བྷྱོ༔ ཏིང་འཛིན་སྤྲུལ་པའི་་་་་

བྷྱོ༔ ཏིང་འཛིན་སྤྲུལ་པའི་གནས་མཆོག་འདིར༔ ཐུགས་དམ་སྐོང་བའི་དམ་རྫས་ནི༔ དངོས་སུ་བཤམ་དང་ཡིད་ལས་བྱུང་༔ བྱང་ཆུབ་སེམས་དང་ཨ་མྲྀ་ཏ༔ མྱོས་བྱེད་དབའ་ཀློང་འཁྲུགས་པ་དང་༔ སྲོག་ཆགས་མདངས་ཀྱིས་ཐུགས་དམ་བསྐང་༔ སྣ་ཚོགས་ཤ་དང་སྙིང་གི་ཁྲག༔ དཀར་གསུམ་མངར་གསུམ་རོ་དྲུག་ཟས༔ ཉེར་སྤྱོད་བྷ་ལིང་གཏོར་མ་དང་༔ སྤྱན་གཟིགས་མཆོད་པས་ཐུགས་དམ་བསྐང་༔ སྒྲུབ་རྫས་སྦ་དཀར་ཚིགས་གསུམ་དང་༔ དུག་ཁྲག་སྦྱར་བ་ནད་ཀྱི་རྒྱུ༔ གསོན་ཁྲག་རླངས་པ་ཕྱུར་བ་ཡིས༔ འདོད་ཆགས་ཅན་གྱི་ཐུགས་དམ་བསྐང་༔ ཤེས་རབ་མཚལ་དང་སྤྱི་བླུགས་ཞྭ༔ ཤ་ཁྲག་སྙིང་སྣ་རུ་མཚོན་དང་༔ རྨ་བྱའི་རྒྱལ་མཚན་ཙིཏྟའི་ཏོག༔ ལེ་བརྒན་དར་དང་མཐིང་ནག་གུར༔ སྣེལ་མོའི་མགོ་དང་གཡང་གཞི་སྙིང་༔ ནལ་བུའི་ཤ་ཁྲག་ལུག་ནག་གསོབ༔ རྐང་གླིང་ཐོད་རྔ་ལྟག་སྤྲོད་སོགས༔ རྟེན་རྫས་རྣམས་ཀྱིས་ཐུགས་དམ་བསྐང་༔ བྱ་ནག་ལུག་ནག་ཁྱི་ནག་འབྲི༔ མི་ཁྱི་རྟ་ཡི་བམ་ཆེན་དང་༔ མདོས་དང་འབྲས་བུ་སྣ་ཚོགས་པ༔ བསྐང་རྫས་རྣམས་ཀྱི་ཐུགས་དམ་བསྐང་༔ རྟ་དང་གཡག་ནག་གྲི་སྙིང་གིས༔ དཔལ་ལྡན་མགོན་པོའི་ཐུགས་དམ་བསྐང་༔ ར་ཡི་ཤ་ཁྲག་གསུར་ཆེན་གྱིས༔ སྐྱེས་བུ་ཆེན་པོའི་ཐུགས་དམ་བསྐང་༔ ཤ་ཁྲག་སྙིང་སྣ་ར་མཆིན་གྱིས༔ གཟའ་བདུད་འཁོར་བཅས་ཐུགས་དམ་བསྐང་༔ དཀར་མངར་འོ་ཆོལ་རྟ་བོང་ཤས༔ དུར་ཁྲོད་བདག་མོའི་ཐུགས་དམ་བསྐང་༔ མདོར་ན་སྣང་སྲིད་སྣོད་བཅུད་ཀུན༔ དབང་པོ་དྲུག་གི་སྤྱོད་ཡུལ་དུ༔ རང་རང་མཐུན་པའི་དམ་རྫས་ཀྱིས༔ སྤྲུལ་འཁོར་ཡོངས་རྫོགས་ཐུགས་དམ་བསྐང་༔ ཁྱད་པར་དུས་ཀྱི་ཐ་མ་ལ༔ སྲིད་པའི་བདེ་སྡུག་མ་མོས་བྱེད༔ འབྱུང་བ་ལྔ་ཡང་ཡུམ་ལྔའི་ཀློང་༔ དེ་ཕྱིར་སྲིད་པའི་མ་མོར་གྲགས༔ དབྱིངས་ལ་རྣམ་རྟོག་མི་མངའ་ཡང་༔ རྩལ་ལས་སྤྲུལ་པ་ཤར་བའི་ཚེ༔ ལེགས་ཉེས་སྟངས་འཛིན་མ་མོ་ནི༔ ཀོ་ལོང་རུ་ང་གདུག་རྩུབ་ཆེ༔ རྣལ་འབྱོར་ཐབས་ལ་མི་མཁས་ཤིང་༔ འཇིག་རྟེན་རྨོངས་པའི་དབང་གྱུར་པས༔ ལྷ་མོའི་དམ་ཚིག་གང་དང་གང་༔ དེ་ཀུན་དང་དུ་མ་བླངས་ཤིང་༔ དཀར་དམར་ཐབ་དང་གཞོབ་ལ་སོགས༔ ཐུགས་དང་འགལ་བའི་ལས་བགྱིས་པ༔ ཁྱོད་ལ་མཐོལ་ལོ་བཟོད་པར་བཞེས༔ དབྱིངས་ནས་བཀའ་ཆད་མ་བཏང་ཅིག༔ ཤོ་དང་རྡེའུ་མ་འགྲིམས་ཤིག༔ ཁྲམ་དང་དལ་ཁ་མ་སྟོན་ཅིག༔ ཚོན་དྲུ་ནད་རྐྱལ་མ་བརྡེག་ཅིག༔ གོད་ཁ་གནས་འགྱུར་མ་བཏང་ཅིག༔ ཐུགས་དམ་གཉན་པོ་བསྐངས་གྱུར་ནས༔ ཞི་རྒྱས་གཉིས་ཀྱིས་གསོ་བ་དང་༔ དབང་དྲག་རོལ་པའི་མངོན་སྤྱོད་ཀྱི༔ ལས་བཞིའི་དངོས་གྲུབ་བདག་ལ་སྩོལ༔ དོ་གལ་ཆེན་ཕུད་སྐོང་བྱ་སྟེ༔ ཕུད་ཉུང་ངུ་ཙམ་ལ་ཕྱར་མི་རུང་ངོ་༔