ཧཱུྃ། འོག་མིན་གནས་ཡུལ་་་་
ཧཱུྃ། འོག་མིན་གནས་ཡུལ་དུར་ཁྲོད་ནས། །བདེ་གཤེགས་རྩ་གསུམ་ཆོས་སྐྱོང་རྣམས། །བསྐང་བའི་གནས་འདིར་གཤེགས་སུ་གསོལ། །བྱང་ཤར་མཁའ་འགྲོའི་དུར་ཁྲོད་ནས། །དཔལ་ལྡན་ལྷ་མེ་འཁོར་དང་བཅས། །བསྐང་བའི་གནས་འདིར་གཤེགས་སུ་གསོལ། །དུར་ཁྲོད་འབར་བའི་ཕོ་བྲང་འདིར། །དཔལ་ལྡན་ལྷ་མོ་སྔགས་སྲུང་མ། །མ་ལུས་འཁོར་བཅས་བཞུགས་སུ་གསོལ། །གུས་པས་ཡིད་ཀྱིས་ཕྱག་འཚལ་མཆོད། །རྒྱལ་བ་རྣམས་ཀྱི་བསྔགས་པ་ལྟར། །ལྷ་མོ་ཁྱོད་ལ་བསྟོད་པར་བགྱིད། །ཧཱུྃ་བྷྱོཿ འཁོར་འདས་དབང་བསྒྱུར་མ་མོ་ཡོངས་ཀྱི་རྗེ། །བསྟན་བསྲུག་ཆེན་མོ་དཔལ་ལྡན་རེ་མ་ཏི། །དྲེགས་པ་བདུན་དང་མ་མོ་བྱེ་བ་འབུམ། །སྔགས་སྲུང་རྒྱལ་མོ་འཁོར་བཅས་ཐུགས་ངམ་བསྐང་། །ཐུགས་དམ་གཉེན་པོ་བསྐང་བའི་དམ་རྫས་ནི། །སྨན་རཀ་གཏོར་ཚོགས་མཆོད་པོས་ཐུགས་དམ་བསྐང་། །བམ་ཆེན་རྒྱལ་མཚན་མང་པོས་ཐུགས་དམ་བསྐང་། །ནམ་མཁའ་ཉི་ཟླ་མང་པོས་ཐུགས་དམ་བསྐང་། །མདའ་དར་མདུང་དར་མང་པོས་ཐུགས་དམ་བསྐང་། །མཁའ་ལྡིང་འདབ་ཆགས་མང་པོས་ཐུགས་དམ་བསྐང་། །སྟག་སེང་གཅན་སྦྱང་མང་པོས་ཐུགས་དམ་བསྐང་། །རྟ་གླང་དུད་འགྲོ་མང་པོས་ཐུགས་དམ་བསྐང་། །རི་གནས་ཆུ་གནས་མང་པོས་ཐུགས་དམ་བསྐང་། །ཆུ་སྣ་རྒྱ་མཚོ་མང་པོས་ཐུགས་དམ་བསྐང་། །སྟོང་གསུམ་རི་རབ་གླིང་བཞིས་ཐུགས་དམ་བསྐང་། །ནང་བཅུད་སྐྱེ་འགྲོ་མང་པོས་ཐུགས་དམ་བསྐང་། །རིན་ཆེན་རྣམ་པར་མང་པོས་ཐུགས་དམ་བསྐང་། །བདག་ཏུ་བཟུང་པའི་ཀ་ཆས་ཐུགས་དམ་བསྐང་། །ཚུལ་བཞིན་བསྒྲུབ་པའི་དཀོར་ཆས་ཐུགས་དམ་བསྐང་། །བདག་མེད་གྲུབ་པའི་ནོར་གྱིས་ཐུགས་དམ་བསྐང་། །དར་ཟབ་རས་གོས་ཤིང་བལ་ཐུགས་དམ་བསྐང་། །ཤིང་ཐོག་སྨན་སྣ་མང་པོས་ཐུགས་སམ་བསྐང་། །འབྲས་སྲན་འབྲུ་སྣ་མང་པོས་ཐུགས་དམ་བསྐང་། །ཤ་ཆང་བཟའ་བཏུང་མང་པོས་ཐུགས་དམ་བསྐང་། །སྒྲ་སྐད་རོལ་མོ་མང་པོས་ཐུགས་དམ་བསྐང་། །གོ་མཚོན་སྤྱན་གཟིགས་མང་པོས་ཐུགས་དམ་བསྐང་། །རྐང་གླིང་བཤུད་པ་མང་པོས་ཐུགས་དམ་བསྐང་། །འདབ་ལྡན་མེ་ཏོག་མང་པོས་ཐུགས་དམ་བསྐང་། །སྤོས་གསུང་དུད་སྤྲིན་མང་བོས་ཐུགས་དམ་བསྐང་། །རྣམ་ལྔའི་དབང་པོ་ལྔ་ཡིས་ཐུགས་དམ་བསྐང་། །ཤ་ལྔ་བདུད་རྩི་ལྔ་ཡིས་ཐུགས་དམ་བསྐང་། །ཕྱར་དར་གཡབ་དར་མང་པོས་ཐུགས་དམ་བསྐང་། །དུག་ལྔ་དུག་གསུམ་རྣམས་ཀྱིས་ཐུགས་དམ་བསྐང་། །མཁའ་ལྟར་ཁྱབ་པ་ལྟ་བས་ཐུགས་དམ་བསྐང་། །ཉི་ལྟར་གསལ་པ་སྒོམ་པས་ཐུགས་དམ་བསྐང་། །བླང་དོར་བྲལ་བ་སྤྱོད་པས་ཐུགས་དམ་བསྐང་། །རེ་དོག་མེད་པའི་འབྲས་བུས་ཐུགས་དམ་བསྐང་། །ཁྱད་པར་མཐུན་རྫས་རྣམས་ཀྱིས་ཐུགས་དམ་བསྐང་། །བསྐང་རྟེན་ཡོ་བྱད་དངོས་འབྱོར་ཡིད་སྤྲུལ་གྱིས། །ཐུགས་དམ་གཉེན་བསྐང་མངའ་གསོལ་དབུ་འཕང་བསྟོད། །ཉམས་ཆགས་བཤགས་བྱངས་དགྱེས་དགོངས་འཕྲིན་ལས་མཛོད། །