ཆོས་ཐམས་ཅད་ཀྱི་སྔོན་དུ་འགྲོ་བ་གཞི་བདག་དང་བགེགས་ལ་གཏོར་མ་འབུལ་ཐབས།
༁ྃ༔ ཆོས་ཐམས་ཅད་ཀྱི་སྔོན་དུ་འགྲོ་བ་གཞི་བདག་དང་བགེགས་ལ་གཏོར་མ་འབུལ་ཐབས་བཞུགས་སོ༔
དང་པོ་བགེགས་ལ་བཀའ་བསྒོ་བར་འདོད་ན༔ སྣོད་གཙང་མའི་ནང་དུ་དཀར་གཏོར་པད་འདབ་བཞི་པ་དང་༔ ནག་ཕྱོགས་གཞི་བདག་ལ་དམར་གཏོར༔ དེ་གཉིས་ལ་བསངས་སྦྱངས་སྤལ་ལ་འབུལ༔ དཀར་གསུམ་མངར་གསུམ་རིན་ཆེན་གསེལ་སྐྱེམས་བདར༔ རང་ཉིད་འཕགས་པ་སྤྱན་རས་གཟིགས་སུ་བསྒོམས༔ ཐུགས་ཀའི་འོད་ཀྱི་བགེགས་དང་གཞི་བདག་རྣམས་སྤྱན་དྲངས༔ གཏོར་མ་ཕུལ་བས་དགྱེས་པར་གྱུར༔ ཨོཾ་སྭ་བྷཱ་ཝས་སྦྱངས༔ སྟོང་པ་ཉིད་དུ་གྱུར༔ སྟོང་པའི་ངང་ལས་རིན་པོ་ཆེའི་སྣོད་དུ་གཙང་ལྡན་གྱི་གཏོར་མ་འདི་དཀར་གསུམ་མངར་གསུམ་ལས་གྲུབ་པ་བདུད་རྩིའི་རྒྱ་མཚོ་ཆེན་པོར་གྱུར༔ ཨོཾ་ཨཱཿཧཱུྃ༔ ལན་གསུམ་གྱིས་བརླབས་ནས༔ ཨོཾ་ཨཱཿཀཱ་རོ་མུ་ཁཾ་སརྦ་དྷ་རྨ་ཎཾ་ཨཱདྱ་ནུདྤེནྣཏྭཏྟེ་ཨོཾ་ཨཱཿཧཱུྃ་ཕ྄ཊ་སྭཱ་ཧཱ༔ ལན་གསུམ་གྱིས༔ ཧཱུྃ༔ ཚངས་པ་བརྒྱ་བྱིན་རྒྱལ་ཆེན་བཞི༔ ལྷ་ཆེན་ཐམས་ཅད་འཁོར་དང་བཅས༔ དགའ་བོ་འཇོག་པོ་དུང་སྐྱོང་སོགས༔ ཀླུ་རྣམས་མ་ལུས་འཁོར་དང་བཅས༔ ཉི་མ་ཟླ་བ་གཟའ་ཆེན་པོ༔ གཟའ་རྣམས་མ་ལུས་འཁོར་དང་བཅས༔ ས་བདག་ས་ཡི་ལྷ་མོ་སོགས༔ ས་བདག་མ་ལུས་འཁོར་དང་བཅས༔ འགུར་ལྷ་དགེ་བསྙེན་བསྟན་མའི་ཚོགས༔ ཕྱོགས་སྐྱོང་རྣམས་དང་གནོད་སྦྱིན་དང་༔ སྲིན་པོ་ཤ་ཆེན་ཟ་བ་དང་༔ དྲི་ཟ་གཤིན་རྗེ་མ་མོའི་ཚོགས༔ འབྱུང་པོ་རྣམས་དང་ཡི་དྭགས་དང་༔ སྡེ་བརྒྱད་ཕྱི་ནང་སྲུང་མའི་ཚོགས༔ མཆོད་སྦྱིན་གཏོར་མ་འདི་བཞེས་ལ༔ སྟོབས་ཆེན་ཕྱག་ན་རྡོ་རྗེ་དང་༔ སློབ་དཔོན་པདྨ་ཐོད་ཕྲེང་གི༔ བཀའ་དང་དམ་ལ་མ་འདའ་བར༔ རྣལ་འབྱོར་བདག་ཅག་འཁོར་བཅས་ལ༔ རྣམ་བཞིའི་ལས་ཀྱི་དངོས་གྲུབ་སྩོལ༔ བདག་གི་བྱང་ཆུབ་མ་ཐོབ་བར༔ ཕྲིན་ལས་བསྒྲུབ་ལ་རོག་ལྡན་མཛོད༔ ཕྱིན་ནང་གསང་བའི་བར་ཆད་བཟློག༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་དཀར་གཏོར་དང་དམར་གཏོར་འབུལ༔ དེ་ནས་བགེགས་ཀྱི་གཏོར་མར་བྲན་ལ་སྦྱོང༔ ཨོཾ་བཛྲ་ཀྲོ་ཏ་ཧྱ་གྷྲི་ཝ་ཧཱུྃ་ཕ྄ཊ༔ ཨོཾ་སྭཱ་བྷཱ་ཝ༴ སོགས་ནས། སྟོང་པ་ཉིད་དུ་གྱུར༔ སྟོང་པའི་ངང་ལས་རིན་པོ་ཆེའི་སྣོད་ཀྱི་ནང་དུ་བགེགས་ཀྱི་གཏོར་མ་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པ་རྣམས་སུ་གྱུར༔ ཨོཾ་ཨཱཿཧཱུྃ༔ ལན་གསུམ་དང་༔ ན་མ༔སརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ༔ ཨོཾ་སམྦྷ་ར་སམྦྷ་ར་ཧཱུྃ༔ ལན་གསུམ༔ ཧྲཱི༔ ཐུགས་རྗེ་ཆེན་པོ་དབང་གི་སྐུ༔ རྟ་མཆོག་རོལ་པ་ཁྲོས་པའི་རྒྱལ༔ དབང་གི་རྟ་སྐད་འཚེར་བ་ཡིས༔ གདོན་བགེགས་འབྱུང་པོ་བཀུག་ཅིང་གཟིར༔ གསང་བ་སྒྲུབ་ལ་མི་དབང་པའི༔ གདོན་བགེགས་འབྱུང་པོ་ལན་ཆགས་ཚོགས༔ གླུད་ཀྱི་གཏོར་མ་འདི་ཁྱེར་ལ༔ རང་རང་སོ་སོའི་གནས་སུ་དེངས༔ ཅི་ཏེ་མི་འགྲོ་འཚེ་བྱེད་ན༔ ཆོས་ཀྱི་དབྱིངས་ཀྱི་ཏིང་འཛིན་དང་༔ ཁྲོ་བོ་ཆེན་པོའི་བརྟུལ་ཞུགས་ཀྱིས༔ འབྱུང་པོའི་ཚོགས་རྣམས་རྡུལ་དུ་བརློག༔ དེ་བས་རང་རང་གནས་སུ་དེངས༔ ཧཱུྃ་བཞིའི་སྔགས༔ ཨོཾ་སུམྦྷ་ནི་སུམྦྷ་ནི་ཧཱུྃ༔ གྲྀ་ཧྣ་གྲྀ་ཧྣ་ཧཱུྃ༔ གྲྀ་ཧྣ་པ་ཡ༔ གྲྀ་ཧྣ་པ་ཡ་ཧཱུྃ༔ ཨ་ན་ཡ་ཧོ༔ བྷ་ག་ཝན༔ བིདྱ་རཱ་ཛ་ཡ་ཧཱུྃ་ཕ྄ཊ༔ བརྗོད་ལ་གདོན་བགེགས་བསྒྲུབས་ལ་མི་དབང་པ་རྣམས་མཐའི་རྒྱ་མཚོའི་ཕ་རོལ་དུ་བསྐྲད༔ བསྲུང་བའི་འཁོར་ལོའི་གོ་བསྒོའོ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་གངས་རིས་རྒྱལ་པོ་ཏི་སེ་ནས་གདན་དྲངས་པའོ༔ དགེའོ༔ མངྒལཾ༔