རྨ་རྒྱལ་སྤོམ་རའི་གསོལ་བསྡུས།
༈ རྨ་རྒྱལ་སྤོམ་རའི་གསོལ་བསྡུས་བཞུགས། ཀྱེ། མདུན་དུ་བྷྲུཾ་ལས་རིན་ཆེན་གཞལ་ཡས་ཁང་། །སྣ་ཚོགས་པདྨ་ཉི་མ་ཟླ་བའི་སྟེང་། །སྐུ་ལྷ་རྨ་རྒྱལ་སྤོམ་ར་གསེར་གྱི་མདོག །ཞལ་གཅིག་ཕྱག་གཉེས་ཕྱག་གཡས་མདའ་དར་བསྣམས། །གཡོན་པས་གསེར་གྱི་ནོར་འཛིན་ནེའུ་ལེ་བསྣམས། །སྐུ་ལ་བེར་ཆེན་སེར་ཁྲབ་ལྷུབ་ལྷུབ་གསོལ། །ཞབས་ལ་ལྷྭམས་འཇའ་རིས་འཁྱིལ་པ་གསོལ། །འཁོར་དུ་རྩེ་ལྷ་བཅུ་༢གསུམ་རྨ་སྲས་དགུ། །སྲིང་གཅིག་རྡོ་རྗེ་དྲག་མོ་རྨ་སྨན་ཚོགས། །རྨ་འཁོར་འབུམ་དང་ལྷ་ཀླུ་གཉན་གྱི་དམག །གནམ་ས་བར་སྣང་ཁྱོན་ཀུན་གང་བའི་ཚོགས། །སྤྱན་འདྲེན་འདིར་གཤེགས་དགྱེས་པར་བཞུགས་སུ་གསོལ། དྭངས་བསིལ་རྙོག་མེད་ཨརྒྷཾ་བདུད་རྩིའི་རྒྱུན། །དག་བྱེད་ཞབས་བསིལ་དྲི་ལྡན་རྒྱ་མཚོ་བསྐྱིལ། །རབ་མཛེས་རྣམ་བཀྲའི་མེ་ཏོག་བལྟ་ན་སྡུག །ལྷན་ཅིག་སྐྱེས་དང་སྦྱར་བའི་བདུག་པའི་སྤྲིན། །སྣང་གསལ་མར་མེ་འོད་ཟེར་ཕྱོགས་བཅུར་འཕྲོ། །དྲི་ཞིམ་སྨན་གྱིས་སྦྱར་བའི་བྱུག་པའི་མཚོ། །སྣ་ཚོགས་རོལ་མོ་སྙན་པའི་སྒྲ་དང་བཅས། །སྨན་གཏོར་རཀྟ་ཚོགས་ཀྱི་ལོངས་སྤྱོད་དང་། །རིན་ཆེན་བདུན་དང་ཉེ་བའི་རིན་ཆེན་བདུན།༣ །ཁྲུས་ཀྱི་རྫིང་བུ་མ་རྨོས་ལོ་ཏོག་དང་། །བུམ་བཟང་དཔག་བསམ་ཤིང་དང་འདོད་འཇོའི་པ། །ཕོ་ཆས་ཀ་ཆ་དཀོར་ཆ་སོགས། །སྲིད་ཞི་དངོས་པོའི་ཡོ་བྱད་ཇི་སྙེད་པ། །ཕུལ་བས་བདག་ལ་ནོར་གྱི་ལོངས་སྤྱོད་དང་། ཚེ་གཡང་དཔལ་གྱི་དངོས་གྲུབ་སྩལ་དུ་གསོལ། །རྫོགས་སྤྲུལ་ལྔ་པས་སོ།། །ཟིལ་ཁྲོམ་གསོལ་མཆོད་བསྡུས་པ་བཞུགས་སོ། རྃ་ཡྃ་ཁྃ། ཨོཾ་ཨཱཿཧཱུྃ། སྐུ་གསུམ་རོལ་གར་ཐུགས་རྗེའི་ཡུལ་སྐྱོངས་ཚུལ། །ཞི་བའི་ཉམས་སྟོན་ཚངས་མཛེས་ཞལ་དཀྱིལ་ནི། །ཉ་རྒྱས་ཟླ་བ་ལྟ་བུའི་གཟི་བྱིན་ཅན། །ཟིལ་ཁྲོམ་རྡོ་རྗེ་གཡུང་དྲུང་གཏོར་མགྲོན་གཤེགས། །བཛྲ་ས་མ་ཡཱ་ཛཿ ཀྱེ། ཡ་མཚེན་ཡུལ་བཟང་རུ་དམ་ལུང་པ་དེར། །སྟེང་ན་རྩ་གསུམ་དཀྱིལ་འཁོར་བླ་བྲེའི་འོག །བར་ན་དཔལ་བོ་མཁའ་འགྲོ་ཉི་རྡུལ་འདྲ། །ས་གཞི་རྟེན་ཁང་གཙུག་ལག་འགྱུར་བ་མེད། །བསྟན་བསྲུང་ཆོས་སྐྱོངས་རྣམས་ནི་འདུ་ཚོགས་འདྲ། །གླིང་བཟང་ལེགས་སྐྱོང་རྡོ་རྗེ་གཡུང་དྲུང་ལ། །སྣོད་བཅུད་བཀོད་ལེགས་ཐམས་བཅད་མཆོད་པའི་རྫས། །བྷ་ལིང་དཀར་དམར་དངོས་འབྱོར་གཙང་ལ་མཛེས། །ཡིད་སྤྲུལ་རི་བོ་ལྟ་བུའི་བཅུད་ཆེན་འབུལ། །བསམ་གཏན་ཆོས་གླིང་སྣོད་བཅུད་ཟས་ཀྱི་པུང་། །དཀོར་ཆ་ལོངས་སྤྱོད་ཁྱོད་ལ་སྤྱན་གཟིགས་འབུལ། །ཚངས་པ་ལྷ་མཛེས་ཡབ་ཡུལ་བདེ་སྟོང་སྦྱོར། །རྒྱལ་ཆ་ཆིབས་སོགས་མཐོང་ན་མི་མཐུན་མེད། །ལྷ་ཀླུ་གཉན་བཙན་རྣམས་ཀྱི་མཐའ་ནས་བསྐོར།།ཡུལ་ལྔའི་རང་བཞིན་ས་ཆུ་མེ་རླུང་ཁམས། །རྒྱལ་བ་ཞི་ཁྲོའི་དཀྱིལ་འཁོར་བཀྲ་ལམ་མེར། །རྒྱལ་བསྟན་བསྲུང་མ་ཡེ་ཤེས་འཇིག་རྟེན་གཉིས། །ཚངས་པ་གཞོན་ནུ་གདོས་བཅས་ལུས་དངོས་མེད། །དག་༣པའི་སྣང་ངོར་བྱམས་མགོན་སྦྱན་རས་གཟིགས། །ཚོགས་གཉིས་རྫོགས་ཕྱིར་བཤམ་པའི་མཆོད་འདི་བཞེས། །བཅོལ་པའི་ཕྲིན་ལས་མ་ལུས་འགྲུབ་པར་མཛོད། ༈ །རྃ་ཡྃ་ཁྃ། །ཨོཾ་ཨཱ༔ཧཱུྃ། །དོ་མཚར་གནས་མཆོག་སྦས་ཡུལ་རོང་མོ་ལྗོང་། །སྐྱོང་མཛད་དཀར་ཕྱོགས་རྡོ་རྗེ་གཡུང་དྲུང་རྩལ། །ཕུན་ཚོགས་འདོདདགུ་མཆོད་པ་ས་དགྱེས་བཞིན་ཚིམས། །བསམ་དོན་ཀུན་འགུབ་བཀྲ་ཤིས་འཕེལ་རྒྱས་མཛོད།