གྲི་བཙན་ཆེན་པོ་རྡོ་དགྲ་འཇོམས་རྩལ་གྱི་གསེར་སྐྱ་འདོད་དོན་བདུད་རྩིའི་རྦ་རླབས།

གྲི་བཙན་ཆེན་པོ་རྡོ་དགྲ་འཇོམས་རྩལ་གྱི་གསེར་སྐྱ་འདོད་དོན་བདུད་རྩིའི་རྦ་རླབས་ཞེས་བྱ་བ་བཞུགས་སོ། །ཧྲཱིཿ དབང་ཆེན་མེ་རླུང་འཚུབ་མའི་ཀློང་དཀྱིལ་ནས། དབང་གི་ལྷ་མཆོག་རྟ་མགྲིན་རྟ་སྐད་བཞད། དབང་མདོག་དབང་གི་རྒྱལ་པོ་རྟ་མཆོག་དཔལ། དབང་ཆེན་དབང་གི་ལྷ་མཆོག་ཧེ་རུ་ཀ། དབང་གི་སྐུ་མཆོག་ཉི་མ་འབུམ་གྱི་གཟི། །དབང་དྲག་ཁྲོས་པའི་རྔམ་སྒྲ་འབྲུག་སྟོང་ལྡིར། དབང་ཕྱུག་དྲེགས་པ་ཡོངས་ཀྱི་གཙུག་གི་རྒྱལ། །དབང་གི་བཀའ་སྡོད་མ་རུང་གདུལ་དཀའི་གཤེད། །སྣང་སྲིད་དྲེག་པ་ཡོངས་ཀྱི་མངའ་བདག་པོ། །གྲི་བཙན་ཆེན་པོ་རྡོ་རྗེ་དགྲ་འཇོམས་རྩལ། ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན། །ཁྲོ་ལ་ཁྲོས་པའི་རྒྱལ་པོ་ཧེ་རུ་ཀ། མདོག་དམར་དུས་མཐའི་མེད་དཔུང་དམར་ནག་འདྲ། མི་བཟད་གཏུམ་ཆེན་ཁྲོས་པ་ཤ་བའི་དབུ། །སྤྱན་གསུམ་བསྒྲད་པའི་སྡང་མིག་ཕྱོགས་བཅུར་གཡོ། །ཞལ་གདངས་མཆེ་གཙིག་ལྗགས་འདྲིལ་གློག་ལྟར་འཁྱུག །མི་ལྤགས་གཡང་གཞིའི་ན་བཟའ་སྐུ་ལ་གསོལ། ཕྱག་གཉིས་མདུང་དམར་བཙན་གྱི་ཞགས་པ་བསྣམས། དམ་ཉམས་དགྲ་བགེགས་འཚང་ཞིང་སྙིང་ལ་བསྣུན། དམར་ནག་མེ་ཡི་ཚྭ་ཚྭ་ཕྱོགས་བཅུར་འཕྲོས། ཆིབས་སུ་གློགས་དམར་ཞོན་ནས་སྟོང་གསུམ་བསྐོར། བརྟེན་ན་སྙིང་ཉེ་སྒྲུབ་ལ་བུ་བཞིན་སྐྱོང་། སྣ་ཚོགས་དངོས་གྲུབ་འདོད་རྒུའི་ཆར་འབེབས་པའི། ཕྲིན་ལས་བཞི་ཡི་ལས་ཀྱི་མངའ་བདག་པོ། སྟོབས་ལྡན་དྲེགས་པའི་རྒྱལ་པོ་ཁྱོད་གཅིག་པུ། གསང་ཡུམ་དགྱེས་སྡེ་ལས་བྱེད་ཁྱུགས་སེ་ཁྱུག །འཁོར་དུ་བཙན་དམག་འབུམས་དེ་སྤྲིན་ལྟ་གཏིབ། ཕོ་ཉ་མི་རིང་དམར་པོ་ཤ་ར་ར། མི་བཟད་བྱ་ཁྱི་དམར་པོ་ཚུབས་སེ་ཚུབ། རྩེ་གཅིག་གདུང་བ་དྲག་པོའི་འབོད་པའི་ཚེ། །མཁའ་ལས་གློགས་ཕྲེང་གཡོ་བ་ཇི་བཞིན་དུ། སྐད་ཅིག་ཙམ་གྱིས་གནས་འདིར་གཤེགས་ནས་ཀྱང་། དམ་རྫས་བདུད་རྩི་རོ་བརྒྱ་ལྡན་པའི་བཅུད། གསེར་སྐྱེམས་གཡུ་སྐྱེམས་ཕུད་རྒོད་ཛ་ཧུའི་རྒྱུན། ལྦུ་ཕྲོང་དོ་ཤལ་གཡོ་བ་རཀྟའི་སྐྱེམས། འདོད་ཡོན་བདུད་རྩི་རླབས་ཀྱི་འཕྲེང་བ་ཅན། བདུད་རྩིའི་ཟེར་ཕྲེང་སྣ་ཚོགས་ཕྱོགས་བཅུར་འཕྲོ། །དགེ་ལེགས་འདོད་འབྱུང་བཀྲིས་མཆོད་པའི་སྤྲིན། དགེ་ལེགས་ཀུན་ལྡན་གསེར་སྐྱེམས་རྒྱ་མཚོ་འདི། །དགེ་ལེགས་དངོས་གྲུབ་མཐའ་དག་སྩོལ་བའི་ཕྱིར། །དགེ་ལེགས་ཀུན་ལྡན་མཆོད་པ་འདི་བཞིས་ལ། འདོད་རྒུའི་དངོས་གྲུབ་ཀུན་བདག་ཁྱོད་ཉིད་ཀྱི་འདོད་དོན་གང་ལ་གང་འདོད་ཇི་བཞིན་དུ། །འདོད་པའི་རེ་བ་ཡིད་བཞིན་བསྐང་ནས་ཀྱང་། འདོད་པའི་བསམ་པ་ལྷུན་གྱིས་འགྲུབ་པར་མཛོད། །ཅེས་པ་འདི་ནི་མགོན་ཁག་གསར་བའི་ལྷ་གཉེར་ཐུབ་བསྟན་སྐལ་བཟངས་གར་དཀོན་མཆོག་བློ་གྲོས་གཉིས་ནས་ཡང་ཡང་བསྐུལ་བའི་ངོར་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེའི་མིང་གཞན་པདྨ་ཐེག་མཆོག་བསྟན་འཛིན་གྱི་མགོན་ཁང་དབང་དྲག་རོལ་བའི་ཕོ་བྲང་ནས་བྲིས་པ་དགེའོ། རྟ་མགྲིན་དྲེགས་པ་ཟིལ་གནོན་ལས་གཏེར་སྲུངས་བསང་གསུར་གྱིས་མཆོད་ཐབས་བཞུས་སོ། །བཟང་ནག། །ཁྲོ་བོ་ཆེ་བཙན་ཧེ་རུ་ཀའི། །གཏེར་སྲུངས་ཆེན་པོ་བསང་གསུང་གྱི། །བརྔན་ཞིང་སྒྲུབ་པོའི་བར་ཆད་སེལ་བའི་ཐབས། །རང་ཉིད་ཡི་དམ་ལྷ་ཡི་བསྐྱེད་རིམ་ངང་། ཧཱུྃ༔ །བསང་གསུར་འདོད་ཡོན་ལྔ་ལྡན་མཆོད་པའི་སྤྲིན། །ཙ་གསུམ་དཔལ་མགོན་སྣང་སྲིད་ལྷ་སྲིན་ཚོགས། །ཁྱད་པར་ཡ་མཚན་ལྡན་པའི་གནས་ཆེན་པོ། །འབར་བ་དབང་གི་བསྒྲུབ་གནས་མེ་འབར་ཕུག །གནམ་གྱི་གང་བ་ཤར་ནས་ཉི་ཟླས་བརྒྱན། །ཆབ་ཀྱི་གང་བ་ནུབ་ནས་ཆུ་བོ་འབབ། །རི་ཡི་རྒྱལ་པོ་བྲག་དམར་མདའ་སྒྲོའི་དབྱིབ། །གྲིབ་སོ་གཉིས་ཀྱིས་ཉིན་མཚན་ཆུ་ཚོད་འཛིན། །རིན་ཆེན་ཐང་བརྡལ་ལྷོ་ནས་འབྲས་དྲུག་སྨིན། །སྨན་སྤོས་དྲི་གསུང་ལྡན་པའི་ལྗོང་ཆེན་པོ། །ཇོ་བོ་ཆེན་པོ་གྲི་བཙན་དགྲ་འཇོམས་བཙལ། །མཆེད་ཟླ་ལྷ་སྲིན་དགྱེས་སྡེ་ཡུམ་དང་སྲས། །ལྷ་ཤིང་ཤུགས་པའི་དུད་པས་བསང་ངོ་མཆོད། །དཀར་དམར་གསུར་གྱི་དུད་པས་བརྔན་ནོ་འབུལ། །ཕུ་ཡི་མཚོ་སྨན་ན་མོ་འཁོར་བཅས་བསངས། །དགྱེས་སྡེ་ཡུམ་ཆེན་ཡིན་པས་མངའ་གསོལ་ལོ། །ཤར་གྱི་རྫོང་བཙན་དམར་པོ་འཁོར་བཅས་བསང་། །དབྱར་མད་གཙིག་པའི་གྲོགས་པོ་མངའ་གསོལ་ལོ། །ལྷོ་ཕྱོགས་ཡི་རིའི་ལྷ་བཙན་འཁོར་བཅས་བསང་། །སྐུ་ཡི་སྲས་མཆོག་ཡིན་པས་མངའ་གསོལ་ལོ། །ནུབ་ཀྱི་རྒྱལ་བ་ཐོད་དཀར་འཁོར་བ་བཅས་བསང་། ཡིད་ལུས་བསྐྱེད་པའི་ཕ་གཅིག་མངའ་གསོལ་ལོ། །བྱང་གི་སྨན་མོ་རང་འཚོངས་བཙན་རྒོད་བསངས། །མཆད་གྱི་སྤུན་ཟླ་ཡིན་པའི་མངའ་གསོལ་ལོ། །ཆུ་དྲོན་གཡུ་ཡི་ཕུག་པའི་ཀླུ་སྨན་བསང་། །ལྕམ་དྲལ་སྲིང་དུ་གྱུར་པས་མངས་གསོལ་ལོ། །མདོ་གསུམ་གླུ་བྲག་བཙན་རྒོད་འཁོར་བཅས་བསང་། །གཉེར་གྱི་ཕྱག་ཚངས་ཡིན་པས་མངའ་གསོལ་ལོ། །ཡོབ་ཀྱི་རྐྱང་རིའི་བཙན་མར་འཁོར་བཅས་བསང་། །བཀའ་ཡི་བློན་པོ་ཡིན་པས་མངའ་གསོལ་ལོ། །ཟླ་ཡི་དམར་པོ་བློན་སྲས་འཁོར་བཅས་བསང་། །ཕྱུགས་ཀྱི་རྫི་བོ་ཡིན་པས་མངའ་གསོལ་ལོ། །ནག་སོགས་ཆུ་ཡི་དགེ་བསྙེན་འཁོར་བཅས་བསང་། །ལས་ཀྱི་ཕོ་ཉ་ཡིན་པས་མངའ་གསོལ་ལོ། །གཞན་ཡང་བསང་འོས་བརྔན་དང་མཆོད་པར་འོས། །མ་ལུས་ཐམས་ཅད་བསང་ཞིང་གསུར་གྱིས་བརྔན། །ཁྱེད་རྣམས་བསང་ཞིང་མཆོད་དེ་བརྔན་པའི་མཐུས། །བསྟན་པ་དར་ཞིང་སེམས་ཅན་སྐྱིད་པ་དང་། །བདག་ཅག་མི་ནོར་འཁོར་དང་བཅས་པ་ལ། །བསྲུང་སྐྱོབས་མགོན་དང་སྡོང་གྲོངས་ཕྲིན་ལས་བསྒྲུབ། །གཞི་བྱེས་ཀུན་ཏུ་མེལ་ཚེ་བྱ་ར་གྱིས། །ཕུ་ཡི་གནགས་སྐྱོངས་མདའ་ཡི་འབྲས་དྲུག་བསྲུང་། །ཉིན་གྱི་ལྷ་མཛོད་མཚན་གྱི་ཟོ་དོར་གྱིས། །ཡུལ་ལྷ་གཞི་བདག་མཆོད་དོ་ངོ་མཆུང་། །རྣལ་འབྱོར་འདོད་འི་འབྲས་བུ་མཆིས་པར་མཛོད། །ཅིས་ཕུར་དང་གཏོར་མ་ཅི་འབྱོར་འབུལ། །བར་ཆད་སེལ་ཞིང་སྟོང་གྲོགས་བྱེད་པར་འགྱུར། །དེ་ཕྱིར་མ་འོངས་རྣམས་ཀྱི་སྤྱོད་མཁས་བྱ། ས་མ་ཡཱཿ རྒྱ་རྒྱ་རྒྱཿ གཏེར་རྒྱཿ ཟབ་རྒྱཿ ས་མ་ཡཱཿ རྒྱ་རྒྱ་རྒྱཿ རྒྱལ་མཁས་པ་ཉི་མ་གྲགས་པ་ནག་གཤོད་མེ་འབར་ཕུག་ནས་ཆུ་ཁྱི་ལོ་གདན་དྲངས་ཤིང་ས་འབྲུག་ལོར་ཤོག་སེར་ལས་བོད་ཡིག་ཏུ་ཕབས་པ་དགེ་ཞིང་བཀྲ་ཤིས་པར་གྱུར་ཅིག གྲི་བཙན་རྡོ་རྗེ་དགྲ་འཇོམས་རྩ་གྱི་རྟགས་བསྟོད་དགྲ་བགེགས་ཚར་གཅོད་ཞེས་བྱ་བ་བཞུགས་སོ། །ཧྲཱིཿ སྟོང་པའི་ངང་ལས་སྐད་ཅིག་དྲན་རྫོགས་སུ། །རང་སྣང་ངུར་ཁྲོད་རོལ་པའི་གཞལ་ཡས་ཁང་། །རང་རིག་དབང་ཆེན་རྟ་མཆོག་ཧེ་རུ་ཀ། རང་ལས་རང་ཤར་ཆུ་ཟླ་ལྟ་བུའི་ཚུལ། རང་མདུན་བཙན་མཁར་དགུང་ལ་སྙེགས་པ་འདྲའི། །ཙེ་ལ་སྲིན་བྱ་མང་པོ་སྤྲིན་ལྟར་གཏིབ། །དབང་པོའི་ཕྱོགས་སུ་ཉི་ཟླའི་དཔལ་གཡང་སྟེར། །ནུབ་ཕྱོགས་ཆུ་བོའི་རྦ་རླབ་རབ་ཏུ་འཁྱུགས། །ལྷོ་པྱོགས་མི་ཟད་རིན་ཆེན་འབྲས་དྲུག་སྨིན། །མདུན་དུ་གཅན་གཟན་མང་པོ་རྒྱུག་འདྲལ་བྱེད། །ལས་བྱེད་ཤན་པའི་དམག་ཚོང་བསམ་མི་ཁྱབ། །དེ་ལྟར་དམ་ཅན་འདུ་བའི་གནས་མཆོག་འདིར། །དམར་ནག་གྲུ་གསུམ་འབར་བའི་དཀྱིལ་འཁོར་ན། །མེ་རླུང་དམར་ནག་འཚུབ་མའི་ཀློང་དཀྱིལ་ན། །དུག་ལྔ་ནམ་དག་ཡེ་ཤེས་ལྔ་ཡི་བདག །ཆོས་དབྱིངས་ཡེ་ཤེས་དབྱིངས་ལས་ཁྲོས་པའི་སྐུ། །དབང་ཆེན་རྟ་མཆོག་པདྨཧེ་རུ་ཀའི། །བཀའ་ཉན་ལས་བྱེད་དྲེགས་པ་ཡོངས་ཀྱི་གཙོ། །གྲི་བཙན་ཆེན་པོ་རྡོ་རྗེ་དགྲ་འཇོམས་རྩལ། །ཁྱོད་ཀྱི་སྐུ་མདོག་དམར་པོ་བསྟན་པ་ནི། །སོར་རྟོགས་ཡེ་ཤེས་དབྱིངས་ལ་མ་གཡོས་རྟགས། །མི་བཟད་རབ་ཁྲོས་ཤ་བའི་དབུ་ཅན་ནི། །འཕུང་བྱེད་ཕྲ་མེན་མཁན་རྣམ་འདུལ་བའི་རྟགས། །རྔམས་བརྗིད་དུང་གི་ར་བཅུའི་བརྒྱན་པ་ནི། །དོན་དམ་དབྱིགས་སུ་ས་བཅུར་གནས་པའི་རྟགས། །སྤྱན་གསུམ་སྡང་མིག་ཕྱོགས་བཅུར་གཟིགས་པ་ནི། །སྲིད་པ་གསུམ་པོ་དབག་དུ་སྡུད་པའི་རྟགས། །ཞལ་གདང་མཆེ་གཙིགས་རྔམས་པར་བསྟན་པ་ནི། །གདུགས་པ་ཅན་རྣམས་དབང་དུ་སྡུད་པའི་རྟགས། །མི་ལྤགས་གཡང་གཞིའི་ན་བཟའ་གསོལ་བ་ནི། །ཉོན་མོངས་དུག་ལྔ་རྩད་ནས་གཅོད་པའི་རྟགས། །སྟག་གི་ལྤགས་པའི་ཤམ་ཐབ་བྱས་པ་ནི། །ཁམས་གསུམ་འཁོར་བའི་སྐྱོན་གྱི་མ་གོས་རྟགས། །ཕྱག་གཡས་བཙན་མདུང་དམར་པོ་བསྣམས་པ་ནི། །དམ་ཉམ་བྱད་མའི་སྙིང་ལ་བསྣུན་པའི་རྟགས། །ཕྱག་ཡོན་བཙན་ཞགས་དམར་པོ་བསྣམས་པ་ནི། །ཕ་རོལ་བྱད་མ་འཆིང་ཞིང་སྒྲོལ་བའི་རྟགས། །ཞབས་གཉིས་གཡས་བརྐྱང་གཡོན་བསྐུམ་བྱས་པ་ནི། །རྒབ་འདྲེ་འབྱུང་པོ་རྡུལ་དུ་བརླག་པའི་རྟགས། །ཆིབས་སུ་དེ་ནི་གློང་དམར་ཆིབ་པ་ནི། །ཕྲིན་ལས་ནམ་མཁའི་གླིང་ལས་མྱུར་བའི་རྟགས། །རྣམ་དག་སྤྲོས་དང་བྲལ་བའི་ཀློང་ཡང་སུ། །རྣམ་མང་ཡང་ཤར་འཇིག་རྟེན་དྲོགས་པའི་གཙོ། །རྣམ་འཕྲུལ་ཆ་ལུགས་ཅིར་ཡང་སྟོན་མཛད་པ། །རྣམ་ཀུན་གནས་ལུགས་ངང་དུ་མཇལ་བའི་འདུད། །རབ་ཁྲོས་མི་ཟད་ཤ་བའི་དབུ་ཅན་གྱིས། །རབ་ཏུ་བརྣག་པའི་མ་རུང་བདུད་སྡེའི་ཚོགས། །རབ་ཁྲོས་མངོན་སྤྱོད་དྲག་པོའི་ཕྲིན་ལས་ཀིས། །རབ་ཏུ་བརླག་མཛད་མཐུ་ཆེན་ཁྱོད་ལ་བསྟོད། །མི་བཟད་སྐུ་ནི་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་ལས་ལྷག་པའི་སྐུ། །ཁྲོ་གཉེར་ནམ་མཁའི་གློགས་སྟོག་འགྱུ་བ་བཞིན། །སྟོབ་ལྡན་དྲེགས་པའི་དབང་ཕྱུག་ཁྱེད་ལ་བསྟོད། །རྔམས་པའི་ང་རོས་འབྲུག་སྟོང་ལྡིར་བ་བཞིན། །ཨ་ལ་ཧ་ལའི་གད་རྒྱང་ཕྱོགས་བཅུར་སྒྲོགས། །བཤུག་པའི་གླུ་ལེན་དྲག་པོའི་འཐོར་རླུང་འབུད། །གསུང་གི་དབང་ཕྱུག་ཁྱོད་ལ་བདག་བསྟོད་དོ། །ཁྱོད་ཐུགས་ཀ་དག་ནམ་མཁའ་ལྟ་བུ་ལ། །ལྷུན་གྲུབ་རོལ་མོའི་ཆོ་འཕྲུལ་ཤར་བ་ལས། །རྣམ་བཞིའི་ལས་ཀུན་སྒྲུབ་པའི་ལྷ་གཅིག་པོ། །སྒྲུབ་ལ་བུ་བཞིན་སྐྱོང་མཛད་ཁྱོད་ལ་བསྟོད། །ཧཱུྃ་ཧྲཱིཿ །སྤྱི་བོ་དུང་ཁང་འབར་བའི་གཞལ་ཡས་ནས། །མེ་ལོང་ཡེ་ཤེས་དབྱིངས་ལས་ཁྲོས་པའི་སྐུ། །སྐུ་ཡི་སྤྲུལ་པའི་རྟ་ཕག་ཡབ་ཡུམ་ཀྱི། །བཀའ་ཡི་ལས་མཁན་སྙིང་རྗེ་ཚད་མེད་བདག །ཞི་བའི་ལས་མཛད་གྲི་བཙན་མཐུ་བོ་ཆེ། །ཟླ་ལྟར་དཀར་བའི་ཞལ་གདང་ཡ་ལ་ལ། །མི་མཐུན་བར་ཆད་རྐྱེན་ངན་མཐའ་དག་མཀུན། །ཞི་བ་ཆེན་པོའི་ཕྲིན་ལས་མཛད་ལ་བསྟོད། །ལྟེ་བ་སྤྲུལ་པའི་འཁོར་ལོའི་གཞལ་ཡས་ནས། །མཉམ་ཉིད་ཡེ་ཤེས་དབྱིངས་ལས་ཁྲོས་པའི་སྐུ། །ཡོན་ཏན་སྤྲུལ་པའི་རྟ་ཕག་ཡབ་ཡུམ་གྱི། །བཀའ་ཡི་ལས་མཁན་བྱམས་པ་ཚད་མེད་བདག །རྒྱས་པའི་ལམ་མཛད་གྲི་བཙན་མཐུ་བོ་ཆེ། །སྐུ་མདོག་སེར་སོ་གཙོ་མ་གསེར་གྱི་མདོག །ཚེ་བསོད་དཔལ་འབྱོར་སྙན་གྲགས་གཟི་བརྗིད་སོགས། །རྒྱས་པའི་ཕྲིན་ལས་རྫོགས་མཛད་ཁྱོད་ལ་བསྟོད། །མགྲིན་པ་ལོངས་སྤྱོད་འཁོར་ལོའི་གཞལ་ཡས་ནས། །སོར་རྟོག་ཡེ་ཤེས་དབྱིངས་ལས་ཁྲོས་པའི་དཔལ། །གསུང་གི་སྤྲུལ་པའི་རྟ་མགྲིན་ཡབ་ཡུམ་གྱི། །བཀའ་ཡི་ལས་མཁན་དགའ་བ་ཚད་མེད་བདག ། །དབང་གི་ལས་མཛད་གྲི་བཙན་མཐུ་བོ་ཆེ། །སྐུ་མདོག་དམར་པོ་པདྨ་ག་འདྲ། །མི་ནོར་ཟས་གསུམ་ཡུལ་ཁམ་རྒྱལ་བཙུན་སོགས། །དབང་དུ་སྡུད་པའི་ལྷ་མཆོག་ཁྱོད་ལ་བསྟོད། །གསང་གནས་བདེ་བ་ཆེན་པོའི་ཕོ་བྲང་ནས། །བྱ་གྲུབ་ཡེ་ཤེས་དབྱིངས་ལས་གྲུབ་པའི་ལྷ། །ཕྲིན་ལས་སྤྲུལ་པའི་རྟ་ཕག་ཡབ་ཡུམ་གྱི། །བཀའ་ཡི་ལས་མཁན་བཏང་སྙོམས་ཚད་མེད་བདག། །དྲག་པོའི་ལས་མཛད་གྲི་བཙན་མཐུ་བོ་ཆེ། །སྐུ་མདོག་ལྗང་ནག་མར་གད་ཞུན་མའི་མདོག །ཕ་རོལ་རྦོད་གཏོང་བྱད་མ་གདོན་གྱི་རིག །མངོན་སྤྱོད་དྲག་པོའི་སྒྲོལ་མཛད་ཁྱོད་ལ་བསྟོད། །མཆེད་ཟླ་ལྷ་སྲས་དགྱེས་སྡེ་ཡུམ་དང་བཅས། །གཞན་ཡང་དྲེགས་པ་ཁྱོད་ཀྱི་བཀའ་འཁོར་ན། །བཙན་གྱི་དམག་ཚོགས་འབུམ་སྡེ་ཉི་ལི་ལི། །རྔམས་བྱེད་མི་རིང་དམར་པོ་རང་སེ་རང་། །གླད་ན་བཙན་བྱ་མང་པོ་སྤྲིན་ལྟར་གཏིབ། །རྗེས་ནས་བཙན་ཁྱི་དམར་པོ་རྒྱུག་འདུར་བྱེད། །གྲི་བཙན་མི་ཟན་དམར་པོ་འཁོར་དང་བཅས། །ཁྱོད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི། ཆེ་བའི་ཡོན་ཏན་བསྟོད་པའི་བྱིན་རླབ་ཀྱི། །དེ་ནས་བྱང་ཆུབ་སྙིང་པོ་མ་ཐོབ་པར། །སྟོབས་ལྡན་དྲེགས་པའི་དབང་པོ་ཁྱོད་ཉིད་ཀྱི། སྒྲུབ་པའི་རིག་འཛིན་རྣལ་འབྱོར་བདག་ཅག་ལ། །བྱང་ཆུབ་སྒྲུབ་ལ་བར་དུ་གཅོད་པའི་བགེགས། །མི་མཐུན་ཉམས་པའི་ཚོགས་རྣམས་མཐའ་དག་ཀུན། །མངོན་སྤྱོད་དྲག་པོ་རོལ་པའི་ཚར་གཅོད་ཅིག །མདོར་ན་བདག་གི་བཞེད་པའི་དོན་རྣམས་ཀུན། །ཡིད་ལ་གང་འདོད་དྲན་པ་ཙམ་གྱིས་ཀྱང་། །བུམ་པ་བཟང་ལས་དངོས་གྲུབ་འབྱུང་བ་བཞིན། །འབད་མེད་ལྷུན་གྱིས་འགྲུབ་པའི་ཕྲིན་ལས་མཛོད། །ཅེས་པ་འདི་ནི་གད་པདྨ་དགེ་ལེགས་ནས་བསྐུལ་བའི་ངོར་མེ་སྦྲུལ་ཟླ་ཚེས་ལ་མགོན་ཁང་དབང་དྲག་རོལ་པ་ནས་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེའི་བྲིས་པ་འདིའི་ཀྱང་བསྟན་ལ་ཕན་པའི་རྒྱུར་གྱུར་ཅིག སརྦ་མངྒ་ལཾ། །།། །གྲི་བཙན་བསྐང་བ་བཞུགས། ཧཱུྃ། པདྨ་དབང་གི་བཀའ་ཉན་པ། །གྲི་བཙན་རོལ་པ་རྐྱ་བདུན་ནི། །བསྐང་བའི་གནས་འདིར་སྤྱན་འདྲེན་གཤེགས། །ཞིང་ཆེན་གདན་ལ་བཞུགས་སུ་གསོལ། །གུས་པས་འདུད་དོ་དགྱེས་སྐོང་རྫས། །དབང་ལྔའི་མེ་ཏོག་ཚིལ་གསུར་སྤོས། །ཞུན་ཆེན་སྒྲོན་མེ་དྲི་ཆུའི་ཆབ། །ཤ་ཁྲག་རུས་པའི་ཞལ་ཟས་དང་། །རྐང་གླིང་རོལ་མོའི་ཐུགས་དམ་བསྐང་། །ཞིང་བཅུ་བསྒྲལ་བའི་རཀྟ་དང་། །རྩ་བརྒྱད་སྟོང་སྦྱར་བདུད་རྩི་སྨན། །དམ་རྫས་བྷ་ལིང་བརྒྱན་ལྡན་བཅས། །བླ་མེད་མཆོད་པས་ཐུགས་དམ་བསྐང་། །མདའ་གདུང་རལ་གྲི་གོ་ཁྲབ་རྨོག །ལྕགས་ཀྱུ་ཞགས་པ་ལ་སོགས་པ། །དྲག་པོའི་ཉིར་སྤྱོད་མ་ཚང་མེད། །བརྔམ་བརྗིད་འབར་པས་ཐུགས་དམ་བསྐང་། །སྟག་གཟིགས་དམ་དྲེད་འཕར་སྤྱང་ཁྱི། །མི་དམར་རྟ་དམར་བྱ་དམར་དང་། །ཤ་བ་ར་བཅུ་ལ་སོགས་པ། །དཀོར་ཆའི་ཚོགས་ཀྱི་ཐུགས་དམ་བསྐང་། །མདོར་ན་རྣལ་འབྱོར་ཏིང་འཛིན་གྱི། །ཡིད་སྤྲུལ་སྣང་སྲིད་ཡོང་བསྐང་བའི། །དངོས་དང་དངོས་མེད་མཆོད་པའི་སྤྲིན། །དུ་མར་སྤྲོས་པའི་ཐུགས་དམ་བསྐང་། ཧཱུྃ། །དེ་ལྟར་ཐུགས་དམ་བསྐང་བའི་མཐུས། །རྣལ་འབྱོར་བདག་ཅག་འཁོར་བཅས་ལ། །རུ་ང་ཕྲག་དོག་མི་མཛད་ཅིང། །ཚེ་སྲིང་དཔལ་འབྱོར་དབང་ཐང་སྤེལ། །མི་རུང་བསམ་སྦྱོར་བརྣག་པ་ཡི། །བསྟན་དང་རྣལ་འབྱོར་ལ་འཚེ་བའི། །དམ་ཉམས་སྒྲོལ་ལ་དུས་ཀུན་ཏུ། །སྲུང་སྐྱོབས་འཕྲིན་ལས་མ་གཡེལ་མཛོད། །རིག་དང་མ་རིག་དབང་གྱུར་པས། །ཐུགས་དང་འགལ་གྱུར་བཟོད་པར་གསོལ། །ཅེས་གཞན་ཡང་བཤགས་པ་དང་ཡིག་བརྒྱ་བརྗོད། ཉི་སྤྲུལ་བཞི་པས་སོ། མངྒ་ལཾ། གྲི་བཙན་ཆེན་པོ་ནང་ལྟར་གནོད་སྦྱིན་རིགས་ཀྱི་ཕྲིན་ལས་དགོས་འདོད་རེ་བསྐོང་བཞུགས་སོ། །ཧཱུྃ་བྷྲཱུྂ། །དཀོར་མཛོད་རིན་ཆེན་ལས་གྲུབ་གཞལ་ཡས་དབུས། །དབང་ཆེན་པད་མའི་བཀའ་སྡོད་མ་ཚིག་ཅན། །གྲི་བཙན་ཆེན་པོ་ནང་ལྟར་ནོར་བུའི་ཚུལ། །སྐུ་མདོག་དམར་པོ་པདྨ་ར་གའི་འདོག །གཞོན་ནུ་ལོ་བརྒྱད་ན་ཚོད་ཡིད་དུ་འོང་། །དར་གྱི་ན་བཟའ་རིན་ཆེན་དུ་མས་བརྒྱན། །ཕྱག་གཡས་གསེར་མར་ལྕགས་ཀྱུའི་ཕྱྭ་གཡང་འགུགས། །གཡོན་པས་རླུང་ཞགས་གཞན་སྣང་དྲན་བཞིན་སྒུལ། །སྐུ་ལས་ཛཿཛའི་སྒྲ་འབྱིན་རླུང་དམར་གྱི། །དྲེགས་ལྡན་ཆེ་དགུའི་ཁེངས་སེམས་ཟིལ་གྱིས་གནོན། །སྙིང་ནོར་བདོག་དགུ་འཕྲོག་པའི་ཆོམ་རྐུན་འགྱེད། །བཙུན་མོ་སྲས་དག་བཀའ་འཁོར་ཕོ་ཉར་བཅས། །སྣང་སྲིད་དབང་དུ་སྡུད་པའི་དགོངས་པ་ཅན། །འཁོར་བཅས་རང་བཞིན་གནས་ནས་སྤྱན་འདྲེན་གཤེགས། །ཡིད་འོང་དར་ཟབ་པད་མའི་གདན་ལ་བཞུགས། །ཕྱི་ནང་གསང་བ་བླ་ན་མེད་པ་ཡི། །མཆོད་རྫས་སྤྱན་གཟིགས་དངོས་འབྱོར་ཡིད་སྤྲུལ་འབུལ། །བྷ་ལིང་གཏོར་མ་ཇ་ཆང་ཕུད་སྐྱེམས་ཀྱིས། །ཐུགས་དམ་བསྐང་ལ་ཉམས་ཆགས་འགལ་འཁྲུལ་བཤགས། ཆོས་ཉིད་དབྱིངས་སུ་འཁོར་འདས་རོ་གཅིག་ཕྱིར། །སྐྱབ་ཀུན་འདུས་པའི་ངོ་བོ་བསྟོད་པར་བགྱིས། །དེ་ལྟར་གསོལ་ཞིང་མཆོད་པའི་བྱིན་རླབས་ཀྱིས། །བདག་ཅག་ལེགས་པའི་དབུ་འཕངས་ནམ་མཁའ་མཉམ། །ཕྱི་ཡི་རྟ་ཕྱུགས་དུད་འགྲོའི་འཕེལ་ཁ་དར། །ནང་དུ་རིན་ཆེན་ཟས་ནོར་བང་མཛོད་བརྟེན། །རྡོ་རྗེའི་སྲོག་སྩོལ་རིག་མཚོའི་རྟེན་འབྲེལ་བསྒྲིགས། །ཕོ་རྒྱུད་རྒྱལ་འབང་དད་པའི་གཏེར་ཁ་ཕྱེས། །མོ་རྒྱུད་ཡ་རབས་ཆགས་པའི་སྲིན་བུ་སློང་། །སྣང་སྲིད་ཐམས་ཅད་བྲེང་བྲེང་དུང་དུང་ཁུག །དབང་གི་ཕྲིན་ལས་ཐོག་མེད་འགྲུབ་པར་མཛོད། བྷཱུྂ་བྷྲཱུྂ་བྷྲཱུྂ། །ཡཀྴ་ཛམ་བྷ་ལ་ཨ་ནྲྀ་ཏྲི་པ་ཤང་ཀུ་རུ་ཛུག་ཛཿཛཿ མ་ཀ་ཡེཿ ཨ་པ་ཡེཿ ཀ་པ་ཡེ་བཛྲ་སིརྷི་ཧཱུྃ། །ཅེས་པའང་ལྷ་རིག་བྱོན་པས་གང་ཤར་བྲིས། མངྒ་ལཾ། ཧཱུྃ་བྷྱོཿ དབང་གི་ལྷ་དམར་འདོད་འབྱུང་རིན་པོ་ཆེ། །པདྨ་ར་ག་བྱེ་རུའི་མདངས་འདྲ་བ། །དྲེགས་པ་སྡེ་བརྒྱད་བཙན་གྱི་ཚུལ་དུ་སྤྲུལ། །གྲིབ་ལ་འཁུ་ལྡོག་ཆེ་བ་ཤ་བའི་དབུ། །རྩ་གསུམ་རྒྱལ་བའི་བསྟན་སྲུང་འཁོར་དང་བཅས། །རྣལ་འབྱོར་བདག་གི་སྒྲུབ་པའི་རྟེན་འབྲེལ་ལ། །གཟུགས་སྒྲ་དྲི་རོ་རེག་བྱ་ཕུན་སུམ་ཚོགས། །ཤ་ཁྲག་མཚན་བྱེད་གཏོར་མ་རི་ལྟར་མིགས། །བཟའ་གཅའ་གསེར་སྐྱེམ་སྣ་ཚོགས་མཆོད་པ་བཤམ། །ལྷ་ཀླུ་མི་ལ་ཛུ་བ་ཐོག་པ་མེད། །དྲག་རྩལ་ཅན་རྣམས་ཐུགས་དམ་བསྐང་གྱུར་ཅིག །དྲེགས་པ་ཟིལ་གནོན་དཀྱིལ་འཁོར་བསྟན་པ་སྲུངས། །དཔའ་བོ་མཁའ་འགྲོ་ཐུགས་དམ་བསྐང་གྱུར་ཅིག །རང་སེམས་རང་ངོ་ཤེས་པའི་འཁྲུལ་སྐབས་ལ། །དྲན་པའི་རྩིས་ཙིན་བསྲུང་མའི་ལྷ་ཤར་བ། །ཕྱི་ནང་གསང་གསུམ་ཐུགས་དམ་བསྐང་གྱུར་ཅིག །འདོད་པའི་དོན་ཀུན་འགྲུབ་པའི་ཕྲིན་ལས་མཛོད། །ཅེས་པ་འང་དོན་གཉེར་ཅན་རྡོས་ཀྱི་བསྐུལ་ངོར་རྫོགས་སྤྲུལ་བཞི་པས་སྨྲས་པའོ། གྲི་བཙན་རྡོ་རྗེ་དགྲ་འཇོམས་རྩལ་གྱི་སྐོང་བསྡུས་དམ་ཉམས་འཇོམས་པའི་འཁྲུལ་འཁོར་བཞུགས་སོ། ཧྲཱིཿ །དབང་ཆེན་ཐུགས་སྤྲུལ་གྲི་བཙན་དགྲ་འཇོམས་རྩལ། །མཆེད་ཟླ་ཡུམ་སྲས་བློན་འཁོར་རྒྱ་མཚོའི་ཚོགས། །མཆོད་པའི་བྱེ་བྲག་རྣམ་མང་རྒྱ་མཚོ་ཡི། །ཐུགས་དམ་སྐོང་ལ་དངོས་གྲུབ་མ་ལུས་སྩོལ། །རྫོགས་སྤྲུལ་ལྔ་པས་སོགས། དགེའོ། །གྲི་བཙན་བསྐང་བསྡུས་ནི། ཧྲཱིཿ །དབང་ཆེན་བཀའ་སྡོད་དྲེགས་པའི་གཙོ། །གྲི་བཙན་རྡོ་རྗེ་དགྲ་འཇོམས་རྩལ། །འཁོར་བཅས་མཆོད་པ་འདི་བཞེས་ལ། །བསམ་དོན་ལྷུན་གྱིས་གྲུབ་པར་མཛོད། རྫོགས་སྤྲུལ་ལྔ་པས་སོ། དགེའོ། ཉི་གྲགས་གྲི་བཙན་གསོལ་བསྡུས་དམ་ཉམས་སྙིང་འབྱིན་བཞུགས་སོ། ཧྲཱིཿ །དབང་ཆེན་བཀའ་སྡོད་གྲི་བཙན་དགྲ་འཇོམས་རྩལ། །མཆོད་ཟླ་ཡུམ་སྲས་བློན་འཀོར་རྒྱ་མཚོའི་ཚོགས། །དམ་རྫས་བརྒྱན་པའི་མཆོད་པ་འདི་འབུལ་བས། །རྣལ་འབྱོར་འདོད་པའི་འབྲས་བུ་མཆིས་པར་མཛོད། །རྫོགས་སྤྲུལ་ལྔ་པས་སོ། དགེའོ། །