོད་པ་ཉོན་ཅིག །བུད་མེད་ནི་གལ་ཏེ་སྐྱེས་པ་གང་གཱའི་ཀླུང་གི་བྱེ་མ་སྙེད་དམ། གཏམ་སྙེད་དམ། དཀྲིགས་སྙེད་དང་ལྷན་ཅིག་འདོད་པ་ཞེན་པར་སྤྱོད་ཀྱང༌། སྦྲང་བུའི་གཅིན་གྱིས་རྒྱ་མཚོ་བརླན་ཅིང་ངོམས་པར་མི་འགྱུར་བ་དེ་བཞིན་དུ། བུད་མེད་རྣམས་ངོམས་པར་མི་འགྱུར་རོ། །མདོ་ཆེན་པོ་འདི་ཡང་ལྷོ་ཕྱོགས་སུ་སོང་ནས། ཡོངས་སུ་མྱ་ངན་ལས་འདས་པ་ཆེན་པོའི་དགོངས་པའི་ཚིག་གི་ཆར་འབེབས་སོ། །དེ་ནས་ལྷོ་ཕྱོགས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་དམ་པའི་ཆོས་འཇིག་པར་ཤེས་ནས་དགུན་གྱི་དུས་དང་ཉེ་བར་གྱུར་པའི་སྤྲིན་བཞིན་དུ་ཁ་ཆེའི་ཡུལ་དུ་སོང་ནས། ས་ལ་ནུས་པར་གྱུར་ཏེ། ཐེག་པ་ཆེན་པོའི་མདོ་སྡེ་ཤིན་ཏུ་རྒྱས་པ་བདུད་རྩིའི་མཆོག་གི་དམ་པའི་ཆོས་ཐམས་ཅད་ནུབ་པར་འགྱུར་རོ། །གསོལ་པ། འདོད་ཆེན་པོ་ཇི་ལྟ་བུ་ལགས། བཀའ་སྩལ་པ། དགེ་སློང་ངམ། དགེ་སློང་མའམ། དགེ་བསྙེན་ནས། དགེ་བསྙེན་མ་ཡང་རུང་སྟེ། ཚིག་ངན་པས་མདོ་སྡེ་སྤངས་ནས། ཕྱིས་བཟོད་པ་གསོལ་བར་ཡང་མི་བྱེད་པ་གང་ཡིན་པ་དེ་ལྟ་བུ་ནི། འདོད་ཆེན་པོའི་ལམ་དུ་ཞུགས་པ་ཡིན་ནོ། །ཕམ་པ་བཞི་དང༌། མཚམས་མེད་པ་ལྔ་བྱེད་པ་དེ་དག་བདག་ཅག་འཇིགས་པའི་ལམ་དུ་ཞུགས་པ་ཡིན་ནོ་སྙམ་དུ་ཤེས་ཀྱང༌།
འཇིགས་པར་མི་ལྟ་ལ། དམ་པའི་ཆོས་འབྱུང་ངོ་སྙམ་དུ་མི་སེམས་ཤིང་དེ་ཉིད་ཀྱི་བསྔགས་པ་མ་ཡིན་པར་ཡང་རྗོད་པར་བྱེད་པ་དེ་དག་ཀྱང་དེར་ཞུགས་པ་ཡིན་ནོ། །དཀོན་མཆོག་གསུམ་མེད་དོ་ཞེས་ཟེར་བ་དེ་དག་ཀྱང་དེར་ཞུགས་པ་ཡིན་ནོ། །མཆོག་ཏུ་ཚུལ་ཁྲིམས་འཆལ་པ་ལ་བྱིན་པ་ནི་འབྲས་བུ་ཅུང་ཟད་ཀྱང་མེད་དོ། །འབྲས་བུ་ཆེན་པོ་འཆགས་ཤིང་བཟོད་པ་གསོལ་བའི་སེམས་བསྐྱེད་པ་ནི་མི་སྲིད་དོ། །ཆད་པ་དག་གིས་ཐམས་ཅད་སྐྲག །ཀུན་ལ་སྲོག་ནི་ཕངས་པ་ཡིན། །བདག་གི་ཉམས་ལས་དཔག་བྱ་ཞིང༌། །བརྡེག་པར་མི་བྱ་གསང་མི་བྱ། །གསེར་འོད་དམ་པ་ལས། སྒྲིབ་པ་ཐམས་ཅད་དང་བྲལ་ཞིང༌། །དགེ་བའི་ཆོས་ཐམས་ཅད་རྫོགས་པའི་ཕྱིར། དེ་ཁོ་ན་ཉིད་དང་ཡང་དག་པའི་ཡེ་ཤེས་ནི་ཆོས་ཀྱི་སྐུའོ། །ཀུན་གཞི་རྣམ་པར་ཤེས་པ་གནས་གྱུར་བ་ནི་ཆོས་ཀྱི་སྐུའོ། །ཉོན་མོངས་པ་ཅན་གྱི་ཡིད་གྱུར་པ་ནི་ལོངས་སྤྱོད་རྫོགས་པའི་སྐུའོ། །འཇུག་པའི་རྣམ་པར་ཤེས་པ་གྱུར་པ་ནི་སྤྲུལ་པའི་སྐུའོ། །དུང་ཕྲེང་གི་མདོ་ལས། དེ་བཞིན་གཤེགས་པའི་སྙིང་པོ་གསལ་བར་མ་གྱུར་པའི་ཚེ་ནི་ཀུན་གཞི་ཞེས་བྱའོ། །གསལ་བར་གྱུར་པའི་ཚེ་ནི་ཆོས་ཀྱི་སྐུ་ཞེས་བྱའོ། །སྟུག་པོ་བཀོད་པ་ལས། སེམས་ནི་རྣམ་པ་གཉིས་དངོས་སུ། །གཟུང་དང་འཛིན་པར་སྣང་བ་སྟེ། །བུམ་པ་སྣམ་བུ་ལ་སོགས་པའི། །ལུས་ནི་གང་ཡང་ཡོད་མ་ཡིན། །གསེར་མདོག་གི་སྔོན་གྱི་སྦྱོར་བ་ལས། གང་རང་སངས་རྒྱས་ཀྱི་ལུས་ཀྱིས་ཆོས་སྟོན་པ་ནི་ཆོས་ཉིད་ཡིན་ཏེ། ཚིག་གིས་ནི་མ་ཡིན་ནོ། །བཅོམ་ལྡན་འདས་རང་སངས་རྒྱས། སྟུག་པོ་བཀོད་པ་ལས། འདི་ལྟར་སྣང་བ་ཅི་ཡང་རུང༌། །མཚན་མ་གཟུགས་སུ་སྣང་བ་ལས། །བག་ཆགས་ཡོད་པར་ཀུན་གཞི་སྟེ། །ས་རྣམས་ཀུན་ན་གཟུགས་ལྟར་གནས། །ཇི་ལྟར་འོ་མ་གྱུར་པ་དང༌། །ཡོན་ཏན་ཞོ་དང་དར་བར་སྣང༌། །དེ་བཞིན་ཀུན་གཞི་རྣམ་ཤེས་ཀྱང༌། །རྣམ་པར་གྱུར་ན་གཟུགས་ལྟར་སྣང༌། །གཟུགས་ཀྱི་ཡོན་ཏན་ལྡན་པའི་གཟུགས། །ཀུན་གཞི་གཟུགས་ལྟར་གནས་པ་སྟེ། །ཇི་ལྟར་བྱིས་པས་བརྟགས་པ་བཞིན། །གཟུགས་ནི་གུད་ན་ཡོད་མ་ཡིན། །ས་ལ་གཟུགས་རྣམས་ཡོད་པ་དང༌། །ལྷ་ཡུལ་གནས་པའི་ཁྱིམ་རྣམས་
ཀྱང༌། །རྣམ་པ་སྣ་ཚོགས་གང་སྣང་བ། །དེ་ནི་ཀུན་གཞིར་གྱུར་པ་ཡིན། །ཀུན་གཞི་ཀུན་དུ་ལག་པ་སྟེ། །ཀུན་ཏུ་ཁ་མིག་མགོ་ཡང་ཡིན། །རིམ་མ་མ་ཡང་ན་ཅིག་ཅར་དུ། །ས་རྣམས་ལོག་པར་རབ་ཏུ་གནས། །རི་རབ་ཙམ་དུ་གྱུར་བ་ཡི། །བདག་ཏུ་ལྟ་བ་མི་གནོད་ཀྱི། །སྟོང་ཉིད་ལྟ་ལ་གནོད་པ་ནི། །ང་རྒྱལ་མི་བདེན་བརྟགས་པའོ། །རྣལ་འབྱོར་སྤྱོད་པས་སྟོང་པ་ཉིད། །གནས་མ་ཡིན་པར་སྤྱད་མི་བྱ། །གནས་མིན་གལ་ཏེ་སྤྱད་གྱུར་ན། །བདུད་རྩི་དུག་ཏུ་འགྱུར་བ་བཞིན། །ལྟ་བ་ཇི་སྙེད་གང་ཡང་རུང༌། །ལུས་ཅན་རྣམས་ལ་ཡོད་པ་ཡིན། །ལྟ་བ་རྣམ་པར་སྦང་བའི་ཕྱིར། །སྟོང་པ་ཉིད་ཀྱི་ཚུལ་བསྟན་ཏོ། །སྟོང་པ་ཉིད་ཀྱི་ལྟ་ཐོས་ནས། །ལ་ལའི་ལྟ་བ་མང་ཞིག་ནི། །གསོར་མི་རུང་བའི་ལྟ་ཅན་ཏེ། །སྨན་པས་བཏང་བའི་ནད་བཞིན་ཏེ། །ཇི་ལྟར་བསྲེག་བྱ་ཚིག་པའི་མེ། །བསྲེག་བྱ་མེད་པས་མི་གནས་སོ། །དེ་བཞིན་བསྲེག་བྱ་ལྟ་ཚིག་ན། །སྟོང་ཉིད་མེ་ཡང་འགག་པར་འགྱུར། །ལྟ་བ་འགགས་པའི་དུས་སུ་ཡང༌། །ཡང་དག་ཡེ་ཤེས་མེ་འབྱུང་སྟེ། །ཉོན་མོངས་བསྲེགས་ནས་རྣམ་པར་མཛེས། །སེམས་ནི་རྣམ་པ་གཉིས་དངོས་སུ། །གཟུང་དང་འཛིན་པར་སྣང་བ་སྟེ། །བུམ་པ་སྣམ་བུ་ལ་སོགས་པའི། །ཡུལ་ནི་གང་ཡང་ཡོད་མ་ཡིན། །རྣམ་པར་ཤེས་པའི་སྤྱོད་ཡུལ་གང༌། །འདི་ལྟར་སྣང་བ་ཅི་ཡང་རུང༌། །རྣམ་པར་ཤེས་པར་གྱུར་པ་སྟེ། །བུམ་པ་ལ་སོགས་མ་ཡིན་ནོ། །འདི་ལྟར་ནོར་བ་སྣང་བ་གང༌། །བུམ་པ་ལ་སོགས་ཅི་ཡང་རུང༌། །དེ་ནི་ཀུན་གཞི་གྱུར་པ་སྟེ། །སྣང་བ་ནོར་བའི་མཚན་ཉིད་དོ། །འཕགས་པ་དཔལ་སྦས་ཞེས་བྱ་བའི་མདོ་ལས། བྲམ་ཟེ་དེ་ནི་ལུས་ཐམས་ཅད་ནས་མེ་བྱུང་སྟེ། ཚིག་ནས་ཚིག་གོ་ཞེས་སྨྲས་ཏེ། སེམས་ཅན་དམྱལ་བ་ཆེན་པོར་ལྟུང་ངོ༌། །དེ་ལ་བྲམ་ཟེའི་ཁྱེའུ་ཆོས་འདོད་ཀྱིས་འདི་སྐད་ཅེས་སྨྲས་སོ། །སློབ་དཔོན་མ་བསྙེངས་ཤིག །བདག་གིས་ཁྱོད་བསྐྱབ་པར་བགྱིའོ། །དེ་ནས་བྲམ་ཟེའི་ཁྱེའུ་ཆོས་འདོད་ཀྱིས། བདག་སེམས་ཅན་རྣམས་ཀྱི་དོན་དུ་བྱང་ཆུབ་ལ་སྤྱོད་པའི་བདེན་པ་དང༌། བདེན་པའི་ཚིག་དེས་འདིའི་སེམས་ཅན་དམྱལ་བ་ཞི་བར་གྱུར་ཅིག་ཅེས་བྱས་པ་དང༌། དེ་མ་ཐག་ཏུ་བྲམ་ཟེ་དེ་སེམས་ཅན་དམྱལ་བ་ནས་ཐར་ཏོ། །སྤོབས་པའི་རྒྱན་བཀོད་བ་ལས། དེ་བཞིན་དུ་གཟུགས་
ནས་བྱང་ཆུབ་ཀྱི་ཕྱོགས་སུམ་ཅུ་རྩ་བདུན་གྱི་བར་དུ། སངས་རྒྱས་ཀྱི་ཞིང་གཞན་ན་མིང་སྣ་ཚོགས་སུ་བྱ་བ་དཔག་ཏུ་མེད་དེ་རྣམ་གྲངས་འདི་ནི། མིང་ཐམས་ཅད་ནི་ཡང་དག་པ་མ་ཡིན་པ་ཀུན་དུ་རྟོག་པ་ཡིན་པར་རིག་པར་བྱའོ། །ཚེ་དང་ལྡན་པ་རབ་འབྱོར་གྱིས་སྨྲས་པ། གལ་ཏེ་བདག་སེམས་རྣམ་པར་གྲོལ་བར་མ་གྱུར་ན། བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་ན་ད་ཅི་བྱར་ཡང་མེད་དོ། །བཀྲེས་པ་ནི་ཉེས་པ་མེད་ཀྱི། དུག་དང་འདྲེས་པའི་ཟས་ཟོས་པ་ནི་དེ་ལྟ་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔས་ཉན་ཐོས་ཀྱི་ཐེག་པ་ནི་མཐོས་ཀྱང་བླའོ། །བྱང་ཆུབ་སེམས་དཔའི་རྒྱན་ནི་རྒྱན་ཏེ། བྱང་ཆུབ་ཀྱི་སེམས་མི་བརྗེད་པའི་རྒྱན་དང༌། སྙིང་རྗེ་ཆེན་པོའི་བསམ་པ་ལ་གནས་པའི་རྒྱན་དང༌། སེམས་ཅན་ཀུན་ལ་སེམས་ཐོགས་པ་མེད་པའི་རྒྱན་དང༌། ཆོས་ཉན་པ་ཚོལ་བས་ཆོག་མི་ཤེས་པའི་རྒྱན་དང༌། ཇི་ལྟར་ཐོས་པའི་ཆོས་རྣམས་ཆུབ་པར་བྱས་ནས། ཚུལ་བཞིན་སོ་སོར་རྟོག་ཅིད་དཔྱོད་པའི་རྒྱན་དང༌། སེམས་ཅན་ཡོངས་སུ་སྨིན་པར་བྱེད་ཀྱང༌། ཆོས་ཐམས་ཅད་ལ་མི་དམིགས་པའི་རྒྱན་དང༌། །ཆོས་ཟབ་མོ་ལ་རྣམ་པར་སེམས་ཤིང་རྟེན་ཅིང་འབྲེལ་པར་འབྱུང་བ་དང༌། སེམས་ཅན་གྱི་དབང་པོ་མཆོག་དང་མཆོག་མ་ཡིན་པ་ཤེས་པའི་རྒྱན་དང༌། སངས་རྒྱས་ཀྱི་བྱིན་གྱི་རླབས་ལ་ཐབས་ལ་མཁས་པས་རྒྱན་ནོ། །སངས་རྒྱས་ཕལ་པོ་ཆེ་ལས། སངས་རྒྱས་སྤྱོད་ཡུལ་ཏིང་ངེ་འཛིན་ལས་སྐྱེས། །དེ་ནས་སངས་རྒྱས་ཀྱི་བྱིན་གྱི་རླབས་ཀྱིས། འཇིག་རྟེན་གྱི་ཁམས་མེ་ཏོག་གི་རྒྱན་གྱིས་བརྒྱན་པའི་གཞི་དང༌། སྙིང་པོ་རྒྱ་མཚོ་ཐམས་ཅད་རབ་ཏུ་གཡོས་སོ། །ཡང་དག་སངས་རྒྱས་ཆོས་ཀྱི་སྐུ། །རྣམ་དག་ནམ་མཁའ་འདྲ་བ་སྟེ། །གཟུགས་ཀྱི་སྐུ་ཡང་རབ་བརྟན་ཅིང༌། །ཆོས་ཉིད་འདི་ལ་ཤིན་ཏུ་འཇུག །སྐད་ཅིག་སེམས་ཀྱིས་དུས་གསུམ་འབྱུང་བ་ཡི། །ཞིང་འབྱུང་ཚུལ་དང་འཇུག་པ་ཀུན་ཀྱང་སྟོན། །སངས་རྒྱས་རྣམས་ཀྱིས་དུས་གསུམ་ཞིང་བསྟན་པ། །རྣམ་པར་སྣང་མཛད་རྒྱ་མཚོ་ཞིང་མི་ཟད། །ཞིང་རྣམས་རིང་དང་ཐུང་དང་གླིང་གི་གཟུགས་དང་རྣམ་པ་སྣ་ཚོགས་ཏེ། །ཆོས་དབྱིངས་མཉམ་
ཞིང་རྣམ་པར་འབྱམ་ཀླས་མིག་ཡོར་སྒྱུ་མ་དང་ཡང་འདྲ། །མིག་འཕྲུལ་རྣམ་ཕྱེ་རྣམ་དག་དྲི་མེད་སེམས་ཀྱིས་ཤིན་ཏུ་བསྐྱེད་པ་སྟེ། །ནམ་མཁའི་དབྱིངས་རྣམས་སྣ་ཚོགས་རྒྱན་གྱི་སྙིང་པོ་གནས་འགྱུར་འདི་ལ་སྣང༌། །རིན་ཆེན་འོད་འཕྲོ་འབྱུང་བའི་ཞིང༌། །འོད་འཕྲོའི་སྤྲིན་གྱིས་མངོན་ཁེབས་ཤིང༌། །རིན་ཆེན་ཐམས་ཅད་སྣ་ཚོགས་ལྡན། །ཐམས་ཅད་ལས་ཀྱི་སྤྲུལ་པ་ཡིན། །རྒྱ་མཚོ་སེམས་ལས་བྱུང་བ་ཡི། །ཞིབ་རྣམས་མོད་པའི་ཡིད་ལ་གནས། །ཡེ་ནས་མི་གནས་སྨིག་རྒྱུ་བཞིན། །ཡོངས་སུ་རྟོགས་པར་ཡང་དག་བསྐྱེད། །བསམ་གཏན་ཚུལ་དང་རྣམ་ཐར་ས་སྦྱང་ཞིང། །ཞིང་རྣམས་རྒྱ་མཚོ་སྣ་ཚོགས་ཡངས་པ་འབྱུང༌། །ཡིད་བཞིན་རིན་ཆེན་རྒྱལ་པོ་རྣམས། །ཁ་དོག་ཀུན་དུ་སྣང་བ་ལྟར། །སེམས་ཅན་བསམ་པ་རྣམ་དག་པས། །དེ་བཞིན་ཞིང་རྣམས་རབ་ཏུ་སྣང༌། །ཀླུ་ཡི་རྒྱལ་པོའི་སྤྲིན་གྱི་གནས། །ནམ་མཁའི་དབྱིངས་ལ་སྟོན་པ་ལྟར། །དེ་བཞིན་སངས་རྒྱས་སྨོན་ལམ་གྱིས། །ཞིང་གི་རྣམས་ནི་འབྱུང་བ་ཡིན། །སེམས་ཅན་ལུས་ཀྱི་རྣམ་པ་དག །ཇི་ལྟར་སེམས་ཀྱིས་བརྟག་པ་ལྟར། །དེ་བཞིན་ཞིང་གི་རྣམ་པ་ཡང༌། །ཐམས་ཅད་ལས་ཀྱིས་རྣམ་པར་བྲིས། །ཇི་ལྟར་གཞན་དང་གཞན་གཟུགས་སུ། །སེམས་ཅན་རྣམས་ཀྱི་བསམ་པ་བཞིན། །མགོན་པོ་རྣམས་ནི་སྣང་བ་ལྟར། །དེ་བཞིན་ཞིང་རྣམས་སྣང་བའོ། །སྒྱུ་མའི་མཁན་པོ་སྔགས་དག་གིས། །སྒོ་རྣམས་སྣ་ཚོགས་སྟོན་པ་ལྟར། །དེ་བཞིན་སེམས་ཅན་ལས་རྣམས་ཀྱིས། །བསམ་གྱིས་མི་ཁྱབ་ཅིང་འབྱུང་ངོ༌། །ཇི་ལྟར་རི་མོ་གཟུགས་ཀྱི་རྣམས། །རི་མོའི་ལས་ཀྱིས་བྲིས་པ་ལྟར། །དེ་བཞིན་ཞིང་རྣམས་འདི་དག་ཀུན། །སེམས་ཀྱིས་རི་མོར་བྲིས་པ་ཡིན། །གླིང་བྱང་ཆུབ་ཀྱི་རྒྱལ་མཚན་དེ་ན་གྲོང་རྡལ་མཛོད་མཐའ་ཡས་པ་ཞེས་བྱ་བ་ཁང་པ་བརྩེགས་པའི་དབྱིངས་སུ་འདུག་པ། གྲོང་རྡལ་འཇིག་རྟེན་གྱི་ཁམས་རྒྱ་མཚོ་བཅུའི་རྡུལ་ཤིན་ཏུ་ཕྲ་རབ་སྙེད་ཀྱི་འཁོར་དང་ལྡན་པ་ཡོད་དེ། གྲོང་རྡལ་མཛོད་མཐའ་ཡས་པ་ཞེས་བྱ་བ་དེ་ནི། དེ་བཞིན་གཤེགས་པའི་དགོངས་པའི་ཕྱིར། རྒྱ་མཚོ་འཇིག་རྟེན་གྱི་ཁམས་རྒྱ་མཚོ་བཅུའི་རྡུལ་ཤིན་ཏུ་ཕྲ་རབ་སྙེད་ཕུན་སུམ་ཚོགས་པ་དང་ལྡན་པའོ། །
དེ་བཞིན་གཤེགས་པའི་དགོངས་པའི་ཕྱིར་ཡང་རེ་རེ་ཞིང་ཡང་ཏིང་ངེ་འཛིན་གྱི་འོབས་རྒྱ་མཚོ་འཇིག་རྟེན་གྱི་ཁམས་རྒྱ་མཚོ་བཅུའི་རྡུལ་ཤིན་ཏུ་ཕྲ་རབ་སྙེད་ཀྱིས་ཡོངས་སུ་བསྐོར་བའོ། །ཏིང་ངེ་འཛིན་གྱི་འོབས་རྒྱ་མཚོ་དེ་དག་རེ་རེ་ཞིང་ཡང༌། །དེ་བཞིན་གཤེགས་པ་ཞི་གནས་ཀྱི་ཆུ་རྒྱ་མཚོ་འཇིག་རྟེན་གྱི་ཁམས་རྒྱ་མཚོ་བཅུའི་རྡུལ་ཤིན་ཏུ་ཕྲ་རབ་སྙེད་ཀྱིས་ཡོངས་སུ་དག་པའོ། །དེ་བཞིན་གཤེགས་པའི་ཞེ་གནས་ཀྱི་ཆུ་རྒྱ་མཚོ་དེ་དག་རེ་རེ་ཞིང་ཡང༌། དེ་བཞིན་གཤེགས་པའི་ཡེ་ཤེས་དང༌། ཡོན་ཏན་གྱི་མེ་ཏོག་ཨུཏྤ་ལ་དང༌། པདྨོ་དང༌། ཀུ་མུ་ད་དང༌། པུཎྜ་རཱི་ཀ་འཇིག་རྟེན་གྱི་ཁམས་རྒྱ་མཚོ་བཅུའི་རྡུལ་ཤིན་ཏུ་ཕྲ་རབ་སྙེད་ཀྱིས་ཡོངས་སུ་གང་བའོ། །གྲོང་རྡལ་མཛོད་མཐའ་ཡས་པ་དེ་ནི། སེམས་རིན་པོ་ཆེ་ཤིན་ཏུ་རྣམ་པར་དག་པའི་ཕ་གུ། རྒྱ་མཚོ་འཇིག་རྟེན་གྱི་ཁམས་རྒྱ་མཚོ་བཅུའི་རྡུལ་ཕྲ་རབ་སྙེད་ལ་སོགས་པ་ཡིན་ནོ། །དེ་ཉིད་ནའང་ཤཱཀྱ་ཐུབ་པ་ཞེས་བྱ་བར་རབ་ཏུ་ཤེས་སོ། །རྣམ་པར་སྣང་མཛད་ཅེས་བྱ་བར་རབ་ཏུ་ཤེས་སོ། །སེམས་ཅན་དེ་དག་ཐམས་ཅད་ཀྱང༌། །ཕུང་པོ་ལྔ་ལས་ཤིན་ཏུ་བརྗོད། །དེ་རྣམས་ལས་ཀྱི་ཕུང་ཆེན་ཡིན། །ལས་ཀྱི་རྩ་བ་སེམས་ཡིན་ཏེ། །སེམས་ནི་སྒྱུ་མ་བཞིན་དུ་བཤད། །སྒྱུ་མར་གྱུར་པ་འགྲོ་བ་འདིའོ། །སེམས་ནི་རི་མོ་མཁན་དང་འདྲ། །སེམས་ནི་ཕུང་པོ་བྱེད་པ་སྟེ། །འཇིག་རྟེན་ཁམས་ནི་ཇི་སྙེད་པའི། །འཇིག་རྟེན་འདི་དག་སེམས་ཀྱིས་བྲིས། །གང་ཞིག་དུས་གསུམ་ཐམས་ཅད་ཀྱི། །རྒྱལ་བ་ཐམས་ཅད་ཤེས་འདོད་ན། །སངས་རྒྱས་ཐམས་ཅད་སེམས་ཀྱི་དངོས། །ཆོས་ཀྱི་དངོས་སུ་བལྟ་བར་གྱིས། །འདུས་བྱས་ཀྱི་ཆོས་རྣམས་གང་ཞེ་ན། འདི་ལྟ་སྟེ། འདོད་པའི་ཁམས་དང༌། གཟུགས་ཀྱི་ཁམས་དང༌། གཟུགས་མེད་པའི་ཁམས་དང༌། སེམས་ཅན་གྱི་ཁམས་རྣམས་ཏེ། འདི་དག་ནི་འདུས་བྱས་ཀྱི་ཆོས་སོ། །འདུས་མ་བྱས་ཀྱི་ཆོས་རྣམས་གང་ཞེ་ན། ནམ་མཁའ་དང་མྱ་ངན་ལས་འདས་པ་དང༌། སོ་སོར་བརྟགས་
ཏེ་འགོག་པ་དང༌། སོ་སོར་མ་བརྟགས་པར་འགོག་པ་དང༌། རྟེན་ཅིང་འབྲེལ་བར་འབྱུང་བ་དང༌། ཆོས་ཀྱི་གནས་ཉིད་དེ། འདི་དག་ནི་འདུས་མ་བྱས་ཀྱི་ཆོས་སོ། །ལས་སྣ་ཚོགས་ཀྱིས་མངོན་པར་འདུས་བྱས་པ། ནམ་མཁའི་ཁམས་དང་འཇིག་རྟེན་གྱི་ཁམས་ཐམས་ཅད་ཀྱིས་ཡོངས་སུ་བསྡུས་པ། འཇིག་རྟེན་གྱི་ཁམས་ཕྱོགས་གཞན་དང་གཞན་གྱི་རྗེས་སུ་སོང་བར་རབ་ཏུ་གནས་པ། སངས་རྒྱས་ཀྱི་ཞིང་ཐམས་ཅད་དུ་ཡེ་ཤེས་ཀྱི་རི་བོ་ཤིན་ཏུ་འཕགས་ཤིང་རྣམ་པར་དག་པའི་རིན་པོ་ཆེའི་རི་བོ་གྲངས་མེད་པ་ཀུན་དུ་གསལ་བར་གྱུར་ཅིག །ཡེ་ཤེས་ཀྱི་ཕུང་པོས་གྲུབ་པའི་རིན་པོ་ཆེའི་འོད་ཀྱི་ཕུང་པོ་གྲངས་མེད་པ་ཀུན་ནས་གནས་པར་གྱུར་ཅིག །ཡེ་ཤེས་ཀྱི་མར་མེས་ཡོངས་སུ་གྲུབ་པའི་རིན་པོ་ཆེའི་མར་མེ་གྲངས་མེད་པ་ཀུན་ནས་གནས་པར་གྱུར་ཅིག །ཡེ་ཤེས་ཀྱི་སྣང་བ་ཀུན་དུ་གཏོང་བའི་རིན་པོ་ཆེའི་ལོ་མ་དང་ལྡན་པ་གྲངས་མེད་པ་ཀུན་ནས་གནས་པར་གྱུར་ཅིང༌། །གཞུང་དེ་ལྟར་རིན་པོ་ཆེ་ཇི་ལྟ་བ་བཞིན་དུ་ཡོངས་སུ་བསྔོ་བ་ཡང་ཁོང་དུ་ཆུད་པར་བྱ་སྟེ། ཡེ་ཤེས་ཀྱིས་སྤོས་ཆགས་པ་མེད་པའི་མཐར་ཐུག་པའི་སྤོས་ཀྱིས། ཡིད་ཀྱི་ལས་རྒྱ་ཆེན་པོ་ཡོངས་སུ་དག་པ་ཚད་མེད་པ་ཀུན་ནས་གནས་པར་གྱུར་ཅིག །དེ་བཞིན་དུ་མེ་ཏོག་ཐམས་ཅད་ཀྱི་མེ་ཏོག་གི་རྒྱན་བསམ་གྱིས་མི་ཁྱབ་པ་ཀུན་དུ་གནས་པར་གྱུར་ཅིག་ཅེས་བྱ་བ་ནས། ཡེ་ཤེས་ཀྱི་མེ་ཏོག་ཆགས་པར་གྱུར་ཅིག་ཅེས་བྱ་བ་ནས། ཡེ་ཤེས་ཀྱི་མེ་ཏོག་ཆགས་པ་མེད་པའི་མཐར་ཐུག་པ་ཞེས་བྱ་བ་དང༌། ཡེ་ཤེས་ཀྱི་ཕྲེང་བ་དང༌། བྱུག་པ་དང༌། ཡེ་ཤེས་ཀྱི་ཕྱེ་མ་དང༌། བདུག་པ་དང༌། ཡེ་ཤེས་ཀྱི་གོས་དང༌། ཆོས་གོས་ཀྱི་རྒྱན་དང༌། ཡེ་ཤེས་ཀྱི་གདུགས་ཀྱི་རྒྱན་དང༌། ཡེ་ཤེས་ཀྱི་རྒྱལ་མཚན་དང༌། བ་དན་དང༌། ཡེ་ཤེས་ཀྱི་ལྷབ་ལྷུབ་དང༌། ཡེ་ཤེས་ཀྱི་ནོར་བུ་རིན་པོ་ཆེ་རྣམ་པར་དག་པ་བརྗོད་དུ་མེད་པ། ཀུན་དུ་གནས་པར་གྱུར་ཅིག་ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སྤྱིན་པ་ལ་སོགས་པས་དགེ་བའི་རྩ་བ་དེ་དག་དགེ་བའི་རྩ་བ་ཐམས་ཅད་ཀྱིས་བསྒྲུབས་པའི་སངས་རྒྱས་ཀྱི་ཞིང་ཡོངས་སུ་བསྔོས་ན། ལྷ་མ་ཡིན་གྱི་དབང་པོ་སྒྲ་
གཅན་ཞེས་བྱ་བ་ཡོངས་སུ་བསྔོའོ། །དེའི་རང་བཞིན་གྱི་ལུས་ནི་དཔག་ཚད་བདུན་བརྒྱའོ། །སྤྲུལ་པའི་ལུས་ནི་དཔག་ཚད་སྟོང་ཕྲག་དྲུག་ཅུ་རྩ་བརྒྱད་དོ། །འདི་ལྟ་སྟེ། ནམ་མཁའ་ནི་སྐྱེ་བ་མེད་ཅིང་འགག་པ་མེད་ཀྱང་འཇིག་རྟེན་ཐམས་ཅད་ཀྱི་སྐྱེ་བ་དང༌། །འགག་པ་འཛིན་ཏོ། །སངས་རྒྱས་བཅོམ་ལྡན་འདས་རྣམས་ནི། སྐུའི་སྐྱེ་མཆེད་ཀྱིས་ཕྲིན་ལས་གང་སྒྲུབ་པ་དེ། ཐུགས་ཀྱི་སྐྱེ་མཆེད་ཀྱིས་ཡོངས་སུ་གྲུབ་པར་མཛད་དོ། །བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའ་ས་གཞན་ལ་ཞེ་སྡང་བསྐྱེད་པ་ཙམ་དུ་ཁ་ན་མ་ཐོ་བའི་ཆོས་ནི་འགའ་ཙམ་ཡང་བདག་གིས་མ་མཐོང་ངོ༌། །དེ་ཅིའི་ཕྱིར་ཞེ་ན། གཞན་ལ་ཁོང་ཁྲོ་བསྐྱེད་པའི་བྱང་ཆུབ་སེམས་དཔའ་ནི། སྒྲིབ་པའི་ཆོས་བརྒྱ་སྟོང་ཕྲག་བཅུ་པོ་འདི་དག་ཡོངས་སུ་འཛིན་པར་འགྱུར་ཏེ། གང་ཞེ་ན་བྱང་ཆུབ་སེམས་དཔའ་མི་མཐོང་བ་དང༌། ཆོས་མི་ཐོས་པ་དང༌། ངན་སོང་དུ་གནས་པ་དང༌། ཐེག་པ་དམན་པ་དང་འདྲེ་བ་དང༌། སྡིག་པའི་གྲོགས་པོ་འཛིན་པ་དང༌། བདུད་ཀྱི་ཡུལ་བསྟེན་པ་དང༌། སངས་རྒྱས་ཀྱི་བསྟན་པ་ལས་རིང་བ་དང༌། ཐེག་པ་དམན་པ་ལ་མོས་པ་དང༌། ཐེག་པ་ཆེན་པོ་ལ་ཡིད་མི་ཆེས་པ་དང༌། དེ་བཞིན་གཤེགས་པའི་ཆོས་སྤོང་བ་དང༌། བྱང་ཆུབ་སེམས་དཔའ་དང་འགྲོགས་པའི་ལས་དྲུངས་འབྱིན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང་མི་མཐུན་པའི་ཕྱོགས་དང༌། གླེང་གཞི་སྒུག་པ་དང༌། དེ་བཞིན་གཤེགས་པའི་རིགས་དང༌། རིང་བར་འཛིན་པར་འགྱུར་བ་ལ་སོགས་པ་སྟེ། སྒྲིབ་པའི་ཆོས་ཀྱི་སྒོ་བརྒྱ་སྟོང་ཕྲག་བཅུ་འཛིན་པར་འགྱུར་རོ། །འཇིག་རྟེན་གྱི་ཁམས་འཇིག་པའི་ཚེ། ཐོག་མར་སྒྲ་ཆེན་པོ་འདི་ལྟ་བུ་འབྱུང་སྟེ། ཀྱེ་མ་གྲོགས་པོ་དག་བསམ་གཏན་དང་པོ་ནི་འདོད་བ་དང༌། གནོད་སེམས་མེད་པས་ཤིན་ཏུ་བདེ་བ་སྟེ། འདོད་པའི་ཁམས་ལས་ཡང་དག་པར་འདའ་བའི་རྒྱུར་འགྱུར་རོ། །སྒྲ་དེ་ཐོས་ནས་སེམས་ཅན་དག་བསམ་གཏན་དང་པོ་བསྒྲུབས་ནས་འདོད་པའི་ཁམས་ནས་ཚངས་པའི་འཇིག་རྟེན་དུ་སྐྱེའོ། །དེ་བཞིན་དུ་བསམ་གཏན་བཞི་
བའི་བར་གྱི་སྒྲ་བསྒྲགས་ནས། དེ་བཞིན་དུ་བསྒྲུབས་ཏེ་སྐྱེ། ཀླུའི་རྒྱལ་པོ་མ་དྲོས་པའི་གནས་ནས་ཆུ་ཀླུང་ཆེན་པོ་བཞི་འབབ་སྟེ། འདི་ལྟར་ཆུ་ཀླུང་ཆེན་པོ་གང་གཱ་ནི་གླང་པོ་ཆེའི་ཁ་ནས་འབབ་བོ། །སི་ཏ་ནི་སེང་གེའི་ཁ་ནས་འབབ་པོ། །སིན་དྷུ་ནི་གླང་གི་ཁ་ནས་འབབ་པོ། །པཀྵུ་ནི་རྟའི་ཁ་ནས་འབབ་པོ། །གང་གཱ་ནི་མདུན་ནས་དངུལ་གྱི་བྱེ་མ་འདྲེན་ཅིང་འབབ་པོ། །སི་ཏ་ནི་རྡོ་རྗེའི་བྱེ་མའོ། །སིན་དྷུ་ནི་གསེར་གྱི་བྱེ་མའོ། །པཀྵུ་ནི་བཻ་ཌཱུརྻ་སྔོན་པོའི་བྱེ་མ་འདྲེན་ཅིང་འབབ་པོ། །དེ་དག་འབབ་པའི་ཚེ་རེ་རེས་ཀྱང་མཚོ་ཆེན་པོ་ལན་བདུན་དུ་གཡས་ཕྱོགས་སུ་བསྐོར་ཏེ་ཕྱོགས་བཞིར་འབབ་ཅིང་རྒྱ་མཚོ་ལ་ཞེན་པར་འདོད་ངོ༌། །ལན་བདུན་བསྐོར་བའི་བར་གྱི་གླིང་དེ་དག་ཀྱང༌། མེ་ཏོག་ཨུཏྤ་ལ་དང༌། པདྨོ་དང༌། ཀུ་མུ་ད་དང༌། པུཎྜ་རཱི་ཀ་ལྷ་རྫས་ཀྱི་རིན་པོ་ཆེའི་རང་བཞིན་ལས་གྲུབ་པའི་འདབ་མ་སྣ་ཚོགས་དང་ལྡན་ཞིང་སྙིང་པོ་སྣ་ཚོགས་ཅན་གྱིས་བརྒྱན་པ། མཚོ་དེའི་དཀྱིལ་འཁོར་ནི་དཔག་ཚད་ལྔ་བཅུ་ཡོད་དེ། ཟབས་སུ་ཡང་དཔག་ཚད་ལྔ་བཅུའོ། །དེའི་ངོགས་ནི་རིན་པོ་ཆེ་སྣ་ཚོགས་བརྩིགས་པ་ཕ་གུ་ལྟར་འདུག་པས་ཀུན་ནས་འཁོར་བའོ། །ཇི་ལྟར་མཚོ་ཆེན་བོ་མ་དྲོས་པ། རིན་པོ་ཆེའི་ཞིང་གིས་འཁོར་བ་དེ་བཞིན་དུ། བྱང་ཆུབ་སེམས་དཔའ་ཡང་མངོན་པར་འཚང་རྒྱ་བ་སྟོན་པ་ན། སངས་རྒྱས་ཀྱི་ཞིང་གིས་ཀུན་ནས་འཁོར་ཞིང་བརྒྱན་པ་ཡིན། ཆུ་ཀླུང་ཆེན་པོ་བཞི་ཆར་ཡང་ཁའི་སྒོ་དཔག་ཚད་ཙམ་ནས་འབབ་པོ། །བྱང་ཆུབ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས་བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོ་ལ་སྨྲས་པ། ཀྱེ་རྒྱལ་བའི་སྲས། དེ་བཞིན་གཤེགས་པ་རྣམས་ཀྱི་སྐུ་བལྟར་ཡོད་ཇི་ལྟར་ཁོང་དུ་ཆུད་བར་བྱ། སྨྲས་པ། ཀྱེ་རྒྱལ་བའི་སྲས་སྐུ་བལྟར་ཡོད་པ་ནི། དཔེར་ན་ཉི་མའི་དཀྱིལ་འཁོར་དེ་ཉིད་འཛམ་བུའི་གླིང་དུ་འཆར་བའི་ཚེ། ཐོག་མར་རི་རབ་རིའི་རྒྱལ་པོ་ལ་སྣང་ངོ༌། །དེའི་འོག་ཏུ་རི་བོ་ཆེ་གཞན་ལ་སྣང་ངོ༌། །དེའི་འོག་ཏུ་རི་ནག་པོ་ལའོ། །དེའི་འོག་ཏུ་ས་ཕྱོགས་མཐོན་པོ་རྣམས་ལའོ། །དེའི་འོག་ཏུ་ས་ཕྱོགས་དམའ་བ་རྣམས་སུ་སྣང་བར་བྱེད་དེ།
འོན་ཀྱང་ཉི་མའི་དཀྱིལ་འཁོར་ལ་འདི་ནི་ཐོག་མར་སྣང་བར་བྱའོ་སྙམ་པ་ལ་སོགས་པའི་རྟོག་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་རྣམས་ཀྱི་སྐུ་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་ཡང༌། ཆོས་ཀྱི་དབྱིངས་མཐའ་དང་དབུང་མེད་པའི་རིས་སུ་འཆར་བར་འགྱུར་བའི་ཆོ་། ཐོག་མར་ལྷག་པའི་རིའི་རྒྱལ་པོ་ལྟ་བུ་དང་ལྡན་པའི་སྐྱེས་བུ་དམ་པ་རྣམས་ལ་ཆོས་ཀྱི་སྣང་བ་ཆེན་པོ་ཡང་དག་པར་སྟོན་པའི་ཚུལ་དུ་འཆར་བར་འགྱུར་རོ། །དེའི་འོག་ཏུ་ཉན་ཐོས་དང༌། རང་སངས་རྒྱས་གྱི་ཐེག་པ་ལ་ཞུགས་པ་རྣམས་ལའོ། །དེའི་འོག་ཏུ་དགེ་བའི་རྩ་བ་ངེས་པ་དང་ལྡན་པའི་སེམས་ཅན་རྣམས་ལ་སྣོད་ཇི་ལྟ་བ་བཞིན་དུའོ། །དེའི་འོག་ཏུ་ལོག་པར་ངེས་པའི་སེམས་ཅན་ཡན་ཆད་སེམས་ཅན་ཐམས་ཅད་ལ་ཡང་འཆར་བར་འགྱུར་རོ། །དེ་ལྟར་འཆར་ཡང་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་འོད་ཟེར་དེ་དག་ནི། སེམས་ཅན་འདི་རྣམས་ལ་བདག་ཅག་གིས་ཐོག་མར་ཐེག་པ་ཆེན་པོ་སྣང་བར་བྱས་ཏེ། དེའི་འོག་ཏུ་འདི་དག་སྣང་བར་བྱའོ་སྙམ་དུ་རྟོག་པ་མི་མངའ་སྟེ། དེ་ནི་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་ལ་རྣམ་པར་རྟོག་པ་མི་མངའ་བའི་ཕྱིར་རོ། །ཡང་དཔེར་ན་ཉི་མའི་དཀྱིལ་འཁོར་ལ་རྟོག་པ་མེད་ཅིང༌། འོད་ཟེར་མཉམ་པ་ཉིད་དུ་འཆར་ཡང༌། རི་ཆེན་པོ་རྣམས་ལ་རྣམ་པ་ཐ་དད་པ་ཉིད་དུ་སྣང་བར་འགྱུར་རོ། །དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་རྣམ་པར་རྟོག་པ་མི་མངའ་ཞིང༌། འོད་ཟེར་མཉམ་པ་ཉིད་དུ་འཆར་ཡང༌། སེམས་ཅན་རྣམས་ཀྱི་དགེ་བའི་རྩ་བ་རྣམ་པ་ཐ་དད་པ་དང༌། བསམ་པའི་རྣམ་པ་ཐ་དད་པས། དེ་བཞིན་གཤེགས་པའི་འོད་ཟེར་ཐ་དད་པ་ཡང་སྣང་ཞིང་ཡོད་དེ། ཀྱེ་རྒྱལ་བའི་སྲས་དཔེར་ན་ཉི་མའི་དཀྱིལ་འཁོར་དེ་ཉིད་ཤར་ཀྱང༌། དམུས་ལོང་རྣམས་ལ་སྣང་བར་མི་འགྱུར་ཏེ། དེ་མིག་དང་མི་ལྡན་པའི་ཕྱིར་རོ། །དེ་མིག་ལམ་དུ་མི་སྣང་དུ་ཟིན་ཀྱང༌། དམུས་ལོང་རྣམས་ལ་ཁ་ཟས་འཇུ་བ་དང༌། ལུས་ཀྱི་གྲང་བ་བསལ་བ་དང༌། ལུས་ཀྱི་ནད་མཁྲིས་པ་ལ་སོགས་པ་སེལ་བས་མི་ཕན་པ་མ་ཡིན་ཏེ་ཕན་འདོགས་སོ། །
དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་ཡང་སེམས་ཅན་ལྷག་པའི་བསམ་པའི་མིག་མདོངས་པ། ལྟ་བ་ལོག་པ། སྦྱོར་བ་ལོག་པ། འཚོ་བ་ལོག་པ། དམུས་ལོང་ལྟ་བུར་གྱུར་པའི་མིག་ལམ་དུ་སྣང་བར་མི་འགྱུར་ཏེ། དེ་ནི་དད་པའི་མིག་དང་མི་ལྡན་པའི་ཕྱིར་རོ། །མིག་ལམ་དུ་མི་སྣང་ཡང༌། དེ་བཞིན་གཤེགས་པའི་མཐུས། དེ་དག་གི་ལུས་ལ་མི་བདེ་བ་རྩེ་ཞིལ་བར་འགྱུར་བ་དང༌། མ་འོངས་པའི་ཉོན་མོངས་པའི་རྒྱུའི་ལྷག་མ་སེལ་བའི་སྒོར་ཕན་མི་འདོགས་བ་མ་ཡིན་ཏེ་ཕན་འདོགས་སོ། །སྨྲས་པ། དེ་བཞིན་གཤེགས་པ་རྣམས་ཀྱི་གསུང་བརྗོད་པ་ཇི་ལྟར་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་རྣམ་པར་རྟོག་པ་མི་མངའ་ཞིང་འོད་ཟེར་མཉམ་པ་ཉིད་དུ་འཆར་ཡང༌། སེམས་ཅན་རྣམས་ཀྱི་དགེ་བའི་རྩ་བ་རྣམ་པ་ཐ་དད་པ་དང༌། བསམ་པའི་རྣམ་པ་ཐ་དད་པས་དེ་བཞིན་གཤེགས་པའི་འོད་ཟེར་ཐ་དད་པ་ཡང་སྣང་ཞིང་ཡོད་ངོ་། །ཀྱེ་རྒྱལ་བའི་སྲས་དཔེར་ན། ཉི་མའི་དཀྱིལ་འཁོར་དེ་ཉིད་ཤར་ཀྱང༌། དམུས་ལོང་རྣམས་ལ་སྣང་བར་མི་འགྱུར་ཏེ། དེ་ནི་མིག་དང་མི་ལྡན་པའི་ཕྱིར་རོ། །མིག་ལམ་དུ་མི་སྣང་དུ་ཟིན་ཀྱང༌། དམུས་ལོད་རྣམས་ལ་ཁ་ཟས་འཇུ་བ་དང༌། ལུས་ཀྱི་གྲང་བ་བསལ་བ་དང༌། ལུས་ཀྱི་ནད་མཁྲིས་པ་ལ་སོགས་པ་སེལ་བས་མི་ཕན་པ་མ་ཡིན་ཏེ། ཕན་འདོགས་སོ། །དེ་བཞིན་གཤེགས་པ་དེ་བཞིན་ཡང་དག་པ་ཇི་ལྟ་བ་བཞིན་དུ་ཡང་མི་ཤེས་ལ། དེ་བཞིན་གཤེགས་པའི་ཡེ་ཤེས་ཀྱང་ཁོང་ན་ཡོད་པ་ངོ་མཚར་ཆེས། བདག་གིས་ཅི་ནས་ཀྱང་སེམས་ཅན་འདི་དག་རང་རང་གི་འདུ་ཤེས་ཀྱི་འདུན་པ་ཆེན་པོ། འཕགས་པའི་ལམ་གྱིས་འགྲོལ་ཏེ། དེ་བཞིན་གཤེགས་པའི་ཡེ་ཤེས་ཁོང་དུ་ཆུད་པར་འཕགས་པའི་ལམ་བསྟན་པར་མཛད་དོ་ཞེ་ན། འདུ་ཤེས་ཀྱི་རྣམ་པ་ཐམས་ཅད་ཡོངས་སུ་སེལ་བར་མཛད་དོ། །དེ་ལྟར་འདུ་ཤེས་ཡོངས་སུ་སེལ་བའི་ཕྱིར་རོ། །ཡེ་ཤེས་ཚད་མེད་པས་འགྲོ་བ་ཐམས་ཅད་ཡོངས་སུ་འཚོའོ། །ཀྱེ་རྒྱལ་བའི་སྲས་ནམ་མཁའ་ནི་སྐྱེ་བ་མེད་པས། འཇིག་རྟེན་གྱི་ཁམས་འཇིག་ཀྱང་རུང༌། འདུ་ཡང་རུང་སྟེ། དེ་བཞིན་དུ་མི་ཟད་མི་འཕེལ་བར་གནས་སོ། །སྨྲས་པ། དེ་བཞིན་གཤེགས་པ་རྣམས་ཀྱི་ཡོངས་
སུ་མྱ་ངན་ལས་འདས་པ་ཇི་ལྟ་བུ་སྨྲས་པ། ཀྱེ་རྒྱལ་བའི་སྲས་དེ་བཞིན་གཤེགས་པ་རྣམས་ནི་བྱང་ཆུབ་སེམས་དཔའ་ལ་ཡོངས་སུ་མྱ་ངན་ལས་འདས་པ་ཤིན་ཏུ་མཐར་ཐུག་པར་མི་བརྗོད་མི་སྟོན་ཏོ། །ཆུ་སྣོད་གཅིག་ཅིག་གམ་དེ་ནས་ལོགས་ཤིག་ཏུ་ཕྱུང་ངམ། སྟོང་པར་གཞག་པར་གྱུར་ལ། ཉི་མའི་གཟུགས་བརྙན་ཡང་སྣང་བར་མི་འགྱུར་ན། ཉི་མའི་དཀྱིལ་འཁོར་གྱིས་ཉེས་སམ། སྨྲས་པ་མ་ཡིན་ནོ། །སྨྲས་པ་དེ་བཞིན་དུ་སེམས་ཅན་སྣོད་ཆག་པ་ལྟ་བུ་ལ་སོགས་པ་ལ། དེ་བཞིན་གཤེགས་པ་མྱ་ངན་ལས་འདས་པར་སྣང་ངོ༌། །ཉི་མའི་དཀྱིལ་འཁོར་ཆོས་དབྱིངས་ཚད་དང་མཉམ་པ་ནི། སྣོད་དུ་གཟུགས་བརྙན་སྣང་སྟེ་ཆག་ལ་སྣང་བ་མིན། དེ་ལྟར་མི་མཆོག་དབང་པོ་ཀུན་དུ་སྣང༌། །སེམས་ཅན་དད་མད་རྣམས་ཀྱིས་མྱ་ངན་འདས་པར་ཤེས། །ཀྱེ་རྒྱལ་བའི་སྲས་ཆོས་ཀྱི་རྣམ་གྲངས་འདི་ལྟ་བུ་ནི། དེ་བཞིན་གཤེགས་པའི་རིགས་སྟོན་པ་ཤིན་ཏུ་ངེས་པ། དེ་བཞིན་གཤེགས་པའི་སྤྱོད་ཡུལ་གྱི་རྗེས་སུ་བསྔོ་བ། ཤིན་ཏུ་མཐར་ཐུག་པའི་མུར་ཕྱིན་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བག་ཆགས་ཏེ། འདི་ལྟ་སྟེ། བྱང་ཆུབ་སེམས་དཔའི་བག་ཆགས་དང༌། དགེ་བའི་རྩ་བའི་བག་ཆགས་དང༌། སེམས་ཡོངས་སུ་སྨིན་པའི་བག་ཆགས་དང༌། སངས་རྒྱས་ལ་ལྟ་བའི་བག་ཆགས་དང༌། འཇིག་རྟེན་གྱི་ཁམས་ཡོངས་སུ་དག་བར་སྐྱེ་བའི་བག་ཆགས་དང༌། དགེ་བའི་བག་ཆགས་དང༌། སྨོན་ལམ་གྱི་བག་ཆགས་དང༌། ཕ་རོལ་ཏུ་ཕྱིན་པའི་བག་ཆགས་དང༌། ཆོས་མཉམ་པ་ཉིད་ངེས་པར་རྟོགས་པའི་བག་ཆགས་དང༌། སྤྱོད་པ་ཐ་དད་པའི་བག་ཆགས་དང༌། བག་ཆགས་དེ་དག་ལ་གནས་ཤིང༌། ཉོན་མོངས་པ་མ་ལུས་པར་སྤངས་ནས། དེ་བཞིན་གཤེགས་པའི་ཡེ་ཤེས་ཆེན་པོས། བག་ཆགས་ཐུགས་སུ་ཆུད་པ། བླ་ན་མེད་བ་འཐོབ་པར་འགྱུར་རོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའི་ཆོས་ལས་འགོལ་བའི་ལམ་སྟེ། བཅུ་གང་ཞེན། དགེ་བའི་བ་ཤེས་གཉེན་ལ་བརྙས་པ་དང༌། འཁོར་བས་འཇིགས་བ་དང༌། བྱང་ཆུབ་སེམས་དཔའི་སྤྱོད་པས་སྐྱོ་བ་དང༌། འཇིག་རྟེན་གྱི་
ཁམས་ན་གནས་པས་སྐྱོ་བ་དང༌། མཉམ་པར་གཞག་པ་ལ་གནས་སུ་བྱེད་པ་དང༌། དགེ་བའི་རྩ་བལ་ཞེན་པ་དང༌། དམ་པའི་ཆོས་སྤང་བ་དང༌། བྱང་ཆུབ་སེམས་དཔའི་སྤྱོད་པ་ལས་དཔགས་པས་འབྱེད་བ་བྱེད་པ་དང༌། ཉན་ཐོས་དང་རང་སངས་རྒྱས་སུ་འདོད་བ་དང༌། བྱང་ཆུབ་སེམས་དཔའ་ལ་ཁྲོ་ཞིང་ཞེ་སྡང་བས་ཏེ། དེ་དག་ནི་ཡོངས་སུ་སྤང་བར་བྱའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའི་བདུད་ཀྱི་ལས་ཏེ། འདི་ལྟ་སྟེ། སེམས་འཁྲུགས་པ་ལ་བརྙས་པ་དང༌། ཤེས་རབ་འཆལ་བ་ལ་སྨོད་བ་དང༌། ཆོས་ཀྱི་དཔེ་མཁྱུད་དང༌། ཆོས་ཀྱི་སྣོད་ལ་ཁྱད་དུ་གསོད་པ་དང༌། ཟང་ཟིང་དང་འབྲེལ་པར་ཆོས་སྟོན་པ་དང༌། སྣོད་མ་ཡིན་པ་ལ་ཆོས་རྒྱ་ཆེན་པོ་སྟོན་པ་དང༌། དགེ་བའི་བཤེས་གཉེན་ཡོངས་སུ་སྤོང་བ་དང༌། ཉན་ཐོས་དང་རང་སངས་རྒྱས་ཀྱི་ཐེག་པ་འདོད་པ་དང༌། བྱང་ཆུབ་སེམས་དཔའ་ལ་ཞེ་སྡང་ཞིང་མི་སྙན་པར་བརྗོད་པ་དང༌། བདག་བསྟོད་ཅིད་གཞན་སྨོད་པ་དང༌། ཟབ་མོའི་གཏམ་འཆབ་ཅིང་སྤོང་བ་དང༌། ཡི་གེ་སྣ་ཚོགས་རང་བཟོར་བྱས་པའི་རང་བཟོ་ལ་དགའ་བ་དང༌། གྲོལ་བ་དང་དབུགས་ཕྱིན་པ་ལ་བསྙེན་ཅིང་བཀུར་སྟི་བྱེད་ཀྱི་མ་གྲོལ་ཅིང་དབུགས་མ་ཕྱིན་པ་ལ་མི་བྱེད་པའོ། །ཉན་ཐོས་ཆེན་པོ་དེ་དག་ཛེ་ཏའི་ཚལ་དེ་ཉིད་ན་འཁོད་ཀྱང༌། སངས་རྒྱས་ཀྱི་ཞིང་དག་པ་དང༌། བྱང་ཆུབ་སེམས་དཔའ་ཀུན་ནས་འདུས་པ་རྣམས་མཐོང་བར་མ་གྱུར་ཏོ། །འདི་ལྟ་སྟེ། དགེ་སློང་ལ་ལ་ཞིག་སྐྱེ་བོ་མང་པོའི་ཚོགས་ཀྱི་དབུས་སུ་སས་ཁྱབ་པའི་ཏིང་ངེ་འཛིན་ལ་སྙོམས་པར་ཞུགས་སམ། ཆུ་འམ་མེ་འམ་རླུང་ངམ་སྔོན་པོ་ལ་སོགས་པས་ཁྱབ་པའི་ཏིང་ངེ་འཛིན་ལ་ཞུགས་ན། འགྲོ་བ་མང་པོ་དེ་དག་གིས་ཆུའི་ཕུང་པོ་ལ་སོགས་པ་མི་མཐོང་སྟེ། ཏིང་ངེ་འཛིན་དེ་ལ་སྙོམས་པར་ཞུགས་ཤིང་རྣམ་པར་དཔྱོད་པ་རྣམས་ནི་མ་གཏོགས་སོ། །དེ་བཞིན་དུ་སངས་རྒྱས་ཀྱི་ཏིང་ངེ་འཛིན་གྱི་ཡུལ་རྣམ་པར་འཕྲུལ་པ་བསམ་གྱིས་མི་ཁྱབ་པ་དེ་དག་ཡོངས་སུ་བསྟན་པ་མཛད་ན། ཉན་ཐོས་དེ་དག་གིས་མ་མཐོང་ཞིང་ཤེས་པར་མ་གྱུར་ཏོ། །བྱང་ཆུབ་སེམས་དཔའ་དེ་བཞིན་གཤེགས་པའི་ལམ་ལ་ཞུགས་པ་དེ་དག་གིས་ནི་མཐོང་ངོ༌། །ཁོང་དུ་ཆུད་དོ། །དཔེར་ན་དགེ་སློང་འགོག་པའི་སྙོམས་
པར་ཞུགས་པ། དབང་པོ་དྲུག་གིས་འཇིག་རྟེན་གྱི་ཐ་སྙད་ཐམས་ཅད་གནས་དེ་ན་ཡོད་ཀྱང༌། སྙོམས་པར་ཞུགས་པ་དེ་ཉིད་ཀྱི་བྱིན་གྱི་རླབས་དང༌། མཐུ་དེས་མི་ཤེས་མི་མཐོང་ངོ༌། །དེ་བཞིན་དུ་ཉན་ཐོས་ཆེན་པོ་དེ་དག་ཛེ་ཏའི་ཚལ་དེ་ན་རྣམ་པར་དཔྱོད་ལ། དེ་དག་ལ་དབང་པོ་དྲུག་ཡོད་དེ། དེ་བཞིན་གཤེགས་པའི་ཏིང་ངེ་འཛིན་དང༌། རྣམ་པར་འཕྲུལ་པ་དང་ཁྱུ་མཆོག་གི་མཐུ་འབྱུང་བ་དང༌། ཆོ་འཕྲུལ་ད་དག་མཐོང་བར་མ་གྱུར་ཤེས་པར་མ་གྱུར་ཏོ། །ཐམས་ཅད་བདོག་བཞིན་དུ། ལྟོ་ཡི་ནད་ཀྱིས་ཤི་བ་བཞིན། །ཆོས་མ་བསྒོམས་པ་དེ་བཞིན་ནོ། །སྒྲ་གདགས་ཇི་སྙེད་ཡོད་པ་དང༌། །སེམས་ཅན་ཀུན་གྱི་སྒྲ་སྐད་དུ། །སྒྲ་ལ་མཁྱེན་པ་ཐུགས་ཆུད་ཀྱང༌། །རྣམ་པར་རྟོག་པ་གང་ཡང་མེད། །གང་དག་སངས་རྒྱས་རྟོག་མེད་ཀྱང༌། །རྒྱལ་བ་རྣམ་པར་རྟོག་པར་སྣང༌། །ཇི་ལྟར་ས་བོན་རྣམ་དག་པ། །ཞིང་བཟང་ལ་ནི་སྐྱེ་འགྱུར་ཞིང༌། །དེ་བཞིན་སེམས་བསམ་རྣམ་དག་ལ། །སངས་རྒྱས་ཆོས་ནི་སྐྱེ་བར་འགྱུར། །སངས་རྒྱས་རྟོག་པར་མི་མཛད་དོ། །སྟོན་ལ་རྟོག་པ་མི་མངའ་ཡང༌། །འཇིག་རྟེན་ཁམས་ནི་ཚད་མེད་པར། །ཐུབ་པས་རྣམ་པར་རྟོག་པ་བསྟན། །སྐུ་གཉིས་དེ་དག་བསམ་མི་ཁྱབ། །འཇིག་རྟེན་ཁམས་སུ་སྣང་གྱུར་ཀྱང༌། །སྐུ་ལ་གཉིས་སུ་གྱུར་པ་མེད། །ཇི་ལྟར་ཟླ་བ་ཤར་གྱུར་པ། །ཚད་མེད་པ་ཡི་གཟུགས་བརྙན་རྣམས། །ཆུ་ཡི་སྣོད་དུ་སྣང་གྱུར་ཀྱང༌། །ཟླ་བ་གཉིས་སུ་གྱུར་པ་མེད། །སངས་རྒྱས་བཅོམ་ལྡན་འདས་རྣམས་ནི་སྤྱན་གྱི་སྐྱེ་མཆེད་ཀྱིས་སངས་རྒྱས་ཀྱི་ཕྲིན་ལས་གང་མཛད་པ་དེ་སྙན་གྱི་སྐྱེ་མཆེད་ཀྱིས་ཡོངས་སུ་གྲུབ་པར་མཛད་དོ་ཞེས་བྱ་བ་ནས་དབང་པོ་ཐམས་ཅད་སྦྱར་བ་འབྱུང༌། སངས་རྒྱས་མྱ་ངན་ལས་འདས་པའི་ཚེ། འཇིག་རྟེན་ཐམས་ཅད་ནི་སེམས་ཅན་རྣམས་ངུ་ཞིང་སྨྲེ་སྔགས་འདོན་པ་ཞེས་བྱ་བ་ལ་སོགས་པ་དེ་དག་གིས་བསོད་ནམས་འཐོབ་པར་བྱ་བའི་ཕྱིར་ཐབས་མཛད་པ་འབྱུང༌། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའི་ཐེག་པ་ལ་ཞུགས་པ་རྣམས་ལ་ནི། ཕན་ཚུན་དུ་ངན་སེམས་ཀྱི་སེམས་བསྐྱེད་པ་ལྟ་བུར་ཁ་ན་མ་ཐོ་བའི་ཆེ་བ་ངས་འགའ་ཙམ་མ་མཐོང་ངེ༌། །སེམས་ཀྱི་རྣམ་པ་འཇིག་རྟེན་ཀུན། འཇིག་རྟེན་རྣམ་
པ་སེམས་ཅན་ཀུན་གྱི་སེམས་ཡིན་ཏེ། རྣམ་པ་གཉིས་ཀྱི་གྲངས་སུ་ཞུགས། དེ་བཞིན་གཤེགས་པ་སྐུ་ཡོངས་སུ་འབྱེད་པ་མི་མཛད། སྐུ་ཐ་དད་པར་མཛད་པ་ཡང་མི་མངའ་བར་འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་བསམ་བ་དང་མོས་པ་ཇི་ལྟ་བ་བཞིན་སྐུ་ཡོངས་སུ་སྟོན་ཏེ། དེ་བཞིན་གཤེགས་པའི་སྐུ་ལ་རྣམ་པར་རྟོག་པ་དང༌། སྤྲོས་པ་མི་མངའོ། །དེ་བཞིན་གཤེགས་པ་ནི་དབྱིངས་ཀྱི་སེར་སྣ་མི་མངའ་སྟེ། སེམས་ཅན་དབང་པོ་ཡོངས་སུ་མ་སྨིན་པ་རྣམས་ལ། དེ་བཞིན་གཤེགས་པའི་དབྱིངས་གྲག་པར་མི་འགྱུར་རོ། །འཁོར་གྱི་དཀྱིལ་འཁོར་དུ་ཚོགས་པའི་སེམས་ཅན་ཐམས་ཅད་ཀྱང་འདི་སྙམ་དུ་སམས་ཏེ། བདག་ཁོ་ནའི་དོན་དུ་དེ་བཞིན་གཤེགས་པ་ཆོས་སྟོན་ཏོ་སྙམ་མོ། །དེ་བཞིན་གཤེགས་པ་ནི་གསུང་སྒྲོགས་པ་ཡང་མེད། ཕྱིར་སྡུད་པ་ཡང་མེད་དེ། དེ་བཞིན་གཤེགས་པའི་གསུང་གི་ཕྲིན་ལས་དེ་དག་ཀྱང་ཡོད་ཅིང་སྣང་ངོ༌། །དཔེར་ན་རྒྱ་མཚོ་ཆེན་པོ་ལ་ཆུའི་ཕུང་པོ་ཚད་མེད་པ་གང་ཇི་སྙེད་ཡོད་པ་དེ་དག་ཐམས་ཅད་ཀླུའི་སེམས་ཀྱི་ཁྱད་པར་ལས་བྱུང་ངོ༌། །དེ་བཞིན་དུ་ཐམས་ཅད་མཁྱེན་པ་ཉིད་ཀྱི་རྒྱ་མཚོ་ལ། ཆོས་ཀྱི་རྒྱུན་ཚད་མེད་པ་གང་ཇི་སྙེད་པ་དེ་ཐམས་ཅད་སྔོན་གྱི་དགོངས་པའི་སྨོན་ལམ་གྱི་ཁྱད་པར་ལས་བྱུང་བའོ། །རྒྱ་མཚོ་ཆེན་པོ་ལ་གླིང་བཞི་པའི་སེམས་ཅན་གྱི་ལུས་ཀྱི་གཟུགས་བརྙན་ལྟ་བུར་སྣང་སྟེ། དེའི་ཕྱིར་རྒྱ་མཚོ་ཆེན་པོ་ཞེས་བྱའོ། །བཅུ་པོ་འདི་དག་ནི་བདུད་ཀྱི་རླབས་ཏེ། བཅུ་ནི་སེམས་ཞུམ་པ་དང༌། བསམ་པ་འཁྲུགས་པ་དང༌། རྒྱ་ཆུང་དུས་མགུ་བ་དང༌། གཅིག་ལས་མི་བཟོད་པ་དང༌། སྨོན་ལམ་ལ་ལྷུང་བར་མི་དམིགས་པ་དང༌། ཉོན་མོངས་པ་རྣམ་པར་བཟློག་པ་དང༌། ཞེ་བ་དང༌། དད་པ་དང༌། འཁོར་བའི་རྒྱུན་གཅོད་པ་དང༌། སྤྱོད་པ་ལས་ཕྱིར་ལྡོག་པ་དང༌། སེམས་ཅན་ཡོངས་སུ་སྨིན་པར་མི་བྱེད་པ་དང༌། ཆོས་ལ་ཐེ་ཚོམ་ཟ་བའོ། །བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་རྣམ་པར་འཕྲུལ་པ་བསྟན་པ་ལས། ཆོས་བཅུ་གཉིས་དང་ལྡན་ན་བླ་ན་མེད་པའི་བྱང་ཆུབ་ཀྱི་སེམས་སྐྱེ་བར་འགྱུར་ཏེ་གང་ཞེ་ན། རང་བཞིན་གྱིས་རྒྱ་ཆེན་པོ་ལ་
མོས་པ་དང༌། སྙིང་རྗེ་དང་ལྡན་པ་དང༌། བཅོས་མ་མ་ཡིན་པ་དང༌། སངས་རྒྱས་ལ་བསྙེན་བཀུར་བྱས་པ་དང༌། ལས་གསུམ་དག་པ་དང༌། སྡིག་པའི་གྲོགས་སྤངས་པ་དང༌། ཇི་སྐད་སྨྲས་པ་བཞིན་བྱེད་བ་དང༌། བགེད་པའི་ངང་ཚུལ་ཅན་དང༌། དེ་བཞིན་གཤེགས་པས་བྱིན་གྱིས་བརླབས་པ་དང༌། བདོག་པ་ཀུན་ལ་མི་ལྟ་བ་དང༌། དགེ་བའི་བཤེས་གཉེན་ལ་བརྟེན་པ་དང༌། ཡི་དམ་ལ་བརྟེན་པའོ། །ཡོན་ཏན་གྱི་ཆོས་བཅུ་གཉིས་མཐོང་བས་སྦྱིན་པར་གནས་པར་བྱ་སྟེ། གང་ཞེ་ན། བྱང་ཆུབ་ཀྱི་སེམས་ཀྱི་ལམ་སྟོན་པ་དང༌། ལོངས་སྤྱོད་སྒྲུབ་པ་དང༌། འདོད་པའི་རིགས་སུ་སྐྱེ་བ་དང༌། སེར་སྣ་ཚར་གཅོད་པ་དང༌། གཏོང་བའི་རྒྱུན་འཕེལ་བར་འགྱུར་བ་དང༌། ཡི་དྭགས་ཀྱི་སྒོ་གཅོད་པ་དང༌། ཐུན་མོང་གི་ལོངས་སྤྱོད་ལས་སྙིང་པོ་ལེན་པ་དང༌། ཡོ་བྱད་རྫོགས་བར་འགྱུར་བ་དང༌། བདོག་པ་ལ་གོམས་པར་འགྱུར་བ་དང༌། འཛིན་པའི་སེམས་མེད་པར་འགྱུར་བ་དང༌། དེ་བཞིན་གཤེགས་པའི་བཀའ་དང་མཐུན་པ་དང༌། སྦྱིན་པའི་ཕ་རོལ་ཏུ་ཕྱིན་པ་རྫོགས་པར་འགྱུར་རོ། །བཅུ་གཉིས་མཐོང་བས་ཚུལ་ཁྲིམས་བསྲུང་སྟེ། བྱིན་གྱི་རླབས་ཕུན་སུམ་ཚོགས་པར་འགྱུར་བ་དང༌། བྱང་ཆུབ་ཀྱི་ལམ་ལ་འཇུག་པ་དང༌། བདག་གི་འཆིང་བ་ལྷོད་པར་འགྱུར་བ་དང༌། བདག་ངན་འགྲོ་ལས་ཐར་བ་དང༌། ངན་འགྲོའི་ལམ་སྤོང་བ་དང༌། ལས་གསུམ་ཁ་ནམ་ཐོ་བ་མེད་པ་དང༌། མཁས་པས་མི་སྨད་པ་དད། བག་ཡོད་པ་ལ་བརྟེན་པ་དང༌། སེམས་ཅན་ལ་མི་འཇིགས་པ་སྦྱིན་པ་དང༌། སྒོ་གསུམ་གྱི་སྡོམ་པ་འཐོབ་པ་དང༌། སངས་རྒྱས་ཀྱི་ཆོས་བསྒྲུབ་པ་དང༌། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྫོགས་པའོ། །བཟོད་པའི་བཅུ་གཉིས་ནི། འདུ་བྱེད་སྐད་ཅིག་པ་ཡིན་པར་བཟོད་པ་དང༌། བདག་མི་དམིགས་པར་བཟོད་པ་དང༌། བདག་དང་གཞན་བསྲུངས་བ་དང༌། འཁྲུག་པའི་གཏམ་མེད་པར་བྱ་བ་དང༌། བག་ལ་ཉལ་བ་དང༌། ཀུན་ནས་དཀྲིས་པ་བསལ་བ་དང༌། རྗེས་སུ་ཆགས་པ་དང་ཁོང་ཁྲོ་བ་བསལ་བ་དང༌། མཚན་དང་དཔེ་བྱད་བསྒྲུབས་པ་དང༌། ཚངས་པའི་འཇིག་རྟེན་དུ་སྐྱེ་བ་དང༌། གཞན་གྱི་གནོད་
པ་ལས་འདའ་བ་དང༌། ཟད་པ་དང་མི་སྐྱེ་བ་ཤེས་པ་འཐོབ་པ་དང༌། བདུད་ཀྱི་ཡུལ་ལས་འདའ་བ་དང༌། དེ་བཞིན་གཤེགས་པ་མཐོང་བའོ། །བརྩོན་འགྲུས་ཀྱི་ནི་ཆོས་ཐམས་ཅད་རྫོགས་པར་བྱང་ཆུབ་བ་དང༌། དེ་བཞིན་གཤེགས་པའི་དྲུང་དུ་ཕྱིན་པ་དང༌། དེ་བཞིན་གཤེགས་པ་ལ་མཆོད་པ་བྱེད་པ་དང༌། དེ་བཞིན་གཤེགས་པ་མཉེས་པར་འགྱུར་པ་དང༌། སེམས་ཅན་སྨིན་པར་བྱེད་པ་དང༌། གདུལ་བྱ་སངས་རྒྱས་ཀྱི་ཆོས་ལ་འགོད་པ་དང༌། སེམས་ཅན་གྱི་མི་ཤེས་པ་སེལ་བ་དང༌། གདུལ་བྱ་ལ་ཡེ་ཤེས་སྒྲུབ་པ་དང༌། ཞིང་སྦྱང་བ་དང༌། མུ་ཐུག་པ་མེད་པར་སེམས་ཅན་གྱི་དོན་བྱེད་པ་དང༌། སྐད་ཅིག་གཅིག་གིས་ཞིང་ཐམས་ཅད་དུ་འགྲོ་བ་དང་མངོན་པར་འཚང་རྒྱ་བའོ། །བསམ་གཏན་གྱི་ནི་མི་འཁྲུག་ཅིང་ཞི་བ་དང༌། ཡུལ་ལ་མི་རྒྱུག་པ་དང༌། སེམས་གནས་པ་དང༌། ཁམས་གསུམ་ལས་འདའ་བ་དང༌། འཇིག་རྟེན་པའི་སྙོམས་པར་འཇུག་པ་ཟིལ་གྱིས་མནན་པ་དང༌། དེ་ལ་མ་ཆགས་པར་འགྱུར་བ་དང༌། བསམ་གཏན་ཟློག་པ་དང༌། དངོས་པོའི་འདུ་ཤེས་དང་འབྲལ་བ་དང༌། ཚད་ཡོད་པའི་ཏིང་ངེ་འཛིན་ལ་སྨོན་པ་དང༌། ཤིན་ཏུ་ཞི་བ་དང༌། ཅང་ཤེས་པ་དང༌། དབང་པོ་བསྡམས་པའོ། །ཤེས་རབ་ཀྱི་ནི་གཏི་མུག་སེལ་བ་དང༌། ཉོན་མོངས་པ་སེལ་བ་དང༌། མི་ཤེས་པ་མེད་པ་དང༌། མ་རིག་པ་དྲུངས་འབྱིན་པ་དང༌། སྲེད་པ་འཇོམས་པ་དང༌། ཤེས་རབ་རྡོ་རྗེ་ལྟ་བུ་དང༌། ཤེས་རབ་ཉི་མ་ལྟ་བུ་དང༌། ཤེས་རབ་མེ་ལྟ་བུ་དང༌། ཤེས་རབ་ནོར་བུ་ལྟ་བུ་དང༌། མཚན་མ་མེད་པ་དང༌། སྨོན་པ་མེད་པ་དང༌། སྟོང་པ་ཉིད་དོ། །སེམས་ཅན་ཐམས་ཅད་འཁོར་ལོས་སྒྱུར་བའི་བསོད་ནམས་དང་ལྡན་པའི་བསོད་ནམས་བརྒྱ་འགྱུར་གྱིས་སངས་རྒྱས་ཀྱི་བ་སྤུའི་ཁུང་བུ་གཅིག་འགྲུབ། བ་སྤུའི་བསོད་ནམས་ཐམས་ཅད་བརྒྱར་འགྱུར་ངས། དཔེ་བྱད་གཅིག །དེ་ནས་མཚན། དེ་ནས་གཙུག་ཏོར། དེ་ནས་ཆོས་ཀྱི་གཡུང་དྲུང་སྟེ། དེས་ནི་སེམས་ཅན་ཐམས་ཅད་ཀྱིས་ཞུས་ན་ཡང་གསུང་གཅིག་གིས་ལན་ཐེབས་སོ། །ང་མྱ་ངན་ལས་འདས་ནས་རྒྱལ་པོ་མ་སྐྱེས་དགྲས་སྐུ་གདུང་བརྒྱད་ཆ་བླངས་ནས་རིན་པོ་ཆེའི་
ཟ་མ་ཏོག་ཏུ་བཅུག་ནས། གྲོང་ཁྱེར་གྱི་ཕྱི་རོལ་དུ་རྒྱལ་པོ་མྱ་ངན་མེད་འབྱུང་བ་ལ་བསྡད་པར་ས་བརྐོས་ནས་འཇོག་པར་འགྱུར་རོ། །རྒྱལ་པོ་མྱ་ངན་མེད་ནི་ང་མྱ་ངན་ལས་འདས་ནས་ལོ་བརྒྱ་ནས་འབྱུང་ངོ༌། །དེ་ནས་ངའི་རིང་བསྲེལ་བྱུང་ནས་ཞག་བདུན་མཆོད་དེ་མཆོད་རྟེན་བརྒྱད་ཁྲི་བཞི་སྟོང་བྱེད་པར་འགྱུར་རོ། །གང་ཆོས་ཀྱི་རྣམ་གྲངས་འདི་ཉན་པ་དང༌། གྲོག་པ་ལ་སོགས་པ་དེ་ནི་ང་ཡང་སྐྱེད་མོས་ཚལ་འདི་ནི་ཆོས་ཀྱི་རྣམ་པ་འདི་སྟོན་པ་དང༌། འཁོར་འདུས་པ་འདི་ཡང་མཐོང་བར་ཤེས་པར་བྱའོ། །འཇིག་རྟེན་དང་མཐུན་པར་འཇུག་པ་ལས། དེ་དག་སྣ་ཚོགས་སྐུ་མེད་ཀྱང༌། །སེམས་ཅན་མོས་པ་ཇི་བཞིན་དུ། །སྐུ་ལུས་སྤྲུལ་པ་མཛད་པ་ནས། །འདི་ནི་འཇིག་རྟེན་མཐུན་འཇུག་ཡིན། །བདུད་ནི་བྱེ་བ་ཕྲག་བརྒྱ་ཡིས། །དགེ་འདུན་དབྱེ་བར་མི་ནུས་ཀྱང༌། །དགེ་འདུན་དབྱེན་ནི་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །སྲིད་པ་འཕོ་བ་ལས། རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱའོ། །རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱའོ། །མིག་གིས་གཟུགས་རྣམས་མི་མཐོང་ཞིང༌། །ཡིད་ཀྱིས་ཆོས་རྣམས་མི་རིག་པ། །དེ་ནི་བདེན་པ་མཆོག་ཡིན་ཏེ། །དེ་ལ་འཇིག་རྟེན་མི་དགོས་སོ། །བྱམས་པ་འཇུག་པ་ལས། ནོར་ཀུན་དུ་བསྲུང་ལ་བགོ་བཤའ་མི་བྱེད་པ་ནི་བྱང་ཆུབ་སེམས་དཔའི་ཉེས་པའོ། །བྱང་ཆུབ་སེམས་དཔའི་དེ་བཞིན་གཤེགས་པའི་བསླབ་པ་ཇི་ལྟར་བཅས་པ་ལ་བསླབས་སུ་ཟིན་ཀྱང༌། དེ་ཉན་ཐོས་ཀྱི་སེམས་སམ། རང་སངས་རྒྱས་ཀྱི་སེམས་སམ། དམིགས་པར་ལྟ་བ་དང༌། ལྷན་ཅིག་རྟེན་པར་བྱེད་ན་བྱང་ཆུབ་སེམས་དཔའི་ཚུལ་ཁྲིམས་ལས་ཉམས་བར་འགྱུར་རོ། །སྟོང་པ་ཉིད་མི་བཟོད་པའི་བྱང་ཆུབ་སེམས་དཔའི་ཉེས་པའོ། །འདི་ལ་ནི་ཡོན་དབུལ་ལོ། །འདི་ལ་ནི་མི་དབུལ་ལོ་སྙམ་པ་ནི་བྱང་ཆུབ་སེམས་དཔའི་ཉེས་པའོ། །འདི་ལ་ནི་ཆོས་བཤད་དོ། །འདི་ནི་ཚུལ་ཁྲིམས་འཆལ་པའོ། །འདི་ནི་མི་འཆལ་པའོ་ཞེས་ཕྱེ་ནས་འཆལ་པ་ལ་བརྙས་པར་བྱེད་ན་བྱང་ཆུབ་སེམས་དཔའི་ཉེས་པའོ། །བག་ཡོད་པ་གང་ཞེན། བསླབ་བ་མི་གཏོང་བ་དང༌། དམ་བཅས་
པ་མི་ཉམས་པ་དང༌། སེམས་ཅན་ཀུན་ལ་བྱམས་པ་དང༌། སེམས་ཅན་མི་གཏོང་བ་དང༌། བྱང་ཆུབ་ལ་འདུན་པ་བརྟན་པ་དང༌། བརྩོན་པ་མི་གཏོང་བ་དང༌། དགེ་བའི་བཤེས་གཉེན་ལ་བརྟེན་ཅིང་བསྙེན་བཀུར་བྱེད་པ་དང༌། ཆོས་ལ་གུས་པ་དང༌། ཐོས་པ་མང་པོས་ཆོག་མི་ཤེས་པ་དང༌། གཞན་ལ་ཆོས་བགོ་བཤའ་བྱེད་པ་དང༌། ཟང་ཟིང་མེད་པར་ཆོས་སྟོན་པ་དང༌། སྦྱངས་པའི་ཡོན་ཏན་དང༌། ཡོ་བྱད་བསྙུངས་པ་རྣམས་མི་གཏོང་བ་དང༌། ཆོག་ཤེས་པ་དང༌། ང་རྒྱལ་བཅོམ་པ་དང༌། རྣ་བླགས་ཏེ་ཆོས་ཉན་པ་དང༌། བླ་མ་ལ་གུས་པ་དང༌། བཟོད་པ་ལ་གནས་པ་དང༌། གནོད་སེམས་ཀྱི་ཐ་བ་སྤངས་པ་དང༌། ཆོས་ཟབ་མོ་ལ་མོས་པ་དང༌། དམིགས་པར་ལྟ་བ་སྤངས་པ་དང༌། ནང་དུ་ཡང་དག་འཇོག་ལ་འདུན་པ་དྲག་པ་དང༌། བྲེ་མོའི་གཏམ་སྡང་བ་དང༌། ལུས་དང་སེམས་དབེན་པར་གནས་པ་དང༌། དགོན་པ་ལ་གནས་པ་དང༌། སེམས་མཉེན་པ་དང༌། ཚུལ་ཁྲིམས་མཆོག་ཏུ་མི་འཛིན་པ་དང༌། བདག་ལ་མི་བསྟོད་པ་དང༌། གཞན་ལ་མི་སྨོད་པ་དང༌། དགེ་སྦྱོང་གི་ཚུལ་ལ་དགའ་བ་དང༌། གསང་པོར་སྨྲ་བ་དང༌། བཞིན་ཁྲོ་གཉེར་མེད་པའོ། །ཡང་ཉན་ཐོས་ཀྱི་སེམས་དང༌། དམིགས་པ་ཅན་གྱི་སེམས་ཐ་ན་རྨི་ལམ་དུ་ཡང་ཡིད་ལ་མི་བྱེད་པ་ནི་བག་ཡོད་པའོ། །དེ་བཞིན་གཤེགས་པའི་སྙིང་རྗེ་ཆེན་པོ་བསྟན་པ་ལས། དེ་བཞིན་གཤེགས་པའི་ལྷའི་སྤྱན་གྱིས་སེམས་ཅན་གྱི་འཆི་འཕོ་དང་སྐྱེ་བ་གཟིགས་སོ། །དམིགས་པ་ཚད་མེད་པ་ལས་ཡང་དག་པ་ཇི་ལྟ་བ་བཞིན་སོ་སོར་རྟོགས་པས། ཀུན་ནས་ཉོན་མོངས་པ་ལ་དམིགས་པ་རྣམ་པར་བྱང་བ་ལ། རྣམ་པར་འཇོག་པ་ཡང་ཡོད། ལྷག་པའི་ང་རྒྱལ་གྱིས་འཛིན་པས་རྣམ་པར་བྱང་བ་ལ་ཀུན་ནས་ཉོན་མོངས་པ་ལ་དམིགས་པར་རྣམ་པར་འཇོག་པ་ཡོད་དེ། དེ་ལ་སྣྲེལ་ཞིའི་རྣམ་གྲངས་ཀྱིས་དེ་བཞིན་གཤེགས་པའི་ཡེ་ཤེས་འཇུག་གོ །ཀུན་ནས་ཉོན་མོངས་པའི་རྒྱུ་ནི་ཚུལ་བཞིན་མ་ཡིན་པ་ཡིད་ལ་བྱེད་པའོ། །རྐྱེན་ནི་མ་རིག་བའོ། །མ་རིག་པ་ནི་རྒྱུའོ། །འདུ་བྱེད་ནི་རྐྱེན་ནོ། །དེ་བཞིན་དུ་བསྒྲེ། རྣམ་པར་དག་པར་འགྱུར་བའི་རྒྱུ་དང་རྐྱེན་ནི་གཉིས་ཏེ་གཞན་ལ་རྗེས་སུ་མཐུན་པའི་སྒྲ་དང༌། རང་གི་ཚུལ་བཞིན་ཡིད་འཁྱེད་པའོ། །ཡང་གཉིས་ཏེ། ཞི་གནས་ལ་རྩེ་གཅིག་པ་དང༌། ལྷག་མཐོང་ལ་མཁས་
པའོ། །ཀུན་དུ་འགྲོ་བ་ལ་མཁྱེན་པ་ནི་ལུས་ཀྱི་ལས་སྦྱོར་ལ་ངག་གི་མ་ཡིན་པ་ཡད་མཁྱེན་ཏོ། །དེ་བཞིན་དུ་བསྒྲེ། ཡང་འདོད་ཆགས་ཀྱི་ལམ་སྡུག་བ་རྣམས་ལས་སྐྱེ་བ་ཡང་ཡོད། རྗེས་སུ་ཆགས་པ་ལས་སྐྱེ་བ་ཡང་ཡོད། བདག་ཆགས་པ་ལས་སྐྱེ་བ་ཡང་ཡོད་དོ། །ཞེ་སྡང་ཁོང་ཁྲོ་བ་ལས་སྐྱེ་བའི་རྒྱུ་ཡང་ཡོད། བསམ་པ་ཡོངས་སུ་མ་རྫོགས་པ་ལས་སྐྱེ་བ་ཡང་ཡོད། བག་ཆགས་ལས་སྐྱེ་བ་ཡང་ཡོད་དོ། །གཏི་མུག་མ་རིག་པའི་རྒྱུ་ལས་སྐྱེ་བ་ཡང་ཡོད། །འཇིག་ཚོགས་ལ་ལྟ་བའི་རྒྱུ་ལས་སྐྱེ་བ་ཡང་ཡོད། ཐེ་ཚོམ་གྱི་རྒྱུ་ལས་སྐྱེ་བ་ཡང་ཡོད་དོ། །གང་ཟག་བསམ་པ་དམན་པ་ལ་སྦྱོར་བ་རྒྱ་ཆེ་བ་ཡང་ཡོད། དེ་བཞིན་དུ་བསྒྲེ། སེམས་ཅན་གང་དག་སྣོད་མིན་པ། །དེ་ལ་སངས་རྒྱས་བཏང་སྙོམས་མཛད། །གང་གི་དུས་ན་འགྲོལ་འགྱུར་པ། །དེ་ཡི་དུས་ལ་རབ་ཏུ་གཞེས། །འཆགས་པའི་ཚུལ་ཁྲིམས་ཀྱིས་ལྷ་དང་མིར་སྐྱེ་བ་དང༌། གནོད་སེམས་ཀྱིས་མཛེས་པ་དང༌། ལེ་ལོས་མངོན་པར་རྟོགས་པ་དང༌། གཡེང་བས་ངེས་པར་འགྱུར་བ་དང༌། དམིགས་པ་ཅན་གྱིས་རྗེས་སུ་མཐུན་པའི་བཟོད་པ་འཐོབ་པ་དང༌། བུད་མེད་ཀྱི་ལུས་མཛེས་པར་འཁོར་ལོས་སྒྱུར་བ་དང༌། བརྒྱ་བྱིན་དང༌། ཚངས་པ་དང༌། སངས་རྒྱས་སུ་འཇིག་རྟེན་དུ་འབྱུང་བ་དང༌། བྱང་གི་སྒྲ་མི་སྙན་པ་ལོག་པར་ལྟུང་བ་དང༌། དེ་བཞིན་གཤེགས་པའི་བྱིན་གྱི་རླབས་མ་རྟོགས་པར་དེ་བཞིན་གཤེགས་པའི་ཐུགས་ཀྱི་རྒྱུ་པ་ཤེས་པ་དང༌། དེ་བཞིན་གཤེགས་པ་ལ་མཉམ་པར་བཞག་པ་ནི་གནས་མེད་དོ། །སྐྱེས་བུ་ཁ་དོག་ལྔ་ཅན་དུ། །ནམ་མཁའ་གཟུགས་སུ་བྱེད་ཀྱང་སྲིད། །སངས་རྒྱས་གནས་མིན་བཤད་པ་འདི། །གནས་སུ་འགྱུར་པ་མི་སྲིད་དོ། །ནང་ནི་ཞི་བའོ། །ཕྱི་ནི་ཉེ་བར་ཞི་བའོ། །ཟག་པ་བཞི་ནི་འདོད་པ་དང༌། སྲིད་པ་དང༌། མ་རིག་པ་དང་ལྟ་བའོ། །ཉེ་བར་ལེན་པ་བཞི་ནི། འདོད་པ་དང༌། ལྟ་བ་དང༌། བདག་ཏུ་ལྟ་བ་སྨྲ་བ་དང༌། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའོ། །སྔོན་དྲི་མཆོག་གི་བསྐལ་པ་ལ། འཇིག་རྟེན་གྱི་ཁམས་དྲི་ལྡན་དུ། དེ་བཞིན་གཤེགས་པ་ཙན་དན་ཁྱིམ་འཇིག་རྟེན་དུ་བྱུང་བ་དེ་མྱ་ངན་ལས་
འདའ་ཁར་གང་ཞིག་གདུལ་བར་བྱ་ཞེས་འཇིག་རྟེན་ལ་གཟིགས་པ་དང༌། སྲིད་པའི་རྩེ་མོ་ན་སེམས་ཅན་དགེ་བའི་རྩ་བ་བསྐྱེད་པ་རྒྱ་ཆེན་པོ་ལ་མོས་པ་སངས་རྒྱས་ཀྱིས་གདུལ་བྱ་གཅིག་ཅིག་འདུལ་བ་དེ་ལ། བསྐལ་པ་སྟོང་ཕྲག་བརྒྱད་ཅུ་རྩ་བཞིར་གནས་ནས་མིར་སྐྱེ་སྟེ། དེ་ནས་ཤི་འཕོས་ཏེ་མིར་སྐྱེས་ནས་འདོད་པ་ལ་མ་བརྩེས་པ་ཐེག་པ་ཆེན་པོ་ཐོས་པ་ལྟ་ན། བྱང་ཆུབ་ཆེན་པོ་ལས་ཕྱིར་མི་ལྡོག་པར་འགྱུར་བ་གཟིགས་སོ། །དེ་ནས་སངས་རྒྱས་དེ་ཐུགས་རྗེ་དང་ཐབས་ལ་མཁས་པས། དགེ་སློང་དག་ལ་དེང་ཡོངས་སུ་མྱ་ངན་ལས་འདའོ་ཞེས་མྱ་ངན་ལས་འདས་པ་ཆེན་པོ་བསྟན་ཏེ། སྐུ་གདུང་གིས་ཀྱང་རྒྱས་པར་གྱུར་ཏོ། །དམ་པའི་ཆོས་ཀྱང་ལོ་བརྒྱད་ཁྲི་བཞི་སྟོང་དུ་གནས་སོ། །བཅོམ་ལྡན་འདས་དེ་ཏིང་ངེ་འཛིན་གྱི་མཐུས་བསྐལ་པ་བརྒྱད་ཅུ་རྩ་བཞིར་སྐུ་མི་སྣང་བར་གྱུར་ཏོ། །དེ་ནས་སེམས་ཅན་མིར་སྐྱེས་ཏེ་ལོ་བརྒྱད་ལོན་པ་དང༌། སངས་རྒྱས་ཀྱི་ཁ་དོག་དང་གཟུགས་ཀྱིས་དེར་གཤེགས་ནས། ཁྱེའུ་དེ་ལ་ཆོས་བཤད་ཅིང་ལུང་བསྟན་ཏེ། དེའི་ཚེ་ཁྱེའུ་དེ་མ་གཏོགས་པ་མིར་གྱུར་པ་གང་གིས་ཀྱང་དེ་བཞིན་གཤེགས་པ་དེ་མ་མཐོང་ངོ༌། །དེ་ནས་ཡང་མྱ་ངན་ལས་འདས་པ་བསྟན་ཏེ། སྐུ་གདུང་ནི་ལྷ་རྣམས་ཀྱིས་མཆོད་དོ། །ཉི་ཟླ་གཅིག་གིས་མུན་པ་ཐམས་ཅད་སེལ་བ་ལྟར་དགེ་བའི་རྩ་བ་ལྷག་མཐོང་དང་ལྡན་པ་གཅིག་གིས་མི་ཤེས་པའི་མུན་པ་ཐམས་ཅད་སེལ་བ་སྟེ། བྱང་ཆུབ་སེམས་དཔའི་རྒྱན་ནི་བཞི་སྟེ། ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་དང༌། གཟུངས་སོ། །ཚུལ་ཁྲིམས་ནི་སེམས་ཅན་ཐམས་ཅད་ལ་གནོད་པ་མི་བྱེད་པའོ། །ཏིང་ངེ་འཛིན་ནི་བྱམས་པའོ། །ཤེས་རབ་ནི་ཐེ་ཚོམ་མེད་པའོ། །གཟུངས་ནི་དྲི་བ་བརྗོད་དུ་མེད་པའོ། །ས་གཞི་བཻ་ཌཱུརྻ་དཀར་པོའི་དབྱིངས་སུ་འདུག་པ། སངས་རྒྱས་རྟག་ཏུ་མཉམ་པར་གཞག །དེ་ཡི་ཏིང་འཛིན་ཉམས་པ་མེད། །ཆོས་རྣམས་ཀུན་དང་མཉམ་པར་ལྡན། །ས་ཆུ་མེ་ལ་མ་ཡིན་ཏེ། །རླུང་དང་འདོད་ཁམས་གཟུགས་མེད་ལ། །རྒྱལ་བ་གནས་ཏེ་བསམ་གཏན་མིན། །ལྷག་པའི་ཚུལ་ཁྲིམས་ནི་ཐམས་ཅད་མཁྱེན་པའི་སེམས་
མི་མཐོང་བ་དང༌། མངོན་པར་འདུ་བྱེད་པ་ཐམས་ཅད་རྣམ་པར་སྤྲོད་བའོ། །ལྷག་པའི་སེམས་ནི་ཏིང་ངེ་འཛིན་ལ་རབ་ཏུ་གནས་ནས་ཤེས་རབ་འཐོབ་བོ། །ལྷག་པའི་ཤེས་རབ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ནས་སོ་སོ་ཡང་དག་པར་རིག་པ་འཐོབ་པོ། མ་ཐོས་པའི་ཆོས་ཉན་པ་ནི་ཤེས་རབ་ཀྱི་རྩ་བའོ། །ཐོས་པའི་ཆོས་གཞན་ལ་སྟོན་པ་ཆེ་ཤེས་རབ་ཀྱི་ལས་སོ། །འདི་ལ་བུདྡྷའི་ཆོས་དང་ཡིག་འབྲུ་བཤད་པ་རིལ་འབྱུང༌། བདུད་རྩི་བརྗོད་པ་ལས། བྱང་ཆུབ་སེམས་དཔའ་ཆོས་ལྔ་དང་ལྡན་ན་བདུད་ཀྱིས་མི་བརྫི་བ་དང༌། ཚེ་རིང་བ་དང༌། མྱུར་དུ་སངས་རྒྱས་སུ་འགྲུབ་སྟེ། ལྔ་ནི་རྟག་ཏུ་སེམས་ཅན་ལ་ཆོས་སྦྱིན་པ་དང༌། སེམས་ཅན་ལ་མི་འཇིགས་པ་སྦྱིན་པ་དང༌། ཚད་མེད་པ་བཞི་སྒོམ་པ་དང༌། མཆོད་རྟེན་རྙིང་པ་འཆོས་པ་དང༌། སེམས་ཅན་ཀུན་བྱང་ཆུབ་ཀྱི་སེམས་ལ་མོས་པར་བྱེད་པའོ། །འཇམ་དཔལ་གྱིས་ཞུས་པ་ལས། རྒྱུ་གཉིས་ཀྱིས་དེ་བཞིན་གཤེགས་པའི་གཟུགས་ཀྱི་སྐུ་ཁྱད་པར་དུ་འཕགས་པ་ཡིན་ཏེ། དེ་བཞིན་གཤེགས་པའི་སྨོན་ལམ་གྱི་དབང་དང༌། གདུལ་བའི་སེམས་ཅན་གྱི་དགེ་བ་ཡོངས་སུ་སྨིན་པའི་དབང་གིས་ཏེ། སྐུ་ཇི་ལྟར་གསུང་དང༌། མཚན་དང་ཆོས་སྟོན་པ་ལ་སོགས་པ་ཡང་དེ་དང་འདྲ་སྟེ། སེམས་ཅན་རྣམས་ཀྱིས་དེ་ལྟར་ཤེས་སོ། །དཀྱིལ་འཁོར་བརྒྱད་པ་ལས། དེས་ནི་ལྕི་བ་སར་བསྲེས་བའི། །དཀྱིལ་འཁོར་གྲུ་བཞི་ལྷམ་བར་བྱ། །སེམས་ཅན་ཀུན་དང་ཐུན་མོད་དུ། །འདས་པའི་སངས་རྒྱས་གང་ཡིན་དང༌། །གང་དག་མ་འོངས་ད་ལྟར་བྱུང༌། །བྱང་ཆུབ་སེམས་དཔའ་ཉན་ཐོས་དང༌། རང་སངས་རྒྱས་གང་དག་ཡོད་པ། །དེ་དག་རྣམས་ལ་ཡོངས་སུ་བསྔོ། །དེ་ནས་དཀྱིལ་འཁོར་འཁོར་ཡུག་ཏུ། །འཁོར་གྱི་དཀྱིལ་འཁོར་རྣམས་བྱ་སྟེ། །འཇིག་རྟེན་དབང་ཕྱུག་བྱམས་པ་དང༌། །ཐུབ་པ་སྐྱེས་མཆོག་ནམ་མཁའ་དང༌། །ཀུན་ཏུ་བཟང་པོ་བློ་ལྡན་དང༌། །གསང་བ་ཡི་ནི་བདག་པོ་དང༌། །འཇམ་དཔལ་གཞོན་ནུར་གྱུར་པ་དང༌། །སྒྲིབ་པ་ཐམས་ཅད་རྣམ་སེལ་དང༌། །དེ་བཞིན་ས་ཡི་སྙིད་པོ་སྟེ། །དེ་དག་གི་ཆེད་དུ་དཀྱིལ་འཁོར་
བརྒྱད་བྱའོ། །འདི་བྱས་ན་ཡོན་ཏན་བཞི་འཐོབ་སྟེ། ཚེ་རབས་ཐམས་ཅད་དུ་ཆོས་དང་ལྡན་པའི་སེམས་དང་མི་འབྲལ་བ་དང༌། འཁོར་མང་པོ་དང༌། ཡོ་བྱད་ཕུན་སུམ་ཚོགས་པ་དང༌། ལུས་སྲ་ཞིང་བརྟན་པའོ། །ཆོས་ཀྱི་ཕུང་པོ་ལས། ཟ་མ་འམ་མ་ནིང་གིས་བུད་མེད་སྡུ་གུ་མཐོང་ནས་འདོད་ཆགས་སྐྱེས་པས། ཕལ་ཆེར་ནད་ཀྱིས་བཏབ་ཅིང་འབྱིན་པ་རེངས་པར་འགྱུར་ཏེ། དེ་དག་གི་ལུས་ཁུ་ཆུ་རྒྱས་པས་དེ་ལྟར་འགྱུར་རོ། །ཟ་མ་དང་མ་ནིང་ལས་མཐོ་རིས་སུ་འགྲོ་བ་ནི་ཉུང་སྟེ། ཕལ་ཆེར་དམྱལ་བར་འགྲོའོ། །འཁོར་བཞི་པོ་གང་དག་འདོད་ཆགས་དང་མི་གཙང་བའི་ཉེས་དམིགས་མི་ཤེས་པ་དེ་དག་ནི་ཆགས་པས་གདུངས་པས་མདོག་ངན་ཅིང་མི་སྡུག་གོ །ཤེས་པ་ནི་དེ་ལས་བཟློག་པའོ། །སྐྱེས་པ་ལྟ་བུ་མ་ཡིན་པ་སྲིན་བུའི་རིགས་ལྔ་བུད་མེད་ལ་ཡོད་དེ། དེ་དག་ནི་བུད་མེད་ཀྱི་གཅི་བའི་ལམ་ན་གནས་ཏེ། རེ་རེ་ལ་ཡང་སྲིན་བུ་བརྒྱད་ཅུ་བརྒྱད་ཅུ་ཡོད་ལ། མཆུ་རྣོ་ཞིང་མཆུ་ཁ་གཉིས་ཡོད་པས་རྟག་ཏུ་བུད་མེད་ཀྱི་ལུས་ལ་ཟའོ། །དེས་ན་དེ་དག་གང་ཡིན་སྤྱོད་པ་སྟེ། འདོད་པས་ངོམས་མི་མྱོང་ངོ༌། །འཆལ་བའི་ཚུལ་ཁྲིམས་ཀྱི་ཉེས་པ་ནི་བཅུ་སྟེ། འཆི་བའི་ཚེ་གདུང་བ་དང༌། འགྱོད་པར་འགྱུར་བ་དང༌། མནར་མེད་པར་འགྲོ་བས་འཇིགས་པ་དང༌། །ཁྲིམས་ལ་སྐུར་པ་འདེབས་པ་དང༌། སངས་རྒྱས་ཀྱིས་སྤངས་པ་དང༌། ཉན་ཐོས་ཀྱིས་སྤངས་པ་དང༌། འཆི་བའི་ཆོ་འཇིགས་པ་དང་བཅས་པ་དང༌། ངན་འགྲོར་འགྲོ་བ་དང༌། མི་ལུས་འཐོབ་པར་དཀའ་བ་དང༌། ལྷ་རྣམས་ཀྱིས་སྤངས་པའོ། །བུད་མེད་ཀྱི་སྣའི་ནང་ན་སྲིན་བུའི་ཚོགས་ཁ་རྫོགས་ཞེས་བྱ་བ་དག་ཡོད་དེ། དེ་དག་བུད་མེད་ཀྱི་ཁ་སྤུ་ལ་ཟ་བས་བུད་མེད་ཀྱི་ཁ་སྤུ་མི་སྐྱེའོ། །བུད་མེད་ལ་སྲིན་བུའི་ཚོགས་ཨ་བ་རོ་ཕེན་ཞེས་བྱ་བ་ཡོད་པས། བུད་མེད་ཀྱི་ཁ་ལ་ཟ་སྟེ། དེས་ན་མགུལ་བ་དམའ་བ་ཡིན་ནོ། །བུད་མེད་ཀྱི་ཁར་བཅུག་པ་ཡང་དང་པོར་དེ་དག་གིས་ཟོས་ནས་ཉལ་ཉིལ་ནུ་མའི་དྲུང་དུ་འདོར་ཏེ། དེས་ན་ནུ་མ་འཕྱང་བ་ཡིན་ནོ། །བུད་མེད་སྦྲུམ་ན་སྲིན་བུ་དེ་དག་ཀྱང་སྦྲུམ་སྟེ། དེས་ན་ནུ་ཞོ་མང་བ་ཡིན་
ནོ། །བུད་མེད་འདོད་ཆགས་མི་བཟོད་པས་ན་བསླབ་པའི་གཞི་ལྷག་མ་བཅའ་བར་མཛད་དོ། །ཡི་གེ་མེད་པའི་ཟ་མ་ཏོག་ལས། བྱང་ཆུབ་སེམས་དཔས་རྟག་ཏུ་ནན་ཏན་དུ་བསྲུང་བར་བྱ་བའི་ཆོས་གཅིག་སྟེ་གང་ཞེ་ན། གང་བདག་མི་འདོད་པ་དེ་གཞན་ལ་མི་བྱའོ། །གང་ཞིག་ཆོས་ཀྱི་རྣམ་གྲངས་འདི་ཉན་པ་དེ། འཆི་བའི་དུས་ཀྱི་ཚེ་ང་ཉིད་བྱང་ཆུབ་སེམས་དཔའ་འདི་དག་ཉིད་དང་ཐབས་ཅིག་བྱ་རྒོད་ཕུང་པོའི་རི་ལ་གནས་པར་མཐོང་བར་འགྱུར་རོ། །བྱང་ཆུབ་ཀྱི་ཕྱོགས་བསྟན་པ་ལས། སུས་འདུ་བྱེད་ཐམས་ཅད་མི་སྐྱེ་བར་མཐོང་བས་སྡུག་བསྔལ་ཤེས་སོ། །ཆོས་ཐམས་ཅད་འབྱུང་བ་མེད་པར་མཐོང་བས་ཀུན་འབྱུང་སྤངས་སོ། །ཆོས་ཐམས་ཅད་ཤིན་ཏུ་མྱ་ངན་ལས་འདས་པར་མཐོང་བས་འགོག་པ་མངོན་སུམ་དུ་བྱས་སོ། །ཆོས་ཐམས་ཅད་དངོས་པོ་མེད་པར་མཐོང་བས་ལམ་བསྒོམས་སོ། །འཕགས་པ་བཅོམ་ལྡན་འདས་ཀྱི་ཡེ་ཤེས་རྒྱས་པའི་མདོ་རིན་པོ་ཆེ་མཐར་ཕྱིན་པ་ལས། བུད་མེད་ཀྱི་ལུས་དེ་ཉིད་ཀྱིས་བརྒྱ་བྱིན་དང་ཚངས་པ་དང༌། འཁོར་ལོས་སྒྱུར་བ་དང༌། དེ་བཞིན་གཤེགས་པར་འགྱུར་བ་དང༌། འཇིག་རྟེན་གྱི་ཁམས་གཅིག་ཏུ་དེ་བཞིན་གཤེགས་པ་གཉིས་འབྱུང་བ་གནས་མ་ཡིན་ནོ། །ཆ་བཞི་དང༌། དྲུག་པ་དང༌། ཆ་བརྒྱད་པ་དང༌། ཆ་བཅུ་དྲུག་པ་དང༌། ཟུར་གསུམ་པ་དང༌། མོའི་སྒྲ་དང༌། མོའི་དབྱངས་དང༌། མོའི་སྤ་བ་དང༌། མོའི་ཚུལ་དང༌། ཀུན་དུ་སྤྱོད་པ་ནི་མོའི་དབང་པོ་ཞེས་བྱ་སྟེ། ཕོའི་ཡང་དེ་དང་འདྲའོ། །བྱང་གི་སྒྲ་མི་སྙན་རྣམས་ཀྱི་ཚེའི་ཚད་ནི་ལོ་སྟོང་ཐུབ་སྟེ། དུས་མ་ཡིན་པར་འཆི་བ་ཡང་ཡོད་དོ། །འདོད་པའི་ཁམས་ཀྱི་ལྷ་དྲུག་དང༌། གཟུགས་ཀྱི་ཁམས་ཀྱི་གནས་བཅུ་བདུན་དང༌། གཟུགས་མེད་པ་བཞི་ལ་ཡང་དུས་མ་ཡིན་པར་འཆི་བ་ཡོད་པར་འབྱུང༌། དམྱལ་བའི་རིས་ལ་ཡང་བར་མདོར་འཆི་བ་ཡོད་པར་འབྱུང་ངོ༌། །འཆི་བ་ན་སྐྱེ་བའི་མཚན་མ་ལམ་རྒྱུད་ལྔ་གང་གི་མཚན་མ་མཐོང་བ་དེར་སྐྱེ་བ་འབྱུང༌། ཟན་ལ་བོད་པ་ལ་ཚུལ་ཤིང་བྲིམ་པ་འབྱུང༌། མཽད་གལ་གྱི་བུས་ཤཱ་རིའི་བུའི་སྣམ་སྦྱར་མྱུར་བར་བྱས་ནས། བཅོམ་ལྡན་འདས་
ཀྱི་ཐད་དུ་འགྲོ་བར་བྱ་བའི་ཕྱིར་སོར་མོ་ལྔས་ཁབ་ལྔས་དྲུབས་པ་བྱུང༌། བྱང་ཆུབ་སེམས་དཔའ་ཡོངས་སུ་འདྲི་བའི་རང་བཞིན་ཅན་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །ང་རྒྱལ་བསྐྱེད་པས་བརྙས་པ་ཐོབ་འགྱུར་ལ། །ང་རྒྱལ་སྤངས་པ་བཀུར་སྟི་འཐོབ་པར་འགྱུར། །བླ་ན་མེད་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས། ང་རྒྱལ་སྤང་བར་བྱ། སེམས་ཅན་ཐམས་ཅད་ལ་ཡོན་གནས་ཀྱི་སེམས་ཉེ་བར་གཞག་པར་བྱ། བྱང་ཆུབ་ཀྱི་སེམས་མི་གཏོང་བར་བྱ། དགེ་བའི་བཤེས་གཉེན་མགུ་བར་བྱ། །ཆོས་བཙལ་བ་ལ་ཆོག་མི་ཤེས་པར་བྱ། མང་དུ་ཐོས་པ་ལ་བརྩོན་པར་བྱ། བསྟན་བཅོས་ཤིན་ཏུ་བརྟགས་པ་དག་ཀྱང་བཙལ་བར་བྱ། སོ་སོའི་གྲུབ་པའི་མཐའ་རྟོགས་པ་ལ་ཡང་བསླབ་པར་བྱ། དོན་དང་ལྡན་པའི་བསྟན་བཅོས་བཙལ་བར་བྱ་ཞིང་དོན་མེད་པའི་བསྟན་བཅོས་འདི་ལྟ་སྟེ། འཇིག་རྟེན་རྒྱང་ཕན་པ་དང༌། བྱད་སྟེམས་ཀྱི་དང༌། གཞོན་ནུ་རྩེ་བའི་བསྟན་བཅོས་དང༌། རྒྱན་པོའི་བསྟན་བཅོས་དང༌། ཉོ་ཚོང་གི་དང༌། འཁྲིག་པའི་བར་དང༌། རིག་བྱེད་ཀྱི་བསྟན་བཅོས་ལ་སོགས་པ་གང་རྣམ་པར་ཐར་པ་དང་མི་མཐུན་པ་ཐམས་ཅད་ནི་སྤང་བར་བྱའོ། །བྱང་ཆུབ་སེམས་དཔས་ཉན་ཐོས་དང་རང་སངས་རྒྱས་ཀྱི་ཐེག་པ་པ་ལ་བསྟན་པར་མི་བྱའོ། །དེ་ཅིའི་ཕྱིར་ཞེ་ན། ཚུལ་ཁྲིམས་འཆལ་པ་དང༌། ལོག་པར་ལྟ་བ་ནི་བྱང་ཆུབ་སེམས་དཔའི་མི་དགེ་བའི་བཤེས་གཉེན་མ་ཡིན་གྱི་ཉན་ཐོས་དང༌། རང་སངས་རྒྱས་ཀྱི་ཐེག་པ་པ་ནི་ཡིན་ནོ། །ཚུལ་ཁྲིམས་འཆལ་པ་དང༌། ལོག་པར་ལྟ་བས་བྱང་ཆུབ་སེམས་དཔའི་ཚུལ་ཁྲིམས་གཞག་པར་མི་ནུས་ཀྱི། ཉན་ཐོས་དང་རང་སངས་རྒྱས་ཀྱི་ཐེག་པ་པས་ནི་བྱང་ཆུབ་སེམས་དཔའ་ཟག་པ་མེད་པའི་ཡེ་ཤེས་ལ་འཇུག་པར་ནུས་སོ། །སྔོན་འཛམ་བུའི་གླིང་འདི་དག་གི་ཚད་ཁྲི་ཕྲག་བཞི་པར་གྱུར་ཏེ། བྱང་ཆུབ་སེམས་དཔའ་བསྟན་བཅོས་ཐམས་ཅད་ལ་མཁས་པར་བྱའོ། །དེ་ཅིའི་ཕྱིར་ཞེ་ན།
ཐམས་ཅད་མཁྱེན་པ་ཉིད་ཀྱིས་རྩོམ་པ་ནི་འདི་ལྟ་སྟེ། བསྟན་བཅོས་ལ་མཁས་པ་ཡིན་ནོ། །ཆགས་པས་ནི་འགྲོ་བ་ལྔར་འགྲུབ་བོ། །ཞེ་སྡང་གིས་ནི་གསུམ་དུའོ། །གཏི་མུག་གིས་ནི་ལྔར་རོ། །དེ་ཅིའི་ཕྱིར་ཞེ་ན། ཞེ་སྡང་ནི་ངན་སོང་འབའ་ཞིག །གི་ས་སྟེ། ལས་ལས་ཉོན་མོངས་པ་རྗེས་སུ་དཔག་སྟེ། ཉོན་མོངས་པ་འདས་པ་ལས་འདི་མངོན་པར་འདུས་བྱས་ཉོན་མོངས་པ་ལས་སེམས་རྗེས་སུ་དཔག་སྟེ། ཉོན་མོངས་པ་རབ་ཏུ་སྤྱོད་པ་ལས་ཆགས་པའམ། སྡང་བའམ་རྨོངས་པའི་སེམས་རྗེས་སུ་དཔག་གོ །སེམས་ལས་གང་ཟག་འབྱུང་བར་རྗེས་སུ་དཔག་སྟེ། དེ་བཞིན་གཤེགས་པས་སེམས་ཅན་དེ་དག་གི་འགྲོ་བ་འདོད་པས་མཛད་དོ། །གང་ཟག་འདིས་ལས་འདི་མངོན་པར་འདུས་བྱས་པས་སེམས་ཅན་དཔའ་པར་འགྲོའོ། །སྔོན་བུདྡྷ་འཇིག་རྟེན་གསུམ་གྱི་བླ་མས་བཅོམ་ལྡན་འདས་ཤཱཀྱ་ཐུབ་པ་བྲམ་ཟེ་ཟླ་བའི་སྨིན་མ་ཞེས་བྱ་བར་གྱུར་པ་ལ། མ་འོངས་པ་ནི་བསྐལ་པ་བྱེ་བ་དྲུག་ཅུ་ན་བུདྡྷ་འཇིག་རྟེན་གསལ་མཛེས་ཞེས་བྱ་བར་འགྱུར་ཏེ། སྐུ་ཚེ་ནི་ལོ་བྱེ་བ་བརྒྱད་ཅུང་འགྱུར་བར་ལུང་བསྟན། སྔོན་བུདྡྷ་གྲགས་མ་སྨིན་པའི་སྤྱན་སྔ་ན། བཅོམ་ལྡན་འདས་ཤཱཀྱ་ཐུབ་པ། བྱང་ཆུབ་སེམས་དཔའི་སྤྱོད་པ་བླ་མ་ཞེས་བྱ་བར་གྱུར་པ་ན། ཡི་དམ་འདི་ལྟར་བཅས་ཏེ་ཇི་སྲིད་དུ་བདག་གིས་སངས་རྒྱས་ཀྱི་ཞིང་དེར་སེམས་ཅན་རྣམས་མངོན་པར་ཤེས་པ་མྱུར་བ། བདེ་བའི་ལམ་གྱིས་མྱ་ངན་ལས་མ་འདས་པ་དང༌། ངན་སོང་གསུམ་དུ་སྐྱེ་བ་དང༌། སྡུག་བསྔལ་གྱི་སྒྲ་ཡོད་པ་དང༌། སེམས་ཅན་ཐམས་ཅད་སྲིད་པ་ཐམ་པར་མ་གྱུར་པ་དེ་སྲིད་དུ་བདག་མངོན་པར་འཚང་མི་རྒྱའོ། །བྱང་ཆུབ་སེམས་དཔའ་གང་ཟག་དང་གྲོང་དང༌། ཡུལ་གྱི་ཐ་སྙད་དང༌། འཇིག་རྟེན་གྱི་ཤེས་པ་ཐམས་ཅད་བསླབ་པར་བྱའོ། །བུདྡྷ་ཤཱཀྱ་ཐུབ་པ་སྔོན་སྟོན་པ་སྤྱན་བཟངས་ཞེས་བྱ་བར་གྱུར་པ་ན་འདོད་པའི་ཁམས་ཀྱི་སྐྱོན་གྱིས་གནོད་པ་ཁམས་གཉིས་ཀྱང་དེ་དང་འདྲ་བས་སེམས་ཅན་རྣམས་ལ་སྐྱབས་མེད་དེ། བདག་གིས་
ནི་འདུ་བྱེད་ཐམས་ཅད་ལ་གནས་པར་མི་བྱ་སྟེ། གནས་པ་མེད་ན་གཡོ་བར་མི་འགྱུར་རོ་སྙམ་མོ། །དེ་ཆོས་ཐམས་ཅད་ལ་མི་གནས་པའི་བསམ་གཏན་དུ་གྱུར་ནས། སེམས་ཅན་ལ་སྙིང་རྗེ་བའི་སེམས་ཐོབ་སྟེ། ཆོས་དེ་བསྟན་པས་སེམས་ཅན་བྱེ་བ་ཁྲག་ཁྲིག་མི་གནས་པའི་མྱ་ངན་ལས་འདས་སོ། །བརྩོན་འགྲུས་བརྩམས་པའི་བྱང་ཆུབ་སེམས་དཔའ་ནི་བདུད་ལྔ་ལས་རྒྱལ་བར་ནུས་སོ། །ལྔ་གང་ཞེ་ན། ཉོན་མོངས་པ་དང༌། ལས་དང༌། ཕུང་པོ་དང༌། འཆི་བདག་དང༌། ལྷའི་བུའི་བདུད་དོ། །སེམས་ཀྱི་དབང་གིས་ཆོས་ཐམས་ཅད་སྐྱེ་སྟེ། སེམས་ཀྱི་དབང་གིས་ཆོས་ཐམས་ཅད་འགག་སྟེ། ཇི་ལྟ་ཇི་ལྟར་སེམས་ཀྱི་རྟོག་པ་དེ་ལྟ་དེ་ལྟར་ཆོས་ཐམས་ཅད་ཀྱི་གཟུགས་བརྙན་སྟོན་པར་བྱེད་དོ། །ཚེའི་ཚད་ཀྱི་མདོ་ལས། བྱང་གི་སྒྲ་མི་སྙན་གྱི་མི་རྣམས་ཀྱི་ཚེའི་ཚད་ནི་ལོ་སྟོང་སྟེ། བར་མ་དོར་འཆི་བ་ནི་མེད་དོ། །སྒྱུ་མ་མཁན་བཟང་པོ་ལུང་བསྟན་པ་ལས། བྱང་ཆུབ་ཀྱི་སྙིད་པོར་འགྲོ་བར་འགྱུར་བའི་ལམ་ནི་བཞི་སྟེ། ཐམས་ཅད་མཁྱེན་པའི་སེམས་ཡོངས་སུ་མི་གཏོང་བ་དང༌། དགེ་བའི་རྩ་བ་ཐམས་ཅད་ཚོལ་བ་ལ་ངོམས་མི་ཤེས་པ་དང༌། དམ་པའི་ཆོས་སྒྲུབ་པའི་ཕྱིར་བརྩོན་པའོ། །བཞི་པོ་འདི་དག་ནི་ཉན་ཐོས་དང༌། རང་སངས་རྒྱས་ཀྱིས་མི་དཔོགས་པ་ཡིན་ཏེ། བསམ་གཏན་ཟློག་པ་དང༌། སེམས་ཀྱི་རྣམ་པར་འབྱེད་པ་དང༌། སེམས་ཅན་ལ་སྙིང་རྗེ་ཆེ་བ་དང༌། སྤོབས་པ་དང་སྐད་སྣ་ཚོགས་པའོ། །ཕན་ཡོན་བཞི་མཐོང་ན། ཐོས་པ་ཚོལ་ལ་བྱེད་དེ། རང་དང་གཞན་གྱི་ཤེས་པར་སྦྱོར་བ་དང༌། ཕྱོགས་བཞི་ནས་ལྷགས་པའི་ཐེ་ཚོམ་གཅོད་པ་དང༌། དམ་པའི་ཆོས་འཛིན་པ་དང༌། སངས་རྒྱས་ཀྱི་བསྔགས་པ་མི་ཟད་པའོ། །ཐོས་ནས་ཆོས་བྱེ་བྲག་ཏུ་འབྱེད་ཤེས་པ་དང༌། ཐོས་ནས་བྱ་བ་མི་བྱེད་པ་དང༌། ཐོས་ནས་གཞན་ལ་སྟོན་པ་དང༌། ཐོས་ནས་བྱང་ཆུབ་ལ་གཏོང་བར་བྱེད་པའོ། །བཞི་པོ་འདི་དག་ནི་ཆོས་སྨྲ་བའི་ཚིག་གཟུང་བར་འོས་པར་འགྱུར་ཏེ། འདོད་པ་ཆུང་བ་དང༌། ཆོག་ཤེས་
པ་དང༌། ངང་ཚུལ་བཟང་ཞིང་མཉེན་པ་དང༌། རང་གི་ཆོས་སྒྲུབ་པའོ། །ཆོས་བཞི་དང་ལྡན་ན་སངས་རྒྱས་དང་ཕྲད་པར་འགྱུར་ཏེ། དྲན་པ་རྩེ་གཅིག་པ་དང༌། སངས་རྒྱས་ཀྱི་བསྔགས་པ་ཡང་དང་ཡང་དུ་བརྗོད་པ་དང༌། ཚུལ་ཁྲིམས་དག་པ་དང༌། ལྷག་པའི་བསམ་པས་སྨོན་ལམ་འདེབས་པའོ། །ཆོས་བཞིས་སྤོབས་པ་དག་འཐོབ་སྟེ། ཆོས་སྨྲ་བ་གཞན་གྱིས་བཤད་པ་དང་འགལ་བར་མི་བྱེད་པ་དང༌། ཆོས་སྨྲ་བ་ལ་གུས་པ་དང༌། ཞེས་དང་བཅས་པར་ཆོས་ཉན་པ་དང༌། ཐོས་པས་ཁེངས་པ་མེད་པ་དང༌། ཐོས་པ་ཉུང་དུ་ལ་བརྙས་པར་མི་བྱེད་པའོ། །ཆོས་བཞི་དང་ལྡན་ན་སྨོན་ལམ་འགྲུབ་སྟེ། ཚུལ་ཁྲིམས་དང༌། བསླབ་པ་དག་བ་དང༌། ལས་ཀྱི་སྒྲིབ་པ་རྣམ་པར་སྦྱོང་བ་དང༌། གཡོ་སྒྱུ་མེད་པ་དང༌། དགེ་བའི་རྩ་བ་བསྐྱེད་པ་ལ་སེམས་པའོ། །འདུལ་བ་གཞི་ལས། བལྟ་བས་མི་ངོམས་པ་ལྔ་སྟེ། རྒྱ་མཚོ་དང༌། བ་གླང་ཅང་ཤེས་དང༌། རི་རབ་དང༌། འཁོར་ལོས་སྒྱུར་བའི་རྒྱལ་པོ་དང༌། སངས་རྒྱས་སོ། །ཀླུ་ནི་གནས་སྐབས་ལྔ་རང་བཞིན་དུ་གནས་ཏེ། སྐྱེ་བ་དང༌། འཆི་བ་དང༌། ཟ་བ་དང༌། གཉིད་ལོག་པ་དང༌། ཉལ་པོ་བྱེད་པའོ། །བུད་མེད་རང་བཞིན་གྱིས་མཁས་པ་ཁ་ཅིག་ནི་སྐྱེས་པ་གང་བདག་ལ་ཆགས་པ་དང༌། དུས་དང་ཟླ་མཚན་འོང་བ་དང༌། བུ་ཆགས་པ་དང༌། གག་ལས་མངལ་དུ་ཞུགས་པ་དང༌། བུ་ཕོ་མོ་ཤེས་ཏེ། ཕོ་ནི་གཡས་པར་རོ། །མོ་ནི་གཡོན་པར་རོ། །རང་བཞིན་གྱི་མ་ནིང་ནི། ཐོག་མ་ནས་བུད་མེད་ཀྱང་མ་ཡིན་པའོ། །ཟླ་བ་ཕྱེད་པ་ནི་བུད་མེད། ཕྱེད་ནི་སྐྱེས་པར་འགྱུར་བའོ། །ཆགས་པའི་མ་ནིང་ནི། གང་ལ་ཕ་རོལ་ལ་ཆགས་ནས་དབང་པོ་འབྱུང་བར་འགྱུར་བའོ། །ཕྲག་དོག་པའི་མ་ནིང་ནི། ཕ་རོལ་ལོག་པར་སྒྲུབ་པ་མཐོང་ནས་དབང་པོ་འགྱུར་བའོ། །ཉམས་པའི་མ་ནིང་ནི། ནད་ཀྱིས་དབང་པོ་ཉམས་པའམ། མཚོན་གྱིས་བཅད་པའོ། །སོར་མོའི་ཕྲེང་བ་ལས། ཉན་ཐོས་ཀྱི་ཐེག་པ་ལས། ཡིད་ཆེས་བསྟན་པ་གང་ཡིན་པ་ཡང་དེ་བཞིན་གཤེགས་པའི་སྙིང་པོའོ་ཞེས་བྱ་བའི་དོན་དེ་ཡིད་རང་
བཞིན་གྱིས་དག་པ་ཞེས་བྱ་བ་གང་ཡིན་པ་དེ་ནི་དེ་བཞིན་གཤེགས་པའི་སྙིང་པོའོ། །དེ་ནི་ཆོས་ཐམས་ཅད་ཀྱི་གཙོ་བོ་སྟེ། ཆོས་ཐམས་ཅད་ཀྱི་གོ་དེ་བཞིན་གཤེགས་པའི་སྙིང་བོའི་རང་བཞིན་ནོ། །འདི་ལྟ་སྟེ། རྒྱལ་པོ་གཞན་གྱིས་ཁྲིམས་བྱས་པ་ཐོས་ནས་བདག་ཉིད་ཀྱང་སྐྱེ་དགུ་སྐྱོང་བ་དེ་བཞིན་དུ། ཁ་ཆེ་ཡུལ་གྱི་འཁོར་དང༌། ཡུལ་བྷ་རུ་ཀ་ཙ་པ་རྣམས་ཀྱང་ངོ་ཚ་དང༌། ང་རྒྱལ་བསྐྱེད་ནས་ཐེག་པ་ཆེན་པོས་འཇིགས་ཤིང་སྐྲག་པས་གསང་སྟེ་སྟོན་པར་འགྱུར་གྱི་དེ་བཞིན་གཤེགས་པའི་སྙིང་པོ་སྟོན་པར་མི་འགྱུར་རོ། །སྔོན་བསྐལ་པ་དཔག་ཏུ་མེད་པའི་སྔོན་རོལ་དུ་བུདྡྷ་ཀོ་སན་ཏ་བཟང་པོ་མཉན་ཡོད་ཀྱི་དྲུང་དུ་བྱུང་བ་ན་དམ་པའི་ཆོས་ནུབ་ཀར་དགེ་སློང་སངས་རྒྱས་བློ་གྲོས་དགོན་པ་ན་གནས་པ་ལ་གཅིག་གིས་གཅིག་ལ་གོས་བཟང་པོ་ཞིག་བྱིན་པ་ནུབ་གཅིག་ནས་གཅིག་གིས་གོས་ཕྲོག་སྟེ་གཅེར་བུར་ཕྱུང་ནས་ཤིང་ལ་བཏགས་སོ། །དེ་ནས་བྲམ་ཟེ་མེ་ཏོག་ཐུ་བ་ཞིག་གིས་མཐོང་ནས། ཀྱེ་མ་དགེ་སྦྱོང་དུར་སྨྲིག་གིས་ནི་ཐར་བར་མི་འགྱུར་བ་ལྟ་ཞིག་སྙམ་ནས། གཅེར་བུར་བྱུང་ལ་དཀའ་ཐུབ་བྱས་ན་ངུར་བ་ལྟ་ཞེས་གཅེར་བུར་བྱུང་ནས་རྒྱུ་སྟེ། དེ་ནས་གཅེར་བུར་བྱུང་ངོ༌། །དེ་ནས་དགེ་སློང་དེ་བཅིངས་པ་ཁྲོལ་ནས་ལུས་ས་སེར་ཞིག་གིས་བྱུགས་ཏེ་འགྲོ་བ་དང༌། ཆུར་ཞུགས་ཏེ་ཀླད་པའི་རྨ་བཀྲུས་ནས་རྩྭ་འཇམ་པོས་ཀླད་པ་བཀབ་པ་དང༌། རང་གི་ལུས་རྨ་ཡོད་པ་སྐྲ་འཇམ་པོས་གཡོགས་པ་དང༌། བ་ལང་གི་ལྕི་བ་བ་སོགས་ཏེ་མེ་ལྡེ་བ་དང༌། རྨ་ལ་ཕོག་སྙམ་བྱེད་པ། བྲམ་ཟེ་ཞིག་དང་ཤིང་ཐུན་ཞིག་དང༌། ཉམ་ཐག་པ་གཞན་དག་ཅིག་གིས་མཐོང་ནས། སྔ་མ་བཞིན་བསམས་ཏེ་ཡ་མཚན་ཅན་ཀུན་དུ་རྒྱུ་དང༌། དཀའ་ཐུབ་ཅན་རྩྭ་གོས་གྱོན་པ་དང༌། ཕྱུགས་བདག་དང་བ་ལང་གི་ལྕི་བའི་རི་ལུ་ཅན་དང༌། མྱ་ངན་དུ་འགྲོ་བ་བྱུང༌། དེ་ནས་མགོ་བྱུང་སྟེ། ཡ་མཚན་ཅན་དགུ་བཅུ་རྩ་དྲུག་པོ་ཐམས་ཅད་ཀྱང་དགེ་སློང་དེའི་སྤྱོད་ལམ་ལས་འཕྲོས་ཏེ་བྱུང་ངོ༌། །འཕགས་པ་བདེ་བྱེད་ཀྱིས་ཞུས་པ་ལས། རིགས་ཀྱི་བུ་གང་སུ་ཡང་རུང་བ་དག་དེ་ལྟར་ཆོས་ཐམས་ཅད་སྤྲུལ་པ་ལྟ་བུར་མི་འདོད་མི་དད་ལ་
སླར་ཟློག་པ་དང༌། གཤེ་བ་དེ་ནི་དགེ་སྦྱོང་མ་ཡིན་པ་ཞེས་བྱ། མུ་སྟེགས་ཅན་ཞས་བྱ། དམིགས་ཅན་ཞེས་བྱ། དཀྲུགས་མ་བ་ཞེས་བྱ། ངན་གཡོ་ཅན་ཞེས་བྱ། འཆལ་པ་ཞེས་བྱའོ། །སྐྱེ་བོ་རྨོངས་པ་ཁྲོས་པས་ཟིལ་ནོན་པ། །འཇིག་རྟེན་མཁས་པའི། བསྟན་ལས་དེ་རིང་སྟེ། དེ་ནི་ལོག་ལྟ་རྣམས་ཀྱི་ནང་འཛིན་ཡིན། །དེ་ལྟ་བས་ན་མཁས་མིས་འཁྲུག་མི་བྱ། །འཕགས་པ་འཇམ་དཔལ་གྱིས་ཞུས་པ་ལས། འཇམ་དཔལ་རྒྱུ་གཉིས་ཀྱིས་དེ་བཞིན་གཤེགས་པའི་གཟུགས་ཀྱི་སྐུ་ཁྱད་དུ་འཕགས་པ་ཡིན་ནོ། །རྒྱུ་གཉིས་གང་ཞེ་ན། འདི་ལྟ་སྟེ། དེ་བཞིན་གཤེགས་པའི་སྔོན་གྱི་སྨོན་ལམ་གྱི་དབང་དང༌། གདུལ་བྱའི་སེམས་ཅན་རྣམས་ཀྱི་དགེ་བ་ཡོངས་སུ་སྨིན་པའི་དབང་གིས་ཏེ། འཇམ་དཔལ་རྒྱུ་དེ་གཉིས་ཀྱིས། དེ་བཞིན་གཤེགས་པའི་གཟུགས་ཀྱི་སྐུ་ཁྱད་པར་དུ་འཕགས་པ་ཡིན་ནོ། །སྐུ་ཇི་ལྟ་བར་གསུང་དང༌། མཚན་དང་ཆོས་སྟོན་པ་ལ་སོགས་པ་ཡང་དེ་འདྲ་སྟེ། སེམས་ཅན་རྣམས་ཀྱིས་དེ་ལྟར་ཤེས་སོ། །འཕགས་པ་ཆོས་ཀྱི་ཕུང་པོ་ལས། བཅུ་པོ་འདི་དག་ནི་ཚུལ་ཁྲིམས་འཆལ་པའི་ཉེས་དམིགས་ཡིན་ཏེ། འཆི་བའི་ཚེ་གདུང་བར་འགྱུར་བ་དང༌། འགྱོད་པར་འགྱུར་བ་དང༌། མནར་མེད་པར་འགྲོ་བས་འཇིགས་པ་དང༌། ཚུལ་ཁྲིམས་ཅན་ལ་སྐུར་པ་འདེབས་པ་དང༌། སངས་རྒྱས་ཀྱིས་སྤངས་པ་དང༌། ཉན་ཐོས་ཀྱིས་སྤངས་པ་དང༌། ལྷས་སྤངས་པ་དང༌། འཆི་བའི་ཚེ་འཇིགས་པ་དང༌། ངན་འགྲོར་འགྲོ་བ་དང༌། མི་ལུས་འཐོབ་པར་དཀའ་བའོ། །འཕགས་པ་རིན་པོ་ཆེའི་མཐའ་ལས། ཆོས་ཀྱི་དབྱིངས་ལ་འདི་དག་ནི་སྐྱེ་བོའི་ཆོས་སོ། །འདི་དག་ནི་འཕགས་པའི་ཆོས་སོ་ཞེས་གདགས་པར་མི་ནུས་སོ། །ཆོས་ཀྱི་དབྱིངས་ལ་འདི་ནི་འདི་ན་འདུག་གོ །ཆེ་གེ་མོ་ཞིག་ན་འདུག་གོ་ཞེས་གདགས་པར་མི་ནུས་སོ། །དེ་ཅིའི་ཕྱིར་ཞེ་ན། ཆོས་ཀྱི་དབྱིངས་ནི་བསྟན་དུ་མེད་པ། གདགས་སུ་མེད་པ། གདགས་པ་ལས་ཡང་དག་པར་འདས་པ་ཡིན་ནོ། །བཅོམ་ལྡན་འདས་སྨན་གྱི་བླ་བཻ་ཌཱུ་རྻའི་འོད་ཀྱི་སྔོན་གྱི་སྨོན་ལམ་རྒྱས་པ་ལས། དུས་མ་ཡིན་པར་འཆི་བ་དགུ་ཡོད་དོ། །གང་ཞེ་ན། ནད་པ་སྨན་དང་རིམ་
གྲོ་དང་མི་ལྡན་པའམ། སྨན་མ་ཡིན་པ་བྱེད་པ་དང༌། རྒྱལ་པོའི་ཆད་པ་དང༌། ཧ་ཅང་བག་མེད་པས་མི་མ་ཡིན་པས་མདངས་ཕྲོགས་པ་དང༌། མེ་དང༌། ཆུ་དང༌། སེང་གེ་སྟག་ཝ་སྦྲུལ་ལ་སོགས་པ་དང་གཡང་དུ་ལྟུང་བ་དང༌། དུག་བྱད་རོ་ལངས་ཀྱི་སྦྱོར་བ་དང༌། བཀྲེས་སྐོམ་སྟེ། འདི་དག་ནི་མདོར་བསྡུས་པའོ། །གཞན་ཡང་གྲངས་མེད་དཔག་ཏུ་མེད་དོ། འཕགས་པ་སྤྱན་རས་གཟིགས་ཞེས་བྱ་བའི་མདོ་ལས། ཇི་ལྟར་དེ་བཞིན་གཤེགས་པ་སངས་རྒྱས་ཀྱི་ཆོས་ཐམས་ཅད་ཀྱིས་མཐའ་ཡས་པ་དེ་བཞིན་དུ། དེ་བཞིན་གཤེགས་པ་ལ་ཡོན་ཕུལ་པ་ཡང་ཚད་མེད་མཐའ་ཡས་སོ། །ཕྱི་མའི་ཚེ་དུས་ལྔ་བརྒྱ་ཐ་མ་ལ་སུ་ཞིག་དེ་བཞིན་གཤེགས་པའི་རིང་བསྲེལ་ཡུངས་འབྲུ་ཙམ་ལ་མཆོད་པ་དང༌། བསྟི་སྟང་བྱེད་པ་དེས་ཕན་ཡོན་ལྔ་གཟུང་བར་འགྱུར་ཏེ། དྲན་པ་དང་ལྡན་པ་དང༌། རྟོགས་པ་དང་ལྡན་པ་དང༌། ངོ་ཚ་ཤེས་ཤིང་ཁྲེལ་ཡོད་པ་དང༌། མྱུར་དུ་སངས་རྒྱས་མཐོང་བ་དང༌། མཐོང་ནས་དད་པ་སྐྱེ་བའོ། །དེ་ཆོས་བཞི་དད་ཡང་ལྡན་པར་འགྱུར་ཏེ། བཞི་གང་ཞེ་ན། དེ་བཞིན་གཤེགས་པའི་བསྟན་པ་འཛིན་པ་དང༌། དེ་ཡང་ཇི་སྐད་བསྟན་པ་བཞིན་སྒྲུབ་པ་དང༌། བསྒྲུབས་ནས་སངས་རྒྱས་དང་ཉེ་བར་འགྱུར་བ་དང༌། མྱུར་དུ་སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བར་འགྱུར་བ་དག་གོ །དྷརྨ་འདི་ལས་མཆོད་རྟེན་ལ་རྒྱན་ཕུལ་པ་ཡན་ཆད་སོ་སོའི་ཡོན་ཏན་ཞིབ་ཏུ་འབྱུང་ངོ༌། །འཕགས་པ་གསེར་གྱི་བྱེ་མ་ལྟ་བུ་ལས། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གྱི་ཁམས་གང་དུ་སངས་རྒྱས་མི་འབྱུང་བ་དང༌། བྱང་ཆུབ་སེམས་དཔའ་རྣམས་ཀྱང་བྱང་ཆུབ་ཀྱི་སྤྱད་པ་མི་སྤྱོད་པའི་འཇིག་རྟེན་གྱི་ཁམས་ཇི་སྙིད་མཆིས། བཀའ་སྩལ་པ། སངས་རྒྱས་འབྱུང་བ་དང༌། བྱང་ཆུབ་སེམས་དཔའི་སྤྱད་པ་སྤྱོད་པ་ནི་དཔེར་ན་རྒྱ་མཚོ་ཆེན་པོའི་བྱེ་མ་དང༌། གང་གཱའི་བྱེ་མའི་ནང་ན་གསེར་གྱི་བྱེ་མ་དཀོན་པ་དང་འདྲ་སྟེ། ཇི་ལྟར་རྒྱ་མཚོའི་བྱེ་མ་དང༌། གང་གཱའི་བྱེ་མ་ལས་ལ་ལ་ཞིག་གིས་བྱེ་མ་འབྲུ་གཅིག་བླངས་པ་
བཞིན་དུ་ཉུང་ངོ༌། །འཕགས་པ་ཆོས་ཀྱི་ཕྱག་རྒྱ་ཞེས་བྱ་བའི་མདོ་ལས། བཅོམ་ལྡན་འདས་ལ་ཚེ་དང་ལྡན་བ་ཤར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་གྱིས་ན་ལེགས་པར་གསུངས་པའི་ཆོས་འདུལ་པ་ལ་རབ་ཏུ་བྱུང་བ་ཞེས་བགྱི། བཀའ་སྩལ་པ། ཤ་ར་དྭ་ཏིའི་བུ་འཇིག་རྟེན་པའི་ཆོས་ལས་ཀྱང་མ་འདས་ལ། ཟག་པ་མེད་པའི་ཆོས་རྣམས་ཀྱང་མ་ཐོབ་ན། དེ་ཙམ་གྱིས་རབ་ཏུ་བྱུང་བ་དང༌། འཇིག་རྟེན་ལས་འདས་པའི་བསྟེན་པར་རྫོགས་པ་ཡིན་ནོ། །འཕགས་པ་བཞི་པ་སྒྲུབ་པ་ལས། བཞི་པོ་འདི་དག་ནི་བྱང་ཆུབ་སེམས་དཔའ་དཀའ་བ་བྱེད་པ་སྟེ། གང་ཞེ་ན། སེམས་ཅན་མཐུ་ཆུང་བ་ལ་བཟོད་པ་བྱེད་པ་དང༌། དབུལ་བ་ལ་བདོག་པ་ཐམས་ཅད་གཏོང་བ་དང༌། ཡན་ལག་གི་མཆོག་མགོ་སློང་བ་ལ་ཁྲོ་བ་མེད་པའི་སྟེང་དུ་བཤེས་གཉེན་དུ་འདུ་ཤེས་པ་དང༌། སྐྱེ་བ་ལ་མི་རྟོག་པས་བསམས་བཞིན་དུ་སྐྱེ་བར་བྱེད་པའོ། །བྱང་ཆུབ་སེམས་དཔའི་ཆོས་ཟུང་དུ་འབྲེལ་བ་བཞི་སྟེ། གང་ཞེ་ན། བསམ་པ་དང་སྦྱོར་བ་ཟུང་དུ་འབྲེལ་པ་དང༌། གཏོང་བ་དད་བསྔོ་བ་ཟུང་དུ་འབྲེལ་པ་དང༌། བྱམས་པ་དང་སྙིང་རྗེ་ཟུང་དུ་འབྲེལ་པ་དང༌། ཐབས་དང་ཤེས་རབ་ཟུང་དུ་འབྲེལ་པའོ། །འཕགས་པ་བློ་གྲོས་མི་ཟད་པས། ཕ་རོལ་ཏུ་ཕྱིན་པའི་དོན་གང་ཞེ་ན། སྤྱོད་པའི་ཁྱད་པར་རྫོགས་པའི་དོན་ནི་ཕ་རོལ་ཏུ་ཕྱིན་པའི་དོན་ཏོ། །ཡེ་ཤེས་ཟབ་མོ་རྫོགས་པའི་དོན་དང༌། འདུས་བྱས་དང༌། འདུས་མ་བྱས་ལམ་ཆགས་པའི་དོན་དང༌། འཁོར་བའི་ཉེས་པ་ཇི་ལྟ་བ་བཞིན་རྟོགས་པའི་དོན་དང༌། སྐྱེ་བོ་མི་མཁས་པ་རྣམས་རྟོགས་པར་བྱེད་པའི་དོན་དང༌། སེམས་ཅན་གྱི་ཁམས་ཤེས་པའི་དོན་དང༌། ཕྱིར་མི་ལྡོག་པའི་ས་འཐོབ་པའི་དོན་དང༌། སངས་རྒྱས་ཀྱི་ཞིང་སྦྱོང་བའི་དོན་དང༌། ཡོན་ཏན་ཐམས་ཅད་ཀྱི་ཕ་རོལ་ཏུ་ཕྱིན་པའི་དོན་ཏོ། །འཕགས་པ་སྒོ་མཐའ་ཡས་བ་སྒྲུབ་པ་ལས། རྒྱལ་བས་བསྔགས་པའི་དགོན་པར་གནས་པར་གྱིས། །དེ་ལ་གནས་པས་གཞན་ལ་བརྙས་མི་བྱ། །ཟབ་མོའི་བཟོད་
ལ་འདུན་པ་བསྐྱེད་ནས་སུ། བག་ཡོད་མགོ་ལ་འབར་བཞིན་གནས་པར་གྱིས། །འདི་ལྟར་ཚུལ་འཆོས་བྱེད་ཀྱི་གཞི་ཡིན་པ། །ཤེས་ཁེ་རྙེད་པ་རྣམས་ལ་གནས་མ་བྱེད། །བྱ་དང་འདྲ་བར་ངན་དོན་ཙམ་གྱིས་ཆོག་བྱ་སྟེ། །མིར་གྱུར་པ་ཡི་འབྲས་བུ་ཡོད་པར་གྱིས། །འཕགས་པ་བྱང་ཆུབ་སེམས་དཔའི་སྤྱོད་པ་བསྟན་པ་ལས། བཅོམ་ལྡན་འདས་ལ་འཇམ་དཔལ་གྱིས་གསོལ་པ། བཅོམ་ལྡན་འདས་དགེ་སློང་དེ་དག་གིས་ཆོས་འདི་ཐོས་ནས་གནོད་པར་གྱུར་བ་ལ་གཟིགས། བཀའ་སྩལ་པ། དེ་སྐད་མ་ཟེར་ཅིག །གལ་ཏེ་འདི་མ་ཐོས་ན་བསྐལ་བའི་བར་དུ་བཟང་འགྲོར་ཡང་མི་སྐྱེ་ན། སངས་རྒྱས་མཉེས་པར་བྱེད་པ་ལྟ་ཅི་སྨོས། ཆོས་ཀྱི་རྣམ་གྲངས་དེ་དག་ཐེ་ཚོམ་དང་བཅས་པར་ཐོས་པས་ད་གཟོད་ཁོ་ན་དམྱལ་བ་ནས་ཐར་ནས་དགའ་ལྡན་དུ་སྐྱེས་སོ། །འཕགས་པ་དཔལ་དབྱིག་གིས་ཞུས་པ་ལས། བྱང་ཆུབ་སེམས་དཔའ་ལས་དང་པོ་པས་ཕ་མ་ལ་གནོད་པ་བྱེད་པ་དང༌། བུ་དང༌། ཆུང་མ་དང༌། བྲན་ཕོ་དང༌། བྲན་མོ་དང༌། ལས་བྱེད་པ་དང༌། ཞོ་ཤས་འཚོ་བ་དང༌། མཛའ་པོ་དང༌། བློན་པོ་དང༌། ཉེ་དུ་དང་རྒན་རབས་ལ་གནོད་པ་བྱེད་པར་ཇི་ལྟར་མོས་པ་དང༌། ཅི་ནུས་པར་དུས་དུས་སུ་སྦྱིན་པར་བྱའོ། །འཕགས་པ་བགྲེས་མོས་ཞུས་པ་ལས། ཆོས་ཐམས་ཅད་ཀྱང་ངོ་བོ་ཉིད་ཀྱིས་སྟོང་བའི་ཕྱིར་ཏེ། འོན་ཀྱང་ཆོས་རྣམས་འདོགས་སོ། །མཁས་པ་རྣམས་ནི་དེ་ལ་མངོན་པར་མི་ཞེན་ཏེ། མངོན་པར་ཞེན་པ་མེད་པས་མི་རྩོད་དོ། །རྩོད་པ་མེད་པ་ནི་དགེ་སློང་གི་ཆོས་ཀྱི་མཆོག་གོ །ཀུན་དགའ་བོས་གསོལ་པ། འདི་ཅིའི་སླད་དུ་འདི་ལྟར་དབུལ་བར་གྱུར་ལགས། བཀའ་སྩལ་པ། ཀུན་དགའ་བོ་ང་བྱང་ཆུབ་སེམས་དཔའི་སྤྱད་པ་སྤྱོད་པ་ན། འདི་ངའི་མར་གྱུར་ཏེ། དེ་བཞིན་གཤེགས་པ་འཁོར་བ་འཇིག་གི་བསྟན་པ་ལ་རབ་ཏུ་འབྱུང་དུ་མ་བཏང་བས། ང་ཟ་གཅིག་ཟན་བཅད་པར་གྱུར་ཏེ། དེ་ནས་འདོད་པས་བཏང་ངོ༌། །དེའི་རྣམ་པར་སྨིན་པས་འདི་ལྟར་གྱུར་ཏོ། །འཕགས་པ་རྣམ་པར་མི་རྟོག་པ་ལ་འཇོག་པ་ལས། དམ་ཆོས་འདི་
ལ་རྒྱལ་བའི་སྲས། །རྣམ་པར་མི་རྟོག་བསམས་གྱུར་ནས། །རྣམ་རྟོག་བགྲོད་དཀའ་རྣམ་འདས་ཏེ། །རིམ་གྱིས་མི་རྟོག་ཐོབ་པར་འགྱུར། །འཕགས་པ་འཇིག་རྟེན་དང་མཐུན་པར་འདུག་པ་ལས། སངས་རྒྱས་ཡེ་ཤེས་དཔག་ཡས་ཏེ། །ཆོས་ཀྱི་དབྱིངས་ལས་འབྱུང་ཡིན་ཡང༌། །སངས་རྒྱས་ཞིང་ནི་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཞིགས་པ་མེད་ཅིང་སྐྱེ་མེད་ལ། །ཆོས་ཀྱི་དབྱིངས་དང་མཉམ་གྱུར་ཀྱང༌། །བསྲེག་པའི་བསྐལ་པ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །འཕགས་པ་ཆོས་དང་དོན་རྣམ་བར་འབྱེད་པ་ལས། བུད་མེད་གང་ལ་ལ་ཞིག་གིས་ཆོས་ཀྱི་རྣམ་གྲངས་འདི་འཆང་ངམ་ཀློག་ན། དེ་བུད་མེད་ཀྱི་ལུས་བརྗེས་ནས། འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། དེ་ཉིད་དེའི་བུད་མེད་ཀྱི་ལུས་ཀྱི་ཐ་མ་ཡིན་ནོ། །འཆི་བའི་དུས་ཀྱི་ཚེ་ཡང་དེ་བཞིན་གཤེགས་པ་འོད་དཔག་མེད་མཐོང་བར་འགྱུར་རོ། །འཕགས་པ་སྲིད་པ་འཕོ་བ་ལས། བཅོམ་ལྡན་འདས་ཇི་ལྟར་ན་ལས་བགྱིས་ཤིང་བ་སོགས་པ་འགགས་ནས་ཡུན་རིང་དུ་ལགས་པ་འགུམ་པའི་དུས་ཀྱི་ཚེ་ཉེ་བར་གནས་ཤིང་ཡིད་ལ་མངོན་དུ་འགྱུར་ལགས། འདུ་བྱེད་ཐམས་ཅད་སྟོད་པ་ལ་ཇི་ལྟར་ལས་རྣམས་འཆབ་མི་འཚལ་བར་གདའ། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་མི་ཞིག་ཉལ་ཉལ་བའི་རྨི་ལམ་ན། ཡུལ་གྱི་བུད་མེད་བཟང་མོ་དང་ལྷན་ཅིག་ཏུ་ཡོངས་སུ་སྤྱོད་པ་རྨིས་ལ། དེ་ཉལ་བ་ལས་སད་ནས་ཡུལ་གྱི་བུད་མེད་བཟང་མོ་དེ་དྲན་ནོ། །རྒྱལ་པོ་ཆེན་པོ་འདི་ཇི་སྙམ་དུ་སེམས། རྨི་ལམ་གྱི་ཡུལ་གྱི་བུད་མེད་བཟང་མོ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་འདི་ཇི་སྙམ་དུ་སེམས། འོ་ན་གང་རྨི་ལམ་གྱི་བུད་མེད་བཟང་མོ་ལ་མངོན་པར་ཞེན་པའི་མི་དེ་ཅི་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་
དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་གྱི་ཡུལ་གྱི་བུད་མེད་བཟང་མོ་ཡང་ཤིན་ཏུ་མ་མཆིས་ཤིང་མི་དམིགས་ལགས་ན། དེ་དང་ཡོངས་སུ་སྤྱོད་བལྟ་ག་ལ་མཆིས་ཏེ། འདི་ལྟར་མི་དེ་ནི་ཕོངས་ཤིང་དུ་བ་པའི་སྐལ་བ་ཅན་དུ་འགྱུར་ལགས་སོ་བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་མིག་གིས་གཟུགས་རྣམས་མཐོང་ན། ཡིད་བདེ་བར་འགྱུར་པའི་གཟུགས་རྣམས་ལ་མངོན་པར་ཞེན་ཏེ། མངོན་བར་ཞེན་པར་གྱུར་ནས་རྗེས་སུ་ཆགས་པར་འགྱུར་རོ། །རྗེས་སུ་ཆགས་ནས་ཀུན་དུ་ཆགས་པར་འགྱུར་རོ། །ཀུན་དུ་ཆགས་ནས་འདོད་ཆགས་ལས་བྱུང་བ་དང༌། ཞེ་སྡང་ལས་བྱུང་བ་དང༌། གཏི་མུག་ལས་བྱུང་བའི་ལས་ལུས་དང་ངག་དང༌། ཡིད་ཀྱིས་མངོན་པར་འདུ་བྱེད་དེ། ལས་དེ་མངོན་པར་འདུས་བྱས་པར་གྱུར་ནས་འགག་གོ །འགག་པ་ན་ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་སུ་མ་ཡིན། ནུབ་ཕྱོགས་སུ་མ་ཡིན། བྱང་ཕྱོགས་སུ་མ་ཡིན། སྟེང་དུ་མ་ཡིན། འོག་ཏུ་མ་ཡིན། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན་ནོ། །དུས་གཞན་ཞིག་ན་འཆི་བའི་དུས་དང༌། ཚོད་ཉེ་བར་གནས་པའི་ཚེ་དང་སྐལ་པ་འདྲ་བའི་ལས་ཟད་ནས་རྣམ་པར་ཤེས་པ་ཐ་མ་འགག་པའི་ཚེ། འདི་ལྟ་སྟེ་དཔེར་ན། ཉལ་ཉལ་བ་ལས་སད་པའི་མིའི་ཡུལ་གྱི་བུད་མེད་བཟང་མོ་ལྟ་བུར་ལས་དེ་ཉིད་ལ་མངོན་དུ་འགྱུར་རོ། །རྒྱལ་པོ་ཆེན་པོ་དེ་ལྟར་རྣམ་པར་ཤེས་པ་ཐ་མ་འགག་ཅིང་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་ཡང་ན་ནི་ལྷའི་ནང་དུ། ཡང་ན་ནི་མིའི་ནང་དུ། ཡང་ན་ནི་ལྷ་མ་ཡིན་གྱི་ནང་དུ། ཡང་ན་ནི་སེམས་ཅན་དམྱལ་བ་རྣམས་སུ། ཡང་ན་ནི་དུད་འགྲོ་རྣམས་སུ། ཡང་ན་ནི་ཡི་དྭགས་རྣམས་སུ་འབྱུང་བར་འགྱུར་རོ། །རྒྱལ་པོ་ཆེན་པོ་རྣམ་པར་ཤེས་པ་དང་པོ་དེ་འགགས་མ་ཐག་ཏུ། གང་ལ་རྣམ་པར་སྨིན་པ་མྱོང་བར་འགྱུར་བ། མངོན་པ་དེ་དང་སྐལ་པ་འདྲ་བའི་སེམས་ཀྱི་རྒྱུད་འབྱུང་ངོ༌། །རྒྱལ་པོ་ཆེན་པོ་དེ་ལ་ཆོས་གང་ཡང་འཇིག་རྟེན་འདི་ནས་ཕ་རོལ་ཏུ་ཕྱིན་པ་ཡང་མེད་ལ། འཆི་འཕོ་
དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་གང་ཐ་མ་འགགས་པ་དེ་ནི་འཆི་འཕོ་ཞེས་བྱ། གང་རྣམ་པར་ཤེས་པ་དང་པོ་འབྱུང་བ་ད་ནི་སྐྱེ་བ་ཞེས་བྱའོ། །རྒྱལ་པོ་ཆེན་པོ་རྣམ་པར་ཤེས་པ་ཐ་མ་འགག་པའི་ཚེ་ཡང་གང་དུ་ཡང་མི་འགྲོའི། །རྣམ་པར་ཤེས་པ་དང་པོ་སྐྱེ་བའི་ཚེ་ཡང་གང་ནས་ཀྱང་མི་འོང་ངོ༌། །དེ་ཅིའི་ཕྱིར་ཞེ་ན། ངོ་བོ་ཉིད་དང་བྲལ་བའི་ཕྱིར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མ་ནི་ཐ་མས་སྟོང༌། འཆི་འཕོ་ནི་འཆི་འཕོས་སྟོང༌། ལས་ནི་ལས་ཀྱིས་སྟོང༌། རྣམ་པར་ཤེས་པ་དང་པོ་ནི་དང་པོས་སྟོང༌། སྐྱེ་བ་ནི་སྐྱེ་བས་སྟོད་ལ། ལས་རྣམས་ཆུད་མི་ཟ་བར་མངོན་པ་ཡང་ཡོད་དོ། །རྒྱལ་པོ་ཆེན་པོ་རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པར་སེམས་ཀྱི་རྒྱུད་འབྱུང་ངོ༌། །འཕགས་པ་རྨད་དུ་བྱུང་བའི་ཆོས་ཀྱི་རྣམ་གྲངས་ལས། ཀུན་དགའ་བོ་སྟོད་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོད་དེ། དེ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་རིན་པོ་ཆེ་སྣ་བདུན་གྱི་རང་བཞིན་དུ་བྱས་ཏེ། རྒྱུན་དུ་ཞུགས་པ་ནས་རང་སངས་རྒྱས་དང༌། ཕྱོགས་བཞིའི་དགེ་འདུན་ལ་ཕུལ་བ་བས། གང་གིས་དེ་བཞིན་གཤེགས་པ་མྱ་ངན་ལས་འདས་པའི་མཆོད་རྟེན་བརྩེགས་པ་ལས་སྐྱུ་རུ་རའི་འབྲས་བུ་ཙམ་བྱས་ལ། ཁབ་ཙམ་གྱི་སྲོག་ཤིང་བཙུགས་ཏེ། རྒྱ་ཤུག་གི་ལོ་མ་ཙམ་གྱི་གདུགས་གསོལ་ནས་ནས་འབྲུ་ཙམ་གྱི་སྐུ་གཟུགས་བྱས་ལ། ཡུངས་འབྲུ་ཙམ་གྱི་རིང་བསྲེལ་བཅུག་ན་དེ་ནི་དེ་བས་ཆེས་བསོད་ནམས་ཆེའོ་ཞེས་ང་སྨྲའོ། །འཕགས་པ་བྲམ་ཟེ་མོ་དཔལ་གྱིས་ཞུས་པ་ལས། དཔལ་ལྡན་མ་མ་རིག་པ་ནི་ཡང་དག་པ་མ་ཡིན་པའི་རྣམ་པར་འབྱུང་གི་ཡང་དག་པའི་རྣམ་པ་ནི་མ་ཡིན་ནོ། །མ་རིག་པ་ནི་ཕྱིན་ཅི་ལོག་རྣམ་པར་འབྱུང་གི་ཕྱིན་ཅི་ལོག་པའི་རྣམ་པར་སྨིན་པ་ནི་མི་འབྱུང་ངོ༌། །ཤེས་རབ་ཀྱི་ཕ་རོལ་ཏུ་ཕྱིན་པ་ལྔ་བཅུ་པ་ལས། བཀའ་སྩལ་བ། རབ་འབྱོར་ཉན་ཐོས་དང་རང་སངས་རྒྱས་ཀྱིས་ལ་སློབ་པར་འདོད་པས། ཤེས་རབ་ཀྱི་ཕ་རོལ་ཏུ་ཕྱིན་
པ་འདི་མཉན་པར་བྱ། གཟུང་བར་བྱ། བཅད་བར་བྱ། བཀླག་པར་བྱ། ཀུན་ཆུབ་པར་བྱའོ། །དེ་ཅིའི་ཕྱིར་ཞེ་ན། ཕ་རོལ་ཏུ་ཕྱིན་པ་དང༌། བྱང་ཆུབ་ཀྱི་ཕྱོགས་ཐམས་ཅད་དེར་འདུས་པས་སོ། །ཤེས་རབ་ཀྱི་ཕ་རོལ་ཏུ་ཕྱིན་བ་ཀཽ་ཤི་ཀ་ལས། བཀའ་སྩལ་བ། ཀཽ་ཤི་ཀ་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ནི་འདི་ཡིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ནི་གཉིས་སུ་བལྟ་བར་མི་བྱ། གཉིས་མ་ཡིན་པར་ཡང་མ་ཡིན། མཚན་མར་མ་ཡིན་མཚན་མ་མེད་པར་ཡང་མ་ཡིན། བླང་བར་མ་ཡིན། དོར་བར་མ་ཡིན། བསྣན་བར་མ་ཡིན། བསྣན་པ་མེད་པར་མ་ཡིན། ཀུན་ནས་ཉོན་མོངས་པར་མ་ཡིན། ཀུན་ནས་ཉོན་མོངས་པ་མེད་པར་ཡང་མ་ཡིན་པ་ནས་ཡང་དག་པའི་མཐའ་ཡང་མ་ཡིན། ཡང་དག་པའི་མཐའ་མ་ཡིན་པ་ཡང་མ་ཡིན་ནོ། །སྐར་མ་རབ་རིབ་མར་མེ་དང༌། །སྒྱུ་མ་ཟིལ་པ་ཆུ་བུར་དང༌། །མི་ལམ་གློག་དང་སྤྲིན་ལྟ་བུར། །འདུས་བྱས་ཐམས་ཅད་དེ་ལྟར་བལྟ། ན་མོ་བྷ་ག་ཝ་ཏེ་པྲ་ཛྙཱ་པ་ར་མི་ཏ་ཡེ། ཨོཾ་དྷཱི་ཤཱི་ཤྲུ་ཏི་སྨྲྀ་ཏི་གཏི་བི་ཛ་ཡེ་སྭཱ་ཧཱ། འགག་པ་མེད་པ་སྐྱེ་མེད་པ། །རྟག་པ་མེད་ཅིང་ཆད་མེད་ལ། །ཐ་དད་དོན་མིན་དོན་གཅིག་མིན། །འོང་བ་མེད་ཅིང་འགྲོ་མེད་ལ། །སྤྲོས་པ་ཞི་བས་ཞི་བ་ཡིན། །རྟེན་ཅིང་འབྲེལ་འབྱུང་སུས་བསྟན་པ། །རྫོགས་པའི་སངས་རྒྱས་གང་ཡིན་པ། །སྨྲ་མཆོག་དེ་ལ་ཕྱག་འཚལ་ལོ། །འཕགས་པ་ཆོས་བཞི་པ་བསྟན་པ་ལས། ཆོས་བཞིན་དང་ལྡན་ན། སྡིག་པ་བྱས་ཤིང་བསགས་པ་ཟིལ་གྱིས་ནོན་པར་འགྱུར་ཏེ། རྣམ་པར་སུན་འབྱིན་པ་ནི་མི་དགེ་བ་སྤྱོད་པ་ན་དེ་ལ་འགྱོད་པ་མང་བ་འོ། །གཉེན་པོ་སྤྱོད་པ་ནི་མི་དགེ་བ་བྱས་ནས་དགེ་བ་ལ་བརྩོན་པའོ། །སོར་ཆུད་པར་བྱེད་པའི་སྟོབས་ནི་སྡོམ་པ་བླངས་ནས་ཕྱིན་ཆད་མི་བྱེད་པའོ། །རྟེན་གྱི་སྟོབས་ནི་དཀོན་མཆོག་གསུམ་ལ་སྐྱབས་སུ་འགྲོ་བ་དང༌། བྱང་ཆུབ་ཀྱི་སེམས་མི་གཏོང་བའོ། །འཕགས་པ་རྟེན་ཅིང་འབྲེལ་པར་འབྱུང་བ་ལས། ཆོས་གང་རྒྱུས་བྱུང་དེ་དག་གི །རྒྱུ་དང་དེ་འགོག་གང་ཡིན་པའང༌། །དེ་བཞིན་གཤེགས་པས་བཀའ་སྩལ་ཏོ། །དེ་སྐད་གསུང་བ་དགེ་སྦྱོང་ཆེ། །ལ་ལས་མི་ཡོད་པའི་ས་ཕྱོགས་སུ་མཆོད་རྟེན་བྱས་ཏེ་
སྙིང་པོ་འདི་བཅུག་ན་ཤི་འཕོས་ནས་ཚངས་པའི་འཇིག་རྟེན་དུ་སྐྱེའོ། །དེ་ནས་ཤི་འཕོས་ནས་གནས་གཙང་མར་སྐྱེའོ། །འཕགས་པ་ཆོས་བཞི་པོ་ལས། བྱང་ཆུབ་སེམས་དཔའ་ཆོས་བཞི་སྲོག་གི་ཕྱིར་ཡང་ནམ་འཚོའི་བར་དུ་མི་གཏོང་བ་ལ། བྱང་ཆུབ་ཀྱི་སེམས་དང༌། དགེ་བའི་བཤེས་གཉེན་དང༌། བཟོད་པ་དང༌། ངེས་པ་དང༌། དགོན་པར་གནས་པའོ། །འཕགས་པ་བྱམས་པ་ལ་བཀའ་སྩལ་པ། བྱམས་བ་སྟོང་གསུམ་གྱི་སྟོང་ཆེན་པོའི་གང་གཱའི་བྱེ་མ་སྙེད་རིན་པོ་ཆེ་སྣ་བདུན་གྱིས་བཀང་སྟེ། དེ་བཞིན་གཤེགས་པ་ལ་ཕུལ་བ་པས་། གང་གིས་སྙིང་རྗེ་བས་ཚིགས་སུ་བཅད་པ་གཅིག་གཞན་གྱི་རྒྱུད་ལ་བཞག་ན། བསོད་ནམས་འདི་ལ་སྡམས་ཆར་ཡང་མི་ཕོད་དོ། །འཕགས་པ་ཀླུའི་རྒྱལ་པོ་རྒྱ་མཚོས་ཞུས་པ་ལས། མདོ་འདི་བཀླགས་ན་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བཀླགས་པར་འགྱུར། །འཕགས་པ་ཆོས་བཞི་པའི་མདོ་ལས། དགེ་སློང་གིས་ཇི་སྲིད་འཚོའི་བར་དུ་ཡིད་བརྟན་པར་མི་བྱ་བ་བཞི་ལ། བུད་མེད་དང༌། རྒྱལ་པོའི་ཕོ་བྲང་འཁོར་དང༌། བདག་གི་གཟུགས་བཟང་བ་དང༌། དབང་ཕྱུག་པ་ཡོ་བྱད་འབྱོར་པའོ། །འཕགས་པ་རྒྱལ་བའི་བློ་གྲོས་ལས། བསོད་ནམས་འདོད་པས་དེ་བཞིན་གཤེགས་པ་མཆོད་པར་བྱའོ། །ཤེས་རབ་འདོད་པས་མཉན་པ་ལ་བརྩོན་པར་བྱའོ། །ལོངས་སྤྱོད་འདོད་པས་གཏོང་བ་སྤེལ་བར་བྱའོ། །གཟུགས་བཟང་བར་འདོད་པས། བཟོད་པ་བསྒོམ་པར་བྱའོ། །སྤོབས་པ་འདོད་པས་བླ་མ་ལ་གུས་པར་བྱའོ། །གཟུངས་འདོད་པས་མངོན་པའི་ང་རྒྱལ་མེད་པར་བྱའོ། །བདེ་བ་འདོད་པས་སྡིག་པ་སྤང་བར་བྱའོ། །སེམས་ཅན་ལ་བདེ་བར་བྱ་བར་འདོད་པས། བྱང་ཆུབ་ཏུ་སེམས་བསྐྱེད་པར་བྱའོ། །སྐད་སྙན་པར་འདོད་པས་བདེན་པ་སྨྲ་བར་བྱའོ། །ཡོན་ཏན་འདོད་པས་དགེ་བའི་བཤེས་གཉེན་ལ་བསྟེན་པར་བྱའོ། །ཞི་གནས་འདོད་པས་འདུ་འཛི་མེད་པར་བྱའོ། །ལྷག་མཐོང་མཐོང་བར་འདོད་པས་ཆོས་ལ་སྟོང་པར་བརྟག་པར་བྱའོ། །ཚངས་པའི་འཇིག་རྟེན་འདོད་པས་ཚད་མེད་པ་བསྒོམ་པར་བྱའོ། །ལྷ་དང་མིའི་ཕུན་སུམ་ཚོགས་པར་འདོད་པས་དགེ་བ་བཅུ་བྱའོ། །
མྱ་ངན་ལས་འདའ་བར་འདོད་པས། ཐོས་པ་ལ་བརྩོན་པར་བྱའོ། །ཡོན་ཏན་ཐམས་ཅད་འདོད་པས་དཀོན་མཆོག་གསུམ་ལ་མཆོད་པར་བྱའོ། །འཕགས་པ་སྦྱིན་པའི་ཕན་ཡོན་བསྟན་པ་ལས། སེར་སྣ་སྤང་བའི་ཕྱིར་དད་པས་སྦྱིན་ནོ། །དུས་སུ་སྦྱིན་ནོ། །དེ་བཞིན་གཤེགས་པས་གནང་བའི་རུང་བ་དངོས་པོ་གསུམ་ཡོངས་སུ་དག་པར་སྦྱིན་ནོ། །སེམས་ཀྱི་འཁྲུག་པའི་སྐྱོན་ཐམས་ཅད་ཡོངས་སུ་སྤང་བའི་ཕྱིར་བསྟི་སྟོང་བྱས་ཏེ་སྦྱིན་ནོ། །སྙིང་པོ་མེད་པའི་ལུས་ལས་སྙིང་པོ་བླང་པའི་ཕྱིར་རང་གི་ལག་ནས་སྦྱིན་ནོ། །དྷརྨ་འདི་ལས་སྦྱིན་པ་རེ་རེའི་རྣམ་པར་སྨིན་པ་ངེས་པ་རྒྱས་པ་འབྱུང༌། འཕགས་པ་མི་རྟག་པ་ཉིད་ཀྱི་མདོ་ལས། ནད་མེད་མི་རྟག་ལང་ཚོ་རྟག་མ་ཡིན། །འབྱོར་བ་མི་རྟག་སྲོག་ཀྱང་རྟག་མ་ཡིན། །སྐྱེ་བོ་མི་རྟག་ཉིད་ཀྱིས་ཉེན་གྱུར་ན། །འདོད་པས་ཡོན་ཏན་དགའ་བ་ཇི་ལྟར་སྐྱེ། །འཕགས་པ་ཀུན་དུ་རྒྱུ་སེན་རིངས་ཀྱིས་ཞུས་པ་ལས། བཅོམ་ལྡན་འདས་ལ་ཀུན་དུ་རྒྱུ་སེན་རིངས་ཀྱིས་གསོལ་པ། བདག་ཇི་སྲིད་འཚོའི་བར་དུ་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་མཆིའོ། །ཇི་སྲིད་འཚོའི་བར་དུ་ཡན་ལག་བརྒྱད་པའི་བསྙེན་ཏེ་གནས་པ་ལ་ཉེ་བར་གནས་པར་བྱའོ། །སྲོག་ཆགས་ཐམས་ཅད་གསོད་དང་གཞན་ནོར་རྐུ་དང་མི་ཚངས་སྤྱོད་པ་དང༌། །གང་གི་དབྱེ་བ་བརྫུན་དང་མྱོས་སྐྱེད་བཏུང་དང་དུས་མིན་ཟ་བ་དང༌། །ཕྲེང་བ་ཁ་དོག་གླུ་གར་རྩེ་འཇོ་མལ་སྟན་མཐོན་པོ་རྣམས། །དེང་ནས་བདག་གིས་སྤངས་ཏེ་ཡོན་ཏན་བརྒྱད་ཀྱིས་དགྲ་བཅོམ་ཚུལ་དུ་བགྱི། །དེ་བཞིན་དུ་ལན་གཉིས་ལན་གསུམ་དུའོ། །བདག་གིས་གསོ་སྦྱོང་གི་ཚུལ་ཁྲིམས་ཀྱི་སྡོམ་པ་ཡང་དག་པར་འཛིན་པ་འདི་སེམས་ཀྱི་རྒྱན་དང༌། སེམས་ཀྱི་ཡོ་བྱད་དང༌། བྱང་ཆུབ་ཀྱི་ཚོགས་སུ་འགྱུར་བ་དང༌། དོན་གྱི་དམ་པ་ཐམས་ཅད་མཁྱེན་པའི་ཡེ་ཤེས་དང༌། མྱ་ངན་ལས་འདས་པའི་བདེ་བ་བླ་ན་མེད་པ་ལ་གནས་པར་གྱུར་ཅིག །བཀའ་སྩལ་པ། བྲམ་ཟེ་ཆེན་པོ་ཁྱོད་དེ་ལྟར་བྱེད་པ་ལེགས་སོ་ལེགས་སོ། །འཕགས་པ་སེང་གེས་ཞུས་པ་ལས། སྐྱེ་བ་ཀུན་དུ་བྱང་ཆུབ་སེམས། །རྨི་ལམ་ན་ཡང་སེམས་དེ་ནི། །འདོར་མི་
འགྱུར་ན་མ་ཉལ་ཚེ། །སྨོས་ཅི་འཚལ་བར་གང་གིས་འགྱུར། །གྲོང་དང་གྲོང་ཁྱེར་རྣམས་སུ་ཡང༌། །གང་དུ་གནས་པའི་ཡུལ་རྣམས་སུ། །བྱང་ཆུབ་ལ་ནི་ཡང་དག་འཛུད། །དེས་ན་སེམས་འདོར་མི་འགྱུར་རོ། །འདིར་ནི་སྙིང་པོ་ལྔ་བྱིན་ཞིང༌། །སྐྲག་ལ་མི་འཇིགས་བྱིན་ན་ནི། །གང་དང་གང་དུ་སྐྱེས་པར་ཡང༌། །དེས་ནི་སྟོབས་ནི་ཆེར་འགྱུར་ཏེ། །རྟག་ཏུ་མཐུ་ཡིས་འཕགས་པ་དང༌། །བདུད་རྣམས་བྱེ་བས་མི་ཚུགས་སོ། །འཕགས་པ་འཇམ་དཔལ་གྱིས་བསྟན་པ་ལས། འཇམ་དཔལ་ཅི་ལ་དམིགས་ནས་དེ་བཞིན་གཤེགས་པ་ལ་མཆོད་པ་བགྱི། ལྷའི་བུ་དམིགས་པ་བཞི་སྟེ་གང་ཞེན། བྱང་ཆུབ་ཀྱི་སེམས་དང༌། སེམས་ཅན་ཐམས་ཅད་ཐར་བར་བྱ་བ་དང༌། དཀོན་མཆོག་གི་གདུང་རྒྱུད་མི་གཅད་པ་དང༌། སངས་རྒྱས་ཀྱི་ཞིང་ཡོངས་སུ་དག་པར་བྱ་བ་ལ་དམིགས་ནས་སོ། །འཕགས་པ་རྡོ་རྗེ་སྙིང་པོའི་གཟུངས་ལས། བཀའ་སྩལ་པ། འཇམ་དཔལ་འདི་ཇི་སྙམ་དུ་སེམས། སེམས་ཅན་དམྱལ་བ་རང་གི་རྟོག་པ་ལས་བྱུང་ངམ། འོན་ཏེ་ངོ་བོ་ཉིད་ལས་བྱུང༌། འཇམ་དཔལ་གྱིས་གསོལ་པ། བཅོམ་ལྡན་འདས་བྱིས་པ་སོ་སོའི་སྐྱེ་བོ་རང་གི་རྟོག་པས་སེམས་ཅན་དམྱལ་བ་དང༌། དུད་འགྲོ་དང་གཤིན་རྗེའི་འཇིག་རྟེན་དུ་རིག་སྟེ། དེ་དག་མ་མཆིས་པ་ལ་སྒྲོ་བཏགས་པའི་སླད་དུ་ངན་སོང་གསུམ་དུ་གནོད་པ་ཚོར་ཞིང་སྡུག་བསྔལ་མྱོང་ལགས་སོ། །བཅོམ་ལྡན་འདས་བདག་གིས་སེམས་ཅན་དམྱལ་བ་ཇི་ལྟར་མི་མཐོང་བ་དེ་བཞིན་དུ་སེམས་ཅན་དམྱལ་བ་པ་རྣམས་མི་མཐོང་སྟེ། སེམས་ཅན་དམྱལ་བའི་སྡུག་བསྔལ་ཡང་མ་མཆིས་སོ། །བཅོམ་ལྡན་འདས་འདི་ལྟ་སྟེ་དཔེར་བགྱི་ན་མི་ལ་ལ་ཞིག་གཉིད་ལོག་པའི་རྨི་ལམ་ན་བདག་སེམས་ཅན་དམྱལ་བར་ལྟུང་བ་སྙམ་དུ་རིག་ནས་དེ་དེན་ལྕགས་ཀྱི་བུམ་པ་རབ་ཏུ་ཁྲོས་པ་ཤིན་ཏུ་འབར་བར་བདག་ཉིད་བཅུག་པར་ཡང་འདུ་ཤེས་པར་འགྱུར་རོ། །དེས་དེ་ན་སྡུག་བསྔལ་གྱི་ཚོང་བ་དྲག་ཅིང་མི་བཟད་ལ་བརྣག་པར་དཀའ་ཞིང་ཡིད་དུ་མི་འོང་བ་མྱོང་བར་འགྱུར། དེས་དེ་ན་ཡིད་ཀྱི་གདུང་བ་མྱོང་བར་འགྱུར། དེས་དེ་ན་སྐྲག་པར་འགྱུར། ད་ངང་བར་འགྱུར། ཀུན་དུ་དངང་བར་འགྱུར་རོ་ཞེས་པ་
ནས་དེ་འདི་ལྟར་བདག་ནི་གཉིད་ཀྱིས་ལོག་པར་གྱུར་ཏེ་ཡང་དག་པ་མ་ཡིན་པ་འདི་བདག་གིས་ཀུན་དུ་བརྟགས་སོ་སྙམ་དུ་དྲན་པ་སྐྱེ་བར་འགྱུར་ཞིང༌། སླར་ཡང་ཡིད་བདེ་བ་ཐོབ་པར་འགྱུར་ལགས་སོ་ཞེས་གསུངས་སོ། །འཕགས་པ་སྣང་བ་བསམ་གྱིས་མི་ཁྱབ་པ་བསྟན་པ་ལས། ཆོས་བཞི་དང་ལྡན་ན་མྱུར་དུ་བཟོད་པ་འཐོབ་ཅིང་བླ་ན་མེད་པའི་བྱང་ཆུབ་མངོན་པར་འཚང་རྒྱ་སྟེ། བཞི་ནི་སངས་རྒྱས་ལ་ཆོས་ཉིད་དུ་མཐོང་གི །གཟུགས་སུ་མ་ཡིན་པ་དང༌། ཆོས་ལ་འདོད་ཆགས་དང་བྲལ་བར་མཐོང་གི །ཡི་གེ་དང་ངེས་པའི་ཚིག་ཏུ་མ་ཡིན་པ་དང༌། དགེ་འདུན་ལ་འདུས་བྱས་སུ་མཐོང་གི །ཚོགས་སུ་མ་ཡིན་པ་དང༌། ཤེས་རབ་ཀྱི་མིག་ཡོངས་སུ་དག་པར་འགྱུར་བའོ། །འཕགས་པ་སངས་རྒྱས་བཅུ་པ་ལས། གང་གིས་མཚན་བཟུང་ན་མྱུར་དུ་འཚང་རྒྱ་བའི་སངས་རྒྱས་བཅུ་ལ། ཤར་ཕྱོགས་ན་འཇིག་རྟེན་གྱི་ཁམས་ཡོན་ཏན་ཐམས་ཅད་རྣམ་པར་དག་པ་ན་སངས་རྒྱས་ཡོན་ཏན་བསྐལ་པ་དཔག་ཏུ་མེད་པ་ལས་འདས་པ་དང༌། ལྷོ་ཕྱོགས་ན་འཇིག་རྟེན་གྱི་ཁམས་ཡོན་ཏན་རིན་ཆེན་བཀོད་པ་ན་སངས་རྒྱས་ཡོན་ཏན་བཀོད་པའི་དཔལ་གཟི་བརྗིད་ཀྱི་ཕུང་པོའི་བསྐལ་པ་དང༌། ནུབ་ཕྱོགས་ན་འཇིག་རྟེན་སྦྱོར་བས་མུན་པ་ཐམས་ཅད་བྲལ་བ་ན་སངས་རྒྱས་ཆོས་ཐམས་ཅད་ལ་སྤོབས་པ་བཀོད་པའི་དཔལ་དང༌། བྱང་ཕྱོགས་ན་འཇིག་རྟེན་མུན་པ་དང་རྡུལ་དང་བྲལ་བ་ན་སྤོབས་པ་དཔག་ཏུ་མེད་པ་ཡང་དག་པར་སྤྱོད་པ་དང༌། ཤར་ལྷོ་ན་འཇིག་རྟེན་ཡུན་རིང་པོར་བདེ་བ་བཀོད་པ་ན་སྤྲིན་གྱི་འབྲུག་སྒྲ་སྒྲ་དབྱངས་བསྟོད་པ་དང༌། ལྷོ་ནུབ་ན་འཇིག་རྟེན་ཡོན་ཏན་དཔག་ཏུ་མེད་པ་བཀོད་པ་ན་སངས་རྒྱས་ཉི་མའི་འོད་དམ་པ་དཔལ་གྱི་གཟི་བརྗིད་འབྱུང་བ་དང༌། ནུབ་བྱང་ན་འཇིག་རྟེན་ངན་སོང་སྤངས་པ་ན་སངས་རྒྱས་རྣམ་པ་མང་པོའི་གཟི་བརྗིད་ཀྱི་རྒྱལ་པོ་དཔལ་འབྱུང་བ་དང༌། བྱང་ཤར་ན་འཇིག་རྟེན་མྱ་ངན་གྱི་གནོད་པ་ཐམས་ཅད་དང་བྲལ་བ་ན་སངས་རྒྱས་བསྐལ་པ་བྱེ་བ་གྲངས་མེད་པར་ཀུན་དུ་འབྱུང་བ་དང༌། སྟེང་ན་འཇིག་རྟེན་གཟི་བརྗིད་དཔག་ཏུ་མེད་པ་བཀོད་པ་ན། སངས་རྒྱས་དགེ་བ་
གསེར་གྱི་ནམ་མཁའ་ངེས་པར་སྒྲོགས་པ་དཔལ་གྱི་གཟི་བརྗིད་འབྱུང་བ་དང༌། འོག་ན་འཇིག་རྟེན་རྡུལ་ཐམས་ཅད་འདུས་བ་ན་སངས་རྒྱས་ཆོས་ཐམས་ཅད་ཀྱི་ཚུལ་རྣམ་པར་འཕྲུལ་པའི་གཟི་བརྗིད་འབྱུང་བའོ། །དམ་པའི་ཆོས་དྲན་པ་ཉེ་བར་གཞག་པ་ལས། དཔེར་ན་ཆུ་བོའི་རྒྱུན་བར་ཆད་མེད་པར་རྟག་ཏུ་འབབ་པ་བཞིན་དུ་སྐྱེས་བུ་དེ་དག་གཉིད་ལོག་གམ། མྱོས་སམ་རབ་ཏུ་མྱོས་པའི་འཇུག་པ་ན་ཡང་དེ་བཞིན་ནོ། །དེ་ལྟར་ན་རྣམ་པར་རིག་བྱེད་མ་ཡིན་པའི་གཟུགས་བསྟན་དུ་མེད་པ་ཐོགས་པ་མེད་པར་འདོད་དོ། །གཟུགས་དེ་ཇི་ལྟ་བུ་ཡིན་ཞེ་ན། ལས་ཀྱི་ངོ་བོར་ཡོད་པ་ཉིད་ཡིན་ནོ། །དུས་གསུམ་གྱི་སངས་རྒྱས་ཐམས་ཅད་ཀྱི་གསུང་རབ་ཡང་དག་པའི་ལམ་སྟོན་པ་ནི་འདི་ལྟ་སྟེ། འདོད་ཆགས་ལ་མི་སྡུག་པའོ། །ཞེ་སྡང་ལ་བྱམས་པའོ། །གཏི་མུག་ལ་རྟེན་ཅིང་འབྲེལ་བར་འབྱུང་བའོ། །འདི་ལྟར་ས་ཆེན་པོའི་ཆོས་བཅུ་ནི་ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་དང༌། འདུན་པ་དང༌། མོས་པ་དང༌། དྲན་པ་དང༌། ཏིང་ངེ་འཛིན་དང༌། ཤེས་རབ་སྟེ། དམིགས་པ་གཅིག་ལ་མཚན་ཉིད་གཞན་དང་གཞན་དུ་འདོད་པ་དེ་དང་འདྲའོ། །མཆོད་རྟེན་ནམ་དགེ་འདུན་གྱི་གཙུག་ལག་ཁང་གི་སྐྱོང་ནུལ་ཉི་མ་འམ། ཆར་པས་ཟད་པ་སླར་འཆོས་ན་ལྷ་ཕྱི་བང་གསུམ་པ་ལུས་དཀར་གྱི་ནང་དུ་སྐྱེ། དེ་ནས་ཤི་འཕོས་ན་ཡང་དེ་དང་རྒྱུ་མཐུན་དཀར་ཤམ་པདྨའི་རྩ་ལག་ལྟ་བུའི་མདོག་སྟོང་ཕྱོགས་དང་རྒྱ་ཡུལ་ལ་སོགས་པར་སྐྱེ་བར་འགྱུར། རྒྱལ་ཆེན་བཞི་རྣམས་ནི་རི་རབ་ཀྱི་ངོས་ལ་འཁོར་རོ། །གཞལ་མེད་ཁང་དང་ལྡན་པ་དེ་དག་ལ་མུ་སྟེགས་ཅན་རྣམས་གཟའ་དང་སྐར་མ་དང༌། རྒྱུ་སྐར་ཡིན་པར་སེམས་ཏེ། དེ་རྣམས་ཀྱི་རགས་པ་བགྲངས་ན་བྱེ་བ་ཕྲག་དྲུག་ཡོད་དོ། །རི་རབ་ཀྱི་ངོས་གང་ལ་ཉི་མ་འཁོར་བའི་ངོས་དེ་དང་དེའི་མིའི་གནས་གང་དུ་རི་རབ་ཀྱི་གྲིབ་མ་འབབ་པ་དེ་ལྟར་མཚན་མོར་འགྱུར་རོ། །བྱང་ཕྱོགས་ན་རླུང་འཁོར་ལོའི་གཟུགས་ཞེས་བྱ་བ་ཡོད་དོ། །བྱང་ཕྱོགས་ཀྱི་སྐར་མ་དེ་དག་འཆར་དུ་ཡང་མི་སྟེར། ནུབ་ཏུ་ཡང་མི་སྟེར་ན་མུ་སྟེགས་ཅན་དེ་
དག་གིས་དེ་མཐོང་ནས་དྲང་སྲོང་བདུན་གྱིས་འཇིག་རྟེན་འཛིན་ཏོ། །བརྒྱ་བྱིན་གྱི་ཁང་པ་བརྩེགས་མ་ལ་བརྒྱ་བྱིན་སྔ་རབས་ཤི་སྟེ་ན་རག་ལ་སོགས་པར་སོང་བའི་མིང་གི་དཀར་ཆག་བྲིས་བ་ནི་ལེགས་འབྱོར་པ་དང༌། ཀུན་དགའ་དང་མི་འཆི་ཞེས་བྱ་བ་ལ་སོགས་སུམ་ཅུ་སྟེ། དེ་མཐོར་ནས་བརྒྱ་བྱིན་སྐྱོ་བ་སྐྱེའོ། །དཀོན་མཆོག་སྤྲིན་ལས། ཇི་ལྟར་ན་བྱང་ཆུབ་སེམས་དཔའ་བྱམས་པ་སྒོམ་པ་མང་བ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་གཅིག་པུར་དབེན་པར་འདུག་སྟེ། ནང་དུ་ཡང་དག་པར་བཞག་ནས་རབ་ཏུ་དབེན་པ་ལ་མངོན་དུ་ཕྱོགས་ཏེ། ཤིན་ཏུ་སྐྱོ་བའི་སེམས་ཀྱིས་ལུས་དྲང་པོ་དང༌། ལུས་བགས་ཀྱིས་ཀློད་པས་སྐྱིལ་མོ་ཀྲུང་བཅས་ནས་དྲན་པ་མངོན་དུ་གཞག་སྟེ། ཕྱི་རོལ་དུ་མ་བྱུང་བའི་སེམས་ཀྱིས་འདི་སྙམ་དུ་སེམས་སོ། །སེམས་ཅན་གང་དག་ཁྲོ་བ་གནོད་སེམས་མང་བ་མི་དགེ་བའི་ལས་བྱེད་པ་རྣམས་དང༌། གང་དག་བདག་ལ་རྒོལ་བ་དང༌། དགྲ་བོ་གཅུགས་མེད་པར་ཤར་གཉེར་བ་རྣམས་བྱུང་ངམ་འབྱུང་ངམ་འབྱུང་བར་འགྱུར་བ་ཡང་རུང་སྟེ། བདག་གིས་དེ་དག་ཐམས་ཅད་ཀྱི་ཁྲོ་བ་དང༌། གནོད་སེམས་རབ་ཏུ་ཞི་བར་བྱ་སྟེ། བྱང་ཆུབ་ཀྱི་སྙིང་པོ་ལ་བཀོད་པར་བྱའོ་སྙམ་མོ། །དེ་ཡང་གང་ཙམ་གྱིས་མ་ཡིན་གྱི་བསམ་པ་ཐག་པས་སེམས་ཏེ། དེ་ལྟར་ན་བྱང་ཆུབ་སེམས་དཔའ་བྱམས་པ་བསྒོམ་པ་མང་བ་ཡིན་ནོ། །བཅོམ་ལྡན་འདས་བསྐལ་བ་གྲངས་མེད་པ་གསུམ་གྱིས་དེ་བཞིན་གཤེགས་པ་རྣམས་ཡང་དག་པར་འགྲུབ་པ་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་ཡུལ་བསྒྲུབ་པར་བྱ་བ་བསམ་གྱིས་མི་ཁྱབ་སྟེ། དེ་བསྐལ་པ་གྲངས་མེད་པ་གསུམ་གྱིས་ཡང་དག་པར་སྒྲུབ་པར་མི་ནུས་ཀྱིས། ནམ་བྱང་ཆུབ་སེམས་དཔས་ཆོས་མཉམ་པ་ཉིད་དུ་ཞུགས་པར་གྱུར་པ་དེའི་ཚེ་ནས་བརྩམས་ཏེ་བསྐལ་པ་བགྲང་བར་བྱའོ། །ཐོག་མའི་སེམས་ནས་བརྩམས་ཏེ་ནི་མ་ཡིན་ནོ། །ཐེག་པ་ཆེན་པོ་ཆོས་མངོན་པའི་མདོ་ལས་འབྱུང་བ་བྱང་ཆུབ་སེམས་དཔའི་ཆོས་བཞི་དང་ལྡན་ན།
རྣམ་པར་རིག་པ་ཐམས་ཅད་ཀྱི་དོན་མེད་པར་ཁོང་དུ་ཆུད་པར་འགྱུར་ཏེ། རྣམ་པར་ཤེས་པ་མི་མཐུན་པའི་རྒྱུ་མཚན་ཉིད་ཤེས་པ་ནི། འདི་ལྟ་སྟེ། ཡི་དྭགས་དང༌། དུད་འགྲོ་དང༌། མི་དང་ལྷ་རྣམས་ཀྱི་དངོས་པོ་གཅིག་ལ་རྣམ་པར་རིག་པ་ཐ་དད་པར་མཐོང་བ་ལྟ་བུ་དང༌། དམིགས་པ་མེད་པའི་རྣམ་པར་རིག་པ་དམིགས་པ་ནི། འདི་ལྟ་སྟེ། འདས་པ་དང༌། མ་འོངས་པ་དང༌། རྨི་ལམ་དང༌། གཟུགས་བརྙན་དམིགས་པ་ལྟ་བུ་དང༌། ཕྲད་པ་མེད་པར་ཕྱིན་ཅི་ལོག་མེད་པར་འགྱུར་བ་ཤེས་པས་ནི་བདེན་པའི་དོན་ལ་དམིགས་པའི་རྣམ་པར་ཤེས་པ་འབད་པ་མེད་པར་བདེན་པར་ཤེས་པའི་ཕྱིར་ཕྱིན་ཅི་ལོག་མེད་པར་འགྱུར་བ་དང༌། ཤེས་པ་རྣམ་པ་གསུམ་པ་རྗེས་སུ་མཐུན་པའི་ཤེས་པས་ནི་འདི་ལྟར་བྱང་ཆུབ་སེམས་དཔའ་དང༌། བསམ་གཏན་པ་སེམས་ལ་དབང་ཐོབ་པ་རྣམས་མོས་པའི་དབང་གིས་དེ་ལྟར་དོན་དེ་དག་སྣང་བ་དང༌། ཞི་གནས་ཐོབ་པའི་རྣལ་འབྱོར་པ་ཆོས་ལ་ལྷག་མཐོང་ལ་བརྩོན་པ་རྣམས་ལ་ཡིད་ལ་བྱེད་བཙམ་དུ་དོན་སྣང་བ་དང༌། རྣམ་པར་མི་རྟོག་པའི་ཡེ་ཤེས་ཐོབ་སྟེ། དེ་ལ་གནས་པ་རྣམས་ལ་དོན་ཐམས་ཅད་མི་སྣང་ངོ༌། །དགོངས་པ་ངེས་པར་འགྲེལ་པ་ལས། འཇམ་དཔལ་འདི་ནི་དེ་བཞིན་གཤེགས་པའི་བྱ་བ་སྒྲུབ་པ་ངེས་པའི་དོན་དུ་བསྟན་པ་ཞེས་བྱ་བར་ཟུང་ཤིག །བཅོམ་ལྡན་འདས་རྣམ་པར་ལྟ་བའི་ཏིང་ངེ་འཛིན་གྱི་སྤྱོད་ཡུལ་གྱི་གཟུགས་བརྙན་གང་ལགས་པ་དེ། སེམས་ལས་ཐ་དད་པ་ཞེས་བགྱི་འམ་ཐ་དད་པ་མ་ལགས་ཞེས་བགྱི་བྱམས་པ་ཐ་དད་པ་མ་ཡིན་ཞེས་བྱའོ། །ཅིའི་ཕྱིར་ཐ་དད་པ་མ་ཡིན་ཞེ་ན། གཟུགས་བརྙན་དེ་རྣམ་པར་རིག་པ་ཙམ་དུ་ཟད་པའི་ཕྱིར་ཏེ། བྱམས་པ་རྣམ་པར་ཤེས་པ་ནི་དམིགས་པ་རྣམ་པར་རིག་པ་ཙམ་གྱིས་ཕྱེ་བ་མ་ཡིན་ནོ་ཞེས་ངས་བཤད་དོ། །བཅོམ་ལྡན་འདས་ཏིང་ངེ་འཛིན་གྱི་སྤྱོད་ཡུལ་གཟུགས་བརྙན་དེ་སེམས་ལས་ཐ་དད་པ་མ་ལགས་ན་སེམས་དེ་ཉིད་ཀྱིས་སེམས་དེ་ཉིད་ལ་ཇི་ལྟར་རྟོག་པར་བགྱིད། བཀའ་སྩལ་པ། བྱམས་པ་ཆོས་གང་ལ་ཡང་རྟོག་པར་མི་བྱེད་མོད་ཀྱི། འོན་ཀྱང་དེ་ལྟར་སྐྱེས་པའི་སེམས་
དེ་ནི་དེ་ལྟར་སྣང་ངོ༌། །བྱམས་པ་འདི་ལྟ་སྟེ། མེ་ལོང་གི་དཀྱིལ་འཁོར་ཤིན་ཏུ་དག་པ་ལ་གཟུགས་ཀྱིས་རྐྱེན་བྱས་ཏེ་གཟུགས་ཉིད་མཐོང་ཡང་གཟུགས་བརྙན་མཐོང་ངོ་སྙམ་དུ་སེམས་ཏེ། དེ་ལ་ནི་གཟུགས་དེ་དང་གཟུགས་བརྙེན་སྣང་བ་དེ་དོན་ཐ་དད་པར་སྣང་བོ། །དེ་བཞིན་དུ་དེ་ལྟར་སྐྱེས་པའི་སེམས་དེ་ཡང་ཏིང་ངེ་འཛིན་གྱི་གཟུགས་བརྙན་ཞེས་བྱ་བ་དང་དོན་ཐ་དད་པར་སྣང་ངོ༌། །བཅོམ་ལྡན་འདས་སེམས་ཅན་རྣམས་ཀྱི་གཟུགས་བརྙན་རང་བཞིན་དུ་གནས་པ་གཟུགས་ལ་སོགས་པ་གང་ལགས་པ་དེ་ཡང༌། སེམས་དང་ཐ་དད་པ་མ་ལགས་པ་ཞེས་བགྱི་འམ། བྱམས་པ་ཐ་དད་པ་ནི་མ་ཡིན་ཏེ། བྱིས་པ་ཕྱིན་ཅི་ལོག་གི་བློ་ཅན་རྣམས་ཀྱིས་གཟུགས་བརྙན་དེ་དག་ལ་རྣམ་པར་རིག་པ་ཙམ་དེ་ཡང་དག་པ་ཇི་ལྟ་བ་བཞིན་མི་ཤེས་པས་ཕྱིན་ཅི་ལོག་ཏུ་སེམས་སོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ་ལས། བཀའ་སྩལ་པ། བྱམས་པ་འདུ་བྱེད་ཀྱི་མཚན་མའི་དངོས་པོ་ལ་འདི་ལྟར་གཟུགས་ཞེས་བྱ་བ་ནས། སངས་རྒྱས་ཀྱི་ཆོས་རྣམས་ཞེས་བྱ་བའི་བར་དུ་མིང་དུ་གློ་བུར་དུ་བཏགས་པ་དེ་རྣམ་པར་རྟོག་པ་ཙམ་དུ་མ་ཟད་དམ། གསོལ་པ། རྣམ་པར་རྟོག་པ་ཙམ་ཉིད་དོ། །ཡི་གེ་མེད་པའི་ཟ་མ་ཏོག་རྣམ་པར་སྣང་མཛད་ཀྱི་སྙིང་པོ་ལས། རིགས་ཀྱི་བུ་གང་བྱང་ཆུབ་སེམས་དཔའི་རྟག་ཏུ་བསྲུང་བར་བྱ་བའི་ཆོས་ནི་གཅིག་སྟེ་གང་ཞེན། གང་བདག་མི་འདོད་པ་དེ་གཞན་ལ་མི་བྱའོ། །ཆོས་གཅིག་པུ་དེ་བསྲུངས་ན་བྱང་ཆུབ་སེམས་དཔའི་བསླབ་པའི་གཞི་ཐམས་ཅད་བསྲུངས་པར་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ་གང་བདག་གི་སྲོག་ཕངས་པར་འཛིན་པ་དེས་སྲོག་མི་གཅོད་དོ། །གང་བདག་གིས་ནོར་ཕངས་པ་དེ་མ་བྱིན་པར་མི་ལེན་ཏེ། གང་བདག་གི་ཆུང་མ་ཕངས་པར་འཛིན་པ་དེ་གཞན་གྱི་ཆུང་མའི་གན་དུ་མི་འགྲོ་བའོ། །རིགས་ཀྱི་བུ་དེ་ལ་སོགས་པ་གང་ལ་ལ་ཞིག་འདི་སྙམ་དུ་དེ་བཞིན་གཤེགས་པའི་བཀའ་བཞིན་དུ་བྱའོ་སྙམ་དུ་སེམས་པ་དེས་ཆོས་གཅིག་པུ་འདི་བསྲུང་བར་བྱའོ་ཞེས་བཤད་དོ། །དི་ཅིའི་ཕྱིར་ཞེ་ན། རིགས་ཀྱི་བུ་གང་ལ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་
གཉེར་བ་དེ་ཐམས་ཅད་ནི་རང་གི་བདེ་བའི་རྒྱུར་དོན་དུ་གཉེར་གྱི། སུ་ཡང་བདག་སྡུག་བསྔལ་བར་མི་འདོད། འགྲོ་བ་རྣམས་ནི་བདེ་བ་འདོད། །ཅེས་བྱ་བའི་ཐ་ཚིག་སྟེ། གང་བྱེད་ཅག་མི་འདོད་པ་དེ་གཞན་དག་ལམ་བྱེད་ཅིག་ཅེས་ང་སྨྲའོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་གང་རྟག་ཏུ་བསྲུང་བར་བྱ་བའི་ཆོས་གཅིག་གོ །གང་མདོ་འདི་ཉན་པ་དེ་འཆི་བའི་དུས་ཀྱི་ཚེ་ཡང་བྱང་ཆུབ་སེམས་དཔའ་འདི་དག་ཉིད་དང༌། ཐབས་ཅིག་ཏུ་རིའི་རྒྱལ་པོ་བྱ་རྒོད་ཀྱི་ཕུང་པོ་ལ་གནས་པ་མཐོང་བར་འགྱུར་རོ། །རིགས་ཀྱི་བུ་གང་དེ་བཞིན་གཤེགས་པས་མངོན་བར་རྫོགས་པར་སངས་རྒྱས་པའི་ཆོས་གཅིག་པུ་དེ་གང་ཞེས་ཟེར་བ་ནི་ཆོས་གཅིག་བུ་དེ་གང་ཡང་མེད་དོ། །གང་ལ་ཆོས་གང་ཡང་རྟོག་པ་མེད་པ་དེ་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་པའོ། །རིགས་ཀྱི་བུ་ཡང་དེ་བཞིན་གཤེགས་པས་ཆོས་ཐམས་ཅད་མ་སྐྱེས་པར་ཐུགས་སུ་ཆུད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་པ་ལས། དེ་ལ་རྣམ་པར་ཐར་པའི་སྒོ་སྟོང་པ་ཉིད་གང་ཞེ་ན། འདི་ལྟ་སྟེ། ཆོས་ཐམས་ཅད་རང་གི་མཚན་ཉིད་ཀྱིས་སྟོང་པར་སོ་སོར་རྟོག་པའི་སེམས་གནས་པ་རྣམ་པར་ཐར་པའི་སྒོ་སྟོང་པ་ཉིད་དེ། དེ་ནི་རྣམ་པར་ཐར་པའི་སྒོ་སྟོང་པ་ཞེས་བྱའོ། །དེ་ལ་རྣམ་པར་ཐར་བའི་སྒོ་མཚན་མ་མེད་པ་གང་ཞེ་ན། འདི་ལྟ་སྟེ། ཆོས་ཐམས་ཅད་རང་གི་མཚན་ཉིད་ཀྱིས་མཚན་མ་མེད་པར་སོ་སོར་རྟོག་པའི་སེམས་གནས་པ་རྣམ་པར་ཐར་པའི་སྒོ་མཚན་མ་མེད་པ་སྟེ། དེ་ནི་རྣམ་པར་ཐར་པའི་སྒོ་མཚན་མ་མེད་པ་ཞེས་བྱའོ། །དེ་ལ་རྣམ་པར་ཐར་པའི་སྒོ་སྨེན་པ་མེད་པ་གང་ཞེན། འདི་ལྟ་སྟེ། ཆོས་ཐམས་ཅད་མངོན་པར་འདུ་བྱེད་པ་མེད་པར་སོ་སོར་རྟོག་པའི་སེམས་གནས་པའོ། །དེ་ལ་མི་ཤེས་པ་ཀུན་ཤེས་པར་བྱེད་པའི་དབང་པོ་གང་ཞན། གང་ཟག་སློབ་པ་མངོན་པར་རྟོག་སྤར་མ་གྱུར་པ་རྣམས་ཀྱི་དད་པའི་དབང་བ་དང༌། བརྩོན་འགྲུས་དང༌། དྲན་པ་དང༌། ཏིང་ངེ་འཛིན་དང༌། ཤེས་རབ་ཀྱི་དབང་པོ་གང་ཡིན་པའོ། །ཀུན་ཤེས་པའི་དབང་པོ་གང་ཞེ་ན། གང་ཟག་སློབ་པ་མངོན་པར་རྟོགས་པར་མ་གྱུར་པ་རྣམས་ཀྱི་གང་ཡིན་པའོ། །
ཀུན་ཤེས་པ་དང་ལྡན་པའི་དབང་པོ་གང་ཞེ་ན། གང་ཟག་མི་སློབ་པ་འདི་ལྟ་སྟེ། དགྲ་བཅོམ་པ་རྣམས་དང༌། རང་སངས་རྒྱས་རྣམས་དང༌། བྱང་ཆུབ་སེམས་དཔའ་ས་བཅུ་ལ་གནས་པ་དང༌། དེ་བཞིན་གཤེགས་པ་རྣམས་ཀྱི་དད་པའི་དབང་པོ་ལ་སོགས་པ་གང་ཡིན་པའོ། །དེ་ལ་རྟོག་པ་མེད་ལ་དཔྱོད་པ་ཙམ་གྱི་ཏིང་ངེ་འཛིན་གང་ཞེ་ན། བསམ་གཏན་དང་པོ་དང༌། བསམ་གཏན་གཉིས་པའི་བར་གང་ཡིན་པའོ། །དེ་དག་ནི་ཟད་པར་གྱི་སྐྱེ་མཆེད་བཅུ་ཞེས་བྱ་སྟེ། ཐམས་ཅད་སའི་ཁམས་སུ་མོས་པར་བྱེད་དེ། ཐམས་ཅད་ཀྱང་སའི་ཁམས་ཁོ་ནར་ཁམས་གཅིག་ཏུ་འགྱུར་རོ། །ཐམས་ཅད་ཆུད་ནས་རྣམ་པར་ཤེས་པའི་ཁམས་ཀྱི་བར་དུ་མོས་པར་བྱེད་དེ། རྣམ་པར་ཤེས་པ་ཁོ་ནར་ཁམས་གཅིག་པའི་བར་དུ་འགྱུར་རོ། །དེ་ལ་ཐམས་ཅད་ཤེས་པ་ཉིད་གང་ཞེ་ན། ཉན་ཐོས་དང་རང་སངས་རྒྱས་རྣམས་སྐྱེ་མཆེད་བཅུ་གཉིས་པོ་དག་ལ་གང་ཟག་ལ་བདག་མེད་པར་ཕྱོགས་གཅིག་ཤེས་པ་གང་ཡིན་པ་སྟེ། དེ་ནི་ཐམས་ཅད་ཤེས་པ་ཞེས་བྱའོ། །དེ་ལ་ལམ་གྱི་རྣམ་པ་ཤེས་པ་གང་ཞེ་ན། བྱང་ཆུབ་སེམས་དཔའ་ཐེག་པ་གསུམ་གྱི་ལམ་ཤེས་ཀྱང༌། ཉན་ཐོས་དང༌། རང་སངས་རྒྱས་ཀྱི་ཐེག་པས་དག་པར་མི་སེམས་ཀྱི། བྱང་ཆུབ་སེམས་དཔའི་ལམ་གྱིས་ངེས་པར་འབྱུང་བ་གང་ཡིན་པའོ། །དེ་ལ་ནྱ་གྲོ་དྷ་ལྟར་ཆུ་ཞེང་གབ་པ་ཉིད་ནི་འདི་ཡིན་ཏེ། ཆུར་ཇི་སྲིད་པ་ཞེད་ཡང་དེ་སྲིད་ལ་ཞེད་དུ་ཇི་སྲིད་པར་ཆུར་ཡང་དེ་སྲིད་ཡིན་ནོ། །རོ་བྲོ་བའི་མཆོག་ནི། དེའི་མགུར་དྲང་པོར་མིད་པ་དྲང་ཞིང་མ་ཡོ་ལ་ཐོགས་པ་མེད་པར་མིད་དུ་རུང་བར་འགྱུར་པ་ཡིན་ནོ། །བཀའ་སྩལ་པ། ཤར་དྭ་ཏིའི་བུ་འདི་ཇི་སྙམ་དུ་སེམས། ཅི་ཕུང་པོ་ལྔ་པོ་འདི་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབས་ནས། རྣམ་པ་ཐམས་ཅད་མཁྱེན་པ་ཉིད་དུ་ངེས་པར་འབྱུང་སྙམ་མམ། གསོལ་པ། བཙུན་པ་བཅོམ་ལྡན་འདས་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་འདི་ལྟར་གཟུགས་ནི་སྒྱུ་མ་ལྟ་བུ་ལགས་ཤིང༌། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི་སྒྱུ་མ་ལྟ་བུ་ལགས་ལ། རྣམ་པར་ཤེས་པ་གང་
ལགས་པ་དེ་ནི་དབང་པོ་དྲུག་པོ་ལགས་ལ། དབང་པོ་དྲུག་གང་ལགས་པ་དེ་ནི་ཉེ་བར་ལེན་པའི་ཕུང་པོ་ལྔ་རྣམས་ལགས་པའི་སླད་དུའོ། །འཇིག་ཚོགས་ལ་ལྟ་བ་དང༌། ཐེ་ཚོམ་དང༌། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་སྟེ། །ཀུན་དུ་སྦྱོར་བ་གསུམ་པོ་དེ་དག་སྤངས་པས་རྒྱུན་དུ་ཞུགས་པ་ཞེས་བྱའོ། །དེས་བསྒོམ་པའི་ལམ་ཐོབ་ནས་འདོད་པ་ལ་འདོད་ཆགས་དང༌། གནོད་སེམས་གཉིས་སྲབ་མོར་བྱེད་པར་འགྱུར་ཏེ། དེ་ནི་ལན་ཅིག་ཕྱིར་འོང་བ་ཡིན་ནོ། །དེས་བསྒོམ་པའི་ལམ་བསྒོམས་པ་དེ་ཉིད་ཀྱིས་འདོད་པ་ལ་འདོད་ཆགས་དང༌། གནོད་སེམས་གཉིས་མ་ལུས་པར་སྤོང་བར་འགྱུར་རོ། །དེ་དེ་གཉིས་སྤངས་པས་ཕྱིར་མི་འོང་བ་ཡིན་ནོ། །དེས་བསྒོམ་པའི་ལམ་ཆེར་བསྒོམས་པ་དེ་ཉིད་ཀྱིས་གོང་མའི་ཆ་དང་མཐུན་པ་ལྔ་པོ་འདི་ལྟ་སྟེ། གཟུགས་ཀྱི་འདོད་ཆགས་དང༌། གཟུགས་མེད་པའི་འདོད་ཆགས་དང༌། མ་རིག་པ་དང༌། ང་རྒྱལ་དང༌། རྒོད་པ་སྤངས་པས་དགྲ་བཅོམ་པར་འགྱུར་རོ། །འདི་ལྟ་སྟེ། འདུ་བྱེད་ཐམས་ཅད་ནི་རྟེན་ཅིང་འབྲེལ་བར་འབྱུང་བའོ་ཞེས་རང་སངས་རྒྱས་ཀྱི་ལམ་བསྒོམ་པར་བྱའོ། །གང་དག་ཡང་དག་པའི་སྐྱོན་མེད་པ་ལ་ཞུགས་པ་དེ་དག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་མི་ནུས་སོ། །དེ་ཅིའི་ཕྱིར་ཞེ་ན། དེ་དག་གིས་འཁོར་བའི་ས་མཚམས་བཅད་པའི་ཕྱིར་རོ། །ཚེ་ཟད་པ་དང༌། ཉོན་མོངས་པ་མགོ་མཉམ་དུ་ཟད་པའི་གང་ཟག་ཅེས་བྱ་བར་མི་བྱའོ། །བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་གང་གིས་ན་བྱང་ཆུབ་སེམས་དཔའ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྤོང་ཞིང་དེ་བཞིན་དུ་རྒྱང་རིང་དུ་བྱེད་པའི་རྣམ་གྲངས་ཡོད་དོ། །རབ་འབྱོར་གལ་ཏེ་བྱང་ཆུབ་སེམས་དཔའ་ཆེན་པོ་བྱམས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན། འདི་སྙམ་དུ། ཀྱེ་མ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་གསོབ་བོ། །གསོག་གོ །སྙིང་པོ་མེད་པའོ། །ཀྱེ་མ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཡ་མ་བརླའོ་སྙམ་དུ་སེམས་ན། འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྤོང་ཞིང་རྒྱང་རིང་དུ་
བྱེད་པ་ཡིན་ནོ། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས། ས་ཕྱོགས་འདི་ཉིད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སྟོན་པར་འགྱུར་རོ། །བསྐལ་པ་བཟང་པོ་འདི་དེ་བཞིན་གཤེགས་པ་ཐམས་ཅད་ཀྱང་བྱང་ཕྱོགས་འདི་ཉིད་དུ་འབྱུང་བར་འགྱུར་ཞིང༌། ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པར་འགྱུར་རོ། །རབ་འབྱོར་འདི་ལྟ་སྟེ་འཇིག་ཚོགས་ལ་ལྟ་བའི་ནང་ན་ལྟ་བར་གྱུར་པ་དྲུག་ཅུ་རྩ་གཉིས་འདུས་པ་དེ་བཞིན་དུ། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདིར་ཕ་རོལ་ཏུ་ཕྱིན་པ་ཐམས་ཅད་འདུས་སོ། །ཀུན་འབྱུང་བའི་ཆོས་གང་ཅི་ཡང་རུང་བ་དེ་ཐམས་ཅད་འགོག་པའི་ཆོས་ཅན་དུ་ཤེས་པ་ནི་རང་བྱང་ཆུབ་ཡིན་ནོ། །སྐུ་དང་དབུ་ལས་སྐྱེས་པའི་དབུ་སྐྲ་དང་སྦུ་རྣམས་ནི་ཁ་གྱེན་དུ་བལྟས་ཤིང་མཐོན་མཐིང་ལ་ཀུན་ནས་ལྕང་ལོར་འཁྱིལ་བ་འཇམ་ཞིང་སྣུམ་ལ་གཡས་སུ་འཁྱིལ་པ་མཛེས་པར་སྐྱེས་པ་ཡིན་ནོ། །གལ་ཏེ་དེ་བཞིན་གཤེགས་པས་བྱིན་གྱིས་བརླབ་པ་མ་མཛད་དུ་ཟིན་ན་ཟླ་བ་དང༌། ཉི་མ་འདི་གཉིས་ཀྱང་འཇིག་རྟེན་ན་ཡོད་པར་མི་འགྱུར། ཟླ་བ་གཅིག་དང༌། ཟླ་ཕྱེད་དང༌། དུས་དང་ལོ་ཁྱུད་ཀོར་རྣམས་ཀྱང་འཇིག་རྟེན་ན་སྣང་བར་མི་འགྱུར་རོ། །ཆོས་འདི་དག་ཐམས་ཅད་ནི་རྟེན་ཅིང་འབྲེལ་བར་འབྱུང་བ་ཕྱིན་ཅི་ལོག་བཞི་ལས་སྐྱེས་པ་དང༌། ལས་ཀྱི་རྣམ་པར་སྨིན་པ་ལས་ཡོངས་སུ་ཟིན་པ་ཡིན་ན། འདི་ལ་ཁྱེད་དངོས་པོ་མེད་པའི་ཆོས་རྣམས་ལ་དངོས་པོར་འདུ་ཤེས་པའི་རྒྱུ་གཞན་གང་ཡིན་ཞེས་སྟོན་པར་བྱེད། བྱང་ཆུབ་སེམས་དཔས་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་མཐོང་ན། འདི་སྙམ་དུ་བདག་གི་སྦྱིན་གནས་ནི་ཡང་དག་པར་རྫོགས་པའི་བྱང་ཆུབ་ཡིན་གྱི། དུད་འགྲོའི་སྐྱེ་གནས་མ་ཡིན་ནོ་སྙམ་དུ་སེམས་པའི་སེམས་བསྐྱེད་ན་བྱང་ཆུབ་སེམས་དཔའི་ཆོས་མ་ཡིན་ནོ། །དེ་ཅིའི་ཕྱིར་ཞེ་ན། རང་གི་སེམས་ཡོངས་སུ་དག་ན་བྱང་ཆུབ་སེམས་དཔའི་སྦྱིན་གནས་ཡོངས་སུ་དག་པའི་ཕྱིར་ཏེ། བྱང་ཆུབ་སེམས་
དཔའ་སེམས་དཔའ་ཆེན་པོས་ནི་བདག་གིས་སེམས་ཅན་དབུལ་པོ་འདི་དག་སྦྱིན་པས་བསྡུས་ནས། གཞན་གྱི་རྫས་ལ་རྐུ་བར་མི་འགྱུར་རོ་ཞེས་བྱ་བ་ལ་སོགས་པར་སེམས་བསྐྱེད་པར་བྱའོ། །གཟུགས་ཀྱང་ཆོས་ཀྱི་དབྱིངས་མ་ཡིན་ལ། གཟུགས་ལས་གུད་ན་ཡང་ཆོས་ཀྱི་དབྱིངས་མེད་དོ། །འདི་ལྟར་བྱང་ཆུབ་སེམས་དཔས་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་ལ་མ་གཏོགས་པར་གཞན་ལ་བསླབ་པར་མི་བྱ་བའི་ཕྱིར་རོ། །དེ་ཅིའི་ཕྱིར་ཞེ་ན། རབ་འབྱོར་རྣམ་པར་ཐར་པའི་སྒོ་གསུམ་པོ་འདིར་དགེ་བའི་ཆོས་ཐམས་ཅད་འདུས་པའི་ཕྱིར་རོ། །བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཆོས་ཐམས་ཅད་མཚན་མ་མ་མཆིས་པ་ལགས་ཏེ། མཚན་མ་ནི་བཏགས་པ་ཙམ་ཀུན་དུ་རྟོག་པ་ལས་འབྱུང་བ་ལགས་ན། བྱང་ཆུབ་སེམས་དཔའ་ཇི་ལྟར་དགེ་བའི་ཆོས་རྣམས་ཀྱིས་ཁྱད་པར་དུ་འཕགས་པར་འགྱུར་ལགས། བཙུན་པ་བཅོམ་ལྡན་འདས་ཅི་དང་པོ་སེམས་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ངེས་པ་ཞེས་བགྱི་འམ། འོན་ཏེ་སྲིད་པ་ཐ་མ་པ་ལགས། བཅོམ་འདས་ཀྱིས་བཀའ་སྩལ་པ། རབ་འབྱོར་དང་པོ་སེམས་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ངེས་པ་ཡིན་ནོ། །ཕྱིར་མི་ལྡོག་པ་དང༌། སྲིད་པ་ཐ་མ་པ་ཡང་ངེས་པ་ཡིན་ནོ། །ཡང་དག་པ་ཉིད་དུ་ངེས་པའི་སར་ནི་སེམས་ཅན་དམྱལ་བ་རྣམས་སུ་མི་སྐྱེའོ། །འཕགས་པ་ཆོས་ཐམས་ཅད་ཤིན་ཏུ་རྒྱས་པར་བསྡུ་བ་ལས། འཇམ་དཔལ་དམ་པའི་ཆོས་སྤོང་བ་ལས་ཀྱི་སྒྲིབ་པ་ནི་ཕྲ་བའོ། །འཇམ་དཔལ་གང་ལ་ལ་དེ་བཞིན་གཤེགས་པའི་བཀའ་ལ་ལ་ལ་ནི་བཟང་བར་འདུ་ཤེས། ལ་ལ་ནི་ངན་པར་འདུ་ཤེས་པ་དེ་ནི་དམ་པའི་ཆོས་སྤོང་བའོ། །གང་ཆོས་སྤངས་པ་དེས་དེ་བཞིན་གཤེགས་པ་ལ་སྐུར་བ་ཡིན་ནོ། །གནས་འཇོག་ལས། བཀའ་སྩལ་པ། གནས་འཇོག་ཡན་ལག་བརྒྱད་དང་ལྡན་པའི་བསྙེན་གནས་ལ་གནས་པར་འདོད་པས། ནང་པར་ལངས་ནས་དགེ་སློང་ངམ། བྲམ་ཟེ་འམ། གཞན་གང་
ཡང་རུང་པ་ཞིག་གི་དྲུང་དུ་སོང་སྟེ། བླ་གོས་ཕྲག་པ་གཅིག་ཏུ་བྱས་ལ། པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་འདི་སྐད་ཅེས་བརྗོད་པར་བྱའོ། །བདག་མིང་ཆེ་གེ་མོ་ཞེས་བགྱི་བ་འདི་དུས་འདི་ནས་བཟུང་སྟེ། གང་དོ་ནུབ་ཀྱི་མཚན་མོ་འདི་དང༌། སང་ཉི་མ་ཤར་གྱི་བར་དུ་སྲོག་གཅོད་པ་སྤངས་ཤིང་སྲོག་གཅོད་པ་ལས་སླར་ལྡོག་སྟེ། དབྱུག་པ་སྤངས་ཤིང་མཚོན་ཆ་སྤངས་ཏེ། ངོ་ཚ་དང་ལྡན་ཞིང་སྙིང་རྗེ་དང་ལྡན་པར་བགྱིས་ལ། སེམས་ཅན་དང་སྲོག་ཆགས་འབྱུང་པོ་ཐམས་ཅད་ལས་ཆུང་དུ་ན་སྲོག་ཆགས་ཕྲ་མོ་གྲོག་སྦུར་ཡན་ཆད་ཀྱི་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལྡོག་པར་བགྱིའོ། །ཇི་ལྟར་འཕགས་པ་དགྲ་བཅོམ་པ་དག་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལྡོག་ནས་དབྱུག་པ་སྤངས་ཤིང་མཚོན་ཆ་སྤངས་ཏེ། སེམས་ཅན་སྲོག་ཆགས་འབྱུང་པོ་ཐམས་ཅད་ལས་ཆུང་ངུ་ན་སྲོག་ཆགས་ཕྲ་མོ་གྲོག་སྦུར་ཡན་ཆད་ཀྱི་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལྡོག་པ་དེ་བཞིན་དུ་བདག་ཆེ་གེ་མོ་ཡང་དུས་འདི་ནས་བཟུང་སྟེ། དོ་ནུབ་ཀྱི་མཚན་མོ་འདི་དང༌། སང་ཉི་མ་མ་ཤར་གྱི་བར་དུ་སྲོག་གཅོད་པ་སྤངས་ཤིང་སྲོག་གཅོད་པ་ལས་སླར་ལྡོག་སྟེ། དབྱུག་པ་སྤངས་ཤིང་མཚོན་ཆ་སྤངས་ཏེ། ངོ་ཚ་དང་ལྡན་ཞིང་སྙིང་རྗེ་དང་ལྡན་པར་བགྱིས་ལ། སེམས་ཅན་དང༌། སྲོག་ཆགས་འབྱུང་པོ་ཐམས་ཅད་ལས་ཆུང་དུ་ན་སྲོག་ཆགས་ཕྲ་མོ་གྲོག་སྦུར་ཡན་ཆད་ཀྱི་སྲོག་གཅོད་པ་ཡང་སྤངས་ཏེ། སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་པོ། །རྗེས་བུ་སྒྲུབ་པོ། །རྗེས་སུ་བགྱིད་དོ། །ཇི་ལྟར་སྲོག་གཅོད་པ་ལས་སླར་ལྡོག་པ་དེ་བཞིན་དུ་མ་བྱིན་པར་ལེན་པ་དང༌། མི་ཚངས་པར་སྤྱོད་པ་དང༌། བརྫུན་དུ་སྨྲ་བ་དང༌། འབྲུའི་ཆང་དང༌། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་དང༌། གླུ་གར་དང་རོལ་མོའི་སྒྲ་དང༌། ཕྲེང་བ་དང༌། སྤོས་ཉུག་པ་དང༌། རྒྱན་དང༌། ཁ་དོག་འཆང་བ་དང༌། ཁྲི་སྟན་མཐོན་པོ་དང༌། ཁྲི་སྟན་
ཆེན་པོ་དང༌། དུས་མ་ཡིན་པའི་ཟས་སྤངས་ཏེ། དུས་མ་ཡིན་པའི་ཁ་ཟས་ལས་སླར་ལྡོག་པར་བགྱིའོ། །ཇི་ལྟར་འཕགས་པ་དགྲ་བཅོམ་པ་དེ་དག་ཇི་སྲིད་འཚོའི་བར་དུ་དུས་མ་ཡིན་པའི་ཁ་ཟས་སྤངས་ཏེ། དུས་མ་ཡིན་པའི་ཁ་ཟས་ལས་སླར་ལྡོག་པ་དེ་བཞིན་དུ། བདག་ཆེ་གེ་མོ་ཡང་དུས་འདི་ནས་བཟུང་སྟེ། གང་དོ་ནུབ་ཀྱི་མཚན་མོ་འདི་དང་སང་ཉི་མ་ཤར་གྱི་བར་དུ་དུས་མ་ཡིན་པའི་ཁ་ཟས་སྤངས་ཏེ། དུས་མ་ཡིན་པའི་ཁ་ཟས་ལས་སླར་ལྡོག་པར་བགྱིའོ། །ཡན་ལག་བརྒྱད་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་པོ། །རྗེས་སུ་བགྱིད་དོ། །དེ་ལྟར་ལན་གཉིས་ལན་གསུམ་དུའོ། །འདི་ལྟ་སྟེ། ཡུལ་ཆེན་པོ་བཅུ་དྲུག་ལ། ཨང་ག་དང༌། མ་ག་དྷཱ་དང༌། ཀ་ཤི་དང༌། བྲི་ཛི་དང༌། མལ་ལ་དང༌། པུན་ཏྲ་དང༌། སྲག་པ་དང༌། ཀ་མ་དང༌། ཨ་བན་ཏི་དང༌། ཀུ་རུ་དང༌། པད་ཙ་ལ་དང༌། པད་ས་དང༌། དཔའ་སྡེ་དང༌། ཡ་བ་ན་དང༌། ཀམ་པོ་རྣམས་སོ། །ཤེས་རབ་འབུམ་པ་ལས། མ་རིག་པ་ཉིད་རྣམ་པ་ཐམས་ཅད་མཁྱེན་པ་སྟེ། རྣམ་པ་ཐམས་ཅད་མཁྱེན་པ་ཡང་མ་རིག་པའོ། །ལྷའི་བུ་དག་བདག་ཟབ་པའི་ཕྱིར། ཆོས་འདི་ཟབ་པོ། །སེམས་ཅན་དང༌། སྲོག་དང༌། འགྲོ་བ་དང༌། གསོ་བ་དང་སྐྱེས་བུ་ལ་སོགས་པ་ཟབ་པའི་ཕྱིར་ཆོས་འདི་ཟབ་པོ། །གཟུགས་ཟབ་པའི་ཕྱིར་ཆོས་འདི་ཟབ་པོ། །དེ་བཞིན་དུ་ཚོར་བ་ལ་སོགས་པ་ཟབ་པའི་ཕྱིར་ཆོས་འདི་ཟབ་པོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤ་ར་དྭ་ཏིའི་བུ་སེམས་ཅན་གང་ཕྱིན་ཅི་ལོག་ལས་བྱུང་བའི་ལས་ལུས་དང་ངག་དང་ཡིད་ཀྱིས་མངོན་པར་འདུ་བྱེད་པ་དེ་དག་འདི་ལྟ་བུའི་སྐྱེ་མཆེད་མངོན་པར་བསྒྲུབས་ཏེ། ལས་ཀྱི་རྣམ་པར་སྨིན་པ་ཕུང་པོའི་གཞི་ཅན་རྣམ་པར་རྟོག་པ་ལས་བྱུང་བ་ཡོངས་སུ་བཟུང་ཞིང་སེམས་ཅན་དམྱལ་བ་དང་བྱོལ་སོང་གི་སྐྱེ་གནས་དང༌། གཤིན་རྗེའི་འཇིག་རྟེན་དང་ལྷ་དང་མིའི་འགྲོ་བ་མངོན་པར་གྲུབ་པོ། །འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་ཇི་སྙེད་ཅིག་བྱུང་བ་དེ་དག་ཐམས་ཅད་ཀྱང་
རྣམ་པར་རྟོག་པ་མི་མངའ་ཞིང་རྣམ་པར་རྟོག་པ་སྤངས་པར་གྱུར་ཏོ། །མ་འོངས་པ་དང༌། ད་ལྟར་བྱུང་བ་ཡང་དེ་བཞིན་ནོ། །དགའ་བོ་དེ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཁྱོད་ལ་གཏད་དེ། དགའ་བོ་གལ་ཏེ་ཁྱོད་ཀྱིས་དས་གང་ཆོས་ཇི་སྙེད་བཤད་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་མ་གཏོགས་པ་ངས་ཆོས་བསྟན་པ་དེ་དག་ཐམས་ཅད་བཟུང་སྟེ། ཀུན་ཆུབ་པར་བྱས་ནས་དེའི་འོག་ཏུ་ཆུད་གསན་ཏེ་བོར་ཡང་དེ་ཙམ་གྱིས་དགའ་བོ་ཁྱོད་ལ་ངས་སྐྱོན་དུ་མི་གཟུང་ངོ༌། །དགའ་བོ་ཁྱོད་ཀྱིས་གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བཟུང་སྟེ། ཀུན་ཆུབ་པར་བྱས་ནས། དེའི་འོག་ཏུ་ཆུད་གསན་ཏམ། བོར་བར་གྱུར་ན་ནི་དེས་ནི་དགའ་བོ་ཁྱོད་ལ་ངས་སྐྱོན་དུ་གཟུང་ངོ༌། །བདག་སྟོང་པ་ཉིད་དུ་རིག་པར་བྱའོ། །སེམས་ཅན་དང༌། སྲོག་དང། སྐྱེས་བུ་དང༌། གང་ཟག་དང༌། ཤེད་ཅན་དང༌། ཤེད་བདག་དང༌། བྱེད་པ་པོ་ལ་སོགས་པ་སྟོང་པ་ཉིད་ཡིན་པར་རིག་པར་བྱའོ། །བཅོམ་ལྡན་འདས་ཀྱིས་འདི་ནི་ཀུན་དུ་སྦྱོར་བ་གསུམ་སྤངས་པས། རྒྱུན་དུ་ཞུགས་པའི་འབྲས་བུའོ། །འདོད་པའི་འདོད་ཆགས་དང༌། གནོད་སེམས་བསྲབས་པས་ལན་ཅིག་ཕྱིར་འོང་བའི་འབྲས་བུའོ། །འོག་མའི་ཆ་ཅན་གྱི་ཀུན་དུ་སྦྱོར་བ་ལྔ་སྤངས་པས་ཕྱིར་མི་འོང་བའི་འབྲས་བུའོ། །བླ་མའི་ཆ་ཅན་གྱི་ཀུན་དུ་སྦྱོར་བ་ལྔ་སྤངས་པས་དགྲ་བཅོམ་པ་ཉིད་དོ། །གང་ཅི་ཡང་རུང་སྟེ། ཀུན་འབྱུང་བའི་ཆོས་དེ་དག་ཐམས་ཅད་འགོག་པའི་ཆོས་ཅན་དུ་ཤེས་པས་རང་བྱང་ཆུབ་པོ། །བག་ཆགས་ཀྱིས་མཚམས་སྦྱོར་བའི་ཉོན་མོངས་པ་ཐམས་ཅད་སྤངས་པས་ཡང་དག་པར་རྫོགས་པའི་བྱང་ཆུབ་པོ་ཞེས་གསུངས། བྱིས་པ་སོ་སོའི་སྐྱེ་བོ་རྣམས་གང་ལ་ཆགས་པར་གྱུར་པའི་འདུས་བྱས་ཐམས་ཅད་ནི་མིང་ཙམ་སྟེ། དེ་དག་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཚེ། ཐབས་མཁས་པས་མིང་ཐམས་ཅད་ནི་ཡོངས་སུ་རྟོག་པ་ལས་བྱུང་བ་ཡིན་གྱི། ཡོངས་སུ་བརྟགས་པ་དངོས་པོ་མེད་པའི་ངོ་བོ་ཉིད་སྟོང་
པ་ཉིད་ལ་ཁྱེད་ཆགས་པར་མ་བྱེད་ཅིག །ཆོས་ཐམས་ཅད་སྟོང་པ་ལ་མཁས་པ་ནི་ཆགས་པར་མི་བྱེད་དོ་ཞེས་འདོམས་པར་བྱེད་དོ། །བཅོམ་ལྡན་འདས་ཀྱིས་བཀའ་སྩལ་པ་ཤ་ར་དྭ་ཏིའི་བུ་ཅི་གཟུགས་ཀྱི་དངོས་པོ་གང་ལ་བྱིས་པ་སོ་སོའི་སྐྱེ་བོ་རྣམས་མངོན་པར་ཞེན་པར་གྱུར་པ་དེ་ལྟ་བུ་ཡོད་དམ། ཡོད་པར་གྱུར་ཏམ། ཡོད་པར་འགྱུར་རམ། གསོལ་པ། ཕྱིན་ཅི་ལོག་མ་གཏོགས་པར་དེ་ནི་མ་ལགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཚེ། ལྷའི་མིག་མངོན་པར་སྒྲུབ་སྟེ། ལྷའི་མིག་དེས་ཆོས་ཐམས་ཅད་སྟོང་པ་ཉིད་དུ་མཐོང་སྟེ། དེས་ཆོས་དེ་དག་ལ་གནས་ཤིང་ལམ་མངོན་པར་སྒྲུབ་པོ། །ཤ་ར་དྭ་ཏིའི་བུ་ཉན་ཐོས་དང༌། རང་སངས་རྒྱས་ཐམས་ཅད་བདག་ཅག་གིས་ཕ་རོལ་ཏུ་ཕྱིན་པ་དྲུག་ལ་སྤྱད་དེ་སེམས་ཅན་ཡོངས་སུ་སྨིན་པར་བྱས། སངས་རྒྱས་ཀྱི་ཞིང་ཡོངས་སུ་དག་པར་བྱས་ཏེ། དེ་བཞིན་གཤེགས་པའི་སྟོབས་བཅུ་དང༌། མི་འཇིགས་པ་དང༌། སོ་སོ་ཡང་དག་པར་རིག་པ་དང༌། བྱམས་པ་དང༌། སྙིང་རྗེ་ཆེན་པོ་དང༌། སངས་རྒྱས་ཀྱི་ཆོས་མ་འདྲེས་པ་ཡོངས་སུ་རྫོགས་པར་བྱས་ཏེ། སེམས་ཅན་ཚད་མེད་པ་ཡོངས་སུ་མྱ་ངན་ལས་འདའོ་སྙམ་དུ་སེམས་སམ། གསོལ་པ། དེ་ལྟར་སེམས་པ་མ་མཆིས་སོ། །བཀའ་སྩལ་པ། བྱང་ཆུབ་སེམས་དཔའ་ནི་དེ་ལྟར་སེམས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་རྨི་ལམ་དང༌། སྒྱུ་མ་དང༌། སྒྲ་བརྙན་དང༌། མིག་ཡོར་དང༌། ཆུ་ཟླ་དང༌། སྨིག་རྒྱུ་དང༌། སྤྲུལ་པ་ལྟ་བུའི་ཕུང་པོ་ལྔ་པོ་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབས་ཤིང༌། རྣམ་པ་ཐམས་ཅད་མཁྱེན་པ་ཉིད་དུ་འབྱུང་བར་འགྱུར་རམ། གསོལ་པ། བཅོམ་ལྡན་འདས་དེ་ནི་མི་འགྱུར་རོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་འདི་ལྟར་རྨི་ལམ་ནས་སྤྲུལ་པའི་བར་དངོས་པོ་མ་མཆིས་པའི་རང་བཞིན་ཏེ། དངོས་པོ་མ་མཆིས་པའི་རང་བཞིན་དེ་ནི་དམིགས་སུམ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་ནི་འདི་ལྟར་གཟུགས་ནི་རྨི་ལམ་ལྟ་བུ། ཚོར་བ་ནི་རྨི་ལམ་ལྟ་བུ། འདུ་ཤེས་ནི་རྨི་ལམ་ལྟ་བུ། འདུ་བྱེད་ནི་རྨི་ལམ་ལྟ་བུ། རྣམ་པར་ཤེས་པ་ནི་རྨི་ལམ་ལྟ་
བུ་སྟེ། རྣམ་པར་ཤེས་པ་གང་ཡིན་པ་དེ་ནི་དབང་ཕོ་དྲུག་གོ །དེ་ནི་ཕུང་པོ་ལྔའོ། །དེ་དག་ནི་ནང་སྟོང་པ་ཉིད་ཀྱི་ཕྱིར་མི་དམིགས་པ་ནས་དངོས་པོ་མེད་པའི་ངོ་བོ་ཉིད་ཀྱི་ཕྱིར་མི་དམིགས་སོ། །རབ་འབྱོར་གཟུགས་ནས་རྣམ་པར་ཤེས་པའི་བར་ནི་སྒྱུ་མ་དང༌། སྒྲ་བརྙན་དང༌། མིག་ཡོར་དང་ཆུ་ཟླ་དང༌། སྨིག་རྒྱུ་དང༌། སྤྲུལ་པ་ལྟ་བུ་སྟེ། རྣམ་པར་ཤེས་པ་གང་ཡིན་པ་དེ་ནི་དབང་པོ་དྲུག་གོ །དེ་ནི་ཕུང་པོ་ལྔའོ། །དེ་དག་ནི་ནང་སྟོང་པ་ཉིད་ནས་དངོས་པོ་མེད་པའི་ངོ་བོ་ཉིད་ཀྱི་ཕྱིར་མི་དམིགས་སོ། །གསོལ་པ། བཅོམ་ལྡན་འདས་དེ་ལྟར་ལགས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཐག་པ་ལ་གསར་དུ་ཞུགས་པས་འདི་ཐོས་ནས་འཇིགས་ཤིང་སྡང་བ་དང༌། སྐྲག་པར་མི་འགྱུར་ལགས། བཀའ་སྩལ་པ། རབ་འབྱོར་གལ་ཏེ་ཐེག་པ་ལ་གསར་དུ་ཞུགས་པ་ཡིན་ལ། ཐབས་ཀྱང་མི་མཁས་པ་ཞིག་སྟེ། མི་དགེ་བའི་བཤེས་གཉེན་གྱི་ལག་ཏུ་འོངས་ན་དེ་ལྟར་འགྱུར་རོ། །གསོལ་པ། བྱང་ཆུབ་སེམས་དཔའ་སེམས་དཔའ་ཆེན་པོས་བསྟན་པ་འདི་ཐོས་ནས་མི་འཇིགས་མི་སྡང་ལ་སྐྲག་པར་མི་འགྱུར་བའི་ཤེས་རབ་ཀྱི་ཕ་རོལ་ཏུ་ཕྱིན་པ་སྤྱད་པའི་ཐབས་ལ་མཁས་པ་དེ་གང་ལགས། བཀའ་སྩལ་པ། རབ་འབྱོར་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཚེ། རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་སེམས་ཀྱིས་གཟུགས་མི་རྟག་ཅེས་བྱ་བར་རྟོགས་ཏེ་དེ་མི་དམིགས་སོ། །ཚོར་བ་ནས་རྣམ་པར་ཤེས་པའི་བར་མི་རྟག་ཅེས་བྱ་བར་རྟོགས་ཏེ་དེ་མི་དམིགས་སོ། །རབ་འབྱོར་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཐབས་མཁས་པའོ། །གཟུགས་ནས་རྣམ་པར་ཤེས་པའི་བར་སྡུག་བསྔལ་བ་དང༌། བདག་མེད་པ་དང༌། ཞི་བ་དང༌། སྟོང་པ་དང༌། མཚན་མ་མེད་པ་ཞེས་བྱ་བ་ལ་སོགས་ཏེ་མི་དམིགས་སོ། །རབ་འབྱོར་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཐབས་མཁས་པའོ། །གསོལ་པ། བཅོམ་ལྡན་འདས་འདུས་བྱས་ཀྱི་ཆོས་གང་ལགས། བཀའ་སྩལ་པ། རབ་འབྱོར་འདུས་བྱས་ཀྱི་ཆོས་ཞེས་བྱ་བ་ནི་འདོད་པའི་ཁམས་དང༌། གཟུགས་
ཀྱི་ཁམས་དང༌། གཟུགས་མེད་པའི་ཁམས་དང༌། གཞན་ཡང་དེ་མ་ཡིན་པ་དེ་འདུས་བྱས་ཀྱི་ཁམས་སུ་གཏོགས་པའི་ཆོས་རྣམས་དང༌། དྲན་པ་ཉེ་བར་གཞག་པ་ནས་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་བར་ཏེ། དེ་དག་གིས་འདུས་བྱས་ཀྱི་ཆོས་ཤེས་པས་ཆོས་ཞེས་བྱའོ། །གསོལ་པ། འདུས་མ་བྱས་ཀྱི་ཆོས་གང་ལགས། བཀའ་སྩལ་པ། རབ་འབྱོར་འདུས་མ་བྱས་ཀྱི་ཆོས་ཞེས་བྱ་བའི་གཞི་གང་ལ་སྐྱེ་བ་མེད་ཅིང་འཇིག་པ་མེད་པ་དང༌། གནས་པ་ལས་གཞན་དུ་འགྱུར་བ་མེད་པ་སྟེ། འདོད་ཆགས་ཟད་པ། ཞེ་སྡང་ཟད་པ། གཏི་མུག་ཟད་པ། དེ་བཞིན་ཉིད་མ་ནོར་བ། དེ་བཞིན་ཉིད་གཞན་མ་ཡིན་པ། དེ་བཞིན་ཉིད་ཆོས་ཀྱི་དབྱིངས་ཆོས་སྐྱོན་མེད་པ་ཉིད་བསམ་གྱིས་མི་ཁྱབ་པའི་དབྱིངས་ཡང་དག་པའི་མཐའ་སྟེ། དེ་དག་ནི་འདུས་མ་བྱས་ཀྱི་ཆོས་ཞེས་བྱའོ། །དེ་ལ་བྱང་ཆུབ་སེམས་དཔའི་ཟང་ཟིང་མེད་པར་ཆོས་སྦྱིན་པ་རྣམ་པར་འབྱེད་པ་གང་ཞེ་ན། ཆོས་སྟོན་པའི་ཚེ་ཆོས་ཀྱི་སྦྱིན་པ་དེས་ཆུང་དུ་ན་བྱང་ཆུབ་ཏུ་ཡང་རེ་བ་མེད་པ་སྟེ། འདི་ནི་ཟང་ཟིང་མེད་པར་ཆོས་སྦྱིན་པའོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་དགེ་བའི་རྩ་བ་བསྐྱེད་ཅིང་ཡོངས་སུ་བསྔོ་བ་གང་ཞེ་ན། དགེ་བའི་རྩ་བ་གང་གིས་སངས་རྒྱས་ཀྱི་ཞིང་ཡོངས་སུ་དག་པར་བྱེད་ཅིང༌། བདག་དང་གཞན་གྱི་སེམས་ཀྱིས་ཞིང་ཡོངས་སུ་སྦྱོར་བའི་ཚེ། དགེ་བའི་རྩ་བ་དེ་དག་ཡོངས་སུ་བསྔོ་བ་སྟེ། འདི་ནི་བྱང་ཆུབ་སེམས་དཔའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་དགེ་བའི་རྩ་བ་བསྐྱེད་ཅིང་ཡོངས་སུ་བསྔོ་བའོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་སློང་མ་དང་བསྟེན་པ་ཡོངས་སུ་སྤངས་པ་གང་ཞེ་ན། དགེ་སློང་མ་དང་སེ་གོལ་གཏོགས་པ་ཙམ་དུ་ལྷན་ཅིག་མི་གནས་ཤིང༌། དེའི་རྒྱུས་ཡོངས་སུ་སྐོམ་པའི་སེམས་མི་སྐྱེད། དེའི་རྒྱུས་གོས་ཐོབ་པར་མི་བྱེད་པ་འདི་ནི་དགེ་སློང་མ་དང་བསྟེན་པ་ཡོངས་སུ་སྤོང་བའོ། །ཤེས་པར་བྱ་བ་ལྔ་གང་ཞེ་ན། འདས་པ་དང་མ་འོངས་པ་དང་ད་ལྟར་བྱུང་བ་དང༌། བརྗོད་དུ་མེད་པ་དང་འདུས་མ་བྱས་སོ། །བྱང་ཆུབ་སེམས་དཔའི་ལྟ་བ་རྣམ་
པར་བཟློག་པ་གང་ཞེ་ན། ཉན་ཐོས་ཀྱི་ས་དང༌། རང་སངས་རྒྱས་ཀྱིས་རྣམ་པར་སྤོང་བའོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་སངས་རྒྱས་ཀྱི་ཞིང་དེ་དག་ཇི་ལྟར་མཐོང་བ་བཞིན་དུ་ཡོངས་སུ་གྲུབ་པ་གང་ཞེ་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་དབང་ཕྱུག་འཁོར་ལོས་སྒྱུར་བའི་ས་ལ་གནས་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་མཐོང་ཞིང་ངེས་རློམ་སེམས་སུ་མི་བྱེད་དོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་སངས་རྒྱས་ཀྱི་ཞིང་ཡོངས་སུ་སྦྱང་བ་གང་ཞེ་ན། མི་དམིགས་པའི་ཚུལ་གྱིས་སེམས་ཅན་ཐམས་ཅད་ཀྱི་སེམས་སུ་སྦྱོང་བའོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་ཡོན་ཏན་ཐམས་ཅད་ཕུན་སུམ་ཚོགས་པར་ཡོངས་སུ་རྫོགས་པ་གང་ཞེ་ན། སེམས་ཅན་ཡོངས་སུ་སྨིན་པར་བྱ་བ་རྣམ་པར་དག་པ་དང༌། སངས་རྒྱས་ཀྱི་ཞིང་རྣམ་པར་དག་པའོ། །དེ་ལ་བྱང་ཆུབ་སེམས་དཔའ་ས་བཅུ་བ་ལ་གནས་པ་དེ་བཞིན་གཤེགས་པ་ཉིད་ཅེས་བྱ་བ་གང་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་ཕ་རོལ་ཏུ་ཕྱིན་པ་ཐམས་ཅད་དང༌། སྟོབས་བཅུ་ནས་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་བར་དང༌། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་དང༌། བག་ཆགས་ཀྱིས་མཚམས་སྦྱོར་བའི་ཉོན་མོངས་པ་ཐམས་ཅད་སྤངས་པ་དང༌། སྙིང་རྗེ་ཆེན་པོ་དང༌། སངས་རྒྱས་ཀྱི་ཆོས་ཐམས་ཅད་ཀྱང་ཡོངས་སུ་རྫོགས་པར་གྱུར་པ་དག་སྟེ། རབ་འབྱོར་དེ་ལྟར་ན་བྱང་ཆུབ་སེམས་དཔའ་སེམས་དཔའ་ས་བཅུ་བ་ལ་གནས་པ་ནི་དེ་བཞིན་གཤེགས་པ་ཉིད་ཅེས་བྱའོ། །ཆོས་གང་ཡང་མི་དམིགས་མོད་ཀྱི་ཐེག་པ་གསུམ་དུ་རྣམ་པར་བཀོད་པ་ནི་ཡོད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་ཐེག་པ་གསུམ་རྒྱ་ཆེར་བསྟན་ཏེ། གསུམ་གང་ཞེ་ན། འདི་ལྟར་ཉན་ཐོས་ཀྱི་ཐེག་པ་དང༌། རང་སངས་རྒྱས་ཀྱི་ཐེག་པ་དང་ཡང་དག་པར་རྫོགས་པའི་སངས་རྒྱས་ཀྱི་ཐེག་པ་བཤད་དོ། །ངས་འདི་ནས་སངས་རྒྱས་ཀྱི་སྤྱན་སྒྲིབ་པ་མེད་པས། ཤར་ཕྱོགས་ཀྱི་འཇིག་རྟེན་གྱི་ཁམས་གང་གཱའི་ཀླུང་
གི་བྱེ་མ་སྙེད་དག་ན་སེམས་ཅན་ཚད་མེད་གྲངས་མེད་པ། བླ་ན་མེད་པའི་བྱང་ཆུབ་ལ་སྤྱོད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཐབས་མཁས་པ་དང་མི་ལྡན་པས་དེ་ལས་གཅིག་གམ་གཉིས་ཤིག་ཕྱིར་མི་ལྡོག་པའི་ས་ལ་གནས་པར་འགྱུར་གྱི་ཕལ་ཆེར་ཉན་ཐོས་ཀྱི་ས་འམ། རང་སངས་རྒྱས་ཀྱི་ས་ལ་གནས་པར་འགྱུར་བར་མཐོང་ངོ༌། །དེ་ཅིའི་ཕྱིར་ཞེ་ན། ཀཽ་ཤི་ཀ་བླ་ན་མེད་པའི་བྱང་ཆུབ་ནི་ལེ་ལོ་ཅན་བརྩོན་འགྲུས་མེད་པ་བསམ་བ་ཞན་པ། མོས་པ་དམའ་བ། ཤེས་རབ་འཆལ་པ་རྣམས་ཀྱིས་བསྒྲུབ་དཀའོ། །ལྷོ་ཕྱོགས་ལ་སོགས་པ་བཅུར་ཡང་དེ་དང་འདྲ་བར་གཟིགས་སོ། །རབ་འབྱོར་སྐྱེས་བུ་གླེན་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སྐྱོན་གདགས་པར་སེམས་ཤིང༌། ཕྱིར་སྤོང་བར་སེམས་པ་དེ་དག་ཀྱང་ཆོས་འདུལ་བ་འདི་ཉིད་ལ་རབ་ཏུ་འབྱུང་བར་འགྱུར་རོ། །རབ་འབྱོར་དཔར་ན་ཁྱི་ལ་ལ་ཞིག་ཇོ་བོའི་ཟན་ནར་མ་བོར་ཏེ་ལས་མི་ལས་ཟན་བཙལ་བར་སེམས་པ་དང་འདྲ་བར་མ་འོངས་པའི་དུས་ན་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང༌། རིགས་ཀྱི་བུ་མོས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་སངས་རྒྱས་ཀྱི་ཆོས་ཐམས་ཅད་ཀྱི་རྩ་བར་གྱུར་པ་འདི་བོར་ཏེ་ཡལ་ག་དང་ལོ་མ་དང་འདབ་མ་ལྟ་བུའི་མདོ་སྔ་ཉན་ཐོས་དང༌། རང་སངས་རྒྱས་དང་ལྡན་པ་དག་ལ་བརྟེན་པར་སེམས་པ་འབྱུང་སྟེ། རབ་འབྱོར་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱའོ། །རབ་འབྱོར་གཞན་ཡང་མ་འོངས་པའི་དུས་ན་བྱང་ཆུབ་སེམས་དཔའི་ཐེག་པ་པ་ཁེ་དང་བཀུར་སྟིའི་ཕྱིར་ཉན་ཐོས་དང༌། རང་སངས་རྒྱས་དང་ལྡན་པའི་མདོ་སྡེ་ཀུན་ཆུབ་བར་བྱ་བའི་སེམས་པ་འབྱུང་སྟེ། དེ་ཡང་བདུད་ཀྱི་ལས་སོ། །དེ་བཞིན་དུ་གླང་པོ་ཆེ་རྙེད་ལ་རྗེས་བཙལ་བར་སེམས་པ་དང༌། རྒྱ་མཚོ་ཆེན་པོ་ལྟ་བར་འདོད་པ་ལ་བ་གླང་གི་རྗེས་བཙལ་བར་སེམས་ལ། དེ་མཐོང་ནས་འདི་དང་རྒྱ་མཚོ་མཉམ་མམ་མི་མཉམ་སྙམ་ན་མཁས་པ་ཡིན་ནམ། རབ་འབྱོར་གྱིས་གསོལ་པ་མ་ལགས་སོ། །
ཉན་ཐོས་དང་རང་སངས་རྒྱས་དང་ལྡན་པའི་ཡིད་ལ་བྱེད་པ་ཡང་བདུད་ཀྱི་ལས་སུ་འབྱུང༌། དེ་བཞིན་དུ་རྣམ་པར་རྒྱལ་བྱེད་ཀྱི་ཁང་པ་བརྩིག་པར་འདོད་ལ་ཚད་ཉི་ཟླའི་གཞལ་མེད་ཁང་ལས་ལེན་པ་དང༌། འཁོར་ལོས་སྒྱུར་བའི་རྒྱལ་པོ་མཐོང་བར་འདོད་ལ། ཁམས་ཀྱི་རྒྱལ་ཕྲན་མཐོང་ནས་སྙོམ་པ་དང་ཟས་རོ་བརྒྱ་དང་ལྡན་པ་སྤངས་ནས་དྲུག་ཅུ་པ་ཚོལ་བ་དང༌། ནོར་བུ་རིན་ཐང་མེད་པ་རྙེད་ནས་མཆིང་བུ་དང་བསྒྲུན་པར་སེམས་པ་དེ་དག་མི་མཁས་པ་བཞིན་དུ། ཤེས་རབ་ཀྱི་ཕ་རོལ་ཏུ་ཕྱིན་པ་སྤྲངས་ཤིང་ཐེག་པ་དམན་པ་དང་ལྡན་པའི་འདོད་པ་ཡང་བདུད་ཀྱི་ལས་སུ་འབྱུང༌། རྣམ་པ་ཐམས་ཅད་མཁྱེན་པའི་སེམས་ཀྱིས་ཡོངས་སུ་མ་བཟུང་ན་བྱང་ཆུབ་སེམས་དཔའི་ཐེག་པ་པ་དེ་དག་བར་མ་དོར་ཉེ་ཞོར་འགྱུར་བར་ཤེས་པར་བྱའོ། །རབ་འབྱོར་དེ་དག་ཉེ་ཞོར་འབྱུང་བ་གང་ཞེ་ན། འདི་ལྟ་སྟེ། ཉན་ཐོས་ཀྱི་སའམ། རང་སངས་རྒྱས་ཀྱི་སའོ། །བཀའ་སྩལ་པ། རབ་འབྱོར་དེ་བཞིན་གཤེགས་པ་རྣམས་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དགེ་བའི་བཤེས་གཉེན་ནོ། །ཉན་ཐོས་གང་ཕ་རོལ་ཏུ་ཕྱིན་པ་དྲུག་བརྗོད་ཅིང་སྟོན་པ་དང་འཆད་ཅིང་འགྲེལ་པ་དང༌། རྣམ་པར་འབྱེད་ཅིང་གསལ་བར་བྱེད་པ་དང༌། ཡང་དག་པར་སྟོན་པ་དེ་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་ཉིད་ཇི་ལྟ་བུ་ལགས། རབ་འབྱོར་ནམ་མཁའ་ལྟར་ཆགས་པ་མེད་པའི་མཚན་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་མཚན་ཉིད་མེད་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཚན་ཉིད་གང་ཡང་མེད་དོ། །གསོལ་པ། མཚན་ཉིད་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་མཆིས་པའི་མཚན་ཉིད་དེས་ཆོས་ཐམས་ཅད་མཆིས་པར་འགྱུར་བའི་རྣམ་གྲངས་དེ་ལྟ་བུ་མཆིས་སམ། བཀའ་སྩལ་པ།
རབ་འབྱོར་དེ་དེ་བཞིན་ནོ། །དེ་དེ་བཞིན་ཏེ། མཚན་ཉིད་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོད་པའི་མཚན་ཉིད་དེ་ཉིད་ཀྱིས་ཆོས་ཐམས་ཅད་ཡོད་དོ། དེ་ཅིའི་ཕྱིར་ཞེ་ན། རབ་འབྱོར་ཆོས་ཐམས་ཅད་ནི་རང་བཞིན་གྱིས་དབེན་པ་སྟེ། ཆོས་ཐམས་ཅད་ནི་ཆོས་ཐམས་ཅད་ཀྱིས་དབེན་པའོ། །ཆོས་ཐམས་ཅད་ནི་ཆོས་ཐམས་ཅད་ཀྱིས་སྟོང་པའོ། །རབ་འབྱོར་རྣམ་གྲངས་དེས་ནི་འདི་ལྟར་སྟོང་པ་ཉིད་ཀྱི་མཚན་ཉིད་དང༌། དབེན་པའི་མཚན་ཉིད་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོད་པའི་མཚན་ཉིད་དེས་ཆོས་ཐམས་ཅད་ཡོད་དོ། །བཀའ་སྩལ་པ། དགའ་བོ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་གང་ལ་ཉན་ཐོས་ཀྱི་ཐེག་པ་པ་དང༌། རང་སངས་རྒྱས་ཀྱི་ཐེག་པ་པ་དང༌། བྱང་ཆུབ་སེམས་དཔའི་ཐེག་པ་པས་བསླབ་པར་བྱ་བ་དང༌། གང་ལ་ཇི་ལྟར་བསྟན་པ་བཞིན་དུ་བསླབས་པས་རང་རང་གིས་ལ་གནས་པར་འགྱུར་བའི་ཆོས་ཐམས་ཅད་རྒྱ་ཆེར་བསྟན་ཏེ། དགའ་བོ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ནི་ཡི་གེ་ཐམས་ཅད་ལ་འཇུག་པའོ། །བཀའ་སྩལ་པ། རབ་འབྱོར་བག་ཆགས་ཀྱིས་མཚམས་སྦྱོར་བ་ནི་ཉོན་མོངས་པ་ཡང་མ་ཡིན་མོད་ཀྱི། ཉན་ཐོས་དང་རང་སངས་རྒྱས་རྣམས་ལ་འདོད་ཆགས་དང༌། ཞེ་སྡང་དང༌། གཏི་མུག་གི་ལུས་ཀྱི་རྣམ་པ་དང༌། ངག་གི་རྣམ་པ་ཡོད་དོ། །དེ་དག་གི་བག་ཆགས་ཀྱི་མཚམས་སྦྱོར་བ་དེ་ནི་བྱིས་པ་སོ་སོའི་སྐྱེ་བོ་ཀུན་དང་ཐུན་མོང་དུ་ཡང་གནོད་པར་འགྱུར་བ་ནི་མ་ཡིན་ཏེ། དེ་བཞིན་གཤེགས་པ་ལ་ནི་དེ་རྣམ་པ་ཐམས་ཅད་དུ་མི་མངའ་ཞིང་མི་དམིགས་སོ། །གསོལ་བ། ཅིའི་སླད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བགྱི། བཀའ་སྩལ་པ། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཆོས་ཐམས་ཅད་ཀྱི་ཕ་རོལ་ཏུ་ཕྱིན་པ་དམ་པ་ཐོབ་པ་ཡིན་ཏེ། དེའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ། །ཆོས་འདི་དག་ཐམས་ཅད་ནི་རྟེན་ཅིང་འབྲེལ་བར་འབྱུང་བ་ཕྱིན་ཅི་ལོག་ལས་སྐྱེས་པ་ལས་ཀྱི་རྣམ་པར་སྨིན་པས་བཟུང་བ་ཡིན་ན། ཁྱེད་རྣམས་ཅིའི་ཕྱིར་ཆོས་ཐམས་ཅད་དངོས་པོ་མེད་པ་ལ་
དངོས་པོའི་འདུ་ཤེས་སུ་བྱེད་ཅེས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཚེ། ཐབས་མཁས་པས་སེམས་ཅན་སེར་སྣ་ཅན་དག་སེར་སྣ་ལས་རྣམ་པར་བཟློག་ནས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱོར་ཏེ། སྦྱིན་པ་ཡོངས་སུ་གཏོང་བ་དེ་ཡང་ལོངས་སྤྱོད་ཆེན་པོའི་རྒྱུར་འགྱུར་རོ། །སྟོང་པ་ཉིད་ཀྱི་ཏིང་ངེ་འཛིན་ནི་སྟོང་པའི་རྣམ་པ་དང༌། དབེན་པའི་རྣམ་པར་སེམས་རྩེ་གཅིག་པའོ། །མཚན་མ་མེད་པ་ནི་ཞི་བའི་རྣམ་པ་དང་མཚན་མ་མེད་པའི་རྣམ་པར་སེམས་རྩེ་གཅིག་པའོ། །སྨོན་པ་མེད་པ་ནི་མི་རྟག་པའི་རྣམ་པ་དང༌། སྡུག་བསྔལ་གྱི་རྣམ་པར་སེམས་རྩེ་གཅིག་པའོ། །ཇི་ལྟར་ན་རྟེན་ཅིང་འབྲེལ་བར་འབྱུང་བ་ཤེས་པ་ཡིན་ཞེ་ན། རྟེན་ཅིང་འབྲེལ་བར་འབྱུང་བ་སྐྱེ་བ་མེད་པ་དང༌། འགག་པ་མེད་པ་དང༌། ཆད་པ་མེད་པ་དང༌། རྟག་པ་མེད་པ་དང༌། དོན་གཅིག་པ་མ་ཡིན་པ་དང༌། དོན་ཐ་དད་པ་མ་ཡིན་པ་དང༌། འོང་བ་མེད་པ་དང༌། འགྲོ་བ་མེད་པ་དང༌། སྤྲོས་པ་དང་བྲལ་ཞིང་ཞི་བར་ཤེས་པ་དེ་ལྟར་ཤེས་པ་ཡིན་ནོ། །རབ་འབྱོར་འདི་ཇི་སྙམ་དུ་སེམས། དགྲ་བཅོམ་པའི་རྨི་ལམ་གྱི་བློ་འཛིན་པ་འམ་མི་འཛིན་བ་གང་ལ་ཡང་སྤྱོད་དམ། གསོལ་པ། དགྲ་བཅོམ་པ་ལ་ཡོད་ཡང་ཉལ་བ་མ་མཆིས་ན། དེ་ནི་རྨི་ལམ་གྱི་བློ་འཛིན་པའམ་མི་འཛིན་པ་ལ་སྤྱོད་པར་འགྱུར་བ་ལྟ་ག་ལ་མཆིས། བཀའ་སྩལ་པ། རབ་འབྱོར་ཆོས་ཐམས་ཅད་ནི་སྤྲུལ་པ་སྟེ། ལ་ལ་ནི་ཉན་ཐོས་ཀྱིས་སྤྲུལ་པའོ། །ལ་ལ་ནི་རང་སངས་རྒྱས་ཀྱིས་སྤྲུལ་པའོ། །ལ་ལ་ནི་བྱང་ཆུབ་སེམས་དཔས་སྤྲུལ་པའོ། །ལ་ལ་ནི་དེ་བཞིན་གཤེགས་པས་སྤྲུལ་པའོ། །ལ་ལ་ནི་ཉོན་མོངས་པས་སྤྲུལ་པའོ། །ལ་ལ་ནི་ལས་ཀྱིས་སྤྲུལ་པའོ། །སྐྱེས་བུ་གླེན་པ་དེ་དག་རྣམ་པ་བཞིས་ཤེས་རབ་ཀྱི་ཕ་རོལ་ཏུ་ཕྱིན་པ་ཕྱིར་སྤོང་བར་འགྱུར་རོ། །གསོལ་པ། བཞི་གང་ལགས། བཀའ་སྩལ་པ། སྐྱེས་བུ་གླེན་པ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་སྤོང་བ་དེ་དག་ནི་བདུད་ཀྱིས་བྱིན་གྱིས་བརླབས་པ་ཡིན་
ཏེ། རབ་འབྱོར་རྒྱུ་དང་པོ་དེས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་ཕྱིར་སྤོང་བར་འགྱུར་རོ། །ཆོས་ཟབ་མོ་རྣམས་ལ་ཡིད་ཆེས་པ་དང༌། དད་ཅིང་མོས་པ་མེད་པ་ཡིན་ཏེ། རྒྱུ་གཉིས་པ་དེས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་ཕྱིར་སྤོང་བར་འགྱུར་རོ། །རབ་འབྱོར་སྐྱེས་བུ་གླེན་པ་དེ་དག་ནི་སྡིག་པའི་གྲོགས་པོའི་ལག་ཏུ་སོང་བ་ཡིན་ཏེ། བརྩོན་འགྲུས་མེད་ཅིང་ཕུང་པོ་ལྔ་ལ་མངོན་པར་ཞེན་པས། རྒྱུ་གསུམ་པ་དེས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཕྱིར་སྤོང་བར་འགྱུར་རོ། །ཞེ་སྡང་གི་སྤྱོད་པ་ཅན་ཡིན་ཏེ། བདག་བསྟོད་ཅིང་གཞན་སྨོད་པར་གྱུར་པས་རྒྱུ་བཞི་པ་དེས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་ཕྱིར་སྤོང་བར་འགྱུར་ཞེས་འབྱུང༌། ཤེས་རབ་ཀྱི་ཕ་རོལ་ཏུ་ཕྱིན་པ་བདུན་བརྒྱ་པ་ལས་བཀའ་སྩལ་པ། འཇམ་དཔལ་བཀོད་པ་གཅིག་པའི་ཏིང་ངེ་འཛིན་ལ་འཇུག་པར་འདོད་པའི་རིགས་ཀྱི་བུའམ་རིགས་ཀྱི་བུ་མོས་དབེན་པར་གནས་བཅའ་བར་བྱ་སྟེ། འདུ་འཛི་མེད་པ་ལ་དགའ་བར་བྱའོ། །མཚན་མ་ཐམས་ཅད་ཡིད་ལ་མི་བྱ་བར་སྐྱིལ་མོ་ཀྲུང་བཅས་ཏེ་འདུག་ལ། དེར་མི་དམིགས་པའི་ཚུལ་གྱིས་དེ་བཞིན་གཤེགས་པ་གཅིག་ཡིད་ལ་བྱའོ། །དེ་བཞིན་གཤེགས་པ་གང་ཡིད་ལ་བྱེད་པ་དེའི་མཚན་ནས་ཀྱང་སྨོས་ཏེ། མཚན་དེ་ཡང་ཐོས་ཏེ་དམིགས་ནས། དེ་བཞིན་གཤེགས་པ་དེ་ག་ལ་བར་བཞུགས་པའི་ཕྱོགས་དེ་མངོན་དུ་བྱས་ནས་འདུག་པར་བྱའོ། །དེ་བཞིན་གཤེགས་པ་དེ་ཉིད་ཡིད་ལ་བྱས་ན་དུས་གསུམ་གྱི་དེ་བཞིན་གཤེགས་པ་ཐམས་ཅད་ཡིད་ལ་བྱས་པར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཉིད་དེ་ནི་གཅིག་གོ །དེ་བཞིན་གཤེགས་པ་གཅིག་གི་སངས་རྒྱས་ཀྱི་ཡོན་ཏན་དཔག་ཏུ་མེད་པ་དང༌། སྤོབས་པ་དཔག་ཏུ་མེད་པ་དེ་བཞིན་དུ་བཀོད་པ་གཅིག་པའི་ཏིང་ངེ་འཛིན་ཐོབ་ནས། མི་སྐྱེ་བ་གཅིག་ལས་ཆོས་ཀྱི་རྣམ་གྲངས་ཀྱི་བྱེ་བྲག་དཔག་ཏུ་མེད་པ་གང་དེ་ལ་འབྱུང་བར་རིག་པར་བྱའོ། །གང་ཡང་མ་འོངས་པའི་དུས་ན་ཤེས་རབ་ཀྱི་ཕ་རོལ་ཏུ་
ཕྱིན་པ་ཟབ་མོ་མ་སྐྱེས་པ་མ་བྱུང་བ་ནས་དངོས་པོ་མེད་པའི་བར་འདི་ཐོས་ནས་ཡིད་དགའ་ཞིང་རངས་པར་འགྱུར་བ་དེ་དག་ནི་དའི་འཁོར་འདི་ཉིད་ན་འདུག་པ་ཡིན་པར་འོད་སྲུངས་ཁྱོད་ཀྱིས་རྟོགས་པར་གྱིས་ཤིག །འཇམ་དཔལ་གྱིས་གསོལ་པ། བཅོམ་ལྡན་འདས་གང་ཅི་ལ་ཡང་མི་གནས་པ་དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པའོ། །གཞན་ཡང་བཅོམ་ལྡན་འདས་གང་ཆོས་ཅི་ལ་ཡང་མི་སེམས་ཤིང་རྣམ་པར་མི་སེམས་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པར་བལྟའོ། །ཤེས་རབ་ཀྱི་ཕ་རོལ་ཏུ་ཕྱིན་པ་རབ་ཀྱི་རྩལ་གྱིས་རྣམ་པར་གནོན་པས་ཞུས་པ་ལས་བཀའ་སྩལ་པ། རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ནི་ཕྱིན་ཅི་ལོག་ལས་བྱུང་བས་སྨིག་རྒྱུ་དང་འདྲའོ། །རབ་ཀྱི་རྩལ་གྱིས་རྣམ་པར་གནོན་པ་འདུ་བ་ཞེས་བྱ་བ་ནི་རྟག་པའོ། །འབྲལ་བ་ཞེས་བྱ་བ་ནི་ཆད་པའོ། །རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ནི་ཕྱིན་ཅི་ལོག་ལས་བྱུང་བ་སྟེ། ཕྱིན་ཅི་ལོག་དེ་ལ་ཡང་འདུ་བ་དང༌། འབྲལ་བ་གང་ཡང་མེད་དོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཕྱིན་ཅི་ལོག་གི་དངོས་པོ་དམིགས་སུ་མེད་དེ། དེའི་འབྱུང་བ་ཡང་མི་དམིགས་སོ། །རབ་ཀྱི་རྩལ་གྱིས་རྣམ་པར་གནོན་པ། ཕྱིན་ཅི་ལོག་ནི་མེད་པ། ཡང་དག་པ་མ་ཡིན་པར་བརྫུན་པ་སླུ་བ་གསོག་གི་ཆོས་ཅན་ཏེ། དེ་ལ་ཆོས་གང་ཡང་མི་དམིགས་པས་དེ་ནི་ཕྱིན་ཅི་ལོག་ཅེས་བྱའོ། །ཕྱིན་ཅི་ལོག་ཅེས་བྱ་བ་འདི་ནི་སེམས་ཅན་རྣམས་ལ་སླུ་བའོ། །འདི་ནི་སེམས་ཅན་རྣམས་ཀྱི་ཡང་དག་པ་མ་ཡིན་པ་ལ་ཡོངས་སུ་རྟོག་པའོ། །ཤཱ་རིའི་བུ་ཆོས་འདི་དག་ནི་བྱིས་པ་སོ་སོའི་སྐྱེ་བོས་ཇི་ལྟར་མངོན་པར་ཆགས་པར་བྱ་བ་དེ་ལྟ་བུའི་རྣམ་པར་རྟོག་པ་ཡོད་པ་མ་ཡིན་ནོ། །གསོལ་པ། བཅོམ་ལྡན་འདས་ཆོས་འདི་དག་རྣམ་པ་གང་གིས་མཆིས་པ་ལས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་མེད་པ་དེ་ལྟར་ཡོད་དེ། དེ་ལྟར་ཡོད་པ་མ་ཡིན་པས། དེའི་ཕྱིར་མེད་ཅེས་བྱའོ། །གསོལ་པ། ཅིའི་
སླད་དུ་མ་མཆིས་པ་མ་ལགས་པ་ལ་མཆིས་ཞེས་བགྱི། བཀའ་སྩལ་པ། གཟུགས་སྟོང་པ་བཅོ་བརྒྱད་ཀྱི་ཕྱིར་ཡོད་པ་མ་ཡིན་པ་ཞེས་བྱའོ། །དེ་བཞིན་དུ་བསྒྲེའོ། །དེ་ནས་གནས་བརྟན་རབ་འབྱོར་འདི་སྙམ་དུ་གྱུར་ཏེ། འདི་ལྟར་ལྷ་རྣམས་ཀྱིས་མངོན་པར་གཏོར་བའི་མེ་ཏོག་འདི་རྣམས་ནི་བདག་གིས་སྔོན་ཆད་ལྷའི་གནས་ཐམས་ཅད་ན་ཡང་ཡོད་པར་མ་མཐོང་སྟེ། མེ་ཏོག་འདི་དག་ནི་སྤྲུལ་པའོ། །འདི་ལྟར་ལྷའི་བུ་རྣམས་ཀྱིས་མངོན་པར་གཏོར་བའི་མེ་ཏོག་འདི་རྣམས་ནི་ལྡུམ་བུ་ལས་སྐྱེས་པ་མ་ཡིན། ཆུ་ལས་སྐྱེས་པ་མ་ཡིན། ཐང་ལས་སྐྱེས་པ་མ་ཡིན་ནོ། །འདི་ལྟར་མེ་ཏོག་འདི་དག་ནི་ཡིད་ལས་བྱུང་བ་སྟེ། མེ་ཏོག་འདི་དག་ནི་ལྡུམ་བུ་ལས་བྱུང་བ་མ་ཡིན་ནོ་སྙམ་མོ། །ཀཽ་ཤི་ཀས་གསོལ་པ། བཅོམ་ལྡན་འདས་གཉིས་པོ་འདི་དག་ནི་ཆོས་ཉིད་དེ་གང་ལགས་ཤེ་ན། འདུས་བྱས་ཀྱི་ཆོས་ཐམས་ཅད་ཀྱི་ཆོས་ཉིད་དང༌། འདུས་མ་བྱས་ཀྱི་ཆོས་རྣམས་ཀྱི་ཆོས་ཉིད་དོ། །དེ་ལ་འདུས་བྱས་ཀྱི་ཆོས་རྣམས་ཀྱི་ཆོས་ཉིད་གང་ལགས་ཤེ་ན། ནང་སྟོང་པ་ཉིད་ཀྱི་ཡེ་ཤེས་ནས་འཇིག་རྟེན་པའི་ཆོས་རྣམས་ཀྱི་ཡེ་ཤེས་དང༌། འཇིག་རྟེན་ལས་འདས་པའི་ཆོས་རྣམས་ཀྱི་ཡེ་ཤེས་ཀྱི་བར་ལགས་སོ། །དེ་ལ་འདུས་མ་བྱས་ཀྱི་ཆོས་རྣམས་ཀྱི་ཆོས་ཉིད་གང་ལགས་ཤེ་ན། དེ་ནི་གང་ལ་སྐྱེ་བམ་མཆིས་པ་དང༌། འགག་པ་དང༌། གནས་པ་དང༌། གནས་པ་ལས་གཞན་དུ་འགྱུར་བ་དང༌། ཀུན་ནས་ཉོན་མོངས་པ་དང༌། རྣམ་པར་བྱང་བ་དང༌། འཕེལ་བ་དང༌། འགྲིབ་པ་མ་མཆིས་པ་སྟེ། དེ་ནི་ཆོས་ཐམས་ཅད་ཀྱི་ངོ་བོ་ཉིད་དོ། །བྱང་ཆུབ་སེམས་དཔའི་ཐེག་པ་ལ་ཞུགས་པའི་རིགས་ཀྱི་བུ་འམ་རིགས་ཀྱི་བུ་མོའི་རྨི་ལམ་ན་བྱང་ཆུབ་ཀྱི་སྙིང་པོ་ལ་འདུག་གི་བར་དུ། ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་དང༌། བསམ་གཏན་ལ་སྙོམས་པར་འཇུག་པ་དང༌། བརྩོན་འགྲུས་རྩོམ་པ་དང༌། བཟོད་པ་སྒྲུབ་པ་དང༌། ཚུལ་ཁྲིམས་སྲུང་བ་དང༌། སྦྱིན་པ་སྦྱིན་པའི་རིགས་ཀྱི་བུ་འམ། རིགས་ཀྱི་བུ་མོ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བསྙེན་པར་རིག་པར་བགྱི་ན། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དངོས་སུ་ཤེས་རབ་
ཀྱི་ཕ་རོལ་ཏུ་ཕྱིན་པ་བསྒོམ་པ་ལ་སོགས་པ་བསྙེན་པ་ལྟ་སྨོས་ཀྱང་ཅི་འཚལ། སྟུག་པོ་བཀོད་པ་ལས། ལུས་ཅན་རྣམས་ཀྱི་ལུས་ཀྱི་ཡུལ། །སྟུག་ན་གནས་ལ་སྟུག་ན་མེད། །ཞིང་དེ་དྲི་མེད་བསོད་ནམས་ཏེ། །སྟུག་པོ་སྙིང་པོ་ཤིན་ཏུ་མཛེས། །དེ་བཞིན་ཐར་པ་ཐར་ཤེས་ལ། །ཞིང་གི་ནང་ན་ཞིང་གི་མཆོག །སངས་རྒྱས་རྣམས་ཀྱི་ཞིང་རབ་སྟེ། །སྟུག་པོ་དེ་ནི་ཡུལ་དུ་བརྟག །མངའ་རྣམས་བཅུ་པོ་དེ་དག་དང༌། །སྟོབས་དང་མངོན་མཁྱེན་ཏིང་ངེ་འཛིན། །ཡིད་ཀྱི་རྒྱུ་ལས་བྱུང་བའི་སྐུས། །སངས་རྒྱས་དེ་ནི་རྣམ་པར་མཛེས། །སྟུག་པོ་ཐར་མཆོག་ཡེ་ཤེས་ཏེ། །ཆོས་ཀྱི་དབྱིངས་དང་རྫུ་འཕྲུལ་ཡང༌། །སྟུག་སྟེ་རྣལ་འབྱོར་ཅན་གྱི་གནས། །མུན་པའི་རྒྱ་ལས་རབ་འདས་ནས། །སྟུག་པོའི་ཞིང་ནི་རྣམ་པར་མཛེས། །ཕྱོགས་འདི་བཀའ་ལས་གྲུབ་པ་སྟེ། །རྒྱུ་ཅན་རྣམས་ཀྱི་སྤྱོད་ཡུལ་མིན། །རྡུལ་ཕྲན་རྣམ་པར་གཞིག་པ་དང༌། །རྡུལ་གྱི་དངོས་པོ་མི་གནས་ཏེ། །རང་བཞིན་ཀུན་གྱི་མཆོག་ཡིན་པས། །རྡུལ་ཕྲན་མཆོག་ཅེས་དེ་ཕྱིར་བརྗོད། །དབང་གི་ཡོན་ཏན་བརྒྱད་པོ་རྣམས། །ཕྲ་སོགས་ཆེ་བའི་ཡོན་ཏན་དང༌། །འཐོབ་དང་འདོད་འབྱོར་བསྒྲགས་པ་དང༌། །བདག་པོ་དབང་དང་ལྡན་པ་དང༌། །ཇི་ལྟར་འདོད་པར་རུང་བ་རྣམས། །ཐོབ་ནས་སྟུག་པོའི་དབུས་ཡུལ་ན། །རྣམ་པར་གནས་ཤིང་རབ་ཏུ་རྩེ། །དེ་ལྟར་ཀུན་གཞི་རྣམ་ཤེས་ཀྱང༌། །རྟག་ཏུ་བག་ཆགས་ལྡན་གྱུར་པ། །རྣམ་པར་ཤེས་པ་རྣམ་བདུན་པོ། །འགྲོགས་ཀྱང་འདྲེ་བ་མེད་པ་སྟེ། །ལྷ་དང་ལྷ་མིན་འབར་བ་དང༌། །ལམ་རྒྱུད་ཀུན་ཀྱང་དེ་ཡི་དབང༌། །སངས་རྒྱས་ཀུན་གྱི་ཞིང་མཛེས་པའང༌། །དེ་ཉིད་རྒྱུར་ནི་གྱུར་བ་སྟེ། །ཚེ་དང་དྲོད་དང་རྣམ་ཤེས་འདིས། །གང་ཚེ་ལུས་འདི་བོར་གྱུར་པ། །དེ་ཚེ་ལུས་འདི་བོར་བ་སྟེ། །ཤེས་བཞིན་ཚོར་བ་མེད་པའོ། །དེ་ནི་ཀུན་གཞི་རྣམ་ཤེས་ཏེ། །ཡིད་ནི་དྲོ་བར་རབ་ཏུ་བརྟགས། །ཡིད་ཀྱི་རྣམ་ཤེས་དེ་ན་སྟེ། །ལྷག་མ་དབང་པོ་ལྔར་ཡང་གནས། །ཡིད་ཆེས་ལུང་དང་མི་ལྡན་པར། །ཆོས་རྣམས་སྟོན་པར་བྱེད་པ་ནི། །མཚན་ཉིད་རྣམ་པར་རྟོག་པ་ཡིས། །བདག་ཀྱང་ཆུད་གཟོན་གཞན་ཆུད་གཟོན། །འཇིག་རྟེན་རྡུལ་ཕྲན་
བསགས་པ་མིན། །ཕྱོགས་དང་གནས་སུ་མི་འགྲོའོ། །དེ་དག་སོར་གཉིས་སོར་གསུམ་དུ། །ཅི་ཡང་རྩོམ་པར་མི་བྱེད་དོ། །ལྷ་ཡུལ་གནས་ནས་གནས་པ་ལ། །སྣ་ཚོགས་སར་ཡང་དེ་བཞིན་རྟོགས། །ཕུང་པོ་གང་ཟག་བདག་མེད་པར། །རབ་ཏུ་རྣམ་ཕྱེ་མཐོང་གྱུར་ཅིང༌། །ཆོས་ཀྱི་དངོས་པོ་ཡོང་མ་ཤིག །ཉན་ཐོས་དེ་དག་མངོན་རྟོགས་འགྱུར། །ཏིང་ངེ་འཛིན་གྱི་རྒྱལ་པོ་ལས། །སངས་རྒྱས་རྗེས་སུ་དྲན་པ། འདི་ལྟར་བཅོམ་ལྡན་འདས་དེ་ནི་ཞེས་བྱ་བ་ལ་སོགས་པ་འབྱུང༌། སྟོན་པ་བདེ་བར་གཤེགས་པས་བཤད་པ་ལྟར། །ངེས་དོན་མདོ་སྡེ་དག་ནི་བྱེ་བྲག་ཤེས། །གང་ལས་སེམས་ཅན་གང་ཟག་སྐྱེས་བུ་བསྟན། །ཆོས་དེ་ཐམས་ཅད་དྲང་བའི་དོན་དུ་ཤེས། །འཇིག་རྟེན་དག་ན་ཏིང་འཛིན་སྒོམ་བྱེད་ཀྱང༌། །དེ་ནི་བདག་ཏུ་འདུ་ཤེས་འཇིག་མི་བྱེད། །དེ་ཡི་ཉོན་མོངས་ཕྱིར་ཡང་རབ་ཏུ་འབྱུང༌། །ལྷག་སྤྱོད་ཀྱིས་ནི་ཏིང་འཛིན་འདིར་བསྒོམ་བཞིན། །མཁས་པ་བྱིས་པ་དག་དང་རྩོད་མི་བྱེད། །བྱིས་པ་དག་ནི་རི་མོར་བྱས་ནས་སྤོང༌། །ཞེ་སྡང་སེམས་ཀྱིས་བདག་གི་དྲུང་འོང་ཞེས། །བྱིས་པ་ཆོས་ལ་སྟེན་པར་ཡོངས་མི་བྱེད། །བྱིས་པ་དག་གི་རང་བཞིན་རྒྱུད་རིག་ནས། །མཁས་པ་བྱིས་པ་དག་དང་མི་འགྲོགས་ཏེ། །ཇི་སྲིད་དུ་ནི་བྱིས་པ་ལེགས་བསྙེན་ཀྱང༌། །དེ་དག་ཕྱིར་ཡང་དགྲ་དང་འདྲ་བར་འགྱུར། །བྱིས་པ་དང་ནི་བྱིས་པ་མཐུན་འབྱོར་བ། །ཇི་ལྟར་མི་གཙང་བ་དང་མི་གཙང་བཞིན། །མཁས་པ་དང་ནི་མཁས་པའི་སྐྱེ་བོ་དང༌། །མཐུན་ཞིང་འབྱོར་པ་མར་དང་སྙིང་ཁུ་བཞིན། །བྱིས་པ་ལ་ནི་གང་ཕན་སྙིང་བརྩེ་བ། །དེ་ལ་གནོད་པ་བྱུང་བ་བྱིས་པ་དགའ། །དེ་ལྟའི་ཉེས་ཕྱིར་བྱིས་པ་རྣམས་སྤངས་ཏེ། །རི་དགས་བཞིན་དུ་གཅིག་པུ་དགོན་པར་གནས། །མཁས་པ་འདི་འདྲའི་ཉེས་པ་རིག་ནས་ནི། །ཤེས་རབ་དམན་བསྟེན་བདག་གི་མཐོ་རིས་ཉམས། །བྱང་ཆུབ་འཐོབ་པར་ག་ལ་འགྱུར་སྙམ་སྟེ། །བྱིས་པ་རྣམས་དང་ནམ་ཡང་ཡངས་མི་བསྟེན། །བླ་མེད་མི་འཇིགས་སྦྱིན་པ་ཁྱོད་ལ་ཕྱག་འཚལ་ལོ། །གཞན་ཕན་སེམས་ཅན་གཉེན་བརྩེ་ཁྱོད་ལ་ཕྱག་འཚལ་ལོ། །སྟོབས་བཅུ་བདེན་པའི་རྩལ་མངའ་ཁྱོད་ལ་ཕྱག་འཚལ་ལོ། །བདེ་གཤེགས་མི་མཉམ་མཉམ་པ་ཁྱོད་ལ་ཕྱག་འཚལ་
ལོ། །མགོན་པོ་ཤིན་ཏུ་ཐུགས་རྗེ་ཅན་ལ་ཕྱག་འཚལ་ལོ། །དཔའ་བོ་དགྲ་བཞི་རྣམ་པར་བཏུལ་ལ་ཕྱག་འཚལ་ལོ། །རྩོད་པ་དམ་པའི་དོན་རྣམས་མཁྱེན་ལ་ཕྱག་འཚལ་ལོ། །ཆོས་ཀྱི་སྐུ་མཆོག་མངའ་པའི་ལྷ་ལ་ཕྱག་འཚལ་ལོ། །སྙིང་རྗེ་བྱམས་འོད་རྒྱལ་བའི་ཉི་མ་མུན་སེལ་བ། །ཤེས་རབ་ཤིན་ཏུ་ཡངས་པ་ནམ་མཁའི་དཀྱིལ་དུ་ཤར། །དོན་དམ་ཤིན་ཏུ་ཟབ་པའི་ཆོས་རྣམས་སྟོན་མཛད་པ། །ལྷ་ཁྱོད་ལ་ནི་རྟག་ཏུ་བདག་ཀྱང་སྐྱབས་སུ་མཆི། །འགྲོ་བ་འདི་དག་ཐམས་ཅད་སངས་རྒྱས་འགྱུར། །འདི་ན་སྣོད་མིན་སེམས་ཅན་འགའ་ཡང་མེད། །བདེ་གཤེགས་ཡོན་ཏན་དེ་དག་དཔག་མེད་དེ། །མི་མཆོག་ཡོན་ཏན་རབ་ཀྱི་ཕ་རོལ་ཕྱིན། །ཡོན་ཏན་ཁྱད་པར་ཀུན་གྱི་ཕ་རོལ་སོན། །སངས་རྒྱས་བསོད་ནམས་ཞིང་ལ་མགོས་ཕྱག་འཚལ། །ཟླ་འོད་གཞོན་ནུར་གྱུར་པས། བཅོམ་ལྡན་འདས་འཁོར་དང་བཅས་པ་བཞུགས་པར་རིག་ནས། མཆོད་ཡོན་ཆེན་པོ་རིམ་གྱིས་གསོལ་ཏེ། ཞལ་ཟས་གསོལ་ཞིང་བདར་ཏོ། །འདི་ལྟར་བྱང་ཆུབ་སེམས་དཔའ་དག །བག་ཆགས་རབ་ཏུ་སྤངས་གྱུར་པ། །དེ་དག་གཟུགས་ཀྱིས་མི་འཕྲོགས་ཏེ། །སངས་རྒྱས་རིགས་ལ་དེ་དག་གནས། །བཀའ་སྩལ་པ། ཟླ་འོད་གཞོན་ནུར་གྱུར་པ་འདི་ཉིད་ཀྱིས། །སྔོན་ཡང་རྒྱལ་པོའི་ཁབ་ཀྱི་གྲོང་ཁྱེར་འདིར། །སངས་རྒྱས་དག་ཀྱང་བྱེ་བ་ཕྲག་སྟོང་མཐོང༌། །སྐུ་ནི་བྱང་ཆུབ་མཚན་ཉིད་དེ། །སངས་རྒྱས་ཞིང་ཡང་དེ་འདྲ་ཞིང༌། །སྟོབས་དང་རྣམ་ཐར་བསམ་གཏན་ཡང༌། །དེ་དག་ཐམས་ཅད་མཚན་ཉིད་གཅིག །དེ་ལྟར་སངས་རྒྱས་འབྱུང་འགྱུར་ཏེ། །འཇིག་རྟེན་མགོན་པོ་དེ་འདྲ་བས། །སུས་ཀྱང་ཤ་ཡི་མིག་གིས་ནི། །ནམ་ཡང་མཐོང་བར་མི་ནུས་སོ། །དཔའ་བོ་ཆེན་པོ་ཆོས་ཀྱི་སྐུ། །སྐུ་ནི་ཆོས་ལས་བྱུང་བ་སྟེ། །གཟུགས་ཀྱི་སྐུ་ནི་ནམ་དུ་ཡང༌། །སངས་རྒྱས་གདགས་པར་ནུས་མ་ཡིན། །སངས་རྒྱས་ཀྱི་ནི་སྐུ་མཐོང་ནས། །འདྲེན་པ་མཐོང་ཞེས་སྨྲ་མོད་ཀྱི། །ང་ནི་གཟུགས་ཀྱི་སྐུ་ལུས་སུ། །སུས་ཀྱང་བལྟ་བར་མི་ནུས་སོ། །གང་གིས་འཁྲུལ་པ་ཅི་མཐོང་ཡང༌། །དེ་དག་གི་ནི་ཉེས་མི་བརྗོད། །ཅི་འདྲ་བ་ཡི་ལས་བྱས་པ། །འབྲས་བུ་དེ་འདྲ་འཐོབ་པར་འགྱུར། །དགོན་
པ་ལ་གནས་པ་ལྷུར་ལེན་པའི་ཕན་ཡོན་ནི་བཅུ་སྟེ། བྱ་བ་ཉུང་བར་གནས་པ་དང༌། འདུ་བ་རིང་བ་བས་ཀྱང་རིང་དུ་སྤོང་བ་དང༌། དེ་ལ་རྩོད་པ་མེད་པར་འགྱུར་བ་དང༌། གནོད་པ་མེད་པར་གནས་པ་དང༌། ཟག་པ་འཕེལ་བར་མི་བྱེད་པ་དང༌། རྩོད་པའི་གཞིར་མི་བྱེད་པ་དང༌། ཤིན་ཏུ་ཞི་བར་སྤྱོད་པ་དང༌། ཤིན་ཏུ་བསྡམས་པར་གནས་པ་དང༌། སེམས་ཐར་པ་དང་མཐུན་པའི་རྒྱུན་དུ་འགྱུར་བ་དང༌། མྱུར་དུ་རྣམ་པར་གྲོལ་བ་མངོན་དུ་བྱེད་པའོ། །ལྷའི་འཁོར་ལོས་སྒྱུར་བའི་རྒྱལ་སྲིད་ཀྱི་བདེ་བ་སྤངས་ཏེ་རབ་ཏུ་འབྱུང་ངོ་ཞེས་གཞོན་ནུ་ཁྱོད་ཀྱིས་དེ་ལྟར་བསླབ་པར་བྱའོ། །རབ་ཏུ་བྱུང་ནས་ཀྱང་སྦྱངས་པའི་ཡོན་ཏན་ཡོ་བྱད་བསྙུངས་པ་ལ་གནས་ཤིང༌། བདེན་པར་གནས་པ་དང༌། བཟོད་པ་དང་དེས་པ་ཕུན་སུམ་ཚོགས་པར་བྱའོ། །སྔོན་སངས་རྒྱས་གཟི་བརྗིད་ཚོགས་རྒྱལ་གྱིས་ཆོས་བཤད་ནས། རྒྱལ་པོ་བརྟན་བྱིན་རབ་ཏུ་བྱུང་ངོ༌། །དེ་ནས་འཛམ་བུའི་གླིང་གི་མི་རིམ་གྱིས་རབ་ཏུ་བྱུང་བ་དང༌། སངས་རྒྱས་ཀྱི་མཐུས་འབྲས་མ་རྨོས་མ་བཏབ་པར་འཁྲུང་བ་དང༌། ཆོས་གོས་ཀྱང་རང་བྱུང༌། གཡོག་ཀྱང་ལྷ་རྣམས་ཀྱིས་བྱས་སོ། །འཇིག་རྟེན་ཁམས་ནི་སྟོང་དག་ཏུ། །ངས་ནི་མདོ་སྡེ་གང་བཤད་པ། །ཚིག་འབྲུ་ཐ་དད་དོན་གཅིག་སྟེ། །ཐམས་ཅད་བརྗོད་པར་ནུས་མ་ཡིན། །ཚིག་གཅིག་རྣམ་པར་བསྒོམས་ན་ནི། །དེ་དག་ཐམས་ཅད་བསྒོམ་པར་འགྱུར། །སངས་རྒྱས་ཇི་སྙེད་ཐམས་ཅད་ཀྱིས། །ཆོས་རྣམས་མང་པོ་རབ་བཤད་པ། །ཆོས་རྣམས་ཐམས་ཅད་སྟོང་པ་ཉིད། །ཆོས་ཀྱི་རང་བཞིན་ཤེས་པས་ན། །དེ་ཕྱིར་སངས་རྒྱས་ཞེས་བྱ་སྟེ། །སེམས་ཅན་བསམ་གྱིས་མི་ཁྱབ་ཅིང༌། །དཔག་ཏུ་མེད་པ་བྱང་ཆུབ་འདུལ། །ཆོས་རྣམས་མིག་ཡོར་ལྟ་བུ་ཡང༌། །གང་གིས་ངོ་བོ་ཉིད་ཤེས་པ། །དེ་དག་གཟུགས་ཀྱི་ལུས་སུ་ནི། །སངས་རྒྱས་སྐུ་ལ་མི་ལྟའོ། །ཆོས་འདི་ལུས་གཟུགས་མེད་པ་སྟེ། །འདི་ལ་ལུས་གཟུགས་གང་ཡང་མེད། །ཆོས་འགའ་ལུས་གཟུགས་མེད་པ་ནི། །དེ་ནི་སངས་རྒྱས་སྐུ་ལུས་སོ། །གང་དག་ཆོས་ཀྱི་སྐུར་ལྟ་བ། །དེ་དག་གིས་ནི་འདྲེན་པ་མཐོང༌། །རྫོགས་པའི་སངས་རྒྱས་ཆོས་ཀྱི་སྐུ། །དེ་ནི་རྫོགས་པའི་སངས་རྒྱས་
མཐོང༌། །འཁོར་བ་དག་ནི་འཕེལ་བྱེད་ཅིང༌། །སོ་སོའི་སྐྱེ་བོ་དེ་དག་འཁོར། །སོ་སོ་ཐ་དད་འགྲོ་བས་ན། །སོ་སོའི་སྐྱེ་བོར་བརྗོད་པ་ཡིན། །འདུ་ཤེས་འདི་ནི་སྤང་སྙམ་དུ། །གང་གི་འདུ་ཤེས་འབྱུང་བ་ནི། །འདུ་ཤེས་སྤྲོས་ལ་སྤྱོད་པ་སྟེ། །འདུ་ཤེས་ལས་ནི་དེ་མི་ཐར། །སུ་ཡིས་འདུ་ཤེས་འདི་དག་འབྱུང༌། །སུ་ཡིས་འདུ་ཤེས་འདི་བསྐྱེད་བྱས། །སུས་ནི་འདུ་ཤེས་རེག་པར་བྱས། །སུས་ནི་འདུ་ཤེས་འགག་པར་འགྱུར། །གང་གི་འདུ་ཤེས་འབྱུང་བ་ནི། །སངས་རྒྱས་ཀྱིས་ཀྱང་ཆོས་མ་བརྙེས། །འདིར་ནི་དོན་དེ་བསམ་པར་གྱིས། །དེ་བས་འདུ་ཤེས་མེད་པར་འགྱུར། །བསམ་པའི་ས་ལ་གནས་ནས་ནི། །མཐར་གྱིས་རྣམ་པར་བསམ་བྱ་སྟེ། །བསམ་པ་ཐམས་ཅད་རྣམ་སྤངས་ན། །དེ་ནས་བསམ་དུ་མེད་པར་འགྱུར། །འདི་ནི་དཀར་ཆོས་རྣམ་སྨིན་ཏེ། །འདུ་བྱེད་མེད་པས་མཐོང་བར་འགྱུར། །སེམས་ཅན་ཀུན་གྱིས་རྣམ་བསམ་པ། །སྐད་ཅིག་གཅིག་ལ་རབ་ཏུ་ཤེས། །སངས་རྒྱས་ཞིང་འདི་ཐམས་ཅད་ཀྱང༌། །རིན་ཆེན་ཤིང་གིས་ལེགས་བརྒྱན་ཏེ། །ཡན་ལག་བརྒྱད་ལྡན་ཆུས་གང་ལ། །རྫིང་བུ་དག་ནི་རྣམ་པར་སྤྲུལ། །རྫིང་བུའི་འགྲམ་ན་གནས་པ་རྣམས། །དེ་དག་དེ་ལས་ཆུ་འཐུངས་ནས། །ཐམས་ཅད་སྲེད་པ་བསལ་ནས་ནི། །འཇིག་རྟེན་གྱི་ཡང་མཆོད་རྟེན་འབྱུང༌། །དེ་བཞིན་དུ་པདྨ་ལ་སོགས་པ་སྤྲུལ་ནས། དེའི་དྲི་ཚོར་བ་དང་དེ་ལས་སྒྲ་གྲག་པ་མཉན་པས་ཀྱང་དུག་གསུམ་སྤོང་བ་ལ་སོགས་པའི་ཡོན་ཏན་འབྱུང་ངོ༌། །བྱང་ཆུབ་སེམས་དཔའ་བདེ་བྱིན་གྱིས་དེ་བཞིན་གཤེགས་པ་དབྱངས་བྱིན་ལ་མཆོད་པར་ལག་པ་གཡས་པ་རས་བཅོས་བུས་དཀྲིས་ཏེ། མར་མེ་བཏང་ནས་ཏིང་ངེ་འཛིན་རྒྱལ་པོའི་མདོ་ཡང་སྐད་ཆེ་ཞིང་འཇམ་པས་བསྒྲགས་པ་དང༌། ས་ཡང་གཡོས། ལྷ་རྣམས་ཀྱང་དད་པ་སྐྱེས་ནས་མཆོད་པ་བྱེད་དོ། །དེ་ནས་ལྷ་ཕལ་མོ་ཆེས་བྱང་ཆུབ་ཏུ་སེམས་བསྐྱེད་པ་ལ་སོགས་པ་སེམས་ཅན་གྱི་དོན་མང་དུ་བྱས་པར་འབྱུང༌། ཚེས་དང་ཟང་ཟིང་སྦྱིན་པ་ནི་བསྔོ་བ་བཞིན་བྱས་ཏེ། ཐབས་མཁས་པ་གང་གིས་དེ་བཞིན་གཤེགས་པ་རྣམས་མངོན་པར་སངས་རྒྱས་པའི་ཐབས་དེ་ཐོབ་པ་དང༌། བླ་ན་མེད་པའི་བྱང་ཆུབ་མྱུར་དུ་ཐོབ་པ་སྟོན་པར་འགྱུར་བའི་དགེ་བའི་བཤེས་གཉེན་དང་ཕྲད་པ་དང༌། ལོངས་སྤྱོད་གང་གིས་སེམས་ཅན་
ཐམས་ཅད་འཚོ་བར་འགྱུར་བའི་ལོངས་སྤྱོད་དེ་དག་དང་ཕྲད་པ་དང༌། བདག་གི་ལུས་གང་གིས་སེམས་ཅན་ཐམས་ཅད་ལ་ཆོས་དང་ཟང་ཟིང་གིས་ཕན་འདོགས་པ་འཐོབ་པར་འགྱུར་བའི་ལུས་འཛིན་པར་བསྔོ་བའོ། །གཅིག་ལ་གཅིག་ཀྱང་གནོད་སེམས་བྱས་ནས་ནི། །དེ་ལ་ཚུལ་ཁྲིམས་ཐོས་པས་སྐྱོབ་མི་ནུས། །བསམ་གཏན་མི་སྐྱོབ་དགོན་གནས་སྐྱོབ་མི་ནུས། །སྦྱིན་པས་མི་སྐྱོབ་སངས་རྒྱས་མཆོད་པས་མིན། །སྐྱེས་བུ་ཆུ་མཆོག་གིས་ནི་དམ་པའི་ཆོས། །འཇིག་པར་འགྱུར་ཚེ་གང་དག་བཏང་སྙོམས་སྒོམ། །དེ་ཡིས་རྒྱལ་བ་བཀུར་སྟི་བྱས་མ་ཡིན། །འདྲེན་པ་དག་ལ་རི་མོར་དེས་མ་བྱས། །རྒྱལ་པོ་དཔའ་བས་བྱིན་གྱིས་དགེ་སློང་མེ་ཏོག་ཟླ་མཛེས་བསད། །ཉན་ཐོས་སར་ནི་ནམ་ཡང་མ་སློབ་ཅིག །དེ་ཡི་སྤྱོད་ལའང་དགའ་བར་མ་བྱེད་ཅིག །སངས་རྒྱས་ཡོན་ཏན་དག་ལས་སེམས་མ་བཏང༌། །མྱུར་དུ་སངས་རྒྱས་རྒྱལ་པོའི་དབང་པོར་འགྱུར། །མི་གཙང་བས་ནི་རྟག་ཏུ་འདོད་ཆགས་ཚར་གཅད་དོ། །བྱམས་པ་ཡིས་ཀྱང་ཞེ་སྡང་ཁོར་མོར་མ་ལུས་བཅོམ། །ཤེས་རབ་ཀྱིས་ནི་གཏི་མུག་ཉོན་མོངས་དྲ་བ་བསལ། །ཏིང་འཛིན་ཐོབ་པ་འཇིག་རྟེན་ཀུན་ན་རབ་ཏུ་མཛེས། །རྫུ་འཕྲུལ་གང་ཞེ་ན། གང་འགྲུབ་པ་དང་སྨོན་པ་དང་འབྱོར་པ་ཡོངས་སུ་རྫོགས་པ་འདི་ནི་རྫུ་འཕྲུལ་ཞེས་བྱ་བའོ། །དེ་ལ་ཐོས་པ་ཡོངས་སུ་ཚོལ་བ་གང་ཞེ་ན། ཉན་ཐོས་ཀྱི་སྡེ་སྣོད་དང་རང་སངས་རྒྱས་ཀྱི་སྡེ་སྣོད་དང༌། བྱང་ཆུབ་སེམས་དཔའི་སྡེ་སྣོད་ཀུན་འཛིན་ཅིང་སྒོམ་པའོ། །སྦྱངས་པ་མཐོང་བ་གང་ཞེ་ན། ཡི་དམ་ལ་བརྟེན་པའོ། །ཁྲེལ་ཡོད་པ་གང་ཞེ་ན། མུར་ཅོར་མི་སྨྲ་བའོ། །སྐྱེས་བུ་དམ་པ་དང་བསྟེན་པ་གང་ཞེ་ན། སངས་རྒྱས་དང༌། བྱང་ཆུབ་སེམས་དཔའ་དང༌། ཉན་ཐོས་དང༌། རང་སངས་རྒྱས་ལ་བརྟེན་པའོ། །སྐྱེས་བུ་དམ་པ་མ་ཡིན་པ་རྣམ་པར་སྤོང་བ་གང་ཞེ་ན། དམིགས་པ་ཅན་དང༌། ལེ་ལོ་ཅན་རྣམས་སྤོང་བའོ། །རྙེད་པ་མེད་ཀྱང་སེམས་མི་འགོང་བ་གང་ཞེ་ན། བདག་གིས་བྱས་པ་ལ་སོ་སོར་རྟོག་པའོ། །ཁྱིམ་པ་དང་མི་བསྟེན་པ་གང་ཞེ་ན། ཟང་ཟིང་ཅི་ཡང་
རྣམ་པར་སྤོང་བའོ། །རབ་ཏུ་བྱུང་བ་ལ་བརྟེན་པ་གང་ཞེ་ན། མི་རིགས་པ་སྤོང་བ་དང༌། རིགས་པ་ཚོལ་བའོ། །དེ་ལ་རྣལ་འབྱོར་སྤྱོད་པའི་ས་གང་ཞེ་ན། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་སྒོམ་པའོ། །སངས་རྒྱས་ཆོས་ནི་རྒྱ་ཆེ་སྟེ། །ཚུལ་ཡང་རྒྱ་ཆེན་བསྟན་པ་ཡིན། །ཆོས་རྣམས་རྒྱ་ཆེར་བསྟན་པས་ན། །ཡོན་ཏན་རྒྱ་ཆེར་ཐོབ་པར་འགྱུར། །ཇི་ལྟར་ནམ་མཁའ་རྒྱ་ཆེ་བ། །ཆོས་ཀྱི་མཚན་ཉིད་དེ་བཞིན་ཏེ། །རིན་ཆེན་འོད་ཟེར་རྒྱ་ཆེ་གང༌། །དེ་ཕྱིར་ཤིན་ཏུ་རྒྱས་ཤེས་བྱ། །སེམས་ཅན་སྤྱོད་པ་རྒྱ་ཆེ་སྟེ། དེ་དག་བསྟན་པའམ་རྒྱ་ཆེའོ། །ལུང་གི་དོན་ཡང་རྒྱ་ཆེ་བས། །དེ་ཕྱིར་ཤིན་ཏུ་རྒྱས་ཤེས་བྱ། །ཀླུའི་རྒྱལ་པོ་རྒྱ་མཚོས་ཞུས་པ་ལས། སུམ་ཅུ་རྩ་གསུམ་པའི་ལྷའི་རྒྱལ་པོ་བརྒྱ་བྱིན། འཐབ་བྲལ་གྱི་རབ་འཐབ་བྲལ། དགའ་ལྡན་གྱི་ཡོངས་སུ་དགའ་ལྡན། འཕྲུལ་དགའི་རབ་འཕྲུལ་དགའ། གཞན་འཕྲུལ་དབང་བྱེད་ཀྱི་དབང་བྱེད། བདུད་ཀྱི་རིས་ཀྱི་ལྷའི་རྒྱལ་པོ་དེད་དཔོན། ཚངས་པའི་མདུན་ན་འདོན་ནི་མདུན་གྱི་རབ་ཚངས་པ། ཚངས་རིས་ཀྱི་མི་མཇེད་ཀྱི་བདག་པོ། འོད་གསལ་གྱི་འོད་གསལ། དགེ་རྒྱས་ཀྱི་དགེ་རྒྱས། འབྲས་བུ་ཆེ་བའི་འབྲས་བུ་ཆེ། གནས་གཙང་མའི་དབང་ཕྱུག་ཆེན་པོ། །འོག་མིན་གྱི་དྲི་མེད། སངས་རྒྱས་ཀྱི་ཆོས་མཉན་འདོད་ཀྱི། ཉན་ཐོས་དང་རང་སངས་རྒྱས་ཀྱི་ཆོས་འདོད་པ་མ་ཡིན་ན། ཆོས་འདོད་པ་ཡིན་ནོ། །བྱང་ཆུབ་ཀྱི་སེམས་ཀྱི་གཏམ་ལ་དགའི། ཐེག་པ་དམན་པའི་གཏམ་ལ་མ་ཡིན་ནོ། །ཆོས་ཀྱི་ཀུན་དགའ་ལ་དགའ་བས་གནས་པ་ཡིན་ནོ། །བྱང་ཆུབ་སེམས་དཔའི་དོན་གྱི་དབང་ལྔ་མཐོང་བའི་ཕྱིར་ཐོས་པ་ཚོལ་བས་ཆོག་མི་ཤེས་ཏེ། ལྔ་ནི་ཐོས་པ་ལས་ཤེས་རབ་འབྱུང་བ་དང༌། འགྱོད་པ་དང་ཐེ་ཚོམ་མེད་པར་འགྱུར་བ་དང༌། ཀུན་ནས་ཉོན་མོངས་པ་དང༌། རྣམ་པར་བྱང་བ་རྟོགས་པར་འགྱུར་བ་དང༌། སེམས་ཅན་གྱི་ཉོན་མོངས་པ་སྤོང་བ་དང༌། མི་འཇིགས་པས་སེམས་ཅན་གྱི་ཐེ་ཚོམ་གཅོད་པའོ། །ཡང་གཉིས་ཀྱི་ཕྱིར་ཏེ། ཡང་དག་པའི་ལྟ་བ་བསྐྱེད་པ་དང༌། ཆགས་པ་མེད་པའི་གཟུངས་འཐོབ་པའོ། །བྱང་ཆུབ་སེམས་དཔའ་ཕན་ཡོན་ལྔ་མཐོང་ནས་
རབ་ཏུ་འབྱུང་བ་ལ་མོས་པར་འགྱུར་ཏེ། ལྔ་ནི་བདག་གིས་ལས་བྱས་པ་ཆུད་མི་ཟ་བ་དང༌། བདག་གིས་ལས་བྱས་པ་བག་ཆགས་ཀྱིས་བསྒོས་པ་དང༌། ཡོངས་སུ་འཛིན་པ་ཐམས་ཅད་ལས་སེམས་གཏང་བ་དང༌། སངས་རྒྱས་ཀྱིས་མི་སྨད་པ་དང༌། བདག་གྲོལ་ནས་གཞན་གྲོལ་བར་བྱ་བའི་ཕྱིར་ཆོས་སྟོན་པར་འགྱུར་བའོ། །བྱང་ཆུབ་སེམས་དཔའ་མི་ཕྱེད་པའི་དད་པ་རབ་ཏུ་ཐོབ་ནས་ཕྱིན་ཅི་ལོག་ལས་བྱུང་བར་མཐོང་བ་དང༌། ཆོས་ཐམས་ཅད་རྨི་ལམ་ལྟ་བུར་རབ་ཏུ་ཤེས་ན་ཆོས་ཟབ་མོའི་ཚུལ་ལ་གནས་པ་ཡིན་ནོ། །ཆོས་གཉིས་དང་ལྡན་ན། བྱང་ཆུབ་སེམས་དཔའ་ཆད་པར་ལྟ་བར་ལྟུང་བར་མི་འགྱུར་ཏེ། ལས་ཀྱི་བྱ་བ་ལ་འཇུག་པ་ཤེས་པ་དང༌། སངས་རྒྱས་ཀྱི་ཆོས་ཐམས་ཅད་རྣམ་པར་སྒྲུབ་ཤེས་པའོ། །གཉིས་དང་ལྡན་ན་རྟག་པའི་ལྟ་བར་མི་ལྟུང་སྟེ། མི་རྟག་པའི་ཆོས་ལ་འཇུག་པ་དང༌། སྐྱེས་ནས་ཞིག་ཅིང་ཞུ་སྟེ་མི་གནས་པར་རྣམ་པར་དབྱེ་བ་ཤེས་པའོ། །བྱང་ཆུབ་སེམས་དཔའ་ཤེས་རབ་ཀྱི་གནས་ལ་གནས་པའི་བསམ་གཏན་གང་ཞེ་ན། ལུས་དང་སེམས་ཀྱི་བསམ་གཏན་གྱི་ཡན་ལག་དང༌། བསམ་པ་དང་སྦྱོར་བ་དེ་དག་སྒྲུབ་པར་མི་བྱེད་པ་དང༌། ཅི་ནས་དེ་བཞིན་ཉིད་དང༌། ཡང་དག་པའི་མཐའ་དང༌། ཆོས་ཀྱི་དབྱིངས་ཀྱིས་སྙོམས་པར་འཇུག་པ་དེ་ལྟ་བུས་སྙོམས་པར་འཇུག་སྟེ། དེ་ནི་དམིགས་པ་ཅན་གྱིས་སྙོམས་པར་འཇུག་པ་ཐམས་ཅད་ཟིལ་གྱིས་གནོན་ཏོ། །དེའི་དགེ་བའི་རྩ་བ་དང༌། བསམ་གཏན་དེ་དག་ཀྱང་ཤེས་རབ་ཀྱི་ཤས་ཆེ་བ་དང༌། ལྟ་བའི་ཉོན་མོངས་པ་དང་བྲལ་བ་ཡིན་ནོ། །བྱང་ཆུབ་ཏུ་བསྔོས་པ་དང༌། སེམས་ཅན་སྨིན་པར་བྱེད་པ་ཡང་གྲུབ་པ་ཡིན་ཏེ། དེ་བས་ན་དེ་བཞིན་གཤེགས་པ་ནི་སྙོམས་པར་འཇུག་པ་གཅིག་གིས་མྱ་ངན་ལས་འདའ་བའི་བར་དུ་ཐུག་པར་མཛད་དོ། །བྱང་ཆུབ་སེམས་དཔའ་འཁོར་གྱི་ནང་དུ་འོངས་ཏེ་འདུག་ལ། ཆོས་ཟབ་མོའི་གཏམ་གྱི་བར་ཆད་བྱེད་དེ་གཏམ་སྣ་ཚོགས་གླེང་བ་གང་ཡིན་པ་དེ་དམ་པའི་ཆོས་ནུབ་པར་བྱ་བའི་ཕྱིར་བརྩོན་པ་ཡིན་ནོ། །གཞན་ཡང་མི་ཆོས་འདོད་དེ་ཉན་པ་ནི་ཉུང་གི་མ་ཡིན་པའི་ཆོས་ཉན་པ་ནི་མང་
སྟེ། ཆོས་སྨྲ་བ་བཏང་སྟེ། གཏམ་སྣ་ཚོགས་གླེང་ན་དེར་ཟབ་མོའི་ཆོས་ལ་མོས་པའི་ལྷ་རྣམས་མ་རངས་ཏེ། འདི་སྐད་དུ་འཇིག་རྟེན་པའི་གཏམ་གླེང་ཞིང་འདུག་སྟེ། ཀྱེ་རེ་ངན་འདི་ནི་སངས་རྒྱས་ཀྱི་ཆོས་མི་གྲག་གོ་ཞེས་ཚིག་ངན་བཏོན་ནས་འཁོར་དེ་ནས་འདོང་ངོ༌། །རྒྱལ་པོ་མ་སྐྱེས་དགྲས་གསོལ་བ། བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱིས་ནི་སངས་རྒྱས་ཀྱི་ཞིང་ཡོངས་སུ་སྦྱང་བར་བགྱིའོ། །བཀའ་སྩལ་པ། དེ་བཞིན་ཏེ་ཆོས་ཐམས་ཅད་ནི་ཡིད་ལ་བྱེད་པ་ལས་འབྱུང་སྟེ། ཆོས་ཐམས་ཅད་བྱེད་པ་མེད་པའི་ཕྱིར། དེ་དག་ནི་ཇི་ལྟར་འདོད་པ་བཞིན་རྣམ་པར་གྲུབ་པོ། །རྒྱལ་པོ་མ་སྐྱེས་དགྲས་གསོལ་པ། བཅོམ་ལྡན་འདས་རྒྱ་མཚོ་ཆེན་པོར་གཤེགས་ན་ཆབ་ཀྱི་ཚོགས་མཆིས་པ་དེ་གང་དུ་མཆིས་ལགས། བཀའ་སྩལ་པ། གང་གི་ཚེ་དགེ་སློང་མེའི་ཁམས་ཀྱི་ཏིང་ངེ་འཛིན་ལ་སྙོམས་པར་ཞུགས་པ་དེའི་ཚེ། སྟོང་གསུམ་གྱི་སྟོང་ཆེན་པོའི་མེས་ཡོངས་སུ་གང་བར་མཐོང་ན་དེར་ཆུའི་ཕུང་པོ་དེ་གང་དུ་སོང༌། གསོལ་པ། དེ་ནི་ཏིང་ངེ་འཛིན་ལ་དབང་ཐོབ་པའི་སེམས་དེ་ལྟར་ལས་སུ་རུང་བ་ལས་གྱུར་ལགས་སོ། །བཀའ་སྩལ་པ། ཁྱོད་ཉན་ཐོས་ཀྱི་སེམས་ལས་སུ་རུང་བ་ལས། དེ་ལྟར་གྱུར་པར་འདོད་ན་དེ་བཞིན་གཤེགས་པ་ཆོས་ཐམས་ཅད་ལ་མངའ་བ་དེ་ལྟར་མི་འདོད་དམ། ང་དེ་བཞིན་གཤེགས་པའི་ཚེ་ཆུ་ན་གནས་པའི་སེམས་ཅན་རྣམས་ནི་བདག་ཉིད་ཆུ་ན་གནས་སོ་སྙམ་དུ་སེམས་སོ། །སྐམ་ན་གནས་པ་རྣམས་ཀྱིས་ནི་རྒྱ་མཚོ་ཆེན་པོ་སྐམ་པར་མཐོང་ངོ༌། །ལྷ་རྣམས་སྡུག་བསྔལ་འཆི་འཕོའི་ཆོས་གཅིག་པ། །མི་རྣམས་ཀྱིས་ནི་སྡུག་བསྔལ་ཚོལ་ཁྲོ་ལགས། །དམྱལ་བ་དག་གི་སྡུག་བསྔལ་གནོད་བ་ལགས། །གཅིག་ལ་གཅིག་འཚལ་དུད་འགྲོ་རྣམས་ཀྱི་ལགས། །ཡི་དྭགས་སྡུག་བསྔལ་འདི་ནི་བཀྲེས་དང་སྐོམ། །སངས་རྒྱས་འགྲོ་བ་ལས། དེ་ནས་རྒྱལ་པོ་གསལ་རྒྱལ་སྤྱན་སྔར་འདུག་ཅིང་རིན་པོ་ཆེའི་གོས་ལག་ན་ཐོགས་པ་དང་གྱོན་པ་ཕུད་ད། བཅོམ་ལྡན་འདས་ལ་ཕུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་གོས་རིན་པོ་ཆེ་འདི་ནི་སྔོན་གྱི་ལས་ཀྱི་རྣམ་པར་སྨིན་པ་ལས་གྲུབ་པ་ལགས་ན་བཞེས་སུ་གསོལ། བཀའ་
སྩལ་བ། རྒྱལ་པོ་ཆེན་པོ་ཆོས་བཞི་པོ་འདི་དག་ལ་བརྩོན་པར་བྱ་སྟེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་དགེ་སྦྱོང་དང་བྲམ་ཟེ་ཚུལ་ཁྲིམས་དང་ལྡན་པའི་ཐད་དུ་འགྲོ་ཞིང་དྲི་བར་བྱ་བ་དང༌། དེ་བཞིན་གཤེགས་པའི་བསྟན་པ་བསྲུང་བའི་ཕྱིར་སྒྲུབ་པ་དང༌། ཟབ་མོ་ལས་མོས་པ་བཙལ་བའི་ཕྱིར་སྤྲོ་བར་བྱ་བ་དང༌། ལོག་པར་ལྟ་བ་དང་བྲལ་བས་ཡང་དག་པ་ཉིད་དུ་ངེས་པར་བྱ་བའི་ཕྱིར་སྤྲོ་བར་བྱའོ། །དགེ་བའི་རྩ་བ་ཡོངས་སུ་འཛིན་པ་ལས། རིགས་ཀྱི་བུ་མདོར་ན་སངས་རྒྱས་ཀྱི་ཆོས་ཐམས་ཅད་ནི་ཆོས་ཡོངས་སུ་ཚོལ་བ་ལ་རག་ལས་པ་ཡིན་ནོ། །བྱང་ཆུབ་སེམས་དཔའ་ཞེས་བྱ་བ་ནི་སངས་རྒྱས་དང་ཉེ་བའི་སེམས་པ་ཡིན་པ་དེས་ན་བྱང་ཆུབ་སེམས་དཔའ་ཞེས་བྱའོ། །བྱང་ཆུབ་ཅེས་བྱ་བ་ནི་སྟོང་པ་ཉིད་གང་ཡིན་པ་དེ་ནི་བྱང་ཆུབ་པོ། །སྟོང་པ་ཉིད་ཅེས་བྱ་བ་ཅིས་སྟོང་ཞེ་ན། ཆོས་ཐམས་ཅད་ཀྱིས་སྟོང་ངོ༌། །བྱང་ཆུབ་སེམས་དཔའི་ལྷག་པའི་བསམ་པ་ནི་གནས་གསུམ་དུ་རིག་པར་བྱ་སྟེ། ལྷག་པའི་བསམ་པ་དང་པོ་ནི་དངོས་པོ་ཐམས་ཅད་ཡོངས་སུ་མཐོང་བའི་ལས་ཅན་ནོ། །གཉིས་པ་ནི་ཆོས་ཡོངས་སུ་ཚོལ་བ་དང༌། ལེན་པ་དང་འཛིན་པར་བྱེད་ལ་བདག་ཏུ་ཞེན་པ་མེད་པ་ཉིད་དོ། །གསུམ་པ་ནི་ཆོས་ཟབ་མོ་མི་སྤོང་བ་དང༌། སངས་རྒྱས་ཀྱི་བྱང་ཆུབ་ལ་འཇུག་ཅིང་སྒྱིད་ལུག་པ་མེད་པའོ། །བཞི་པོ་འདི་དག་ནི་བདེ་བའི་རྒྱུ་ཡིན་ཏེ། བཞི་ནི་དེ་བཞིན་གཤེགས་པ་མཐོང་བ་དང༌། དལ་བ་ཕུན་སུམ་ཚོགས་པ་ཡིན། དེ་བཞིན་གཤེགས་པའི་ཆོས་འདུལ་བ་ལ་དད་པ་རྙེད་པ་ཡིན། ལྟ་བ་དྲང་པོ་ཕུན་སུམ་ཚོགས་པ་ཡིན། ཁྱིམ་བདག་རྣམ་པར་རྒྱལ་བསྲུང་བ། ཆུང་མ་གཟུགས་ལྡན་མ། ཤཱཀྱའི་བུ་གནག་སྦྱིན་ནོ། །ཆོས་བཞི་དང་ལྡན་ན་ཚེ་བརྗེས་ན་ཡང་དྲན་པ་བརྗེད་པར་མི་འགྱུར་ཏེ། བཞི་ནི་ཆོས་ཚོལ་བ་དང༌། སྦྱིན་པས་ཆོག་མི་ཤེས་པ་ཡིན། སེམས་ཅན་གཞན་བླ་ན་མེད་པའི་བྱང་ཆུབ་འཛིན་དུ་འཇུག་ཅིང༌། དེ་བཞིན་གཤེགས་པའི་ཡོན་ཏན་སྒྲོགས་པ་ཡིན། ཆོས་ཟབ་མོ་ལ་བཟོད་པ་ཡིན། དེ་བཞིན་གཤེགས་པ་མཉེས་པར་བྱ་བའི་ཕྱིར་ཡང་མི་གཡེང་ཞིང༌། ཆོས་ཡིད་ལ་བྱ་བའི་ཕྱིར་དྲན་པ་དང་ཤེས་བཞིན་ཅན་ཡིན་ལ།
ཆོས་ཟབ་མོ་ལ་བཟོད་ཅིང་འཆི་བའི་འདུ་བྱེད་པ་ཡིན་ནོ། །ཆོས་བཞི་ནི་ཐེག་པ་ཆེན་པོ་ལ་ཞུགས་པའི་མཆོག་སྒྲུབ་པ་ཡིན་ཏེ། བཞི་ནི་སངས་རྒྱས་ཀྱི་བྱང་ཆུབ་རྣམ་པར་འཇིག་ཅིང་དམ་པའི་ཆོས་ནུབ་པར་འགྱུར་བ་ན་དམ་པའི་ཆོས་ཚོལ་བ་ལ་བརྩོན་པ་ཡིན། དེ་བཞིན་གཤེགས་པའི་མཆོད་རྟེན་རྣམ་པར་འཇིག་ན་ཕྱིས་འཚེས་ཤིང་ལུས་དང་སྲོག་ལ་བབ་ཀྱང་ཆོས་མི་གཏོང་བ་ཡིན། སེམས་ཅན་སྡུག་བསྔལ་བ་མཐོང་ན། སྙིང་རྗེ་བསྐྱེད་པ་ཡིན། སྙིང་རྗེ་ཐོབ་ནས། བརྩོན་འགྲུས་རྩོམ་ཞིང༌། ནམ་ཞིག་བདག་སངས་རྒྱས་ནས། སེམས་ཅན་དེ་དག་གི་སྡུག་བསྔལ་གཞིལ་བའི་ཕྱིར། ཆོས་བསྟན་པར་བྱ་སྙམ་པ་ཡིན་ནོ། །བྱང་ཆུབ་སེམས་དཔའ་ཆོས་ཀྱིས་སེམས་ཅན་ལ་ཕན་འདོགས་པ་ནི་ཟག་པ་མེད་པའི་བདེ་བ་སྒྲུབ་པ་ཡིན་ལ། སེམས་ཅན་གྱི་༌༌༌༌གོས་ལ་སོགས་པས་ལན་གླན་པ་ནི་ཟག་པ་དང་བཅས་པ་ཡིན་ན། ཇི་ལྟར་དེས་དེ་ལ་ལན་ལོན་པར་འགྱུར། ཤ་ར་དྭ་ཏིའི་བུས་གསོལ་པ། བདག་ཅག་གིས་ནི་དེང་སླན་ཆད་ལ་ལར་ཆོས་བསྟན་ན་ཆེས་ཐོག་མར་བྱང་ཆུབ་སེམས་དཔའི་ཐེག་པ་ལས་བརྩམས་ནས་བསྟན་པར་བགྱི་ཞིང༌། ཉན་ཐོས་ཀྱི་ཐེག་པ་ནི་སླར་གྱིས་བསྟན་པར་བགྱིའོ། །དེ་ཅིའི་སླད་དུ་ཞེ་ན། སེམས་ཅན་འགའ་ཞིག་བྱང་ཆུབ་ཆེན་པོ་ལ་བཞག་ན་བདག་གིས་དེ་བཞིན་གཤེགས་པ་ལ་བྱས་པ་གཟོ་བ་ལགས་སོ། །བཀའ་སྩལ་པ། ཤཱ་རིའི་བུ་ཁྱོད་དེ་ལྟར་གོ་གྱོན་པ་ལེགས་སོ། །དེ་ཅིའི་ཕྱིར་ཞེ་ན། ཐེག་པ་དེ་ལྟ་བུ་དེ་ལ་འཕྱ་བ་དང༌། བསྟིང་བར་བྱེད་པ་དང༌། མདོ་སྡེ་དེ་ལྟ་བུ་སྤོང་བར་བྱེད་པ་འབྱུང་བའི་ཕྱིར་རོ། །ཆོས་བཞི་དང་ལྡན་ན། བདག་ཉིད་ཀྱིས་བདག་དབུགས་ཕྱུང་ཞིང་བདེ་བར་གནས་པ་ཡིན་ནོ། །བཞི་ནི་ཐེག་པ་ཆེན་པོ་ལ་ཞུགས་ནས་ལོངས་སྤྱོད་ཀྱི་བདོག་པ་ཐམས་ཅད་གཏོང་བ་ཡིན། ཚུལ་ཁྲིམས་ཀྱི་ཕུང་པོ་ལ་གནས་པ་ཡིན། ཆོས་ཟབ་མོའི་ཡེ་ཤེས་འཕགས་ཤིང་ལུས་དང་སྲོག་གི་ཕྱིར་ཡང་ཆོས་མི་གཏོང་བ་ཡིན། དགེ་སློང་དམ་པའི་ཆོས་སྨྲ་བ་དམ་པའི་ཆོས་འཛིན་པ་ལ་བདེ་བའི་ཡོ་བྱད་ཐམས་ཅད་ཀྱིས་སྟོབས་པ་ཡིན་ནོ། །ཆོས་བཞི་དང་ལྡན་ན་བྱང་ཆུབ་ཆེན་པོ་ལས་ཉམས་པར་མི་འགྱུར་ལ།
ཚེ་བརྗེས་ནས་ཀྱང་འཁོར་ལོས་སྒྱུར་བར་འགྱུར་ཞིང༌། དགེ་བའི་རྩ་བ་ཡང་ཇི་ལྟར་སྨོས་པས་འཇུག་པར་འགྱུར། འཁོར་ལོས་སྒྱུར་བ་ཐོབ་ནས་རབ་ཏུ་འབྱུང་བར་ཡང་འགྱུར་ཞིང༌། ཚངས་པའི་གནས་པ་བཞི་ཡང་འཐོབ་བར་འགྱུར། དེ་ནས་ཤི་འཕོས་ནས་ཀྱང་ཚངས་པའི་འཇིག་རྟེན་དུ་སྐྱེ་བར་འགྱུར་རོ། །བཞི་ནི་དེ་བཞིན་གཤེགས་པའི་མཆོད་རྟེན་ཞིག་པ་མཐོང་ནས་བཅོས་པའི་ཕྱིར་སྤྲོ་ཞིང་ཐ་ན་འཇིམ་པའི་གོང་བུ་གཅིག་ཙམ་ཡང་རྩིག་པར་བྱེད་པ་ཡིན། མཆོད་རྟེན་བརྩིགས་པས་སྐྱེ་བོ་མང་པོ་འདུ་བའི་ས་ལམ་གྱི་བཞི་མདོ་ལྟ་བུ་མཆོད་རྟེན་དང་ཁང་པ་བརྩེགས་པ་འམ། རྡོ་རིངས་སམ་དེ་བཞིན་གཤེགས་པའི་ཡོན་ཏན་རྗེས་སུ་དྲན་པ་གང་ཡང་རུང་བ་བྱེད་པ་འདི་ལྟ་སྟེ། མངོན་པར་འབྱུང་བ་ནས་མྱ་ངན་ལས་འདས་པའི་བར་གྱིས་མཆོད་རྟེན་བརྩིགས་པ་ཡིན། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་བྱེ་ཞིང་འཐབ་པ་དང༌། རྩོད་པ་བྱུང་བ་མཐོང་ནས་མི་འབྱེད་པ་དང་མཐུན་པར་བསྡུམ་པའི་ཕྱིར་བརྩོན་པ་ཡིན། བསྟན་པའི་ཆོས་རབ་ཏུ་འཇིག་པ་ནི་ཐ་ན་ཚིགས་སུ་བཅད་པ་གཅིག་ཙམ་ཡང་བསྲུང་བ་དང༌། མི་ཉམས་པར་བྱ་བའི་ཕྱིར་བརྩོན་བ་ཡིན་ནོ། །ཆོས་བཞི་དང་ལྡན་ན་ཚེ་བརྗེས་ནས་དགེ་སློང་ཚུར་ཤོག་ཅེས་བྱས་པའི་རབ་ཏུ་འབྱུང་བ་འཐོབ་སྟེ། བཞི་ནི་བདག་ཉིད་རབ་ཏུ་འབྱུང་བ་ལ་དགའ་ཞིང་གཞན་ཡང་རབ་ཏུ་འབྱུང་བ་འཛིན་དུ་འཇུག་ལ། རྣམ་པ་ཐམས་ཅད་དུ་རབ་ཏུ་འབྱུང་བ་ལ་རྟོན་པར་བྱེད་དེ། རབ་ཏུ་བྱུང་ནས་ཆོས་དང་ལྡན་པའི་གཏམ་གྱིས་ཡང་དག་པར་དགའ་བར་བྱེད་ཅིང་འཛིན་དུ་འཇུག་པ་ཡིན་ནོ། །ཆོས་བཙལ་བའི་ཕྱིར་བདག་ཉིད་ཀྱང་བརྩོན་ཞིང་གཞན་ཡང་བརྩོན་པར་འཇུག་པ་ཡིན། བདག་ཉིད་བཟོད་པ་དང་ངེས་པ་དང་ལྡན་ཞིང་གཞན་ཡང་དེ་ལ་འགོད། བདག་ཉིད་ཡོ་བྱད་བསྙུངས་ཤིང་ཤེས་པ་ཕུན་སུམ་ཚོགས་ལ་གཞན་ཡང་དེ་དག་ལ་འགོད་པ་ཡིན། བདག་ཉིད་ཐབས་ལ་མཁས་ཤིང་སྨོན་ལམ་གྱི་སྟོབས་ཅན་ཡིན་ལ། གཞན་ཡང་དེ་ལ་འགོད་པ་ཡིན་ནོ། །ཆོས་བཞི་དང་ལྡན་ན། བྱང་ཆུབ་ཆེན་པོ་ལས་མི་ཉམས་པ་ཡིན་ཏེ། བཞི་ནི་ལྷག་པའི་སེམས་ཀྱིས་བྱང་ཆུབ་ཏུ་སེམས་བསྐྱེད་པ་དེ་
བཞིན་གཤེགས་པའི་བསྟན་པ་ལ་དགའ་བ་ཡིན། ཆོས་ཉན་པས་ངོམས་མི་ཤེས་པ་ཡིན། མི་སླུ་བས་བདེན་པར་སྨྲ་བ་ཡིན་ནོ། །གང་དག་དགེ་སློང་བསྟེན་བྱེད་པ། །དེ་དག་མང་དུ་ཐོས་པར་འགྱུར། །ཆོས་ཀྱི་རྒྱལ་པོས་བཀུར་བ་ཡིན། །དེ་དག་འདི་ནི་ང་རྗེས་འབྲང༌། །ཇི་ལྟར་ན་བྱང་ཆུབ་སེམས་དཔའ་ཆོས་ལས་ཉམས་པ་ཡིན་ཞེ་ན། ཆོས་སྟོང་པ་ཉིད་བསྟན་ཀྱང་ཟང་ཟིང་སྔོན་དུ་བཏང་སྟེ་སྟོན་པར་བྱེད་པ་ཡིན། ཆོས་དེ་དག་སྟོན་ཀྱང་དེ་དེ་བཞིན་དུ་ཞུགས་པ་མ་ཡིན་ཏེ། དེ་ལྟར་ན་ཆོས་ལས་ཉམས་པ་ཡིན་ནོ། །ཡབ་དང་སྲས་མཇལ་བ་ལས། དེ་བཞིན་གཤེགས་པའི་ཡོན་ཏན་གཟུགས་ཅན་ཞིག་ཡིན་ན་ནི། སེམས་བསྐྱེད་པ་རེ་རེའི་བསོད་ནམས་དང་ཡོན་ཏན་གྱི་ཚོགས་ཀྱང༌། དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་ཀྱི་བསྐལ་པ་དེ་སྙེད་དུ་བརྗོད་པར་མི་ནུས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་བྱང་ཆུབ་སེམས་དཔའི་སྤྱད་པ་སྤྱོད་པ་ན་སེམས་བསྐྱེད་པ་ཡང་རུང་སེམས་ཅན་ཇི་སྙེད་པ་ཐམས་ཅད་ལ་ཕན་བ་དང༌། བདེ་བའི་དོན་དུ་མ་སྐྱེས་པ་གཅིག་ཀྱང་མེད་དོ། །སེམས་ཅན་གྱི་ཁམས་ཚད་མེད་པ་དང་ཟད་མི་ཤེས་པ་བསོད་ནམས་ཀྱང་དེ་སྙེད་དུ་འགྱུར་རོ། །སེམས་དེ་ལྟར་བསྐྱེད་པས་སེམས་ཅན་ཐམས་ཅད་ཀྱིས་མཆོད་པས་ཀྱང་ལན་མི་ལོན་ཏོ། །འཇིག་རྟེན་པའི་མཆོད་པ་ནི་ཟང་ཟིང་ཡིན་ལ། སེམས་བསྐྱེད་པ་ནི་སེམས་ཅན་འཁོར་བ་ལ་གཞོལ་བ་རྣམས་མྱ་ངན་ལས་འདས་པར་གཞོལ་བར་བྱེད་པས་ཟང་ཟིང་མེད་པའི་ཕྱིར་རོ། །བཅོམ་ལྡན་འདས་ཤཱཀྱ་ཐུབ་པ་འདི་ཉིད་སྔོན་བགྲང་དུ་མེད་པའི་སྔོན་རོལ་ན། དེ་བཞིན་གཤེགས་པ་དབང་པོའི་ཏོག་ཅེས་བྱ་བར་གྱུར་ཏོ། །ཆོས་རྣམས་གང་ཡང་རང་བཞིན་ཉིད་ཀྱིས་མེད། རྣམ་པར་རྟོག་པ་ཆོས་འབྱུང་ཀུན་ཀྱང་སྟོང༌། །རྟོག་པ་མེད་པས་མཚན་མ་མེད་པར་འགྱུར། །དེ་ཉིད་བྱང་ཆུབ་གཞན་དུ་མཁས་མི་སྨྲ། །སངས་རྒྱས་བརྡ་ཙམ་ཉིད་ལགས་ཏེ། །དེ་བཞིན་སྟོབས་དང་ཡེ་ཤེས་དང༌། །མི་འཇིགས་བཞི་ཡང་དེ་བཞིན་དུ། །ཀུན་རྫོབ་ཅེས་ནི་ཐུབ་པས་གསུངས། །དཀོན་མཆོག་སྤྲིན་ལས། དེ་དེ་ལྟར་སེམས་མི་མཁས་པས། ཆོས་འདི་དག་ནི་སྒྱུ་མ་ལྟ་བུའོ། །ཆོས་འདི་དག་ནི་རྨི་ལམ་ལྟ་བུའོ། །ཆོས་འདི་དག་ནི་དགེ་བའོ། །ཆོས་འདི་དག་ནི་མི་དགེ་
བའོ། །ཆོས་འདི་དག་ནི་འབྱུང་བའོ། །ཆོས་འདི་དག་ནི་མི་འབྱུང་བའོ་ཞེས་ཆོས་རྣམས་ལ་ཡོངས་སུ་རྟོག་སྟེ། དེ་འདི་སྙམ་དུ་ཆོས་འདི་དག་ཐམས་ཅད་ནི་སེམས་ལ་གནས་པ། སེམས་ལས་བྱུང་བ། སེམས་རྐྱེན་དུ་འགྲོ་བ་སྟེ། སེམས་ཤིན་ཏུ་བཅིལ། ཤིན་ཏུ་བཏུལ། ཤིན་ཏུ་ཁོང་དུ་ཆུད་པར་བྱས་ནས། ཆོས་དེ་དག་ཐམས་ཅད་ཀྱང་ཤིན་ཏུ་བཅིལ་བ་དང༌། ཤིན་ཏུ་བཏུལ་བ་དང༌། ཤིན་ཏུ་ཁོང་དུ་ཆུད་པར་འགྱུར་ཏེ། དེས་ཆོས་རྣམས་དེ་ལྟར་མཐོང་བས། རྒྱུ་དེ་དང་རྐྱེན་དེས་སེམས་ཞི་བར་བྱ་བའི་ཕྱིར་ནན་ཏན་བྱེད་དེ་དེ་སེམས་ཉིད་ལ་མི་གཏོད་དོ། །ཇི་ལྟར་ན་བྱང་ཆུབ་སེམས་དཔའ་ཡོངས་སུ་བསྔོ་བའི་ཐབས་མཁས་པ་ཡིན་ཞེ་ན། གང་འདི་མེ་ཏོག་གི་རྣམ་པའམ། འབྲས་བུའི་རྣམ་པ་ང་ཡིར་བྱ་བ་མེད་པ་ཡོངས་སུ་བཟུང་བ་མེད་པ་དེ་རྣམས་ཉིན་ལན་གསུམ་མཚན་ལན་གསུམ་སངས་རྒྱས་དང་བྱང་ཆུབ་སེམས་དཔའ་རྣམས་ལ་འབུལ་ལོ། །དགེ་བའི་རྩ་བ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་བཞིན་དུ་མེ་ཏོག་གི་ཤིང་ལ་སོགས་པ་ཡང་བསྔོའོ། །མདོ་སྡེ་དག་མཆོད་པའི་རྣམ་པ་རྒྱ་ཆེན་པོ་དག་ཉན་ཅིད་བསམ་པ་ཐག་པ་ནས་ཡོངས་སུ་བསྔོའོ། །ཇི་ལྟར་ན་བྱང་ཆུབ་སེམས་དཔའ་གནས་ནས་གནས་སུ་སློང་བའི་ཐབས་ལ་མཁས་པ་ཡིན་ཞེ་ན་སེམས་ཅན་གང་དག་བླ་ན་མེད་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ནུས་ཤིང་ལྕོགས་པ་ཞིག་ལ་དེ་ཡང་ཉན་ཐོས་དང༌། རང་སངས་རྒྱས་ཀྱི་ཐེག་པ་ཐོག་མར་རྩོལ་ཞིང་འབད་དེ། བརྩོན་འགྲུས་བརྩམ་པ་མཐོང་ན། དེ་གནས་དེ་ནས་བསླངས་ཏེ་དེ་ན་འཁོར་དབྱེ་བ་ཡང་བྱས་ནས་ཐེག་པ་ཆེན་པོ་ལ་འཇོག་སྟེ། དེ་ལྟར་ན་གནས་ནས་གནས་སུ་སློང་བའི་ཐབས་ལ་མཁས་པ་ཡིན་ནོ། །བྱང་ཆུབ་སེམས་དཔའ་སྣོད་དུ་མ་གྱུར་པའི་སེམས་ཅན་རྣམས་ལ་ཆོས་མི་སྟོན་ཏོ། །ཞེ་འགྲས་པ་རྣམས་ལ་མ་ཡིན། ཀླན་ཀ་ཚོལ་བ་དང༌། མུ་སྟེགས་ཅན་དང༌། རི་མོ་མེད་པ་དང༌། མ་དད་པ་མང་བ་དང༌། གཡོ་དང་སྒྱུས་གླགས་པ་དང༌། འཚོ་བའི་བསམ་པ་ཅན་དང༌། རྙེད་པ་དང༌། བཀུར་སྟི་དང༌། ཕྲག་དོག་དང༌། སེར་སྣས་གླགས་བ་དང༌།
གླེན་པ་རྨོངས་པ་ལུག་ལྟར་ལྐུགས་པ་རྣམས་ལ་མ་ཡིན། ཅིའི་ཕྱིར་ཞེ་ན། ཆོས་ལ་སེར་སྣ་ཡང་མེད་སེམས་ཅན་གྱི་དོན་ལ་རྒྱབ་ཀྱིས་ཕྱོགས་པ་ཡང་མ་ཡིན་མོད་ཀྱི། སེམས་ཅན་འདི་དག་ནི་དེ་བཞིན་གཤེགས་པའི་ཆོས་འདུལ་བའི་སྣོད་དུ་མ་གྱུར་ཏོ་ཞེས་བཏང་སྙོམས་སུ་འཇུག་གོ །སེམས་ཅན་ཅི་འདྲ་བ་ལ་སངས་རྒྱས་དང་བྱང་ཆུབ་སེམས་དཔས་ཆོས་སྟོན་ཞེ་ན། སེམས་ཅན་དང་བ་ཅན་དང༌། དགེ་བའི་རྩ་བ་སྨིན་པ་དང༌། སྣོད་དུ་གྱུར་བ་དང༌། གཡོ་མེད་པ་དང༌། སྤྱོད་ལམ་མི་འཆོས་པ་དང༌། རྙེད་པ་དང༌། བཀུར་སྟི་ལ་མ་ཆགས་པ་དང༌། ཚུལ་བཟང་པོ་དང༌། ལེགས་པར་སྟོན་ནུས་པ་དང༌། དབང་པོ་རྣོ་བ་དང༌། ཇི་སྐད་བཤད་པ་བཞིན་བྱེད་པ་རྣམས་ལ་སྟོན་ཏོ། །བྱང་ཆུབ་སེམས་དཔའ་ནི་ཐེག་པ་ཆེན་པོ་ཡོངས་སུ་འཛིན་པ་དང༌། དེ་ཡོངས་སུ་འཛིན་པ་རྣམས་ལ་ཆོས་མཚུངས་པའི་འདུ་ཤེས་ཀྱིས་ཞེ་ས་དང༌། རི་མོ་དང་བཅས་པ་དང༌། ཐེག་པ་ཆེན་པོ་ལ་གཞོལ། འབབ། བབ་པ་ཡིན་ཏེ། དེས་ན་བྱང་ཆུབ་ཀྱི་སེམས་མ་སྣད་བ་ཡིན་ནོ། །སྐྱོན་ཡང་གང་ཞེ་ན། རྙེད་པ་དང༌། བཀུར་སྟི་འདོད་པ་དང༌། རིགས་དང་རུས་དང༌། ལྟ་བ་ལ་ཆགས་པ་དང༌། སྡིག་པ་ཆུང་ངུས། འཇིགས་པར་མི་ལྟ་བ་དང༌། ཤི་བས་མི་སྐྲག་པ་དང༌། མི་བསམ་པ་སེམས་པ་དང༌། ལམ་མ་ཡིན་བ་ལ་ལམ་དུ་འདུ་ཤེས་པ་དང༌། འཕྲལ་གྱི་བྱ་བ་ལ་ཆགས་པ་དང༌། ཐེག་པ་ཆེན་པོ་དང༌། དེ་སྟོན་པའི་གང་ཟག་གི་མི་བསྔགས་པ་བརྗོད་པ་དང༌། ཉན་ཐོས་ཀྱི་ཐེག་པ་དང༌། དེ་སྟོན་པའི་གང་ཟག་གི་བསྔགས་པ་བརྗོད་པ་དང༌། རྩོད་པ་ལྷུར་ལེན་བ་དང༌། བརླང་བ་དང༌། རྩུབ་བ་དང༌། སྤྱི་བརྟོལ་ཆེ་བ་དང༌། གཏུགས་པ་དང༌། དག་མི་སྙན་པ་དང༌། མུར་ཅོར་སྨྲ་བ་དང༌། མི་གཙིགས་པར་སྨྲ་བ་དང༌། ངག་ཏུ་སྨྲ་བ་སྟེ། དེ་དེ་ལྟར་སྐྱོན་ལ་མཁས་པས་སྤྲོས་པ་ཐམས་ཅད་དང་བྲལ་བར་བྱ་བའི་ཕྱིར། སྟོང་པ་ཉིད་བསྒོམས་པ་ལ་རྣལ་འབྱོར་དུ་བྱེད་དོ། །འདི་ནི་བྱང་ཆུབ་སེམས་དཔའ་རྣམས་ཀྱི་འདུལ་བའོ། །ལང་ཀར་གཤེགས་པ་ལས། ལང་ཀའི་བདག་པོ། ས་བོན་གཅིག་ལས་བྱུང་ཡང༌། མྱུ་གུ་དང༌། ལྗང་བུ་དང༌།
སོག་མ་དང༌། ཚིགས་དང༌། ཡལ་ག་དང༌། མེ་ཏོག་དང༌། འབྲས་བུ་དང༌། གྲ་མའི་བྱེ་བྲག་ཡོད་པ་དེ་བཞིན་དུ་ཕྱི་ནང་གི་ཆོས་སྐྱེ་བའི་ཆོས་མ་རིག་བ་ལས་རབ་ཏུ་བྱུང་བ་ཕུང་པོ་དང༌། ཁམས་དང་སྐྱེ་མཆེད་ལ་སོགས་པ་ཐམས་ཅད་དང་ཁམས་གསུམ་དུ་སྐྱེས་པའི་ཆོས་ཐམས་ཅད་ལ་བདེ་བའི་དབྱིངས་དང༌། བརྗོད་པ་དང་འགྲོ་བའི་ཁྱད་པར་དག་སྣང་སྟེ། མཚན་ཉིད་གཅིག་པའི་རྣམ་པར་ཤེས་པ་ཡུལ་ན་མངོན་པར་འཛིན་པར་རབ་ཏུ་འཇུག་པའི་ཁྱད་པར་རབ་དང་འབྲིང་དང༌། ཐ་མའི་ཁྱད་པར་དང༌། རྣམ་པར་བྱང་བ་དང༌། དགེ་བ་དང་མི་དགེ་བར་ཡང་སྣང་ངོ༌། །ལང་ཀའི་བདག་པོ་དེ་དག་གི་ཐ་དད་པའི་ཁྱད་པར་དུ་ཡང་མ་ཟད་དེ། རྣལ་འབྱོར་བ་རྣལ་འབྱོར་བསྒོམ་པ་རྣམས་ཀྱི་ལམ་ལ་ཡང་སོ་སོ་རང་གིས་རིག་པའི་མཚན་ཉིད་སྣང་ན། སོ་སོའི་རྣམ་པར་རྟོག་པ་ལས་བྱུང་བའི་ཆོས་དང༌། ཆོས་མེད་པའི་ཁྱད་པར་ལྟ་ཅི་སྟེ་མེད་དེ་ཡོད་དོ། །བློ་གྲོས་ཆེན་པོ་འཇིམ་པའི་གོང་བུ་རྡུལ་ཕྲ་རབ་ལས་ཐ་དད་པ་ཞིག་ཡིན་ན་ནི། དེ་དག་ལས་བརྩམས་པ་མ་ཡིན་པར་འགྱུར་བ་ཞིག་ན་བརྩམས་པས་ཐ་དད་པ་མ་ཡིན་ནོ། །ཐ་མི་དད་པ་ནི་ཁྱད་མེད་པར་འགྱུར་རོ། །དེ་བཞིན་དུ་འཇིག་པའི་རྣམ་པར་ཤེས་པ་རྣམས་ཀུན་གཞིའི་རྣམ་པར་ཤེས་པའི་རིགས་ཀྱི་མཚན་ཉིད་དང་ཐ་དད་ན་ནི་དེ་ལས་འབྱུང་བར་མི་འགྱུར་རོ། །ཐ་མི་དད་ན་ནི་འཇིག་པའི་རྣམ་པར་ཤེས་པ་འགགས་ན་ཀུན་གཞི་ཡང་འགག་པར་འགྱུར་ན། རང་གི་རིགས་ཀྱི་མཚན་ཉིད་ནི་འགག་པར་མི་འགྱུར་ཏེ། དེའི་ཕྱིར་རྣམ་པར་ཤེས་པ་རྣམས་ཀྱི་རང་གི་རིགས་ཀྱི་མཚན་ཉིད་མི་འགག་གི་ལས་ཀྱི་མཚན་ཉིད་འགག་གོ །རང་གི་རིགས་ཀྱི་མཚན་ཉིད་འགགས་ན་ཀུན་གཞི་རྣམ་པར་ཤེས་པ་ཡང་འགག་པར་འགྱུར་ཏེ། བློ་གྲོས་ཆེན་པོ་ཀུན་གཞི་རྣམ་པར་ཤེས་པ་འགགས་ན་ནི་སྨྲ་བ་འདི་ཡང་མུ་སྟེགས་བྱེད་པའི་ཆད་པར་སྨྲ་བ་དང་ཁྱད་པར་འགྱུར་རོ། །མུ་སྟེགས་བྱེད་རྣམས་ཀྱི་སྨྲ་བ་ནི་འདི་ལྟ་སྟེ། ཡུལ་འཛིན་པ་རྒྱུན་ཆད་པས་རྣམ་པར་ཤེས་པ་རྒྱུན་ཆད་པར་འགྱུར་ཏེ། རྣམ་པར་ཤེས་པའི་རྒྱུན་ཆད་པས་ཐོག་མ་མེད་པའི་དུས་ཀྱི་རྒྱུན་ཡང་ཆད་པར་འགྱུར་རོ། །མུ་སྟེགས་བྱེད་པ་རྣམས་ནི་རྒྱུ་ལས་
རྒྱུན་འབྱུང་བར་སྨྲ་བའི་རྒྱུ་མ་གཏོགས་པར་མིག་གི་རྣམ་པར་ཤེས་པ་གཟུགས་དང་སྣང་བ་འདུས་པ་ལས་འབྱུང་བར་མི་སྨྲ་སྟེ། རྒྱུ་ནི་གཙོ་བོ་དང༌། སྐྱེས་བུ་དང༌། དབང་ཕྱུག་དང༌། དུས་དང༌། རྡུལ་ཕྲ་མོར་སྨྲ་བའོ། །བློ་གྲོས་ཆེན་པོ་སྙིང་རྗེ་ཆེན་པོ་དང་ཐབས་ལ་མཁས་པ་ལྷུན་གྱིས་གྲུབ་པར་འགྱུར་བའི་སྦྱོར་བ་དང༌། སེམས་ཅན་གྱི་ཁམས་ཐམས་ཅད་སྒྱུ་མ་དང༌། གཟུགས་བརྙན་དང༌། མཉམ་པ་ཉིད་དང༌། རྐྱེན་གྱིས་མ་བརྩམས་པ་དང༌། ནང་དང་ཕྱིའི་ལས་རྣམ་པ་དབེན་པ་དང༌། ཕྱི་རོལ་སེམས་སུ་ལྟ་བས་མཚན་མ་མེད་པའི་གནས་དང་ལྡན་པ་རྣམས། རིམ་གྱིས་སའི་རིམ་པ་ཏིང་ངེ་འཛིན་གྱི་སྤྱོད་ཡུལ་ལ་རྗེས་སུ་འཇུག་པ་དང༌། ཁམས་གསུམ་བ་དག་གི་སེམས་སྒྱུ་མར་ཤིན་ཏུ་མོས་པས་རབ་ཏུ་སྒོམ་པ་ནི་སྒྱུ་མ་ལྟ་བུའི་ཏིང་ངེ་འཛིན་འཐོབ་བར་འགྱུར་རོ། །བདག་གི་སེམས་སྣང་བ་ཙམ་ལ་འཇུག་པས། ཤེས་རབ་ཀྱི་ཕ་རོལ་ཏུ་ཕྱིན་པ་གནས་པ་རྗེས་སུ་འཐོབ་པ་སྐྱེ་བ་བྱ་བ་དང་ལྡན་པ་མེད་པའི་བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་རྡོ་རྗེའི་གཟུགས་ལྟ་བུ། དེ་བཞིན་གཤེགས་པའི་སྐུའི་རྗེས་སུ་སོང་སོང་བ། དེ་ཉིད་ཀྱི་སྤྲུལ་པ་དང་ལྡན་པ། སྟོབས་དང་མངོན་པར་ཤེས་པ་དང༌། སྙིང་རྗེ་དང་ཐབས་ཀྱིས་བརྒྱན་པ། སངས་རྒྱས་ཀྱི་ཞིང་མུ་སྟེགས་ཀྱི་གནས་ཐམས་ཅད་དུ་ཉེ་བར་སོང་བ་སེམས་དང་ཡིད་དང་རྣམ་པར་ཤེས་པ་དང་བྲལ་བ། རིམ་གྱིས་གནས་འཕོས་པ་དེ་བཞིན་གཤེགས་པའི་སྐུ་རབ་ཏུ་འཐོབ་པར་འགྱུར་རོ། །ཇི་ལྟར་སྒྱུ་མ་སྣ་ཚོགས་དག །སྣང་ཡང་ཡོད་པ་མ་ཡིན་ཏེ། །དེ་བཞིན་གཤེགས་པ་སྣ་ཚོགས་ཀྱང༌། །བཤད་པ་རྣམ་པར་འཁྲུལ་པ་ཡིན། །གཞན་ལ་གང་ཞིག་བསྟན་པ་དེ། །གཞན་ལ་བཤད་པར་མི་རུང་སྟེ། །ཇི་ལྟར་ནད་པ་སོ་སོ་ལ། །སྨན་པ་སྨན་རྣམས་བཏང་བ་ལྟར། །དེ་བཞིན་སངས་རྒྱས་སེམས་ཅན་ལ། །སེམས་ཙམ་དུ་ཡང་རབ་ཏུ་གསུངས། །མགོན་པོ་རྣམས་ནི་གང་གསུངས་པའི། །སོ་སོ་རང་རིག་སྤྱོད་ཡུལ་ནི། རྟོག་གེ་ཅན་གྱི་སྤྱོད་ཡུལ་མིན། །ཉན་ཐོས་རྣམས་ཀྱི་འང་དེ་བཞིན་མིན། །བློ་གྲོས་ཆེན་པོ་གནས་ཡང་བྱང་ཆུབ་སེམས་དཔའ་རང་གི་སེམས་སྣང་བའི་གཟུང་བ་དང༌།
འཛིན་པ་རྣམ་པར་རྟོག་པའི་སྤྱོད་ཡུལ་ཡོངས་སུ་ཤེས་པར་འདོད་པས་འདུ་བ་དང༌། འདུ་འཛི་དང༌། གཉིད་དང་སྒྲིབ་པ་མེད་པར་བྱའོ། །སྲོད་དང་ཐོ་རངས་དང་ནམ་གྱི་གུང་ཐུན་ལ་མི་ཉལ་བའི་སྦྱོར་བ་ལ་བརྩོན་པར་བྱའོ། །མུ་སྟེགས་ཅན་ངན་པའི་གཙུག་ལག་དང༌། གཏམ་དང༌། ཉན་ཐོས་དང༌། རང་སངས་རྒྱས་ཀྱི་ཐེག་པའི་མཚན་ཉིད་དང་བྲལ་བར་བྱ་ཞིང་བྱང་ཆུབ་སེམས་དཔའ་སེམས་དཔའ་ཆེན་པོས་རང་གི་སེམས་སྣང་བ་ལ་རྣམ་པར་རྟོག་པའི་མཚན་ཉིད་ཁོང་དུ་ཆུད་པར་རྟོགས་པར་བྱའོ། །སྣ་ཚོགས་སྣང་བ་ཡོད་མ་ཡིན། །སྣང་བ་ལས་ནི་སེམས་འབྱུང་སྟེ། །ལུས་དང་ལོངས་སྤྱོད་གནས་ལྟ་བུར། །ཀུན་གཞི་མི་ལ་སྣང་བ་ཡིན། །བློ་གྲོས་ཆེན་པོས་རང་སེམས་སྣང་བའི་རྒྱུར་རྣམ་པར་དག་པར་བྱ་བའི་ཕྱིར་ཡང་གསོལ་བ་བཏབ་པ། བཅོམ་ལྡན་འདས་རང་གི་སེམས་སྣང་བའི་རྒྱུ་ཅིག་ཅར་རམ་རིམ་གྱིས་འཇུག་པས་སམ། ཇི་ལྟར་རྣམ་པར་དག་པར་འགྱུར། །བཀའ་སྩལ་པ། རིམ་གྱིས་ཏེ་ཅིག་ཅར་མ་ཡིན་པའི་དཔེ་ཨ་མྲའི་འབྲས་བུ་སྨིན་པ་དང༌། རྗེ་མཁན་སྣོད་བྱེད་པ་དང༌། ས་ལས་རྩི་ཤིང་སྐྱེ་བ་དང༌། རོལ་མོ་ལ་མཁས་པ་རིམ་གྱིས་འབྱུང་བ་གསུངས། མེ་ལོང་དུ་གཟུགས་བརྙན་སྣང་བ་རྟོག་པ་མེད་པ་ཅིག་ཅར་འབྱུང་བའི་དཔེས། དེ་བཞིན་གཤེགས་པ་ཡང་སེམས་ཅན་གྱི་རང་གི་སེམས་སྣང་བའི་རྒྱུད་རྣམ་པར་མི་རྟོག་ཅིང་སྣང་བ་མེད་པའི་སྤྱོད་ཡུལ་ཅིག་ཅར་རྣམ་པར་སྤྱོད་དོ་ཞེས་བསྟན། བློ་གྲོས་ཆེན་པོ་ཡང་ཉན་ཐོས་ཀྱི་དངོས་པོ་རྣམ་པར་རྟོག་པའི་རང་བཞིན་ལ་མངོན་པར་ཞེན་པ་གང་ཞེ་ན། འདི་ལྟ་སྟེ། སྔོན་པོ་དང༌། སེར་པོ་དང༌། དྲོ་བ་དང༌། གཤེར་བ་དང༌། གཡོ་བ་དང༌། སྲ་བའི་འབྱུང་བ་ཆེན་པོ་རྣམས་བྱེད་པ་མེད་པར་འབྱུང་བ་རང་དང་སྤྱིའི་མཚན་ཉིད་དང༌། རིགས་པ་དང༌། ལུང་གི་ཚད་མ་དང༌། ཤིན་ཏུ་འགྲེལ་པ་རྣམས་མཐོང་ནས། དེའི་རང་བཞིན་ལ་མངོན་བར་ཞེན་པའི་རྣམ་པར་རྟོག་པ་འབྱུང་ངོ༌། །བློ་གྲོས་ཆེན་པོ་འདི་ནི་བྱང་ཆུབ་སེམས་དཔས་ཁོང་དུ་ཆུད་ནས་བཟློག་པར་བྱའོ། །དེ་ནས་ཡང་བཅོམ་ལྡན་འདས་ལ་བློ་གྲོས་ཆེན་པོས་གསོལ་བ། ཇི་ལྟར་
བདག་དང་བྱང་ཆུབ་སེམས་དཔའ་གཞན་སྒྲོ་འདོགས་པ་དང༌། སྐུར་པའི་ལྟ་བ་ངན་པ་སྤངས་པའི་བློ་ཅན་རྣམས་བླ་ན་མེད་པའི་བྱང་ཆུབ་ཏུ་འཚང་རྒྱ་ཞིང༌། སངས་རྒྱས་ནས་ཀྱང་རྟག་པ་དང་སྒྲོ་འདོགས་པ་དང་ཆད་པ་དང༌། སྐུར་པ་འདེབས་པའི་ལྟ་བ་རྣམ་པར་སྤངས་ཏེ། ཁྱོད་ཀྱིས་སངས་རྒྱས་ཀྱི་ཚུལ་ལ་མི་སྐུར་པར་འགྱུར་བ་སྒྲོ་འདོགས་པ་དང༌། སྐུར་པའི་མཚན་ཉིད་བདག་ལ་བཤད་དུ་གསོལ། བཀའ་སྩལ་པ། སྒྲོ་འདོགས་པ་དང་སྐུར་པ་དག །སེམས་ཙམ་པོ་ལ་ཡོད་པ་མིན། །ལུས་དང་ལོངས་སྤྱོད་གནས་ལྟ་བུས། །སེམས་ནི་སུ་དག་མི་ཤེས་པ། །སྒྲོ་འདོགས་པ་དང་སྐུར་བ་ལ། །མི་མཁས་དེ་དག་རབ་ཏུ་སྤྱོད། །རང་བཞིན་མེད་པ་ནི་རང་བཞིན་ཐར་པ་མེད་པ་ལ་དགོངས་ཏེ། དངོས་པོ་ཐམས་ཅད་རང་བཞིན་མེད་པ་ཞེས་བྱའོ། །བློ་གྲོས་ཆེན་པོ་ཐམས་ཅད་ཀྱི་རྟེན་ནས་རྒྱུ་དང་འབྲེལ་པར་འབྱུང་བའི་མཚན་ཉིད་ནི་རྣམ་པ་གཉིས་ཏེ། འདི་ལྟར་ཕྱིའི་དང་ནང་གི་གིའོ། །དེ་ལྟར་ཕྱིའི་རྟེན་ཅིང་འབྲེལ་པར་འབྱུང་བ་ནི་འཇིམ་པའི་གོང་བུ་དང༌། ལག་ཟུངས་དང༌། འཁོར་ལོ་དང༌། སྲད་བུ་དང༌། ཆུ་དང༌། མིའི་ནན་ཏན་ལ་སོགས་པའི་རྐྱེན་གྱིས་རྫ་མ་འབྱུང་བ་དང༌། དེ་བཞིན་དུ་ཐགས་ལས་སྣམ་བུ་དང༌། རྩི་སྐྱོང་ལས་རེ་ལྡེ་དང༌། ས་བོན་ལས་མྱུ་གུ་དང༌། སྲུབ་མ་ལ་སོགས་པ་མིའི་ནན་ཏན་དང༌། ཞོ་ལས་མར་འབྱུང་བ་འདི་ནི་ཕྱིའི་རྟེན་ཅིང་འབྲེལ་པར་འབྱུང་བ་སྔ་མ་ལས་ཕྱི་མ་འབྱུང་བའོ། །ནང་གི་ནི་འདི་ལྟ་སྟེ། མ་རིག་པ་དང༌། སྲིད་པ་དང༌། ལས་དང༌། ཆོས་འདི་དག་ལ་སོགས་པ་ནི་རྟེན་ཅིང་འབྲེལ་པར་འབྱུང་བའི་མིང་འཐོབ་པོ། །བློ་གྲོས་ཆེན་པོ་འདི་དག་ལས་སྐྱེས་པའི་ཕུང་པོ་དང༌། ཁམས་དང་སྐྱེ་མཆེད་ཅེས་བྱ་བའི་ཆོས་དེ་དག་ཀྱང་རྟེན་ཅིང་འབྲེལ་པར་འབྱུང་བ་ཞེས་བྱ་བའི་མིང་འཐོབ་སྟེ། དེ་དག་ནི་ཁྱད་པར་མེད་པ་ལས་བྱིས་པ་རྣམས་ཀྱིས་བརྟགས་པའོ། །བློ་གྲོས་ཆེན་པོས་གསོལ་པ། བཅོམ་ལྡན་འདས་ཀྱིས་རྟེན་ཅིང་འབྲེལ་བར་འབྱུང་བ་བཤད་པས། རྒྱུ་རྣམ་པར་བརྗོད་པ་ཉིད་བགྱིས་ཀྱི། རང་གི་ཚུལ་གྱིས་སླར་གཞིལ་བའི་ཚུལ་མ་གསུངས་ན། བཅོམ་ལྡན་འདས་མུ་སྟེགས་བྱེད་རྣམས་ཀྱང་གང་ལས་དངོས་པོ་རྣམས་འབྱུང་
བ་འདི་ལྟ་སྟེ། གཙོ་བོ་དང་དབང་པོ་དང༌། སྐྱེས་བུ་དང་དུས་དང༌། རྡུལ་ཕྲ་མོ་འཇུག་པས། རྒྱུ་ལས་བྱུང་བར་བརྗོད་དེ། བཅོམ་ལྡན་འདས་ཀྱིས་ནི་རྣམ་གྲངས་གཞན་གྱིས་དངོས་པོ་རྣམས་སྐྱེ་བར་བཀའ་སྩལ་མོད་ཀྱི། གྲུབ་པའི་མཐའ་ལ་བྱེ་བྲག་ཏུ་དབྱེ་བ་ནི་མ་མཆིས་སོ། །བཅོམ་ལྡན་འདས་མུ་སྟེགས་ཅན་རྣམས་ཀྱང་མ་མཆིས་པ་དང༌། མ་མཆིས་པ་ལས་སྐྱེ་བར་བརྗོད། བཅོམ་ལྡན་འདས་ཀྱིས་ཀྱང་མ་མཆིས་པ་ལས་རྐྱེན་རྣམས་ཀྱིས་འབྱུང་བ་དང༌། བྱུང་ནས་ཀྱང་འཇིག་པར་གསུངས་ཏེ། གང་ཡང་བཅོམ་ལྡན་འདས་ཀྱིས་མ་རིག་པའི་རྐྱེན་གྱིས་རྒ་ཤིའི་བར་གསུངས་པ་འདི་ཡང་རྒྱུ་མེད་པར་སྨྲ་བ་རྣམས་བརྗོད་པ་གསུངས་ཀྱི་རྒྱུར་སྨྲ་བ་ནི་མ་ལགས་སོ། །འདི་ཡོད་ན་འདི་ཡོད་དོ་ཞེས་བགྱི་བ་འདི་ནི་ཅིག་ཅར་གནས་པ་རྣམས་ལ་རུང་གི །རིམ་གྱིས་འབྱུང་བ་ལ་ལྟོས་བར་གནས་པ་རྣམས་ལ་མ་ཡིན་ཏེ། མུ་སྟེགས་ཀྱི་བརྗོད་པ་ཉིད་བཟང་གི་ཁྱོད་ཀྱི་བཟང་པོ་མ་ལགས་སོ། །ཅིའི་སླད་དུ་ཞེ་ན། མུ་སྟེགས་ཀྱི་རྟེན་ཅིང་འབྲེལ་པར་འབྱུང་བ་མ་ལགས་པའི་རྒྱུས་འབྲས་བུ་མངོན་པར་སྒྲུབ་པོ། །བཅོམ་ལྡན་འདས་ཁྱོད་ཀྱིས་རྒྱུ་ཡང་འབྲས་བུ་ལ་ལྟོས། འབྲས་བུ་ཡང་རྒྱུ་ལ་ལྟོས་པས། རྒྱུ་རྐྱེན་ཡང་འདྲེ་སྟེ། དེ་བཞིན་ཕན་ཚུན་ཐུག་པ་མ་མཆིས་པར་ཡང་འགྱུར་རོ། །འདི་ཡོད་ན་འདི་ཡོད་དོ་ཞེས་བརྗོད་པ་ནི་འཇིག་རྟེན་རྒྱུ་མ་མཆིས་པར་འགྱུར་རོ། །བཀའ་སྩལ་པ། བློ་གྲོས་ཆེན་པོ་གཟུང་བ་དང༌། འཛིན་པ་མེད་པ་དང༌། རང་གི་སེམས་སྣང་བ་ཙམ་དུ་ཁོང་དུ་ཆུད་པའི་ཕྱིར་འདི་ཡོད་དོ་ཞེས་བརྗོད་ཀྱང་རྒྱུ་དང་བྱེད་པར་སྨྲ་བ་དང༌། རྒྱུ་རྐྱེན་འདྲེས་པར་ཡང་མི་འགྱུར་རོ། །གང་གཟུང་བ་དང༌། འཛིན་པ་ལ་མངོན་པར་ཞེན་ཅིང༌། ཕྱི་རོལ་གྱི་རང་གི་ཡུལ་གྱི་དངོས་པོ་མེད་པར་རང་གི་སེམས་སྣང་བ་ཙམ་དུ་ཁོང་དུ་ཆུད་པ་དེ་དག་ལ་ནི་འདི་ལྟ་བུ་ཉེས་པར་འགྱུར་གྱི། ངའི་རྟེན་ཅིང་འབྲེལ་པར་འབྱུང་བ་བརྗོད་པ་ལ་ཉེས་པར་མི་འགྱུར་རོ། །བློ་གྲོས་ཆེན་པོ་སྒྱུ་མ་ནི་སྐྱེས་བུ་གཞན་གྱི་རིག་སྔགས་ཀྱི་མཐུས་འབྱུང་སྟེ། རང་གི་རྣམ་པར་རྟོག་པའི་གནས་ངན་ལེན་གྱི་བག་ཆགས་ཀྱི་མཐུ་ལས་ནི་མ་ཡིན་ནོ། །བྱིས་པ་སོ་སོའི་སྐྱེ་བོ་ལྟ་བ་ངན་པའི་མཚན་ཉིད་དུ་ལྟུང་བའི་བསམ་པ་ཅན། རང་གི་སེམས་སྣང་
བ་ཙམ་དུ་མ་རྟོགས་པ་རྒྱུ་དང་རྐྱེན་གྱི་བྱེད་པ་འོས་སྐྱེ་བའི་མཚན་ཉིད་དུ་མངོན་པར་ཆགས་པ་རྣམས་ལ་ཕན་པའི་ཕྱིར་ཆོས་ཐམས་ཅད་སྒྱུ་མ་དང༌། རྨི་ལམ་གྱི་རང་བཞིན་གྱི་མཚན་ཉིད་དུ་བསྟན་ཏོ། །བློ་གྲོས་ཆེན་པོ་ཆོས་ཐམས་ཅད་ནི་ངོ་བོ་ཉིད་མེད་པ་སྟེ། ཅིའི་ཕྱིར་ཞེ་ན། བློ་གྲོས་ཆེན་པོ་འདི་ལྟར་རང་གི་བློས་རྣམ་པར་དཔྱད་ན། རང་དང་སྤྱིའི་མཚན་ཉིད་ཀྱི་དངོས་པོ་མི་རིགས་པས་ན། དེའི་ཕྱིར་ཆོས་ཐམས་ཅད་ངོ་བོ་ཉིད་མེད་ཅེས་བྱའོ། །སྲོག་དང་ལུས་གཞན་དང་གཞན་མ་ཡིན་བ་ལ་སོགས་པ་དྲིས་ན་འཇོག་པ་ནི་མུ་སྟེགས་ཅན་སེམས་ཙམ་མི་ཤེས་པ་ཡིན་གྱི། སངས་རྒྱས་ཀྱི་མ་ཡིན་གྱི་བུདྡྷའི་ནི་གཞག་བར་ལུང་བསྟན་པ་ཡེ་ཤེས་མེད་དེ་སྣོད་ལ་ལྟོས་ནས་རེ་ཞིག་ལུང་མི་བསྟན་པར་བྱ་བར་འགྱུར། ལོག་པ་ལ་བདེན་པར་ཆགས་པས་ནི་ཕུང་པོ་ལྔ་འདུས་པ་དང༌། འབྱུང་བ་ལས་གྱུར་པ་རྣམས་སྐྱེའོ། །བློ་གྲོས་ཆེན་པོ་རྣམ་པར་ཤེས་པ་ཡང་གནས་ཀྱི་ཡུལ་སྣ་ཚོགས་ལ་མངོན་པར་ཆགས་ཤིང་འདོད་པའི་རྒྱུས་འགྲོ་བ་གཞན་དུ་མཚམས་སྦྱོར་བར་འབྱུང་ངོ༌། །སའི་འབྱུང་བ་ལས་གྱུར་པ་རྣམས་ལ་ནི་རྒྱུ་འབྱུང་བ་ཆེན་པོ་རྣམས་ཡོད་མོད་ཀྱི། འབྱུང་བ་ཆེན་པོ་རྣམས་ལ་ནི་མེད་དོ། །དེ་ཅིའི་ཕྱིར་ཞེ་ན། བློ་གྲོས་ཆེན་པོ་དངོས་པོ་དང༌། རྟགས་དང༌། མཚན་ཉིད་དང༌། དབྱིངས་དང༌། བྱ་བའི་བདག་ཉིད་དང༌། སྦྱོར་བ་མེད་པས་འབྱུང་བ་རྣམས་མི་སྐྱེའོ། །དངོས་པོ་ལ་སོགས་པའི་བྱ་བ་འདུས་པ་ལས་སྐྱེ་བར་འགྱུར་གྱི། རྟགས་དང་མི་ལྡན་པ་ལས་མ་ཡིན་ནོ། །དེ་ལྟ་བས་ན་བློ་གྲོས་ཆེན་པོ་འབྱུང་བ་དང༌། འབྱུང་བ་ལས་གྱུར་པའི་མཚན་ཉིད་ནི། མུ་སྟེགས་བྱེད་རྣམས་ཀྱིས་རྣམ་པར་བརྟགས་པ་ཡིན་ཏེ། དེས་ནི་མ་ཡིན་ནོ། །བརྟགས་པ་སྣ་ཚོགས་སྣང་བ་ནི། །གཞན་གྱི་དབང་ཞེས་བརྗོད་པ་སྟེ། །རྣམ་པ་གཞན་དུ་བརྟགས་ན་ནི། །མུ་སྟེགས་སྨྲ་ལ་གནས་པར་འགྱུར། །རྟོག་པ་རྟོགས་ཞེས་བྱ་བ་སྟེ། །མཐོང་བའི་ཕྱིར་ནི་རྒྱུ་ལས་བྱུང༌། །རྣམ་རྟོག་གཉིས་ལས་གྲོལ་བ་ནི། །དེ་ཉིད་ཡོངས་སུ་གྲུབ་པ་ཡིན། །
བློ་གྲོས་ཆེན་པོ་ཉན་ཐོས་དང༌། རང་སངས་རྒྱས་ཐམས་ཅད་ནི་ཤེས་བྱའི་སྒྲིབ་བ་དང༌། ལས་ཀྱི་བག་ཆགས་མ་སྤངས་པའི་ཕྱིར་ཆོས་ལ་བདག་མེད་པ་མ་རྟོགས་ཤིང་བསམ་གྱིས་མི་ཁྱབ་པར་འགྱུར་བའི་འཆི་འཕོ་བ་མ་ཐོབ་པས་ཉན་ཐོས་རྣམས་ལ་ཐེག་པ་གསུམ་དུ་བསྟན་ཏེ་གཅིག་ཏུ་མ་བསྟན་ཏོ། །བློ་གྲོས་ཆེན་པོ་དེ་དག་ནམ་ཉེས་པའི་བག་ཆགས་ཐམས་ཅད་སྤངས་ཤིང་ཆོས་ལ་བདག་མེད་པ་རྟོགས་པ་དེ་ནི། དེ་དག་བག་ཆགས་ཀྱི་ཉེས་པ་དང༌། ཏིང་ངེ་འཛིན་གྱིས་མྱོས་པར་གྱུར་ནས། ཟག་པ་མེད་པའི་དབྱིངས་ནས་སླར་སད་དེ་འཇིག་རྟེན་གྱི་དང༌། འཇིག་རྟེན་ལས་འདས་པ་ཟག་པ་མེད་པའི་དབྱིངས་སུ་གཏོགས་པའི་ཚོགས་རྣམས་ཡོངས་སུ་བསྐང་ནས། ཆོས་ཀྱི་སྐུ་བསམ་གྱིས་མི་ཁྱབ་པ་ལ་དབང་བྱེད་པ་རབ་ཏུ་འཐོབ་པར་འགྱུར་རོ། །ཐེག་པ་རྣམ་པར་གཞག་མེད་ཀྱང༌། །སེམས་ཅན་རྣམས་ནི་དྲང་བའི་ཕྱིར། །ཐེག་པ་ཐ་དད་ངས་བཤད་དོ། །ཐེག་བ་གཅིག་ཏུ་ངས་བཤད་དོ། །སེམས་ཀྱི་གནས་ཤིན་ཏུ་གྱུར་ཏེ། སྒྱུ་མ་ལྟ་བུའི་ཏིང་ངེ་འཛིན་གྱི་སྒོ་གཞན་དག་རབ་ཏུ་ཐོབ་པ་དང༌། མཚན་དང༌། དབང་དང༌། མངོན་པར་ཤེས་པ་དུ་མའི་མེ་ཏོག་རྒྱས་ཤིང་ཡིད་ཀྱི་མགྱོགས་པ་དང་མཚུངས་པ་སྒྱུ་མ་དང༌། རྨི་ལམ་གཟུགས་བརྙན་ལྟ་བུ་འབྱུང་བ་ལས་གྱུར་པ་མ་ཡིན་པ་ལ་འབྱུང་བ་དང༌། འབྱུང་བ་ལས་གྱུར་པ་འདྲ་བ་གཟུགས་ཐམས་ཅད་ཀྱི་ཡན་ལག་སྣ་ཚོགས་འདུས་པ་སངས་རྒྱས་ཀྱི་ཞིང་ཐམས་ཅད་དུ་འཁོར་གྱི་དཀྱིལ་འཁོར་དུ་རྗེས་སུ་སོང་བའི་ལུས་དེ་ནི་ཆོས་ཀྱི་ངོ་བོ་ཉིད་རྟོགས་པ་ཡིན་གྱིས་ལུས་ཞེས་བྱའོ། །ལྟ་བ་ཐམས་ཅད་རྣམ་བཟློག་ཅིང༌། །རྟོག་དང་བརྟགས་པ་སྤངས་པ་སྟེ། །དམིགས་མེད་སྐྱེ་བ་མེད་པ་ན། །སེམས་ཙམ་དུ་ཡང་ངས་བཤད་དོ། །དངོས་མིན་དངོས་པོ་མེད་མིན་པ། །དངོས་དང་དངོས་མེད་རྣམ་པར་སྤངས། །དེ་བཞིན་སེམས་ལེས་གྲོལ་བ་ནི། །སེམས་ཙམ་དུ་ཡང་ངས་བཤད་དོ། །དེ་བཞིན་ཉིད་དང་སྟོང་པའི་མཐའ། །མྱ་ངན་འདས་དང་ཆོས་ཀྱི་དབྱིངས། །སྣ་ཚོགས་ཡིད་ཀྱི་ལུས་རྣམས་ནི། །སེམས་ཙམ་དུ་ཡང་ངས་བཤད་དོ། །རྣམ་རྟོག་བག་ཆགས་འབྲེལ་བ་ཡིན། །
སྣ་ཚོགས་སེམས་ལས་བྱུང་བ་སྟེ། །མི་རྣམས་ལ་ནི་ཕྱི་རོལ་སྣང༌། །འཇིག་རྟེན་པ་ཡི་སེམས་ཙམ་མོ། །ཕྱི་རོལ་སྣང་བ་ཡོངས་མེད་དེ། །སེམས་ནི་སྣ་ཚོགས་རྣམས་སུ་སྣང༌། །ལུས་དང་ལོངས་སྤྱོད་གནས་འདྲ་བ། །སེམས་ཙམ་དུ་ནངས་བཤད་དོ། །བུདྡྷའི་དྲུང་དུ་བྲམ་ཟེ་འཇིག་རྟེན་རྒྱང་པན་པ་ཞིག་གིས་ཐམས་ཅད་བྱས་པའམ་མ་བྱས་པའམ། རྟག་པའམ་མི་རྟག་པའམ། གཅིག་པའམ་ཐ་དད་པའམ་ཞེས་བྱ་བ་ལ་སོགས་པ་མང་པོ་ཞིག་ཞུས་པ་ལས། བུདྡྷས་ལན་དུ་དེ་སྐད་ཅེས་ཟེར་བ་ཐམས་ཅད་ནི་འཇིག་རྟེན་རྒྱང་པན་པ་ཡིན་ཏེ། ཀྱེ་བྲམ་ཟེ་འཇིག་རྟེན་རྒྱང་པན་པ་འདི་ནི་ཁྱོད་ཀྱི་སྟེ་དེའི་མ་ཡིན་ནོ། །བྲམ་ཟེ་ང་ནི་ཐོག་མ་མེད་པའི་དུས་ནས་སྤྲོས་པ་རྣམ་པར་རྟོག་པའི་བག་ཆགས་གནས་ངན་ལེན་གྱི་རྒྱུ་ལས་སྲིད་པ་གསུམ་སྐྱེས་པར་སྟོན་ཏེ། བྲམ་ཟེ་དེ་ཡང་རང་གི་སེམས་སྣང་བ་ཙམ་ཁོང་དུ་མ་ཆུད་པས་རྣམ་པར་རྟོག་པ་འབྱུང་གི །ཕྱི་རོལ་གྱི་དངོས་པོ་དམིགས་པ་ལས་ནི་མ་ཡིན་ནོ། །འདི་ལྟ་སྟེ། མུ་སྟེགས་བྱེད་རྣམས་ཀྱི་བདག་དང༌། དབང་པོ་དང༌། དོན་གསུམ་ཕྲད་པ་ལྟ་བུ་དའི་མ་ཡིན་ནོ། །ཀྱེ་བྲམ་ཟེ་ང་ནི་རྒྱུར་སྨྲ་བ་ཡང་མ་ཡིན། རྒྱུ་མེད་པར་སྨྲ་བ་ཡང་མ་ཡིན་ཏེ། གཞན་དུ་ན་རྣམ་པར་རྟོག་པ་ཉིད་གཟུང་བ་དང་འཛིན་པའི་དངོས་པོ་རབ་ཏུ་བཤིག་སྟེ། རྟེན་ཅིང་འབྲེལ་པར་འབྱུང་བར་སྟོན་ཏོ། །ཁྱོད་ལྟ་བུ་དང་བདག་ཏུ་འཇིན་པར་ལྟུང་བའི་རྒྱུད་ཅན་གཞན་དག་གིས་མི་རིག་གོ །གཞན་ཡང་བློ་གྲོས་ཆེན་པོ་བྲམ་ཟེ་འཇིག་རྟེན་རྒྱང་པན་པས་ང་ལ་འདི་སྐད་ཅེས་ཟེར་རོ། །ཀྱེ་གཽ་ཏ་མ་སྲིད་པ་གསུམ་པོ་འདི་མི་ཤེས་པ་དང༌། སྲེད་པ་དང༌། ལས་ཀྱི་རྒྱུ་ལས་བྱུང་ངམ། དེ་སྟེ་རྒྱུ་ལས་མ་བྱུང༌། བྲམ་ཟེ་འདི་གཉིས་ཀ་ཡང་འཇིག་རྟེན་རྒྱང་པན་པའོ། །ཀྱེ་གཽ་ཏ་མ་དངོས་པོ་ཐམས་ཅད་རང་དང་སྤྱིའི་མཚན་ཉིད་ལྟུང་བ་འམ། ཀྱེ་བྲམ་ཟེ་དེ་ཡང་འཇིག་རྟེན་རྒྱང་ཕན་པ་ཉིད་ཡིན་ཏེ། བྲམ་ཟེ་ཇི་ཙམ་དུ་ཡིད་ལས་རྣམ་པར་གཡོས་པ་དང༌། ཕྱི་རོལ་གྱི་དོན་ལ་མངོན་པར་ཆགས་ཤིང་རྣམ་པར་རྟོག་པ་དེ་ཙམ་དུ་འཇིག་རྟེན་རྒྱང་པན་ནོ། །མེ་ལོང་
ལ་ནི་ཇི་ལྟར་གཟུགས། །སྣང་ཡང་ཡོད་པ་མ་ཡིན་ལྟར། །བག་ཆགས་དག་ནི་མེ་ལོང་ལ། །བྱིས་པས་སེམས་ནི་རྣམ་གཉིས་མཐོང༌། །སེམས་ཀྱི་སྣང་བ་མ་ཤེས་པས། །རྣམ་པར་རྟོག་པ་རྣམ་གཉིས་སྐྱེ། །སེམས་ཀྱི་སྣང་བ་ཡོངས་ཤེས་ནས། །རྣམ་པར་རྟོག་པ་མི་འབྱུང་ངོ༌། །སེམས་ནི་སྣ་ཚོགས་འགྱུར་བ་སྟེ། །མཚན་དང་མཚན་གྱི་གཞི་ཡང་སྤངས། །ཇི་ལྟར་བྱིས་པས་བརྟགས་པ་བཞིན། །སྣང་བའི་རྣམ་པ་སྣང་བ་མེད། །སྲིད་གསུམ་རྣམ་པར་རྟོག་ཙམ་པས། །ཕྱི་རོལ་གྱི་ནི་དོན་མེད་དོ། །རྣམ་རྟོག་སྣ་ཚོགས་སྣང་བ་ནི། །བྱིས་པ་དག་གིས་མི་རྟོགས་སོ། །ཇི་སྲིད་དུ་ཡང་དམ་བཅའ་བ། །དེ་སྲིད་ཐམས་ཅད་འདྲེས་བ་ཅན། །རང་སེམས་ཙམ་དུ་བལྟ་བྱ་སྟེ། །རྩོད་པ་བཙལ་བར་མི་བྱའོ། །བློ་གྲོས་ཆེན་པོ་གལ་ཏེ་ཀུན་གཞི་རྣམ་པར་ཤེས་པ་ཞེས་བསྒྲགས་པ་དེ་བཞིན་གཤེགས་པའི་སྙིང་པོ་མེད་དུ་ཟིན་ན། དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་ཞེས་བསྒྲགས་པ་མེད་པས་འཇུག་པའང་མེད། ལྡོག་པའང་མེད་པར་འགྱུར་ན། བློ་གྲོས་ཆེན་པོ་བྱས་པ་དང༌། འཕགས་པ་རྣམས་ལ་འཇུག་པ་དང༌། ལྡོག་པ་ཡང་ཡོད་དེ་རྣལ་འབྱོར་ཅན་བརྩོན་པ་མི་འདོད་པ་རྣམས་བདག་གི་སོ་སོ་རང་གིས་རིག་པ་ཚེ་འདིའི་བདེ་བར་སྤྱོད་པས་གནས་སོ། །དྲོ་དང་གཤེར་དང་སྲ་གཡོ་བར། །ཆོས་རྣམས་བྱིས་པས་རྣམ་པར་བརྟགས། །ཡང་དག་མ་ཡིན་སྒྲོ་འདོགས་ཏེ། །མཚན་ཉིད་མེད་ཅིང་མཚན་གཞི་མེད། །རྒྱུན་རྣམས་ཀྱི་ནི་ལུས་འདི་ལ། །འདི་ནི་རྫས་བརྒྱད་གཟུགས་ཡིན་ཏེ། །ལུས་ཀྱི་དབྱིབས་དང་དབང་པོར་ནི། །བྱིས་པ་ནོར་བ་རྣམ་རྟོག་གོ །ལུས་དང་ལོངས་སྤྱོད་གནས་དག་ནི། །གཟུང་བའི་རྣམ་པར་རིག་གསུམ་སྟེ། །ཡིད་དང་ཡིད་ཀྱི་རྣམ་རིག་དང༌། །རྣམ་པར་རྟོག་ནི་འཛིན་པ་གསུམ། །རང་གི་སེམས་ལ་མངོན་ཆགས་པས། །སེམས་ནི་ཤིན་ཏུ་འབྱུང་བར་འགྱུར། །ཕྱི་རོལ་སྣང་བ་ཡོངས་མེད་དེ། །དེ་ཡི་ཕྱིར་ན་སེམས་ཙམ་མོ། །དབང་པོ་རྣམས་ནི་སྒྱུ་མ་བཞིན། །ཡུལ་རྣམས་ཀྱང་ནི་རྨི་ལམ་འདྲ། །བྱེད་དང་ལས་དང་བྱ་བ་ཉིད། །རྣམ་
པ་ཀུན་དུ་གཡོ་བ་མིན། །ཀུན་རྫོབ་ཏུ་ནི་ཐམས་ཅད་ཡོང༌། །དམ་པའི་དོན་དུ་ཡོད་པ་མིན། །གང་འདི་སྣ་ཚོགས་སྣང་བ་ནི། །གནས་ངན་ལེན་གྱིས་བསྒོས་པའི་སེམས། གཟུགས་སུ་སྣང་བ་འཛིན་པ་སྟེ། །ཕྱི་རོལ་དག་ན་སེམས་འཁྲུལ་པ། །སྣང་བ་རི་བོང་རྭ་བཞིན་ཏེ། །མི་རྣམས་ཀྱི་ནི་རྣམ་རྟོག་ཡོད། །སྨིག་རྒྱུ་ལ་ནི་རི་དགས་བཞིན། །གང་རྣམས་རྟོགས་པ་དེ་དག་ནོར། །རྣམ་རྟོག་མངོན་པར་ཆགས་པ་ཡིས། །རྣམ་པར་རྟོག་པ་ཤིན་ཏུ་འབྱུང༌། །ཕྱི་རོལ་བརྟགས་པའི་རང་བཞིན་ཏེ། །གཞན་དབང་རང་གི་གཞི་ལས་སྐྱེས། །བདག་ལ་སྐྱེས་པའི་འཁྲུལ་མ་མཐོང༌། །དེ་ཡི་སེམས་རྣམས་རབ་ཏུ་འཇིག །དེ་ཡི་རྒྱུ་ཅན་དེ་ལ་དམིགས། །ཡིད་མི་འཇུག་པའི་གནས་ཡིན་ཏེ། །སེམས་ཀྱི་རྒྱུ་ཡང་འབྱིན་པར་བྱེད། །རྣམ་པར་ཤེས་ཀྱང་དེ་ལ་གནས། །དངོས་པོ་མཚན་ཉིད་ལྡན་པ་ནི། །ཕྱི་རོལ་ཇི་སྲིད་རྣམ་རྟོག་ཅིང༌། །རང་གི་ནོར་བ་མ་མཐོང་ན། །དེ་སྲིད་དུ་ནི་སེམས་རྒྱས་བྱེད། །བག་ཆགས་དག་ལས་སེམས་མི་བྱེད། །སེམས་དང་བག་ཆགས་གཅིག་མ་ཡིན། །སེམས་ནི་ཐ་དད་མ་ཡིན་མཚན། །བག་ཆགས་རྣམས་ཀྱིས་ཡོངས་སུ་དཀྲིས། །ཡིད་ཀྱི་ཤེས་ལས་བྱུང་བ་ཡི། །བག་ཆགས་དྲི་མ་བཞིན་དུ་ལྟོས། །སེམས་ནི་རས་ཡུག་དཀར་པོ་འདྲ། །བག་ཆགས་རྣམས་ཀྱིས་མི་མཛེས་སོ། །མྱ་ངན་ལས་འདས་པའི་སྐབས་ནས་གསོལ་པ། བཅོམ་ལྡན་འདས་ཀྱིས་རྣམ་པར་ཤེས་པ་བརྒྱད་དུ་གཞག་གམ། གཞོག་གོ །བཞག་ན་ཇི་ལྟར་ཡིད་ཀྱི་རྣམ་པར་ཤེས་པ་ལོག་ལ་མ་བཞག་ལགས། བཀའ་སྩལ་པ། དེའི་རྒྱུ་དང་དམིགས་པའི་ཕྱིར་རྣམ་པར་ཤེས་པ་འདུས་པ་རྣམས་འབྱུང་བར་འགྱུར་ཏེ། །བློ་གྲོས་ཆེན་པོ་ཡིད་ཀྱི་རྣམ་པར་ཤེས་པ་ཡུལ་བྱེ་བྲག་འབྱེད་པ་ལ་མངོན་པར་ཆགས་ཤིང་འབྱུང་བས། བག་ཆགས་ཀྱི་ཀུན་གཞི་རྣམ་པར་ཤེས་པ་ཤིན་ཏུ་རྒྱས་པར་བྱེད་དོ། །ཡིད་དང་ལྷན་ཅིག་ཏུ་བདག་དང་བདག་གིར་འཛིན་པ་ལ་མངོན་བར་ཆགས་པས། རང་སེམས་པ་ལྟ་བུ་རྗེས་སུ་འཇུག་སྟེ། ཀུན་གཞི་རྣམ་པར་ཤེས་པ་རྒྱུར་གྱུར་ཅིང༌། དེ་ལ་དམིགས་པ་
ལུས་ཐ་དད་པ་མ་ཡིན་པའི་མཚན་ཉིད་དོ། །རང་གི་སེམས་སྣང་བའི་ཡུལ་ལ་མངོན་པར་ཆགས་པས། གཅིག་གི་རྒྱུར་གཅིག་གྱུར་པའི་སེམས་འདས་པ་འབྱུང་སྟེ། བློ་གྲོས་ཆེན་པོ་རྒྱ་མཚོ་ཆེན་པོ་ལྟར་རང་གི་སེམས་སྣང་བའི་ཡུལ་གྱི་རླུང་གིས་བསྐྱོད་པས་འཇུག་ཅིང་ལྡོག་གོ །དེ་ལྟ་བས་ན་ཡིད་ཀྱི་རྣམ་པར་ཤེས་པ་བཟློག་པས་བདུན་པོ་རྣམས་ཀྱང་ལྡོག་པར་འགྱུར་རོ། །ཀུན་གཞི་ལ་ནི་རྟེན་བཅས་ནས། །ཡིད་ཀྱང་ཤིན་ཏུ་འཇུག་པར་འགྱུར། །སེམས་དང་ཡིད་ལ་རྟེན་བཅས་ནས། །རྣམ་པར་ཤེས་པ་འཇུག་བར་འགྱུར། །དཀར་པོ་ལ་ནི་དྲི་མ་སྣང༌། །དྲི་མ་ལ་ནི་སེམས་མི་སྣང༌། ནམ་མཁའ་ལ་ནི་སྤྲིན་བཞིན་དུ། །དེ་བཞིན་སེམས་ཀྱང་མི་སྣང་ངོ༌། །ཐམས་ཅད་འབྱུང་འགྱུར་གཟུགས་མེད་དེ། །འབྱུང་ལས་མ་གྱུར་གཟུགས་ཡོད་དོ། །དྲི་ཟའི་གྲོང་ཁྱེར་རྨི་ལམ་དང༌། །སྒྱུ་མ་སྨིག་རྒྱུ་འབྱུང་འགྱུར་མིན། །ཇི་ལྟར་གསེར་ནི་དག་བ་དང༌། །ཆུ་ཡང་རྙོག་པ་དངས་པ་དང༌། །ནམ་མཁའ་ལ་ནི་སྤྲིན་མེད་ལྟར། །རྣམ་རྟོག་དག་པ་དེ་བཞིན་ནོ། །དབུས་མ་འཇིགས་པ་དང་སེམས་ཙམ། །དབུ་མ་ཡིན་པ་རྒྱུན་ཆགས་འབྱུང༌། །ཡོན་ཏན་རྡུལ་ཕྲན་རྫས་འདུས་པར། །བྱིས་པ་རྣམས་ནི་གཟུགས་ལ་རྟོག །རྡུལ་ཕྲན་རེ་རེར་ཡོད་པ་མིན། །དེ་ཡི་ཕྱིར་ཡང་དོན་མེད་དོ། །རང་གི་སེམས་ནི་སྣང་བའི་དབྱིབས། །མི་རྣམས་ལ་ནི་ཕྱི་རོལ་སྣང༌། །ཕྱི་རོལ་སྣང་བ་ཡོད་མིན་ཏེ། །དེ་ཡི་ཕྱིར་ཡང་དོན་མེད་དོ། །སྐྲ་ཤད་འཛིངས་དང་སྒྱུ་མ་དང༌། །རྨི་ལམ་དྲི་ཟའི་གྲོང་ཁྱེར་དང༌། །མགལ་མེ་སྨིག་རྒྱུ་སྣ་ཚོགས་དག །མེད་ཀྱང་མི་ལ་རབ་ཏུ་སྣང༌། །སེམས་དང་རྣམ་རྟོག་རྣམ་རིག་དང༌། །ཡིད་དང་རྣམ་ཤེས་ཉིད་ཀྱང་སྟེ། །ཀུན་གཞི་སྲིད་གསུམ་གཡོ་བ་རྣམས། །དེ་དག་སེམས་ཀྱི་རྣམ་གྲངས་ཡིན། །གང་དག་འཇུངས་པའི་ཉན་ཐོས་དང༌། །མུ་སྟེགས་ཅན་གྱིས་བྱས་པ་ནི། །གང་ཕྱིར་རྟོག་གེས་བཤད་པས་ན། །དེ་དག་དོན་ལ་འཁྲུལ་པའོ། །ཆོས་ཡང་དག་པར་སྡུད་པ་ལས། །ཆོས་ཀྱི་ཚུལ་ལ་འཇུག་པ་བཅུས་བྱང་ཆུབ་སེམས་དཔའ་རྣམས་མི་འགྲོགས་པ་ཁོང་དུ་ཆུད་པར་བྱ་སྟེ། བཅུ་གང་ཞེ་ན། འདི་ལྟ་སྟེ། དམན་པ་ལ་སེམས་པ་དང༌། དམན་པ་
ལ་སྨོན་པའི་སེམས་ཅན་དམན་པ་རྣམས་དང་ལྷན་ཅིག་མི་འགྲོགས་པ་དང༌། སེམས་ཅན་མི་བརྩོན་པ་མི་འགྲུས་པ་ལེ་ལོ་ཅན་བརྩོན་འགྲུས་མེད་པ་རྣམས་དང་ལྷན་ཅིག་མི་འགྲོགས་པ་དང༌། ང་རྒྱལ་བདུན་དང་ང་རྒྱལ་གྱིས་ཁེངས་པའི་སེམས་ཅན་རྣམས་དང་ལྷན་ཅིག་མི་འགྲོགས་པ་དང༌། སེར་སྣ་དང༌། འཆལ་པའི་ཚུལ་ཁྲིམས་དང༌། གནོད་སེམས་དང༌། ལེ་ལོ་དང༌། རྣམ་པར་གཡེང་བ་དང༌། འཆལ་པའི་ཤེས་རབ་ཀྱི་རང་བཞིན་ཅན་གྱི་སེམས་ཅན་རྣམས་དང་ལྷན་ཅིག་མི་འགྲོགས་པ་དང༌། འདོད་པ་ལ་འདུན་པ་དང༌། གནོད་སེམས་དང༌། རྣམ་པར་འཚེ་བའི་རྣམ་པར་རྟོག་པ་རྣམས་དང་ལྷན་ཅིག་མི་འགྲོགས་པ་དང༌། རྟོག་པ་དང༌། རྣམ་པར་རྟོག་པ་དང༌། ཀུན་དུ་རྟོག་པ་ཐམས་ཅད་དང་ལྷན་ཅིག་མི་འགྲོགས་པ་དང༌། སྒྲིབ་པ་དང༌། ཆོད་པ་དང༌། ཀུན་ནས་དཀྲིས་པ་ཐམས་ཅད་དང་ལྷན་ཅིག་མི་འགྲོགས་པ་དང༌། ཉན་ཐོས་དང་རང་སངས་རྒྱས་ཀྱི་ཡིད་ལ་བྱེད་པ་ཐམས་ཅད་དང་ལྷན་ཅིག་མི་འགྲོགས་པ་དང༌། རྙེད་པ་དང་བཀུར་སྟི་དང༌། ཚིགས་སུ་བཅད་པ་ལ་མངོན་པར་དགའ་བའི་ཡིད་ལ་བྱེད་པ་ཐམས་ཅད་དང་ལྷན་ཅིག་མི་འགྲོགས་པ་དང༌། ངར་འཛིན་པ་དང༌། ང་ཡིར་འཛིན་པ་རྣམས་དང་ལྷན་ཅིག་མི་འགྲོགས་པ་དང༌། འཇའ་ལ་ཁ་དོག་སྐྱ་བོ་དང༌། སྔོན་པོ་དང༌། དམར་པོ་རྣམས་ནི་རིམ་བཞིན་ས་ཆུ་མེའི་དབང་པོ། །གཞུའི་དབྱིབས་ནི་རླུང་གི་དབང་པོ་ཞེས་འབྱུང༌། རྣལ་འབྱོར་སྤྱོད་པའི་དགེ་སློང་དགེ་བ་མེད་པའི་ཚོགས་རྣམ་པར་དག་པ། དབང་རབ་ཏུ་ཐོབ་པས་ཟད་པར་ནམ་མཁར་བསམས་ཙམ་གྱིས་དེ་བཞིན་དུ་འགྱུར་ཏེ། སྲ་བ་དང༌། གཤེར་བ་དང༌། ཚ་བ་དང༌། གཡོ་བ་རྣམས་དང༌། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམས་ཀྱི་སྒྲིབ་པ་མེད་པར་འགྱུར་ཡང༌། སེམས་ཀྱི་སྒྲིབ་པ་མེད་པ་ནམ་མཁའི་སྒྲིབ་པ་མེད་པར་འཕོ་བ་ཡང་མ་ཡིན། བསམས་པ་ཙམ་གྱིས་སྒྲིབ་པ་མེད་པ་དང་མི་ལྡན་པར་སྲབ་ལ་སོགས་པ་མེད་པར་འགྱུར་བ་མ་ཡིན་ནོ། །དེ་བཞིན་དུ་རྐྱེན་ལས་བྱུང་བའི་ལས་དགེ་བ་དང༌། མི་དགེ་བ་ཐམས་
ཅད་ཀྱི་རྣམ་པར་སྨིན་པའི་དབང་ཉིད་ཁོང་དུ་ཆུད་པར་བྱའོ། །བྱང་ཆུབ་སེམས་དཔའི་རྣམ་པར་ཐར་བ་བརྒྱད་ལ། གཟུགས་ཅན་གཟུགས་རྣམས་ལ་ལྟ་བའི་རྟེན་ཅིང་འབྲེལ་བར་འབྱུང་བ་དང༌། སྟོང་པ་དང་གཡོ་བ་མེད་པར་ལྟ་སྟེ། དེས་འགྲོལ་བས་རྣམ་པར་ཐར་པ་ཞེས་བྱའོ། །ནང་གཟུགས་མེད་པར་འདུ་ཤེས་པས། ཕྱིའི་གཟུགས་རྣམས་ལ་ལྟ་བ་ནི་སྟོང་པ་ཉིད་དང༌། རྟེན་ཅིང་འབྲེལ་བར་འབྱུང་བ་དང༌། གཡོ་བ་མེད་པར་ལྟ་བས་སོ། །སྡུག་པར་མོས་པ་ནི་སྟོང་པའོ། །མི་སྡུག་པ་ནི་ལྟ་བར་གྱུར་པའོ། །སྡུག་པར་མོས་པས་སོ། །གཟུགས་ཀྱི་འདུ་ཤེས་ལས་འདས་ནས། ནམ་མཁའ་མཐའ་ཡས་སོ་སྙམ་པ་ནི་སྟོང་པ་སྟེ་རྣམ་ཤེས་མཐའ་ཡས་སོ་སྙམ་པ་ནི་རྣམ་པར་ཤེས་པ་ཐོག་མ་མེད་པ་ཅན་དུ་བཤད་ལ། གང་ཐོག་མ་མེད་བ་དེ་ནི་སྟོང་པ་ཡིན་ཏེ། དེ་ལྟར་མཐོང་བས་སོ། །ཅི་ཡང་མེད་དོ་སྙམ་པ་ནི་ཅི་ཡང་ཞེས་བྱ་བ་ནི་དུས་གསུམ་སྟེ། དེ་དག་མེད་པས་མཐོང་ངོ༌། །འདུ་ཤེས་མེད་འདུ་ཤེས་མེད་མིན་རྫོགས་པར་བྱ་སྟེ། གནས་པ་ནི་འདུ་ཤེས་མེད་ཅེས་བྱ་བ་ནི་སྟོང་པའོ། །འདུ་ཤེས་མེད་མིན་སྐྱེ་མཆེད་ཅེས་བྱ་བ་ནི། རྟེན་ཅིང་འབྲེལ་པར་འབྱུང་བ་སྟེ། དེ་ལྟར་མཐོང་བས་སོ། །འདུ་ཤེས་དང་ཚོར་བ་འགོག་པ་ནི་དེ་འདི་སྙམ་དུ་འདུ་ཤེས་ནི་སྨིག་རྒྱུ་ལྟ་བུའོ། །ཚོར་བ་ནི་ཆུའི་ཆུ་བུར་ལྟ་བུ་སྟེ། འདུ་ཤེས་ཉིད་ཚོར་བ། ཚོར་བ་ཉིད་འདུ་ཤེས་པས། འདི་ལ་ཤེས་པ་བོ་མེད། ཚོར་བ་པོ་མེད་ནས། དེ་ལྟར་མཐོང་བས་སོ། །འདུ་ཤེས་དང་ཚོར་བ་འགོག་པ་ནི་བྱང་ཆུབ་སེམས་དཔའི་ཟད་པར་གྱི་སྐྱེ་མཆེད་བཅུ་ལ། ཟད་པར་ས་ནས་རྣམ་པར་ཤེས་པའི་བར་དུ་མོས་ན་ཡང་དེ་ཁོ་ན་བཞིན་དུ་འགྱུར་ཏེ། ཟད་པར་གྱི་སྐྱེ་མཆེད་ཅེས་བྱའོ། །རེ་རེ་ལ་ཡང་སྐྱེ་མཆེད་ཐམས་ཅད་དུ་འགྱུར་བས་དེའི་ཕྱིར་ཟད་པར་སྐྱེ་མཆེད་ཅེས་བྱའོ། །བྱང་ཆུབ་སེམས་དཔའི་དབང་བཅུ་ལ། མི་འཆི་བ་ཐོབ་པས་ཚེ་ལ་དབང་བའོ། །སེམས་ཙམ་དུ་ཡོངས་སུ་ཤེས་པའི་ཕྱིར་སེམས་ལ་དབང་བའོ། །ལག་ན་རིན་པོ་ཆེ་དང༌། ནམ་མཁའི་མཛོད་རབ་ཏུ་བརྙེས་པའི་ཕྱིར་ཡོ་བྱད་དོ། །བག་ཆགས་དང་བཅས་པའི་ལས་ཀྱི་ལམ་བཅད་པས་ལས་སོ། །ཏིང་ངེ་འཛིན་བཟློག་པའི་བསམ་
གཏན་རྙེད་པས་སྐྱེ་བའོ། །ལྷུན་གྱིས་གྲུབ་པར་བྱ་བ་ལ་འཇུག་པ་ཐོབ་པས་རྫུ་འཕྲུལ་ལོ། །ཟད་པར་གྱི་སྐྱེ་མཆེད་ཐོབ་པས་མོས་པའོ། །བསམས་པ་ཙམ་གྱིས་དོན་འཐོབ་པས་སྨོན་ལམ་མོ། །ཡེ་ཤེས་སྔོན་དུ་འགྲོ་བའི་ལུས་དང་ངག་དང་ཡིད་ཀྱི་ལས་ཐོབ་པས་ཡེ་ཤེས་སོ། །དེ་བཞིན་ཉིད་དང་ཆོས་ཀྱི་དབྱིངས་དང༌། ཡང་དག་པའི་མཐའ་མཉམ་པའི་ཡེ་ཤེས་དྲི་མ་མེད་པའི་ཕྱིར་ཆོས་སོ། །དབང་བཅུ་པོ་དག་མི་མཐུན་པ་གང་གི་གཉེན་པོ་ཡིན་པ་དང༌། དེ་དག་གི་རྒྱུ་ཡང་དྷརྨ་འདི་ལས་བཤད། བྱང་ཆུབ་སེམས་དཔའ་ནི་གང་སོ་སོར་ཐར་བའི་སྡོམ་པས་བསྡམས་པ་ཡང་ལགས་ལ། སོ་སོར་ཐར་པ་ཙམ་གྱིས་དག་པར་ཡང་མི་སེམས་ཏེ། བྱང་ཆུབ་སེམས་དཔའི་སྡོམ་པ་ལ་རྟོན་པ་ལགས་སོ། །དྷརྨ་འདི་ལས་སངས་རྒྱས་བཅུ་འབྱུང༌། ཆོ་འཕྲུལ་ཆེན་པོ་བསྟན་པ་ལས། འཇམ་དཔལ་ཇི་ལྟར་བྱང་ཆུབ་སེམས་དཔའ་ལུས་ཡོངས་སུ་དག་པ་ཡིན། སྨྲས་པ། ལྷའི་བུ་གང་གི་ཚེ་ཡིད་ལས་བྱུང་བའི་ལུས་ཀྱིས་སེམས་ཅན་ཐམས་ཅད་ཀྱི་ལུས་དང་མཐུན་པར་སྟོན་པ་ཡིན། ཇི་ལྟར་ངག་ཡོངས་སུ་དག་པ་ཡིན། སེམས་ཅན་ཐམས་ཅད་ཀྱི་སྒྲ་ཡོངས་སུ་རྫོགས་པས་འབྲས་བུ་ཡོད་པས་ཆོས་སྟོན་པ་ཡིན། ཇི་ལྟར་ན་སེམས་ཡོངས་སུ་དག་པ་ཡིན། སེམས་གཅིག་གིས་སེམས་ཅན་ཐམས་ཅད་ཀྱི་སེམས་ཡོངས་སུ་ཤེས་པ་ཡིན་ནོ། །བུདྡྷའི་སྤྱན་སྔ་ན་འཕགས་པ་འཇམ་དཔལ་དང༌། ལྷའི་བུ་དེད་དཔོན་ཆོས་གླེང་བ་ལས། དེད་དཔོན་གྱིས་ཆོས་ཟབ་མོ་མང་དུ་སྨྲས་པ་དང༌། ཤཱ་རིའི་བུས་བུདྡྷ་ལ་དེད་དཔོན་འདི་དགེ་བའི་རྩ་བ་ཅན་ནོ་ཞེས་གསོལ་པ་དང༌། སྔོན་ཡང་དགེ་བ་སྤེལ་བ་ཡིན་པ་ལས་གླེང་བ་བསྐལ་བ་གྲངས་མེད་པའི་སྔོན་རོལ་ན་འཇིག་རྟེན་གྱི་ཁམས་བདེ་བར་བུདྡྷ་རི་རབ་ལྟ་བུར་འབྱུང་བ་དེའི་ཚེ། འཁོར་ལོས་སྒྱུར་བའི་རྒྱལ་པོ་དགེ་བས་བཀོད་པ་བྱུང༌། དེ་ལ་བུདྡྷས་ཆོས་བཤད་ནས་བུ་དང་བཅས་པས་ཆོས་དད་མཐུན་པའི་བཟོད་པ་ཐོབ། དེ་ནས་འཁོར་དེ་ནི་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་ཞེས་བྱ་བ་ཞིག་ཡོད་པས་རྒྱལ་པོ་ལ་ཆོས་ཟབ་མོ་བཤད་པ་དང་རྒྱལ་པོ་རངས་ནས་གོས་དང༌། རྒྱན་ཅི་ཡོད་པ་དེ་ལ་ཡོན་དུ་བྱིན་ནོ། །
དེ་ནས་དགེ་སློང་དེས་གོས་ལ་སོགས་པ་ནི་མཆོད་པ་ཆེན་པོ་མ་ཡིན་གྱི། རབ་ཏུ་བྱུང་ཞིང་ཆོས་སྤྱོད་མཆོད་པའི་བར། །གང་དག་སྟོང་ཆེན་སེམས་ཅན་དེ་དག་ཀུན། །བྱང་ཆུབ་ཕྱིར་ནི་རབ་ཏུ་ཞུགས་གྱུར་ཅིང༌། །མ་ཞུམ་སེམས་ཀྱིས་བསྐལ་པ་རྫོགས་པར་ནི། །བུ་དང་ཆུང་མ་སྦྱིན་པ་བྱས་པ་ལས། །གང་གིས་བྱང་ཆུབ་ཕྱིར་ནི་སེམས་བསྐྱེད་ནས། །དེ་བཞིན་གཤེགས་པའི་རྗེས་སུ་བསླབ་ཆེད་དུ། །རབ་འབྱོར་སེམས་ཀྱིས་གོམ་པ་གཅིག་བོར་བ། །དེ་ནི་དེ་བས་བསོད་ནམས་ཁྱད་པར་འཕགས། །གང་དག་སྔོན་ཆད་བྱུང་བའི་སངས་རྒྱས་དང༌། །གང་དག་མ་བྱོན་བྱུང་དང་བཞུགས་པ་རྣམས། །དེ་དག་སྐྱོན་མང་ཁྱིམ་ནི་མ་སྤངས་བར། །བླ་མེད་བྱང་ཆུབ་ཞི་བ་ཐོབ་བ་མེད། །རབ་བྱུང་དེ་བཞིན་གཤེགས་པ་ཐམས་ཅད་ཀྱིས། །རབ་ཏུ་སྟོན་ཅིང་བསྔགས་ལ་བཀུར་བ་སྟེ། །གང་ཞིག་སངས་རྒྱས་ཀུན་ལ་མཆོད་འདོད་པ། །རྒྱལ་བའི་བསྟན་ལ་རབ་བྱུང་གཟུང་བར་གྱིས། །གང་ཞིག་ཁྱིམ་གནས་རིན་ཆེན་ཁྱིམ་བརྒྱན་པའི། །གང་གཱའི་བྱེ་སྙེད་སངས་རྒྱས་ཞིང་བྱིན་དང༌། །གང་ཞིག་རབ་བྱུང་ཉིད་དང་མཚན་གཅིག་ཏུ། །མི་རྟག་སྡུག་བསྔལ་བདག་མེད་སེམས་བྱེད་ན། །གང་ཞིག་རབ་བྱུང་བག་ཡོད་གྱུར་བ་ཡི། །བྱང་ཆུབ་སེམས་དཔའ་བྱང་ཆུབ་ཉེ་བ་དང༌། །བདུད་ཀྱི་དཀྱིལ་འཁོར་ཤིན་ཏུ་བཅོམ་བྱས་ཤིང༌། །དགེ་བའི་ཕྱོགས་ཀྱང་མི་འགྲིབ་འཕེལ་བ་ཡིན། །རབ་བྱུང་དེ་ནི་ལམ་ངན་སྤངས་པ་དང༌། །ལམ་གྱི་རྗེས་མཐུན་འཕགས་པའི་སྐྱེ་བོས་བསྟོད། །དེ་ནི་དགེ་བ་ཅུང་ཟད་མ་ཡིན་ཞིང༌། །དེ་ནི་ཡོངས་སུ་འཛིན་པ་སྤངས་བ་ཡིན། །ཁྱིམ་ལས་གྲོལ་བ་ཉོན་མོངས་མི་འཕེལ་ཞིང༌། །ཉོན་མོངས་རྣམ་གྲོལ་བདུད་ཀྱི་འཆིང་བ་མེད། །རྣམ་གྲོལ་སེམས་ནི་བྱང་ཆུབ་སྤྱད་པ་སྤྱོད། །སྤྱོད་པ་དག་པས་བྱང་ཆུབ་རྙེད་མི་དཀའ། །དེ་ནས་རྒྱལ་པོ་དེ་རབ་ཏུ་བྱུང་བར་འདོད་ནས། བུདྡྷ་ལ་གསོལ་ཏེ་གནད་ནས་བུ་སྟོང་ལ་སྨྲས་པ། ཁྱེད་ལས་རྒྱལ་སྲིད་འཛིན་ཅིང་སེམས་ཅན་ཆོས་བཞིན་སྐྱོང་བར་སྤྲོ་བ་སུ་ཡོད། །དེ་དག་ཐམས་ཅད་ཀྱིས་བདག་ཀྱང་རབ་ཏུ་འབྱུང་གིས་མི་འདོར་བར་གསོལ་ཞེས་སྨྲས་སོ། །རྒྱལ་པོས་སྨྲས་པ། འདི་རབ་ཏུ་བྱུང་ན་གླིང་བཞི་བའི་འགྲོ་བ་ཆུད་ཟོས་སུ་འོང་གིས། ཁྱོད་
པས་གང་སྙིང་རྗེ་བརྟན་པ་དེས་རྒྱལ་སྲིད་ཟུང་ལ་འགྲོ་བ་ཆོས་ལ་ཚུད་ཅིག །དེ་ནས་རྒྱལ་བུ་སྙིང་རྗེ་ཅན་སེམས་ཀྱིས་ཁས་བླངས་ནས། གཞན་རིལ་རབ་ཏུ་བྱུང་ངོ༌། །དེའི་ཚེ་རྒྱལ་པོའི་དེད་དཔོན་ཆོས་སྨྲ་བའི་དགེ་སློང་དེ་འཇམ་དཔལ་ལོ། །རྒྱལ་བུ་རྒྱལ་སྲིད་འཛིན་པ་ནི་བཅོམ་ལྡན་འདས་ཤཱཀྱ་ཐུབ་པའོ། །རྒྱལ་བུ་གཞན་ནི་བསྐལ་བ་བཟང་པོའི་སངས་རྒྱས་གཞན་ནོ། །ཡེ་ཤེས་སྣང་བའི་རྒྱན་ལས། དཔེར་ན་ས་ཆེན་པོ་འདི་བཻ་ཌཱུརྻའི་རང་བཞིན་དུ་གྱུར་ཏེ། སུམ་ཅུ་རྩ་གསུམ་པའི་གནས་བརྒྱ་བྱིན་ལོངས་སྤྱོད་དང་བཅས་པར་སྣང་ལ་དེ་ནི་ལྷ་རྣམས་ཀྱིས་འཛམ་བུའི་གླིང་གི་མི་རྣམས་ལ། ཀྱེ་ལྷའི་དབང་པོ་ལ་ལྟོས་ཁྱེད་ཀྱང་བསོད་ནམས་ཀྱིས་ལས་འདི་འདྲ་བར་འགྱུར་བར་གྱིས་ཤིག་ཅེས་སྨྲས་པ་དང༌། དེ་དག་བསོད་ནམས་དག་བྱེད་སྨོན་ལམ་ཡང་འདེབས་སོ། །དེ་ན་བརྒྱ་བྱིན་ལ་སོགས་པ་མེད་ཀྱང་ས་གཞི་དག་པས་དེ་ལྟར་སྣང་བ་དེ་བཞིན་དུ་བསྒོམ་པ་ལ་ཤིན་ཏུ་གོམས་ཤིང་སེམས་དག་པའི་ཕྱིར་སེམས་ཅན་གྱིས་དེ་བཞིན་གཤེགས་པའི་སྐུ་མཐོང་བར་འགྱུར་ཞིང༌། དེ་བཞིན་གཤེགས་པའི་བྱིན་གྱི་རླབས་ཀྱིས་སྐུ་མཐོང་སྟེ། དེ་ཡང་མ་སྐྱེས་མ་འགགས་སྣང་བ་ཡང་མ་ཡིན་མི་སྣང་བ་ཡང་མ་ཡིན་མོད་ཀྱི། དེ་བཞིན་གཤེགས་པའི་སྐུའི་གཟུགས་བརྙན་ལ་དམིགས་ནས། བསོད་ནམས་བྱེད་ཅིང་ཡོངས་སུ་བསྔེའོ་། །བརྒྱ་བྱིན་གྱི་གཟུགས་བརྙན་མི་གཡོ་མི་སེམས་མི་རྟེག་པ་དེ་བཞིན་གཤེགས་པ་ཡང་མི་སྐྱེ་མི་རྟོག་མོད་ཀྱི་གཟུགས་བརྙན་དང་འདྲ་བར་འཇིག་རྟེན་ནི་སྣང་སྟེ། སེམས་ཅན་རྣམས་ཀྱི་མཐོང་བའི་རིམས་ཐ་དད་བས་ཆེ་བའི་རིམ་པ་ཐ་དད་པར་སྟོན་ཏོ། །ཡོངས་སུ་སྨིན་པ་དང་དད་པའི་སྟོབས་བསྐྱེད་པས་ཆོས་ཐོས་བར་འགྱུར་ཞིང་བསམ་པ་ཇི་ལྟ་བ་བཞིན་ཐེག་པ་གསུམ་དུ་ཡང་ཤེས་རབ་རྣམ་པར་གྲོལ་བར་ཡང་འགྱུར་རོ། །ལས་དང་པོ་པའི་བྱང་ཆུབ་སེམས་དཔའ་དང༌། གཞན་ཡང་བྱིས་པ་སོ་སོའི་སྐྱེ་བོ་མྱ་ངན་ལས་འདའ་བས་འདུལ་བ་རྣམས་ཀྱི་སྔོན་གྱི་རྣམ་པར་སྨིན་པས། གཟུགས་བརྙན་ལྟར་མི་སྣང་བར་གྱུར་པ་དང༌། དེ་བཞིན་གཤེགས་པ་མྱ་ངན་ལས་འདས་
ཞེས་དེ་སྙམ་དུ་སེམས་སོ། །ཉི་མའི་དཀྱིལ་འཁོར་སའི་མཐོན་དམན་རིམ་པར་འཆར་བ་བཞིན་དུ། དེ་བཞིན་གཤེགས་པའི་ཡེ་ཤེས་ཀྱི་ཉི་མའི་དཀྱིལ་འཁོར་ཡང་བྱང་ཆུབ་སེམས་དཔའ་ནས་ཐ་ན་ལོག་པར་ཞུགས་པ་ཡན་ཆད་ལ་རིམ་གྱིས་འཆར་རོ། །མདོར་ན་མི་དགེ་བ་ཡིད་ལ་བྱེད་པ་ཐམས་ཅད་ནི་ཀུན་ནས་ཉོན་མོངས་པའི་རྒྱུའོ། །དགེ་བ་ཡིད་ལ་བྱེད་པ་ཐམས་ཅད་ནི་རྣམ་པར་བྱང་བའི་རྒྱུའོ། །དཀའ་སྩལ་པ། དེ་བཞིན་གཤེགས་པས་རྩ་བ་མེད་ཅིང་རྟེན་མེད་པའི་བྱང་ཆུབ་བརྙེས་སོ། །འཇམ་དཔལ་གྱིས་གསོལ་བ། རྩ་བ་དང་རྟེན་གང་ལགས། རྩ་བ་ནི་འཇིག་ཚོགས་སོ། །རྟེན་ནི་ཡང་དག་པ་མ་ཡིན་པ་ཀུན་བརྟགས་སོ། །གང་བརྗོད་དུ་མེད་པའི་དོན་དེ་རྟེན་ཅིང་འབྲེལ་པར་འབྱུང་བའི་དོན་ཏོ། །གང་རྟེན་ཅིང་འབྲེལ་པར་འབྱུང་བའི་དོན་དེ་ཆོས་ཀྱི་དོན་ཏོ། །གང་ཆོས་ཀྱི་དོན་དེ་སངས་རྒྱས་ཀྱི་དོན་ཏོ། །དེའི་ཕྱིར་གང་གིས་རྟེན་ཅིང་འབྲེལ་པར་འབྱུང་བ་མཐོང་བ་དེས་ཆོས་མཐོང་ངོ༌། །གང་གིས་ཆོས་མཐོང་བ་དེས་སངས་རྒྱས་མཐོང་སྟེ། ཇི་ལྟར་བཙལ་ན་ཅི་ཡང་མི་མཐོང་བ་དེ་ལྟར་མཐོང་ངོ༌། །འཇམ་དཔལ་ཅི་ཡང་ཞེས་བྱ་བ་གང་ཞེ་ན། འདི་ལྟ་སྟེ། སེམས་དང་དམིགས་པའོ། །དེ་ནས་སེམས་དང་དམིགས་པ་མི་མཐོང་བ་དེ་ན་ཡང་དག་པ་མཐོང་བའོ། །དེ་ལྟར་ན་ཆོས་དེ་དག་དེ་བཞིན་གཤེགས་པས་མཉམ་པ་ཉིད་ཀྱིས་མཉམ་པར་མངོན་པར་རྫོགས་པར་སངས་རྒྱས་སོ། །དེ་བཞིན་གཤེགས་པ་དགེ་ཆོས་ཟག་མེད་ཀྱིས། །གཟུགས་བརྙན་ལྟ་བུ་ཡིན་ཏེ་འདི་ལ་ནི། །དེ་བཞིན་གཤེགས་མེད་དེ་བཞིན་ཉིད་ཀྱང་མེད། །འཇིག་རྟེན་དག་ན་གཟུགས་བརྙན་སྣང་བར་ཟད། །ཆོས་ཡང་དག་པར་བསྡུས་པ་ལས། བྱང་ཆུབ་སེམས་དཔའ་མཐར་གྱིས་གནས་པའི་སྙོམས་པར་འཇུག་པ་དགུ་ལ། འདོད་པ་དག་ལས་དབེན་པ་སྡིག་པ་མི་དགེ་བའི་ཆོས་ལས་དབེན་པ། རྟོག་པ་དང་བཅས་དཔྱོད་པ་དང་བཅས་དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་རྫོགས་པར་བྱས་
ཏེ་གནས་སོ། །དེ་ལ་འདོད་པ་རྣམས་ནི་བསམ་གཏན་དང་པོའི་མི་མཐུན་པའི་ཕྱོགས་ཏེ། གང་སྲེད་པ་དེ་དག་ལས་དབེན་པའོ། །སྡིག་པ་མི་དགེ་བའི་ཆོས་རྣམས་ནི་ཆགས་པ་དང༌། ཞེ་སྡང་དང་གཏི་མུག་སྟེ། གཞི་དེ་ལས་མི་དགེ་བ་བཅུ་འབྱུང་ངོ༌། །འདི་ནི་སྡིག་པ་མི་དགེ་བའི་ཆོས་རྣམས་ཞེས་བྱ་སྟེ། དེ་དག་ལ་དབེན་པ་ནི་བསམ་གཏན་དང་པོའོ། །རྟོག་པ་དང་ལྷན་ཅིག་པ་ནི་རྟོག་པ་དང་བཅས་པ་སྟེ། རྟོག་པ་དེ་དག་གང་ཞེ་ན། གང་དག་བསམ་གཏན་དང་པོ་དང་མཐུན་པའི་རྟོག་པ་སྟེ། དེ་ཆོ་ག་བཞིན་དུ་རྟོག་ཅིང་དེ་དག་ཀྱང་དུལ་བས་ན། དེ་དག་ནི་རྟོག་པ་ཞེས་བྱ་སྟེ། ཤེས་པ་དང་ཁོང་དུ་ཆུད་པ་དང༌། དཔྱོད་པ་དང་རབ་ཏུ་རྟོག་པ་དང༌། ཏིང་ངེ་འཛིན་དུ་བྱེད་པ་ནི་རྟོག་པའོ། །དཔྱོད་པ་གང་ཞེ་ན། བསམ་གཏན་དང་པོ་དང་མཐུན་པའི་རྟོག་པ་དེ་དག་ཉིད་ལ་དཔྱོད་པ་དང༌། རྣམ་པར་དཔྱོད་པ་དང༌། ཉེ་བར་དཔྱོད་པ་དང༌། ཀུན་དུ་ལོངས་སྤྱོད་པ་དང༌། ཏིང་ངེ་འཛིན་དུ་བྱེད་པ་དང༌། སེམས་རྗེས་སུ་འགྲོ་བ་ནི་དཔྱོད་པ་ཞེས་བྱ་སྟེ། དེ་དག་དང་ལྷན་ཅིག་པ་ནི་རྟོག་པ་དང་བཅས། དཔྱོད་པ་དང་བཅས་པ་བསམ་གཏན་དང་པོའོ། །དགའ་བ་དང་བདེ་བ་དབེན་པ་ལས་སྐྱེས་པས་དེའི་ཕྱིར་དབེན་པ་ལས་སྐྱེས་པའི་དགའ་བ་དང་བདེ་བ་ཞེས་བྱའོ། །རྫོགས་པར་བྱས་ཏེ་གནས་ཞེས་བྱ་བ་ལ། རྫོགས་པར་བྱས་ཞེས་བྱ་བ་ནི། སྡོམ་པ་དང༌། སྡོམ་པར་བྱེད་པ་དང༌། སྦེད་པ་དང༌། སྦེད་པར་བྱེད་པ་དང༌། རོ་མྱང་བ་དང་མངོན་པར་དགའ་བ་སྟེ། བསམ་གཏན་དེ་ལ་གནས་པའི་བྱང་ཆུབ་སེམས་དཔའ་ནི་མི་སྐྱེ་བའི་ཆོས་ལ་བཟོད་པ་ཁོང་དུ་ཆུད་པར་བྱ་བའི་འདུན་པ་དང༌། འདོད་པ་འཐོབ་སྟེ། འདུན་པ་དང་འདོད་པ་དེས་བསམ་གཏན་དང་པོ་ལ་སྙིང་པོ་འདུ་ཤེས་པ་མ་ཡིན་ནོ། །དེ་བསམ་གཏན་གཉིས་པ་རྩོམ་ཏེ། དེ་བསམ་གཏན་དང་པོའི་རྟོག་པ་དང༌། དཔྱོད་པ་དེ་དག་ཞི་བར་བྱེད། དེ་དག་ལས་སེམས་རབ་ཏུ་ཞི་བར་བྱེད་ཅིང༌། བསམ་གཏན་གཉིས་པ་ཡོངས་སུ་འགྲུབ་པའི་རྒྱུ་ཚོལ་ཏེ། དེ་རྟོག་པ་དང་དཔྱོད་པ་དང་བྲལ་ནས། ནང་ཡོངས་སུ་དང་སྟེ། སེམས་ཀྱི་རྒྱུད་གཅིག་ཏུ་གྱུར་པས། རྟོག་པ་དང་དཔྱོད་
པ་མེད་པར་དགའ་བ་དང་ལྡན་པ། བསམ་གཏན་གཉིས་པ་རྫོགས་པར་བྱས་ཏེ་གནས་སོ། །དེ་ལ་ནང་ཡོངས་སུ་དང་བ་ནི་དེའི་བསམ་གཏན་གཉིས་པའི་མི་མཐུན་པའི་ཕྱོགས་ཀྱི་ཆོས་གང་ཡིན་པ་དེ་དག་ཉེ་བར་ཞི་བ་དང་ལྡན་པ་ཡིན་ཏེ། དེའི་ཕྱིར་ནང་ཡོངས་སུ་དང་བ་ཞེས་བྱའོ། །རྒྱུད་གཅིག་ཏུ་གྱུར་ཞེས་བྱ་བ་ནི་བསམ་གཏན་དང་པོའི་རྟོག་པ་དང་དཔྱོད་པ་དེ་དག་ཐམས་ཅད་རབ་ཏུ་ཞི་ནས། རྒྱ་མཚོའི་ཆུ་ལྟར་རོ་གཅིག་ཏུ་འགྱུར་བར་འཐོབ་པོའོ། །འདི་ལྟ་སྟེ་དཔེར་ན་རྒྱ་མཚོ་ཆེན་པོར་ཆུ་འབབ་པ་རྣམས་ལན་ཚྭར་རོ་གཅིག་པར་འགྱུར་བ་དེ་བཞིན་དུ། བྱང་ཆུབ་སེམས་དཔའ་བསམ་གཏན་གཉིས་པ་ལ་སྙོམས་པར་ཞུགས་པའི་བསམ་གཏན་དང་པའི་རྟོག་པ་དང་དཔྱོད་པ་དེ་དག་ཐམས་ཅད་ཞི་ནས་རོ་གཅིག་ཏུ་གྱུར་ཏེ། དེ་ནི་ཏིང་ངེ་འཛིན་ཞེས་བྱའོ། །ཏིང་ངེ་འཛིན་དེ་ལས་སངས་རྒྱས་དང༌། ཆོས་དང༌། དགེ་འདུན་ལ་དགའ་བ་སྐྱེས་ཏེ། དེ་དཀོན་མཆོག་ལ་དགའ་བས་དགེ་བའི་ཆོས་རྣམས་རྫོགས་པར་འགྱུར་རོ། །དེ་ལས་མི་སྐྱེ་བའི་ཆོས་ལ་བཟོད་པ་ཐོབ་པའི་འདུན་པ་ཤིན་ཏུ་འབར་བ་དང༌། ཤིན་ཏུ་འོད་གསལ་བ་དང༌། ཤིན་ཏུ་འོད་བ་འཐོབ་པོ། །དེ་འདུས་པ་དེས་བསམ་གཏན་གཉིས་པ་ལ་མི་ཆགས་ཏེ། བསམ་གཏན་གསུམ་པ་ཀུན་དུ་ཚོལ་ལོ། །དེ་འདི་སྙམ་དུ་སེམས་ཏེ་དགའ་བ་ནི་བསམ་གཏན་གསུམ་པའི་སྒྲིབ་པ་ཡིན་ནོ་སྙམ་ནས། དེ་དགའ་བ་དེ་ལས་འདོད་ཆགས་དང་བཏང་སྙོམས་དྲན་པ་ཡོངས་སུ་དག་པ། འཕགས་པ་རྣམས་ཀྱིས་གང་དག་དགའ་བ་མེད་པ་བདེ་བ་ལ་གནས་པ་ཞེས་བརྗོད་པ། བསམ་གཏན་གསུམ་པ་རྫོགས་པར་བྱས་ཏེ་གནས་སོ། །ཏིང་ངེ་འཛིན་ལས་སྐྱེས་པའི་དགའ་བ་ལ་འདོད་ཆགས་དང་བྲལ་བར་ཐོབ་པ་དེ་གང་དེ་དགའ་བ་མེད་པའི་གཏན་དུ་བདེ་བ་མ་ཡིན་གྱི་ཟད་པ་དང་འཇིག་པའི་ཆོས་ཅན་ཏེ། དེ་མི་རྟག་ཅིང་མི་བརྟན་ལ་ཐེར་ཟུག་མ་ཡིན་ཞིང་དེ་ཡིད་བརྟན་དུ་མི་རུང་ངོ་སྙམ་པའི་སེམས་དེ་ལྟ་བུ་འཐོབ་པོ། །དེ་ལྟར་ཤེས་ནས་མི་སྐྱེ་བའི་ཆོས་ལ་བཟོད་པར་རབ་ཏུ་འཐོབ་པའི་འདུན་པ་དྲག་པོ་ཆེན་
པོ་འཐོབ་པོ། །འདུན་པ་དྲག་པོ་དེས་བདེ་བ་དང་སྡུག་བསྔལ་ལ་མངོན་པར་ཆགས་པ་མི་སྐྱེའོ། །དེ་བདེ་བ་ཡང་སྤངས་ཏེ་སྔ་ནས་སྡུག་བསྔལ་ཡང་སྤངས་ཤིང༌། ཡིད་བདེ་བ་དང༌། ཡིད་མི་བདེ་བ་ཡང་ནུབ་པས། བདེ་བ་ཡང་མ་ཡིན། །སྡུག་བསྔལ་བ་ཡང་མ་ཡིན་པ། བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་རྫོགས་པར་བྱས་ཏེ་གནས་སོ། །དེ་བསམ་གཏན་བཞི་བ་ལ་སྙོམས་པར་ཞུགས་པས་གཉེན་པོའི་སེམས་སོ། །ཡིད་དུ་འོང་བའི་སེམས་སོ། །ལས་སུ་རུང་བའི་སེམས་སོ། །འོད་གསལ་བའི་སེམས་སོ། །དྲན་པའི་སེམས་སོ། །བདེ་བ་དེ་སེམས་ཅན་ཐམས་ཅད་ཀྱིས་མངོན་པར་སྨོན་ཏེ། དེ་སེམས་ཅན་ཐམས་ཅད་ལ་ཕན་པ་དང་བདེ་བ་ལ་མངོན་དུ་ཕྱོགས་པས་མི་སྐྱེ་བའི་ཆོས་ལ་བཟོད་པ་སྣང་བ་སྐྱེའོ། །དེ་སྣང་བ་སྐྱེས་པ་དེས་བསམ་གཏན་བཞི་པ་སྡུག་བསྔལ་བ་ཡང་མ་ཡིན། བདེ་པ་ཡང་མ་ཡིན་པ་མང་བ་དེ་ལ་དགའ་བར་མི་འགྱུར་རོ། །གང་བཏང་སྙོམས་དང་དྲན་པ་ཡོངས་སུ་དག་པའི་བདེ་བ་ལས་ཡང་ཆགས་པར་མི་བྱེད་དོ། །དེ་ལ་མི་ཆགས་པས་དེ་ནམ་མཁའ་ཉིད་དུ་སྣང་བར་འགྱུར་རོ། །དེ་ཐམས་ཅད་ཀྱི་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ཏེ་ཐོགས་པའི་འདུ་ཤེས་རྣམས་ནུབ་པར་གྱུར་ཅིང༌། སྣ་ཚོགས་ཀྱི་འདུ་ཤེས་ཡིད་ལ་མི་བྱེད་པས། ནམ་མཁའ་མཐའ་ཡས་སོ་སྙམ་ནས། ནམ་མཁའ་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་སོ། །དེ་འདི་སྙམ་དུ་སེམས་ཏེ། མདོར་ན་འདི་ལ་གཟུགས་ནི་རྣམ་པ་གཉིས་ཏེ། འབྱུང་བ་དང༌། འབྱུང་བ་ལས་གྱུར་བའོ། །འབྱུང་བའི་གཟུགས་ནི་འབྱུང་བ་ཆེན་པོ་བཞིའོ། །འབྱུང་བ་ལས་གྱུར་པ་ནི་ཁ་དོག་དྲི་རོ་རེག་པ་སྟེ། དེ་ལྟར་གཟུགས་རྣམ་པ་བརྒྱད་དོ། །གཟུགས་དེ་དག་གིས་འདུ་ཤེས་རྣམས་ལས་ཡང་དག་པར་འདས་ནས། ཐོགས་པའི་འདུ་ཤེས་མི་འབྱུང་སྟེ་ནུབ་པར་འགྱུར་རོ། །གང་ན་གཟུགས་སུ་འདུ་ཤེས་པ་དེ་ན་ཐོགས་པའི་འདུ་ཤེས་པ་སྟེ། དེ་བས་ན་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ནས་ཐོགས་པའི་འདུ་ཤེས་རྣམས་ནུབ་པར་འགྱུར་རོ། །ཐོགས་པའི་འདུ་ཤེས་རྣམས་ནུབ་ན། སྣ་ཚོགས་ཀྱི་འདུ་ཤེས་རྣམས་ཡིད་ལ་མི་བྱེད་པས་ནམ་
མཁའ་མཐའ་ཡས་སོ་སྙམ་དུ་འཇུག་གོ །དེ་ནས་ནམ་མཁའ་མཐའ་ཡས་སོ་སྙམ་ནས། ནམ་མཁའ་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་སོ། །དེ་ལ་བྱང་ཆུབ་སེམས་དཔའ་ནམ་མཁའ་མཐའ་ཡས་སྐྱེ་མཆེད་ལ་སྙོམས་པར་ཞུགས་པ་འདི་སྙམ་དུ་སེམས་ཏེ། ནམ་མཁའ་ནི་མཐའ་མེད་པས་སོ། །གང་ལ་མཐའ་མེད་པ་དེའི་ཐོག་མ་ཡོད་པར་ག་ལ་འགྱུར་དབུས་ཡོད་པར་ག་ལ་འགྱུར་ཏེ། དེ་ལྟར་ཆོས་ཐམས་ཅད་ནི་ཐོག་མ་དང་ཐ་མ་དང༌། དབུས་མེད་དོ་སྙམ་མོ། །དེ་ལྟར་སྙོམས་པར་ཞུགས་པའི་བྱང་ཆུབ་སེམས་དཔའ་སེམས་ཅན་རྣམས་ལ་ནི་སྙིང་རྗེ་ཆེན་པོ་བསྐྱེད། ཆོས་རྣམས་ལ་ནི་ནམ་མཁའ་དང་མཚུངས་པ་ཉིད་ཀྱི་ཤེས་པ་འཇུག་སྟེ། དེ་ནི་དེའི་མི་སྐྱེ་བའི་ཆོས་ལ་བཟོད་པའི་བརྩོན་པའོ། །དེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་པས་ཡང་དག་པར་འདས་ཏེ། རྣམ་པར་ཤེས་པ་མཐའ་ཡས་སོ་སྙམ་ནས། རྣམ་ཤེས་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་སོ། །དེ་འདི་སྙམ་དུ་སེམས་ཏེ། ནམ་མཁར་འདུ་ཤེས་པ་ནི་རྣམ་པར་ཤེས་པར་འགྱུར་བའོ་སྙམ་ནས། འདི་སྙམ་དུ་འདི་ཐམས་ཅད་ནི་རྣམ་པར་ཤེས་པ་ཙམ་སྟེ། རྣམ་ཤེས་མཐའ་ཡས་དེ་ཡང་ཡོད་པ་ཡང་མ་ཡིན། མེད་པ་ཡང་མ་ཡིན་ནོ་སྙམ་དུ་སེམས་སོ། །དེ་དེ་ལྟར་སྙོམས་པར་ཞུགས་པས་མི་སྐྱེ་བའི་ཆོས་ལ་བཟོད་པ་ཡིན་ཏེ། ཡོངས་སུ་གྲུབ་པ་ནི་མ་ཡིན་ནོ། །དེ་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅི་ཡང་མེད་དོ་སྙམ་ནས་ཅི་ཡང་མེད་པའི་སྐྱེ་མཆེད་རྫོགས་པར་བྱས་ཏེ་གནས་སོ། །ཅི་ཡང་མེད་ཅེས་བྱ་བ་ལ། ཅི་ཡང་ཞེས་བྱ་བ་ནི་འདོད་ཆགས་ཞེ་སྡང་གཏི་མུག་དང༌། རྟོག་པ་དང་རྣམ་པར་རྟོག་པ་དང༌། ཡོངས་སུ་རྟོག་པ་དང༌། འདུས་བྱས་ཀྱི་ཆོས་ཐམས་ཅད་དང༌། ཡང་དག་པ་མ་ཡིན་པ་ཀུན་དུ་རྟོག་པ་ལས་བྱུང་བ་རྣམས་ནི་ཅི་ཡང་ཞེས་བྱའོ། །ཅི་ཡང་མེད་པ་ནི་ཇི་སྐད་དུ་བརྗོད་པ་དེ་དག་ལས་ཆུང་དུར་འགྱུར། ཕྲ་བར་གྱུར་པ་ནི་ཅི་ཡང་མེད་པ་ཞེས་བྱའོ། །དེ་ལ་གནས་པའི་བྱང་ཆུབ་སེམས་དཔའི་མི་སྐྱེ་བའི་ཆོས་ལ་བཟོད་པ་
ཤིན་ཏུ་འབར་བ་ཤིན་ཏུ་འོད་གསལ་བ་ཡིན་ནོ། །དེ་རྒྱུ་དེ་དང་རྐྱེན་དེ་དང་གཞི་དེ་དང་དེ་ཐོབ་པ་དེའི་ཕྱིར། ཅི་ཡང་མེད་པའི་སྐྱེ་མཆེད་ལ་མི་ཆགས་ཏེ་གོང་དུ་ཚོལ་ལོ། །དེ་གོང་དུ་ཚོལ་བ་ནི་འདི་སྙམ་དུ་སེམས་ཏེ། འདི་ནི་གང་དུ་འདུ་ཤེས་རྣམས་ཀྱི་ཕྲ་བ་ལ་ཅི་ཡང་མེད་པར་ཡོངས་སུ་བརྟགས་ཏེ། དེ་ནི་འདུ་ཤེས་མེད་འདུ་ཤེས་མེད་མིན་མ་ཡིན་ནོ་སྙམ་མོ། །དེ་ལ་འདུ་ཤེས་མེད་པ་ནི་སྟོང་པའི་ཕྱིར་རོ། །འདུ་ཤེས་མེད་པ་ཡང་མ་ཡིན་པ་དེ་རྟེན་ཅིང་འབྲེལ་པར་འབྱུང་བའི་ཕྱིར་རོ། །དེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་མངོན་དུ་གྱུར་ཏེ། དེ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ཏེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་བྱས་ཏེ་གནས་སོ། །དེ་དེ་ལ་གནས་ནས་འདི་སྙམ་དུ་སེམས་ཏེ། གང་འདུ་ཤེས་མེད་འདུ་ཤེས་མེད་མིན་དེ་ལ་དགའ་བ་ཅི་ཞིག་ཡོད་སྙམ་ནས། བློ་དེ་ལས་གོང་དུ་བསྐྱེད་དོ། །བློ་དེ་ལས་གོང་དུ་བསྐྱེད་ནས། སྐྱེ་བ་མེད་པ་དང༌། འགག་པ་མེད་པའི་ཆོས་མངོན་དུ་གྱུར་ཏོ། །དེ་ཆོས་ཐམས་ཅད་མ་སྐྱེས་པ་དང༌། མ་འགགས་པར་མཐོང་ངོ༌། །དེ་ཆོས་ཐམས་ཅད་རང་བཞིན་གྱིས་འགགས་པར་མཐོང་ནས་ཡང་མི་འཇིག་མི་རྟག་གོ །དེའི་ཕྱིར་མི་སྐྱེ་བའི་ཆོས་ལ་བཟོད་པ་ཡོངས་སུ་དག་པ་ཡིན་ནོ། །དེ་དེ་ལས་གོང་དུ་ལྷུན་གྱིས་གྲུབ་པ་རྒྱུན་མི་འཆད་པར་འཇུག་སྟེ། འདི་དག་ནི་བྱང་ཆུབ་སེམས་དཔའི་མཐར་གྱིས་གནས་པའི་སྙོམས་པར་འཇུག་པ་དགུའོ། །དྲི་མ་མེད་པར་གྲགས་པས་བསྟན་པ་ལས། ལི་ཙྪ་བཱི་གཞོན་ནུ་དཀོན་མཆོག་འབྱུང་གནས་ཀྱིས། བུདྡྷ་ལ་སངས་རྒྱས་ཀྱི་ཞིང་ཡོངས་སུ་དག་པ་ཞུས་པ་དང༌། ཕ་རོལ་ཏུ་ཕྱིན་པ་དང༌། དགེ་བ་བཅུ་དང༌། བྱང་ཆུབ་ཀྱི་སེམས་ལ་སོགས་པ་སངས་རྒྱས་ཀྱི་ཞིང་ཡིན་པར་བཤད་པའི་རྗེས་ལ། རིགས་ཀྱི་བུ་དེ་ལྟ་བས་ན་སངས་རྒྱས་ཀྱི་ཞིང་ཡོངས་སུ་སྦྱོང་བར་འདོད་ན་བྱང་ཆུབ་སེམས་དཔས་རང་གི་སེམས་ཡོངས་སུ་སྦྱང་བར་བྱའོ། །དེ་ཅིའི་ཕྱིར་ཞེ་ན། ཇི་ཙམ་དུ་བྱང་ཆུབ་སེམས་དཔའ་སེམས་ཡོངས་སུ་དག་པ་དེ་ཙམ་དུ་སངས་རྒྱས་ཀྱི་ཞིང་ཡོངས་སུ་དག་པར་འོང་ངོ༌། །དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཤཱ་རིའི་བུས་འདི་སྙམ་དུ་སེམས་
སོ། །ཇི་ལྟར་རང་གི་སེམས་ཅན་ཐམས་ཅད་ཡོངས་སུ་དག་པ་ལྟར་སངས་རྒྱས་ཀྱི་ཞིང་ཡོངས་སུ་དག་པར་འགྱུར་རོ་ཞེ་ན། བཅོམ་ལྡན་འདས་ཤཱཀྱ་ཐུབ་པ་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སེམས་ཡོངས་སུ་དག་གམ། ཅི་ནས་སངས་རྒྱས་ཀྱི་ཞིང་འདི་ལྟ་བུར་ཡོངས་སུ་མ་དག་པར་སྣང༌། དེ་ནས་བཅོམ་ལྡན་འདས་ཀྱི་ཤཱ་རིའི་བུའི་བསམ་པ་མཁྱེན་ནས་བཀའ་སྩལ་པ། ཤཱ་རིའི་བུ་ཇི་སྙམ་དུ་སེམས། ཉི་མ་དང་ཟླ་བ་དག་ཅི་ན་དམུས་ལོང་གིས་མ་མཐོང་བ། དམུས་ལོང་གིས་ནོངས་ཀྱི་ཉི་ཟླས་མ་ནོངས་སོ། །ཤཱ་རིའི་བུ་དེ་བཞིན་དུ་སེམས་ཅན་བསོད་ནམས་མེད་ཅིང་མ་རིག་པའི་མིག་གིས་ཉེས་ཀྱི་སངས་རྒྱས་ཀྱི་ཞིང་གི་ཡོན་ཏན་གྱི་རྒྱན་མང་པོ་སེམས་ཅན་གང་གིས་ཀྱང་མི་མཐོང་བ་ནི་དེ་བཞིན་གཤེགས་པས་མ་ཉེས་སོ། །ཤཱ་རིའི་བུ་དེ་བཞིན་གཤེགས་པའི་སངས་རྒྱས་ཀྱི་ཞིང་ནི་ཡོངས་སུ་དག་ན་ཁྱོད་ཀྱིས་མ་མཐོང་ངོ༌། །དེ་ནས་ཚངས་པ་རལ་པ་ཅན་གྱིས་ཤཱ་རིའི་བུ་ལ་སྨྲས་པ། སངས་རྒྱས་ཀྱི་ཞིང་མ་དག་གོ་ཞེས་མ་ཟེར་ཅིག །སངས་རྒྱས་ཀྱི་ཞིང་ནི་ཡོངས་སུ་དག་པའོ། །ཤཱ་རིའི་བུ་དཔེར་ན་གཞན་འཕྲུལ་དབང་བྱེད་ཀྱི་ལྷའི་གནས་བརྒྱན་པ་བཞིན་དུ། བཅོམ་ལྡན་འདས་ཤཱཀྱ་ཐུབ་པའི་སངས་རྒྱས་ཀྱི་ཞིང་འདི་ཡང་ཡོན་ཏན་གྱིས་བརྒྱན་པར་བདག་ཅག་གིས་མཐོང་ངོ༌། །དེ་ནས་ཤཱ་རིའི་བུས་ཚངས་པ་རལ་པ་ཅན་ལ་འདི་སྐད་ཅེས་སྨྲས་སོ། །ཚངས་པ་ཁོ་བོས་ནི་ས་ཆེན་པོ་འདི་མཐོན་དམན་དང༌། ཚེར་མ་དང༌། གད་པ་དང༌། རོང་དང༌། རི་རྩེ་དང༌། དམ་གྲོག་དང༌། མི་གཙང་བ་དང༌། བོད་བས་རབ་ཏུ་གང་བར་མཐོང་ངོ༌། །ཚངས་པས་སྨྲས་པ། བཙུན་པ་ཤཱ་རིའི་བུ་སེམས་ཡོངས་སུ་མ་དག་ཅིང་མཐོན་དམན་དུ་རྟོག་པ་དང༌། སངས་རྒྱས་ཀྱི་ཡེ་ཤེས་ལ་བསམ་པ་ཡོངས་སུ་མ་དག་པས་ན་སངས་རྒྱས་ཀྱི་ཞིང་དེ་ལྟ་བུར་མཐོང༌། ཤཱ་རིའི་བུ་སེམས་ཅན་དེ་དག་ཐམས་ཅད་ཀྱི་སེམས་ཀྱི་བསམས་པ་ཡོངས་སུ་དག་ཅིང་སངས་རྒྱས་ཀྱི་ཡེ་ཤེས་ལ་བསམ་པ་ཡོངས་སུ་དག་པ་དེ་དག་གིས་ནི་སངས་རྒྱས་ཀྱི་ཞིང་འདི་ཡོངས་སུ་དག་པར་མཐོང་ངོ༌། །དེ་ནས་སངས་རྒྱས་ཀྱི་འཁོར་དེ་རྣམས་འདི་ལྟ་བུ་ཇི་ཞིག་ཡིན་སྙམ་དུ་སེམས་པ་མཁྱེན་ནས་ས་ཆེན་པོ་འདི་ལ་ཞབས་ཀྱི་མཐེ་བོས་རིག་པར་མཛད་པ་དང༌། དེའི་ཚེ་སྟོང་གསུམ་
གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་དུ་མ་དང༌། ཡོན་ཏན་གྱི་ཚོགས་ཀྱིས་བརྒྱན་པར་སྣང་སྟེ། དཔེར་ན་དེ་བཞིན་གཤེགས་པ་རིན་ཆེན་རྒྱན་གྱི་ཞིང་ལྟར་སྣང་ངོ༌། །འཁོར་ཐམས་ཅད་ཀྱང་བདག་ཀྱང་རིན་པོ་ཆེའི་པད་མོ་ལ་འཁོད་པར་ཤེས་སོ། །དེ་ནས་ཤཱ་རིའི་བུ་ལ་བཀའ་སྩལ་པ། མཐོང་ངམ། གསོལ་པ། སྔོན་མ་མཐོང་བ་འདི་ལྟ་བུ་མཐོང་ངོ༌། །བཀའ་སྩལ་པ། ངའི་སངས་རྒྱས་ཀྱི་ཞིང་རྟག་ཏུ་ཡང་འདི་བཞིན་དག་སྟེ། སེམས་ཅན་ངན་པ་སྨིན་པར་བྱ་བར་གནོད་པ་དང་ཉེས་པ་མང་པོར་སྟོན་ཏོ། །དཔེར་ན་ལྷའི་བུ་རྣམས་སྣོད་གཅིག་ནས་ཟ་བ་ཟ་མོད་ཀྱི། བསོད་ནམས་ཇི་ལྟ་བ་བཞིན་མྱོང་ངོ༌། །དེ་བཞིན་དུ་སངས་རྒྱས་ཀྱི་ཞིང་གཅིག་ཏུ་སྐྱེས་ཀྱང་སེམས་ཅན་གྱི་བསམ་པ་ཇི་ལྟར་དག་པ་བཞིན་སངས་རྒྱས་ཀྱི་ཞིང་གི་ཡོན་ཏན་གྱི་བསྔགས་པ་ཡང་དེ་བཞིན་མཐོང་ངོ༌། །དེ་ནས་སངས་རྒྱས་ཀྱི་ཞིང་དེ་ལྟར་སྣང་བའི་ཚེ། སྲོག་ཆགས་བརྒྱད་ཁྲི་བཞི་སྟོང་བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །སྣང་བ་བསམ་དུ་མེད་པ་ལས། རྒྱལ་པོ་སྡེ་རབ་ཏུ་འཕམ་བྱེད་ཀྱིས་སངས་རྒྱས་ལ་ཞུས་པ་དང༌། བཀའ་སྩལ་པ། བསྐལ་པ་དགུ་བཅུ་རྩ་གཅིག་གི་སྔོན་ལོགས་སུ་སངས་རྒྱས་རྣམ་པར་གཟིགས་བྱུང་བའི་ཚེ། དེའི་གསུང་རབ་ལ་བྱང་ཆུབ་སེམས་དཔའ་བཟང་བའི་ལྷ་དང་ས་ཞེས་བྱ་བ་གཉིས་ཤིག་བྱུང་བ་ལས། བཟང་བའི་ལྷ་ནི་འདོད་པ་ཆུང་བྱ་བ་ཉུང་བསམ་གཏན་དང་མངོན་པར་ཤེས་པ་བྱ་བ་ལ་ཕྱིར་མི་ལྡོག་པ་ཞིག་གོ །ས་ནི་དེ་ཙམ་གྱི་ཆོས་ཆེན་པོ་དང་ལྡན་པ་མ་ཡིན་ཏེ། བཟང་ས་ལྷའི་གཡོག་བྱེད་པ་ན། དེ་ཧ་ཅང་གྲོང་དང་ཡུལ་དང༌། རྒྱལ་པོའི་ཕོ་བྲང་འཁོར་དུ་འགྲོ་ཞིང་དེར་ཕྱིན་ནས་ཀྱང་བྱ་བ་མང་བ་དང༌། བཟང་བའི་ལྷ་ཁྱོད་ཧ་ཅང་བྱ་བ་མང་ཆེས་སོ། །སྤྱད་པས་སྤང་བ་ལ་ཅུང་ཟད་སྒྲིམས་ཤིག་ཅེས་བྱས་ཏེ་ཡང་བསྐུལ་ཡང་བསྐུལ་བ་དང༌། ཁྲོས་ཚིག་མི་དགའ་ནས། ཚིག་རྩུབ་མོས་ནལ་བུ་སྦྱར་མའི་བུ་ཁྱོད་ཀྱི་ཕ་མ་ཡང་བྱི་བོ་བྱེད་ན། ཁྱོད་ལ་ཚུལ་ཁྲིམས་དང༌། ཤེས་རབ་ག་ལ་ཡོད་ཅེས་སྨྲ་ཞིང་སླར་ཡང་མི་འཆགས་བག་ལ་ཉལ་སྟོན་ཏོ། །བཟང་བའི་
ལྷས་ཀྱང་དེ་སྣོད་མ་ཡིན་པ་ཙམ་དུ་རིག་ནས་བཅོས་ཏེ་བཏང་བ་དང༌། དེ་ཚིག་པ་ཟ་ནས་ཕྲད་དགུ་ལ་བཟང་བའི་ལྷ་ལ་ཁ་ཕྱར་བཏང་ངོ༌། །དེ་ཤི་ནས་བསྐལ་པ་ཁྲུག་ཅུར་ནལ་བུར་སྐྱེས་ཤིང་སྐྱེས་མ་ཐག་ཏུ་སྲང་གི་རྡོག་ལམ་དུ་བོར་ནས་ཝ་ཁྱི་ལ་སོགས་པས་ཟ་བ་དང༌། འགྲོ་བ་མང་པོས་ནལ་བུ་སྦྱར་མའི་བུ་ཞེས་ཁ་ཕྱ་བར་གྱུར་ཏོ། །བྱང་ཆུབ་ཀྱི་སེམས་ཀྱིས་བཟུང་བས་སེམས་ཅན་དམྱལ་བར་མ་སྐྱེས་སོ། །བཟང་བའི་ལྷ་ནི་དེ་བཞིན་གཤེགས་པ་མི་སྒུལ་བའི་སངས་རྒྱས་ཀྱི་ཞིང་ན་ཚངས་བར་སྤྱད་པ་སྤྱོད་དེ། བྱང་ཆུབ་སེམས་དཔའ་དཔལ་འབྱུང་ཞེས་བྱའོ། །སྣང་བ་བསམ་དུ་མེད་པས་ཀྱང་སྔོན་སངས་རྒྱས་བྱེ་བ་ཕྲག་དགུ་བཅུ་རྩ་བཞིའི་དྲུང་དུ་ཚངས་བར་སྤྱད་ཅིང་མཉེས་པར་བྱས་པས། དེ་ལྟ་བུའི་བདག་ཉིད་ཆེན་པོར་གྱུར་ཏོ། །དེ་བས་ན་སྲོག་དང་ཡང་བསྔོས་ཏེ། སྡིག་པའི་ལུས་དང་དག་དང་ཡིད་ཀྱི་ལས་བསྡམ་མོ། །དགེ་བའི་བཤེས་གཉེན་ལ་བརྟན་པར་བྱ་སྟེ། དེ་ལས་ཡོན་ཏན་གྱི་ཚོགས་ཐམས་ཅད་འགྲུབ་བར་འགྱུར་རོ། །དེའི་ཚེ་བུདྡྷ་ཛེ་ཏན་བཞུགས། བུདྡྷ་བསོད་སྙོམས་ལ་གཤེགས་པའི་ཚེ། ཁྱེའུ་ཡང་ཛེ་ཏའི་ཚོང་འདུས་ཀྱི་སྲང་གི་ཁང་སྟོང་ཞིག་ན་གཞག་པ་གཟིགས་སོ། །ཁྱེའུ་ཡང་བསྐལ་པ་གྲངས་མེད་པ་བརྒྱ་ན་སྣང་བ་བསམ་དུ་མེད་པའི་བུདྡྷར་འགྱུར་བར་ལུང་བསྟན་ཏོ། །རིན་པོ་ཆེའི་ཕུང་པོ་ལས། དགེ་སྦྱོང་གི་དྲི་མ་ནི་སུམ་ཅུ་རྩ་གཉིས་ཏེ། གང་ཞེ་ན། འདོད་པའི་ལྷ་རྣམ་པར་རྟོག་པ་དང༌། གནོད་སེམས་དང༌། འཚེ་བ་དང༌། བདག་བསྟོད་པ་དང༌། ཕ་རོལ་ལ་བརྙས་པ་དང༌། ཡ་ང་བའི་རྙེད་པ་ཚོལ་བ་དང་དྲི་མ་ནི་རྙེད་པས་རྙེད་པ་འདོད་པ་དང༌། དད་བས་བྱིན་པ་ཆུང་གཟོན་པ་དང༌། ལྟུང་པ་འཆབ་བ་དང༌། ཁྱིམ་པ་ལ་བརྟེན་པ་དང༌། རབ་ཏུ་བྱུང་བ་དང་བརྟེན་པ་དང༌། འདུ་འཛི་ལ་དགའ་བ་དང༌། རྙེད་པ་ཡོངས་སུ་མ་རྫོགས་པར་རྟོག་པ་དང༌། ཕ་རོལ་གྱི་རྙེད་པ་ལ་འདོད་པ་དང༌། བདག་གི་རྙེད་པས་ཆོག་མི་ཤེས་པ་དང༌། ཕ་རོལ་བསོད་ནམས་རྙེད་པ་ལ་ཕྲག་དོག་དང༌། སེར་སྣ་བྱེད་པ་དང༌། ཕ་རོལ་གྱི་འཁྲུལ་པ་ཚོལ་བ་དང༌། བདག་གི་འཁྲུལ་པ་ལ་སོ་སོར་ཐར་པ་དང༌། འདུལ་བས་མ་བསྡམས་པ་དང༌།
བྱ་རོག་ལྟར་མུར་ཅོར་སྨྲ་བ་དང༌། མ་གུས་པ་དང༌། རྒོད་པ་དང༌། གཡེང་བ་དང༌། ལྟ་བ་ཀུན་ནས་ལྡད་བ་དང༌། རྐྱེན་དང་འདུ་བ་ཚོགས་ཏེ་བྱུང་བ་དང༌། འགལ་བ་དང་མཐར་ལྟ་བ་ལ་ཆགས་པ་དང༌། འཁོར་བ་ལ་མངོན་པར་དགའ་བ་དང༌། མྱ་ངན་ལས་འདས་པ་ལ་མངོན་པར་མི་དགའ་བ་དང༌། འཇིག་རྟེན་གྱི་འདུ་མཆེད་པའི་གསང་སྔགས་འཛིན་པ་དང༌། སྒྲིབ་པས་ཀུན་དུ་བསྐོར་བ་དང༌། ལས་ཀྱི་རྣམ་པར་སྨིན་པ་འགལ་བ་དང༌། རྣམ་པར་ཐར་པའི་སྒོ་གསུམ་གྱིས་སྐྲག་པ་དང༌། སངས་རྒྱས་ཀྱི་ཆོས་ཟབ་མོ་སྤོང་བ་དང༌། ཆོས་དང་འགལ་བ་གནས་བ་དང༌། དཀོན་མཆོག་གསུམ་ལ་མ་གུས་པའོ། །འོད་སྲུངས་སྡིག་པའི་དགེ་སློང་མང་པོས་དའི་བསྟན་པ་འདི་ནུབ་པར་བྱེད་དོ། །འོད་སྲུངས་མུར་འདུག་དགུ་བཅུ་རྩ་ལྔ་དང༌། ཕ་རོལ་རྒོལ་བ་ཐམས་ཅད་ཀྱིས་ནི་དིའི་བསྟན་པ་ནུབ་པར་བྱེད་མི་ནུས་སོ། །གཞན་དུ་ན་ངའི་བསྟན་པ་འདི་ཉིད་ལས་སྐྱེས་བུ་གཏི་མུག་པ་འབྱུང་སྟེ། ངེས་ངའི་བསྟན་པ་འདི་ནུབ་པར་བྱེད་དོ། །འདི་ལྟ་སྟེ། འོད་སྲུངས་རི་དགས་ཀྱི་རྒྱལ་པོ་སེང་གེ་འཆི་བའི་དུས་བྱས་ནས་ཀྱང༌། རི་དགས་དང་བྱ་གག་གིས་ཀྱང་དེའི་ཤ་ཟ་བར་མི་ནུས་ཀྱི། འདི་ལྟར་སེང་གེའི་རོ་དེ་ཉིད་ལས་སྲིན་བུ་བྱུང་སྟེ། གང་རི་དགས་ཀྱི་རྒྱལ་པོ་སེང་གེའི་ཤ་ལ་ཟ་བ་དང་འདྲའོ། །འོད་སྲུངས་ཆོས་བཞི་དང་ལྡན་པ་ནི་སྡིག་པའི་དགེ་སློང་དུ་རིག་པར་བྱ་སྟེ། བཞི་གང་ཞེ་ན། ཁེངས་པ། ཅ་ཅོ་ཅན། བྱ་རྒོད་ལྟ་བུ། འཆལ་བའི་ཚིག་ཡིན་ནོ། །ཡང་བཞི་སྟེ། འཕྱར་བ། འགྱིང་བ། རྙེད་པ་འདོད་པ། ཆོས་མ་ཡིན་པ་འདོད་པའོ། །འོད་སྲུངས་དགེ་ལོང་གཉིས་ཀྱིས་ཞལ་ཏེ་བྱ་བར་ངས་རྗེས་སུ་གནང་སྟེ། གཉིས་གང་ཞེ་ན། ཡོངས་སུ་དག་པའི་དགེ་སློང་འཇིག་རྟེན་ཕ་རོལ་གྱི་ཁ་ན་མ་ཐོ་བས་འཇིགས་པར་ལྟ་བ་ལས་ཀྱི་རྣམ་པར་སྨིན་པའི་རྗེས་སུ་འབྲང་བས་ངོ་ཚ་ཞིང་འགྱོད་པ་དང་ལྡན་ཞིང༌། དགྲ་བཅོམ་པར་གྱུར་པའོ། །དཀོན་མཆོག་གི་ཟ་མ་ཏོག་ལས། ཀླུའི་རྒྱལ་པོ་མཐུ་དང་ལྡན་པ་ས་སེམས་པའི་དབང་གིས་སྤྲིན་གྱི་ཕུང་པོ་གཅིག་ལས་ཚ་བའི་བདག་ཉིད་གློག་གི་ཕྲེང་བ་ཡང་
གཏོང་ངོ༌། །སྐྱེད་པར་བྱེད་པའི་བདག་ཉིད་རྒྱུའི་རྒྱུན་ཀྱང་གཏོང་ངོ༌། །ཀུན་དགའ་བོ་ཕྱི་མའི་དུས་ལྔ་བརྒྱའི་ཐ་མ་ལ་དམ་པའི་ཆོས་འཇིག་པའི་ཚེ། ངའི་བསྟན་པ་ལ་དགེ་སློང་དག་ཕལ་ཆེར་ཤམ་ཐབས་དང་བླ་གོས་ལེགས་པར་མ་བགོས་པ་བཏུལ་ཏེ་བྱོན་པ་ལྷུང་བཟེད་ཆག་པ། ཤེས་བཞིན་མེད་པ། སྤྱོད་ལམ་མི་སྡུག་པ། ལག་ན་འཁར་བ་ཐོགས་པ། སྣ་ལེབ་དང་ཞར་བ་དང༌། ཐེད་པོ་དང༌། ཞ་བོ་དང༌། ལུས་ཀྱི་ཤ་ཚུགས་མ་ལེགས་པ་ནད་སྣ་ཚོགས་ཀྱིས་བཏབ་བ་འབྱུང་བར་འགྱུར་རོ། །ཅིའི་ཕྱིར་ཞེ་ན། དེའི་ཚེ་དགེ་སློང་དག་ཕལ་ཆེར་བསྙེན་བཀུར་དང་རྙེད་པ་དང༌། བཀུར་སྟི་འདོད་པ་བྱ་བ་སྣ་ཚོགས་ཀྱིས་འབྲེལ་བ། འདུལ་བ་པོར་སོ་སོར་ཐར་པ་དྲལ་བ་ཡིན། ཚེ་འདིར་ལྷུར་ལེན་པ་ཚེ་ཕྱི་མ་ལ་མི་ལྟ་བར་འགྱུར་ཏེ། དེ་དག་ཆོས་ཀྱི་ཕྱིར་མ་ཡིན་གྱི། བསྙེན་བཀུར་གྱི་ཕྱིར་ཞར་བ་དང༌། ཤ་ཚུགས་མ་ལེགས་པའི་བར་རབ་ཏུ་འབྱིན་པ་བསྙེན་པར་རྫོགས་པར་བྱེད་པར་འགྱུར་རོ། །དེའི་དེ་ལྟ་བུས་ངའི་བསྟན་པ་བལྟར་མི་རུང་བ་དང༌། མཉན་དུ་མི་རུང་བར་འགྱུར་རོ། །ལྷ་རྣམས་ནི་ཡིད་མི་དགའ་བར་འགྱུར་རོ། །བདུད་རྣམས་ནི་དགའ་བ་དང་བཏང་སྙོམས་སུ་འགྱུར་རོ། །ཆོས་གཉིས་ཀྱིས་ནི་བླ་ན་མེད་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། བརྩོན་འགྲུས་དང་བག་ཡོད་པའོ། །མངོན་ན་བྱང་ཆུབ་སེམས་དཔའི་ཐབས་མཁས་པའི་ལས་ཇི་སྙེད་པ་དེ་དག་ཐམས་ཅད་ནི་བརྩོན་འགྲུས་སོ། །ཤེས་རབ་ཀྱི་ལས་ཡོད་པ་ཐམས་ཅད་ནི་བག་ཡོད་པ་སྟེ། དེ་བས་ན་ཐབས་དང་ཤེས་རབ་དང་ལྡན་པ་ལ་བླ་ན་མེད་པའི་བྱང་ཆུབ་ལས་ལྡོག་པ་མེད་དོ། །རྣམ་པར་འཕྲུལ་བའི་རྒྱལ་པོས་ཞུས་པ་ལས། དེས་པའི་དོན་གྱི་མདོ་གང་ཞེ་ན། བརྗོད་དུ་མེད་པའི་ཕྱིར་མདོ་སྡེ་ཐམས་ཅད་ནི་ངེས་པའི་དོན་ཏེ། དེ་ལྟར་ན་ངེས་པའི་དོན་གྱི་མདོ་སྡེ་ལ་རྟོན་པ་ཡིན་ནོ། །ངེས་པའི་དོན་གྱི་མདོ་སྡེ་འདི་དག་ལ་གང་དག་མི་རྟོན་པ་དེ་དག་ནི་དྲང་བ་ཞེས་བྱ་སྟེ། ཅིའི་ཕྱིར་དྲང་བ་ཞེ་བྱ་ན། འདི་ལྟར་ངེས་པའི་དོན་དན་འགལ་བའི་ཆོས་ལ་གནས་པ་ཡིན་ཏེ། དེ་དག་ནི་དྲང་དགོས་པ་ཡིན་ནོ། །གང་གིས་དྲང་ཞེ་ན། སྒྲས་དྲང་ངོ༌། །ངེས་པའི་དོན་གྱི་མདོ་སྡེ་
དག་ལ་རྟོན་པ་ནི་སྒྲས་དྲང་བ་ཡིན་ནོ། །ཅིའི་ཕྱིར་ཞེ་ན། དེ་དག་གིས་དོན་དམ་པ་བརྗོད་དུ་མེད་པ་རྟོགས་ཤིང༌། དེ་དག་གིས་དུས་གསུམ་གྱི་ཆོས་ཐམས་ཅད་ལ་ལྷག་ཆད་མེད་པར་ཤེས་པའི་ཕྱིར་ཏེ། རྣམ་པར་འཕྲུལ་པའི་རྒྱལ་པོ་དོན་གྱི་རྣམ་པ་འདི་ལ་དེ་ལྟར་ཆོས་ཉིད་འདི་ལ་རྟོན་ན་མདོ་སྡེ་ཐམས་ཅད་ངེས་པའི་དོན་དུ་འགྱུར་རོ། །དེ་ལྟར་མི་རྟོན་ན་མདོ་སྡེ་ཐམས་ཅད་དྲང་བའི་དོན་དུ་འགྱུར་རོ། །དེ་བཞིན་གཤེགས་པ་ལྷའི་རྒྱལ་པོའི་སངས་རྒྱས་ཀྱི་ཞིང་ན་མི་རྣམས་ཀྱི་བཟའ་བ་དང་བཏུང་བ་རྣམས་ཀྱང་ཡིད་ལ་བསམས་པ་ཙམ་གྱིས་འབྱུང་ངོ༌། །དྲག་ཤུལ་ཅན་གྱིས་ཞུས་པ་ལས། བྱང་ཆུབ་སེམས་དཔའ་ཁྱིམ་པས་སློད་མོ་པ་མཐོང་ན་འདུ་ཤེས་གསུམ་བསྐྱེད་པར་བྱ་སྟེ། དགེ་བའི་བཤེས་གཉེན་དེ་ཚེ་བརྗེས་ནས་ལོངས་སྤྱོད་དུ་འགྱུར་བ་དང༌། བྱང་ཆུབ་ཀྱི་ལམ་ཉེ་བར་བསྟེན་པའོ། །ཡང་གསུམ་སྟེ། དུག་གསུམ་དང་བྲལ་བར་རོ། །ཅིའི་ཕྱིར་ཞེ་ན། དངོས་པོ་གཏོང་བ་དང༌། སྙིང་རྗེ་བ་དང༌། སྦྱིན་པ་བླ་ན་མེད་པའི་བྱང་ཆུབ་ཏུ་བསྔོ་བས་སོ། །ཁྱིམ་ན་གནས་པ་ནི་གདུང་བ་དང༌། བཅིངས་པ་དང་དོན་ཆུང་བ་དང་ངན་སོང་གི་ཐེམ་སྐས་དང་དམ་པའི་ཆོས་རྒུད་པ་དང༌། ཟང་ཟིང་དང་བཅས་པ་དང་སྡུག་བསྔལ་གྱི་གཞིའི། །རབ་ཏུ་བྱུང་བ་ནི་དེ་དག་ལས་བཟློག་པའོ། །བྱང་ཆུབ་སེམས་དཔའ་ཁྱིམ་པས་ནི་དགེ་སྦྱོང་གི་སྤྱོད་པ་ལ་མཁས་པར་བྱའོ། །དགེ་སྦྱོང་གི་མི་འདུམ་པ་རྣམས་ཀྱི་སྡུམ་བྱའོ། དམ་པའི་ཆོས་འཇིག་པ་ན་སྲོག་དང་བསྡོས་ཏེ་བསྲུང་བར་བྱའོ། །དགེ་སློང་ན་བ་མཐོང་ན་རང་གི་ཤ་ཁྲག་གིས་ཀྱང་གསོ་བར་བྱའོ། །ཚུལ་ཁྲིམས་ཡོངས་སུ་དག་པ་བཞི་ནི་འཕགས་པའི་རིགས་བཞི་ལ་གནས་པ་དང༌། སྦྱངས་པའི་ཡོན་ཏན་དང་ཡོ་བྱད་བསྙུངས་པ་ལ་མངོན་པར་དགའ་བ་དང༌། ཁྱིམ་པ་དང་རབ་ཏུ་བྱུང་བ་དང་མི་འདྲེ་བ་དང༌། ཚུལ་འཆོས་པ་མེད་པར་དགོན་པར་གནས་པའོ། །བྱམས་པ་སེང་གེས་སྨྲས་པ། བཞི་ནི་དགེ་སྦྱོང་ཆོམ་རྐུན་པ་སྟེ། དགེ་སློང་གི་རྟགས་ཁ་དོག་དང་དབྱིབས་ལ་གང་གནས་ཤིང་སྡིག་པའི་ཆོས་སྤྱོད་པ་དང༌། ཚུལ་ཁྲིམས་འཆལ་པ་དད་དེབ་པར་སོང་བ་སྟེ། མི་དགེ་བ་རྣམ་པར་རོག་པ་དང་འབྲས་
བུ་མ་ཐོབ་པར་རྙེད་པ་དང་བཀུར་སྟིའི་ཕྱིར་འབྲས་བུ་ཐོབ་པར་ཁས་འཆེ་བ་དང་བདག་བསྟོད་ཅིང་གཞན་སྨོད་པའོ། །དཔེར་ན་དུག་གསོ་བའི་སྔགས་དང་སྨན་ལ་མཁས་པ་གཉིས་ཤིག་ཡོད་པ་དེ་ལས་གཅིག་གིས་མི་མང་པོ་མང་བར་བྱ་བའི་ཕྱིར་དུག་ཟོས་ནས་ལན་ཅིག་ཐབས་དེས་གསོས་སོ། །ཡང་དེ་ལྟར་བྱ་ཞེས་དུག་ཟོས་པ་ལས་བཅོས་མ་ཁོམ་པར་ཤི་བ་དང༌། ཅིག་ཤོས་ན་རེ་ཁོ་བོ་ནི་མི་དག་མི་མང་ཡང་བླའི་དུག་ཀྱང་མི་ཟ་སྨན་ཡང་མི་གཏང་ངོ་ཞེས་ཟེར་ཏེ། བདེ་བླག་ཏུ་འདུག་ནས་ཚེའི་མཐར་ཕྱིན་པ་དང་འདྲ་བར་ཕྱི་མའི་དུས་ན་རབ་ཏུ་བྱུང་བ་ཁ་ཅིག་ནི་ཉེས་པ་བྱས་པ་ལས་སྤྱོད་ཞེས་ཟེར་བ་དང༌། ཁ་ཅིག་སྔ་ནས་སྡོམ་པ་གཉིས་འབྱུང་བ་ཡང་དེ་དང་འདྲའོ། །བྱང་ཆུབ་སེམས་དཔའ་བཞི་པོ་འདི་ལ་དཔག་ཚད་བརྒྱར་འབྱོལ་བར་བྱ་སྟེ། བཞིན་རྙེད་པ་དང༌། བཀུར་སྟི་དང༌། ཚིགས་སུ་བཅད་པ་དང༌། སྡིག་པའི་གྲོགས་པོ་དང་འདུ་འཛི་ལས་འབྱོལ་བར་བྱ། གནས་གང་ན་བྱང་ཆུབ་སེམས་དཔའི་ཐེག་པ་ཞིག་གནས་ལ། དེ་ལ་ཞེ་སྡང་གི་སེམས་འགའ་ཙམ་སྐྱེ་བར་འགྱུར་བ་ལྟ་ན་ཡང་དཔག་ཚད་བརྒྱར་འབྱོལ་པར་བྱའོ། །བྱམས་པ་བྱང་ཆུབ་སེམས་དཔས་སྟོང་གསུམ་གྱི་སེམས་ཅན་ཐམས་ཅད་སྤྱོས་སམ་བརྒྱད་དམ་མཚོན་གྱིས་བཏབ་པས་ནི་བྱང་ཆུབ་སེམས་དཔའ་གཞན་ཞིག་ལ་ཞེ་སྡང་འགའ་བསྐྱེད་པ་དེ་ཉམས་པར་འགྱུར་ཏེ་གལ་ཏེ་ཞེ་སྡང་བསྐྱེད་ན་སེམས་ཇི་སྙེད་ཀྱི་བསྐལ་བར་གོ་བགོས་སོ། །དཔེར་ན་ལྕགས་ནི་ལྕགས་ཀྱིས་ཆོད་ཀྱི་བོང་བ་འམ་ཤིང་ངམ་རྩྭས་གཅོད་མི་ནུས་པ་ལྟར། བྱང་ཆུབ་སེམས་དཔའ་དགེ་བའི་རྩ་བ་ཡང་ཟླ་ལ་ཞེ་སྡང་བསྐྱེད་པ་མ་ཡིན་པ་གཞན་གྱིས་ཟད་པར་མི་འགྱུར་རོ། །དེ་བས་ན་སེམས་དང་པོ་བསྐྱེད་པ་ལ་ཡང་སྟོན་པའི་འདུ་ཤེས་བསྐྱེད་པར་བྱའོ། །གང་ཞིག་ཁྱིམ་ན་གནས་ནས་ནི། །སྟོང་གསུམ་ཐམས་ཅད་རིན་ཆེན་གྱིས། །རབ་ཏུ་བཀང་སྟེ་འཇིག་རྟེན་གྱི། །མགོན་ལ་ཡོན་དུ་འབུལ་བྱེད་ན། །མཁས་པ་གང་ཞིག་ཡིད་འབྱུང་ཞིང༌། །ཉེས་པ་ཤེས་ནས་ཁྱིམ་སྤངས་ཏེ། །སངས་རྒྱས་རྗེས་སུ་སློབ་བྱེད་ལ། །རབ་ཏུ་འབྱུང་བ་ཚོལ་བྱེད་ཅིང༌། །རབ་ཏུ་འབྱུང་བ་བཙལ་ནས་ཀྱང༌། །གཡེལ་བ་མེད་པར་འདོད་རྣམས་དང༌། །ཁྱིམ་གྱི་གནས་ལ་མི་ལྟ་བར། །
གོམ་པ་བདུན་ནི་འདོར་བྱེད་ན། །བསོད་ནམས་ཕུང་པོ་དེ་ལ་ནི། །སྔ་མས་རིན་གྱི་ཆར་མི་ཕོད། །དེ་བཞིན་གཤེགས་པ་ཏོག་སྣ་ཚོགས་ཀྱི་ཚེ་འཁོར་ལོས་སྒྱུར་བ་མུ་ཁྱུད་ཀྱིས་སྣ་དྲངས་ནས། གླིང་བཞི་པའི་མི་རིལ་རབ་ཏུ་འབྱུང་བ་དང༌། མ་རྨོས་མ་བཏབ་པའི་འབྲས་དང་དཔག་བསམ་གྱི་ཤིང་ཡང་བྱུང༌། གཡོག་ཀྱང་ལྷས་བྱས་སོ། །ཆོས་ཀྱི་དབྱིངས་ཀྱི་རང་བཞིན་དབྱེར་མེད་པ་བསྟན་པ་ལས། འཇིག་རྟེན་གྱི་ཁམས་དགའ་བ་བཀོད་པ་ན། མི་རྣམས་ཀྱི་བཟའ་བ་དང་བཏུང་བ་ཡིད་ལ་བསམས་པ་ཙམ་གྱིས་འབྱོར་པར་འགྱུར། སངས་རྒྱས་རྣམས་ནི། ཆོས་ཀྱི་དབྱིངས་ཀྱི་རང་བཞིན་དབྱེར་མེད་པ་ཉིད་ཀྱིས་ཆོས་སྟོན་པར་མཛད་ཀྱི། སྐྱེ་བ་མེད་པ་འགག་པ་མེད་པ་ནས། མྱ་ངན་ལས་འདའ་བར་བྱ་བའི་ཕྱིར་ཆོས་སྟོན་པར་ནི་མི་མཛད་དེ། བཅོམ་ལྡན་འདས་རྣམས་ནི་དེ་ལྟར་ཆོས་སྟོན་པར་མཛད་དོ། །མར་མེ་དབུལ་བ་ལས་དེ་བཞིན་གཤེགས་པ་ལ་མཆོད་པའི་བསམ་པས་མར་མེ་ཐ་ན་གློག་གི་རྒྱུན་ཙམ་མ། །ཐ་ན་ཐེམ་སྐས་གྱི་གཞི་གཅིག་ཙམ་ཡང་སྣང་བར་བྱེད་ན། དེའི་རྣམ་པར་སྨིན་པ་ཉན་ཐོས་དང་རང་སངས་རྒྱས་རྣམས་ཀྱིས་བསམ་པར་མི་ནུས་སོ། །དེ་བཞིན་གཤེགས་པའི་མཆོད་རྟེན་ལ་མར་མེ་ཕུལ་ན་འཆི་བའི་ཚེ་སྣང་བ་བཞི་འཐོབ་སྟེ། གང་ཞེ་ན་མདུན་ན་ཉི་མའི་དཀྱིལ་འཁོར་འཆར་བ་དང༌། ཟླ་བ་འཆར་བ་དང༌། ལྷའི་འཁོར་གནས་པ་དང༌། དེ་བཞིན་གཤེགས་པ་མཐོང་བའོ། །མཆོག་ཏུ་རྙེད་པར་དཀོན་པ་ནི་ལྔ་སྟེ། མིར་སྐྱེ་བ་དང་དེ་བཞིན་གཤེགས་པའི་བསྟན་པ་ལ་རབ་ཏུ་འབྱུང་བ་དང༌། དེ་ལ་མངོན་པར་དགའ་བ་དང༌། ཚུལ་ཁྲིམས་ཡོངས་སུ་རྫོགས་པ་དང༌། ཟག་པ་ཟད་པའོ། །ཕ་རོལ་ཏུ་ཕྱིན་པ་ལྔ་ལས། བྱང་ཆུབ་སེམས་དཔའ་ནམ་ཡང་འགོག་པའི་སྙོམ་པར་འཇུག་པ་ལ་མི་འཇུག་སྟེ། འཇུག་པར་དེ་བཞིན་གཤེགས་པས་ཀྱང་མ་གནང་ངོ༌། །བྱང་ཆུབ་སེམས་དཔའ་འགོག་པ་ལ་སྙོམས་པར་འཇུག་པའི་དུས་དང་སྐབས་དེ་ནི་ཕྱིར་འོང་བར་འགྱུར་ཏེ། གང་གི་ཚེ་བྱང་ཆུབ་གྱི་སྙིང་པོ་ལ་འདུན་པར་འགྱུར་བ་དེ་ནི་དེའི་དུས་དང་སྐབས་ཡིན་ནོ། །འདུ་ཤེས་དང་ཚོར་བ་ཐམས་ཅད་ལས་བཟླ་བའི་ཕྱིར་དེ་ལ་
སྙོམས་པར་ཞུགས་ཏེ། བླ་ན་མེད་པ་ཡང་དག་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རྣམ་པ་བཅུ་གཉིས་པ་སྐོར་བར་བྱེད་དོ། །མཐར་གྱིས་གནས་པའི་སྙོམས་པར་འཇུག་པ་བརྒྱད་ལ་ནི། སྙོམས་པར་ཡང་འཇུག་པ་འབྱུང་སེམས་ཅན་གང་དག་དགྲ་བཅོམ་པའི་འབྲས་བུ་མངོན་དུ་བྱ་བར་འདོད་པའི་ཕྱིར། བསྐལ་པ་གང་གཱའི་བྱེ་མ་སྙེད་དུ་སེམས་ཅན་རྣམས་སམ། ཉན་ཐོས་སམ་རང་སངས་རྒྱས་རྣམས་ལ་སྦྱིན་པ་བྱིན་ལ། སྦྱིན་པ་དེ་ལ་བྱང་ཆུབ་སེམས་དཔའ་བསམས་ཏེ། རྗེས་སུ་ཡི་རངས་ནས་དགེ་བའི་རྩ་བ་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་ཕྱིར་མི་ལྡོག་པ་དང༌། ཕྱིར་མི་ལྡོག་པ་རྣམས་མྱུར་དུ་ཐམས་ཅད་མཁྱེན་པ་ཉིད་ཐོབ་པར་བསྔོ་ན། དེ་ལ་བསོད་ནམས་སྔ་མས་དཔེ་དང་ཆར་ཡང་མི་ཕོད་དོ། །མི་ཞིག་ཆོམ་རྐུན་གྱིས་ཡ་ང་བ་ལས། ཕྱིས་དེ་འོངས་པ་ནི་བླའི་བཅོམ་སྟེ་མྱུར་དུ་འོངས་པ་ནི་དེ་ལྟ་མ་ཡིན་ནོ། །དེ་བཞིན་དུ་རིང་མོ་ཞིག་སྟེ་མངོན་པར་རྫོགས་པར་འཚང་རྒྱ་བ་ནི་བླའི། ཉན་ཐོས་ཀྱི་ས་འམ་རང་སངས་རྒྱས་ཀྱི་སར་ལྟུང་བ་ནི་དེ་ལྟ་མ་ཡིན་ནོ། །གང་པོས་གསོལ་པ། མི་ཤེས་པ་ནི་རྟེན་ཅིང་འབྲེལ་བར་འབྱུང་བ་ལགས་ཏེ། སུས་ཀྱང་མ་བསྐྱེད་ལགས་སོ། །རྒྱུ་ཚོགས་ཤིང་འདུས་པ་ལས་འབྱུང་ལ་རྒྱུ་མ་མཆིས་པར་གྱུར་པས་ནི་འགག་པར་འགྱུར་རོ། །ཆོས་རྣམས་ནི་རང་གི་དང་གིས་འགགས་པས་ན་སུས་ཀྱང་འགག་པ་མ་མཆིས་སོ། །དངོས་པོ་འདི་དག་སྒྱུ་མ་ལྟ་བུར་མི་ཤེས་པས་དེ་དག་ལས་ཤས་ཆེར་ཞེན་པར་གྱུར་ཏེ། ཡོངས་སུ་མི་གཏོང་བའི་བློར་འགྱུར། ཡོངས་སུ་མི་གཏོང་བས་སེར་སྣ་འཛིན་ཏོ། །སེར་སྣ་དེས་ཀྱང་ངན་སོང་རྣམས་སུ་སྐྱེ་བར་འགྱུར་ལ། དངོས་པོ་དེ་དང་འབྲེལ་པར་འགྱུར་རོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་བསམ་གཏན་བཞི་ལ་སྙོམས་པར་འཇུག་ཏུ་ནི་གནད་ལ་གནས་པར་ནི་མ་གནང་ངོ༌། །དེ་ཅིའི་ཕྱིར་ཞེ་ན། ལྷ་ཚེ་རིང་པོ་རྣམས་སུ་སྐྱེ་བར་དོགས་པས་ཏེ། འདོད་པར་སྐྱེས་ན་མྱུར་དུ་ཐམས་ཅད་མཁྱེན་པར་རྫོགས་པར་འགྱུར་རོ། །ཆོས་ཐམས་ཅད་ཀྱི་ཡོན་ཏན་བཀོད་པའི་རྒྱལ་པོ་ལས། བཀའ་སྩལ་པ། རྒྱལ་བ་ཅན་ཞེས་བྱ་བའི་གཟུངས་ཡོད་དེ། དེ་ནི་བྱང་ཆུབ་
སེམས་དཔར་གྱུར་པ་ན་དེ་བཞིན་གཤེགས་པ་རྒྱལ་བའི་དབྱངས་ལས་བླངས་ཏེ་ཐོབ་པའི་མོད་ལ་ཡང་ས་བཅུ་ཐོབ་པར་གྱུར་ལ། སྲོག་ཆགས་སྟོང་ཕྲག་དུ་མས་ཀྱང་ཆོས་ལ་བཟོད་པ་ཐོབ་པར་འགྱུར་ཏོ། །དེ་ནས་བྱང་ཆུབ་སེམས་དཔའ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་གཟུངས་མཐུ་ཆེན་པོ་བསྟན་པར་གསོལ། དེ་ནས་བཅོམ་ལྡན་འདས་ཀྱིས་གཟུངས་འདི་བཀའ་སྩལ་པ། ཏདྱ་ཐཱ། ཛ་ཡ་ཛ་ཡ། ཛ་ཡ་བ་ཧ། ཁ་བ་ཧ། ཧུ་ལུ་ཧུ་ལུ། པདྨ་བྷེ། ཨ་བ་མ་བ་མེ། ས་རཱ་ས་རཱ་ཎེ། དྷི་རི་དྷི་རི། དྷི་རི་དྷི་རི། དེ་བ་ཏཱ་ཨ་ནུ་པཱ་ལ་ཎ། ཡུཏྟོཏྟཱ་ར་ཎི། པ་ར་ཙ་ཀྲ་ནི་བར་ཎི། པུ་ར་ཡ་བྷ་ག་བཱ་ན། སརྦ་ཨཱ་ཤ་ན། མ་མ་སརྦ་ཀརྨ་ཀྵ་པ་ཡ། བུདྡྷ་ཨ་ཏི་ཤ་ནེ་ཎ་སྭཱཧཱ། རིགས་ཀྱི་བུ་འདི་ནི་རྒྱལ་བ་ཅན་ཞེས་བྱ་བའི་གཟུངས་ཡིན་ཏེ། སྡིག་པ་ཐམས་ཅད་ཟད་པར་བྱེད་པ་ནོར་དང་འབྲུ་རྣམ་པར་འཕེལ་བར་བྱེད་པ། ཕ་རོལ་གྱི་དམག་ཚོགས་ཟློག་པར་བྱེད་པ། མུ་གེའི་གནོད་པ་རབ་ཏུ་ཞི་བར་བྱེད་པ་ཚེ་ནུར་བར་བྱེད་པ་སྟེ། འདི་ནི་དེ་བཞིན་གཤེགས་པ་རྣམས་ཀྱི་ཡབ་ཡུམ་དང་འདྲ་བའི་ཆོས་ཀྱི་རྣམ་གྲངས་ཡིན་ནོ། །དེ་ནས་བྱང་ཆུབ་སེམས་དཔའ་ལག་ན་རྡོ་རྗེས་གཟུངས་སྔགས་གྱི་ཚིག་འདི་དག་སྨྲས་སོ། །ན་མཿསརྦ་ཏ་ཐཱ་ག་ཏཱ་ནཱཾ། ན་མོ་ཨ་མི་ཏ་བྷཱ་ཡ་ཏ་ཐཱ་ག་ཏཱ་ཡ། ན་མཿསརྦ་བོ་དྷི་སཏྭཱ་ནཱན། ན་མཿསརྦ་མ་ཧརྟེ་ཀེ་བྷྱཿ། ཏདྱ་ཐཱ། ཧུ་ཧུ་ཧེ་ཧེ། མ་ཏི་མ་ཏི། མ་ཧཱ་བཛྲ་མ་ཏི། དྲྀ་ཌྷ་པ་ར་བཛྲ་མ་ཏི། ཏ་ཐཱ་ག་ཏ། ཨ་ནུ་པ་རི་བ་ལེ་ཊི། ས་ར་ས་ར་ཨ་ཡོ་ཁི། བྷྲྀ་ཀུ་ཊི། བྷྲྀ་ཀུ་ཊི་མུ་ཁི། ཀྲི་པི་ཀྲི་པ་ལུ་ཀེ །ས་ཏྱ་པཱ་ཙ་ན། མ་ནུ་སྨ་ར་བྷ་ག་བཱན། བཛྲ་པཱ་ཎི་སརྦ་ཀརྨ། ཨཱ་པ་ར་ཎི་ཀྵ་བ་ཡ། སརྦ་ཨརྠ་མ་པ་རི་པཱུ་རཱ་ཡ། དེ་ཧི་མེ་བ་རམ། བུདྡྷ་ས་ཏྱེན། བོ་དྷི་སཏྭ་ས་ཏྱེ་ན་སྭཱ་ཧཱ། གང་ལ་ལ་བདག་མཐོང་བར་འཚལ་བ་དང༌། སྟོབས་ཀྱིས་འཁོར་ལོས་སྒྱུར་བར་འགྱུར་བ་དང༌། ཏིང་ངེ་འཛིན་ཐོབ་པ་དང༌། ཐོས་པ་འཛིན་པར་འགྱུར་བ་དང༌། ཁམས་རྣམ་པར་སྨིན་པར་འགྱུར་བ་དང༌། ལུས་མི་སྣང་བར་འགྱུར་བ་དང༌། ནམ་མཁའ་ལ་མཆི་བར་འཚལ་བ་དེས་ནི། ཟླ་བ་ཡར་གྱི་ངོ་ཚེས་བརྒྱད་ལ། ཉིན་
མཚན་དུ་སྨྱུང་བ་བགྱིས་ལ། གཟུགས་བགྱིད་དུ་སྩལ་ཏེ། རྡོ་རྗེ་འཆང་གི་གཟུགས་འོད་མ་མདའ་རྒྱུའི་མདོག་ཅན་དང༌། རྒྱན་ཐམས་ཅད་ཀྱིས་བརྒྱན་པ། ཞི་བའི་ཚུལ་ཅན་སྐུ་གདུང་དང་ལྡན་པར་བགྱིའོ། །དབུས་སུ་ནི་དེ་བཞིན་གཤེགས་པ་ཤཱཀྱ་ཐུབ་པ་བཞུགས་པར་བགྱིའོ། །གཡས་ལོགས་སུ་ནི་འཕགས་པ་སྤྱན་རས་གཟིགས་དབང་ཕྱུག་ལག་བ་བཞི་པ། རྒྱན་ཐམས་ཅད་ཀྱིས་བརྒྱན་པ། སྐུ་གདུང་དང་བཅས་པ་གཞག་གོ །གཡས་གཡོན་དག་ཏུ་ནི་རྒྱལ་པོ་ཆེན་པོ་བཞི་མཆོད་པ་བགྱིད་པ་གཞག་གོ །སྒྲུབ་པ་པོའི་རིགས་ཀྱི་བུ་དེས་ཀྱང་གཙང་སྦྲ་བགྱི་བ་དང༌། དུས་གསུམ་དུ་ཁྲུས་བགྱི་བ་དང༌། དུས་ལྔའི་བར་དུ་ཟས་སུ་ནས་ཀྱི་འོ་ཐུག་འཚལ་ཞིང༌། དུས་གསུམ་བཟླས་བརྗོད་བགྱིའོ། །བདུག་པ་ནི་ཨ་ཀ་རུ་དང༌། ཙནྡན་དང༌། བོག་དང་གུ་གུལ་དབུལ་ལོ། །ལན་སུམ་འབུམ་གྱི་བར་དུ་བཟླས་བརྗོད་བགྱིས་ཏེ། དེ་ནི་འདི་ལྟར་གཟུགས་བརྙན་བགྱི་བ་ལགས་སོ། །སྐུ་གདུང་དང་ལྡན་པའི་མཆོད་རྟེན་ནམ། དགོན་པའི་གནས་སུ་སྤོས་དང༌། བདུག་པ་དང༌། མེ་ཏོག་སྣ་ཚོགས་དང༌། བ་དན་སྣ་ཚོགས་ཀྱིས་ཀྱང་མཆོད་པར་བགྱིའོ། །དཀར་བག་གི་ལྷ་བཤོས་ཀྱང་དབུལ་བར་བགྱིའོ། །ཆོས་ཀྱི་རྣམ་པ་འདི་ཡང་ཡི་གེར་འདྲིར་སྩལ་ཞིང་གོས་དང་རྒྱན་དང་ལྷབ་ལྷུབ་དང༌། གདུགས་དང་བཞོན་པ་རྣམ་པ་སྣ་ཚོགས་ཀྱིས་མཆོད་པར་བགྱིའོ། །དེ་ནས་ཟླ་བ་ཉ་བ་ཚེས་བཅོ་ལྔའི་བར་དུ་སེམས་ཅན་ཐམས་ཅད་ལ་སྙིང་རྗེའི་སེམས་དང་ལྡན་པ་དང༌། དུས་གསུམ་དུ་ཁྲུས་བགྱི་བ་དང༌། དུས་གསུམ་དུ་གོས་བརྗེ་བར་བགྱི་སྟེ། དཀྱིལ་འཁོར་གྲུ་བཞི་པ་བ་ལང་གི་ལྕི་བས་བསྐུས་ལ་མེ་ཏོག་སྣ་ཚོགས་ཀྱིས་ཁེབས་པར་བགྱིས་ཏེ། བུམ་པ་གང་བ་བཅུ་དྲུག་དང༌། མར་མེ་བཅུ་དྲུག་ཀྱང་གཞག་པར་བགྱིའོ། །གདུགས་དང་རྒྱལ་མཚན་དང་བ་དན་སྣ་ཚོགས་ཀྱིས་ཀྱང་ས་ཕྱོགས་དེ་བརྒྱན་པར་བགྱིའོ། །རོ་སྣ་ཚོགས་སྦྱར་བའི་ལྷ་བཤོས་རྒྱ་ཆེན་པོ་ཕབ་ལ་སྦོས་ཆབ་ཀྱིས་ཕྱོགས་དེར་ཆག་ཆག་བཏབ་ནས། ནམ་སྐུ་གཟུགས་དང་ས་གཞི་འགུལ་བ་དང༌། བདག་ཉིད་ཀྱང་དགའ་
བར་གྱུར་པའི་བར་དུ་བཟླས་བརྗོད་བགྱིའོ། །དེ་ནས་ངེས་འདི་ནི་གཅིག་ཏུ་ངེས་པར་འགྲུབ་པར་འགྱུར་རོ་སྙམ་དུ་ཤེས་པར་བགྱིའོ། །དེ་ནས་དེའི་འོག་ཏུ་བདག་གི་རྨི་ལམ་དུ་བསྟན་པར་བགྱི་ཞིང་འབེལ་བའི་གཏམ་བགྱིའོ། །བསམ་པ་ཐམས་ཅད་ཀྱང་རྫོགས་པར་བགྱིའོ། །བུ་གཅིག་པ་བཞིན་དུ་ཡོངས་སུ་བསྐྱང་བར་བགྱིའོ། །དམ་པ་ཅི་འཚལ་བ་ཡང་སྩལ་བར་བགྱི་སྟེ། ཆོས་ཀྱི་རྣམ་གྲངས་འདི་ལ་མ་དད་ཅིང་སྤང་བར་བགྱིད་པ་ནི་མ་གཏོགས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་སྤྱན་རས་གཟིགས་དབང་ཕྱུག་སྤྱན་རས་གཟིགས་དབང་ཕྱུག་ཅེས་བགྱི་བ། ཅིའི་སླད་དུ་དེ་སྐད་ཅེས་བགྱི་ལགས། བཀའ་སྩལ་པ། གང་གི་ཕྱིར་འདི་ལྟར་འཇིག་རྟེན་ཐམས་ཅད་ལྟ་བར་བྱེད། རྟོག་པར་བྱེད། ཚིམ་པར་བྱེད། ཡོངས་སུ་སྐྱོད་པར་བྱེད། ཡང་དག་པར་དབུགས་འབྱིན་པར་བྱེད་ཅིང༌། སྙིང་རྗེའི་སེམས་དང༌། བདེ་བའི་སེམས་དང༌། བྱམས་པའི་སེམས་དང༌། སྙིང་བརྩེ་བའི་སེམས་དང་ལྡན་ལ། བསམ་པ་ཐམས་ཅད་ཡོངས་སུ་རྫོགས་པར་བྱེད་པས་ན། དེའི་ཕྱིར་སྤྱན་རས་གཟིགས་དབང་ཕྱུག་ཅེས་བྱའོ། །ནམ་མཁའ་མཛོད་ལས། བྱང་ཆུབ་སེམས་དཔའ་བསོད་ནམས་ཀྱིས་བརྒྱན་པས་གསོལ་པ། བཅོམ་ལྡན་འདས་རིགས་ཀྱི་བུ་འམ་རིགས་ཀྱི་བུ་མོ་གང་འདི་ལྟ་བུའི་མདོ་སྡེ་ཟབ་མོ་དེ་བཞིན་གཤེགས་པས་གསུངས་པ་ངེས་པའི་དོན་བལྟ་དཀའ་བ། སངས་རྒྱས་ཐམས་ཅད་ཀྱིས་བསྟན་ཅིང་བསྔགས་པ་འདི་ཀུན་ཆུབ་པ་དང་གཞན་དག་ལ་ཡང་རྒྱ་ཆེར་སྟོན་པ་དེ་དག་བསོད་ནམས་ཅི་ཙམ་ཞིག་སྐྱེད་པར་འགྱུར། དེ་ནས་སངས་རྒྱས་ཀྱིས། བསོད་ནམས་དཔག་ཏུ་མེད་པར་གསུངས། །རྣམ་པར་རིག་པའི་མཚན་ཉིད་པས། །ཆོས་ཐམས་ཅད་ནི་དངོས་པོ་མེད་པའོ། །རྒྱལ་བ་ཆོས་ཀྱི་སྐུས་ནི་རབ་ཕྱེད་སྐུ་མཉམ་ཡང༌། །གཟུགས་མཛེས་ལྡན་ཞིང་གཟུགས་བཟང་སྐུ་ཡང་སྟོན་པར་མཛད། །སེམས་ཅན་རྣམས་ལ་ཕན་པའི་ཐུགས་རྗེ་རབ་བསྐྱེད་ནས། །བསོད་ནམས་བརྒྱ་ཡི་མཚན་གྱི་སྐུ་ཡི་མཆོག་ཀྱང་སྟོན། །ཆོས་འདི་ཐམས་ཅད་རྒྱུ་དང་རྐྱེན་ལས་སྐྱེས་པ་སྟེ། །
བྱེད་མེད་ངོ་བོ་ཉིད་མེད་ཀུན་དུ་རྟོག་ལས་སྐྱེས། །བདེ་བར་གཤེགས་པ་དེ་འདྲའི་ཆོས་ཀྱི་ཚུལ་རྣམས་མཁྱེན་ནས་སུ། །བྱང་ཆུབ་མི་འགྱུར་ཞི་བ་བླ་ན་མེད་པ་བརྙེས། །དེ་ལ་རིགས་ཀྱི་བུ་ཇི་ལྟར་ན་བྱང་ཆུབ་སེམས་དཔའ་རྟེན་ཅིང་འབྲེལ་པར་འབྱུང་བའི་ཡེ་ཤེས་ལ་མཁས་ཤིང༌། མཐར་ལྟ་བ་ཐམས་ཅད་དང་བྲལ་བ་ཡིན་ཞེ་ན། རིགས་ཀྱི་བུ་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་རྟེན་ཅིང་འབྲེལ་པར་འབྱུང་བ་དེ་ཅི་ཡང་མ་ཡིན་ཏེ། གང་རྐྱེན་ལ་བརྟེན་པ་དེ་དངོས་པོ་མེད་པའོ། །གང་རྐྱེན་ལ་བརྟེན་པ་དེ་ཡོངས་སུ་མ་གྲུབ་པའོ། །གང་རྐྱེན་ལ་བརྟེན་པ་དེ། བདག་མེད། སེམས་ཅན་མེད། སྲོག་མེད། གསོ་བ་མེད། སྐྱེས་བུ་མེད། གང་ཟག་མེད། ཤེད་ལས་སྐྱེས་པ་མེད། ཤེད་བུ་མེད་དོ། །གང་རྐྱེན་ལ་བརྟེན་པ་དེ་ལ་ཡང་དག་པར་ན་གང་ཡང་སྐྱེས་པ་མེད་དོ། །ཆོས་གང་རྐྱེན་ལ་བརྟེན་པ་དེ་ལ་སྤྲོས་པ་མེད་པ་སྟེ། དེའི་ཕྱིར་སྤྲོས་པ་མེད་པ་མ་སྤྲོས་པ་ནི། སྐྱེ་བ་ནི་ཡང་ཆོས་ཉིད་སྐྱེ། འགག་པ་ནི་ཡང་ཆོས་ཉིད་འགག །ཅེས་བྱ་སྟེ། དེ་ལ་བདག་གམ། སེམས་ཅན་ནམ། ཤེད་བུའི་བར་གང་ཡང་མེད་དོ། །ཆོས་གང་རྐྱེན་ལས་བྱུང་བ་དེ་དག་ལ་བདག་པོ་མེད་པའི་ཕྱིར་སྐྱེ་བ་གང་ཡང་མེད་དེ། དེའི་ཕྱིར་ཆོས་ཐམས་ཅད་ནི་རྩྭ་དང་ཤིང་དང་རྩིག་པ་དང༌། རྨི་ལམ་དང་མིག་ཡོར་ལྟ་བུ་ཞེས་བྱའོ། །ཇི་ལྟར་ཕྱི་རོལ་གྱི་དངོས་པོ་རྣམས་སྐྱེ་བ་ལ་ཡང་བསྐྱེད་པ་མེད། འགག་པ་ལ་ཡང་འགོག་པར་བྱེད་པ་མེད་པ་དེ་བཞིན་དུ། རྐྱེན་རྣམས་ཡོད་ན་སྐྱེ་བ་དང༌། མ་ཚང་ན་འགག་པར་འགྱུར་བ་མ་གཏོགས་པར་ནང་གི་ཆོས་རྣམས་ཀྱང་སྐྱེ་བ་ལ་བསྐྱེད་པ་མེད། འགག་པ་ལ་འགོག་པར་བྱེད་པ་མེད་དེ། །དེ་ལྟར་ཡེ་ཤེས་ལ་རབ་ཏུ་སྦྱོར་བ་ནི་མཐར་ལྟ་བ་ཐམས་ཅད་རབ་ཏུ་སྤོང་ངོ༌། །དེ་ལ་མཐར་ལྟ་བ་གང་ཞེ་ན། མཐའ་ཞེས་བྱ་བ་ནི་རྟག་པ་དང་ཆད་པ་སྟེ། གང་དེ་ལ་སྐྱེ་བར་ཡང་མི་བྱེད། འཇིག་པར་ཡང་མི་བྱེད་དོ། །གང་སྐྱེ་བ་མེད་ཅིང་འཇིག་པ་མེད་པ་དེ་ནི། རྟག་པ་དང་ཆད་པ་མེད་པའོ། །དེ་བས་ན་དག་པ་སྟེ། མཐར་ལྟ་བ་ཐམས་ཅད་རྣམ་པར་དག་པ་ཡིན་ནོ། །དེ་ལྟར་ན་རྟེན་ཅིང་འབྲེལ་པར་
འབྱུང་བ་དང༌། འཇུག་པའི་ཡེ་ཤེས་ལ་མཁས་ཤིང༌། མཐར་ལྟ་བ་ཐམས་ཅད་དང་འབྲེལ་པ་ཡིན་ནོ། །ཐེག་པ་ཆུང་ངུ་འདོད་པ་ནི་བདུད་ཀྱི་ལས་སོ། །བྱང་ཆུབ་མཆོག་གི་སེམས་ནི་བསྐྱེད་པར་བགྱི། །སེམ་ཅན་ཐམས་ཅད་བདག་གིས་རབ་ཏུ་གཉེར། །བྱང་ཆུབ་སྤྱོད་མཆོག་ཡིན་པར་སྤྱོད་པར་བགྱི། །འགྲོ་བ་བླ་མེད་སངས་རྒྱས་འགྱུར་བར་བགྱི། །དཔེར་ན་ནམ་མཁའ་ལ་གཉེན་པོ་མེད་པ་དེ་བཞིན་དུ། ཆོས་ཐམས་ཅད་ལ་ཡང་གཉེན་པོ་མེད་དོ། །གང་དག་གཉེན་པོས་མྱ་ངན་ལས་འདས་པ་ཚོལ་བ་དེ་དག་ནི། སྐྱེ་བ་དང་འཇིག་པར་ལྟ་བ་ཡིན་ཏེ། ཆོས་འདི་དག་ནི་བསྐྱེད་པར་བྱ་ཞེས་སྐྱེ་བ་དང་འཇིག་པ་ལ་སྤྱོད་པས། དེ་དག་མྱ་ངན་ལས་འདས་པའི་མཉམ་པ་ཉིད་མི་ཤེས་སོ། །དེ་བས་ན་བཅོམ་ལྡན་འདས་ཀྱིས་ཀྱང་འདི་སྐད་ཅེས་ཤེས་པར་གྱིས་ཤིག །མ་རྩོད་ཅིག །རྩོད་པ་མེད་པ་ནི་དགེ་སྦྱོད་གི་ཡོན་ཏན་གྱི་མཆོག་རྣམས་ཡོངས་སུ་རྫོགས་པར་གྱིས་ཤིག་ཅེས་གསུངས་སོ། །དམིགས་པ་དག་ལ་རབ་གནས་པ། །བདུད་ཀྱི་ཕོ་ཉ་བདུད་ཀྱི་ཕྱོགས། །དམ་པའི་ཆོས་ལ་སྐུར་འདེབས་པའི། །དགེ་སློང་དག་ནི་འབྱུང་བར་འགྱུར། །དང་ཚུལ་ངན་པ་སྡིག་ཆོས་ཅན། །ཁྱིམ་པ་དང་ནི་རྟེན་ཅིང་གནས། །བཀུར་སྟི་དག་དང་རྙེད་ལ་བརྐམ། །ཚུལ་འདི་ཚོལ་བར་མི་བྱེད་དོ། །འཇིག་རྟེན་རྒྱང་པན་རྣམས་དང་འདྲེ། །བདག་ལ་རབ་ཏུ་སྟོད་བྱེད་ཅིང༌། །རབ་ཏུ་ངེས་པ་རྣམས་ལ་སྨོད། །མི་མཁས་ང་རྒྱལ་ཅན་དག་འབྱུང༌། །དགོན་པའི་གནས་རི་སྤངས་ནས་སུ། །རྟག་ཏུ་འདུ་འཛི་རྣམས་ལ་དགའ། །འཇིག་རྟེན་པ་ཡི་གསང་ཚིག་བརྩོན། །འཇིག་ཚོགས་ལ་ནི་རབ་ཏུ་གནས། །མི་མཁས་དེ་དག་དགེ་འདུན་ལ། །ཞལ་ཏ་བྱེད་ལ་རབ་ཏུ་བརྩོན། །མདོ་སྡེ་རྣམས་ཀྱང་ཕན་ཚུན་དུ། །མཐུན་པར་དཔྱོད་པར་མི་བྱེད་དེ། །རང་རང་གིས་ནི་སྨྲ་རྣམས་ལ། །དེ་དག་རྟག་ཏུ་མོས་པར་བྱེད། །དམིགས་པ་ཡིས་ནི་རབ་ཏུ་འགྱིང༌། །ལྟ་བ་ཐ་དད་ཀུན་དུ་གནས། །སྟོང་པ་ཉིད་ཀྱི་ཆོས་ཐོས་ནས། །དེ་དག་གཡང་ས་བཞིན་དུ་སེམས། །འདི་འདྲ་བ་ཡི་དུས་འདི་ན། །དོན་བཅས་ཡི་གེ་ལྡན་པ་ཡིན། །ལེགས་པར་གསུངས་པའི་ཆོས་རྣམས་ནི། །རབ་ཏུ་རྣམ་པར་འཇིག་པར་འགྱུར། །ཆོས་རྣམས་ལ་
ནི་གནས་པ་ལས། །དེད་ལ་འདྲ་བའི་ཆོས་རྣམས་ནི། །ཇི་ལྟ་བུར་ན་ཡོད་མེད་ཅེས། །གཤེད་མ་དག་ཀྱང་འགྱེད་པར་འགྱུར། བདག་ཅག་མིང་གི་དགེ་སྦྱོང་སྟེ། །དགེ་སྦྱོང་ཡོན་ཏན་མེད་དོ་ཞེས། །ཡང་དག་བསྐུལ་བ་ཐོབ་པ་དང༌། །མདོ་སྡེ་འདི་ལ་སྨོན་པར་འགྱུར། །རྣ་བ་དང་ནི་སྣ་ཆད་རྣམས། །མེ་ལོང་བལྟས་ཀྱང་མི་སྡུག་ཅེས། །ཡང་དག་བསྐུལ་བ་ཐོས་པ་དང༌། །དེ་དག་དམ་ཆོས་སྨོན་པར་འགྱུར། །དགེ་སྦྱོང་གང་དག་དམ་པའི་ཆོས། །རབ་ཏུ་འཛིན་པ་འབྱུང་འགྱུར་ཏེ། །དེ་དག་གཞན་དུ་ཚུལ་འཆོས་ཀྱང༌། །གང་ཡང་ཆོས་འདི་མི་ཉན་ཏོ། །རྒྱལ་པོ་རྣམས་ཀྱང་སླུ་བར་བགྱི། །སྐྱེ་བོ་ཕལ་ཆེན་འབྱེད་འགྱུར་ཡང༌། །སངས་རྒྱས་ཀྱི་ནི་བྱིན་རླབས་ཀྱིས། །སེམས་ཅན་དེ་དག་ཆོས་ཉན་འགྱུར། །དུས་དེ་ཚེ་ན་བདག་ཅག་རྣམས། །སེམས་ཅན་རྣམས་ལ་ཕན་སླད་དུ། །ལུས་དང་སྲོག་ཀྱང་རབ་བཏང་སྟེ། །དམ་པའི་ཆོས་ནི་གཟུང་བར་བགྱི། །བྱང་ཆུབ་སེམས་དཔའི་ལས་ནི་བཞི་སྟེ། བདུད་དང་ཉོན་མོངས་པ་ཐམས་ཅད་ཚར་གཅོད་པ་དང༌། ཕ་རོལ་རྒོལ་བ་ཐམས་ཅད་ཆོས་དང་མཐུན་པར་ཟིལ་གྱིས་མནན་པ་དང༌། སེམས་ཅན་ཡོངས་སུ་སྨིན་པར་བྱ་བ་དང༌། དམ་པའི་ཆོས་ཡོངས་སུ་བཟུང་བའོ། །ལས་བཞི་པོ་དེ་དག་ཀྱང་ལས་གཅིག་གིས་ཡོངས་སུ་བསྡུས་ཏེ། གང་གིས་ཤེ་ན། འདི་ལྟ་སྟེ། དམ་པའི་ཆོས་ཡོངས་སུ་འཛིན་པའོ། །བྱང་ཆུབ་སེམས་དཔའ་ནམ་མཁའ་མཛོད་ཀྱི་བྱིན་གྱི་རླབས་ཀྱིས་ནམ་མཁའ་ལས་ཆོས་ཟབ་མོ་སྟོན་པའི་ཚིགས་སུ་བཅད་པ་མང་པོ་ཞིག་གྲག་པ་དང༌། བྱང་ཆུབ་སེམས་དཔའ་ངོ་མཚར་དང་ལྡན་པས་ནམ་མཁའ་མཛོད་ལ་སྨྲས་པ། སྒྲ་འདི་དག་ག་ལས་བྱུང་སྙམ་བདག་ངོ་མཚར་དུ་གྱུར་ཏོ། །ནམ་མཁའ་མཛོད་ཀྱིས་སྨྲས་པ། རིགས་ཀྱི་བུ་ཇི་སྙམ་དུ་སེམས། བྲག་ཅའི་སྒྲ་ག་ལས་བྱུང༌། སྨྲས་པ། ཕ་རོལ་གྱི་སྒྲ་གོ་བར་བྱེད་པ་ལས་བྱུང་ངོ༌། །སྨྲས་པ། བྲག་ཅ་ལས་ལུས་སམ་སེམས་སམ། གཟུགས་སམ་ཁ་དོག་དང༌། དབྱིབས་གང་ཡང་ཡོད་དམ། སྨྲས་པ། མེད་པ་དེ་བཞིན་ཏེ། བྲག་ཅ་མ་གྲུབ་ཀྱང་གོ་བར་བྱེད་པ་དེ་བཞིན་དུ་ནམ་མཁའ་
མ་གྲུབ་སྟེ། སྒྲ་དང་སྐད་གོ་བར་བྱེད་པར་འགྱུར་རོ། །སྨྲས་པ། སྒྲ་འདི་གོ་བར་བྱེད་པ་སུ། གང་ནས་དབྱངས་འདི་བྱུང༌། སྨྲས་པ། ཡེ་ཤེས་ཀྱི་གོ་བར་བྱེད་པ་བསམ་གྱིས་མི་ཁྱབ་སྟེ། ངས་ཡིད་ཀྱི་སེམས་པས་བསམས་ན། བདེ་བར་སྣང་བ་འདི་ལས་བྱུང་ཡང་སེམས་དེར་འགྲོ་བ་ཡང་མེད། དེ་འདི་ལྟར་འོང་བ་ཡང་མེད་མོད་ཀྱི། སྒྲའི་སྒྲ་བརྙན་ཡང་འབྱུང་ངོ༌། །རིགས་ཀྱི་བུ་རྟེན་ཅིང་འབྲེལ་པར་འབྱུང་བ་ཇི་ཙམ་དུ་ཟབ་པ་ལྟོས། གང་རྒྱུ་ལས་འབྲས་བུ་འབྱུང་ཡང༌། རྒྱུ་འབྲས་བུ་གྲུ་པར་མི་འཕོ་ལ། རྒྱུ་མེད་པ་ལས་ཀྱང་འབྲས་བུ་འབྱུང་བ་མ་ཡིན་ནོ། །འདི་ལྟ་སྟེ། རྒྱུ་རྐྱེན་ལས་འབྲས་བུ་འགྲུབ་པའི་ཆོས་འདི་གཉིས་ཀ་ཡང་གཡོ་བ་མེད་ཅིང་བྱེད་པ་མེད་དོ། །གང་དེ་ལྟ་བུའི་འདུ་བ་ཤེས་པ་དེ་དག་ནི་འབྲལ་བ་སྟེ། ཅིའི་ཕྱིར་ཞེ་ན། བཅོམ་ལྡན་འདས་ཀྱིས་ཀྱང་གང་ཀུན་ནས་ཉོན་མོངས་པ་ཤེས་པ་དེ་ཉིད་དེའི་རྣམ་པར་བྱང་བ་ཞེས་གསུངས་སོ། །གཙུག་ན་རིན་པོ་ཆེས་ཞུས་པ་ལས། བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་བརྒྱད་དེ་གང་ཞེ་ན། ཟང་ཟིང་མེད་པའི་སེམས་ཀྱིས་ཚུལ་མི་འཆོས་པ་དང༌། ཡོངས་སུ་འཛིན་པ་ཐམས་ཅད་འདོར་བས་ཁ་གསག་མེད་པ་དང༌། རང་བཞིན་གྱིས་ཆོག་ཤེས་པས་གཞོགས་སློང་མི་བྱེད་པ་དང༌། སྦྱངས་པའི་ཡོན་ཏན་དང་ཡོ་བྱད་བསྙུངས་པས་འཕགས་པའི་རིགས་ཡང་དག་པར་འཛིན་པ་ཡོངས་སུ་རྫོགས་པ་དང༌། དགོན་པ་ལ་གནས་པ་རྗེས་སུ་མི་གཏོང་བས་ལུས་ལ་མི་ལྟ་བ་དང༌། དམ་པའི་ཆོས་ཡོངས་སུ་འཛིན་པས་སྲོག་ལ་མི་ལྟ་བ་དང༌། འདུ་འཛི་སྤོང་བས་གཅིག་པུར་དགའ་བ་དང༌། ཁམས་གསུམ་ཐམས་ཅད་ཀྱིས་འཇིགས་པས་ཆོས་ཀྱི་དཔའ་བ་མོས་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ནི། ཕ་རོལ་ཏུ་འགྲོ་བར་གསུངས་ཏེ། དེའི་ཕྱིར་ཕ་རོལ་ཏུ་ཕྱིན་པ་ཞེས་བྱའོ། །མཚན་མ་ཐམས་ཅད་དང༌། དམིགས་པ་ཐམས་ཅད་དང༌། སེམས་ཅན་གྱི་སེམས་ཀྱི་སྤྱོད་པ་ཐམས་ཅད་ཀྱི་ཕ་རོལ་ཏུ་སོང་བས་དེའི་ཕྱིར་ཕ་རོལ་ཏུ་ཕྱིན་པ་ཞེས་བྱའོ། །དེའི་ཤེ་སྲབ་ཡོངས་སུ་དག་པ་གཉིས་ཏེ། གང་ཞེ་ན། ཆགས་པ་མེད་
པའི་མཚན་ཉིད་ཡོངས་སུ་དག་པ་དང༌། ཐོགས་པ་མེད་པའི་མཚན་ཉིད་ཡོངས་སུ་དག་པའོ། །བཀའ་སྩལ་པ། རིགས་ཀྱི་བུ་མངོན་པར་ཤེས་པ་རྣམས་ཞེས་བྱ་བ་ནི། ཟག་པ་མེད་པའི་ཡེ་ཤེས་ཀྱི་ཚིག་བླ་དགས་སོ། །བྱང་ཆུབ་སེམས་དཔའ་ནི་མངོན་པར་ཤེས་པ་ལྔ་པོ་འདི་དག་གིས། རྣམ་པར་རོལ་ཅིང་ཟག་པ་མེད་པའི་ཡེ་ཤེས་ལ་ཡང་རབ་ཏུ་གནས་སོ། །བྱང་ཆུབ་སེམས་དཔའི་ཆོས་བཞི་དང་ལྡན་ན། སེམས་ཅན་ཡོངས་སུ་སྨིན་པར་བྱེད་ནུས་ཏེ། བཞི་ནི་མི་སྐྱོ་བ་དང༌། བདག་བདེ་བ་ལ་མི་ཆགས་པ་དང༌། དུས་དང་དུས་མ་ཡིན་པར་བསྐུལ་བ་དང༌། བསམ་པ་ཡོངས་སུ་ཤེས་པའོ། །ཡང་བཞི་སྟེ། བཀའ་བློ་བདེ་བ་དང༌། སྙན་པར་སྨྲ་བ་དང༌། ངང་ཚུལ་མཉེན་པ་དང༌། བཞིན་འཛུམ་ཞིང་ཁྲོ་གཉེར་མེད་པའོ། །བྱང་ཆུབ་སེམས་དཔའ་ལུས་དྲན་པ་ཉེ་བར་གཞག་པ་བཞི་ནི། རྣམ་པ་གཉིས་དང་ལྡན་པའི་དྲན་པ་ཉེ་བར་གཞག་པའོ། །གཉིས་ནི་མི་སྡུག་པ་དང༌། སྡུག་པར་སོ་སོར་རྟོག་པའོ། །དེ་ལ་མི་སྡུག་པ་ནི་ཀྱེ་མ་ལུས་འདི་མི་གཙང་བས་གང་བ། ཡུན་ཐུང་བ། བྱིས་པ་འདྲིད་པའོ་སྙམ་མོ། །སྡུག་པ་ནི་ལུས་འདིས་དེ་བཞིན་གཤེགས་པའི་སྐུ། ཆོས་ཀྱི་སྐུ། བསོད་ནམས་ཀྱི་སྐུ། ཡེ་ཤེས་ཀྱི་སྐུ། རྡོ་རྗེའི་སྐུ། མི་ཤིགས་པའི་སྐུ། ཟག་པ་མེད་པའི་སྐུ་གཟུགས་མཐོང་ན། སེམས་ཅན་ཐམས་ཅད་ཚིམ་པར་འགྱུར་བ་ཐོབ་པར་བྱའོ་སྙམ་མོ། །ཡང་རྣམ་པ་གཉིས་ཏེ། མི་རྟག་པ་དང༌། རྟག་པའི་རྣམ་པར་རོ། །དེ་ལ་མི་རྟག་པའི་རྣམ་པར་ནི། ཀྱེ་མ་ལུས་འདི་མི་རྟག་པ། འཇིག་པའི་ཆོས་ཅན་ཡིན་པས། ལུས་ཀྱི་ཕྱིར་ཡ་ང་བས་མི་འཚེའོ། །རྟག་པ་ནི་ལུས་ཀྱི་རྗེས་སུ་ལྟ་ཞིང་གནས་པའི་དགེ་བའི་རྩ་བ་ཐམས་ཅད། དཀོན་མཆོག་གསུམ་གྱི་གདུད་མི་འཆད་པ་དང༌། སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར། བླ་ན་མེད་པའི་བྱང་ཆུབ་ཏུ་ཡོངས་སུ་བསྔོ་བའོ། །དྲན་པ་ཉེ་བར་གཞག་པ་བཞི་ལ་གནས་པས། ཕྱིན་ཅི་ལོག་བཞི་སྤོང་སྟེ། ལུས་ཀྱི་གཙང་པ་སྤོང༌། ཚོར་བས་བདེ་བ། སེམས་ཀྱིས་རྟག་པ། ཆོས་ཀྱིས་བདག་ཏུ་ཕྱིན་ཅི་ལོག་པ་སྤོང་བའོ། །
གསེར་འོད་དམ་པ་ལས། སྐུ་ལ་རུས་པ་ཁྲག་མེད་ན། །རིང་བསྲེལ་ཡོད་པར་ག་ལ་འགྱུར། །སེམས་ཅན་རྣམས་ལ་ཕན་པའི་ཕྱིར། །ཐབས་ཀྱི་རིང་བསྲེལ་གཞག་པ་མཛད། །སྐབས་གཞན་དག་ཏུ་མྱ་ངན་ལས་འདས་པ་དང༌། རིང་བསྲེལ་འཇིག་རྟེན་དུ་བཞག་པ་ཞེས་བྱ་བ་ནི། དེ་བཞིན་གཤེགས་པའི་ཐབས་མཁས་པ་སྟེ། སེམས་ཅན་རྣམས་ཀྱིས་མཆོད་པ་དང༌། རིམ་གྲོ་བྱེད་པ་དེ་དག་ཀྱང་དེ་བཞིན་གཤེགས་པའི་ཐུགས་རྗེ་དང་དགེ་བའི་རྩ་བའི་མཐུ་ཡིན་པར་བལྟ་བར་བྱའོ། །དེ་ལ་གང་ཞིག་མཆོད་པ་དང་རིམ་གྲོ་བྱེད་པ་དེ་ནི་མ་འོངས་པའི་དུས་ན། མི་ཁོམ་པ་བརྒྱད་ཡོངས་སུ་སྤངས་ཏེ། དེ་བཞིན་གཤེགས་པ་རྣམས་དང་ཕྲད་ཅིང་དགེ་བའི་བཤེས་གཉེན་དང་ལྡན་པ་དང༌། བྱང་ཆུབ་ཀྱི་སེམས་མི་སྟོར་བ་དང༌། བསོད་ནམས་དཔག་ཏུ་མེད་པ་འཕེལ་བ་དང༌། འཁོར་བ་ལས་མྱུར་དུ་འདའ་ཞིང་འཁོར་བའི་འཆིང་བས་གླགས་པར་མི་འགྱུར་བའི་སྤྱོད་པ་དམ་པ་འདི་ཡིན་པས་ཁྱེད་ཀྱིས་ནན་ཏན་དུ་སྒྲུབ་ཅིང་གཡེལ་བ་མེད་པར་བྱའོ། །དེ་ཁོ་ན་ཉིད་དང༌། ཡང་དག་པའི་ཡེ་ཤེས་ཉིད་ཙམ་དུ་གནས་པ་དེ་ནི། ཆོས་ཀྱི་སྐུ་ཞེས་བྱའོ། །སྐུ་སྔ་མ་གཉིས་ནི་བཏགས་པ་ཙམ་མོ། །ཆོས་ཀྱི་སྐུ་ནི་ཡང་དག་པ་སྟེ། སྐུ་དེ་ཉིད་ཀྱི་གཞི་བྱེད་དོ། །ཅིའི་ཕྱིར་ཞེ་ན། ཆོས་ཀྱི་དེ་བཞིན་ཉིད་དང༌། རྣམ་པར་རྟོག་པའི་ཡེ་ཤེས་ལས་གུད་ན། སངས་རྒྱས་ཀྱི་ཆོས་གང་ཡང་མེད་པའི་ཕྱིར་རོ། །རིགས་ཀྱི་བུ་དཔེར་ན་རྣམ་པར་རྟོག་པའི་སེམས་ལ་བརྟེན་ནས། ཉོན་མོངས་པ་དང་ལས་དང་འབྲས་བུ་རྣམ་པ་མང་པོ་སྟོན་པ་བཞིན་དུ། ཆོས་ཀྱི་ཆོས་ཉིད་དང༌། དེ་བཞིན་ཉིད་ཀྱི་ཡེ་ཤེས་ལ་བརྟེན་ནས། ཐེག་པ་གསུམ་གྱི་ཆོས་རྣམས་སྣ་ཚོགས་སྟོན་ཏོ། །དཔེར་ན་ཉི་མ་དང་ཟླ་བ་ལ་ཡང་རྟོག་པ་མེད། ཆུ་དང་མེ་ལོང་ལ་ཡང་རྟོག་པ་མེད། སྣང་བ་ལ་ཡང་རྟོག་པ་མེད་མོད་ཀྱི། གསུམ་འདུས་པ་ལས་གཟུགས་བརྙན་འབྱུང་ངོ༌། །དེ་བཞིན་དུ་དེ་བཞིན་ཉིད་དང༌། དེ་བཞིན་ཉིད་ཀྱི་ཡེ་ཤེས་ལ་ཡང་རྣམ་པར་རྟོག་པ་མེད་མོད་ཀྱི། སྨོན་ལམ་
གྱི་དབང་གིས་སེམས་ཅན་སྐལ་བ་ཅན་དག་ལ་ལོངས་སྤྱོད་རྫོགས་པ་དང༌། སྤྲུལ་པའི་སྐུ་ཡང་ཉི་ཟླའི་གཟུགས་བརྙན་བཞིན་དུ་རྒྱུ་དང་རྐྱེན་འདུས་པ་ལས་བྱུང་ངོ༌། །རིགས་ཀྱི་བུ་གཞན་ཡང་དཔེར་ན་ཚད་མེད་གྲངས་མེད་པའི་ཆུ་དང་མེ་ལོང་དག་ནི་སྣང་བ་ལ་བརྟེན་ནས་སྟོང་པའི་གཟུགས་བརྙན་མཚན་ཉིད་ཐ་དད་པ་དག་སྣང་ངོ༌། །སྟོང་པ་ཞེས་བྱ་བ་ནི་མཚན་ཉིད་མེད་པའོ། །དེ་བཞིན་དུ་ལོངས་སྤྱོད་རྫོགས་པ་དང་སྤྲུལ་པའི་སྐུས་ནི་འཁོར་རྣམས་ལ་ཆོས་ཀྱི་སྐུའི་གཟུགས་བརྙན་སྟོན་པར་སྨོན་ལམ་གྱི་དབང་གིས་སྐུ་དེ་གཉིས་སྣང་སྟེ། མཚན་མ་སྣ་ཚོགས་སུ་སྣང་ཡང་ཆོས་ཀྱི་སྐུའི་གནས་པ་ནི་མཚན་ཉིད་ཐ་དད་པ་མེད་དོ། །རིགས་ཀྱི་བུ་སྐུ་དེ་ཉིད་ལ་གནས་ཏེ། སངས་རྒྱས་བཅོམ་ལྡན་འདས་རྣམས་ཕུང་པོའི་ལྷག་མ་དང་བཅས་པའི་མྱ་ངན་ལས་འདས་པ་ཞེས་གསུངས་སོ། །ཆོས་ཀྱི་སྐུ་ལ་གནས་ཏེ། ཕུང་པོ་ལྷག་མ་མེད་པའི་མྱ་ངན་ལས་འདས་པ་ཞེས་གསུངས་སོ། །སྐུ་འདི་གསུམ་ལ་བརྟེན་ནས། སངས་རྒྱས་རྣམས་མི་གནས་པའི་མྱ་ངན་ལས་འདས་པ་ཞེས་བཤད་དོ། །རིགས་ཀྱི་བུ་སངས་རྒྱས་ཀྱི་སྤྲུལ་པའི་སྐུ་ནི་སོ་སོའི་སྐྱེ་བོའི་ཡིད་དང་མཐུན་པར་རྣམ་པ་མང་པོས་མཚན་མ་སྣ་ཚོགས་སྟོན་པའི་ཕྱིར་མང་པོ་ཞེས་བྱའོ། །ལོངས་སྤྱོད་རྫོགས་པའི་སྐུ་ནི་འཁོར་རྣམས་ཀྱི་བསམ་པ་གཅིག་པས་མཚན་ཉིད་གཅིག་པའི་ཕྱིར་གཅིག་ཅེས་བྱའོ། །ཆོས་ཀྱི་སྐུ་ནི་མཚན་མ་སྣ་ཚོགས་ལས་ཡང་དག་པར་འདས་པ་མཚན་མར་གཟུང་བའི་སྤྱོད་ཡུལ་མ་ཡིན་པ་སྟེ། དེ་བས་ན་གཅིག་པ་ཡང་མ་ཡིན། ཐ་དད་པ་ཡང་མ་ཡིན་པ་ཞེས་བྱའོ། །རིགས་ཀྱི་བུ་སྤྲུལ་པའི་སྐུ་ནི་ལོངས་སྤྱོད་རྫོགས་པའི་སྐུ་ལ་བརྟེན་ཏེ་སྣང་ངོ༌། །ལོངས་སྤྱོད་རྫོགས་པའི་སྐུ་ནི་ཆོས་ཀྱི་སྐུ་ལ་བརྟེན་ཏེ་སྣང་ངོ༌། །ཆོས་ཀྱི་སྐུ་ཡང་དག་པ་སྟེ་ཅི་ལ་ཡང་མི་གནས་སོ། །རིགས་ཀྱི་བུ་སྐུ་དེ་གསུམ་ནི་རྟག་པར་བཤད་པའི་རྣམ་གྲངས་ཀྱང་ཡོད། མི་རྟག་པར་བཤད་པའི་རྣམ་གྲངས་ཀྱང་ཡོད་དོ། །སྟོབས་དང་མི་འཇིགས་པ་དང་
སོ་སོ་ཡང་དག་པར་རིག་པ་ལ་སོགས་པ་མ་འདྲེས་པའི་ཆོས་བརྒྱད་ཅུ། གསེར་དང་ཆུ་དང་ནམ་མཁའ་དག་དྲི་མ་དང་རྙོག་པ་དང་སྤྲིན་དང་བྲལ་ན་གསེར་ལ་སོགས་པ་མེད་པ་ཡིན་པ་བཞིན་དུ། ཆོས་ཀྱི་སྐུ་ཉོན་མོངས་པ་ཐམས་ཅད་ཟད་པའི་ཕྱིར། རྣམ་པར་དག་པ་ཞེས་བྱ་བའི་སྐུ་ཉིད་མེད་པར་གྱུར་པ་ནི་མ་ཡིན་ནོ། །རྣམ་པར་རྟོག་པ་ཡོད་པར་སྣང་ཡང་ངོ་བོ་ཉིད་ལ་ནི་རྣམ་པར་རྟོག་པ་ཡང་མེད་དོ། །གསུམ་དུ་བགྲང་བ་ཡོད་མོད་ཀྱི། དངོས་པོ་གསུམ་དུ་ཡང་མེད་དེ་འཕེལ་བ་དང་འགྲིབ་པ་མེད་པ་དེ་ནི་རྨི་ལམ་དང་སྒྱུ་མ་དང་སྨིག་རྒྱུ་ལྟ་བུ་སྟེ། གཟུང་བ་ཡང་མེད་འཛིན་པ་ཡང་མེད་དོ། །ཤཱ་རིའི་བུ་སྦྱིན་པ་རྣམས་ཀྱི་ནང་ན་ཆོས་ཀྱི་སྦྱིན་པ་མཆོག་ཅེས་ངས་བཤད་དོ། །ལུས་ནི་གཡོ་བ་མེད་ཅིང་བྱེད་པ་མེད། །སྙིང་པོ་མེད་ཅིང་རྐྱེན་ལས་བྱུང་བ་སྟེ། །ཡང་དག་མ་ཡིན་ཡོངས་སུ་རྟོག་ལས་བྱུང༌། །གྲོང་སྟོང་ལས་ཀྱི་འཁྲུལ་འཁོར་འདྲ་བར་གནས། །ཆོས་རྣམས་འདི་དག་ཐམས་ཅད་སྟོང་པ་སྟེ། །མ་རིག་པ་ཡི་རྐྱེན་ལས་བྱུང་བ་ཡིན། །འབྱུང་བ་ཆེན་པོ་འདི་དག་ཆེས་འབྱུང་མིན། །མ་བྱུང་བ་ལས་བྱུང་ཞིང་མི་འབྱུང་སྟེ། །གང་གི་ཕྱིར་ནི་འབྱུང་བ་མི་འབྱུང་བ། །དེ་ཕྱིར་འབྱུང་བ་ཆེ་ཞེས་ངས་བརྗོད་དོ། །ཡོད་པ་མིན་ཞིང་ནམ་ཡང་ཡོད་མིན་ལ། །མ་རིག་པ་ཡི་རྐྱེན་ལས་བྱུང་བ་ཡིན། །མ་རིག་འདི་ནི་ཡོད་པ་མ་ཡིན་ཏེ། །དེ་བས་ངས་ནི་མ་རིག་འདི་བཤད་དོ། །རྡོ་རྗེ་རི་རབ་ཆེན་པོའི་རྩེ་མོའི་ཁང་བ་བརྩེགས་པའི་གཟུངས་ལས། ཡོངས་སུ་བརྟགས་པ་ཡིན་པའི་ཕྱིར་བརྟགས་པ་ཡང་སྟོང་པའོ། །རྟེན་ཅིང་འབྲེལ་པར་འབྱུང་བའི་ཕྱིར། གཞན་གྱི་དབང་ཉིད་ཀྱང་སྟོང་པའོ། །རྒྱུ་དང་རྐྱེན་ལས་བྱུང་བའི་ཕྱིར། རྟེན་ཅིང་འབྲེལ་པར་འབྱུང་བ་ཡང་སྟོང་པའོ། །གློ་བུར་དུ་རྒྱུ་དང་རྐྱེན་གྱིས་བསྐྱེད་པའི་ཕྱིར། འབྱུང་བའི་བདག་ཉིད་ཀྱིས་སྟོང་ངོ༌། །དེ་ལ་རྟེན་ཅིང་འབྲེལ་པར་འབྱུང་བ་ནི། རང་གི་མཚན་ཉིད་ཀྱིས་སྟོང་ངོ༌། །རང་གི་མཚན་ཉིད་ཀྱིས་སྟོང་པ་གང་ཡིན་པ་དེ་མཚན་ཉིད་མེད་པའོ། །སྐུ་གསུམ་རྣམ་པར་གཞག་པ་ཞེས་བྱ་བ་དེ་
ནི་ཚོགས་གཉིས་ཀྱིས་སྤྲུལ་པའི་མཚན་ཉིད་དོ། །དེ་བཞིན་གཤེགས་པ་སྐྱེ་བ་འབྱུང་བ་ལས། བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་ཡེ་ཤེས་ཀྱི་རང་བཞིན་གྱི་ལུས་གཅིག་ཅིང་ཐ་མི་དད་པས་གཟུགས་ཀྱི་ལུས་མཐའ་ཡས་པའི་སྒོ་ཀུན་དུ་སྟོན་པ་ཤ་སྟག་འདི་ལྟ་སྟེ། བྱང་ཆུབ་སེམས་དཔའ་ཀུན་ཏུ་བཟང་པོ་ལ་སོགས་པ་སངས་རྒྱས་ཀྱི་ཞིང་ཕྲག་བཅུའི་རྡུལ་ཕྲ་རབ་སྙེད་དང་ཐབས་ཅིག་ཏུ་བཞུགས་སོ། །ལྷའི་རྒྱལ་པོ་དབང་སྒྱུར་གྱི་ལྷའི་བུ་མོ་བཟང་མོའི་དབུགས་གཅིག་གིས་ལྷ་རྫས་ཀྱི་རོལ་མོའི་སྒྲ་ཡན་ལག་བརྒྱ་ཕྲག་སྟོང་དང་ལྡན་པའི་ང་རོ་འབྱུང་སྟེ། སྒྲ་དེ་བྱུང་བ་ནི་སྒྲ་རྣམ་པ་ཐ་དད་པ་བརྒྱ་ཕྲག་སྟོང་གི་དབྱངས་སུ་གྲག་གོ །དེ་བཞིན་དུ་དེ་བཞིན་གཤེགས་པའི་གསུང་གཅིག་འབྱུང་ཡང་སེམས་ཅན་གྱི་བསམ་པ་བཞིན་ཚང་མེད་པའི་སྒྲ་རྣམ་པར་གྲག་གོ །དཔེར་ན་འོག་གི་ཆུའི་ཕུང་པོ་ཉེ་བར་བཟུང་བ་ཡན་ཆད་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྲིད་པའི་རྩེ་མོའི་བར་གྱི་སྟོང་གསུམ་གྱི་སྟོང་ཆེན་པོ་ཐམས་ཅད་ནམ་མཁའ་ལ་གནས་ཏེ། གཟུགས་མེད་པ་ལ་སྤྱོད་པའི་སེམས་ཅན་གྱི་གནས་དང༌། འདོད་པ་ན་སྤྱོད་པའི་སེམས་ཅན་གྱི་གནས་ཇི་སྙེད་པ་དེ་དག་ཐམས་ཅད་ནམ་མཁའ་ལ་གནས་ཤིང༌། ནམ་མཁའི་དབྱིངས་ལས་བྱུང་བའོ། །དཔེར་ན་རི་མོའི་གཞི་ཆེན་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཙམ་ཞིག་ཡོད་པར་གྱུར་ལ། གཞི་དེ་ལ་སྟོང་གསུམ་གྱི་སྟོང་ཆེན་པོ་རིལ་གྱིས་རྫོགས་པར་བྲིས་ཏེ། འདོད་པ་ན་སྤྱོད་པའི་ལྷའི་གཞལ་མེད་ཁང་གི་ཚད་དང༌། གཟུགས་ན་སྤྱོད་པའི་ལྷའི་གཞལ་མེད་ཁང་དང༌། གཟུགས་མེད་པ་ན་སྤྱོད་པའི་ལྷའི་གཞལ་མེད་ཁང་གི་ཚད་ལ་སོགས་པ་དེའི་ཚད་དུ་བྲིས་ལ། རི་མོའི་གཞི་དེ་རྡུལ་ཕྲ་རབ་གཅིག་གི་ནང་དུ་ཆུད་པར་བྱས་པ་སེམས་ཅན་གང་གིས་ཀྱང་མཐོང་བའམ། ཤེས་པར་མ་གྱུར་ལ་འཕྲུལ་གྱི་མིག་ཅན་འགའ་ཞིག་གིས་མཐོང་ནས། རྡུལ་དེ་ཕྱེ་སྟེ་སེམས་ཅན་ལ་བསྟན་ཏེ་
ཕན་བཏགས་པ་ཞིག་ཡོད་ན། དེ་དང་འདྲ་བར་དེ་བཞིན་གཤེགས་པའི་ཡེ་ཤེས་སེམས་ཅན་ཐམས་ཅད་ཉེ་བར་འཚོ་བ་ཡང་སེམས་ཅན་ཐམས་ཅད་ཀྱི་སེམས་ལ་རིལ་གྱིས་ཆུད་པར་གནས་པ་བྱིས་པས་མི་ཤེས་པས་མི་ཤེས་པ་རྣམས་ལ་དེ་བཞིན་གཤེགས་པས་བྱིས་པའི་འདུ་ཤེས་ཀྱི་མདུད་པ་བཀྲོལ་ནས། ཡེ་ཤེས་ཁོང་དུ་ཆུད་ཅིང་མཉམ་པ་ཉིད་རྟོགས་པར་བྱེད་པ་ཡང་དེ་དང་འདྲ་སྟེ། དཔེ་འདིས་དེ་བཞིན་གཤེགས་པའི་ཡེ་ཤེས་འབྱུང་བ་ཤེས་པར་བྱའོ། །དམ་པའི་ཆོས་པདྨ་དཀར་པོ་ལས། བྱམས་མའི་བུ་གང་པོ་མ་འོངས་པའི་དུས་ན། འཇིག་རྟེན་གྱི་ཁམས་མི་མཇེད་འདི་ཉིད་དུ་མངོན་པར་འཚང་རྒྱ་སྟེ། དེའི་ཚེ་སངས་རྒྱས་ཀྱི་ཞིང་འདི་ནང་ན་སོང་མེད། བུད་མེད་ཀྱང་མེད་དོ། །སེམས་ཅན་དེ་དག་ཐམས་ཅད་རྫུས་ཏེ་སྐྱེ་བར་ཚངས་པར་སྤྱོད་པ་ཡིད་ལས་བྱུང་བའི་ལུས་འོད་རང་ལ་ཡོད་པ། རྫུ་འཕྲུལ་ཅན་ནམ་མཁའ་ལ་འགྲོ་བ་ལུས་གསེར་གྱི་མདོག་ཅན་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པར་འགྱུར་བའོ། །སྐྱེས་བུ་དམ་པ་བཅུ་དྲུག་ལ། བཟང་སྐྱོང༌། དཀོན་མཆོག་འབྱུང་གནས། དེད་དཔོན་བཟང་པོ། །མིས་བྱིན། ཕུག་སྦས། ཆུས་བྱིན། དབང་པོས་བྱིན། བླ་མའི་བློ་གྲོས། ཁྱད་པར་བློ་གྲོས། འཕེལ་བའི་བློ་གྲོས། མཐོང་བ་དོན་ཡོད། ཤིན་ཏུ་ཡང་དག་ཞུགས། རབ་ཀྱི་རྩལ་གྱིས་རྣམ་པར་གནོན་པ། དཔེ་མེད་བློ་གྲོས། ཉི་མའི་སྙིང་པོ། ས་འཛིན། ཕྱོགས་བཅུའི་དེ་བཞིན་གཤེགས་པ་རྣམས་བདག་གི་ཞམ་རིང་བ་དང་ལྷན་ཅིག་ཏུ་བདག་དང་གཅིག་གམ་བདག་དང་གཉིས་མི་མཇེད་ཀྱི་འཇིག་རྟེན་གྱི་ཁམས་འདིར་གཤེགས་སོ། །དེའི་ཚེ་ཐམས་ཅད་དང་ལྡན་པའི་འཇིག་རྟེན་གྱི་ཁམས་མི་མཇེད་འདི་རིན་པོ་ཆེའི་ཤིང་ལྗོན་པས་རབ་ཏུ་བརྒྱན་པར་གྱུར་ཏོ། །བཻ་ཌཱུརྻའི་གཞི་ལ་རིན་པོ་ཆེ་སྣ་བདུན་དང་གསེར་གྱི་དྲ་བས་བྲེས། དྲིལ་བུ་གཡེར་ཀའི་དྲ་བས་བརྒྱན་པ། མེ་ཏོག་སྣ་ཚོགས་བཀྲམ་པ། གསེར་གྱི་སྐུད་པས་མིག་མངས་རིས་སུ་བྲེས་པར་གྱུར་ཏེ། གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་ཡང་མེད་པར་གྱུར། རི་ནག་པོ་ཡང་མེད་པར་གྱུར། བཏང་བཟུང་དང༌། བཏང་བཟུང་ཆེན་
པོ་དང༌། ཁོར་ཡུག་དང༌། ཁོར་ཡུག་ཆེན་པོ་དང༌། རི་རབ་ཀྱང་མེད་པར་གྱུར། རི་རབ་ཆེན་པོ་དང༌། རི་གཞན་ཡང་མེད་པར་གྱུར། རྒྱ་མཚོ་ཡང་མེད་པར་གྱུར། འབབ་ཆུ་དང༌། འབབ་ཆུ་ཆེན་པོ་ཡང་མེད་པར་ཡོངས་སུ་གནས་པར་གྱུར་ཏོ། །ལྷ་དང་མི་དང་ལྷ་མ་ཡིན་གྱི་ཚོགས་ཀྱང་མེད་པར་གྱུར། སེམས་ཅན་དམྱལ་བ་དང་དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་ཡང་མེད་པར་གྱུར་ཏོ། །འདི་ལྟར་དེའི་ཚེ་འཇིག་རྟེན་གྱི་ཁམས་མི་མཇེད་འཁོར་འགྲོ་བ་དྲུག་ཏུ་སྐྱེས་པའི་སེམས་ཅན་དེ་དག་ཐམས་ཅད་འཇིག་རྟེན་གྱི་ཁམས་གཞན་དག་ཏུ་བཀོད་པར་གྱུར་ཏེ། གང་དག་འཁོར་དེར་འདུས་པ་དེ་དག་མ་གཏོགས་སོ། །འདུ་ཤེས་ཕྱིན་ཅི་ལོག་ལས་བྱུང་བར་དེ་ལྟར་འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ཆོས་ཐམས་ཅད་ལ་ལྟ་ཞིང་གནས་པ་འདིས་གནས་ན། བྱང་ཆུབ་སེམས་དཔའ་ཆེན་པོ་སྤྱོད་ཡུལ་ལ་གནས་པ་ཡིན་ནོ། །གང་ཞིག་མདོ་འདི་འཆད་འདོད་ཆོས་སྨྲ་བས། །གཡོ་དང་ང་རྒྱལ་དེ་བཞིན་འཕྱ་བ་དག །མ་ལུས་པར་ནི་ཡོངས་སུ་སྤང་བར་བྱ། །དེ་བཞིན་མཁས་པས་ཕྲག་དོག་གཞན་མི་བྱ། །ནམ་དུ་སུ་ལ་འང་མི་སྙན་བརྗོད་མི་བྱ། །ལྟ་བས་རྩོད་པ་ནམ་ཡང་མི་བྱའོ། །བླ་མེད་ཡེ་ཤེས་ཐོབ་པར་མི་འགྱུར་ཞེས། །ཐེ་ཚོམ་གནས་ནི་ནམས་ཀྱང་མི་བྱའོ། །འཇམ་དཔལ་འདི་ནི་དེ་བཞིན་གཤེགས་པ་རྣམས་ཀྱི་ཆོས་བསྟན་པའི་མཆོག་སྟེ། ཆོས་ཀྱི་རྣམ་གྲངས་ཀྱི་མཐའོ། །ཆོས་ཀྱི་རྣམ་གྲངས་ཐམས་ཅད་ཀྱི་ནད་ན་ཆོས་ཀྱི་རྣམ་གྲངས་འདི་ཟབ་སྟེ། འཇིག་རྟེན་ཐམས་ཅད་དང་མི་མཐུན་པའོ། །འཇིག་རྟེན་གྱི་ཁམས་གཞན་ནས་ལྷགས་པའི་བྱང་ཆུབ་སེམས་དཔའ་མང་པོ་ཞིག་གིས་ཆོས་ཀྱི་རྣམ་གྲངས་འདི་དེ་བཞིན་གཤེགས་པ་མྱ་ངན་ལས་འདས་པ་དང་མི་མཇེད་འདིར་བསྟན་པ་ལ་སོགས་པར་བགྱི་བར་འཚལ་ན། བཅོམ་ལྡན་འདས་ཀྱིས་གདམས་སུ་གསོལ་ཞེས་བྱ་བ་དང༌། བཀའ་སྩལ་པ། ཁྱོད་ཀྱིས་བྱ་ཅི་དགོས། འཇིག་རྟེན་གྱི་ཁམས་འདི་ཉིད་ན་ངས་
སྨིན་པར་བྱས་པའི་བྱང་ཆུབ་སེམས་དཔའ་སྟོང་ཕྲག་གང་གཱའི་ཀླུང་དྲུག་ཅུའི་བྱེ་མ་སྙེད་ཡོད་དེ་དེ་དག་སྟོན་པ་ལ་སོགས་པ་བྱེད་པར་འགྱུར་རོ། །དེ་སྐད་གསུངས་མ་ཐག་ཏུ་བྱང་ཆུབ་སེམས་དཔའ་མང་པོ་ཞིག་ས་རུམ་ནས་འཐོན་ཏེ། དེ་བཞིན་གཤེགས་པ་རིན་ཆེན་མང་དང༌། ཤཱཀྱ་ཐུབ་པ་དང་ཕྱོགས་བཅུ་ནས་གཤེགས་པ་རྣམས་ལ་ཕྱག་འཚལ་ཏོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ས་རུམ་ནས་འཐོན་ནས་བར་གྱི་བསྐལ་པ་ལྔ་བཅུ་རྫོགས་པར་འདས་ཀྱི་བར་དུ་དེ་བཞིན་གཤེགས་པ་རྣམས་ལ་ཕྱག་འཚལ་ཞིང་བྱང་ཆུབ་སེམས་དཔའི་བསྟོད་པ་རྣམ་པ་དུ་མས་བསྟོད་དོ། །བར་གྱི་བསྐལ་པ་ལྔ་བཅུ་པོ་དེ་དག་ལ་བཅོམ་ལྡན་འདས་ཤཱཀྱ་ཐུབ་པ་དེ་ཅང་མི་གསུང་བར་གྱུར་ཏོ། །འཁོར་བཞི་པོ་དེ་དག་ཀྱང་བར་གྱི་བསྐལ་པ་ལྔ་བཅུ་པོ་དེ་དག་ལ་ཅང་མི་སྨྲ་བར་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་བྱ་བ་འདི་ལྟ་བུ་མངོན་པར་འདུ་མཛད་དོ། །རྫུ་འཕྲུལ་ཇི་ལྟ་བུ་མངོན་པར་འདུ་བྱ་བ་མངོན་པར་མཛད་པས་འཁོར་བཞི་པོ་དེ་དག་གིས་ཕྱི་དྲོ་གཅིག་ཁོ་ན་སྙམ་དུ་ཤེས་སོ། །རྟག་ཏུ་ང་བྱིན་རླབས་དེ་འདྲ་སྟེ། །བསྐལ་པ་བསམ་ཡས་བྱེ་བ་སྟོང་དུ་ནི། །བྱ་རྒོད་ཕུང་པོ་འདི་ལས་མི་འཕོ་ཡང༌། །གུད་ན་འང་བྱེ་བ་སྙེད་ཀྱི་མལ་ཆ་ཡོད། །གང་ཚེ་འཇིག་རྟེན་ཁམས་འདི་སེམས་ཅན་གྱི། །བསྐལ་པས་བསྲེག་པར་མཐོང་ཞིང་རྟོག་པ་ནི། །དེ་ཚེ་ང་ཡི་སངས་རྒྱས་ཞིང་འདི་ནི། །ལྷ་དང་མི་ཡིས་ཡོངས་སུ་གང་བར་འགྱུར། །དེ་དག་རྩེ་ཞིང་དགའ་བ་སྣ་ཚོགས་ལྡན། །སྐྱེད་མོས་ཁང་བཟངས་གཞལ་མེད་ཆེ་བ་ཡོད། །རིན་ཆེན་རི་བོ་རྣམས་དང་དེ་བཞིན་དུ། །མེ་ཏོག་འབྲས་ལྡན་ཤིང་ལྗོན་རྣམས་ཀྱིས་བརྒྱན། །སྟེང་ནས་ལྷ་རྣམས་རྔ་ཆེན་རབ་ཏུ་བརྡུང༌། །མནྡཱ་ར་ཡི་ཆར་ཀྱང་རབ་ཏུ་འབེབས། །མཁས་པ་གཞན་གང་བྱང་ཆུབ་འདིར་ཞུགས་དང༌། །ང་དང་ཉན་ཐོས་རྣམས་ལས་མངོན་པར་འཐོབ། །ང་ཡི་ཞིང་འདི་དེ་ལྟར་རྟག་གནས་ཀྱང༌། །གཞན་དག་འདི་ལ་བསྐལ་པས་བསྲེག་པར་རྟོག །མྱ་ངན་བརྒྱ་ཡིས་གང་ཞིང་
གཙེས་པ་དང༌། །འཇིག་རྟེན་ཁམས་ནི་ཤིན་ཏུ་འཇིགས་པར་མཐོང༌། །ལོ་མང་བྱེ་བར་དེ་བཞིན་གཤེགས་རྣམས་དང༌། །ཆོས་དང་ང་ཡི་དགེ་འདུན་ཚོགས་རྣམས་ཀྱི། །མིང་ནི་ནམས་ཀྱང་ཐོས་པར་མི་འགྱུར་ཏེ། །སྡིག་པའི་ལས་ཀྱི་འབྲས་བུ་དེ་འདྲའོ། །ནམ་ཞིག་སེམས་ཅན་འཇམ་ཞིང་མཉེན་པ་རྣམས། །མི་ཡི་འཇིག་རྟེན་འདིར་ནི་སྐྱེས་གྱུར་ཏེ། །དགེ་བའི་ལས་ཀྱིས་དེ་ལྟར་སྐྱེས་མ་ཐག །ད་ནི་ཆོས་རྣམས་རབ་ཏུ་འཆད་པར་མཐོང༌། །དེ་བཞིན་གཤེགས་པ་སྐུ་ཚེ་དཔག་ཏུ་མེད། །མྱ་ངན་ལས་འདའ་བར་བསྟན་པ་ཐམས་ཅད་ཡིན་པར་བཤད་པའི་རྗེས་ལ་བཀའ་སྩལ་པ། མ་ཕམ་པ་གང་གི་ཚེ་རིགས་ཀྱི་བུའམ། རིགས་ཀྱི་བུ་མོ་དེ་བཞིན་གཤེགས་པའི་ཚེའི་ཚད་བསྟན་པའི་ཆོས་ཀྱི་རྣམ་གྲངས་འདི་ཐོས་ནས་ལྷག་པའི་བསམ་པས་མོས་པར་བྱེད་པ་དེའི་ཚེ། དེའི་ལྷག་པའི་བསམ་པའི་མཚན་ཉིད་འདི་ཡིན་པར་རིག་པར་བྱ་སྟེ། འདི་ལྟ་སྟེ། བྱ་རྒོད་ཀྱི་ཕུང་པོའི་རིལ་འདུག་སྟེ། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་བ་དང༌། བྱང་ཆུབ་སེམས་དཔའི་ཚོགས་ཀྱིས་མདུན་གྱིས་བལྟ་བ་དང༌། ཉན་ཐོས་ཀྱི་དགེ་འདུན་གྱི་དབུས་ན་འདུག་ཅིང་ཆོས་སྟོན་པར་མཐོང་བ་དང༌། ངའི་སངས་རྒྱས་ཀྱི་ཞིང་མི་མཇེད་ཀྱི་འཇིག་རྟེན་གྱི་ཁམས་འདི་གཞི་བཻ་ཌཱུརྻ་ལས་གྲུབ་ཅིང་མཉམ་པར་གནས་ལ། གསེར་སྐུད་མིག་མངས་རིས་སུ་བྲེས་ཤིང་རིན་པོ་ཆེའི་ཤིང་ལྗོན་པ་རྣམས་ཀྱིས་རྣམ་པར་བཀྲ་བར་མཐོང་བ་དང༌། འདི་ནི་ཡོངས་སུ་སྤྱད་པའི་ཁང་པ་བརྩེགས་པ་དག་ན། བྱང་ཆུབ་སེམས་དཔའ་དག་གནས་པར་མཐོང་བ་སྟེ། མ་ཕམ་པ་འདི་ནི་ལྷག་པའི་བསམ་པས་མོས་པའི་རིགས་ཀྱི་བུ་འམ་རིགས་ཀྱི་བུ་མོའི་ལྷག་པའི་བསམ་པའི་མཚན་ཉིད་རིག་པར་བྱའོ། །རིགས་ཀྱི་བུ་དག་མདོར་ན་སངས་རྒྱས་ཀྱི་ཆོས་ཐམས་ཅད་དང༌། སངས་རྒྱས་ཀྱི་ཁྱུ་མཆོག་ཏུ་གྱུར་པ་ཐམས་ཅད་དང༌། སངས་རྒྱས་ཀྱི་ཆོས་ཟབ་མོའི་གནས་ཐམས་ཅད་ངས་ཆོས་ཀྱི་རྣམ་གྲངས་འདི་ལས་བཤད་དོ། །རིགས་ཀྱི་བུའམ་རིགས་ཀྱི་བུ་མོ་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་འདི་འདོད་པས། དེ་བཞིན་གཤེགས་པའི་མཆོད་རྟེན་དག་ལ་རྐང་པའི་མཐེ་བོང་འབར་བར་བྱའོ། །ལག་པའི་སོར་མོ་འམ། རྐང་པའི་སོར་མོ་གཅིག་གམ། ཡན་ལག་གཅིག་གམ། ལག་པ་འབར་བར་བྱའོ། །བྱང་ཆུབ་སེམས་དཔའི་ཐེག་པ་ལ་ཞུགས་པའི་རིགས་ཀྱི་བུ་འམ་རིགས་ཀྱི་བུ་མོ་འདི་ནི་བསོད་ནམས་འདུ་བྱེད་པ་ཆེས་མང་དུ་བསྐྱེད་ཀྱི། རྒྱལ་སྲིད་དང༌། བུ་དང༌། ཆུང་མ་དང༌། སྟོང་གསུམ་གྱི་འཇིག་རྟེན་གྱི་ཁམས་ཡོངས་སུ་གཏང་བ་ནི་དེ་ལྟ་མ་ཡིན་ནོ། །དེ་བཞིན་གཤེགས་པས་བཤད་པའི་མདོ་སྡེ་ཐམས་ཅད་ཀྱི་ནད་ན་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་མཆོག་ཏུ་གྱུར་པ་ཡིན་ནོ། །བྱང་ཆུབ་སེམས་དཔའ་ཀུན་ཏུ་བཟང་པོས་གསོལ་པ། སུ་ཆོས་ཀྱི་རྣམ་གྲངས་འདི་སྤྱོད་པ་དེ་བསྲུང་བའི་ཕྱིར། བདག་གླང་པོ་ཆེ་དཀར་པོ་མཆེ་བ་དྲུག་པ་འཚལ་ཏེ་དེར་མཆིའོ། །དེའི་ཚེ་ན་བཅོམ་ལྡན་འདས་འཁོར་བཞི་པོ་རྣམས་ཀྱིས་ཡོངས་སུ་བསྐོར་ཅིང་མདུན་གྱིས་བལྟས་ཏེ། བསྟི་སྟང་དུ་བྱས་བཙུན་པར་བྱས་ཏེ། ངེས་པར་བསྟན་པ་ཆེན་པོ་ཞེས་བྱ་བའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བྱང་ཆུབ་སེམས་དཔའ་ལ་གདམས་པ་སངས་རྒྱས་ཐམས་ཅད་ཀྱིས་ཡོངས་སུ་གཟུང་བར་བཤད་དོ། །ནམ་མཁའི་སྤྱན་ལས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་མ་འོངས་པའི་དུས་ན། གང་དེ་བཞིན་གཤེགས་པས་ཉན་ཐོས་རྣམས་ལ་བསླབ་པའི་ཁྲིམས་སུ་བཅའ་བ་འཆའ་བར་འགྱུར་བའི་རྐྱེན་དེ་ལྟ་བུ་དག་འབྱུང་བར་འགྱུར་ཏེ། གང་ཟག་གནོད་མི་བཀུར་བ་རྣམས་ཚར་གཅད་པའི་ཕྱིར་དང༌། ངོ་ཚ་ཤེས་པ་རྣམས་བདེ་བ་ལ་རེག་པར་གནས་པར་བྱ་བའི་ཕྱིར་དང༌། ཚེ་འདིའི་ཟག་པ་རྣམས་སྤང་བའི་ཕྱིར་དང༌། ཚེ་ཕྱི་མའི་ཟག་པ་རྣམས་བསྡམས་པའི་ཕྱིར་དང༌། ངའི་བསྟན་པ་ཡུན་རིང་དུ་གནས་པར་བྱ་བའི་ཕྱིར་གང་ཟག་ལམ་གོལ་བར་ཞུགས་པ་ཁ་ཅིག་ལ་ནི་ལུས་དུབ་པ་སྤྱད་པའི་ཆད་པ་བཅའོ། །ཁ་ཅིག་ལ་ནི་ཡིད་དུ་མི་འོང་བ་དང་འཕྲད་པའི་ཆད་པའོ། །ཁ་ཅིག་ལ་ནི་མཚམས་
ཀྱི་ཕྱི་རོལ་དུ་དབྱུང་ཞིང་ཐ་དད་དུ་གནས་པར་བྱ་བའི་ཆད་པའོ། །ཁ་ཅིག་ལ་ནི་དགེ་སློང་གི་ཐ་མར་གཞག་པའི་ཆད་པའོ། །ཁ་ཅིག་ལ་ནི་སངས་རྒྱས་ཀྱི་བསྟན་པ་ཐམས་ཅད་ལ་བསྙིལ་ཞིང་སྨད་པར་འོས་པའི་ཆད་པ་བཅད་དེ། རྒྱལ་རིགས་ད་ལྟར་བྱུང་པ་ཁྱེད་དང་མ་འོངས་པ་ཐམས་ཅད་ཀྱི་ལག་ཏུ་ཉན་ཐོས་ཀྱི་བསླབ་པ་ཁྲིམས་སུ་བཅའ་བ་གཏོད་དོ། །དེ་ཅིའི་ཕྱིར་ཞེ་ན། གང་ད་ལྟར་དང་མ་འོངས་པའི་དུས་ན་ངའི་བསྟན་པ་ལ། གང་ཟག་ལམ་གེལ་བ། གདུལ་དཀར་བ། ངོ་ཚ་དང༌། ཁྲེལ་སྤངས་པ། སྤྱོད་པ་མ་དག་པ་འབྱུང་བར་འགྱུར་ལ། གང་དག་ཉེ་དུའི་སྟོབས་སམ། ནོར་གྱི་སྟོབས་སམ། ཁྱིམ་པའི་དཔུང་ངམ། མང་དུ་ཐོས་པའི་སྟོབས་སམ། ཁ་སྟོབས་ཀྱིས་བསླབ་པ་དག་ལ་སྐྱོན་ཡོད་པར་སྤྱོད་ཅིང༌། ཁྱིམ་ན་གནས་པའི་རྟགས་དང༌། ཁྱིམ་གྱི་ལོངས་སྤྱོད་དག་ལ་སྣང་ལ་ཡོངས་སུ་གཟུང་བ་བསྡུས་པ་དེ་དག་དགེ་སློང་དོན་ཉུང་དུ་རྣམས་ཀྱིས་མྱུར་དུ་དགེ་འདུན་གྱི་ནང་ནས་བསྐྲད་པ་དང༌། བསླབ་པ་ཇི་ལྟར་བཅད་པ་བཞིན་ཆད་པས་གཅད་པར་མི་ནུས་པས། དེ་དག་བསླབ་པའི་ཁྲིམས་སུ་བཅའ་བ་བཞིན་བྱ་བར་རྒྱལ་རིགས་ཀྱི་ལག་ཏུ་གཏད་དེ། རྒྱལ་རིགས་དེ་དག་གང་ཟག་དེ་ལྟ་བུ་རྣམས་ལ་ཇི་ལྟར་ཁྲིམས་བཅས་པ་བཞིན་ཆད་པས་གཅོད་པར་འགྱུར་རོ། །རྒྱལ་རིགས་གང་དག་ད་ལྟར་དང་མ་འོངས་པའི་དུས་ལྔ་བརྒྱ་ཐ་མའི་བར་དུ་དེ་ལྟ་བུའི་བརྩོན་པ་དང༌། ཕ་རོལ་གནོན་པས་ངའི་བསྟན་པ་བསྲུང་ཞིང་ཡོངས་སུ་སྐྱོད་བ་དང༌། ཆོས་ཀྱི་ཚུལ་འབར་བར་བྱེད་པ་དང༌། དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པ་དེ་དག་ནི་སངས་རྒྱས་ཀྱི་བསྟན་པ་བསྲུང་བ་ཡིན་ཏེ། ལྷ་རྣམས་ཀྱང་བསྲུང་ཞིང་ཡོངས་སུ་སྐྱོང་བར་འགྱུར་རོ། །རྒྱལ་རིགས་དེ་དག་ནི་རྒྱལ་སྲིད་ཀྱང་ཡུན་རིང་དུ་བྱེད་དུ་འཇུག་གོ །བསོད་ནམས་ཀྱང་ཤིན་ཏུ་འཕེལ་པར་འགྱུར་རོ། །དེ་ནས་བསྐལ་པ་བརྒྱར་བྱང་ཆུབ་ཀྱི་སྤྱད་པ་སྤྱོད་པར་འགྱུར་རོ། །རྒྱལ་རིགས་གང་དག་ད་ལྟར་དང་མ་འོངས་
པའི་དུས་ན་ངའི་བསྟན་པ་ཡལ་བར་འདོར་ཞིང་འདུག་པའི་རྒྱལ་རིགས་དེ་དག་ནི་ལྷ་ཐམས་ཅད་ཀྱིས་བོར་བ་ཡིན། ཉན་ཐོས་དང་རང་རྒྱལ་བ་ཐམས་ཅད་ཀྱིས་ཀྱང་ཡོངས་སུ་གཏང་བ་ཡིན་ཏེ། རྒྱལ་རིགས་དེ་ནི་འཇིག་རྟེན་ཕ་རོལ་ཏུ་ཕྱིན་པ་ལྷ་དང་མིར་སྐྱེ་བ་ཡང་མེད་དོ། །གང་ངའི་བསྟན་པ་ཡལ་བར་འདོར་བ་དེ་ནི་དཀོན་མཆོག་གསུམ་གྱི་གདུང་གཅོད་པར་ཞུགས་པ་ཡིན། ཆོས་ཀྱི་སྒྲོན་མ་གསད་པར་ཞུགས་པ་ཡིན། ཆོས་ཀྱི་ཆུ་བསྐམ་པར་ཞུགས་པ་ཡིན། སེམས་ཅན་ཐམས་ཅད་ཀྱི་ཆོས་ཀྱི་མིག་འབྱིན་པར་ཞུགས་པ་ཡིན་ནོ། །རྒྱལ་པོ་ཆེན་པོ་དེ་ཇི་སྙམ་དུ་སེམས། གང་ཟག་གང་ཞིག་སེམས་ཅན་ཐམས་ཅད་ཀྱི་མིག་འབྱིན་པར་བྱེད་ན། གང་ཟག་དེ་བསོད་ནམས་མ་ཡིན་པ་ཇི་ཙམ་ཞིག་དང་ལྡན་པར་འགྱུར། རྒྱལ་པོ་གཟུགས་ཅན་སྙིང་པོས་མཆི་མ་བླགས་ཏེ་འདི་སྐད་ཅེས་གསོལ་ཏོ། །གང་ཟག་དེ་ནི་བསོད་ནམས་མ་ལགས་པ་ཟླ་མ་མཆིས་པ་གྲངས་མ་མཆིས་པ། ཚང་མ་མཆིས་པ་འཕེལ་བར་འགྱུར་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བས་རྒྱལ་རིགས་གང་དག་ད་ལྟ་དང་མ་འོངས་པའི་དུས་ན། ངའི་བསྟན་པ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་འབར་གྱི་བར་དུ་གང་ཟག་ཆོས་ཀྱིས་གནས་པ་རྣམས་མི་སྲུན་ཞིང་ལམ་གོལ་བ་ལ་གནས་པའི་གང་ཟག་རྣམས་ཆོས་བཞིན་མི་སློབ་པ་དེ་དག་ལ་བསོད་ནམས་མ་ཡིན་པ་ཆེས་མང་དུ་འཕེལ་བར་འགྱུར་ཏེ། རྒྱལ་རིགས་དེས་སྔ་མ་བསྐལ་བ་བརྒྱར་སྦྱིན་པ་བྱིན། ཚུལ་ཁྲིམས་བསྲུངས་པ་ནས་ཤེས་རབ་བསྒོམས་པའི་བར་དུ་གྱུར་ལ། ཐེག་པ་གསུམ་ལས་ཐེག་པ་གང་ཡང་རུང་བ་ཞིག་གིས་ཞུགས་པར་གྱུར་ན། ཡང་དམ་པའི་ཆོས་ཡལ་བར་འདོར་བའི་རྒྱུས་དེའི་དགེ་བའི་རྩ་བ་སྔོན་བསགས་པ་དེ་དག་ཐམས་ཅད་ཡོངས་སུ་ཟད་ཅིང་གཏུགས་པར་འགྱུར་རོ། །དེའི་ཡུལ་དུ་ཆོས་གསུམ་དུ་ཡང་འབྱུང་བར་འགྱུར་ཏེ། ལོ་ཉེས་དང༌། འཐབ་མོ་དང༌། ནད་འབྱུང་བར་འགྱུར་རོ། །ལྷས་ཀྱང་ཡལ་བར་འདོར་
ཞིང་བཏང་བར་འགྱུར་རོ། །དེའི་ཡུལ་དུ་བཀའ་མི་བརྩན་ཞིང་གཡོ་དང་སླུ་བ་དང༌། བརྫུན་སྣ་ཚོགས་ཀྱང་འབྱུང་བར་འགྱུར་རོ། །གཞན་གྱི་དམག་གིས་ཀྱང་དེའི་ནོར་གྱི་ཕུང་པོ་ཕྲོགས་པར་འགྱུར་རོ། །ཡང་ན་མེས་ཚིག་པར་འགྱུར་རོ། །ཡང་ན་ཆུས་ཁྱེར་བར་འགྱུར་རོ། །རྒྱལ་རིགས་དེ་རིང་པོར་མི་ཐོགས་པར་ནད་ཚབ་པོ་ཆེས་ཐེབས་ནས། སྡུག་པ་ཡིད་དུ་འོང་བ་དང་བྲལ་བར་འགྱུར་རོ། །ཤི་ནས་ཀྱང་དམྱལ་བ་དག་ཏུ་སྐྱེ་བར་འགྱུར་རོ། །བརྒྱ་ལ་རེས་འགའ་ཞིག་རིང་མོ་ཞིག་ན། ལེགས་པར་སྤྱད་པས་མི་ཉིད་ཐོབ་ན་མྱུར་དུ་མིག་མེད་པ་དང༌། ལོངས་སྤྱོད་དང༌། ཉེ་བར་སྤྱོད་པ་ཐམས་ཅད་དང་བྲལ་བར་འགྱུར་རོ། །ཉམ་ང་བར་གནས་ཤིང་ཡུན་རིང་དུ་འཚོ་བར་འགྱུར་རོ། །ཤི་ནས་ཡང་དམྱལ་བ་དག་གི་ནང་དུ་སྐྱེ་བར་འགྱུར་རོ། །དེ་གནས་མ་ཡིན་པ་ཡོངས་སུ་བརྟགས་པས་སངས་རྒྱས་འབྱུང་བའི་ཚེ་ཡང་མི་ལུས་མི་འཐོབ་པོ། །རྒྱལ་རིགས་ཇི་ལྟར་བྲམ་ཟེ་དང༌། རྗེའུ་རིགས་དག་ཀྱང་དེ་བཞིན་ཏེ། གྲོང་ཁྱེར་གྱི་གཙོ་བོ་འམ། ཡུལ་གྱི་གཙོ་བོ་འམ། རི་ཁྲོད་ཀྱི་གཙོ་བོ་འམ། ལྗོངས་ཀྱི་གཙོ་བོ་ཡང་རུང༌། གང་ཞིག་བག་མེད་པའི་རྒྱུ་འམ། ནོར་གྱི་ཕྱིར་ངའི་བསྟན་པ་ལ་ཆོས་ཀྱིས་གནས་པའི་གང་ཟག་རྣམས་ཅི་ནུས་ཀྱིས་མི་སླུ་ཞིང་ལམ་གོལ་བ་ལ་གནས་པའི་གང་ཟག་རྣམས་ཆོས་བཞིན་དང་འདུལ་བ་བཞིན་ཚར་མི་གཅོད་པ་དེ་ཐམས་ཅད་ལས་ཀྱི་སྒྲིབ་པ་དེ་ལྟ་བུ་དང་ལྡན་པར་འགྱུར་རོ། །རྒྱལ་པོ་གཟུགས་ཅན་སྙིང་པོས་གསོལ་པ། བཅོམ་ལྡན་འདས་ད་ལྟར་དང་མ་མཆིས་པའི་དུས་ན། རྒྱལ་རིགས་རྣམས་ཀྱིས་མི་ཉིད་འཐོབ་པ་ནི་དཀའ་ལགས་ཏེ། གང་དག་མྱོས་ཤིང་བག་མ་མཆིས་པར་མང་དུ་གནས་ལ། དམ་པའི་ཆོས་ཡུན་རིང་དུ་གནས་པ་དང༌། དཀོན་མཆོག་གསུམ་གྱི་གདུང་རྒྱུན་མི་འཆད་པར་བགྱི་བའི་སླད་དུ་ཆོས་ལ་གནས་པ་ཚུལ་ཁྲིམས་དང་ལྡན་པ། ཡོན་ཏན་གྱིས་ཕྱུག་པ་རྣམས་མཆོད་གནས་སུ་མི་བགྱིད་པ་དང༌། ལམ་གོལ་བ་ལ་གནས་པ་ངོ་ཚ་དང་ཁྲེལ་བོར་བ་རྣམས་
ཆོས་དང་མཐུན་པའི་ཆད་པས་མི་འགུམས་པ་དེ་དག་ནི་ཕུང་བར་འགྱུར་ལགས་སོ། །ལྷའི་བུ་སྐྱ་རེངས་ནི་སྨོན་ལམ་གྱི་དབང་གིས་རྒྱལ་ཆེན་བཞིའི་རིས་ཀྱི་ལྷའི་ནང་དུ་སྐྱེས་ཏེ། དེ་ཉི་མའི་མདུན་དཔག་ཚད་ཁྲིས་བཅད་ནས་འགྲོའོ། །དེའི་གཞལ་མེད་ཁང་ནི་དཔག་ཚད་ཉི་ཤུ་པའོ། །དེ་ཉིན་མཚན་གཅིག་ལ་གླིང་བཞི་དང་བར་གྱི་གླིང་བརྒྱད་ཁྲི་དང༌། ཀླུའི་གླིང་དྲུག་ཁྲི་དང༌། ལྷ་མ་ཡིན་གྱི་གླིང་བཞི་ཁྲི་དང༌། ནམ་མཁའ་ལྡིང་གི་གླིང་བརྒྱ་དང༌། མི་འམ་ཅིའི་གླིང་ལྔ་སྟོང་ཉིས་བརྒྱ་དང༌། ལྟོ་འཕྱེ་ཆེན་པོའི་གླིང་བཞི་སྟོང་དྲུག་བརྒྱ་དང༌། གྲུལ་བུམ་གྱི་གླིང་བརྒྱད་བརྒྱ་དང༌། ཡི་དྭགས་ཀྱི་གླིང་བརྒྱད་ཁྲི་བཞི་སྟོང་དང༌། ཤ་ཟ་དང༌། སྲུལ་པོ་དང༌། ལུས་སྲུལ་པོའི་གླིང་སུམ་སྟོང་དག་ཏུ་གླིང་རེ་རེ་ཞིང་ཡང་སྲོག་ཆགས་བྱེ་བ་ཁྲག་ཁྲིག་ཕྲག་བརྒྱ་སྟོང་མང་པོ་དག་ཡོངས་སུ་སྨིན་པར་བྱེད་དོ། །འཛམ་བུའི་གླིང་འདིའི་ནང་ཤར་ཕྱོགས་ཀྱི་ཆ་རྒྱ་མཚོ་ཆེན་པོ་ནི་བཻ་ཌཱུརྻ་འབའ་ཞིག་གི་རི་ཨརྞ་པ་ཞེས་བྱ་བ་ཡོད་དེ། དེ་ནི་ཆུའི་ནང་ནས་དཔག་ཚད་ཉི་ཤུ་གྱེན་དུ་འཕགས་སོ། །རི་དེ་ལ་རི་ཕུག་ཤིན་ཏུ་བཀྲ་བ་ཞེས་བྱ་བ་སྔོན་གྱི་བྱང་ཆུབ་སེམས་དཔའ་རྣམས་གནས་ནས་གནས། འཕང་དང་རྒྱར་དཔག་ཚད་རེ་རེ་བ་ཞིག་ཡོད་དེ། ཕུག་དེ་ན་ཛན་དུར་གནས་སོ། །དེ་ནི་ཉན་ཐོས་དང་ཐུན་མོང་གི་བྱམས་པ་ལེགས་པར་སྦྱང་བར་བྱས་པ་ཡིན་ནོ། །རི་ཕུག་གཉིས་པ་ཨ་མ་ར་ཞེས་བྱ་བ་འཕང་དང་རྒྱར་དཔག་ཚད་གཅིག་ཡོད་དེ། ཕུག་དེ་ན་རྟའི་གནས་སོ། །རི་ཕུག་གསུམ་པ་རབ་ཏུ་གནས་པ་ཞེས་བྱ་བ་འཕང་དང་རྒྱར་དཔག་ཚད་རེ་རེ་བ་ཞིག་ཡོད་དེ། ཕུག་དེ་ན་ཕྱུགས་གནས་སོ། །རི་དེ་ལ་ཤིང་གི་ལྷ་རྒྱལ་བའི་བློ་གྲོས་ཞེས་བྱ་བ་དང༌། སྲིན་མོ་ཆེན་མོ་མགྲིན་བཟངས་མ་ཞེས་བྱ་བ་གནས་ཏེ། གཉིས་ཀ་ཡང་འཁོར་ལྔ་སྟོང་ལྔ་སྟོང་དང་བཅས་པར་དུད་འགྲོའི་སྐྱེ་གནས་སུ་གཏོགས་པ་དེ་གསུམ་གྱི་སྦྱིན་བདག་བྱེད་ཅིང་ཉིན་མཚན་རྟག་ཏུ་བཀུར་སྟི་བྱ་བར་བརྩོན་ནོ། །འཛམ་བུའི་གླིང་འདི་ན་ལྷོ་ཕྱོགས་ཀྱི་ཆ་རྒྱ་མཚོ་ན་ཤེལ་འབའ་ཞིག་གི་རི་སྐྱེ་བོའི་དཔལ་ཞེས་བྱ་བ་ཡོད་དོ། །
དེ་ནི་ཆུའི་ནད་ནས་དཔག་ཚད་ཉི་ཤུ་གྱེན་དུ་འཕགས་སོ། །རི་དེ་ལ་རི་ཕུག་མདོག་བཟངས་ཞེས་བྱ་བ་རྒྱ་དང་འཕང་དུ་དཔག་ཚད་རེ་རེ་ལ་སྤྲེའུ་གནས། རི་ཕུག་གཉིས་པ་སྤྲ་བའི་ཧན་བཟང་པོ་ཞེས་བྱ་བ་རྒྱ་དང་འཕང་དུ་དཔག་ཚད་རེ་རེ་བ་ལ་ཁྱིམ་བྱ་གནས། རི་ཕུག་གསུམ་པ་དྷརྨ་པ་ཧ་ཞེས་བྱ་བརྒྱ་དང་འཕང་དུ་དཔག་ཚད་རེ་རེ་བ་ལ་ཁྱི་གནས། རི་དེ་ལ་སྦྱིན་གནས་སྲིན་མོ་སྣང་བ་དང༌། ཉེ་སྣང་བ་ཞེས་བྱ་བ་འཁོར་ལྔ་སྟོང་དང་གནས་ཏེ་སྦྱིན་བདག་བྱེད། འཛམ་བུའི་གླིང་གི་ནུབ་ཕྱོགས་རྒྱ་མཚོའི་ནང་ན་གསེར་འབའ་ཞིག་གི་རི་བྱང་ཆུབ་ཀྱི་ཟླ་བ་ཞེས་བྱ་བ་ཡོད་དེ། དེ་ནས་དཔག་ཚད་ཉི་ཤུ་ནས་གྱེན་དུ་འཕགས་སོ། །རི་དེ་ལ་རི་ཕུག་མི་ལ་ནིཏྲ་ཞེས་བྱ་བ་ལ་འཕང་དང་རྒྱར་དཔག་ཚད་རེ་རེ་བ་ལ་ཕག་གནས་སོ། །ཕུག་གཉིས་པ་དྲི་དཔལ་ཞེས་བྱ་བ་འཕང་དང་རྒྱར་དཔག་ཚད་རེ་རེ་བ་ལ་བྱི་བ་གནས། ཕུག་གསུམ་པ་ཨུངས་ཤྲཱི་ཞེས་བྱ་བ་འཕང་དང་རྒྱར་དཔག་ཚད་རེ་རེ་བ་ལ་གླང་གནས། རི་དེ་ལ་སྲིན་མོ་ཆེན་མོ་ལེགས་སྲུང་ཞེས་བྱ་བ་དང༌། བེའུ་སུ་རཱ་ཀྵ་ཞེས་བྱ་བ་འཁོར་སྔ་མ་སྙེད་དང༌། རི་དེ་རླུང་ལྷ་གཡོག་པ་ཞེས་བྱ་བ་འཁོར་སྔ་མ་སྙེད་དང་བཅས་པ་སྔ་མ་བཞིན་སྦྱིན་བདག་བྱེད། འཛམ་བུའི་གླིང་གི་ནང་བྱང་ཕྱོགས་ཀྱི་ཆ་རྒྱ་མཚོ་ན་འཛམ་བུ་ཆུ་བོ་འབའ་ཞིག་གི་རི་ཏོག་དཔལ་གྱི་མཚན་ཉིད་ཅེས་བྱ་བ་ཡོད་དེ། དེ་ནི་དཔག་ཚད་ཉི་ཤུ་ཆུ་ནས་གྱེན་དུ་འཕགས་སོ། །རི་དེ་ལ་རི་ཕུག་ཨ་རུ་ན་གེན་གོ་ལ་ཞེས་བྱ་བ་ཚད་སྔ་མ་ཙམ་ལ་སེང་གེ་གནས། ཕུག་གཉིས་པ་ལཾ་ཀ་ར་ཞེས་བྱ་བ་ཚད་སྔ་མ་ཙམ་ལ་རི་བོང་གནས། ཕུག་གསུམ་པ་དགའ་བར་འབྱུང་ཞེས་བྱ་བ་ཚད་སྔ་མ་ཙམ་ལ་སྤྲུལ་གནས། རི་དེ་ལ་སྲིན་མོ་དུད་ཅན་མ་ཞེས་བྱ་བ་དང༌། ཤ་ཏ་དྲང་སྲུང་ཞེས་བྱ་བ་འཁོར་སྔ་མ་སྙེད་དང༌། ཆུ་ལྷ་འབེབས་བྱེད་ཅེས་བྱ་བ་འཁོར་སྔ་མ་སྙེད་དང༌། གནས་སྔ་མ་བཞིན་ཡོན་བདག་བྱེད་དོ། །དུད་འགྲོའི་སྐྱེ་གནས་སུ་སོང་བ་བཅུ་གཉིས་པོ་དེ་དག་ནི་བསོད་ནམས་ཆེ་བསྐལ་བ་ཆེ་བ་ཡིན་ནོ། །སྨོན་ལམ་གྱི་དབང་གིས་ཉིན་མཚན་རེ་རེ་ཞིང་སེམས་ཅན་རྣམས་ཡོངས་སུ་སྨིན་པར་བྱེད་དོ། །བྱི་བ་དང༌། ག་བ་དང༌། སྟག་
དང༌། རི་བོང་དང༌། གླང་པོ་དང༌། ཛན་དུ་དང༌། རྟ་དང༌། པ་ཤུ་དང༌། སྤྲེའུ་དང༌། ཁྱིམ་བྱ་དང༌། ཁྱི་དང༌། ཕག་སྟེ། དེ་དག་ནི་ལྷ་དང་མིའི་མཆོད་པ་ཡོན་ཏན་ཐོབ་པ་ཡིན་ནོ། །སྐད་ཅིག་མ་དང་པོ་ལ་མའི་མངལ་དུ་ས་བོན་གྱི་རྣམ་པར་ཤེས་བ་ནུར་ནུར་པོར་གནས་པར་འགྱུར་ཏེ། དཔེར་ན་ཡུངས་ཀར་གྱི་འབྲུའི་ཚད་ཙམ་གྱི་ཆུང་ངུའོ། །ཞག་བདུན་པ་དྲུག་པ་ལ། ནུར་ནུར་པོར་གྱུར་ནས། མེར་མེར་པོར་འགྱུར་ཏེ། དཔེར་ན་རྒྱ་ཤུག་གི་ས་བོན་ཙམ་དུ་ཆུང་བའི་ཞག་བདུན་པ་ལས་མེར་མེར་པོར་གྱུར་ནས་ནར་ནར་བོར་འགྱུར་ཏེ་སྟར་ག་ཙམ་མོ། །ཞག་བདུན་པ་བརྒྱད་པ་ལ་ནར་ནར་པོར་གྱུར་ནས། གོར་གོར་པོར་འགྱུར་ཏེ་བིལ་བའི་འབྲས་བུ་ཙམ་མོ། །དེ་ནས་ཞག་བདུན་ཐལ་ནས་ཞག་བདུན་པ་བཅུ་གསུམ་གྱི་བར་དུ་མགོའི་མཚན་མ་དང༌། ལག་པ་དང་བརླ་དང་གནས་ཀྱི་མཚན་མ་དག་དོང་པར་འགྱུར་རོ། །ཞག་བདུན་པ་ཉི་ཤུ་པ་ལ་ཕོ་དང་མོའི་མཚན་མ་དོད་པར་འགྱུར་རོ། །ཞག་བདུན་པ་ཉི་ཤུ་རྩ་གཅིག་པ་ལ་རུས་པ་རྫོགས་པར་འགྱུར་རོ། །ཞག་བདུན་པ་སུམ་ཅུ་པ་ལ་ཡན་ལག་ཐམས་ཅད་དང༌། ཁྲག་དང༌། པགས་པ་དང༌། བ་སྤུའི་བུ་ག་ཀུན་རྫོགས་པར་འགྱུར་རོ། །དེ་ནས་མའི་ལྟོ་ན་ཁྲག་དང་དྲི་མི་ཞིམ་པའི་ནང་ན་གནས་སོ། །གང་མའི་ལྟོ་ན་གནས་པ་ན་ཚེ་རབས་སྔ་མ་དྲན་ནས་མཆོག་ཏུ་སྐྱོ་བར་འགྱུར་ཏེ། བདག་མའི་ལྟོ་འདི་ནས་ནམ་འབྱུང་ཞིག་གུ། ཕྱིས་མའི་མངལ་དུ་སྐྱེ་བར་མི་འགྱུར་བ་དེ་ལྟ་བུའི་དགེ་བ་དག་ལ་བརྩོན་འགྲུས་དང༌། ཕ་རོལ་གནོན་པ་བརྟན་པོར་བྱའོ་སྙམ་པ་ལས་བཅས་པ་དང༌། མའི་ལུས་ཀྱིས་གཟིར་བ་དང༌། སའི་རེག་པ་དང༌། ལག་པའི་རེག་པ་དང༌། དྲི་མ་བཀྲུ་བའི་སྡུག་བསྔལ་ལུས་དང་སེམས་ལ་མཆོག་ཏུ་གནས་པ་དག་གིས་ཚེ་རབས་སྔ་མ་རིལ་བརྗེད་དོ། །དེའི་ཚེ་ལྷའི་དབང་པོ་ནས། ཤ་ཟའི་དབང་པོའི་བར་ནམ་མཁའ་ལ་རྒྱུ་བ་དང༌། ས་ལ་རྒྱུ་བ་ཐམས་ཅད་ཀྱིས་མགྲིན་གཅིག་ཏུ་གསོལ་པ། བཅོམ་ལྡན་འདས་དེ་ལྟར་འཚལ་ལོ། །བདེ་བར་གཤེགས་པ་དེ་ལྟར་འཚལ་ཏེ། མ་མཆིས་པའི་དུས་ན་ཇི་སྲིད་དུ་དེ་བཞིན་གཤེགས་པས་བྱིན་གྱིས་བརླབས་པའི་ཆོས་ཀྱི་ཚུལ་འབར་ཤིང་ཇི་སྲིད་དུ་བཅོམ་ལྡན་འདས་ཀྱིས་ཉན་ཐོས་རྣམས་རྣམ་པ་ཐམས་ཅད་དུ་ཡོངས་
སུ་འཛིན་པ་མ་མཆིས་པས་ཆོས་ལ་མངོན་པར་དགའ་བ་དེ་སྲིད་དུ། བདག་ཅག་གིས་རང་གི་སུག་ལས་བཏང་སྟེ། དེ་བཞིན་གཤེགས་པས་གསུངས་པའི་ཆོས་འདུལ་བ་བསྲུང་བར་འཚལ་ལོ། །ཆོས་ཀྱིས་གནས་པའི་གང་ཟག་ཚུལ་ཁྲིམས་ཀྱིས་ཕྱུག་པ་ཡོན་ཏན་ཕུན་སུམ་ཚོགས་པ་དག་དང༌། དེ་དག་གི་འཁོར་དང་ཡོངས་སུ་བཟུང་བ་ཐམས་ཅད་ཀྱང་ཡོངས་སུ་བསྲུང་ཞིང་བསྐྱང་བར་འཚལ་ལོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཇི་སྲིད་དུ། བཅོམ་ལྡན་འདས་ཀྱི་ཉན་ཐོས་རྣམས་རྣམ་པ་ཐམས་ཅད་དུ་ཡོངས་སུ་འཛིན་པ་མ་མཆིས་པར་ཆོས་ལ་གནས་ཤིང་ཆོས་དང་མཐུན་པའི་ཆོས་སྒྲུབ་པ་དེ་སྲིང་སའི་མདངས་དང༌། སེམས་ཅན་གྱི་མདངས་དང༌། ཆོས་ཀྱི་མདངས་ནུབ་པར་མི་འགྱུར་བར་གནས་ལགས་སོ། །དེ་སྲིད་དུ་ལྷ་དང༌། ཀླུ་དང༌། གནོད་སྦྱིན་རྣམས་མིའི་འཇིག་རྟེན་འདིར་མངོན་པར་དགའ་ལགས་སོ། །དེ་སྲིད་དུ་སེམས་ཅན་རྣམས་ཤི་འཕོས་ནས། ལྷ་དང་མི་རྣམས་ཀྱི་ནང་དུ་དབང་ཆེ་བར་གྲགས་པ་དག་ཏུ་སྐྱེ་བར་འགྱུར་ལགས་སོ། །དེ་སྲིད་དུ་ལྷ་རྣམས་ཀྱི་ནང་ན་སེམས་ཅན་དབང་ཆེ་བར་གྲགས་པ་དག་གིས་གང་བར་འགྱུར་ལགས་སོ། །དེ་སྲིད་དུ་བྱང་ཆུབ་སེམས་དཔའ་ཚེས་ཀྱིས་གནས་པ་རྣམས་གནས་ལགས་སོ། །དེ་སྲིད་དུ་བདག་ཅག་གི་སྟོབས་དང་བརྩོན་པ་འདི་ལྟར་ཆོས་མ་ལགས་པའི་ཕྱོགས་ཚར་དགུམ་པར་ཕ་རོལ་གནོན་པར་འགྱུར་ལགས་སོ། །དེ་སྲིད་དུ་སེམས་ཅན་དེ་བཞིན་གཤེགས་པའི་བསྟན་པ་ལ་དད་པར་བགྱི་བར་རྔོ་ཐོགས་ལགས་སོ། །བཙུན་པ་བཅོམ་ལྡན་འདས་མ་འོངས་པའི་དུས་ན། བཅོམ་ལྡན་འདས་ཀྱི་ཉན་ཐོས་ཡོངས་སུ་འཛིན་པ་དང་བཅས་པ། རྣལ་འབྱོར་ཡིད་ལ་བྱེད་པའི་ཆོས་ཀྱིས་གནས་པའི་དགོན་པ་དང༌། ནགས་མཐའ་དང༌། བས་མཐའི་གནས་མལ་བོར་བ། ཕྲག་དོག་ཅན་ལ་སོགས་པ། མར་པོས་གནས་པ། བསླབ་པ་དང་ངོ་ཚ་དང་ཁྲེལ་བོར་བ། ཁྱིམ་པ་དང་འདྲེ་བ། རྙེད་པ་དང་བཀུར་སྟི་ལ་དགའ་བ་དག་འབྱུང་བར་འགྱུར་ལགས་ཏེ། དེ་དག་ཁྱིམ་པའི་དཔུང་དང་
ནོར་གྱི་ཕུང་པོའི་སྟོབས་ཀྱིས་ཕན་ཚུན་སྙེམས་ཤིང་འཐབ་མོ་ལ་དགའ་བས་ཁྱིམ་པ་རྣམས་ཀྱི་མདུན་དུ་ཡང་རྩོད་ཅིང་ཚིག་རྩུབ་མོ་དང༌། བརྫུན་དག་མི་སྲུང་ལགས་སོ། །དེའི་ཚེ་ཁྱིམ་པ་རྒྱལ་རིགས་དང་བྲམ་ཟེ་ནས་ལྗོངས་དང༌། ཡུལ་ན་གནས་པའི་བར་རྣམས་བཅོམ་ལྡན་འདས་ཀྱི་བསྟན་པ་ལ་ཆེ་ཐོང་དུ་མ་དད་པར་འགྱུར་ཞིང༌། གང་དག་བདེ་བར་གཤེགས་པའི་བསྟན་པ་ལ་དད་པ་སྐྱེས་པ་དེ་དག་ཀྱང་རྒྱུན་ཆད་པར་འགྱུར་ལགས་སོ། །དཀར་པོའི་ཕྱོགས་ཟད་པའི་དུས་དེ་ལྟ་བུ་ཉེ་བར་གནས་པན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་ཐུགས་དགྱེས་ཤིང༌། འཇིག་རྟེན་གྱི་ཁམས་གཞན་དག་ཏུ་གཤེགས་སོ། །ལྷ་དང་གནོད་སྦྱིན་ཆོས་ཀྱིས་གནས་པ་དབང་ཆེ་བར་གྲགས་པ་རྣམས་ཀྱང་བཏང་སྙོམས་སུ་གནས་པ་འམ། དེ་ནས་འོང་བར་འགྱུར་ལགས་ཏེ། དེའི་ཚེ་ནི་བདག་ཅག་གིས་སྡིག་པ་ཅན་གྱི་གནོད་སྦྱིན་དང༌། ལུས་སྲུལ་པོ་ནས་སྡིག་པ་ཅན་གྱི་མི་རྣམས་ཀྱི་བར་བཟློག་པའི་རྡོ་ཡང་མི་ཐོགས་ལ། དེའི་ཚེ་བདག་ཅག་གིས་དཀར་པོའི་ཕྱོགས་ཟད་པ་དང༌། འཇིགས་པ་སྣ་ཚོགས་ཀྱང་བཟློག་པའི་རྔོ་མི་ཐོགས་ལགས་སོ། །དགོངས་པ་ངེས་པར་འགྲེལ་པ་ལས། སེམས་ཅན་རྣམས་ནི་གཞན་གྱི་དབང་དུ་ཡོངས་སུ་གྲུབ་པའི་ངོ་བོ་ཉིད་ལ་ཀུན་བརྟགས་པའི་ངོ་བོ་ཉིད་དུ་སྒྲོ་བཏགས་ནས། གཞན་གྱི་དབང་དང་ཡོངས་སུ་གྲུབ་པའི་ངོ་བོ་ཉིད་ལ་ཀུན་བརྟགས་པའི་ངོ་བོ་ཉིད་རྗེས་སུ་ཐ་སྙད་འདོགས་ཏེ། ཇི་ལྟ་ཇི་ལྟར་རྗེས་སུ་ཐ་སྙད་བཏགས་པས་སེམས་ཡོངས་སུ་སྒོམ་ཞིང་ཐ་སྙད་བཏགས་པའི་རྗེས་སུ་འབྲེལ་པ་འམ། ཐ་སྙད་བཏགས་པའི་བག་ལ་ཉལ་གྱིས་གཞན་གྱི་དབང་དང་ཡོངས་སུ་གྲུབ་པའི་ངོ་བོ་ཉིད་ལ་ཀུན་བརྟགས་པའི་ངོ་བོ་ཉིད་ཀྱི་མཚན་ཉིད་དུ་མངོན་པར་ཞེན་ཏོ། །ཇི་ལྟ་ཇི་ལྟར་མངོན་པར་ཞེན་པ་དེ་ལྟ་དེ་ལྟ་བུར་གཞན་གྱི་ངོ་བོ་ཉིད་ལ་ཀུན་བརྟགས་པའི་ངོ་བོ་ཉིད་དུ་མངོན་པར་ཞེན་པའི་རྒྱུ་དེ་དང་རྐྱེན་དེས་ཕྱི་མ་ལ་གཞན་གྱི་དབང་གིས་ངོ་བོ་ཉིད་རབ་ཏུ་བསྐྱེད་དོ། །གཞི་དེས་ན་
ཉོན་མོངས་པ་རྣམ་པ་གསུམ་གྱིས་ཀུན་ནས་ཉོན་མོངས་ཤིང༌། འགྲོ་བ་རིས་ལྡར་འཁོར་ཞིང་ཀུན་དུ་རྒྱུ་སྟེ་འཁོར་བ་ལས་མི་འདའོ། །གལ་ཏེ་མིག་གི་རྣམ་པར་ཤེས་པ་གཅིག་ལན་ཅིག་འབྱུང་བར་གྱུར་ན་རྣམ་པར་རྟོག་པའི་ཡིད་ཀྱི་རྣམ་པར་ཤེས་པ་མིག་གི་རྣམ་པར་ཤེས་པ་དང་སྤྱོད་ཡུལ་མཐུན་པ་གཅིག་ཀྱང་ལན་ཅིག་འབྱུང་ངོ༌། །གལ་ཏེ་ལན་གཅིག་གཉིས་དང་གསུམ་དང་བཞི་དང༌། ལན་ཅིག་རྣམ་པར་ཤེས་པའི་ཚོགས་ལྔ་རྣམས་འབྱུང་བར་གྱུར་ན་ཡང་དེ་ལ་རྣམ་བར་རྟོག་པའི་ཡིད་ཀྱི་རྣམ་པར་ཤེས་པ། རྣམ་པར་ཤེས་པའི་ཚོགས་ལྔ་དང་སྤྱོད་ཡུལ་མཐུན་པ་གཅིག་ཀྱང་ལན་ཅིག་འབྱུང་བ། །བྱམས་པ་གཞན་གྱི་དབང་གི་མཚན་ཉིད་དང༌། ཡོངས་སུ་གྲུབ་པའི་མཚན་ཉིད་ལ་རྣམ་པ་ཐམས་ཅད་དུ་ཀུན་ནས་ཉོན་མོངས་པ་དང༌། རྣམ་པར་བྱང་བའི་ཀུན་བརྟགས་པའི་མཚན་ཉིད་དང༌། ཤིན་ཏུ་བྲལ་བ་དེ་ལ་དེ་ཡང་མི་དམིགས་པ་འདི་ནི། ཐེག་པ་ཆེན་པོ་ལ་སྟོང་པ་ཉིད་ཀྱི་མཚན་ཉིད་རྫོགས་པ་ཞེས་བྱའོ། །ཉི་མའི་སྙིང་པོ་ལས། འཛམ་བུའི་གླིང་འདི་ན་མཆོད་རྟེན་དྲང་སྲོང་ཐུབ་པའི་གནས་ཀུན་རྟེན་འདི་ནི་སྔོན་གྱི་སངས་རྒྱས་དང༌། བྱང་ཆུབ་སེམས་དཔའ་དང༌། རང་རྒྱལ་བ་དང༌། ཉན་ཐོས་མང་པོ་གནས་ཤིང༌། མ་འོངས་པའི་དུས་ན་ཡང་གནས་པར་འགྱུར་བ་སྟེ། རྗེས་སུ་བསྟན་པ་ཆེན་པོ་ཡུན་རིང་དུ་གནས་པར་མཛད་པའི་ཕྱིར་དྲང་སྲོང་ཐུབ་པའི་གནས་ཀུན་རྟེན་འདི་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཆུ་ལྷའི་ལག་ཏུ་ཡོངས་སུ་གཏད་པ་མཛད་དོ། །ངས་ཀྱང་དེ་ཉིད་ཀྱི་ལག་ཏུ་ཡོངས་སུ་གཏད་དེ། འདི་ཡང་སྤྲོ་བར་འགྱུར་ཞིང་གང་ཟག་ཆོས་ཀྱིས་གནས་པ་རྣལ་འབྱོར་ཡིད་ལ་མངོན་པར་བརྩོན་པ་དག་ཡོངས་སུ་སྨིན་པར་འགྱུར་རོ། །གང་དག་གང་ཟག་ཆོས་ཀྱིས་གནས་པ་རྣམས་ལ་བསྙེན་བཀུར་ལ་མངོན་པར་བརྩོན་པའི་སྦྱིན་པ་པོ་དང༌། སྦྱིན་བདག་དེ་དག་ཀྱང་ཡོངས་སུ་བསྲུང་བར་འགྱུར་རོ། །ཀླུའི་རྒྱལ་པོ་ཆུ་ལྷས་གསོལ་བ་དེ་ལྟ་ལགས་སོ། །བ་ལོང་སྤྱོད་ཀྱི་གླིང་ན་རྡུལ་གྱི་རི་ལ་
དྲང་སྲོང་ཐུབ་པའི་གནས་བཀྲ་བ་ཀླུའི་རྒྱལ་པོ་རིན་པོ་ཆེའི་འཕེལ་བལ་ཆད་ཁྱིར་གཏད། ལུས་འཕགས་ཀྱི་གླིང་ན་ནི་བ་ལང་གི་ནའི་རི་ལ་དྲང་སྲོང་འབྱུང་བ་ཀླུའི་རྒྱལ་པོ་ཟླ་སྲུང་ལ་གཏད། སྒྲ་མི་སྙན་གྱི་གླིང་ན་རྒྱལ་དགའི་རི་ལ་སྤོས་བརྩེགས་ཀླུའི་རྒྱལ་པོ་ལུས་འབིགས་པའི་ཁབ་ལ་གཏད། བ་ལང་སྤྱོད་ཀྱི་གླིང་ན་འོད་ཟེར་འབྱུང་བ་ཀླུའི་རྒྱལ་པོ་བ་ལང་མགོ་ལ་གཏད། ཤར་ཕྱོགས་གླིང་ན་པདྨ་ཤིན་ནྱ་གྲོ་དྷ་ལྟ་བུ་ཀླུའི་རྒྱལ་པོ་དབྱིབས་སྟོང་ལ་གཏད། སྒྲ་མི་སྙན་གྱི་གླིང་ན་སྤོས་བརྩེགས་འོད་ཟེར་ཀླུའི་རྒྱལ་པོ་གནས་ན་རྒྱུ་ལ་གཏད། རྒྱ་མཚོ་ཆེན་པོའི་ནང་ན་ནོར་བུའི་སྙིང་པོའི་འོད་འཕྲོ་བ་ཀླུའི་རྒྱལ་པོ་རྒྱ་མཚོ་ལ་གཏད། རི་རབ་ཀྱི་རྩེ་མོ་ན་སུམ་ཅུ་རྩ་གསུམ་པའི་གནས་ན་མེ་ཏོག་རབ་ཏུ་རྒྱས་པའི་སྙིང་པོ་ཀླུའི་རྒྱལ་པོ་ས་སྲུང་གི་བུ་ལ་གཏང༌། འཛམ་བུའི་གླིང་ན་དགའ་འཕེལ་ཞེས་བྱ་བ་ན་གནས་བརྟན་གྱི་ཕུག་ཀླུའི་རྒྱལ་པོ་ཆེ་སྦྱང་ལ་གཏད། ཡངས་པ་ཅན་ན་ཤིན་ཏུ་བརྟན་ཀླུའི་རྒྱལ་པོ་ནོར་རྒྱས་ཀྱི་བུ་ལ་གཏད། སེར་སྐྱའི་གནས་ན་གསེར་སྒྲོན་དྲི་ཞིམ་ཀླུའི་རྒྱལ་པོ་མ་དྲོས་པ་ལ་གཏད། ཡུལ་མ་ག་དྷཱ་ན་རྒྱལ་ཆེན་ཀླུའི་རྒྱལ་པོ་རི་བོས་བྱིན་ལ་གཏད། བཅོམ་བརླག་ན་སྡུག་པའི་སྤྲིན་ཀླུའི་རྒྱལ་པོ་ཅེ་སྤྱང་རྒྱུ་བ་ལ་གཏད། ཡུལ་འཁོར་ཀོ་ས་ལ་ན་རྒྱལ་བ་དག་པ་ཀླུའི་རྒྱལ་པོ་སྲིན་བུ་ལ་གཏད། ཕུག་གི་ཕ་རོལ་ན་བཏང་བཟུང་བདེན་པའི་དྲི་ཀླུའི་རྒྱལ་པོ་བཏང་བཟུང་ལ་གཏད། ཡུལ་འཁོར་ས་འཛིན་ན་མཐོང་བའི་ལམ་རྒྱགས་ཀླུའི་རྒྱལ་པོ་ཨེ་ལའི་འདབ་ལས་གཏད། ཁ་ཆེའི་ཡུལ་ན་གུར་གུམ་གྱི་རྩེ་མོ་ཀླུའི་རྒྱལ་པོ་ཧུ་ལུ་ཧུ་ལུ་ལ་གཏད། ཡུལ་ཆུ་ལེན་ན་འོད་ཟེར་བྱེ་བའི་སྙིང་པོ་ཀླུའི་རྒྱལ་པོ་འཕྱང་བ་ལ་གཏད། རྒྱ་ཡུལ་ན་སྲེད་མེད་ཀྱི་བུའི་འོད་ཀྱི་རྒྱལ་པོ་རྒྱ་མཚོས་བྱིན་ལ་གཏད། ཁ་ཤའི་ཡུལ་ན་སའི་ནུ་མའི་གནས་རི་གླང་རུའི་དྲུང་ཆུ་བོ་གོ་མ་ཏིའི་ངོགས་ན། གོ་མ་སཱ་ལ་གན་དྷ་ནི་ཀླུའི་རྒྱལ་པོ་ཁྱིམ་བདག་གིས་བྱིན་ལ་གཏད། དེ་གལ་ཏེ་ཕྱོགས་ཐམས་ཅད་དུ་ལྟ་བར་བྱེད་ན་ཐམས་ཅད་དུ་ནམ་མཁའ་ཐམས་ཅད་ལ་དེ་བཞིན་གཤེགས་པ་མཐོང་བར་འགྱུར་
རོ། །ཆུང་ངུར་ལྟ་བར་བྱེད་ན་དེ་བཞིན་གཤེགས་པ་ཆུང་ངུ་ཉིད་དུ་མཐོང་ངོ༌། །ཚད་མེད་པར་ལྟ་བར་བྱེད་ན་ཚད་མེད་པར་མཐོང་ངོ༌། །དེ་འདི་སྙམ་དུ་སེམས་ཏེ། དེ་བཞིན་གཤེགས་པ་འདི་ག་ལས་གཤེགས་སྙམ་མོ། །དེ་འདི་སྙམ་དུ་སེམས་ཏེ། དེ་བཞིན་གཤེགས་པ་ནི་ག་ལས་ཀྱང་མ་གཤེགས་སོ། །གང་དུ་ཡང་མི་བཞུད་དོ། །དེ་གང་དུ་ཡང་དེ་བཞིན་གཤེགས་པ་བཞུད་པ་མི་དམིགས་བྱོན་པ་མི་དམིགས་སོ། །ཡང་དེ་འདི་སྙམ་དུ་སེམས་ཏེ། ལུས་ཀྱི་རྒྱུ་ཁམས་གསུམ་པ་འདི་ནི་སེམས་ཙམ་པས་སུས་ཇི་ལྟར་རྣམ་པར་བརྟགས་པ་དེ་བཞིན་དུ་མཐོང་ངོ༌། །བདག་གིས་རང་གི་སེམས་ཀྱིས་སངས་རྒྱས་སུ་བྱེད་དོ། །བདག་གི་སེམས་ཀྱིས་སངས་རྒྱས་མཐོང་ངོ༌། །བདག་གི་སེམས་ཉིད་སངས་རྒྱས་སོ། །བདག་གི་སེམས་ཉིད་ལུས་སོ། །སེམས་ཉིད་ཀྱང་ནམ་མཁའོ། །བདག་གི་སེམས་ཀྱི་རྣམ་པར་རྟོག་པས་སངས་རྒྱས་མཐོང་ངོ༌། །སེམས་ཀྱིས་སེམས་མི་མཐོང་ངོ༌། །སེམས་སུ་འདུ་ཤེས་པ་རྣམས་ནི་ཤེས་པ་མེད་པའོ། །སེམས་སུ་འདུ་ཤེས་པ་རྣམས་ནི་ལྡན་པའོ། །ལྡོག་པ་ནི་སྙིང་པོ་མེད་པའོ། །ཆོས་དེ་དག་ནི་ཤེས་པ་མེད་པའི་ཕྱིར་ཡང་དག་པར་མ་བྱུང་བའོ། །སུས་སྔོན་བྱང་ཆུབ་ཏུ་སེམས་བསྐྱེད་ཅིང་ཤེས་རབ་གང་གིས་སྟོང་པ་རྟོགས་པ་དེ་ཡང་རང་བཞིན་གྱིས་སྟོང་པའོ་སྙམ་ནས། དམིགས་པ་ཡིད་ལ་བྱེད་པ་དེས་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འཐོབ་བོ། །འོན་ཀྱང་ཡང་ཉན་ཐོས་ཀྱི་ཐེག་པ་ཡིན་ཏེ། དེ་ལྟར་མཚན་མ་མེད་པའི་གཟུགས་ཐམས་ཅད་རྣམ་པར་བསྒོམས་པས་ངེས་པར་འབྱེད་པ་ཡོངས་སུ་དག་པ་ཡིན། འདོད་ཆགས་དང་བྲལ་བ་ཡོངས་སུ་དག་པ་ཡིན། མ་རིག་པ་ཡོངས་སུ་དག་པ་ཡིན་ནོ། །མདོ་སྡེ་རབ་ཏུ་རྣམ་པར་འབྱེད་པ་ལས། ཤཱ་རིའི་བུ་སྐྱེས་བུ་དམ་པ་མ་ཡིན་པའི་འཚོ་བའི་ལམ་དང་བྱིང་བ་འཐབ་མོ་འཛིན་པས་བདག་དང་གཞན་ཡང་ཕུང་བར་བྱེད་པ་དེ་ལྟ་བུས་འཛམ་བུའི་གླིང་འདི་གང་བར་འགྱུར་རོ། །གཞན་ཡང་ཤཱ་རིའི་བུ་བཅོམ་ལྡན་འདས་འོད་སྲུངས་ཀྱིས་ཀྱང་དེ་བཞིན་གཤེགས་པ་ཤཱཀྱ་ཐུབ་པའི་གསུང་རབ་ནི་རྙེད་པ་དང་བཀུར་སྟིས་མྱུར་དུ་ནུབ་པར་འགྱུར་ཞེས་བྱ་བ་འདི་ལུང་བསྟན་ཏེ། ཤཱ་རིའི་
བུ་རྙེད་པ་དང་བཀུར་སྟིས་ནི་ཆོས་འདུལ་བ་འདི་མྱུར་དུ་ནུབ་པར་འགྱུར་རོ། །ཤཱ་རིའི་བུ་དགེ་སློང་ཆོས་ཡོངས་སུ་མ་དག་པ་སྟོན་པ་ནི་དེ་བཞིན་གཤེགས་པས་དགོངས་ཏེ་གསུངས་པ་མི་ཤེས་པར་གཞན་དག་ལས་ཆོས་སྟོན་པར་བྱེད་དོ། །དེ་དེ་བཞིན་གཤེགས་པས་སེམས་ཅན་མེད་པ་དང༌། སྲོག་མེད་པ་དང༌། གསོ་བ་མེད་པ་དང༌། གང་ཟག་མེད་པའི་ཆོས་བསྟན་པ་དེ་དག་ལ་བདག་གོ་ཞེའམ། སེམས་ཅན་ནོ་ཞེའམ། གསོ་བའོ་ཞེའམ། གང་ཟག་གོ་ཞེས་ཆོས་སྟོན་པར་བྱེད་དོ། །དེས་ནི་ང་ལ་ཡང་སྐུར་པ་བཏབ་པ་ཡིན། ཆོས་ཀྱང་སྤངས་པ་ཡིན། དགེ་འདུན་ལ་ཡང་མི་སྙན་པར་བརྗོད་པ་ཡིན་ཏེ། དེའི་རྣམ་པར་སྨིན་པ་གང་ཡིན་པ་དེ་ནི། དེ་བཞིན་གཤེགས་པ་མ་གཏོགས་པ་ལྷའི་དབང་པོ་དང་བཅས་པའི་འཇིག་རྟེན་གྱིས་ཤེས་པར་ནུས་པ་མ་ཡིན་ནོ། །ཤཱ་རིའི་བུ་ཁྱོད་མོས་པར་བྱ། ཁོང་དུ་ཆུད་པར་བྱ། ཆོས་ཡོངས་སུ་མ་དག་པར་སྟོན་པའི་དགེ་སློང་དེ། མི་དགེ་བའི་བརྩོན་པ་ཇི་ཙམ་དང་ལྡན་པ་དེའི་བྱའོ། །ཤཱ་རིའི་བུ་དེ་ཇི་སྙམ་དུ་སེམས། འཛམ་བུའི་གླིང་གི་སེམས་ཅན་མང་ངམ། གསོལ་པ། བཅོམ་ལྡན་འདས་མང་ལགས་སོ། །བཀའ་སྩལ་པ། ཤཱ་རིའི་བུ་འགའ་ཞིག་གིས་འཛམ་བུའི་གླིང་གི་སེམས་ཅན་རྣམས་བསད་ན་དེ་གཞི་དེས་མི་དགེ་བའི་རྩ་བ་མང་པོ་མངོན་པར་འདུས་བྱས་པར་མི་འགྱུར་རམ། གསོལ་པ་མང་ལགས་སོ། །བདེ་བར་གཤེགས་པ་མང་ལགས་སོ། །བཀའ་སྩལ་བ་གང་ཞིག་སངས་རྒྱས་ཀྱི་བྱང་ཆུབ་མི་ཤེས་པར་གཞན་དག་ལ་ཆོས་ཡོངས་སུ་མ་དག་པར་སྟོན་པ་དེ་ནི་དེ་བས་ཀྱང་ཆོས་མི་དགེ་བ་མང་དུ་མངོན་པར་འདུས་བྱས་པར་འགྱུར་རོ། །དེ་ཅིའི་ཕྱིར་ཞེ་ན། གང་ཞིག་སངས་རྒྱས་ཀྱི་བྱང་ཆུབ་སྤོང་བ་དེས་ནི་འདས་པ་དང་མ་འོངས་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་ལ་སྐུར་པ་བཏབ་པ་ཡིན་ནོ། །དེ་ཅིའི་ཕྱིར་ཞེ་ན། སྔོན་དང་མ་འོངས་པ་དང༌། ད་ལྟར་བྱུང་བ་དང༌། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱང་དོན་དམ་པ་སྟོང་པ་ཉིད་ཁོ་ན་སྟོན་ཅིང་བདག་མེད་པ་དང༌། སེམས་ཅན་མེད་པ་དང༌། སྲོག་མེད་པ་དང༌། གསོ་བ་མེད་པ་དང༌། གང་ཟག་མེད་པའི་ཆོས་སྟོན་ཏོ། །ཤཱ་རིའི་བུ་
སངས་རྒྱས་བཅོམ་ལྡན་འདས་རྣམས་ཀྱིས་དོན་དམ་པ་སྟོང་པ་ཉིད་ཀྱི་ཆོས་བསྟན་པ་འདི་ནི་ཡང་དག་ཕུལ་ཡིན་ཏེ། འདི་ལྟ་སྟེ། སངས་རྒྱས་ཀྱི་ཆོས་རྣམས་ནི་རང་གི་ངང་གིས་འཇིག་པ་ངོ་བོ་ཉིད་མེད་པ་དམིགས་པ་མེད་པ་སྟོང་བ་ཉིད་དོ། །སྔོན་དེ་བཞིན་གཤེགས་པ་བཀོད་པ་ཆེན་པོ་བྱུང་སྟེ། དེ་ཡོངས་སུ་མྱ་ངན་ལས་འདས་ནས་སྐུ་གདུང་ནི་རྒྱས་པར་བྱས་ཏེ། དཔེར་ན་མ་འོངས་པའི་དུས་ན་ང་ཇི་ལྟ་བ་བཞིན་ནོ། །དམ་པའི་ཆོས་ནི་ལོ་ལྔ་བརྒྱར་གནས་པར་གྱུར་ཏེ། དཔེར་ན་མ་འོངས་པའི་དུས་ན་ངའི་ཇི་ལྟ་བ་བཞིན་ནོ། །ཤཱ་རིའི་བུ་དེ་བཞིན་གཤེགས་པ་བཞུགས་པ་ན་ནི་སངས་རྒྱས་དཀོན་མཆོག་གཅིག །ཆོས་དཀོན་མཆོག་གཅིག །དགེ་འདུན་དཀོན་མཆོག་གཅིག་གོ །ཡོངས་སུ་མྱ་ངན་ལས་འདས་ནས་ནི་བསྟན་པ་རྣམ་པ་ལྡར་འགྱུར་རོ། །ཤཱ་རིའི་བུ་གང་ཡང་བསྟན་པ་འདི་ལ་བདུད་སྡིག་ཅན་དགེ་སློང་གི་གཟུགས་སུ་སྦྲུལ་ནས། ལོག་པར་འཛིན་པ་རྣམ་པ་དུ་མར་རབ་ཏུ་སྟོན་ཅིང་སྐྱེ་བོ་མང་པོ་དེ་ལ་འགོད་པའི་དུས་དེ་དང་དེ་ཡོད་དོ། །དེ་ལ་འདི་ལྟ་བུའི་ལོག་པར་འཛིན་པ་ཡང་དག་པར་རབ་ཏུ་སྟོན་ཏོ། །འདི་ལྟ་སྟེ། ཡིད་ཀྱི་གཞི་དང་ལྔ་ཆ་མཐུན་པའི་གཞི་དང་སྐད་ཅིག་མ་དང་ཆ་མཐུན་པའི་གཞི་དང༌། ཐམས་ཅད་ཡོད་པར་སྨྲ་བའི་གཞི་དང༌། གང་ཟག་གི་གཞི་དང༌། དམིགས་པའི་གཞིའོ། །ཤཱ་རིའི་བུ་སངས་རྒྱས་དང༌། ཉན་ཐོས་རྣམས་ཀྱིས་རབ་ཏུ་མ་བསྟན་པ་ལོག་པར་འཛིན་པ་དེ་ལྟ་བུ་རབ་ཏུ་སྟོན་པར་འགྱུར་རོ། །བཀའ་སྩལ་པ། ཤཱ་རིའི་བུ་ང་ནི་སྦྲུལ་རོ་མྱགས་པ་འམ། ཁྱི་རོ་མྱགས་པའམ། མི་རོ་མྱགས་པས་གང་བའི་ས་ཕྱོགས་སྤྱོད་ལམ་གང་ཡང་རུང་བས་གནས་པར་སྤྲོའི། ཤཱ་རིའི་བུ་དགེ་སློང་ཚུལ་ཁྲིམས་འཆལ་པ། ཆོ་ག་ཉམས་པ། འཚོ་བ་ཉམས་པ། ལྟ་བ་ཉམས་པ་ནི་མཚན་གཅིག་གམ། ཉིན་གཅིག་གམ། སྐད་ཅིག་གམ། ཐ་ན་སེ་གོལ་གཏོགས་པ་ཙམ་ཡང་གནས་པར་མི་སྤྲོའོ། །ཤཱ་རིའི་བུ་བླུན་པོ་དེ་དག་གིས་དེ་བཞིན་གཤེགས་པས་གསུངས་པའི་མདོ་
སྡེ་འདི་ལྟ་བུ་ཐོས་ནས་སྐྲག་པར་འགྱུར། ཀུན་དུ་སྐྲག་པར་འགྱུར། ཀུན་དུ་དངང་བར་འགྱུར། གཡང་སའི་འདུ་ཤེས་སུ་འགྱུར། གཡངས་ས་ཆེན་པོའི་འདུ་ཤེས་སུ་འགྱུར་རོ། །དེ་ཅིའི་ཕྱིར་ཞེ་ན། མདོ་སྡེ་འདི་ལས་ཚུལ་ཁྲིམས་འཆལ་པའི་སྐྱོན་མ་ལུས་པར་བཤད་པས་སོ། །ཤཱ་རིའི་བུ་རྒྱུ་གང་དང་རྐྱེན་གང་གིས་ཚུལ་ཁྲིམས་འཆལ་པ་ཞེས་བྱ་ཞེ་ན། འཆལ་པའི་ཚུལ་ཁྲིམས་སྤྱོད་པས་ན། ཚུལ་ཁྲིམས་འཆལ་པ་ཞེས་བྱའོ། །ཚིག་དག་གི་སྤྱོད་པ་དང༌། དུས་གསུམ་གྱི་སྤྱོད་པ་དང༌། ལས་ཀྱི་མཐའ་མང་པོའི་སྤྱོད་པ་དང༌། སྨྲ་བ་མང་པོའི་སྤྱོད་པ་དང༌། གཉིད་ལ་དགའ་བ་དང༌། འདུ་འཛི་ལ་དགའ་བ་དང༌། སྤྲོས་པ་ལ་དགའ་བ་དང༌། རིགས་པ་མ་ཡིན་པའི་གཏམ་མ་ཡིན་པ་ཟེར་བ་དང༌། བདག་ཏུ་འཛིན་པ་དང༌། སེམས་ཅན་དང༌། སྲོག་དང༌། གང་ཟག་ཏུ་འཛིན་པ་དང༌། ཕ་དང༌། མ་དང༌། དགེ་སློང་དང༌། བྲམ་ཟེར་མི་འཛིན་པ་དང༌། སྨན་དཔྱད་ཀྱི་ཐ་སྙད་བྱེད་པ་དང༌། ཁྱིམ་སུན་འབྱིན་པ་དང༌། ཕོ་ཉར་འགྲོ་བ་དང༌། ཁྱིམ་གྱི་ལས་ཀྱི་མཐའ་ལ་དགའ་བ་དང༌། ཁྱིམ་པ་དང་འདྲེ་བ་དང༌། ཁྱིམ་པའི་གཡོག་བྱེད་པ་དང༌། ལོ་མ་དང༌། མེ་ཏོག་དང༌། འབྲས་བུ་འཇོམས་པ་དང༌། ལོ་ཉི་ཤུར་མ་ལོན་པ་བསྙེན་པར་རྫོགས་བར་བྱེད་པ་དང༌། ཡན་ལག་མ་ཚང་བ་བསྙེན་པར་རྫོགས་པར་བྱེད་པ་དང༌། འབྲུ་རྗེན་ལེན་པ་དང༌། ཤ་རྗེན་ལེན་པ་དང༌། གསེར་དངུལ་ལེན་པ་དང༌། བརྫུན་དུ་སྨྲ་བ་དང༌། སྤྱོད་ལམ་ལྷོད་པ་དང༌། སྲན་ཆུང་བ་དང༌། བྱས་པ་མི་གཟོ་བ་དང༌། དད་པ་ཆུང་བ་དང༌། རྨུགས་པ་དང༌། གཉིད་མང་བ་དང༌། འགྱོད་པ་མང་བ་དང༌། ཁྲོ་བ་དང༌། གཡོ་སྒྱུ་མང་བ་དང༌། ཕྲག་དོག་ཆེ་བ་དང༌། ངོ་ཚ་བ་དང༌། ཁྲེལ་མེད་པ་དང༌། རྒྱགས་པ་དང༌། དྲེགས་པ་དང༌། ཁེངས་པ་དང༌། འགྱིང་བ་དང༌། ཁ་ཟས་རྒྱགས་པ་དང༌། སེམས་མི་ཞུམ་པས་རྒྱགས་པ་དང༌། ང་རྒྱལ་བདུན་དང༌། ངན་གཡོ་དང༌། ཁ་གསག་དང༌། གཞོགས་སློང་དང༌། ཐོབ་ཀྱིས་འཇལ་བ་དང༌། རྙེད་པས་རྙེད་པར་བྱེད་པ་དང༌། དཀོན་མཆོག་གསུམ་ལ་དད་པ་མི་མངའ་བ་དང༌། ལས་ཀྱི་རྣམ་པར་སྨིན་པ་ལ་ཡིད་མི་ཆེས་པ་དང༌། ཚེ་འདི་ཆེད་ཆེར་འཛིན་པ་དང༌། ཚེ་ཕྱི་མ་ལ་ཆེད་ཆེར་མི་འཛིན་པ་དང༌། ཐེ་ཚོམ་དང་
ཡིད་གཉིས་མང་བས་ན། ཚུལ་ཁྲིམས་འཆལ་བ་ཞེས་བྱ་སྟེ། ཤཱ་རིའི་བུ་ལུས་དང༌། ངག་དང༌། ཡིད་ཀྱི་ལས་མི་གཙང་བ་དང༌། འཚོ་བ་མི་གཙང་བ་དང་ལྡན་པ་དེ་དག་ནི་ཕྱིས་དང་འདྲ་འོ། །དེ་དག་ནི་ལུས་ཞིག་སྟེ། ཤི་ནས་སེམས་ཅན་དམྱལ་བ་དག་ཏུ་སྐྱེ་བར་འགྱུར་རོ། །དེ་དག་ནི་སངས་རྒྱས་དང༌། སངས་རྒྱས་ཀྱི་ཉན་ཐོས་དང༌། དགེ་བ་དོན་དུ་གཉེར་བ་རྣམས་ཀྱིས་སྤང་བར་བྱ་སྟེ། དཔེར་ན་མི་གཙང་བའི་སྣོད་ཀྱི་ནང་དུ་ཙནྡན་དམར་པོ་བཅུག་ན། དེ་ཡང་མི་གཙང་བར་འགྱུར་བ་བཞིན་ནོ། །འབུམ་པ་ལས། ཤཱ་རིའི་བུ་འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་སྤྱོད་པ་དང་པོ་སེམས་བསྐྱེད་པ་ཉིད་ཀྱིས་བྱང་ཆུབ་སེམས་དཔའི་སྐྱོན་མེད་པ་ལ་ཞུགས་ནས་ཕྱིར་མི་ལྡོག་པའི་ས་ཐོབ་པ་ཡང་ཡོད་དོ། །ཤཱ་རིའི་བུ་འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དང་པོ་སེམས་བསྐྱེད་པ་ཉིད་ཀྱིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་ཞིང་མངོན་པར་སངས་རྒྱས་ནས། ཆོས་ཀྱི་འཁོར་ལོ་བསྐོར་ཏེ། སེམས་ཅན་གྲངས་མེད་ཚད་མེད་པའི་དོན་བྱས་ནས། ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་སུ་མྱ་ངན་ལས་འདས་ཞིང༌། དེ་དག་ཡོངས་སུ་མྱ་ངན་ལས་འདས་ནས་ཀྱང༌། དམ་པའི་ཆོས་བསྐལ་པའམ། བསྐལ་པ་ལས་ལྷག་པར་གནས་པ་དག་ཀྱང་ཡོད་དོ། །འབུམ་པའི་ཊཱི་ཀ་ལས། བཅུ་གཉིས་པ་ནི་ཡོན་ཏན་དེ་དག་ཉིད་དང་ལྡན་ཞིང་སངས་རྒྱས་ཀྱི་ཞིང་གི་སྟོབས་བསྐྱེད་པ་དང༌། བདག་ཉིད་ཡོན་ཏན་རྣམས་ཀྱིས་སེམས་ཀྱི་རྒྱུད་ཡོངས་སུ་དག་པར་བྱས་ཤིང༌། རྩོལ་བ་ཆུང་དུས་ས་དང་པོ་ཐོབ་པར་བྱས་ནས་འཕྲལ་ཁོ་ནར་ཆེན་པོ་འབད་མི་དགོས་པར་སངས་རྒྱས་ནས་ཆོས་ཀྱི་འཁོར་ལོ་བསྐོར་ཏེ། དུས་ཇི་སྲིད་ཀྱི་བར་དུ་བསྟན་པ་གནས་པར་བྱེད་དོ། །ཤནྟ་དེ་བས་བཤད་པ། གལ་ཏེ་གཉེན་པོར་བྱར་ཡོད་ན། །དེ་ལ་ཅི་ཕྱིར་ཡིད་མི་བདེ། །ཅི་སྟེ་གཉེན་པོར་བྱར་མེད་ནའང༌། །དེ་ལ་ཅི་ཕྱིར་ཡིད་མི་བདེ། །ཡིད་མི་བདེ་དང་ཁྲོས་རྒྱལ་བ། །གཉེན་པོ་ལ་ནི་རྨོངས་པར་འགྱུར། །
ཞུམ་པའི་ཕྱིར་ནི་སྤྲོ་བ་མེད། །རྒུད་པ་ཆེན་པོས་ཟིན་པར་འགྱུར། །དེ་སེམས་པས་ན་ཡུད་ལའང༌། །ཚེ་ནི་ཐུང་བར་འགྱུར་བ་ཡིན། །དེ་ལྟ་བས་ན་དོན་མེད་པ། །གནོད་པ་བཞིན་དུ་གོམས་པར་སྤང༌། །ཡིད་མི་བདེ་བ་སྤང་བ་ཇི་ལྟར་འཐོབ་ཅེ་ན། ཡང་བ་དང༌། ཤིན་ཏུ་མཉེན་པའི་སེམས་བོར་བ་སྟེ། དྲག་ཤུལ་ཅན་གྱིས་ཞུས་པ་ལས། ཤིང་བལ་གྱི་འདབ་མ་ལྟ་བུའི་སེམས་བོར་བ་ཞེས་གསུངས་པ་དང༌། སྡོང་པོ་བཀོད་པ་ལས། ཉོན་མོངས་པ་ཐམས་ཅད་གཞོམ་པའི་ཕྱིར་ཐུབ་པར་དཀའ་བའི་སེམས་བསྐྱེད་པར་བྱའོ་ཞེས་གསུངས་པ་ལྟ་བུའོ། །གོམས་ན་དཀའ་བར་འགྱུར་བ་ཅུང་ཟད་ཀྱང་མེད་དེ། དཔེར་ན་ཉོན་མོངས་པའི་དབང་གིས་སེམས་ཅན་ཐམས་ཅད་སྡུག་བསྔལ་བ་ལ་བདེ་བར་འདུ་ཤེས་པ་བཞིན་དུ་སྡུག་བསྔལ་འབྱུང་བ་ཐམས་ཅད་ལ་བདེ་བར་འདུ་ཤེས་ཉེ་བར་གཞག་པ་གོམས་པར་བདེ་བའི་འདུ་ཤེས་ཉིད་དུ་གནས་སོ། །དེས་ན་ཆོས་ཐམས་ཅད་ལ་བདེ་བར་འགྲོ་བ་ཞེས་བྱ་བའི་ཏིང་ངེ་འཛིན་འཐོབ་སྟེ། སེམས་ཅན་དམྱལ་བའི་སྡུག་བསྔལ་གྱིས་བབ་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་ཏེ། ཡབ་དང་སྲས་མཇལ་བའི་མདོ་ལས་བྱུང་བ་བཞིན་ནོ། །དགའ་བོ་རབ་ཏུ་བྱུང་བའི་མདོ་ལས། བསྐལ་པ་བྱེ་བ་སྟོང་དང་ནི། །བརྒྱ་དང་ཁྲག་ཁྲིག་དག་ཏུ་ཡང༌། །སངས་རྒྱས་སྒྲ་ཡང་མི་ཐོས་ན། །སངས་རྒྱས་མཐོང་བ་གལ་ཞིག །ཨུ་དུམ་བཱ་རའི་མེ་ཏོག་ནི། །ཤིང་ལས་ཤིན་ཏུ་རྙེད་དཀའ་ལྟར། །དེ་བཞིན་སངས་རྒྱས་རྙེད་དཀའ་སྟེ། །ཁྱོད་ཀྱིས་དེ་ནི་རྙེད་གྱུར་ན། །དགའ་བོ་ཁྱོད་ཀྱིས་རབ་ཏུ་འབྱུང༌། །དལ་བ་ཤིན་ཏུ་རྙེད་དཀའ་རྙེད། །དགའ་བོ་སྟོན་པར་མཐོང་གྱུར་བ། །ང་ལ་མི་མཉེས་མ་བྱེད་ཅིག །གཉའ་ཤིང་བུག་ཅན་དེ་ཡང༌། རླུང་གིས་བསྐྱོད་ནས་ཕྱོགས་ཕྱོགས་སུ་རྒྱུག་པར་བྱེད་པ་ན། དགའ་བོ་བརྒྱ་ལ་རྐྱེན་ཞིག་གིས་རུས་སྦལ་ཞར་བ་དེའི་མགྲིན་པ་གཉའ་ཤིང་གི་བུ་ག་དེར་འཇུག་པར་འགྱུར་གྱི་དགའ་བོ་མི་ཉིད་ཐོབ་པ་ནི་མ་ཡིན་ནོ། །དལ་བ་ཕུན་སུམ་ཚོགས་པ་ཡང་དེ་བཞིན་ནོ། །ཕྱོགས་བཅུའི་མུན་པ་རྣམ་པར་སེལ་བ་ལས། ནུབ་བྱང་གི་མཚམས་
ན་བུདྡྷ་ཡིད་གཉིས་ཀུན་འཇོམས་རྣམ་པར་གནོན་པ་ཞེས་བྱ་བ་བཞུགས་ཏེ། དེ་བྱང་ཆུབ་ཀྱི་ཤིང་དྲུང་དུ་བཞུགས་པ་སྟོང་གསུམ་གྱི་བདུད་ཀྱི་རིས་ཀྱི་ལྷ་ཇི་སྙེད་པ་ཐམས་ཅད་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པར་མཛད་དེ། སྐྱེས་བུའི་རྩལ་དེ་ལྟ་བུ་བྱུང་བ་ཡིན་ནོ། །བྱ་བ་ཀུན་ལ་ཉིན་མཚན་དུ། །སངས་རྒྱས་དེ་ནི་དྲན་བྱ་ཞིང༌། །བྱང་ཆུབ་སེམས་ཀྱང་མ་བཏང་དང༌། །ཁྱོད་ལ་འཇིགས་པ་འབྱུང་མི་འགྱུར། །བྱམས་པ་སེང་གེའི་སྒྲ་ཆེན་པོ་ལས། དགེ་སྦྱོང་ཆོམ་རྐུན་བཞི་ལ། དགེ་སློང་དགེ་སྦྱོང་གི་ཁ་དོག་དང༌། རྟགས་དང་དབྱིབས་ལ་གནས་ཤིང་ཚུལ་ཁྲིམས་འཆལ་ཅིང་སྡིག་པའི་ཆོས་དང་ལྡན་པ་དང༌། དབེན་གནས་སུ་སོང་བ་སྟེ། མི་དགེ་བའི་རྣམ་པར་རྟོག་པ་དག་ལ་གནས་པ་དང་འབྲས་བུ་མ་ཐོབ་པ་བཞིན་རྙེད་པ་ལ་སོགས་པ་ལ་ཆགས་པས་འབྲས་བུ་ཐོབ་པར་ལས་འཆི་བ་དང༌། འདག་བསྟོད་ཅིང་གཞན་སྨོད་པའོ། །བཀའ་སྩལ་པ། འོད་སྲུངས་དེ་བཞིན་གཤེགས་པ་རིང་པོར་མི་ཐོགས་པར་ཡོངས་སུ་མྱ་ངན་ལས་འདའ་བར་འགྱུར་རོ། །གསོལ་པ། དམ་པའི་ཆོས་ཡོངས་སུ་བསྲུང་བའི་སླད་དུ་བསྐལ་བ་པས་ལྷག་པར་བཞུགས་སུ་གསོལ། །བཀའ་སྩལ་པ། གལ་ཏེ་སངས་རྒྱས་སྟོང་སྙེད་ཀྱིས་ཆོ་འཕྲུལ་དང་བཅས་པའི་ཆོས་སྟོན་དུ་ཟིན་ཀྱང༌། སྐྱེས་བུ་དམ་པ་མ་ཡིན་པ་དེ་དག་སྡིག་པ་འཛིན་པ་དེ་དག་ལས་ཕྱིར་གཟུང་བའམ་བཟློག་བར་མི་སྤྱོད་དོ། །བཀའ་སྩལ་པ། བྱམས་པ་ཕྱི་མའི་དུས་ལྔ་བརྒྱ་ཐ་མ་ལ། བྱང་ཆུབ་སེམས་དཔར་ཁས་འཆེ་བ་ཁྱིའི་ཆོས་ཀུན་དུ་སྤྱོད་པ་འབྱུང་སྟེ། དེས་སྔོན་ཕྱིན་པའི་ཁྱིམ་དེར་དགེ་སློང་གཞན་འོང་བར་མཐོང་ན། ཁྲོ་བས་ལྟ་བ་དང་ཉེས་པ་འདི་ཡོད་དོ་ཞེས་བྱ་བ་ལ་སོགས་པ་རྗོད་པར་བྱེད་དེ། དེ་དག་ནི་སྐྱུགས་པའི་རྒྱུར་གྱུར་པ་རིང་དུ་མི་གནས་པ་སྨད་པར་བྱ་བའི་ཟས་ཁམ་འགའི་ཕྱིར་བསོད་ནམས་མ་ཡིན་པ་མང་དུ་སྐྱེད་དོ། །དེ་དག་ཡི་དྭགས་ཀྱི་ཆོས་ཀུན་དུ་སྤྱོད་དེ། སྣོག་པ་དང༌། སེམས་དམན་པ་དང་ལྡན་པ་ཡིན་ཏེ། མིང་གིས་བྱང་ཆུབ་སེམས་དཔར་ཁས་འཆེ་ཞིང༌། བདག་ཉིད་སྡིག་པ་ཅན་གྱི་
བསམ་པ་དང་ལྡན་བཞིན་དུ། སངས་རྒྱས་དང་བྱང་ཆུབ་སེམས་དཔའི་བསྔགས་པ་བརྗོད་ནས། ཟས་དང་སྐོམ་སྒྲུབ་པར་བྱེད་དོ། །བྱམས་པ་དཔེར་ན། སེང་གེའི་སྒྲ་སྒྲོགས་ཤིང་ཝའི་ལས་བྱེད་པ་ལྟར་དེ་དག་བསྡུ་བའི་དངོས་པོ་བཞིའི་བསྔགས་པ་བརྗོད་ཅིང༌། སེམས་ཅན་འགའ་ལ་ཡང་སྦྱིན་པ་ལ་སོགས་པ་མི་སྤྱོད་པས། ཚིག་ཙམ་དུ་འགྱུར་གྱི་ཡོན་ཏན་ཡང་དག་བ་བླང་བ་དང་འབྲེལ་པའི་སྤྱོད་པས་བརྩོན་པ་ནི་མ་ཡིན་ནོ། །དེ་དག་ནི་ཇི་ལྟར་གཞན་དག་གིས་མ་རྙེད་པས་ཡི་རང་བ་དེ་ལྟར་བདག་ཉིད་ཀྱིས་རྙེད་པས་ནི་དེ་ལྟ་མ་ཡིན་ནོ། །ཇི་ལྟར་གཞན་གྱི་རྙེད་པས་ཡིད་མི་བདེ་བར་འགྱུར་བ་ལྟར་བདག་ཉིད་ཀྱིས་བདེ་བའི་ཡོ་བྱད་ཐམས་ཅད་ལ་མི་ལྟ་བར་གཞན་ལ་སྦྱིན་དགོས་ན། དེ་དག་ཇི་ཙམ་དུ་ཕྱིན་ཅི་ལོག་ཏུ་འགྱུར་པ་ལྟོས། དགེ་སློང་ཁྱིམ་རྣམས་སུ་འགྲོ་བས་ཆོས་ཀྱི་སྐྱེས་མ་གཏོགས་པ་ཟང་ཟིང་གི་ཡོ་བྱད་འདུ་འཛིའི་གཏམ་མི་བྱ་སྟེ། དེ་དག་ནི་ཕན་འདོགས་པ་མ་ཡིན་ནོ། །དེ་ལས་དགོངས་ནས། གང་ཞིག་གང་གཱའི་བྱེ་སྙེད་ཀྱི། །འཇིག་རྟེན་ཁམས་མཆོག་རིན་ཆེན་གང་བྱས་ཏེ། །དགའ་མཆོག་སེམས་ཀྱིས་རྒྱལ་ལ་ཕུལ་བ་དང༌། །གང་གིས་སེམས་ཅན་གཅིག་ལ་ཚིགས་བཅད་བྱིན། །རིན་ཆེན་སྦྱིན་པ་ཤིན་ཏུ་རྒྱ་ཆེན་དེས། །ཚིགས་བཅད་སྦྱིན་པ་སྙིང་རྗེས་བསྒྲུབས་དེ་ལ། །ཆར་ཡང་མི་ཕོད་གྲངས་སུའང་མ་ཡིན་ན། །གཉིས་སམ་གསུམ་ལ་བསམ་དུ་ག་ལ་ཡོད། །ཅེས་བསྟན་ཏོ། །བྱང་ཆུབ་སེམས་དཔའི་ཐེག་པ་བ་རྣམས་ནི་ལས་ཡོངས་སུ་བསལ་བ་བྱས་པས་ན། མི་དགེ་བའི་ལས་ཆུད་ངུས་ངན་སོང་དུ་སྐྱེ་བར་མི་འགྱུར་མོད་ཀྱི། བདག་གྲོལ་བས་གཞན་གྲོལ་བར་འདོད་པས་འཛེམ་དོགས་དང་ལྡན་པ་དང༌། མྱུར་དུ་བསལ་ཞིང་འཇིག་རྟེན་ཕ་རོལ་ལ་འཇིགས་པར་བལྟ་བར་བྱའོ། །འདི་ལ་བདག་དང་སེམས་ཅན་དང༌། །སྲོག་དང་གང་ཟག་མ་མཆིས་པར། །བཟོད་པ་བླ་མེད་གང་ལགས་པ། །སྦྱིན་པ་དེ་ནི་སྦྱིན་ཆེན་ལགས། །ཞི་བའི་ཚུལ་ལས་མི་གཡོ་བའི། །ཚུལ་ཁྲིམས་ཡོངས་སུ་སྦྱང་བར་བྱ། །
གང་ཞིག་ཞི་ཚུལ་མཛེས་རྟོགས་པ། །དེ་ནི་ཚུལ་ཁྲིམས་མཆོག་ཡིན་གསུངས། །བརྩོན་འགྲུས་བརྟན་པའང་བརྩོན་པར་བྱོས། །འདུས་བྱས་ཀུན་ཀྱང་སྤང་བར་གྱིས། །དབེན་པར་ལྟ་བ་གང་ཡིན་པ། །དེ་ནི་སངས་རྒྱས་བརྩོན་འགྲུས་གསུངས། །དངོས་པོའི་དངོས་པོ་མེད་པས་ན། །དངོས་པོ་ཐམས་ཅད་བསྲེག་པར་བྱ། །ཉོན་མོངས་མེད་པ་གང་ཡིན་པ། །དེ་ནི་རྟོགས་མེད་བསམ་གཏན་ཡིན། །ཚུ་རོལ་མ་ཡིན་ཕ་རོལ་མིན། །དབུས་སུའང་གནས་པར་མི་བྱ་སྟེ། །དུས་གསུམ་མཉམ་ལྟ་གང་ཡིན་པ། །དེ་ནི་ཤེས་རབ་དམ་པ་ཡིན། །གནས་བརྟན་འོད་སྲུངས་ཆེན་པོས་ནི། །ཚུ་རོལ་མ་ཡིན་ཕ་རོལ་མིན། །དབུས་སུའང་གནས་པར་མི་བྱ་སྟེ། །དུས་གསུམ་མཉམ་ལྟ་གང་ཡིན་པ། །དེ་ནི་ཤེས་རབ་དམ་པ་ཡིན། །གནས་བརྟན་འོད་སྲུངས་ཆེན་པོས་གསོལ་པ། སྐྱེ་བོ་མང་པོ་ལ་སྨན་པར་བགྱི་བའི་སླད་དུ། བྱང་ཆུབ་སེམས་དཔའ་ལྷག་པའི་བསམ་པ་ཉམ་ཆུང་བ། ཚུལ་འཆོས་བ་ལགས་པར་འཚལ་བར་འགྱུར་བའི་གནས་དེ་བཤད་དུ་གསོལ། བཀའ་སྩལ་པ། ཕྱི་མའི་དུས་ལྔ་བརྒྱ་ཐ་མ་ལ་བྱང་ཆུབ་སེམས་དཔའ་སྡིག་པའི་གྲོགས་ཀྱིས་ཟིན་ཅིད་ལྷག་པའི་བསམ་པ་ཉམ་ཆུང་བ་དེ་དག་ནི། དེ་བཞིན་གཤེགས་པའི་སྐུ་གདུད་རྣམས་ལ་མེ་ཏོག་ནས། མར་མེའི་བར་གྱི་མཆོད་པའི་ལས་ལ་བརྩོན་པར་འགྱུར་རོ། །འོད་སྲུངས་ངས་ནི་ཤེས་པ་དང་མི་ལྡན་པ་རྣམས་ཀྱིས་དགེ་བའི་རྩ་བ་ཡང་དག་པར་སྒྲུབ་པའི་མཆོད་པ་བཤད་པ་ཡིན་ན། མི་བླུན་པོ་དེ་དག་ནི་དེ་ལས་བརྩོན་པར་གྱུར་ཏེ། ངས་ལྷ་དང་བཅས་པའི་འཇིག་རྟེན་གྱི་མདུན་དུ་ཁྱེད་ཅག་ནི་བདག་ཉིད་དུལ་བ་དང༌། ཞི་བར་སྦྱོར་བའི་རྗེས་སུ་བརྩོན་བས་གནས་པར་གྱིས་ཤིག །བྲམ་ཟེ་དང་ཁྱིམ་བདག་དད་པ་དང་ལྡན་པ་དག་ཡོད་ན། ངའི་སྐུ་གདུང་རྣམས་ལ་མཆོད་པ་བྱེད་པར་འགྱུར་རོ་ཞེས་དེ་སྐད་གསུངས་ན། མི་བླུན་པོ་དེ་དག་རྣལ་འབྱོར་དང༌། སྤོང་བ་དང༌། ལུང་ནོད་བ་དང༌། ཁ་ཏོན་སྤངས་ནས་སྐུ་གདུང་གི་མཆོད་པ་ལ་བརྟེན་ནས་འཚོ་བར་བྱེད་པ་ལ་ལྟོས།
གང་གིས་ཆུའི་ཕུང་པོ་ནས་ཚངས་པའི་འཇིག་རྟེན་གྱི་བར་འབྲུ་མར་གྱིས་བཀང་སྟེ། སྙིང་པོ་རི་རབ་ཙམ་གྱི་མར་མེ་བཙུགས་ཏེ། དེ་བཞིན་གཤེགས་པ་ལ་མཆོད་པ་པས། བྱང་ཆུབ་སེམས་དཔའ་ལྷག་པའི་བསམ་པ་ཅན་ཚུལ་ཁྲིམས་ལ་གནས་པ་ཅིག་གིས་མཁན་པོ་འམ། སློབ་དཔོན་ལས་ཚིག་བཞི་པའི་ཚིགས་སུ་བཅད་པ་གཅིག་ལུང་ནོད་དེ། ཁ་དོན་བྱེད་ཅིང་གོམ་བ་བདུན་བོར་བ་གང་ཡིན་པ་དེ་ཆེས་བསོད་ནམས་མང་དུ་བསྐྱེད་དོ། །སངས་རྒྱས་སུ་འདུ་ཤེས་པ་ལ་སངས་རྒྱས་མཐོང་བ་ཡང་མེད་ན་མཆོད་པའི་ལས་ལྟ་ཅི་སྨོས་ཏེ་དེ་ནི་གནས་མེད་དོ། །གང་འདུ་ཤེས་དང་མཚན་མར་མི་བྱེད་པ་དེ་ནི་དེ་བཞིན་གཤེགས་པ་མཆོད་པ་ཡིན་ནོ། །གྲོགས་པོ་དག་དེ་བཞིན་གཤེགས་པའི་སྐུ་ནི་མི་སྐྱེ་བ་ཡིན་པས་མཆོད་པར་སླ་བ་མ་ཡིན་ནོ། །འོད་སྲུངས་དུས་ཕྱི་མ་ལྔ་བརྒྱ་ཐ་མ་ལ། བྱང་ཆུབ་སེམས་དཔའི་ཐེག་པ་པ་ཐབས་ལ་མི་མཁས་པ་བརྐམ་པ་འདོད་པས་ཟིལ་གྱིས་ནོན་པ་དག་འབྱུང་བར་འགྱུར་ཏེ། དེ་དག་རས་བཅོས་བུའམ་རྩིག་ངོས་ལ་བྲིས་བའམ། དེ་བཞིན་གཤེགས་པའི་སྟུ་གཟུགས་གཞན་དག་ལ་མཆོད་པ་བྱས་པས། དངོས་གྲུབ་དང་རྫུ་འཕྲུལ་འཐོབ་པར་སེམས་ཤིང་རློམ་སེམས་སུ་ཡང་འགྱུར་ཏེ། དགེ་བའི་རྩ་བ་ཅུང་ཟད་ཙམ་པོ་དེས་བདག་བསྟོད་གཞན་ལ་སྨོད་པར་བྱེད་ཅིང༌། གཞི་དེས་འཚོ་བར་ཡང་སེམས་སོ། །དེའི་ཚེ་དེ་བཞིན་གཤེགས་པའི་སྐུ་གཟུགས་བྱེད་པ་དང༌། མཆོད་པ་ལ་མ་གཏོགས་པ་ལུང་ནོད་པ་དང༌། ཁ་ཏོན་དང༌། བསམ་གཏན་གཅེས་སུ་མི་བྱེད་དོ། །དེ་དག་དེའི་ཚེ་ཁྱིམ་པ་དང་རབ་ཏུ་བྱུང་བ་དག་གིས་མཆོད་པ་དང༌། རི་མོར་བྱ་བར་ཤེས་ནས། བསོད་སྙོམས་དང༌། སྨན་དང༌། ཡོ་བྱད་ཀྱི་བར་དག་ཀྱང་རྙེད་པར་འགྱུར་རོ། །ངས་ནི་བྱང་ཆུབ་སེམས་དཔའི་ཐེག་པ་པ་རྣམས་ཀྱི་ལས་སུ་འདི་ལྟ་སྟེ། ཚུལ་ཁྲིམས་ལ་གནས་ཏེ་མང་དུ་ཐོས་པ་བཙལ་བར་བྱའོ་ཞེས་བསྟན་ན་དེ་དག་དེའི་ཚེ་ན། ཚུལ་ཁྲིམས་འཆལ་པར་གནས་ཤིང་ཆོས་ཚོལ་བ་སྤངས་ཏེ། མཆོད་རྟེན་དག་ལ་མཆོད་པའི་ལས་བྱ་བར་བརྩོན་ཞིང་གཞི་དེ་
འཚོ་བར་འགྱུར་བར་སེམས་པ་ལ་ལྟོས། མྱ་ངན་ལས་འདས་པ་ཆེན་པོ་ལས། གཞན་ཡང་དེའི་རྒྱལ་པོ་མ་སྐྱེས་དགྲ་མ་གཏོགས་པ། ཡངས་པ་ཅན་གྱི་རྒྱལ་པོ་ཟླ་བ་དྲི་མ་མེད་པའི་སྙིང་པོ་གྲོང་ཁྱེར་གྱི་ནང་ན་གནས་པ་དང༌། ཕྱི་རོལ་ན་གནས་པའི་གཡོག་འཁོར་དང་བཅས་པ་ལ་སོགས་པ་འཛམ་བུའི་གླིང་ཐམས་ཅད་ཀྱི་གྲོང་ཁྱེར་དང༌། རི་ཁྲོད་ཀྱི་གྲོང་དང༌། ཡུལ་པོ་ཆེ་དང༌། ཁ་ལུངས་ཀྱི་རྒྱལ་པོ་གང་གཱའི་ཀླུང་དྲུག་གི་བྱེ་མ་སྙེད་དང་ལྷན་ཅིག་ལྷགས་སོ། །གཞན་ཡང་དེའི་ཚེ་རྒྱལ་པོ་མ་སྐྱེས་དགྲའི་བཙུན་མོ་མ་གཏོགས་པ་ཡངས་པ་ཅན་གྱི་རྒྱལ་པོའི་བཙུན་མོ་འཇིག་རྟེན་གསུམ་ན་མཛེས་མ་ལ་སོགས་པ་འཛམ་བུའི་གླིང་གི་རྒྱལ་པོ་དང༌། ཚོང་དཔོན་དང༌། ཁྱིམ་བདག་གི་ཆུང་མ་གང་གཱའི་ཀླུང་གི་བྱེ་མ་སྙེད་དང་ལྷན་ཅིག་ལྷགས་སོ། །དེ་ལ་བདག་ཅེས་བྱ་བ་ནི་སངས་རྒྱས་ཞེས་བྱ་བའི་དོན་ཏོ། །རྟག་ཅེས་བྱ་བ་ནི་ཆོས་ཀྱི་སྐུ་ཞེས་བྱ་བའི་དོན་ཏོ། །བདེ་ཞེས་བྱ་བ་ནི་མྱ་ངན་ལས་འདས་པའི་དོན་ཏོ། །སུག་ཅེས་བྱ་བ་ནི་ཆོས་ཀྱི་ཚིག་བླ་དགས་སོ། །འདི་ལྟར་རྟག་པ་ཐམས་ཅད་ཀྱི་ནང་ན་ནི་ནམ་མཁའ་མཆོག་ཏུ་རྟག་པ་ཡིན་ལ། དེ་བཞིན་གཤེགས་པ་ཡང་ནམ་མཁའ་བཞིན་དུ་རྟག་གོ །ངས་ནི་བསྐལ་པ་གྲངས་མེད་པ་ནས་ཀྱང་དགྲ་བཅོམ་པའི་མཐར་གཏུགས་ཟིན་མོད་ཀྱི། བྱང་ཆུབ་ཀྱི་ཤིང་དྲུང་དུ་རྩྭ་བཏིང་བ་ལ་འདུག་པ་དང༌། བདུད་བཏུལ་བར་བསྟན་པ་ལ་འདི་ནི་འཇིག་རྟེན་ངེས་པར་བསྒྲལ་བར་བྱ་བའི་ཕྱིར་བདུད་ཕམ་པར་བྱས་ཏེ་སངས་རྒྱས་སོ་ཞེས་བྱ་བར་སེམས་ཅན་རྣམས་ཀྱིས་ཤེས་སོ། །ངས་ནི་བསྐལ་པ་གྲངས་མེད་པ་ནས་བདུད་ཕམ་པར་བྱས་ཏེ་བདུད་རྩི་རྟོགས་སོ། །བླ་མ་བླ་མ་ཞེས་བྱ་བ་ནི་ཇི་ལྟར་ཕྱོགས་ཐམས་ཅད་ཀྱི་ནང་ན་བྱང་ཕྱོགས་མཆོག་ཡིན་པ་དེ་བཞིན་དུ། ཐར་པ་ཡང་དེ་དང་འདྲ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །བླ་ན་མེད་པ་བླ་ན་མེད་པ་ཞེས་བྱ་བ་ནི་ཇི་ལྟར་ཡུལ་ཐམས་ཅད་ཀྱི་ནང་ན་བྱང་ཕྱོགས་པ་ལ་ཡུལ་བླ་ན་མེད་པ་ཞེས་བྱ་བ་དེ་བཞིན་དུ་ཐར་པ་ཡང་དེ་དང་འདྲ་སྟེ། དེ་ནི་དེ་བཞིན་གཤེགས་པའོ། །ཆུ་ཀླུང་
ཞེས་བྱ་བ་ནི་རྒྱ་མཚོ་ལ་བྱ་སྟེ། ཆུ་ཀླུང་ཐམས་ཅད་ཀྱི་ནང་ན་རྒྱ་མཚོ་འབའ་ཞིག་ཆུ་ཀླུང་ཡིན་པས། རྒྱ་མཚོ་ནི་ཆུ་ཀླུང་ཞེས་བྱ་བའི་གྲངས་སུ་གཏོགས་པའོ། །སེམས་ཅན་ཡོན་ཏན་དཔག་ཏུ་མེད་པ་དང་ལྡན་པ་དེ་དག་ནི་ཐེག་པ་ཆེན་པོ་ཐོས་ནས་དད་པར་འགྱུར་ཏེ། དམ་པའི་ཆོས་འདོད་པའི་རིགས་ཀྱི་བུ་དེ་དག་གིས་ནི་སྡིག་པའི་ལས་གྲངས་མེད་པར་བྱས་པ་རྣམས་ཀླད་པ་ན་བ་དང༌། རིམས་ཀྱིས་གདུངས་པ་དང༌། ཟུག་རྡུ་དང༌། སྐུར་པ་ཙམ་གྱིས་འབྱང་བར་འགྱུར་རོ། །བཅོམ་ལྡན་འདས་ཀྱིས་འབྲས་བུ་རྣམ་བཞི་ལྟ་བུའི་མདོ་ལས་གསུངས་པའི་ཚུལ་ཁྲིམས་དང་ལྡན་པ་དང༌། ཚུལ་ཁྲིམས་འཆལ་པ་དེ་ཇི་ལྟར་རྟོགས་པར་བགྱི་ལགས། ཆོས་ཉིད་ནི་དེ་བཞིན་གཤེགས་པ་རྟག་པ་བརྟན་པ་ཐེར་ཟུག་ཅེས་བྱའོ། །གལ་ཏེ་གང་ཟག་ཚུལ་ཁྲིམས་འཆལ་པ་ཟད་ཟིང་ལ་བརྐམ་པ་རྣམས་དེ་བཞིན་གཤེགས་པ་མི་རྟག་གོ་ཞེས་ཟེར་ན། གང་ཟག་དེ་དག་ནི་ཚད་མ་ཡིན་ནོ་ཞེས་བྱ་བའི་དོན་ཏོ། །ངེས་པའི་དོན་གྱི་མདོ་སྡེ་ནི་ཐེག་པ་ཆེན་པོ་པ་རྣམས་ཡིན་ནོ། །ཉན་ཐོས་ཀྱི་ཐེག་པ་པ་རྣམས་ནི་དྲང་པོའི་དོན་གྱི་རྣམ་གྲངས་སུ་གཏོགས་སོ། །ཡེ་ཤེས་ཞེས་བྱ་བ་ནི་དེ་བཞིན་གཤེགས་པའི་ཚུལ་བླ་དགས་ཏེ། ཆོས་ཀྱི་སྐུ་ནི་ཚད་མ་ཡིན་ནོ། །དེ་བཞིན་གཤེགས་པ་ཤའི་སྐུའོ་ཞེས་བྱ་བ་ནི། རྣམ་པར་ཤེས་པ་བརྟགས་པ་ལས་བརྟེན་ཏེ། རྣམ་པར་ཤེས་པ་ནི་ཚད་མ་མ་ཡིན་ནོ། །དོན་ཞེས་བྱ་བ་ནི་དེ་བཞིན་གཤེགས་པ་རྟག་ཅེས་བྱ་བ་ནི་ཆོས་རྟག་པའི་དོན་ཏོ། །ཆོས་རྟག་ཅེས་བྱ་བ་ནི་དགེ་འདུན་རྟག་ཅེས་བྱ་བའི་དོན་ཏོ། །ཡི་གེ་ཞེས་བྱ་བ་ནི་རང་བཟོའི་ཡི་གེ་དང་ཚིག་སྣ་ཚོགས་སངས་རྒྱས་ཀྱིས་གསུངས་པ་མ་ཡིན་པ་རྣམས་སོ། །བདག་ཅེས་བྱ་བ་ནི་དེ་བཞིན་གཤེགས་པའི་སྙིང་པོའི་དོན་ཏོ། །སངས་རྒྱས་ཀྱི་བསྟན་པ་ཤིན་ཏུ་རྒྱས་པའི་མཆོག་ཏུ་ཆ་ཕྲ་སྟེ་བདུད་རྩིའི་མཆོག་ཀྱང་ཡིན་ནོ། །དུག་གི་མཆོག་ཀྱང་ཡིན་ནོ། །སངས་རྒྱས་ཉིད་ཆོས་ཀྱང་ཡིན་དགེ་འདུན་ཀྱང་ཡིན་ཏེ། དེ་བཞིན་གཤེགས་པ་ཉིད་གཞི་གསུམ་པ་ཡིན་ནོ། །ཉན་ཐོས་ཀྱི་ཐེག་པ་ལས་
ནི་བྱིས་པ་རྣམས་ཀྱིས་འཇིག་རྟེན་པའི་ལྟ་བ་བསལ་བའི་ཕྱིར་གཞི་གསུམ་པ་གཞག་གོ །བག་ཡོད་པ་ནི་འཆི་བ་མེད་པའི་གནས་སོ། །བག་མེད་པ་ནི་འཆི་བའི་གནས་སོ། །འཇིག་རྟེན་པ་རྣམས་ནི་བག་མེད་པ་དང་ལྡན་པ་ཡིན་ཏེ་ཤི་བ་དང་འདྲའོ། །འཇིག་རྟེན་ལས་འདས་པ་ནི་རྒ་བ་དང་འཆི་བ་མེད་དོ། །བག་ཡོད་པ་རྣམས་ནི་མྱ་ངན་ལས་འདས་པ་མཆོག་ཏུ་བདེ་བ་འཐོབ་པའོ། །དེ་བཞིན་གཤེགས་པའི་སྐུ་དང་དགོངས་པའི་ཚིག་ནི་ཤེས་པར་དཀའ་སྟེ། དཔེར་ན་རྒྱལ་པོ་ལ་ལས་བློན་པོ་ལ་སིནྡྷ་པ་འོན་ཅིག་ཅེས་བྱས་ན། ཟས་ཟ་བའི་དུས་སུ་ནི་ལན་ཚྭ་ཁྱེར་ཏེ་འོང༌། །ཟོས་ཟིན་པའི་ཚེ་ནི་སྐོམ་ནོད། །སྐྱེད་མོས་ཚལ་དུ་འགྲོ་བའི་ཚེ་ནི་རྟ། གཡུལ་ངོར་འགྲོ་བའི་ཚེ་ནི་རལ་གྲི་ཁྱེར་ཏེ་འོང་སྟེ། རྒྱལ་པོའི་དགོངས་པའི་ཚིག་རྣམས་ཤེས་པར་བྱེད་དེ། དེ་བཞིན་དུ་ཐེག་པ་ཆེན་པོ་འདི་ལ་ཡང། མི་རྟག་པ་རྣམ་པ་བཞི་ཡོད་པར་ཐེག་པ་ཆེན་པོའི་བློན་པོ་རྣམས་ཀྱིས་ཤེས་པར་བྱ་སྟེ། གང་གི་ཚེ་དེ་བཞིན་གཤེགས་བ་འཇིག་རྟེན་དུ་བྱུང་ནས་ཡོངས་སུ་མྱ་ངན་ལས་འདས་པ་སྟོན་པ་དེའི་ཚེ་ནི་མི་རྟག་པའི་འདུ་ཤེས་བསྒོམ་མོ། །ཆོས་ནུབ་པ་དང་ཞི་བར་འགྱུར་རོ། །ཞེས་སྟོན་པ་དེའི་ཚེ་ནི་སྡུག་བསྔལ་བསྒོམ་པར་བྱའོ། །ནམ་ངའི་ལུས་ནད་མཐའ་ཡས་པས་གཟིར་ཏོ། །དགེ་འདུན་འཇིག་པར་འགྱུར་རོ་ཞེས་སྟོན་པ་དེའི་ཚེ་བདག་མེད་པ་བསྒོམ་མོ། །ནམ་དེ་བཞིན་གཤེགས་པའི་ཐར་པ་མཚན་མ་མེད་པ་དང་ཅི་ཡང་མེད་པའོ་ཞེས་སྟོན་པ་དེའི་ཚེ་ནི་སྟོང་པ་བསྒོམ་པར་བྱའོ། །གང་གི་ཕྱིར་སྡུག་བསྔལ་ཅི་ཡང་མེད་པ་དང༌། མི་རྟག་པ་དང་མི་བརྟན་པ་དང་ཐེར་ཟུག་མ་ཡིན་པ་དང༌། ཞི་བ་མ་ཡིན་པ་མེད་པས་ན་དེ་བཞིན་གཤེགས་པ་ནི་བདེ་བ་དང༌། རྟག་པ་དང༌། བརྟན་པ་དང༌། ཐེར་ཟུག་དང་ཞིབ་སྟེ། ནམ་དེ་བཞིན་གཤེགས་པས་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དོ་ཞེས་བཤད་པ་དེའི་ཚེ་ནི་ཡང་དག་པར་རྟག་པ་བསྒོམ་པར་བྱའོ། །དེ་ལྟར་བསྒོམས་པ་ནི་ངའི་ཉན་ཐོས་ཡིན། དགོངས་པའི་ཚིག་ལ་མཁས་པ་ཡིན་ནོ། །མདོ་འདི་ནི་སྐྱེས་
པའི་རང་བཞིན་དེ་བཞིན་གཤེགས་པའི་སྙིང་པོ་སྟོན་པ་སྟེ། སྐྱེས་པའི་རང་བཞིན་ནི་མི་ཞེས་བྱའོ། །དེ་བཞིན་གཤེགས་པའི་རང་བཞིན་ནི་སྐྱེས་པའོ། །རིགས་ཀྱི་བུ་གཞན་ཡང་ཕམ་པ་བྱེད་བྱད་པས་ཇི་ལྟར་བྱ་བ་ཉོན་ཅིག །ཕ་མ་པ་བྱེད་བྱེད་པས་ནི་ཆོས་ཀྱི་དེ་ཁོ་ན་ཉིད་དེ་བཞིན་གཤེགས་པའི་སྙིང་པོ་ཁོང་དུ་ཆུང་པར་བྱས་ནས། དམ་པའི་ཆོས་འབྱུང་པར་བྱའོ་སྙམ་དུ་བསམས་ན། དེ་ལ་བྱིན་པ་ཡང་ཆེས་ཁྱད་པར་ཅན་དུ་འགྱུར་རོ། །དམ་པའི་ཆོས་འབྱིན་པའི་འབྲས་བུ་ནི་དེ་ལྟར་ཆེའོ། །དྲག་ཤུལ་ཅན་གྱིས་ཞུས་པ་ལས། ཁྱིམ་ཞེས་བྱ་བ་ནི་དགེ་བའི་རྩ་བ་འཇོམས་པ་དང༌། དགེ་བའི་སྡོང་པོ་སྒྱེལ་བར་བྱེད་པས་ཁྱིམ་ཞེས་བྱའོ། །ཁྱིམ་ན་གནས་པ་ཞེས་བྱ་བ་ནི་ཉོན་མོངས་པའི་རྩ་བ་ལ་རྣམ་པར་རྟོག་པ་སྔོན་གོམས་པའི་དགེ་བའི་རྩ་བ་ཉམས་པར་བྱེད་པས་ཁྱིམ་ན་གནས་པ་ཞེས་བྱའོ། །ཁྱིམ་ན་གནས་པ་ནི་རྒྱ་མཚོ་ལ་ཆུ་བྲན་ལྟར་དགང་དཀའ་བའོ། །མེ་ལ་ཤིང་ལྟར་ཆོག་མི་ཤེས་པའོ། །རླུང་དམར་ལྟར་ཐུག་པ་མེད་པར་རྟོག་པའོ། །ཁ་ཟས་བཟད་པོ་དང་དུག་ལྟར་འདྲེས་པའོ། །ཕན་ཚུན་གྱི་རྐྱེན་གྱིས་འཐབ་པའོ། །ལས་ཀྱི་མཐར་ཐུག་པ་མེད་པའོ། །ངན་འགྲོར་འགྲོ་བར་འགྱུར་པའོ། །དངོས་པོ་ཚོལ་ཞིང་སྲུང་བས་སྡུག་བསྔལ་མྱུར་དུ་ཕན་ཚུན་འགྱེས་པས་མཐར་རྒུད་ཅིང་འགྱུར་བའོ། །སློང་བ་མཐོང་ན་དགེ་བའི་བཤེས་གཉེན་དང༌། ལོངས་སྤྱོད་ཀྱི་རྒྱུས་དང་བྱང་ཆུབ་སྟོན་པ་ཡིན་པར་འདུ་ཤེས་པ་བསྐྱེད་དོ། །བྱང་ཆུབ་སེམས་དཔའི་ཁྱིམ་པས་ཆུང་མ་ལ། རྒྱ་དང་ཁོག་ཚེ་དང་རྙིར་འདུ་ཤེས་པའོ། །ཡང་གསུམ་སྟེ། ཁྲི་མོན་དང་འཆིང་བ་དང་གསོད་པའོ། །གང་ཟག་གིས་གང་ཟག་ལ་ཚོད་གཟུང་བར་མི་བྱ་སྟེ། བཟུང་ན་ཉམས་པར་འགྱུར་རོ། །དགོན་པ་ལ་གནས་པ་ནི་ཚེས་ཀུན་འཛིན་པའོ། །འཕགས་པས་བཀུར་བའོ། །བྱང་ཆུབ་ཀྱི་སེམས་མི་བརྗེད་པའོ། །དགོན་པ་ལ་གནས་པ་ནི་ཚོགས་ཆུང་ངུས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །ཇི་ལྟར་ཞེ་ན། ལུས་དང་སྲོག་ལ་མི་ལྟ་
པས་སྦྱིན་པ་དང༌། སྦྱངས་པའི་ཡོན་ཏན་གྱིས་ཚུལ་ཁྲིམས་དང༌། གནོད་སེམས་མེད་པས་བྱམས་ཤིང་ཐམས་ཅད་མཁྱེན་པ་ཉིད་ལ་བཟོད་པས་བཟོད་པ་དང༌། མི་སྐྱེ་བའི་ཆོས་ལ་བཟོད་པ་ཐོབ་པ་ལས་ཕྱིར་མི་ལྡོག་པ་ལས་བརྩོན་འགྲུས་དང༌། སེམས་ཅན་ཡལ་བར་མི་འདོར་ཞིང་དགེ་བའི་རྩ་བ་སྡུད་པས་བསམ་གཏན་དང༌། དེ་བཞིན་ཉིད་ཀྱིས་མི་རྟོགས་པས་ཤེས་རབ་པོ། །བྱང་ཆུབ་སེམས་དཔའ་རབ་ཏུ་བྱུང་བ་ཆོས་བཞི་དང་ལྡན་ན་དགོན་པར་གནས་པ་གནད་སྟེ་གང་ཞེ་ན། མང་དུ་ཐོས་པ་ཡིན་ཏེ། ཐོས་པ་འཛིན་པ་ཆོས་གཏན་ལ་དབབ་པ་ལ་མཁས་པ། ཚུལ་བཞིན་ཡིད་ལ་བྱེད་པ་ལ་བརྩོན་ཞིང་ཆོས་སྒྲུབ་པ་དང༌། ཉོན་མོངས་པ་ཤས་ཆེན་པོ་ཞི་བར་བྱ་བ་དང༌། མངོན་པར་ཤེས་པ་ལྔ་ཐོབ་པ་ཡིན་ཏེ་ལྷ་དང་ཀླུ་ལ་སོགས་པ་སྨིན་པར་བྱ་བའི་ཆེད་དང༌། དགེ་བའི་རྩ་བ་བརྟན་ནས་ཕྱིས་གྲོང་ལ་སོགས་པར་ཆོས་བསྟན་པར་བྱའོ་སྙམ་པ་དེ་བཞི་དང་ལྡན་པར་བྱའོ། །མི་རྟག་པ་ཉིད་ཀྱི་མདོ་ལས། ནད་མེད་མི་རྟག་ལང་ཚོ་རྟག་མ་ཡིན། །འབྱོར་པ་མི་རྟག་སྲོག་ཀྱང་རྟག་མ་ཡིན། །སྐྱེ་བོ་མི་རྟག་ཉིད་ཀྱིས་ཉན་གྱུར་པ། །འདོད་པའི་ཡོན་ཏན་དགའ་བ་ཇི་ལྟར་སྐྱེ། །ཟ་མ་ཏོག་བཀོད་པ་ལས། ཡུལ་འཁོར་མོ་འཇིག་གི་གྲོང་ཁྱེར་ཆེན་པོ་ན་བཤད་པ་དང་གཅི་བའི་གནས་དེ་ན་སྲིན་བུའི་རིགས་བརྒྱ་སྟོང་དུ་མ་གནས་པ། སྤྱན་རས་གཟིགས་དབང་ཕྱུག་བུང་བའི་གཟུགས་སུ་སྤྲུལ་ནས། སངས་རྒྱས་ལ་ཕྱག་འཚལ་ལོ་ཞེས་བྱས་པ་དང༌། དེ་དག་སངས་རྒྱས་ལ་ཕྱག་འཚལ་ལོ་ཞེས་བྱ་བ་རྗེས་སུ་དྲན་ནས། འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་བྱུང་བ་ཡེ་ཤེས་ཀྱི་རྡོ་རྗེས་བཅོམ་ནས། དེ་དག་ཐམས་ཅད་བྱང་ཆུབ་སེམས་དཔའ་ཁ་ན་སྤོས་ཀྱི་དྲི་ཞེས་བྱ་བར་གྱུར་ཏེ། འཇིག་རྟེན་གྱི་ཁམས་བདེ་བ་ཅན་དུ་སྐྱེས་སོ། །ཨོཾ་མ་ཎི་པདྨེ་ཧཱུཾ། ན་མཿསཔྟཱ་ནཱཾ། ས་མྱཀྶཾ་བུདྡྷ་ཀོ་ཊཱི་ནཱཾ། ཏདྱ་ཐཱ། ཙ་ལེ་ཙུ་ལེ་ཙུནྡེ་སྭཱཧཱ། གང་གཙུག་ལག་ཁང་ལ་ཁྱིམ་གྱི་འདུ་ཤེས་འཛིན་པ་དེ་དག་ནི་བུ་དང་བུ་མོ་དག་གིས་ཡོངས་སུ་བསྐོར་བར་
འགྱུར་རོ། །དེ་དག་དགེ་འདུན་གྱི་ཁྲི་དང༌། ཁྲིའུ་དང༌། ཚང་ཐུར་དང༌། སྔས་དང༌། མལ་སྟན་དག་ལ་སྤྱོད་པར་མ་འོས་པ་ལས་སྤྱོད་པར་བྱེད། དགེ་འདུན་གྱི་ཉེ་བར་སྤྱོད་པ་ལ་བཤད་བ་དང་གཅི་བར་བྱེད་དོ། །མཆིལ་མ་དག་ཀྱང་འདོར་ཞིང་ལས་ཀྱི་རྣམ་པར་སྨིན་པ་མི་ཤེས་སོ། །དགེ་འདུན་གྱི་ཉེ་བར་སྤྱོད་པ་ལ་མཆིལ་མ་འདོར་བ་དེ་དག་ནི། ལོ་བཅུ་གཉིས་སུ་སཱ་ལའི་ཚལ་དུ་ཁ་ཁབ་མིག་ཙམ་གྱི་སྲོག་ཆགས་སུ་སྐྱེའོ། །དགེ་འདུན་གྱི་སོ་ཤིང་ལ་སྤྱོད་པར་མི་འོས་པ་ལས་སྤྱོད་པ་ནི་རུས་སྦལ་དང་ཆུ་སྲིན་དང་ཉའི་ནང་དུ་སྐྱེའོ། །དགེ་འདུན་གྱི་ཏིལ་དང་འབྲས་ལ་སོགས་པ་མི་འོས་པར་སྤྱད་ན་ཡི་དྭགས་སུ་སྐྱེའོ། །དགེ་འདུན་གྱི་ཟས་ཀྱིས་ཁྱི་གསོ་བར་བྱེད་པ་དེ་དག་ནི་རིགས་དམན་པ་དང༌། དབང་པོ་ཉམས་བ་དང་སྒུར་པོ་དང་སྤྲད་པོར་སྐྱེའོ། །དགེ་འདུན་གྱིས་ལ་མི་འོས་པར་སྤྱད་ན། བསྐལ་པ་བཅུ་གཉིས་སུ་དམྱལ་བ་འོ་དོད་འབོད་པར་སྐྱེའོ། །དགེ་འདུན་གྱི་ནི་མེའི་འོབས་ལྟ་བུའོ། །དུག་ལྟ་བུའོ། །རྡོ་རྗེ་ལྟ་བུའོ། །ཁུར་ལྟ་བུའོ། །དུག་ལ་ནི་གཉེན་པོ་བྱ་ནུས་ཀྱི་དགེ་འདུན་གྱི་ལ་ནི་གཉེན་པོ་བྱ་མི་ནུས་སོ། །རྨི་ལམ་བསྟན་པ་ལས། བཀའ་སྩལ་པ། རྣམ་པ་དང༌། མཚན་མ་དང༌། རྟགས་གང་གིས་བྱང་ཆུབ་སེམས་དཔའི་ཐེག་པ་པ་ཡིན་པར་ངས་ཁྱོད་ལ་བཤད་དོ། །མཚན་མ་བརྒྱ་རྩ་བརྒྱད་ཀྱིས་བྱང་ཆུབ་སེམས་དཔའི་ཐེག་པ་པ་ཡིན་པར་ཤེས་པར་བྱ་སྟེ། རྨི་ལམ་ན་དེ་བཞིན་གཤེགས་པ་མཐོང་བ་དང༌། སྐུ་གདུང་རྙེད་པ་དང༌། །དེ་བཞིན་གཤེགས་པའི་མཆོད་རྟེན་ལ་མཆོད་པ་དང༌། ཆོས་ཐོས་པ་དང༌། དགེ་སློང་ལ་ཆོས་སྨྲ་བ་དང༌། དེ་བཞིན་གཤེགས་པའི་གདུགས་མཐོང་བ་དང༌། བདག་གཅེར་བུར་འདུག་པ་དང༌། སྔོན་མ་མཐོང་བའི་ཡུལ་དུ་ཕྱིན་པ་དང༌། ཆུའི་ནང་ན་འདུག་པར་ཤེས་པ་དང༌། སྤྲིན་ལས་ཆར་འབབ་པར་ཤེས་པ་དང༌། ས་གཡོས་པ་དང༌། བདག་བསད་པ་ལས་ཤོར་བ་དང༌། བདག་ནམ་མཁའ་ལས་འགྲོ་བ་དང༌། གླེགས་བམ་རྙེད་པ་དང༌། ཆོས་སྨྲ་བ་དགེ་སློང་ཆེ་གེ་མོ་ཞེས་བྱ་བའི་མིང་ཐོས་པ་དང༌། རིན་པོ་ཆེ་ཐུ་བ་དང༌། ཉི་མ་དང་ཟླ་བ་གཟས་
ཟིན་པ་དང༌། གཙུག་ལག་ཁང་ན་འདུག་པར་ཤེས་པ་དང༌། སྤྲིན་ལས་འབྲུག་གྲག་པ་དང༌། གློག་འབྱུང་པ་དང༌། གོ་མཚོན་རྙེད་པར་མཐོང་པ་ལ་སོགས་པའོ། །བྱང་ཆུབ་སེམས་དཔའ་གང་གི་རྨི་ལམ་ན་དེ་བཞིན་གཤེགས་པ་ཅང་མི་གསུང་བ་མཐོང་ན། དེས་ནི་ཆོས་ལ་སྒྲིབ་པར་འགྱུར་བའི་ལས་བསགས་པ་ཡིན་པས། དེས་ཆོས་ཉན་པ་ཡང་དག་པར་འཛིན་དུ་གཞུག་ཅིང་ཁ་དོན་ལ་བརྩོན་པའི་གང་ཟག་རྣམས་ལ་ཡང་བསྙེན་བཀུར་སྒྲུབ་པོ། །དེས་ནི་སྒྲིབ་པ་དེ་དག་པར་འགྱུར་ཏེ། གང་ཟག་དེ་ནི་ས་དང་པོ་བདུན་པ་དག་ལས་བྱུང་བར་བལྟའོ། །དེའི་ཚེ་ས་དང་པོ་ལ་གནས་པ་ཞིག་ན་ནི་དེས་སྦྱང་བའི་ཕྱིར། ལོ་བདུན་དུ་ཕུང་པོ་གསུམ་པའི་ཆོས་ཀྱི་རྣམ་གྲངས་ཉིན་ལན་གསུམ་མཚན་ལན་གསུམ་གདོན་པར་བྱའོ། །ས་གཉིས་པས་ནི་ལོ་དྲུག །ས་གསུམ་པས་ནི་ལོ་ལྔ། ས་བཞི་པས་ནི་ལོ་བཞི། ས་ལྔ་པས་ནི་ལོ་གསུམ། ས་དྲུག་པས་ནི་ལོ་གཉིས། ས་བདུན་པས་ནི་ལོ་གཅིག་གདོན་པར་བྱའོ། །གལ་ཏེ་དེ་བཞིན་གཤེགས་པའི་སྐུ་གཟུགས་འཇིམ་པ་ལས་བྱས་པ་མཐོང་ན། བྱང་ཆུབ་སེམས་དཔའ་ད་ནི་ས་དང་པོ་པར་བལྟའོ། །ས་བདུན་པོ་དག་ལ་མཐོང་བ་གང་ཡིན་པ་དེ་ས་བདུན་གྱི་ལས་ཀྱང་རིག་པར་བྱའོ། །ས་དགུ་པ་དང་བཅུ་པ་དག་ལ་ནི་རྨི་ལམ་ལོག་པར་མཐོང་བ་མེད་དོ། །དེ་བཞིན་གཤེགས་པ་རྣམས་ཀྱིས་ཡོངས་སུ་བསྐོར་བར་མཐོང་ནས་བཅུ་པར་བལྟ་སྟེ། བདུད་ཀྱི་ལས་ནི་མ་གཏོགས་སོ། །ནམ་མཁའི་ཁམས་དང་དེ་བཞིན་སེམས་ཅན་ཁམས། །སངས་རྒྱས་བྱང་ཆུབ་དེ་བཞིན་བྱང་ཆུབ་སེམས། །ཆོས་བཞི་གང་ཡིན་དེ་དག་དཔག་མེད་ངོ༌། །དེ་དག་འཇིག་རྟེན་ཀུན་གྱིས་རྟོགས་མི་ནུས། །མདོག་ངན་གླེན་ནམ་ཡང་ན་རྙེད་མེད་དམ། །བརྙས་ཤིང་དམན་པར་བྱ་བ་ཡིན་ན་ཡང༌། །མི་ཡི་ཁམས་དང་སྤྱོད་པ་ཤེས་དཀའ་བས། །དེ་ལ་གྱ་ཚོམ་དག་ཏུ་སྐྱོན་མི་གདགས། །དགྲ་བཅོམ་ཀུན་གྱིས་རང་སེམས་མི་ཤེས་ན། །སེམས་ཅན་
སྤྱོད་པ་ཤེས་པ་སྨོས་ཅི་དགོས། །མ་སྐྱེས་དགྲ་ཡིས་ཕ་ནི་བསད་གྱུར་ཅིང༌། །དེ་བཞིན་གཤེགས་པ་བཀྲོངས་པར་སྦྱོར་བྱས་ཀྱང༌། །དེ་སེམས་གཅིག་གིས་ངན་འགྲོ་རྣམས་གྲོལ་ན། །གང་ཟག་དག་པ་གང་ཡིན་སྨོས་ཅི་དགོས། །གསེར་ནི་མི་གཙང་ནང་དུ་བཅུག་གྱུར་ཀྱང༌། །འབར་བའི་རང་བཞིན་ནམ་ཡང་མི་འབྲི་ལྟར། །ངེས་པ་གང་ཞིག་འཇིག་རྟེན་ཆོས་སྤྱོད་ཀྱང༌། །ནམ་ཡང་བསམ་པའི་རང་བཞིན་དེ་མི་སྤོང༌། །གང་དག་བྱང་ཆུབ་སེམས་ནི་མི་བརྗེད་པ། །དེ་དག་རྙེད་པར་བ་རྙེད་ལེགས་འཚོ་བ། །ནོར་འདོད་པ་དག་རྒྱ་མཚོ་ཆེན་པོ་ལྟར། །དེ་བཞིན་དེ་དག་རྙེད་པ་ཕུན་སུམ་ཚོགས། །དགོན་པར་དགའ་ཞིང་རྟག་ཏུ་དབང་བསྡམས་ལ། །བརྩོན་འགྲུས་བརྩམས་ཞིང་ཉེ་དུ་ཐག་བསྲིངས་ལ། །བྱམས་ལ་གནས་ཤིང་དོན་དམ་མཁས་གྱུར་བ། །དེས་ནི་དེ་འདྲའི་བྱང་ཆུབ་ཐོབ་པར་འགྱུར། །རིན་པོ་ཆེའི་མཐའ་ལས། འཇམ་དཔལ་སངས་རྒྱས་ཉིད་ཅེས་བྱ་བ་དེ་ནི་ཆོས་ཀྱི་དབྱིངས་ཀྱི་ཚིག་བླ་དགས་སོ། །སྟོབས་དང་མི་འཇིགས་པ་ནས་མ་འདྲེས་པ་ལ་ཐུག་པ་དེ་དག་ཀྱང་ཆོས་ཀྱི་དབྱིངས་ཁོང་དུ་ཆུད་པར་བྱའོ། །ཆོས་ཀྱི་དབྱིངས་ལ་ནི་སོ་སོའི་སྐྱེ་བོ་ནས། སངས་རྒྱས་ཀྱི་ཆོས་ཀྱི་བར་དག་ཐ་དད་པར་རྗེས་སུ་མི་མཐོང་ངོ༌། །ཆུ་བོ་གང་གཱ་ལ་སོགས་པ་རྒྱ་མཚོར་བབ་པ་འདིའོ་ཞེས་ཐ་དད་པར་གདགས་པར་མི་ནུས་པ་ལྟར་ཆོས་ཀྱི་དབྱིངས་ལ་སོ་སོའི་སྐྱེ་བོའི་ཆོས་ལ་སོགས་པ་ཐ་དད་པར་གདགས་པར་མི་ནུས་སོ། །འཕགས་པ་སྒྲ་ཆེན་པོ་ལས། གླིང་བཞི་པ་གསེར་ལ་སོགས་པས་གང་བར་བྱས་པའམ། རྣམ་པར་རྒྱལ་བྱེད་ཀྱི་ཁང་པ་ལྟ་བུས་སྟོད་གསུམ་གྱི་སྟོང་ཆེན་པོ་བཀང་སྟེ། ཕྱོགས་བཞིའི་དགེ་འདུན་ལ་ཕུལ་བ་བས་། གང་གིས་དེ་བཞིན་གཤེགས་པའི་སྐུ་གདུང་ཡུངས་འབྲུ་ཙམ་མཆོད་རྟེན་གྱི་བུམ་པ་སྐྱུ་རུ་ར་ཙམ་གྱི་ནང་དུ་བཅུག་སྟེ། སྲོག་ཤིང་ཁ་བཙམ་བཙུགས་ནས་རྒྱ་ཤུག་གི་ལོ་མ་ཅམ་གྱི་གདུགས་འདོགས་པར་བྱེད་དམ། དེ་བཞིན་གཤེགས་པའི་སྐུ་གཟུགས་མཚོན་གང་བ་བྱེད་ན་ཆེས་བསོད་
ནམས་ཆེའོ། །མ་སྐྱེས་དགྲས་ཕ་རྒྱུན་དུ་ཞུགས་པ་བསད་ནས། དེ་བཞིན་གཤེགས་པའི་སྐུ་གདུང་བརྒྱད་ཆ་ལ་མཆོད་པ་དང་རི་མོར་བྱ་བའི་ལས་བྱས་པས། སེམས་ཅན་དམྱལ་བར་ལན་ཅིག་སོད་ནས། དགེ་བའི་རྩ་བ་དེ་ཉིད་ཀྱིས་བསྐལ་པ་ཉི་ཤུར་ལོག་པར་ལྟུང་བར་མི་འགྱུར་ཞིང་རབ་ཏུ་བྱུང་ནས། རང་རྒྱལ་བ་མངོན་དུ་བྱེད་པར་འགྱུར་ཏེ། རྣམ་པར་རྒྱལ་བའི་སྡེ་ཞེས་བྱ་བར་འགྱུར་རོ། །བྱམས་པ་འཇུག་པ་ལས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་བྱམས་པ་ཡང་དག་པར་ཞུགས་ཏེ། བསྐལ་པ་བརྒྱད་ཁྲི་བཞི་སྟོང་ལོན་ནས། དེའི་འོག་ཏུ་གདོད་ངས་བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །བྱམས་པས་ནི་དེ་བཞིན་གཤེགས་པ་གསེར་བཟངས་ཞེས་བྱ་བའི་སྤྱན་སྔར་འཁོར་ལོས་སྒྱུར་བའི་རྒྱལ་པོ་གསེར་མདོག་ཅེས་བྱ་བར་གྱུར་བས་བྱང་ཆུབ་ཏུ་སེམས་བསྐྱེད་དེ། བཀའ་སྩལ་པ། བྱང་ཆུབ་སེམས་དཔའ་དེ་བཞིན་གཤེགས་པའི་བསླབ་པ་གཞན་ལས་འགལ་བར་བྱས་སམ། ངས་ལྟུང་བར་འགྱུར་བའི་ཆོས་བཞི་གང་དག་གསུངས་པ་དེ་དག་གི་ཉེས་པ་དེ་དག་བྱས་སམ། མི་དགེ་བའི་ལས་ཀྱི་ལམ་བཅུ་བླངས་ཏེ་འདུག་གམ། མཚམས་མེད་པ་ལྔ་བྱས་སུ་ཟིན་ཀྱང་དེ་བྱང་ཆུབ་ཀྱི་སེམས་མ་སྤངས་མ་བཏང་སྟེ། བྱང་ཆུབ་ཀྱི་སེམས་དང་མ་བྲལ་བ་ལ་དམིགས་པ་ཅན་གྱི་སེམས་དང་མངོན་པར་ཞེན་པའི་སེམས་ཀྱང་མི་བསྐྱེད་ན། བྱང་ཆུབ་སེམས་དཔའ་དེ་ནི་ཚུལ་ཁྲིམས་དང་ལྡན་པ་ཁོ་ན་ཡིན་ནོ། །དེ་ཅིའི་ཕྱིར་ཞེ་ན། དེ་དག་ནི་བྱང་ཆུབ་སེམས་དཔའི་བྱང་ཆུབ་ལ་བར་དུ་གཅོད་པར་བྱེད་པ་མ་ཡིན་པའི་ཕྱིར་ཏེ། སྡིག་པའི་ལས་བྱས་སྲིད་པར་སྐྱེས་ཀྱང་ཇི་ཙམ་དུ་སྲིད་པར་སྐྱེས་པ་དེ་ཙམ་དུ་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །བྱང་ཆུབ་སེམས་ཀྱི་རྣམ་སྨིན་བསྟན་པ་ཡི། །བསོད་ནམས་དེ་ལ་གལ་ཏེ་གཟུགས་ཡོད་ན། །ཞིང་རྣམས་གང་བའི་བྱེ་སྙེད་གང་བྱས་ཀྱང༌། །དེ་དག་བཀང་བས་ཚ་ཙམ་ཟད་པ་མེད། །རྒྱ་མཚོ་དང་ནི་ཆུ་ཡི་ཐིགས་པ་བཞིན། །སངས་རྒྱས་ཞིང་འདིར་སེམས་ཅན་ཇི་སྙེད་པ། །བསྐལ་པ་རེ་རེ་ལ་ནི་སངས་རྒྱས་གྱུར། །བསྐལ་པ་མང་པོར་
ལས་གཞན་མི་བྱེད་པར། །བསོད་ནམས་བཤད་ཀྱང་མཐའ་ནི་ཐུག་མེད་པ། །དེ་དག་བྱང་སེམས་ཀྱི་རྣམ་སྨིན་བསྟན། །གང་གིས་སྟོང་གསུམ་རིན་ཆེན་བཀང་བྱས་ལ། །སྟོབས་བཅུ་མངའ་བ་རྣམས་ལ་དབུལ་བྱེད་པ། །དེ་བས་བྱང་ཆུབ་ཏུ་ནི་སྨོན་བྱེད་པ། །བསོད་ནམས་ཤིན་ཏུ་མང་པོ་འཕེལ་བར་འགྱུར། །གལ་ཏེ་སེམས་ཅན་མཐའ་དག་སངས་རྒྱས་ཏེ། །སྤོབས་པ་མཐའ་ཡས་ལྡན་པ་ཉིད་འགྱུར་ལ། །ཇི་ལྟར་སྔོན་གྱི་འཁོར་བའི་བསྐལ་པའི་བར། །སེམས་ཅན་གཅིག་པུས་མཆོད་པ་བྱས་པ་དང༌། །མཁས་པའི་མི་ནི་གང་ཡང་རུང་བ་ཡིས། །བྱང་ཆུབ་མཆོག་ཏུ་སེམས་ནི་བསྐྱེད་ནས་ཀྱང༌། །མེ་ཏོག་གཅིག་པུ་ཕུལ་བའི་བསོད་ནམས་འདི། །དེ་བས་ཁྱད་པར་འཕགས་པར་འགྱུར་བ་ཡིན། །གལ་ཏེ་སེམས་ཅན་ཐམས་ཅད་དགྲ་བཅོམ་གྱུར། །ཡེ་ཤེས་དབང་ཐོབ་གྱུར་པ་དེ་དག་ལ། །བསོད་ནམས་འདོད་པའི་གང་ཟག་ལ་ལ་ཞིག །བསྐལ་པ་བྱེ་བ་ཁྲག་ཁྲིག་བར་མཆོད་བྱེད། །གང་གིས་སྙིང་རྗེ་བསྐྱེད་ནས་བྱང་ཆུབ་ཏུ། །རྒྱ་ཆེན་སེམས་ནི་སྐྱེད་པར་བྱེད་གྱུར་ཏེ། །སེམས་ཀྱི་གཙོ་བོ་བསྐྱེད་པ་བྱས་ནས་ཀྱང༌། །གོམ་པ་བདུན་ནི་བོར་བའི་བསོད་ནམས་འདི། །དེ་བས་ཁྱད་པར་འཕགས་པར་འགྱུར་བ་ཡིན། །གསོལ་པ། བཅོམ་ལྡན་འདས་ཅིའི་སླད་དུ་བྱང་ཆུབ་སེམས་དཔའ་བྱམས་པ་ལ་བྱམས་པ་ཞེས་བགྱི། མིང་འདི་ག་ལས་རྙེད་ལགས། བཀའ་སྩལ་པ། དེ་བཞིན་གཤེགས་པ་རིན་ཆེན་གདུགས་བྱུང་བའི་ཚེ། དགེ་སློང་བློ་གྲོས་བརྟན་པོ་ཞེས་བྱ་བས་སེམས་ཅན་བྱེ་བ་ཁྲག་ཁྲིག་འབུམ་ཕྲག་སུམ་ཅུ་རྩ་དྲུག་ལ་ཅི་ནས་བྱམས་པ་བསྒྲུབ་པར་འགྱུར་བ་དེ་ལྟ་བུའི་ཆོས་སྟོན་ཅིང༌། དགེ་སློང་དེ་གང་གི་ཚེ་གྲོང་དུ་འགྲོ་བ་དེའི་ཚེ། བྱམས་པའི་ཏིང་ངེ་འཛིན་དུ་ཞུགས་ཏེ་འགྲོའོ། །གྲོང་ལ་སོགས་པའི་ཐེམ་པ་ལ་རྐང་པ་བཞག་མ་ཐག་ཏུ་སེམས་ཅན་བྱམས་པ་ལ་གནས་པ་དེ་དག་ཐམས་ཅད་བྱམས་པའི་ཏིང་ངེ་འཛིན་ལ་ཞུགས་པར་གྱུར་ཏེ། དེ་ནི་ལྷ་རྣམས་ཀྱིས་ཨ་ལ་ལ་སེམས་དཔའ་ཆེན་པོ་འདི་ནི་བྱམས་པར་འགྱུར་རོ་ཞེས་བསྒྲགས་ནས། མིང་
དེ་ལ་དེ་བཞིན་གཤེགས་པ་དེ་ཡང་ཡི་རང་བས་ནི་བྱམས་པ་ཞེས་བྱའོ། །གང་གཱའི་མཆོག་ལ་བཀའ་སྩལ་པ། གང་གཱའི་མཆོག་དཔེར་ན་བདག་ཅེས་འདོགས་ཀྱང་བདག་གང་ཡང་མི་དམིགས་པ་དེ་བཞིན་དུ་ངས་གཟུགས་ནས་མྱ་ངན་ལས་འདས་པའི་བར་བརྟགས་ཀྱང་དོན་དམ་པ་ན་དེ་དག་ཐམས་ཅད་མེད་ཅིང་མི་དམིགས་སོ། །ཚངས་པའི་དཔལ་ལུང་བསྟན་པ་ལས་ནི། དེ་ལྟར་སངས་རྒྱས་བསམ་མི་ཁྱབ། །སངས་རྒྱས་ཆོས་ཀྱང་དེ་བཞིན་ཏེ། །བསམ་མི་ཁྱབ་ལ་དད་པ་ཡིན། །རྣམ་པར་སྨིན་པའང་དེ་བཞིན་ནོ། །ལས་ཀྱི་སྒྲིབ་པ་རྣམ་པར་དག་པ་ལས། བཀའ་སྩལ་པ། འཇམ་དཔལ་སྒྲིབ་པ་ཞེས་བྱ་བ་འདོད་ཆགས་ནི་སྒྲིབ་པའོ། །ཞེ་སྡང་དང་གཏི་མུག་ནི་སྒྲིབ་པའོ། །སྦྱིན་པ་ནི་སྒྲིབ་པའོ། །ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་ནི་སྒྲིབ་པའོ། །སངས་རྒྱས་སུ་འདུ་ཤེས་པ་ནི་སྒྲིབ་པའོ། །ཆོས་དང་དགེ་འདུན་དང༌། སྟོང་པ་ཉིད་དང༌། མཚན་མ་མེད་པ་དང་སྨོན་པ་མེད་པར་འདུ་ཤེས་པ་ནི་སྒྲིབ་པའོ། །གསོལ་པ། ཇི་ལྟར་སྦྱིན་པ་ནས་ཤེས་རབ་ཀྱི་བར་སྒྲིབ་པ་ལགས། བཀའ་སྩལ་པ། ཆོས་ཐམས་ཅད་ལ་སྒྲིབ་པ་མེད་མོད་ཀྱི། བྱིས་པ་སོ་སོའི་སྐྱེ་བོ་རྣམས་རང་གི་རྟོག་པས། སྦྱིན་པ་ལ་སོགས་པ་ཡང་སྒྲིབ་པར་བྱེད་དོ། །དེ་ཅིའི་ཕྱིར་ཞེ་ན། བྱིས་པ་རྣམས་ཀྱིས་སྦྱིན་པ་བྱེད་པ་ན་སེམས་ཅན་སེར་སྣ་ཅན་རྣམས་ལ་མ་དད་དོ། །མ་དད་པ་དེས་ཁོང་ཁྲོ་བ་དང༌། ཐ་བའི་ཉེས་པ་བསྐྱེད་དེ། ཉེས་པ་ངེས་སེམས་ཅན་དམྱལ་བར་ལྟུང་བར་འགྱུར་རོ། །དེ་བཞིན་དུ་ཚུལ་ཁྲིམས་སྲུང་བ། ཚུལ་ཁྲིམས་འཆལ་པ་ལ་སྨད་པར་བྱེད་དེ། སྨད་པས་སྐྱེ་བོ་མང་པོ་དག་བསྔགས་པ་མ་ཡིན་པ་ཐོབ་པས། དེ་དག་ལ་མ་དད་པ་དེས་ངན་འགྲོར་འགྲོ་བར་འགྱུར་རོ། །བཟོད་པ་བསྒོམ་པ་ནི་འདི་དག་གནོད་སེམས་ཀྱི་གཞི་དང་ལྡན་ཞེས་བྱ་བ་དང༌། བརྩོན་འགྲུས་བརྩམ་པ་ནི་འདི་དག་ལེ་ལོ་ཅན་དེས་དད་པས་སྦྱིན་པ་ཆུ་རའི་ཆུ་ཡང་སྤྱད་པར་མི་འོས་སོ་སྙམ་པ་དང༌། བསམ་གཏན་ལ་མཉམ་པར་
འཇོག་ན་འདི་དག་ནི་སེམས་གཡེངས་བའོ་སྙོམ་པས་བརྙས་པར་བྱེད་དེ། དེ་དག་ཇི་ཙམ་དུ་བརྙས་པའི་སེམས་བསྐྱེད་པ་དེ་ཙམ་དུ་འཁོར་བ་ཡོངས་སུ་འཛིན་པར་འགྱུར་རོ། །ཕྱིས་དེ་དག་གིས་གོང་དུ་བྱང་ཆུབ་ཏུ་སྤྱོད་པ་ན་མང་དུ་ཐོས་ཀྱང་ཆོས་ཐམས་ཅད་ཡི་གེ་མེད་པ་ལ་རྣམ་པར་ཤེས་པ་ཡོད་པར་བརྟགས་ཏེ། ཤེས་རབ་ཏུ་དམིགས་ནས། ཕ་རོལ་དུ་སོན་པར་བྱེད་པ་དེ་དག་ནི་མི་ཤེས་པ་ཞེས་ང་སྨྲའོ། །གལ་ཏེ་ཐེག་པ་ཆེན་པོ་ལ་ཞུགས་ན་ཡང༌། བདག་ཅག་ནི་འཇིག་རྟེན་ན་གཙོ་བོ་སྙམ་ནས། ཉན་ཐོས་ཀྱི་ཐེག་པ་པ་ལ་སྨོན་ཅིང་བསམ་པ་ངན་པ་དང་ཉེས་པར་བརྗོད་པ་དེས་ན་ངན་འགྲོར་འགྲོ་བ་འཐོབ་པར་འགྱུར་རོ། །འཇམ་དཔལ་སྒྱུ་མ་ལྟ་བུའི་སེམས་ལ་གནས་པ་ལ་ནི་ཆོས་གང་ཡང་སྒྲིབ་པ་མེད་དོ། །འཇམ་དཔལ་གྱིས་གསོལ་པ། ཉོན་མོངས་པ་སྤོང་བའི་སླད་དུ་སངས་རྒྱས་ཀྱི་ཆོས་རྣམས་ལ་དམིགས་པ་དེ་ནི་ཕོངས་པར་འགྱུར་བ་ལགས་སོ། །བཀའ་སྩལ་པ། བྱང་ཆུབ་སེམས་དཔའི་ཉོན་མོངས་པ་ཐམས་ཅད་ལ་སངས་རྒྱས་ཀྱི་ཆོས་རྣམས་སུ་མོས་པ་དེས་ནི་ལས་ཀྱི་སྒྲིབ་པ་འཐོབ་པར་འགྱུར་རོ། །ཁྱེའུ་བཞི་པའི་ཏིང་ངེ་འཛིན་ལས། གང་གིས་དེ་འདྲར་རང་བཞིན་སྟོང་ཤེས་ནས། །དངོས་པོ་ཀུན་ལ་མི་གནས་སྒོམ་བྱེད་པ། །དེ་ནི་ཉོན་མོངས་དྲ་བ་ཀུན་སྤངས་ཤིང༌། །སྲིད་པའི་འདོད་ཆགས་བཅོམ་པའི་སངས་རྒྱས་འགྱུར། །གང་གིས་སྟོང་པ་སྟོང་ཤེས་ཤིང༌། །སྟོང་པ་ལ་ཡང་མི་སེམས་ལ། །གང་དག་སྟོང་ཉིད་མི་འཐོབ་བོ། །དེ་དག་སྟོང་ཉིད་ཤེས་པ་ཡིན། །འཁོར་ལོ་བཅུ་པ་ལས་བཀའ་སྩལ་པ། འདི་ལྟ་སྟེ། འགའ་ཞིག་གིས་བྱམས་པའམ་འཇམ་དཔལ་ལམ། ཀུན་དུ་སྤྱན་རས་གཟིགས་སམ། ཀུན་ཏུ་བཟང་པོ་ལ་སོགས་པ་བྱང་ཆུབ་སེམས་དཔའ་ཆེན་པོ་གང་གཱའི་ཀླུང་གི་བྱེ་མ་སྙེད་ལ་བསྐལ་པ་བརྒྱའི་བར་དུ་སེམས་རྩེ་གཅིག་ཏུ་སྐྱབས་སུ་སོང་ནས། དེ་དག་གི་མཚན་ནས་བརྗོད་ཅིང་དམིགས་པས་མཆོད་ཅིང་སྨོན་ལམ་བཏབ་པ་བས། འགའ་ཞིག་གིས་སྐད་ཅིག་ཡུད་ཙམ་བྱང་ཆུབ་སེམས་དཔའ་སའི་སྙིང་པོ་ལ་དེ་ལྟར་བྱས་ན། མྱུར་དུ་རེ་བ་ཐམས་ཅད་འགྲུབ་པར་འགྱུར་རོ། །སྐྱེས་བུ་ཡང་དག་པ་ཡི་སྙིང་པོ་ནི། །ཡོན་ཏན་མང་པོ་ཕུན་
སུམ་ཚོགས་པར་ལྡན། །དགེ་སྦྱོང་ཆ་ལུགས་འཛིན་ཅིང་སྟོན་བྱེད་པ། །སྟོན་པ་ཆེན་པོ་ལ་ནི་ཕྱག་འཚལ་ལྷགས། །དེ་བཞིན་གཤེགས་པ་ནི་སྣོད་དུ་གྱུར་པའི་སེམས་ཅན་ལྷ་དང་མིའི་ཐེག་པ་ལ་རྒྱབ་ཀྱིས་ཕྱོགས་ཤིང་ངན་སོང་དུ་གཞོལ་བར་མི་མཛད་དོ། །བཀའ་སྩལ་པ། རྣལ་འབྱོར་པས་མིའི་ཆོས་འདི་བཅུ་བྱས་ན། འདོད་པའི་ཁམས་ཀྱི་དགེ་བའི་རྩ་བ་ཙམ་ཡང་མི་འགྲུབ་ན། གོང་མ་ལྟ་ཅི་སྨོས། སྔར་གྲུབ་པ་ཡང་ཉམས་ཤིང་སྟོན་པར་འགྱུར་རོ། །བཅུ་གང་ཞེ་ན། འཚོ་བའི་ཡོ་བྱད་ཀྱིས་དཔའ་ཡང་ཐང་བ་དང་ཚུལ་ཁྲིམས་ཉམས་པ་དང༌། ལོག་པ་ལ་ཞེན་ཅིང་འཇིག་རྟེན་གྱི་ལྟས་ལ་ཆགས་པ་དང༌། འཕགས་པ་ལ་མི་གཞོལ་ཞིང་སེམས་རྒོད་པ་དང༌། ཕྲ་མ་དང་དབྱེན་བྱེད་པ་དང་འཕགས་པ་ལ་སྨོད་ཅིང་དབང་ཟ་བ་དང༌། ལོག་པར་ལྟ་བས་རྒྱུ་འབྲས་ལ་སྐུར་པ་འདེབས་པའོ། །ཡང་རྣལ་འབྱོར་པ་ཆོས་འདི་བཅུ་དང་ལྡན་ན་ཏིང་ངེ་འཛིན་མི་འགྲུབ་ཅིང་གྲུབ་ན་ཡང་ཉམས་པར་འགྱུར་རོ། །བཅུ་གང་ཞེ་ན། ལས་སུ་བྱ་བའི་དངོས་པོ་ལ་དགའ་ཞིང་ཆགས་པ་དང༌། བྲེ་མོའི་གཏམ་ལ་དགའ་བ་དང༌། གཉིད་ལ་དགའ་བ་དང༌། གང་ཟག་ཚོལ་བ་ལ་དགའ་བ་དང༌། གཟུགས་ལ་དགའ་བ་དང༌། སྒྲ་ལ་དགའ་བ་དང༌། དྲི་ལ་དགའ་བ་དང༌། རོ་ལ་དགའ་བ་དང༌། རེག་ལ་དགའ་བ་དང༌། རྟོག་པ་དང་དཔྱོད་པ་ལ་དགའ་བའོ། །ཨུ་ཏྲ་ཀ་དང༌། ཨར་ཀ་དང༌། དེ་ཤ་ཀུ་པ་ལི་ཀ་དང༌། ལྷ་སྦྱིན་ལ་སོགས་པ་དང་འདྲ་བར་བསམ་གཏན་ལས་ཉམས་ནས་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །ཨུ་པཱ་ལིས་གསོལ་པ། ཚུལ་ཁྲིམས་ཀྱི་རྩ་བ་བཞི་སྲུངས། ཀུན་ལ་སེམས་མཉམ་པར་བཞག་སྟེ། མི་བརྙས་མི་སྨད་གློ་བུར་དུ་ཉེས་པ་མི་གླེང་ངོ་ཞེས་གསུངས་ན། ཚུལ་ཁྲིམས་འཆལ་པ་དག་ལ་དགེ་འདུན་གྱིས་ཇི་ལྟ་བུའི་ཐབས་བགྱི། བཀའ་སྩལ་པ། ངས་ནི་མུ་སྟེགས་ཅན་དང༌། ཁྱིམ་པས་དགེ་སློང་གི་ཉེས་པ་གླེང་དུ་གནང་བའི་སྐབས་ནི་མེད་དོ། །དགེ་འདུན་གྱིས་ཀྱང་མ་རྟོགས་པ་དང༌། ཆོས་བཞིན་
མ་ཡིན་པར་གླེང་དུ་མ་གནང་ན་བསྐྲད་པ་ལྟ་ཅི་སྨོས། མ་རྟོགས་པ་དང་ཆོས་བཞིན་མ་ཡིན་པར་གླེང་ན། ཁ་ན་མ་ཐོ་བ་ཆེན་པོའི་སྡིག་པ་འཐོབ་པོ། །ཨུ་པཱ་ལི་མ་རྟོགས་པ་དང༌། ཆོས་བཞིན་མ་ཡིན་པ་འདི་བཅུས་གླེང་ན་སྡིག་པ་ཆེན་པོ་འཐོབ་སྟེ། གང་ཞེ་ན། དགེ་འདུན་མ་དད་པ་རྒྱལ་པོའི་སྤྱན་སྔར་གླེང་བ་དང་མ་དད་པར་ཀུན་དུ་རྒྱུའི་ནང་དང༌། མ་དད་པར་བློན་པོའི་མདུན་དང༌། ཚོང་དཔོན་དང༌། ཁྱིམ་བདག་དང༌། བུད་མེད་མང་པོ་དང་མ་རུང་བར་བྱེད་པ་མང་པོ་དང༌། དགེ་སློང་དང༌། དགེ་སློང་མའི་མདུན་དང༌། ཤ་ཁོན་ཡོད་པའི་མདུན་དང༌། ཁྲོ་བོ་ཞེ་འགྲས་པའི་མདུན་དུའོ། །དེ་ལྟར་དགེ་སློང་དེ་ཆོས་ཀྱི་སྣོད་མ་ཡིན་ཏེ། འཕགས་པའི་ཆོས་ཉམས་པས་ཡོངས་སུ་དག་པའི་དགེ་འདུན་སྨེ་བར་བྱེད་ཅིང༌། དགེ་སྦྱོང་གི་ལས་ཐམས་ཅད་མི་རུང་བར་བྱེད་པ་ཡིན་ཏེ། ཕྱོགས་བཞིའི་དགེ་འདུན་གྱི་ལོངས་སྤྱོད་ལ་སྤྱོད་དུ་མི་གནང་མོད་ཀྱི། འོན་ཀྱང་ཡིད་མཐུན་པའི་དགེ་འདུན་ལ་བསྙེན་པར་རྫོགས་ཏེ། སྡོམ་པ་ཐོབ་པ་མ་བཏང་བས་ཁྱིམ་པ་སྐྱེ་བོ་ཐམས་ཅད་པས་མཆོག་གོ །རྩ་བའི་སྡིག་ཉམས་ཀྱང་དེ་ལྟ་བུ་ཡིན་ན་བཅས་པའི་སྡིག་ཕྲ་མོ་གཞན་ཉམས་པ་ལྟ་ཅི་སྨོས་ཏེ། དེ་བས་ན། རྒྱལ་པོ་དང༌། བློན་པོ་དང༌། ཁྱིམ་པ་རྣམས་ཀྱིས་བརྙས་པའམ། ཆད་པས་གཅད་དུ་མི་གནང་ངོ༌། །མ་འོངས་པའི་དུས་ན། རྒྱལ་རིགས་ཁྱིམ་བདག་གདོལ་པས་བསྟན་པ་ལ་སྐྱབས་སུ་སོང་ཞིང་རབ་ཏུ་བྱུང་བ་ཆོས་ཀྱི་སྣོད་དུ་གྱུར་ཀྱང་རུང་བ་རྣམས་ལ་འཚེ་བར་བྱེད་དེ་གཤེ་བ་ནས་སྲོག་དང་བྲལ་བའི་བར་དུ་བྱེད་དེ་དེ་དག་ནི་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་ངོ༌། །མར་འཚིར་གནས་སྡིག་བཅུ་པོ་དག །སྨད་འཚོང་གནས་སྡིག་གཅིག་དང་མཉམ། །སྨད་འཚོང་གནས་སྡིག་བཅུ་པོ་དག །ཆང་འཚོང་གནས་སྡིག་གཅིག་དང་མཉམ། །ཆང་འཚོང་གནས་སྡིག་བཅུ་པོ་དག །ཤན་པའི་གནས་སྡིག་གཅིག་དང་མཉམ། །ཤན་པའི་གནས་སྡིག་བཅུ་གནས་པས། །རྒྱལ་པོ་གདོལ་ཅན་སྡིག་གཅིག་མཉམ། །ཐེག་པ་གསུམ་གྱི་དམ་པའི་ཆོས་ལ་ཐམས་ཅད་ཀྱིས་དད་ཅིང་བཀུར་སྟི་བྱའི་དེ་ལ་འཕྱ་ཞིང་སྐུར་པ་
འདེབས་པ་དང༌། བར་ཆད་དང་གེགས་མི་བྱ་སྟེ། ཐེག་པ་གསུམ་གྱི་དམ་པའི་ཆོས་ལས་ཚིགས་སུ་བཅད་པ་གཅིག་ཙམ་མེད་པར་བྱས་ན་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །ཐེག་པ་གསུམ་ལས་གཅིག་ལ་འཕྱ་ཞིང་སྐུར་ན་དེ་དག་ལྷན་ཅིག་མི་གནས། ཆུང་ངུ་ན་སྐད་ཅིག་ཙམ་ཡང་བསྙེན་བཀུར་དང༌། ཆོས་མཉན་པར་མི་བྱའོ། །དེ་ལྟ་བུ་ལ་འདྲི་ཞིང་མཉན་པར་བྱས་ན། དེའི་རྒྱུ་དང་རྐྱེན་གྱིས་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་སྤྱད་པ་སྤྱོད་པ་ན། ཐེག་པ་གསུམ་ཆར་གྱི་ཚིགས་སུ་བཅད་པ་འགའི་ཕྱིར་ཡང་གླེང་བ་ལས་ཐོས་ན། བླ་ན་མེད་པའི་བྱང་ཆུབ་ཐོབ་པར་གྱུར་ཏོ། །བྱམས་པ་ལ་གནས་ཏེ་ཞེ་སྡང་དང༌། ཁོང་ཁྲོ་བ་སྤོང་བ་དང༌། སྙིང་རྗེ་ལ་གནས་ཏེ་སེམས་ཅན་ཉམ་ཐག་པ་སྒྲོལ་བ་དང༌། དགའ་བ་ལ་གནས་ཏེ་ངག་གི་ལས་མི་དགེ་བ་བཞི་སྤོང་བ་དང༌། བཏང་སྙོམས་ལ་གནས་ཏེ་འདོད་ཆགས་དང༌། སེར་སྣ་དང༌། ཕྲག་དོག་ཐམས་ཅད་སྤོང་ངོ༌། །ཐེག་པ་གཉིས་ཀྱི་ཆོས་ལ་དད་ནས། ཐེག་པ་ཆེན་པོ་ལ་ནི་དད་པར་མི་འགྱུར། ཐེག་པ་ཆེན་པོ་ཆོས་ལ་དད་པ་ཐེག་པའི་ཚིག་ཏུ་སྨྲ་བས་དོན་དུ་མི་འགྱུར། ནང་ནི་ཡང་དག་ཆད་པར་ལྟ་ཞིང༌། ཐེག་པ་ཆེན་པོ་ཅན་ཞེས་ཁས་འཆེ། མི་དགེ་གསུམ་གྱི་ལས་མི་སྲུང་བ། ང་ཡི་དམ་ཆོས་མ་རུང་འཇིག་བྱེད། གང་ཟག་དེ་ནི་འཆི་འཕོས་གྱུར་ནས། སེམས་ཅན་དམྱལ་བའི་མཚམས་མེད་ལྟུང་ངེས། ལུས་རུལ་པ་ལ་དྲི་ཞིམ་པོས་བྱུགས་ཀྱང་ཞིམ་པོར་མི་འགྱུར་རོ། །དེ་བཞིན་དུ་སེམས་ཅན་ཐེག་པ་གཉིས་ཀྱི་ཆོས་ལ་བརྩོན་པར་མ་དད་པ་མི་དགེ་བ་བཅུ་མ་སྤངས་པས་ཐེག་པ་ཆེན་པོའི་ཆོས་ཟབ་མོ་རྟོགས་པར་མི་ནུས་ཏེ། རྒྱུ་མེད་པར་སྨྲ་བ་ལ་ཐེག་པ་ཆེན་པོ་བསྟན་ཀྱང་བདག་དང་གཞན་ལ་ཕན་པའི་དོན་དུ་མི་འགྱུར་རོ། །རྟེན་ཅིང་འབྲེལ་པ་ཉིད་སྟོང་པ་ཡིན། རྟེན་ཅིང་འབྲེལ་པར་འབྱུང་བའི་ཆོས་ལས་གཞན་པ་སྟོང་པ་མ་ཡིན་ནོ། །ཚུལ་ཁྲིམས་ཉམས་པར་དགའ་ལ་སྡིག་པ་ཅན། །ཐེག་
པ་ཆེན་པོའི་ཡོན་ཏན་མཆོག་ཐོབ་ནས། །ཁེ་དང་གྲགས་ཕྱིར་ཐེག་ཆེན་ཁས་འཆེ་བ། །བོང་བུ་སེང་གེའི་པགས་པ་གྱོན་པ་བཞིན། །དེང་འདིར་འཁོར་རྣམས་ཀུན་ལ་བཀའ་སྩལ་པ། །གང་ཞིག་མྱུར་དུ་བྱང་ཆུབ་མཆོག་འདིར་ནི། །དགེ་བཅུའི་ལས་ཀྱི་ལམ་ལ་ནན་ཏན་བྱོས། །ང་ཡི་ཆོས་ལ་མི་སྨད་ཤིན་ཏུ་བསྲུང༌། །ངས་སྔོན་མདོ་སྡེ་གཞན་དག་ལས་གསུངས་པ། །བྱང་ཆུབ་ཆེན་པོ་འདོད་པ་ཐེག་ཆེན་སྤྱད། །ཉན་ཐོས་རང་རྒྱལ་ཐེག་པ་སྤོངས་ཤིག་པ། །དེ་ནི་རྣམ་དག་འཁོར་ལ་བསྟན་པའི་ཆོས། །ལ་ལ་ཉན་ཐོས་ཐེག་པའི་ཆོས་དང་ལྡན། །ལ་ལ་བདེན་པར་དགའ་ཞིང་རང་བྱང་ཆུབ། །ལ་ལ་ཡེ་ཤེས་མཆོག་ལ་དགའ་འོས་པ། །དེ་བས་མོས་པ་བཞིན་དུ་ཐེག་གསུམ་ཤོད། །སྦྱངས་པའི་ཡོན་ཏན་ཙམ་གྱིས་གྲོལ་འདོད་པ། །ཐེག་ཆེན་བཤད་པ་ཐོས་ན་ངན་སོང་ལྟུང༌། །བསྐལ་པ་བཟང་པོའི་སངས་རྒྱས་སྟོང་གི་ཐ་མ་སྣང་མཛད་ཅེས་བྱ། གལ་ཏེ་དགེ་བཅུའི་ལས་ཡང་དག་པར་མ་བསྒྲུབས་པར་མངོན་པར་འཚང་རྒྱ་བའམ། དགེ་བ་བཅུའི་ལས་འགའ་ཙམ་ཡང་མི་སྲུང་བར་ནི་ཐེག་པ་ཆེན་པོ་ཡང་དག་པར་སྤྱོད་པའོ་ཞེས་སམ། བླ་ན་མེད་པའི་བྱང་ཆུབ་སྒྲུབ་པའོ་ཞེས་ཟེར་ན་བརྫུན་དུ་སྨྲ་བ་སྟེ། ཕྱོགས་བཅུའི་སངས་རྒྱས་ཀྱི་སྤྱན་སྔར་འཇིག་རྟེན་སླུ་བ་ངོ་ཚ་མེད་པར་སྟོང་པར་སྨྲ་ཞིང་ཆད་པར་ལྟ་བ་ཡིན་པས་ཚེ་འཕོས་ནས་ངན་སོང་དུ་སྐྱེ་བར་འགྱུར་རོ། །དེ་ཅིའི་ཕྱིར་ཞེ་ན། དགེ་བ་བཅུའི་ལས་ནི་ཐེག་པ་ཆེན་པོའི་རྩ་བ་ཡིན་ཏེ། བྱང་ཆུབ་ཀྱི་རྒྱུད་དང་མྱ་ངན་ལས་འདས་པའི་ཐེམ་སྐས་ལྟ་བུ་ཡིན་ནོ། །དཔེར་ན་སྤོས་བསྲེགས་ན། སྤོས་ཉིད་ཚིག་སྟེ་མེད་པར་སོང་ཡང་དྲི་བསུང་གིས་གཞན་ལ་བྲོ་བར་བྱེད་དོ། །དེ་བཞིན་དུ་ཚུལ་ཁྲིམས་ཉམས་པའི་དགེ་སློང་ཡང་བསོད་ནམས་ཀྱི་ཞིང་གཤིན་པ་མ་ཡིན་ཏེ། ཉིན་མཚན་དུ་དད་པས་བྱིན་པས་བསྲེགས་ཏེ་ངན་སོང་དུ་འགྲོ་མོད་ཀྱི་སེམས་ཅན་དཔག་ཏུ་མེད་པའི་ཕན་པ་དང༌། བདེ་བའི་དོན་དུ་འགྱུར་ཏེ་མཐོ་རིས་དང་མྱ་ངན་ལས་འདས་པའི་བསུང་བྲོ་བར་བྱེད་དོ། །དེ་ལྟར་དགེ་སློང་དེ་ཆོས་ཀྱི་སྣོད་མ་ཡིན་མོད་ཀྱི་སྐྲ་དང་ཁ་སྤུ་བྲེགས་ཏེ་གོས་དུར་སྨྲིག་གྱོན་པས་
ཆ་ལུགས་དང༌། སྤྱོད་ལམ་འཕགས་པ་རྣམས་དང་མཐུན་ཏེ་དེ་མཐོང་བ་ཙམ་གྱིས་སེམས་ཅན་ཚད་མེད་པ་དགེ་བའི་རྩ་བ་རྣམ་པ་སྣ་ཚོགས་འཕེལ་ཞིང་སྐྱེ་བར་འགྱུར་རོ། །དེ་བས་ན་རྒྱལ་པོ་ལ་སོགས་པས་གང་ཡང་ཆད་པས་གཅོད་པ་མི་དབང་ངོ༌། །རྒྱལ་པོ་ལ་གདམས་པ་ལས། ནོར་ནི་བཏང་གིས་ལུས་ནི་བསྲུང་བར་བྱ། །ཡན་ལག་བཏང་གིས་སྲོག་ནི་བསྲུང་བར་བྱ། །ནོར་དང་ཡན་ལག་རྣམས་དང་དེ་བཞིན་སྲོག །ཐམས་ཅད་བཏང་གིས་འདིར་ནི་ཆོས་སྲུང་ངོ༌། །ཆོས་སྤྱོད་པ་ནི་ཆོས་ཀུན་སྲུང་བར་བྱེད། །དཔེར་ན་དབྱར་དུས་གཏུགས་ཆེས་སྲུང་བ་བཞིན། །ཆོས་སྤྱོད་པ་ཡི་ཕན་ཡོན་འདི་ཡིན་ཏེ། །ཆོས་སྤྱོད་པ་ནི་ངན་འགྲོར་མི་འགྲོའོ། །ཆོས་མ་ཡིན་པ་སྤྱོད་ཅིང་བག་མེད་པ། །འདི་ནས་ཤི་འཕོས་ངན་འགྲོ་མི་བཟད་འགྲོ། །གང་དུ་གནས་ན་ཤི་བས་མི་ཚུགས་པ། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣད་མ་ཡིན་རྒྱ་མཚོའི་ནང་མ་ཡིན། །རི་ཡི་ཕུག་ཏུ་ཞུགས་ཀྱང་མི་ཕན་ནོ། །མྱ་ངན་ལས་འདས་པ་ཐོབ་ཕྱིན་ཆད་འཆི་བར་མི་འགྱུར་རོ། །དགེ་བའི་རྩ་བ་ཡོངས་སུ་འཛིན་པ་ལས། ཡི་གེ་མ་མཆིས་ཞེས་བགྱི་བ་ནི་བརྗོད་དུ་མ་མཆིས་པ་ལགས་ལ། ཡི་གེ་ནི་བརྗོད་པ་ཁོ་ན་ལགས་སོ། །བཀའ་སྩལ་པ། མ་ཕམ་པ་འདི་ལྟ་སྟེ། དཔེར་ན་མར་མེད་པས་མར་གྱི་སྙིང་ཁུའི་རྒྱུན་ཆད་པར་འགྱུར་བ་དེ་བཞིན་དུ། བྱང་ཆུབ་ཀྱི་སེམས་བསྐྱེད་པ་མེད་པར་དེ་བཞིན་གཤེགས་པ་མངོན་པར་འགྲུབ་བར་མི་འགྱུར་རོ། །ཇི་ཙམ་དུ་སྤྲོས་པ་དེ་ནི་བྱང་ཆུབ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་ནི་སྤྲོས་པ་མེད་པའི་ཕྱིར་ཏེ། འདི་ནི་ཚུལ་ཡིན་ནོ། །གང་ན་ཇི་ཙམ་དུ་སྤྲོས་པ་དེ་ཙམ་དུ་བྱང་ཆུབ་པོ། །དེ་ཅིའི་ཕྱིར་ཞེ་ན། སྤྲོས་པ་ཐམས་ཅད་ནི་དབེན་པའི་ཕྱིར་ཏེ། བྱང་ཆུབ་དེ་ཡང་དབེན་པ་ཡིན་ནོ། །མཐའ་གཉིས་ཟིལ་གྱིས་མནན་ནས་སུ། །ཁམས་རྣམས་དབུ་མས་སྤྱོད་པར་བྱེད། །དེའི་ཕྱིར་བཟོད་པ་བསྟན་པར་བྱ། །ངོ་བོ་ཉིད་ཀྱིས་ཆོས་སྟོང་པ། །དེ་ནི་བྱང་ཆུབ་ལམ་ཡིན་ཏེ། །ངས་ཀྱང་དེ་ནི་བསྟན་པ་ཡིན། །ཡང་དག་པའི་ལྟ་བ་ཞེས་བྱ་བ་ནི་གང་ལྟ་བ་མེད་པའོ། །ལྟ་བ་ཐམས་ཅད་ནི་ལོག་
པར་ལྟ་བའོ། །གང་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དགྲ་བཅོམ་པས་གང་བ་སྲོག་དང་ཕྲལ་བ་དེ་བས་ནི། འགའ་ཞིག་གིས་བྱང་ཆུབ་སེམས་དཔའ་བྱང་ཆུབ་ཀྱི་སེམས་ལས་མོས་པ་བཟློག་ན། བསོད་ནམས་མ་ཡིན་པའི་ཕུང་པོ་ཆེས་ཆེ་བར་ང་སྨྲའོ། །ཤཱ་རིའི་བུ་མདོར་ན་བྱང་ཆུབ་ཏུ་སེམས་བསྐྱེད་པ་ལ་བར་ཆད་བྱ་བའི་ཕྱིར་སེམས་འཇུག་པ་དེ་ལ་མྱ་ངན་ལས་འདས་པར་འགྲོ་བ་མེད་ཅིང་དལ་བ་ཕུན་སུམ་ཚོགས་པ་མེད་དོ། །ཆོས་བཞི་དང་ལྡན་པ་ནི་དགེ་བའི་བཤེས་གཉེན་དུ་རིག་པར་བྱ་སྟེ། གང་ཞེ་ན། ཚར་གཅོད་པའི་ཚིག་དང་ལྡན་པ་ཡིན། ཆོས་ཟབ་མོ་དང་ལྡན་པ་ཡིན། ཆོས་ཟབ་མོ་ལ་སྦྱོར་བར་བྱེད་པ་ཡིན། དུས་དུས་སུ་གདམས་ངག་གི་ཚིག་དང་ལྡན་པ་ཡིན། དུས་དུས་སུ་ཡལ་བར་འཇོག་པ་ཡིན་ནོ། །མངོན་པར་ཤེས་པ་མྱུར་བ་ཉིད་དུ་བྱ་བའི་ཕྱིར་དེ་བཞིན་གཤེགས་པའི་མཆོད་རྟེན་མཆོད་པ་དང༌། ཕྱིར་བཅོས་པ་དང༌། བྱི་དོར་བྱ་བ་ལྷུར་བླང་བར་བྱ་སྟེ། གང་ཞིག་བྱི་དོར་བྱེད་པ་དེ་ནི་གཟུགས་ཀྱི་སྨོན་ལམ་གྱི་མཆོག་དང༌། དལ་བ་ཕུན་སུམ་ཚོགས་པ་དང༌། ཡང་དག་པར་བླང་བ་བརྟན་པ་དང༌། དེ་བཞིན་གཤེགས་པའི་ལྟ་བའི་སྨོན་ལམ་གྱི་མཆོག་འཐོབ་པོ། །འཇམ་དཔལ་རྣམ་པར་འཕྲུལ་པའི་ལེའུ་ལས། རྣལ་འབྱོར་པ་རྣམ་པར་གྲོལ་བར་འདོད་ཅིང་འཁོར་བས་སྐྲག་པ་རྣམས་ལ་བརྟེན་ཅིང་བསྙེན་བཀུར་བྱེད་པ་ནི་བདུད་ཀྱི་ལས་སོ། །སྟོང་པ་ཉིད་ལ་རྟོག་ཅིང་སེམས་ཅན་ཡལ་བར་འདོར་བ་ནི་བདུད་ཀྱི་ལས་སོ། །འདུས་མ་བྱས་པ་ལ་རྟོག་ཅིང་འདུས་བྱས་ཀྱི་དགེ་བའི་རྩ་བས་སྐྱོ་བ་ཡང་བདུད་ཀྱི་ལས་སོ། །ཉོན་མོངས་པ་མ་ལུས་པ་ཟད་པར་ཚོལ་ཞིང་འཁོར་བའི་རྒྱུན་གྱིས་ཉོན་མོངས་པ་རྣམས་ལ་སྨོད་པ་ཡང་བདུད་ཀྱི་ལས་སོ། །ནམ་དགེ་སློང་འཇིག་ཚོགས་ལ་ལྟ་བ་ངོ་བོ་ཉིད་ཀྱི་བགྲོད་པ་གཅིག་པའི་ལས་སུ་བསྒོམས་ཏེ། གཉིས་སུ་མེད་པར་འཇིག་ཚོགས་ལ་ལྟ་བའི་ངོ་བོ་ཉིད་གང་ཡིན་པ་དེ་བགྲོད་པ་གཅིག་པའི་ལས་ཀྱི་ངོ་བོ་ཉིད་དུ་མཉམ་པར་ཤེས་ཤིང་མ་རིག་པ་དང་སྲིད་པ་དང་སྲེད་པ་ལས་བྱུང་བ་ཡང་ཚོལ་ལམ་རིག་པ་དང༌། སྲེད་
པ་དང༌། སྲིད་པ་ལས་བྱུང་བ་ལ་སོ་སོར་རྟོག་པས་ནམ་རིག་པ་དང༌། སྲིད་པ་དང་སྲེད་པའི་ངོ་བོ་ཉིད་ཀྱང་རིག་པ་དང་རྣམ་བར་གྲོལ་བར་ཤེས་ན་ལྷག་པའི་ང་རྒྱལ་མེད་པ་ཡིན་ནོ། །ཆོས་བཞིས་རྫུ་འཕྲུལ་འཐོབ་སྟེ། ལུས་ཡང་བ་དང༌། སེམས་ཡང་པ་དང༌། ཆོས་ཐམས་ཅད་ལ་མངོན་པར་ཞེན་པ་མེད་པ་དང༌། ཁམས་བཞི་ནམ་མཁའི་ཁམས་དང་མཉམ་པ་ཉིད་དུ་བྱིན་གྱིས་རློབ་པའོ། །ཆོས་བཞིས་རྫུས་ཏེ་སྐྱེ་བར་འགྱུར་ཏེ། དེ་བཞིན་གཤེགས་པའི་སྐུ་གཟུགས་པད་མའི་སྟེང་ན་བཞུགས་པ་བྱེད་དུ་འཇུག་ཅིང༌། པད་མ་ལ་སོགས་པས་ལག་པ་བཀང་སྟེ། སྐུ་གཟུགས་དང་མཆོད་རྟེན་ལ་འཐོར་བ་དང༌། ཕན་པའི་དངོས་པོ་མང་ཞིང་དགའ་བར་བྱེད་པའི་ངང་ཚུལ་དང༌། གཞན་གྱི་སྐྱོན་མི་འཛིན་པ་དང༌། དགེ་བའི་རྩ་བ་ཐམས་ཅད་སེམས་ཅན་གྱི་དོན་དུ་སངས་རྒྱས་སུ་བསྔོ་བའོ། །ཆོས་བཞིས་ཤེས་རབ་ཆེན་པོར་འགྱུར་ཏེ། ཆོས་ལ་སེར་སྣ་མི་བྱེད་པ་དང༌། མི་མཐུན་པར་འཇུག་པས་འགྱོད་པ་སེལ་བ་དང༌། གསོལ་བ་འདེབས་པ་ལ་ཡང་དག་པ་ཇི་ལྟ་བ་བཞིན་གདམས་ངག་སྟོན་པ་དང༌། སྟོང་པ་ཉིད་བསྒོམ་པ་ལ་མང་དུ་གནས་པའོ། །ཆོས་བཞིས་སངས་རྒྱས་དང་འཕྲད་པ་འཐོབ་སྟེ། སྲོག་གི་ཕྱིར་ཡང་དམ་པའི་ཆོས་མི་སྤོང་བ་དང༌། སྲོག་གི་ཕྱིར་ཡང་སྡིག་པའི་གྲོགས་པོ་མི་བསྟེན་པ་དང༌། སྲོག་གི་ཕྱིར་ཡང་ཆོས་སྨྲ་བ་ལ་སྐུར་པ་མི་འདེབས་པ་དང༌། སངས་རྒྱས་རྗེས་སུ་དྲན་པའི་ཏིང་ངེ་འཛིན་བསྒོམ་པའོ། །ཆོས་བཞིས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་འཐོབ་སྟེ། དེ་བཞིན་གཤེགས་པའི་མཆོད་རྟེན་ལ་རིན་པོ་ཆེ་སྤར་གྱིས་འཐོར་བ་དང༌། འབྲུ་མར་གྱི་དྲི་ཞིམ་པོས་དེ་བཞིན་གཤེགས་པའི་མཆོད་རྟེན་ལ་འཁྲུ་བ་དང༌། མཆོད་རྟེན་ལ་སྤོས་དང་མེ་ཏོག་དང་སིལ་སྙན་ལ་སོགས་པས་མཆོད་པ་དང༌། ཡིད་དུ་འོང་བའི་གཡོག་འཁོར་གྱིས་མཁན་པོ་དང༌། སློབ་དཔོན་ལ་བསྙེན་བཀུར་བྱས་པས་རིམ་གྲོ་བྱེད་པའོ། །ཆོས་བཞིས་དཔེ་བྱད་བཟང་པོ་བརྒྱད་ཅུ་འཐོབ་སྟེ། སྟན་རྒྱུ་སྣ་ཚོགས་ཀྱི་སྟན་འདུལ་བ་དང༌། གཞན་ལ་བསྟི་སྟང་བྱེད་
པས་མི་སྐྱོ་བ་དང༌། ཆོས་སྨྲ་བ་ལ་འཐབ་མོ་མི་རྒོལ་བ་དང༌། སེམས་ཅན་རྣམས་བྱང་ཆུབ་ལ་ཡང་དག་པར་འཛིན་དུ་འཇུག་པའོ། །ཆོས་བཞིས་སངས་རྒྱས་ཀྱི་ཞིང་གར་སེམས་བསྐྱེད་པ་དེར་སྐྱེ་སྟེ། གཞན་དག་གིས་ཤེས་པའི་ཁེ་དང་རྙེད་པ་ལ་ཕྲག་དོག་མི་བྱེད་པ་དང༌། ལྷག་པའི་བསམ་པས་ཕ་རོལ་ཏུ་ཕྱིན་པ་དྲུག་ཡོངས་སུ་དག་པ་ཚོལ་བ་དང༌། བྱང་ཆུབ་སེམས་དཔའ་ཐམས་ཅད་ལ་སྟོན་པའི་འདུ་ཤེས་སྐྱེད་པ་དང༌། ཤེས་ཀྱི་ཁེའི་ཕྱིར་ཚུལ་འཆོས་པ་མེད་དོ། །ཀུན་རྫོབ་དང་དོན་དམ་པའི་བདེན་པ་བསྟན་པ་ལས། ཤའི་མིག་གིས་སེམས་ཅན་ཐམས་ཅད་དང་སངས་རྒྱས་ཀྱི་ཞིང་མཐོང་ངོ༌། །ལྷའི་མིག་གིས་སེམས་ཅན་གྱི་འཆི་འཕོ་དང་སྐྱེ་བ་མཐོང་ངོ༌། །ཤེས་རབ་ཀྱི་མིག་གིས་སེམས་ཅན་གྱི་སེམས་ཀྱི་སྤྱོད་པ་དང་གཡོ་བ་ཤེས་སོ། །ཆོས་ཀྱི་མིག་གིས་སེམས་ཅན་ཡང་དག་པ་ཇི་ལྟ་བ་བཞིན་མཐོང་ངོ༌། །སངས་རྒྱས་ཀྱི་སྤྱན་གྱིས་སངས་རྒྱས་ཀྱི་མཛད་པ་ཐམས་ཅད་བྱེད་དོ། །མི་དགེ་བའི་གྲོགས་པོ་དང་བརྟེན་པ་ནི་མི་དགེ་བ་ཐམས་ཅད་ཀྱི་སྒོའོ། །དགེ་བའི་བཤེས་གཉེན་དང་བརྟེན་པ་ནི་དགེ་བའི་རྩ་བ་ཐམས་ཅད་ཀྱི་སྒོའོ། །བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་སྒོའོ། །དེ་བཞིན་གཤེགས་པའི་ཡེ་ཤེས་ཀྱི་ཕྱག་རྒྱའི་ཏིང་ངེ་འཛིན་ལས། བཀའ་སྩལ་པ། བྱམས་པ་བྱང་ཆུབ་སེམས་དཔའ་བྱེ་བ་བརྒྱ་ཕྲག་སུམ་ཅུ་པོ་འདི་དག་གི་ནང་ནས་བརྒྱད་སྟོང་ནི་དམ་པའི་ཆོས་འཛིན་ཅིང་ཡོངས་སུ་འཛིན་པར་གནས་པར་འགྱུར་རོ། །བྱང་ཆུབ་སེམས་དཔའ་ལྷག་མ་ནི་དམུ་རྒོད་དམིགས་པར་འཛིན་པ་ལ་མངོན་པར་ཞེན་པ་དམ་པའི་ཆོས་འཛིན་པ་མ་ཡིན་པར་འགྱུར་ཏེ། དེ་དག་ཕྱི་མའི་དུས་ལྔ་བརྒྱ་ཐམ་པའི་ཚེ། ངའི་བྱང་ཆུབ་བསྐལ་པ་གྲངས་མེད་པ་དུ་མར་བསྒྲུབས་པ་འདི་སྤོང་བར་འགྱུར། འགལ་བར་བྱེད་པར་འགྱུར། མི་སྟོན་པ་འཛིན་པར་འགྱུར་རོ། །དེ་ཅིའི་ཕྱིར་ཞེ་ན། བྱམས་པ་རྣམ་པ་བདུན་གྱིས་བྱང་ཆུབ་ཏུ་སེམས་བསྐྱེད་དོ། །བདུན་གང་ཞེ་ན། སངས་རྒྱས་བཅོམ་ལྡན་འདས་རྣམས་
ཀྱིས། བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་པ་དང༌། དམ་པའི་ཆོས་རྣམ་པར་འཇིག་པའི་དུས་ན། དམ་པའི་ཆོས་ཡོངས་སུ་འཛིན་པའི་ཕྱིར། བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་པ་དང༌། སྡུག་བསྔལ་སྣ་ཚོགས་ཀྱིས་ཡོངས་སུ་གཟིར་བའི་སེམས་ཅན་གྱི་ཁམས་མཐོང་ནས་སྙིང་རྗེ་ཆེན་པོ་སྐྱེས་ཏེ། བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་པ་དང༌། བསྟི་སྟང་དུ་བྱས་ཏེ་སྦྱིན་པ་བཟང་པོ་ཡིད་དུ་འོང་བ་བྱིན་ནས། བྱང་ཆུབ་སེམས་དཔའ་བདག་ཉིད་བྱང་ཆུབ་ཏུ་སེམས་བསྐྱེད་པ་དང༌། གཞན་བྱང་ཆུབ་ཏུ་སེམས་བསྐྱེད་པ་མཐོང་ནས། བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་པ་དང༌། དེ་བཞིན་གཤེགས་པའི་སྐུའི་མཚན་ཉིད་དང་དཔེ་བྱད་བཟང་པོའི་རྒྱན་སྣ་ཚོགས་ཀྱི་ཡོན་ཏན་བསྔགས་པ་རྫོགས་པ་ཐོས་ནས། བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་པ་གོང་མ་གསུམ་ནི། སངས་རྒྱས་ཀྱི་བྱང་ཆུབ་སྲུང་བ་ཡིན་ཏེ། མྱུར་དུ་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །ལྷག་མ་བཞི་ནི་བྱང་ཆུབ་སེམས་དཔའ་དམུ་རྒོད་དམ་པའི་ཆོས་འཛིན་པ་མ་ཡིན་པར་འགྱུར་རོ། །བྱང་ཆུབ་སེམས་དཔའ་ཆོས་ལྔ་དང་ལྡན་ན་ཕྱིར་མི་ལྡོག་པའི་ཆོས་སུ་རིག་པར་བྱ་སྟེ། ལྔ་ནི་སེམས་ཅན་ཐམས་ཅད་ལ་སེམས་སྙོམས་པ་དང༌། ཕ་རོལ་གྱི་རྙེད་པ་དང་བཀུར་སྟི་ལ་ཕྲག་དོག་མེད་པ་དང༌། སྲོག་གི་ཕྱིར་ཡང་དམ་པའི་ཆོས་འཛིན་པའི་དགེ་སློང་གི་བསྔགས་པ་མ་ཡིན་པ་བརྗོད་པ་དང༌། ཤེས་ཀྱི་ཁེ་དང་རྙེད་པ་དང༌། བཀུར་སྟི་དང་གྲགས་བ་ལ་མི་ཆགས་པ་དང༌། ཆོས་ཟབ་མོ་ལ་མོས་པའོ། །ཆོས་ལྔ་དང་ལྡན་ན་བྱང་ཆུབ་སེམས་དཔའ་དམུ་རྒོད་ཡིན་ཏེ། ལྔ་ནི་གཟི་བརྗིད་ཆུང་ཞིང་བཀའ་བློ་མི་བདེ་བ་ཡིན། དམན་པ་ལ་མོས་ཤིང་ཐམས་ཅད་ལ་དམན་པའི་ཆོས་སྟོན་པ་ཡིན། ཤེས་ཀྱི་ཁེ་དང་རྙེད་པ་དང་བཀུར་སྟི་ལ་ཆགས་ནས་སློང་མོ་སྟེར་བའི་ཁྱིམ་ལ་སེར་སྣ་བྱེད་པ་ཡིན། གཡོ་སྒྱུ་དང་ལྡན་པ་ཡིན། སྟོང་པ་ཉིད་ལ་ངག་གི་ལས་ལྷུར་ལེན་པས་མི་འདྲ་བ་ཡིན་ནོ། །བྱམས་པ་ཕྱི་
མའི་ཚེ་ཕྱི་མའི་དུས་ན་བྱང་ཆུབ་སེམས་དཔའ་སྒྱིད་ལུག་པར་མི་འགྱུར་ཞིང༌། ཡང་དག་པར་བླངས་པ་སྟོན་ལ་བསམ་བ་ཐག་པ་ནས་བྱང་ཆུབ་ལ་ཞུགས་པའི་བྱང་ཆུབ་སེམས་དཔའ་དེ་དག་ནི་སངས་རྒྱས་གྲངས་མེད་པ་མང་པོ་ལ་བསྙེན་བཀུར་བྱས་པ་ཡིན་ནོ། །དེ་དག་གིས་ངན་སོང་དུ་འགྱུར་བའི་ལས་གང་མངོན་པར་འདུས་བྱས་པ་དེ་ཡང་མདོག་ངན་པར་འགྱུར་བ་ཙམ་གྱིས་བྱང་བར་འགྱུར། ནད་མང་བ་ཙམ་དང༌། དམན་པའི་རིགས་སུ་སྐྱེས་པ་དང༌། དབུལ་པོ་དང་མཐའ་འཁོབ་པ་དང༌། ལོག་པར་ལྟ་བའི་རིགས་སུ་སྐྱེས་པ་དང༌། སེམས་ཅན་ལ་མྱ་ངན་མང་བ་དང༌། དགེ་བའི་བཤེས་གཉེན་མི་མཐོང་བ་དང༌། རྒྱུན་དུ་ཆོས་མཉན་པ་མི་འཐོབ་པ་དང༌། བསམ་གཏན་ལ་སེམས་གཡེང་བ་དང༌། ཐ་ན་རྨི་ལམ་ན་སྡིག་པ་མཐོང་བ་རྨིས་པས་ཀྱང་ལས་ཀྱི་སྒྲིབ་པ་འབྱང་བར་འགྱུར་རོ། །གང་ཞིག་སྟོང་སེམས་དེ་ནི་རིགས་མིན་ཏེ། །ཇི་ལྟར་དེ་ཡིས་སྐྱེ་མེད་བརྟགས་ཕྱིར་རོ། །རྣམ་རྟོག་ཐམས་ཅད་བདུད་ཀྱི་ཞུགས་པ་སྟེ། །འགྱུར་མེད་ཆོས་ཀྱི་ཕྱག་རྒྱ་ཞེས་བྱའོ། །སྐྱེ་བ་མེད་པ་བདེན་པ་གཅིག་ཡིན་ན། །དེ་ལ་ཁ་ཅིག་བདེན་པ་བཞི་ཞེས་ཟེར། །བྱང་ཆུབ་སྙིང་པོར་འདུག་ནས་བདེན་ཅིག་ཀྱང༌། །གྲུབ་པར་མ་མཐོང་ཞི་ལྟ་ག་ལ་ཞིག །སྒྱུ་མ་ལྟ་བུའི་ཏིང་ངེ་འཛིན་ལས། དེ་བཞིན་གཤེགས་པ་འོད་དཔག་མེད་མྱ་ངན་ལས་འདས་ནས། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞིའི་བར་དུ་དམ་པའི་ཆོས་གནས་པར་འགྱུར་རོ། །དམ་པའི་ཆོས་ནུབ་མ་ཐག་པའི་མཚན་མོ་སྐྱ་རེངས་འཆར་བའི་དུས་ཀྱི་ཚེ། སྤྱན་རས་གཟིགས་དབང་ཕྱུག་མངོན་པར་འཚང་རྒྱ་སྟེ། འོད་ཟེར་ཀུན་ནས་འཕགས་པ་དཔལ་བརྩེགས་རྒྱལ་པོ་ཞེས་བྱ་བར་འགྱུར་རོ། །འཇིག་རྟེན་གྱི་ཁམས་དེ་ནི་རིན་ཆེན་ཀུན་ནས་བསགས་པ་ཞེས་བྱ་བར་འགྱུར་རོ། །དེའི་འོག་ཏུ་བྱང་ཆུབ་སེམས་དཔའ་མཐུ་ཆེན་ཐོབ་དེར་འཚང་རྒྱ་སྟེ། ཡོན་ཏན་ཤིན་ཏུ་གནས་པ་ནོར་བུ་བརྩེགས་པའི་རྒྱལ་པོ་ཞེས་བྱ་བར་འགྱུར་རོ། །ཆོས་ཀྱི་རྣམ་གྲངས་འདི་བུད་མེད་སུས་ཐོས་མ་ཐག་ཏུ་བུད་མེད་ཀྱི་དངོས་པོ་ལས་ཐར་བར་འགྱུར་ཏེ། རྒྱུ་གཉིས་པོ་སེར་སྣ་དང་ཕྲག་དོག་ནི་མ་གཏོགས་སོ། །རབ་ཏུ་ཞི་བ་
རྣམ་པར་ངེས་པའི་ཆོ་འཕྲུལ་གྱི་ཏིང་ངེ་འཛིན་ལས། བྱང་ཆུབ་སེམས་དཔའ་གང་གིས་སྙིང་རྗེ་དང་ལྡན་པའི་སེམས་བསྐྱེད་ན་དགེ་བའི་རྩ་བ་དེས་གལ་ཏེ་སངས་རྒྱས་མ་བྱུང་བར་འཛམ་བུའི་གླིང་དུ་སྐྱེས་ན་ཡང་སྐྱེས་བུ་དམ་པར་འགྱུར། །ལྷ་རྣམས་ཀྱིས་ཡོངས་སུ་གཟུང་བར་འགྱུར་ཏེ། ནམ་བག་མེད་པར་གྱུར་པ་དེའི་ཚེ། ཡང་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་བསྐུལ་བར་འགྱུར། དེ་ནི་དྲན་པ་ཆུད་མི་ཟ་བར་འགྱུར་རོ། །རྣམ་པར་དག་པའི་ཆོས་ལྔ་ཡང་ཡོངས་སུ་འཛིན་ཏེ། ཚུལ་ཁྲིམས་རྣམ་པར་དག་པ་དང༌། ལུས་རྣམ་པར་དག་པ་དང༌། མཚན་ཕུན་སུམ་ཚོགས་པ་རྣམ་པར་དག་པ་དང་དགེ་བའི་རྩ་བ་སྦྱངས་པ་རྣམ་པར་དག་པ་དང༌། དཀོན་མཆོག་གསུམ་ལ་བརྟེན་པ་དང༌། བྱང་ཆུབ་སེམས་དཔའ་དང༌། བྱང་ཆུབ་ཀྱི་སེམས་ལ་བརྟེན་པ་རྣམ་པར་དག་པ་ཡོངས་སུ་འཛིན་ཏོ། །བཀའ་སྩལ་པ། གང་གིས་འཛམ་བུའི་གླིང་པའི་སེམས་ཅན་ཐམས་ཅད་སྲོག་གཅོད་དེ་བདོག་པ་ཐམས་ཅད་ཕྲོག་པ་ལས། གང་གིས་བྱང་ཆུབ་སེམས་དཔའི་དགེ་བའི་རྩ་བ་ཐ་ན་བྱོལ་སོང་ལ་ཟན་ཁམ་གཅིག་བྱིན་པའི་བར་ཆད་བྱས་ན་ཆེས་སྡིག་གྲངས་མེད་པར་ཆེའོ། །གང་ཆོས་ཐམས་ཅད་མི་མཐོང་བ་ནི་དེ་བཞིན་གཤེགས་པ་མཐོང་བའོ། །བྱང་ཆུབ་ཏུ་ནི་སེམས་བསྐྱེད་ན། །བསྐལ་པ་བྱེ་བ་རྣམས་སུ་ཡང༌། །ནམ་དུའང་ལོང་ཐེང་མི་འགྱུར་ཏེ། སྟོན་པ་བླ་ན་མེད་པར་འགྱུར། །བཀའ་སྩལ་པ། འཇམ་དཔལ་ངས་ནི་ཇི་ལྟར་བྱང་ཆུབ་སེམས་དཔའ་ལ་ཁོང་ཁྲོ་བའི་སེམས་ཅིག་བསྐྱེད་པ་ལས། ཁ་ན་མ་ཐོ་བ་ཆེ་བའི་ཆོས་དེ་ལྟ་བུ་གཅིག་ཀྱང་མ་མཐོང་ངོ༌། །འཇམ་དཔལ་བྱང་ཆུབ་སེམས་དཔས་བྱང་ཆུབ་སེམས་དཔའ་ལ་ཁྲོ་པའམ། བརྙས་པའི་སེམས་བསྐྱེད་པ་སྙེད་པ་སྐལ་བར་སེམས་ཅན་དམྱལ་བ་རྣམས་སུ་གནས་པར་གོ་ཆ་བགོ་བར་བྱའོ། །འཇམ་དཔལ་བྱང་ཆུབ་སེམས་དཔའ་ལ་སྐུར་བ་བཏབ་པ་མ་གཏོགས་པར་བྱང་ཆུབ་སེམས་དཔའ་ལས་གཞན་གང་གིས་ཀྱང་ལོག་པའི་ལྟུང་བར་བྱེད་མི་ནུས་སོ། །རིན་ཆེན་ཟླ་བས་ཞུས་བ་ལས། རྒྱལ་པོ་གཟུགས་ཅན་སྙིང་པོའི་བུ་རིན་ཆེན་ཟླ་བས་གསོལ་པ། གང་
གིས་ཕྱོགས་བཅུའི་སངས་རྒྱས་བཅུའི་མཚན་བཟུང་ན་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་བར་འགྱུར་བ་དེ་ལྟ་བུ་བཅོམ་ལྡན་འདས་ཀྱིས་བཤད་དུ་གསོལ་ཞེས་སོགས་ཀྱི་ལན་དུ་བཀའ་སྩལ་པ། ཤར་ན་འཇིག་རྟེན་གྱི་ཁམས་ལག་མཐིལ་ལྟར་མཉམ་པ་ན་སངས་རྒྱས་མྱ་ངན་མེད་པ་བཞུགས། ལྷོ་ན་འཇིག་རྟེན་གྱི་ཁམས་དགའ་བ་ན་སངས་རྒྱས་ཙནྡན་དཔལ་བཞུགས། ནུབ་ན་འཇིག་རྟེན་གྱི་ཁམས་བཟང་པོ་ན་སངས་རྒྱས་སྣང་བ་མཐའ་ཡས་བཞུགས། བྱང་ན་འཇིག་རྟེན་གྱི་ཁམས་འཁྲུགས་མེད་ན་སངས་རྒྱས་ཏོག་གི་དཔལ་བཞུགས། ཤར་ལྷོ་ན་འཇིག་རྟེན་གྱི་ཁམས་ཟླ་བ་སྣད་བ་ན་སངས་རྒྱས་མྱ་ངན་མེད་པའི་དཔལ་བཞུགས། ལྷོ་ནུབ་ན་འཇིག་རྟེན་གྱི་ཁམས་ཏོག་དང་ལྡན་པ་ན་སངས་རྒྱས་རིན་པོ་ཆེའི་མཆོད་སྡོང་བཞུགས། ནུབ་བྱང་ན་འཇིག་རྟེན་གྱི་ཁམས་སྒྲ་ལྡན་ན་སངས་རྒྱས་མེ་ཏོག་དཔལ་བཞུགས། བྱང་ཤར་ན་འཇིག་རྟེན་གྱི་ཁམས་བདེ་ལྡན་ན་སངས་རྒྱས་མངོན་པར་ཤེས་པ་ཆུང་ངུ་དང་ཆེན་པོས་རྣམ་པར་རོལ་པ་བཞུགས་སོ། །འོག་ན་འཇིག་རྟེན་གྱི་ཁམས་ཡངས་པ་དང་ལྡན་པ་ན་སངས་རྒྱས་སྣང་བའི་དཔལ་བཞུགས། སྟེང་ན་འཇིག་རྟེན་གྱི་ཁམས་ཟླ་བ་ཅན་ན་སངས་རྒྱས་ནོར་དཔལ་བཞུགས་སོ། །དཀོན་མཆོག་ཏ་ལ་པའི་གཟུངས་པས། དད་པ་མེད་པའི་མི་དག་ལ། །དཀར་པོའི་ཆོས་རྣམས་མི་སྐྱེ་སྟེ། །ས་བོན་མེ་ཡིས་ཚིག་པ་ལས། །མྱུ་གུ་སྔོན་པོ་ཇི་བཞིན་ནོ། །སྡོང་པོ་བཀོད་པ་ལས། བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །དྲི་མ་མེད་པར་གྲགས་པས་བསྟན་པ་ལས། འཇིག་ཚོགས་ལ་ལྟ་བ་རི་རབ་དང་མཉམ་པ་བསྐྱེད་ཀྱང། བྱང་ཆུབ་ཀྱི་སེམས་སྐྱེ་ཞིང་དེ་ལས་སངས་རྒྱས་ཀྱི་ཆོས་རྣམས་སྐྱེའོ། །དཀོན་མཆོག་ཟ་མ་ཏོག་ལས། བྱང་ཆུབ་སེམས་དཔའ་མ་རིག་པའི་སྦུབས་ཀྱི་ནང་ན་འདུག་པ་བདག་ཏུ་ལྟ་བ་མ་བརྟོལ་ཞིང་ཁམས་གསུམ་ལས་མ་བྱུང་ཡང་སངས་རྒྱས་ཀྱི་སྒྲ་ཉིད་དུ་རྣམ་པར་ཐར་པའི་སྒོ་གསུམ་གྱི་སྒྲ་འབྱིན་ཏོ། །དཔའ་བར་འགྲོ་བའི་མདོ་ལས་གཡོ་བྱས་ཏེ་བྱང་ཆུབ་ཀྱི་སེམས་བསྐྱེད་པ་ལ་ཡང་སངས་རྒྱས་ཀྱི་རྒྱུར་གསུངས་ན། དགེ་བ་སྣ་འགའ་བྱས་ཏེ་སེམས་བསྐྱེད་པ་ལྟ་སྨོས་ཀྱང་ཅི་དགོས། བསྐལ་པ་བཟང་པོའི་མདོ་ལས་དེ་བཞིན་གཤེགས་པ་སྐར་མའི་རྒྱལ་པོ་བ་ལང་རྫིར་གྱུར་
པས་སོ་རྩིའི་འདབ་མ་ཕུལ་ཏེ། དང་པོ་བྱང་ཆུབ་ཏུ་སེམས་བསྐྱེད་དོ། །དེ་བཞིན་གཤེགས་པ་གྲགས་པ་ཐག་པར་གྱུར་པས་རས་ཀྱི་ཁ་ཚར་ཕུལ་འོད་འཕྲོ་ཅན་གྲོང་གི་སྤྲང་པོར་གྱུར་པས་རྩའི་མེ་སྒྲོན་ཕུལ། གདུལ་དཀའ་ཤིང་ཐུན་དུ་གྱུར་པས་སོ་ཤིང་ཕུལ་ཏེ། དང་པོ་བྱང་ཆུབ་ཏུ་སེམས་བསྐྱེད་དོ། །སྤྱོད་པ་དང་མི་ཡང་བྱང་ཆུབ་ཀྱི་སེམས་ནི་བདེ་བ་མཐའ་ཡས་པ་བསྐྱེད་པ་ཡིན་ཏེ། ཅི་མངོན་ཞེ་ན། བྱམས་པའི་རྣམ་པར་ཐར་བ་ལས། རིགས་ཀྱི་བུ་དཔེར་ན་རྡོ་རྗེ་རིན་པོ་ཆེ་ནི་ཆག་ཀྱང་གསེར་རྒྱན་ཐམས་ཅད་ཟིལ་གྱིས་གནོན་ཅིང༌། རྡོ་རྗེ་རིན་པོ་ཆེའི་མིང་ཡང་མི་འདོར་ལ་དབུལ་བ་ཐམས་ཅད་ཀྱང་རྣམ་པར་བཟློག་གོ །དེ་བཞིན་དུ་ཐམས་ཅད་མཁྱེན་པར་སེམས་བསྐྱེད་པའི་རྡོ་རྗེ་རིན་པོ་ཆེ་ནན་ཏན་དང་བྲལ་ཡང་ཉན་ཐོས་དང་རང་སངས་རྒྱས་ཀྱི་ཡོན་ཏན་ཐམས་ཅད་ཟིལ་གྱིས་གནོན་ཅིང༌། བྱང་ཆུབ་སེམས་དཔའི་མིང་ཡང་མི་འདོར་ལ། འཁོར་བའི་དབུལ་བ་ཐམས་ཅད་རྣམ་པར་བཟློག་གོ །སྡོང་པོ་བཀོད་པའི་མདོ་ལས། འཕགས་པ་དཔལ་འབྱུང་གིས་བསྟན་པ་ལྟ་བུ་སྟེ། རིགས་ཀྱི་བུ་དགེ་བའི་བཤེས་གཉེན་གྱིས་ཡང་དག་པར་ཟིན་པའི་བྱང་ཆུབ་སེམས་དཔའ་རྣམས་ངན་འགྲོར་མི་ལྟུང་ངོ༌། །བྱང་ཆུབ་སེམས་དཔའི་བསླབ་པ་དང་འགལ་བར་མི་བྱེད་དོ། །སྤྱོད་པ་ཐམས་ཅད་བརྗེད་ངས་པ་མེད་པར་སྤྱོད་པ་ཡིན་ནོ། །ལས་དང་ཉོན་མོངས་པས་ཐུབ་པར་དཀའ་བ་ཡིན་ནོ། །དགེ་བའི་བཤེས་གཉེན་ནི་བག་མེད་པའི་གནས་ནས་ཟློག་པའོ། །འཁོར་བའི་གྲོང་ནས་འདོར་བའོ། །རིགས་ཀྱི་བུ་དེ་ལྟ་བས་ན་ཡིད་ལ་བྱ་བ་རྒྱུན་མ་ཆད་པས་དགེ་བའི་བཤེས་གཉེན་རྣམས་ཀྱི་དྲུང་དུ་འགྲོ་བར་བྱའོ། །ཁུར་ཐམས་ཅད་ཀྱིས་མི་སྐྱོ་བས་ས་ལྟ་བུའི་སེམས་དང༌། མི་ཕྱེད་པས་རྡོ་རྗེ་ལྟ་བུ་དང༌། ལས་ཐམས་ཅད་ཉམས་སུ་ལེན་པས་བྲན་ལྟ་བུ་དང༌། བརྒྱལ་བཅོམ་པས་ཕྱག་དར་བ་ལྟ་བུ་དང༌། མི་ཁྲོ་བས་ཁྱི་ལྟ་བུ་དང༌། དགེ་བའི་བཤེས་གཉེན་གྱི་ངོར་ལྟ་བས་བུ་མཛངས་བ་ལྟ་བུའི་སེམས་ཀྱིས་དགེ་བའི་བཤེས་གཉེན་ལ་བསྙེན་བཀུར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་ནད་པའི་འདུ་ཤེས། དགེ་བའི་བཤེས་གཉེན་ལ་ནི་སྨན་པ། རྗེས་སུ་བསྟན་པ་ལ་ནི་སྨན། ནན་ཏན་ལ་ནི་ནང་འཚོ་བའི་འདུ་ཤེས་བསྐྱེད་པར་བྱའོ། །སེང་
གེས་ཞུས་པ་ལས། སྐྱེ་བ་ཀུན་དུ་བྱང་ཆུབ་སེམས། །རྨི་ལམ་ན་ཡང་སེམས་དེ་ནི། །འདོར་མི་འགྱུར་ན་མ་ཉལ་ཚེ། །སྨོས་ཅི་འཚལ་བར་གང་གིས་འགྱུར། །བཀའ་སྩལ་པ། གྲོང་དང་གྲོང་ཁྱེར་རྣམས་སུའམ། །གང་དུ་གནས་པའི་ཡུལ་རྣམས་སུ། །བྱང་ཆུབ་ལ་ནི་ཡང་དག་འཛུད། །ངེས་ན་སེམས་འདོར་མི་འགྱུར་རོ། །རིན་པོ་ཆེའི་ཕུང་པོ་ལས། མཆོད་རྟེན་ལ་གོས་ཕུལ་བ་གང་ཡིན་པ་དེ་ནི་མཆོད་རྟེན་དེ་ཉིད་དུ་རླུང་དང་ཉི་མ་དང་ཆར་པས་དེངས་ཀྱང་བླའི། མཆོད་རྟེན་ལ་ཕུལ་བའི་གོས་ཟོང་གསེར་དུ་བསྒྱུར་དུ་མི་རུང་སྟེ། མཆོད་རྟེན་ལ་ནི་མཆོད་རྟེན་གྱི་ཟོང་ཅིས་ཀྱང་བྲེལ་ཕོངས་པ་མེད་པའོ། །དཔའ་བར་འགྲོ་བའི་ཏིང་ངེ་འཛིན་ལས་གང་ཟག་གིས་གང་ཟག་ལ་དྲོད་བཟུང་ན་སྨས་པར་འགྱུར་བར་ཤེས་པར་གྱིས་ཤིག །ཆོས་ཐམས་ཅད་ཤིན་ཏུ་རྒྱས་པའི་བསྡུས་པའི་མདོ་ལས། གང་ཆོས་སྨྲ་བ་ལ་མི་གུས་པ་དེ་སངས་རྒྱས་མཐོང་བར་མི་འདོད་པ་ཡིན་ནོ། །གང་ཆོས་སྨྲ་བ་ལ་མི་སྙན་པར་བརྗོད་པ་དེ་སངས་རྒྱས་ཡོངས་སུ་གཏོང་བ་ཡིན་ནོ། །བྱམས་པ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་ཕྱིར་ཕ་རོལ་ཏུ་ཕྱིན་པ་དྲུག་ཡང་དག་པར་བསྒྲུབས་པ་གང་ཡིན་པ་དེ་ལ་གཏི་མུག་ཅན་དེ་དག་འདི་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་པ་དྲུག་ཡང་དག་པར་བསྒྲུབས་པ་བྱང་ཆུབ་སེམས་དཔའ་བསླབ་པར་བྱ་བའི་ཕ་རོལ་ཏུ་ཕྱིན་པ་ལྷག་མ་རྣམས་ཀྱིས་ཅི་ཞིག་བྱ་ཞེས་ཟེར་ཞིང་དེ་དག་ཕ་རོལ་ཏུ་ཕྱིན་པ་གཞན་ལ་སུན་འབྱིན་པར་སེམས་ན་འདི་སྙམ་དུ་སེམས། ང་ཀ་ཤི་ཀའི་རྒྱལ་བོར་གྱུར་པས་ཕུག་རོན་གྱི་ཕྱིར་ཁྲ་ལ་ཤ་བྱིན་པ་དེ་ཤེས་རབ་འཆལ་བ་ཅན་ཡིན་ནམ། གསོལ་བ། དེ་ནི་མ་ལགས་སོ། །ངས་བྱང་ཆུབ་ཀྱི་སྤྱད་པ་སྤྱོད་པ་ན་ཕ་རོལ་ཏུ་ཕྱིན་པ་དྲུག་དང་ལྡན་པའི་དགེ་བའི་རྩ་བ་བསྒྲུབས་པ་དེ་དག་གིས་གནོན་པར་གྱུར་ཏམ། དེ་ནི་མ་ལགས་སོ། །མི་གཏི་མུག་ཅན་དེ་དག་འདི་སྐད་དུ་བྱང་ཆུབ་ནི་སྟོང་པ་ཉིད་ཀྱི་ཚུལ་གཅིག་བ་ཡིན་ནོ་ཞེས་ཟེར་ན། དེ་དག་སྤྱོད་པ་ཡོངས་སུ་དག་པ་མ་ཡིན་ནོ། །དཀོན་མཆོག་བརྩེགས་པའི་མདོ་ལས། ཆོས་བཞིས་བྱང་ཆུབ་སེམས་དཔའི་དགེ་བའི་རྩ་བ་སྐྱེས་པ་རྣམས་ཟད་པར་འགྱུར་ཏེ། ང་རྒྱལ་གྱིས་འཇིག་རྟེན་རྒྱང་པན་པའི་གསང་ཚིག་ཚོལ་བ་དང༌། ཐོས་པ་དང༌། བཀུར་སྟི་ལ་ཆགས་པས་ཁྱིམ་པས་ལྟ་བ་དང༌། བྱང་ཆུབ་སེམས་དཔའ་འཁྲོ་ཞིང་སྐུར་
པ་འདེབས་པ་དང༌། མ་ཟིན་ཅིང་མ་ཐོས་པའི་མདོ་སྡེ་སྤོང་བའོ། །ཐམས་ཅད་ཡོད་པར་སྨྲ་བའི་ལུང་ལས། བཀའ་སྩལ་པ། དགེ་སློང་འདིས་མཆོད་རྟེན་ལ་ཕྱག་བྱས་ཏེ་སེམས་དང་བ་ལ་ལྟོས། བཙུན་པ་དེ་ལྟ་ལགས་སོ། །དགེ་སློང་འདིས་ས་ཇི་ཙམ་ནོན་པའི་འོད་དཔག་ཚད་བརྒྱད་ཁྲི་བཞི་སྟོང་ན་བྱེ་མ་ཇི་སྙེད་ཡོད་པ་དེ་སྙེད་དུ་འཁོར་ལོས་སྒྱུར་བའི་རྒྱལ་སྲིད་སྟོང་འགྱུར་དུ་སྤྱོད་པར་འགྱུར་རོ། །ཚེ་དང་ལྡན་པ་ཉེ་བ་འཁོར་གྱིས་གསོལ་པ། དགེ་བའི་རྩ་བ་དེ་ལྟ་བུར་ཆེ་བ་གང་དུ་ཡོངས་སུ་བས་པར་འགྱུར། བཀའ་སྩལ་པ། ཚངས་པ་མཚུངས་པར་སྤྱོད་པས། ཚངས་པ་མཚུངས་པར་སྤྱོད་པ་ལ་རྨ་ཕྱུང་བ་དང༌། རྨས་པ་བྱས་པ་དེ་ལྟ་བུ་ནི་ངས་མ་མཐོང་སྟེ། དགེ་བའི་རྩ་བ་ཆེན་པོ་འདི་དག་དེར་ཡོངས་སུ་ཟད་པར་འགྱུར་རོ། །དེ་བས་ན་འགལ་བ་ལ་ཡང་སེམས་ཀྱིས་གནོད་བར་མི་བྱན། སེམས་དང་བཅས་པའི་ལུས་ཅི་སྨོས། སྨན་གྱི་བླ་བཻ་ཌཱུརྻ་འོད་ཀྱི་མདོ་ལས། གང་དག་བྱང་ཆུབ་སེམས་དཔའི་བསླབ་པའི་གནས་བཞི་བརྒྱ་འཛིན་པ་དང༌། དགེ་སློང་གི་སྡོམ་པ་བསླབ་པའི་གནས་ཉིས་བརྒྱ་ལྔ་བཅུ་དང༌། དགེ་སློང་མའི་ལྔ་བརྒྱ་འཛིན་པ་ལས་ཉམས་ཏེ། ངན་འགྲོས་འཇིགས་ན་སྨན་གྱི་བླ་ལ་མཆོད་པ་སྣ་ཚོགས་བྱས་ན་ངན་སོང་ལས་ཐར་རོ། །འཕགས་པ་བྱམས་པའི་རྣམ་པར་ཐར་པ་ལས། དཔེར་ན་མར་མེ་གཅིག་ཁྱིམ་མམ་ཁང་བུར་བཅུག་མ་ཐག་ཏུ་ལོ་སྟོང་དུ་བསགས་པའི་མུན་པ་ཡང་སེལ་བ་དེ་བཞིན་དུ། ཐམས་ཅད་མཁྱེན་པའི་སེམས་གཅིག་བསྐྱེད་མ་ཐག་ཏུ་བསྐལ་བ་བརྗོད་དུ་མེད་པར་བསགས་བའི་ལས་དང་ཉོན་མོངས་པ་སེལ་ཏོ། །ཟླ་བ་སྒྲོན་མའི་མདོ་ལས། སེམས་ཅན་དོན་བརྩོན་བྱང་ཆུབ་སེམས་དང་ནི། །ཚུལ་བཞིན་ཡིད་ཀྱིས་དབེན་སེམས་གང་ཡིན་དང༌། །རྟག་ཏུ་བག་ཡོད་འཆི་མེད་རྒྱུ་ཡིན་ཏེ། །ཡོངས་སུ་འཛིན་མེད་བདེ་བ་ཀུན་གྱི་རྒྱུ། །འོད་སྲུངས་ཀྱི་ལེའུ་ལས། ཆོས་བཞིས་བྱང་ཆུབ་སེམས་དཔའ་ཤེས་རབ་ཡོངས་སུ་ཉམས་པར་འགྱུར་ཏེ་བཞི་ནི་ཆོས་དང་ཆོས་སྨྲ་བ་ལ་མི་གུས་པ་ཡིན། ཆོས་ལ་སེར་སྣ་བྱེད་ཅིང་སློབ་དཔོན་གྱིས་དཔེ་མཁྱུད་བྱེད་པ་ཡིན། ཆོས་འདོད་པའི་གང་ཟག་ལ་ཆོས་ཀྱི་བར་ཆད་བྱེད་དེ་
འདུན་པ་བཟློག་ཅིང་ཆོས་མི་སྟོན་པ་ཡིན། ང་རྒྱལ་གྱིས་བདག་བསྟོད་གཞན་ལ་སྨོད་པ་ཡིན། ཆོས་བཞིས་བྱང་ཆུབ་ཀྱི་སེམས་བརྗེད་བར་འགྱུར་ཏེ། བཞི་ནི། སློབ་དཔོན་དང༌། བླ་མ་དང༌། སྦྱིན་གནས་ལ་སླུ་བ་དང༌། གཞན་འགྱོད་པ་མེད་པ་ལ་ཉེ་བར་སྒྲུབ་པ་དང༌། ཐེག་པ་ཆེན་པོ་ལ་ཞུགས་པའི་གང་ཟག་ལ་བསྔགས་པ་མ་ཡིན་པ་སྨྲ་བ་དང༌། གཡོ་དང་སྒྱུས་གཞན་ལ་སྤྱོད་ཀྱི་ལྷག་པའི་བསམ་པས་མ་ཡིན་ནོ། །ཆོས་བཞིས་བྱང་ཆུབ་ཀྱི་སྙིང་པོའི་བར་དུ་བྱང་ཆུབ་ཀྱི་སེམས་བརྗེད་པར་མི་འགྱུར་ཞིང་སྐྱེས་མ་ཐག་ཏུ་མངོན་དུ་འགྱུར་ཏེ། བཞི་ནི། སྲོག་གི་ཕྱིར་ཡང་ཐ་ན་བཞད་གང་དུ་ཡང་བརྫུན་མི་བྱེད་པ་དང༌། གཡོ་སྒྱུ་མེད་པར་སེམས་ཅན་ཐམས་ཅད་ལ་ལྷག་པའི་བསམ་པས་གནས་པ་དང༌། བྱང་ཆུབ་སེམས་དཔའ་ཐམས་ཅད་ལ་སྟོན་པར་འདུ་ཤེས་ཤིང་དེ་དག་གི་བསྔགས་པ་ཕྱོགས་བཞིར་སྒྲོགས་པ་དང༌། ཉི་ཚེ་བའི་ཐེག་པ་མི་འདོད་པའི་ཕྱིར་སེམས་ཅན་སྨིན་པར་བྱེད་པ་དེ་དག་བླ་ན་མེད་པའི་བྱང་ཆུབ་འཛིན་དུ་འཇུག་གོ །བཞི་པོ་འདི་ནི་བྱང་ཆུབ་སེམས་དཔའི་ཡང་དག་པའི་ཡོན་ཏན་ནོ། །གང་ཞེ་ན། ཆོས་རྣམས་སྟོང་པ་ཉིད་དུ་རྟག་མོད་ཀྱང༌། །ལས་ཀྱི་རྣམ་པར་སྨིན་ལའང་ཡིད་ཆེས་སོ། །བདག་མེད་བཟོད་པས་མཉམ་པ་ཉིད་གནས་ཀྱང༌། །སེམས་ཅན་རྣམས་ལ་སྙིང་རྗེ་ཆེན་པོ་བསྐྱེད། །དེ་ཡི་བསམ་པ་རྟག་ཏུ་མྱ་ངན་འདས་ལ་གནས། །དེ་ཡི་སྦྱོར་བ་འཁོར་བར་གནས་པ་ཡིན། །ཡོངས་སྨིན་བྱ་ཕྱིར་སྦྱིན་པ་སྦྱིན་བྱེད་ཀྱང༌། །ལས་ཀྱི་རྣམ་པར་སྨིན་ལ་རེ་བ་མེད། །སྔགས་དང་སྨན་གྱིས་ཟིན་པའི་དུག་གིས་ནི་འཆི་བར་བྱེད་མི་ནུས་སོ། །དེ་བཞིན་དུ་ཐབས་དང་ཤེས་རབ་ཀྱིས་ཟིན་པའི་བྱང་ཆུབ་སེམས་དཔའི་ཉོན་མོངས་པའི་དུག་གིས་ཀྱང་ལོག་པར་ལྟུང་བར་བྱེད་མི་ནུས་སོ། །དཔེར་ན་གྲོང་ཁྱེར་རྣམས་ཀྱི་མི་གཙང་ལུད། །དེ་ནི་བུ་རམ་ཤིང་གི་ཞིང་ལ་ཕན། །དེ་བཞིན་བྱང་ཆུབ་སེམས་དཔའི་ཉོན་མོངས་ལུང༌། །དེ་ནི་རྒྱལ་བའི་ཆོས་ལ་ཕན་པ་བྱེད། །ལྟ་བར་གྱུར་པ་ཐམས་ཅད་ལས་བྱུང་བའི་སྟོང་པ་ཡིན་ནོ། །འོད་སྲུངས་སྟོང་པ་ཉིད་ཁོ་ནར་ལྟ་བ་དེ་ནི་གསོར་མི་རུང་བའོ་ཞེས་ངས་བཤད་དོ། །བྱང་ཆུབ་
སེམས་དཔའ་སེམས་དང་པོ་བསྐྱེད་པ་མ་རིག་པའི་སྒོ་ངའི་སྦུབས་ན་འདུག་པ། མ་རིག་པའི་མུན་པ་དང་ལིང་ཏོག་གིས་མིག་ཁེབས་པ་དང་ཡང་འདི་ལྟ་སྟེ། དགེ་བའི་རྩ་བ་ཡོངས་སུ་བསྔོ་བའི་སྒྲ་སྐད་ཀྱིས་ཉན་ཐོས་དང༌། རང་སངས་རྒྱས་ཐམས་ཅད་ཟིལ་གྱིས་གནོན་ཏོ། །ལོག་པར་ཞུགས་པའི་འདུ་ཤེས་པ་ལས་འབྱུང་བ་མ་གཏོགས་པས་སངས་རྒྱས་ཐམས་ཅད་ཀྱིས་ཀྱང་མ་གཟིགས་པ་གང་ཡིན་བ་དེ་ནི་རྒྱུ་བ་འདྲི་བ་ལྟ་ཞེ་ན། འོད་སྲུངས་སེམས་ནི་སྒྱུ་མ་དང་མཚུངས་སོ། །ངན་སོང་བཞི་གང་ཞེ་ན། སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་དང་ལྷ་མ་ཡིན་ནོ། །རྩོད་པ་མེད་པའི་ལྷུར་ལེན་པ་ནི་དགེ་སྦྱོང་གི་ཆོས་སོ། །གང་ཞིག་དེ་བཞིན་གཤེགས་པའི་ཆོས་སྨྲ་བ་ལ་རིམ་གྲོ་བྱེད་པ་དེས་འཆི་བའི་དུས་ཀྱི་ཚེ། དེ་བཞིན་གཤེགས་པ་མཐོང་ཞིང་ལུས་ཀྱི་དགེ་བ་བཅུ་ནི་ཚོར་བས་ཀུན་དུ་མ་ཟིན་པར་འཆི་བའི་དུས་མི་བྱེད་པ་དང༌། མིག་འཁྲུལ་བར་མི་འགྱུར་བ་དང༌། ལག་པ་གཡོབ་པར་མི་བྱེད་པ་དང༌། རྐང་པ་འཕྲ་བར་མི་བྱེད་པ་དང༌། གཅིན་མི་གཏོར་བ་དང༌། ཕྱི་ས་མི་འབྱུང་བ་དང༌། དེའི་སྙིང་གར་རྡུལ་མི་འབྱུང་བ་དང༌། ཁུ་ཚུར་མི་འཆང་བ་དང༌། ནམ་མཁའ་ལ་མི་སྙེགས་པ་དང༌། ཇི་ལྟར་འདུག་པ་དེ་བཞིན་དུ་ཚེའི་འདུ་བྱེད་འདོར་བར་འགྱུར། ལས་ཀྱི་སྒྲིབ་པ་རྒྱུན་གཅོད་པ་ལས། སྦྱིན་པ་རྣམས་ཀྱི་ནང་ན་ནི་འདི་ལྟ་སྟེ། ཆོས་ཀྱི་སྦྱིན་པ་མཆོག་ཅེས་ངས་བཤད་དོ། །རིན་པོ་ཆེ་བདུན་ནི། གསེར་དང༌། དངུལ་དང༌། མུ་ཏིག་དང༌། བཻ་ཌཱུརྻ་དང༌། ཤེལ་དང༌། སྦུག་དང༌། མུ་ཏིག་དམར་པོའོ། །རྣམ་པར་འཐག་པ་ཐམས་ཅད་བསྡུས་པ་ལས། གང་ཟག་སེམས་དང་པོ་བསྐྱེད་པའི་བྱང་ཆུབ་སེམས་དཔའ་ཁོང་ཁྲོ་བའི་སེམས་བསྐྱད་པ་དག་གིས་ནི་སངས་རྒྱས་ཡོངས་སུ་གཏང་བ་ཡིན་ཏེ། ཇི་སྙེད་ཀྱི་ཁོང་ཁྲོ་བའི་སེམས་བསྐྱེད་པ་དེ། དེ་སྙེད་ཀྱི་བསྐལ་བར་སེམས་ཅན་དམྱལ་བར་གོ་བགོ་དགོས་སོ། །བྱང་ཆུབ་སེམས་དཔའ་རྣམས་ལ་གནོད་སེམས་བསྐྱེད་པས། བྱང་ཆུབ་སེམས་དཔའ་ངན་སོང་དུ་འགྲོ་བར་ལོག་པར་ལྟུང་བར་འགྱུར་བའི་ཆོས་དེ་ལྟ་བུ་གཞན་ནི་ངས་མ་མཐོང་ངོ༌། །མ་ཕམ་པ་བྱང་ཆུབ་སེམས་དཔའ་རྣམས་ཀྱི་ཕ་རོལ་ཏུ་ཕྱིན་
པ་དྲུག་སྒྲུབ་པ་འདི་ནི་བྱང་ཆུབ་ཀྱི་ཕྱིར་ཡིན་ན། དེ་ལ་མི་བླུན་པོ་དག་འདི་སྐད་ཅེས་ཤེས་རབ་ཀྱི་ཕ་རོལ་ཏུ་ཕྱིན་པ་ཁོ་ནས་བྱང་ཆུབ་སེམས་དཔའ་བསླབ་པར་བྱའོ་ཞེས་ཟེར་ཞིང་ཕ་རོལ་ཏུ་ཕྱིན་བ་ལྷག་མ་རྣམས་སུན་འབྱིན་ཏོ། །འདི་ཇི་སྙམ་དུ་སེམས། ཀ་ཤིའི་རྒྱལ་པོ་གང་ཡིན་པ་དེས་མགོ་བྱིན་པ་དེ་འཆལ་བའི་ཤེས་རབ་ཅན་ཡིན་ནམ། གསོལ་པ་མ་ལགས་སོ། །དེ་བཞིན་གཤེགས་པའི་བཀའ་ལ་ལ་ནི་བཟང་བར་འདུ་ཤེས། ལ་ལ་ནི་ངན་པར་འདུ་ཤེས་ན་ཆོས་སྦོང་བའོ། །འདི་ནི་བྱང་ཆུབ་སེམས་དཔའི་ཆེད་དུ། འདི་ནི་ཉན་ཐོས་ཀྱི། འདི་ནི་རང་སངས་རྒྱས་ཀྱི་ཆེད་དུ་གསུངས་པའོ་ཞེས་ཟེར་ན་ཆོས་སྤོང་བའོ། །ང་ནི་ཉན་ཐོས་དང་བྱང་ཆུབ་སེམས་དཔའི་རྣམས་ཀྱི་སྤོབས་པ་ཐམས་ཅད་དེ་བཞིན་གཤེགས་པའི་མཐུ་ལས་བྱུང་བར་སྨོན་ལམ་བཏབ་པ་ཡིན་ན། མི་བླུན་བོ་དེ་དག་ངན་སོང་དུ་འགྲོ་བར་བདུད་ཀྱིས་བྱིན་གྱིས་བརླབས་པའི་ཕྱིར་དེ་ལ་སྐྱོན་འདོགས་པར་སེམས་སོ། །དེ་བཞིན་གཤེགས་པས་གནང་བའི་ཆོས་སྨྲ་བ་ལ་སྐྱོན་འདོགས་པར་སེམས་སོ། །ཆོས་ཀྱི་རྣམ་གྲངས་འདི་མ་བཟུང་མ་བཀླགས་པར་སྨྲ་ན་ཆོས་ཀྱིས་ཕོངས་པར་འགྱུར་བ་ལས། མ་སྨྲས་པར་ཐར་པ་ཤིན་ཏུ་དཀའོ། །ཆོས་བཞི་དང་ལྡན་ན་མ་སྨྲས་པར་འགྱུར་ཏེ། སེམས་ཅན་ལ་ཁོང་ཁྲོ་བ་མེད་པ་དང༌། ཆོས་སྨྲ་བ་རྣམས་དང་འགལ་བར་མི་བྱེད་པ་དང༌། ཕ་རོལ་མི་སྤོང་བ་དང༌། དེ་བཞིན་གཤེགས་པས་གསུངས་པ་ཐམས་ཅད་ལ་གུས་པའོ། །སྤྲིན་ཆེན་པོ་ལས། བྲམ་ཟེ་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་སེར་པོ་ཆེན་པོ་བྱང་ཆུབ་སེམས་དཔའི་འཁོར་གྱིས་བསྐོར་བ་ལ་བཟོད་པར་གསོལ་ཅིག །གང་ལ་ལ་ལྷ་སྦྱིན་གྱི་ཡོན་ཏན་མི་ཤེས་པ་དེ་དག་ནི་སངས་རྒྱས་བྱུང་བའི་ཕྱེད་ཐོབ་པ་ཙམ་དུ་ཟད་པ་ཡིན་པར་རིག་པར་བྱའོ། །བྲམ་ཟེ་ཆེན་པོ་ལྷས་བྱིན་གྱི་ཡོན་ཏན་གྱི་ཆེ་བ་ལ་ལྟོས། དེ་བཞིན་གཤེགས་པའི་ཡུལ་དང་འདྲ་བར་སྐྱེས་བུ་ཆེན་པོ་ཡིན་པར་བལྟ་སྟེ། འདུལ་བའི་དབང་གིས་དེ་བཞིན་གཤེགས་པ་གང་དང་གང་ན་སྣང་བ་དེར། སྐྱེས་བུ་ཆེན་པོ་འདི་ཡང་ཕྱི་བཞིན་འབྲང་ཞིང་སྣང་ངོ༌། །བྱང་ཆུབ་སེམས་དཔའི་དྲུག་སྡེ་རྣམས་ཀྱིས་བསྐོར་བ་ལ་རྗེས་སུ་ཡི་རང་བར་གྱིས་ཤིག །བྱང་ཆུབ་སེམས་དཔའ་རྣམས་ནི་རྟག་ཏུ་དེ་མངོན་པར་ཤེས་པ་རྣམས་ཀྱིས་
སེམས་ཅན་དམྱལ་བ་ན་རྩེ་བར་བྱེད་དེ་འདི་ནི་བྱང་ཆུབ་སེམས་དཔའི་ཡུལ་ཡིན་ནོ། །ལྷ་སྦྱིན་ནི་སེམས་ཅན་དམྱལ་བར་འགྲོ་བ་ཡང་མ་ཡིན་ནོ། །ལྷ་མོ་སློབ་དཔོན་ལུང་སྟོན་པ་བྲམ་ཟེ་ཀཽཎྜ་ནྱི་འདས་པའི་འོག་ཏུ་ལོ་བརྒྱ་ཉི་ཤུ་ལོན་པ་ན་མཽ་རྒྱའི་རིགས་ཞེས་བྱ་བ་བྱེད་ཀྱི་འཁོར་ལོས་སྒྱུར་བའི་རིགས་སུ་སྐྱེ་བར་འགྱུར་ཏེ། སྐྱེས་ནས་ཡང་ཕྱེད་ཀྱིས་འཁོར་ལོས་སྒྱུར་བའི་རྒྱལ་པོར་འགྱུར་རོ། །གསོལ་པ། དེའི་མིང་ཇི་སྐད་ཅེས་བགྱི། ལྷ་མོ་དགེ་བསྙེན་གྱི་རྒྱལ་པོ་མྱ་ངན་མེད་ཅེས་བྱ་བར་འགྱུར་རོ། །སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །སེམས་ཅན་རྣམས་ནི་སྨིན་མཛད་ཕྱིར། །ཡོངས་སུ་མྱ་ངན་འདའ་བ་སྟོན། །སྒྲིན་ཆེན་པོ་འདི་ཡང་ལོ་བཞི་བཅུའི་བར་དུ་འཛམ་བུའི་གླིང་ན་སྤྱོད་པར་འགྱུར་ཏེ། རྒྱས་པར་ཡང་འགྱུར་རོ། །དམ་པའི་ཆོས་ཡོངས་སུ་ཉམས་པའི་དུས་ན། འོད་སྲུངས་ཆེན་པོ་དང་འདྲ་བའི་དགེ་སློང་དུ་འཛམ་བུའི་གླིང་དུ་སྐྱེ་བར་འགྱུར་ཏེ། བསླབ་པའི་གཞི་བཅས་པའི་བསྔགས་པ་བརྗོད་པར་འགྱུར་རོ། །ལྷའི་བུ་མང་པོ་དག་གིས་གསོལ་པ། ཡུན་ཇི་སྲིད་ཅིག་ན་འོད་སྲུངས་ཆེན་པོ་དང་འདྲ་བའི་དགེ་སློང་འབྱུང་བར་འགྱུར་རོ། །གང་དུ་ནི་སྐྱེ། དེའི་མིང་ནི་ཇི་སྐད་ཅེས་བགྱི་བར་གཟུང་བར་འཚལ། བཀའ་སྩལ་པ། ང་འདས་པའི་འོག་ཏུ་ལོ་བརྒྱ་ཕྲག་མང་པོ་འདས་པ་ན། ལྷོ་ཕྱོགས་ཀྱི་རྒྱུད་དུ་མཁར་གྱི་རྒྱལ་པོ་བདེ་སྤྱོད་ཅེས་བྱ་བ་འབྱུང་བར་འགྱུར་ཏེ། དེའི་ཚེ་ལོ་བརྒྱད་ཅུ་ན། དམ་པའི་ཆོས་ནུབ་པར་འགྱུར་བའི་ལྷག་མ་ཙམ་ལུས་པའི་དུས་ལ་བབ་པ་དེའི་ཚེ་དའི་ཉན་ཐོས་འབྱུང་བར་འགྱུར་ཏེ། ཆོས་ཀྱང་འཛིན་པར་འགྱུར། ཐེག་པ་ཆེན་པོ་ཡང་གཞན་ལ་རྒྱས་པར་འཆད་པར་འགྱུར་རོ། །གང་གི་ཕྱིར་དགེ་སློང་དེས་ནི་དེ་བཞིན་གཤེགས་པ་ཀླུ་རིགས་སྒྲོན་མའི་ཐད་དུ་ཤཱཀྱ་ཐུབ་པའི་བསྟན་པ་བཟུང་བའི་ཕྱིར་སྨོན་ལམ་བཏབ་སྟེ། བརྩོན་འགྲུས་ཆེན་པོའི་གྲུ་དེ་ནི་དེ་ལྟར་ལིཙྪ་བཱི་འཇིག་རྟེན་ཐམས་ཅད་ཀྱི་མཐོང་ན་དགའ་བ་འདི་ཡིན་ནོ། །འདི་ནི་དེ་བཞིན་གཤེགས་པ་དང་མི་མཐུན་པའི་དགེ་སློང་དུ་འགྱུར་བར་རིག་པར་བྱའོ། །གཞན་ཡང༌། ངའི་ཉན་ཐོས་དེ་བཞིན་གཤེགས་པ་དང་མི་མཐུན་པའི་དགེ་སློང་ཆོས་ཀྱི་སྒྲ་ཆེན་པོ་ལན་གསུམ་མངོན་པར་
བསྒྲགས་ནས་འཆི་བའི་དུས་བྱེད་པར་འགྱུར་བའི་ཆེ་བ་ཉིད་ལ་ལྟོས། །དེའི་ཚེ་ངའི་དམ་པའི་ཆོས་ཀྱི་ཚོགས་ནུབ་པར་འགྱུར་རོ། །དེ་ནི་འདི་ནས་འཆི་འཕོས་ནས་སངས་རྒྱས་སུ་འགྱུར་ཏེ། བསྐལ་པ་བཟང་པོ་འདི་འདས་ནས། བསྐལ་པ་དྲུག་ཅུ་རྩ་གཉིས་སུ་སངས་རྒྱས་མི་འབྱུང་སྟེ། རང་སངས་རྒྱས་བྱེ་བ་ཕྲག་དྲུག་འབུམ་འབྱུང་ངོ༌། །བསྐལ་པ་དེ་དག་འདས་ནས་སངས་རྒྱས་བདུན་འབྱུང་བར་འགྱུར་རོ། །བདུན་པོ་ཡོངས་སུ་མྱ་ངན་ལས་འདས་པའི་ཚེ། འཇིག་རྟེན་གྱི་ཁམས་འདི་མངོན་པར་དང་བཞེས་བྱ་བར་འགྱུར་ཏེ། དེར་འདི་དེ་བཞིན་གཤེགས་པ་ཡེ་ཤེས་འབྱུང་གནས་འོད་ཅེས་བྱ་བར་འགྱུར་རོ། །བྱང་ཆུབ་སེམས་དཔའ་ཆེན་པོ་གང་དག་དེ་ཁོ་ན་དང༌། རྟག་པ་དང༌། བདག་དང༌། སེམས་ཅན་དུ་འདུ་ཤེས་པ་ཡང་དག་པར་མཐོང་བ་ནི། ཤིན་ཏུ་ཡང་དག་པའི་ལྟ་བ་ཅན་ཞེས་ང་སྨྲའོ། །གསོལ་བ། ཅི་ལས་དགོངས་ཏེ་འཇིག་རྟེན་པའི་འདུ་ཤེས་བརྫུན་པ་རྣམས་རྫོགས་པར་བཤད་ཅིང༌། དེ་སྐད་བཀའ་སྩལ་པ་དེ་ཁོ་ན་དང་རྟག་པ་དང་བདག་དང་སེམས་ཅན་དུ་འདུ་ཤེས་པ་ཞེས་བྱ་བ་ནི་ཐར་བའི་ཚིག་བླ་དགས་སོ། །དེ་བཞིན་གཤེགས་པ་རྟག་པ་དང་ཐེར་ཟུག་དང་བརྟན་པ་ཞེས་བྱ་བ་དམ་པའི་ཆོས་ནུབ་པར་མི་འགྱུར་བའི་ཚིག་བླ་དགས་སོ། །སེམས་ཅན་བསོད་ནམས་ཆུང་ངུ་དག་ནི་ཐར་པ་ལ་ཟད་པའི་འདུ་ཤེས་བསྐྱེད་ཅིང༌། དེ་བཞིན་གཤེགས་པ་བཞུགས་བཞིན་ཡོངས་སུ་མྱ་ངན་ལས་འདས་པར་སེམས་ཏེ། དེ་བཞིན་གཤེགས་པ་རྣམས་ཀྱི་ཤིན་ཏུ་ལྷག་པ་ཡང་དག་པར་མཐོང་བར་འདོད་པས་ནི། ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ལ་རྟག་པ་དང་བདག་དང་སེམས་ཅན་དུ་འདུ་ཤེས་བསྐྱེད་པར་བྱ་ཞིང་ཐར་བའི་འདུ་ཤེས་བསྐྱེད་པར་བྱའོ། །འདི་ནི་མ་འོངས་པའི་སེམས་ཅན་བྱེ་བ་སྙེད་དག་ལུང་སྟོན་པར་སྤྲིན་ཆེན་པོའི་མདོ་ཆེག་བར་བརྒྱད་པར་སྦྱར་བའི་ལེའུ་འབུམ་པ་ལས་ལུང་བསྟན་པའི་རྒྱུད་ཡིན་ནོ། །སྒོ་མཐའ་ཡས་པ་རྣམ་པར་སྦྱོང་བ་ལས་ཆོས་ཀྱི་རྣམ་གྲངས་གང་ཞེ་ན། མི་ཤེས་པ་ལས་འདུས་བྱས་ཀྱི་ཆོས་ཐམས་ཅད་འབྱུང་བར་རྟོགས་པ་དང༌། ཡེ་ཤེས་
མཐོང་བ་ལས་འདུས་མ་བྱས་ཀྱི་ཆོས་ཐམས་ཅད་འབྱུང་བར་རྟོགས་ནས། སྤྲོས་པ་མེད་པའི་ཡེ་ཤེས་ཀྱིས་འདུས་བྱས་དང་འདུས་མ་བྱས་པའི་ཆོས་རྣམས་ལ་ཡང་དག་པར་འཇུག་པར་བྱ་ཞིང་ཡོངས་སུ་སྤྱད་བར་བྱའོ། །གང་དག་དེ་བཞིན་གཤེགས་པ་ལ་ཆོས་ཉིད་དུ་རྟོགས་ན་ཡང་དེ་དག་གིས་དེ་བཞིན་གཤེགས་པ་མཐོང་བ་རྣམ་པར་དག་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་ཆོས་ཀྱང་མ་ཡིན། ཆོས་མ་ཡིན་པ་ཡང་མ་ཡིན་ནོ། །ཆོས་ཐམས་ཅད་ནི་སེམས་ཙམ་སྟེ་སེམས་དང་མཚུངས་པར་ལྡན་པ་མ་ཡིན་ནོ། །ངས་སེམས་ཅན་ཆོས་ཟབ་མོ་ལ་སྤྱོད་པ་མ་བྱས་པ་རྣམས་རྨོངས་པར་གྱུར་ན་མི་རུང་ཞེས་དེ་བཞིན་གཤེགས་པ་རྨོངས་ཕན་ཆད་ཡོད་པ་མེད་དོ་ཞེས་རྣམ་གྲངས་ཀྱིས་བསྟན་པར་བྱ་བ་ཡིན་ཞེས་གསུངས་སོ། །ཆོས་གང་ཞིག་སྐྱེ་བ་ཡང་མེད། འགག་པ་ཡང་མེད་པ་དེ་ནི་ཤི་ཕན་ཆད་པ་འམ་མེད་བ་ཞེས་བྱ་བར་མི་འགྱུར་རོ། །དེ་བཞིན་གཤེགས་པ་ཡང་སྐྱེ་བ་ཡང་མེད་འགག་པ་ཡང་མེད་དོ། །ཆོས་ཐམས་ཅད་ནི་ནམ་མཁའ་ལྟ་བུའོ་ཞེས་བྱ་བ་ཇི་ལྟར་ཆོས་ཐམས་ཅད་ནམ་མཁའ་ལྟ་བུ་ཡིན་ཞེ་ན། ཇི་ལྟར་ནམ་མཁའ་གང་དུ་ཡང་མ་གཏོགས་པ་དེ་ལྟར་ཆོས་ཐམས་ཅད་ཀྱང་གང་དུ་མ་གཏོགས་པའོ། །དེ་བཞིན་གཤེགས་པ་ནི་ཐམས་ཅད་མཁྱེན་པའི་ཡེ་ཤེས་རྣམ་པར་མི་རྟོག་པ་མ་ཆགས་མ་ཐོགས་པས། སེམས་ཅན་ཐམས་ཅད་ཀྱི་སྤྱོད་པ་རྣམ་པ་དུ་མ་མ་ལུས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ལུས་ངན་པོ་ཡི་བུ་ཐུ་བོ། །གནོད་སྦྱིན་ཡང་དག་ཤེས་ཞེས་བྱ། །རྩོད་མེད་ཁྲོ་བ་མེད་གནས་ཏེ། །ཕ་དང་བཅས་ཏེ་རྟག་ཏུ་ནི། །ཆོས་འདི་དག་ལ་དགའ་བ་གང༌། །དེ་ལ་སྲུང་བ་བྱེད་པར་འགྱུར། །ལྷའི་བུ་རབ་རྩལ་སེམས་ཀྱིས་ཞུས་པ་ལས། བྱང་ཆུབ་སེམས་དཔའ་ཆོས་བཞི་དང་ལྡན་ན་ཤེས་རབ་ཀྱི་མུན་བ་དང་བྲལ་བ་ཡིན་ཏེ། བཞི་ནི་ཐོས་པས་ངོམས་པ་མེད་ཅིང༌། ཚུལ་བཞིན་ལ་རབ་ཏུ་སྦྱོར་བ་དང༌། ཟང་ཟིང་མེད་པའི་སེམས་ཀྱིས་ཆོས་སྟོན་པ་དང༌། ཆོས་ཀྱི་དབྱིངས་དབྱེར་མེད་པར་ཤེས་པར་བྱ་བའི་ཕྱིར་ཉོན་མོངས་པ་ཐམས་ཅད་སྒྱུ་མ་ལྟ་བུར་རྟོགས་པ་དང༌། ཚུལ་གཅིག་
ལ་འཇུག་པས་ཚུལ་ཐམས་ཅད་ཀྱི་འཇུག་པ་ལ་འཇུག་གོ །ཆོས་བཞི་དང་ལྡན་ན་འཇིག་རྟེན་གྱི་ཚུལ་ལ་རྟོག་པ་རྣམས་ཡིན་ཏེ། བཞི་ནི་བྲེ་མོ་གཏམ་བྱེད་པ་རྣམས་ལ་ཆོས་སྟོན་པ་དང༌། སྐྱེ་པོ་ཕལ་པོ་ཆེ་འདུས་པ་འཆིབ་རྗེས་སུ་དྲན་པ་དང༌། གཏོང་བ་ཆེན་པོ་ལ་རྗེས་སུ་ཡི་རང་ཞིང་བྱང་ཆུབ་ཏུ་བསྔོ་བ་དང༌། འདུ་འཛི་ཐམས་ཅད་ལས་དབེན་པར་གཞོལ་བའོ། །ཆོས་བཞི་དང་ལྡན་ན་སངས་རྒྱས་ཀྱིས་གསུངས་བ་བཞིན་སྨྲ་བ་ཡིན་ཏེ། བཞི་ནི་བྱང་ཆུབ་གྱི་སེམས་མི་གཏོང་བ་དང༌། ཐོས་བ་དམ་པ་སྙིང་བོར་བྱེད་པ་དང༌། ཇི་སྐད་སྨྲས་པ་དེ་བཞིན་དུ་བྱེད་པ་དང༌། རང་བཞིན་གྱིས་བདག་མེད་པ་ལ་འཇུག་པའོ། །ཆོས་བཞི་དང་ལྡན་ན་ལས་ཀྱི་བྱ་བ་ཐམས་ཅད་ཀྱི་རྒྱུ་ལ་མཁས་པ་ཡིན་ཏེ། བཞི་ནི་ལོངས་སྤྱོད་ཆེན་པོའི་རྒྱུ་སྦྱིན་པ་མི་སྤོང་བ་དང༌། མཐོ་རིས་ཀྱི་རྒྱུ་ཚུལ་ཁྲིམས་མི་སྤོང་བ་དང་ཤེས་རབ་ཆེན་པོའི་རྒྱུ་ཐོས་པ་མི་སྤོང་བ་དང༌། བྲལ་བའི་རྒྱུ་སྒོམ་པ་མི་སྤོང་བའོ། །གང་གི་ཚེ་བྱང་ཆུབ་སེམས་དཔའ་ཆོས་ཐམས་ཅད་རང་བཞིན་གྱིས་མཉམ་པར་གཞག་པ་ཉིད་ཡིན་པར་ཡང་ཤེས་པར་བྱེད་ལ་སེམས་རྣམ་པར་གཡེང་བ་རྣམས་ལ་སྙིང་རྗེ་ཆེན་པོ་བསྐྱེད་དེ། ཕྱི་མའི་མཐའི་མུར་ཐུག་གི་བར་དུ་སྤྱོད་པར་བྱེད་ཀྱང་བསམ་གཏན་ལ་གནས་པ་ལས་གཡོ་བར་མ་གྱུར་ན། དེ་ཙམ་གྱིས་ན་བྱང་ཆུབ་སེམས་དཔའ་བསམ་གཏན་པ་ཡིན་ནོ། །བྱང་ཆུབ་སེམས་དཔའ་ཡུལ་ཐམས་ཅད་སངས་རྒྱས་ཀྱི་ཡུལ་ཡིན་པར་ལྟ་ཞིང༌། སངས་རྒྱས་ཀྱི་ཡུལ་ཡང་མེད་པར་ལྟ་ན། དེ་ཙམ་གྱིས་ན་བྱང་ཆུབ་སེམས་དཔའ་དབང་པོ་བསྲུངས་པ་ཡིན་ནོ། །བྱང་ཆུབ་སེམས་དཔའ་སངས་རྒྱས་ཀྱིས་གསུངས་པ་ཐམས་ཅད་ཉན་པར་བྱེད་ཅིང་ཐོས་པའི་དོན་ཡང་རྟོགས་པར་བྱེད་ལ། ཇི་ལྟར་ཐོས་པ་ཡང་འཛིན་ཅིང་ཇི་ལྟར་གཟུང་བ་ཡང་གཞན་ལ་སྟོན་པར་བྱེད་ན་མང་དུ་ཐོས་པ་ཡིན་ནོ། །འཇམ་དཔལ་གྱིས་སྨྲས་པ། བྱང་ཆུབ་སེམས་དཔའི་འཇིགས་པ་ནི་འདུས་བྱས་ལས་ཀྱང་འབྱུང་ལ་འདུས་མ་བྱས་ལས་ཀྱང་འབྱུང་སྟེ། འདུས་བྱས་ལས་ནི་ཉོན་མོངས་པའི་འཇིགས་པ་འབྱུང་ལ། འདུས་མ་བྱས་ལས་ནི་ཉོན་མོངས་པ་མེད་པའི་འཇིགས་པ་འབྱུང་ངོ༌། །འཇམ་དཔལ་
ཉོན་མོངས་པ་མེད་པས་འཇིགས་པ་ཅི་ཡོད། ལྷའི་སྐུ་ཁམས་གསུམ་ན་ནི་ཉོན་མོངས་པའི་འཇིགས་པ་ཡོད་ལ། བྱང་ཆུབ་སེམས་དཔའ་དེར་ཉོན་མོངས་པར་མི་བྱེད་ན་ཉན་ཐོས་སུ་འགྱུར་རོ། །བྱང་ཆུབ་སེམས་དཔའ་ཡོངས་སུ་མི་གཏོང་བས། སྦྱིན་པའི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དང༌། ཚུལ་ཁྲིམས་ལས་ཡང་དག་པར་འདའ་བས་ཚུལ་ཁྲིམས་དང༌། གནོད་སེམས་ཀྱིས་བཟོད་པ་དང༌། ལེ་ལོས་བརྩོན་འགྲུས་དང༌། བརྗེད་ངས་བས་བསམ་གཏན་དང༌། བེམས་པོ་དང་སེམས་དང་པོ་ལུག་ལྟར་ལྐུགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་ན་དེ་ཙམ་གྱིས་ན་ལམ་ལ་གནས་པ་ཡིན་ནོ། །འཇམ་དཔལ་ཅི་ལས་བསམས་ཏེ་དེ་སྐད་སྨྲ། ལྷའི་བུ་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱིས་ཡོངས་སུ་མི་གཏོང་བ་ཡིན་ཏེ། སེམས་ཅན་དང་ཆོས་དང༌། བྱང་ཆུབ་ཀྱི་ཆོས་དགེ་བའི་ཆོས་ཏེ་བཞི་པོ་དེ་དག་ཡོངས་སུ་མི་གཏོང་བས་སྦྱིན་པའི་ཕ་རོལ་ཏུ་ཕྱིན་པ་སྒྲུབ་པར་བྱེད་དོ། །ཚུལ་ཁྲིམས་ལས་ཡང་དག་པར་འདའ་བ་ནི། ཚུལ་ཁྲིམས་ལས་ཡང་དག་པར་འདས་པ་ཡིན་ཏེ། ཏིང་ངེ་འཛིན་དང་དེ་ལས་འདས་པས་ཤེས་རབ་དང༌། དེ་ལས་འདས་པས་རྣམ་པར་གྲོལ་བ་སྟེ། དེ་ལྟ་བུས་ཚུལ་ཁྲིམས་སྒྲུབ་པ་ཡིན་ནོ། །གནོད་སེམས་ལ་ཞུགས་པ་ནི་ཉན་ཐོས་དང༌། རང་སངས་རྒྱས་ཀྱི་ཐེག་པ་ལ་ལྡན་ཞིང་ཐེག་པ་ཆེན་པོ་ལ་ཞུགས་པ་སྟེ། ཐེག་པ་ཆེན་པོ་ལ་ཞུགས་པ་ནི་བཟོད་པའི་ཕ་རོལ་ཏུ་ཕྱིན་པའོ། །ལེ་ལོའི་ལུས་དང་ངག་དང་སེམས་ཀྱིས་རྟུལ་པར་མི་བྱེད་པ་སྟེ། ཆོས་ལ་ལྟར་བརྩོན་པ་ནི་བརྩོན་འགྲུས་སོ། །རྨི་ལམ་ན་ཡང་ཉན་ཐོས་དང༌། རང་སངས་རྒྱས་ཀྱིས་དྲན་པ་མེད་པས། བརྗེད་ངས་པ་སྟེ། ས་དེ་ལྟ་བུར་མ་ལྟུང་བ་ཉིད་ཐེག་པ་ཆེན་པོ་ལ་མཉམ་པར་གཞག་པ་ཡིན་པས་བསམ་གཏན་ནོ། །ཆོས་ཐམས་ཅད་བེམས་པོ་སྟེ། རྩ་བ་ལ་སོགས་པ་དང་གནས་ལུགས་ཇི་ལྟ་བ་དེ་བཞིན་དུ་ཤེས་པ་ནི་ཤེས་རབ་བོ། །གང་ཚེ་སེམས་ནི་ཆགས་མེད་པ། །བླ་མེད་བྱང་ཆུབ་སེམས་ཡིན་ཏེ། །
སེམས་ཀྱི་རད་བཞིན་མངོན་སུམ་པ། །དེ་ནི་ཤེས་རབ་མཚན་ཉིད་དོ། །སེམས་བསྐྱེད་པ་ནི་ཐམས་ཅད་ན། །བྱང་ཆུབ་ཏུ་ནི་ཡོངས་བསྔོ་ཞིང༌། །བྱང་ཆུབ་སེམས་ལས་རབ་བརྟག་པ། །དེ་ནི་ཐབས་ཀྱི་མཚན་ཉིད་དོ། །ཐབས་དང་མི་ལྡན་ཤེས་རབ་ཀྱིས། །མ་བྱུང་འབྱུང་བར་འགྱུར་བ་མེད། །ཤེས་རབ་མེད་པའི་ཐབས་ཀྱིས་ནི། །མཁས་པ་རབ་ཏུ་ཞི་མི་འགྱུར། །ནད་བཞི་བརྒྱ་རྩ་བཞི་འདི་ལྟ་སྟེ། རླུང་ལས་གྱུར་པ་བརྒྱ་རྩ་གཅིག་དང༌། མཁྲིས་པ་ལས་གྱུར་པ་བརྒྱ་རྩ་གཅིག་དང༌། བད་ཀན་ལས་གྱུར་པ་བརྒྱ་རྩ་གཅིག་དང༌། འདུས་པ་ལས་གྱུར་པ་བརྒྱ་རྩ་གཅིག་གོ །ལས་རྣམ་པ་གསུམ་སྟེ། ཚེ་དང་འབྲེལ་པ་དང༌། སྲིད་པ་བར་མ་དང་འབྲེལ་པ་དང༌། ཚེ་གཞན་དང་འབྲེལ་པའོ། །སྐྱེས་པ་གང་ཞིག་སྐྱེས་པ་ལ་འཇུག་པར་བྱེད་ན། དེ་ལུས་དང་བྲལ་ནས་སེམས་ཅན་དམྱལ་བ་ཉམ་ང་བར་སྐྱེ་བར་འགྱུར་རོ། །ལུག་མོའམ་བོད་མོ་ལ་འཇུག་པར་བྱེད་ན་སེམས་ཅན་དམྱལ་བ་ཨ་ཙ་ཟེར་དུ་སྐྱེ་བར་འགྱུར་རོ། །སྲིད་མོའམ་གཞན་ཡང་འོས་མ་ཡིན་པ་ལ་འཇུག་ན་སེམས་ཅན་དམྱལ་བ་ཀྱི་ཧུད་ཟེར་དུ་སྐྱེ་བར་འགྱུར་རོ། །དགེ་སློང་མ་ཚུལ་ཁྲིམས་རལ་ཞིང་སྤྱོད་པ་ངན་པ་ལ་འཇུག་ན་སེམས་ཅན་དམྱལ་བ་འཆི་བའི་རྒྱུན་མེད་ལྟ་བུར་སྐྱེ་བར་འགྱུར་རོ། །གཉིས་རྩོད་པ་ན་རྒྱལ་བོའི་བློན་པོའམ་གཞན་ཡིད་ཆེས་པའི་གནས་སུ་བྱ་བས་ནོར་བླངས་པས་མཛའ་བཤེས་སམ། འདོད་ཆགས་ལ་སོགས་པའི་དབང་གིས་ཞལ་ཆེ་ཡོན་པོར་བཅད་ན། སེམས་ཅན་དམྱལ་བ་ལྕེ་བཅུ་གཅིག་པར་སྐྱེ་བར་འགྱུར་རོ། །སྡུག་བསྔལ་བ་དང༌། ནད་བུ་ཅན་དང་ལྟོགས་པ་དང་མགོན་མེད་པ་དང༌། བཀྲེན་པ་དག་ལ་ནོར་རྫས་སྦྱིན་པར་ཁས་བླངས་པ་ལས་མ་བྱིན་ཞིང་བཟའ་བ་དང་བཏུང་བ་ཁས་བླངས་པ་ལས་མ་བྱིན་ན། སེམས་ཅན་དམྱལ་བ་ཀུན་དགའ་ལ་རེ་བ་མེད་པར་སྐྱེ་བར་འགྱུར་རོ། །དོན་མེད་ཆོས་ལ་དགའ་བ་ནི། །བུད་མེད་གཡོ་དང་ཕྲག་དོག་མེད། །འཇིག་རྟེན་གཉིས་ནི་རྣམ་འཇིག་པ། །སྐྱེས་པ་རྣམས་ཀྱི་མདུན་ན་གནས། །དེའི་ཚིག་ཤིན་ཏུ་མི་བརྟན་ཏེ། །རྟག་ཏུ་འདོད་ཆགས་སྐྱེ་ལ་མཁས། །དེ་ཡི་སྙིང་ནི་གཞན་སེམས་ལ། །གཞན་གྱི་ཚུལ་གྱིས་སྤྲོ་བར་བྱེད། །དང་པོ་མཉེན་ཞིང་སྲུན་བྱེད་ལ། །
ཕྱི་ནས་སེམས་ནི་རྡོ་རྗེ་འདྲ། །སེམས་ནི་ཡང་ཞིང་ཕན་པ་མེད། །བཀུར་སྟི་དག་ནི་དྲན་མེད་བྱེད། །ལེགས་པ་བརྒྱ་ནི་ཆུད་གསན་ལ། །མ་ལེགས་གཅིག་པུ་དྲན་པར་བྱེད། །སྡིག་པའི་ས་གཞི་བུད་མེད་ཡིན། །སྙིང་ནི་གློག་གི་ངོ་བོ་བཞིན། །སྐྱེས་པ་ཆགས་པའི་སེམས་ཡོད་ན། །འཇིགས་པའི་རྒྱུ་ནི་བུད་མེད་ཡིན། །འཇིག་རྟེན་འདི་དང་ཕ་རོལ་དུ། །འཇིགས་བྱེད་ནང་ན་བུད་མེད་འཇིགས། །གལ་ཏེ་བདེ་བའི་མཆོག་འདོད་ན། །དེ་ལྟར་བུད་མེད་རྣམ་པར་སྤོངས། །བུད་མེད་རྟག་ཏུ་སྤངས་པ་ནི། །འཇིག་རྟེན་འདི་དང་ཕ་རོལ་བདེ། །གང་ཞིག་དབུལ་བ་སྤོང་འདོད་ཅིང༌། །གང་ཞིག་བདག་ནི་འབྱོར་འདོད་དང༌། །གང་ཞིག་མྱ་ངན་འདས་འགྲོ་འདོད། །མི་དེས་བུད་མེད་སྤོང་བར་བྱེད། །ཇི་ལྟར་བྲམ་ཟེ་སྨྲ་བ་ལས། །བུད་མེད་གཞོན་ནུ་འདོད་ལངས་ལ། །བག་མར་མ་བླངས་ན་མི་སྲོག་གཅད་ལ་དང་འདྲ་བར་འགུར་ཟེར་ཞེས་པ་ལྟ་བུའོ། །མཚམས་མེད་པ་ལྔ་ཆར་བྱས་ན་ལུས་དཔག་ཚད་ལྔ་པར་གྱུར་བ་ནས། གཅིག་བྱས་ན་གཅིག་གི་བར་དུ་འགྱུར་རོ། །མནར་མེད་པ་དེ་དག་ཁ་ཅིག་ནི་འཆི་བའི་དུས་ཀྱི་ཚེ་རང་གི་ལུས་ཉིད་ལས་མནར་མེད་པའི་མེ་འབྱུང་བར་འགྱུར། ཁ་ཅིག་ནི་འཆི་བའི་དུས་བྱས་ནས་སྲིད་པ་པར་མར་སྐྱེས་ལ། དེའི་འོག་ཏུ་སེམས་ཅན་དམྱལ་བ་མནར་མེད་པར་འགྱུར་རོ། །བསླབ་པའི་གཞི་གཅིག་གམ་གཉིས་སམ་གསུམ་མམ། བཞི་འམ་ལྔ་འམ་གཞན་བླངས་པ་དང༌། བུ་སྲིང་ངམ་བུ་སྲིང་དང་འདྲ་བ་འམ། གྲོགས་ཀྱི་ཆུང་མ་འོས་པ་མ་ཡིན་པ་དག་ལ་སླུ་བར་བྱེད་ན། སེམས་ཅན་དམྱལ་བ་ཨ་ལ་ལ་ཞེས་ཟེར་བར་སྐྱེ་བར་འགྱུར་རོ། །ཡི་དྭགས་ཀྱི་རིགས་ནི་མདོར་བསྡུས་ན་སུམ་ཅུ་རྩ་དྲུག་ཡོད་དོ། །འདི་ལྟ་སྟེ། ལྟོ་གུག་དང༌། ཁ་ཁབ་མིག་ལྟར་ཕྲ་བ་དང༌། བཤང་བ་ཟབ་དང༌། དྲི་ཟབ་དང༌། སྤོས་ཟབ་དང༌། ཆུ་འཐུང་བ་དང༌། མཆིལ་མ་ཟ་བ་དང༌། ཕྲེང་བ་ཟ་བ་དང༌། ཤ་ཟ་བ་དང༌། ཁྲག་ཟབ་དང༌། དུད་པ་ཟ་བ་དང༌། དྲག་ཤུལ་སྤྱོད་པ་དང༌། གླགས་ལྟ་བ་དང་མཐུ་བོ་ཆེ་དང༌། མི་ལ་གླགས་ལྟ་བ་དང་མཚན་མོ་ལུས་འབར་བ་དང༌། འདོད་པའི་གཟུགས་ཅན་དང༌། གཤིན་རྗེའི་དབྱུག་པ་དང༌། ཚངས་པའི་སྲིན་པོ་དང༌། མི་གཙང་བ་ཟ་བ་དང༌། བདུད་ཀྱི་སྡེ་
དང༌། ཡུལ་དགོན་དུ་ཆུ་དཀོན་པ་སྲོག་ཆགས་དང་འབྲེལ་ཅིང་སྤྱོད་པ་འཚོ་བ་དེ་ལ་ལྟོས་པ་དེ་བཅད་ན་སེམས་ཅན་དམྱལ་བར་བྱ་ཛ་བ་བྷ་སྒྲ་འབྱིན་དུ་སྐྱེའོ། །ཀླན་ཀ་བཙལ་བའི་ཕྱིར་མཁས་པ་ལས་ཆོས་མཉན་ནས། ཆོས་འདུལ་བ་དེ་ལ་མི་འཇུག་མི་སྙན་པས་སུན་འབྱིན་ན་སེམས་ཅན་དམྱལ་བ་མེས་སྲེག་ཏུ་སྐྱེའོ། །གནོད་སེམས་སྙིང་ལ་ཡོད་པ་ནི། །ཀུན་གྱིས་བསྲུང་བར་མི་ནུས་ཏེ། །བཤེས་གྲོགས་གཉེན་གྱི་མྶི་མ་ཡིན། །ཆོས་དང་དོན་གྱི་ཚོགས་ཀྱིས་མིན། །འཁྲུགས་མེད་མི་ཟད་ནོར་ཡིན་ཏེ། །སྐྱེ་བོ་ཀུན་གྱི་རྗེ་བོར་ཆེ། །བདེན་པ་མཐོ་རིས་སྐས་ཡིན་ཏེ། །དེ་ཉིད་མྱ་ངན་འདས་པའི་སྒོ། །མོས་པའི་རྫུ་འཕྲུལ་དང་ལྡན་པ་ནི་ཇི་ལྟར་མོས་པ་དེ་ལྟར་འགྲོ་བ་ཡིན་ཏེ། གལ་ཏེ་སའི་ཁམས་སུ་མོས་ན་ནམ་མཁའ་ཡང་སའི་ཁམས་སུ་མཐོང་ནས་འགྲོ་བར་འགྱུར་རོ། །རིན་ཆུང་དུས་ཉོས་ནས་ཆེན་པོར་འཚེ་བ་དང་ཕྲག་དོག་དང༌། སེར་སྣས་ཉམས་པ་ནི་ཡི་དྭགས་ཚངས་པའི་སྲིན་པོར་སྐྱེ་སྟེ། མི་བྲམ་ཟེའི་གཟུགས་ཀྱིས་རྒྱུ་བ་ཡིན་ནོ། །ཡུན་རིངས་དན་འགྲོར་བཅོམ་པ་ཡི། །དགེ་བའི་བག་ཆགས་དགའ་བྱེད་དེ། །མེ་ཏོག་ཉམས་ཀྱང་ཏིལ་དག་ལ། །བག་ཆགས་སྣང་པ་ཇི་བཞིན་ནོ། །དེ་དག་གིས་ལས་ངན་པ་བྱས་པ་དེས་རྒྱ་མཚོ་ཡང་ཐམས་ཅད་དུ་སྐམས་ཤིང་རི་དང་ནགས་ཚལ་དང་རྒྱ་མཚོར་བཅས་པ་དེ་ཡང་འབར་བར་མཐོང་ངོ༌། །འཕགས་པ་ཀླུའི་རྒྱལ་པོ་རྒྱ་མཚོས་ཞུས་པའི་མདོ་ལས། འཁོར་ལོས་སྒྱུར་བའི་རྒྱལ་པོ་ལྷས་བཙས་གཉིད་ཀྱིས་ལོག་པའི་རྨི་ལམ་དུ་ཚིགས་སུ་བཅད་པ་གཉིས་ཐོས་ནས། དེའི་མཚན་མོ་འདས་ནས་གཡོག་འཁོར་དང་བཅས་ཏེ། བཅོམ་ལྡན་འདས་ཀྱི་སྤྱན་སྔར་དོང་སྟེ་ལྷགས་ནས་བཅོམ་ལྡན་འདས་དེའི་སྤྱན་སྔར་བྱང་ཆུབ་ཏུ་སེམས་བསྐྱེད་དེ་ཚིགས་སུ་བཅད་པ་འདི་དག་སྨྲས་སོ། །གཟུགས་ལ་བརྐམ་དང་སྒྲ་ལ་བརྟེན་པ་དང༌། །དྲི་དང་རོ་དང་རེག་ལ་གནས་པ་དང༌། །འདོད་ལ་བརྐམ་དང་བདེ་ལ་དགའ་བ་ཡིས། །བྱང་ཆུབ་མཆོག་འདི་རྟོགས་པར་མི་ནུས་སོ། །ཡང་དེ་ཉིད་ལས་བྱུང་བ། བྱང་ཆུབ་སེམས་ནི་བདག་གི་རྨི་ལམ་ཐོས། །ཆོས་རྣམས་བདག་
ནི་བྱང་ཆུབ་མཆོག་ལ་ཞུགས། །དེ་བཞིན་གཤེགས་པ་གསད་བ་བསྟན་བ་ལས་བྱུང་བའི། ཞི་བའི་བློ་གྲོས་གཞན་ཡང་དེ་བཞིན་གཤེགས་པའི་གསུང་ནི། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་རྒྱས་པར་འགེངས་ཤིང༌། སེམས་ཅན་ཐམས་ཅད་ཀྱི་བསམ་པ་ཡང་དག་པར་ཚིམ་པར་མཛད་ཀྱང༌། ཞི་བའི་བློ་གྲོས་དེ་བཞིན་གཤེགས་པ་ནི་འདི་སྙམ་དུ། མདོའི་སྡེ་ལ་སོགས་པ་གསལ་བར་འཆད་ཅིང་སྟོན་ཀྱང༌། འདི་ལྟར་ཡང་དག་པར་བསྒྲགས་པར་མཛད་དོ་སྙམ་དུ་མི་དགོངས་སོ། །དེ་ལྟ་མོད་ཀྱི་དེ་བཞིན་གཤེགས་པའི་འཁོར་འདུས་པ་དགེ་སློང་ལ་སོགས་པ་དེ་དག་གི་དཔང་པོའི་རིམ་པ་དང༌། དེ་དག་ཅི་འདྲ་བའི་ཆོས་ཀྱི་སྦྱིན་པ་ཐོས་པས་དགོངས་པར་འགྱུར་བ་དེ་འདྲ་བའི་ཆོས་ཀྱི་སྦྱིན་པ་ཐོབ་པ་དེ། དེ་བཞིན་གཤེགས་པའི་ཞལ་གྱི་སྒོ་ནས་འབྱུང་བར་ཤེས་ཀྱང༌། ཆོས་བསྟན་པ་དེ་ནི་ཕན་ཚུན་ངེས་པའི་ཚིག་ཐ་དད་པ་ལ། གནོད་པ་མེད་པར་ཐམས་ཅད་ཀྱང་རང་རང་གི་ཆོས་རྣམ་པར་རིག་པར་ཀུན་དུ་ཤེས་ཏེ། ཞི་བའི་བློ་གྲོས་འདི་ནི་དེ་བཞིན་གཤེགས་པའི་གསུང་གི་གསང་བའོ། །ཡང་དེ་ཉིད་ལས། དེ་བཞིན་གཤེགས་བ་ནི་ཤིན་ཏུ་མཉམ་པར་བཞག་པ་སྟེ། ཡི་གེའི་རྣམ་པར་རྟོག་བ་ཐམས་ཅད་ཀྱི་ཐམས་ཅད་དུ་རྣམ་པར་རིག་པར་མི་མཛད་ཀྱང༌། སེམས་ཅན་ཡི་གེར་ལྷུར་ལེན་པ་རྣམས་འདི་སྙམ་དུ་སེམས་ཏེ། དེ་བཞིན་གཤེགས་པ་ནི་བདག་ཅག་ལ་ཆོས་སྟོན་ཏོ། །བདག་ཅག་ནི་དེ་བཞིན་གཤེགས་པའི་ཆོས་བསྟན་པ་ཀུན་ཤེས་སོ་སྙམ་མོ། །ཞི་བའི་བློ་གྲོས་དེ་བཞིན་གཤེགས་པའི་ཚེམས་དང༌། སྒྲོས་དང༌། ཞལ་གྱི་རྐན་དང༌། ལྗགས་དང༌། ཞལ་གྱི་སྒོ་ནས་སྒྲ་འབྱུང་བ་ཡང་མེད་ལ། འབྱུང་བ་ཡང་གྲག་གོ །ཞི་བའི་བློ་གྲོས་གཞན་ཡང་དེ་བཞིན་གཤེགས་པའི་སྐུ་ནི་ཕུང་བོས་རབ་ཏུ་ཕྱེ་བ་མ་ཡིན། ཁམས་ཀྱིས་རབ་ཏུ་ཕྱེ་བ་མ་ཡིན། སྐྱེ་མཆེད་ཀྱིས་རབ་ཏུ་ཕྱེ་བ་མ་ཡིན། ལས་ལས་བྱུང་བ་མ་ཡིན། ཉོན་མོངས་པ་ལས་བྱུང་བ་མ་ཡིན། ཕ་མ་ལས་བྱུང་བ་མ་ཡིན། འབྱུང་བ་ཆེན་པོའི་ནུར་ནུར་པོ་ལས་བྱུང་བ་མ་ཡིན། ཤ་དང་ཁྲག་གི་པགས་པས་གཡོགས་པ་མ་ཡིན། རུས་པ་དང་ཆུ་བའི་འོག་རིས་འབྲེལ་
བ་མ་ཡིན། དབུགས་ཕྱི་ནང་དུ་རྒྱུ་བ་མ་ཡིན། སྲོག་དང་འབྲེལ་བ་མ་ཡིན་ཏེ། ཞི་བའི་བློ་གྲོས་དེ་བཞིན་གཤེགས་པའི་སྐུ་ནི་སྐུ་མེད་པ་སྟེ། ཆོས་ཀྱི་སྐུ་དང་གཟུགས་དང་མཚན་མ་མེད་པའི་སྐུ་དང༌། སྤྲོས་པ་མེད་ཅིང་རྒྱུ་བ་མེད་པའི་རྒྱུ་ཡིན་ཡང༌། གཟུགས་དང་མཚན་མ་གཙོ་བོར་བྱེད་པའི་སེམས་ཅན་སྐུ་བསྟན་པས་འདུལ་བའི་སེམས་ཅན་རྣམས་ཀྱི་མིག་ལ་སྣང་བར་འགྱུར་རོ། །གཟུགས་ལས་དཔེན་པ་ཆོས་ཀྱི་མཚན་ཉིད་གཙོ་བོར་བྱེད་པའི་སེམས་ཅན་རྣམས་ལ་ནི་ལྷའི་མིག་གིས་ཀྱང་ཐམས་ཅད་དུ་བལྟར་སྣང་བར་མི་འགྱུར་རོ། །འདུལ་བ་གཞི་ལས། བུདྡྷ་འོད་སྲུངས་ཀྱི་རིང་ལ་རྒྱལ་པོ་ཀྲྀ་ཀཱི་བྱུང་སྟེ། བུདྡྷས་ཀྱང་དེར་སྨོན་ལམ་བཏབ་ནས་དགའ་ལྡན་དུ་སྐྱེས་སོ། །ཀྲྀ་ཀཱིའི་རྒྱུད་ཀྱིས་གྲོང་ཁྱེར་པོ་ཏ་ལར་རྒྱལ་པོའི་རབས་བརྒྱ་རྩ་གཅིག་བྱས་སོ། །དེ་དག་གི་ཐ་མར་རྒྱལ་པོ་ཀརྞ་ཞེས་བྱ་བ་སྟེ། དེ་ལས་བུ་གཽ་ཏམ་དང༌། བྷ་རདྷྭ་ཛ་ཞེས་བྱ་བ་གཉིས་ཡོད་པ་ལས། བྷར་དྷྭ་ཛ་ནི་རྒྱལ་པོ་བྱེད་དོ། །གཽ་ཏ་མ་ནི་ཕ་མ་ལ་གསོལ་ནས། དྲང་སྲོང་ནག་སྦྱིན་ལས་རབ་ཏུ་བྱུང་སྟེ། དྲང་སྲོང་གི་གནས་དགོན་པ་མ་བཅས་ཏེ། གྲོང་པོ་ཏ་ལ་དང་ཉེ་བ་ཞིག་ན་སྦྱིལ་བུན་འདུག་པ་ལས། བཟང་མོ་གཟུགས་ཀྱིས་འཚོ་བ་མི་གཡོན་ཆེན། མྲི་ན་པ་ཞེས་བྱ་བ་དང་མཐུན་ཏེ་ཉལ་བར་བྱས་པ་ལས་གཞན་ཞིག་དང་ཁྲི་བའི་གཏམ་ཐོས་ནས། བཟང་མོ་མྲི་ན་བ་བསད་པ་དང༌། བཟང་མོའི་གཡོག་གིས་ཁུས་བཏབ་སྟེ། མི་ཀུན་གྱིས་བསྙགས་པ་དང༌། མྲི་ན་ལས་རལ་གྲི་ཁྲག་ཅན་དྲང་སྲོང་གཽ་ཏ་མའི་སྤྱིལ་པོའི་སྒོར་བཞག་ནས་བྲོས་སོ། །མི་ཀུན་གྱིས་རལ་གྲི་མཐོང་བ་དང༌། རབ་ཏུ་བྱུང་བ་མི་གསོད་ཅེས་དེ་ཁྲིད་བ་དང༌། རྒྱལ་པོ་བྷ་ར་དྷྭ་ཛས་མ་བརྟགས་པར་གསལ་ཤིང་ལ་བཙུགས་སོ། །དེ་ནས་དྲང་སྲོང་ནག་པོས་དེ་མཐོང་ནས་དྲིས་ཏེ་གཏམ་བྱས་ནས། གཽ་ཏ་མས་བདག་གར་སྐྱེ་ཞེས་བྱས་པ་དང༌། དེ་ན་རེ་བྲམ་ཟེ་དག་ན་རེ་རིགས་རྒྱུད་མེད་པ་ལ་འགྲོ་བ་མེད་དོ་ཞེ་ན། བུ་ལྟ་ཡོད་དམ་མེད་དེས་སྨྲས་པ་མེད་དོ། །དེ་ནས་དྲང་སྲོང་གིས་བྱིན་གྱིས་བརླབས་ཏེ། ཆར་པ་དང་རླུང་བསིལ་བ་དག་གིས་ལུས་ལ་ཕོག་པར་བྱས་ནས་སྔོན་གྱི་འདོད་པ་ལ་སྤྱོད་པ་དྲན་པར་གྱིས་ཤིག་ཅེས་པ་དང༌། ཁུ་བ་དང་ཁྲག་འདྲེས་པའི་ཐིགས་པ་གཉིས་ཟགས་
པ་ལས་སྒོང་གཉིས་བྱུང་སྟེ། ཉི་མས་སྨིན་པར་རྒྱས་པ་དང༌། དེ་བརྡོལ་ནས་བུ་གཉིས་བྱུང་སྟེ་བུ་རམ་གྱི་ཚལ་གྱིར་བ་ཞིག་ཏུ་དོང་ངོ༌། །ཕ་ནི་ཤིའོ། །དེ་ནས་དྲང་སྲོང་གིས་དེ་གཉིས་བླངས་ནས་གསོས་ཏ། ཉི་མས་སྨིན་པར་བྱས་པ་དང༌། བུ་རམ་གྱི་ཚལ་ན་གནས་པ་དང༌། གཽ་ཏ་མའི་བུ་ལ་མིང་གསུམ་དུ་གྲགས་པར་བཏགས་སོ། །དེ་ནས་བྷ་ར་དྷཱ་ཇ་རབས་ཆད་དེ། ཤི་ནས་བློན་པོས་ཕོ་བོ་གཽ་ཏ་མ་རབ་ཏུ་བྱུང་བ་རྒྱལ་པོར་གཞུག་གོ་ཞེས་ནས་དྲང་སྲོང་ནག་པོ་ལ་རྨས་བ་ལས་བསད་པར་གྱུར་ཏོ། །བུ་གཉིས་དེ་ནི་འདུག་པ་ལས་ཕུ་བོ་རྒྱལ་པོར་བཅུག་པ་ལས་རབས་ཆད་དོ། །ནུ་བོ་བཅུག་སྟེ་བུ་རམ་ཤིང་པ་ཞེས་བྱ་བར་གྲགས་སོ། །དེའི་འཕེལ་རྒྱུད་ལས་གྲོང་ཁྱེར་པོ་ཏ་ལའི་རྒྱལ་པོ་བརྒྱ་རྩ་གཅིག་གོ །དེ་དག་གི་ཐ་མ་བུ་རམ་ཤིང་པ་རྒྱལ་པོ་འཕགས་སྐྱེས་པོའོ། །དེ་ལ་བུ་བཞི་སྟེ། ཏ་ལ་ལ་གང་ནི་དང༌། ཀ་ར་ཀར་ནི་དང༌། ཧ་སྟི་ནི་ཡངས་པ་དང༌། ནུ་བོ་རོ་ཀའོ། །དེ་ནས་འཕགས་སྐྱེས་པོའི་ཆུང་མ་ཤི་བས་རྒྱལ་པོ་གཞན་ཞིག་གི་བུ་མོ་བླངས་པ་ལས། རྒྱལ་པོ་དེས་རང་གི་ཚ་བོ་ཞིག་ཡོད་ན། རྒྱལ་ཚབ་ཏུ་གཞུག་བར་དམ་བཅས་ནས་བྱིན་ནོ། །ཕྱིས་བུ་ཞིག་བྱུང་བ་དང༌། རྒྱལ་ཚབ་ཏུ་མ་བཅུག་པ་དང༌། རྒྱལ་པོ་དེ་ཡང་དག་གམ་ཞེས་བསྡིགས་སོ། །དེ་ནས་འཕགས་སྐྱེས་པོ་བྲེད་ནས། ཇི་ལྟར་བྱ་ཞེས་པ་དང་བློན་པོས་བུ་གཞན་སྐྲོད་ལ་དེ་ཆུག་ཅེས་སོ། །དེ་ནས་རྒྱལ་པོ་དང་བློན་པོས་ཐབས་བྱས་ནས་བུ་ཀུན་བསྐྲད་པ་དང༌། དེ་དག་ལ་ཀུན་དགའ་བས། སྲིང་མོ་ཡ་ན་ཆད་ཞག་བདུན་གྱི་བར་དུ་གྲོང་ཏ་ལ་ལའི་སྒོ་ནས་འདྲུལ་མ་ཆད་པར་དོད་པ་དང༌། ཕྱིས་སྒོ་བཅད་དེ་ལྷག་མ་མ་བ་ཀྱེའོ། །དེ་དག་གངས་རི་དང་ཉེ་བ་ཆུ་བོ་བྷ་གོ་ར་ཐིའི་དྲུང་ན་དྲང་སྲོང་སེར་སྐྱའི་གནས་ཀྱི་ཉེ་འཁོར་དུ་དོང་ནས་སྤྱིལ་པོ་བྱས་ཏེ་རི་དགས་བཤོར་ཞིང་འཁོད་དོ། །དེ་ནས་འདོད་ཆགས་ཀྱིས་གདུངས་ནས་ཀུན་སེར་པོ་བསེང་བསེང་བོར་སོང་ནས། དྲང་སྲོང་གིས་ཁྱོད་རྒྱལ་རིགས་རྒྱལ་ཐབས་ལས་ཉམས་པས་གཡས་ཁྱིམ་གྱི་སྲིང་མོ་འཚོ་ཞིང་ཆོས་སོ། །དེ་ནས་མི་འཕེལ་ནས་ཀུན་ཆོས་དྲང་སྲོང་ལ་མནོས་ནས། གསེར་གྱི་རིལ་བའི་ཆུས་ས་ཁོར་བྲིས་ཏེ། གྲོང་ཁྱེར་བརྩིགས་
ནས་དེར་བཞག་གོ །གྲོང་ཁྱེར་གྱི་བཞི་དྲང་སྲོང་སེར་སྐྱས་བྲེས་པས། སེར་སྐྱའི་གྲོང་ཁྱེར་རོ། །དེ་ནས་འཕགས་སྐྱེས་ཀྱིས་དེ་དག་གིས་ནུས་ཕོང་བར་ཐོས་ནས་ཤཱ་ཀྱར་བཏགས་སོ། །དེ་ནས་འཕགས་སྐྱེས་པོ་ཤི་ནས་རྒྱལ་ཚབ་དང་བུ་བསྐྲད་པ་ཡན་ཆད། རིའི་རྒྱལ་པོར་མཐར་གྱིས་བཅུག་པ་ལས་གཞན་ནི་ཀུན་རབས་ཆད་དོ། །ནུ་པུར་ཀོ་ལ་བུ་ལ་ཀ་ཞེས་བྱ་བ་ཞིག་ཡོད་པའི་འཕེལ་རྒྱུད་ཀྱིས། སེར་སྐྱའི་གྲོང་ཁྱེར་གྱི་རྒྱལ་པོ་སྟོང་ལྔ་བཅུ་རྩ་ལྔར་བྱས་སོ། །དེ་དག་གི་ཐ་མ་གཞུ་བརྟེན་ལ་བུ་གཉིས་ཏེ། སེང་གེ་མན་ཀལ་དང༌། སེང་གེའི་སྒྲའོ། །སེང་གེའི་མན་ཀལ་ལ་བུ་བཞི་སྟེ། ཟས་གཙང་མ་དང༌། ཟས་དཀར་པོ་དང༌། དྲོ་ནོ་ད་ན་དང༌། བདུད་རྩི་ཟས་སོ། །བུ་མོ་ནི་གཙང་མ་དང༌། དཀར་མོ་དང༌། བྲེ་མོ་དང༌། བདུད་རྩི་མའོ། །ཟས་གཙང་མ་ལ་བུ་གཉིས་ཏེ། དོན་གྲུབ་དང་དགའ་བོའོ། །ཟས་དཀར་པོ་ལ་བུ་གཉིས་ཏེ། ཚེ་དང་ལྡན་པ་ཏི་ཤྱ་དང༌། བྱི་ཀའོ། །དྲོ་ནོ་དན་ལ་བུ་གཉིས་ཏེ། ཚེ་དང་ལྡན་པ་མིང་ཆེན་དང་མ་འགགས་པའོ། །བདུད་རྩི་ཟས་ལ་བུ་གཉིས་ཏེ། ཚེ་དང་ལྡན་པ་ཀུན་དགའ་བོ་དང་ལྷས་བྱིན་ནོ། །གཙང་མའི་བུ་ནི་རབ་ཏུ་ཚོར་བའོ། །དཀར་མོའི་བུ་ནི་པ་ཏྲ་མ་ལིའོ། །དྲོ་ནོའི་བུ་ནི་ཏ་ལིའོ། །བདུད་རྩི་མའི་བུ་ནི་ཤེ་བ་ལའོ། །བུདྡྷེའི་སྲས་ནི་རཱཧུ་ལའོ། །བུདྡྷའི་ཡུམ་སྒྱུ་འཕྲུལ་ཆེན་མོའོ། །ཡུམ་ཡར་མོ་སྒྱུ་མ་སྟེ། གཉི་ག་རྒྱལ་པོ་གཉི་ཚད་ཀྱི་བུ་མོའོ། །ཡུམ་ནི་གཅེན་ནོ། །བྱང་ཆུབ་སེམས་དཔའ་དགའ་ལྡན་གྱི་གནས་ནས་གཤེགས་པ་ཆོས་ཉིད་ཀྱིས་གཟིགས་པ་ལྔ་ལ་གཟིགས་ཏེ། རིགས་དང་ཡུལ་དང་རུས་དང་ངུས་དང་བུང་མེད་དོ། །རིགས་ནི་རྒྱལ་རིགས་དང་བྲམ་ཟེ་གང་ལ་བཙན་པར་འཛིན་པ་ལ་གཟིགས་ཏེ། དེར་སྐྱེ་བ་མ་བླངས་ན་འཇིག་རྟེན་ལ་ཕན་པ་དང༌། སེམས་ཅན་གྱི་དོན་དུ་མི་འགྱུར་ཏེ། གཞན་ཡང་དེ་དང་འདྲའོ། །ཡུལ་ནི་གང་ན་བུ་རམ་ཤིང་དང་བ་ལང་དང་མ་ཧེ་དང་སློང་མོ་བ་མང་བ་འགྲོ་བ་ཡང་རབས་མང་ཞིང་མཐའ་འཁོབ་ཀྱི་སྐྱེ་བོ་མེད་པའོ། །དུས་ནི་སྐྱེ་བོའི་ཚེ་ལོ་བརྒྱད་ཁྲི་ལས་ཡར་འདས་ན་ཡང་སྐྱོ་བ་ཆུང་ཞིང་བླུན། །བརྒྱ་
ལས་མར་འགྲིབས་ན་ཡང་སྙིགས་མ་ལྔ་ཤས་ཆེ། རུས་དང་བུད་མེད་ནི་ཤཱཀྱ་དང་སྒྱུ་མ་ཆེན་པོ་ལྟ་བུ་གོ་རིམས་བཞིན་མང་པོས་བཀུར་བ་ཚུན་ཚན་ཆེ་བ་དང༌། བདུན་རྒྱུད་ཚུན་ཚན་ལ་སྐྱོན་མེད་ཅིང་མཛངས་དགེ་ལ། བྱང་ཆུབ་སེམས་དཔའ་ཡང་མངལ་ན་ཟླ་བ་བཅུར་འཛིན་ནུས་པའོ། །སྟོན་པ་དྲུག་འོད་སྲུངས་རྫོགས་བྱེད་ལ་སོགས་པ་རྗེས་སུ་སྟོན་པ་དྲུག་བྲམ་ཟེ་ཀུ་ཏ་ཏིལ་དོ་ལ་སོགས་པ་དྲུག་མ་རིག་པའི་བུ་ཨུ་ཏྲ་ཀ་ལ་སོགས་པ། བུདྡྷ་ལྷུམས་སུ་ཞུགས་ཚུན་ཆད་དོན་ཀུན་གྲུབ་པའི་ཕྱིར་དོན་ཀུན་གྲུབ། ཤཱཀྱའི་སྤྱི་ལྷ་སྦྱིན་ཤཱཀྱ་སྤེལ་བ་ལ་ཕྱག་འཚལ་དུ་ཁྲིད་པ་ལས། དེས་ཕྱི་རོལ་དུ་བསུ་སྟེ། ཕྱག་བྱས་པས་ལྷའི་ཡང་ལྷ། ལྷ་ལ་ཕྱག་འཚལ་དུ་ཆས་པའི་ཚེ། གྲོང་ཁྱེར་དེན་གནས་པའི་ཤཱཀྱ་མཐོང་ཟུར་ཅན་མི་སྲུན་པ་ཀུན་ཐུབ་པ་བཞིན་འཁོད་པས་ན་ཤཱཀྱ་ཐུབ་པའོ། །བདུན་མཐོ་བ་ཕྱག་གཉིས་དཔུང་མགོ་གཉིས་ལྷག་པའོ། །རིན་པོ་ཆེ་བདུན་ལས་འཁོར་ལ་ནི་གསེར་ལས་བྱས་པ་ལྟེ་བ་ཟླུམ་པོ་རྩིབས་སྟོང་པའོ། །ནོར་བུ་ནི་བཻ་ཌཱུརྻ་དགོས་འདོད་འབྱུང་བའོ། །བ་ལང་ནི་ཐལ་ཀར་རོ། །རྟ་ནི་མགྲིན་སྔོན་ནོ། །བུད་མེད་ནི་རེག་ན་བདེ་བའོ། །བློན་བོ་ནི་གསེར་ལ་སོགས་པ་ནོར་འབུལ་བའོ། །དམག་དཔོན་ནི། དམག་ཐབས་ལ་མཁས་པའོ། །ཆོས་ཉིད་ཀྱིས་བྱང་ཆུབ་སེམས་དཔའ་བལྟམས་ནས། །ཞག་བདུན་ན་ཡུམ་དུས་ལས་འདས་སོ། །བྱང་ཆུབ་སེམས་དཔའ་ལོ་ཉི་ཤུ་རྩ་དགུ་ན་ཁབ་ནས་བྱུང་སྟེ། ལོ་དྲུག་དཀའ་བ་སྤྱད་ནས་བདུད་རྩི་ཆུད་པར་འགྱུར་བར་དྲང་སྲོང་མི་དཀར་པས་ཚོར། དྲང་སྲོང་མི་དཀར་པ་རི་གིས་སྐིན་ངི་ལ་གནས་ཏེ། ཤི་ཁར་སློ་བ་མ་ལ། བདུད་རྩི་ཚོལ་དུ་བཏང་ནས་ཕྱུང་བ་ཀ་ཏྱ་ཡ་ཆེན་པོ་ཡིན། ཇི་ལྟར་ལམ་བརྒྱགས་ཉུང་བ་དག །ལམ་ཞུགས་སྡུག་བསྔལ་འགྲོ་བ་ལྟར། །དེ་བཞིན་ལས་བཟང་མ་བྱས་པའོ། །སེམས་ཅན་དག་ནི་ངན་འགྲོར་འགྲོ། །ཇི་ལྟར་ལམ་བརྒྱགས་གང་བདོག་པ། །ལམ་ཞུགས་བདེ་བར་འགྲོ་བ་ལྟར། །དེ་བཞིན་ལས་བཟང་
བྱས་པ་ཡི། །སེམས་ཅན་དག་ནི་བདེ་འགྲོ་འགྲོ། །རྒྱུ་ལྔས་སྲོག་གཅོད་པ་བྱས་ཀྱང་ཁ་ན་མ་ཐོ་བས་གོས་པར་མི་འགྱུར་ཏེ། འདི་ལྟ་སྟེ། ལམ་དུ་འགྲོ་བར་ཞུགས་པའི་མི་ཤེས་པས་སྲོག་ཆགས་ཕྲ་མོ་དང༌། གྲོག་སྦུར་ལ་སོགས་པ་སྲོག་དང་བྲལ་བར་བྱེད་པ་དང༌། གཞན་ལ་མཚོན་ཆས་གཟས་པ་ལས་བསམ་པ་དང་མི་ལྡན་པར་གཞན་ལ་ཕོག་སྟེ། དེ་སྲོག་དང་བྲལ་བ་དང༌། ནད་པ་ལ་སྨན་པས་ཕན་པར་འདོད་པས་ཉེས་པར་མ་མཐོང་སྟེ། སྨན་བྱིན་པ་ལས་དེས་ཤི་བ་དང༌། དེ་བཞིན་དུ་མས་སུ་འདུལ་བར་བྱ་བའི་ཕྱིར་བརྡེག་པ་ལས་དེ་སྲོག་དང་བྲལ་བ་དང༌། མེ་སྦར་བའི་ནང་དུ་སྲོག་ཆགས་མི་འདོད་བཞིན་ལྷུང་བ་སྟེ། རྒྱུ་རྣམ་པ་དེ་ལྔས་སྲོག་བཅད་བར་གྱུར་ཀྱང༌། ཁ་ན་མ་ཐོ་བས་གོས་པར་མི་འགྱུར་རོ། །མ་བྱིན་པར་ལེན་པའི་སྡོམ་བ་མ་བླངས་པར་མ་བྱིན་པར་ལེན་པ་འདི་ནི་རྣམ་པར་སྨིན་པ་ཆུང་བ་ཡིན་ནོ། །གླང་པོ་ཆེ་བདུན་ལེགས་པར་གནས་པ་ནི་རྐང་ལག་བཞི་དང་མཇུག་མ་ལེགས་པ་དང༌། རླིག་པ་མདོམས་ཀྱི་ནད་ན་འདུག་པ་དང༌། སྣ་ལེགས་པར་གནས་པའོ། །རལ་གྲི་ཉེ་བའི་རིན་པོ་ཆེ་ནི། ཡུལ་འཁོར་གཞན་དུ་རལ་གྲི་རང་སོང་སྟེ་མི་འདེབས་པར་མཐོང་བ་ཙམ་གྱིས་ཐམས་ཅད་རྒྱལ་པོའི་བཀའ་ཉན་པའོ། །པགས་པ་ནི་རྒྱ་མཚོའི་ཀླུའི་པགས་པ་ཡིན་ཏེ། ཞེང་དཔག་ཚད་ལྔ་ཆུར་དཔག་ཚད་བཅུ་སྟེ། ཀླུ་རྣམས་ཀྱིས་རྒྱལ་པོ་ལ་འབུལ། གྲང་ན་དྲོ་བར་བྱེད། དྲོ་ན་བསིལ་བར་བྱེད། བུད་མེད་མི་སྡུག་པ་མཐོང་བར་མི་བྱེད་དོ། །མལ་ཆ་ནི་མདོར་ན་དེར་ཉལ་ན་སེམས་ལས་སུ་རུང་བར་འགྱུར་རོ། །ཚལ་ནི་རྒྱལ་པོ་དེར་ཞུགས་པ་ན་ལྷའི་བྱ་བ་ལ་སོགས་པ་འདུ་བའོ། ཁྱིམ་ནི་གྲང་དྲོ་རན་ཐུན་ཚོད་གང་ལ་དགེ་བ་བྱ་བ་དེའི་དུས་སུ་སད་པར་འགྱུར་རོ། །གོས་ནི་མེ་ལ་སོགས་བས་མི་རྫི་དུ་བ་མེད་པའོ། །ལྷམ་ནི་ཆུ་ལ་ཡང་མི་འབྱིང་དལ་གྱིས་འགྲོ་ན་ཡང་དཔག་ཚད་བརྒྱར་ཕྱིན་པའོ། །གཉེན་བདག་ལ་དགའ་མེད་ཅིང༌། །མཁས་པ་དག་ལ་ལྟ་འདོད་ལ། །ཁྱིམ་གྱི་སྐྱོན་ལས་དེས་འབྱུང་བ། །དེ་ལྟ་བུ་ནི་དགེ་སློང་ཡིན། །གླུ་དང་གར་ལ་མི་ལྟ་ཞིང༌། །ཉེས་ཚོགས་རྣམས་ལ་ཆགས་མེད་པ། །གང་དག་དུར་ཁོང་དགའ་བྱེད་པ། །དེ་ལྟ་བུ་ནི་དགེ་སློང་ཡིན། །དེ་ལ་མི་དགེ་བའི་ལས་ཀྱིས་ནི་སེམས་ཅན་དམྱལ་བ་རྣམས་སུའོ། །དགེ་བས་ནི་ལྷ་རྣམས་སུའོ། །འདྲེན་
མས་ནི་མི་རྣམས་སུ་སྐྱེའོ། །རྒྱལ་པོའི་ཆད་པས་ཉན་པ་དང༌། བླ་མ་དང་ཕ་མ་དང༌། འཕགས་པའི་ནད་པ་ལྟོགས་པ་དག་གི་དོན་དུ་མ་བྱིན་པར་ལེན་པ་ན་འབྲས་བུ་ཆུང་བ་ཡིན། དཀོན་མཆོག་གསུམ་ལས་མ་བྱིན་པར་བླངས་པ་དེ་དག་ལས་ཀྱང༌། སངས་རྒྱས་དང་ཆོས་ཀྱི་ནི་རིས་མཐུན་པར་སླར་ཕུལ་ན་དག་པར་འགྱུར་ལ། དགེ་འདུན་གྱིས་བརྐུས་པ་ནི་ཚོར་པ་མ་མྱོང་པ་དག་པར་འགྱུར་བ་མེད་དོ། །མ་བྱིན་པར་ལེན་པའི་སྡོམ་པ་མ་བླངས་པས་མ་བྱིན་པར་བླངས་པ་འདི་ནི་རྣམ་པར་སྨིན་པ་ཆུང་བ་ཡིན་ནོ། །དེ་ཡི་ལས་ནི་རྣམ་གསུམ་གྱིས། །གནས་སྐབས་དག་ཏུ་འཚོ་བྱེད་ཅིང༌། །རྣམ་པར་སྨིན་པ་བཞི་བཅུ་ཐམ། །དྲག་པོ་དག་ཏུ་གཡོས་པར་འགྱུར། །དོན་མེད་གཞི་ནི་ཆང་ཡིན་ནོ། །སེམས་ཅན་དམྱལ་བའི་བཞད་གང་པ། །དབང་པོ་ཐམས་ཅད་རྣམ་ཉམས་ཤིང༌། །དོན་མེད་པ་ཡི་རྒྱུར་གྱུར་ཏོ། །ཚིག་ལ་ཤིན་ཏུ་དགའ་བ་དང༌། །ཆགས་པ་དང་ནི་འཇིག་པ་དང༌། །ངག་གི་སྐྱོན་དང་རློམ་པ་དང༌། །ཚིག་རྩུབ་བཞི་ནི་དེ་བཞིན་ནོ། །ཆང་གིས་ཀུན་དུ་གཡེངས་པའི་ཡིད། །བྱ་དང་མི་བྱ་མི་ཤེས་པ། །མི་དེ་ཕྱུགས་དང་མཚུངས་པ་ཡིན། །དེ་ལྟ་བས་ན་ཆང་སྤོངས་ཤིག །ཆང་གིས་གཡེངས་པའི་མི་དག་ནི། །གསོན་ཡང་ཤི་བ་དག་དང་མཚུངས། །གང་ཞིག་རྟག་ཏུ་གསོན་འདོད་པས། །རྟག་པར་ཆང་ནི་རྣམ་པར་སྤོངས། །ཆང་ནི་ཉེས་པ་ཀུན་གྱི་གཞི། །རྟག་པར་དོན་ཀུན་མེད་པར་བྱེད། །ངན་སོང་ཀུན་གྱི་ཐེམ་སྐས་ཏེ། །མུན་ནག་གནས་ནི་ཆེན་པོ་ཡིན། །ཆང་གིས་སེམས་ཅན་དམྱལ་བར་འགྲོ། །དེ་བཞིན་ཡི་དྭགས་འཇིག་རྟེན་དང༌། །ཆང་གིས་སྐྱོན་གྱིས་བསླུས་པ་ཡིན། །མི་དག་དུད་འགྲོ་རྣམས་སུ་འགྲོ། །དུག་གི་ནང་ན་དུག་ནི་ཆང༌། །དེ་བཞིན་དམྱལ་བའི་ནང་ན་དམྱལ། །ནད་ཀྱི་ནང་ན་ནད་མཆོག་ནི། །ཆོས་ཞེས་མཁས་པ་རྣམས་ཀྱིས་བཤད། །བློ་དང་དབང་པོ་ཉམས་བྱད་ཅིང༌། །རིན་ཆེན་ཆོས་ནི་ཟད་བྱེད་ལ། །ཚངས་པར་སྤྱོད་པ་འཇིག་བྱེད་པ། །མི་ཟད་ཆང་ནི་སྐྱེ་གནས་གཅིག །རྒྱལ་པོ་དང་ནི་བསྟན་བཅོས་མཁས། །ཆང་གིས་སྔོང་པར་བྱེད་འགྱུར་ན། །ཐ་མལ་མི་དག་ཆང་འཐུང་བ། བསླུས་པར་འགྱུར་བ་ཅི་ཞིག་སྨོས། །ཆང་ལ་བརྟེན་པའི་མི་དག་ནི། །ཆོས་རྣམས་ཀུན་གྱི་སྟ་རེ་ཡིན།
ངོ་ཚ་མེད་པར་བྱེད་པའི་མཆོག །སྤོང་བ་དག་ཏུ་ཉེ་བར་བསྟན། །ཆང་གིས་ཕྲོགས་པར་གྱུར་པའི་སེམས། །བྱ་བ་དང་ནི་མི་བྱ་བ། །མི་ཤེས་རྣམ་པར་མི་ཤེས་ཤིང༌། །ཐམས་ཅད་མི་ཡིས་མི་ཤེས་སོ། །གང་ཞིག་ཆང་ལ་བརྟེན་བྱེད་པ། །སྐྱེ་བོ་རེས་འགའ་དགའ་བྱེད་ཅིང༌། །རིས་འགའ་ཡོངས་སུ་གདུང་བྱེད་ལ། །རེས་འགའ་སྡིག་པ་བྱེད་ལ་ཡིན། །བློ་ནི་ཤིན་ཏུ་རྨོངས་བསྐྱེད་ཅིང༌། །འཇིག་རྟེན་གཉིས་ནི་རྣམ་འཇིག་བྱེད། །ཐར་བའི་ཆོས་ལ་མེ་ལྟ་བུར། །སྲོག་བྱེད་ཁོ་ན་ཆང་ཡིན་ནོ། །མི་གང་དག་ནི་ཆང་སྤོང་བ། །ཆོས་གྱི་ངང་ཚུལ་མཉམ་པར་གཞག །གང་ན་འཆི་བ་མེད་པ་ཡིན། །གནས་མཆོག་དག་ཏུ་དེ་འགྲོའོ། །ཆང་འཐུང་པ་ཡིས་བསླུས་པ་དག །དེ་ནི་བྱེད་པ་དམན་པ་ཡིན། །མི་བཟོད་སེམས་ཅན་དམྱལ་བར་ལྟུང༌། །དོན་མེད་ཅི་ཞིག་ཡོངས་སུ་གདུང༌། །འཐུང་བའི་ཚེ་ན་ཆང་ཞིམ་སྟེ། །རྣམ་སྨིན་ཚེ་ན་མཆོག་ཏུ་ཚ། །ཀིམ་པ་ཀ་ནང་ཀིམ་བ་ཀ །ཆང་ཞེས་མཁས་པ་རྣམས་ཀྱིས་བཤད། །བདག་ལ་འདི་ཡིས་མི་གནོད་ཅེས། །བློ་ལྡན་ཆང་ལ་ཡིད་མ་རྟོན། །མྱངས་ན་བསིལ་ཡང་རྣམ་སྨིན་ཚ། །ཆང་ནི་དམྱལ་བར་འགོར་བར་བྱེད། །སྡིག་བའི་ཆོས་རྣམས་བྱེད་པ་ལ། །སེམས་གཡེང་དག་དགའ་བར་བྱེད། །ཕྱི་ནས་རྣམ་སྨིན་ཚ་བ་རུ། །བློ་ངན་ཡོངས་སུ་གདུང་པར་འགྱུར། །འདོད་པ་རྣམས་ལ་བློ་མི་གཏད། །འདོད་པ་མཆོག་ཏུ་སླུ་བ་ཡིན། །འཁོར་བའི་འཆིང་བ་དྲག་པོ་སྟེ། །སེམས་ཅན་དམྱལ་བ་ཀུན་གྱི་རྒྱུ། །གང་ཞིག་འདོད་པ་རྣམས་ལ་དགའ། །དེ་ཡི་སྡུག་བསྔལ་མཐའ་མེད་དོ། །འདོད་པའི་སྤྲུལ་གྱིས་ཟིན་པ་ལ། །བདེ་བ་ནམས་ཀྱང་ག་ལ་ཡོད། །ཁྱེད་ཅག་འདོད་པ་མི་བཟད་ཅིང༌། །དྲག་པོ་སེམས་ཅན་དམྱལ་བར་འོངས། །གནོད་པ་ཤིན་ཏུ་མི་བཟད་ལ། །དོན་མེད་ཅི་ཞིག་ཡོངས་སུ་གདུང༌། །གང་ཚེ་འདོད་པས་བསླུས་པ་ཡི། །ཁྱེད་ཅག་གིས་ནི་སྡིག་བྱས་པ། །དེ་ཚེ་ཅི་ཕྱིར་ཁྲོ་མི་བྱེད། །དེ་རིང་ཅི་ཞིག་ཡོངས་སུ་གདུང༌། །བྱས་བ་བསགས་པ་བརྟན་པ་ཡི། །ལས་དག་གི་ནི་འབྲས་བུ་སྣང༌། །སྡིག་པའི་ཚོར་བ་མི་བཟད་པས། །དེ་ལྟ་བས་ན་སྡིག་མི་བྱ། །སྡིག་པ་སྡིག་པའི་རྣམ་སྨིན་ནི། །རྟག་ཏུ་ངན་སོང་རྣམས་སུ་སྨིན། །སྡིག་མི་བྱེད་ལ་སྡིག་མེད་དོ། །དེ་ལྟ་བས་ན་སྡིག་པ་སྤོངས། །སྡིག་པ་ཡོངས་སུ་སྤངས་པ་
ལ། །སྡིག་པའི་རྣམ་སྨིན་མེད་པ་ཡིན། །སྡིག་པ་རང་གིས་བྱས་པ་གནོད། །གཞན་གྱིས་སྤྱོད་པར་མི་འགྱུར་རོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས། དེ་བཞིན་གཤེགས་པའི་རིང་བསྲེལ་གསོ་བ་དང༌། མཆོད་རྟེན་རྩིག་པར་འབྱུང་བ་དང༌། བཅོམ་ལྡན་འདས་ཀྱིས་དགའ་བོ་དང་འཁོར་མང་པོ་རྣམས་ལ་བཀའ་སྩལ་པ། ང་མྱ་ངན་ལས་འདས་ནས་གནས་ཀྱི་སྟེང་ངམ། མིའི་འཇིག་རྟེན་ན་སེམས་ཅན་གྱིས་ངའི་སྐུ་གདུང་ལག་ཏུ་ཐོབ་སྟེ། མྱ་ངན་དང་དགའ་བ་དང་བཅས་པ་བས་བསྟི་སྟོང་དུ་ཕྱག་འཚལ་ཏེ། དད་པའི་སེམས་ཀྱིས་མཆོད་པ་བྱས་ན་བསོད་ནམས་ཚད་མེད་དཔག་ཏུ་མེད་པ་འཐོབ་པར་འགྱུར་རོ། །དགའ་བོ་གང་གིས་དེ་བཞིན་གཤེགས་པའི་སྐུ་གདུང་མཐོང་ན་དེས་ནི་སངས་རྒྱས་མཐོང་ངོ༌། །སངས་རྒྱས་མཐོང་བ་དེས་ནི་ཆོས་མཐོང་ངོ༌། །ཆོས་མཐོང་བ་དེས་ནི་དགེ་འདུན་མཐོང་ངོ༌། །དགེ་འདུན་མཐོང་བ་དེས་ནི་མྱ་ངན་ལས་འདས་པ་མཐོང་ངོ། །དགའ་བོ་དེ་བས་ན་དཀོན་མཆོག་གསུམ་ནི་རྟག་པ་བརྟེན་པ་མི་འགྱུར་མི་འཕོ་བ་སྟེ། སེམས་ཅན་ཐམས་ཅད་ཀྱི་མགོན་དང་སྐྱབས་ཀྱི་གནས་སུ་འགྱུར་བར་རིག་པར་བྱའོ། །དགའ་བོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཡོངས་སུ་མྱ་ངན་ལས་འདས་ནས་བདག་ཅག་གིས་ཆོ་ག་གང་དང་སྦྱར་ཏེ། དེ་བཞིན་གཤེགས་པའི་སྐུ་ཞུགས་ལ་བཞེན་ན། སྐུ་གདུང་ཐོབ་ཅིང་དད་པས་མཆོད་པར་འགྱུར། །བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། ད་མྱ་ངན་ལས་འདས་ནས་ཁྱེད་ཀྱིས་འཁོར་ལོས་སྒྱུར་བའི་རྒྱལ་པོའི་ཐབས་སུ་སྲེག་ཤིག་དགའ་བོས་ཡང་གསོལ་པ། འཁོར་ལོས་སྒྱུར་བའི་རྒྱལ་པོའི་སྲེག་བའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། འཁོར་ལོས་སྒྱུར་བའི་རྒྱལ་བོ་ནི་ཤི་ནས་ཞག་བདུན་གྱི་བར་དུ་འཇོག་སྟེ། གདོད་ལྕགས་ཀྱི་སྒྲོམ་གྱི་ནང་དུ་འཛུད་དོ། །སྒྲོམ་དུ་བཅུག་ནས། འབྲུ་མར་བསུང་ཅན་གྱིས་སྒྲོམ་གྱི་ནང་བཀང་ནས། ཁ་ལེགས་བར་བཅད་དེ་ཡང་ཞག་བདུན་དུ་འཇོག་གོ །དེ་ནས་སྒྲོམ་ནས་ཕྱུང་སྟེ་སྤོས་ཆུས་བཀྲུའོ། །སྤོས་ཆུས་བཀྲུས་ནས་བདུག་སྤོས་ཀྱིས་མཆོད་ཅིང་གཏམས་ལ། ཤིང་བལ་གྱིས་ལུས་ཀུན་དཀྲིའོ། །ཤིང་བལ་གྱིས་དཀྲིས་པའི་སྟེང་དུ་
རས་དཀར་པོ་བཟང་པོ་ཡུག་སྟོང་གིས་མཐར་ཆགས་སུ་དཀྲིའོ། །དེ་ལྟར་དཀྲིས་ནས་སྒྲོམ་གྱི་ནང་འབྲུ་མར་བསུང་ཅན་གྱིས་བཀང་སྟེ། རྒྱལ་པོའི་རུས་བུ་ཕྱིར་སྒྲོམ་དུ་བཅུག་ལ་སྒྲོམ་གྱི་ཁ་ལེགས་པར་བཅད་དོ། །ཤིང་བསུང་ཅན་གྱི་རིན་པོ་ཆེ་སྣ་བདུན་གྱི་ཤིང་རྟའི་སྟེང་དུ་དྲངས་ཏེ། ཤིང་རྟའི་ངོས་བཞི་ཡང་རྒྱན་འཕྱང་ཞིང་རིན་པོ་ཆེ་སྣ་ཚོགས་ཀྱིས་ཀྱང་ཤིང་རྟ་བཀྲའོ། །གྲངས་མེད་པའི་མེ་ཏོག་དང༌། བ་དན་དང༌། རིན་པོ་ཆེ་སྣ་བདུན་གྱི་གདུགས་དང༌། རྒྱལ་མཚན་དང་སྤོས་བཟང་པོ་སྣ་ཚོགས་དང་ལྷའི་རོལ་མོས་བསྐོར་ཅིང་མཆོད་པ་བྱའོ། །དེ་ནས་ཤིང་བསུང་ཅན་ཕྱིན་རི་མོ་དང་ལྡན་པ་དང༌། མར་བསུང་ཅན་གྱིས་འཁོར་ལོས་སྒྱུར་བའི་རྒྱལ་པོའི་རུས་བུ་བསྲེག་གོ །དེ་ལྟར་བསྲེགས་ནས་རིང་བསྲེལ་བསྡུས་ཏེ། གྲོང་ཁྱེར་ཆེན་པོའི་བཞི་མདོར་རིན་པོ་ཆེ་སྣ་བདུན་གྱི་མཆོད་རྟེན་སྒོ་བཞི་དོད་པར་བྱས་ཏེ། རིང་བསྲེལ་དེའི་ནང་དུ་བཞག་ལ། འཇིག་རྟེན་དུ་བཅས་པ་ཐམས་ཅད་ཀྱིས་རྗེས་སུ་ཡི་རང་བས་བལྟར་གཞུག་གོ །དགའ་བོ་འཁོར་ལོས་སྒྱུར་བའི་རྒྱལ་པོ་བསོད་ནམས་ཅུང་ཟད་ཅིག་གིས་རྒྱལ་པོའི་ཐབས་ཐོབ་ཀྱང་སྲིད་པ་ལས་རྣམ་པར་མ་གྲོལ་འདོད་པ་ལྔ་དང་བསྟེན་ཏེ། བཙུན་མོ་དང་ཕོ་བྲང་གི་སླས་སུ་བཅས། ངན་པར་ལྟ་བ་དང༌། གདུག་པ་གསུམ་དུ་བཅས། ཉོན་མོངས་པ་དང༌། ཀུན་ནས་ཉོན་མོངས་པ་བ་སྤུའི་ཉག་མ་ཙམ་ཡང་མ་སྤངས་པ། ཤི་ནས་འཇིག་རྟེན་དུ་བཅས་པས་དེ་ལྟ་བུའི་ཆོ་ག་བྱེད་ཅིང་མཆོང་རྟེན་བརྩིགས་ནས། ཐམས་ཅད་རྗེས་སུ་ཡི་རང་ཞིང་ལྟ་ན། དགའ་བོ་དེ་བཞིན་གཤེགས་པ་ལ་ཅི་སྨོས་ཏེ། བསྐལ་པ་ཚང་མེད་མཐའ་ཡས་དཔག་ཏུ་མེད་གྲངས་མེད་པ་ནས། བཙུན་མོ་དང་ཕོ་བྲང་གི་སླས་དང་འདོད་པ་ལྔ་ཡོངས་སུ་སྤངས་ཏེ། འཇིག་རྟེན་གྱི་ཆོས་ལ་བ་མོ་འམ་སེར་བ་ལྟ་བུར་རྟོགས་ནས་བརྩོན་དཀའ་བ་བརྒལ་ཏེ། ཤིན་ཏུ་སྤྱོད་དཀའ་བ་སྤྱད་ནས་བྱང་ཆུབ་སེམས་དཔའ་ཐམས་ཅད་ཀྱིས་འཇིག་རྟེན་ལས་འདའ་བའི་སྤྱོད་དཀའ་བ་སྤྱད་དེ། ཕྱོགས་བཅུ་ན་དུས་གསུམ་དུ་རྣམ་པར་བཞུགས་པའི་སངས་རྒྱས་ཐམས་ཅད་ཀྱི་མཛད་པ་ཡོངས་སུ་དག་པའི་ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་སྟོན་པ་དང༌། ཕ་རོལ་ཏུ་ཕྱིན་པ་དྲུག་
མ་བསྒྲུབས་པ་གང་ཡང་མེད་ལ། གཞན་ཡང་དེ་བཞིན་གཤེགས་པའི་སྟོབས་བཅུ་དང༌། སྙིང་རྗེ་ཆེན་པོ་དང་མི་འཇིགས་པ་བཞི་དང༌། རྣམ་པར་ཐར་པའི་སྒོ་གསུམ་དང༌། སྟོང་པ་བཅོ་བརྒྱད་དང༌། མངོན་བར་ཤེས་པ་དྲུག་དང༌། སྤྱན་ལྔ་དང་བྱང་ཆུབ་ཀྱི་ཕྱོགས་སུམ་ཅུ་རྩ་བདུན་དང༌། མ་འདྲེས་པའི་ཆོས་བཅོ་བརྒྱད་དང༌། མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུ་དང༌། སངས་རྒྱས་ཐམས་ཅད་ཀྱི་སྐུ་ཚེ་དང་སངས་རྒྱས་ཀྱི་ཞིང་ཐམས་ཅད་ཡོངས་སུ་སྦྱང་བ་དང༌། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང༌། སྤྱོད་དཀའ་བ་ཐམས་ཅད་དང༌། དགེ་བ་བསྡུ་བའི་ཚུལ་ཁྲིམས་དང༌། སེམས་ཅན་གྱི་དོན་བྱ་བའི་ཚུལ་ཁྲིམས་དང༌། སྡོམ་པའི་ཁྲིམས་དང༌། ཡོན་ཏན་ཐམས་ཅད་དང༌། ཡེ་ཤེས་ཐམས་ཅད་དང༌། རྒྱན་ཐམས་ཅད་དང༌། སྨོན་ལམ་ཆེན་པོ་ཐམས་ཅད་དང༌། ཐབས་ལ་མཁས་པ་ཐམས་ཅད་དང༌། དེ་ལ་སོགས་ཏེ་བསམ་གྱིས་མི་ཁྱབ་པའི་བསོད་ནམས་དང༌། ཡེ་ཤེས་ཐམས་ཅད་ཡོངས་སུ་རྫོགས་པར་ལྷུན་གྱིས་གྲུབ་སྟེ། མི་དགེ་བ་ཐམས་ཅད་ཡོངས་སུ་བཅད། ཉོན་མོངས་པ་ཐམས་ཅད་ཀྱང་ཡོངས་སུ་བཅད། ཉོན་མོངས་པའི་བག་ཆགས་ཐམས་ཅད་ཀྱང་ཡོངས་སུ་བཅད་དེ། བདེན་པ་བཞི་དང་རྟེན་ཅིང་འབྲེལ་ཏེ་འབྱུང་བ་བཅུ་གཉིས་ཤིན་ཏུ་རྟོགས་ནས། བྱང་ཆུབ་ཀྱི་ཤིང་དྲུང་དུ་བདུད་རྣམ་བཞི་བཏུལ་ཏེ། ཐམས་ཅད་མཁྱེན་པའི་ཡེ་ཤེས་སུ་གྱུར་ནས། དེ་ལྟ་བུའི་དམ་པའི་ཆོས་ཐམས་ཅད་ནན་ཏན་བྱས་པས། སངས་རྒྱས་ཐམས་ཅད་ཀྱི་གསུང་མཐུན་པར་ལེགས་སོ་ལེགས་སོ་ཞེས་བཀའ་སྩལ་པས། མཐུན་པར་ཆོས་ཉིད་ཀྱི་ཡེ་ཤེས་ཀྱི་ཆུ་ཆོས་ཀྱི་སྐུའི་སྤྱི་བོར་དབང་བསྐུར་ཏེ། གདོང་བླ་ན་མེད་པ་ཡང་དག་བར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ་ཞེས་བསྒྲགས་སོ། །དེ་བས་ནི་ད་ལྟར་ལྷ་དང་མི་རྣམས་ཀྱི་སྟོན་པ་སྟེ། ཕྱོགས་བཅུར་རྣམ་པར་སངས་རྒྱས་པ་མཐར་ཕྱིན་པ། བཅོམ་ལྡན་འདས་ཞེས་བྱ་བ་སྟེ་ལྷ་དང་མིའི་ནང་ན་དཔེ་ཟླ་མེད་པ་སེམས་ཅན་ཐམས་ཅད་ལ་སྒྲ་གཅན་འཛིན་དང་འདྲ་བར་གཟིགས་པས། དེ་བཞིན་གཤེགས་པ་ཡང་
དག་བར་རྫོགས་པ། མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་ཞེས་བྱ་སྟེ། འཇིག་རྟེན་ལ་ཐུགས་བརྩེ་བའི་མཛད་པ་ཀུན་མཛད་ནས། སེམས་ཅན་གྱི་ཕྱིར་མྱ་ངན་ལས་འདས་ན། འཇིག་རྟེན་གྱི་ཆོས་བཞིན་དུ་འཁོར་ལོས་སྒྱུར་བའི་རྒྱལ་པོ་ལྟར་སེམས་ཅན་ཐམས་ཅད་ཀྱིས་མཆོད་པ་བྱེད་བར་འགྱུར་བར་བྱའོ། །དགའ་བོ་ང་མྱ་ངན་ལས་འདས་ན། འཁོར་ལོས་སྒྱུར་བའི་རྒྱལ་པོ་ལྟར་ཞག་བདུན་གྱི་བར་དུ་ཞག་ལ། གདོད་ལྕགས་ཀྱི་སྒྲོམ་བུར་ཆུག་ཅིག །ལགས་ཀྱི་སྒྲོམ་བུར་བཅུག་ནས་མར་བསུང་ཅན་གྱིས་ཁོང་ལ། ཁ་ལེགས་པར་ཆོད་ཅིག །སྒྲོམ་ཡང་རིན་པོ་ཆེ་སྣ་བདུན་གྱིས་རབ་ཏུ་སྤྲས་ཞིང་བརྒྱན་ལ། སྒྲོམ་འཁོར་བར་རིན་པོ་ཆེའི་རྒྱལ་མཚན་དང༌། སྤོས་དང་མེ་ཏོག་གིས་མཆོད་པ་གྱིས་ཤིག །དེ་ལྟ་བུར་ཞག་བདུན་དུ་མཆོད་ནས། སྒྲོམ་ནས་ཕྱུང་ལ་སྦོས་ཆུས་ལེགས་པར་ཁྲུས་ཤིག །དེ་ལྟར་སྤོས་ཆུས་དེ་བཞིན་གཤེགས་པ་སྐུ་ལེགས་པར་བཀྲུས་ནས་ཤིང་བལ་གྱིས་སྐུ་ལེགས་བར་དཀྲི་ཞིང༌། དེའི་སྟེང་དུ་རིན་ཐང་མེད་པའི་རས་དཀར་པོ་ཡུག་སྟོང་གིས་དཀྲི་ཞིང༌། དེ་ལྟར་དཀྲིས་ནས་ཕྱིས་ལྕགས་ཀྱི་སྒྲོམ་དུ་ཆུག་ལ། མར་བསུང་ཅན་གྱིས་བཀང་སྟེ། ཁ་ལེགས་པར་ཆོད་ཅིག །དེ་ནས་གོར་ཤི་ཤ་ཙནྡན་དང༌། ཨ་ཀ་རུ་དང༌། ཤིང་བསུང་ཅན་ཐམས་ཅད་དང་བཅས་སྐུ་རིན་པོ་ཆེ་སྣ་བདུན་གྱི་ཤིང་རྟའི་སྟེང་དུ་བཞག་སྟེ། རིན་པོ་ཆེ་ཐམས་ཅད་ཀྱིས་བརྒྱན་ཏེ་སྲེག་པའི་གནས་སུ་དྲངས་ཤིག །རིན་པོ་ཆེའི་རྒྱལ་མཚན་གྲངས་མེད་པ་དང༌། རིན་པོ་ཆེའི་གདུགས་གྲངས་མེད་པ་དང༌། རིན་པོ་ཆེའི་གོས་གྲངས་མེད་པ་དང༌། གྲངས་མེད་བའི་རོལ་མོ་དང༌། གྲངས་མེད་པའི་མེ་ཏོག་དང༌། སྤོས་ཀྱིས་ནམ་མཁའ་ཡང་གང་ཙམ་དུ་མཆོད་པ་གྱིས་ལ་དུགས་ཤིག །ལྷ་དང་མི་དང་འཁོར་ཐམས་ཅད་ཀྱིས་ནི་སྤོས་ཀྱི་ཤིང་ཙནྡན་རྡང༌། ཨ་ཀ་རུ་དང༌། མར་བསུང་ཅན་གྱིས་བསྲེགས་ལ་དུས་ཤིག །དེ་ལྟར་བསྲེགས་ནས་ལྷ་དང་མི་དང་འཁོར་རྣམ་བཞིས་རིང་བསྲེལ་བསྡུས་ལ། རིན་པོ་ཆེ་
སྣ་བདུན་གྱི་བུམ་པར་བཅུག་སྟེ། གྲོང་ཁྱེར་ཆེན་པོའི་ལམ་གྱི་བཞི་མདོར་རིན་པོ་ཆེ་སྣ་བདུན་གྱིས་མཆོད་རྟེན་བྱས་ལ་རིང་བསྲེལ་ལ་མཆོད་ན་སེམས་ཅན་དག་བསོད་ནམས་ཆེན་པོ་ཐོབ་ཅིང༌། སྲིད་པ་གསུམ་གྱི་སྡུག་བསྔལ་སྤངས་ནས་མྱ་ངན་ལས་འདས་པའི་བདེ་བ་ཐོབ་པར་འགྱུར་རོ། །དགའ་བོ་འཁོར་རྣམ་པ་བཞི་པོས། སངས་རྒྱས་ཀྱི་སྐུ་གདུང་གི་རིན་པོ་ཆེ་སྣ་བདུན་གྱིས་མཆོད་རྟེན་བྱས་ནས། གཞན་ཡང་མཆོད་རྟེན་གསུམ་བྱའོ། །གང་ཞེ་ན་འདི་ལྟ་སྟེ། རང་སངས་རྒྱས་ཀྱི་མཆོད་རྟེན་དང༌། དགྲ་བཅོམ་པའི་མཆོད་རྟེན་དང༌། འཁོར་ལོས་སྒྱུར་བའི་རྒྱལ་པོའི་མཆོད་རྟེན་ཏེ། འཇིག་རྟེན་དུ་བཅས་པས་སྐྱབས་སུ་འགྲོ་བའི་གནས་ཤེས་པར་བྱ་བའི་ཕྱིར་རོ། །དགའ་བོས་གསོལ་པ། བཅོམ་ལྡན་འདས་དེ་བཞིན་གཤེགས་པ་འཇིག་རྟེན་དུ་གཤེགས་པ་ན་སེམས་ཅན་ལ་ཐུགས་བརྩེ་བའི་སླད་དུ། སྟོབས་བཅུ་དང༌། ཐུགས་རྗེ་ཆེན་པོ་དང༌། མི་བསྙེངས་པ་བཅུ་དང༌། རྟེན་ཅིང་འབྲེལ་ཏེ་འབྱུང་བ་བཅུ་གཉིས་དང་བདན་པ་བཞི་དང་རྣམ་པར་ཐར་པའི་སྒོ་གསུམ་དང༌། ཚངས་པའི་དབྱངས་རྣམ་པ་བརྒྱད་ཀྱིས་ཁམས་གསུམ་དུ་བསྒྲགས་པ་དང༌། ཁ་དོག་རྣམ་པ་ལྔ་དང་ལྡན་པའི་བྱམས་པའི་འོད་ཀྱིས་ལམ་རྒྱུད་དྲུག་སྣང་བ་མཛད་ནས་སེམས་ཅན་གྱི་བསམ་པ་བཞིན་དུལ་ལ་ནི་འབྲས་བུ་བཞི་དང༌། ཐེག་པ་གཉིས་ལ་སྤྱོད་པར་གྱུར། ལ་ལ་ནི་ཟག་པ་མེད་པའི་འདུས་མ་བྱས་པའི་རང་སངས་རྒྱས་ཀྱི་བྱང་ཆུབ་ཐོབ་པར་གྱུར། ལ་ལ་ནི་འགོག་པ་མི་སྐྱེ་བའི་བྱང་ཆུབ་ཀྱི་ས་ནོན་པར་གྱུར། ལ་ལ་ནི་ཚད་མེད་པའི་གཟུངས་རྣམས་ཐོབ་པར་གྱུར། ལ་ལ་ནི་སྤྱན་ལྔ་དང་མངོན་པར་ཤེས་པ་དྲུག་ཐོབ་པར་གྱུར། ལ་ལ་ནི་ངན་སོང་གསུམ་ལས་ཐར་བར་གྱུར། ལ་ལ་ནི་མི་ཁོམ་པ་བརྒྱད་དང་བྲལ་བར་གྱུར། ལ་ལ་ནི་ལྷ་དང་མིའི་འཇིག་རྟེན་གསུམ་གྱི་སྡུག་བསྔལ་དང་བྲལ་བར་གྱུར་ཏོ། །དེ་བཞིན་གཤེགས་པའི་བྱམས་པའི་ཤུགས་རྣམ་པར་དག་པ་དང༌། དེ་བཞིན་གཤེགས་པའི་རྣམ་པར་གྲོལ་བའི་ཆོས་ཀྱི་གཞུང་བསམ་གྱིས་མི་ཁྱབ་པས་མྱ་ངན་ལས་འདའ་བའི་བར་དུ། འཇིག་རྟེན་དུ་བཅས་པ་ལྷ་དང་མི་དང་འཁོར་རྣམ་བཞིས་རིན་པོ་ཆེ་སྣ་བདུན་གྱིས་མཆོད་རྟེན་བྱས་ཏེ་རིང་བསྲེལ་ལ་མཆོད་ན་བསོད་ནམས་ཆེན་པོ་ཐོབ་ཅིང་སོ་
སོའི་སྐྱེ་བོ་དག་ཁམས་གསུམ་གྱི་སྡུག་བསྔལ་ལས་ཐར་ཅིང་ཡང་དག་པའི་རྣམ་པར་གྲོལ་བ་ལ་འཇུག་པར་འགྱུར་ཏེ། དེ་བས་ན་སངས་རྒྱས་མྱ་ངན་ལས་འདས་ན། འཇིག་རྟེན་དུ་བཅས་པ་ལྷ་དང་མི་དང་འཁོར་ཐམས་ཅད་ཀྱིས་སངས་རྒྱས་མཛད་པའི་དྲིན་ཆེན་པོ་རང་བྱམས་པ་ཚད་མ་མཆིས་པ་རྗེས་སུ་གཟུང་བའི་སླད་དུ་རིན་པོ་ཆེ་སྣ་བདུན་གྱིས་མཆོད་རྟེན་བགྱིད་ཅིང༌། རིང་བསྲེལ་ལ་མཆོད་པ་བགྱིད་པ་ནི་འོས་ན། བཅོམ་ལྡན་འདས་མཆོད་རྟེན་རྣམ་པ་གསུམ་པོ་བགྱིས་པས་སེམས་ཅན་རྣམས་ལ་སྨན་པ་ཅི་མཆིས་ན། མཆོད་རྟེན་བགྱིད་ཅིང་མཆོད་པ་བགྱིད། །བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། རང་སངས་རྒྱས་ནི་རྟེན་ཅིང་འབྲེལ་ཏེ་འབྱུང་བའི་ཆོས་ཤིན་ཏུ་ཟབ་མོ་རྟོགས་ནས། སྲིད་པ་ཐམས་ཅད་ལས་རྣམ་པར་གྲོལ་ཏེ། ཉེས་པའི་སྐྱོན་ཐམས་ཅད་དང་བྲལ་ནས། ལྷ་དང་མིའི་བསོད་ནམས་ཀྱི་ཞིང་དུ་གྱུར་ཏེ། །དེ་བས་ན་མཆོད་རྟེན་བྱས་ཏེ། མཆོད་ན་བསོད་ནམས་ཐོབ་པར་འགྱུར་རོ། །དེ་བཞིན་གཤེགས་པའི་འོག་ཏུ་འགྲོ་བ་མང་པོ་འབྲས་བུ་མཆོག་ཐོབ་པར་བྱེད་པའི་ཕྱིར་རོ། །དགའ་བོ་དགྲ་བཅོམ་པ་ནི་སྐྱེ་བོའི་ཕྱོགས་ཟད་དེ་སྲིད་པ་ཕྱི་མ་མི་ལེན་ལ་ཚངས་པར་སྤྱོད་པ་ཡོངས་སུ་རྫོགས་པ་འཇིག་རྟེན་གྱི་བསོད་ནམས་ཀྱི་ཞིང་དུ་གྱུར་ཏེ། དེ་བས་ན་མཆོད་རྟེན་བྱས་ཏེ་མཆོད་ན་བསོད་ནམས་ཐོབ་པ་ནི་རང་སངས་རྒྱས་ཀྱི་འོག་ཏུ་དེ་མང་སྟེ། དེས་ཀྱང་འགྲོ་བ་རྣམ་པར་གྲོལ་བར་བྱེད་དོ། །དགའ་བོ་འཁོར་ལོས་སྒྱུར་བའི་རྒྱལ་པོ་ཡང་ཁམས་གསུམ་གྱི་ཉོན་མོངས་པ་ལས་རྣམ་པར་མ་གྲོལ་མོད་ཀྱི། བསོད་ནམས་ཀྱི་ཤུགས་ཀྱིས་གླིང་བཞི་ལ་དབང་སྟེ་དགེ་བ་བཅུའི་ལས་ཀྱིས་སེམས་ཅན་ཇི་སྲིད་བྱེད་པས་སེམས་ཅན་དེ་དག་གིས་བཀུར་སྟིའི་གནས་ཡིན་ཏེ། དེ་བས་ན་འཁོར་རྣམ་བཞིས་མཆོད་རྟེན་བྱས་ཏེ་མཆོད་ན་བསོད་ནམས་ཚད་མེད་པ་ཐོབ་པར་འགྱུར་རོ། །དགའ་བོས་ཡང་གསོལ་པ། བཅོམ་ལྡན་འདས་སངས་རྒྱས་མྱ་ངན་ལས་འདས་ནས། བདག་ཅག་འཁོར་རྣམ་བཞིས་གང་དུ་དེ་བཞིན་གཤེགས་པའི་སྐུ་ཞུགས་ལ་བཞེན་ན། དེ་བཞིན་གཤེགས་པའི་རིང་བསྲེལ་ཐོབ་པར་འགྱུར་བ་བཅོམ་ལྡན་འདས་ཀྱིས་བསྟན་དུ་གསོལ།
བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། སངས་རྒྱས་མྱ་ངན་ལས་འདས་ནས། འཁོར་རྣམ་བཞིས་གལ་ཏེ་རྩྭ་མཆོག་གི་གྲོང་ཁྱེར་གྱི་ནང་དུ་ང་བསྲེགས་ན། གྲོང་ཁྱེར་དེའི་མི་དག་རྒྱལ་པོའི་ལས་ཀྱི་ཆད་པ་དང༌། རྩོད་པ་ཚད་མེད་པ་འབྱུང་སྟེ། ཐམས་ཅད་ཀྱིས་བསོད་ནམས་མཉམ་པར་མི་འཐོབ་བོ། །དགའ་བོ་གལ་ཏེ་འཁོར་རྣམ་བཞིས་གྲོང་ཁྱེར་གྱི་ཕྱི་རོལ་ན་བསྲེགས་ན། འཇིག་རྟེན་དག་བསོད་ནམས་མཉམ་པར་འཐོབ་པོ། །དགའ་བོས་གསོལ་པ། བཅོམ་ལྡན་འདས་སངས་རྒྱས་མྱ་ངན་ལས་འདས་ནས་ཞུགས་ལ་བཞེན་པའི་འོག་ཏུ་འཁོར་རྣམ་བཞིས་རིང་བསྲེལ་བསྡུས་ཏེ། རིན་པོ་ཆེའི་བུམ་པར་སྩལ་ནས། རིན་པོ་ཆེ་སྣ་བདུན་གྱི་མཆོད་རྟེན་གང་དུ་བརྩིགས་ན་ཐམས་ཅད་དད་པའི་སེམས་སྐྱེ་ཞིང་མཆོད་པར་འགྱུར་བ་བཅོམ་ལྡན་འདས་ཀྱིས་བསྟན་དུ་གསོལ། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། སངས་རྒྱས་མྱ་ངན་ལས་འདས་ཏེ། བསྲེགས་ནས་འཁོར་རྣམ་བཞིས་རིང་བསྲེལ་བསྡུས་ཏེ། རིན་པོ་ཆེ་སྣ་བདུན་གྱི་བུམ་པར་ཆུག་ལ་རྩྭ་མཆོག་གི་གྲོང་ཁྱེར་གྱི་ནང་ལམ་གྱི་བཞི་མདོར་རིན་པོ་ཆེ་སྣ་བདུན་གྱིས་མཆོད་རྟེན་བང་རིམ་གསུམ་དང་ལྡན་པ་འཕང་ལོ་དང་བཅས་པ་རིན་པོ་ཆེ་ཐམས་ཅད་ཀྱིས་བརྒྱན་ཅིང་སྤྲས་པ། འཇིག་རྟེན་པ་ཐམས་ཅད་ཀྱིས་མཆོག་ཏུ་བྱ་བའི་བ་དན་གྱིས་ཤིན་ཏུ་བརྒྱན་པ། ངོས་བཞིའི་པུ་ཤུ་ཡང་རིན་པོ་ཆེ་སྣ་བདུན་ལས་བྱས་པ་ཐམས་ཅད་དུ་རྒྱན་གྱིས་རབ་ཏུ་སྤྲས་པ། མཆོད་རྟེན་དེའི་རིམ་པ་གཅིག་ནི་ཡང་ངོས་བཞིར་སྒོ་རེ་རེར་བཏོད་པ། སྐར་ཁུང་ཐད་ཀར་འབར་བའི་ནང་དུ་རིན་པོ་ཆེའི་བུམ་པ་བཅུག་སྟེ། འཁོར་རྣམ་བཞིས་མཆོད་པར་བྱའོ། །དགའ་བོ་རང་སངས་རྒྱས་ཀྱི་མཆོད་རྟེན་ནི་རིམ་པ་བཅུ་གཅིག་དང་ལྡན་པ། རིན་པོ་ཆེ་སྣ་ཚོགས་ཀྱིས་སྤྲས་པར་བྱའོ། །དགའ་བོ་དགྲ་བཅོམ་པའི་མཆོད་རྟེན་ནི་རིམ་པ་བཞི་དང་ལྡན་པ་སྟེ། དེ་ཡང་རིན་པོ་ཆེ་སྣ་ཚོགས་ཀྱིས་སྤྲས་པའོ། །དགའ་བོ་འཁོར་ལོས་སྒྱུར་བའི་རྒྱལ་པོའི་མཆོད་རྟེན་ཡང་རིན་པོ་ཆེ་སྣ་བདུན་ལས་བྱས་ཏེ།
རིམ་པ་དང་བཅས་པ་ནི་མ་ཡིན་ནོ། །དེ་ཅིའི་ཕྱིར་ཞེ་ན། ཁམས་གསུམ་གྱི་སྲིད་པའི་སྡུག་བསྔལ་ལས་མ་གྲོལ་བའི་ཕྱིར་རོ། །དེའི་ཚེ་མ་འགགས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་མྱ་ངན་ལས་འདས་ཏེ་ཞུགས་ལ་བཞིན་ན། ལྷ་དང་མི་དང་འཁོར་རྣམ་བཞིས་དེ་བཞིན་གཤེགས་པའི་རིང་བསྲེལ་ཇི་ལྟར་བགོས་ན་ཐམས་ཅད་ཀྱིས་མཆོད་པར་འགྱུར། དེའི་ཚེ་བཅོམ་ལྡན་འདས་ཀྱིས་མ་འགགས་པ་ལ་འདི་སྐད་ཅེས་བཀའ་སྩལ་ཏོ། །མྱ་ངན་ལས་འདས་ནས་ལྷ་དང་མི་ལ་སོགས་པས་སངས་རྒྱས་ཀྱི་རིང་འགྲེལ་བསྡུས་ཏེ། ཤིན་ཏུ་མཉབ་པར་སེམས་ཀྱིས་ཁམས་གསུམ་དང་རྒྱུད་དྲུག་པ་ཐམས་ཅད་ལ་ཡང་བགོས་ཏེ། མཆོད་པ་བྱེད་པར་འགྱུར་བར་བྱའོ། །དེའི་ཚེ་བརྒྱ་བྱིན་ལྷའི་དབང་ཕྱུག་གིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་དེ་བཞིན་གཤེགས་པ་ལས་དེ་བཞིན་གཤེགས་པའི་རིང་བསྲེལ་གྱི་ཕྱེད་གསོལ་ཏོ། །བཅོམ་ལྡན་འདས་ཀྱིས་བརྒྱ་བྱིན་ལྷའི་དབང་པོ་ལ་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ནི་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་གཟིགས་ཏེ། དེ་བས་ན་ཁྱེད་རིང་བསྲེལ་གྱི་ཕྱེད་འདོད་དོ་ཞེས་མ་ཟེར་ཅིག །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ལ་ཕན་པའི་དོན་སྙོམས་པར་མཛད་པའི་ཕྱིར་རོ། །བཅོམ་ལྡན་འདས་ཀྱིས་བརྒྱ་བྱིན་ལྷའི་དབང་ཕྱུག་ལ་བཀའ་སྩལ་བ། ངས་ཁྱོད་ལ་འགྲམ་པ་གཡས་པའི་ཚེམས་མཆེ་བ་གཅིག་སྦྱིན་གྱིས། ཁྱོད་ཀྱིས་ལྷའི་འཇིག་རྟེན་དུ་མཆོད་རྟེན་བྱོས་ལ་མཆོད་ཅིག་དང༌། ཁྱོད་ཀྱིས་བསོད་ནམས་ཟད་མི་ཤེས་པ་ཐོབ་པར་འགྱུར་རོ། །དེའི་ཚེ་ན་ལྷ་དང་མི་ཐམས་ཅད་ཆོ་ངེས་འདེབས་ཤིང་དུས་སོ། །དེ་ནས་བཅོམ་ལྡན་འདས་ཀྱིས་འཁོར་བཞི་པོ་ལ་བཀའ་སྩལ་པ། སངས་རྒྱས་མྱ་ངན་ལས་འདས་པ་ལ་ལྷ་དང་མི་ལ་སོགས་པ་ཁྱེད་མྱ་ངན་མ་བྱེད་ཅིག །དེ་ཅིའི་ཕྱིར་ཞེ་ན། སངས་རྒྱས་མྱ་ངན་ལས་འདས་ཀྱང་རིང་བསྲེལ་དག་མཆོད་དུ་ཡོད་ལ། གཞན་ཡང་བླ་ན་མེད་པའི་སངས་རྒྱས་དཀོན་མཆོག་མདོ་སྡེ་དང་འདུལ་བ་དང༌། ཆོས་མངོན་པ་ཡོད་དོ། །དེ་བས་དཀོན་མཆོག་གསུམ་དང་བདེན་པ་བཞི་རྟག་ཏུ་འཇིག་རྟེན་ན་ཡོད་དོ། །སེམས་
ཅན་དག་དད་པས་མཆོད་པའི་གནས་ཡོད་པ་ཡིན་ནོ། །དེ་ཅིའི་ཕྱིར་ཞེ་ན། རིང་བསྲེལ་ལ་མཆོད་པ་སངས་རྒྱས་དཀོན་མཆོག་ཡིན་ནོ། །སངས་རྒྱས་མཐོང་བ་དེས་ནི་ཆོས་ཀྱི་སྐུ་མཐོང་ངོ༌། །ཆོས་མཐོང་བ་དེས་ནི་འཕགས་པ་མཐོང་ངོ༌། །འཕགས་པ་མཐོང་བ་དེས་ནི་བདེན་པ་བཞི་མཐོང་ངོ༌། །བདེན་པ་བཞི་མཐོང་བ་ངེས་ནི་མྱ་ངན་ལས་འདའ་བ་མཐོང་ངོ༌། །དེ་བས་ན་དཀོན་མཆོག་གསུམ་ནི་རྟག་པ། གནས་པ་མི་འགྱུར་བ་མི་འཕོ་བ་སྟེ། འཇིག་རྟེན་གྱི་གནས་དང་རྟེན་དུ་འགྱུར་བར་རིག་པར་བྱའོ། །བཅོམ་ལྡན་འདས་ཀྱིས་འཁོར་མང་པོ་རྣམས་ལ་བཀའ་སྩལ་པ། ཁྱེད་སྡུག་བསྔལ་གྱིས་གདུངས་པར་གྱུར་པའི་མྱ་ངན་ཆེན་པོ་མ་བྱེད་ཅིག །ང་ནི་མྱ་ངན་ལས་འདའ་བར་གཤེགས་སུ་ངེས་ཚུལ་ཁྲིམས་སམ། གནས་སམ། རྟག་པའམ། མི་རྟག་པའམ། དཀོན་མཆོག་གསུམ་མམ། བདེན་པ་བཞི་འམ། ཕ་རོལ་ཏུ་ཕྱིན་པ་དྲུག་གམ། རྟེན་ཅིང་འབྲེལ་ཏེ་འབྱུང་བ་བཅུ་གཉིས་ལས་ཐེ་ཚོམ་དུ་གྱུར་པ་ཡོད་ན་མྱུར་དུ་དྲིས་ཤིག །འདྲི་བ་འདི་ནི་ཐ་མར་འདྲི་བ་སྟེ། །སངས་རྒྱས་མྱ་ངན་ལས་འདས་ནས་འགྱོད་པ་མེད་པར་བྱའོ་ཞེས་ལན་གསུམ་གྱི་བར་དུ་བཀའ་སྩལ་ཏོ། །དེའི་ཚེ་འཁོར་རྣམ་བཞི་ལ་སོགས་བ་མྱ་ངན་གྱིས་ཡིད་གདུངས་ཏེ། སྐད་བརྣངས་ནས་ཡི་ཆད་པ་ཙམ་དུ་ཡིད་ལ་གཅགས་ཏེ་མྱ་ངན་གྱིས་བརྒྱལ་ལོ། །སངས་རྒྱས་ཀྱི་བྱིན་གྱི་རླབས་ཀྱིས་མཆི་མ་ཕྱིས་ནས་ཅང་མི་སྨྲ་སྟེ་ཞུ་བ་ཡང་མེད་དོ། །དེ་ཅིའི་ཕྱིར་ཞེ་ན། འཁོར་བཞི་པོ་འདི་དག་ཐམས་ཅད་ནི་ཚུལ་ཁྲིམས་དང༌། གནས་དང༌། དཀོན་མཆོག་གསུམ་དང༌། བདེན་པ་བཞི་མངོན་སུམ་དུ་རྟོགས་ཏེ། ཐེ་ཚོམ་མེད་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་འཁོར་རྣམ་བཞི་པོ་ལ་ཐེ་ཚོམ་མེད་པར་ཐུགས་ཀྱིས་མཁྱེན་ནས། ལེགས་སོ་ལེགས་སོ་ཤིན་ཏུ་ལེགས་སོ། །འཁོར་བཞི་པོ་ཁྱེད་དཀོན་གསུམ་དང༌། བདེན་པ་བཞི་ཤིན་ཏུ་རྟོགས་ཏེ། ཐེ་ཚོམ་མེད་པ་ནི་ཇི་ལྟར་ཆུ་དང་བས་དྲི་མ་བཀྲུས་པ་དང་འདྲ་སྟེ། ཁྱེད་ཀྱང་བརྩོན་འགྲུས་གྱིས་ཤིག་དང༌། མྱུར་དུ་འབྱུང་བའི་ལམ་
ཐོབ་པར་འགྱུར་གྱིས་བརྒྱས་པ་ཙམ་དུ་མྱ་ངན་མ་བྱེད་ཅིག །དེའི་ཚེ་བཅོམ་ལྡན་འདས་ཀྱིས་སེང་གེའི་ཁྲི་ལ་བཞུགས་བཞིན་དུ་གསེར་ལྟ་བུའི་ཕྱག་གིས་ན་བཟའ་སྦྱར་མ་བཞག་ནས་གསེར་བཙོ་མའི་ཁ་དོག་ལྟ་བུ་སེང་གེའི་མཐོང་ཀ་དཔལ་བེའུ་ཕྱུང་སྟེ། འཁོར་མང་པོ་རྣམས་ལ་བསྟན་ནས། ལྷ་དང་མི་དང་འཁོར་མང་པོ་རྣམས་ལ་ངའི་སྐུ་ཁ་དོག་གསེར་བཙོ་མ་ལྟ་བུལ་ལྟོས་ཤིག་ཅེས་བཀའ་སྩལ་ཏོ། །དེའི་ཚེ་འཁོར་རྣམ་བཞི་དང་ཐམས་ཅད་ཀྱིས་དེ་བཞིན་གཤེགས་པའི་སྐུ་གསེར་བཙོ་མའི་ཁ་དོག་ལྟ་བུ་ལ་མིག་མི་འཛུམས་པར་བལྟས་པས་རབ་ཏུ་བདེ་བ་ནི་ཇི་ལྟར་དགེ་སློང་དག་སྡོམ་པ་གསུམ་ལ་རིག་པ་དང་འདྲ་བར་གྱུར་ཏོ། །དེའི་ཚེ་བཅོམ་ལྡན་འདས་གསེར་བཙོ་མའི་ཁ་དོག་ལྟ་བུའི་སྐུ་འཁོར་མང་པོ་ལ་བསྟན་ནས་མྱ་ངན་ལས་འདས་པ་ཆེན་པོའི་འོད་ཟེར་ཚད་མེད་དཔག་ཏུ་མེད་པ་ཁྲག་ཁྲིག་བརྒྱ་སྟོང་སྙེད་བཀྱེ་ནས། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་སྣང་བར་བྱས་ནས། ཉི་ཟླའི་འོད་ཀྱང་ཟིལ་གྱིས་གནོན་ཏོ། །དེ་ལྟར་འོད་བཀྱེ་ནས་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ནི་ཁྱོད་ཀྱི་ཕྱིར་བསྐལ་པ་གྲངས་མེད་པའི་བར་དུ་ཤིན་ཏུ་སྤྱོད་དཀའ་བ་སྤྱད་དེ། ལུས་ཀྱི་ཡན་ལག་དང༌། རྐང་པ་ཡང་གཏུབས་ནས་ཤིན་ཏུ་སྤྱོད་དཀའ་བ་ཐམས་ཅད་སྤྱད་དེ། སྙིང་རྗེ་ཆེན་པོའི་སྨོན་ལམ་གྱི་དབང་གིས་རྙོག་པ་ལྔའི་འཇིག་རྟེན་གྱི་ཁམས་འདིར་བླ་ན་མེད་པ་ཡང་དག་པར་རྫོགས་བའི་བྱང་ཆུབ་ཏུ་མངོན་པར་སངས་རྒྱས་ཏེ། རྡོ་རྗེ་ལྟ་བུར་མི་འཇིག་པ་གསེར་བཙོ་མའི་ཁ་དོག་གི་སྐུ་མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུ་དང་ལྡན་པ་ཚད་མེད་པའི་འོད་ཟེར་གྱིས་ཐམས་ཅད་དུ་སྣང་བར་བྱས་པ་ཐོབ་སྟེ། འོད་ཟེར་གྱིས་རིག་གམ། སྐུ་མཐོང་བ་ཙམ་གྱིས་ཀྱང་མ་གྲོལ་བ་མེད་དོ། །བཅོམ་ལྡན་འདས་ཀྱིས་ཡང་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །སངས་རྒྱས་འཇིག་རྟེན་དུ་གཤེགས་པ་ཤིན་ཏུ་དཀའ་བ་ནི་མེ་ཏོག་ཨུ་དུམ་བཱ་ར་དང་འདྲ་སྟེ། ཤིན་ཏུ་མཐོང་བར་དཀའོ། །ཁྱོད་ཀྱིས་ནང་གི་ཐ་མར་ངའི་སྐུ་མཐོང་བ་འདི་ལ་དོན་མེད་པར་མི་བྱའོ། །སྔོན་གྱི་སྨོན་ལམ་གྱི་མཐུས་
རྙེད་པའི་འཇིག་རྟེན་གྱི་ཁམས་འདིར་གཤེགས་ཏེ། དེ་ནི་གདུལ་བྱའི་དོན་མཛད་ནས་ང་མྱ་ངན་ལས་འདར་ཉེའོ། །ཁྱེད་ལ་སོགས་པ་སེམས་རྩེ་གཅིག་ཏུ་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ཤིན་ཏུ་ལྟོས་ཤིག །ཁྱེད་ཀྱང་ཡོངས་སུ་དག་པའི་ལས་ལ་ནན་ཏན་བྱས་ན། །འབྲས་བུ་འདི་ཐོབ་པར་འགྱུར་རོ། །དེའི་ཚེ་བཅོམ་ལྡན་འདས་དེ་བཞིན་དུ་ཡང་དང་ཡང་ལན་གསུམ་གྱི་བར་དུ་བཀའ་སྩལ་ནས། གསེར་བཙོ་མ་ལྟ་བུའི་སྐུ་འཁོར་མང་པོ་རྣམས་ལ་མངོན་དུ་བསྟན་ཏོ། །དེ་ནས་རིན་པོ་ཆེ་སྣ་བདུན་གྱི་གསེར་གྱི་ཁྲི་ལས་བཞེངས་ཏེ་སྟེང་གི་ནམ་མཁའ་ལ་ཤིང་ཏ་ལ་བདུན་སྲིད་དུ་འཕགས་ནས་ཡང་འདི་སྐད་ཅེས་བཀའ་སྩལ་ཏོ། །ད་ཡོངས་སུ་མྱ་ངན་ལས་འདར་ཉེ་ཡ་སི། ཁྱེད་ལ་སོགས་བ་འཁོར་མང་པོ་རྣམས་བསམ་པ་ཤིན་ཏུ་དག་པས། ངའི་སྐུ་ཁ་དོག་གསེར་བཙོ་མ་ལྟ་བུ་ལ་ལྟོས་ཤིག་ཅེས་ལན་བདུན་གྱི་བར་དུ་བཀའ་སྩལ་ཏོ། །དེ་ནས་ནམ་མཁའ་ལས་བབས་ཏེ། སེང་གེའི་ཁྲི་ལ་བཞུགས་ནས། ཡང་འཁོར་མང་པོ་རྣམས་ལ་ང་ཡོངས་སུ་མྱ་ངན་ལས་འདར་ཉེ་ཡིས་ཁྱེད་ལ་སོགས་པ་བསམ་པ་ཤིན་ཏུ་དག་པས་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ལྟོས་ཤིག་ཅེས་བཀའ་སྩལ་ཏོ། །དེ་ནས་ཡང་བཅོམ་ལྡན་འདས་སེང་གེའི་ཁྲི་ལ་བཞེངས་ནས་ནམ་མཁའ་ལ་ཤིང་ཏ་ལ་གཅིག་སྲིད་དུ་འཕགས་ནས། འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ང་ཡོངས་སུ་མྱ་ངན་ལས་འདར་ཉེའི་ཁྱེད་ལ་སོགས་པ་བསམ་པ་དག་པས་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ལྟོས་ཤིག །དེ་བཞིན་དུ་ཤིང་ཏ་ལ་བདུན་སྲིད་དུ་འཕགས་ནས་ལན་བདུན་གྱི་བར་དུ་ང་ཡོངས་སུ་མྱ་ངན་ལས་འདར་ཉེའི། །ཁྱེད་ལ་སོགས་པ་འཁོར་མང་པོ་རྣམས་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ལྟོས་ཤིག་ཅེས་བཀའ་སྩལ་ཏོ། །དཀོན་མཆོག་གི་ཟ་མ་ཏོག་ལས། གང་དག་སེམས་བཤུས་ངོ་ཚ་མེད་ཅིང་ཁྲེལ་མེད་དང༌། །གང་དག་འདི་འདྲའི་ཡོན་ཏན་མེད་ཅིང་བདེན་ཚིག་མེད། །དེ་དག་སྒྲེན་མོ་བས་ཀྱང་སྒྲེན་མོར་འཇིག་རྟེན་རྒྱུ། །སྲོག་ཆགས་ཤི་བ་རྗེས་བླང་སྟེ། །འཚོ་བ་ངན་པ་དེ་ལྟ་མིན། །གཡུལ་ངོར་ཤི་བ་ལེགས་པ་སྟེ། །ཕམ་ནས་གསོན་པ་དེ་ལྟ་མིན། །སྔ་མའི་དབུང་ལས་མི་རྒྱལ་ཏེ། །དཔའ་བོའི་
དབུང་ལས་རྒྱལ་བར་འགྱུར། །ཞེས་འབྱུང༌། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་བ་ལས་བཀའ་སྩལ་པ། རབ་འབྱོར་གལ་ཏེ་སེམས་ཅན་རྣམས་དངོས་པོ་ཡིན་ཏེ། དངོས་པོ་མེད་པ་མ་ཡིན་ན་ནི། གང་དག་གི་ཆེད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཆོས་ཀྱི་འཁོར་ལོ་བསྐོར་བའི་སེམས་ཅན་དེ་དག་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་མི་འགྱུར་བ་ཞིག་ན། རབ་འབྱོར་གང་གི་ཕྱིར་སེམས་ཅན་རྣམས་དངོས་པོ་མེད་ཅིང་དངོས་པོ་ཡོང་བ་མ་ཡིན་པས་དེའི་ཕྱིར་གང་དག་གི་ཆེད་དུ་དེ་བཞིན་གཤེགས་པས་ཆོས་ཀྱི་འཁོར་ལོ་བསྐོར་བའི་སེམས་ཅན་དེ་དག་ཕུང་པོ་ལྷག་མ་མེད་པའི་མྱ་ངན་ལས་འདའ་བའི་དབྱིངས་སུ་ཡོངས་སུ་མྱ་ངན་ལས་འདའོ། །ཡོངས་སུ་མྱ་ངན་ལས་འདས་སོ། །ཡོངས་སུ་མྱ་ངན་ལས་འདའ་བར་འགྱུར་རོ་ཞེས་འབྱུང་བ་དང༌། ཡང་རབ་འབྱོར་གལ་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དངོས་པོ་ཡིན་ཏེ། དངོས་པོ་མེད་པ་མ་ཡིན་ན་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་འོད་དང༌། སྐུ་མདོག་དང་གཟི་བརྗིད་དང༌། དཔལ་གྱིས་ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ཏེ། མཛེས་ཤིང་ལྷམ་མེ། ལྷན་ནེ། ལྷང་དེར་མི་འགྱུར་བ་ཞིག་ན། རབ་འབྱོར་གང་གི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དངོས་པོ་མེད་ཅིང་དངོས་པོ་ཡོད་པ་མ་ཡིན་པས། དེའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་འོད་དང་སྐུ་མདོག་དང་གཟི་བརྗིད་དང་དཔལ་གྱིས་ལྷ་དང་མི་དང༌། ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ཏེ། མཛེས་ཤིང་ལྷ་མ་མེ། ལྷན་ནེ། ལྷང་ངེ་ཞེས་འབྱུང་བ་དང༌། ཡང་རབ་འབྱོར་གལ་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཆོས་ཀྱི་འཁོར་ལོ་དངོས་པོ་ཡིན་ཏེ། དངོས་པོ་མེད་པ་མ་ཡིན་ན་
ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། དགེ་སློང་ངམ། བྲམ་ཟེའམ། ལྷ་འམ། བདུད་དམ། ཚངས་པ་འམ། སུས་ཀྱང་འཇིག་རྟེན་དུ་ཆོས་དང་མཐུན་བར་བསྐོར་བར་མི་ནུས་པའི་ཆོས་ཀྱི་འཁོར་ལོ་བསྐོར་བར་མི་འགྱུར་གཞིག་ན། རབ་འབྱོར་གང་གི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་འཁོར་ལོ་དངོས་པོ་མེད་ཅིང༌། དངོས་པོ་ཡོད་པ་མ་ཡིན་པས། དེའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་སློང་ངམ། བྲམ་ཟེའམ། ལྷ་འམ། བདུད་དམ། ཚངས་བའམ། སུས་ཀྱང་འཇིག་རྟེན་དུ་ཆོས་དང་མཐུན་པར་བསྐོར་བར་མི་ནུས་པའི་ཆོས་ཀྱི་འཁོར་ལོ་བསྐོར་རོ་ཞེས་འབྱུང་བ་དང༌། ཡང་རབ་འབྱོར་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོའི་རྡོ་རྗེ་ལྟ་བུའི་ཡེ་ཤེས་དངོས་པོ་ཡིན་ཏེ། དངོས་པོ་མེད་པ་མ་ཡིན་ན་ནི། ཐེག་པ་ཆེན་པོ་འདི་བྱང་ཆུབ་སེམས་དཔའ་སེམས་དཔའ་ཆེན་པོས་བག་ཆགས་དང༌། མཚམས་སྦྱོར་བ་དང༌། ཉོན་མོངས་པ་ཐམས་ཅད་དངོས་པོ་མེད་པར་རྟོགས་ནས། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་རྣམ་པ་ཐམས་ཅད་ཀྱི་མཆོག་དང་ལྡན་པ་ཐོབ་ནས། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ཏེ། ངེས་པར་འབྱུང་བར་མི་འགྱུར་བ་ཞིག་ན། རབ་འབྱོར་གང་གི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོའི་རྡོ་རྗེ་ལྟ་བུའི་ཡེ་ཤེས་དངོས་པོ་མེད་ཅིང༌། དངོས་པོ་ཡོད་པ་མ་ཡིན་པས། དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོས་བག་ཆགས་དང༌། མཚམས་སྦྱོར་བ་དང༌། ཉོན་མོངས་པ་ཐམས་ཅད་དངོས་པོ་མེད་བར་རྟོགས་ནས། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་རྣམ་པ་ཐམས་ཅད་ཀྱི་མཆོག་དང་ལྡན་པ་འཐོབ་སྟེ། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ནས། ངེས་པར་འབྱུང་བར་འགྱུར་རོ་ཞེས་འབྱུང༌། རབ་འབྱོར་གྱིས་སྨྲས་པ། ཚེ་དང་ལྡན་པ་ཤ་ར་དྭ་ཏིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་འདི་
བཤད་པ་ན། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ནེམ་ནུར་མེད་ཅིང༌། རྨོངས་པ་མེད་པར་གྱུར་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་འདི་ལྟ་བུ་སྟེ། སེམས་ཅན་ཐམས་ཅད་བསྐྱབ་པ་དང༌། སེམས་ཅན་ཐམས་ཅད་ཡོངས་སུ་མི་གཏོང་བའི་ཕྱིར། འདི་ལྟར་གནས་པ་འདིས་གནས་པ་ཡིན་པར་རིག་པར་བྱ་སྟེ། དེ་ཡང་མི་གནས་བའི་ཚུལ་གྱིས་གནས་ཤིང༌། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་འདི་ལྟ་སྟེ། སྙིང་རྗེ་ཆེན་པོ་ཡིད་ལ་བྱེད་པ་དེ་དང་མ་བྲལ་བར་རིག་པར་བྱའོ། །ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར་འདི་ལྟ་སྟེ། སྙིང་རྗེ་ཆེན་པོ་ཡིད་ལ་བྱེད་པ་དེ་ཡིད་ལ་བྱེད་པ་དེ་དང་མ་བྲལ་བར་གནས་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པར་འདོད་ན། ཚེ་དང་ལྡན་པ་རབ་འབྱོར་དེ་ལྟར་ན་སེམས་ཅན་ཐམས་ཅད་ཀྱང་བྱང་ཆུབ་སེམས་དཔའ་ཡིན་པར་འགྱུར་རོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་རབ་འབྱོར་འདི་ལྟར་སེམས་ཅན་ཐམས་ཅད་ནི་ཡིད་ལ་བྱེད་པ་དང་མ་བྲལ་བའི་ཕྱིར་རོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ་ལེགས་སོ་ལེགས་སོ། །ཚེ་དང་ལྡན་པ་ཤཱ་རིའི་བུས་ཡང་དག་པའི་ཚིག་བརྗོད་ནས། དོན་དེ་ཉིད་ཡོངས་སུ་བཟུང་བ་ནི་ཚེ་དང་ལྡན་པ་ཤཱ་རིའི་བུའི་དམིགས་སུ་ཕེབས་སོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་ཤཱ་རིའི་བུ་སེམས་ཅན་མེད་པའི་ཕྱིར། ཡིད་ལ་བྱེད་པ་མེད་པར་རིག་པར་བྱའོ། །སེམས་ཅན་སྟོང་པ་ཉིད་ཀྱི་ཕྱིར། ཡིད་ལ་བྱེད་པ་སྟོང་པ་ཉིད་དུ་རིག་པར་བྱའོ། །སེམས་ཅན་དབེན་པའི་ཕྱིར། ཡིད་ལ་བྱེད་པ་དབེན་པར་རིག་པར་བྱའོ། །སེམས་ཅན་ངོ་བོ་ཉིད་མེད་པའི་ཕྱིར། ཡིད་ལ་བྱེད་པ་ངོ་བོར་འགྱུར། །དབང་པོའི་འཁོར་དུ་སེམས་ཅན་མངོན་པར་རྫོགས་བར་འཚང་རྒྱ་བ་མེད་པའི་ཕྱིར། ཡིད་ལ་བྱེད་པ་མངོན་པར་རྫོགས་པར་འཚང་རྒྱ་བ་མེད་པར་རིག་པར་བྱ་བའི་ཕྱིར་རོ་ཞེས་འབྱུང༌། འཕགས་པ་སངས་རྒྱས་ཕལ་པོ་ཆེ་སྡོང་པོ་བརྒྱན་པ་ལས། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་ཡོན་ཏན་འབྱུང་བ། སོང་ཤིག་ནོར་བཟངས་དཔལ་གྱི་ཆུ་རྒྱལ་
དཔུང་ཤིག་ན། །མཁས་པ་རྣམས་ཀྱི་རི་རྒྱལ་གྲུ་འཛིན་མཛེས་པ་ཡོད། །རིན་ཆེན་རྒྱུས་བྱས་ཤིང་དང་ནགས་ཚལ་མེ་ཏོག་མང༌། །བཟའ་ཤིང་ར་བའི་རྫིང་དང་ཆུ་བྲན་འབབ་པར་ལྡན། །དྲི་མཆོག་དེ་ལ་བརྟེན་ནས་སྤྱན་རས་གཟིགས་ཀྱི་དབང༌། །འགྲོ་བ་རྣམས་ལ་ཕན་པའི་དོན་དུ་རྣམ་པར་སྤྱོད། །དེ་གན་སོང་དང་ནོར་བཟངས་ཁྱོད་ལ་མགོན་པོ་ཡི། །ཡོན་ཏན་རྒྱ་ཆེན་ཚུལ་འཇུག་བསྟོད་པར་བྱེད། །གཡས་ཕྱོགས་བསྐོར་བ་བྱས་ཏེ་གུས་པར་སྐུར་སྟོན་ནས། །ནོར་བཟངས་ཤིན་ཏུ་དུལ་བ་ལྷོ་ཕྱོགས་རྒྱུད་དུ་སོང༌། །སྤྱན་རས་གཟིགས་དབང་དྲང་སྲོང་སྙིང་རྗེ་རྣམ་སྤྱོད་པ། །རིན་ཆེན་རི་ཡི་སུལ་ན་གནས་པར་དེས་ཀྱང་མཐོང༌། །རིན་ཆེན་སྣ་ཚོགས་རྡོ་རྗེའི་རི་ཡི་སྨན་ལྗོངས་ན། །པདྨའི་སྙིང་པོ་སེང་གེའི་ཁྲི་ལ་བརྟེན་པ་འདུག །ལྷ་དང་ལྷ་མིན་ཀླུ་དང་སྲིན་པོ་མི་འམ་ཅི། །རྒྱལ་བའི་སྲས་ཀྱིས་བསྐོར་ཞིང་དེ་ལ་ཆོས་ཀྱང་སྟོན། །མཐོང་ནས་ནོར་བཟངས་དགའ་བ་ཚད་མེད་སྐྱེས་པར་འགྱུར། །བསྙེན་ཏེ་ཡོན་ཏན་རྒྱ་མཚོའི་ཞབས་ལ་ཕྱག་འཚལ་ནས། །ཅི་ནས་བཟང་པོའི་སྤྱོད་པ་བདག་གིས་ཐོབ་འགྱུར་བར། །འཕགས་པ་ཐུགས་རྗེ་བསྐྱེད་དེ་གདམས་ཤིང་བསླབ་པར་གསོལ། །བསོད་ནམས་བརྒྱ་པས་བརྒྱན་པ་དྲི་མེད་ཕྱག་བརྐྱང་སྟེ། །འོད་སྤྲིན་དྲ་བརྒྱ་ཆེན་བཟང་པོ་རབ་འཐོན་ནས། །ནོར་བཟང་སྤྱི་བོར་བཞག་སྟེ་སེམས་ཅན་རྣམ་དག་པ། །སྤྱན་རས་གཟིགས་ཀྱི་དབང་ཕྱུག་མཁས་པས་ཚིག་འདི་སྨྲས། །སངས་རྒྱས་སྲས་པོ་ང་ནི་རྣམ་ཐར་གཅིག་སྒོ་ཤེས། །ཡེ་ཤེས་སྙིང་པོ་རྒྱལ་བ་ཀུན་གྱི་ཐུགས་རྗེས་སྡུག །འགྲོ་བ་ཐམས་ཅད་བསྐྱབ་ཅིང་ཡོངས་སུ་བསྡུ་ཕྱིར་འབྱུང༌། །ཀུན་དུ་བདག་ཉིད་རང་ལ་བྱམས་པ་བཞིན་དུ་རྒྱུ། །འགྲོ་བ་མང་པོ་ཐམས་ཅད་སྡུག་བསྔལ་ཀུན་ལས་སྐྱོབ། །གང་རྣམས་དམ་དུ་བཅིངས་ཤིང་དགྲ་ལག་ཕྱིན་པ་དང༌། །ལུས་ལ་གཟིར་ཅིང་དེ་བཞིན་བཙོན་རར་བཙུད་པ་ཡང༌། །ང་ཡི་མིང་ཐོས་བཅིངས་ཤིང་བཟུང་བའང་
ཐར་བར་འགྱུར། །རྒྱལ་པོ་དག་ལ་ཉེས་པའི་གཡོར་བྱས་བསད་སྤངས་པ། །དེ་ཚེ་དེ་དག་ང་ཡི་མིང་ཡང་དྲན་གྱུར་ན། །མདའ་འཕངས་དེ་ཡི་ལུས་ལ་ཕོག་པར་མི་འགྱུར་རོ། །མཚོན་སྣོས་བཏབ་ཀྱང་དེ་དག་མི་འཇུག་རྒལ་བར་འགྱུར། །དབང་པོའི་འཁོར་དུ་ཕྱིན་དང་གང་རྣམས་རྩོད་འགྱུར་པ། །དགྲ་རྣམས་ཀུན་ལས་རྒྱལ་འགྱུར་གྲགས་པ་ཐོབ་པར་འགྱུར། །གྲགས་དང་གྲོགས་དང་རིགས་དང་ནོར་རྣམས་འཕེལ་བར་འགྱུར། །གང་གིས་ང་ཡི་མིང་ནི་རྗེས་སུ་དྲན་བྱས་པ། །དེ་དག་རྐུན་པོས་འཇིགས་དོགས་དགྲས་འཇིགས་ནམ་ཕྱིན་ཏེ། །སེང་གེ་དོམ་གཟིག་གཅན་ག་ཟན་གཡག་རྒོད་སྦྲུལ་གང་ཡང༌། །དགྲ་རྣམས་ཀུན་ལས་རྒྱལ་ཞིང་འཇིགས་པ་མེད་པར་འགྱུར། །གང་རྣམས་ལ་ལས་ང་ཡི་མིང་ཞིག་དྲན་བྱས་ན། །སྡང་བའི་སེམས་རྒྱུན་ས་ཆེན་ལྟོངས་སུ་ཐར་གྱུར་ཏམ། །སོལ་དག་ལྕི་མེ་རབ་ཏུ་འབར་གྱུར་ཀྱང༌། །གང་བ་ཆུ་ཡི་གཏེར་དུ་འབྱུང་བར་འགྱུར། །ང་ཡི་མིང་ནི་སྐད་འགའ་ཡུད་ཙམ་རྗེས་དྲན་ན། །རྒྱ་མཚོའི་ཆུར་བོར་དེ་ནི་ནང་དུ་འཆི་མི་འགྱུར། །ཆུ་བོས་མི་ཁྱེར་མེ་ཡི་དབུས་སུ་འཚིག་མི་འགྱུར། །དོན་མེད་ཀུན་དུ་མི་འགྱུར་དོན་རྣམས་གྲུབ་པར་འགྱུར། །ཤིང་སྒྲོག་དབྱིག་བཅིངས་ལྕགས་སྒྲོག་དེ་བཞིན་ལྟུང་རྣམས་དང༌། །བརྙས་ཤིང་ཁྱད་བསད་དེ་བཞིན་བྲེད་ཅིང་བསླུས་པ་དང༌། །སྤྱོས་ཤིང་བསྡིགས་ཏེ་གཤེ་དང་སྨ་ཕབ་རྣམ་པ་ལས། །ང་ཡི་མིང་ཙམ་དྲན་པར་བྱས་ན་ཐར་པ་ཐོབ། །གང་རྣམས་ཤར་གཉེར་སྣ་ཚོགས་གླགས་ལྟ་ཇི་སྙེད་དང༌། །གང་རྣམས་རྟག་ཏུ་ཞེ་སྡང་མི་སྙན་བརྗོད་པ་རྣམས། །ང་ཡི་མིང་ཐོས་དྲན་བྱས་སྙན་པར་བརྗོད་པར་འགྱུར། །མཐོང་བ་ཙམ་གྱི་མདོ་ལ་བྱམས་པའི་སེམས་ཀྱང་བསྐྱེད། །ང་ཡི་མིང་ཙམ་ལ་ལ་གང་གིས་དྲན་བྱས་ན། །གནོད་པའི་དོན་དུ་རོ་ལངས་སྔགས་དང་བྱེད་པ་ཡི། །དགྲ་རྣམས་རྟག་ཏུ་དེ་ཡིས་ཟིལ་གྱིས་གནོན་པར་འགྱུར། །མ་ལུས་དུག་གིས་དེ་ཡི་ལུས་ལ་མི་ཚུགས་སོ། །ལ་ལ་གང་གིས་ང་ཡི་མིང་
ཙམ་དྲན་བྱས་ན། །ཀླུ་དབང་སྤྲིན་ཚོགས་མཁའ་ལྡིང་ཤ་ཟ་ཐམས་ཅད་དང༌། །གྲུལ་བུམ་སྲིན་པོ་འཚེ་བྱེད་གཏུམ་པའི་སེམས་ལྡན་དང༌། །མདངས་འཕྲོག་འཇིགས་བྱེད་རྨི་ལམ་འོང་བཞི་བར་འགྱུར། །ང་ཡི་མིང་ནི་སྐད་ཅིག་ཡུད་ཙམ་དྲན་བྱས་ཀྱང༌། །ཕ་དང་མ་དང་གཉེན་བཤེས་མཛའ་བ་ཀུན་དང་ཡང༌། །འབྲལ་བར་མི་འགྱུར་སྡད་དང་འགྲོགས་པར་དེ་བཞིན་མིན། །ནོར་ཟད་མི་འགྱུར་ཕོངས་པའི་དངོས་སུ་མི་འགྱུར་རོ། །ང་ཡི་མིང་ནི་རྗེས་སུ་ལ་ལས་དྲན་བྱེད་ན། །འདི་ནས་ཤི་འཕོས་མནར་མེད་སེམས་དམྱལ་མི་འགྲོ་སྟེ། །བྱོལ་སོང་སྐྱེ་གནས་ཡི་དག་མི་ཁོམ་གནས་སུ་མིན། །སེམས་ཅན་དག་པ་ལྷ་དང་མི་ཡི་གནས་སུ་སྐྱེ། །ང་ཡི་མིང་ནི་ལ་ལ་དག་གིས་དྲན་བྱས་ན། །དམུས་ལོང་ཞར་བ་འོན་པ་ཞ་བོར་མི་འགྱུར་ཏེ། །ཐེང་པོ་ལོང་བར་མི་འགྱུར་གསལ་སྨྲ་བལྟ་སྡུག་འགྱུར། །བསྐལ་བ་བྱེ་བ་མང་བོར་དབང་པོ་ཀུན་ལྡན་འགྱུར། །ལ་ལ་གང་གིས་ངའི་རྗེས་དྲན་ན། །སེམས་ཅན་དག་པ་འདི་ནས་ཤི་འཕོས་ཕྱོགས་བཅུ་ཡི། །འཇིག་རྟེན་ཁམས་སུ་སངས་རྒྱས་མངོན་སུམ་སྐྱེ་བར་འགྱུར། །སངས་རྒྱས་མཐོང་འགྱུར་དེ་དག་ཆོས་ཀྱང་ཐོས་པར་འགྱུར། །འདི་དང་དེ་བཞིན་གཞན་དག་ཐབས་མང་ཇི་སྙེད་ཀྱིས། །འགྲོ་བ་སེམས་ཅན་ངེས་འདུལ་གཞན་དང་ཟད་ནུས་ཀྱིས། །སངས་རྒྱས་སྲས་པོ་ངས་ནི་རྣམ་ཐར་གཅིག་བསྒོམས་ཏེ། །ཡོན་ཏན་ཅན་གྱི་ཡོན་ཏན་ཐམས་ཅད་ངས་མི་ཤེས། །འཕགས་པ་སྤྱན་རས་གཟིགས་དབང་ཕྱུག་གི་ཡོན་ཏན། འཕགས་པ་མདོ་སྡེ་སྣ་ཚོགས་ཀྱི་མདོ་བཏུས། གསུང་རབ་རིན་པོ་ཆེའི་གཏམ་རྒྱུད། འདུས་པ་ཤཱཀྱའི་རབས་རྒྱུད། མཁན་པོ་དཔལ་བརྩེགས་ཀྱིས་མཛད་པ་རྫོགས་སྷོ་།། །།