དམ་ཅན་སྐྱེས་བུ་རྡོ་རྗེ་ལེགས་པ་ལ་ཕྲིན་བཅོལ་ཉུང་བསྡུས།

ཧོཿ འཛམ་བུའི་གླིང་གི་སྐྱེས་མཆོག །རིག་པ་ཅན་གྱི་རྒྱལ་པོ། །ཉི་མ་ནུབ་ཕྱོགས་ཀྱི་སྲོག་བདག །རྣལ་འབྱོར་ཡོངས་ཀྱི་ སྲུང་མ། རིན་ཆེན་གཏེར ་གྱི་བདག་པོ། རྡོ་རྗེ་ལེགས་པ། རྡོ་རྗེ་བདེ་ལྡན། རྡོ་རྗེ་འབར་བ། རྡོ་རྗེ་ཁྱུང་གཤོག་རྩལ། རྡོ་རྗེ་ཐིག་ལེ་རྩལ། སྐུ་མདོག་དམར་ནག་འཇིགས་སུ་རུང་བ། རལ་པའི་རྩེ་ནས་དུ་བ་ཕྱུར་བ། སྤྱན་གསུམ་སྡང་མིག་དགྲ་ལ་གཟིགས་པ། སྨ་ར་ཨག་ཚོམ་མེ་སྟག་འཕྲོ་བ། མཆེ་བ་ཟངས་ཡག་ཧ་ཧ་རྒོད་པ། ཕྱག་གཡས་རྡོ་རྗེ་རྩེ་དགུ་གསོར་བ། གཡོན་པས་དགྲ་སྙིང་ཞལ་དུ་གསོལ་བ། སྐུ་སྟོད་ཞིང་ཆེན་གཡང་གཞི་གསོལ་བ། སྐུ་སྨད་སྟག་གི་ཤམ་ཐབས་གསོལ་བ། སྦྲུལ་དང་ཐོད་པས་སེ་རལ་འཕྱང་བ། སེང་གེ་དཀར་མོའམ་ར་སྐྱེས་ཁམས་པ་ལ་འཆིབས་པ། ཐུགས་ཀྱི་དགྱེས་སྡེ་བཙུན་མོས་བསྐོར་བ། བཀའ་བློན་ལྷ་སྲིན་སྡེ་བརྒྱད་དང་བཅས་པ། སྒྲོལ་གིང་བྱེ་བའི་ཚོགས་ཀྱིས་བསྐོར་བ། ཕོ་ཉ་ལྕགས་སྤྱང་དོམ་དྲེད་འགྱེད་པ། རྒྱ་ཡི་ཨ་བསེ་ཆེན་པོ། ཁམས་ཀྱི་གནོད་སྦྱིན་ཆེན་པོ། བོད་ཀྱི་ཨ་ཇོ་ཆེན་པོ། །མགར་བ་ནག་པོ། །མོན་པ་ནག་པོ། །གའུ་ནག་པོ། །སེར་སྐྱ་ནག་པོ། །མཆེད་འཁོར་སུམ་བརྒྱ་དྲུག་ཅུའི་གཙོ་བོ། །སྐྱེ་བོ་ཡོངས་ཀྱི་དགྲ་ལྷ། བན་བོན་ཡོངས་ཀྱི་སྲུང་མ། དམག་དཔོན་ཆེན་པོ། །ཇག་དཔོན་ཆེན་པོ། །ཚོང་དཔོན་ཆེན་པོ། །སྟོང་དཔོན་ཆེན་པོ། །མཁན་དཔོན་ཆེན་པོ། །གྲལ་དཔོན་ཆེན་པོ། །ལས་མཁན་ཆེན་པོ། །སྒྲོལ་གིང་ཆེན་པོ། །ཕོ་ཉ་ཡང་སྤྲུལ་ཕྱག་བརྙན་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །ལེགས་པ་ཆོས་ཤིག །ཉེས་པ་བཟློག་ཅིག །བསམ་པ་སྒྲུབས་ཤིག །རེ་བ་སྐོངས་ཤིག །མི་ལ་ན་ཚ་མ་བཏང་། ཕྱུགས་ལ་གོད་ཁ་མ་བཏང་། ཁ་སྨྲས་དང་གླེང་བརྗོད་མ་བཏང་། མི་་ཁ་དང་དལ་ཡམས་མ་༤༠༠་བཏང་། དགྲ་རྐུན་དང་འཚེ་བ་མ་བཏང་། གཞན་ཡང་གཞི་ལ་འདུག་ན་ལེགས་པར་སྲུངས་ཤིག །བྱེས་སུ་འགྲོ་ན་མགོན་སྐྱབས་མཛོད་ཅིག །ལམ་འཕྲང་འཇིགས་པར་སྐྱེལ་བསུ་གྱིས་ཤིག །ཆུ་ལ་འགྲོ་ན་སྒྲོལ་འདོན་མཛོད་ཅིག །ཚོང་ལ་འགྲོ་ན་ཚོང་དཔོན་གྱིས་ཤིག །དམག་ལ་འགྲོ་ན་དམག་དཔོན་གྱིས་ཤིག །ཇག་ལ་འགྲོ་ན་ཇག་དཔོན་གྱིས་ཤི། །དགྲ་དང་བརྩོད་ན་ཕ་རོལ་གནོན་ཅིག །མི་མཉམ་པ་དང་མཉམས་སུ་ཆུག་ཅིག །མཉམ་གཉིས་གོང་དུ་ལེགས་པར་ཐོན་ཅིག །བཅོལ་བའི་ཕྲིན་ལས་སྒྲུབས་ཤིག །བསྒྲུབ་པའི་རྟགས་ཕྱུངས་ཤིག །དགྱེས་པའི་ཞལ་སྟོན་ཅིག །མཐུ་དང་རྫུ་འཕྲུལ་བསྐྱེད་ཅིག །མངའ་ཐང་དང་འབྱོར་པ་སྤེལ་ཅིག །སྙན་པ་དང་གྲགས་པ་སྒྲོགས་ཤིག །བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །ཅེས་པའང་དམ་ཅན་སྐྱེས་བུ་རྡོ་རྗེ་ལེགས་པ་ལ་ཕྲིན་བཅོལ་ཉུང་ངུ་བསྡུས་པ་འདི་ནི་ཀུན་མཁྱེན་ངག་གི་དབང་པོ་ཀློང་ཆེན་པ་རབ་འབྱམས་བཟང་པོའི་གསུང་བྱིན་རླབས་ཅན་གཞན་བཅོས་ཀྱིས་མ་བསླད་པར་དག་པར་ཕབ་པའོ། །སྤར་འདི་རྫོགས་ཆེན་དགོན་དུ་བཞུགས། དགེའོ།། །།