རྫོགས་ཆེན་མཁའ་འགྲོ་སྙིང་ཐིག་གི་གསོལ་འདེབས།

༄༅། །རྫོགས་ཆེན་མཁའ་འགྲོ་སྙིང་ཐིག་གི་གསོལ་འདེབས་བཞུགས་སོ། །

རྫོགས་ཆེན་མཁའ་འགྲོ་སྙིང་ཐིག་གི་གསོལ་འདེབས་ནི། ན་མོ་གུ་རུ་དངོས་མེད་མཐའ་བྲལ་ཀ་དག་ཆོས་ཀྱི་སྐུ། །རང་རིག་གསལ་སྟོང་ལྷུན་གྲུབ་ལོངས་སྤྱོད་རྫོགས། །ཀུན་ཁྱབ་སྣ་ཚོགས་ཤར་གྲོལ་སྤྲུལ་པའི་སྐུ། །དུས་གསུམ་རང་རིག་བླ་མ་རྣམས་ལ་འདུད། །དམིགས་མེད་ཆོས་དབྱིངས་དག་པའི་ཕོ་བྲང་ནས། །ཀུན་བཟང་ཡབ་ཡུམ་གཉིས་ལ་གསོལ་བ་འདེབས། །ངོ་བོ་ཀ་དག་རྟོགས་པར་བྱིན་གྱིས་རློབས། །ལྷུན་གྲུབ་རང་གསལ་འོད་ཀྱི་ཕོ་བྲང་ནས། །ལོངས་སྐུ་ཞི་ཁྲོའི་ཚོགས་ལ་གསོལ་བ་འདེབས། །རིག་པ་སྐུ་རུ་སྨིན་པར་བྱིན་གྱིས་རློབས། །ཐུགས་རྗེ་ཕྱོགས་རིས་མེད་པའི་ཕོ་བྲང་ནས། །སྤྲུལ་སྐུ་རྡོ་རྗེ་འཆང་ལ་གསོལ་བ་འདེབས། །སྣང་སེམས་འཛིན་པ་སྟོང་པར་བྱིན་གྱིས་རློབས། །དུར་ཁྲོད་མེ་རི་འབར་བའི་ཕོ་བྲང་ནས། །དགའ་རབ་རྡོ་རྗེ་ཉིད་ལ་གསོལ་བ་འདེབས། ཆོས་ཉིད་དོན་དང་ལྡན་པར་བྱིན་གྱིས་རློབས། །དུར་ཁྲོད་སོ་ས་གླིང་གི་ཕོ་བྲང་ནས། །ཤྲཱི་སིངྷ་ཉིད་ལ་གསོལ་བ་འདེབས། །བདེ་ཆེན་འདུ་འབྲལ་མེད་པར་བྱིན་གྱིས་རློབས། །པདྨ་འོད་ཀྱི་གཞལ་ཡས་ཕོ་བྲང་ནས། །ཨོ་རྒྱན་པདྨ་ཡབ་ཡུམ་ལ་གསོལ་བ་འདེབས། །འབད་མེད་གཞན་དོན་འབྱུང་བར་བྱིན་གྱིས་རློབས། །བསོད་ནམས་ལས་འཕྲོ་ལྡན་པའི་ཕོ་བྲང་ནས། །གཏེར་སྟོན་ལས་འབྲེལ་རྩལ་ལ་གསོལ་བ་འདེབས། །ཟབ་གསང་དངོས་གྲུབ་འབྱུང་བར་བྱིན་གྱིས་རློབས། །ཡེ་ནས་སངས་རྒྱས་ཆོས་སྐུའི་ཕོ་བྲང་ནས། །ཀློང་ཆེན་རབ་འབྱམས་བཟང་པོ་ལ་གསོལ་བ་འདེབས། །འོད་གསལ་སྙིང་པོའི་དོན་རྟོགས་བྱིན་གྱིས་རློབས། །སྣང་སྟོང་འོད་དུ་འབར་བའི་ཕོ་བྲང་ནས། །ཡེ་ཤེས་རབ་འབྱམས་ཉིད་ལ་གསོལ་བ་འདེབས། །སྣང་བཞི་གོང་དུ་བགྲོད་པར་བྱིན་གྱིས་རློབས། །ཡང་དབེན་ཏིང་འཛིན་བརྟན་པའི་ཕོ་བྲང་དུ། །མཁས་གྲུབ་བསམ་གཏན་པ་ལ་གསོལ་བ་འདེབས། །སྣང་སྲིད་ཆོས་སྐུར་འཆར་བར་བྱིན་གྱིས་རློབས། །བྱར་མེད་བདེ་ཆེན་ལྷུན་གྲུབ་ཕོ་བྲང་དུ། །གྲུབ་ཆེན་སྦྱིན་པ་བཟང་པོ་ལ་གསོལ་བ་འདེབས། །གནས་ལུགས་མངོན་དུ་རྟོགས་པར་བྱིན་གྱིས་རློབས། །འགྱུར་མེད་བསྟན་པ་རིན་ཆེན་ཕོ་བྲང་དུ། །རྫོགས་ཆེན་ཤཱཀྱའི་མཚན་ལ་གསོལ་བ་འདེབས། །གསལ་སྟོང་མངོན་དུ་གྱུར་པར་བྱིན་གྱིས་རློབས། །ཚོགས་གཉིས་ནོར་བུ་སྤུངས་པའི་ཕོ་བྲང་དུ། །བསོད་ནམས་རིན་ཆེན་ཞབས་ལ་གསོལ་བ་འདེབས། །འོད་གསལ་རྫོགས་ཆེན་འབྱོང་བར་བྱིན་གྱིས་རློབས། །བྱ་ཁྱུང་གསང་སྔགས་ལྷུན་གྲུབ་ཕོ་བྲང་དུ། །ངག་དབང་པདྨ་ཉིད་ལ་གསོལ་བ་འདེབས། །གསང་སྔགས་དངོས་གྲུབ་ཐོབ་པར་བྱིན་གྱིས་རློབས། །ཡང་གསང་སྒྲུབ་པ་མཐར་ཕྱིན་ཕོ་བྲང་ནས། །རྫོགས་ཆེན་བསོད་ནམས་དབང་པོ་ལ་གསོལ་བ་འདེབས། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །རྣམ་ཀུན་ཟག་མེད་བདེ་ཆེན་ཕོ་བྲང་དུ། །རིག་འཛིན་ཆོས་ཀྱི་རྒྱལ་མཚོ་ལ་གསོལ་བ་འདེབས། །འབྲེལ་ཚད་དོན་དང་ལྡན་པར་བྱིན་གྱིས་རློབས། །ཆོས་དབྱིངས་ཁྱབ་གདལ་ལྷུན་གྲུབ་ཕོ་བྲང་ནས། །གྲུབ་ཐོབ་པདྨ་རིག་འཛིན་ལ་གསོལ་བ་འདེབས། །ཀ་དག་ཡེ་གྲོལ་རྟོགས་པར་བྱིན་གྱིས་རློབས། །གར་བཞུགས་ཆོས་འཁོར་བསྐོར་བའི་ཕོ་བྲང་ནས། །འདྲེན་མཆོག་ནམ་མཁའ་འོད་གསལ་ལ་གསོལ་བ་འདེབས། །རང་རིག་བླ་མར་རྟོགས་པར་བྱིན་གྱིས་རློབས། ༈ །བཀའ་གཏེར་རྒྱུད་སྡེ་རྒྱ་མཚོའི་ཕོ་བྲང་ནས། །ཁྱབ་བདག་ཐེག་མཆོག་བསྟན་འཛིན་ལ་གསོལ་བ་འདེབས། །སྨིན་གྲོལ་གཞན་དོན་འབྱུང་བར་བྱིན་གྱིས་རློབས། །ཨོ་རྒྱན་བསམ་གཏན་གླིང་གི་ཕོ་བྲང་ནས། །སྤྲུལ་སྐུ་གསང་སྔགས་བསྟན་འཛིན་ལ་གསོལ་བ་འདེབས། །ཉམས་རྟོགས་རྒྱུད་ལ་སྐྱེ་བར་བྱིན་གྱིས་རློབས། །ཡང་ན་ནམ་མཁའ་འོད་གསལ་ནས་འདི་ལྟར་ཡང་བརྒྱུད། ༈ །གསང་ཆེན་སྨིན་གྲོལ་ཆོས་ཀྱི་ཕོ་བྲང་ནས། པདྨ་ཀུན་གྲོལ་རྣམ་རྒྱལ་ལ་གསོལ་བ་འདེབས། །མཆོག་ཐུན་དངོས་གྲུབ་ཐོབ་པར་བྱིན་གྱིས་རློབས། །ཟབ་རྒྱས་བཀའ་གཏེར་གདམས་པའི་ཆོས་མཛོད་ནས། །འཇིག་མེད་པདྨ་རྣམ་རྒྱལ་ལ་གསོལ་བ་འདེབས། །བློ་འདས་རང་རིག་རྟོགས་པར་བྱིན་གྱིསརློབས། །ངེས་དོན་ཟབ་གསང་སྙིང་པོའི་ཕོ་བྲང་ནས། །དུས་གསུམ་རྩ་བརྒྱུད་བླ་མ་ལ་གསོལ་བ་འདེབས། །འཁོར་འདས་རང་གྲོལ་རྟོགས་པར་བྱིན་གྱིས་རློབས། །སྤྱིི་གཙུག་འཇའ་འོད་འབར་བའི་ཕོ་བྲང་ནས། །རྩ་བའི་བླ་མ་རྗེ་ལ་གསོལ་བ་འདེབས། །རྫོགས་ཆེན་ཆོས་ཉིད་རྟོགས་པར་བྱིན་གྱིས་རློབས། རང་ལུས་རྣམ་པར་དག་པའི་ཕོ་བྲང་ནས། །ཞི་ཁྲོ་ཌཱཀྐིའི་ཚོགས་ལ་གསོལ་བ་འདེབས། །རྐྱེན་ངན་བར་ཆད་ཞི་བར་བྱིན་གྱིས་རློབས། །གཏེར་གནས་ཕྲ་མོ་བྲག་གི་ཕོ་བྲང་ནས། མཁའ་འགྲོ་སྙིང་ཐིག་ཉིད་ལ་གསོལ་བ་འདེབས། ཕུང་པོ་ལྷག་མེད་དུ་འགྲུབ་པར་བྱིན་གྱིས་རློབས། །རྫོགས་ཆེན་མཁའ་འགྲོ་སྙིང་ཐིག་གི་གསོལ་འདེབས་འདི་པདྨ་ལས་འབྲེལ་རྩལ་གྱིས། ཟབ་ཆོས་གཏེར་ནས་གདན་དྲངས་པའི་དུས་སུ་མཛད་པ་ལས། བླ་བརྒྱུད་རྣམས་རིམ་པར་ཁ་བཀང་པའོ། །