དགོངས་སུ་གསོལ་ལོ་མ་་་
འབྲུ་སྣ་གཏོང་གསུར་ཆེན་གྱི་དུད་སྤྲིན་གཏོང་༔ རོལ་མོ་འབིར་ཞིང་གཉེར་གཏད་པ་ནི༔ ཧཱུྃ་བྷྱོ༔ དགོངས་སུ་གསོལ་ལོ་མ་ཆེན་མོ༔ གསན་དུ་གསོལ་ལོ་རེ་མ་ཏི༔ སྔོན་གྱི་བསྐལ་པ་དང་པོ་ལ༔ རི་རབ་ཆེན་པོའི་བྱང་ཕྱོགས་ན༔ ཡང་དག་དཔལ་ཆེན་ཧེ་རུ་ཀས༔ དམ་ལ་བཏགས་པའི་དབྱར་དམ་དགོངས༔ དབྱར་དམ་དགོངས་ལ་གཉེར་བྱང་ལོང་༔ དེ་འོག་བར་གྱི་བསྐལ་པ་ལ༔ རི་རབ་ཆེན་པོའི་བྱང་ཤར་མཚམས༔ ཡོངས་འདུ་ཤིང་གི་རྩ་བ་ན༔ གུ་རུ་རྡོ་རྗེ་ཐོད་ཕྲེང་གིས༔ དམ་ལ་བཏགས་པའི་ཐ་ཚིག་དགོངས༔ ཐ་ཚིག་དགོངས་ལ་གཉེར་བྱང་ལོང་༔ དེ་འོག་བསྐལ་པའི་ཐ་མ་ལ༔ ཡང་ལ་གོང་གི་བྲག་ཕུང་ཏུ༔ སློབ་དཔོན་དྷཱ་ན་སཾ་ཀྲི་ཏས༔ དམ་ལ་བཏགས་པའི་ཁས་ལེན་དགོངས༔ ཁས་ལེན་དགོངས་ལ་གཉེར་བྱང་ལོང་༔ ཧཱུྃ་བྷྱོ༔ མ་གཅིག་ཁྱོད་ལ་གཉེར་གཏད་པ༔ སངས་རྒྱས་བསྟན་པའི་བཞུགས་གཉེར་འདི༔ བསྟན་པ་འཛིན་པའི་སྐྱེས་བུ་རྣམས༔ ཁྱོད་ལ་གཉེར་གཏད་སྲུངས་ཤིག་སྐྱོབས༔ སྒྲུབ་པའི་རྟགས་སྟོན་བཀའ་སྐྱོངས་ཅིག༔ འཕགས་པའི་དགེ་འདུན་ཆོས་གྲཱ་རྣམས༔ ཁྱོད་ལ་གཉེར་གཏད་སྲུངས་ཤིག་སྐྱོབས༔ བཤད་སྒྲུབ་པྱོགས་བདུར་རྒྱས་པར་མཛོད༔ འཛམ་བུ་གླིང་གི་སྐྱེ་འགྲོ་རྣམས༔ ཁྱོད་ལ་གཉེར་གཏད་ལེགས་ཉེས་གཟིགས༔ སྡིག་ལྡན་སྒྲོལ་ལ་ཆོས་ལྡན་སྐྱོངས༔ རྣལ་འབྱོར་བདག་གི་དགོན་གཞིས་མཁར༔ ཁྱོད་ལ་གཉེར་གཏད་བདག་ཏུ་བཅོལ༔ ཀ་ཆ་དཀོར་བསྲུང་དཀོར་རྐུན་སྤྲོལ༔ རྣལ་འབྱོར་བདག་གི་རྟ་ཕྱུག་ནོར༔ ཁྱེད་ལ་གཉེར་གཏད་དགྱེས་བསྐང་བཞེས༔ ཇག་ཆོམ་སྒྲིབ་ལ་གཅན་སྦྱང་སྲུད༔ རྣལ་འབྱོར་བདག་གི་འཁོར་སློབ་བྲན༔ ཁྱོད་ལ་གཉེར་གཏད་སྲུང་སྐྱོབ་མཛོད༔ དམ་ལྡན་སྐྱོང་ལ་དམ་མེད་སྒྲོལ༔ ཧཱུྃ་བྷྱོཿ དཔལ་ལྡན་ལྷ་མོ་དུད་སོལ་མ༔ བདག་ཅག་རྣལ་འབྱོར་བསྒྲུབ་པ་པོས༔ རྗེ་ལྟར་བསྟེན་ནོ་དབང་མ་ཆེ༔ མ་ལྟར་བསྟེན་ནོ་སྙིང་མ་རེད༔ སྲིང་ལྟར་བསྟེན་ནོ་ཚུལ་མ་ཞན༔ ཆུང་མར་བྱས་སོ་མཚུངས་མ་ཞན༔ ཕོ་ཉར་བཏང་ངོ་བར་མ་བུལ༔ ཤན་པར་བསྐོས་སོ་དགྲ་མ་ཤོར༔ བསྲུང་མར་བྱས་སོ་བགེགས་མ་གཏོད༔ པོས་པའི་ཚེ་ན་སྙན་མ་སྲ༔ གཡབ་པའི་ཚེ་ན་སྤྱན་མ་རྡུལ༔ བསྐུལ་བའི་ཚེ་ན་རང་མ་རིང༔ རྦད་པའི་ཚེ་ན་ལས་མ་འགྱང་༔ མངག་པའི་ཚེ་ན་བང་མ་བུལ༔ དམར་ཆེན་ཨརྒྷཾ་འདི་བཞེས་ལ༔ དགྲ་བགེགས་ཟློག་ལ་བར་ཆད་བསྒྱུར༔ དེངས་ནས་བྱང་ཆུབ་མ་ཐོབ་བར༔ བདག་གི་མགོན་སྐྱོབས་སྡོང་གྲོགས་མཛོད༔ མཆོད་པ་ཡིན་ནོ་ངོ་མ་ཆུང་༔ བརྟན་པ་ཡིན་ནོ་རྒྱང་མ་རིང་༔ སྒྲུབ་པ་ཡིན་ནོ་ཕྲག་མ་དོག༔ ལུས་དང་གྲིབ་མའི་ཚུལ་དུ་འགྲོགས༔ བསྡུ་བ་རྣམ་བཞི་དབང་དུ་བསྡུས༔ དཔལ་འབྱོར་ཚེ་བསོད་ཉམས་རྟོགས་སྤེལ༔ བཅོམ་པའི་ཕྲིན་ལས་འགྲུབ་པར་མཛོད༔ ཅེས་བརྗོད་ཕུད་མཆོད་གསོལ་མཆོད་འབུལ༔ ས་མ་ཡཱ༔ རྒྱ་རྒྱ་རྒྱ༔ མན་ངག་བཀའི་ཐ་རམ་མཁའ་འགྲོའི་སྙིང་ཁྲག་དངས་མ་ཨོ་རྒྱན་བདག་གི་སྙིང་ཐིག་དམ་པ་འདི་བཞིན་དམ་ལྡན་རྣམས་ཀྱིས་བརྩོན་པར་བྱའོ༔ དམ་མེད་ལ་གསང་ངོ༔ འདི་ལྟར་མཆོད་བསྟོད་བརྟེན་པས་ལུས་དང་གྲིབ་མ་ལྟར་འགྲོག་ཤིང་མགོན་སྐྱབས་དང་སྡོང་གྲོགས་བྱེད་པ་གདོན་མི་ཟའོ༔ དབྱར་དམ་ལ་རང་འགལ་ན་མས་བུ་ལ་འཁུ་ཞིང་བཟློག་ཏེ་རང་གཤེད་རང་ལ་དབབ་པར་འགྱུར་བ་ཡོངས་ངེས་ཤེས་པར་དམ་ཚིག་བསྲུང་ཞིང་མཆོད་བསྟོད་ལ་འབུང་བ་གལ་ཆེའོ༔ ས་མ་ཡཱ༔ ཨི་དན་ཏེ་རྒྱ༔ ན་ར་ཀན་རྒྱ༔ སོ་ཕ་ག་ཤིན་རྒྱ༔ བཀའ་རྒྱ༔ དམ་རྒྱ༔ གཉན་རྒྱ༔ གསང་རྒྱ༴ གཏད་རྒྱ༴ སྦས་རྒྱ༔ གཏད་རྒྱ༔ གཏེར་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཐཐཾཨཐཾཁནདཱ༔ རིག་འཛིན་ཆེན་པོ་ཉི་མ་གྲགས་པས་འཕགས་ཡུལ་རྒྱ་གར་ནས་གདན་དྲངས་ཤིང་གནས་མཆོག་དམ་པ་ལོ་རོ་ཀར་པོ་དོན་ལྡན་དུ་དུས་ཀྱི་རྒྱལ་པོ་ཆོས་བཅུའི་ལྕོག་པུའི་ནང་དུ་ཤོག་སེར་ལས་བོད་ཡིག་ཏུ་བསྒྱུར་བའོ༔ མངྒ་ལཾ༔ བཀྲ་ཤིས༔