སྐྱ་མོའི་གསོལ་བསྡུས།
སྐྱ་མོའི་གསོལ་བསྡུས་ནི། ཧཱུྃ། །བདག་ཉིད་ལྷར་གསལ་མདུན་དུ་སྐད་ཅིག་གིས། །སྣ་ཚོགས་རིན་ཆེན་ལས་གྲུབ་གཞལ་མེད་ཁང་། །ལྕམ་མོ་ཆེན་མོ་སྨན་བཙུན་གཞོན་ནུ་མ། །རབ་དཀར་ཟླ་བ་གཞོན་ནུའི་ལང་ཚོ་ཅན། །རབ་མཛེས་ཡིད་འོང་ལྷ་ཡི་བུ་མོ་བཞིན། །རབ་བཀྲ་ཟ་འོག་གོས་དང་སྭག་ཏིའི་ལྷྭམ། །རབ་མང་རིནཆེན་སྣ་ཚོགས་བརྒྱན་གྱི་སྤྲས། །ཕྱག་གཉིས་མདའ་དར་གཏེར་གྱི་སྒྲོམ་བུ་བསྣམས། །རྫུ་འཕྲུལ་ཤུགས་ལྡན་ཅང་ཤེལ་དྲེའུ་ནི། །རབ་དཀར་གངས་ཀྱི་རི་ལ་འགྲན་ནུས་ཆིབས། །མིང་པོ་ལྷ་ཡི་དགེ་བསྙེན་དྲག་པོ་རྩལ། །སྐུ་མདོག་སྨུག་པོ་དུང་གི་རྣ་ཆ་ཅན། །སྐུ་ལ་བེར་ཆེན་སྨུག་པོ་མཛེས་པར་ཀླུབས། །ཕྱག་ན་མདུང་དར་འཕྲུལ་གྱི་ཞགས་པ་བརྣམས། །རྟ་དཀར་ཞོན་ཅིང་སྟོང་བསུམ་ཡུད་ཀྱི་བསྐོར། །ལྕམ་དྲལ་རྣམ་གཉིས་འཁོར་དང་ཡང་འཁོར་བཅས། །སྤྲུལ་པ་ཡང་སྤྲུལ་ཉི་ཟེར་རྡུལ་ལྟ་བུ། །སྐད་ཅིག་ཙམ་གྱིས་གནས་འདིར་གཤེགས་དུ་གསོལ། །ཁྱོད་ལ་དགྱིས་པའི་མཆོད་པ་འབུལ་བ་ནི། །ལྷ་རྫས་ཕྱི་ཡི་མཆོད་པ་སྤྲིན་ལྟར་གཏིབས། །རང་བྱུང་ནང་གི་མཆོད་པ་དྭངས་རེ་སྤྲོ། །གསང་མཆོད་སྦྱོར་སྒྲོལ་མཆོད་པ་བླ་ན་མེད། །གྷ་ན་ཙ་ཀྲའི་ལོངས་སྤྱོད་རི་ལྟར་སྤུངས། །གཞན་ཡང་མཆོད་པར་འོས་པའི་དམ་ཚིག་རྫས། །མ་ཚང་མེད་པར་གུས་པས་འབུལ་ལགས་ན། །བདག་ཅག་བྱང་ཆུབ་སྒྲུབ་བའི་གང་ཟག་ལ། །ནད་གདོན་མི་མཐུན་བར་ཆད་ཀུན་ཞི་ཞིང་། །ཚེ་བསོད་དཔལ་འབྱོར་ལོངས་སྤྱོད་རྒྱས་པ་དང་། །རྒྱལ་བློན་རྗེ་འབངས་ཟས་ནོར་དབང་དུ་བསྡུས། །དགྲ་གདོན་བྱད་ཕུར་རྦོད་གཏོང་བརླག་པར་མཛོད། ཅེས་པ་འདི་ཡང་དཔྱལ་བྲག་སྒྲུབ་སྡེའི་མགོན་བླ་འགྱུར་མེད་ནས་བསྐུལ་ངོར་ས་སྤྲུལ་ཟླ་བ་གསུམ་བའི་ཆོས་བཅུ་རྒྱལ་ཕུར་གྱི་འགྲུབ་སྦྱོར་ལ་༧རྫོགས་སྤྲུལ་ལྔ་བས་བྲིས་པ་དགེ།། །སརྦ་དཱ་མངྒ་ལཾ།།