ཀྱཻ་མ་བདག་ནི་ཚེ་ཡི་ཕན་པ་ཟད་པའི་ཚེ་་་་་་
ཀྱཻ་མ་ བདག་ནི་ཚེ་ཡི་ཕན་པ་ཟད་པའི་ཚེ༔ འཇིག་རྟེན་འདི་ན་ཉེ་དུས་མི་སྟོངས་ཏེ༔ རང་ཉིད་གཅིག་པུར་བར་དོ་འཁྱམས་ཙ་ན༔ རྒྱལ་བ་ཞི་ཁྲོའི་རྗེའི་ཤུགས་ཕྱུང་ནས༔ མ་རིག་མུན་པའི་སྨག་རུམ་སེལ་པར་ཤོགཿ དགའ་བའི་གྲོགས་དང་བྲལ་ནས་གཅིག་པུར་འཁྱམས༔ རང་སྣང་སྟོང་པའི་གཟུགས་བརྙན་འཆར་དུས་དེར༔ སངས་རྒྱས་རྣམས་ཀྱི་ཐུགས་རྗེའི་ཤུགས་ཕྱུང་ནས༔ དངང་སྐྲག་པར་དེའི་འཇིགས་པ་མི་འབྱུང་ཤོག༔ ཡེ་ཤེས་གསལ་བའི་འོད་ལྔ་འཆར་དུས༴ མི་འཇིགས་མི་སྐྲག་རང་ངོ་ཤེས་པར་ཤོག༔ ཞི་དང་ཁྲོ་བོའི་སྐུ་གཟུགས་འཆར༴ མི་འཇིགས་གདེང་ཐོབ་བར་དོ་ངོ་ཤེས་ཤོག༔ ལས་ངན་དབང་གི་སྡུག་བསྔལ་མྱོང་ཙམ་ན༔ རྒྱལ་བཞི་ཁྲོས་སྡུག་བསྔལ་སེལ་བར་ཤོག༔ ཚེས་ཉིད་རང་སྒྲ་འབྲུག་སྟོང་ཙམ་ན༔ ཐེག་ཆེན་ཆོས་ཀྱི་སྒྲ་རུ་འགྱུར་བར་ཤོག༔ སྐྱབས་མེད་ལས་ཀྱི་རྗེས་སུ་འབྲང་དུས་དེར༔ རྒྱལ་བཞི་ཁྲོས་བདག་སོགས་སྐྱབས་དུ་གསོལ༔ བག་ཆག་ལས་ཀྱིས་སྡུག་བསྔལ་མྱོང་ཙམ་ན༔ འོད་གསལ་བདེ་བའི་ཏིང་འཛིན་འཆར་བར་ཤོག༔ སྲིད་པ་བར་དོ་བརྫུས་དེ་སྐྱེས་ཙམ་ན༔ ཕྱིར་ལོག་བདུད་ཀྱི་ལུང་བསྟན་མི་འབྱུང་ཤོག༔ གང་དུ་བསམ་པའི་དབང་གི་སླེབ་ཙམ་ན༔ ལས་ངན་འཁྲུལ་པའི་འཇིགས་སྐྲག་མི་འབྱུང་ཤོག༔ གཅན་གཟན་འཁྲོ་པའི་དར་སྐད་འདོན་པའི་ཚེ༔ ཡིག་གེ་དྲུག་མའི་ཆོས་སྒྲར་འགྱུར་བར་ཤོག༔ ཁ་ཆར་རླུང་དང་མུན་པས་དེད་པའི་ཚེ༔ ཡེ་ཤེས་གསལ་བའི་ལྷ་མིག་མཐོང་བར་ཤོག༔ རིག་མཐུན་ནང་ཚན་བར་དོའི་སེམས་ཅན་རྣམས༔ མིག་སེར་མེད་ཅིང་མཐོ་རིས་སྐྱེ་བར་ཤོག༔ ཤིན་ཏུ་ཉོན་མོངས་བཀྲེས་ཤིང་སྐོམ་པའི་ཚེ༔ ལྟོག་སྐོམ་ཚ་གྲང་སྡུག་བསྔལ་མི་འབྱུང་ཤིང༔ ཕྱི་མ་ཕ་མའི་འདུ་འཕྲོད་མཐོང་ཙམ་ན༔ རྒྱལ་བ་ཞི་ཁྲོ་ཡབ་ཡུམ་ཉིད་མཐོང་ཤོག༔ གར་སྐྱེས་རང་དབང་ཐོབ་ནས་གཞན་དོན་དུ༔ མཚན་དཔེས་བརྒྱན་པའི་ལུས་མཆོག་ཐོབ་པར་ཤོག༔ བདག་ཉིད་སྐྱེས་པའི་ལུས་མཆོག་ཐོབ་གྱུར་ནས༔ མཐོང་ཐོས་ཐམས་ཅད་མྱུར་དུ་ཐོབ་པར་ཤོག༔ ལས་ངན་ཐམས་ཅད་རྗེས་སུ་མི་འབྲང་ཞིང་༔ བསོད་ནམས་གང་ཡོད་འཕེལ་ཞིང་རྗེས་འབྲང་ཤོག༔ གང་དང་གང་དུ་སྐྱེ་བ་དེ་དང་དེར༔ ཚེ་རབས་ཡི་དམ་ལྷ་དང་འཇལ་བར་ཤོག༔ སྐྱེ་མ་ཐག་དུ་སྨྲ་ཤིང་འགྲོ་ཤེས་སྟེ༔ སྐྱེ་བ་དྲན་ཅིང་མི་བརྗེད་གཟུངས་་ཐོབ་ཐོག༔ ཡོན་ཏན་ཆེ་ཆུང་འབྲིང་དང་སྣ་ཚོགས་པ༔ ཐོས་བསམ་མཐོང་བ་ཙམ་གྱིས་ཤེས་གྱུར་ཅིག༔ གང་དུ་སྐྱེས་པའི་ཡུལ་དེར་བཀྲ་ཤིས་ཤོག༔ སེམས་ཅན་ཐམས་ཅད་བདེ་དང་ལྡན་གྱུར་ཅིག༔ རྒྱལ་བ་ཞི་ཁྲོ་ཁྱེད་སྐུ་ཅི་འདྲ་དང་༔ འཁོར་དང་སྐུ་ཚེའི་ཚད་དང༴ ཁྱེད་ཀྱི་མཚན་མཆོག༴ དེ་འདྲ་ཁོ་ནར༴ ཀུན་བཟང་ཞི་ཁྲོ་རབ་འབྱམས་ཐུགས་རྗེ་དང་༔ ཆོས་ཉིས་རྣམ་པར་དག་པའི་བདེན་སྟོབས་དང་༔ གསང་སྔགས་རྩེ་གཅིག་བསྒྲུབ་པའི་བྱིན་རླབས་ཀྱིས༔ སྨོན་ལམ་བཏབ་པ་དེ་བཞིན་འགྲུབ་ཅིག༔ བར་དོའི་སྨོན་ལམ་འཇིགས་སྐྱོབས་མ་ཞེས་བྱ་བ་འཁོར་བ་མ་སྟོང་གི་བར་དུ་མ་རྫོགས་སོ༔ གྲུབ་ཐོབ་ཀརྨའི་གླིང་པའི་གཏེར་མའོ༔ མངྒལཾ༔ དགེའོ༔ དགེའོ༔ ༔