གྲི་བཙན་ཆེན་པོ་རྡོ་རྗེ་དགྲ་འཇོམས་རྩལ་གྱི་མཆོད་འབུལ་རྒྱས་པ་མེ་ལྕེའི་ཕྲེང་བ།

གྲི་བཙན་ཆེན་པོ་རྡོ་རྗེ་དགྲ་འཇོམས་རྩལ་གྱི་མཆོད་འབུལ་རྒྱས་པ་མེ་ལྕེའི་ཕྲེང་བ་ཞེས་བྱ་བ་བཞུགས་སོ། ཨོཾ་སྭཱ་སྟི། །བདེ་ཆེན་སོ་སོ་རྟོགས་པའི་ཡེ་ཤེས་ལས། །ཁྲོས་པའི་རྒྱལ་པོ་རྟ་གདོང་ཧེ་རུ་ཀ། །གདུགས་ས་མ་ལུས་ཟིལ་གྱི་མནོན་མཛད་པ། །གར་དགུའི་ཉམས་ལྡན་ཁྱོད་ལ་བདག་བསྟོད་སོ། །དབང་གི་རྒྱལ་པོ་པདྨ་ཧེ་རུ་ཀ། །དབང་མཛད་དབང་གི་རྒྱལ་པོ་མཐུ་རྩལ་ཅན། །དབང་ཆེན་རང་མདང་དྲེགས་པ་ཀུན་གྱི་གཙོ། །དབང་གི་བཀའ་སྟོད་ཁྱོད་ལ་བདག་བསྟོད་དོ། །དེ་ལ་འདིར་གྲི་བཙན་ཆེན་པོ་རྡོ་རྗེ་དགྲ་འཇོམས་རྩལ་གྱི་མཆོད་ཐབ་རྒྱལ་པ་ལ། མཆོད་གཏོར་དང་མཐུན་པའི་དམ་རྫས་རྣམས་འདུ་བྱས་ལ། རང་ཉིད་ཡི་དམ་གྱི་ང་རྒྱལ་དང་ལྡན་པའི་ངང་ནས། ཨོཾ་སྭཱ་བྷ་ཝ་སོགས། སྟོང་པའི་ངང་ལས་རང་གི་མདུན་དུ་ཟངས་བྲག་དམར་པོ་རྔམ་བརྗིད་འབར་བ་དགུང་ལ་བསྙེང་པ་ལྕེ་སྤྱང་དང་སྟག་གཟིག་མང་པོ་རྒྱུག་འདྲལ་བྱེད་པའི་གནས་སུ་བཙན་གྱི་སྐུ་མཁར་འཇིགས་སུ་རུང་བར། མི་རོའི་རྒྱལ་མཚན་ལ་ཙིཏྟ་རློན་པའི་ཏོག་གི་བརྒྱན་པ་དང་། བ་དན་དམར་པོ་དུ་མའི་བརྒྱན་པ། གློག་ལྕེ་དམར་པོ་མེ་འོད་འཁྲིགས་པའི་ཀློང་དཀྱིལ་དུ་སྣང་སྲིད་དྲེགས་པ་ཡོངས་ཀྱི་ཆེ་བཙན་གྲི་བཙན་ཆེན་པོ་རྡོ་རྗེ་དགྲ་འཇོམས་རྩལ་སྐུ་མདོག་དུས་མཐའི་མེ་ལྟར་འབར་བ། ཞལ་གཅིག་ཕྱག་གཉིས་པ་ཕྱག་གཡས་པས་བཙན་མདུང་དམར་པོའི་གདུག་པ་ཅན་ཐམས་ཅད་གཅོད་པར་བྱེད་པ། གཡོན་བཙན་གྱི་ཞགས་པ་དམར་པོའི་གནོད་བྱེད་དེ་དམ་ཉམས་ཐམས་ཅད་འཆིང་བར་བྱེད་པ། མི་ཟད་རྔམ་བརྗིད་ཤིན་ཏུ་ཁྲོས་པ་ཤ་བའི་དབུ་ཅན། སྤྱན་གསུམ་སྡང་མིག་ཁྲག་ལྟར་གཡོ་བ། ཞལ་གདང་ཤིང་ལྗགས་གློག་ལྟར་འཁྱུགས་པ། ཤང་ནས་དྲག་པོའི་འཐོར་རླུང་འཚུབ་ཅིང་། སྨ་ར་སྨིན་མ་ལས་མེ་འཁྱོགས་པོར་འབར་བ། བ་སྤུའི་བུ་ག་ཐམས་ཅད་ནས་མེ་ཡི་ཚྭ་ཚྭ་ཐོ་རོ་རོ་འཕྲོ་བ། སྐུ་སྟོད་ལ་ཞིང་གི་གཡང་གཞིའི་བརྒྱན་པ། སྐུ་སྨད་ལ་དཔའ་བོ་སྟག་གི་ཤམ་ཐབས་གྲོལ་བ། རྟོགས་མེད་རོ་ཡི་གདན་ལ་གཡས་བརྐྱང་གཡོན་བསྐུམ་པའི་སྟབས་ཀྱི་བཞུགས་པ། མངོན་སྤྱོད་དྲག་པོའི་ཤུགས་ཀྱི་མཁའ་ནས་བསྐྱོད་པ། སྤྲུལ་པ་ལས་བྱེད་ཀྱི་ཕོ་ཉ་མི་དམར་མང་པོ་སྔོན་ནས་རྒྱུག བཙན་གྱི་བྱ་དམར་མང་པོ་ཀླད་ན་ལྡིང་བ། ཟ་བྱེད་ཁྱི་དམར་མང་པོ་རོལ་དུ་ཁྲིད་པ། དགྱེས་སྡེ་ཡུམ་ཆེན་མཚོ་སྨན་ནག་མོད། དམ་ཚིག་གཉན་པོ་གཅིག་ཏུ་གྱུར་པ། ཤར་གྱི་རྫོང་བཙན་དམར་པོ། སྐུ་ཡི་སྲས་མཆོག་ལྷོ་ཕྱོགས་ཡི་རི་ལྷ་བཙན། ཡབ་གཉེན་ཆེན་རྒྱལ་བ་ཐོད་དཀར། མཆེད་ཀྱི་སྤུན་ཟླ་བྱང་གི་སྨན་མོ་རང་འཚོང་བཙན་རྒོད་ལྕམ་དྲལ་སྲིང་དུ་གྱུར་པ་ཆུ་དྲོན་གཡུ་ཡི་ཕུག་པའི་ཀླུ་སྨོན། གཉེར་གྱི་ཕྱག་ཚང་མདོ་གསུམ་གླུ་བྲག་བཙན་རྒོད། བཀའ་ཡི་བློན་པོ་ཡོབ་ཀྱི་རྐྱང་རི་བཙན་དམར་ཕྱུགས་ཀྱི་རྫི་པོ་ཟླ་ཡི་བློན་སྲས་དམར་པོ། ལས་བྱེད་ཀྱི་ཕོ་ཉ་ནགས་སོག་ཆུ་ཡི་དགེ་བསྙེན་ཆེན་པོ་ལ་སོགས་དགྱེས་སྡེ་ཡུམ་སྲས་བློན་པོ་རྣམས་རང་རང་གི་འཁོར་དང་བཅས་པ། གཞན་ཡང་བརྩན་དམག་འབུམ་སྡེའི་འཁོར་ཚོགས་བསམ་གྱི་མི་ཁྱབ་པ་དང་བཅས་པ་ཉི་མའི་ཟེར་གྱི་རྡུལ་ལྟར་འཚུབ་པ་གཙོ་འཁོར་ཐམས་ཅད་ཀྱི་སྤྱི་བོར་ ཨོཾ་དཀར་པོ། མགྲིན་པར་ཨཱཿདམར་པོ། ཐུགས་དཀར་ཧཱུྃ་སྔོན་པོ་རྣམས་ལས་འོད་ཟེར་འཕྲོས་པས་དབང་ཆེན་རོལ་པའི་ངུར་ཁྲོད་ཆེན་པོ། ཨཱཪྱ་པ་ལོའི་གླིང་། གནས་མཆོག་ཆེན་པོ་སྒྲུབ་གནས་མེད་འབར་ཕུག་ལ་སོགས་རང་བཞིན་གར་བཞུགས་ཀྱི་གནས་ནས། བཙན་རྒོད་ཆེན་པོ་རྡོ་རྗེ་དགྲ་འཇོམས་རྩལ་འཁོར་དང་བཅས་པ་སྐད་ཅིག་གི་མཁའ་ལས་གློག་ཕྲེང་གཡོ་བ་བཞིན་དུ་བྱོན་ནས་བཞུགས་པར་གྱུར། དེ་ནས་སྤྱན་འདྲེན་པ་ན། ཧཱུྃ་བྷྱོཿ སྔོན་གྱི་བསྐལ་པ་དང་པོ་ལ། བཅོམ་ལྡན་པདྨ་ཧེ་རུ་ཀས། དབང་ཆེན་རོལ་པའི་ངུར་ཁྲོད་དུ། །དམ་ལ་བཞག་པའི་གཡར་དམ་ཅན། དེ་འོག་བར་གྱི་བསྐལ་པ་ལ། བདག་ཉིད་པདྨ་ཐོད་ཕྲེང་གིས། །ཨཱ་ཪྱ་པ་ལོའི་གཙུག་ལག་ཏུ། དམ་ཚིག་བསྒྲགས་པའི་གསང་མཚན་ཅན། ཚུར་བྱོན་ཚུར་བྱོན་དམ་ལ་འདུས། དམ་རྫས་བཀའ་ཡི་གཏོར་མ་བཞེས། སྔོན་གྱི་རྒྱལ་བའི་བཀའ་མ་བཅག །ད་ལྟ་རྣལ་འབྱོར་དམ་མ་བཀྲལ། བཅོལ་པའི་ཕྲིན་ལས་འགྲུབ་པར་མཛོད། །བཛྲ་ས་མ་ཛཿཛཿཧཱུྃ་བྃ་ཧོ༔ ཏིཥྛ་ལྷན། མཆོད་པ་འབུལ་བ་ནི། ཧཱུྃ༔ བཙན་རྒོད་ཆེན་པོ་རྡོ་རྗེ་དགྲ་འཇོམས་རྩལ། ཁྱོད་ལ་དགྱེས་པའི་མཆོད་པ་འབུལ་བ་ནི། དུང་ཆེན་བྷནྷ་རློན་པའི་སྣོད་མཆོག་ཏུ། རཀྟ་ཁྲག་གི་རྒྱ་མཚོ་མེད་རེ་རེ། མཚན་དང་ལྡན་པ་དབྱིངས་ཀྱི་བྷནྷ་རུ། བདུད་རྩི་སྨན་གྱི་རྒྱ་མཚོ་ཆེན་པོ་བསྐྱིལ། དམ་ཉམས་དགྲ་བགེགས་བསྒྲལ་བ་ལས་བྱུང་བ། དུག་གསུམ་བསྒྲལ་བའི་ཤ་ཁྲག་རུས་གསུམ་གྱིས། །མ་དག་དངོས་འཛིན་དྲི་མ་ཀུན་སྦྱང་ནས། །ཡེ་ཤེས་བདུད་རྩི་ཆེན་པོར་མཆོད་པ་འབུལ། །ཨོཾ་བཛ་ཨརྒྷཾ་སོགས། ཤབྟ་པྲ་ཏིཥཡེ་སྭཱ་ཧཱ། ཨོཾ་ཨཱཿཧཱུྃ་མ་ཧཱ་བྷ་ལིང་ཏ་རཀྟ་ཨ་མྲྀ་ཏ་བྷ་སུ་ཏ་ཀེཾ་ནི་རི་ཏི་སརྦ་སུ་ཙ་ས་མ་ཡ་ཕེཾ་ཕེཾ་ཧྲཱིཾ་ཧྲཱིཾ་ཛ་ཛ་སྭཱ་ཧཱ། དགྲ་བགེགས་བསྒྲལ་བའི་ཤ་ཁྲག་ལས་བྱུང་བའི་མཆོད་སྦྱིན་གྱི་གཏོར་མ་འདོད་ཡོན་ལྔའི་འོད་ཟེར་འཕྲོ་བ། འདི་ཉིད་བསྔོ་ཞིང་འབུལ་བའི་གནས་སུ་གྱུར་པ་ནི་བཙན་རྒོད་ཆེན་པོ་རྡོ་རྗེ་རོལ་པ་རྒྱ་བདུན་ཕྱི་ནང་གསང་བའི་འཀོར་གཡོག་བྲན་དང་ཕོ་ཉ་སྡོང་ཟླ་དགྱེས་སྡེ་སྐུ་འཁོར་དང་བཅས་པ་རྣམས་དང་ཁྱད་པར་ངུ་གྲི་བཙན་ཆེན་པོ་རྡོ་རྗེ་དགྲ་འཇོམས་རྩལ་སྐུ་འཁོར་དང་བཅས་པ་རྣམས་ཀྱི་ཞལ་དུ་ཁ་ཁ་ཁ་ཧི་ཁ་ཧི། བསྟོད་པ་ནི། ཧྲཱིཿ ཆོས་ཉིད་དབྱིངས་ཀྱི་རང་བཞིན་ལ། ཆོས་ཅན་སྣང་བའི་སྲུང་མ་ཆེ། ལེགས་ཉེས་སྟང་འཛིན་བདག་པོ་མཆོག །རྡོ་རྗེ་དགྲ་འཇོམས་རྩལ་ལ་བསྟོད། མདོག་དམར་མེ་ཡི་ཕུང་པོ་འདྲ། གཏུམ་དྲག་བཟོད་པར་དཀའ་བའི་སྐུ། །ཤིན་ཏུ་ཁྲོས་པའི་དྲག་རྩལ་ཅན། །དབང་གི་བཀའ་སྡོད་ཁྱོད་ལ་བསྟོད། །ཉམས་པ་བདུན་ལྡན་དགྲ་བོ་ལ། ལྟས་ངན་ཐབས་ཀྱི་བསྒྲལ་མཛད་པ། །ཨ་ལའི་ཧ་ལའི་གདད་རྒྱང་ཅན། ཁྲོས་པའི་རྒྱལ་པོ་ཁྱོད་ལ་བསྟོད། གང་ཐུགས་ནམ་མཁའི་རང་བཞིན་ལ། སྙིང་རྗེའི་ཤུགས་དང་མ་བྲལ་ཡང་། མངོན་སྤྱོད་དྲག་པའི་ཕྲིན་ལས་ཀྱིས། །གདུལ་དགའ་འདུལ་མཛད་ཁྱོད་ལ་བསྟོད། །ཁམས་གསུམ་སྐྱེ་འགྲོའི་སྲོག་གི་བདག །ཉམས་པ་ཡོངས་ཀྱི་གཤེད་མ་ཆེ། །ནགས་ཕྱོགས་བདུད་སྡེ་ཕམ་མཛད་པའི་། བཙན་རྒོད་ཆེན་པོ་ཁྱོད་ལ་བསྟོད། །བསྟན་པ་གཉན་པོ་སྲུང་བ་དང་། །གང་བཅོལ་ཕྲིན་ལས་སྒྲུབ་མཛད་པའི། །མཐུ་ཆེན་ཁྱོད་ལ་བདག་བསྟོད་དོ། །དབང་ཆེན་བཀའ་སྡེ་ཆེན་པོ་ཡི། །ཅི་བགྱིའི་བཀའ་ཉན་སྐྱོང་མཛད་པ། མཆོད་ཟླ་ཡུམ་སྲས་སྤྲུལ་འཁོར་བཅས། །འཁོར་ཚོགས་དམ་ཅན་ཚོགས་ལ་བསྟོད། །ཕྲིན་བཅོལ་ནི། ཧོ་རྟ་མཆོག་རོལ་པ་དབང་གི་དཀྱིལ་འཁོར་གྱི་བཀའ་སྡོད་ལས་མཁན། ཨོ་རྒྱན་ཆེན་པོའི་དམ་མནོས་ཕྲིན་ལས་དྲག་རྩལ་གློག་ལས་མྱུར་བ། རྣལ་འབྱོར་བདག་གི་སྲུང་མ། གྲི་བཙན་ཆེན་པོ་རྡོ་རྗེ་དགྲ་འཇོམས་རྩལ་སྐུ་འཁོར་དང་བཅས་པ། མ་རྫས་ཀྱི་གཏོར་མ་རི་བོ་ལྟ་བུ། བདུད་རྩི་ཕུད་དང་། རཀྟ་དམར་གྱི་ཨརྒྷཾ་རྒྱ་མཚོ་ལྟ་བུར་བསྐྱིལ་ཏེ་འབུལ་བས། དགྱེས་པ་ཆེན་པོས་བཞེས་ལ། སྤྱིར་སངས་རྒྱས་ཀྱི་བསྟན་པ་སྲུང་ཤིག །བསྟན་འཛིན་སྐྱེས་བུའི་སྐུ་ཚེ་བསྲིངས་ཤིག །སྒོས་སུ་སྔ་འགྱུར་རྡོ་རྗེ་ཐེག་པའི་བསྟན་དང་དེ་འཛིན་སྐྱོངས་ཤིག །ལོག་ལྟ་གནོད་བྱེད་དམ་ཉམས་སྒྲོལ་ཅིག །རྣལ་འབྱོར་སྒྲུབ་པ་པོ་འགལ་རྐྱེན་སོལ་ཞིག་མཐུན་རྐྱེན་བསམ་པའི་དོན་ཀུན་ཡིད་བཞིན་དུ་འགྲུབ་པའི་ཕྲིན་ལས་སྒྲུབ་ཤིག །འཇིག་རྟེན་ཁམས་སུ་ནད་མུག་འཁྱུག་ཙོད་ཀྱི་སྐལ་ངན་བཟློག་ཅིག །བདེ་སྐྱིད་ལོངས་སྤྱོད་ཕུན་སུམ་ཚོགས་པ་སྤེལ་ཞིག །མདོར་ན་བཅོལ་བའི་ལས་ཀུན་ཐོགས་པ་མེད་པར་འགྲུབ་པར་མཛོད་ཅིག །