གྲུབ་དབང་རྫོགས་ཆེན་རིན་པོ་ཆེའི་སྐྱེ་བརྒྱད་གསོལ་འདེབས།

༄༅། །གྲུབ་དབང་རྫོགས་ཆེན་རིན་པོ་ཆེའི་སྐྱེ་བརྒྱུད་གསོལ་འདེབས་བཞུགས་སོ། །

དུས་གསུམ་སྐྱེ་འགགས་མེད་པར་ཆོས་ཉིད་ཀྱང་། སེམས་ཅན་ཁམས་ལ་གཟུགས་སྐུ་རྣམ་གཉིས་སུ། སྣང་བའི་ངོ་མཚར་བདེ་གཤེགས་གཙུག་གཏོར་ཅན། །མཚན་གྱིས་ངན་སོང་སྒྲོལ་ལ་གསོལ་བ་འདེབས། །རྒྱུད་སྡེ་རྒྱ་མཚོའི་མངའ་བདག་ཀུ་ཀུ་རི། །འཕོ་ཆེན་རྡོ་རྗེའི་ས་བརྙེས་བི་མ་ལ། །སྤྲོས་བྲལ་ཕྱག་རྒྱ་ཆེན་པོ་ས་ར་ཧ། །བསྟན་པའི་ཆུ་འགོ་གསུམ་ལ་གསོལ་བ་འདེབས། །ལྷ་སྲིན་བྲན་ཁོལ་རླངས་དཔལ་ཤྲྀ་སེང་། །འཁྲུལ་སྣང་བྲག་རི་སྙིལ་བ་དཀོན་མཆོག་འབྱུང་། །རྒྱལ་བསྟན་ཉིན་མོར་བྱེད་པའི་ཁྲི་རལ་ཞབས། །བསྟན་པའི་རྩ་ལག་གསུམ་ལ་གསོལ་བ་འདེབས། །གཏི་མུག་ལམ་སློང་གྲུབ་ཆེན་ཕག་ཚང་པ། །མི་ལ་བཞད་པའི་སྲས་གྱུར་བྱང་ཆུབ་རྒྱལ། །དྲུག་པ་སེང་གེའི་སྒྱུ་འཕྲུལ་དུས་གསུམ་མཁྱེན། །གྲུབ་པ་མཆོག་བརྙེས་གསུམ་ལ་གསོལ་བ་འདེབས། །རྟོགས་པས་བདག་རྒྱུད་གྲོལ་བ་གླིང་རས་རྗེ། །བླ་མར་མོས་གུས་མཐར་ཕྱིན་སྟག་ལུང་པ། །བརྟུལ་ཞུགས་གྲུབ་པ་ཨོ་རྒྱན་རང་བྱུང་དཔལ། །བསྒྲུབ་བརྒྱུད་བསྟན་འཛིན་གསུམ་ལ་གསོལ་བ་འདེབས། །གཞི་གསུམ་རྩ་བ་བརྟན་པའི་བློ་གྲོས་བཟང་། །རྙིང་བསྟན་མདོ་སྨད་སྤེལ་ལ་སྨོན་ལམ་གྱི། །མཐུ་གྲུབ་པདྨའི་རིག་པ་འཛིན་པ་དང་། །འགྱུར་མེད་ཐེག་མཆོག་ཞེས་ལ་གསོལ་བ་འདེབས། །སྔ་འགྱུར་བསྟན་པའི་རྩ་བ་མདོ་སྒྱུ་སེམས། །ཡང་ཕུར་སངས་རྒྱས་མཉམ་པར་སྦྱོར་ལ་སོགས། །བཀའ་མའི་སྒྲུབ་ཆེན་ཕྲིན་ལས་སྲོལ་བཏོད་པ། །ངེས་དོན་བསྟན་འཛིན་བཟང་པོར་གསོལ་བ་འདེབས། །དམ་པ་དུ་མའི་ཞབས་པད་གཙུག་ཏུ་ཁུར། །སངས་རྒྱས་བསྟན་ལ་ལྷག་བསམ་ཟླ་ལྟར་དཀར། །གསང་སྔགས་རྫོགས་པ་ཆེན་པོའི་དོན་ལ་སྤྱོད། །འཇིགས་མེད་མཁྱེན་བརྩེའི་དབང་ཕྱུག་གསོལ་བ་འདེབས། །དྲི་མེད་མཁྱེན་པའི་ལྷ་ལམ་ཡངས་པ་ནས། །བརྩེ་བའི་སྙིང་རྗེའི་འོད་སྟོང་འབར་བའི་གཟིའི། །འགྲོ་རྣམས་མུན་པའི་སྨག་རུམ་སེལ་མཛད་པ། །ཐུབ་བསྟན་ཆོས་ཀྱི་རྡོ་རྗེ་གསོལ་བ་འདེབས། །རྒྱལ་ཀུན་སྤྱི་གཟུགས་ཨོ་རྒྱན་རྡོ་རྗེ་འཆང་། །འཕོ་ཆེན་སྐུ་བརྙེས་དྲི་མེད་གཤེས་གཉེན་ཞབས། །དབྱེར་མེད་རིག་བརྒྱའི་ཁྱབ་བདག་སྤྲུལ་པའི་སྐུ། །འཇིགས་བྲལ་བྱང་ཆུབ་རྡོ་རྗེ་གསོལ་བ་འདེབས། །ངེས་འབྱུང་རྒྱུད་བརླན་བྱང་ཆུབ་སེམས་གཉིས་ཀྱི། །ཤིང་རྟས་དྲངས་པའི་སྨིན་གྲོལ་ལམ་མཆོག་ལ། །རྟག་ཏུ་བསྟན་གོམས་བགྱིས་པའི་དངོས་གྲུབ་ཀུན། །ཚེ་འདི་ཉིད་ལ་ཐོབ་པར་བྱིན་གྱིས་རློབས། །ཅེས་པའང་མདོ་ཁམས་དགེ་རྩེ་བླ་མས་བསྐུལ་ངོར་རྫོགས་ཆེན་པ་རང་བྱུང་རྡོ་རྗེས་སོ། །དགེའོ། །