དགྲ་ལྷ་རླུང་རྟ་གསོ་བའི་མཆོད་འབུལ་དགའ་བདེའི་དཔལ་བསྐྱེད།
ཀློང་གསལ་ཐུགས་ཀྱི་ཐིག་ལེ་ལས༔ དགྲ་ལྷ་རླུང་རྟ་གསོ་བའི་མཆོད་འབུལ་དགའ་བདེའི་དཔལ་བསྐྱེད་བཞུགས་སོ༔ སྐུ་གསུམ་རྒྱལ་བ་ཡོངས་ལ་འདུད༔ དགྲ་ལྷ་རླུང་རྟའི་མཆོད་བསྡུས་ནི༔ ནམ་མཁའ་རྒྱང་བུ་མདའ་འཕང་ལྔ༔ སྦ་ལྕགས་ཁྲབ་བྱུང་མདུང་རྒྱལ་མཚན༔ གདུགས་དང་ཤིང་རེས་མཁའ་ཐབས་གཏོར༔ ཅི་འབྱོར་པ་ཡི་རྫས་ལ་བརྟེན༔ བདག་བསྐྱེད་གང་རུང་སྤྱི་འགྲོས་དང༔ སྒེར་གྱི་བསྲུང་མར་མཆོད་བྱ༔ རྫས་རྣམས་སྔགས་རྒྱས་བྱིན་གྱིས་རླབས༔ རཾཡཾཁཾ༔ ཨོཾ་ཨཿཧཱུྃ༔ དབྱིངས་ན་བཞུགས་པའི་མཆོག་གསུམ་རྩ་བ་གསུམ༔ བཀའ་སྲུང་གཏེར་བདག་དགྲ་ལྷ་བཅུ་གསུམ་དང༔ ལོ་ཟླ་འབྱུང་སྤར་སྨེ་ཞག་དུས་ཚོད་བདག༔ འཁོར་བཅས་མ་ལུས་སྤྱན་འདྲེན་གཤེགས་གསོལ་བཞུགས༔ ས་མ་ཡ་ཏིཥྛ་ལྷན༔ ཛ༔བྷྲཱུྃ་ཁྃ་སྭཱ་ཧཱ༔ མཆོད་པའི་དམ་རྫས་དཔག་ཡས་ནམ་མཁའི་མཛོད༔ ཏིང་འཛིན་ལྷ་སྔགས་རོལ་མོའི་ཕྱག་རྒྱ་ཆེར༔ སྦྱངས་སྤེལ་བསྒྱུར་བརླབས་ངོ་མཚར་རྨད་བྱུང་རྫས༔ མདོས་གཏོར་ཡོ་བྱད་སྤྱན་གཟིགས་མཆོད་སྤྲིན་འདི༔ སྐྱབས་ཀྱི་མཆོག་གྱུར་དཀོན་མཆོག་རིན་ཆེན་གསུམ༔ མགྲོན་གྱི་གཙོ་བོ་རྩ་གསུམ་ནོར་སྐྱོངས་ལྷ༔ བརྟེན་གྱི་གཙོ་བོ་ཆོས་སྐྱོངས་གཏེར་གྱི་བདག༔ དཔལ་མགོན་བདུན་ཅུ་འགོ་བའི་ལྷ་ལྔ་དང༔ དགྲ་ལྷ་བཅུ་གསུམ་ཡུལ་རིའི་གཞི་བདག་བཅས༔ མཆོད་དོ་འབུལ་ལོ་མངའ་གསོལ་གཟིངས་བསྟོད་དོ༔ ཕྱོགས་བཞིའི་བདག་པོ་རླུང་རྟ་སྡེ་བཞིའི་ལྷ༔ དཔའ་རྔམས་སྟོབས་བསྐྱེད་དུང་སེང་གཡུ་རལ་ཅན༔ ངར་སྐད་སྟོབས་བསྐྱེད་གཡུ་འབྲུག་སྔོན་མོ་སྟེ༔ དཔལ་རྩལ་སྟོབས་བསྐྱེད་རྒྱ་སྟག་མཚལ་རིས་ཅན༔ སྟོབས་ཤུགས་བང་བསྐྱེད་ཁྱུང་ཆེན་འབར་བ་བཞི༔ མཆོད་དོ་འབུལ་ལོ་མངའ་གསོལ་གཟེངས་བསྟོད་དོ༔ འཇིག་རྟེན་གཙུག་ལག་འབྱུང་བ་ལྷ་ཡི་གཙོ༔ མ་ཧཱ་གསེར་གྱི་རུ་སྦལ་སེར་པོས་བྱེད༔ ཁམས་དང་སྐྱེ་མཆེད་དབང་མདངས་ལུས་བསྐྱེད་ལྷ༔ སྲིད་པའི་ལོ་འགྲོས་ལོ་སྐོར་བཅུ་གཉིས་དང༔ སྤར་ཁའི་ཁམས་བརྒྱད་སྨེ་བའི་གླིང་དགུ་དང༔ བྱི་བ་གླང་ལ་སོགས་ཏེ་གནས་པ་ཡིས༔ ལོ་ལྷ་དེ་ནི་བདུན་ཅུ་རྩ་གཉིས་དང༔ ས་འཛིན་དེ་ནི་ལག་པ་ཆེན་པོ་སོགས༔ མི་འཕོས་བདག་ཉིད་ས་བདག་ཉི་ཤུ་གཅིག༔ བསྟན་མ་ལ་སོགས་ས་འོག་རིམ་དགུའི་བདག༔ ཐེ་སེ་ལ་སོགས་ལོ་འཁོར་ས་བདག་དང༔ འབྲུག་ལྷ་རྗེ་སོགས་ཟླ་འཁོར་ས་བདག་དང༔ བིཏཊིིི།།།ཟིན་ཕུང་ཚེས་གྲངས་ལ་དབང་ལ༔ ནུ་རུ་ལུགས་དང་རྣོ་མྱུར་དུས་མཚན་བདག༔ ལོ་ཟླ་ཞག་དུས་དབང་བྱེད་ས་བདག་སྟེ༔ ཕན་གནོད་ལ་དབང་རྐོ་ལོང་གདུགས་སེམས་ཅན༔ ཐམས་ཅད་མཆོད་ཅིང་བསྟོད་དོ་བརྔན་ཡོན་འབུལ༔ སྔགས་འཆང་རྣལ་འབྱོར་ཅན་ལ་སོགས་པ་ཡིས༔ སྲོག་ལུས་ཁ་རྗེ་དབང་ཐང་སྙན་གྲགས་དཔལ༔ འབྱུང་ཁམས་སྤར་ཁ་ལོག་མེན་སྨེ་བ་ཡིས༔ རླུང་རྟའི་དཔལ་གཡང་མ་ལུས་བསྐྱེད་དུ་གསོལ༔ རླུང་རྟ་བསྐྱེད་ཅིང་དགྲ་ལྷ་གསོ་བའི་རྟེན༔ རིན་ཆེན་སྣ་ལྔའི་སྐུ་མཁར་འབར་བའི་ཏོག༔ རྦ་ལྕགས་ཁྲབ་དཀར་ལོ་རྒྱས་ཚིག་དགུའི་སྙུགས༔ མདའ་མོ་བྱ་རྒོད་སྒྲོ་ལྡན་དར་སྣས་བརྒྱན༔ རིན་ཆེན་སྣ་ལྔའི་གསེར་འཕང་གཡུ་ལོ་ཅན༔ ནམ་མཁའ་རྒྱང་རིས་གཏེར་བུམ་འཕན་གདུགས་བསྒྲེངས༔ སྲིད་པའི་བདོག་དགུ་ཕུན་སུམ་ཚོགས་པ་འདིས༔ མཆོད་པ་ཡིན་ནོ་ཁ་རྗེ་བསོད་ནམས་སྤེལ༔ བརྔན་དུ་འབུལ་ལོ་དགོས་དགུའི་དངོས་གྲུབ་སྩོལ༔ རྟེན་དུ་འཛུག་གོ་ཀླུང་རྟའི་སྲོག་ཉམས་གསོས༔ མངའ་གསོལ་བསྟོད་དོ་དགྲ་ལྷའི་མཐུ་དཔུང་བསྐྱེད༔ དགྲ་ལྷ་གཟིང་བསྟོད་རླུང་རྟ་མཆོད་བྱས་མཐུས༔ ཕོ་མོ་བུ་ཚ་ཟས་ནོར་དབྱིགས་སོགས་པའི༔ རླུང་རྟ་ཆགས་ཉམས་རྒུད་འཐོར་ཞིག་པ་སོགས༔ བུག་རལ་གས་ཆད་འབྱུང་ཁམས་མི་མཐུན་པ༔ གཅིག་བདུད་ཅིག་བཅད་ནང་འཕྲད་དགྲ་གྱུར་སོགས༔ མི་མཐུན་ལོག་པ་ཀུན་ལས་སྐྱབས་བསྲུང་མཛོད༔ ལུས་ལ་ནད་མེད་གཟི་མདངས་བདེ་དཔལ་སྐྱེད༔ ངག་ལ་བདེན་སྟོབས་ནུས་འབར་གྲགས་པ་བསྐྱེད༔ སེམས་ལ་དབང་ཐོབ་ཉམས་རྟོགས་མཐའ་རྒྱས་སྐྱེད༔ ལས་བཞི་ཀུན་འགྲུབ་ཕྱོགས་ལས་རྒྱལ་གྱུར་ཅིག༔ སརྦ་བྷི་ཛཿས་མ་ཡ་གུ་ཧེ་ཛཿསིདྡྷི་བྷེ་ཏྲི་གྷ་རུ་ཊ་སརྦ་སིདྡྷི་ནི་ཀུན་འདུ་ཧོ་སྭཱ་ཧཱ༔ ལྒིས་ཀྱི་ལྷ་མོ་སྤུན་གསུམ་ཞོལ༔ གནས་ཀྱི་འབྲེལ་བར་ཁུག་པའི་ཚེ༔ གནས་སྲུང་སྨོན་ལམ་རྨིས་ཉམས་ངོར༔ དགའ་བདེ་བསྐྱེད་པའི་སྣང་ཉམས་རྩལ༔ འགགས་པ་མེད་པའི་དག་སྣང་གཟུགས༔ ཤར་ནས་འགོགས་པ་མེད་པ་རུ༔ མཐའ་བྲལ་གླིང་པའི་ཉམས་གཏེར་ཡིན༔ ས་མ་ཡ༔ ༔