བཙན་རྒོད་ཆེན་པོ་རྡོ་རྗེ་དགྲ་འཇོམས་རྩལ་གྱི་གསོལ་མཆོད།
༄༅། །བཙན་རྒོད་ཆེན་པོ་རྡོ་རྗེ་དགྲ་འཇོམས་རྩལ་གྱི་གསོལ་མཆོད་བཞུགས་སོ། །
རྡ་ཡིག་ཡོད་་་་ དབང་ཆེན་རྟ་མཆོག་རྒྱལ་པོའི་སྐུ་ལ་འདུད༔ དྲེགས་པ་མི་བསྲུན་རབ་གཏུམ་དྲེགས་པའི་སྡེ༔ འདུལ་དཀའ་འདུལ་མཛད་པདྨ་ཧེ་རུ་ཀའི༔ གདམས་པའི་གཉེར་འཛིནལས་ཀྱི་ཕོ་ཉ་བ༔ པདྨ་བདག་གི་མངག་གཞུག་དམ་འཛིན་པ༔ བཙན་རྒོད་ཆེན་པོ་རྡོ་རྗེ་དགྲ་འཇོམས་རྩལ༔ ཇི་ལྟར་མཆོད་ཅིང་གཏོར་མ་འབུལ་བ་ནི༔ བྷནྡྷའི་སྣོད་དུ་བཤོས་བུ་ཤ་ཁྲག་བརྒྱན༔ བྱ་དམར་གཟུགས་དང་ལིངྒ་སྙིང་རྣམས་གཟུགས༔ རང་ཉིད་རྟམགྲིིན་དབང་གི་བསྐྱེད་རིམ་གསལ༔ མདུན་གྱི་གཏོར་མར་དགྲ་བགེགས་འགུགས་ཅིང་བསྟིམ༔ སྤྲུལ་པའི་འཁོར་ལོའི་བསྒྲལ་ཞིང་ཤ་ཁྲག་སྤུང༔ འདོད་ཡོན་མཆོད་པའི་སྤྲིན་དུ་བྱིན་གྱི་བརླབས༔ ཨོཾ་ཨཱཿཧཱུྃ༔ མ་ཧཱ་བྷ་ལིང་ཏ་རཀྟ་ཨམྲྀ་ཏ་བྷ་སུ་ཏ་ཀེང་ནི་རི་ཏི་སརྦ་པུཥྩ་ས་མ་ཡ་ཕེཾ་ཕེཾ་ཧ་ཧོ་ཧྲིཿཧྲཱིང་ཧྲིང་ཛཿཛཿསྭཱ་ཧཱཿ དགྲ་བགེགས་བསྒྲལ་བའི་ཤ་ཁྲག་ལས་བྱུང་བའི་མཆོད་སྦྱིན་གྱི་གཏོར་མ་འདོད་ཡོན་ལྔའི་འོད་ཟེར་འཕྲོ་བ་འདི་ཉིད་བསྔོ་ཞིང་འབུལ་བའི་གནས་སུ་གྱུར་པ་ནི་བཙན་རྒོད་ཆེན་པོ་རོལ་བ་རྐྱ་བདུན་ཕྱི་ནང་གསང་བའི་འཁོར་གཡོག་བྲན་དང་ཕོ་ཉ་སྡོང་ཟླ་དགྱེས་སྡེ་སྐུ་འཁོར་དང་བཅས་པ་རྣམས་དང་། ཁྱད་པར་དུ་གྲི་བཙན་ཆེན་པོ་རྡོ་རྗེ་དགྲ་འཇོམས་རྩལ་སྐུ་འཁོར་དང་བཅས་པའི་ཞལ་དུ་ཁ་ཁ་ཁཱ་ཧི་ཁཱ་ཧི༔ ལན་གསུམ༔ ཧཱུྃ་བྷྱོཿ སྔོན་གྱི་བསྐལ་པ་དང་པོ་ལ༔ བཅོམ་ལྡན་པདྨ་ཧེ་རུ་ཀས༔ དབང་ཆེན་རོལ་པའི་དུར་ཁྲོད་དུ༔ དམ་ལ་བཞག་པའི་གཡར་དམ་ཅན༔ དེ་འོག་བར་གྱི་བསྐ་ལ་པ་ལ༔ བདག་ཉིད་པདྨ་ཐོད་ཕྲེང་གིས༔ ཨཱཪྱ་པ་ལོའི་གཙག་ལག་ཏུ༔ དམ་ཚིག་བསྒྲགས་པའི་གསང་མཚན་ཅན༔ ཚུར་བྱོན་ཚུར་བྱོན་དམ་ལ་འདུས༔ དམ་རྫས་བཀའ་ཡི་གཏོར་བཞེས༔ སྔོན་གྱི་རྒྱལ་བའི་བཀའ་མ་བཅག༔ ད་ལྟར་རྣལ་འབྱོར་དམ་མ་བཀྲལ༔ བཅོལཔའི་ཕྲིན་ལས་འགྲུབ་པར་མཛོད༔ བཀྲ་ཤེས་པར་གྱུར་ཅིག།། ༔བསྐུལ་པ་ནི༔ ཧཱུྃ། དམ་ཚིག་ཅན་གྱི་ལྷ་ཆེན་པོ༔ སྐུ་མདོག་དམར་བོ་ཤ་བའི་དབུ༔ སྨ་ར་སྨུན་མ་མེ་ལྟར་འབར༔ ཞལ་གདངས་ལྗགས་འདྲིལ་མཆེ་བ་གཙིགས༔ སྤྱན་གསུམ་སྡང་མིག་ཁྲག་ལྟར་གཡོ༔ མི་ལྤགས་གཡང་གཞིའི་ན་བཟའ་ཅན༔ ཕྱག་གཉིས་བཙན་མདུང་ཞགས་པ་དམར༔ བ་སྤུའི་བུ་ག་ཐམས་ཅད་ནས༔ མེ་ཡི་ཚ་ཚྭ་ཐོ་རོ་རོ༔ ཆིབས་སུ་དེ་ནི་གློག་དམར་བཅིབས༔ འཁོར་ནི་བཙན་དམག་འབུམ་སྡེ་གཡོ༔ མི་རིང་དམར་པོ་ཕོ་ཉར་འགྱེད༔ རླུང་དམར་འཚུབ་མའི་ཀློང་དཀྱིལ་ནས༔ དྲག་པོའི་ཤུགས་གྱི་མཁའ་ནས་སྤྱོད༔ སྔོན་ནས་མི་དམར་ཤ་ར་ར༔ ཀླད་ནས་བྱ་དམར་ཚུབས་སེ་ཚུབ༔ རྗེས་ནས་ཁྱི་དམར་ཀེངས་སེ་ཀེང༔ གྲི་བཙན་མི་ཟན་དམར་པོ་ནི༔ འཁོར་དང་བཅས་པ་དྲག་ཏུ་ཆོས༔ སྡང་བའི་དགྲ་ལ་ལས་མ་འགྱང་༔ གནོད་པའི་བགེགས་ལ་དཔའ་མ་ཞན༔ དུས་ལ་བབ་པོ་ས་མ་ཡཱ༔ ཅེས་བརྗོད༔ གཏོར་མ་འབུལ་ཞིང་བསྐུལ༔ ལས་མྱུར་དྲག་པོའི་ཐོག་དང་འདྲ༔ དམ་ཚིག་ཅན་གྱི་གྲོགས་སུ་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡཱ༔ རྡ་ཡིག་ཡོད་་་ བདག་རྒྱལ་ཁམས་བ་ཉི་མ་གྲགས་པས་ཨོ་རྒྱན་བསྒྲུབ་གནས་ནག་ཤོད་མེ་འབར་ཕུག་ནས་
ཆུ་ཁྱི་ཧོར་ཟླ་དགུ་བར་གདན་དྲངས་ཤིང་བུ་འབོར་རྒང་དུ་ས་འབྲུག་ཧོར་ཟླ་དགུ་པར་ཤོག་སེར་ལས་བསྒྱུར་བའོ༔