བཙུན་པ་ཟླ་བའི་སྨོན་ལམ་ཞེས་བྱ་བ།
ཙནྡྲགོམིན།
རྒྱ་གར་སྐད་དུ། ཙནྡྲ་གོ་མི་པྲ་ཎི་དྷཱ་ན་ནཱ་མ། བོད་སྐད་དུ། བཙུན་པ་ཟླ་བའི་སྨོན་ལམ་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །སྲིད་པའི་ལས་ནི་ཉམ་ང་ཡིས། །གང་དང་གང་དུ་ཉེར་སྐྱེ་བ། །དེ་དང་དེར་ནི་སྐྱེས་པ་དང༌། །དད་དང་དབང་པོ་ཚང་བ་དང༌། །བཟོ་དང་སྒྱུ་རྩལ་ཀུན་མངོན་ཤེས། །བསྟན་བཅོས་ཀུན་ལ་འཇིགས་མེད་དང༌། །འདོད་པ་ཀུན་ལ་རྒྱབ་ཕྱོགས་ཤིང༌། །དངོས་ཀུན་ཡོངས་སུ་གཏོང་བ་དང༌། །དྲན་དང་ལྡན་ཞིང་བདེན་སྨྲ་དང༌། སེམས་ཅན་རྣམས་ཀྱིས་མཐོང་ན་དགའ། །བྱང་ཆུབ་སེམས་ཀྱིས་རྣམ་བརྒྱན་པའི། །དགེ་བའི་བཤེས་གཉེན་བསྟེན་པ་དང༌། །དུལ་བའི་སྤྱོད་དང་ཡང་དག་ལྡན། །བློ་བཟང་སྐྱེ་བ་གཙང་མ་དྲན། །སྡིག་པའི་ལས་ལ་འཇིགས་བྱེད་པས། །སྤྱོད་པ་དགེ་བའི་སྤྱོད་ཡུལ་ཅན། །མཐར་ཡང་བླ་མེད་རྟོགས་པ་ཡིས། །ཕ་རོལ་ཕྱིན་པ་བཅུ་བསྟེན་པས། །འགྲོ་ལ་གཅིག་ཏུ་བདེ་བ་ཡི། །གཡོ་མེད་མགོན་པོ་ཐོབ་པར་གྱུར། །བདག་ནི་བྲན་དང་མོར་མ་གྱུར། །བླུན་དང་ཡུལ་ངན་སྐྱེ་བ་དང༌། །སངས་རྒྱས་འབྱུང་ལ་ལྐོག་མ་གྱུར། །ནམ་དུའང་ལྟ་བ་ལོག་མ་གྱུར། །འདོད་མེད་ཚུལ་ལྡན་སངས་རྒྱས་རྒྱུར། །ཕ་རོལ་འདོད་པའི་རྫས་ལོངས་སྤྱོད། །སེམས་ཅན་ཉམ་ཐག་བྱེད་འགྱུར་བའི། །འདོད་པའི་སློང་མོ་བདག་མི་སྤྱོད། །སེམས་ཅན་རྣམས་ལ་བྱམས་གོམས་ཤིང༌། །རྒྱུ་མེད་རང་བཞིན་སངས་རྒྱས་དང༌། །བྱང་
སེམས་འགྲོ་བའི་འབྲས་མི་ལྟ། །རིགས་ཆེན་བློ་ནོར་སྐྱེ་བ་དང༌། །སྐྱེ་བ་སྐྱེ་བར་ལུས་མཛེས་ཤིང༌། །བདེ་གཤེགས་མང་པོའི་སྙན་ངག་བྱེད། །སྐྱེ་ཞིང་སྐྱེ་བ་དང་ལྡན་པར། །གང་དུ་སངས་རྒྱས་ལྷར་བྱེད་པའི། །རིགས་དེར་བདག་ནི་སྐྱེ་བ་དང༌། །སྐྱེ་བ་དང་ནི་སྐྱེ་བ་རུ། །ཆོས་ལྔ་པོ་ནི་མི་སྤོང་ཞིང༌། །བསོད་ནམས་ཡེ་ཤེས་སྟོབས་དང་ནི། །བརྩོན་འགྲུས་བྱང་ཆུབ་སེམས་ལྔ་པོ། །ཇི་ལྟར་ཐམས་ཅད་མཁྱེན་པ་ཡི། །ཞབས་ཐོབ་པ་ཡི་ཐབས་དེ་བཞིན། །དེ་ལྟར་བདག་གིས་ཐབས་ཀྱིས་ནི། །ཐུབ་པའི་དབང་པོའི་ཞབས་ཐོབ་ཤོག །བཙུན་པ་ཟླ་བའི་སྨོན་ལམ་ཞེས་བྱ་བ་རྫོགས་སོ།། །།རབ་ཏུ་བསྔགས་པའི་གནས་ཆེན་པོ་ཉེ་བའི་འཐུང་གཅོད་དཔལ་བལ་པོ་ཡམ་བུའི་གྲོང་ཁྱེར་དུ། བལ་པོའི་པཎྜི་ཏ་ཛཻ་ཀ་ཀརྞའི་ཞལ་སྔ་ནས་དང༌། བོད་ཀྱི་ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །